﻿Songs.
120.
Song fo sing wen you go up to da Temple Fo God Da One In Charge, Weneva I get trouble, He da one I yell to fo help me. He lissen, an help me. 
Eh! Da One In Charge! Get me outa trouble! Peopo come afta me Fo bulai me an scam me. 
All you peopo dat talk Jalike you goin scam me, You no tink God goin punish you guys Way mo fo do dat, o wat?! 
God goin punish you guys. Jalike he hurt you Wit da sharp arrows da army guys use, An wit da red hot charcoal from da broom bush! 
Bummahs! I gotta live Far away from my peopo, Jalike I stay wit da no good peopo Meshek side, O jalike I put up one tent Wit da Kedar peopo. 
Too long, I stay Wit peopo dat ony like Fight each odda! 
Me, I da kine guy Dat like tings go good fo erybody. But weneva I talk lidat, Dem guys, dey ony like make war! 
