﻿Songs.
114.
Da Israel peopo, dey da ones From Jacob ohana— Wen dey come outa Egypt, An bag from da Egypt peopo Dat talk diffren kine language, 
Was den dat dose Judah ohana peopo Come spesho fo God An dose Israel peopo get God Fo stay in charge a dem. 
Was jalike da Red Sea wen see dem Coming, an run away! Jalike da watta inside da Jordan Riva Wen turn roun An go back mauka side! 
Da mountains wen jump aroun Jalike dey sheeps an dey sked, An da hills wen move fas Jalike dey bebe sheeps dat run away. 
Eh! So, you, Red Sea, tell me dis: How come you so sked, You wen run away?! Eh you! Jordan Riva, tell me dis: How come you so sked, You wen turn aroun?! 
Eh! You mountains, How come you so sked, You wen jump jalike da sheeps?! Eh! You hills, How come you so sked, You wen move fas Jalike da bebe sheeps?! 
Eh you! Earth! Weneva da Boss show up, You betta shake! Cuz he da God dat Jacob wen pray to. 
Dat God, he da One wen make Watta pools come outa da big rocks, An pukas fo watta come outa da cliffs. 
