GEN 1:1 Bamba piganengiore Ngode Datagaliwabehanda dindi haribi wabialu uruni karu ngarubi bibahendeore wabiai hene.
GEN 1:2 Anigo dindini áyu ngagobi ndo mbiraleru nahe tara mbira wini. Aruma holeneme iba timbuni bereago dambi haiho wiagola Ngode Datagaliwabenaga Dinini ibu ibani yuluyu pu íbu bialu hene.
GEN 1:3 Ai Ngode Datagaliwabehanda lalu, Wá ha layagola wá hene.
GEN 1:4 Wá hayago hondowa Ngode Datagaliwabe ibugua bayaleoreyane hendene. Ani hondowa aruma holene wá holenela mo tuwia hene.
GEN 1:5 Ani buwa aruma hayago mbiraga lalu wá hayago horo lalu mini wini. Mbiraga piai halu ega bi layagola horo mbira pigane ogoni hene.
GEN 1:6 Mani Ngode Datagaliwabehanda lalu, Iba halu kirani berelo tubari mbira íbu ha layagola tubari ogoni hene. Ibugua iba hari daligaha biralu dindihabi berelo lowa tubari ogoni wini.
GEN 1:8 Ani buwa hanuni tubari wiyadagoni hari mini wini. Mbiraga piai halu ega bi layagola horo mende ogoni hene.
GEN 1:9 Ani heagola mani Ngode Datagaliwabehanda lalu, Dindi yobi pani helo iba dindiha bedamiruni mbiraoreha hangu birumogo bidaba, lene. Ani layagola dindi yobi pani hene.
GEN 1:10 Dindi yobi pani hayago Ngode Datagaliwabehanda dindi mini wini. Ani bialu iba mbiraoreha birumogo biyagola ibugua iba solowara mini wini. Ani buwa Ngode Datagaliwabe ibunime o biyaruni bibahende bayaleoreyane hendene.
GEN 1:11 Ani hondowa ibugua lalu, Ai dindini ira dataniru tomo nolene alerubi bibahende anda hai ha, layagola
GEN 1:12 bibahende ira datani tomo nolene alerubi anda hai hene. Ngode Datagaliwabe ibugua mbirale uruni bibahende ani anda hai hayago bayaleoreyane hendene.
GEN 1:13 Mbiraga piai halu ega bi layagola horo tebone ogoni hene.
GEN 1:14 Mani howa Ngode Datagaliwabe ibugua lalu, Harini wá holene aleru hadaba, lene. Ani lowa ibugua mbi horola tu wuleneru horo malirunaga pongo yuleneru wigi bilonaga helene.
GEN 1:15 Ani bialu nde harini howa wá haragome dindiha wá hadali helobi ani hadaba layagola wá holene ale harini hene.
GEN 1:16 Ibugua wá holene timbuni kira harini helene. Horongi wá timbuni hondo helonaga ni helalu mbiraga wá emene hondo helonaga ege helowa yapibiyarubi hela dege bini.
GEN 1:17 Uruni bibahande tigua harini howa dindiha wá hadali helonaga Ngode Datagaliwabehanda helene. Ani helowa horongibi mbiragabi wá haame helonaga horo mbila mo tu wia hene. Ibugua uruni bibahende ani hai heagola bayaleoreyane hendene.
GEN 1:19 Mbiraga piai halu ega bi layagola horo mane ogoni hene.
GEN 1:20 Mani Ngode Datagaliwabehanda lalu, Ai iba solowaraha buhe̱ lagaru bibahende birai helo. Ani bialu egaru harini yagalo yu ibaga bulene biralu bilo, lene.
GEN 1:21 Ani lowa ibugua, Iba wena timbuniru nogombi timbunirubi buhe̱ laga emene marubi bibahende iba solowaraha biralu egarubi nde yagalo yu ibaga bule biradaba, layadagua birai hayago Ngode Datagaliwabehanda bayaleoreyane hendene.
GEN 1:22 Ani bereagola ibugua ti mo hongo halu lalu, Ibaha biraga bedamiru tígua hono dame bialu ibaha biru to̱lalimu. Egaru tíguabi nde dindi bibahendeha ega birai hole hono dame bialu biralimu, lene.
GEN 1:23 Mbiraga piai halu ega bi layagola horo dauni ogoni hene.
GEN 1:24 Maha Ngode Datagaliwabehanda lalu, Ai dindiha howa buhe̱wi tara tara dewaore birulene nga. Buhe̱wi uruni andaga hinu holenebi tayandaha minana birulenerubi bibahende emene timbunibi birai hadaba, layagola ani birai hene.
GEN 1:25 Ibugua buhe̱wi andagaha hinu holenerubi tayandaha gabua yamo minana birulenebi bibahende hadaba layadagua naina íbu hai heagola ibuni bayaleoreyane hendene.
GEN 1:26 Lone mani Ngode Datagaliwabe ibugua lalu, Áyu inane ale helonaga wali agali wabimi̱ya. Libugua buhe̱wi tara tara irabuha bedarubi andagani hinini bedarubi ibaha wena bedarubi dindi bibahendebi handaya ho helo wali agalila wabu helami̱ya, lene.
GEN 1:27 Ani lowa Ngode Datagaliwabehanda wali agali wabu heleagola libubi ibuni ale dege ona hene. Ibugua walibi agalibi wabu helene.
GEN 1:28 Ani hebigola Ngode Datagaliwabehanda libu mo hongo halu bi bayale mbira ogodagua lamini. Ibugua lalu, Dindi bibahende ngaruha wali agali hai howa dindini ngaru baya hangu handaya ho hai helo waneigini hono wialu halibu. I̱na ega bedaru ibaha wena bedarubi dindini buhe̱wi timbuni emene bedarubi uruni bibahende libugua haru hai halibulo ngerogoni.
GEN 1:29 Libu nalibulo ira lini daganeru tani lini daganeru i̱na libu ngerogo tomo uruni nalu halibu.
GEN 1:30 Anigo ai nogo egarubi buhe̱wi tara tara bedaru ti datani yuni bu karuni nalu helo merogoni, lene. Ai henene Ngode Datagaliwabehanda layagodagua aniore bini.
GEN 1:31 Ibunime handalu hearia mbirale bibahende bayaleoreyane hendene. Mbiraga piai halu ega bi layagola ogoni horo waragane hene.
GEN 2:1 Ogonidagua bialu Ngode Datagaliwabehanda dindi haribi bibahende uruniha karu ngarubi wabiai hene.
GEN 2:2 Horo kane hayagola ibunaga biabe bibahendeore bu maro biruyane hondowa horo kaneni ibuni ha̱lo hene.
GEN 2:3 Ibunime horo kaneore tara wubagi helowa lalu, Sarere bibahendenaga horo kane i̱ninaga ngelarogoni, lene.
GEN 2:4 Horo marungi mbirale bibahende wabu helalu hayago ai horo kane ogoningi ibuni ha̱lo birulene wubagiho ngelene. Anduane Homogo Ngode Datagaliwabehanda dindi haribi wabu ngelenego
GEN 2:5 dindi ogoriani dalu ibulene mbira ibugua wabia nabi wiagola ai datani irarubi mbira anda nahaga wini. Dindini tomo hongolene wali agalibi nahe dege wini.
GEN 2:6 Dalu naibagago dindiha howa iba dugu daga haga biagagome dindi bibahendeni iba birai hene.
GEN 2:7 Mani howa Anduane Homogo Ngode Datagaliwabehanda dindi duguwa dindi ogonime agali mbira wabini. Naina wabu ngelowa ngui harigaha buhe̱ lolene pulaanda hayagola agali biago ibu buhe̱ lolenewi hene.
GEN 2:8 Ani bialu Anduane Homogo Ngode Datagaliwabe ibugua mabu mbira ni tagira ibiragohayagi Ideneni hengene. Ani buwa ibugua agali wabiyago mabu ogoniha helene.
GEN 2:9 Ani helowa ibugua dindiha howa tomo anda helayagola ira lini baya dagaru mabuni andaho helene. Ira lini daga uruni bibahende bayale dege dege hene. Ai mabu dombeni haabo holene miaga ira mbira hene. Ani bialu ogoriani dege ira mende ko bayalela manda bulenenaga mabu ogoniha hene.
GEN 2:10 Idene dindini mabu winidagoni mo bayale halu dindi mo gomba helonaga iba mbira mabu ogoniha ibilene. Iba ogoni ibu gene maria pugupugu bini.
GEN 2:11 Iba mbirago mini Pisono ogonime dindi Habila pu mabu bialu peda. Dindi Habila ogoniha ngolo dewa wialu ira ibane ngabiaga ale dewa ogoniha halu bida. Ai ege to̱le̱ dege baya tara mbira muni dewaoreme miaganego ogoni mini kaniliana lagago ogonialebi dindi ogoniha wialu bida.
GEN 2:13 Iba mendego mini Gihono pedago ogonime dindi Kusi mbira ngago pu mabu bialu peda.
GEN 2:14 Iba tebone porago mini Taigirisi ogoni ibu ni tagira ibiragohayagi Asiria dindiha pupe halu peda. Iba manego mini Yuberedisi peda.
GEN 2:15 Anduane Homogo Ngode Datagaliwabe ibugua agali wabiyago haru puwa Idene mabu biagoha howa handaya ho helo helene.
GEN 2:16 Ani buwa ibugua agali biagohondo lalu, Ira o karuni bibahendenaga lini do naga bibe.
GEN 2:17 Anigo ira mbiraore ko bayalela manda bibelonaga mini dugua haga o kagonaga lini dege do noleni nadonabe. Nanabe laro do nariyagua í̠ni abaleore homolebere, lalu lamini.
GEN 2:18 Ani lowa Anduane Homogo Ngode Datagaliwabe ibugua lalu, Ainde agali ibuni hangu holene nakarulapedago. Ibu biamogo bilonaga ibuni aleore mbirali wabuliya, lene.
GEN 2:19 Ani lowa ibugua dindime nogo egarubi ema bialu piaga bibahende wabiniru agali biago bereagoria tinaga mini hangu hangu wigi bilo haru ibuwa helene. Ani biyagola agali biagome uruni bibahende mini wiai hene. Ema bialu piaga gabua tagiraha biragabi andagaha hinagabi ega bedarubi bibahendeore mini wiai hene. Bibahendenaga mini agali ogoni ibugua winidaruni áyu wiaabo ka. Anigo ema bialu piaga uruni aria mbiraoremebi Adamala bi te lo halu ibu biamogo bulene ibuni ale mbira nahe wini.
GEN 2:21 Ani heagola Anduane Homogo Ngode Datagaliwabehanda agali biago mo paliahondo helowa agali ogoninaga kuabene kuni mbira gilila muwa dongone heneyadagua hadai bilene.
GEN 2:22 Ani buwa kuabene kuni biagome ibugua wali mbira wabu helowa mani agali biago hearia haru pene.
GEN 2:23 Agali biagome wali biago hondowa bi ogodagua lene. Agua i̱ni aleore ogonida. I̱naga kunime ibunaga kuni heneda. I̱naga tinginime ibunaga tingini hela howa Ngode Datagaliwabehanda i̱naga kuabene kunime wabiyadago. Ai i̱na ibu mini wali wero, lene.
GEN 2:24 Ani binigome mana ogobi winigo ngagoni. Agali ibugua ibu aba ai̱ya helalu ibu onela mandagi howa libu ho mbiraore holebira lenego nga.
GEN 2:25 Wali agali libu hura dambale payaburu nabi howa libu taga nahaga hene.
GEN 3:1 Anduane Homogo Ngode Datagaliwabehanda ema bialu piagaru bibahende wabiai howa berelenego uruni ti puyame ohaga berenegobi mbira naberene. Puya ibugua wali biagohondo ogodagua hale halu lalu, Ngode Datagaliwabehanda mabuha ira lini bibahende dedaruni mbira donabe nale mbauleda, lene.
GEN 3:2 Ani layagola wali biagome ladai bialu lalu, Iyame ira bibahende karunaga lini do nolene karulapego.
GEN 3:3 Ibugua ira mbiraore hangu amu mabu hanuni kagonaga lini dege nado nalibu. Libu homoligo elabi nahalibu laya, lene.
GEN 3:4 Ani layagola puya biagome ke̱ howa wali biagohondo ladai bialu lalu, Bi ogoni henene ndo. Libu nahomoleberabi.
GEN 3:5 Libugua ira ogoninaga lini do naribiyagua libunaga de ngalalu Ngode Datagaliwabe ibuni ale dege howa ko bayaleru tale bulene miniha tagira ibai holebira ndobe. Anidagua bulebirago manda buwa Ngode Datagaliwabehanda libu ira lini ogoni nadonalibu layada, lene.
GEN 3:6 Ani layagola wali biagome ira ogoninaga lini bayaleore nolene karulape dewa dearia hondowa ibu mini dewa wialu hene. Aniore buwa wali biagome manda bialu, I̱na ira lini ogoni do nowa miniru dingidangialeore biraruyagua karulapedago manda bini. Ani manda buwa wali biagome ira ogoninaga lini mbira do nalu maru ibu agalini nelo miyagola agali ibubi nene.
GEN 3:7 Nai howa libunaga de ngala hayagola handalu hebira libu tibabe haribayane hendene. Ani hondowa libugua ira yuni mbalape lebumaga howa aga biagadagua buwa hene.
GEN 3:8 Ani bu hebira alendo hayagola Anduane Homogo Ngode Datagaliwabe uyu mabuha ibagabu hayuago hale halu libu irabu teha puwa ha do hene.
GEN 3:9 Ani hebira Anduane Homogo Ngode Datagaliwabe ibugua agali biago olowa lalu, Í̠ agoha kebe, lene.
GEN 3:10 Ani layagola agali biago ibugua ladai bialu lalu, Í̠ mabuha ibayuago hale howa i̱ tibabe haruyagola gi howa ogoha ha do ko, lene.
GEN 3:11 Ani layagola Ngode Datagaliwabehanda ibuhondo hale halu lalu, Í̠ tibabe haruda lowa agua handaribe. Í̠ ani kegoni lalu langiyadago aiwabe. Ira lini nadonabe larugo donaribe, lene.
GEN 3:12 Ani layagola agali biago ibugua ladai bialu lalu, Í̠na wali i̱ni ale dege i̱la holobaya ngirigome ira lini ogoni do ngiyagola naru, lene.
GEN 3:13 Ani layagola Anduane Homogo Ngode Datagaliwabehanda wali biagohondo lalu, Í̠na ogoni biridago aginagabe, layagola wali biago ibugua ladai bialu lalu, Puyame ohowa nolenego do na layagola i̱na ira ogoninaga lini do naru, lene.
GEN 3:14 Anduane Homogo Ngode Datagaliwabehanda puya biagohondo lalu, Áyu i̱na í̠ ha halu mo ko howa bi hongoheore laro. Genda timbuniore í̠na yulebere. Genda ema bialu piaga maru bedarume yulebiraru emene lowa í̠naga genda timbuni bolanguahe yulebere. Ai áyu ogoni howa í̠ tombeme pialu dindi himu abalu ngaru dugu naga bima piaga birulebere.
GEN 3:15 I̱na í̠ walila mo waitigi helowa ibunaga aguanene í̠naga aguaneneru baba waitigi haabo holebira. Wali aguanene mbiru ibugua í̠naga haguane tagada hengeda haragola í̠na ibunaga ge ayuendeni hayulebere, lalu lene.
GEN 3:16 Wali biagohondobi nde Ngode Datagaliwabehanda ogodagua lalu, Ai í̠na wali gali bere biruwa ndelaheore handalu birabelo mo ngero. Ani biruwa nde waneigini taba hanarengi tandaga timbuniore habe. Anigo uruni embeda howa í̠na í̠ agalini hame lalu biraabo howa ibu andaneha birulebere, lene.
GEN 3:17 Ani lowa Ngode Datagaliwabe ibugua Adamahondo ogodagua lalu, Í̠na í̠ onenaga bi hale howa ira lini nadonabe larugo do naridago. Anidagua biridagonaga i̱na tomo bayuwa anda hai nahelo dindi ogo mo ko harogoni. Ani berogola tomo karulape anda helonaga horo bibahendengi erekui biabe biaabo holebere.
GEN 3:18 Tomo hangaregola mamunali aniheru datani ko bu karu í̠ mabuha anda holebira. Ani biragola í̠na tomo bayale mbira hongowa bialu nole lo manda buwa hanga dege bialu keria poboyogo giligalalo howa hangalu holebere. Biabe ndelahe dege bialu kene í̠ homalu i̱na í̠ dindime wabirugo ai lone dindiha dai beregola í̠naga tingini dindi hodai bulebira, lene.
GEN 3:20 Adama ibugua ibu one wali agali mani dewa holebirarunaga ai̱ya birulebirago manda buwa ibu mini Iba wini.
GEN 3:21 Mani howa Anduane Homogo Ngode Datagaliwabe ibugua libunaga aga bilo nogo dongoneme wabu miyagola libu ogoni karulo hene.
GEN 3:22 Mani Anduane Homogo Ngode Datagaliwabehanda lalu, Ai wali agalime ko bayalela manda bialu ina ale dege hayadago. Anigo iname libu haabobo holene miaga ira kagoria nahelami̱ya. Libugua ira ogoninaga linibi do nowa nahome haabobo holigo, lene.
GEN 3:23 Ani lowa Ngode Datagaliwabe ibugua dindi mbira wali agali biago Idene mabuha howa bo batagi halu dindi ibuni wabiyagoha biabe bialu tomoru hangalu helo pelene. Ani biyagola wali agali libugua dindi tombalu biabe bialu tomo hongolene wini.
GEN 3:24 Ibugua wali agali talia tagi howa lone dai buligonaga dahuliyali hongoherume Idene mabunaga gibuni ni tagira ibiragohayagi mamage helene. Ani buwa wai biagane ayu tibu ne gadele mbirani ira hungu bialu hego ogonime mabu bibahendeha mamage ibaga bialu helo helene. Wali agali haabobo holene miaga ira ogoni kagoria dai bulilono dahuliyali o biarubi ayu tibu ne gadele biagobi mabu ogoniha mamage haabo helene.
GEN 4:1 Adamahanda ibu onela mandagi hebigola wali ibu gali bere berene. Ani biralu ibugua igiri mbira taba hanayagola Adamahanda lalu, Anduane Homogohanda i̱ biamogo bialu igiri mbira ngiya, lowa igiri gali biago mini Keni wini.
GEN 4:2 Mani Keni hamene Abele taba henene. Ai libu anda howa Keni ibu mabuha tomo hangaga halu Abele ibu nogo sibi hinaga hene.
GEN 4:3 Horo mbirungi Keni ibugua ibu mabuni tomo wiaru maru bu yalu puwa Anduane Homogohondo lomabu mini.
GEN 4:4 Ani biyagola Abele ibubi nde Anduane Homogohondo mbirale bo lomabu mule nogo sibi hungubaluaore habahe nogo angibuni piganeme igini wiyago ogoniore haru halu puwa bo delene. Ani biyagola Abele ibugua nogo sibi bo lomabu miyago handalu Anduane Homogo ibu turu hene.
GEN 4:5 Kenihanda tomo Anduane Homogohondo bu lomabu miyago turu nahe hene. Ani biyagola Keni ibugua keba timbuni howa ngui higi bu hene.
GEN 4:6 Ani bu heagola Anduane Homogohanda Kenihondo hale halu lalu, Í̠ keba howa ngui higi bu kegoni aginaga.
GEN 4:7 Í̠na mana tigabi bulene ngadagua bidele nde i̱na ogoni karulape birida larogola í̠ni turuho kelego. Ai í̠na mana ko ngaruni biridago kome í̠ mo ko hole ka. Mana kome í̠ bope halu wayali hole hame lalu kago ai í̠nabi ibu bope halu wayali hole habe lene.
GEN 4:8 Mani howa Kenihanda ibu hamene Abelehondo lalu, Ainde ibaga bialu mba, lene. Ani puwa Kenihanda ibu hamene Abele bo homelene.
GEN 4:9 Ani bu hearia Anduane Homogohanda Kenihondo hale halu lalu, Í̠ hamene Abele agoha kabe, layagola Keni ibugua lalu, I̱ tobara. Agua biya í̠na manda beregola i̱ hamene haru haga i̱ harudabe, lene.
GEN 4:10 Ani layagola Anduane Homogohanda Kenihondo ogodagua lalu, Í̠na mana ko ogoni aginaga biribe. Í̠ hamenenaga darama dindini wiagome i̱hondo agali ogoni pani mia lalu dugu biyago hale harugo.
GEN 4:11 Áyu bi hongohe mbira í̠hondo ogodagua laro. Ai í̠ hamene balu homelarigonaga darama dindi ogome nelarigoni ndobe. Ani biridagonaga i̱na dindi ogonaga tomo anda holenego mo waharogola í̠na tomo hangalu nanolebere.
GEN 4:12 Í̠na tomo hangariyagua dindime tomo bayale anda helo biamogo nabulebira. Ani biragola í̠naga dindi anda henene nga lene mbira nawi howa í̠ni tiga biragoha palia edede biaga holebere, lalu lamini.
GEN 4:13 Keni ibugua bi ogoni hale howa Anduane Homogohondo ogodagua ladai bialu lalu, Genda í̠na áyu i̱ mo ngeregoni timbuoredago.
GEN 4:14 Mabu e nahangabe lalu í̠ni kegoria nahe dindi kaundiaha hole pobe larida. Ani bialu i̱naga dindi anda henene mbira nawi howa i̱ni tiga biragoha palia edede biaga agali habe larida. Ani laridago nde agali mbiragome i̱ ngola hayagua i̱ homoliya bo waholobadago. Aiore gi ho kogoni, lene.
GEN 4:15 Ani layagola Anduane Homogohanda Kenihondo lalu, Í̠na gi nahabe. Agali mbirame í̠ bayagua heneneore i̱na genda timbuniore mo mialu o bayagonaga pani agali karia homelo bolene wulebira, lene. Ani lowa Anduane Homogo ibugua agali mbirame Keni ngola howa nabelonaga manane mbira Keninaga tinginini helene.
GEN 4:16 Ani biya handala Keni ibugua Anduane Homogo helalu dindi mbira mini Ibagadegebiaga Idene mabunaga ni tagira ibiragohayagi winigoha hole pene.
GEN 4:17 Keni ibu onela mandagi howa wali ibu gali bere berene. Ani biruwa ibugua igiri mbira taba hanayagola igiri ogoni mini Inogo wini. Mani howa Keni ibugua tano mbira bu winigo ogoni mini ibu igini Inogonaga mini wialu Inogo dege lene.
GEN 4:18 Mani howa Inogo igini Irada hene. Irada igini Mehuyale hene. Mehuyale igini Medusale hene. Medusale igini Lamege hene.
GEN 4:19 Lamege ibu wali kira dabu binigo. Mbiragonaga mini Ada biralu mendego ibu mini Sila berene.
GEN 4:20 Ada ibu igini Yabala taba henenego. Yabala ogoni ibu balai andaru bia howa nogo bulumaga hinaga karunaga aguanene hene.
GEN 4:21 Yabala ibu hamene Yubala henego ogoni ibu ngida ga̱wa̱ hiliyularu laga karunaga aguanene hene.
GEN 4:22 Mani howa Sila ibugua nde igiri mbira taba honowa ibu mini Tubala Keni wini. Igiri ogoni ibugua ege to̱le̱ boronosi aeanerume mbirale wabiaga hene. Tubala Keni ibu mbalini mbira berenego ogoni ibu mini Nama berene.
GEN 4:23 Horo mbirungi Lamegehanda ibu one kira biago labohondo ogodagua lene. Ada Silala-o libuore Lamege i̱ oneore bedabigonigo áyu i̱na bilarogoore baya hangu hale hadaba. Agali mbirame i̱ balu hearia i̱na ibu bo tongolo milaru. Igiri daliahe mbirame i̱ to̱a balu hearia i̱na ibu bo tongolo milaru.
GEN 4:24 Ai agali mbirame Keni homelo bayagonaga pani agali karia homelo bolene nga manda biyagua agali mbirame i̱ bayagua ogoninaga pani agali ngui laa̱i̱ bo waholene wulebira, lalu lene.
GEN 4:25 Mani howa Adama ibu onela mandagi howa wali ibu gali bere berene. Ani biruwa ibugua igiri tebone taba henene. Taba honowa wali biagome lalu, Kenihanda ibu hamene Abele bo wahayagonaga aribia halu Ngode Datagaliwabehanda igiri mbira ngiyago. Ai Abele holene winigoria igiri ogoni ibu ho aribia holebirago, lowa ibunaga mini Sede wini.
GEN 4:26 Mani Sede ibu igini mbira hayagola ogoni ibu mini Inoso wini. Ogoningi howa wali agalime Ngode Datagaliwabe mitangi bialu lotu lalu howa ibunaga mini mende Anduane Homogo lalu lotu lalu hene.
GEN 5:1 Adama waneigini aguaneneru hama ibinigo uru. Ngode Datagaliwabe ibugua wali agali wabialu ibuni aleore helo wabini.
GEN 5:2 Ibugua walibi agalibi wabu helowa mo bayale holenaga bi lamialu libu mini wali agalila lene.
GEN 5:3 Mani Adama ibu dindini heagola ibunaga mali handari mbirani pira tebira (130) hayagola ibu oneme igiri mbira Adama ibuni ale taba hanayagola ibugua igiri ogoni mini Sede wini.
GEN 5:4 Ani wialu mani Adama ibu waneigini maru hono wigi bialu heane mali handari halira (800) pene.
GEN 5:5 Ibu dindini heane dege mali hama ibinigo lamaga howa handari dirani pira tebira (930) hayagola Adama ibu homene.
GEN 5:6 Adama igini Sede ibu mali handari mbirani duria (105) heangi ibu oneme igiri mbira mini Inoso taba hanayagola Sede ibu igiri ogoninaga aba hene.
GEN 5:7 Ani howa Sede ibu waneigini marubi heagola ibunaga mali handari halirani karia (807) hene.
GEN 5:8 Ani howa nde Sede ibu mali handari dirani homberia (912) bibahende halu homene.
GEN 5:9 Ainde Inoso ibu mali hama ibinigo pira dira (90) hayagola ibu igini Kenana hene.
GEN 5:10 Mani Inoso ibu waneigini marubi heagola mali handari halirani pira mbirani duria (815) hene.
GEN 5:11 Inoso ibu dindini heane dege mali bibahende handari dirani duria (905) halu homene.
GEN 5:12 Kenana ibu mali pira karia (70) hayagola ibu igini mini Mahalalele hene.
GEN 5:13 Ani howa mani ibu waneigini marubi halu ibu mali handari halirani pira maria (840) hene.
GEN 5:14 Kenana ibu dindini heane dege mali handari dirani huniane pira mbira (910) hayagola ibu homene.
GEN 5:15 Mahalalele ibu mali pira waragariani duria (65) hayagola ibu igiri Yarede aba hene.
GEN 5:16 Mahalalele ibu waneigini marubi heagola mali handari halirani pira tebira (830) ha dege bini.
GEN 5:17 Ani howa Mahalalele ibu mali handari halirani pira dirani huniane duria (895) hayagola homene.
GEN 5:18 Anigo nde Yarede ibu mali handari mbirani pira waragariani kira (162) hayagola ibu igini mbira Inogo hene.
GEN 5:19 Yarede ibu waneigini marubi heagola mali handari halira (800) hene.
GEN 5:20 Ibu mali henego bibahende lamaga halu handari dirani pira waragariani kira (962) hayagola ibu homene.
GEN 5:21 Inogo ibu mali pira waragariani duria (65) hayagola ibu igiri mbira Medusela henego aba hene.
GEN 5:22 Inogo ibu Ngode Datagaliwabela nenegeore ho hene. Ani henego ibu waneigini marubi heagola mali handari tebira (300) hene.
GEN 5:23 Inogo ibu mali bibahende henego daga lamaga halu handari tebirani pira waragariani duria (365) howa
GEN 5:24 Ngode Datagaliwabehanda ibu mo yu ereba hayagola wali agalime ibu lone handa walia nahene. Ibu abale dindini hayangi Ngode Datagaliwabela nenege haaboore henegome ani bini.
GEN 5:25 Medusela ibu mali handari mbirani pira halirani karia (187) hayagola ibu igini mbira mini Lamege hene.
GEN 5:26 Medusela ibu waneigini marubi heagola mali handari kariani pira halirani kira (782) ha dege bini.
GEN 5:27 Ani henego ai ibu dindini heane dege mali daga lamaga halu handari dirani pira waragariani dira (969) halu homene.
GEN 5:28 Medusela igini Lamege ibu mali handari mbirani pira halirani kira (182) hayagola ibu igiri mbira aba hene.
GEN 5:29 Ibu igini ogoni mini Noa wuwa ibugua lalu, Bamba Anduane Homogohanda bi hongohe mbira lo wialu lalu, Dindi ogo mo ko holebero, layago ai dindi ogoniore mo ko hene ngagoni. Iname tomo bayaleore anda helo biabe erekuibi bialu haabo harimagoni. Ainde igiri ogoni ibugua dindini tomo mo anda helonaga malia howa emene tigimbira hanguni ha̱lo holeberema, lene.
GEN 5:30 Lamege ibu waneigini marubi heagola mali handari duriani pira dirani duria (595) hene.
GEN 5:31 Ani henego ai Lamege ibu dindini heane dege mali bibahende daga lamaga halu handari kariani pira kariani huniane karia (777) halu ibu homene.
GEN 5:32 Noa ibu mali handari duria (500) hayagola howa ibu igini tebira henego mini Seme Hama Yabede imaru hene.
GEN 6:1 Dindini wali agali dewaore ho dame bialu uruningi wandari dewa berene.
GEN 6:2 Dahuliyali tara tigua handalu hemiria wandari baya birama pearia hendene. Ani hondowa tini hame layadagua haru pugu buwa dabu bigi bini.
GEN 6:3 Ani biyagola Anduane Homogohanda lalu, I̱naga dinini wali agali uruni tiha helo mialu holene tiha pulanda harugo. Ai nde ti dindi tawe hangu haragonidago wahalu i̱naga dinini tiha haho wia nabilonaga tinaga mali mo tubagi halu handari mbirani pira kira (120) hangu halu homelo, lene.
GEN 6:4 Uruningi howabi maha howabi agali ndo timbu gibiru dindini haga bini. Agali timbuni uruni wandari berearume dahuliyali hearu baba kayu yuwa hono wini. Agali timbuni uruni ti mini lene howa tigua biabe dewa tara tara wiaru biai haga hene.
GEN 6:5 Anduane Homogo ibugua handalu hearia wali agali dindi bibahendeha hearume mana koore wiaru bialu howa tigua mana ko ngubi wiaru hangu bule manda bu hearia hendene.
GEN 6:6 Ani biyago hondowa ibugua lo mitangi bialu lalu, Ainde wali agali uruni nawabidole nde bayale ngaleda, lowa Anduane Homogohanda ibu miniha genda ho hene.
GEN 6:7 Genda howa ibugua lalu, Wali agali uruni i̱nime wabu helene biarunidago ai dindi bibahendeha wali agali karu bibahendeore bo wahai holiya. Ega tia nogobi bibahende ema bialu piaga irabuha biraga gabua bedarubi andagaha wali agalime hinaga karubi bibahende i̱nime wabirugo nabidole nde bayale kaleda. Ai uruni bibahendeore bo hilo wahai holiya, lene.
GEN 6:8 Ani la lowa Anduane Homogo ibugua Noahondo dege turuho hene.
GEN 6:9 Noa ibu igini tebira henego urunime tinaga mini Seme Hama Yabede imaru hene. Noa ibu agali bayale howa Ngode Datagaliwabenaga deni ibu tigabiore howa ibuni Ngode Datagaliwabenaga nenegeore hene.
GEN 6:11 Anigo Anduane Homogo ibugua handalu hearia dindi bibahendeni wai hangu bigibigi bialu mana ko timbuni dewaore biyaria hendene.
GEN 6:12 Ibugua dindi bibahendeha mana ko bulene timbuni tagira ibalu wali agali bayale tigabi dindi mbirani heane nahende. Bibahendeme mana ko wiaru hangu bule de buyu hearia hendene.
GEN 6:13 Ngode Datagaliwabehanda Noahondo ogodagua lalu, Dindi bibahendeni wali agalime mine howa tini bagabaga bialu wai dege bialu karuni mangabago ai bo wahai holebero. Wali agali dindini yu wahene mbira naholebira.
GEN 6:14 Anigo í̠na irabuha ira bayaleoreru handalu dibu pelowa iba talu mbira wabibe. Iba talu ogoniha hobane maru helalu tamuha tagiraha howabi diri nawilo wagayame ndibu lelo para hai habe.
GEN 6:15 Iba talu ogoni ogodagua wabibe. Luninaga mida magi handari mbirani pira tebira (130) wialu aranenaga mida magi pira kirani kira (22) wibe. Bima iraga hole mida magi pira mbirani tebira (13) wibe.
GEN 6:16 Iba talunaga danginihayagi bule howa dangini ibu háila bu ndibu nale hái danginila hengeneha henge wá anda ibilonaga ngelabe. Tamuha hobane tebira helo. Hobane mbira dindiha mendego obeneni tebonego danginila tubariha helabe. Ani buwa panga haraba mbira abenehayagi dugu wibe.
GEN 6:17 Ani bidegola i̱na dalu timbuni ibilowa dindini ema bialu piagaru bibahende bo wahai hole iba li timbuni ibilolebero. Ani berogola dindini karubi ngarubi bibahende homaiore holebira.
GEN 6:18 Anigo í̠la dege habo nalolene bi lo werogo. Í̠ one waneiginibi í̠ igini ti onerubi tí bibahende í̠ni heba iba taluha anda puwa biralimu.
GEN 6:19 Ai ema bialu piaga dameneru mbira mbira angibuni taubi kira kira haru halu tini heba iba taluha anda pilimu.
GEN 6:20 Ega tia bedarubi nogo damene bibahendebi ema bialu piagaru bibahendeore angibuni wangabela kira dege dege tini heba homa nabi berelo iba taluha haru anda pilimu.
GEN 6:21 Ani buwa tininaga tomo nolenebi ema bialu piaga uruninaga tomo karulape nalu berelobi tíni nagane alego iba taluha bu ngelalimu, lalu lamini.
GEN 6:22 Ani layagola Noa ibugua Ngode Datagaliwabehanda lamiyadagua bibahende biai hene.
GEN 7:1 Mani Anduane Homogohanda Noahondo lalu, Í̠ hangu wali agali dindini karubi ndo tigabi harigoni handarugo. Ai í̠ one waneiginirubi iba taluha anda piai halimu.
GEN 7:2 Ani bialu ema bialu piaga i̱naga deni bayale karu arianaga angibuni karia wangabe karia lowa haru anda pilimu. Anigo ema bialu piaga i̱naga deni bayale ndo karu angibuni wangabebi mbiraore dege dege haru anda pobe.
GEN 7:3 Anidagua dege ega bedarubi nde angibuni wangabebi karia dege dege haru anda poregola ti homa nabi biruwa mani dindini bira aribia holene tigua hono wilo ani bibe.
GEN 7:4 Horo karu howa dalu timbuniore mbiraga horombebi lamaga halu pira mariani (40) dalu hangu ibiloleberogo iba dalu timbuni ogoni mbirale bibahende i̱nime wabiruruni iba lime nai helolebero, lene.
GEN 7:5 Ani layagola Noa ibugua Anduane Homogohanda bibe layadagua biai hene.
GEN 7:6 Noa ibunaga mali hama ibinigo handari waragaria (600) hayagola dindini iba li timbuni ogoni ibini.
GEN 7:7 Noa ibu onebi libu iginiru tinaga onerubi bibahende iba li timbuni ibiragome nayilo abale iba taluha anda piai hene.
GEN 7:8 Ani bialu ema bialu piaga Ngode Datagaliwabenaga deni bayale hearu ariabi ibunaga deni ko hearu ariabi angibuni wangabela kira dege dege minu baanda
GEN 7:9 halu ega berearubi ema bialu piaga bibahendeorebi minu baanda haiore howa Noa ibuni heba Ngode Datagaliwabehanda bibe layadagua iba taluha anda pu berene.
GEN 7:10 Horo karu biago piai hayagola dindini iba li timbuni ibiyagome dindi bibahende namu lama iraga hene.
GEN 7:11 Noa ibunaga mali handari waragaria (600) hayagola howa mali ogoninaga dege ege mendegonaga horo pira mbirani karia (17) hayagola horo ogoningi dindi andaneha panga dugua hayagola iba timbuni bereago peago pu daga hene. Ani bialu iba hari daligaha bereago panga dugua hayagola iba timbuni pugulope hene.
GEN 7:12 Horo pira mariani (40) mbiraga horombebi dalu ibaho wiaabo hene.
GEN 7:13 Horo pigane dalu ibiyadangi Noabi ibu onebi libu igini tebirali Seme Hama Yabede imarubi ti onerubi bibahende iba taluha anda piai hene.
GEN 7:14 Ema bialu piaga irabuha biraga emene timbunibi andagaha biraga emene timbunibi bibahendeore Noa ibu damene biaru heba iba taluha anda puwa birai hene.
GEN 7:15 Ngode Datagaliwabehanda layadagua ema bialu piaga angibuni wangabela kira dege dege Noa heba iba taluha anda piai hene. Ani bereagola Anduane Homogohanda iba talunaga panga payini.
GEN 7:17 Dalu iba libi íbu dege bialu heagola horo pira maria (40) hene. Iba biradaga hayagome talu yaraga halu dindi yu wahene.
GEN 7:18 Iba bira timbu howa talu biago ibani yu ibagabu hene.
GEN 7:19 Iba biradaga halu hari bare wiaru namu lai hene.
GEN 7:20 Maniore hayagola iba bira timbuore halu hari bare uruni yu wahai halu bolangua howa ge mandanaga karia birama iraga hene.
GEN 7:21 Ani biyagola ema bialu piaga irabuha biraga emene timbunibi andagaha biraga emene timbunibi ega berearubi wali agali bu hearubi bibahendeore homai hene.
GEN 7:22 Dindini anda holene damene wiaru homaiore hene.
GEN 7:23 Anduane Homogohanda dindini buhe̱wibi anda haga alebi wali agali bibahendeore dindi hangu ngelalu bo hilo wahai henego. Noabi ibu damenerubi ema bialu piaga biarubi ega biarubi bibahende iba taluha anda pu birayaru ti dege iba li timbuni ibiyagome nai nahe tamuha bereagome yo pene.
GEN 7:24 Iba biagome nde birama iraga dege halu heane horo handari mbirani pira duria (150) pene.
GEN 8:1 Ngode Datagaliwabe ibugua Noa halu bibahende iba taluha birayaru mitangi hene. Ani mitangi howa Ngode Datagaliwabehanda puyabu iba bereagoria ibilayagola iba emene birama dalidali bini.
GEN 8:2 Iba dindiha howa dugua daga hayago hundialu daligaha howa pugulope helo panga dugua hene biago payiyagola ai iba birayago hundiama dalini.
GEN 8:3 Iba hundiama dalia dege bialu heane horo handari mbirani pira duria (150) pene.
GEN 8:4 Ani bialu dege howa ege kanegonaga horo pira mbirani karia (17) hayagola iba talu biago hari mbira Ararada dindini weagoria yu paga hene.
GEN 8:5 Iba wene hundiama dalia dege bialu heane ege pinigonaga horo mbira layagola hari wearunaga nene pani hai hene.
GEN 8:6 Horo pira maria (40) peagola Noa ibugua windo mbira dugua howa
GEN 8:7 ega mbira minu batagi hene. Ega ogoni minu batagi hayagola yagalo yalu pene. Ani puwa lone dai nabi iba hundialu dindi yo biai helo ibu yagaloyu ibaga bialu hene.
GEN 8:8 Ani biyagola Noa ibugua iba hundialu dindi pani hayadabe hondole ega mende mini malibu minu batagi hene.
GEN 8:9 Ani biyagola ega biago ibu birulene henge nawi dindini iba biraho wiagola ibu iba taluha lone dai bini. Ani dai biyagola Noahanda gi yatagi howa ega malibu biago iba taluha minu yamini.
GEN 8:10 Ani bialu Noa ibugua horo karia biruwa ega malibu biago lone minu batagi hene.
GEN 8:11 Ega biagome pialu alendo hayagola ira olibenaga yuni gahenge mbira ibunaga neme gilo yalu Noa berearia taluha lone dai bini. Ani biyagola Noa ibugua iba hundiai hayidalo manda bini.
GEN 8:12 Ani manda buwa ibugua horo karia howa ega malibu biago lone minu batagi hene. Ani biyagola ega biago ibu dai nabi puabo hene.
GEN 8:13 Noa ibunaga mali handari waragariani mbira (601) howa mali ogoninaga ege mbiranaga horo mbira hayagola iba biago wene dege hundialu hene. Noa ibugua iba talu biagonaga dangini mbira gialowa handa tagi hene. Handa amu nana bialu hearia iba wene dege yo bialu hearia hendene.
GEN 8:14 Ai ege mendegonaga horo pira kirani karia (27) hayagola dindi bibahende yobiai hene.
GEN 8:15 Ani biyagola Ngode Datagaliwabehanda Noahondo bi ogodagua lalu, Ai áyu í̠ onebi í̠ iginirubi tinaga onerubi tí bibahende iba taluha howa tagira pudaba.
GEN 8:17 Ega bibahende bedarubi nogo tara tara biarubi bibahende tíni heba haru tagira pilimu. Tigua dindi bibahende ngaruha purogo lalu hono dame bilo, lene.
GEN 8:18 Ani laya handala Noabi ibu one iginirubi ti onerubi ti bibahende iba taluha howa tagira pene.
GEN 8:19 Nogo tararubi egarubi ema bialu piaga bibahendebi ti nde tini aria dege dege piyadagua mandagi wabuni pugupugu bialu iba taluha howa tagira piai hene.
GEN 8:20 Noa ibugua mbirale bo lomabu delaga dabu mbira naina bu helene. Ani bia howa nogo egaru Ngode Datagaliwabenaga deni ko nabi bayale damenerunaga mbira dege dege ibunihondo bo lomabu delole bene. Bowa dabu bia hayagoria lomabu delene. Ani bo lomabu delayagola
GEN 8:21 Anduane Homogohanda loma biagonaga ngaore baya tara dendebiore biyagola ibugua lalu, Wali agalime ko biragonaga mani pani mialu dindi ogo halu mende mo ko naholebero. Wene wandari igiri emene ko howa mana ko bulenela haru anda hagago. Nde wali agalibi ema bialu piaga bedarubi ti halu mende naboleore.
GEN 8:22 Ai mani tu wigi buwa tomo hongolene henge wialu tomo bulene hengebi wulebira. Ani bialu dindi ogoria ni bayale poboyogobi dolenebi dagarengi holenebi henge wulebira. Dalu ibalu gaea bulene hengebi wia dege bulebira. Dindi ogo mo ko halu ereba nahe ngaha horo uru anidaguaore wiaabobo bu wulebira, lalu Anduane Homogohanda lene.
GEN 9:1 Ngode Datagaliwabehanda Noabi ibu iginirubi ti bayale helonaga bi ogodagua lalu, Dindi bibahendeni wali agali palu to̱lelo tígua waneigini dewa hono wialu halimu.
GEN 9:2 Nogo tara tara karubi iba wena ega tia bedarubi ema bialu piaga bibahende irabuha gabua biragarubi andagaha hinini bedarubi uruni bibahende tígua handameho halimulo helarogoni. Uruni tigua wali agali hondowa gi halu birulebira.
GEN 9:3 Ai tígua ema bialu piaga dindini biraga bedaru bowa nema bayale andaho ngaru heba tínaga tomo dawa nalu halimulo i̱na ngero.
GEN 9:4 Mbiraore hangu nanolene ngago ogo. Nogo egaru bowa darama bedaore nanalimu. Darama ogonime dére holene ngiaga tene nga.
GEN 9:5 Mbiralime wali agali maru balu homelayagua i̱na ibu biragonaga pani genda timbuniore yu helolebero. Nde ema bialu piaga bedagomebi wali agali mbirago balu homelayagua i̱na ibuniore bo waholebero.
GEN 9:6 Mbiralime wali agali mbira Ngode Datagaliwabehanda ibuni ale helo wabinigo balu homelayagua wali agali maru karume baga kago ibunibi bo waholene nga, lene.
GEN 9:7 Ngode Datagaliwabehanda lalu, Dindi bibahendeni tínaga aguanene palu to̱lelo tígua waneigini dewaore hono wilimu, lene.
GEN 9:8 Ani lowa Ngode Datagaliwabehanda Noabi ibu igini biaruhondobi ogodagua lalu,
GEN 9:9 Áyu howa tínibi tínaga aguanene mani hama polebiraruhondobi i̱na habo nalolene bi mbira lo ngero.
GEN 9:10 Ani bialu ema bialu piaga nogo egarubi tia bedarubi ema bialu piaga iba talu biagoha berene tagira ibiyaru bibahendehondo habo nalolene bi mbira lo wialu bulebero.
GEN 9:11 Tí baba habo nalolene bi ogoni ogodagua lo ngelaro. Aiore iba lime ema bialu piagaru lone bo wa naholeore. Iba lime dindi ogobi halu mende namulai naholebiraore laro, lene.
GEN 9:12 Ngode Datagaliwabehanda lalu, Ai i̱na tí bababi ema bialu piaga bedaru bababi habo nalolene bi lo werogo heneneore lowa walia halu ni domo mbira harini helolebero. Ni domo ogonime dindini ngarubi karubi bibahendeore baba habo nalolene bi lo werogoni heneneore lalu walia holene manane ogoni holebira.
GEN 9:14 I̱na ginu hagua harini íbu helarogola ni domo ogonibi íbu holebira.
GEN 9:15 Ani íbu kago hondowa i̱na wali agalibi dére ale ema bialu piagarubi iba lime halu mende nai nahelole lalu habo nalolene bi hongohe lo wirugo lone mitangi bu dai bulebero.
GEN 9:16 Ai i̱na ni domo naina harini kagola hondowa i̱na nde wali agalibi ema bialu piaga damenerubi bibahende lone naboleore lalu habo nalolene bi hongohe lo wirugoni mitangiore bulebero, lene.
GEN 9:17 Ani lowa ibugua Noahondo bi ogodagua lamialu, Ni domo ogoni i̱na dindi bibahendeni ema bialu piagaru heba habo nalolene bi lo wirugoninaga manane ogoni holebira, lene.
GEN 9:18 Noa igini ibuni heba iba taluha biralu tagira ibinidaru ti Seme Hama Yabede imaru hene. Hama ibu Kenana aba hene.
GEN 9:19 Noa igini uruni ti wali agali dindi bibahendeha hama pedarunaga mamali hene.
GEN 9:20 Noa ibu agali e hangaga howa pu mbira mini gerebi lini dagane mabuha hangaga pigane ibu hene.
GEN 9:21 Ani biaga henego horo mbirungi ibu waini iba hambu na timbu bialu luluyu howa ibuninaga balai anda tamuha agaru golo wahai halu mo koho palu wini.
GEN 9:22 Ani palearia Kenana aba Hama ibugua ibu aba aga nabi tibabe paleago hondowa ibu hamene kirali biago labo lamule pene.
GEN 9:23 Lamiyagola Seme Yabede libugua aga mbira libu aba aga nabi paleago hondoligonaga libuni de geho yalu tigibebege pialu libu abanaga balai anda ibuni tibabe paleagoha anda puwa agame bu dambi hene. Libu aba tibabe paleago nahende handa taraho yalu dai bini.
GEN 9:24 Ai Noa ibu palenego heyuwa lulu ereba hayagola hale halu hearia ibu igini heyogone biagome aga nabi paleago handaya layagola hale hene.
GEN 9:25 Ani hale howa Noahanda lalu, Kenana ibu genda timbunioreme dambi hene íbu holebira. Ibuore ibu hamenerunaga garabaya biabe ale biaga holebira.
GEN 9:26 Semenaga Ngode Datagaliwabe Anduane Homogo ibunaga mini yaraga hama. Kenana ibu Semenaga garabaya biabe ale bia haga holebira.
GEN 9:27 Yabede waneigini Ngode Datagaliwabehanda mo dewa helo. Ibunaga aguanene ti Seme waneiginiru heba mandagi helo. Kenana ibu Yabedenaga garabaya biabe ale biaga dege holebira, lalu Noahanda lene.
GEN 9:28 Iba li timbuni biago ibini lo howa Noa ibu mali handari tebirani pira duria (350) hene.
GEN 9:29 Ibunaga mali lamaga halu handari dirani pira duria (950) halu nde homene.
GEN 10:1 Mini ogoha ngaruni Noa igini tebirali Seme Hama Yabede imaru henegonaga waneigini aguaneneru ogodagua hene. Wali agali uruni ti iba li timbuni ibiyago ibalu peaha mani ho aribia hene.
GEN 10:2 Yabede ibu igini ogodagua hene. Gome Magogo Madai Yabana Tubala Mesege Tirasa imaru ti wali agali maha ha aribia hayarume tinaga mamali mini mo hameigini mini henego wiaabo ka.
GEN 10:3 Ani henego Gome ibunaga aguanene Asagenasa Libada Togama imaru ti dindi uruninaga wali agali hene.
GEN 10:4 Yabana ibunaga aguanene Elisali Sebenali Saibarasali Lodesealiru ti dindi uruni wali agali hene.
GEN 10:5 Wali agali uruni ti áyu unu iba solowara bedago ange angeha paluyu pialu iba dege dombeneha dindi wupe haga bidaruha hearunaga mamali hene. Wali agali uruni ti Yabede aguanene hene. Wali agali uruni ti nde tini dindi wigiwigi binidadagua haga haga bialu tinaga bi lole bi nde tara tara lagalaga biaga hene.
GEN 10:6 Hama ibu igini henego uru. Kusuali Iyibiali Libiali Kenanali haga biniru ti wali agali maha ha aribia hayarume mini uruni tinaga mamali mo hameigini mini laga bima ibinigo nga.
GEN 10:7 Kusu ibu aguanene Sebali Habilali Sabadali Lamali Sabadegaliru hene. Lama ibu aguanene Seba hameiginibi Dedana hameiginibi howa tinaga dindi minibi ogoni labo dege wini.
GEN 10:8 Kusu ibu igini mbirabi ha dege binigo ibu mini Nimirodo henego ibu dindi bibahendeha agali pari wayali haguane mbira nahe wiangi piganeore ibu hene.
GEN 10:9 Anduane Homogohanda Nimirodo ibuhondo hongo miyagola ibugua nogo gabua ega yáriru ta nabi taya bialu baga hongohe mbira hene. Ani henego mitangi bialu wali agaliru ti mbirame nogo gabua egaru mbira pigane bayagua tigua lalu, Ogoni ibu Anduane Homogohanda Nimirodohondo taya bulenenaga hongo miyadagua ibubi taya bialu holenenaga hongo miyada, laga biaga wini.
GEN 10:10 Nimirodo ibugua dindi handayaho kagoha tano timbuni mini lene maru uru Babilonobi Eregebi Agadabi tano tebira uruni Babilonia dindiha nga.
GEN 10:11 Anigo Nimirodo ibu Babilonia wahalu Asiria dindihayagi puwa ibugua Ninibabi Lehobodiabi Kalabi
GEN 10:12 Lesenebi tano uruni mo heya halu bu helaga bini. Lesene tano ogoni Niniba tanola tano dunini timbuni Kala tanola hengene wiagoha wini.
GEN 10:13 Iyibinaga aguanene Lidia hameiginirubi Anama hameiginirubi Lehaba hameiginirubi Nabadu hameiginirubi
GEN 10:14 Padarusu hameiginirubi Kasalu hameiginirubi Kiridi hameiginirubi hene. Pilidia wali agali ti Kiridi hameiginime hono winigo Kiridi aguanene hene.
GEN 10:15 Kenana igini wahene Saidonobi ibu igini mende Hidibi libu wali agali maha ha aribia hayarume mini uruni tinaga mamali mo hameigini mini laga bima ibinigo nga.
GEN 10:16 Yabusu hameiginirubi Amora hameiginirubi Giagasa hameiginirubi
GEN 10:17 Hibi hameiginirubi Aga hameiginirubi Sini hameiginirubi
GEN 10:18 Abada hameiginirubi Semara hameiginirubi Hamada hameiginirubi ti bibahendenaga mamali Kenana ibu hene. Kenanali uruni ti dindi wiagoha pugupugu bialu dindi tara tara wiaruha hai hene.
GEN 10:19 Kenana ibunaga dindi arane timbuni Saidono tano howa wima pialu Gasa tanoha tano mbira mini Gera wiagoha wiairi hene. Mendehayagi wima pialu ni tagira ibiragohayagi Sodomo tano Gomora tanola wiagoria howa wima pialu Adama dindiha wima pialu Seboimi dindi pialu Lasa dindi wiago kawareni wiairi hene.
GEN 10:20 Hameigini uruni ti bibahende Hama aguanene hangu hama ibinigo ti nde tininaga dindi haluni wigiwigi bialu tinaga bi tara tara lagalaga biaga hene.
GEN 10:21 Seme ibu Yabede hamene wahene howa Hiburuali Ebe aguaneneru bibahendenaga mamali hene.
GEN 10:22 Seme igini uru hene. Elama Asua Abagasada imaru Ludu Arama ti nde wali agali maha ha aribia hayarume mini uruni tinaga mamali mo hameigini mini laga bima ibinigo nga.
GEN 10:23 Arama ibu aguanene urudagua hene. Usualibi Hulualibi Gedealibi Mesegealibi uruni ti Arama aguanene hene.
GEN 10:24 Abagasada igini Sela halu Sela igini Ebe hene.
GEN 10:25 Ebe ibu igini kira henego mende mini Pelege hene. Pelege ibu heangi wali agali dindi bibahendeha hearu ti tini headagua hoba migimigi bialu hagahaga bini. Ebe igini mendego mini Yogodana hene.
GEN 10:26 Yogodanahanda hono wini ibu aguanene urudagua hene. Alamodadalibi Selebealibi Hasamabedealibi Yaralibi
GEN 10:27 Hadoramalibi Usalalibi Digilalibi
GEN 10:28 Obalalibi Abimaelealibi Sebalibi
GEN 10:29 Obialibi Habilalibi Yobabalibi uruni bibahendeore Yogodanahanda hono winiru howa ibu aguanene dege bu hene.
GEN 10:30 Hameigini uruni ti Mesa dindi wiagoria howa palima pialu amuraore ni tagira ibiragohayagi hari bare bare Seba dindi wiagoria paliairi hene.
GEN 10:31 Hameigini uruni ti bibahende Seme aguanene hangu hama ibinigo ti nde tininaga dindi haluni wigiwigi bialu tinaga bi tara tara lagalaga biaga hene.
GEN 10:32 Hameigini uruni bibahendeore Noanaga aguanene howa ti dindi bibahendeha purogolo hagahaga bini. Ani binidaruni iba li timbuni ala wiyago hundiai hayagola iba taluha howa tagira ibini biaruni purogo lalu dindi tara taraha hameigini maha heneru ti bibahende Noa aguanene hangu hene.
GEN 11:1 Bambaore dindini wali agali heneru ti bi mbiraore laga hene.
GEN 11:2 Ti ni tagira ibiragohayagi howa yu dindi wiagohayagi hama pialu dindi mini Babilonia anda puwa ogoriani hene.
GEN 11:3 Ani biruwa tini lala bialu lalu, I̱name abaleore dindi dugu mbera buwa ege timeni helo irani delami̱ya, lene. Ani lowa tigua ogonidagua bialu anda bule ege timeni wabu bila hene. Ege timeni uruni ndibu laga bulene wagaya tararu manda bu ngela dege bini.
GEN 11:4 Ani ngelowa lalu, Ainde iname anda dewa bu helowa tano timbuni mbira ngelami̱ya. Tano ogoni dombeneni anda timbuni mbira bugimbu bu migi bima iraga howa hari damindini ela helo mbira bimi̱ya. Ani birimayagua iname bibahende dindi tara tarani hama purogo nale holeberamago. Ogoni hondowa wali agali maru karume inanaga mini yaraga helo ani bimi̱ya, lene.
GEN 11:5 Ani bialu hemiria Anduane Homogo ibu daluwa tigua anda dewa buwa tano ngeleagobi tano ogoni dombeneha anda bima iraga heagobi hendene.
GEN 11:6 Ani hondowa ibugua lalu, Ai áyu wali agali uruni ti hameigini mbiraore halu bi mbiraore laga karuni howa tano timbuni mbira bu heledago handa nabere. Ani bialu howa ai tinime hame ledadagua bialu mbirale bulene bibahende ngaru biai holobadago.
GEN 11:7 Ani biyadagoni lehedago iname dalialu puwa wali agali tininaga bi hale nahene lagalaga bilo bi mo tara tara bimi̱ya ma, lene.
GEN 11:8 Anduane Homogohanda tinaga bi mo tara tara lagalaga bialu dindi tara tarani hama purogo lelene. Ani biya handala tigua tano biago bumaro nabi wahalu purogo lene.
GEN 11:9 Tano bialu henedagoni mini Babele. Irane Anduane Homogohanda wali agali uruni tinaga bi tara tara lagalaga bialu tinibi dindi bibahendeha hama purogo lalu pelene. Babele mini ogoni inanaga bi lalu Bi Mo Tara Tara Laga.
GEN 11:10 Seme ibu aguanene hama ibinidaruni ogodagua hama ibini. Iba li timbuni biago hundiyagola mali kira howa Seme ibunaga mali handari mbira (100) hayagola ibu igini mbira mini Abagasada hene.
GEN 11:11 Abagasada helowa Seme ibu mali handari duria (500) hama ibalu heagola ibunaga waneigini marubi hene. Ani ho helowa ibuni homene.
GEN 11:12 Abagasada ibunaga mali pira tebirani duria (35) hayagola ibu igini mbira mini Sela hene.
GEN 11:13 Sela helowa Abagasada ibu mali handari mariani tebira (403) hama ibalu heagola ibunaga waneigini marubi ha dege bini. Ani ho helowa ibuni homene.
GEN 11:14 Sela ibunaga mali pira tebira (30) hayagola ibu igini mbira mini Ebe hene.
GEN 11:15 Ebe helowa Sela ibu mali handari mariani tebira (403) hama ibalu heagola ibunaga waneigini marubi hene. Ani ho helowa ibuni homene.
GEN 11:16 Ebe ibunaga mali pira tebirani maria (34) hayagola ibu igini mbira mini Pelege hene.
GEN 11:17 Pelege helowa Ebe ibu mali handari mariani pira tebira (430) hama ibalu heagola ibunaga waneigini marubi ha dege bini. Ani bu helowa ibuni homene.
GEN 11:18 Pelege ibunaga mali pira tebira (30) hayagola ibu igini mbira mini Leu hene.
GEN 11:19 Leu helowa Pelege ibu mali handari kirani huniane dira (209) hama ibalu heagola ibunaga waneigini marubi hene. Ani helowa ibuni homene.
GEN 11:20 Leu ibunaga mali pira tebirani kira (32) hayagola ibu igini mbira mini Serugu hene.
GEN 11:21 Serugu helowa Leu ibu mali handari kirani huniane karia (207) hama ibalu heagola ibunaga waneigini marubi hadege bini. Ani bu helowa ibuni homene.
GEN 11:22 Serugu ibunaga mali pira tebira (30) hayagola ibu igini mbira mini Naho hene.
GEN 11:23 Naho helowa Serugu ibu mali handari kira (200) hama ibalu heagola ibunaga waneigini marubi hene. Ani helowa ibuni homene.
GEN 11:24 Naho ibunaga mali pira kirani dira (29) hayagola ibu igini mbira mini Tera hene.
GEN 11:25 Tera helowa Naho ibu mali handari mbirani pira mbirani dira (119) hama ibalu heagola ibunaga waneigini marubi hadege bini. Ani bu helowa ibuni homene.
GEN 11:26 Tera ibunaga mali pira karia (70) hayagola howa ibu igini tebira henego mbirago mini Abarama mendego Naho tebonego Harana laga biyaru hene.
GEN 11:27 Tera ibunaga igini Abarama Naho Harana imaru hene. Harana ibu igini Lode hene.
GEN 11:28 Harana ibuni dindi Kaladiaha dindi emene mbira Ua winigoria ibu aba Tera nahome wene daliahe helalu ibu ala homene.
GEN 11:29 Abarama ibugua Sarai dabu biyagola Naho ibugua Harana wane Miliga dabu bini. Harana ibu igini Isagabi hene dege.
GEN 11:30 Ainde Sarai ibu waneigini mbira taba hanabe naheore berene.
GEN 11:31 Ani howa Tera ibugua Kaladia dindiha dindi emene mbira Ua winigo ogoni yu wahalu Kenana dindiha pole pene. Ibu heba penedaruni uru. Tera ibugua ibu igini Abaramabi ibu one Saraibi Tera aguane Harana igini Lodebi ti bibahende puwa Harana tanoni pu hene.
GEN 11:32 Ani pu howa Tera ibu mali handari kirani duria (205) howa tano ogoriani homene.
GEN 12:1 Anduane Homogohanda Abaramahondo lalu, Í̠naga dindibi í̠ hamenerubi í̠ aba ai̱ya damene karubi bibahende helalu dindi gahenge mbira i̱na walia holeberogoha pobelo.
GEN 12:2 Ani poregola i̱na í̠naga aguaneru mo dewaore helolebero. I̱na í̠ biamogo bialu mini leneore helolebero. Wali agali mani holebirarume mendealihondo bi bayale lalu, Anduane Homogohanda Abarama biamogo binigodagua í̠bi nde biamogo bilo, laga bulebira.
GEN 12:3 Wali agalime í̠ biamogo biyagua nde i̱nabi ti biamogo bulebero. Mbiralime í̠hondo mo ko holene bi layagua nde i̱nabi ti mo ko holebero. Anigo í̠ha howa wali agali bibahende dindi tara tarani mani holebiraru i̱na ti biamogo bialu mo bayale helolebero, lene.
GEN 12:4 Ani laya handala Abarama ibugua Anduane Homogohanda Harana dindi wahalu pobe layadagua pene. Horo ogoningi Abarama ibu mali hama ibinigo pira kariani duria (75) hayagola Lode libu haru pene.
GEN 12:5 Pole howa Abarama ibugua ibu one Saraibi ibu hamene igini Lodebi ibuni haru halu wali agali biabe bia hagabi tinaga dabudabu wiarubi bibahende Harana dindini wu heneru mo yai halu Kenana dindi pole pene.
GEN 12:6 Abaramabi ibunaga wali agali biarubi bibahende Segeme tano wiagoria anda pene. Ogoniha dindi mbira mini More laga winiyagoria ira mbira hada bia heneyago ogoriani anda pene. Dindi ogoriani Kenana wali agali tini heaore dege pene.
GEN 12:7 Anduane Homogo ibu Abarama hearia ibuwa lalu, Dindi ogoni í̠nibi í̠naga waneigini aguane holebirarubi tihondo ngulebero, lene. Ani layagola Abarama ibugua mbirale bo lomabu mulene dabu mbira Anduane Homogonaga ibuni íbu hearia hapani hayagoria howa bia hene.
GEN 12:8 Ani bialu mani Abarama ibu dindi ogoni ngelalu unurahayagi pene. Puwa Bedele dindi ni paliragohayagi Ai dindi ni tagira ibiragohayagi ngela buwa dombeni ibu balai anda bu hene. Ogoriani howa Abarama ibugua Anduane Homogohondo mbirale lomabu mulene dabu mbira bia hene. Ani buwa ibugua ogoriani howa Anduane Homogo mitangi bialu lotu lalu hene.
GEN 12:9 Ani bialu howa emene mani hayagola ti dindi ogoni ngelalu unurahayagi pene. Tigua balai anda bu palia gelo ya bigi bima pu dege bialu Negebe dindini anda pene.
GEN 12:10 Ani bialu heagola hina gari timbuniore biyagola Kenana dindini tomo noleneore nawi hene. Ani biyagola Abaramabi ibu damene biarubi ti bibahende Iyibi dindiha togolo yalu pene.
GEN 12:11 Pialu Iyibi dindini anda puwa Abaramahanda ibu one Saraihondo lalu, Hale ha. Í̠ore wali baya mbira bedegoni.
GEN 12:12 Iyibiali karume í̠ hondowa ti dimagoliore holebira. Tigua i̱ onedalo handayagua nde í̠ berelo wahalu i̱ bolobadago.
GEN 12:13 Ai í̠na tihondo i̱ mbalini lariyagua nde i̱hondo mana tigabi dege bialu i̱ bo wa nahe baya hangu haru holebira, lene.
GEN 12:14 Ani lowa Abarama halu ibu dameneru ti Iyibi dindi tagira pialu hemiria o layagodagua Iyibiali hearume handalu hearia Abarama one Sarai ibu wali bayaore bereago hendene.
GEN 12:15 Iyibiali haguane hearume Sarai hondowa tinaga kini berearia puwa lalu, Wali bayaore mbira íbu beda, lene. Ani lowa tigua Sarai kini berearia haru piyagola kini ibu andaga haru pene.
GEN 12:16 Kini ibugua Sarai hondowa hamelo howa Abarama mo turu halu ibugua nogo sibiru memerubi bulumaga dongi kamelerubi wali agali biabe bia hagarubi bibahende Abarama mini.
GEN 12:17 Anigo kini ibugua Sarai dabu bule heagola Anduane Homogohanda kini damene bu heagoha warago timbuni tara tara dewa tagira ibilene. Irane kini ibugua Abarama one Sarai ibu aribia halu ibu one berelonaga ibilene.
GEN 12:18 Ani biyagola kini ibugua Abarama olowa lalu, Í̠na Sarai í̠ one nale howa liahe ogonidagua biridagoni irane agibe. Nde Sarai ibu í̠ one beda lalu langia nabirigo.
GEN 12:19 Ibu i̱ mbalini beda larigola nde i̱ dabu bule harugo. Ai mana kagua ogonidagua biridagoni irane aginaga. Í̠na kagua ogonidagua biridago ai í̠ ogoria nahe í̠ one haru halu pudaba, lene.
GEN 12:20 Ani lowa kinihanda ibunaga agali haguane hearuhondo, Abarama Iyibi dindini nahelo talia tagi hadaba layagola agali haguane biaru tigua Abaramabi ibu onebi ibunaga dabudabu wiarubi nogo tara tara hearubi bibahende ibuni heba talia tagi hene.
GEN 13:1 Abarama ibu mbirale dewawi hene. Ibunaga nogo sibi meme bulumagarubi ngolo silibarubi dewawi howa Iyibi dindi yu wahalu tagira puwa Negebe dindi wiagoha pene. Ibunaga nogo bibahendebi dabudaburubi yai halu Lode libu haru pene.
GEN 13:3 Mani Abarama halu ibu damene biaru ti dindi Negebe ogoni wahalu uyurahayagi pene. Balai andaru bu haga bima pialu Bedele tano anda pene. Anda puwa Bedele tano Ai tanola hengene abale Abarama ibuni balai anda bu hene biagoria lone puwa ogoriani hene.
GEN 13:4 Pu howa ibugua abale lomabu delaga dabu bia hayagoria puwa Anduane Homogo mitangi bialu lotu lalu hene.
GEN 13:5 Lode ibubi nde nogo meme sibi bulumagarubi dewaore hinalu wali agali biabe biagarubi dewa dege henego Abarama libu haru mandagi hene.
GEN 13:6 Abarama Lodela libunaga nogobi dabudaburubi mandagi ngelo habe nahe dindi henge emene ko wini.
GEN 13:7 Ani biyagola Abaramanaga nogo haru haga hearubi Lodenaga nogo haru haga hearubi tini keba hagahaga buwa lai lalu hene. Ogoningi Kenana wali agalibi Perese wali agalibi dindi ogoriani hene.
GEN 13:8 Anigo Abarama ibugua Lodehondo lalu, Iya agali mbiraore igini darama mandagiore kabagonigo ai nde iyanaga biabe bia haga karubi iyanebi mo keba holene wuligo.
GEN 13:9 Dindi timbuni nai ngago handa. Í̠nime hameledegoria nigohayagi í̠ hariyagua nde i̱ ligohayagi holiya. Í̠ ligoha holene hame lariyagua nde i̱ mendehayagi holiya, lene.
GEN 13:10 Ani layagola Lode ibu heyuwa handa amu halu hearia iba Yodana angehayagi dindi wuyu pialu amuraore Soa tano wia tagi heago hendene. Dindi ogonihayagi bayaleore dindi gede ibane bere Anduane Homogo ibuni mabu aleni howa Iyibi dindi wiagobi dege wini. Anduane Homogohanda Sodomo Gomorala bo wa naheha ogonibi wini.
GEN 13:11 Ani wiagola Lode ibu amu ni ibiragohayagi iba Yodana ange ange dindi uliuli ibane bere uruni bibahende ibugua, I̱ hai haro, lowa Lode ibu amu ni tagira ibiragohayagi hole Abarama helalu pene. Ani pialu Abarama Lodela mandagi nahole ogoningi purogo lene.
GEN 13:12 Ani buwa Abarama ibu Kenana dindi hene. Lode ibu nde pialu iba Yodana angeni dindi uliuli tano dewa buhe wiagoha pialu Sodomo tano kaware ngelowa balai anda bu hene.
GEN 13:13 Tano ogoniha wali agali koorene koru hangu howa Anduane Homogonaga deni mana ko ngubi wiaru hangu bialu haga hene.
GEN 13:14 Lode ibu peagola Anduane Homogohanda Abaramahondo ogodagua lalu, Ai heyuwa í̠na ni tagira ibiragohabi ni paliragohabi gi tigahabi gi lehabi bibahendeha handa amunana bialu handa.
GEN 13:15 Dindi áyu o de hendedegoni í̠nibi í̠naga aguanene mani holebirarubi tí bibahendehondo ngulebero. Ani ngerogola dindi ogoni tínagaore wiaabobo wulebira.
GEN 13:16 Ani bialu í̠ waneigini aguaneneru daga labe nahe iba mu ngarubi holebira. Mbiralime iba mu daga lagayagua nde í̠ waneigini aguaneneru daga labehe holebira.
GEN 13:17 Ai heyalu puwa dindi i̱ ngule larugoni handama ibaga bia. Uruni bibahendeore í̠hondo ngiai holebero, lene.
GEN 13:18 Ani laya handala Abarama ibu dindi o hayago wahalu Heberono tanoni hole pene. Dindi ogoriani Mamerenaga ira timbuniru buhe mbira wiagoria puwa anda bu hene. Ani buwa ibugua Anduane Homogonaga lomabu delaga dabu mbira dindi ogoriani bia hene.
GEN 14:1 Bera ibu Sodomo tanonaga kini heagola Bisa ibu nde Gomora tanonaga kini hene. Sinaba ibu Adema tanonaga kini halu Semebe ibu Seboiminaga kini halu tano Bela mini mende Soa lagago ogoninaga kinibi hene. Kedolaome ibu dindi hobane mbira Elama kini howa ibugua kini duriali uruni mali homberiani (12) handaya ho henego ai mali halene (13) hayagola tigua Kedolaomenaga bi mo wahalu muni dagisi nami wahene. Ani bialu hemiria mali dene (14) hayagola Kedolaome ibugua ibunaga nenege kini tebirali mo mogo bu hene. Ibugua Babilonia dindi Kini Amarabelebi Elasa dindi Kini Ariagobi Goima dindi Kini Tidala imarubi ti mo mogo bu halu kini mariali uruni bibahende ami agaliru haru halu wai bule pene. Puwa Lebaimi hameigini Asederodo Kanaimu tanoni hearu baba wai bialu bo podo hana hene. Ani bialu puwa Susi hameigini Hama tanoni hearubi Emimi hameigini dindi tigabi yu dindi Kiriadaimi tanoni hearubi bo podaiore halu bini. Ani bialu Ho hameigini Hari Idomo heagoha hene hearubi bo podama pialu dindi Elebarana wiagoha piaho wialu amuraore wali agali napale wiagoha bo poda hanaho ngelalu Kadese tano dai bini. Kadese ogoni abale Enemisibada lagago ogoriani ibini. Ani bialu tigua Amalege hameigini bibahendeore mbira wanahe bo podaiore hene. Ani buwa Amoro hameigini Hasasono Tamara tanoha hearu baba wai bialu tigua bo poda dege bini. Tigua ani bo podai halu Kedolaome ibubi ibunaga nenege kini tebira biarubi tigua tano Sodomobi Gomorabi Ademabi Seboimi Belarunaga kini duriali hearu baba wai bule ibini. Ani ibiyagola kini duriali biarume tinaga wai biaga ami agaliru haru puwa Sidimi dindi ulini mbira wiagoria mo ngoai howa tidiyu howa Kedolaomebi ibu nenege kini tebira biaru heba wai bule manda manda buwa wai hanalu tidiyu haga haga bini. Ani anda ibiyagola kini duriali hene biarume kini maria ibiyaru baba wai timbuniore bialu hene.
GEN 14:10 Sidiminaga nira ulinihayagi wagaya duguaga gundu uli dewa wini. Ogoriani wai bialu howa Sodomonaga kinibi Gomoranaga kini biagobi libu ibida pole pialu hebiria gundu uli wagaya duguaga biagoha pilo wia handala kini tebira biaru ti ibida hari heagoha piai hene.
GEN 14:11 Kedalaomebi ibunaga nenege kini tebirali biarubi tigua wai hongo howa bialu tinaga waitigi hearu bo podai hene. Ani bialu tigua Sodomo Gomorala bo podalu uruni tinaga dabudabu wiarubi tomo bu wiarubi bibahende mo hilu yai halu pene.
GEN 14:12 Lode ibu Abarama hamene Harana igini biago ibubi Sodomo dindini dege henego nde wai ibiyarume Lodebi ibunaga mbirale bibahende wiarubi mo yai halu pene.
GEN 14:13 Ani biyagola agali mbira ibu wai hamani howa ibida pialu Hiburuali Abarama hearia puwa ibugua Abaramahondo mbirale biyaruni bibahende lamiai hene. Abarama ibu Amoroali Mamerenaga ira timbuni bu heagoha balai anda bu henego. Mamere ibu hamenebi nde kirali Esegolo Anela henego tebirali uruni ti bibahende Abaramanaga nenegeore heneya.
GEN 14:14 Ani howa Abarama ibugua hale halu hearia ibu igini Lode waitigime minu yalu piya layago hale howa ibuni agali hongohe hearu handari tebirani pira mbirani halira (318) mo mogo buwa naina tidiyalu pene. Puwa agali kini maria biaru piyiyadagua haruru talima pialu Dana tanoni tagira pene.
GEN 14:15 Ani buwa Abarama ibugua ibunaga agali wai biaga ibiyaru halu kira tagalaki howa mbiraga ogoningi dege kini mariali biaru baba wai bialu Abarama ibugua hongo howaore wai bialu bo podama pialu uyu Damasagasa tano bolangua halu pu dege bialu uyura tano mende Hobani bo poda anda hene.
GEN 14:16 Bo poda anda howa agali kini mariali urunime wai labu halu mbirale mo yalu piyaru Abaramahanda lone mo yalu dai bini. Abarama ibu igini Lodebi Lodenaga dabudaburubi ibu one wanerubi wali agali marubi bibahendeore wai bialu bo gingila miai hene.
GEN 14:17 Abarama ibugua Kini Kedolaome ibunaga nenege kini tebirali biarubi bibahendeme wai biyagola Abarama ibu wayali howa ibugua bo podai halu harigani dai bialu hene. Ani biyagola Sodomonaga kini ibugua Kininaga Harigaore laga mbira yu dindi tigabi wiagoha winigo ogoriani Abarama ngola hole pene.
GEN 14:18 Salemenaga kini howa Ngode Datagaliwabe Daligaorene Daliga kagonaga loma binigo mo miaga agali mbira Melegesedege heneyago. Ogoni ibugua mberedi waini ibala Abarama hearia yalu ibini.
GEN 14:19 Ani buwa Melegesedege ibugua Anduane Homogohanda Abarama biamogo bilo bi ogodagua lene. Ibugua lalu, Dindi hariru wabiaga Ngode Datagaliwabe Daligaorene Daliga kago ogoni ibugua í̠ mo bayaleore helo.
GEN 14:20 Ai í̠naga wai tigiru bo podalu mbirale mo yalu piyaru lone mo yu dai bibelonaga hongo ngiyidago. Áyu iname ibunaga mini yaraga hama, lene. Ani layagola Abarama ibugua wai bialu mbirale gingilo yalu dai biyaru pi halu tale buwa pinigo Melegesedege mini.
GEN 14:21 Mani Sodomonaga kini biagome Abaramahondo lalu, Mbirale í̠nime haruru puwa wai bialu gingila miridaruni í̠ni hai halu i̱naga wali agali dege daibi labe, lene.
GEN 14:22 Ani layagola Abaramahanda ladai bialu lalu, Anduane Homogo Ngode Datagaliwabe Daligaorene Daliga dindi hariru wabiaga kagonaga minini howa i̱na heneneore bulego laro.
GEN 14:23 I̱na mbirale mbira emene ko aga pu aleyaguabi pu dini emeneoreyaguabi mbira nayuleore. Mani í̠na Abarama i̱na mo homogo hene lowa wai bi lalu holeberegodagonaga laro, lene.
GEN 14:24 Ani lowa ibugua lalu, Ai i̱na agali karume tomo nolene aleru nayago dege i̱ haradagua uruni harogoni. I̱naga nenege tebirali Anebi Esegolobi Mamarebi tigua dege dabudabu uruni aria maru mo yilo, lene.
GEN 15:1 Mani Abaramahanda de gandeba mbira handalu Anduane Homogohanda ibuhondo bi ogodagua lalu, Abarama-o i̱na í̠naga humbi ale howa í̠ horo bibahendengi handaya ho haabo kogonigo gi nahabe. I̱na í̠ agali timbuni mini leneore helolebero, lene.
GEN 15:2 Ani layagola Abarama ibugua lalu, Anduane Homogo Bibahende Haru Haame Ho Haga-o i̱naga waneigini mbira naheore kogodago. Ai í̠na agua beregola i̱ agali mini lene holeberodabe. Mani i̱ homarogola i̱naga paluni Damasagali Eliasa ibu hai holebiragodago.
GEN 15:3 Í̠na i̱ waneigini mbira nangi kegonidago ai i̱naga paluni bibahendeore agali i̱naga biabe bia haga Eliasa ogoni ibu karulai holobadago, lene.
GEN 15:4 Ani layagola Anduane Homogohanda Abaramahondo lalu, Í̠naga paluni agali í̠naga biabe bia haga ogoni ibugua nayulebira. Í̠ igini mbira holebirago ogoni ibuniore í̠ henegoria ha aribia howa ibuni karulai holebira, lene.
GEN 15:5 Ani lalu Anduane Homogohanda Abarama haru tagira puwa lalu, Ai hari daligaha yapibiya li bu karuni handa. Ainde í̠na uruni daga labehedabe. Mani í̠naga waneigini aguaneneru dewaore yapibiya bu karunidagua holebira, lene.
GEN 15:6 Abarama ibugua Anduane Homogohanda bi layago hale halu mini dunu biaho hene. Ani biyagola Anduane Homogohanda, Ibu agali mini tigabiorewi kagoni, lene.
GEN 15:7 Ani lowa Anduane Homogohanda lalu, I̱ Anduane Homogo í̠ Kaladia dindinaga Ua tano howa haru tagira ibirugoni. Ani birugo irane dindi ogo í̠ ngerogola mani í̠ damenerunaga wiaabo helonaga biru, lene.
GEN 15:8 Ani layagola Abaramahanda Anduane Homogohondo lalu, Anduane Homogo Bibahende Haru Haame Ho Haga-o i̱na dindi ogo i̱nagaoreda lalu agua hondoliyadabe, lene.
GEN 15:9 Ani layagola Anduane Homogohanda ladai bialu lalu, Ai nogo bulumaga angibuni mbirabi nogo meme angibuni mbirabi nogo sibi wangabebi bibahende mali tebira henego hondowa haru halu ega malibu kirabi minu yalu ibabe, lene.
GEN 15:10 Ani layagola Abarama ibugua o layaruni ale bibahende haru halu ibuwa helene. Ani buwa nogo biaruni bibahende balu daga bigi buwa obeneni halu kira yabuloki buwa duguni kirani ngelama pene. Ega biago labo dege podaki nabi ngelene.
GEN 15:11 Ani ngelearia ega hariawe alerume ibalu mo nolebiyagola Abarama ibugua tibu yu howa talialu hene.
GEN 15:12 Ani bialu hearia Abarama ibuni alendo ni dadai biyagome de umu layagola emene ona de mugu lalu palia hondo hene. Ani paluwa emaga handalu hearia aruma timbuni mbirame íbu dambi hayagola mogo lene.
GEN 15:13 Ani biyagola Anduane Homogohanda Abaramahondo lalu, Ai mani í̠naga waneigini ti dindi tara nalene mbiraha pu holebira. Ani pu howa ti mali handari mariani (400) wali agali tara uruni tigua ti mo ko howa garabaya biabe ale bialu helolebira.
GEN 15:14 Ani biragola wali agali urunidagua biaga karu i̱na ti mo ko halu pani migi bulebero. Ani berogola í̠naga aguanene dindi mende ogoniha wahalu tigua mbirale dabudaburu dewaore dindi tara ogoniha howa mo yalu dai bulebira.
GEN 15:15 Anigo í̠niha ko gendaru mbira naanda ibi bayale dege luore howa homaregola tigua í̠ hora holebira.
GEN 15:16 Anigo í̠naga aguanene uruni tigua tininaga dindi dai nabi lu dege holebira. Ani kagola Amoroali karu tigua mana ko ngaru bialu ha holebira. Ti ko timbuni bia timbu hayagua i̱na ti mana bialu bo batagi harogola ai í̠naga aguanene uruni waneigini aguanene dabane maria agima halu nde dai bulebira, lene.
GEN 15:17 Ni palialu aruma hayagola manane kira ogodagua walia hene. Todobene be ira hagua bialu heaore mbirabi ira hale hungu dalu heaore mende lowa nai nogoru bo podo daga bigi buwa talebuki bu wima piyago dombeni henge wiadagua damadama piyaria hendene.
GEN 15:18 Horo ogoningi Anduane Homogohanda Abaramahondo habo nalolene bi hongohe mbira lo wialu lalu, Ai i̱na dindi ogoni í̠naga aguaneneru ti mulebero. Tubari iba emene Iyibi dindi kawareha pedagoni puabo halu amuraore Yuberedisini hende holebira.
GEN 15:19 Ani buwa tigua hameigini kira Keniali dindibi Kenisiali dindibi karulalu Kadamonoali dindibi karu dege lolebira.
GEN 15:20 Ani bialu Hidi hameigininaga dindibi Perese hameigini dindibi Lebaimi hameigininaga dindi ngarubi
GEN 15:21 Amoro dindi Kenana dindi wima pedarubi Gigasa hameigininagabi Yabusu hameiginirunaga dindi ngaru bibahendeore í̠naga aguanenerume karu laiore holebira, lalu Anduane Homogohanda Abaramahondo lamini.
GEN 16:1 Abarama one Sarai ibu waneigini mbira nataba hene dege biraabo hene. Anigo Iyibi wandari mbira mini Hega ibu Sarainaga biabe bia haga berene.
GEN 16:2 Saraihanda Abaramahondo lalu, Anduane Homogohanda i̱naga waneigini mbira nataba honoliya tombe mo hangai hayadago ai waneigini mbira taba honole ndo o bedogonidago. Ai i̱naga biabe bia haga wandari o bedagonime i̱naga waneigini mbira taba hana harabe hondoliya í̠na ibu haru palibe, lene. Ani layagola Abaramahanda ibu one Sarainaga bi layago hale hene.
GEN 16:3 Sarai ibugua ibunaga biabe bia haga wandari Hega berenego ogoni ibu Abarama one biraradagua berelo haru pene. Ogoni biyago Abarama ibu Kenana dindiha mali pira howa ani bini.
GEN 16:4 Hega Abaramala libu haru mandagi palu heagola Hega ibu wali gali bere berene. Anidagua buwa Hega ibu gali bere bedolo manda buwa ibugua Saraihondo mine haga bialu yo handalu berene.
GEN 16:5 Ani biyago hondowa Saraihanda Abaramahondo lalu, Hega ibugua i̱hondo mine halu bedagoni tene í̠ni howa hangu birigoni. Ibu i̱nime henemane í̠ ngirugo ai ibu wali gali bere bedogodalo manda buwa ibugua mine halu bedagoni. Anigo nde Anduane Homogo ibunime iyanaga bi henenego tale bilo, lene.
GEN 16:6 Ani layagola Abarama ibugua Saraihondo ladai bialu lalu, Hega ibu í̠naga biabe bia haga birayagonidago. Ibuhondo í̠nime hame ledegoale ogobi berogola karulapeda lalu bibe, lene. Ani layagola Sarai ibugua Hegala waitigi halu handabe mangaho berene. Ani biyago hondowa Hega ibu nde tagira pialu ibida pene.
GEN 16:7 Hega ibu ibida pialu dindi mini Sura wiagoria pialu wali agali nahaga wiagoha anda pene. Ani buwa iba hambiaga uli mbira wiagoria berearia Anduane Homogonaga dahuliyali mbira ibini.
GEN 16:8 Ibuwa ibugua Hegahondo lalu, Sarainaga biabe bia haga Hega-o í̠ agoha howa ibalu ai pu agoha pole bedebe, lene. Ani layagola Hega ibugua ladai bialu lalu, I̱ Sarai wahalu ibida pialu hewariago, lene.
GEN 16:9 Ani layagola dahuliyali biagome Hegahondo lalu, Ai Sarai ibugua bi larago hale halu bule dai bia, lene.
GEN 16:10 Ani lowa dege lone ogodagua lalu, Í̠naga waneigini aguaneneru wali agalirume daga labe nahe aulolebe tobaheore holebira. Ai í̠na gi nahe dai bibe, lalu dahuliyali biagome lene.
GEN 16:11 Ani lowa ibugua lone la dege bialu lalu, Áyu ogoni dege waneigini taba honole bedegonigo í̠na igiri mbira taba honolebere. Ai í̠na tandaga halu genda yu beregoni hondowa igiri ogoni ngirugo. Anidagua birudagonaga igiri ibu mini Isimale wibe. Mini Isimale ogoni irane í̠na genda yu biruwa Anduane Homogohondo dugu birigonaga hale haya.
GEN 16:12 Ai í̠ igini ibuore nogo dongi gabua ale howa wali agali maru karu baba waitigi hai haragola tiguabi nde ibuhondo waitigi holebira. Ani bialu ibu damene karu baba mandagi naholebira, lalu dahuliyali biagome lene.
GEN 16:13 Mani Hega ibu mitangi bu dai buwa bi ogoni Anduane Homogohanda layadago lowa ibugua Anduane Homogonaga mini Ngode Datagaliwabe i̱ Handaga Kago lene.
GEN 16:14 Irane ogoninaga wali agali tigua iba hambiaga uli ogoni mini Ngode Datagaliwabe Haluhe Kagome I̱ Handaga ka laga nga. Iba hambiaga uli ogoni tano Kadesela Beredela hengene wiagoria nga.
GEN 16:15 Hegahanda Abarama igini mbira taba hanayagola Abaramahanda igiri gali ogoni mini Isimale wini.
GEN 16:16 Ogoningi Abarama ibu ibunaga mali pira halirani waragaria (86) hene.
GEN 17:1 Abarama ibunaga mali henego lamaga halu pira dirani dira (99) hayagola Anduane Homogohanda ibuhondo bi ogodagua lene. I̱ Ngode Datagaliwabe Hongo Haiheore Kogoni. I̱naga tuha í̠ haabo howa i̱ninaga deni mana bayale tigabi ngaru dege biaabo halu habe.
GEN 17:2 Ai i̱na í̠la habo nalolene bi mbira lo wialu lalu í̠naga waneigini mani dewaore ngulebero, lene.
GEN 17:3 Ani layagola hale howa Abarama ibu ge duli hanga howa bulu paluwa dengui dindiniore ela ho bereagola Ngode Datagaliwabehanda ogodagua lamini.
GEN 17:4 Áyu i̱na habo nalolene bi ogo lo werogo ai wali agali hameigini tara tara dewaorenaga mamali í̠ holebere.
GEN 17:5 Anigo ai í̠naga mini Abarama ndo holebere. Í̠ hameigini dewaorenaga mamali holeberegodane ai i̱na í̠naga mini Abarahama werogoni.
GEN 17:6 Mani í̠ waneigini aguaneneru ti dewa helarogola uruni aria marume handame haga kiniru haga bulebira.
GEN 17:7 Í̠nilabi í̠naga aguanene mani holebiraru bababi habo nalolene bi ogoni áyu lo werogoniore wiaabobo bu wulebira. Ai habo nalolene bi ogoni ogodagua lo wero. Í̠naga Ngode Datagaliwabebi í̠naga waneigini aguaneneru tinaga Ngode Datagaliwabebi i̱ hanguore kogoni.
GEN 17:8 Kenana dindi áyu kegoni bibahende hameigini mende taranaga ngagoni. Mani howa dindi ogoni bibahende í̠nibi í̠naga waneigini aguanene holebirarubi tí ngiai harogola tínaga dindi ogoniore wiaho wiaaboboore halu i̱nibi tínaga Ngode Datagaliwabe haabo holebero, lene.
GEN 17:9 Ngode Datagaliwabehanda Abarahamahondo lalu, Í̠nibi í̠naga waneigini mani holebirarubi tígua i̱na habo nalolene bi lo werogo baya hangu talialu biaore bilimu.
GEN 17:10 Habo nalolene bi lo werogo wiaabo helonaga mana agalinaga dongone poda mabu bilimu lalu langirugobi anidagua bialu haabo halimu.
GEN 17:11 Igiri galiru tinaga horo halira pedagola podalimu. Ani bialu agali tínaga garabaya biabe ale bia haga karubi igiri emene gali garabaya biabe ale bia helo walime ti tí andagaha howa taba hanararubi garabaya biabe ale bia helo tinaga dindi taraha howa agali yolo bini karubi bibahendenaga dongone podaiore halimu. Ogonidagua buleberemigo irane habo nalolene bi lo weremago mo embeda nahe manda bu wiaabo helonaga anidaguaore bilimu.
GEN 17:13 Agali tara mende bu karume habo nalolene bi ogoni tigua yu wanahe manda bu haabo kamigo manane tinaga dongone podo mabu bidamigoria hondolebira.
GEN 17:14 Ai bi ogo hale howa agali mbirame talialu bia nabiyagua nde agali ogoni ibu i̱naga habo nalolene bi ti baba lo werogo talia nabi mo wahaga kago. Agali ogonibi kago ti haru mandagi nahe dindi tara ngaruha hama puwa helo bo batagi halimu, lene.
GEN 17:15 Ani lowa Ngode Datagaliwabehanda Abarahamahondo lalu, Ai í̠ one ibubi nde ibunaga mini Sarai wahalu ibu mini Sara wibe.
GEN 17:16 Ainde Sara ibugua í̠naga igiri mbira taba henelo i̱na ibu biamogo bulebero. Ani berogola Sara ibunaga aguaneneru dewaore halu marume handame haga kini holebira, lene.
GEN 17:17 Bi ogoni hale howa Abarahama ibu bulu paluwa ibugua denguime dindi ela howa ibuni oba halu mitangi bu dai buwa lalu, Agali wahe mali handari mbira heneme waneigini agua hono wuledabe. Ainde Sara ibubi mali pira dira (90) penedago ai ogonibime waneigini hono wibehedabe, lowa
GEN 17:18 Abarahama ibugua Ngode Datagaliwabehondo lalu, Isimale ibu bayale helo handaya ho ha nabiridago, lene.
GEN 17:19 Ani layagola Ngode Datagaliwabehanda Abarahamahondo lalu, Í̠na ogonidagua larego agi. Í̠ one Sarahanda igiri mbira taba honolebirago í̠na igiri ogoni ibu mini Aisaga wibe. I̱na ibunaga aguaneneru bababi habo nalolene bi wiaabobo bilo lo wulebero.
GEN 17:20 Ai í̠na i̱hondo Isimale biamogo bibe larigonaga nde i̱na ibu biamogo berogola ibunaga aguanenerubi dewa dege holebira. Ibunaga hameiginirunaga haguane agali homberia (12) holebiraru ai i̱na ti mo hongo holebero.
GEN 17:21 Anigo i̱na habo nalolene bi ogoni Aisagala lo wulebero. Mali edegonaga horo áyu ogodaguani Sarahanda igiri ogoni taba honolebira, lene.
GEN 17:22 Abarahamala bi ogoni lai howa Ngode Datagaliwabe ibu Abarahama helalu pene.
GEN 17:23 Ani biyagola Abarahama ibugua Ngode Datagaliwabehanda bibe lalu layadagua agali damene bibahende hearunaga dongone poda mabu bini. Ibu igini Isimalenagabi agali biabe bia haga ibu andagani taba henene hearubi garabaya biabe ale bia helonaga agali marume muni tagule haru ibiyagola Abarahama ibu yolo bini biarunagabi bibahende dongone poda mabu biai hene.
GEN 17:24 Abarahamanaga mali pira dirani dira (99) heangi ibu igini Isimale ibunaga mali haleria (13) heangibi tigua libunaga dongone podabe layadagua podene.
GEN 17:26 Dongone podabe lalu Abarahamahondo horo lamiyangiore abale puwa libunaga dongone podalu,
GEN 17:27 agali Abarahamanaga garabaya biabe ale bia haga hearunagabi horo ogoningi dege poda mabu biai hene.
GEN 18:1 Anduane Homogo ibu Mamerenaga ira te biagoha Abarahama hearia hapani hene. Ni hongoheore dayagola Abarahama ibu nde ibunaga balai anda haneni berene.
GEN 18:2 Ani biruwa handalu hearia agali tebirali ona íbu hearia hendene. Ani hondowa abaleore heyalu agali tebirali biaru lola hole puwa ibu ge duli hanga howa ibunaga dengui dindini elaore howa ibugua tihondo lalu,
GEN 18:3 Agali timbuniru-o ai tínaga biabe bia haga agali i̱ andaga ibalimulo hamelo kogoni. I̱ andaga helalu pu bolangua halimulo hame naledogoni.
GEN 18:4 Ai tínaga ge wayawaya bilimulo agali mbirame iba hambu yalu íbu laro. Tígua ira te gumba ogoria hondo biralimu.
GEN 18:5 I̱na tí tomo nalu hongo kagola pole pirimidagoria pilimulo tomo maru mo yalu ibule porogo. Ai tígua i̱ andaga ibirimidagonaga i̱na nde tí biamogo buleberogo, lene. Ani layagola tigua ladai bialu lalu, Karulapego ani bia, lene.
GEN 18:6 Ani layagola Abarahama ibu abaleore ibunaga balai anda biagoha puwa Sarahondo lalu, Balawa bayale nu biagoha hono ngelaribagoni aria maru haealowa mberedi wabuwa abale hirabe, lene.
GEN 18:7 Ani lalu Abarahama ibugua ibunaga nogo bulumaga hagaha hearia puwa igini hungubalua habatigi mbira heago bo yalu ibuwa ibunaga biabe bia haga agali mbira heagome abale dawelo podo mini.
GEN 18:8 Nogo mbirini maru podo dawayago dai hayagola Abarahama ibugua nogo mbirinibi nogo andu ibanebi ti bereagoria nelo yalu íbu mini. Ti tomo uruni ira gumba heago teneha nalu bereagola Abarahama ibu handaya ho hene.
GEN 18:9 Tigua tomo nai howa Abarahamahondo lalu, Í̠ one Sara agoha bedabe, lene. Ani layagola Abarahama ibugua ladai bialu lalu, Ibu amu balai anda tamuha beda, lene.
GEN 18:10 Anidagua layagola agali tebonego ibugua lalu, Mali mende edegonaga ege áyu kagodagua haragola í̠ dai bulebero. Dai berogola í̠ one Sara ibugua igiri mbira taba honolebira, lene. Sara ibu agali ogoninaga erembirahayagi balai anda tamuha biruwa agali ogonime bi layago hale hene.
GEN 18:11 Abarahama Sarabi libu haru waheore howa waneigini mbira hono wibe naheore hene. Sara ibunaga waneigini holene tu biba hene berene.
GEN 18:12 Agali ibiyagome bi ogoni layuagola Sara ibu miniha ibuni hangu mitangi bialu lalu, I̱naga agalinibi i̱nibi iyane waheore tinginiru hongo naheore kabagodago. Ai agua bialu i̱ agalinila turu hagabu howa waneigini agua hono wuliyadabe, lowa ibu oba halu berene.
GEN 18:13 Ani bereagola Anduane Homogohanda Abarahamahondo hale halu lalu, Sara ibu i̱ waheore biruwa waneigini hono wibe nahe bedogodago lowa oba halu bedago agibe.
GEN 18:14 Abarahama-o hale harene. Anduane Homogo ibugua nabibehe mbira nawiore. Anigo mali mende edegonaga ege áyu kamadagua haragola i̱ dai bulebero. Dai berogola Sara ibugua igiri mbira taba honolebirago laro, lene.
GEN 18:15 Ani layagola Sara ibu gi halu ke̱ howa lalu, I̱ oba nahe, layagola Anduane Homogohanda lalu, Í̠ oba haore birigoni, lene.
GEN 18:16 Tomo nai halu agali tebirali biaru pole heyalu piyagola Abarahama ibugua harigani ngua hole ti haru mandagi pene. Pialu howa Sodomo dindiha wá handa amu hene.
GEN 18:17 Ani hondowa Anduane Homogo ibuni lo mitangi bialu lalu, Agua mbirale i̱na bule ngogo Abarahama ibu manda bilo mo do holene nakarulapedago lowa manda bini.
GEN 18:18 Mani ibunaga waneigini aguaneneru dewaore hongohe bu holebira. Ani biragola ibuni howa hameigini dindi tara tara bibahendeha karu biamogo bialu mo bayale helolebero.
GEN 18:19 I̱na ibu waneigini aguaneneru bibahendeme Anduane Homogo i̱ninaga bi larogo hale howa talialu helobi mana tigabi bulene ngaru bialu helobi Abarahama ibugua lamialu helonaga ibu dabo heledogoni. Ai i̱na bilimu larugo tigua hale halu biyagua i̱na nde tihondo bule lalu lo wirugoni biaore bulebero, lo mitangi bini.
GEN 18:20 Ani lowa Anduane Homogohanda Abarahamahondo lalu, Bi lolene dewaore Sodomo Gomorala tanoni mana ko timbuni ngagonaga lolene nga.
GEN 18:21 Anidago ai wali agali uruni tigua mana agobi bialu henedabe handama poro, lene.
GEN 18:22 Ani bialu agali kirali biago libu Sodomo tano pole piyagola Anduane Homogo ibu Abarahamala emene hondo hene.
GEN 18:23 Ani howa Abarahama ibugua Anduane Homogo heagoria hapara howa bi maru ogodagua hale halu lalu, Í̠na agali maru bayale heagua uruni heba wali agali ko biaga karu heba bo wahai holeberebe.
GEN 18:24 Agali bayale pira duria (50) tano ogoniha heagua urunibi bibahende ko biaga karu heba bo waholebe. Agali pira duria uruni mitangi halu tano ogoni ngelo waholebe.
GEN 18:25 Agali bayale tigabi karu ko biaga karu heba bamaga holenego liaheda. Agali bayale biaga ko biagabi mana mbiraoregome dambi hai holene nakarulape. Dindi bibahendenaga Dabaga kagome mana tigabi ngadagua tale bulene nga, lene.
GEN 18:26 Ani layagola Anduane Homogohanda ogodagua ladai bini. Sodomo tanoha agali tigabi pira duria (50) uruni heagua ti bibahende mbirago ereba nahe hai holebira, lene.
GEN 18:27 Ani layagola Abarahama ibugua lone hale halu lalu. Anduane Homogo-o i̱na í̠hondo bi dewa hale harogonaga manga nahabe. I̱ galone nabulene bame nahabane kogoni. I̱na ogoale bibeheda lalu mbira labe naheore kogoni.
GEN 18:28 Ai agali bayale pira duria (50) nahe pira mariani duria (45) heagua nde duriali nigome tubagi haruago wahalu uruni heba bo waharo loleberebe, lene. Ani hale hayagola Anduane Homogo ibugua ladai bialu lalu, Agali bayale pira mariani duria (45) heagua i̱na tano ogoni mo ko naholebero, lene.
GEN 18:29 Abarahamahanda lone lalu, Agali pira maria (40) hangu bayale heagua nde agua buledabe, lene. Ani hale hayagola Anduane Homogohanda ladai bialu lalu, Agali pira maria (40) bayale heagua nde i̱na tinaga tano mo ko halu tini heba ba nabulebero, lene.
GEN 18:30 Ani layagola Abarahama ibugua lone lalu, Anduane Homogo-o i̱na bi lone hale harogo keba nahabe. Ainde agali pira tebira (30) heagua agua buleberebe, lene. Ani layagola Anduane Homogohanda ladai bialu lalu, Agali pira tebira (30) hangu bayale heagua nde tano mo ko naholebero, lene.
GEN 18:31 Abarahamahanda lone dege hale halu lalu, Anduane Homogo-o i̱na bi dewa laabo harogonaga keba nahabe. Ai agali pira kira (20) hangu bayale heagua nde agua buleberebe, lene. Ani layagola Anduane Homogohanda ladai bialu lalu, Pira kira (20) bayale heagua tano mo ko naholebero, lene.
GEN 18:32 Ani layagola Abarahama ibugua lone lalu, Anduane Homogo-o aiore nde keba nahabe. Bi mbiraore hangu hale harogo agali pirali bayale heagua nde agua buleberebe, lene. Ani layagola Anduane Homogohanda ladai bialu lalu, Pirali bayale heagua nde tinaga tano mo ko naholebero. Agali bayale uruni tibi ereba naholebira, lene.
GEN 18:33 Anduane Homogo ibu bi uruni lai halu piya handala Abarahama ibu nde ibuni andaga dai bini.
GEN 19:1 Lode ibu nde Sodomo tanonaga panga haraba wali agali ngoai haga hama wiagoha berearia dahuliyali kirali ala Anduane Homogo heba Abarahama berearia ibiyago labo ibini. Lode ibugua abale heyalu libu ibiyago ngola hole pene. Puwa ibu ge duli hanga ho biruwa bulu palialu denguime dindi ela ho biruwa lalu,
GEN 19:2 Agali timbuni-o aiore i̱ libunaga biabe bia haga kogo i̱ andaga ma. Libunaga geru wayawaya balu mbiraga i̱ andaga palialu ega bi laragola nde pilibulo, lene. Ani layagola libugua ladai bialu lalu, Ani ndo iya wali agali ngoai hagagoria palueberaba, lene.
GEN 19:3 Ani layagola Lode ibugua hongo howaore ma laabo hayagola nde ti haru Lode andaga pene. Puwa Lodehanda agali ibunaga biabe bia haga hearuhondo lamialu, Mberedi yidi nahe hiralu tomo dendebi maru libu nelo dawalimu, lene. Ani layagola tigua tomo ani dawa yalu ibiyagola libugua tomo biago nalu berene.
GEN 19:4 Libu palia nabiaore dege Sodomoali hearume anda libu bereago tagiraha ho mabu biai hene. Igiribi agali wahebi Sodomo tanoni hearuni bibahendeore ibai hene.
GEN 19:5 Ani ibuwa tigua Lode olowa lalu, Agali kirali í̠ andaga palima ibiyago labo agoha padabe. Libu iname yuluma̱ya tagira ibila, lene.
GEN 19:6 Ani layagola Lode ibu tagira puwa panga hongo howa paya tagi halu
GEN 19:7 ibugua tihondo ogodagua lamialu lalu, I̱naga nenegeru-o hale halimu. Tígua mana ko ogonidaguaore bulene nawi.
GEN 19:8 I̱ wane kirali agali baba nahene bedago ogoni labo nde tínaga hame ledamigo ale libuha bia halimulo i̱na libu haru tagira ibuliyago. Agali kira ogolabo dege i̱ andagaha palelowa i̱nime handaya halu mamage holebero. Anigo tígua libuhondo mana ko mbira nabilimu, lene.
GEN 19:9 Sodomoali biarume Lodehanda layago hale howa lalu, Lode í̠ dindi haluni tarali howa inahondo mana labe nahego í̠ habagi halu pu. Í̠ habagi habe laramago hale nahariyagua iname agali ogoni libu mo ko halu í̠bi nde mo ko timbuni howa mo ngubiaore holeberama, lene. Ani lowa tigua Lode he̱la dai bialu anda panga bo gialole bini.
GEN 19:10 Ani bialu helowa agali kirali biago labome gi yatagi howa Lode tamuha gililo yamialu panga hongo howa payatagi hene.
GEN 19:11 Ani bialu libugua agali tagiraha hayarunaga de bibahende ndibulowa helayagola tigua anda panga biago handabe nahe hene.
GEN 19:12 Agali kirali biago labome Lodehondo hale halu lalu, Í̠ damene maru tano ogoha kabe nahebe. Í̠ waneiginirubi í̠naga imane balibuni karubi í̠naga damene karubi bibahendeore tano ogo yu wahalu piai halimu.
GEN 19:13 Tano ogoha mana ko mbira mbirale ngaru biai halu bi mbira tara ale ngaru lalu biagadago iyame tano ogoni mo ko howa bo tangu delaraba. Anduane Homogo ibugua dindi ogoha ogonidagua bialu ka layago hale halu iyame tano ogo bo tangu wahole pudaba lenego íbu kaba, lene.
GEN 19:14 Ani laya handala Lode ibugua agali kirali ibu wane biago labo dabu bule lowa lawu henego ogoni labo hearia puwa lalu, Ai dindi ogo mo ko haragonigo abale tagira pialu ma. Anduane Homogohanda tano ogo áyu ogoniore mo ko haragoni, lene. Ani layagola libugua manda bialu hebiria Lode ibu tabirene hayabe toba hene.
GEN 19:15 Ega bi layagola dahuliyali biago labome Lodebi ibu one wane kirabi abaleore pudaba lowa mo daila halu lalu, Abale gerai ladaba. Wali agali o karu ereba hai holebiradagua tíbi ereba hai holigo í̠ onebi í̠ wanego labobi tí haru tano ogo abale wahalu pilimu, lene.
GEN 19:16 Ani layagola Lode ibunaga miniha yaleyale howa hendore bigi bialu hene. Ani bialu hearia dahuliyali biago labome tinaga gini gililo yalu tano yu wahalu tagira pene. Anduane Homogohanda Lode dara hayago hondowa ani bini.
GEN 19:17 Ani buwa dahuliyali mende biagome lalu, Tíbi nde homoligo abaleore pilimu. Pialu howa handa dai nabilimu. Dindi ulini amu ngaruha nape tí homa nabuleyagua gerai lalu uyu hari bare ngagoha iraga halu puabo halu pilimu, lene.
GEN 19:18 Ani layagola Lodehanda lalu, Agali timbuni-o í̠na bibe laregonidagua bibe nahedago.
GEN 19:19 Ainde hale habe. Í̠na i̱ dara halu biamogo beregonigo hari bare amuraoredago wene harigani pialu kamaore tano abale bo tangu delaragola ina heba homamaga holigo agua buledabe.
GEN 19:20 Ai tano emene ko mbira amu ngago handa. Tano ogoni kawaredago ogoniha dege abale anda puwa bira do kamagola wali agali maru tandaga nararudagua namaga holeberama badago i̱ ogoniha poloma̱ya pudaba la, lene.
GEN 19:21 Ani layagola dahuliyali biagome lalu, Ogoniha karulapego pudaba. Tano ogoni bo de nalolebero. Ai dai ladaba.
GEN 19:22 Tí wene pialu kamiore i̱na mbirale mbira nabuleberogo pudaba, lene. Ti puwa Lodehanda lalu, Tano ogoni emene kooredago, lowa tano ogoni mini Soa wini.
GEN 19:23 Ni wene tagira ibalu heaore dege Lode ibu Soa tano abale anda pene.
GEN 19:24 Ani piyagola abaleore Anduane Homogohanda ege to̱le̱ ambuabi mini soloba kundibi heba ira deaore tano Sodomo Gomorala wiagoria ibira helene.
GEN 19:25 Ani biyagola tano ogoninaga dindi ulini wiago labo heba do mundulo wa helene. Wali agali tano ogoniha hagadarubi mbirale mbirale bibahendeore uruniha hearubi do mundu lai helene.
GEN 19:26 Anigo Lode heba ibu one wanerubi ti harigani pialu howa Lode one ibu handadai bialu hearia abaleore mo ibikui bu hinalu naina ema nabi ira tili haradagua bini.
GEN 19:27 Egerebagiore Abarahama ibu abe dege Anduane Homogola bi lalu haribigoria pene.
GEN 19:28 Puwa Sodomo tano Gomora tanobi ogonihayagi yu dindi wu banga biaruha handape halu hearia hagua timbuniore biyago hendene.
GEN 19:29 Ngode Datagaliwabehanda yu dindi uruniha tano wiaru bibahende bo hilo delai halu Lode dege Abarahama mitangi howa bo dela nabi yo pialu tagira pelene.
GEN 19:30 Lode ibu tano emene Soa biagoha holene gi biyagola tano ogoni wahalu ibu wane biago labo haru halu uyu hari bare wiagoha hole pene. Ti pialu egeanda mbira hearia handa walia howa ogoniha hene.
GEN 19:31 Ani howa wandari wahene biagome mende heyogone biagohondo ogodagua lamialu, Ai iya aba wahe hayadago abale biaga wiyadagua iya dabu bulene dindi bibahende ngaruha agali mbira naheda.
GEN 19:32 Ainde iya aba waini iba dewa nowa mo luluya helo hambu mibiya. Ibuni luluyu ngelowa iyane haru palerabagola nde waneigini holebira. Ani biragola dindi bibahendeha wali agali lone haame helo, lene.
GEN 19:33 Ani lowa mbiraga hayagola wandari biago labome libu aba waini iba dewaore nelo hambu miyagola nowa bu luluyu palene. Palearia wandari wahene biago puwa ibu abala mandagi palene. Waini iba dewa biagome agali biago mo luluya heagola ibu waneme biradago manda nabi hene.
GEN 19:34 Horo mendengi wandari wahene biagome lalu, Abale mbiraga i̱ abala paliribago ai áyu mbiraga nde iya aba ogonidagua luluyu ngagola í̠la paliribadagua libu palilibulo. Ogonidagua berabagola iya waneigini mani dindi bibahendeha lone haame holebira, lene.
GEN 19:35 Ani lowa mbiraga mendengi wandari biago labome libu aba waini iba dewa nelo hambu muwa luluyu paleagola wandari heyogone biagola palene. Ani biyagola libu aba ibu mini naibi abale mbiraga paliyadagua dege paluwa ibu wane biagome biaruago manda nabi palene.
GEN 19:36 Libugua ogonidagua bialu libuni waneigini libu abanaga taba honole gali bere berene.
GEN 19:37 Wandari wahene biago ibugua igiri mbira taba honowa igiri ogoni ibu mini Moaba wini. Ani wiyagola Moaba wali agali áyu karunaga mamali ogoni ibu hene.
GEN 19:38 Wandari mende biago ibuguabi igiri dege taba honowa igiri ogoninaga mini Benami wini. Áyu wali agali Amono hameigini karuni tinaga mamali ogoni íbu hene.
GEN 20:1 Abarahama ibu Mamere dindi wahalu puwa Negebe dindiha Kadese Suala hengene wiagoria pu hene. Ani buwa mani ibu one Sara libu pialu Gera tano wiagoria anda pene.
GEN 20:2 Ogoniha pu howa Abarahamahanda Gera wali agali bu hearuhondo lalu, Sara ibu i̱ mbalini beda, lene. Ani layago hale howa Geranaga Kini Abimelege ibunaga biabe bia haga hearuhondo lamialu lalu, Sara ibu i̱ dabu buliya haru ibule pudaba, lene.
GEN 20:3 Ani lowa mbiraga Ngode Datagaliwabehanda Abimelege palearia ibu emagaha ha pani howa lalu, Wali o haru ibirigoni agali onego í̠ homolebere, lene.
GEN 20:4 Ai Abimelege ibu Sarala mandagi palia nabi heariago ibugua lalu, Anduane Homogo-o i̱ ko mbira nabigo í̠na agali mbirame mana ko mbira nabi kagola agali ogonibi ibu damenerubi bo waholeberebe.
GEN 20:5 Abarahama ibunime wali ogoni ibu mbalini lalu langiyago. Wali ogo ibuguabi Abarahama ibu mbalini lalu langia dege biya. I̱na wali ogoni damu pirudago tigabi birudalo manda bido. Kagua mbira i̱na nabi kogoni, lene.
GEN 20:6 Ani layagola emagaha dege Ngode Datagaliwabehanda ladai bialu lalu, Ogoni henene. Í̠na mana tigabi wiadagua birigola i̱nime í̠ wali ogonila mandagi palia nabibelo mo habo larugoni.
GEN 20:7 Wali ogoni i̱naga bi mana latagi haga agali mbira onego áyu ogoni abale dai bilabe. Ibugua í̠ homoligonaga bi la helo ani bibe. Anigo í̠na wali ogoni ibu agalini andaga daibi nalariyagua í̠nibi wali agali í̠ damene bu karubi bibahende homaiore holeberemi, lene.
GEN 20:8 Ega bi layagola Abimelegehanda ibunaga agali haguane hearu olo ngoai howa Anduane Homogohanda bi lamiyago bibahende tihondo lamiai hene. Bi uruni layago hale howa ti bibahendeme giore hene.
GEN 20:9 Ani howa Abimelege ibugua Abarahama olalu íbu lowa hale halu lalu, Í̠na mana ogonidagua biridagoni agiale biribe. I̱na í̠hondo agi birugonaga i̱ damenerubi i̱nibi bibahendeore pani nai holoma̱ya mo pe haribe. Í̠na mana ogonibi biridagoni tiga nabialu nabiore biridagoni, lene.
GEN 20:10 Ani lowa Abimelege ibugua bi laabo halu lalu, Í̠na mini agua wuwa mana ogonidagua biribe, lene.
GEN 20:11 Ani layagola Abarahamahanda ladai bialu lalu, Agali dindi ogoha kamiru tígua Ngode Datagaliwabehondo gi nahaga howa i̱ one aribia halu i̱ bo waholigonaga gi haru.
GEN 20:12 Bi ogoni henene dege Sara ibu i̱ mbalinigo iyanaga ai̱ya tara tara howa iya aba mbiraore hangugo nde iyane dabu bini.
GEN 20:13 Ngode Datagaliwabehanda i̱naga dindi andaru i̱naga damenerubi bibahende wahai halu pobe laya handala tagira pialu howa i̱na Sarahondo ogodagua laruli, Dindi mbiraha porabago pialu howa í̠na i̱hondo mana tigabiore bulene hame lariyagua nde Abarahama mbalini bedo labe, laru, lene.
GEN 20:14 Ani layagola Abimelegehanda Abarahama ibuni hearia Sara haru dai bini. Ani haru dai buwa ibugua nogo sibiru bulumagaru wali agali garabaya biabe ale bia hagaru dewaore Abarahama mini.
GEN 20:15 Ani mialu howa ibugua Abarahamahondo lalu, Ai dindi o ngaruni handa. Dindi uruni bibahende i̱ninaga ngogonigo í̠ dindi uruni hobane mbiragoha hole hame lariyagua nde karulape, lene.
GEN 20:16 Ani lowa ibugua Sarahondo lalu, Ainde mana liahe birugonaga taga domalu muni kuni siliba daosini mbira (1,000) í̠ mbalini Abarahama mule manda bido. Anidagua berogola wali agali í̠ baba mandagi haga karu tigua í̠na kagua mbira biridalo manda nabulebira, lene.
GEN 20:17 Anduane Homogohanda Abimelege ibu damene wali berearu bibahendenaga tombeha waneigini biraga mugube mo wahayagola wali uruni waneigini taba hanabe nahe berene. Abarahama one Sara Abimelegehanda yamo haru piyagonaga Anduane Homogohanda ogoni miadai bini. Ani biyago hondowa Abarahamahanda Ngode Datagaliwabehondo bi la hayagola nde ibugua Abimelegebi ibu onebi wali garabaya biabe ale bia haga berearubi ti mo bayale howa wali urunime waneigini lone taba hanabehe berene.
GEN 21:1 Anduane Homogohanda Sara biamogo bulebero lalu abale lo wiyadagua bialu biamogo bini.
GEN 21:2 Sara ibu gali bere biruwa ibugua Abarahamabi agali wahe heagola igiri mbira taba henene. Ngode Datagaliwabehanda horo ogoningiore taba honolebere lalu abale lo wiyagongiore igiri ogoni taba henene.
GEN 21:3 Taba hanayagola Abarahamahanda igiri gali ogoni mini Aisaga wini.
GEN 21:4 Sarahanda Aisaga taba hono bereane horo halira piyagola Ngode Datagaliwabehanda bibe lalu mana lamiyadagua bialu igiri gali ogoninaga dongone poda mabu bini.
GEN 21:5 Abarahama ibunaga mali handari mbira (100) hayagola ibu one Sarahanda Aisaga taba henene.
GEN 21:6 Taba honowa Sarahanda lalu, Ngode Datagaliwabehanda i̱ dara halu biamogo biyadagonaga turu ho biruwa oba halu bedogoni. Ainde wali agali mani holebirarume i̱naga bi te ogoni hale howa ti i̱na turu harogoha turu hatago holebira, lene.
GEN 21:7 Sarahanda la dege bialu lalu, Abale wali agalime Abarahamanaga waneigini mbira Sarahanda taba hono birulubada lagago ai áyu Abarahama ibuni agali wahe kangi i̱na ibu igini mbira taba honowa andu mialu bedogoni, lene.
GEN 21:8 Igiri biago ibu anda halu wahe howa ibu ai̱ya andu waho heagola Abarahama ibugua turu howa ibu igininaga tomo timbuniore dawene.
GEN 21:9 Iyibi wali Hega ibugua igiri mbira Abarahamanaga ala taba henene. Horo mbirungi igiri ogoni ibu Sara igini Aisagala gini bialu hearia Sara ibu hendene.
GEN 21:10 Ani hondowa Abarahamahondo lalu, Wali biabe bia haga ogoni ibu igini heba talu pelabe. Garabaya biabe ale bia haga ogoni iginime í̠naga paluni í̠ igini Aisaga ibu hangu hai holene ngago maru ibu mo holigo talu pelabe, lene.
GEN 21:11 Bi ogoni layagola Abarahama ibu Isimalebi nde ibu igini dege biagoha ibu miniha genda ho hene.
GEN 21:12 Ani heagola Ngode Datagaliwabehanda Abarahamahondo lalu, Wali garabaya biabe ale bia haga Hega ibu iginilanaga genda nahabe. Wahalu Sarahanda bi larago hale halu bia laradagua bibe. Í̠naga waneigini aguaneru Aisagaha howa hama tagira polebira.
GEN 21:13 Ainde wali garabaya biabe ale bia haga ogoni igini ibunaga damenebi nde dewa dege holebiragonaga mamali ibu holebira. Ibubi nde í̠ igini dege kagoni, lene.
GEN 21:14 Horo mendengi egerebagiore Abarahama ibugua tomoru iba be nogo meme dongoneme wabini mbiraha iba hambu to̱lowa Heganaga payani mo ya hene. Ani buwa Abarahama ibugua igiri biago Hega mialu, Libu pudaba, lene. Ani biya handala Hega ibu dindi ko wali agali nahaga Beaseba dindi wiagoha puwa ogoniha ibaga bialu berene.
GEN 21:15 Ani bialu howa iba biba hayagola Hega ibugua igiri ira tene wiagoha berelene.
GEN 21:16 Ani berelalu ibu igini homarago nahondole lowa mabu tu mbira ale birule pene. Ani biruwa nde Hega ibu dugu bialu biru wini.
GEN 21:17 Ngode Datagaliwabehanda igiri biagome dugu biyago hale hene. Hale hayagola dahuliyali mbira dahuliya andaga howa Hegahondo oladali howa lalu, Hega-o agua biyabe. Í̠na gi holene nawi. Ngode Datagaliwabehanda igiri dugu biayuago hale hayago
GEN 21:18 ai í̠ heyalu puwa igiri gini mule pu. I̱na ibunaga waneigini aguaneneru mo dame bia halu dewaore helolebero, lalu lene.
GEN 21:19 Ani lowa Ngode Datagaliwabehanda Heganaga de mo ngala hayagola handa amu halu hearia iba biraga uli mbira wiaria hendene. Ani wiaria handalu Hega ibugua abale puwa iba be nogo dongoneme wabini biagoha iba hambu yalu dai buwa ibu igini nelo mini.
GEN 21:20 Igiri biago Ngode Datagaliwabehanda amu wali agali nahaga wiagoha dege halu anda howa hongoheore hene. Ogoniha howa ibuguaore danda timuru yulenenaga dolomini howa pari wayali hene.
GEN 21:21 Ibu Parana dindi ko wali agali nahaga ogoniha halu anda hayagola ibu ai̱yahanda Iyibi wandari mbira ibu dabu bilo haru ibini.
GEN 21:22 Horo ogoningi Abimelegebi ibunaga ami agali haru haga haguane mbira mini Pigolo heagobi libu haru Abarahama hearia puwa ibuhondo lalu, Í̠na bialu keruni damene bibahendeha Ngode Datagaliwabe ibu í̠ heba dege bialu haga kegoni.
GEN 21:23 Ani haga kegonigo ai í̠na Ngode Datagaliwabenaga deni howa heneneore i̱bi i̱ waneigini aguaneneru bababi mo hondo nahe bayale tigabi bulene ngadagua bialu holebero lalu bi ogoni lo wibe. I̱na í̠hondo mana bayale dege bialu haabo harugoni. Anidagua dege í̠na i̱hondobi nde dindi í̠ bai nale o íbu kegoriani howa mana bayale dege bialu holebero lalu lo wibe, lene.
GEN 21:24 Ani layagola Abarahamahanda ladai bialu lalu, Í̠na bi o laregonidaguaore bulebero, lalu lowini.
GEN 21:25 Ani lowiyagola howa Abarahama ibugua iba hambiagane uli mbira winigo Abimelegenaga biabe bia haga agali bu hearume ti karulenego ogoni nakarulape biya lalu Abimelege lamini.
GEN 21:26 Ani lamiyagola Abimelegehanda ladai bialu lalu, Ogoni biyago i̱ manda nabi haruda. Í̠na abale langia nabi áyu dege laregoni hale haro, lene.
GEN 21:27 Ani layagola Abarahamahanda nogo sibi bulumagaru tale buwa maru Abimelege mialu libugua habo nalolene bi lowini.
GEN 21:28 Ani lo wialu howa Abarahamahanda ibunaga sibi angibuni hinu hearu aria dalua hearu karia sibi maru heba hearia tale bialu naina dababagi ho helene.
GEN 21:29 Ani heleagola Abimelegehanda ibuhondo hale halu lalu, Uruni agi bulenaga talebu dababagiho helarebe, lene.
GEN 21:30 Ani layagola Abarahamahanda ladai bialu lalu, I̱na nogo sibi dalua hinulene egene o ngerogoni irane iba hambiagane uli ogoni heneneore i̱nime wa winigo mo walia halu ngerogoni haru ha, lene.
GEN 21:31 Nogo sibi biaru mialu howa libu haru habo nalolene bi ogoriani howa lowini. Ani lo winidagoni mitangi bialu dindi ogoni mini Beaseba wini.
GEN 21:32 Libugua habo nalolene bi ogoni Beaseba dindi ogoriani howa lai halu Abimelegebi ibunaga ami agali haru haga haguane Pigolobi libu haru Pilidia dindiha dai bini.
GEN 21:33 Ani piyagola Abarahama ibu nde Beaseba dindini howa ira mbira hengene. Ani hongowa Anduane Homogo ibu Ngode Datagaliwabe Haluhe Haabobo Haga kago mitangi bialu lotu lalu hene.
GEN 21:34 Ani bialu howa Abarahama ibu luore Pilidia dindiha haabo hene.
GEN 22:1 Mani Ngode Datagaliwabehanda Abarahama ba hondole ibu olowa lalu, Abarahama-o, layagola Abarahama ibugua ladai bialu, Ya-o i̱ kogoni, lene.
GEN 22:2 Ani layagola Ngode Datagaliwabehanda lalu, Í̠ igini mbiraore hangu gubalini hariligoni haru halu Moraia dindiha hari mbira i̱na walia holeberogoha pobe. Hari ogoriani í̠na Aisaga i̱hondo loma bialu irani bo delabe, lene.
GEN 22:3 Ani laya handala egerebagiore hayagola Abarahamahanda nogo dongibi ibunaga biabe bia haga igiri kiralibi Aisaga heba pole manda manda bini. Ani bialu tigua ira maru lomabu mulenaga delole gabu mandabu yalu hari nene mbira Ngode Datagaliwabehanda pobe layagoha pole pene.
GEN 22:4 Pialu howa horo tebonengi hari nene pole piyago kaundia dege wiaria hendene.
GEN 22:5 Ani hondowa Abarahama ibugua igiri biabe bia haga biago labohondo lalu, I̱ igini iyame Ngode Datagaliwabe mitangi bialu lotu lole amugoha porabago libugua nogo dongi heba ogoria halibu. Emene howa abale dai bulubago, lene.
GEN 22:6 Ani lalu lomabu delolene ira Aisaga ibugua yilo gabu mialu Abarahama ibunime ira dene hede yalu ayu nabi mbira ya bialu pene.
GEN 22:7 Libu harigani pialu howa Aisagahanda lalu, Aba-o, layagola Abarahamahanda lalu, Igini-o agua biyabe, lene. Ani layagola Aisagahanda hale halu lalu, Aba-o ira hede yalu delolene gabu yalu bidabago lomabu delolene nogo sibi igini hungubalua mbira ago haru kabagobe, lene.
GEN 22:8 Ani layagola Abarahamahanda ladai bialu lalu, Igini-o iyame lomabu delabiya nogo sibi igini hungubalua Ngode Datagaliwabe ibunime ngulebirago, lene.
GEN 22:9 Ani lalu libu hari nene polebiribigoria anda puwa lomabu delaga dabu mbira abale bu helowa ira gabu yaribigo ogoriani manda mandabu ngelene. Ani ngelowa Abarahamahanda ibu igini Aisaganaga gi ge pume minu kabu buwa ira gabu manda mandabu ngelayagoria wia dambi hene.
GEN 22:10 Ani buwa Abarahamahanda ibu igini Aisaga ayu nabime bole manda bini.
GEN 22:11 Bole manda bialu heaore Anduane Homogonaga dahuliyali mbirame dahuliya andagaha howa olalu lalu, Abarahama-o Abarahama-o, layagola Abarahamahanda ladai bialu lalu, Ya-o i̱ kogoni, lene.
GEN 22:12 Ani layagola dahuliyali biagome lalu, Í̠naga igini mbiraore ogoni hangu mo ko halu ba nabulego ibu pume dabaho ngeledegoni hadapeha. Í̠na ogonidagua beregome Ngode Datagaliwabenaga andaneha ko lalu walia harigo manda bidogoni, lene.
GEN 22:13 Ani laya handala Abarahama ibu handa amu nana bialu hearia nogo sibi wangabe mbira ira gini gene dewa heagoha hanaho wiaria hendene. Ibugua Aisaga loma bialu bo delole biyadagua nogo sibi ogoni aribia halu bo delene.
GEN 22:14 Ani buwa dindi ogoni, Anduane Homogohanda Ngiaga ka, lalu Abarahamahanda mini ogoni wini. Wali agali áyu karu tiguabi, Anduane Homogonaga hari ogoriani mbirale buru palego ngiaga ka, laga nga.
GEN 22:15 Anduane Homogonaga dahuliyalime Abarahama halu mende olowa bi ogodagua lamini.
GEN 22:16 Anduane Homogo i̱na i̱ninaga minini howa bi heneneore mbira agua laro. Í̠naga igini mbira hanguda lowa wa naharigodago i̱na í̠hondo mana bayaleore bulebero.
GEN 22:17 Ai i̱na í̠hondo mana bayale dege berogola í̠naga waneigini aguanebi aguanalirubi ti dewaore harini yapibiya kaligobi halu iba angeniha ibamu ngaligobi holebira. Ani buwa mani tigua tinaga waitigi karu bo podalu uruninaga dindini tano ngaru ti aribia howa karulo holebira.
GEN 22:18 Í̠na i̱naga bi hale halu bia larudagua birigonaga i̱na í̠nibi í̠naga aguanene mani holebirarubi tí bibahende biamogo bialu kogo hondowa wali agali dindi bibahendeha karu tigua nde i̱hondo lalu, Inabi biamogo biahabe, lalu holebira, lene.
GEN 22:19 Ani layagola howa Abarahama Aisagala igiri biabe bia haga biago labo hearia dai bialu ti haru mandagi Beaseba dindi dai bialu Abarahama ibu dindi ogoniha haabo hene.
GEN 22:20 Mani howa Abarahama ibu hale halu hearia wali Miligahanda igiri halira taba hanaya, layane hale hene. Wali Miliga ogoni ibu Abarahama hamene Naho one berene.
GEN 22:21 Igiri uruni tinaga mini uru. Wahene Usu hene. Ani bialu igiri mende mini Busu ibu hamene Kemuelela hene. Kemuele ibu Arama aba hene.
GEN 22:22 Igiri marubi nde uru hene. Kesedebi Hasobi Pilidasabi Yidilababi Beduelebi ha dege bini.
GEN 22:23 Beduele ibu wandari Lebega aba hene. Igiri halira uruni Abarahama hamene Naho one Miligahanda taba henene.
GEN 22:24 Naho ibu one wali mende mini Leuma berenego ogoni ibuguabi nde igiri maria taba henenego mini uru Teba Gahama Tahasa Maga imaru taba hanaga bini.
GEN 23:1 Abarahama one Sara ibu mali handari mbirani pira kirani huniane karia (127) hayagola
GEN 23:2 ibu Kenana dindini Kiriada Araba tano mini mende Heberono laga wiagoria homene. Ani homayagola Abarahamahanda dara timbuni howa dugu bialu hene.
GEN 23:3 Ani bialu Abarahama ibugua Sara ani tongolomu wia handala Hidiali hearu baba bi lole pene. Ani puwa ibugua tihondo lalu,
GEN 23:4 I̱ dindi tarali tí baba íbu harugoni. Ani harugo ai i̱ one homayagola hora holenaga dindi mbira ibunaga homali ngelo yolo bule hameledogoni, lene.
GEN 23:5 Ani hale hayagola Hidiali hearu tigua lalu,
GEN 23:6 Agali haguane-o inanaga bi hale ha. Í̠ agali haguane dunini mbira kegoni laga kamagoni ndobe. Í̠ one inanaga homali bayale ngamaruha hora habelo. Ainde í̠nime homali ogoha hora hole lalu ngi laregola homali anduane kagome í̠ one ogohaore hora habelo ngulebira, lene.
GEN 23:7 Ani layago hale howa Abarahama ibugua wali agali bu hearuhondo ma podalu
GEN 23:8 lalu, Tígua i̱ one ogoha hora holene karulape larimiyagua nde Soha igini Eberono hale hadaba.
GEN 23:9 Ani hale haramigola ibunaga homali mini Magabela Egeanda laga amu Eberono dindi gibuni mbira ngagoria hora holiya ngilo. Tígua dindi ogoni i̱ mia lalu lamilimu. Ani lameramigola i̱na tínaga deni howa dindi ogoni i̱ damenerunaga homali wiaabo helonaga ti yolo tiga tiga bulene ngadagua buliya, lene.
GEN 23:10 Ani bialu Eberono ibunibi nde bi layaruni hale howa ti haru mandagi tanonaga pabe panga haraba wiagoria biruwa dege lalu hene. Ani berearia Hidiali bu hearu bibahende hale hai helo ibugua Abarahamahondo lalu,
GEN 23:11 Agali haguane-o i̱na bi larogo hale ha. I̱naga egeanda ogoni í̠na yolo nabibelo. Egeanda ogonibi dindi egeanda ogoriani ngarubi í̠ ngerogoni. I̱ damene bu karunaga deni howa dindi ogoni í̠ one hora habelo turu howa ngero, lene.
GEN 23:12 Ani layago hale howa Abarahama ibugua wali agali bu hearuhondo ibunaga ma podalu bulu palene.
GEN 23:13 Ani bialu wali agali bu hearunaga deni howa ibugua Eberonohondo lamialu lalu, Eberono-o í̠hondo bi langerogo hale habelo hameledo. Ai i̱na i̱ one dindi ogoriani hora holiya áyu í̠ yolo berogoni, lene.
GEN 23:14 Ani layagola Eberono ibugua Abarahamahondo ladai bialu lalu,
GEN 23:15 Agali haguane-o i̱na bi larogo nde hale ha. Dindi ogoninaga muni siliba genda magi kilo pira duria (50) hangu yolo karulapego. Ainde uruninaga galone iyame bi mbira lolene nawigo wahalu dindi ogoni í̠ halu í̠ one ogoniha hora habe, lene.
GEN 23:16 Ani layagola Abarahama ibugua hale halu harugo lowa muni siliba tale buwa agali biyinaya biaga hearunaga siliba genda magi handagadagua ibunime Hidiali hearunaga deni howa muni siliba pira duria (50) karulape dindi biago yolo bialu Eberono mini.
GEN 23:17 Anidagua bialu Eberononaga dindi Magabela ogoni Mamere dindi kaware dege winigo Abarahama ibu mini. Dindi ogoniha egeanda homali ogonibi dindi wiagobi ira bu hearubi Abarahama ibu hai hene.
GEN 23:18 Horo ogoningi howa Hidiali bi lalu henedarume dindi ogoni Abarahama ibunagaore wiragoni lalu manda biai ho hene.
GEN 23:19 Ani bialu Abarahama ibugua Kenana dindiha dindi emene Mamere wiagoha dege Magabela wiagoria ibu one Sara egeanda homali wiagoha hora hene. Dindi Mamere ogoni Heberono dindiha wini.
GEN 23:20 Ani binigo dindi ogonibi homali egeanda ogonibi Hidi hameigini tinaga ala winigo ai Abarahama ibu damenerunaga homali wia aribia hene.
GEN 24:1 Anduane Homogohanda Abarahama biamogo biyagola ibugua biyago bayale dege bialu heane ai ibuni agali waheore hene.
GEN 24:2 Ani howa Abarahama ibuni waheore haruyane handalu agali mbira ibunaga biabe luore bialu haga henego ogoni olowa bi ogodagua lalu, Í̠na i̱naga ge dulini yaniho biruwa bi mbira buleore lalu hongo howa lowia.
GEN 24:3 Anduane Homogo dahuliya andaganagabi dindi bibahendenagabi Ngode Datagaliwabe kago ibunaga minini howa i̱ igini Aisaganaga waliore Kenana dindi ogoha bedago nadabu bia hole lalu lowiaore bia, lene.
GEN 24:4 Ani lowa lalu, Ai i̱ninaga dindi henene wirugoha dai buwa wali mbira i̱ igini Aisaga dabu bilo taya bibe, lene.
GEN 24:5 Ani layagola agali biagome ladai bialu lalu, Walime ibuni dindi andaru yu wahalu naibule layagua agua buledabe. Í̠ igini ibuni í̠ni dindi ogoniha haru dai biaguadabe be agua buliyadabe, lene.
GEN 24:6 Ani layagola Abarahamahanda ladai bialu lalu, I̱ igini i̱naga dindi ogoniha haru daiore nabibe laro.
GEN 24:7 Anduane Homogo dahuliya andaganaga Ngode Datagaliwabe kago ibunime i̱naga aba ai̱ya damenerubi i̱naga dindibi bibahendeore bu hea handala i̱ hangu haru tagira ibuwa dindi ogoore i̱naga waneigini aguanene holebiraru tihondo muleore lo nga. Ibugua ibunaga dahuliyali í̠ poleberegoha bamba halu pelaragola í̠na i̱ igininaga wali mbira bedaria handa walia halu haru dai bulebere.
GEN 24:8 Anigo walime manga layagua nde í̠na bi habo nalole lalu lo wirigome dariba naholebirago. I̱ igini dege ibuni dindi haru daiore nabibe laro, lene.
GEN 24:9 Bi lai heagola agali biabe bia haga biagome ibunaga gi Abarahama ge dulini yani howa bi habo nalolene hongohe lo wialu ibugua aniore biai hole, lene.
GEN 24:10 Bi lo ngelalu nde agali biabe bia haga biagome Abarahamanaga nogo kamele hearu aria pirani yári dabudabu wiaru maru mo paga howa yalu Mesebodemia dindiha Naho hearia pole pene.
GEN 24:11 Horo dewaore puabo halu alendo hayagola iba hambu ngoai haga mbira winiyagoria anda puwa ibunaga nogo kamele biaru mo palia howa berene. Alendo ogonidagua haragola walime iba hambu ibaga winiyago.
GEN 24:12 Ainde agali biago ibugua biruwa lalu, Anduane Homogo-o i̱naga agali haguane kagonaga Ngode Datagaliwabe í̠na i̱naga agali haguane kago nde daraore halu biabe áyu i̱na buleberogo bayale helo biamogo bibe.
GEN 24:13 Áyu i̱ ogoria bedoria wandari maru iba hambu ibulebira.
GEN 24:14 Ibiragola i̱na mbiragohondo lalu, Í̠naga be yidegonime iba noliya hambu ngi, larogola ibugua iba noliya hambu ngialu i̱naga nogo kamelerubi nelo hambu miyagua ogoni ibu í̠naga biabe bia haga Aisaga one berelo dabaridalo manda bulebero. Ani manda buwa i̱naga agali haguane biagohondo dara halu biamogo biridago hondolebero, lalu lene.
GEN 24:15 Agali biagome bi ogoni lalu bereaore dege wandari mbira Beduele wane Lebega berenego iba be payani yalu iba hambu ibini. Beduele ibu Miliga Nahola igini. Naho ibu Abarahama hamene hene.
GEN 24:16 Wandari Lebega ogoni ibu baya buruguleore mbira biruwa agalila mbira mandagi napaleneya. Ibu abale iba be payani yalu ibuwa iba hambu pialu dai bini.
GEN 24:17 Ani biyagola agali biabe bia haga biagome heyuwa gerai lalu abale Lebega ibiyago ngola howa lalu, Aiore í̠naga iba be ogoniha howa iba noliya hambu ngiaore bia, lene.
GEN 24:18 Ani layagola Lebega ibugua agali biagohondo lalu, Agali timbuni-o iba hambu ngerogo na, lowa iba hambu miyagola iba biago nene.
GEN 24:19 Agali biago ibu iba nai howa heagola Lebegahanda lalu, Í̠naga nogo kamele tibi nde iba karulape nalu nabe mangaore helo hambu muliya dege, lene.
GEN 24:20 Ani lowa Lebega ibugua iba hambu yu tone bialu nogo kamele iba naga wabu wini wiagoha odo berelayagola nogo biaru tibi nde iba karulape nene.
GEN 24:21 Ani biyagola agali biago ibu nde bi nale Anduane Homogo ibunaga biabe bibe layago agua birabe hondole berene.
GEN 24:22 Nogo kamele ti iba nai hayagola agali biagome nguira mbira ngolome wabini heneneyago Lebeganaga nguini da halu gi pagida ngolome wabini kira heneneyago gini wia halu bini. Gi pagidabi nguirabi muni dewaoreme yolo mibehe. Nguira o biagonaga genda magi garama duria wialu gi pagida genda magi garama pira pira (100) labolabo mialu bini.
GEN 24:23 Ani buwa agali biabe bia haga biagome Lebegahondo lalu, Aiore í̠ ai wanebe. I̱ damene ibirimadaru áyu mbiraga hangu í̠ aba andaga paluene henge mbira ngabe, lalu hale hene.
GEN 24:24 Ani layagola Lebegahanda ladai bialu lalu, Miliga Nahola igini Beduele ibu wane Lebega i̱ bedogoni.
GEN 24:25 Í̠naga nogo kamele ti tani nolenebi tí anda paluenebi henge dewa karulapeore nga, lene.
GEN 24:26 Ani layago hale howa Abarahamanaga biabe bia haga biagome dindini bulu paluwa Anduane Homogo mitangi bialu lotu lalu hene.
GEN 24:27 Ibugua lalu, Anduane Homogonaga mini yaraga haro. Ibu i̱naga agali haguane Abarahamanaga Ngode Datagaliwabe kago ibugua i̱naga agali haguane dara halu biamogo biaore biyadane hendedo. Dara kago walia halu i̱bi nde tiga tigaore i̱naga agali haguane Abarahama ibu dameneore andagani haru anda ibiyadagonaga turuore howa ibunaga mini yaraga haro, lene.
GEN 24:28 Ani lai hayagola wandari biago ibugua gerai lalu ibu ai̱ya berearia andaga abale puwa o biyaruni lamiai hene.
GEN 24:29 Lamiyagola Lebega mbalini Labana ibu nde bi layaru hale ha nguira gi pagidaru ngolome wabini wiaru handa bialu ibugua abale gerai lalu tagira pene. Puwa handalu hearia agali Abarahamanaga biabe bia haga biago ibu nde nogo kameleru helowa unu iba hambiaga biagoria hearia hendene.
GEN 24:31 Hondowa Labanahanda lalu, Agali haguane-o Anduane Homogohanda í̠hondo bayale biyadago. Í̠ ogoria nahe i̱na mbirale manda manda bialu í̠naga nogo kamele ti palelobi anda mo tiga bialu birugo mba, lene.
GEN 24:32 Ani laya handala Labana abale andaga pene. Andaga puwa Labanahanda ibunaga biabe bia haga agali hearuhondo lalu, Abarahamanaga biabe bia haga agali biago ibu heba ibiyadarubi tinaga ge waya waya bilo iba hambu midaba. Ani bialu nogo kameleni dabudabu yidaru mo pe halu bidaba, lene.
GEN 24:33 Ani biai halu ti tomo nelo dawa yalu ibalu hearia agali Abarahamanaga biabe bia haga biagome lalu, Tomo nane howa bi mbira ala lolebero, lene. Ani layagola Labanahanda lalu, Karulapego latagi harene, lene.
GEN 24:34 Ani layagola ibugua lalu, I̱ Abarahamanaga biabe bia haga kogoni.
GEN 24:35 Anduane Homogohanda i̱naga agali haguane Abarahama biamogo bialu bayale heleagola ibu áyu mbirale dewawi homogoore ka. Nogo sibi memebi bulumagabi dewa hinalu siliba ngolobi dewa dege wialu nogo dongi kamelerubi wali agali biabe bia hagarubi dewa dege halu bida.
GEN 24:36 Ibu one Sarahanda wali daguaheoreni igiri mbiraore hangu taba henenego ai i̱naga agali haguane ogoni ibugua ibunaga mbirale uruni bibahende ibu igini ogonihondo miai haya.
GEN 24:37 Ani binigo i̱naga agali haguane ogoni ibugua i̱hondo bi hongo howa lalu, I̱ igininaga waliore dindi áyu Kenana o kogoniha berene nadabu bia habe. I̱ninaga dindi teneore dai bialu i̱ni aba hamene karuha wandari bereagua i̱ igini dabu bilo damu dai bibe, laya. Ani lowa ibugua i̱hondo lalu, Ani buleore lalu bi habo nalole lalu hongo howa lowia, laya.
GEN 24:39 Ani layagola i̱na nde i̱naga agali haguane ogonihondo ogodagua laru. Ai wali ogoni ibugua i̱la haru dai bua nahayagua agua buledabe laru.
GEN 24:40 Ani larugola ibugua ogodagua laya. I̱ Anduane Homogonaga bi laragoore taliaga agali kogo ibunime ibunaga dahuliyali mbira í̠la haru poragola í̠na biabe berego bibahende bayale dege holebira. Ai i̱ igininaga wali mbira i̱ni damene haruagoha bedaria handa walia holebere.
GEN 24:41 Ani bialu i̱naga damene karia poregola tigua wandari mbira nanguleberama layagua nde bi habo nalole lalu lo wirigome í̠ dariba ho wiaabo naholebira laya, lene.
GEN 24:42 Agali biabe bia haga biagome laabo halu lalu, Áyu alendo iba hambiaga biagoria anda íbu howa i̱na i̱naga agali haguane Abarahama kagonaga Ngode Datagaliwabehondo ogodagua bi laru. Anduane Homogo-o í̠na i̱naga biabe berogo mo bayale helabe.
GEN 24:43 Áyu alendo ogoria bedoria wandari mbira ibiyagua i̱na ibuhondo lalu, I̱ iba noliya í̠naga iba be ogoniha hambu ngiaore berene, lolebero.
GEN 24:44 Ani larogola ibugua lalu, E̱ iba nabelo hambu ngerogo na. Í̠naga nogo kamele karunibi iba nelo hambu muliya, layagua í̠nime i̱naga agali haguane kagonaga wali ogoniore dabarida manda bulebero.
GEN 24:45 Bi ani lalu berewaria Lebega ibiya. Iba be payani yiniyago abale hambule ibaha dalipe halu piyagola i̱na lalu, Ainde iba i̱ noliya hambu ngiaore bia, laru.
GEN 24:46 Ani larugola ibugua abaleore iba be yupe halu iba hambu ngialu howa lalu, Agali haguane-o iba ogo na. Í̠naga nogo kamele karubi nelo hambu muliya, laya. Ai iba nai harugola ibugua nogo kamelerubi hambu miya.
GEN 24:47 Ani biyagola i̱na ibuhondo lalu, Í̠ ai wanebe, lalu hewaria ibugua lalu, Miliga Nahola igini Beduele ibu wane i̱ bedo, laya. Ani layagola i̱na ibunaga nguirabi gi pagidabi wia haru.
GEN 24:48 Ogonidagua buwa i̱na Anduane Homogo Ngode Datagaliwabe mitangi bialu ge duli hanga howa lotu lalu haru. I̱naga agali haguane Abarahamanaga Ngode Datagaliwabe ibugua Abarahama ibuni hameneore andagani haru ibiyadago manda buwa ibunaga mini yaraga harugoni. Ai wandari ogoni i̱naga agali haguane ibu igininaga dabu bia hole haru holiya lo manda biru.
GEN 24:49 Ai tígua i̱naga agali haguanehondo mana bayale tigabi bule lo manda birimiyagua nde bi áyu ogoniore ladai bilimulo hame ledo. Ndo ogonidagua bulene hame nalarimiyagua nde i̱na mbirale mbira agoale bibehedabe hondoliya, lene.
GEN 24:50 Ani leagola Beduele Labanala libugua ladai bialu lalu, Anduane Homogo ibunime urunidagua binidago iname bi mbira lolene nawida.
GEN 24:51 Lebega o bedagoni Anduane Homogohanda layadadagua bialu ibu í̠naga agali haguane igini dabu bilo haru pu, lene.
GEN 24:52 Agali biabe bia haga biago ibugua bi bayale layago hale halu ibu bulu palialu Anduane Homogo mitangi buwa lotu lene.
GEN 24:53 Ani buwa ibugua mani yári bayale damene ngolome silibarume wabinirubi aga bayalebi Lebega ibu karulelo mialu maru wandari aba ai̱yala mialu yári maru nde wandari mbalini Labana mialu bini.
GEN 24:54 Bi lai halu Abarahamanaga biabe bia haga biagobi agali maru ibu heba ibiyarubi ti biruwa tomo ibabi nalu bialu palene. Egerebalene palu heyuwa Abarahamanaga biabe bia haga biagome lalu, Áyu ogoningi dege i̱naga agali haguane karia dai bulene hamelo kogoni, lene.
GEN 24:55 Ani layagola wandari ai̱ya mbalinilame lalu, Wandari ogoni horo piru agima nde inane biruluma̱ya berelo. Mani nde pilimulo, lene.
GEN 24:56 Ani layagola agali biabe bia haga biagome lalu, Anduane Homogo ibunime biabe timbuniore biyago. I̱naga agali haguane karia abale dai buleberogo tígua hapai nahalimu, lene.
GEN 24:57 Ani layagola tigua ladai bialu lalu, Iname wandari ibuninaga hame hale hami̱ya ibuni olowa íbu lama, lene.
GEN 24:58 Ani lowa tigua Lebega olalu íbu lowa ibuhondo hale halu lalu, Í̠ agali ogola polebe, layagola, E̱ polebero, lene.
GEN 24:59 Ani laya handala Lebegabi ibunaga biabe bia haga wali mbirabi libu haru agali Abarahamanaga biabe bia haga biagobi agali ibu heba ibiyarubi ti haru pole pene.
GEN 24:60 Pole pialu hearia tigua Lebega mo turu halu bi lalu, Mbalibuni-o í̠ore waneigini daga aulolebe tobahe daosini dewa ai̱ya birabelobi í̠naga aguanenerume tinaga waitigi karunaga wai buwa wayali halu tinaga dindi tano ngaru karulai helobi hamelo kama, lene.
GEN 24:61 Ani laya handala Lebega ibunaga wandari biabe biahaga marubi ti haru nogo kameleni biralu Abarahamanaga biabe bia haga agali biago heba pene.
GEN 24:62 Tigua hariga ibalu hea tambu Aisaga ibu iba gorene bere mbira mini, Ngode Datagaliwabe Haluhe Kagome I̱ Handaga Kagonaga, lagago ogoni ngelalu ibu bolangua halu Negebe dindini íbu hene.
GEN 24:63 Horo mbirungi alendo hayagola Aisaga ibu ibaga bialu datani tilitilia hangu buhe wiagoria howa handa amu halu hearia nogo kamele dewa ibiyaria hendene.
GEN 24:64 Lebega ibuguabi nde Aisaga hondowa ibu nogo kamelenaga erembirani berenego dalipe hene. Dalipe howa agali biabe bia haga biagohondo hale halu lalu,
GEN 24:65 Agali amu ina poleberemagoha howa ibiragoni aibe, lene. Ani layagola agali biabe bia haga biagome ladai bialu lalu, I̱naga agali haguane o ibiragoni, lene. Ani layagola Lebega ibunaga aga mbira emboneni tangi henenego yamuwa ibuninaga dengui buyi hene.
GEN 24:66 Aisaga ngola howa agali biabe bia haga biagome Aisagahondo o biyaruni bibahende ogodagua biya lalu lamiai hene.
GEN 24:67 Ani lalu Aisaga ibugua Lebega ibu ai̱ya Saranaga balai anda paluni heagoha haru puwa ibu dabu bini. Abale Aisaga ibu ai̱ya Sara homayagola dara dege howa henego ibu one Lebega dabu bialu dara holene embeda halu ibu oneore gubalini halu bu miniha dungulo hene.
GEN 25:1 Abarahama ibu mani wali mende mini Kedura dabu bini.
GEN 25:2 Ani dabu buwa wali ogoni ibugua igiri Simirana Yogosana Medana Midiana Isibaga Sua imaru taba hanaga bini.
GEN 25:3 Yogosana ibu Seba Dedanala aba hene. Dedana ibu Asurimi Ledusimi Lemimi uruninaga mamali hene.
GEN 25:4 Midiana ibu iginiru Ebabi Ebebi Hanogobi Abidabi Eledabi haga binigo uruni ti Kedura aguane hene.
GEN 25:5 Abarahama ibugua ibunaga paluni bibahende Aisagahondo miai hene.
GEN 25:6 Abarahama ibuni homa nabi howa ibu one mani dabu binigo igini bu henedaruni mo turu haga bialu mbirale migi biaga hene. Ani biaga henego ainde igiri uruni ti ibu igini Aisaga kagoria mandagi nahelo ti dindi kaundia ni tagira ibiragohayagi hole pudaba lene.
GEN 25:7 Abarahama ibu turu haga bialu waheore howa mali handari mbirani pira kariani duria (175) hayagola ibu homene.
GEN 25:9 Ani homayagola ibunaga tingini ibu igini Aisaga Isimalelame Mamere dindini homali Magabela egeanda biagoha hora hene. Homali ogoni Hidi hameigini Soha igini Eberononaga egeanda winigo ogoniha hora hene.
GEN 25:10 Dindi ogoni Abarahama ibugua Hidialinaga yolo bini wini. Ani bini winigoha Aisaga Isimalela libugua homali Sara hora hene wiagoha dege Abarahama hora hene.
GEN 25:11 Abarahama homayagola Ngode Datagaliwabehanda Aisaga bayuwaore biamogo bialu hene. Anigo Aisaga ibu nde iba uli wene mini Ngode Datagaliwabe Haluhe Kagome I̱ Handaga kagonaga laga iba bereagoria dindi mbira kaware wiagoria ibu haabo hene.
GEN 25:12 Isimale ibu Saranaga garabaya biabe ale bia haga Iyibi wali mini Hega Abarahamala libu igini hene.
GEN 25:13 Ani henego Isimale igini waheneni howa daga lama pialu heyogone henego lamaro uru dege hene. Nebaiodo ibu igini wahene howa igini mende Keda tebone Adabele mane Mibisama
GEN 25:14 dauni Misima waragane Duma kane Masa hene.
GEN 25:15 Igini halini Hadada dini Tema pini Yadua beane Nabisi hombeane Kedema uruni haga bini.
GEN 25:16 Ani henego Isimale igini o biaruni ti hameigini hombearia (12) mani henerunaga mamali pigane ti hene. Tinaga mini dindi ti henedaruninaga mini winigo nga.
GEN 25:17 Isimale ibu mali handari mbirani pira tebirani karia (137) hayagola ibu homene.
GEN 25:18 Isimale aguaneneru ti Habila dindi Sua dindila hengeneha dindi wupe kagoha paluyu peda. Dindi Sua ogoni Asiria dindi pole hariga peagoria Iyibi dindi kaware ngelowa dege wia. Anigo hameigini uruni tini Abarahama aguanene maru hearu heba mandagi nahaga hene.
GEN 25:19 Abarahama igini Aisaganaga bi te ogo.
GEN 25:20 Aisaga ibuni mali pira maria (40) howa ibu one Lebega dabu bini. Lebega ibu hameigini Aramia aria Mesobodemia dindini agali mbira Beduele henego wane biruwa Labana mbalini berene.
GEN 25:21 Aisagahanda ibu oneme waneigini nataba hanayagola ibu one biamogo bia lalu Anduane Homogohondo bi layagola Lebega ibu wali gali bere berene.
GEN 25:22 Lebega tombeha waneigini kira biruwa gungu biayuane handalu ibugua Anduane Homogohondo bi ogodagua lene. I̱ha ogonidagua biaruagoni agidabe, lene. Ibugua Anduane Homogohondo bi layadagoni aginaga binidabe hondolenaga lene.
GEN 25:23 Ani layagola Anduane Homogohanda bi ogobi ladai bini. Wali agali hameigini kira í̠naga tombeha bedabigo í̠na hameigini kira ogoni taba hanarengi libu hongo haga haga buleberabi. Hameigini mbiragome mendego bope holebira. Pigane taba hanarego ibu maha halu maha taba hanarego ibu mo wahene haragola wahene ibugua lone heyogonenaga biabe bia haga holebira, lene.
GEN 25:24 Lebega waneigini taba honolene tu hayagola heneneore igiri kira taba henene.
GEN 25:25 Igiri pigane taba hanayidago ibunaga tingini daramabioreni iri dewaheyagola ibunaga mini Iso wini.
GEN 25:26 Hamene mende taba hanayagola ogonime ibu hamene Isonaga ge ayuendeni yaniho yalu ibini. Ani binigonaga ibu mini Yagaba wini. Aisaga ibuni mali pira waragaria (60) heagola Lebegahanda igiri ogoni labo taba henene.
GEN 25:27 Igiri biago labo wahe halu Iso ibu tayanda irabuha taya haga mugubeyi hene. Yagaba ibu ibagaru nabi andaga hangu haga hene.
GEN 25:28 Aisaga ibugua ibu igini Isohanda nogo ega bo yalu ibiraru nolenaga turu howa ibu Iso dege gubalini haga hene. Anigo Lebega ibu nde Yagaba gubalini haga berene.
GEN 25:29 Horo mbirungi Iso ibu irabuha howa dai bialu hearia Yagaba ibu nde paboro subu bayale ngabiore dawaho berearia hendene.
GEN 25:30 Iso ibu tomo garibi timbuniore lama ibalu heariago ibugua lalu, Yagaba í̠na tomo subu iba baya daramabi dawedegoni maru abale noliya ngi, lene. Irane ogoninaga tigua Iso mini mende Idomo wini.
GEN 25:31 Ani layagola Yagabahanda ladai bialu lalu, Í̠na nde í̠ wahene holene henge yidegoni i̱ holiya ngiriyagua nde ngi larego ngulebero, lene.
GEN 25:32 Ani layagola Iso ibugua lalu, Ogoni karulape. Áyu garime tongo labehe kogodago. Wahenenaga holene henge ogonime i̱ biamogo agua bulubadabe, lene.
GEN 25:33 Ani layagola Yagabahanda lalu, Heneneore í̠naga henge i̱hondo ngule la, lene. Iso ibugua lalu, I̱na heneneore larogo i̱naga henge í̠ haore bibe, lene.
GEN 25:34 Ani laya handala Yagabahanda mberedi maru mialu paborome dawene subu baya ngabi dawa wiyarubi nelo miyagola Iso ibu nene. Nai halu Iso ibu heyalu pene. Ogoni binidagonime Iso ibuninaga holene henge bame nagaloneda manda bialu anidagua bini.
GEN 26:1 Kenana dindini gaea timbuni bialu bamba Abarahama heangi hina gari penedagua dege pene. Ani piya handala Aisaga ibu Kenana wahalu Pilidia dindiha Gera tano pialu Kini Abimelege hearia pene.
GEN 26:2 Ani piyagola Anduane Homogohanda Aisaga hearia ibuwa ibuhondo lalu, Í̠ Iyibi dindiha pu nabi dindi mbira i̱na í̠ habelo nguleberogoria pu habe.
GEN 26:3 Í̠ dindi ogoriani pu kegola i̱na í̠ baya hangu handayaho howa í̠ biamogo bialu holebero. Dindi ogoni bibahende í̠hondo ngialu í̠naga aguanene mani holebiraru tihondobi mulebero. I̱na í̠ aba Abarahamahondo lo wirugo lola helo ani ngulebero.
GEN 26:4 Ani bialu mani í̠ waneigini aguaneneru dewaore harini yakundi dagalabe nahe bu karunidagua i̱na mo dewa holebero. Dindi o kegonibi bibahende tihondo miai holebero. Ani berogola hameigini dindi tara tarani bibahende holebirarume i̱hondo hale halu í̠ waneigini aguaneneru biamogo bialu mo bayale harudagua tibi nde ani biamogo bialu mo bayale ha lalu i̱hondo bi lolebira.
GEN 26:5 Abarahama ibugua i̱naga bi hale halu bi mana wiwaru baya hangu talialu bialu hayagonaga i̱na í̠ biamogo bialu mo bayale holebero, lene.
GEN 26:6 Ani layagola nde Aisaga ibu Gera tano wiagoha haabo hene.
GEN 26:7 Ani heagola agali tano ogoniha hearume Aisaga one bereago hondowa ibu aibe lalu hale halu hearia Aisagahanda ladai bialu lalu, Wali ogoni ibu i̱ mbalini beda, lalu hene. Ani layagonaga irane ibu gi howa wali ibu one beda nalene. Ibugua mitangi bialu Lebega ibu i̱ one beda laruyagua agali urunime Lebega ti holenaga i̱ bo waholebada manda bialu ani lene. Lebega ibu wali bayaore berenego manda buwa ani lene.
GEN 26:8 Aisaga ibu dindi ogoniha lu dege howa horo mbirungi Pilidialirunaga Kini Abimelege ibugua ibu andaga windoha howa handatagi halu hearia Aisagahanda ibu one Lebega yu hubi layane de hendene.
GEN 26:9 Ani biyago hondowa Abimelege ibugua Aisaga olalu íbu lowa ibuhondo lamialu lalu, Áyu heneneore wali ogoni í̠ oneoredane hendedogoni. Ai irane aginaga ibu í̠ mbalini beda laribe, lene. Ani lamiyagola Aisagahanda ladai bialu lalu, I̱na wali ogoni i̱ one beda laruyagua agali bu karume i̱ bo wahalu wali ogoni ti holobada manda buwa laru, lene.
GEN 26:10 Anidagua layagola Abimelege ibugua ladai bialu lalu, Í̠na inahondo mana agilego o biridagoni. Inanaga agali bu karu aria mbirame í̠ one kayu binidale nde inaha genda timbuni anda ibidalego. Ainde genda ogoni mo yu anda ibaga tene í̠niore kele, lene.
GEN 26:11 Ani lowa mani Abimelegehanda wali agali bu hearuhondo bi hongo howa lamialu lalu, Agali mbirame agali ogo mo ko harimiyaguabi ibu one o bedago mo ko harimiyaguabi agali ogonidagua biaga kago ibuni homelo bo waholene wulebira, lene.
GEN 26:12 Aisaga ibu dindi ogoniha howa e bialu tomo dewa hangalu hene. Ani hangalu heagola Anduane Homogohanda Aisaga biamogo bialu mo bayale hayagola ibu mabuha tomo anda hagadagua ndo dewaore anda hene.
GEN 26:13 Ibugua bibahende biyago bayaleore biaabo hayagola ibunaga dabudabu dewaore wuwa ibu agali homogo hene.
GEN 26:14 Ibunaga nogo sibi bulumagaru dewaore hinalu ibunaga biabe biaga agaliru dewa dege heago hondowa Pilidiali bu hearume henge lalu hene.
GEN 26:15 Ani lalu howa tigua iba hambiaga uli dewa abale Abarahamanaga biabe biaga agali hearume wa winigo uruni dindi alu mogo bini.
GEN 26:16 Ani biyagola mani Abimelege ibugua Aisagahondo lamialu lalu, Í̠ hongoheore halu ina bolangua haridago ai ina baba holene nakarulapedago dindi ogoriani nahe tagira pobelo hameledo, lene.
GEN 26:17 Ani laya handala Aisaga ibugua ti helalu puwa Gera dindiha dindi tigabi ulini wiagoha puwa balai anda bu hene.
GEN 26:18 Ani buwa bamba Abarahamahanda iba hambiaga uli dindi ogoniha wa wigi binidaruni Abarahama homeha Pilidiali hearume uli uruni dindi alu mogo biai hayaru Aisaga ibugua lone mo tiga bini. Ani buwa ibugua iba uli uruni ibu aba Abarahamahanda mini abale wini wiago lone lalu hene.
GEN 26:19 Horo mbirungi Aisaganaga biabe biaga agali bu hearu tigua iba uli mbira walu hearia uli ogoniha howa iba duguadaga hene.
GEN 26:20 Ani biyagola Gera agali maru nogo sibi haru haga hearume Aisaganaga nogo sibi haru haga hearu baba lai lalu howa lalu, Iba uli ogoni inanaga ngama, lene. Anidagua layagola Aisagahanda tihondo lai layago manda buwa ibugua iba uli ogoni mini Lai Laga wini.
GEN 26:21 Ani bialu Aisaganaga biabe biaga agali biarume iba uli mende wene. Ani wa wiagola Gera agali biarume lone ibalu lai lene. Anidagua layagola Aisagahanda iba uli ogoni mini Waitigi Haga Iba laga wini.
GEN 26:22 Ani buwa Aisaga ibu dindi ogoni wahalu puwa iba uli tebone wene. Ani walu heagola agali biaru tigua lone lai nale hene. Ani wiyago lai nale heagola hondowa Aisagahanda iba uli ogoni mini Bayale Holene laga wini. Wialu howa ibugua lalu, Anidagua larogoni irane Anduane Homogo ibugua ina dindi ogoniha bayale halubi mbirale bayalerubi yu holoma̱ya ngiyada, lene.
GEN 26:23 Mani howa Aisaga ibu dindi ogoni wahalu dindi mende Beaseba wiagoria pu hene.
GEN 26:24 Horo ogoningi mbiraga Anduane Homogo ibu Aisaga hearia ibuni hapani howa lalu, Í̠ aba Abarahamanaga Ngode Datagaliwabe i̱ kogonigo í̠ gi nahabe. Í̠ heba mandagi i̱ haabo ko. I̱na i̱ninaga biabe biaga agali Abarahama mitangi bialu ibuhondo bi lo wirugonaga lola helo í̠ biamogo bialu mo bayale halu í̠naga waneigini aguanenerubi mo dewaore holebero, lene.
GEN 26:25 Ani layagola Aisaga ibugua lomabu delaga dabu mbira dindi o hayadagoriani bia howa Anduane Homogo mitangi bialu lotu lalu hene. Ani bialu ti dindi ogoriani balai anda bu howa ibunaga biabe biaga agali bu hearume iba uli mbira wene.
GEN 26:26 Abimelege ibu Gera tano howa Aisaga hondo pene. Abimelege mini mandaru talebu miaga agali mbira Ahusada henegobi kininaga ami agaliru haru haga haguane mbira Pilogo henegobi ti haru mandagi Aisaga hearia pene.
GEN 26:27 Ani hondo ibiyagola Aisagahanda tihondo lalu, Abale i̱ tínaga dindiha nahole lowa taliatagi harimigodago ai áyu agi taya ibirimibe, lene.
GEN 26:28 Ani layagola tigua ibuhondo ladai bialu lalu, Iname handalu hemaria Anduane Homogo ibu í̠ heba kago manda bu kama. Ani manda buwa ai í̠ baba habo nalolene bi mbira lo wimi̱ya lalu ibirima. Habo nalolene bi ogoni ogodagua.
GEN 26:29 Iname í̠hondo mana ko mbira nabiore harimago ai í̠na nde ina mo ko holene mitangi nabi habelo. Abale iname í̠hondo mana bayale wiaru dege bialu harimagoni ndobe. Ina helalu tagira piriangi í̠ genda nahe pirigoni. Áyubi nde ogonidagua dege Anduane Homogohanda í̠ heba howa biamogo bialu mo bayale halu kago hendedemagoni, lene.
GEN 26:30 Ani layagola Aisagahanda tomo timbuni dawa hayagola ti tomo ibabi nalu berene.
GEN 26:31 Egerebagiore heyuwa tini hangu hangu howa ina mini mbiraore hami̱ya laga bialu habo nalolene bi hongohe lowini. Ani lowa Aisaga ibugua lalu, Ai mo palia holene tí heba pudaba, laya handala tigua Aisaga helalu turu halu tini dalu dai bini.
GEN 26:32 Horo ogoningi dege Aisaganaga biabe biaga agali hearume ibu hearia ibuwa lalu, Iname uli mbira walu hemaria iba bayaleore berearia abale handa walia harima, lalu lamini.
GEN 26:33 Ani lamiyagola Aisaga ibugua iba uli ogoni mini Seba lalu wini. Ani lenedagoni wiaabo henegonaga tigua tano ogoni mini Beaseba wini.
GEN 26:34 Iso ibu mali pira maria (40) hayagola ibugua Hidi wali kira dabu bini. Wali mbira ibu Hidi agali mini Beri henego wane Yudidi bereago dabu bini. Ani bialu Iso ibu wali mende Hidi agali dege mini Elono henego wane Basemada bereago dabu bini.
GEN 26:35 Wali kira ogoni libugua Aisaga Lebegala mo tandaga haabo haga berene.
GEN 27:1 Aisaga ibu agali waheore halu de au halu mbirale handabe nahe hayagola berene. Ani biruwa ibu igini wahene Iso olowa lalu, Igini-o, layagola Iso ibu ladai bialu lalu, Ya-o i̱ kogoni, lene.
GEN 27:2 Ani layagola Aisagahanda lalu, Ai i̱ waheore halu angi homolebe tobahe bedogonidago.
GEN 27:3 Áyu í̠naga danda timu wiridaru yalu irabuha taya puwa nogo mbira babe.
GEN 27:4 Bo yalu dai buwa tomoore dendebi i̱na noa haruligobiore dawa yalu ibabe. Eberegola i̱naga paluni bi lalu i̱ nahome howa Anduane Homogohanda í̠ biamogo bialu mo bayale helo bi lamaro bulene yidogo la holiya, lene.
GEN 27:5 Aisagahanda ibu igini Isola bi ogoni lalu birayuago Lebega ibu nde haleho berene. Libu bi ogoni lai halu Iso ibu irabuha taya pole tagira pialu piyagola
GEN 27:6 Lebegahanda Yagabahondo lalu, Áyu ogoningi í̠ abahanda Isohondo mbira ogodagua layuane hale haru.
GEN 27:7 Nogo mbira bo yalu ibuwa dawale pu. Dawa yalu eberegola nowa nde i̱ nahome howa Anduane Homogohanda í̠ biamogo bialu mo bayale helo bi lamaro bulene yidogo la holiya, layuago hale haru.
GEN 27:8 Aiore i̱ igini-o bi larogoore hale halu bibelonaga larogoni.
GEN 27:9 Ai í̠ nogo pabeha puwa tomo í̠ aba ibu hame lagagobiore i̱na dawa holiya. Nogo meme igini hungubalua kira bo yalu ibule pu.
GEN 27:10 Nogo ogoni dawa yalu poregola í̠ aba ibugua nowa nde Anduane Homogohanda í̠ biamogo bialu mo bayale helonaga bi lamaro bulene winigo lolebirago, lene.
GEN 27:11 Ani layagola Yagabahanda ibu ai̱yahondo ladai bialu lalu, Anigo Iso ibu iri dewahe halu i̱ nahedago nde
GEN 27:12 abahanda i̱ ela halu karia tingini iri nahedane hondowa ibu mo hondo hole ibiridalo manda buwa ibugua Anduane Homogohondo i̱ mo ko habe lalu bi laragola i̱ biamogo bialu mo bayale naholebirago, lene.
GEN 27:13 Ani layagola ibu ai̱yahanda lalu, Igini-o í̠ mini burugu nalabe. Genda mbira ibiyagua nde i̱niha ibilogo. Áyu i̱na larudagua bialu nogo meme igini hungubalua larugo bo yalu ibule pu, lene.
GEN 27:14 Ani laya handala Yagaba ibugua nogo meme igini hungubalua biago labo bo yalu ibuwa ibu ai̱yahondo mini. Ani biyagola Lebegahanda nde Yagaba aba ibu tomo ogobiore hame lagago lowa manda bialu dawene.
GEN 27:15 Ani buwa Isonaga aga bayale maru Lebega andagaha ngeleneyago muwa Yagaba karula hene.
GEN 27:16 Ani karula heagola Lebegahanda Yagabanaga mabi gi kirabalibi nogo meme irini heba dongone lagalo wiyagome biadambi helene.
GEN 27:17 Ogonidagua bia howa Lebega ibugua tomo baya dendebiore dawa wiyagobi mberedi maru hiru wia binigo Yagaba ibu yalu pelo mini.
GEN 27:18 Miya handala ibu aba berearia yalu puwa lalu, Aba-o, lene. Ani layagola Aisagahanda lalu, Ya igini-o í̠ aibe, lene.
GEN 27:19 Ani layagola Yagabahanda ladai bialu lalu, I̱ Iso í̠ igini wahene biagonigo. Ai í̠nime bibe larigodagua bialu tomo dendebi dawa yidogo nole heya. Nowa nde Anduane Homogohanda i̱ biamogo bialu mo bayale helonaga bi lamaro bulene labelo, lene.
GEN 27:20 Ani layagola Aisagahanda lone hale halu lalu, Igini-o í̠na nogo ogoni nde abaleore agua handa walia halu baribe, lene. Ani layagola Yagabahanda ladai bialu lalu, Anduane Homogo í̠naga Ngode Datagaliwabehanda biamogo biyagola i̱na nogo ogoni abale handa walia howa balu dawarudagoni, lene.
GEN 27:21 Ani layagola Aisagahanda lalu, Ai kaware ogoria hapara halu íbu. I̱na gime ela halu í̠ i̱ igini Isooredabe be taradabe hondoliya, lene.
GEN 27:22 Ani layagola Yagaba ibu aba bereagoria hapara halu pu heagola Aisagahanda gime baya hanguore yahandaga bialu biruwa lalu, Í̠na bi larego Yagaba aledago í̠naga gi ge Isoda, lene.
GEN 27:23 Irane Yagabanaga gi meme dongoneme kabu buwa heagola Aisaga ibugua ogoda lalu handabe nahe berene. Ibu handabe nahe berenedago tene Yagabanaga gi nogo meme dongoneme kabu buwa heagola ibu gi irihe Isodalo manda bu berene. Ani manda buwa dege Aisagahanda ibu biamogo bialu mo bayale hole howa
GEN 27:24 lone hale halu lalu, Í̠ henene i̱ igini Isoore íbu kebe, lene. Yagabahanda ladai bialu lalu, E̱ i̱ Isoore, lene.
GEN 27:25 Aisagahanda lalu, Nogo dawa yaridagoni noliya ogoria yalu íbu. Nowa í̠ biamogo bialu mo bayale helo bi lamaro bulene yidogo loliya, layagola Yagaba ibugua tomo dawa yalu waini ibabi hambu yalu binigo ibu aba nelo miyagola Aisaga ibu nene.
GEN 27:26 Nai howa lalu, Igini ai kaware birapara howa i̱ nu̱nu̱ la, lene.
GEN 27:27 Ani layagola Yagabahanda ibu aba nu̱nu̱ lole birapara halu hearia Aisaga ibugua Yagabanaga aga ngahene. Ani buwa Aisagahanda Anduane Homogohondo ibu igini biamogo bialu mo bayale habe lowa lalu, I̱ iginiha nga bayale o biaruago Anduane Homogohanda mabu mbira mo bayaleore hene mbauleda, lowa lalu,
GEN 27:28 Ngode Datagaliwabehanda dadimba mbiraga ibira helaragome í̠naga maburuha tomo bibahende bayale hangu anda hai helo. Ibugua widibi waini iba berelo pu mbira mini gerebi lini delobi dewaore í̠ mabuha bayale anda hai helelo.
GEN 27:29 Ani bialu wali agali bibahende karuni í̠naga biabe biaga hai halu wali agali dindi tara tarani hagahaga bidarubi í̠ andaneha hai helo. Í̠ ai̱ya ibu waneigini aguanene mani holebiraru tibi nde í̠ andaneha hai helo. Agali marume Anduane Homogohanda í̠ mo ko helo bi lalu karu tini mo ko helo. Marume Anduane Homogohanda í̠ biamogo bialu mo bayale helonaga bi la halu karu tibi nde Anduane Homogohanda tini biamogo bialu mo bayale helo laro, lalu Aisagahanda lai hene.
GEN 27:30 Áyu ogoni dege Aisaga ibu Yagaba biamogo bialu mo bayale helonaga Anduane Homogohondo bi lalu berenego Yagaba ibu tagira pialu piyagola ibu hamene Iso irabuha taya penego dai bini.
GEN 27:31 Ibuguabi nde tomo bayale dendebiore dawa yinigo ibu aba berearia yalu puwa lalu, Aba-o Anduane Homogohanda i̱ biamogo bialu mo bayale helo bi lahabelo nogo dendebiore dawa yidogo nole heya, lene.
GEN 27:32 Ani layagola Aisagahanda lalu, Be í̠ aibe, lene. Ani layagola Isohanda ladai bialu howa lalu, I̱ Iso í̠ igini wahene biago eberogoni, lene.
GEN 27:33 Ani layago hale howa Aisaga ibu mogo timbuni lowa duru lalu biruwa ogodagua hale halu lalu, Agali abale i̱ berewaria nogo bo dawa yalu ibiyadagoniore aidabe. I̱na biamogo bialu mo bayale helonaga bi lamaro bule wirugo abale lai harugo. Ai ogoni ibuha helo lalu mirudago lone mo yu daibulene nakarulape, lene.
GEN 27:34 Iso ibu abahanda bi ogoni layago hale howa dugu timbuni bialu lalu, Aba-o i̱bi nde Anduane Homogohanda biamogo bialu mo bayale helo bi lahabelo, lene.
GEN 27:35 Ani layagola Aisagahanda lalu, Í̠ hamenehanda i̱ mo hondo halu í̠ biamogo bialu bayale holenego ibu hole mo yalu piyada, lene.
GEN 27:36 Ani layagola Isohanda lalu, Áyu ogoni i̱naga paluni halu mende mo kayu biyada. Ani biyadagome ibu mini Yagaba ogoni henene tagira poragoni. Aba-o ai̱yahanda i̱ ala taba henene howa wahene i̱ harugo. Ai wahenenaga henge ogoni ibu miyagola waharugoni. Áyu i̱niore biamogo bialu mo bayale helonaga Anduane Homogohondo bi lolene winigobi ibu degeme palu bialu piaruago agua binidabe. Áyu i̱ biamogo bialu mo bayale helo bi halu mende labe nahedabe. Lolene wiagua nde labehedago, lene.
GEN 27:37 Ani layagola Aisagahanda ladai bialu lalu, Ibu í̠naga haguane dabo helalu ibunaga dameneru ti ibunaga biabe biaga helo lalu helaru. Ibunaga mabuha widiru waini ibaru berelobi pu mbira lini daga mini gerebi dewa dege anda hai helo larugo ai í̠ore Anduane Homogohanda biamogo bialu mo bayale helo agialeore loabe, lene.
GEN 27:38 Ani layagola Isohanda lone dege hale halu lalu, Aba-o i̱la mo turu ho holene nde mbiraore hangubi nayiorebe. Anduane Homogohondo i̱bi nde biamogo bialu mo bayale habe lalu mbira laharene, lene. Iso ibugua ani dege lalu biruwa dugu bia timbu hene.
GEN 27:39 Ani biyago hondowa Aisagahanda lalu, Í̠ dalu dindi kaundiaha ko mbirale anda habe naheore wulebira. Mbiraga dadimbabi í̠ mabuni ibira naholebira.
GEN 27:40 Í̠na tomo bayale nalu í̠ni bayale holenaga wai biaga áyu tibu yuwa taya bialu wai dege bialu holebere. Ani bialu howa í̠ hamenenaga biabe bia haga holebere. Ani ha holeberego mani í̠ hamene yu wahalu í̠ni hangu ha tara holebere, lalu lene.
GEN 27:41 Iso ibu abahanda Yagaba biamogo bialu mo bayale helo bi layiyagonaga keba timbuniore Yagabaha ho wia halu lalu, Tigimandi hangu howa i̱ aba homolebirago. Homaragola dugu andaru hai howa dara embeda kagola Yagaba bo waore holiya haro, lene.
GEN 27:42 Ibugua bi ogonidagua lalu heago Lebega hale howa berene. Ani hale howa ibugua Yagabahondo lalu, Bi ogo baya hangu hale habe. Í̠ hamene Isohanda í̠na biriruninaga ibu bu miniha tandaga timbuniore ho howa í̠ homabelo bo wahole manda bialu kago.
GEN 27:43 I̱ igini-o aiore i̱na mbira bia larogo bibelo. Áyu ogoningi Harana dindi ibida pialu i̱ mbalini Labana karia pobelo.
GEN 27:44 Í̠ hamenenaga bu miniha tandaga ho kago ereba halu
GEN 27:45 í̠na biriruni embeda hai helo tagi hole pu. Embeda ho kagola mani í̠ dai bibelo i̱na mbiralihondo damu pu lolebero. Ani larogoni tene libu kirabali nahomalibulonaga larogoni, lene.
GEN 27:46 Lebegahanda Aisagahondo lalu, Iso one Hidi wali libugua mana bialu kagoniore manga kogoni. Mani Yagabahanda Hidi wali kirali o bedagolabo ale dege dabu biyagua i̱ ogoria bira ndo homoleneore karulape, lene.
GEN 28:1 Ani layagola Aisagahanda Yagaba olalu íbu lowa ibuhondo ogodagua lene. Í̠ Kenana dindi ogo wali nadabu buleore.
GEN 28:2 Ai í̠ ai̱ya ibu aba Beduele dalu Mesobodemia pobelo. Puwa í̠ ababuni Labana wane mbira birulebirago ogoni dabu bule pobelo, lene.
GEN 28:3 Ani lowa ibugua lalu, Ngode Datagaliwabe Hongo Haiheore Kagome í̠ biamogo bialu mo bayale howa í̠ hameigini dewali aba habelo ibugua í̠ waneigini dewaore ngilo hamelo ko.
GEN 28:4 Ai Ngode Datagaliwabehanda Abarahama biamogo bialu mo bayale dege henedagua í̠bi í̠naga aguanene mani holebirarubi ti biamogo bialu mo bayale dege helo. Mani dindi ogo Ngode Datagaliwabehanda Abarahama minigo ogoni í̠ karulo habelo, lene.
GEN 28:5 Aisagahanda Aramia hameigini aria agali mbira Beduele igini Labana ibu Yagaba Isola ai̱ya Lebega mbalini Harana dindini kago ogoni ibu andaga, Yagaba í̠ pole pu, lene.
GEN 28:6 Aisagahanda Yagaba biamogo bialu mo bayale helo ibu Mesobodemia wali mbira dabu bule pu layiyago Iso ibu hale hene. Aisagahanda Yagaba biamogo bialu mo bayale helonaga Anduane Homogohondo bi layangi howa Yagaba ibu Kenana wali nadabu bibe layadalo manda bini.
GEN 28:7 Iso ibugua manda bialu hearia ai Yagaba ibugua ai̱ya abalanaga biore hale halu Mesobodemia piyidalo manda bini.
GEN 28:8 Ani biyago hondowa Isohanda ibu aba Aisaga ibugua Iso one Kenana wali berearu hame nale kagonidalo manda bini.
GEN 28:9 Ani biyago hondowa Iso ibugua Abarahama igini Isimale aria wandari mbira ibu mini Mahalada Nebaiodi mbalini berenego ogoni dabu bini.
GEN 28:10 Yagaba ibu Beaseba dindi wahalu Harana dindi pole pene.
GEN 28:11 Alendo halu mbi layagola Yagaba ibu hariga obeneni ege to̱le̱ mbira mo haguanda howa palene.
GEN 28:12 Ani paluwa emaga handalu hearia egageria mbiranaga tene dindini howa nguni uyura dahuliya andagahayagi paga hearia hendene. Ngode Datagaliwabenaga dahuliyalirume egageria ogoriani iri dali bigi bialu hearia hendene.
GEN 28:13 Ani hondowa handalu hearia Anduane Homogo kaware íbu howa ibugua lalu, I̱ Anduane Homogo Abarahama Aisagalanaga Ngode Datagaliwabe kogoni. Dindi áyu o padegoni í̠bi í̠naga waneigini aguaneneru ti ngulebero.
GEN 28:14 Í̠naga waneiginiru dewaore himu dudumbu ale halu ti ho yanga lowa dindi tu ni tagira ibiragoha howa ni paliragoha polebira. Palu yanga lalu uyuraha howa palu yalu unuraha polebira. I̱na ti biamogo bialu mo bayale halu kogo hondowa wali agali dindi bibahendeni holebirarume ti nde biamogo bialu bayale holoma̱ya mo biaha lalu i̱hondo hale halu holebira.
GEN 28:15 Ai i̱na í̠ yu wanahe í̠ poregoha i̱nime haru haabo halu mani bi o larogo tagira piai helo dindi ogoria lone haru dai bulebero, lalu Anduane Homogohanda Yagabahondo emagaha lamini.
GEN 28:16 Yagaba ibu palenego heyuwa lalu, Aiore Anduane Homogo ogoria heneda manda nabi harudago. Heneneore ibu ogoria heneda, lene.
GEN 28:17 Ibugua gi taraore howa lalu, Ai dindi ogo gi ho kogoni. Ogoriani Ngode Datagaliwabe andagabi dahuliya andaga harababi ogoni degeda, lene.
GEN 28:18 Egerebalene Yagaba ibugua ege to̱le̱ haguanda howa paliyago yamuwa mani mitangi bu dai bulenenaga o biagoriani hengene. Ani buwa olibe lininaga weli ege to̱le̱ biagoria odoba halu ogoni Ngode Datagaliwabenagaore nga lowa ani bini.
GEN 28:19 Ogonidagua buwa dindi ogoni mini Bedele wini. Abale dindi ogoniha tano mbira winidagoni mini Lusi laga wini.
GEN 28:20 Yagabahanda bi heneneore mbira Anduane Homogohondo lo wialu lalu, Í̠ áyu i̱ poleberogoha baya hangu handaya ho halu hariga lu porogoha haru pialu tomo agabi ngialu
GEN 28:21 nde bayale anda pialu i̱ aba dindini dai buliya handaya ho hariyagua í̠ i̱naga Ngode Datagaliwabeore holebere.
GEN 28:22 Áyu ege to̱le̱ ogoriani hangarugo í̠ andaga ogonioreda lalu manane o helarogoni. Ai í̠na mbirale ngerego bibahende pi halu tale buwa pinigo í̠nihondo ngigi bulebero, lene.
GEN 29:1 Yagaba ibu pu dege bialu wali agali ni tagira ibiragohayagi haga hearunaga dindini anda pene.
GEN 29:2 Dindi ogoriani anda pu howa naina handa amunana bialu hearia iba hambiaga uli mbira winiyagoria nogo sibi ti iba ogoniha nagayago naina wabuni tebira palearia hendene. Iba ulidagoha to̱le̱ timbuni mbirame panga payaria hendene.
GEN 29:3 Nogo sibi bibahende íbu hai kagola nogo sibi haru haga karume ege to̱le̱ timbuni panga payiyago dugua haragola nogo sibi ti iba naga wini. Nogo sibi ti iba nai kagola haru haga biaru tigua iba hambiaganaga panga ege to̱le̱me paya dai biagaya.
GEN 29:4 Ani bialu heagola Yagaba ibugua tihondo hale halu lalu, Nenegeru-o tí ani howa dege íbu kamibe, layagola tigua ladai bialu lalu, Ina Harana tano howa íbu kama, lene.
GEN 29:5 Ani layagola Yagabahanda lone hale halu lalu, Tígua agali Naho aguane Labana hendedamibe, lene. Ani layagola tigua ladai bialu lalu, E̱ ina hendedama, lene.
GEN 29:6 Yagabahanda lone hale halu lalu, Ibu karulape kabe, lene. Ani layagola tigua lalu, Ibu bayale ka. Ai ibu wane Leselo ibu abanaga nogo sibi nai haru ibiragoni, lene.
GEN 29:7 Yagabahanda lalu, Áyu wene horombedago nogo tani nalu emene helo haru dai bule iba nelo midaba, lene.
GEN 29:8 Ani layagola nogo sibi haru haga biarume lalu, Ani nabule nogo bibahende ibai haragola iba nelo dugupe holeberama, lene.
GEN 29:9 Yagaba ibu nogo sibi haru haga agali biaru heba bi lalu hearia Leselo ibu nde ibu aba Labananaga nogo sibiru ibuni haru haga henego iba nelo haru halu ibini.
GEN 29:10 Yagaba ibu Leselo ibiyago hondowabi ibu ababuninaga sibi Leselohanda haru ibiyago hondowabi ibugua nogo sibiru iba nelo ege to̱le̱ panga dugua hene.
GEN 29:11 Ani buwa Yagabahanda Leselo yu nu̱nu̱ lalu turu howa dugu bini.
GEN 29:12 Dugu bialu howa lalu, I̱ í̠ aba Labana mbalini Lebega igini kogoni, lene. Ani laya handala Leselo ibugua gerai lalu andaga ibu aba lamule pene.
GEN 29:13 Labana ibugua ibu ababuni íbu ka layago hale howa gerai lalu hondole pene. Ani puwa ibunaga ababuni abale yu hubi lalu turuore howa nu̱nu̱ lalu andaga haru pene. Andaga pu biruwa Yagabahanda ibuni bialu heneru bibahende te tihondo lamiai hene.
GEN 29:14 Ani layagola Labanahanda lalu, Heneneore iya darama mbiraore kabagoni, layagola Yagaba ibu ege mbira Labana andaga ho hai hene.
GEN 29:15 Labanahanda Yagabahondo lalu, Iyaore darama mbiraore howa i̱naga biabe í̠na bame buwa habelo hame naledogo. Í̠ore yolo hame ledego i̱na nguliya. Agile hame ledebe, lene.
GEN 29:16 Labana ibu wane kira berene. Wahenego Lia biralu mendego Leselo berene.
GEN 29:17 Lia ibu de bayale ndo berenego Leselo ibu wandari bayaleore berene.
GEN 29:18 Yagabahanda Leselo gubalini ho howa Labanahondo lalu, Í̠ wane Leselo i̱ dabu buliya ngibelonaga mali karia í̠naga biabe bia holiya, lene.
GEN 29:19 Ani layagola Labanahanda ladai bialu lalu, Nde agali maru tara karu nami í̠niore nguliya karulapego ai iya haba, lene.
GEN 29:20 Ogonidagua lalu, Yagaba ibugua Leselo hame timbuniore leagome mali karia uruni lu ndo yamo horo tebira maria ale hene.
GEN 29:21 Mali uruni piai heagola Yagabahanda Labanahondo lalu, Ai mali karia piai hayago Leselo i̱ dabu buliya ngi, lene.
GEN 29:22 Ani layagola Labana ibugua tomo timbuni dawalu wali agali dindi ogoniha hearu tomo nalu turuho birami̱ya ibalimu laga bini.
GEN 29:23 Tomo no biralu mbiraga hayagola Labanahanda Leselo wahalu Lia Yagaba paleagoha haru puwa pale layagola libu haru mandagi palene.
GEN 29:24 Labanahanda wandari biabe bia haga mbira mini Siliba berenego Lianaga biabe bia haga berelo mini.
GEN 29:25 Egerebalene Yagaba ibu handalu hearia abale mbiraga wali haru paliyago Leselo ndo Lia haru paleneyane mogolo hendene. Ani biniyagola ibugua Labana hearia puwa lalu, Í̠na o biridagoni tene aginaga biribe. I̱na mali lu í̠naga biabe bialu harugoni Leselo dabu bule lowa bialu harugo ai i̱ aginaga mo hondo haribe, lene.
GEN 29:26 Ani layagola Labanahanda ladai bialu lalu, Inanaga mana ngagome wandari wahene ibugua ala agali pedagola mani heyogoneme piaga ngago
GEN 29:27 ainde dabu bini tomo ala nai hami̱ya sarere mbira hondo harene. Ani howa nde Leselobi dabu bibelo nguluma̱ya. Ngeramagola ogoninaga mali karia mende biabe bialu habelo, lene.
GEN 29:28 Yagabahanda bi ogoni hale halu e̱ lowa tomo nai halu sarere mbira piyagola Labanahanda Leselo Yagaba miyagola Leselo ibu Yagaba one berene.
GEN 29:29 Ani birayagola Labanahanda wandari biabe bia haga mbira mini Bila berenego Leselonaga biabe bia haga berelo mini.
GEN 29:30 Ogonidagua biyagola Yagaba ibu Leselola mandagi palialu ibu oneore gubalini timbuni hene. Anigo Yagaba ibugua Lia gubalini emene dege hene. Ani howa Yagaba ibugua mali karia mende lone biabe bialu hene.
GEN 29:31 Anduane Homogohanda handalu hearia Yagaba ibu Lia gubalini nahe heane hondowa ibugua Lia dara halu biamogo biyagola ibu wali gali bere berene. Anigo Leselo ibu gali nabere berene.
GEN 29:32 Emene howa Lia ibugua igiri mbira taba henene. Taba hono biruwa lalu, Anduane Homogohanda i̱naga bu miniha genda ho berewago hondowa igiri mbira ngiyadago ai i̱ agalinihanda i̱hondo gubalini timbuni holebira, lene. Ani lowa igiri ogoni ibu mini Lubene wini.
GEN 29:33 Mani Lia ibugua igiri mende taba honowa lalu, Yagabahanda i̱ hame lalu gubalini nahe kago hondowa Anduane Homogohanda i̱ dara hayadago ai ibugua igiri mende ngiyada, lowa ibu mini Simiono wini.
GEN 29:34 Lia ibugua igiri tebone taba honowa lalu, Ai i̱na igiri tebone taba hanarogonaga Yagabahanda i̱ gubalini halu turu howa ai i̱na haru mandagi holeberama, lowa ibugua igiri mini Libai wini.
GEN 29:35 Lone dege Liahanda igiri mane taba hono biruwa lalu, Ai áyu i̱na Anduane Homogonaga mini yaraga holebero, lowa igiri mini Yuda wini. Mani Lia ibu nde waneigini maru taba hana nabi biraabo hene.
GEN 30:1 Leselo ibugua waneigini mbira taba hana nabi biruwa ibu hagibuni Liahanda waneigini taba hanalu bereago hondowa ibu dimagoli ho biruwa ibu agalini Yagabahondo lalu, Í̠na nde waneigini mbira ngerene. Nangiriyagua nde i̱ homolebero, lene.
GEN 30:2 Ani layagola Yagabahanda ibuhondo talialu lalu, Ngode Datagaliwabehanda í̠naga waneigini taba honolene mo wahayadagoni. I̱ Ngode Datagaliwabe ndo kogoni. I̱na waneigini agua bialu í̠ nguliyanaga larebe, lene.
GEN 30:3 Ani layagola Leselohanda Yagabahondo lalu, I̱naga biabe bia haga wandari Bila bedagome i̱naga waneigini mbira taba hana helo mandagi haru palibe. Ibugua i̱naga waneigini dewa taba hanaragola mani i̱ waneigini dewali ai̱ya dege biruliya, lene.
GEN 30:4 Ani lowa Leselohanda ibunaga biabe bia haga wandari Bila biago Yagaba hearia ibu dabu bilo haru ibini. Ani biyagola Yagaba Bilala libu mandagi palu hene.
GEN 30:5 Ani paluwa Bila ibugua Yagabanaga igiri mbira taba henene.
GEN 30:6 Ani biyagola Leselohanda lalu, Ngode Datagaliwabehanda i̱naga hame wiwago hondowa i̱ birugobi nde tigabi dege biruyane handayada. I̱na bi larugobi nde hale halu igiri mbira ngiyada, lowa igiri mini Dana wini.
GEN 30:7 Wali biago ibugua Yagabanaga igiri mende taba henene.
GEN 30:8 Taba heneagola Leselohanda lalu, I̱ hagibunila keba halu harugo ai áyu karulapeore bedogoni, lowa igiri mini Nabadali wini.
GEN 30:9 Lia ibugua handalu hearia ibuni nde waneigini lone taba hanabe naheyane hondowa ibunaga biabe bia haga wandari mini Siliba berenego Yagabala helo miyagola ibu one ho berene.
GEN 30:10 Ani biruwa ibugua Yagabanaga igiri mbira taba henene.
GEN 30:11 Ani taba hanayagola Liahanda lalu, Áyu ina bolangua kogoni, lowa igiri mini Gada wini.
GEN 30:12 Mani Silibahanda Yagabanaga igiri mende taba henene.
GEN 30:13 Taba hanayagola Liahanda lalu, Áyu i̱ turu timbuniho bedogoni. Wali maru bedarume i̱ turuho beda lolebira, lene. Ani lowa ibugua igiri mini Ase wini.
GEN 30:14 Widi lini gandulo wulenengi hayagola Lubene ibu mabuha ibaga bialu hearia ira lini baya mbira gamugamu biaga ale dearia hendene. Ibugua ira lini ogoni ibu ai̱ya Lia berearia do yalu pene. Ani biyago hondowa Leselo ibugua Liahondo lalu, Í̠ iginime ira lini mbira do yalu ibiyago handarugo ai maru i̱ ngerebe, lene.
GEN 30:15 Ani lalu hearia Liahanda ladai bialu lalu, I̱ agalini nde í̠ haru pu waharigo ai í̠na manda bialu keria ogoni nagalonedabe. Áyu i̱ iginime ira lini do yidagobi nde í̠ dege nguabe, lene. Ani layagola Leselohanda ladai bialu lalu, Í̠na ira lini ogoni ngiriyagua áyu mbiragaore Yagabala palialibulo, lene.
GEN 30:16 Ogoningi alendo Yagaba ibu mabuha howa dai bialu hearia Lia ibu harigani ngola ho puwa lalu, Áyu mbiraga iya haru mandagi palibiya. Iya palibiyanaga i̱ iginime ira lini mabuha howa do yalu ibiyagome í̠ yolobu ngeledogo, lene. Ani layagola horo ogoningi mbiraga libu haru mandagi palene.
GEN 30:17 Ngode Datagaliwabehanda Lianaga bi hale halu biamogo biyagola ibugua igiri dauni taba henene.
GEN 30:18 Honowa Liahanda ogodagua lene. Wandari i̱naga biabe bia haga i̱ agalini hado mirugola Ngode Datagaliwabehanda i̱ yolo bayaleore ngia dai biyada, lowa ibugua igiri mini Isaga wini.
GEN 30:19 Mani Lia ibu wali gali bere biruwa igiri waragane taba henene.
GEN 30:20 Taba honowa lalu, Ngode Datagaliwabehanda i̱ mo turu halu igiri waragane ngiyidagome i̱ agalinihanda i̱naga mini yaraga halu turuore holebira. Ani lowa ibugua igiri mini Sebulunu wini.
GEN 30:21 Mani Liahanda wandari mbira taba honowa ibu mini Daina wini.
GEN 30:22 Ainde Ngode Datagaliwabehanda Leselo mitangi bialu dara howa waneigini taba hanabehe berelene.
GEN 30:23 Ani biyagola Leselo ibu wali gali bere biruwa mani igiri mbira taba henene. Taba hono biruwa lalu, Aiore Ngode Datagaliwabehanda i̱ biamogo bidagonime i̱ lone taga holene nawi. Ibugua i̱naga genda bibahendeore mo wahai haya.
GEN 30:24 Ai Anduane Homogohanda igiri mendebi ngilo hame ledo, lowa ibugua igiri mini Yosebe wini.
GEN 30:25 Yagaba one Leselohanda Yosebe taba hono bereagola Yagaba ibugua Labanahondo lalu, I̱ one waneigini o bu karuni helonaga í̠naga yolo biabe luore bia halu harugoni. Ai i̱ni dindi polene hamelo kogo pu larene. Í̠naga biabe bulene wiaruni bibahende baya hanguore bialu harugo í̠ manda bidegoni, lene.
GEN 30:27 Ani layagola Labanahanda ladai bialu lalu, Karulapego i̱na bi mbira ala langerogo hale habe. Ai ala i̱na Anduane Homogonaga hame wiago hondole handalu hewaria í̠ iya haru mandagi kabagome Anduane Homogo ibugua i̱ biamogo bialu mo bayale halu heneyane handa walia haru.
GEN 30:28 Ani birugo í̠na i̱hondo yolo ngi laredagua nguliyago agiraore nguliya hameledebe, lene.
GEN 30:29 Ani layagola Yagabahanda ladai bialu lalu, I̱na í̠naga biabe bialu harugo ogodagua biri lalu í̠nime manda bidegoni. Í̠naga nogo sibi haru harugome ai nogo sibi biaru bayale dewaore bu kagoni.
GEN 30:30 Bamba í̠ nogo sibi dewa ndo emene hangu hinu heneyagoni. Ai i̱ íbu hewagola Anduane Homogohanda i̱ mitangi bialu í̠ biamogo biyagome í̠naga nogo sibi dewaore henego kagoni. Anigo áyu i̱ mbirale i̱ninagaore handaya ho holene hamelo kogoni, lene.
GEN 30:31 Ani layagola Labanahanda ibuhondo hale halu lalu, I̱naga biabe birigonaga yolo agileore nguliya hamelo kebe, lene. Ani hale hayagola Yagabahanda ladai bialu lalu, I̱ muni ngibelo hame nale kogo ai i̱na mini ngogo karulape lariyagua nde i̱na í̠naga nogo meme sibiru hinalu holiyago i̱naga hame ngogo ogo.
GEN 30:32 Áyu i̱na í̠naga nogo meme sibiru kagoha pialu baya hanguore hondole polebero. Ani puwa sibi igini mindi karu bibahende i̱ hai halu meme mindi pagabua pehagabi karubi i̱ holene hameledo. Ainde i̱naga biabe berogonaga yolo ogoni karulape holebira.
GEN 30:33 Ani berogola mani howa í̠nime hondoa birangi sibi memeru haru harugonaga yolo i̱ harugo handalu ai i̱na bi larugo tiga tiga larudabe yole larudabe handalu manda bulebere. Ani handalu keria nogo meme mindi mbira pagabua bu gombedaga nabi mbira i̱naga kagoha heaguabi sibi mindi ndo mbira heaguabi nde i̱na í̠naga nogo kayu biyada lolebere, lalu lai hene.
GEN 30:34 Ani layagola Labana ibugua ladai bialu lalu, Karulapego í̠na laregonidagua bibiya, lene.
GEN 30:35 Ani lowa horo ogoningiore Labana ibu meme pagabua pehagabi hearubi sibi mindi hearubi ibu hai hene. Ani howa ibu igini hearuhondo lalu, Nogo uruni haru pubagi halu mendehayagi hinule haru pudaba, lene.
GEN 30:36 Ani bialu Labana ibu ti haru pene. Tigua nogo sibi meme uruni haru halu pialu dindi tara mbiraha pialu heane dege horo tebiru pene. Ani biyagola Yagaba ibu nde Labananaga nogo sibi memeru maru helo wahayaru hinalu hene.
GEN 30:37 Mani howa Yagaba ibugua ira gahenge tara tara hearunaga magane podo yuwa dongone lagalo wahowa irane pele pana helaga bini.
GEN 30:38 Ani buwa nogo meme biaru iba nole ibaga wiagoria ibalu hendelo lowa handabehe wiagoria ira magane uruni bibahende wa haga bini. Nogo meme ti iba nole ibalu meme wangabe karume angibuni karu hendelelo manda buwa ani bini.
GEN 30:39 Ani wa heagoria ibuwa meme wangabe hearume angibuni hearu ira magane dongone bu wahowa wayagoria howa hendelaga biyagola meme angibuni urunime igini mindi pagabua bu gombedagabi hono yu haga bini.
GEN 30:40 Ani heagola Yagaba ibugua Labana nogo sibi wangabe hearume sibi angibuni meme igini mindini pagabua bu gombedagabi heagoria kaware helowa hendelaga bilo helene. Ibugua ogonidagua bialu ibunaga meme sibi hearubi Labananaga heba mandagi hela nabi ibunaga haru pu bagiho helene.
GEN 30:41 Meme sibi hearubi mandagi iba nalu hearia wangabe bayale hongohe kagome angibuni hendelarangi Yagaba ibugua ira magane podo wiyago yu puwa nogo uruni iba naga biagoria de tiga tiga ngelaga bini. Ngelayagola nogo ti ogoniha howa hendelaga bini.
GEN 30:42 Ani bialu howa meme sibirubi hongo nahe nogo damene bu karu hendelarangi ira magane ogoni nawi wahaga bini. Ani biyagola nogo sibi memebi Labananaga hearu bibahende ko hongo nahe damene hene. Yagaba ibunaga sibi memerubi bibahende hongohe bayale dege hene.
GEN 30:43 Anidagua biyadagome Yagaba ibu mbirale dewa wuwa homogo hene. Ibunaga nogo sibirubi memerubi dewaore hinu halu ibunaga biabe bia haga wali agalirubi dewaore bu halu nogo kamele dongibi dewaore hinu haga bini.
GEN 31:1 Yagaba ibu hale halu hearia Labana igini bu hearume lalu, Yagaba ibugua ina abanaga mbirale wiaru ibu mo hai halu kagome ibu mbirale dewawi homogo haragonida, laga bira layane hale hene.
GEN 31:2 Yagaba ibu bi ogoni hale ho hearia dege Labanahandabi nde ibuhondo ala turuho hagadagua ndo ai mini mende ale wu hearia hendene.
GEN 31:3 Ani bu heago hondowa Anduane Homogohanda Yagabahondo lamialu lalu, Áyu ogoni í̠ aba dindiha í̠ni dameneru bu karia dai bialu pobe. I̱nime í̠ baya hangu handayaho holeberogo ani bibe, lene.
GEN 31:4 Ani layagola hale halu Yagaba ibugua ibu one Lia Leselola ibuni nogo sibi memeru haru haga biagoha ibilo libuhondo bi lawia hene.
GEN 31:5 Libu ibiyagola Yagaba ibugua libuhondo lamialu lalu, Libu abahanda i̱hondo abale bayale bialu hagadagua ndo bialu ka. Anigoyu i̱ abanaga Ngode Datagaliwabe ibu i̱ni heba haabo ka.
GEN 31:6 Ai i̱na libu abanaga biabe luore biaabo halu harugoni libu manda bidabigoni.
GEN 31:7 Ibugua bia layago i̱na hongo howa bialu hewagola ibugua i̱hondo ke̱ halu i̱ yolo bule layadagua nabi mo hondo howa pi halu mo iriari biaabo haga biya. Ani bialu heago helowa Ngode Datagaliwabe ibugua Labanahanda i̱ mo ko helo yupe nahaya.
GEN 31:8 Abale howa Labana ibugua nogo meme pagabua gilimugalimubi harago yolo ogonigo í̠ habelo layagola ai meme igini gilimugalimubi dege dewa hono yu haya. Ani heagola mani howa nogo pagabua luni giligilibi bupe hagabi kago í̠ habelo layagola meme biarume pagabua luni giligilibi bupe hagabi dewa hono yu haya.
GEN 31:9 Ai Ngode Datagaliwabe ibugua libu abanaga nogo hearu anidagua bialu i̱ mo ngiai haya.
GEN 31:10 Horo mbirungi emaga handalu hewaria nogo meme angibuni bu hearu wangabe pagabua giligili bigibime hendelalu hearia handaru.
GEN 31:11 Ani hondo hewagola Ngode Datagaliwabenaga dahuliyali mbirame lalu, Yagaba-o, layagola i̱na, Ya i̱ o kogoni, laru.
GEN 31:12 Ani larugola ibugua i̱hondo lalu, Nogo meme gilimugalimubime hendelalu kagoni í̠ de handa. Ogoni i̱nime ani mo bia harogoni. Ani berogoni irane Labana ibugua í̠hondo mana liahe bialu heago hondowa i̱na ani bero.
GEN 31:13 Ala í̠ Bedele dindini paleria Ngode Datagaliwabe i̱na hapani harugonaga í̠na mani mitangi budai bule ege to̱le̱ haguanda harigo weli odoba halu loma bia harigoni. Ani bialu habo nalolene bi mbira i̱hondo lo wialu birigoni. Ai áyu ogoni heyalu mbirale wu haridaruni mo manda manda bialu í̠ni dalu dai bibe, laya, lene.
GEN 31:14 Lia Leselola libugua bi ogoni hale howa ladai bialu lalu, I̱ya aba andagaha howa mbirale mbira mo yulene nawi.
GEN 31:15 Iya abahanda iya wali tara berelaradagua biya. Ibugua iya dabuni dewa taguiyagoyu bibahende ibuni mo hole biai haya.
GEN 31:16 Mbirale bibahendeore Ngode Datagaliwabehanda iya abanaga giha howa yamialu í̠ mo ngiai hayagoni. Anigo uruni bibahende iyanebi iya waneigini bu karubi ina harunaga ngago ai Ngode Datagaliwabehanda bibe lalu langiyadadagua bibe, lene.
GEN 31:17 Ani layagola Yagabahanda ibu one waneiginiru nogo kamele erembirani berelai halu
GEN 31:18 ibunaga nogo sibi memeru haru hai halu mbirale yári damene Mesobodemiaha howa mo yiniru ya bialu ibu bamba halu pene. Anidagua bialu ti dindi ogoni wahalu ibuni dindi ibu aba Aisaga hearia Kenana dai bini.
GEN 31:19 Ti pole howa Labana ibu ibunaga nogo sibi irini podama piyago hondowa ti pene. Pole howa Leselo ibugua ibu abanaga mbirale dama mitangi bialu bi pupu wule gime wabini mbira anda mamage helo mo do ho wiago mo yalu pene.
GEN 31:20 Yagaba ibugua nde ina anidagua poleberema lalu Aramiali Labana lamia nabi ti ohalu
GEN 31:21 ibunaga mbirale wiyadaru bibahende kabu biai halu yalu pene. Ibugua Labana dalu wahalu puwa iba Yuberedisi doma ede halu Gileadaha hari barebare wiago hondo yalu pupe hene.
GEN 31:22 Ti ani peaha horo kiru howa horo teboneni agali marume Labana lamialu lalu, Yagaba togo lalu abale piyago ndobe, lene.
GEN 31:23 Ani layago hale howa Labanahanda ibu damene bu hearu haru halu Yagaba talima pialu horo karu harigani handa paligi bima pene. Ani pialu tigua Yagaba ibu Gileada dindiha dindi barebare wiagoria anda pu hearia ibini.
GEN 31:24 Ibiyagola Ngode Datagaliwabehanda mbiraga mbirungi emagaha howa Labanahondo lamialu lalu, Í̠na Yagaba mo gi hole mbirale mbira nabibe, lalu lamini.
GEN 31:25 Yagaba ibu hari hombene wiagoria balai anda bu hearia Labana ibu hendene. Ani hondowa Labana halu agali ibuni damene haru hayaru tibi nde Gileada dindiha hari hombene wiagoria dege balai anda bini.
GEN 31:26 Ani bialu Labana ibugua Yagaba hearia puwa ibuhondo lalu, Irane aginaga í̠na i̱ mayongo bia halu i̱ wane biago labo wai bialu garabaya haru poradagua bialu pu yola harigo agibe.
GEN 31:27 Í̠ ani pole kogoni lalubi i̱ nalangi howa yola halu ibiriyago irane agi. Í̠ pole kogoni lalu i̱ abale biago langidele nde i̱na i̱ dameneruhondo lamialu tigua iba gana lalu ngida balu í̠ baya hanguore turu hama pobe ledole.
GEN 31:28 Ai ani ndo í̠na i̱ wane biago labohondobi i̱ aguaneruhondobi tí pilimu lalu i̱nime yu nu̱nu̱ loliya ha nabi piriyagoni mana koore biriya.
GEN 31:29 I̱na tí mo ko holene karulapeore kogo ainde í̠ abanaga Ngode Datagaliwabehanda áyu mbiraga emagaha howa i̱ langialu lalu, Í̠na Yagaba mo gi holene ale mbirale mbira nabibe, laya laro.
GEN 31:30 Ainde i̱ yu wahalu í̠ni dalu dai buleore hame laridane manda bidogo. Anigo irane aginaga mbirale dama mitangi bialu bi pupu wule gime wabinigo i̱ andaga mamage helonaga ngelarugo tí mo hilo yai halu ibirimida agibe, lene.
GEN 31:31 Ani layagola Yagabahanda ladai bialu lalu, I̱ ohalu í̠ handa nabini ibirudagoni irane í̠ wane biaruni í̠ni haru dai bibeheyane biru.
GEN 31:32 Ani birugo ai ina ibirimadago aria mbirame í̠naga mbirale bi pupu wiaga ogoni mbira mo yiniyagua ogoni ibuni homelo bo wahabe. Ainde í̠ damene bu kamaru bibahendenaga deni howa mbirale iname mo yalu ibirimadaruni handai hole íbu. Handalu keria mbirale mbira í̠naga lenego wiagua ogoni í̠ni mo yu dai bibelo, lene. Anigo Leselohanda ibu abanaga mbirale bi pupu wule gime wabini uruni mo do ho bereago manda nabi howa Yagaba ibugua anidagua lene.
GEN 31:33 Ani laya handala Labana ibugua Yagabanaga balai anda heagoha anda puwa mbirale wiaru baya hangu handai hene. Handai halu Lianaga balai anda heagohabi anda puwa handai hene. Ani bialu biabe bia haga wali kirali bereagonaga balai andahabi handalu hearia ibunaga bi pupu wule gime wabini biaruni mbira wiaria handa walia nahe dege hene. Nawioreya handala ai uruninaga balai anda helalu Leselonaga balai anda heagoha taya bule anda pene.
GEN 31:34 Anda puwa mbirale bi pupu wule gime wabini ogoni Leselo ibu mo page buwa nu ale mbira nogo kamele erekunini mo pagaho biraga wiagoha hanado ho ngelowa ibuni bira dambiho berene. Ani bereagola Labana ibugua balai anda tamuha anda puwa taya bialu hearia uruniha nawi degeyane hendene.
GEN 31:35 Ani handalu hearia Leselohanda lalu, Aba-o í̠na i̱ heya nalabe. Áyu i̱na walinaga horongi bedogo, lene. Ani layagola Labanahanda taya bialu heariabi mbirale dama mitangi bialu bi pupu wule gime wabini biagoni mbira handa walia nahe dege hene.
GEN 31:36 Ani handa walia nahe dege heagola Yagaba ibugua Labanahondo keba howa lalu, I̱na í̠hondo mana ko liahe mbira agi birugonaga í̠na i̱ haruru talima ibiribe.
GEN 31:37 Í̠na mbirale i̱naga wiwaruni bibahende handai harigonidago ai mbirale agilego mo yiwaria handa walia haribe. Í̠naga mbirale mbirale wiaria handa walia hariyagua nde wali agali í̠ aria bu karubi i̱ aria bu karubi bibahendenaga deni ti hendelo mo pani ha. Ani beregola tigua iyanaga bi hale hai howa ái ibunaga bi tigabidabe hendelo ani bia nabere.
GEN 31:38 Ai i̱na mali pira kira (20) í̠la haabo harugo. Ani hewagola í̠naga nogo sibi memeru bibahende igini bayale wialu haya. Ani howa í̠naga nogo sibi uruni aria wangabe hearu mbira balu na nabi dege haru.
GEN 31:39 Ani handayaho hewagola ai gabua tara tara karume í̠naga nogo sibi memeru mbira balu naragola ogoale biya lalu í̠ni langia nabi i̱nime nogo dege aribia haruli. Í̠naga sibi memeru mbirale mbira ngamiru mbiraga horombeyaguabi mbiralime page bu yalu piyiyagua minalu biyada nale howa i̱hondo í̠naga nogo aribia habe larili.
GEN 31:40 Horo bibahendengi ni tandagabi dayagome i̱ do yogo biyagola i̱na harugo lowa biabe bialu haruli. Mbiragabi dagare nde timbuni biyagola u napale harugo lalu haruli.
GEN 31:41 Ogonidagua i̱na mali pira kirani (20) í̠naga biabe biaabo halu haru. Í̠ wane kira biago labo dabu bule mali pira mbirani maria (14) í̠naga biabe bialu nogo meme sibiru ngibelonaga i̱na mali waragaria biabe bialu haru. Ani bialu hewagola í̠na yolo ogoore nguliya lalu lo wirigo wahalu mende ale mo iriari biaabo haga birili.
GEN 31:42 Ani biriligo ainde i̱ mamali Abarahama Aisagabi libugua Ngode Datagaliwabe mo tene howa ibu mitangi bialu lotu lalu haga kago ibugua i̱ heba nahenedale í̠na i̱ mbirale mbira giha nayi bame dai bia ledelego. Ainde Ngode Datagaliwabe ibugua i̱naga bu miniha genda yu hewago handalu biabe ndelahe bialu harugo mitangi bialubi ibunime bi hongohe mbiraga í̠ talialu bi langiyada, lene.
GEN 31:43 Labana ibugua Yagabanaga bi layarunaga ladai bialu lalu, Wali kira o bedagoni labo libu i̱ wane biralu libu waneigini bu karunibi nde i̱ aguane bu ka. Ani bialu nogo sibi meme bu karunibi nde i̱ nogo dege bu ka. Mbirale bibahende o ngaruni i̱naga wini biaruni degedago. Ainde i̱ wane kira ogolabo baba libunaga waneigini bu karunibi ina mandagi holoma̱yanaga tihondo mbirale mbira agilego buliyabe.
GEN 31:44 Mbira bulene nawidago ainde habo nalolene bi mbira dege lo wibiya. Ani lo wialu bi ogoni mo mitangi bia helonaga ege to̱le̱ dugu hangabiya, lene.
GEN 31:45 Ani layagola Yagaba ibugua bi ogoni mitangi biaabo holenaga tubari ege to̱le̱ mbira dugu hengene.
GEN 31:46 Ani hongowa ibu damene bu hearuhondo lamialu, Ege to̱le̱ dewaore dugu yu ibalu wima irigi hadaba, layagola tigua ani biai hene. Mani ani biai howa Yagaba ibu damenerubi Labana ibu damenerubi bibahende ege to̱le̱ dewa dugu wima irigi ho heagoria tomo timbuniore dawalu ti mandagi biruwa nene.
GEN 31:47 Ani biruwa Labana ibugua ege to̱le̱ dugu wima irigi hene wiago mini Yaga Sahaduda wialu Yagabahanda ege to̱le̱ uruni mini Galede laga wini.
GEN 31:48 Labana ibugua lalu, Ege to̱le̱ dugu wima irigi ho ngago ogoni habo nalolene bi áyu lo wiribagonaga tubari ogoni iya mitangi biaabo holobaya wiaabo helo, lene. Ani lene winigo wali agali heneru tigua ege to̱le̱ dugu wima irigi hene ogoni mini Galede laga wini.
GEN 31:49 Ani wialu Labana ibugua lalu, Iya haru mandagi nahe haga hagabu kabago iyame mana bialu kabaruni Anduane Homogo ibunime handape halu helo hameledo, lene. Ani layagola dindi ogoni mini mendebi wialu nde Misiba laga hene.
GEN 31:50 Labana ibugua la dege bialu, Í̠na i̱ wane kira o bedago labohondo mana ko bialu hariyaguabi wali maru biru ngaruni dabu bialu piriyaguabi bi áyu lo wiribago wali agalime manda nabi heaguabi mana iyame bialu kabaruni bibahende Ngode Datagaliwabe kagome handai ho kagoni manda bibe, lene.
GEN 31:51 Ani lowa Labanahanda Yagabahondo laabo halu lalu, Ege to̱le̱ uruni iya kabago hengeneha dugu wima irigi hene ngaru handalu ege to̱le̱ mbiraore luni amu heyu kagobi handabe.
GEN 31:52 Ainde ege to̱le̱ luni amu heyu kagobi maru o dugu wima irigi haribagobi ogonilabo kirabali habo nalolene bi lo wiribagonaga tubari ogoni holebira. I̱na ege to̱le̱ ogoni bolangua halu í̠ kegohayagi wai bule naibaguago í̠nabi nde ogoni bolangua halu i̱ kogohayagi wai bule naibabe, lene.
GEN 31:53 Ani lowa lalu Labana ibugua ibu mamalirunaga Ngode Datagaliwabenaga minini howa lalu, Abarahamanaga Ngode Datagaliwabe kagomebi Nahonaga Ngode Datagaliwabe kagomebi mana iyame bialu kabaru tiga tigaore ngadagua mo tale bilo, lene. Ani layagola Yagaba ibuguabi nde ibu aba Aisagahanda Ngode Datagaliwabe kago mitangi bialu lotu laga henegonaga minini howa lalu, Í̠na laredagua i̱na buleorebero, lalu bi lo wini.
GEN 31:54 Ani lo wialu ibugua hari bare ogoriani Anduane Homogohondo nogo mbira bo lomabu delene. Nogo bo lomabu delayagonaga mbirini wiaru ibu dameneru nole ibidaba lene. Ogoni nalu mbiraga ogoningi ti bibahende hari bare ogoriani ho palu hene.
GEN 31:55 Palialu gao layagola Labana ibu heyalu ibu wane kira biagobi ibu aguane hearubi yu nu̱nu̱ lai halu hondo halimu lalu ibuni dalu dai bini.
GEN 32:1 Yagababi ibu damene biarubi ti harigani pole pialu hemiria Ngode Datagaliwabenaga dahuliyaliru lola hene.
GEN 32:2 Ti ani hondowa ibugua lalu, Dindi ogoni Ngode Datagaliwabe ibu hagahadago, lowa ibugua dindi ogoni mini Mahanaima wini.
GEN 32:3 Mani Yagabahanda agali maru tale buwa bi yalu Sia dindi mini mende Idomo mbira ngagoria ibu hamene Iso lola hole pudaba lene.
GEN 32:4 Ani pialu bi ogodagua lalimu laya. Agali haguane Iso-o í̠naga biabe bia haga Yagabahanda ogodagua laya. I̱ Labanala luore howa harugo ai dai bulene hame ledogoni.
GEN 32:5 I̱na nogo bulumagaru dongiru sibiru memeru dewa hinalu wali agali i̱naga biabe bia hagabi dewaore kago. Ai áyu i̱naga agali haguane-o í̠na i̱ha mini yaleyale holani nahe howa miniha dungulo habelonaga laro labe, lalu bi ogoni yalu pudaba, lene.
GEN 32:6 Agali bi yalu piyarume dai bialu howa lalu, I̱name í̠ hamene Iso hearia bi yalu pirimago ai ibu harigani í̠ lola hole agali handari maria (400) heba ibira, lene.
GEN 32:7 Bi ani layago hale howa Yagaba ibu gi timbuni howa mini burugulo hene. Ani howa ibugua ibunaga biabe bia haga wali agalibi nogo bulumagaru dongiru memeru sibiru kamelerubi bibahende halu kirani talebuki howa halu kirani anda bu paligi paligi bini.
GEN 32:8 Isohanda ibalu wabuni mendegola wai biyagua nde wabuni mendego ibida pelo manda buwa ani talebuki hene.
GEN 32:9 Ani talebu helowa Yagabahanda Ngode Datagaliwabehondo bi ogodagua lene. I̱ mama Abarahamanagabi i̱ aba Aisaganagabi Ngode Datagaliwabe-o i̱naga bi larogo hale ha. Anduane Homogo-o abale í̠na i̱hondo lalu mani i̱naga dindi dai berogola í̠na i̱ mo bayale holebero larigoni.
GEN 32:10 I̱ agali baya biaga ndo hewaria í̠nime dara halu i̱hondo bayale dege biaabo hariligoni. Abale iba Yodana domalu Labana hearia pole pirungi i̱naga giha mbirale nayiore halimbu hangu yalu pirugoni. Ai áyu mbirale bibahende talebuki buwa wabuni kira ngelo kogoni.
GEN 32:11 I̱ hamene Isohanda wai biba loligo í̠na mamage habe lalu i̱ onene waneiginirubi bibahende bai holigonaga í̠hondo bi larogoni.
GEN 32:12 Abale í̠na i̱hondo lalu, Í̠ waneigini aguanenebi daga labe nahe dewaore iba mu ngaligobi holebira, larigonidane laro, lene.
GEN 32:13 Yagabahanda mbiraga palialu heyuwa egerebalene hayagola ibunaga nogo uruni maru ibu hamene Iso talebu mule manda manda bini.
GEN 32:14 Ibugua nogo meme angibuniru handari kira (200) wangaberu pira kira (20) nogo sibi angibuniru handari kira (200) wangaberu pira kira (20) lowa helene.
GEN 32:15 Nogo kameleru pira tebira (30) tinaga iginiru heba nogo bulumaga angibuniru pira maria (40) wangaberu pira mbira lowa talebu helene. Dongi angibuniru pira kira (20) wangaberu pira mbira tale bigibu helowa
GEN 32:16 nogo uruni damene mbira mbira haru helonaga agali biabe bia haga mbira mbira helowa lalu, Ai tígua ala bamba halu pudaba. Pialu howa nogo ti biamagamaga nabi tini aria degedege wabuni pugupugu bilalimu, lene.
GEN 32:17 Ani lowa Yagabahanda ibunaga biabe bia haga haguane biagohondo bi ogodagua lamini. I̱ hamene Iso í̠ harigani lola haregola ibugua í̠hondo hale halu lalu, Í̠ agali ainaga biabe biagabe. Í̠ ani pore. Nogo uruni ainaga haru kebe, laga biyagua
GEN 32:18 í̠na ogodagua ladai bibe. Uruni í̠naga biabe bia haga Yagabanaga. Ibugua uruni í̠naga wia haya. Yagaba ibuni wene mani ibira, lalu lamibe.
GEN 32:19 Ani lowa Yagabahanda ibunaga biabe bia haga mende tebonehondobi bi mbiraore ogonidagua dege lalimu lalu bi endeho mini.
GEN 32:20 Bi maru urunibi ladege bilimu. I̱naga biabe bia haga Yagaba ibuni maha ibira lalimu. Yagaba ibugua Iso mo gede harogola ibugua ala keba ho hayago wahalu turu howa ibu lola helo manda buwa ani bini.
GEN 32:21 Nogo biarubi agali nogo haru piyarubi ti pudaba lowa ibuni horo mbira ogoningi ho palene.
GEN 32:22 Ogoningi dege mbiraga hayagola Yagaba ibugua ibu one kiralibi wali biabe bia haga kirali biago labobi ibu waneigini beriali (11) biarubi ti ibuwa iba mini Yabogo domade hene.
GEN 32:23 Domade howa edeyagi berelalu ibuni ibunaga biabe bia haga agali biaru hearia dai buwa ibunaga dabudabu yarimiru yalu ma lama pene.
GEN 32:24 Ti piyagola ibuni hangu ederayagi hondo hene. Ani hearia agali mbira iraga howa gi gungu bialu hebine ega bi lene.
GEN 32:25 Gungu bialu dege hebine agali biagome Yagaba bope habe naheyane hondowa Yagabanaga ge mendeyagi bo yolope hene.
GEN 32:26 Libu gungu bialu howa agali biagome Yagabahondo lalu, Ai ega bi layadago i̱ poliya yu peha, lene. Ani layagola Yagabahanda lalu, Í̠na i̱ biamogo bialu mo bayale helonaga bi mbira ala labe. Bi la kegola pobelo yupe holiya, lene.
GEN 32:27 Ani layagola agali biagome Yagabahondo lalu, Í̠ mini ai kebe, lene. Ani layagola Yagabahanda ladai bialu lalu, I̱ mini Yagaba kogoni, lene.
GEN 32:28 Ani layagola agali biagome lalu, Í̠na agalirubi Ngode Datagaliwabebi baba gungu bialu í̠ wayali harigodago ai í̠naga mini Yagaba wahalu í̠ mini Isaraele lolebira, lene.
GEN 32:29 Ani layagola Yagabahanda lalu, Í̠ nde aibe mini langerene, layagola agali biagome ladai bialu lalu, I̱naga mini agi bule languliyabe, lowa ibugua Ngode Datagaliwabehanda Yagaba biamogo bialu mo bayale helonaga bi lene.
GEN 32:30 Ani biyagola Yagabahanda lalu, I̱ Ngode Datagaliwabe dengui hondowa ai homa nabi kogoni, lowa ibugua dindi ogoni mini Peniele wini.
GEN 32:31 Ni tagira ibiyagola Yagaba ibu dindi Peniele ogoni ngelalu pene. Pialu ibunaga ge tigatiga piagadagua ndo pene. Tene agi ge mendegonaga wabene dugupe hayagome ge kohe hene.
GEN 32:32 Ani binidago manda buwa Isaraele wali agali tigua nogonaga ge kuni mbirini nanaga winigo nga.
GEN 33:1 Yagaba ibugua handalu hearia Isonaga agali handari maria (400) haru halu ibiyaria hendene. Ani ibiyago handalu Yagaba ibu waneigini bu hearuni, Tí ai̱ya baba hagahaga bu hole pudaba, lene.
GEN 33:2 Ani lalu wali biabe bia haga bereago labo libu waneigini heba bamba halu Lia ibu waneiginiru heba mani pialu Yosebela ibu ai̱ya Leselola maniore pumaro bini.
GEN 33:3 Ani piyagola Yagaba ibuni ibu dameneru piyadagua mo bamba halu puwa ibugua dindini ge duli hanga halu dengui dindini ela helo bulu paligi bialu kahalu ani dege bima pialu ibu hamene Iso heagoria hapara hene.
GEN 33:4 Ani biyagola Iso ibu abale gerai ibalu ibu hamene yu hubi lalu nu̱nu̱ lene. Ani bialu libu haru dugu bigibigi bialu hene.
GEN 33:5 Ani dugu bialu howa Iso ibugua handa amu howa handalu hearia wali waneigini ibiyaru hondowa ibugua Yagabahondo hale halu lalu, Í̠ heba ibiraru ti aibe, lene. Ani hale hayagola Yagabahanda ladai bialu lalu, Ngode Datagaliwabehanda í̠naga biabe bia haga agali i̱ mo bayale halu wali waneigini uruni ngiya, lene.
GEN 33:6 Ani leagola wali biabe bia haga biagolabo libunaga waneigini heba ala ibalu Isonaga wanakuihayagi ge duli hanga howa denguime dindi ela helo bulu palene.
GEN 33:7 Ani biyagola Lia ibu nde ibuni waneigini heba ibalu Isonaga wanakuihayagi bulu palialu dengui dindini ela helene. Yosebe Leselola mani íbumaro bialu libubi ge duli hanga howa denguime dindi ela hene.
GEN 33:8 Ani biyagola Iso ibugua lalu, Agali maru nogo sibiru haru ha mbiraleru ya bigi bialu bamba halu pu lariyaruni lola harugo ai irane aginaga yalu pudaba laribe, lene. Ani layagola Yagaba ibugua ladai bialu lalu, Agali haguane-o mbirale uruni i̱la í̠naga bu mini hado habelonaga ibilarugoni, lene.
GEN 33:9 Ani layagola Isohanda ladai bialu lalu, Hamene-o i̱ mbirale wiai kogo í̠naga wia hariyaruni í̠ni holene karulape, lene.
GEN 33:10 Ani layago lelowa dege Yagabahanda lalu, Anigo í̠na i̱la bu miniha hado heyagua nde mbirale uruni i̱na talebu ngerogoni mo ya. Ai í̠naga wanakui handalu koria dengui wálalu Ngode Datagaliwabenaga dengui handalehe hendedogo. Í̠na i̱la bu miniha hado kene hendedogoni.
GEN 33:11 Ani hendedogo ainde mbirale i̱na bame í̠ ngerogoni harugo mo yarene. Ngode Datagaliwabehanda i̱ mo turu halu mbirale bayale dege ngiyagola i̱ni karulapeore yu kogo ai uruni í̠ mo ya, lene. Ani dege lalu lo hongo halu mo yaore laya handala nde Iso ibugua mbirale Yagabahanda miyadaruni mo yini.
GEN 33:12 Ani mo yuwa Iso ibugua lalu, Ai i̱bi nde ina haru mali̱ya heyalu ma, lene.
GEN 33:13 Ani layagola Yagaba ibugua ladai bialu lalu, Agali haguane-o waneiginiru ge hongo halu gerai labe nahedago nogo sibi igini áyu dege hono wini gali bu karubi nde ani degedagola horo mbira hanguni gerai lalu abale anda pobe nahedago í̠ manda bide. Abale pialu horo mbiru hanguni anda polene manda buwa nogo bu karu wara daila harimayagua nde nogo uruni bibahende homai holebira.
GEN 33:14 Anigo agali haguane-o ainde í̠na bamba halu ala pialu ha. I̱na nde mani nogo waneigini bu karuni haru halu hendore ibugu bialu eberogoni. Ani ibalu amu Idomo dindini lola habiya, lene.
GEN 33:15 Ani layagola Isohanda lalu, Aniyagua nde i̱naga agali bu karu maru tí haru mandagi ibalimulo heloliya, lene. Ani layagola Yagabahanda lalu, Agali haguane-o í̠na i̱hondo mana bayaleore berego nde wahalu i̱naga agali bu karuni tini karulape haru ibulebirago wahadaba, lene.
GEN 33:16 Ani laya handala Iso ibu horo ogoningi pialu Idomo dindi pole pene.
GEN 33:17 Yagaba ibu nde pialu Sugodo dindi wiagoria anda puwa ibugua ibunaga balai anda bia halu balai anda emene emene maru ibunaga nogo sibi bulumagaru bu hearunaga bia hene. Ani binigo manda bialu tigua dindi ogoni mini Sugodo wini.
GEN 33:18 Yagaba ibu Mesobodemia yu wahalu Kenana dindiha dai buwa Segeme tano kaware wiagoria balai anda bu hene.
GEN 33:19 Ani pu howa dindi ogoni Segeme aba Hamo aguanenerunaga winigo ibugua dindi ogoninaga muni siliba handari mbirame (100) yolo bini.
GEN 33:20 Ani buwa Yagaba ibugua lomabu delaga dabu mbira dindi ogoriani bu helene. Ani bu helowa dabu ogoni mini Ele Isaraele wali agalirunaga Ngode Datagaliwabe lalu bu helene.
GEN 34:1 Yagaba Liala wane mbira mini Daina berenego ibu nde horo mbiru Segeme tanoha Kenana wali berearu nenege pene.
GEN 34:2 Hibiali mbira mini Hamo henego ibu nde Kenana dindiha tano ogoninaga agali haguane hene. Agali ogoni ibu igini Segeme henegome Daina ibalu hearia hondowa ibugua minu yania halu kayu bini.
GEN 34:3 Ani binidagoni Daina ibu wandari bayaleore bereago hondowa hame timbuni lowa binigo ai ibu Dainahondo ibu hame lelonaga bi gedaoreme ladebodebo bialu hene.
GEN 34:4 Ani lalu puwa Segeme ibu abahondo lamialu lalu, Aba-o wali ogoni i̱ dabu buliya í̠na damu pu ha, lene.
GEN 34:5 Yagaba ibu nde ibu wane Daina Segemehanda kayu biya layago hale ho hene. Anigo ibu igini bu hearu ti tagiraha nogo sibi bulumagaru haru hama peaha hale howa Yagaba ibugua nde bi mbira labe naheyagola wahowa ibu iginiru andaga dai bilo lowa hondo hene.
GEN 34:6 Ani hearia Segeme aba Hamo ibu Yagabala bi lole ibini.
GEN 34:7 Libu bi lalu hebira Yagaba igini biaru ti andaga dai buwa bi layalaya hale halu hearia Segemehanda ti mbalini biago kayu biya layago hale howa tigua tandaga timbuni halu keba hai hene. Ainde Isaraele hameigini tinaga deni Segeme ibugua Yagaba wane Daina kayu biyadagoni mana koorene ko mbira bini. Isaraele hameigini tigua mitangi bialu mana ogonidagua bulene nawiore mitangi bu haga wini.
GEN 34:8 Hamohanda Yagabahondo lalu, I̱ igini Segeme ibugua í̠ wane bedago hame timbuniore lo kago ai libu dabu bilo karulapedabe be nakarulapedabe.
GEN 34:9 Ainde ina haru mandagi howa wandari ina wane bedaru nde tí dabu bialu tí wane bedaru nde ina dabu bigi bimi̱ya hamelo ko.
GEN 34:10 Ani bialu tínibi nde ina dindi ogoha mandagi dege hami̱ya. Tí dindi lene mbira tíni holene hame ledamigoriani howa tomo hanga nogo sibi bulumagaru hina bialu biyinayaru bialu tíni halimulo, lene.
GEN 34:11 Segeme ibu nde ibu abala haru mandagi dege ibinigo ibugua Daina aba mbalini hearuhondo bi lamialu lalu, Tígua i̱naga bi larogoni hale halu karulape larimiyagua nde tínime i̱hondo ngi laramigo ngiai holebero.
GEN 34:12 Tínime nogo wariabu ogodagua hende habe lalu langeramidagua hende holiya. Aniore buliyago wali ogoniore i̱ dabu buliya ngiaore bilimu, lene.
GEN 34:13 Anigo Yagaba igini biaru tigua Segemehanda ti mbalini Dainahondo mana ko timbuni biyago miniha mo pehowa mitangi bu hene. Ani mitangi bu howa tigua Segemela ibu aba Hamolahondo ke̱ howa mo hondo halu
GEN 34:14 tigua ogolabohondo lalu, Agali mbira ibunaga dongone podo mabu nabi kagohondo ina mbalini namuleberema. Iname ogonidagua dabu bilo mirimayagua ina tagabi holeberema.
GEN 34:15 Ai tígua mbiraore hangu bulene ngago ogoni ala bule pudaba. Ani bialu tí nde ina kamagobi dege hole agali tí bibahendenaga dongone podo mabu biai hole pudaba. Tígua ogonidagua bidamigola nde mani tígua bi laramigo hale halu karulape loleberema.
GEN 34:16 Anidagua birimiyagua nde ina wane bedarubi tí dabu bilimulo ngialu tí wane bedarubi nde iname dabu buleberema. Ani buwa inanebi tí heba mandagi halu ina hameigini mbiraore hangu holeberema.
GEN 34:17 Ainde tígua tínaga dongone podo mabu nabirimiyagua nde inanaga wali ogoni haru halu tínaga dindi ogobi wahalu tagira poleberema, lene.
GEN 34:18 Ani layagola Hamo ibu igini Segemelame bi ogoni karulapeda lo manda bini.
GEN 34:19 Ani manda bialu Segeme ibugua Yagaba wane Dainaore hame timbuni lo howa tigua bibe layadagua ibugua bule pene. Segeme ibu damene dindi ogoniha bu hearume ibunaga mini mo yaraga hene howa tinaga deni ibu agali mini lene mbira ona hene.
GEN 34:20 Ani howa Hamo ibu igini Segemela libuni dalu pialu tanoha ubanda tagi biaga pabe haraba wali agali ngoai haga wiagoria pu howa agali maru hearu heba bi lalu hene. Libugua tihondo lamialu lalu,
GEN 34:21 Agali íbu hearuni ti bayaleore heneyago howa ai ina baba mandagi holene hamelo hea. Inanaga dindi timbuni ngamagoniha howa tinime hoa biragoha ta nabi ibagabu helo wahami̱ya. Ani howa iname ti wane bedaruni dabu bialu tiguabi nde ina wane bedaruni dabu bilo.
GEN 34:22 Ani bimi̱yanaga iname mbirale mbira bulenego tigua bilimu laya. Ti kamagobi dege hole agali bibahendenaga dongone podo mabu biai halimu laya. Tigua lalu, Ogonidagua birimayagua nde tígua ina heba mandagi howa hameigini mbiraore ho holene karulapeda, lo manda biya.
GEN 34:23 Ani bialu tinaga nogo sibi bulumagarubi tinaga mbirale tara tara yu karubi bibahende inanaga hangu wiai holebira ndobe. Ani bulebirago ai tigua inahondo bi mbira langiyago hangu bimi̱ya. Ani beremagola bibahende tigabi wiai holebira, lene.
GEN 34:24 Ani layagola agali tanoha hearu tigua Hamo Segemelame bi layagoni karulapeda lowa tinaga dongone podo mabu biai hene.
GEN 34:25 Horo kiru peagola agali dongone podo mabu bini biaruni ti tandaga howa dege hene. Ani heagola horo tebonengi Daina mbalini kirali Simiono Libailame wai biaga ayu tibu yalu tanoha anda pene. Ani anda puwa mbiralime libu hapai habe naheore pialu agali tanoha bu hearuni bibahendeore homelo bo wahaiore hene.
GEN 34:26 Ani bialu libugua Hamo igini Segemebi homelo bo wahalu Daina ibu Segeme andagaha berearia libuni haru halu dai bini.
GEN 34:27 Simiono Libailame Segemenaga tanoha agali hearu bibahende bo wahai heagola Yagaba igini maru hearume tanoha anda puwa dabudabu bayale damene bu wiaruni bibahende mo yai hene. Ani binidagoni irane ti mbalini Dainahondo mana ko biyagonaga bene.
GEN 34:28 Tigua nogo sibi meme bulumaga dongiru bibahende haru piai hene. Ani bialu mbirale bibahende tano tagirahayagi wini wiarubi tano tamuha wini wiarubi bibahende mo yalu piai hene.
GEN 34:29 Ani bialu mbirale muni timbunime yolo biaga ale dewaore mo yalu wali waneigini biru wiarubi ti haru haga bini. Ani haru howa anda bu hearuha wiaruni damenego bibahendeore mo yaiore halu pene.
GEN 34:30 Mani howa Yagaba ibugua Simiono Libailahondo lamialu lalu, Libugua genda timbuniore i̱ha mo ya haribida. Dindi ogoha padaru Kenana wali agalirubi Perese wali agalirubi wali agali maru bibahendebi ai tigua i̱ore agali kooredane hondolobada. I̱ agali dewa nahe kogo ainde agali bu karume mo mogo bialu wai ibiyagua nde i̱bi i̱naga waneigini bu karunibi ina bibahende bo wahai holobada, lene.
GEN 34:31 Ani layago lelowa dege libugua lalu, Agilego o lalu kegonibe. Wali iya mbalini ogoni wahalu bayanda wali biralu ibu agali kayu yama ibagabu berelo wahama lalu laribe, lene.
GEN 35:1 Ngode Datagaliwabehanda Yagabahondo lamialu lalu, Áyu ogoni heyalu Bedele dindini hole pu. Ani pu howa i̱naga lomabu delaga dabu mbira ogoriani bu helabe. Horo mbiru í̠ hamene Isohondo gi halu ibida pole pialu heria Ngode Datagaliwabe hapani harugo i̱ kogoni, lene.
GEN 35:2 Ani lamiya handala Yagaba ibu one waneiginirubi ibunaga biabe biaga hearubi bibahendehondo lamialu lalu, Tígua mbirale dama mitangi bialu gime wabini yu kamiruni bibahende wahai halimu. Ani bialu mana bayale tigabi holenenaga ngago bialu howa aga dodo nahe bayale ngaru karulo halimu.
GEN 35:3 Ai ina dindi ogo yu wahalu Bedele mali̱ya kamagoni. Bedeleni pu howa i̱na lomabu delaga dabu mbira Ngode Datagaliwabenaga bia holiya. Ngode Datagaliwabe ogoni ibugua i̱ genda yu hewangi i̱ heba haabo howa i̱ ibaga bialu porogo bibahendeha i̱la mandagi haabo haga kagoni, lene.
GEN 35:4 Ani layagola tigua mbirale dama mitangi bialu bi pupu wule gime wabini dindi taraha howa mo yu ibini tinime yu haga biniyaruni bibahende Yagabahondo mo miai hene. Ani mialu mbirale haleria daga wiarubi heba golo mialu bini. Ani biyagola Yagaba ibugua mbirale uruni bibahende Segeme dindi kawareni ira mbira mini oga laga heago teneha hora hene.
GEN 35:5 Anidagua bialu Yagababi ibunaga one waneiginibi wali agali biabe bia haga hearubi bibahende tano yu wahalu piai hene. Ngode Datagaliwabe ibunime tano bibahende wiaruha hearu ti gi holene timbuni mo wia hayagola tigua Yagaba halu ibu damene piyaruni talima pobe nahe hene.
GEN 35:6 Ani hea handala Yagaba halu ibu damene biaru heba pialu Kenana dindiha Lusu tano mbira wiagoria anda pene. Lusu tano ogoni mani mini Bedele laga winigo ogoriani pene.
GEN 35:7 Ani pu howa dindi ogoriani lomabu delaga dabu mbira Yagabahanda bu helene. Ani bu helowa dindi ogoni Ngode Datagaliwabenaga lalu mini Bedele wini. Ani winidagoni irane Yagaba ibu horo mbirungi ibu hamene Iso gi halu ibida pialu hearia Ngode Datagaliwabe ibuni Yagaba hearia hapani henego mitangi bialu wini.
GEN 35:8 Ti dindi ogoniha hemigola Lebeganaga biabe bia haga wali mbira mini Debora berenego ogoningi ibu homene. Homayagola tigua ibunaga tingini Bedele tanonaga abene ni tagira ibiragohayagi ira timbuni mbira mini oga heago teneha hora hene. Ani hora howa tigua ira ogoni mini Dugu Bulene Oga Ira ka, laga hene.
GEN 35:9 Yagaba ibu Mesobodemia dindi wahalu Kenana dindiha daibu heagola Ngode Datagaliwabe ibu Yagaba hearia ibuwa ibuhondo lalu, I̱na í̠ biamogo biaabo holebero, lalu lamini.
GEN 35:10 Ngode Datagaliwabehanda lalu, Áyu í̠naga mini Yagaba lene kegonigo mani howa tigua í̠naga mini Yagaba nalolebira. Tigua í̠naga mini Isaraele lolebira, lene. Anidagua lalu Ngode Datagaliwabehanda Yagabanaga mini Isaraele lalu wini.
GEN 35:11 Anigo Ibugua Yagabahondo lalu, I̱ Ngode Datagaliwabe Hongo Haiheore kogoni í̠ waneiginiru dewaore helo hono wibe. Ani beregola wali agali hameigini dewaorenaga mamalibi maru kini holebirarunaga mamalibi í̠ holebere.
GEN 35:12 Dindi ogo i̱na abale Abarahama Aisagala libuhondo minigo áyu í̠hondo ngero. Mani howa í̠naga waneigini aguaneneru bu holebiraruhondo mulebero, lene.
GEN 35:13 Ani lowa Ngode Datagaliwabe ibu Yagaba helalu pene.
GEN 35:14 Ani peagola Yagaba ibugua ege to̱le̱ luni mbira duguwa Ngode Datagaliwabela bi lalu haribigoria hengene. Ani hongowa ibugua olibe lini ibanemebi waini ibamebi ege to̱le̱ ogoni Ngode Datagaliwabehondo loma bia halu o hangayagoriani odo wini.
GEN 35:15 Yagaba ibugua Ngode Datagaliwabela bi lalu haribidagoni dindi mini Bedele wini.
GEN 35:16 Ani bu howa Yagababi ibu dameneru ti Bedele wahalu Ebarada pole pialu hene. Harigani pialu heaore dege Leselo ibu gali taba honolene tu hayagola ibu tandaga timbuniore hendene.
GEN 35:17 Ani tandaga handalu berearia tidawali ibu biamogo biaga bereagome Leselohondo lalu, Gi halu mogo nalabe. Áyu ogoni í̠ igiri gali mende taba hanarigoni, lene.
GEN 35:18 Ani taba honowa nde Leselo ibuni homole howa buhe̱ emeneore wuwa bi mbira hangu lalu igiri biago mini Benoni lene. Mani howa igiri biago abahanda ibu mini Beniyamini lene.
GEN 35:19 Leselo homayagola tigua ibunaga tingini Ebarada polene hariga gibuni wiagoria hora hene. Ebarada ogoni mani mini Bedeleheme winigo áyu nga.
GEN 35:20 Ani hora howa Yagaba ibugua homali biagoria ege to̱le̱ mbira homali lalu mo walia helonaga duguwa Leselonaga homali biagoriani hengene. Ani hengenego ege to̱le̱ ogoni áyu wiaabo ka.
GEN 35:21 Ani hora howa nde Yagaba halu ibu dameneru ti pialu Ede dindini anda bu gimbu bu migi bialu bima iraga hene heago hapara howa dege balai anda bu hene.
GEN 35:22 Yagaba ibu dindi ogoniha heangi ibu igini Lubenehanda ibu aba one wali mende mini Biliha bereago kayu yini. Lubene ibugua ogonidagua biya layago Yagaba ibu nde hale howa keba timbuniore hene. Yagaba ibu igini hombearia (12) hene.
GEN 35:23 Ibu one Lia igini uru hene. Wahene Lubene halu mende Simiono hene. Tebone Libai halu mane Yuda hene. Dauni Isaga waragane Sebulunu imaru haga bini.
GEN 35:24 Ibu one mende Leselo berenego ibu igini kira hangu Yosebe Beniyaminila hene.
GEN 35:25 Wali mbira Leselonaga biabe bia haga Biliha berenegome igiri kira Dana Nabadalila taba henene.
GEN 35:26 Wali mende Lianaga biabe bia haga Siliba berenegome igiri kira Gada Asela taba henene. Yagaba ibugua Mesobodemia heangi igiri uruni hono wini.
GEN 35:27 Yagaba ibugua ibu aba Aisaga berearia Mamere dindi mbira Kiriada Araba tano laga winigo mini mende Heberono laga ogoni kaware wiagoria pene. Bamba Abarahama Aisagala libu dindi ogoniha haga winigo ogoniha berearia hondo pene.
GEN 35:28 Aisaga ibunaga mali hama ibinigo bibahende handari mbirani pira halira (180) halu
GEN 35:29 ibu agali waheore biru wialu homene. Ani homayagola ibu igini Iso Yagabala libunime ibu hora hene.
GEN 36:1 Iso ibunaga mini mende Idomo henego ogoni ibunaga aguanene ogodagua hama ibini.
GEN 36:2 Iso ibu Kenana wali dabu binigo mbirago Hidiali Elono henego wane mini Ada bereago dabu bini. Wali mende agali Ana wane mini Oholibama berenego dabu bini. Ana ogoni ibu Hibiali Sibeono igini hene.
GEN 36:3 Wali tebone Isimaele wane mini Basemada ibu Nebaiodo mbalini bereago dabu bini.
GEN 36:4 Ani dabu bu howa Adahanda igiri Elibasa taba henene. Basemada ibugua nde igiri Luele taba henene.
GEN 36:5 Oholibama ibugua Yausu Yalama Kora imaru taba henene. Iso ibu Kenana dindiha hearia igiri uruni hono wigi bini.
GEN 36:6 Mani howa Iso ibugua ibu hamene Yagaba helalu dindi kaundiaha hama pene. Pialu ibu one waneiginiru bibahendebi wali agali ibu baba haga hearubi ibunaga nogo sibi bulumaga bu hearubi haru hai halu mbirale bibahende Kenana dindiha wu hene wiarubi mo yai halu pene.
GEN 36:7 Iso ibugua Yagaba helalu penedagoni irane libunaga nogo tara tara hebigo dindi mbiraore ogoriani hinu hai habe nahe dewaore halu to̱layagola Iso ibu pene.
GEN 36:8 Iso ibu pialu Sia dindi barebare wiagoha pu hene.
GEN 36:9 Iso ibu Idomo hameigini Sia dindi barebare wiagoha palearunaga mamali hene. Iso ibu igini aguanene ogodagua hene.
GEN 36:10 Iso one Ada ibu igini mbira mini Elibasa hene. Wali mende Basemada berenego ibu igini Luele hene.
GEN 36:11 Elibasa igini uru mbira Temana mende Oma tebone Sebo mane Gadama dauni Kenasa imaru hene.
GEN 36:12 Iso igini Elibasa ibu one mende mini Timina berenego ibugua igiri mbira mini Amalege taba henene. Iso one Ada ibugua taba hanayagome ibu aguane hama penego uruni.
GEN 36:13 Iso one mende mini Basemada ibu igini mbira Luele taba henenego ogoni ibu igini maria henego uru Nahadabi Serabi Samabi Misabi uruni hene. Igiri uruni ti Iso one Basemada aguane hene.
GEN 36:14 Iso one tebone Oholibama bereago ibu igini tebirali Yausu Yalama Kora imaru hene. Oholibama ogoni ibu Sibeono igini Ana wane berene.
GEN 36:15 Iso aguane maru agali haguane haga binigo mini uru. Iso igini wahene Elibasa ibu igini Temanabi Omabi Sebobi Kenasabi Korabi Gadamabi Amalegebi uruni tigua Idomo dindiha agali haguane howa dindi mbira mbira wiagoria haru haga bini. Uruni ti Iso one Ada aguane bu hene.
GEN 36:17 Iso igini mende Luele ibu Idomo dindiha igini ogodagua hene. Nahadabi Serabi Samabi Misabi tibi nde agali haguane dege howa Idomo dindi maruha haru hene. Uruni ti Iso one Basemada aguane bu hene.
GEN 36:18 Ana wane Oholibama ibu Iso one bereagome ibu igini ogodagua hene. Yausubi Yalamabi Korabi tibi nde Idomo dindiha agali haguane dege howa haru hene.
GEN 36:19 Iso iginirume hono winigo ibu aguane uruni hene. Ani howa tininaga hameigini headagua haru haga haga biaga agali haguane hama ibini.
GEN 36:20 Sia ibu iginiru ogodagua hene. Sia ibu Hoali howa ibuni Idomo dindiha dege haga hene. Sia ibu igini Lodanabi Sobalabi Sibeonobi Anabi
GEN 36:21 Disonobi Esebi Disanabi henego tibi Sia igini agali haguane dege howa Idomo dindiha Hoali hearu haru haga hene.
GEN 36:22 Lodana ibu Hori Hemanala hameigininaga mamali hene. Lodana ibu mbalini mbira Timina berene.
GEN 36:23 Ani bialu Sobala ibu Alabanabi Manahadabi Ebalabi Sebobi Onamabi hameigininaga mamali hene.
GEN 36:24 Sibeono ibu igini kira Aia Anala hene. Agali mbira dindi ko wali agali nahaga wiagoha ibu aba Sibeononaga nogo dongi haru hearia iba pobohe mbira duguadaga halu ibiyaria handa walia heneyagoni agali Ana ogoni ibugua hendene.
GEN 36:25 Ana ogoni ibu igini Disono ibu wane Oholibamala hene. Ai Oholibama ibu Ana wane berene. Disono ibu Hemedanabi Esebanabi Idiranabi Keranabi hameigini uruninaga mamali hene.
GEN 36:27 Ese ibu nde Bilihanabi Sabanabi Aganabi hameigini tebira uruni tinaga mamali hene.
GEN 36:28 Disana ibu Usu Aranala hameigini kira ogoninaga mamali hene.
GEN 36:29 Hoali hameigini hearume Idomo dindiha agali haguane howa haru haga uru hene. Lodanabi Sobalabi Sibeonobi Anabi Disonobi Esebi Disanabi uruni ti Hoali howa Idomo dindiha agali haguane haga bini.
GEN 36:31 Isaraele wali agalinaga kini mbira naheangi Idomo dindiha agali uru ti kini ala hene.
GEN 36:32 Bero igini Bela ibugua kini howa Dinihaba tano wiagoria haru hene.
GEN 36:33 Ani howa Bela homayagola Bosora tanoali Sera igini Yobaba ibu kini ha aribia hene.
GEN 36:34 Yobaba homayagola nde Temanali dindi wiagoha agali Husama henego ibu kini ha aribia howa haru hene.
GEN 36:35 Ani howa Husama homayagola nde Bedada igini Hadada henego ibu kini ha aribia hene. Hadada ibugua Moaba dindiha puwa Midianali hearu baba wai bialu ti bo poda hana hene. Hadada ibu kini howa Abidi tanoha hene.
GEN 36:36 Hadada halu homayagola Masarega tanoali mbira Samala henego ibu kini ha aribia hene.
GEN 36:37 Samala halu homayagola iba Yuberedisi pedago kawareha Lehobodo tanoali Saulu mbira henego ibugua kini ha aribia hene.
GEN 36:38 Saulu halu homayagola Agabo igini Balahanana mbira henego ibu kini ha aribia hene.
GEN 36:39 Ani halu Balahanana homayagola Hadada mbira henego ibu kini ha aribia howa Pau tano wiagoria haru hene. Hadada ibu one Maderede wane Mesahaba aguane Mehedabele berene.
GEN 36:40 Iso ibu Idomoali haga binidarunaga mamali henego ti mini uru. Timina Alaba Yadede Oholibama Ela Pinono Kenasa Temana Mibisa Magadiele Irama imaru hene. Agali uruni ti Idomo dindiha hameigini mbira mbiranaga agali haguane haga bini. Idomo ogoni Isonaga mini mende winigo nde ibu agali haguane uruninaga mamali hene. Agali haguane uruni mbira mbira headagua tinaga dindi wigiwigi bialu tini hameigini headagua haru haga agali haguane haga bini.
GEN 37:1 Yagaba ibu Kenana dindi ala ibu aba Aisaga hene wiagoria hene.
GEN 37:2 Yagababi ibu iginirubi ti bialu henegonaga bi te ogo. Yosebe ibu igiri hagua dehe mali pira mbirani karia (17) hayagola ibu aba one Bili Silibalanaga igini ibu hamene biaru baba nogo sibi memeru haru haga hene. Ani haru howa ibu hamenerume ko mbira birago hondowa abale puwa ibu abahondo lamiaga hene.
GEN 37:3 Yagaba ibu mini mende Isaraele ibugua wahe howa ibu igini Yosebe hono winigonaga igini maru gubalini emene nira lowa Yosebe gubalini timbuni haga hene. Ani bu howa ibugua aga bayale dagarenaga gi lu biagimbu biaga mbira wabuwa ibu igini Yosebe mini.
GEN 37:4 Yagaba igini maru hearume handalu hearia ti abahanda Yosebe gubalini timbuni halu ti emene mangaho heago hondowa tigua Yosebehondo keba timbuniore howa ibuhondo bi bayale nalaga hene.
GEN 37:5 Mbiraga mbirungi Yosebe ibugua emaga mbira handayago ibu hameneru lamini. Lamiyagola tigua hale howa keba timbuni hene.
GEN 37:6 Yosebehanda ti lamialu lalu, I̱na emaga mbira handarugo loliya hale hadaba.
GEN 37:7 Ina bibahende mabuha hai howa widiore kabu bigibigi bialu hemaria ai kabuni i̱naga biago ibu tigabi heyu heagola tínaga biaru bibahendeoreme i̱naga heyu heagoha ho mabu buwa bulu paliai hearia handaru, lene.
GEN 37:8 Ani layagola ibu hamene biarume lalu, Ai í̠ inanaga handame haga kini haregola ina bibahende í̠na haru holebedabe, lowa ti bibahendeme handabe manga hai hene.
GEN 37:9 Yosebehanda ibu hameneruhondo emaga halu mende hondowa tihondo lamialu lalu, I̱na emaga handalu hewaria nibi egebi yakundi beriarubi bibahende i̱naga wanakuihayagi ibuwa ma podalu bulu paliai hayaria handaru, lalu lamini.
GEN 37:10 Emaga ogoni handayago ibugua ibu ababi lamini. Lamiyagola ibu abahanda lalu, Ogoni agile emagadabe. Í̠na manda beregola i̱bi í̠ ai̱yabi í̠ hamene karubi ina bibahende í̠ kegoria ibuwa í̠naga wanakuihayagi ma podalu ge duli hanga holeberamadabe, lene.
GEN 37:11 Ibu hamene biarume keba timbuniore ho heagola ibu aba ibunime emaga ogoni agoale handayadabe lowa mitangi tangi bialu berene.
GEN 37:12 Horo mbirungi Yosebe hamene biaru ti Segeme dindi wiagoria ti abanaga nogo sibi haru hole pene.
GEN 37:13 Ti ani peagola Yagaba ibugua Yosebehondo lalu, Í̠ hameneru Segeme dindini nogo sibi haru kago hondo pu, lene. Ani layagola Yosebe ibugua ladai bialu lalu, I̱na hondo porogo, lene.
GEN 37:14 Ani layagola ibu abahanda lalu, Áyu í̠na puwa í̠ hameneru tibi nogo sibirubi agua kabe handabe. Handalu ti agua hea lalu abale langule dai bibe, lene. Ogoningi Isaraele hameigini ti Heberonoha dindi ulini wiagoria hene. Yosebe ibu abale Segeme dindi wiagoria anda pialu
GEN 37:15 abale ibaga bialu hearia agali mbirame hondowa lalu, Í̠ agile tai berebe, lene.
GEN 37:16 Ani layagola Yosebe ibugua lalu, I̱ hameneru tai berogo í̠na ti mbirani nogo sibi haru hearia handaribe, lene.
GEN 37:17 Ani layagola agali biagome ladai bialu lalu, Ti oali nahe Dodana dindi piya, lene. Ani laya handala Yosebe ibu hameneru piyiyadagua abale pialu Dodana dindi anda puwa ti handa walia hene.
GEN 37:18 Yosebe ibu kaundia ibalu heago de hondowa ibu hamene biarume Yosebe homelo bo wahami̱ya lowa lo manda bialu berene.
GEN 37:19 Tini degedege ladene bialu lalu, Handa naberego emaga handaga biago amu ibiragoni.
GEN 37:20 Ai homelo bowa ibunaga tingini iba biraga uli nai ngaruniha bape hami̱ya. Iname ibu nogo gabuame bo nayiya lami̱ya. Ani beramagola ibugua emaga handaraligo agua birabe handami̱ya, lene.
GEN 37:21 Tigua ogonidagua larimigo hale howa Lubene ibugua Yosebe bo waholene hame nale howa lalu, Ibu homelo nabami̱ya.
GEN 37:22 Inanenaga giha howa homelo bolene nakarulapego. Ibu dindi wali agali nahaga ogoha iba biraga uli yobi o ngagoha minu bape hami̱ya, lene. Ani lenedagoni tene ibugua Yosebe ibu aba karia haru dai bule manda buwa lene.
GEN 37:23 Yosebe ti bereagoria ibiyagola tigua abaleore minuwa ibunaga aga ibu abahanda mini baya biagimbu biaga biago minu golene.
GEN 37:24 Golo ngelalu Yosebe minu yalu puwa iba biraga uli mbira iba nabere yobi wiagoha bape hene.
GEN 37:25 Ani bialu ti daibu biruwa tomo nalu beramiore dege Isimale hameigini maru Gileada dindi howa tinaga nogo kameleni dabudabu bayaleore ira lini ibaneme wabini marasinirubi weli ngabiorebi muni dewaoreme yolo biagago uruni Iyibi dindiha muni tagu pole ibiyaria hendene.
GEN 37:26 Ani ibiyagola Yudahanda ibu hameneruhondo lalu, I̱na hamene inaneme ogoha bo do holene nakarulapedago
GEN 37:27 ibu wali agalinaga biabe bia haga helo muni miagadagua áyu agali urunime muni ngi lowa Yosebe muni taguimi̱ya. Ina hamene darama mbiraorego nde inaneme bo waholene nakarulapedago, layagola ti bibahendeme ogoni karulapego ani bimi̱ya lowa berene.
GEN 37:28 Igiri biaru ti bi ogoni lalu berearia agali Midiana howa maru nde tinaga dabudabu maru muni tagu pole harigani pialu howa handalu hearia Yosebe uliha berearia hondowa dugu yamini. Ani biyagola Yosebe hamene biaru tigua Isimale aria biaruha muni taguini. Isimale aria biarume muni kuni siliba pira kira (20) Yosebe hamenehondo mialu Yosebe Iyibi dindi haru pene.
GEN 37:29 Mani Lubene ibu iba uli biagoha Yosebe berelayago hondo dai bialu hearia Yosebe nabereyane hondowa ibu dara timbuniore howa ibuninaga aga lerelene.
GEN 37:30 Ani bialu ibu hameneru hearia dai buwa lalu, Yosebe iba uli biagoha nabereyago. Aiore agua buabe, lene.
GEN 37:31 Ani layagola tigua nogo meme mbira bowa Yosebenaga aga biagoria darama wai hene.
GEN 37:32 Ani bialu tigua aga darama bagabi biago ti aba berearia yalu dai buwa lalu, Aga ogo namugoha winiyago ogoni í̠ igininaga mbauledago de handa bia, lene.
GEN 37:33 Ani layagola ti abahanda aga biago hondowa lalu, Ogoni i̱ igini Yosebenaga agaoredago. Ai ibu nogo gabua mbirame balu naore biyadagoni, lene.
GEN 37:34 Ani lowa Yagabahanda ibu iginiore dara timbuniore halu ibunaga aga lerelalu dara howa aga biagane ale bu berene. Horo dewaore ibu igininaga dara howa dugu bialu biraabo hene.
GEN 37:35 Ani bialu bereagola ibu waneigini maru hearume ti abanaga bu mini mo palia hole lowa bi layagolabi nahondoleore biruwa lalu, I̱na dugu bialu kone dege i̱nibi homalu homene dindiha puwa ibuni iya haru lola halu waholebero, lene. Ani lowa Yagaba ibu dugu dege bialu bira ho wiaabo hene.
GEN 37:36 Midianali biaru tigua Yosebe Iyibi dindiha haru halu puwa muni taguini. Iyibi dindi kini kagonaga wai biaga ami agali karu haru haga mbira ibu mini Podiba hene. Podiba ogoni ibunaga biabe bia haga Yosebe helo Midianali biaru ti muni mialu Yosebe ibu andaga haru pene.
GEN 38:1 Horo uruningi Yuda ibugua ibu hameneru helo wahalu Adulama tanoha agali mbira mini Hira henego ibula hama pene.
GEN 38:2 Ani pu howa Kenanali mbira mini Sua heago wane mbira berearia hendene. Ani hondowa ibugua wandari ogoni ibu dabu bialu libu dindi ogoniha hene.
GEN 38:3 Mani wali o biagome igiri mbira taba hono bereagola Yuda ibugua igiri gali ogoni mini Ere wini.
GEN 38:4 Emene howa nde wali biagome igiri mende taba hanayagola ibu mini Onana wini.
GEN 38:5 Wali biagome igiri tebonebi taba hanayagola ibu mini Sela wini. Yuda ibu Kesibi dindi wiagoria heangi walime igiri Sela ogoni taba henene.
GEN 38:6 Maniore howa igiri uruni andaho hai heagola Yudahanda ibu igini wahene Erenaga wali mbira mini Tama bereago dabu bia hene.
GEN 38:7 Ere ibugua Anduane Homogonaga deni howa mana ko bialu hearia Anduane Homogohanda ibu bo wahene.
GEN 38:8 Ani homaya handala Yudahanda ibu igini mende Onanahondo lamialu lalu, Inanaga mana ngamagome í̠ hamene waneigini mbira nahonowi kaore ibu one dalo berelalu homayagua nde hamene mende kago ibula bira aribia holene nga. Ani biruwa ibu hamene homayagonaga waneigini ibuni henegoria ha aribia helonaga hamene kagome hono wia holene nga lo wini ngago ai wali dalo Tama bedago í̠la biralibu, lene. Ani biruwa ibugua waneigini í̠ hamene homayagonaga hono wia helo, lene.
GEN 38:9 Ani layagola Onana ibugua waneigini ibuninaga helo ndoyagola ibu anidagua bulene turu nahe hene. Ani howa ibugua wali dalo ogonila mandagi padabira ibu hamenenaga waneigini holilono Onana ibu ohaga hene.
GEN 38:10 Onana ibugua anidagua bialu henedagoni Anduane Homogonaga deni howa mana ko wiago biyagola Anduane Homogohanda Onanahondo keba halu Onanabi bo wahene.
GEN 38:11 Ani biyagola mani Yuda ibugua ibu aruni Tamahondo lamialu lalu, Ainde í̠ agalini homayagonidago mani i̱ igini Sela anda halu wali dabu bibehe kagola ogonila dabu bilibulo áyu ibu anda helo tagi í̠ aba andagaha birule pu, lene. Yuda ibugua bi o layadagoni henene ndo ohowa ibu igini kirali biagolabo homayadagua Selabi homolilono ani lene. Ani pu laya handala Tama ibu nde ibu aba andaga pu berene.
GEN 38:12 Luore ho wahowa Yuda one Sua wane biago homene. Ani homayagola hora howa duguandaru hai halu horo mbirungi agali marume Timina dindi wiagoria ibunaga nogo sibi irini podalu heagola ogoni handama Yuda ibu pole pene. Pialu ibu nenege Adulama tanoali Hira libu haru mandagi pene.
GEN 38:13 Ani pole pialu heagola agali mbirame Tamahondo lalu, Í̠ aruni biago Timina dindiha ibunaga nogo sibi irini podole ibira, lalu lamini.
GEN 38:14 Tama ibugua lo mitangi bialu ai Sela wahe karulape kagoyu libu dabu bulene mo tiga nabi hearia hendene. Ani hondowa ibugua dalo nu hono bereago dugu ngelene. Ngelowa aga bu aribia halu aga emene mbirame ibunaga dengui buyi halu Enaimi dindi mbira Timina dindi polene hariga kaware wiagoria handatagiho berene.
GEN 38:15 Ani berearia Yuda ibu ibuwa handalu hearia wali biago ibu labolabo emene mbirame dengui buyiho bereago hondowa wali ogoni bayanda wali bedabe toba hene.
GEN 38:16 Ani hondowa Yuda ibugua wali hariga gibuni wiagoria bereago ibu aruni biago bereago nahende wali tara bedabe toba howa ibugua wali biagohondo lalu, Iya kayu bibiya hameledogo kayu biba, lene. Ani layagola wali biagome ibuhondo lalu, Ani bibiya dege í̠na i̱ agile nguleberebe, lene.
GEN 38:17 Ani layagola Yudahanda lalu, I̱ nogo meme bu kogo igini mbirago í̠naga ibilolebero, lene. Ani layagola wali biago ibugua lalu, Ogoni bayale larigo í̠na bi laregoni heneneore buleyagua walia halu áyu mbirale mbira i̱ giha yu biruliya ngerene. Mani nogo meme igini ogoni haru eberegola í̠ni ngiadai buliya ngi, lene.
GEN 38:18 Ani layagola Yuda ibugua hale halu lalu, Bi larogoni henene bulebero lalu mbira agile nguliya hameledebe, lene. Ani hale hayagola wali biago ibugua lalu, Mbirale í̠naga magibi ogoni hende howa pu mani ngegobi ngialu í̠naga halimbu yidegonibi ngi, lene. Ani layagola mbirale ngi layaruni mialu Yuda ibu wali biagola palene. Ani biyagola wali biago mani ibu gali bere berene.
GEN 38:19 Tama ibu andaga dai buwa aga emene ibunaga dengui buyi hayago golo ngelalu ibu agalini homene dara howa dalo nu hanaga dugu wini biago lone hono berene.
GEN 38:20 Mani howa Yuda ibugua Hirahondo lalu, Nogo meme igini mbira haru halu puwa wali biago mialu i̱naga mbirale wali biagome mo yu birayago yu dai bule pu, laya handala Hira ibu pene. Pialu hearia wali biago handa walia nahe taya bu wahene.
GEN 38:21 Ani taya bu wahowa Hira ibugua agali maru dindi ogoniha haga hearuhondo lalu, Bayanda wali mbira Enaimi harigani biragayago agoha bedabe, lene. Ani layagola tigua ladai bialu lalu, Bayanda wali mbira ogoha nabiraga, lene.
GEN 38:22 Ani laya handala Hira ibu Yuda hearia dai buwa lalu, Wali biagoni nabere tayabu waharu. Agali dindi ogoniha haga hearumebi bayanda wali mbira dindi ogoniha nabiraga laya, lene.
GEN 38:23 Ani layagola Yudahanda lalu, Wahalu taya nabi mbirale uruni wali ogoni ibu yu berelo waha. I̱naga bi larugo la hondo naholenaga nogo meme ogoni haru pu larugo ai wali agali bu karume iya hondo oba holigo nde í̠na ibu handa walia naharidago wahalu waha, lene.
GEN 38:24 Ani lalu ege tebira agima peagola maru hearume Yudahondo lamialu lalu, Í̠ aruni Tama ibugua agali kayu bialu bereneyago ai áyu ibu gali bere beda, lalu lamini. Anidagua lamiyago hale howa Yudahanda hongo howa lalu, Wali ogoni balu irani delole pudaba, lene.
GEN 38:25 Ani layagola tigua Tama irani bo delole haru pialu hearia Tama ibugua Yudanaga mbirale biaruni yalu pudaba lalu bi ogodagua lawia hene. I̱ mbirale uruni ngiaga agali kagonaga gali bere bedogo ai mbira ibuninaga magibi ogoninaga pu hende howa mani wiagabi halimbu ogonibi ainagadabe dabo handabe, lalu wia hene.
GEN 38:26 Ani layiyago hale howa Yuda ibugua mbirale biaruni hondowa lalu, Mana ko ogoni wali ogonime bini ndo i̱na birudagoni. Ani birudago ainde wali ogoni i̱ igini Sela ibu dabu bilonaga mo tiga nabi dege harudago ai dabu bilo, lene. Ani lalu Yuda ibu wali ogonila mani lone napale wahene.
GEN 38:27 Tama ibu gali taba honolene tu bereagola handalu hearia ibu tombeha gali labo laboli bereyane hendene.
GEN 38:28 Anigo ibugua gali taba honole biyagola mbira gi ala pani hayagonaga tidawali Tama biamogo bialu bereagome pu daramabi mbira gini pongo bia hene. Ani pongobia howa ibugua lalu, Gali ogoni ibu ala pani haya, lene.
GEN 38:29 Ani lo berearia gini pu helayago yamialu dai biyagola ibu hamene mendego ala taba henene. Ani biyagola wali biago ibugua lalu, Í̠ mani taba honolene winigo ai í̠ni hongome í̠ ala ibirida, lene. Ani lowa ibu mini Perese wini.
GEN 38:30 Mani ibu hamene pu daramabi gini pongo bia hayago taba henene. Taba hanayagola ibu mini Sera wini.
GEN 39:1 Isimaleali biaru tigua Yosebe Iyibi dindini haru pu heleagola Podibahanda agali biaru muni mialu Yosebe haru pene. Podiba ogoni ibu kini mamage haga ami agali hearunaga hondo haga haguane howa ibuni Iyibiali dindi tene hene.
GEN 39:2 Anduane Homogohanda Yosebe baya hangu handaya ho heagola ibugua Podiba andagani howa biyago bibahende bayale hangu hai hene.
GEN 39:3 Podibahanda handalu hearia Yosebe ibuha Anduane Homogo ibula haru howa ibugua biyago bibahende bayale dege hayago hendene.
GEN 39:4 Ani biyago hondowa ibugua Yosebehondo lalu, I̱ andagaha bibahende ngoruni handameho habe, lene.
GEN 39:5 Ogonidagua biyagola Podiba ibu andagaha wiaru bibahende bayale hai hene. Anduane Homogohanda Yosebe handaya ho heagola ani bini. Ibunaga mabu andabi maruale wiarubi ani dege bini.
GEN 39:6 Aniore biyagola Podiba ibunaga mbirale wiaruni Yosebenaga giha ya hai halu ibu tomo nolenego hangu mitangi biaga hene. Yosebe ibunibi nde baya henene baya mbira halu hongo pururuleore heneya.
GEN 39:7 Ani heagola Podiba one ibu Yosebe dimagoli ho biruwa lalu, Iya palibiya íbu, lene.
GEN 39:8 Ani layagola Yosebehanda ladai bialu lalu, I̱naga agali haguane ibugua ibu andagaha ngaru bibahende i̱na hondo holiya ngiai hayago tene i̱ha ko mbira bulubada manda nabi howa ani biyagoni.
GEN 39:9 Áyu ibunaga mbirale ngaru bibahende ibuni handaya ho holenedagua i̱na kogoni. Ibugua i̱hondo ogo bibe nabibe lalubi mbira nale. Bibahende i̱na hondo hai kogoni. Ai í̠ dege ibuni hangu one bedego. Ibugua i̱hondo í̠la palilibu lalu mbira nalego. Ngode Datagaliwabenaga deni howa i̱na mana ko ngubi ogoni bulene nawiore, lene.
GEN 39:10 Horo bibahendengi howa wali ogoni ibugua Yosebehondo kayu yaba lalu laho wiyagola Yosebe ibu walila mandagi napale ohalu haabo hene.
GEN 39:11 Horo mbirungi Yosebe ibu andaga tamuha biabe mbira bulene wiyagola anda pene. Ogoningi agali biabe biaga mbira nahe ibuni hangu hene.
GEN 39:12 Yosebe ibu tamuha anda pu heagola Podiba one biagome aga biagoria minu yani howa lalu, Ai palibiya íbuore bia, lene. Ani lalu hea handala Yosebe ibunaga aga biago wali ogoninaga giha golo ya helalu ibuni ibida tagira pene.
GEN 39:13 Wali biagome handalu hearia Yosebenaga aga yu wahalu tagira piyagola
GEN 39:14 ibugua agali biabe bia haga maru hearu olowa lalu, Uru-o ai handadaba. I̱ agalini ibugua Hiburuali haru ibiyagome i̱na mo taga hole o bialu hayadago handadaba. Ibugua i̱ tamu paliagaha anda ibuwa mandagi paliba layagola i̱na hongo howa koaba larugoni.
GEN 39:15 I̱na hongo howa koaba larugola ibunaga aga i̱ tamuni wia handala gerai lalu ibida piya, lene.
GEN 39:16 Ani lowa ibugua Yosebenaga aga biago ibu agalini andaga ibiragola walia hole lalu yu biraabo hene.
GEN 39:17 Ibu agalini andaga ibiyagola bi ala layadagua dege lone lalu, Hiburu igiri biabe bia haga í̠na haru ibirigonime i̱ tamuha anda ibuwa i̱ minulebiya.
GEN 39:18 Ani biyagola i̱na hongo howa koaba laru handala ibunaga aga i̱ tamuha ibira halu gerai ibida piya, lene.
GEN 39:19 Yosebenaga agali haguane biagome bi uruni layago hale howa ibu keba gibiore hene.
GEN 39:20 Ani howa ibugua ami agali hearuhondo lalu, Yosebe minu yalu puwa kininaga garabaya anda wiagoha garabaya helo heladaba, layagola tigua haru puwa helene.
GEN 39:21 Anigo Anduane Homogo ibu Yosebela haabo howa Yosebehanda biyago mo bayale haga bialu hene. Ani bialu Anduane Homogohanda agali garabaya haru haga heagome Yosebe mitangi bialu hame lelo biamogo bigi bialu hene.
GEN 39:22 Agali ogoni ibugua Yosebehanda garabaya hearu bibahende handameho helo dabo helene. Ani biyagola Yosebehanda garabaya andaha biabe bulene wiaru bibahende ibugua dege hondo hai helene.
GEN 39:23 Anduane Homogohanda Yosebe bayuwaore haru heagome biabe ibugua biyaruni aria mbira lone agali haguane biago ibuni handa dai bibe nahe hene.
GEN 40:1 Yosebe ibu lu dege heagola kininaga waini iba hambu miaga heneyagobi kininaga mberedi anda hondo haga heneyagobi libugua mana kinihanda hame naleadagua mbira biribiya.
GEN 40:2 Iyibi dindi kini heagome keba timbuniore howa
GEN 40:3 agali kirali biago labo garabaya haru haga haguane mbira andagaha Yosebe garabaya hayagoha dege helene.
GEN 40:4 Garabaya haru haga haguane biagome agali kirali ogoni labobi Yosebehanda haruha dege bibe layagola libu garabaya andaha luore hene.
GEN 40:5 Horo mbirungi agali kininaga waini iba hambu miaga biagobi kininaga mberedi anda hondo haga biagobi libu harume emaga mbira hendene. Libunaga emaga ogoni labo mbiraore ale ndo tara tara handaribiya.
GEN 40:6 Egerebagi Yosebe ibu hondo ibalu hearia libugua genda timbuniore ho bereria hendene.
GEN 40:7 Ani hondowa Yosebehanda libuhondo hale halu lalu, Libu handalu koria genda yu berene mbauledago agua biyabe, lene.
GEN 40:8 Ani layagola libugua Yosebehondo ladai bialu lalu, Iyame emaga mbira hendenego. Ai mbiralime irane ogoaleda lalu langulene nahedagola mini burugulo bedabagoni, lene. Ani layago hale howa Yosebehanda libuhondo ogodagua lamini. Ngode Datagaliwabehanda hangu agalime manda nabibehe ngaru manda biaihe kago. Ai libugua emaga handaribidago langidaba, lene.
GEN 40:9 Ani layagola kininaga waini iba hambu miaga biago ibugua ogodagua lene. I̱na pu lini daga mini gerebi mbira hearia handaru.
GEN 40:10 Pu ogoninaga magane tebira hea. Ai abaleore yuni anda halu pabua baya. Pabua balu lini abale do girigere laya. Ani dowa abale ibiri ndigi ndugu laya.
GEN 40:11 Ai i̱na Iyibi kini kagonaga gabo be yu howa lini deago daga bialu ibane gabo be yarugoniha pingido baanda howa kini ibuni nelo migi bialu haruya, lene.
GEN 40:12 Ani layagola Yosebehanda lalu, Ira magane tebira handarigo ogoni horo tebira ale.
GEN 40:13 Horo tebira howa kinihanda í̠ haru dai buwa í̠ninaga biabe biaga wiyadagoha bialu helolebira. Ani biragola í̠ni abale biagadagua kininaga waini iba hambu mialu holebere.
GEN 40:14 Ani hambu mialu howa i̱ mitangi bialu dara habe. Luore garabaya ogoha haho wirugo. Ai nde i̱ golope halu tagira pu lelo kiniore lamia habe.
GEN 40:15 Bambaore i̱ Hiburu dindiha hewaria i̱ hamenerume agali tara ndelo miyagola minu yalu ibinigo. Ai oali Iyibi dindini kagua mbira nabi hewaria tigua bameore ogoha garabaya helenego kogoni, lene.
GEN 40:16 Agali mende kininaga mberedi anda hondo haga biago ibugua agali kininaga waini iba hambu miaga biagonaga emaga handayago baya hangu latagi hayago hondowa ibunagabi nde Yosebe ogodagua lamini. I̱bi nde emaga handalu hewaria mbasigedi nu tebira mberedi hono to̱lego haguani yaruya.
GEN 40:17 Mbasigedi nu daligaore yarudagoha mberedi mbisigedibi kini ibuore gubalini haga ale dege yiwaria egame ibuwa nalu hearia handaru, lene.
GEN 40:18 Ani layagola Yosebehanda lalu, Emaga ogoni irane ogodagua. Mbasigedi tebira ogoni irane horo tebira.
GEN 40:19 Horo tebira ogoni howa kinihanda í̠ garabaya golalu haru tagira polebira. Ani puwa ibunaga ami agali karume í̠naga ma puguadaba lolebira. Ani lowa í̠naga tingini ira mbira wa howa ogoriani mo pagaho ngeledagola egarume buduyu togolowa nalu holebira, lene.
GEN 40:20 Horo tebira layago hai howa kini taba henenego horo mitangi bialu ibunaga biabe biaga agali haguane hearunaga tomo timbuni dawene. Ani buwa agali kirali biago labo haru ibuwa agali haguane biarunaga deni íbu helene.
GEN 40:21 Ani íbu heagola kini ibugua lalu, Waini iba hambu miaga biago ibu biabe ala biagadagoha bule pelo, lene.
GEN 40:22 Ani lowa kinihanda lalu, Agali mberedi anda hondo haga biago irani bo derela hole pudaba, lene. O biyadaruni Yosebehanda ogonidaguaore bulebira lalu libugua emaga handaribingi layago lola hene.
GEN 40:23 Agali kininaga waini iba hambu miaga biago ibugua Yosebehanda kini lamibe layago embedaho waore hene.
GEN 41:1 Mali kira piyagola Iyibinaga kini ibugua emaga mbira hendene. Ibuni iba Naili angeni howa handalu hearia
GEN 41:2 nogo bulumaga kariaore bayale habanehe timbuni dege degeru ibaha howa tagira ibalu iba angeni tani bayale heago nalu hearia hendene.
GEN 41:3 Ani hondowa handalu hearia nogo bulumaga karia mende tingini ko hongo nahe kuni hanguhe ibaha howa tagira ibiyaria hendene.
GEN 41:4 Nogo ko urunime nogo bayale karia ala íbu hayaru bo hengeda howa nai hayaria hendene. Ani hondowa dege kini ibuni dengala halu heyini.
GEN 41:5 Lone palia dai buwa kini ibugua emaga halu mende handalu hearia ladi ale mini widi irane mbira hangume lini karia dearia hendene. Widi o dayadaruni timbuni bayale dowa nolene dewa pale dearia hendene.
GEN 41:6 Mani widi iraneni lini karia mende dearia hendene. Ogoni bayale ndo dindi ko ni daho wiaga wiagoha howa puyabu poboyogobi ibiyagome do yogobu wahene howa lini deago emene ko habane napale hadogoe ale de hendene.
GEN 41:7 Widi lini ko girali de biarume widi bayale ala dayaru bo nalu mbedogo biai hayaria hendene. Kini ibu heyuwa emaga handaruyane hendene.
GEN 41:8 Ani hondowa kini ibugua mini burugulo biruwa agali mandabi dewa hearubi agali mini bogabi mbirale wiado kago handa walia haga hearubi bibahende olo ngoai hene. Ibai hayagola ibunaga emaga handayago lamiyagola mbiralime ogoni irane ogo aleda lalu lamibe nahe hene.
GEN 41:9 Ani biyagola mani agali kininaga waini iba hambu miaga biagome kinihondo lalu, Áyuore mana tiga nabi mbira bu harudago latagi haro.
GEN 41:10 Ala halu mbiru kini í̠na agali í̠naga mberedi anda handaya ho haga biago iya í̠naga garabaya haru haga haguane í̠ni mamage haga biago andagaha garabaya helarigoni.
GEN 41:11 Ani birigola garabaya andaha howa iya harume emaga mbira hendenego ogoni kirabali galone tagira piya.
GEN 41:12 Hiburu igiri mbira í̠naga garabaya haru haga haguane kago ibunaga biabe bia haga heneyago ina haru mandagi garabaya henego ogoni hondo lamiriba.
GEN 41:13 Ani lamiribagola ibugua langiyago henene layadaguaore biai hayagoni. I̱ biabe bialu haga wirugoria bule dai bialu agali mberedi anda handaya ho haga biago tigua bo derela harimigoni, lene.
GEN 41:14 Iyibi dindi kini biagome bi ogonidagua layago hale howa Yosebe garabaya andaha hearia hondo pudaba layagola tigua abale garabaya andaha Yosebe hearia puwa lamini. Ani lamiyagola Yosebe ibu angari mialu aga bayale karula bigi biyagola agali ibiyaru tigua kini andaga abale haru pene.
GEN 41:15 Haru piyagola kini ibugua Yosebehondo lalu, I̱na emaga mbira hendenego agali bu hearume ogoaleda lalu mbira nalangiyagola howa agali marume lalu, Í̠na emaga hendenego ogoaleda lalu bulebiragoore tiga tiga latagi harili laya, lene.
GEN 41:16 Ani layagola Yosebehanda kini biagohondo lalu, I̱nime latagi habe nahe kogo. Ngode Datagaliwabehanda emaga ogoni irane ogoaleda lalu latagi haragola í̠na hale howa turu holebere, lene.
GEN 41:17 Ani layagola kinihanda lalu, Ai i̱na emagaha iba Naili angeni pu haruya.
GEN 41:18 Ogoriani howa handalu hewaria nogo bulumaga timbuni hongoheni habanehe dege dege karia ibaha howa tagira ibuwa iba angeni tani nalu hearia handaru.
GEN 41:19 Mani nogo bulumaga karia ko tingini hongo nahe kuni hanguhe kooreru Iyibi dindini nogo urunibi mbira hearia handa nabinigo ibaha howa tagira ibiyaria handaru.
GEN 41:20 Ani bialu nogo ko urunime nogo bayale ala hayaru bo nai haya.
GEN 41:21 Tigua nogo bayale biaru bo nai hearia tinaga tingini nogo biaru bo nene mbaule bayale ndo koore dege hearia handaru. Ogoni handalu dengala haru.
GEN 41:22 Mani palia dai bialu hewaria emaga halu mende handaru. Ogoni i̱na ogodagua handaru. Widi irane mbirani lini karia dearia handaru. Ogoriani widi bayaleore dowa nolene dewa palu to̱laiheni do nole tu dearia handaru.
GEN 41:23 Ogoni hondo hewaria dege widi mende bayale ndo dindi ko ni dege daho wiaga wiagohayagi howa puyabu poboyogobi ibiyagome do yogobu wahene howa lini habane napale hadogoe ale dearu handaru.
GEN 41:24 Ai widi ko yogobi habane napale dayadagonime widi bayale lini timbuni de heago bo nalu mbedogo biai hayaria handaru. Ani hondowa agali mandabi dewa hearubi agali maru mini bogabi mbirale marume handabe nahe ngaru handa walia haga hearubi bibahende íbu ngoai hadaba lowa tihondo lamialu hewaria mbiralime ogoaleda lalu handa walia nahaya, lene.
GEN 41:25 Ani lai hayagola Yosebehanda Iyibi dindi kinihondo lalu, Emaga ogoni kirabali galone mbiraore hangunaga. Ngode Datagaliwabehanda mbirale mani bule ngagonaga mo walia hayadago.
GEN 41:26 Nogo bulumaga karia handaridagobi widi lini karia handaridagobi uruni mali karia ale. Uruni manane mbiraore ale dege walia haya.
GEN 41:27 Ani bialu nogo bulumaga karia ko ibiyadarubi widi ko habane napale puyabu poboyogobime do yongo bini dayadarubi uruni bibahende mali kariani hina gari timbuni polebiragonaga walia haya.
GEN 41:28 Uruni mani ogodagua bulebira lalu Ngode Datagaliwabehanda í̠ni walia hayada lalu langerogoni.
GEN 41:29 Ai mali kariani Iyibi dindi bibahende tomo timbuni bu payabu wulebira.
GEN 41:30 Ani buwa mani mali karia mendeni hina gari timbuniore polebira. Ogoningi Iyibi wali agalime tomo dewa payabu wiyaruni mitangi bu dai bibe nahe mo ko howa homolebira.
GEN 41:31 Iyibi wali agalime mali dewani tomo bayale dewa bu payabu nalu hayaru mitangi bu dai bibe naheore mo ko holebira.
GEN 41:32 Ai áyu ogoni mani Ngode Datagaliwabehanda ogodagua bulebero lalu í̠ manda bibelonaga emaga kira ogoniha howa walia hayago. Áyu í̠na nde gibi ogoni mani tagira ibulubada lowa mandaore buwa holene nga.
GEN 41:33 Ai áyu í̠na agali manda timbunibi howa bogabi mbira Iyibi dindi bibahendeni biabe bialu helo dabo helolene nga.
GEN 41:34 Ani helowa agali marubi dabo helolene nga. Agali uruni tigua mali kariani tomo bayale anda haragoha tomo uruni dau halu tale buwa daunigo gabumanehondo dagisi mulene nga.
GEN 41:35 Tomo dagisi mini uruni agali dabo helene biaru tigua mo ngoai halu tano mbira mbirani tomo mo ngoaiho wulene anda buwa uruniha mo ngelolene nga.
GEN 41:36 Ani biragola mali kariani hina gari ibirangi Iyibi wali agali ti hina tomo agali haguane uruni tigua mo ngoai howa tomo andaha wiyaru karulape nalu howa ti nahomolebirago, lalu Yosebehanda kinihondo ani lamini.
GEN 41:37 Iyibi dindi kinibi ibunaga agali haguane hearubi tigua Yosebehanda bi layagoni karulape laya manda buwa ani bimi̱ya lai hene.
GEN 41:38 Ani lowa Iyibinaga kini ibugua lalu, Ngode Datagaliwabenaga Dinini agali ogo ibuha kago. Ai iname agali mende biabe ogoni bilo abiale taya bimi̱yabe, lene.
GEN 41:39 Ani lowa kini ibugua Yosebehondo lalu, Ngode Datagaliwabe ibunime í̠hondo mbira ogoni walia hayagoni. Ai iname agali maru manda timbunibibi boga timbunibirubi lone abiale daboloma̱yabe.
GEN 41:40 Áyu í̠na biabe ogoni hondo habelobi Iyibi dindi bibahende handaya ho habelobi i̱na í̠ gabumane haguane habelo dabo helolebero. Kini i̱nime dege bolangua ho holiya. Maru bibahende í̠naga andaneha hai helo, lene.
GEN 41:41 Ani lowa kinihanda Yosebehondo lalu, Ai hale habe. Áyu i̱na Iyibi dindi bibahende handame ho habelo gabumane haguane í̠ dabo helarogoni, lene.
GEN 41:42 Ani lowa kini ibunaga gi hondoneni wiaga magi wiago Yosebenaga gi hondoneni golo karula halu aga bayaleore wiagobi Yosebe karula howa pu seni ngolome wabini mbira Yosebe mani wia halu bini.
GEN 41:43 Ani buwa kininaga garo ale mini karisi nogo hosime gili laga dewa winigo mbira kini ibuninaga mende wiyadagoria Yosebe berelowa harigani agali biabe biaga hearume bamba halu lalu, Wali agali karunaga haguane ibirago habagi hadaba, laga bima pene.
GEN 41:44 Ani lowa kini ibugua Yosebehondo lalu, Ai i̱na bi ogodagua larogoni. Iyibi dindini karu ti bibahende í̠ hale nahe howa tini hangume mbirale mbira nabulebiraore. Tigua í̠hondo hale ala holene wulebira, lene.
GEN 41:45 Ani lowa kinihanda Yosebenaga mini aribia halu ibu mini Sabanada Panea wini. Ani bialu loma binigo mo miaga agali mbira Heliobolisi dindi wiagoria henego mini Podibera ogoni ibu wane mbira Asenada berenego Yosebe ibu dabu bilo mialu bini. Ani bigi biya handala Yosebe ibu Iyibi dindi bibahendeha de handama ibaga biai hole pene.
GEN 41:46 Yosebe ibuni mali pira tebira (30) hayagola Iyibi dindini kini kagonaga biabe ogoni bilo dabo helene. Ani biya handala Yosebe ibu Iyibi dindi bibahendeore handai hole kini ibu helalu pene.
GEN 41:47 Mali kariani tomo bayale Iyibi dindini anda hai hene.
GEN 41:48 Ani anda hayagola Yosebehanda dindi tano mbira mbirani tomo anda timbuni heagoha widi mo mogobu wialu hene.
GEN 41:49 Tomo mo mogo binidaruni daga aulolebe tobahe. Daga labe nahe ibamu ale mo mogobu wini.
GEN 41:50 Mali hina gari timbuni polene wiyago tagira naibi dege howa Yosebe one Asenadahanda igiri kira taba henene.
GEN 41:51 Ani taba hanayagola Yosebehanda lalu, Ngode Datagaliwabehanda i̱ biamogo biyagola i̱na i̱naga aba ai̱ya damenerubi i̱ni tandaga timbuni handalu harugobi bibahende embeda harugoni, lowa ibu igini mbiragonaga mini Manase wini.
GEN 41:52 Ani lowa lalu, Ai Ngode Datagaliwabehanda dindi ogoha genda yu hewagola i̱ biamogo bialu waneigini ngiyadago, lowa ibu igini mendego mini Eberaimi wini.
GEN 41:53 Ani lowa hearia mali bayale debengi karia biago piai hene.
GEN 41:54 Ani bialu ko hina garingi tagira ibulene abale Yosebehanda lo wiyago tagira ibini. Dindi bibahendeha hina gari timbuni tagira piyago Iyibi dindiha dege hina gari nahe tomo dewa ngelo hene.
GEN 41:55 Maniore hayagola Iyibi dindi bibahendeha hina gari timbuni tagira piyagola kinihondo ti tomo ngi lowa dugu bialu hene. Ani biyagola kinihanda lalu, Yosebe ibugua bidaba laradagua bule ibuni karia pudaba, lene.
GEN 41:56 Iyibi dindiore bibahendeni hina gari timbuni pialu mo luluya hayagola Yosebehanda tomo anda timbuni biagoha wali agali ti ibalu widi do wiyaru munime yolo bini. Ani binigo nde hina gari tagira piyadagoni Iyibi dindi hangu ndo dindi bibahendeni hina gari timbuni tagira piai hayagola wali agali dindi bibahendeha howa Yosebe hearia muni yalu tomo yolo bule ibugu bini.
GEN 42:1 Yagaba ibugua Iyibi dindiha widi dewa nga layago hale howa ibu iginiruhondo lalu, Tí ogoria darabini ale howa ogoria bame biru ngamigo agi.
GEN 42:2 Iyibi dindiha widi dewa bu nga layago ai ina hina garime homoligo maru yolo bule pudaba, lene.
GEN 42:3 Ani laya handala Yosebe hamene pirali biaru ti Kenana dindi wahalu Iyibi dindiha tomo widi bu nga layago yolo bule pene.
GEN 42:4 Yosebe hamene Beniyamini libu ai̱ya mbiraorego manda buwa ibubi bolilono Yagabahanda ti haru mandagi pelo yupe nahe ibu andaga helene.
GEN 42:5 Kenana dindiha gaea bialu hina gari timbuni biyagola agali maru Iyibi dindiha tomo yolo bu piyadagua Yagaba igini biaru tibi nde tomo yolo bule pene.
GEN 42:6 Horo ogoningi Yosebe ibu gabumane haru haga haguane heagola agali dindi tara taraha howa Iyibi dindi widi yolo bule pialu ti Yosebe hearia ibiyadagua ibu hamene biaru tibi widi yolo bule ibalu ibu heagoria ge duli hanga howa wanakuime dindi ela halu Yosebenaga geha bulu paliai hene.
GEN 42:7 Ani bulu paliai heagola Yosebehanda ibu hamene biaruoreyane hendene. Ani hondowa ibu agali tara hetingi howa tihondo bi hongo howa lalu, Tí dindi ani ali íbu kamibe, lene. Ani layagola tigua ladai bialu lalu, Ina Kenana dindiha howa tomo widi yolo bule íbu kama, lene.
GEN 42:8 Ani lowa Yosebe ibugua ibu hamene biaruniore kagonida manda biai henego ibu hameneru tigua dege Yosebeda manda nabi hene.
GEN 42:9 Ani howa Yosebe ibugua emaga mbira ala hendene biago mitangi bu dai bialu hearia ibu hamene biarume ibunaga geha bulu paliai hene biaru mitangi bu dai bini. Ani manda buwa ibugua tihondo lalu, Tí dindi diri mbira agohayagi ngabe hondo wule ibirimida. Inanaga dindi ogo gibuni lene mbirahayagi henge mbira au ngabe hondole ibirimida, lene.
GEN 42:10 Ani layagola tigua ladai bialu lalu, Agali haguane-o anidagua mitangi nabiore. Ina í̠naga biabe bia haga agaliru howa tomo henene yolo bu ibirima lalu tiga tigaore laramagoni.
GEN 42:11 Ina bibahende agali mbiraore ibu hangu igini kamago agali hondo wule ibini ndo ina agali heneneore íbu kama, lene.
GEN 42:12 Ani layagola Yosebehanda hongo howa tihondo lalu, Ndoore tí inanaga dindi ogonaga gibuni lene mbirahayagi anda ibulene henge mbira agoha ngabe hondo wule ibirimidane hendedogoni, lene.
GEN 42:13 Ani layagola tigua ibuhondo ladai bialu lalu, Agali haguane-o ina homberiali (12) hamenema agali mbiraoreali igini Kenana dindiha henego. Ai ina hamene heyogonego ibu abala andaga ka. Ina hamene mbirago pu ereba henego homaya bada, lene.
GEN 42:14 Ani layagola Yosebehanda tihondo lone lalu, I̱na tí ke̱ howa dindi hondo wule ibirimida larugoni ndobe.
GEN 42:15 Anigo i̱na tí ba hondolene hariga mbira manda bidogo. Áyu Iyibi kini kagonaga minini howa heneneore bulego laro. Tí hamene heyogone ogoni i̱naga deni íbu ha nabiyagua tí bibahende tíni dalu dai nabuleberemi.
GEN 42:16 Áyu kamiruni aria mbiragome tí hamene heyogone andaga haruago haru halu ibule pu ladaba. Ai maru tínaga bi larimigo tiga tiga larimidabe be ke̱ harimidabe daba hondoloma̱ya tíni garabaya andaha halimulo helolebero. Mani handalu kamaria tígua bi larimigo henene ndoyagua nde Iyibinaga kini kagonaga minini howa heneneore larogo tí ohowa dindi ogo hondo wule ibirimida lolebero, lene.
GEN 42:17 Yosebe ibugua bi lai howa agali uruni ti horo tebiru garabaya andaha helene.
GEN 42:18 Ani helowa horo tebonengi Yosebe ibugua tihondo lamialu lalu, Ainde i̱ Ngode Datagaliwabenaga andaneha haabo haga henego kogo tígua i̱naga bi larogo talialu birimiyagua nde tí bayale holeberemi.
GEN 42:19 Anigo tí agali bi heneneore laga kamiyagua nde agali mbiraoreali dege garabaya anda tí harimidagoha heladaba. Ani bialu tí marume tínaga wali waneiginiru hina garime homoligo widiru yolobu hanalu pole pudaba.
GEN 42:20 Anigo tínaga bi larimigo heneneore larimida lo manda buliyanaga tí hamene heyogone andaga haruagoni haru halu dai bilimu. Tígua bi o larodagua birimiyagua nde tí homa nabi holeberemi, lene. Ani lamiyago hale howa tigua bi ogoni karulapeda lo manda bini.
GEN 42:21 Yosebe hamene biaru ti Yosebe ibu heba mandagi howa tinime bi lagalaga bialu howa lalu, Heneneore ina hamenehondo koore timbuni birimagonime ai inane pani nolene áyu wiragonida. Ibugua ga̱ lalu dugu bialubi ibu biamogo bidaba layago hale nahe tingi harimagoni. Anidagua birimagonime pani ngiadai binigo áyu nami̱yaore kamagoni ndobe, lalu hene.
GEN 42:22 Ani lowa Lubenehanda ibu hamenemahondo lalu, Áyu pani nolene íbu ngagoni irane ala tígua i̱naga bi larugoni hale howa nahe tingi halu i̱na mbira nabuleore lalu hewago helowa igiri emene biago homayagonaga pani nalu kamagoni, lene,
GEN 42:23 Yosebe hamene biaru tigua tinaga bi layago hale nahe bedabe toba howa ti Hiburu bi lowa lalu berenego Yosebe ibunime hale howa dege nahalehe tingiho hene. Ani binigo pigane ti Yosebe baba bi layangi Yosebe ibugua Iyibi bi lalu lamiyagola bi lo beregedaga mbira heagome Yosebe hameneruhondo Hiburu bi lalu lamiyagola tigua bi lalu bereago hale naholobadalo manda buwa ani lalu berene.
GEN 42:24 Tigua bi urunidagua lalu bereago Yosebe ibu hale howa dara halu mini tigilaya handala ha do howa dugu bule pene. Yosebe ibu dugu biai halu ti baba bi lone lole dai bini. Dai bu howa ibunaga biabe bia haga agali mbira heagohondo lamialu lalu, Simiono minu yania ha, lene. Minu yania howa ibu hamene biaru tini handayaho heaore dege pu hongohe wiagome minu kabu bigi bini.
GEN 42:25 Mani howa Yosebehanda ibunaga biabe biaga agali hearuhondo lalu, Tomo tale buwa tininaga nuha hana hagahaga bialu tinaga munibi tini nuha hanadai bilimu. Ani buwa harigani ti tomo nelobi milimu, lalu lamini. Ani lamiyago hale howa Yosebenaga biabe biaga agali bu hearume bibe layadagua biai hene.
GEN 42:26 Ani miai haya handala Yosebe hamene biaru tigua tomo nu heba hono wiaruni nogo dongi erekunini mo paga halu andaga pole pene.
GEN 42:27 Pialu hariga obeneni handa palue lowa balai anda bia howa hamene mbiragome ibunaga nogo dongi tomo nelo mule lowa ibugua nuha tomo taguini. Taguialu hearia ibunaga muni nu poneni henearia hendene.
GEN 42:28 Ani hondowa ibu hamene biaruhondo lalu, Ai handadaba i̱naga muni mirugo ngiadai biyadago i̱ninaga nuha heneneda, lene. Hamene maru biarume bi ani layago hale howa ti mogo lowa gi hai hene. Ani gi hai howa tini dege dege laedene bialu howa lalu, Ngode Datagaliwabehanda agilego o biyadagonida, lene.
GEN 42:29 Ani lalu Kenana dindi anda pu howa ti aba Yagabahondo mbirale biyaruni bibahende lamiai hene.
GEN 42:30 Tigua lalu, Iyibinaga gabumane agali haguane heagome inahondo bi hongoheore laede halu lalu, Tí dindi diri handaga mbira ibirimida, laya.
GEN 42:31 Ani layagola iname ibuhondo ladai bialu, Ina agali dindi diri hondole ndo ina bi henene laga íbu kama.
GEN 42:32 Ina agali mbiraore igini hombearia hamenema henego ai mbira pu ereba henego mendego heyogone igiri emenego ogoni ibu abala andaga Kenana dindiha ka, larima.
GEN 42:33 Ani larimagola gabumane agali haguane biagome inahondo lone lalu, Tí agali bi henene lagadalo hondoliya mbiraligo i̱ baba halu tí marume widiru hanalu tí damene garibilo holebirago andaga pudaba.
GEN 42:34 Ani pialu tí hamene heyogone haruagoni i̱ koria haru halu dai bilimu. Anidagua birimiyagua tí dindi diri handaga ndo agali bi tiga tiga laga ibirimida lolebero. Ani bialu tí hamenebi golope halu tí Iyibi dindiha tínime hoa biragoha ta nabi halimulo helo waholebero laya, lene.
GEN 42:35 Ani lalu mani widi nuha hanayaru taguialu hemiria tinaga muni biaruni bibahendeore hanai hearia hendene. Ani hondowa tinibi ti ababi bibahende gi howa mogo lalu mini burugulo hene.
GEN 42:36 Ani bu howa Yagaba ibugua tihondo lamialu lalu, Tígua dege binime ai i̱ igini kira ereba hayada. Bamba Yosebebi ereba hayago ai áyu Simionobi ereba dege hayada. Ani biyago ai áyu Beniyaminibi nde haru halu kaundiaha pole degebe. I̱naga genda uruni angi ereba holobadabe, lene.
GEN 42:37 Ani layagola Lubenehanda ibu aba lamialu lalu, Aba-o i̱na Beniyamini í̠ni keria haru halu dai nabiruyagua nde i̱ igini kirali o kagoni labo bo wahabelo. Ai i̱na baya hangu handayaho halu í̠ni keria haru dai bule poloma̱ya waha, lene.
GEN 42:38 Ani layago hale howa dege Yagaba ibugua lalu, I̱ igini ogoni ibu tí baba napolebira larugoni ndoyabe. Ai ibu hamene biago homayagola ibuni hanguore kagoni ndobe. Ibu harigani pialu kamiria ibuha mo ko holene mbira wuligo napoleorebira. Áyu i̱ agali waheore bedogonidago ai tígua haru pialu kamiria harigani mo ko holene mbira lola hayiyagua nde tígua dara holene timbuniore i̱ mo ngeramigola uruni yalu nde homenerunaga dindiha hama polebero, lene.
GEN 43:1 Kenana dindiha gaea bialu hina gari timbuniore pene.
GEN 43:2 Ani biyagola Yagaba ibu mini mende Isaraele winigo ibu damene biaru tigua tomo Iyibi howa mo henene biago nai hene. Nai howa Yagaba ibugua ibu igini biaruhondo lamialu lalu, Tígua lone Iyibi dai bialu inanaga tomo yolo bule pudaba, lene.
GEN 43:3 Ani layagola Yudahanda ibu abahondo lalu, Aba-o Iyibi gabumane agali haguane heagome inahondo bi hongoheore langiya lalu larimagoni. Ibugua ina hamene naharuhe pirimayagua inanaga dengui nahondoleore laya.
GEN 43:4 Ina hamene haru halu pudaba lariyagua nde iname í̠naga tomoru yolobu poleberema.
GEN 43:5 Anigo í̠na ina hamene napole lariyagua nde inabi napoleberama. Iyibinaga agali haguane biagome lalu, Tínaga hamene haru naibirimiyagua nde tínaga dengui nahondoleorebero laya, lene.
GEN 43:6 Ani layagola Yagaba ibugua lalu, Tígua agali haguane ogoni tí hamene mbira ka lalu agua bulenaga lamirimibe. Tígua ogonidagua larimidagonime i̱ genda timbuniore mo ngirimida, lene.
GEN 43:7 Ani layagola tigua ibuhondo lalu, Agali ogonime inahondo bi dewa hale haga biya. Ibugua ina dameneru aguaore kabe lalubi baya hanguore hale haga biya. Ibugua lalu, Tí aba kabe homayabe, laga biya. Tí hamene mbira kabe nahebe, lalu hale haya. Ani hale hayagola inamebi nde tiga tiga lamiai harima. Ina hamene ogoni haru ibalimu lolenaga layago nahende howa lamirimaya, lene.
GEN 43:8 Ani lowa Yudahanda ibu aba Yagabahondo lamialu lalu, Beniyamini ibu i̱laore poleberebago ibilo yupe hariyagua nde poleberema. Ani poramagola í̠bi inanaga waneigini bu karubi ina bibahende hina garime nahome bayale holeberema.
GEN 43:9 I̱na ibu baya hanguore handayaho holebero. I̱na í̠ni keria haru dai nabiruyagua ko timbuni ogoni i̱ha wiaabo holebira.
GEN 43:10 Ai ina napole nale abale poloma̱ya wahenedale nde halu ki agima pialu dai bidamaleda, lene.
GEN 43:11 Ani layagola Isaraele ibugua tihondo lalu, Tígua bulene hariga mende nawiyagua nde ogonidagua bidaba. Tomo bayale maru ina dindini ngaru nuha mo hanalu puwa gabumane agali haguane o haruagoni mo turu halu bame mule hanadaba. Tomo bayale uru mone ibanebi marasini ngabi ira ibaneme wabini tara tara bu ngarubi ira lini dendebi anga ale tara mini pitasio dedaru ariabi anga mende amono ngarubi hanalu pialu bidaba.
GEN 43:12 Muni abale hanalu pirimigo heba marubi mo tago howa hanalu pudaba. Muni abale tínaga nuha hanadai biyiyarubi tigua embeda howa ani bini badago urunibi heba hanalu pilimu.
GEN 43:13 Ai tí hamene haru halu agali haguane ogoni karia áyu ogoni abale gerai lalu pudaba.
GEN 43:14 Agali haguane ogoni ibugua tí dara halu biamogo bilonaga i̱na Ngode Datagaliwabe Hongo Haiheore kagohondo bi lalu kogo tí pudaba. Agali haguane ogonime tí hamene minu yu haruagobi Beniyaminibi libu haru mandagi i̱ni koria haru dai bidaba lelonaga bi lalu ko. Anigo Ngode Datagaliwabe ibunime i̱ igini bibahende ereba hai helo hamelo heagua nde bibahende ereba hai helo, lene.
GEN 43:15 Isaraele ibugua ani laya handala tigua tomo tara tara biarubi ira lini ibane ngabi tara tara biarubi manda mandabu hanalu muni ala nuha hanadai biyiyarubi tomo yolo bulenebi hanaga bigi bialu pene. Tigua Beniyaminibi haru halu Iyibi anda puwa Yosebe hondole abale pene.
GEN 43:16 Yosebe ibugua handalu hearia tigua Beniyamini haru ibiyago hondowa ibunaga biabe biaga agali mbira heagohondo lamialu, Agali uruni i̱ andaga haru puwa nogo bulumaga mbira balu dawalimu. Agali uruni ti áyu horombenaga tomo i̱ni heba mandagi noloma̱ya ani manda manda bilimu, lene.
GEN 43:17 Yosebenaga biabe biaga agali biagome Yosebehanda lamiyadagua bialu agali biaru Yosebe andaga haru pene.
GEN 43:18 Anigo Yosebe hamene biaru tigua Yosebe andaga polene gi howa tini dege dege lalu, Tigua ala ibirimangi muni inanaga nuha hana hayiyagonaga lara bada. Tigua ina anda ogoha haru anda puwa minu yania holebira bada. Ina minu yania howa tinaga garabaya biabe ale bialu helonaga helolebira bada. Ani bialu inanaga nogo dongi haru kamarunibi ti dege holebira bada, lene.
GEN 43:19 Ani lalu howa tigua Yosebenaga biabe bia haga agali biago Yosebenaga anda harabani heago hondowa ibuhondo lamialu,
GEN 43:20 Agali haguane-o bi laramago hale habe. Ala halu mbira iname tomo yolo bu ibirimangi
GEN 43:21 tomo yolo bu ibinigo hanalu puwa ha obeneni palue balai anda bialu howa handalu hemaria ina bibahendenaga muni mbira mbira tomo yolo birimarubi bibahende henearia handarima. Ani handalu muni uruni bibahende hanalu dai birimago.
GEN 43:22 Muni ogoni aiwa henelenedabe ina manda nabi kamago ai tomo yolo bule muni marubi henedema, lene.
GEN 43:23 Ani layagola biabe biaga agali biagome hale howa ladai bialu lalu, Tígua gi halu mini dege dindiho nahalimu. Tínagabi tí abanagabi Ngode Datagaliwabe ibunime muni uruni tínaga nuha hanadai biyabe tobaheda. Ai muni abale tígua tomo yolo birimiruni i̱ mo yarugoni ndobe, lene. Ani lalu ibugua Simiono damu pialu ti hearia haru ibini.
GEN 43:24 Ani bialu mani agali biago ibugua Yosebe hamene biaru Yosebe andagaha haru anda pene. Haru anda puwa tinaga ge wayawaya bilo iba hambu mialu tinaga nogo dongibi tomo nelo mini.
GEN 43:25 Ani biyagola Yosebe hamene biaru tigua hale halu hearia Yosebe ibu horombe ti heba tomo mandagi nole ibulebira layago hale howa mbirale Yosebe mo turu halu mule hanalu ibiyaruni tagu manda mandabu ngelo berene.
GEN 43:26 Yosebe ibu anda ibiyagola tigua mbirale biaruni Yosebe ibu mo turu halu mini. Ani mialu howa tigua Yosebenaga wanakuihayagi ge duli hanga howa bulu palialu tinaga wanakuime dindi elaore hene.
GEN 43:27 Ani biyagola Yosebe ibugua tihondo, Ibirimidago turuba. Tí aba agali wahe beda lalu abale i̱ langirimigo ai ibu karulape bedabe, lalu hale hene.
GEN 43:28 Ani hale hayagola tigua ladai bialu lalu, Agali haguane-o ina aba bayale beda, lene. Ani lalu tigua Yosebe deni howa lone bulu palene.
GEN 43:29 Yosebe ibu Beniyamini hondowa libu ai̱ya mbiraore igini haribada lo mitangi bialu ibugua lalu, Igiri daliahe ogoni abale tí hamene andaga ka lalu langirimigoni mbauleda, lene. Ani lowa ibugua ibu hamene Beniyaminihondo lalu, Igini-o Ngode Datagaliwabehanda í̠ biamogo bilo laro, lene.
GEN 43:30 Ani lalu Yosebe ibu hamene heyogone biago handalu dara timbuniore howa ibuni dugu bule manda bialu hene. Ani biyagola ti helalu ibu abale tamuha anda puwa dugu bialu hene.
GEN 43:31 Dugu bu wahalu de iba domalu tagira ibuwa biabe bia haga agali hearuhondo lalu, Tomo dugu tale bialu tomo dagiani ngeladaba, lene.
GEN 43:32 Ani layagola tigua Yosebenaga tomo dagia mbirani manda mandabu ngelalu ibu hamenerunaga mendeni wia hene. Ani bialu Iyibiali bu hearu ti nde Hiburualiru baba tomo mandagi nanaga howa tibi nde dagia tebone wiagoria biruwa nalu berene. Tigua tomo mandagi nanagadagoni irane Iyibiali ti daligaore kama manda buwa nanaga hene.
GEN 43:33 Yosebe ibunime ibu hamene biarunaga biragane dagia tini taba henenedagua waheneni howa birama pialu heyogoneni bira maro bilo ibunaga biabe biaga agali hearunihondo lalu, Mo manda manda bia halimu, lalu lamini. Hamene biaru tigua o biyadagoni hondowa tini mogo lalu mini dege dindiho biruwa tini handaya hagahaga bialu berene.
GEN 43:34 Ani bialu bereagola biabe biaga agali hearume Yosebe hamene biarunaga tomo Yosebenaga dagiani wiago mo yalu ibuwa talebu tahaga bini. Ti tomo karulapeore nelo talebu migi bini. Anigo Beniyamini dege dewaore agali durialimebi nolene karulape talebu mini. Ani miyagola tigua Yosebe baba tomobi ibabi nalu biruwa turu timbuni howa nalu berene.
GEN 44:1 Ti tomo nai heagola Yosebehanda ibunaga biabe biaga agali bu hearuhondo lamialu lalu, Ai tomo dewaore tinaga nuha hono to̱latagi helo talebu hana halimu. Ani hono to̱lai howa tinaga munibi tininaga nu poneni hana halimu.
GEN 44:2 Ani bialu i̱naga gabo be silibame wabini ngogobi ti hamene heyogone biagonaga nuha ibunaga widi yolo bule muni yu ibiyagobi hanaramigoha dege hana halimu, lene. Ani layagola biabe biaga agali hearume Yosebehanda ogonidagua bilimu lalu lamiyadagua biai hene.
GEN 44:3 Ani biai howa horo mendengi gao layagola biabe biaga agali biarume Yosebe hamene biarunaga nogo dongi heba pelo biamogo bialu pudaba lene.
GEN 44:4 Pu lu nabi wene pialu heaore dege Yosebe ibugua ibunaga biabe biaga agali anda mamage haga heagohondo lalu, Agali o piyaru haruru talima puwa tihondo ogodagua labe. Iname tíhondo mana bayale dege birimagola tígua inahondo mana ko wiago birimiyago irane aginaga birimibe.
GEN 44:5 I̱naga agali haguane biagonaga gabo be mbira mo hanarimiya. Ani bialu ibugua mbirale manda bulene wiado hene ngarunaga gabo be ogoniha howa galone handa walia hagago ai tígua mana ko liaheore bialu mo hanarimiya labe, lene.
GEN 44:6 Ani laya handala Yosebenaga biabe biaga agali biagome Yosebe hamene biaru piyadagua talima pene. Ibugua pialu ti tali minuwa Yosebehanda bi labe layarunidagua lamini.
GEN 44:7 Ani layagola tigua ladai bialu lalu, Agali haguane-o í̠na inahondo bi uruni ale aginaga larebe. Iname mbirale í̠na lareruni mbira bibe nahe kamagoni ndobe.
GEN 44:8 Iname abale tomo yolobu ibirimangi muni inanaga nu poneni hana heneyago Kenana dindiha howa halu mende dai bialu howa hanalu dai birimagoni í̠ manda bide. Ai áyu í̠naga agali haguane andagaha wini ngolo silibaru iname agua bialu mo page biyada lo manda bidebe.
GEN 44:9 Agali haguane-o ina o kamaruni aria mbiralime gabo be ogoni mo heneagua ogoni ibuni homelo bo wahabe. Ani beregola ina bibahende í̠naga garabaya biabe ale bia haga holoma̱ya, lene.
GEN 44:10 Ani layago hale howa Yosebenaga biabe biaga agali biago ibugua ladai bialu lalu, Tígua bi tiga tiga dege larimigo gabo be ogoni mbiralinaga nuha henedaria handa walia haruyagua agali ogoni ibu hangu i̱naga garabaya biabe ale bia haga holebira. Tí bibahende andaga piai holeberami, lene.
GEN 44:11 Ani layagola tigua Yosebenaga biabe biaga biagome tinaga nu handai helo dindini dugu ibira hai hene.
GEN 44:12 Ani biyagola Yosebenaga biabe biaga agali biago ibugua Yosebe hamene wahenenaga nuha ala hondowa mani tini taba hanayagola hama ibinidagua handama pialu heyogone biagonaga nu handa maro bini. Ani handalu hearia gabo be biago Beniyamininaga nuha henearia handa walia hene.
GEN 44:13 Yosebe hamene biaru ti gabo be biago Beniyamininaga nuha heneneyago hondowa tigua daraore ho kama lowa walia halu tinaga aga bu hearu minu lerelene. Ani lerelowa tinaga nu lone nogo dongi erekunini mo paga halu Yosebe hearia dai bini.
GEN 44:14 Yuda ibu hamene biarubi tigua Yosebe andaga lone dai buwa handalu hemiria Yosebe ibu mbiraha nape ibuni andagaha bereneyane hendene. Ani hondowa ti gi timbuniore halu tigua Yosebenaga wanakuihayagi dindini bulu paliai hene.
GEN 44:15 Ani biyagola Yosebehanda tihondo lamialu lalu, Mana agialego o birimidagonibe. I̱na oholene mbirale wiado hene ngaru handa walia nahaga kabe toba harimibe, lene.
GEN 44:16 Ani layagola Yudahanda ladai bialu lalu, Agali haguane-o iname í̠hondo bi ladai bulene mbira nayi kamagoni ndobe. Iname ko nabi kama labe nahe kamagoni. Ai Ngode Datagaliwabehanda inanaga ko wu hemago mo pani hayago. Áyu agali í̠naga gabo be mo page biyago hangu ndo ina bibahende í̠naga garabaya biabe ale bia haga hai holeberema, lene.
GEN 44:17 Ani layagola Yosebehanda lalu, Ani ndo i̱na tí bibahende hai hadaba nalolebero. Agali mbiraore i̱naga gabo be mo hanalu piyadago ibu hangu i̱naga garabaya biabe ale bialu helo helolebero. Tí bibahende miniha genda nahe tí aba karia andaga dai bidaba. I̱ tí baba bi lolene nawigo áyu ogoni pudaba, lene.
GEN 44:18 Yuda ibugua Yosebe heagoria kaware puwa ibuhondo lalu, Agali haguane-o i̱naga bi larogo nde hale harene. Í̠ agali timbuni Iyibinaga kini kagobi dege kegonigo ainde harugo i̱naga biore hale halu i̱hondo keba nahabe.
GEN 44:19 Ai abale biago í̠na inahondo hale halu tí aba hamenebi mbira kabe nahebe lalu hale harigoni.
GEN 44:20 Ani hale harigola iname lalu, E̱ ina aba agali waheore beda. Ina hamene heyogonebi aba ibu agali wahe daguaheore howa hono winigo andaga ka larima. Wali mbiragome igiri kira hono winigo mende homayagola mendego hangu ka. Anigo ibu abahanda ibu igini mbiraore ogoni hangu gubalini ho haga ka lalu abale langirimagoni.
GEN 44:21 Ai agali haguane-o í̠nime lalu ina hamene heyogone ogoniore i̱ hondoliya haru ibule pudaba lari.
GEN 44:22 Ani larigola igiri ogonime ibu aba helalu naibulebirago nde helalu ibiyagua ina aba homolebira larimagoni.
GEN 44:23 Anidagua larimagola í̠na bi mbira ogodagua lari. Tí hamene heyogone ogoni helo wahalu i̱naga deni halu mende naibuleberemiore, lalu abale biago langirigoni ndobe.
GEN 44:24 Ai agali haguane-o iname í̠naga bi uruni hale hai halu puwa ina abahondo bi uruni bibahende lamiai harima.
GEN 44:25 Ani larimagola ina abahanda lalu, Tomo lone yolo bule pudaba, laya.
GEN 44:26 Ani layagola iname lalu, Ina hamene heyogone kago naharu pirimayagua Iyibinaga agali haguane kagome inanaga dengui lone nahondoleore layagodago ina napoleberama, larima.
GEN 44:27 Ani larimagola aba ibugua inahondo lalu, I̱ one Leselo ibugua igiri kira hangu hono wiyagoni tí manda bu kamigoni.
GEN 44:28 Igiri mbirago ereba hayagola i̱ nahende waore harugoni. Ogoni ibu laiono gabuame balu nedabe be agua biyabe tobara.
GEN 44:29 Anigo áyu tígua i̱ helalu i̱ igini mende ogobi dindi kaundiaha haru pole kamigoni. Ai tí heba harigani pialu kamiria mo ko holene mbira ibuha anda ibiyagua nde i̱ha dara holene timbuniore wiragome i̱ bo homelaramigola homenerunaga dindiha hama polebero, lalu laya.
GEN 44:30 Ainde agali haguane-o i̱ aba ibu igiri ogoni ibuninaga gubaliniore hagago i̱ aba karia ibu haru dai nabiruyagua nde ibu homolebira. Ina aba agali waheore bedago ai igiri ogoni haru dai nabirimayagua nde iname ibuha genda timbuniore mo mialu dara holene timbuni dege yalu homolobada.
GEN 44:32 I̱ abahondo bi mbira buleore lalu hongohe ogodagua lamiru. I̱na igiri ogo ibuni karia haru dai nabiruyagua nde ina abahondo bia ko timbuniore harogola ogoninaga genda i̱niha wiaabo holebira lalu lamiru.
GEN 44:33 Ani larugo ai i̱na igiri ogonaga henge mialu í̠naga garabaya biabe ale bialu holiya ibu hameneru baba ibu aba karia andaga dai biaore la.
GEN 44:34 Igiri ogo naharuhe i̱na i̱ aba karia andaga dai nabulebero. I̱ aba ibugua genda timbuni holobadago i̱ hondole hame nale kogo andaga napolebero, lalu Yudahanda lene.
GEN 45:1 Yosebe ibugua dara timbuniore howa dugu bua biyagola ibunaga biabe biaga agali hearuhondo lalu, Tí tagira piai hadaba, lene. Piai hayagola ibu hamene biaru baba tini hangu hene. Ani howa ibugua tihondo lamialu lalu, I̱ Yosebe tí hamene biago kogoni, lene.
GEN 45:2 Ani lowa Yosebe ibugua dugu hongo howa biayuago Iyibi wali agali tagira hearume hale halu tigua agali kini andagaha haga hearu lamule pene.
GEN 45:3 Yosebehanda ibu hamene biaruhondo lamialu lalu, I̱ Yosebeore kogonigo i̱ aba bayale kabe, lene. Ani layagola ibu hamene biarume mogo timbuniore lowa bi mbira ladai bibe nahe hene.
GEN 45:4 Ani hemigola Yosebe ibugua laabo halu lalu, Tí gi nahe i̱ kogoria kaware ibidaba, lene. Ani layagola ti kaware hapara ho heagola ibugua tihondo lamialu lalu, I̱ tí hamene Yosebe kogoni. Bamba tígua biyinaya biabe biaga agali hearume yolo bilo i̱ minu mirimigola tigua i̱ Iyibi dindiha minu yalu ibiya.
GEN 45:5 Anigo áyu tígua mana ko ogoni birimigonaga tí bu miniha genda howa holene nawigo wahalimu. Ngode Datagaliwabe ibunime tí homoligonaga i̱na ala manda manda bialu holiya i̱ dindi ogoha ibilaya.
GEN 45:6 Ai gaea timbuni bialu hina gari pialu heane mali kira hangu piyagoni. Mali duria wene hole ngago nde agalime tini mabuha tawe tomo mbira bialu nanolebiraore.
GEN 45:7 Gaea hangu bialu hina gari timbuni nahendene ale áyu o tagira poragoningi Ngode Datagaliwabehanda i̱ha howa tí biamogo bulenaga i̱ ala ogoha íbu helaya.
GEN 45:8 Ani biyago tígua i̱ ibilarimi ndo Ngode Datagaliwabe ibunime minu ibilayagola ibirugoni. Ani íbu hewagola Ngode Datagaliwabe ibunime i̱ Iyibi kini kagonaga aba haradagua haguane daligaore helaya. Ani helayagola i̱na kini andagaha wali agali bibahende bu karu handayaho halu Iyibi dindi bibahendenaga agali haguanebi i̱ dege kogoni.
GEN 45:9 Ai áyu ogoni abale ina aba karia dai bialu ibuhondo bi ogodagua lamilimu. Í̠ igini Yosebe i̱na bi ogo lawia harogo. Ngode Datagaliwabehanda i̱ Iyibi dindi bibahendeha handameho holiya agali haguane helenego kogo ai í̠na emene hondo ha nabi abaleore ibabe laro.
GEN 45:10 Ibalu i̱ni kogoria Gosene dindi kaware ngagoriani habelo. Í̠nibi í̠ waneiginirubi í̠ aguanerubi í̠naga nogo sibirubi memerubi bulumagarubi í̠naga mbirale wiridarubi uruni bibahendeore Gosene dindi ngagoria hole ibaiore halimu.
GEN 45:11 Í̠ Gosene dindini íbu bedegola i̱na handayaho holebero. Ai gaea timbuni bialu hina gari timbuni áyu poragoni biaho ngane dege mali duria polene ngago. Mali duria ogoniha í̠nibi í̠ waneigini aguanerubi í̠naga nogo tara tara bu karubi bibahende garibilo halimulo i̱ hame nalego abale ibalimu laya lalimu, lalu Yosebe ibugua lene.
GEN 45:12 Ani lowa Yosebe ibugua ibu hamene biaruhondo lamialu lalu, Tígua i̱ baya hangu manda bialu áyu bi lalu kogoni tara ndo. I̱ tí hamene Yosebe biagoniore kogoni. Beniyamini í̠ nde i̱ni hamene heyogoneore biago í̠na i̱ manda bibehe dege kegoni.
GEN 45:13 Ai tígua i̱ aba bedaria dai bialu i̱ Iyibi dindiha agali mini lene timbuni mbira hea lalu lamilimu. Ani lamialu tígua mbirale handarimigo damene bibahende lamiai halimu. Ibu haru ibule áyu ogoni gerai lalu abale pudaba, lene.
GEN 45:14 Yosebe ibu bi uruni lai halu ibu hamene Beniyamini yu hubi lalu dugu biyagola Beniyamini ibubi nde dugu dege bini.
GEN 45:15 Ani bialu Yosebe ibugua ibu hameneru bibahende yu hubi laga bialu nu̱nu̱bi lalu dugu bia dege bini. Ani biyagola ibu hamene biaru tigua Yosebe baba bi lole manda bini.
GEN 45:16 Ani biyagola Iyibinaga kinibi ibunaga agali haguane bu hearubi tigua hale halu hearia Yosebe ibu hameneru ibuni heba íbu ka layago hale howa ti turu ho hene.
GEN 45:17 Ani hale howa kini ibugua Yosebehondo lalu, Í̠ hameneru ti nogo dongiru mo manda manda bialu Kenana dindi abale dai bidaba labe.
GEN 45:18 Dai bialu ti ababi ti one waneiginirubi bibahende haru halu dindi ogoriani abale dai bilimu labe. Ani bialu haru halu ibiragola i̱nime Iyibi dindiha dindi bayaleore ngago ti ogoriani helo tu wu mulebero. Ani merogola dindi ogoniha tomo baya tara tara hangararu damene bibahende anda hai holebirago ti karulapeore nalu holebira.
GEN 45:19 Ai ti pialu Iyibinaga garo ale mini karisi ngaruni ti one waneiginiru biralu tini heba mandagi ibule mo yalu pilimu. Ti ababi haru halu íbu dege bilimu.
GEN 45:20 Tinaga mbirale Kenana dindiha howa ngelo henedaru yu wahalu ibuleda lo manda nabilimu. Mbirale baya tara tara Iyibi dindiha wini ngaru ti wu helo talebu miai holeberogo ibalimu labe, lalu kini biagome Yosebehondo lamini.
GEN 45:21 Yagaba igini biaru tigua kini ibugua bilimu lalu lawia hayadagua bini. Yosebehandabi nde kini ibugua bibe lalu lamiyadagua karisi wiaruni aria maru mo mini. Mo mialu ti harigani pialu howa tomo nelobi maru mo wia halu bini.
GEN 45:22 Yosebehanda aga mbira dege dege ibu hamene biaru tahalu Beniyamini dege duria mini. Ani mialu muni siliba handari tebirabi (300) Beniyamini mialu bini.
GEN 45:23 Ani mialu Yosebe ibugua mbirale bayale damene Iyibi dindiha wini wiaru aria dewaore nogo dongi wangabe piranaga erekunini mo paga howa ibu abanaga yalu pudaba lene. Ani bialu widiru mberedirubi tomo tara tara maru wiarubi bibahende ibu aba harigani ibalu howa nelonaga biamogo bialu nogo dongi angibuni piranaga erekunini mo paga halu yalu pudaba lalu bini.
GEN 45:24 Yosebe ibugua ibu hameneru pelo lowa ibugua tihondo lamialu lalu, Tí harigani pialu howa tíni dege dege keba nahe laibi nale baya hangu pilimu, lalu lamini.
GEN 45:25 Ani laya handala Yosebe hamene biaru ti pialu ti aba Yagaba hearia Kenana dindi anda pene.
GEN 45:26 Anda puwa ti abahondo lamialu lalu, Aba-o Yosebe ibu nahome heneyago ai ibugua Iyibi dindi bibahende handameho hea, lene. Yagaba ibu bi o layadagoni hale halu ibu mini naibi dege howa bi ogoni mo henene nahe hene.
GEN 45:27 Ani heagola tigua Yosebehanda bi lawia hayaruni bibahende lamiai hene. Ani bialu Yosebehanda ibu aba Yagaba Iyibi ibilonaga karisi mo wia hayiyago hondowa ibunaga miniha wálo dege berene.
GEN 45:28 Ani wálo biruwa Yagaba ibugua lalu, Heneneore i̱ igini Yosebe homa nabi harua lo manda bido. Ai i̱ Yosebe nahende koore homoligo ina abale Iyibi ma, lene.
GEN 46:1 Yagaba ibunaga mbirale wiarubi waneigini aguanene hearubi bibahende mo ngoai halu Iyibi dindi pole hariga peadagua pialu hene. Ani pialu howa dindi mbira mini Beseba wiagoria anda puwa Yagaba ibugua ibu aba Aisaganaga Ngode Datagaliwabehondo mbirale bo loma bu mini.
GEN 46:2 Ani buwa mbiraga Yagaba ibu paluwa de gandeba handalu hearia Ngode Datagaliwabe ibu ibuwa lalu, Yagaba-o Yagaba-o, lalu olene. Ani layagola Yagabahanda lalu, Ya i̱ o kogoni, lene.
GEN 46:3 Ani layagola Ngode Datagaliwabehanda lalu, Í̠ aba Aisaganaga Ngode Datagaliwabe kogonigo ai í̠naga waneigini aguaneneru mo dewaore heloleberogo í̠na Iyibi dindi gi nahe pobe.
GEN 46:4 I̱na í̠ heba Iyibi dindi pialu mani Kenana dindi lone haru dai bulebero. Í̠ homaregola í̠naga tingini Yosebe ibunime hora holebira, lene.
GEN 46:5 Egabi layagola Yagaba ibu igini biarume ti aba Yagaba tinaga one waneiginiru baba garo ale nogo hosime gili laga kini ibugua Iyibi howa ti yalu dai bilo ibilene biagoria berelowa yalu pene.
GEN 46:6 Yagaba ibunaga yári dabudabu wiaruni bibahendeore tinaga nogo bulumagarubi mbirale bibahende Kenana dindi yu hene wiaruni yaiore halu Iyibi dindi pene.
GEN 46:7 Yagaba waneiginirubi aguanerubi bibahendeore Iyibi dindi pole Yagaba ibuni heba piaiore hene.
GEN 46:8 Yagaba damene bibahendeore Iyibi dindiha ibu heba mandagi penerunaga mini uru. Yagaba igini wahene Lubene ibubi
GEN 46:9 Lubene iginiru Hanogobi Palubi Heseronobi Kami imaru ti pene.
GEN 46:10 Simiono ibu iginiru nde Yamuelebi Yaminibi Ohadabi Yaginibi Sohabi Saulubi uruni ti pene. Saulu ibu ai̱ya Kenana wali mbira berene.
GEN 46:11 Libai ibu iginiru nde Gesonobi Kohadabi Merari imaru pene.
GEN 46:12 Yuda ibu iginiru nde Selabi Peresebi Sera imaru pene. Yuda igini maru Ere Onanala kirabali Kenana dindi hemingi homene. Perese ibu igini Heserono Hamulula pene.
GEN 46:13 Isaga ibu igini Tolabi Puabi Yasububi Simirono imaru pene.
GEN 46:14 Ani bialu Sebulunu ibu igini nde Serede Elono Yalele imaru pene.
GEN 46:15 Yagaba one Lia ibu igini uruni bu hene. Lia ibugua igiri uruni Mesobodemia dindini hemingi taba hanaga bini. Liahanda wandari mbiraore hangu mini Daina taba henenego ogoni berene. Yagabanaga waneigini aguanerubi Liaha howa henego aria pira tebirani huniane tebira (33) ti bibahende Iyibi dindi pene.
GEN 46:16 Yagaba igini Gada ibu igini nde Sebonobi Hagibi Sunibi Esebonobi Eribi Arodobi Areli imaru henego tibi pene.
GEN 46:17 Ase iginiru nde Iminabi Isibabi Isibibi Beria imaru halu ibu wane Sera berenegobi uruni pene. Ani pialu Beria igini nde Hebe Malagielela libubi pene.
GEN 46:18 Wali agali uruni bibahende ti wali mbira mini Siliba ibu Lianaga biabe bia haga berelo Labanahanda ibu wane Lia minigo o biago Yagabala libu waneigini hene. Ti bibahende daga lamaga halu pira mbirani waragaria (16) pene.
GEN 46:19 Yagaba one mende Leselo ibugua Yagaba igini Yosebe Beniyaminila taba henene.
GEN 46:20 Anigo Yosebe ibu Iyibi dindiha heangi loma binigo mo miaga agali mbira mini Podibera ibu Heliobolisi tanoha henego ibu wane Asenada bereago ibu Yosebe one biruwa ibugua igiri kira Manase Eberaimila taba henene.
GEN 46:21 Beniyamini igini nde Belabi Begebi Asabelebi Gerabi Namanabi Ehibi Losobi Mubimibi Hubimibi Ada imaru hene.
GEN 46:22 Agali uruni pira mbirani maria (14) ti Yagaba Leselola libu aguaneru ti bibahende Iyibi dindi pene.
GEN 46:23 Dana ibu igini mbiraore hangu mini Husimi hene.
GEN 46:24 Nabadali ibu iginibi nde Yaselebi Gunibi Yasebi Sileme imaru hene.
GEN 46:25 Agali karia uruni bibahende Yagaba Bilihala libu waneigini aguaneru bu hene. Wali Biliha ogoni Labanahanda ibu wane Leselonaga biabe bia haga berelo minigo berene.
GEN 46:26 Yagaba ibu aruniru daga nale howa ibuni waneigini hangu Iyibi dindi pole peneru daga pira waragariani waragaria (66) pene.
GEN 46:27 Anigo Yosebe oneme igiri kira Iyibi dindini taba hanayago heba lamaga halu Yagaba ibu damene pira karia (70) Iyibi dindi pu hene.
GEN 46:28 Yagabahanda Yuda abale bamba halu Yosebe Gosene dindini ngola hole ibilo, Lamima pu, lene. Ani bialu Yagaba dameneru Gosene dindini anda íbu heagola
GEN 46:29 Yosebehanda ibunaga agali biabe bia haga hearuhondo lalu, Gosene dindini i̱ aba lola hole poliya i̱naga garo ale mini karisi mo manda manda bidaba, lene. Ani bialu Yosebe ibu puwa ibu aba wanakuiore handalu dugu timbuni luore biaho wini.
GEN 46:30 Ani biyagola Yagabahanda Yosebehondo lalu, Áyu í̠ore homaribe toba harugo ndo henedago áyu hendedogo ai homaruyagua karulape kogoni, lene.
GEN 46:31 Ani layagola Yosebehanda ibu hameneru ibu aba waneigini bu hearuhondo lalu, Ai áyu ogoni kinihondo i̱ aba hameneru tinaga dindi andaru Kenana dindi ngelo wahalu oali anda íbu ka lalu lamule porogo.
GEN 46:32 Agali uruni ti nogo sibi hinaga howa ai tinaga mbirale wu hearu bibahende yalu ibai haya. Tinaga nogo bulumaga sibirubi bibahende haru ibiya lolebero.
GEN 46:33 Ani larogola kini ibugua tíhondo, Biabe agi dege biaga kamibe, lalu hale hayagua
GEN 46:34 tígua ibuhondo ogodagua ladai bilimu, Agali haguane-o inanaga biabe nogo sibi bulumagaru hinaga kamagoni. Inanaga aba mamarume biagadagua inabi nde igiri emeneni howa biabe ogoni biaga kamagoni, lalimu. Tígua ani larimiyagua ibugua, Tí dindi Gosene ogoria halimu, lalu dindi ogo tí ngulebirago ani lalimu, lene. Yosebehanda ibu hameneruhondo ani lalimu layago irane Iyibi wali agali tigua agali nogo sibi hinaga karu handabe manga hagago manda buwa ani lene.
GEN 47:1 Ani lalu Yosebe ibugua ibu hamene duriali kini hearia haru puwa kinihondo lalu, I̱ aba hameneru tinaga nogo tara tararu haru hai halu Kenana yu wahalu ibuwa ai Gosene dindini íbu ka, lene.
GEN 47:2 Ani lowa Yosebe ibugua ibu hameneruhondo, Kininaga wanakuini íbu hadaba, lene.
GEN 47:3 Ani íbu heagola kini ibugua tihondo hale halu, Tí biabe agile dege biaga kamibe, lene. Ani layagola igiri biarume ladai bialu lalu, Inanaga agali haguane-o inanaga aba mamarume biagadagua inamebi nogo sibiru hinaramali.
GEN 47:4 Ai ina dalu Kenanaha hina gari timbuni biyagome ina habe naheyagola oali íbu kamago. Inanaga sibiru tibi nde tani nolene nahe degego. Ai hina gari piai kagola inane dalu dai bulego í̠na karulape lariyagua nde ina dindi Gosene ogoriani holene hame ledama, lene.
GEN 47:5 Ani layagola kini ibugua Yosebehondo lalu, Ai í̠ hameneru í̠ni haru mandagi hole ibiyadagonigo
GEN 47:6 í̠nime Iyibi dindi bibahendeha manda beregola ti holene karulape mbira wiagua dindi ogoriani ti hole pudaba labe. Ti Gosene dindini berelo hame lariyaguabi nde ogoni karulape dege. Ani bialu agali uruni mbirago ibu nogo bulumaga hinaga mandabi heagua nde ogoni ibugua i̱naga nogo bulumagaru hinalu helo hame ledogoni, lene.
GEN 47:7 Ani layagola Yosebehanda ibu aba kini hearia haru ibiyagola Yagabahanda kini mo bila hene.
GEN 47:8 Ani biyagola kini ibugua Yagabahondo hale howa, Í̠ áyu mali agira hene kegonibe, lene.
GEN 47:9 Ani layagola Yagabahanda ladai bialu lalu, I̱ dindi ogoria hewane dege mali handari mbirani pira tebira (130) hangu piyago. Ogoni mali lu ndo howa genda dewaore yidogoni. I̱naga mamaliru tigua i̱ bolangua halu ti mali dewore hene, lene.
GEN 47:10 Ani lalu te lai halu Yagaba ibugua kinihondo lalu, Hondo birabe, lalu ibu tagira pene.
GEN 47:11 Mani Yosebe ibu kinihanda layadagua bialu ibu aba hameneru Iyibi dindi helo mo tiga biai hene. Ti Lamese tano dindi mbira Gosene dindiha winigo ogoniha nogo hinulene bayale dataniru dewa buhe Iyibi dindi maruha wiarubi ndo dindi ogoni bayaleore wiago hondowa ti ogoriani helo walia hene.
GEN 47:12 Ani íbu heagola Yosebehanda ibu ababi ibu hamenerubi tinaga one waneiginiru ti tomo nelo karulapeore mialu baya hanguore handaya ho hene.
GEN 47:13 Hina gari timbuniore piyagola dindi bibahendeha tomo nolene emeneorebi mbira nawi hene. Hina gari ogonime Kenana wali agalibi Iyibi wali agalibi kirabali mo ko hene.
GEN 47:14 Ani biyagola Iyibi wali agali hearubi Kenana wali agali hearubi tigua tinaga muni emene wiago tomo anda Yosebehanda hondo hayagoha yalu ibalu tomo yolo bigi biyagola tinaga muni bibahende biba hene. Muni uruni Yosebe ibugua mo yuwa kini andagaha ngelaga bini.
GEN 47:15 Ani bialu Iyibi wali agalibi Kenana wali agalibi tinaga muni bibahende bibaore hayagola Iyibi wali agali tigua Yosebe hearia puwa lalu, Ai nde í̠na ina tomo hangu bame ngibelo ibirima. Inanaga muni bibahendeore tomo yolo biai harimagola ai nawiore kamago. Ina tomo noloma̱ya nangiriyagua nde í̠naga deni ina homai haramagoni, lene.
GEN 47:16 Ani larimigola Yosebehanda tihondo lalu, Tínaga muni biba hayagua nde tínaga nogo tara tara hinu kamirume tomo yolo bule haru ibalimu, lene.
GEN 47:17 Ani layagola wali agali tinaga nogo hosi sibiru memeru bulumagaru dongiru bibahende haru halu Yosebe hearia puwa tomo yolo bu naga bialu hemiria dege mali mbira pene.
GEN 47:18 Mali mbira piai hayagola tigua Yosebe hearia lone ibuwa lalu, Agali haguane-o ina genda timbuniore yu kamagoni. Inanaga muni bibahendebi inanaga nogo tara tara bibahendebi í̠ ngiai harimago ai nde mbirale yu wahene mbira í̠hondo ngulene nayiore kamagoni. Inanaga dindibi inane wali agalirubi uruni hangu yuwa kamagonidago
GEN 47:19 ai ina wali agali homoloma̱ya wahariyagua nde inanaga dindi mo koore holobadago. Ai wahalu inane kini ibunime tomo ngialu handaya ho helonaga ina bibahende ibunaga biabe bia haga holeberama. Inanaga dindibi kini ibu hai helo. Anigo aiore ina tomo nolene egene heba ngiaore bia. Ina tomo egene ngeregola inane homa nabi howa inanaga dindi ogobi mo ko naholebira, lene.
GEN 47:20 Horo hina gari piyadagoningi howa Yosebehanda Iyibi wali agalinaga dindi wiaru bibahendeore yolo biai howa kininaga mo ngelai hene.
GEN 47:21 Ani buwa Yosebehanda wali agali bibahende kininaga garabaya biabe ale bia haga helo helai hene.
GEN 47:22 Anigo loma binigo mo miaga hearunaga dindi dege yolo nabi muni kinihanda bame migi biyagola ti tomo ogonime yolo bu naga bialu hene.
GEN 47:23 Ani buwa Yosebehanda wali agalihondo lalu, Hale hadaba. Áyu tínibi tínaga dindi ngamirubi bibahende munime yolo biai harugoni. Ai áyu tí wali agali kininaga biabe bia haga kamigonigo tomo egene o ngaru mo yalu mabuha hongole pudaba.
GEN 47:24 Tomo hangaramigo boga biragola buyu mogobu ngelowa dau halu tale bilimu. Tale buwa daunigo kini mialu maria tíni howa lini maru mani hongole egene ngelalu maru tí one waneigini heba tíni nole ngelalimu, lene.
GEN 47:25 Ani layagola wali agali tigua lalu, Agali haguane-o í̠na inahondo biamogo timbuniore buwa ina homa nabi helaregonagabi ina kininaga biabe bia haga holoma̱ya henge ngeledogonagabi í̠hondo ka̱i̱ore laramagoni, lene.
GEN 47:26 Ani buwa Yosebehanda mana mbira ogobi wabu wini. Wali agali bibahende ti mabuha tomo boga bialu nolene tu haragola buyu ngoai howa dau halu tale buwa daunigo kini mulene nga, lalu lo winigo áyu wiaabo ka. Loma binigo mo miaga agali biarunaga dindi dege yolo nabi tini helo wahene.
GEN 47:27 Isaraele wali agali biarume ti dindi Goseneha mialu ogoniha hene. Ani howa waneigini dewaore hono wialu ti ho damebi dewaore hene.
GEN 47:28 Yagaba ibu mali pira mbirani karia (17) Iyibi dindi pu hene. Ibunaga mali lamaga halu handari mbira pira mariani karia (147) hene.
GEN 47:29 Ani howa ibu homolene tu kaware harudalo manda bialu ibu igini Yosebe íbu lowa bi ogodagua lamini. Í̠na i̱hondo gubalini howa keyagua nde í̠naga gi i̱naga ge dulini yaniho biruwa i̱hondo mana bayale ogonidagua bule lalu bi mbira hongohe i̱ Iyibi dindini hora nahole lalu áyu lo wia.
GEN 47:30 Ai i̱naga de mugulalu i̱naga mamaliru heba mandagi hole porogola i̱naga tingini Iyibi dindi wahalu i̱ni aba mamaru hora haga wiyagoria hora hole yalu dai bibe, lene. Ani layagola Yosebe ibugua, Nde i̱na aniore biagua, lalu ladai bini.
GEN 47:31 Yagabahanda lone lalu, Í̠na heneneore ani bule lalu bi heneneore la, lene. Yosebehanda, Heneneore larogoni lalu aniore bulebero, layagola Yagaba ibugua Yosebehondo, Turuore ko, lowa walia halu ibu dagiani biruwa ma podalu bulu palene.
GEN 48:1 Yosebe ibu emene howa hale halu hearia ibu aba warago bo nga layago hale hene. Ani laya handala ibu igini kirali Manase Eberaimila haru halu ibu aba Yagaba hondole pene.
GEN 48:2 Piyagola agali maru hearume Yagabahondo lalu, Í̠ igini Yosebe ibu í̠ warago bo ngego hondole ibiragoni, lene. Ani layago hale howa Yagaba ibu heyulene hongo emene hayagola ibuni heyuwa dagiani berene.
GEN 48:3 Yagaba ibugua ani heyu biruwa Yosebehondo lalu, Ngode Datagaliwabe Hongo Haiheore ibuni i̱ Kenana dindiha tano emene Lusi ngagoria hewaria ibuwa bi galone mbira langialu lalu, Í̠ biamogo bialu mo bayale holebero, layagoni.
GEN 48:4 Ibugua ogodagua laya, I̱na waneigini dewaore ngulebero. Ani berogola í̠ aguanene dewaore daga labe nahe holebira. Dindi ogo tihondo merogola tinaga dindi ogoniore wiaabo holebira, laya lene.
GEN 48:5 Yagaba ibugua laho wialu lalu, I̱ Iyibi dindi naibi hewaha í̠ one ibugua igiri kira taba hanayadago. Ai ogoni labo i̱ iginiore haradagua holebira. Eberaimi Manasela i̱ni iginiore Lubene Simionola baba ogobi dege dege holebira.
GEN 48:6 Anigo í̠ waneigini mani holebiraru ti í̠ninaga holebira. Ani howa mani tini hameiginiru dege dege dindi tu wa ta holene wiragola waneigini maru ti Eberaimi Manasela libu dagalalu tale biragola tigua tinaga hamene wahene Eberaimi Manaselanaga erembiraha holebira.
GEN 48:7 I̱na áyu bi larogoni í̠ ai̱ya Leseloore mitangi bialu dara ho haabo kogonaga laro. I̱ Mesobodemia wahalu Kenana dindi íbu dai bule harigani ibalu hemaria homaya. I̱na dindi emene mbira Eberada winigo anda ibule dege ibalu hemaria homayagola dindi Eberada ogoni kawareni dege hora kama, lalu lene. Áyu dindi Bedeleheme ngagoni abale Eberada laga wini.
GEN 48:8 Ani lowa Yagaba ibugua handalu hearia igiri emene kirali Yosebe igini biagolabo hondowa lalu, Igiri emene ogolabo ai iginibe, lalu Yosebehondo hale hene.
GEN 48:9 Ani hale hayagola Yosebehanda ladai bialu lalu, Ogonilabo i̱ igini. Iyibi dindiha hewaria Ngode Datagaliwabehanda ngiya, lene. Ani layagola Yagabahanda lalu, I̱na Ngode Datagaliwabehondo libuore biamogo bialu mo bayale habe lalu bi laholiya i̱ bedogoria kaware haru íbu, lene.
GEN 48:10 Yagaba ibuni nde waheore biruwa ibugua mbirale deme baya hangu handabe nahe berene. Ani bereagola Yosebehanda ibu igini biagolabo Yagaba bereagoria kaware haru ibini. Haru íbu heleagola Yagaba ibugua igiri biagolabo yania howa nu̱nu̱ lalu howa
GEN 48:11 Yosebehondo lalu, Abale howa i̱na í̠ wanakui nahondoleda mandabu henego. Ai áyu í̠nibi í̠ igini kirali ogolabobi handaore buliya Ngode Datagaliwabehanda henge ngiyada, lene.
GEN 48:12 Ani leagola Yosebehanda igiri emene biagolabo Yagabanaga bani berenego minu yamialu dindini helene. Helowa Yosebe ibu abanaga mini yaraga halu ibu ma podalu dindini bulu palene.
GEN 48:13 Yosebe ibugua ani bialu ibu igini Manase Yagabanaga gi tigahayagi helalu Eberaimi gi lehayagi helo Yagaba bereagoria kaware helene.
GEN 48:14 Ani biyagoyu Yagabahanda ibunaga gi wia iriari buwa gi tiga heyogone Eberaiminaga haguaneni wialu gi le wahene Manasenaga haguaneni wia aribia hene.
GEN 48:15 Ani buwa Yagaba ibugua Yosebenaga damene Ngode Datagaliwabehanda mo bayale helo bi lahalu howa lalu, Ngode Datagaliwabe-o i̱ mama Abarahamahandabi i̱ aba Aisagahandabi libu harume í̠ andanehaore hayagoni. Ai i̱bi nde i̱ ai̱yahanda taba hanayangi howa í̠na baya hanguore handaya ho hama ibirigoni.
GEN 48:16 Í̠na dahuliyali ibiradagua bialu i̱ ko gendabi wiagoha pu hewaria haru dai birigonigo áyu igiri ogolabo libunaga waneigini aguaneneru dewaore helo libu mo bayale habe. Mani holebirarume Abarahama Aisagalanaga minibi i̱ninaga minibi ereba nahe manda biaabo helonaga aniore bibe, lalu Yagabahanda lene.
GEN 48:17 Yosebe ibu handalu hearia Yagabahanda ibunaga gi tiga Eberaiminaga haguaneni wialu gi le Manasenaga haguaneni wiyagola ogoni nakarulapeda manda buwa ibu abanaga gi tiga yamuwa Manasenaga haguaneni wialu howa
GEN 48:18 ibu abahondo lalu, Aba-o ogonidagua ndo. Igiri ogo ibu wahenego í̠naga gi tiga ibunaga haguaneni wulene karulape, lene.
GEN 48:19 Ani layagola ibu abahanda ogonidagua bulene hame nale biruwa Yosebehondo lalu, Igini-o ogoni i̱ manda bidogoni. Mani howa Manase ibu waneigini dewa dege holebiragoyu ibu hamene heyogone ogo ibunaga waneigini aguanene dewaore howa Manase waneigini ho bolangua holebira. Ani howa wali agali dewaore dindi maru ngaruha karubi dege holebira, lalu Yagabahanda lene.
GEN 48:20 Yagaba ibugua igiri biagolabo Ngode Datagaliwabehanda libu mo bayale helonaga bi lalu howa lalu, Isaraele wali agalirume Ngode Datagaliwabehondo ti mo bayale helonaga bi lalu howa libunaga minini lalu ogodagua lolebira. Ngode Datagaliwabe-o í̠na bamba Eberaimi Manasela mo bayale harigodagua áyu urubi nde ani dege bibe lolebira, lene. Yagabahanda anidagua lalu howa Eberaimi mo bamba halu wahene Manase mo maha helene.
GEN 48:21 Ani buwa mani Yagabahanda Yosebehondo lalu, Hale ha. Ai i̱ áyu dege homole bedogoni. Anigo Ngode Datagaliwabe ibugua tí biamogo bialu tí baba mandagi haabo halu tíninaga dindi haru dai bulebirago laro.
GEN 48:22 Dindi baya gibiore Segeme tanoha ngago i̱na abale Amoroaliru baba ayu tibu danda timurume wai buwa dindi ogoni i̱ karulenego ai dindi bayale ogoni í̠ hamene maru karu wahalu í̠ hangu ngerogoni, lene.
GEN 49:1 Yagabahanda ibu iginiru olalu ibidaba lowa tihondo bi ogodagua lene. Tí ogobiore holeberemi lalu languliya i̱ bedogoria kaware íbu hapara hadaba.
GEN 49:2 Ai Yagaba iginiru-o tígua tí aba Isaraele i̱na bi áyu larogoore baya hangu hale hadaba, lene.
GEN 49:3 Ai Lubene í̠ore i̱ni huliya igirini hono wini wahene howa í̠ agali timbuni gibi halu i̱ igini maru hongohe karubi ndo í̠na ti bolangua halu hongo gibiorehe kegoni.
GEN 49:4 Mana í̠na berego hongohe agali mendealime hapai habe nahe iba li ale holebere. Anigo í̠ waheneme holene henge ngagoria naholebere. Mana í̠na í̠ aba one haru paliriyagome i̱ kogoha mana tiga nabi taga holene mo yu anda ibiriyago lehe biriyagoni.
GEN 49:5 Simiono Libaila libu hamenela kabigoni. Libugua danda timu abale gilila mialu mendeali kago balu wai bule abale tungu laga.
GEN 49:6 Libugua ogonidagua bule bialu kagola i̱nime libu heba mini mbiraore nahe halu ogoni karulape bidabida nalolebero. Ani larogoni tene libugua keba ho kabingi agali abale homelo balu turu ho kabingi nogo bulumaganaga ge minu libulaki hagayago.
GEN 49:7 Libuha keba holene daligaore wialu tandaga harabigome libuni bo waholene wulebira. Ani bilodago i̱na libu Isaraele dindini wali agali karuha hopebe bu helo helarogoni.
GEN 49:8 Ai Yuda-o í̠ nde í̠ hamene karume í̠naga mini yaraga holebira. Í̠naga waitigi bu karu mani minuwa balu kegola í̠ hamene maru karume ibuwa í̠ni deni tinaga ma podalu bulu paligi bialu holebira. mini
GEN 49:9 Yuda ibu pudi gabua laiono hungubalua ale kagoni. Ibugua nogo tara tara balu nowa hongo howa hagadagua kagoni. Ibu emaru nabi laionome biragadagua hendore damboya bedagola agali mbirame ibunaga deni howa mine naholebiraore.
GEN 49:10 Ibugua handame haga kini manda bialu yaga halimbu ngago yu biruwa ibu kini haabo holebira. Ibu agali mini lene dege haho wialu Silo dindi anda puwa wali agali bibahende handame ho holebira.
GEN 49:11 Ibugua ibunaga pu mini gerebi lini dagane dewaore howa ibunaga nogo dongi dariba hole howa ira ogoni bayaleni dariba holebira. Ibunaga waini iba dewaore hambu bila kagola agalime nai habe nahe bu payabu wulebira. Ani wiragola ibugua ibuninaga agaru waini ibaneha wayawaya bulebira.
GEN 49:12 Ibu waini iba dewaore naga kalo mandabi ibunaga de daramabi halu nogo bulumaga andu ibane dewa naga kalo mandabi ibunaga ne peleore holebira, lene.
GEN 49:13 Sebulunu ibu iba solowara timbuni bedago angeni iba sibiru anda ibulene henge bayale wialu bidagoha holebira. Ani bialu ibula dindi tubaria amuraore puabo halu Saidono tanoni wulebira.
GEN 49:14 Isaga ibu nogo dongi hongohe ale howa ibuni nu dabudabu ngaru dombeneha yamo palima ibagabu holebira.
GEN 49:15 Ani howa mani handalu karia ibunaga dindini mbirale anda habe nahedane hondowa tomo hongole biabe hongo howaore bialu holebirago. Ani bialu howa mani agali mendenaga garabaya biabe ale erekuibi ndelaheore bia halu holebira, lene.
GEN 49:16 Dana ibugua ibunaga wali agali baya hangu handaya ho kagola ti Isaraele wali agali maru karubi dege holebira.
GEN 49:17 Ani howa ibu nogombi ko ale howa hariga gibunini bedaria agali nogo hosini biralu ibiragola harigani yu berenego abale porabu tagi howa nogo hosinaga ge ayundeni hayulebira. Hayaragola hosi mogo laragome agali nogo hosini biralu ibiyago mo para holebira.
GEN 49:18 Anduane Homogo-o í̠na i̱ biamogo bialu gini ngibelo kogoni.
GEN 49:19 Gada í̠ baba pageali karume wai bule ibalu karia í̠na wai hongo howa bialu ti bo talu pelolebere.
GEN 49:20 Ase í̠ daluha dindi bayaleni tomo dewa anda holebira. Anda haragola í̠na tomo bayale ngabiore handame haga kinime gubalini hagagobiore dawa wigi bulebere.
GEN 49:21 Nabadali í̠ nogo meme ale mini dia gabua ibunime hoa hagadagua hopebe bu howa igini baya dege degeru honoyu hagadagua holebere.
GEN 49:22 Yosebe ibu pu mbira gerebi lini dagane iba angeni dindi bayale ngagoria howa lini dewa do hagagobi holebira. Ani howa gene maganerume yuluyu pialu gana paberu dambi holebira.
GEN 49:23 Agali danda timu yuwa wai biaga karume hongo howa Yosebela wai bialu mo koore halu holebira.
GEN 49:24 Ani holebiragoyu Yosebe ibunaga danda hibuni gede nahe hongo haho wiaabo holebira. Yagabanaga Ngode Datagaliwabe Hongo Gibihe kagome ibu mo hongo haragola Yosebenaga gi hongo emeneorebi ibira naholebira. Ngode Datagaliwabe ogoni ibu Isaraele wali agali tinaga bira do hagane anda wia do hene ale ngelo kagola ibugua ti handaya ho haga ka.
GEN 49:25 Í̠ abanaga Ngode Datagaliwabe ogoni íbu howa ibu Hongo Haiheore kago ibugua hangu í̠ biamogo bialu mo bayale halu mbirale bayale dege ngaru ngiaga kagoni. Ibugua dege hariha howa iba dalu ibilalu dindiha howa iba dewa dugua dagadaga bilaga kagoni. Ibugua í̠naga aguanenerume waneigini dewaore taba henelo ngulebira.
GEN 49:26 Ai Yosebe-o i̱ni í̠ abahandaore larogo. Áyu í̠ biamogo bialu bayale habelonaga bi larogo heneneore mbirale bayale ngaru bibahende mibelonaga larogoni. Í̠na dewa aulolebe tobehe dewa dege lalu abale í̠naga mamalirume yu henegobi ndo dewaore hari wedaru bolangua howa yu habelo hame ledo. Ai Yosebe í̠ni hamene karunaga agali haguane mini lene í̠ni kegonidago. Bi áyu laruruni heneneore í̠na mo yai habelo larugoni.
GEN 49:27 Beniyamini ibu biango dudu timbuni ale mbira howa tia nogo egaru bo ngelowa egerebagi nalu birulebira. Ani buwa alendo ibugua mo yiniru talebu migi bialu holebira, lalu Yagabahanda lai hene.
GEN 49:28 Isaraele hameigini homberia (12) biaru uruni. Ti aba Yagaba ibuni kaware dege homole biruwa ibu iginiruhondo bi lolene winigo ti hangu hanguhondo lamigi bini.
GEN 49:29 Yagabahanda ibu iginiruhondo mani bulebirarunaga bi lai howa lalu, Tí lone ibidaba, lalu, Ai nde i̱ damene ala homayaru heba áyu dege tigi mbira hangu biralu mandagi hama pole bedogoni. Ani pedogola i̱naga tingini uyu Hidi hameigini Eberononaga dindini egeanda mbira ngago ogoniha i̱ dameneru hora hene biagoha yalu puwa ogoniha dege hora halimu.
GEN 49:30 Egeanda ogoni Kenana dindiha dindi emene Mamere mbira ngago kaware ngelowa dege dindi emene mbira Magabela ngagoria egeanda kagoha homali ogoniha nga. Abarahamahanda ala egeanda ogoni ibuninaga homali ngelonaga yolo binigo nga.
GEN 49:31 Homali ogoniha Abarahama hora halu ibu one Sarabi hora ka. Ani bialu Aisagabi ibu one Lebegabi ogoniha dege hora halu Liabi nde homayagola i̱na homali ogoniha dege ibu hora ko.
GEN 49:32 Dindi ogoni Abarahama ibugua Hidi hameigini hearunaga wiaria yolo bini ngago ogoniha tígua i̱bi hora halimu, lalu Yagabahanda ani lene.
GEN 49:33 Yagaba ibu bi urunidagua ibu iginiruhondo lai howa ibunaga ge dagiahayagi paulo yamialu homene. Homalu ibu damene ala homene biaru baba mandagi hora hole pene.
GEN 50:1 Yosebe ibugua handalu hearia ibu aba homaore biyiyagola ibuni Yagaba tongolomu wiagoria palia paga howa ibu aba nu̱nu̱ lalu dugu bialu hene.
GEN 50:2 Ani bialu mani Yosebe ibunaga anogoda hearume ibu abanaga tingini togo nabilo marasini tara ale wiaru ha̱i̱ hadaba layagola tigua ha̱i̱ howa ngelene.
GEN 50:3 Agali homenenaga tingini bayale wiaabo helonaga marasini horo pira mariani (40) ha̱i̱ halu hagadagua Yagabanaga tinginibi nde anogoda biarume horo pira mariani (40) ha̱i̱ halu howa biai hene. Iyibi wali agali hearu tigua horo pira kariani (70) Yagaba dara howa dugu bialu hene.
GEN 50:4 Dara howa dugu bialu duguandaru hai howa Yosebehanda kininaga agali haguane hearuhondo lalu, Aiore nde agaliru-o tígua kini bedaria puwa bi ogo lamule pudaba. Kinihondo agua lamilimu.
GEN 50:5 Ai kini-o i̱ aba ibuni nahome biruwa i̱hondo ibunaga tingini Kenana dindi homali ibuni wabu ngagoria hora hole yalu dai buleore lalu bi heneneore la layagola i̱na e̱ aniore bule larugo. Ai i̱ aba hora halu dai bule poabe laya lalimu, lene.
GEN 50:6 Kini ibugua Yosebenaga bi ogoni hale howa lalu, Karulapego ani bule í̠ abahondo bi lo wiridadagua bialu ibunaga tingini hora hole yalu pobe, lene.
GEN 50:7 Ani laya handala Iyibi dindi howa agali haguane bibahendebi agali ami haru haga timbuni hearubi ti bibahende Yosebe heba Yagaba hora hole pene.
GEN 50:8 Yosebe hamenerubi ti one waneiginirubi bibahendeore piai hene. Ti pialu howa tinaga nogo sibiru memeru bulumagaru dege waneigini emene galiru baba Gosene dindini helalu pene.
GEN 50:9 Nogo hosime gili laga garo ale mini karisibi nogo hosi erekuninibi agali biralu wali agali dewaliore Yosebe heba pole pialu hene.
GEN 50:10 Pialu dindi mbira Adada amu iba Yodana angeha ni tagira ibiragohayagi widi iraneru lini hondo ibira ibira bilo dagia mbira winiyagoria anda puwa dugu timbuniore agali homene dara howa dugu biagadaguaore bialu hene. Yosebe ibuni nde daraore howa horo karu dugu biaga wiadagua bialu hene.
GEN 50:11 Kenana wali agali hearume handalu hearia Adada dindini wali agali bu hearu dara howa dugu bialu heago hondowa tigua lalu, Iyibi wali agalirume dara timbuni howa dugu bialu kagonida, lene. Ani lowa tigua dindi ogoni mini Abele Misiraimi wini.
GEN 50:12 Yagaba igini biaru tigua ti abahanda layagoore talialu bilimu lenegodagua bialu
GEN 50:13 Abarahama ibugua egeanda mbira ibuninaga homali helo dindi emene mbira mini Magabela Mamere dindi kaware ngelowa Kenana dindini winigo. Egeanda ogoni agali Eberono Hidi hameigini heneyagonaga winigo ogoni yolobu ngelenego.
GEN 50:14 Ai Yosebehanda ibu aba egeanda ogoniha hora halu ibu hamenerubi wali agali ibu heba ibini biarubi ti bibahende Iyibi dindi dai bini.
GEN 50:15 Ti aba homayagola Yosebe hamene biaru tigua bi ogodagua lalu hene. Abale iname Yosebehondo mana kagua dewa birimaruni áyu ibugua mo wiaho howa inaha biadai bule manda buligo agua bimabe, lalu hene.
GEN 50:16 Ani lowa tigua Yosebe ibuni hearia bi mbira ogobi loyalu pelene. Tigua lalu, Ina aba ibuni nahome biruwa bi mbira inahondo langinigo yu kama.
GEN 50:17 Ibugua bi ogodagua laya. Aiore Yosebe í̠naga hamenerume í̠hondo koore timbuni biyaruni í̠na la nabi embeda halu pani biadai nabibe laro, laya. Ibugua ani layadagua áyu ina abanaga Ngode Datagaliwabenaga biabe biaga agali kamagonigo iname í̠hondo ko timbuni birimago la nabi embeda halu wahabelo hamelo kama, lene. Ani larimiyago Yosebe ibuni hale howa dugu bialu berene.
GEN 50:18 Ani berearia ibu hamene biaru ti Yosebe bereagoria ibuwa ibunaga geha bulu palialu howa lalu, Ina bibahende í̠naga biabe bia haga haradagua bule ibirima, lene.
GEN 50:19 Ani layagola Yosebehanda ladai bialu lalu, Tígua i̱hondo gi holeneore nawi. Tígua beramigo dabagane Ngode Datagaliwabe i̱ ndo kogoni.
GEN 50:20 Henene tígua mini mo mbiraore howa i̱ mo ko hole bia ani birimigo nde mani wali agali bu karu homa nabilonaga Ngode Datagaliwabehanda henemane bero lalu tíha howa binigo ai ogo ale binida lalu tínime hendedamigoni.
GEN 50:21 Anigo tígua gi holene nawi. Tínaga one waneiginirubi tínibi heba i̱na baya hanguore handaya ho holebero, lene. Ani laga bialu Yosebe ibugua ibu hameneru giho holigonaga ti gi nahe embedaho helo ibugua tinaga bu mini mo palia haga bialu hene.
GEN 50:22 Yosebe ibu hameneru heba Iyibi dindini howa ibu ai̱yahanda taba hanayangi mali hama ibinigo ibunaga mali handari mbirani pira mbira (110) howa ibu homene.
GEN 50:23 Ani nahome biruwa ibu igini Eberaimi igini aguanenerubi hendene. Ani bialu Manase igini Magia ibu iginirubi Yosebe berearia haru ibiyagola ibugua ibunaga pani berelaga bialu ibu aguaneneru hendene.
GEN 50:24 Yosebehanda nahome howa ibu hameneruhondo lalu, Ainde i̱ áyu dege homole bedogonidago tí nde Ngode Datagaliwabehanda dindi ogoha kamigoni wahalu tínaga dindi bamba Abarahama Aisagalahondobi Yagabahondobi ngulebero lalu habo nalolene bi lo wiyagoria haru dai bulebira, lene.
GEN 50:25 Ani lowa Yosebehanda Isaraele igini aguanene biaru ibidaba lowa tihondo lalu, Ai Ngode Datagaliwabehanda tí tíninaga dindi haru dai birangi i̱naga kuniru tíni heba yalu dai bule lalu bi heneneore hongohe ladaba, lene.
GEN 50:26 Ani lalu Yosebe ibuni mali handari mbirani pira mbira (110) howa homene. Homayagola tingini togo nabilo marasini tara tararu ha̱i̱ howa mbogoyi mbiraha Iyibi dindini ngelo hene.
EXO 1:1 Yagaba iginiru ti one waneigini heba Iyibi dindi pole Yagaba heba peneru uru.
EXO 1:2 Lubene Simiono Libai Yuda
EXO 1:3 Isaga Sebulunu Beniyamini
EXO 1:4 Dana Nabadali Gada Ase imaru pene.
EXO 1:5 Wali agali o penedaruni Yagaba ibunioreha howa tagira penego pira karia (70) pene. Ibu igini Yosebe ibu Iyibi dindi abale pu heaha ti mani pene.
EXO 1:6 Ani pu howa Yosebe ibu hamenerubi wali agali dabane ogoni aria ti mandagi henerubi homai hene.
EXO 1:7 Tini homalu tigua hono wiyagome Isaraele hameigini palene. Isaraele hameiginime hono tawe hama piyagola dewaore hapaya bialu Iyibi dindi ti dege ho namulene.
EXO 1:8 Ani bialu heagola agali gahenge mbira Yosebe manda nabinime Iyibi wali agalinaga kini ho aribia hene.
EXO 1:9 Ani howa ibugua ibunaga Iyibi wali agalihondo lalu, Isaraele wali agali o íbu karuni ti hongo gibihe ina dindi wirimagoni ti dege dindi halu hapaya bidagome ina babehe hiriribi kama.
EXO 1:10 Ina agali baba wai beramangi tigua ina napele ngulebira. Ti wai mendegoha anda puwa ina badai bialu dindi wahalu pole o íbu karuni. Ani bule kago manda buwa o karuni ti ho timbu halu ho dame nabilonaga iname mbira agi bibehedabe handami̱ya, lene.
EXO 1:11 Ani lowa Iyibi wali agalime agali ko handabe mangabi wali agali garabaya biabe ale bilo mo miaga hearu dabowa urunime haru helo helene. Biabe wiarunime Isaraele wali agalinaga mini tinginibi bo gangu lelonaga biabe erekuibiore mo mini. Ani mo miyagola Isaraele wali agalime anda dewa buhe tano timbuni kira Pidomo Lamesela kini biago ibu dabudabu wilonaga bia hene.
EXO 1:12 Iyibi wali agalime Isaraele wali agali hengedalu mo emene hole biyagola Isaraele wali agali ti ho dame biaho wialu Iyibi dindi wiagoriani ti dege ho yu lama pene. Ani biyagola hondowa Iyibi wali agali ti Isaraele wali agali handalu gi howa
EXO 1:13 Isaraele wali agali mo genda halu hengedapeore holenaga garabaya biabe ale koore mangabiru mo bia hene. Iyibi wali agali tinaga ege timeni andaru biaha mabu biaberu biaha bigi bilalu dara naheore garabaya biabe ale gibiru mo migi bini.
EXO 1:15 Ani bialu howa Iyibinaga kini biagome wali kira Pua Sibarala libu Isaraele wali waneigini gali taba henelo biamogo biaga berenego ogonilabo lamialu lalu,
EXO 1:16 Isaraele wali gali taba henelo biamogo bigi berabingi igiri taba hanayagua bo wahaga bialu wandariyagua berelalibu lene.
EXO 1:17 Ani lamiyagoyu wali biago libu Anduane Homogohondo giho biraga berenegome kini biagome layadagua nabi igiri taba hanaga biyago nabe wahene.
EXO 1:18 Ani bira layago hale howa kini biagome wali biago labo hondo pudaba lowa ibiyagola libuhondo lalu, Igiri taba hanarago bo wahaga bilibu larugo nabe wahalu helaga biribiyago aginagabe, lene.
EXO 1:19 Ani layagola libugua ladai bialu lalu, Hiburu waliru ti Iyibi wali ale ndo beda. Ti waneigini baya hanguore mbira mo ko nahe taba hanaga biaga. Iyame biamogo bule lowa pialu kabaria abale tini taba hono bedaria pugu berabali.
EXO 1:20 Wali gali biamogo biaga biagolabo libu Ngode Datagaliwabe ibuhondo gi howa mana tigabi bialu bereago hondowa Ngode Datagaliwabehanda libuhondo bayale bialu libuni nde waneigini helo biamogo bini. Ani bialu Isaraele wali agali ti timbuni halu hongohe hene.
EXO 1:22 Aniore biyago hondowa kini biagome ibunaga wali agali bibahendehondo, O larogodaguaore bilimu, lowa lalu, Hiburu walime wandari taba hanarago berelowa igiri taba hanarago bibahende abale minuwa iba Nailiha bape halimu, lene.
EXO 2:1 Odangi Libai hameigini aria agali mbirame Libai wali dege wali tagini mbira dabu bini.
EXO 2:2 Dabu biyagola agalidagonaga igiri mbira taba henene. Taba honowa handalu hearia hulu igiri baya gibioreyagola taba hono do howa ege tebira berene.
EXO 2:3 Ani biruwa handalu hearia taba hono doho biraabo habe naheyagola mbasigedi nu mbira dambe aleme bini wiago muwa iba anda polilono golodame hirame howa ndibu lene. Ani buwa igiri gali biago nu o biagoniha mo pale lowa dunduyame bu heagoha mo ngelene.
EXO 2:4 Ani ngelowa igiri gali biago mbalini mbirame agi birabe hondole madia hondo hene.
EXO 2:5 Ani madia hondo hearia kini wane mbira ibaha wayawaya bule ibini. Wandari maru ibunaga biabe biagaru ti iba angeange ibagabu hene. Kini wane biago ibu wayawaya bule lowa handalu hearia mbasigedi nu mbira ibu heagoha wiaria hondowa ibunaga biabe biaga wandari mbirahondo, Mo pu, lene.
EXO 2:6 Mo yu ibiyagola panga duguwa handalu hearia igiri emene gali mbira dugu bialu wiago hondowa dara hene. Dara howa lalu, Igiri gali ogo Hiburu wali mbiragonagada, lene.
EXO 2:7 Ani layagola igiri gali mbalini mbira madiahondo hayagome lalu, I̱na igiri gali ogoni mondo bia helo Hiburu wali mbira hondo poabe, lene.
EXO 2:8 Ani layagola kini wane biagome ladai bialu, E̱ aniore bia, lene. Ani layagola wandari biagome puwa igiri gali biago ibuninaga ai̱ya haru ibini.
EXO 2:9 Ibiyagola kini wane biagome wali biago lamialu lalu, Í̠na igiri gali ogo i̱naga mondo bia habe. Ani beregonaga i̱ yolo nguliya, lene. Ani layagola wali biagome ibu igini biago ibuni andu mialu mondo bini.
EXO 2:10 Ani bialu howa mani igiri emene biago boga bialu wahe hayagola ibu ai̱yahanda kini wane biago berearia haru pene. Haru piyagola kini wane biagome ibuni iginiore mondo biradagua bini. Ani bialu howa manda bialu hearia igiri ogo ibaha wiaria gililo mirugodago ibu mini gililo mini lalu Mosese wibeheda manda buwa mini Mosese wini.
EXO 2:11 Horo mbiru Mosese ibu igiri wahe heangi ibu aria Isaraele wali agali hearia nenege pene. Puwa handalu hearia ibunaga wali agaliru biabe erekuibi ndelaheore mo bia halu harayago hendene. Ani bialu Iyibiali mbirame Isaraeleali Mosese ibuni aria mbirago bo wahalu hearia de hendene.
EXO 2:12 Ogoni biyago hondowa Mosese ibu ala handade̱le̱ bialu hearia mbirali naheyagola Iyibi agali biago bowa iba muha bo hora hene.
EXO 2:13 Ogoni bialu puwa horo mendengi lone dai bialu hearia Isaraeleali labolabo kira gungu bialu hearia hendene. Hondowa agali mende kagua biniyagohondo lalu, Í̠ni aria ogo nde dara nahe aginaga minu barebe, lene.
EXO 2:14 Ani layagola agali biagome ladai bialu lalu, Í̠na ogoria de hondo howa dabaki bule ibabe layadago aiwa. Abe Iyibiali biago bo waharigo ai áyu i̱ bo wahole íbu kebe, lene. Bi ogonidagua ladai biyago hale howa Mosese ibu gi howa ibuni minime lo manda bialu ai i̱na birugo wali agalime handa walia hayadago lo manda bini.
EXO 2:15 Mosesehanda ogonidagua biya layago hale howa Iyibinaga handame haga kini biagome Mosese bo wahole manda bini. Ani bialu heago hondowa Mosese ibu Midiana dindiha ibida pene. Pu howa horo mbiru Mosese ibu iba uli mbira wiagoria berearia Midiana dindinaga loma binigo mo miaga agali Yadero henego ogoni wane kariali berenego uruni ti iba nolenebi ti abanaga nogo sibi memerunagabi hambu yule lowa hambu ibini.
EXO 2:17 Ibalu hearia nogo sibi haru haga agali tara maru hearume wandari biaru tali pelene. Tali pelalu hearia Mosesehanda heyuwa lalu, Ogoni nabidababe, lowa wandari biaru biamogo bialu tinaga nogo haru hearubi iba nelo ibugua dege hambu mini.
EXO 2:18 Ani biya handala wandari biarume ti aba hearia dai bialu hemiria ti abahanda lalu, Tí eberamilidagua ndo áyunde abaleore ibirimidago agua birimibe, lene.
EXO 2:19 Ani layagola tigua ladai bialu lalu, Nogo sibi haru haga hearume ina talima ibalu hearia Iyibiali mbirame ina biamogo biya. Ina biamogo bialu inanaga ibabi ibugua hambu ngialu inanaga nogo sibi memeru ibabi ibugua dege hambu ngiya, lene.
EXO 2:20 Ani layagola Yaderohanda ibu wane biaruhondo lalu, Be-e áyu agalidago ibuni abiyabe. Agi bule helalu ibirimi. Tomo ina haru nami̱ya agalidago hondo pudaba, lene.
EXO 2:21 Ani layagola tigua Mosese hondo puwa tomo ti haru mandagi nene. Tomo nalu Mosese ibu pu nabi o biagoria hearia dungu leneni Yaderola hadali hene. Hadali halu libu howa Yaderohanda ibu wane Sibora Mosese ibu dabu bilo mini.
EXO 2:22 Miyagola wali biagome Mosesenaga igiri taba henene. Taba hanayagola Mosese ibuni manda bialu hearia ibu dindi tarali bame igiri yango íbu harugoda lo manda buwa ibu igini mini Gesomo wini.
EXO 2:23 Mosese ibu uruni bialu heaha ege pu mali pu bigi biyagola Iyibi dindini kini hayago homene. Isaraele wali agali u̱lu̱ lalu garabaya biabe ale bialu genda hayagoni haabo howa Ngode Datagaliwabehondo biamogo bia lalu hene. Gendaho howa bi layago Ngode Datagaliwabe ibu hale hene.
EXO 2:24 Hale howa ibugua Abarahama Aisaga Yagaba imaruhondo habo nalolene bi lo wigi biniru mitangi bini.
EXO 2:25 Ani mitangi bialu Isaraele wali agali garabaya biabe ale darabi bialu heago hondowa ibugua ti mitangi bialu mandabu hene.
EXO 3:1 Horo mbirungi Mosesehanda ibu imane Yaderonaga nogo sibi memeru haru halu dindi ko wali agali nahe wiagoria haru bolangua halu pialu Hari Sainai heagoria haru anda pene. Hari Sainai odago Ngode Datagaliwabenaga lowa loma bini hene. Ibu imane Yadero ibu Midiana dindinaga loma binigo mo miaga agali henego ogoninaga nogo sibi haru hene.
EXO 3:2 Odagoriani haru hearia Anduane Homogonaga dahuliyalime ira emene heagonaga yuni maganeruha howa ira hungu datagi helene. Ani biyagola Mosese ibu hearia ira emene dombedene biagoha howa hungu biatagi hayagoyu ira denego hondole ndo dalu hearia de hendene.
EXO 3:3 De ogoni nde abu tobahedago agua binidabe. Ira dombeneha ogoni do mina nabi dalu kagoni aube tobahedago kaware hapara howa hondoliya lo manda bini.
EXO 3:4 Ani manda buwa kaware hapara hole ibiyago hondowa Ngode Datagaliwabehanda ira hungu biagoha howa olalu, Mosese-o Mosese-o, lalu olene. Ani layagola Mosesehanda ladai bialu lalu, Yao i̱ o ko, lene.
EXO 3:5 Ani layagola Ngode Datagaliwabehanda lalu, Kaware hapara nahe ogoriani hondoha. Í̠ dindi kegoriani Anduane Homogonaga loma bini kegonigo í̠ ge su hadalu wibe.
EXO 3:6 I̱ í̠ mamali Abarahama Aisaga Yagaba imarunaga Ngode Datagaliwabe kogoni, lene. Ani layago hale howa Mosese ibu Ngode Datagaliwabe de handaya helenego gi howa ibunaga dengui yi hene.
EXO 3:7 Yi hayagola Anduane Homogohanda lalu, I̱naga wali agali Iyibi dindini garabaya biabe ale bilo mo miagane karume handabe manga halu mo ko howa kagoni hendedo. Mo ko howa haru haruagoni nahelo gi mia lalu dugu biayuago hale haru. Ti tandaga nalu kagoni ogobiore nara i̱ manda bido.
EXO 3:8 Ani manda buwa i̱na ti gi mule Iyibi wali agali andaneha kago nahelo gi mialu Iyibi dindi wahalu haru tagira pialu polenaga i̱ dalipe ho ko. Haru tagira puwa dindi henge timbuniwi mbira tomo bayale anda holenenaga dindi homogoore dindi ogoni áyu Kenanali Hidiali Amoroali Pereseali Hibiali Yabusuali imaru hameigini uruni ti kagoria haru pu helolebero, lene.
EXO 3:9 I̱naga wali agalinaga dugu biyago hale haore bialu Iyibi wali agalime minu hengeda mbaralo wahalu kago i̱ hondo ko.
EXO 3:10 Ani hendedogo ai Mosese í̠na Isaraele wali agali Iyibi dindi howa haru tagira pole í̠ áyu polebere, lene.
EXO 3:11 Ani layagola Mosesehanda Ngode Datagaliwabehondo lalu, I̱ agali mbira abogo ka nalene kogo i̱ alegome kini kagoria puwa Isaraele wali agali Iyibi dindi howa haru tagira ibule au poledabe, lene.
EXO 3:12 Ani layagola Ngode Datagaliwabehanda ladai bialu lalu, I̱na í̠ heba holebero. Isaraele wali agali Iyibi dindi howa haru tagira ibuwa hari o kagoria tígua i̱ mitangi bialu mo dunini howa lotu loleberami. Nde ogonidagua buleberamigo bialu howa i̱na heneneore biamogo bulenaga pu leneda lalu ogoningi manda bulebere, lene.
EXO 3:13 Ani layagola Mosesehanda ladai bialu lalu, I̱na Isaraele wali agali kagoria puwa tihondo, Tí mamalinaga Ngode Datagaliwabe bamba heneyagome i̱ tí kamiria pu laya handala ibiru, larogola tigua odagoni ibu mini aibe lolebirago ani laragola ai laguadabe, lene.
EXO 3:14 Ani layagola Ngode Datagaliwabehanda lalu, I̱ I̱ni Haluhe Henego Haabo Hole Kogoni. Mbirali mini I̱ Haluhe Kogo ibugua ti kamiria pu laya handala ibiru lamibe, lene.
EXO 3:15 Isaraele wali agali lamialu au labe. Tínaga mamali Abarahama Aisaga Yagaba imaru heneyarunaga Anduane Homogo Ngode Datagaliwabehanda i̱ tí kamiria pu laya handala ibiru labe. I̱ mini wia̱i̱ a̱i̱ bulebirago o langirugoni. Wali agali dabane mani hararumebi i̱ mini ogoni dege lalu lolebira.
EXO 3:16 Ani lolebirago i̱ pialu Isaraele wali agalinaga haru haga haguane karu mo ngoai howa ti mamali Abarahama Aisaga Yagaba imarunaga Anduane Homogo Ngode Datagaliwabe i̱ hewaria hapani haya lalu lamibe. Ibu ti hemiria ibalu Iyibi wali agalime tihondo bialu kagoni i̱ handaru laya lamibe.
EXO 3:17 Ani hondowa Iyibi dindini howa mo tandaga gibi haragola tandaga naabo halu kamigo nanalimulo haru tagira pole manda biru laya lalu lamibe. Dindi Kenanali Hidiali Amoroali Pereseali Hibiali Yabusuali urunaga dindi ngagoria haru tagira polebero laya, labe.
EXO 3:18 I̱naga wali agalime í̠na tihondo bi larego hale holebirago lamibe. Wali agalihondo ani lamialu Isaraelenaga agali haguane hangu haru halu Iyibi dindinaga kini bedagoria puwa ibuhondo agua lamilimu. Anduane Homogo Hiburu wali agalinaga Ngode Datagaliwabe kagome ibuni inahondo hapani haya handala eberama. Ani beramago ina dindi ko wali agali nahaga ngagoria puwa inanaga Anduane Homogo Ngode Datagaliwabehondo mbirale bo delo muluma̱ya horo tebiru henge ngerebe lalimu, lene.
EXO 3:19 Iyibinaga kini kagome tígua ani laramigo hale halu mo henene halu haru pudaba nalolebiralo manda bidogo menaga hangu hale halimu.
EXO 3:20 Ani nale mini giambe harago hondowa i̱na i̱naga hongome mbirale hiriribiru bialu Iyibi wali agali pani merogo hondowa tí pudaba lolebira.
EXO 3:21 Ani bialu Iyibi wali agali tigua Isaraele wali agali mo yo handabe nahedane hondolebira. Ani biragola i̱naga wali agali ti giha mbirale mbira nayiore natagira polebira.
EXO 3:22 Ani nabi howa Isaraele wali hangu hangume Iyibi wali anda be mendeha padaruhondo ainde porogo agabi ngolobi silibabi mbira ngia naberego lalu hale holebira. Ani laragola Iyibi wali agalime bu hombedo miragola Isaraele wali agali ti mbirale uruni ti waneiginibi hombedo yalu Iyibinaga dabudabu bibahende ti hombedo yai halu polebira.
EXO 4:1 Ani layagola Mosesehanda Anduane Homogohondo ladai bialu lalu, Ogoni karulapego Isaraele wali agalime i̱na bi lamerogo hale halu henene lara lowa yu tiga nabi bi lamerogobi hale hoa naholebira. Ani howa Anduane Homogo í̠ heria hapani haya laregoni ke̱ harego waha layagua i̱na agua laguadabe, lene.
EXO 4:2 Ani layagola Anduane Homogohanda ibuhondo lalu, Í̠ giha o yidegoni agilebe, lene. I̱na gewa halimbu yido, ladai bini.
EXO 4:3 Ani layagola Anduane Homogohanda lalu, Gewa halimbu ogoni dindini ibiraha, lene. Dindini ibira hayagola mo nogombi hene. Nogombi hayagola Mosese ibu gi howa ibida pene.
EXO 4:4 Ibida piyagola Anduane Homogohanda Mosesehondo lalu, Bulu paluwa ereneni minuwa yamia, lene. Ani layadagua ereneni minayagola lone mo gewa halimbu hodai bini.
EXO 4:5 Ani biyagola Anduane Homogohanda Mosesehondo lalu, Isaraele wali agalime Anduane Homogo ti mamali Abarahamabi Aisagabi Yagababi tinaga Ngode Datagaliwabe kago ibu í̠ heria hapani haya larego henene ani biyadalo hendelo manane ogoni walia habe, lalu lamini.
EXO 4:6 Ani lowa Anduane Homogohanda Mosesehondo lone lalu, Í̠naga gi aga bidegoni pogediha gambira, lene. Mosese ibu hale halu layadagua gi pogediha gambirini. Gambiruwa yamialu hearia gi hamuabi ale pewele hari beraliba ale yamini.
EXO 4:7 Ani biyagola Anduane Homogohanda Mosesehondo lalu, Ai í̠naga gi lone pogedi biagoha gambira, lene. Ani layagola gambiruwa yamialu hearia gi hamua ale biniyago nabi bayale tingini maru heagobi dege yamini.
EXO 4:8 Ani biyagola Anduane Homogohanda Mosesehondo lalu, Isaraele wali agali tigua í̠na bi lamerego hale halu yu tiga nabiyaguabi nahendene ale hiriribi pigane biago berego hondowa miniha hiri nalayagua nahendene ale mende ogoni berego hondowa henene larida manda bulebira.
EXO 4:9 Ai manane kira ogonilabo berego hondowabi ti miniha hiri nalole bi lameregobi hale habe manga dege hayagua o iba Naili porago hambu yuwa ti de hendelo dindini odope habe. Odope haregola iba ogoni mo darama holebira, lene.
EXO 4:10 Ani layagola Mosesehanda lalu, Anduane Homogo-o i̱ ndogo pu nalabe. I̱ wali agali deni howa bi bayuwa nalene ko. Bi uruniale mbira i̱na lole kogoni lo mandabu henebi ndo ko. Bi bayuwa hege bebenabu nalaruli loa naloalo howa hendore laga biruli, lene.
EXO 4:11 Ani layagola Anduane Homogohanda Mosesehondo lalu, Wali agalinaga ne hambu wabu heledagoni aiwabe. Wali agalinaga hale mo tuluha bi mo ndibula bigi biaganego aiwabe. Wali agalinaga de mo angalaha mo ndibula bigi biaganego aiwabe. Anduane Homogo i̱na ani biaga ndoyabe.
EXO 4:12 Ani biruligo í̠ áyu ogoni pu. Bi ogo la lalubi i̱na dege langulebero, lene.
EXO 4:13 Ani layagola Mosesehanda bi ladai bialu lalu, Anduane Homogo i̱ ndogo mbirali pu labe, lene.
EXO 4:14 Ani ladai biyagola Anduane Homogohanda Mosesela keba howa lalu, Aniyagua í̠ hamene Arono Libaiali biago abiyabe, lene. Ibugua bi bayuwa lolebira lo manda bidogo. Arono ibuni í̠ keria ibule áyu ogoni harigani ibalu kago ibugua í̠ hondowa turu holebira, lene.
EXO 4:15 Í̠na Aronohondo bi ogoale labiya kaba lalu ibuhondo lamibe. I̱na libu harume bi lalibulonaga biamogo bialu ogoale bidaba lalubi libu haru biamogo bulebero, lene.
EXO 4:16 Í̠na bi endeho meregola Arono ibugua wali agali deni howa í̠na lolenegodagua lolebira. Í̠na Ngode Datagaliwabehanda lolenedagua ibuhondo ogoale labe lalu bi endeho migi berego yuwa ibugua lamigi bulebira.
EXO 4:17 Ani buleberabigo gewa halimbu ogo yalu pobe ogonime agalime nabiagane ale hiriribi bigi buleberego giha ogoni yalu pobe, lene.
EXO 4:18 Anduane Homogohanda ani lamiya handala Mosese ibuni ibu imane Yadero hearia dai buwa lalu, Imane-o ainde i̱ hameigini biaru Iyibi dindini bu hayago uruni kabe handama pole manda bidogo poabe, lene. Ani layagola Yaderohanda lalu, Nde abini mbiru handa degego pobe, lene.
EXO 4:19 Mosese pole lo dege Midiana dindini hearia Anduane Homogohanda ibuhondo lalu, Agali í̠ bo wahole lowa tai bialu hayaruni bibahende homai hayago áyu í̠ Iyibi dindi dai bia, lene.
EXO 4:20 Ani laya handala Mosesehanda ibu onebi ibu igini kira biago labobi nogo dongini berelalu ibuni giha Ngode Datagaliwabehanda halimbu yabe layago yalu Iyibi dindi pole pene.
EXO 4:21 Pole piyagola Anduane Homogohanda Mosesehondo lone lalu, Iyibi dindi anda puwa kini kagonaga deni howa manane walia habelo hongo ngirugo yuwa manane biaruni bihende biai habe. Uruni berego hondowabi ibu miniha mogo lalu hiri nalelo ibunaga bu mini i̱na mo giambe holebero. Bu mini mo giambeore harogola i̱naga wali agali yupe halu pudaba nalolebira.
EXO 4:22 Ani biragola í̠na kini ogonihondo lamialu, Anduane Homogohanda lalu, Isaraele ibu i̱naga igini wahene ale ndoyabe, laya labe.
EXO 4:23 Anigo i̱ igini ibuni i̱ mitangi bialu mo dunini howa lotu lelo tagira pialu pela larugo napelolebero larigoni. Ani birigodago i̱na nde í̠ igini wahenego áyu barogoni laya, lalu lamibe.
EXO 4:24 Ani laya handala hale halu Mosese ibu Iyibi pole pialu hariga handa paliagani palearia Anduane Homogo ibu puwa Mosese bo wahole bini.
EXO 4:25 Ani biyagola Mosese ibuni one Siborahanda are ne gadele mbira muwa ibu igininaga dongone podowa Mosesenaga ge mbarianeni ela hene.
EXO 4:26 Ela halu lalu, Darama ogonime iya mo bimaga kagola í̠ i̱ agalini kegoni, lene. Ani layagola Anduane Homogohanda Mosese ba nabi wahene.
EXO 4:27 Ogoni bialu heaha Anduane Homogohanda Aronohondo lamialu, Mosese ibirago lola hole dindi ko wali agali nahe ngagoria pobe, lene. Ani layagola dindi ko wali agali nahe biagoria Arono ibu Mosese lola hole Ngode Datagaliwabenaga hari loma bini heagoria pialu hearia Mosese ibiyagola lola howa yu nu̱nu̱ lene.
EXO 4:28 Ani buwa Mosese ibugua Aronohondo bi bibahende Anduane Homogohanda ibuhondo Iyibi dindi dai bia lalu lamiyago lamiai hene. Ani bialu Anduane Homogohanda manane maru Mosese ibugua bibe layagobi lamiai dege hene.
EXO 4:29 Ani bialu Mosese Arono libu haru Iyibi dindi puwa Isaraele wali agalinaga agali haguane hearu mo ngoai hene.
EXO 4:30 Mo ngoaiho helowa Arono ibugua Anduane Homogohanda Mosesehondo bi laminiyago bibahende agali biaruhondo lamiai hene. Lamialu howa Mosese ibugua wali agali bu hearu deni howa agalime nabiagane ale manane bibe laya ale bibahende biai hene.
EXO 4:31 Uruni biyago hondowa wali agali biarume heneneda lowa mini mbiraore wiai hene. Wialu Anduane Homogo ibu ti hearia ibalu Iyibi wali agalime ti handabe mangaore howa haru kagoni de handaru laya lalu lamiyagola hale hene. Aniore layago hale howa ti bulu palialu Anduane Homogo mitangi bialu ibu mo dunini howa lotu lalu hene.
EXO 5:1 Ani bialu halu Mosese Aronola libu Iyibinaga kini hearia puwa ibuhondo au lene. Anduane Homogo Isaraele wali agalinaga Ngode Datagaliwabe kagome lalu, I̱naga wali agalime dindi ko wali agali nahaga ngagoria puwa i̱naga mini yaraga helo áyu ogoni pudaba la, lene.
EXO 5:2 Ani layagola kini biagome ladai bialu lalu, Anduane Homogo haruagoni aibe. I̱na ibunaga bi hale halu Isaraele wali agali pudaba larodago aginagabe. Anduane Homogo o haruadagoni i̱ manda nabidogo Isaraele wali agali pudaba nalolebero, lene.
EXO 5:3 Ani layagola Mosese Aronolame ladai bialu lalu, Hiburu wali agalinaga Ngode Datagaliwabe ibuni iya hebaria hapani haya. Ani biyago inanaga Anduane Homogo Ngode Datagaliwabe kagohondo mbirale bo delo mule dindi ko wali agali nahaga ngagoria poloma̱ya horo tebiraore henge ngi. Iname anidagua nabirimayagua ibugua agali wai waragorume ina bo home lolebirago, lene.
EXO 5:4 Ani layagola kini biagome Mosese Aronolahondo lalu, Ogoni wali agalime biabe birago hado wahelonaga hawa larabidago bi nale pudaba. Wali agali garabaya biabe ale bia haga o kamiruni biabe bule áyu ogoni pudaba.
EXO 5:5 Iyibi wali agali kagobi ndo dindi o ngagoniha tí hangu paliame kamigo agua. Ani kamigo howa ai áyu biabe biari holenaga larimidago be, lene.
EXO 5:6 Ani lowa horo odangiore kini biagome garabaya biabe ale hondo haga Iyibiali hearubi biabe haru haga Isaraele agali hearubihondo lamialu au lene.
EXO 5:7 Ibugua lalu, Isaraele wali agali ege timeni wabilonaga tani yobi meramilidagua yawi namilimu. Tini mbirani taya bima pialu mo yu ibilo nami wahalimu, lene.
EXO 5:8 Ai biabenaga mbira gadia dai buwa ndo ege timeni o wabiralidaguaore bilo bidaba lalimu. Áyu tinaga Ngode Datagaliwabe kagoria puwa mbirale bo delo mule poloma̱ya henge ngi lalu i̱hondo hale haabo halu kagoni irane biabe mo mirugo emene hameleyane ai maru mo tagoha layadago mo tago harogoni.
EXO 5:9 Agali karuni biabe erekuibiore bilo mo mialu mbirali bame holani. Agalime dugu tindule lama ibuwa o lalu kago hale haganego biabeniore helai halimu, lene.
EXO 5:10 Ani layagola garabaya biabe ale hondo hagabi Isaraelenaga haru hagabi tigua puwa Isaraele wali agalihondo lalu, Kini ibugua tí ege timeni wabilimulonaga tani yobi ngirulidagua ai nangulebero laya. Nanguleberogo ti ege timeninaga mbira gadu wanahe waberamilidaguaore wabuleberami laya.
EXO 5:11 Ani bulenaga tani biagoni ale tínime tai bima ibaga bialu mo yalu ibuwa bulene ngago ege timeni mbira gadu wanahe daga ngirudaguaore wabuleberami laya, lene.
EXO 5:12 Ani laya handala Isaraele wali agali biaru Iyibi dindiha pume halu tani yobi biago taya bima pugu pugu bini.
EXO 5:13 Ani bialu Iyibiali garabaya biabe ale hondo haga biarume biabe gendabiore mo bia halu tani yobi kini biagome miyagola wabiyadagua dege tani yobi tinime taya bialu ogonidagua dege wabilo mo bia haabo halu hene.
EXO 5:14 Ani bialu Iyibi garabaya biabe ale hondo haga hearume Isaraeleali tini aria haru helo maru dabo helayaru minu baga bini. Minu baga bialu howa lalu, Tínaga wali agalime ege timeni ala wabiralidagua ndo áyu mani emene wabiragoni agua binidabe tígua langi handadaba, laga bialu baga bini.
EXO 5:15 Ani bigi biya handala Isaraeleali tini yangone de hondo helo dabo helene biarume kini heagoria puwa genda heagobi agua lamini. Inanaga kini daligaore í̠ kego inahondo tandagabi o bialu kegoni aginaga berebe, lene.
EXO 5:16 Ina tani yobi biago nangi inaneme taya bialu bilimu lariyago lalu ege timeni mbira gadia dai nabi howa waberamilidaguaore bilimu lalu kago ogonidagua karulapedabe. Ogonidagua wa nabirimida lowa ina minu baga bialu kagoni mana liahe kini í̠naga agalime inahondo bialu kagoni, lene.
EXO 5:17 Ani layagola kini biagome ladai bialu lalu, Ogoni ke̱ ti mangani biabe nabulenaga bi larimidago. Tínaga Anduane Homogohondo mbirale bo delo mule poramabe lowa hale harimigo tindule biabe manganiore larimida mandabu kogoni, lene.
EXO 5:18 Bayuwa birimidago áyu ogoni biabe bule dai bidaba. Tani yobi ngirudagua nanguleberogoyu ege timeni waberamilidaguaore wabulene nga, lene.
EXO 5:19 Ani layago hale howa Isaraeleali haru haga biarume ai hiriribioreni harimada lo manda bini. Horo bibahendengi ege timeni mbira gadu wanahe waberamilidaguaore wabilimu layago hale howa ai hiriribini harimada lo manda bima pene.
EXO 5:20 Pole pialu hearia Mosese Aronola ti ibilonaga hondo hearia pene.
EXO 5:21 Libu hearia puwa tigua libuhondo lalu, Libugua bi o lama ibiribigonime hawa ina belonaga kinibi ibunaga biabe biaga karumebi ina belonaga minu miradagua biribiyago. Libugua o biribigoni Anduane Homogo ibugua hendedago ibugua libu pani ngulebira. Ibugua ina irane agini boabe tabaho hayago ai irane libugua mo miribigoriani geho howa ina bo waholebira, lene.
EXO 5:22 Ani layagola Mosesehanda Ngode Datagaliwabehondo lalu, Í̠naga wali agali mo genda haregoni agonaga berebe. Í̠na i̱ wali agali uru hearia pu larigoni aginaga laribe.
EXO 5:23 Kini biago hearia puwa í̠na langiridagua lamule pirungi howa ibugua wali agaliruhondo handabe manga howa kebabi dege biaabo haya. Ani biyago hondowa í̠na ti mbira biamogo bule manda nabi í̠ handayaho kegoni, lene.
EXO 6:1 Ani layagola Anduane Homogohanda Mosesehondo lalu, Ai i̱na kini ogonihondo bigi berogo hondolebere. I̱naga wali agali tagira pialu pelo i̱ninaga hongome he̱latagi halu pudaba lolebero. Iyibi dindi wahalu pudaba lelonaga i̱ninaga hongome mo bia holebero, lene.
EXO 6:2 Ani lowa Ngode Datagaliwabehanda Mosese lamialu lalu, I̱ Anduane Homogo kogoni.
EXO 6:3 Abarahamabi Aisagabi Yagababi hearia hapani haga birugoni. Ani bialu harugoni i̱ Ngode Datagaliwabe Hongo Haiheore Ko, lalu hapani haga birugoni. Ai i̱ninaga mini baya burugule Anduane Homogo kogoni ti manda bilo mo walia nahene ko.
EXO 6:4 I̱na ti baba habo nalolene bi lowialu Kenana dindi ti bai nale haluni hameigini tara dindini kamigoni ti dindi teneore ogoni buhinu halimulo ngulebero lowini ngo, lene.
EXO 6:5 Ai áyu Isaraele wali agaliru Iyibiali tigua tinaga garabaya biabe ale biahe layago bialu howa tandaga howa u̱lu̱ lalu haabo hayuago i̱ hale haru. Hale howa habo nalolene bi ala lo wirudagoni mitangi biru.
EXO 6:6 Ani mitangi bu kogo ai áyu Isaraeleali lamialu i̱na au laya lamibe. I̱ Anduane Homogo kogo. I̱na tí gi mialu Iyibialinaga garabaya biabe ale bialu kamigoni nahalimulo golope halu pudaba lolebero. I̱na i̱ninaga gi hongohe kogo yaraga halu Iyibi wali agali pani hiriribiore mialu tí pele ngulebero, laya labe.
EXO 6:7 Ani bialu i̱na tí mo i̱naga wali agali bu hinalu i̱ nde tínaga Ngode Datagaliwabe holebero. Tí Iyibi dindini garabaya biabe ale bialu kamigo nahalimulo golope harogola tagira poramingi i̱ Anduane Homogo tínaga Ngode Datagaliwabe heneda manda buleberami, laya lamibe.
EXO 6:8 I̱na tí haru tagira pialu bamba i̱na Abarahama Aisaga Yagaba imaruhondo dindi ogoni ngulebero lo winidagoriani haru puwa helolebero. Ani bialu dindi odagoni tíni dindioreni bu hinu halimulo ngulebero. I̱ Anduane Homogohanda ani laya lamibe, lene.
EXO 6:9 Ani laya handala puwa Mosese ibugua Anduane Homogohanda labe layadagua Isaraele wali agali lamini. Lamiyagoyu Isaraele wali agali biaru biabe erekuibi biaabo hayagome mini dininila bo gangu leagola bi layaruni hale nahene.
EXO 6:10 Ani bu heagola Anduane Homogohanda Mosesehondo lalu,
EXO 6:11 Áyu ogoni Iyibinaga kini kagoria puwa ibuhondo lalu, Isaraele wali agali Iyibi dindi wahalu pudaba labe laya, lalu lamule pu, lene.
EXO 6:12 Ani layago lelowa dege Mosesehanda ladai bialu lalu, Isaraele wali agalime i̱na bi lamirugo hale nahayagoria kini agalidagome i̱na bi lamerogo hale holebadalo manda nabido. I̱ bi uruniale bayuwa nalagane ko, lene.
EXO 6:13 Ani layagola Anduane Homogohanda Mosese Aronolahondo lalu, Libugua bi olarogo bilibu, lowa lalu, Áyu ogoni Isaraele wali agalihondobi Iyibinaga kini kagohondobi lamialu, Anduane Homogohanda iyame Isaraele wali agali Iyibi dindi howa haru tagira pialu pilibu laya, lalu lamilibu, lene.
EXO 6:14 Yagaba igini wahene Lubene ibugua igini maria hene. Uruni ti mini Hanogo Palu Hesorono Kami imaru hene. Mariali uruni hono winidaruni áyu hameigini mini urunile palu ngagoni.
EXO 6:15 Yagaba igini mende Simionohanda igiri waragaria hono winigo odaruni mini Yamuele Yamini Ohada Yagini Soha imaru hene. Mbira Solo henego ibu Kenana wali igini hene. Ani binigo uruni tigua hono winime hameigini áyu mini urunile palu ngagoni.
EXO 6:16 Yagaba igini tebone Libai ibugua igini tebira Gesono Kohada Merari imaru hene. Igiri tebira uruni tigua hono winime áyu hameigini mini urunile palu ngaruni. Libai ibuni mali handari mbirani pira tebirani karia (137) halu homene.
EXO 6:17 Gesono ibu igini kira mini Libini Simaila henego libugua hono winigome dewaore hoyu lene.
EXO 6:18 Kohada igini maria hene. Amarama Isa Heberono Usile imaru hene. Kohada ibuni mali handari mbirani pira tebirani tebira (133) halu homene.
EXO 6:19 Merari igini kirali Mali Musila hene. Ani binigo agali uruni bibahende tiha howa Libai hameigini tagira penego ka.
EXO 6:20 Amaramahanda ibu aba mbalini Yogobede dabu bini. Yogobedehanda igiri kira Mosese Aronola hono wini. Amarama ibuni mali handari mbirani pira tebirani karia (137) halu homene.
EXO 6:21 Isa ibu igini tebira hene. Kora Nebege Sigiri imaru hene.
EXO 6:22 Usile ibubi igiri tebira dege hene. Misaele Elisabana Sidiri imaru hene.
EXO 6:23 Arono ibu Aminadaba wane Nasono mbalini Eliseba dabu bini. Dabu biyagola wali ogonime Arononaga igiri Nadaba Abihu Eleasa Idama imaru hono wini.
EXO 6:24 Korahanda igiri tebira hono wini. Asiri Elegana Abiasa imaru hene. Igiri tebira urunime hono winime áyu Kora hameigini tu wigi buwa palu ngagoni.
EXO 6:25 Arono igini Eleasa ibugua Pudile wane mbirago dabu bini. Wali odagome Piniasa hono wini. Agali uruni Libai hameigininaga agali haguane haga bini.
EXO 6:26 Ani binigo agali marudaru helowa Mosese Aronolahondo Ngode Datagaliwabehanda lalu, Isaraele wali agali Iyibi howa haru tagira pudaba, lene.
EXO 6:27 Agali ogonilabo libugua Iyibinaga kinihondo, Isaraele wali agali golope halu pela, lene.
EXO 6:28 Anduane Homogohanda Mosese ibu Iyibi dindini hearia bi lamiyangi lalu,
EXO 6:29 I̱ Anduane Homogo kogoni. Iyibinaga kini kagohondo bi i̱na langirugo damene bibahende lamiai habe, lene.
EXO 6:30 Ani layagola Mosesehanda ladai bialu lalu, I̱ bi bayuwa nalagaore bi uruni ale laroria liaheore kogoni í̠ manda bidegoni. Kini biago ibugua i̱ aleme bi larogo hale au holobadabe, lene.
EXO 7:1 Ani layagola Anduane Homogohanda Mosesehondo lalu, I̱na í̠ kininaga deni mo Ngode Datagaliwabe ale bu hini lalu í̠ hamene Arono ibu í̠naga bi mana latagi haga ale helolebero. Ani berogola Arono ibugua mbiwia hagane lamiradagua kinihondo lamulebira.
EXO 7:2 Ani buleberogo mbirale o bibe langerogo damene bibahende Arono lamiai habe. Arono ibugua kini biagoni lamialu Isaraele wali agali Iyibi dindi wahalu pela lalu lamulebirago.
EXO 7:3 Ani lamiragola kome miniwi tingi howa giambe helo i̱na kini ogoninaga mini mo giambe helarogola ibugua libunaga bi hale naholebira.
EXO 7:4 I̱na Iyibi dindini mbirale hiriribi dewa bigi berogo hondowabi ibu miniha hiri nalolebira. Ani haabo kagola i̱na Iyibi wali agalibi kini ogonihondobi pani hiriribiore mialu i̱naga wali agali damenego bibahendeore dindi ogoni wahalu haru tagira polebero.
EXO 7:5 I̱na i̱ninaga gi yaraga howa Iyibi wali agali ti i̱naga gime balu Isaraele wali agali haru tagira polebero. Ani berongi Iyibi wali agalime i̱ Anduane Homogo henedalo ogoningi manda bulebira, lene.
EXO 7:6 Ani laya handala Mosese Aronolame Anduane Homogohanda bilibu layadagua bialu kini biago hearia puwa bi lalibu layadagua lamini.
EXO 7:7 Ogoningi Mosese ibu mali pira halira (80) Arono ibu mali pira halirani tebira (83) lowa hebingi lamialu hene.
EXO 7:8 Anduane Homogohanda Mosese Aronolahondo lalu,
EXO 7:9 Kini agali ogonime libuhondo lalu, Libugua bi o larabigoni heneneda loliyayagua agalime nabiagane ale manane mbira bidaba layagua manane walia holenaga Arono ibunaga halimbu biago libu pialu howa mo ya labe. Halimbu ogoni kini bedagoria pialu ibu deni howa ibira haragola halimbu ogoni mo nogombi bu hinulebira, lene.
EXO 7:10 Ani laya handala Mosese Aronola libu kini biago hearia puwa Anduane Homogohanda bilibu layadagua bini. Arono ibugua ibunaga halimbu biago kini biagobi ibunaga biabe biaga hearubi tinaga deni yu ibira hayagola halimbu biago mo nogombi bu hinini.
EXO 7:11 Ani biyago hondowa kini biagome ibunaga agali miniwi gamugamu biaganeru ti nde tininaga halimbu yiniyago ibira hayagola ogolabome biyadagua dege bini.
EXO 7:12 Ti nde tininaga halimbu yiniyaru dindini ibira hayagola bibahende mo nogombi hai hene. Ani biyagoyu Arononaga halimbu nogombi biagome nogombi marunaga biago bo mbedogo biai hene.
EXO 7:13 Ani biyagola hondowa dege kini biago ibu doga howa Anduane Homogo ibugua Mosese Aronola libugua bi lamerabigo hale naholebira layadagua doga tagiho hene.
EXO 7:14 Ani bu heagola Anduane Homogohanda Mosesehondo lalu, Kini biagonime mine gibiore halu Isaraele wali agali yupe halu pudaba nalole kagoni.
EXO 7:15 Ani bu kago yawi egerebagi kini ogoni uyu iba Naili poragoria dalipe halu polebirago lola hole pobe. Halimbu mo nogombi hene biago yalu puwa ibu maha ibilo í̠ ala puwa unu iba angeni pu habe.
EXO 7:16 Pu keria ibiragola au labe. Anduane Homogo Hiburu wali agalinaga Ngode Datagaliwabe kagome lalu ibunaga wali agalime ibu mitangi bialu mo dunini howa lotu lole dindi ko wali agali nahegoria pelo pudaba labe layagoni. Ani layago hale howa pudaba nalole hahowine dege áyu haabo kegoni.
EXO 7:17 Mosese ibugua lalu, Ai Agali Haguane-o Anduane Homogohanda lalu, I̱na bigi berogoria hondowa ibu ogo heneda hondole hondo habe, laya. I̱na halimbu yidogome iba o poragoni barogola iba ogoni darama bulebira.
EXO 7:18 Wena bibahende homai halu iba ngu timbuniore biragola Iyibi wali agali ti iba nabe nahe holebira, lalu Mosesehanda lene.
EXO 7:19 Anduane Homogohanda Mosesehondo lalu, Arono lamialu ibugua halimbu biago mo yalu puwa Iyibi dindini iba porarubi iba ganaha bedarubi iba birape hene bedarubi iba lenego bibahendeore halimbu ogonime ya angua hai habe. Ani ya angua haragola iba bibahende darama bia halu dindi bibahendeni darama biame howa iba nole beha hambu ngarubi ira guabiniha hambu ngarubi bibahende darama biai holebira, lene.
EXO 7:20 Ani layagola Mosese Aronolame Anduane Homogohanda bilibu layadagua bini. Libugua kini agali biagobi ibunaga biabe biaga biarubi deni howa Arono ibugua ibunaga halimbu biago yaraga howa iba Naili bene. Ani biyagola iba Nailibi iba maru berearubi bibahende darama biai hene.
EXO 7:21 Ani darama biyagome wena ibaha bereago bibahende homa hai hene. Ani biyagola wena ngu timbuniore biame hayagome iba nabe naheyagola wahene. Ani bialu Iyibi dindi bibahendeni iba berearu darama biame hene.
EXO 7:22 Ani biyagola kini biagonaga gamugamu biaga hearumebi Aronohanda biyadagua dege tininaga gamugamume ani bini. Ani biyagola kini biago ibu bu mini giambeho hayagobi dege haabo hene. Anduane Homogohanda ani bulebira layadagua kini biagome Arono Moseselame layago hale holene hame nalene.
EXO 7:23 Ani nale howa bu mini giambeore halu ogolabome bi layago hale nahole lalu erembira mialu ibu andaga dai bini.
EXO 7:24 Ani bialu bibahende darama biai hayagome iba nolene nabereyagola Iyibi wali agalime iba Naili biago angeange iba berelo uli wama ibaga bini.
EXO 7:25 Ani bialu iba Naili iba marudarunibi darama dege bu wiaabo heane horo karu pene.
EXO 8:1 Ani buwa Anduane Homogohanda Mosesehondo lalu, Kini biago karia puwa Anduane Homogohanda ibunaga wali agalime ibu mitangi bialu mo dunini howa lotu lelo tagira pialu pelabe laya lamibe.
EXO 8:2 Olarogo hale halu nabirayagua i̱na í̠ pani ngialu í̠ dindi ogoni yago degeme dungume helolebero laya lamibe.
EXO 8:3 Iba Nailiha yago biru to̱ore lalu birulene henge nawidagola í̠ andagani ibalu í̠ paliagahabi í̠ tamunibi birame halu í̠naga biabe biaga karunaga andaganibi í̠naga wali agali bibahendenaga andaganibi yago birame halu tomo dawaganehabi tomo dawa wiagane behabi biru to̱lotagi holebira laya lalu lamibe.
EXO 8:4 Ani bialu porabu daga daga buwa í̠ni birame hama pialu í̠naga wali agalini birame halu í̠naga biabe biaga karu bibahendeni birame hai holebira laya lamibe, Anduane Homogohanda lene.
EXO 8:5 Ani lowa Anduane Homogo ibugua Mosesehondo lalu, Arono lamialu ibunaga gi dogo lowa halimbu biagome iba porarubi iba ganaha bedarubi iba goreyane timbuni bedarubi iba bibahende bedago ya angua hai ha labe. Ani biragola yago bibahende tagira ibalu Iyibi dindi bibahende yago birame holebirago helo ani bia labe, lene.
EXO 8:6 Ani layadagua Aronohanda ibunaga halimbu biagome iba bereago bibahende ya angua hai hayagola yago dewaore tagira ibalu Iyibi dindi bibahendeni yago birame hene.
EXO 8:7 Ani biyagola kini biagonaga gamugamu biaga biarume nde tininaga gamugamu yiniyago biyagola lone yago ibaha berearu dindini haru íbu berelene.
EXO 8:8 Ani biyagola kini biagome Mosese Aronola ibilo oladaba lowa ibiyagola ogolabohondo lalu, Anduane Homogohondo bi lalu yago o biru ngago mo erebaha lalibu. Mo ereba haribiyagua libunaga wali agalime Anduane Homogohondo mbirale bo delo milo tí pudaba lolebero laya lamilibu, lene.
EXO 8:9 Ani layagola Mosesehanda ladai bialu lalu, Ogoni bayale Anduane Homogohondo í̠naga bi laholene turuho kogo la holebero. Ani buliyago ogoni í̠nagabi í̠naga biabe biaga karunagabi í̠naga wali agali bihendenagabi Anduane Homogohondo bi laholeberogo horo ogongi lahabe lalu pongo dege ngi. Ani laharogola Anduane Homogohanda yago o bedaruni bibahende mo ereba haragola mbira nabere iba Nailiha dege birulebira, lene.
EXO 8:10 Ani layagola kini biagome ladai bialu lalu, Yawi bi ogoninaga lahabe, lene. Ani layagola Mosesehanda ladai bialu lalu, Í̠na bibe laregonidagua buleberogo Anduane Homogo ibugua hale halu birago handaregola inanaga Anduane Homogo Ngode Datagaliwabe ale mendeali nahedane hondolebere.
EXO 8:11 Ani buleberogo áyu í̠bi í̠naga biabe biaga karubi í̠naga wali agali bibahende karubi yago o biru ngaruni yamiragola mbira nabere iba Nailiha dege birulebira, lene.
EXO 8:12 Ani lalu Mosese Arono libu kini biago berelalu puwa Mosese ibugua Anduane Homogohanda yago íbu berelearu yamilonaga ibuhondo bi lene.
EXO 8:13 Ani lamiyagola Anduane Homogohanda hale halu Mosesehanda layadagua bialu yago anda tamuha berearubi pabe tamuha berearubi mabuha berearubi bibahande homai helene.
EXO 8:14 Homa payapayabu wiago Iyibi wali agali tinime hilu mo mogo buwa alugumu ngelaga bima piyaru togo biyagola ngu hiriribiore biame hene.
EXO 8:15 Ani biyagola kini biagome handalu hearia yago bereago bibahende homahi layiyago hondowa ibu bu mini lone giambe hodai bini. Anduane Homogohanda Mosese Aronola lamialu bu mini giambe howa libunaga bi hale naholebira layadagua ani bini.
EXO 8:16 Ani biyagola Anduane Homogohanda Mosesehondo lalu, Arono lamialu ibunaga halimbu biagome dindini ba labe. Ani baragola Iyibi dindi bibahendeha abalu wima pedago mo hinabibi bu hinulebirago, lene.
EXO 8:17 Ani layadagua lamiyagola Aronohanda ibunaga halimbu biagome dindini bene. Bayagola Iyibi dindi bibahendeni abalu wiame heago bibahende mo hinabibi bu hinayagola nogo wali agalila bibahendeore hinabibime mbulope howa dugu neme hondole ndo hayume hene.
EXO 8:18 Ani biyagola kininaga gamugamu biaga biaru tiguabi tinaga gamugamume hinabibi tagira íbu berelole bialu hearia ani nabibeheore hene. Ani buwa hinabibi birame howa nogo wali agalila hinabibime yalu hanalu bini.
EXO 8:19 Ani biyagola kininaga gamugamuyi biarume kinihondo lalu, O biradagoni hinabibi o biru ngaruni Ngode Datagaliwabehanda ibuoreme ibilayadago, lene. Ani layagola kini biago ibu bu mini giambeore halu abale Anduane Homogohanda Mosese Arono libunaga bi hale naholebira layadagua hale nahe mini giambe hatagiho hene.
EXO 8:20 Ani heagola Anduane Homogohanda Mosesehondo lalu, Yawi egerebagiore kini biago unu iba biagoha polebirago lola hole pobe. Lola howa Anduane Homogohanda au laya lamibe. I̱naga wali agalime i̱ mitangi bialu mo dunini howa lotu lelo golope halu pelabe laya lamibe.
EXO 8:21 Ani napelolebero lariyagua áyu langerogo i̱na í̠ pani lone ngialu bunguna í̠ kegoriabi í̠naga biabe biaga biaru kagoriabi í̠naga wali agali kagoriabi ibilolebero. Iyibi wali agalinaga anda bibahendeha bunguna birame halu Iyibi dindi bibahende bunguname birame helolebero laya lamibe.
EXO 8:22 Ti pani ani ngialu ai i̱naga wali agali kagoria Gosene dindini bunguna mbira birulani hondolebero. I̱na ogonidagua buleberogo irane Anduane Homogo i̱na dindi ogoriani biabe bialu kagonidalo handalimulonaga ani bulebero.
EXO 8:23 Ani buleberogo i̱na i̱naga wali agalila í̠naga wali agalila mo tale buwa tu ngelolebero. Bi olarogonidagua yawi buleberogo handabe laya lamibe, lene.
EXO 8:24 Ani layagola kini biagome bu mini giambeho haabo hayagola Anduane Homogohanda bunguna gibiore mberane tidu yalu ibuwa kini biago andaga heagoha haeala anda hene. Kini biagonaga biabe biaga hearu andagahabi ogonidagua dege bini. Ani bialu Iyibi dindi lenego bibahendeoreha bunguname mo ngubia hene.
EXO 8:25 Ani biyagola kini biagome Mosese Aronola ibilo olowa ibiyagola ibugua libuhondo lalu, Tígua Iyibi dindini dege mbirani puwa tínaga Ngode Datagaliwabehondo mbirale bo loma bu delole pudaba, lene.
EXO 8:26 Ani layagola Mosesehanda ladai bialu lalu, Ogonidagua bulene emene karula napolebirago irane ina Isaraele wali agalime nogo tara tararu Anduane Homogo inanaga Ngode Datagaliwabehondo bo delo meramagome Iyibi wali agali ti mo genda holebira. Iname ti de hendedaore nogo tara uruni delarimayagua tigua ina handabe manga howa ina to̱le̱me bo home lolebira.
EXO 8:27 Ani bulebirago ina horo tebiruni dindi ko wali agali nahegoria puwa Anduane Homogo inanaga Ngode Datagaliwabehondo mbirale bo lomabu delo muleberama. Ibunime inahondo ani bilimu lenedagua buleberama, lene.
EXO 8:28 Ani layagola kini biagome lalu, Karulapego tígua Anduane Homogo tínaga Ngode Datagaliwabehondo mbirale bo lomabu delo mule dindi ko wali agali nahegoria pudaba loleberogoyu kaundiaore napilimu. Ani bialu tíguabi Anduane Homogohondo i̱naga bi lahalimu, lene.
EXO 8:29 Ani layagola Mosesehanda ladai bialu lalu, Áyu o kabago halu puwa ina Anduane Homogohondo bi lalu, Yawi bunguna o biru ngaruni yamiai habe laguago. Ani bia buleberogo áyu í̠na ina lone mo guya halu inanaga Anduane Homogohondo mbirale bo lomabu delo mule napudababe lone naloleberegoni, lene.
EXO 8:30 Ani lalu bialu Mosese ibu kini biago helalu puwa Anduane Homogohondo bi lene.
EXO 8:31 Mosesehanda bi ani layagola Anduane Homogohanda bi layago hale halu bunguna bibahende kini andagani birayarubi ibunaga biabe biaga biarunaga andagani birayarubi ibunaga wali agali biarunagabi mbira yu wanahe ereba haiore hene.
EXO 8:32 Ani biyagola kini ibu mini giambe halu Isaraele wali agali wahalu pudaba, nalene.
EXO 9:1 Ani mini giambe ho wiaabo hayagola Anduane Homogohanda lalu, Áyu kini biago karia puwa ibuhondo ogodagua lalu, Anduane Homogo Hiburu wali agalinaga Ngode Datagaliwabehanda ibunaga wali agalime ibu mitangi bialu mo dunini howa lotu lole pelo pudaba labe laya, lole pu.
EXO 9:2 Áyu ogonibi lone mini giambeho wiaabo dege hariyagua
EXO 9:3 i̱na í̠ pani ngialu í̠naga nogo tara tara hinideruni bibahendeni warago hiriribi tara mbira ibilolebero. Ani ibilarogola nogo hosibi dongibi kamelebi bulumagabi sibibi memebi nogo lenego bibahende warago ogonime bo homo lai holebira laya, lamibe.
EXO 9:4 I̱nime dabalu Isaraele wali agalinaga nogo ogoda Iyibi wali agalinaga nogo ogoda lowa mo tale bialu Isaraele wali agalinaga nogogo mbira homolani hondolebero.
EXO 9:5 I̱ Anduane Homogo i̱nime horo yawi biabe ogoniore bule ngo laya labe, lene.
EXO 9:6 Mosesehanda ani lamiyagolabi kini biago ibu mini giambeore hene. Ani biyagola egerebalene Anduane Homogohanda bulebero layadagua bialu Iyibinaga nogo bibahende homai helene. Isaraele wali agalinaga nogo mbiraorebi heba nahomene.
EXO 9:7 Ani biyagola kini biagome maru hearuhondo hale halu Isaraele wali agalinaga nogo homayiyabe nahomeyabe lowa hale halu hearia tigua lalu, Mbiraorebi nahomeoreya, ladai bini. Ani biyiyago hondowabi kini biago ibu bu mini giambeoreho haabo hene.
EXO 9:8 Ani biyagola Anduane Homogohanda Mosese Aronolahondo lalu, Libugua anda mbira ege timeni hirule ira delaradagoha puwa be abalu ogoriani bu wulebirago libu gi tahe labolabo dugu yalibu. Dugu yalu puwa kini biagonaga deni pu howa Mosese í̠na be abalu ogoni uyu hariha haealo baraga habe.
EXO 9:9 Baraga haregola be abalu ogoni Iyibi dindi bibahendeha pu yulume halu abale ti taulome henego yalu yaga laradagua bulebira. Ani buwa be abalu ogoni nogo wali agalila bu kagoria ibira ibira bialu tinginini ela haragola moge buwa mani togodalu mo ti̱wa̱ howa nogo wali agalilanaga tingini nalu guabima anda polebira, lene.
EXO 9:10 Anduane Homogohanda ani lamiya handala puwa libugua be abalu wiago dugu yalu puwa kini biagonaga deni pu hene. Pu howa Mosesehanda be abalu dugu yayago uyu hariha baraga hene. Baraga hayago ibira halu nogo wali agalilanaga tinginini ela hayagola moge buwa mani togodalu ti̱wa̱ biame hene.
EXO 9:11 Ani biyagola kini biagonaga gamugamuyi biarubi Mosese hearia ibabe nahe mogeme bogopai layagola andaga wiaabo hene.
EXO 9:12 Ani biyagolabi Anduane Homogohanda kini biagonaga bu mini mo giambeore hayagola Anduane Homogohanda Mosese Aronolahondo lalu kini ogonime libugua bi larabigo hale naholebira layadagua hale nahene.
EXO 9:13 Ani biyagola Anduane Homogohanda Mosesehondo lalu, Yawi egerebagiore kini biago karia puwa Anduane Homogo Hiburu wali agalinaga Ngode Datagaliwabe kagome lalu, I̱naga wali agalime i̱ mitangi bialu mo dunini howa lotu lelo pelabe laya, lamibe.
EXO 9:14 Ai mini giambe halu napelole lalu hariyagua áyu í̠naga biabe biaga karubi í̠naga wali agali karubi hangu pani mule ndo i̱na í̠nibi heba pani ngulebero. Dindi bibahendeni mbirali i̱ ale nahedane handabelo walia holebero laya, lamibe.
EXO 9:15 I̱na i̱ninaga gi yaraga howa warago mbira ibiledole í̠bi í̠naga wali agalibi bibahende warago ogonime bo paya biragola bibahende homaiore kamile.
EXO 9:16 Ani nabi i̱naga hongo í̠hondo walia harogola dindi bibahende ngaruha bu karume i̱ hongohe ogoni ka lowa i̱naga mini loyogo lelonaga í̠ ba nabi habelo waharugoni.
EXO 9:17 Ani birugo bilowa í̠ mine halu dogatagi howa i̱naga wali agali napelolebero lalu kegoni.
EXO 9:18 Ani bialu kegonigo ai hale habe. Yawi ogodaguaore haragola dalu dindiguni gibiore ala Iyibi dindini naibinidagua yawi ibilolebero.
EXO 9:19 Ani buleberogo nogo walila minu kabu bialu tamuni hangu payanda habe. Mbirale mbirale tagirani ngelama pedamigo bibahende tamuha mo baanda hai halimu. Nogo tara tarabi wali agalibi tagirani tuha ndo kago dalu damuyu karia dindiguni ogonime bo baya biragola homai holebira laya, lamibe lene.
EXO 9:20 Mosesehanda puwa anidagua lamiyagola kini biagonaga biabe biaga biarume Anduane Homogohanda anidagua layiyago hale howa ti gi hene. Gi howa ti tinaga garabaya biabe ale bia haganebi nogobi anda tamuha haru anda piai hene.
EXO 9:21 Ani biyagola maru ti Anduane Homogohanda o bulebero layadagoni ani bila lowa hada hole bialu tinaga garabaya biabe ale bia hagabi nogobi tagirani helowa ti embedaho hene.
EXO 9:22 Ani bu hearia Anduane Homogohanda Mosesehondo lalu, Í̠naga gi uyu hariha yaraga habe. Ani beregola dalu dindiguni Iyibi dindi bibahendeni ibume halu wali agalibi nogobi tomo mbirale mbirale mabuni karubi bibahende damiai holebirago, lene.
EXO 9:23 Ani bulebira layagola Mosesehanda ibunaga halimbu biago uyu hariha yaraga hene. Yaraga hayagola Anduane Homogohanda hariha howa dalu dindigunibi hari dababi gibiore dindi tawa balu ibilene.
EXO 9:24 Anduane Homogohanda dalu dindiguni heba ibilalu harini kulu mege lalu hari dabaru tulade lalu gibiore buyu pu íbu daibu bilene. Iyibi dindini ala hama ibinidagoriani dalu dindigunibi naibinidaguaore odangi ibilene.
EXO 9:25 Ibalu dalu dindiguni heba biagome Iyibi dindi bibahende wali agalibi nogobi tagirani haga biarubi dindigunime bo mbala pialu damia dege bialu damu tongolomi lene. Mabuni tomo hengearu bibahende dindi heba bapara helalu ira hearu bibahendeore podai helene.
EXO 9:26 Iyibi dindini ani bialu heagola Gosene dindi Isaraele wali agali ti heagohayagi dege dalu dindigunibi mbira hondole ndo howa hada payabu hene.
EXO 9:27 Ani bialu heagola kini biagome, Ai Mosese Aronola hondo pudaba, lene. Ogolabo ibiyagola ibugua lalu, Ai koore bialu harudane hendedogo Anduane Homogo ibugua mana bayale bialu heagola i̱bi i̱naga wali agalirubi iname ko bialu harimadane áyu hendedogoni.
EXO 9:28 Ani birimadago ai dalu dindiguni hari dabala gibi biagome ina bowa kago ainde harula lalu Anduane Homogohondo bi lamilibu. I̱na heneneore buledagua larogo dalu ogoni tohayagua tí i̱naga dindi ogoria holene nawigo pudaba lolebero, lene.
EXO 9:29 Ani layagola Mosesehanda ladai bialu lalu, I̱ anda dewa buhe ogo yu wahalu tagira pialu i̱na i̱naga gi yaraga howa Anduane Homogohondo bi lolebero. Ani berogola dalu o ibiragoni naibi tohalu dindiguni hari dabala o biragonibi nabulebira. Dindi timbuni ogo bibahende Anduane Homogo ibunagada lo manda bibelonaga ani bulebira, lene.
EXO 9:30 Ani bia bulebiragoyu í̠bi í̠naga biabe biaga kamirubi tígua Anduane Homogo Ngode Datagaliwabe hondowa gi nahe dege kamigoni manda bido, lene.
EXO 9:31 Dalu dindiguni gibi ibiyagome ira emene dewa bu henego dambialu ogoni aga wabiaga pu mini palagasi bu henego urunibi ladi ale mini bali dewa hongo winigo urunibi bibahende mo koore hene. Balidaru bogabi dolenengi ai palagasi ira emene dambialu aga wabiaga hongone anda halu heaorego uruni bibahende dindigunime dindi heba bapara helene.
EXO 9:32 Widi tomo nagane do wiaru dege mani boga biaganegome widi mo ko nahene.
EXO 9:33 Mosese ibu kini biago helalu anda dewa buhe biagoha howa tagira pialu pene. Puwa ibunaga gi hariha yaraga howa Anduane Homogohondo bi lene. Ani layagola dalubi dindigunibi hari dababi bibahende biyago abale nimulo mini.
EXO 9:34 Ani biyago handayagola kini biagome lone ko bini. Ibuguabi ibunaga biabe biaga hearumebi bu mini giambe halu dogatagiho ala haralidagua hene.
EXO 9:35 Anduane Homogohanda Mosese Aronolahondo ala lamialu kini biago bu mini giambe howa Isaraele wali agali pudaba nalolebira abale layadagua nalene.
EXO 10:1 Kini biagome ibu mini ani giambeho heagola Anduane Homogohanda Mosesehondo lalu, Ai kini biago hondo pobe. I̱na kinibi ibunaga biabe biaga karubi bihendenaga mini mo giambe halu helarugo. Uruni ti de hendelo i̱na agalime nabibehe bigi bulenaga ani mo giambe haru, lene.
EXO 10:2 Ani bialu tíguabi tínaga waneiginirubi aguanerubi tigua hono wima poraruhondo ladalidali bialu Anduane Homogohanda Iyibi wali agali agua bialu mo luluya halu mo taga haya lalu lamigi buleberami. Tí bibahendemebi i̱ Anduane Homogoore kagoni lo manda buleberami, lene.
EXO 10:3 Ani laya handala Mosese Aronola kini biago hearia puwa ibuhondo lalu, Anduane Homogo Hiburu wali agalinaga Ngode Datagaliwabe kagome lalu, Í̠na i̱naga bi mo wa dege howa doga dege halu kene lu agua hole kebe. I̱naga wali agalime i̱ni mitangi bialu mo dunini howa lotu lelo ti tagira pialu pelabe, laya.
EXO 10:4 Ani nabi napelole lalu haabo hariyagua o yawi í̠naga dindini pagaya ale birame helo ibilolebero, laya.
EXO 10:5 Pagaya aleme dindini biru dungume kagola dindi de handabe nahe holebere, laya. Ani bialu pagaya ale urunime tani irabi dalu dindiguni biagome ba nabi yu wahayaru namaro bulebira, laya.
EXO 10:6 Birama ibalu kini í̠ andaga tamuhabi birame halu í̠naga biabe biaga karu andagahabi birame halu Iyibi wali agali bibahende andagahabi ani dege biru to̱lome holebira. Ala tínaga mamali hama ibiyarumebi áyu tínimebi nahendenegobi koorene ko ogoni hondoleberami laya, lene. Ani lalu bialu Mosese ibu beregedalu kini biago erembira mialu tagira pene.
EXO 10:7 Ani tagira piyagola kininaga biabe biaga biarume kini biagohondo lalu, Agali ogonime ina genda hangu mo ngialu kagoni. Ani ngialu haabo helole ke agini. Harugo Isaraele agali hangume Anduane Homogo tinaga Ngode Datagaliwabe mitangi bialu ibu mo dunini howa lotu lole pelo agali hangu pudaba la. Áyu Iyibi mo koore haro lalu o kagoni í̠ nahendedebe, lene.
EXO 10:8 Ani layagola nde kini biagome Mosese Aronola hondo pudaba lowa ibiyagola ibugua libuhondo lalu, Tígua Anduane Homogo tínaga Ngode Datagaliwabe mitangi bialu ibu mo dunini howa lotu lole polene karulapego poleberami. Pu pole dege polebirago ibuni ai polebirabe, lene.
EXO 10:9 Ani layagola Mosesehanda ladai bialu lalu, Ina bibahende poleberama. Inanaga waneiginibi wali agali wahebi heba poleberama. Inanaga waneiginibi haru halu nogo sibibi memebi bulumagabi haru hai holeberama nde i̱nanaga Anduane Homogohondo mbirale bo lomabu delo mialu ibu mitangi bialu mo dunini howa lotu loledago ani buleberama, lene.
EXO 10:10 Aniore layagola kini biagome lalu, Be-e o Anduane Homogo mini lalu larogo tínaga one waneiginiru haru pudaba naloleberoore. Ai tindule tí hameigini paluenaga ina bodai bule o harimidane hendedogoni.
EXO 10:11 Ani birimidago napolego tí agali hangume pialu Anduane Homogo mitangi bialu ibu mo dunini howa lotu lole wirimidadagua lole pudaba, lene. Ani lowa kini biagome ibunaga biabe biaga biaruhondo lalu, Mosese Aronola i̱ deni naholego tagira bo batagi hadaba, layagola tagira bo batagi hene.
EXO 10:12 Ani biyagola Anduane Homogohanda Mosesehondo lalu, Í̠naga gi dogolo amu halu Iyibi dindi ya anguaha. Ani beregola pagaya ale ibulebirago ibilo. Pagaya urunime ibalu mbirale bibahende andaho kago damene no mundu lalu dalu dindiguni biagome ba nabi yu wahene karu tigua namaro bulebira, lene.
EXO 10:13 Ani layagola Mosesehanda ibunaga halimbu biago yaraga hene. Yaraga hayagola Anduane Homogohanda puyabu ni ibiragohayagi howa puloyu tagira ibilowa pu lame dege halu heane alendo halu mbiragabi pu lame dege halu gao lene. Gao lopaya biyagola pagaya íbu birume hearia hendene.
EXO 10:14 Pagaya uruni ti tidu yalu ibuwa haealo paya bialu Iyibi dindi bibahendeni birame hene. Pagaya ale wabuni tidu yalu ibuwa ibira haga binidadagua ala nabinigo manibi ogonidagua nabulebiraore.
EXO 10:15 Tidu yalu ibalu mberabu pehaga bialu dindi bibahende biru dungume hayagola pagayame dindi bibahende mindi bu gimbu bini. Bira gimbu buwa nagimbu biahini pearia dindigunime yu wahearu tigua namaro bialu irani ira lini dearubi heba do nai hene. Mbirale ira yuni tani bolange yunibi mbira yu waholedago naholeore. Iyibi dindini anda haga heago damenegonaga yuni ti dondolo naiore hene.
EXO 10:16 Ani biyago hondowa kini biagome abaleore Mosese Aronola ibilo hondo pudaba lowa ibiyagola ogolabohondo lalu, Ai i̱na Anduane Homogo libunaga Ngode Datagaliwabehondobi libuhondobi koore birugoni.
EXO 10:17 Ai harugo halu mbira áyu ogo dege i̱naga ko ogoni domalu Anduane Homogo libunaga Ngode Datagaliwabehondo bi lalu ina balu home lolenaga pani hiriribi o ngidagoni mo yu erebaha lamilibu, lene.
EXO 10:18 Ani laya handala Mosese Aronola libu puwa Anduane Homogohondo bi lene.
EXO 10:19 Ani layagola Anduane Homogohanda puyabu biago mo aribia halu namu ni paliagahayagi howa pulo dai bilene. Ani pulo dai biyagome pagaya ale biru wiaruni minu yalu yaga lalu Iba Daramabi bereagoha yalu anda pelene. Ani biyagola pagaya o biru wiyaruni aria mbira mbiraorebi heba Iyibi dindini yu wanahene.
EXO 10:20 Ani biyago bilowa dege Anduane Homogohanda kini biagonaga bu mini mo giambe hayagola ibugua Isaraele wali agali pudaba nalene.
EXO 10:21 Ani buwa Anduane Homogohanda Mosesehondo lalu, Í̠naga gi uyu hariha yaraga habe. Ani beregola aruma dumbilihinu ngane Iyibi dindi bibahendeni aruma hodambi holebira, lene.
EXO 10:22 Ani layagola Mosesehanda ibunaga gi hariha yaraga hayagola aruma dumbilinime timulope hayagola Iyibi dindi bibahendeni aruma ndibulope ho wiane horo tebiru pene.
EXO 10:23 Iyibi wali agalime tini handaya haga bibe nahe wini. Aniyagola mbirali tagira nape bibahendeore tini andagani birai hene. Isaraele wali agali ti heagoha dege wáni hene.
EXO 10:24 Ani biyagola kini biagome Mosese hondo pudaba lowa ibiyagola lalu, Ai tí tínaga Anduane Homogo mitangi bialu ibu mo dunini howa lotu lole polene karulapego pudaba. Tínaga one waneiginibi tíni heba piai halu ai tínaga nogo sibiru memeru bulumagaru dege helalu pudaba, lene.
EXO 10:25 Ani layagola Mosesehanda ladai bialu lalu, Aniyagua ina Anduane Homogo inanaga Ngode Datagaliwabehondo nogo bo lomabu delo muluma̱yanaga í̠na bo ngulebedagoni.
EXO 10:26 Ndo ina inanaga nogo lenego bibahendeore haru hai holeberama. Homane mbiraorebi mbira hadai nabiloleberama ndobe. Inanaga nogo inaneme dabalu inanaga Anduane Homogohondo bo mibehe ogoda lowa muleberama. Nogo ogoalego bo mule wiyada uyuna Anduane Homogo mitangi bialu ibu mo dunini howa lotu laramagoria pu howa hondolene wulebira, lalu lamini.
EXO 10:27 Ani lamiyagolabi Anduane Homogohanda kini biagonaga bu mini mo ndibu layagola giambeho tagiho howa Isaraele wali agali pudaba nalene.
EXO 10:28 Bu mini giambeho howa ibugua Mosesehondo lalu, Í̠ i̱ deni nahe pu. Mani o i̱ kogoria bilingi bolanguabu holeni. Í̠naga denguiore mani nahondolego wahalu pobe. Í̠naga dengui lone handaruyagua handarongiore yania howa bo waholiya habe, lene.
EXO 10:29 Ani layagola Mosesehanda ladai bialu lalu, Ogoni tiga tiga larigo. Í̠na i̱naga dengui lone nahondolebereore ndobe, lene.
EXO 11:1 Ani lalu bialu pu heagola Anduane Homogohanda Mosesehondo lalu, I̱na Iyibinaga kini biagohondobi ibunaga wali agalihondobi pani halu mbiraore hangu miamaro bulebero. Ani berogola ibugua ai ti wahalu pudaba lalu ti mo hibilabala howa ibu dindini naholego abale tagira pialu pudaba lowa ti bo batagi holebira.
EXO 11:2 Ani bulebirago ai áyu Isaraele wali agali bibahende lamialu, Iyibi wali agali tí baba mandagi handa a̱i̱ na̱i̱ paliaga karuhondo ai poramago muni ngolobi silibabi mbira ngidaba lalimu, labe.
EXO 11:3 Anduane Homogohanda Isaraele wali agali mo yaragaho helayagola Iyibi wali agalime Isaraele wali agali mo yo handabe nahe hene. Ani bialu kininaga biabe biaga hearumebi wali agali bibahendemebi Mosese agali gibiore kagoni lowa ibuha handadagaho hene.
EXO 11:4 Ani bu henego Mosesehanda kini biagohondo lalu, Anduane Homogohanda lalu, Áyu mbiraga mbi hanuni haragola i̱ Iyibi dindini ibagabu holebero. Ibaga bialu howa Iyibialinaga igini wahene damenego bibahende homai helolebero, laya.
EXO 11:5 Kininaga igini wahene kagome ibu abanaga dagia ibugua mule kago ogoni ala homalu Iyibi wali agalinaga igini wahene damenego bibahende homahi lalu wali garabaya biabe ale biaga widi dambialu bedarunaga igini wahene damenerume homa maro bulebira, laya. Nogo bulumaga igini ala wini karubi homai dege holebira, laya.
EXO 11:6 Iyibi dindini wali agalime genda gibiore howa dugu gibiore biame halu dugu ala nabinidaguabi mani nabulebiragodaguabi áyu mbiraga howa bulebira.
EXO 11:7 Ai Isaraele wali agali ti kagoriabi tinaga nogo kagoriabi biangomebi heba duabi mbira naloleorebira. Ani birago handaregola Anduane Homogo i̱na Iyibi wali agalila Isaraele wali agalilani tu henemane ngelenedane hondolebere, lalu Anduane Homogohanda laya, lene.
EXO 11:8 Ani lowa Mosesehanda lamaro bialu lalu, Ani birago hondowa kini í̠naga biabe biaga karu bibahendeme i̱ kogoria ibuwa i̱ deni bulu paluwa i̱hondo ladeborebo bialu i̱naga wali agali haru halu áyu ogoni pu lolebira. O bulebira laruruni bibahende biai kagola i̱ Iyibi dindi wahalu tagira polebero, lene. Ani lalu bialu Mosese ibu keba gibiore halu kini andaga biagoha howa tagira pene.
EXO 11:9 Ani lamiyagolabi Anduane Homogohanda Mosesehondo lalu, Kini ogonime bu mini giambeho dege karia i̱naga hongo lone walia holebero, lamini wiadagua tagira pene. Hongo lone walia holene tawe heariane ibu giambe haabo hene.
EXO 11:10 Mosese Arono libugua kini biago deni howa manane tara tara uruni biyagoyu Anduane Homogohanda kini biagonaga bu mini mo giambe heagome o biragoni ogoale bira lole ndo howa Isaraele wali agali Iyibi dindi yu wahalu pudaba nalole hene.
EXO 12:1 Mosese Arono libu Iyibi dindini heaore Anduane Homogohanda libuhondo bi agua lamini.
EXO 12:2 Isaraele wali agali tinaga pongo yulenego mali mbiranaga ege pigane áyu kago holebira.
EXO 12:3 Ani bulebirago Isaraele wali agali lenego bibahendeore mo ngoai howa tihondo bi ogo lamibe. Ege áyu kagonaga horo pini haragola agali bibahendeme nogo sibi iginiyaguabi nogo meme iginiyaguabi mbira ibu one waneigini baba nama lole dabo bagiho helalimu, lalu lamilibu.
EXO 12:4 Ti hangu hangume ani bima poragola agali mbirago ibugua nogo bo ngago ibu one waneigini baba tini hangume nai habe nahe nogo timbuni halu wali agali ndia hayagua o anda be mende handa ai̱ nai̱ padabigola libu haru mandagi nabiya íbu lowa ololene nga. Nogo puguni dagala wali agali dagala buwa baya hangu nai helo manda buwa bulene nga.
EXO 12:5 Nogo sibiyaguabi memeyaguabi ngoalia hara alego bolene nga. Nogo igini ogoni wangabe bayago hondowa ko kumburayu mbira para naheore mali mbirani hininigo bolene nga.
EXO 12:6 Nogo ogonibigo dabo helowa ege áyu kagonaga horo daga dene (14) haragola alendoore ne̱le̱ni̱ni̱ nogo uruni bama polene nga.
EXO 12:7 Bowa nogo ogoninaga darama hambuwa anda nogo ogoni nalu birulenegoria panga harabanibi anda gene lene labolabonibi hirulene nga.
EXO 12:8 Ani buwa nogo ibuni irani hiri polowa mberedi yidi nahego mo peha palena aleru kaubigo dugupeha buwa ogoni heba nolene nga.
EXO 12:9 Nogo ogoni aria gahenge podo mialu nanalimu todobeneha dawabi nabilimu. Homa hende irani hiri polowa nalimu. Haguanebi gi gebi tini garinibi irani hirahira hangu nalimu.
EXO 12:10 Egerebagi nole lowa mbira podo wia nabilimu. Mbira ibira hayagua na nabi wahalu irani hangu delai halimu.
EXO 12:11 Ogoni nole howa ala agua bilimu. Aga baya hangu ndibulo bialu ge gamu mo karulalu giha halimbu mo yu howa nolene nga. Hariga lu pole howa narolo manda buwa ala naga bulene nga. Ala naga bulene ngago irane tomo naramigoni Anduane Homogohanda ina nabe bolangua halu pene lalu i̱naga mini yaraga holenaga noleberami, lalu Anduane Homogohanda lene.
EXO 12:12 Anduane Homogo ibugua Mosese Aronolahondo laabo halu lalu, Mbiraga o larogoningi i̱na Iyibi dindi bibahendeha pume halu Iyibi wali agalinaga igini wahene bibahende bo wahai halu tinaga nogo igini ala winibi bowa dege holebero. Ani bialu Anduane Homogo mbiraore i̱ hangu kogo de hendelo walia halu tinaga dama tara tara hayadaruni bibahende bo haeala bagabu waholebero.
EXO 12:13 Ani bima poleberogo tí anda ogoha ina padama lalu walia halu darama harabani hiridemigome walia holeberami. I̱na mbiraga Iyibialirunaga igini wahene balu wali agali pani merongi tí andagani darama hiridamigo hondowa tíhondo mbira bia nabi i̱na tí bolangua halu polebero.
EXO 12:14 Ani buleberogo Anduane Homogo i̱na tí nabe bolangua halu porogoni mitangi biaho wiaabo helonaga horo ogoni baya hangu pongo yuwa ogoningi i̱ mitangi bialu mo dunini howa lotu lalu halimu. Tínaga waneigini maha hama poraruhondobi mana lamialu tibi mugubali helo ogoniore embeda holemini horo ogoni tagira ibirangi biaabo halu i̱na tíhondo berogo mitangi biaabo halimu, lalu lamini.
EXO 12:15 Ani lowa Anduane Homogohanda lone ladege bialu lalu, Horo karuni tí mberedi yidi nahe hirinigo nolene nga. Mberedi yidi heba hirinigo mbira nolemini, lene. Ani bialu horo mbirani tí andagani yidi wigi bidamigo bibahende mo wahai halimu. Ai bi o langerogo donge howa mbiralime horo karia uruni andaneha howa mberedi yidihe hirinigo mbira nayagua ogoni narago ibu i̱naga wali agali ndo holebira. Bi mo wahaga ogoni tí heba holemini bo batagi halimu.
EXO 12:16 Horo mbira piganegoriabi horo kanegoriabi tí mo ngoai howa i̱ mitangi bialu mo dunini howa lotu lalimu. Horo kiru ogoningiore biabe bulene damenego mbira nabi bame halimu. Tíni tomo nolene dege manda manda bilimu.
EXO 12:17 Horo karia uruninaga horo piganegoria i̱na tí Isaraele hameigini bibahende Iyibi dindi howa haru tagira pirugoni. Ogoni birugo mitangi bialu mali bibahendengi horo timbuni mbira Mberedi Yidi Nahe Hirinigo Nalu Holene Horo ogoni mitangi biaabo halu halimu. Tínaga waneigini mani hararu tiguabi ogonidagua dege bia a̱i̱ helo tihondobi mana lamilimu.
EXO 12:18 Ani bialu ege piganegonaga horo dene haragola alendo ne̱le̱ni̱ni̱ howa hama pialu horo pira kirani mbiragonaga alendo ne̱le̱ni̱ni̱ howa horo dombene niguniha howa mberedi yidihe hirinigo mbira nanalimu.
EXO 12:19 Horo karu ogoniha tí andagani yidi mbira wulene nawiore.
EXO 12:20 Tíni aria mbiragomebi ndo dindi tarali mbira tí baba igiri yango ibu henemebi mberedi yidihe hirinigo mbira nalu karia handarimiyagua ogoni ibu i̱naga wali agali kago aria ndo holebira, lalu Anduane Homogohanda ani lene.
EXO 12:21 Ani buwa Mosesehanda Isaraele wali agali haru haga hearu olo ngoai howa tihondo lalu, Tí bibahende hangu hangume nogo sibi iginiyaguabi nogo meme iginiyaguabi ngoalia hara ale mbira bowa tí one waneigini baba biruwa Ngode Datagaliwabehanda Isaraele wali agali tí nabe Bolangua Halu Polebiragonaga Horo ogoni mitangi halu tomo nole nogo ogoni balimu, lene.
EXO 12:22 Nogo igini ogoni bowa darama ndisiha oda berelalimu. Oda berelowa ira hisobo magane podaga buwa gi mbira agima yuwa nogo darama hambu wirimigoha ibira haga bialu darama nai anda haraba gene labolabonibi uyu harabanibi hiralimu. Tí hangu hangume tí andagani ogonidagua hirama puwa tí mbiraligo mbira andaga yu wahalu tagira polemini nape tamuha biru ngamiore dege gao lelalimu.
EXO 12:23 Ani buwa Anduane Homogohanda Iyibiali igini wahene bo wahole Iyibi dindini pume harangi tí andagani darama anda genenibi harabanibi hiridamigo hondowa Anduane Homogohanda ibunaga Homelo Bagane dahuliyalime tí andagaha anda naibi bolangua halu pelolebira.
EXO 12:24 Ani bulebirago bi o bilimulo langirugoni damenego baya hanguore bulene horo harangi biaabo halu tí waneigini mani hama porarumebi mana ogoni mo tene howa bima pelo mana milimu.
EXO 12:25 Anduane Homogohanda tíhondo dindi mbira tí halimulo ngulebero layago dindi ogoriani pu howabi mana ogoni dege bigi bilimu.
EXO 12:26 Tí waneiginime tíhondo mana ogoni aginaga beramabe laga biyagua
EXO 12:27 tígua ladai agua bilimu. Horo ogoni mini Bolangua Halu Penegonaga mitangi bialu ina Anduane Homogo mo dunini howa lotu lalu tomo ogoni naramagoni. Ibugua Iyibialinaga igini wahene damenego bo wahama piyangi ina Isaraele wali agali andaga bolangua halu pialu inanaga igini wahene nabayagonaga mitangi bialu beramagoni lalimu, lene. Mosesehanda ani lamiyagola Isaraele wali agali hale howa ge duli hangaho biruwa Ngode Datagaliwabe mitangi bialu lotu lene.
EXO 12:28 Ani bialu heyalu puwa Anduane Homogohanda Mosese laminigo tihondo lamiyaria hale hayadagua bini.
EXO 12:29 Mbiraga mbi hanuni hayagola Anduane Homogohanda Iyibialinaga igini wahenego bibahende bo wahai hene. Iyibi kininaga igini wahene ibu abanaga dagia mule heago ala bo wahene. Ani buwa agali hearunaga igini wahenego bo wahama pialu garabaya andaha garabaya hearunaga igini waheneni bairi halu igini wahene damene bibahende bo hilene. Nogo igini ala wini hearu damenebi bibahende bo wahai hene.
EXO 12:30 Mbiraga odagoningi kini agali biagobi ibunaga biabe biaga hearubi Iyibiali bibahendebi heyai howa handalu hearia tinaga igini wahene bo wiaria hendene. Hondowa Iyibi wali agali bibahendeme dugu emene ndoore ya yi lalu gibiore bigibigi bini. Nde mbirago igini mbira yu wahenedanego mbirali dugu nabi holebe.
EXO 12:31 Ogonidagua biyago hondowa mbiraga odagoningi dege kini biagome Mosese Aronola ibilo hondo pudaba lowa ibiyagola libuhondo lalu, Áyu ogoni libubi tí Isaraele wali agali bibahendebi áyu ogoniore piai hadaba. Tí bibahende i̱naga dindini i̱naga wali agali heba naholego áyu ogoniore pialu tínaga Anduane Homogo mitangi bialu ibu mo dunini howa lotu lole porama larimidagua lole pudaba.
EXO 12:32 Tínaga nogo sibirubi memerubi bulumagarubi haru hai halu pole pudaba. Pialu howa Anduane Homogohanda i̱hondo bayale bilonaga i̱nagabi bi lahalimu, lene.
EXO 12:33 Ani bialu Iyibi wali agali tinimebi Isaraele wali agali Iyibi tinaga dindi yu wahalu abale pelonaga mo daila hene. Mo daila halu howa lalu, Tí áyu ogoni napirimiyagua ina bibahende áyu bo wahai haragonidago tí áyu ogoni pudaba, lene.
EXO 12:34 Ani layagola Isaraele wali agalime abaleore tinaga balawa yidi heba wa nabi wiaru ndisi beha mo gambiruwa agame mo huba buwa payani yagayaga bialu pene.
EXO 12:35 Pialu howa Isaraele wali agali biarume Iyibi wali agalihondo lalu, Ainde poramago muni ngolo silibabi agabi mbira ngia naberami, lene. Ani lalimu lalu Mosesehanda ala layadagua lene.
EXO 12:36 Anduane Homogohanda Iyibi wali agalinaga deni Isaraele wali agali mo yaraga hayagola Iyibi wali agalime Isaraele wali agalihondo mbirale mbirale ngidaba laya ale bu hombedo mini. Anidagua biyagola Iyibi wali agalinaga mbirale mbirale wiaru Isaraele wali agali ti mo hombedo yalu piyagola Iyibi wali agali bo tabuanda helene.
EXO 12:37 Ani bialu Isaraele wali agali ti Lamese tano mo mogo bu halu Sugodo pole pene. Penedagoni agali hangu daga daosini handari waragaria (600,000) pene. Wali wandari igiri emene daga nale wahowa agali hangu daga ogonidagua pene.
EXO 12:38 Ani bialu wali agali dindi tarali marubi dewaore Isaraele wali agali heba yamaga halu pialu nogo sibibi memebi bulumagabi dewaore haru pene.
EXO 12:39 Pialu Sugodo anda puwa balawa yidi nahe Iyibi dindi howa yarimiru hiruwa nene. Iyibiali biarume hibilaba lalu áyu ogoni pudaba lowa de duguyu mo daila hayagola balawa baya hangu wa nabi piyago ai Sugodo anda puwa bayuwa wabialu hiruwa nene.
EXO 12:40 Isaraele wali agali ti Iyibi dindini mali handari mariani pira tebira (430) ogonidagua hene.
EXO 12:41 Mali handari mariani pira tebira (430) ogonidaguaore ngau layagola Anduane Homogonaga wali agali wabuni ogoni Iyibi yu wahalu tagira pene.
EXO 12:42 Puwa horo odagoningi mbiraga Anduane Homogohanda Isaraele wali agali baya hangu mamage halu Iyibi dindi howa haru tagira pene. Ani binigo mitangi bialu Isaraele wali agali ti mani hama pialu howa mbiraga Anduane Homogohanda mamage henedagoni horo tagira ibigi biragola mbiraga ogoni Anduane Homogohondo lomabia ho ngelalu ibu mitangi bialu lotu lalu haga wini.
EXO 12:43 Anduane Homogohanda Mosese Aronolahondo lamialu lalu, Ai i̱na bi larogo hale hadaba. I̱na Isaraele wali agali nabe bolangua halu haru tagira pirugo mitangi bu dai bialu tomo nolene mana ngago baya hangu hale hadaba. Wali agali dindi tara taraha howa ibugu bini tí baba karu tigua Bolangua Halu Penegonaga Tomo ogoni nanolebira.
EXO 12:44 Anigo agali maru tínaga munime yolo binigo ti tínaga garabaya biabe ale bialu haga howa tinaga dongone podo mabu bu wahene heagua nde tomo ogoni nolene karulape.
EXO 12:45 Wali agali tara tara tí baba tigimandi hangu íbu heneyaguabi ti muni biabe bialu heneyaguabi bibahende tomo ogoni aria nolene nawi.
EXO 12:46 Wali agali tigua nogo sibi bo dawale anda manda manda biyadagoria howa dege nolene nga. Nogo sibi ogoni aria podene maru ibira hayagua yu tagira nape anda ogorianiore howa nai holene nga. Ani bialu nogo sibi boleberemigonaga kunibi mbira napodoleore beremi.
EXO 12:47 Ani bialu Isaraele hameigini bibahendeoreme nogo sibi balu tomo ogoni dawa nai holene nga.
EXO 12:48 Anigo agali maru tinaga dongone podo mabu nabi heagua nde tigua tomo ogoni nolene nawi. Agali tara maru tinaga dindi tene wiyadago wahalu ibuwa tí baba hene karu tibi nde i̱na Isaraele wali agali tí golope hene halimulo haru tagira pirugo mitangi bialu Bolangua Halu Penegonaga Tomo ogoni nolene mana bulene hamelo heagua nde agali ogoni ibunaga dongonebi igiri ibu andagaha haga karunaga dongonebi podo mabu bulene nga. Ani podai howa nde tomo ogoni nolene wulebira. Anidagua bialu karu tí ariaore holebira.
EXO 12:49 Isaraeleali tínagabi agali dindi taraha howa ibini uruni tinagabi mana mbiraore ogoni dege nga, lene.
EXO 12:50 Ani layagola Isaraelealiru tigua Anduane Homogohanda Mosese Aronolahondo bilimu lalu lamiyadagua biai hene.
EXO 12:51 Horo ogoningiore Anduane Homogohanda Isaraele wali agali Iyibi dindi howa haru tagira pene.
EXO 13:1 Anduane Homogohanda Mosese lamialu lalu,
EXO 13:2 Tí igini wahene karu bibahende i̱nihondo lomabu ngiai halimu. Isaraeleali tínaga igini wahene damene bibahendebi tínaga nogo bulumaga karume igini pigane wialu wangabe wiyagua uruni bibahendebi i̱ninagaore holebira, lene.
EXO 13:3 Mosesehanda wali agaliru lamialu lalu, Tígua Iyibi dindiha garabaya biabe ale bialu haabo ho hemiria Anduane Homogohanda ibuninaga hongo timbuniore kagome tí Iyibi dindiha howa haru tagira piyagoni. Ani biyago mitangi bialu tígua horo ogoniore embeda naholenaga mberedi yidi nahe hirini hangu ngago nalu halimu.
EXO 13:4 Ai tígua ege piganego mini Abibi horo áyu kagoningi Iyibi dindi yu wahalu tagira porami.
EXO 13:5 Anduane Homogohanda tí mamali hearuhondo bi lowialu Kenana dindiha Hidialibi Amoralibi Hibialibi Yabusualibi uruni karuha dindi ngaru bibahende tí mo ngiai holebero lo wiyagoni. Dindi uruniha dindi benebere ngago tomo bayale anda hai holene bayaleore nga. Ani ngago ai Anduane Homogohanda tí dindi ogoniha haru halu pu heledagola howa tígua Mberedi Yidi Nahe Hirini Nolene ogoni mali bibahendengi ege áyu kamago aleni mitangi biaabo halu halimu.
EXO 13:6 Tígua Mberedi Yidi Nahe Hirini Nolene ngaru ege áyu kamago aleni horo karuni nalu halimu. Ani howa horo kanego ogoningi tígua Anduane Homogo ibunihondo mitangi bialu lotu lalimu.
EXO 13:7 Horo karu uruningi wali agali bibahendeme mberedi yidi howa hirini nolene nawiore. Horo uruningi tínaga dindi ngamiruha yidibi mberedi yidi howa hirinibi mbira ngela nabi wahai halimu.
EXO 13:8 Horo timbuni ogoni tagira ibirangi tí igini karuhondo bi ogodagua lamilimu. Iname mbirale o bialu kamagoni irane ala Anduane Homogohanda ina Iyibi dindiha howa mbirale tara taraore dewa bialu haru tagira pialu ina dindi ogoha haru ibinigo mitangi bialu ani beremali, lalu lamilimu.
EXO 13:9 Lotu ogoni ale lolenego mana tínaga gi habenibi wanakuinibi gilibu ngelowa haradagua bu halimu. Ani bu howa Anduane Homogonaga mana lo ngago mo mitangi bia haragola tígua ogoni lalu holeberemi. Irane Anduane Homogohanda ibuninaga hongo timbunioreme tí Iyibi dindiha howa haru tagira puwa dindi ogoria haru ibinigo mitangi bialu ani bulene nga.
EXO 13:10 Ainde mali bibahendengi horo ogoni tagira ibiragola tígua tomo ogoni hiru nalu haabo halimu, lalu Mosesehanda lene.
EXO 13:11 Mosesehanda lalu, Anduane Homogohanda tí Kenana dindi ngagoha haru polebira. Ani pialu ibugua dindi ogoni bamba tínaga mamali hearuhondobi tínihondobi ngulebero lalu lo wiyadagua ngulebira.
EXO 13:12 Ibugua dindi ogoni tí ngiragola tígua tínaga igini wahene damenego Anduane Homogo ibunihondo lomabu milimu. Ani bialu tínaga nogo hinidamirume igini pigane wiragola wangabe wiyaguabi bibahende Anduane Homogohondo milimu.
EXO 13:13 Anigo nogo dongi igini pigane wirago nahomelonaga nogo sibi iginime bo lomabu aribia halimu. Ai tínaga dongi ogoni nogo sibime bo loma budai bibe naheyagua nde wahalu nogo dongi igini wangabe pigane wini biago ma pugualu bo waholene nga. Ani bialu tínaga igini wahene loma biaho helaramigo lone tinime yolo biadai bulene nga.
EXO 13:14 Ani beramigola tí igini urunime mana ogoni irane aginaga bialu kamibe lalu tínihondo hale hayagua nde tígua ogodagua ladai bilimu. Bamba ina Iyibi dindiha garabaya biabe bialu hemaria Anduane Homogohanda ibunaga hongo timbunioreme ina haru tagira pialu ogoria haru ibini kamagoni.
EXO 13:15 Pigane howa Iyibi dindini kini heagome mine halu ina yupe holene manga hayagola Anduane Homogohanda Iyibiali bu hearu bibahendenaga igini wahene hearubi nogo damenenaga igini pigane winigo wangabe hearubi bibahende bo wahai hene. Ani binigonaga ai iname nde nogo damene bu karunaga igini pigane wini wangabe bibahende Anduane Homogohondo loma buwa bo meremali. Ani buwa iname inane igini wahene haragobi lomabu mialu mani inane yolo biadai beremali.
EXO 13:16 Anidagua beremalidagoni irane Anduane Homogohanda ibuninaga hongo timbuniore kagome ina Iyibi dindiha howa haru tagira ibinigo mitangi bialu ani beremali. O binidagoni embeda nahole manane inanenaga gi habenibi wanakuinibi gilibu wiradagua bialu mana ogonidagua beremali, lalu lamilimu, lalu Mosesehanda lene.
EXO 13:17 Iyibinaga kini biagome Isaraele wali agali pudaba layagola howa Ngode Datagaliwabehanda Isaraele wali agali haru halu hariga nemandi tongo lalu iba angeange pialu Pilidia dindi tagira pole polene wiago manda buwa dege ibugua hariga ogonidagua naharu pole manda bini. Ibugua manda bialu hearia ogonidagua haru piruyagua Isaraele tinaga waitigi hariga obeneni karia lola howa ogonila wai bule haruda manda buwa wahalu Iyibi dindi ibida dai bule manda bulebira lo manda bini.
EXO 13:18 I̱naga wali agalime mini ogonidagua nawilo manda buwa Anduane Homogo ibugua hariga nemandi ogoni wahalu hariga mende dindi ko wali agali nahaga wiagodagua haru pu mabu bialu iba solowara mini Iba Daramabi bereagoria haru tagira pene. Isaraele agali ti wai bulene danda timu ayagubi giha yalu yalu pene.
EXO 13:19 Ani bialu tinaga mamali Yosebenaga kunibi dugu yadege pialu pene. Yosebenaga kuni dugu yinidagoni irane ala ibu nahome howa ibugua Isaraele wali agali lamialu bi ogodagua lene. Awe Ngode Datagaliwabehanda tí gi mialu Iyibi dindi howa haru tagira polebirago ani birangi i̱naga kuniore Iyibi dindini nawulego dugu yalimulo hame ledogo dugu yuleberama ladaba, layagola ina, E̱ dugu yaore buleberama, lenedagua o dugu yinidagoni. Ani bialu Yosebenaga kunidagoni duguwa Mosese ibugua yalu ti pene.
EXO 13:20 Pialu Isaraele wali agali biarume Sugodo yu wahalu Edama dindi anda pialu dindi ko wali agali nahaga wiagoria leneha anda puwa haanda palene.
EXO 13:21 Anduane Homogohanda ibunaga wali agalihondo hariga walia hole horombeni hariha howa beraliba mberane tigabi timbuni mbira wiadali halu ibuni ogoniha howa hariga bamba hama pialu hene. Ani bialu mbiraganaga hariga walia hole Anduane Homogo ibuni ira hungu mberane timbuni tigabi mbiraha howa ibu bamba halu walia hama pene. Anidagua binigome Isaraele wali agali ti mbiraga horombebi hariga pobehe hene.
EXO 13:22 Beraliba mberane tigabi timbuni biagome horombeni hariga bamba halu pugu bialu ira hungu mberane tigabi timbuni biagome mbiraganaga wá hadali hama hariga bamba hama pialu hene.
EXO 14:1 Ani buwa Anduane Homogohanda Mosesehondo lalu,
EXO 14:2 Í̠na Isaraele wali agalihondo ogodagua lamialu, Tí ibirimidagua dai bialu haanda paluene anda yuwa unu iba solowara ange Pihahirodini bilimu, lalu lamibe. Dindi o mini larogoni Migido tanola Iba Daramabi bedagola dombeneha Balasebono dindi kaware nga.
EXO 14:3 Ti dindi ogoriani anda yagimbu bu palu kamigo hondowa Iyibinaga kini biagome manda bialu karia Isaraele wali agali pu piyago ai agohayagi poabe toba howa dindi ko wali agali nahaga wiagoria tagira puwa nai pu luluyaho kagodalo manda bulebira.
EXO 14:4 Ani biragola i̱na kini biagonaga bu mini mo giambe halu ndibulo helolebero. Ibunaga bu mini giambe howa ibugua tí gerai talima ibulebira. Tí minuyu dai bule lowa talima ibalu karia i̱na kini ogoni ibunibi ibunaga ami agalirubi bibahende bope halu i̱ wayali holebero. Ani wayali harogome wali agali biaru tigua i̱naga mini mo yaraga holebira. Ani bialu Iyibi wali agali tigua i̱ Anduane Homogo heneneore henedane hondolebira, lene. Ani layagola Isaraele wali agali biarume bilimu layadagua bialu ti dai bini.
EXO 14:5 Ani biyagola agali marume kini biago lamialu lalu, Isaraele wali agali bibahende pu yola haya, lalu lamini. Ani lamiyago hale howa kini biagomebi ibunaga biabe biaga hearumebi lone mini wiadai bialu lalu, Ai o biagoni agua birimayabe. Isaraele wali agali bibahende pelai harimago ai inanaga garabaya biabe ale bia haga wiyagoni lone budai bule ndo ogonida, lene.
EXO 14:6 Ani lowa kini biagome ibunaga wai biagane garo ale mini karisi nogo hosime gili lagabi nogo hosi agali berelowa piaga hearubi ibunaga ami agalirubi ho manda bilene.
EXO 14:7 Ani ho manda buwa kini ibunibi ibunaga wai bigane karisi biago bibahendebi ogoni heba handari waragariago (600) pari wayali gibi hangugo tinaga wai hanaga agali haguane heba ho manda bialu Isaraele wali agali piyiyadagua haruru pene.
EXO 14:8 Isaraele wali agali ti Iyibinaga hongo bolangua halu poramagoni lo mitangi bialu miniha turu timbuniore hama pene. Ani pialu heagola Anduane Homogohanda kini biagonaga bu mini mo giambeho tagi helayagola kini biagome abaleore Isaraele wali agali piyiyadagua haruru pene.
EXO 14:9 Iyibinaga ami maru ti nogo hosime gili lelo karisi biagoha halu maru ti nogo hosini biralu maru ti geni pialu Isaraele wali agali talima gerai pene. Gerai talima pialu Isaraele wali agali haanda paleagoria Iba Daramabi bereago ange Pihahirodi dindila Balasebono dindila kaware ngelowa pu palearia tali minini.
EXO 14:10 Isaraele wali agalime kini biagobi ibunaga ami biarubi tidu yalu kaware ti heagoria ibiyago hondowa ti gi timbuniore hene. Ani biyagola ti biamogo bilonaga Anduane Homogo olene.
EXO 14:11 Ani buwa tigua Mosesehondo lalu, Namuali Iyibi dindini ina hora holenego homali naheyagola dindi ko wali agali nahaga ngagoria homoloma̱ya haru ibiribe. Ina Iyibi dindini harimadagua howa homoloma̱ya waha nabi ibirimagome ogoria hamaramagonida, lene.
EXO 14:12 Ina Iyibi dindi howa tagira ibalu íbu nabi hemangi áyu o biradaguaore bulebira langirimagoni ndoyagoda. Aniore bulebira manda buwa ina harugo Iyibi wali agalinaga garabaya biabe ale bialu kamagonidagua bialu haabo holego í̠ wahalu pu larimagoni ndoyabe. Oali dindi ko wali agali nahagagoria homolenego wahowa namuali Iyibi garabaya biabe ale bialu harimago kamale bayale kamaleda, lene.
EXO 14:13 Tigua ani layagola Mosesehanda ladai bialu lalu, Tí gi nahalimu. Tí bu mini dungulo daibu hadaba. Ani bidamigola Anduane Homogo ibugua tí pele ngulebirago áyu hondoleberami. Iyibi agali o tidu yalu ibirane hendedamigoni mani lone nahondoleberami.
EXO 14:14 Tínaga wai Anduane Homogo ibugua bia holebirago tínime mbira bulene nawigo tí ema nabi holene dege nga, lene.
EXO 14:15 Ani leagola Anduane Homogohanda Mosesehondo lalu, Biamogo bia lowa i̱ olalu kamigoni aginagabe. Isaraele wali agali ogodagua lamialu, Gi nahe heyalu pudaba, labe.
EXO 14:16 Mosese í̠naga halimbu biago yaraga howa Iba Daramabi bedagoha dogola angua habe. Ani beregola iba o bedagoni bira li ni bulebirago. Ani biragola dombeni hariga ngagola Isaraele wali agali ti dindi yobini hariga uba ede halu pobehe holebira.
EXO 14:17 Ani birago hondowa Iyibi ami ti bu mini mo giambe harogola ti mina tagotago porabupe halu ti talima gerai ibalu karia bibahende ibame nai helolebero. Ani bialu i̱na kini agali biagobi ibunaga ami agalirubi ibunaga garo ale mini karisi nogo hosime gili laga ngarubi agali karisi ogoriani heyu piaga karubi bibahende bope halu i̱ wayali holebero.
EXO 14:18 I̱na ti bope halu i̱ wayali harogo hondowa Iyibi wali agalime i̱ Anduane Homogo henedane hondolebira.
EXO 14:19 Ngode Datagaliwabenaga dahuliyali mbira Isaraelenaga ami erembiraha helowa ibu ala wai deni pu halu hariga bamba haga henego ogoni ibu dai buwa Isaraele wali agali erembirahayagi hene. Ani biyagola hari beraliba mberane hariga bamba halu piaga biago ibubi hadai buwa erembirahayagi dege hene.
EXO 14:20 Ani bialu Isaraele wali agalibi Iyibi ami agalirubi ti hengeneha ogonilabo libu hene. Hari beraliba mberane biagome Iyibiali ibiyagohayagi arumaho mialu Isaraele wali agali heagohayagi wáho mini. Ani biagola mbiraga odangi Isaraelenaga amirubi Iyibinaga amirubi libu handaya halu ngola habe nahe hene.
EXO 14:21 Ani bu howa Mosesehanda ibunaga gime halimbu biago yaraga halu iba biagoha dogola angua hayagola Anduane Homogohanda puyabu hongohe ni tagira ibiragohayagi ibilowa pu dege lalu heaore gao lene.
EXO 14:22 Ani biyagola iba biago bira li ni biyagola dombeni yobi wiaria Isaraele wali agali ti uba ede hole pene.
EXO 14:23 Ibani hariga wiagoria pole pialu hearia Iyibi ami biarume haruru nogo hosini bira nogo hosime gili laga karisi biagoria ha bigi bialu Isaraele wali agali piyadagua haruru pene.
EXO 14:24 Talima pialu hearia Anduane Homogo ibu ira hungu mberane biagohabi hari beraliba biagohabi howa egabi lolebiyahayagi handadali halu Iyibinaga ami tidu yalu piyago hondowa ami biarunaga mini mo luluya hene.
EXO 14:25 Karisi hosime gili laga biarunaga ge dindi wiagoha bahora helayagola abale dugu mialu pobe nahe ndelahe handalu hene. Ani biyago hondowa Iyibiali biaru tinime lalu, Anduane Homogo ibu wai Isaraelehayagi anda pu howa ina o baragonidago ibida ma nalarimigo. Áyu ogoni ma, lene.
EXO 14:26 Ani lalu heaha Anduane Homogohanda Mosesehondo lalu, Iba bedagoha í̠naga gi dogola ede ha. Ani beregola iba o biru migimigi bidagoni lone bira gimbu buwa Iyibiali o tiduyu ibiraruni biranamu lalu iba nai holebirago helo ani bia, lene.
EXO 14:27 Ani layagola Mosesehanda ibunaga gi dogo lowa iba biago ya angua hene. Ani buwa egerebagi gao layagola iba biagoni labo biraga biadagua biru gimbu bini. Ani biyagola Iyibiali biaru ibida pole bialu hearia Anduane Homogohanda ibunaga hongome bibahende ibaha mo para howa bai hene.
EXO 14:28 Iba biagolabo lone bira gimbu buwa karisi biarubi agali karisi ogoni yagarubi Iyibinaga ami bibahende Isaraele wali agali haruru talima ibini biarubi mbira yu wanahe bibahende iba nai helene.
EXO 14:29 Ani biya handala Isaraele wali agali ti dindi yobini iba lene labolabo bira migimigi bilowa dombeneha pialu angeni uba edede bini.
EXO 14:30 Horo odangi Anduane Homogohanda Isaraele wali agali Iyibialime balu hearia mo wialu Iyibiali o beadagoni. Ani bialu Isaraele wali agalime handalu hearia Iyibiali biaru homo payapaya buwa ede iba angeni wiaria hendene.
EXO 14:31 Anduane Homogohanda ibunaga hongo gibime Iyibiali biaru bibahende bo wahai hayago handayagola Isaraele wali agalime tinaga bi nawiyagola ti gi dege dindi howa Anduane Homogo geha handa daga daga bu hene. Ani bialu tigua Anduane Homogohondobi ibunaga biabe biaga Mosesehondobi mini mbiraore wini.
EXO 15:1 Ani biyago hondowa Mosese Isaraele wali agali hearumebi turu howa wai bi lalu iba gana ogo Anduane Homogohondo lo mini. Áyu Anduane Homogohanda wai bialu wayali taraore hayagonaga i̱na Anduane Homogohondo iba gana lo mulebero. Anduane Homogohanda Iyibinaga nogo hosibi nogo hosini agali berearubi ibaha minu bope hayagoni.
EXO 15:2 Anduane Homogo ibugua i̱ mo hongo haga kago i̱na ibunaga mini yaraga halu iba gana lolebero. Ibugua i̱ pele ngiaga kago i̱na ibunaga mini mo yaraga halu iba gana lolebero. Ibu i̱naga Ngode Datagaliwabe kago i̱na ibunaga mini mo yaraga holebero. Ibu bamba i̱ abanaga Ngode Datagaliwabe hene kago i̱na ibunaga mini lene daligaore wini ngago mo yaraga halu iba gana lolebero.
EXO 15:3 Anduane Homogo ibu wai biaga kago ibunaga mini Anduane Homogo ka.
EXO 15:4 Ibugua Iyibi amirubi nogo hosirubi nogo hosirume gili laga karisirubi karisi yaga agali hearubi bibahende iba solowaraha bopebe biai haya. Iba solowara mini Iba Daramabiha bopebe biyagola Iyibi ami haru haga haguane hearu ibame nai haya.
EXO 15:5 Bopebe biyagola bibahende ibaha ege to̱le̱ ibira haradagua bialu unura yupebe bialu ibame nai hayagoni.
EXO 15:6 Anduane Homogo-o í̠naga gi tigagoore hongo gibioreya. Í̠naga waitigi hearu bame gi mbiraoreme bo gingirulo paya bialu barigoni handarima.
EXO 15:7 Hongo gibihegonime í̠naga waitigi bibahende bope harigoni. Í̠naga keba holenego ira hungu kiaulo tagi haradagua bialu gambe aea daradagua í̠naga waitigi karu bo ereba hareya.
EXO 15:8 Í̠na puyabu hongohe pu lelarigoni. Puyabu hongohe puloyu ibiyagome iba biago daliga biruyu iraga helaya. Iba biago halu ki bira migimigi buwa gana wa mini hagahaga biradagua biya. Iba kuyamaore unu dindiha bereago giambe hodaga hayagola ege mbaulene.
EXO 15:9 Inanaga waitigirume lalu, Ina talima ibalu tigua ina minu yani howa inanaga mbirale bayale yidamaru gingilamu yuwa mo tale bimi̱ya. Ina hame lara alego mo ya dege bimi̱ya. Iname ayu tibu yidamarume balu inanenaga hongome Isaraele wali agaliore mo ko howa bami̱yago ma, lalu hongoho yalu ibirimi.
EXO 15:10 Ani bu yalu ibiyago ndo Anduane Homogo í̠na í̠naga buhe̱ halu mbira hangu latagi harigome Iyibiali biaru bibahende iba nai hayagoni. Ibaha to̱le̱ ibira haradagua unuraore ti kuni duguale ndoni yupe hayagoni.
EXO 15:11 Anduane Homogo-o dama tara tarahondo bi pupu wiaga bu karuni aria mbirago hongohe í̠ aleore ai kabe. Daligaorebi duninibi baya buruguleorebi í̠ni dege kegoni. Í̠na hongo gibi howa agalime nabiagane ale tara tara bigi berego wali agalime í̠ hondowa gi timbuniho bu kagoni.
EXO 15:12 Í̠na í̠naga gi tiga biago dogola amu harigola dindi wiagome ne ha̱lowa inanaga waitigi hearu minu mbedogo biya.
EXO 15:13 Í̠nime haru holebero lalu lo wiridagua heneneore wali agali í̠ni pele miriru baya hangu haru halu í̠ninaga hongome ina haru halu dindi mbira wali agali nahaga í̠ni dege haga wiagoha haru ibirigo kamagoni.
EXO 15:14 Wali agali dindi tara tarani hearume í̠na bigi biriru hale howa ti gi dege dindi howa duru ala lalu kagoni. Pilidiali karubi gi timbuniore halu kagoni.
EXO 15:15 Idomo dindinaga agali haguanerubi gi timbuniore ho ka. Moaba dindinaga agali hongohe karubi gi howa duru ala lalu kagoni. Kenana wali agalinagabi hongo bibahendeore pirilipe hai henego ka.
EXO 15:16 Gi holenebi mogo lolenebi ti kagoha ibiraho nga. Anduane Homogo-o tigua í̠naga hongo timbuni kegoni hondowa ti gi dege dindi howa mbirale mbira bibe nahe ka. Ti bame de pigi piagolo ira tili haradagua bu ka handala helalu í̠naga wali agali Iyibi dindi garabaya hemaria golope hene kamaru iname ti bolangua halu pole kamagoni.
EXO 15:17 Garabaya hemaria golope halu haru halu ibuwa í̠ninaga hari mbira í̠ni ogoriani hole lowa dabo wini biagoria haru puwa berelo harili. Anduane Homogo-o hari ogoriani í̠nime í̠ninaga anda bulebere.
EXO 15:18 Ai Anduane Homogo-o í̠ handame haga kini haluhe haabobo haga kegoni, lalu iba gana lene.
EXO 15:19 Iba solowara mini Iba Daramabi biago dombeneha hariga yobi wiyagoria Isaraele wali agali ti dindi ange mendeha howa ange mendeha uba ede hene. Ani uba edede biyaru hondowa Iyibinaga ami biarubi nogo hosini berearubi nogo hosirume gili laga karisini agali heyu hearubi bibahende Isaraele wali agali talima ibaha hariga wiadagua yupebe bialu hearia Anduane Homogohanda iba biago lone biragimbu bilayagola Iyibiali biaru bibahende ibame nai hene.
EXO 15:20 Ani biyago hondowa Anduane Homogonaga mana latagi haga wali Arono mbalini Miriamuhanda ibunaga ngilinge̱le̱ laga irabitele ale mbira wiago mo yayagola Isaraele wali maru berearume nde tininaga ngilinge̱le̱ laga wiaru mo yagayaga bialu Miriamu piyadagua haruru pialu irabitele ale balu turu howa ae̱a kae̱a bialu mali lima pialu hene.
EXO 15:21 Ani pialu howa Miriamuhanda tihondo iba gana mbira ogo lo mini. Anduane Homogohanda wai bialu wayali taraore hayagonaga ibuhondo iba gana lo midaba. Ibugua nogo hosibi nogo hosini agali berearubi bibahende mo paraho bagabu ibame bo nai helayagonaga Anduane Homogohondo iba gana lo midaba, lalu lama pene.
EXO 15:22 Uruni bialu Mosese ibugua Isaraele wali agali Iba Daramabi bere biagoria howa haru halu pialu dindi ko wali agali nahaga mini Sua wiagoria haru anda pene. Puwa horo tebiru dindi ko wali agali nahaga ogoriani pu dege bialu iba nolene mbira nabereoreyane hendene.
EXO 15:23 Ani bialu dindi mbira mini Mara wiagoria anda pialu hemiria iba mbira bereago hondowa iba biago nole birimiria nabenahe kau gibiore bini. Dindi ogoriani iba kaubi ogoni bereago hondowa dindi ogoni mini Mara inanaga bi lalu Kaubi wininagaya.
EXO 15:24 Wali agalime iba biago nalu hemiria kaubiyago hondowa tigua keba howa Mosesehondo gimigomo lalu lalu, Ina iba agi noledabe, lene.
EXO 15:25 Ani layagola Mosese ibu mini burugu lowa ibugua Anduane Homogohondo hongo howa bi lene. Bi layagola Anduane Homogo ibugua Mosesehondo ira gabini mbira wiago mo walia hayagola Mosesehanda ira gabini biagoni muwa ibaha mo bape hayagola iba biago kau biyago ereba halu dendebi hene. Ani bialu dindi ogoriani Anduane Homogohanda Isaraele wali agalihondo ibunaga bi mana lamialu lalu, Langerodagua bilimu, lene. Ani bialu dindi ogoriani dege hearia ibugua ti ba handalu hene.
EXO 15:26 Ani bialu ibugua tihondo lalu, Tígua i̱na bi larogo damene bibahende hale halu biaiore halu i̱na mana bayale manda bidogo bilimu larodagua bialu mana maru ko manda bidogo nabilimu laruyagua nabilimu. Aniore birimiyagua i̱na Iyibi wali agalihondo warago tara tara mirugodagua tíhondo nangulebero. I̱ Anduane Homogo i̱na tí mo dabi haga biago kogoni, lene.
EXO 15:27 Ani bialu Isaraele wali agali ti dindi ogoni yu wahalu dindi mende mini Elimi iba nairia duguaga duguaga bialu homberia (12) dugualuhe bibi ayage ale mini dedi dege panda pira karia (70) buhe wiagoria anda puwa ogoriani handa palene.
EXO 16:1 Isaraele wali agali lenego bibahendeore Elimi dindi yu wahalu pialu dindi ko wali agali nahaga mbira mini Sini wiagoria tagira pene. Dindi Sini ogoni Elimila Sainaila dombeneha wini. Isaraele wali agali ti Iyibi dindi yu wahalu tagira ibuwa heane ege mendegonaga horo nguinini (15) Sini dindi anda pene.
EXO 16:2 Ani anda puwa Isaraele wali agali bibahende dindi ko wali agali nahaga wiagoriani howa Mosese Aronolahondo gomogomo lalu hene.
EXO 16:3 Tigua gomogomo laga bialu howa ogolabohondo lalu, Inaore Iyibi dindini hemaore Anduane Homogohanda bo wahai nahayada. Ne nalu homabe lene ngago ina Iyibi dindi henedale nogoru bame dawa paya buwa ne tara tara ngaru mo yu ngoai howa inane biru mabu buwa nolenegobiore nowa to̱lotagi halu homedamale karulape. Ai ani bule ndo libugua ina ogoria haru ibiribigome ne noa ha dege bialu noa halu homoleni lenego henene áyu ne noa halu homole o kamagonida, lene.
EXO 16:4 Ani lalu heago hondowa Anduane Homogohanda Mosesehondo lalu, Ai áyu i̱na tí bibahende tomo nalimulonaga tomo hariha howa ibira ibira bulebero. Ani buleberogo wali agali ti horo bibahendengi tagira pugu bialu tomo horo mbiru odangi hangu naga bulenedagua migi bulene nga. I̱na bi o lamerodaguaore birabe be o larogoni mo waharabe hondoliya ani bidaba labe. Ti ogoriani ba hondoliya.
EXO 16:5 Horo bibahendengi horo mbira ogonaga dege nolenedagua migi bialu horo waraganeni o horo kirunaga nolene mo yu wilimu laya lalu lamibe, lene.
EXO 16:6 Ani laya handala puwa Mosese Aronolame Isaraele wali agali bibahendehondo lamialu lalu, Uru-o alendoore tí Iyibi dindini hemira haru tagira ibiyagoni Anduane Homogohanda ani binida lowa manda buleberami.
EXO 16:7 Yawi egerebagi tígua Anduane Homogo ibuni tí heba ko lalu walia halu wá holene taraore de mborerebime ina kamagoria hadali holebirago hondoleberami. Tígua ibuhondo gomogomo laga birimiruni ibu hale hai haya. Nde gomogomo larimiruni mbiralihondo larima lolebe ibuhondoore larimigoni ndobe. Arono iyame bame ibugua ogoale bia ogoale ladaba laga biyago bia la bialu kabagoni ndobe, lene.
EXO 16:8 Ani lowa Mosesehanda lalu, Ani bigi birimigo áyu Anduane Homogohanda tí tomo nalimulo ngulebira. Tí tomo noa biragobiore alendo nalimulonaga ega de̱wa̱re ale ngulebira egerebagi nalimulonaga mena ngulebira. Tígua ibuhondo gomogomo laga birimiruni aguaore larimi ibu manda biaiho kago ibugua tí tomo noa harimidadagua nalimulo ngiaore bulebira. Tígua Arono iyahondo gomogomo lama hariha bi la bigi birimiyagua ogoni iyahondo ndo tí Anduane Homogohondo larami, lene.
EXO 16:9 Ani lowa Mosesehanda Aronohondo lalu, Isaraele wali agali bibahende lamialu tígua gomogomo larimigoni Anduane Homogo ibu hale hayago áyu Anduane Homogo ibu deni tí heyu hole ogoria ibai halimu, laya lamibe.
EXO 16:10 Ani layagola Arono ibugua puwa Isaraele wali agali lamiyagola haleho howa Isaraele wali agali ti de amu dindi ko wali agali nahaga wiagohayagi handa amu halu hearia au tobane buwa Anduane Homogonaga wá holene taraore de mborerebigo hari beralibani tagira ibiyaria hendene.
EXO 16:11 Ani hondo hearia Anduane Homogohanda Mosesehondo lalu,
EXO 16:12 Isaraele wali agalirume gomogomo lalu hearuni i̱ hale haru. Ani hale harugo Isaraele wali agalihondo ogodagua lamibe. Áyu alendoore ne̱le̱ni̱ni̱ ega de̱wa̱re ale bo dawa nalimulo ngulebero. Ani bialu yawi egerebagi mberedi tí noa biragobiore nalu nama mangaore halimulo ngulebero. Ani ngerogo no howa tígua i̱ Anduane Homogo tinaga Ngode Datagaliwabeore i̱ni henedane hondoleberami, lene.
EXO 16:13 Ani layadagua alendo ne̱le̱ni̱ni̱ hayagola ega de̱wa̱re ale wabuni yagalo yalu ibuwa Isaraele wali agali anda bu palu heagoria biru haealome howa dindi namulai hene. Ani bialu egerebalene tani anda hane hane headagua pibira birame hene.
EXO 16:14 Pibira biago yo biyagola mbirale emene adadabi mbira ira yuniru gingirulo bigi bini mbaulego o biagoriani haealo payabu wiame hearia hendene.
EXO 16:15 Hondowa Isaraele wali agali ti o bu payabu wiagoni agigo wiyabe toba howa tinihondo hale haga haga bialu o bu payabu ngaruni agiledabe lalu hene. Ani lalu hearia Mosesehanda tihondo lalu, Anduane Homogohanda tí tomo nalimulo ngulebero layagoni tíhondo o ngidagoni.
EXO 16:16 Ani ngialu howa Anduane Homogohanda au laya. Tí hangu hangume tínibi tí one waneiginibi nolenedagua mo mogobu wilimu, laya. Tí andagaha paliaru daga lowa homane mbiraligo ibunaga todobene be emene mbirago mo to̱lo ba a̱i̱ ho wigi bilimu laya, lene.
EXO 16:17 Isaraele wali agalime Mosesehanda lamiyadagua bia binigoyu marume bi layago pugualu dewaore mo bolangua howa ilu mogobu wialu marume emene dege ilu mogobu wialu bini.
EXO 16:18 Ani bia binigo nde andagani mo yu puwa magi handalu hemiria minime dewaore bolanguaho mule mandabu mia miyago magini Mosesehanda layago bolangua nahene. Ibugua layagoria ha iri hene. Ai emeneore mo yini hearubi andagani puwa dege magi handalu hearia emene yidamabe toba hearia emene ndo Mosesehanda magi layagoore karulape yarimayane hendene. Ani bialu ti bibahende tini nolenedagua karulapeore mo yagayaga birimayane hendene.
EXO 16:19 Ani bialu Mosesehanda tihondo lalu, Tomo ogoni bibahende áyu hangu nai halimu. Yawi nole mbira nangelalimu, lene.
EXO 16:20 Ani lamiyago hale howa dege maru ti Mosesehanda bi layago mo wahalu tomo biago maru egerebagi nole lowa mo wini. Mo wiaria tomo mo wiyago bibahende togo buwa himi dibidabu lalu ngu hiriribi biame hene. Ani biyago hondowa Mosese ibu wali agalidaru baba keba gibi hene.
EXO 16:21 Ani bigi bialu egerebagi bibahendengi wali agali hangu hangume tagira pugu bialu tini nolenedagua mo wigiwigi bini. Ani mialu peha ni dalu tandaga biyagola tagirani mialu ibira hene bu payabu wigi biaru nime do egege lalu ereba haga bini.
EXO 16:22 Ani bigi bialu horo waraganeni ti hangu hangume tomo mo mogo bigi biyadagua dege haluki horo kiru nolene mo mogo bialu todobene be emene mbira to̱lotagi howa mo yagayaga bini. Ani biyago hondowa Isaraele wali agali haru haga agali haguane hearume aguani biyago hondowa tigua wali agalime agua bira lalu Mosese lamule pene.
EXO 16:23 Lama pialu hearia Mosesehanda tihondo lalu, Anduane Homogohanda yawi ha̱lo holene horo loma bini wulebira laya. Yawi Sabada horo tara Anduane Homogo ibu hangu mitangi bialu holene wulebira laya. Ani layago ai tomo irani hirule ngamiru áyu howa hirule manda bu wu palialu dawale ngamirubi áyu howa dege dawa mandabu paluene nga. Hira dawa bialu ibira harago yawinaga mo bagiho ngelalimu, lene.
EXO 16:24 Ani lamiyagola Isaraele wali agali tigua Mosesehanda lamiyadagua hale halu bialu tomo hira dawa bialu ibira hayago egerebaginaga mo ngelene. Egerebanaga mo wiyaruni egerebagi handalu hearia ngu bialu himi dibidabu nale bayale wiaria hendene.
EXO 16:25 Ani handalu Mosesehanda wali agalihondo lalu, Horo áyu Sabada horo biabe nabi ha̱lo howa Anduane Homogonaga mini yaraga halu hami̱ya kamagoni. Ani hami̱ya kamago horo áyu mbirali tomo taya bima putagi halu napoleberami. Mbirali napoleorego ti tomo noa biyagua abe howa áyunaga lalu bagiho wirimigoni noleberami.
EXO 16:26 Tí horo waragaruni tomo mo wigi bialu horo kanegoria ha̱lo holenengigo horo ogoningi tomo mbira dindini ibiraho nawulebira, lene.
EXO 16:27 Ani layago lelowa wali agali maru ti horo kanengi tomo nawulebirago mo tagira napilimu layago hale howa dege donge halu tomo ngalono mo tagira pialu hearia nawiaria hendene.
EXO 16:28 Ani biyago hondowa Anduane Homogohanda Mosesehondo lalu, Wali agali tígua i̱naga bi tí langialu ogoale bilimu laga berogo bule ndo tí dogaho howa mine halu tíni hame ledamidagua bialu kamigoni. Ainde angiore i̱naga bi hale halu bule kamibe.
EXO 16:29 Horo áyu Anduane Homogo i̱na howa tí i̱ mitangi bialu ha̱lo halimu langirugoni ndobe. Ani bialu halimulonaga horo waraganengi i̱na tí tomo horo kiru nalimulonaga manda buwa ngiaabo holebero. Ani buleberogo horo kanengi wali agali bibahende mbiraligo mbira tagira pialu nape andagani hai holeberami, lene.
EXO 16:30 Anduane Homogohanda ani lamiyagola Isaraele wali agali ti horo kane ogoningi biabe nabi ha̱lo haga hene.
EXO 16:31 Ani henego Isaraele wali agalime Anduane Homogohanda miyadagoni mini mena lene. Mena ogoni ibuni pele emene ladi alego dendenaga mone ibane nalehe nelo mini.
EXO 16:32 Ani minigo Mosesehanda Isaraele wali agalihondo lalu, Anduane Homogohanda iname be emene mbira dindime wabinigo muwa be ogoniha mena mo gambiru to̱lotagiho ngelalimu, laya. Ani mo gambiru ngelalimu layago irane awe inanaga waneigini aguaneru mani holebirarume tinaga mamaliru Anduane Homogohanda Iyibi dindi howa haru tagira puwa tomo miniyago ogoniore nelo minidalo hendelonaga mo gambiru ngelalimu laya, lene.
EXO 16:33 Ani lowa Mosesehanda Aronohondo lalu, Be mbira muwa mena ogoniha mo to̱lo yalu puwa Anduane Homogonaga deni ngelabe. Inanaga waneigini aguane mani holebirarume de handalu manda bilo ani ngelabe, lene.
EXO 16:34 Anduane Homogohanda Mosesehondo ani bibe leneyadagua Mosese ibugua Aronohondo bia layagola Arono ibugua hale halu beha mena mo tolo̱tagihe biago yalu puwa Habo Nalolene Bi lo winigonaga Mbogoyi wiago buha wiaabo holeneni wini.
EXO 16:35 Ani bialu Isaraele wali agali ti tomo mena ogoni nalu heane mali pira maria (40) pene. Ani nalu howa dege Kenana dindi anda puwa tini tomo hengenego nalu wahene.
EXO 16:36 Horo odaruningi mbirale magi hondolenenaga todobene be emene ale karulape handaga wialu magi mende timbuni todobene emene ogonibi pira biamaga howa handabehe wialu bini.
EXO 17:1 Isaraele wali agali lenego bibahendeore Anduane Homogohanda lamiyadagua bialu dindi ko wali agali nahaga mini Sini biago yu wahalu pene. Ti pialu dindi mbira mini Lebidimi wiagoria anda puwa ogoriani haanda palu hene. Ogoriani palu howa handalu hearia iba nolene nabereoreyane hendene.
EXO 17:2 Ani hondowa tigua Mosesehondo keba howa lalu, Ai iba noloma̱ya ngia nabere, lene. Ani layagola Mosesehanda ladai bialu lalu, Tí aginaga keba howa gomogomo lalu kamibe. Tígua aginaga Anduane Homogo ba handalu kamibe, lene.
EXO 17:3 Mosesehanda ani layago lelowa dege wali agali biaru ti iba noa howa hége lebola hayagola Mosesehondo keba howa gomogomo dege lalu hene. Tigua Mosesehondo lalu, Í̠na ina Iyibi dindi hemaria haru tagira ibirigoni irane aginaga haru tagira ibiribe. Inanebi ina waneiginirubi inanaga nogorubi iba noa ha dege bialu tongolo muluma̱yanaga hawa haru tagira ibiru nalarego, lene.
EXO 17:4 Tigua ani layago hale howa Mosesehanda Anduane Homogohondo deremola howaore bi lalu, Wali agali o bu karume áyu dege i̱ to̱le̱me bo waharagonidago aiore nde agua buadabe, lene.
EXO 17:5 Ani layagola Anduane Homogohanda Mosesehondo lalu, Isaraele wali agali haru haga agali haguane maru karu haru halu tí ala bamba halu pudaba. Pialu howa í̠naga halimbu iba Naili baga yu hariligoni giha yalu pobe.
EXO 17:6 I̱na uyu Hari Sainaini puwa ege to̱le̱ mbirani i̱naga de tiga tiga heyu holebero. Ani buleberogo í̠na o larudagua bialu puwa ege to̱le̱ o larogoni í̠naga halimbume babe. Baregola wali agaliru ti iba nelo ege to̱le̱ ogoniha howa tagira ibulebira, lene. Ani layadagua puwa Mosesehanda Isaraele wali agalinaga haru haga agali biaru handayaho helowa Anduane Homogohanda bibe layadagua bini.
EXO 17:7 Ani bialu Isaraele wali agalime Anduane Homogohondo keba howa gomogomo laabo halu lalu, Anduane Homogo biagoni ina heba kabe be pebe tobaneya, layagonaga dindi odagoni mini Masa Meribala wini.
EXO 17:8 Ani binigo Isaraele wali agali Lebidimi dindini hearia Amalege agalirume bo anda ibini.
EXO 17:9 Tigua Isaraele wali agali bo ibulebira layago hale howa Mosesehanda Yosuahondo lalu, Yawi Amalege agaliru baba wai bu pelonaga í̠na Isaraele agali maru wai bibehego hondowa erelomigi buwa dabo helabe. Agali o dabareruni tigua Amalege agaliru baba wai biragola i̱na bare hombene biagoria heyu howa i̱naga halimbu Ngode Datagaliwabehanda giha yabe layago yu holeberogo, lene.
EXO 17:10 Ani lamiyagola Yosua ibugua Mosesehanda lamiyadagua bialu Isaraele agali maru bu̱lu̱migi buwa haru halu Amalege agaliru baba wai bu pene. Ani piya handala Mosesebi Aronobi Huabi tigua hari biago neneni pu hene.
EXO 17:11 Ani pu howa Mosesehanda ibunaga gi kirabali hariha yaragaho haga biagola Isaraele tigua Amalege bo podama anda pugu bini. Ani bialu Mosese ibunaga gi yu ibira haga biyagola Amalege tigua Isaraele bo podama dai bigi bini.
EXO 17:12 Ani bigi bialu Mosese ibunaga gi hi halu yu ibira habehe haga biyagola Arono Hua libugua to̱le̱ mbira Mosese berelo mo yalu ibuwa Mosese ibu ogoriani bereagola libugua lene labolabo howa Mosesenaga gi yaragaho hene. Ti wai biyago de handape ho biruwa libugua Mosesenaga gi baya hangu ema nabi yaraga howa haabo dege heane ni palene.
EXO 17:13 Ani dege bialu Yosuahanda haru howa Isaraele agalirume Amalege agaliru mo ko howaore bo paya paya biai hene.
EXO 17:14 Ani buwa Anduane Homogohanda Mosesehondo lalu, Ai áyu Amalege agaliru baba wai bialu bo hana harimigoninaga te mbirani gili bu wibe. Tí mani hama poramiha áyu wai bialu pari wayali harimigoni embeda nahe mitangi biaabo holenaga ani gilibu wibe. Ani bialu í̠na Yosua lamialu, I̱na Amalege agaliruore mbira yu wanahe bibahendeore bo mburi lolebero, laya lamibe, lene.
EXO 17:15 Ani layadagua lamuwa Mosesehanda Ngode Datagaliwabenaga lomabu delolene dabu mbira buwa dabu odagoni mini Anduane Homogo ibu i̱naga Humbi ka wini.
EXO 17:16 Ani wuwa ibugua lalu, Anduane Homogonaga waibi, daliga ladaga howa ladaba. Anduane Homogohanda Amalegeali baba wai bialu haho wiaaboore holebira, lene.
EXO 18:1 Mosese imane ibu Midianalinaga loma binigo mo miaga biago Yadero ibugua Ngode Datagaliwabehanda Isaraele wali agali Iyibi dindi howa haru tagira ibalu Moseseha howa biabe agua biya Isaraele wali agali agua biamogo biya lalubi te laga biyago haleho hene.
EXO 18:2 Ani hale howa Yadero ibugua Mosese one Sibora namu Midiana dindi berea handala penego Mosese ibuni hearia haru ibalu
EXO 18:3 libunaga igini kira Gesomo Elieselabi heba haru ibini. Mosese ibuni manda bialu ibu dindi tarali mendeali dindini bame igiri yango íbu harugo manda buwa ibu igini mbirago mini Gesomo wini.
EXO 18:4 Ani bialu ibu bamba Iyibi dindinaga kini heagome bo wa kalego ibu abanaga Ngode Datagaliwabehanda ibu biamogo bialu mo wiya manda buwa ibu igini mendego mini Eliese wini.
EXO 18:5 Ani binigo Yaderohanda Mosese onebi Mosese igini kira biago labobi haru halu dindi ko wali agali nahaga hari loma biaho wini biagoria Mosese ogoriani hearia haru ibini.
EXO 18:6 Yadero ibugua Mosese one iginiru haru ibalu howa ani haru ebero lalu bi ala lo pelene.
EXO 18:7 Ani ibira layago hale howa Mosese ibu lolaho pene. Mosese ibugua ibu imane lola howa ibu bulu paluwa ibu imane yu hurubale bini. Ani buwa libuni waragoru mbira balu henedabe nabe henedabe hondole hale haga haga buwa Mosesenaga balai andaha haru pene.
EXO 18:8 Ani pu biruwa Mosesehanda ibu imane Yaderohondo Anduane Homogohanda Isaraele wali agali golope halu haru tagira polenaga Iyibinaga kini biagohondobi Iyibi wali agali bibahendehondobi biyaru damenego lamiai hene. Ani lamialu Isaraele wali agali ti haru tagira ibinigo ibalu heariabi harigani gendabi ndelahe tara tara handaga bialu hearia Anduane Homogohanda biamogo biyarunaga bi tebi lamia dege bini.
EXO 18:9 Mosesehanda te laga bigi biyagola Yadero hale howa ibu turu timbuniore hene.
EXO 18:10 Turuore howa ibugua Mosesehondo lalu, Iyibi wali agalimebi Iyibinaga kini heagomebi í̠ bolene winigo Anduane Homogohanda mo wiyadagonaga Anduane Homogonaga mini yaraga hami̱ya. Anduane Homogohanda ibuninaga wali agali garabaya biabe ale bialu hearia golalu gi miyadagonaga Anduane Homogonaga mini yaraga hama nalaramigo.
EXO 18:11 Aiore Anduane Homogo ibu mbirale tara tarahondo bi pupu wiaga ngaru bibahende bope hai howa ibu daligaore haruane hendedo. Iyibi wali agalime Isaraele wali agali handabe manga gibi howa haru hayadagoni haru tagira pole o biyadago handarogola gibiore haruane hendedo, lene.
EXO 18:12 Ani lowa Yaderohanda nogo tara mbira homa hende Ngode Datagaliwabehondo loma bialu bo delo mule haru ibalu mbirale marubi heba delole yalu ibini. Ani biyagola Isaraelenaga haru haga hearu bibahende Arono heba puwa nogobi tomobi loma binigo yu íbu wiyadagoni Ngode Datagaliwabe mitangi bialu ibu mo dunini howa lotu lolenaga nole pene.
EXO 18:13 Horo mendengi Mosese ibu wali agali tini degedege lai lalu hearu mo tiga bialu hene. Egerebagi howa wali agalinaga genda wiaruni mo tiga bialu heaore dege mbiraga hene.
EXO 18:14 Mosese ibugua dege biabe bulene emene ndoore bu payabu wiaru hondowa Yaderohanda Mosesehondo lalu, Í̠na wali agalinaga genda ngaruni mo tiga bialu kegoni agua berebe. Wali agali ho mabubu helowa homane í̠ni hangume erekuibi lo tiga bialu kegoni nde í̠ni hanguoreme lolene ngadagua lo tabalu bede agini. Wali agali egerebagi ho wahalu alendo haga bialu o bu karuni nde í̠ baba dege bi loledago manda bideni, lene.
EXO 18:15 Ani layagola Mosesehanda ladai bialu lalu, Wali agali tinime i̱ koria ibugu bialu gendabi ngaru langigi biragola i̱na tihondo Ngode Datagaliwabehanda bilo hame ledago ogodagua bulene ngago agua bilimu lalu lamigi biruli.
EXO 18:16 Kirali libu lai lalu mini iriari biyagua i̱na lo tiga buliya i̱ koria ibugu biragoni. Ani ibugu biragola i̱na hale halu tale buwa ogome larago tigabi lara lalu lamialu Ngode Datagaliwabenaga bi lo ngagome ogo ale bibe nabibe lalu ledagobi lamia dege bialu kogoni, lene.
EXO 18:17 Ani layagola Yaderohanda ladai bialu lalu, Ogoni tigabi ndo bialu kegoni.
EXO 18:18 Ogonidagua biaabo hariyagua í̠nibi wali agali bu karubi binigo ale bia dege bialu kalukalu bialu ngoe̱ ngoe̱ lalu hongo pirilipe hai holeberami. Biabe gendabi ogonibigo homane í̠ni hangume nabibehe kegoni.
EXO 18:19 Anidane hendedogodago ai ogodagua bulene nga lalu bi maru langerogo hale habe. O langerodagua bibelo Ngode Datagaliwabe ibunime í̠ heba howa biamogo bulebira. Anigo í̠na wali agali tini degedege lai lalu mini iriari bialu karu Ngode Datagaliwabehondo lamialu kegoni karulape bialu ke.
EXO 18:20 Í̠na wali agalihondo Ngode Datagaliwabehanda bilimu nabilimu ledagobi lawai halu ti mana ogodagua bialu halimu lalubi ha ogodagua halimu lalubi lamuleneore ngadagua lamialu kegoni.
EXO 18:21 Ani bialu kegonigo áyu ogoni bialu howa dege í̠ biamogo bilonaga agali maru wali agali haru holene mugube karu dabowa uruni tigua wali agali haru helo dabolene nga. Haru haga marume wali agali daosini (1,000) haruha marume handarini (100) haruha marume pira duriani (50) haruha marume pirani howa haru haga haga bigi bialu wali agali wabuni dewaore mo ta howa haru helo haru haga agali urunidagua dabo helolene nga. Agali Ngode Datagaliwabe hondowa giho hagaru mbirale ibugua bulebira lowa hanaho habeherubi ndelalu dange hana habe naherubi hondowa urunibime wali agali haru helo dabolene nga.
EXO 18:22 Wali agalinaga godi larago hale halu dabagane agali uruni helolene nga. Ti biabe ogoniale biaga ka lene howa biaabo helo dabo helolene nga. Genda emene ale ngaru tigua lo tiga bigi bialu bi timbuni gendabi tigua hangu lai habe nahe ngaru í̠ keria yalu ibugu bulene nga. Anidagua mo tale birimiyagua í̠ genda yu kegoni maru tigua yamu yu kagola í̠ yabiabi holebere.
EXO 18:23 Anigo áyu o langerogoni Ngode Datagaliwabehanda labe ledadagua langerolo manda bidogo o larogonidagua biriyagua í̠ kalukalu bialu ngoe̱ ngoe̱ lowa hongo pirilipe naholebira. Ani bialu wali agali o bu karu tibi nde tinaga genda abale mo tiga berami handala andaga polebira, lalu Yaderohanda lai hene.
EXO 18:24 Mosesehanda manda bialu hearia Yaderohanda bi layagoni heneneore layada manda bialu lamiyadagua bule manda bini.
EXO 18:25 Ani manda buwa ibugua Isaraele agali hearu bibahende bi libele lo handama pialu agali maru wali agali haru habehe mugubeyi hearu dabo helene. Agali uruni marume wali agali daosinini (1,000) handaya ho hela marume handarini (100) handaya ho hela marume pira duriani (50) handaya ho hela marume pirani handaya ho haga haga bigi bilo dabo helene.
EXO 18:26 Ani biyagola agali uruni tigua wali agalime bi laga biyaru hale halu lo tabaga bialu mo tiga bigi bini. Bi tigua hangu lo tababe nahe gendabi ale wiaru Mosese hearia yu pugu bialu emene yabiabi ale tigua labehe wiaru tigua lo tabalu hene. Ti biabe ogoni bia li hole bialu hene.
EXO 18:27 Yaderohanda Mosesehondo agua bia lalu lamiyadagua Mosese ibugua hale halu biyago handalu howa nde Yadero ibu ibuni dindi, Dai bero, layagola Mosesehanda, Nde pobe, lene.
EXO 19:1 Isaraele wali agali ti Lebidimi dindi wahalu pene. Iyibi dindi howa tagira ibuwa ege tebonegonaga horo mbira pigane ngabu layagola Sainai dindi ko wali agali nahaga wiagoria anda ibini. Anda ibuwa Hari Sainai heago teneha palu hole balai anda ya gimbu bu hene.
EXO 19:3 Wali agali biaru ti ani bu hea handala Mosese ibu hari biagoha iraga halu Ngode Datagaliwabela heba bi lole pene. Ani pu hearia Anduane Homogohanda hari biagoha howa bi lamialu Yagabanaga aguanene Isaraele wali agali hearuhondo bi lamilonaga Mosese lamini.
EXO 19:4 Mosesehondo Isaraele wali agali lamilo agua lene. Isaraele wali agali tí biamogo bule lowa Anduane Homogo i̱na Iyibi wali agalihondo birugo tí de handarimigoni. Ega bodo hariawe ale ibu igini ibuninaga babaganeni berelowa yalu yaga lagadagua i̱na tí i̱naga payani au yalu ibalu o kamigoriani yupeho heledogoni tí manda bidamigoni.
EXO 19:5 Ani birugonigo áyu tígua i̱na bi larodaguaore hale halu bialu i̱na habo nalolene bi lo ngoruni napuguiore harimiyagua tí i̱ninaga wali agaliore holeberemi. Dindini mbirale bibahende ngarubi wali agali bibabende karubi i̱naga degego ai tíore i̱naga wali agali dabeneore holeberemi.
EXO 19:6 I̱naga hanguore hole lowa loma bini tí i̱naga loma binigo mo miagame biabe biradagua bia haga holeberemi laya, lalu lamibe, lene.
EXO 19:7 Ani laya handala hale halu Mosese ibu hari biagoha howa dalipe halu puwa Isaraele wali agali haru haga hearu íbu ngoai hadaba lowa Anduane Homogohanda labe layaru bibahende o biaruhondo lamiai hene.
EXO 19:8 Ani lamiyago wali agali bibahendeme hale howa tigua ladai bialu lalu, Anduane Homogohanda layadaru damene iname bibahendeore hale halu biai holeberema, lene. Tigua anidagua ladai biyagola wali agalime agua laya lalu Mosese ibugua Anduane Homogo lamini.
EXO 19:9 Ani lamiyagola Anduane Homogohanda Mosesehondo lalu, Áyu howa i̱na beraliba timbuni mberane biagoha howa tí kamigoria ibuwa bi laga bulebero. I̱na í̠hondo bi laga berogo hale howa wali agalime í̠na bi laga berego hale halu ti yu tiga bulebira, lene. Isaraele wali agalirume agua laya lalu Mosese ibugua Anduane Homogohondo lamini.
EXO 19:10 Ani lamiyagola Anduane Homogohanda Mosese lamialu lalu, Áyu wali agali kagoria puwa lamialu áyu yawila tíha kobi dodobi para karu domo wahalu halimu laya, labe. Wali agali tí ko dodo bagabi howa i̱ mitangi bialu mo dunini howa lotu lole i̱ kogoria ibabe nahe holebira laya, labe. Tinaga aga baya hangu wayawaya bialu
EXO 19:11 yawi howa luma i̱ mitangi bialu i̱hondo lotu lole halimu laya lamibe. I̱na horo ogoningi wali agali bibahende i̱ de handai helo Hari Sainaini dalipe holebero laya, lamibe.
EXO 19:12 Ani lamialu wali agali ti hari ogo iraga holemeni hari ogoha ibu haparabi heba holamini laya, lamibe. Ani bialu hari ogo tene tene wali agali ti baba i̱ baba tigi dibu yu mabu bibe. Tigi dibanda kegoha i̱ kohayagi mbirali anda ibulani bibahende tagirayagi hadaba labe. Ani larogoni pugualu mbirali i̱ kogohayagi tigi dibanda kegoha ge yaanda hayagua dogahe ogoni bo tongolomiore lolene nga.
EXO 19:13 To̱le̱me bo tongolo milalimu. Danda timume bogarimiyaguabi karulapego timu heba bogopeho ngagola mbiralime elaore holamini. Nogo agali bogarimiyaguabi mana mbiraore ogoni hangugo timu heba wu ga̱e̱ lalu tongolo milo ela nahe ngelalimu laya, lalu lamibe. Ai mbelo pu larane hale harimiyagua wali agali bibahende hari ogo iraga iraga bialu ibai halimu, laya, lalu lamibe, lene.
EXO 19:14 Anduane Homogohanda ani lamigi biya handala hale halu Mosese ibu hari biagoha howa dalipe halu ibuwa wali agali lamialu lalu, Ai Anduane Homogo mitangi bialu ibu mo dunini howa lotu lami̱yago manda manda bidaba, lene. Ani layagola wali agali tinaga aga bibahende bayuwa wayawaya biai hene.
EXO 19:15 Ani bu heagola Mosesehanda tihondo lalu, Áyu yawibi bayuwa manda manda bialu howa luma lotu lami̱yago dombene nigoniha howa onene agalinila mandagi napale hangu haga haga bilimu, lene.
EXO 19:16 Ai horo tebone biangi egerebagiore hayagola hari daba bialu hari kulu lalu beraliba mberane tohe timbunigo li hari biago neneni pu banga biyagola mbelo hongo howaore halu mbira tolade lene. Ani bigi biyago hondowa wali agali bibahendeme gi hai howa duru ala lalu hene.
EXO 19:17 Ani bialu heagola Mosesehanda wali agali bibahende Ngode Datagaliwabe lola helo lowa haru tagira puwa hari biago teneha hope ho helene.
EXO 19:18 Ani bu hearia Anduane Homogohanda hagua hungula ala bima bima tagira ibiyagola Hari Sainai emene mbira pana hole ndo ali haguame ndibulo wahene. Hagua timbuni anda dene hagua mbaulego pa̱u̱ lalu iraga iraga biyago hondowa wali agali biaru mogo lowa duru emene agima ndo gangawalu ibani lene.
EXO 19:19 Ani bialu mbelo tolade layagobi lama iralu lo hongore hene. Mosese ibugua bi ibuni lalu Ngode Datagaliwabehondo layagola Ngode Datagaliwabehanda hari kulu lalu howa ladai bini.
EXO 19:20 Ani bialu Anduane Homogo ibu Hari Sainai neneoreni dalipeho howa, Mosese í̠ hari neneore ogoriani iraga halu íbu, lene. Mosese ibu hari nene biagoriani pu heagola
EXO 19:21 Anduane Homogohanda ibuhondo lalu, Í̠ áyu ogoni dalialu wali agali lamialu ti i̱ de hondole manda buwa ti baba i̱ baba tu wirimago bolangua halu i̱ kohayagi naibalimu. Tu wirimago bolangua halu ibirimiyagua ti dewali homa mburi loleberemi laya, lalu lamibe.
EXO 19:22 Loma binigo mo miaga karubi heba i̱ kohayagi kaware íbu hapara haramiru tibi dodo bibahende bayuwa mbililo wahene howa ibalimu. Ani nabi dodo bagabigo iraga harimiyagua nde bibahende pani mulebero laya labe, lalu lamini.
EXO 19:23 Ani layagola Mosesehanda Anduane Homogohondo lalu, Hari ogoni wali agali ge nahagago ti baba í̠ baba tu tigi dibuyu mabu bibe larigo manda buwa wali agali ti hari ogo iraga halu ibulene gi holebira, lene.
EXO 19:24 Ani layagola Anduane Homogohanda Mosesehondo ladai bialu lalu, Í̠ áyu ogoni dalialu Arono damu pialu libu haru ibalibu. Ai wali agali bibahendebi loma binigo mo miagarubi ti bibahende baba ina tu wirimagoni ti tini kamiha hamilimu. Tu biago boladaga halu i̱ koha kaware ibirimiyagua dogahe ogoni pani mulebero laya labe, lalu lamini.
EXO 19:25 Ani laya handala Mosese ibu dalialu puwa Anduane Homogohanda layadagua wali agali biaru lamini.
EXO 20:1 Ngode Datagaliwabehanda ibuninaga bi lenego ogo.
EXO 20:2 I̱ Anduane Homogo tínaga Ngode Datagaliwabe i̱na tí Iyibi dindini garabaya biabe ale biaga hemiria haru tagira ibirugoni i̱ kogoni, lene.
EXO 20:3 Tígua dama tara tarahondo bi pupu wiaga karu mitangi nabi i̱ hangu mitangi bialu mo dunini howa lotu lalu halimu, lene.
EXO 20:4 Mbirale mbira hari daligaha winibi dindini winibi ibaha winibi humbirini andagaha winibi uruni mbiragoha winigo Ngode Datagaliwabe handaradagua bule lowa gime wa nabilimu, lene.
EXO 20:5 Mbirale gime wabini mbira mo ngelowa ogonihondo tíni bulu palialu bi pupu nawilimu. Ani nawilimu larogo irane tínaga Anduane Homogo Ngode Datagaliwabe i̱ni kogola mbiralime ogonidagua bilo henge namiaga kogoni. I̱ handabe manga halu erembira ngiaga kago pani mialu ogoninaga waneigini mani hama porarubi daba tebone mane daba haragoriabi pani miaho dege ngoria hondolebira.
EXO 20:6 Ai i̱ gubalini halu i̱na larodaguabi i̱naga mana lo wirugo ngodaguabi hale halu biaga karu i̱na ti gubalini halu maha ti waneigini dabane hama poraru gubalini haho wiaabo haga kogoni, lene.
EXO 20:7 Mana ohowa tara tara bulenenaga i̱ mini lalu labi biabi nabilimu. I̱ tínaga Anduane Homogo Ngode Datagaliwabe kogo mbiralime i̱naga mini mo nagalone haga kago pani miaore bulebero, lene.
EXO 20:8 Sabada horo i̱ninaga loma biaho ngeledogo i̱ mitangi bialu halimu.
EXO 20:9 Tí horo waragaru tíninaga biabe bulene horo o ngarunigo
EXO 20:10 ai horo kanego i̱ mitangi bialu ha̱lo halimulonaga nga. Horo kane ogoningi biabe bulene nawiore. Tínibi tí waneiginirubi tínaga biabe biaga karubi dindi tarali maru tí heba mandagi kamirubi tínaga nogorubi tí bibahendeme biabeore mbira nabi halimu.
EXO 20:11 Horo waragaruni i̱ Anduane Homogo i̱na dindi bibahendebi hari daligabi ibabi mbirale bibahende uruniha ngarubi karubi wabiai harugoni. Ai horo kanengi i̱ ha̱lo hene ko. Anduane Homogo i̱na ani bini kogome Sabada horo ogoni mo bayale halu loma bini ngeledo, lene.
EXO 20:12 Tígua aba ai̱yala mo yo handa nabi laradagua hale halu bilimu. Anigo tí dindi i̱na ngerogoni lu haabo holeberemi.
EXO 20:13 Wali agali homelo nabalimu.
EXO 20:14 Wali agali kayu nayalimu.
EXO 20:15 Mbirale page nabilimu.
EXO 20:16 Ke̱ howa dibade nahalimu.
EXO 20:17 Agali mende ibunaga anda kago hondowa tí hame nalalimu. Ibu one bedago hondowabi tí dimagoli nahalimu. Ibunaga biabe biaga wali agali karubi ibunaga nogo hinidarubi ibunaga nogo dongi karubi ibunaga mbirale maru ngaru bibahendebi tí hame lalu dimagoli nahalimu, lalu lai hene.
EXO 20:18 Hari kulu layuagobi mbelo biguli layuagobi kirabalime tolade layuago wali agali tigua hale howa handalu hearia hari daba gibi biayuagobi Hari Sainai biagoha hagua pa̱u̱ lalu tagira ibiyagobi hondowa ti gi timbuniore hene. Gi timbuni howa ibida pugu pugu bialu duru lalu haga haga bini.
EXO 20:19 Ani gi howa tigua Mosesehondo lalu, Í̠na inahondo bi lariyagua iname hale holeberamagoyu ai Ngode Datagaliwabehanda inahondo bi langiyagua ina áyu ogoni homolomada manda buwa giho kamagoni, lene.
EXO 20:20 Tigua ani layagola Mosesehanda ladai bialu lalu, Tí gi nahalimu. Ngode Datagaliwabehanda áyu tí ba handalu ibugua laradagua hale halu bialu mana ko nabilimulonaga o bigi biyaruni de handalimulo ibunaga hongo walia haya, lene.
EXO 20:21 Mosesehanda ani laya hondobi wali agali ti gi howa de pigipiagolo kaundia namu hayagoriani haho wiaabo hene. Ti ani biagola Mosese ibuni dege hari beraliba mberane arumahe wiagoha Ngode Datagaliwabe heagohayagi kaware pu hapara hene.
EXO 20:22 Anduane Homogohanda Mosesehondo lalu, Isaraele wali agaliruhondo bi ogo lamibe lowa lalu, I̱ Dahuliya andagaha howa tí baba bi lalu harugoni manda bu kamigoni.
EXO 20:23 Ani manda bu howa tígua bi pupu wulenaga mbirale mbira ngolo silibarumebi wabu ngelowa urunihondo bi pupu wulene nawiore. Tígua i̱ni hanguhondo mitangi bialu lotu lalu halimu.
EXO 20:24 Tígua dindime lomabu delaga dabu wabu helowa ogoriani nogo bulumaga sibiru bo loma bialu irani dai helo delalu Anduane Homogoi̱nila ho gimbu bulenaga lomabi bo delalimu. Tígua i̱nihondo mitangi bialu lotu lalimulonaga i̱na dindi dabo ngelarugo bibahendeha i̱nime wali agali mo turu halu bayale helonaga íbu holebero.
EXO 20:25 Tígua lomabu delaga dabu ege to̱le̱me bulene manda birimiyagua nde ege to̱le̱ agalime podo wini ngagome nabilimu. Ani larogoni irane ege to̱le̱ biabe biaga aeane ngagome podowa dabu birimiyagua nde ogonidagua binime i̱naga dabu bulene tiga nabi nga.
EXO 20:26 Ani bialu lomabu delaga dabu daligaore egegeria bima iraga halu bo delole nabilimu. Tígua loma delolenaga iraga howa bo delalu karia wali agali dindiha bu karu we̱ lai holigo daligaore nabilimu laya, lalu lamibe, Anduane Homogohanda Mosesehondo lene.
EXO 21:1 Anduane Homogohanda bi laabo halu lalu, Isaraele wali agalihondo bi mana ogo lamibe.
EXO 21:2 Isaraele wali agali bu karu aria degeme tíninaga garabaya biabe ale biaga helo yolo mialu helarimiyagua mali waragariani hangu biabe bialu helalimu. Ani bialu mali kane haragola ti pelo golope halimu. Ti pole howa muni mbira ibu anduane kagohondo mia nabi pelo wahalimu.
EXO 21:3 Ibugua tínaga garabaya biabe ale bule ibiyangi ibu wali dabu nabi heneyagua nde ibuni hangu polene nga. Abale ibu wali dabubi howa ibu one heba garabaya biabe ale bialu heneyagua nde ibu one heba pelo pudaba lolene nga.
EXO 21:4 Anigo ai anduanedago ibugua ibunaga biabe biaga ogoni wali mbira miragola walime waneigini taba hanayagua nde waneiginirubi walibi anduane ibuninaga helo wahalu garabaya biabe ale biaga agali biago ibuni hangu polene nga.
EXO 21:5 Ani buwa garabaya biabe ale biaga agali biago ibugua lalu, I̱naga agali anduane kagobi i̱ one waneiginirubi yu wahalu napole layagua
EXO 21:6 nde agali anduane kago ibugua ibunaga garabaya biabe ale biaga agali ogoni Anduane Homogo andagaha haru polene nga. Ani bialu garabaya biabe ale biaga ogoni anda panga harabani helowayaguabi anda haneni helowayaguabi anduane kago ibunime agali ogoninaga hale diri bolo wulene nga. Ani bolo ngagola agali biago ibu anduane biagonaga garabaya biabe ale bialu haabo halu homalu waholebira.
EXO 21:7 Agali mbirame ibu wane garabaya biabe ale bilo lowa yolo biragola miyagua wandari ogoni ibugua garabaya biabe ale bialu mali karia howa agali garabaya biabe ale bialu hene golope halu pu laga ngadagua wandari biago golope halu pu nalolebira.
EXO 21:8 Agali mbirame wandari ogoni yolo bialu howa mani ibuni dabu bulene manda bialu yolo buwa dege ibugua wandari biago dabu bule manga hayagua nde wandari aba ibunime ibu wane lone yolo biadai bulene nga. Agali anduane biagome mana bayale bulene ngadagua ndo biyago ai ibugua agali dindi taraha howa ibiragohondo yolo bidaba lalu muni tagulene nawi.
EXO 21:9 Agali mbirame wandari mbira ibu iginime dabu bilo yolo biyagua nde agali ogoni ibugua ibuni waneore handayaho hagadagua handayaho holene nga.
EXO 21:10 Agali wali biago anduane kago ibugua wali mende dabu biyagua wali ala dabu biyago baya hangu handayaho holene nga. Ibugua wali mende biago dabu nabi howa mana ala biaga wiyadagua wali ala dabu binigonaga tomo agabi mialu ala hagadagua holene nga.
EXO 21:11 Agali biago ibugua ogonidagua nabiyagua nde wali ala dabu bini biagohondo ibunaga muni ngiadai bia nale wahalu ibuni andaga pu lolene nga, lalu Anduane Homogohanda lene.
EXO 21:12 Anduane Homogohanda laabo halu lalu, Kirali gungu bialu karia mendealime mendealigo bo homelayagua nde baga biago ibuni homelo bo waholene nga.
EXO 21:13 Anigo agali ogoni ibugua mendeali biago baro lalu ndo bame gungu bialu kabiria mememe bo homayagua nde bagago ibuni tano maru agali mememe bene ogoni ale ibida pialu ha do helo dabo ngeloleberogoha howa hada payabu hole polene nga.
EXO 21:14 Anigo agali kirali gungu bialu kabira mendego keba howa homelo henemane bo wahayagua nde baga biago ibunibi nde bo waholene nga. Agali biagome mendealigo bo wahalu ibugua nahomole lowa i̱naga lomabu delolene dabu wabu wiagoha ibida piyagua ibu minalu haru pubagi howa ibuni homelo bo waholene dege nga.
EXO 21:15 Mbiralime ibu aba ai̱yabi bayagua ibuni nde homelo bo waholene nga.
EXO 21:16 Mbiralime wali agali mende kago minu page buwa yolo ngilo lowa mendealihondo minu miyaguabi ibuninaga garabaya biabe ale bialu helo minu helayaguabi ogonidagua biaga kago ibuni nde homelo bo waholene nga.
EXO 21:17 Mbirali ibu aba ai̱yalahondo keba howa ha halu Anduane Homogohanda pani milo layagua ibuni homelo bo waholene nga.
EXO 21:18 Kirali gungu bialu mendego kangomebi gimebi ege to̱le̱mebi benego homa nabiyagua baga hayago ibuni pani mulene nawi. Benedago ibu ibuni andagaha dagiani wuwa
EXO 21:19 mani lone heyalu halimbu yalu tagira poragola agali baga biago ibunime bene warago wiyagonaga muni mbira mulene nga. Muni biabe bulene winigo bayagome ibuni yolo biabe bibe nahedagola buru paluebira manda bialu dabi helo ngatagi yolo miagadagua mialu holene nga.
EXO 21:20 Garabaya biabe ale biaganaga anduane mbirame ibunaga garabaya biabe ale biaga wali agaliyaguabi mbirago kangome baragola ogoningiore abale tongolo miyagua nde anduane ogoni ibuni pani nelo milimu.
EXO 21:21 Anigo mbirali biabe bia haga bayagua abale barangiore homa ndo horo kiru tebirubi wuwa homayagua nde ogoni anduanedago ibuninaga munime yolo bialu ibunime hameleda ale bulenaga ani yolo bu helenego ai mani ibuni hame handa walia holebira. Hame handa walia holebiragome pani ogoni karulapego tigua pani lone namilimu.
EXO 21:22 Kirali gungu bialu karia wali nuyi mbira bedagoha gungu buya howa wali ogoni hengedaragola gali tombeha bedago mo ko haragola yu wahalu wali ibuni mo ko nahe bayale bereagua nde wali hengedene biago agalini kagome hengedayagohondo yolo bia laradagua bulene nga. Anigo tinaga mana dabaki haga karume karulape ogodagua mibeheda laradagua wali agalini biago ibu mo yulene nga.
EXO 21:23 Ai wali biago hengedayagome mo ko hayagua nde hengedayago ibuni pani ogodagua mulene nga. Wali biago homayagua nde agali hengedayago ibunibi homelo bo waholene nga.
EXO 21:24 Ani bialu de bo hundia hayagua nde ibuninaga debi bo hundia halu ne bo hondayagua ibuninaga ne bo hondalu gi bo podayagua nde ibuninaga gi bo podalu ge bo podayagua nde ibuninaga ge bo podalu bulene nga.
EXO 21:25 Ani bialu wali irame heda hayaguabi tingini maruha mo ko haragola tingini dere timbuni biyaguabi gewame bo baulo wahayaguabi uruni biyadagua agali ogoni ibunihondo biadai biai holene nga.
EXO 21:26 Agali mbirame wali agali ibunaga garabaya biabe ale biaga karu aria mbiragonaga de bo hundia halu mo ko hayagua nde anidagua biyagome ibu garabaya biabe ale biyagonaga yolo biadai biradagua ibu bame golope halu andaga pu lolene nga.
EXO 21:27 Wali agali garabaya biabe ale bialu haga karu aria mbirago anduane kagome baragola ibunaga ne bo hondayagua nde ibunaga anduane kagome ne bo hondayagonaga yolo biradagua ibu bame golope halu ibuni andaga pu lolene nga, lalu Anduane Homogohanda Mosesehondo, Isaraele wali agaliruhondo lamibe, lalu lene.
EXO 21:28 Anduane Homogohanda laabo halu ogodagua laya. Bulumaga mbirame ibunaga haguaneni ne gayane kagome wali agali balu homelayagua nde tigua bulumaga ogoni homelo bo waholene nga. Ani bialu nogo bulumaga ogoni nanalimu. Bulumaga aba kagohondo abi bia lalubi nalalimu.
EXO 21:29 Ai nogo bulumaga ogonime ala keba haabo halu wali agali bama ibaga biaabo haga kago hondowa wali agalime bulumaga anduane kagohondo bi hongo howa lamiaabo haragola ibugua bi hale nahe tingi halu ibunaga bulumaga pabeha hela nabiyaguabi nde ogodagua bilimu. Nogo bulumaga biagome waliyaguabi agaliyaguabi bo wahayagua nde ibunibi nogo aba kagobi kirabali homelo ege to̱le̱me bo wahalimu.
EXO 21:30 Bulumaga aba biagome ibuni nahomolenaga muni yolo mule manda biyagua nde muni yolo ogodagua bulene nga larago laradaguaore yolo biyagua nde karulape ogoni. Ani biragome ibu homa nabi helolebira.
EXO 21:31 Bulumagame wandari igiribi mbira bayaguabi nde mana mbiraore ogonidagua dege bulene nga.
EXO 21:32 Bulumaga mbirame wali agali garabaya biabe ale biaga karu aria mbirago balu homelayagua nde bulumaga aba kagome wali agali homayagonaga anduane kagohondo muni kina handari tebira ale (300) mialu nogo bulumaga biago ibuni homelo wali agali tigua ege to̱le̱me bo waholene nga.
EXO 21:33 Agali mbirame gundu uli bu yi hene ngago mo wabia howa duguaho ngelayaguabi gundu uli gahenge timbuni tombowa bu yi nahe ngagoha nogo bulumaga dongiru mbira pilalu
EXO 21:34 homayagua nde agali o biagome nogo homayago anduane kago yolo bialu nogo homene biago ibuni dawa nolene nga.
EXO 21:35 Ai mbiralinaga bulumaga hinidago mendealinaga bulumaga kagome balu homelayagua nde nogo hayaga kago anduanebi homene ngago anduane kagobi libu haru nogo hayaga kago muni taguialu muni libuni talebu ki halu nogo homene ngagobi libuni bo daga bulene nga.
EXO 21:36 Ai nogo bulumaga hayaga biagome ogonidagua biaabo haganego manda buwa anduane kagome bulumaga ogoni pabeha hela nabiyagua nde bulumaga homene anduane kago nogo mbira hada aribia halu nogo homene ngago ibuni dawa nolene nga, lalu Anduane Homogohanda lene.
EXO 22:1 Agali mbiralime mendealinaga bulumaga mbirayaguabi nogo sibi mbirayaguabi page bialu bayagua haru halu puwa muni miyaguabi nde nogo anduane kago hado aribia holene nga. Bulumaga mbiranaga bulumaga duria hado aribia holene nga. Nogo sibi mbiranaga sibi maria hado aribia holene nga.
EXO 22:2 Mbirale page biragonaga miadai bulene nga. Pageali kago ibugua miadai bulene mbira nawi heayagua nde ibuni nogo mbirale page biyadago anduane kagonaga garabaya biabe ale biaga holene nga. Ai nogo bulumaga dongi sibiyaguabi mbira page binidagoni balu nane ibu daluha heagua nde pageali kago ibugua nogo kira miadai bulene nga. Mbiraga pagealime mbiralinaga anda gialalu anda pialu karia anda anduaneme hondowa pageali ogoni homelo bo tongolo milayagua nde anda anduane biago ibuha ko nawi. Anigo horombe bayagua anda anduane biago ibuhabi nde bia ko hene dege wulebira.
EXO 22:5 Mbiralime ibunaga nogo bulumagaru yupe howa ibuni daluhayagibi ibunaga pu mbira mini gerebi lini dagane mabuhabi nalu heledagola bulumaga biarume agali mende daluhabi mendealinaga gerebi mabuhabi anda puwa nayagua nde nogo anduane kagome gerebi linibi tomo bayaleore ibuni mabu tawe bialu mabu anduane kago yolo bulene nga.
EXO 22:6 Mbiralime ibuni dalu dangi teha bo delalu karia datimbu howa mendeali dalu ngagohayagi dama pialu tomo hengedarubi widi lini gandulo ngarubi dalu biyagua nde bo delaga kago ibugua tomo dayadago damene bibahende bu aribia holene nga.
EXO 22:7 Agali mbirame ibunaga muni dabudaburu agali mende ibu nenege kagome ngelo handayaho habe lalu mialu pedagola pagealime mo pagebu yalu pialu karia handa walia hayagua pageali ogoni ibugua mbirale mo page binigo aleore kira kira mo aribia holene nga.
EXO 22:8 Anigo pageali biago handa walia nahayagua nde agali mbirale uruni handayaho hagadago ibuni wali agali ngoai howa lotu laga ngagoria haru pu helolene nga. Ani haru pu heledemigola agali mbirale handayaho haga kago ibu i̱ninaga deni howa ibugua lalu, Heneneore larogo i̱na mbirale uruni mo page nabiore, lalu latagi holene nga.
EXO 22:9 Anidagua dege mbiralime nogo bulumagayaguabi dongiyaguabi sibiyaguabi agabi yári tara tarabi mbirago ibunaga nenege mende kagola í̠naga i̱naga lowa garere bialu hebiyagua nde kirabali i̱naga deni wali agali ngoai howa lotu laga ngagoria haru polene nga. Ogoriani howa daba handalu kamiria mendealime ke̱ howa laya lalu i̱na dababagi harogo ibugua mende henene laga kago mbira mbira uruninaga haluki dege dege miadai bulene nga.
EXO 22:10 Mbiralime nogo bulumagayaguabi dongiyaguabi sibiyaguabi mbirago ibu nenege mbira kagome hinu habe lalu pedaria nogo uruni mbirago homayaguabi mo ko hayaguabi wai tigirume wai anda ibuwa haru halu piyaguabi mbiralime handa nabiyagua
EXO 22:11 nde libu haru i̱ninaga deni wali agali mo ngoai howa lotu laga ngagoria puwa Anduane Homogo i̱ninaga minini howa bi heneneorego latagi holene ngago ogo. Heneneore larogo í̠naga nogo ogoni i̱na bo pagebi hado pagebi nabiore kogoni, lolene nga. Anidagua laragola nogo aba hayadago ibugua mememe ereba hayadago hado aribia nahe wahabe lolene nga.
EXO 22:12 Anigo mbiralime hado page biniyagua nde nogo hinu hayadagome nogo anduanedago nogo hado aribia holene nga.
EXO 22:13 Nogo ogoni nogo gabuame balu nayagua nde naya lalu anduane kago ibuni mo walia hole nalu ibira henedago mo yalu anduane karia polene nga. Ani bialu nogo gabuame nogo bo nayadagonaga miadai bulene nawi.
EXO 22:14 Agali mbirame ibu agali nenege kagonaga nogo bulumagame biabe bulenaga haru pialu karia mo koha homa biyagua nogo anduane ibuni nahende heagua nde agali o biagome ibu nogo anduane kagohondo yolo mulene nga.
EXO 22:15 Anigo ai bulumaga anduane libu haru mandagi kabiria homayagua nde mememe biyada lalu waholene nga. Ai nogome biabe bilo haru polenaga nogo aba biago muni marume yolo bialu haru peneyagua nde mo koha homa bidagola yolo miadai bulene nawi. Yolo ala biyadagoni karulape, lene.
EXO 22:16 Anduane Homogohanda laabo halu lalu, Agali mbirame wandari mbira ibu agalila nahene biruwa mbirame dabu bule lo berelenebi ndo mbira bedago kayu biyagua nde agali ogoni ibugua wandari aba ala yolo bialu wariabu hende holene nga. Ani bialu ibu dabu bulene nga.
EXO 22:17 Anigo wandari aba biagome ibu wane agali ogonime dabu nabule layaguabi nde karulape. Ani layagua agali ogoni ibugua wandari hibaria berene yolo biagadagua wandari aba biago nogo tawa bo mulene nga.
EXO 22:18 Wali mbirame wali agali maru tomia biyagua ogoni ibu homelo bo waholene nga.
EXO 22:19 Wali agalime nogo biango karu baba kayu biaga heagua ogonidagua biaga kago homelo bo waholene nga, lene.
EXO 22:20 Wali agalime mbirale loma bialu Anduane Homogo i̱hondo hangu ngulene nga. Anidagua nabi howa mbirale dama mitangi bialu gime wabini ngaruhondo lomabu miaga mbira heagua ogoni ibu homelo bo wahalimu.
EXO 22:21 Wali agali dindi tara tara ngaruha howa íbu hene karuhondo mo ko halubi genda mo mialubi mbira nabiore halimu. Ani larogoni irane tínibi nde bamba Iyibi dindiha anidagua dege harimigo mitangi bialu halimu.
EXO 22:22 Wali dalo ti agalini homene bedarubi waneigini ti aba ai̱yala homene bu karubi uruni mo ko nahalimu.
EXO 22:23 Tígua uruni mo ko harimiyagua nde tigua biamogo bia lalu i̱hondo bi laragola Anduane Homogo i̱na tinaga bi larago hale halu biamogo bulebero.
EXO 22:24 Ani bialu tíhondo keba timbuni howa tínaga waitigi bu karume tí baba wai bialu tí mo ko howa bo hilo wahelo ibilolebero. Anidagua berogola tí one bedaru agalini nahe dalo biralu tínaga waneigini bu karu aba nahe hono wahene halu bulebira.
EXO 22:25 I̱naga wali agali bu karu aria mbiraligo ibu muni nawi yagibano howa agali ogonibi kagome tínaga muni mo dano hayagua nde tí biyinaya biagame muni bolangua howa bo yudai bule lowa mendealiha wia hagadagua nabilimu. Tínaga dano harimigo tiga tiga ngiadai birangi bolangua howa ngi lolene nawiorego nalalimu.
EXO 22:26 Mbiralime tínaga dano harimigo hongoleore lalu manane ibunaga dagare bulilono biaga aga tohe ngago tíhondo ngiyagua nde horo ogoningi dege mbiraga ni palia nabidaore abale yu daibu milimu.
EXO 22:27 Ani larogoni irane mbiraga dagare biragola tongobu paluene aga mende nawi howa mbiraore ogoni hangu wuwa dagare holebiragonaga laro. Ibunaga aga tohe dagarenaga biaga ogoni tí mo yu haabo harimiyagua nde ibuni mbiraga dagare biragola aga agome tongobu paluebadabe. Anidagua beramigola yagibano uruni tigua i̱hondo bi laragola i̱na wali agali tanabi dara hai haga kogome tinaga bi larago hale halu biamogo bulebero.
EXO 22:28 Ngode Datagaliwabe i̱niore kogohondo bi ko nalalimu. Ani bialu tínaga agali haguane kago ha halu ibu karia mo ko holene wilo lalu nalalimu.
EXO 22:29 Tínaga mabuha widi linirubi gerebi lini ibanerubi olibe lini ibanerubi pigane boga birago i̱nihondo lomabu ngulene manga nahalimu. Tí igini wahene taba hanaragobi i̱nihondo lomabu ngilimu.
EXO 22:30 Ani bialu tínaga nogo bulumaga sibirume igini pigane wiragola horo karu angibuni baba helo wahowa horo halini haragola i̱nihondo bo lomabu ngilimu.
EXO 22:31 Tíore i̱ninaga wali agali kamigo manda bialu nogo tara tara bu karu aria mbira gabua karume bo wahene irabuha wiagua ogoni nolene nawiorego manda bialu nanalimu. Wahalu biango karume nelo mo milimu, lalu Anduane Homogohanda lene.
EXO 23:1 Anduane Homogonaga bi mana Mosesehanda latagi halu lalu, Tígua hale halu kamiria ogoale mbira biyada lowa diburibu mbira lalu kane hale howa henene ndoyagua bi te ogoninaga latimbu nahalimu. Mbiralime mana pugualu nabulene nga lowini mbira biyane deme handarimiyagua nde godi deni ke̱ howa biamogo bialu la nahe tigatiga latagi halimu.
EXO 23:2 Agali dewalime mana ko ngago bialu hai heagua nde ko biaga uruni talialu mana ko biradagua tígua nabilimu. Agali dewalime godi deni howa godi larago la ko helonaga bi mo lingilungu biyagua mana ogoni biradagua nabilimu.
EXO 23:3 Mbiralime agali ko yagibano kago godini haru íbu helayagua nde ko ogoninaga bi lahalu mo wulenaga godi ke̱ howa bi nalalimu.
EXO 23:4 Tínaga waitigi kagonaga nogo dongi bulumagayaguabi mbirago pora bialu tí daluha íbu heagua nde nogo anduane ibu karia haru dai bilimu.
EXO 23:5 Ani bialu waitigi kagonaga nogo dongi mbiragonaga erekunini dabudabu yu kaore harigani pilo wiagua nde tínaga waitigi hayadago biamogo bialu nogo pilo ngago mo heya halimu. Ibu harigani pilo ngelalu napilimu.
EXO 23:6 Agali yagibano mbira godi lole lowa lalu karia tígua bime bope halu mo hondo howa mo luluya nahalimu.
EXO 23:7 Agali mende kago baba ke̱ howa no̱a taini godi nalalimu. Agali ko nabi mbira kago bameore godi deni íbu helarimiyagua ibu helowa homelo bo wa nahalimu. Mana ko ogonidagua birago ibu i̱na dabaki harogola ke̱ howa godi laga kago ibu ke̱ hayagonaga pani nolebira.
EXO 23:8 Mbiralime ke̱ godi lolenaga ke̱ halu bi lahabe lowa muni ngiyagua muni ogoni mo yulene nawi. Mana ko ogonibi biragome agali ko mbira nabi kago bi degeme mo luluya halu godi lolene ngago ndo la ko helaga ka.
EXO 23:9 Wali agali dindi tara taraha howa tí daluha íbu hene maru heagua nde urunihondo mana ko nabi bayuwa helo halimu. Anidagua bulene ngago irane tínibi nde Iyibi dindiha hemiria Iyibialime tíhondo biyago mitangi bialu ani nabilimu.
EXO 23:10 Tínaga mabu ngamiruha mali waragaruni tomo hangarimigo bialu tíni nolenaga ngelaga bilimu.
EXO 23:11 Anigo mali kane haragola dindi ibu emene ngelo wahowa mabuha tomo minana andaho karu nabilimu. Mabuha hangabi nabule dege. Dindi ibu emene bame ngelo wahalimu. Pu mbira lini daga mini gerebi mabu ngamiruhabi olibe mabu ngamiruhabi ani dege bilimu. Anidagua bidamigola wali agali yagibano karu ti tomo uruni bu nalu helo. Ti bu nalu howa ibira harago nogo ega biru karu ti nalu helo yupe halimu.
EXO 23:12 Sarere bibahendeangi horo waragaru biabe bialu halimu. Anigo horo kaneni biabe damenego bibahende nabi ha̱lo hai halimu. Tínaga wali agali biabe bia haga bu karubi hongo mialu horo ogoningi ha̱lo helo. Wali agali dindi taraha howa íbu hene karubi bibahende ha̱lo haga bilo helalimu. Horo ogoningi tínaga nogo dongi bulumagarubi biabe nabi dege ha̱lo helo helalimu.
EXO 23:13 Anduane Homogo i̱nime bi o larogo baya hangu hale howa taluwa bialu halimu. Mbirale dama mitangi bialu bi pupu wule gime wabini ngaruhondo bi pupu nawi halimu. Mbirale uruninaga minibi naloleore lalu hongo howa larogoni, lalu Anduane Homogohanda Moseseha howa latagi hene.
EXO 23:14 Anduane Homogohanda lalu, Mali mbira mbiranaga andaneha horo timbuniore i̱hondo mitangi bialu lotu lolenaga halu tebira daba bagiho ngelalimu.
EXO 23:15 Horo timbuni mbirago Mberedi Yidi Nahe Hirini Nolenengi tíni mo mogobu howa i̱nihondo mitangi bialu lotu lalu holene nga. Ege Abibi haragola i̱na bilimu lalu langirudagua tí mo mogobu howa horo karu mberedi yidi nahe hiru nalu halimu. Bi ani larogoni irane ege ogoningiore i̱nime tí Iyibi dindiha howa haru tagira ibirugoni. Tígua i̱ mitangi bialu lotu lole eberemingi mbirale i̱hondo ngulenaga lomabu wirimigo mo yalu ibugu bilimu.
EXO 23:16 Horo timbuni mendego tínaga mabuha tomo hengedemigo liniru pigane daramiangi horo uruni mini Mabuha Widi Lini Bogabi Gandulo Winigonaga Horo lalu uruningi i̱ mitangi bialu lotu lalu holene nga. Horo timbuni tebonego Anda Nemandaha Palu Holenengi tínaga mabuha ira lini dedaru boga birangi tagira ibulebira. Horo uruni tagira ibirangi tínaga ira olibe lini dedarubi gerebi lini dedarubi dalu kamingi anda nemandaha ho halimu.
EXO 23:17 I̱ Anduane Homogo tínaga Ngode Datagaliwabe kogo i̱na mali mbira mbirago andaneha horo timbuniore halu tebira uruni i̱hondo mitangi bialu lotu lalu halimulo daba bagiho ngelarogo uruningi Isaraele agali bibahendeore i̱ mitangi bialu lotu lole íbu ngoai ho halimu.
EXO 23:18 Tígua i̱hondo nogo mbira bo lomabu ngialu howa mberedi yidihe hirini nangilimu. Mbirale bo lomabu delaramigonaga abene habaneru horo mendengi nangelalimu. Ogoningiore delai halimu.
EXO 23:19 Tínaga tomo hengedemiru ariame lini pigane bogabi bayaleore daramirunaga maru Anduane Homogo tínaga Ngode Datagaliwabe i̱nihondo lomabu ngule i̱naga anda yalu ibalimu. Tígua nogo meme igini sibi iginiyaguabi mbirago ibu angibuni andu ibane beha hambu yu delaramigoha delamaga nahalimu, lene.
EXO 23:20 Anduane Homogohanda laabo halu lalu, Bi o larogo hale halimu. Tí poleberemigoha i̱naga dahuliyali tí mamage helonaga ala mo bamba halu pelolebero. Ani bialu tí dindi mbira i̱na ngulenaga manda mandabu ngeledo larugoha haru polebira.
EXO 23:21 Tígua ibunaga bi larago hale howa talialu bilimu. I̱nimeore ibu tí heba helo ibilarugo ai i̱nibi ibu heba mandagi kogo wali agalime ibunaga bi mo wahalu mana ko birago hondowa ibugua ko ogoni wa naholebira.
EXO 23:22 Anigo tígua ibunaga bi hale halu i̱na bilimu ledodagua biai halu harimiyagua nde i̱na tínaga waitigi bu karu baba wai bialu bope holebero.
EXO 23:23 I̱naga dahuliyali kago ibugua tí haru halu Amoro dindibi Hidi dindibi Perese dindibi Kenana dindibi Hibi dindibi Yabusu dindibi dindi uruniha pialu biragola i̱na wali agali uruniha karu bibahende bo amo lolebero.
EXO 23:24 Tígua dindi uruniha puwa mbirale dama mitangi bialu gime wabini ngaruhondo ge duli hanga howa bi pupu nawilimu larogoni. Tígua bi pupu wialu howa biagane mana ngarubi nabuleore larogoni. Tí puwa tinaga bi pupu wiaga anda bu heledaru bo gialo wahai halu mbirale bi pupu wulenaga wabu ngeledaru bibahende dambu gingirulobaga bu wahai halimu.
EXO 23:25 I̱ Anduane Homogo tínaga Ngode Datagaliwabe kogo nde tígua i̱ mitangi bialu i̱hondo hangu lotu lalu halimu. Anidagua bialu harimiyagua nde i̱na tí mo bayale halu tomo ibabi nalu halimulo ngialu tínaga warago tara tara ngaru mo wahai holebero.
EXO 23:26 Tí dindiha wali tí one bedarume waneigini nataba hene berelo mbira i̱na mo wa naholebero. Bibahendeme waneigini gali taba hanaiore holebira. Tínibi nde dindini luore howa hodagua halu homoleberemi.
EXO 23:27 I̱nime tí poleberemigoha pu bamba halu puwa wali agali tara tara bu karu i̱hondo gi helo mo gi holebero. Tínaga waitigi bu karu tibi tíhondo gi helo mo gihaga bialu mo luluya ho helolebero. Ani berogola tí handalu ibida piai helolebero.
EXO 23:28 Dindi tí poleberemigoha wali agali hayaga aleru bamba halu pelolebero. Anidagua pelarogola wali agali hayaga ale urunime Hibialibi Kenanalibi Hidialibi bibahende wara pelai holebero.
EXO 23:29 Anigo wali agali uruni mali mbira hanguni waratagi hai naholebero. Ani waratagi hai haruyagua nde nogo gabuabi ega tara tarabi dewa bedarume dindi ti karulai halu tí mo ko holobadago
EXO 23:30 i̱na ti hendore waratagi haga bulebero. Ani buwa tí ho dewa halu dindi emene karula dindi aba emene bo taliatagi ha bigi bialu dindi tí karulo halimulo mo ngiai holebero.
EXO 23:31 Tí halimulonaga dindi tubari iba solowara mini Iba Daramabi laga bedago angeha Agaba dindi ngagoria howa pialu iba solowara timbuni Meditereniana bedagoria tagira polebira. Ani bialu tubari uyurayaginaga iba timbuni mini Yuberedisi poragoria howa daliape halu dindi abene unurayagi dindi ko wali agali nahaga ege kelekele ngagoria tagira polebira. Dindi uruniha agali dindi aba bu karu baba wai bilimulo hongo karulapeore ngerogola tígua dindi ogoniha anda puwa wali agali uruniha karu bo taliatagi hai holeberemi.
EXO 23:32 Ani anda puwa tígua wali agali dindi ogoniha hene karu bababi tinaga bi pupu wiaga gime wabini ngaru bababi habo nalolene bi mbira buleore lalu lo wia nabilimu.
EXO 23:33 Ani bialu wali agali ogoniha hene karu tínaga dindi ogoriani helo nahelalimu. Helarimiyagua wali agali urunime tí mo hondo harago nahende henene larabe toba howa tígua i̱nihondo ko buligonaga laro. Tígua tinaga bi pupu wulenaga gime wabini ngaruhondo bi pupu wialu harimiyagua tí mo ko halu piloleberemi, lalu Anduane Homogohanda Moseseha howa bi ogoni latagi hene.
EXO 24:1 Ani biyagola Anduane Homogohanda Mosesehondo lalu, Mosese-o hari ogoni iraga halu i̱ kogoria íbu. Í̠ ibalu Aronobi Nadababi Abihubi tígua Isaraele wali agali haru haga agali pira karia (70) biarubi tí haru ma lalu ibalimu. Ani bule ai áyu ibalu howa tí o kaundia kamigoriani howa bulu paluwa i̱ mitangi bialu mo dunini howa lotu lalimu.
EXO 24:2 Maru o mini laruruni mbira i̱ kogoria hapara hole ndogo homane í̠ hanguore i̱ kogoria kaware ibabe. Ai wali agali bibahende hari ogoha mbira ge haraga halu ibulani handabe, lene.
EXO 24:3 Ani laya handala Mosesehanda wali agali hearia puwa Anduane Homogohanda bilimu lalu bi layagobi ogo nabilimu lalu mana lamiyagobi bibahende Isaraele wali agali lamiai hene. Ani lamiyago hale howa wali agali bibahendeme ladai bialu lalu, Iname Anduane Homogohanda layadadagua bibahendeore hale halu biai holeberama, lai hene.
EXO 24:4 Anduane Homogohanda bilimu lalu bi layago Mosese ibugua bibahendeore gilibu wiai hene. Ani bialu horo mendengi egerebagiore ibugua lomabu delagane dabu mbira hari biago teneha bu helene. Ani buwa ibugua to̱le̱ homberia (12) Isaraele hameigini homberia (12) hayago ta howa ibugua hongo mabu bini.
EXO 24:5 Ani buwa ibugua igiri daliahe hearume nogo bulumagaru Anduane Homogola ho gimbu bulenaga bo delo mule pudaba, lene.
EXO 24:6 Ani bialu Mosese ibugua nogo biaru darama hanuni yabu lowa halu mende ibu beha hambu ngelowa halu mendego dabu biagoha odo bade hene.
EXO 24:7 Ani buwa ibugua habo nalolene bi lowini mbuga Anduane Homogohanda bi lenego gilibu wini biago muwa bi dalimu lowa wali agali hale hai helo dagalope hene. Dagalope hai heagola hale howa wali agalime Mosesehondo lalu, Iname Anduane Homogohanda bi olayadagoni damenego bibahendeore hale halu biai holeberama, lai hene.
EXO 24:8 Ani layagola Mosesehanda nogo darama beha hambu wiyago muwa wali agali bu hearuni tandala ba hene. Tandala ba halu howa lalu, Anduane Homogohanda tí baba ibu baba i̱e̱ lalu habo nalolene bi lowinigo lo yu tiga birimigonaga mo hongo hagane darama ogoni, lene.
EXO 24:9 Ani lalu bialu Mosesebi Aronobi Nadababi Abihubi tigua Isaraele wali agali haru haga agali pira karia (70) biaru ti hari biagoha iraga halu pene.
EXO 24:10 Ani puwa tigua Isaraele wali agalinaga Ngode Datagaliwabe biago hearia de hendene. Ngode Datagaliwabe ibunaga ge habe yaraga howa nira buguni hari damindinigobi ku tagalitaya ale domodomobi wuyu pearia hendene.
EXO 24:11 Isaraelenaga agali haguane uruni ti Ngode Datagaliwabe de handayagonaga ibugua ti mbira mo ko nahene. Ti ibu de hondowa agali biaru tini mandagi biruwa tomobi ibabi mandagi nene.
EXO 24:12 Ani buwa Anduane Homogohanda Mosesehondo lalu, Hari ogoni iraga halu i̱ kogoria ibabe. Í̠ ogoria íbu kegola i̱na ege to̱le̱ mbalape kirani i̱naga mana lo wirugo Isaraele wali agalime bilonaga gilibu ngogo ogoni nguliya, lene.
EXO 24:13 Ani layagola Mosesebi ibunaga biamogo biaga Yosuabi libu harume Mosese ibu hari loma bini biagoha iraga halu pelonaga manda manda bini. Manda manda biai howa Mosese ibu hari biagoha iraga halu pialu hene.
EXO 24:14 Pialu howa Mosese ibugua Isaraele wali agali haru haga biaruhondo lalu, Iyame pialu dai bulubago tígua anda birimaru o karunigo uruniha palu halimu. Arono Huala libu tí heba o haramigonigo bi lo tabolene mbira wigi birangi ogolabo karia pugu bilimu, lene.
EXO 24:15 Ani lalu bialu Mosese ibu Hari Sainai iraga halu pialu hearia beralibame hari biago dambi ho hene.
EXO 24:16 Anduane Homogo ibuni íbu howa ibunaga wá holene de mborerebi hiriribigo hari biagoria hope hene. Wá hope hayadagoni Isaraele wali agali tigua handalu hearia hari biago neneni ira daradagua biyaria hendene. Ani bialu horo waragaru hari beraliba biagome hari biago dambi ho wiaabo hene. Ani buwa horo kanegoria Anduane Homogohanda beraliba biagoha howa Mosese olene.
EXO 24:18 Ani olayagola Mosese ibu hari biagoha iraga halu piaho wialu beraliba biagoha anda pene. Anda puwa o biagoniha horo mbi heba pira maria (40) ho haabo hene.
EXO 25:1 Anduane Homogohanda Mosesehondo lamialu lalu,
EXO 25:2 Isaraele wali agali bu karuhondo lamialu, Tígua mbirale i̱hondo loma bialu ngulene manda bu kamiru tanabi loma bialu ngilimu, labe. Tigua ngiraru ale bibahende mo ya dege bibe.
EXO 25:3 Lomabu ngiraru ngolobi silibabi boronosibi uruni lomabu ngulene nga.
EXO 25:4 Ani bialu nogo sibi irinime pu wabini mindibi hari mindini handalehebi tagalitayabi mo daramabi hene ngarubi aga baya taraore ngarubi nogo meme irinime wabini labolabo baya taraore ngarubi uruni lomabu ngulene nga.
EXO 25:5 Ani bialu nogo sibi wangabenaga dongone mo daramabi hene ngarubi wena timbuni iba tia alenaga dongone bayale ngarubi ira bayale mini agasia laga kagonaga gabini bayale ngarubi loma bulene nga.
EXO 25:6 Ani bialu lamu hale delolenaga olibe lini ibanebi mbirale i̱ninaga wiabagi hene ngelonaga padua ngabi tara tara ngaru heba biamaga hene ngarubi ira hagua ngabilo delaga inisenesi ngarubi lomabu ngulene nga.
EXO 25:7 Ani bialu ege to̱le̱ muni dewaoreme yolo miaga tara tara ngarubi loma binigo mo miaga agali haguane timbuninaga aga mini ebodi mo yáribia halu labolabo galuhombeni karulaga ngagobi mo yári bia holenaga migi bulene nga.
EXO 25:8 Ani bialu i̱ni tí heba mandagi holiya i̱naga Balai Anda mbira tínaga balai anda bu kamiru dombeneha bia halimu, lalu wali agali lamibe.
EXO 25:9 Ai i̱naga anda ogoni ogobi helo lalu andanaga magi manda i̱na í̠hondo mo walia harodagua bilimu, lene.
EXO 25:10 Anduane Homogohanda laabo halu lalu, Wali agali tígua Mbogoyi mbira ira agasia dibu pelowa mbaraleore ngagome wabilimu. Mbogoyi ogoni luninaga magi sendimida emene handari mbirani pira mbira (110) arane timbuninaga magi sendimida emene pira waragariani waragaria (66) manda bima iraga halu magi sendimida emene pira waragariani waragaria (66) helo wabilimu.
EXO 25:11 Ani bialu ngolo bayaleore irani do taulo wahene ngarume Mbogoyi ogoni tagira tamuhabi baya hangu paraho dambi halu bu gimbu bini nene pugu bidadagua ngolo baya uruni ariame mo homane howa paraho mabu bilimu.
EXO 25:12 Ani bialu Mbogoyi ogoni iraho yulenenaga gi pagida ale holene gimbuni maria ngadagua mabubi maria ngolome dege wabuwa gene maria dindiha karu ta howa wabu helalimu. Gene mende mendehabi kira labolabo helalimu.
EXO 25:13 Ani biai howa Mbogoyi iraho yulenenaga ira agasiame ira kira wabu ngelalimu. Ani ngelowa ira ogoni labobi ngolome para hadambi dege halimu.
EXO 25:14 Ogoni biai howa ira ogoni labo Mbogoyinaga gene dindiha mbirale mabubi gi pagida ale ngolome wabu helarimigoha Mbogoyi iraho yalu polenedagua abe tale buwa mo karulalimu.
EXO 25:15 Ira kira Mbogoyi iraho yulene ogoni labo golo wia nabi Mbogoyi heba kaore ani wiaabo helo helalimu.
EXO 25:16 Mani ege to̱le̱ mbalape kirani i̱naga bi mana wabu nguleberogo Mbogoyi ogoniha wilimu.
EXO 25:17 Ani bialu mbogoyi ogoninaga panga ngolo bayaleore ngagome wabuwa luninaga magi sendimida emene handari mbirani pira mbira (110) wialu arane timbuninaga sendimida emene pira waragariani waragaria (66) ngelo wabu helalimu. Ogoriani howa wali agalime mana ko biniru domo waholene wulebira.
EXO 25:18 Ani buwa tígua dahuliyali handalehe kira ngolo bayaleorerume baya hangu hamame bo dambu tiga bigi buwa wabilimu.
EXO 25:19 Ani wabuwa Mbogoyinaga daligani mendego gi tigaha mendego gi lehayagi lowa talebu helalimu. Tígua ngolome Mbogoyinaga pangabi dahuliyali handalehe ogonilabobi wabilimu. Mbirale uruni ti hangu hangu wabia ndo Mbogoyi pangabi dahuliyali handalehebi bibahende mbiraoreha wabu gimbu bini ngelo wabilimu.
EXO 25:20 Dahuliyali handalehe kira ogonilabo libuni handa edene buwa Mbogoyinaga panga daligani wali agalinaga ko domaga laga ngagoria helalimu. Libunaga babaganeme Mbogoyinaga panga yula dambi hai helo helalimu.
EXO 25:21 Ani biai kamigola ege to̱le̱ mbalape kirani i̱naga bi mana gilibuwi nguleberogo Mbogoyi biagoha ogonilabo mo ngelowa panga payalimu.
EXO 25:22 Ani bu ngeledemigola i̱ni ibalu í̠la Mbogoyi panga wali agalinaga ko domaga ngagoria lola holebero. I̱ni dahuliyali handalehe kira handa edene bu heledamigoria hanuni íbu howa i̱na í̠hondo i̱naga bi mana latagi halu holebero. Anigo bi mana uruni Isaraele wali agalime taluwa bialu helo í̠na tihondo lamulene nga, lalu Anduane Homogo ibugua Mosesehondo lamini.
EXO 25:23 Anduane Homogohanda ogodagua laya. Tebolo dagia mbira ira agasia dibu pelowa ogonime wabilimu. Tebolo dagia ogoni luninaga magi sendimida emene pira halirani halira (88) aranenaga sendimida emene pira mariani maria (44) wialu daliganaga sendimida emene pira waragariani waragaria (66) helo wabilimu.
EXO 25:24 Ani wabu ngelowa ngolo bayaleme paraho dambi halu tebolonaga gibuni nene ngadagua ngolo mo homane howa paraho dambi halimu.
EXO 25:25 Ani buwa tebolo neneni ngolome paraho mabu bulenego tohenaga magi sendimida emene halira helowa ogonime tebolo neneni ngolome para hayago lone paraho dambi halu tebolo nene bibahendeni paraho mabu bupe halimu.
EXO 25:26 Ani buwa tebolo biago iraho yulenenaga ngolome wabini mabubi maria gi pagida ale wabuwa gene maria kagoha ta howa wabu helolene nga.
EXO 25:27 Ani bialu tebolo iraho yulenenaga mabubi uruni gi pagida ale ogoni tebolo gene maria kago tiga tiga nene ngolome paraho dambi hayago andaneha dege haparaho helolene nga.
EXO 25:28 Ani buwa ira agasiame tebolo iraho yulene kira manda mandabu ngelowa ngolome paraho dambi halimu.
EXO 25:29 Ani bialu waini iba loma binigo odo delolene ndisibe mbira wabialu beledibi be marubi wabia dege bilimu. Be uruni bibahende ngolo bayale hangume wabiai halimu.
EXO 25:30 Ani bialu tígua mberedi i̱hondo lomabu ngeremigo bibahende i̱ninaga deni tebolo dagia ngagoria yu puwa ngelalimu, lalu Anduane Homogohanda lene.
EXO 25:31 Anduane Homogohanda laabo halu lalu, Tígua ngolo bayaleorerume lamu hale wiagane irane wabu helalimu. Hamame ngolo baya hangu dambu tiga bigi buwa lamu hale gene helolene tene baya hangu ngelowa irane ogoriani mo karulo helalimu. Ani buwa lamu halenaga gene kagoria ginigene helowa wabupe halimu. Ani buwa ngolome dege balawaya wabuwa lamu hale gene ogoniha wabu gimbu bigi bilimu.
EXO 25:32 Lamu halenaga irane ogoriani ginigene waragaria wabuwa abene mendeha tebira mendehabi tebira dege dege wabu helalimu.
EXO 25:33 Lamu hale gebagene biarunaga mbira mbirani balawaya ira amononaga lini ale tebira dege dege wabu helalimu.
EXO 25:34 Lamu halenaga iraneni balawaya bayale ira amononaga lini dedaligobi mitangi bialu maria wabu helalimu.
EXO 25:35 Ani biai howa lamu hale gebagene biaruni andanehayagi balawaya yuni ale mbira mbira wabuwa helaga bilimu.
EXO 25:36 Ani bu ngelowa hamame bo ndibulaga bialu mo mbiraore howa wabu gimbu biai halimu.
EXO 25:37 Ani biai howa lamu halenaga dolene karia wabuwa irane manda mandabu wirimigoria berelaga bilimu. Ani buwa lamu hale wá haragome i̱naga Balai Anda kagoha daanda helonaga baya hangu mo dabadaba howa mo tiga bu ngelalimu.
EXO 25:38 Ani buwa ira dedago tabolene pero mbira ngolo bayaleoreme wabialu beledi marubi wabilimu.
EXO 25:39 Lamu hale wabulenenaga gene biagobi bibahende wabulenenagabi ngolo genda magi kilogarama pira tebirani duria (35) mo ngelowa bulene nga.
EXO 25:40 Tígua mbirale uruni wabule howa i̱na ogobiore bilimu lalu hari nene biagoria howa walia harugoni manda buwa langirudagua bilimu, lalu Anduane Homogohanda Mosesehondo lamini.
EXO 26:1 Anduane Homogohanda laabo halu lalu, Tígua i̱naga Balai Anda bule anda dangi labolabo pu payini bayaleore mindibi hari mindini handalehe ngarumebi tagalitaya handalehe ngarumebi daramabi ngarumebi wabini ogobi dege dege labolabo pirame bulene nga. Ani bialu aga lebiaga pume dahuliyali handalehe labolaboni lebiamaga halimu.
EXO 26:2 Labolabo pira bibahendego ogobi dege dege wabu ngelalimu. Luninaga magi mida homberia (12) yangalenaga mida kira lowa wabu ngelalimu.
EXO 26:3 Ani buwa duria halu mbira lebumaga halu duria mendego halu mende lebumaga halimu.
EXO 26:4 Ani buwa labolabo ogonilabo mo gimbu bulenaga aga mindibime mabubi gi pagida ale wabuwa lene leneha mo gimbu bulenedagua helaga bilimu.
EXO 26:5 Gi pagida ale uruni labolabo ogoni kirabalinaga arane mende mendehayagi dege pira duria (50) labolaboni helaga bilimu.
EXO 26:6 Ani bu helowa ai labolabo timbuni biagolabo kirabali mo gimbu bulenaga ngolome wangobi pira duria (50) wabilimu.
EXO 26:7 Ani biai howa mani Balai Anda dangi timbuni mbira wabuwa i̱naga Balai Anda ogoni bu dangila dambi hai halimu. Anda dangi ogoni aga nogo meme irinime wabini bearia (11) bibahendeme bulene nga.
EXO 26:8 Uruni bibahende ogobi dege dege helo wabilimu. Luninaga ge magi manda bialunaga mida haleria (13) helo. Arane yangalenaga mida kirame bulene nga.
EXO 26:9 Ani buwa labolabo duria halu mbira lebu gimbu bialu labolabo waragaria halu mende lebu gimbu beramigola labolabo timbuni luni kira holebira. Ani bialu labolabo halu mende waragaria lebu gimbu bini biagonaga waraganego pau ladai buwa balai anda biagonaga harabahayagi dambi helalimu.
EXO 26:10 Ani buwa mbirale gi pagida ale pira duria (50) anda dangi mendegonaga gibuniha wabu helalu pira duria (50) anda dangi mendegonaga gibuniha wabu helalimu.
EXO 26:11 Ani biai howa boronosime mbirale yania helolene wangobi pira duria (50) wabuwa Balai Anda dangi timbuni kira biago laboha wabu helaramigoha yaniaho helaga beramigola labolabo biago lebumaga hene mbiraore mbaule wulebira.
EXO 26:12 Ani buwa anda dangi lalu kamiria luni bolangua holebirago ogoni i̱naga Balai Anda ogoninaga anda tibihayagi paulope howa luni helo wahalimu.
EXO 26:13 Ani bialu anda manda mende mendehayagibi luni bolangua ho kagome anda ibiduba helo gulatagi ho helo wahalimu. Anidagua biragome Balai Anda dangilo yi hai hene holebira.
EXO 26:14 Ani buwa Balai Anda dambi holenenaga kirabi wia dege bida. Mbirago nogo sibi wangabenaga dongone mo daramabi ho ngarume wabuwa mendego wena timbuni iba tia alenaga dongone ngagome wabulene nga.
EXO 26:15 Anda háinaga ira generu gimbu gimbu bulene ira mini agasiame bilimu.
EXO 26:16 Anda ira uruni luninaga ge magi manda bialu mida maria mbalapenaga sendimida emene pira waragariani waragaria (66) helo helalimu.
EXO 26:17 Ira anda háinaga gene uruni maru dindihayagi gimbu bilo manda bialu luniale tigi halimu. Ira bibahende luni tubagi lolani hondowa ogobi dege degeore tigi haga bilimu.
EXO 26:18 Anda háinaga ira kira kira dege dege daba hamagamaga buwa daga lamaga halu pira kira (20) mende mende lowa abene unurayaginaga wabilimu.
EXO 26:19 Ani buwa silibame mbogoyi emene dege dege pira maria (40) anda gene biaru berelaga bule wabilimu. Ai anda gene kira mbogoyi mbiraha helaga bilimu. Ani beramigome mbogoyi mo hongo holebira.
EXO 26:20 Anda gene maru anda manda uyurayagi karubi nde ani dege bulene nga. Ani bialu anda gene pira kira (20) wabu manda mandabu ngelalu anda gene berelolene mbogoyi pira maria (40) silibame wabu ngelalimu. Silibame wabini mbogoyi kira kirani anda gene berelolene nga.
EXO 26:22 Ani buwa anda gene ni paliragohayagi waragaria helalu
EXO 26:23 anda gene kira mende manda tibila gimbu biragoha helolene nga.
EXO 26:24 Anda háinaga gene manda tibila gimbu biragoha kira ogonilabo ho pagu pagubi lowa gimbu bima iraga helolene nga. Manda tibila gimbu birago bibahendeha ani dege bulene nga.
EXO 26:25 Ani biragola anda tibihayagi anda gene halira halu siliba mbogoyi pira mbirani waragaria (16) anda gene dindiha mo hongo holene wialu mbogoyi kirame anda gene mbira mo hongo holene wulebira.
EXO 26:26 Ani buwa anda hái libu banga bulenaga ira mini agasia dibalu lunioreru pelo mbaralowa wilimu.
EXO 26:27 Ira luni mbalape uruni aria duria anda hái manda abene unurayagi libu para halu duria mende uyurahayagi libu para halu duria tebone ni paliragohayagi libu para halu bulenaga ani dibu pelo manda bilimu.
EXO 26:28 Anda hái libu para holenaga ira dibu pelaramigo lunaga anda magi manda buwa anda ibuniore karulape puguwa pelalimu.
EXO 26:29 Ani buwa anda genebi anda ira karubi ngolome paraho dambi halimu. Ani buwa mandaha hái para haramigo yaniaho helonaga ngolome yania holene mabubi gi pagida ale maru wabuwa ira hái libu para kamigo yaniho helaga bilimu. Anda hái para holene ogoni ngolome paraho dambi halimu.
EXO 26:30 Urunidagua biai howa Balai Anda ogoni i̱na ogobiore bilimu lalu hari nene biagoria howa walia harugoni manda buwa langirudagua bu helalimu.
EXO 26:31 Uruni biai howa aga labolabo baya taraore mbira anda tamuha hobaki holene wabilimu. Aga timbuni ogoni pu tara tarame mo yári biahaga bialu howa nogo sibi irinime payini mo mindibi howa hari mindini handalehe ngarumebi mo tagalitaya ale hene ngarumebi mo daramabi ho ngarumebi mo yári bia halimu. Ani buwa dahuliyali handaleheru labolabo ogoriani lebialu yári bia halimu.
EXO 26:32 Ani buwa ira agasia mbira dibuwa anda gene ale maria wabuwa ngolome para hadambi halimu. Anidagua buwa silibame mbogoyi maria wabilimu. Ani wabuwa ira gene biago mbogoyi ogoriani helalimu. Ani helowa ira ogoriani aga yani helonaga wangobi mbira ngolome wabuwa ira maria ogoriani ta howa helaga bilimu.
EXO 26:33 Ani buwa labolabo biago ogoriani mo gerela halimu. Mo gerela kamigola anda biago hobaki bulebira. Ani hobaki bu kagola Habo Nalolene Bi lo winigonaga Mbogoyi biago hobane tamuhayagi mo yalu puwa ogoniha ngelalimu. Labolabo biagome anda biago mo hobaki kagola Hobane mbirago Loma Bia Hene halu Hobane mendego Loma Bia Heneore holebira.
EXO 26:34 Ani kagola Habo Nalolenenaga Bi ege to̱le̱ kirani gilibu winigonaga Mbogoyi biago tamu Hobane Loma Bia Heneore laga ngagoha mo wilimu. Ani buwa panga ngolome wabu wini biagome payalimu. Panga ogoriani ko binigo domo waholene wulebira.
EXO 26:35 Ani bialu tebolo dagia biago anda Hobane Loma Bia Heneore hayago tagirahayagi mo wilimu. Anda hái abene uyurahayagi kagoria wiapara howa ngelalimu. Anda manda abene unurahayagi lamu hale manda mandabu wini biago mo ngelalimu.
EXO 26:36 Ani biai howa labolabo timbuni mbira anda ogoninaga panga helole wabilimu. Panganaga labolabo ogoni pu tara tarame mo yári biahaga bialu nogo sibi irinime payini mo mindibi howa hari mindini handalehe ngarumebi mo tagalitaya ale hene ngarumebi mo daramabi ho ngarumebi labolabo wabini ngaruni yári bia halimu.
EXO 26:37 Ira agasia mbira dibuwa gene duria wabuwa ngolome paraho dambi halimu. Boronosime mbogoyi duria anda gene uruni helole wabu ngelalimu. Ani buwa mbogoyi duria uruniha ira gene duria biaru hanga howa labolabo gerela holene wangobi maru ira ogoriani helalu buwa labolabo biago ogoriani mo gerela halimu, lalu Anduane Homogohanda lene.
EXO 27:1 Anduane Homogohanda laabo halu lalu, Tígua ira agasia dibuwa lomabu delaga dabu mbira wabilimu. Gibuni gibuni bibahendeha ge magi manda bialu mandanaga ogobi dege dege mida kirani sendimida emene pira kira (20) helo. Daliganaga mida mbirani sendimida emene pira tebira (30) halu bilo wabilimu.
EXO 27:2 Ani buwa nogo bulumaganaga ne gayane ale maria ira agasia biagome dege wabuwa gimbuni mariani helalimu. Ani buwa mbirale bulumaganaga ne gayane ale biarubi lomabu delaga dabu ogonibi bibahende boronosime paraho dambi hai halimu.
EXO 27:3 Ani buwa ndisibe marubi ira pungaru hilo yulenaga wabilimu. Ani bialu nama tabuli ale emene marubi nama dege mende genehe mini pogobi beledibi bibahende ira punga hilo waholene ale uruni boronosime dege wabiai halimu.
EXO 27:4 Ani buwa mbirale ira delagane dagia diri dewawi dabu ogoninaga gene maria kagoria helole boronosime dege wabilimu. Ani buwa dabu ogoni iraho yulenaga mabubi mbira gi pagida ale dabu iraho yulenenaga ira helolene maria gene maria kagoha tahowa wabu helalimu.
EXO 27:5 Ani buwa ira delolene dagia biago dabunaga gene obeneni bapara howa hama pialu lina obeneni dege hairi helalimu.
EXO 27:6 Ani buwa mbirale mabubi gi pagida ale maria iraho yulenaga ira nguni pelolene biago nira dindihayagi gene maria biagoria bu gimbu buwa helalimu. Ira agasia pelowa kirago boronosime paraho dambi halimu.
EXO 27:7 Lomabu delaga dabu biago yalu pole howa ira kira ogonilabo mabubi gi pagida ale yulene dindiha manda bu helarimidagua mo karulalu yu pilimu.
EXO 27:8 Tígua lomabu delaga dabu ogoni ira pelene mbalapeme mbogoyi ale dege wabilimu. Ani buwa dindiha henge ngelo wahalimu. Abale ogodagua bilimu lalu amu hari nene wiagoria howa langirudagua bilimu, lene.
EXO 27:9 Anduane Homogohanda laabo halu lalu, Tígua labolabo bayaleoreru wabuwa i̱naga Balai Anda kagoha pabe bu yanda holenaga bilimu. Labolabo ogoni unurahayagi aranenaga ge magi manda bialunaga mida pira mariani maria (44) wabilimu.
EXO 27:10 Ani buwa gene pira kira (20) boronosime wabu wialu gene uruni helolenenaga mbogoyibi pira kira (20) dege boronosime wabu ngelalimu. Ani bialu bubigi homane luni banga bulene silibame wabuwa gene wiaru bibahende daba ho gimbu gimbu bigi bilimu. Ani buwa labolabo bubigi homane luni banga bini biaruni gerela holenaga ta howa silibame wangobi wabu helalimu.
EXO 27:11 Anda manda abene uyurahayagibi ogonidagua dege wabu helalimu.
EXO 27:12 Ai ni paliragohayaginaga pabe labolabo aranenaga ge magi manda bialunaga mida pira kirani kira (22) wabuwa gene boronosime pira wabialu mbogoyibi pira dege gene uruni helolenenaga diriwi wabu helalimu.
EXO 27:13 Ani bialu anda panga haraba abene ni tagira ibiragohayagi ngagoha helolenenaga labolabo aranenaga ge magi manda bialunaga mida pira kirani kira (22) dege wabialu helalimu.
EXO 27:14 Labolabome pabe bu yanda ho helolenego aranenaga ge magi manda bialunaga mida waragariani sendimida emene pira waragaria (60) lowa panga haraba anda pu íbu bulenegoria lene labolaboni tale bu helalimu. Boronosime mbogoyi wabu ngelayagoria gene manda manda bu wiyago mendehayagi tebira mendehabi tebira dege lowa helalimu.
EXO 27:16 Pabe buyu mabu bulenenaga labolabo bibahende baya taraoreme wabu helalimu. Labolabo ogoni ge magi manda bialunaga mida dira wabialu pu bayale nogo sibi irinime payini mindibiha guyini hari mindini handalehe ngarumebi tagalitaya aleha guyini ngarumebi daramabiha guyini ngarumebi yári bia halimu. Ani buwa boronosime mbogoyi maria diriwi wabuwa gene mariabi wabia dege buwa diri ogoniha mo karula ho helowa labolabo ogoni ira gene ogoriani mo gerelape halimu.
EXO 27:17 Gene helama pedamigo bibahende daligahayagi bubigi homane luni banga bulene silibame wabuwa bu gimbu gimbu bigi bu helalimu. Gene uruni ta howa silibame wangobi wabu helaga bilimu. Gene uruninaga helolene mbogoyi boronosi degeme wabu helaga bilimu.
EXO 27:18 Pabe ogoni luninaga ge magi manda bialunaga mida pira mariani maria (44) aranenaga ge magi manda bialunaga pira kirani kira (22) daliganaga ge magi manda bialunaga mida kirani sendimida emene pira kira (20) helo bilimu. Labolabo ogoriani gerela holene pu bayaore ngarume wabilimu.
EXO 27:19 Balai Anda ogoni bulenego bibahende boronosime hangu biai halimu. Ani bialu tígua Balai Anda dangini paulape kagoha mo hongo halu dariba holenaga dindiha gelo helama polene karubi bibahende boronosi hangume wabiai halimu. Labolabome pabe bidago mo hongo halu daba holenebi nde boronosime dege wabilimu, lalu Anduane Homogohanda lene.
EXO 27:20 Anduane Homogohanda Mosesehondo lamialu lalu, Í̠na Isaraele wali agali lamialu Anduane Homogonaga Balai Anda kagoha lamu hale karia wiagane irane mbiraoreni daho wiaabo helonaga weli bayaleore olibe linime wabiniru yalu ibalimu labe.
EXO 27:21 Arono halu ibu igini karu tigua lamu hale uruni mo yalu puwa i̱naga Balai Anda biago labolabome hobaki hene biagonaga tamu hobane Habo Nalolene Bi lo winigonaga Mbogoyi wiyagoha ndo hobane mende tagirani hayagonaga ngelelo. Horo pigane eberamiangi weli yalu ibuwa lamu haleha berelalu lamu hale hungubia howa tamuha ngelalu horo bibahendeni ne laragola howa gao lelo ani daho wiaabo helo ngelalimu. Horo bibahendengi weli berelaabo halu lamu hale biaru ogonidagua daho wiaabo heloleberemi. Ani bialu howa tínaga waneigini aguanene mani holobadarumebi mana ogonidagua bialu haabo holene nga.
EXO 28:1 Anduane Homogohanda laabo halu lalu, Mosese-o í̠ andaga dai bialu í̠ hamene Arono halu ibu igini Nadababi Abihubi Eleasabi Idamabi bibahende ibai hadaba labe. Ani íbu hai kagola Isaraele wali agali bu karu aria lenego ai ti i̱naga loma binigo mo miaga agaliru helo dabo helabe.
EXO 28:2 Ani helowa wali agali tigua ibunaga aga bayale tara mo yári bia howa Arono milimu. Ani meremigola ibu mo karulo ho helo. Ani howa ibu maru karu aria ndo ibu dabo helene howa mini lene mbira holebira.
EXO 28:3 Agali maru tigua aga bayale tara tara wabigi bilonaga manda tara tara i̱na talebu migi biruruni ti ibilo olabe. Íbu ngoaiho kagola Arono ibu loma binigo mo miaga howa i̱naga biabe bulene ngaru bialu howa mo karulo helo aga loma binigo mo miaga agalime biaga lene ngelo maru wabilimu.
EXO 28:4 Ani buwa labolabo emene mbira yári tara tarabi galuhombeni mo karulelo wabia halimu. Ani buwa labolabo mbira mo yáribia howa mini ebodi wabialu mbira luni biagimbu bilo wabialu mbira giha bulene yári biahe wabialu mbira emboneni bobu mabu bilo wabialu mbirago mandibu wilo wabilimu labe. Loma binigo mo miaga agalinaga aga uruni Aronobi ibu igini karubi tigua mo karula howa i̱naga biabe bia halu helo ani bilimu labe.
EXO 28:5 Aga wabiaga agali tigua aga uruni wabulenaga pu nogo sibi irinime payini ngaru mialu maru mindibiha guyini hari mindini handalehe ngarumebi maru tagalitaya aleha guyini ngarumebi maru daramabiha guyini ngarumebi maru pu ngolo handaleheme payini ngarumebi labolabo bayale tara tara ngarumebi loma binigo mo miaga agalinaga aga labolabo uruni wabilimu.
EXO 28:6 Ani bialu aga mini ebodi pu sibi irinime payini ngago mialu maru mindibiha guyini hari mindini handalehe ngarumebi maru tagalitaya aleha guyini ngarumebi maru daramabiha guyini ngarumebi pu maru tarame payini ngolo handalehe ngarumebi loma binigo mo miaga agalinaga labolabo ogoni mo yáribia haga bulene nga.
EXO 28:7 Ani buwa aga payani erembiraha buhabi paulape kago yania helonaga pu nogo sibi irinime payini ngagome nu ene ale mabu bo bidagoria lebumaga halimu.
EXO 28:8 Ani bialu pu nogo sibi irinime payini ngago mialu maru mindibiha guyini hari mindini handalehe ngarumebi pu maru tagalitaya aleha guyini ngarumebi pu maru daramabiha guyini ngarumebi aga mini ebodi ngagoria mo yáribia howa labolabo karulayagoria dege lebu para halimu.
EXO 28:9 Ani buwa ege to̱le̱ kira mini kaneliana ngagoria Isaraele hameigini homberia (12) karunaga mini gilibu wilimu.
EXO 28:10 Mini gili bule howa Yagaba igini waheneni howa mini gilibu wima pialu heyogone henegonaga mini gilibu maro bilimu. Ege to̱le̱ni mini gili bialu howa ai ege to̱le̱ mbirani mini waragaria gili bialu ege to̱le̱ mendeni mini waragaria mende gili bigi bilimu.
EXO 28:11 Í̠na agali mbira ege to̱le̱ni mini gili biaga mandabi kagome Yagaba igini homberia (12) biarunaga mini ege to̱le̱ kira ogoni laboni gilibu wiai helo biabe ogoni agali mbira kagohondo mo mibe. Ege to̱le̱ kira ogoni yania helonaga ngolome paraho dambi haga bialu mo yáribia halimu.
EXO 28:12 Anidagua biai howa ege to̱le̱ni mini gilibuwi biago pume hende howa aga mbira mini ebodi nu ene ale payani mo paulaki howa lebumaga halu erembirahabi ani dege bini biagonaga tombehayagi ege to̱le̱ Isaraele hameiginirunaga manane biago pongobia halimu. Ani buwa Aronohanda Isaraele hameiginirunaga mini ibunaga payani pongo biaho kagola hondowa Anduane Homogo i̱na i̱naga Isaraele wali agali mitangi bu haabo holebero.
EXO 28:13 Tigua ngolome mo yáribia hene kirabi
EXO 28:14 seni pu ngolo bayaleme wabini kirabi mo lu howa pu payaradagua buwa ngolome yári biahe biagoria pongobia halimu, lalu Anduane Homogohanda Mosesehondo lamini.
EXO 28:15 Anduane Homogohanda laabo halu lalu, Loma binigo mo miaga agali haguane timbuni kago ibugua aga mbira galuhombeni karula dambi helonaga wabulene nga. Aga ogoni Ngode Datagaliwabenaga hame ngago hondolenaga karulagane. Aga mini ebodi emene mbira ala wabirimigo mendebi ogonibi dege wabulene nga.
EXO 28:16 Aga ogoni luninaga magi sendimida emene pira mariani maria (44) wabialu yangalenaga magi sendimida emene pira kirani kira (22) wabilimu. Ani wabuwa hau hanuniore mo paulaki beregola nguni ogobi labolabo helo ani bilimu.
EXO 28:17 Ani buwa ege to̱le̱ muni dewaoreme yolo miaga ngaru ariame duguni maria helalimu. Duguni mbirago ibu ege to̱le̱ mini lubibi tobasabi ganedebi uruni helalimu.
EXO 28:18 Duguni mendegoria ege to̱le̱ mini emeralabi sabaiabi daimonobi uruni helalimu.
EXO 28:19 Ani bialu duguni tebonego ege to̱le̱ mini tegoisibi agedebi amedisibi helalimu.
EXO 28:20 Ani bialu duguni manenaga ege to̱le̱ mini berilibi kanelianabi yasababi helaga bilimu. Ege to̱le̱ uruni ngolome mo yáribia haga buwa mani pongobilo pu helo ngelalimu.
EXO 28:21 Ege to̱le̱ homberia (12) uruni mbira mbirani Isaraele hameigini mbira mbira karu mitangi bialu Yagaba igini homberia (12) biarunaga mini gili biai halimu.
EXO 28:22 Ani buwa ngolo bayaleme seni pu kira wabuwa ogonime labolabo galuhombeni karulolenenaga hende howa pongo bia hole wabilimu.
EXO 28:23 Labolabo galuhombeni karulagane biagola mo barobia holenenaga ngolome mabubi kira wabuwa ogoriani helalimu.
EXO 28:24 Ani buwa seni pu ngolome wabini biagolabo mabubi kira ngolome wabini ngagoria mo pongo bia halimu.
EXO 28:25 Ani buwa seni pu kira biagolabo nguni mende ege to̱le̱ kira Isaraele hameigini mini gilibuwi biagolabo aga mini ebodinaga nu ene ale payani lebu winigoria pongo bia halimu.
EXO 28:26 Anigo ngolome mabubi gi pagida ale kira lone wabuwa labolabo galuhombeni karulaga biagonaga dindihayagi nguni kira kagoria pongo bia halimu.
EXO 28:27 Ngolome mabubi gi pagida ale kirabi lone wabuwa aga mini ebodinaga nu ene ale dindiha lebumaga halimu.
EXO 28:28 Ani buwa pu mindibiha guyini hari mindini handaleheme mabubi kira biagolabo galuhombeni karulaga biago hayagoriani pongobia howa aga mini ebodi biagonaga mabubi hayagoria pongo bumaga halimu. Anidagua beremigome labolabo galuhombeni karulagane ogoni hado ibira habe nahe mandibu hongohe ndibule bidagola barobia hene hadabe nahe hongohe holebira.
EXO 28:29 Ani bialu Arono ibu Balai Anda biagonaga Hobane Loma Bia Hene biagoha anda pole howa aga galuhombeni karulaganego Isaraele hameigini homberia (12) biarunaga mini gilibuwi biago karulalu anda polene wulebira. Anidagua bu kagola de hondowa Anduane Homogo i̱nime i̱naga Isaraele wali agaliru mitangi biaabo holebero.
EXO 28:30 Ani bialu Arono ibu Anduane Homogo i̱naga anda Hobane Loma Bia Hene biagoha i̱ni kogoria anda ibule howa ege to̱le̱ kira mini Urimu Tumimula aga galuhombeni karulagane biago ibuninaga mani paulaki bini biagoha yalu anda polene wulebira. Ani bulene ngago irane Anduane Homogo i̱na tigua bialu helo hamelo kogo lamulenaga ani bulebira, lalu Anduane Homogohanda Mosesehondo lamini.
EXO 28:31 Anduane Homogohanda laabo halu lalu, Aga luni biagimbubi aga mini ebodi dindiha karulaga biago ogoninaga wabulene pu nogo sibi irinime payini ngago mindibiha guyini hari mindini handalehe hene ngagome wabilimu.
EXO 28:32 Wabuwa loma binigo mo miaga agali kago ibunaga haguane anda pelolenedagua manda buwa hanuni wabu ngelalimu. Ani wabu ngelowa aga lerela timbu holigonaga aga podene mbirame ngunidago paula dai buwa aga lebiagadagua lebulene nga.
EXO 28:33 Ani buwa aga ogoni nguni dindihayagi pu nogo sibi irinime payini mindibiha guyini hari mindini handalehe ngarumebi tagalitaya aleha guyini ngarumebi daramabiha guyini ngarumebi mo yári bia halu ira pomegaranade lini aleru wabu helaga bilimu. Ani buwa ira pomegaranade lini ale yári bu ngagoria dombeni mbelo emene emeneru ngolome wabuwa nguni ogoriani dege pongo bia haga bima pilimu.
EXO 28:35 Anidagua buwa Arono ibugua loma binigo mo miaga biabe bialu howa aga ogoni mo karulo howa bulene nga. Anda Hobane Loma Bia Hene biagoha i̱ni kogoria anda tamuha íbu howa tagira pugu biragola wali agali bu karume mbelo aga biagoria pongo bia hayaru ngi̱li̱nge̱le̱ laga laga birago hale holebira. Arono ibugua anidagua biyagua nde ibuni homolene nawulebira.
EXO 28:36 Ani buwa ngolo bayale mbirame mani magagua wulenedagua mo mbalapuwa bi mbira Anduane Homogonaga Loma Biaho Nga lalu gilibuwi wabilimu.
EXO 28:37 Ani wabuwa mendebi pu mindibiha guyini hari mindini handalehe ngarume pongobia howa loma binigo mo miaga agali haguane biagonaga wanakuini dombo heda wiradagua wia halimu.
EXO 28:38 Horo bibahendengi Arono ibugua aga manda ogoriani dombo heda ale wanakuini karulo haabo holebira. Ani biragola Anduane Homogo i̱na Isaraele wali agalime i̱nihondo lomabu ngiraru yamulebero. Anigo tígua mbira bulene ngaru bia ko harimiyagua nde ogoninaga genda Arono ibugua yu howa ibunaga wanakuini karulo kago hondowa tígua i̱hondo ngirimiru i̱na yamule dege kogoni.
EXO 28:39 Ani buwa Arononaga aga mbira giha bulene pu bayale mbirame wabilimu. Ani bialu Arononaga aga manda mbira labolabo bayaleoreme wabilimu. Ani buwa ogoni bobu dambi holenenaga aga yáribi bayale degeme wabuwa mandibu wiradagua karula habe.
EXO 28:40 Ani buwa Arono igini bu karunaga aga giha karulolenebi mandibu biradagua aga luni bo bia dambi holenebi haguaneni karulaga tangi labolabome wabinibi uruni bibahende Arono igini karunaga wabiai halimu. Ani beramigola nde tigua aga uruni karulo kagola wali agali maru bu karunaga deni howa ti agali loma bia heneore mbira henedane hondowa wali agalime ti mini leneore holebira.
EXO 28:41 Anidagua buwa Mosese í̠na í̠ hamene Aronobi ibu iginirubi agali uruninaga agabi yárirubi bibahende mo karula howa ti loma binigo mo miaga agaliore howa i̱naga biabe bialu helonaga loma bialu weli bayale olibe linime wabini ngago tinaga haguaneni odo wiahalu bibe.
EXO 28:42 Tigua biabe bulene ngaru bialu karia wali agali we̱ loligo tinaga darasibi wabu milimu.
EXO 28:43 Arono halu ibu igini ti i̱naga Balai Anda i̱ni kogoha ibiragolabi Hobane Loma Bia Hene ngagoha loma binigo mo miaga biabe bule lomabu delaga dabu ngagoria pialu howabi darasi ogoni bialu polene nga. Anidagua nabiyagua tini ko ogoni biragonaga homolene wulebira. Arono ibunaga igini aguanene maniore hama polobadarumebi mana ogoni dege talialu haabo holebira, lene.
EXO 29:1 Anduane Homogohanda laabo halu lalu, Arono halu ibu igini bu karu ti i̱naga loma binigo mo miaga agali helo dabo helabelonaga mana maru bibelogo languliya. Nogo bulumaga wangabe mbirabi sibi wangabe kirabi uruni dere durubi mbira nabiore kago hondowa haru ibabe.
EXO 29:2 Ani buwa balawa widi dambini bayaleore ngagobi mo yalu ibabe. Balawa uruni yidi nahe howa mberedi maru olibe lininaga weli odo biamaga howa wabialu mberedi maru olibe lininaga weli naberele howa wabibe. Balawa marume mbisigediru wabialu olibe lininaga welime ha̱i̱ habe.
EXO 29:3 Ani buwa nogo bulumaga wangabe mbira sibi wangabe kira lowa haru halu i̱hondo loma bialu bo delalu howa mberedi mbisigedibi wabiriru mbasigedi nu mbiraha honowa i̱nihondo lomabu ngibe.
EXO 29:4 Arono halu ibu igini biaru i̱ kogoha i̱naga Balai Anda haneni haru halu ibuwa ilili bialu wayawaya bia halimu.
EXO 29:5 Ani biai howa loma binigo mo miaganaga aga biaru Arononi mo karula habe. Aga giha biagabi aga luni biagimbu biagabi aga mini ebodi biagobi labolabo emene galuhombeni karulaga biagobi mandibu biagobi bibahende mo karula hai habe.
EXO 29:6 Ani buwa labolabo emboneni bobu mabu bilo karulaga biago karulalu ogoriani mbirale ngolome wabinigo ogo Anduane Homogonaga Loma Biaho Nga lalu gilibuwi biago wanakuini heda wiradagua bilo mialu bibe.
EXO 29:7 Ani buwa dabene helonaga weli emboneni odo wiaga ngagome ibu loma binigo mo miaga helo ibunaga emboneni weli odo wia halu dabo helabe.
EXO 29:8 Arono ibuni loma binigo mo miaga helo dabo helowa ibu igini biaru aga giha biaga biaru mo karula halu
EXO 29:9 labolabo bo bia dambi holene mandibu wiyago ale mo karula halu tinaga emboneni tangi labolabome wabinigo karulaga wiyago mo karula halu bibe. Arono ibunibi ibu iginirubi ti bibahende loma binigo mo miaga agali helonaga dabalu ani bibe. Anidagua beregome tinibi ti igini aguane mani hama polobadarubi bibahendeore loma binigo mo miaga howa i̱naga biabe ogoni bialu haabo holebira.
EXO 29:10 Ani buwa nogo bulumaga mbira i̱ kogoha Balai Anda biagonaga haneni haru íbu helabe. Ani helowa í̠na Arono halu ibu igini biaruhondo lalu, Tígua nogo bulumaga ogoninaga haguaneni gi wilimu, labe.
EXO 29:11 Ani bidagola nogo ogoni i̱ninaga deni howa Balai Anda haraba ngagoria bope habe.
EXO 29:12 Ani buwa nogo bulumaga ogoninaga darama maru hambu yuwa lomabu delaga dabu ngagonaga gibuni maria ngagoria nogo bulumaganaga ne gayane ale maria karu í̠ninaga gi hondoneme ha̱i̱ habe. Ani bialu darama maru ibira ho ngago mo yalu puwa dabu ogoninaga dindiha odo paya biai habe.
EXO 29:13 Ani biai howa nogo abenebi habane damenebi kabaneha hene bu karubi gubalini bunibi luhabene lilini kirabi maru podaga buwa i̱hondo loma bialu lomabu delaga dabu biagoriani delabe.
EXO 29:14 Ani bialu mbirinibi dongonebi tini damenebi bibahende yu tagira puwa tínaga balai anda karu tagirahayagi delabe. Anidagua bulenego irane loma binigo mo miaga agali biarume ko biyagonaga domo wahelo loma ogonigo tagirani delabe.
EXO 29:15 Ani bialu nogo sibi wangabe mbirago haru anda ibabe. Ani haru ibuwa í̠na Arono halu ibu iginiruhondo lalu, Tígua nogo sibi ogoni haguaneni gi wiai hadaba, labe.
EXO 29:16 Ani biragola sibi biago balu darama hambu yalu puwa lomabu delaga dabu biagonaga gibuni maria ngagoha ta̱la̱ ba amu nana bibe.
EXO 29:17 Ani buwa nogo sibi ogoni podo baga buwa gebi tinirubi wayawaya bialu sibi haguanebi mbirini podene maru ngarubi heba mo paga howa ngelabe.
EXO 29:18 Ani bialu lomabu delaga dabu ngagoria irani lomabu delai habe. Ani beregola i̱ Anduane Homogo kogo i̱na loma ogoni irani dai heledegonaga ngabirago hondowa turu timbuni holebero.
EXO 29:19 Ani buwa nogo sibi wangabe mende mbirale lomabu mulenaga biagobi haru anda ibuwa í̠na Arono halu ibu igini biaruhondo lalu, Tígua nogo sibi ogoninaga haguaneni gi wiai hadaba, labe.
EXO 29:20 Ani bialu nogo bowa darama emene hambu yuwa Arononaga hale tigahayagi teneha darama ogonime ha̱i̱ habe. Ani bialu ibu igini bu karunagabi hale teneha ani dege biai habe. Ani buwa tinaga gi hondone angibiyane ge hondone angibiyanebi tigahayagi ha̱i̱ habe. Ani bialu darama maru ngagome lomabu delaga dabu ngagonaga gibuni maria ngagoha ta̱la̱ ba amu nana bibe.
EXO 29:21 Mani darama maru lomabu delaga dabuni bedago mialu loma binigo mo miaga agali dabo helole haguaneni odo wiaga weli biagobi mialu Aronobi ibunaga aga biarubi Arono igini biarubi tinaga agabi bibahende darama ogonime tandala ba habe. Anidagua beregome Arono ibunibi ibu igini karubi tinaga aga bidarubi bibahende i̱ninaga loma bia hene dege wiai holebira.
EXO 29:22 Ani bialu loma binigo mo miaga agali helonaga nogo sibi loma bini biago podabaga bialu habane abene damene kagobi erene tohe kagobi buni dara buwa darakibi luhabane lilini kirabi ge tigahayagi mbirini tohe kagobi podo wiai halimu.
EXO 29:23 Ani bialu mbasigedi nuha mberedi tara tara i̱hondo lomabu ngini wabu hanarigo aria mbira mbira yamigi bialu olibe lininaga weli heba biamaga howa wabini biago mbirabi mberedi mende olibe lininaga weli bere nale howa wabini biago mbirabi mbisigedi biaru aria mbirabi mo yabe.
EXO 29:24 Ani buwa nogo sibi ogonibi mberedi biarubi Arono halu ibu igini biaru mo mibe. Tigua mo yuwa i̱ deni howa gi dogolalu wigiwaga lalu yu helo mibe.
EXO 29:25 Ani buwa mberedi uruni tigua yu hayaruni bibahende yamialu lomabu delaga dabu ngagoria irame dai helo delabe. Ani biragola i̱ Anduane Homogo i̱na loma ogoni irani dai heledegonaga nga birago hondowa i̱na turu timbuni holebero.
EXO 29:26 Ani bialu nogo sibi mende mani bene biagonaga galukuni yuwa i̱ deni howa gi dogolalu i̱hondo yu wigiwaga lowa ogoni í̠nagago í̠ nabe.
EXO 29:27 Agali mbira loma binigo mo miaga helo gahenge dabo helole howa nogo sibinaga galukunibi ge tigahayaginaga modawane mbirinibi lomabu yuwa i̱ deni howa wigiwaga lalu loma binigo mo miaga agali dabo helolebere. Ani biai howa nogo sibi mbirini odagoni loma binigo mo miaga agali karu ti nelo mo milimu.
EXO 29:28 I̱naga Isaraele wali agali tigua Anduane Homogo i̱la ho gimbu bulenaga tomo nolenengi nogo mbirale bo lomabu mialu howa nogo ogoninaga galukunibi ge tigahayaginaga modawane mbirinibi loma binigo mo miaga agali karu miaabo holene nga. Isaraeleali tigua Anduane Homogo i̱ni kogohondo loma urunidagua bu ngiaabo holebira.
EXO 29:29 Mani Arono homaragola ibunaga loma binigo mo miaga agalinaga aga damene bibahende ibu igini karuhondo mulebira. Arono igini mbirali ibu loma binigo mo miaga helo dabo helarangi ibugua aga uruni mo karulo holebira.
EXO 29:30 Arono igini mbirame loma binigo mo miaga agali haguane ha aribia howa i̱ kogoha i̱naga Balai Anda Hobane Loma Bia Hene biagoha biabe bule ibalu howa ibugua aga uruni horo karu karulo haabo holene nga.
EXO 29:31 Aronobi ibu igini biarubi ti loma binigo mo miaga helo dabo helarengi nogo sibi wangabe baregonaga mbirini ngaru Balai Anda pabe bu ya anda hene tamu ngagoria todobene behe dawabe.
EXO 29:32 Ani buwa loma binigo mo miaga agali tigua mberedi mbasegedi nuha henene maru ibira hayagobi nogo sibi mbirini urunibi i̱ kogoha i̱naga Balai Anda haneni howa nolene nga.
EXO 29:33 Ti loma binigo mo miaga agali helonaga dabalu nogo sibi biago bowa tinaga ko domo waholenaga loma bo delene biagonaga mbirini ngarubi heba nolebira. Ani buwa loma bini uruni wali agali bibahendeme nolene nawigo loma binigo mo miaga agali karu ti degeme nolene nga.
EXO 29:34 Ani buwa nogo sibibi mberedibi uruni ti karulape nalu maru ibira hayagua horo mendeni nole nangelalimu. Nogo sibibi mberedi uruni loma binigo horo ogoningi dege nolene nga. Wia dege biyagua nde wahalu irani dai helo delolene nga.
EXO 29:35 Í̠na Aronobi ibu iginirubi loma binigo mo miaga helo dabo helalu howa abale bibe lalu langirudagua bialu horo karu bialu habe.
EXO 29:36 Horo karu bibahendengi nogo bulumaga mbira tígua ko birimigo domo wahelonaga loma bialu bo ngilimu. Ani bialu loma ogonime dege i̱ninaga lomabu delaga dabu kagobi ko mbira para nahe bayale dege wulebira. Ani buwa lomabu delaga dabu biago i̱naga loma biahene wilo olibe lininaga weli odo ba habe.
EXO 29:37 Horo karu anidagua biaabo habe. Ani biai kegola lomabu delaga dabu ogoni i̱ninaga loma biaho wubagi heneore wiaabo holebira. Agali mbirame lomabu delaga dabu ogoni ela hayaguabi maru ale ngarume karumebi ela hayaguabi ela harago ibuni loma bini aria bu hinalu wubagi hene dege bu hinulebira, lalu Anduane Homogohanda Mosesehondo lamini.
EXO 29:38 Anduane Homogohanda laabo halu lalu, Horo bibahendengi nogo sibi igini mali mbira pene kago kira bo loma buwa lomabu delaga dabu kagoria delaga biaabo halimu.
EXO 29:39 Nogo sibi igini ogonilabo mendego egerebagi bo lomabu delalu mendego alendo bo lomabu delalimu.
EXO 29:40 Nogo sibi igini mbira egerebaginaga ogoni heba balawa widime wabini genda magi kilogarama mbirabi olibe lininaga weli mbodoli be mbirabi odo biamaga howa bo lomabu delalimu. Ani bialu howa waini iba mbodoli be kira alebi loma bialu odo wilimu.
EXO 29:41 Ani bialu nogo sibi igini mendego alendo bo lomabu delalimu. Balawa widime wabinibi olibe lininaga welibi waini ibabi loma bialu egerebaginaga lomabu delaridagua dege delabe. Tígua tomo uruni loma bialu Anduane Homogo i̱nihondo lomabu delaga dabu ngagoria deledemigola ngabirago hondowa i̱na turu timbuni haruli.
EXO 29:42 Nogo sibi igini irani dai helo lomabu delolene ogoni horo bibahendengi delaho wiaabo halu i̱naga Balai Anda haneni i̱ deni howa delaabo holene nga. Ani bule lowa hama ogoriani mo ngoai ho kamigola i̱nime i̱naga wali agali bu kamiruni tí heba mandagi howa tíhondo bi langigi bulebero.
EXO 29:43 Ogoningi i̱na Isaraele wali agali heba mandagi howa i̱naga wá taraore holeneme i̱naga Balai Anda ogoniha daluwa kogola tamu ogoniha i̱ninagaore wubagi helolebira.
EXO 29:44 I̱naga Balai Anda ogoni kagobi lomabu delaga dabu ngagobi kirabali i̱ninagaore lomabia howa wubagi heneore ngelolebero. Ani ngelowa Arono halu ibu igini karubi tigua i̱naga biabe bia halu loma binigo mo miaga helo dabo helolebero.
EXO 29:45 Ani bialu i̱na Isaraele wali agali heba mandagi howa tínaga Ngode Datagaliwabeore holebero.
EXO 29:46 Ani kogola tígua i̱niore Anduane Homogo tínaga Ngode Datagaliwabe kogome tí heba mandagi haabo holenaga i̱na tí Iyibi dindiha howa haru tagira pialu ogoria haru ibirudane hondoleberami. I̱ni Anduane Homogo tínaga Ngode Datagaliwabeore kogoni, lalu Anduane Homogohanda lene.
EXO 30:1 Anduane Homogohanda laabo halu lalu, Ira agasia mbira dibu pelowa ira hagua ngabiaga mini inisenesi lomabu delolene dabu mbira bilimu.
EXO 30:2 Dabu ogoni luninaga magi sendimida emene pira mariani duria (45) wialu aranenaga sendimida emene pira mariani duria (45) dege wialu daliganaga magi sendimida emene pira dira (90) helo bu helalimu. Gibuni maria ngagoria nogo bulumaganaga ne gayane ale maria ta howa wabu helalimu.
EXO 30:3 Ani buwa gibuni maria bibahende ngolome para halu ngolome dege mo homabia howa dabunaga nene nene ngagoria ndibulo mabu bialu nogo bulumaganaga ne gayane handalehe maria kagobi ngolome dege paraho dambi halimu.
EXO 30:4 Ani buwa ngolome dege mabubi kira wabuwa abene kirabaliha tale buwa iraho yalu polene gibu kira manda mandabu helalimu. Mbirale mabubi ogoni ngolo homane paraho mabu birimigo andaneha kaware dege wabu para halimu.
EXO 30:5 Ani buwa ira agasia kira dabu ogoni iraho yule mo manda manda buwa ngolome paraho dambi howa ngelalimu.
EXO 30:6 Ani bialu ogoni mo yalu i̱naga Balai Anda tamuha puwa lomabu delolene dabu ogoni labolabo gerela kagome tu ngago tamuha i̱naga Habo Nalolene Bi lo winigonaga Mbogoyi biago ngagonaga tagirahayagi ngelalimu. Ani bialu ko binigo domaga mbogoyinaga daliga ngagoria i̱ni ibalu tí heba holeberema.
EXO 30:7 Horo bibahendengi egerebagi Arono ibugua lamu hale mo tiga bule ibalu ira hagua nga bilonaga mini inisenesiru lomabu delaga ngagoria delaga bulebira.
EXO 30:8 Alendobi Arono ibugua lamu hale ngago mo tiga bule ibalu howa nde ira hagua nga bilonaga inisenesiru lomabu delaga ngagoria delaga bulebira. Tígua inisenesiru Anduane Homogo i̱nihondo lomabu delalu manibi ani delaabo halimu.
EXO 30:9 Dabu ogoriani inisenesi ngabi maru ale tara tara lomabu nadelalimu. Ani bialu nogo bo lomabu delolenebi widi lomabu delolenebi waini iba lomabu odo delolenebi uruni bibahende damenego dabu ogoriani nadeloleore larogoni.
EXO 30:10 Mali bibahendenaga horo mbiru mbirungi Arono ibugua i̱naga deni dabu ogoni ko nahe ngelonaga mo gini bulene nga. Ani bialu howa ibugua ko binigo domolenenaga nogo bo lomabu delaramigonaga darama hambu yalu puwa dabu ngagonaga bulumaga ne gayane handalehe maria ngago ha̱i̱ haga bulebira. Mali bibahendengi ogonidagua biaabo halimu. Ani bialu dabu ogoni loma bia howa wiabagi heneore Anduane Homogo i̱ninagaore wiaabo holebira, lalu Anduane Homogohanda Mosesehondo lene.
EXO 30:11 Mani Anduane Homogohanda Mosese lamialu lalu,
EXO 30:12 Isaraele wali agalinaga mini bibahende gili bialu daga laramingi ti dagalalu katambu homolenenaga warago ko mbira tiha anda naibilo ti bayale holenaga agali bibahende hangu hangume i̱nihondo dagisi muni ngulene nga.
EXO 30:13 Agali mini gilibu ngaru bibahendeme muni dagisi kina duria ale dege dege i̱nihondo lomabu ngulene nga.
EXO 30:14 Agali mali pira kira (20) bolangua hene karu bibahende mini gilibu wulene nga. Ani bialu agali uruni bibahendeme i̱nihondo muni dagisi ogoni ngulene nga.
EXO 30:15 Muniwi karu tigua dewa mia tago halu mulene nawi. Ani bialu yagibano karu tiguabi nde emene wulene nawi dege. Tigua kina duria ale dege dege tini holenenaga yolo muni biadai bulene nga.
EXO 30:16 Muni ogonime i̱naga Balai Anda kagoha biabe bulene ngaru handayaho helonaga ngulene nga. Ani ngiragola muni uruni handalu i̱na tinaga holene handayaho holebero, lene.
EXO 30:17 Anduane Homogohanda Mosesehondo lamialu lalu,
EXO 30:18 Boronosime ndisi be mbira wabialu ndisi be ogoni wulene dagia boronosime dege wabilimu. Ani buwa lomabu delaga dabu ngagola Balai Anda kagola hengene ngagoriani mo ngelowa ndisi be ogoniha iba hambu berelalimu.
EXO 30:19 Ani bu ngagola Arono halu ibu igini karu tinaga gi geru waya bilonaga ani ngelalimu.
EXO 30:20 Tigua i̱naga Balai Anda kogoha anda poleyaguabi lomabu delaga dabu kagoria mbirale lomabu delole poleyaguabi i̱na ti bo wa naholiyanaga tinaga gi geru waya ala bialu polene nga.
EXO 30:21 Heneneore larogo tigua tininaga gi geru waya bialu piyagua nde ti homa nabulebira. Mana ogoni tinimebi tinaga aguaneneru mani hama polebirarumebi talialu bialu haabo holene nga, lene.
EXO 30:22 Anduane Homogohanda Mosesehondo laabo halu lalu,
EXO 30:23 Mbirale tara tara bayaleore ngabiaga ngago damene bibahende miai habe. Pigane muwenaga ibane genda magi kilogarama waragaria ngago mibe. Ani bialu mbirale ngabiaga ale dege mini sinamono genda magi kilogarama tebira ngago mibe. Ani mialu gambe hale handalehe nga bayale taraore biaga ngago genda magi kilogarama tebira dege ngago mibe.
EXO 30:24 Ani bialu padua maru ira kasia dongoneme wabini ngabi kilogarama waragaria ngago mibe. Uruni mo mogo bu ngelowa olibe lininaga weli bedago aria mbodoli be maria odo mogo bibe.
EXO 30:25 Ani bialu mo beregeda beregeda buwa mo bimaga hai halu mbirale mbira dongoneni wai haga mini sanda ngago ale wabibe. Anidagua bialu weli baya tara ogonime mbirale uruni i̱ninaga wiabagi hene wilo dabalu odo ba haga bulene ngelabe.
EXO 30:26 Ani buwa weli nga biagane ogonime i̱naga Balai Anda kagoha emene odo ba hama ibaga bialu Habo Nalolene Bi lo wini ngagonaga Mbogoyi ngagobi odo ba halu
EXO 30:27 dagia tebolo biago heba mbirale uruniha wiaga ngarubi lamu hale irane ngagobi odo ba habe. Ani bialu ira hagua ngabilo delaga mini inisenesi lomabu delaga dabu kagobi odo ba halu bibe.
EXO 30:28 Ani bialu mbirale irame dai helo lomabu delaga dabu kagobi dabu ogoriani biabe biaga dabudabu ngarubi gi geru waya biaga ndisi bebi ndisi be ogoni wiagane dagia ngagobi bibahendeore weli ogonime odo ba hai habe.
EXO 30:29 Mbirale mbirale uruni bibahende i̱ninaga wiabagi heneore wialu wali agali mbiralime ela holene nawiore. Ela hayaguabi maru ale ngaru aria mbirame ela hayaguabi mbirale bibahende uruni wiabagi hene ngaru aria dege holebira.
EXO 30:30 Ani biai howa mani í̠na Arono halu ibu igini karu ti i̱naga biabe biaga helo loma binigo mo miaga agali dabo helalu weli ogonime ti odo wia habe.
EXO 30:31 Ani bialu Isaraele wali agali bu karuhondo bi ogodagua lamibe. Tíguabi tínaga waneigini aguanene mani hama polebirarumebi mbirale i̱ninaga leneore wiabagi helo weli ogonime odo wia holene nga.
EXO 30:32 Agali kago ta nabi bame odo wia holene nawi. Weli ogoni ale tíninaga ngelobi mbira wa nabilimu. Weli ogoni Anduane Homogo i̱ninaga hangu ngelo tígua mbira wabu wulene nawiore laro.
EXO 30:33 Agali mbirame weli ogoni ale mbira wabiyaguabi agali loma binigo mo miaga ndo ta nabi karuni bame odo wiyaguabi agali ogoni ibu i̱naga wali agali karu baba mandagi nahe ibu tagira helo, lalu Anduane Homogohanda lene.
EXO 30:34 Anduane Homogo ibugua Mosesehondo laabo halu lalu, Tígua mbirale bayaleore ngabiaga ngaru mo yuwa ira hagua ngabilo delaga mini inisenesi wabilimu. Inisenesi ogoni wabulenaga padua urunaga genda magi ogobi dege degeme karulape holebira. Padua uru mini muwebi tara ale mbirame wabini mini onigabi tara dege balawaya mbiranaga ibane mini galabanumubi inisenesi ibuni ngagobi mo wigi bilimu.
EXO 30:35 Ani buwa uruni bibahende mo biamaga haga buwa ira hagua nga bayale bilo delaga mini inisenesi wabilimu. Ani buwa inisenesi ogoni bayale loma bia heneore wiaabo helo ibi emene mbira ogoniha ibira haga bilimu.
EXO 30:36 Mbirale uruni be aleore helo baya hangu dambilimu. Ani buwa Balai Anda kagoha i̱ninaga deniore ngelo yu puwa Habo Nalolene Bi lo winigonaga Mbogoyi biago ngagoria wanakuihayagi ngelabe. Hagua ngabilo delaga inisenesi ogoni nagalone ngaru ale ndo ogoni i̱ninaga loma bia heneore wiaabo holebira.
EXO 30:37 Inisenesi ogoni tíni hangunaga ogonidagua mbira wabulene nawiore larogoni. Ogonidagua wabiniru Anduane Homogo i̱ninagaore loma bia henego ngelo tíninaga mbira wabu wulene nawiore laro.
EXO 30:38 Agali mbiragome padua ngabiaga mini sanda ngago wabulenaga mbirale biamaga haga buwa ogonidagua wabiyagua agali ogonidagua biagago ibu i̱naga wali agali baba mandagi nahelo tagira helolene nga, lalu Anduane Homogohanda lene.
EXO 31:1 Anduane Homogohanda Mosese lamialu lalu,
EXO 31:2 Bi larogo hale habe. I̱na agali mbira Yuda hameigini karu aria Hua aguane Uri igini Besalele dabo heledo.
EXO 31:3 Ani helalu i̱na i̱naga Dinini kagonaga hongo ibuha karula ko. Ani heledogo ibugua ngolo siliba boronosimebi mbirale bayale tara tara ngaru wabilonaga manda bulenebi mugubebi karulape mido.
EXO 31:5 Ibugua ege to̱le̱ muni dewaoreme miaga alerume podaga bialu mbirale tara tara ngaru wabilobi ira ngaru podaga bialu bage tara tara ngaru podalu mbirale tara tara ngaru bulenebi ibugua bilo dabo heledo.
EXO 31:6 Ani bialu agali mende Dana hameigini aria Ahisamaga igini Oholiaba dabalu ibugua Besalelela biabe mandagi bialu helonaga dabo heledo. Ani bialu agali marubi dabo hela dege bidogo uruni ti haru mandagi howa biabe bulene o langirugoni damenego biai helo dabo heledogoni.
EXO 31:7 Agali uruni tigua i̱naga Balai Andaha bulene langirugoni bibahende biai holebira. Balai Andabi Habo Nalolene Bi lo winigonaga Mbogoyi larugobi Mbogoyi ogoninaga panga ngagoria wali agalime ko binigo domaga laga biagobi bibahendeore Balai Anda biagonaga mbirale wabulene ngarubi biai holebira.
EXO 31:8 Tigua dagia tebolo wabialu ogoriani wulene damenego bibahendebi lamu hale irane ngolome wabulenebi mbirale mbirale lamu halenaga biabe bulene ngarubi wabulene nga. Ani bialu ira hagua ngabilo delolene mini inisenesi lomabu delolene dabubi wabulene nga.
EXO 31:9 Ani bialu nogo mbirale irani dai helo bo lomabu delolene dabubi wabialu ogoninaga biabe bulene damenego bibahendebi wabiai holebira. Ani bialu gi geru waya bulenenaga iba hambu wulene ndisi bebi ndisi be ogoni wiagane dagiabi tigua wabulene nga.
EXO 31:10 Tigua Arono halu ibu igini karume loma binigo mo miaga biabe bialu howa aga karulo helo wabulene nga.
EXO 31:11 Ani bialu mbirale mbirale ngaru i̱ninaga wiabagi hene wilo olibe lininaga weli odo ha̱i̱ holene biago wabialu Hobane Loma Bia Hene ngagoha ira hagua ngabilo delolene mini inisenesi biagobi wabu wulebira. Ani buwa tigua mbirale uruni bibahende wabialu howa i̱na ogobi wabilimu lalu langirugonidagua biai halu wabilimu, lalu Anduane Homogohanda Mosesehondo lamini.
EXO 31:12 Anduane Homogohanda Mosese lamialu lalu,
EXO 31:13 Isaraele wali agaliruhondo au labe. Sabada horo i̱naga ha̱lo holene horo ngago ai Sabada horo bibahendengi ha̱lo haabo holene nga lalu lamibe. Sabada horo ogoni áyu kamingibi mani holebiragonagabi i̱ baba tí baba manane mbira wiaabo helonaga ngelarogoni. Ani ngelarogome i̱ Anduane Homogo i̱nime tí i̱naga wali agali dabeneore kami lalu mo walia holenaga ngelaro.
EXO 31:14 Horo ogoni Anduane Homogo i̱ninaga ngogo mitangi bialu ogoningi tí ha̱lo halimu. Horo ogoningi mbiralime biabe biyagua ogoni ibugua i̱naga mana pugualu ka manda bialu ogoni ibu homelo bo wahalimu.
EXO 31:15 Sarere mbiranaga horo waragaru tíninaga biabe bulene ngaru bialu halimu. Ani bialu horo kanego i̱ninaga Sabada horo loma bia hene ngago manda bialu ogoningi ha̱lo holene nga. Wali agalime horo ogoningi biabe bialu hayagua uruni ti homelo bo wahai halimu.
EXO 31:16 Isaraele wali agali tí horo ogoningi ha̱lo holenego irane habo nalolene bi lowinigo mitangi bialu tígua talialu buleore lalu lowinigo ogoniha ngagoni.
EXO 31:17 Ani bialu i̱ni Anduane Homogo kogome dindi haribi bibahende horo waragaruni wabialu howa horo kaneni i̱ni ha̱lo berenego manda bialu ani bilimu. Ani birugonaga horo ogoni i̱ baba tí baba manane mbirale wiaabo helonaga ngelarogoni, lene.
EXO 31:18 Ngode Datagaliwabe ibuni Mosesela Hari Sainaini howa bi lai halu ibugua ege to̱le̱ kirani ibuninaga bi leneru ibunime gilibu winigo Mosesehondo mo mini.
EXO 32:1 Ani binigo Mosese ibu ogoni bialu heaha wali agalime handalu hearia Mosese ibu hari biagoha howa dalipe halu íbu nabi uyu hari biagoha haabo hayuane hendene. Ani hondowa tigua Arono hearia ibuwa Arono ho mabubupe howa ibuhondo lalu, Ina Iyibi dindi hemaria haru tagira ibinigo agali Mosese biago mbiraha pu tagalayadago mbira biya hendedeni. Ibu ani biyadagonigo ina haru helonaga Arono í̠na inanaga mbirale mbira bi pupu wuluma̱ya wabu ngibe, lene.
EXO 32:2 Ani layagola Aronohanda wali agali biaruhondo lalu, Haleira ngamigo bibahende tí oneme ngagobi tí iginime ngagobi tí waneme ngagobi haleria ngolome wabinigo bibahende goloyu ngoai howa i̱hondo ngidaba, lene.
EXO 32:3 Aronohanda ani layago hale halu wali agali bibahendeme tinaga haleira goloyu ngoai howa Aronohondo mini.
EXO 32:4 Goloyu ngoai hayagola Arono ibugua haleira biaru irame do gedaore helowa dodo do gundulo wahalu ngolo ibuniore do ibira hayagola dindi uli wuwa odo berelowa ngolo ogonime nogo bulumaga igini ale mbira wabini. Arono ibugua ani wabu heleagola wali agalime tini aria maruhondo lalu, Isaraele wali agaliru o inanaga dama ina Iyibi dindi hemaria haru tagira ibiyago o kagomego de handadaba, lene.
EXO 32:5 Ani buwa Arono ibugua bo lomabu miaga dabu mbira wabialu nogo bulumaga igini ale biago tiga tiga handade̱le̱ bu helowa ibugua bi dalimu lowa lalu, Ai ina Anduane Homogonaga mini yaraga halu yawi nogo bami̱ya, lene.
EXO 32:6 Ani layagola horo mendengi egerebagiore wali agalime nogo maru bo lomabu miaga dabuni emene podowa bo delalu maru tini Anduane Homogola ho gimbu bulenaga hiruwa mandagi nole berene. Ani nalu biruwa tigua lulu iba no erelo muwa wali agali tini o biagoniha kayu yu wima pene.
EXO 32:7 Ani bialu heago hondowa Anduane Homogohanda Mosesehondo lalu, Í̠naga wali agali Iyibi dindini howa í̠na haru tagira ibirirume ai i̱ erembira ngialu ko timbuni biyago í̠ áyu ogoni dalialu unu wali agali karia pobe.
EXO 32:8 I̱na ti agua bialu holeberami laga bialu i̱naga mana mirugo mo wahowa ti tinime hame ledadagua bialu kagoni. Tigua muni ngolo irame hiru gedaore howa nogo bulumaga igini ale mbira wabu helowa ogonihondo mbirale bo delalu ogoni mitangi bialu kagoni. Ti Iyibi dindi hemaria haru tagira ibiyagoni tinaga dama ogonioreme haru tagira ibiyagoni lalu ka.
EXO 32:9 Wali agali uruni mini dogahe kane hendedogo.
EXO 32:10 Ai áyu wali agali uruni baba keba emene ndoore kogo wali agali bu mini giambe damene uruni áyu ogo bo mburi lai holeberogo ani nabibe nalolebere. Wali agali ko damene ogoni bo hilu wahai howa Mosese í̠bi í̠ aguane maha hararubi mo timbu halu hameigini timbuni paluyu lelolebero, lalu Anduane Homogohanda lene.
EXO 32:11 Ani layagola Mosesehanda Anduane Homogo ibunaga Ngode Datagaliwabe la deborebo bialu Ngode Datagaliwabenaga mini mo hada hole bi lene. Mosese ibugua lalu, Í̠naga wali agali uruni nde Iyibi dindini hearia gi mialu haru tagira ibirigodago í̠naga hongo gibiru walia halu ani birigodago uruni baba keba gibiore kego nde aginagabe.
EXO 32:12 Í̠na henene halu ani bo mburi lariyagua Iyibi wali agali ti hale howa, Ae Anduane Homogohanda Isaraele wali agali haru tagira piyago hari wearu teneha howa bo hilu wahai holenaga haru penenagada, lolebira ndobe. Ani laga bulebirago keba haridagoni wahalu bu mini hadabe. Mini wiadai bialu í̠naga wali agalihondo hiriribi o bule mandabu wiridagonidagua nabi wahabe.
EXO 32:13 Í̠naga biabe bia haga Abarahama Aisaga Yagaba ima hayaru nde mitangi bibe. Agali urunihondo habo nalolene bi lo wialu tinaga waneigini ho dame bialu daga labe nahe yakundi li hariha bu kagobi holebira larigoni. Ani bialu tinaga waneigini ti dindi i̱na mulebero lo wirigoria anda pu howa ogoriani haho wiaabo holebira lalu bi urunibi lo wigi biriruni nde manda bibe, lene.
EXO 32:14 Mosesehanda bi aniore layagola nde Anduane Homogohanda bu mini hadalu keba howa ibunaga wali agalihondo pani mulebero layagoni nde pani nami wahalu wahene.
EXO 32:15 Ani biya handala Mosese ibu ege to̱le̱ mbalape kira bi mana leneru kirabalini gilibuwi biago yalu wali agali hearia dai bule hari biagoha howa dalini.
EXO 32:16 To̱le̱ mbalape kiradagoni Ngode Datagaliwabe ibunime ogonibi mo mbalape lenego odagolaboni bi mana leneru gilibu winidagoni.
EXO 32:17 Yosua libu haru dalialu hebirago Yosuahanda wali agali bi ladagadagabu layuago hale howa ibugua Mosesehondo lalu, Wali agali ni andabu palu hayagoniha wai bialu puromo laruane hale ko, lene.
EXO 32:18 Ani layagola Mosesehanda lalu, O laruagoni wai buwa agali bo hana halu pialu ali iwa mambolola laradagua ndo biarua agua. Wai anda ibuwa bo paya biragola ga̱ kobala laradaguabi ndo dege biarua. Olaruagoni wali agalime iba ganaore laruagoni, lene.
EXO 32:19 Ani lalu bialu libu hari biagoha howa dalialu Mosese ibu kaware wali agali heagoria íbu hapara howa handalu hearia nogo bulumaga igini ngolome wabini biago mo ngelowa tini luyu mabu bialu dawe halu heago hondowa Mosese ibu keba gibiore hene. Kebaore howa ege to̱le̱ mbalape kira bi mana leneru gilibuwi yayago dindini ibira hayagola poda gingilu baga bini.
EXO 32:20 Ani bialu puwa ibugua nogo bulumaga igini ale gime wabini heyu heleago muwa irani hiru gedaore howa do iba heagola be abalu ale ti taulo wiagoha odope hene. Ani buwa iba o bagoniha odope howa mo bimaga hene. Ani bu ngelowa ogoni Isaraele wali agalihondo lalu, Ogoni tíni nole ibidaba, lowa mo nahalu ibuni handayaho hene. Ani biyagola wali agalime nde wahole ndoyagola o biagoni naore bini.
EXO 32:21 Ani buwa ibugua Aronohondo lalu, O biridago nde gibidago wali agalime í̠hondo agi biyagola í̠na wali agali o bu karume ko timbuniore hiriribi o biyadagoni bilo mo bia haribe, lene.
EXO 32:22 Ani layagola Aronohanda ladai bialu lalu, Í̠ i̱la keba nahabe. Wali agali o bu karuni tinime mana ko buleore lalu de daramabu kaligoni í̠ manda bidegoni.
EXO 32:23 Tigua i̱hondo lalu, Agali Mosese mbaria ina Iyibi dindi hemaria haru tagira ibini ogoria hayagoni agoha piyabe tobane biyadago ina manda nabidamago ina haru hoari bia helonaga inanaga mbirale bi pupu wulenaga mbira wabu ngibe, laya.
EXO 32:24 Ani layagola i̱na tihondo tinaga haleria ngolome wabini ngamiru goloyu ngoai hadaba larugola wiarume golalu i̱hondo ngigi biya. Ani ngiyagola ina haleria odaruni ira deagoha haealo baamu howa delarugola ira biagoha howa nogo bulumaga igini ale o ngagoni ibuni minalu tagira ibiya, lene.
EXO 32:25 Mosese ibugua handalu hearia Aronohanda wali agali bame tini hame layadagua bu helo yupeho heleneyane hendene. Ani bialu tinaga waitigirume tinaga dongone handalu bame mo yobu wahabehe heleneyane hendene.
EXO 32:26 Ani biyiyago hondowa Mosese ibu wali agali ubanda tagi bulene panga paya dugua biaga wiagoria pu howa bi dalimu ga̱ lowa lalu, Anduane Homogonaga kamigo bibahende o i̱ kogoria ibai hadaba, lene. Ani layagola hale howa Libai aria hearu bibahende ibalu Mosese heagoha ho mabubu hene.
EXO 32:27 Ani íbu heagola ibugua Libai aria biaruhondo lalu, Isaraele wali agalinaga Anduane Homogohanda áyu tí hangu hanguhondo au laya. Tínaga ayu tibu mo yagayaga bialu puwa tí hamenebi tí damenebi tí baba handa a̱i̱ na̱i̱ padamigobi homelo bo wahalimu layago bo wahama pole pigane o harabani howa bama pialu namu tibini palimaro bidagoria bairi hole áyu ogoni badaba, laya lene.
EXO 32:28 Ani layadagua Libai aria biarume nde hale halu bama pialu horo ogoningi Isaraele agali hangu daosini tebira (3,000) bibahende bo wahai hene.
EXO 32:29 Ani beagola Mosesehanda Libai aria biaruhondo lalu, Horo áyu tí tíni dabo bagi hene halu maru karubi ndo tí tara halu tínaga iginibi tí hamenebi bo waharimigome Anduane Homogonaga biabe bulenehayagi tí loma binigo mo miaga hole kamigoni. Ani birimigonaga Anduane Homogohanda áyu tí biamogo bialu mo bayale holebira, lene.
EXO 32:30 Ani bialu horo mendengi Mosesehanda wali agali biaruhondo lalu, Tígua ko hiriribiore i̱na bulile wiago birimigoni. Ani birimigonigo nde abule i̱na hari o kagoha lone iraga halu Anduane Homogo karia porogo. Anduane Homogo ibugua tígua ko birimigoni domo waharo loloba badago í̠na domarebe lalu haleho porogo, lene.
EXO 32:31 Ani lalu bialu Mosese ibuni lone hari biagoha iraga halu puwa Anduane Homogohondo lalu, Wali agali o biarume ko hiriribiore i̱na bulile wiago biya. Tigua muni ngolome nogo bulumaga igini ale mbira tini gime wabuwa tinaga dama ogoni lowa ogonihondo bi pupu wialu heneya.
EXO 32:32 Ani bialu heneyago ainde harugo agua bule ndodago tinaga ko o biyadagoni domo wahabe. Ai domo wa naholeyagua nde wahalu i̱ninaga mini ebere í̠naga mbugani gilibu wirigoni nde í̠naga waneigini marunaga mini ngelalu i̱naga minigo wahalu domo wahabe laro, lene.
EXO 32:33 Mosesehanda ani layagola Anduane Homogohanda ladai bialu lalu, I̱hondo ko biyadarunaga minigo i̱naga mbugani nawilo domo waholebero.
EXO 32:34 Ani buleberogo ai í̠ áyu ogoni pialu wali agali haru halu dindi mbaria nga lalu i̱na langirugoria haru pole áyu ogoni pu. I̱naga dahuliyalime í̠ biamogo bialu í̠ mo tiga bule holebira. O larogoniore manda biaabo habe. Ai wali agalime ko biya ebere larigonaga ko biaga uruni tigua ko biyagonaga pani mulene horo ibirangi pani mulebero, lene.
EXO 32:35 Ani layadagua wali agalime Aronohondo bia bia degeni nogo bulumaga igini ale biago wabilo mo bia hayagonaga Anduane Homogohanda wali agali biaru pani mialu warago tara mbira ti heagoria ibilene.
EXO 33:1 Anduane Homogohanda Mosesehondo lalu, Wali agali Iyibi dindi hearia haru tagira ibirigoni o bu kagonigo uruni haru halu dindi o kamigoni wahalu pudaba. Pialu dindi mbira i̱na Abarahama Aisaga Yagaba imaruhondobi tinaga waneigini aguanene maha hama poraruhondobi karulelo mulebero lo wirugo dindi ogoriani haru pole pobe.
EXO 33:2 Dahuliyali mbira tí hariga walia hama mandagi pilimulonaga pu lagua. Ani bialu Kenanaliru Amoroaliru Hidialiru Peresealiru Hibialiru Yabusualiru uruni bibahende i̱na bo batagi hai holeberogo dindi landaneha ngaria tí karuloleberami.
EXO 33:3 Ani buleberogo tí dindi ibane bere tomo anda holene bayaoreha hole poramigoni. Ai i̱na dege tí heba naibulebero irane tí i̱naga bi laga berogoni ogoale laralo manda bule ndo ora luluanda hope howa tí miniha ibira alego bia dege dindi halu hagayago. Ani bialu kamiria i̱na ti hariga obeneni howa bo wahai hoa biaganego i̱ naibulebero laya lalu wali agali lamibe, lene. Mosesehanda puwa wali agali lamibe layadagua lamini.
EXO 33:4 Aniore layago hale howa wali agali biarume mini burugu lalu gendaore ho hene. Genda ho howa ti tinginini yári biagane damene dongone ganuni wule bu heagoni bibahende golo ngelai howa tini dara howa mini hulula bu hene.
EXO 33:5 Mosesehanda Anduane Homogonaga bi agua laya lalu, Wali agali tí luluanda i̱na bi larogo ogoale lara lole ndo tini bua bira ale bupe haga bialu kamigoni. I̱ni tí heba ibiruyagua hariga lu pu lu nabi howa nai hariga obeneni dege howa tígua tínaga mana biagane egene wini biago bialu kamiria tí bibahendeore bo hilu wahai harogonidago i̱ naibagua. Ani biaguago tínaga tinginini yári tara tara karu ledamigoni damenego bibahende golo ngelai halimu. Ani bidamigola i̱na tíhondo agi bibehedabe hondoliya, Anduane Homogo ani lalu lamibe laya, lene.
EXO 33:6 Ani layagola nde Isaraele wali agalime Hari Sainai yu wahalu tagira pialu peadangi howa tinaga tinginini yári biagane damene bibahende nabi wahai hene.
EXO 33:7 Isaraele wali agalime dindi mbirani puwa palue anda bigi bialu howa Mosese ibugua nde Balai Anda mbira wali agali ta nabime anda napiaga mbira haluni amura bu helaga biaga wini. Dindi mbiragoha pole howa gialo yalu pialu anda pu paligi beramigoria anda ogoni ibu hangu haluni bu helaga biaga wini. Anda ogoni mini Anduane Homogo Ina Heba Ka manda bulenenaga anda laga wini. Ani biaga winigo wali agali ti mbiraligo ibu Anduane Homogonaga hame hale holebi mbirale ogo buabe nabuabe lalu Anduane Homogo hale hole manda biyagua Anda ogoniha howa haleho piaga hene.
EXO 33:8 Mosese ibu Balai Anda odagoniha pugu biragola wali agalime tinaga anda harabani howa Mosese porago baya hangu deme handayaho wialu anda odagoni tamuha anda pora handala wahaga biaga hene.
EXO 33:9 Ani bialu Mosese ibu Anda biago tamuha anda pu kagola hari beraliba timbuni mberane biago dalipe haga wini. Dalipe howa Balai Anda biago harabani gerelapeho ngagola Anduane Homogohanda hari beraliba timbuni mberane biagoniha howa Mosesehondo bi lamigi biaga wini.
EXO 33:10 Wali agalime handalu karia beraliba mberane ogoni Balai Andadago panga harabani wiape kago hondowa ti bulu paliaga wini.
EXO 33:11 Anda odagoniha howa Anduane Homogohanda Mosesela bi la de̱le̱ bialu agali yangonela mini hana hagabu howa bi lo haralidagua lo haga biaga wini. Anduane Homogola bi ani lo halu Mosese ibu wali agali bu karia dai bigi biaga wini. Mosese ibugua bi lo pialu dai bigi bilo lowa igiri daliahe mbira Nunu igini Yosua hayago ibugua Mosese biamogo bule Mosese geha ibagabu howa Balai Anda biago tamuha haga hene.
EXO 33:12 Mosesehanda Anduane Homogohondo lalu, Í̠na i̱hondo wali agali o bu karuni haru halu dindi o biagoria haru anda pobe larigonigo i̱la polobayago mbirali ogola polebere nalarigoni. Í̠na i̱ ogobiore ka lo manda bialu i̱hondo turuho ko larigoni.
EXO 33:13 Ani larigo ai í̠na henene halu i̱hondo turuho keyagua o Anduane Homogo í̠na bule manda bu wiaruago ogo ale bule manda bu ngo lalu i̱ langi. Langerego hale howa i̱na í̠ ani bule manda bu wiridago hangu bialu í̠ mo turu haabo holiya langi, lene. Ani bialu hameigini áyu karu í̠ninaga wali agaliore helo dabarigoni í̠ni manda bibe, lene.
EXO 33:14 Ani layagola Anduane Homogohanda ladai bialu lalu, I̱ni í̠ heba ibalu í̠na waitigi karu baba wai bigi beregola wayali habelo biamogo bigi bulebero, lene.
EXO 33:15 Ani layagola Mosesehanda ladai bialu lalu, Í̠ ina heba namali̱yayagua o ina dindi o kamago wahalu nape ogoria holeberamago ina pudaba nalabe, lene.
EXO 33:16 Í̠ni ina heba naibiriyagua wali agali bu karume manda bialu karia Anduane Homogo í̠ wali agali ti bababi Moseselabi turuho ndo harua manda bulebira. Ani bialu í̠ni ina heba ibagabu mandagi harimayagua ogonime ina wali agali maru karubi ndo ina mo tara holebira, lene.
EXO 33:17 Ani layagola Anduane Homogohanda Mosesehondo lalu, I̱na í̠ ogobiore ke lo manda bialu í̠hondo turuho kogodago í̠na o larigonidaguaore bulebero, lene.
EXO 33:18 Ani layagola Mosesehanda Anduane Homogohondo hale halu lalu, Í̠ni íbu ko lalu wá holene de mborerebiore handaya habe nahe walia hagayago wá holene de mborerebi o biagoni dege halu mbira hondoliya waliaha, lene.
EXO 33:19 Ani layagola Anduane Homogohanda ladai bialu lalu, I̱naga wá holene í̠ handabelo í̠ deni pu bolangua helalu i̱naga mini wali agalime nalaga tua mbaria wia do hene ngogo áyu mini tua ogoni hale habelo í̠ deni howa loliya, lene. I̱ Anduane Homogo kogo darabi gubalinibi hoa birago haga kogoni.
EXO 33:20 Ani buleberogo áyu í̠na i̱naga dengui handabelo walia naholebero. Irane mbirali i̱naga dengui handaya harago homaganego í̠ walia haruyagua í̠ homoleberegodago walia naholebero, lene.
EXO 33:21 I̱naga dengui walia naholeberogo í̠ heyu holene karulape mbira o i̱ kogohayagi to̱le̱ni heyu holene ngago ogoriani hole ibabe.
EXO 33:22 Í̠ ani heyu kegola i̱naga wá holene de mborerebi biago bolangua haragola i̱na í̠ minu muwa ege ogoniha kaba mbira ngagoha í̠ minu berelowa i̱naga gime í̠ yi holebero. I̱ bolangua halu poleberogo i̱ porogo í̠ nahandabelonaga ani bulebero.
EXO 33:23 Ani buwa i̱ bolangua halu puwa i̱naga gi yamerogola í̠na i̱naga dengui nahende erembira dege de hondolebere, lene.
EXO 34:1 Ani lowa Anduane Homogohanda Mosesehondo lalu, Ege to̱le̱ mbalape kira abale biagobi labolabo kambulo yalu ibabe. Kambulo yalu eberegola bi mana ala i̱na to̱le̱ mbalape kira biagoria gilibu wiwaria í̠na minu podarigoni ai lone gilibu aribia holiya to̱le̱ mbalape kira kambulo pobe.
EXO 34:2 To̱le̱ mbalape kira ogoni manda mandabu yalu egerebagiore Hari Sainai iraga halu ibabe. I̱ hari neneoregoria haguago lola habiya egerebagiore ibabe larogoni.
EXO 34:3 Í̠ kirali ibuleni í̠ni hangu ibabe. Wali agali mbirali mbira hari ogoniha hapara howabi holani handabe. Nogo sibi bulumagabi mbira hari ogoni teneha tani nalu holani wara peladaba labe, lene.
EXO 34:4 Ani laya handala Mosese ibuni hale halu puwa ege to̱le̱ mbalape kira kambulo manda mandabu ngelene. Horo mendengi egerebagiore to̱le̱ mbalape kira biagoni yalu Anduane Homogohanda ibabe layadagua Hari Sainai yalu iraga hene.
EXO 34:5 Yalu iragaho heagola Anduane Homogo ibuni hari beralibaha howa dalialu Mosese heagoria mandagi libu haru hene. Howa ibugua ibunaga mini loma bini lalu, Anduane Homogo i̱ Henego Hole Ko, lamini.
EXO 34:6 Ani lamuwa Anduane Homogo ibugua Mosese denguini bolangua halu pua̱i̱ howa bi ladaga howa lalu, I̱ Anduane Homogo dara holenebi biamogo bulenebi to̱lo tagihe keba ala awane nahaga gubalini holenebi mini bilinahe holenebi deremolahebi gibi Ngode Datagaliwabe kogoni, lene.
EXO 34:7 I̱na bule lo winiru heneneore bigi biruria hendene wali agali dabane daosini au lolebe tobaheme handaga bialu homaga bini nga. I̱na bule lo wiruru lo beregeda nabi dabane dewa halu homayaguabi lo ngogo biaore biaga kogoni. Ani bialu wali agali tigua mana ko haragobi hale ko tara tara bigi biragobi domaga i̱ kogoni. Ani domalu dege ai aba ai̱yalame ko biragonaga pani ti waneiginibi aguanebi maha hama poraruhondo mialu daba tebone mane daba hama poraruhondobi pani mia dege bialu haga ko, lene.
EXO 34:8 Ani layago hale howa Mosese ibu dindini bulu palialu Anduane Homogo mitangi bialu ibu mo dunini howa lotu lalu hene.
EXO 34:9 Anduane Homogo mitangi halu ibugua lalu, Anduane Homogo-o í̠na henemanenaga i̱hondo turuho keyagua o ina haruore mali̱ya ibulebere larogoni. Isaraele wali agali uruni minila haru ndo luluanda haradagua hope howa laragoni ogo ale lara lole ndo kagoni í̠ manda bidegoni. Nde abule harugo í̠naga wali agalime ko birimaru domo wahalu í̠ni buha ina yamibe, lene.
EXO 34:10 Ani layagola nde Anduane Homogohanda Mosesehondo lalu, Ainde áyu i̱na Isaraele wali agali baba habo nalolene bi lo wulebero. I̱na tí bibahendenaga deni biabe taraoreru wali agali dindi bibahendeha karume de nahendene ale i̱na Isaraele wali agali tíore de hondole bigi bulebero. Wali agali bibahende i̱na mbirale gibioreru i̱ Anduane Homogo i̱na tínaga bia haga beroru tí de handalu duru loleberami.
EXO 34:11 Ani buleberogo i̱naga mana áyu lo ngeroruni baya hangu handalu bi o ledorunidagua hale halu biai halimu. I̱na hameigini Amoroaliru Kenanaliru Hidialiru Peresealiru Hibialiru Yabusualiru bibahende bo batagi halu balu puabo helarogola dindi bame landaneha ngaria tígua karulama hama anda pugu buleberami.
EXO 34:12 Ani bigi buleberamigo tí dindi gahenge mbira anda poramigoha wali agali uruniha karu baba nenege hinu ndi bu holene mbira manda bulamini. Uruni baba nenege hinu tí ndi bu harimiyagua ogoni gono bu hinaragola gundulo mialu pobe tobahe mbaria ogoniha do wuleberamigo ti baba haru hinu mandagi nahalimu.
EXO 34:13 Mandagi nahe ti hobamu howa wali agali uruni tinaga mbirale gime wabiniruhondo mbirale bo delo miaga dabu bidaru gelo labailo bagabu wahalimu. Tinaga to̱le̱ ira giambe waradagua berelama pedaruni ela nahaga lowa hogaralebu haga to̱le̱ uruni bibahende podobagabu langu wahai halu mbira wulani handalimu. Ani bialu tinaga dama wali Asera dengui handaradagua bule lowa mbirale irame wabu wu hama pedaru bibahende ayume dibu gingirulo bagabu wahai halimu, lene.
EXO 34:14 I̱ Anduane Homogo tínaga kogonigo i̱ hangu mitangi bialu mo dunini howa lotu lalimu. Ani bialu tígua mbirale gime wabini ngaru mbirago ogonihondo bu pupu nawilimu. Ani nawilimu larogo irane mbiralime i̱la í̠ abi i̱ abi laba lole manda birago bilo i̱ nde handayaho nahaga ogoni birago bo ereba haga kogonaga laro.
EXO 34:15 Ani biaga kogo wali agali dindi uruniha karu baba ndi bu mbirale doborobo bu nahalimu. Ani nahalimu larogo irane tigua dama tara tarahondo bi pupu wialu nogo egaru loma bialu urunihondo bo minigo dawawa tí nami̱ya ibidaba lolebira. Ani laragola nde tí wahalu pobe tobahe nolene kaware wulebirago ani nenege hinu nahalimu larogoni.
EXO 34:16 Ani nenege hinu harimiyagua tínaga iginime wandari dindi tara uruniha bedaru dabu bu karia wali urunime haru gili lenego pialu i̱ erembira ngialu ti one urunime dama tara tarahondo bi pupu wiradadagua wima yupe holigo wali agali uruni heba mandagi huru hinu nahalimu larogoni, lene.
EXO 34:17 Mbirale tara tara aeaneme wabuwa tinaga dama lowa urunihondo bi pupu nawilimu.
EXO 34:18 Horo mbira Mberedi Yidi Nahe Hirinigo mo yu ngoai howa nagane horo biagoni embeda nahe horo ogoni tagira ibirangi naabo halimu. Ani nalimu lalu i̱na ala pongo bo ngirudagua ege mini Abibi haragola ege ogoninaga horo karuni mberedi yidi nahe ogoni nalu halimu larugoni. Ani nalimu larugo irane tí Iyibi dindi howa ege ogoningi tagira ibirimigo manda buwanaga nalimu larugoni.
EXO 34:19 Tí igini wahene hono weramigo bibahende i̱naga dege dege holebira. Ani bialu tínaga nogo dameneru tanabi bibahendeme igini pigane wangabe wirago dameneru bibahende i̱naga dege dege holebira.
EXO 34:20 Ani bulene wulebirago ai nogo dongi igini pigane winigo i̱naga heleneyagua nde nogo dongi ogoni wahalu í̠ni holeyagua i̱naga nogo sibi igini mbira kango hela aribia holene nga. Ai kango nangibeheyagua wahalu nogo dongi ogoni ibuninaga ma minu taga lolene nga. Ani bialu igini wahene damenego aba ai̱ya tini holeyagua i̱hondo maru ale lomabu ngigi bulene nga. Mbirali i̱hondo mbirale mbira ngule giha nayi bame ibirimiyagua i̱ denguini bilingi bolanguabu holene nawi.
EXO 34:21 Horo waragaru tíninaga biabe bilimulo wiyagoni. Ai horo kanegoria biabe mbira nabilimu. Tomo hongole dindi aluene ngangibi tomo bu wulene ngangibi nabilimuore larogoni.
EXO 34:22 Tomo bu wialu howa widi lini hini dedagola Mabuha Widi Lini Pigane Denegonaga mana pigane wirimadagua bilimu. Ani bialu dagare bulene tu harangi Anda Nemandaha Palu Holene Hororu bu henego mitangi bialu mana pigane wirimigonidagua ira lini pigane hini dedago daramingi ani bilimu.
EXO 34:23 Ani bialu Isaraele agali damenego bibahendeme mali mbira mbirani halu teboore Anduane Homogo i̱niore Isaraele wali agalinaga Ngode Datagaliwabe kogo i̱ mitangi bialu mo dunini howa lotu lole ibugu bulene nga.
EXO 34:24 I̱na tínaga waitigiru tí hariga polenegoha palipai haga bidaru bo batagi haga bialu balu pelarogola dindi dabulu ngaria tí karulalu ho yanga laga bima ibugu buleberami. Ani bigi berogola wali agali maru karume tí baba wai bialu tínaga dindi karulolene manda nabulebira. Tí bibahende tínaga mini tomo halu tebo nolene larimagoha puwa nalu kamigohabi mbirame tínaga dindi karulalu tí bo anda naibulebira.
EXO 34:25 Tígua i̱hondo nogo mbira bo ngialu dela howa mberedi yidi heba mo biamaga henego i̱hondo nangilimu. Ani bialu Bolangua Halu Penego Horonaga Tomo mitangi buwa nogo bo dawenego aria mbira egerebagi nolenaga podo wia nabilimu.
EXO 34:26 Ani bialu mali bibahendengi tí mabuni tomo hangaramigo hini damenego Anduane Homogonaga andaha bu yu íbu wilimu. Tígua nogo sibi igini meme iginiyaguabi mbirago ibu angibuni andu ibane beha hambu yu delaramigoha delamaga nahalimu, lene.
EXO 34:27 Ani lamigi buwa Anduane Homogohanda Mosesehondo lalu, Bi o laroruni baya hanguore bebani gilibu wibe. Irane bi o laga berogoriani mo tene howa Mosese í̠labi Isaraele wali agali bibahende bababi i̱na habo nalolene bi lo wigi berogoni, lene.
EXO 34:28 Mosese ibu Anduane Homogohanda bi lamiyago hale halu tomobi ibabi mbira naneore uyu hari biagoniha Anduane Homogola heane dege horo pira maria mbi pira maria (40) lowa pene. Ani bialu Anduane Homogohanda ege to̱le̱ mbalape kira biagoria Habo Nalolene Bi gilibu wini. Bi gilibu winidaruni Ngode Datagaliwabe Bi Mana Pira gilibu wini.
EXO 34:29 Mosese ibu howa Bi Mana Pira biago gilibu yalu Hari Sainai biagoha howa daliyagola nde ibu Anduane Homogo heba bi lalu hene biagome ibunaga dengui biagoni wá haamehe huailo yalu dalini. Ibunaga dengui wá haame howa huailo yalu daliyadagoni ibuni de nahende manda nabi dalini.
EXO 34:30 Mosese ibuni de nahende manda nabi ani hearia Arono halu Isaraele wali agali ti bibahendeme Mosese ibiyago handalu hemiria ibunaga denguiha wá haameho huailo yalu ibiyago hondowa ti bibahendeme Mosese heagoria hapara holene giho hagahaga bini.
EXO 34:31 Ti ani bu hemiria Mosesehanda wali agali biaru olayagola Aronobi Isaraele wali agali haru haga biarubi ti bibahende Mosese ibu hearia ibiyagola ibugua ti baba bi lalu hene.
EXO 34:32 Agali uruni baba bi lalu hemiria Isaraele wali agali bibahende íbu ngoai howa Mosese ho mabubupe hene. Ani biyagola Mosese ibugua tihondo Anduane Homogohanda Hari Sainai howa mana damene ibuhondo lamiyaruni Isaraele wali agali biaruhondo lamiaiore hene.
EXO 34:33 Ani lamiai howa Mosese ibu ibunaga dengui agame buyi hene.
EXO 34:34 Ani bialu Mosese ibu Balai Anda Anduane Homogo Isaraele wali agali ti heba ka manda bule bu helene biagoha Anduane Homogo heba bi lole anda pugu bialu howa aga ibunaga dengui buyi hayagoni golo wigi bini. Ani buwa Anduane Homogo heba bi lalu howa tagira ibugu bialu Isaraele wali agalihondo Anduane Homogohanda lamibe layada ale bibahendeore lamiai haga bini.
EXO 34:35 Ani bialu Isaraele wali agali tigua handaga bialu hearia Mosese ibu Anda biagoha howa Anduane Homogo heba bi lalu hene tagira ibugu biyagola ibunaga dengui biago wá haame howa huailo yu tagira ibugu buwa tihondo bi lamigi biyaria hendene. Mosesehanda wali agalihondo bi lamiai howa aga biagome ibunaga dengui lone yiho haga bini. Ibunaga dengui ani yiho haabo howa Anduane Homogola bi lole anda biagoha anda pugu bialu howa golo wigi biaga hene.
EXO 35:1 Mosesehanda Isaraele wali agali bibahende íbu ngoai hadaba lowa tihondo lamialu lalu, Anduane Homogohanda bi mana tígua taluwa bialu halimu layago ogo,
EXO 35:2 Tígua horo waragaru biabe tara tara ngaru bialu halimu. Horo kanego Anduane Homogo i̱ kogonaga horo loma bia hene ngago ogoningi biabe damene bibahende wahai howa ha̱lo holene nga. Wali agaliyaguabi mbiralime horo kaneni biabe mbira bialu kane handarimiyagua tígua ibu homelo bo wahalimu.
EXO 35:3 Biabe emene bame tíninaga andagani ira hangubi bo delolenego ogoni biabe degego ha̱lo holene horo ogoningi biabe damenego nabuleore larogoni laya, lalu Mosesehanda lene.
EXO 35:4 Mani Mosesehanda Isaraele wali agali bu hearuhondo lamialu lalu, Anduane Homogohanda tígua ogodagua bilimu laya.
EXO 35:5 Tígua loma maru yalu ibuwa ngilimu, laya. Wali agali bibahendeme lomabu mulene manda bu kamiyagua nde ngolobi silibabi boronosibi yalu ibuwa ibuhondo mialu
EXO 35:6 labolabo bayaleorebi pu sibi irinime payini mindibiha guyini hari mindini handalehe ngarubi tagalitaya aleha guyini ngarubi daramabiha guyini ngarubi labolabo meme irinime wabini ngarubi milimu.
EXO 35:7 Nogo sibi wangabenaga dongone daramabiha guyini ngarubi yalu ibalimu. Wena timbuni iba tia alenaga dongonebi ira agasia kambulene marubi yalu ibalu
EXO 35:8 lamu halenaga olibe lini welibi mbirale wiabagi holenaga odo ha̱i̱ holene weli wabulene padua alebi ira hagua ngabilo delaga inisenesi tarabi wabulene paduabi yalu ibugu bilimu.
EXO 35:9 Ege to̱le̱ bayale kanelianaru tara tararubi loma binigo mo miaga agali haguane timbuni kagonaga aga mini ebodi hela dambi bulenebi aga emene galuhombeni karulaga biagoria helaga bulenebi mo yalu ibalimu, lene.
EXO 35:10 Mosesehanda laabo halu lalu, Agali bu kamiru aria maru biabe tara tara biaga mugubeyi kamiru Anduane Homogohanda bilimu lalu langiyago bibahende bule ibai halimu.
EXO 35:11 Balai Anda bialu daligani dambi holene biagobi wabilimu. Anda hongo helonaga daba haga bulene wangobi biarubi anda háinaga ira generubi anda hái libu banga bulenaga irabi generubi gene helolene mbogoyirubi wabialu helolene nga.
EXO 35:12 Tigua Habo Nalolene Bi lo winigonaga Mbogoyi biagobi wabialu Mbogoyi ogoni iraho yulenenaga ira kirabi dibu wabialu wali agalime ko binigo domo waholenenaga Mbogoyi ogoninaga panga ngolome wabulene nga. Tígua Habo Nalolene Bi lo winigonaga Mbogoyi biago mo ge holenaga labolabo gerela holene wabulene nga.
EXO 35:13 Ani bialu dagia tebolobi dagia ogoni iraho yulenenaga ira kirabi biabe ogoninaga bulene mbirale marubi wabulene nga. Ani bialu mberedi hiruwa Ngode Datagaliwabenaga deni dagia tebolo o biagoriani hiru wilimu.
EXO 35:14 Lamu halenaga wiagane irane helolenebi ogoninaga biabe bulene mbirale marubi wabulene nga. Lamu halerubi uruninaga welibi wabulene nga.
EXO 35:15 Ira hagua ngabilo delaga mini inisenesi lomabu delolene dabubi wabulene nga. Ani bialu dabu ogoni iraho yulene ira kirabi manda mandabu ngelolene nga. Tigua mbirale Anduane Homogonagaore wiabagi helonaga weli odo ha̱i̱ holenebi inisenesi bayaleore nga tarabi wabulene nga. Ani bialu Balai Anda biagonaga panga harabani labolabo gerela ho wule wabulene nga.
EXO 35:16 Mbirale bo lomabu delolenenaga dabu mbira bu helalu mbirale ira delolene dagia diri dewawi dabu ogoninaga gene maria kagoria helole boronosime dege wabilimu. Ani wabialu lomabu delaga dabu ogoriani biabe bulene alego damene wabu wiai holene nga. Ani bialu dabu ogoni iraho yule ira kira manda manda bu ngelalu bulene nga. Gi geru waya bulenenaga iba hambu wulene ndisi be mbira wabialu be ogoni wulene dagiabi bia holene nga.
EXO 35:17 Balai Anda kago pabe bu yanda hole labolabobi gerela holene wabialu ogoninaga generubi gene helolene mbogoyirubi pabe harabanaga panga labolabobi wabulene nga.
EXO 35:18 Balai Anda dangini yulupe kagonagabi Balai Anda pabe bu mabu bu kagonagabi dindini dariba holene pu hongohe heba gelo holene biarubi uruni bibahende wabulene nga.
EXO 35:19 Ani buwa Arono halu ibu iginirunaga aga bayale tini Balai Anda biagonaga tamu Hobane Loma Bia Hene biagoha biabe bialu howa mo karulo helobi wabulene nga, lalu Mosesehanda Isaraele wali agaliruhondo lamini.
EXO 35:20 Ani laya handala Isaraele wali agali ti Mosese helalu tini andaga pugu pugu bini.
EXO 35:21 Mosesehanda bi layagome wali agalinaga gubaliniha nogoba hayagola tigua ogonidagua bule lo manda bialu pugu pugu bini. Wali agali biabe bulene mugube tara tarayiru íbu ngoai hene. Ani bialu tigua Anduane Homogonaga mbirale tara tararu yalu ibunaga Balai Anda biago bilonaga mule yalu íbu ngoai haga bini. Tigua Anduane Homogo mitangi bialu lotu lolenenagabi Balai Anda bulenenagabi loma binigo mo miaga agalinaga aga wabulenebi mo yalu ibini.
EXO 35:22 Wali agali tinime yalu ibulene hame leadagua yári tara tara biniru haleiraru gi magibi ma gaguabi yári tara tara ngolome wabinirubi yalu íbu dege bini. Yalu ibalu uruni bibahende Anduane Homogohondo lomabu mule yalu ibugu bini.
EXO 35:23 Ani bialu wali agali marume labolabo bayale wiaru mo yu ibalu nogo sibi irinime pu payini mindibiha guyini hari mindini handalehe wiarubi tagalitaya aleha guyini wiarubi daramabiha guyini wiarubi bibahende wabiniru mo yalu ibugu bini. Ani bialu meme irinime labolabo wabinibi nogo sibi wangabenaga dongone daramabiha guyini wiarubi wena timbuni iba tia alenaga dongonebi bibahende mo yu ngoai hene.
EXO 35:24 Wali agali maru tigua siliba boronosiru wiago mo yalu ibugu bialu Anduane Homogohondo lomabu migi bini. Agali maru ira agasia wu hearu tigua ira uruni Anduane Homogonaga Balai Anda biago bule mo yalu ibugu bini.
EXO 35:25 Wali pu payaga berearume pu payini bayale wiarubi nogo sibi irinime pu payini mindibiha guyini hari mindini handalehe wiarubi tagalitaya aleha guyini wiarubi daramabiha guyini wiarubi uruni bibahende mo yalu ibini.
EXO 35:26 Wali maru nogo meme irinime pu payaga mugube berearu tigua nogo meme irinime pu payiniru yalu ibini.
EXO 35:27 Ani bialu agali haguane hearu tigua ege to̱le̱ mini kanelianabi maru baya tara tara wiaru uruni loma binigo mo miaga agali haguane timbuni heagonaga aga mini ebodibi aga emene mende galuhombeni karulaga biagoria pongobu helaga bulebi mo yalu ibugu bini.
EXO 35:28 Ani buwa tigua padua tara tarabi welibi urunime lamu biaruha berelolebi mbirale Anduane Homogonaga wiabagi holenaga weli wabulebi mbirale ngabi sanda ale ira hagua nga biaga inisenesi wabulebi mo yalu ibugu bini.
EXO 35:29 Isaraele wali agali tigua mbirale wiaru bibahende Anduane Homogohondo lomabu mule hame leadagua mo yalu Anduane Homogohanda ogoale bibe lalu Mosesehondo lamiyago bilo mo yu ibai hene.
EXO 35:30 Mosesehanda Isaraele wali agali lamialu lalu, Anduane Homogohanda Uri igini Besalele ibu Yuda hameigini aria Hua aguane heago dabaya.
EXO 35:31 Ibugua biabe bayale tara tara ngaru biai holene mugubeyi Anduane Homogohanda ibunaga Dinini Besalele ibuha helalu biabe uruni bilonaga mini manda bogaru bulenebi ibuhondo miya.
EXO 35:32 Ibugua ngolomebi silibamebi boronosimebi giligili tara tara bulene mugube ibuhondo miya.
EXO 35:33 Ani bialu ege to̱le̱me mbirale ngaru bule bage tara tara podalu ira dibu pelowa bage tara tarabi bialu yári tara tara marubi bilo ibuhondo mugube miya.
EXO 35:34 Anduane Homogohanda manda tara tarabi agali Besalelebi Dana hameigini aria Ahisamaga igini Oholiababi libuhondo miya. Manda uruni yu howa libugua agali maru karubi biabe uruni bilo biawai holene mugube miya.
EXO 35:35 Anduane Homogohanda agali ogoni labohondo ege to̱le̱ ngaru podalu yári tara tara bilobi giligili tara tara mo yáribia halu aga bayale tara tararu wabilobi nogo sibi irinime pu payini mindibiha guyini hari mindini handalehe ngarumebi tagalitaya aleha guyini ngarumebi daramabiha guyini ngarumebi labolaboni yári tara tara wabu helolenebi manda biai ka. Libugua giligili bulene tara tara libunime hameleda ale wabu helalu biabe uruni biai habeheore kagoni, lalu Mosesehanda lene.
EXO 36:1 Mosese ibugua laabo halu lalu, Anduane Homogohanda Besalele Oholiabala libuhondobi agali maru hearuhondobi mandabi mugube bayale tara tarabi miyagome tigua biabe tara tara ngaru bulene manda biai howa Anduane Homogonaga Balai Anda biago bulene nga. Ani bibehe howa agali uruni tigua Anduane Homogo ibugua ogoale bilimu layadaguaore biai holene nga, lene.
EXO 36:2 Mani howa Mosesehanda Besalelebi Oholiababi agali maru Anduane Homogohanda manda bulene mini biarubi olalu íbu ngoai hadaba lene. Ani layagola agali biabe buahe hearu íbu ngoai hayagola Mosesehanda tihondo lalu, Ai biabe bidaba, lene.
EXO 36:3 Balai Anda ogoni bilonaga Mosese ibugua Isaraele wali agalime mbirale yu ibiyaruni bibahende yu howa tigua biabe bilo tihondo mo mini. Ani bialu heagola egerebagi bibahendengi Isaraele wali agali tigua mbirale marubi Anduane Homogohondo lomabu mule hamelo hearu yalu ibugu biaabo hene.
EXO 36:4 Agali Balai Anda bialu hayaru tigua wali agalime mbirale dewaore yalu ibiyago hondowa tigua biabe bialu hayago bialaho ngelalu
EXO 36:5 Mosese hearia puwa tigua Mosesehondo lamialu lalu, Wali agalime mbirale dewaore yu ibaabo haragoni. Anduane Homogohanda biabe bilimu layago bulene mbirale karulapeore wiatago ho ngamago ai maru dewaore bame bu paya bulubada, lene.
EXO 36:6 Ani layagola Mosesehanda wali agali bibahende tinaga balai anda bu hearuha bi lo pelalu lalu, Ai wali agalime Anduane Homogonaga Balai Anda bulenenaga mbirale biaru lone yalu naibalimu, lalu lamiyagola tigua lone yalu naibi wahene.
EXO 36:7 Anduane Homogonaga Balai Anda bule wali agalime mbirale yalu ibiyaru dewaore anda bulene damenego bu karula pialu huniane maru ibira hene.
EXO 36:8 Agali biabe biaga mugubeyi hearu tigua Anduane Homogonaga Balai Anda bialu hene. Tigua labolabo bayaleore timbuniru pirame bialu hene. Tigua labolabo bayaleore uruni muwa pu nogo sibi irinime payini maru mindibiha guyini hari mindini handaleherubi maru tagalitaya aleha guyinirubi maru daramabiha guyinirubi urunime labolabo uruni yári bia haga bini. Pu payini urunime labolabo biagoria dahuliyali handaleheru pigiya ale wabu helaga bini.
EXO 36:9 Labolabo pira uruninaga luni ge magi manda bialu mida homberia (12) aranenaga ge magi manda bialu mida kira wigi buwa labolabo bibahende ogobi dege dege wini.
EXO 36:10 Ani bialu labolabo duria halu mbira lebumaga halu duria mende halu mende lebumaga halu bini.
EXO 36:11 Ani buwa labolabo mindibime kirabali mo gimbu buwa barobia haga bulenedagua haleira ale mabubi labolabo mbira mbirani wabu helaga bini.
EXO 36:12 Tigua mo gimbu bialu barobia holenedagoria haleira ale mabubi pira duria (50) labolabo pira duria (50) mbiranaga piganeni lebialu labolabo pira duria (50) mendenagabi labolabo maro biagoria haleira mabubi pira duria (50) dege helene.
EXO 36:13 Ani manda bu helowa mo yania helaga bulene wangobi pira duria (50) ngolome wabuwa urunime yania helaga biyagola labolabo biaru mo gimbu bialu timbuni mbiraore hene.
EXO 36:14 Ani buwa labolabo timbuni mbira Balai Anda biago bu dangila dambi hole wabini. Labolabo ogoni nogo meme irinime wabinigo bibahende lamaga halu bearia (11) lebumaga howa wabini.
EXO 36:15 Labolabo bearia (11) uruninaga luni ge magi manda bialu mida haleria (13) wialu aranenaga ge magi manda bialu mida kira dege dege winigo bibahende ogobi dege dege wini.
EXO 36:16 Ani buwa labolabo duria uruni lebumaga howa luni timbuni mbiraore hene. Ani bialu labolabo halu mende waragaria wiyarubi anidagua dege bini.
EXO 36:17 Ani buwa labolabo luni ogoni labonaga lene leneha mo gimbu bialu barobia holenedagua mbirale haleira ale mabubi pira duria (50) labolabo maro biagoria helalu labolabo timbuni mendegonagabi ani dege helene.
EXO 36:18 Ani bu helowa ogoni barobia howa yaniaho helolene wangobi pira duria (50) boronosime wabu wini. Wabiai howa mo gimbubu wiagola labolabo timbuni mbiraore wini.
EXO 36:19 Ani biai howa mani nogo sibi wangabenaga dongone daramabiha guyinigome Balai Anda biago lone dambi dege holenaga mo wini. Ani buwa halu tebone wena timbuni iba tia alenaga dongenemebi dangila dambi dege hene.
EXO 36:20 Anda háinaga ira generu gimbu gimbu bulene ira mini agasiame bini.
EXO 36:21 Anda ira uruni luninaga ge magi manda bialu mida maria mbalapenaga sendimida emene pira waragariani waragaria (66) helo helene.
EXO 36:22 Anda háinaga ira gene uruni maru dindihayagi gimbu bilo manda bialu emene luni ale tigi haga bini. Ira bibahende luni tubagi lolani hondowa ogobi dege degeore tigi haga bini.
EXO 36:23 Anda háinaga ira kira kira dege dege daba hamagamaga buwa daga lamaga halu pira kira (20) mende mende lowa abene unurayaginaga wabini.
EXO 36:24 Ani buwa silibame mbogoyi emene dege dege pira maria (40) anda gene biaru helaga bule wabini. Ani buwa anda gene mbira mbogoyi kiraha helaga buwa mbogoyi mo hongo ho helene.
EXO 36:25 Anda gene maru pira kira (20) anda manda uyurayagi hearubi nde ani dege bini.
EXO 36:26 Ani bialu anda gene pira kira (20) uruni wabu manda mandabu ngelalu anda gene helolene mbogoyi pira maria (40) silibame wabuwa mbogoyi kiraha anda gene mbira helaga bini.
EXO 36:27 Ani buwa anda gene ni paliragohayagi waragaria helalu
EXO 36:28 anda gene kira mende manda tibila gimbu biragoha helene.
EXO 36:29 Anda háinaga gene manda tibila gimbu biragoha kira ogonilabo ho pagupagu bilowa gimbu bima iraga ho helene. Manda tibila gimbu birago bibahendeha ani dege bini.
EXO 36:30 Ani biyagola anda tibihayagi gene halira halu siliba mbogoyi pira mbirani waragaria (16) anda gene dindiha mo wialu mbogoyi kirame anda gene mbira mo hongo ho helaga bini.
EXO 36:31 Ani buwa anda hái libu banga bulenaga ira mini agasia pira mbirani duria (15) dibalu lunioreru pelo mbaralowa wini. Ira luni mbalape uruni aria duria anda hái manda abene unurayagi libu para halu
EXO 36:32 duria mende uyurahayagi libu para halu duria tebone ni paliragohayagi libu para halu bulenaga ani dibu pelo manda bini.
EXO 36:33 Anda hái libu para holenaga ira dibu pelenego dombeni para holenego lunaga anda magi manda buwa anda ibuniore karulape tigi howa pelene.
EXO 36:34 Ani buwa anda hái gene biaru ngolome paraho dambi hene. Mandaha hái para howa yaniaho helonaga ngolome yania holene gi pagida ale mabubi maru wabuwa ira hái libu para hayago yaniaho helaga bini. Anda hái para holene ogoni ngolome paraho dambi hene.
EXO 36:35 Uruni biai howa labolabo baya taraore mbira anda tamuha hobaki holene wabini. Labolabo timbuni ogoni pu tara tarame mo yári biahaga bialu howa nogo sibi irinime pu payini mindibiha guyini hari mindini handalehe wiarumebi tagalitaya aleha guyini wiarumebi daramabiha guyini wiarumebi mo yári bia halu dahuliyali handaleheru pigiya labolabo ogoriani yári bia hene.
EXO 36:36 Ani buwa ira agasia mbira dibuwa anda gene maria wabuwa ngolome paraho dambi hene. Anidagua buwa silibame mbogoyi maria wabuwa ira gene biaru mbogoyi ogoriani helene. Ani helowa ira ogoriani labolabo yani helonaga wangobi ngolome wabuwa ira maria ogoriani ta howa helaga bini.
EXO 36:37 Ani biai howa labolabo timbuni mbira anda ogoninaga panga helole wabini. Panganaga labolabo ogoni pu tara tarame mo yári biahaga bialu nogo sibi irinime pu payini mindibiha guyini hari mindini handalehe wiarumebi tagalitaya aleha guyini wiarumebi daramabiha guyini wiarumebi labolabo wabini wiaruni yári bia hene.
EXO 36:38 Ira agasia mbira dibuwa gene duria wabuwa ngolome paraho dambi howa boronosime mbogoyi duria anda gene uruni helole wabu wini. Ani buwa mbogoyi duria uruniha ira gene duria biaru helowa labolabo gerela holene wangobi maru ira ogoriani helalu buwa labolabo biago ogoriani mo gerelape ho wini.
EXO 37:1 Besalelehanda Habo Nalolene Bi lo winigonaga Mbogoyi mbira ira agasia dibu pelowa mbaraleore winigome wabini. Mbogoyi ogoni luninaga magi sendimida emene handari mbirani pira mbira (110) wialu aranenaga magi sendimida emene pira waragariani waragaria (66) wialu daliganaga magi sendimida emene pira waragariani waragaria (66) dege wialu wabini.
EXO 37:2 Ani bialu ibugua ngolo bayaleore irani do taulo wahene ngarume Mbogoyi ogoni tagira tamuhabi baya hangu paraho dambi hene. Ani buwa bu gimbu bini nene pugu bidadagua ngolo baya uruni ariame mo homane howa paraho mabu bini.
EXO 37:3 Ibugua ani bialu Mbogoyi ogoni iraho yulenenaga gi pagida ale mabubi ira holene gimbuni maria wiadagua mabubi maria ngolome dege wabuwa gene maria dindiha hearu ta howa wabu helene. Gene mende mendehabi mabubi kira labolabo helene.
EXO 37:4 Ani biai howa Mbogoyi iraho yulenenaga ira agasiame ira kira wabu wialu ira ogoni labobi ngolome paraho dambi dege hene.
EXO 37:5 Ogoni biai howa Besalele ibugua ira ogoni labo Mbogoyinaga gene dindiha mbirale mabubi gi pagida ale ngolome wabu helayagoha Mbogoyi iraho yalu polenedagua abe tale buwa mo karulelene.
EXO 37:6 Ani bialu Mbogoyi ogoninaga panga ngolo bayaleore wiagome wabuwa luninaga magi sedimida emene handari mbirani pira (110) wialu aranenaga magi sendimida emene pira waragariani waragaria (66) wilo wabu helene. Ogoriani howa wali agalime mana ko biniru domo waholene wini.
EXO 37:7 Ani buwa ibugua dahuliyali handalehe kira ngolo bayaleorerume baya hangu hamame bo dambu tiga bigi bialu wabini.
EXO 37:8 Ani wabuwa Mbogoyinaga pangani mbirago gi tigaha mendego gi lehayagi lowa talebu helene. Mbirale uruni ti hangu hangu wabia ndo Mbogoyi pangabi dahuliyali handalehebi bibahende mbiraoreha wabu gimbu bigi bini wilo wabini.
EXO 37:9 Dahuliyali handalehe kira ogonilabo libuni handa edene buwa Mbogoyinaga panga daligani wali agalinaga ko biniru domaga laga wiagoria helene. Libunaga babaganeme Mbogoyi biagonaga panga yula dambi hai helo helene.
EXO 37:10 Besalele ibugua tebolo dagia mbira ira agasia dibu pelowa ogonime wabini. Dagia tebolo dagia ogoni luninaga magi sendimida emene pira halirani halira (88) aranenaga sendimida emene pira mariani maria (44) wialu daliganaga sendimida emene pira waragariani waragaria (66) helo wabini.
EXO 37:11 Ani wabu ngelowa ngolo bayaleme paraho dambi halu dagia tebolonaga nene gimbuni wiadagua ngolo mo homane howa paraho dambi hene.
EXO 37:12 Ani buwa dagia tebolo neneni ngolome paraho mabu bulenego tohenaga magi sendimida emene halira helowa ogonime dagia tebolo neneni ngolome para hayago lone paraho dambi halu nene bibahendeni paraho mabu bupe hai hene.
EXO 37:13 Ibugua ani buwa dagia tebolo biago iraho yulenenaga ngolome wabini mabubi gi pagida ale maria wabuwa gene maria kagoha ta howa wabu helene.
EXO 37:14 Ani bialu dagia tebolo iraho yulenenaga mabubi gi pagida ale uruni dagia tebolo gene maria kagoha tigatiga nene ngolome paraho dambi hayago andaneha dege hapara ho helaga bini.
EXO 37:15 Ani buwa ira agasiame ira kira dagia tebolo iraho yulenenaga manda mandabu ngelowa ngolome paraho dambi hene.
EXO 37:16 Ani bialu dagia tebolo ogoriani ngelolenenaga ndisi bebi beledibi iba bebi be marubi waini iba loma binigo odo mulenaga ndisi bebi uruni bibahende ngolome dege Besalelehanda wabiai hene.
EXO 37:17 Besalele ibugua lamu hale wiagane irane ngolo bayaleoreme wabu helene. Ibugua hamame ngolo baya hangu dambu tiga bigi buwa lamu hale wiagane tene baya hangu ngelowa irane ogoriani mo karulaga bini. Ani buwa lamu halenaga irane heagoria dege gebagane helowa lamu hale wabupe haga bini. Ani buwa ibugua ngolome dege balawaya lini dole pabua baradaguabi ale wabuwa lamu hale irane ogoriani wabu gimbu bigi bini.
EXO 37:18 Lamu halenaga irane ogoriani gebagane waragaria wabuwa abene mendeha tebira mendehabi tebira dege lowa wabu helaga bini.
EXO 37:19 Lamu hale gebagane waragaria biarunaga tebira mbira mbirani balawaya ira amononaga lini dole pabua baradaguabi ale ginigene wabu helaga bini.
EXO 37:20 Lamu halenaga iraneni balawaya bayale ira amononaga lini dedaligobi mitangi bialu maria wabu helene.
EXO 37:21 Ani biai howa lamu hale gebagane biaruni andanehayagi balawaya lini dole pabua baradaguabi ale mbira mbira wabuwa helaga bini.
EXO 37:22 Ani bu ngelowa gebaganebi balawayanaga lini dole pabua baradaguabi ale biaru hamame bo ndibulaga bialu mo mbiraore howa wabu gimbu biai hene.
EXO 37:23 Ani biai howa lamu hale iranenaga gebaganeni ira dolene karia wabuwa helaga bini. Ani buwa ira dedago tabolene pero mbira ngolo bayaleoreme wabialu beledi marubi wabini.
EXO 37:24 Ani wabuwa lamu hale iranenaga gebagane maru biaru bibahende wabulenenagabi ngolo genda magi kilogarama pira tebirani maria (34) winigome wabini.
EXO 37:25 Besalelehanda ira agasia mbira dibu pelowa ira hagua nga biaga mini inisenesi lomabu delolene dabu mbira wabini. Dabu ogoni luninaga magi sendimida emene pira mariani duria (45) wialu aranenaga magi sendimida emene pira mariani duria (45) dege wialu daliganaga magi sendimida emene pira dira (90) helo bu helene. Gibuni maria ngagoria nogo bulumaganaga ne gayane handalehe maria ta howa wabu helene.
EXO 37:26 Ani buwa gibuni maria bibahende ngolome para halu ngolome dege mo homane howa dabunaga nene nene wiagoria ndibulo mabu bialu nogo bulumaganaga ne gayane handalehe maria heagobi ngolome dege paraho dambi hai hene.
EXO 37:27 Ani buwa ngolome dege gi pagida ale mabubi kira kira wabuwa abene mende mendeha lowa tale buwa iraho yalu polenenaga gibu kira manda mandabu helene. Gi pagida ale mabubi ogonilabo ngolo homane paraho mabu biyago andaneha hapara helowa dege wabu para hene.
EXO 37:28 Ani buwa ibugua dabu ogoni iraho yulenaga ira agasiame ira kira mo manda manda buwa ngolome paraho dambi ho wini.
EXO 37:29 Besalele ibugua weli mbira baya taraore Anduane Homogo ibuninagaore wiabagi helo odope haga biago wabini. Ani buwa ira hagua ngabilo lomabu delaga inisenesi bayale taraore wabialu padua mbira ngabiore sanda ale wiarume mo biamaga howa dambiyagola ngabi baya taraore wabu wini.
EXO 38:1 Besalele halu biabe biaga agali bu hearu tigua ira agasia mbira dibuwa lomabu delolene dabu mbira wabini. Dabu ogoni gibuni gibuni bibahendeha ge magi manda bialu ogobi dege dege mida kirani sendimida emene pira kira (20) manda bialu wabini. Daliganaga ge magi manda bialu mida mbirani sendimida emene pira tebira (30) halu bilo wabini.
EXO 38:2 Ani buwa nogo bulumaganaga ne gayane handalehe maria ira agasia biagome dege wabuwa gibuni mariani helene. Ani helowa mbirale bulumaganaga ne gayane handalehe biarubi lomabu delolene dabu urunibi bibahende boronosime paraho dambi hai hene.
EXO 38:3 Ani buwa ndisi be marubi ira pungaru hilo yulenaga wabini. Ani bialu nama tabuli ale emene marubi ndisi be marubi pogorubi belediru ira punga hiliyu waholenaga alebi uruni bibahende boronosi degeme wabiai hene.
EXO 38:4 Ani buwa mbirale ira delolene dagia diri dewawi dabu ogoninaga gene maria heagoria helole boronosime dege wabini. Ani buwa ira delolene dagia biago dabunaga gene obeneni bapara hama pialu lina obeneni dege hairi helene.
EXO 38:5 Ani buwa dabu ogoni iraho yulenaga gi pagida ale mabubi maria gene maria heagoha ta howa wabu helene.
EXO 38:6 Ani wabu helowa dabu ogoni iraho yulenenaga ira kira ira agasiame manda manda buwa boronosime paraho dambi howa ngelene.
EXO 38:7 Ani buwa mbirale gi pagida ale mabubi maria taho helayagoha ira biagolabo anda pelowa ngelene. Lomabu delolene dabu ogoni mbogoyi ale dege wabinigoyu tibiniha dege payadaga nahe ngelene.
EXO 38:8 Wali maru Anduane Homogonaga Balai Anda kago harabani biabe biaga berearume boronosi maru Besalele tagu mini. Boronosi uruni wali tinaga iba wa̱yu̱ ale wini. Biabe biaga hearu tigua boronosi ogonime gi geru waya bulene ndisi be mbira wabialu ndisi be ogoninaga wiagane dagiabi boronosi degeme wabu wini.
EXO 38:9 Tigua labolabo bayaleoreru wabuwa Anduane Homogonaga Balai Anda kago pabe bu yanda holenaga bini. Labolabo ogoni unurahayagi aranenaga ge magi manda bialu mida pira mariani maria (44) wabini.
EXO 38:10 Ani buwa gene pira kira (20) boronosime wabu wialu gene uruni helolenenaga mbogoyibi pira kira (20) dege boronosime wabu wini. Ani buwa bubigi homane luni silibame wabiniru gene mbira mbira helearuni bibahende dabaho gimbu bigi bini. Ani buwa labolabo luni banga bini biaruni gerela holenaga ta howa silibame wangobi wabu helaga bini.
EXO 38:11 Anda manda abene uyurahayagibi nde anidagua dege wabu helene.
EXO 38:12 Pabe ni paliragohayagi labolabome aranenaga ge magi manda bialu mida pira kirani kira (22) wialu gene boronosime wabini pira wabialu mbogoyibi pira dege wialu gene uruni helolenenaga diriwi wabu ngelene. Lu bubigi banga bini biarunibi wangobi biarubi silibame dege wabuwa labolabo gerela holenaga wangobi biaruni ta howa helaga bini.
EXO 38:13 Ani bialu anda panga haraba abene ni tagira ibiragohayagi wiagoha helolene labolabo aranenaga ge magi manda bialu mida pira kirani kira (22) dege wini.
EXO 38:14 Labolabome pabe bu yanda ho helolenego aranenaga ge magi manda bialu mida waragariani sendimida emene pira waragaria (60) lowa panga haraba anda pu íbu bulenegoria lene labolaboni tale bu helene. Boronosime mbogoyi wabu ngelayagoria gene manda mandabu wiyago mendehayagi tebira lowa mendehabi tebira dege lowa helene.
EXO 38:16 Pabe buyu mabu bulenaga labolabo bibahende baya taraoreme wabu helene.
EXO 38:17 Gene bibahende boronosime wabiniru helolene mbogoyi boronosi degeme wabini. Labolabo gerela holenaga wangobi wiarubi bubigi homane luni banga binirubi uruni bibahende silibame wabu helene. Gene bibahende nguni daligahayagi siliba degeme paraho dambi hai howa bubigi homane luni banga bulene silibame wabiniru gene mbira mbira helearuni bibahende dabaho gimbu bigi buwa helene.
EXO 38:18 Ani buwa anda panga haraba pu íbu bulenegoria labolabo baya tara tarame wabu helaga bini. Labolabo ogoni pu nogo sibi irinime payini maru mindibiha guyini hari mindini handalehe wiarumebi tagalitaya aleha guyini wiarumebi daramabiha guyini wiarumebi bayuwaore mo yári bia hene. Labolabo ogoni aranenaga ge magi manda bialu mida dira lowa lu daliganaga ge magi manda bialu mida kirani sendimida emene pira kira labolabo maru biarubi helayadagua dege helene.
EXO 38:19 Ani bialu labolabo yaniaho helolene gene mariabi gene helolene mbogoyi mariabi boronosime wabu helene. Ani helowa labolabo gerela holenaga wangobi helearubi bubigi homane luni banga binirubi uruni bibahendeore silibame wabini. Gene bibahende nguni daligahayaginaga silibame paraho dambi hene.
EXO 38:20 Balai Anda biago nguni pume dariba holenaga dindiha gelo holene wabuwa pabe gelo holenenagabi boronosime dege wabu wia dege bini.
EXO 38:21 Tigua Anduane Homogonaga Balai Anda ege to̱le̱ kirani ibunaga bi pira gilibuwi biagolabo wulenaga ala bini biagoha ngolo siliba boronosirubi uruni tigua mo yu ngoai henedaruni bibahende dagalai hene. Mosese ibunime Libaiali hearuhondo lamialu lalu, Ngolobi mbirale uruni bibahende dagalai howa bebani gili bilimu, lene. Tigua dagaleagola loma binigo mo miaga agali Arono igini Idama ibugua hondo haga hene.
EXO 38:22 Yuda hameigini aria Hua aguane Uri henego igini Besalele heago ibugua mbirale Anduane Homogohanda Mosesehondo bibe lalu laminiyago bibahende biaiore hene.
EXO 38:23 Agali mende ibula biabe mandagi biaga mbira Dana hameigini aria Ahisamaga igini Oholiaba ibugua ege to̱le̱ni bage ale podaradagua bialu bi gilibu wiaga howa biabe uruni manda mandabu haga hene. Ibugua agani pume yári tara tara bulenebi nogo sibi irinime pu payini mindibiha guyini hari mindi handalehe wiarubi tagalitaya aleha guyini wiarubi daramabiha guyini wiarubi yári tara tara lebiaga hene.
EXO 38:24 Anduane Homogonaga Balai Anda biago bulenaga wali agalime ngolo yu ibiyaru lomabu wiabagi ho winiru bibahendenaga genda magi manda bialu kilogarama handari dirani pira dirani halira (998) yalu ibiniyane hendene.
EXO 38:25 Tigua siliba dagalo handalu hemiria genda magi manda bialu kilogarama daosini tebirani handari mariani pira tebira (3,430) mo mogo biniyane hendene. Muni siliba uruni agali mali pira kira (20) ho bolangua hene hearu tinaga mini bebani gilibu wigi biyarume muni kina duria ale yu ibugu biyago dagalalu hemiria agali daosini dege handari waragariani tebira handari duriani pira duria (603,550) bibahende ibiniyane hendene.
EXO 38:27 Tigua siliba uruni marume Anduane Homogonaga Balai Anda biagonaga anda gene helolene mbogoyi handari mbira (100) wabini. Mbogoyi mbira mbiranaga siliba genda magi manda mialu kilogarama daosini tebirani handari maria (3,400) wabu wini.
EXO 38:28 Ani bialu siliba maru ibira hene genda magi manda bialu kilogarama pira tebira (30) wini. Ani wiagola ibira hene urunime labolabo yania holenenaga nguni kirabali wangobi helayarubi bubigi homane lu banga binirubi gene damene helearu daligahayagi daba hogimbu bigi bulenebi siliba urunime wabini.
EXO 38:29 Tigua Anduane Homogonaga boronosi wiabagi henego genda magi manda bialu kilogarama daosini kira handari mariani pira kirani duria (2,425) mini.
EXO 38:30 Boronosi urunime Anduane Homogonaga Balai Anda biago haraba pu íbu bulenegoria gene helolene mbogoyi wabini. Ani bialu lomabu delaga dabu biagonibi mbirale diri dewawi helenegobi mbirale tara tara lomabu delaga dabu biagonaga bibahendebi boronosime wabiai hene.
EXO 38:31 Ani bialu Balai Anda pabe bu mabu biyagonaga gene helolene mbogoyi biarubi pabe biago haraba pu íbu bulenegoria gene helolene mbogoyibi boronosime dege wabu helene. Balai Anda biago nguni pume dariba holenaga dindiha gelo boronosime wabuwa pabenaga gelobi boronosime dege wabu wia dege bini.
EXO 39:1 Loma binigo mo miaga agali hearu ti Balai Anda Hobane Loma Bia hene heagoha biabe bialu howa aga karulelonaga wabini. Tigua pu tara tara bayaleoreru nogo sibi irinime payini mindibiha guyini hari mindini handalehe wiarumebi tagalitaya aleha guyini handalehe wiarumebi daramabiha guyini wiarumebi urunime baya hangu yári bia halu aga wabini. Arononaga aga Anduane Homogohanda ogobiore wabibe lalu Mosesehondo lamiyadagua wabini.
EXO 39:2 Tigua loma binigo mo miaga agalinaga aga mini ebodi karulaga wabini. Ani wabuwa aga ogoni lebialu pu ngolo ale bayale wiagomebi nogo sibi irinime payini mindibiha guyini hari mindini handalehe wiarumebi tagalitaya aleha guyini wiarumebi daramabiha guyini wiarumebi wabini.
EXO 39:3 Tigua ngolo wiago hamame balu bo mbalape lowa beba ale ngelene. Ani buwa ngolo emeneore ogoni podaga bialu pu dini emeneme helowa pu maru mindibiha guyini wiarumebi tagalitaya aleha guyini wiarumebi daramabiha guyini wiarumebi uruni heba payamaga halu aga lebulene pu ale helowa agani yári maru lebu helaga bini.
EXO 39:4 Tigua aga mini ebodi pu dini lunime payani paulaki holenedagua kira wabuwa loma binigo mo miaga agalinaga aga karulaga biago baba ndibu lelonaga lebumaga hene.
EXO 39:5 Ani buwa labolabo bayale mbira pu bayaleorerume aga mini ebodi yári tara tara wabiyadagua bialu mo yári bia haga bialu lebigi bini. Labolabo ogoni loma binigo mo miaga agalinaga aga ebodi biago mandibu leneha lebu paraho mabu bini. Ani bialu abale Anduane Homogohanda Mosesehondo bibe lalu lamiyadagua bini.
EXO 39:6 Ani biai howa ege to̱le̱ kira mini kaneliana wiago labo mo yuwa Yagaba igini homberia (12) biarunaga mini ege to̱le̱ o biago laboni bage ale podaradagua bialu podo wigi bini. Ani buwa ege to̱le̱ ogo laboni ngolome mo yári bia hene biagoriani mo wini.
EXO 39:7 Ani buwa aga mini ebodi biagoni pu dini emeneme payinigo payani paulaki hayagoriani Isaraele hameigini homberia (12) mitangi bulenaga ege to̱le̱ kira biago labo paraho dambi hene. Anduane Homogohanda anidagua bibe lalu Mosesehondo lamiyadagua ani bini.
EXO 39:8 Tigua aga emene galuhombeni karulolene ogoni loma binigo mo miaga agali karunaga aga mini ebodi wabiyagobi dege wabini. Aga ogoni pu payini ngolo alemebi pu mindibiha guyini hari mindini handalehe wiarubi pu tagalitaya aleha guyini wiarubi pu daramabiha guyini wiarubi urunime yári bia haga bini.
EXO 39:9 Ani buwa aga biago hanuni paulaki biyagola luninaga magibi aranenaga magibi sendimida emene pira kirani kira (22) dege hene.
EXO 39:10 Ani buwa ege to̱le̱ muni dewame miaga wiaru duguni maria aga ogoriani helaga bini. Duguni mbirago ege to̱le̱ mini lubibi tobasabi ganedebi uruni mbira mbiraha dabaho helaga bini.
EXO 39:11 Ani bialu duguni mendegoria ege to̱le̱ mini emeralabi sabaiabi daimonobi uruni mbira mbiraha dabaho helaga bini.
EXO 39:12 Duguni tebonego ege to̱le̱ mini tegoisibi agadebi amedisibi uruni mbira mbiraha dabaho helaga bini.
EXO 39:13 Ani bialu duguni manego ege to̱le̱ mini berilibi kanelianabi yasabebi mbira mbiraha dabaho helaga biai hene. Ege to̱le̱ uruni mbira mbirago ala ngolome mo yári bia haga buwa mani aga biagoria helaga bini.
EXO 39:14 Ege to̱le̱ homberia (12) uruni mbira mbirani Yagaba igini homberia (12) biarunaga mini bage ale podaradagua bialu podo wigi bini. Isaraele hameiginiru mitangi bialu ani bini.
EXO 39:15 Ani buwa aga ogoni galuhombeni mo karulolenaga ngolo pume hendehope helonaga seni pu aleme wabu helene.
EXO 39:16 Ani buwa ngolome wabini yáribi haleira ale mabubi kira kirabi wabu helene. Ani buwa tigua haleira ale mabubi kira ngolome wabini biagolabo aga galuhombeni biagonaga lene gimbuni kirabalini daligahayagi pongobia hene.
EXO 39:17 Ani buwa ngolome seni pu ale kira wabu helayagonaga ngunini haleira ale mabubi kira ngolome dege wabini ogoriani pongobu mini.
EXO 39:18 Ani bialu seni pu ngolome wabini biago labonaga nguni mende mendehayagi ngolome yári bia hene kira biagoha pongobia halu ngolome mo yári biahe ogoni aga mini ebodi biagonaga pu dini emeneme payinigo payani paulaki hene biagoha barobia hene.
EXO 39:19 Ani buwa tigua ngolome haleira ale mabubi kira mende wabuwa aga galuhombeni karulolene biagonaga lene gimbuni kirabalini dindihayagi aga mini ebodi biagoriani pongobia hene.
EXO 39:20 Ani bialu ogoniale dege haleira ale mabubi kira lone ngolome dege wabuwa nguni aga mini ebodi biago dindiha ndibulaga mandibu biagoria pongobia hene.
EXO 39:21 Ani biai howa pu mindibi hari mindini handalehe mbirame haleira ale mabubi ngolome wabini kira biagolabo aga emene galuhombeni karulolene biagoria pongobu hayagoria pongobia howa aga mini ebodi biagonaga haleira ale mabubi helayagola pongo bumaga haga bini. Ani biyadagome aga galuhombeni karulolene biago mandibu dariba haga biagola aga emene ogonila golo wahabe naheore bayale wiaabo hene. Anidagua bibe lalu Anduane Homogohanda Mosese laminidagua bini.
EXO 39:22 Loma binigo mo miaga agali hearunaga aga mini ebodi biago dindiha karulolenenaga aga mende biagimbu bulene pu nogo sibi irinime payini mindibiha guyini hari mindini handalehe wiarume wabini.
EXO 39:23 Wabuwa loma binigo mo miaga agali kago ibunaga haguane anda pelolenedagua manda buwa hanuni wabuwa ngelene. Ani wabu ngelowa aga lerela timbu holigonaga aga podene mbirame ngunidago paula dai buwa lebini.
EXO 39:24 Ani buwa aga ogoni nguni dindihayagi pu nogo irinime payini mindibiha guyini hari mindini handalehe wiarumebi tagalitaya aleha guyini wiarumebi daramabiha guyini wiarumebi mo yári bia halu ira pomegaranade lini aleru wabu helaga wini. Ani buwa ira pomegaranade lini ale yári bu ngagoria dombeni mbelo emene emeneru ngolome wabiniru nguni ogoriani dege pongo biahaga bima pene. Anduane Homogohanda ani bilimu lalu Mosesehondo laminigodagua bini.
EXO 39:27 Ani bialu Arono ibu igini biarubi tinaga aga giha karulolenebi labolabo emboneni bobu mabu bulene mandabi wabialu tangi haguaneni karulaganegobi wabialu darasi aga bayaleoreme wabuwa bobia dambi holene aga mandibu biradagua nogo sibi irinime pu payini mindibiha guyini hari mindini handalehe wiarumebi tagalitaya aleha guyini wiarumebi daramabiha guyini wiarumebi o biago mo yári bia halu wabini. Anidagua bilimu lalu Anduane Homogohanda Mosesehondo laminigodagua bini.
EXO 39:30 Ani bialu mbirale dombo heda wiradagua ngolome wabuwa ogoriani bi ogo Anduane Homogonaga Loma Biahene Ka lalu gilibu wini.
EXO 39:31 Ani buwa dombo heda bi gilibuwi biago pu payini mindibiha guyini hari mindini handalehe wiarume hende howa loma binigo mo miaga agali biagonaga aga emboneni bobu mabu bini biagoria pongobia hene. Anidagua bibe lalu Anduane Homogohanda Mosesehondo lamiyadagua ani biai hene.
EXO 39:32 Anidagua bialu Balai Andanaga biabe bulene wiaru biai hene. Anduane Homogohanda bilimu lalu Mosesehondo lamiyadagua Isaraelealirume biaiore hene.
EXO 39:33 Ani buwa tigua mbirale uruni Mosese hearia mo yalu pene. Tigua Balai Anda bulene damene bibahendebi anda háinaga labolabo gerela ho wulenenaga wangobi biarubi anda háinaga ira generu gimbu gimbu bulenebi anda hái libu banga bulenagabi anda generubi gene helolene mbogoyirubi
EXO 39:34 Balai Anda dangini nogo sibi wangabe dongone daramabiha guyinime dangila dambi holene wabu wiyagobi wena timbuni iba tia ale biraganaga dongoneme dangila dambi holene wabu wiyagobi yalu ibini. Ani ya bialu labolabo timbuni anda Hobane Loma Bia Heneore hoba yanda hene biagoha gerela holene biagobi mo yalu ibini.
EXO 39:35 Ani bialu Habo Nalolene Bi lo winigonaga Mbogoyi biagobi ogoninaga panga daligani wali agalinaga ko domaga laga biagobi ege to̱le̱ kirabi ira kira Mbogoyi ogoni iraho yulene biagolabobi mo yalu ibini.
EXO 39:36 Ani bialu dagia tebolo biagobi mbirale bibahende dagia ogoriani biabe bulene wiarubi mberedi Ngode Datagaliwabenaga deni dagia tebolo ogoriani wiaga biarubi mo yalu ibini.
EXO 39:37 Ani bialu lamu hale wiagane irane ngolome wabini biago heba lamu hale ogoriani helolene biarubi lamu halerume biabe bulene wiarubi uruniha weli berelolene wiarubi
EXO 39:38 inisenisi lomabu delolene dabu ngolome wabini biagobi mo yu ibini. Ani bialu mbirale Anduane Homogo ibuninagaore wiabagi helonaga odo ha̱i̱ holene weli baya taraore wiagobi ira hagua ngabilo delaga inisenesi biagobi Balai Anda panga harabani gerela haga labolabo wabini biagobi mo yalu íbu dege bini.
EXO 39:39 Ani bialu lomabu delolene dabu boronosime wabini biago heba ira delolene dagia diri dewawi boronosi degeme wabu wiagobi ogoni iraho yulene ira manda mandabu wiyagobi dabu ogoriani biabe bulene damene bibahendebi gi geru waya bulenaga iba hambu wulene ndisi be heba ndisi be wiagane dagia biagobi mo yu íbu dege bini.
EXO 39:40 Tigua Balai Anda biago pabe bu yanda howa gerela holenenaga labolabo lebu wiyagobi generubi gene helolene mbogoyi biarubi pabe harabanaga pangani helolene labolabo wabu wiyagobi pu Balai Anda dangi yulupe kago dindini dariba holene gelo biarubi yalu ibugu bini. Balai Anda biagonaga biabe bulene damenego bibahendeore wabiai howa mo yalu ibini.
EXO 39:41 Loma binigo mo miaga agalime Anda Hobane Loma Biahene biagoha biabe bialu howa aga karulo helonaga wabiyarubi bibahende mo yalu ibini. Aga uruni Aronobi ibu igini biarubi ti mo karulelo lalu lomabu wiabagi ho wiyago mo yalu íbu dege bini.
EXO 39:42 Anidagua bialu Isaraelealihondo Anduane Homogohanda uruni bilimu lalu Mosesehondo bi lamiyadagua biaiore hene.
EXO 39:43 Ani yalu íbu wiai heagola Mosese ibugua baya hangu handalu hearia mbirale bibahende Anduane Homogohanda bibe lalu lamiyagobiore biai hayiyane hendene. Mbirale uruni de handai howa ibugua lalu, Anduane Homogohanda tí biamogo bilo hameledo, lalu Mosesehanda lene.
EXO 40:1 Anduane Homogohanda Mosesehondo lamialu lalu,
EXO 40:2 Bi larogo hale habe. Ege pigane haragonaga horo mbira laragola tígua i̱naga Balai Anda bu helalimu.
EXO 40:3 Anda bu helowa Habo Nalolene Bi lo winigonaga Mbogoyi ege to̱le̱ kirani Bi Pira gilibuwi yu wiaga biago anda ogoniha mo ngelowa labolabome tamuha hái bu yanda halu mo ge howa wilimu.
EXO 40:4 Ani bialu dagia tebolo mbira mo yu anda pu ngelowa mbirale tara tara dagia tebolo ogoriani wiagaru mo wigi bilimu. Ani bialu lamu hale wiagane irane ngagobi lamu hale ngarubi mo yu anda puwa mo tiga bialu wilimu.
EXO 40:5 Ani buwa ira hagua ngabilo inisenesi delolene lomabu delaga dabu ngolome wabu wini biago mo yalu anda puwa Habo Nalolene Bi lo winigonaga Mbogoyi biago ngagoria wanakuihayagi wialu labolabo lebu ngagome Balai Anda harabahayagi panga helo gerela peho wilimu.
EXO 40:6 Lomabu delolene dabu Balai Anda ogoninaga haneni ngelalimu.
EXO 40:7 Ani bialu lomabu delolene dabu kagola Balai Anda kagola hengeneha gi geru waya bulene ndisi be mo ngelalimu. Mo ngelowa ndisi be ogoniha iba hambu berelalimu.
EXO 40:8 Ani buwa Balai Anda kagoha pabe bu mabu buwa ogoninaga panga harabani labolabo timbuni biago gerela peho wilimu.
EXO 40:9 Uruni biai howa mani Balai Anda ogonibi anda ogoniha mbirale ngarubi i̱ninaga loma bia heneore wilo weli tara mbirale wiabagi holenaga odo wiaga biago mo yalu puwa ogonime mbirale ngarunagabi andanibi bibahendeni odope hai haga bilimu. Anidagua beremigola mbirale uruni bibahende i̱ninaga lomabia heneore wulebira.
EXO 40:10 Ani buwa lomabu delolene dabu boronosime wabini ngagobi ogoriani biabe bulenaga wini ngarubi bibahende i̱ninagaore loma bia hene wilo weli ogoni degeme odope hai halimu.
EXO 40:11 Gi geru waya bulenaga iba hambu wiaga ndisi be biagobi be ogoni wiagane dagia biagobi i̱ninaga loma bia hene dege wilo anidagua bilimu.
EXO 40:12 Ani biai howa mani Aronobi ibu iginirubi Balai Anda ogoninaga harabani haru ibuwa ti ilili bialu wayawaya bia holene nga.
EXO 40:13 Wayawaya biai howa Arono ibu loma binigo mo miaganaga aga karulaga ngago mo karula howa ibu i̱naga loma binigo mo miaga howa biabe ogoni bialu helo odo wiaga weli biagome ibunaga haguaneni odo wialu loma biaho helolene nga.
EXO 40:14 Ani bialu mani ibu iginiru kawareni haru halu ibuwa loma binigo mo miaga agalime aga giha bulene ngaru mo karula habe.
EXO 40:15 Ani karula halu igiri uruni ti aba lomabu helaridagua tibi i̱naga loma binigo mo miaga agali howa biabe ogoni bialu helo tinaga haguaneni weli biago odo wiai habe. Í̠na tinaga haguaneni weli odo wiai kegola ti loma binigo mo miagaore haabo holebira, lene.
EXO 40:16 Anduane Homogohanda Mosesehondo bibe lalu lamiyadagua ibugua biaiore hene.
EXO 40:17 Ani binigo Balai Anda mbira Anduane Homogonaga anda biago bini. Anda ogoni binidagoni Isaraele wali agali tini Iyibi dindi howa tagira íbu heane mali mbira puwa mali mendegonaga ege pigane mbira ngabu layagola ege mbira ogoninaga horo mbira dege pigane tehinayagola ani bini.
EXO 40:18 Mosesehanda anda ogoni bialu howa ala dindiha anda hái gene helolene mbogoyi ala wima pene. Ani buwa anda hái gene helowa hái libu banga bulene ira helalu ira gene helaga bini.
EXO 40:19 Ani biai howa Balai Anda ibuni muwa dangilo dambi hene. Ani dangilo dambi howa Balai Anda ogoni kabubu yaga andane winigome lone dangilo dambi hene. O binidagoni Anduane Homogohanda Mosesehondo ani bibe lenedagua bini.
EXO 40:20 Ani buwa ege to̱le̱ mbalape kira Bi Mana Pira gilibuwi biago labo Habo Nalolene Mbogoyi biagoha mo wini. Ani buwa iraho yulene kira Mbogoyi biagoha gi pigida mabubi heagoha mo hana hene. Ani mo hana howa Habo Nalolene Mbogoyi biagonaga panga daligani bini.
EXO 40:21 Ani buwa Mbogoyi biago Balai Anda biyagoha mo ngelowa aga gerelape heagome dogolo a̱i̱ na̱i̱ buwa tamuha handabe nahe geho ngelene. Aga dungu gimbu buwa gerela peho ngelenedagome Mbogoyi biago hoba muwa tamuha ngelene. Ani binidagoni Anduane Homogohanda Mosesehondo ani bibe lenedagua bini.
EXO 40:22 Ani buwa dagia tebolo muwa Balai Anda biago tamuha uyurayagi aga gerelape hayago tagirahayagi mo ngelene.
EXO 40:23 Anduane Homogo ibunime Mosesehondo ani bibe lenedagua dagia tebolo ogoriani mberedi ibunihondo loma bialu minigo mo wini.
EXO 40:24 Ani buwa lamu hale wiagane irane gimbu bini biago muwa Balai Anda tamuha mo yu anda puwa dagia tebolo biago unurayagi ngelowa lamu hale wiagane iranedagoni dagia tebolo biago handadaga howa ngelene.
EXO 40:25 Ani mo ngelowa Mosese ibugua Anduane Homogo deni odagoriani howa lamu hale dagane biaru delene. O delenedagoni Anduane Homogohanda ani delabe lenedagua delene.
EXO 40:26 Ani delowa ibugua inisenesi lomabu delolene dabu ngolome wabini biago Balai Anda tamuha mo yu anda puwa aga luni gerelape hayago tigatiga mo wini.
EXO 40:27 Ani mo ngelowa dabu biagoria ira hagua ngabilo delaga mini iniseneni o biagoria delene. O delenedagoni Anduane Homogohanda Mosesehondo ani delabe lenedagua delene.
EXO 40:28 Ani buwa aga luni biago Balai Anda ubanda tagi bulene panga harabani gerelape hene.
EXO 40:29 Ani buwa aga o gerelape hayadagoniore tigatiga mbirale mbirale Anduane Homogohondo lomabu delolenenaga dabu ogoriani mo wini. Ani mo ngelowa ogoriani mbirale irame dai helo delolene winigobi widi lini do winigobi odagoriani mo delene. Anduane Homogohanda bibe lenedagua ani bini.
EXO 40:30 Ani buwa ibugua gi ge wayawaya bulene ndisi be Balai Anda biagola dabu biagola dombeneha mo ngelowa iba hambu to̱lotagiho ngelene.
EXO 40:31 Ani buwa Mosese ibubi Aronobi Arono iginirubi tinaga gi gebi ogoniha wayawaya biaga wini.
EXO 40:32 Agali uruni ti Balai Anda biago tamuha anda pole howabi lomabu delaga dabu biagoha pole howabi tinaga gi geru ala wayawaya bilimu lalu Anduane Homogohanda ani lenedagua bini.
EXO 40:33 Mosesehanda Balai Anda biagoni bu helowa anda o biagonibi lomabu delolene dabu wiagobi hobanda hole lowa manda manda pabe buyu mabu bini. Ani hobandaho ngelowa pabe ogoni ubanda tagi bulene harabani aga luni mbira gerelape hene. Ani bigi bialu Mosesehanda Balai Andaha biabe bulene winigo biaiore hene.
EXO 40:34 Mosesehanda Balai Anda biagoni biaiore howa bu heleagola nde hari beralibame ibalu Balai Anda biagoni buyi hai hene. Ani biyagola Anduane Homogonaga wá holene de mborerebi agiore loabe tobahegome Balai Anda biagoni to̱lotagi hene.
EXO 40:35 Ogonidagua biyago handayagola Mosese ibu Balai Anda biago tamuha ubanda halu pobe nahe gibioreyagola nape wahene.
EXO 40:36 Ani binigo Isaraele wali agali ti dindi o hemidagoriani haabo howa hari beraliba Balai Anda biagoria wiadali hayago iraga halu poragola dege tibi anda gialo yalu dindi mendeni anda bu hama pugu bialu hene.
EXO 40:37 Hari beraliba biago ibu ema nabi wiagola ti nde ema nabi odagoriani ho palu haga bini.
EXO 40:38 Ani bigi bialu henego Isaraele wali agali ti ibaga bialu anda geleyu palima ibagabu headangi Anduane Homogo ibuni ti heba ko lalu manane walia halu hari beraliba biago horongi Balai Anda biagoria wiape halu mbiraganaga Balai Anda biago yarali howa ogoni tiga tiga ira hungu bialu daho wiaabo halu hene. Ti ani dege bialu howa Anduane Homogohanda dindi tí nguliya lenegoria anda piyagola beraliba biago ereba hene.
LEV 1:1 Anduane Homogo ibuninaga Balai Anda biagoha howa ibugua Mosese olalu íbu lowa lalu,
LEV 1:2 Isaraele wali agaliruhondo ogodagua lamibe. Tí kamiru aria mbirago ibu Anduane Homogohondo nogo lomabu mule ibuleyagua nde ibunaga bulumagayaguabi sibiyaguabi memeyaguabi mbira hangu haru ibalimu, lene.
LEV 1:3 Mosese ibugua Anduane Homogohanda lamibe layadagua lalu, Agali mbirame nogo bulumaga mbira irame dai helo bo lomabu delole lowa haru halu ibiyagua nde bulumaga wangabe habatigiore tingini mo ko nahe dere durubi nabiore kago haru ibulene nga. Mbirali lomabu yalu ibirago ibuhondo Anduane Homogohanda turu helo hame ledayagua nde ibugua loma ogonidagua bu yalu ibulene nga. Ibugua Anduane Homogonaga Balai Anda kago haneni yu pialu
LEV 1:4 bulumaganaga haguaneni gi wialu biragola Anduane Homogohanda ibuhondo miniha dungulo howa ibunaga ko wiyadaru domo wahai holebira.
LEV 1:5 Ani bialu Anduane Homogonaga deni howa agali loma haru ibiyago ibunime bulumaga biago baragola Arono aria loma binigo mo miaga agali karu tigua bulumaga ogoninaga darama Anduane Homogohondo lomabu mulebira. Tigua darama hambu yalu lomabu delaga dabu Balai Anda kago haneni puwa dabu gibuni maria ngagoha odo baamu nana bulebira.
LEV 1:6 Ani bidagola agali ogoni ibugua bulumaga biagonaga dongone bo lagalalu mbirini podobaga bulebira.
LEV 1:7 Ani bialu nogo tini baya hangu halialu gi geru wayawaya biai holene nga. Ani biragola loma binigo mo miaga agali karu tigua lomabu delaga dabu biagoria ira dene hedo delolene nga. Ani delowa ira da timbu kagola bulumaga biagonaga haguanebi abenebi habanebi nogo bo podo paya biyago damene bibahende irani dai halu do ira punga helo delolene nga. Anidagua biragola Anduane Homogohanda loma ogoninaga tumutumu nga bayaleore birago nga halu ibuni miniha turu timbuni howa dungulo holebirago ani bulene nga, lalu Mosesehanda lene.
LEV 1:10 Mbiralime nogo sibi memeru mbirago loma bialu bo delole haru ibiyagua nde sibiyaguabi memeyaguabi ogoni wangabego hondowa dere durubi nabi bayale kago hondowa haru ibulene nga.
LEV 1:11 Ani haru halu ibuwa ibugua sibibi memebi ogoni lomabu delaga dabu kagonaga abene uyurayagi howa ogoriani bolene nga. Ani bope kagola loma binigo mo miaga agali karu tigua sibibi memebi ogoninaga darama hambuwa lomabu delaga dabu kagonaga gibuni maria ngagoha odo baamu nana bulene nga.
LEV 1:12 Ani buwa agali ogoni ibugua sibi biago podowa tini baya hangu haluwa gi geru wayawaya bo wahai howa ngeledagola loma binigo mo miaga kagome lomabu delaga dabuni ira dedagoria sibi haguanebi abenebi habanebi bibahende delai holebira. Loma binigo mo miaga kagome irani dalu do ira punga helo lomabu delolebira. Anidagua biragola Anduane Homogohanda loma ogoninaga tumutumu bayaleore birago nga halu ibuni miniha turu timbuni howa dungulo holebirago ani bulene nga, lalu Mosesehanda lene.
LEV 1:14 Mbiralime ega Anduane Homogohondo lomabu mule minu yalu ibiyagua nde ega malibu ale bedago minu yalu loma binigo mo miaga agali kagohondo mule yalu polene nga.
LEV 1:15 Ani miragola loma binigo mo miaga agali kago ibugua ega biago mani yuwa yu tinditanda laragola ega homolebira. Homaragola haguane pundulo muwa lomabu delaga dabuni ira dedagoha lomabu delolene nga. Ani bialu ibugua ega darama lomabu delaga dabunaga lenelene ngagoha odope hai holebira.
LEV 1:16 Ani buwa ega nema yaga magini kagobi dugualu lomabu delaga dabu ngago abene ni tagira ibiragohayagi be ira punga hilo wiaga ngagoha bape holene nga.
LEV 1:17 Ani bialu ega ibuni loma binigo mo miaga agali kago ibugua babaganeni gi talebu yuwa minu dogaki holene nga. Ani bialu irani dalu do ira punga helo lomabu delolebira. Mana ogonidagua biragola Anduane Homogohanda loma ogoninaga tumutumu bayaleore birago nga halu ibu miniha turu timbuni howa dungulo holebirago ani bulene nga, lalu Mosesehanda lene.
LEV 2:1 Anduane Homogo ibugua Mosesehondo lamialu lalu, Isaraele wali agali karume i̱hondo widi lomabu ngule yalu ibiyagua nde tígua widi andane bu wahowa widi ibuni dambuwa balawa bayaleore ogoni yalu ibalu i̱nihondo lomabu ngulene nga. Balawa ogoniha olibe lininaga weli maru odo wialu ira hagua nga bilo delaga ale inisenesibi maru ogoni biamaga howa
LEV 2:2 Arono aria loma binigo mo miaga agali karu ti karia yalu puwa mulene nga. Ani biragola loma binigo mo miaga agali kago aria mbiragome ibunaga gi balawa biagoha ibira halu balawa emene maru gime yamialu olibe lininaga welibi hagua nga bilo delaga mini inisenesibi heba lomabu delaga dabu ngagoria ira dedagoha delolebira. Balawa emene ogonime nuha dewa henedaruni delai holenedagua emene ogoni dege Anduane Homogohondo lomabu mulebira. Ani loma buwa delaragola Anduane Homogo ibugua widi lomabu deledagonaga tumutumu baya birago nga halu ibugua turu timbuni halu miniha dungulo holebira.
LEV 2:3 Ani buwa balawa maru wirago loma binigo mo miaga agali karu ti nolene nga. Balawa wali agalime Anduane Homogohondo lomabu yalu ibini ogoni wali agali ta nabi nai haga ndo loma binigo mo miaga agali karu tinaga hangu wulebira.
LEV 2:4 Tígua mberedi abeneha hiralu howa ogoni aria maru Anduane Homogohondo lomabu mule lowa hirayagua nde mberedi ogoni yidi nahe howa hirulene nga. Balawa biago hanguha olibe lininaga weli ibira howa mberedi wabuwa ogoni yalu puwa lomabu mulene nga. Mberedi nawabuleyagua nde mbisigedi hangu hiruwa olibe lininaga weli ngagome ha̱i̱ howa lomabu yalu polene nga.
LEV 2:5 Balawa lomabu yalu polenaga parabane ngagoria hirarimiyagua nde balawa bayaleore yidi nahe hiralimu. Balawa ogoni olibe lininaga weli ngago odo biamaga howa hiralimu.
LEV 2:6 Ani buwa balawa ogoni emene budabaga buwa olibe lininaga weli odo wialu Anduane Homogohondo lomabu milimu.
LEV 2:7 Tígua mberedi lomabu mulenaga todobene be timbuni ngagoha hirarimiyagua nde balawa bayaleorebi olibe lininaga weli odo biamaga howa yidi nahe hiralimu.
LEV 2:8 Anidagua bialu hiru yalu Anduane Homogohondo lomabu mule loma binigo mo miaga agali kago mule yalu pilimu. Ani beramigola loma binigo mo miaga agali kago ibugua lomabu delaga dabu kagoria yalu polebira.
LEV 2:9 Ani buwa mani loma binigo mo miaga agali biagome mberedi mbisigediyaguabi ogoninaga budini mbira yalu puwa tomo dewa uruni miradagua mo loma bialu irani dai helo lomabu delaga dabu kagoria delolebira. Ani biragola nga bayaleore howa Anduane Homogohanda turu halu ibuni miniha dungulo holebira.
LEV 2:10 Ani buwa mberedi mbisigediyaguabi maru ngago loma binigo mo miaga agali karu tinaga wulebira. Tígua mberedi mbisigedibi Anduane Homogohondo mule lomabu yalu pirimigo ibira hayagua loma binigo mo miaga agali karu ti nolebira. Agali maru karu ti loma binigo mo miaga ndo heagua tomo ogoni aria mbira ti nolene nawi.
LEV 2:11 Mberedi balawaru mbira Anduane Homogohondo lomabu mulene yalu polenaga hirarimiyagua nde yidiru mone tara mbiranaga ibaneru biamaga howa hirinigo Anduane Homogohondo lomabu delolene nawigo manda bilimu.
LEV 2:12 Uruni tígua widiru tínaga mabu hengedemigoha pigane denegonaga Anduane Homogohondo lomabu mialu yalu eberemingi lomabu milimu. Anigo Anduane Homogo ibugua loma uruni irame dai haragola nga howa turu halu miniha dungulo helo manda buwa irani nadelalimu.
LEV 2:13 Widi lomabu delaramigo bibahendengi ibi howa delalimu. Ibi howa delaramigo irane Anduane Homogo heba habo nalolene bi lo wirimigo mo tene halu anidagua bilimu. Lomabu delalu howa bibahendengi widi heba ibi haabo halimu. Widi bali damenego bibahende ibi naheore howa nadelalimu.
LEV 2:14 Tínaga mabuha widibi balibi pigane denegonaga gandulalu howa Anduane Homogohondo lomabu mule lini uruni maru hiruwa maru dambu gingirulo baga buwa emene halu balawa kagola Anduane Homogonaga yu pilimu.
LEV 2:15 Tígua widi irani dai helonaga ani lomabu delalu howa olibe lininaga weli biamaga halu ira hagua ngabilo delaga inisenesibi daligani wialu delalimu.
LEV 2:16 Tínaga loma ogoni lomabu delaradagua widi ogoni ariabi olibe lininaga welibi inisenesibi emene mbira yamigi bialu irani do dapelo loma binigo mo miaga agali kago ibugua lomabu delolebira. Ogoni tínaga widi gandulowa dambinigo loma bialu Anduane Homogohondo mirimigoni irani do ira punga helonaga ani lomabu delolebira, lene.
LEV 3:1 Anduane Homogo ibugua Mosesehondo Isaraele wali agaliru lamilonaga bi lamialu lalu, Mbiralime Anduane Homogola ho gimbu bulenaga lomabu delolene manda biyagua nde ibunaga nogo bulumaga angibuni wangabeyaguabi mbirago dere durubi mbira nabi tingini bayale habatigi kago hondowa lomabu mulene nga.
LEV 3:2 Ibugua nogo bulumaga biagonaga haguaneni gi wialu Anduane Homogonaga Balai Anda kago haneni bolebira. Ani baragola nogo darama ngago Arono aria loma binigo mo miaga agali karu tigua hambu yalu puwa lomabu delaga dabu kagonaga gibuni maria ngagoha odo baamu nana bulebira.
LEV 3:3 Ani bialu agali o biago ibunime nogo ogoni podalu mbirini maru loma binigo mo miaga agali kago ibugua Anduane Homogohondo lomabu delelo mo mulene nga. Ibugua nogo ogoninaga tinibi habane abenerubi
LEV 3:4 luhabane lilini kira abenebi heba bunibi mulene nga.
LEV 3:5 Ani miragola loma binigo mo miaga agali karu tigua mo yalu puwa lomabu delaragola Anduane Homogo ibugua nga bayaleore birago hondowa ibu turu halu bu miniha dungulo holebira.
LEV 3:6 Agali mbirame nogo sibi memeru angibuni wangabeyaguabi Anduane Homogola ho gimbu bulenaga lomabu mulene manda biyagua nogo sibibi memebi ogoni ibu dere durubi mbira nabigo hondowa bo lomabu mulene nga.
LEV 3:7 Agali mbirame nogo sibi mbira Anduane Homogohondo lomabu mule manda bu heagua nde nogo sibi ogoni Anduane Homogo ibuninaga deni haru halu ibulene nga.
LEV 3:8 Haru íbu helowa ibugua nogo sibi ogoninaga haguaneni gi wialu Anduane Homogonaga Balai Anda kago haneni haru halu puwa bolene nga. Ani biragola loma binigo mo miaga agali kagome nogo sibi darama ngago hambu yalu puwa lomabu delaga dabu kagonaga gibuni maria ngagoha odo baamu nana bulebira.
LEV 3:9 Ani biai howa sibi podowa loma binigo mo miaga agali kagome Anduane Homogonaga lomabu delelo mulene nga. Ibugua sibi abene habanebi bayale damene bu karubi ereneha habane kagobi mulene nga. Erene mbolombolone unura modawenehayagi gaibu dali holene nga. Ani bialu abene gugunibi bu mulene nga.
LEV 3:10 Ani bialu nogo sibi luhabane lilini kirabali heba abene kagobi buni kagobi lomabu mulene nga.
LEV 3:11 Ogoni bibahende loma binigo mo miaga agali kagome mo yalu puwa lomabu delaga dabu kagoria delai holebira.
LEV 3:12 Mbiralime nogo meme mbira lomabu mulene manda biyagua Anduane Homogonaga deni haru halu polene nga.
LEV 3:13 Haru puwa agali biago ibugua meme haguaneni ibunaga gi wialu Anduane Homogonaga Balai Anda kago haneni bolene nga. Bope kagola meme darama ngago loma binigo mo miaga agali kago ibugua hambu yalu puwa lomabu delaga dabu gibuni maria ngagoha odo baamu nana bulebira.
LEV 3:14 Ani bialu agali ogoni ibugua nogo podowa Anduane Homogohondo lomabu miragola loma binigo mo miaga agali kagome Anduane Homogonaga lomabu delaga dabu kagoria lomabu delolebira. Agali biago ibugua nogo
LEV 3:15 luhabane lilini kirabalibi abene habanebi bunibi bibahende lomabu delolene nga.
LEV 3:16 Loma binigo mo miaga agali kago ibugua nogo meme ogoni mo yalu puwa lomabu delaga dabu kagoria irame dai helo lomabu delaragola Anduane Homogohanda turu halu bu miniha dungulo holebira. Nogo meme habane abene damene bibahende Anduane Homogonaga dege nga.
LEV 3:17 Isaraele wali agali tígua nogo habane daramaru nolene nawigo nanalimu. Nanolenego nanalimuore laro. Tíguabi tínaga waneigini aguaneneru mani hama polobadarubi tínaga mana ogoni wia a̱i̱ helonaga ani bilimu. Tígua dindi tara ngaruha pu howabi mana ogoni dege yu tiga biaabo halimu, lalu Anduane Homogohanda lene.
LEV 4:1 Anduane Homogo ibugua Mosesehondo lalu,
LEV 4:2 Isaraele wali agali bu karu ogodagua lamibe. Wali agali mbirame ibu minime ko bero mitangi nabi howa Anduane Homogonaga mana lowini ngago mbira puguayagua ogoni mana ko biyagoni. Anidagua biyadagonaga ibugua ibunaga ko ngago Anduane Homogohanda domo wahelo biagane mana ngago talialu mbirale lomabu mulene nga, lene.
LEV 4:3 Mosesehanda laabo halu lalu, Loma binigo mo miaga agali haguane timbuni kago ibunime mana ko ngago biyagua ibugua hangu binime wali agali bibahende mo ko hai holebira. Anidagua biyadagonaga ibugua nogo bulumaga wangabe dalua mbira ibunaga tingini dere durubi nabi habatigiore kago haru halu puwa ibuninaga ko domo wahelo Anduane Homogohondo loma bialu bo delolene nga.
LEV 4:4 Ibugua bulumaga ogoni haru halu Anduane Homogonaga Balai Anda kagonaga haneni pu helowa nogo biago haguaneni ibunaga gi wialu Anduane Homogonaga deni howa nogo bolebira.
LEV 4:5 Ani bowa loma binigo mo miaga agali haguane timbuni kago ibugua bulumaga biagonaga darama hambu yalu Balai Anda kagoha anda polebira.
LEV 4:6 Yalu puwa ibugua darama biagoha ibunaga gi hondone mbirani wai howa Balai Anda tamuha Hobane Loma Bia Heneore helo hobaki bini labolabo timbu gerela kagoria daramame kahalu tandala ba haragola Anduane Homogo de hondolebira.
LEV 4:7 Ani biai halu hagua nga bilo inisenesi lomabu delaga dabu Anduane Homogonaga deni kagoria polebira. Puwa lomabu delaga dabu ogoninaga gibuni mariani nogo bulumaganaga ne gayane ale maria kago nogo darama yayagome ha̱i̱ holebira. Ani bialu nogo bulumaga bo wiyagonaga darama maru ngaru mo yalu puwa lomabu delaga dabu li tagirani Balai Anda kagoha haneni yalu puwa lomabu delaga dabu kago dindiha odope hai holebira.
LEV 4:8 Ani buwa ibugua nogo bulumaga ogoninaga habane abenebi tinibi
LEV 4:9 luhabane lilini kirabi bunibi bu yai holebira.
LEV 4:10 Ani bialu loma binigo mo miaga agali kagome nogo uruni lomabu delaga dabu kagoria irame dalu do ira punga helo delolebira. Anduane Homogola ho gimbu bulenaga loma bini irani dai helaga ngadagua dege dai helolebira.
LEV 4:11 Anigo nogo ogoninaga dongonebi kuni mbirini ngarubi gi gebi haguanebi nogoni henego bibahende mo yalu
LEV 4:12 balai anda bu karu helalu tagira puwa ira punga hilo yu pu wahaga ngagoria dindi ogoni Anduane Homogonaga deni bayale ngago ogoriani ira bo delowa nogo podene uruni irame dalu do ira punga helo delolebira, lene.
LEV 4:13 Anduane Homogo ibugua Mosesehanda Isaraele wali agali lamilonaga ogodagua lene. Isaraele wali agalime ko bero mitangi nabi howa Anduane Homogonaga mana mbira puguayagua nde tigua mana ko dege biya.
LEV 4:14 Anigo mani howa tigua ko ogoni birimada lo manda biyagua nde nogo bulumaga wangabe dalua mbira haru halu puwa ko domo wahelonaga bo lomabu delolene nga. Tigua nogo ogoni Anduane Homogonaga Balai Anda kagoria haru halu ibulene nga.
LEV 4:15 Ani buwa Anduane Homogonaga deni Isaraele agali haguane karu tigua nogo bulumaga ogoninaga haguaneni gi wialu nogo bolene nga.
LEV 4:16 Ani bo ngagola loma binigo mo miaga agali haguane timbuni kago ibugua bulumaganaga darama Anduane Homogonaga Balai Anda kagoha yalu anda polebira.
LEV 4:17 Yalu puwa ibugua darama biagoha ibunaga gi hondone mbirani wai howa Balai Anda tamuha Hobane Loma Bia Heneore helo hobaki bini labolabo timbu gerela kagoria daramame kahalu tandala ba haragola Anduane Homogo de hondolebira.
LEV 4:18 Ani bialu bulumaganaga darama gi hondoneme wai howa ira hagua ngabilo inisenesi lomabu delaga dabu Anduane Homogonaga deni kagonaga gibuni mariani nogo bulumaganaga ne gayane ale maria wabu helene kago ha̱i̱ holebira. Ani bialu bulumaga biagonaga darama maru ibira harago mo yalu puwa lomabu delaga dabu kago dindiha odope hai holebira.
LEV 4:19 Ani bialu mani nogo ogoninaga habane abenebi kago damene lomabu delaga dabu kagoria lomabu delai holebira.
LEV 4:20 Loma binigo mo miaga haguane kago ibugua bulumaga ogoni ibuninaga ko biyago domo wahelo lomabu bo delayadagua dege delolebira. Anidagua bialu loma binigo mo miaga haguane timbuni kago ibugua wali agalime ko biyago domo wahelonaga loma bialu delolebira.
LEV 4:21 Ani bialu mani nogoni hene damenego bibahende balai anda bu karu helalu mo yalu tagira puwa ibuninaga ko domo wahelo lomabu delaga wiyadagua dege ira bo delowa bulumaga biago irani dai helo lomabu delolebira. Wali agalime bulumaga haru ibiyago tinaga ko ngago domo wahelonaga lomabu bo delole haru ibulebira, lene.
LEV 4:22 Anduane Homogo ibugua Mosesehanda Isaraele wali agali lamilonaga ogodagua lene. Agali haguane mbirame ibu ko bero mitangi nabi howa Anduane Homogonaga bi mana lowini ngago puguayagua nde ibugua mana ko biyagoni.
LEV 4:23 Mani howa ibugua mana ko biruda lo manda biyagua nde nogo meme wangabe mbira dere durubi nabi bayaleore kago lomabu bo delole haru halu ibulene nga.
LEV 4:24 Haru halu ibuwa Anduane Homogonaga deni howa nogo biagonaga haguaneni ibunaga gi wialu nogo bo lomabu delole bagane ngagoria haru halu ibuwa bolene nga. Nogo meme ogoni agali haguane biagome ko biyago domo wahelonaga loma binigo mo miaga agali kagome bo delelo anidagua bulene nga.
LEV 4:25 Ani bo ngagola loma binigo mo miaga agali kagome nogo meme darama ngagoha ibunaga gi hondone mbira hanguni wai howa lomabu delaga dabu kagonaga gibuni mariani nogo ne gayane ale kago daramame ha̱i̱ holene nga. Ani bialu darama maru ibira haragome lomabu delaga dabu ogoninaga dege dindiha odope hai holene nga.
LEV 4:26 Ani bialu nogo habane abene damene ngago lomabu delolebira. Ani bialu nogo maru Anduane Homogola ho gimbu bulenaga bo lomabu delaga mana wiyadagua dege lomabu delolene nga. Anidagua bialu loma binigo mo miaga kago ibugua agali haguane biagonaga ko biyago domo wahelo loma ogonidagua bu delaragola Anduane Homogohanda agali haguane biagonaga ko biyago domo waholebira, lene.
LEV 4:27 Anduane Homogohanda Mosesehondo wali agali lamilonaga bi lamialu lalu, Wali agali mbiragome ko bero mitangi nabi howa Anduane Homogonaga mana lo ngago mbira puguayagua ibuha ko wu holebira.
LEV 4:28 Mani howa ogoni mana ko biruda lo manda birangi ibunaga ko ogoni biyadago domo wahelo ibugua nogo meme angibuni mbira dere durubi nabi bayaleore kago haru halu bo lomabu mule haru ibulebira.
LEV 4:29 Haru ibuwa ko domo wahelo nogo loma bialu irame dai helo bo delagane ngagoria íbu helowa ibunaga gi nogo meme haguaneni wialu nogo ogoni bolebira.
LEV 4:30 Ani baragola loma binigo mo miaga agali kago ibugua meme darama gi hondone mbirame wai howa lomabu delaga dabu kagonaga gibuni mariani nogo bulumaganaga ne gayane ale maria wabu heledagoria ha̱i̱ holebira. Nogo meme darama maru ibira haragome lomabu delaga dabu kago dindiha odope hai holebira.
LEV 4:31 Ani bialu nogo meme ogoninaga habane abeneru lomabu delaga ngagoria lomabu delolebira. Loma binigo mo miaga agali kagome nogo maru ngago Anduane Homogola ho gimbu bulenaga lomabu delagadagua dege delolebira. Ibugua nogo habane abeneru dabuni lomabu delaragola Anduane Homogohanda nga bayaleore birago nga howa turu halu dungulo holebira. Anidagua bialu loma binigo mo miaga agali kago ibugua wali agalime ko biyagonaga loma bo delaragola ko binidagoni Anduane Homogohanda domo waholebira.
LEV 4:32 Wali agali mbirame ibunaga ko domo wahelonaga nogo sibi mbira bo lomabu mulene manda biyagua nde ibugua nogo sibi angibuni mbira igini nawini dere durubi nabi kago haru ibulene nga.
LEV 4:33 Ani haru ibuwa ibugua sibi haguaneni ibunaga gi wialu irani dai helo bo lomabu delole baga ngagoria howa bolene nga.
LEV 4:34 Bo ngagola loma binigo mo miaga agali kago ibugua sibi darama gi hondone mbirani ha̱i̱ howa lomabu delaga dabu kagonaga gibuni mariani nogo bulumaganaga ne gayane ale kagoria ha̱i̱ holebira. Darama maru ibira haragome lomabu delaga dabu kagonaga dindihayagi odope hai holebira.
LEV 4:35 Ani bialu nogo habane abeneru lomabu delaga dabu ngagoria lomabu delolebira. Loma binigo mo miaga agali kago ibugua Anduane Homogola ho gimbu bulenaga lomabu delaga mana ngadagua bo delolebira. Ibugua habane abeneru lomabu delaga dabu kagoria loma marubi heba Anduane Homogohondo lomabu mialu irame dalu do ira punga helo lomabu delolene nga. Anidagua bialu loma binigo mo miaga agali kagome wali agali ogonime ko biyagonaga loma bo delaragola ibugua ko ogoni binidagoni Anduane Homogohanda domo waholebira, lene.
LEV 5:1 Anduane Homogo ibugua Mosesehondo Isaraele wali agaliru lamilonaga bi lamialu lalu, Agali mbira kagohondo mendealime ko biyago hendeneyaguabi bi layago hale heneyaguabi uruni godini latagi hole íbu laragola ibugua latagi hole napeyagua nde agali ogoni ibu mana puguayagome ibuha ko ngelo holebira.
LEV 5:2 Agali mbiragome mini pu taraho howa mbirale ko nga lalu lowinigo ela hayagua nde ibubi Anduane Homogonaga deni ko henego ka. Mana ogonidagua bialu nogo tara tarabi ema bialu piaga bedarubi uruni aria mbirago Anduane Homogohanda ko dodohe lenego ogoni homo ngaria mbiralime de nahende ibalu hengedayagua nde agali biago ibubi dodohe ho ka. Ibugua ogoni biyago mitangibu dai biyagua nde ibuha ko para hayadane hondolebira.
LEV 5:3 Agali mbira ibu mitangi nabi howa wali agali mendenaga mbirale ko dodohe lene ngaru ela hayagua nde ibubi Anduane Homogonaga deni dodohe ka. Agali ogoni ibu mani mitangibu dai bialu karia nde mana ko birudane handa walia holebira.
LEV 5:4 Mbiralime ibu mini baya hangu haru ha nabi howa bi bame abale latagi halu heneneore laro lalu gi do larogoni layagua nde ibugua Anduane Homogonaga deni koore biragoni. Mani howa o biagome mana ko biruda lo mitangi biyagua nde ibuha ko ngelo ka.
LEV 5:5 Mbiralime ibuha ko ogonibi ngelo ko lo mitangi bu heagua nde ko ogoni ngelo dongeho ha nabi latagi hai holene nga.
LEV 5:6 Ani bialu ibugua ko ogoni biyagonaga nogo sibi memeyaguabi angibuni mbira loma bialu bo delole haru halu ibulene nga. Ani haru ibiragola loma binigo mo miaga agali kago ibugua agali o biagome ko biyago domo wahelonaga bo lomabu delaragola Anduane Homogohanda ko biyadagoni domo waholebira.
LEV 5:7 Agali mbirago ibu nogo meme sibiru bo lomabu mulenaga muni nawiyagua nde ibu ega malibu ale bedaru aria kira minu yalu Anduane Homogohanda ibunaga ko biyago domo wahelo lomabu mule yalu ibulene nga. Anidagua biragola ega mendego ko domo wahelonaga loma bialu bo delalu mendegobi nde loma bialu irani dai helo delolene nga.
LEV 5:8 Ani bialu ega kira ogonilabo yalu ibuwa loma binigo mo miaga kagohondo miragola ibugua ega mendego agali ogoni ibunaga ko ngago domo wahelo lomabu mulebira. Ani bulenaga loma binigo mo miaga kagome ega haguane pugulani hondowa dege ma minu ndelalu bolebira.
LEV 5:9 Ani bialu eganaga darama emene mbira lomabu delaga dabu ngagoria tandala bahalu maru dabu andaneha odope hai holebira. Ko binigo domo wahelonaga ega ogoni loma bialu bo mulebira.
LEV 5:10 Mani loma binigo mo miaga agali kago ibugua ega mende biagobi irani dai helonaga loma bialu bo delolebira. Ibugua manani bulene winigo ngadagua talialu bulebira. Ani bialu agali biagome ko biyago domo wahelonaga loma binigo mo miaga agali ibugua bo lomabu delaragola ko biyadagoni Anduane Homogohanda domo waholebira.
LEV 5:11 Ainde agali mbira ibu ega yolo bulene muni nakarulapeyagua nde wahalu balawa widinaga dambini bayaleore ngago aria kilogarama mbira ale lomabu mule yalu ibulene nga. Balawa ogoni ko domo wahelonaga ngago widi lomabu delaga ale ndogo manda bialu tígua olibe lini welibi ira hagua nga bilo delaga inisenesibi mo biamaga nahe balawa dege lomabu yalu ibulene nga.
LEV 5:12 Ani yalu ibiragola loma binigo mo miaga agali kago ibugua balawa biago lomabu miradagua nuha henenego emene gi mbira yamialu delolebira. Ani bialu loma binigo mo miaga agali kago ibugua loma maru ngaru heba biamaga howa lomabu delolebira. Balawa ogoni ko domo wahelonaga lomabu delolebira.
LEV 5:13 Anidagua bialu loma binigo mo miaga agali kago ibugua ko domo wahelonaga lomabu delaga dabu ngagoria lomabu delaragola Anduane Homogohanda agali biagome ko biyadagoni domo waholebira. Ani bialu balawa maru ibira harago loma binigo mo miaga agali karu tinaga wiagadagua dege wulebira, lene.
LEV 5:14 Anduane Homogohanda Isaraele wali agaliru Mosesehanda lamilo bi ogodagua lamini.
LEV 5:15 Mbiralime Anduane Homogohondo lomabu mulene winigo mitangi nabi howa mo waho hayagua agali ogonidagua birago ibuha ko ngelo kagoni. Ani ngago mitangi bialu agali ogoni ibugua ibuha ko ngagonaga Anduane Homogohondo dano hangaradagua bialu ibuhondo lomabu mulene nga. Ibugua nogo sibi wangabe bayaleore mbira dere durubi nabi kago yolo ogodaguame bibehe ledago hondowa Anduane Homogohondo lomabu mule loma binigo mo miaga agali biago karia haru ibulene nga.
LEV 5:16 Ani bialu agali ogoni ibugua abale Anduane Homogohondo mule lowa lahondo hayagonaga marubi mo tago howa yu ibulene nga. Ibugua duria agima mulene winiyagua nde duria dano hayadago mialu waragane tago howa mulene nga. Ibugua mbirale uruni loma binigo mo miaga agali kagohondo mulene nga. Ani miragola loma binigo mo miaga agali kago ibugua yamialu nogo sibi ogoni agali biagome ko biyadagoni domo wahelonaga loma bialu bo delolebira. Ani biragola Anduane Homogohanda agali biagonaga ko ngago domo waholebira.
LEV 5:17 Mbiralime ko bero mitangi nabi howa Anduane Homogonaga mana ngago puguayagua nde Anduane Homogonaga deni ibuha ko ngelo ka lolebira.
LEV 5:18 Ani manda bialu ibugua mbirale biako henedago mo tiga bialu ko ngago domo wahelo mbirale loma bialu bo mule loma binigo mo miaga agali kago karia yalu ibulene nga. Agali biago ibugua nogo sibiyaguabi memeyaguabi wangabe bayaleore habatigihe dere durubi mbira nabi kago ibu yolo ogodagua mibehe kagobi hondowa loma binigo mo miaga agali kago mule haru ibulene nga. Haru ibiragola loma binigo mo miaga agali biago ibugua nogo sibi haru ibirago hondowa agali ogoninaga ko domo wahelo loma bialu bo delolebira. Ani biragola Anduane Homogohanda agali biagome ko biyadagoni domo waholebira.
LEV 5:19 Nogo sibi ogoni agali biagome Anduane Homogonaga deni mana ko binigonaga loma bialu bo delolene nga, lene.
LEV 6:1 Anduane Homogo ibugua Mosesehondo Isaraele wali agali lamilonaga lamialu lalu,
LEV 6:2 Agali mbirame ibunaga nenege mbiranaga mbirale mbira handayaho howa mani mbirale ogoninaga anduane biagohondo yadai nabiyagua nde ibuha ko wulebira. Mendealinaga mbirale mo page biyaguabi mo hondo howa mbirale ibu mo yayaguabi
LEV 6:3 mbirale mbira ibira halu porago hondowa mani ibugua ke̱ howa lalu, Heneneore larogoni i̱ de nahendeore, layaguabi nde ibugua ogoni koore biragoni.
LEV 6:4 Mbirali mana ogonibi biaga kago ibu ko bira. Anidagua biyagua ibugua page biagadagua bialubi ke̱ howa mo hondo halubi mo yayago ibugua anduane biago yadai bulene nga. Ibugua ko biyadago mo tiga bialu loma bialu bo delarangi mbirale mo page binidaru heba yadai biai holebira. Ibugua duria mo yiniyagua nde waragane tago howa yadai bulene nga.
LEV 6:6 Ibugua ko biyadago mo tiga bialu ibunaga ko domo wahelonaga nogo sibi memeyaguabi wangabe mbira Anduane Homogohondo loma bialu bo mule loma binigo mo miaga agali karia haru ibulene nga. Agali ogoni ibugua nogo sibi memeyaguabi dere durubi mbira nabi bayale kago ibu yolo ogodaguame bibehe ledago hondowa loma binigo mo miaga agali kagohondo mulene nga.
LEV 6:7 Ani miragola loma binigo mo miaga agali biago ibugua agali biagonaga ko domo wahelonaga nogo biago loma bialu bo delaragola Anduane Homogohanda agali biagome ko biyadagoni domo waholebira, lene.
LEV 6:8 Anduane Homogohanda Mosesehondo lamialu lalu,
LEV 6:9 Aronobi ibu igini karubi tihondo mbirale loma bialu irame dai helo loma bialu bo delolenenaga mana lamibe. Tigua loma ngaru lomabu delaga dabu ngagoria delaragola dalu kane dege mbiraga halu gao lolebira. Anidagua bilonaga ira hundia nabi dalu egabi lelolene nga.
LEV 6:10 Ani dai kagola mani loma binigo mo miaga agali ibugua ibunaga darasibi aga luni biagimbu bulenebi labolabo baya tara mbirame wabinigo mo karulalu puwa lomabu delayago dai kagola ira pungabi nogo bene dabuni ngarubi bibahende dabu kago andane dindiha hilope holebira.
LEV 6:11 Ani biai howa ibugua aga bu hayago golo ngelowa mende karula aribia halu ira punga nogo bene biaru hilo yalu balai anda bu karu helalu tagira puwa dindi mbira mebia nahene i̱naga deni bayale ngagoria haealo ngelalimu.
LEV 6:12 Anigo ira lomabu delaga dabuni dedago ibu hundia nabilo daho wiaabo helolene nga. Gao laragola loma binigo mo miaga agali kago ibugua lomabu delaga dabu biagoria ira maru delalu egerebaginaga lomaru irame dai helo lomabu delolebira. Nogo habane abeneru Anduane Homogola ho gimbu bulenaga lomabu delolene nga.
LEV 6:13 Lomabu delaga dabu ngagoria ira dene dedago hundia nabilo daho wiaabo helalimu, laya lene.
LEV 6:14 Anduane Homogohanda Mosese lamialu lalu, Isaraele wali agalihondo ogodagua lamibe. Widi dambini balawa lomabu delolenenaga mana ogodagua bulene nga. Arono aria loma binigo mo miaga agali karume Anduane Homogo i̱nihondo balawa lomabu delole howa lomabu delaga dabu ngagoria kawareni yalu ibulene nga.
LEV 6:15 Loma binigo mo miaga agali kago ibugua balawa gi mbirame yamialu welibi heba biamaga hene ngagobi ira hagua ngabilo delaga inisenesibi heba lomabu delaga dabu ngagoria lomabu delolebira. Balawa emene ani lomabu delolobadagoni i̱nihondo lomabu ngule yalu ibirago bibahende delaradagua emene ogoni dege delolebira. Ani delaragola Anduane Homogo i̱nime hondowa turu halu miniha dungulo holebero.
LEV 6:16 Balawa maru ibira hene ngaru loma binigo mo miaga agali karu ti nolebira. Tigua balawa ogoni yidi nahe hiruwa yalu tagira nape i̱naga Balai Anda kagoha howa dege nolene nga.
LEV 6:17 Tigua balawa lomabu yu ibini uruni yidi nahe hiruwa nolene nga. Balawa lomabu delalu ibira hene ogoni loma binigo mo miaga agali karu tininagaore ngeledo. Balawa yidi nahe hirulene ngago i̱ninaga loma bia heneore ngagoni. Ogonibi dege ko binigo domo wahelonaga lomabi ko berolo mitangi nabi howa binigonaga lomabi i̱ninaga dege loma bia heneore ngagoni.
LEV 6:18 Mani balawa yidi nahe ogoni ale hirarago Arono aguanene mani holebiraru tini hangumeore nolene wulebira. Isaraele wali agalirume i̱hondo mbirale lomabu yalu ibiraru aria loma binigo mo miaga karunagaore ngeledogo tigua naabo holene wulebira. Anigo wali agali karumebi mbirale ngarumebi mbirale loma bia hene ngago ela hayagua ogoni ibu loma bia henegonaga hongome bolebira, lene.
LEV 6:19 Anduane Homogohanda Mosesehondo bi ogodagua lamialu lalu,
LEV 6:20 Loma binigo mo miaga agali Arono aria pigane dabo helarangi tigua i̱nihondo loma mbira ala bu ngulene ngago ogo. Tigua widi lomabu delolenenaga balawa maru yuwa egerebagibi alendo ni paliragolabi i̱nihondo lomabu delolene nga.
LEV 6:21 Balawa ogoni olibe lini weli biamaga howa parabane ngagoria hirulene nga. Ani hiruwa mani dedagola gaibubaga buwa Anduane Homogo i̱nihondo lomabu ngulene nga. Ani ngiragola i̱na nga howa bayaleoredago hondowa turu halu i̱naga miniha dungulo holebero.
LEV 6:22 Maniorebi Arono ariarume loma binigo mo miaga agali Haguane Timbuni howa tigua i̱nihondo loma ogonidagua dege bu ngiaabo holene wulebira. Ani lomabu ngialu irame dai helo delarago bibahende dalu do ira punga helo delolene nga.
LEV 6:23 Loma binigo mo miaga agali tinime widi lomabu yalu ibirago aria tini nolene nawi. Irani dai helo lomabu delai holene nga, lene.
LEV 6:24 Anduane Homogohanda Mosese lamialu lalu,
LEV 6:25 Aronobi ibu igini loma binigo mo miaga agali karubi tihondo ko domo wahelonaga lomabu delolene mana ogodagua bulene nga, lalu lamibe. Ko domo wahelonaga nogo haru halu ibuwa i̱naga deni howa bolene nga. Nogo irame dai helo lomabu delolenaga bagane ngagoria dege bolene nga. Loma ogoni i̱ninaga wiabagi heneore wulebira.
LEV 6:26 Loma binigo mo miaga agali loma ogoni bo delalu kago ibunime nogo ogoninaga mbirini ngago i̱naga Balai Anda pabe bu yaanda hene ngago tamuhayagi howa dege nai holebira.
LEV 6:27 Anigo agali mbira loma binigo mo miaga ndo kagobi mbirale tara ngaru ariabi mbiragome i̱naga loma wiabagi hene ogoni ela hayagua nde ogoni ibubi loma bia henegonaga hongome bolebira. Ai nogo ogoninaga darama emene mbira tinaga agani wai hayagua nde aga ogoni darama para hayadagoni i̱naga loma bia hene ngagoria ogoniha dege wayawaya bolene nga.
LEV 6:28 Loma binigo mo miaga kagome nogo ogoni aria maru todobene be dindime wabini ngagoha dawayagua nde mani be ogoni pambulo waholene nga. Ai todobene be boronosime wabini ngagoha dawayagua nde be ogoni ibame wayawaya baya hangu bulene nga.
LEV 6:29 Loma binigo mo miaga agali hameigini igiri agali hangume nogo ogoni nolene nga. Wali agali maru ta nabi nolene nawigo irane loma ogoni i̱ninaga wiabagi heneore ngago marume nolene nawiore.
LEV 6:30 Anigo loma binigo mo miaga agali kago ibugua wali agalinaga ko domo wahelonaga nogo bowa ogoninaga darama maru hambu yalu i̱naga Balai Anda kagoha biabe bulene ngago bulenaga yalu ibiyagua nde loma binigo mo miaga agali karu tigua nogo ogoninaga mbirini nolene nawi. Tigua nogo ogoni irani lomabu delalu do ira punga helolene nga, lalu Anduane Homogohanda lene.
LEV 7:1 Anduane Homogo ibugua Mosesehondo lamialu lalu, Isaraele wali agali karuhondo ogodagua lamibe. Wali agali mbirame ko berolo mitangi nabi howa binigo mo tiga bialu lomabu mulene ngagonaga wiabagi heneore nga. Loma ogoninaga mana ngago ogo.
LEV 7:2 Tígua nogo sibi loma bialu bo delole haru halu ibuwa sibi irame dai helo delole bagane ngagoria howa bolene nga. Tígua sibi ogoni balu darama lomabu delaga dabu ngagonaga gibuni maria ngagoha odo ba amunana bilimu.
LEV 7:3 Ani bialu sibi ogoninaga habane abene kago damene bibahende lomabu delaga dabuni lomabu wulene nga. Ani bialu ere gabone kagobi abene guguni nuni karubi bibahendeore podo lomabu wilimu.
LEV 7:4 Ani bialu luhabane lilini kirabali heba abene kagobi bunibi bibahende lomabu delole dugu yulene nga.
LEV 7:5 Yalu puwa loma binigo mo miaga agali kago ibugua lomabu delaga dabuni Anduane Homogohondo lomabu mialu delai holebira. Nogo sibi ogoni mbiralime mana ko berolo mitangi nabi howa biyagua dano hangaradagua bialu lomabu mulenenaga bo delolebira.
LEV 7:6 Loma binigo mo miaga karunaga hameigini igiri agalibi karu tigua dege nogo ogoni maru podalu nolene karulape. Nogo sibi ogoni Anduane Homogonagaore lomabu wiabagi hene winigo manda bialu tigua Balai Anda pabe bu yaanda hene ngago tamuhayagi howa nai holene wulebira.
LEV 7:7 Ko binigo domo wahelonaga lomabu mulene manabi ko berolo mitangi nabi howa binigonaga mo tiga bialu lomabu mulene manabi kira ogoni labonaga mana mbiraore hangu nga. Ani ngagola loma binigo mo miaga agali biabe ogoni bialu kago ibunime nogo sibi ogoninaga mbirini maru podalu nolene karulape.
LEV 7:8 Ani bialu loma irani dai helonaga nogo bo delalu nogo dongone ibira hene ngago loma binigo mo miaga agali biabe bialu kago ibuninaga wulebira.
LEV 7:9 Anidagua dege widi dambininaga balawa parabaneni hiriniyaguabi abeneha todobene behabi hiriniyaguabi uruni aria ngago loma binigo mo miaga agali biabe bialu kago ibuni degeme nolene karulape.
LEV 7:10 Ani bialu balawa hira nabinigo olibe lininaga weli heba mo biamaga henebi nahenebi lomabu mini ngago loma binigo mo miaga agali Arono aria karu ti bibahendeme nolene wulebira. Loma binigo mo miaga agali bibahende karu ti balawa uruni ogobi degedege talebu taho yulene nga, lalu Anduane Homogohanda Mosesehondo lene.
LEV 7:11 Anduane Homogohanda Mosesehondo lalu, Isaraele wali agalihondo ogodagua labe. Tí Anduane Homogola ho gimbu bulenaga ibuhondo loma ogodagua bu milimu.
LEV 7:12 Agali mbira ibu Anduane Homogohondo ka̱i̱ lalu ho gimbu bulenaga lomabu delole heagua nde nogo mbira mberedi yidi nahe hirinibi heba lomabu mulene nga. Ibugua balawa olibe lininaga weli heba biamaga howa mberedi hirini ngagobi mbisigedi maru hirini olibe lininaga welime ha̱i̱ hene ngagobi balawa olibe lininaga weli heba biamaga heneme mberedi emene mi̱li̱mo̱lo̱ wabu hirini ngarubi nde uruni yidi nahe dege lomabu mulene ngadagua mulene karulape.
LEV 7:13 Anduane Homogola ho gimbu bulenaga lomabu mialu howa mberedi yidihe marubi biamaga howa lomabu mulene nga.
LEV 7:14 Ani bialu ibugua mberedi uruni aria mbira mbira Anduane Homogohondo lomabu mulene nga. Mberedi uruni loma binigo mo miaga agali nogo darama lomabu delaga dabu ngagoria dindiha odope hai haga kagonaga wulebira.
LEV 7:15 Ibugua Anduane Homogola ho gimbu bulenaga nogo bo lomabu mirago maru ibira hene ngago horo ogoningiore nai holene nga. Horo mendengi nole podo wulene nawiore.
LEV 7:16 Agali mbirame Anduane Homogohondo bi lo winidagua bialu ibula ho gimbu bulenaga nogo loma bialu bo delole heaguabi ibunime bo mua biragobiore bo mule heaguabi loma ogoni alenaga nogo bo delarangi mbirini maru nalu maru ibira harago horo mendengi nolenebi karulape dege.
LEV 7:17 Anigo ai horo kiru nalu howa horo tebonengibi wia dege biyagua wahalu irame dai helo iraha bape halu delalimu.
LEV 7:18 Horo tebonengibi nogo ogoni nalu ha dege biyagua nde Anduane Homogohanda agali ogoninaga loma ogoni nayamulebira. Ani nayami howa ibugua loma ogonidagua binigo ibunaga deni dodohe ko ngubiore nga manda bialu agali horo tebonengi nogo ogoni nalu kagohondo ibuha ko ngelo ka lolene wulebira.
LEV 7:19 Anduane Homogola ho gimbu bulenaga lomabu delole yalu ibiragonaga nogo mbirini aria mbirago Ngode Datagaliwabenaga deni ko ngagome ela hayagua nde tigua loma ogoni nolene nawigo nanalimu. Wahalu irame dai helo iraha bape halu delai halimu. Wali agali Ngode Datagaliwabenaga deni tiha ko mbira para nahe kagome ibula ho gimbu bulenaga bo lomabu mini ogoninaga mbirini ngago ibuni dege nolene karulape nga.
LEV 7:20 Anigo mbirali ibu bayale ndo Ngode Datagaliwabe deni ko howa loma bini nogo ogoni nayagua nde ogoni ibu Ngode Datagaliwabenaga wali agali bu karu aria ndo ibu ko taraore helolebira.
LEV 7:21 Agali mbira ibugua mbirale Ngode Datagaliwabenaga deni ko hene ngaru ela heneyaguabi ema bialu piaga ko hene ngaru ela heneyaguabi wali agali ko bini karu ela heneyaguabi urunidagua bu howa ibugua loma ogoni Anduane Homogohondo bo minigonaga ngago nayagua nde ibu Anduane Homogonaga wali agali bu karu aria ndo ka, lalu Anduane Homogohanda lene.
LEV 7:22 Anduane Homogohanda Mosesehondo bi ogo lamialu lalu,
LEV 7:23 Isaraele wali agali bu karuhondo ogodagua lamibe. Tígua nogo sibi bulumaga memebi bu karunaga habane damenego nolene nawiore.
LEV 7:24 Nogo gabua karume bulumaga mbira bo wahenebi minana homagadagua homayaguabi ogoninaga habane nolene nawigo nanalimu. Anigo habaneme biabe mende ale bulene ngago bule podo yarimiyagua nde karulape dege.
LEV 7:25 Agali mbirame nogo bulumaga mbira Anduane Homogohondo bo lomabu delenego aria habane mbirago nayagua agali ogoni ibu Ngode Datagaliwabenaga wali agali karu aria ndogo ti heba mandagi holene nawi.
LEV 7:26 Isaraele wali agali lene kamiru tí dindi taraha pu hemiyaguabi nogo egaru darama heba nolene nawigo nanalimuore laro.
LEV 7:27 Mbiralime bi ogoni mo wahalu nogo egaru darama heba nayagua ogoni ibu Ngode Datagaliwabenaga wali agali bu karu aria ndo holebira, lalu Anduane Homogohanda lene.
LEV 7:28 Anduane Homogohanda Mosesehondo lalu,
LEV 7:29 Isaraele wali agalihondo ogodagua lamibe. Mbiralime Anduane Homogola ho gimbu bulenaga nogo loma bialu bo delole haru halu ibiyagua nde ibugua Anduane Homogohondo nogo kuni ogo alenelaore mule lowa manda bu yalu ibulene nga.
LEV 7:30 Agali ogoni ibuni gime nogo ogo aleore mule lalu lo wiyago lomabu delole habane abenerubi galukuni mbirinibi lomabu yalu ibuwa mulene nga. Ani yalu ibiragola loma binigo mo miaga agali kago ibugua Anduane Homogohondo ogodagua lomabu mulebira. Nogo galukuninaga mbirini biago Anduane Homogonaga deni gi dogolowa wigiwaga lalu holebira.
LEV 7:31 Ani bialu habene abene yayaru lomabu delalu galukuni mbirini yayago loma binigo mo miaga agali Arono aria karu tini nolebira.
LEV 7:32 Anduane Homogola ho gimbu bulenaga nogo ogoninaga ge tigahayagi loma binigo mo miaga agali kago ibu nelo burulo mulene nga.
LEV 7:33 Loma binigo mo miaga agali Arono igini kago ogoni ibugua nogo biagonaga habane abene daramaru lomabu delalu hayago nogo ge tigahayagi ogoni ibunaga wulebira.
LEV 7:34 Anduane Homogo ibunime nogo biagonaga galukunibi ge tigahayaginaga burulene biagobi ti Isaraele wali agalime mini biago yamialu loma binigo mo miaga agali Arono aria karu mo mulebira. Anidagua dege manibi wia a̱i̱ halu nogo puguki ogonilabo loma binigo mo miaga agalinaga lene wiaabo holebira.
LEV 7:35 Wali agali tígua nogo galukunibi ge burulene biagobi ogonilabo lomabu mirimigo Anduane Homogo ibuninaga dege holebira. Anduane Homogo ibunime Aronobi ibu iginirubi loma binigo mo miaga helo dabo helayangi howa lalu nogo puguki ogonilabo tinaga wulebira lene wiyagoni.
LEV 7:36 Horo ogoningi howa Anduane Homogohanda Isaraele wali agaliruhondo lamialu nogo galukunibi ge burulene biagobi ogonilabo bo lomabu mialu loma binigo mo miaga agali kago milimu lenego nga. Ani bialu mana ogoni mani wia a̱i̱ helo talialu bialu halimu, lene.
LEV 7:37 Bi uruni loma biniru bibahendeore irani daiore helo lomabu delolenenaga mana ngagobi widi aria lomabu delolenenaga mana ngagobi ko domo wahelonaga lomabu delolene mana ngagobi mbirali ko bero lo mitangi nabi howa binigo dano hangaradagua bilo lomabu delolene mana ngagobinaga lo nga. Ani bialu loma binigo mo miaga agali helonaga loma biaho helolenenaga manabi Anduane Homogola ho gimbu bulenaga lomabu delolene manabi uruninaga lo nga.
LEV 7:38 Bi mana uruni Isaraele wali agali ti dindi ko wali agali nahagabi iba dalu naibagabi wiagoha heangi Anduane Homogohanda Hari Sainai neneni howa Mosesehondo laminigo nga. Anduane Homogo ibunime Isaraele wali agali tigua ibuhondo loma uruniale bo mule heagola ibugua bi mana uruni lamigi bialu hene.
LEV 8:1 Anduane Homogo ibugua Mosesehondo lalu,
LEV 8:2 Aronobi ibu igini karubi i̱naga Balai Anda kago haneni haru ibuwa helabe. Loma binigo mo miaga agalime aga karulagane biarubi tigua biabe ogoni bialu helo dabo helaga weli biagobi mo yalu wali agalime ko binigo domo wahelonaga nogo bulumaga wangabe mbira loma bialu bo delole haru halu nogo sibi wangabe kirabi heba haru halu mberedi yidi nahe hirini mbasigedi nu mbira heba uruni bibahende i̱naga Balai Anda kago haneni yalu ibalimu.
LEV 8:3 Ani bialu mani wali agali bibahende i̱naga Balai Anda haneni íbu ngoai hadaba lalu lamilimu, lene.
LEV 8:4 Anduane Homogohanda bi ogoni layago hale halu Mosese ibugua wali agali bibahende Balai Anda haneni mo ngoaiho hene.
LEV 8:5 Ani ngoaiho heagola Mosese ibugua tihondo lamialu lalu, Mbirale i̱na áyu buleberogoni Anduane Homogo ibunime bibe lalu langiyadagua bulebero, lene.
LEV 8:6 Ani lalu Mosesehanda Aronobi ibu igini biarubi wali agalinaga deni haru íbu helowa ti ilili biagane mana winidagua bialu ibame wayawaya bia hene.
LEV 8:7 Ani biai howa ibugua Arononaga aga giha bulene biago ala mo karula halu aga mende luni biagimbu bulene biadambi helalu mandibu biradagua aga mbira bo bia dambi ho mabu bia hene. Ani bialu Mosesehanda aga tebone daligahayagi buha mbirahabi biadambi haga biago mini ebodi winigo Arono mo karula hene. Ani karula howa ebodinaga mandibu ale mo yaribia howa ngelenego obeneni mandibu wia howa aga biago mo ndibu lelene.
LEV 8:8 Ani bialu aga emene mbira Arononaga galuhombeni mo karula howa aga emene nu ale ogoni wiagoha ege to̱le̱ kira mini Urimu Tumimula Anduane Homogonaga hame hale haga biagolabo nu ale ogoniha hana hene.
LEV 8:9 Ani bialu labolabo emene luni mbira Arononaga emboneni bobu mabu bia hene. Ani buwa labolabo bo bu mabu bini biago wanakuini mbirale ngolome wabini dombo heda wiradagua mo wia halu agali ogoni ibu Anduane Homogonaga Loma Biahene ka lalu gilibu wini. Anduane Homogohanda bibe lalu lamiyadagua Mosesehanda biai hene.
LEV 8:10 Ani biai halu mani Mosese ibugua mbirale Anduane Homogo ibunagaore wiabagi helo weli odo wiaga winigo mo yalu puwa Anduane Homogonaga Balai Anda heagobi mbirale anda ogoniha bibahende wiaru odoba hene. Anidagua biyadagonime Balai Andabi mbirale uruniha wiarubi bibahende Anduane Homogo ibuninaga wiabagi heneore wini.
LEV 8:11 Ani bialu lomabu delaga dabu wiagobi dabu ogoriani wiaga wiarubi waya bulenenaga iba hambu wiaga ndisi bebi ibunaga wiagane dagia wiagobi weli biagome kahalu dege dege tandalaba haga bini. Anidagua biyadagome mbirale uruni Anduane Homogo ibuninaga loma bia howa wiabagi hai helene.
LEV 8:12 Ani biai howa weli biagome Arononaga emboneni emene mbira odo wia halu bini. Anidagua biyadagome Arono ibu Anduane Homogonaga loma binigo mo miaga agaliore hene.
LEV 8:13 Mani Mosesehanda Arono igini bu hearu haru ibuwa aga giha bulene wiaru ti mo karula hai halu labolabo luni mandibu biradagua bobu mabu bia hene. Ani bialu tinaga haguaneni tangi emene ale karula haga bini. Anduane Homogohanda anidagua bibe lalu Mosese lamiyadagua Mosesehanda hale halu bigi bini.
LEV 8:14 Mosese ibugua uruni biai howa nogo bulumaga wangabe mbira wali agalime ko binigo domo wahelonaga loma bialu bo delole haru halu ibini. Haru íbu helowa Aronobi ibu igini biarubi tigua bulumaga haguaneni gi wiai hene.
LEV 8:15 Ani biai heagola Mosesehanda bulumaga biago balu darama maru hambu yalu puwa gi hondoneme daramaha wai howa lomabu delaga dabu wiagonaga gibuni mariani nogo bulumaganaga ne gayane ale hearu nogo darama biagome ha̱i̱ hene. Anidagua biyadagome lomabu delaga dabu ogoni Anduane Homogonaga deni ko mbira para nahe bayaleore ngelene. Mani darama maru wiagome lomabu delaga dabu biagonaga dindiha odope hai hene. Anidagua biyadagome dabu odagoni Anduane Homogonaga wiabagi heneore wini.
LEV 8:16 Ani bialu Mosese ibugua nogo bulumaga biagonaga habane abene buni heagobi luhabane lilini kirabalibi bibahende dabu biagoria lomabu delai hayagola dalu do ira punga halu do be hene.
LEV 8:17 Ani bialu nogo bulumaga biagonaga podo paya bini maru ibira hene dongonebi mbirinibi tini wiarubi bibahende balai anda bu hearu tagirahayagi yalu pene. Yalu tagira puwa tagirani ira bo delowa nogoni hene damene wiago ogoriani delai hayagola do tauladaga halu ira punga hene. Anduane Homogo ibunime anidagua bibe lalu lamiyadagua bini.
LEV 8:18 Ani biai halu mani Mosese ibu nogo sibi wangabe kira tigua haru íbu helayago aria mende heago haru ibini. Sibi ogoni loma bialu irani dai helo haru ibini. Ani haru ibalu Aronobi ibu igini biarubi tigua sibi biago haguaneni gi wiai hene.
LEV 8:19 Ani wiyagola Mosesehanda sibi biago bowa daramame lomabu delaga dabu wiagonaga gibuni maria wiagoha odo ba amu nana biai hene.
LEV 8:20 Ibugua sibinaga darama biago odo wahalu nogo podowa tinibi baya hangu halialu ge kirabi baya hangu wayawaya biai hene. Ani biai howa uruni bibahende lomabu delaga dabu biagoria lomabu delayagola dalu do ira punga halu do be hene. Anduane Homogohanda bibe lalu lamiyadagua ani bini. Sibi o loma bialu bo delayadagoni irani dai helayagonaga Anduane Homogohanda loma ogoninaga nga baya taraore biyago nga howa ibu turu halu miniha dungulo hene.
LEV 8:22 Ani bialu Mosesehanda nogo sibi wangabe mende ala tigua haru íbu helayagobi haru ibini. Nogo sibi ogonime loma binigo mo miaga agali helo dabo helolenenaga loma bialu bo delole Aronobi ibu igini biarubi tigua sibi ogoninaga haguaneni gi wiai hene.
LEV 8:23 Ani biyagola Mosesehanda sibi biago bowa darama wiago emene mbira yamuwa Arononaga gi tigahayagi hale teneha ha̱i̱ halu gi tiganaga hondone angibiyanegobi ha̱i̱ halu ge tiganaga hondone angibiyanegobi ha̱i̱ dege hene.
LEV 8:24 Ani biai halu mani Arono igini biarunaga gi tigahayagi hale teneha gi tiga hondone angibiyane kagobi ge tigaha hondone angibiyane kagobi bibahende sibi darama biarume ha̱i̱ hene. Ani bialu darama maru ibira hene wiago lomabu delaga dabu wiagonaga gibuni maria wiagoha odo ba amu nana bini.
LEV 8:25 Ani biai halu mani Mosese ibugua sibi biagonaga habane abene damenego bibahende podo yai hene. Nogo sibi eregabone tohe heagobi tiniha nuni habane abene damene hearubi buni heagobi luhabane lilini heba abene hearubi ge tigahayaginaga burulenebi bibahende podo wiai hene.
LEV 8:26 Ani bialu Mosese ibugua mbasigedi nuha mberedi yidi nahe hirini Anduane Homogohondo lomabu mini heneago aria mbirabi balawa olibe lininaga weli heba biamaga howa hirini mberedi heneago aria mbirabi mbisigedi mbirabi uruni tagu yini. Uruni bibahende yalu sibi biagonaga habane abene damene hearubi ge burulene tigahayaginaga wiago uruni bibahende wiagoriani mberedi mbisigedi biarume wiadambi helene.
LEV 8:27 Ani bialu Mosese ibugua mbirale uruni bibahende Aronobi ibu iginirubi tinaga giha mo ya hayagola tigua tomo uruni mo yuwa Anduane Homogohondo gi dogolowa wigiwaga lalu mo loma bialu hene.
LEV 8:28 Ani bialu mani tomo yu hayaru Mosesehanda yamialu sibi maru wiyaruni heba lomabu delaga dabu biagoria loma irame dai holene winigo mo paga howa irame dalu do tauladaga halu ira punga hai helene. Loma binigo mo miaga agali dabo helalu loma ogoni delayagonaga nga bayale taraore biyago nga howa Anduane Homogo ibugua turu halu miniha dungulo hene.
LEV 8:29 Mosese ibugua sibi biagonaga galukuni biago gime yuwa Anduane Homogonaga deni gi dogolowa wigiwaga lalu hene. Sibinaga galukuni biago loma binigo mo miaga agali helonaga dabo helalu lomabu mini biagonaga Mosese ibuni sibi ogoni nolene karulape wini. Anduane Homogohanda bibe lalu lamiyadagua Mosesehanda biai hene.
LEV 8:30 Ani buwa Mosesehanda loma binigo mo miaga agali helo dabo helaganaga weli biagobi nogo sibi biagonaga darama dabuni odo hai hene wiagobi mo yini. Mo yalu puwa ibugua Aronobi ibu igini biarubi tinaga agani tandala bahaga bini. Mosesehanda ogonidagua bialu Aronobi ibu igini biarubi Anduane Homogonaga loma biahene helalu tinaga aga biarubi bibahende Anduane Homogonaga wiabagi heneore wini.
LEV 8:31 Ani biai howa Mosesehanda Aronobi ibu igini biarubi tihondo lamialu lalu, Ai sibi mbirini ngaru mo yalu Anduane Homogonaga Balai Anda hane ngagoria puwa todobene beha dawalimu. Ogoni dedagola mberedi mbasigedi nuha hono ngaru heba nalimu. Basigedi nu ogoniha mberedibi mbisigedibi loma binigo mo miaga agali helonaga lomabu mini biagoha hono wini.
LEV 8:32 Tígua nogo sibi biagonaga mbirinibi mberedi mbisigedi uruni heba nalu nabe manga biyagua nde wahalu irani dai helo delalimu.
LEV 8:33 Ani bialu tígua horo karu Anduane Homogonaga Balai Anda hane kagoria haabo halimu. Horo karu hangu howa tí loma binigo mo miaga agali howa biabe bulenaga mana bulene ngaru biai howa tagira pole hondo halimu.
LEV 8:34 Anduane Homogo ibunime tínaga ko birimiru domo wahelonaga ogonidagua bilimu layadagua ina áyu ogoni biai haramagoni.
LEV 8:35 Horombe mbiragabi Anduane Homogonaga Balai Anda harabani horo karu ogoni piai helo ani biraabo halimu. Ani bialu Anduane Homogo ibunime tíhondo bilimu lalu langiyaruni biai halimu. Anduane Homogohanda i̱hondo ogodagua laya, Tígua ibunaga bi larago mo waho kamiria tíni homolene wuligo de hondo halimu, laya lene.
LEV 8:36 Anduane Homogohanda bi uruni Moseseha howa Aronobi ibu igini biarubi tihondo bulene nga layaruni layadagua tigua hale halu biai hene.
LEV 9:1 Horo karu piai hayagola Aronobi ibu igini biarubi loma binigo mo miaga agali helonaga biabe bialu hayaruni biai hene. Ai horo halini hayagola Mosesehanda, Aronobi ibu igini biarubi Isaraele wali agalirubi bibahende íbu ngoai hadaba, lene.
LEV 9:2 Ti íbu ngoaiho hai heagola Mosesehanda Aronohondo lamialu lalu, Nogo bulumaga dalua wangabebi nogo sibi wangabebi mbira dere durubi nabi bayaleore kago handa handa buwa haru halu ibabe. Haru ibuwa Anduane Homogonaga deni ko binigo domo wahelonaga bulumaga bo lomabu delalu sibibi irani dai helo bo lomabu delolenaga haru ibabe.
LEV 9:3 Ani bialu ko binigo domo wahelonaga nogo meme wangabe mbira lomabu delole haru halu ibalimu lalu Isaraele wali agali lamibe. Ani bialu nogo bulumaga igini mali mbira hangu hene kagobi sibi igini mali mbira hangu hene kagobi haru halu loma buwa irani dai helo bo delole haru ibalimu lalu lamibe. Nogo uruni bayale dere durubi nabi kago hondowa haru halu ibalimu lalu lamibe.
LEV 9:4 Ani bialu wali agali tígua nogo bulumaga wangabebi sibi wangabebi Anduane Homogola ho gimbu bulenaga loma bialu bo delole haru halu ibalimu lalu lamibe. Tígua nogo kira ogoni heba widi dambininaga balawa olibe lininaga weli heba biamaga howa lomabu delole yalu ibalimu lalu lamibe. Ani bulene ngago áyu ogoningiore Anduane Homogo ibuni tí kamigoria tíninaga deni hapani holebirago tígua tínaga loma uruni lomabu delalu holene nga, lene.
LEV 9:5 Ani laya handala Aronobi wali agali bu hearubi tigua Mosesehanda yalu ibalimu layaru mo puwa Anduane Homogo mitangi bialu lotu lole ibunaga Balai Anda heagoria íbu ngoai ho hene.
LEV 9:6 Ani íbu ngoai ho heagola Mosesehanda tihondo lamialu lalu, Anduane Homogonaga wá taraore tí kamigoria hadali holebirago tí de handalimulonaga Anduane Homogo ibugua ani íbu ngoai hadaba laya, lene.
LEV 9:7 Ani lowa Mosesehanda Aronohondo lamialu lalu, Í̠na lomabu delaga dabu ngagoria puwa í̠na ko biriru domo wahelonaga loma bialu bo delalu loma mende irani dai helo lomabu delagadagua bo delabe. Loma kira ogonibi mendego wali agalinaga ko biniru domo wahelonagabi loma bialu bo delolene nga. Ani bialu wali agali tigua lomabu mule yalu ibirarume Anduane Homogohanda layadagua tininaga ko biyadaru domo wahelo lomabu delabe, lene.
LEV 9:8 Ani laya handala Arono ibugua ibunime ko biniru domo wahelonaga nogo bulumaga wangabe dalua biago lomabu delaga dabuni bope hene.
LEV 9:9 Ani bope hayagola ibu igini biarume bulumaga biagonaga darama hambu miyagola ibugua darama biago gi hondoneni wai howa lomabu delaga dabu heagonaga gibuni mariani bulumaganaga ne gayane ale heago ha̱i̱ hene. Ani bialu darama maru wiago mo yalu puwa lomabu delaga dabu biagonaga dindiha odope hai hene.
LEV 9:10 Ani bialu mani Aronohanda nogo biagonaga habane abene hearubi luhabane lilini kirabalibi buni abenebi heba bibahende podo yalu puwa irame dalu do ira punga helo lomabu delaga dabuni lomabu delene. Anduane Homogo ibunime anidagua bibe lalu Mosesehondo lamiyadagua bini.
LEV 9:11 Ani bialu nogo podene maru wiarubi dongonebi bibahende balai anda bu hearu pabe tagirahayagi mo yalu puwa irame dai helo delene.
LEV 9:12 Arono ibugua uruni biai halu ibuninaga sibi wangabe biago balu irani dai helo lomabu delole bene. Ani bayagola Arono igini biaru tigua nogo bayagonaga darama hambu miyagola ibugua yalu puwa lomabu delaga dabu biagonaga gibuni maria wiagoha odo ba amu nana bini.
LEV 9:13 Ani bialu ibu igini biarume nogo haguanebi podene bibahendebi ibuhondo miai hayagola ibugua lomabu delaga dabuni irame dai helo delene.
LEV 9:14 Ani delowa ibugua nogo tini baya hangu halialu wayawaya bo wahai halu ge kirabi wayawaya bo wahai howa bibahende daligani mo dambi howa lomabu delaga dabuni delayagola irame dalu do ira punga halu do amolaiore hene.
LEV 9:15 Ani biai howa mani Arono ibugua wali agali tinaga loma yu ibiyaru yamialu Anduane Homogohondo lomabu migi bini. Wali agalime ko biyago domo wahelonaga lomabu bo delole nogo meme haru ibiyago yamini. Ani yamialu Arono ibugua ala bulumaga wangabe ibuninaga ko biniru domo wahelonaga lomabu bo delayadagua dege meme ogoni wali agalinaga bo lomabu delene.
LEV 9:16 Ani buwa Arono ibugua loma irame dai helo delolene winidagua wali agalinaga loma yalu ibiyaru lomabu delene.
LEV 9:17 Ani delalu ibugua widi dambinigonaga balawa lomabu delole yalu ibiyaru lomabu delaga winidagua delaga bini. Mana winidagua loma mende egerebaginaga ala delenego delowa ibugua widinaga balawa emene mbira gime mo yuwa irame dai helo lomabu delaga bini.
LEV 9:18 Ani bialu mani Arono ibugua wali agalime nogo bulumaga sibi wangaberu Anduane Homogola ho gimbu bulenaga lomabu delole haru ibiyaru yamigi bialu bene. Ani bayagola ibu igini biaru tigua nogo kira ogoni labonaga darama wiago hambu miyagola ibugua mo yalu puwa lomabu delaga dabu heagonaga gibuni maria wiagoha odo ba amu nana bini.
LEV 9:19 Ani bialu Arono ibugua nogo biago labonaga eregabone tohe wiagobi abene guguni bunibi luhabane lilinibi podo wiai hene.
LEV 9:20 Mbirale uruni damene nogo kirabalinaga galukunini mo dambi hai howa lomabu delaga dabu wiagoria mo yalu pene. Ani bialu habane abene podo yayago damene bibahende lomabu delaga dabuni delai hene.
LEV 9:21 Ani buwa nogo bulumaga sibi biagobi kirabalinaga galukunila ge tigahayagi burulene mbirala podo yuwa Mosesehanda bibe lalu lamiyadagua Anduane Homogonaga deni gime yuwa wigiwaga lalu mini.
LEV 9:22 Ani bialu Arono ibugua loma uruni bibahende Anduane Homogohondo lomabu miai howa lomabu delaga dabu biagoria howa ibunaga gi kirabali wali agali heagoha dogola amu halu lalu, Anduane Homogohanda tí mo bayale helo, lowa ibu lomabu delaga dabu biagoria howa dalipe hene.
LEV 9:23 Ani bialu Mosese Aronobi libu haru Anduane Homogonaga Balai Anda biagoha anda pene. Anda puwa tagira ibalu howa libugua wali agalihondo Anduane Homogohanda tí mo bayale helo lalu hebiore Anduane Homogonaga wá taraore hapani hayagola wali agali bibahende bu hearume de handai hene.
LEV 9:24 Ani bialu abaleore aube tobane buwa Anduane Homogohanda hari daligaha howa ira timbuni hungu bialu dalipe helowa lomabu delaga dabu biagoria mbirale lomabu wiago damene bibahendeore dai helene. Anidagua biyago wali agali bu hearume de hondowa tigua turu timbuni halu ku lowa bi dalimu lalu dindini bulu palene.
LEV 10:1 Horo ogoningi Arono igini kirali Nadaba Abihulame ira hagua ngabilo lomabu delaga inisenesi wiago libuninaga parabane ale wiago mo yalu puwa ogoriani delaga bialu hene. Libugua ira denebi inisenesibi parabane aleni mo ngelowa Anduane Homogonaga lomabu yalu pugu bialu hene. Ani biyagola Anduane Homogo ibugua mana ogonidagua bilibu lalu mbira nalenego libugua biyago ibunaga ndoyane handalu ibu turu nahe hene.
LEV 10:2 Ani biyagola Anduane Homogohanda ibuha howa libu hearia ira abaleore bape hayagola ira biagome igiri biagolabo dalu Anduane Homogonaga deni howa do homelene.
LEV 10:3 Ani biyagola Mosesehanda Aronohondo lalu, Bamba Anduane Homogohanda ogodagua laya. I̱naga biabe biaga howa i̱ni kogoria kaware ibiraru tigua i̱ habane nabulene ale ndo i̱ Anduane Homogoore kogo manda bialu ibulene nga. Tigua anidagua biyagua nde i̱na i̱ninaga hongo holene timbuni gibiore ngogobi wá taraore holene ngogobi wali agalihondo mo walia holebero, laya, lene. Ani layagola Arono ibugua hale howa bi mbira ladai nabi hene.
LEV 10:4 Ani buwa Mosesehanda Arono aba hamene heyogone Usiele igini kirali Misaele Elesabanala heago ibilo olene. Ibiyagola Mosesehanda libuhondo lamialu lalu, Libu hamenenaga tingini o ngago mo ibalu Anduane Homogonaga Balai Anda kago yu wahalu wali agalinaga balai anda bu kago tagirahayagi yalu pilibu, lene.
LEV 10:5 Ani layago hale halu libugua agali biagolabonaga tingini mo puwa Mosesehanda bilibu lalu lamiyadagua balai anda bu hearu yu wahalu tagiraha yalu pene. Ani buwa libugua homene biago labonaga aga golo wa nahe aga karuleaore aga heba yalu pene.
LEV 10:6 Ani biyagola Mosesehanda Aronobi ibu igini Eleasa Idamalabi tihondo lalu, Tígua agali kirali homayagonaga dara howa biaga ale nabi wahalu tínaga mandariru pere nabi ha ndo pere biaabo halu agaru minu lere nale dara ho nahalimu. Tígua dara ho howa biaga ngago mbira birimiyagua nde Anduane Homogohanda tíhondo keba timbuni halu tí homalimulo bo wahalu ina Isaraele wali agali kamaru bibahendehondobi keba hai dege holebirago ani nabilimu. Isaraele wali agali tínaga damene maru karu tigua dege Anduane Homogo ibuni ira hedo bape halu agali kira bo heda hayagolabo dara halu helo. Tíni dara nahalimu.
LEV 10:7 I̱na tí Anduane Homogo ibunagaore habagi halimulonaga weli oda wiaga biagome tíni odo wialu helarugo ai ibunagaore loma bini kamigoni. Anigo Balai Anda o kago wahalu tagira nape anda ogoha haabo halimu, lene. Tigua Mosesehanda bi ogoni layago hale howa ti tagira nape tamuha haabo hene.
LEV 10:8 Anduane Homogohanda Arono lamialu lalu,
LEV 10:9 Í̠nibi í̠ igini karubi tígua waini ibabi mbiabi nalu i̱naga Balai Anda o kagoha anda polene nawigo napilimu. Anda pirimiyagua nde homoleberemigo manda bilimu. Tínaga igini aguanenebi mani hama polobadaru tiguabi nde mana ogoni dege talialu haabo holene wulebira.
LEV 10:10 Tígua i̱naga Balai Anda kagoha biabe bialu howa mbirale bibahende i̱naga ogoore ngagoni wali agalinaga ogoore ngagoni lalu minime mo tale buleberemi. Ani bialu i̱naga deni mbirale ngaru ko bayale lalu tale bulene nga.
LEV 10:11 Ani bialu i̱naga bi mana Mosesehondo lamirugo damene bibahende tígua Isaraele wali agali karu baya hangu lawai halimu, lene.
LEV 10:12 Mosesehanda Aronobi ibu igini kirali Eleasa Idamalabi ti tebiralihondo lamialu lalu, Tígua widi dambini balawa Anduane Homogohondo lomabu minigo maru ibiraho ngaru mo yuwa mberedi yidi nahe wabilimu. Balawa ogoni Anduane Homogo ibuninagaore wiabagi ho ngagoni. Anigo ai tígua mberedi wabuwa lomabu delaga dabu ngagoria kaware biruwa nalimu.
LEV 10:13 Tí Anduane Homogonaga Balai Anda kagoha pabe bu yaanda hene tamuhayagi howa nalimu. Wali agalime widi Anduane Homogohondo lomabu minigo ogoni tínibi tí iginibi tínaga leneore wiaa̱i̱ holebirago nalimu. Anidagua bulene nga, lalu Anduane Homogohanda i̱hondo abale langiya.
LEV 10:14 Tínibi tínaga waneiginirubi tígua nogo galukunibi ge tiganaga ge burulenebi Anduane Homogonaga deni howa gime yuwa wigiwaga lenego ogoni tínaga ngago nalimu. Anduane Homogonaga deni dindi mebia nahene daba bagi hene mbira ngane hendedemigoria nogo mbirini lomabu mini uruni yu puwa nalimu. Mbirini uruni Anduane Homogola ho gimbu bulenaga Isaraele wali agalime loma binigo mo miaga agali tí kamirubi tí waneiginirubi tí nalimulonaga talebu wini nga.
LEV 10:15 Anduane Homogohanda lenedagua wali agalime nogo bulumagaru sibirunaga galukunibi ge tigahayaginaga burulenebi habane abene guguni nuni karubi lomabu ngirago yamialu Anduane Homogonaga deni gime yuwa wigiwaga lalu halimu. Anidagua biai howa habane abene podo yarimigo irani lomabu delalu galukunibi ge burulene biagobi tíni nole mo yalimu. Anduane Homogo ibunime nogo puguni kira ogonilabo tíbi tí aguanene mani holobadarubi tínaga wiaa̱i̱ holebira lalu laya, lene.
LEV 10:16 Mani howa Mosesehanda hale halu lalu, Nogo meme ko biniru domo wahelonaga bo lomabu delolene biago agua biyabe, layagola tigua ladai bialu lalu, Abale irani lomabu delai harima, lene. Ani ladai biyagola Mosese ibugua Eleasa Idamalahondo keba howa lalu,
LEV 10:17 Ai ko biniru domo wahelonaga nogo meme loma bialu bene biago tígua Anduane Homogonaga Balai Anda kagoha nolene ngago nanarimigo irane agibe. Loma ogoni Anduane Homogo ibunime wali agalinaga ko ngago domo wahelonaga loma bo delene biago tí mo ngiyagoni ndobe.
LEV 10:18 Nogo meme ogoninaga darama Balai Anda biagoha hobane loma biahene kagoha i̱na bialu halimu lalu langirudagua nabi nogo meme darama yalu anda nape howabi nolenego tamu hobane ogoniha howa nolene ngagobi nane dege harimiyago irane agibe, lene.
LEV 10:19 Ani layagola Aronohanda Mosesehondo ladai bialu lalu, Hale harene. Áyu ogoni wali agalime tinaga ko ngaru domo wahelonaga lomabi irani dai helonaga lomabi Anduane Homogohondo lomabu miyagoni. Ani birugoni bilowa gendabi ogoni i̱ha anda ibiyago aginagadabe. Iname nogo áyu bo miyagonaga mbirini nedamale nde Anduane Homogohanda turu ho kaledabe, lene.
LEV 10:20 Aronohanda bi ani layago hale howa Mosese ibugua bi ogoni karulapeda lo manda bialu ibunaga miniha dungulo hene.
LEV 11:1 Anduane Homogohanda Mosese Aronola lamialu lalu,
LEV 11:2 Isaraele wali agali bu karuhondo ogodagua lamilibu. Ema bialu dindini piaga damene tí nolene ngago ogo. Nogo tinaga gi ge giba kira hanguhe tomo datani hangu naga nogo bulumaga aria kago balu nalimu.
LEV 11:4 Anigo ai nogo kamelebi huru ale mini labidibi pagana ale egeha paliaga bedarubi nolene nawi. Urunime datani naga degego tinaga gi ge giba kira ndo tara tara ka. Anigo i̱naga deni uruni ti bayale ndo dodohe kago manda bialu tígua nolene nawiore.
LEV 11:7 Nogo ibuniore kagobi tinaga ge bulumaga ale degegoyu ti tomo maginiha yuwa nanagayagodago uruni balu nolene nawi laro. Nogo ibuni i̱naga deni ko dodohe kagonida lo manda bilimu.
LEV 11:8 Ema bialu piaga uruni ti balu nolenebi nawi uruni ale mbirago homo ngagola ela holenebi nawiore irane ti i̱naga deni ko dodohe kagodane, laro.
LEV 11:9 Ibaha iba wena bedaru damene bibahende dongone harenehe bedarubi babaganehe bedarubi iba emeneha bedarubi solowaraha bedarubi uruni ale bibahende nai holene karulapego balu nalimu.
LEV 11:10 Anigo wena marubi ema biaga alebi iba emenehabi solowarahabi bedaru tinaga dongoneni harene nahebi babagane nahebi bedaru bibahende ko beda lo manda bialu bo nolene nawi.
LEV 11:11 Anigo uruni ti i̱naga deni ko dodohe manda bialu tígua balu nabi homene ngago elabi heba holene nawiore larogoni.
LEV 11:12 Baya hanguore lone hale hadaba. Ibaha wena bedaru aria maru harene nahe babaganebi nahe bedaru ko bedago nolene nawiore, larogoni.
LEV 11:13 Ega tara tarabi nde tígua nanolene bedaru uru. Ega parambaguabi bodo hariawe tara tara emene timbuni bedaru bibahendebi ega umi damenego ale bibahendebi ega nene bedarubi ega yári timbuni tara karubi ega dindiha biraga bedarubi ibaha biraga ega habo ale tara tara bedarubi ega ge luhe ngui luhe gabiago ale tara tara bedarubi nolene nawi. Ani bialu dalagamiabi dumaniabi ti aria tara tara bedaru bibahende nolene nawiore laro.
LEV 11:20 Ema bialu piaga maru gi ge waragariahe babaganehe bedaru nolene bayale ndogo nanalimu laro.
LEV 11:21 Anigo ai mbirale uruni aria maru geme pogolama piagayagua nde balu nolene karulape.
LEV 11:22 Uruni gonalia alebi pagaya damene bedago bibahende emene timbunibi nai holene karulape laro.
LEV 11:23 Ani bialu maru gi gebihe howa babaganebihe bedaru ko bedago nolene nawigo nanalimu.
LEV 11:24 Ema bialu piaga tara maru bedarubi nde i̱naga deni tí mo dodo holigo nanalimu. Tígua mbirale ema bialu piaga ko urunialenaga tingini homene ngago ela harimiyaguabi
LEV 11:25 mbirale uruni mbirago mo yalu pirimiyaguabi nde ani biragome ibu i̱naga deni dodohe kane dege alendo halu ni anda polebira. Agali mbirame uruniale mbira homo ngaria mo yayagua nde ibunaga aga bu kago wayawaya bo waholene nga. Ani biragome ibu i̱naga deni dodohe kane dege alendo halu ni anda polebira.
LEV 11:26 Ema bialu piaga damenego tinaga ge giba kirahe ndoyaguabi bulumagame datani maginiha yuwa nagadagua nanagayaguabi ogonialego koore nga lo manda bilimu.
LEV 11:27 Nogo tara tara ge giba kira nahe kago damene bibahende balu nolene nakarulapeore laro. Mbiralime mbirale homene uruni alegonaga tingini ela hayagua nde ti ko kamine dege alendo halu ni anda polebira.
LEV 11:28 Mbiralime ogoni ale mbira homenego mo yalu piyagua ibunaga aga wayawaya bolene nga. Ani wayawaya bayaguabi ibuni dodohe ko kane dege alendo halu ni anda polebira. Ema bialu piaga urunialeme tí mo dodo haga bedagoni.
LEV 11:29 Ema bialu piaga ale marubi nde tia mali bedarubi huru bedarubi guruwalibi gau tara tara bedarubi nolenebi ela holenebi nawiore.
LEV 11:31 Tígua uruni ale mbira homo ngaria ela harimiyagua nde tí i̱naga deni dodohe kamine dege alendo halu ni anda polebira.
LEV 11:32 Ema bialu piaga dodohe uruni aria mbirago mbirale ngagoriani homo wiagua ogoni ela hayadago nde i̱naga deni dodohe dege wulebira. Ai mbirale irame wabini tara tara ngagoria homo wiaguabi labolaboni homo wiaguabi nogo bulumaga dongone lagalo wini ngagoria homo wiaguabi nuni homo wiaguabi uruni ale bibahende mbirago ibu biabe tara biaga wiaguabi bibahende homene ela hayadagome i̱naga deni ko dodohe wulebira. Anigo mbirale ela hayadago ibame wayawaya bo waharimiyaguabi i̱naga deni ibu dodohe wiaho ngane dege alendo halu ni anda polebira.
LEV 11:33 Uruni ale mbira todobene be dindime wabini ngamigoha anda puwa homo ibiraho wiagua nde todobene be ogoniha ngamigo damene i̱naga deni ko dodohe dege wulebirago todobene be ogoni pambulo wahalimu.
LEV 11:34 Tomo nolene ale mbira kaware ngagola iba todobene be ogoniha berenegome odoba hayagua nde tomo ogoni i̱naga deni ko dodohe hayagoni. Iba todobene be ogoniha bedagobi ko dodohe dege birulebira.
LEV 11:35 Mbirale bayale tara tara ngagoria ema bialu piaga uruni mbirago homo paga hayagua nde mbirale uruni i̱naga deni ko dodohe hayagoni. Ai ira delowa mberedi balawaru hiragane dindime wabini ngagoha homo wiyagua nde mberedi hiragane dindime wabini ogoni mo pambulo wahalimu.
LEV 11:36 Anigo ai ema bialu piaga i̱naga deni dodohe uruni aria mbira iba hambiaga uli iba bedagoha homo wiagua nde iba ogoni i̱naga deni mo dodo naholebira. Anigo maru tara ale ngaru ela hayagua nde ela harago i̱naga deni ko dodoheore wulebira laro.
LEV 11:37 Ai tomo egene wene nahenge ngamigoha mbirale biago homo ibira hayagua nde egene ogoni i̱naga deni dodo nahe bayale wiaabo holebira.
LEV 11:38 Anigo ai tomo egene uruni ibaha ngaore dege ema bialu piaga mbira iba ogoniha homo wiagua nde tomo egene biago i̱naga deni ko dodohe wulebira.
LEV 11:39 Ema bialu piaga maru i̱na tíhondo nolene karulape larugo uruni aria mbirago bame homene ngaria wali agali mbirame ela hayagua o ela harago ibu i̱naga deni dodohe holebira. Ani dodohe dege kane alendo halu ni anda polebira.
LEV 11:40 Mbiralime homene biagonaga mbirini ngago podalu nayaguabi homo ngaria mo ya hangu biyaguabi nde o biyagonaga ibu aga karulo kago wayawaya bulene nga. Anigo ibuni i̱naga deni dodohe kane dege alendo halu ni anda polebira.
LEV 11:41 Ema bialu dindini ibagabu biraga emene ko biru ngaru tígua uruni minalu nolene nawigo nanalimu. Uruni ti bayale ndo bedago nanalimu laro. Dereparia ale uruni ti i̱naga deni koore beda lo mitangi bilimu laro.
LEV 11:42 Tombeme piaga uruni ale bedarubi gi ge bibahendeme piaga bedarubi gi ge dewahe bedarubi bibahende ta nabi nanalimu laro.
LEV 11:43 Ainde ema bialu piaga uruni balu narimiyagua tígua i̱naga deni tíni ko mo dodo holeberemigo nanalimu larogoni.
LEV 11:44 I̱ Anduane Homogo tínaga Ngode Datagaliwabeore kogonigo ai tígua mana tiga nabi ngago yu wahalu tíni i̱hondo ngialu mana bayale ngago bialu howa i̱naga deni baya buruguleore halimu. Irane i̱ni hangu baya burugule howa mana i̱na talialu biaga ngogo bayalebi tigabiorebi biaga kogo manda bialu mbirale tombeme piaga bedarubi nolene nawi laro. Tí i̱naga deni ko dodohe holigo ani bilimu.
LEV 11:45 I̱ Anduane Homogo i̱nime tí Iyibi dindiha hemiria i̱ni tínaga Ngode Datagaliwabeore holenaga haru tagira ibirugoni ndobe. Anidagua birugo mitangi bialu tígua mana tigabi ngaru dege bialu haabo howa wali agali baya buruguleore hole halimu. Ani larogoni irane i̱ni baya buruguleore howa mana i̱nime berogo bayalebi tigabibi bialu kodagua tíguabi bialu halimu larogoni.
LEV 11:46 Mana áyu dege langirugoni ema bialu piaga damene bibahende ega bedarubi ibaha wena tara tara biru ngarubi dindini ibaga bialu piaga bedarubi uruni bibahendenaga laro.
LEV 11:47 Ani larogo manda bialu tíni bayale holenebi tíni i̱naga deni ko dodohe holenebi ngago baya hangu manda bialu mo tale bialu halimu. Ani bialu mbirale ema bialu piaga uruni bibahende baya hanguore tígua nalu holenebi nanaga alebi mo tale bialu halimu, lalu Anduane Homogohanda lene.
LEV 12:1 Anduane Homogohanda Mosesehondo lamialu lalu,
LEV 12:2 Í̠na Isaraele wali agali lamialu wali mbirame yamu ko biruwa igiri mbira taba hanayagua ibu horo karu i̱naga deni dodohe wali ti horo kongi biragagobi beda.
LEV 12:3 Anidagua bialu horo halini haragola igiri gali biagonaga dongone podo mabu bulene nga.
LEV 12:4 Wali igiri gali ai̱yadago ibuni horo pira tebirani tebira (33) bolangua haragola ibu i̱ninaga deni dodo nahe birulebirago irane ibugua waneigini taba hanayangi darama dewaore piai hayagonaga anidagua bulebira. Ani biruwa mbirale i̱ninaga mo loma biahene ngaru aria mbira ela naholebiraore. Ani buwa i̱naga Balai Anda kagoha anda nape biraabo halu ibunaga horodago bolangua haragola i̱ninaga deni dodo nahe biruwa anda polebira.
LEV 12:5 Walime wandari gali taba hanayagua nde ibu horo pira mbirani maria (14) i̱naga deni dodohe wali ti horo kongi biragagobi beda. Ani biralu ibugua darama dewaore wahayagonaga horo pira waragariani waragaria (66) bira dege bialu mani i̱naga deni dodo nahe birulebira.
LEV 12:6 Horo uruni piai haragola waneigini ai̱ya mo bayale holenaga wali ibugua nogo sibi bayale karu aria igini hungubalua mali mbira pene kagobi ega malibu ale mbirabi loma bule yalu ibulene nga. Ani bialu nogo sibi igini ogoni irani dai helo lomabu bo delalu ega minu yayago ibu ko berenego mo tiga bilonaga loma bialu bo delolene nga. Anidagua bule loma kira ogonilabo yalu i̱naga Balai Anda kago haneni loma binigo mo miaga agali kagoria yalu ibulene nga.
LEV 12:7 Ani yalu ibiragola loma binigo mo miaga agali kago ibugua nogo ega biagolabo yamialu Anduane Homogo i̱nihondo loma bialu bo delaragola wali biago ibu i̱naga deni dodo nahe bayale birulebira. Walime wandari taba hanayaguabi igiri taba hanayaguabi mana ogonidagua dege bulene nga.
LEV 12:8 Anigo ai wali ogoni ibu nogo sibi igini mbira hende holenego muni nayi bereagua nde ibugua ega malibu ale bayale kira minu yalu ibulene nga. Ani biragola loma binigo mo miaga agali kago ibugua ega ogonilabo yamialu mendego irani dai helo loma bialu bo delalu mendego ko berenego mo tiga bilonaga loma bialu bo delolebira. Anidagua bo deledagola i̱naga deni wali biago ibu dodo nahe bayale birulebira, lalu Anduane Homogohanda lene.
LEV 13:1 Anduane Homogohanda Mosese Aronolahondo lamialu lalu,
LEV 13:2 Wali agali mbirago ibu dere biyaguabi tinginini to halu moge biyaguabi tinginini ge hamua bulenaga pagaya tagira ibiyaguabi urunidagua birago ibu Arono kariayaguabi loma binigo mo miaga agali mbirago kariayaguabi abale haru polene nga.
LEV 13:3 Ani haru poramigola loma binigo mo miaga agali kago ibugua de handalu karia dere bidagoria irini kago pele halu dere tinginiha gua bima anda piyagua nde ogoni ge hamua ale bulenaga bidaria hondolebira. Ani hondowa loma binigo mo miaga biago ibugua de handalu karia mbira derebi kago hondowa ibu Anduane Homogo deni bayale ndo dodohe ka lolebira.
LEV 13:4 Anigo ai ge hamua ale biatagi nahe bulenaga pagaya bidago hondowabi derebi biago tinginini dere bidagoria irini karubi pele nabidaore tinginiha gua bima anda napedaore loma binigo mo miaga agali kago ibugua derebi biago anda mbira kagoha horo karu ibuni hangu ho palu helolebira.
LEV 13:5 Ani helowa loma binigo mo miaga agali biago ibugua horo kaneni lone handalu karia dere bia timbu nahe abale biyagobi dege bidaria handayagua nde horo karu mende hadai bilolebira.
LEV 13:6 Ani bilowa loma binigo mo miaga agali biago ibugua lone horo waragaru howa kanengi handalu karia dere biago bia timbu nahe bu emene hama dai bialu dabi habehe degeyagua nde bame dere damene bidagoni lo manda bulebira. Anidagua manda bialu ibugua mbirali derebi hayago lamialu, Í̠ Anduane Homogonaga deni dodo nahe bayale kegoni, lalu lamulebira. Anidagua lamiragola agali biago ibugua ibunaga aga wayawaya bialu ibu Anduane Homogonaga deni dodo nahe bayale holebira.
LEV 13:7 Anigo mani howa dere ogoni lone biyagua agali biago ibugua loma binigo mo miaga agali kagome lone hendelo ibu karia polene nga.
LEV 13:8 Ani poragola loma binigo mo miaga agali kago ibugua de handalu karia dere lone bia timbu hayadane handayagua nde ogoni ge hamua ale bida manda bulebira. Ani manda buwa loma binigo mo miaga agali kago ibugua lalu, Ogoni ge hamua ale biyadago ai í̠ Anduane Homogonaga deni dodohe kegoni, lalu lamulebira.
LEV 13:9 Mbirali ibu dere timbuni mbira bu heagua nde loma binigo mo miaga agali karia haru polene nga.
LEV 13:10 Ani haru poragola loma binigo mo miaga agali kago ibugua dere ogoni baya hangu hondolebira. Ani handalu karia dere bidago pele halu dere bidagoria irini kagobi pele dege howa dere ibuni angibu tugudatagi halu heagua
LEV 13:11 ogoni ge hamua aleore bu wiaabo heneyane manda bulebira. Ani manda buwa loma binigo mo miaga kago ibugua, Í̠ Anduane Homogonaga deni dodohe kegoni, lolebira. Loma binigo mo miaga ibugua agali ogoni dodoheoredane handalu wali agali heba mandagi helolene nawi.
LEV 13:12 Ani bialu emene howa dere ogoni bia timbu taraore halu agali biagonaga tingini bibahendeha biame hayagua nde
LEV 13:13 loma binigo mo miaga kagome agali ogoninaga tingini lone baya hangu hondolebira. Ani handalu agali biagonaga tingini bibahendeha pagaya biame heagua nde loma binigo mo miaga biago ibugua agali pagayabi biagohondo lamialu lalu, Í̠ Anduane Homogonaga deni dodo nahe bayale ke, lolebira. Ani laragola agali ogoni ibu dodo nahe bayaleore holebira.
LEV 13:14 Ani lo karia mani howa agali biagonaga tinginiha howa dere timbuni tugudatagi hayagua nde agali ogoni ibu lone dodoheore holebira.
LEV 13:15 Loma binigo mo miaga ibugua lone handalu karia agali biagonaga dere biago bia timbu kane handayagua nde ibugua agali ogoni lamialu, Í̠ Anduane Homogonaga deni dodoheore kegoni, lalu lamulebira. Mbirali dere timbuni bialu tinginiha bidago dombeni tugudatagi heagua nde ogonidagua bidago ibu dodohe ka lolebira. Dere ogoni alego ko taraore mbira nga.
LEV 13:16 Mani howa agali dere bu hayago ibunaga dere biago dabi halu hununu bidagoria pagabua biyagua nde agali ogoni ibu loma binigo mo miaga biago karia lone dai bulene nga.
LEV 13:17 Ani dai biragola loma binigo mo miaga kagome de handalu karia dere bini hununu biagoria pagabua bialu dabi hayadane hondowa dodo nahe ka manda bulebira. Ani manda buwa loma binigo mo miaga ibugua agali biagohondo, Í̠ Anduane Homogonaga deni dodo nahe bayale harida, lalu lamulebira.
LEV 13:18 Agali mbiranaga tingini moge ala binigo dabi ho kayagua
LEV 13:19 nde mani howa dere hununu biagoriani tohoyu tagira ibalu darama bialu pagabua biyagua agali o biago ibu nde loma binigo mo miaga mbira kagome hendelo ibu karia polene nga.
LEV 13:20 Ani poragola loma binigo mo miaga kago ibugua agua biyadabe hondole moge bini biagoria hondolebira. Ani handalu karia dere biago bia timbu howa kabaneha bima anda pialu dere bidagoria irini pele kago hondowa ibugua agali o biagohondo lalu, Í̠ Anduane Homogonaga deni dodohe kegoni, lalu lamulebira. Moge binidagoria dere bia aribia hene ogoni koorene ko nga.
LEV 13:21 Anigo loma binigo mo miaga kago ibugua handalu karia dere biago emene karulapeni irini kago pela nabi howa dere bidago gua bima anda pobe nahe mani bayale habehedane handayagua nde agali ogoni ibuni hangu anda mbiraha horo karu helo helolebira.
LEV 13:22 Horo waragaru howa kanengi loma binigo mo miaga kagome lone handalu karia dere biago bia timbu hayadane handayagua nde ogoni koore bidago manda buwa ibugua lamialu lalu, Í̠ Anduane Homogonaga deni ko dodohe kegoni, lalu lamulebira.
LEV 13:23 Anigoyu dere hununu biago timbu nahedane handayagua nde bame moge binigonaga motudu nga hondowa loma binigo mo miaga kagome ibuhondo lamialu lalu, Ai í̠ Anduane Homogonaga deni dodo nahe bayale kegoni, lalu lamulebira.
LEV 13:24 Anigo mbiralinaga tingini irame denegoria tingini darama bialu pagabua biyaguabi
LEV 13:25 nde loma binigo mo miaga kagome baya hanguore hondolene nga. Ani handalu karia irame dene biagoria irini kago pelayaguabi dere bidago bima anda piyaguabi nde dere koore mbira bidaria hondolebira. Ani bidago hondowa loma binigo mo miaga kago ibugua lamialu lalu, Í̠ Anduane Homogonaga deni bayale ndo ko dodohe kegoni, lolebira.
LEV 13:26 Anigo ai dere binigoria irini karu penale bayale halu derebi timbu naheyagua nde agali ogoni ibuni hangu anda mbiraha horo karu helo helolene nga.
LEV 13:27 Ani helowa horo waragaru howa kanengi loma binigo mo miaga ibugua dere lone agua biyadabe hondolene nga. Ani handalu karia dere bia timbu hayayagua nde dere ogoni koore bidago hondowa ibugua agali ogoni Anduane Homogonaga deni dodohe kagoni lolebira.
LEV 13:28 Ainde dere ogoni timbu nahe biyagobi bu haabo heagua nde agali irame dene hununu bidago handalu motudu dege ngago manda buwa loma binigo mo miaga ibugua lamialu lalu, Ai í̠ Anduane Homogonaga deni dodo naheore bayale kegoni, lolebira.
LEV 13:29 Wali agali mbiralinaga embonenibi yanga andanehabi duru dere biyagua
LEV 13:30 loma binigo mo miaga kagome baya hangu hondolebira. Ani handalu karia dere kabaneha bima anda pialu dere bidagoria irini kago emene hangu howa ambua biyagua nde ibugua dere ogoni kooredane manda bulebira. Ani manda buwa ibugua waliyaguabi agaliyaguabi lamialu lalu, Í̠ Anduane Homogonaga deni bayale ndo dodohe kegoni, lolebira.
LEV 13:31 Ai loma binigo mo miaga ibugua handalu karia dere ogoni kabaneha bima anda nape dere binidagoria irini bayale nahe dege heagua nde waliyaguabi agaliyaguabi ogoni ibu horo karu anda mbiraha ibuni hangu palu helolebira.
LEV 13:32 Horo waragaru howa kanengi loma binigo mo miaga ibugua dere bini biago agua biyadabe lone hondolebira. Ani handalu karia dere bia timbu halu bima andapu nabiyagua irini ambua nabi bayale heagua
LEV 13:33 nde o biago ibugua ibunaga mandari angariyaguabi kago podo wahai halu dere binidagoria dege poda nabi helolene nga. Ani bialu loma binigo mo miaga ibugua agali biago horo karu lone ibuni hangu helo helolene nga.
LEV 13:34 Ani bialu horo waragaru howa kanengi loma binigo mo miaga ibugua dere biyago lone handalu karia emene halu timbu bima anda napeyaguabi nde ibugua o biagohondo lamialu, Ai í̠ Anduane Homogonaga deni dodo nahe bayale kegoni, lalu lamulebira. Ani laragola ibugua ibunaga aga bu hayago wayawaya bialu ibu bayale holebira.
LEV 13:35 Mani dere biago lone bia timbu hayiyagua
LEV 13:36 nde loma binigo mo miaga ibugua lone hondolene nga. Ani handalu karia dere biago biatimbu hayadane hondowa loma binigo mo miaga kagome waliyaguabi agaliyaguabi ogoni dere bidagoria irini kago lone ambua biyadabe hondolene nawi. Ibugua o biago ibu Anduane Homogonaga deni lone dodoheore hayada manda bulebira.
LEV 13:37 Ai loma binigo mo miaga ibugua hondowa walibi agalibi ibunaga dere emene biyagobi dege biaabo halu timbu nahebi dere bidagoria irini bayale ibiyagua nde dere ogoni dabi hayada lo manda bulebira. Ani manda buwa ibugua o biagohondo lamialu lalu, Ai í̠ Anduane Homogonaga deni dodo nahe bayale kegoni, lalu lamulebira.
LEV 13:38 Wali agali maru tinaga tinginini pagaya biyagua nde
LEV 13:39 loma binigo mo miaga ibugua agua biyadabe hondole baya hangu begelo hondolebira. Ani handalu karia pagayadago peleore ndoyagua nde bame dege binidane manda bulebira. Ani manda bialu karia walibi agalibi ibu dodo nahe bayaleda lolebira.
LEV 13:40 Agali mbirago ibunaga mandari kago bame piai halu mandari nahe heagua ogoni ibu dodohe ndo bayale ka. Ani bialu agali ogoninaga mandari wanakuihayagi piai hayagua nde agali ogoni ibu dodohe ndo bayale ka.
LEV 13:42 Anigo agali ogoninaga haguaneni mandari nahe ngagoria dere biyago darama bialu pelayagua nde dere ogoni koore biyada manda bulebira.
LEV 13:43 Ani manda bialu loma binigo mo miaga ibugua baya hangu begelo hondolene nga. Ani handalu karia ge hamua ale biagadagua dere darama bialu peledago handayagua
LEV 13:44 nde dere emboneni bidago koorene ko binidane hondowa ibugua agali dere bu kagohondo, Í̠ Anduane Homogonaga deni bayale ndo dodohe kegoni, lalu lamulene nga.
LEV 13:45 Wali agali mbira ibu dere ko ogoni ale bu heagua ibu aga ko budabagabi ngago mo karulo halu mandari pere nabi helalu ibunaga gime ne hariga pai howa ibugua hongo howa lalu, I̱ ko ge hamuabi kogoni. I̱ ko ge hamuabi kogoni, laga bialu holene nga.
LEV 13:46 Wali agali dere ogonibi bu karu bibahendeore Anduane Homogonaga deni ti bayale ndo dodohe dege haabo holebira. Ani biragola ibugua ibunaga damene bu karu ti tini haga balai anda bu kagoha helalu ibu tagiraha pubagi ho holebira, lalu Anduane Homogohanda lene.
LEV 13:47 Anduane Homogohanda Mosese Aronolahondo laabo halu lalu, Aga labolabo mbirale ngamirubi nogo sibi irinime wabini ngarubi pu payini baya tara mbirame wabini ngarubi nogo bulumaga dongoneme wabini ngarubi nogo maru maru dongoneme wabini ngarubi uruni ale ngamiruha hagama ho ngane handarimiyagua
LEV 13:49 mbirale ogoni ira yuni dongomi hayaguabi daramabi hayaguabi uruni tígua loma binigo mo miaga karia mo yalu puwa walia holene nga.
LEV 13:50 Ani bialu loma binigo mo miaga ibugua aga ogoni yamialu horo karu anda mbiraha mo ngelolebira.
LEV 13:51 Ani ngelo howa horo waragaru howa kanengi lone handalu karia aga labolabonibi nogo dongone biagoriayaguabi hagama ha timbu hayane handayagua nde ogoni ko dodohe ngagonida manda bulebira.
LEV 13:52 Ani manda buwa loma binigo mo miaga ibugua mbirale uruni hagama hayadago hondowa ge hamua wai hole biagadagua biyadane hondowa wahalu irani dai helo delolebira.
LEV 13:53 Loma binigo mo miaga agali kagome aga biago handalu karia ko timbu nahe ala wiyagobi dege ngane handayagua
LEV 13:54 nde aga mbirale uruni baya hangu wayawaya bo wahowa horo karu lone mo bagi howa ngelolene nga.
LEV 13:55 Ani ngelowa horo waragaru howa kanengi lone handalu karia aga biagoni buhayagibi mbirahayagibi hagama hayago ha timbu nahe ala wiyagobi dege wiagua ira yuni dongomi hayagobi daramabi hayagobi ereba nahe wiaabo hayagua nde ogoni bayale ndo dodohe dege ngagoni. Anigo loma binigo mo miaga ibugua aga uruni mialu iraha dai helo delolene nga.
LEV 13:56 Anigoyu ibugua horo waragaru howa horo kanengi lone handalu karia aga labolabobi nogo dongoneme wabini agayaguabi wayawaya bu wini biago hagama hayago ereba habehe wiane handayagua nde emene mo ko hayadago hangu podo waholene nga.
LEV 13:57 Ani biragola mani howa hagama ala hayagobi lone hadai biyagua nde wahalu mbirale ogoni anduane kago ibunime irani do tauladaga helo delolene nga.
LEV 13:58 Ai aga hagama hayago wayawaya buwa bayale hayiyagua nde halu mende lone wayawaya bialu aga labolaboyaguabi nogo dongoneme wabini agayaguabi ko nahe bayaleore wulebira.
LEV 13:59 Mana ogoni aga mbiraleru nogo bulumaga dongoneme wabini ngarubi labolabo ngarubi pu nogo sibi irinime payini ngarubi bibahende mo ko haga biragola bulenego mana ogoni dege ngagoni. Mana ogoni Anduane Homogo i̱naga deni ogo dodoheda ogo dodo naheda lalu dabolene mana nga, lalu Anduane Homogohanda lene.
LEV 14:1 Anduane Homogohanda Mosese lamialu lalu,
LEV 14:2 Mana o larodagua wali agali lamibe. Mbirali ibu ge hamua ale bu henego dabi haragola i̱ninaga deni ibu ko dodohe ndo bayale kagoni lelo ibu loma binigo mo miaga agali kago walia hole ibu karia polene nga.
LEV 14:3 Ani poragola loma binigo mo miaga ibugua tínaga balai anda bu karuha tagirahayagi haru pialu baya hangu begelo hondolebira. Ani hondowa ge hamua ale biyago ereba hayiyagua
LEV 14:4 nde ibugua ibuhondo uruale mo yalu ibule pobe lolebira. Uruni ega kira i̱ninaga deni bayaleorebi ira tamia emene gabini mbirabi pu payini daramabi mbirabi ira hisobonaga magane mbirabi yalu ibalimu lolebira.
LEV 14:5 Ani bialu loma binigo mo miaga ibugua wali agali biaruhondo, Iba duguaraga haragoha howa iba hambu yalu dai bialu todobene be dindime wabini ngagoha berelabe, lolebira. Ani bialu mani ega biago darama todobene be biagoha anda pelo nene daligani ega mendego bolebira. Ani baragola darama todobene be biagoha anda polebira.
LEV 14:6 Ani buwa loma binigo mo miaga ibugua ega mende biagobi ira tamia gabini biagobi pu payini daramabi biagobi ira mini hisobonaga magane biagobi bibahende yamialu iba ega darama birayagoha ibira holebira.
LEV 14:7 Ani buwa mani loma binigo mo miaga biagome agali ge hamua ale bu hene bayale helonaga ibiyago ega darama biagome kahalu tandala ba holebira. Ani biai howa loma binigo mo miaga biago ibugua agali biago lamialu lalu, Áyu í̠ Anduane Homogonaga deni dodo mbira para nahe bayaleore kegoni, lolebira. Ani lowa ibugua ega mende biago yalu tagira puwa yagalo yalu pelo yupe holebira.
LEV 14:8 Ani biragola wali agali ge hamua ale bu hene biago ibugua ibunaga aga wayawaya balu mandaribi angaribi podo wahai halu ibunibi wayawaya bulene nga. Anidagua biyagua nde o biago ibu i̱ninaga deni dodo mbira para nahe holebira. Ani howa ibugua balai anda bu karuha dai buwa ibuninaga balai anda biagoha abale anda pu nabi horo karu tagirani holene nga.
LEV 14:9 Ani bialu horo waragaru howa kanengi ibunaga mandari angari de hambolene iribi ibu tingininaga iri bibahende podo wahai halu ibunaga agabi ibuni tinginibi wayawaya biai haragola ibu i̱ninaga deni ko mbira para nahe bayale holebira.
LEV 14:10 Ani bialu horo haliningi o biago ibugua nogo sibi igini wangabe kirabi nogo sibi angibuni mali mbira hangu hene kago mbirabi haru halu ibulene nga. Nogo sibi uruni dere durubi mbira nabi bayale tigabi kago hondowa haru halu ibulene nga. Ani bialu balawa bayaleoreru genda magi kilogarama tebira olibe lininaga weli heba odo biamaga hene ngagobi yalu olibe lininaga weli maru gabo be kiraha berelo yalu lomabu mule yu ibulene nga.
LEV 14:11 Ani yalu ibiragola loma binigo mo miaga kagome i̱naga deni dodo nahe bayale kego lowa ibugua ge hamua ale bu hene biago haru halu mbirale uruni bibahende lomabu mulenaga yalu ibiragobi mo yalu i̱naga Balai Anda kago haneni haru polebira.
LEV 14:12 Ani bialu loma binigo mo miaga ibugua nogo sibi igini wangabe mende biago yamialu olibe lininaga weli heba mana ko berolo mitangi nabi howa binigo mo tiga bulenaga loma delolebira. Lomabu delolene uruni bibahende yu howa i̱naga deni gime yuwa wigiwaga lalu holebira.
LEV 14:13 Ani bialu loma binigo mo miaga ibugua nogo maru ko binigo domo wahelonagabi nogo maru irame dai helonagabi loma bo delolene ngagoria nogo sibi igini wangabe biago haru halu puwa bolebira. Loma binigo mo miaga kagome anidagua bulebirago irane mana ko binigo domo wahelonaga nogo sibi loma bialu bo delolene loma binigo mo miaga ibuni milo mirugonidagua mana ko berolo mitangi nabi howa binigo mo tiga bulenaga loma bo delolenebi loma uruni ibunaga dege i̱na wiabagi ho ngeledogoni.
LEV 14:14 Ani buwa loma binigo mo miaga biago ibugua nogo sibi daramame wali agali biago dodo nahe helonaga gi tigahayagi hale teneha ha̱i̱ halu ge tigahayagi ge angibiyane kago ha̱i̱ halu gi tiganaga gi angibiyane kagobi ha̱i̱ halu bulebira.
LEV 14:15 Ani bialu loma binigo mo miaga ibugua olibe lininaga weli emene mbira ibuninaga gi leha habeni odo wulebira.
LEV 14:16 Ani buwa gi tiganaga gi hondoneme weli biagoha ibira halu wai howa Anduane Homogo i̱ninaga deni kahalu tandala ba holene nga.
LEV 14:17 Ani buwa ibugua olibe lininaga weli ibuninaga gi habeni wiyago mialu wali agali i̱naga deni dodo nahe bayale helo biagonaga gi tigahayagi hale teneha nogo darama helayagoria hela dambi halu gi angibiyane tigahabi ge angibiyane tigahabi darama wai hayagoria weli biago hela dambi haga bulebira.
LEV 14:18 Ani buwa weli emene ibuninaga gi habeni odo wiyago ibiraho ngagome wali agali biagonaga haguaneni dege odo wulebira. Anidagua biragome o biago i̱naga deni ko mbira ibuha para nahe helonaga anidagua bulebira.
LEV 14:19 Anidagua biai halu loma binigo mo miaga ibugua wali agali biagonaga ko binigo domo wahelonaga loma biago bo delaragola o biago ibu i̱naga deni ibuha ko mbira para nahe bayaleore holebira. Ani buwa mani loma binigo mo miaga ibugua irame dai helo loma bialu bo delolenenaga nogo sibi igini mende bo delolebira.
LEV 14:20 Ani bialu loma binigo mo miaga ibugua nogo sibi igini ogoni loma bo delowa widibi lomabu delaga dabu ngagoria loma bialu delolene nga. Ani bo delowa ibugua wali agali biagonaga ko domo wahelo ogonidagua biragola i̱naga deni o biagoha ko mbira para nahe bayaleore holebira.
LEV 14:21 Mbirali ibugua mana ko berolo mitangi nabi howa binigo mo tiga bulenaga loma bo delole munime mulenego muni nawi yagibano kayagua nde nogo sibi igini wangabe mbiraore hangu minu yalu ibulene nga. Wali agali o biagome ko binigo mo tiga bulenaga loma binigo mo miaga kagome nogo sibi igini ogoni podo yuwa i̱ninaga deni gime wigiwaga lalu lomabu ngulebira. Ani bialu balawa bayaleoreru genda magi kilogarama mbira olibe lininaga weli heba odo biamaga hene ngagobi mo yalu olibe lininaga weli maru gabo be kiraha berelowa lomabu mule yalu ibulene nga.
LEV 14:22 Ani bialu ibugua ega malibu ale kira minu yalu ibalu lomabu mulene ngago irane ibu munime nogo sibi kira hende holenego muni ya nabi heagua ani bulene nga. Ega mbirago ko binigo domo wahelonaga loma bialu bo delalu mendego irame dai helo lomabu yalu ibulene nga.
LEV 14:23 Horo halini ibuni mo bayale helolene ogoni tagira ibirangi ibugua loma uruni yalu loma binigo mo miaga biago Anduane Homogo i̱naga Balai Anda haneni i̱ninaga deni yalu ibulene nga.
LEV 14:24 Ani yalu ibiragola loma binigo mo miaga ibugua nogo sibi biagobi olibe lininaga weli biagobi ibunaga giha mo yuwa Anduane Homogo i̱ninaga deni wigiwaga lalu holebira.
LEV 14:25 Ani bialu loma binigo mo miaga kagome wali agali ge hamua ale bu hene biagome mana ko berolo mitangi nabi howa binigo mo tiga bulenaga nogo sibi igini lomabu mialu bolebira. Ani bowa loma binigo mo miaga ibugua nogo sibi darama ngago gime yu howa wali agali ibiyagonaga hale gi tigahayagi kagonaga teneha ha̱i̱ halu gi tiganaga angibiyane kago ha̱i̱ halu ge tiganaga angibiyane kagobi ha̱i̱ dege halu bulebira.
LEV 14:26 Ani buwa loma binigo mo miaga kago ibugua olibe lininaga weli biago emene mbira ibuninaga gi leha habeni odo wulebira.
LEV 14:27 Ani odo wialu Anduane Homogo i̱ni deni howa ibugua gi tigahayaginaga gi hondone mbira hangume weli gi habeni odo wiyagoha ibira howa kahalu tandala bahaga bulebira.
LEV 14:28 Anidagua biai howa loma binigo mo miaga ibugua olibe lininaga weli biagome wali agali biagonaga hale tenehabi gi angibiyanebi ge angibiyanebi bibahende gi tigaha dege dege abale nogo darama ha̱i̱ hayagoria welime ha̱i̱ hadambi holebira.
LEV 14:29 Ani biai howa ibugua weli gi habeni emene ibiraho ngagome wali agali ko domo wahelo ibiyagonaga haguaneni odo wulebira. Ani biragola wali agali ogonime ko binigo domo wahelonaga loma bialu bo delolebira.
LEV 14:30 Ani bulenaga loma binigo mo miaga ibugua wali agali ko binigo domo wahelo ibiyagome ega malibu ale kira lomabu mule minu yalu ibiyago mbirago yamulebira.
LEV 14:31 Ani yamuwa ega mbirago ko binigo domo wahelonaga loma bialu bo delalu mendego irame dai helo loma bialu bo delolebira. Ani bialu widi lomabu delolenegobi ega kira biago heba bo delolebira. Anidagua biragome i̱naga deni wali agali biagoha ko mbira para nahe bayaleore hole ibiyagonaga ko domo wahelo loma binigo mo miaga kagome lomabu delolebira.
LEV 14:32 Mana ogoni mbirali ibu ge hamua ale binigo dabi halu i̱naga deni bayale holenaga lomabu delole yalu ibulenego yolo mulene muni nawidagola ogonidagua bulene nga, lene.
LEV 14:33 Anduane Homogohanda Mosese Aronolahondo lamialu lalu,
LEV 14:34 Mani tí Kenana dindi i̱na mo ngule ngogoria pu holeberemi. Dindi ogoni tínaga lene wiaabobo bu wulebira. Ai tí dindi ogoniha pu kamingi anda maru kago tamuha hagama holene mbira ibilaruyagua
LEV 14:35 tí de handalu anda ogoni anduane hayadago ibunime loma binigo mo miaga agali karia polene nga. Puwa ibuhondo lalu, I̱ andagaha hagama mbira hatagi ho ngago i̱na de handarugoni, lalu lamulene nga.
LEV 14:36 Anidagua lamiragola loma binigo mo miaga kagome hale howa anda anduane biagohondo lamialu, Anda ogoni i̱ de hondole ibulebero. I̱ de hondo naibidoha í̠naga dabudabu wiridaruni mo yu tagira piai habe, lolebira. Ani larago hale halu bibahende mo yu tagira napeyagua loma binigo mo miaga ibugua lalu, Anda ogoniha dabudabu yalu tagiraha nape ngaru bibahende Anduane Homogonaga deni ko nga, lolebira. Ani lamialu loma binigo mo miaga biagome anda tamuha de hondole polebira.
LEV 14:37 Ibugua anda tamuha anda puwa mbirale anda háini hagamame hatagi halu mo ko hayadago de hondolebira. Ani de handalu mbirale ira yuni handalehebi daramabirumebi anda hái mo togo bia howa diri tombela andatagi bidago hondowa ogoni anda kabaneha bima anda peda lo manda biyagua nde
LEV 14:38 loma binigo mo miaga ibugua tagira puwa lalu, Horo karu wali agali anda ogoniha napale bameore ngelalimu, lolebira.
LEV 14:39 Ani lalu puwa horo waragaru howa kanengi loma binigo mo miaga ibugua lone dai bialu anda biago de hondolebira. Ani hondowa anda hái biago mo ko timbuni hayadane dehandayagua nde
LEV 14:40 ibugua tihondo lalu, Anda ogoninaga hái bini ege to̱le̱ mo ko hayadago bo gialalu tano tagirahayagi mbirale Anduane Homogo i̱ninaga deni ko ngaru mo yu wahaga ngagoha yu wahole pudaba, lolebira.
LEV 14:41 Ani bialu anda hái biadambi hene ege timeni anda háinaga ege to̱le̱ wabu dambi halu bu mabu bini kago bo dodai holebira. Ani biai halu mo yalu puwa tanonaga tagiraha ko yu wahaga ngagoha mo wahai holebira.
LEV 14:42 Anidagua biai howa ege to̱le̱bi timenibi gialo wahayago gahengeme bia aribia holebira. Timeni gahengeme anda hái lone para hadambi halu bulene nga lolebira.
LEV 14:43 Anda gialowa lone bia dai bidamigola ala mo ko hayadagua dege lone mo ko hayagua nde
LEV 14:44 loma binigo mo miaga biagome lone de hondole dai bulebira. Ani handalu karia anda biago mo ko habeheoredane handayagua nde ibugua lalu, Anda ogoni i̱naga deni ko kagoni, lolebira.
LEV 14:45 Ani kago manda bialu timenibi ege to̱le̱bi irabi bibahende anda ogoni bini damene kago mbira ibira nahelo mo yai halu amura tagiraha mbirale i̱naga deni ko ngaru yu wahaga ngagoha yalu pu waholene nga.
LEV 14:46 Anda ogoniha anda napole lalu panga payidaha mbirali anda piyagua ogoni ibubi i̱naga deni ko dege kane alendo holebira.
LEV 14:47 Mbirali anda ogoniha napole layago lelowa tomo nalu birayaguabi anda ogoniha paliyaguabi nde ibunaga aga wayawaya bulene nga.
LEV 14:48 Anigo mani loma binigo mo miaga biagome anda ogoniha lone anda puwa handalu karia anda hái biago bayale halu hagama biago ha timbu nahedane handayagua nde ibugua lalu, Anda ogoniha hagama biago ereba hayadago ai Anduane Homogonaga deni bayale ka, lolebira.
LEV 14:49 I̱naga deni anda biago mo bayale helonaga mana ogodagua bulene nga. Loma binigo mo miaga biagome ega kirabi ira tamia emene gabini mbirabi pu payini daramabi mbirabi ira hisobonaga magane mbirabi mo yulebira.
LEV 14:50 Ani bialu iba duguaraga haragoha howa iba hambialu yu dai bulebira. Ani hambu yudai bialu todobene be dindime wabini ngagoha berelowa ibugua ega mende biago todobene be iba bere biagoha darama anda pelo nene daligani bolebira. Ega ogoni baragola darama todobene be iba birayagoha ibira holebira.
LEV 14:51 Ani ibira ho bedagola loma binigo mo miaga ogonime ira tamia emene gabini biagobi ira hisobo magane biagobi pu payini daramabi biagobi ega mende ba nabini biagobi bibahende gime hilamagamaga bu yuwa iba ega darama heba birayagoha abaleore ibira halu yamulebira. Ani buwa iba ega darama heba wai ho yayagome anda biagoha kahalu tandala bahaga bulebira.
LEV 14:52 Loma binigo mo miaga biago ibugua anidagua biragome anda ogoni ko nahe i̱naga deni bayale holebira.
LEV 14:53 Ani bialu ega mende ba nabi dére minu yu hayago ibu tano yu wahalu amura ibuni biraga dangi te ngagoha yagalalu pelo yupe holebira. Ogonidagua biyagome anda ko hayadago domo wahalu i̱naga deni bayale helonaga bulene mana ogoni.
LEV 14:54 Mana uruni wali agalinaga tinginini warago ale tara tara ngarubi ge hamua pagayabi karubi dere durubi karubi moge ti̱wabi karubi nahendene ale tinginini tagira íbu karubi mbiraleme agaru andaru hagama hagarubi uruni damenego tagira ibiragola bulene wini.
LEV 14:57 Mana ogonime i̱ninaga deni mbirale ko nga bayale nga lalu mo walia haga bulebira, lalu Anduane Homogohanda lene.
LEV 15:1 Anduane Homogohanda Mosese Aronolahondo lalu,
LEV 15:2 Isaraele wali agali karu lamialu ogodagua lalibu. Agali mbirame warago tara balu ibunaga pinduha howa angibu tagira ibiyagua ogoni biragome agali ogoni i̱naga deni ko ka.
LEV 15:3 Angibu ogoni dewa iba poradagua piyaguabi angibu ogoni giambe howa pu tolenego hariga ndibu layaguabi agali ogonidagua bini kago ibu i̱naga deni ko ka.
LEV 15:4 Ibu paliagane dagia ngagoriani paliyaguabi biragane dagia ngagoriani birayaguabi bibahende ibugua mo ko hene dege nga.
LEV 15:5 Anigo mbiralime agali ogoninaga paliagane dagia ngago ela hayaguabi ibunaga biragane dagia ngagoriani birayaguabi o ani biyadagonaga ibunaga aga tinginibi abale wayawaya bulene nga. Anigo ibu ko kane dege alendo ni anda polebira.
LEV 15:7 Wali agali mbirame agali warago ogoniale bu kago ela hayagua nde tinaga agabi tinginibi wayawaya bo waholene nga. Ani bialu ti horo ogoningi dodo ogoni ha ho kane dege alendo ni anda polebira.
LEV 15:8 Agali waragowi biagome agali mbira ibu i̱naga deni ko nahe bayale kago hamiaga toloba hayagua nde ibubi i̱naga deni mo ko henego ka ai ibunaga aga wayawaya bialu ibunibi wayawaya bulene nga. Ani bialu ogoni ibu dodo ha ho kane dege alendo ni anda polebira.
LEV 15:9 Ani bialu agali warago tara ogoni barago ibu nogo dongi hosirunaga erekunini biragane nogo dongoneme wabini birayagua nde biragane ogonibi ko dodohe dege ho wulebira.
LEV 15:10 Agali ogoni ibu birayagoria mbiralime mbirale ngago ela hayagua nde agali ela haga kago ibubi ko dodohe dege kane alendo halu ni anda polebira. Agali mbirame mbirale agali waragowi abale birayago ogoni mo yalu piyagua nde agali ogoni ibubi ko dodohe dege holebira. Anigo ibugua ibunaga aga wayawaya bialu ibuni tinginibi wayawaya bulene nga. Ani bialu ibu ko dodohe kane dege alendo halu ni anda polebira.
LEV 15:11 Agali warago tara ogonibiwi kagome ibu gi wayawaya nabi howa agali mende bayale kago ela hayagua nde agali bayale ogoni ibugua ibunaga aga wayawaya balu ibunibi wayawaya bo polene nga. Ani bialu ibuni ko dege kane alendo halu ni anda polebira.
LEV 15:12 Agali warago ogonialewi kagome todobene be dindime wabini ngago ela hayagua nde be ogoni bo pambulo waholene nga. Ani bialu ndisi be irame wabini ngago ela hayagua nde ndisi be ogoni baya hangu ibame wayawaya bulene nga.
LEV 15:13 Ani buwa agali ogonibi kagome warago tara ogoni dabi hayagua nde ibu horo karu howa mani ibu dodo nahe bayale holenaga mo tiga bulebira. Horo karu piai haragola ibunaga aga wayawaya bo wahalu ibuni tinginibi iba poragoha wayawaya bo poragola nde ibu Anduane Homogonaga deni dodo nahe bayale holebira.
LEV 15:14 Horo haliningi agali biago ibugua ega malibu ale kirayaguabi ega mendeale kirayaguabi minu yalu puwa Anduane Homogonaga Balai Anda kagoria yalu puwa anda haneni loma binigo mo miaga kagohondo mulene nga.
LEV 15:15 Ani miragola loma binigo mo miaga ibugua ega mbirago ko domo wahelonaga loma bialu bo delalu mendego irani dai helo loma bialu bo delai holebira. Anidagua biragome loma binigo mo miaga ibugua agali ogoni ibu warago dabi halu Anduane Homogo i̱naga deni dodo nahelonaga mana bulebira.
LEV 15:16 Agali mbira ibu mbiraga u̱ padaha emaga handalu karia ibunaga ibane bame tagira piyagua nde agali ogoni ibu dodohe kago manda bialu ibunaga tingini bibahende wayawaya bai holene nga. Ani bialu ibu dodohe dege kane alendo halu ni paliragola bayale holebira.
LEV 15:17 Ibunaga ibane ogoni aganiyaguabi mbirale maru ngaruniyaguabi mbirale nogo dongoneme wabini ngagoniyaguabi mbirani ibira hayagua nde mbirale uruni wayawaya biai holene nga. Ani biragola ogoni alendo halu dodohe dege kane ni paliragola bayale holebira.
LEV 15:18 Wali agali kirali mandagi padebira agalinaga ibane tagira ibiyagua nde libu haru dodohe holebira. Ani biragola libu haru heyalu wayawaya bo polene nga. Ani bialu libu dodohe dege kane alendo halu ni paliragola bayale holebira.
LEV 15:19 Wali mbira ibu ege habolo bedangi nde ibu horo karu dodohe biraabo holebira. Mbiralime wali ogoni ela hayagua nde ibubi dodohe dege halu ni paliragola bayale holebira.
LEV 15:20 Wali ogoni ibu bira palia biaga dagiabi bibahende dodohe dege wiai holebira.
LEV 15:21 Mbiralime wali biagonaga biraga paliaganebi dagia ngago ela hayagua nde ela haga biago ibu dodohe holebira. Ani holebirago ai ibunaga aga wayawaya balu ibunibi ibaha wayawaya bo polene nga. Ani bialu ibuni dodohe dege kane alendo halu ni paliragola ibu bayale holebira.
LEV 15:23 Aga paliaga hanguyaguabi marualebi wali ogoni ibu biraga ngagobi ela hayagua mbirali ogoni ela harago ibu dodohe howa ni paliragola bayale holebira.
LEV 15:24 Agali mbira ibu wali ege habolo bedagola mandagi paliyagua nde agali ogoni ibu dodohe kane horo karu holebira. Ani bialu dagia ibu paliaga ngagobi nde dodohe dege horo karu holebira.
LEV 15:25 Wali mbira ibu ege habolo biragadagua ndo mendengi handa aribia hayaguabi ibu horo lu dewa biraabo hayaguabi nde ibu dodohe dege horo lu bedane ereba harangi wahole ibu ege habolo biragadagua biraabo holebira.
LEV 15:26 Dagia ibu bira pali biaga ngagobi bibahende dodohe dege wiai holebira.
LEV 15:27 Mbiralime dagia uruni ela hayagua nde ibubi dodohe dege holebirago ibunaga agabi ibunibi ibame wayawaya bulene nga. Anigo ibu dodohe dege kane alendo halu ni paliragola bayale holebira.
LEV 15:28 Wali ege habolo birayago horo bolangua haragola ibu horo karu biralu mani Anduane Homogonaga deni ibu dodo nahe bayale birulebira.
LEV 15:29 Horo halini haragola ega malibu ale kira minu yalu Anduane Homogonaga Balai Anda kago haneni puwa loma binigo mo miaga kagohondo mulene nga.
LEV 15:30 Ani miragola loma binigo mo miaga kagome ega mbirago ko domo waholenenaga loma bialu bo delalu mendego irani dai helo loma bialu bo delolene nga. Anidagua biragome wali biago ibu Anduane Homogonaga deni dodo nahe bayale berelo anidagua bulebira.
LEV 15:31 Isaraele wali agalirume tini Anduane Homogonaga deni dodohe holigo lowa mo dodo hagane ngagoria polene nawi. Ani polene nawigo irane i̱naga Balai Anda ogoni tinaga balai anda bu kagoria dege dombeneha kago ti i̱naga deni dodohe kangi anda ogoniha piyagua tigua i̱naga Balai Anda kago mo mebia harimigonaga ti homelo bo waholene wulebira, Anduane Homogohanda Mosese Aronolahondo ani lene.
LEV 15:32 Mana uruni agalinaga tinginiha howa angibu ale tagira ibiyaguabi agalinaga ibane bame padaha tagira piyaguabi ogonidagua biragome agali mo dodohe haga kago mana urunidagua bulene nga.
LEV 15:33 Ani bialu wali ibu ege habolo bedangibi wali agalibi tinaga tinginiha angibu ale tagira ibiyaguabi agali ibu wali ege habolo bedagola libu haru mandagi paliyaguabi uruningi tigua bayale holenenaga bulene mana uruni lo winigo nga.
LEV 16:1 Anduane Homogohanda Arono igini kira biago labome loma bu mulene winingi ndo mana puguwa mbirale loma bialu hearia bo homelene. Ani bu howa Anduane Homogohanda Mosesehondo lamialu lalu,
LEV 16:2 Í̠naga hamene Arono lamialu Anduane Homogonaga Hobane Loma Bia Heneore labolabome tu wuwa hoba amu kagoha Habo Nalolene Bi lo winigonaga Mbogoyi ngagoria ibuni hameme poa biradagua polene nawi lamibe. Polene winingi ndo ibuni hameme ibiyiyagua homolebira. Homolebirago irane Habo Nalolene Bi lo winigonaga Mbogoyi ogoni wali agalinaga ko biniru domagane panga ogoriani i̱ni hari beralibaha howa ha pani haruli. Anigo i̱na larogonidagua ibu nabiyagua homolebira lamibe.
LEV 16:3 Ibugua Hobane Loma Bia Heneore biagoha ibule harangi nogo bulumaga wangabe mbira ibunibi ibu one waneiginirubi tinaga ko i̱na domo waholiya bo yalu mende nogo meme wangabe mbira irani bo delai hole haru halu ibalu anda polene nga lalu lamibe, lene.
LEV 16:4 Anduane Homogohanda bi ogodagua lalu, Arono ibugua Hobane Loma Bia Heneore biagoha anda pu nabi howa ibuni ala wayawaya bulene nga. Ani buwa ibugua loma binigo mo miaga biabe bulenaga darasi tubagibi aga bia gimbubi nogo dongonebi labolabo emboneni bobu mabu bialu karulolene nga.
LEV 16:5 Isaraele wali agali tigua nogo meme wangabe kira tinaga ko i̱na domo waholiyanaga haru ibalu nogo sibi wangabe mbirabi irani bo delai helo haru ibuwa Aronohondo mulene nga.
LEV 16:6 Ibugua nogo bulumaga wangabe mbira ibuninagabi ibu one waneigininagabi ko domo waholiya bolene nga.
LEV 16:7 Ani buwa ibugua nogo meme wangabe biagolabo haru halu Anduane Homogo lola holenaga Balai Anda haneni haru polene nga.
LEV 16:8 Anda hane ogoriani howa ibugua to̱le̱ kira hame dabagane biago labome hame dabagane mana wiyadagua dabolene nga. To̱le̱ mbira Anduane Homogonaga dabole howa dabagane mana wiyadagua dabalu to̱le̱ mende Asaselenaga dabole dabagane mana wiyadagua dabolene nga.
LEV 16:9 Arono ibugua nogo meme wangabe mendego Anduane Homogonaga lowa to̱le̱ mbira biagome dabene biago wali agalinaga ko i̱na domo waholiya bolene nga.
LEV 16:10 Nogo meme wangabe mende Asasalenaga lowa dabene biago dére kaore Anduane Homogo kagoria haru ibulene nga. Ani buwa ogoni haru halu pialu dindi ko wali agali nahaga mbira ngagohayagi puwa wara pelolene nga. Ani biragola wali agalinaga ko biyaru nogo meme wangabe biagome mo yalu puabo helo ani bulene nga.
LEV 16:11 Arono ibuninagabi ibu one waneigininagabi ko domo wahelonaga ibugua nogo bulumaga wangabe biago loma bialu bo muwa
LEV 16:12 ibugua lomabu delaga dabu ira do wiaga ngagoria howa ira pungane dedaore duguwa ira hedo yagani tabo wulebira. Ani buwa ira hagua ngabi biaga mini inisenesinaga pauda gi kira yulene mo yulebira. Mo yalu Anduane Homogonaga Hobane Loma Bia Heneore labolabome tu hoba amu ho wiyagoha yalu Aronohanda anda polene nga.
LEV 16:13 Ani buwa ibugua Anduane Homogonaga deni hagua ngabilonaga inisenesi ira dedagoria ogoriani delolebira. Ani delaragola hagua ngabi biragome Habo Nalolene Bi lo winigonaga Mbogoyi wali agali ko biniru domagane panga ngagoria dunguame holebira. Anidagua biragome Arono ibu panga biago nahende howa ibu nahomolebira.
LEV 16:14 Arono ibugua nogo bulumaga wangabe bayagonaga darama maru yamuwa Habo Nalolene Bi lowinigo Mbogoyi ogoriani yalu puwa wali agalinaga ko biniru domagane pangani ibunaga gi hondoneme darama maru odo tindi tanda lolene nga. Ani buwa Mbogoyi biagoha hapara howa ibunaga gi hondoneme darama maru lone kahalu odo tindi tanda lolene nga.
LEV 16:15 Ogoni biai howa wali agalinaga ko biniru domo wahelonaga ibugua nogo meme bole haru ibiyago bowa darama yamuwa Hobane Loma Bia Heneore labolabome tu hoba amuho wiyagohayagi yalu puwa nogo bulumaga wangabe biagonaga daramame ala biyadagua tindi tanda lolene nga. Ibugua wali agalinaga ko biniru domagane panganibi Mbogoyi biago ngagoria hapara howabi ibunaga gi hondoneme darama halu mende tindi tanda lolene nga.
LEV 16:16 Arono ibugua anidagua biragome Isaraele wali agalirume ko tara tara biyarubi Hobane Loma Bia Heneore biago tigua mebia hayagobi domolene wulebira. Balai Anda o biago wali agali tini kagoria kago mebia hayarunaga ko domalu mo baya holenaga ogonidagua dege bulene nga.
LEV 16:17 Horo ogoningi dege Arono ibu Anduane Homogonaga Hobane Loma Bia Heneore biagoha ko domole anda pu kaha wali agali mbirali Arono kagoria anda polene nawiore. Hobane Loma Bia Heneore ogoniha howa Arono ibuninagabi ibu one waneigininagabi Isaraele wali agali bibahendenagabi ko domo wahai helonaga mana ngadagua biai holene nga.
LEV 16:18 Ani biai halu tagira puwa ibugua bo lomabu delagane dabu ngagoria puwa Isaraele wali agalinaga ko binirume mo dodo hene ngago ogoni domole mana biagane wiyadagua bulene nga. Nogo bulumaga biagonaga daramabi meme mbira biagonaga daramabi yamuwa lomabu delaga dabu ngagonaga gibuni maria ngagoria bulumaga ne gayane ale maria karuni daramame ha̱i̱ holene nga.
LEV 16:19 Ibugua darama uruni gi hondoneni wai howa dabu tindi tanda la a̱i̱ na̱i̱ bialu kahalu hirulene nga. Ani biragome Isaraele wali agalinaga mana ko tara tara biyarume dabu biago mo dodo ho wiyagoni darama ogonime mo baya halu lomabu dai buwa ngelolebira.
LEV 16:20 Aronohanda Anduane Homogonaga Hobane Loma Bia Heneore biagonagabi Balai Anda biagonagabi lomabu delaga dabunagabi ko domai helonaga mana wiyadagua biai howa ibugua nogo meme mbira dére Asaselenaga dabo helayago Anduane Homogo deni haru ibulene nga.
LEV 16:21 Ani buwa Arono ibugua meme dére biagonaga haguaneni ibunaga gi kirabali wialu Isaraele wali agalime mana ko biyarubi bi mana mo wahayarubi lapani halu uruni bibahende meme biagonaga haguaneni lo ngelai helo. Ani buwa ibugua meme biago dindi ko wali agali nahaga ngagoha agali biabe ogoni bule dabo helenedagome haru halu puwa wara pelolene nga.
LEV 16:22 Meme biagome tinaga ko bibahende lo wiai hayaru mo yai halu dindi ko wali agali nahaga ngagoha dai nabule pu wahalu puabo holebira.
LEV 16:23 Arono ibugua uruni biai halu Balai Anda biagoha lone anda puwa Anduane Homogonaga Hobane Loma Bia Heneore biagoha ala pole lowa loma binigo mo miaga agalime karulagane aga horo ogoningi biyago golo ngelolene nga.
LEV 16:24 Ani buwa ibuni dongone ogoningi dege wayawaya baga wiyagoria waya bialu dai buwa aga ibuni horombe bu haga wiyago bulene nga. Ani buwa ibuninagabi wali agali bibahendenagabi ko domo wahai helo bo mulene kira dabu wiyagoni irani dai helo delolene nga.
LEV 16:25 Ko biyarunaga nogo habane delaga wiyagobi lomabu mini delaga dabuni biagoria delolene nga.
LEV 16:26 Agali mbira meme wali agalinaga ko mo yalu porago haru halu puwa wara pelaga biago ibubi ibani puwa ibunaga agabi ibunibi wayaore biai halu wali agali kagoria dai bibehe holebira.
LEV 16:27 Bulumaga wangabe meme wangabe bo mini biagolabonaga darama Anduane Homogonaga Hobane Loma Bia Heneore biagoha wali agalinaga ko domo wahelonaga yalu anda ibiyago labo wali agali balai anda bu kagoria howa tagirahayagi yalu tagira polene nga. Ani buwa nogo biago labonaga dongonebi mbirini podo ibira ibira bini ngarubi nogo tinibi bibahende ira dalu do mundulo wahelolene nga.
LEV 16:28 Agali ogoni delaga kago ibunibi ibunaga agabi wayaore bayuwa balu howa wali agali kagoria dai bibehe holebira, lalu Anduane Homogohanda lene.
LEV 16:29 Anduane Homogohanda, Mana ogodagua biaabo holene nga, lene. Ko domo wahelonaga mana bulene ogo galoneda lowa manda bu haabo halimu. Ege kanegonaga horo pinini Isaraele wali agalirubi dindi tara tara wali agali tí heba mandagi íbu kamirumebi horo ogoningi haragola tomo nane howa biabe nabi halimu.
LEV 16:30 Horo ogoningi wali agalime horo bibahendeni ko biyaru Anduane Homogohanda domo wahelonaga loma binigo mo miaga kagome bo lomabu mulene ngadagua miragola tí Anduane Homogo deni dodo nahe holeberemi.
LEV 16:31 Horo ogoni dabo bagi hene mbira wuwa ogoningi tomo mbira nane halu biabebi nabi holeberemi. Ani bialu mali bibahendeni horo ogoninaga ko domolene mana ngadagua biaabo holeberami.
LEV 16:32 Loma binigo mo miaga haguane timbuni ibu ha aribia holene tu haragola ibu igini dabalu ibu aba henegoria ha aribia helo tígua dabo helalimu. Ani heledamigola ibugua wali agali bibahendenaga ko biyaru domo wahelonaga mana lowini ngadagua biai holene nga. Ani bule ibugua loma binigo mo miaganaga aga karulowa
LEV 16:33 Anduane Homogonaga Balai Anda Hobane Loma Bia Heneore biagohabi Balai Andaha bibahende ngarubi lomabu delaga dabu biagobi loma binigo mo miaga agali biarubi wali agali bibahende biarubi i̱naga deni dodo nahe hole biagane mana wiyadagua biai holene nga.
LEV 16:34 Mana o lo werogoni tígua bulene horo haragola pugu wanahe bayuwaore handayaho howa biaabo halimu. Loma Binigo Mo Miaga Haguane Timbuni ibugua mali mbira mbira haragola Isaraele wali agalinaga ko biyaru domo waholene mana biai holebira. Anduane Homogohanda bi uruni Mosesehondo lamiyagola layadagua Mosese ibugua biai hene.
LEV 17:1 Anduane Homogohanda Mosesehondo lalu,
LEV 17:2 Arono halu ibu iginirubi Isaraele wali agalirubi bibahendehondo bi ogo lamibe. Anduane Homogo i̱na i̱naga bi mana uru tíhondo ngerogoni.
LEV 17:3 Isaraele wali agali tígua nogoru balu nole howa nogo bulumagayaguabi sibiyaguabi memeyaguabi tínaga balai anda bu kamigoha howabi tagiraha howabi bame nabalimu. Bame bope harimiyaguabi i̱naga mana puguarami.
LEV 17:4 I̱ninaga Balai Anda kagoha anda haneni i̱hondo ala lomabu ngule yalu naibirimiyagua nde tígua darama bame pelarimigoni. Ani birimiyagua tígua wali agali bo waharadagua beramigo tí i̱naga wali agali karu baba mandagi nahe tí tara ka lalu bo batagi holebero.
LEV 17:5 Mana ogoninaga irane ogo. Abale Isaraeleali tígua nogo mbiraleru tíni tagira kamigoha howa loma beramili. Anigo áyu loma binigo mo miaga agali karia i̱ninaga Balai Anda haneni yalu ibuwa Anduane Homogoi̱nila ho gimbu bulenaga bo lomabu delaga bilimulo mana ogoni lo wero.
LEV 17:6 Anidagua beramigola loma binigo mo miaga karu tigua nogo uruninaga darama hambu yuwa balai anda biagonaga anda harabani lomabu delaga dabu kagonaga lenelene odo ba haga bulebira. Ani bialu nogo abene habaneru lomabu delaga kagoria delaramigola loma uruninaga tumutumu ngabi bayale birago nga howa Anduane Homogo i̱na miniha turu halu dungulo holebero.
LEV 17:7 Isaraele wali agali tígua i̱ erembira ngialu nogo mbiraleru balu dama nogo meme handalehe kagohondo bo mulene nawiore. Ai bibahendengi tínaga damene mbirame loma bini mbira mbira yalu i̱naga Balai Anda kagoria yalu ibulene nga.
LEV 17:8 Isaraele wali agaliyaguabi dindi tarali tí baba heneyaguabi tígua loma bini mbira irame dai helo bo delole yalu ibule heaguabi i̱hondo loma maru bu ngule heayaguabi tigua loma uruni i̱naga Balai Anda kagonaga harabani ala yu ibalu loma bulene nga. Anidagua nabiyagua Anduane Homogo i̱ni kogome ogoni ibu i̱naga wali agali bu karu aria ndo ibu tara ka lalu bo taliatagi holebero, lalu bi ogonidagua Anduane Homogohanda Mosesehondo lamini.
LEV 17:10 Tígua nogo balu howa nogo ma pugualu darama bibahende pelai helalimu. Ai Isaraele wali agali kamiru aria mbirameyaguabi dindi tarali wali agali karu aria mbirameyaguabi ibugua nogo mbirini darama bedaore nayagua i̱ Anduane Homogo kogo i̱na wali agali uruni baba waitigi halu i̱naga wali agali karu baba mandagi nahelo bo taliatagi holebero.
LEV 17:11 Daramame wali agalibi mbirale ema bialu piaga darama bere karubi ti holene miaga ngagonaga i̱na tíhondo bi mbira langerogo. Loma binigo mo miaga agali karu tigua darama hambu yuwa loma biniru bo delaga dabu bidagoria wali agalinaga ko ngaru domo wahelo lomabu mulene nga.
LEV 17:12 Ani bulene ngagonaga i̱na Isaraele wali agali tíhondo larogo. Tíguabi dindi tara tara howa tí baba íbu hene karubi bibahendeme nogo darama bedaore nolene nawiore laro.
LEV 17:13 Anigo Isaraele wali agali tíguabi wali agali dindi tarali tí baba íbu hene karumebi mbirale nogo memeru egarubi mbira i̱na tí nanalimu nalene bedaru gabua mbira tayandaha taya howa barimiyagua darama baya hangu piai helowa dindi dugu dambi halimu.
LEV 17:14 Ani larogoni irane daramame wali agalibi mbirale ema bialu piaga darama bere karubi tinaga holene miaga ngago darama nanalimu. Anidagua miaga ngagonaga i̱na Isaraele wali agali tíhondo nogo egaru darama mbiriniha bedaore nolene nawiore larogoni. Mbirali nogo egaru darama bedaore nalu kago ibu i̱naga wali agali karu baba mandagi nahelo i̱na ibu bo taliatagi holebero.
LEV 17:15 Ai nogo egaru minana homene ngarubi nogo gabuame bo wahene ngarubi mbira tíguabi dindi taraha howa ibini tí baba mandagi haga karumebi nayagua ogoni ibu i̱naga deni howa ko dodoheore holebira. Ani holebirago ai ibunaga agaru wayawaya bo wahai halu ibuni tinginibi wayawaya bulene nga. Ani buwa ibu i̱naga deni dodohe kane dege alendo halu ni paliragola ibu ko mbira ibuha para nahe bayale holebira.
LEV 17:16 Ibugua ibunaga agabi tinginibi wayawaya nabiyagua nde ibunime bia ko hayagonaga pani genda ngago yu holene wulebira, Anduane Homogohanda laya lalu Mosesehanda lene.
LEV 18:1 Anduane Homogohanda Mosesehondo
LEV 18:2 ibunaga bi Isaraele wali agali bu karuni lamibe lowa lalu, I̱ Anduane Homogo tínaga Ngode Datagaliwabe kogoni.
LEV 18:3 Tí Iyibi dindiha hene ha kamigonigo Iyibialime mana biaga ngadagua tígua talialu bulene nawiore. Ani bialu áyu tí Kenana dindi haru poleberogo ogoniha howabi mana ti biaga ngagobi nabule dege laro.
LEV 18:4 Tígua mana i̱naga ngerogo dege taluwa bialu halu ogoale bilimu lalu i̱nime langerogo dege bialu halimu. I̱ Anduane Homogo tínaga Ngode Datagaliwabe kogo i̱naga bi tíhondo langerogoni.
LEV 18:5 Tígua mana i̱na hameledogo bialu haabo halu bi mana ogoale bilimu lalu lo ngogo talialu halimu. Tígua ogonidagua bialu harimiyagua nde bayale holeberemi. Anduane Homogo i̱niore kogo i̱na tí ogonidaguaore bilimu larogoni, lene.
LEV 18:6 Anduane Homogo ibugua mana ogodagua bilimu lalu langiya. Wali agali tí damene darama mbiraore bedago kayu bulene nawi. Deme handaya howa dimagoli ha kayu biabi bulene nawiore.
LEV 18:7 Í̠ ai̱yala mandagi kayu bu holene nawi. Anidagua biriyagua í̠na í̠ aba mo taga holebere. Ani buleberego í̠ ai̱ya bedago í̠na ibu í̠ ai̱yaore beda manda buwa ko ogoni nabilimu.
LEV 18:8 Í̠ aba one mende bedago bababi nde kayu bulene nawi dege. Í̠na ogonidagua beregome í̠ aba mo tagaore timbuni holebere.
LEV 18:9 Í̠ mbalini bedago í̠ aba ibu waneyaguabi ai̱ya ibu waneyaguabi uruni alego baba kayu bulene nawiore. Ai̱yahanda í̠ aba andagani taba heneneyaguabi anda mendeha taba heneneyaguabi ta nabi í̠ mbalini degego ti baba kayu nabilimu.
LEV 18:10 Í̠ igini ibu wanebi í̠ wane ibu wanebi í̠ aguane ogoni bedagola kayu nabibe. Mana ogonibi beregome í̠ni mo taga holene wulebira.
LEV 18:11 Í̠ aba ibu yagini bedago baba kayu nabibe. Ogoni ibu í̠ aba waneore biralu í̠ mbalini bedago manda bibe.
LEV 18:12 Í̠ aba ibu mbalini bedago baba kayu nabibe. Ogoni ibu í̠ abala darama yabulene beda.
LEV 18:13 Í̠ ai̱ya hagibuni bedago baba kayu nabibe. Ogoni ibu í̠ ai̱yala darama yabulene beda.
LEV 18:14 Í̠ aba hamene onela kayu nabibe. Ogoni ibu í̠ ai̱ya ale beda. Wali ogoni alego haru paliriyagua nde í̠ aba hamene kago ibuni taga timbuni holebira.
LEV 18:15 Í̠ igini ibu one bedagola kayu nabibe. Ibu í̠ one ndo bedago ani nabibe.
LEV 18:16 Í̠ hamene one í̠ kiane bedagola kayu nabibe. Wali ogonila mandagi paliribiyagua í̠ hamene kago ibu taga timbuni holebirago ani bulene nawiore.
LEV 18:17 Wali mbira í̠ dabu berego wane ogoni í̠ yagini mbira bereagua í̠na ogoni í̠ kayu bulene nawi. Ani bialu í̠ one ibu igini kago wane bereagua ogonibi í̠ kayu bulene nawi. Ogoni irane wali uruni í̠ one ibu baba darama mbiraore ibu waneigini hangu ka. Í̠na uruni baba page biriyagua nde í̠na mana ko tagabiore wali tagini holene ngago mo pe holebere.
LEV 18:18 Í̠ one berelowa ibu hagibuni bedago kayu bulene nawi. Í̠na libu mo keba holeberego mana ogoni bayale ndogo nabibe.
LEV 18:19 Wali ege habolo bedagola kayu nabibe. Ogoningi ibu dodohe bedago nabibe.
LEV 18:20 Agali í̠naga nenege kago onela kayu nabibe. Anidagua biriyagua Anduane Homogonaga deni í̠ni mo ko hene dodoheore holebere.
LEV 18:21 Baya hanguore hale hadaba. Tígua mbirale dama mitangi bialu bi pupu wule gime wabini mini Molegehondo tínaga waneigini lomabu mialu irani bo delolene nawi. Ani birimiyagua Anduane Homogo tínaga Ngode Datagaliwabe kagonaga mini mo dindiha halu holigo ani bulene nawi.
LEV 18:22 Tí wali baba mandagi paliagadagua agali dege dege mana ko ngubi ngago bulene nawiore. Mana ogoni ko ngubiore ngago i̱na tí ogonidagua bilimulo hame naleore kogoni.
LEV 18:23 Wali agalimebi nogo biango baba mana ko ngubi ngago bulene nawiore. Mana ogonibi bialu kamirume tíni mo ko holeberemi. Mana ogoni ko ngubiore ngago birimiyagua Anduane Homogonaga deni tí dodoheore holeberemi.
LEV 18:24 Mana ko urunialego mbira tígua bulene nawiore. Anidagua bialu harimiyagua tí Anduane Homogonaga deni tíni mo ko hene dodoheore holeberemi. Wali agali Anduane Homogo mitangi nabiaga Kenana dindiha hene karu tigua mana ko ngubi urunidagua bialu hayagome tini mo ko halu Anduane Homogonaga deni dodohe ka. Ani kago áyu dindi ogoni tígua karulo halimulonaga Anduane Homogo ibugua wene taliatagi halu ka.
LEV 18:25 Tigua mana ko binigome dindi ogoni mo ko hene dodohe ngeleda. Ani ngeledago Anduane Homogo ibugua dindi ogoni pani nelo miragola wali agali mana ko biaga uruni dindi ogonime ti magu taguiatagi halu balu purogo lelolebira.
LEV 18:26 Anigo tígua mana bayale Anduane Homogohanda langiyaruni baya hangu taluwa bialu halimu. Isaraeleali tíguabi wali agali tara tí baba hene kamirubi tí bibahendeme mana ko ngubi urunibi nabilimuore.
LEV 18:27 Dindi ogoriani wali agali ala heneyaru tigua mana ko ngubi uruni dege bialu haga heneyago tí manda bilimu. Ani bialu henegome dindi ogo mo ko henego ngagoni.
LEV 18:28 Tígua ogonidagua mbira bialu holigonaga laro. Tígua mana ko uruniale bialu harimiyagua nde wali agali Anduane Homogo mitangi nahaga ogoriani heneru dindi ogonime ti magu taguiatagi henedagua tíbi nde anidagua dege bulebira.
LEV 18:29 Isaraele wali agali bu kamiru aria mbirame mana ko uruniale bialu harimiyagua Anduane Homogonaga wali agali bu karu baba nahelo bo batagi holebira, lalu Mosesehanda lene.
LEV 18:30 Anduane Homogohanda ogodagua laya. Tígua i̱naga bi o langerogoni baya hanguore taluwa bialu haabo halimu. Tígua wali agali dindi ogoniha ala henerunaga mana ko ngubiore bini ngadagua bialu holemini de hondowa halimu. Ani bialu harimiyagua nde tínime i̱naga deni mo ko hene dodohe holigonaga nabilimu laro. Hale haramine. I̱ Anduane Homogo tínaga Ngode Datagaliwabe kogome laya, lalu Mosesehanda lene.
LEV 19:1 Anduane Homogo ibugua Mosesehondo lalu,
LEV 19:2 Isaraele wali agalihondo bi ogodagua labe, lene. Ibugua lalu, Anduane Homogo tínaga Ngode Datagaliwabe i̱ mini baya burugule taraore kodagua tíbi mini baya burugule taraore halimu.
LEV 19:3 Tí bibahende hangu hangume tínaga aba ai̱yabi yohanda nabi laradagua hale halu bilimu. Ani bialu Sabada horo tara ngago pugua nabi bilimu larudagua bialu halimu. I̱ Anduane Homogo tínaga Ngode Datagaliwabe kogonigo i̱na laro.
LEV 19:4 Mbirale gime wabini ngaru bi pupu wule i̱ yu wahalu napilimu. Aeanemebi mbira bi pupu wule gime wanabilimu. I̱ Anduane Homogo tínaga Ngode Datagaliwabe kogonigo i̱na laro.
LEV 19:5 Tígua mbirale mbira Anduane Homogo i̱la ho gimbu bulenaga bo ngulene tu haragola mana langirugodaguaore beramigola i̱na turu howa ogoni mo yulebero.
LEV 19:6 Mbirale bo loma binigo horo ogoningi degeyaguabi horo mendengiyaguabi noleberami. Horo tebonengi maru nai nahe ibira hayagua ogoni nolene nawiorego irani delai holene nga.
LEV 19:7 Horo tebone pedagola loma binigonaga podo ibiraho winigo i̱naga deni dodohe ngago mbiralime nayagua i̱hondo lomabu ngiyago mebia hayada manda buwa nayulebero.
LEV 19:8 Mbiralime podo ibiraho wini ogoni nayagua ko timbuni bira. Anidagua biragome ko ibulebirago tene ibuniha nga. Tigua i̱hondo lomabu nginigo mebia hayagonaga ogoni ibu i̱naga wali agali karu aria ndo ka lolebero.
LEV 19:9 Tígua tínaga mabuni tomo mbirale ngaru bialu howa mabu gibuni lenehayagi nabi helalimu. Ani buwa maru yu waharamigobi bu dai nabi ani helo wahalimu.
LEV 19:10 Pu mbira mini gerebinaga lini mabuni yu wahenerubi dogolo ibira ibira binirubi mbira ilama dai bulemini. Uruni wali agali yagibano karubi wali agali ti aria ndo karubi ti milo ngelalimu. I̱ Anduane Homogo tínaga Ngode Datagaliwabe kogonigo i̱na laro.
LEV 19:11 Mbirale page nabilimu. Mendealinaga yidago mule lalu ke̱ howa nabilimu. Tindule nalalimu.
LEV 19:12 Í̠na mbirale mbira nabule mitangi bialu henene buleore bero lalu Anduane Homogo i̱naga mini lalu nalo wilimu. Ani beramigome i̱naga mini mo ko holeberamigo nalalimu. I̱ Anduane Homogo tínaga Ngode Datagaliwabe kogonigo i̱na laro.
LEV 19:13 Ko ogobi hayago manda buwa mbiralinaga ngaru guru nole manda bialu pagebi nabilimu. Mendealime í̠naga biabe biaha lowa ibunaga yolo mulenengi í̠na yuha nabi yu paliabi buleni.
LEV 19:14 Hale paihe karu hale nahaga ka manda buwa ha nahalimu. De kohe karu pilelo manda buwa mbirale mbira tinaga hariga pu íbu buleneni wiapai nahalimu. I̱ Anduane Homogo tínaga Ngode Datagaliwabe kogonigo i̱hondo giho halimu.
LEV 19:15 Godi hale halu howa mana henene tigatiga lolene ngadagua lalimu. Wali agali yagibano karu koda lowa godime ti bolangua helo manda nabilimu. Homogo mini lene karu hondowabi gi howa godi ti bolangua helo biamogobi nabilimu. Godi tigatiga gai bulene ngadagua gai bilimu.
LEV 19:16 Mendealigo erembiraha howa ke̱ halubi lo guralubi lama ibaga nabilimu. Mbirali holene homolenela tuni howa godi lalu kagola í̠na ibu biamogo bule bi baya mbira lolene yideyagua labe. I̱ Anduane Homogo tínaga Ngode Datagaliwabe kogonigo i̱na laro.
LEV 19:17 Í̠naga nenege mbirame í̠hondo ko biyagua í̠naga gubaliniha handabe manga ho haabo nahabe. Genda wiaruago libuni howa abale lo tiga biba labe. Nabiriyagua mana ko ibunaga wiyagome í̠bi minumaga habehe ke.
LEV 19:18 Mana ko birago biadai nabilimu. Wali agali mbira handabe manga haho wiaabo nahe howa í̠ni gubalini ho harilidagua maru karu ta nabi gubalini ho habe. I̱ Anduane Homogo kogoni.
LEV 19:19 Mana bilimu lalu langerogo biai halimu. Nogo tara tarabi biango tara tarabi budi tara tarabi igini mende ale hono wilo hendela tagotago nabilimu. Tomo mbira ale lini heba mende alegonaga lini heba mandagi hangamaga nahalimu. Aga nogo tara tara irinimebi mbirale tara pu tondo alemebi heba mandagi wabiniru karulolemini.
LEV 19:20 Agali mbirame ibunaga garabaya biabe ale biahaga wandari mbira bedago ogoni agali mendehondo í̠naga garabaya biabe ale biahaga berelo nguliya lalu agali mendegome yolo nami howa yupe nahe. Yupe nahe karia agali anduane ala hayago ibunila onene agalini mana biagadagua bialu wandari biagola mandagi paliyayagua mana ngagome pani nelo ledadagua nelo mulene nga. Anigoyu agali ogonime wandari yupe nahego ibu andaga biraho winidagome homelo nabolebira.
LEV 19:21 Agali ogonime ko biyagonaga i̱na domoliya ibugua nogo sibi wangabe mbira dege i̱naga Balai Anda biago harabani haru ibulene nga.
LEV 19:22 Ani biragola nogo sibi wangabe ogoni loma binigo mo miaga kago ibugua agali ko biyagonaga dodo para hayago domolene mana ilili bialu bo loma bulebira. Ani biragola ibunaga ko biyago i̱na la nabi waholebero.
LEV 19:23 Dindi i̱na ngule lo wirugoria anda puwa tígua ira tara tara hangaramigonaga lini daragola mali tebirani lini dedaru nanolene manda bilimu.
LEV 19:24 Mali manegoria ira lini daragola bibahende tígua Anduane Homogo i̱ kogohondo turu halu lomabu ngiai halimu.
LEV 19:25 Anigo mali daunigoria ira lini dedaruni bibahende tíni do nalimu. Larodagua biai harimiyagua tínaga ira hengedamigoria lini daho wiaabo holebira. I̱ Anduane Homogo tínaga Ngode Datagaliwabe kogonigo i̱na laro.
LEV 19:26 Nogo tara tarabi egarubi darama bedaore nolemini. Damanaga gamugamu bibahende ngaruni bule lo manda bulemini.
LEV 19:27 Mandari halehayagi dambu tigini kago podolemini. Angaribi gandu lalu mo tumagi nahalimu.
LEV 19:28 Mbirali homaragola dara howa tínaga tinginini gi pugulebi hale podolebi manda nabilimu. I̱ Anduane Homogo kogoni.
LEV 19:29 Wali agali tara tara karume damahondo bi pupu wialu howa tinaga wane mo ko hagadagua tínaga wane bedamiru mo ko halu agali page biaga bayanda wali berelolemini. Tígua i̱ yu wahalu dama karu yu tiga birimiyagua tínaga dindini mana ko ngubiore tagira ibai holebira.
LEV 19:30 Tígua i̱ mitangi bulene Sabada horo pongo bo wiruru pugua nabilimu. I̱ mitangi bialu lotu lole lomabia hene anda kagobi mo yo nahandalimu. I̱ Anduane Homogoore kogoni.
LEV 19:31 Mbirale maru hale hole homene dinini heba bi laga karu karia napilimu. Pirimiyagua ani beramigome tí i̱naga deni dodohe holeberami. I̱ Anduane Homogo tínaga Ngode Datagaliwabe kogonigo i̱na laro.
LEV 19:32 Wali agali wahe karuhondo mana bayale bialu ti mo yo nahandalimu. I̱hondo giho halu i̱na bi larodagua bialu halimu. Anduane Homogo i̱ore kogoni.
LEV 19:33 Wali agali tara tara maru tínaga dindini tí heba mandagi íbu karuhondo mana bia ko halu nabilimu.
LEV 19:34 Tíni Isaraele wali agalihondo beramilidagua tihondobi ogonidagua dege bilimu. Ani bialu tíni gubalini haramilidagua dege tibi gubalini halimu. Tínibi Iyibi dindini hemingi ogoni ale dege harimigo mitangi bialu embeda nahalimu. I̱ Anduane Homogo tínaga Ngode Datagaliwabe kogonigo i̱na laro.
LEV 19:35 Mbirali mo hondo howa ibunaga mbirale ngago i̱ mo hole lowa luninaga magi handaga ngagobi genda handaga ngagobi timbuni magi handaga ngagobi mbira ke̱ halu nabilimu.
LEV 19:36 Anidagua nabi bayuwa tale bialu magi polene ngadagua pelowa dagabi bayuwa lolene ngadagua tigatigaore lalimu. I̱ Anduane Homogo tínaga Ngode Datagaliwabe kogonigo i̱na tí Iyibi dindini hemiria haru tagira ibirugoni.
LEV 19:37 I̱naga mana lo wirugo damenebi bi larurunibi bibahende ledogo biai halimu. I̱ Anduane Homogoore kogoni.
LEV 20:1 Anduane Homogohanda Mosese lamialu lalu,
LEV 20:2 Í̠na Isaraele wali agali bu karuhondo ogodagua lamibe. Isaraele wali agali tínimebi wali agali tara tí heba íbu hene kamirumebi tínaga waneigini mbira mbirale gime wabini mini Molege laga ngagohondo loma bialu bo miyagua wali agali ogonidagua birago homelo bo wahalimu. Wali agali bu kamiru bibahendeme ege to̱le̱ dugualu ogoni birago homelo to̱le̱me baga baga bialu bo wahalimu.
LEV 20:3 Tí mbiralime ibu waneigini mbirago Molegehondo bo miyagua ibugua i̱naga Balai Anda mo mebia halu i̱naga mini timbuni lene kogoni bope halu mo nagalone haragoni. Anidagua biragola i̱na ogonidagua biaga kagola waitigi halu ibu i̱naga wali agali heba mandagi nahelo bo batagi holebero.
LEV 20:4 Anigo wali agali maru karume mana ogonidagua birago hondowa la nabi wahalu tigua agali ogoni birago balu home nalayagua
LEV 20:5 nde i̱na wali agali urunihondo waitigi halu ibu damene lenego bibahende baba waitigi hai ho holebero. Ani bialu wali agali i̱nihondo erembira ngialu dama mitangi bialu gime wabini mini Molege ngagonaga bi pupu wialu karu tihondobi erembira mulebero. Ani bialu ti i̱naga wali agali baba mandagi nahelo bo batagi holebero.
LEV 20:6 Mbiralime i̱ wahalu wali agali dama mana biaga kagoha piyagua maru homene dinini baba bi ladobo biaga kagoha piyaguabi nde ogoni ibu wali agali i̱ mitangi nabiaga karu ale dege holebira. Anidagua bialu kagola i̱na ibuhondo erembira mialu i̱naga wali agali baba mandagi nahelo bo batagi holebero.
LEV 20:7 Anidagua bule ngogo ai tígua mana bayale tigabi i̱na hameledogo bialu howa tíni bayaleore ani hole halimu. I̱ Anduane Homogo tínaga Ngode Datagaliwabe kogo i̱na bi o ledogoniore laro.
LEV 20:8 Anigo i̱ Anduane Homogo kogo i̱na tí i̱naga wali agaliore halimulo dabo bagiho heledogo ai tígua i̱naga bi mana lo ngago baya hangu taluwa bialu halimu, lene.
LEV 20:9 Anduane Homogo ibugua, Mana ogodagua bilimu, lene. Wali agali mbirame ibu abahondoyaguabi ibu ai̱yahondoyaguabi ha halu lalu, Ngode Datagaliwabehanda í̠ mo ko helo, layagua wali agali bi ogonidagua laga kago homelo bo wahalimu. Wali agali bi ogonidagua larago ibuniha ko ngagonaga ibuni homolene karulapeore.
LEV 20:10 Agali mbirame ibunaga nenege kago onela kayu biyagua nde wali agalibi kirabali homelo bo wahalimu.
LEV 20:11 Agali mbirame ibu aba onela mandagi paliyagua nde agali ogoni ibugua ibu aba mo taga halu yo handaragoni. Anidagua birago ai agali ogonibi wali biagobi kirabali homelo bo waholene nga. Libugua mana ko ogonidagua biyagonaga libuni homelo bolene nga.
LEV 20:12 Agali mbirame ibu igini one bedagola kayu bialu hayagua wali agalibi kirabali homelo bolene nga. Libugua mana ko biyagonaga libuni homolene ngago bo wahalimu.
LEV 20:13 Agali mbirame wali baba paliagadagua agali mendealila palialu mana ko ngubi ngago biyagua libugua mana koorene ko biyagonaga libu kirabali homelo bo wahalimu.
LEV 20:14 Agali mbira kagome wali mbira dabu bialu ibu imane wandari ai̱ya bedagobi dabu bu palu biyagua nde ogoni mana ko leheore biragoni. Mana ogonidagua birago mana koorego tí kamigoha ogoniale mbira nawilo wali agali ogoni birago tebirabali ti haru homelo irani bo delalimu.
LEV 20:15 Agali mbirame nogo biangorula mana ko biyagua nde agali ogoni homelo bo wahalu nogo biangoyaguabi agali biagome yinidagobi homelo bo wahalimu.
LEV 20:16 Wali mbirame nogo biangoru mbira kagoha puwa mana ko biyagua nde wali ogoni homelo bo wahalu nogo biangoyaguabi mbira wali ogoni yaga hayadagobi homelo bo waholene nga. Mana ko ogoni libunime biyagonaga homolene nga.
LEV 20:17 Agali mbirame ibu aba wane bedagoyaguabi ibu ai̱ya wane bedagoyaguabi ibu mbaliniore bedago dabu biyagua nde wali agali ogonidagua birago libu mana koore biya. Anidagua biaga kago tí baba mandagi nahelo tígua wali agali bibahendenaga deni wali agali ogonilabo waratagi holene nga. Agali ogonime ibuni mbalini nguniorela mana ko bero lalu mini wuwa biyagonaga genda yu holene wulebira.
LEV 20:18 Agali mbirame wali ege habolo bedangi mandagi yu paliribiyagua nde libugua Anduane Homogonaga deni mana ko dodoheore biya. Ani biyago ai wali agali ogonilabo libu haru Anduane Homogonaga wali agali karu heba mandagi nahelo bo talu pelalimu.
LEV 20:19 Agali mbirame ibu ai̱ya hagibunibi ibu aba mbalinibi kayu biyagua agali ogoni ibugua ibu dameneore yo handalu mana ko biyago ai libugua mana ko biribigonaga genda libuni yu holebira.
LEV 20:20 Agali mbirame ibu aba hamene one bedago kayu biyagua mana ogonibi biragome ibu aba hamene kago mo taga holebira. Anidagua biragome wali agali ogonilabo libunime mana ko biribigonaga genda yu holeberabi. Anigo agali ogoni ibugua wali ogoni dabu biyagua nde libunaga waneigini mbira nahonowi halu homolebira.
LEV 20:21 Agali mbirame ibu hamene one haru pubagi halu dabu biyagua nde ibugua Anduane Homogonaga deni mana koore bialu ibu hamene mo taga holebira. Ani biragome libunaga waneigini mbira nahe howa walibi agalibi homolebira.
LEV 20:22 Anduane Homogo ibugua lalu, I̱na tí Kenana dindiha haru poleberogo dindi ogonime tí magu tagu wiatagi nahelo tígua i̱naga bi mana lo werogoni baya hangu manda biaabo halimu.
LEV 20:23 Tí Kenana wali agali Anduane Homogo mitangi nabiaga karume mana ko biaga ngaru talialu nabilimu. Tigua mana ko uruni bialu heagola i̱na tihondo turu naheore henego kogoni. Ani howa ai i̱na tí dindi ogoni karulo halimulo Kenana wali agali karu wahalu pelo bo batagi holebero.
LEV 20:24 Dindi ogoni bayaleore dindi ibane bere wialu tomo bayale anda hai haga ngago tí karulo halimulo lalu abale ngulebero lo wirugoni. Ani lo wirugo ai dindi ogoni mo nguleberoore larogoni. I̱ Anduane Homogo tínaga Ngode Datagaliwabe kogo i̱na tí wali agali tara tara dewaore heago dombeneha hemiria i̱na tí i̱ninaga wali agaliore halimulonaga dabo bagi ho helene kamigoni.
LEV 20:25 Anigo ai ema bialu piaga ariabi ega bedaru ariabi bibahende tígua balu nolene biru ngaru bayale lene agodabe handa i̱naga deni ko dodohe agodabe baya hangu dabo handalu halimu. Egabi ema bialu piaga maru bedarubi pagaya tara tara bedarubi bibahende dodohe ogoale beda lalu langiai harugoni. Tígua balu nolene nawi lalu langirugo bi mo wahalu bo narimiyagua nde tíbi i̱naga deni ko dodohe holeberemi.
LEV 20:26 I̱ni Anduane Homogo kogo i̱na tí wali agali tara tara bu hearu dombeneha hemiria dabo bagi halu i̱ninaga wali agaliore halimulo dabo helarugoni. I̱naga mini tigabiorebi bayalebi howa baya buruguleore kogoni. Ai tíguabi nde mana tigabi bayaleore ngaru talialu bialu howa tíni baya buruguleore hole halimu.
LEV 20:27 Wali agali mbirame homene dinini mo bila haga bialu dininime hame ngago hale halu heagua nde ogonidagua bialu kago ibuni homelo bo waholene nga. Wali agali mana ko ibunime bialu hayadagonaga pani ibuni homolene ngago ai wali agali bibahendeme ege to̱le̱ dugualu bo homelalimu, lalu Anduane Homogohanda Mosesehondo lamini.
LEV 21:1 Anduane Homogohanda Mosesehondo lalu, Loma binigo mo miaga agali Arono aria karuhondo bi ogodagua lamibe. Tínaga damene bu karu aria mbirago homayagua dara howa mana biaga ngadagua nabilimu laro. Mana ogonidagua beramigome i̱naga deni tí ko dodohe holeberemigo nabilimu.
LEV 21:2 Anigo í̠ aba ai̱yaoreyaguabi waneiginiyaguabi hameneoreyaguabi
LEV 21:3 mbaliniore mbira agali nape í̠ andaga biragabi uruni homayagua nde dara howa biaga mana ngago ai harugo lowa tí mo ko holene wiaguabi wahalu mana ogoni bilimu.
LEV 21:4 Anigo loma binigo mo miaga kago ibu balibuni homayagua nde ibugua dara howa mana biaga ngago ibu mo dodo holigo bulene nawi laro.
LEV 21:5 Loma minigo mo miaga kamigome dara holenaga mana biaga ngamigo bialu howa tínaga mandari lene maruha podowa hagadaguabi angari podo tubagi halubi tínaga tingini darama ibilo podolenebi mana uruni bulene nawiore laro.
LEV 21:6 Ani larogoni irane loma binigo mo miaga kamiru tí i̱naga dabo bagiho heledogoni ndobe. Ai i̱ tínaga Ngode Datagaliwabeore kogonigo tígua i̱naga mini bope halu mo nagalone nahalimu. Tígua wali agalime mbirale yalu ibiragola mo yalu i̱hondo loma buwa mo ngialu uruni i̱naga tomo bu ngiadai biradagua biaga kamigoni. Ani kamigo tígua mana ko ngagoha erembira mialu tí i̱naga dabo bagiho helene kamigo manda bialu haabo halimu.
LEV 21:7 Loma binigo mo miaga kamigo damene tí i̱ninaga agaliore kamigoni. Ani kamigo manda bialu tígua wali mbira agali kayu bima ibaga biaga bedagobi agali heba mandagi palene bedagobi wali ibu agalinime wahene bedagobi uruni ale biaga biraga bidago tígua dabu bulene nawi laro.
LEV 21:8 Wali agali bu karume tí i̱naga loma binigo mo miaga kami leneore kalo manda bilo halimu. Irane tí i̱naga tomo lomabu ngiagaore hene kamine de hendelo halimu. I̱ Anduane Homogoore kogoni. I̱ni mini baya buruguleore howa mana bayale tigabiore ngago biaga kogoni. Ani howa i̱ninaga wali agaliore lene karu bibahende mo tara helowa mana bayale tigabi hangu bialu helonaga dabo bagi helaga kogoni.
LEV 21:9 Loma binigo mo miaga kamiru tí waneme agali kayu yama ibaga biaga bereagua mana ogonibi bialu bedagome ibu aba mo taga holebira. Anigo wandari ogonidagua birago ibu homelo wali agalime ira bo delowa irame do tauladaga helo irani delolene nga.
LEV 21:10 Loma Binigo Mo Miaga Haguane Timbuni kago ibu biabe tara mbira yu kagoni. Ibunaga emboneni weli baya taraore odo wialu loma binigo mo miaganaga aga karulo kagoni. Ani howa ibu damene mbirago homaragola ibugua dara ho howa biagadagua ibunaga mandari bame helo wahowa manda pere nabi holene nawi. Ibugua mandari baya hangu pere bu holene nga. Ibunaga aga bu kago lerelo waholene nawi.
LEV 21:11 Loma Binigo Mo Miaga Haguane Timbuni biagome ibu damene homene tingini moaho ngagoha polene nawigo napolebira. Ibu aba ai̱yaore homayaguabi i̱naga deni ibuni mo dodohe holigo ibu wali agali duguanda kagoha daraho yalu polene nawigo napolebira.
LEV 21:12 Ibugua i̱naga Balai Anda Hobane Loma Bia Hene helo wahalu duguanda piyagua nde i̱naga Balai Anda Hobane Loma Bia Hene kago mo mebia halu mo dodo holebira. Ibu Loma Binigo Mo Miaga Agali Haguane Timbuni helo tígua weli baya taraore i̱na ngirugome odo wialu dabo helarimigoni ka. Ani kago ai ibugua homene tingini ngagoha polene nawiore laro. I̱ Anduane Homogo kogoni.
LEV 21:13 Loma Binigo Mo Miaga Haguane Timbuni ibugua wali mbira agalila napalene bedago dabu bulene nga.
LEV 21:14 Wali mbira ibu agalini homene dalo bedagobi agalinime wahene bedagobi agali kayu yama ibaga biaga bedagobi dabu bulene nawiore. Ibu damene loma binigo mo miaga kago wane mbira mabuage biruwa agalila napalene bedago dege dabu bulene nga.
LEV 21:15 I̱na bi o larogo mo wahalu puwa ibugua wali dabu bulene nawi larogo dabu biyagua nde ibunaga waneigini harago damene i̱naga deni dodohe holebira. I̱ Anduane Homogo kogome agali ogoni ibu i̱ninagaore helo dabo helalu Loma Binigo Mo Miaga Haguane Timbuni helo heledogoni, lene.
LEV 21:16 Anduane Homogohanda Mosesehondo lone lamialu lalu,
LEV 21:17 Í̠na Aronohondo ogodagua lamibe. Í̠ damene mbira áyu karu ariabi mani holebirarubi mbirago ibunaga tingini mo ko hene heagua ogoni ibugua tomo mbirale i̱hondo lomabu ngulene nawi. Mana ogonidagua wia a̱i̱ holebira.
LEV 21:18 Agali maru tinaga tinginiha mo kohe damene kagome tinaga tomo i̱hondo lomabu ngulene nawiore. Agali o larogoni mbirali de kohebi ge kohebi dengui mo ko henebi ibu ai̱yahanda gi geru tubagi ndindele taba hanayaguabi nde tigua i̱naga lomabu delaga nabulebira.
LEV 21:19 Agali gi ge kuduguheyaguabi
LEV 21:20 erene koheyaguabi agali tubagi gayabogoliyaguabi deha dere biaga heaguabi dongoneni derebi heaguabi agali tinginini haga alego mbira naheyaguabi urunibi damene kagome loma binigo mo miaga agali nahabehe holebira.
LEV 21:21 Agali Arono aguanene tí aria kago mbirago ibuha tingini mo ko hene urunibi mbira heagua tigua i̱naga loma binigo mo ngiaga nahelo laro.
LEV 21:22 Ani bialu tomo i̱hondo tígua lomabu ngini tíni nolene ngago aria ibubi nolebira. Anigo tomo i̱nagaore lalu lomabu ngini ngago tí nalimulo ngerogo aria ibubi nolebira.
LEV 21:23 Agali mbirali tingini kohe ogonibigo ibugua Balai Anda biagonaga tamuha Hobane Loma Bia Heneore biagola hobaki hene labolabo timbuni gerelape ho ngagoria hapara naholebira. Ani bialu lomabu delaga dabu ngagoriabi hapara ho naholebira. Mbirale bayale i̱nagaore wiabagi ho winigo ngagoria kaware ibiyagua ibugua uruni i̱naga deni mo ko holebirago polene nawiore larogoni. Ani larogoni irane i̱ni Anduane Homogo kogoni howa mbirale uruni i̱ninagaore ngelo dabo bagiho winigo ngeledo, lalu Anduane Homogohanda lene.
LEV 21:24 Bi uruni anidagua laya, lalu Mosese ibugua bi uruni Aronohondobi Arono igini hearuhondobi Isaraele wali agali hearuhondobi lamiai hene.
LEV 22:1 Anduane Homogohanda Mosesehondo lamialu lalu,
LEV 22:2 Arono halu ibu igini karuhondo ogodagua labe. Isaraelealirume mbirale lomabu yalu ibiraru i̱ninagaore ngalo manda bilimu. Ani manda bialu loma bini uruni i̱ninagaore nga lowa baya hangu handayaho halimu. Anidagua handayaho naharimiyagua nde tígua i̱ mini lene timbuni kogo mo nagalone heloleberemi. Anduane Homogo i̱ore kogoni.
LEV 22:3 Loma binigo mo miaga kamiru aria áyu karubi mani holebirarubi mbirago ibugua Isaraele wali agali bu karume mbirale i̱hondo lomabu yalu ibiragoria ibu i̱naga deni dodo kaore howa kaware hapara holene nawiore. Ibu kaware pu hayagua nde i̱na agali ogoni ibu loma binigo mo miaga nahelo bo talia tagi holebero. Mana ogoniore baya hangu talialu bialu haabo halimu. Anduane Homogo i̱ore kogoni.
LEV 22:4 Loma binigo mo miaga kamirubi mani holebirarubi tí aria mbirago ibu tinginini dere timbuni mbira bidago angibu tuguda tagitagi biyagua nde agali ogoni ibu i̱naga deni dodohe holebira. Ani holebirago ibugua i̱naga biabe biaga howa mbirale loma bini ngaru nolene nawi. Loma binigo mo miaga agalime mbirali homenegonaga mbirale dodohe ngaru ela hayaguabi ibunaga tinginiha ibane bame tagira ibiyaguabi ogoni i̱naga deni dodohe ka. Nogo tarabi ema bialu piagarubi i̱naga deni ko karu aria mbirago ela hayaguabi wali agali i̱naga deni dodohe karu aria mbirago ela hayaguabi uruni damenego bibahende ela hayagua nde ibugua i̱naga tomo loma bini ngago nanolebira. Ibugua bayale hole mana bulene winidagua biyagua nde ibu i̱naga deni dodo nahe howa tomo lomabu minigo mo miaga howa nolene ngaru ta nabi nalu holene karulape nga.
LEV 22:6 Loma binigo mo miaga kamiru aria mbirago ibugua mana mbira biragome ibu mo dodohe hayagua ibu dodohe dege kane alendo halu ni anda polebira. Ani bialu ibuni wayawaya biagane mana ngadagua buwa dodo nahe howa i̱hondo lomabu bo delole ngagonaga mbirini nolene ngadagua nolebira. Anigo ibu wayawaya biagane mana ngadagua nabi hayagua nde tomo ogoni nanolebira.
LEV 22:7 Ani howa ni paliragola nde ibu i̱naga deni dodo nahe karulape howa tomo i̱hondo loma bialu loma binigo mo miaga karume nelo winigo ibugua nolene karulape nga.
LEV 22:8 Ibugua nogo bame homene ngagobi nogo gabua maru karume bo wahene ngagobi nolene nawi. Uruni nayagua nde ibu i̱naga deni dodohe holebira. Anduane Homogo i̱ore kogoni.
LEV 22:9 Loma binigo mo miaga kamiru tígua bi mana ogoni langirugoni baya hangu taluwa bialu holene nga. Tígua bi ogoni mo nagalone halu waharimiyagua nde koore ogoni birimigome nde i̱na tí bo homelolebero. I̱ Anduane Homogo i̱na tí i̱naga loma binigo mo miaga agali halimulo dabalu helarugo i̱nime tíhondo bi ogonidagua laro.
LEV 22:10 Loma binigo mo miaga kamiru tínibi tí damene karu hangumebi tomo wali agalime i̱nihondo lomabu yalu íbu ngini ngaru noleberami. Wali agali marubi tínaga yolo biabe biaga karubi tí andagani nenege íbu hene karubi ti tomo ogoni aria nanolebira.
LEV 22:11 Anigo garabaya biabe ale bia haga agali waliyaguabi loma binigo mo miaga biago ibunaga munime yolo bini karu tibi tinaga waneigini karubi ti bibahendeme loma binigo mo miaga agalinaga tomo uruni aria nolene nga.
LEV 22:12 Loma binigo mo miaga kago ibu wane bedago loma binigo mo miaga ndo agali tara kagome dabu biyagua nde wali ogoni ibu tomo i̱hondo loma bini ngago nanolebira.
LEV 22:13 Anigo ibu wane wali ogoni agalini homaragola ibu hibaria bereaguabi ibu agalinime wahene biruwa waneigini nahe bereaguabi nde ibu aba andaga dai buwa loma binigo mo miaga karu ti miaga ngaru aria tomo ibu aba andagaha nolene nga. Anigo loma binigo mo miaga agali ibu damene dege karume tomo ogoni aria nolene nga.
LEV 22:14 Mbirali ibu loma binigo mo miaga kago damene ndo howa ibu manda nabi howa tomo i̱hondo lomabu ngini ngago aria mbira nayagua nde tomo o nayadagonidagua loma binigo mo miaga kagohondo dano hongolebira. Ibugua tomo duria neneyagua nde ibugua waragane tago halu dano hongolene nga.
LEV 22:15 Anigo loma binigo mo miaga karu tigua i̱hondo tomo lomabu ngini ngaru mo mebia holigo wali agali ta nabi bu karume nanelo bayuwa mamage halu handayaho holene nga.
LEV 22:16 Loma binigo mo miaga kagome wali agali ta nabi mbirago tomo ogoni aria nelo miyagua nde o nayadagonime ibuha mo ko halu genda yu holene anda ibulebira. Ani ibiragola ibugua tomo ogoni nayagonaga dano hongolene wulebira. Ani larogoni irane tomo ogoni nayagonaga Anduane Homogo i̱na i̱ninagaore mo wiabagi hene nga, lene.
LEV 22:17 Anduane Homogohanda Mosesehondo lamialu lalu,
LEV 22:18 Í̠na bi ogo larogoni Arono halu ibu igini bu karuhondobi Isaraele wali agali bu karuhondobi lamibe. Agali mbira Isaraeleali kamiru ariabi agali dindi tara howa tí heba íbu hene karubi tí bibahendeme nogo mbira i̱hondo loma bialu irani dai helonaga haru ibiyagua nde ogonidagua bulene nga. Loma ogoni agali biago ibugua ani bule lalu bi lowinigo lola helonaga haru ibiyaguabi ndo ibuni hameme lomabu delole haru ibiyaguabi nogo biago ko ndo dere durubi mbira nabiore bayaleore kago haru ibulene nga.
LEV 22:19 Loma ogoni i̱na turu howa mo yuliyanaga nogo uruni bulumagayaguabi sibiyaguabi memeyaguabi wangabe mbirago dere durubi mbira nabiore kago bo loma bule haru halu ibulene nga.
LEV 22:20 Baya hangu hale halimu. Tígua nogo ko derebi kago lomabu bo delole haru halu ibirimiyagua nde Anduane Homogo i̱na tínaga loma ogoni hondowa turu naholebero.
LEV 22:21 Agali mbirame Anduane Homogo i̱nila ho gimbu bulenaga loma bo delole haru ibalu loma ogoni ibunime ngule lowa bi lowinigo lola helonaga haru ibiyaguabi ibuninaga hameme lomabu delole haru ibiyaguabi nde nogo ogoni ibu dere durubi nabi bayaleore kago hondowa haru halu ibulene nga. Tígua ogonidagua birimiyagua nde i̱na tínaga loma ogoni hondowa turu howa mo yulebero.
LEV 22:22 Tígua nogo de kohebi ge kohebi tingini mo kohebi dere timbunibibi kindubibi uruni ale mbirago i̱hondo lomabu delaga dabu ngagoria ogoni loma bialu bo de nalalimu.
LEV 22:23 Tíninaga hameme bo delole haru ibirimiyagua nde nogo gi ge banayaguabi gi geru bereabiyagua nde karulapego bo delalimu. Anigo tígua ala i̱hondo lomabu ngule lowa bi lowinigo lola helonaga loma bo delole haru ibirimiyagua nde nakarulapedago bo de nalalimu larogoni.
LEV 22:24 Nogo wangabe pindu mo waheneyaguabi mo ko heneyaguabi ani bini kago i̱hondo bo lomabu nangilimu. Tí daluha nogo kagonaga mbirale ogonidagua mo ko holeneore nawigo nabilimu.
LEV 22:25 Agali mbirame dindi taraha howa nogo haru halu ibuwa ngirago i̱hondo bo loma bialu ngulene nawiore larogoni. Nogo ogonibigo i̱ninaga deni bayale ndo holebira. Ani birimiyagua i̱na loma ogoni alego hondowa turu naholebero larogoni, lene.
LEV 22:26 Anduane Homogohanda Mosesehondo lamialu lalu,
LEV 22:27 Nogo bulumaga sibi memerume igini yu heagua nde igini ogoni horo karu ibu angibunila mandagi helo helalimu. Ani helowa mani i̱hondo lomabu delaga dabu ngagoria loma bialu bo delole haru halu ibuwa bo delarimiyagua nde i̱na loma ogoni hondowa turu howa mo yulebero.
LEV 22:28 Anigo nogo bulumagabi sibibi memebi uruni ale mbirago igini angibuni heba horo mbiru hanguni bo palu buwa loma bo delolene nawigo anidagua nabilimu.
LEV 22:29 Tígua Anduane Homogo i̱nihondo ka̱i̱ lolenenaga mbirale loma bialu bo delarimiyagua nde loma bo delaga mana ngadagua talialu bo delaramigola i̱na loma ogoni hondowa í̠hondo turu holebero.
LEV 22:30 Ani bialu loma ogoni bo delaramigonaga podo weramigo horo mendengi nole podo ngela nabi horo ogoningi dege nai halimu.
LEV 22:31 Anduane Homogohanda lalu, I̱ Anduane Homogoore kogonigo i̱na mana lo ngogo baya hanguore hale halu taluwa bilimu.
LEV 22:32 I̱naga mini daligaore lene kogo mo yo hondolene nawiore. Isaraele wali agali tígua i̱ mini tigabi baya buruguleore kogoni manda bilimu. I̱ni Anduane Homogoore kogo howa i̱na tí mo tiga bialu bayuwa dabobagi ho helaga kogoni.
LEV 22:33 I̱ tínaga Ngode Datagaliwabeore holenaga i̱na tí Iyibi dindiha hemiria haru tagira ibirugoni. I̱ Anduane Homogo i̱nime anidaguaore biru, lene.
LEV 23:1 Anduane Homogohanda Mosesehondo lalu, Isaraele wali agalihondo bi uru lamibe. Horo taratara tuho werogo pugulani hondowa wali agali tigua horo uruni Anduane Homogonaga ngago i̱ mitangi bialu lotu lole ngoai harangi bilo ogo.
LEV 23:3 Horo waragaru tíninaga biabe biaga wirimigoni. Horo kane Sabada horo ogoningi ha̱lo holene ngago manda bilimu. Horo ogoningi biabe nabi wahowa i̱naga mini mitangi bialu lotu lole ngoai ho halimu. Dindi mendeha pu harimiyaguabi Sabada horo ogoni Anduane Homogonaga ngalo mandabu halimu.
LEV 23:4 Bi langeroruni bayuwa loyogo lalu wali agali lamiai halu horo ogongi ogoale bilimu laruru mo ngoai howa bayuwa bilimu.
LEV 23:5 Bolangua Halu Penegonaga Horo Anduane Homogo mitangi howa turu haganenaga lotu ogoni ege mbiranaga horo deneni (14) alendo ni paliragola horo ogoni tenialu holene nga.
LEV 23:6 Horo nguini (15) haragola Mberedi Yidi Nahe Hirini Nolenenaga Horo holebira. Ogoningi howa horo karu mberedi yidi nahe hirinigo hangu nolene nga.
LEV 23:7 Horo karunaga horo mbira haruagola biabe beramilidagua nabi Anduane Homogo mitangi bialu lotu lole ngoai halimu.
LEV 23:8 Horo karuni tígua Anduane Homogo i̱nihondo tomo lomabu ngule yalu ibalimu. Horo kanego haragola biabe beramilidagua nabi Anduane Homogo mitangi bialu lotu lole ngoai halimu, lalu Anduane Homogohanda Mosesehondo lamini.
LEV 23:9 Anduane Homogohanda laabo halu lalu, I̱na dindi nguleberogoria anda puwa tígua widi hongowa lini pigane hini dedago huba mbira loma binigo mo miaga agali karia bu yalu ibalimu.
LEV 23:11 Ibugua ogoni gime yuwa Anduane Homogo i̱naga deni howa yu wigiwaga lalu loma bulebira. Ani biragola i̱na tíhondo turu holebero. Loma binigo mo miaga ibugua widi lini ogoni Sabada horo bolangua kagola horo mendeni loma bulebira.
LEV 23:12 Horo widi lini ogoni lomabu meramingi nogo sibi igini wangabe mali mbira bolangua nahe ko dere durubi nabi mbira bo lomabu dabuni delai hole haru ibalimu.
LEV 23:13 Ogoni heba balawa magi kilogarama kira olibe lini ibane hamaga halu tomo loma ogonidagua bu delaramigola Anduane Homogo i̱na nga bayaledane hondowa turu holebero. Ngiyaruni ngiamaga halu waini ibabi magi mbodoli emene kira lita mbira hambu yalu ibuwa ngulene nga.
LEV 23:14 Widi lini pigane dedago ogoni gahengeyaguabi hiriniyaguabi daweneyaguabi tí nolene nawi. Ala i̱hondo lomabu nguwa tígua widi lini ogoni aria nalu holene nga. Mana ogoni tínaga aguanene mahaore holebirarumebi ogonidagua dege biaabo holene nga.
LEV 23:15 Widi hubua mbira gandulo yalu Anduane Homogo i̱ ngule eberamingi howa sarere karia daga lalimu.
LEV 23:16 Ani buwa sarere kane daga lamaro beramigonaga Sabada haragola sarere halinigonaga horo mbira (50) ogoningi widi lini pigane hini denego halu mende Anduane Homogohondo loma bule yalu ibalimu.
LEV 23:17 Isaraele agali mbira ibu one waneigini heba bibahendeme mberedi hirini kira degedege i̱hondo lomabu ngule yalu ibalimu. Mberedi ogoni labo balawa genda magi kilo kira muwa ogoni yidi heba minu magamaga bialu hirulene nga. Yalu ibalu loma binigo mo miaga agalihondo miragola ibugua gime yuwa Anduane Homogo i̱naga deni howa wigiwaga lolebira.
LEV 23:18 Isaraele wali agali tígua mberedi ogoni labo heba nogo sibi igini karia bibahende mali mbira bolangua naheru haru ibulene nga. Uruni heba nogo bulumaga wangabe mbirabi sibi wangabe kirabi uruni bibahende ko dere durubi mbira nabiore haru ibulene nga. Uruni bibahende Anduane Homogohondo bo lomabu delagane dabuni delai holene nga. Tígua uruni heba widi lini loma bini biarubi waini iba loma bini biarubi ngulene nga. Anduane Homogo i̱na uruninaga nga hondowa turu timbuni holebero.
LEV 23:19 Ani buwa ko birimiru i̱na domo waholiyanaga nogo meme wangabe mbira bo loma buwa dabuni delalimu. Ani bialu nogo sibi igini wangabe kira mali mbira bolangua nahego Anduane Homogo i̱la ho gimbu bimi̱yanaga bo lomabu delalimu.
LEV 23:20 Loma binigo mo miaga ibugua mberedi kira biago labo heba nogo sibi igini kira biago labobi Anduane Homogo i̱naga deni howa wigiwaga lolebira. Loma binigo ogoni i̱nihondo loma bia henego ngulebadagoni taraorego loma binigo mo miaga agali karu ti nelo mo mulebero.
LEV 23:21 Horo ogoningi biabe beramilidagua nabi Anduane Homogo mitangi bialu lotu lole ngoai halimu. Tínaga waneigini maha holebirarume dindi mendeha pu hayaguabi mana o langerogo biaabo halu holene nga.
LEV 23:22 Tígua tínaga mabuni tomo mbirale ngaru bialu howa mabu gibuni lenehayagi ngaru nabi helalimu. Ani buwa maru yu waharamigobi bu dai nabi ani helo wahalimu. Uruni wali agali yagibano karubi wali agali tí aria ndo dindi tarali karubi ti milo ngelalimu. Anduane Homogo tínaga Ngode Datagaliwabe i̱ore kogoni, lene.
LEV 23:23 Ege kanegonaga horo mbira haragola biabe damene bibahende wahai howa ogoningi horo tara lowa ha̱lo halimu. Ani bu howa mbelo biguli pu laragola Anduane Homogo i̱ kogoni mitangi bialu lotu lole ngoai halimu.
LEV 23:25 Ogoningi biabe beramilidagua nabi howa tomo maru loma buwa dabuni delo i̱hondo ngulene nga, lalu Anduane Homogohanda lene.
LEV 23:26 Anduane Homogo ibugua Mosesehondo bi ogodagua lamialu lalu, Ege kanegonaga horo pini haragola wali agalime ko biyaru i̱na domo waholiyanaga mana lo wirudagua biai holene nga. Horo ogoningi tomo mbira nane howa Anduane Homogo i̱ mitangi bialu lotu lole ngoai howa i̱hondo tomo maru lomabu ngilimu.
LEV 23:28 Wali agalinaga ko biyaru domo waholene horo ogoni duniniorego ogoningi biabe mbira nabilimu.
LEV 23:29 Horo ogoningi mbirali ibu tomo mbira nayagua wali agali ogoni ibu Anduane Homogo i̱naga wali agali ka aria ndo ibu tara haluni ka manda bulebero.
LEV 23:30 Mbirali ibu biabe mbira horo ogoningi biyagua ogoni ibu Anduane Homogo i̱nime bo homelolebero.
LEV 23:31 Mana ogoni tínaga waneigini mani holebiraru tí dindi tarani hayaguabi mana ogoni biaabo halu holene nga.
LEV 23:32 Ege kanegonaga horo dininaga alendo ni paliragola howa horo pininaga alendo ni paliragola dombeneha horo ogoni taraore lowa ha̱lo biralu tomobi mbira nane halimu, lalu Mosesehondo lamini.
LEV 23:33 Anduane Homogohanda Mosese ibuhondo lamialu lalu, Bi ogo Isaraele wali agalihondo lamibe. Ege kanegonaga horo nguini (15) haragola Anda Nemandaruha Palu Holene Horo ogoningi nemandaruha horo karu palu halimu.
LEV 23:35 Horo uruni holenaga horo pigane harangi biabe bibahende beramilidagua nabi Anduane Homogo i̱ mitangi bialu lotu lole ngoai halimu.
LEV 23:36 Horo karu nigoniha i̱hondo tomo lomabu dabuni delowa ngiaabo halimu. Horo halini haragola tíni lone íbu ngoai howa i̱ mitangi bialu lotu lalu tomobi dabuni lomabu delowa ngilimu. Ani bialu biabe beramilidagua nabi horo ogoningi i̱ mitangi bialu lotu lole ngoai halimu.
LEV 23:37 Horo uruni i̱nagago i̱ mitangi bialu lotu lole ngoai howa tomo loma binirubi mbirale bo lomabu irani delai helo delolenerubi widi lini lomabu delolenerubi waini iba lomabu odo wulenerubi uruni horo bibahendeni lomabu ngulene wiyadaru ale ngiai halimu.
LEV 23:38 Horo o holeberamigonaga irane galone abale Anduane Homogonaga Sabada horo haragola haga wirimidaguaore halimu. Lomabu ngiai halu maru ngiaga wirimirubi ngiai halimu. Ani bialu loma bini maru tara ngule lo wirimiru heba bibahende ngiai halimu.
LEV 23:39 Ege kanegonaga horo nguiningi (15) mabuni tomo mbirale hengene ngamiru bialu howa Anda Nemandaruha Palu Holene ogoni horo karuni Anduane Homogo mitangi halu holene wiyadagua bialu halimu. Horo piganego ogoni taraore lowa biabe nabi ha̱lo halimu.
LEV 23:40 Horo piganegoria ira lini bayaleore dedaru do yalu ayage ale yunibi ira marunaga magane yuni dewahebi bu yalu ibalimu. Uruni bu yu howa Anduane Homogo tínaga Ngode Datagaliwabe i̱ mitangi bialu lotu lalu i̱naga mini yaraga halimu.
LEV 23:41 Anda Nemandaruha Palu howa horo karuni ani bialu halimu. Tínaga waneigini mani holebirarumebi mana uruni biaabo halu holene nga.
LEV 23:42 Isaraele wali agali bibahendeore horo ogoningi haragola anda nemandaruha hangu horo karu palu holene nga.
LEV 23:43 Anidagua beramigola tínaga waneigini mani holebirarume mitangi bialu Anduane Homogohanda Isaraele wali agali Iyibi dindini howa haru tagira piyagola anda bame nemanda aleruni bu pale lama haru halu ibinidalo manda bilo ani bilimu. Anduane Homogo i̱ tínaga Ngode Datagaliwabe kogoni.
LEV 23:44 Mosesehanda Isaraele wali agalihondo lamibe layadagua Anduane Homogonaga mini yaraga hole horo uruni agua bilimu lalu lamiai hene.
LEV 24:1 Anduane Homogohanda Mosesehondo lamialu lalu,
LEV 24:2 Isaraele wali agalime olibe lininaga weli bayaleorego i̱naga Balai Anda biagoha lamu hale ngaruha berelole yalu ibalimu lalu lamibe. Ani yalu ibiragola lamu hale wá haabo helo mbiraga bibahendengi delaho wiaabo hole loma binigo mo miaga karume de hondo haabo holebira.
LEV 24:3 Arono ibugua lamu hale uruni alendo dela haragola dalu kane dege gao lolebira. Lamu hale uruni Anduane Homogo i̱naga deni howa Balai Anda Hobane Loma Bia Heneoreha i̱naga Habo Nalolene Bi lo winigonaga Mbogoyi biago ngagola hobane mende Loma Bia Hene kagola tubari labolabo timbuni gerelaho wini biago tagirahayagi ngagoni. I̱naga bi mana ogoni tíhondobi tínaga waneigini aguanene mani hama polobadarumebi bialu haabo helo langerogoni.
LEV 24:4 Arono ibugua lamu hale wiagane irane ngolo bayaleme wabini ngagoni lamu hale biaru delaabo helo baya hangu handayaho haabo holebira. Lamu hale uruni mbiraga bibahendengi daho ngane de hondoliya hundulani hondowa handayaho haabo helolene nga, lalu lene.
LEV 24:5 Anduane Homogohanda Mosesehondo laabo halu lalu, Í̠na balawa bayaleru genda magi kilogarama homberia (12) muwa ogonime mberedi homberia (12) wabibe. Genda magi kilogarama mbira mbirame mberedi mbira mbira wabigi bibe.
LEV 24:6 Ani wabuwa dagia ira agasiamebi ngolo bayalemebi wabini ngago i̱ninaga deni mberedi uruni mo dabadaba howa waragaria halu mbirago duguni mbira wialu waragaria halu mende duguni mende wibe.
LEV 24:7 Ani ngelowa mberedi waragaria duguni kira dagia ngagoriani ira hagua ngabilo delaga mini inisenesi heba mo ngelalu tígua mberedi i̱hondo ngiradagua inisenesi ngabi ogoni aribia halu delalimu.
LEV 24:8 Sabada horo bibahendengi loma binigo mo miaga karume mberedi i̱hondo loma bialu dagiani i̱ni de hondoliya wiaabo holene nga. Habo nalolene bi mbira tí baba lo werogonigo Isaraele wali agalime mana ogoni bialu haabo holene nga.
LEV 24:9 Mberedi ogoni Arono halu ibu aria loma binigo mo miaga holebirarubi tigua nolene wulebira. Isaraele wali agali karume tomo ogoni i̱nihondo lomabu ngini ngago manda bialu loma binigo mo miaga karu tigua Anduane Homogonaga Balai Anda pabe tamuha howa nai holene nga. Tomo ogoni i̱ninagaore ngago i̱na nde loma binigo mo miaga karu ti nelo mulebero, lalu Anduane Homogohanda Mosesehondo bi ogoni lamini.
LEV 24:10 Agali mbira henego ibu aba Iyibiali howa ibu ai̱ya Isaraele wali berene. Ibu ai̱ya Dana hameigini aria agali Dibiri mbira henego wane mini Selomidi berene. Agali ogoni ibu balai anda bu harimidaruha ti haru mandagi howa horo mbirungi ibugua Isaraeleali mbira heagola keba howa gungu bini. Gungu bialu howa Selomidi igini ogoni ibugua Anduane Homogo mini lalu bi koore lene. Ani layagola wali agali bu hearume hale howa agali ogoni Mosese hearia haru halu pene.
LEV 24:12 Ani haru piyagola Mosese ibu Anduane Homogohanda ogodagua bibe lalu ladai bilonaga ibugua hale ala hole agali ogoni garabaya helo helene.
LEV 24:13 Ani heleagola Anduane Homogohanda Mosesehondo lamialu lalu,
LEV 24:14 Agali ogoni balai anda bu karu yu wahalu haru tagira pilimu. Ani buwa wali agali bibahende agali ogonime i̱ mini lalu bi ko layane hale harimidaru tígua agali ogoninaga haguaneni gi wiai halimu. Agali ogoni ibugua bi ko layagonaga ibuniha pani nolene nga lowa wali agali maru bu karu de hendelonaga anidagua bilimu. Ani bialu wali agali bibahendeme ege to̱le̱ dugualu baga baga bialu balu homelalimu.
LEV 24:15 Ani bialu mani Isaraele wali agali bu karu lamialu ti mbiralime i̱ mini lalu bi ko mbira layagua nde ibu pani nolene wulebira.
LEV 24:16 Ibugua bi ko lalu howa i̱naga mini Anduane Homogo layagua nde ibuni homolene nga. Agali ogoni ibu Isaraelealiyaguabi agali dindi taraha howa tí heba íbu heneyaguabi ibugua i̱naga mini lalu bi ko layagua nde ibuni homoleneore nga. Agali ogoni homelo wali agali bibahendeme ege to̱le̱ dugualu homelo bolene nga, lene.
LEV 24:17 Anduane Homogohanda lalu, Mbiralime wali agali mende kago homelo bo wahayagua nde ibunibi homelo bo wahalimu.
LEV 24:18 Mbiralime mendealinaga nogo bulumaga sibirubi hinu kago bame homelo bo wahayagua nde nogo bayagonaga kango aribia holene nga. Mana ogoni ale mo tiga bulenego agali mbirame agali mendenaga nogo kago bo wahayagua ibuni bo wahayago aleme kango hongolene nga.
LEV 24:19 Agali mbirame mendeali kago mo ko halu bayagua nde ibunibi o biyadagonidagua dege biadai bilimu.
LEV 24:20 Agali mbirago ibugua mendealinaga kuni mbira bo tagalayagua nde ibuninaga kuni mbirabi bo tagalalimu. Mendealinaga de bo halu wahayagua nde ibuninaga debi bo halu wahalimu. Mendealinaga ne bo hondayagua nde ibuninaga nebi bo hondo wahalimu. Agali mbirame mendeali kagohondo birago ale ibuniha biadai biai halimu.
LEV 24:21 Agali mbirame mendealinaga nogo kago bayagua nde nogo ogoni aleme dege kango hongolene nga. Anigo mbiralime agali mende kago homelo bo wahayagua nde ibunibi homelo bo waholene nga.
LEV 24:22 I̱na mana ogoni Isaraele wali agali tínagabi wali agali dindi taraha howa tí baba mandagi íbu hene kamirubi tí bibahendenaga lo wero. I̱ Anduane Homogo tínaga Ngode Datagaliwabe kogonigo aniore bilimu laro, lene.
LEV 24:23 Anduane Homogohanda bi ogoni layadagua Mosese ibugua Isaraele wali agali bu hearuhondo lamiyagola tigua agali Anduane Homogo mini lalu bi ko laga biago minuwa balai anda bu hearu yu wahalu haru tagira pene. Haru tagira puwa wali agali hearume agali biago ege to̱le̱me homelo bo wahene. Ani bialu Isaraele wali agali tigua Anduane Homogohanda Mosesehondo laminigo hale howa talialu layadagua bini.
LEV 25:1 Mosese ibu Hari Sainaini heagola dege Anduane Homogohanda ibuhondo lalu,
LEV 25:2 Bi o larogo Isaraele wali agali lamialu au labe. Tígua dindi i̱na tí nguleberogoria pu howa mali kane haga biragola mabuha tomo damenego nahenge dindi bame ngelo halimu. Tígua Sabada horongi ha̱lo hagadagua dindibi mali kane haragola ha̱lo ngelo wahalimu. Mali kane ogoni ani wiabagi howa i̱ninaga nga lene ngelo wahalimu.
LEV 25:3 Mali waragaria haramigo andaneha howa tínaga mabu ngemiruha tomo tara tararu hangalu pu mbira mini gerebi lini dedaru do wialu magane lini bayale dabe nahe karu gandulo wahaga bigi bilimu.
LEV 25:4 Anidagua bialu howa mali kane haragola dindi bame ngelo wahalimu. Ani bialu mali ogoni i̱ninaga wiabagi howa ngelalimu. Ani bialu tígua tomobi nahenge gerebi magane karubi gandulo wabia nahe ngelalimu laro.
LEV 25:5 Widi minana anda ho heagua nde gandu lowa tínaga tomo wiaga andaha mo wia nabilimu. Pu mbira mini gerebi magane gandu nale karunaga lini deagua nde tígua do pingidalu waini iba wabulene nawi. Mali ogoningi dindi bame ngelo wahalimu.
LEV 25:6 Mali ogoningi mabuha tomo minana anda harago bialu nalimu. Tomo wiaga andaha bu yalu puwa ngela nabilimu. Mbirale tomo tara tara wabigi bulene ngago ale wabulene nawi. Ai tínibi wali agali tínaga garabaya biabe ale biahaga karubi wali agali biabe maru biaga karubi wali agali tara tara tí heba mandagi íbu hene kamirubi tí bibahendeme tomo uruni bialu nolene karulape.
LEV 25:7 Ani bialu nogo hinini damene bibahende bulumagabi sibi bu karubi meme karubi ti nolenebi karulape wulebira. Gabua tara tara biru karu tibi na dege bulene karulape, lalu Anduane Homogohanda lene.
LEV 25:8 Anduane Homogohanda laabo halu lalu, Tígua mali karia dege mbira mende laga bialu mali karia dege kahalu dagalamaga harimiyagua nde mali pira mariani dira (49) holebira.
LEV 25:9 Ani haragola mali ogoninaga ege kane halu horo pini laragola agali maru Isaraele dindi bibahendeha purogo lalu dindi gibuni lenelene ngaruha pialu tígua mbelo biguli pu lalimu. Horo ogoningi wali agalinaga Ko Domo Waholene Horo ngago Anduane Homogo i̱na wali agalinaga ko ngaru domo wahai holebero.
LEV 25:10 Mali pira daunigonaga (50) horo pigane haragola mbelo biguli pu laramingi mali ogoni Anduane Homogo i̱ninagaore wiabagi hene wulebira. Mali ogoningi wali agali bibahende kamiru tínaga genda yu haramiru golope hai hayago ai tí turu howa miniha dungulo holene nga. Mali ogoningi tígua dindi mbira agali mendenaga yolo bu winiyagua nde dindi aba ibunihondobi ibunaga waneigini aguanene bu karuhondobi miadai bilimu. Wali agali maru tínaga garabaya biabe ale biahalu hagayagua uruni bibahende golope halu tini dameneru karia dai bilo pudaba lalimu.
LEV 25:11 Mali pira dauni (50) ogoningi wali agali bibahende bu miniha turu howa dungulo holene horo tagira ibulebira. Mali ogoningi tínaga mabu ngamigoha tomo damene hongolene nawi. Ani bialu mabuha widi minana anda halu lini dedago dowa tomo wiaga andaha ngelolenebi nawi dege. Pu karunaga gerebi lini dedaru dowa waini ibabi wabulene nawi.
LEV 25:12 Mali ogoni bibahende Anduane Homogo i̱ninagaore ngago manda bialu halimu. Ani howa tínaga mabuha tomo minana andaho karu hangu bu nalu halimu.
LEV 25:13 Tínaga dindi mbira agali mende ibu yolo binigo mali ogoningi dindi ogoni aba ibunihondo bame mia dai bilimu.
LEV 25:14 Anidagua bulene ngago ai tígua dindi yolo bilo mule howa agali dindi yolo birago ibu mali ogoniha tomo dabane agira halu hongolobadabe ala manda bialu dindi Yadai Bulenenaga Mali agira wiaruabe manda buwa dindi ogoni mendealime yolo bilo mulene nga. Ani beramigola dindi yolo birago ibuguabi nde dindi ogoni karulape ngadagua yolo bulene nga.
LEV 25:16 Yadai Bulenenaga Mali tagira ibilo mali dewaore wiagua nde yolo dewa bulene nga. Mali dewa ndo wiagua nde yolo emene dege bulene nga. Ibugua mali dagalowa dindi ogoniha tomo agira daba hangalu nolobadabe mitangi bialu yolo ogoni karulape mulene nga.
LEV 25:17 Wali agali tíni damene karu ke̱ howa mo hondo nahalimu. Tígua Anduane Homogo i̱nihondo dege gi howa mana bayale tigabi bulene ngago bialu halimu. Anduane Homogo tínaga Ngode Datagaliwabe kago i̱na bi o larogonidagua bialu halimu, lene.
LEV 25:18 Anduane Homogohanda laabo halu lalu, Tígua i̱na bi áyu langerogobi i̱naga bi mana lowini ngagobi baya hanguore taluwa bialu halimu. Tígua anidagua bialu harimiyagua nde dindi i̱nime tí nguleberogoria howa bayale haabo holeberemi.
LEV 25:19 Dindi ogoniha howa tomoru dewaore bayale anda haga biragola tígua nalu howa tínibi bayaleore haabo holeberemi.
LEV 25:20 Ani anigo mali kane tagira ibiragola tígua lo manda bialu, Iname tomo hongowa bu mogo bialu andagaha nawirimagodago ai mali ogoningi ina tomo agoha wini nalu holeberamadabe, nalalimu.
LEV 25:21 Anduane Homogo i̱nime mali waragane tagira ibirangi tínaga dindi mo bayale harogola tomo dewaore mali tebirani nalu holene karulape bu wuleberemi. Anigo tí gi halu mogo nale halimu.
LEV 25:22 Tígua mali halini tagira ibirangi tomo lone hongo aribia halu howa tomo nolene mali waraganeni bu wirimigo naho wiaabo holeberemi. Ani nalu kamine dege tomo hangarimigo boga bulebira, lene.
LEV 25:23 Anduane Homogohanda laabo halu lalu, Agali mbirame tínaga dindi ngamiru yolo bialu ibunaga wiaabo helo yolo bulene nawi. Ani larogoni irane dindi ogoni tínaga ndo ngelo kami. Dindi ogoni Anduane Homogo i̱ninaga ngogoria tí dindi taraha howa mendeali dindini íbu haradagua ibini kamigoni.
LEV 25:24 Agali tíni aria kamirume tínaga dindi mbira yolo biyagua nde dindi ogoni ibunagaore lene wiaabo helo ndo laro. Agali dindi aba biago ibunime yolo biadai bulene manda biyagua nde ani bulene karulapeda manda bilimu.
LEV 25:25 Agali mbira kago ibu muni mbiralebi nawi howa ibunaga dindi ngago muni miyagua nde ibu damene darama mbiraore ibuni aria hangume biamogo bialu dindidago yolo biadai bulene nga.
LEV 25:26 Agali dindi aba ogoni biamogo bulene ibu damene mbira naheyagua nde ibunime yolo biadai bulene mani karulape wulebira manda bialu muni dewaore yu kangi ogonime ibunaga dindi biago ibuni yolo biadai bule holene nga.
LEV 25:27 Ani bialu ibugua dindi ogoni ibuni yadai bulene manda biyagua Yadai Bulenenaga Mali biago tagira ibilonaga mali agira wiaruabe ala manda bu hondolene nga. Ani mandabu handalu mali uruniha howa mabu ogoniha tomo hongolenenaga muni agirame karulape bulubadabe handalu ai uruni biai holene muni karulape wiagua nde agalime ibunaga dindi ogoni yolo biyago ibuni yolo biadai bulene nga.
LEV 25:28 Anigo ai ibunaga munime dindi ogoni yolo biadai bulene nakarulapeyagua nde wahalu dindi mbiraleru Yadai Bulenenaga Mali biago dege ibilonaga hondo holene nga. Ani hondo howa mali biago tagira ibirangi dindi yolo bini biago ibugua dindi ogoni dindi aba kagohondo miadai bulebira.
LEV 25:29 Agali mbira ibunaga anda tano pabe hongohe kago tamuha henego agali mendeme yolo binigo ai anda ogoni ibuni yolo biadai bule manda biyagua nde mali mbira ogoningi dege yolo biadai bibehe holebira.
LEV 25:30 Anda anduane biagome mali mbira ogoniha yolo biadai bibe naheyagua nde mani anda ogoni lone yolo biadai bibe nahe holebira. Mbirale anduane biagohondo Yadai Bulene Mali biago tagira ibiragola ibugua miadai bulenebi nawi dege wulebira. Anda yolo biyago ibunagaore haabo halu ibu waneigini mani hama polobadarunagabi wia a̱i̱ holebira.
LEV 25:31 Anigo anda maru tanonaga tagirahayagi heneyagua nde anda uruni yolo biadai bulene karulape. Mabu ogoriani ngagome ibunaga mabu ibuni yolo biadai biagadagua dege anda ogoniha kagobi yolo biadai bulebira. Ani ngago manda bialu anda tano tagiraha hene uruni alego anduane ibunime yolo biadai bulenebi mali biago tagira ibiragola anduane kago ibuni yadai bulenebi karulape nga.
LEV 25:32 Anigo Libai hameigini tigua dege mana ogonidagua nabulebira. Tigua tinaga anda tano pabe tamuha henego muni muwa lone yolo biadai bulebi ta nabi ani bulebira.
LEV 25:33 Anigo agali Libai aria ogoni ibugua ibunaga anda mbira yolo binigo biadai bulene hame nale heagua nde mbirale Yadai Bulenenaga Mali biago tagira ibirangi ibunaga anda ogoni agali yolo biyagome Libai agali biagohondo miadai bulene wulebira. Ani larogoni irane Isaraele hameigini tí bibahende dindi tu wuwa ta halu Libai aria ti tano hangu tu wuwa mirugodane laro. Anidagua birudagoni Libai hameigini karu tinaga anda tanoha heagua nde anda uruni tinaga leneore haabo holebira.
LEV 25:34 Ani bialu dindi emene tanonaga lenelene wigi bidaruni agali marume yolo bulene nawi. Dindi uruni Libai hameigini tinagaore wiaabo holebira, lalu Anduane Homogo ibugua lene.
LEV 25:35 Anduane Homogohanda laabo halu lalu, Tí damene karu aria mbira ibu ala karulape henego mani muni mbirale nawiore yagibano heagua nde tígua agali dindi kaundiaha howa íbu kagola handayaho haga wirimidagua dege agali ogoni baya hangu handayaho holene nga. Ani beramigola tí damene ogoni ibu tíni baba howa bayale holebira.
LEV 25:36 Agali ogoni aleme tí baba muni danoho heneyagua tígua muni maru tago howa ngi nalalimu. Tínaga tomo ngamiru aria maru agali biago ibugua yolo bule ibiragola tígua muni yolo mo yaraga howa ngi nalalimu. Tígua Ngode Datagaliwabe ibuni hanguhondo gi halu agali yagibano ogoni ale kago ibu helo wahalimu.
LEV 25:38 Bi ogoni i̱ Anduane Homogo tínaga Ngode Datagaliwabe kogoni howa i̱na ledogoniore. I̱niore tínaga Ngode Datagaliwabeore holenaga i̱na tí Iyibi dindiha hemiria haru tagira ibalu Kenana dindi ngago tí mo ngulenaga haru ibirugoni ndobe, lene.
LEV 25:39 Anduane Homogohanda laabo halu lalu, Agali mbira tí aria kago ibu ala karulape henego mani yagibano howa tí kamiru mbiragonaga garabaya biabe ale biahole manda biyagua nde tígua agali ogoniale kagohondo biabe yolonaga ndo bame bia lalu hongo howa nalalimu.
LEV 25:40 Tígua ibu yolo biabe biaga haru haradagua bialu mbirale anduane biagohondo Yadai Bulenenaga Mali tagira ibirangi ibu pelo golope halimu.
LEV 25:41 Mali ogoningi agali ogoni ibunibi ibu one waneiginirubi bibahende ti golope haramigola tini dalu dai bialu tinaga damene bu karu baba tininaga mamali dindi tene ngagoriani hole polebira.
LEV 25:42 Anidagua larogoni irane bamba tínibi nde Iyibi dindiha garabaya biabe ale biahalu hemiria i̱na tí haru tagira ibirugola tígua Iyibi dindi yu wahalu ibirimigoni. Ani ibalu tí Anduane Homogo i̱ninagaore garabaya biabe ale biahaga kamigo ai tígua wali agali tíni aria bu karume garabaya biabe ale biahalu helo hela nabilimu. Mana ogonidagua bulene nawiore laro.
LEV 25:43 Ani kago manda bialu tínaga damene degeme biabe biaga karuhondo biabe mangabi hongohe ngaru bialu kagoha bi hongo howa lalu holene nawi. Tínaga Ngode Datagaliwabe i̱ni kogohondo dege gi halu agali ogonibi kago biamogo bialu halimu.
LEV 25:44 Wali agali tínaga garabaya biabe ale biahalu helo yolo bule lo manda birimiyagua nde wali agali dindi tara taraha howa tí kamigoha palia para para bidaru aria dege yolo milimu.
LEV 25:45 Ani bialu wali agali dindi taraha howa ibini karuni tinaga waneigini garabaya biabe ale biahaga helo minu helolene karulape. Wali agali uruni tínaga dindini howa waneigini hono winiru tigua tínaga garabaya biabe ale biahaga helo helolene karulape kagoni.
LEV 25:46 Ani kago minu helowa garabaya biabe ale biahaga kane dege tíni homaramigola tínaga waneigini holebirarunaga garabaya biabe ale biahaga haabo holene karulape holebira. Anigo Isaraele wali agalibi tíni aria karu tíninaga biabe biaga heagua nde uruni mo tandaga nahalimu. Hendore howa biabe bialu helo helalimu.
LEV 25:47 Mbirali dindi taraha howa tí baba íbu hene kago ibu muni dewawi homogo hayagua tí aria karu mbirago ibu yagibano howa ibugua agali ogoninaga garabaya biabe ale biahaga helo yolo biyaguabi ibu damene karunaga helo yolo biyaguabi nde
LEV 25:48 tí Isaraeleali kamiru tí damene ogoni mani tínime yolo biadai bulene wulebira. Ibuni hameneyaguabi
LEV 25:49 ibu aba hameneyaguabi ibu aba mbalini iginiyaguabi ibu damene maru karuyaguabi mbirago ibugua yolo biadai bulene wulebira. Ibunime muni karulape yu heagua nde biabe ko ogoni yu wahalu pole manda buwa agali ibu yolo biaga haruagohondo muni mialu polene nga.
LEV 25:50 Agali garabaya biabe ale biahaga helo yolo bini biago ibugua ibunaga agali anduane hayagohondo bi baya hangu lalu mali áyu ogoni howa dagalalu mali agira howa mbirale yolo biniru anduane hayadagohondo Yadai Bulenenaga Mali biago agongi tagira ibulubadabe hondole dabo hondolene nga. Agali anduane biago ibugua agali biagome mali agira halu ibunaga biabe bialu holenego waholobadabe hondole daga lolene nga. Anigo yolo ogonidaguame karulape larago hondowa ibunimeyaguabi ibu damene karu aria marumeyaguabi muni ogonidagua karulapedago hondowa yolo biadai bulene nga.
LEV 25:51 Mali dewaore wiagua nde agali ogoni ibugua ibunaga anduane kago muni dewame yolo miadai bulene wulebira.
LEV 25:52 Mbirale anduane biago ibuni Yadai Bulenenaga Mali mbira biago tagira ibulene kaware ngelowayagua nde agali anduane biago muni emene degeme yolo biadai bulene nga.
LEV 25:53 Agali anduane kago ibugua nde agali ibunaga garabaya biabe ale biahaga kago yolo biabe mali mbira kiraru ale yolo biabe biahaga kaligobi dege bialu kagoni lo manda bialu ibunaga garabaya biabe ale biahaga kago mo tandaga holene nawi. Anduaneme ibu hendore helo helolene nga.
LEV 25:54 Agali garabaya biabe ale biahaga biago ibu damene bu karume ibalu ibu yolo ogonidagua biadai nabiyagua nde mbirale anduane kago ibuni Yadai Bulenenaga Mali biago tagira ibirangi ibunibi ibu one waneiginirubi bibahende ti pelo golope holene nga.
LEV 25:55 Isaraeleali tígua agali mendealinaga garabaya biabe ale lu bia haabo helolene nawiore. Anidagua larogoni irane i̱ Anduane Homogo tínaga Ngode Datagaliwabeore howa tí Iyibi dindiha garabaya biabe ale biahalu hemiria i̱na tí haru tagira ibalu dindi ogoha haru ibirugoni ndobe. Ani birugo ai tí i̱naga garabaya biabe ale biahaga kamigoni, lalu Anduane Homogohanda lene.
LEV 26:1 Anduane Homogohanda lalu, Tígua ira dibu pelowa ogonime pigiya mbira wabu helolenebi ege to̱le̱ mbira muwa ona hanga holenebi ege to̱le̱ timbuni ngagoria bage podagadagua podolenebi uruni alego tínaga dama mitangi bialu bi pupu wulenaga wabu helabi nabilimu. Ani nabi howa i̱ Anduane Homogo tínaga Ngode Datagaliwabe kogo i̱ni hangu mitangi bialu lotu lalu halimu.
LEV 26:2 I̱na horo pongobo wini ngoru tígua pugua nabi i̱ mitangi bialu ha̱lo halimu. Ani bialu i̱naga lotu anda lomabia hene bu kagobi mo yo nahandalimu. Anduane Homogo i̱ore kogoni.
LEV 26:3 Tígua i̱naga bi mana lo ngoru talialu mbirale ogo bilimu lalu langirugo bialu harimiyagua
LEV 26:4 nde tínaga mabuha tomo hengedemiru bayale anda hai helobi ira lini daga karume lini bayale daabo helonagabi i̱na iba dalu ibilolebero.
LEV 26:5 Ani berogola tínaga mabuha tomo hengedamiru dewaore bu paya bulebira. Tomo dewaore andaho kagola widi gandulo wialu ha dege bidamine pu mbira mini gerebi lini boga bialu dolene tu holebira. Ani bialu gerebi lini dedago dalu kamine dege widi lone hongo aribia holene tu holebira. Ani biragola tígua tomo dewa nalu tombeho howa tínaga dindi ogoniha bayaleore haabo holeberemi.
LEV 26:6 Tínaga dindi nguleberogoria pu kamigola i̱naga mo palia holene tíha wia harogola tí mbiraga paluwa mbirale mbirahondo gi nahe embedaho palueberemi. Mbirale gabua tara tara dindi ogoniha bedaru bo taliatagi hai holebero. Ani bialu tínaga dindi ogoriani waitigi karume tí baba wai bule naibulebira.
LEV 26:7 Tígua waitigi baba wai bu puwa tí wayali halu waitigi karu mo ko howa boleberemi.
LEV 26:8 Tínaga ami agali duriali hangume waitigi handari mbira (100) baba wai birimiyagua bo waholeberami. Ani buwa tínaga ami agali handari mbira (100) hangume waitigi agali daosini pira (10,000) baba wai birimiyagua tígua waitigi mo ko howa bo poda hana haga buleberemi.
LEV 26:9 Ani bialu kamigola i̱na tí mo bayale howa waneigini mo dame bia halu dewaore ngigi bialu howa i̱na habo nalolene bi lo wirugodagua biaore bulebero.
LEV 26:10 Tínaga mabu ngamigoha tomo mali mbiranaga bu wirimigo mali mendegonagabi karulape nalu holene wiadege bulebira. Mali mendenaga tomo hengenego boga bidagola tomo bu wiaga andaha tomo ala bu winigo nai habe nahedagola wahalu tomo gahenge bu wia aribia holene wulebira.
LEV 26:11 Ani bialu kamigola i̱nibi nde tí dege dombeneha i̱naga Balai Anda biagoha mandagi haabo holebero. I̱na tí wahalu erembira ngialu napolebero.
LEV 26:12 Ani bialu i̱ tínaga Ngode Datagaliwabe howa tí dege dombeneha ibaga bialu tí heba mandagi haabo holebero. Ani kogola tí nde i̱naga wali agali leneore holeberemi.
LEV 26:13 I̱ni Anduane Homogo tínaga Ngode Datagaliwabeore kogoni. Bamba tí Iyibi dindiha garabaya biabe ale biahalu hemiria ani nahalimulonaga i̱na tí golope halu haru tagira ibirugoni. Iyibi agali tí garabaya bu helaga hearunaga hongo wiago bope harugola tí garabaya golalu tagira pu howa turu tara ho kamigoni ndobe, lene.
LEV 26:14 Anduane Homogohanda laabo halu lalu, Tígua mana o langiruruni talialu bia nabi harimiyagua nde tí pani noleberami.
LEV 26:15 Tígua i̱naga bi mana lo ngoru erembira ngialu i̱naga bi larogobi mo wahalu pirimiyaguabi habo nalolene bi lo wirugo mo habo larimiyaguabi
LEV 26:16 nde i̱na tí pani nalimulo ngulebero. I̱na tí mo gi timbuni halu warago timbuni tara tara ngaru mo ibilalu berogola tínaga de ndibulai helalu tínaga tinginibi mo ko hai helalu bulebero. Tínaga mabuha tomo hangarami tiraga tomo bialu nanoleberemi. Tínaga waitigi karu ibalu tí mo ko halu tínaga mabuha tomo hengedemiru bialu nolebira.
LEV 26:17 I̱nabi nde tí baba waitigi halu i̱na tínaga waitigi karume tí baba wai bilimulo ibilolebero. Ani ibilarogola waitigime tí bo poda hana halu handayaho holebira. Ani bialu tíhondo handabe manga ho karume tínaga haru haga holebira. Marume tí bama talima ibiragola ndo tígua bame gi timbuni halu ibida poleberemi.
LEV 26:18 I̱na ogonidagua bialu tí pani ngialu kogolabi tígua doga howa mana ko ngaru bialu haabo harimiyagua nde i̱na tíha genda tandagaru timbuni kahalu mo tago howa ngulebero.
LEV 26:19 I̱na anidagua bialu tínaga mine haga mana ngamiru bope holebero. Tínaga dindi ngamiruhabi dalu naibilo minu yania ho kogola dalu naibi wialu dindi giambe halu ege to̱le̱ ale holebira.
LEV 26:20 Ani bidagola mabuha tomo hengedemirubi ira lini dagane hengedemirubi bibahende lini nadolebira. Ani hangalu kamiria tínaga biabe uruni erekui bini bame horo mo hole bini bialu holeberemi.
LEV 26:21 Ani bialu genda uruni ibirago ibilowabi tígua i̱naga bi hale habe manga haabo harimiyagua nde tíhondo genda timbuniore kahalu lone mo tago howa ibilolebero.
LEV 26:22 Nogo gabua tara tara karu tí kamigoha i̱na ibilolebero. Ani ibilarogola urunime tínaga waneigini bu karubi nogo bulumaga bu karubi bo wahaga bulebira. Ani bialu kagola tí daluha hariga ngaruni wali agali mbira bolangua haga bialu pialu kariabi nahondoleberami. Wali agalibi dewa ndo emene hangu holeberemi.
LEV 26:23 Ani bialu i̱na genda urunibi ngaru tíha ibilaga berogola tígua mini beregeda nabi i̱naga bi mana hale habe manga dege halu i̱hondo mine haabo harimiyagua
LEV 26:24 nde i̱na tínaga ko ngamiru mitangi bialu genda timbuniore ala ibilarudagua ndo lone kahalu mo tago howa ibilolebero.
LEV 26:25 Tí baba habo nalolene bi lo wirugo mo habo larimigonaga i̱na nde tínaga waitigi karu tí baba wai hongo howa bilimulo ibilolebero. Ani ibilarogola tígua tano hongohe ege pabe bu mabubi ngagoha howa bayale kamabe toba ho kamiria i̱na warago ko timbuni dabi nahagane ngago ibilarogola wali agali dewaore warago ogonime balu homelolebira. Tí ani mo ko hene kamigola nde i̱na tí waitiginaga giha minu ya haga bulebero.
LEV 26:26 I̱na tínaga tomo mo ndia helarogolabi tínaga wali bedarume irani tomo dawalene dewa nawulebira. Ani biragola ira mbiraore dege dedagoria wali pirame mberedi hirulebira. Ani hiruwa walime mberedi ogoni tale biragola tígua emene budini hangu naga bialu howa tombe nahe dege garibilo haabo holeberemi.
LEV 26:27 Anidagua berogo bilowa tígua mine ha dege bialu i̱naga bi ledogo mo wahalu haabo harimiyagua nde
LEV 26:28 i̱na tíhondo keba timbuniore ho howa tígua ko ogoni biaabo harimigonaga pani abale ngirugobi ndo timbu gibiore lone kahalu mo tago howa ngulebero.
LEV 26:29 Ani ngerogola tí kamigoha hina gari timbuni tagira ibiragola tomo nalu holene nawidagola tínaga waneiginiore balu noleberemi.
LEV 26:30 I̱na tí baba miniha gendaore timbuni yu howa tígua dama mitangi bialu bi pupu wulenaga mbirale gime wabini ngarunaga anda hari nene ngaruha bu helaga bidemiruni bibahende bo gialo wahai holebero. Ani bialu ira hagua ngabilo inisenesiru lomabu delaga dabu bu heledemiruni bo gialo wahai holebero. Ani bialu tínibi minu balu tínaga tingini bi pupu wulenaga dama wabu wirimigo gialo waharugoria wia dambi helolebero.
LEV 26:31 Tíninaga anda bu kamirubi i̱ mitangi bialu lotu laga anda bu heledamirubi bibahende bo gialo wahai halu tígua mbirale i̱hondo lomabu yalu ibuwa ngeremigobi hondowa turu nahe handabe manga holebero.
LEV 26:32 Ani buwa tínaga dindi mo ko hai harogola wali agali tínaga waitigi dindi ogoni karulo karume dindi kodane mogolo hondowa ogoni agile dindidabe laga bulebira.
LEV 26:33 I̱na tínaga waitigi bu karu baba wai bilimulo mo biahaga berogola waitigime tí bo garabaya bu yalu dindi tara tara ngaruha pugupugu bulebira. Anidagua biragola tínaga dindi ngamigoha wali agali mbira nahe dindi dabulu wulebira. Ani bialu tano ngarubi bo gialabaga bini wulebira.
LEV 26:34 Anidagua bialu tí dindi tara tínaga waitigiru daluha pu kamitambu tínaga dindi dabulu bameore wulebira. Bamba tígua dindi ogoniha howa mali kaneni tomo nahenge bame ngelalimu lalu i̱na langirugodagua nabi dege haabo harimigonaga anidagua bulebero. Dindi tomo nahenge ogonidagua ngelarogola dindi bayaleore hodai bulebira.
LEV 26:36 Tínaga wali agali bibahende homaiore nahe emene yu waheneru tí dindi tara tara ngaruha garabaya bu yalu pene holeberami. Ani kamigola i̱na tí mo gi timbuni halu puyabu pulalu howa ira yuni giligele laga biraru hale howa waitigiru talima ibaruabe toba howa mogo lalu ibida hariga nawiha poleberemi. Waitigi naibi ngagoyu tínime gi howa ibida pugupugu bialu kamiria pu lulu yahalu tíninaga embone degedege mo tilitola lalu ona pilo odo wigiwigi buleberemi. Ani bialu howa tínaga waitigi karume ibalu tí wai bule ibiragola nde tí hongo halu wai bibenahe holeberemi.
LEV 26:38 Ani bialu tínaga waitigi karu daluha pu kamiria dindi ogoniha tí pu ereba halu homai holeberemi.
LEV 26:39 Anigo wali agali maru hangu waitigi daluha yu wahene kamiru tí nde hangu hangu mo ko haga biragome homo biba halu ereba hai holene kawareore wulebira. Anidagua bulubadagoni irane tínimebi tínaga mamalirumebi mana ko bialu hene ngarume pani nolene ogoni tíha wiaabo holebira.
LEV 26:40 Ani bulebiragoyu mani tínaga aguanene holebirarume ko tiha wiyada lo manda bialu tigua tinaga ko uruni i̱hondo lapani haga bulebira. Tigua lalu, Inamebi inanaga mamalirumebi mana ko dege bialu harima. Ani buwa iname í̠naga bi mana lo wiago mo wahalu mine timbuni harimagoni, laga bialu lapani holebira.
LEV 26:41 Tígua mine tara halu hemigola pani nalimulo i̱na mo ngialu tínaga waitigi bu hearume ti daluha garabaya bu yalu pelarugoni ndobe. Anigo tínaga aguanene uruni tigua tini mo dindiha halu tigua ko biyarunaga pani tandagabi nolene ngaru nalu
LEV 26:42 haragola howa i̱na bamba habo nalolene bi Yagaba bababi Aisaga bababi Abarahama bababi tihondo lo wialu lalu, Kenana dindiore tínaga waneigini aguanene mani holebirarubi tinaga wilo mulebero, lalu lo wirugo mitangi budai bulebero.
LEV 26:43 Anigo ala dindi ogoni wali agali nahe dabulu ngelo hondoha nabi tomo hangalu haabo harimigonaga dindi halu mbira embera ngelonaga tí dindi ogoni ngelalu tagira polene nga. Ani howa mana lowini ngagobi bi langirugobi bibahende mo wahai harimigonaga pani nalu genda yu haabo holene nga.
LEV 26:44 Tí dindi tara tínaga waitigi dindiha howa tandaga ani nalu kamigolabi i̱na tí yu wa naholebero. Tí yu waharuyagua nde habo nalolene bi lo wirugobi habo lolebira. Anigo i̱ Anduane Homogo tínaga Ngode Datagaliwabeore kogodago anidagua nabulebero.
LEV 26:45 I̱na tí mitangi bialu tínaga mamali i̱nila habo nalolene bi lo wialu lenedarubi bibahende mitangi budai bulebero. Ani bialu tí wali agali dindi bibahendeha bi taratara lagalaga biaga palearu bibahendenaga deni i̱na tínaga mamali Iyibi dindiha howa haru tagira ibalu ogoha haru ibirugola wali agali bibahendeme i̱ninaga hongo timbuni wiwago ti handai haya. I̱ Anduane Homogo howa tí Isaraele wali agalinaga Ngode Datagaliwabeore holenaga i̱na tí haru tagira ibalu ogoha haru ibirugoni, lalu Anduane Homogohanda lene.
LEV 26:46 Mana uruni lamiyadagobi bi galone lamiyadagobi uruni bibahende Anduane Homogohanda Hari Sainaiha howa Mosesehondo lamini.
LEV 27:1 Anduane Homogohanda Mosesehondo lalu,
LEV 27:2 Isaraele wali agali bu karuhondo ogodagua labe. Mbiralime ibuni i̱hondo lomabu ngulene hame lowa bi lo wu hene heaguabi wali agali mbirago i̱hondo lomabu ngule lowa bi lo wu heaguabi nde urunidagua lomabia ho henedaruni tinaga munime yolo biadai bulene nga. Muni ogoni wali agali mbirago yolo bulene muni karulapedago hondowa loma binigo mo miaga kagohondo muni mule lalu lo wiyago karulapelo mulene nga.
LEV 27:3 Wali agalime muni yolo biadai bulene magi ogodagua. Agali mali pira kirala (20) pira waragariala (60) dombeneha hene karu ti muni kina dege handari duriame (500) yolo biadai bulene nga. Wali mali ogonidagua dege bedaru tibi nde muni kina dege handari tebirame (300) yolo biadai bulene nga. Igiri mali duriala pira kirala (20) dombeneha karu ti bibahende muni kina dege handari kirame (200) yolo biadai bulene nga. Wandari mali ogonidagua dege pene bedaru tibi nde muni kina dege handari mbirame (100) yolo biadai bulene nga. Igiri gali mali duria bolangua nahe karu ti muni kina pira duriame (50) yolo biadai bulene nga. Wandari gali emene mali ogonidagua dege bedaru tibi nde muni kina pira tebirame (30) yolo biadai bulene nga. Agali mali pira waragaria (60) bolangua hene karu ti nde muni kina handari mbirani pira duriame (150) yolo biadai bulene nga. Walibi nde mali ogonidagua dege bedaru ti muni kina handari mbirame (100) yolo biadai bulene nga.
LEV 27:8 Wali agali mbirago ibuni nde yolo ogoni biadai bulenego manda bu karia muni nakarulape tubagi hayagua nde o biago ibu loma binigo mo miaga kago hondo polene nga. Loma binigo mo miaga kago ibugua muni ogodagua karulapedago manda buwa yolo bialu ngiadai bule í̠na ogodagua yolo bibehedago bia laradagua bulene nga.
LEV 27:9 Mbiralime Anduane Homogo i̱hondo mbirale lomabu ngule lalu lo winidagua áyu lomabu ngiyagua nde nogo egabi ogoaleore lomabu bo ngilimu lalu abale langirudagua bialu bo ngulene nga. Tígua nogo egabi lomabu ngeremigo damene bibahende i̱ninagaore wulebira.
LEV 27:10 Mbiralime i̱hondo nogo mbira loma bialu bo ngule lo wiyago nogo mende aribia hole manda biyaguabi nogo bayale i̱hondo bo ngule kago mo aribia howa nogo ko kago i̱hondo lomabu ngulene manda biyaguabi ogoni nakarulapeore. Ani biyagua nde bayale kago lomabu bo delolenaga ko kagome kango henedagobi kirabali Anduane Homogo i̱ninaga dege holebira.
LEV 27:11 Mbiralime i̱hondo nogo egaru mbira loma bialu bo ngule karia ogoni i̱naga deni ko dodoheyagua nde wahalu loma binigo mo miaga agali karia yalu polene nga.
LEV 27:12 Ani yalu poragola loma binigo mo miaga kagome nogo egabi bayalebe kodabe hondowa muni ogodaguame yolo bibeheda lolebira. Anidagua laragola yolo ogoni gadia dali ha gadia daga ha bulenebi nawiore.
LEV 27:13 Nogo egabi anduane biago ibugua muni aribia halu lomabu mulene hamelayagua nde muni nogo yolo bulene karulape mialu marubi tago howa mulene nga. Loma binigo mo miaga kago ibugua kina duriame yolo bibe layagua nde anduane biagome kina mbira tago howa waragariame yolo biadai bulene nga. Kina pirame yolo bibeheda layagua nde kina kira tago howa homberiame (12) yolo biadai bulene nga.
LEV 27:14 Mbiralime ibunaga anda i̱hondo lomabu ngule hamelo heagua loma binigo mo miaga kago ibugua anda ogoni kodabe bayaledabe ala hondolene nga. Ani hondowa ibugua anda ogoni muni yolo ogodaguame karulapeda lolebira. Ani laragola muni ledago gadia dali ha gadia daga ha bulene nawi. Muni daga miyadagua yolo bulene nga.
LEV 27:15 Ani bialu agali biagome Anduane Homogo i̱nihondo anda lomabu ngiyago ibuni yolo biadai bulene manda biyagua nde agali anda anduane biagome anda biago muni karulapeme yolo bialu muni marubi tago howa mulene nga. Ibugua loma binigo mo miaga kagohondo muni mialu anda ibuninaga holebira.
LEV 27:16 Agali mbirame ibunaga dindi mbira Anduane Homogo i̱hondo loma bialu tu wu ngiyagua nde dindi ogoniha widi ale dege mini bali lini egane agirame hongolene karulapedabe hondole loma binigo mo miaga kago ibugua hondo polene nga. Ani handalu karia bali lini egane genda magi kilogarama pira kirame (20) hongolene karulapeyagua nde mabu ogoni muni kina handari mbirame (100) yolo bulene karulape holebira.
LEV 27:17 Yadai Bulenenaga Mali biago tagira ayure ibini lowa mali mbira napedaore nde dindi anduanedago ibunime muni kina handari mbira (100) ogonidagua degeme Anduane Homogo i̱ni ngiadai bulene nga. Muni gadia daliha gadia dagaha bulene nawi.
LEV 27:18 Anigo agali mbiragome dindi i̱hondo nguledago dindi anduane ibunihondo Yadai Bulenenaga Mali biago mende angi tagira ibulebadabe ala manda buwa loma binigo mo miaga kagome mali ngadagua nde muni ngi lolebira.
LEV 27:19 Agali mbirame dindi mbira i̱hondo tu wu ngiyago ibugua nde dindi ogoni ibuni yolo duguadai bulene hamelo heagua nde munime yolo duguadai bulebira. Loma binigo mo miaga kago ibugua muni kina handari mbirame (100) yolo duguadai bulene nga layagua nde agali mabu anduane ogoni ibugua muni kina handari mbirani pira kirame (120) yolo duguadai bulene nga. Ibugua muni ogoni loma binigo mo miaga agali biagohondo mialu dindi ibuni mo yu dai bulebira.
LEV 27:20 Agali ogoni ibugua i̱hondo yolo ngiadai nabi ngelowa agali mende kagohondo dindi biagonaga muni mo nayagua nde mani ibunaga dindi Yadai Bulenenaga Mali biago tagira ibirangi miadai nabibehe holebira.
LEV 27:21 Yadai Bulenenaga Mali biago mende tagira ibiragola nde agali dindi yolo biyago ibugua i̱nihondo ngiadai bulebira. Ani ngiadai biragola dindi ogoni i̱ninaga wiabagi hene wialu wali agali mbiralime ogoni karulolene nawulebira. Ani ngagola i̱nime i̱naga loma binigo mo miaga karuhondo mo mulebero.
LEV 27:22 Agali mbira ibu aba mamalirunaga dindi ndo agali mendenaga ngago yolo buwa Anduane Homogo i̱hondo lomabu ngiyagua
LEV 27:23 nde loma binigo mo miaga kago ibugua mali agira howa dindi ogoni Yadai Bulene Mali angi tagira ibulubadabe ala manda bu hondolene nga. Ani hondowa mabu ogoniha tomo mali uruniha bialu nalu holobadadagua muni yolo bibe lolebira. Ani laragola agali biago ibugua horo ogoningiore muni loma binigo mo miaga kagohondo mulene nga. Ani miragola muni ogoni Anduane Homogo i̱ninagaore wulebira.
LEV 27:24 Ani howa mani dindi andaru anduane kago ibunihondo Yadai Bulenenaga Mali biago tagira ibirangi agali dindi ogoni yolo biyagome dindi anduane kago ibuni miadai bulene nga.
LEV 27:25 Tígua uruniale damene bibahende yolo tiga tigaore bulene ngadagua latagi haga bilimu.
LEV 27:26 Tígua i̱hondo nogo lomabu ngule howa nogo igini pigane wini kago bibahende i̱ninaga hene kago lone ngibe nahego ai maha wini karu lomabu ngilimu. Nogo bulumaga sibiru mbirago hangu ndo nogo damene bibahendenaga igini pigane wini kago damene i̱ninagaore ka.
LEV 27:27 Anigo nogo igini pigane wini kago aria mbirago i̱naga deni bayale ndo heagua nde tíni halu i̱ muni aribia halimu. Muni ogoni loma binigo mo miaga agali kagome kina pira agimame mulene ngago layagua nde agali nogo anduanedago ibunime kina kira paga howa homberia (12) mulene nga. Agali ogoni ibu nogo ogoni yolo aribia nahayagua nde loma binigo mo miaga agali kago ibugua muni ogodaguame yolo bibe laradagua agali mendeme yolo bia aribia halu nogo ogoni ibu holebira.
LEV 27:28 Agali mbirame ibunaga mbirale ngago mbira Anduane Homogo i̱ninagaore lalu wiabagi ho ngelayagua nde ogonime biabe tara tara ngaru bulene nawi. Ani bialu agali mende kagome yolo bilo mulenebi nawi. Ibunimebi loma binigo mo miaga kagonaga giha howabi yolo biadai bulenebi nawi dege. Mbiralime wali agali lomabia heneyaguabi nogo lomabia heneyaguabi dindi ibu mamalinaga wia a̱i̱ heneyaguabi uruni bibahende Anduane Homogo i̱ninagaore loma bini wiaabo holebira.
LEV 27:29 Hale halimu. Tígua waliyaguabi agaliyaguabi mbira loma bia howa heleneyagua nde i̱ninagaore lene haabo holebira. Anduane kago ibunime yolo biadai bulene nawiore. Wali agaliyaguabi ogoni ibu homelo bolene nga.
LEV 27:30 Tí mabuha tomo hengedemiru boga biragola widiyaguabi ira lini dedaru alebi bibahendenaga pinipinigo Anduane Homogo i̱ninagaorego i̱nihondo talebu ngilimu. Pinigo tíni nolene nawigo nanalimu laro. Pinigo i̱ninagaore nga.
LEV 27:31 Agali mbirame mbirale uruni ale ibuni yolo biadai buleyagua nde ani bulene karulape degego yolo biadai bulene nga. Mbirale uruni muni kina duriame yolo biadai bulene karulapeyagua nde ibugua muni kina waragane tago howa yolo biadai bialu muni loma binigo mo miaga kagohondo mulene nga.
LEV 27:32 Nogo bulumaga pira heaguabi sibi pira heaguabi pinipinigo i̱naga dege holebira. Nogo hinu kamiru damene mo mogobu helowa pira dege halu mbira helaga bialu pira mbiragonaga pini dege dege i̱ni ngilimu.
LEV 27:33 Nogo ko bayaleyaguabi pini i̱ninaga kago mbira mo iriari nabilimu. Mbira mo iriari birimiyagua nde mende aribia harimigobi kirabali i̱ninaga dege holebira. Kirabali i̱ninaga dege holebirago tíni yolo biadai bulene nawigo nabilimu, lalu Anduane Homogohanda lene.
LEV 27:34 Bi mana uruni Isaraele wali agali hearume talialu biai helo Anduane Homogo ibugua Hari Sainaiha howa Mosesehondo lamiai hene.
NUM 1:1 Isaraele wali agali ti Iyibi dindi wahalu tagira penego mali mendegonaga ege mendeni horo mbira hayagola Sainai dindi ko yobi iba dalu naibaga wiagoria Anduane Homogohanda ibunaga Balai Anda heagoha howa Mosesela bi lene.
NUM 1:2 Anduane Homogohanda lalu, Í̠ Aronola libugua Isaraele agali karu dagalalu tinaga mini gilibu wiai halibu. Mini gilibu wialu ti damene mbira mbira hayadagua hameigini hangu hangu dagalalu gilibu wiai halibu.
NUM 1:3 Agali maru ami agali habehe mali pira kira (20) bolangua hene karu dagalai halibu.
NUM 1:4 Ani bialu libuni biamogo bilonaga agali hameigini kadagua agali haguane mbira mbira dabo helalibu, Anduane Homogohanda lene.
NUM 1:5 Ani lowa lalu agali haguane maru libu biamogo bilonaga dabo helenedaruni uru. Lubene aria Sederu igini Elisu helene. Simiono aria Surisadai igini Selumiele helene. Yuda aria Aminadaba igini Nasono helene. Isaga aria Suara igini Nedanele helene. Sebulunu aria Helono igini Eliaba helene. Eberaimi aria Amihudu igini Elisama helene. Manase aria Pedasu igini Gamaliele helene. Beniyamini aria Gidioni igini Abidana helene. Dana aria Amisadai igini Ahiese helene. Ase aria Ogorana igini Pagiele helene. Gada aria Duele igini Eliasaba helene. Nabadali aria Enana igini Ahira helene.
NUM 1:17 Ani lamiyagola hale howa Mosese ibugua Isaraele agali hameigini mbira mbiranaga agali haguane uruni ti ibilo olo ngoai hene.
NUM 1:18 Ibiyagola Mosese Aronobi agali haguane homberiali (12) dabo helayarubi tigua ege mendegonaga horo mbira hayagola Isaraele wali agali bibahende íbu ngoai hadaba layagola ti bibahende íbu ngoai hene. Ani ibiyagola agali haguane biaru tigua bibahendenaga mini tini hameigini hayadagua gilibu wigi wigi bini. Ani bialu agali mali pira kira (20) bolangua hene agira kabe hondole dagalalu tinaga mini gilibu wini.
NUM 1:19 Anduane Homogohanda ala Sainai dindi ko iba dalu naibaga wiagoria Mosesehondo lamiyadagua ani biai hene.
NUM 1:20 Ani bialu agali mali pira kira (20) hayarubi maru pira kira bolangua hene hayarubi bibahende ami agali habehe biaru mini gilibu wialu dagalai hene. Tigua ani bule howa hameigini mbira mbira aba igini mbira mbira headagua agali ami habeheru Yagaba igini wahene Lubene hameigini howa ala dagalalu mini gilibu wini. Agali hameigini headagua tinaga mini ogodagua gilibu wini. Lubene aria daosini dege pira mariani waragaria halu handari duria (46,500) bibahende hene. Simiono aria daosini dege pira duriani dira halu handari tebira (59,300) bibahende hene. Gada aria daosini dege pira mariani duria halu handari waragaria pira duria (45,650) bibahende hene. Yuda aria daosini dege pira kariani maria halu handari waragaria (74,600) bibahende hene. Isaga aria daosini dege pira duriani maria halu handari maria (54,400) bibahende hene. Sebulunu aria daosini dege pira duriani karia halu handari maria (57,400) hene. Eberaimi aria daosini dege pira mariani handari duria (40,500) bibahende hene. Manase aria daosini dege pira tebirani kira halu handari kira (32,200) bibahende hene. Beniyamini aria daosini dege pira tebirani duria halu handari maria (35,400) bibahende hene. Dana aria daosini dege pira waragariani kira halu handari karia (62,700) bibahende hene. Ase aria daosini dege pira mariani mbira halu handari duria (41,500) bibahende hene. Nabadali aria daosini dege pira duriani tebira halu handari maria (53,400) bibahende hene. Anidagua haga binigo ai bibahende daga lamaga halu daosini dege handari waragariani huniane tebira halu handari duriani pira duria (603,550) bibahende hene.
NUM 1:47 Tigua agali bibahendenaga mini dagalalu gilibu wiai hayangi hameigini mbiraore Libai ibu aria dege dagalalu nagilibu wini.
NUM 1:48 Anidagua binidagoni irane abale Anduane Homogohanda Mosesehondo lamialu lalu,
NUM 1:49 Í̠na ami agali habehe karu dagalalu mini gilibu wialu howa Libai hameigini ti dege mini gili bialu daga lamaga nahabe.
NUM 1:50 Ani bulene nawiore. Libai hameigini tigua i̱naga Balai Anda kagoha biabe bialu howa anda ogoni handayaho haga helo helabe. Ani helowa tininaga balai andabi i̱naga bu heledagoria dege mandagi helo lenelene bu mabu bidaba labe.
NUM 1:51 Tígua dindi mbirani balai anda bu harimigo gialo yalu dindi mendeha poramingi i̱naga Balai Anda kagobi mbirale i̱ anda ogoniha wini ngarubi bibahende Libai agali karume mo yalu pugu bilo. Agali maru Libai hameigini aria ndo kamiru tígua i̱naga Balai Anda kagoria haparaho harimiyagua nde tíni homolene nga.
NUM 1:52 Isaraeleali hameigini maru kamiru tí nde tíninaga hameigini emene hagahaga birimidagua balai anda bu hagahaga buwa tíni hameigininaga pelagi helagalaga bilimu.
NUM 1:53 Anigo Libai hameigini tigua dege tinaga balai anda i̱naga Balai Anda kagoria buyu mabu buwa anda ogoni handayaho helo. Ai bi larugo mo wahalu mbirali i̱naga Balai Anda ogoni kagoha pialu karia i̱naga keba holene timbu halu Isaraele wali agali bo wahai holigo Libai aria tigua i̱naga Balai Anda mamage helo helolene nga, lene.
NUM 1:54 Ani layagola hale howa Mosese ibugua bi uruni Isaraele wali agaliruhondo lamiyagola tigua Anduane Homogohanda layadagua talialu biai hene.
NUM 2:1 Anduane Homogo ibugua Mosese Aronolahondo lamialu lalu,
NUM 2:2 Agali hameigini mbira mbira kamiru tínaga balai anda bule tíninaga pelagi kagoria kaware tí hameigininaga pelagi kago kawarenibi balai anda biapara howa bilimu. Ani buwa i̱naga Balai Anda kagonaga lenelene bu mabu bilimu. Anigo tínaga balai anda i̱naga Balai Anda kago biapara howa kaware nabi emene kaundiani bilimu, lalu lamini.
NUM 2:3 Ani layadagua Isaraeleali tigua abene ni tagira ibiragohayagi hameigini tebira Yuda hameigininaga pelagi kago andaneha mo mogo buwa balai anda bialu tinaga agali haguane hearu andaneha hene. Yuda aria Aminadaba igini Nasono daosini dege pira kariani maria halu handari waragaria (74,600) hene. Isaga aria Sua igini Nedanele agali dege daosini pira duriani maria halu handari maria (54,400) hene. Sebulunu aria Helono igini Eliaba daosini dege pira duriani karia halu handari maria (57,400) hene. Ani howa ti dagalamaga howa agali hameigini tebira uruni daosini dege handari mbirani pira halirani waragaria halu handari maria bibahende (186,400) hene. Ti balai anda bu hayaru gialo yalu dindi mendeha polene tu haragola Yudanaga pelagi kagoha hameigini tebira heneru ti ala mo bamba halu piaga hene.
NUM 2:10 Dindi abene unurahayagi hameigini tebira Lubene hameigininaga pelagi kago andaneha mo mogo buwa balai anda bialu tinaga agali haguane hearu andaneha hene. Lubene aria Sederu igini Elisu daosini dege pira mariani waragaria halu handari duria (46,500) hene. Simiono aria Surisadai igini Selumiele daosini dege pira duriani dira halu handari tebira (59,300) hene. Gada aria Duele igini Eliasaba daosini pira mariani duria halu handari waragariani pira duria (45,650) hene. Hameigini tebira bibahendenaga agali dagalamaga halu daosini dege handari mbirani pira duriani mbira halu handari mariani pira duria (151,450) hene. Dindi ti balai anda bu hayaru wahalu dindi mendeha pole pialu howa tigua hameigini tebira bamba halu piyaru talima mama pene.
NUM 2:17 Tigua pole pialu howa Yuda hameigini tigua bamba halu piaga hene. Ani poragola hameigini maru porago erembiraha pumaga halu pugu biaga hene. Balai anda bu hayagoria mo tiga buwa harimidagua gi tigahayagi hayago tigua ala mo bamba haga bialu tinaga pelagi biago yalu poradagua pugu biaga hene. Ani poragola Libai hameigini tigua Anduane Homogonaga Balai Anda heago gialo yalu hameigini waragaria bamba helalu waragaria mende maha helalu buwa ti dombeneha piaga hene.
NUM 2:18 Ni paliragohayagi hameigini tebirali mo mogo buwa Eberaimi hameigininaga pelagi heagoha dege hamaga haga biaga hene. Ani howa ti hameigininaga agali haguane mbira mbira haga biyaru andaneha hagahaga biaga hene. Eberaimi Amihudu igini Elisama daosini dege pira mariani handari duria (40,500) hene. Manase Pedasu igini Gamaliele daosini dege pira tebirani kira halu handari kira (32,200) hene. Beniyamini Gidioni igini Abidana daosini dege pira tebirani duria halu handari maria (35,400) hene. Agali hameigini uruni bibahende dagalamaga howa daosini dege handari mbirani halira halu handari mbira (108,100) hene. Balai anda bu hayaru wahalu dindi mendeha pole howa tigua hameigini tebira halu mende bamba halu piyaru talima mama pene.
NUM 2:25 Dindi abene uyurahayagi Dana hameigini heagonaga pelagi heagoria kaware haparaho haga hearu ti nde tinaga agali haguane hearu andaneha haga hene. Dana Amisadai igini Ahiese daosini dege pira waragariani kira halu handari karia (62,700) hene. Ase Ogorana igini Pagiele daosini dege pira mariani mbira halu handari duria (41,500) hene. Nabadali Enana igini Ahira daosini dege pira duriani tebira halu handari maria (53,400) hene. Hameigini uruni bibahende dagalamaga halu daosini dege handari mbirani pira duriani karia halu handari waragaria (157,600) hene. Tigua tinaga pelagi yalu ti maha pumaro biaga hene.
NUM 2:32 Isaraele hameigini bibahende dagalamaga halu daosini dege handari waragariani tebira halu handari duriani pira duria (603,550) hene.
NUM 2:33 Tigua Anduane Homogohanda layadagua Libai hameigini ti Isaraele hameigini maru baba dagalamaga nahene.
NUM 2:34 Anidagua bialu Isaraele wali agali tigua Anduane Homogohanda Mosesehondo bilimu lalu lamiyadagua bibahende biaiore hene. Hameigini mbira mbirame tininaga balai anda pelagi heagoria kawareni bu hayaru ti pole howa gialo yalu tini henedagua pugu biaga hene.
NUM 3:1 Anduane Homogo ibugua Mosesela Hari Sainai heagoria bi laribingi howa Mosese Aronola libu damene ogodagua hene.
NUM 3:2 Arono igini maria henego wahene Nadaba hene. Mende Abihu halu tebone Eleasa halu mane Idama hene.
NUM 3:3 Ani hemigola Mosesehanda tinaga haguaneni weli odo wialu ti agali loma binigo mo miaga helo dabo helene.
NUM 3:4 Anigo ti Sainai dindi ko yobi wiagoha hemingi howa Nadaba Abihulame ira hagua ngabiaga inisenesi lomabu delalibu lalu Anduane Homogohanda lamiyagola ndo libuni manda bialu lomabu delalu hene. Ani bialu hebiria Anduane Homogohanda libu homelo bo wahene. Anigo libunaga waneigini mbira nahe homene. Ani biyagola igiri kirali Eleasa Idamala libu aba Arono heangi loma binigo mo miaga agali howa biabe bialu hene.
NUM 3:5 Anduane Homogohanda Mosesehondo lamialu lalu,
NUM 3:6 Libai hameigini karu haru ibuwa ti loma binigo mo miaga Arononaga biabe biaga helo dabo helabe.
NUM 3:7 Tigua i̱naga Balai Anda kagoha biabe bulene ngago bialu howa loma binigo mo miaga karunaga biabe birago biamogo bialu wali agali karubi biamogo bialu helo dabo helabe.
NUM 3:8 I̱na Isaraele wali agali tihondo lamirudagua Libai hameigini tigua i̱naga Balai Andaha ngaru bibahende baya hangu handayaho holebira.
NUM 3:9 Libai hameigini karu tinaga biabe bulene mbiraore hangu nga. Tigua Aronobi ibu iginirubi loma binigo mo miaga karunaga biabe bialu haabo holebira.
NUM 3:10 Aronobi ibu iginirubi tigua dege loma binigo mo miaga howa tinaga biabe bulene alego bialu holebira. Anigo agali Arono aria ndo mbirame loma binigo mo miaganaga biabe ngago bialu heagua nde agali ogoni homelo bo wahalimu, lene.
NUM 3:11 Ani lowa Anduane Homogohanda Mosese lamialu lalu,
NUM 3:12 Áyu Libai hameigini karu ti i̱ninaga wali agaliore helo helarogoni. Bamba i̱na Iyibialirunaga igini wahene hearu damene bibahende bo wahai halu Isaraele wali agali tí igini wahene bibahende i̱ninagaore helo dabalu tínaga nogo tara tara kamirunaga igini wangabe pigane wirago bibahendebi i̱ninaga helo helalimu larugoni. Anigo áyu howa ai uruni bibahende tíninaga helalu Libai hameigini i̱ninagaore helarogoni. Tínaga igini wahene i̱nihondo ngulenedaguabi tínaga nogo tara tara karume igini wangabe pigane wirago i̱hondo ngulenedaguabi uruni bibahendenaga Libai hameigini ti i̱ninagaore hai helarogoni. Anduane Homogo i̱ore kogoni, lene.
NUM 3:14 Dindi ko yobi Sainai wiagoria howa Anduane Homogohanda Mosesehondo lamialu lalu,
NUM 3:15 Libai hameigini karu bibahende dagalai halu tinaga one waneiginirubi bibahende daga lalu mini gilibu wibe. Ani bialu igiri gali ege mbira bolangua hene taba yidarunaga minibi gilibu wiai halimu, lene.
NUM 3:16 Ani layagola Mosesehanda nde Anduane Homogohanda bibe lalu lamiyago bibahende biai hene.
NUM 3:17 Ani bialu Libai igini tebirali Gesonobi Kohadabi Merari imaru hene.
NUM 3:18 Gesono igini kira Libini Simeila hene.
NUM 3:19 Kohada igini nde maria Amaramabi Isihabi Heberonobi Usielebi uruni hene.
NUM 3:20 Merari igini nde kira Mali Musila hene. Libai aria tinaga aguanene mani henerume tinaga hameigini agali uruninaga mini dege laabo haga hene.
NUM 3:21 Gesono ibu hameigini kira henego mbirago Libini ibu damene halu mendego Simei damene hene.
NUM 3:22 Ani howa tinaga igiri emene ege mbira pu bolangua henego dagalamaga halu daosini kariani handari duria (7,500) bibahende hene.
NUM 3:23 Agali uruni tinaga balai anda Anduane Homogonaga Balai Anda kagonaga erembiraha ni paliragohayagi biaga hene.
NUM 3:24 Ani bialu Gesono hameigini Laele igini Eliasaba ibu agali uruninaga haguane hene.
NUM 3:25 Agali uruni tinaga biabe Anduane Homogonaga Balai Anda heago handayaho howa Balai Anda dangini dambi haga wiagobi anda ogoninaga panga payaga labolabo wiagobi
NUM 3:26 labolabo mbira Balai Andala lomabu delaga dabula tu wiaki haga gerelape heagobi pabe panganaga labolabo heagobi handayaho haga wini. Tinaga biabe uruni damenego handayaho haga wini.
NUM 3:27 Ani bialu Kohada ibu hameigini maria hene. Uruni mbirago Amarama ibu damenerubi mendego Isiha ibu damenerubi tebonego Heberono ibu damenerubi manego Usiele ibu damenerubi hene.
NUM 3:28 Ainde hameigini maria uruni tinaga igini gali ege mbira bolangua henego bibahende dagalamaga howa daosini halirani handari tebira (8,300) bibahende hene.
NUM 3:29 Hameigini uruni tigua tinaga balai anda dindi abene unurahayagi bulene wini.
NUM 3:30 Ani bu heagola Usiele igini Elisabana ibu tinaga haguane hene.
NUM 3:31 Agali uruni tigua handayaho howa biabe bialu helogo Habo Nalolene Bi lo winigonaga Mbogoyi wiagobi dagia tebolo wiagobi lamu hale wiagane irane biagobi lomabu delaga dabu kira hayago labobi ndisi beru belediru loma binigo mo miaga biaru tigua Hobane Loma Bia Hene tamuhabi labolabo Hobane Loma Bia Heneore hobaanda hene biagobi uruni bibahendeore handayaho hai haga wini. Tinaga biabe mbirale uruni damenego baya hangu handayaho haga hene.
NUM 3:32 Loma binigo mo miaga Arono igini Eleasa ibu Libai hameigini uruni bibahendenaga agali haguane hene. Ibugua agali uruni Anduane Homogonaga Balai Anda heagoha biabe bulene wiago damene bilonaga haru haga hene.
NUM 3:33 Merari aria hearu ti nde hameigini kira henego Mali ibu damenerubi Musi ibu damenerubi hene.
NUM 3:34 Tinaga igiri gali ege mbira bolangua henego damene dagalamaga halu daosini dege waragariani handari kira (6,200) bibahende hene.
NUM 3:35 Abihaili igini Suriele ibu agali uruninaga haguane hene. Uruni tinaga balai anda Anduane Homogonaga Balai Anda henegonaga abene uyurayagi bini.
NUM 3:36 Ani bu howa tinaga biabe Balai Anda henegonaga anda gene heneru handayaho hene. Anda gene bibahende heneru hongo howa helonaga mbogoyi boronosime dindiha wabu berelaga biyarubi ira anda háinaga libu helayarubi anda gene uruni damenego handayaho hene. Tinaga biabe mbirale uruni handayaho haga hene.
NUM 3:37 Ani heagola Balai Anda hagira bu yaanda halu pabe bini heagonaga gene bu hearubi gene hongo howa yilo mbogoyi dindiha wabu bereledagobi labolabo anda hái heago hongo howa yu helo pu dariba holenaga ira gelo dindiha wearubi pabe ogoninaga labolabo daba heagobi uruni bibahende handayaho hai haga hene.
NUM 3:38 Mosesebi Aronobi Arono igini bu hearubi tinaga balai anda ni tagira ibiragohayagi Anduane Homogonaga Balai Anda heago haraba wiagoria bialu haga wini. Ani bialu agali uruni ti hangume Balai Anda Hobane Loma Bia Hene heagoha anda puwa biabe bulene winiru bialu wali agalinaga lomabu yalu ibirago mo migi bialu hene. Agali hameigini mendeme biabe ogoni biyagua nde Isaraele wali agali bu hearume agali ogoni homelo bo wahaga wini.
NUM 3:39 Libai hameigini bibahende dagalamaga halu daosini dege pira kirani kira (22,000) hene. Agali daga lenego bibahendeore igiri gali ege mbira bolangua henegoria howa dagalama pialu agali waheni dagalairi henego ogoni. Mosese Aronola libugua Anduane Homogohanda daga lalibu lalu lamiyadagua ani dagalai hene.
NUM 3:40 Anduane Homogohanda Mosesehondo lamialu lalu, Isaraele wali agalinaga igini wahene taba hanarago i̱ninagaore holebira. Ani holebirago walime igini wahene taba hono bedago ege mbira poragola ibunaga mini gilibu wilimu.
NUM 3:41 Ani wialu igiri emene uruni ti wahalu helo. Anduane Homogo i̱ore kogonigo i̱na Libai hameigini ti i̱nagaore helo hela aribia holebero. Ani bialu Isaraelealinaga nogo bulumaga igini wangabe pigane wirago i̱ninaga holebira larugoni wahalu Libai hameigini karunaga nogo igini wangabe pigane wirago i̱ninaga ha aribia helo, lalu Anduane Homogohanda lene.
NUM 3:42 Ani layagola Anduane Homogohanda bibe layadagua bialu Mosesehanda igiri gali
NUM 3:43 ege mbira bolangua heneru damene bibahende mini gilibu wiai hene. Ani gili biai howa dagalalu hearia daosini dege pira kirani kira halu handari kirani pira kariani tebira (22,273) bibahende hene.
NUM 3:44 Anduane Homogohanda Mosesehondo lone lamialu lalu,
NUM 3:45 Áyu Isaraele wali agali bibahendenaga igini wahene taba hanarago i̱nihondo ngulene winigo wahalu Libai hameigini bibahende i̱nihondo lomabu ngibe. Isaraele wali agalinaga nogo bulumagaru igini wangabe pigane wirago i̱nihondo lomabu ngulene winigo wahalu Libai hameigini karunaga nogo bulumagaru ha aribia halu i̱ninaga helo lomabu ngulene nga.
NUM 3:46 Isaraeleali igini wahene dewaore halu handari kirani pira kariani tebirame (273) Libai hameigini bolangua hayadago ai tínaga igiri uruni Isaraele wali agali tíni yolo biadai bilimu. Igiri bolangua howa handari kirani pira kariani tebira (273) hayadago yolo biadai bilimu, lene.
NUM 3:47 Igiri mbira mbiranaga muni kina pira duria (50) dege degeme yolo biadai bulene nga.
NUM 3:48 Muni uruni yalu puwa Arono halu ibu igini karuhondo milimu, lene.
NUM 3:49 Mosese ibugua Anduane Homogohanda bibe layadagua bialu Isaraeleali igini wahene maru bolangua hayaru yolo biadai binigonaga muni mo mogo buwa kina dege daosini pira mbirani tebirani handari waragariani pira duria (K13,650) mialu Arono halu ibu igini biaruhondo mo mini.
NUM 4:1 Anduane Homogo ibugua Mosese Aronolahondo lamialu lalu,
NUM 4:2 Libai hameigini emene Kohada karu arianaga agali bibahendenaga mini gili biai halibu.
NUM 4:3 Agali lenego damene bibahende mali pira tebirala (30) pira duriala (50) dombeneha hene karu tigua i̱naga Balai Anda kagoha biabe bialu helo helalibu.
NUM 4:4 I̱naga mbirale lomabu bagiho wini ngago agali tanabi karume ela nahaga ngagoha tigua biabe bialu helonaga dabo helalibu, lalu lamini.
NUM 4:5 Anduane Homogohanda Mosesehondo bi ogodagua lamialu lalu, Ai Isaraele wali agali ti balai anda bu hayagoria wahalu dindi mendeha pole manda biyagua nde loma binigo mo miaga Arono halu ibu igini biaru tigua i̱naga Balai Anda biagoha anda puwa labolabo timbuni anda Hobane Loma Bia Heneore biagola hobaki hene heago hadowa Habo Nalolene Bi lo winigonaga Mbogoyi biago labolabo ogonime dambiho yulebira.
NUM 4:6 Ani buwa labolabo ogoni daligani wena timbuni iba tia alenaga dongoneme dambi howa mani labolabo mindibi hari mindini handalehe bayaleore ngagome dambi dege halu payani iraho yulenaga ira magui holenaga ira manda manda bu wiyago mo karulo helolebira.
NUM 4:7 Ani bialu aga mindibi hari mindini handalehe ngagome dagia tebolo i̱naga mberedi lomabu ngelaga ngago mo dambi halimu. Ani buwa ndisi bebi beledibi ira hagua ngabilo delaga mini inisenesi lomabu ngarubi loma maru bu wiaga beledi maru ngarubi mbodoli be waini iba lomabu odo mulenaga ngarubi bibahende dabuni aga mindibi mo paga hayagoria dege daligani mo dambi ho ngelalimu. Ani bialu mberedi dagia teboloni dambi hene ngagoria wiaabo halimu.
NUM 4:8 Ani ngelowa aga daramabi mbirame mo dambi halimu. Ani bialu wena timbuni iba tia alenaga dongoneme yi ho dambi howa iraho yulenenaga manda mandabu helarimigoha ira mo karulowa yalu polenedagua manda mandabu ngelalimu.
NUM 4:9 Ani biai howa lamu hale wiagane irane ngago aga labolabo mindibi hari mindini handalehe ngagome mo dambia halimu. Lamu hale wiagane irane heba ngarubi beledi emene maru ira punga hiloyaga ngarubi lamu halenaga biabe biaga ngarubi olibe lini weli berelaga be ngarubi bibahende ogoniha dege kabu bumaga howa aga biagome dambi ho ngelalimu.
NUM 4:10 Ani bu wiai howa wena timbuni iba tia alenaga dongoneme daligani yi ho dambi howa yalu polenedagua manda mandabu ngelalimu.
NUM 4:11 Ani biai howa mani lomabu delaga dabu ngolome wabini biago aga labolabo mindibi hari mindini handalehe ngagome dambi howa mani wena timbuni iba tia alenaga dongoneme dambi howa ira kirame dabu ogoni iraho yalu polenedagua manda mandabu wiyago mo karulowa yalu polenedagua manda mandabu ngelalimu.
NUM 4:12 Ani bialu ndisi be beledirubi loma binigo mo miaga karu ti Balai Anda Hobane Loma Bia Hene biagoha biabe biaga damene ngaru bibahende labolabo mindibi hari mindini handalehe biagome kabu buwa mani wena timbuni iba tia alenaga dongone biagome yi hadambi howa yalu polenedagua manda mandabu ngelalimu.
NUM 4:13 Mani bo lomabu delaga dabuni ira punga beru hilo wahowa labolabo tagalitaya aleme mo dambi halimu.
NUM 4:14 Ani bialu loma binigo mo miaga karu tinaga dabu ogoriani biabe biaga ira hedo wiaga ngarubi mbirale wangobi ngarubi be ira pungaru hilo yaga ngarubi ndisi be nogo darama loma biniru hambu yaga ngarubi bibahende dabuni mo paga hai halimu. Ani mo paga hai howa wena timbuni iba tia alenaga dongone ngagome mo dambi howa iraho yule ngelarimigome mo karulalu yalu polenedagua manda mandabu ngelalimu.
NUM 4:15 Ani ngago manda bialu tigua Balai Anda kago yu wahalu pole howa Arono ibu igini loma binigo mo miagaru tigua mbirale uruni baya hangu kabu biaiore holene nga. Ani biaiore kagola Balai Anda gialo yalu pialu howa Kohada hameigini karu ibalu yalu polebira. Ani yalu pialu howa tigua mbirale uruni bibahende ela naholebira. Tigua ela hayagua tini homelo i̱na bo waholebero. Kohada hameiginiru tigua dege Anduane Homogonaga Balai Andabi anda ogoniha wiagarubi yalu polene wulebira.
NUM 4:16 Loma binigo mo miaga Arono igini Eleasa ibugua Balai Anda biagobi lamu halenaga weli biagobi loma binigo mo miaga helonaga dabo helalu weli odo wiaga biagobi ira hagua ngabilo delaga mini inisenesi biagobi widi loma bini biagobi mbirale i̱naga Balai Anda biagoha wiaga ngarubi bibahende ibugua handayaho hai holebira, lene.
NUM 4:17 Ani lowa Anduane Homogohanda Mosese Aronolahondo lalu,
NUM 4:18 Agali Kohada aria ti i̱naga mbirale uruni ngagoha kaware ibuligo libugua baya hangu de handayaho halibu. Tigua ko mbira bialu karia i̱na ti homelo bo waholeberogo naboliyanaga ani bilibu laro. Kohada aria biarume mbirale uruni mo yalu pelonaga Arono halu ibu igini karu tigua ala anda puwa mo tahalu mo migi bilimu.
NUM 4:20 Anigo Kohada hameigini karu aria mbirago ibu abale i̱naga Balai Anda kagoha anda ibuwa loma binigo mo miaga karu tigua mbirale uruni mo kabu bialu mo manda manda bialu katambu anda ibiyagua i̱na agali ogoni homelo bo waholebero, lene.
NUM 4:21 Anduane Homogohanda Mosesehondo lalu,
NUM 4:22 Libai hameigini Gesono ibu aria dege karu bibahende mini gilibu wiai habe.
NUM 4:23 Agali uruni mali pira tebirala (30) pira duriala (50) dombeneha hene karu i̱naga Balai Anda kagoha biabe bibehego hondowa dabo helabe.
NUM 4:24 Agali uruni tinaga biabe mbirale uruale yulebira.
NUM 4:25 Balai Andabi ogoninaga dangibi labolabo dambi hene kira ngago labobi wena timbuni iba tia alenaga dongone bayale wia dambi hagagobi Balai Anda ogoni panga payaga labolabo bayale wabu helene biagobi
NUM 4:26 pabeni labolabo helayagobi pu Balai Anda biagonaga pabe bu mabu bini biagobi lomabu delaga dabu biagobi pabenaga panga labolabo timbuni heagobi mbirale emene tara tara pabe ogoni bini ngaru bibahende Gesono hameigini karu tigua uruni mo tiga bialu yulene damenego tinaga biabe nga.
NUM 4:27 Arono halu ibu igini karu tigua Gesono aria karume mbirale uruni yilo mo tiga buwa mo tahaga bialu tinaga biabe ogoni bilo haru holebira.
NUM 4:28 Gesono aria karu tigua Balai Anda biagonaga biabe uruni bulebira. Ani bialu helonaga loma binigo mo miaga Arono igini Idama ibugua biabe uruni handayaho holebira.
NUM 4:29 Anduane Homogohanda Mosese lamialu lalu, Libai hameigini aria Merari ibu damene karunaga mini gili bibe.
NUM 4:30 Agali uruni tigua Anduane Homogonaga Balai Anda kagoha biabe bialu helo tinaga mali pira tebirala (30) pira duriala (50) dombeneha hene karu dege dabo helabe.
NUM 4:31 Tinaga biabe Balai Anda biagonaga gene karubi ira anda hái libu para hene biagobi anda gene hongohe helonaga mbogoyi wabu helene biagobi
NUM 4:32 Balai Anda pabe bu mabu bini biarunaga gene hene biarubi heba mbogoyi gene mo hongo helonaga dindiha wabu helene biarubi pabe daba hene pu ngarubi Balai Andanaga daba haga biaga pu ngarubi maru ale pabe ogoni bini emene emene tara tara ngarubi bibahende tigua mo yai holebira. Uruni mo yai helonaga loma binigo mo miaga kago ibugua agali uruni biabe bilo mo tahaga bulebira.
NUM 4:33 Merari aria karu tigua Balai Anda kagoha biabe uruni bulebira. Ani bialu kagola loma binigo mo miaga Arono igini Idama ibugua agali biaru handayaho howa haru holebira.
NUM 4:34 Mosese Aronobi agali bu hearunaga agali haguane hearubi tigua Anduane Homogonaga bi layago talialu Libai hameigini aria agali tebirali Kohada damene hearubi Gesono damene hearubi Merari damene hearubi ti damene darama mbiraore hearu bibahendenaga mini gilibu wiai hene. Tigua agali mali pira tebirala (30) pira duriala (50) dombeneha heneru Anduane Homogonaga Balai Anda biagoha biabe bibehe hearu bibahende mini gilibu wiai hene. Agali uruni ti daga ogodagua hene. Kohada aria daosini kirani handari kariani pira duria (2,750) hene. Gesono aria daosini kirani handari waragariani pira tebira (2,630) hene. Merari aria daosini tebirani handari kira (3,200) hene. Agali tebira uruni damene bibahende daga lamaga halu daosini halirani handari duriani pira halira (8,580) hene.
NUM 4:49 Anduane Homogo ibunime ogodagua bibe lalu Mosesehondo lamiyagola tigua anidagua dege bini. Ani bialu Libai aria mbira mbira kagohondo biabe bilo mo ta hai habe lalu Anduane Homogohanda lamia dege bini. Ani howa tigua Balai Anda kagonaga biabe bulenenagabi Balai Anda gialo ya larangi yai helobi helene. Bi uruni bibahende Mosesehanda hale hai howa Anduane Homogohanda bibe lalu lamiyago bibahende biaiore hene.
NUM 5:1 Anduane Homogo ibugua Mosesehondo lamialu lalu,
NUM 5:2 Isaraele wali agalihondo ogodagua lamibe. Wali agali ko ge hamuabi karubi dereni angibu tugudatagi halu karubi ibane daramayaguabi tinaga tinginiha howa tagira ibalu heaguabi mbiralime homene tingini ngago ela hayaguabi kuduguhe uruni ale kago bo talialu pelalimu. Wali agali uruni ale kago ti i̱naga deni bayale ndo ko dodohe kago ti wali agali baba mandagi balai anda bu kamigoha nahelo tagira pelo taliatagi halimu.
NUM 5:3 I̱ni i̱ninaga wali agali baba Balai Anda bu kagoha haga kogodago ai wali agali i̱ninaga deni ko dodohe uruni balai anda bu karuha wahalu tagira pelo pelalimu. I̱naga deni wali agali ti haga balai anda bu karuni mo dodohe holigo ani pelalimu, lalu Anduane Homogohanda lene.
NUM 5:4 Anduane Homogohanda Mosesehondo bi lamiyiyagola hale halu Isaraele wali agali tigua wali agali ko urunibi hearu balai anda bu henedagoria howa tagira pelo waratagi haga bini.
NUM 5:5 Anduane Homogohanda Mosesehondo lalu,
NUM 5:6 Isaraele wali agali bu karuhondo bi ogodagua lamibe. Wali agali mbiralime Anduane Homogohondo erembira ngialu mende kagohondo ko biyagua nde
NUM 5:7 ibugua ko biyadago latagi halu mendeali kagohondo ko biyago mo tiga bialu yolo bulene nga. Ibunaga yolo karulape bulene ngadagua kina duria degedege bialu uruninaga kina waragane degedege paga howa mulene nga.
NUM 5:8 Ani miragola muni ogoni mo yulene agali ibuni homeneyagua ibu damenehondo mulene mbira naheyaguabi nde yalu ibuwa loma binigo mo miaga kagome mo yilo Anduane Homogohondo mulene nga. Ani bialu ibunaga ko domo wahelonaga nogo sibi wangabe mbira bo delolene nga.
NUM 5:9 Isaraele wali agali tigua mbirale bayale mbira Anduane Homogohondo lomabu mule yalu ibiragola uruni loma bini mo miaga kagome yamirago ibunaga holebira.
NUM 5:10 Wali agalime mbirale Anduane Homogohondo loma binigo yalu ibiragola loma binigo mo miaga karu aria mbira loma uruni yamirago ibu mo yalu ibunaga holebira, lalu Anduane Homogohanda lene.
NUM 5:11 Anduane Homogohanda Mosesehondo lamialu lalu,
NUM 5:12 Isaraele wali agalihondo ogodagua labe. Agali mbirame ibu one agali mendela kayu biyadalo manda buwa wali ogoni ibu i̱naga deni dodohe bedalo manda bialubi deme baya hangu handa nabi howa ani bini badalo manda buwabi agali ogoni ibugua ibu onehondo mini ko wuwabi hayagua
NUM 5:15 nde ibu one ogoni loma binigo mo miaga kago karia haru polene nga. Ani bialu agali ogoni ibugua balawa balime wabini genda magi kilogarama mbira yalu lomabu mule polene nga. Ani yalu pialu balawa ogoni weli odo ba nahebi ira hagua ngabilo delaga inisenesibi nayi polebira. Anidagua bulubadago irane agali ogoni ibu oneme mana ko binidabe nabidabe toba toba howa tigua dabo hendelonaga ibugua loma ogoni bu yalu polene nga.
NUM 5:16 Ani biragola loma binigo mo miaga kagome wali ogoni haru ibuwa i̱naga deni lomabu delaga dabu kagoria kaware hapara howa helolebira.
NUM 5:17 Ani íbu kagola loma binigo mo miaga ibugua iba loma bini hambu ngago maru ndisi be dindime wabini ngagoha odo berelolebira. Ani bialu i̱naga Balai Anda tamuha anda puwa dindi wini ngago emene mo yalu ndisi be ogoniha ibira haragola iba mo kaubia helolebira.
NUM 5:18 Wali biago ibu i̱naga deni helowa dege loma binigo mo miaga kagome wali ogoninaga mandari pongobu kago hadape ho helolebira. Ani helowa agali biago ibu oneme ko biyada lowa balawa lomabu yalu ibiyago loma binigo mo miaga kago ibugua yamialu wali biago giha mo ya holebira. Ani bialu loma binigo mo miaga kago ibunaga giha iba kaubi beha berelo wiyago mo yu holebira. Walime mana ko henene biniyagua iba ogonime wali biago mo ko holebira.
NUM 5:19 Ai loma binigo mo miaga ibugua bi hongohe mbira i̱ninaga deni howa lolebira. Ibugua wali biagohondo lamialu lalu, Í̠na agali mbirala page nabi tigatiga bereneyagua nde wali mana ko binigo mo ko haga iba ogome í̠ mo ko naholebira.
NUM 5:20 Anigo í̠ agali mbirala kayu biriyagua nde í̠ Anduane Homogonaga deni ko henego bedegoni. Ani bidagome í̠ mo ko holebira, lalu lamulebira.
NUM 5:21 Ani lamialu loma binigo mo miaga agali kagome wali biago ha halu lalu, Anduane Homogohanda í̠ wali agali maru karunaga deni ko ngubi nagaloneore mbira bede, lolebira. Ibugua í̠naga tingini hongo nahelo mo gedaore halu í̠naga tombegene mo timbu helolebira.
NUM 5:22 Ai wali mo ko hagane iba ogome í̠naga tiniha anda puwa tombegene mo timbuore halu í̠naga tingini hongo nahelo mo gedaore helo, lolebira. Anidagua laragola wali biago ibugua ladai bialu lalu, Ogoni karulapego Anduane Homogo ibunime aniore bilo laro, lolebira.
NUM 5:23 Ani lalu loma binigo mo miaga biagome bi layago beba ira ongoba aleni gilibu wulebira. Ani gili biai howa gilibu wiyago iba kaubi hambu wiyagoha domo peholebira.
NUM 5:24 Ani bialu iba kaubi ogoni wali biago nelo miragola wali biagome iba nalu karia wali biagonaga tini mo ko holebira.
NUM 5:25 Anidagua bulebirago manda bialu iba biago walihondo nami howa ala pigane wali biagome balawa yu hayago loma binigo mo miaga biago ibu yamuwa gi mbira haeala yuwa Anduane Homogo i̱ninaga deni yaraga halu loma bialu lomabu delaga dabu ngagoria yalu polebira.
NUM 5:26 Ani puwa balawa maru gime mo yalu lomabu delaga dabu ngagoria lomabu delolebira. Ani delalu puwa iba kaubi biago wali biago nelo mulebira.
NUM 5:27 Wali ogoni ibu agali kayu bini henene bereneyagua nde iba ogonime tandaga timbuni halu tombe timbu halu ibunaga tingini hongo nahe gedaore holebira. Wali agalime mendeali kagohondo ha halu howa lalu, Anduane Homogohanda wali ogoni mo ko hayadagua í̠ mo ko helo, laga bulebira.
NUM 5:28 Anigo wali ogoni ibu ko nabi bereneyagua nde ibu i̱naga deni dodo nahe biruwa iba ogonime ibunaga tinginiha mo ko naholebira. Ibugua waneiginiru taba hanabehe biruwa waneigini taba honolebira.
NUM 5:29 Agali mbira ibu oneme agali kayu bima ibaga bialu beda badalo manda buwa ibu mini ko wu heagua nde mana ogonidagua bilimu.
NUM 5:30 Agali mbira ibunaga mini ko hangume ibu one agali mendela kayu yarabe tobaho heaguabi nde mana mbiraore ogonibi dege bilimu. Agalime ogonidagua manda biyagua nde ibu one haru ibuwa i̱naga deni lomabu delaga dabu ngagoria kaware íbu helalimu. Ani íbu kagola loma binigo mo miaga ibugua mana biaga lo wiyadagua bulebira.
NUM 5:31 Anidagua biragome wali ogoni ibu agalinidagoha ko nawi. Anigo wali ibuha ko wiagua nde ko ibunime bialu hayadagonaga pani nalu genda ibuni dege yu birulebira, lalu Anduane Homogohanda lene.
NUM 6:1 Anduane Homogo ibugua Mosesehondo lamialu,
NUM 6:2 Bi ogo Isaraele wali agaliruhondo lamibe. Wali agali mbirame Nasa aria hole lalu bi hongohe lo wialu ibuni i̱hondo lomabu nguleore lalu lo wiyadagua ngiyagua
NUM 6:3 nde ibugua waini ibabi lulu iba marubi nolene nawiore. Ani bialu pu mbira lini daga mini gerebi lini ibanebi gerebi lini bogabi ibire ngagobini dedagoria do gembe bini ngagobi bibahende nolene nawiore.
NUM 6:4 Horo bibahendengi ibugua ibuni i̱hondo lomabu ngulene mandabu haabo hayagua nde ibugua pu gerebi karunaga lini dedarubi lini ogonaga egenebi dongonebi nolene nawiore.
NUM 6:5 Horo bibahendengi ibu i̱naga heneore haabo howa ibunaga mandari angaribi napodolebira. Ibu i̱ninagaore kogoni lene howa ibunaga mandari angaribi napode lu helo helolebira.
NUM 6:6 Angari mandaribi luni helolobadagoni manane ibuni i̱hondo lomabu nginiore howa i̱ninagaore hene kogoni lalu mo walia hagane holebira. Ani bu howa ibu wali agali homene ngagoriabi kaware napolebira. Homenedago ibu aba ai̱yaoreyaguabi ibu hamene mbalinioreyaguabi napolebira. Piyagua nde ibu i̱naga deni ko dodohe holebira.
NUM 6:8 Ibugua horo bibahendengi i̱hondo ibuni nguleore lalu lo wiyadagua haabo hayagua nde ibu Anduane Homogo i̱ninagaore holebira.
NUM 6:9 Agali ogoni ibu kagoria mbirali abale homo ibira hayagua ogonime agali biago ibunaga mandari i̱nagaore hene biago dodohe holebira. Anidagua biragola horo karu howa mandari podo waholene wulebira. Ani birangi ibu i̱naga deni dodo nahe holebira.
NUM 6:10 Ani bialu horo haliningi ega malibu ale kira minu yalu i̱naga Balai Anda kago haneni puwa loma binigo mo miaga agali kago mulene wulebira.
NUM 6:11 Ani miragola loma binigo mo miaga kago ibugua ega kira ogoni yamialu ega mendego ko domo wahelonaga loma buwa bo delalu mendego irani dai helo loma buwa bo delolebira. Agali ogoni ibu wali agali homenenaga tingini wiagoria kaware hayagome ibu mo dodohe henego ai ega kira biago lomabu bo delayagome i̱ninaga deni ibu dodo nahe bayale holebira. Ani howa horo ogoningi dege agali ogoni ibunaga mandari i̱nihondo lone lomabia holene nga.
NUM 6:12 Horo ogoningi dege howa i̱nihondo loma biaho holene horo tenialu daga lolebira. Horo ala i̱hondo lomabia hene biaru ibunaga mandari mo dodo hayagome puguayagoni. Ani larogoni irane mandari i̱naga loma biaho helene biago mo dodo hayagome puguayagoni. Ani biyagome ibuni mo dodo hayago ai ibunaga ko biyadago domo wahelonaga loma bialu bo delole nogo sibi mbira mali mbira hangu penego kago haru halu ibulene nga.
NUM 6:13 Agali ogoni ibuni Nasa aria loma bia holene horo lo wiyago piai haragola i̱naga Balai Anda haneni pu holebira.
NUM 6:14 Ani pu howa ibugua Anduane Homogo i̱nihondo nogo tebira lomabu ngulene nga. Nogo sibi igini wangabe mali mbira hangu pene kago irani dai helonaga lomabu bo delole haru halu ibulene nga. Loma mendego nogo sibi igini dege angibuni mali mbira hangu pene kago ko domo wahelonaga lomabu delole haru ibulene nga. Ani bialu tebonego nogo sibi wangabe Anduane Homogola ho gimbu bulenaga loma bialu bo delole haru ibulene nga. Nogo sibi uruni bibahende dere durubi mbira nabi bayaleore kago hondowa haru ibulene nga.
NUM 6:15 Ani bialu mberedi yidi nahe hiriniru mbasigedi nu mbiraha hanalu ibuwa lomabu ngulene nga. Mbasigedi nu ogoniha balawa bayaleme mberedi timbuni olibe lini welibi heba biamaga heneme wabini ngarubi mbisigedi hiruwa olibe lini weli wai hene ngarubi heba hanalu ibulene nga. Ani hanalu ibuwa ibugua lomabu miaga mana ngago talialu widi lomabu delalu waini ibabi mberedibi ogoni heba odope halu lomabu delolene nga.
NUM 6:16 Ani buwa loma binigo mo miaga kago ibugua mbirale uruni yamialu ko domo wahelonagabi irani dai helonagabi Anduane Homogo i̱nihondo lomabu delolene nga.
NUM 6:17 Ani bialu ibugua nogo sibi wangabe mbira heba mbasigedi nuha mberedi wabu hanayagobi heba Anduane Homogo i̱nila ho gimbubu holenaga lomabu delolene nga. Ani bialu widi lomabu delolenebi waini iba lomabu delolenebi bibahende lomabu delolene nga.
NUM 6:18 Agali biago ibugua bule lalu bi lo wiyago biai howa ibuni i̱naga Balai Anda haneni kaware íbu howa ibunaga mandari helo wahayago podolene nga. Podalu i̱nila ho gimbu bu holenaga lomabu delaga dabu ngagoria irani delolene nga.
NUM 6:19 Ani bialu mani nogo sibi wangabe loma bialu bo delole haru halu ibiyagonaga payane podowa todobene beha dawalebira. Ani dawawa dedagola loma binigo mo miaga kago ibugua nogo payane ogonibi mberedi mbisigedibi mbasigedi nuha hono wiyago mbira mbira tagu yalu nogo payane heba agali biagonaga giha mo ya holebira.
NUM 6:20 Ani mo ya howa loma binigo mo miaga kago ibuni mo yu dai bialu i̱ninaga deni yaraga howa wigiwaga lalu lomabu i̱hondo ngulebira. Loma ogoni i̱ninagaore ngago loma binigo mo miaga karu ti mo yulebira. Ani bialu nogo sibi lomabu mini ogoninaga ge burulene ngagobi galukuni ngagobi payane heba loma binigo mo miaga kagonaga dege ngago tini mo yulebira. Loma binigo mo miaga karu tigua biabe uruni biai kagola Nasa aria biago ibu waini iba ta nabi nolene wulebira.
NUM 6:21 Wali agali mbiralime ibuni i̱hondo Nasa aria lomabu nguleore lalu bi pongo bo wiyagua nde o layadagua bialu holene nga. Mbirali ogonime mbirale marubi i̱hondo nguleore lalu lo wiyadagua biaiore holene nga, lalu Anduane Homogohanda lene.
NUM 6:22 Anduane Homogohanda Mosesehondo bi hongohe mbira lamialu lalu,
NUM 6:23 Aronobi ibunaga iginirubi Isaraele wali agali Ngode Datagaliwabehanda mo bayale helonaga bi ogobi lolene ngago lamibe, lene.
NUM 6:24 Anduane Homogohanda tí mo bayale helobi bayuwa hondo helobi
NUM 6:25 Anduane Homogohanda tíhondo dara halu mo bayale howa biamogo bilobi
NUM 6:26 Anduane Homogohanda ibunaga biamogo buleneme hondo halu mo palia holene ngilobi halimu, lalu ani lalimu lamini.
NUM 6:27 Anduane Homogohanda ani lowa lalu, Tigua i̱naga minini howa Isaraele wali agali mo bayale ho holene hame layagua i̱na ti mo bayale holebero, lene.
NUM 7:1 Mosese ibugua Anduane Homogonaga Balai Anda biago bu helene. Balai Anda ogoni biai hayadangi dege anda biagobi mbirale ogoniha wiarubi lomabu delaga dabu biagobi mbirale dabu ogoriani biabe biaga wiarubi bibahende Anduane Homogo ibunaga wiabagi heneore ngelonaga weli odo ha̱i̱ haga winiyago mo yuwa odo ha̱i̱ haga bini.
NUM 7:2 Ani biyagola Isaraele hameigini mbira mbiranaga agali haguane mbira mbira hayadagua tigua tinaga loma biniru Anduane Homogohondo mule yalu ibugu bini. Agali haguane uruni ti Isaraeleali agali henego dege ibini. Isaraele wali agalinaga mini gili bialu agali dagalayago biabe agali uruni tigua haru bamba howa handayaho hene.
NUM 7:3 Agali uruni tigua tinaga loma biniru Anduane Homogohondo mule yalu ibiyaru uru ale. Dabudabu yulene garo ale waragaria yalu ibalu nogo bulumaga homberia (12) haru ha bialu Anduane Homogonaga Balai Anda heagoria ibuwa ibunihondo mini. Dabudabu yulene garo mbirago agali kiralime lomabu mule yalu ibalu nogo bulumaga mbira dege dege agali haguane tini hangu hangu ta howa haru halu uruni bibahende Anduane Homogohondo lomabu mule ibini.
NUM 7:4 Tigua mbirale yalu ibai hayagola Anduane Homogohanda Mosesehondo lamialu lalu,
NUM 7:5 Tigua mbirale lomabu yalu ibiyaru yamuwa Mosese í̠na Libai hameigini karume Balai Andaha biabe bulene ngadagua bilo uruni bibahende tigua mo yulene wulebirago tihondo mo mibe, lene.
NUM 7:6 Ani lamiyagola Mosese ibugua dabudabu yulene garo biarubi nogo bulumaga biarubi Libai hameigini hearuhondo mini.
NUM 7:7 Ibugua dabudabu yulene garo kira mialu nogo bulumaga maria lowa Gesono aria hearu tinaga biabe bulene wiaru bilo mini.
NUM 7:8 Ani bialu Merari aria hearu tinaga biabe bulene wiago bilonaga dabudabu yulene garo maria mialu nogo bulumaga halira lowa mini. Ani mialu Arono igini Idama ibugua Merari aria hearunaga biabe bulene wiago haru howa biabe bilonaga handayaho hene.
NUM 7:9 Anigo Kohada aria hearu tigua bulenego duniniore payani hangu yulene wiagola Mosesehanda nogo bulumaga dabudabu yulene garo mbira nami wahene.
NUM 7:10 Lomabu delaga dabu biago Anduane Homogonagaore helo loma biaho ngelolene horoore hayagola Isaraeleali agali haguane hearu tigua loma biniru mo yalu ibini. Agali haguane uruni tigua loma ogobi dege dege yalu ibugu bini. Tigua ndisi be silibame wabini genda magi kilogarama mbira bolanguahe dege dege yalu ibini. Ani bialu beledi mbira dege dege genda magi garama handari halira (800) silibame wabinigo yalu ibini. Ani yalu ibalu howa ndisi be ogonihabi beledi ogonihabi balawa bayaleoreru olibe lininaga weli wiago odo biamaga howa widi lomabu mule yalu ibugu ibugu bini. Ani bialu agali haguane mbira mbira biaru tigua beledi ngolome wabini baya taraoreru genda magi garama handari mbirani pira (110) yalu ibugu ibugu bini. Beledi ngolome wabini ogoriani ira hagua ngabilo delaga inisenesiru wu to̱lowa ogobi dege dege yalu ibuwa migi bini. Ani bialu agali haguane mbira mbira uruni tigua nogo bulumaga wangabe dalua mbirabi sibi wangabe dalua mbirabi sibi igini hongolo mali mbira hangu pene mbirabi bo loma buwa irani dai helole haru halu ibugu ibugu bini. Ani bialu nogo meme mbira ko domo wahelonaga lomabu bo delole haru halu ibugu ibugu bini. Ani bialu bulumaga wangabe kirabi sibi wangabe duriabi meme wangabe duriabi sibi igini mali mbira hangu pene duriabi uruni bibahende Anduane Homogola ho gimbu bulenaga loma bialu bo delole haru halu ibugu ibugu bini. Tigua mbirale uruni lomabu delaga dabu wiagoria kaware yalu ibuwa mule biyagola Anduane Homogohanda Mosesehondo lalu, Agali haguane karu tigua i̱naga loma o yalu ibiyadaruni horo áyu dege bu ngiai nahe horo mbiru mbirungi agali mbira mbirame loma yu ibugu ibugu bialu loma bulene horo hombenengi (12) dela maro bialu wahole ani bilimu, lalu lamini. Ani lamiyagola agali haguane mbira mbira uruni tigua mbirale Anduane Homogohondo mule wiyaru horo mbiru mbirungi yalu ibugu bialu migi bini. Horo mbirungi Yuda hameigini agali haguane Aminadaba igini Nasonohanda mule ibini. Horo mendengi Isaga hameigini agali haguane Sua igini Nedanelehanda mule ibini. Horo tebonengi Sebulunu hameigini agali haguane Helono igini Eliabahanda mule ibini. Horo manengi Lubene hameigini agali haguane Sederu igini Elisuhanda mule ibini. Horo dauningi Simeono hameigini agali haguane Surisadai igini Selumielehanda mule ibini. Horo waraganengi Gada hameigini agali haguane Duele igini Eliasabahanda mule ibini. Horo kanengi Eberaimi hameigini agali haguane Amihudu igini Elisamahanda mule ibini. Horo haliningi Manase hameigini agali haguane Pedasu igini Gamalielehanda mule ibini. Horo diningi Beniyamini hameigini agali haguane Gidioni igini Abidanahanda mule ibini. Horo piningi Dana hameigini agali haguane Amisadai igini Ahiesehanda mule ibini. Horo beanengi Ase hameigini agali haguane Ogorana igini Pagielehanda mule ibini. Horo hombenengi Nabadali hameigini agali haguane Enana igini Ahirahanda mule ibini.
NUM 7:84 Ani biai heagola tigua agali haguane homberia (12) biarume mbirale bibahende lomabu mulebi lomabu delaga dabu biagobi Anduane Homogonagaore helo lomabia holebi mbirale yalu ibiyaru damenego daga ogodagua silibame wabini ndisi homberia beledi homberia dege dege lowa wini.
NUM 7:85 Ndisinaga genda magibi beledinaga genda magibi biamaga howa handalu hemiria kilogarama pira kirani halira (28) hene.
NUM 7:86 Beledi ngolome wabini homberia (12) biarunaga genda magi garama daosini mbirani handari tebirani pira kira (1,320) hayane hendene. Beledi uruni mbira mbira bibahendeni ira hagua ngabilo delaga mini inisenesi dewa berelowa yu ibinigobi wini.
NUM 7:87 Ani bialu nogo bulumaga wangabe homberia (12) sibi wangabe homberia (12) dege haru ibalu sibi igini hungubalua mali mbira hangu pene homberiabi (12) loma irani dai helo lomabu bo delole haru íbu helene. Ani buwa widi lomabu delolenebi nogo uruni heba lomabu delamaga hole yu ibalu ngela dege bini. Ani bialu ko domo wahelonaga nogo meme lomabu bo delole homberiabi (12) haru íbu helene.
NUM 7:88 Ani bialu Anduane Homogola ho gimbu bulenaga loma buwa bo delole nogo bulumaga wangabe pira kirani mariabi (24) sibi wangabe dege pira waragariabi (60) meme wangabe pira waragariabi (60) haru íbu helalu sibi igini hongolo mali mbira hangu pene pira waragariabi (60) bibahende anidagua loma buwa bo delole haru halu ibugu ibini. Ani bialu tigua lomabu delagane dabu biago ala Anduane Homogo ibuninagaore helo mo loma biaho ngelene. Ani biai howa mbirale uruni bibahendeore Anduane Homogohondo mo lomabu miai hene.
NUM 7:89 Mosese ibu Anduane Homogo heba bi lole Balai Anda heagoha anda puwa Habo Nalolenenaga Bi lo winigonaga Mbogoyi panga ngagoria dahuliyali handalehe kira nguni mende mendelani handa ai̱ na̱i̱ bu heleago dombeneni wali agalinaga ko domaga ngagoria Mosese ibugua Anduane Homogo bi larago hale haga hene.
NUM 8:1 Anduane Homogo ibugua Mosesehondo lamialu lalu,
NUM 8:2 Arono ibugua i̱naga tamu Hobane Loma Bia Hene biagoha lamu hale wiagane irane mbiraore gebagane kariahe ngagoria mo berelaga bialu i̱naga tamu hobane ngago dombeneha wá hai helo lamu hale baya hangu mo tiga buwa ngelabe lalu lamibe, lene.
NUM 8:3 Ani layago hale halu Arono ibugua Anduane Homogohanda bibe layadagua bialu lamu hale wiagane irane wabu wini biagoria berelaga buwa delayagola anda tamu Hobane Loma Bia Hene biagonaga hanuni wá haame hene.
NUM 8:4 Lamu hale wiagane irane ogoni ala Anduane Homogohanda Mosesehondo bibe lalu walia hayadagua bialu tigua ngolo maru mo yuwa hamame bo dambu mbaralaga buwa lamu hale wiagane irane gebaganebi ogoninaga yári balawaya alebi bibahende wabu wini.
NUM 8:5 Anduane Homogohanda Mosesehondo laabo halu lalu,
NUM 8:6 Í̠naLibai hameigini tini hangu olalu ibidaba lowa tini i̱naga deni dodo nahe bayale helo dabo helabe.
NUM 8:7 Ani bule howa ogodagua bibe. I̱naga deni dodo nahe helonaga iba biagome Libai agali uruni tandala bahaga bibe. Ani bialu tinaga mandari angaribi bibahende dogo wahai halu tinaga agabi wayawaya bo wahai hadaba labe. Anidagua biragola ti dodo nahe bayale holebira.
NUM 8:8 Ani biai halu tigua nogo bulumaga wangabe hungubalua mbirabi balawa bayaleore olibe lininaga weli heba biamaga hene lomabu delole ngagobi nogo bulumaga biago heba lomabu mulene nga. Bulumaga wangabe mendebi ko domo wahelonaga loma buwa bo delole haru ibulene nga.
NUM 8:9 Ani bidagola Isaraele wali agali bibahende íbu ngoai howa Libai aria bibahendebi i̱naga Balai Anda kago haneni haru íbu helowa helabe.
NUM 8:10 Ani helowa horo ogoningi Libai ti i̱naga deni íbu kagola Isaraele wali agali tigua agali uruninaga emboneni gi wiaiore halimu lamibe.
NUM 8:11 Ani biai kamigola Arono ibugua Libai uruni ibunaga giha lomabu yuwa ngiradagua bialu i̱naga deni gi dogolowa wigiwaga lalu holebira. Anidagua biragome Isaraele wali agali tigua Libai hameigini uruni i̱ninaga biabe biagaore helo loma biaho helolebira.
NUM 8:12 Ani buwa Libai hameigini tigua nogo bulumaga wangabe kira biago labonaga haguaneni gi wulebira. Ani wialu bulumaga mbirago tininaga ko domo wahelonaga loma buwa bo delalu mendego irame dai helo loma buwa bo delolebira. Loma kira ogonilabo Libai uruni ti i̱naga deni ko dodo nahe bayale helonaga loma ogoni.
NUM 8:13 Í̠na Libai hameigini uruni i̱ninagaore helo i̱hondo mbiraleore ngiradagua ngeregola Arono aria karu tigua Libai uruni handayaho holebira.
NUM 8:14 Anidagua beregome Libai ti Isaraele hameigini maru karu aria ndo ti i̱ninaga daba bagi hene tara holebira.
NUM 8:15 Í̠na ti mo bayale halu i̱nihondo loma biaho heledegola tigua i̱naga Balai Anda kagoha biabe bulene ngaru bialu holebira.
NUM 8:16 Isaraele wali agalinaga igiri wahene taba hanarago i̱nihondo ngulene winigo wahalu i̱na Libai hameigini i̱ninagaore helo dabo helarugo ti i̱ni hangunagaore holebira.
NUM 8:17 Ai hale halimu. Isaraele wali agali tinaga igiri wahenebi nogo bulumaga sibirunaga igini wangabe pigane wiyaguabi i̱naga dege haga wiyagoni. Mana ogoni i̱na Iyibi wali agalinaga igiri wahene bibahende bo wahai harungi howa i̱ninagaore helarimi.
NUM 8:18 Ani binigo ai áyu Isaraele wali agali tinaga igiri wahene wahalu Libai hameigini bibahende i̱ ha aribia harogoni.
NUM 8:19 I̱na Isaraelealihondo i̱naga Balai Anda kagoha biabe ogo bulene nga lalu abale langirugo ai Libaiali uruni tigua bialu helo Arono halu ibu igini karu ti merogoni. Isaraeleali tigua biaga winigo áyu Libai hameiginime bu aribia haragonigo ai ti nde i̱naga Balai Anda Hobane Loma Bia Hene kagoria kaware napoleberemi. Ti ogoriani kaware pu karia i̱na ti mo ko holene wuligo napilimu lamibe larogoni, lene.
NUM 8:20 Ani layagola Mosese Aronobi Isaraele wali agali bibahendebi tigua Anduane Homogohanda Mosesehondo bi layadagua bialu Libai hameigini Anduane Homogonagaore lomabia hene helonaga loma biaho helene.
NUM 8:21 Ani loma biaho helayagola Libai hameigini tini dodo nahe holene mana biaga wiago bialu tinaga aga winirubi wayawaya biai hene. Ani biai heagola Aronohanda uruni ti Anduane Homogohondo lomabu mialu ibunaga deni gi yaraga howa wigiwaga lalu Libai hameigini lomabia hene. Ani bialu ti dodo nahe bayale helonaga loma bo delalu bini.
NUM 8:22 Isaraele wali agali tigua Anduane Homogohanda Mosesehondo lamiyadagua bialu Libai hameiginiru dabo bagiho helene. Ani biyagola Libai aria tigua Anduane Homogonaga Balai Andaha biabe bulene wiaru bialu helo Arono halu ibu iginirume ti haru haga hene.
NUM 8:23 Anduane Homogohanda Mosesehondo lamialu lalu,
NUM 8:24 Libai hameigini agali ibunaga mali pira kirani duria (25) bolangua hene kagome i̱naga Balai Anda kagoha biabe bialu holebira.
NUM 8:25 Ani bialu kane dege tinaga mali pira duria (50) bolangua haragola biabe nabi waholebira.
NUM 8:26 Mali ogonidagua haragola uruni tini hangu howa Balai Andaha biabe bulene wiaru bulene nawulebira. Tigua ti aria karu biamogo bialu i̱naga Balai Anda kagoha biabe biamogo bulene ngaru biamogo mogo bialu holebira, lalu Anduane Homogohanda Mosesehondo lamini.
NUM 9:1 Isaraele wali agali ti Iyibi dindi wahalu tagira pu heane mali mendegonaga ege mbira hayagola ti Sainai dindi ko iba dalu naibaga wiagoria hene. Ani heagola Anduane Homogohanda Mosese lamialu lalu,
NUM 9:2 Ege áyu kamagonaga horo dene (14) laragola alendohayagi Isaraele wali agali bibahendeme nogo sibi igini loma bialu bo dawalimu. Ani bialu horo i̱na tí mo wialu pelarugo mitangi bialu tomo naga mana wiyadagua bialu bo dawalu nalimu. Tomo ogoni horo ogoningiore nolene nga. Tígua tomo ogoni nalu howa mana biaga wiyarunidagua bialu nalimu, lene.
NUM 9:4 Ani layagola Mosese ibugua Isaraele wali agali lamialu, Bolangua Halu Penegonaga Horo mitangi bialu tomo nagane winigo nami̱ya, lalu lamini.
NUM 9:5 Ani lowa ege mbiranaga horo dene (14) ogoningi alendo hayagola Isaraele wali agali tigua Sainai dindi ko iba dalu naibaga wiagoria howa tomo ogoni dawa nene. Ani bialu howa Isaraele wali agali tigua Anduane Homogohanda Mosesehondo ogodagua bilimu lalu lamiyago biai hene.
NUM 9:6 Anigo agali marume wali agali homene tingini wiaru ela haga hearu ti Ngode Datagaliwabenaga deni bayale ndo dodohe hene. Ani howa uruni tigua Bolangua Halu Penegonaga Horo mitangi bialu tomo ogoni nabe nahe hene. Aniyagola tigua Mosese Aronola hearia puwa
NUM 9:7 libuhondo lamialu lalu, Iname homenerunaga tingini ela howa ina Ngode Datagaliwabenaga deni bayale ndo dodoheore kama. Ani kamago ai ina wali agali maru karu baba mandagi mo mogobu biruwa Anduane Homogohondo loma ogoni bo mibe nahedago irane aginagabe, lalu hale hene.
NUM 9:8 Ani hale hayagola Mosese ibugua ladai bialu lalu, I̱na Anduane Homogo ala hale holiya emene hondo hadaba, lene.
NUM 9:9 Ani layagola Anduane Homogo ibugua Mosesehondo lalu,
NUM 9:10 Í̠na Isaraele wali agaliru bi ogodagua lamibe. Tí kamiruni ariamebi tínaga aguanene holebirarumebi tí bibahende homa ela howa i̱naga deni bayale ndo dodohe kamiyaguabi dindi taraha ibaga bialu pirimiyaguabi urunidagua buwa Bolangua Halu Penegonaga Horo mitangi bialu tomo nolene wiyaru noa biyagua nde nolene nga.
NUM 9:11 Tígua tomo nolene ogoni ege mendegonaga horo dene (14) ogoningi alendo haragola dawalu nolene nga. Tígua nogo sibi igini bo dawa nalu mberedi yidi nahe hirini ngago nalu palena ale kaubigo dugu peha buwa ogoni heba nolene nga.
NUM 9:12 Bolangua Halu Penegonaga tomo ogoni dawa nalu biruwa mana biaga wiyaru biaiore holene nga. Nogo sibi balu naramigo aria podo ibira hene iriria maru yawi nole nawilimu. Nogo podalu howa kuni podolani napodalimu.
NUM 9:13 Anigo agali maru ti i̱naga deni ko mbira nawi bayale howabi dindi mendeha ibaga bima tagira nape howabi tigua ege áyu ogonaga Bolangua Halu Penegonaga tomo dawalu nolene ngago nane hayagua ti i̱naga wali agali bu karuni aria ndo ti tara kago i̱naga wali agali baba mandagi nahelo bo taliatagi halimu. Anidagua larogoni irane tigua i̱hondo lomabu ngulene horo wiyangi ngulenego nangi manga haragoninaga ani bilimu. Anidagua bo batagi haramigola mana ko tini biyagonaga genda tinime yu helo anidagua bilimu.
NUM 9:14 Ainde wali agali dindi tara howa ibini tí baba mandagi kayagua tiguabi tomo tí naramidagua noa biyagua nde nalu mana biaga wiyaru dege talialu biai holene nga, lene.
NUM 9:15 Anduane Homogonaga Balai Anda biago biai hayadangi beraliba mbirame ibuwa anda biago yi hene. Mbiraga hayagola beraliba biagoni ira dene ngaralo wiradagua bini.
NUM 9:17 Beraliba biagome Balai Anda biago helalu piyagola Isaraele wali agali tinaga andabi gialo hubua bialu puwa beraliba biago dalu wiyagoria tinaga anda bu hene.
NUM 9:18 Anduane Homogohanda, Pilimu, layadaguabi, Halimu, layadaguabi tigua anda gialo yalu pialu anda bu haga bini. Beraliba biagome Anduane Homogonaga Balai Andani wiaabo hayagua wali agali tibi hama ogoriani haabo hene.
NUM 9:19 Beraliba biagome Balai Anda biago helalu pu a̱i̱ nahe haabo hayagua tigua Anduane Homogonaga bi hale halu pu a̱i̱ na̱i̱ nabiaga ogoriani haabo hene.
NUM 9:20 Marungi horo dewa nahaga biradagoni bibahende anda gialalu piyaguabi nape hondo hayaguabi Anduane Homogonaga bi hale howa layadagua hangu biaga hene.
NUM 9:21 Horo marungi alendo hangu ibalu egerebagi hayagola heyalu piaga. Beraliba biago ema bialu piyagola wali agali tibi nde piaga hene.
NUM 9:22 Horo kiru hayaguabi ege mbira hayaguabi mali mbira hayaguabi ndo mali dewa hayaguabi hayadagoni beraliba biagome Balai Anda biago yiho wiagola ogoriani haho wialu beraliba biagome ema bialu piyagola wali agali tibi piaga hene.
NUM 9:23 Anduane Homogohanda anda bidaba lalubi gialo yalu pudaba lalubi Mosesehondo bi lamiyagola wali agali tigua hale halu biaga hene.
NUM 10:1 Anduane Homogohanda Mosesehondo lamialu lalu,
NUM 10:2 Tígua siliba ngaru muwa hamame dambu mbara lowa mbelo lolenenaga biguli kira wabilimu. Ani wabuwa biguli ogonilabo wali agali íbu ngoai helonaga olalubi dindi tí kamigo yu wahalu tagira pole mbirale manda manda bilonagabi pu lolene wulebira.
NUM 10:3 Biguli ogonilabome lu pulalu haabo kagola wali agali abale ibalu i̱naga Balai Anda kagoria haneni íbu ngoai hole manda bulebira.
NUM 10:4 Biguli mbiraore hangu pulayagua Isaraele wali agalinaga haru haga karu ti hangu íbu ngoai holebira.
NUM 10:5 Ai biguli tigi mbira hangu pulaga biyagua agali ni tagira ibiragohayagi balai andaha bu karu ti dege ala polene wulebira.
NUM 10:6 Ani bialu biguli emene ogonidagua dege halu mende pulayagua nde balai anda abene unurahayagi bu karu ti heyalu polene wulebira. Ogonidagua tígua tíninaga balai anda bu kamigo yu wahalu polenaga manda manda bilo lowa biguli emene tigi mbira hangu pulolebira.
NUM 10:7 Anigo wali agali bibahende íbu ngoai hadaba lalunaga biguli lu laho wulebira.
NUM 10:8 Arono igini loma binigo mo miaga karu tinaga biabe ogoni bialu biguli pulolene wulebira. Tíguabi tínaga waneigini aguanene mani holobadarumebi mana ogonidagua dege bialu haabo holene nga.
NUM 10:9 Tí waitigi karume tí baba wai bule tí daluha anda ibiragola wai bu pole agali íbu ngoai helonaga biguli ala pulalimu. Tígua anidagua birimiyagua nde Anduane Homogo tínaga Ngode Datagaliwabe i̱ni kogome tí mitangi bialu mo werogola tí waitigi ibirarume tí bopeore naholebira.
NUM 10:10 Ani bialu horo timbuni lotu lolenaga Ege Mbira Ngabulo haragolabi horo timbuni marubi loma biniru irame dai helo lomabu delolene horo harangibi Anduane Homogo i̱la ho gimbu bulenaga lomabu delolene harangibi tígua mbelo biguli pulalimu. Ani beramigola i̱na tí mitangi halu biamogo bulebero. I̱ Anduane Homogo tínaga Ngode Datagaliwabe kogoni, lene.
NUM 10:11 Isaraele wali agali ti Iyibi dindi yu wahalu tagira penego mali mende egebi mendenaga dege horo pira mende (20) hayagola hari beraliba biagome Anduane Homogonaga Balai Anda biago helalu pene.
NUM 10:12 Ani piyago handalu Sainai dindi ko wali agali nahaga wiagoha henego wali agaliru ti wahalu pene. Hari beraliba biago pialu Parana dindiha dindi ko wali agali nahaga iba dalu naibaga wiagoriani puwa hondo hene.
NUM 10:13 Anduane Homogohanda Mosesehondo bi ala lamiyagola Mosese ibugua wali agali lamialu, Ai ina heyalu ma, layagola ti heyalu pene.
NUM 10:14 Pialu howa Yuda hameiginibi Isaga hameiginibi Sebulunu hameiginibi tigua bamba halu pene. Tinaga hameigini emene emene headagua tininaga pelagi yagayaga bialu pene. Aminadaba igini Nasono ibu hameigini tebira uruninaga agali haru haga henegobi ti haru dege pene.
NUM 10:15 Ani bialu Sua igini Nedanele ibu Isaga hameigini hearunaga agali haru haga hene.
NUM 10:16 Helono igini Eliaba ibu Sebulunu hameigini hearunaga agali haru haga henegome ti haru pene.
NUM 10:17 Ani piyagola Libai aria Gesono damene hearubi Merari aria hearubi tigua hameigini tebira biaru piyadagua erembiraha talima pene. Uruni tigua Anduane Homogonaga Balai Anda biago ogoniha wiaga wiarubi yalu pene.
NUM 10:18 Hameigini uruni tinaga erembiraha hameigini tebira Lubene ariabi Simiono ariabi Gada ariabi tini hameigini emene hayadadagua pugu bialu tininaga pelagi hangu hangu wiyadagua yagayaga bialu pene. Sederu igini Elisu ibu hameigini tebira uruninaga agali haru haga howa ti haru pene.
NUM 10:19 Ai Surisadai igini Selumiele ibu Simiono hameigini hearunaga haru haga hene.
NUM 10:20 Ani bialu Duele igini Eliasaba ibu Gada hameigini hearunaga agali haru haga henegome ti haru pene.
NUM 10:21 Ani piyagola Libai aria Kohada hameigini hearu tigua Balai Anda biagonaga Hobane Loma Bia Henebi Loma Bia Heneore biago laboha biabe biaga wiaru damene bibahende mo yai halu tigua maru piyarudagua mama talitali dege pene. Ani pialu hearia anda piyagola Libai hameigini maru ti abale piyarume Balai Anda bu hearia Kohada hameigini anda pene. Ani puwa Kohada hameigini tigua Balai Andanaga mbirale maru yalu piyaru Balai Andaha loma binigo mo miaga hearu tigua Balai Anda biagoha mo wilo tihondo mini.
NUM 10:22 Mani Eberaimi hameiginibi Manase hameiginibi Beniyamini hameigini hearubi ti bibahende tini hameigini emene headagua tininaga pelagi yagayaga bigi bialu pene. Amihudu igini Elisama ibu hameigini tebira uruninaga agali haguane howa ti haru pene.
NUM 10:23 Ani bialu Pedasu igini Gamaliele ibu Manase hameigininaga agali haru haga hene.
NUM 10:24 Gidioni igini Abidana ibu Beniyamini hameigini hearunaga agali haru haga hene.
NUM 10:25 Uruni ti peha erembira maniore Dana hameiginibi Ase hameiginibi Nabadali hameiginibi tini bibahende hameigini emene headagua tinaga pelagi yagayaga bialu pene. Amisadai igini Ahiese ibu hameigini tebira uruninaga agali haru haga henegome ti haru pene.
NUM 10:26 Ogorana igini Pagiele ibu Ase hameigininaga agali haru haga hene.
NUM 10:27 Enana igini Ahira ibu Nabadali hameigininaga agali haru haga hene.
NUM 10:28 Isaraeleali ti dindi mendeha pole pialu howa tigua maha bambaha bigi bialu piagago ho iriari bule ndo henedadagua pugu biaga hene.
NUM 10:29 Ti heyalu pole howa Mosesehanda ibu imane dindi Midianali Yadoro igini ibu balibuni Hobabahondo lalu, Áyu ina dindi bamba ina mamaliruhondo ngulebero lalu Anduane Homogo ibugua lowini ngagoha pole poromago ai ogoniha howa ina bayaleore holeberema. Anigo í̠bi nde ina heba mbirale bayale ngaru mandagi tale bigi bimi̱ya ma, lene.
NUM 10:30 Ani layagola Hobabahanda lalu, Anidagua bulene bayale degego nde wahalu i̱ni daluha hama dai berogo, lene.
NUM 10:31 Ani layagola Mosesehanda lalu, Ainde balibu dara kogoni. Í̠na ina yu wahalu dai bibelo hame nalego dindi ko wali agali nahaga ngagoha balai anda ogoria bibeheda lalu ina harigabi í̠na dege walia habehe kegoni.
NUM 10:32 Í̠ ina haru pirimayagua nde Anduane Homogohanda mbirale bayale damene inahondo ngulebirago maru í̠ talebu nguleberamago ma, lene.
NUM 10:33 Wali agali biarume Anduane Homogo ibuninaga Hari Sainai loma bia henego yu wahalu pialu hemiria hangu horo tebira pene. Anduane Homogonaga Habo Nalolene Bi lo winigonaga Mbogoyi biago ala yu bamba haga bialu ti ha̱lo holenego agoriadabe handaga bima pene.
NUM 10:34 Horo bibahendengi tinaga balai anda gialalu pirimigola Anduane Homogonaga hari beraliba biagome dambi hayagola ogoninaga andaneha piaga hene.
NUM 10:35 Habo Nalolenenaga Mbogoyi biago yalu pole piyagola Mosesehanda bi ogodagua laga. Anduane Homogo-o í̠na bamba halu puwa í̠ waitigi karu bo purogo lalu wali agali í̠ handabe manga haga karubi bo pelabe, laga hene.
NUM 10:36 Ani lalu puwa ha̱lo holegoria heagola ibugua lalu, Anduane Homogo-o Isaraele damene mbira mbira daosini au loabe tobahe kagoria daibu habe, laga hene.
NUM 11:1 Wali agali biarume tiniha genda tagira ibiyaru hondowa Anduane Homogohondo gimigomo dewa lalu hene. Anidagua layago hale howa Anduane Homogohanda keba howa wali agali heagoria ira hedo ibira hene. Ira biagome da dege dindi hayagola wali agalinaga balai anda bu hearu lene mbirahayagi do mundulo wahene.
NUM 11:2 Ani biyagola wali agali biarume Mosese hearia biamogo bia lama pene. Ani layagola Mosesehanda Anduane Homogohondo bi lamia hayagola ira biago hundini.
NUM 11:3 Anduane Homogohanda irame delenedago manda buwa dindi ogoni mini Irame Delene laga wini.
NUM 11:4 Isaraele wali agali hangu ndo wali agali dindi tara tara howabi Isaraele wali agali heba bimaga halu pene. Dindi tara wali agali urunime nogo tara tara nogo bulumagabi nogo memebi noabira lalu gimigomo lene. Isaraele wali agali biarumebi tini dege dege gimigomo lalu howa lalu, Nogoore mbira narimayagua baya gibidago agoha taya bulebadabe.
NUM 11:5 Ina Iyibi dindini howa wena mialu ndo inane noabiradagua nalu haramali. Bambo naramali biaru manda bidaba. Iname melono bambogini ale naramalirubi aniani tara tara naramalirubi manda bidaba.
NUM 11:6 Uruni ale naramaligo áyu nane kamagome inanaga hongo piai hayada handadaba. Mena ogo hangu horo bibahendengi naho wiaabo holene wiaruago tomo nolene bayale mbira nawida, lalu hene.
NUM 11:7 Mena odagoni ira lini egene ale ambuabini pele emene mbira parahagabi wini.
NUM 11:8 Mbiragaha balai anda bu heagoria ginu ti ibira haradagua menabi mandagi ibira ho wiaga wini.
NUM 11:9 Egerebagi hayagola wali agali biarume ilumu buwa budabaga biaga alerume budubagabi ndoyagua nde ege to̱le̱me dambigi buwa balawa ale haealabagabu ngelaga. Ani bu ngelowa todobeneni dawawa mbisegedi ale ho wiaga. Nalu karia dende mberedi olibe lini ibane heba biamaga howa wabini nene mbau laga wini.
NUM 11:10 Wali agali biarume tininaga balai anda harabani wabuni hagahaga bu howa gi̱ga̱ lalu gimigomo dewaore layuane Mosese ibu hale hene. Ani hale howa Mosesehanda Anduane Homogo ibugua tihondo keba hayago hondowa ibu genda timbuni ho hene.
NUM 11:11 Genda howa ibugua Anduane Homogohondo lalu, Í̠na i̱ mo genda haregoni irane aginaga berebe. I̱la turu nahe kegoni aginagabe. Wali agali o bu karunaga biabe bia holene ogoni í̠na i̱hondo abule ngiribe.
NUM 11:12 Ti wabinibi hono winibi mbira i̱ ndoya hendedeni. Gali taba yaradagua dindi tinaga mamaliruhondo ngulebero lo winiyagoria pole ogoni agida.
NUM 11:13 Wali agali o karu bibahende nelo mule nogo egaru mbira agohayagi tai buadabe. Lawanana bialu howa nogo egaru ngi laho wiaabo kagoni.
NUM 11:14 Wali agali bibahende karunaga biabe biahalu handaya ho holene genda ho ko. Biabe ogoni i̱ hangume bulene gendabioredago nabibehe kogoni.
NUM 11:15 Í̠na i̱hondo ogonidagua buleyagua genda timbuni o ngereru nahondoliya í̠na i̱ dara halu bo home lolene karulapeda, lene.
NUM 11:16 Ani layagola Anduane Homogohanda Mosesehondo lalu, Agali pira karia (70) wali agalime galone bibehe mini lene kalo mandabiru dabowa i̱naga Balai Anda i̱ni íbu hagagoria mo ngoai howa í̠ kegoria mandagi halimu.
NUM 11:17 I̱na ibuwa í̠ heba bi lalu i̱naga Dinini mugube ala í̠ha helaruru maru agali uruni tihondo muliya. Ani berogola gendabi ngaru maru agali uruni tigua í̠ biamogo bia haragola tí haru mandagi buleberami.
NUM 11:18 Áyu wali agali lamialu nogo egaru mbira yawi noleberami. Ani nole howa Ngode Datagaliwabe deni tíni mo tiga bialu manda manda bayuwa bilimu lalu, lamibe. Tígua lawanana bialu lalu nogo egaru mbira nane kama. Iyibi dindini howa ina baya gibiore harima larimigo Anduane Homogo hale haya. Anduane Homogo i̱na yawi nogo egaru maru nalimulo ngulebero. Ani ngerogola tígua nogo egaru nguleberoru noleberami.
NUM 11:19 Noleberamidagoni bame horo mbiru kiru agima bidaru piru agimabi ndo horo pira kira agimabi ndo dege.
NUM 11:20 Nalu kamine hangu ngui harigaha bidi bede lalu tagira pialu magu taguialu bilimulo ege mbira naho wiaabo halu holeberami. Anduane Homogo i̱na tí heba mandagi ogoria henego tígua wara a̱i̱ halu gimigomo lalu howa lalu Iyibi dindiore yu wahabe nahego yu waharima larimigonaga ani bulebero laya lamibe, lene.
NUM 11:21 Mosesehanda Anduane Homogohondo lalu, Wali agali o haru kogo daosini hangu handari waragariadago (600,000) i̱na nogo egaru ege mbira no karulapelo ngule larigo wali agali o karubigo nelo agiha ngaria muleberebe, lalu hale hene.
NUM 11:22 Wali agali bibahendeme nai helo nogo bulumaga sibibi bibahende bai harimayagua no karulo polobadabe. Iba solowaraha wena bedaru bibahende bayaguabi ti ogoni no karulo polobadabe, lene.
NUM 11:23 Anduane Homogohanda ladai bialu lalu, I̱ hongo nakarulape kalo mitangi bu kebe. I̱na larudaguaore abale buleberogo í̠ hondolebere, lene.
NUM 11:24 Anduane Homogohanda layadagua Mosese ibu tagira puwa ibugua wali agali hearuhondo lamini. Ani lamialu ibugua agali haru hagane pira karia (70) biaruni haru puwa Balai Anda biagoha ho mabu bu helene.
NUM 11:25 Ani bu heagola Anduane Homogo beralibaha daluwa Mosesehondo bi lene. Ibugua Dinininaga mugube Moseseha heleneyaru maru yamuwa haru haga pira karia (70) biaruhondo mini. Dinininaga mugube agali biaruha íbu heagola tigua Anduane Homogonaga mana latagi hagarume ga̱ lalu bi lagadagua lenegoyu ti emene tigi mbira dege ani lene.
NUM 11:26 Agali pira karia (70) dabayaru aria kirali Eledada Medadala libu Balai Anda biagoha nape libuni balai andaha bereria libuhabi Anduane Homogo Dinininaga mugube ibini. Libuha ibiyagola libuguabi Anduane Homogonaga mana latagi haga agalirume ga̱ lalu bi lagadagua dege lalu lene.
NUM 11:27 Ani layagola igiri mbirame Mosese hearia puwa Eledada Medadalame ogobi bialu ka lalu lamini.
NUM 11:28 Ani layago hale howa Nunu igini Yosua ibu Mosese biamogo biaga heago ibugua Mosesehondo lalu, Haru haga-o libu wahadaba larene, lene.
NUM 11:29 Libu ani layagola Mosesehanda ladai bialu lalu, I̱na biabe berogoni í̠na minime bolangua kebe. Anduane Homogohanda ibunaga wali agali o karu bibahende ibu Dinininaga mugube bayale miragola tigua Anduane Homogonaga mana latagi hagarume ga̱ lalu lagadagua lelo hame ledo, lene.
NUM 11:30 Ani biai halu Mosesebi haru haga pira karia (70) biarubi heba wali agali bibahendenaga balai anda bu heagoria dai bini.
NUM 11:31 Abale aube tobaneore buwa Anduane Homogohanda puyabu iba solowarahayagi howa ibilayagome ega de̱wa̱re dindiha pulo yalu ibuwa balai anda bu heagoria bira dege dindi halu biruyu mabu bialu biruyu peagola hendedamibe nahe de handa wiahe íbu berene.
NUM 11:32 Anidagua biyagola wali agali biarume ega de̱wa̱re berearu minalu hearia hangu horo mbira halu mbiraga hene. Ani buwa egerebagi gao layagolabi minaho wini. Wali agali homane mbira mbirame minayagoni nu pira kira agimaore hanabe nahe dege degeru hono ngelaga bini. Ani buwa ega biaru nime do giambe helo anda bibahendeni yo bia haame hene.
NUM 11:33 Ani lalu ega de̱wa̱re biaru wene nole nalu heagola Anduane Homogohanda wali agali biaru baba keba howa warago mbira ti heagoria ibilene.
NUM 11:34 Dindi odagoriani nogo egaru mbira noa kama layaru hora henego manda buwa dindi mini Noa Habuabinaga Homali wini.
NUM 11:35 Wali agali biarume odagoriani howa Haserodo pialu balai anda bu ho hene.
NUM 12:1 Mosese ibu Idiobia dindi wali dabu bini. Ani biyago hondowa Arono Miriamala libugua Mosese guralu la hirini.
NUM 12:2 Libugua lalu, Anduane Homogohanda Moseseha howa hangu bi lagayabe iyaha howa bi laraligoni ndobe, lene. Ani layago Anduane Homogohanda hale hene.
NUM 12:3 Mosese ibuniore mo dindiha haganego ibu ogonibi agali mende dindi áyu ogoria mbira nahe.
NUM 12:4 Anduane Homogohanda Mosesebi Aronobi Miriamabi abaleore tihondo lalu, Tí tebirabali i̱naga Balai Anda i̱ kogoria ibidaba, lene. Ani layagola ti tebirabali pene.
NUM 12:5 Ani pu heagola Anduane Homogo ibuni beralibaha howa ibagadagua ibuwa Balai Anda biagonaga harabani íbu howa ibugua Arono Miriamalahondo, Ibidaba, lene. Ani layagola libugua pu hapara hene.
NUM 12:6 Libu pu heagola Anduane Homogo ibugua libuhondo lalu, I̱na bi larogo bayuwa hale halibu. I̱naga bi mana latagi hagaru tí heba mandagi kayagua i̱na de gandebaha howa i̱ni ti mo walia halu emagaha howabi i̱ni tihondo bi laruli.
NUM 12:7 Anigo i̱na i̱naga biabe biahaga Mosese ibu uruni ale ndo ka. Mosesela bi lalu i̱na mana mende ale biruli. Ibugua Isaraele wali agali haru helo heledo.
NUM 12:8 Anigo i̱na ibuhondo nenegela bi laradagua biruli. Bi yobage lalu Mosesela nalaruli. Mosese ibugua i̱ hendeneda. Anidago i̱naga biabe biahaga Mosese agali ogonibi heagola libugua agi bulenaga guralu lahiraribibe, lene.
NUM 12:9 Anduane Homogohanda libu baba keba timbuni howa o biagoria hea handala piyagola
NUM 12:10 hari beraliba biagobi Balai Anda biago yu wahalu pene. Ani piyagola Miriama ibu ge hamuabi bialu dongone bibahende abaleore pagayu biame hene. Aronohanda ogonibi biyago hondowa
NUM 12:11 Mosesehondo lamialu lalu, Agali timbuni-o iyame í̠hondo koore timbuni laribalo manda bidabago warago ogoni iya heba nahelo iya dara halu biamogo bibe.
NUM 12:12 Wali mbirame gali taba hanaragola ogonibi hono wini mbaule dagane mbirahayagi togobi o kagobi ibu nahelabe, lene
NUM 12:13 Ani layagola Mosese ibugua Anduane Homogohondo lalu, Ngode Datagaliwabe-o ibu biamogo bialu mo dabi habe, lene.
NUM 12:14 Anduane Homogohanda ladai bialu lalu, Miriama ibu abahanda hamiaga wanakuini toloba henedale horo karu taga ho bedale. Ogonidagua dege horo karu ibuni hangu balai anda bu kagoria howa tagira birulene nga. Horo karia ogoni piai kagola ibuni andaga haru dai bulene nga, lene.
NUM 12:15 Ani layagola Miriama ibu horo karu tagirahayagi waratagi howa berelene. Anidagua berelowa Isaraele wali agali biaru ti pu nabi Miriamanaga horo karu biago piai helo hondo hene.
NUM 12:16 Horo karu biago piai heagola Isaraele wali agali tigua Haserodo dindi yu wahalu puwa dindi ko wali agali nahaga mbira mini Parana wiagoria balai anda bu hene.
NUM 13:1 Anduane Homogohanda Mosesehondo lamialu lalu,
NUM 13:2 Kenana dindi Isaraele wali agali tihondo nguleberogo í̠ manda bide. Ani buleberogo áyu í̠na agali hameigini homberia (12) biaru aria bogabi mbira mbira dabalu Kenana dindi hondo wule pudaba labe, lene.
NUM 13:3 Mosese ibugua Anduane Homogonaga bi layago hale halu Parana dindi ko iba dalu naibaga wiagoria howa agali haguane maruhondo, Kenana dindi hondo wule pudaba, lene. Agali o piyadaruni tinaga mini uru - Lubene aria Saguru igini Samua pialu Simiono aria Hori igini Sabada pialu Yuda aria Yabune igini Kalebe pialu Isaga aria Yosebe igini Igala pialu Eberaimi aria Nunu igini Hosia pialu Beniyamini aria Labu igini Palidi pialu Sebulunu aria Sodi igini Gadiele pialu Manase aria Susi igini Gadi pialu Dana aria Gemali igini Amiele pialu Ase aria Migaele igini Seduru pialu Nabadali aria Bobisi igini Nabi pialu Gada aria Magi igini Guele pialu bini.
NUM 13:16 Agali uruni tigua pialu Mosese ibugua Kenana dindi bibahendeha hondo wima ibaga bialu dai bule pudaba laya handala ti pene. Ani bialu Mosese ibugua Nunu igini Hosianaga mini wia aribia halu ibu mini Yosua wini.
NUM 13:17 Mosese ibugua agali uruni pelonaga ibugua tihondo lamialu lalu, Tígua uyuraha pialu dindi emene mbira Negebe ngago anda pialu yu wahalu hari barebare ngagoha iraga halu pilimu.
NUM 13:18 Pialu dindi ogoni agi ale ngabe handaiore halimu. Ani handalu dindi ogoniha wali agali agira kabe handalu ti hongohedabe nahedabe handaiore halimu.
NUM 13:19 Dindi bayaledabe be kodabe handalu wali agali ti tano pabe hongohe bu mabubiha kabe be tano pabe nabi bame winiha kabe handalimu.
NUM 13:20 Ani handalu dindi ogoni ibane bere tomo anda habehe wialu uruniha irabu ngabe nawidabe handalu bilimu. Ani handalu kamiria dindi ogoniha ira lini dedaru maru do yalu dai bilimu. Mbira do ya nabiore dai bulamini, lene. Mosese ibugua bi laminidagoni pu mbira mini gerebi lini boga bulenengi howa maru ala deneru boga bialu heaore dege lene.
NUM 13:21 Ani lamiya handala agali pudaba layaru tigua puwa Sini dindi ko iba dalu naibaga unurahayagi wiagoria howa ala handama pialu abene uyurahayagi Hamada tanoha anda polene harigani Lehobo tano wiagoria anda pene.
NUM 13:22 Ti puwa Negebe dindi ala anda pialu Heberono tano wiagoha pene. Dindi ogoniha henedaruni agali hameigini mini Anagimu laga agali timbuni luore bamba heneru aguanene Ahimanabi Sesaibi Talamaibi uruni hearia hendene. Heberono tano ogoni agali hameigini maru hearume bu helearia mani Iyibiha tigua Soana tano bu aribia howa mali karia ogoriani hene wini.
NUM 13:23 Agali haguane piyaru ti pialu dindi bayale ulini panda panda mbira mini Esegolo laga wiagoria anda pene. Dindi ogoniha gerebi lini dewaore do mbule timbuni mbira dearu do yini. Gerebi lini mbiraore ogoni agali mbiraoreli hangume yabe naheyagola agali kiralime iraho yalu dai bini. Ani bialu ira maru poge ale linibi pomegaranate linibi nendabu dewaore do yalu dai bini.
NUM 13:24 Mani Isaraele tigua dindi uluni panda panda ogoni mini Esegolo winigo irane agali haguane piyaru tigua gerebi ene mbiraoreme lini timbuni deneyago manda buwa lene.
NUM 13:25 Agali biaruni tigua dindi handama ibaga bialu heane horo pira maria (40) pene.
NUM 13:26 Ani peagola tigua Mosesebi Aronobi Isaraele wali agali bibahendebi Parana dindi ko Kadese biagoria hemiria dai bini. Tigua dindi biago ogobiya lalu te lamialu ira lini do yiniyaru walia hene.
NUM 13:27 Tigua Mosesehondo lamialu lalu, Dindi biago bibahende handama ibaga bialu howa handalu hemaria dindi ibane bere tomo mbirale anda hagaya. Dindi ogoriani ira lini dene o do yidamagoni handa.
NUM 13:28 Anigoyu wali agali dindi ogoriani hearuni hongohe gibioreya. Tinaga tano timbuni wiarubi ege pabe hongohe wa mabu biarubi diri nawi hongoheore hea. Ani bigi biagola gibiore handarimago agali luni timbu gibi mbira ala halu homeayaru aguanene ogoriani hearia handarima.
NUM 13:29 Amalegeali unurahayagi palea Hidialibi Yabusualibi Amoroalibi ede hombene hombeneha palea Kenanaliru iba solowara Medidereniana ange ange palea maru iba Yodana ange ange palea, lene.
NUM 13:30 Kalebehanda Mosese bereagoria ho mabu buwa hearu bi nale hadaba lowa lalu, Tígua gi dege dindi howa laramigoni agi laramibe. Ina hongohe karulape kamagoni wai bialu dindi ogoni mibehe kama, lene.
NUM 13:31 Ani layagola agali maru Kalebe heba mandagi penayarume lalu, Iname wai bialu tinaga dindi nakarulabehe kama. Wali agali o handarimadaruni hongo gibiore ina baba nakarulape heane handarima, lene.
NUM 13:32 Ani lowa tigua ke̱ halu Isaraele wali agali mo gi howa bogo para halu tindule lama ibaga bialu howa lalu, Dindi ogoriani tomo dewa nawiya. Wali agali ogoriani hearuni tomo noa howa hangu hea. Wali agali handarimadaru bibahende lu daligani timbuni hangu heane handarima.
NUM 13:33 Agali lu timbuni damene Anage aguanene marubi ogoriani hea. Ti heago baba manda bialu hemaria ina dereparia ale bu hinaya. Tigua inabi anidagua hendeda holebira, lene.
NUM 14:1 Ogonibi layago hale halu mbiraga howa wali agali biarume gi̱gi̱ lalu dugu bialu hangu heane gao lene.
NUM 14:2 Tigua dugu bialu howa Mosese Aronolahondo lalu, Iyibi dindiniyaguabi dindi ko wali agali nahaga ogorianiyaguabi homedemale karulapedale.
NUM 14:3 Anduane Homogohanda dindi ogoniha agibule haru piaruabe. Tigua ina bo wahai halu inanaga one waneiginiru ti haru holebada. Ogoria howa Iyibi dindi dai bulenebi ko ndo dege, lene.
NUM 14:4 Ani lowa tini dege dege lamigimigi bialu howa lalu, Iyibi dai bimi̱ya haru bamba holene agali mbirali dabama, lene.
NUM 14:5 Ani laga biyagola Mosese Aronolame wali agali biaru wanakuini bulu palu ibira hene.
NUM 14:6 Ani biyagola agali dindi hondo wule piyago aria kirali Nunu igini Yosuala Yabune igini Kalebelame genda timbuni howa libuninaga aga budaki haga haga bini.
NUM 14:7 Ani buwa libugua wali agali hearuhondo lalu, Dindi iname handarimadagoni baya gibiore handarima.
NUM 14:8 Anduane Homogo ibugua ina heba turu kayagua dindi bayale ibane bere ogoni ina ngulebira.
NUM 14:9 Anduane Homogohondo mine howa yu wa nahadababe wali agali odaruni hondowa gibi nahadababe bame balu dindi karuloleberamago. Anduane Homogo ibugua ina heba howa ti dama lowa mbirale irame wabiniruhondo bi pupu wialu hearuni balu ina wayali holeberamago gi nahadababe, lene.
NUM 14:10 Ani layagola wali agali bibahende hearume Yosua Kalebela to̱le̱me balu homelole hongo howa hene. Ani bule bialu hemira Anduane Homogonaga wá holene timbuni Balai Anda biagoria íbu hayago hondowa ogolabo ba nabi wahene.
NUM 14:11 Anduane Homogohanda Mosesehondo lalu, Wali agali urume i̱naga bi agira halu mo waholebirabe. I̱na nahendene ale dewaore birugolabi hondowa tigua i̱hondo mini mbiraore nawi kago agibe.
NUM 14:12 Ani biragonaga warago ko mbira ti kagoria ibilowa bo wahai halu í̠ dege wali agali maha holebirarunaga aguanene heloliya. Wali agali odaruni áyu karubi ndo hongohe dewaore helolebero, lene.
NUM 14:13 Ani layagoyu Mosesehanda Anduane Homogohondo lalu, Í̠ninaga hongome wali agali uruni Iyibi dindi howa haru halu tagira ibirigoni. Iyibi wali agalirume í̠ninaga wali agali biaruhondo ogodagua biriya larago hale howa tigua wali agali ogoria padaruhondo lamulebira.
NUM 14:14 Wali agali ogoria karume Anduane Homogo í̠ ina heba ke lo mandabu ka. Í̠niore ibuwa hari beralibaha howa ha pani haga kelo manda bida. Ani buwa horombengi hari beralibaha íbu halu mbiraga ira hunguha íbu howa ina halu bamba haga kelo manda bida.
NUM 14:15 Áyu í̠na wali agali uru bibahende bo wahai hariyagua wali agali dindi bibahendeni howa í̠na dewa biriru hale hayarume ogodagua lolebada.
NUM 14:16 Tinaga Anduane Homogohanda ibunaga wali agali haru halu ibiyaru ibunime dindi mulebero lo wiyagoria haru polene hongo nakarulapeyagola bibahende dindi ko wali agali nahe ogoha bo wahai hayada lolebada.
NUM 14:17 Ani lolebadago Anduane Homogo-o í̠naga hongo biago áyu walia halu bulebero lalu lo wirigodagua bibelo hameledo.
NUM 14:18 Í̠na bi ogodagua larigoni Anduane Homogo i̱ emene mbirame abale mo lembo nahaga ko. I̱na gubalini holeneorebi mini bilinahebi kagua bialu i̱ baba wai birarubi biadai nabiruli. Ani anigo tinaga waneigini mani hararu daba tebone mane dabanibi ti aba ai̱yarume ko biragonaga tandaga naho wiaabo holebira, larigoni.
NUM 14:19 Anigo Anduane Homogo-o í̠naga gubalini holene beregeda nabiaga luniore wirigome wali agali Iyibi yu wahalu ibalu howa ko biragola domarilidagua áyu birarubi domabe laro, lalu Mosesehanda lene.
NUM 14:20 Anduane Homogo ibugua ladai bialu lalu, Í̠na bia laridagua tigua ko biyaru domo waharu.
NUM 14:21 Ani buleberogoyu bi henene buleberodagua mbira lo wero. I̱ninaga haabo holenebi wá holenebi hongo holenebi dindi bibahendeha wiame kagome bule ledogo biaore bulebero.
NUM 14:22 Wali agali mine haga uruni damenego bibahende dindi ngulebero larugoria anda napolebira. I̱naga wá holenebi nahendene ale Iyibini howa birurubi dindi ko wali agali nahe ogoria howa birugobi handaya. Ani hondowa dege i̱naga bi larugo hale naholene halu i̱ ba hondolene pi halu bialu i̱ mo genda haya.
NUM 14:23 Tinaga mamaliruhondo dindi ngulebero lo wirugoria anda napolebira. I̱ yo handaga biaru damene bibahende anda napolebira.
NUM 14:24 Anigoyu i̱naga biabe biahaga Kalebe ibunaga mana bayale biyagonagabi ibugua i̱ yu wanahe i̱la haabo hayagonagabi dindi biago hendelo ibu haru anda polebero. Haru anda pialu dindi ibugua hondo wima ibaga biyago ibunibi ibunaga aguanenerubi ti helo mulebero.
NUM 14:25 Dindi ogoriani Amalegealiru Kenanalirubi ti áyu padagoni. Ai yawi beregedalu wali agali nahe biahayagi dai bilimu. Ani buwa iba solowara Daramabi bedagoha Agabahayagi pilimu, lene.
NUM 14:26 Anduane Homogohanda Mosese Aronolahondo lalu,
NUM 14:27 Wali agali ko urunime i̱hondo gimigomo lalu karuni angi lairi holobadabe. Tinaga gimigomo ogoni haruore hale ko.
NUM 14:28 Ai Anduane Homogo i̱ heneneore haabo haga kogome larodagua libugua lamidaba. Tígua i̱hondo hale harimiru dege tíhondo i̱na bulebero. I̱ Anduane Homogo i̱na bi o ledogoniore.
NUM 14:29 Homaramigola tínaga tingini hangu dindi ko wali agali nahe ngagoria homopaya bima polebira. I̱hondo gimigomo larimigo yasianaga daga layangi bibahende mali pira kira (20) bolangua hene kamigo dindi ngulebero larugoria anda napoleberami.
NUM 14:30 Tí dindi ogoriani halimulo ngulebero lalu lo wirugo napoleberami. Kalebe Yosuala libu hangu anda polebira.
NUM 14:31 Tígua lalu tínaga waneigini wai tigialime karulai holebira lalu dindi ogonibi tí manga larimigoyu i̱na tínaga waneigini karulelo haru halu anda polebero. Ani berogola tigua tinaga dindi henene ogoniha turuho holebira.
NUM 14:32 Tí kamiru nde dindi ko wali agali nahe ogoha homai holeberami.
NUM 14:33 Tígua mini mbiraore nawirimigonaga tínaga waneiginirume pani nalu mali pira maria (40) dindi ko wali agali nahaga ogoha ibaga hangu bialu tí wahe kamiru bibahendeore homamaro bilimulo ibaga bialu haabo holebira.
NUM 14:34 Dindi biago de hondo wule pialu hemiria horo pira maria (40) piyagonaga mali mbira horo mbira biagonaga dagalo ngido. Kagua birimigonaga mali pira maria (40) pani naabo halu holeberami. Mali ogonibi ngerogonime tí heba i̱na keba ogobi kada lo manda bilimulonaga bido.
NUM 14:35 I̱na heneneore larogo wali agalime kagua bule mini mbira ho karu i̱na dindi ko wali agali nahe o ngaruha homamaro bilolebero. I̱ Anduane Homogo i̱na bi o ledogoniore, lalu lene.
NUM 14:36 Mosesehanda ala agali maru dindi hondo wule pudaba layarume handalu dai buwa wali agali hearu mo hondo howa lalu, Dindi ogoni kooreya layarume wali agali bu hearu Anduane Homogohondo mo gimigomo la hene. Anigo mo hondo hagadaruni Anduane Homogohanda abaleore waragome bo homelai hene.
NUM 14:38 Agali dindi hondo wule pene biaru aria homai halu Yosua Kalebela hangu yupe howa helene.
NUM 14:39 Mosese ibugua Anduane Homogohanda layadagua lamiyagola Isaraele wali agali biarume dugu ndoore gibi bini.
NUM 14:40 Ani buwa tigua lalu, Ai dugu timbuniore birimagoni ko birima lalu mo walia harimagoni lowa egerebagi hayagola tigua wali agali hariha palearu baba wai bule pene.
NUM 14:41 Ani pole piyagola Mosese ibugua tihondo lalu, Anduane Homogonaga bi mo wahalu poramigo agibe. O beramigonime wayali naholeberami.
NUM 14:42 Anduane Homogo tí heba nahego napudababe tínaga waitigi
NUM 14:43 Amelegeali Kenanaliru baba wai beramigola homoleberami. Tígua Anduane Homogohanda bia layadagua nabi waharimigome ibu tí heba naholebira, lene.
NUM 14:44 Ani layagola helalu Mosesebi Anduane Homogonaga Habo Nalolene Bi lo winigonaga Mbogoyi biagobi anda bu harimigoria ngelalu napobe layagoyu tini ti hongo timbuniore halu pene.
NUM 14:45 Ani pialu hearia Amelegeali Kenanalibi paleneyarume bama talima puabo halu Homa tanoha bo porabia hene.
NUM 15:1 Anduane Homogohanda Mosese lamialu,
NUM 15:2 Í̠na Isaraele wali agali bu karuhondo bi ogo lamibe. Dindi i̱na tí nguleberogoha pu howabi dindi ogoniha pialu baya hangu ho dungulo howabi
NUM 15:3 tígua i̱nihondo mbirale lomabu ngule manda bialu nogo bulumagayaguabi sibiyaguabi memeyaguabi tíni nogoore henedago loma bialu bo ngilimu. Ani bialu loma uruni irani dai helo bo deloleyaguabi tínime lomabu ngule lalu lo winidagua lomabu nguleyaguabi lotu lolene horo timbuni tagira ibiragola nguleyaguabi tíni hameme lomabu nguleyaguabi tíni manda bidamidagua ngigi bilimu. Tígua loma bayale uruni bu ngigi beremigonaga nga bayale birago hondowa i̱na turu ho haruli.
NUM 15:4 Agali mbirame nogo sibi memeyaguabi mbirago i̱hondo loma bialu irani dai helo bo delole yalu ibiyagua nde balawa bayaleore genda magi kilogarama mbirago olibe lininaga weli be mbira agima balawaha odo biamaga howa lomabu delole yalu ibulene nga.
NUM 15:5 Ani bialu waini iba be mbira agimabi nogo sibi memeyaguabi mbirago heba lomabu bo delalu delamaga holene nga.
NUM 15:6 Tígua nogo sibi wangabe lomabu bo deloleyagua nde balawa genda magi kilogarama kira olibe lininaga weli be mbirani mende gombedene heba odo biamaga howa lomabu delolene nga.
NUM 15:7 Ani bialu waini iba be mbirani mende gombedene heba nogo sibi wangabe biagobi lomabu delolene nga. Anduane Homogo i̱na loma baya ogonibi bu delaragonaga nga bayale birago hondowa turu ho haruli.
NUM 15:8 Agali mbirame nogo bulumaga wangabe mbira irani dai helo lomabu bo deloleyaguabi ibugua lomabu delole lalu lowinigonaga deloleyaguabi Anduane Homogo i̱nila ho gimbu bulenenaga lomabu deloleyaguabi
NUM 15:9 nde ibugua balawa genda magi kilogarama tebira olibe lininaga weli be kira odo biamaga hene biagobi heba loma bialu ngulene nga.
NUM 15:10 Ani bialu waini ibabi be kira hambu yu ibalu nogo bulumaga wangabe biago heba lomabu ngulene nga. I̱ Anduane Homogo kogo i̱na loma bayale urunime tumutumu birago nga halu turu haruli.
NUM 15:11 Tígua balawabi olibe lininaga welibi gerebi lininaga ibane wainibi i̱hondo lomabu ngeremigo heba nogo bulumaga wangabeyaguabi sibi wangabeyaguabi sibi iginiyaguabi meme iginiyaguabi manda bidamidagua i̱nihondo lomabu ngulene nga.
NUM 15:12 Tígua nogo bulumaga kira tebirayaguabi loma bialu delarimiyagua nde balawabi olibe lininaga welibi waini ibabi nogo mbira mbira heba delolene karulape ngadagua loma bialu delalimu.
NUM 15:13 Isaraeleali tígua loma bayale ngabi Anduane Homogo i̱nime hame laruligobi ngulene hamelo kamiyagua nde balawaha olibe lininaga welibi waini ibabi biamaga howa uruni bibahende lomabu ngilimu.
NUM 15:14 Agali mbira dindi taraha howa tí baba tigi mbira hangu íbu heneyaguabi tí baba mandagi haabo heneyaguabi ibugua Anduane Homogo i̱na hame laruligobi lomabu ngule hamelo heagua nde karulapego ani ngulene nga. Anigo ibugua bame bupebe ndo lomabu delaga mana talialu Isaraele wali agalime biaga ngadagua bulene nga.
NUM 15:15 Ani bulene ngago irane lomabu ngulenenaga mana mbiraore hangu Isaraeleme lomabu delolenebi wali agali tara tí baba mandagi íbu hene kamirubi bibahendeme loma bulene mana mbiraore dege nga. Mana ogoni mbirago iriari nabuleore ani wiaabo halu tínaga waneigini aguanene mani hama polebirarumebi talialu bialu haaboore holebira. Ani larogoni irane i̱ Anduane Homogo i̱na handalu hewaria tí Isaraele wali agalibi dindi tara wali agali bu karubi tí bibahende ogobi dege dege hemiria handaru.
NUM 15:16 Isaraele wali agali tíguabi wali agali dindi taraha howa ibini karubi tí bibahendeme lomabu delolene mana mbiraore ogonidagua talialu bialu haabo halimu, lalu Anduane Homogohanda lene.
NUM 15:17 Anduane Homogohanda Mosese lamialu lalu,
NUM 15:18 Í̠na bi ogo Isaraele wali agalihondo lamibe. Dindi mbira i̱na tíhondo ngule lalu lo wirugoria haru porogola bi ogo larodagua tí bibahendeme bialu holene nga.
NUM 15:19 Anigo tí dindi ogoriani pu howa tínaga maburuha tomo hangalu boga biragola bialu nalu holeberemi. Tígua tomo uruni nalu howa maru i̱ninaga lomabu ngigi bilimu.
NUM 15:20 Tí mabuha widi pigane gandu laramigo dambuwa balawa ogoninaga mberedi pigane waberemigonaga mbira i̱ninagaore lomabu ngilimu. Tígua widi dambiaga ngamigoha howa widi gahenge dambialu kamigo aria maru mo yalu ibuwa lomabu ngilimu.
NUM 15:21 Tíguabi tínaga waneigini aguanene mani hama polobadarubi mana ogoni wiaa̱i̱ helo widi pigane gandu lenegonaga balawame mberedi pigane wabini ngamigo i̱nihondo lomabu ngilimu.
NUM 15:22 Tígua mana Mosesehanda langiyagola hale harimigoni mani tínaga aguanene hama polobadaru tiguabi bulene nga. Anigo marume mana ko berolo mitangi nabi howa mana pugualu holebira.
NUM 15:24 Isaraele wali agali bibahendeme mana ko berolo mitangi nabi howa mana langiyago puguarimiyagua nde tígua nogo bulumaga wangabe mbira irani dai helo loma bialu bo delolene nga. Ani bialu widibi waini ibabi nogo bulumaga biago heba lomabu delolene nga. Ani bialu i̱na ko domo waholiyanaga nogo meme wangabe mbira loma bialu bo delolene nga. Ani deledagola i̱na loma ogoninaga nga birago hondowa turu holebero.
NUM 15:25 Ani bialu loma binigo mo ngiaga kagome wali agali bibahendenaga ko i̱na domo waholiyanaga loma ogoni bu delolebira. Ani bu delaragola Anduane Homogo i̱na tinaga ko wiyadago domo waholebero. Ani buleberogo irane tigua mana ko berolo mitangi nabi howa i̱naga mana puguaya. Ani biyadagonaga ko birimada lalu i̱na tinaga ko domo waholiyanaga i̱hondo lomabu yalu ibiyagoni.
NUM 15:26 I̱na Isaraele wali agali bibahendenaga ko ngago domo wahalu wali agali dindi tarali tí heba íbu hene karu tigua nde i̱naga mana pugua dege biyagobi bibahende domo wahai holebero.
NUM 15:27 Wali agali mbiralime mana ko berolo mitangi nabi howa biyagua nde ibugua meme angibuni mali mbira hangu hene kago i̱na ko domo waholiyanaga loma bialu bo delolene nga.
NUM 15:28 Anduane Homogo i̱ninaga deni loma binigo mo ngiaga kago ibugua agali biagonaga ko domo waholiya lomabu delolebira. Loma binigo mo ngiaga kago ibugua anidagua biragola agali ogoni ibu i̱naga deni dodo nahe holebira. Ani biragola ibunaga ko ngago i̱nimeore domo waholebero.
NUM 15:29 Tígua mana ko berolo mitangi nabi howa birimiyagua nde mana ogoni dege talialu tíni Isaraele wali agaliyaguabi wali agali dindi tarali tí baba mandagi heneyaguabi bibahende mana mbiraore ogoni dege taluwa bilimu.
NUM 15:30 Anigo wali agalime i̱hondo mine halu mana ko bialu hayagua ogonidagua biragome Anduane Homogo i̱ni yo handaragoni. Anidagua bialu kago ibu Isaraele wali agaliyaguabi dindi tara wali agaliyaguabi ta nabi homelo bo wahalimu.
NUM 15:31 Ani bilimu larogoni irane wali agalime mana puguarago ibuni i̱hondo mine halu hame ledadagua bialu i̱naga bi mana puguaro lalu puguaragoni. Ani biragome ibuni homelo bo waholene nga, lalu Anduane Homogohanda lene.
NUM 15:32 Isaraele wali agali ti dindi ko iba dalu naibaga wiagoha howa Sabada horongi agali mbirame ira bo yu hearia hendene.
NUM 15:33 Ani handa walia howa tigua agali ogoni Mosese Aronolabi Isaraele wali agali bibahende hearu hearia haru pene.
NUM 15:34 Ani biyagola tigua ibuhondo ogoale buleda lo manda nabi howa ibu garabaya helo helene.
NUM 15:35 Ani heleagola Anduane Homogohanda Mosesehondo lamialu lalu, Agali ogoni homelo bo wahalimu. Ibu balai anda bu karu tagirahayagi haru puwa wali agali bibahendeme ege to̱le̱ dugualu bai halu bo homelalimu, lene.
NUM 15:36 Ani layagola wali agali bibahendeme Anduane Homogohanda bilimu lalu lamiyadagua agali biago balai anda bu hearu tagirahayagi haru puwa ege to̱le̱me balu homelene.
NUM 15:37 Anduane Homogohanda Mosese lamialu lalu, Isaraele wali agali bu karuhondo ogodagua lamibe.
NUM 15:38 Tígua pu tubagi emene emeneme kabu bigi buwa tíninaga aga bu kamigonaga nguni mariani pongobia haga bilimu. Kabuni mbira mbiranaga pu mindibi hari mindini handalehe ngagome pongo bigi bilimu. Tínimebi tínaga waneigini aguanene mani holobadarumebi anidagua biaabo holene nga.
NUM 15:39 Ani pongo bia howa horo bibahendengi tígua mbirale ogoni handalu i̱naga bi mana lowinigo bibahendeore manda bilimu. Ani bialu mana ogonidagua bialu halimu. Anidagua birimiyagua nde tígua ogoni de handalu i̱ yu wahalu puwa mana ko tíni hameledemidagua bialu naholeberemi.
NUM 15:40 Pu ogonime i̱naga bi mana lowini ngago mo mitangi biaabo haragola tígua i̱naga mana ogoni taluwa bialu haabo howa tí i̱ninaga wali agali heneneore hene holeberemi.
NUM 15:41 I̱ni Anduane Homogoore howa tínaga Ngode Datagaliwabe kogoni. I̱na tí Iyibi dindiha howa haru tagira ibirugo i̱ni tínaga Ngode Datagaliwabeore holenaga ani birugoni. Ai i̱ore Anduane Homogo kogoni, lalu Mosesehondo lamini.
NUM 16:1 Libai hameigini Kohada aria mbira Isara igini Kora ibugua mine halu Mosesehanda ti haru kagonaga manga ho hene. Ani ho hearia Lubene hameigini aria agali tebirali tiguabi Kora heba hogimbu bu hene. Agali tebirali uruni ti Eliaba igini mini Dadanabi Abiramabi Pelede igini Onobi ti Kora heba mini mbiraore ho hene. Ani howa agali mariali uruni tigua Isaraele agali haru bamba haga heneru handari kirani pira duria (250) haru halu pu tara howa ti haru mandagi mine hamaga hene. Isaraele wali agali tinime agali uruni tinaga haru haga helo dabalu helaga buwa ti agali mini lene ka lene hene.
NUM 16:3 Ani howa tigua Mosese Aronola heagoria íbu ngoaiho howa ogolabohondo lamialu lalu, Ai hale hadaba. Ina bibahende Anduane Homogonaga wali agali dege bu kamagoni. Libu hangu ndo kabi. Anduane Homogo ibu ina bibahendeha hai ka. Ani kamagodago ai irane agome libugua libuninaga mini mo yaraga halu ina handame ho howa haru kabibe. Mana libugua bialu kabiruni bayale ndo bialu kabigoni, lene.
NUM 16:4 Tigua bi urunibi layago hale howa Mosese ibugua dindini palia pehalu Anduane Homogohondo bi lene.
NUM 16:5 Ani lowa mani heyalu ibugua Kora halu ibu aria hearuhondo lamialu lalu, Tí hale hadaba. Yawi egerebagiore Anduane Homogo ibunime ogo ibunaga heneore lalu ai walia harabe handami̱ya. Agali ibunagaore helo dabenego ibu hangu ibuninaga lomabu delaga dabu kagoria kaware polebira.
NUM 16:6 Ai Kora í̠ halu agali í̠ aria bu harimidarunibi tígua ogodagua bilimu. Yawi egerebagiore tígua ira hagua ngabilo delaga beledi be mo yalu
NUM 16:7 ira hagua ngabilo delolene inisenesibi maru mo ya ira pungane hoaile beledi be ogoriani hedo ya bialu ibalimu. Yalu ibuwa Anduane Homogonaga loma bu delaga dabu kagoria Anduane Homogonaga deni pu halimu. Ani pu kamigola Anduane Homogo ibunime ibunaga biabe bilo dabene agali ogo ibu ka lalu walia holebira. Libai hameigini kamiru tígua dege mana lehe bialu kami, lene.
NUM 16:8 Ani lowa Mosese ibugua Korahondo laabo halu lalu, Libai aria kamiru tígua bi ogo hale halimu.
NUM 16:9 Isaraele wali agalinaga Ngode Datagaliwabe ibugua ina Isaraele hameigini maru hemaru helowa tí hangume ibunaga biabe bialu halimulo daba bagiho helaya. Tí hangume Anduane Homogonaga Balai Anda kagoha puwa biabe bialu howa wali agali bu karunaga deni heyu howa ti biamogo bialu halimulonaga dabo helayagoni ogoni galoneore ndobe.
NUM 16:10 Ai í̠nabi Libai aria maru kamirumebi biabe ogoni tígua bialu halimulo Ngode Datagaliwabe ibunime dabo helaya. Tí biabe ogoni biaga mini leneore mbira hene kami. Ani hene kamigodago ai agua biya. Tígua manda bu handalu hemiria biabe ogoni nagaloneyabe. Anidago tíbi nde loma binigo mo miagabi hoa kamibe.
NUM 16:11 Ai Arono ibu agali abidane tígua ibuhondo keba ho kamibe. Ibu nde agali damene bu kamiruni ale dege kagoni ndobe. Ani kago ai í̠nabi agali í̠ aria bu kamirumebi tígua keba ho kamiruni Aronohondo ndo Anduane Homogo ibunihondo keba ho kami, lene.
NUM 16:12 Ani lalu Mosese ibugua Dadana Abiramala libu ibilo agali mbirahondo, Damu pu, lene. Ani layagola libugua bi lawia halu lalu, Iya naibuleberaba.
NUM 16:13 Í̠na ina dindi bayale Iyibini hemaria haru tagira ibalu dindi ko iba dalu naibaga ogoha ina homoloma̱ya bo wahole haru ibirida. Ani birigo í̠nime manda bu handalu keria ogoni bamedalo manda bidebe. Ani manda bialu áyubi nde í̠na ina handape howa haru hoa ho kebe.
NUM 16:14 Ina dindi bayale mbiraha inane mabu wigiwigi bialu pu mbira mini gerebi mabu wigiwigi buluma̱ya haru pu nabi dege kegoni ndobe. Í̠na manda bu handalu keria ina mini nawi luludaria mo hondo hole manda bidebe. Í̠na inahondo anidagua bibe naheore ndobe. Anigo áyu iya naibuleberaba, lene.
NUM 16:15 Bi uruni layago hale howa Mosesehanda keba timbuni halu Anduane Homogohondo bi ogodagua lamialu, Agali uruni tigua í̠hondo mbirale lomabu yalu ibuwa ngirago nayamibe. Tigua i̱na ti bayuwa haru nahaga layagoni. Ani layago ai i̱na tinaga nogo dongibi marualebi mbira mo page nabiore henego ko, lene.
NUM 16:16 Ani lowa Mosese ibugua Korahondo lamialu lalu, Yawi í̠nibi í̠naga agali í̠ aria handari kirani pira duria (250) biarubi tí bibahende Anduane Homogonaga Balai Anda kagoria íbu ngoai halimu. Arono ibubi nde íbu holebira.
NUM 16:17 Tí bibahendeme ira hagua ngabilo inisenesi delaga beledi be biago yagayaga bialu ira pungane hoailebi hedo yalu Anduane Homogonaga deni howa lomabu delole ibalimu, lene.
NUM 16:18 Ani layago hale halu egerebagi agali biaru tigua inisenesi ira hagua ngabilo delole beledi beni ira pungane hoaile hedo yagayaga bialu íbu ngoai hene. Ani ngoai howa tigua beledi beni ira yayago inisenesi delolenaga ibira halu abale delo manda manda bini. Ani bialu Mosese Aronobi ti haru mandagi Anduane Homogonaga Balai Anda biago haneni pu hene.
NUM 16:19 Ani pu hearia Kora ibugua wali agali bibahende mo mogo bialu Balai Anda biago haneni pu howa Mosese Aronolanaga deni handayaho hene. Ani heagola Anduane Homogohanda ibunaga wá hongohe taraore helayagola Isaraele wali agali bibahendeme de handai hene.
NUM 16:20 Ani handai heagola Anduane Homogohanda Mosese Aronolahondo lamialu lalu,
NUM 16:21 Libu habagi halu pudaba. Wali agali o karuni áyu bo wahai holeberogo ti ani helo wahalu libu pudaba, lene.
NUM 16:22 Ani layago lelowa Mosese Aronolame dindini bulu palialu palia pehowa Anduane Homogohondo lamialu lalu, Ngode Datagaliwabe-o wali agali í̠nioreme wabiriruni o bu karuni. Ai agali mbira hangume mana ko biyagua í̠na ti maru karu bibahendehondo keba hai holeberebe, lene.
NUM 16:23 Ani layagola Anduane Homogohanda Mosesehondo lamialu lalu,
NUM 16:24 Wali agali bibahendeore bu karuhondo lamialu, Kora Dadana Abirama imaru tinaga balai anda kagoria kaware nahe wahalu kaundiani pu halimu labe, lene.
NUM 16:25 Ani laya handala Mosese halu Isaraeleali agali haguane biaru ti Dadana Abiramala hearia pene.
NUM 16:26 Puwa Mosesehanda wali agali bibahende lamialu lalu, Agali mana ko biaga o karunaga anda kagoria tí hapara nahe kaundiaha haga haga bilimu. Tinaga mana ko ngagome tíbi heba yamaga haragola homoligo tinaga mbirale ngarubi heba ela nahe pilimu, lene.
NUM 16:27 Ani layagola hale halu wali agali ti agali tebira Kora Dadana Abirama imarunaga balai anda heagoria kaware nahe kaundiani pu hene. Ani biyagola Dadana Abiramala libu one waneiginibi ti haru mandagi libuninaga balai anda haneni tagira pu hene.
NUM 16:28 Ani heagola Mosese ibugua wali agali bu hearuhondo lalu, Áyu mbirale mbira bulebirago tígua de hondoleberami. Hondowa tígua Anduane Homogo ibunime i̱ dabalu ibunaga biabe bialu howa i̱na tí handayaho holiya dabo helene kogoni manda buleberemi. I̱ninaga hameme ndo bialu harudane tígua hondoleberami.
NUM 16:29 Ai agali uru ti áyu homai holebira. Ngode Datagaliwabehanda agali uruni pani mialu ndo bame homayagua nde Anduane Homogohanda i̱na biabe ogoni buliya dabene ndo i̱ i̱ninaga hameme biabe uruni bialu henedalo henene manda buleberami.
NUM 16:30 Anigo Anduane Homogohanda nahendene ale mbira bialu dindi mo gai buki halu ha edene bilowa gundu uli timbuni ngagoha agali uruni tinibi tinaga mbirale ngarubi bibahende uli ogoniha haealape halu tini homa nabi dére kaore homenerunaga dindiha pu helayagua nde agali uruni tigua Anduane Homogo erembira mialu hayadalo manda buleberami, lene.
NUM 16:31 Mosesehanda bi ogoni lalu heaore dege aube tobane buwa Dadana Abiramala heagoria dindi mo gai buki hayagola gundu uli timbuni mbira o biagoria wini.
NUM 16:32 Ani wiagola Dadanabi Abiramabi libu one waneiginirubi Koranaga aria hearubi tinaga dabudabu wiarubi bibahende gundu uli o biagoha haealape hai hene. Haealape hai heagola dindi biago ibuni aube tobane buwa wiyadagua wu karulo dai bini.
NUM 16:33 Anidagua bialu ti bibahende homa nabi dére heaore tinaga mbirale wiaru heba homene dindiha piai hene. Peagola dindi ala wiyadagua lone wia karulalu wali agali biarunibi mogobu dambi hai hene. Anidagua biyagola wali agali maru hearume tinaga dengui lone nahondoleore wahene.
NUM 16:34 Wali agali uruni uli biagoha haealape hayagola ga̱ timbuni lama yupe hayagola Isaraele wali agali kaware bu hearu tigua lalu, Inabi nde anidagua dege buligo abale ibida ma nalarami, lene. Ani lalu ti abaleore ibida piai hene.
NUM 16:35 Ani biyagola agali handari kirani pira duria (250) biarume ira hagua ngabilonaga inisenesi lomabu delaga dabuni delaga biarubi nde Anduane Homogohanda ira hedo bape halu bo heda hai hene.
NUM 16:36 Mani Anduane Homogohanda Mosesehondo lamialu lalu,
NUM 16:37 Loma binigo mo ngiaga Arono ibu igini Eleasahondo agali irame dai hayarunaga beledi be boronosime wabini biaru í̠ keria mo yalu ibule pu labe. Mo yalu ibiragola kaundiani yu pubagi howa be abalu beledini para karu taulo wahabe. Ani larogoni irane beledi uruni i̱ninaga wiabagi hene ilili biagaore ngelonaga laro.
NUM 16:38 Beledi uruni agali homayaru tigua inisenesiru Anduane Homogo i̱ninaga lomabu delaga dabu heagoria lomabu delole mo yalu ibiyangi i̱nagaore wiabagi hene wini. Ani winigo ai agali tinime mana ko bialu homayarunaga beledi uruni mo yalu ibuwa uruni bo tiga bigi bialu mo mbalape lowa gaba ale helalu ogonime lomabu delaga dabu ngago para hadambi hadaba labe. Ani para hadambi kagola Isaraele wali agali tigua de handalu agali o biarume mana ko biyadagua nabule lelo ani bilimu, lene.
NUM 16:39 Ani layagola Mosese ibugua loma binigo mo miaga Eleasahondo beledi uruni mo yalu ibabe lalu lamiyagola Eleasa ibugua mo yalu ibini. Mo yalu ibiyagola agali marume beledi uruni bo tiga bigi buwa mbalape gaba podene ale heagola ogonime lomabu delaga dabu biago para hadambi helene.
NUM 16:40 Ani para hadambi henedagoni Isaraele wali agali tigua tinaga miniha mitangi biaabo helonaga ani bini. Arononaga aguanene holebiraru ti hangume lomabu delaga dabu ngagoria Anduane Homogonaga inisenesi lomabu delolene ngago manda bu haabo helonaga ani bini. Anigo mbiralime lomabu delaga dabu ngagoria puwa Anduane Homogohondo ira hagua ngabiaga ale inisenesi lomabu delayagua ogoni ibu Anduane Homogohanda Kora halu ibu dameneru pani mialu bo delayadagua dege bo delolebira. O biyaruni Anduane Homogohanda Moseseha howa, Eleasa í̠na anidagua bibe, lalu lamiyadagua biai hene.
NUM 16:41 Horo mendengi wali agali bu hearume Mosese Aronolahondo keba howa lai lowa lalu, Libugua Anduane Homogonaga wali agali maru bo homelai haribigoni, lene.
NUM 16:42 Ti bibahendeme Mosese Aronolahondo lai lole íbu ngoai halu Anduane Homogonaga Balai Anda biagoha handa amu ho hene. Ani handalu hemiria Balai Anda biago heagoria hari beralibame íbu dambi halu Anduane Homogonaga wá hongoheore hapani hayaria hendene.
NUM 16:43 Ani biyagola Mosese Aronola libu Anduane Homogonaga Balai Anda haneni pu hene.
NUM 16:44 Ani pu hebigola Anduane Homogohanda Mosesehondo lamialu lalu,
NUM 16:45 I̱na wali agali o karuni bo wahai holeberogo libu ti kagoria nahe habagi halu kaundiani hole pudaba, lene. Ani layago hale howa libu dindini bulupalu ibira hene.
NUM 16:46 Ani buwa Mosesehanda Arono lamialu lalu, Í̠naga beledi be ira hagua ngabilo inisenesi lomabu delaga biago mo yalu puwa ira punga hoaile lomabu delaga dabuni deda aria mbira hedowa beledini tabo ngelabe. Ani bialu hagua ngabilo delaga inisenesi ogoriani haealape howa delabe. Ani mo yalu puwa wali agalirume mana ko bialu hayadago domo wahelo Ngode Datagaliwabehondo loma bialu delabe. Tigua Anduane Homogonaga deni howa mana ko biyagome ibu mo keba timbuni hayagonaga warago timbuni mbira ibilayago ai ogoninaga abale lomabu delabe, lene.
NUM 16:47 Ani laya handala Arono ibugua Mosesehanda bia lalu lamiyadagua bini. Ani bialu ibugua lomabu delolene inisenesibi beledibi mo yalu wali agali mo ngoaiho heagoha abale pene. Puwa wali agali dewaore warago koore balu heane hendene. Ani hondowa ibugua inisenesi beledini haealape halu lomabu delene.
NUM 16:48 Ani bu delayagola warago koore timbuni bayago ba nabi ereba hai hene. Ani biyagola Arono ibugua wali agali homo tongolo mini wiarubi dére hene hearubi dombeni hengene wiagoria howa inisenesi lomabu delene.
NUM 16:49 Wali agali daosini deriani handari karia (14,700) warago ko ogonime bo homai helene. Agali maru Kora aria homayaru heba daga lamaga nahe warago ko balu homayaru hangu dagalenego ogoni.
NUM 16:50 Warago timbuni bayago ereba hai haya handala Arono ibu Mosese hearia dai bialu Anduane Homogonaga Balai Anda haneni pu hene.
NUM 17:1 Anduane Homogohanda Mosese lamialu lalu,
NUM 17:2 Isaraeleali karuhondo halimbu homberia (12) ngidaba lalu lamibe. Halimbu uruni hameigini homberiarunaga agali haru haga mbira mbira headagua yalu ibiragola tinaga mini hangu hangu halimbu ogoriani gili bibe.
NUM 17:3 Libai hameigini karu tinaga halimbu ngagoria Arononaga mini gili bibe.
NUM 17:4 Ani bialu mani halimbu biaruni bibahende i̱naga Balai Anda tamuha Hobane Loma Bia Heneore kago i̱naga Habo Nalolene Bi lo winigonaga Mbogoyi ngagoria i̱ni tí baba bi laga kogoria kawareni mo ngelabe.
NUM 17:5 Ani mo ngeledegola mbira i̱nime dabarudago ibunaga halimbu ngagoria yuni doai lalu gahenge anda holebira. Ani andaho ngagola ti bibahendeme manda bialu agali halimbu ogoni anduane kago ibu i̱naga loma binigo mo ngiaga agali helo dabarudane hondolebira. Anidagua biragola Isaraeleali tigua í̠hondo keba howa lai lalu karuni nale waholebira, lalu Mosese lamini.
NUM 17:6 Anduane Homogohanda ogonidagua lamiyagola Mosesehanda Isaraele hameigini hearunaga agali haru haga mbira mbira headagua tinaga halimbu homberia (12) yalu ibidaba layagola yalu ibai howa Mosesehondo mo mini. Ani yu íbu wiagoha Arononaga mini gilibuwi halimbu wiagobi heba mandagi mo ngelene.
NUM 17:7 Ani wiagola Mosesehanda halimbu uruni mo yalu puwa Anduane Homogonaga Balai Anda tamuha Habo Nalolene Bi lo winigonaga Mbogoyi wiago kawareni mo ngelene.
NUM 17:8 Ani ngelowa ai horo mendengi Mosese ibugua Anduane Homogonaga Balai Anda biagoha anda pene. Anda puwa handalu hearia Arononaga mini gilibuwi halimbu wiago handalu hearia ogoriani yuni doai lalu anda howa lini dalu ira amono lini bogabi ogoriani dearia hendene. Halimbu ogoni Libai hameigininaga winigo ani biaria hendene.
NUM 17:9 Ani biago hondowa Mosesehanda halimbu biaru bibahende yalu tagira puwa Isaraeleali bu hearu mo walia hene. Ogonidagua biago hondowa Isaraele wali agalinaga haru haga biaru tininaga halimbu mo yu dai bigi bini.
NUM 17:10 Ani biyagola Anduane Homogohanda Mosesehondo lamialu lalu, Halimbu Arononaga mini gilibuwi biago mo yu dai buwa Habo Nalolene Bi lo winigonaga Mbogoyi ngagoria kawareni wiapara ho ngelabe. Mana ogonidagua beregome agali mine haga karu ti mini dewa wialubi keba halu lai nalelobi ne hariga ndibu helarogola tigua i̱hondo lone keba naholebira. Ani beregola i̱na ti homelo bo waholene henge nawulebira, lene.
NUM 17:11 Anduane Homogohanda anidagua layagola Mosesehondo ogoale bibe lalu lamiyadagua Mosese ibugua biai hene.
NUM 17:12 Mosese ibugua mbirale uruni biai heagola Isaraele wali agali tigua ibuhondo lamialu lalu, Agaliore-o áyu ina mo ko holene wiaruago homai holeberamadago agua buleda.
NUM 17:13 Ina mbirali Anduane Homogonaga Balai Anda kagoria kaware poragola ibu bo waholobada. Ani bialu ina bibahende homai holeberemada, lene.
NUM 18:1 Anduane Homogohanda Aronohondo lamialu lalu, Í̠nibi í̠ igini bu karubi í̠ aria Libaiali bu karubi tígua i̱naga Balai Anda kagoha biabe tiga tiga bulene ngadagua ndo kagua bialu harimiyagua nde mo ko holene tíniha anda ibiragola ko tíni bibahendeme birimidagonaga genda yu holeberemi. Ai í̠nibi í̠ igini bu karubi tígua loma binigo mo miaganaga biabe bialu haga ngagoha mo ko hene wiagua nde genda tíni hangume yu holene wulebira.
NUM 18:2 Í̠nibi í̠ igini bu karubi tígua i̱naga biabe bialu kamigola í̠naga mamali Libai aguane í̠ni aria bu karu tigua í̠ biamogo bialu Balai Andanaga biabe ngaru mandagi bialu halimu.
NUM 18:3 Tigua biabe í̠na mo meregobi bialu tininaga biabe Balai Anda kagoha bialu haga wiyarubi bialu holebira. Anigo uruni tigua biabe bialu howa mbirale tamu Hobane Loma Bia Hene kagoha ngarubi lomabu delaga dabu ngagobi mbirago ela holene nawi. Tigua uruni mbirago ela hayagua nde í̠nibi ti heba homolene wulebira.
NUM 18:4 Libai hameigini tí bibahendeme í̠ baba biabe bialu howa Balai Andaha biabe bulene damene ngaru biai holebira. Anigo agali maru i̱na ti biabe ogoniha bialu habe naledogo ibu nabulebira.
NUM 18:5 Í̠nibi í̠ igini karu tibi nde Balai Anda Hobane Loma Bia Hene biagohabi lomabu delaga dabu ngagorianibi tíni hangume biabe bialu holene wulebira. Ani beremigola i̱na Isaraele wali agalihondo lone keba halu ti mo ko naholebero.
NUM 18:6 Haleha. Isaraele hameigini maru hearuni helowa i̱nimeore í̠ aria Libaiali hearu dabarugo í̠bi í̠ igini karubi tíhondo mugube ngialu biabe duniniore ogoni bialu halimulo dabarugoni. Agali uruni ti i̱ninagaore howa i̱naga Balai Anda kagoha biabe bialu holebira.
NUM 18:7 Anigo í̠nibi í̠ igini karubi tí hangume anda tamu Hobane Loma Bia Heneore kagohabi lomabu delaga dabu ngagoriabi biabe bulene ngaru bialu holeberemi. Tí loma binigo mo ngiaga agali howa biabe duniniore ogoni bialu halimulo i̱nimeore tínihondo mo ngirugoni. Ani birugo ainde agali mbira i̱na ibu biabe ogoni bilo dabo hela nabinigo ibuwa biabe bialu hayagua nde ibu homelo bo wahalimu, lalu Anduane Homogohanda Aronohondo lamini.
NUM 18:8 Anduane Homogohanda Aronohondo lone lamialu lalu, Hale ha. Wali agali tigua nogo irani dai helo delararu aria ndo loma maru bo ngirarunaga mbirini ngaru tí nalu holene wulebira. Í̠bi í̠naga waneigini aguanene mani hama polobadarubi tí nalu holene wiaabo holebira.
NUM 18:9 I̱ninagaore loma biaho wiabagi hene lomabu delaga dabu ngagoria lomabu dai helonaga ndo ngaru damene tí mo yulene urubi. Loma bini tí mo yuleberamidago widi loma bini ngagobi ko domo wahelonaga lomabu yalu íbu ngiragobi mbirale mbira yolo biadai bialu ngiragobi bibahendeore wali agalime i̱naga lomabu yalu ibiraru damene tíhondo mo ngiaore holebero. Í̠nibi í̠naga igini aguanene mani holobadarubi tí nalimulo ngulebero.
NUM 18:10 Tígua nogo loma binirubi mbirale maru loma bini ngarubi uruni bibahende de hondowa i̱ninagaore lomabu wiabagi heneore ngalo manda bulene nga. Anidagua bini ngago manda bialu agali igiribi tini hangume i̱naga Balai Anda tamuha howa tomo uruni nai holene nga.
NUM 18:11 Ani bialu loma maru Isaraele wali agali bu karume lomabu yalu ibirarubi tigua yamialu loma binigo mo ngiaga karu tinaga gime yuwa yaraga halu i̱hondo wigiwaga lalu mo loma biaga ale yalu ibirarubi í̠naga waneigini maha holobadaruhondobi ngerogo tínagaore wiaa̱i holebira. Í̠ damene i̱naga deni dodo nahe karu tigua tomo ogoni ta nabi nolene wulebira.
NUM 18:12 Isaraele wali agali tigua i̱hondo lomabu ngule mbirale bayaleore pigane dararu olibe lininaga welibi waini iba ngarubi widi lini bayale ngarubi mali bibahendengi yalu ibiraru bibahende tíhondo mo ngiaabo holebero.
NUM 18:13 Tomo bayale loma bini uruni tí one waneiginiru i̱naga deni dodo nahe karu tigua ta nabi nolene wulebira.
NUM 18:14 Mbirale bibahende Isaraele wali agali tigua i̱hondo lomabu ngini ngaru tinime yolo biadai nabule larugo uruni bibahende tínaga dege wiai holebira.
NUM 18:15 Isaraele wali agali tinaga igiri wahene taba hanaragobi nogo igini wangabe pigane hono wiragobi bibahende i̱ninaga lalu lomabu yalu ibugu biraru bibahende tíninaga ngelarogoni. Anigo mani Isaraele wali agali tinime tinaga waneiginibi nogo i̱naga deni dodohe kagobi yolo biadai bule layagua nde ani bilo hondo halimu.
NUM 18:16 Isaraele tinaga igiri gali ege mbira hangu penego muni kina pira duria (50) hangume yolo biadai bulene nga.
NUM 18:17 Anigo nogo bulumaga meme sibiru pigane wini karu ti yolo biadai bulene nawi. Ogoni loma bialu i̱ninaga bo deloleneore nga. Tígua nogo uruni balu darama lomabu delaga dabu ngagoha odoba halu habane damene kago loma bialu dabu ngagoriani delalimu. Anidagua deledemigola nga baya tara birago i̱na nga halu turu holeberogo ani bilimu.
NUM 18:18 Ani bialu loma urunibi tínaga dege nogo bo delaragonaga galukunibi ge tigahayaginaga burulene ngarubi tígua gime yaraga howa i̱nihondo wigiwaga lalu ngiaga biagobi tí mo nolene nga.
NUM 18:19 I̱na Isaraele wali agalirume i̱nihondo mbirale lomabu ngiraru bibahende tíhondobi mo ngialu tínaga waneigini aguanene mani holobadaruhondobi miaabo holebero. Anidagua larogoni habo nalolene bi tí bababi tínaga waneigini aguanene mani holobadaru bababi wiaabo helonaga lo wero, lene.
NUM 18:20 Anduane Homogohanda Aronohondo laabo halu lalu, Tígua Isaraele wali agalinaga dindi ngaru aria mbirago mani tí waneigini bu holebiraru tinaga mo wia holenaga na mo wilimu. Tí mbirale burupale kamiru tínaga Anduane Homogo i̱ni kogome karulape ngialu haabo holebero, lene.
NUM 18:21 Anduane Homogohanda laabo halu lalu, Isaraele wali agali tigua tinaga tomo bibahende tale buwa pini damenego i̱hondo yu ibalu ngiragola i̱na tomo i̱hondo ngirago Libaiali karu hangu mo mulebero. Tomo mbirale o ngulubadaruni tigua i̱naga Balai Anda kagoha biabe bialu handayaho kagonaga yolo ogoni holebira.
NUM 18:22 Maniore howa horo bibahendengi Isaraele wali agali bu karu aria mbira i̱naga Balai Anda kago kaware polene nawiorego napolebira. Mbirali ibu doga halu Balai Anda kago kawareni piyagua nde tiha pani nolene wulebirago i̱na ogoni ibu homelo bo waholebero.
NUM 18:23 Áyu ogoni howa Libai hameigini karu ti hangume i̱naga Balai Anda handayaho howa biabe bialu holebira. Tigua biabe ogoni baya hangu bulene ngago nabi hayagua nde tinime bia ko hayadagonaga pani nolene wulebira. Mana ogoni wiaa̱i̱ halu tinaga waneigini aguanene mani holobadarume yu haabo holebira. Libai aria karu tinaga dindi lenego mbira Isaraeleali maru ti ngadagua nawi kagoni
NUM 18:24 irane wali agalime tinaga tomo mbirale ngaru pinigo i̱naga lomabu yalu ibirago ogoni Libaiali tininaga mo miruli. Anidagua bulenaga ai ti Isaraele dindiha Libai hameigini karu ti dindi tu wa mia nabilimu laru, lalu Anduane Homogohanda lene.
NUM 18:25 Anduane Homogohanda Mosese lamialu,
NUM 18:26 Libai hameigini karuhondo bi ogodagua labe. Isaraele wali agali maru karu tigua tinaga pini pini Anduane Homogo mule yalu ibiraru ibugua Libai hameigini tí mo ngulebira. Ani biragola tígua nde mbirale uruninaga pini pini damenego Anduane Homogo ibunihondo lomabu milimu.
NUM 18:27 Ani beramigola loma uruni widi bayale gahenge lomabu miagago alebi waini iba bayale gahenge lomabu miagago alebi tígua lomabu meramigo Anduane Homogo ibuni hondolebira.
NUM 18:28 Isaraele wali agali tigua tinaga pini pini lomabu minigo aria ngiraru yu howa nde ogoninaga pini pinigo tale bialu Anduane Homogohondo mulene wini ngago manda bialu loma binigo mo miaga Aronohondo milimu.
NUM 18:29 Tígua tomoru baya hangu tale bigi bialu bayaleorego Anduane Homogonaga mo bagiho ngelowa ibuni mo milimu.
NUM 18:30 Ani bialu tígua tomo bayale uruni Anduane Homogohondo mo miai howa ibira harago Libai aria kamiru tí mo yalimu. Tomo hangaga agali kagome ibunaga tomo pini pini lomabu mialu ibira harago mo yagadagua ani mo yulene nga.
NUM 18:31 Tomo uruni Anduane Homogonaga Balai Anda kagoha biabe bialu kamigonaga yolo ogonigo tí one waneigini baba ibira hene ngago tí nolene nga.
NUM 18:32 Tígua tomo bayale damenego lomabu mialu ibira hene ngago tíni narimiyagua nde tíha mo ko hene mbira nawulebira. Anigo Isaraele wali agalinaga lomabu yalu ibiyaruni lomabu mia nabi tíni ala nalu harimiyagua nde tígua mo ko hai haramigome ai tíha mo ko hene wialu pani nolene wulebira. Ani ngagola Anduane Homogohanda tí balu homelolebira, lalu Mosesehanda lene.
NUM 19:1 Anduane Homogohanda Mosese Aronolahondo lamialu lalu,
NUM 19:2 Isaraele wali agalihondo bi ogodagua lamilibu. Isaraele wali agali tigua bulumaga angibuni honenaga tingini dere durubi mbira nabi kagobi agalime biabe bilo mo bia nahene kagobi libu kabiria haru halu ibalimu lalibu.
NUM 19:3 Ani haru ibiragola bulumaga ogoni loma binigo mo miaga Eleasa mo milibu. Ani merebigola agali marume nogo ogoni balai anda bu karu yu wahalu haru tagira puwa Eleasahanda ti handaya haragola nogo bulumaga ogoni bolene nga.
NUM 19:4 Ani baragola Eleasa ibugua nogo darama biago maru hambu yalu puwa gi hondone mbira hangume darama biagoha wai howa i̱naga Balai Anda kagoha kahalu tandala bahaga bulebira.
NUM 19:5 Ani bialu loma binigo mo miaga kago ibu de hendedaore nogo ogoni irani bo delolebira. Tigua nogo ogoninaga dongonebi mbirinibi daramabi nuni tini ayuni luhabane damene bibahende irani dai helo delolebira.
NUM 19:6 Ani deledagola loma binigo mo miaga kagome ira tamianaga gabini marubi ira mini hisobonaga magane emene mbirabi pu payini daramabi dege dene mbirabi uruni bibahende nogo biago dedagoha bape halu delolebira.
NUM 19:7 Ani bialu loma binigo mo miaga kago ibugua ibunaga aga bu hayago wayawaya bialu ibuni tinginibi iba odo bahalu bulebira. Loma binigo mo miaga kago ibugua ogoni biai halu balai anda bu karuha anda polebira. Anigo ibu horo ogoningi Anduane Homogonaga deni dodohe kane dege halu alendo holebira.
NUM 19:8 Ani bialu agali nogo bo delalu hayago ibunaga aga bu hayago wayawaya bialu ibuni tinginibi iba odo bahalu bulebira. Ani bialu ibunibi Anduane Homogonaga deni dodohe kane dege halu alendo holebira.
NUM 19:9 Anidagua bidagola agali mbira ibu Anduane Homogonaga deni dodo nahe kagome ira punga nogo biago lomabu bo delayagoria ngago hilo yalu puwa balai anda bu karu tagirani dindi henge mbira Anduane Homogonaga deni dodo nahe ngagoria ngelolebira. Ani ngelowa Isaraele wali agali tinaga tingini wayawaya bulene iba bedagoha maru mo pehalu mbirale Anduane Homogonaga deni dodohe ngarubi ogonime wayawaya bulene wulebira. Tininaga ko ngago domo wahelonaga wayawayabi iba ogonime dege bolene nga.
NUM 19:10 Ani buwa agali ira punga hilo yalu tagira piyago ibunaga aga wayawaya bulene nga. Anigo horo ogoningi ibuni dodohe kane halu alendo holebira. Mana ogoni maniorebi wiaho wiaabo holebira. Ani wiaabo ho ngagola Isaraele wali agali tinibi wali agali dindi taraha howa tí baba íbu hene karubi bibahendeme mana ogoni talialu bialu haabo holeberemi labe, lalu Anduane Homogohanda lene.
NUM 19:11 Anduane Homogohanda laabo halu ogodagua lamibe lalu, Mbiralime homenenaga tingini ngago ela hayagua nde ibu horo karu Anduane Homogonaga deni dodohe holebira.
NUM 19:12 Ani howa horo tebonengibi horo kanengibi ibugua dodo nahe bayale holenaga iba biagome ibuni domo wahalu Anduane Homogonaga deni dodo nahe bayale holebira. Anigo horo tebonengibi horo kanengibi ibugua anidagua nabi heneyagua nde ibu bayale ndo dodohe haabo holebira.
NUM 19:13 Mbiralime homene tingini ngago ela hayagua ibugua Anduane Homogonaga deni dodo nahe holenaga iba biagome doma nabi kayagua nde ibu dodohe haabo holebira. Mana ogonidagua biragome Anduane Homogonaga Balai Anda kagobi ibunaga deni ko dodohe holebira. Anidagua bulebirago agali ogoni ibu Ngode Datagaliwabenaga wali agali tí kamigoha mandagi holene nawi.
NUM 19:14 Balai anda kamigoha howa mbirali homayagua nde maru anda ogoniha mandagi bedarubi Anduane Homogonaga deni dodohe halu maru anda ogoniha anda poragobi dodohe dege holebira. Ani dodohe kane dege horo karu haabo holebira.
NUM 19:15 Ani bialu ndisi todobene be po̱ya nabi anda ogoniha winidarubi dodohe dege wulebira.
NUM 19:16 Mbirali ibu bolange dangi ngaruha ibaga bialu kariayaguabi irabu ngaruha pialu kariayaguabi wali agali bo wahene ngago ela hayagua bame homene ngago ela hayaguabi mbirali homene kuni ngago ela hayaguabi homali mbira kago handa nabi puwa hengedayaguabi urunidagua birago ibubi Anduane Homogonaga deni dodohe kane dege horo karu haabo holebira.
NUM 19:17 Mbiraligo ibu homene tingini ngago ela howa dodohe hayagua bulene mana ngago ogo. Wali agalinaga ko domo wahelonaga bulumaga angibuni hone bo delene biagonaga ira punga wiyago maru muwa todobene be dindime wabini ngagoha ibira holene nga. Ani ibira halu iba bayale hambu yalu puwa todobene be ogoniha dege berelolene nga.
NUM 19:18 Ani buwa agali mbira Anduane Homogonaga deni dodo nahe kago ibugua ira mini hisobonaga magane emene yunihe mbira podo yuwa iba biagoha ibira holebira. Ani ibira howa iba ogonime balai anda agali homene wiyagoha wali agali berene biaru tandala bahalu mbirale anda ogoniha ngarubi anda biagobi tandala bahaga bulebira. Ani buwa wali agali homene kunibi homene tinginibi homalibi uruni ela hayago agali mbira dodo nahe kago ibugua iba ogonime dege o biagoni tandala bahaga bulene nga.
NUM 19:19 Ani bialu horo tebonengibi kanengibi agali Anduane Homogonaga deni dodo nahe biago ibugua wali agali maru dodohe biaru iba ogonime dege lone tandala bahaga bulebira. Ani biai howa wali agali dodohe mo bayale hayaru tinaga aga wayawaya bialu tini tinginibi iba odo bahalu bulebira. Ani biai halu horo kanengi alendo ni paliragola wali agali uruni ti dodo nahe bayaleore holebira.
NUM 19:20 Mbirali ibu Anduane Homogonaga deni dodohe howa ibugua dodo nahe holenaga mana biaga ngago nabi hado waho heagua nde ogoni ibu dodohe kagoni. Ani dodohe kago irane dodo domo wahelonaga mbiralime iba odo bahaga mana winigo odo ba nahe kagome ibu dodohe haabo ka. Ani biragome Anduane Homogonaga Balai Anda kago ibugua mo dodo harago ibu Ngode Datagaliwabenaga wali agali bu karu heba mandagi holene nawi.
NUM 19:21 Anigo Isaraele wali agali tigua mana ogoni talialu biaabo holene nga. Agali mbira kago ibugua mendeali kagonaga dodo domo wahalu bayale helonaga iba tandala bahayagua nde ibuninaga aga bu kago wayawaya bulene nga. Mbiralime wali agalinaga ko domaga iba ogoniha gi ibira hayagua nde ibubi Anduane Homogonaga deni dodohe kane dege alendo halu ni paluebira.
NUM 19:22 Mbirali ibu dodohe howa mbirale bayale ngaru mbirago ela hayagua mbirale ogonibi dodohe dege wulebira. Mbirale dodohe ogoni mbiralime ela hayagua nde ibubi Anduane Homogonaga deni dodohe kane dege alendo halu ni paluebira, lalu Mosese ibugua Anduane Homogohanda bi ogodagua labe layadagua lene.
NUM 20:1 Ege mbira layagola Isaraele wali agali biaru bibahende dindi ko wali agali nahaga mini Sini wiagoria anda pene. Anda puwa tigua dindi emene mbira mini Kadese wiagoria pu howa ogoriani hemiria Mosese Aronolanaga mbalini Miriama homayagola hora hene.
NUM 20:2 Ogoriani iba nabere henene wiago hondowa Isaraele wali agali biaru ti mo mbiraore halu Mosese Aronola keba howa gomogomo lalu hene.
NUM 20:3 Tigua ani bialu howa Mosese Aronolahondo lalu, Inaore ina hamene maru Anduane Homogonaga Balai Anda biago harabani homayadagua homai kamale galone kaleda.
NUM 20:4 Libugua ina dindi ko wali agali nahaga ogoha agibule haru ibiribibe. Inanaga nogobi inanebi heba dindi ko ogoria homoloma̱ya haru ibiribida.
NUM 20:5 Ina Iyibi dindiha hemaria tingagali dindi mbirale henene anda naholene ogoha agibule haru halu ibiribibe. Widirubi pogerubi pu mbira mini gerebi linirubi ira lini mini pomegaranaderubi uruni bibahende nawida. Ai iba nolene henenebi nawioreda, lalu hongo howa lene.
NUM 20:6 Ani lalu hea handala Mosese Aronola libu Anduane Homogonaga Balai Anda biagoria puwa harabani hene. Ani pu hearia libugua libuninaga wanakui dindiha bulupalu wini. Ani wibigola Anduane Homogonaga wá holene hongohe biago libu bulupalu wibigoria íbu hene.
NUM 20:7 Ani buwa Anduane Homogohanda Mosesehondo lalu,
NUM 20:8 Í̠na gewa halimbu Habo Nalolene Bi lo winigo Mbogoyi biago wanakuihayagi wiyago mo yabe. Mo yalu Arono libu harume wali agali bibahende biaru mo ngoai hadaba. Ani buwa bibahendeme handaya hai kagola ege to̱le̱ nai kagohondo bi labe. Ani laregola iba ogoniha bedago pugulo tagitagi holebira. Í̠na ogonidagua bialu wali agalibi tinaga nogo bibahende karubi iba karulape nelo ege to̱le̱ ogoniha howa tagira ibulebira, lene.
NUM 20:9 Ani layadagua Mosesehanda gewa halimbu Anduane Homogo heagoria wiago mo yini.
NUM 20:10 Ani buwa Mosese Aronola libugua wali agali biaru bibahende ege to̱le̱ biago heagoria hapara howa mo ngoai ho howa Mosesehanda tihondo lalu, Mana lo ngago baba wai biaga o kamiru hale hadaba. Iyame iba tí nalimulo ege to̱le̱ ogoha howa pugulo tagi helolene wiaruabe, lene.
NUM 20:11 Ani lowa Mosesehanda halimbu yayagome to̱le̱ biago halu ki bayagola iba timbuni pugulo tagi hene. Ani pugulo tagi hayagola wali agali biarubi tinaga nogo haru hayaru heba naiore hene.
NUM 20:12 Ani biyagoniyu Anduane Homogohanda Mosese Aronolahondo lalu, Libugua Isaraele wali agalinaga deni howa i̱naga hongo holene tigabi walia naharibida. Anigo wali agali uruni dindi muleberogoria libugua ti haru anda napoleberebi, lene.
NUM 20:13 O binidagoni Meriba dindini howa bini. Ogoriani Isaraele wali agalime Anduane Homogo baba keba halu gomogomo layagola ibugua ibu hongohe tigabiore kagoni walia hene.
NUM 20:14 Mosesehanda agali marume Kadese dindi howa Idomonaga kinihondo bi yalu pudaba lowa lalu, Í̠ aria í̠naga hamene Isaraelealime bi ogodagua laya. Inani gendabi timbuni ibiyagoni í̠ manda bide.
NUM 20:15 Inanaga mamali Iyibi dindini puwa mali dewa ogoniha harimagoni. Iyibi dindini hemaria Iyibiali hearume inanaga mamalirubi inabi mo ko howa handayaho haya.
NUM 20:16 Ani biyagola iname Anduane Homogohondo dugu bialu biamogo bia larimagola ibugua hale howa dahuliyali mbira ibilayagome Iyibi dindi yu wahalu ina haru tagira ibiya. Ai ina áyu Kadese tano mbira í̠ baba tubariha kama.
NUM 20:17 Í̠naga dindini ina poloma̱ya henge ngibelo hame ledema. Inamebi inanaga nogo bulumagabi hariga pu a̱i̱ na̱i̱ nabuleberama. Tínaga mabuhabi pu lini daga gerebi mabu gama ngamiruha pu a̱i̱ na̱i̱bi iba uli ngamiruhabi no pu a̱i̱bi heba naholeberema. Iname kininaga hariga tene haiweni hangu pialu pu tagi holene manda bidama.
NUM 20:18 Ani layagola Idomoali tigua ladai bialu lalu, Tí inanaga dindini ogoha hariga pilimulo iname henge nanguleberema. Tígua harugo lowa pole manda bialu ibirimiyagua wai bule tagira ibuleberema, lene.
NUM 20:19 Ani layagola Isaraele wali agali biarume lalu, Iname kininaga harigani polenaga hangu larama. Inanaga wali agalimebi nogo bulumaga haru kamarumebi tínaga iba uli ngamirubi nayagua iname yolo nguleberema. Hariga hangu poloma̱ya henge ngidaba larama, lene.
NUM 20:20 Idomoali biarume hongo howaore halu mende lalu, Tí pilimulo henge nanguleberema. Ani lowa tigua tinaga ami agali gibiore heneyarume Isaraele wali agali biaru bole tagira ibini.
NUM 20:21 Idomoali biarume tinaga dindini henge namule layagola Isaraele wali agali tigua hariga mendehayagi wandialu pene.
NUM 20:22 Isaraele wali agali hearume Kadese yu wahalu puwa Hari Ho heagoria anda pu hene.
NUM 20:23 Idomoali baba tu Hari Ho heagoria anda pu hemiria Anduane Homogohanda Mosese Aronolahondo lamialu lalu,
NUM 20:24 Arono ibu dindi Isaraele wali agalihondo mulebero lo wirugoria anda napolebira. Libugua i̱naga bi larugo Meriba dindini howa mo waharibigonaga Arono ibu ogoria homolebira.
NUM 20:25 Ani bulebirago Aronobi ibu igini Eleasabi haru halu Hari Honi pobe.
NUM 20:26 Puwa Arononaga aga loma binigo mo miaganaga biabe biaga bidaru golowa Eleasani karula habe. Arono ibu mamali homayadagua ibu ogoriani homolebira, lalu lamini.
NUM 20:27 Mosese ibugua Anduane Homogohanda lamiyadagua bini. Isaraele wali agali bibahende handayaho hea handala ti Hari Ho pole irigi halu pene.
NUM 20:28 Puwa Mosese ibugua Arononaga aga loma binigo mo miagame biaga biago golo muwa Eleasani mo karula hene. Arono ibuni hari biago neneni homaya handala Mosese Eleasala libu dalialu dai bini.
NUM 20:29 Isaraele wali agali biarume Arono homayadalo manda bialu tigua horo pira tebiru (30) dugu bu hene.
NUM 21:1 Arada tanonaga kini ibu Kenana aria unugohayagi heneyago ibugua hale halu hearia Isaraele wali agali biaru Adarimi harigani ibira layago hale howa ibugua Isaraele wali agali biaru baba wai bialu maru minu yalu pene.
NUM 21:2 Ani biyagola Isaraelali tigua Anduane Homogohondo ogo buleore lalu bi mbira hongoheore lowialu lalu, Anduane Homogo-o í̠na wali agali uruni inanaga giha ya hariyagua iname tibi tinaga tano timbuni ngarunibi bo gialo haealabagabu wahalu í̠hondo lomabu ngiai holeberama, lene.
NUM 21:3 Isaraele wali agalime bi ogoni layago Anduane Homogohanda hale howa Kenanali biaruni tinaga giha ya hene. Ani ya hayagola tigua tanobi wali agali hearubi bo gialo haealabagabu wahai hene. Ani bialu dindi ogoni mini Homa wini.
NUM 21:4 Tigua Idomoalinaga dindi wandialu pole Hari Ho yu wahalu iba solowara Daramabi bereagoria pialu Agabahayagi pene. Ani pialu howa wali agali biarume hariga biago hondowa keba timbuni howa gomogomo lama pene.
NUM 21:5 Tigua Anduane Homogohondobi Mosesehondobi keba howa lalu, Ina Iyibi dindi ngelalu dindi ko wali agali nahe iba hinabi henene nawi ogoria homoloma̱ya agibule haru ibiribibe. Tomo ko ngubi uru nabe manga kama, lene.
NUM 21:6 Ani layagola Anduane Homogohanda nogombi mbira wali agali haniragola homagane ale ti heagoria dewa ibilene. Ani ibilayagola nogombi biarume wali agali dewaore haniyagola homene.
NUM 21:7 Wali agali hearume Mosese hearia ibuwa lalu, Iname Anduane Homogohondobi í̠hondobi keba halu bi larimago kagua larimayago í̠na Anduane Homogohondo nogombi uruni mo yu ereba ha lalu lamibe, lene. Ani layagola Mosesehanda wali agali biarunaga Anduane Homogohondo bi lahene.
NUM 21:8 Ani layagola Anduane Homogohanda Mosesehondo lamialu, Nogombi mbira ege to̱le̱ boronosime wabuwa ira mbira dibuwa howa nogombi ogoni ogoriani derela ho wibe. Ani bu ngegola nogombime haniyaru tigua nogombi boronosime wabini ogoni handaya haragola ti nahome dabi holebira, lene.
NUM 21:9 Ani layadagua Mosesehanda nogombi mbira boronosime wabuwa ira dibuwa howa ogoriani derela ho wini. Wali agali nogombime haniyiyagua ogoni ibu nogombi boronosime wabini irani derelaho wiyago handaya haragola dabi helo lowa ani bini.
NUM 21:10 Isaraele wali agali dindi dindi ogoria Obodi dindini anda puwa balai anda bu hene.
NUM 21:11 Ogoriani halu puwa wali agali nahe anda bambaore hene wiagoria Abarimini Moabaliru dindi ni ibiragohayagi handa amu halu puwa balai anda bu hene.
NUM 21:12 Ani bialu puwa Seredinaga dindi ulini wiagoha anda bu hene.
NUM 21:13 Ogoriani howa pialu iba Anono porago domalu puwa angeni anda bu hene. Dindi ogoni wali agali nahe hangu wima puabo halu Amoroali dindiha wima puabo ka. Amoroali Moabalilanaga dindi tu Iba Anono handa nga.
NUM 21:14 Irane Anduane Homogonaga Wai Biagane Bite Mbugani howa lo wialu lalu, Waheba tano Subahayagibi dindi ulini wiaruhabi iba Anonohabi
NUM 21:15 dindi ulini wiarunaga barebare wiaruniha howa pialu Ara tanoni pia ho wini. Ani pialu Moabali baba tuhayagi pene, lalu gilibu wini.
NUM 21:16 Ogoriani howa pialu tigua dindi ogoni mini Iba Biragane Uli laga wiagoria pene. Ogoriani howa Anduane Homogohanda ala lalu, Iba muliya wali agali bibahende haru ngoai hadaba, lene.
NUM 21:17 Ogoningi Isaraele wali agalime iba gana ogodagua lene. Iba Biragane uliru-o iba biru to̱ ladaba. Iname de handalu turu howa iba gana loleberema.
NUM 21:18 Iba Biragane Uli kini iginirume wene. Wali agali haru hagarumebi wene. Kininaga gewame wene. Tininaga halimburume wene, lalu iba gana lene. Ani lalu tigua wali agali nahe biagoria howa Madanahayagi pene.
NUM 21:19 Madanani howa Nahaliele pene. Nahaliele howa Bamodo pene.
NUM 21:20 Bamodo howa dindi ulini Moaba wiagoha pene. Ogoni Hari Pisiga andaneha winigo ogoriani howa dindi ko wali agali nahe wiago handa amu howa wini.
NUM 21:21 Isaraeleali biaru tigua bi yalu piaga marume bi Amoroalinaga Kini Sihono hearia yalu pudaba lowa lalu,
NUM 21:22 Ina tí daluni pu bolangua holoma̱ya henge ngi. Inamebi inanaga nogo bulumaga haru kamarumebi hariga tene yu wahalu tínaga mabu ngemiruhabi gerebi gama ngemiruhabi pu a̱i̱ na̱i̱ nabuleberema. Tínaga iba naga uli ngamirubi nanoleberema. Kini hariga tene haiweni hangu piaho wialu tínaga dindiha henge ngeremidagua poloma̱ya, lene.
NUM 21:23 Tigua ani hale hayagola Sihonohanda, Dindi henge nangule, lene. Ibugua ibunaga ami mo mogo bialu wali agali nahe dindi Yahase wiagoria tagira puwa Isaraeleali biaru baba wai bule ibini.
NUM 21:24 Wai bule ibiyaruni Isaraeleali biarume dewaore balu dindi Iba Anono howa uyurahayagi Iba Yabogo Amonoali baba tubaria wiago ti karulai hene. Amonoali ti ami agali hongohe howa tinaga dindi tubaria bayuwa mamage haga hene.
NUM 21:25 Isaraeleali biarume Amoroali biarunaga tano timbuni wiaru bibahende karulai hene. Hesebonobi tano emene emene uruniha wiapara para biaruni bibahendebi karulai hene.
NUM 21:26 Amoroalirunaga Kini Sihono ibunaga tano timbuni Hesebono winiya. Kini Sihono ibugua Moabalirunaga kini ala heneyago baba wai bialu dindi wiago damene bibahende karulama pialu Iba Anono bereagoria karulairi ho wini.
NUM 21:27 Ani binidagonaga Moabalinaga bi bulene mbira iba gana laga hearume lalu, Tí Kini Sihononaga tano Hesebononi ibidaba. Gialabaga bu ngaru hongohe helo lone biadai birane hondole hamelo kama.
NUM 21:28 Bamba Hesebono tano ogoriani howa Sihononaga amime wai gibi irame bo daradagua bialu Moaba dindini Ara tano bo haealabaga bini. Iba Anono manehayagi harini palearu bo gamu haradagua bini.
NUM 21:29 Moaba wali agali tíha mo ko holene wulebiragonaga daraho kama. Irane tígua dama Kemoso bi pupu wirimigome tíni mo ko harimi. Tínaga dama biagome agaliru dindi taraha pora bialu purogo lelene. Wali dameneru Amoroalinaga kini kagome ti minuwa ibunaga garabaya biabe ale bilo berelene.
NUM 21:30 Anigo áyu tinaga aguanenebi nde bo haealabaga biyada. Hesebononi howa bama pialu Dibono bo perelatagi hayada. Nasimu howa bama pialu Medeba hapara howa Nobani bo haeala tagi haya, lalu iba gana lene.
NUM 21:31 Ani bialu Isaraele wali agali biarume Amoroalinaga dindi karulo hene.
NUM 21:32 Ani howa Mosesehanda agali marume tano timbuni Yasere agua puwa babehedabe hondo wule wai taya pudaba, lene. Ani buwa Isaraeleali biarume Amoroali ogoriani paleneyaru bo purogo lalu tano maru ogoriani mandagi wia pagu biniyarubi bo purogo lene.
NUM 21:33 Ani bialu Isaraeleali biarume hariga mende Basana dindihayagi pole peagoria pene. Ani piyagola Basananaga Kini Ogahanda ibunaga ami haru halu Isaraele baba wai bule tagira pialu Ederini pene.
NUM 21:34 Anigo Anduane Homogohanda Mosesehondo lamialu lalu, Í̠na Kini Oga hondowa gi nahabe. Í̠na bai habelo hongo ngialu í̠naga giha wara ya harogo ibunaga dindibi wali agali bibahendebi bai holebere Amoroalinaga kini Hesebononi hearia birigodagua dege bulebere, lamini.
NUM 21:35 Isaraeleali biarume Kini Oga balu ibu iginirubi ibunaga wali agalirubi bibahende bo wahai halu mbiraliore yu wanahene. Ani bialu dindi winiyarubi ti karulai hene.
NUM 22:1 Isaraeleali biaru tigua puwa Moabanaga yu dindi mbira wiagoria iba Yodana peagoriani howa ni ibiragohayagi Yarigo iba Yodana ange mendehayagi ngela buwa anda bu hene.
NUM 22:2 Moabalinaga kini Sibo igini Balaga ibugua Isaraeleali biarume Amoroali biaruhondo ogodagua biya layago hale halu
NUM 22:3 Isaraele wali agali dagalabe nahe ka layagobi hale howa ibunibi ibunaga wali agali hearubi gi gibiore ho hene.
NUM 22:4 Moabali biarume Midiananaga haru haga hearuhondo lalu, Wali agali daga labe nahe niminamu lo karume wali agalibi dindibi mbirale o ngaru nogo bulumagame tani nai haradagua bialu bo haealabaga bulubada, lene.
NUM 22:5 Ani manda buwa Moabalinaga Kini Balagahanda, Bero igini Balama Amawali dindi Iba Yuberedisi hapara howa ibuni dalu Pedoroni kagohondo marume bi yalu pudaba, lalu bi ogodagua lene. Balama í̠na bi ogo manda bibelo langero. Wali agali maru Iyibi dindi howa tagira ibiniru áyu ti dindi bibahendeha haame halu inanaga dindi bibahende karulole ho manda manda bira.
NUM 22:6 Ti ina kamagobi ndo dewaore kago í̠na ti ha hole ibabelo hamelo ko. Í̠na ani beregola ti inanaga dindini nahelo bo peloleberema bada. Í̠na biriligo i̱na manda bido. Wali agali ha halu mo ko helo larego mo ko haga. Wali agali bayale helo lalu bi bayale larego bayale haraligoni, lene.
NUM 22:7 Moabali Midinialibi haru haga biarume Balagahanda bi lawia hayago mo yalu ha helonaga yolo mulene biarubi mo ya bialu Balama hearia puwa bi biago lamini.
NUM 22:8 Balama ibugua agali biaruhondo ladai bialu lalu, Áyu mbiraga ogoria palidaba. Yawi haragola Anduane Homogohanda langirago agua lara lalu languliya, lene. Ani layagola Moabalinaga haru haga biaru tigua mbiraga Balama heba palu hene.
NUM 22:9 Ani palu heagola Ngode Datagaliwabehanda Balama hearia ibuwa lalu, Agali í̠ heba o karuni aniali íbu kabe, lene.
NUM 22:10 Ani layagola Balama ibugua ladai bialu lalu, Moabalinaga Kini Balaga ibugua i̱ hewaria
NUM 22:11 wali agali maru Iyibi dindi howa ibuwa dindi o wiaru bibahendeha haame harago lalu lama pu leneyago ibinida. I̱na ha habe layayagoni ha harogome ibugua wali agali biaru bibahende balu bo waratagi hole lowa bi uruni yalu pu leneyago íbu ka, lene.
NUM 22:12 Ngode Datagaliwabehanda Balama lamialu lalu, Agali uru heba í̠ napobe. Isaraele wali agali ti i̱naga mo baya holene heba kago í̠na ha nahabe, lene.
NUM 22:13 Egerebagi hayagola Balamahanda Balaganaga bi yalu ibaga biaruhondo lamialu lalu, Anduane Homogohanda i̱ tí heba napobe layago tí andaga dai bidaba, lene.
NUM 22:14 Ani layagola bi yalu ibiyago biaru tigua dai buwa Balaga lamialu lalu, Balama ibu naibule laya, lene.
NUM 22:15 Ani layagola Balagahanda halu mende agali dewa o ibiyaru ale ndo agali haru haga mini leneore hearuhondo lalu, Balama hearia bi yalu pudaba, lene.
NUM 22:16 Tigua Balama hearia bi ogobi yalu pudaba lowa lalu, Balama o mbirale mbirame mo baragola hadai buleni i̱ koria abaleore ibabe.
NUM 22:17 Í̠ore homogo holenerume yolo bialu bia lareru buleberogo wali agali uruni ha hole ibabe, lene.
NUM 22:18 Anidagua layago hale howa Balama ibugua ladai bialu lalu, Balaga ibugua muni ngolo silibaru ibu andagaha ngaruni bibahende ngiai hayaguabi Anduane Homogo i̱naga Ngode Datagaliwabehanda ledago emeneoreyaguabi mo wa naholebero.
NUM 22:19 Anigo áyu tí ala maru ibalu piyadagua egerebagi pole palidaba. Áyu mbiraga Anduane Homogohanda bi mende agi langirabe hale holiya palidaba, lene.
NUM 22:20 Mbiraga ogoningi Ngode Datagaliwabe ibuwa Balamahondo lamialu lalu, Agali urunime í̠ ma layagua pole manda manda bibe. Anigo puwa i̱nime langerodagua hangu biai habe, lene.
NUM 22:21 Egerebagi hayagola Balamahanda ibunaga nogo dongini biralu Moabali haru haga biaru heba pene.
NUM 22:22 Balama pole piyagonaga Ngode Datagaliwabehanda ibuhondo keba hene. Ibunaga nogo dongini biralu biabe biahaga kirali heba pole piyagola Anduane Homogonaga dahuliyalime hariga pole biyagoria hapai helene.
NUM 22:23 Nogo dongi biagome dahuliyali mbira wai biagane ayu tibu yuwa harigani heago hondowa hariga ngelalu leneha pubagi pene. Ani biyagola Balamahanda nogo dongi biago balu hariga teneni haru dai bini.
NUM 22:24 Ani biyagola mani dahuliyali biago ibu gerebi mabu kira wiagolabonaga dombeneha ege to̱le̱me pabe ange kirabaliha buwa hariga dorogoneore winiyagoria pu hene.
NUM 22:25 Nogo dongi biagome o heago hondowa angeha pubagi halu hearia Balamanaga ge pabe biagola nogo dongi biagola gingidamaga howa dambini. Ani biyagola Balamahanda nogo dongi biago o bayadagua dege lone bene.
NUM 22:26 Dahuliyali biago ibu puwa hariga dorogoneore balalu polene nawi wiagoria hapai hene.
NUM 22:27 Nogo dongi biagome dahuliyali biago hapai heago hondowa hariga biagoriani palupe hene. Ani biyagola Balamahanda keba timbuni howa nogo dongi biago kango yiniyagome bene.
NUM 22:28 Ani biyagola Anduane Homogohanda nogo dongi biagohondo bi lolene wia hayagola ibugua Balamahondo lalu, I̱na í̠hondo agi birugonaga í̠na i̱ halu tebo baribe, lene.
NUM 22:29 Ani hale hayagola Balamahanda ladai bialu lalu, Í̠na i̱ agali lulu ale helarigonaga i̱na wai biagane ayu tibu yinidale nde í̠ áyu bo home ledole, lene.
NUM 22:30 Nogo dongi biagome ladai bialu lalu, Í̠ mali dewa i̱naga erekunini biraabo hariligo ogonidagua mbira birulibe, lene. Balamahanda ladai bialu lalu, Ogonidagua mbira nabiriligoni, lene.
NUM 22:31 Ani layagola Anduane Homogohanda Balamanaga de mo ngala hayagola dahuliyali mbira biago wai biagane ayu tibu yu heago hendene. Ani biyagola Balamahanda ibunaga wanakui dindihayagi yadindi howa bulu palu odo ibira hene.
NUM 22:32 Ani biyagola dahuliyali biagome Balamahondo hale halu lalu, Í̠na í̠naga nogo dongi halu tebo barigo aginaga baribe. Í̠ hariga porego napoleneha poregonaga hapai hole ibiru.
NUM 22:33 Ani birugola í̠naga nogo dongi biagome i̱ handalu hariga halu tebo pu tara haga biyagoni. Ibugua ani nabinidale í̠ balu í̠naga nogo dongi peledole, lene.
NUM 22:34 Balamahanda ladai bialu lalu, I̱na ko birugoni. Hariga porogo napobe lole í̠na hariga hapaihego manda nabi ibiruya. I̱na hariga ogoniha napobehedalo manda bideyagua wahalu andaga dai buliya, lene.
NUM 22:35 Ani layagola dahuliyali biagome lalu, Agali uruni heba pobe. Ani puwa bi i̱na langerogo hangu latagi habe, lene. Ani laya handala Balama ibu agali biaru heba pene.
NUM 22:36 Balama ibira layago hale howa Balaga ibugua Moabaliru baba tuni Iba Anono piyagoria Ara tanoni lola hole pene.
NUM 22:37 Lola howa Balagahanda Balamahondo lalu, I̱na pigane í̠hondo íbu laruyangi naibiriyago aginagabe. I̱na í̠hondo yolo timbuni ndo emene hangu ngulebira manda biribe, lene.
NUM 22:38 Balama ibugua ladai bialu lalu, Áyu ibirudagoni hendedebe. I̱niha hongo agi yu kobe. Ngode Datagaliwabehanda la larago hangu labehe kogoni, lene.
NUM 22:39 Ani lalu Balaga ibu Balama haru halu Husodo tano puwa
NUM 22:40 Balagahanda nogo bulumaga sibiru bo podowa maru Balamabi agali haguane maru ibu heba ibiniyarubi ti mini.
NUM 22:41 Egerebagi hayagola Balaga ibugua Balama haru halu Bamodo Bala dindini howa Isaraele wali agali maru hearu hendelo lowa haru halu irigi hene.
NUM 23:1 Balama ibugua Balagahondo lalu, Bo lomabu delaga dabu karia biaha. Biai howa nogo bulumaga wangabe kariabi nogo sibi wangabe kariabi haru ibalu bia, lene.
NUM 23:2 Balamahanda bia layadagua biai hene. Ani buwa Balama Balagala libu harume nogo bulumaga wangabebi nogo sibi wangabebi dabu mbira mbira biagoria ta howa bo lomabu delene.
NUM 23:3 Ani buwa Balama ibugua Balagahondo lalu, I̱na Anduane Homogo lola harabe hondole poro tagi í̠na í̠naga mbirale bo lomabu delarigoriani hondo habe. Ibugua mo walia harago damene bibahende langiai holebero, lene. Ani lalu ibugua hari hombene mbira wiagoria ibuni hangu pene.
NUM 23:4 Ogoriani pu hearia Ngode Datagaliwabe ibalu Balama lola hene. Ani lola hayagola Balama ibugua Ngode Datagaliwabehondo lalu, Lomabu delaga dabu karia biarunaga nogo bulumaga wangabebi nogo sibi wangabebi mbira dege dege karia bo delaru, lene.
NUM 23:5 Anduane Homogohanda ogodagua labe laya handala Balama ibu Balaga hearia lamule dai bini.
NUM 23:6 Dai buwa handalu hearia Balaga ibu mbirale bo delayagoria Moabali haguane biaru heba habe layagoria hearia hendene.
NUM 23:7 Balama ibugua mbiwia halu bi ogodagua lalu, Moabalinaga Kini Balaga ibugua i̱ haru ibini ko. I̱ Siria dindini ni ibiragohayagi harini hewaria haru ibuwa lalu, I̱naga bi lahole íbu, lene. Isaraele wali agali ha habe laya, lene.
NUM 23:8 Ngode Datagaliwabe ibugua ha nahe ngagoha i̱na ha agua holiyabe. Anduane Homogohanda mo ko nahe ngagobi i̱na agua mo ko holiyabe.
NUM 23:9 Ege to̱le̱ daliga wiagoria howa i̱na ti de hendedo. Hari nene wiagoria howabi ti de hendedo. Wali agali hameigini ti habagi haga ka. Ti wali agali tara tara kagobi ndo ti mo bayaleore henego mandabi ka.
NUM 23:10 Isaraelenaga aguanene abalu ngaligobi nga. Isaraele wali agali dewaliore ti dagala mibe nahe ka. Ngode Datagaliwabenaga wali agali horo hamaro biagadagua i̱ hoa ho ko. Mini tigabi karume mo palia holeneyi homaradagua i̱ homolene hamelo ko, lalu, Balamahanda mbiwia halu lene.
NUM 23:11 Ani layagola Balagahanda Balamahondo lalu, Í̠na i̱hondo agi biribe. I̱ ogoria haru halu ibirugo i̱naga waitigi agali karu ha habelonaga haru ibirugo í̠na ani nabi howa ti baya helo mo bayale holene bi hangu larigoni, lene.
NUM 23:12 Ani layagola Balama ibugua ladai bialu lalu, I̱na Anduane Homogo ibuninaga bi la larago hangu labehe kogoni, lene.
NUM 23:13 Balagahanda Balamahondo lalu, Isaraele wali agali dindi mendehayagi maru hangu karu handabeheni mbaliya íbu. Ogoriani howa ha habelo, lene.
NUM 23:14 Ani lowa ibugua Balama haru halu Sobimunaga dindi hari hombene Pisiga wiagoria haru pene. Ogorianibi bo lomabu delaga dabu karia buwa nogo bulumaga wangabebi nogo sibi wangabebi mbira mbira dege dege dabu biaru ta howa karia bo delene.
NUM 23:15 Balama ibugua Balagahondo lalu, Mbirale bo lomabu delarigoria hondo habe. I̱na Ngode Datagaliwabe lola hole naina porogo, lene.
NUM 23:16 Anduane Homogohanda Balama lola howa, Bi ogodagua labe, lalu, Ai Balaga karia lama dai bia, lene.
NUM 23:17 Balama ibu dai bialu hearia Balaga ibu mbirale bo lomabu delene biagoria Moabali haru haga maru heba hayagoriani ngadagua heneyane hendene. Balama daibiyagola Balaga ibugua, Anduane Homogohanda agua layabe, lalu hale hene.
NUM 23:18 Ani layagola Balamahanda mbiwia halu lalu, Sibo igini Balaga-o hale hole íbu. I̱na bi larogo hale hole íbu.
NUM 23:19 Ngode Datagaliwabe ibu ke̱ haga agali ale ndo ka. Ibu mini iriari biaga wali agali ale ndo kagoni. Ibugua mbirale mbira bule lo winigo biagaore. Ibugua bime laragola binidane handaga ka.
NUM 23:20 Ti bayale helo bi bayale labe i̱hondo laya. Ngode Datagaliwabe ibugua mo bayale henego i̱na mo beregedabe nahe.
NUM 23:21 I̱na de gandeba hondowa hondo bolangua halu koria Isaraele ti mani holebiragoria ko mbira nahondolebira. Anduane Homogo tinaga Ngode Datagaliwabe ibu ti heba ka. Tigua lalu, Ibu inanaga Kini ka, lalu latagi haga.
NUM 23:22 Ngode Datagaliwabe ibugua ti Iyibi dindi howa haru tagira ibini. Ibugua nogo bulumaga gabuame hongo hagadagua Isaraelenaga wai bia hole hongo haga ka.
NUM 23:23 Isaraele baba wai bulenaga hubibi bulenebi dama ndilalu bolenebi nakarulapeore holebira. Wali agali tarame Isaraele hondowa lalu, Ngode Datagaliwabehanda bia hayada handadaba, lolebira.
NUM 23:24 Isaraele wali agali gabua laiono ale hongo gibihe ka. Laiono ibu abale ha̱lo nabiraga ka. Ibugua dére ale mbira balu lerelabaga buwa bayagonaga mbirini darama heba nai haluore ha̱lo biraga ka, lalu Balamahanda mbiwia hene.
NUM 23:25 Ani layagola Balagahanda Balamahondo lalu, Ha nahole larigonigo ti mo bayale holeneyagi nalabe, lene.
NUM 23:26 Balama ibugua ladai bialu, Anduane Homogohanda bia larago ale biai hole larugo piganengi nalangiruyabe, lene.
NUM 23:27 Ani layagola Balagahanda Balamahondo lamialu lalu, Dindi teboneni howa agi larabe hondole mba íbu. Ngode Datagaliwabehanda í̠na dindi ogoriani howa ha haregola hale holebira badago, lene.
NUM 23:28 Ani lalu ibugua Balama haru halu Hari Peronaga neneni howa dindi ko iba dalu naibaga wiago handa gimbu bulene wiagoria haru pene.
NUM 23:29 Balama ibugua Balagahondo lalu, Bo lomabu delagane dabu karia biaha. Ani buwa nogo bulumaga wangabe karia nogo sibi wangabe karia lowa ogoria haru halu ibabe, lene.
NUM 23:30 Ani layagola Balaga ibugua Balamahanda layadagua bo lomabu delagane dabu karia biyagoria ta hai howa bo lomabu delene.
NUM 24:1 Odagoningi Balama ibu manda bialu hearia Anduane Homogohanda Isaraele wali agali bayaleore helo mo baya hole heago ibu manda buwa ibugua halaga abale biyadagua lone bule nape. Ibugua dindi ko iba dalu naibaga wiagohayagi wanakui handa amu howa
NUM 24:2 Isaraele wali agali hameigini hangu hangu headagua anda bu haga haga bu hearu hendene. Ani handa amu ho hearia Ngode Datagaliwabenaga Dinini ibuha daliyagola
NUM 24:3 ogodagua mbiwia hene. I̱ Bero igini Balamahanda mbiwia harogo I̱na ngagobi deme bayuwa ngoalia howa hondowa
NUM 24:4 Ngode Datagaliwabehanda bi larago hale halu Ngode Datagaliwabe Hongo Haiheore kagome de gandeba mo walia haragola i̱ de handaya ho wiaabo halu latagi haro.
NUM 24:5 Yagaba-o í̠naga balai anda baya gibioredane hendedo. Isaraele-o í̠ holeneore baya gibioredane hendedo.
NUM 24:6 Balai anda biaru duguni ayage ale mini dedi ho dugu haradagua hoyu pedane hendedo. Iba poraru angeni mabu wuyu poradagua bidane hendedo. Anduane Homogohanda ira mini aloru mabu ogoriani hengene mbauleda. Ira tamia iba ange ange hoyu poradagua bia.
NUM 24:7 Isaraele tinaga dindini dalu iba ho wiaabo holebira. Tigua dindi mo hini haragola tomo hongolebira. Isaraele tinaga kini ibu Agaga ale ndo ibu hongohe mini lene daligaore holebira. Ibunaga handame howa haru holene timbuni yangale daliga wulebira.
NUM 24:8 Ngode Datagaliwabehanda ti Iyibi dindi howa haru tagira ibiya. Ibugua bulumaga gabuame hongo hagadagua bialu tinaga wai bia hole hongo haga ka. Tinaga waitigirubi bo ibira hai halu Kuni gingiru lalu timubi bulubaga biaga.
NUM 24:9 Isaraeleali uruni gabua laiono hongo gibiorehe ale ka. Ogoni ibu padaria mbiralime barila hole ai kabe. Mbiralime Isaraele bayale helo mo bayale hayagua ibubi bayale holebira. Mbiralime Isaraele ko helo ha hayagua ibubi ko helo ha hene holebira, lalu Balamahanda mbiwia hene.
NUM 24:10 Balagahanda bi ogoni mbiwia hayagola Balama ibugua keba timbuniore howa ibunaga gi kirabali tanda lowa Balamahondo lalu, I̱na í̠ olarugo wali agali uruni ha habelo olaru. Anigo í̠na bi halu tebo larigoni bibahende bayale hangu lari.
NUM 24:11 Ai i̱ manga ho kogo wahalu dai bia. I̱na í̠ yolo buliya larugoni Anduane Homogohanda yolo biagoni namibelo mo wahayada, lene.
NUM 24:12 Ani layagola Balama ibugua ladai bialu lalu, Í̠naga agaliru i̱ hewaria bi yalu pu lariyaruhondo ogodagua larugoni ndobe.
NUM 24:13 Í̠na kini andagaha muni siliba ngolobi ngeru bibahende ngiai hariyaguabi Anduane Homogohanda langirago mo wahalu i̱ni hame ledodagua nabulebero. Anduane Homogohanda la larago hangu labehe ko lalu tihondo lamirugoni, lene.
NUM 24:14 Balamahanda Balagahondo lalu, Áyu i̱ i̱ninaga wali agali karia dai bulebero. Isaraele wali agali o karunime mani í̠naga wali agalihondo ogodagua bulebira lalu í̠ manda bu habelo mo walia haro.
NUM 24:15 Ani lowa ibugua mbiwia ogodagua lene. I̱ Bero igini Balamahanda mbiwia harogo I̱na ngagobi deme bayuwa ngoalia howa hondowa
NUM 24:16 Ngode Datagaliwabehanda bi larago hale halu Mbirali Daligaorene Daliga Kagome manda mo wia hene ko. Ngode Datagaliwabe Hongo Haiheore kagome de gandebaha mo walia haragola i̱ de handaya ho wiaabo halu latagi haro.
NUM 24:17 Mbirali hendedogo mani holebiragonaga de hondo ko. I̱na Isaraele hameigini de hendedo. Kini mbira yakundi ale hameigini uruniha howa tagira ibulebira. Ibunaga halimbu Isaraeleha howa tagira ibulebira. Kini ogoni ibugua Moabalinaga haguane tuguda hole bialu Sede hameiginiru mo ko hai holebira.
NUM 24:18 Ibugua ibu waitigi Idomo bo waholebira. Tinaga dindi karulowa ibunaga wulebira. Isaraelenaga hongo anda halu ha ho wiaabo holebira.
NUM 24:19 Isaraele hameiginirume bibahende karu bo hengeda hai holebira. Tano timbuni ogoriani yu wahene karu bo hilu wahai holebira.
NUM 24:20 Balama ibugua de gandeba handalu hearia Amalegealiru paleago hondowa mbiwia halu lalu, Ala Amalegeali ti hameigini bibahendenaga hongo bolangua hene. Mani ti bo ereba hai holebira.
NUM 24:21 Ani lowa Balama ibugua de gandeba dege handalu Kenialiru paleago hondowa mbiwia ogodagua hene. Kenialiru tí holeneore pabeme bu mabu bupeheda. Í̠naga anda hari nene ngaru obeneni ega hariaweme biradagua bu kamigonida.
NUM 24:22 Anigoyu Asiria tigua tí garabaya haru haragola tí bo haealabagabu waholebira.
NUM 24:23 Ani lowa Balama ibugua mbiwia halu bi ogo lalu, Ngode Datagaliwabehanda ogonidagua biragola bayale ai ibu habehebe.
NUM 24:24 Saibarasi agalirume iba taluni ibalu Asiriabi Eberebi bope hai holebira. Ani bulebirago mani tinibi ereba hai holebira, lene.
NUM 24:25 Ani lai howa Balama ibu heyalu ibuni andaga dai biya handala Balaga ibubi nde ibuni andaga pene.
NUM 25:1 Isaraele wali agali ti pialu dindi ulini tigabi mbira mini Sidimi wiagoha balai anda bu hene. Ani howa Isaraele agali hearume Moaba wali ogoniha berearu baba kayu yu palima ibaga bialu hene.
NUM 25:2 Ani bialu heagola wali uruni tigua Moaba wali agalime dama mitangi bialu bi pupu wulenaga gime wabini mini Bala lomabu miaga wiagoha Isaraelealihondo ibalimu laga bini. Ani layagola tigua Balahondo bi pupu wialu tomo lomabu mini wiaru nalu hene.
NUM 25:3 Anidagua bialu Isaraeleali tigua Pero dindini bi pupu wiaga mini Balahondo bi pupu wialu haga hene. Ani bialu hemiria hondowa Anduane Homogo ibugua tihondo keba hene.
NUM 25:4 Ani keba howa Anduane Homogohanda Mosesehondo lamialu lalu, Wali agali maru karume de hendelo agali haguane mbira mbira karu lamialu agali ko biaga uruni homelo irani bo gerela halimu. Tígua ogonidagua birimiyagua i̱na wali agali bibahendehondo keba naholebero, lene.
NUM 25:5 Ani layago hale howa Mosesehanda Isaraeleali agali haguane mbira mbira hearuhondo lamialu lalu, Tínime tínaga agali mana ko ngubi bialu Pero dindini mbirale bi pupu wulenaga gime wabini mini Bala ngagohondo bi pupu wiaga karu bibahende homelo bo wahai halimu, lene.
NUM 25:6 Mosese heba wali agali maru Anduane Homogonaga Balai Anda haneni dugu bialu berene. Ani biruwa handalu hemiria Isaraele agali mbirame Midiana wali mbira ibuninaga balai anda heagoha haru anda piyaria de hendene.
NUM 25:7 Loma binigo mo miaga Arono aguane Eleasa igini Piniasa ibugua wali agali ogonilabo ibiyago handa walia hene. Ani handalu wali agali berelalu ibunaga yandare winigo abale mo pene.
NUM 25:8 Mo yalu ibuwa wali agali biagolabo anda piyagoha haruru anda puwa libu homelo bo wahene. Ala Anduane Homogohanda Isaraele wali agali hearuha warago timbuni mbira ibilayagola wali agali daosini dege pira kirani maria (24,000) homai hene. Ani biyagola Piniasahanda wali agali biagolabo homelo bo wahayagola warago ko ogoni ereba hene.
NUM 25:10 Anduane Homogohanda Mosesehondo lamialu lalu,
NUM 25:11 Piniasahanda wali agali biagolabo homelo bo wahayagome i̱naga Isaraele wali agaliru baba keba nahe kogoni. Ani bayadagoni irane Isaraele wali agali tígua mbirale gime wabini ngagohondo bi pupu nawilimulonaga bayagoni. I̱na tí bialu halimulo hamelo kodagua ibuguabi Isaraele wali agali bu kamiru tígua i̱ni hanguhondo mitangi bialu lotu lalu halimulonaga ani biya. Anidagua biyagome i̱na wali agali bibahende bo wahai nahe waharugoni.
NUM 25:12 Áyu í̠na ibuhondo lamialu i̱na ibula habo nalolene bi mbira lo wialu i̱ni ibunaga nenegeore haabo holebero laya labe.
NUM 25:13 Ibugua anidagua biyagome ibunibi ibu waneigini aguanenerume i̱naga biabe bialu loma binigo mo ngiaga haabo holebira. Ani larogoni irane Piniasa ibugua Isaraele wali agali karume i̱ni yu wahalu puwa mbirale dama mitangi bialu gime wabini ngagohondo bi pupu wima pelo hame nale hayagonaga ani bulebira. Ani bialu i̱na wali agali uruninaga ko ngago domo waholiyanaga galone mbira biyane hondowa ani bulebero, lalu lamini.
NUM 25:14 Agali mbira Midiana wali biagola hearia bo wahayago ibu mini Simiri henego ogoni Piniasahanda bo wahene. Simiri ogoni ibu Simiono hameigini aria howa ibu agali haguane mbira mini Sulu henego igini hene.
NUM 25:15 Midiana walidago mini Kosobi berenego ogoni bene. Kosobi ibu Midiana dindinaga agali haguane mbira mini Sua henego wane berene.
NUM 25:16 Mani howa Anduane Homogohanda Mosesehondo lamialu lalu,
NUM 25:17 Tígua Midiana hameigini karu baba wai bialu mo ko halu bo wahalimu.
NUM 25:18 Ani larogoni irane tigua tí Pero dindini hemiria mo hondo halu ko timbuniore biyagobi wali Kosobi biago ibugua mana ko biyagonagabi tígua Midiana hameigini baba wai bilimu. Wali Kosobi ogoni tí Pero dindini warago timbuni balu hemiangi ibugua ko biyagonaga bo wahaya.
NUM 26:1 Warago timbuni tagira ibiyago ereba hayagola Anduane Homogohanda Mosesela Arono igini Eleasalahondo lamialu lalu,
NUM 26:2 Áyu libugua Isaraeleali lenego bibahende ami agali habeheru mali pira kira (20) henebi pira kira (20) bolangua hene karubi bibahendenaga mini gili biai halibu.
NUM 26:3 Ani layago hale howa Mosese Eleasalame Anduane Homogonaga bi layadagua talialu bini. Libugua agali mali pira kirabi (20) pira kira bolangua hene hearubi bibahende mini gilibu wule ibai hadaba layagola bibahende hale halu íbu ngoai ho hene. Ti Iba Yodana angeha Moaba dindi ulini tigabi wiagoria Yarigo tano kaware dege íbu ngoai hene. Tigua agali Iyibi dindi wahalu ibiyaru dagala handalu hemiria daga ogodagua tagira pene.
NUM 26:5 Yagaba igini wahene Lubene howa ibu damene ogodagua hene. Hanogobi Palubi
NUM 26:6 Heseronobi Kamibi uruni hene.
NUM 26:7 Agali mariali uruni tinaga aguanene heneru dagalamaga halu daosini dege pira mariani tebira halu handari kariani pira tebira (43,730) bibahende hene.
NUM 26:8 Palu ibu igini Eliaba hene.
NUM 26:9 Eliaba igini ogodagua hene. Nemuelebi Dadanabi Abiramabi henego ai wali agalime Abiramala Dadanala libu haru tinaga agali haguane dabo helearia libugua Mosese Aronolahondo mine halu libu Kora aria hearu baba hatago hene. Ani hatagoho howa ti bibahendeme Anduane Homogonaga bi doga haga hene.
NUM 26:10 Ani bialu hemiria dindi gaibuki bialu gundu uli timbuni mbira wiyagola agali mine hagane uruni bibahende dindi uli ogoniha haealape hai halu dindi lone gegebu dai buwa agali biaru dindime yi hai ho wahene. Agali uruni ti bibahende Kora halu ibu aria handari kirani pira duria (250) biaru irame dai hayangi dege ani homene. Anduane Homogohanda ibunaga wali agali bu hearu mini hongoheore wilo mo wiahalu tigua mana ko ogonidagua nabule lelonaga ani bini.
NUM 26:11 Anigo Kora igini hearu ti horo ogoningi nahome hene.
NUM 26:12 Simiono ibu hameigini ogodagua hene. Nemuelebi Yaminibi Yaginibi
NUM 26:13 Serabi Saulubi hene.
NUM 26:14 Agali duriali uruninaga aguanene daosini dege pira kirani kira halu handari kira (22,200) bibahende hene.
NUM 26:15 Gada hameigini ogodagua hene. Sebonobi Hagibi Sunibi
NUM 26:16 Osonibi Eribi
NUM 26:17 Arodobi Arelibi uruni hene.
NUM 26:18 Agali karia uruninaga igini aguaneneru bibahende daosini dege pira mariani handari duria (40,500) bibahende hene.
NUM 26:19 Yuda hameigini ti henego ogodagua. Selabi Peresebi Serabi Heseronobi Hamulubi uruni hene. Perese ibu Heserono Hamulula libu aba hene. Bamba Yuda igini kirali Erebi Onanabi Kenana dindiha howa homene.
NUM 26:22 Agali duriali uruni ti aguaneneru dagalamaga howa daosini dege pira kariani waragaria halu handari duria (76,500) bibahende hene.
NUM 26:23 Isaga hameigini ogodagua hene. Tolabi Pubabi Yasububi Simironobi hene. Puba hameigini tinime tini mini Punu laga hene.
NUM 26:25 Agali mariali uruni tinaga agali bibahende dagalamaga halu daosini dege pira waragariani maria halu handari tebira (64,300) bibahende hene.
NUM 26:26 Sebulunu hameigini ogodagua hene. Seredebi Elonobi Yalelebi tebirali hene.
NUM 26:27 Hameigini tebirali uruni tinaga aguaneneru bibahende daosini dege pira waragariani handari duria (60,500) bibahende hene.
NUM 26:28 Yosebe ibu igini kirali hangu Manase Eberaimila hene.
NUM 26:29 Manase hameigini ogodagua hene. Magiri ibu Manase igini howa ibuni Gileada aba hene. Gileada ibu damene ogodagua hene. Iesebi Helegebi
NUM 26:31 Asarielebi Segemebi
NUM 26:32 Semidabi Hebebi
NUM 26:33 Hebe igini Selobehada ibu igini mbira nahe wandari dege aba hene. Ibu wane mini Malabi Noabi Hogolabi Miligabi Tirisabi uruni berene.
NUM 26:34 Hameigini waragaria uruninaga agali daosini dege pira duriani kira halu handari karia (52,700) bibahende hene.
NUM 26:35 Eberaimi hameigini ogodagua hene. Sudelabi Begebi Tahanabi hene.
NUM 26:36 Ani henego Sudela ibu Erana damene henerunaga mamali hene.
NUM 26:37 Hameigini uruni tinaga agali daosini dege pira tebirani kira halu handari duria (32,500) bibahende hene. Eberaimi hameigini Manase hameiginila libunaga mamali mbiraore Yosebe hene.
NUM 26:38 Beniyamini hameigini uru hene. Belabi Asabelebi Ahiramabi
NUM 26:39 Sebubamabi Hubamabi hene.
NUM 26:40 Ani howa Bela ibu Ada hameigini Namana hameiginila mamali hene.
NUM 26:41 Hameigini duria uruni ti aria agali daosini dege pira mariani duria halu handari waragaria (45,600) bibahende hene.
NUM 26:42 Dana ibu hameigini mbiraore Husimi hangu hene.
NUM 26:43 Hameigini ogoni ibunaga agali daosini dege pira waragariani maria halu handari maria (64,400) bibahende hene.
NUM 26:44 Ase hameigini ogodagua hene. Iminabi Isibibi Beriabi hene.
NUM 26:45 Ani henego ai Beria ibu aguanene kira Hebela Malagielela hene.
NUM 26:46 Ase ibu wane mbira mini Sera berene.
NUM 26:47 Hameigini tebira uruni tinaga agali daosini dege pira duriani tebira halu handari maria (53,400) bibahende hene.
NUM 26:48 Nabadali aria ti hameigini ogodagua hene. Yaselebi Gunibi
NUM 26:49 Yasebi Silemebi hameigini maria uruni hene.
NUM 26:50 Ani henego tinaga agali bibahende dagalamaga halu daosini dege pira mariani duria halu handari maria (45,400) bibahende hene.
NUM 26:51 Isaraele hameigini bibahende agali dege dagalamaga hai halu daosini dege handari waragariani mbira halu handari kariani pira tebira (601,730) bibahende hene.
NUM 26:52 Mani howa Anduane Homogohanda Mosesehondo lamialu lalu,
NUM 26:53 Ai Isaraeleali hameigini mbira mbira ti wali agali kago manda bialu dindi ti karulape holobadago manda bialu tu wa tahabe.
NUM 26:54 Dindi tu wa taholenaga pigane ái harabe hondole ala ege to̱le̱ wiaru emeneni mini gili buwa baraga halu dindi podene mbira mbira ngago wali agali dewaliore harago ti dindi timbuni tu wa mialu wali agali daga emene harago ti dindi emene tu wa migi bibe, lalu Anduane Homogohanda lene.
NUM 26:57 Libai ti hameigini tebira Gesonobi Kohadabi Meraribi uruni hene.
NUM 26:58 Gesonobi Kohadabi Meraribi tinaga aguanene hameigini emeneru ogodagua hene. Libinibi Heberonobi Malibi Musibi Korabi hene. Kohada ibu Amarama aba hene.
NUM 26:59 Amarama ibu wali mbira Libai wane Yogebede berenego dabu bini. Yogebede ibu Iyibi dindini hemingi howa taba henenego berene. Yogebedehanda igiri kira taba henenego mbirago Arono mendego Mosesela taba henene. Ani bialu ibugua wandari mbiraore hangu Miriama taba henene.
NUM 26:60 Mani Arono ibu wali dabu bialu ibu oneme igiri maria mini Nadababi Abihubi Eleasabi Idamabi taba henene.
NUM 26:61 Nadaba Abihu libugua Anduane Homogohondo ira hagua ngabilo inisenesi lomabu delaga winidagua ndo delalu hebiria libu homene.
NUM 26:62 Libai hameigini igiri gali ege mbira bolangua henegoria howa agali damene bibahende dagalairi halu daosini dege pira kirani tebira (23,000) bibahende hene. Isaraele hameigini maru heba dagalamaga nahe Libai hameigini tini hangu dagalene. Anidagua binidagoni irane Isaraele hameigini maru biaruhondo dindi tu wa miyadagua ti dindi tu wa namiyagonaga ani bini.
NUM 26:63 Mosesebi Eleasabi Isaraele agali bibahendebi Yarigo tano abene uyurahayagi Iba Yodana ange dindi ulini tigabi Moaba dindi wiagoria howa libugua mini uruni gili bialu dagalene.
NUM 26:64 Abale pigane Mosese Aronolame dindi ko iba dalu naibaga Sainai dindi wiagoria howa Isaraele agali bibahende dagalai hene. Daga halu mende ogoni layangi agali Mosesehanda ala mini gili bini uruni aria mbira naheneore.
NUM 26:65 Bamba Anduane Homogohanda Mosesehondo lamialu lalu, Agali uruni ti dindi ko iba dalu naibaga ngagoha howa homai holebira, lalu lamini. Ani lenego lola halu agali ala hene uruni bibahende homai hene. Anigo agali kirali Yabune igini Kalebela Nunu igini Yosuala dege nahome haabo hene.
NUM 27:1 Selobehada ibu Hebe igini hene. Ani bialu Hebe ibu Gileada igini hene. Gileada ibu Magiri igini hene. Ani bialu Magiri ibu Manase igini halu Manase ibu Yosebe igini hene. Selobehada ibu wali dabu bialu ibu oneme wandari duria taba henene. Wandari uruni mini Mala Noa Hogola Miliga Tirisa imaru uruni berene.
NUM 27:2 Wandari uruni tigua puwa Anduane Homogonaga Balai Anda heago haneni pu howa Mosesebi loma binigo mo miaga Eleasabi Isaraele wali agali bu hearubi tinaga deni pu hene. Ani pu howa wandari uruni tigua lalu,
NUM 27:3 Ina aba dindi ko iba dalu naibaga wiagoha homayagoni. Ibu agali mine halu Anduane Homogo kagohondo erembira miaga Kora aria ndo hene. Ibunime ko tara binigome ibu igini mbira nahonowi halu homayagoni.
NUM 27:4 Ibunaga mini ereba nahe wiaabo helo ibu igini mbira nahedago ai ina Isaraele hameigini kamaruni aria mbirago homo amolelo waholene karulapedabe. Anidagua bulene nakarulapedago ina abanaga dindi podo wini ngago inane mo ngilimulo hamelo kamagoni, lalu lamini.
NUM 27:5 Ani layagola Mosesehanda tinaga bi layago hale howa Anduane Homogohondo bi la halu hene.
NUM 27:6 Ani la hayagola Anduane Homogohanda ladai bialu lalu,
NUM 27:7 Selobehada wane urunime tinaga bi layadagoni tigabioredago ti aba damenerunaga dindi ngago tini helo mo milimu.
NUM 27:8 Isaraele hameigini karuhondo ogodagua labe. Agali mbira ibu igiri nahonowi wandari hangu aba heneyagua nde wandari uruni ti abanaga dindi tini helo mulene nga.
NUM 27:9 Ibu wanebi mbira nahonowi dege homayagua ibu hamene karume karulolene wulebira.
NUM 27:10 Ibu hamene naheyagua nde ibu aba hamene karume karulolene nga.
NUM 27:11 Ai ibu hamene nahe aba hamenebi naheyagua nde ibu hameigini kagome karulolene nga. Isaraele wali agalirume I̱ Anduane Homogo i̱na bi áyu langerogodagua baya hangu talialu bulene nga, lalu Anduane Homogohanda lene.
NUM 27:12 Anduane Homogohanda Mosese lamialu lalu, Hari Abarimini irigi howa dindi Isaraele wali agalihondo muleberogo amu ngagonigo handa amuha hole pu.
NUM 27:13 Hondowa í̠ hamene Arono homayadagua í̠bi homoleberego irane
NUM 27:14 Sini dindi ko wali agali nahaga Meribani howa wali agali hearume gomogomo dewa lene. Ani layangi libu kirabalime i̱naga bi larugo mo wahowa i̱naga hongo holene tigabi ogobi lalu mo walia naharibigonaga í̠ homolebere, lene. Iba Meriba ogoni dindi ko wali agali nahaga Sini dindiha dindi emene mbira Kadese ngagoria dugualu pora.
NUM 27:15 Mosesehanda Anduane Homogohondo bi ogodagua lalu.
NUM 27:16 Anduane Homogo Ngode Datagaliwabe-o wali agali bibahendenaga holene tene í̠ kegoni. Í̠naga wali agali nogo sibi haru haga nahe mbaule holigo agali mbira dababelo. Agali ogoni ibugua wali agali haru helobi wai birangi haru bamba helobi ani dababelo hameledo, lene.
NUM 27:18 Ani layagola Anduane Homogohanda Mosesehondo lalu, Nunu igini Yosua ibu miniwi kago ibunaga haguaneni gi wibe.
NUM 27:19 Loma binigo mo miaga Eleasa halu wali agali bibahende kagoria Yosua helowa í̠na biabe bibahende biriligo ibugua bia aribia helo lalu bibahendenaga deni latagi habe.
NUM 27:20 Isaraele wali agali bibahendeme ibunaga bi larago hale halu bilo í̠naga hongo maru ibuhondo mibe.
NUM 27:21 Anigo Yosua ibugua i̱naga hame hondole lowa loma binigo mo miaga Eleasa karia puwa ibunaga deni holebira. Eleasa ibugua ege to̱le̱ kira manane handagane mbira mini Urimu mende mini Tumimu ogonilabome i̱naga hame mo walia holebira. Ani walia haragola hondowa Eleasa ibugua Yosuahondobi Isaraele wali agali bibahendehondobi ogo ale bidaba lalu lamulebira, lene.
NUM 27:22 Mosesehanda Anduane Homogohanda layadagua bibahende biai hene. Ibugua Yosua haru puwa loma binigo mo miaga Eleasabi Isaraele wali agali bibahendebi heagoria haru íbu helene.
NUM 27:23 Anduane Homogo ibugua bibe layadagua Mosese ibugua Yosuanaga haguaneni gi wialu, I̱na biabe biagane bibahende ngaru í̠na bialu habelo, lalu lene. Ani layagola Yosua ibugua Isaraele wali agalinaga haru hagane ha aribia hene.
NUM 28:1 Anduane Homogohanda Mosese lamialu,
NUM 28:2 Bi ogo Isaraele wali agalihondo lamibe. Isaraele wali agali tígua lomabu delaga dabu ngagoria tomo bibahende bu delalu kamiru nga bayale bilo bu delaga bilimu. I̱na loma ogoaleru hame laruli. Loma uruni i̱nime horo ogoningi bilimu lalu langirugo tagira ibirangi biaabo halimu.
NUM 28:3 Mosese-o Isaraele wali agali bu karuhondo bi ogodagua lamibe. Tígua Anduane Homogohondo loma uruale bu mulene nga. Horo bibahendengi nogo sibi igini wangabe kira dere durubi nabi mali mbira hangu hene hungubalua kago loma bialu bo delaga bilimu. Nogo sibi ogonilabo irani dai helo loma bialu bo delalimu.
NUM 28:4 Sibi kira ogonilabo mendego egerebagi bo delalu mendego alendo bo delalimu.
NUM 28:5 Egerebagi bo delolenaga nogo sibi mbira biago heba widi bayaleore dambinigo balawa genda magi kilogarama mbira olibe lininaga weli bayaleore odo biamaga hene ngago heba delalimu.
NUM 28:6 Horo bibahendengi loma ogonidagua buwa irani dalu do ira punga helo delalimu. Bamba tígua Hari Sainaiha hemingi nogo ogonibiore pigane loma bialu bo delaga birimigola Anduane Homogohanda loma uruni nga bayale biyagola ibunaga bu miniha turu howa dungulo haga hene.
NUM 28:7 Loma uruni bu delalu howa waini iba be mbira nogo sibi igini mbira egerebagi loma bialu bo delarago heba delalu waini iba maru lomabu delaga dabu ngago lenelene odo pehaga bulene nga.
NUM 28:8 Anidagua bialu alendo nogo sibi igini mendego loma bialu bo delalu balawabi waini ibabi egerebagi lomabu delarimidagua dege delolene nga. Loma ogoni irame dai helo egerebagi delarimidagua dege delaramigola Anduane Homogohanda nga baya biragola turu halu ibunaga bu miniha dungulo helo ani delalimu, lalu lamini.
NUM 28:9 Anduane Homogohanda Mosese ibugua Isaraele wali agali bu hearu lamilonaga ibuhondo lamialu lalu, Sabada horongi nogo sibi igini wangabe kirago mali mbira hene dere durubi nabi kago hondowa loma bialu bo delalimu. Ogoni heba widi bayaleore dambinigo balawa genda magi kilogarama kira olibe lininaga weli heba odo biamaga henebi waini ibabi nogo sibi kira ogolabo heba lomabu delalimu.
NUM 28:10 Sabada horo bibahendengi loma irani dai helo ogonidagua lomabu delaabo halimu. Ani bialu loma irani dai helobi waini iba odo delalu lomabu delolenebi horo bibahendengi egerebagi alendobi delaga wirimidagua delaabo halimu, lalu lamini.
NUM 28:11 Anduane Homogohanda Mosesehondo lamiaabo halu lalu, Ege bibahende pigane ngabulo kagola ogoningi Anduane Homogohondo loma irani dai helo bu delaabo haga bilimu. Tígua irani lomabu delolene horo tagira ibugu biragola nogo bulumaga wangabe kirabi sibi wangabe mbirabi sibi igini wangabe mali mbira hene kariabi tinaga tingini dere durubi nabi bayale kago loma bialu bo delalimu.
NUM 28:12 Tígua lomabu delalu howa widi loma bini heba delalimu. Bulumaga mbira mbira lomabu delaga beremigo bialu howa widi bayaleore dambinigo aria balawa genda magi kilogarama tebira olibe lininaga weli odo biamaga hene ngaru heba lomabu delalimu. Sibi wangabe biago bo lomabu delalu howa balawa bayale genda magi kilogarama kiraha olibe lininaga weli heba odo biamaga halu lomabu delalimu.
NUM 28:13 Ani bialu sibi igini mbira mbira loma bialu bo delalu howa balawa bayale genda magi kilogarama mbira dege dege sibi igini biaru heba lomabu delalimu. Nogo uruni irani dai helo bo delolene nga. Loma uruninaga nga baya birago nga howa Anduane Homogo ibugua turu halu miniha dungulo holebira.
NUM 28:14 Bulumaga wangabe mbira mbira bo delaramigo heba waini iba be kira odo lomabu delalu sibi mbira heba waini iba be mbirani mende gombedene odo delaga bulene nga. Nogo sibi igini biaru mbira mbirani waini iba be mbira mbira odo lomabu delaga bulene nga. Mali bibahendengi ege bibahende ngabulo kagola horo pigane haragola tígua loma ogonidagua biaabo holene nga.
NUM 28:15 Ani bialu horo bibahendengi nogo irani dai helonaga loma waini iba heba delaramiligo ogoni heba nogo meme wangabe mbira bo loma bialu tínaga ko ngago domo wahelonaga delamaga holene nga. Ege bibahendengi horo pigane tagira ibiragonaga lomabu delolenego uruni, lalu lamini.
NUM 28:16 Anduane Homogohanda Mosesehondo laabo halu lalu, Mali gahengenaga ege pigane horo dene (14) haragola horo ogoni Bolangua Halu Penegonaga Horo mitangi bu holene wulebira. Horo ogoningi Anduane Homogohanda Isaraele wali agali nabe bolangua halu penego mitangi bialu ibunaga mini mo yaraga halu holene nga.
NUM 28:17 Ani bialu horo nguini (15) haragola lotu lalu holene horo pigane ogoningi howa horo karu ani biaabo holene wulebirago manda bialu mberedi yidi nahe hirinigo dege nolene nga.
NUM 28:18 Horo pigane ogoni timbuni mbira ngago wali agalime biabe maru bulene nawi Anduane Homogo mitangi bialu lotu lole horo pigane ogoningi íbu ngoai holene nga.
NUM 28:19 Horo ogoningi Anduane Homogohondo lomabu migi bialu halimu. Nogo bulumaga wangabe kirabi sibi wangabe mbirabi sibi igini hungubalua karia mali mbira hangu hene karubi nogo uruni bibahende dere durubi nabi karu bo loma bialu irani dai helo delolene nga.
NUM 28:20 Nogo uruni heba widi bayale dambinigonaga balawa lomabu miaga ngagobi milimu. Balawa ogoni olibe lininaga weli heba odo biamaga howa lomabu milimu. Bulumaga mbira heba balawa genda magi kilogarama tebirabi sibi wangabe mbira biago heba balawa kilogarama kirabi
NUM 28:21 nogo sibi igini karia biaru heba balawa kilogarama mbira mbira lomabu mulene nga.
NUM 28:22 Ani bialu meme wangabe mbira ko domo wahelonaga loma bialu bo delolene nga. Loma ogoni bo delalu howa wali agali bibahende i̱naga deni dodo nahe bayale helonaga mana bulene nga.
NUM 28:23 Tígua horo bibahendengi egerebagi loma bialu bo delaramilidagua loma uruni heba delamaga halimu.
NUM 28:24 Loma urunidagua bu migi bialu horo karu bibahendengi ani bialu haabo kamigola Anduane Homogohanda nga baya biragola ibu turu howa miniha dungulo holebira. Ani bialu irani dai helo lomabu delolenebi waini iba odo lomabu mulenebi tígua horo bibahendengi biaabo haga wiyadagua bulene nga.
NUM 28:25 Ani bialu horo kanengi lone íbu ngoai howa i̱ mitangi bialu lotu lalimu. Ani bialu horo ogoningi biabe maru ngago bulene nawigo nabilimu, lalu Anduane Homogohanda lene.
NUM 28:26 Anduane Homogohanda Mosesehondo lamialu lalu, Mabuha Widi Lini Denego Gandu Lolene Horo tagira ibiragola ogoningi tígua turu howa Anduane Homogohondo widi gandu laramigo lomabu milimu. Ani bialu tíni mo mogobu howa Anduane Homogo mitangi bialu lotu lalimu. Horo ogoningi biabe tara ngaru bulene nawi.
NUM 28:27 Bulumaga wangabe kirabi sibi wangabe mbirabi sibi igini mali mbira hangu hene kariabi uruni bibahende dere durubi nabi karu haru ibalimu. Nogo uruni haru ibuwa loma bialu irani dai helo bo delalimu. Loma ogoni alego nga bayale biragola Anduane Homogohanda nga howa turu halu ibunaga bu miniha dungulo holebira.
NUM 28:28 Lomabu mulenenaga widi dambuwa balawa bayaleme olibe lininaga weli odo biamaga hene ngago heba lomabu milimu. Ani bialu nogo bulumaga wangabe mbira mbirabi balawa genda magi kilogarama tebira heba lomabu miai howa sibi wangabe biago heba balawa kilogarama kira lomabu milimu.
NUM 28:29 Nogo sibi igini wangabe karia biaru mbira mbira heba balawa kilogarama mbira dege dege lomabu milimu.
NUM 28:30 Ani bialu nogo meme wangabe mbira ko domo wahalu wali agali Anduane Homogonaga deni dodo nahe helonaga lomabu bo delalimu.
NUM 28:31 Tígua loma uruni bo delole howa nogo uruninaga tinginini dere durubi nabi bayale kago hondowa lomabu bo delalimu. Ani buwa waini iba odo lomabu delolenebi irani dai helo lomaru bu delolenebi widi lomabu delolenebi horo bibahendengi delaga winidagua delaga bilimu, lalu Anduane Homogohanda lene.
NUM 29:1 Anduane Homogohanda Mosese ibugua wali agali lamilo bi lamialu lalu, Ege kanenaga horo mbira haragola tígua biabe ngaru nabi wahalu lotu lole íbu ngoai halimu. Horo timbuni ogoningi Mbelo Biguliru Pu Lolene ngagoni.
NUM 29:2 Ani íbu ngoaiho howa Anduane Homogonaga loma binigo irani dai helo delalimu. Loma ogoni alenaga nga baya biragola Anduane Homogo ibu nga howa turu haga ka. Ai tígua bulumaga wangabe mbirabi sibi wangabe mbirabi sibi igini wangabe karia mali mbira hangu hene karubi uruni bibahende tinginini dere durubi mbira nabi karu hondowa loma bialu bo delalimu.
NUM 29:3 Loma ogoni bo delalu howa widinaga balawa heba lomabu delalimu. Balawa bayaleore olibe lininaga welibi heba odo biamaga hene ngago lomabu delalimu. Balawa genda magi kilogarama tebira bulumaga wangabe biago heba lomabu delalu sibi wangabe biago heba balawa genda magi kilogarama kira heba lomabu delalimu.
NUM 29:4 Ani bialu sibi igini karia biaru mbira mbira heba balawa bayale biaru aria kilogarama mbira dege dege delalimu.
NUM 29:5 Ani bialu nogo meme wangabe mbira wali agali tinaga ko domo wahelonaga lomabu bo delalimu. Anidagua beremigome wali agali ti i̱naga deni dodo nahe bayaleore holebira.
NUM 29:6 Tígua uruni lomabu delalu howa loma irani dai helobi widi lomabi ege mbira mbiranaga horo mbira haragola delaga wirimidagua bu delalimu. Ani bialu horo bibahendengi loma irani dai helo lomabu delalu widi lomabu delalu waini iba odo loma bialu delo tago haga bialu delalimu. Anduane Homogohanda loma uruni nga howa turu halu ibunaga bu miniha dungulo holebira, lene.
NUM 29:7 Anduane Homogohanda Mosesehondo bi lamialu lalu, Ege kanegonaga horo pini haragola tígua íbu ngoai howa i̱ mitangi bialu lotu lalimu. Horo ogoningi tígua tomo nane howa biabe bulene ngarubi nabi dege halimu.
NUM 29:8 Ani bialu nogo bulumaga wangabe mbirabi sibi wangabe mbirabi sibi igini hungubalua karia mali mbira hangu hene karubi uruni bibahende dere durubi mbira nabi lomabu milimu. Uruni Anduane Homogohondo lomabu mialu irani dai helo delalimu. Ani bo deledemigola Anduane Homogohanda loma uruninaga nga bayale birago nga howa turu timbuni holebira.
NUM 29:9 Ani bialu widi lomabu delolenebi loma irani dai helolenebi bu delaga bilimu. Widi bayalenaga balawa olibe lininaga weli heba odo biamaga hene ngago lomabu delalimu. Bulumaga mbirago heba balawa kilogarama tebira lomabu delalu sibi wangabe mbira biagobi balawa kilogarama kira heba lomabu delalimu.
NUM 29:10 Nogo sibi igini hungubalua karia biaru mbira mbira biaru heba balawa kilogarama mbira dege dege lomabu delaga bilimu.
NUM 29:11 Ani bialu nogo meme wangabe mbira wali agalinaga ko ngaru domo wahai helonaga loma bialu bo delalimu. Anidagua biragome wali agali tí Anduane Homogonaga deni dodo nahe bayale holenaga loma uruni bu delaga dege bulene nga. Loma horo bibahendenaga lomabu delaga ngago irani dai holene lomabi widi lomabu delolenebi waini iba odo lomabu delolenebi bibahende uruni beramilidagua lomabu miai halimu, lene.
NUM 29:12 Anduane Homogohanda Mosesehondo bi lamiaabo halu lalu, Ege kanenaga horo nguini (15) haragola tí mo ngoai howa Anduane Homogo mitangi bialu lotu lalimu. Tígua lotu lolene ogoni horo timbuni karia ngagoha mo ngoaiho howa ani lalu halimu. Horo uruningi biabe damenego bibahende nabi halimu.
NUM 29:13 Horo karu uruninaga horo pigane haragola Anduane Homogohondo loma urualeme lomabu mialu nga bayale biragola ibugua nga howa ibu miniha turu holebira. Tígua loma uruni nogo bulumaga wangabe daluaru haleria (13) bo lomabu mialu sibi wangabe dalua kira bo lomabu mialu sibi igini wangabe hongolo deria (14) mali mbira hangu heneru lomabu mialu bo delalimu. Nogo uruni bibahende dere durubi nabi bayale karu hondowa haru halu ibugu bilimu.
NUM 29:14 Ani bialu widinaga balawa bayale ngarume olibe lininaga weli heba biamaga hene ngago aria lomabu milimu. Bulumaga mbira mbira heba balawa kilogarama tebira dege degebi sibi wangabe mbira heba balawa kilogarama kirabi
NUM 29:15 nogo sibi igini hongolo biaru mbira mbira heba balawa genda magi kilogarama mbira dege dege lomabu mialu waini ibabi odo loma bialu delo tago halimu.
NUM 29:16 Ani mialu meme wangabe mbira ko domo wahelonaga loma bialu bo delalimu. Horo bibahendengi lomabu delaga ngagobi heba delamaga halimu. Loma uruni irame dai helo lomabu delolenebi widi lomabu mulenebi waini iba odo mulenebi uruni biai halimu.
NUM 29:17 Horo karia biarunaga horo mende haragola nogo bulumaga wangabe dalua homberia (12) biarubi sibi wangabe kirabi sibi igini wangabe deria (14) mali mbira hangu hene biarubi uruni bibahende dere durubi mbira nabi bayale karu loma bialu bo milimu.
NUM 29:18 Loma urunibi heba horo piganengi lomabu mini biaru muleberamidagua mia dege bilimu.
NUM 29:20 Ani bialu horo tebonengi bulumaga wangabe beariabi (11) sibi wangabe kirabi sibi igini wangabe deria (14) mali mbira hangu heneru uruni bibahende dere durubi mbira nabi kago hondowa lomabu milimu.
NUM 29:21 Loma urunibi heba horo piganengi lomabu mini biaru muleberamidagua mia dege bilimu.
NUM 29:23 Horo manengi bulumaga wangabe pirabi sibi kirabi sibi igini hungubalua deria (14) mali mbira hangu hene karubi uruni bibahende dere durubi mbira nabi kago loma bialu bo delalimu.
NUM 29:24 Loma urunibi heba horo piganengi lomabu mini biaru meramilidagua mia dege bilimu.
NUM 29:26 Ani bialu horo dauningi bulumaga wangabe dirabi sibi wangabe kirabi sibi igini wangabe deria (14) mali mbira hangu hene karubi uruni bibahende dere durubi mbira nabi karu loma bialu bo milimu.
NUM 29:27 Loma urunibi heba horo piganengi lomabu mini biaru meramilidagua mia dege bilimu.
NUM 29:29 Horo waraganengi tigua bulumaga wangabe halirabi sibi wangabe kirabi sibi igini hungubalua deria (14) mali mbira hangu hene karubi uruni bibahende dere durubi mbira nabi karu loma bialu bo milimu.
NUM 29:30 Loma urunibi heba horo piganengi lomabu mini biaru meramilidagua mia dege bilimu.
NUM 29:32 Ani bialu horo kanengi bulumaga wangabe kariabi sibi wangabe kirabi sibi igini wangabe deria (14) mali mbira hangu hene karubi uruni bibahende dere durubi mbira nabiore karu hondowa loma bialu bo mulene nga.
NUM 29:33 Loma urunibi heba horo piganengi lomabu mini biaru meramilidagua mia dege bilimu.
NUM 29:35 Ani bialu horo halini haragola biabe maru ngaru nabi wahalu Anduane Homogo mitangi bialu lotu lole íbu ngoai halimu.
NUM 29:36 Ani ngoai howa tígua Anduane Homogonaga tomo lomaru bu milimu. Loma uruninaga nga bayaleore biragola Anduane Homogo ibu nga howa turu timbuniho holebira. Anigo tígua bulumaga wangabe mbirabi sibi wangabe mbirabi sibi igini wangabe dege karia mali mbira hangu hene karubi uruni bibahende irani dai helo loma bialu bo delalimu. Nogo loma uruni bibahendeore dere durubi mbira nabi karu loma bialu bo mulene nga.
NUM 29:37 Loma urunibi heba horo piganengi lomabu mini biaru meramilidagua mia dege bilimu.
NUM 29:39 Anduane Homogonaga horo timbuni maru ibu mitangi bialu ibunihondo lotu lolene tagira ibirangi lomabu mulenenaga mana ogoni talialu bilimu. Irani dai helo lomabu mulenebi widi lomabu mulenebi waini iba odo loma bulenebi Anduane Homogola ho gimbu bulenaga lomabu mulenebi uruni bibahende horo timbuni ibunaga dabobagiho wini ngangi anidagua bialu halimu. Loma uruni bu mialu kamingi dege ibuhondo mule lalu lowini ngarubi tíninaga hameme lomabu mulene winiyaguabi uruni bibahende lomabu migi bilimu, lene.
NUM 29:40 Bi uruni bibahende Anduane Homogo ibugua Mosesehondo lamiyagola Mosesehanda hale hai howa Isaraele wali agali bu hearuhondo lamiai hene.
NUM 30:1 Mosesehanda Anduane Homogonaga bi uru agali haguane bu hearuhondo lamini.
NUM 30:2 Ibugua lalu, Mbiralime ibunaga mbirale ngaru ale mbira Anduane Homogo muleore lalu lo winiyaguabi mbirale mbira nabuleore lalu bi hongohe lo winiyaguabi nde ibugua bule lalu lowiyago habo nale buleneore nga.
NUM 30:3 Wandari mabuage mbira ibu ai̱ya aba andaga biraga biruwa ibugua mbirale mbira Anduane Homogo muleore lalu bi lo wiyaguabi mbirale mbira nabuleore lalu lowiyaguabi ogoni bayaleore mbira bulebira.
NUM 30:4 Wandari ogoni ibugua mbirale mbira bule lalu lo wiyadagua bulene nga. Ani bulene ngagoyu ibu abahanda wandari biagonaga bi lowiyago hale howa ani bulene nawi manda biya.
NUM 30:5 Ani manda buwa ibu abahanda wandari biagohondo, Buleore lalu lowirigo nabibe, layagua nde wandari biagome lowiyago waholene karulape nga. Ibugua ogo bule lalu bi lowiyago ibuni wahayago ndo ibu abahanda mo wahaya. Anidagua biyagome wandari ogoni biyagonaga Anduane Homogohanda domo waholebira.
NUM 30:6 Wandari mbira agali nape hibaria biruwa ibunaga minime ogoaleore berogoni lo mitangi bialu mbirale mbira nabuleore lalu bi lo wialubi bame dege lope howa buleore lalu lowiyaguabi layadagua bulene nga. Mani ibu agali piyagua ibu agalinime ibunaga bi lowiyadago hale howa nakarulapego manda buwa
NUM 30:8 ibu agalini haragome wali ogoni ibunaga bi lowirago nabi wahabe layagua nde waholene karulape. Ani wahayagonaga ko ngago Anduane Homogohanda domo waholebira.
NUM 30:9 Wali mbira ibu agalini homene dalo bereneyaguabi ibu agalinime wahene bereneyaguabi ibugua mbirale mbira buleore lalu bi lowiyaguabi mbirale mbira nabuleore lalu lowiyaguabi lo wiyadagua biai holebira.
NUM 30:10 Wali mbira ibu agali one biruwa ibugua mbirale mbira buleore lalu bi lowiyagua nde ogoni bayaleore.
NUM 30:11 Ibugua bi lowiyadagua biaiore holene nga. Ani lo wiyago hale howa ibu agalini ibugua wali ogonime lowiyago bayale ndo manda buwa
NUM 30:12 ibugua bi lowirangiore mo wahalu nabibe layagua nde wali biagome bule lalu lowiyago nabi waholebira. Anidagua biragonaga ko ngago ibunime ndo ibu agalinime mo wahayagome Anduane Homogohanda domo waholebira.
NUM 30:13 Wali ogoni ibugua bi lowiyago nabilo lalu ibu agalinime dege lolebira.
NUM 30:14 Anigo ibu agalinime wali biagohondo bi lowiyago waha nale hayagua nde horo mendengi wali biago ibugua bule lalu lowiyago layadagua bulebira. Ani bialu kagola nde ibu agalini biagome bi mbira nale hayago mitangi bialu ibu oneme bule lalu lowiyaruni talialu biaiore helonaga ibu one mo hongo haradagua bulebira.
NUM 30:15 Anigo wali biago ibu bule lalu bi lowiyago bialu karia ibu agalinime nabule lalu layagua nde wali biago ibu bule layago waharagome ko bini nga. Ko ogoni wali biago ibunime bero lalu bini ndo agali biago ibugua mo bia hene ngagome ibuni pani nolene wulebira, lene.
NUM 30:16 Mbirale mbira bule lalu lowinigo bulenenaga mana ogoni Anduane Homogohanda Mosesehondo bi lamini. Bi ogoale buleore lalu wali agali one bedarumebi wali hibaria berene bedarumebi wandari mabuage ibu ai̱ya aba andaga berene bedarumebi lo wulenenaga mana ogoni.
NUM 31:1 Anduane Homogo ibugua Mosese lamialu lalu,
NUM 31:2 Midiana hameigini padagome Isaraele wali agali tíhondo mana ko biyagonaga pani mulene nga. Tígua Midianali karu baba wai bialu tí wayali holeberami. Ani biai halu dai beramigola Mosese í̠ homolebere.
NUM 31:3 Ani layagola Mosesehanda Isaraele wali agali lamialu lalu, Wai biagane ale mo yalu Midianali bu karu baba wai bule pudaba. Midianali karume mana ko biyagonaga pani mialu tígua Anduane Homogohanda ani bo wahai hole pilimu layadagua pudaba.
NUM 31:4 Isaraele hameigini mbira mbira haga bidamidagua agali wai bule pelo daosini mbira (1,000) dege dege dabalu pelalimu, lene.
NUM 31:5 Ani layagola Isaraele hameigini mbira mbira hayadagua agali daosini homberia (12,000) bibahende wai bule pelo mo manda manda bu helene.
NUM 31:6 Ani manda manda bialu Mosesehanda loma binigo mo miaga Eleasa ibu igini Piniasa ibugua agali uruni haru helo ti haru pudaba lene. Piniasa ibugua Balai Andaha wiaru bibahende mo yuwa handayaho halu agali wai bule pelobi wai bialu dai bilobi ololenaga mbelo biguli pulagane wiago mo yalu ibini.
NUM 31:7 Ani bialu Anduane Homogo ibugua Mosesehondo bilimu lalu lamiyadagua tigua puwa Midianali hearu baba wai bialu agali biahende bo wahai hene.
NUM 31:8 Bo wahai halu Midiana dindiha kini duria henego mini uru Ebi Legeme Sua Hua Leba imaru henego uruni bibahende homelo bo wahalu dai bini. Tigua Bero igini Balamabi homelo bo wahalu bini.
NUM 31:9 Isaraele ami agali biarume Midiana agali bo wahayarunaga wali waneigini biru wiaru ti bibahende haru ibini. Ani bialu nogo bulumagabi sibi bu hearubi haru halu dabudabu bayale wiarubi bibahende mo yalu piai hene.
NUM 31:10 Ani biai halu Midiana wali agalinaga tanobi balai anda bu hearubi bibahende bo heda hai hene.
NUM 31:11 Ani bialu mani Midiana wali waneiginirubi bulumaga sibi bu hearubi haru halu dabudabu wiarubi
NUM 31:12 mo yai halu balai anda bu henegoria Mosese Eleasalabi wali agali marubi ti hearia dai bini. Dindi ogoni Moaba wali agalinaga dindi iba Yodana angeha Yarigo tano kaware winigoria daibu hene.
NUM 31:13 Mosese Eleasalabi Isaraele wali agalinaga agali haguane hearubi ti bibahende ami agali wai bialu dai biyaru lola hole pene.
NUM 31:14 Tigua ami agali haru bamba haga agali haguane ami agali daosini mbira (1,000) haru haga hearubi handari mbira (100) haru bamba haga hearubi wai howa dai biyaru harigani lola howa Mosese ibugua ti bibahendehondo keba howa lai lene.
NUM 31:15 Ibugua tihondo keba howa hale halu lalu, Wali haru kamiruni homelo bo wa nahe aginaga haru ibirimibe.
NUM 31:16 Ina Pero dindini hemangi walime Balamanaga bi layago hale hayagome inanaga wali agali bu hearu tigua Anduane Homogohondo erembira miyagoni. Anidagua biyagome Anduane Homogonaga wali agali hearu warago ko ibiyagome ti bo wahai hayagoni ndobe.
NUM 31:17 Ani biyago tígua agali baba mandagi paliaga wali bedarubi igiri emene karubi bibahende homelo bo wahai hadaba.
NUM 31:18 Ani bialu wandari emenebi wandari wahe agali baba mandagi napalene bedarubi bibahende bo wa nahe tíni dabu bule haru hadaba.
NUM 31:19 Ani bialu ami agali kamiru tígua agali homene tingini ngago ela hene kamiyaguabi agali wai bialu homelo bo wahene kamiyaguabi uruni ale bini kamiru tí balai anda bu karuha anda nape horo karu tagira ho halimu. Ani howa horo tebonengibi kanengibi tínibi wali haru harimidarubi tí bibahende Anduane Homogonaga deni dodo nahe holenaga mana biaga ngadagua bialu howa bayale holeberami.
NUM 31:20 Ani bialu tínaga aga ngamirubi bulumaga dongoneme mbirale wabini ngamirubi nogo meme irinime mbirale wabu ngamirubi mbirale irame wabini ngamirubi bibahende Anduane Homogonaga deni dodo nahe wilonaga mana biaga ngadagua bialu halimu, lalu Mosesehanda lene.
NUM 31:21 Loma binigo mo miaga Eleasahanda agali wai bu pene dai biyaruhondo lamialu lalu, Anduane Homogohanda ibunaga bi Mosesehondo lamiyadaruni baya hangu hale halu bilimu.
NUM 31:22 Mbirale irame dalu do ereba naholeneru ngolobi silibabi aeanebi gababi boronosibi bibahende dodo para kago irame dalu bayale helo delalimu. Ani bialu mbirale maru irame dalu ereba holene damenego bibahende dodo nahe bayale wilo ibame wayawaya bo wahai halimu.
NUM 31:24 Horo kanengi tíninaga agabi wayawaya biai halu Anduane Homogonaga deni dodo mbira nahe howa tínaga balai anda karuha dai bilimu, lene.
NUM 31:25 Anduane Homogohanda Mosese lamialu lalu,
NUM 31:26 Í̠nibi Eleasabi Isaraele agali haguane bu karubi tígua ami agali biarume wai bialu howa wali waneiginibi nogobi dabudabubi bibahende mo ya haru ha biyaruni dagalabe.
NUM 31:27 Ani dagalalu bibahende mo tale buki buwa halu mbirago ami agali uruni tini mialu halu mendego wali agali andaga hayadaru tihondo mibe.
NUM 31:28 Ani bialu mbirale ami agali bu karu mulebereru aria maru Anduane Homogo i̱nihondo dagisi ngulene nga. Wali agali garabaya helo haru ibirimiru handari duria (500) dege dege haragola mbirago i̱ni ngulene nga. Ani bialu bulumagabi sibi karubi meme karubi bibahendenaga handari duria (500) dege dege kagola uruni aria mbira mbirago i̱ni ngibe.
NUM 31:29 Ai mbirale uruni i̱nihondo ngulebereru loma binigo mo miaga Eleasa mibe.
NUM 31:30 Ani bialu mbirale dabudabubi wali agali garabaya helo haru ibirimirubi bulumagabi sibibi memebi uruni wali agali andaga hayadarunaga talebu miriru bibahende pira duria (50) dege degenaga mbira mbira yamialu Anduane Homogo i̱ninaga dagisi ngialu agali i̱naga Balai Anda handayaho haga Libai hameigini karu tihondo mulene nga, lene.
NUM 31:31 Anidagua lamiyagola Mosese Eleasala libugua Anduane Homogohanda ogodagua bilibu lalu Mosese lamiyadagua biai hene.
NUM 31:32 Ami agali biarume wai bialu mbirale mo yalu ibiyadaruni aria nogo sibi daosini dege handari waragariani pira kariani duria (675,000) bibahende haru halu ibini. Bulumaga daosini dege pira kariani kira (72,000) bibahende haru halu ibini. Ani bialu nogo dongi daosini dege pira waragariani mbira (61,000) haru ibalu wandari mabuage agali baba mandagi nahene daosini dege pira tebirani kira (32,000) bibahende haru halu ibini. Ani bialu tinaga waitigi bo wahaga biyarunaga dabudabu yáribi bayale damene wiaru mo yalu ibalu bini.
NUM 31:36 Ami agali biaru tigua nogo sibi daosini dege handari tebirani pira tebirani karia halu handari duria (337,500) bibahende haru hai henego uruni mo tale bialu handari waragariani pira kariani duria (675) bibahende Anduane Homogohondo dagisi mini. Tigua bulumaga daosini dege pira tebirani waragaria (36,000) bibahende haru ibiyaru tale bialu pira kariani kira (72) Anduane Homogohondo dagisi mini. Ani bialu nogo dongi daosini dege pira tebirani handari duria (30,500) bibahende haru ibiyaru tale bialu pira waragariani mbira (61) Anduane Homogohondo dagisi mini. Ani bialu wandari mabuage agali baba nahene daosini dege pira mbirani waragaria (16,000) bibahende haru halu ibiyaru tale bialu pira tebirani kira (32) Anduane Homogohondo dagisi mini.
NUM 31:41 Mosesehanda uruni bibahende Anduane Homogo ibunime bibe lalu lamiyadagua bialu mbirale dagisi mini uruni bibahende Eleasa mo miai hene.
NUM 31:42 Mosese ibugua uruni bibahende ami agali biaru talebu ta hayadagua dege wali agalirubi ani mo talebia haga bialu migi bini. Wali agali ti nogo sibi daosini dege handari tebirani pira tebirani karia halu handari duria (337,500) bibahende mialu bulumaga daosini dege pira tebirani waragaria (36,000) mo mialu nogo dongi daosini dege pira tebirani handari duria (30,500) bibahende mini. Ani bialu wandari daosini dege pira mbirani waragaria (16,000) bibahende mini.
NUM 31:47 Ani bialu Mosese ibugua uruni bibahende tale bigi bialu wali agali garabaya hayaru pira duria (50) hayago mbira yamialu nogo sibi bu hearubi bulumaga hearubi dongi hearubi bibahende pira duria (50) haga biyago mbira yamigi bialu Libai aria Anduane Homogonaga Balai Andaha biabe bialu haga hearu mo mini. Anduane Homogohanda lamialu bibe layadagua bini.
NUM 31:48 Ani biai heagola agali maru ami agali daosini mbira (1,000) haru bamba haga hearubi handari mbira (100) haru bamba haga hearubi tigua Mosese hearia puwa
NUM 31:49 lalu, Agali haguane-o iname agali haru harimaru daga lamaga bialu hemaria mbiraligo bo ereba nahe bibahende haiore kama, lalu lamini.
NUM 31:50 Áyu iname gi pagida ngolome wabinirubi ma gaguabi haleirabi yári tara tarabi bibahende ina hangu hangu mo yaga birimadaru yalu eberemagoni. Inanaga waitigi giha hemaria Anduane Homogohanda ina mo wiyagonaga turu howa ibuhondo mialu ibugua ina handayaho haabo helonaga ibuhondo mule yalu eberema, lene.
NUM 31:51 Ani lalu miyagola Mosese Eleasala libugua ngolome wabini yári uruni yamini.
NUM 31:52 Ngolo uruninaga genda magi kilogarama handari kira (200) mini.
NUM 31:53 Anigo ami agali haru haga ndo bu hearu tigua mbirale mo yinidaru yalu íbu nabi tini mo yu hene.
NUM 31:54 Ani mo yalu ibiyaru bibahende Mosese Eleasalame mo yalu puwa Anduane Homogonaga Balai Anda heagoha mo wini. Anduane Homogohanda Isaraele wali agali mitangi bialu handayaho helonaga ani mo ngelene.
NUM 32:1 Lubene hameiginibi Gada hameiginibi tinaga nogo bulumaga dewaore hinu hene. Ani hinu howa tigua handalu hemiria dindi bayale datani anda haga kira Yasere Gileadala wiaria hendene.
NUM 32:2 Ani hondowa tigua Mosese Eleasabi Isaraelenaga agali haguane bu hearubi hearia pene. Tigua puwa lalu,
NUM 32:3 Anduane Homogohanda ina biamogo biyagola wai bialu dindi karularimago bayaleore mbira ngagoni. Dindi ogoniha Adarodo tanobi Dibono tanobi Yasere tanobi Nimira tanobi Hesebono tanobi Eleale tanobi Sibima tanobi Nebo tanobi Beono tanobi wiai ka. Dindi o ngago ina nogo bulumaga dewa hinu howa dindi bayale ogoniha datani bayaleru anda haga wiaria hondo kama.
NUM 32:5 Ani kamago ai dindi ogoni ina tu wa ngilimulo hamelo kama. Ina iba Yodana domaede halu edegohayagi hole pudaba lalimulo hame nale kama, lene.
NUM 32:6 Ani layagola Mosesehanda Lubene hameigini Gada hameiginilahondo bi hongo howa ladai bialu lalu, Irane aginaga tí hameigini maru karu wai bu poragola tí ogoria hole manda birimibe.
NUM 32:7 Tígua Isaraele hameigini maru karunaga mini mo ko holene aginaga manda birimibe. Tí iba Yodana domalu dindi Anduane Homogohanda ngulebero layagoha pole hame nale kamibe. Tígua anidagua bule harimidago aginagabe.
NUM 32:8 Abale i̱na tí aba biaru Kadese Banea dindi wiagoria howa diri hondole pudaba larungi tiguabi nde anidagua dege biyagoni.
NUM 32:9 Abale tigua pialu dindi bugubugu Esegolo wiagoha hangu pialu dindi hondo porama layagoha piai nahe wahalu dai biya. Ani dai buwa tigua Isaraeleali bu hearu mo gi hayagola inanaga dindi Anduane Homogohanda ngule lalu lowiyago waharimagoni.
NUM 32:10 Horo ogoningi Anduane Homogohanda bi mbira hongohe lowialu lalu,
NUM 32:11 Agali mali pira kira (20) hene hearubi agali marubi Iyibi dindiha howa ibini hearu tigua i̱hondo mini mbiraore nawi howa i̱ni talima naibiya. Ani biyagonaga i̱na heneneore larogo agali uruni aria karu mbira dindi Abarahamabi Aisagabi Yagababi tihondo mule lalu lowinigoha naanda polebiraore, laya.
NUM 32:12 Dindi ogoniha anda polebirago agali kira Kenasa hameigini aria Yabune igini Kalebebi Nunu igini Yosuabi libugua Anduane Homogohondo mini mbiraore hongohe wu howa ibu talima ibalu haabo haga henego libu hangu dindi ogoniha anda polebira laya, lalu Mosese ibugua lamini.
NUM 32:13 Mosesehanda laabo halu lalu, Anduane Homogo ibugua keba timbuni ho howa wali agali ko biaga uruni homai helonaga mali pira mariani (40) dindi ko yobi wali agali nahaga heagoha ibaga hangu bialu haabo helene.
NUM 32:14 Ani bialu henego ai áyu tíguabi nde tí abahanda mana ko bialu henedadagua dege bule bialu harimida. Ani bulenaga bialu harimidagome tígua Anduane Homogo mo keba haramigola ina Isaraele wali agali baba keba helo mo keba harimida.
NUM 32:15 Áyu Lubene hameiginibi Gada hameigini bu kamirubi tígua Anduane Homogonaga bi ledago mo wahalu ibu talima napirimiyagua nde Anduane Homogo lone mo keba haramigola ina dindi ko yobi wali agali nahaga ngagoha haru ibaga bialu mo ko holobada. Anidagua biyagua tígua biako heneme ani bulubada, lene.
NUM 32:16 Bi ogoni layago hale halu tigua Mosese hearia puwa lalu, Iname nogo sibi helonaga pabe bia halu tanoha wali waneiginiru bayale berelo ege pabe ala bia holoma̱ya bule pudaba la.
NUM 32:17 Anidagua biai halu mani iname wai haru bamba halu puwa ina hamene karu heba pialu wai bialu ina damene uruni holene ngagoria helo iname waitigi uruni bope hole poloma̱ya karulapebe. Ina wali waneiginiru ti tano bayale ege pabe bu mabubiha helalu pirimayagua nde waitigi agali dindi ogoniha karume anda ibuwa mo ko naholebira.
NUM 32:18 Inanaga damene bu karu tinaga dindi mo wialu uruniha karulape kagola inabi dai bialu inanenaga dindini bayale holeberema.
NUM 32:19 Inanaga dindi iba Yodana doma orayagi ni tagira ibiragoha ngamagoni karulape. Ina damenenaga dindi iba doma ederayagi ngago iname mulene nawi, lene.
NUM 32:20 Ani layagola Mosesehanda ladai bialu lalu, Tígua bi ogoni heneneore larimiyagua nde tínaga ami agali hayadaru ho manda bialu tí wai bu pole Anduane Homogonaga deni ho manda bilimu.
NUM 32:21 Tínaga ami agali bu karu ti bibahende Anduane Homogo andaneha hai howa iba Yodana domaede halu puwa wai bialu Anduane Homogohanda tínaga waitigi bope halu
NUM 32:22 tinaga dindi karulole wai bilimu. Ani biai halu tígua dai buleberemigo irane Anduane Homogohanda tí biamogo biragome tínaga hameigini biaru dindi mo wia halu dai buleberemi. Anidagua birimiyagua nde Anduane Homogohanda tí dindi iba Yodana doma orayagi ni tagira ibiragoha ngago tí holene karulape lolebira.
NUM 32:23 Áyu i̱na tíhondo hongo howaore larogo tígua bi lowirimigo mo habo larimiyagua nde Anduane Homogohondo ko tígua bini wulebira. Anidagua birimiyagua Anduane Homogohanda tínaga ko birimigo mitangi bialu tí pani ngialu mo ko holene wulebirago manda bilimu.
NUM 32:24 Ai karulapego tígua dai bialu tínaga nogo wali waneiginiru berelonaga pabe bialu tanorunagabi ege pabe bule pudaba. Uruni biai halu tínime bule lalu bi lowirimigo bialu wai pole áyu pudaba, lene.
NUM 32:25 Ani layagola Lubene hameigini Gada hameiginibi tigua Mosesehondo lalu, Agali haguane-o iname í̠na langeregonidagua buleberema.
NUM 32:26 Inanaga one waneiginirubi nogo bulumaga sibi karubi bibahende Gileada dindinaga tano uruniha bereloleberema.
NUM 32:27 Ai ina bibahende Anduane Homogohanda haru kagola iname wai bule poleberema. Iname iba Yodana domaede halu í̠na laridagua wai bule poleberema, lene.
NUM 32:28 Ani layagola howa Mosesehanda loma binigo mo miaga Eleasabi Yosuabi agali haguane hearubi tihondo bi maru lamigi bini.
NUM 32:29 Mosesehanda lalu, Agali Gada hameiginirubi Lubene hameiginirubi tigua Anduane Homogonaga bi layago hale halu tí heba mandagi iba Yodana domaede halu tínaga waitigi karu baba wai bule pirimiyagua nde karulape holebira. Tígua wai bialu tínaga waitigi bope halu dindi ogoni karularimiyagua Gileada dindi ogoni Gada hameiginibi Lubene hameiginibi ti dindi ogoniha haabo helo mo milimu.
NUM 32:30 Anigo tigua iba Yodana domaede halu tí haru mandagi wai bule napirimiyagua ti dindi ogoniha nahe tí haru mandagi Kenana dindiha hole poleberemi, lene.
NUM 32:31 Ani layagola Gada hameiginibi Lubene hameiginibi tigua ladai bialu lalu, Ogonidagua karulapego Anduane Homogohanda layadagua buleberema.
NUM 32:32 Anduane Homogo ibunime ina haru helowa iname iba Yodana domaede halu wai bu poleberema. Ani bialu dai buwa mani inanaga dindi iba Yodana doma orayagi ni tagira ibiragoha holeberema, lene.
NUM 32:33 Ani lalu Mosesehanda dindi Amora wali agalinaga Kini Sihononaga wiagobi Basana wali agalirunaga Kini Ogonaga dindi wiagobi heba tano uruniha wiarubi dindi emene wiarubi uruni bibahende Gada hameigini hearubi Lubene hameigini hearubi Manase hameigini halu mende hearubi tinaga wilo mo wiabagi ho ngelene.
NUM 32:34 Gada hameigini tigua tano ege pabe hongohe ala gialapaya bu wini wiaru mo tiga bialu bini. Tigua Dibono tanobi Adarodo tanobi Aroe tanobi
NUM 32:35 Adodosobana tanobi Yasere tanobi Yogobeha tanobi
NUM 32:36 Bedenimira tanobi Bedeharana tanobi bibahende biadai bigi bialu hene.
NUM 32:37 Ani bialu Lubene hameigini bu hearu tigua Hesebono tanobi Eleale tanobi Kiriadaimi tanobi
NUM 32:38 Nebo tanobi Balameono tanobi biadai bigi bialu hene. Tigua Balameono tano mini mo aribia halu mini mende wini. Ani bialu tigua Sibima tano lone biadai bialu hene. Anidagua bigi bialu tano bibahende tigua biatiga bigi bialu mini mende wia aribia haga bini.
NUM 32:39 Ani bialu Manase igini Magiri aria hearu tigua Amoroali baba wai bini. Wai bialu howa tigua Amoroali biaru bo batagi halu tinaga dindi karulene.
NUM 32:40 Ani biyagola Mosesehanda dindi Gileada ogoni Magiri hameigini hayadaru mo miyagola tinaga wali agali dindi ogoniha hene.
NUM 32:41 Ani biyagola Manase hameigini Yairi aria tigua dindi maru wiaruha pialu wai buwa dindi maru karulaga bialu dindi uruni mini Yairi Dalu laga wini.
NUM 32:42 Ani bialu agali Noba mbira henego ibugua ibunaga agali bu hearu haru halu puwa Kenada tano wiagoha wai bialu tanobi dindi emene wiapara para bu wiarubi bibahende karulai hene. Ani karulai howa dindi uruni mini Noba ibuninaga mini wia aribia haga bini.
NUM 33:1 Mosese Aronola libugua Isaraele wali agali haru halu ti Iyibi dindi yu wahalu tagira puwa balai anda bu haga bima pugu bini.
NUM 33:2 Anduane Homogohanda Mosesehondo bibe lalu lamiyadagua dindi ti balai anda bu haga binidaru mini gilibu wigi bini. Dindi ti haga binidaruni ogodagua.
NUM 33:3 Isaraele wali agali ti ege mbiranaga horo nguini (15) hayagola horo ogoni Anduane Homogohanda ti nabe Bolangua Halu Penegonaga lalu horo mendengi ti Iyibi dindi yu wahalu tagira pene. Anduane Homogohanda ti baya hangu haru heagola tigua dindi mini Lamesese yu wahalu tagira pene. Ani piyago Iyibi wali agali ti de hendeaore tagira pene.
NUM 33:4 Horo ogoningi Iyibi wali agali ti tinaga igini wahene Anduane Homogohanda bo wahayago hora halu hea handala pene. Anduane Homogohanda Iyibinaga dama bi pupu wiaga wiaru bope haga howa ibuni Anduane Homogoore kogoni lalu ibunaga hongo tihondo mo walia halu anidagua bini.
NUM 33:5 Isaraele wali agali ti Lamesese dindi wahalu Sugodo tano wiagoria tagira pialu balai anda bu hene.
NUM 33:6 Ani buwa ogoriani halu puwa dindi ko yobi iba dalu naibaga wiagoria dindi mini Edama wiagoria puwa balai anda bu hene.
NUM 33:7 Ani bialu tigua Edama wahalu pialu dindi mini Pihahirodo anda pene. Pihahirodo dindi ogoni Balasebono ni tagira ibiragohayagi wini. Ogoria anda pialu Migidolo tano kaware wiagoria tagira puwa balai anda bu hene.
NUM 33:8 Ogoriani howa Pihahirodo dindi ogoni wahalu iba Solowara Daramabi laga bereago domalu Sua dindi ko yobi iba dalu naibaga wiagoha tagira pene. Ani bialu tigua horo tebiru pu dege bialu dindi mini Mara wiagoria tagira pialu ogoriani balai anda bu hene.
NUM 33:9 Mani Mara wahalu pialu Elimi dindi wiagoria tagira puwa tinaga balai anda bini. Elimi ogoriani iba hambiaga uli homberia (12) wialu ira mini dedi pira karia (70) halu biagoria hene.
NUM 33:10 Mani tigua Elimi yu wahalu puwa iba timbuni Solowara Daramabi bereagoria tagira puwa ogoriani balai anda bu hene.
NUM 33:11 Ani bialu iba Solowara Daramabi bereago yu wahalu dindi ko yobi iba dalu naibaga mini Sene wiagoria anda puwa ogoriani balai anda bu hene.
NUM 33:12 Ani buwa Sene ogoni wahalu puwa dindi mini Doboga wiagoria tagira puwa ogoriani balai anda bu hene.
NUM 33:13 Ani bialu nde Doboga wahalu puwa Alusu wiagoria tagira pialu ogoriani balai anda bu hene.
NUM 33:14 Mani ti Alusu wahalu puwa Lebidimi wiagoria tagira puwa balai anda bu hene. Dindi Lebidimi ogoriani iba nolene mbira nabereore wiagoria pu hene.
NUM 33:15 Mani Lebidimi ogoni wahalu puwa balai anda bu haga binidaru dindi ko yobi iba dalu naibaga Sainai wiagoriabi Kibirodohadababi Haserodobi Lidimabi Limonoberesebi Libinabi Lisabi Keheladabi Hari Sebe heagohabi Harada dindibi Magahelodo wiagohabi Tahada wiagoriabi Tera wiagoriabi Midiga dindi wiagoriabi ani bialu Hasamonabi Moserodobi Beneyaganabi Hohagidigada wiagoriabi Yodobada wiagoriabi Abarona wiagoriabi Esiongebe tano wiagoriabi pialu ani bialu Sene dindi ko yobi iba dalu naibaga wiagoriabi pene. Sene ogoni Kedese wiagoha wini. Maniore Hari Ho heagoha Edomo dindi gibuni wiagoria tagira puwa balai anda bini.
NUM 33:38 Dindi ogoriani heangi ti Iyibi dindi wahalu ibinigo mali pira maria (40) hayagola ege dauninaga horo mbirangi loma binigo mo miaga Arono ibugua Anduane Homogohanda bibe lalu lamiyadagua bialu ibu Hari Ho heagoha irigi howa homene. Ibu ai̱yahanda taba hanayangi howa hama ibinigo mali handari mbirani pira kirani tebira (123) halu homene.
NUM 33:40 Dindi ogoriani pu hemigola Kenana dindinaga abene unurahayagi dindi mini Arada wiagonaga kini heago ibugua Isaraele wali agali ibira layago hale hene.
NUM 33:41 Isaraele wali agali ti Hari Ho heago helalu puwa balai anda bigi bima pugu binigo dindi mini Salamona Punono Obodo Abarimibi dindi uruniha pene. Abarimi ogoni Moaba dindiha tano mbira gialo payabu winigoria pene. Ani bialu Dibonogada tanobi Alamono Dibiladaimi dindibi Hari Nebo heagoria kawareni Abarimi hari hearuhabi pene. Ani bialu Yarigo wiagoria kaware iba Yodana peago doma ederahayagi tano kira mini Bedeyasimodobi Sidimi hengene wiagoha dindi uli uli bayale wuyu peagoha pugu bini. Ani bialu dindi ulini bayale wuyu peago bibahendeha balai anda bu haga bima pugu dege bini.
NUM 33:50 Ti puwa Yarigo tano kawareha iba Yodana peago abene ederayagi Moaba dindi ulini wuyu peagoria hemiria Anduane Homogohanda Mosesehondo bi maru
NUM 33:51 Isaraele wali agali lamilonaga ibu lamini. Anduane Homogohanda lalu, Tígua iba Yodana porago domalu Kenana dindi anda pialu howa
NUM 33:52 wali agali dindi ogoniha hene karu bibahende bo pelai halimu. Ani bialu ti dama mitangi bialu bi pupu wulenaga mbirale ege to̱le̱me wabini ngarubi aeaneme wabini ngarubi bibahende bo dambiai halu tinaga bi pupu wiagane anda karubi gialo wahai halimu.
NUM 33:53 Dindi ogoni i̱na tí ngerogo karulole pu halimu.
NUM 33:54 Tígua dindi tíni hameigini mbira mbira kamidagua tu wa tahole tadu ale ege to̱le̱ tínaga mini gilibu wini biago badaga halu handalimu. Ani hondowa hameigini wali agali dewa karu dindi timbuni tu wa mialu wali agali emene karu dindi emene migi bilimu.
NUM 33:55 Anigo wali agali dindi ogoniha hene bu karu ala bo batagi nahe ani helo harimiyagua nde wali agali urunime tí tandaga mo ngulebira. Tigua biragome tínaga denibi gubalinihabi igibu anime nogoba haradagua bialu holebira. Ani bialu dindi tí pu holeberemigoha wai bialu haabo holeberemi.
NUM 33:56 Tígua wali agali dindi ogoniha haga karu bo batagi naharimiyagua nde i̱na wali agali uruni mo ko hole manda birudagua tí mo ko holebero, lalu Anduane Homogohanda lene.
NUM 34:1 Anduane Homogohanda bi ogo Mosese lamialu,
NUM 34:2 Í̠na Isaraele wali agali tigua bilonaga bi ogodagua lamibe. Tígua Kenana dindi i̱na tí nguleberogoria anda pialu dindi ogoni bibahendeore karulo hai holeberemi.
NUM 34:3 Dindi ogoninaga abene unurahayagi tubari dindi ko wali agali nahaga mini Sini laga ngagoha howa pialu Edomo dindi baba tubariha puabo ka. Ani bialu tubari ni tagira ibiragohayagi iba kuyama mini Homene Iba bedagoria howa puamu ka.
NUM 34:4 Ani bialu tubari ogoriani howa pu ai̱ halu dindi abene unurayagi daliape halu Hari Agarabimi nene ngagoha iraga halu piaga hariga pedagoria dindi ulini hari labo hengene ngagoha pupe halu Sini dindi ko wali agali nahaga ngagoha pialu Kadese Banea wiagoria tagira peda. Ai ogoriani howa dindi mini Hasarada ngagoha puabo halu Asamono tagira peda.
NUM 34:5 Ani pialu ogoriani howa pu dai bialu iba pedadagua Iyibila tubari nga. Ani bialu puabo halu iba solowara Medidereniana bedagoriani tagira peda.
NUM 34:6 Dindi ti baba tubari ngago iba solowara Medidereniana bedago wulebira. Ni paliragohayagi tubari ogoni holebira.
NUM 34:7 Dindi abene uyurahayagi tubari iba solowara Medidereniana bedagoria howa pu banga bialu Hari Ho kagoria tagira pialu
NUM 34:8 ogoniha howa puabo halu Hamada dindi ulini ngagoha pupe ka. Ani bialu dindi mini Sedada bolangua halu
NUM 34:9 Siborono dindi tagira pialu Hasarenana dindi ngagoria tagira peda.
NUM 34:10 Ni tagira ibiragohayagi Hasarenana dindi ngagoria howa pialu amuraore Sebama dindi ngagoria tagira polebira.
NUM 34:11 Ani bialu Sebama dindi howa pialu abene unurahayagi pupe halu Libila dindi ngagonaga abene ni tagira ibiragohayagi bolangua halu Aini dindi tagira pialu puabo halu Galili iba kuyama bedago angeha hari emene mbira wedagoha tagira polebira. Ogoni Galili iba kuyama bedagonaga abene ni tagira ibiragohayagi tagira polebira.
NUM 34:12 Ani bialu tubari ubadali halu unurayaginaga iba Yodana tubari pialu iba kuyama mini Homene Iba bedagoria tagira peda. Ai tínaga dindi tubari maria uruni holebira, lalu Anduane Homogohanda Mosese lamini.
NUM 34:13 Mosesehanda Isaraele wali agalihondo lamialu lalu, Anduane Homogohanda Isaraele hameigini dira kamirubi Manase hameigini halu mende karubi tinaga dindi tubari o langeroru wulebira. Ai tígua dindi hobane mbira mbirago ainaga holobadabe hondole tadu ale ege to̱le̱ emene badaga halimu.
NUM 34:14 Ai Lubene hameiginibi Gada hameiginibi Manase hameigini halu mende karubi ti dindi abale mo wialu ta hene.
NUM 34:15 Ti dindi Yarigo kawareni iba Yodana porago doma ederayagi ni tagira ibiragoha wiago karulo hayagoni, lene.
NUM 34:16 Anduane Homogohanda Mosese lamialu lalu,
NUM 34:17 Loma binigo mo miaga Eleasabi Nunu igini Yosuabi libugua Isaraele hameigini dindi ogoni tu wa taholebira.
NUM 34:18 Eleasa Yosuala biamogo bilonaga agali haguane tini hameigini mbira mbira kadagua dabo helabe, lene.
NUM 34:19 Agali mini uru Yuda hameigini Yabune igini Kalebe. Simiono hameigini Amihudu igini Selumiele. Beniyamini hameigini Kisilono igini Elidada. Dana hameigini Yogoli igini Bugi. Manase hameigini Ebodo igini Haniele. Eberaimi hameigini Sibidana igini Kemuele. Sebulunu hameigini Panaga igini Elisabana. Isaga hameigini Asana igini Paladiele. Ase hameigini Selomi igini Ahihudu. Nabadali hameigini Amihudu igini Pedahele.
NUM 34:29 Agali haguane urunime Yosua Eleasala biamogo bialu Isaraele hameigini headagua dindi tu wa tahaga bilonaga Anduane Homogohanda dabo helabe layadagua helaga bini.
NUM 35:1 Isaraele wali agali ti iba Yodana doma ederahayagi Yarigo kaware wiagoria Moaba hameigini dindi uli uli Yodana angeha wuyu peagoha hemingi Anduane Homogohanda bi ogodagua Mosese lamini.
NUM 35:2 Í̠na Isaraele wali agaliruhondo bi ogodagua lamibe. Tígua tínaga dindi podene ngagoha tano maru Libai hameigini karulelo migi bilimu. Tinaga bulumaga karu tani nalu helonaga tano uruniha tani bayale anda haga ngaru milimu.
NUM 35:3 Libai hameigini ti tano urunibi ngago milimu. Tano kawareni datani bayale anda haga ngaru Libai hameigini ti bulumagaru sibiru hinalu helo milimu.
NUM 35:4 Dindi ti holene uruni datani bayale gibuni gibuni andaho mabubi wialu tanonaga pabe kagoria howa wima tagira pialu lunaga mita magi handari mariani pira duria (450) wialu bidago milimu.
NUM 35:5 Ani bialu tano ibu dombeneha ngelo gibu gibu dindi bayale datani andaho mabubi ngago milimu. Dindi gibuni mbirahayagi howa mendehayagi polenenaga mita magi handari dira (900) karulape milimu.
NUM 35:6 Ani bialu agali ibida pialu ha do holene tano waragaria Libai hameiginiru tihondo milimu. Agali mbirame agali mende baba waitigi nahe karia mememe balu homelayagua agali bagadago ibuni tano uruni mbiragoha ibida pialu ha do holebira. Ani ha do kagola homene andua kagome ibu talima pialu tano ogoniha karia nababehe holebira. Ani bialu tano pira mariani kirabi (42) Libai hameigini karu mia dege bilimu.
NUM 35:7 Dindi bayale datani anda holene tano urunibi ngago ti mulene karulape wialu tinaga tano pira mariani halira (48) bibahende wulene nga.
NUM 35:8 Tígua Libai hameigini Isaraeleali karu tano tale bialu mule howa dewali karu timbuni mo mialu hameigini emene karu emene mo mulene nga. Tí hameigini kago ala manda bu hondowa tini kagobi karulape talebu mulene nga, lene.
NUM 35:9 Anduane Homogohanda Mosese lamialu,
NUM 35:10 Isaraele wali agaliru bi ogodagua lamibe. Tígua iba Yodana domalu Kenana dindi anda pole howa
NUM 35:11 ibida pialu ha do holene tano maru dabo ngelalimu. Agali mbirame agali mende kago baba waitigi howa ndo mememe ba bowa bo homelayagua nde bagadago ibuni tano uruni mbiragoha ibida pialu hadapaya bu holebira.
NUM 35:12 Tano uruni agali baro lalu ndo mememe ba bowa homara handala baga biago ibuni ibida pialu tano ogoniha kagola homayago damene bu karume haruru talima pialu babe nahe holebira. Agali bagadago ibu ibida pialu tano ogoniha kane dege godi lalu dabaki haragola ibuni homelo bo wahabehe wiagua nde homelo bolene nga.
NUM 35:13 Anidagua pialu ha do holene tano waragaria hangu wiabagi halimu.
NUM 35:14 Iba Yodana doma edera ni tagira ibiragohayagi tano tebira mo wialu Kenana dindiha nde tano tebira dege wilimu.
NUM 35:15 Tano uruni Isaraeleali tínibi wali agali dindi taraha howa tí baba íbu halu pole heneyaguabi haabo hole hene heaguabi tí bibahendenaga ha do holene uruni wulebira. Agali mbirame ibunaga damene kago homelo baro lalu ndo mememe balu homelayagua nde baga kago ibuni tano uruni aria mbiragoha pialu ha do holene wulebira.
NUM 35:16 Anigo agali baga kagome ibu damenedago homelo mbirale aeanemebi ege to̱le̱mebi iramebi homelo baga ngagome henemane baro lalu beneyagua nde ibunibi homelo bo wahalimu. Ibunime bero lalu bayagonaga pani ogoni.
NUM 35:19 Agali homayago ibu damene darama mbiraore kago ibugua baga hayadago homelo bolene nga. Anigo damene ogoni ibugua bagadago lola hayagua ibuni homelo bolebira.
NUM 35:20 Agali mbirame agali mende kago handabe manga halu hongo howa he̱la pelaragola homayaguabi to̱le̱me baragola homayaguabi gi bo tagalalu baragola homayaguabi nde ibugua biako haragome ibuni pani nelo mulene ngago ainde ibunibi homelo balimu. Agali ibuni dameneore baragola pani bole henedago ibunime agali ogoni homelo bolene nga. Agalidago deme handa ala hondowa homelo bolene nga.
NUM 35:22 Anigo agali mbirame ibu damene kago handabe manga howa ndo bame hongo howa he̱la pelaragola homayaguabi mbirale mbira ibu kagoha ba pelaragola ogonime bila halu homayaguabi
NUM 35:23 ibu de handa nabi howa ege to̱le̱ mbira bape halu karia ogonime bila halu homayaguabi nde urunidagua bole manda nabi howa mememe birago ogodagua bilimu.
NUM 35:24 Tígua mana ogonidagua biragola agali baga kago abale homelo nabe manani dabo handalu mo tale ala bulene nga. Homayago aria kagome ibunibi homelo abale bo waholene nawi.
NUM 35:25 Tígua ibu mo wialu haru dai beremigola homayago damene kagome bolene nawi. Ani helowa ha do haga tano biagoha ha do helo haru dai bilimu. Ani haru daibu kane dege Loma Binigo Mo Miaga Haguane Timbuni kago homalu mende gahenge haribia ho kagola ibu tagira polene wulebira.
NUM 35:26 Anigo Loma Binigo Mo Miaga Haguane Timbuni tano ogoniha henedago nahome howa agali ha do hene biago tagira pu ledaria homene aria biagome lola halu bo wahayagua nde godi lolene nawulebira.
NUM 35:28 Irane agali ha do hene biago ibu Loma Binigo Mo Miaga Haguane Timbuni kago homaragola tagira polene wiyago wahalu abale tagira piyagua ibunime biako hayagome homayagua nde karulape dege. Loma Binigo Mo Miaga Haguane Timbuni kago homaragola agali biago ibu andaga dai bialu ibu dameneru baba hayagua nde ibu gi nahe hadapayabu holebira.
NUM 35:29 Tí ta nabi kamigoha howa tínaga waneigini aguaneneru mani hama polobadarume mana mbiraore ogoni hangu talialu buleberemi.
NUM 35:30 Agali maru karume agali mbira kago ibu waitigi howa mendeali heago homelo bo wahaya laya lalu kirali tebiralime bi lo mbira hayagua nde tígua agali mendego homelo bo wahaga kago ibunibi nde homelo bo wahalimu. Anigo mbiraoreli hangume hendeneyagua nde nabalimu.
NUM 35:31 Agali mbira ibu aria kago baba waitigi howa homelo bo wahayagua nde ogoni ibunibi homelo bo wahalimu. Agali ogoni ibuni nogo abi bulene henge nawiore ibu homolene hangu wulebira.
NUM 35:32 Agali mbirame ibu mendeali homelo bo wahalu ha do haga tano biagoha ibida pu howa Loma Binigo Mo Miaga Haguane Timbuni kago homa nabi kaore munime yolo bialu tagira polene nawulebira. Anidagua bulene nakarulapego nabilimu.
NUM 35:33 Tígua agali ogonialego yupe halu pelarimiyagua nde i̱naga deni tínaga dindi bibahende mo dodohe holeberemi. Agali homelo bo wahaganeme tínaga dindi bibahende mo dodo holebira. Anidagua biragola tínaga dindi i̱naga deni dodo nahe ngelonaga bulene mbiraore hangu nga. Bulene mbiraore hangu ogoni agali baga kago ibuni homelo bo waholene nga.
NUM 35:34 Tínaga dindi kamigoria mo dodo holene nawi. Irane i̱niore Anduane Homogo kogoni. I̱ Isaraele wali agaliru tí heba mandagi haabo kogoni, laya lalu Mosesehanda lene.
NUM 36:1 Yosebe igini Manase Manase igini Magiri Magiri igini Gileada hene. Ani howa horo mbirungi Gileada aria hearu tigua Mosese halu Isaraele
NUM 36:2 agali haguaneru hearia puwa lalu, Anduane Homogohanda ina Isaraele hameigini dindi tu wa taholenaga tadu ale ege to̱le̱ biago badaga halu dindi hameigini ogonaga lalu mo tale bia haga bilimu lene. Ani bialu dindi tu wialu inanaga damene Selobehada henego ogoni wane berearubi ti dindi tu wa milimu lene.
NUM 36:3 Anigo wali agali hameigini mende kagome dabu biyagua nde dindi ogoni hameigini mende kagoha mo yu polobada. Anidagua biragola dindi ina tu wa ngirimigo emene hangu holobada.
NUM 36:4 Anigo mbirale Yadai Bulene Mali biago tagira ibirangi ina damene Selobehada wane bedarume tinaga dindi ti agalini kagoha mo yu polobada. Ani bialu agali ogoni ibunaga dindi ngagoha mo wiatago holobada. Anidagua biragola dindi ogoni inanaga lene ndo wulubada, lene.
NUM 36:5 Ani layagola Mosesehanda Anduane Homogonaga bi ogo Isaraele wali agali bu hearu hale helo latagi halu lalu, Manase hameigini karume bi layago tigabiore laya.
NUM 36:6 Ani layagonaga Anduane Homogohanda, Wandari Selobehada wane bedaru ti agali tini hameme polene karulapegoyu agali tini aria karu hangu polene karulape lo nga, laya.
NUM 36:7 Anidagua beremigola Isaraele wali agali tínaga hameigini dindi mbira mbira ngagodagua wiaabo holebira. Ani ngagola hameigini tarame uba a̱i̱ na̱i̱ bulene nawulebira.
NUM 36:8 Wandari mbirame ibu aba homaragola dindi paluni wiagua ibu agali ibuni aria dege hameigini mbiraore kago polene nga. Tígua ogonidagua bialu harimiyagua nde dindi tíni wiaabo halu tínaga mamalirume wini ngaru wu haga haga buleberemi.
NUM 36:9 Ani manda bialu tínaga dindi uruni hameigini mende kagohondo mulene nawulebira. Tíni hameigini mbira mbira kamidagua tínaga dindi wu haabo holeberami, lene.
NUM 36:10 Ani layago hale halu wandari Selobehada waneru Mala Tirisa Hogola Miliga Noa imaru tigua Anduane Homogohanda layadagua bialu agali tini aria hameigini mbiraore hearu pugu bini.
NUM 36:12 Tigua Yosebe igini Manase aguane hearu pugu bini. Anidagua biyagome ti abanaga dindi hameigini mendeha podo yalu nape ti aba damenenaga wiaabo hene.
NUM 36:13 Bi mana uruni Anduane Homogohanda Isaraele wali agaliruhondo Moseseha howa iba Yodana ange Yarigo kawareni Moabalirunaga dindi ulini tigabi wiagoria hemiria lamini.
DEU 1:1 Mbuga ogoha howa Mosese ibugua Isaraele wali agali hearu ti dindi ko wali agali nahaga ni tagira ibiragohayagi iba Yodana ange kaware dege ngelowa bu hearia tihondo bi leneru nga. Ti dindi buguni yu dindi mbira iba Yodana angeha Subu dindi wiago kaware dege pu hene. Parana tano mendehayagi wiagola Tobele tanobi Labana tanobi Haserodo tanobi Disahaba tanobi nai mendehayagi ngela buwa ti dombeni pu hene.
DEU 1:2 Hari Sainai howa hariga pedadagua pialu Idomo dindini hari kagoria anda polene horo bearia (11) agima handa paligi bima pialu dindi mbira Kadese Banea ngagoria anda piaga wini.
DEU 1:3 Isaraele wali agali ti mali pira maria (40) Iyibi dindi yu wahalu tagira pene lowa ai mali ogoninaga ege beane (11) hayagola horo mbirani Mosese ibugua Anduane Homogohanda bi ibuhondo lamiyaru bibahende wali agalihondo lamiai hene.
DEU 1:4 Mosese ibugua bi lamiyago nalami heangi Anduane Homogohanda Hesebono tano handaya ho haga Amoroalinaga Kini Sihono bope hene. Ani bialu Anduane Homogohanda Asarodo tano Ederi tanola handaya ho haga Basanali Kini Ogabi bope hene.
DEU 1:5 Isaraele wali agali ti iba Yodana ange ni tagira ibiragohayagi Moaba wali agalinaga dindini heangi dege Mosese ibugua Anduane Homogonaga bi mana lawai halu hene.
DEU 1:6 Mosese ibugua lalu, Ina Hari Sainaini hemaria Anduane Homogo inanaga Ngode Datagaliwabe ibugua bi ogodagua langiya. Hari andane ogoha tí luore karulape harimigoni.
DEU 1:7 Ai dindi ogoni yu wahalu puwa Amoroaliru dalu amu hari nene ngaruhabi dindi maru kaware ogoniha ngaruhabi hole pudaba, layagoni. Dindi uruni iba Yodana angeha dindi buguni yu dindi wu yu pedarubi hari neneha wima pedarubi dindi tigabi wima pedarubi dindi ni tagira ibiragoha wima pedarubi dindi bayale iba solowara timbuni Medidereniana iba angeange wima pedaruhabi piai halimu, laya. Ani piaho wialu Kenana dindi ngagohabi pialu Lebanonohayagi hari nene ngaruha puabo halu amuraore iba timbuni Yuberedisi poragoria puari halimu, laya.
DEU 1:8 Dindi uruni Anduane Homogo i̱ni kogome tí ngulebero lalu bamba tínaga mamali Abarahama Aisaga Yagaba imaruhondobi uruni tinaga waneigini aguane hearuhondobi lo wirugoni. Áyu tígua pialu dindi uruni tí karulai hole pudaba, laya, lalu Mosesehanda lamini.
DEU 1:9 Mosesehanda wali agaliruhondo lamialu lalu, Bamba ina Hari Sainaini harimangi i̱na tí langialu wali agali dewaore bu kamigo i̱ hangume tí haru holene erekuibioredago nahabehe ko larugoni.
DEU 1:10 Anduane Homogo inanaga Ngode Datagaliwabe ibugua tí dewaore harini yakundi bu karubi heledago.
DEU 1:11 Ai Anduane Homogo ina mamalirunaga Ngode Datagaliwabe ibunime bamba bulebero lalu lo wiyadagua tí mo dewaore halu tínaga mbirale wu kamiruni mo bayaleore helo hame ledogoni.
DEU 1:12 Anigo i̱ hangume tígua lai gungu bialu kamiru mo hadalu tí bayale halimulo mo tiga agua buliyadabe. Genda uruni i̱ hangume yulene nakarulape kogoni.
DEU 1:13 Anidago ai tígua agali maru mini bogabi dingidangialebi wali agali maru haru habehe karu hondowa agali urunibi karu tigua wali agali haru helo dabadaba. Tínaga hameigini hangu hangu kamidagua dabaga bilimu. Ani dabo heledamigola i̱na agali uruni tigua wali agali tí haru helo heloliya larugoni.
DEU 1:14 Ani larugola tígua bi ogoni karulape lalu ani helarimigoni.
DEU 1:15 Ani birimigola i̱na agali mini dingidangiale biaruni hameigini mbira mbiraha howa haru ibirimigola i̱na agali uruni ti wali agali haru helo helarugoni. Agali haguane uruni ti marume wali agali daosini mbira (1,000) haru helo helalu marume handari mbira (100) haru helo helalu marume pira duria (50) haru helo helalu marume nde pirali hangu haru helo helaru. Ani bialu agali marubi dabalu ti nde wali agali tini hameigini headagua haru haga bilo dabo hela dege birugoni.
DEU 1:16 Ani dabo helowa agali dabene uruni i̱na tihondo wali agalime lai gungu bialu ibirarunaga bi baya hanguore hale halimu larugoni. Í̠ damenela keba heneyaguabi wali agali maru tara ti heba henedaru baba leneyaguabi
DEU 1:17 bi uruni baya hanguore hale halu mbiralinaga la nahe bi ogobi dege dege lo talebia halimu larugoni. Tígua wali agalinaga godi hale halu biruwa agali haguane timbuni heneyaguabi agali damene kali ale dege heneyaguabi mbirago mo wia nahe ogobi dege dege maname dabolene ngadagua dabalimu. Mbirali hondowa gi nahalimu. Godi hale holene ogoni tínime ndo Ngode Datagaliwabe ibunime tíhondo mini bayale godi hale halu kamingi ogobi bulene nga lalu mo mitangi bia holebira laru. Ai gendabi timbuniore tígua hangu mo tiga bibe naheyagua nde i̱na tinaga godi ogoni hale halu mo tiga buliya i̱ni koria haru ibalimu larugoni.
DEU 1:18 Horo uruningi dege i̱na mana maru tígua ogodagua bialu halimu lalubi nde dewaore mo wála halu lawai hai harugoni, lene.
DEU 1:19 Mosesehanda laabo halu lalu, Anduane Homogo inanaga Ngode Datagaliwabehanda inahondo bilimu lalu langiyago talialu birimagoni. Iname Hari Sainai helalu dindi koorene ko iba dalu naibaga ni daho wiaabo haga wiagoha ibaabo halu Amoro hameigini daluhayagi hari barebare wiagoria anda ibirima. Ani ibalu dindi Kadesebanea wiagoria anda íbu howa
DEU 1:20 i̱na tíhondo lalu, Ai ina Amoro dindihayagi hari bare ngagoria anda íbu kamagoni. Dindi ogoni Anduane Homogo inanaga Ngode Datagaliwabe ibunime inahondo ngulebira.
DEU 1:21 Anduane Homogo tí mamalirunaga Ngode Datagaliwabe kago ibunime dindi ogo tí mo ngirago de handadaba. Anigo ibunime tíhondo langiyadagua dindi ogoni tíhondo ngiyadago abale karulole pilimu. Tí gi halu mini dege dindi howa nahalimu, larugoni.
DEU 1:22 Ani larugoyu tígua i̱ hewaria ibuwa lalu, Dindi diri hondo wialu dai bilo agali maru pelama. Tigua handalu dai buwa ina hariga bayale mo walia haradagua mali̱ya. Ani bialu tanoru nde ogobi wigi bia lalu te lama dai bilo, lalu laga birimigoni.
DEU 1:23 Anidagua larimigo hale halu i̱na Isaraele hameigini homberia (12) hemidagua agali mbira mbira lowa homberiali dabarugoni.
DEU 1:24 Ani dabarugola tigua pialu hari bare wiagoha puabo halu Esegolo dindi ulini panda panda bayale wiagoha puwa dindi baya hangu hondo wima ibaga bialu hene.
DEU 1:25 Ani bialu ira lini bayaleru do hanalu dai buwa ina ngiyagoni. Ani ngialu howa tigua lalu, Dindi áyu Anduane Homogo inanaga Ngode Datagaliwabe ibunime ina ngulebirago ogoni ibane bere bayaleoreya, laya.
DEU 1:26 Tigua anidagua layagoyu tígua mine halu Anduane Homogo tínaga Ngode Datagaliwabehanda bi layago mo wahalu dindi ogoniha poa nahe harimigoni.
DEU 1:27 Tígua tíninaga balai anda bu hemigoha biruwa bi gomogomo lagalaga bialu lalu, Anduane Homogohanda ina handabe manga ho kagoni. Ibugua ina Amoroalirunaga giha mo ya halu bo wahai holenaga Iyibi dindiha howa haru tagira ibiyada.
DEU 1:28 Ina gi timbuni biaruago dindi ogoniha agibule poledabe. Iname agali dindi diri hondole pudaba larimaru tigua handalu dai buwa wali agali dindi ogoniha bu hearu ti luni timbuni hongoheru bu hea lalu langiyagoni. Tinaga tanobi hongohe wai pabe egeme bu mabu bialu hari daliga elahe bini hama pea lalu langiai haya. Ani lalu agali timbuni gibioreru tano uruniha hama pearia handarima, laya, laga bialu harimigoni.
DEU 1:29 Ani larimigola nde i̱na tíhondo ogodagua laru. Wali agali o haruaruni hondowa gi nahalimu.
DEU 1:30 Anduane Homogo tínaga Ngode Datagaliwabe ibunime tí poleberemigoha bamba halu polebirago tí gi holene nawi. Ibugua ala tí Iyibi dindini hemiria tínaga wai bia hayadagua bia holebira.
DEU 1:31 Dindi ko yobi iba dalu naibaga wiagoha howabi tí biamogo bialu hayadagua dege bialu holebira. Ibugua tí biamogo biyago handarimigoni handama ibaabo henego áyu ogoria íbu kamigoni ndobe. Waneigini abame tinaga waneigini taba yu hagadagua yu haga kagoni.
DEU 1:32 Ina tíhondo bi anidagua larugoyu hale naharimigoni. Ani bialu tígua Anduane Homogo kagohondobi mini mbiraore nawi harimigoni.
DEU 1:33 Abale howa tí polene wiagoha ibugua mo bamba halu puwa tínaga balai anda bu holene wiagobi mo walia haga bialu hayagoni. Mbiraga ibuni ira hungu ale howa tí polebirimigoha bamba halu horombe beralibaha howa bamba hagane hayagoni, lene.
DEU 1:34 Mosesehanda lalu, Tígua bi dewa lama ibaga bialu hemigo hale howa Anduane Homogo ibugua tíhondo keba haya. Keba howa ibugua bi hongo howa latagi halu lalu,
DEU 1:35 Wali agali mini kowi kamiruni tí dindi bayale mbira ngule lalu tínaga mamaliruhondo lo wirugoha napoleberemiore.
DEU 1:36 Yabune igini Kalebe ibu dege dindi ogoniha pu holebira. Ibugua dege i̱naga bi mana baya hangu taluwa bialu haya. Ani bialu hayagonaga i̱na dindi ibuni hondo wiyagoni ibubi ibunaga aguanene mani holebirarubi tihondo mulebero.
DEU 1:37 Tígua mana ko bialu harimigonaga Anduane Homogohanda i̱hondobi keba howa i̱ langialu lalu, Mosese í̠bi nde dindi ogoniha napolebere.
DEU 1:38 Anigo í̠ biamogo biaga agali Nunu igini Yosua kago ibu dindi ogoniha pu holebira. Yosua ibugua Isaraele wali agali dindi ogoniha haru polebirago ani bilo í̠na ibunaga mini mo hongo habe, lalu langiya.
DEU 1:39 Ani lowa mani Anduane Homogohanda ina bibahende kamaruhondo lalu, Tínaga waneigini áyu emene gali mbirale ko bayalela baya hangu manda nabi karu ti dege dindi ogoniha pu holebira. Tígua, Waneigini uruni waitigime bo waholebira, laramiligo uruni ti dege dindi ogoni merogoha pu holebira.
DEU 1:40 Ai wali agali wahebi daliahebi kamiruni tí beregedalu dindi ko yobi iba dalu naibaga ngagoha hole dai bidaba. Iba Solowara Daramabi bedagohayagi Agaba dindi pole piaga ngagoha pudaba, layagoni.
DEU 1:41 Ani layagola mani tígua i̱hondo lalu, Mosese-o iname Anduane Homogonaga deni mana koore birimadago. Ai áyu Anduane Homogo ibunime wai bilimu lalu layadagua iname wai bule poleberema, larimi. Ani lowa tígua agali hari barebareha paluyu pearu minime mo mogola halu bope holeberemabe toba howa tínaga wai pole yári wimiru mo karularimi.
DEU 1:42 Ani bu hemigola Anduane Homogohanda i̱hondo langialu lalu, I̱na tí biamogo bialu ha nabi yu waharogola waitigime tí bo wahai holebirago wai nape wahadaba lalu lamibe, laya.
DEU 1:43 Ani layagola i̱na Anduane Homogonaga bi uruni tíhondo langirugola tígua ibunaga bi hale naharimigoni. Tí abale heyalu agali hari barebare palearu baba wai bule pirimi.
DEU 1:44 Ani pialu hemiria Amoroali dewaore hari barebareha palearume abaleore mone mo emabia haragola abale porabu tagitagi bialu agali hayule tagira piagadagua bialu tí baba wai bule tagira ibiya. Ani tagira ibalu tí bama talima pu dege bialu Idomo dindiha hari dewa bu heagoria dindi mini Homa wiagoha bo talia hana hayagoni.
DEU 1:45 Anidagua biyagola tígua Anduane Homogo olalu ibuhondo ina biamogo bia lalu harimigoni. Anidagua lalu ha hemigola ibugua tínaga bi larimigo hale nahaya.
DEU 1:46 Irane ogonidagua biyagome ina Kadese dindi wiagoha lu haabo harimagoni, lalu Mosesehanda lene.
DEU 2:1 Mosesehanda lalu, Kadese dindiha lu haabo howa ina beregedalu hariga peadagua dindi ko yobi iba dalu naibaga wiagoha pialu amu iba Solowara Daramabi bereagohayagi puabo harima. Anduane Homogo ibunime ogodagua bilimu lalu langiyadaguaore birimagoni. Ani bialu ina Idomoalirunaga dalu hari barebare wiagoha luore ibagabu haabo harimagoni ndobe.
DEU 2:2 Ani hemagola mani Anduane Homogohanda Mosese i̱hondo lalu,
DEU 2:3 Tígua hari barebare dindi ko uruniha luore ibaga bialu haabo harimigo ainde dindi abene uyurahayagi pu uyu halimu, laya.
DEU 2:4 Ani lalu bi tí languliya ibugua i̱hondo langiyago ogo, Áyu Idomo dindi hari bare dege dombeneha poleberemigo dindi ogoni tí hameigini Iso aguanene bu karunaga ngagoni. Pialu kamiria tigua tí hondowa gi holebira.
DEU 2:5 Anigo tígua ti baba wai nabilimu. Irane tinaga dindi ngaruni aria emeneorebi mbira tí mo ngia nabuleberogo ai tígua wai nabilimu laro. Idomo dindi ogoni i̱na Iso aguaneneru tinagaore ngelo mirugo ngagoni.
DEU 2:6 Ti dalu ngagoha tí bolangua halu pialu howa tinaga tomobi ibabi bibahende munime yolo bialu nalimu, laya.
DEU 2:7 Tígua mbirale bibahende birimigo damene Anduane Homogo tínaga Ngode Datagaliwabehanda tí biamogo timbuniore biyagonaga embeda nahalimu. Ibugua tí dindi ko yobi iba dalu naibaga wiagoha ibagabu hemiria handayaho haabo hayagoni. Mali pira mariani (40) ibugua tí baya hangu handayaho haabo heagola tí mbirale mbira burupale nabi bayale haabo harimigoni.
DEU 2:8 Ai dindi ogoni yu wahalu ina lone pialu hariga tano kira Elada Esiongebela howa tagira piaga wiadagua pu dege bialu iba timbuni Homene Iba laga bereagoha puabo harima. Ani bialu ogoriani howa lone beregedalu Moabalirunaga dindi ko iba dalu naibaga wiagoha yupe halu pirimagoni.
DEU 2:9 Ani pirimagola Anduane Homogohanda i̱hondo lalu, Moaba wali agali uruni Lode aguanene padago tígua hameigini ogoniha karuni mo ko nahalimu. I̱nime Ara tano ngago ti helo mirugo ti baba wai nabilimu. Tinaga dindiore lene ngago emene mbira hangubi tí mo ngia nabulebero laya, lene.
DEU 2:10 Bamba dindi Ara ogoriani agali hameigini timbuni hongohe mbira mini Emimi hene. Agali hameigini timbuni uruni ti luni lina handadali dali damene Anagimi hameigini luore henegobi dege hene.
DEU 2:11 Hameigini lu timbuni kira ogonilabo mini mende Lebaimiali laga hene. Lebaimiali uruni Moabali hearu tigua ti mini Emimiali laga hene.
DEU 2:12 Bamba dindi Idomo ogoniha Ho hameigini ti haga winigo mani Iso aguanene hearume ti bo batagi howa karulo hene. Mani nde Isaraele hameigini hearu tigua dindi Anduane Homogohanda ngulebero lalu lowiyago karulalu howabi ani dege bini.
DEU 2:13 Mosesehanda laabo halu lalu, Mani Anduane Homogohanda layadagua bialu iname Iba Serede peago domalu ubaede harimagoni.
DEU 2:14 Dindi Kadesebanea biago wahalu pialu Iba Serede peago domarimagola mali pira tebirani halira (38) piya. Ai dindi Kadesebanea ogoriani hemangi agali wai biaga hearu homai hayagoni. Anduane Homogohanda bi layago lola helo anidagua bini.
DEU 2:15 Anduane Homogohanda ti baba keba ho haabo howa ibugua ti bibahende bo wahai helene.
DEU 2:16 Mani agali wai biaga biaru homai heagola
DEU 2:17 Anduane Homogohanda inahondo lalu,
DEU 2:18 Áyu ogoni tígua heyalu Moaba dindiha pole Ara dindini hariga pedadagua pole pudaba.
DEU 2:19 Ani pialu Lode aguanene Amonoali karu dalu kaware ngagoria pu holeberami. Ani pialu tígua ti mo keba holebi wai bima lelobi mbira nabilimu. Dindi ogoni i̱na ti helo miniore ngago tinaga dindi ogoni tí mo ngia nabuleberogo ani nabilimu, lene.
DEU 2:20 Dindi ogoniha hameigini mbira Lebaimi ti hene wuwa dindi ogoni mini Lebaimi dalu laga wini. Anigo Amono hameigini hearu tigua hameigini ogoni mini Samasumimi laga wini.
DEU 2:21 Agali dindi aba ogoniha hearu tibi agali luni timbunibi Anagimi hameigini ale dege hene. Ti agali hongoheni dewaore henegoyu Anduane Homogohanda agali uruni bo amolalu dindi ogoni Amonoali ti karulo helo mini.
DEU 2:22 Iso aguanene Idomo dindi hari barebare wiaruha agali uruni hearia Anduane Homogohanda ti bo batagi halu Iso aguanene biaru mo miyadagua dege mo mini. Anduane Homogohanda Hoali hearu bo wahai hayagola tinaga dindi Idomoali hearu ti karulo henego ka.
DEU 2:23 Anidagua dege dindi mbira mini Kiridi iba dege dombeneha wupe heagoha haga hearume puwa Abimi hameigininaga dindi iba solowara timbuni Medidereniana bereagoria howa wima pialu unugohayagi dindi mini Gasa wiagoria wima tagira peago ti karulo hene.
DEU 2:24 Mosesehanda laabo halu lalu, Ina Moaba wahalu ibirimagola Anduane Homogohanda inahondo langialu lalu, Áyu heyalu Iba Anono pedago domadaba. Anidagua beremigola i̱na Amoroali Hesebono dindinaga Kini Sihono kago tínaga giha minu ya halu ibunaga dindi ngagobi tí mo ngulebero. Ani buleberogo ai tígua wai bia dindi karula bima anda pilimu.
DEU 2:25 Áyu ogoni howa i̱na dindi tara tara wima pedagoha wali agali bu karume tí hondowa gi timbuni helo i̱nime ti mo gi holebero. Anidagua berogola tigua tínaga minibi hale hayagua ti mogo lowa duru lagalaga bialu hai holebira laya, lene.
DEU 2:26 Mosesehanda laabo halu lalu, Kedemodo dindi ko yobi iba dalu naibaga wiagoria howa i̱na agali maru Hesebono wali agalinaga Kini Sihono hearia bi bayale mo palia holenenaga lo yalu pudaba larugoni.
DEU 2:27 Agali uruni tigua bi lo yalu puwa ibuhondo hale halu lalu, Í̠naga dindiha hariga pedadagua bolangua halu polene karulapebe.
DEU 2:28 Ani bolangua halu pialu howa ina iba tomobi bame mialu nole ndo iname yolo bialu noleberema. Ina í̠naga dindi ngagoha hariga pedadagua dege bame bolangua halu poa kamagoni.
DEU 2:29 Ani pialu dindi bamba inanaga Anduane Homogohanda ngule lalu lowinigoha hama pole bolangua halu Iba Yodana domaede holoma̱ya karulapedabe. Ainde Iso aguanene Idomo dindiha karubi Moabali Ara dindiha karubi tigua ina tinaga dindi ngagoha bolangua halu poloma̱ya henge ngiyagoni, lalu lama pene.
DEU 2:30 Ani hale harimagola Kini Sihonohanda ibunaga dindi wiagoha bolangua halu napole lowa hapai haya. Dindi áyu ina karulo kamago holoma̱ya mo ngulenaga Anduane Homogo inanaga Ngode Datagaliwabehanda iname ibu baba wai buwa wayali halu dindi karuloloma̱ya mo ngiya.
DEU 2:31 Ani buwa Anduane Homogohanda i̱hondo langialu lalu, Hale hadaba. Áyu i̱na Kini Sihono ibunibi ibunaga dindi ogonibi tínaga giha mo yaharogo tí karulo halimu, layagoni.
DEU 2:32 Ani layagola Kini Sihono halu ibunaga agali henedaru haru halu ina baba wai bule Yahasa tano wiago kawareni tagira ibiyagoni.
DEU 2:33 Ani ibalu hearia inanaga Anduane Homogohanda ina biamogo biyagola iname ibunibi ibu igini hearubi ibunaga agali hearubi bibahende minalu bai harima.
DEU 2:34 Horo ogoningi dege ibunaga tano wiarubi bo gialahole bialu mo ko hai harimagoni. Ani bialu tinaga wali agali waneiginirubi bibahende bo homelai harima. Iname mbiraore hangubi mbira yu wanahe baiore harimagoni.
DEU 2:35 Ani bialu tinaga tano wiaru bibahendeha nogo sibi bulumaga hearubi dabudabu wiarubi bibahende karulai harimagoni.
DEU 2:36 Iname tano wiaru bibahendeore bo gialo wahai halu ina karuloloma̱ya Anduane Homogo inanaga Ngode Datagaliwabehanda ina biamogo biya. Ani biyagola iname tano bibahende iba Anono peago kawareni dindi Aroe ngagoria howa bama pialu iba angeni tano wiarubi bo gialabaga bima pialu Gileadaliru dalu wiagoha tagira pirima. Tano mbira pabe hongohe ina anda napobehe mbira naheya.
DEU 2:37 Anigo ai Anduane Homogo inanaga Ngode Datagaliwabehanda napilimu lalu langini wiaru Amonoali dindibi Iba Yabogo peagohabi hari bare wiaruha tano maru wiarubi uruniha nape waharimagoni lalu, Mosesehanda lene.
DEU 3:1 Mosesehanda te laabo halu lalu, Ani bialu mani ina dindi abene uyurahayagi Basana dindiha polene hariga wiagoria pialu hemaria Kini Ogahanda ibunaga agali hearu haru halu ibuwa ina baba wai bule Ederi tano wiago kawareni tagira ibiya.
DEU 3:2 Ani ibiyagola Anduane Homogohanda i̱hondo langialu, Í̠na ibu hondowa gi nahabe. I̱na ibunibi ibunaga agali karubi ibunaga dindi ngarubi bibahende í̠naga giha mo ya holebero. Amoro wali agalinaga Kini Sihono ibu Hesebono dindini haru heangi í̠na ibuhondo biridagua Kini Ogahondobi ogonidagua dege bialu bibahende karulai holebere, lalu langini.
DEU 3:3 Ani lowa Anduane Homogohanda Kini Oga halu ibunaga agali hearubi bibahende inanaga giha mo yahai hayagola iname bibahende bo wahai harimagoni.
DEU 3:4 Ani birimangi iname tinaga mbirale wiarubi mbira yu wanahe tano pira waragaria (60) bibahende karulai harimagoni. Kini Oga ibuni Basana tano wiagoria howa dindi Agobo bibahende handame ho haru haga wiarubi karulai hene.
DEU 3:5 Tano uruni bibahendenaga ege pabe hongohe daligaore bu mabubi howa tano panga hongohe helalu aeaneme panga bedena helaga wiaruni karulai halu tano emene maru pabe nabi hearubi karulai harima.
DEU 3:6 Iname tano bibahende bo gialo wahai halu wali agali waneigini bu hearubi bibahende bo wahai harimagoni. Hesebononaga Kini Sihononaga tano wiarubi bo gialo wahai harimadagua dege bibahende bo gialo wahai harimagoni.
DEU 3:7 Ani bialu nogo sibi bulumagarubi dabudabu tanoha wiarubi bibahende mo yaiore halu birima.
DEU 3:8 Ani bialu horo ogoningi iname Amoro wali agalinaga Kini Sihonobi Ogabi libunaga dindi ina karulai harima. Dindi uruni Iba Yodana peago doma edera ni tagira ibiragohayagi Iba Anono peagoria howa pialu dindi abene unuraha pupe halu uyurahayagi Hari Hemono heagoria pu paga harima.
DEU 3:9 Anigo Saidono wali agali tigua Hari Hemono ogoni mini mende Siriono lalu Amoro wali agali tigua nde Hari Seniri laga hene.
DEU 3:10 Iname dindi tigabi yu dindi panda panda wuyu peagoha wiaruni karulai halu Gileada dindi wiagobi Basana dindi wiagobi ogonilaboha dindi wiaru bibahende karulai halu tano kira mini Salega Ederila wiagoria karulai harimagoni. Tano uruni bibahende Kini Oganaga dindiha wiaria bibahende iname karulai harima, lene.
DEU 3:11 Kini Oga ibu Lebaimi wali agalinaga kini hamaro hene. Ibu homayagola hora holene mbogoyi ege to̱le̱me wabini. Mbogoyi ogoni lunaga ge magi manda bialu mita maria howa aranenaga mita kira wini. Homali odagoni Amonoali dindiha Laba tano ngagoria wiaabo ka.
DEU 3:12 Mosesehanda laabo halu lalu, Iname tano uruni karulai harimangi howa Iba Anono poragoria Aroe tano ngagoria howa dindi ogoniha wuyu peago damene bibahende Lubene Gada hameigini libu mo miai harugoni. Ani bialu Gileada dindiha hari barebare ngaruha tano maru ngaru heba ti dege mo miru.
DEU 3:13 Ani bialu Gileada dindiha dindi maru wiarubi Basana dindi wiarubi bibahende Manase hameigini dabane halu mbira hene karubi ti miru. Basana ogoni ala Kini Ogahanda handayaho haga winigobi miru. Ai Manase hameigini ti dindi abale Agobo laga winigobi bibahende Manase hameigini halu mbira hayadaru ti mo miru lalu, Mosesehanda lene. Abale Basana ogoni Lebaimi hameigini tinaga nga laga wini.
DEU 3:14 Mani howa Manase hameigini aria agali mbira mini Yairi henego ibugua dindi Agobo ogoni bibahende karulai howa mani dindi ogoni mini Basana wia aribia hene. Dindi ogoni wuyu pialu Gesua dindi Maga dindilanaga gibuni wiagoha wiari hene. Ani bialu dindi uruni bibahende ibuninaga mini lalu wia aribia hayagola wali agalime dindi uruni bibahende Yairi dindi laga wini.
DEU 3:15 Mosesehanda laabo halu lalu, Magiri hameigini ti Gileada dindi karulelo ngeledogoni. Magiriali uruni ti Manase hameigini dege hene.
DEU 3:16 Ani bialu Lubene hameigini Gada hameiginila libu dindi Gileada ngagoria howa wuyu pialu Iba Anono poragoria tagira polebira. Dindi abene unurahayagi wima pialu iba ogoni poragoria tubari wulebira. Amura ni tagira ibiragohayagi howa wima ibalu Iba Yabogo poragoria tubari wulebira. Ani bialu Iba Yabogo ogoni Amono hameigini baba tubari wulebira.
DEU 3:17 Ani bialu orayaginaga ni paliragoha tubari Iba Yodana poragoria nga. Ani bialu uyurayaginaga tubari iba kuyama Galili bedagoria howa pupe halu unurahayagi Homene Iba laga bedagoria abene ni tagira ibiragohayagi Hari Pisiga hapara howa kagoria bolangua halu Homene Iba bedagoria tagira peda.
DEU 3:18 Ogoningi dege tihondo ina bi ogodagua lamiru. Ai Anduane Homogo inanaga Ngode Datagaliwabehanda dindi Iba Yodana doma ederayagi ni tagira ibiragoha ngago tí halimulonaga nga. Ai tígua wai biaga ale wirimidaru mo yalu Iba Yodana domaede halu tí hamene Isaraele maru karunaga dindi mo mule tígua bamba halu pole pudaba.
DEU 3:19 Tí one waneiginiru ti ina tí tano mo ngirugoha berelalu pilimu. Tínaga nogo bulumagaru dewa dege hinidemilo manda bidogo urunibi nde tano uruniha dege helalu pilimu.
DEU 3:20 Tígua tí hamene karunaga dindi Anduane Homogo inanaga Ngode Datagaliwabehanda Iba Yodana doma edera ni paliragohayagi ngaru ngulebero lalu lowiyago henene ngilo tígua wai bialu biamogo bilimu. Ai tígua wai biai howa abale dai nabi tí hamene biaru ti karulape ka handala dai bule ti heba mandagi ho halimu. Ani bialu mani tínaga dindi i̱na tu wa ngirugoha hole dai bilimu, lene.
DEU 3:21 Mani i̱na Yosuahondo ogodagua laru. Anduane Homogo inanaga Ngode Datagaliwabehanda Kini Oga Kini Sihonolahondo biyagoni í̠ de handarigoni. Ai tígua kini maru karu baba wai bialu tinaga dindi karularamigolabi nde anidagua dege bulebira.
DEU 3:22 Anduane Homogo inanaga Ngode Datagaliwabehanda tí biamogo bulebirago tígua gi nahe halimu laru, lalu Mosesehanda lene.
DEU 3:23 Mosesehanda lalu, Horo ogoningi i̱na Anduane Homogohondo hongo howa ogodagua laru.
DEU 3:24 Anduane Homogo Bibahende Haru Haame Ho Haga-o í̠na bule ngego damene bibahendenaga i̱ emene hangu mbira mo walia harida. Í̠ birilidagua bulene mbirali dindiha harihabi naheore.
DEU 3:25 Áyu nde i̱ dindi bayale í̠na ngini dindi benebere biagobi hari barebare bayale ngarubi Hari Lebanono wedagobi hondoliya Iba Yodana nde domalu poliya yupe habelo hameore ledo.
DEU 3:26 Ani larugoyu tígua biako hene ngamigome Anduane Homogohanda keba halu i̱naga bi hale nahe handa tara haya. Ibugua i̱hondo lalu, Ne hariga bi lalu kegoni pai howa ema nabi harene. Bi ogonidagua lalu i̱hondo lone hale nahabe.
DEU 3:27 Áyu heyalu Hari Pisiga wedago nene ngagoria iragaho howa dindi abene uyurahayagi handa uyu ha abene unurahayagi handa unuha ni tagira ibiragohayagi handa daibia ni paliragohayagi handa amuha bigi bibe. Í̠ Iba Yodana domalu ubaede naholeberego hari nene ogoriani howa wá baya hanguore handa amu nana bibe.
DEU 3:28 Yosua baya hangu lawai halu ibunaga bu mini mo hongo habe. Ani larogoni Yosua ibugua wali agali haru halu Iba Yodana domaede halu ederayagi polebira. Ani pialu ti dindi áyu í̠ handa amu halu handaregoniha pu holebira, Anduane Homogohanda laya.
DEU 3:29 Anidagua layagola ina dindi ulini panda panda Bedepeo tanonaga abene amurayagi hondo harimagoni, lalu Mosesehanda lene.
DEU 4:1 Mosesehanda Isaraele wali agali lamialu lalu, I̱na tíhondo bi mana olangiruru baya hangu talialu bialu harimiyagua tíni bayaleore holeberemi. Ani bialu Anduane Homogo ina mamalirunaga Ngode Datagaliwabe ibugua dindi tí halimulo bamba ngini biagoria karulo holeberami.
DEU 4:2 Anduane Homogo inanaga Ngode Datagaliwabe ibugua bi mana lowini áyu langeroruniha tígua mana gahenge mbira tínime wabu tago nahalimu. Mana uruni aria mbira mo wanahe o langeroruni bibahendeore baya hangu talialu biai halimu.
DEU 4:3 Anduane Homogo ibunime Hari Peroni howa biyaruni tíni handai harimi. Dewaliore dama mitangi bialu gime wabini Balahondo bi pupu wiaga bibahende hearuni ibugua ti mo ko hai hayago handarimigoni.
DEU 4:4 Anigo wali agali Anduane Homogo inanaga Ngode Datagaliwabe kago ibugua bia larago hale halu biaga harimiru tí dege haabo henego kamigoni.
DEU 4:5 Anduane Homogo inanaga Ngode Datagaliwabe kago ibugua bi mana i̱hondo langiyaru i̱na tíhondo bibahende langiai haru. Áyu tígua pialu dindi bayale ogoriani karulo hole poleberemigoha pu howa bi mana uruni talialu biaabo halu halimu.
DEU 4:6 Wali agali dindi tara tarani bu karume tí manda timbuniwi mini gigabi taraoredane hendelo tígua mana uruni baya hangu talialu bialu halimu. Wali agali tara karume bi mana uruni hale howa tigua bi ogodagua lalu, Ayali-o wali agali urunaga mini mandala timbuni ina kamaru ale ndoya lolebira, lene.
DEU 4:7 Ani lowa lalu, Wali agali tara tara karu tininaga hongo timbuniorehe heaguabi tigua bi pupu wulenaga dama heaguabi ti biamogo bialu mo wulene Anduane Homogo inanaga Ngode Datagaliwabe kadagua nahe. Anigo Anduane Homogo ibu inane haru mandagi haabo haga howa iname biamogo bia lalu ibuhondo olarimayagua ibugua hale halu abale biamogo biaga ka.
DEU 4:8 Wali agali tara tara karu tininaga hongo timbuniorehe heaguabi uruni tiha mana bayale tigabi áyu i̱na tíhondo lawai harugoni ale bulene mbira nawiore ti bame haga ka.
DEU 4:9 Anigo tí de hondowa mamage halu halimu. Horo bibahendengi tí dindi ogoria kamingi howa mbirale tíninaga deme handarimiruni embeda nahalimu. Tínaga waneigini aguaneneru mani holebiraruhondobi lamiaabo halimu.
DEU 4:10 Hari Sainai heagoria howa Anduane Homogo inanaga Ngode Datagaliwabe deni kaware harimago mitangi bialu lamilimu. Horo ogoningi ibugua i̱hondo langialu lalu, Wali agali bibahendeore i̱naga bi mana larogoni hale helo íbu ngoai hadaba la, layagoni. Ti hale howa dindini kangi i̱naga bi mana ogoni tini ala talialu bialu howa tinaga waneiginirubi lamilo. Waneigini tiguabi nde i̱naga bi mana hale howa talialu bialu howa i̱ni andaneha haabo helo, layagoni.
DEU 4:11 Anduane Homogo ibugua bi lai hayagola tí hari tene kaware hapara howa dege hemigola ginu pobobi ira haguamebi hari nene biago bu yihalu ira hungu timbuni hari nene biagoha howa kiaulo daga hayane handarimigo te ogoni tí waneiginiru lamilimu.
DEU 4:12 Ani buwa Anduane Homogo ibuni ira hagua ogoniha howa tíhondo bi layagola hale harimigoni. Anigo tígua Anduane Homogo ibuni kagobi deme nahende bi layaru dege hale harimigoni lamilimu.
DEU 4:13 Horo ogoningi ibugua tí baba habo nalolene bi lowialu ege to̱le̱ kirani Bi Pira gilibu ngiyagoni. Ani ngialu howa lalu, Tígua habo nalolene bi lo werogoniore baya hangu talialu bialu halimu, layagoni.
DEU 4:14 Ani lowa Anduane Homogohanda tígua dindi bayale anda pialu karulo holeberemigoha howa bialu halimulonaga bi mana bibahende baya hangu lawai habe lalu i̱hondo langiya, lene.
DEU 4:15 Mosesehanda laabo halu lalu, Anduane Homogo ibuni Hari Sainai neneni ira hungu biagoha howa tíhondo bi langiyangi tígua ibuore ogo ale handalehe lalu manda bibe nahe harimigoni. Ani birimigoni mitangi bialu tígua mamage howa de hondo halimu.
DEU 4:16 Tígua mbirale mbira gime wabu ngelowa inanaga anduaneore handalehe ogoni lolemini nalalimu. Ogonidagua bialu harimiyagua tígua mana ko timbuni bialu holeberemi. Tígua bigiya mbira wali mitangi bialubi agali mitangi bialubi nogo ega puya iba wenaru mitangi bialubi mbira gime wabu yu howa uruni tínaga anduaneore lalu mbirale uruni alehondo tígua bi pupu wulene nawiore.
DEU 4:19 Tígua ni ege yakundiru hari daligaha bu karuhondobi nde bi pupu wulene nawi dege. Anduane Homogo inanaga Ngode Datagaliwabe ibunime wali agali tara maru karume urunihondo bi pupu wialu helo ani heleda.
DEU 4:20 Anigo tígua ani bulene nawiore. Tí Iyibi dindini ira timbuni daradagua biagoha dole hemiria Anduane Homogohanda tí yo pialu pilimulo mo wialu pelayagoni ndobe. Ani bialu ai tí ibuninaga wali agaliore halimulo lowa ibunime tí haru tagira ibiyagoni. Áyubi nde tí ibunaga kamigoni.
DEU 4:21 Ai nde tíguaore biako harimigome Anduane Homogo inanaga Ngode Datagaliwabe ibugua i̱hondo keba hayagoni. Keba howa ibugua i̱hondo bi hongo howaore lalu, Í̠ore dindi bayale tí ngule larugo ede ngagoha Iba Yodana doma ede halu napolebere, laya.
DEU 4:22 Ai nde i̱na iba ogo domalu ubaede naholebero. I̱ ogohayagi dege biralu homolebero. Tí dege dindi bayaleore benebere ede ngagoniha hole poleberami.
DEU 4:23 Ani pu howa tígua Anduane Homogo inanaga Ngode Datagaliwabe ibugua ina baba habo nalolene bi lowiyago yu wanahe baya hangu handayaho halimu. Tígua mbirale gime wabini ngaruhondo bi pupu nawi ibunaga bi manaore baya hangu hale halu bialu haabo halimu.
DEU 4:24 Tígua gime wabiniruhondo bi pupu nawilimu larogoni irane Anduane Homogo inanaga Ngode Datagaliwabe ibuniore kagoni. Ibugua tí mbirale gime wabini urunihondo bi pupu wialu halimulo yupe naholebira. Ibu ira hungu hongohe dalude ale kagome mbirale mbira ibu handalehe lowa tígua wabu helolene manda birimiyagua uruni daiore helolebira.
DEU 4:25 Maniorebi tíni dindi ogoria haabo howa tínaga waneigini aguanerubi haragola mbirale bi pupu wulenaga gime nawabuleore larogoni. Tígua nabule larogo hale howa dege bialu harimiyagua mana ogoni Anduane Homogonaga deni ko ngubiorego ogonime ibu mo keba holeberemi.
DEU 4:26 Áyu i̱na bi hongohe olarogoni hari daligamebi dindimebi libugua hale hariba lolene wilonaga olarogo tí hale hadaba. Tígua Anduane Homogonaga bi áyu langerogo hale naharimiyagua nde Anduane Homogohanda tí dindi ogoriani nahalimulo bo batagi holebira. Ani bialu dindi bayale Iba Yodana ange ederayagi karulole kamigoriani lu haabo naholeberemi. Tí bibahendeore pu ereba hai holeberemi.
DEU 4:27 Anduane Homogohanda tí dindi tara tara ngaruha balu purogo lelaragola emene hangu mbira yu wahene holeberemi.
DEU 4:28 Dindi tara tara uruniha purogolo howa tígua mbirale dama mitangi bialu wali agali tinime ege to̱le̱ irarume wabini ngaruhondo bi pupu wuleberemi. Anigo mbirale gime wabini uruni aleme de nahandagabi hale nahagabi bi nalagabi tomo nanagabi mbirale nga nahagabi nga.
DEU 4:29 Ani handalu horo odagoningiore howa tígua mogolo handalu Anduane Homogo ibuni karia beregedalu dai bulene mitangi bu holeberemi. Ani buwa tíninaga hameoremebi minioremebi hongo halu ibuni taya bulene hame larimiyagua nde ibalu ibuni karia handa walia holeberemi.
DEU 4:30 Anigo ai tíha genda timbuni mbira íbu ngangibi mo ko holene mbira íbu ngangibi tínaga bu mini beregedalu Anduane Homogo ibunaga bi mana lowini ngaru baya hangu talialu bialu holeberemi.
DEU 4:31 Ngode Datagaliwabe ibugua tí yu wahalu bo batagi halu mo ko nahaga tí daraore howa biamogo biaga kagoni. Ani howa ibugua bamba inanaga mamaliru baba habo nalolene bi lowinigo embeda naholebiraore.
DEU 4:32 Ai ala bamba tí dindini nahemiha henedago mitangibu dai bidaba. Ani bialu Ngode Datagaliwabe ibunime wali agali piganeore wabinidago mitangibu dai bidaba. Tígua dindi tara tara ngaruha pu harimiyaguabi mbirale timbuni o binidaruni ale mbira bini dege ngane nahondoleberemi. Bi uruni ale mbira bamba agalime hale heneyabe. Ndoyago.
DEU 4:33 Anduane Homogo ibugua ira hungu timbuni deagoha howa bi layuago tígua hale harimigoni. Ai bamba mbirale gime wabinirume bi mbira ira hunguha howa ogonidagua layane hale howa homa nabi mbira ai heneyabe. Mbirali naheneore ndobe.
DEU 4:34 Anduane Homogo inanaga Ngode Datagaliwabe ibunime ina Iyibi dindiha howa haru tagira ibalu ina ibuninaga wali agaliore heledagoni. Ibugua tínaga deoreni howa biabe hongohe tara tara wiaru dewaore biya. Ibugua Iyibiali hearu baba wai bialu warago timbuniru Iyibi dindiha ibilayagoni. Ani bialu nde ibugua Iyibi wali agali mo gi halu agalime nabiagane ale dewaore biya. Anduane Homogo ibugua ani biyadagua biaga mendeali kabe. Mendeali naheoreyago.
DEU 4:35 Mbirale uruni biyaruni Anduane Homogo ibugua tíhondo mbirale hongohe urunidagua bibehe mendeali mbira naheore. Ibugua, I̱ni hangu kogoni, lalu tí mo walia hayagoni.
DEU 4:36 Ibugua tí lawai holenaga ibunaga bi dahuliya andagaha howa ladali haya. Ani buwa ibugua dindini ira timbuni hongohe deagoha howa bi latagi hayane hale harimigoni.
DEU 4:37 Ai Anduane Homogo ibugua tínaga mamaliru gubalini ho howa ibugua tí ibunaga wali agali halimulo dabaya. Ani dabalu ibuninaga hongo timbuni wiagome tí Iyibi dindiha howa haru tagira ibiyagoni.
DEU 4:38 Tí ani haru tagira ibalu howa harigani wali agali timbuni hongo timbunihe tí baba hongo manda nakarulape hearuni ibugua bope haga biyagoni. Ani bima ibalu tí haru halu ibuwa agali uruninaga dindi anda wiaru tí karulo halimulo ngulenaga ani binigo ai dindi ogoni áyu tí karulo kamigoni.
DEU 4:39 Anidaguaore binigo áyu mitangi bialu tígua o binidaruni embeda nahalimu. Anduane Homogo ibu dindibi dahuliya andagabi bibahendenaga Ngode Datagaliwabe kagoni. Mendeali ibu kagobi naheore.
DEU 4:40 Anigo ibunaga bi mana áyu i̱na tíhondo langiruruni baya hangu talialu bialu halimu. Anidagua talialu bialu harimiyagua tínibi tínaga waneiginirubi bayale hai holeberemi. Ani bialu tígua Anduane Homogo inanaga Ngode Datagaliwabe ibugua dindi áyu o ngiragoha haabo howa holeberemi. Ani bialu dindi ogoni tínagaore wiaabobo bu wulebira, lalu Mosesehanda lai hene.
DEU 4:41 Mani Mosesehanda tano tebira Iba Yodana doma ederayagi ni tagira ibiragoha mo wini.
DEU 4:42 Tano uruniha agali mbirame agali mende ibu waitigi ndo kago baro la nabi mememe balu homayagua ibida pialu ha do holene dabo ngelene. Agali urunidagua birago ibu tano uruni mbiragoha ibida pialu ha do kagola homayago damene karume talima pialu bo wanaholebira.
DEU 4:43 Tanodaru mini uru wini. Mbirago dindi ko yobi wiagoria Bese winigo tano ogoni Lubene hameigini ti ha do helonaga mo wini. Tano mende Lamodo winigo ogoni Gileadahayagi wini. Gada hameigini ti ibida pialu ha do holene ogoni wini. Tano tebone Golana winigo ogoni Basana dindihayagi wini. Manase hameigini halu mende karu ti ibida pialu ha do holene ogoni wini.
DEU 4:44 Mosesehanda Isaraele wali agalihondo Anduane Homogonaga bi mana maru lamini.
DEU 4:45 Ibugua bi mana uruni ti Iyibi dindi wahalu tagira ibalu mani ti Iba Yodana doma ederayagi ni tagira ibiragoha dindi ulini Bedebero tano wiago handape ho howa bi mana ogoni lamini. Dindi ogoni Amora wali agalinaga Kini Sihono ibu dindi ogoriani hene. Ala ibu Hesebono tano wiagoria biruwa ibugua dindi uruni handameho haga hene. Ani henego ai Mosese halu Isaraeleali tigua Iyibi wahalu tagira ibuwa ti baba wai bialu bope hene.
DEU 4:47 Ani bialu ibunaga dindi wiagoriabi Basana dindinaga Kini Oga dalu wiagobi Isaraelealime ti karulo hene. Amora wali agalirunaga kini mende ogoni Iba Yodana doma ederayagi ni tagira ibiragoha haga hene.
DEU 4:48 Isaraele hameigini tigua dindi karulo henedaru tubari Aroe tano Iba Anono pedago kawareni howa wuyu pialu hari mini Siriono laga mini mende Hari Hemono laga heagoria tagira pene.
DEU 4:49 Ani bialu Isaraeleali tigua dindi Iba Yodana ange mende ni tagira ibiragohayagi wiaru bibahende ti karulai halu iba kuyama mini Homene Iba laga bedagoria tagira pialu unura piaho wialu Hari Pisiga kagoria wima tagira pene.
DEU 5:1 Mosesehanda Isaraele wali agaliru íbu ngoai hadaba lowa tihondo lalu, Isaraele wali agaliru-o i̱na tíhondo bi mana áyu langerogo hale hadaba. Bi mana baya hanguore hale halu mo yai howa talialu bilimu.
DEU 5:2 Anduane Homogo inanaga Ngode Datagaliwabe ibugua Hari Sainai neneni howa ina baba habo nalolene bi lo wiyagoni.
DEU 5:3 Habo nalolene bi ogoni ina mamali heneru baba hangu ndo áyu ina kamaru bababi lowinigo nga.
DEU 5:4 Anduane Homogo ibugua ibuni hari biagoria ira hungu biyagoha howa ina dengui handalu bi layagoni.
DEU 5:5 Horo ogoningi i̱ dombegua howa Anduane Homogo ibunaga bi layago lo yudai bialu tí langialu harugoni. Ira hungu timbuni biyago hondowa tínime hari biagoha polenego gi harimigola i̱na ani pu harugoni. Anduane Homogohanda ogodagua laya.
DEU 5:6 I̱ Anduane Homogo tínaga Ngode Datagaliwabe kogoni. Tí Iyibi dindiha garabaya hemiria i̱na tí haru tagira ibirugoni.
DEU 5:7 Dama tara tarahondo bi pupu nawi i̱ hangu mitangi bialu mo dunini howa lotu lalu halimu.
DEU 5:8 Mbirale mbira hari daligaha winibi dindini winibi ibaha winibi dindi andaneha winibi uruni ale bi pupu wulenaga gime wa nabilimu.
DEU 5:9 Mbirale mbira gime wabini mbira ngelowa ogonihondo tíni bulu palialu bi pupu nawilimu. Ani nawilimu larogo irane Anduane Homogo tínaga Ngode Datagaliwabe i̱niore kogo mbiralime ogonidagua bilo henge namiaga kogoni. I̱ handabe manga halu erembira ngiaga karu pani mialu uruninaga waneigini mani hama porarubi daba tebone mane daba haragoriabi pani miaho dege ngoria hondolebira.
DEU 5:10 Ai i̱ gubalini halu i̱na larodagua bialu i̱naga mana lo ngodaguabi hale halu biaga karu i̱na uruni ti gubalini halu maha ti waneigini dabane daosini dewa hama porarubi gubalini haho wiaabo hole kogoni.
DEU 5:11 Mana ko tara tara bulenenaga i̱ mini lalu labi biabi nabilimu. I̱ Anduane Homogo tínaga Ngode Datagaliwabe kogo mbirali i̱naga mini mo nagalone haga kago pani miaore bulebero.
DEU 5:12 Anduane Homogo tínaga Ngode Datagaliwabe kogo i̱na tíhondo bilimu lalu langirudagua Sabada horo i̱ninaga loma biaho ngeledogo ogoni mitangi bialu halimu.
DEU 5:13 Tí horo waragaru tíninaga biabe bulene horo o ngarunigo
DEU 5:14 ai horo kanego i̱ mitangi bialu ha̱lo halimulonaga nga. Horo kane ogoningi biabe bulene nawiore. Tínibi tí waneiginibi tínaga garabaya biabe ale biahaga karumebi tínaga nogomebi dindi tarali maru tí heba mandagi kamirumebi tí bibahendeme biabeore mbira nabi halimu. Wali agali tínaga garabaya biabe ale biahaga karu tibi nde tíni ha̱lo kamidagua dege ti biabe nabi ha̱lo holene nga.
DEU 5:15 Tínibi nde Iyibi dindiha garabaya biabe ale bialu hemiria i̱ Anduane Homogo tínaga Ngode Datagaliwabe kogo i̱na i̱ninaga hongo timbuni gibiorehe kogome tí haru halu tagira ibirugoni. Ani birugonaga mitangi bialu tígua nde bi mana o langerogo talialu Sabada horo ogoniore ha̱lo birulene horo wiabagi hene ngelalimu.
DEU 5:16 Anduane Homogo tínaga Ngode Datagaliwabe i̱na bilimu lalu langirudagua talialu tínaga aba ai̱yala mo yo handa nabi bi laradagua hale halu bilimu. Anidagua bialu harimiyagua tígua mbirale bialu holeberamiru bibahende bayale dege hai halu dindi i̱na ngerogoriani luore haabo holeberami.
DEU 5:17 Wali agali homelo nabalimu.
DEU 5:18 Wali agali kayu nayalimu.
DEU 5:19 Mbirale page nabilimu.
DEU 5:20 Ke̱ howa dibade nahalimu.
DEU 5:21 Agali mende ibu one bedago hondowa tí dimagoli nahalimu. Mendealinaga anda kago hondowabi tí dimagoli nahalimu. Mendeali ibunaga dindi ngagobi ibunaga wali agali garabaya biabe ale biahaga bu karubi ibunaga nogo bulumaga hinidarubi nogo dongi karubi ibunaga mbirale maru ngaru bibahendebi tí hame lalu dimagoli nahalimu, laya lalu lene.
DEU 5:22 Bi uruni Anduane Homogohanda amu Hari Sainai teneha tí ngoai ho hemiria langiyagoni. Ogoningi ibugua ira hungu ginu hagua mberane timbuni biagoha howa tí bibahendehondo bi uruniore baya hangu talialu bialu halimu lalu tí langiyagoni. Ibugua bi tara maru bilimu lalu mbira nalangi. Mani hayagola ibugua bi mana uruni bibahende ege to̱le̱ mbalape kirani gili buwa i̱hondo ngiyagoni, lalu Mosesehanda lene.
DEU 5:23 Mosesehanda laabo halu lalu, Hari nene biago ira hungu hagualame bu dambi hai heagola ge heagoha howa bi mbira layuago tí hale harimigoni. Ani hale halu tínaga agali haguane hearubi hameigini hangu hangu hemirunaga agali bamba hene hemirubi ti bibahende i̱ hewaria ibuwa lalu,
DEU 5:24 Anduane Homogo inanaga Ngode Datagaliwabe ibugua ira hungu haguala timbuni datagi hayagoha howa bi latagi halu ibunaga hongo holene timbuni gibiore wiago inahondo mo walia hayagoni. Áyu ogoni Ngode Datagaliwabe ibunime agali mbirala lola howa bi layagua agali ogoni ibu homolene nawidane iname hendedamagoni.
DEU 5:25 Anigo Anduane Homogo inanaga Ngode Datagaliwabe ibugua ina baba bi lone layagua nde ina homolene wulubadago. Ira hungu haguala tara dayagonime ina mo ko howaore dolobada. Anigo áyu ina aginaga homolene ngabe.
DEU 5:26 Ngode Datagaliwabe haluhe kago ibunime ira hungu haguaru timbuni dedagoha howa bi larago hale howa wali agali kamaru aria mbirali nahome ai kabe.
DEU 5:27 Ai Mosese í̠na dai bialu Anduane Homogo inanaga Ngode Datagaliwabe ibugua inahondo bi lararu damene bibahende hale hole pu. Hale howa í̠na ibugua bi layaru ina langeregola iname hale halu talialu biai holeberemago ai hale hole pu, larimi.
DEU 5:28 Ani larimigo hale howa Anduane Homogo ibugua i̱hondo langialu lalu, I̱na wali agali tigua bi layaruni hale harugo bi uruni tigabiore layada.
DEU 5:29 Ai tigua mini ogonidagua dege wu haabo helo hamelo ko. Tigua i̱naga mini mo yaraga haabo helobi i̱naga bi mana lowinigo ngaru bibahende talialu bialu haabo helobi hameore lo kogoni. Tigua ogonidagua bialu hayagua nde tinibi tinaga waneigini aguaneru mani holebirarume bialu holebirarubi bibahende bayale dege haabo holebira.
DEU 5:30 Anidagua bulebirago ai tíninaga balai anda bu henedagoha hole pugupugu bidaba lole pu.
DEU 5:31 Anigo Mosese i̱na i̱naga bi mana bibahende í̠hondo languliya í̠ ogoriani habe. Wali agali tigua dindi i̱na tihondo ngulebero lalu lamirugoha pu howa i̱naga bi mana uruni talialu bialu helo í̠na ti lawai habe, laya lene.
DEU 5:32 Ani lowa Mosesehanda tihondo lamialu lalu, Isaraele wali agaliru-o tígua baya hanguore de hondo howa Anduane Homogo inanaga Ngode Datagaliwabe ibuguabi langiyaruni baya hangu talialu bialu haabo halimu. Mana lo ngaruni aria mbiraore hangubi napugualimu.
DEU 5:33 Tígua bialu holeberemiru bibahende bayale hai helo mana lowini ngaruni baya hangu talialu biai halimu. Anidagua birimiyagua tí dindi bayale karulole kamigoria anda pu howa bayaleore haabo holeberami, lene.
DEU 6:1 Mosesehanda laabo halu lalu, Anduane Homogo inanaga Ngode Datagaliwabe ibugua i̱hondo bi mana uru tí lawai habe lalu langiya. Tígua dindi bayale ogoniha anda pole pialu kamigoria pu howa ibunaga bi mana uru baya hangu talialu bialu halimu.
DEU 6:2 Tíni dindini kamingi howabi tínaga waneigini aguane mani holebiraru ti howabi bibahendengi tígua Anduane Homogo inanaga Ngode Datagaliwabe andaneha haabo halimu. Anidaguaore bialu harimiyagua tí dindi ogoria luore halu hodagua holeberemi.
DEU 6:3 Isaraele wali agaliru-o bi uruni hale howa talialu bilimu. Anidagua bialu harimiyagua nde tígua bialu kamiru bayale hai halu tí hameiginibi hongohe mbira tagira pialu dindi bene bere bayale Anduane Homogo ina mamalirunaga Ngode Datagaliwabe ibunime tí ngulebero lalu bamba layadagua pu holeberemi.
DEU 6:4 Isaraele wali agaliru-o Anduane Homogo ibuni hanguore inanaga Ngode Datagaliwabe kago manda bialuore halimu.
DEU 6:5 Anduane Homogo tínaga Ngode Datagaliwabe kago tínaga gubalinimebi minimebi hongomebi ibu mitangi bialu gubalini ho halimu.
DEU 6:6 Bi mana i̱na áyu o langerogoni embedaore nahalimu.
DEU 6:7 Tínaga waneiginiruhondo lawai halu halimu. Tíni andagaha biruwabi harigani pialu howabi biabe bialu howabi ha̱lo biruwabi tí waneigini lawai haabo halu halimu.
DEU 6:8 Bi uruni embeda holigonaga bebani gili buwa tíninaga gi habenibi wanakuinibi gilibu bapara howa halimu. Anidagua birimiyagua nde bi mana uruni embeda naholeberemi.
DEU 6:9 Bi mana uruni tíni andaga panga harabani gilibu wialu tanoha uba anda tagi biaga pabe panga kagoriabi gilibu wilimu, lalu Mosesehanda lene.
DEU 6:10 Mosesehanda laabo halu lalu, Bamba Anduane Homogo tínaga Ngode Datagaliwabe ibugua bulebero lalu tínaga mamali Abarahama Aisaga Yagaba imaru tihondo lowiyadagua dindi bayale mbira tano timbuni dewa buwi tígua erekui biabe bini ndo ngaruni ngulebira.
DEU 6:11 Anda odaruniha dabudabu tara tara bayale degeru bu wulebirago tígua mo wini ndo wulebira. Iba hambiaga ulibi tombo wulebirago urunibi tígua tombene ndo dege wulebira. Dindi uruniha pu mbira gerebi lini daga maburu ira olibe maburu wulebirago tígua hengene ndo dege. Anduane Homogo ibunime dindi bayale ogoniha tí haru halu puwa tígua meore karulo halimulo ngulebira. Ai tígua dindi ogoniha anda pu howa tomo bayale tara tara ngaru minana tínime noa bira ale naga bialu tombe ho howa
DEU 6:12 Anduane Homogo ibuni embeda holigo de handaluore halimu. Ibunimeore tí Iyibi dindiha garabaya biabe ale bialu harimigoria howa dindi ogoni yu wahalu haru tagira ibiyagoni.
DEU 6:13 Tígua Anduane Homogo inanaga Ngode Datagaliwabe ibu andaneha haabo halimu. Ani howa lotu ibuhondo hangu lalu ibunaga minini howa bi henene lalu halimu.
DEU 6:14 Wali agali tí kamigoria kaware handa a̱i̱ na̱i̱ bu padarume dama mitangi bialu gime wabiniruhondo bi pupu wialu kadagua nahalimu.
DEU 6:15 Tígua mbirale gime wabini urunihondo bi pupu wirimiyagua Anduane Homogohanda tíhondo keba timbuni howa irame bo heda halu mbirale bibahende do mundulai hagadagua tí balu bo wahaiore holebira. Ani bulebirago irane Anduane Homogo ibuni inane haru mandagi haabo kagoni howa ibugua tí mbirale gime wabiniruhondo bi pupu wilimulo yupe naholebira.
DEU 6:16 Tígua Masa dindini howa birimidagua mani Anduane Homogonaga hongo abidabe hondole bahanda nabilimu.
DEU 6:17 Bi mana ogoni baya hangu talialu biai halimu lalu langiyago mbiraore yu wanahalimu.
DEU 6:18 Anduane Homogohanda bulene tigabi bayale lalu langiyaru talialu bialu harimiyagua bibahendeore tígua beremiru bayale hai holebira. Ani bialu bamba Anduane Homogohanda dindi bayale benebere ogoni tí ngulebero lalu tínaga mamaliruhondo laminigo heneneore tí halimulo ngulebira.
DEU 6:19 Ani bialu tígua waitigi dindi uruniha holebiraru bo batagi holeberemi layadagua heneneore uruni bo batagi holeberemi.
DEU 6:20 Mani horo mbirungi tínaga waneiginirume tí hale halu lalu Anduane Homogo inanaga Ngode Datagaliwabe ibugua mana uruni iname taluwa bialu halimu layago irane aginagabe lolebira.
DEU 6:21 Ani hale haragola tígua ogodagua ladai bilimu. Ina bamba Iyibi dindini kini heagonaga garabaya biabe ale biahaga hemaria Anduane Homogohanda ibunaga hongome ina mo wialu haru dai binigo kama.
DEU 6:22 Heneneore Anduane Homogo ibugua agalime nabiagane alebi deme nahendene alebi hongohe tara tara tiha mo ko holene mo tandaga holenebi wiaru Iyibi wali agalihondobi Iyibinaga kini heagohondobi agali haguane haru haga hearuhondobi biyaru inanenaga demeore handarima lalimu.
DEU 6:23 Ani bialu ibugua ina Iyibi dindiha howa haru tagira ibalu bamba ina mamaliruhondo bi lowiyadagua heneneore dindi bayale ogoni ina ngulebero layagoni heneneore ngule haru ibiya.
DEU 6:24 Mani howa Anduane Homogo inanaga Ngode Datagaliwabe ibugua ina ibu andaneha howa ibunaga bi mana uruni talialu bialu halimu lene. Ani layadagua bialu haabo harimayagua ibugua inanaga dindi ogo handayaho haabo kagola bayale áyu ngagobi wiaabo holebira.
DEU 6:25 Anduane Homogo ibunaga bi mana inahondo langiyago baya hangu talialu bialu haabo harimayagua nde Anduane Homogo inanaga Ngode Datagaliwabe ibugua inahondo ibunaga gubaliniha turu halu dungulo howa ina wali agali tigabiore kami lolebira, lalu Mosesehanda lene.
DEU 7:1 Mosesehanda laabo halu lalu, Anduane Homogo inanaga Ngode Datagaliwabe ibugua tí dindi áyu pole kamigoriani haru pialu howa hameigini tara tara dindi ogoriani padaru bo waratagi hai holebira. Tí pialu dindi ogoriani anda poramigola agali tí ale ndo hameigini karia timbuni hongoheru dindi ogoniha padago bo batagi hai holebira. Hameigini hongohe uru Hidiru Gigasaru Amoraru Kenanaru Pereseru Hibiru Yabusuru uruni paligi bida.
DEU 7:2 Anduane Homogo inanaga Ngode Datagaliwabe ibugua hameigini uruni bope halimulo henge ngirangi tígua hameigini o biaru homelo bo wahai halimu. Tígua hameigini uruni dara halu wai palimi̱ya lalu bi mbira nalalimu.
DEU 7:3 Ani bialu hameigini uruni baba wali dabu bu pu íbu nabilimu.
DEU 7:4 Wali dabu bu pu íbu birimiyagua tigua tí waneiginiru dama mitangi bialu gime wabini ngaruhondo bi pupu wima pialu Anduane Homogo yu wahalu polebiragonaga laro. Nabilimu larogoni tínaga waneiginirume bialu hayagua nde Anduane Homogohanda tíhondo keba timbuni halu abaleore tí mo ko hai holebira.
DEU 7:5 Ani buligo tígua wali agali uruni ti heba mandagi nahe howa tinaga bi pupu wiaga damene ngaruni bo haeala bagabu wahai halimu. Tinaga lomabu delaga dabu bu karu bo haeala baga bialu anda gene ege to̱le̱me wabu helene karu bo gindulobaga bialu gene irame wabu helene karu dibu gindulobaga bialu tinaga dama mitangi bialu gime wabini mini Asera laga wabu heledaru dambialu irani delalimu.
DEU 7:6 Tí Anduane Homogo inanaga Ngode Datagaliwabe ibunaga hanguore hene kamigo manda bialu anidagua bilimu. Dindi tara tara ngaruha hameigini bu karu helowa tí hanguore ibuninaga wali agali halimulo dabo heledagoni.
DEU 7:7 Tí wali agali dewaore hameigini maru karu bolanguahe hemiria ndo Anduane Homogo ibugua tí gubalini howa dabayagoni. Tí hameigini emene koore hemiria dabayagoni ndobe.
DEU 7:8 Anigo Anduane Homogo ibunime tíore gubalini timbuni howa bi abale ina mamaliruhondo bulebero lalu lowiniyago lola helonaga dabene. Ani buwa ibuninaga hongo timbuni kagome tí Iyibi dindiha garabaya biabe ale bialu hemiangi Iyibi kini kagonaga giha howa gingila mialu mo wiyagoni.
DEU 7:9 Ai nde tígua mbirale uruni mitangi bialu Anduane Homogo inanaga Ngode Datagaliwabe ibuni hanguore Ngode Datagaliwabe henene howa mini bilinahe kagoni. Horo bibahendengi ibunime bi ledago biai hagaore kago tihondo bulebero lalu bi bamba lowiyaruni henene biaiore holebira. Wali agali dewaore dindi bibahendeha karume ibu gubalini howa ibunaga bi mana hale halu biai hararuhondo ibunaga gubalini holene walia holebira.
DEU 7:10 Anigo ibugua wali agali marume ibu handabe manga haga karuhondo pani nelo abale mulebira.
DEU 7:11 Ani bulebirago tígua ibunaga bi mana lowini ngarubi i̱na áyu bi mana langirurunibi bibahende baya hangu mo tene howa bialu halimu, lalu Mosesehanda lene.
DEU 7:12 Mosese ibugua lalu, Tígua bi mana uruni hale howa ledadagua bialu harimiyagua Anduane Homogo inanaga Ngode Datagaliwabe ibuguabi nde bulebero lalu habo nalolene bi lowiyadagua bialu ibunaga gubalini holene tiha wiaabo helolebira.
DEU 7:13 Ibugua tí gubaliniore halu mo turu haragola tínaga waneigini dewaore halu damebi timbuniore holeberemi. Tínaga mabu ngamirubi mo bayale haragola tí mabuha widirubi waini iba timbuni berelo gerebi linirubi olibe linirubi dewaore holebira. Ibugua tínaga nogo sibiru bulumagaru karume igini dewaore wuyu helolebira. Bamba tínaga mamaliruhondo habo nalolene bi lowialu dindi ogoni tí ngulebero layagoha pu kamingi ibugua bayale uruni bibahende tí ngiaiore holebira.
DEU 7:14 Anduane Homogo ibugua tíhondo mbirale uruni ngulubadadagua dindi maru ngaruha wali agali maru karuhondo mbira namulebira. Tínaga wali bedaru aria mbirabi dalo wali nabirulebirago tínaga nogo sibi bulumagaru angibuni karuni aria mbirabi pudu naholebiraore.
DEU 7:15 Anduane Homogo ibunime ti baya hangu handayaho haabo kagola tíha warago tara tara ngaru naanda ibulebira. Ani bialu warago koore Iyibi dindini hondo hemiria ibilayadagua tíha nde naibilelolebira laro. Anigo tínaga waitigi bu karuha warago koore uruni ibilaga bulebira.
DEU 7:16 Tígua wali agali Anduane Homogo inanaga Ngode Datagaliwabe ibugua tínaga giha minu ya haga biraruni daraha dai nabi bibahendeore bo wahai halimu. Ani buwa tinaga dama mitangi bialu gime wabini ngaruhondo bi pupu nawilimu. Ani wialu harimiyagua tí homoleberemi.
DEU 7:17 Tígua wali agali uruni timbu dewaore tí kamigobi ndodane handalu uruni bo batagi habe nahedalo mitangi nabilimu.
DEU 7:18 Tígua urunihondo gi nahe elahe howa Anduane Homogo ibugua Iyibinaga kini heago heba ibunaga wali agali hearuhondo ala biyagoni mitangibu dai bilimu.
DEU 7:19 Iyibi dindini warago ko tara tara tagira ibiyane tíni deme handarimiruni mitangibu dai bilimu. Anduane Homogo inanaga Ngode Datagaliwabe ibugua agalime nabiagane ale biyarubi mitangi budai bilimu. Anduane Homogohanda tí gi mialu haru dai bule biabe timbuni Iyibi dindini biyarubi mitangi budai bilimu. Áyu tígua wali agali hondowa gi halu kamirunibi ibugua o biyarunidagua dege ti mo ko howaore bolebira.
DEU 7:20 Ani barago handalu maru ibida puwa ha do hayagua Ngode Datagaliwabe ibugua ti ha do kagoha moneme ti hayilo pelaragola urunime hayalu home lolebira.
DEU 7:21 Ani bulebirago tígua gi nahalimu. Irane Anduane Homogo ibuni tí baba mandagi haabo kamigoni. Ibunaga hongo holene timbuniore hondowa wali agali bibahendeme ibuhondo gi timbuni hai holene nga.
DEU 7:22 Tí hapara halu kawareore pugu beramigola Anduane Homogo ibunime wali agali uruni hendore hendore waratagi haga bulebira. Tígua wali agali uruni áyu dege abale bo haeala hole nabuleberemi. Abale pialu bo wahai harimiyagua nde gabua ema bialu piaga tara tara agali homene tingini ngaru nagane bedaru ti bira timbu halu urunime tí bo nolebira.
DEU 7:23 Anduane Homogo ibunime tínaga waitigiru baba wai bialu ti bope halimulo hongo karulape ngulebira. Ani bialu tínaga waitigiruha gi holene mo wia haragola ti giho kaore dege tígua pialu bo wahai halimulo helolebira.
DEU 7:24 Anidagua bialu uruni tinaga kini karu minu yalu ibalu tínaga giha minu ya holebira. Anidagua biragola tígua kini uruni homelo bo waharamigola mani holebirarume kini uruni abogo ogoria hene lolene nawulebira. Tígua uruni bialu kamigola nabibe lalu hapai holene mbirali naholebira. Tígua pialu bibahendeore bo wahai holeberemi.
DEU 7:25 Tinaga dama mitangi bialu gime wabini ngaru bibahendeore irani mo delai halimu. Mbirale dama mitangi bialu gime wabini uruni mo yári bia hene ngolo siliba ngaru minime dimagoli halu mo yabi nabilimu. Uruni mo ya nabilimu larogoni irane Anduane Homogohanda dama mitangi bialu gime wabini ngaru turu nahagaore kagoni. Ai tígua mbirale uruni mo yu kamiria tíni homoligonaga mo ya nabilimu lalu langero.
DEU 7:26 Mbirale dama mitangi bialu gime wabini uruni aria mbira tí andagaha mo yalu anda polene nawiore. Ngode Datagaliwabe ibugua lalu, Mbirale uruni mo ko hai holene nga, laya. Ai tígua mo yalu pirimiyagua nde ti heba mo ko holene wulebirago nayalu pilimu laro. Mbirale dama mitangi bialu gime wabini uruni ko ngubiore ngago manda bialu tígua uruni erembira mialu halimu, lalu Mosesehanda lene.
DEU 8:1 Bi mana i̱na tíhondo langiruruni baya hangu hale howa talialu bialu halimu. Ani birimiyagua nde tíni bayale halu dewaore ho dame buleberemi. Ani howa Anduane Homogo ibugua tínaga mamaliruhondo dindi ngulebero lowiyago tíhondo ngulebira.
DEU 8:2 Ina hariga luore ibirimagoha inanaga Anduane Homogo ibunime bamba halu hama ibiyago tígua baya hangu manda bilimu. Dindi ko wali agali nahaga wiagoha mali pira mariani (40) ibagabu harimingi Anduane Homogo inanaga Ngode Datagaliwabe ibugua tí ibunaga mana baya hangu talialu buleberemidabe be nabuleberemidabe hondolenaga tí bahandalu genda maru tí hemigoha ibilaga biyagoni.
DEU 8:3 Ibugua tí tomo mo garibila ala howa mani tí mena nalu halimulo ngiya. Tomo ogoni tínibi tínaga mamali henerumebi mbira abale nalu haga ale ndo. Ibugua anidagua biyagoni irane wali agalinaga holene tomo noleneme hangu miaga ndo. Iname Andunae Homogo ibunaga bi mana hale halu bialu harimayagua nde holene ogonime miaga lalu mo walia holenaga tomo ogoni ngiya.
DEU 8:4 Mali pira maria (40) ogoniha howa tínaga aga bu hemiru mbira budabaga nabi harimi. Tínaga ge habebi mbira to nahe bayale karulape dege harimigoni.
DEU 8:5 Ai nde tígua manda bulene mbira ngago ogo tínaga abahanda ibu waneigini mana lalu mo tiga biagadagua Anduane Homogo inanaga Ngode Datagaliwabe kago ibugua mana lalu tí mo tiga bialu haga ka.
DEU 8:6 Ani biaga kago mitangi buwa tígua Anduane Homogo ibunime bilimu lalu langiyadagua bialu halimu. Ibunaga mana lo ngaru talialu bialu howa ibuni andaneha haabo halimu.
DEU 8:7 Ai Anduane Homogo inanaga Ngode Datagaliwabe ibugua tí dindi bayale biagoha haru pole poragoni. Dindi ogoniha iba timbuniru pialu iba ulihabi iba biraga dewa ngaha poleberemi. Iba marubi dindiha howa duguadaga halu dindi ulini ngaruha howabi hari nene ngaruha howabi iba bayale duguadaga haga biaga nga.
DEU 8:8 Dindi ogoriani balawa wabiaga bali widiru anda hagabi pu mbira mini gerebi lini dagaru ira lini maru pogeru oliberu pomegaranaderu anda haga bialu mone tara ibane dendebi mbira mini haniru wiaga ngagoni.
DEU 8:9 Ai nde dindi ogoniha pu howa tí tomo garibi nalebi mbirale mbira buru palia nabibi holeberemi. Dindi ogoniha ege to̱le̱ ngaruha aeane pale ngagobi hari nene ngaruha ege to̱le̱ mini goba taya bibehe holeberemi.
DEU 8:10 Tomo nolene taya beremiru bibahendeore wiai holebirago ai mbirale uruni bibahendebi dindi bayale benebere ngulebiragonagabi Anduane Homogo inanaga Ngode Datagaliwabe ibuhondo ka̱i̱ lolene nga lalu, Mosesehanda lene.
DEU 8:11 Mosesehanda laabo halu lalu, Anduane Homogo inanaga Ngode Datagaliwabe kago ibu embeda halu yu wanahalimu. Ibunaga bi mana i̱na tíhondo áyu langialu kogobi embeda holemini nahalimu.
DEU 8:12 Tígua anda bayaleni padamingibi tomo bayaleru dewa bu payabu ngagola nalu howabi
DEU 8:13 tínaga nogo bulumagaru sibiru dewa hinu howabi muni ngolo silibarubi yári tara tara dewa wu howabi
DEU 8:14 tígua mine howa balagala halu Anduane Homogo inanaga Ngode Datagaliwabe ibuore mo embeda nahalimu. Ibugua tí Iyibi dindiha garabaya biabe ale bialu hemiria haru tagira ibiyago ibuniore kagoni.
DEU 8:15 Ani buwa tí haru halu dindi ko wali agali nahaga wiagoria ibalu hemiria nogombimebi alipiagomebi hayaragola homaga dindi wiagoha ibunime haru bamba halu tí baya hangu handayaho hayagoni. Dindi ko iba nabiraga dindi yobi wiagoriani hemiria ibugua iba nalimulo ege to̱le̱ timbuni mbira wiagoha howa iba dugutagi helayagoni. Ani helayagola tígua iba ogoni hambialu narimi.
DEU 8:16 Dindi ogoniha howa tomo nalimulo mena ibilene. Tomo ogoni bamba tínaga mamali henedarume mbira naga ale ndo nalu harimi. Ibugua tí bahondolenaga genda tara tara wiarubi ibilaga biya. Anidagua biyagoni irane mani tíha mbirale bayaleru dege ngulenaga ibilaya.
DEU 8:17 Ani binigo ai tígua mbirale bayale mbira birimiyagua tíninaga hongome birimalo mitangi nabilimu.
DEU 8:18 Ai uruni Anduane Homogo inanaga Ngode Datagaliwabe ibugua tí mbirale bayale mo yu halimulo hongo karulape ngiragome mo yu holeberemi. Mbirale uruni embeda nahe mitangi biaabo halimu. Ibugua anidagua bulebirago irane bamba inanaga mamaliruhondo ani bule lalu lowinigo ibu mini bilinahe howa habo nale henene tagira pelonaga bulebira.
DEU 8:19 Anduane Homogo inanaga Ngode Datagaliwabe ibuore embeda nahalimu. Mbirale dama mitangi bialu gime wabini ngaruhondo bi pupu wule uruni talima napilimu. Ani talima pirimiyagua i̱na tíhondo hongo howa heneneore larogo tí bo homelaiore helolebira.
DEU 8:20 Anduane Homogo ibunime dindi tí hariga bolangua holeberemiruha hapai haga biraru bo podama polebira. Anigo tígua ibunaga bi mana mo waharimiyagua tínibi nde mo ko howa ogonidagua dege bolebira, lalu Mosesehanda lene.
DEU 9:1 Mosesehanda lalu, Isaraele wali agaliru tí hale hadaba. Áyu tígua Iba Yodana domalu ubaede haramigola wali agali tí kamirubi ndo hameigini hongo gibihe karunaga dindi tí karulole pole kamigoni. Dindi ogoniha tano dewaore ege pabe timbuni daligaore hari ela habehe bu mabu bigi bini wigi bida.
DEU 9:2 Wali agali dindi uruniha haruaruni luniore hongohebi kago tí ale baba wai bibe nahe ka lagago tí hale halu manda biai ho kamigoni.
DEU 9:3 Anigoyu mbira dege tígua manda bulene ngago ogo Anduane Homogo inanaga Ngode Datagaliwabe ibuni ira deneme mbirale bo dagadagua do mundula a̱i̱ haga bima ibuni bamba holebira. Ani bialu tí anda poramigola ibunaga bi bamba lo winidagua henene tagira pelonaga tígua waitigi karu baba hongo howa wai bilimulo Anduane Homogo ibugua tíhondo hongo ngulebira. Ani ngiragola tígua waitigi uruni tinaga dindi wiyadagoria hongo ho howa abale bo batagi hai holeberemi.
DEU 9:4 Anduane Homogo inanaga Ngode Datagaliwabe kago ibugua waitigi uruni balu purogo lelaragola tígua tíni hangu lo manda bialu lalu, Ina wali agali tigabi bayale hemaria hondowa dindi ogo inahondo ngiyada lo manda nabilimu. Mini ogonidagua wu holene nakarulape. Ai nde Anduane Homogo ibugua wali agali dindi uruniha bu hearu handalu hearia tigua mana ko timbuni bialu hearu hondowa ibu keba timbuniore halu ti bo batagi holebira.
DEU 9:5 Anidagua bulebirago irane tí wali agali bayale tigabi kamigo hondowa dindi ogoni tí karulo halimulo ngulebira ndo. Dindi ogoniha wali agali karu tigua mana ko ngubiore biaga kago hondowa uruni bo batagi holebira. Irane mende inanaga mamali Abarahama Aisaga Yagaba imaru baba habo nalolene bi lowiniyago lola helonaga ani bulebira.
DEU 9:6 Heneneore dindi ogoni dindi benebere bayaleore mbirago Anduane Homogohanda ngulebirago tígua mana bayale mbira bialu harimigonaga yolo ndogo tí manda bilimu. Tíbi nde mine haga dege kamigoni ndobe.
DEU 9:7 Tí dindi ko wali agali nahaga wiagoria howa Anduane Homogo mo keba harimigo mitangibu dai bilimu. Iyibi dindi yu wahalu tagira ibirimingi howa Anduane Homogo mo keba hama ibalu henego kamigoni.
DEU 9:8 Amu Hari Sainai heagoria harimangi howabi Anduane Homogo mo keba harimigola ibugua keba timbuni howa tí bo wahai habeheore hayagoni.
DEU 9:9 I̱na hari nene biagoha irigi halu ege to̱le̱ mbalape kira mo pirugoni. Ege to̱le̱ kira ogoriani Anduane Homogo ibugua tí baba habo nalolene bi lowinigo biago gilibu wiyagoni. I̱na hari nene ogoniha horo pira mariani (40) mbiraga horombebi haabo howa hina ibabi mbira naneore harugoni.
DEU 9:10 Ani bu hewagola Anduane Homogo ibugua ege to̱le̱ mbalape kira ogoni labo i̱hondo ngiya. Ege to̱le̱ kira ogoni laboni ibuni gime ibunaga bi mana hari nene biagoha ira hungu datagi hayagoha howa latagi hayuane tí hari teneha howa tíni hale harimiruni gilibu winigo nga.
DEU 9:11 Hari nene biagoha horo pira mariani (40) mbiraga horombebi harugoni. Ani hewagola Anduane Homogo ibunaga habo nalolene bi biago ege to̱le̱ mbalape kira biago laboni gili buwa i̱hondo ngiyagoni.
DEU 9:12 Ani nguwa ibugua i̱hondo lalu, I̱naga wali agali Iyibi dindi howa haru tagira ibiniru tigua mana koore bialu kago ai abale dalipe halu pu. Tigua i̱naga bi mana biago abaleore erembiraha mo bagi halu dama mitangi bialu gime mbira wabu ngelowa ogonihondo bi pupu wialu ka, lene.
DEU 9:13 Anduane Homogohanda i̱hondo laabo halu lalu, Wali agali urunime mineore haabo halu kagoni manda bido.
DEU 9:14 Anidagua bialu kagonaga mani wali agali uruni ogoria hene lalu bi te mbira tinaga nawilo bo wahai holene hamelo kogoni. Mani i̱na wali agali uruni kagobi ndo í̠ni damene hangu bayale ti dewaore damebi hongo gibihebi helalu tinaga mamali í̠ holebere. Anigo ai i̱na wali agali ko biaga uruni bo wahai holiya nabibe lowa hapai nahabe, laya.
DEU 9:15 Ani laya handala i̱na ege to̱le̱ kirani habo nalolene bi gilibu wini biago labo mo yalu hari nene biagoha howa dalipe halu piru. Ani dalialu hewaria dege ira hungu timbuniore hari nene biagoha howa kikiaula amu nana biya.
DEU 9:16 I̱na abale daluwa handalu hewaria heneneore tígua Anduane Homogo inanaga Ngode Datagaliwabe ibunaga bi mana erembira mu hemiria handaru. Tígua dama mitangi bialu bi pupu wulenaga nogo bulumaga igini handalehe mbira ngolome wabu helemiria handaru. Anidagua birimidagoni Anduane Homogo ibuhondo ko timbuniore birimi.
DEU 9:17 Ani bialu hemiria i̱na ibalu ege to̱le̱ kira biago labo tí deni howa dindini bape harugola dodahole biya.
DEU 9:18 Ani bialu i̱na halu mende Anduane Homogo hearia lone pialu ibunaga wanakuihayagi bulu paluwa dindini horo pira mariani (40) mbiraga horombebi ani wiaho wiaabo haru. Anidagua biaabo howa iba hinabi mbira naneore wiru. I̱na anidagua birudagoni irane tígua Anduane Homogohondo ko timbuniore buwa ibu mo keba harimiyane biru.
DEU 9:19 Anduane Homogo ibugua tíhondo keba timbuni gibiore ho howa tí bo wahai hole manda bu hayago hondowa i̱ gi timbuni haru. Ani gi ho hewaria Anduane Homogo ibugua i̱naga bi lalu harugo lone hale haya.
DEU 9:20 Anduane Homogohanda Aronohondobi keba timbuni howa ibu bo waholene manda biya. Ani manda bialu hearia i̱na Anduane Homogohondo tínagabi Arononagabi bibahendenaga bi laharu.
DEU 9:21 Ani lowa mbirale nogo bulumaga igini handalehe tígua wabuwa ko timbuniore bialu harimiyane hondowa i̱na mo yuwa ira deagoha delo mo bape harugoni. Ani delowa do ira punga hayagola dambialu be abalu heagola iba emene mbira hari ogoniha howa dalipe halu piyagoha bape haru.
DEU 9:22 Ai tígua dindi mini Masani howabi Irame Delene wiagoria howabi dindi mini Noa Habuabinaga Homali laga wiagoria howabi Anduane Homogo inanaga Ngode Datagaliwabe mo keba halu harimigoni.
DEU 9:23 Mani Anduane Homogohanda tí dindi mini Kadesebanea wiagoria pu helowa ibugua dindi mbira tíhondo ngule lalu lowini biagoria karulole pudaba layagola tígua ibu erembira mialu ibuhondo mini mbiraore nawi howa ibunaga bi mo waharimigoni.
DEU 9:24 I̱ tí heba mandagi biabe bima hama ibirimagoha tígua Anduane Homogo erembira mialu haabo harimi.
DEU 9:25 Ani bialu hemigo hondowa Anduane Homogohanda tí bo wahole biayuane hale howa i̱na horo pira mariani (40) mbiraga horombebi Anduane Homogo hearia puwa dindini iba hinabi mbira nane bulu palu wiaabo haru.
DEU 9:26 I̱na ibuhondo lalu, Anduane Homogo Bibahendenaga Haru Haame Ho Haga-o í̠naga wali agali uruni bo wanahabe. Í̠ninaga hongomeore Iyibi dindi howa haru tagira pialu haru ibirigoni.
DEU 9:27 Abarahamabi Aisagabi Yagababi í̠naga biabe biaga agali uruni mitangi bibe. Wali agali áyu o karunaga mine howa mana lehe bialu ko bialu o karuni mitangi nabibe.
DEU 9:28 Iyibi wali agalirume í̠na wali agali biaruni dindi mbira tihondo ngulebero lalu lowini biagoha haru pobe nahe wahayada loligo. Í̠na í̠naga wali agali uruni handabe manga howa ti dindi ko wali agali nahaga iba dalubi naibaga ko wiagoha bo wahole haru piyada loligo.
DEU 9:29 Aiore Anduane Homogo-o wali agali uruni í̠ninagaore helo dabarigoni. Ani bialu í̠ninaga hongo timbuniore kegome wali agali uruni Iyibi dindiha howa haru tagira ibalu dindi ogoha haru ibirigonigo ai ti mo ko nahabe, lalu Mosese ibugua Anduane Homogohondo bi ani lahalu hene.
DEU 10:1 Mosesehanda lalu, Anduane Homogohanda i̱hondo ogodagua laya. Ege to̱le̱ kira abale i̱na ngirugobi labo pelo mbaralo yalu ibabe. Irame mbogoyi mbira baya hangu pelo mbara laga buwa wabu wialu bibe. Ani bialu ege to̱le̱ kira ogonilabo i̱ni koria hari nene biagoha mo yalu ibabe.
DEU 10:2 Ani yalu eberegola i̱nabi ala ege to̱le̱ mbarale kira biagoria gilibu wirugoni lone gili budai bulebero. I̱na gili biai kogola í̠na mbogoyi wabu wirigoha ege to̱le̱ biagolabo mo wibelo ngulebero, laya.
DEU 10:3 Ani layagola i̱na ira mini agasiame mbogoyi wabiru. Ani buwa ege to̱le̱ mbalapebi kira ala pambulo waharugobi dege yalu hari nene biagoha piru.
DEU 10:4 Ani pu hewagola Anduane Homogohanda ege to̱le̱ kira yalu pirugoria ibunaga bi mana pigane ala gilibu ngiyadagua lone gili biya. Bi mana uruni Bi Pira biagoni ibunime ira hunguha howa latagi hayago tí hari tene biagoha howa hale harimigoni. Ibugua ege to̱le̱ kira biagoria gili biai howa i̱ ngiya.
DEU 10:5 Ngiya handala i̱na mo yalu abale beregedalu hari nene biagoha howa dalialu ibirugoni. Mo yalu dai buwa Anduane Homogo ibunime wabibe lene mbogoyi wabu mandabu wirugoha ege to̱le̱ Bi Pira gilibu wini biagolabo mo baanda howa wirugo ngagoni, lalu Mosesehanda lene.
DEU 10:6 Mani hayagola Isaraele wali agali biaru tigua Yagana wali agalirunaga iba hambiaga iba uli wiaru wiagoria wahalu dindi Mosera mbira wiagoha anda pene. Dindi ogoniha pu hemigola Arono homayagola ogoriani hora hene. Ani homayagola ibu igini Eleasa ibugua ibu abanaga henge mialu loma binigo mo miaga ha aribia hene.
DEU 10:7 Ani buwa tigua dindi ogoni wahalu Gugoda pialu emene howa nde piaho wialu dindi mbira ibaru dewa bere Yobada wiagoria anda pene.
DEU 10:8 Bamba ti Hari Sainai teneni heangi howa Habo Nalolene Bi lo winigonaga Mbogoyi ogoni hameigini Libai ariame hangu handayaho helo lalu Anduane Homogo ibunime dabene. Libai hameigini agali uruni tinaga biabe loma binigo mo miaga howa tigua wali agaliru Anduane Homogo ibugua ti mo bayale helo laga biaga hene. Anigo tinaga biabe ogoni wiaabo hene.
DEU 10:9 Ani biaga howa Isaraele hameiginiru ti dindi tu wu tahayadagua Libai hameigini ti dindi mbira nawi hene. Ti bayale mbira yu henego Anduane Homogo inanaga Ngode Datagaliwabe ibugua bi lenedadagua tigua loma binigo mo miaganaga biabe bialu hene.
DEU 10:10 Mosesehanda lalu, I̱na iba hinabi naneore horo pira mariani (40) mbiraga horombebi uyu hari nene biagoha ala bulu palu wirudagua halu mendebi ani bulu palu wirugoni. Ani birugola Anduane Homogohanda i̱na tínaga bi la harugola hale howa tí nabolebero layagoni.
DEU 10:11 Ani lowa ibugua i̱hondo langialu lalu, Ai í̠na dalialu puwa wali agaliru haru halu dindi bamba tínaga mamaliruhondo ngulebero larugoni karulo helo haru pole pu, laya, lene.
DEU 10:12 Mosesehanda laabo halu lalu, Isaraele wali agaliru-o Anduane Homogohanda tígua bialu halimulo hame ledago langerogo hale hadaba. Tígua Ngode Datagaliwabe andaneha howa ibuninaga bi mana lo ngago talialu bialu halimu. Ibunaga biabe bulene ngaru tígua bialu howa bu miniha turu halu gubaliniore howa bialu halimu.
DEU 10:13 Ani bialu howa ibunaga mana áyu langerogo bibahende baya hanguore taluwa bilimu. Tí bayale halimulonaga i̱na mana uruni langerogoni.
DEU 10:14 Hari daligaore ngago Anduane Homogo ibunaga wialu dindibi mbirale bibahende uruniha karubi ngarubi ibunaga dege nga.
DEU 10:15 Ani howa Anduane Homogo ibugua hameigini maru hearu aria daba nabi tínaga mamaliruore gubalini halu tíore ibuninaga wali agali halimulo dabayagoni. Ani dabayagome tí ibunaga wali agaliore dabene kamigoni.
DEU 10:16 Anigo tígua mine halu kamiru wahalu áyu ogoni howa ibunaga bi mana talialu bialu halimu.
DEU 10:17 Anduane Homogo inanaga Ngode Datagaliwabe ibu dama tara tara karubi mbirale hongohe ngarubi bibahende ibugua bolangua haihe kagoni. Ibu timbuniorebi hongo haiheorebi kago bibahendeoreme ibuhondo gi ho halu ibu andaneha holene nga. Ibugua ibunaga nenegeru mitangi halubi wali agalime ibunaga mini bamialu haru pu tara helo hame nalaga ka.
DEU 10:18 Ibugua wali dalo agalini homene bedarubi waneigini aba ai̱yaru homalu hono wahene biru ngarubi dara halu biamogo biaga ka. Wali agali dindi taraha howa ibalu ina baba hene karu gubalini howa ti aga bilobi tomo nelobi karulapeore miaga ka.
DEU 10:19 Ani biagago ai tínibi nde Iyibi dindiha hemingi dindi taraha howa ibini ogoniale dege harimigoni mitangi bialu wali agali dindi taraha howa ibini tí baba mandagi ho kamiruni mitangi halu gubalini howa halimu.
DEU 10:20 Anduane Homogo inanaga Ngode Datagaliwabe ibuni andaneha howa lotu ibunihondo hangu lalu halimu. Tígua ibuni hongo howa yaniho haabo howa bulenerubi henene hangu lalu lowialu ibunaga minini howa mo hongo haga bialu halimu.
DEU 10:21 Ibu inanaga Ngode Datagaliwabeore howa ibugua tí biamogo bialu mbirale nahendene ale tara tara timbuni wiaruni bigi biyago tíni deme handarimigoni manda bialu ibunaga mini mo yaraga halu halimu.
DEU 10:22 Bamba tínaga mamaliru ti Iyibi dindiha piyangi wali agali pira karia (70) hangu piyagoni ndobe. Ani binigo áyu Anduane Homogo inanaga Ngode Datagaliwabe ibugua tí mo dewa halu daga labe nahe harini yakundi bu karubi heledagoni, lalu Mosesehanda lene.
DEU 11:1 Mosesehanda tihondo lamialu lalu, Tígua Anduane Homogo inanaga Ngode Datagaliwabe kago gubalini timbuni halu ibunaga bi mana ngago baya hangu talialu bialu halimu.
DEU 11:2 Tígua Anduane Homogohanda tí lawai holenaga mbirale tara tara dewaore bialu hayago handarimigoni. Tínaga waneigini bu karume handaya lole ndo tínime de handarimigoni. Anduane Homogonaga hongo timbuniore wiago tígua de handarimigoni.
DEU 11:3 Ani bialu Anduane Homogohanda agalime nabiagane ale biyarubi handarimi. Ibugua Iyibinaga kini heago heba ibunaga dindi wiagohabi biyagoni de handarimi.
DEU 11:4 Iyibinaga ami agali biarubi tinaga nogo hosirubi wai biaga garo ale mini karisibi uruni bibahende ina talima ibalu hearia Anduane Homogohanda bo amo lai hayagobi de handarimigoni. Ibugua iba Solowara Daramabi laga bereagome nai helayagoni.
DEU 11:5 Tí dindi áyu o kamigoria naibi wene dindi ko yobi iba dalu naibaga wiagoha ibalu hemingi Anduane Homogohanda tí biamogo bialu dewaore biyago tí manda bidami.
DEU 11:6 Agali Lubene hameigini aria kirali Eliaba igini Dadana Abiramala heago labohondo biyago manda bilimu. Tí bibahende hendedemiore agali kirali ogonilabo heba libu one waneiginibi libunaga balai andabi heba dindi gaibu de̱le̱ bialu uruni bibahende dindiha ibira hai hayagola dindi wiyadagua wiadai bialu uruni bibahende dindiha dambi hai hayane tí de handarimigoni.
DEU 11:7 Anduane Homogohanda mbirale timbuni uruni biyago tí bibahendeme de handaiore harimi, lalu Mosesehanda lene.
DEU 11:8 Mosesehanda laabo halu lalu, Bi áyu i̱na tíhondo langerogoni baya hangu talialu bialu haabo halimu. Ani bialu howa dindi iba pedago domaede halu puwa karulo holeberemigoria pialu holeberemi.
DEU 11:9 Ani bialu tí dindi ibane bere ogoniha pialu luore haabo holeberemi. Ai dindi ogoni bamba Anduane Homogohanda tínaga mamaliruhondo tíbi tínaga waneigini aguaneneruhondobi ngulebero lalu lowini biago ngagoni.
DEU 11:10 Dindi áyu tí pu holeberemigoni ala tí Iyibi dindi harimigonibi ndo. Iyibi dindiha hemingi tínaga mabuha tomo anda helonaga iba erekuibi haru ibaga wiyagoni.
DEU 11:11 Anigo ai dindi áyu pialu karulole kamigoni bayale hari teneha dindi ulini wialu bidagoha iba dalu ibalu mabuha iba bayale ibaga nga.
DEU 11:12 Anduane Homogo inanaga Ngode Datagaliwabe ibunime mali bibahendenaga ege bibahendengi dindi ogoni baya hangu handayaho haabo haga ka.
DEU 11:13 Anidagua biaga kago manda bialu tígua bi mana áyu langerogoni baya hangu bialu haabo halimu. Tígua Anduane Homogo inanaga Ngode Datagaliwabe kago gubalini timbuniore ho howa ibunaga biabe bulene ngago bialu howa tínaga bu miniha turu holene to̱lai ho howa biabe bialu halimu.
DEU 11:14 Tígua anidagua bialu harimiyagua nde Anduane Homogohanda tínaga mabuha iba dalu halu mbira ibirangibi halu mendengibi ibilaabo holebira. Anidagua biragola tínaga tomobi waini ibabi olibe lini welibi dewaore wu holeberemi.
DEU 11:15 Anidagua biragola tí tomo nolene tubagi nahe holeberemi. Tínaga nogo bulumaga karu tibi nde tomo nalu holene tinaga dataniru karulape andaho holebira.
DEU 11:16 Wali agali tara tara bu karume tínaga mini mo luluya helo nahalimu. Tigua tí Anduane Homogo yu wahalu pilimulo haru pu tara hayagua Anduane Homogo erembira mialu puwa mbirale bi pupu wulenaga gime wabini ngaruhondo bi pupu wima napilimu.
DEU 11:17 Anidagua birimiyagua nde Anduane Homogohanda tíhondo keba holebira. Anduane Homogohanda tí daluha iba dalu naibilo minu yu kagola tínaga mabuha tomo hengedemiru gaulai halu anda naholebira. Anidagua biragola tí dindi bayale Anduane Homogohanda ngiyagoria howa homoleberemi.
DEU 11:18 Mana bayale urunime tínaga bu miniha to̱latagi helo halimu. Bi mana uruni embeda holigo tínaga gini gi ndole wiradagua bialu tínaga wanakuinibi heda wiradagua bilimu.
DEU 11:19 Ani bialu bi mana uruni tínaga waneigini bu karu baya hangu lawai halu halimu. Tíni daluha kamigo howabi harigani ibaga bialu howabi biabe bialu howabi biabe nabi ha̱lo howabi bibahendengi tígua bi mana uruni dege te lalu halimu.
DEU 11:20 Bi mana uruni tínaga anda panga harabani ira kagoria gili bialu pabenaga panga kagoriabi gili bilimu.
DEU 11:21 Tígua ogonidagua bialu harimiyagua nde tínibi tínaga waneigini aguanenerubi tí bibahende dindi Anduane Homogo inanaga Ngode Datagaliwabehanda ngule lalu inanaga mamaliruhondo laminigoria halu hodagua haga buleberemi. Hari daliga haabo haga kadagua tíbi haabo holeberemi.
DEU 11:22 I̱na bi langerogoni baya hangu taluwa biaabo halimu. Tígua Anduane Homogo inanaga Ngode Datagaliwabe kago gubalini haabo howa ibunaga bi mana baya hangu talialu hongo howa yu haabo halimu.
DEU 11:23 Anidagua bialu harimiyagua nde tínaga waitigi dindi tí poleberemigoha kaware pialu kamigola wali agali dindi ogoniha hayadaruni ibugua bo batagi hai holebira. Anidagua biragola tígua pialu wali agali timbuni dewaorebi hongo gibihe tínaga hongo bolanguahe karubi uruninaga dindi ngagoria pu howa karuloleberemi.
DEU 11:24 Dindi tí ge halu poleberemiru bibahende tíninagaore wiai holebira. Tínaga dindi tubari unurahayagi dindi ko yobi iba dalu naibaga ngagoria howa pialu uyurahayagi Hari Lebanono wedagoria tagira polebira. Ani bialu tubari ni tagira ibiragohayagi Iba Yuberedisi pedago wialu ni paliragohayagi iba solowara Medidereniana bedago wulebira.
DEU 11:25 Anidagua nahalimulo hapai holene mbirali naholebira. Ani bialu dindi tí poleberemigo bibahendeha Anduane Homogo inanaga Ngode Datagaliwabehanda abale tíhondo langiyadagua bialu wali agali dindi uruniha karu tigua tí de hondowa gi halu holebira.
DEU 11:26 Hale hadaba. Ai i̱na tíhondo hariga kira áyu mo walia harogoni. Mbira Anduane Homogo inanaga Ngode Datagaliwabehanda tíhondo bayale bulene. Mendego Anduane Homogo inanaga Ngode Datagaliwabehanda tí mo ko holenegobi langerogoni.
DEU 11:27 Tígua Anduane Homogo inanaga Ngode Datagaliwabe kagonaga bi mana baya hangu taluwa bialu harimiyagua nde ibugua tí mo bayale ho helolebira.
DEU 11:28 Anigo tígua ibunaga bi mana lo ngago mo wahalu puwa mbirale bi pupu wule gime wabini bamba tígua urunihondo bi pupu nawiaga ngaruhondo bi pupu wima pirimiyagua nde Anduane Homogo inanaga Ngode Datagaliwabehanda tí mo ko holebira.
DEU 11:29 Dindi áyu tí pole kamigoha Anduane Homogohanda haru porangi tígua hari kira mini Gerisimibi Ebalabi kagoha pilimu. Pialu Hari Gerisimi ogoriani howa Anduane Homogo inanaga Ngode Datagaliwabehanda mbirale bayale damene tíhondo ngiyaru lai halimu. Ani bialu Hari Ebala kagoria howa tígua mbirale ko Anduane Homogohanda tíhondo bule ngaru damene lai halimu.
DEU 11:30 Hari kira ogonilabo dindi abene ni paliragohayagi Iba Yodana doma ederayagi iba angeange Kenana dindi ngagoria ka. Hari ogonilabo ni paliragohayagi Giligala tano ngagoria ira loma bini dindi mini More kawareni ngagoria ka.
DEU 11:31 Emene tigi mbira hangu howa dindi Anduane Homogo inanaga Ngode Datagaliwabehanda ngulebiragoha pu holeberemi. Tígua dindi ogoriani anda pu howa
DEU 11:32 i̱na tíhondo bi mana áyu dege langerogobi bibahende taluwa bialu halimu, lalu Mosesehanda lene.
DEU 12:1 Mosesehanda bi laabo halu lalu, Bi mana uru baya hangu hale hadaba. Anduane Homogo tí mamalirunaga Ngode Datagaliwabe ibugua dindi ngulebero layagoria pu howa bi mana uruni baya hangu hale howa talialu bialu halimu.
DEU 12:2 Tígua dindi ogoniha anda pialu wali agali uruniha henedaru tinaga bi pupu wiaga ngaru mo ko halu bo gialobaga bilimu. Tinaga bi pupu wiaga uruni hari emene timbunibi bibahendenaga nenenibi ira timbuni karu andane gumba karuhabi bibahende ngaru bo gialobaga biai halimu.
DEU 12:3 Ani bialu lomabu delaga dabu bu heledaru bo gialobagabu wahalu bi pupu wiaga anda gene ege to̱le̱me wabu helene karubi bibahende bo gaibu bagabu wahalimu. Dama wali beda mitangi bialu gime wabini mini Asera laga agalime ira dibu pelowa wabini ngaru ayume dibu gabu dangiala bagabu wahai halimu. Anidagua beramigola tigua bi pupu wiaga dindi uruniha dai bialu bi pupu lone nawilonaga anidagua bilimu.
DEU 12:4 Wali agali tara karume mbirale gime wabiniruhondo bi pupu wule mana tara biagane ngadagua tígua Anduane Homogo mitangi bialu ani nabilimu.
DEU 12:5 Anduane Homogo mitangi bialu lotu lole ngoai halimulonaga ibugua tí hameigini bibahendenaga dindi ngaru hondowa dindi mbiraore hangu ibunime dabo ngelolebira.
DEU 12:6 Dindi odagoria hanguni howa tígua loma tara tara irani dai helo delolenebi loma marubi bu migi bulene wulebira. Tínaga mbirale ngamiru pi halu tale buwa pini piniru Anduane Homogohondo lomabu mule howa dindi mbiraore lotu laga wiyagoria dege yu pugu buleberemi. Tígua mbirale maru Anduane Homogo mule lowabi ibuhondo lomabu mule yalu pialu howabi Anduane Homogohondo muleore lalu bi ala lowinidagua muleyaguabi tínime loma bame mule manda bu heneyaguabi nogo sibi bulumagarume igini pigane wiragola turu halu lomabu muleyaguabi uruni damene bibahende dindi mbiraore lotu lagadagoria hangu yu poleberemi.
DEU 12:7 Dindi bayale Anduane Homogo inanaga Ngode Datagaliwabe ibugua ngulebiragoha pu howa ibunaga deni tínimebi tínaga waneiginirumebi tomo tara tararu hangalu halimulo hongo ngiyagola hangarimiru bu nalu howa mbirale mbirale bayale maru ngiyagobi mitangi bialu turu timbuni halu holeberemi.
DEU 12:8 Dindi mbiraoreni lotu lolene horo ogoni tagira ibirangi áyu tíni hangu hangu howa lotu lagalaga bialu kamidagua nahalimu.
DEU 12:9 Áyu ogoni tíni miniha dungulo biruwa ema nabi awadaga halimulo dindi mbira ngule lalu lo wiyagoha anda nape wene kamitagi howa tí lotu ani lagalaga bialu kamigoni.
DEU 12:10 Tí Iba Yodana domalu ubaede haramingi Anduane Homogohanda dindi ogoni tí karulo halimulo yupe haragola tí dindi ogoriani pu holeberemi. Ibugua tí handayaho haabo kagola tínaga waitigiru tí kamigoria naibulebira. Ani biragola tínaga bu miniha dungulo holeberemi.
DEU 12:11 Wali agali tígua Anduane Homogo ibunihondo mitangi bialu lotu lole íbu ngoai halimulonaga dindi mbira ibunime mo wulebira. Dindi ogoriani lotu lole pialu howa mbirale uru ale yalu pilimu lalu áyu i̱na langiruruni mo yalu pugu bilimu. O yalu pilimu lalu laruruni loma tara tara irani dai helo delolenebi loma marubi bu migi bulene wulebira. Tínaga mbirale ngamiru pi halu tale buwa pini piniru Anduane Homogohondo lomabu mule howa hame ledemirubi mbira bayale maru Anduane Homogo mule lalu lowinidagua mialubi uruni bibahende dindi ogoniha yalu puwa mulene nga.
DEU 12:12 Ani bule howa tínaga waneiginirubi tínaga biabe biahaga wali agali karubi Libaiali tínaga tanoha haga karubi uruni bibahendeore ma lalu puwa tínaga Anduane Homogo kagoria puwa ibuhondo turu ho holene nga. Tígua Libai hameigini karu ti tininaga dindi podene mbira nawiore kago manda bilimu.
DEU 12:13 Tínime hame ledadagua tíni kamiruha haga haga buwa lomabu migimigi nabilimu.
DEU 12:14 Dindi mbiraore tíni hameigini kamigo aria mbiragonaga dindini Anduane Homogo ibugua mo wiragoria hangu lomabu mialu halimu. Dindi mbiraore ogoriani hangu howa loma irame dai helolenebi bo delalu maru bulene nga lalu langirugonibi biai halu halimu.
DEU 12:15 Anigo dindi maru tíni kamiruha howa nogo egarubi balu nanolene nawi. Tanabi bo nalu halimu. Anduane Homogo ibugua tí tomo nalu halimulo ngiraru tanabi nalu halimu. Tíni Anduane Homogonaga deni ko howayaguabi bayale howayaguabi ibugua tí tomo nalu halimulo dindi tíni kamigoha howa gabua dia ale minana hene karu balu naramilidagua balu nalu halimu.
DEU 12:16 Anigo mbirale balu nole baramirunaga darama dege nolene nawiore. Ema bialu piaga baramirunaga darama pugu lalu dindini iba odo wahagadagua odo wahalimu.
DEU 12:17 Mbirale Anduane Homogohondo bo lomabu minigo ogoni tíni kamiruha howa nolene nawi. Loma uruni ogodagua. Widi lini pini pini Anduane Homogohondo lomabu minibi waini iba pini pinibi olibe lini ibane pini pinibi bulumaga igini sibi iginiru pigane wini karubi maru maru tínime Anduane Homogohondo lomabu mule lalu lo winidarubi tara tara mulene hamelo kamirubi uruni bibahendeore dindi tíni kamigoha howa nolene nawiore.
DEU 12:18 Mbirale uruni balu nole howa tínibi tínaga waneiginirubi tínaga biabe biahaga wali agali karubi Libai hameigini aria tínaga tanoha haga bu karubi tí haru mandagi howa balu naga bilimu. Tígua mbirale Anduane Homogohondo loma bialu bo nalu howa dindi tara taraha howa ndo dindi mbiraore Anduane Homogo ibunime ibuni mitangi bialu lotu lolene dindi henge mo wiyagoria howa loma bialu nalu halimu. Tígua loma bialu tomo uruni nalu howa mbirale bayale biabe erekuibi bialu harimigoha howa lini tagira ibiyagonaga turu halu nalimu.
DEU 12:19 Dindi ogoniha howa Libai hameigini karu biamogo biaabo holene ngago embeda nahalimu.
DEU 12:20 Mani howa Anduane Homogo inanaga Ngode Datagaliwabe ibugua bamba lo wiyadagua bialu tínaga dindi mo timbuni helarangi tínime nogo tara tara noa biradaguaore nalu holeberemi.
DEU 12:21 Ani howa lotu lolenenaga dindi Anduane Homogohanda tu wu ngelayago tí polene kaundiaore hayagua nde i̱na ogodagua bilimu lalu bi langirudagua bialu halimu. Tínime nogo bulumaga sibirubi Anduane Homogo ibugua tí ngiyaru tanabi tíni dindi kamigoria howa bo dawa nalu halimu. Horo tanabi tínime balu noa birangi balu nalu halimu.
DEU 12:22 Mbirali ibu Anduane Homogonaga deni bayale heaguabi bayale ndo heaguabi tanabi howa tigua nogo anidagua bo dawalu howa ibu nogo gabua karu balu nagadagua narolo manda bialu nolene nga.
DEU 12:23 Anigo ema bialu piaga uruni darama heba nolene nawiorego nanalimu. Ani larogoni irane bibahendenaga holene tene daramaha ngagodago ema bialu piagaru balu darama heba nanalimu laro.
DEU 12:24 Mbirale baramirunaga darama nane dindini iba odo wahagadagua pugulelo yupe halimu.
DEU 12:25 Tígua mana ogoni langerogo hale howa darama nane waharimiyagua nde Anduane Homogo ibugua tígua mana bayale beremigo hondowa tíhondo gubalini haabo howa tí biamogo biragola bayale haabo holeberemi. Ani bialu tínaga waneigini aguane mani holebirarubi ogonibi dege holebira.
DEU 12:26 Anigo tínaga lomabu mule yu kamirubi mbirale tígua Anduane Homogohondo mule lo winidarubi bibahende lotu lalu lomabu mulene dindi Anduane Homogohanda podo wiyagoria yalu pu mulene nga.
DEU 12:27 Dindi ogoriani howa loma biniru irame dai helo deloleneru Anduane Homogonaga lomabu delaga dabu kagoria lomabu delolene nga. Loma maru nde Anduane Homogonaga lomabu delaga dabu kagoria darama hambu yidamiru dege odoba halu mbirini podo yidamiru tíni nalu halimu.
DEU 12:28 Tígua bi mana i̱na langiruruni bibahende talialu bialu holene nga. Ani bialu harimiyagua nde Anduane Homogohanda tí bayale halimulonaga tí biamogo bialubi tínaga waneigini aguanene mani holebirarubi bayale helonaga biamogo bialu haabo holebira. Ani bulebirago irane tígua mbirale bialu holeberemiru bibahende Anduane Homogo turu helo hangu bialu harimiyagua nde ibugua anidagua bialu haabo holebira, lalu Mosesehanda lene.
DEU 12:29 Mosesehanda laabo halu lalu, Anduane Homogo inanaga Ngode Datagaliwabe ibugua tí dindi mbiragoria anda pugu beremingi wali agali dindi anduane karu bo wahai holebira. Ani biragola dindi uruni tígua karulo haga buleberemi.
DEU 12:30 Anduane Homogohanda wali agali dindi uruniha karu bo wahai haragola tígua uruni tinaga damahondo bi pupu wiaga mana ngaru aria mbira talialu nabilimu. Ani bialu harimiyagua tíni homolene wulebirago bayuwa mamage howa holene nga. Tígua wali agali uruni tinaga damahondo bi pupu wiaga mana biradago dabo honowa iname nde ogonidagua dege bimi̱ya lolemini nalalimu.
DEU 12:31 Tígua Anduane Homogo inanaga Ngode Datagaliwabe ibu mitangi bialu lotu laramingi wali agali uruni karume bi pupu wiaga mana ngadagua nabilimu. Wali agali uruni tigua dama mitangi bialu bi pupu wiaga ngaru wialu howa mana ko ngubi koorene ko tara tara Anduane Homogohanda turu nahaga ngaru bialu haga ka. Tigua mana ko mbira ogobi biaga. Tinaga waneiginiru lomabu delaga dabu ngagoria loma bialu bo delaga ka.
DEU 12:32 Anigo i̱na bi langiruruni baya hangu talialu biai halimu. Mana uruni aria tígua maru latagoha maru mo waha bulene nawiore laro.
DEU 13:1 Agali mbiwia haga mbira kagomebi mbirali emaga hendenerunaga galone ogoale lalu latagi haga mbira kagomebi tí haru halu mbirale dama mitangi bialu gime wabini tínaga bi pupu wiaga ndo wirimigoha haru pubagi holenaga tigua mbirale turubi nahendene ale mbira bulebira lalu mbiwia halu lolebira. Ani layagua o laragoni henene tagira piyaguabi
DEU 13:3 bi uruni mo henene nahalimu. Mbirale uruni Anduane Homogo inanaga Ngode Datagaliwabe ibugua tí ibunaga wali agaliore ibuni gubalini howa henedabe be bame dege henedabe hondolenaga agali uruni ibunime henemane tí ba hondolenaga ibilagago.
DEU 13:4 Ai tígua Anduane Homogonaga bi talialu ibu andaneha holene nga. Ibugua bi layaru baya hangu hale halu mana ngaru talialu bialu holene nga. Tígua ibuni hangu mitangi bialu lotu lalu ibu hongo howa yaniho haabo holene nga.
DEU 13:5 Anigo agali mbiwia haga karubi emaga hendenerunaga galone latagi haga karubi tigua tíhondo lalu, Anduane Homogonaga bi doga halu mo waholene nga, layagua bibahende homelo bo wahaiore holene nga. Anduane Homogo ibugua tí Iyibi dindiha garabaya biabe ale bialu hemiria haru tagira ibiyago mitangi biaabo halimu. Agali mana urunibi biaga karu tini ko ngubi biaga howa urunibime tí kamiru maru hariga Anduane Homogohanda pialu halimu layaru yu wahalu hariga mendeha haru pubagi halu holebira. Anigo agali mana urunidagua biaga karu bo wahai halimu. Anidagua bo wahai haramigome tíni mana koha pubagi holene henge nawilo bibahende bo homelai haramigoni holebira.
DEU 13:6 Mbirali í̠ hamenemebi í̠ waneiginimeyaguabi onene agalini í̠ni gubalini ho hagameyaguabi í̠ nenegemeyaguabi í̠hondo mbirale dama mitangi bialu gime wabini urunihondo bi pupu wiba lalu í̠ mo biahalu la deborebo biyagua ibunaga bi uruni hale nahabe. Bamba tínibi tínaga mamali henerumebi mbirale uruni alehondo bi pupu mbira nawiniore henego kamigoni ndobe.
DEU 13:7 Ti marume tí mbiralihondo wali agali maru dindi kawarenibi kaundiahabi karu tigua tinaga mbirale damaru mitangi bialu gime wabiniruhondo í̠na bi pupu wibelo mo biaholani.
DEU 13:8 Mbirali ogonime í̠ mbirale dama mitangi bialu gime wabini urunihondo bi pupu wibelo haru pu tara holene manda biyagua í̠na ibunaga bi la deborebo birago hale nahabe. Ai í̠na walimeyaguabi agalimeyaguabi ogoni biagago ibu dara halu biamogobi nabi habagi helabe.
DEU 13:9 Ibu homelo bo wahabe. Í̠na mbirali o biago homelo ege to̱le̱me bole howa ege to̱le̱ dugualu í̠nime ala pigane bolene nga. Ani baregola mani wali agali maru karume ege to̱le̱ dugualu o biago hangu bo ariari bulene nga.
DEU 13:10 Anduane Homogo inanaga Ngode Datagaliwabe ibugua ina Iyibi dindiha garabaya biabe ale bialu hemaria haru tagira ibini biago yu waholoma̱yanaga la deborebo biaga uruni tigua tí haru pubagi hole bialu karu homeloore ege to̱le̱me bo wahai halimu.
DEU 13:11 Tígua wali agali mana urunidagua bule bialu karu bo wahai harimiyagua Isaraele wali agali maru karume hale hai howa tini gi hagahaga bialu tigua mana ko urunidagua lone nabule wahai holebira.
DEU 13:12 Tígua Anduane Homogo inanaga Ngode Datagaliwabe ibugua tano tí ngulebiraruha pu howa tígua bi maru ogodagua larane hale holeberemi bada.
DEU 13:13 Tigua ogodagua lalu, Agali maru ko ngubi tínaga tanoha bu hearume tínaga mini mo batara hayagola dama mitangi bialu gime wabiniruhondo tígua bi pupu nawiaga winigo áyu nde wialu kamirunida, laragola hale holeberemi.
DEU 13:14 Tígua bi diburibu urunidagua mbira lalu kane hale harimiyagua bi tene baya hangu goaria handalimu. Handalu kamiria marume mana ko ogonidagua henene biniyagua
DEU 13:15 wali agalibi tinaga nogo bulumagabi tano ogoniha henedaru bibahende homelo bo wahai halimu. Ani buwa tano ogonibi bo haealo wahalimu.
DEU 13:16 Wali agali ko biaga uruninaga dabudabu ngaru bibahende mo yu ngoai howa tano ogoninaga hanuni ngagoria ngelalimu. Ani mo ngelowa mbirale uruni heba tano ogonibi bibahendeore Anduane Homogo inanaga Ngode Datagaliwabe ibuhondo loma bialu bo heda hai halimu. Ani bo heda hai henego mani lone biadai bulene nawiore.
DEU 13:17 Tígua mbirale tano ogoniha wini mbira tíni hole mo yulene nawiore. Irame daiore helo wahalimu. Anidagua beremigola Anduane Homogohanda ibunaga keba holene wahalu tí dara howa biamogo bulebira. Ani bialu ibugua bamba tínaga mamaliruhondo bi lowiyadagua tí wali agali dewaore palia timbu halimulo mo dewa holebira.
DEU 13:18 Áyu ibunaga bi mana o langerogo hale halu bialu howa ibugua hame ledaru talialu bialu harimiyagua ibugua nde tí ani biamogo bulebira, lalu Mosesehanda lene.
DEU 14:1 Mosesehanda laabo halu lalu, Tí Anduane Homogo inanaga Ngode Datagaliwabe ibuni waneigini kamigoni. Ani kamigo mitangi bialu tígua mbirali homaragola dugu bialu howa agali Anduane Homogo mitangi nabiaga karume biagadagua tínaga tingini darama ibilo podalu mandari angariru minu doga nabilimu.
DEU 14:2 Tí Anduane Homogo inanaga Ngode Datagaliwabenaga wali agaliore halimulo wali agali maru hearu aria dege hemiria ti helalu ibunime tí kamiru daba bagi henego kamigoni, lene.
DEU 14:3 Mosesehanda laabo halu lalu, Ema bialu piaga maru Anduane Homogonaga deni dodohe bedago nolene nawi layaru damene bibahende nanalimu.
DEU 14:4 Nogo bulumaga sibi meme karunaga mbirini nolene karulapego nalu
DEU 14:5 nogo tara mini diabi sibi gabuabi meme gabuabi maru hari nene ngaruha biraga gabua biru karubi
DEU 14:6 tinaga gi giba ge gibaru luni kirahe biruwa datani bulumagame nagadagua naga bu karubi tinaga mbirini nolene karulapego nalimu.
DEU 14:7 Anigo nogo maru ti tomo bulumagame nagadagua datani karu nanaga howa tinaga gi giba ge gibabi luni kira naheyagua nolene nawiore larogoni. Nogo kamelebi budi ale mini labidibi tia mali ale ege ngaruha biraga bedarubi nanalimu. Ti tomo bulumagame nagadagua datani karu nagago damene tinaga gi gerunaga gibane luni kira nahe kagome uruni alego bibahende Anduane Homogonaga deni dodohe beda.
DEU 14:8 Nogo ibuni kago balu nolene nawi. Nogonaga gi gerunaga giba bulumaga ale dege kagonigo tinaga tomo bulumagame nagadagua datani ndo naga ka. Anigo ai uruni ale kago Anduane Homogonaga deni dodohe kalo manda bu halimu. Uruni ale bu karu damene nane halu homo ngagola tinaga tinginibi ela nahalimu.
DEU 14:9 Iba wena dongone ligilagale bedarubi harenehe bedarubi nalimu.
DEU 14:10 Anigo ibaha biragane dongone ligilaga nalagabi harene nahebi uruni ale bedaru tígua nolene nawiorego nanalimu. Urunibi bedaru Anduane Homogonaga deni ko dodohe bedalo manda bialu halimu.
DEU 14:11 Ega biru karu nde bayale Anduane Homogonaga deni ko dodo nahe bedaru balu nalimu.
DEU 14:12 Anigo ega bodo hariawebi nenebi bedaru emene timbuniyagua nolene nawigo nanalimu. Ega mbiraga biraga dagi̱ya bedarubi halongau bedarubi umi bedarubi bibahende nanalimu. Ega yári karubi gabiago tara tara bedarubi habo tara tara ma luhe bedarubi dalagamia tara tara bedarubi nolene nawigo nanalimu.
DEU 14:19 Mbirale emene babaganehe yagalalu piaga bedaruni damene bibahende Anduane Homogonaga deni ko dodohe bedago uruni ale tígua minalu nolene nawi.
DEU 14:20 Anigo uruni aria maru Anduane Homogo ibuninaga deni ko dodo nahe bedaru balu nalimu.
DEU 14:21 Nogo egaru minalu homene ngago nanalimu. Wali agali tara tí baba íbu hene karu ti nelo mirimiyaguabi marume tí yolo biyaguabi ani bilo milimu. Ai Anduane Homogo inanaga Ngode Datagaliwabe kago tí ibunaga kamigoni. Tí ibunaga wali agali heneneore kamigoni. Tígua nogo meme igini sibi iginiyaguabi mbirago ibu angibuni kagonaga andu ibane beha hambu yu delaramigoha delamaga nahalimu, Mosesehanda lene.
DEU 14:22 Mosesehanda lalu, Tí mabuha tomo mali mbira mbiranaga hengene bu ngamiru aria pi halu tale bialu pinigo mo bagiho ngelalimu.
DEU 14:23 Ani mo bagiho wirimigo mo yalu wali agali ngoai howa lotu laga wiyagoria Anduane Homogo ibunaga daba bagiho ngelelo milimu. Ani ngagola Anduane Homogonaga deni howa tínaga widi wirimirubi waini iba wirimirubi olibe lininaga weli wirimirubi bibahende tínaga tomo pini pini yalu ibirimigo tale bialu nalimu. Ani bialu tínaga nogo bulumaga sibiru igini pigane wini bayale hinidemiru horo ogoningi dindi ogoriani howa balu tale bialu nalimu. Anduane Homogo inanaga Ngode Datagaliwabe andaneha haabo kama lalu mo walia halu ogonidagua bialu halimu.
DEU 14:24 Tí dindi kaundiaha howa Anduane Homogohanda tíhondo tomo ngiyaru aria yalu lotu lole wali agali ngoai haga ngagoria pobe nahe harimiyagua nde ogodagua bilimu.
DEU 14:25 Agali maru karume tínaga tomo ogoni yolo bilo milimu. Ani bidagola muni tomo yolo birago mani mo yalu lotu laga biagoria pilimu.
DEU 14:26 Yalu puwa lotu laga ogoriani howa tínaga muni biagome tomo damenego yolo bialu nogo bulumaga sibiru dawa ngaru yolo bialu waini ibarubi iba mbia alerubi tínaga muni mo yarimigome tomo tínime hameledemiru damene bibahende yolo biai halimu. Ani yolo biai howa Anduane Homogonaga deni lotu lole mo ngoai haga dindi biagoria biruwa tínibi tínaga one waneiginirubi bibahende turu hagabu mandagi biruwa tomo uruni nalimu.
DEU 14:27 Anigo Libai hameigini tínaga tanoha karu biamogo bulene embeda nahalimu. Libai hameigini uruni tininaga mabu andabi nahe howa ti mbirale mbira nawiore kagoni tí manda bu kamigoni.
DEU 14:28 Mali tebone piai kagola tígua tomo pini pinigo bibahende bu yalu ibuwa tanoha tomo wiaga anda timbuni kagoha ngelaga bilimu.
DEU 14:29 Tomo uruni maru Libai hameigini mabu andabi nahe kago tinaga wulebira. Ani bialu tomo maru wali agali dindi taraha howa ibini bu karubi waneigini aba ai̱yala homene karubi wali agalini homene dalo bedarubi bibahende tínaga tano uruniha bu karume ti tomo uruni nolene wulebira. Wali agali urunime ti ta nabi ibalu tomo uruni tinime hame ledadagua mo yagayaga bulebira. Tígua urunidagua bialu harimiyagua nde Anduane Homogo inanaga Ngode Datagaliwabehanda tínaga mini mo dungulo helalu bibahende mo bayale hai holebira, lalu Mosesehanda lene.
DEU 15:1 Mosesehanda laabo halu lalu, Mali kane piai kagola tí baba dano ho kamigo damene ngi nale wahalimu.
DEU 15:2 Tígua ogodagua bilimu. Agali mbira ibugua muni mbira ibu damene kagohondo dano helo miniyagua ngi nale waholene nga. Dano ho hayago manda bialu Anduane Homogo ibuguabi mibe nalolebira.
DEU 15:3 Agali dindi taraha howa tí baba íbu hene karu aria kagohondo dano ho heneyagua tínaga dano ngi lalimu. Anigo tínaga damene dege baba dano ho kago dano ngi nalalimu.
DEU 15:4 Anduane Homogo inanaga Ngode Datagaliwabe ibugua dindi ngulebiragoha pu kamigola ibunime tí mini mo dungulo helalu mo bayale holebira. Tí kamiru aria mbirago ibu mbirale mbira tubagi nahe holeberemi.
DEU 15:5 Anigo tígua Anduane Homogonaga bi mana áyu i̱na langerogo baya hangu talialu harimiyagua nde tí buru pale nabi bayale holeberemi.
DEU 15:6 Anduane Homogo ibunime bulebero lalu langiyadagua ibugua tí mo bayale holebira. Ani bidagola wali agali tara tara karume tínaga mbirale ngamiru dano halu mo yulebirago tígua wali agali taranaga ngaru dano holene henge nawi holeberemi. Tígua hameigini tara dindi tara taraha karu handayaho howa haru holeberemi. Anigo ai hameigini tara tara karume tí haru naholebira.
DEU 15:7 Anduane Homogohanda dindi tí ngule ngagoha tano mbira ngagoria tí damene mbirago ibu mbirale mbira tubagiho heagua tígua hondowa nahende tingi halu biamogo bulene ngago nabi ani helowa nahalimu.
DEU 15:8 Ani nabi ibu tubagiho howa burupale kago ale tínime mbuni nabi biamogo bialu milimu.
DEU 15:9 Tígua dano ho henego hilahole bialu waholene biago kaware ngagola ai ti ngiadai bulene nawi howa hilahole bialu burupada manda bialu mulene nga. Mini ko ogonialego tíha mbira nawilo halimu. Tígua muni mbiraleru dano halu mo yilo namirimiyagua nde agali ogoni ibugua Anduane Homogohondo bi lamiragola hale halu Anduane Homogohanda tí ko birimi lolebirago tígua mbirali burupada hondowa nahende tingi ho nahalimu.
DEU 15:10 Tígua wali agali yagibano ogoni ibu tíhondo hale harago damene turu howa miai halimu. Ani mirimiyagua Anduane Homogohanda tí biamogo bialu tínaga biabe bialu kamiru bibahende mo bayale hai holebira.
DEU 15:11 Inanaga damene bibahende Isaraele hameigini burupale mbira hadege bulebirago ai i̱na tíhondo langerogo ogo. Tígua yagibano uruni dara halu ti bayale helo biamogo bialu halimu, lalu Mosesehanda lene.
DEU 15:12 Mosesehanda laabo halu lalu, Ainde wali agali inane aria bu karu mbirago ibu tí kamiru mbiragonaga garabaya biabe ale bialu hole lalu ibunime ibuni tínaga giha ya hayagua nde mali waragaria hanguni tínaga biabe bialu helo. Ani bialu mali kane haragola tígua ibu garabaya golalu tagira pelalimu.
DEU 15:13 Ibu garabaya golalu tagira porangi mbirale nayi bame ibu andaga daibia nalalimu.
DEU 15:14 Anduane Homogohanda nogo sibirubi widirubi waini ibarubi mbirale tíhondo ngiyago ibu nde maru talebu mialu yalu pelo milimu.
DEU 15:15 Tí ala Iyibi dindiha garabaya biabe ale bialu hemiria Anduane Homogo inanaga Ngode Datagaliwabehanda tí haru tagira pialu golope hene kamigo mitangi bilimu. Irane ogoninaga i̱na bi mana ogoni langerogoni.
DEU 15:16 Anigo garabaya biabe ale biahaga ogoni ibugua tíbi tí one waneiginirubi tí baba baya hangu gubalini ho haga howa ibugua lalu, I̱na tí yu wahalu polene mangaba, layagua
DEU 15:17 nde tíni andaga haraba ngagoria haru halu pu helo ibunaga haleni diri bolo wulene nga. Ani bialu ibu tínaga garabaya biabe ale biahalu haabo halu homalu waholebira. Tínaga garabaya biabe ale biahaga wali bedarubi nde anidagua dege bilimu.
DEU 15:18 Wali agali tínaga garabaya biabe ale biahaga uruni mali waragaria biabe bialu hayago kaneni golalu poragola tígua miniha genda nahe halimu. Irane tigua mali waragariani tínaga biabe bialu howa yolo emeneore mialu hayagoni. Tígua ogonidagua beremigola Anduane Homogohanda tínaga mbirale ngamiru bibahende mo bayale halu tí mini mo dungulo helolebira, lalu Mosesehanda lene.
DEU 15:19 Mosesehanda laabo halu lalu, Tígua nogo bulumaga sibirume igini pigane wini wangabe harago Anduane Homogo inanaga Ngode Datagaliwabe ibunihondo loma biahalu milimu. Ani lomabu muwa bulumaga loma bini urunime agali karunaga biabe bulene nawi. Sibi karunaga irinibi podolene nawi dege.
DEU 15:20 Mali mbira pugu biragola tínaga one waneiginiru heba nogo sibi bulumaga uruni haru halu lotu lole ngoai haga tano wubagi hene ngagoria puwa Anduane Homogonaga deni howa balu nalimu.
DEU 15:21 Anigo ai nogo bulumaga sibi uruninaga tingini mo kohe gi geru garayabi heaguabi de koheyaguabi mo ko hene tara maruyaguabi urunibi kago Anduane Homogo inanaga Ngode Datagaliwabe kagohondo loma bialu bo mulene nawi.
DEU 15:22 Nogo ko urunibi hayagua nde gabua dia ale minana hene karu balu naramilidagua tíni andagani bame balu nalimu. Wali agali tíni Anduane Homogonaga deni nakarulape ko howayaguabi bayale tigabi howayaguabi ta nabi balu nolene nga.
DEU 15:23 Anigo nogo uruninaga darama nolene nawigo nanalimu. Nogo uruninaga darama bedago dindini iba odo wahagadagua odo wahalimu, lene.
DEU 16:1 Mosesehanda laabo halu lalu, Ege mini Abibi tagira ibiragola mali bibahendengi horo mbirungi mbiraga Anduane Homogo inanaga Ngode Datagaliwabehanda tí Iyibi dindini helalu Bolangua Halu Penego mitangi bialu tomo nolene wulebira. Anidagua bulenedago irane ege Abibi ogoningi Anduane Homogohanda tí mo wialu Iyibi dindiha howa haru tagira ibiyago mitangi budai bialu ibunaga mini yaraga halu ani ngoai holene nga.
DEU 16:2 Tígua dindi mbira Anduane Homogo inanaga Ngode Datagaliwabehanda mo wulebiragoria nogo bulumaga mbirayaguabi sibi mbirayaguabi ibunihondo lomabu milimu. Ani bialu Anduane Homogo inanaga Ngode Datagaliwabe mitangi bialu ibunaga mini yaraga halu ibugua Isaraele wali agali tí Bolangua Halu Penegonaga tomo nolene horo ogoningi balu nalimu.
DEU 16:3 Tomo uruni nalu howa tígua mberedi yidi howa hirini ngago nolene nawigo nanalimu. Horo karuni mberedi yidi nahe hirini ngago nalu halimu. Anidagua bulene ngago irane bamba tí Iyibi dindini hemiria genda tandagala nalu harimigo wahalu tagira pirimingi tígua mberedi baya hangu hiralu na ndo abale hibilaba lalu yidi nahe hiru nalu ibirimigo mitangi bialu anidagua bulene nga. Mbirale uruni mitangi biaabo halu tíni homalu wahalimu.
DEU 16:4 Mberedi yidi nahe nolene horo karu uruni tagira ibirangi tí andagaha yidi mbira wulene nawi. Horo piganengi nogo loma biniru bo dawalu ogoningi dege nai halimu. Horo mendengi nole nangelalimu.
DEU 16:5 Bolangua Halu Penegonaga Horo tomo nolene harangi tígua tomo nole mo ngoai howa dindi mendeni nogo uruni balu nolene nawi.
DEU 16:6 Tígua dindi mbiraore lotu lole mo ngoai haga ngagoria dege puwa ogoriani Anduane Homogohondo bo lomabu mialu nolene nga. Bamba tí Iyibi dindi howa alendo ni paliyagola yu wahalu tagira ibirimigo mitangi bialu ai nogo uruni alendo ni paliragola bolene nga.
DEU 16:7 Nogo uruni horo ogoningi dege dindi lotu lole ngoai haga ngagoriani howa bo dawalu howa nai halu horo mende egerebagi haragola tíninaga balai anda kagoha dai bulene nga.
DEU 16:8 Horo waragaru hanguni mberedi yidi nahe hirinigo nalu halimu. Horo kane haragola Anduane Homogo inanaga Ngode Datagaliwabe mitangi bialu lotu lole mandagi ngoai halimu. Ani bialu horo kane lotu laramingi biabe tara tara ngago nabilimu, lalu Mosesehanda lene.
DEU 16:9 Mosesehanda laabo halu lalu, Tí mabuha widi balila hengedemigo boga biai kagola pigane gandu lole howa horo daga laga bilimu.
DEU 16:10 Daga laga bialu sarere kanegonaga horo hamaro bialu howa horo ogoni Anduane Homogo inanaga Ngode Datagaliwabe mitangi bialu ibunaga mini yaraga halu tígua Mabuha Widi Lini Boga Birangi Gandulo Wulenaga turuho holene horo wulebira. Horo ogoningi Anduane Homogohanda tíhondo widi balila bayale dewaore ngiyago mitangi bialu holene nga. Ani bialu tínaga tomo uruni aria maru tale bialu Anduane Homogohondo mua biradagua ta nabi tale bialu lomabu milimu.
DEU 16:11 Anduane Homogo mitangi bialu lotu lole mo ngoai haga ngagoria pialu ogoriani Anduane Homogonaga deni howa tígua ibuhondo turu timbuni holene nga. Tínibi tí one waneiginirubi tínaga garabaya biabe ale biahaga wali agali karubi Libai aria karubi agali dindi tara taraha howa tí baba íbu hene karubi waneigini tí aba homene karubi wali dalo ti agalini homene bedarubi bibahende tínaga tanoha haga bu kamirubi turu timbuni hamaga holene nga.
DEU 16:12 Tíni Iyibi dindiha hemingi tí garabaya biabe ale bialu harimigo mitangi bilimu. Ani mitangi bialu tígua mana ogoni mbirago puguligo mitangi bialu baya hangu taluwa bialu halimu, lene.
DEU 16:13 Mosesehanda laabo halu lalu, Tígua widi balila lini hondo ibira ibira bilo bo tale bialu howa pu mbira lini daga mini gerebi lini pingidalu waini iba hambu wiaiho howabi uruni biai howa Anda Nemandaha Palu Holene Horo tagira ibulebira. Ani ibirangi horo karu tí bibahende turu hagabu holene nga.
DEU 16:14 Tínibi tí one waneiginirubi wali agali garabaya biabe ale biahaga karubi Libai hameigini karubi agali dindi tara taraha howa tí baba íbu hene karubi waneigini ti aba homene karubi wali dalo ti agalini homene bedarubi tínaga tanoha kamiru tí bibahende turu haga bu halimu.
DEU 16:15 Tí bibahende ani mo ngoai howa lotu lolene ogoni horo karu dindi mbira Anduane Homogo ibunime dabo ngeledagoria polene nga. Anduane Homogo inanaga Ngode Datagaliwabe ibunime tínaga dindi maburu mo bayale holebiragonaga tígua ibunaga mini yaraga halu lotu lalu turu timbuniho halimu.
DEU 16:16 Ani bialu mali mbirani agali hangume mo ngoai haga dindi wiyagoria halu tebira mo ngoai haga bialu lotu lalu holene nga. Mali mbira ogoniha lotu halu tebira holobadagoni mbira Mberedi Yidi Nahe Hirini Nolene Horo wiyagobi mende Mabuha Widi Lini Boga Birangi Gandu Lenegonaga Horo wiyagobi tebone Anda Nemandaha Palu Holene Horo tagira ibirangibi lotu lolene horo uruni wulebira. Horo uruningi tí bibahende giha mbirale mbira nayi ibulene nawi.
DEU 16:17 Mbirale mbira Anduane Homogonaga yalu ibugu bilimu. Anduane Homogo inanaga Ngode Datagaliwabe ibunime tíhondo mbirale dewaore ngiyago manda bialu tíguabi nde tale bialu maru ibunihondo mule yalu ibalimu, lalu Mosesehanda lene.
DEU 16:18 Mosesehanda laabo halu lalu, Anduane Homogo inanaga Ngode Datagaliwabehanda tano tíhondo ngigi bulebiragoria pu howa tínaga tano hangu hangu ngamigoha howa tígua godi hale haga agali maru dabo helalu haru haga marubi dabo helaga bilimu. Ani dabo heledemigola agali uruni tigua bi baya hangu hale halu mana tigabi ngadagua mo tale bigi bilo ani dabo helalimu.
DEU 16:19 Agali godi hale haga karume godi larago mo tale bialu howa mendego mo hondo holenebi ke̱ halu mo guya howa mendego hangu biamogo bulenebi nawiore. Agali mende kagome ibunaga bi lahelonaga mbirale mbira godi hale haga kago miragola ibugua mo yulene nawi. Irane agali tigabi kagome ke̱ ha helonaga yolo miragome mendeali tigatiga lalu kago mo batara halu maname tigabi dabolene ngadagua ndo mo habo lolenaga yolo mo yulene nawiore.
DEU 16:20 Bibahendengi bi henenego lalu mana tigatiga ngadagua taluwa bialu halimu. Anidagua bialu harimiyagua nde Anduane Homogo inanaga Ngode Datagaliwabehanda dindi ngulebiragoha howa lu haho wiaabo holeberemi.
DEU 16:21 Tígua Anduane Homogo inanaga Ngode Datagaliwabenaga lomabu delaga dabu bu helalu howa mbirale bi pupu wulenaga dama wali beda lo mitangi bialu irame wabu helaga mini Aseranaga pigiyabi dabu kagoria kawareni helolenebi nawiore. Mbirale urunihondo bi pupu wulene nawi.
DEU 16:22 Ege to̱le̱ mbira mo helowa ogonihondo bi pupu wulenebi nawiore. Mbirale uruni Anduane Homogo ibunaga deni ko ngubiore ngago bu wulene nawiore.
DEU 17:1 Tígua nogo bulumaga wangabebi sibirubi mbira ko tingini biakohe derebi karu Anduane Homogo inanaga Ngode Datagaliwabe ibuhondo loma bialu nabo milimu. Loma ogonibi bu mirago Anduane Homogo ibu hame nalagaore ka.
DEU 17:2 Wali agali tínaga tano ogoniha karu aria mbirame Anduane Homogo kagonaga habo nalolene bi lowini ngaru pugualu
DEU 17:3 mbirale dama mitangi bialu gime wabini ngaruhondobi ni kagohondobi egehondobi yakundi karuhondobi bi pupu wialu Anduane Homogohanda bi lowinigo pugualu heagua ko timbuniore bialu ka.
DEU 17:4 Wali agali mbirame mana urunidagua bialu ka lene hale harimiyagua nde irane aginaga biyadabe hondole baya hangu goaria handalimu. Isaraele dindiha mbiralime mana ko ogoni henene anidagua bialu heneyagua
DEU 17:5 ogoni birago ibuni tanonaga pabe tagirahayagi haru tagira puwa ege to̱le̱ dugualu bo home lolene nga.
DEU 17:6 Ibugua mana ko ogonidagua binidago kirali tebiralirume hendene kayagua ani bo home lolene nga. Ai mbirali hangume hendene kayagua nde wali agali homelo bolene nawi.
DEU 17:7 Mbiralime ko biya lalu handa walia hagadaru tinime ala ege to̱le̱ dugualu ko biaga ogoni baragola maru karu tiguabi mani bolene nga. Anidagua bo wahai haramigome tini mana koha pubagi holene henge nawilo bibahende bo homelai haramigoni holebira.
DEU 17:8 Horo marungi godi hale haga agali maru tíninaga tanoha emene emene karume godi maru mo tiga bibe nahe timbuni gendabi wigi bulebira. Uruni mbiralime mendeali kago baragola tingini mo ko henerubi dindi andaru garere bialu bi layaguabi gungu bialu mende kago homelo benedabe be mememe bayagola homayadabe dabolenebi uruni ale tigua hale halu mo tiga bibe nahe holebirago. Timbuni uruni ale mbira wigi biragola mana hale haga agali biarume mo tiga nabibeheyagua Anduane Homogo inanaga Ngode Datagaliwabe ibugua iname ibuni mitangi bialu lotu lole íbu ngoai holene dindi mbira dabo ngelayagoria godi urunibi yu polene nga.
DEU 17:9 Yu puwa Libai hameigini loma binigo mo miaga karuhondobi godi hale halu mo tiga biaga horo ogoningi biabe bialu kago tigua mo tiga bialu manani howa dabaki helo ti lamulene nga.
DEU 17:10 Tígua hale hai howa manani ogo ale bibe lalu langiradagua bilimu.
DEU 17:11 Tígua bi langirago baya hangu hale howa bilimu laradagua biai halimu.
DEU 17:12 Tí mbiralime godi hale haga biagome bibe lalu lamirago hale howa nabiyaguabi loma binigo mo miaga agali howa Anduane Homogonaga deni biabe bialu haga biagome bibe laragobi bia nabi mo wahowa heagua ogonidagua biaga kago ibu homelo ege to̱le̱me bo homelalimu. Anidagua bo wahai haramigome tíni mana koha pubagi holene henge nawilo bibahende bo homelai haramigoni holebira.
DEU 17:13 Anidagua beremigola ogo ale biya lalu te ogoni wali agalime haleho yogolowa mani mbiralime mine halu maname bibe lalu lamidago mo wahalu napolebirago anidagua bilimu, lene.
DEU 17:14 Mosesehanda bi laabo halu lalu, Tígua dindi mbira Anduane Homogo inanaga Ngode Datagaliwabe ibugua ngulebero lalu lo wiyagoria pu howa dindi tara tara ngaruha kinime haru kadagua tíbi nde kini mbirame haru helo hame loleberemi.
DEU 17:15 Ani hame larimiyagua nde ogoningi tíninaga hameme dabole ndo Anduane Homogo ibunime mbirali tínaga kini helo dabenego walia helo halimu. Ani bialu kini ogoni ibu dindi tarali ndo tíni iginioreme helo helolene nga.
DEU 17:16 Kini ogonime ibunaga ami agaliru wai pole biralu pelonaga nogo hosiru dewaore helolene nawi. Ibunaga agali maru Iyibi dindiha nogo hosiru yolobu pudaba lolenebi nawi dege. Ani larogoni irane Anduane Homogohanda ibunaga wali agali lenego aria mbira Iyibi dindiha lone dai nabuleore lene.
DEU 17:17 Kini ogonime wali dewa dabu bulene nawi. Ani larogoni irane wali dewa uruni tigua kinime Anduane Homogo yu wahalu pelonaga haru pubagi holebira. Ai ibugua muni ngolo silibarubi dewaore ilu wia dege bialu holenebi nawi.
DEU 17:18 Ibu kini howa mbuga mbira Anduane Homogonaga bi mana gilibuwi ngago mo yu holene nga. Ibugua kini howa mana Libai hameigini karu tigua yu kadagua dege yu howa mana uruni dege lone gili buyane bigi buwa yu holene nga.
DEU 17:19 Mbuga ogoni ibuni bedagoria kaware ngelo biruwa horo bibahendengi bi mana mbuga ogoniha gilibu wini ngaru aria mbira daga laga bialu holene nga. Ani biragome ibuni Anduane Homogo andaneha haabo howa bi mana lowini ngaru baya hangu talialu bialu haabo holebira.
DEU 17:20 Ani biragome ibugua ibuninaga mini hangu mo yaraga haabo halu Isaraele wali agali mo hengedope nahaga holebira. Ani howa ibugua Anduane Homogonaga bi mana lowini ngaruni aria mbira pugua nabiaga howa ibu luore kini haho wialu mali dewa pu a̱i̱a̱i̱ bulebira. Kini holebirarubi uruni ibu waneigini aguanerume dege hama pu a̱i̱ holebira, lalu Mosesehanda lene.
DEU 18:1 Mosesehanda laabo halu lalu, Libai hameigini karu ti ina Isaraele hameigini kamaru dindi tu wu ta haramago aria maru namulebira. Ti loma binigo mo miaga howa tomobi nogo sibirubi ina Isaraele wali agali maru kamarume Anduane Homogohondo lomabu meremaru tinaga wulebirago ogoni nalu holebira.
DEU 18:2 Isaraele hameigini maru karu tinaga dindi mbira mbira ngamidagua Libai hameigini tinaga nawulebira. Tigua mbirale bayale yu kago ogo. Anduane Homogo ibunime bilimu lalu lo wiyadagua tigua Anduane Homogonaga biabe biaga howa loma binigo mo miaga helo dabo helene ka.
DEU 18:3 Agali mbirame nogo bulumaga sibiru wangabe mbira Anduane Homogohondo bo lomabu miyagua nde nogo ogoninaga payane mbirinibi ne hangane mbirinibi tinibi podalu loma binigo mo miaga karu ti nelo mulebira.
DEU 18:4 Ani bialu widi bayale ngarubi waini ibabi olibe lini welibi nogo sibi irini bayale ngarubi bibahende loma binigo mo miaga karuhondo pigane migi bulene nga.
DEU 18:5 Anduane Homogohanda ibunaga biabe biahalu loma binigo mo miaga helo ibugua Isaraele hameigini maru karu aria ndo Libai hameigini karume tinaga aguanene mani holebirarumebi biabe ogoni bialu haabo helo dabaya.
DEU 18:6 Libai hameigini karu aria mbirago ibu Isaraele dindiha ibunaga tano ngago wahalu dindi mbira lotu laga wubagi hene ngagoha poa biyagua nde ani polene nga.
DEU 18:7 Ani pialu howa loma binigo mo miaga maru dindi ogoria karu ti Libai hameigini dege howa tigua Anduane Homogonaga deni biabe bialu hagadagoria ibuguabi Anduane Homogo ibunaga Ngode Datagaliwabenaga biabe biahalu holene nga.
DEU 18:8 Loma binigo mo miaga karu tinaga tomo mbiraleru ibugua ogobi dege dege talebu migi bulebira. Ani bialu ibunaga damenerume talebu migi bini ngaru mo yu haga haga bulebira, lene.
DEU 18:9 Mosesehanda laabo halu lalu, Ai dindi Anduane Homogo inanaga Ngode Datagaliwabehanda ngulebero layagoria pu howa mana ko ngubi dindi ogoniha wali agali hene karume biagadagua nabilimu.
DEU 18:10 Tígua wali agali dindi ogoniha karume biaga ngadagua tínaga waneiginiru loma bialu bo delaga dabu kagoria bo delolene nawi. Ani bialu ke̱ howa halaga biaga mana ngago bulene nawiore. Damanaga toro manabi tomia manabi bulene nawi. Mbirali í̠ keria ibilo ndole mulenebi uruni ale damenego bulene nawi dege. Homene dininihondobi mo bila nahalimu.
DEU 18:12 Anduane Homogo inanaga Ngode Datagaliwabe kago ibugua wali agali mana ko urunibi biaga karu handabe manga haga kagoni. Wali agali dindi uruniha karu tigua mana ko urunibi bialu kagonaga Anduane Homogohanda tí dindi ogoniha anda polene kaware hapara halu pialu kamigola ibunime wali agali uruni bo batagi holebira.
DEU 18:13 Tígua mana beremigo bibahende Anduane Homogohanda hameledadagua taluwa bialu mini bilinahe ho halimu, lene.
DEU 18:14 Mosesehanda lalu, Dindi tí poleberemigoha wali agali bu karu tigua halaga biaga karunaga bi hale halu talima piagabi damanaga mana ngaru bialu hagabi ka. Anigo Anduane Homogo inanaga Ngode Datagaliwabe ibugua, Tí mana urunialeore nabilimu, leda.
DEU 18:15 Anigo Anduane Homogo ibugua ibunaga bi mana latagi haga mbira i̱ni kogobi tíni hameigini karuni aria mbira dabo helolebira. Ani dabo heledagola tígua ibunaga bi larago hale howa talialu bialu halimu.
DEU 18:16 Tí Hari Sainai hapara ho harimingi Anduane Homogo ibugua bi layagola tígua gi howa ibuhondo lalu, Bi lone nalabe, larimi. Ani bialu ira hungu timbuni Anduane Homogo ibuni heagoria howa kiau latagi haragonaga hondolenebi gi harimigoni. Ai tígua mitangi bialu lalu, Iname Anduane Homogonaga bi larago lone hale harimayaguabi ibuni de handarimayaguabi nde ina homoleberemada, larimi.
DEU 18:17 Ani larimigola Anduane Homogohanda i̱hondo langialu lalu, Isaraele wali agali tigua i̱hondo bi hale haga biraru bayaleore hale haga bira.
DEU 18:18 I̱na tini hameigini karuni aria mbirago dabo helolebero larugo ibugua i̱naga bi mana wali agalihondo lamia larongi heyu howa latagi halu holebira.
DEU 18:19 I̱naga minini howa agali ogoni ibugua i̱naga bi mana latagi halu kagola wali agalime bi ogoni mo wahaga kago i̱na ti mana lalu pani mulebero.
DEU 18:20 Anigo bi mana latagi haga agali mbirame i̱naga minini howa bi i̱nime latagi habe lene ndo ibuninaga bi hangu latagi halu heagua nde ibuni homolene wulebira. Ani bialu agali mbirali ibugua dama mbiranaga minini howa bi latagi hayagua nde ibubi homolene dege wulebira lalu Anduane Homogo ibugua i̱hondo langiya, lalu Mosesehanda lene.
DEU 18:21 Anigo tígua bi mbira hale howa tíni lo manda bialu bi ogoni Anduane Homogoha howa ibinidabe be mendeha howa ibinidabe lalu mo tale agua buleberemibe.
DEU 18:22 Ai bi ogodagua hondo manda bilimu. Bi mana latagi haga mbirame Anduane Homogonaga minini howa ibugua ogoale mbira bulebira lalu mbiwia haragola bulebira layago henene tagira naibiyagua nde ibugua bi layagoni Anduane Homogohanda lamini ndo holebira. Agali ogoni ibuni miniha howa tagira ibiyago latagi hene holebirago tígua ibuhondo gi nahalimu, lalu Mosesehanda lene.
DEU 19:1 Mosesehanda laabo halu lalu, Anduane Homogo inanaga Ngode Datagaliwabehanda dindi tí mo ngulebiragoha wali agali bu karu bo taliatagi hai halu tinaga dindi anda ngaru tí karulo halimulo ngulebira. Tí dindi bayale ogoniha pu howa
DEU 19:2 dindi ogoni halu tebo tu wupe halimu. Ani buwa dindi tu wini hobane mbira mbira uruniha tano mbira dege agali gerai lalu abale polene hana nahe ngagoria dabo helalimu. Ani ngagoria agali marume mbirali kago bo wahalu tini tano uruni mbiragoha abale ibida pialu ha do holene wulebira.
DEU 19:4 Agali mbirame mbiralila libu waitigi ndo howa mememe koba puwa bo wahayagua nde baga biago ibuni tano uruni aria mbiraha ibida pialu ha do howa bayale holebira.
DEU 19:5 Agali ibida pialu ha do holobadagoni ogodagua holebira. Agali kirali irabuha puwa ira dibalu kabira ayu gola puwa agali mendego dibaragola homayagua nde agali ayu yaga hayadago ibu ibida pialu tano tebira uruni mbiragoha pu howa ibu gi nahe holebira.
DEU 19:6 Ha do holene tano ogoni aria mbiraore hangu wiagua nde agali baga biago ibu ibida polene kaundiaore ngagola tano ogoniha pole wene harigani pialu kaore homayago damene bu karume ibuni homelo bo wahayagua bame bo waharagoni. Ai ha do holene tano mbiraore hangu wulene nakarulape. Anigo agali ayu yaga biago darabi ibugua agali mende biago baro lalu ndo mememe ayu gola puwa dibayagome homaya.
DEU 19:7 Irane ogonidagua bulebadagonaga tano tebira dabo ngelalimu larogoni.
DEU 19:8 Mani Anduane Homogo inanaga Ngode Datagaliwabehanda bamba tínaga mamali biaruhondo dindi ngulebero lalu bi lo winigodagua ngialu tínaga dindi ogoni yangalalu mo timbu holebira.
DEU 19:9 Ibugua ani mo timbu haragola tígua tano tebira mende dabo ngelalimu. Ai tígua bi áyu langerogo bialubi Anduane Homogo inanaga Ngode Datagaliwabe kago gubalini timbuniho howa ibunaga bi larago baya hangu talialu bialu harimiyaguabi nde ibugua dindi uruni bibahende tí mo ngiai holebira.
DEU 19:10 Tí dindi Anduane Homogohanda ngulebero lalu lo wiyagoha pu howa wali agali mememe koba puwa balu homayagua tígua biako hene mbira nawilo tano tebira ogoniha helo ani dabo ngelalimu.
DEU 19:11 Anigo ai agali mbirame ibunaga damene karu aria mbirago handabe manga howa homelo bo wahalu tano tebira uruni mbiragoha ha do hole pole manda biyagua nde
DEU 19:12 agali haguane ibuni daluha hene bu karu tigua agali tano ogoni ibu ha do hole piyadagoha haga karuhondo bi lo pelolebira. Ani puwa lalu, Agali baga ogoni yupe halu daibia lalimu, lolebira. Dai bu kagola agali haguane ibuni daluha hayadaru tigua agali balu piaga biago homayago andua karu giha minu ya haragola tigua ibu homelo bo waholebira.
DEU 19:13 Tígua ibu dara holene nawiore. Ko ibunime bialu Isaraeleali hearu aria bame homelo bo wahaganaga pani mialu dindi ogoniha nahelo bo waholene nga. Anidagua birimiyagua tí bayale holeberemi, lalu Mosesehanda lene.
DEU 19:14 Anduane Homogo inanaga Ngode Datagaliwabe ibugua dindi áyu ngulebirago karulalu howa tígua tínaga damene mbiragonaga dindi hamelowa dindi tu ege to̱le̱me bambaore wini ngago dugu yaamu nahalimu.
DEU 19:15 Mosesehanda laabo halu lalu, Mbiralime ko biya lalu mbiraoreli hangume hondowa godi deni latagi hayagua mbiraorelime larago maname hale nahalimu. Ko binidago kirali tebiralirume hendeneyagua nde manani ko biagadago ibu helalimu.
DEU 19:16 Ai mbiralime mendeali kago mo ko holenaga hariga taya bialu howa lalu, Agali ogoni ibu ko biya, layagua
DEU 19:17 libu haru pialu mo ngoai howa lotu laga mbira wiyagoria polene nga. Ani puwa Anduane Homogonaga deni henene lalu agali maru loma binigo mo miagabi ko biniru manani ngadagua tale biagabi horo ogoningi biabe bialu henedarume libunaga bi tale bilo polene nga.
DEU 19:18 Ani pu howa bi laragola agali mana hale halu tale biagadaru tigua hale halu karia biya laga biago ibu ke̱ heneyagua nde
DEU 19:19 mendeali bame dibaede hayago pani mulene wiyadagua ke̱ howa dibaede haga biago ibuni no aribia holene wulebira. Ani buleneore wulebirago ai tíha ke̱ halu nde lolene mbira ogonibi nawilo ani bulene nga.
DEU 19:20 Anidagua birimiyagua wali agali bibahendeme hale howa ti gi howa tigua ke̱ halu mendeali bameore nde nalolebirago ani bilimu.
DEU 19:21 Mbirali ke̱ haga karuhondo tígua dara holene nawiore. Mbiralime ibunaga nenege mbira ko nawi kago bame homelo manda biyagua nde ibuni homolene nga. Ke̱ haga biago ibugua ibu damene biagonaga de hundiabi ne bo hondabi gi gebi mbirago bo tagalia bilobi hame layagua nde ke̱ haga ogoni ibuniha bilo hame layago biadai bulene nga, lalu Mosesehanda lene.
DEU 20:1 Mosesehanda laabo halu lalu, Tígua waitigi baba wai bule pialu kamiria waitiginaga wai biaga garo ale karisi dewabi nogo hosi dewabi ami agali dewabi howa ti dewaore halu tíninaga emene harimiyagua nde harugo tígua uruni hondowa gi nahalimu. Irane tí Iyibi dindiha hemiria haru halu tagira piaga Anduane Homogo inanaga Ngode Datagaliwabe ibuni kago ibugua tí mo hongo halu tí heba mandagi holebira.
DEU 20:2 Tígua wai bu pole howa tidiyu haga haga bu kamiru wanakuini loma binigo mo miaga mbiragome íbu howa ami agaliruhondo ogodagua lolebira.
DEU 20:3 Ibugua lalu, Isaraeleali kamiru tí bi o larogo hale hadaba. Áyu tígua wai bu pole kamigoni. Ani pole howa waitigi bu karu hondowa tígua gi halu tínaga hongo ibira holene nawi. Ti de hondowa mogobi nalalimu.
DEU 20:4 Anduane Homogo inanaga Ngode Datagaliwabe ibuni tí heba mandagi pialu tígua wai bilimulo ibugua tí mo hongo halu holebira. Ani biragola tígua wai bialu waitigi bo poda hana holeberemigo pilimu lalu, lamulebira lene.
DEU 20:5 Ani laragola ami agali haru haga haguane karu tigua lalu, Agali áyu kamaru aria maru tí anda gahenge áyu dege bia howa Anduane Homogohondo, Anda ogoni mo bayale ha, nale ogoniha palia nabi ai kamibe. Mbirali ani heagua nde waiha bogaragola ibunaga anda gahenge biago mendealime karulo holenego nakarulapedago wahalu andaga daibia, lalu lolebira.
DEU 20:6 Agali áyu kamaru aria mbirali pu mbira mini gerebi mabu hengedagoha howa gerebi lini dalu waini iba wabu nane mbirali ai kabe. Mbirali heagua nde ibu waiha bogaragola ibunaga gerebi hengedago mbirali ibu aribia halu do nolene wuligo wahalu dai bulene nga.
DEU 20:7 Agali kamaru aria mbirali wali wene dabu biaho berelowa ai kamibe. Mbirali ani bu heagua nde tini waiha bogaragola wali gahenge dabubu berelarimigo mendeali kago ibu aribia holigo wahalu daibia, lalu lolebira.
DEU 20:8 Ani lowa ami agali haru haga haguane biarume laabo halu lalu, Agali maru wai polene gi howa duru lalu kamiyagua nde tí gi heneme agali maru karubi mo gi holigo wahalu andaga hole dai bilimu, lalu lolebira.
DEU 20:9 Ami agali haru haga haguane biarume bi lai howa tigua agali marume ami mo tale bigi bialu tidi mbira mbiranaga haru holene dabo helaga bulebira.
DEU 20:10 Tí tano mbira wai pabe hongohe ege pabe buyu mabubi ngagoria anda pialu howa tígua wali agali tano ogoniha karuhondo ogodagua lalimu. Tígua ina baba wai nabi wahalu tínaga tano ogoni ina ngidaba lalimu.
DEU 20:11 Anidagua laramigola hale halu tigua wai nabi wahalu tanonaga panga timbuni kago dugupe hayagua nde dindi aba hayadago ti tí andaneha howa tínaga garabaya biabe ale bialu holene wulebira.
DEU 20:12 Anidagua nabi howa agali tanoha karume tí baba wai bule hongo hayagua nde tínaga ami agali biarume tano ogoni baya hangu ho hagira bilimu.
DEU 20:13 Ani beremigola Anduane Homogo inanaga Ngode Datagaliwabehanda tano ogoni karulalimulo tí giha mo ya holebira. Ani biragola tígua tano ogoni karulowa agali tano ogoniha karu bibahendeore bo wahai halimu.
DEU 20:14 Anigo wali waneigini bedarubi nogo bulumaga karubi dabudabu tara tara ngarubi bibahende tano ogoniha wini ngaru mo yai halimu. Ani bialu waitigi biarunaga mbirale mo yaramiru bibahende Anduane Homogo ibugua tí mo ngiyago tíni hai halimu.
DEU 20:15 Tínaga dindi holeberemigo yu wahalu tano maru kaundiani ngaru wai bialu howabi nde anidagua dege bilimu.
DEU 20:16 Anigo dindi Anduane Homogo inanaga Ngode Datagaliwabehanda tí ngulebiragoha tano ngaru wai bialu howa wali agalirubi waneiginirubi bibahende ogoniha haga karu homelo bo wahai halimu.
DEU 20:17 Anduane Homogohanda bilimu lalu tíhondo langiyadagua bialu Hidialibi Amoralibi Kenanalibi Peresealibi Hibialibi Yabusualibi wali agali bibahendeore homelo bo wahai halimu.
DEU 20:18 Wali agali uruni tigua dama mitangi bialu gime wabini ngaruhondo bi pupu wialu mana ko ngubi ti bialu haga ngaru tíhondo biawai nahelo bibahende bo hilo wahai halimu. Wali agali tara urunime tígua Anduane Homogohondo mana ko bilimulo mo bia holigo anidagua bilimu.
DEU 20:19 Tígua tano mbira ngago karulolenaga horo bibahendengi ho hagirabu haabo howa tano tagiraha irabu karu dibule haramiyagua nde ira lini tomo nagane ale daga karu dibu wanahe helalimu. Ira lini dedaru lini nagane ale dedago do nalu halimu. Irane ira uruni tínaga waitigi ndo kago diba nabi helo wahalimu.
DEU 20:20 Anigo tígua ira maru lini nagane ale nadaga kago hondowa tí wai beremigonaga irame bulene mbira wiagua nde ira kago damene bibahende dibai halimu, lalu Mosesehanda lene.
DEU 21:1 Mosesehanda laabo halu lalu, Dindi Anduane Homogo inanaga Ngode Datagaliwabehanda ngulebiragoha pu kamingi agali mbira dindi ogoniha bo wahene ngane hondowa aiwa bayabe manda nabiyagua nde ogodagua bilimu.
DEU 21:2 Tínaga agali haguane karubi godi hale halu dabaki biaga karubi tigua dindi agali tingini ngagola tano agola kaware wiyadabe hondole hondo manda bulene nga.
DEU 21:3 Ai tano mbira agali tingini wiyadago kaware ngagoha haga agali haguane karu tigua nogo bulumaga angibuni dalua mbira wali agalinaga biabe nabini kago dabo helolebira.
DEU 21:4 Ani bialu nogo bulumaga ogoni haru halu iba hundia nabiaga mbira pedagoha haru polene nga. Ani bialu iba ogoni kawareni dindi mbira mbiralime mabu e hanga nabini ngagoria bulumaga ogoni homelo ma minu ndelalu bolene nga.
DEU 21:5 Ani bialu Libai hameigini loma binigo mo miaga karu Anduane Homogo inanaga Ngode Datagaliwabe ibugua ti ibunaga biabe bialu haga helobi ibunaga mini latagi halu wali agali biamogo bialu Anduane Homogohanda tí mo bayale helo lalu helobi dabo helene ka. Ani helayago tigua kirali keba halu gungu binigo mo dabaki biaga kago manda bialu tibi nde iba ogoni pedagoha haru mandagi polene nga.
DEU 21:6 Ai agali bo wahene biago ngagoria tano kaware henedaru agali haguane tibi nogo biago haru halu piyadagua pialu tigua iba pedagoria tinaga gi wayawaya bulumaga biagoria bope holene nga.
DEU 21:7 Ani buwa tigua lalu, Iname agali ogoni bo wanaheorego aiwa bo wahayabe tobaho kama.
DEU 21:8 Ai Anduane Homogo-o ina Isaraele wali agali í̠nime Iyibi dindiha howa haru tagira ibirigo bu kamarunaga ko ngago domo wahabe. Agali ogo ibuha ko mbira nawi heago bame homelo bo wahayada. Anidagua biyadagonaga inaha biako hene ngalo manda nabibe, lolebira.
DEU 21:9 Ani lalu tígua mana tigabi bulene ngadagua beremigola Anduane Homogohanda tíhondo agali bo wahene ngagonaga biako hene mbira tíha nawida lolebira, lalu Mosesehanda lene.
DEU 21:10 Mosesehanda laabo halu lalu, Tígua wai pialu kamiria Anduane Homogo inanaga Ngode Datagaliwabehanda tí mo hongo haragola tígua wai bialu waitigi maru garabaya haru poleberemi.
DEU 21:11 Ani haru puwa garabaya uruni aria mbirago wali baya mbira bedane handalu í̠ one berelo hame lariyagua dabu bule haru polene karulape.
DEU 21:12 Ani manda buwa í̠na wali biago í̠ andaga haru polene nga. Haru puwa wali ogoni ibunaga mandari podo wahai halu gi gibabi podai holene nga.
DEU 21:13 Ani buwa garabaya howa aga bu hayago golo wahalu gahenge karula aribia holene nga. Ani bialu wali ibu agali biago andagaha biruwa ege mbirani ibu dameneru aba ai̱yaru waiha howa homayagonaga dara howa dugu bialu birulebira. Ani biruwa ege mbira ogoni piai kagola libu dabu bulene nga.
DEU 21:14 Ani bialu mani howa agali biagome wali ogoni hame nalayagua nde wali wahalu pu lolene nga. Wali ogoni bame haru halu puwa paliribigo manda bialu ibu agali biagonaga garabaya biabe ale biaga berelowa muni tagu nolene nawiore, lalu Mosesehanda lene.
DEU 21:15 Mosesehanda laabo halu lalu, Agali mbirame wali kira dabubu howa ibugua wali mbirago gubalini ho howa wali mendego handabe mangaho haga. Ani howa ibugua wali handabe manga hene biagome igiri wahene taba hanalu wali mende ibuni gubalini haga biagomebi igiri dege mani taba hanaga.
DEU 21:16 Ani bidagola mani agali biagome ibunaga mbirale ngaru paluni tale bule howa wali ibu handabe manga haga bedago igini wahene taba henenegonaga paluni winigo wali ibuni gubalini haga biago igini mani taba henene kagohondo mulene nawi.
DEU 21:17 Ibugua paluni tale bialu howa ibu igini wahene wali berene igini kagohondo mbirale wiyadaru tale bialu halu kira igini wahene kago miaga ngadagua mulene nga. Agali ogoni ibu one berenedago ibu gubalini nahagagoyu harugo biaga ngadagua ibu igini pigane hono wini wahene biago mulene nga lalu, Mosesehanda lene.
DEU 21:18 Mosesehanda laabo halu lalu, Agali mbira ibu iginime mine howa aba ai̱yanaga bi mo wahaga kagonaga ibu aba ai̱yalame tibume minu baragola ogonibi doga halu bi hale nahaga ka.
DEU 21:19 Anidagua bialu haabo hayagua nde wahalu libu iginidago tininaga tano panga haraba ngagoha agali haguaneru karia haru halu puwa godini helolene nga.
DEU 21:20 Ani helowa ibu aba ai̱ya biagolabome agali haguane karu lamialu lalu, Iya igini ogonime iyanaga bi mo wahalu mine gibi haga. Ibugua iyanaga bi larabago hale nahaga. Ibugua lulu iba nalu lulu yu haabo haga howa iyanaga muni ngabago mohole biaga kagoni, lalu lamulene nga.
DEU 21:21 Ani laragola agali haguane tano ogoniha haga hayadarume ege to̱le̱ dugualu bagabaga bialu igiri ogoni balu bo homelolene nga. Mana ko ogonibi tí kamigoha nawilo anidagua bialu mo waholene nga. Anidagua beremigola Isaraele wali agali bibahende hale halu mogolo hondowa gi hai holebira, lalu Mosesehanda lene.
DEU 21:22 Mosesehanda laabo halu lalu, Agali mbirame mana ko timbuniore bidagola ogoninaga tígua ibu homelo balu ibunaga tingini ira dibini tilinini mo paga harimiyagua
DEU 21:23 nde horo mbiru wialu egabi nalelalimu. Ani larogoni irane agali tingini derelaho wirago Ngode Datagaliwabehanda tandaga nama pobe lolene wulebira. Ani ngago manda bialu horo ogoningi dege hora halimu. Anidagua nabirimiyagua tínaga dindi Anduane Homogo inanaga Ngode Datagaliwabehanda ngulebirago ibuninaga deni howa mo koore heloleberemigo ani nabilimu lalu, Mosesehanda lene.
DEU 22:1 Tígua handalu kamiria tí aria bu karunaga nogo bulumaga sibiru mbira tini haga biago yu wahalu tagira ibagabu kane de handarimiyagua ani helo hondo donge nahalimu. Nogo anduane biago ibuni karia haru dai bilimu.
DEU 22:2 Anigo nogo anduane ogoni ibuni kaundiaha heaguabi nogo anduane aibe toba harimiyaguabi nde wahalu tí andaga haru pilimu. Ani haru pu kamiria nogo anduane ogoni ibuni taya bima ibiyagua nde ibuni haru halu pelo milimu.
DEU 22:3 Ani bialu tí damene bu karu aria mbiragonaga nogo dongi tagira pu heneyaguabi aga dabudabu marubi bame harigani waheneyaguabi anduane ibuni karia mo yalu dai bilimu.
DEU 22:4 Isaraele aria karu mbiragonaga nogo dongibi bulumagayaguabi mbirago harigani pilopeho ngane handarimiyagua nde ogoni ngelo wahalu napilimu. Tí damenenaga nogo ogoni biamogo biahalu mo heya halimu.
DEU 22:5 Agalime aga biagane ale ngago walime karulo holene nawi. Walime aga biagane ngagobi agalime karulo holene nawi dege. Anduane Homogo inanaga Ngode Datagaliwabehanda mana urunibi birago hondowa turu nahaga ka.
DEU 22:6 Tígua ega anda mbira ira geha ngane handarimiyagua dindihayagi ngane handarimiyaguabi ega angibunime habane dambiho padaria hondowa igini yu bedariabi de hondowa ega angibuni bedago ibuni naminalimu.
DEU 22:7 Ega igini bedago minalu angibuni pelo yupe halimu. Anidagua birimiyagua tí dindi ogoria lu haabo howa Anduane Homogohanda mbirale dewaore tíhondo ngulebira.
DEU 22:8 Tígua anda beremigo bialu howa dangini daligahayagi pabe emene mbira bu mabu bilimu. Ani nabi ngeledemigola wali agali anda dangini irigi howa ibagabu karia pilope halu homayagua nde tígua biako hene wuligo ani bilimu.
DEU 22:9 Pu mbira lini daga mini gerebi mabu ngamigoha tomo tara ale maru hangamaga nahalimu. Tomo tara maru heba hangamaga harimiyagua nde gerebi lini dedarubi tomo tara karubi nolene nawigo nanalimu.
DEU 22:10 Nogo bulumaga dongila mandagi mabuni dindi alialu helonaga aeaneme mani dariba hamagamaga nabi halimu.
DEU 22:11 Tígua pu nogo sibi irinimebi pu baya gedaore taramebi mandagi paya magamaga buwa aga wabini ngago nabilimu.
DEU 22:12 Tínaga aga ngamirunaga gibuni mariani yári bayale luni uruni lebu para haga bilimu lalu, Mosesehanda lene.
DEU 22:13 Mosesehanda laabo halu lalu, Agali mbira ibu wali dabu buwa ibu onela andaga palu howa mani ibu one ogoni manga howa
DEU 22:14 ibugua ke̱ halu ndelowa lalu, Wali ogoni ibu agali mendela heneyane handaru, lolebira.
DEU 22:15 Agali biago ibugua bi ogonidagua layagua wandari aba ai̱yalame wandari ogoni ibu mana ko ogonidagua nabiagaore lalu mo walia hagane labolabo mbira winigo mo yalu polebira. Ani mo yalu tanonaga pabe haraba wali agali ngoaiho howa godi laga ngagoria puwa tanonaga agali haguane miniwi bu karuhondo labolabo biago mo walia holebira.
DEU 22:16 Mo walia halu wandari aba biagome agali haguane biaruhondo lamialu lalu, I̱ wane agali ogo ibu dabu binigo ai áyu ibugua wali ogo manga haya.
DEU 22:17 Manga howa ibugua ke̱ howa bi lalu, Wali ogo i̱ dabu buwa mani handalu hewaria ibu agali mendela kayu ala biniyane handaru laya, lalu lamulebira. Ani lamialu ibugua labolabo yalu piyago agali haguane biarunaga wanakuihayagi dindini dungua holene nga.
DEU 22:18 Ani biragola agali haguane biarume agali ke̱ haga biago tibume bo mberaho waholene nga.
DEU 22:19 Ani bialu agali ogoni ibugua muni kina ale daosini mbirame (1,000) wandari aba biago yolo bulene nga. Irane agali ogoni ibugua Isaraele wali bayale berene bereago mo yobia halu mo taga hayagonaga ani bulene nga. Anidagua bialu wali biago ibu agali ogoni one biraabo halu homalu waholebira. Agali ogoni ibugua wali wahalu pu lolene nawiore.
DEU 22:20 Anigo ai wali ogoni ibu henene agali mendela kayu bini biruwa tigua nabi tingi heneyane handa walia hayagua nde
DEU 22:21 tanonaga agali haguane biaru tigua wandari biago ibu aba anda haneni haru tagira pu helowa tigua ege to̱le̱ dugualu to̱le̱me balu homolene nga. Anidagua bulubadagoni irane wandari ogoni ibugua ibu aba andaga bereangi mana ko tagabi wiago inanaga wali agali bu karunaga deni bialu ibu agali nape biruwa agali kayu yalu birayadagonaga ibuni homolene nga. Anidagua birimiyagua mana ko mbira ogoni alego tí kamigoha nawilonaga mo wahai holeberemi.
DEU 22:22 Agali mbirame mendeali one bedago kayu bialu karia handa walia harimiyagua nde mana ko ogoni ale tí daluha nawilonaga hada bialu wali agalibi kirabali homelo bo wahalimu.
DEU 22:23 Agali mbirame wandari mbira ibu dabu bule lowa haru bedaria agali mendeme kayu bialu karia handarimiyagua
DEU 22:24 wali agalibi kirabali tanonaga pabe tagirahayagi haru tagira puwa homelo ege to̱le̱me bo wahalimu. Walidago ibu ogodagua bira lalu koaba layagua tanoha agali maru karume hale holene winigo ai ibugua koaba nale donge howa bialu hayagonaga ibuni homolene nga. Agalidago ibubi nde ibuni aria dege mende heago ibu dabu buleore lowa haru bereago kayu bialu hayadagonaga ibubi homolene dege nga. Anidagua bialu mana ko ogoni alego biba halu ereba helalimu.
DEU 22:25 Ai wandari mbira agali mbirame ibu dabu bule lowa haru berenego wali ogoni ibu tanoha howa tagira puwa ibuni hangu pialu karia agali mbirame handa walia howa minade halu ibu kayu biyagua nde agali ogoni ibuni hangu homelo bo waholene nga.
DEU 22:26 Anigo tígua waligohondo mbirale mbira bulene nawiore. Ibugua mana ko bini mbira ibu homabehe nawi. Agali mana ko ogoni biyagome agali mbirame mendeali kago homelo bame bo wahagagobi nga.
DEU 22:27 Agali biago ibugua wali ogoni tano tagirahayagi howa kayu biyagola walidago ibugua koaba layagoyu ibu biamogo bulene mbira nahe wini.
DEU 22:28 Wandari mbira agalime dabu bule haru berene ndo bedagome agali baba kayu bialu karia handa walia harimiyagua
DEU 22:29 nde agalidago ibugua wariabu hende howa wandari aba mialu ibu dabu bulene nga. Irane agali biago ibugua wali biago minade halu kayu biyagonaga ani bulebira. Ani bialu wali biago ibu agali ogoni one biralu waholene nawi biraabo halu homolebira.
DEU 22:30 Agalime tí aba one bedago baba kayu bulene nawiore. Tí aba mo taga holene wulebirago ani bulene nawiore, lalu Mosesehanda lene.
DEU 23:1 Mosesehanda laabo halu lalu, Agali mbira ibu pindu mo wahene heaguabi wi podo wahai heneyaguabi ogonidagua bini kago ibu Anduane Homogonaga wali agali kagoha hatago howa mandagi holene nawi.
DEU 23:2 Agali mbira ibu wali kayu binime waneigini taba hanayagua nde waneigini ogoni ibu Anduane Homogonaga wali agali kagoha hatago halu ti baba mandagi holene nawi. Ani haabo halu ibu waneigini aguanene mani hama polobadarubi pini daba hama piyaguabi mandagi holene nawiore.
DEU 23:3 Amonoali karubi Moabali karubi tinaga waneigini aguanene pi daba mani hama polobadarubi bibahende tigua Anduane Homogonaga wali agali bu karu heba mandagi holene nawiore.
DEU 23:4 Anidagua bulenego irane ina Iyibi dindiha howa tagira ibalu hemaria tigua inahondo iba tomobi nangi haya. Ani howa tigua Ngode Datagaliwabehanda ina mo ko helonaga bi la helo agali mini Balama heago yolo bulene manda biya. Balama ogoni ibu Beo igini howa Mesobodemia dindiha Pedoro tano wiagoali hene.
DEU 23:5 Anigo Anduane Homogo inanaga Ngode Datagaliwabe ibugua Balamahanda bi layago hale nahe hene. Ani howa ibugua Balamahanda bi ko lole biyago mo beregedalu bi bayale ina biamogo bulene bi lelo mo la hene. Anduane Homogo inanaga Ngode Datagaliwabehanda inahondo gubalini timbuni ho howa anidagua bini.
DEU 23:6 Anidagua biyago mitangi bialu tígua hameigini ogoni ti bayale helonaga biamogo bulene nawi.
DEU 23:7 Iyibi wali agali marubi Idomo wali agali marubi tí heba holebirago ai Idomo wali agali uruni ti baba darama mbiraore gaibini howa tí damene ka. Ani bialu tígua Iyibi wali agali karuhondo mini ko nawi halimu. Irane tíni Iyibi dindiha hene kamigo manda bialu ani halimu.
DEU 23:8 Wali agali uruni tinaga waneigini aguaneneru daba tebo agima haragola nde tí baba ho mbira hole anda ibalu Anduane Homogonaga wali agali kamiru aria hatago hayagua karulape dege, lalu Mosesehanda lene.
DEU 23:9 Mosesehanda laabo halu lalu, Tígua wai bu pialu wai hamaha howa mbirale Anduane Homogo inanaga Ngode Datagaliwabenaga deni ko damene bu ngaruha nape wanduwa hogorale bialu halimu.
DEU 23:10 Agali mbira ibu mbiraga paluwa emaga handalu karia ibunaga tinginiha howa ibane tagira piyagua nde paliaga balai anda wahalu tagira pu holene nga.
DEU 23:11 Alendo haragola ibu tingini wayawaya balu ni paliragola balai anda bu hayagoha lone dai bulene nga.
DEU 23:12 Ami agali kamiru tí wai pu howa ti uli mbiraoreha hangu polene nga. To payapaya bulene nawi.
DEU 23:13 Ami agali ti kanogo emene mbira giha yu haga haga bulene nga. Tí kagoha howa ti tolene haragola uli tombolenaga ani yulene nga. Tai halu uli baya hangu mogo bulene nga.
DEU 23:14 Anduane Homogo inanaga Ngode Datagaliwabe ibu tí wai beremigo biamogo bialu mo hongo hole balai anda bu kamigoha tí heba mandagi haabo holebira. Ani holebirago mitangi bialu tínaga balai anda bu kamigoha mo ko nahe wabu ngelo halimu. Anduane Homogohanda tí erembira ngialu poligo tígua ibunaga deni howa mana ko mbira nabilimu, lalu Mosesehanda lene.
DEU 23:15 Mosesehanda laabo halu lalu, Agali garabaya biabe ale biahaga mbira ibugua ibunaga anduane kago helalu pora bialu tí kamiria ibalu tígua ibu biamogo bidaba lama ibiyagua nde tígua ibu anduane karia dai bia nalalimu.
DEU 23:16 Tígua ibu mo kobi nahalimu. Ibu tínaga tano ngamiru mbiragoha holene hame layagua nde ogoniha helo wahalimu.
DEU 23:17 Isaraeleali tí wali agali maru mbirale dama mitangi bialu bi pupu wialu wali agali kayu yu palue piaga ngagoha puwa kayu bialu bayanda wali agali hole napilimu.
DEU 23:18 Ani bialu Anduane Homogohondo mbirale mbira bule lo wirimidago bule muni wali agali kayu binigonaga minigo mo yalu ibalu Anduane Homogohondo mulene nawi. Anduane Homogo inanaga Ngode Datagaliwabe ibugua mana urunidagua birago hondowa handabe manga haga ka.
DEU 23:19 Tíni aria bu karu mbirame muni dano henego ngiadai bialu bolangua howa ngi nalalimu. Tínaga nenege karu baba tomo mbiraleru dano henego ngiadai bialu bolangua howa ngi nalalimu.
DEU 23:20 Wali agali maru tara karu baba dano harimiyagua nde bolangua howa ngi lolene karulape. Tí damene karuhondo ngi lolene nawiore. Tí dindi gahenge Anduane Homogo inanaga Ngode Datagaliwabehanda ngulebiragoria pu kamigola ibugua tí mo bayale helonaga tígua mana uruni baya hangu taluwa bialu haabo halimu.
DEU 23:21 Tígua Anduane Homogo inanaga Ngode Datagaliwabehondo ogoale mbira buleore lalu bi lowirimiyagua nde lowirimidago abaleore bulene nga. Anduane Homogo ibugua bi lowinigo embeda nahaga kagome tígua bule lalu lowirimigo embeda harimiyagua nde ibunaga deni tígua biako hene wulebira.
DEU 23:22 Tígua Anduane Homogohondo ogoale mbira bule lalu lowulene hame nalarimiyagua ogoni ko ndo karulapedagoni.
DEU 23:23 Anigo bi uruni tíni hameme bule lalu lowiniyagua nde abale bule larigo bulene nga.
DEU 23:24 Tí damene kagonaga pu mbira gerebi lini daga mabu ngadagua bolangua halu pirimiyagua nde gerebi lini dedago tíni hameme nolenedagua do nalu pilimu. Anigo tíni nuha do hanalu polenaga nado hanalimu.
DEU 23:25 Tí damenenaga widi mabuha bolangua halu pialu howa widi lini dedaru gime daramigo do nalimu. Anigo widi gandu lagane ayu tibu garayabi ngago yalu puwa gandu lolene nawi, lalu Mosesehanda lene.
DEU 24:1 Mosesehanda mana maru latago halu lalu, Agalime wali mbira dabu bu howa mani wali biagome mana lehe bialu kago hondowa agalinime ibu one handabe manga howa wahalu pu lolene manda biyagua nde agali ogoni ibugua beba mbirani gilibu mialu wali ogoni ibu one ndo lalu tagira pu laga.
DEU 24:2 Ani pu laragola wali ibu agali mende pu biruwa
DEU 24:3 agali mende ogoni ibuguabi mangabago waharo lalu beba ogonidagua dege gilibu mialu wahalu pu layaguabi wali biago ibu agali mende andaga wahalu polebira. Agali mende piyago o biago homayagua nde
DEU 24:4 ala agalini biago ibuni wali haru dai bialu dabu bulene henge nawi. Ala agalini biagome wali ogoni ibunaga deni koore bedagoni manda bialu lone haru dai bulene nawiore. Ala agalini biagome wali ogoni lone haru dai bialu dabu biyagua Anduane Homogohanda mana ogonidagua birago turu naheore holebira. Anigo ai tígua dindi bayale Anduane Homogo inanaga Ngode Datagaliwabe ibugua ngule kagoria anda pu howa mana koorene ko urunidagua nabilimu, lene.
DEU 24:5 Mosesehanda laabo halu lalu, Agali mbira ibu wali wene áyu dege dabu bu hayagua ogoni ibu ami wai bulenebi gabumanenaga biabe timbuni maru ngaru bilobi nahelabehe. Ibu wahalu ibuni andagaha mali mbira agima ibu onela bu miniru mo palia haga bialu helo helalimu.
DEU 24:6 Mbiralime tí baba dano mbira ho kagola ai ibugua mani dano hongoliya lowa manane mbirale mbira ala ngiaha lowa mo yarimiyagua nde ibunaga widi dambiaga ege to̱le̱ ngago namo yalimu. Widi dambiaga ege to̱le̱ biago tí mo yalu pirimiyagua ibunaga tomo manda manda bulene mbira nawi howa ibubi ibu one waneiginirubi garibilo holebirago namo yalimu.
DEU 24:7 Mbiralime ibuni damene Isaraele karu aria mbirago minu yania howa ibunaga garabaya biabe ale bialu haga helo helayaguabi nde ibugua agali mendenaga garabaya biabe ale bialu haga helonaga muni taguiyaguabi agali mana ko ogonidagua birago homelo bo wahalimu. Anidagua beramigola mana ko bulene ogonibi tí daluha mani nawilonaga ani bilimu.
DEU 24:8 Tínaga tinginini dere ko tara tara ngaru biyagua nde Libai hameigini aria loma binigo mo miaga karu tigua bidaba laradagua bialu halimu. Mana ogodagua bilimu lalu i̱na tihondo lamirudaruni baya hangu taluwa bialu halimu.
DEU 24:9 Bamba Iyibi dindi yu wahalu tagira ibirimingi Anduane Homogo inanaga Ngode Datagaliwabe ibugua wali Miriamahondo biyago mitangi budai bilimu.
DEU 24:10 Tínaga damene baba mbirale dano harimiru andaga puwa dano hongole lalu manane ogo ala ngialuha lowa tínime danoali andaga mbirale mo anda napilimu.
DEU 24:11 Ibuni handalu yalu ibuwa ngilo tagirani hondo halimu.
DEU 24:12 Agali danoali ogoni ibu yagibano howa ibuninaga aga tongo biaga mbiraore ngago mani dano hongoleore lalu manane ogoni ala ngialu hayagua ibunaga aga ogoni horo mende yu ho bolangua nahelalimu.
DEU 24:13 Mbiraga ibuni tongobu palelo alendo ni paliragola abale yalu daibu milimu. Anidagua beramigola agali danoali biago ibugua í̠hondo ka̱i̱ laragome Anduane Homogo inanaga Ngode Datagaliwabe ibugua tí mana bayale beremigo hondowa tíhondo turu holebirago ani bilimu.
DEU 24:14 Tínaga biabe biahaga karuni mbirale mbira nawi yagibano kago mo hondo nahalimu. Uruni Isaraelealiyaguabi dindi tarali tínaga tano ogoniha íbu hene heaguabi tihondo kagua nabilimu.
DEU 24:15 Biabe biahaga uruni tigua tínaga biabe horo mbira bia hayagonaga yolo karulape alendo ni napale howa milimu. Biabe biahaga ibu muni nawiore howa í̠na mibelo maliaho holebira. Tígua muni namirimiyagua nde uruni tigua Anduane Homogohondo ogodagua biya lalu dugu biragola Anduane Homogonaga deni tíha ko timbuni ngelo holeberemi.
DEU 24:16 Mbiralime ko biyagua ogoni pani ibu aba ai̱yalaha mo baede halu aba ai̱yala bolene nawi. Mana ogonidagua dege aba ai̱yalame ko biyagua waneiginiha mo baede halu pani waneigini bo waholene nawi. Ko biyago kago ibuniore bo wahalimu.
DEU 24:17 Mbirali dindi mendeha howa íbu hene karunagabi waneigini aba ai̱ya homene hono wahene karunagabi mbirale mbira tinaga giha yu karu gingila mule manda nabilimu. Wali dalo agalini homene bedaru tí baba dano mbira heneyagua dano ogoni mani hongole lalu manane tinaga aga biaga ngaru ngi lowa namo yalimu.
DEU 24:18 Tínibi nde Iyibi dindiha garabaya biabe ale bialu hemiria Anduane Homogo inanaga Ngode Datagaliwabe ibunime tí golope halu haru tagira ibiyago manda bilimu. Anigo áyu tí ko ogonibiore bulemini lalu i̱na mana ogoni tíhondo langero.
DEU 24:19 Tígua widi mabu ngamiruha widi gandu lalu howa maru ibira hararu lone ilu dai nabilimu. Ira olibe linibi pu mbira mini gerebi linibi boga bidagola halu mbira pigane bogabi dedaru do yu pialu halu mende lone boga nabiyane delo waharimigo do dai nabilimu. Widi gandulo mogo bialu kamiria ibira hararubi ira olibe gerebiru lini delo helarimirubi uruni bibahende wali agali dindi taraha howa íbu hene karubi waneigini aba ai̱yala homalu hono wahene biru ngarubi wali dalo agalini homene bedarubi ti mo nelo wahalimu. Anidagua birimiyagua Anduane Homogo inanaga Ngode Datagaliwabe ibugua tí biamogo bialu tígua bibahende beremigo damene bayale dege holebira.
DEU 24:22 Tínibi Iyibi dindini abale ko darabi urunibi dege howa garabaya biabe ale bialu harimigo embeda holigonaga i̱na mana ogoni bialu halimulo langero.
DEU 25:1 Mbirungi Isaraeleali kirali godime libunaga genda mo tiga bilo godi lole pialu kabiria godi dabaga karume daba handalu karia mendealigo ko biya larago mendealigoha ko nawidane hondolebira.
DEU 25:2 Ani buwa godi hale haga kagome ko biya larago ibu tibume badaba lalu layagua agali ko biyago ibu dagiani handa dindi ho pale lowa ko biyadagonaga karulape tibume badaba lolene nga.
DEU 25:3 Tigua tibume pira maria (40) hangu bolene nga. Wali agali maru bu karunaga deni taga holigo bo bolangua halu nabalimu.
DEU 25:4 Widi gandulo winirunaga lini hondo ibira ibira bilo nogo bulumaga geme hengedama pelo haru howa bulumaganaga ne hangane hubua bulene nawi.
DEU 25:5 Mosesehanda laabo halu lalu, Libu hamenela dindi mbiraoreha mandagi kabiria mendeali ibu igini mbira nahe kaore ogoni ibu homayagua ibu one dalo bedago ibu agali mende tanabi karu polene nawi. Homayadago ibu hameneme dabu bulene nga.
DEU 25:6 Ani dabu bu kagola wali dalo biago ibugua igiri mbira taba hanayagua nde igiri ogoni agali homayagonaga iginida lolebira. Anidagua biragome ina Isaraele hameigini kamaru aria mbirago ereba nahelo ani bilimu.
DEU 25:7 Ai agali homaragonaga hameneoreme ibu hamene one dalo bedago ibuni dabu bulene manga hayagua nde wali dalo ogoni ibu godi hamani agali haguane karu karia polene nga. Ani puwa wali biagome lalu, I̱ kianeme mana lowini ngadagua talia nabi ibu hamene homayago ina Isaraele hameigini kama aria ereba nahelonaga i̱na igiri mbira taba hana holiya biraba nalaya, lolene nga.
DEU 25:8 Anidagua laragola agali haguane tanoha godi hale hagadarume homene hameneme one wali manga hagadago ibabe lowa ibuni heba bi lo tiga bulene nga. Tigua handalu karia wali dalo ogoni dabu bulene hame nale dege heagua
DEU 25:9 wali dalo biago ibuni agali haguane biaru tanoni bu kagoria tagira ibuwa ibu kianenaga ge su mende golalu ibunaga denguiha hamiaga tolo bahalu howa ogodagua lolebira. Mbirali ibu hamene henegoria ho aribia halu dewa palia dame bilo hame nalaga kagohondo mana ogonidagua biaga nga, lolebira.
DEU 25:10 Mani howa Isaraele wali agali maru karu bibahendeme agali ogoni ibu waneigini karu hondowa lalu ti ge su golene waneigini ka lene holebira, lalu lene.
DEU 25:11 Mosese ibugua laabo halu lalu, Agali kirali gungu bialu kabiria agali mendego ibu oneme ibu agalini pele mialu mendegonaga pindu minu duguayagua
DEU 25:12 wali ogoni biyadago tígua dara holene nawi. Ibunaga gi ogoni pugu waholene nga.
DEU 25:13 Wali agali marume tinaga mbirale mbira ngaru muni mule yalu ibiragola tígua genda magi handalu ke̱ howa mo hondo nahalimu.
DEU 25:15 Tí mana tigabi hangu bulene ngadagua bialu harimiyagua nde dindi mbira Anduane Homogo inanaga Ngode Datagaliwabe ibugua tí ngulebero lo wiyagoria pu howa luore halu hodagua holeberemi.
DEU 25:16 Ai Anduane Homogo ibugua mbirale ke̱ haga ogoni alego turu nahe handabe manga haga ka.
DEU 25:17 Mosese ibugua laabo halu lalu, Tí Iyibi dindi yu wahalu tagira ibalu ibirimingi Amalegeali hearume tíhondo mana lehe biyaru manda bilimu.
DEU 25:18 Ogoningi tigua Ngode Datagaliwabehondo gi nahe howa tí ha̱lalu gehi bialu hongo nahe hemingi erembiraha talima ibalu tí baba wai biyagoni. Ani buwa maru hongo nahe wene mani ibalu hearuni bo wahai hayagoni.
DEU 25:19 Anidagua biyagonaga mani tínaga dindi Anduane Homogo inanaga Ngode Datagaliwabe ibugua ngulebero layagoria pu howa tano uruni wai paberume hagirabu yaanda hai ho ngelalimu. Ani ngelai howa tínaga waitigi kaware bu karume gialanda halu ibuwa babe nahe howa tígua Amalegeali uruni bibahendeore bo wahai halimu. Bo wahai haramigola mani holebirarume Amalegeali abogo ogoria hene lalu bi te nalelo ani bilimu. I̱na bi o larogo embedaore nahe aniore bilimu, lalu Mosesehanda lene.
DEU 26:1 Mosesehanda laabo halu lalu, Mani Anduane Homogo inanaga Ngode Datagaliwabe ibugua dindi ngulebero lalu lowini biagoria pu howa
DEU 26:2 tígua dindi ogoha tomo pigane hengene beremiru aria nu mbira dege dege bu hanalimu. Ani honowa Anduane Homogo mitangi bialu lotu lole dindi mbira ibunime dabo wiyagoha hanalu pilimu.
DEU 26:3 Hanalu puwa mbirali loma binigo mo miaga ogoniha kagohondo tí hangu hangume mialu howa lalu, Anduane Homogo i̱naga Ngode Datagaliwabe ibugua bulebero lalu bi lowinigo heneneore layada laro. Ibugua bamba inanaga mamaliruhondo laminidagua bialu i̱ dindi ngule lene biagoha haru íbu helayadane manda bidogoni, lalu loleberemi.
DEU 26:4 Ani laramigola loma binigo mo miaga kagome tomoru nuha bu hono kamigo yamuwa Anduane Homogo inanaga Ngode Datagaliwabe ibunaga lomabu delaga dabu kaware kagoria mo pagaho ngelolebira.
DEU 26:5 Ani biragola tígua nde Anduane Homogonaga wanakuini howa bi ogodagua lalimu, I̱naga mamali ibu Aramiali pu howa dindi yu wahalu ibaga ibaga bialu haabo haga hene. Ani haabo haga henego mani ibugua ibu hameiginiru haru halu Iyibi dindiha hama pene. Pigane Iyibi dindi pialu howa ti daga emene hangu penego mani howa ti dewaore halu hodame buwa hongoheore hene.
DEU 26:6 Ani pu heagola Iyibi dindi agali haguane hearume ina mo ko halu iname tinaga garabaya biabe ale bialu holoma̱ya helaya.
DEU 26:7 Ani bialu howa iname Anduane Homogo ina mamalirunaga Ngode Datagaliwabe ibugua ina pele ngilo olarima. Iname ani olarimagola ibugua hale howa ina biabe ndelaheore bialu genda tandagabi yu hemaria de hendene.
DEU 26:8 Ani hondowa ibugua ina Iyibi dindiha howa haru tagira polenaga biabe timbuni hongoheore bigi biya. Ibugua agalime nabiaganebi nahendene alebi tara tara dewaore bialu ko tandagabi tara tara Iyibi wali agali hearuha ibilaga biya.
DEU 26:9 Ani buwa ibugua ina haru ibalu dindi bayale benebere ogoha holoma̱ya ngiyagoni.
DEU 26:10 Anigo Anduane Homogo ibugua urunidagua biyagonaga i̱na tomo pigane dindi ibunime ngiyagoria hangarugo bu yalu eberogoni, lalimu. Bi ani lai howa tígua tomo bu hanarimiruni Anduane Homogonaga wanakuihayagi ngelowa dindi ogoriani ibu mitangi bialu lotu lalu halimu.
DEU 26:11 Ani bialu tígua Anduane Homogohanda tíhondobi tí waneiginiruhondobi mbirale bibahende bayale damene ngiyarunaga ka̱i̱ lalimu. Ani lalu howa Libai hameiginirubi wali agali dindi taraha howa ibini kamirubi tí heba turu hamaga halimu.
DEU 26:12 Ani bialu mali tebira haga biragola bibahendengi tí mabuha tomo hengedamiru pi halu tale bilimu. Tale buwa pini damenego bibahende Libai hameigini karubi wali agali dindi tara howa tí baba íbu hene karubi waneigini aba ai̱ya homene hono wahene karubi wali dalo agalini homene bedarubi talebu migi bilimu. Tígua ogonidagua bialu harimiyagua wali agali uruni ti tomo nalu holene karulape wulebira. Tígua biabe urunidagua biai howa
DEU 26:13 Anduane Homogohondo bi ogodagua lalimu. Mbirale i̱na í̠hondo nguliya hame lariruni bibahende tale biai haru. Ai i̱ andagaha mbirale yu wahene mbira nawiore kogoni. Libai hameigini karuhondobi wali agali dindi tara taraha howa ina baba íbu hene karubi waneigini ai̱ya aba homene hono wahene karubi wali dalo agalini homene bedarubi ti bibahendehondo tale bialu miai haru. Ai í̠na bi larigo hale halu i̱naga mbirale winiru pi halu tale biai harudagoni. Í̠na i̱hondo bibe lariruni aria i̱na mbira embedahabi mo wahalu waho habi mbira nabiore.
DEU 26:14 Homa dugu andaha dugu bialu howa í̠naga tomo uruni aria mbira nane haru. I̱ni ko dodohe hewangi tomo uruni aria mbira i̱ andaga howa mo yalu tagira nape. Maru mo yalu puwa homene dinini hearuhondo lomabu nami. Ai i̱naga Anduane Homogo-o í̠na tomo uruni tale bialu pi halu mulene ogodagua mibe lalu langirigodagua i̱na biaiore harugoni.
DEU 26:15 Ai í̠ni dalu dahuliya andaga baya taraore ngegoria howa ina Isaraele wali agali kamaruha de handadali howa handalu ina mo bayale habe. Ani bialu inanaga dindi bayale benebere ogoni í̠nime bamba inanaga mamaliruhondo ngule lalu lowiridagua inahondo ngirigobi mo bayale bia habe, lalimu, lalu Mosesehanda lene.
DEU 26:16 Mosesehanda la dege bialu lalu, Áyu ogoni Anduane Homogo inanaga Ngode Datagaliwabe ibugua lalu, I̱naga bi manaore baya hangu talialu halimu, laya. Ani layadagua tígua bi mana uruni gubaliniore ho howa mitangi biaabo halu bialu halimu.
DEU 26:17 Áyu Anduane Homogo ibu tínaga Ngode Datagaliwabe kago larimigoni. Iname ibunaga bi mana hale howa bibahende bilimu layaru talialu biai holeberemaore lalu bi lo wirimigoni.
DEU 26:18 Ani larimigome áyu Anduane Homogohanda tí ibunaga wali agaliore halimulo yamulebero lalu abale bi lowinigo tagira pelo tí yamiyagoni. Ai ibunaga mana ngaru bibahendeore talialu biai halimu laya.
DEU 26:19 Ani lowa ibugua hameigini tara tara dindi tarani helo wabiniru emene dege lowa tí dewaore halimulo mo dewa holebira. Ani heledagola tígua mana bayale tigabi bialu kamiru hondowa wali agali maru bu karume turu halu Anduane Homogonaga mini yaraga helonaga mo manda bia holeberemi. Ani bialu tíni nde abale bulebero lalu lo wiyadagua heneneore Anduane Homogo ibuninaga dameneore tí holeberemi, lalu Mosesehanda lene.
DEU 27:1 Mosese ibugua agali haguane hearu heba howa Isaraele wali agalihondo lamialu lalu, Bi mana áyu i̱na tíhondo langerogo baya hangu talialu bialu halimu.
DEU 27:2 Tí Iba Yodana domalu dindi Anduane Homogo inanaga Ngode Datagaliwabehanda ngiragohayagi ubaede halu pu howa horo ogoningi dege tígua ege to̱le̱ timbuni ngaru duguwa timeni wabu dambi halimu.
DEU 27:3 Ani buwa bi mana áyu langeroruni bibahende ege to̱le̱ ogoriani gilibu wiai halimu. Anduane Homogo ina mamalirunaga Ngode Datagaliwabehanda dindi bayale benebere ogoni inahondo nguleore lalu bi lowinigoria anda pu howa
DEU 27:4 Iba Yodana doma edeyagi ege to̱le̱ uruni Hari Ebala kagoriani hangalimu. Ani hongowa áyu bilimu lalu langerodagua timenime wabu dambi halimu.
DEU 27:5 Ani buwa lomabu delaga dabu mbira wabu helole tígua ege to̱le̱ maru duguwa ege to̱le̱ uruni mbirale aeaneme wabini ngagome bo tiga nabi duguarimigo ogonibioreme dabu wabu helalimu.
DEU 27:6 Ani bulene ngago irane Anduane Homogo inanaga Ngode Datagaliwabenaga lomabu delaga dabu bialu ege to̱le̱ poda nabini ngarume wabulene nga. Ani wabu helowa dabu ogoriani dege loma irani dai helonaga delalimu.
DEU 27:7 Anduane Homogola ho gimbu bulene lomarubi bu delaga bialu halimu. Ani bialu nogo loma bo delaramigonaga mbiriniru nalu howa Anduane Homogo inanaga Ngode Datagaliwabenaga deni turu timbuni ho halimu.
DEU 27:8 Ani bialu ege to̱le̱ timenime wabu dambi howa hangarimigoria Ngode Datagaliwabenaga bi mana baya hangu wále wali agalime handabehe gilibu wiai halimu, lene.
DEU 27:9 Ani lowa Mosese ibu Libai hameigini loma binigo mo miaga bu hearu heba mandagi howa ibugua Isaraele wali agali hearu lamialu lalu, Isaraele wali agaliru-o i̱na bi ogo tí langerogo bayuwa hale hai halimu. Áyu ogoni tí bibahende Anduane Homogo inanaga Ngode Datagaliwabenaga wali agaliore ho kamigoni.
DEU 27:10 Anigo tígua ibunaga bi mana i̱na áyu latagi harogo bayuwa hale howa talialu bialu halimu, lene.
DEU 27:11 Mosesehanda Isaraele wali agalihondo bi lone lamialu lalu,
DEU 27:12 Mani tí Iba Yodana domaede halu pu howa Anduane Homogohanda tí mo bayale helonaga bi larago mo yule lowa wali agali tíni hameigini aria karu Hari Gerisimi kagoria irigiho halimu. Hameigini uruni Simionobi Libaibi Yudabi Isagabi Yosebebi Beniyaminibi uruni aria tí pu halimu.
DEU 27:13 Ani bialu Anduane Homogohanda mo ko holenaga bi larago hale holene harangi wali agali hameigini maru karu Hari Ebala kagoha irigi holene nga. Hameigini Lubenebi Gadabi Asebi Sebulunubi Danabi Nabadalibi uruni aria tí pu halimu.
DEU 27:14 Ani pu kagola Libai hameigini karume bi hongo howa latagi halu lolene ngago ogo.
DEU 27:15 Tigua lalu, Mbirale dama mitangi bialu bi pupu wulenaga ege to̱le̱mebi iramebi aeanemebi wabu ngago hondowa Anduane Homogo ibugua mana ogoni hame naleore kagoni. Anigo mbiralime uruni alehondo ohowa bi pupu wialu heagua nde Ngode Datagaliwabenaga mo ko holene ogoni ibuha wulebira, lolebira. Ani laragola wali agali bibahendeme ladai bialu lalu, Heneneore Ngode Datagaliwabehanda aniore bilo, lolebira.
DEU 27:16 Mbiralime ibu aba ai̱yalanaga mini mo ko halu mege bialu heagua nde Ngode Datagaliwabenaga mo ko holene ogoni ibuha wulebira, lolebira. Ani laragola wali agali bibahendeme ladai bialu lalu, Heneneore Ngode Datagaliwabehanda aniore bilo, lolebira.
DEU 27:17 Agali mbirame dindi tu ege to̱le̱me winigo dugu yaamu howa dindi ibu hayagua nde Ngode Datagaliwabenaga mo ko holene ogoni ibuha wulebira, lolebira. Ani laragola wali agali bibahendeme ladai bialu lalu, Heneneore Ngode Datagaliwabehanda aniore bilo, lolebira.
DEU 27:18 Mbiralime wali agali de kohe mbira pialu karia hariga piagagoha ndo mendeha pu tara helo mo hondo hayagua nde Ngode Datagaliwabenaga mo ko holene ogoni ibuha wulebira, lolebira. Ani laragola wali agali bibahendeme ladai bialu lalu, Heneneore Ngode Datagaliwabehanda aniore bilo, lolebira.
DEU 27:19 Mbiralime wali agali dindi taraha howa íbu hene karuhondobi waneigini ai̱ya abala homene karuhondobi agalini homene wali dalo bedaruhondobi biamogo bulene ngadagua nabi tihondo mana ko ngago bialu heagua nde Ngode Datagaliwabenaga mo ko holene ogoni ibuha wulebira, lolebira. Ani laragola wali agali bibahendeme ladai bialu lalu, Heneneore Ngode Datagaliwabehanda aniore bilo, lolebira.
DEU 27:20 Mbiralime ibu aba one kayu biyagua ibu aba mo tagaore hayagonaga nde Ngode Datagaliwabenaga mo ko holene ogoni ibuha wulebira, lolebira. Ani laragola wali agali bibahendeme ladai bialu lalu, Heneneore Ngode Datagaliwabehanda aniore bilo, lolebira.
DEU 27:21 Mbiralime wali agalila hagadagua nogo biangoru kayu biyagua nde Ngode Datagaliwabenaga mo ko holene ogoni ibuha wulebira, lolebira. Ani laragola wali agali bibahendeme ladai bialu lalu, Heneneore Ngode Datagaliwabehanda aniore bilo, lolebira.
DEU 27:22 Mbiralime ibu mbalinila kayu biyagua nde Ngode Datagaliwabenaga mo ko holene ogoni ibuha wulebira, lolebira. Ani laragola wali agali bibahendeme ladai bialu lalu, Heneneore Ngode Datagaliwabehanda aniore bilo, lolebira.
DEU 27:23 Agali mbirame ibu imane bedago kayu biyagua nde Ngode Datagaliwabenaga mo ko holene ogoni ibuha wulebira, lolebira. Ani laragola wali agali bibahendeme ladai bialu lalu, Heneneore Ngode Datagaliwabehanda aniore bilo, lolebira.
DEU 27:24 Mbiralime ohowa wali agali mende kago homelo bo wahayagua nde Ngode Datagaliwabenaga mo ko holene ogoni ibuha wulebira, lolebira. Ani laragola wali agali bibahendeme ladai bialu lalu, Heneneore Ngode Datagaliwabehanda aniore bilo, lolebira.
DEU 27:25 Mbiralime wali agali ko mbira nabi kago homelo bo waholenaga ndelalu muni hana hayagua Ngode Datagaliwabenaga mo ko holene ogoni ibuha wulebira, lolebira. Ani laragola wali agali bibahendeme ladai bialu lalu, Heneneore Ngode Datagaliwabehanda aniore bilo, lolebira.
DEU 27:26 Wali agali mbirame Ngode Datagaliwabe kagonaga bi mana lo ngago mo wahayagua nde Ngode Datagaliwabenaga mo ko holene ogoni ibuha wulebira, lolebira. Ani laragola wali agali bibahendeme ladai bialu lalu, Heneneore Ngode Datagaliwabehanda aniore bilo, lolebira. Ani lolene nga lalu Mosese ibugua Isaraele wali agalihondo lamini.
DEU 28:1 Mosesehanda laabo halu lalu, Tígua Anduane Homogo inanaga Ngode Datagaliwabe kagonaga bi mana i̱na tíhondo áyu o langerogo talialu bialu harimiyagua nde ibugua tí mini leneore mbira helalu wali agali dindi tara tarani bu karu bibahende bolangua hai hene halimulo helolebira.
DEU 28:2 Anduane Homogo inanaga Ngode Datagaliwabe kagonaga bi mana lo ngago hale howa bialu haabo harimiyagua nde ibugua tíhondo bayale holene ngulebirago urubi nga.
DEU 28:3 Anduane Homogohanda tínaga tanobi mabu ngamirubi mo bayale hai holebira.
DEU 28:4 Anduane Homogohanda waneigini dewaore tíhondo ngialu tínaga mabuha tomo dewabi mo anda halu nogo bulumaga sibiru dewaore ngialu bulebira.
DEU 28:5 Anduane Homogohanda tínaga widi mabu ngamirubi mo bayale halu tomo nolene ale widi urunime balawa hiraramilirubi mo bayale hai holebira.
DEU 28:6 Anduane Homogohanda tínaga biabe beramigo damene bibahende bayale helo mo bayale hai holebira.
DEU 28:7 Anduane Homogo ibugua tínaga waitigiru baba wai beramingi tí wayali halimulo biamogo bulebira. Waitigiru tigua wai bule hariga mbiraoreha ibulebiragoyu ti ibida pole hariga dewa ngaruha pugupugu bulebira.
DEU 28:8 Anduane Homogo inanaga Ngode Datagaliwabehanda tínaga biabe bialu kamigo damene bibahende mo bayale hai halu tínaga mabuha widi hengedamigobi bibahende bayale mo anda hai halu tomo bu wiaga anda bu heledemigoha wu to̱latagi hai holebira. Ani bialu dindi gahenge ngulebiragoha pu kamigola ibugua tí biamogo biaabo holebira.
DEU 28:9 Anduane Homogo inanaga Ngode Datagaliwabehanda bi larago hale halu ibugua bilimu lalu langiyago tígua bialu harimiyagua nde ibugua, Tí i̱naga wali agaliore helolebero, lalu bamba lo wiyadagua helolebira.
DEU 28:10 Ani heledagola wali agali dindi tara tara ngaruha bu karume de hondowa Anduane Homogo ibunime tí ibunaga wali agali helo dabo helenedalo manda buwa tíhondo gi holebira.
DEU 28:11 Ani biragola Anduane Homogohanda dindi bamba inanaga mamaliruhondo ngulebero lo wiyadagua tíhondo ngiragola tí dindi ogoniha pu kamigola ibugua waneiginibi nogo bulumagarubi dewaore ngialu mabuha tomobi mo dewa holebira.
DEU 28:12 Anduane Homogo ibuni iba dalu ibilaga anduaneore kagome iba dalu ibilolene horo ngangiore ibilaga bulebira. Ani bialu tígua biabe bialu holeberemigo mo bayale hai helolebira. Anidagua biragola tínaga mbirale ngamiru wali agali tara bu karume dano helo muleberemigoyu mbirale tinaga ngago tígua dano naholeberemi.
DEU 28:13 Anduane Homogo inanaga Ngode Datagaliwabe ibugua wali agali maru dindi tarali karume tí haru helo ndo tígua dindi tarali karu haru haga haguane halimulo dabo helolebira. Anduane Homogonaga bi mana áyu o langerogo talialu bialu harimiyagua nde tíha mbirale mbira tubagi nahe howa mbirale bu payapayabu ngelo hai holeberemi.
DEU 28:14 Anigo tígua ibunaga bi mana ngago mo wahalu pu nabi baya hangu talialu biai halimu. Tígua mbirale dama mitangi bialu gime wabini ngaruhondo bi pupu nawilimu. Uruni nabilimuore, lene.
DEU 28:15 Mosesehanda laabo halu lalu, Tígua Anduane Homogo inanaga Ngode Datagaliwabenaga bi lo ngaru i̱na áyu tíhondo o langerogo hale howa talialu biaabo naharimiyagua nde mo ko holene tíha anda ibulebirago damene áyu langero.
DEU 28:16 Anduane Homogohanda tínaga tano ngamiru mo ko halu tí mabuha tomo hengedemirubi bibahende mo ko hai holebira.
DEU 28:17 Anduane Homogohanda tínaga widi mabu ngamirubi tomo nolene ale widi urunime balawa hiraramilirubi bibahende mo ko hai holebira.
DEU 28:18 Anduane Homogohanda tí mo ko halu waneigini mbiraore hangu ngigi bulebira. Tínaga mabu ngamiru ko hai halu tomo dewa anda naholebira. Nogo sibi bulumagaru ko halu dewa naholebira.
DEU 28:19 Anduane Homogohanda tígua mbirale bibahende beremiru damene mo ko hai holebira.
DEU 28:20 Tígua Anduane Homogohondo erembira mialu mana ko ngaru bialu harimiyagua nde ibugua tíha ko tara tara ibilaga bulebira. Ibugua tí mo luluya halu tígua beremigo damene bibahende mo libilaba lalu mo ko helolebira. Ani biragome tí mo koore hai holebira.
DEU 28:21 Dindi ibugua ngini áyu pole kamigoria pu kamigola warago ko tara tara ngaru tíha ibilaga bialu tí bo biba haiore holebira.
DEU 28:22 Ani bialu Anduane Homogohanda tí warago ko tara tara wai haga ngagome abale tínaga tinginini tohatagi helalu poboyogo bilalu bulebira. Ani buwa ibugua ni dedago mo poboyogo timbuniore bilalu puyabu poboyogobi timbuni ibilalu mabuha tomo hengedemiru bibahende gabu hai holebira. Mbirale mo ko holene uruni tí baba haho ngamine dege tí bibahende homai holeberemi.
DEU 28:23 Tínaga dindiha iba dalu naibi ngane dege dindi ngago giambe halu hongohe polabe nahe to̱le̱ ale wulebira.
DEU 28:24 Anduane Homogohanda iba dalu ibilagadagua puyabu hongohe ibila aribia holebiragome tí dindiha be abalu heba iba mubi puloyu íbu ngelalu tí bibahende mo ko hai holebira.
DEU 28:25 Ani bialu Anduane Homogo ibugua waitigi ibilaragome tí bo wahai holebira. Tígua wai bule howa wai hanalu hariga mbiraoreha mandagi puwa mani waitigi hondowa tí ibida pialu hariga dewa ngaruha pugupugu buleberemi. Wali agali dindi bibahendeha karume tí anidagua mo ko harago de hondowa ti mogo timbuni lo holebira.
DEU 28:26 Tí homaramigola tínaga tingini ega bodo hariawe bedarumebi nogo biango gabua bu karumebi nalu holebira. Ani nalu kagola talu pelolene mbirali naholebira.
DEU 28:27 Ani bialu Anduane Homogohanda Iyibi wali agaliha biyadagua tínaga tinginini moge timbuni bilolebira. Tínaga tinginini dere durubi timbuni tagira ibilaragola duru kilau lalu holeberemi. Anidagua bialu kamigola mo dabi holene hariga mbira ngane handa walia naholeberemi.
DEU 28:28 Anduane Homogohanda tínaga miniha mo talola halu tínaga de bo ndibu lalu biragola tí luluyu ibagabu holeberemi.
DEU 28:29 Wá kangi tí de handabe nahe howa luluyu ibaga bialu wali agali de koheme hariga taya biagadagua taya bialu howa hariga handa walia naholeberemi. Ani howa tígua mbirale beremiru damene bibahende bayale tigabi bulene ngadagua nabuleberemiore. Waitigi bu karume tí bope haabo halu tínaga mbirale ngamiru mo page bigi biragola tí biamogo bialu mo wulene mbirali naholebira.
DEU 28:30 Tígua wandari mbira igiri mbirago ibu dabu bilonaga dabo berelarimiyagua agali mende kago ibu dabu bia aribia holebira. Tínaga anda gahenge bia buleberemigoyu tíni anda ogoniha paluha nabuleberemi. Tígua pu mbira lini daga mini gerebi hanga hongoleberemigoyu lini do na nabuleberemi.
DEU 28:31 Waitigirume ibalu tínaga nogo bulumaga hinidemiru tíni deni bo podalu holebiragoyu ogoninaga mbirini budiniru mbira nanoleberemi. Tínaga nogo dongi helo kamirubi tíni hendedemiore haru polebirago mani haru dai nabuleberami. Nogo sibi hinu kamirubi page haru puwa tínaga waitigiruhondo mulebira. Ani miragola tí biamogo bialu haru dai bulene mbirali naholebira.
DEU 28:32 Tíni de handayaho kamiore dege tínaga waneigini bu karu agali dindi tara tara ngaruha karunaga garabaya biabe ale bialu helo minu yalu polebira. Ani minu yalu poragola lone dai birabe hondole lowa tígua horo bibahendengi hariga piyagoha de dege handalu bu wiaabo holeberemi.
DEU 28:33 Agali maru tí manda nabini dindi tara mbira ngagoha howa ibalu tí mabuha tomo erekuibi hangalu hene hengedemiru ti bu hanalu polebira. Horo bibahendengi anidagua biaabo haragola tí tandaga haabo holeberemi.
DEU 28:34 Tíha ko uruni anda ibalu haabo kagola de hondowa tígua tínaga miniha luluyu halu mini naibi ona holeberemi.
DEU 28:35 Ani bialu kamigola Anduane Homogohanda tínaga geni dere timbuni bilalu tínaga tingini bibahendeha moge tuguda tagitagi biame heledagola mo dabi holene mbira ngaria handa walia naholeberemiore.
DEU 28:36 Ani bialu Anduane Homogohanda tíbi tínaga kinibi dindi tara tíguabi tínaga mamalirumebi handa mandabi nabini ngagoha haru halu polebira. Ani haru halu pu heledagola tígua dindi ogoniha howa dama mitangi bialu mbirale iramebi ege to̱le̱mebi wabu wini ngaruhondo bi pupu wialu holeberemi.
DEU 28:37 Anduane Homogohanda tí dindi tara taraha bo taliatogo laragola wali agali bu karume mo ko holene taraore tíha ibilarago de hondowa ti mogolo holebira. Ani mogolowa tigua tí mege bialu hondo oba halu holebira.
DEU 28:38 Tínaga mabuha tomo dewaore hangaramigola pagaya aleme nalu no ereba hai helolebira. Ani biragola tomo emene dege bu nalu holeberemi.
DEU 28:39 Pu mbira lini daga mini gerebi baya hangu hongowa handayaho ha holeberemigoyu timamu bedarume gerebi irane uruni nai haragola tígua lini uruni dedaria do pingidalu waini iba wabialu nalu ha nabuleberemi.
DEU 28:40 Dindi ogoniha ira olibe dewa anda haame holebiragoyu lini darangi boga nabidaore abale dogolope haragola tígua olibe lini ibaneme weli wabibe nahe holeberemi.
DEU 28:41 Tínaga waneiginiru ha holebiragoyu tíni heba mandagi haabo naholeberemi. Waitigi karume ibalu waneigini uruni ti dindiha garabaya bu yalu piai holebira.
DEU 28:42 Tínaga mabuha ira lini dagane ale karubi mabuha tomo andaho karubi pagaya ale dewame naiore holebira.
DEU 28:43 Wali agali dindi tara taraha howa tínaga dindiha íbu holebiraru ti hongoheore halu tínaga hongo ibira holebira.
DEU 28:44 Tinaga muniru dewawi hongohe kagola tígua agali uruninaga mbirale ngaru dano hole mo yuleberemigoyu tigua tí baba dano naholebira. Ani howa tigua tí mo dindiha howa bope halu tí agali uruni andaneha holeberemi.
DEU 28:45 Genda tandaga uruni tíha ibaabo haragola tí damene lenego bibahende ereba hai helolebira. Anidagua bulubadago irane tígua Anduane Homogo inanaga Ngode Datagaliwabehanda bi layago mo wahalu ibunaga bi mana tíhondo langiyago bibahende talialu bia nabi mo wahaabo harimigome genda tandaga uruni tíha tagira ibulebira.
DEU 28:46 Genda tandaga uruni tíhabi tínaga waneigini aguaneneruhabi wiaabobo bu wiragola Ngode Datagaliwabe ibunime tíhondo keba howa miniha tandaga ho hayada lalu wali agali marume de hondolebira.
DEU 28:47 Anduane Homogo inanaga Ngode Datagaliwabe ibugua tíhondo mbirale bayale damene bibahende ngiai hayagoyu tígua uruni mo yu howa turu halu bu miniha dungulo howa ibunaga biabe bialu ha nabi holeberemi.
DEU 28:48 Anigo Anduane Homogohanda waitigi tí dindiha ibilaragola tígua waitigi uruninaga andaneha howa biabe bia halu holeberemi. Ani bialu howa tí tomo garibilo haabo halu iba noaho halubi aga bulene mbira nawiore halubi dabudabu tara tarabi mbira nawiore bibahende burupale dege hai holeberemi. Ani kamigola tínaga waitigirume tí bo hengedape halu bo wahai holebira.
DEU 28:49 Ani biragola Anduane Homogohanda hameigini tara mbira tí uruninaga bi hale nahenebi manda nabinibi dindi kaundiaha kago haru halu ibulebira. Uruni tigua abaleore aube tobane ibuwa ega bodo hariaweme ega emene bedago minule yulope hagadagua bialu ibulebira.
DEU 28:50 Ani ibuwa tigua tínaga wali agali waneigini galioreyaguabi wali agali waheoreyaguabi dara howa biamogo nabi mo tandaga dege holebira.
DEU 28:51 Tínaga nogo bulumaga sibi hinidemirubi bibahende tigua bo nai halu mabuha tomo hengedemirubi widi hengedemirubi waini iba wabu ngemirubi olibe lini weli hambu ngemirubi naiore holebira. Ani nai haragola tíni tomo nolene mbira nawioredagola tomo noa halu homai holeberemi.
DEU 28:52 Tínaga dindi Anduane Homogo inanaga Ngode Datagaliwabehanda ngulebiragoha tano wulebiraru bibahendeha wai bialu bo gialo wahai holebira. Wai pabe hongoheore tíni ha do holenaga ege to̱le̱me bu mabu bidemiru bibahende bo gialapaya biai holebira.
DEU 28:53 Waitigirume ibalu tínaga tano ngamiruha ho hagirabu yaanda ho kagola tíni tomo nolene nawioredagola tínaga waneigini Anduane Homogo inanaga Ngode Datagaliwabehanda ngiyaru bo nalu holeberemi.
DEU 28:54 Horo ogoningi agali mini lene bayale bu karumebi tomo mbirale nolene nawioredagola tininaga waneiginiru balu nolebira. Ani bo nalu howa maru tini hamene karubi ti one bedarubi tini waneigini maru bedarubi mbira nelo podo mia nabulebira.
DEU 28:56 Ani bialu wali homogo mini lene muni dewawi dagiani berelowa leberani iraho yu ibaga biaga bedaru tiguabi ani dege bulebira. Waitigirume tano ho hagirabu yaandaho kangi wali urunibi bedarume tini waneigini gali taba hanararu horo ogoningi dege bira do howa gali nu heba nalu birulebira. Ani nalu biruwa ti agalini tini gubalini haga kagobi ibu waneigini maru bu karubi ti mbira nelo podo mia nabulebira.
DEU 28:58 Tígua Ngode Datagaliwabenaga bi mana mbuga ogoha ngago baya hangu talialu bia nabi harimiyaguabi Anduane Homogo inanaga Ngode Datagaliwabenaga mini timbuni gibi baya buruguleore ngago mitangi bialu mo yaraga naharimiyaguabi nde
DEU 28:59 ibugua warago ko taraore ereba naholene mbira tínihabi tínaga waneigini aguanene mani holebiraruhabi ibilolebira.
DEU 28:60 Warago ko tara tara tí Iyibi dindini hemiria ibiyane de handarimigobi dege tíha ibilaragola tí dabi naholeberemi.
DEU 28:61 Ani bialu warago ko tara tara uruni mini ogoale lalu Ngode Datagaliwabenaga bi mana mbuga ogoha nagilibuwi. Anigo warago ko taraore uruni tíha ibilaragola tí dabi nahe homaiore holeberemi.
DEU 28:62 Tí dewaore harini yakundi bu karubi heneyaguabi bibahende homai halu tí aria mbira mbira hangu yu waholebira. Anidagua bulebirago irane tígua Anduane Homogo inanaga Ngode Datagaliwabenaga bi mana lowini ngago mo waharimigome ani bulebira.
DEU 28:63 Bamba piganengi howa Anduane Homogohanda tíore gubalini timbuni ho howa tí dewaore halimulo mo dame bia hole hame timbuni layadagua ibugua tí ereba hai halimulobi bo biba hai hole hame timbuni lolebira. Dindi mbira ibugua ngule layagoria hole anda pu kamigola ibugua tí bo taliatagi holebira.
DEU 28:64 Anduane Homogohanda tí dindi tara tara ngaruha pu haame halimulo purogo lelolebira. Dindi uruniha pu howa tígua dama mitangi bialu mbirale iramebi ege to̱le̱mebi wabu wini ngaruhondo bi pupu wialu holeberemi. Bamba tínimebi tínaga mamalirumebi mbirale uruni alegohondo bi pupu nawiaga harimi.
DEU 28:65 Tí dindi tara uruniha howa bayale holene mbira ngaria handa walia naholeberemi. Dindi tíninaga lenego mbira nawulebiraore. Anduane Homogo ibugua tíha genda yu holenebi mini burugu lolenebi wia haragola ai ina yu waheneore mbira harimadago aginagadabe lo manda bialu holeberemi.
DEU 28:66 Horo bibahendengi tíha mo ko holene mbirago anda ibulilono gi ho haabo holeberemi. Mbiraga horombebi tíni homolenenaga dege gi howa mini burugulo haabo holeberemi.
DEU 28:67 Mbirale bibahende tí de handaramigo dameneme tí mo gi timbuni haabo holebira. Ani biragola tígua horo abaleore bolangua haga bilo hamelo holeberemi. Ani howa tígua egerebagi howa lalu alendo abale ha loleberemi. Ani bialu alendo howa tígua mbiraga abale ha lalu mbiraga howa gao lelo abaleore hame loleberemi.
DEU 28:68 Anduane Homogohanda tíore Iyibi dindi lone dai nabuleberemi la layagoyu ibugua tí lone iba sibini biralu Iyibi dindi daibilolebira mandabu holeberami. Anidagua biragola Iyibi dindiha pu howa tígua waitigi karunaga garabaya biabe ale biahaga hole tíni yolo mbiralime bilo hameledemiria mbiralime tí yolo nabulebira, lalu Mosesehanda lene.
DEU 29:1 Anduane Homogohanda Moaba dindini howa Isaraele wali agali baba habo nalolene bi mbira lowialu Mosesehondo laminigo ogo. Anduane Homogohanda habo nalolene bi mende ogoni Hari Sainai heagoria howa lowiyago aria dege latago hene.
DEU 29:2 Mosesehanda Isaraele wali agali bibahendeore olalu mo mogo buwa tihondo lamialu lalu, Anduane Homogo ibugua Iyibi wali agalinaga kini heagohondobi ibunaga agali haguane hearuhondobi wali agali bu hearuhondobi Iyibi dindiha biyago damene bibahendeore tí de handai harimi.
DEU 29:3 Warago ko tara tara ibilayarubi agalime nabiagane ale dewa biyarubi Anduane Homogohanda mbirale timbuni tara tara nahendene ale biyarubi tí de handaiore harimi.
DEU 29:4 Anigo Anduane Homogohanda tígua uruni biyarunaga irane mandabu halimulonaga mitangibi handalimulonaga debi bayuwa hale halimulonaga halebi tíhondo nangini kamigoni.
DEU 29:5 Anduane Homogohanda ogodagua laya. Mali pira mariani (40) i̱na tí dindi ko ege kelekele iba dalu naibaga wiagoha haru hewangi tínaga agabi ge subi mbirago budabaga nabi bayale karulo haabo halimulo handayaho harugoni ndobe.
DEU 29:6 Dindi ogoniha hemingi tí tomo nolene mberedibi waini ibabi iba mbiabi mbira nawi hemigola i̱ni Anduane Homogo tínaga Ngode Datagaliwabeore henedalo manda bilimulo i̱nime tí mbira burupale hemiria baya hangu handayaho harugoni ndobe, laya lene.
DEU 29:7 Mosesehanda laabo halu lalu, Ina dindi ogoniha anda íbu hemagola Hesebononaga Kini Sihono heagomebi Basana dindinaga Kini Ogabi libugua ibalu ina baba wai biyagoni. Anidagua biyago bilowa iname ti bope halu wayali harima.
DEU 29:8 Iname tinaga dindi karulalu hameigini Lubenebi Gadabi Manase hameigini halu mende hearubi tí karulo helo tu wa tahaga birimagoni.
DEU 29:9 Tígua bialu holeberemigo damene bibahende bayale hai helonaga habo nalolene bi lowirimigo ogoni bibahende taluwa bialu halimu.
DEU 29:10 Áyu ogoni tí Anduane Homogo inanaga Ngode Datagaliwabenaga deni kamigoni ndobe. Tí agali haguane kamirubi ami agali haru haga kamirubi agali maru kamirubi
DEU 29:11 tínaga one waneigini bu kamirubi wali agali dindi tarali tí heba mandagi íbu howa tínaga ira gabia iba hambu pu biaga karubi tí íbu hai kamigoni.
DEU 29:12 Tí bibahende ogoria bu kamirume habo nalolene bi Anduane Homogo inanaga Ngode Datagaliwabehanda lowirago hale halu mo yule kami. Hale howa habo nalolene bi ogoni talialu hole lalu bi lowuleberemi.
DEU 29:13 Anidagua beremigola Anduane Homogohanda tí mo ibunaga wali agaliore helalu tínihondobi tínaga mamali Abarahama Aisaga Yagaba imaruhondobi tínaga Ngode Datagaliwabe i̱niore holebero lalu bi lo winigodagua loyane biragoni.
DEU 29:14 Anduane Homogohanda habo nalolene bi ogoni ina áyu o kamaru baba hangu bulenaga lowirago ndo.
DEU 29:15 Ibugua ina áyu ngoai ho kamarubi mani inanaga waneigini aguanene holobadarubi lamaga halu ina bibahende baba lowiragoni. Ani manda bialu ina bibahendeme aniore bule lalu bi lowimi̱ya.
DEU 29:16 Tí abale Iyibi dindiha harimingi abi harimadabe mitangi biadai bilimu. Ani bialu hameigini tara taranaga dindi wiagoria ibaga bialu harimingi bigi biyarubi mitangi biadai bilimu.
DEU 29:17 Tígua hameigini tara tara uruniha hearume dama mitangi bialu mbirale bi pupu wulenaga ko ngubiore iramebi ege to̱le̱mebi ngolo silibarumebi wabiniru dindi uruniha wiaria de handarimi.
DEU 29:18 Tí aria lenegoore agaliyaguabi waliyaguabi onene agalini waneiginiru hebayaguabi hameigini mbirayaguabi áyu o kamiru aria mbirame Anduane Homogo inanaga Ngode Datagaliwabe kago erembira mialu puwa dindi tara wali agalinaga mbirale ko ngubi gime wabini ngagohondo bi pupu wuligo de hondo halimu. Tígua bi áyu hale haramigo mo wahalu puwa mbirale uruni alehondo bi pupu wialu harimiyagua nde mbirale kau biaga alenaga pini kago hangaramigola mani ogoni ibu wialu anda howa wali agali dewaliore mo ko holene wulebira.
DEU 29:19 Wali agali marume bi hongohe o larogo hale ho howa mo nagalone halu puwa mitangi bialu i̱na bi uruni hale howa nabi haruyagua nde karulape. Ani berogome nde i̱ bayale dege holebero lo mitangi buligo handalimu. Anigo mbiralime mana ogoni pugualu bi mo wahayagua nde ogonidagua biragome wali agali ko biagabi bayale biagabi bibahendeha mo ko holene anda ibai holene wulebira.
DEU 29:20 Mbiralime mana ko urunibi biaga kagonaga ko ngago Anduane Homogohanda domo wa naholebira. Anigo Anduane Homogo ibugua keba timbuni howa ibunaga bu miniha ira hungu ale biragola mbirale mo ko holene damene mbuga ogome ledaru bibahende agali ogoni ibuha ibalu kane dege ibunaga dindini holene wini ngago hamaro birangi waholebira.
DEU 29:21 Anduane Homogohanda mbirali ogonidagua biagago ibu minalu Isaraele hameigini bibahendeme de hendelo ibuha tandaga nolene ibunagaore wini ngago nalu kane dege hamaro bilolebira. Anduane Homogo ibugua aniore bule lalu mana lowinigo loyane ogoha lo ngadagua mbirale mo ko holene damene ngarume ibuha íbu wiai holebira. Anduane Homogohanda habo nalolene bi tí baba lowiyago mbiralime mo habo layagua anidaguaore bulebira.
DEU 29:22 Mani howa tínaga aguanene holobadarumebi wali agali dindi tara taraha howa íbu holebirarumebi Anduane Homogohanda tínaga dindiha genda timbuniore ibilenedane hondolebira.
DEU 29:23 Mabu ngemiru bibahende mo ko hai hene wulebira. Tínaga dindi ko kui halu ege to̱le̱ ale ambuabi mini saloba dege ngagoha mabu e hangabe nahe wulebira. Dindi ogoniha datanibi mbira anda habe nahe wulebira. Ani bialu tínaga dindi ogoni mo ko hai hene tano maria Sodomo Gomora Adama Seboimi imaru winigobi wulebira. Tano uruni bamba Anduane Homogohanda ibu miniha keba timbuniore howa mo ko hai hene.
DEU 29:24 Wali agali dindi bibahende ngaruha bu holebirarume tinihondo hale haga haga bialu lalu, Anduane Homogohanda Isaraele wali agalinaga dindi ogoni irane aginaga mo ko hayadabe. Ibugua irane aginaga tihondo keba timbuni hayadabe, lalu holebira.
DEU 29:25 Ani hale haragola tinime dege ladai bialu lalu, O biyadagoni irane Anduane Homogonaga wali agali bu hearu tigua tinaga mamalirunaga Ngode Datagaliwabe ti Iyibi dindiha howa haru tagira pialu dindi ogoha haru ibini biagola habo nalolene bi lowirimigo tinime mo habo lalu piyagola mo ko hene nga, lolebira.
DEU 29:26 Isaraele wali agali tigua dama mitangi bialu mbirale gime wabini wiaruhondo bi pupu wialu heneya. Mbirale uruni alehondo tigua abale bi pupu nawiagabi Anduane Homogohanda ogoni alehondo bi pupu nawilimu lalubi laminigo mo wahayagola biniya.
DEU 29:27 Ani biyagola Anduane Homogohanda ibunaga wali agalihondo keba timbuniore howa mo ko holene tara tara ibulebira lalu mbuga ogome ledaru tiha tagira ibiyagola ti ani mo ko hai henego ngagoni.
DEU 29:28 Ani buwa Anduane Homogohanda keba timbuniore halu wali agali uruni tini daluha howa ho dugualu dindi tara taraha bo purogo lelenego nga. Anidagua binigo áyu ti nde dindi tara uruniha haabo kagoni, lalu ladai bulebira, lene.
DEU 29:29 Mosesehanda laabo halu lalu, Bi maru inanaga Anduane Homogohanda latagi nahe mo do howa wiaabo helenego áyu nga. Anigo ibunaga bi mana lowinigo latagi hene áyu ngago ogoni inamebi inanaga aguanene mani holebirarumebi talialu bialu holoma̱ya ngiyago mana ogoni taluwa bialu haabo hami̱ya, lene.
DEU 30:1 Mosesehanda laabo halu lalu, Áyu tígua tale bialu poa biragoha talialu pilimulo hariga kira mo walia haragoni. Hariga mbiragoha Anduane Homogo ibugua mo bayale holene wialu hariga mendegoha mo ko holene wulebira. Tígua bialu holene bayale agodabe handalu tínime dabalimu. Anduane Homogo inanaga Ngode Datagaliwabe ibugua tí hameigini tara tara bu karu baba halimulo pelenego pu kamiria mana bialu harimidagonaga lini tíniha mo ko holene anda ibiragola i̱na bi kira dabolene o langirugoni mitangibu dai buleberemi.
DEU 30:2 Ai tíguabi tínaga waneigini aguane mani holebirarumebi mini beregedalu Anduane Homogo ibuni kagoha daibu howa ibugua bilimu layaru bu miniha hongo howa bialu haabo harimiyagua nde
DEU 30:3 Anduane Homogo inanaga Ngode Datagaliwabe ibugua tí dara halu biamogo bulebira. Ibunime tí dindi tara taraha haru pu helayagoria howa lone tíni dindi ala hene wirimigoria haru daibu helolebira. Ani helowa ibugua tínaga mbirale ngamiru mo bayale hai holebira.
DEU 30:4 Tí kaundiaore dindi wia maro bidaruha haru pu helaga biniyaguabi Anduane Homogo ibunime tí mandagiore halimulo bibahendeore mo mogo bialu haru dai biai holebira.
DEU 30:5 Ani haru dai biragola dindi abale tínaga mamaliru hene biagoria daibu hai holeberemi. Ani daibu kamigola Anduane Homogo inanaga Ngode Datagaliwabe ibugua tí mo dewaore halu tínaga mbirale yu holeberemirubi tínaga mamalirume yu henegobi ndo bolangua howa dewaore yu holeberemi.
DEU 30:6 Ibugua tínibi tí waneigini aguane mani holebirarubi tínaga mini mo beregedalu gahengeore helalu biragola tígua ibunaga bi mana ngaru baya hangu hale halu bialu ibu gubaliniore howa holeberemi. Ani bialu tí dindi ogoriani haabo holeberemi.
DEU 30:7 Mo ko holene wulebirago lalu áyu i̱na tíhondo langiruruni Anduane Homogohanda wali agali tínaga waitigi handabe manga haga heneru tí mo ko holene uruni ti karuha pelolebira.
DEU 30:8 Anigo i̱na ibunaga bi mana áyu o langerogo tígua baya hangu talialu bialu holeberemi.
DEU 30:9 Ani beremigola tígua bialu holeberemiru bibahende Anduane Homogohanda mo bayale hai holebira. Ani mo bayale hai haragola tínaga waneiginiru dewaore halu nogo sibi bulumagarubi dewa dege holebira. Tínaga maburuha tomoru bayale dewaore anda holebira. Anduane Homogohanda mbirale dewaore abale tínaga mamaliru mialu henedagua tíhondobi nde dewaore turu halu ngulebira.
DEU 30:10 Anigo tíguaore Anduane Homogonaga bi hale halu bialu bi mana mbuga ogoha gilibu ngaruni baya hangu taluwa biai halu holene nga. Ibuni karia dai bialu tíninaga bu gubalinime minimebi ibunihondo gubalini ho haabo holene nga.
DEU 30:11 Bi mana áyu langerogo tígua mo yuwa bialu holene gendabi ndo langero.
DEU 30:12 Bi mana uruni uyura hari damindiniha wiaruagola ai iname hale howa talialu buluma̱ya mbirali aiwa irigi halu puwa mo yalu dai bulubadabe naloleberemi.
DEU 30:13 Iba solowara timbuni bedarunaga ange mende amurahayagi wiaruagola ai nde iname bi mana uruni hale howa talialu buluma̱ya aiwa mo yu dai bule polobadabe lalubi nalabeheore kami ndobe.
DEU 30:14 Ani nalabeheore kamigoni. Bi mana uruni kaware tíni kamigoria tínaga ne harigaha halu tínaga bu minihabi kagoni. Ani bidago tíni bi mana ogoni manda bu howa latagi habehe kamigo ai tínime talialu bialu haabo halimu.
DEU 30:15 Ai nde hariga kira holene homolenela ogoni labo tígua dabalimulo i̱na tíhondo mo walia harogo. Tígua hariga mbira nga larogoria pialu harimiyagua nde tí holene bayale handa walia halu bayale haabo holeberemi. Hariga mende larogoria pialu harimiyagua nde tí mo ko halu homolenehayagi holeberemi.
DEU 30:16 Áyu i̱na tíore langerogo tígua Anduane Homogo inanaga Ngode Datagaliwabe gubalini ho howa ibunaga bi mana lo ngaru bibahende hale halu talialu bialu halimu. Ani bialu howa ibunaga hame ngaru talialu harimiyagua tí wali agali damebi dewaore paluwi bayaleore haabo holeberemi. Anduane Homogo inanaga Ngode Datagaliwabe ibugua dindi áyu karulole poramigoriani pu kamigola tí bayale holeberemi laro.
DEU 30:17 Ai nde tígua bi mana uruni hale habe manga howa mo bagi halu dindi tara wali agali bu karume ti haru pubagi haragoha pialu mbirale dama mitangi bialu gime wabini ngaruhondo bi pupu wilimulo haru piyagua nde
DEU 30:18 tíha mo ko holene timbuniore wulebirago de hondo halimu laro. Bi o langerogo mo waharimiyagua nde tígua Iba Yodana porago domaede halu dindi ede ngagoha hole kamigoriani haabo naholeberemi.
DEU 30:19 Ainde bayale holenebi homolenebi hariga kira ngago tí mendego hangu dabalimulo ngagoni. Hariga mbiragoria Ngode Datagaliwabe ibugua tí bayale halimulo biamogo bialu holebira. Hariga mendegoria tíniha mo ko holene taya buleberemigo. Ai i̱na dindi o ngagomebi hari li kagomebi áyu tígua dabaramigo libu de hendelo lamerogoni. Anigo áyu tígua pialu hariga agoria holeberemibe dabalu bayale holene ngagoria hole dabalimu laro.
DEU 30:20 Tígua Anduane Homogo inanaga Ngode Datagaliwabe kagohondo gubalini halu ibunaga bi mana bu miniha baya hangu mo hongo halimu. Anidagua bialu howa tínibi tínaga waneigini aguane mani holebirarubi tígua dindi bamba tínaga mamali Abarahama Aisaga Yagaba imaruhondo ngulebero lalu Anduane Homogohanda bi lo wiyagoria pialu luore haabo holeberemi, lalu Mosesehanda lene.
DEU 31:1 Mosesehanda Isaraele wali agaliruhondo laabo halu lalu,
DEU 31:2 I̱ áyu agali daguaheore kogoni. I̱ mali handari mbirani pira kira (120) piyadago ai i̱na tínaga haguane habe naheore kogoni. Anigo nde bi mende Anduane Homogohanda i̱hondo lalu, Í̠ Iba Yodana domaede halu napolebere, lalu langiya.
DEU 31:3 Anduane Homogo inanaga Ngode Datagaliwabe ibugua tí dara halu ibunime bamba halu puwa wali agali edegoniha bu karuni bo hilo wahai holebira. Ani biragola tinaga dindi ogoni tígua karulo holeberemi. Anduane Homogo ibunime layadagua Yosua ibu tínaga haru hagane holebira.
DEU 31:4 Anduane Homogohanda ala Amoroalinaga kini kirali Sihono Ogalanaga dindiha anda bo heda hayadagua dindi edego bo haealabaga bulebira.
DEU 31:5 Anduane Homogohanda tí biamogo biragola tígua wali agali uruniha holebiraru bope halu tíni wayali holeberemi. Ani bialu howa i̱na ogodaguaore tíhondo bilimu lalu abale langirudagua biaiore halimu.
DEU 31:6 Tígua uruni handalu gi nahe miniha hongo ho halimu. Tínaga Ngode Datagaliwabe Anduane Homogo ibuniore tí heba mandagi haabo holebira. Ibugua tí mo embeda halu tíni hangu halimulo yu wahalu napolebira, lalu Mosesehanda lene.
DEU 31:7 Ani lowa Mosesehanda Yosua olalu íbu lowa wali agali bu hearunaga deni helalu Yosuahondo lamialu lalu, Í̠ gi nahe miniha hongo ho habe. Abale Anduane Homogohanda ina mamaliruhondo dindi edegoni ngulebero lalu lowiyagoni mialu karulole í̠na wali agali o bu karu haru halu bamba halu pobe.
DEU 31:8 Anduane Homogo ibu í̠ heba howa ibunime bamba halu haru polebira. Í̠ mo ko howa bara handala ibugua í̠ yu wahalu napolebira. Ani bulebirago ai í̠na mogo lalu gi nahabe, lalu lene.
DEU 31:9 Mosesehanda Ngode Datagaliwabenaga Bi Mana lowinigo gili bialu Libai hameigini loma binigo mo miaga hearuhondobi Isaraeleali agali haguane hearuhondobi migi bini. Libai hameigini uruni tigua Habo Nalolene Bi lo winigonaga Mbogoyi biago handayaho haga hene.
DEU 31:10 Ani heagola Mosesehanda tihondo lamialu lalu, Ai mali karia piai halu lotu lolenaga horo timbuni Anda Nemandaha Palu Holene tomo nole ngoai haramingi tígua bi mana ogoni wali agaliruhondo dagalo migi bilimu. Mali kane pu bolangua haga biragola ogoningi dano heneru wahaga biaga nga.
DEU 31:11 Isaraele wali agaliru tigua Anduane Homogo inanaga Ngode Datagaliwabe ibugua dindi mbira tí ibu mitangi bialu lotu lolene mo wiragoria íbu ngoai haragola tígua bi mana o gilibu ngiruruni hale helo dagalo tagi haga bilimu.
DEU 31:12 Bi mana uruni hale hai helo dagalole howa wali agali waneiginirubi wali agali dindi taraha howa tí baba tanoha mandagi hole íbu hene karubi bibahendeoreme bi mana uruni hale halu manda biai helo lope halimu. Ani bialu ti bibahendeme bi mana uruni hale howa Anduane Homogo inanaga Ngode Datagaliwabe andaneha hai helo ani lope halimu.
DEU 31:13 Tigua anidagua hale helo dagalatagi haramigome tinaga waneigini aguane maha andaho aribia hararu ti Anduane Homogo inanaga Ngode Datagaliwabenaga mana lowinigo ogoni ala hale nahene tibi hale holebira. Anidagua beremigola tigua bi mana uruni hale howa Iba Yodana domalu dindi ede ngagoha pu howa Anduane Homogo andaneha haabo helo ani bilimu, lalu Mosesehanda lene.
DEU 31:14 Anduane Homogohanda Mosesehondo lamialu lalu, Ai í̠naga homolene kaware ngagonidago nde i̱naga biabe bulene ngaru Yosua mo walia holiya ibu olalu i̱naga Balai Anda kagoha haru ibabe, lene. Anidagua laya handala Mosese Yosuala Balai Anda biagoha anda pene.
DEU 31:15 Libu ani anda piyagola Anduane Homogo ibuni Balai Anda biago haneni beraliba mberane biagoha kaware íbu hene.
DEU 31:16 Ani íbu howa Anduane Homogohanda Mosese lamialu lalu, Áyu í̠ homolene kaware kegoni. Ani homaregola wali agali tigua i̱ yu wahalu ti baba habo nalolene bi lowirugobi pugulobada. Ani bialu tigua i̱ erembira ngialu puwa dindi áyu poleberemigoha wali agali karunaga dama mitangi bialu gime wabini ngaruhondo bi pupu wialu holobada.
DEU 31:17 Tigua anidagua biragola i̱na tihondo keba timbuniore holebero. Ani howa i̱na ti yu wahalu erembira merogola tiha mo ko halu tandaga nolene timbuniore wulebira. Ani nalu howa tigua ogodagua lolebira. Ngode Datagaliwabe ibu ina heba mandagi nahe ngagome genda inaha anda ibiragonida, lolebira.
DEU 31:18 Ani lalu kagola i̱na ti biamogo nabuleberogo irane tigua i̱ erembira ngialu puwa ko timbuniore bialu dama mitangi bialu gime wabini ngaruhondo bi pupu wima piyagonaga ani bulebero.
DEU 31:19 Áyu i̱na iba gana mbira langerogo bebani gili buwa Isaraele wali agaliru lawai habe. Iba gana ogonime mani tini dabaki holene wulebirago ani bilonaga gili bibe.
DEU 31:20 Ai dindi bayaleore benebere ogoniha haru halu polebero lalu bamba tinaga mamaliruhondo lowirudagua bialu ti haru anda polebero. Dindi ogoniha ti tomo dewaore bu payabu ngelowa karulapeore nalu holebira. Ani holebiragoyu tigua i̱ erembira ngialu puwa dama mitangi bialu mbirale gime wabini ngaruhondo bi pupu wialu holebira. I̱na yu wahalu ti baba habo nalolene bi lowirugo pugu waholebira.
DEU 31:21 Ani biragola mani howa mo ko holene tara tara ti kagoria íbu wulebira. Horo mo ko holene uruni íbu wigi bidagola howa Isaraele wali agali tigua iba gana ogo lalu haabo holebira. Iba gana ogonime tinaga mana ko bialu hayaruni mo mitangi bia haga bulebira. I̱nime ti dindi ogoniha haru polebero lalu lowirugoria haru anda nape wene kamagonigo ai mani ogoale bulebira lalu tinaga bu miniha ngelo kago ina áyu hondo bolangua hai ho kogoni, lalu Anduane Homogohanda Mosesehondo lamini.
DEU 31:22 Horo ogoningi dege Mosesehanda iba gana ogoni gili bialu Isaraele wali agaliruhondo lawai hene.
DEU 31:23 Ani biyagola howa Anduane Homogohanda Nunu igini Yosuahondo lalu, Í̠na mbirale mbira hondowa gi nahe miniha hongo ho habe. Isaraele wali agaliru i̱nime tihondo dindi ogoni ngulebero lalu abale lowirugoria haru pobe. Ani haru poregola i̱ni í̠ heba mandagi haabo holebero, lene.
DEU 31:24 Ani layagola Mosesehanda Ngode Datagaliwabe ibunaga mana lowinigo aria mbira yu wanahe bibahendeore mbuga mbiraha gilibu wiai hene.
DEU 31:25 Ibugua bi uruni gili biai howa Anduane Homogonaga Habo Nalolene Bi lowinigonaga Mbogoyi handayaho haga Libai hameigini aria lomabu minigo mo miaga hearuhondo bi mbira lamini. Ibugua lalu,
DEU 31:26 Mbuga ogoni Ngode Datagaliwabenaga bi mana lowinigo gilibu nga. Ogoni Anduane Homogo inanaga Ngode Datagaliwabe ibunaga Habo Nalolene Bi lowinigonaga Mbogoyi ngagoria kaware mo ngelalimu. Ani ngeledemigoria wiaabo howa mbuga ogonime tí Anduane Homogonaga wali agali kamiru manani tale bialu haabo helo wiaabo holebira.
DEU 31:27 Wali agali ti mine hagabi bi mo wahagabi kago i̱ manda bu kogoni. Áyu i̱ koangi tigua mine howa Anduane Homogonaga bi mo wahalu ibunaga mana lo ngaru pugualu hayagoni. Ai mani howa i̱ homedogolabi tigua mine timbuni halu anidagua dege bialu holebiralo manda bido.
DEU 31:28 Ai áyu agali haru haga bu karubi agali haguane bu karubi bibahendehondo i̱na bi laruruni ti lamuliya íbu ngoai hadaba lole pudaba. I̱na dindi ngagomebi hari li kagomebi libugua i̱na bi áyu ogoni wali agali tihondo lamerogo hale hene lelonaga ololiya.
DEU 31:29 I̱ homedogola wali agali mani mo ko heneore halu i̱na tihondo bi áyu lamirugoni hale halu talialu ha nabulebiralo manda bido. Tigua mana ko dewa bulebiragome Anduane Homogo mo kebaore halu biragola ibugua mo ko holene ngaru ti kagoha ibilolebira, lalu Mosesehanda lene.
DEU 31:30 Mosesehanda iba gana gilibu wiyadagoni Isaraele wali agaliru ti hale helo tihondo lominigo ogo,
DEU 32:1 Hari mindini dindila-o i̱naga bi hale hadaba. I̱na bi larogo bayuwa hale hadaba.
DEU 32:2 I̱naga bi lawai harogome dalu ibilagadagua ibilalu datani bayale anda helo dindini dadimba ale mo mindibia hagadagua tí bayale halimulo mo bayale holebira. I̱naga bi dalu ibira hagadagua ibalu dalume mbirale dindini anda ho karunaga mane bayale helo mo tiga biagadagua bulebira.
DEU 32:3 I̱na Anduane Homogonaga mini yaraga holebero. Tígua ibu mini leneore ka loleberemi.
DEU 32:4 Anduane Homogo ibu haabo hagaore ka. Ibu ege to̱le̱ timbuni mo ema bibe nahe wiraligobi ka. Ibunaga mana baya buruguleore tigabi dege nga. Tínaga Ngode Datagaliwabe ibugua bi leneru mbira mbiralime mo iriari bibe nahe bibahende ibuninaga bi lowiyago ke̱ hole nalaga. Ibugua mana tigabi bayale bulene ngadaguaore biaga ka.
DEU 32:5 Tí ogonibi ndo kamigoni. Wali agali ke̱ haga howa tígua buleore lalu lowirimiru wahalu piaga kami. Wali agali mana ko hangu bialu haga kamigome tí Anduane Homogonaga wali agali habe nahe kamigoni.
DEU 32:6 Anduane Homogo ibu tínaga aba howa tí bibahende Wabiaga ka. Ibugua tí damene timbuni hodame bileda. Anidagua binidago manda bialu tígua ibuhondo mana ko uruni irane aginaga bialu kamibe. Tí wali agali lulu howa mini nawiore kamigoni.
DEU 32:7 Tígua abaleore howa biniru mitangibu dai bidaba. Tí abaruhondo agua binibe lalu hale hadaba. Agali daguahe ala hene karuhondo agua dege binibe lalu hale hadaba.
DEU 32:8 Daligaorene Daliga kago ibunimeore wali agali tara tarahondo dindi tu wu tahene. Tahalu ti ogoriaore halimu lalu lamigi bini. Ibugua Isaraele wali agali hameigini headagua dindi karulapeore tu wini. Wali agali tara hearu ti helobi tu wu ngelaga bini.
DEU 32:9 Ibugua Yagaba aguaneru ibunime handayaho hole dabo helayagoni.
DEU 32:10 Isaraele wali agaliru luluyu yalu dindi ko yobi pupe hayagoni. Dindi koore puyabu hongohe pu laga wiagoha pupe ho hayagoni. Anduane Homogohanda ibuni handayaho hagadagua ti handaya halu biamogo biya.
DEU 32:11 Ega bodo hariawe bedarume tinaga iginiru yaga lalu pelo yupe howa mo ko halu ibira hole tiga biragola ibunime dindiha pialu babagane yangalalu iginiru mo yaraga hagadagua Anduane Homogohanda Isaraele wali agaliru tiha mo ko holene mbira anda ibuligo baya hangu handayaho hene.
DEU 32:12 Dindi taranaga dama karume haru hamaga nahe Anduane Homogo ibuni hanguoreme Isaraele wali agaliru haru halu hariga mo walia hene.
DEU 32:13 Anduane Homogohanda ti dindi hari barebare wiaruni handaya ho helalu tigua mabuni tomo andaho hearu bialu naya. Ege to̱le̱ timbuni hearuha mone ibane wiaru mo nalu ege to̱le̱ dindini wiaruha tinaga ira oliberu bayale taraore anda haya.
DEU 32:14 Tinaga bulumaga memeru hearunaga andu ibane tini nolene karulape hambiya. Tigua bulumagaru sibiru memeru bayale habanehe hinaya. Tinaga widiru bayale anda halu waini iba bayale berelo gerebi liniru bayale ibiralu do ndigindugu laya.
DEU 32:15 Anduane Homogonaga wali agali heneru ti mbirale dewaore wu howa tinime ibu erembira mialu mine haga hene. Tigua tomo dewa naabo howa tini timbuni pudu ho hene. Tigua Ngode Datagaliwabe ti wabinigo yu wahowa tinaga pele miaga timbuni kagohondo erembira mialu hene.
DEU 32:16 Tigua dama mitangi bialu gime wabini wiaruhondo bi pupu wiyagome Anduane Homogo mo tandaga hene. Tigua ko ogoni biyagome ibu mo keba hene.
DEU 32:17 Tigua Ngode Datagaliwabehondo ndo dama tara tarahondo mbirale bo lomabu miaga hene. Dama uruni bamba tinaga mamalirume manda nabini. Isaraele wali agali bamba henerume dama uruninaga andaneha nahene.
DEU 32:18 Tinaga Ngode Datagaliwabe ibu hongo gibihe tini pele miaga timbuni henego embeda ho hene. Tihondo bayale holene tene miaga kago ti embeda hai ho wahene.
DEU 32:19 Tigua mana ko uruni biyago hondowa Anduane Homogohanda tihondo keba timbuni hene. Keba ogonibi howa ibugua ibuni waneigini biaru erembira mini.
DEU 32:20 Ibugua lalu, I̱na wali agali uruni biamogo nabulebero. Tiha genda tara tara anda ibiyaguabi ibilo wahalu biamogo nabulebero, lene. Ti mine gibi hagabi i̱hondo mini mbiraore nawi hagabi ka.
DEU 32:21 Tigua Ngode Datagaliwabe ndo nagalone wiaru talima pialu kagoni. Anidagua biyagome i̱naga bu mini mo tandaga halu tihondo keba haru. Ko uruni biyagonaga i̱na hameigini mbira mini lene ndo tara karume ti mo keba helo helalu wali agali hameigini tara mini nawi karu urunime Isaraele wali agali mo tandaga helo helolebero.
DEU 32:22 Horo ogoningi i̱naga keba holeneme timbuniore ira hungu ale daradagua bialu dindi bibahendeni karu ngarubi bo dai holebira. Irame humbirini dindiha pialu dindi hari pini karubi daiore holebira.
DEU 32:23 Agalime timu dewa gime yu howa waitigiru bagadagua balu i̱na tiha mo ko holene dewaore ibilolebero.
DEU 32:24 I̱na ti tomo nolene mo garibila halu tiha warago tara tara mo wia halu ti mo homa haga bulebero. I̱na mbirale tara tara gabua karunime ti hayilobi nogombi ko ngarumebi ti hayule pudaba laga bulebero.
DEU 32:25 Wai timbuni bialu kagola waitigirume ti harigani howa homelo bolebira. Tini andagaha bira do kamiria gi timbuni holeneme tini ibira holebira. Tinaga waitigirume ibalu wandari igiri daliahe bu karubi bo homelalu waneigini galibi wali agali wahe bu karubi yu wanahe bibahende bo wahaiore holebira.
DEU 32:26 Mbiralime ti mitangi bialu abogo ogoria hene nalelo i̱na ti mbira yu wa nahe bo wahai hole manda biru.
DEU 32:27 Ani manda birugoyu i̱na ti bo wahai kole nde waitigi bu karume mine halu lalu, Iname Ngode Datagaliwabenaga wali agali biaruni bope harimagoni ndobe, lalu kalego. Ani nalelo i̱na i̱naga hongoore holeneme ti bope harugoni ndobe. Anigo i̱na waitigi bu karume bi ogonidagua loligo i̱nime ti bo wahai nahene, lene.
DEU 32:28 Isaraele wali agali mini nawiore kagoni tinaga mini gigabi nawi emene tubagiore ka.
DEU 32:29 Ti wali agali miniwi henedale nde tiha mo ko holene anda ibiyago agilemedabe handalu manda bidale.
DEU 32:30 Isaraeleali daosini mbira (1,000) hearu waitigi mbiraore hangu baba wai bialu dari hayago agibe. Isaraeleali daosini pira (10,000) waitigi kirali hangu baba wai bialu dari hayagonaga irane agibe. Anidagua biyagoni irane ogo. Anduane Homogo tinaga Ngode Datagaliwabe ibugua ti yu wahalu ti handabe manga timbuniore howa hongo haihe kagome ti erembira mini.
DEU 32:31 Waitigi karume tininaga dama gime wabini bu karunaga hongo naheoreyane handaya. Isaraele wali agalirunaga Ngode Datagaliwabe kagonaga hongo ege to̱le̱ timbuni ema bibe nahe ngaligobi hongo timbuniore ka.
DEU 32:32 Isaraelenaga waitigi bu karu tinaga mana ko ngubiore biagago Sodomo Gomorala wali agalirume binigobi biaga ka. Tinaga waitigi biaru ti pu mbira lini daga mini gerebi kome lini kaubiore dagagobi ka.
DEU 32:33 Tinaga mana koorene ko waini iba puya ko homaganaga ibaneme wabini ale ka.
DEU 32:34 Anduane Homogo ibugua Isaraelerunaga waitigi bu hearume biyago manda biaiho ka. Ibugua ti ko biyagonaga pani mulene henge mbira tagira ibilo hondo ka.
DEU 32:35 Horo ogoni tagira ibiragola ibugua ti ko biyagonaga badai bialu pani mialu howa bo wahai holebira. Tigua ko biyagonaga mo dindiha helolene íbu nga. Ti mo ko holene horo kaware hapara haragoni.
DEU 32:36 Anduane Homogohanda ibunaga wali agaliru hongo biba halu kago handalu ibugua ti pele mulebira. Ibugua ibunaga biabe biahaga uruni tini hangu howa mbira mbira yu wahene handalu ibugua ti dara halu biamogo bulebira.
DEU 32:37 Anduane Homogohanda ibunaga wali agaliruhondo ogodagua hale halu, Abale tígua dama mitangi bialu gime wabini hongohe urunime tí biamogo bulebira manda bialu pirimigo ai odaruni agoha kabe, lolebira.
DEU 32:38 Tígua urunihondo nogo habanerubi waini ibanerubi ti nelo lomabu mirimigo. Ai odarunime áyu tí biamogo bule ibilo. Tigua tí ko ngagoria howa haru dai bilo.
DEU 32:39 I̱ni mbiraore hangu Ngode Datagaliwabeore kogoni manda bilimu. I̱ ale mendeali mbira naheore. Holene ngiagabi bo wahagabi i̱ni hanguore kogoni. I̱na mbirali mo tandaga holenebi mbirali mo dabi holenebi i̱ni hangu kogoni. I̱na buleberogo mbiralime hapai habe nahe.
DEU 32:40 Heneneore Ngode Datagaliwabe i̱ni hanguore haluhe henego kogoni. Ani kogonigo i̱na buleore lalu mbira ogobi lo wiruli.
DEU 32:41 Mana tigua bialu karu baya hangu tale bulebero. I̱na i̱naga wai biaga ayu tibu ne̱ halu mo ngiringara lelolebero. I̱naga ayu tibu ogonime maru i̱naga waitigi karu bo wahai halu maru i̱ handabe manga haga karu mo ko holebero. Maru i̱ baba wai bule karu ina tini homelo bo wahai holebero. Tinaga darama timu togo togo pora bialu holebira. Agali maru wai hamaha nahomayagua nde i̱nime ti bo wahai holebero, lene.
DEU 32:43 Dindi tara tara wali agali kamiru-o tígua Anduane Homogo ibuninaga wali agali bu karunaga mini yaraga holene nga. Ibunaga wali agaliru bo wahaga karu ibunime tinibi mo ko haga ka. Ibugua waitigirume ko birago biadai biaga ka. Ibunaga wali agalirume ko biyaru ibugua domo wahaga ka, lalu Mosesehanda lai hene.
DEU 32:44 Mosesela Nunu igini Yosualame iba gana lalu bi ogoniha gilibu wiaruni Isaraele wali agali bu hearume hale hai helo daga latagi halu hene.
DEU 32:45 Mosese ibugua Ngode Datagaliwabenaga bi mana wali agali bu hearuhondo lawai hai howa
DEU 32:46 mani ibugua tihondo lamialu lalu, I̱na bi mana áyu o langiruruni baya hangu de handalu talialu bialu halimu. Tínaga waneiginiru tiguabi nde Ngode Datagaliwabenaga bi mana ogoni talialu horo bibahendengi bialu helo lamilimu.
DEU 32:47 Ibunaga bi mana lawai holene uruni bi damene ndo uruni bi kuniore tíni bayale holenenaga ngagoni. Bi mana uruni bibahendeore mo dunubia howa hale halu bialu halimu. Anidagua bialu harimiyagua áyu tí Iba Yodana doma ede halu pole kamigoria pu howa dindi edegoriani luore haho wuleberemigo ani bilimu, lene.
DEU 32:48 Horo ogoningi dege Anduane Homogo ibugua Mosesehondo lalu,
DEU 32:49 Moaba dindiha hari mini Abariminaga Hari karuha pobe. Hari uruni Iba Yodana angeha halu Yarigo tano ederayagi ngelowa ngago. Hari uruni bibahende bolangua hai howa Hari Nebo nene kagoria irigi howa Kenana dindi i̱na Isaraele wali agali tíhondo nguleberogoni ederayagi ngago handaede habe.
DEU 32:50 Í̠ hamene Arono ibu Hari Ho nene wiagoha ala homayadagua í̠bi nde Hari Nebo nene ogoniha howa homolebere. Í̠naga dinini í̠ damene homayarunaga dinini pu karu heba mandagi hole pobe.
DEU 32:51 Ala Arono homayadagua í̠bi nde homolebere larogoni irane libugua i̱naga bi larugo mo wahowa Kadese tano kaware dege ngelowa dindi ko iba dalu naibaga Meriba wiagoria howa Isaraele wali agali bu hearunaga deni i̱naga mini mo dindiha haribigonaga ibu homayadagua í̠bi homolebere laro.
DEU 32:52 Ani birigodago ai í̠na dindi ogoni ngagoria kaware hapara halu napoleberego handa amu hangu hole pu. Dindi ogoni i̱na Isaraele wali agaliruhondo muleberogoha í̠ napolebere, lene.
DEU 33:1 Ngode Datagaliwabenaga bi mana latagi haga Mosese ibuni homolene horo kaware dege ngelo howa ibugua Isaraele wali agaliru mo bayale helonaga bi lahalu hene.
DEU 33:2 Ibugua lalu, Anduane Homogo ibu Hari Sainai howa ibini. Ibugua ni tagira ibiradagua ibalu Idomo dindini ani ibini. Hari Parana heagoria howa ni darali haradagua bialu ibugua ibunaga wali agali bu hearuni daba hai haya. Dahuliyali daosini daga labenahe dewaore ibuni heba mandagi howa ibunaga gi tigahayagi ira hungu ale datagi haya.
DEU 33:3 Anduane Homogo ibugua ibunaga wali agaliru gubalini ho haga ka. Ibugua wali agali ibunaga karu mamage halu biamogo biaga. Ani biagago iname ibu geha bulu paluwa ibugua bia laradagua hale howa bialu holene nga.
DEU 33:4 Anduane Homogonaga Mana lowinigo Mosese i̱na tí langirugoni iname hale howa talialu bialu holene nga. Bi Mana ogoni galoneorego inanaga dindiha duniniore nga.
DEU 33:5 Isaraele hameigini mbira mbira bibahendebi tinaga agali haguane hearubi ti íbu ngoaiho heangi Anduane Homogo ibu Isaraele wali agalinaga kini ho hene, lalu lene.
DEU 33:6 Mosese ibugua Lubene hameigini hearu mitangi bialu lalu, Lubene hameigini emene hangu ha kagonigo ti biba halu homaiore nahelo hameledo, lalu lene.
DEU 33:7 Ibugua Yuda hameigini hearu mitangi bialu lalu, Anduane Homogo-o Yuda hameigini bu karume ina biamogo bia lowa í̠ olalu kagola í̠na tinaga bi larago hale halu biamogo bibe. Í̠na ti hameigini maru karu baba lone mandagi helo mo mogobu helabe. Tinaga waitigiru baba wai bialu kagola Anduane Homogo-o í̠nime ti hongo mialu biamogo bibe, lalu lene.
DEU 33:8 Ibugua Libai hameigini hearu mitangi bialu lalu, Anduane Homogo-o í̠naga hame ledego ege to̱le̱ kira mini Urimu Tumimula ogoni labome mo walia habe. Í̠naga biabe biahaga agali bayale Libaiali karuha howa mo walia habe. Masa dindini hearia í̠na ti ba handalu iba Meriba bereagoriabi tigua nde mana tigabiore birabe hondole í̠nime ti ba handarigoni.
DEU 33:9 Í̠na tihondo bia larodagua bialu halimu larigoni bialu í̠naga Habo Nalolene Bi lo wirigobi talialu bialu hayagoni. Uruni tigua ti aba ai̱yarubi damenerubi waneiginirubi tinaga bi hale holene nira ale lowa Anduane Homogo í̠naga bi hangu hale howa talialu bialu haga ka.
DEU 33:10 Tigua í̠naga Isaraele wali agalirume í̠naga Mana lowinigo talialu bialu helo biawai holebira. Tigua í̠naga lomabu delaga dabu kagoria loma biniru bo delaga bulebira.
DEU 33:11 Anduane Homogo-o í̠nime Libai hameigini uruni hongo halu anda hama irigi helo mo hongo haabo habe. Tigua biabe bialu karu hondowa turu ho habe. Uruni tinaga waitigi bu karu bibahendeore bo hengedaga bibe. Ti lone heyabe naheore helo bo hengedaga bibe, lalu lene.
DEU 33:12 Mosese ibugua Beniyamini hameigini hearu mitangi bialu lalu, Anduane Homogo ibunime Beniyamini hameiginiore ti gubalini howa handayaho haabo haga. Ibugua horo bibahendengi ti mamage haabo haga. Ibugua horo mbirubi yu wanahe ti baba mandagi haaboore haga kagoni, lalu lene.
DEU 33:13 Ibugua Yosebe hameigini hearu mitangi bialu lalu, Anduane Homogo ibugua Yosebe hameiginirunaga dindi mo gumbila halu iba dalu bayale ibilaabo helo. Dindiha howabi iba bayale duguaraga halu berelo hameledo.
DEU 33:14 Tinaga mabu hengedaruha mo gumbila halu ni daragome ira lini ibiralu do ndigindugu lalu tinaga tomo uruni bibahende bayaleore boga biaiore helobi hameledo.
DEU 33:15 Dindi bare hombene ala wini ngaruha tinaga tomo hangararu bayaleore anda hai helo hameledo.
DEU 33:16 Tinaga dindiha Anduane Homogohanda mo gumbila halu tomo bayale damene anda hai helo hameledo. Anduane Homogo abale ira hungu deagoha howa i̱hondo bi lenego ogoni ibugua ani bilo hameledo. Bayale holene uruni Yosebe hameigininaga íbu wilo. Yosebe ibu ibuni hamenerunaga haguane hayagome bayale turubi ani wilo.
DEU 33:17 Yosebe hameiginiru ti nogo bulumaga wangabe hongohe kagobi ka. Bulumaga gabua haguaneni ne gayane kirahe kaligobi ka. Ibunaga ne gayane mendego Manase hamewaneigini daosini dewaore karubi ka. Mendego Eberaimi hamewaneigini aria daosini dewaore karubi ka. Ne gayane kira ogoni labome dindi tara tarani hameigini palima pedaru bo he̱la amu haga biaga. Ti dindi gibuni ngaruha bope laga bima piaga ka, lalu lene.
DEU 33:18 Mosese ibugua Sebulunu Isagala hameigini hearu mitangi bialu lalu, Sebulunu hameigini tigua solowara domalu dindi tara taraha pialu biyinaya bialu karia bayale helo. Isaga hameigini tigua tini dindini howa biyinaga bialu karia bayale halu timbu dege helo hameledo.
DEU 33:19 Hameigini kira ogoni labome libuni dalu hari nene ngaruha wali agali tara tara karu bibahende íbu ngoai hadaba laga. Mo ngoai howa loma biniru damene bibahende bayale tigabiore bulene ngadagua bialu bo miaga ka. Tigua wali agali tara tara karu baba biyinaya bialu iba solowaraha winiru mialubi iba angeni ibamu bu ngaruha wini ngaru mialubi urunime mbirale mo yu anda ibirarume tini homogo gibiore haga ka, lalu lene.
DEU 33:20 Mosesehanda Gada hameigini hearu mitangi bialu lalu, Ngode Datagaliwabe ibugua tinaga dindi henge timbuni mo yangala hayagonaga ibu mini yaraga holene nga. Gada hameiginiore laiono hongohe kaligobi howa mbirale bo nole nendebu biruwa gi ge bo dogalu haguaneni iri karu abale dogaralidagua ani biaga ka.
DEU 33:21 Isaraele hameigini dindi tu wu tahole íbu ngoai hayangi Gada hameigini ti dindi bayale wiago tu wu mini. Dindi ogoni agali haguanerume habehe wiago ti hene. Isaraele agali haguaneru mandagi íbu ngoai howa tigua Anduane Homogonaga mana lowini ngarubi hale halu talialu bialu hene, lalu lene.
DEU 33:22 Ibugua Dana hameigini hearu mitangi bialu lalu, Dana hameiginiru ti laiono hungubalua ale howa Basana dindiha howa abaleore porabu tagi halu ibinigo ka, lalu lene.
DEU 33:23 Mosesehanda Nabadali hameigini hearu mitangi bialu lalu, Anduane Homogohanda mbirale bibahende bayale damenego Nabadali hameiginiru mialu ti homogo gibiore ho ka. Tinaga dindi tubaria Galili iba kuyama bedago bolangua halu unura puabo ka, lalu lene.
DEU 33:24 Ibugua Ase hameigini hearu mitangi bialu lalu, Anduane Homogohanda hameigini maru karu mo turu hayadagua ndo Ase hameigini tiore bolangua howa mo turu hene ka. Isaraele hameigini maru bu karume Ase hameiginiru baba howa tini miniha turu hagabu helo. Ti daluha ira olibe dewaore anda haga biragola tinaga olibe lininaga ibane timbuni biru wilo hameledo.
DEU 33:25 Tinaga tanoruha wai pabe hongoheore egeme bianda howa pabe pangaru aeaneme wabu helelo. Waitigiru tano ogoniha anda naibabeheda lowa ti gi nahe embedaho helo hameledo, lalu lene.
DEU 33:26 Ani lowa Mosesehanda ti bibahendehondo lamialu lalu, Isaraele wali agaliru-o inanaga Ngode Datagaliwabe kagobi mende naheore. Ibugua hari daligani wá holene heba ibalu hari beralibaha howa ina biamogo bule ibaga kagoni.
DEU 33:27 Ngode Datagaliwabe haluhe kago ibu inanaga ha do hagane andaore henego haabo ka. Ibu andaneha howa ibunaga gini ina maliaho haabo kamagoni. Tínaga dindi biago karulole anda pialu pirimingi ibugua bamba halu tínaga waitigi bu hearuni bo batagi halu uruni tínime bo wahai hadaba lalu langiyagoni.
DEU 33:28 Ani binigo nde Yagaba aguaneneru ti hado payabu karia mbiralime wai bima lole mbira naibaga. Hari daligaha howa dalu emene ibaabo haga ngagome dindi mo gomba haga. Dindi ogoniha tomo widirubi waini ibabi dewaore wirago tigua turu howa baya hangu mo wialu haga ka.
DEU 33:29 Isaraeleru-o tí turu timbuniore holene nga. Anduane Homogohanda tí biamogo bialu haru dai biniorego kami. Hameigini mende mbira ani binigo nahe. Anduane Homogo ibuniore tínaga wai humbibi ayu tibu nene gadele alebi kagoni. Ibugua tí ho pabebu howa wai beramingi ibunime tí mo wayali helaga ka. Tínaga waitigi bu karume tí kamiria ibuwa dugu bialu ina dara howa biamogo bidaba lolebira. Tígua waitigi uruni bope halu hengedoleberemi, lalu Mosesehanda lamaro bini.
DEU 34:1 Mosese ibu Moaba dindi tigabi yu dindi wiagoria pialu Hari Nebo nene wiagoha irigi halu pene. Ani pialu Hari Pisiga neneore wiagoria Yarigo tanonaga abene ni tagira ibiragohayagi pene. Mosese ibu ogoriani pu hearia Anduane Homogohanda dindi bibahende Isaraelealiru mule wiyago ibuhondo mo walia hai hene. Anduane Homogohanda Gileada dindi wiagoria howa mo walia hama pialu Dana hameiginirunaga dindi uyurahayagi wiarubi mo walia hene.
DEU 34:2 Ani bialu Nabadali hameigini hearunaga dindibi Eberaimi hameiginirunaga dindibi Manase hameiginirunaga dindibi Yuda hameiginirunaga dindibi mo walia hama pialu uyuraore ni paliragohayagi iba solowara timbuni Medidereniana bedagobi mo walia haiore hene.
DEU 34:3 Ani bialu Anduane Homogo ibugua Mosesehondo Yuda hameiginirunaga dindi maru abene unurahayagi wiarubi dindi bayale yu dindi dege piaho wialu Yarigo tanoha ayage ale mini dedi dewa buhe wiagobi yadai bialu piaho wialu unuraore Soa dindi wiagoria walia hairi hene.
DEU 34:4 Ani walia hai howa Anduane Homogohanda Mosesehondo lamialu lalu, Abale i̱na Abarahama Aisaga Yagaba imaruhondo bi lalu, I̱na dindi uruni bibahende tínaga waneigini aguaneneruhondo mulebero, lalu lowirugoni. Ai dindi ogoni áyu í̠ni deme dege handabelo mo walia harogonigoyu í̠ni dege dindi edegoniha anda pobelo yupe halu pu nalolebero, lene.
DEU 34:5 Ani layagola howa nde Anduane Homogonaga biabe biahaga agali Mosese ibu Anduane Homogohanda bi lamiyadagua Moabaliru dalu wiagoha howa homene.
DEU 34:6 Ani homayagola ibunaga tingini Anduane Homogo ibunime Moaba dindiha dindi ulini Bedebero tano handa de̱le̱ wiagoha hora hene. Dindi ulini ogoniha Mosesenaga homali agoriaore ngabe manda nabiore henego áyubi haabo kamagoni.
DEU 34:7 Mosese ibu ai̱yahanda taba hanayangi howa ibunaga mali hama ibinigo handari mbirani pira kira (120) hayagola homene. Ibunaga tingini hongohebi debi bayale dege howa homene.
DEU 34:8 Mosese homayagola Isaraele wali agaliru tini nde Moaba dindi tigabi yu dindi wiagoria horo pira tebira (30) ogoriani ibunaga dugu bialu duguanda biraabo hene.
DEU 34:9 Ani hai halu Anduane Homogohanda Nunu igini Yosuahondo mini gigabiwi holene ibuha wia hene. Ani binidagoni irane Mosesehanda ibuni henegoria Yosua ibuha aribia howa Isaraele wali agali haru helonaga dabo helene. Ani helayagola Isaraele wali agali hearume Yosuanaga bi layago hale halu Anduane Homogohanda abale Moseseha howa bia layadagua tigua biai halu hene.
DEU 34:10 Isaraele dindiha Anduane Homogonaga bi mana latagi haga Mosese ale mbira naheore winigo wiaabo kagoni. Anduane Homogo ibuni Mosesela bi laedene bialu agali kirali bi laradagua biaga hene.
DEU 34:11 Anduane Homogohanda Mosese dabalu Iyibi dindini agalime nabiagane alebi nahendene alebi dewaore Iyibi dindinaga kini heagobi ibunaga ami haru haga hearubi Iyibi dindini wiarubi bibahende mo ko hai hole ibugua Mosese í̠na ani bule pu lene. Anduane Homogonaga bi mana latagi haga maru tigua agalime nabiagane ale Mosesehanda binidaruni ale nabini.
DEU 34:12 Mosesehanda Isaraele wali agali bibahenderunaga deni howa biabe timbuni gibi biniru ale bi latagi haga maru henerume urunidagua mbira nabibeheore hene.
JOS 1:1 Anduane Homogo ibunaga biabe biahaga Mosese homeagola ibugua Nunu igini Yosuahondo lalu,
JOS 1:2 I̱naga biabe bia haga agali Mosese homayago. Ala i̱na dindi Isaraele wali agali tíhondo ngulebero larugoria áyu í̠bi wali agali urunibi tígua Iba Yodana domalu anda pole manda manda bilimu.
JOS 1:3 I̱na abale Mosesehondo lo winigodagua dindi tígua ge hai holeberemigo i̱na tí ngido.
JOS 1:4 Dindi tu au ngeledo. Dalu emene hangu ibagane wiagoha howa Hari Lebanononaga tu wulebira. Ni tagira ibiragoha iba timbuni mini Yuberedisi poragoria howa Hidialinaga dindibi ni paliragoria iba solowara Medidereniana tu wulebira.
JOS 1:5 Yosua-o í̠ keangi agali bibahendeme í̠ bope halu ti wayali nahabehe holebira. I̱na Mosesela harudagua í̠labi obiagonidagua dege holebero. I̱na í̠ yu wa naholebero.
JOS 1:6 Wali agali o karu ti mamaliruhondo dindi o ngago tí ngulebero lo wirugo í̠ha howa mo mulebero. Wali agali dindi ogoniha karu bu helo í̠na haru halu í̠ mini bilinahe howa miniha dungulo habe.
JOS 1:7 I̱na mana lo wirugo i̱naga biabe biahaga Mosesehanda langiyagome lo wiadagua bibahende bialu maru pugulani hondowa habe. Ogoni hondowa nahende tingi howa gi tigahayagibi gi lehayagibi handa a̱i̱ na̱i̱ buleni. Ani bialu kegola í̠ kegohayagi bayale hangu hama polebere. Anigo í̠na mini bilinaheore howa miniha dungulo habe.
JOS 1:8 Mana lo wirugonaga mbuga ogoria lo ngagoniore mitangitangi bialu mbiragabi horombebi lo manda biaabo habe. Ani buwa bibahende lo ngadagua biaiore hole bayuwa manda bibe. Anidagua biriyagua í̠na bule lowa mandabu keru biai halu bayaleore bima polebere.
JOS 1:9 Nalangiruyabe. Í̠ mini bilinahe howa miniha dungulo habe langirugo ndobe. Anduane Homogo í̠naga Ngode Datagaliwabe i̱ kogo í̠ poregoria í̠ heba holeberogo gi nahe bu miniha au buledabe lo mandabi buleni, lalu lamini.
JOS 1:10 Yosua ibugua wali agali haru haga haguane hearuhondo lamialu lalu, Wali agali kagoria purogo lowa lalu, Horo tebiru howa Anduane Homogo tínaga Ngode Datagaliwabe ibugua dindi ngule layago ngulebirago tígua Iba Yodana domole tomo manda manda buwa mali̱ya, lamilimu, lene.
JOS 1:12 Ani lowa hameigini Lubenebi Gadabi hameigini Manase maru talebu howa tihondo Yosuahanda ogodagua lalu,
JOS 1:13 Ngode Datagaliwabenaga biabe biahaga agali Mosesehanda bi langiyago ogo, Dindi ogoni tí biralimulo Anduane Homogo tíninaga Ngode Datagaliwabe ibugua ngiyadagoni, lenego bayuwa mitangi bilimu.
JOS 1:14 Tí onebi waneiginirubi bulumagarubi iba ange ni ibirahayagi ogoria heloleberemi. Tínaga wai biagane agali biarume ti hamene Isaraele hameigini o poraru biamogo bule tigua Iba Yodana ala domalu bamba holebira.
JOS 1:15 Tínaga Anduane Homogo Ngode Datagaliwabe ibugua ti dindi ni paliragohayagi biago mule layago milo. Mialu bayuwa ka handala tíbi tíni dindi Anduane Homogonaga biabe biahaga Mosese ibugua Iba Yodana ni tagira ibiragohayagi ngiyagoria hole dai bule, lalu Yosuahanda lene.
JOS 1:16 Ani layagola tigua Yosuahondo ladai bialu lalu, Iname í̠na bia larego bibahendeore biai holeberema. Í̠na pu laregohabi piai holeberema.
JOS 1:17 Mosesenaga bi hale harimadagua í̠naga bi laregobi hale holeberema. Anduane Homogo í̠naga Ngode Datagaliwabe ibugua Mosesela hayadagua í̠labi ogonidagua helo.
JOS 1:18 Mbiralime í̠ kalo manda nabiyaguabi í̠naga bi larego hale nahayaguabi bia larego nabiyaguabi ogonibigo ibu homelo bolebira. Í̠ mini bilinahe howa miniha dungulo habe, lalu lamini.
JOS 2:1 Nunu igini Yosuahanda Agasia howa agali kira dindi hondo wule pelo lowa lalu, Libugua Kenana dindi ohowa handama ibaga bule pialu dindi timbuni Yarigoore bayuwa hondowa bilibu, lene. Ani lamiyagola libugua pialu Yarigo tanoha pialu anda mbira heagoria anda pene. Anda ogoni bayanda wali mbira mini Lahaba ibunaga anda ogoriani libu anda pu palene.
JOS 2:2 Yarigo kini biago hale halu hearia Isaraele agali maru dindi hondo ibuwa mbiraga biago íbu ka layago hale hene.
JOS 2:3 Ani layago hale howa ibugua Lahaba berearia bi lawia halu lalu, Agali í̠ andaga ebere biraruaru inanaga dindi bibahende hondo wule íbu kago haru halu ibabe, lalu lowia hene.
JOS 2:4 Lahabahanda agali kira biago labo bira do helowa lalu, Heneneore handarimida. Agali maru i̱ andaga ogoria íbu ibinigo agoha howa ibiyabe i̱ manda nabido. Alendo neha Yarigo tano pabe panga payulene tu hayagola tagira pialu piyago agohayagi piyabe i̱ manda nabidogo. Áyu ogoore abale ge guariarimiyagua handa walia holeberemi, lene. Lahabahanda agali biagolabo anda daliga danginihayagi haru halu irigi howa aga wabiaga pu tondo ale mini palagasi gandulo winiyarume mo yihowa palia do helene.
JOS 2:7 Haibu ibiyago biarume agali biagolabo tali minule lowa abale Iba Yodana geme pahaga winiyago hendende abale pene. Pea tambu Yarigo tano panga payini.
JOS 2:8 Agali dindi taya bule ibiyago palia hondo nahe udu dangi biagoria berearia puwa Lahabahanda libuhondo lalu,
JOS 2:9 I̱ manda bialu koria dindi ogo Anduane Homogohanda tí nginigo. Wali agali bibahende dindi ogoria karume tí hondowa gi halu mogo timbuni lo ka.
JOS 2:10 Tígua Iyibi dindi yu wahalu ibirimigola Anduane Homogohanda solowara mini Iba Daramabi biago mo yo biyagola dindi hanguni ibirimiyarubi hale harima. Tígua Iba Yodana ni ibiragohayagi ibalu howa Amoroalinaga kini kira Sihonobi Ogabi bo waharimiyagobi hale harima.
JOS 2:11 Hale howa inanaga gubaliniha gi halu mogo timbuniore lo kamagoni. Ani biyiyago Anduane Homogo inanaga Ngode Datagaliwabe biago dindihanagabi harihanagabi Ngode Datagaliwabe ibuniore ka, lene.
JOS 2:12 Ibugua lalu, Ani biniyago áyu libugua bi heneneore mbira Anduane Homogo deni howa lalu, I̱na libuhondo bayuwa birudagua libuguabi i̱ hameiginiru biamogo bule lalu ladaba. Ani lowa ogonaga manane mbira i̱ hondoliya waliaore hadaba.
JOS 2:13 I̱ ababi i̱ ai̱yabi mbalinirubi hagibunirubi ti heba karubi bibahende dindi ogo meramiangi bo wanahe biamogo bule lalu ladaba, lene.
JOS 2:14 Ani layagola agali biago libugua ladai bialu lalu, Larabadagua nabiribayagua Ngode Datagaliwabe ibugua iyanaga holenego yamilo. O berabago í̠na mbirali lamia nabiriyagua iyame í̠naga bi laregoore mo yuwa Anduane Homogo ibugua dindi ogo ina ngirangi tíhondo bayuwaore buluma, lalu lene.
JOS 2:15 Lahaba ibu anda tanonaga to̱le̱ pabe timbunini biniyago ibugua windoha pulimu ibira howa agali biagolabo pulimu biagoria yani halu dalialu tagira pelene.
JOS 2:16 Pole piyagola ibugua libuhondo lalu, Libu haibu ibiyarume handa walia holigo harihayagi puwa horo tebiru bira do halibu. Agali biaru dai biragola libu andaga pole, lene.
JOS 2:17 Ani layagola agali biagolabo libugua Lahabahondo lalu, Í̠na iyahondo bilibu larigoore embeda naholobago, lene.
JOS 2:18 Í̠na bulene mbira ogo wai anda ibalu dindi ogo meramangi pu daramabi ogo windo iya minupe haregoria pongo bupe habe. Ani bialu í̠ ababi ai̱yabi hagibunibi mbalinirubi í̠ aba damene bibahende anda ogoria mo ngoai habe.
JOS 2:19 Mbirali ogoniangi anda ogoria nabere tagira puwa homayagua tene iya ndo ibuni holebira. Tamu ogoria bedago mbiralime gi wiyagua tene iya holeberaba.
JOS 2:20 Ani anigo í̠na iyame bialu kabago mbirali lamiriyagua o iya buleberaba laribaruni bame holebira, lene.
JOS 2:21 Ani layagola wali biagome e̱ lalu, Pudaba, lene. Libu peagola ibugua pu daramabi biago windo biagoria pongo bupe hene.
JOS 2:22 Dindi taya piaga agali biagolabo libugua puwa hariha bira do hene. Kini heagonaga agali biarume dindi bibahende wiagoha horo tebiru hai bini. Hai biyago naheya handala tigua Yarigo dai bini.
JOS 2:23 Ani bialu peagola agali kirali biagolabo bira do hayagoha howa dalialu Iba Yodana ubade halu puwa Yosua hearia dai bini. Dai buwa o biyarubi handayarubi lamiai hene.
JOS 2:24 Ani lamuwa lalu, Iyame manda bidabago Anduane Homogohanda dindi o handaribagoni bibahende ina nginiya. Wali agali bibahende hearume ina hondowa gi timbuniore halu heago, lene.
JOS 3:1 Egerebagiore hayagola Isaraele wali agali bibahende Yosua heba heyalu dindi Agasia anda bu harimigo yu wahalu Iba Yodana angehayagi pene. Puwa iba domole lalu ogoriani balai anda buwa hondo hene.
JOS 3:2 Horo tebiru peagola Isaraele wali agali haru haga haguane hearume wali agali balai anda bu heagoria purogo lowa
JOS 3:3 bi lamialu lalu, Loma binigo mo miagarume tínaga Anduane Homogo Ngode Datagaliwabenaga Habo Nalolene Bi lowinigonaga Mbogoyi biago payani yalu porago hondowa balai anda gialo paulalu ti poradagua talima pilimu, lene.
JOS 3:4 Tí hariga ogoha nahendene kamigonaga tigua walia holebira. Ani pialu howa Mbogoyi biago baba ti baba henge ge handari pira (100) kilomida mbira agima ngeloleberemi. Haparaore holemini, lene.
JOS 3:5 Yosua ibugua wali agali biaruhondo lalu, Yawi Anduane Homogo ibugua tíha howa agalime nabiagane ale bulebirago tíni áyu Ngode Datagaliwabe deni dodo nahe bayale holenaga mana ngadagua bilimu, lene.
JOS 3:6 Ani lowa Yosua ibugua loma binigo mo miaga biaruhondo lalu, Mbogoyi biago mo yalu bamba hadaba, lalu lamini. Ani layagola tigua Yosuahanda layadagua bini.
JOS 3:7 Ani biyagola Anduane Homogohanda Yosuahondo lalu, Horo áyu ogoriani wali agali bibahendeme handai helo i̱na í̠naga mini mo yaraga holebero. Ani berogola tigua i̱ Mosesela harudagua í̠labi kadalo manda bulebira, lene.
JOS 3:8 Í̠na loma binigo mo miaga Mbogoyi biago yaga biaruhondo au labe. Iba angeni haparaore howa ema nabi Iba Yodanani hope howa halimu labe, lene.
JOS 3:9 Ani layagola Yosuahanda wali agali hearuhondo lalu, Anduane Homogo tínaga Ngode Datagaliwabe ibugua bi larago hale hole ibidaba, lene.
JOS 3:10 Ani lowa ibugua lalu, Ngode Datagaliwabe haluhe haabo kago tí heba mandagi kamalo mitangi bilimulo ibugua tí biamogo biragola tígua Kenanalibi Hidialibi Hibialibi Peresealibi Giagasialibi Amoroalibi Yabusualibi hi nahe bo hilo batagi hai holeberemi.
JOS 3:11 Ani bialu dindi bibahendenaga Anduane Homogo ibunaga Mbogoyi biago Iba Yodana hanunini yu bamba haragola tí de hondoleberemi.
JOS 3:12 Áyu agali homberiali (12) Isaraele hameigini homberia (12) biagoria howa dabadaba.
JOS 3:13 Ani bialu loma binigo mo miaga biaru tigua ibani ge hade halu dindi bibahendenaga Anduane Homogo ibunaga Mbogoyi biago yalu poragola Iba Yodana gandula udu nunu biragola ibalu hari waradagua bulebira, lene.
JOS 3:14 Balawa wabiaga widi balila gandu lolene tu heangi Iba Yodana li timbuniore wiaga. Ogoningi wali agali poledagua hoba migimigi bialu hea tambu loma binigo mo miaga biaru tigua Mbogoyi biago yalu bamba hene. Ani bu wiago loma binigo mo miaga biarume Mbogoyi biago yuwa ge Iba Yodanani hayagola
JOS 3:16 iba o ibiyagoni pu nabi hundiape hene. Udura irigi howa dindi mini Adama wiagoria Saredana dindi hapara howa ogoriani iba biago biru haealadaga hene. Erenehayagi iba mini Homene Iba pole piyago yoabu wahayagola wali agali biaru ti Yarigo handa a̱i̱ howa dege ubadede bini.
JOS 3:17 Wali agali biaru ibalu piyago piai helo lowa loma binigo mo miaga biaru tigua Mbogoyi biago yuwa Iba Yodana hanunini iba yoabu wahowa dindi hangu wiagoria hondo hene.
JOS 4:1 Wali agali Isaraele hameigini biaru bibahende Iba Yodana domai hayagola Anduane Homogohanda Yosuahondo lalu,
JOS 4:2 Agali homberiali (12) hameigini homberia (12) biagoha howa dababe.
JOS 4:3 Dabowa au bidaba labe. Loma binigo mo miaga biaru hene muguni biagoria howa ege to̱le̱ homberia (12) payani mo yalimu. Yalu puwa áyu mbiraga paleremigoria ngelalimu labe, lalu lene.
JOS 4:4 Ani layagola agali homberiali (12) Yosua ibugua biabe ogoni bilo dabo helene biaru, Ibidaba,
JOS 4:5 lowa tihondo lalu, Anduane Homogo inanaga Ngode Datagaliwabenaga Habo Nalolene Bi lowinigonaga Mbogoyi yu kagoria emene puamu howa ege to̱le̱ homane mbira mbira tí Isaraele hameigini ta howa dugu payani yalimu, lene.
JOS 4:6 Ege to̱le̱ urunime tígua mani Anduane Homogo ibugua biyago mo mitangi bia helo. Mani tí waneiginirume, Ege to̱le̱ uruni aginaga winibe, laragola
JOS 4:7 tígua ladai bialu lalu, Anduane Homogonaga Mbogoyi biago yalu Iba Yodana domayagola iba biago bira migimigi binigonaga lamilimu. Ege to̱le̱ uruni ogoria wiaabo howa Isaraele wali agali mani hararu mo mitangi bia ho wiaabo helo wulebira, loleberemi, lene.
JOS 4:8 Agali biarume Yosuahanda layadagua bini. Anduane Homogo ibugua Yosuahondo bi lamiyadagua bialu tigua to̱le̱ homberia (12) Iba Yodana hanuni wiaru Isaraele hameigini tara tara hayadagua hangu hangu ta howa dugualu payani yalu puwa tini balai anda bu paliyagoriani ngelene.
JOS 4:9 Yosuahanda to̱le̱ homberia (12) mende yalu puwa iba hanunini loma binigo mo miaga biarume Mbogoyi biago yu hayagoria ngelene. Ege to̱le̱ odaruni áyu ogoriani wia ho wiaabo ka.
JOS 4:10 Anduane Homogohanda wali agalime bilonaga Yosuahondo lamiyadagua biai helo lowa loma binigo mo miaga biaru tigua Iba Yodana hanunini haho wiaabo hene. Mosese ibugua ala anidagua bilimu lalu lowinigo layadagua bini. Wali agali biaru tigua Iba Yodana abale ubade haga bini.
JOS 4:11 Wali agali bibahende dindi edeyagi piai heagola loma binigo mo miaga biarume Anduane Homogonaga Mbogoyi biago yalu ti bamba halu pene.
JOS 4:12 Lubene hameiginirubi Gada hameiginirubi Manase hameiginiru hanuni talebu ki bini biaru mendegome Mosesehanda bilimu layadagua wai biagane ale taba yalu tigua ala bamba halu pene.
JOS 4:13 Agali daosini pira maria (40,000) agima wai biagane wiyaru ale taba yalu Anduane Homogonaga deni Iba Yodana domalu Yarigo tano yu palepale wiagoria kululape hene.
JOS 4:14 Horo ogoniangi Anduane Homogohanda galone o binidarume Yosuanaga mini Isaraele wali agali hearu deni mo yaraga hene. Ani bialu Mosesenaga mini yaraga haabo hayadagua Isaraele wali agalime Yosua heangi ibunaga mini yaraga haabo hene.
JOS 4:15 Ani buwa Anduane Homogohanda Yosuahondo lamialu lalu, Loma binigo mo miaga biaruhondo Mbogoyi biago Iba Yodana hanuni howa yalu irigi hadaba la, lalu lamini.
JOS 4:17 Ani layadagua Yosuahanda ani lamini.
JOS 4:18 Ani lamiya handala loma binigo mo miaga tigua irigi halu ibiyagola iba li timbuni abale piyadagua lone pene.
JOS 4:19 Ege mbiranaga horo pini layagola Isaraele wali agali biarume Iba Yodana domene. Domalu puwa tigua dindi mini Giligalani Yarigo kaware howa ni ibiragohayagi balai anda bu hene.
JOS 4:20 Ogoriani Yosuahanda to̱le̱ homberia (12) Iba Yodana howa duguayayaru mo mogo buwa wima irigi hene.
JOS 4:21 Ibugua Isaraele wali agalihondo lamialu lalu, Mani tí waneiginirume ogo aginaga bu ngamibe layagua
JOS 4:22 tígua Isaraele wali agalime Iba Yodana yoabu wahowa dindi dege wiagola ubade halu penegonaga te lalimu, lalu lamini.
JOS 4:23 Lamialu lalu, Anduane Homogo tínaga Ngode Datagaliwabehanda Iba Yodana yoabu wa helowa tí bibahende iba domai hemigola pene biadagua piyaru te lalimu. Ibugua solowara mini Iba Daramabi ina ibirimagola biyadagua bini lalimu.
JOS 4:24 Ani biyago hale howa wali agali dindi bibahendeni karume Anduane Homogonaga hongo timbuniore ogobida lowa manda biai holebira. Ani biragola tíguabi Anduane Homogonaga mini mo yaraga halu haho wiaabo holeberami, lalu lamini.
JOS 5:1 Amoroalinaga kini Iba Yodana ni paliragohayagi henerubi Kenanalinaga kini iba solowara mini Medidereniana hapara ho henerubi tigua Anduane Homogohanda Isaraele wali agali Iba Yodana domalu pelonaga iba biago mo hundia haya layago hale howabi Isaraele wali agali hondowabi tinaga gubaliniha gi timbuni halu mogo lowa durulalu hene.
JOS 5:2 Ogoningi Anduane Homogohanda Yosuahondo lalu, Í̠na are neheme Isaraele agalinaga dongone podo mabu bule manda bibe, lene.
JOS 5:3 Ani layagola Yosuahanda are neheme Isaraele agali bibahende dongone podo mabu bini. Hari odago mini Hari Dongone Podene lalu wini.
JOS 5:4 Yosua ibugua agali biarunaga dongone podo mabu binidaruni irane manda ogobi buwa bini. Iyibi dindi yu wahalu ibiyaru agali igiribi bibahende dongone podo mabu biai hene. Ani binigo mani Isaraele wali agali biaru ti dalu emene hangu ibagane wiagoria ibaga bu hearia mali pira maria (40) henego ogoningi igiri hono wiyaru bibahende dongone podo mabu nabi hene. Mali uruni piai heangi agali wai bibehe hayaru Anduane Homogohanda layadagua nabiyagola homai hene. Anduane Homogo ibugua bi ala lowinigo ogo, Tí dindi bayaore gibi ngulebero larugo nahendedemiore homoleberemi, lo winidagua ani bini.
JOS 5:7 Anigo agali homayaru igini ho aribia hayaruni ti dongone podo mabu nabiyagola bi lo winidagua hendelo lowa igini o biaru podo mabu bini.
JOS 5:8 Isaraele hameigini biaru dongone podo mabu biai howa helayaru dere biyaru dabi helo lowa balai anda bu hayagoria hadai bialu hondo hene.
JOS 5:9 Ani biaria Anduane Homogohanda Yosuahondo lalu, Tí Iyibi dindi howa garabaya biabe ale bia halu howa tagaho harimigo horo áyu ogoni i̱na mo waharogoni, lalu lene. Dindi o binidagoni mini Giligala wini. Mini ogoni áyubi wiaabo ka.
JOS 5:10 Isaraele wali agali Giligala dindi palepale wiagoria balai anda bu hayagoni Yarigo dindi hapara hearia Bolangua Halu Penego Horo mitangi bialu ogonaga tomo ege o biagoninaga horo denengi (14) nelayagola howa nene.
JOS 5:11 Egerebalene tigua tomo Kenana dindini wini pigane ogoningi ladi ale mini widi hirinibi mberedi yidi nahe howa hirinibi nene.
JOS 5:12 Horo ogoningi howa tomo mini mena hariha howa ala ibira haabo hayago ibira nahe Isaraele wali agali tigua tomo Kenana dindini wiaru nene.
JOS 5:13 Yosua ibugua Yarigo hapara howa handalu hearia agali mbira wai biagane ayu tibu gime yu howa ibu denguini ha daga hearia de hendene. Ani hondowa Yosua ibugua agali biago hearia hapara howa lalu, Í̠ inanaga wai biaga amiali biaru aria mbira kebe be waitigi agali kebe, lene.
JOS 5:14 Ani layagola agali biago ibugua ladai bialu lalu, Hale harigoni kirabali ndo labolabo. Anduane Homogonaga ami karunaga haru bamba hagane agali i̱ ko, lene. Ani layago hale howa Yosua ibugua dindini bulu palu ibira howa agali biagohondo lotu lalu howa lalu, Anduane-o i̱ í̠naga biabe bia hagane agali kogo i̱na agi buliya hameledebe, lene.
JOS 5:15 Ani layagola Anduane Homogonaga ami karunaga haru hagane biago ibugua Yosuahondo lalu, Dindi o kegoni Anduane Homogo ibunaga dindi loma bia ho winini kego ge su golo ngela, lene. Ani layagola Yosua ibugua layadagua bini.
JOS 6:1 Isaraele wali agali biaru wara tagi hole lowa Yarigo tano pabe bu mabu bu wiagoria pabe panga paya tagi howa mamage ho hene. Ani biyagola Yarigo tanohayagi howa wali agalime anda pubi tagira íbubi bibe nahe wini.
JOS 6:2 Ani bu wiagola Anduane Homogohanda Yosuahondo lalu, I̱na Yarigo wali agalinaga kini heba wai biagane agali gi nahe elahe karu bibahende í̠naga gini ya harogoni, lene.
JOS 6:3 Í̠naga wai biagane karu heba í̠ni heba tígua Yarigo tano horo mbiru tidiyu mabu bilimu. Ogonidagua horo waragaru dege bilimu.
JOS 6:4 Loma binigo mo miaga kariali mbelo biguli pu lagane nogo sibi wangabenaga ne gayane biaru yagayaga bialu tigua Habo Nalolene Bi lo winigonaga Mbogoyi biago yalu poragoria bamba halu pelo ani pudaba labe. Horo kanengi í̠bi í̠naga wai biagane ami hayarubi heba loma binigo mo miaga biaru tigua tinaga mbelo biguli pu lagane biaru pu lama ka halu mabu bilo ani bidaba labe.
JOS 6:5 Ani bidagola mbelo biguli pu lagane biaru tigua ne hambu lo mbiraore howa halu mbiraore hangu luore pu la ho wiaabo helo. Ani biragola hale howa agalime ga̱ timbuni hongo howa lagimbu bidaba labe. Ani beramigola Yarigonaga pabe bu mabu bu ngagoni podo haealo bagabu ibira holebira. Ani birangi wai biaga amiali bibahende biaru tígua anda piai holebermi, lalu Ngode Datagaliwabehanda Yosuahondo lamini.
JOS 6:6 Ani layagola Yosua ibugua loma binigo mo miaga biaru ibidaba lowa lalu, Tígua Anduane Homogonaga Mbogoyi biago payani yalu tí karialime mbelo biguli pu lagane biaru mo yalu bolangua halu bamba halimu, lene.
JOS 6:7 Ani lowa ibugua wali agali hearuhondo lalu, Tí bibahende Yarigo tano pabeha pu mabu bule pudaba. Wai biaga ami agali maru tígua ala Anduane Homogonaga Mbogoyi biago yidago bamba halu pudaba, lalu lene.
JOS 6:8 Yosuahanda, Bilimu, layadagua bialu ami agali maru biaru tigua ala bamba halu pene. Ani buwa loma binigo mo miaga mbelo biguli pu lagane biaru tigua dombeneni pialu loma binigo mo miaga maru Mbogoyi biago yalu uruni peagola erembirani amiali maru biaru ti haruru pene. O piyadagoni pialu howa mbelo biguli pu lama pene.
JOS 6:10 Yosua ibugua o piyadaruni ti ala lamialu lalu, Wai mambolo bulamini bibi lolemini. I̱na bi lalu ladaba larongi dege lole, ani lalu lamini.
JOS 6:11 Ani lowa ibugua loma binigo mo miaga agali wabuni biaruhondo lalu, Anduane Homogonaga Mbogoyi biago yalu tano pabeha halu mbira pu mabu bidaba, lalu lamini. Ani layadagua buwa tigua wali agali bibahende paleagoria palue dai bini.
JOS 6:12 Egerebagiore hayagola Yosua ibu heyalu loma binigo mo miaga biarubi wai biaga ami agali maru biarubi horo piganengi biyadagua dege pu mabu bialu dai bini. Ani peagola ala wai biaga agali ti bamba halu pialu loma binigo mo miaga kariali mbelo biguli pu lagane biaru ti mbelo pu lama pialu loma binigo mo miaga marume Anduane Homogonaga Mbogoyi biago mo yalu uruni ti bamba halu peagola ere mbirani wai biaga ami agali maru biaru tigua mama haruru pene. Ti bibahende ani pu mabu bialu hearia mbelo biguli biaru pu laabo halu pene.
JOS 6:14 Horo mendengi halu mbira hangu pu mabu bialu dai bini. Horo waragaru ogonidagua biaabo hene.
JOS 6:15 Horo kane hayagola tigua muna biyagola heyini. Ani buwa tigua pu mabu ala biyadagua horo ogoningi dege ka halu pu mabu bini.
JOS 6:16 Ani piai howa kane haluore pu maro bialu loma binigo mo miaga kariali biarume mbelo biguli leagola Yosuahanda agali hearuhondo lamialu lalu, Anduane Homogo ibugua dindi timbuni ogo tí nginigo wai mambolo balu bi dalimuore ladaba.
JOS 6:17 Dindi ogoniha ngagoni damenego Anduane Homogo ibuhondo loma bia haradagua beremago bibahende bo hilu wahai hami̱ya. Lahaba ibugua inanaga agali kira taya piyago labo ibu andaga bira do helayiyagonaga ibubi ibu damenerubi ti hangu nabami̱ya.
JOS 6:18 Bo hilu baga bu wahabehe ngago mbira mo yulamini. Mo yarimiyagua Isaraele wali agali kagoria ko mo yu anda ibalu mo ko holene wulebira.
JOS 6:19 Anigo silibamebi ngolomebi boronosimebi aeanemebi wabiniru bibahende Anduane Homogo ibunaga lowa mo bagi ho wilimu. O biaruni ibunaga muni wiaga wiagoha mo wulene nga, lalu lene.
JOS 6:20 Ani lai heagola loma binigo mo miaga mbelo biguli pu laga biarume biguli pu lalu hene. Mbelo biguli pu layuago hale howa agali wai mambolo hongo howaore balu bi dalimu layagola to̱le̱ pabe timbuni biagoni podo haealo bagabu ibira hene. Ani biyagola wai biaga ami biarume handayago hondo yalu dindi anda puwa bareni irigi halu tigua Yarigo tano karulene.
JOS 6:21 Karulalu howa tigua wai biaga ayu tibume bibahende hearu bo wahai hene. Wali agali wahebi daliahebi nogo bulumagabi sibibi dongibi bibahende bo hilo wahai hene.
JOS 6:22 Ani biyagola Yosuahanda agali kira ala taya piyago labohondo lalu, Bayanda wali biago andaga puwa ibunibi ibunaga damene anda ogoriani bedarubi bibahende buleberaba laribidagua haru halu tagira ibule pudaba, lalu lamini.
JOS 6:23 Ani layagola agali kira biagolabo libugua Lahaba andaga puwa ibubi ibu ababi ai̱yabi mbalinibi ibunaga damenebi biabe bia hagabi ti bibahende haru halu tagira puwa Isaraele wali agali balai anda bu paleagoha ha para howa haru íbu helene.
JOS 6:24 Ani buwa tigua dindi timbuni o biagoni ira hedope howa do gindulo wahene. Mbirale ngolomebi silibamebi boronosimebi aeanemebi wabiniru dege dabo yuwa Anduane Homogo ibuninaga muni wiaga wiagoha ngelene.
JOS 6:25 Bayanda wali Lahaba ibugua ala agali kira Yosuahanda, Yarigo dindi taya pudaba, layago labo ibu andaga bira do helayagonaga Yosuahanda ibubi ibu damenerubi bibahende biamogo bialu nabe helene. Ani biyagola howa Lahabanaga aguaneneru ti Isaraele dindini áyu ogoningi haabo ka.
JOS 6:26 Horo ogoningi Yosua ibugua bi hongohe mbira lo wialu lalu, Wali agali mbiralime Yarigo tano timbuni ogo lone bia dai bule manda biyagua ogoni ibu Ngode Datagaliwabenaga ha holene heba holebira, lowa lalu, Mbiralime anda gene pigane tenialu kago ibu igini wahene homolebira. Mbiralime dindi pabe ogonaga panga bia dai birago ibu igini heyogone homolebira, lalu lene.
JOS 6:27 Ani binigo Anduane Homogo ibugua Yosuala haabo halu ibunaga mini dindi bibahende wiagoniha loyogo lene.
JOS 7:1 Anduane Homogohanda Isaraele wali agalihondo Yarigo dindini mbirale mbira mo yulamini lalu mana lamiyago puguini. Agali mbira mini Agana ibugua mbirale mo yulamini layaru mo yayagome Anduane Homogonaga lembo holene Isaraele wali agali heba helene. Agana ibu aba Kami ibu aguane Sabadi hene. Yuda hameigini mbira Seraha heneru ti ibu hameigini hene.
JOS 7:2 Yosua ibugua agali maru Yarigo howa tano mbira mini Ai pudaba lene. Ai tano ogoni Bedele tano howa ni ibiragohayagi Bedabene tano wiago kaware ha para ho wini. Anigo Yosua ibugua, Tano ogoni abidabe hondole taya pudaba, lene. Ani layadagua
JOS 7:3 tigua pialu dai buwa lalu, Ai tano timbuniore ndogo bibahendeme polene nakarulapego agali daosini kirabi (2,000) tebirabi (3,000) dege pela, lalu Yosuahondo lamini.
JOS 7:4 Ani layagola agali daosini tebira (3,000) agimame hangu Ai wali agali bole pene. Pu piyagoyu babe naheya handala pora bialu dai biai hene.
JOS 7:5 Ani biyagola Ai agali biarume dindi pabe weagoria howa Isaraele agali bama talima pialu dindi anda bule ege to̱le̱ duguagaha bama puabo hene. Ani puwa tigua Isaraele agali bare mbirani dalialu hearia pira tebirani waragaria (36) agima bo wahene. Ani biyagome Isaraele agalinaga turu holene biba howa ti gi timbuni ho hene.
JOS 7:6 Yosua halu hameigini hangu hangu haru hagane haguane biarume miniha genda timbuni howa aga bu hemiruni budubaga bialu danga duguwa haguaneni hirai hene. Ani buwa tigua wanakui dindiha yadindi howa bulu paluwa Anduane Homogonaga Mbogoyi biago wiagoria biralu nelene.
JOS 7:7 Ani buwa Yosuahanda lalu, Anduane Homogo Bibahende Haru Haame Ho Haga kego-o í̠na ina Iba Yodana domalu dindi ogoria aginaga haru halu ibiribe. Í̠na Amoroali karume ina bo wahelonaga haru halu ibiribe. Ina kamaru karulape Yodana iba ange edeyagi harimago í̠na helowa naharigo aginagabe.
JOS 7:8 Anduane Homogo-o Isaraele agali biarume ala nabinidagua mbira áyu gi howa pora bialu dai biyadagola bi agobi loabe toba halu tai bidogo.
JOS 7:9 Kenanalibi hameigini maru karubi ti bibahendeoreme ogobi biya lalu hale hai holebira. Hale howa tigua ina bibahende ho mabu bupe howa bo hilo wahai howa inanaga mini dindi ogoria nawulubada. Ani bulubadagonigo í̠na Ngode Datagaliwabe hongo ogobi ko lalu walia harigo hondowa dege bulubadago í̠naga mini hongohe wiaabo helo agua buleberebe, lene.
JOS 7:10 Ani layagola Anduane Homogohanda Yosuahondo hongo howa lalu, Í̠ ogoria aginaga dindini bulu palu ngebe. Heya.
JOS 7:11 Isaraele wali agalime koore biyagoni. I̱na tí ko bulumini larugo birimida. Bibahende ngago bo hilubaga bilimu larugodagua ndo tigua page bialu ke̱ halu mbirale biaru maru muwa tininaga baba mandagi wia tago howa nga.
JOS 7:12 Ogonibi biyagome Isaraele wali agali tigua tinaga waitigi baba wai nabibehe hayagoni. Tigua waitigi biaru hondowa pora bialu dai biyagoni irane ti tini bo hilubagabu waholene ale ka. Mbirale bibahende bo hilubagabu wahalimu larugo mo ngamigo odaruni muwa haeala bagabu wanaharimiyagua i̱nabi tí baba mandagi naholebero, lene.
JOS 7:13 Ibugua hongo howa lalu, Heya. Wali agali bibahende ko ngaru mo wahalu yawi i̱ deni holenaga manda manda bilimu. Anduane Homogo Isaraelenaga Ngode Datagaliwabe i̱na ti bibahendehondo bi ogobi lolenaga o larodagua lamiai habe. Tihondo i̱na bi ogobi lalu, Tí marume mbirale tara tara bo hilubagabu wahalimu larugo mo yu íbu ngamigoni. Anigo mbirale uruni mo wanaharimiyagua waitigi baba wai bialu tí hongo nahe howa wayali nahabehe holeberemi.
JOS 7:14 Egerebagi haragola hameigini hangu hangu haru ibugu bilimu. Ani bialu i̱na hameigini ogoha ko nga larogo ibu hameigini emene ogoniha hayadagua ibugu bilo. Ani biragola i̱na hameigini emene ogoniha ko nga larogo ibu aba ai̱ya baba libunaga waneigini baba hangu hangu ibugu bilo. Ani biragola i̱na aba ai̱yabi waneiginibi uruni tiha ko nga larogo ibu agali hangu hangu ibugu bilo.
JOS 7:15 Agali ogoha ko nga lalu handa walia harago agali ogoni ibugua mbirale namo yalimu larugo ale maru ibu mo yalu íbu wiyagome i̱naga Habo Nalolene Bi ti baba lo wirugo habo layadagonaga ibu irani bo delolene nga. Ibugua mana ogonibi biyagome Isaraele wali agali heagoria taga bini ale mbira yu anda ibiyada, laya lalu lamiai habe, lalu Anduane Homogohanda ani lene.
JOS 7:16 Egerebagi hayagola Yosuahanda Isaraele wali agali hameigini biaru bibahende hangu hangu haru ibugu bini. Ani buwa Yuda hameiginiha ko nga lalu Yuda hameigini daba a̱i̱ hene.
JOS 7:17 Ani buwa Yuda hameiginiha howa ibunaga hameigini emene bibahende hangu hangu haru ibugu bini. Ani buwa hameigini emene Seraha ko nga lalu daba a̱i̱ hene. Sera hameigini daba a̱i̱ hayagola Yosua ibugua hameigini ogoni aria biaru ababi ai̱yabi waneiginibi hangu hangu haru ibugu bini. Ani haru ibugu biyagoria Sabadi ababi ai̱yabi waneiginibi daba a̱i̱ hene.
JOS 7:18 Ani daba a̱i̱ hayagola ibugua Sabadi ababi ai̱yabi waneiginibi hangu hangu haru ibugu bini. Ani haru ibugu biyagola Kami igini Sabadi aguane Agana daba bagi hene.
JOS 7:19 Ani biyagola Yosuahanda Aganahondo lalu, I̱ igini-o Anduane Homogo Isaraelenaga Ngode Datagaliwabe deni howa henene tigatiga biridadaguaore lapani ha. Maru ya do holeni biridadagua tigatiga langiai ha, lene.
JOS 7:20 Ani layagola Aganahanda ladai bialu lalu, Heneneore larigoni. I̱na Anduane Homogo Isaraelenaga Ngode Datagaliwabehanda bi layago hale howa mo waharu. I̱na agua biru.
JOS 7:21 Bo hilubaga birimago bialu howa handalu hewaria aga baya de mborerebiore Babilono dindi tawe mbira wiaria handaru. Siliba genda magini kilogarama kira agima polene wiagobi ngolo maru genda magini emene gombedene hangu pobehe wiagobi handaru. Hondowa i̱ hame timbuni layagola mo yaru. Odaruni áyu i̱naga balai anda tamuha hora ko. Siliba biago dindiha ngo, lalu lamini.
JOS 7:22 Ani layagola Yosuahanda, Agali maru hondo pudaba, layagola uruni tigua gerai lalu puwa handalu hearia mbirale bo haealobaga bilimu layaru aria o layadagua siliba dindiha wiaria handa walia hene.
JOS 7:23 Handa walia howa tigua mo yalu Yosua heba Isaraele wali agali bibahende biaru heagoria yalu ibuwa Anduane Homogonaga deni ibira howa ngelene.
JOS 7:24 Ani biyagola Yosuabi Isaraele wali agali biarubi bibahendeme Agana minini. Siliba biarubi aga bayale biarubi ngolo gaibu mini biarubi Agana waneiginirubi nogo bulumagarubi dongirubi sibirubi ibunaga balai andabi Agananaga wiaru damene bibahende tigua dindi mini Genda Biaga Guane wiagoria mo yi haruha bialu pene.
JOS 7:25 Dindi ogoriani odo howa Yosua ibugua hongo howa Aganahondo lalu, Í̠na ina hemagoria ko haru anda ibirigo Anduane Homogo ibuguabi í̠ni ko haru anda ibulebira, lene. Ani layagola bu heago bibahendeme Agana to̱le̱me bene. Ibunaga onene waneiginibi to̱le̱me balu dabudabu wiaru heba ibuni heba irani balu delai hene.
JOS 7:26 Ani buwa tigua to̱le̱ dewa mo yu ngoai howa o biaru bibahende yi hene. To̱le̱daruni dindi odagoria áyu ogoningi wia ho wiaabobo nga. Irane o binidagome dindi ogoni mini Genda Biaga Guane wini. Ani biai hayagola Anduane Homogohanda lembo ala hayago hadene.
JOS 8:1 Anduane Homogohanda Yosuahondo lamialu lalu, Í̠na gi nahe gendabi nahabe. Ai dindinaga kini kagobi ibunaga wali agali karubi dindi timbuni wiagobi uruni bibahende tínaga holebira. I̱na áyu tí mo wayali heloleberogo tínaga wai biaga ami agaliru heba Ai irigi halu pilimu.
JOS 8:2 Ala Yarigobi Yarigonaga kini henegobi barimidagua dege Ai boleberami. Anigo Ai bo waharimingi dabudabu ngaru tíninaga hole mo yalimu. Tinaga nogo bulumagabi nogo tara tarabi ogoriani karu bibahende tínaga hole haru halimu. Tígua erembirahayagi mo mogola howa bole manda manda bu halimu, lalu lamini.
JOS 8:3 Ani layagola Yosua ibugua Aiali bole ibunaga wai biaga ami agali bibahende hearu haru halu bo pole lo manda manda bini. Ibugua wai biaga moneheru dununiru hondowa daosini pira tebira (30,000) daba bagiho helowa mbiraga,
JOS 8:4 Pudaba, lowa wai hono mialu, Dindi timbuni ogoninaga abene ede ni paliragohayagi puwa bira do halimu. Kaundia puabo holemini porabu anda halu bole manda manda bu halimu.
JOS 8:5 Agali i̱ heba eberamaru iname Aialime hendelo manda buwa hapara holeberema. Ani beremagola Aiali biaru tigua ina hondowa bole tagira ibulebira. Ibiragola iname gihe tingi howa ala pora bialu pirimadagua pora bialu poloma.
JOS 8:6 Tigua manda bialu karia ina ala pora bialu pirimadagua pora lowa bole talima ibulebira. Iname tini tano yu wahalu tagira ibilo manda buwa ale haru halu polomago
JOS 8:7 tígua tano ogoni mialu karulole ibalimu. Anduane Homogo tínaga Ngode Datagaliwabe ibugua tano tí karulalimulo ngulebira.
JOS 8:8 Tígua tano ogoni bibahendeore miai howa Anduane Homogohanda layadagua bo heda halimu. Tígua ogonidagua bilimulo o larogoni, Yosuahanda lai hene.
JOS 8:9 Ibugua ani layagola agali biaru tigua Ainaga erembiraha ni paliragohayagi Bedelela Aila hengebanegoha bira do hole pene. Yosua ibu mbiraga hayagola Isaraele wali agali baba mandagi palu hene.
JOS 8:10 Egerebagiha Yosuahanda heyalu ami agali biaru olo ngoai halu ha hendene. Ani buwa Yosuabi Isaraele hameigini haru haga haguane biaru heba tigua ami agali biaru haru halu Ai pole pene.
JOS 8:11 Tigua Ai dindi anda pole peagoriani puwa tigua Ai dindinaga uyurahayagi pu hene. Ani buwa ti baba dombeneni dindi buguni yu dindi wu yalu pelowa hene.
JOS 8:12 Yosuahanda agali biaru aria daosini duria (5,000) tale buwa Ainaga ni paliragohayagi Bedelela hengebanegoha bira do helene.
JOS 8:13 Wai biaga ami agali biaru dewa bayuwa mo tiga bu wahowa Ai dindinaga uyurahayagi berelene. Ani buwa agali maru ni paliragohayagi berelene. Yosua ibuni dindi buguni biagoha palima dai bini.
JOS 8:14 Ainaga kini biagome Yosuanaga agali hearu hondowa ibuguabi ibunaga agalirubi abaleore tagira pialu Yodana dindi buguni puamu halu wai bule tagira pene. Dindi ogoni wai abale bialu Isaraele agali hayagoria dege wai bule penego ibugua Yosuahanda agali erembiraha howa belo wai hono bereleago nahende pene.
JOS 8:15 Yosua halu Isaraele agali biaru ke̱ howa pora bialu petingi howa dindi ko wali agali nahagaha pene.
JOS 8:16 Aialinaga haru haga hearume tinaga wai biaga agali biaru olo ngoai halu Isaraele agali biaru piyadagua bama talima, Mali̱ya ibidaba, lene. Isaraele agali biaru tigua Aiali biaru haru halu tininaga tano biago yu wahalu Isaraele agali biarume haru halu pu wahene.
JOS 8:17 Ai agali hearu bibahende Isaraele agali biaru talima peagola Ai tano biagonaga panga dugu paya buwa wiagola mamage holene agali mbira naheore wini.
JOS 8:18 Ani bu wiagola Anduane Homogohanda Yosuahondo lalu, Í̠naga yandare yidegoni Ai dindihayagi nguni yadeha. Tano ogoni áyu í̠ ngero, lene. Ani layagola Yosua ibugua bia layadagua bini.
JOS 8:19 Ibugua yandare biago yaraga hayagola agali bira do hayarume abale tagira ibalu Ai tano wiagoniha anda puwa karulalu delene.
JOS 8:20 Aiali wai biaga biaru handadai bialu hearia hagua timbuni mbira udu harini irigi hayane hendene. Isaraeleali tigua pora bialu petingi hayarume Aiali biaru baba wai bule handadai biyagola tigua pora bialu polene hariga nawiyane hendene.
JOS 8:21 Yosuabi agali ibu heba hearubi tigua Ai tano biago agali bira do helayarume delayago hondowa tiguabi pora bialu pole tingi howa piyarume beregeda dai biyagola Aiali wai biaga o ibiyaru bo wahai hole bene.
JOS 8:22 Isaraeleali ala Ai tano delalu hayarume dalipe howa agali Yosua heba hayaru baba Aiali biaru homabu bupe howa bibahende bo wahai hene.
JOS 8:23 Ai tanonaga kini biago hangu gime minuwa Yosua hearia minu yalu pene.
JOS 8:24 Isaraeleali biarume dindi ko wali agali nahaga wiagoria Aiali pora bialu pu hearu bibahende bo wahai hene. Ani bialu tigua Ai tano biagoria dai buwa wali agali dindi ogoriani hearu bibahende bo wahai hene.
JOS 8:25 Yosuahanda yandare biago yupe nahe dindi ogoriani hearu bibahende bo wahaiore helo yadeho wiaabo hene. Horo ogoningi wali agali daosini homberia (12,000) bibahende bai hene.
JOS 8:27 Isaraeleali biaru tigua Anduane Homogo ibugua layadagua nogo bulumagabi nogo tara tarabi dabudabubi ti hole mo yalimu layadagua mo yini.
JOS 8:28 Yosuabi ibunaga agali biarubi tigua Ai bo heda hene. Bo heda henedagoni muguni áyubi wiaabo ka.
JOS 8:29 Yosua ibugua Aialinaga kini biago irani mo eanogo da howa wialu nelene. Ni paliyagola Yosuahanda layadagua tigua ibunaga tingini irani mo eanogo da ho ngelayago mo yu daluwa Ai hariga anda pugu bulene biagoria yalu puwa ngelene. Ani buwa tigua to̱le̱ timbuni dewa wiaru duguwa yi hene. To̱le̱ winidaruni áyubi wiaho nga.
JOS 8:30 Ani buwa Yosua ibugua mbirale bo lomabu delaga dabu mbira Anduane Homogo Isaraele wali agalinaga Ngode Datagaliwabehondo bini.
JOS 8:31 Ala Anduane Homogonaga biabe bia haga Mosese ibugua Isaraele wali agalihondo bilimu lalu lo winiyadagua Yosuahanda ani bini. Mosesehanda Mana lowinigo ogo, Mbirale bo lomabu delaga dabu mbira ege to̱le̱me wabilimu. To̱le̱ uruni aeaneme podenego ndo homane mbira mbirame wabilimu, lowinigo wiadagua bini. Ani buwa Isaraele wali agalime dabu o biagoriani Anduane Homogohondo mbirale bo loma bialu irani delai ho mialu Anduane Homogola ho gimbu bulenaga lomabi ibuhondo delalu mini.
JOS 8:32 O biagoningi wali agali biaru handaya ho helowa Bi Mana Mosesehanda ala gilibu winigo Yosua ibugua ege to̱le̱ni Bi Mana ogoni gili bini.
JOS 8:33 Ani biyagola Isaraeleali biarubi tinaga haru haga biarubi wai haru bamba haga biarubi godi hale howa dabagane heneyarubi wali agali tara ti baba heneyarubi ti bibahendeoreme duguduguni kira howa dombeni Anduane Homogonaga Mbogoyi biago loma binigo mo miaga biarume yu heagohayagi wanakui muwa duguduguni mendegome Hari Gerisimihayagi erembira muwa mendegome Hari Ebalahayagi erembira muwa hene. Anduane Homogonaga biabe bia haga Mosesehanda lalu, Tí mo turu halu bayale helonaga anidagua bilimu, lalu lowini.
JOS 8:34 Yosua ibugua Anduane Homogohanda Mana lowinigonaga mbuga yamuwa tihondo hongo howa daga lai hene. Mana lowiniyaru mo turu halu bayale holenebi ha halu pani nolenebi bibahende lowinidagua daga lai hene.
JOS 8:35 Mosese heneyangi Mana lo wiadagoni bibahende wali agalibi waneiginibi Isaraeleali dege ndo wali agali tara tara ti heba heneyarubi bibahende ngoai ho hearu hale hai helo Yosuahanda daga lai hene.
JOS 9:1 Iba Yodana ni paliragohayagi howa wali agalinaga kini bibahende hearume Isaraelealime wai bialu agali bo bibahara layago hale hai hene. Hari bare barehayagi hearumebi hari biaru tene teneha hearumebi iba solowara Medidereniana bereagohayagi hearumebi uyura Lebanonohayagi howabi hale hai hene. Kini o hale henedaruni Hidialibi Amoroalibi Kenanalibi Peresealibi Hibialibi Yabusualibi ti bibahende hearume hale hai hene.
JOS 9:2 Hale hai howa uruni ti bibahendeme íbu ngoai halu mo mbiraore howa Yosua halu Isaraeleali baba wai bule manda bini.
JOS 9:3 Ani biyago Hibiali biaru ti hameigini mbira Gibionoali hene. Tigua Yosua halu Isaraele hameigini biarume Yarigo tano timbuni biagobi Ai tanobi bo wahaya layago hale howa
JOS 9:4 Yosua halu Isaraele wali agali biaru mo hondo hole manda bini. Ani manda buwa tigua tomo maru muwa nu ala tawe togobi waini iba be nogo dongoneme wabinigo budubaga bini wiaru lebudai buwa bibahende nogo dongini mo yini.
JOS 9:5 Tigua aga ala tawe ko lerelabagabi wiaru bialu ge su urubi ko lerelene lebini wiarubi bini. Tigua mberedibi bamba hirini ko hagamahe wiaru mo henene.
JOS 9:6 Uruni mo hanalu tigua Yosua halu Isaraele wali agali Giligala dindini hearia puwa lalu, Iname ibirimadagoni dindi kaundiaoreha howa ibirima. Tígua ina baba habo nalolene bi mbira lo wimi̱ya ibirima, lene.
JOS 9:7 Ani layagola Isaraele agali biarume lalu, Tí hapara ho paluwa ke̱ haganego iname tí baba habo nalolene bi ogoni lo wulene hame naledama, lene.
JOS 9:8 Ani layagola tigua Yosuahondo lalu, Í̠ hame lareale bibelo ina í̠ andaneha kamagoni, lene. Ani layagola Yosuahanda tihondo hale halu lalu, Tí ibini aibe. Tí dindi ani howa ibirimibe, lene.
JOS 9:9 Ani layagola tigua Yosuahondo bi ogobi lamini. Haru haga-o iname Anduane Homogo tínaga Ngode Datagaliwabe mini hale howa dindi kaundia onadege ndooreni howa ibirima. Iyibi dindini howa tínaga Ngode Datagaliwabe kagome biya layago hale harima.
JOS 9:10 Ibugua Amoroali Iba Yodana ni ibiragohayagi Hesebono dindinaga Kini Sihonobi Basana dindinaga Kini Oga ibu Asarodo dindini heagobi o biago labohondo biya layago hale harima.
JOS 9:11 Inanaga haru hagane hearumebi wali agali bibahende hearumebi lalu, Tomo nolene maru manda manda bialu tí baba habo nalolene bi ogoni lo wule tí karia puwa tínaga hameme bilimulo tínaga andaneha birule lalu lamule pudaba, lalu inahondo laya.
JOS 9:12 Mberedi o henedamaru de handaramine. Pigane ibule ibirimaria pobohe ngabi bayale noabi henenego ibalu hangu hemaria o bidagoni handadaba. Togo bialu hagama hayada.
JOS 9:13 Waini iba be nogo dongoneme wabinigo ogoni gahengeha waini iba odo berelarima. Ai áyu togo bialu lerelabaga biyadagoni handadaba. Inanenaga agabi ge su urubi hariga lu kaundiaoreni howa ibalu hemaria budubaga bidagoni handadaba, lalu lamini.
JOS 9:14 Isaraeleali biaru tigua Gibionoali biarume tomo maru heneneyaru yamuwa nalu howa lalu, Mini mbiraore harama, lene. Tigua Anduane Homogohanda bi agi larabe hondole hale nahe howa ani bini.
JOS 9:15 Yosuahanda habo nalolene bi lalu nenege hami̱ya lowa ti Gibionoali baba wai nabule tini henedagoria helo lalu lowini. Isaraele wali agali biaru haru haga hearume, Bi lo werama hada nabimi̱ya, lalu lene.
JOS 9:16 Habo nalolene bi biago lalu purogo lowa horo tebiru peagola Isaraeleali biarume mani hale halu hearia agali o ibiyaru ti kaware hapara howa heneyane hale hene.
JOS 9:17 Ani hale howa Isaraeleali biaru tigua talima horo tebiru puwa handalu hearia agali o ibiyaruni dindi timbuni Gibionobi Kebirabi Berodibi Kiriadi Yarimubi dindi urunialiyane hendene.
JOS 9:18 Isaraelealime bo waholene henge nawiyane hendene. Isaraele wali agalinaga haru haga biarume habo nalolene bi Anduane Homogo Isaraelealinaga Ngode Datagaliwabe minini lo winigome pugulene nawi manda buwa Isaraele wali agali bibahende hearume ogoni kagua biyada lalu haru haga biaruhondo bi hongo howa lene.
JOS 9:19 Ani layagola haru haga biaru tigua ladai bialu lalu, Ina habo nalolene bi lo wialu nabule larimago Isaraelealinaga Anduane Homogo Ngode Datagaliwabe minini howa larima. Anigo iname ti babe nahe kama.
JOS 9:20 Bi lo wirimagome ti ba nabi helo wahama. Barimayagua Ngode Datagaliwabehanda ina pani ngulebira.
JOS 9:21 Ti bo wanahe howa tigua inanaga ira ba halu iba uru hambia holene heloleberema, lalu Isaraeleali haru haga biarume ani lene.
JOS 9:22 Yosuahanda Gibionoali biaru olalu ibidaba lowa hale halu lalu, Tígua kaware hapara howa ina kaundia howa ibirima lalu ina mo hondo harimigo tene aginaga birimibe.
JOS 9:23 Tígua ogonibi birimigonaga Ngode Datagaliwabe ibugua tí kagua birimi ledagoni. Ani lowa lalu, Gibiono wali agali tí bibahende garabaya biabe ale bia haho wiaabo holeberemi. Inanaga Ngode Datagaliwabe kagonaga anda biabe bialu ira baha iba hambiaha bulene holeberemi, lalu lamini.
JOS 9:24 Ani layagola Gibionoali biaru tigua ladai bialu lalu, Haru haga-o ina hale halu hemaria Anduane Homogo tínaga Ngode Datagaliwabe ibugua Mosese lamialu lalu, Dindi ogo bibahende i̱na tí nguleberogo meramiangi wali agali ogoriani karu bibahende bo hilubaga bu wahai habe, layayago hale harima. Hale howa inane homolene gi howa o birimadagoni.
JOS 9:25 Áyu ina í̠ andaneha bedamagonigo í̠ hame lededagua berogo tigabida lowa manda bidedagua dege bibe, lene.
JOS 9:26 Ani layagola Yosuahanda Isaraelealihondo, Gibiono agali biaru bo wa nahadababe, lowa ibugua bime mo humbi hene.
JOS 9:27 Ani buwa ibugua Gibiono wali agali biaruni garabaya biabe ale bia helo helene. Gibionoali biaru tinaga biabe bulene ogobi Isaraele wali agalinagabi Anduane Homogo mbirale bo lomabu delaga dabunaga ira bahalu iba hambia halu bulene helene. Ogoniangi howa áyubi ti biabe ogoni Anduane Homogonaga mini mitangi bialu lotu lolenaga anda kagoria ira bo yu pu iba hambu yu pu biaabo haga ka.
JOS 10:1 Yarusalemenaga Kini Adoni Sedege ibu howa hale halu hearia Yosuahanda Yarigo tanobi tinaga kinibi bo wahayadagua Ai tanobi tinaga kinibi baiore haya layane hale hene. Gibionoali hearumebi Isaraeleali baba wai nabule lowa habo nalolenebi mbira lo wuwa mandagi ka layane hale hene.
JOS 10:2 Uruni hale howa Yarusalemeali hearume mogo lowa gi timbuni ho hene. Tigua gi timbuni hayadagoni irane au manda buwa Gibionoali uruni ti gibi hongohe wali agalibi dewahe tano timbuni maru wiarunibi dege kinibi hene. Ai tano emene lowa Gibiono tano timbuniore wialu tinaga agalirumebi wai bu debe haga ka manda biyagome gi hene.
JOS 10:3 Ogonibi biyiyagola Adoni Sedegehanda Heberononaga Kini Hohama heariabi Yamudinaga Kini Piramu heariabi Lagisinaga Kini Yabia heariabi Egelononaga Kini Debiri heariabi bi ogobi lo yalu pelene.
JOS 10:4 Ibugua lalu, Gibionoalime habo nalolene bi lalu Isaraeleali baba wai nabule lo wuwa kagonaga i̱na Gibiono dindi ogoni barogo biamogo bule ibai hadaba, lalu bi pelene.
JOS 10:5 Yarusalemenaga kinibi Heberononaga kinibi Yamudinaga kinibi Lagisinaga kinibi Egelononaga kinibi kini duria uruni ti Amoro hameigini hangu howa hogimbu buwa Gibionoali bole pene.
JOS 10:6 Ani bole piyagola Gibionoali biarume Yosua Giligala dindini hearia bi pelalu au lene. Haru haga-o ina embeda nahe biamogo bule abaleore ibalimu. Amoroali hameigini hari gibuha hayaru bibahendeme gimbu buwa ina barago, lalu bi pelene.
JOS 10:7 Bi ogoni hale howa Yosuahanda ibunaga wai biaga agali bibahende biaru wai baya gibi bulene maru dabobagi howa heleneyaru heba haru halu Giligala howa wai bule pene.
JOS 10:8 Pole howa hearia Anduane Homogohanda Yosuahondo lalu, Agali odaruni hondowa gi holeni. I̱na í̠ gini ngiai kogo bope hai holebere, lene.
JOS 10:9 Yosua halu Giligala howa Isaraelenaga wai biaga ami biarume mbiraga pialu hangu heneyago Gibiono anda puwa Amoroali biarume ti handa nabi hearia bo dalime hene.
JOS 10:10 Anduane Homogohanda Isaraeleali biaru handalu Amoroali biaru mo mogola howa bigibagi bi lene. Ani biyagola Isaraeleali biarume Amoroali biaru Gibiono dindini bo wahalu hari winiyagoha bama talima dalialu Bede Horono tano bolangua halu bama Asega tagira pialu Magedahayagi bama puabo hene.
JOS 10:11 Amoroali biaru bare hariga mbira winiyagoha dalialu heagola Anduane Homogohanda dalu dindiguni timbuni to̱le̱ ale ibilayagome bama dege puabo halu Asega anda pene. Isaraele agali biarume emene mbira beagola dindiguni to̱le̱ ale biagomeore dewa homelo bene.
JOS 10:12 Anduane Homogohanda Isaraeleali biaru wayali helo biamogo biyago horo ogoningi Yosuahanda Isaraeleali biaru deni howa Anduane Homogohondo lalu, Ni Gibiononi da dali howa ema nabi hela. Ege Ayalono buguni hondo helabe, lalu lene.
JOS 10:13 Ani layagola Isaraeleali biarume tinaga waitigi biaru bai helo nibi egebi libu hondo hagahaga bini. Anda pu nabi heagoria haho wiane hangu horo mbira pene. Ogonibi bini lalu bi ogoni Yasanaga mbugani lo nga.
JOS 10:14 Horo mbiru Anduane Homogohanda agali mbiranaga bi hale howa binidadagua abaleorebi áyuorebi nabi ogoningi dege ani bini. Anduane Homogohanda Isaraeleali timbuniore pele mini.
JOS 10:15 Ani biyagola howa Yosua ibu Isaraele wai biaga ami agali biaru haru halu tini aria maru Giligala dindini heagoria dai bini.
JOS 10:16 Amoroali hameigini duria henerunaga kini duria biaru ti wai bialu hea tambu pora bialu puwa Mageda dindi egeandaha bira do hene.
JOS 10:17 Ogoniha bira do ho berearia marume handa walia howa Yosua lamini.
JOS 10:18 Ani lamiyagola Yosuahanda lalu, Egeanda ogoninaga harabani ege to̱le̱ timbuni maru pendegelo pai halimu. Ani buwa haraba ogoriani handaya howa agali marume mamage helalimu.
JOS 10:19 Tínime ogoniha hondo holemini waitigi piyadagua talima puabo halimu. Waitigi tininaga tanohayagi anda polani handalimu. Anduane Homogo tínaga Ngode Datagaliwabehanda agali uruni bo ibira hai halimulonaga hongo ngida, lene.
JOS 10:20 Yosua halu Isaraele agali biarume Amoroali waitigi biaru bibahendeore bo wahai hene. Waitigi maru mbira mbira pora bialu puwa tini pabeha porabu anda hayaru ti dege ba nabi helene.
JOS 10:21 Ani bialu Isaraeleali biaru tini mbira ba nabi bibahende Mageda dindini Yosua balai anda bu heagoria dai biai hene. Wali agali dindi ogoriani hearume Isaraele wali agali ko ka lalu mbira lolene gi timbuni ho hene.
JOS 10:22 Yosuahanda lalu, Egeanda harabaha ege to̱le̱ pendegelo pai harimigo pendegelo bagi howa kini duria biaru ogoria haru ibidaba, lene.
JOS 10:23 Ani layagola tigua egeanda biagonaga ege panga biago pendege la a̱i̱ howa Yarusalemenaga kinibi Heberononaga kinibi Yamudinaga kinibi Lagisinaga kinibi Egelononaga kinibi kini duria o biaru haru tagira ibuwa
JOS 10:24 Yosua berearia haru ibini. Íbu heagola Yosuahanda Isaraele agali bibahende ibu bereagoria olo ngoai hene. Ani buwa agali haguane ibula haru pene biaruhondo lalu, Tígua tínaga ge kini duria biarunaga mani widaba, lene. Yosuahanda layadagua agali haguane biaru tigua ani bini.
JOS 10:25 Ani bu heagola Yosuahanda ibunaga haguane biaruhondo lalu, Gi nahe halimu. Mini bilinahe howabi miniha dungu lowabi halimu. Anduane Homogo ibugua tínaga waitigi o biaruhondo biyadagua waitigi bibahendeorehondo mani ani bulebira, lalu lamini.
JOS 10:26 Ani lai howa Yosuahanda kini duria biaru bibahende bo homelene. Bowa tinaga tingini ira duriani bo derela howa wialu nelene.
JOS 10:27 Ni paliyagola Yosuahanda kini duria biaru irani bo derela ho wiyago, Mo ibira hadaba, lene. Ani layagola agali haguane hearume kini biarunaga tingini yalu puwa egeanda tini bira do hene biagoha mo baanda hene. To̱le̱ timbuni wiaru haraba biagoria pendegelo pai hene. To̱le̱ odaruni áyu ogoni ani wiaabo ho nga.
JOS 10:28 Horo ogoningi Yosua halu Isaraeleali biarume Amoroalinaga tano mbira mini Magedabi karulalu tinaga kinibi minini. Dindi ogoriani hearu mbira hela nabi bibahende bo wahai hene. Yarigonaga kinihondo biyadagua Magedanaga kini biagohondo ani bini.
JOS 10:29 Mageda balu Yosuabi ibunaga wai biaga ami biarubi tigua Libina puwa agali tano timbuni ogoriani hearu baba wai bini.
JOS 10:30 Anduane Homogohanda biaga biadagua dege Libina tano timbuni biagoni bope halu kinibi Isaraelealinaga gini ya hene. Hearuni bibahendeore bo wahai halu mbirali pora bialu pe nalene. Yarigonaga kinihondo biyadagua dege Libinanaga kini biagohondo ani bini.
JOS 10:31 Libina bai halu Lagisi pene. Ani buwa Lagisi ho mabu bupe howa bene.
JOS 10:32 Wai bialu hemira horo mende hayagola Isaraeleali biarume Lagisi dindi bo ibira helo Anduane Homogohanda mo wayali hene. Libinani biyadagua mbirali pora bialu pe nale bibahendeore bo wahai hene.
JOS 10:33 Gesenaga Kini Horamahanda Lagisiali biaru biamogo bule ibalu hearia Yosua halu ibunaga wai biaga ami agali biarume bope hai halu ibunibi ibunaga ami ibiniyarubi bibahende bo homelai halu mbirali pora bialu pe nalene.
JOS 10:34 Yosua ibu wai biaga ami biaru heba Lagisi bai halu bialu Egelono puwa mabu bupe halu bene.
JOS 10:35 Tigua horo ogoniangi dege Lagisi ala bayadagua balu bibahendeore Egelononi hearu homelo bai hene.
JOS 10:36 Ani buwa Egelono balu Yosua halu Isaraele wai biaga ami biaru baba tigua hari hombene wiagohayagi iraga halu Heberono puwa bene.
JOS 10:37 Balu dindi timbuni ogoni karulowa tinaga kinibi wali agali heneyarubi tano maru haparapara bu heneyarubi bibahende bo wahai hene. Yosuahanda dindi ogoni bo mebia halu bo hilubagabu Egelono biyadagua bini. Dindi ogoriani hene mbirali pora bialu nape homaiore hene.
JOS 10:38 Ani buwa Yosuabi ibunaga ami biarubi tigua beregedalu Debiri dai buwa bene.
JOS 10:39 Dindi ogoriani henerunaga kinibi tano maru haparapara bu heneyarubi karulai hene. Karulai howa wali agali bibahende heneru bo wahai hene. Yosuahanda Heberono Libinalahondobi tinaga kinihondobi biyadagua Debiribi wali agali heneyarubi tinaga kinibi urunihondo anidagua dege bini.
JOS 10:40 Yosuahanda dindi wiaruni bibahende karulaiore hene. Ibugua tano hari barehayagi wiarubi dindi bare emene heyolepeheni ni ibiragohayagi wiarubi ni paliragohayagi wiarubi dindi dalu emene hangu ibagane unurahayagi wiarubi tinaga kini hearubi heba bibahendeore bo hai halu karulai hene. Wali agali dindi urunini heneyarubi mbira hela nabi bo wahai hene. Isaraele wali agalinaga Anduane Homogo Ngode Datagaliwabehanda ani bilimu layadagua bini.
JOS 10:41 Yosuahanda dindi uruni mialu wai binidagoni dindi Kadese Baneani howa unurahayagi puabo halu iba solowara hapara howa Gasahayagibi Gosenehayagibi uyurahayagi Gibionobi heba karulaiore hene.
JOS 10:42 Yosuahanda kini odaruni baba tinaga dindini heneru heba wai halu mbira hangu biyagome minidagoni irane Isaraele wali agalinaga Ngode Datagaliwabe Anduane Homogo ibugua Isaraelenaga wai bia hayagome mini.
JOS 10:43 Uruni biai howa Yosuabi ibunaga wai biaga ami agali biarubi tini balai anda bu heagoria Giligalani dai bini.
JOS 11:1 Isaraele agali biarume agali palearu baba wai bialu bo pebe bima ibira layago hale howa Hasoali Kini Yabini ibugua Madonoalinaga Kini Yobaba heagoriabi Simironoalinaga kiniru heagoriabi Agasabalinaga kiniru heagoriabi
JOS 11:2 uyurayagi howa hari barebare wiarunaga kiniru heagoriabi iba kuyuma Galili berene unurayagi Iba Yodana angeangeha kiniru heagoriabi hari teneha kiniru heagoriabi iba solowara kaware tano mini Do wiagohayagi kiniru heagoriabi kini uruni bibahende heagoria bi yalu pene.
JOS 11:3 Kenanali Iba Yodana angelabo palearuhabi Amoroali heariabi Hidiali heariabi Pereseali heariabi Yabusuali hariha haga hearu heariabi Hibiali Misiba dindini Hari Hemono weagoria hearu heariabi bi yalu pela dege bini.
JOS 11:4 Tigua tinaga wai biaga ami agali hangu hangu hene biaruni mo mandagi hene. Tidiyu heayagi iba angeni mu wiago ale daga labenahedadagua agali dewaore íbu hene. Tinaga wai biaga garo ale mini karisi aeaneme wabinigo ge kirahe nogo hosime gili lagabi dewaore wini.
JOS 11:5 Kini dindi uruniha hearu bibahende hogimbu buwa tigua Isaraeleali baba wai bule iba Meromo duguayagoria mo ngoai halu balai anda bu hene.
JOS 11:6 Anduane Homogohanda Yosuahondo lalu, Uruni ti hondowa gi holeni. Horo áyu ogodagua yawi haragola i̱na agali uruni Isaraelenaga ba halu bo wahai holebero. Tígua tinaga nogo hosi ge gungubuni gandulape halu wai biaga garo ale karisi heda halu buleberemi, lene.
JOS 11:7 Ani layagola Yosua halu Isaraeleali biarume iba Meromo duguayagoha ti nahende hearia bo dalime hene.
JOS 11:8 Anduane Homogohanda Isaraeleali mo wayali helaya. Ani biyagola tigua agali biaru bama uyurahayagi talima puabo halu Misirebodo Maimi bolangua halu Saidono bolangua halu pene. Pora bialu piyago bama talima ni ibiragohayagi Misiba puabo hene. Wai biagoni biaho wiane waitigi agali biaru bibahende homai heagola wahene.
JOS 11:9 Yosua ibugua Anduane Homogohanda bia layadagua nogo hosi biarunaga ge gungubuni gandulalu wai biaga garo ale karisi heda halu bini.
JOS 11:10 Yosua dai bialu ibugua Haso dindi karulalu tinaga kinibi bo wahene. Agali hameigini o hene larimaruni hongo nira lowa hongo gibihe Haso hene.
JOS 11:11 Dindi ogoriani hearu mbira hela nabi bibahende bo wahai halu tano timbuni biagobi heda hai hene.
JOS 11:12 Anduane Homogonaga biabe bia haga Mosesehanda bibe layadagua Yosua ibugua tano timbuni urunini wali agali hearubi kini hearubi bibahende bo hilubaga bu wahai halu dindi bibahende karulai hene.
JOS 11:13 Ani binigo Yosua halu Isaraeleali biaru tigua tano hombeneni wiaru bo gialobaga nabi helene. Dindi mbiraore Haso hangu bo gialobaga bialu Yosua ibugua ogoni dege heda hene.
JOS 11:14 Isaraele wali agalime dabudabu wiarubi nogo bulumagabi nogo tara tarabi tano ogoriani hearubi ti karulai hene. Wali agali hearu bibahendeore mbirali he nale bo wahai hene.
JOS 11:15 Anduane Homogo ibugua anidagua bibe lalu ibunaga biabe bia haga Mosesehondo lamini. Mosese ibugua nde Yosuahondo lamini. Mosesehanda Yosuahondo biabe bia lenedaguaore hale halu Yosuahanda biai hene. Ibugua Anduane Homogohanda Mosesehondo bibe layadaguaore hale halu biai hene.
JOS 11:16 Hari barebarehayagi wiarubi hari biaru teneha wiarubi uyurahayagibi Gosene dindi bibahendebi ogoninaga dindi dalu emene hangu ibagane unurahayagi wiarubi Yodananaga ulini buguni wiarubi heba karulai hene.
JOS 11:17 Dindi karulenedaruni tu Hari Halaga unurahayagi Idomo hapara howa pialu Balagada uyurahayagi Lebanono ulini buguni Hari Hemono hapara howa karulene. Yosuahanda dindi uruninaga kini headaru baba wai luore bialu hene. Ani bialu henegoyu Yosua ibugua odaruni balu bo wahai halu dindi winiyaruni ibu karulai hene.
JOS 11:19 Tano mbiraore Gibiono wiago Hibiali maru heagoria ogoniha hameigini hearu ti degeme Isaraele baba wai nabule lalu habo nalolene bi lowini. Dindi maru winiyaruni bibahende Isaraelealime karulai hene.
JOS 11:20 Anduane Homogohanda waitigi biaru tigua bu miniha Isaraele baba wai hongo howa buleore manda bilo mo manda bia ho helene. Ani binidagoni irane Isaraelealime waitigi mbira hela nabi bibahende bo wahaiore helo ani bini. Ala Anduane Homogohanda Mosesehondo ogonidagua bo wahabe lene.
JOS 11:21 Ogoningi dege Yosuahanda agali timbu gibi gurulu dege damene hameigini mini Anagimu dindi Heberonobi Debiribi Anababi uruni hari barehayagi paleneyaru bo hilubaga bu wahene. Tinaga hameigini maru Yuda dindibi Isaraele dindibi hari barehayagi palearu tinaga tanobi bo hilubaga bu wahai hene.
JOS 11:22 Anagimu hameigini uruni aria damenego Isaraele dindini mbira hela nabi bibahendeore bo wahai hene. Ani binigoyu emene mbira mbira dege dindi Gasanibi Gedenibi Asadodonibi helo yu wahene.
JOS 11:23 Anduane Homogohanda Mosesehondo lamialu bibe layadagua Yosuahanda dindi wiaruni bibahende karulai hene. Ani karulowa ibugua Isaraele wali agali hameigini biaru hangu hangu helo dindi wiaru tu ho tahalu mini. Ani bialu Anduane Homogohanda layadagua biai howa ti wai nabi bayale hene.
JOS 12:1 Isaraelealirume wai bialu dindi Iba Yodana doma edera ni tagira ibiragohayagi wiaru bo podama pialu karulai hene. Dindi timbuniore tubari Iba Anono peagoha dindi ulini wiagoha howa pialu Iba Yodana angeange dindi uliuli wuyu peagoha puabo hene. Ani pialu amuraore Hari Hemono heagoriani tagira pene. Piganeore Isaraelealirume agali kini kirali Sihonola Ogala baba wai bialu bo podo hana halu ti wayali hene.
JOS 12:2 Kini Sihono ibu Amoro wali agalinaga kini howa Hesebono tanoni haru haga hene. Ibunaga dindi tubari Aroe dindi ulini biagonaga hanuni puabo halu Iba Yabogo peagoria tagira pene. Amono dindi Anono dindila tubari Iba Yabogo ogoni pene. Dindi ogoni Gileada dindi ngagonaga emene mbira dege wini.
JOS 12:3 Ani bialu tubari Iba Yodananaga abene ni tagira ibiragohayagi dindi ulini wuyu peagodagua pialu pu maro bini. Ogoriani howa pialu Galili iba kuyama bereagoria tagira pene. Ani bialu Bele Yasimodo wiagoria bolangua halu iba solowara mini Homene Iba laga bereagoriani tagira pene. Ogoriani howa lone pialu dindi abene unurayagi Hari Pisiga heago andaneha bolangua hene.
JOS 12:4 Isaraelealirume Basana dindinaga Kini Oga heago baba wai bialu bo podalu ti wayali hene. Kini ogoni ibu Lebaimi hameigini aria mbira hene. Abale hameigini ogoni timbuni dege mbira palenego mani emene hangu hene. Kini Oga ibu nde tano kira Asarodo Ederilani hondo haga hene.
JOS 12:5 Ani howa ibugua dindi dewa dege Hari Hemono heagoha dindi wiagobi Salega tanobi Basana dindi bibahendebi handayaho howa Gesua hameigini baba tubari wialu Maga hameigini bababi wini. Ani howa mendehayagi Gileada dindi maru haru halu Kini Sihono dindila tubari wuwa haru haga hene.
JOS 12:6 Ani hearia Mosese halu Isaraeleali biarume kini kira ogonilabo baba wai bialu bo podo hana halu ti wayali hene. Ani buwa Anduane Homogonaga biabe bia haga Mosesehanda dindi ogoni tu wigi bialu Lubene ariabi Gada ariabi mialu Manase hameigini aria marubi emene mbira podo mia dege bini.
JOS 12:7 Yosua halu Isaraelealirume wai bialu kini dewaore bo podama pialu tigua Iba Yodananaga abene ni paliragohayagi dindi wima pearuni bo podaga bima pene. Lebanononi dindi ulini Balagada tano wiagoha howa ala bo podaga bima pialu Idomo dindi kawareha Hari Halaga heago teneni tagira pene. Ani bialu dindi dewaore hari barebare wiarubi ni paliragohayagi hari nene emene hama pearubi Iba Yodana ange ange dindi ulini wima pearubi karulai dege hene. Ani bialu dindi ko wali agali nahaga gaea dege biaho wiaga dindi abene unurayagi Negebe dindi wiagobi karulene. Bamba dindi urunihayagi hameigini tara tara Hidi hameiginiru Amoro hameiginiru Kenana hameiginiru Perese hameiginiru Hibi hameiginiru Yabusu hameiginiru uruni ti paligi binigo wini. Ani winigo ai mani Yosuahanda dindi uruni Isaraele wali agaliru mo miyagola Isaraele tinaga dindiore bu hinu wini.
JOS 12:9 Isaraeleali tigua wai bialu kini bo podo hana haga binidaruni tinaga tano mini uru. Yarigo tanobi Ai tano ogoni Bedele dindi kawareni dege winigobi Yarusalemebi Heberonobi Yamudubi Lagisi tanobi Egelonobi Gesebi Debiribi Gedere tanobi Homa tanobi Aradabi Libinabi Adulamabi Magedabi Bedelebi Tabua tanobi Hebebi Abege tanobi Lasaronobi Madono tanobi Hasobi Simirono Merono tanobi Agasababi Tanagabi Megido tanobi Kedesebi Yogoneama tano ogoni Kamelo dindini winigobi Do tano ogoni iba solowara angeni winigobi Goimi tano ogoni Galili dindi kawareni winigobi Tisa tanobi tano uruni bibahendenaga kini baba wai buwa Isaraeleali tigua uruninaga kini heneru lamaga halu pira tebirani mbira (31) bope hai howa tinaga tano wiaru bibahende ti karulai haga bini.
JOS 13:1 Yosua ibu waheore hayagola Anduane Homogohanda ibuhondo lamialu lalu, Áyu í̠ waheore haridago ai Isaraele hameigini tígua dindi maru karulai nahe kami.
JOS 13:2 Tígua Pilidialirunaga dindibi Gesualirunaga dindibi bibahende ngaruni karu nale dege kamigoni.
JOS 13:3 Dindi unurahayagi Abimi hameiginiru haga ngarubi karu nale kamigoni, lene. Pilidialirunaga kini durialime Gasabi Asadodobi Asagelonobi Gedebi Egeronobi tano uruni bibahende handame haga hene. Dindi hobane mbiraha iba mini Sihoro peagoria howa pialu Iyibi dindila tubari howa pialu abene uyurahayagi Egerono dindi wiagoria tubari bamba Kenana wali agali ti haga biago hene.
JOS 13:4 Anduane Homogohanda la dege bialu lalu, Kenanalirunaga dindi bibahendebi Meara tano Saidono wali agalirunaga ngagobi karu nale dege kami. Dindi ogoni wima pialu amuraore Amoro hameiginiru baba tubari Abege tano ngagoriani tagira peda.
JOS 13:5 Tígua Gebala hameigininaga dindi ngarubi Lebanono dindi ni tagira ibiragohayagi Hari Hemono kago teneha Balagada tano ngagoria pialu amuraore Hamada tano pole hariga tagira piaga ngagoriabi tígua karu nale dege kamigoni ndobe, lene.
JOS 13:6 Ibugua laabo halu lalu, Tígua dindi maru Lebanono dindiha hari labo hengene ngagoha Saidono wali agali bu karu ti haga dindi mini Misirebodo Maimi ngago ogonibi karu nale kami. Isaraele wali agali tígua dindi uruni karulole poramigola i̱na wali agali dindi uruniha karu waratagi hai holebero. Ani berogola i̱na bibe lalu í̠hondo ala langirudagua bialu dindi uruni Isaraele wali agaliru tíninaga dindiore ngelo talebu tahaga bibe.
JOS 13:7 Ani buwa dindi ogoni í̠na hameigini maru dirali karuhondo tu wa ta halu Manase hameigini halu mende karu ariabi podo tahaga bibe. Ani bialu tigua tininaga dindi heneneore ogoni wu helo ani bibe, lalu Anduane Homogohanda Yosuahondo lamini.
JOS 13:8 Lubene hameiginibi Gada hameiginibi Manase hameiginiru aria marubi ti dindi Iba Yodana ange mendeha abene ni tagira ibiragohayagi winigo Anduane Homogonaga biabe bia haga Mosesehanda talebu mini.
JOS 13:9 Tinaga dindi tubari Aroe tano Iba Anono peago angeha dindi bayale wuyu peagohayagi wima pialu tano ogoniha dindi dombeni wiagobi karulai halu Medeba dindi bayale tigabi wiarubi Dibono dindibi ti dege karulai hene.
JOS 13:10 Ani bialu Amono dindi tu Kini Sihononaga tano wiaruni bibahende ti karulai hene. Ala Kini Sihono ibugua Hesebono tano wiagoria howa tano dewa wiaru bibahende handame ho howa Amono dindila tubari wiagoria handairi haga hene.
JOS 13:11 Tigua Gileada wali agalinaga dindi wiarubi karulalu Gesua dindi timbuni wiagobi Maga dindibi karulaga bima pialu Hari Hemono heago andaneha dindi wima pearu bibahende karulai halu bini. Ani bialu Basana dindi wiago karulama pialu Salega tano wiago karulalu bini.
JOS 13:12 Ani bialu Kini Oga ibu hayadangi ibugua Asadarodo tanobi Ederi tanobi handaya ho haga henego dindi ogonibi Isaraele ti karulai hene. Oga ibu Lebaimi hameigini howa tinaga kini hamaro bini. Ala Mosesehanda Lebaimi hameiginiru baba wai bialu ti bo batagi hai hene.
JOS 13:13 Anigo Isaraeleali tigua hameigini kira Gesua Magadala dege bo batagi nahe hene. Uruni ti Isaraele heba hamaga howa mandagi hene.
JOS 13:14 Ani binigo Mosese ibugua Libai hameigini hearu ti dege dindi mbira tu wa nami hene. Ala Anduane Homogohanda Mosesehondo bilimu lalu laminigodagua bialu mbirale wali agali bu hearume Isaraelenaga Anduane Homogohondo loma biniru mo yalu ibugu biragola irani delagane aria maru Libai hameigini ti talebu miaga wini.
JOS 13:15 Mosesehanda dindi tu wigi buwa maru Lubene hameiginiru tinaga dindiore wilo mini.
JOS 13:16 Tinaga dindi tubari Aroe tano Iba Anono peago angeha dindi bayale wuyu peagohayagi wima pialu tano ogoniha Medeba dindi bayale tigabi dombeni wiagobi ti karulai hene.
JOS 13:17 Ani bialu Hesebono tano wiago karulalu ogoniha dindi bayale tigabiore wia gimbu biarubi karulai hene. Ani bialu ogoniha tano dewa Dibonobi Bamodobalabi Bede Balameonobi karulalu
JOS 13:18 Yahasabi Kedemodobi Mebadabi karulalu
JOS 13:19 Kiriadaimibi Sibimabi karulalu Seredesaha tano ogoni hari emene wiagoria wiagobi karulai dege hene.
JOS 13:20 Ani bialu Bedebeobi Hari Pisiga heagonaga andaneha dindi bayale wiarubi Bede Yasimodo dindibi karulai hene.
JOS 13:21 Anidagua bialu dindi bayale ogoniha wiaru karulai hene. Abale Kini Sihono ibugua Hesebono tano wiagoria howa tano uruni bibahende handame ho haga hene. Ani karulo hearia Mosese ibugua wai bialu Midianahabi Ebihabi Legemehabi Suruhabi Huruhabi Lebahabi agali haguane bu hearu bibahende bope halu dindi karulai hene. Agali haguane uruni bibahende Kini Sihono ibugua ti tininaga dindi emene wiadagua haru haga haga bilo dabo helaga bini henego uruni bibahende Mosesehanda bo podo hana hai halu tinaga dindibi karulai hene.
JOS 13:22 Mani bulebiragonaga mbiwia haga agali Beo igini Balama dindi ogoniha heago Isaraeleali biarume ibubi homelo bo wahene.
JOS 13:23 Lubene hameigini baba maru bababi tubari Iba Yodana peago wialu iba doma ederayagi Lubene hameigini tinaga wini. Tano mbira mbirabi dindi emene mbira mbirabi Lubene hameigini tigua wai bialu karulayaru bibahende tininaga dindiore uruni mo wigi bini.
JOS 13:24 Mosese ibugua dindi tu wigi buwa maru Gada hameigini aria hearu bibahendehondo talebu miyagola tinaga dindi ogoniore wini.
JOS 13:25 Gada hameigini tinaga dindi winigo uru. Yasere dindibi Gileada dindiha tano wiaru bibahendebi mo mialu Amono hameigini hearunaga dindiha Aroe tano ni ibiragohayagi Laba tano kawareni wiagobi mo mialu bini.
JOS 13:26 Dindi uruni Hesebono tano wiagoria howa pialu Lamadamisibebi Bedonimi tanobi wiagoria tagira pene. Ani bialu Mahanaimi tano wiagoha howa pialu Lodeba tano wiagoria tagira pugu bini.
JOS 13:27 Iba Yodana ange edeyagi dindi panda panda bayale wiagoha Gada hameigini tigua Bedeharama tanobi Bedenimara tanobi Sugodo tanobi Sabono tanobi Hesebono dindiha Kini Sihononaga dindi wiarubi ti dege karulaga bini. Gada hameigininaga dindi tubari Iba Yodana peago doma ederayagi ni tagira ibiragoha howa pialu uyurahayagi Galili iba kuyama bereagoria tagira pene.
JOS 13:28 Ani buwa Gada hameigini tigua wai bialu dindibi tanobi karulenedaruni tininaga dindiore wigi bini.
JOS 13:29 Mosesehanda dindi tu wigi buwa Manase hameigini maru hearu podo migi biyagola tininaga dindiore wini.
JOS 13:30 Tinaga dindi tubari abale Kini Oga ibugua handaya ho hene wiaru Mahanaimi tano wiagoria howa uyurahayagi pialu Basana dindi bibahende wiarubi karulene. Ani bialu Manase hameigini maru biarume tano emene emene pira waragaria (60) Yairi hameigininaga ala wai buwa Basana dindi karulaga bini winiru urunibi ti dege karulai hene.
JOS 13:31 Dindi uruni Gileada dindi hobane mendehayagi wiagobi Asarodo tanobi Ederi tanobi karula dege bini. Tano uruni bibahende Kini Oga ibunaga winigo karulai hene. Mosesehanda dindi uruni Manase igini Magirinaga aguane maru hearuhondo tu wa tahaga bini.
JOS 13:32 Anidagua bialu Mosese ibugua Moaba hameiginiru daluha dindi bayale tigabi yu dindi wiagoha hearia Yarigo tanoha tagira ibiragohayagi dindi wiagobi Iba Yodana peago angeha dindi bayale wiarubi tu wa tahaga biai hene.
JOS 13:33 Anigo Mosesehanda dindi tu wa tahalu howa Libai hameigini bu hearu ti dege dindi mbira tu wa mia nabi wahene. Ibugua lalu, Tíhondo dindi tu wa ngulenego nakarulape. Tígua Isaraele wali agalirume Anduane Homogo tínaga Ngode Datagaliwabe kagohondo mbirale miniru tale bialu tíhondo galoneore ogoni ngirago yu holeberemi, lene.
JOS 14:1 Bi uruniha lo ngaruni Isaraele hameigini hayadagua Kenana dindiha dindi hobane ogohayagi hameigini abogo ibu haya lalu mo walia haga bida. Isaraeleali ti ni tagira ibiragoha Iba Yodana doma ederahayagi heangi howa Mosese ibugua Kenana dindiha dindi hobane mbirago hameigini kiralibi ti damene maru hearubi tu wiahaga bini. Anigo Mosesehanda dindi tale bialu howa Libai hameiginiru mbira nami hene. Isaraele wali agali abale Kenana dindiha anda ibalu Iba Yodana peago ange ni paliragohayagi pu bolangua hene. Ani bialu loma binigo mo miaga Eleasabi Nunu igini Yosuabi Isaraele hameigini mbira mbiranaga agali haguane hearubi bibahendeme Anduane Homogohanda ibunaga biabe bia haga Moseseha howa bi lamiyago talialu dindi ogoni Isaraele hameigini diralihondo tu wa tahalu ti damene maru hearubi tu wa mialu bini.
JOS 14:4 Tigua dindi tu wa tahalu howa Yosebe igini Manase ibu hameigini mbira dagalalu Eberaimi ibubi anidagua dege dagalalu libu hameigini kira dagalene. Ani bialu Mosese ibugua Libai hameigini hearu dege dindi mbira tu wa mia nabini. Libai hameigini ti tano maru hangu wu howa tinaga dindi emene ti mbira mbira tinaga nogo bulumaga sibiru hinu helonaga mini.
JOS 14:5 Isaraele hameigini tigua Anduane Homogohanda ibunaga biabe biahaga Mosesehondo bilimu lalu lamiyadagua bialu Kenana dindi tini headagua mbira mbira tu wa ta haga bini.
JOS 14:6 Yosua ibu Giligala dindiha hearia Yudali maru ibu hearia ibini. Ani ibuwa Kenisi hameigini aria Yabune mbira henego igini Kalebe ibugua Yosuahondo lamialu lalu, Ina amu Kadese Banea dindini hemangi howa Anduane Homogohanda i̱bi í̠bi iya ibunaga biabe bia haga agali Mosesehondo bi lamiyago í̠ manda bu kegoni.
JOS 14:7 Horo ogoningi i̱ mali pira maria (40) hewagola Anduane Homogonaga biabe bia haga Mosese ibugua i̱ Kadese Banea dindi wahalu dindi ogoriani diri hondo wule pu laya. Ani laya handala i̱na pialu dindi ogoniha wiane de handarugo damene bibahende Mosese berearia handalu dai buwa tigatiga lamiai haru. I̱na ibuhondo ke̱ halu mo ha howa mbira nalami.
JOS 14:8 Agali maru i̱ heba mandagi pialu dai birimarume ke̱ halu bi tara tara dewa layagola wali agali bu hearu ti gi hai hene. Anigo i̱na bi heneneore Anduane Homogo i̱naga Ngode Datagaliwabenaga bi wiagoria talialu haru.
JOS 14:9 Ani birugola Mosesehanda i̱hondo buleore lalu bi mbira ogodagua lo wiya. Í̠na Anduane Homogo inanaga Ngode Datagaliwabenaga bi baya hanguore talialu haridago. Anidagua biridagonaga dindi í̠nime de hondo wima piridaruni í̠nibi í̠ waneigini aguanerubi tíni ogonihaore holeberemi laya, lene.
JOS 14:10 Ani lowa Kalebe ibugua laabo halu lalu, Bi ogo hale ha. Isaraele wali agali dindi ko iba dalu naibaga wiagoria heagola Anduane Homogohanda mbirale uruninaga bi lamiya. Ai áyu mali pira mariani duria (45) piyadago Anduane Homogo ibunime i̱ biamogo biyagola ko. Áyu í̠na i̱ de handa. I̱naga mali bibahende pira halirani duria (85) kogoni.
JOS 14:11 Anigo i̱naga hongo biba nahe dege bamba Mosese ibugua i̱ dindi hondo wule pu layangi henegobi dege áyu haabo ko. I̱na wai bu polenebi mbirale maru ngaru bulenebi hongo karulape haabo ko.
JOS 14:12 Ani kogo ai bamba dindi diri hondo wialu handarugo damene bibahende Mosesehondo lamiai harugola Anduane Homogo ibunime dindi hari barebare ngaru i̱ ngulebero lalu layadagua áyu dindi ogoni i̱ni ngibelo hamelo ko. Horo ogoningi i̱na lalu dindi ogoniha agali luni timbuni Anaga hameigini palialu tinaga tanoruha ege pabe hongohe bu mabu bu yaanda hene wiagoha hea lalu langirugoni. Anigo Anduane Homogo ibunime i̱ heba howa biamogo biyagua nde i̱na agali timbuni uruni baba wai bialu tinaga tano uruniha howa Anduane Homogohanda bulebere layadagua i̱na agali uruni ti bo taliatagi hai holebero laro, lene.
JOS 14:13 Bi uruni layago hale howa Yosua ibugua Anduane Homogohondo Kalebe mo bayale habe lalu bi lene. Ani lalu Yosuahanda Heberono tano Kalebenaga helo podo mini.
JOS 14:14 Kalebe ibugua Anduane Homogo Isaraele wali agalirunaga Ngode Datagaliwabe kago bi mana hale howa talialu bialu haga hene. Ani heagola nde Heberono tano ogoni Kenisi hameigini aria Yabune igini Kalebe ibu waneigini aguanerunaga dindiore wiaabo henego nga.
JOS 14:15 Bamba Heberono dindi ogoninaga mini Kiriada Araba wini. Araba ogoni agali timbuni Anagimi damene henerunaga haguane mbira hene. Kalebe ibu dindi ogoni karulo howa wai lone nabi wahowa bayale hene.
JOS 15:1 Yuda hameiginiru ti dindi ogodagua tu wa mini. Tinaga dindi tubari unurayagi Idomo dindi baba tubari wialu unura puabo halu dindi ko wali agali nahaga wiagoria mini Sini wini.
JOS 15:2 Dindi tubari ogoni Homene Iba bereagoria unurayagi pialu
JOS 15:3 hariga mbira Hari Agarabimi pole piaga wiagoria pu bolangua halu dindi ko wali agali nahaga mini Sini wiagoria tagira pene. Ani bialu unurayagi pialu Kadese Banea wiagoria pene. Ani bialu Heserono tano bolangua halu tubari Ada tanoni tagira pene. Ogoriani howa beregedalu Kaga tano wiagoria tubari bolangua halu
JOS 15:4 pialu Asamono tanoni tubari tagira pene. Ani bialu ogoriani howa iba emene dalipe kago tigida Iyibila tubari piaho wialu iba solowara timbuni mini Medidereniana bereagoria tagira pene. Yudanaga dindi tubari unurayagi wia maro ogoni.
JOS 15:5 Tinaga dindi ni tagira ibiragohayagi tubari unu Homene Iba bereagoria howa pialu Iba Yodana tagira peagoria bolangua hene. Ani bialu Homene Iba bereagonaga haguane iba Yodana tagira peagoria howa uyurayagi pialu
JOS 15:6 Bedehogola tano tagira pene. Ani bialu puabo halu uyurayagi Bedaraba wiagoria pialu Lubene igini Bohananaga ege to̱le̱ timbuni wiagoria tagira pene.
JOS 15:7 Ani bialu Ago dindi abene uyurayagi tinaga tubari dindi ulini wupe hene wiagoria tagira pene. Ani bialu dindi Debiri wiagoria bolangua halu mani uyurayagi howa pu beregedalu Giligala hondo yalu puwa hene. Giligala howa handa amu halu dindi ulini wupe hene unurayagi biagoha howa dindi mini Adumimi pole piaga hariga biago hari neneni iraga halu piaga ngago handaga. Ogoriani howa tubari pialu iba duguaraga bereago mini Enesemese bolangua halu pialu Enerogele dindi tagira pene.
JOS 15:8 Ani pialu hari emene Yabusualinaga tano Yarusaleme wiagoria unurayagi pialu dindi ulini panda panda mini Hinomo igini laga wiagoha tubari pene. Tubari piaho wialu hari nene wiago iraga halu piaga Hinomo dindi ulini wiago ni paliragohayagi howa hari wayu peagoria tagira pene. Tagira pialu Lebaimi dindi ulini dondole wiagoria uyurayagi tagira pene.
JOS 15:9 Tubari ogoni pialu iba mini Nebedoa duguaraga halu peagoria bolangua halu tano maru Hari Eberono weagoria wia para para bidagoha tagira pene. Ogoriani howa lone beregedalu Bala tano mini mende Kiriada Yarimi laga wiagohayagi pene.
JOS 15:10 Bala howa tubari lone pu mabu bialu ni paliragohayagi pialu Hari Seri pupe halu Hari Yarimi mini mende Kesalono heagonaga abene uyurayagi tagira pene. Ani bialu tubari Bedesemese tano wiagoria pialu Timina tano bolangua halu pupe hene.
JOS 15:11 Ani bialu tubari Egerono tanonaga abene uyurayagi hari nene mbira wiagoha bolangua hene. Ani bialu Sigerono tanohayagi íbu dai bialu Hari Bala weago yu wahalu Yamania tano wiagoria tagira pene. Ani pialu tubari ogoni iba solowara timbuni mini Medidereniana bereagoha pu maro bini.
JOS 15:12 Yuda dindinaga tubari ni paliragohayagi iba solowara timbuni Medidereniana bereago wini. Yuda hameigini hearu ti nde tinaga one waneiginibi heba mandagi dindi ogoniha hene.
JOS 15:13 Bamba Anduane Homogohanda Yosuahondo lamialu lalu, Dindi mbira Yuda dindi ngami aria Yabune igini Kalebe tu wa mulene nga, lalu lowini. Anigo Yosuahanda bi ogoni mitangi bu howa Anduane Homogo ibugua bibe layadagua bini. Ibugua Heberono tano mini mende Kiriada Araba laga winigo ogoni Kalebe mini. Araba ogoni ibu Anaga hameigini henegonaga mamali hene.
JOS 15:14 Kalebe ibugua Anaga aguanenenaga tano ogoniha Sesai hameiginiru Ahimana hameiginiru Talamai hameiginiru palearia bibahende balu bo taliatagi hene.
JOS 15:15 Ani bialu maha Kalebe ibugua tano ogoni ngelalu hameigini mbira Debiri tanoha palearu baba wai bule pene. Debiri tano ogoni bamba Kiriada Sebe laga winigo ogoniha pene.
JOS 15:16 Ani puwa Kalebe ibugua lalu, Agali mbira Kiriada Sebe tano anda puwa wai bialu dindi karularago ibu i̱ wane Agasa dabu bilo mulebero, lene.
JOS 15:17 Ani layagola Kalebe hamene Kenasa igini Odoniele henegome Kiriada Sebe tano anda puwa bo podalu karulayagola Kalebehanda ibu wane Agasa ibu miyagola dabu bu hene.
JOS 15:18 Ani bialu Odoniele ibugua Agasa ibuni andaga haru pialu howa ibuhondo hongo howa lalu, Í̠ aba Kalebehondo dindi mbira i̱ tu wa ngi labe, layagola Agasa ibugua Kalebe hondo pene. Puwa Agasa ibu nogo dongini biralu penego dalipe hayagola Kalebehanda hale halu lalu, Í̠ agi hamelalu ibiribe, lene.
JOS 15:19 Ani layagola Agasa ibugua ibu abahondo lalu, I̱ mo turu halu mbirale mbira ngibelo hameledo. Í̠na dindi mbira unugohayagi wini ngirigoni dindi ko ibaru nabere dindi lebolaheyago ai dindi iba bere mbira ngibelo hameledo, lene. Ani hale hayagola ibu abahanda dindi iba duguaga lirayagi wiagobi nirayagi wiagobi kirabali ibuhondo mini.
JOS 15:20 Yuda hameigini ti tinaga one waneigini heba dindi ta howa haga bini.
JOS 15:21 Ti tano haga binidaruni abene unurayagi Idomo dindila tubari wiagoria howa migi binidagoni ndisirigi mbiragonaga tano ogodagua. Kabaselebi Edebi Yagubi Kinabi Dimonabi Adadabi Kedesebi Hasobi Idinanabi Sibibi Telemebi Bealodobi Hasohadadabi Keriodobi Heserono mini mende Hasobi Amamabi Semabi Moladabi Hasagadabi Hesemonobi Bedebeledebi Hasasualabi Beasebabi Bisiodiabi Balabi Imibi Esemebi Eledoladabi Kesilibi Homabi Sigilagabi Madamanabi Sanasanabi Lebaodobi Silihimibi Ainibi Limonobi uruni tano timbuni lamaga halu pira kirani dira (29) wialu tano maru emene wia para para dewa dege wigiwigi bini.
JOS 15:33 Ndisirigi mendego hari emene barebare wiaruha wigi biniru tano mini uru wini. Esedaolobi Sorabi Asanabi wialu Sanoabi Enganimibi Tabuabi Enamabi wini.
JOS 15:35 Ani bialu Yaramudubi Adulamabi Sogobi wialu Asegabi wini.
JOS 15:36 Ani wialu Saraimibi Adidaimibi Gederabi Gederodaimibi wigi bini. Tano timbuni uruni lamaga halu deria (14) bibahende wialu tano maru emene dewa dege wia para para bu wigi bini.
JOS 15:37 Ndisirigi tebonegonaga tano winidaru mini uru. Senanabi Hadasabi Migidalagada tanobi wini.
JOS 15:38 Ani bialu Dileanabi Misibabi Yogodelebi wini.
JOS 15:39 Ani bialu Lagisibi Bosogadabi Egelono tanobi wini.
JOS 15:40 Ani wialu Kabonobi Lamamabi Kidilisi tanobi wialu
JOS 15:41 Gederodobi Bededagonobi Namabi wialu Mageda tanobi wigi bini. Tano timbuni uruni lamaga halu nguirani mbira (16) wialu tano maru emene emenerubi uruniha dewa wia para para bu wigi bini.
JOS 15:42 Ndisirigi manegonaga tano urudagua wini. Uruni Libina tanobi Edere tanobi Asana tanobi wialu
JOS 15:43 Ibida Asana Nesibi tano uruni wigi bini.
JOS 15:44 Keila tano Agasibi tano Maresa tanobi wigi bini. Tano timbuni uruni dira wialu tano maru emene emenebi uruniha wia para para bu wigi bini.
JOS 15:45 Ndisirigi daunigonaga tano wigi biniru uru. Egeronohayagi tano marubi dindi emene emene wia para para bu maru wigi bini.
JOS 15:46 Ani wigi binidagoni Asadodo tano wiagoria kaware wima pialu Egerono howa tano dewa wigi bialu iba solowara timbuni Medidereniana bereagoria wiatagi hene.
JOS 15:47 Ani bialu Asadodola Gasala ogoni labonaga tanobi dindi emene emene unurayagi dewa wigi bima pialu Iyibi dindiha tubari wiagoria iba emene mbira peagoria tubari wialu ni paliragohayagi iba solowara Medidereniana bereagoria wiari hene.
JOS 15:48 Ndisirigi waraganegonaga tano maru hari bare bare wiaruha wigi binigo uru. Samiribi Yadiribi Sogobi tano uruni wini.
JOS 15:49 Ani wialu Danabi Kiriada Sebe tano mini mende Debiribi wialu
JOS 15:50 Anababi Esedemoabi Animi tanobi wini.
JOS 15:51 Ani bialu Gosenebi Holonobi Gilobi tano uruni wigi bini. Tano timbuni uruni lamaga halu bearia (11) bibahende wialu tano maru emene emene dewa tano uruniha kaware wia para para bu wigi bini.
JOS 15:52 Ndisirigi kanegonaga tano maru wigi binigo uru. Araba tanobi Duma tanobi wialu Esana tanobi wialu bini.
JOS 15:53 Ani bialu Yanimibi Bede Tabuabi wialu Abegabi tano uruni wini.
JOS 15:54 Tano marubi winigo Humudabi Kiriada Araba tano mini mende Heberono winigobi Siobi uruni wini. Tano timbuni uruni dira wialu tano maru emenebi dewa tano uruniha wia para para bima pene.
JOS 15:55 Ndisirigi halinigonaga tano maru wigi binirunaga mini Maonobi Kamelobi Sibi tanobi wialu tano mbira mini Yudabi wini.
JOS 15:56 Ani bialu Yaserilibi Yogodeamabi Sanoabi tano uruni wini.
JOS 15:57 Ani bialu Kaini tanobi Gibea tanobi Timina tanobi uruni wialu tano timbuni dege lamaga halu pira wialu tano maru emenebi wia para para bigi bini.
JOS 15:58 Ndisirigi dinigonaga tano wigi binigo uru. Halahulu tanobi Bedesuru tanobi Gedo tanobi wialu bini.
JOS 15:59 Ani bialu tano maru Maradabi Bedanodobi Eledegonobi tano timbuni uruni waragaria wialu tano uruniha tano maru emenebi wia para para bini.
JOS 15:60 Ndisirigi pinigonaga tano urudagua wini. Kiriada Bala tanonaga mini mende Kiriada Yarimu laga winigobi Laba tanobi wini. Tano timbuni kira ogoni wialu ogonilaboha tano maru emenebi wia para para bini.
JOS 15:61 Ndisirigi beanegonaga (11) tano maru dindi ko iba dalu naibaga wiagohayagi winiru urudagua wigi bini. Bedearaba tanobi Midini tanobi wialu Segaga tanobi wini.
JOS 15:62 Ani bialu Nibisana tanobi Ibi tano laga wiagobi Engedi tanobi wini. Tano timbuni uruni waragaria wialu uruniha tano maru emenebi wia para para bu wigi bini.
JOS 15:63 Ani winigo nde Yuda hameigini tigua Yabusuali Yarusaleme tanoha haga hearu bo taliatagi habe nahe hene. Ani heagola nde Yabusu hameigini uruni ti Yudaliru baba mandagi Yarusaleme tanoha haabo hene.
JOS 16:1 Yosebe aguaneneru tinaga dindi tu wa minigo unurayagi tubari Iba Yodana peagoria Yarigo tano kaware wiagoria iba duguaraga halu piaga wiagoria ani tagira ibiragohayagi howa pialu dindi ko dalu naibaga wiagoria anda pene. Yarigo tano howa hari bare bare wiagoria bolangua halu Bedele tano wiagoria tagira pene.
JOS 16:2 Bedeleni howa pialu Lusu tano wiagoria bolangua halu Adarodo Ada tano bamba Aga hameigini hene wiagoria bolangua hene.
JOS 16:3 Ani bialu lone ni paliragoha tubari Yabaledeni bolangua halu Bedehorono tano wiagoria unura tagira pene. Ogoriani howa Gesere tanoni bolangua halu iba solowara timbuni Medidereniana bereagoria tagira pene.
JOS 16:4 Yosebe aguaneneru ti hameigini kira Eberaimi hameiginibi Manase hameigini halu mende ni paliragohayagi henerubi tigua dindi ogoni karulene.
JOS 16:5 Eberaimi hameigininaga dindi ogodagua wini. Tinaga dindi tubari Adarodo Ada tano wiagoria howa ni tagira ibiragohayagi pialu Bedehorono tano uyura wiagoria pialu
JOS 16:6 iba solowara timbuni Medidereniana bereagoria tagira pene. Dindi mbira Migimedada wiago tinaga dindi dege gibuni uyurahayagi wini. Tinaga dindi ogoria howa ni tagira ibiragohayagi tubari pu dai bialu Tanadasilo dindi wiagoria bolangua howa ni tagira ibiragohayagi pialu amuraore Yanoa tano wiagoria tagira pene.
JOS 16:7 Ani bialu Yanoa tanoni howa uba dali halu Adarodo tanobi Nara tanobi wiagoria pene. Ogoriani howa puabo halu Yarigo tano bolangua halu Iba Yodana peagoria tagira pene.
JOS 16:8 Tabua tano wiagoria howa tubari ni paliragohayagi pialu Kana iba peagoria bolangua halu iba solowara timbuni Medidereniana bereagoria tagira pene. Dindi ogonibi tano ogoniha wiarubi dindi bayale ti heagoria kaware wia parapara bu wiarubi bibahende Eberaimi hameiginiru ti helo miai hene. Eberaimi hameigini aria maru ti Manase hameigininaga dindiha tanobi dindi marubi wiagoha tihondo miyagoriani hene.
JOS 16:10 Ani heagola tigua Kenanali maru Gesere tanoha hearu bo pela nabi helo waho hene. Ani heleagola Kenanali ti Eberaimi hameigini baba mandagi howa tigua Eberaimi hameigininaga garabaya biabe ale biahaga ho helene.
JOS 17:1 Yosebe igini wahene Manase henego ogoni ibunaga hameigini aguanene hearu tinaga dindi Iba Yodana peagoha ni paliragohayagi tu wa mini. Manase igini wahene Magiri henego ogoni ibu Gileada aba howa wai biaga mugube hongohe hene. Ani heagola tigua dindi hobane mbira Iba Yodana ni ibiragohayagi Gileada tano wiagobi Basana tano wiagobi Magiri aguaneneru ti helo tu wa mini.
JOS 17:2 Manase igini aguaneneru ogodagua hama ibini. Abiesebi Helegebi Asarielebi Segemebi Hebebi Semidabi haga bini. Isaraeleali tigua dindi tu wialu howa dindi abene Iba Yodana peagoha ni paliragohayagi Yosebe igini Manase aguanene uruni ti helo tu wa mini.
JOS 17:3 Selobehada ibu Hebe igini Hebe ibu Gileada igini Gileada ibu Magiri igini Magiri ibu Manase igini hene. Anigo Selobehada ibu igini mbira nahe howa ibu wandari dege taribu hene. Ibu wanedaruni tinaga mini uru berene. Malabi Noabi Hogolabi Miligabi Tirisabi uruni biraga bini.
JOS 17:4 Ani berenego wandari uruni tigua loma binigo mo miaga Eleasabi Nunu igini Yosuabi agali haguane maru bu hearubi ti hearia puwa lalu, Ala Anduane Homogohanda Mosesehondo bi lalu, Selobehada igini mbira nahedago ibu wane bedaruhondo dindi mbira tu wa mibe leneya, lalu lamini. Ani layagola tigua wandari urunibi Manase hameigini bu hearubi dindi Anduane Homogohanda tu wa ta habe layadagua bialu migi bini.
JOS 17:5 Isaraele hameigini hearume dindi maru Selobehada wane biaru tinaga waneigini aguaneneru tu wa mini wiago heba biamaga howa Manase hameigini ti dindi timbuniore hameigini pira holene ti hai hene. Ani wu howa Manase hameigini ti degeme Iba Yodana doma ederayagi dindi timbuni Gileada wiagobi Basana wiagobi ti hai hene.
JOS 17:7 Manase hameigini tinaga dindi tubari Ase dindi wiagoria howa Segeme tano ni tagira ibiragohayagi howa Migimedada dindiha tagira pene. Ani bialu unurayagi wima pialu Enedabua wali agali heagoria tubari wini.
JOS 17:8 Tabua dindiha dindi wu mabu bu wiago bibahende Manase hameigininaga wini. Tabua tano ogoni Manase Eberaimila tubarini winigo ogoni Eberaimi aguanenerunaga wini.
JOS 17:9 Ani bialu dindi tubari iba emene mbira mini Kana peadagua dalipe hene. Tano maru iba ogoni tene unurayagi winiru bibahende Manasenaga dindiha winigoyu Eberaimi hameigini tinaga dege wini. Anigo Manase hameigini tinaga dindi iba Kana ogoni tubari uyurayagi pialu iba solowara timbuni Medidereniana bereagoria tagira pene.
JOS 17:10 Dindi emene mbira iba Kana ogoniha abene unurahayagi wiago Eberaimi hameigini tinaga wialu abene uyurahayagi wiago Manase hameigini tinaga wini. Ni paliragohayagi iba solowara timbuni Medidereniana bereago tubari wini. Ani bialu abene uyurahayagi Manase hameigini ti baba tubari Ase hameiginirunaga dindi winigoria bolangua halu ni paliragohayagi uyurayagila dombeneha pupe halu Isaga hameigini dindi ni tagira ibiragohayagi uyurayagila dombeneha hene.
JOS 17:11 Isaga dindihabi Ase dindihabi tano wiaru Manase hameigini ti karulaga binigo ogo. Bedesana tanobi Ibileama tanobi ogonilaboha tano maru emene emene wiarubi ti karulo hene. Tano maru Dobi Endobi karulalu Tanagabi Megidobi karulalu tano timbuni uruniha tano emene maru wia parapara bima pearubi bibahende karulai hene.
JOS 17:12 Anigo Manase hameigini tigua dindi uruniha Kenanali bu hearu balu taliatagi habe nahe howa Kenana wali agali uruni ti heba mandagi haabo hene.
JOS 17:13 Mani Isaraele ti dewali hongohe howa Kenana wali agali bu hayadaru bo taliatagi nahabeheyagola tigua tinaga garabaya biabe ale biahaga helo helaga bini.
JOS 17:14 Mani howa Yosebe aguanene hearume Yosua hearia puwa lalu, Inahondo dindi mbiraore hangu ngirigo aginagabe. Anduane Homogohanda ina mo dewaoreho heledagome dindi ogoni ina bibahende holene nakarulapeda, lene.
JOS 17:15 Ani layagola Yosuahanda ladai bialu lalu, Ai tí dewaliore halu Eberaimi dindiha hari barebare ngarubi nakarulape degeyagua nde Perese dindi ngagohabi Lebaimi dindi ngagohabi pialu tí ogoniha hole irabu ngaru e ima dibalu hongole pudaba, lene.
JOS 17:16 Ani layagola Yosebe aguanene biaru tigua ladai bialu lalu, Hari barebare ogoniha ina holene nakarulape kamagoni. Anigo iname dindi ulini bayale ngago karulole manda birimayagua nde Kenanali dewaore Bedesana tano ngagohabi dindi emene emene tanoha wia parapara bidaruhabi dewaore ka. Ani bialu Yaserili tano ngagoria wai biaga garo ale nogo hosime gililaga mini karisi aeaneme wabini dewaore nga, lene.
JOS 17:17 Ani layagola Yosuahanda Eberaimi hameigini Manase hameiginilahondo lamialu lalu, I̱na tíhondo heneneore larogo tí dewaliore howa hongoheore kamigoni. Tí dindi mbiraore hanguni holene nakarulapedago dindi marubi wiatago hole tígua dindi taya bulene karulape kamigoni.
JOS 17:18 Tígua dindi hari barebare ngaru karuloleberemi. Ai tígua pialu irabu tegi ko ngaru e ima dibalu hongowa tínaga dindi ogoni holeberemi. Kenanali karu ti nde wai biaga karisi aeaneme wabini wu howa hongohebi kagoyu tígua bo batagi holeberemi, lene.
JOS 18:1 Isaraeleali tigua wai bialu dindi bibahendeha hameigini palearu bo poda hana hai halu tini Silo tano wiagoria íbu ngoai ho hene. Ani buwa tigua Anduane Homogo mitangi bialu lotu lolenaga Balai Anda ogoriani bu helene.
JOS 18:2 Anigo ti aria hameigini karialihondo ti dindi mbira talebu mia nabi dege hene.
JOS 18:3 Ani heagola Yosuahanda Isaraele wali agali hearuhondo lamialu lalu, Anduane Homogo tínaga mamali henerunaga Ngode Datagaliwabehanda dindi ogo tíhondo ngiyago ai tígua dindi ogoni karulai nahe aginaga hondo kamibe.
JOS 18:4 Tí hameigini mbira mbiranaga agali tebirali dege dege dabo heladaba. Ani heledemigola i̱na ti dindi bibahendeha piai halu mani tinaga hameigini pialu holobadagoria hole tinime hondo wule pialu dai buwa i̱ langilo ani dabalu pelolebero.
JOS 18:5 Tigua dindi ogoni kahalu tu wulebira. Yuda hameigini ti dindi abene unurahayagi kago haabo halu Yosebe hameigini ti uyurahayagi kagoniha ogoriani haabo helo.
JOS 18:6 Tígua dindi podene karia bibahendenaga ogobi nga lalu dindi uruninaga bi te bibahende bebani gili biai halu i̱ koria yalu ibalimu. Yalu eberemigola i̱na Anduane Homogohondo hale halu dindi podene mbirago hameigini ái ibu holobadabe hondolenaga ege to̱le̱ emene baraga halu gilibu ngagome mo walia haga birago ibu dindi ogoni holebira.
JOS 18:7 Anigo Libai hameigini ti dege dindi mbira tininaga lenego hameigini tí maru kamiru tu wa migi bidamidagua nabulebira. Ti Anduane Homogonaga loma binigo mo miaga holebira. Anigo Gada hameiginibi Lubene hameiginibi Manase hameigini marubi ti dindi Iba Yodana doma edeyagi karulo hai helo Anduane Homogonaga biabe bia haga Mosese ibugua tihondo dindi ogoni ala mini ngagoria kagoni, lene.
JOS 18:8 Yosuahanda agali maru dindi podene karia hondo wule piyaruhondo lalu, Dindi ogobida lalu garealo wirimidaru mo yalu ibalimu. Ani yalu eberemigola i̱na ege to̱le̱ emeneni gilibu ngagome baraga halu mo walia haga biragola Anduane Homogohanda áinaga layadabe hondoliya, lene. Ani laya handala agali biaru tigua Yosuahanda layago hale halu dindi garealalu bebani gili bulenaga dindi hondo wule podene karia biaruha purogo lene.
JOS 18:9 Tigua dindi podene biaru bibahendeha piai halu dindi ogobiya lalu handayago damene bibahende garealowa bebani gilibu wiai hene. Tigua dindi podene kariani ibaga biai halu dindi uruniha tano mbira mbiranaga mini gilibu wiai hene. Ani biai halu mani Yosua hearia Silo dindini tini balai anda bu henedagoria lone dai bini.
JOS 18:10 Ani daibu heagola Yosua ibugua dindi uruni mbira mbirago Anduane Homogohanda hameigini ái ibu mirabe hondole ege to̱le̱ emene baraga hene. Ani bialu mani Yosuahanda dindi tu wigi bialu Isaraele hameigini ala dindi nami hearuhondo talebu tahaga bigi bini.
JOS 18:11 Beniyamini hameigini ti dindi Yuda Yosebe hameiginila hengeneha wiago mini.
JOS 18:12 Beniyamini hameigini tinaga tubari uyurahayagi pu uyu halu Iba Yodana peagoria howa pialu hari nene emene mbira wiagoria pialu Yarigo tano wiagoria tagira pene. Ogoriani howa ubaamu halu ni paliragohayagi hari emene barebare wiagoria bolangua halu Bedehabene dindi ko iba dalu naibaga wiago Beniyamini hameigini tinaga wini.
JOS 18:13 Ani buwa unurayagi daliape halu hari emene barebare wiagoria bolangua halu Lusu tano mini mende Bedele laga wiagoria tagira pene. Ani bialu tano Adarodo Adara wiagoria daliape halu dindi unurayagi wiago bolangua halu Bedehorono dindi wiagoria tagira pene.
JOS 18:14 Ogoriani howa tubari pubagi halu ni paliragohayagi hari bare wiagoria pupe halu unurayagi Kiriada Bala tano mini mende Kiriada Yarimi laga wiagoha pene. Tano ogoni Yuda hameigininaga wini. Beniyamini hameigini tinaga dindi tubari ni paliragohayagi tano ogoni wini.
JOS 18:15 Ani bialu tubari unurayagi uba amu holene Kiriada Yarimi wiago kaware lowa pialu Nebedoanaga iba duguaraga ho biraga wiagoria bolangua hene.
JOS 18:16 Ani bolangua halu ogoriani daliape halu dindi ulini Hinomo igininaga dindi laga wiago kaware ngelalu hari baba pu banga bini. Hari ogoni ibu dindi abene uyurayagi Lebaimi dindi ulini wiago gibuniha dege hene. Ani bialu dindi tubari unurahayagi dalipenaga Hinomoha dindi ulini ngago hanuni pu pugualu Yabusu hameigini dindiha hari bare emene wiagoria bolangua halu Enerogele dindiha iba duguaraga ho biraga wiagoha pupe hene.
JOS 18:17 Ani bialu ogoriani howa dindi abene uyurahayagi dai bialu Enesemese bolangua halu Gelilodo wiagoria tagira pene. Gelilodo ogoriani howa dindi Adumimi handaede halu hariga hari nene weagoha iraga halu piaga wiagoria bolangua hene. Ani bialu tubari ege to̱le̱ timbuni mbira mini Bohana winigoria bolangua hene. Mini Bohana ogoni Lubene igini mbira hene.
JOS 18:18 Ani bialu ogoriani howa ubadali halu hari nene wiagoria uyurahayagi Yodana dindiha dindi ulini baya panda panda wuyu peagoria wa handa gimbu bialu
JOS 18:19 Bedehogola pialu mini Homene Iba bereago ogoniha yupe halu Iba Yodana mogo biragoria tagira pene. Beniyamini hameigininaga dindi tubari abene unurahayagi ogonidagua wini.
JOS 18:20 Ani wialu ni tagira ibiragohayagi Iba Yodana peago tubari wini. Dindi ogoni Beniyamini hameigini tinaga dindiore wilonaga tubari penegodagua ogoni.
JOS 18:21 Beniyamini hameigini tinaga tano uru wini. Yarigobi Bedehogolabi Emege Kesesibi
JOS 18:22 Bedearababi Semaraimibi Bedelebi
JOS 18:23 Abimibi Parabi Oborabi
JOS 18:24 Kebaramonibi Obonibi Gebabi tano uruni daga lamaga halu homberia (12) wini. Tano emene marubi uruniha wia para para bu wini.
JOS 18:25 Beniyamini hameigini tinaga dindiha tano maru wigi binigo uru. Gibeonobi Lamabi Berodobi Misibabi Kebirabi Mosabi Legemebi Iribelebi Taralabi Selabi Halebebi Yabusu ibu mini mende Yarusalemebi Gibeabi Kiriada Yarimibi tano uruni bibahende daga lamaga halu pira mbirani maria (14) wialu tano uruniha tano maru emene emenebi wia parapara bu wigi bini. Ai dindi uruni bibahende Beniyamini hameigini tinaga wini.
JOS 19:1 Ege to̱le̱ halu mende baraga howa handalu hearia Simiono hameigini hearunaga mini wiaria hondowa ti dindi tu wa mini. Simiono hameigininaga dindi ogoni Yuda hameigininaga dindi wiago dombeneha tu wa mini.
JOS 19:2 Dindi ogoniha tano wigi binigo uru. Beasebabi Sebabi Moladabi Hasasualabi Balabi Esemebi Eledoladabi Bedulubi Homabi Sigilagabi Bedemagabodobi Hasasusabi Bedelebaodobi Saruhenebi tano uruni daga lamaga halu pira mbirani tebira (13) wini. Tano timbuni uruni heba tano maru emene emenebi wia parapara bu wia dege bini.
JOS 19:7 Ani bialu tano maru Ainibi Limonobi Ederebi Asanabi tano maria timbuni uruni heba tano maru emene wia parapara bu wiarubi tinaga wini.
JOS 19:8 Simiono hameigininaga tano timbuni uruniha tano maru emene emene wiarubi karulaga bima pialu Baladabere tano mini mende Lama laga dindi abene unurahayagi wiagoria wima tagira pene.
JOS 19:9 Yuda hameiginirunaga dindi tu wa miyadago ti hangu holenego timbuniore hayagola lone tu wia dai bialu Simiono hameigini ti dombeneha helo tihondo mini.
JOS 19:10 Ege to̱le̱ halu tebone baraga howa handalu hearia Sebulunu hameiginiru tinaga mini wiaria hondowa ti dindi tu wa mini. Sebulunu hameigininaga dindi tubari pialu Saridi tano wiagoria tagira pene.
JOS 19:11 Ani bialu ogoriani howa tubari pu banga bialu ni paliragohayagi pialu Mareala tano wiago yadai bialu Dabesede tano kaware wiago bolangua halu Yogoneama tanonaga abene ni tagira ibiragohayagi iba emene peagoria tagira pene.
JOS 19:12 Saridi tanoha howa ni tagira ibiragohayagi tubari Kisilodo Tabo gibuni pialu Daberada tano wiagoha puabo howa Yabia tano wiagoria ubadaga halu pene.
JOS 19:13 Tubari ogoni puabo halu ni tagira ibiragohayagi Gedehebe tanobi Edegasini tanobi wiagoria bolangua hene. Ani bialu ogoriani howa beregedalu Nea dindi wiagoha bolangua halu Limono dindi polene hariga peagohayagi pene.
JOS 19:14 Ani puwa abene uyurayagi tubari pu banga bialu Hanadono tano wiagoria bolangua halu Ibidahele dindi ulini wiagoria tagira pene.
JOS 19:15 Sebulunu hameiginirunaga dindi winigoha tano maru winigo uru. Kadada tanobi Nahalala tanobi Simirono tanobi Idala tanobi Bedeleheme tanobi uruni daga lamaga halu homberia (12) wuwa tano maru emene emenerubi wia parapara bini.
JOS 19:17 Ege to̱le̱ mane halu baraga howa handalu hearia Isaga hameiginirunaga mini wiaria hondowa ti dindi tu wa mini.
JOS 19:18 Isaga hameigini tinaga dindiha tano winidaru uru. Yaserilibi Kesulodobi Sunemebi
JOS 19:19 Habaraimibi Sionobi Anaharadabi wini.
JOS 19:20 Ani wialu Labidibi Kisionobi Ebesebi
JOS 19:21 Lemedebi Enganimibi Enehadabi Bedebasesebi wini.
JOS 19:22 Ani wuwa Isaga hameiginirunaga dindi tubari tano maru wiagoria pialu ogodagua pene. Hari Tabo heagoria howa pialu Sahasuma tanobi bolangua halu Bedesemese tano wiagoria piaho wialu amura Iba Yodana peagoria tagira pene. Isaga hameiginiru tinaga tano timbuni uruni pira mbirani waragaria (16) wialu tano maru emene emenebi kaware wia parapara dege bini.
JOS 19:24 Ege to̱le̱ dauni halu baraga howa handalu hearia Ase hameiginirunaga mini wiaria hondowa ti dindi tu wa mini.
JOS 19:25 Ase hameiginiru tinaga dindi ogoniha tano wigi binidarunaga mini uru. Helegada tanobi Hali tanobi Bedene tanobi Agasaba tanobi wialu Alamamelege tanobi Amada tanobi Misala tanobi wigi bini. Ase hameiginirunaga dindi tubari ni paliragohayagi Hari Kamelo heagoriabi Siholibinada tanobi wiago kaware dege pene.
JOS 19:27 Ani bialu tubari ni tagira ibiragoha pudai bialu Bededagono tano wiagoria pialu Sebulunu hameigininaga dindi tubari kaware dege bolangua halu Ibidahele dindi ulini wiagoha bolangua halu pene. Tubari ogoni dindi abene uyurahayagi pudai bialu Bedemege tanobi Naiele tanobi wiagoha tagira pene. Ani pialu tubari uyurayagi puabo halu tano maru Kabulubi
JOS 19:28 Eberonobi Lehobobi Hamonobi Kanabi tano uruni bibahende wiagoria bolangua haga bialu tano timbuni Saidono wiagoria tagira pene.
JOS 19:29 Ani bialu ogoriani howa lone beregedalu tubari Lama tano wiagoria pialu Taia tano wai pabe hongohe ege to̱le̱me bu mabubi heagoria tagira pene. Ani puwa tubari ogoriani beregedalu Hosa tanohayagi pudai bialu iba solowara timbuni mini Medidereniana bereagoria pu maro bialu pene. Ani pialu tano maru Mahalababi Agasibibi
JOS 19:30 Umabi Abegebi Lehobobi tano uruni Ase hameigininaga dege wigi bini. Tano timbuni uruni daga lamaga halu pira kirani kira (22) wialu tano maru emene emene wia parapara wiarubi bibahende ti karulo hene.
JOS 19:32 Ege to̱le̱ waragane halu baraga howa handalu hearia Nabadali hameigini hearu tinaga mini wiaria hondowa ti dindi tu wa mini.
JOS 19:33 Tinaga dindi tubari Helebe tano wiagoria howa pialu dindi Sananimiha ira mini oga heagoria tagira pialu Adaminegebe tano wiagoria bolangua halu Yamania tano pialu amuraha Lagumu tano wiagoha puabo halu Iba Yodana angeni tagira pene.
JOS 19:34 Ani pialu tubari ni paliragohayagi pudai bulenaga Asanodo Taboro tano wiagoha pudai bialu Hugogo tano wiagoria pene. Ani pialu dindi abene unurahayagi Sebulunu hameigini dindi tubari wiago kaware pialu ni paliragohayagi Ase hameiginiru baba tubari wiagoria puabo halu ni tagira ibiragohayagi Iba Yodana peagoria pene.
JOS 19:35 Tinaga tano maru pabe ege to̱le̱me bu mabu bini hongohe haga binidaruni Sidimi tanobi Sere tanobi Hamada tanobi Lagada tanobi Kinerede tanobi
JOS 19:36 Adama tanobi Lama tanobi Haso tanobi
JOS 19:37 Kedese tanobi Ederei tanobi Enehaso tanobi wialu
JOS 19:38 Yirono tanobi Migidalele tanobi Horeme tanobi Bedanada tanobi Bedesemese tanobi wigi bini. Tano timbuni uruni daga lamaga halu pira mbirani dira (19) wiagoha tano maru emene emenebi wia parapara bu wiaru heba bibahende Nabadali hameiginirume karulo wini.
JOS 19:40 Ege to̱le̱ kane halu baraga howa handalu hearia Dana hameigini hearunaga mini wiaria hondowa ti dindi tu wa mini.
JOS 19:41 Dana hameigini tinaga tano wigi biniru mini uru. Sora tanobi Esedaolo tanobi Irisemese tanobi
JOS 19:42 Salabimi tanobi Ayalono tanobi Idila tanobi
JOS 19:43 Elono tanobi Timina tanobi Egerono tanobi
JOS 19:44 Eledege tanobi Gibedono tanobi Balada tanobi
JOS 19:45 Yahudu tanobi Beneberaga tanobi Gadarimono tanobi
JOS 19:46 Meyagono tanobi Lagono tanobi dindi emene emene Yoba tanoha wiarubi heba ti karulai hene.
JOS 19:47 Ani howa mani agali dindi aba ogoniha hene hearume Dana hameiginiru baba waitigi halu Dana hameigini bo batagi hene. Ani biya handala Dana hameigini ti tagira pialu Laisi hameigininaga dindi wiago karulole lowa Laisiali hearu baba wai bini. Wai bialu wali agali dewaore bo wahai halu Laisi tano Dana hameiginirume karulene. Karulowa mani dindi ogoni Dana hameigini tinaga lowa malu lalu karulo howa tano ogoni ala mini Laisi laga winigo mani tigua tinaga mamali mini Dana wia aribia hene.
JOS 19:48 Dindi ogoniha tano timbuni wiarubi tano maru emene wia parapara bu wiarubi bibahende Dana hameiginiru ti karulo hai hene.
JOS 19:49 Isaraele hameigini tini bibahende dindi tuwa ta hai howa dindi mbira Nunu igini Yosua tu wa mini.
JOS 19:50 Yosua ibugua ala Isaraele hameigini bu hearuhondo lalu, I̱ dindi mbira Timinada Sera tano Eberaimi dindihayagi hari bare ngagoha wiago ngidaba, lene. Ani layagola nde Anduane Homogohanda bibe lenedagua tigua dindi ogoni Yosua mini. Miyagola Yosua ibugua tano biago mo tiga budai bialu ibuni tano ogoniha hene.
JOS 19:51 Ani biai howa loma binigo mo miaga Eleasabi Nunu igini Yosuabi Isaraeleali hameigini mbira mbiranaga agali haguane haga bini hearubi tigua Silo tanoha Anduane Homogonaga Balai Anda biagonaga panga haraba wiagoriani ngoai ho hene. Ani ngoai ho hearia tigua dindi Anduane Homogohanda Isaraele hameiginiruhondo minigo tu wa taholenaga hameigini mbiranaga dindi ago mibehedabe hondole ege to̱le̱ emene biaru Anduane Homogonaga deni baraga hayagola walia hayadagua dindi bibahende tu wa tahai halu maro bini.
JOS 20:1 Anduane Homogohanda Yosuahondo Isaraele wali agali lamia lowa lalu, Tano mbiraha pora bialu puwa ha do holene maru dabalimu lalu ala Mosesehondo lamirugo áyu dabadaba.
JOS 20:3 Wali agali mbiralime mendeali mememe ko ba bowa bo home laragola homayagonaga dameneme ibunibi bo wahole talirago ibu dindi ogoniha pora bialu pelo.
JOS 20:4 Ibunime dindi uruni mbiragoha pora bialu puwa tale biagane anda pugu bulene ngagoria howa agua bini lalu ogoni handaya ho haga karuhondo lamulene nga. Ani bidagola tigua dindi ogoniha anda íbu lowa ibu helo dindi tu wu mulebira.
JOS 20:5 Dameneme ibu nde bo wahole lowa talima anda ibiragola wali agali ogoniha karu tigua pora bialu ibiyago bo wahelo bo wahole ibiyagohondo minu namulebira. Wali agali ogoniha karu tigua agali ogoni bayuwa mamage howa handaya ho holebira. Agali homayagoni ibugua barolo manda buwa ndo ko ba puwa homaya.
JOS 20:6 Ibugua dindi ogoniha howa godi dabagame wali agali deni dabalu mememe homelo baya lalu dabayagua agali biago ogoniha haho ngane Loma binigo mo miaga Haguane Timbuni ogoningi hene kago homaragola ibuninaga dindi andaga dai bulebira, lene.
JOS 20:7 Anduane Homogohanda ani layagola Isaraele wali agali Iba Yodana ni paliragohayagi howa Galili uyurahayagi barebare Nabadali dindi tano mini Kedese tu wu wini. Dindi dombeni Eberaiminaga barebareha tano mini Segeme tu wu wini. Dindi unurahayagi Yudanaga barebareha tano mini Heberono tu wu wini.
JOS 20:8 Ani bialu Iba Yodana poragonaga Yarigo tano ni ibiragohayagi howa dindi dalu emene hangu ibaganeha hameigini Lubene daluha tano mini Bese tu wu ho wini. Hameigini Gada daluha Gileadani tano mini Lamodi tu wu wini. Hameigini Manase daluha Basanani tano mini Golana tu wu wini.
JOS 20:9 Yuda wali agalibi wali agali maru tara ti heba hole ibinirubi ti heba hama lama ibiniru dindi uruni mbiraha pora bialu puwa ha do helonaga ani wini. Wali agali mbira mememe ko ba bowa bo homelayagua ogoni ibu wali agali homayago dameneme ibuni nde bo wahole lowa taliragola ibu pora bialu puwa dindi ogoniha ha do holebira. Godi dabagame wali agali deni godi ala lo dabowa ibu bolene nga layagua bolebira.
JOS 21:1 Libai hameigini aria agali haguane hearume loma binigo mo miaga Eleasabi Nunu igini Yosuabi Isaraele hameigini mbira mbira hearunaga agali haguanerubi ti hearia pene.
JOS 21:2 Libai hameigini agali haguane biaru tigua Kenana dindiha Silo tano wiagoria Isaraele hameigini agali haguane maru mo ngoai howa tihondo lalu, Anduane Homogohanda ibunaga bi mana latagi haga Moseseha howa inahondo bi mbira langiyagoni. Ibugua lalu, Ina Libai hameigini bu kamaru nde tano timbuniha holoma̱yabi dindi bayale dataniru anda haga ngago mbira inanaga nogo sibi bulumagaru hinalu holoma̱yanagabi tu wa ngulene nga laya, lene.
JOS 21:3 Ani layagola Isaraele hameigini bu hearume Anduane Homogohanda layadagua bialu dindi marubi tano marubi tininaga winiru Libai hameigini helonaga tu wa mini.
JOS 21:4 Ani bialu tigua dindi tu wa mulene pigane Anduane Homogo ibunime Kohada hameiginiru dindi agohayagi tu wa mibehedabe hondolenaga ege to̱le̱ emene biaru baraga hene. Ani baraga howa handalu hearia loma binigo mo miaga Arono aguaneneru Kohada hameigini hayadaruni ti Yuda dindihabi Simiono dindihabi Beniyamini dindihabi dindi uruniha howa tano pira mbirani tebira (13) bibahende mini.
JOS 21:5 Ani biyagola Kohada hameigini maru hayadaru tibi nde tano maru Eberaimi hameigini dindihabi Dana hameigini dindihabi Manase halu mende ni paliragohayagi henerunaga dindihabi dindi uruniha howa tano timbuni pira ti helonaga tu wa migi bini.
JOS 21:6 Ani bialu Gesono hameigini hearu tibi nde tano pira mbirani tebira (13) tu wa mini. Tano timbuni uruni Isaga hameigininaga dindihabi Ase hameigininaga dindihabi Nabadali hameigininaga dindihabi Manase hameigini halu mende ni tagira ibiragohayagi henerunaga dindihabi dindi uruniha howa tu wa migi bini.
JOS 21:7 Merari hameigini hearu tibi nde tano pira mbirani kira (12) tu wa mini. Tano timbuni uruni Lubene dindihabi Gada dindihabi Sebulunu dindihabi dindi uruniha howa tu wa miyagola ti uruniha hene.
JOS 21:8 Isaraelealime Anduane Homogo ibugua Moseseha howa bi latagi hayadagua talialu tigua ege to̱le̱ emene biaru baraga halu Libai hameiginiru dindi ani tu wa migi bini. Tano uruniha dindi emene wigi biarubi Libai hameigini tinaga nogo sibi bulumagaru hinu helobi mini.
JOS 21:9 Yuda hameiginibi Simiono hameiginibi tinaga dindiha howa tano timbuni Arono aguaneneru Kohada hameigini tu wa migi binirunaga mini uru gilibu wigi bida. Kohada hameigini ti Libai aguaneneru hene. Isaraelealiru tigua Arono aguanenerunaga dindi ala tu wabagi holenaga ege to̱le̱ baraga hene.
JOS 21:11 Tano timbuni mbira Araba mini mende Heberono ogoni winigo Yuda hameiginirunaga dindi hari bare wiagohayagi wini. Mini Araba ogoni Anaga aba hene. Yuda hameigini tigua dindi ogoni Arono aguanene ti helo mialu dindi bayale gibugibu wiarubi ti nogo sibi bulumagaru hinaga bialu helo mini.
JOS 21:12 Ani bialu Heberono tano timbuni ogoninaga dindi emene wiarubi tano emene wia para ho wiarubi ala Isaraele hameigini tigua Yabune igini Kalebehondo tu wa mialu ibunaga dindi ogoniore ngelonaga mini.
JOS 21:13 Tigua loma binigo mo miaga Arono aguanene hearuhondo Heberono tu wa minidagoni agalime ibida pialu ha do holene tano mbira winigo mini. Tano maru minidaruni Libina tanobi
JOS 21:14 Yadiabi Esedemoabi
JOS 21:15 Holonobi Debiribi
JOS 21:16 Ainibi Yutabi Bedesemese tanobi uruni wigi bini. Tano timbuni dira uruni Yuda hameigini Simiono hameiginilanaga dindiha winigobi ti tu wa mini.
JOS 21:17 Beniyamini hameiginime tinaga dindiha howa tano timbuni maria minidaruni Gibeonobi Gebabi
JOS 21:18 Anadodobi Alamonobi uruni tu wa mini.
JOS 21:19 Arono hameigini uruni ti loma binigo mo miaga howa tano timbuni miniru daga lamaga halu pira mbirani tebira (13) uruniha dindi emene wia parapara bu wiarubi heba ti nogo sibi bulumagaru hinaga bialu helo mini.
JOS 21:20 Libai hameigini Kohada hearu aria maru ti Eberaimi hameigini dindiha tano marubi wigi bini.
JOS 21:21 Kohada hameigini uruni ti tano timbuni maria tu wa mini. Tano uruni mbirago Segeme tano hari bare wiagoha winigo ogoniha agali ibida pora bialu ha do holene tano biaru aria winigo ogonibi Gesere tanobi
JOS 21:22 Kibisaimi tanobi Bedehorono tano winigobi mia dege bini.
JOS 21:23 Dana hameigini tiguabi nde tano timbuni maria Eledege tanobi Gibedono tanobi
JOS 21:24 Ayalono tanobi Gadarimono tanobi tu wa mia dege bini.
JOS 21:25 Manase hameigini maru ni paliragohayagi heneru tigua nde tano timbuni kira Kohada hameiginiru mini. Tano ogonilabo Tanaga tanola Gadarimono mini mende Ibileama tanola tihondo mia dege bini.
JOS 21:26 Kohada hameigini uruni ti tano timbuni minidaru daga lamaga halu pira uruniha dindi emene tomo dataniru anda holene bayale wiagoha tinaga nogo sibi bulumagaru hinu haga winiru heba mia dege bini.
JOS 21:27 Libai hameigini maru Gesonoali tihondo Manase hameigini maru ni ibiragohayagi henerunaga dindini tano timbuni kira Basana dindihayagi Golana tano winigo ogoni agali ibida pora bialu ha do haga tano winigobi Besedera tano winigobi mia dege bini.
JOS 21:28 Isaga hameiginirume tinaga dindiha tano timbuni maria wiaru Gesono hameigini urunihondo minigo uruni Kisiono tanobi Daberada tanobi
JOS 21:29 Yamudu tanobi Enganimi tanobi mini.
JOS 21:30 Ase hameiginirunaga dindiha howa tano timbuni maria mini. Misala tanobi Abadono tanobi
JOS 21:31 Helegada tanobi Lehobo tanobi mini.
JOS 21:32 Nabadali hameiginirunaga dindiha tano timbuni tebira wiaru Gesono hameiginiru mini. Tano uruni Kedese tano Galilihayagi wiago ogoni agali ibida pora bialu ha do haga tano mbira wiagobi Hamododo tanobi Kadana tanobi mia dege bini.
JOS 21:33 Gesono hameigini mbira mbira hearu ti tano timbuni minidaruni daga lamaga halu pira mbirani tebira (13) bibahende minigo wu hene. Tano timbuni uruniha dindi emene tomo dataniru anda holene bayale wiarubi heba ti nogo sibi bulumagaru hinu helonaga miai hene.
JOS 21:34 Libai hameigini maru Merari hameigini hearu tihondo Sebulunu dindiha tano wiaru maria mo mini. Tano timbuni uruni Yogoneama tanobi Kada tanobi
JOS 21:35 Dimina tanobi Nahalala tanobi winigo mini.
JOS 21:36 Lubene dindihayagi tano maria wiaru Merari hameigini hearuhondo mini. Tano timbuni uruni Besere tanobi Yahasa tanobi
JOS 21:37 Kedemodo tanobi Mebada tanobi mini.
JOS 21:38 Gada hameiginiru tinaga dindiha tano maria winirubi Merari hameigini hearu ti mini. Tano timbuni uruni Lamodo tano Gileada dindihayagi agali ibida pora bialu ha do haga tano biaru aria mbira winigobi Mahanaimi tano wiagobi
JOS 21:39 Hesebono tano wiagobi Yasere tano wiagobi mini.
JOS 21:40 Merari hameigini ti tano timbuni minidaru daga lamaga halu hombearia (12) mini. Tano timbuni uruniha dindi emene tomo dataniru anda holene bayale wiarubi heba ti nogo sibi bulumagaru hinilo mini.
JOS 21:41 Isaraele wali agalime tinaga dindi bibahendeha howa tano timbuni pira mariani halira (48) bibahende Libai hameiginiru helo tu wa mini.
JOS 21:42 Tano uruniha dindi emene tomo dataniru anda holene bayale wiarubi heba ti nogo sibi bulumagaru hinaga bilo mini.
JOS 21:43 Anduane Homogohanda Isaraele hameiginiruhondo dindi minidaru bibahende ala tinaga mamaliruhondo lamialu, I̱na dindi ogoni tí ngulebero, lalu lowinigodagua henene ani tagira pene. Ani miyagola Isaraele hameigini ti dindi ogoniha puwa bayale hene.
JOS 21:44 Bamba Anduane Homogohanda tinaga mamaliruhondo lamialu lalu, Tínaga miniha mo palia holene karulowa hada paya bu holeberemi, lenego bi ogoni henene lola halu ti ani hene. Ani heagola Anduane Homogohanda ti biamogo biyagome tigua tinaga waitigi bu hearu damene bibahende bope hai hene. Ani biyagola tinaga waitigi hearume ti bope holene hongo nahe hene.
JOS 21:45 Anduane Homogohanda bi bayale Isaraele wali agali ti baba lowini wiaru layadaguaore lola helo ani biai hene.
JOS 22:1 Isaraeleali dindi tu wa ta hai ho howa Yosuahanda Lubene hameiginirubi Gada hameiginirubi Manase hameigini maru ni ibiragohayagi henerubi olalu ti bibahende íbu ngoai hene.
JOS 22:2 Íbu ngoai ho hearia ibugua tihondo lalu, Tígua Anduane Homogonaga biabe biahaga Mosesehanda bilimu lalu langiyadagua bialu harimi. Ani bialu i̱naga bi langirugobi hale halu birimigoni.
JOS 22:3 Ani bialu howa horo bibahendengi tínaga damene Isaraele wali agali bu karu mbirago yu wa nahe biamogo bialu haabo harimi. Tígua Anduane Homogo inanaga Ngode Datagaliwabenaga bi layagobi hale halu bayuwa biaabo haga kamigoni.
JOS 22:4 Ai áyu Anduane Homogohanda bamba bulebero lalu lo wiyadagua tínaga damene bu karuni tiha bayale dege holene mbirani heledagoni. Ani bidago ai tínaga dindi Anduane Homogonaga biabe biahaga Mosesehanda tu wa nginigo Iba Yodana peago ange ni ibiragohayagi ngagoha hama dai bidaba.
JOS 22:5 Ani dai bu howa Anduane Homogohanda ibunaga biabe biahaga Moseseha howa bi mana tíhondo bilimu lalu langiyaruni bayuwa taluwa bialu haabo halimu. Ani bialu howa tígua Anduane Homogo tínaga Ngode Datagaliwabehondo gubalini howa ibugua hame ledadagua bialu ibunaga bi langiyago taluwa biai halu mini bilinahe ho halimu. Ani howa tígua tínaga gubalinimebi mandamebi hongo howa ibunaga biabe bia halu halimu, lalu lamini.
JOS 22:6 Yosuahanda bi ogoni lai howa ibugua, Anduane Homogohanda tí biamogo biaabo helo, lalu bi la hene. Ogonidagua layagola tini daluha pole pene.
JOS 22:7 Bamba Mosesehanda Manase hameigini halu mende hearuhondo dindi podene Basana Iba Yodana peago domo ede ni ibiragohayagi wiaru mini. Ani minigo mani Yosuahanda dindi maru Iba Yodana peagonaga abene ni paliragohayagi wiaru Manase hameigini maru hearubi Isaraele hameigini maru hearubi tihondo mialu bini. Ani bialu agali uruni tini dindi Iba Yodana peagoha hama dai bilonaga Yosua ibugua Anduane Homogohanda ti mo turu halu biamogo bilonaga bi lalu howa
JOS 22:8 tihondo lamialu lalu, Áyu tígua dabudabu dewaore mo yalu nogo sibi bulumagarubi muni ngolo silibarubi boronosibi aeanerubi aga dewaorerubi yu kamiruni yalu tíni dindi dai bidaba. Yalu dai buwa tígua wai bialu wai labuha howa mbirale mo yidamiruni aria maru tínaga damene andaga hayadaru talebu migi bilimu, lene.
JOS 22:9 Ani lai haya handala Lubene hameigini biarubi Gada hameigini biarubi Manase hameigini maru biarubi ti bibahende tini dindi ni ibiragohayagi dai biai hene. Hameigini uruni ti tinaga hameigini Isaraele maru hearu aria Kenana dindini Silo tano wiagoria hemi handala ti tininaga dindi Gileada ala henegoha dai bini. Dindi ogoni Anduane Homogohanda Moseseha howa layadagua ti karulene winigo tinaga dindi ogoniha dai bini.
JOS 22:10 Ani pialu Kenana dindihayagi yu wahalu piai nahe wene dege pialu iba Yodana peago angeni ni paliragohayagi hearia tigua dagia dabu timbuni mbira iba ange ogoriani bu helene.
JOS 22:11 Ani buwa Isaraele hameigini maru hearume tini aria bu hearu lamule puwa lalu, Hale hadaba. Lubene hameiginibi Gada hameiginibi Manase hameigini maru karubi tigua Anduane Homogonaga lomabu delaga dabu mbira Iba Yodana angeni ina daluhayagi abale bu heledago, lalu lamini.
JOS 22:12 Ani layago hale howa Isaraele hameigini maru bu hearu tigua abaleore Silo tano wiagoria hameigini tebira uruni baba wai bu pole manda manda bialu tidiyu hene.
JOS 22:13 Ani manda manda bu howa tigua loma binigo mo miaga Eleasa igini Piniasa heago Lubene hameiginibi Gada hameiginibi Manase hameigini maru biarubi Gileada dindi ti karia í̠ pole pu lene.
JOS 22:14 Ani layagola agali haguane pirali ti haru ma lalu Piniasa heba pene. Agali uruni ti bibahende Isaraeleali howa hameigini ni paliragohayagi hearu mbira mbiranaga agali haguane haga biniru ti pene.
JOS 22:15 Tigua Gileada dindi anda puwa Lubene hameigini bu hearubi Gada hameigini hearubi Manase hameigini maru biarubi tihondo lalu,
JOS 22:16 Anduane Homogonaga wali agali bibahende bu kamarume tíhondo bi mbira laramago hale halimu. Tígua irane aginaga Isaraele wali agali inanaga Anduane Homogohondo mana ko ogoni birimibe. Tígua Anduane Homogonaga bi mo wahalu tíninaga dagia dabu mbira bu helarimida. Anduane Homogo talima nape waharimida.
JOS 22:17 Bamba iname Peo dindini howa mana ko bialu hemaria Anduane Homogohanda warago koore mbira Isaraele wali agali mo ko halu bo wahai holenaga ibilayago mitangi bilimu. Áyubi nde iname ko ogoni birimagonaga genda yu haabo kamagoni. Tígua manda bu handalu hemiria ko ala birimago nakarulape degeyagola ai mendebi biatago holene manda bu harimibe.
JOS 22:18 Áyu tígua, Iname Anduane Homogo talima napoleberama, laramigo irane agibe. Áyu howa tígua Anduane Homogo erembira mirimiyagua nde yawi ina Isaraele wali agali bibahendehondo ibugua keba hai holobada.
JOS 22:19 Anigo tígua manda bu handalu kamiria tíninaga dindiha Anduane Homogo mitangi bialu ibuhondo lotu lolene nakarulape lo manda birimiyagua nde dindi ogoni wahalu dai buwa ina kamagoha dege Anduane Homogo ibuni dindi ngagoriabi ibuninaga Balai Anda kagoriabi dindi dombeni mbira karulole dai nabirimida. Anduane Homogo inanaga Ngode Datagaliwabe ibunaga lomabu delolene dabu mbiraore Silo dindini bu helarimagoni. Anigo tígua dabu mende ogoni irane aginaga bu helarimibe. Tíguabi ani birimigome tí dege ndo ina bibahende Anduane Homogonaga bi ala lowinigo mo wahene kamagoni.
JOS 22:20 Ani bialu harimidago ai Sera igini Agana hayago mitangi bilimu. Abale Anduane Homogohanda Yarigoha wai bialu howa mbirale tano ogoniha winiru aria mbira nayalimu lene. Ani layago lelowa Agana ibugua bi mo wahalu mo yayagome Isaraele wali agali bibahendeha genda anda ibai hene. Ko ibugua biyagome genda ibuni hanguha anda ibini ndo wali agali maru hearuhabi mo ko holene anda ibai hene, lalu agali haguane biarume lamini.
JOS 22:21 Ani lamiyagola Lubene hameiginibi Gada hameiginibi Manase hameigini marubi tigua lo mbiraore howa Isaraele hameigini mbira mbiranaga agali haguane dindi ni paliragohayagi howa ibini biaruhondo ladai bialu lalu,
JOS 22:22 Mbirali Hongo Haiheore kago ibu Ngode Datagaliwabe ka. Ibuni hangu Anduane Homogo kagoni. Mbirali Hongo Haiheore kago ibu Ngode Datagaliwabe ka. Ibuni hangu Anduane Homogo kagoni. Iname o birimadagoni irane ogonaga biya lalu ibuni manda bu ka. Ai tíguabi nde irane manda bilimulo hamelo kamagoni. Iname Anduane Homogo erembira mialu ibuhondo mini mbiraore nawi ibunaga bi mo waharimayagua nde ani holene nawigo tígua ina homelo bo wahai halimulo.
JOS 22:23 Iname Anduane Homogonaga bi ledago mo wahalu inanenaga dagia dabu bu helowa loma biniru irame dai helo bo delolenebi widiru lomabu delolenebi Anduane Homogola ho gimbu bulenaga lomabu delolenebi manda buwa dabu ogoni bu helarimayagua nde Anduane Homogo ibunime ina pani ngialu bo waholene nga.
JOS 22:24 Anigo ogonidagua bini ndo. Tínaga aguanene mani holobadarume inanaga aguanene mani holebiraruhondo lalu, Irane aginaga ina Anduane Homogo Isaraelenaga Ngode Datagaliwabe kago mitangi bialu lotu lalu kamibe.
JOS 22:25 Anduane Homogohanda Iba Yodana poragoha tubari wialu ina Isaraele wali agali kamaru tí Lubene hameigini Gada hameiginiru baba mandagi naholenaga wini. Ani winidago hondowa tí Anduane Homogonaga ndo kamiruni lolobada. Anidagua lalu tínaga aguaneneru mani holebirarume inanaga aguaneneru mani holebiraru ti Anduane Homogo mitangi nabi erembira mu holobadagonaga anidagua lolobadago manda bialu ina gi ho harimagoni.
JOS 22:26 Ani giho howa iname dabu ogoni loma tara tara mbira bule ndo iname bame manane walia hole bu helarima.
JOS 22:27 Dabu ogoni bu heledamagome tínaga aguanenebi inanaga aguanenebi mani holobadaru ina bibahende mo walia halu Anduane Homogo mbiraore kago ibunaga Balai Anda kagoni hondowa ibu mitangi bialu ibuhondo lotu lalu loma biniru irani dai helonagabi Anduane Homogo ibunila ho gimbu bulenaga loma marubi delaga beremali hendelo helarima. Ani bialu mani tínaga aguanenerume inanaga aguaneneruhondo lalu, Tí ina aria ndo kamigoni lolobadago manda bialubi bu helarima.
JOS 22:28 Iname mitangi bialu tígua inahondo bi ogoni larimiyaguabi tínaga aguanenerume inanaga aguanene holobadaruhondo bi ogonidagua larimiyaguabi nde iname ogodagua loleberema. Ai de handadaba. Dabu ogoni ina mamalirume bu helenego Anduane Homogonaga lomabu delaga dabu kagoni ale dege o bu kagoni. Dabu ogoriani loma biniru irani dai helo lomabu delolebi loma marubi bu delole ndo manane hangu tínaga wali agalirubi inanaga wali agalirubi hendelonaga bu heledema, loleberema.
JOS 22:29 Iname dagia dabu ogoriani loma irani dai helo delolebi widi lomabu delolebi loma bini marubi delole ndo bu heledema. Ani bule ndoore. Iname ani birimayagua nde Anduane Homogonaga bi mo wahalu ibu erembira mialu poleberema. Iname Anduane Homogo inanaga Ngode Datagaliwabeore kago ibuninaga lomabu delaga dabu ibunaga Balai Anda kagoria bu helene kagoni yu wahalu puwa mende bu aribia holene manda buwa ndo birima, lalu tihondo ladai bini.
JOS 22:30 Ani ladai biyagola loma binigo mo miaga Piniasabi Isaraele hameigini aria ni paliragohayagi hearu mbira mbiranaga agali haguane biarubi tigua Lubenebi Gadabi Manase hameigini aria maru biarume bi ladai biyago hale howa ti turu hene.
JOS 22:31 Loma binigo mo miaga Eleasa igini Piniasahanda Lubene hameiginibi Gada hameiginibi Manase hameigini maru biaru tihondo lamialu lalu, Tígua Anduane Homogo erembira mialu ibunaga bi mo wahowa ndo bialu harimidagome áyu Anduane Homogo ibuni ina heba mandagi kama manda bu kogoni. Ai bialu harimigome nde Anduane Homogohanda inahondo keba nahelo laro, lalu Piniasahanda lene.
JOS 22:32 Ani lai halu Piniasa heba agali haguane biaru ti Lubenebi Gadabi Manase hameigini aria maru biarubi ti Gileada dindini hemi handala tigua Isaraele hameigini Kenana dindiha hearuhondo ogoale bialu heneya laga bima ti hearia dai bini.
JOS 22:33 Ani dai buwa Isaraeleali hearu lamiyagola tigua te uruni hale howa turu timbuni ho hene. Ani howa tigua Lubene hameiginibi Gada hameiginibi Manase hameigini aria maru bababi wai bialu tinaga dindi andaru bo gialopaya bialu mo ko hole abale manda bu henego embeda halu ai te biago hale howa tigua turu halu Anduane Homogonaga mini yaraga ho hene.
JOS 22:34 Anigo nde Lubene hameiginibi Gada hameiginibi Manase hameigini aria maru hearubi tigua lalu, Dagia dabu ogoni Anduane Homogo ibuni hangu Ngode Datagaliwabe ka lalu ina bibahende mo walia holenaga manane o bu heledagoni, lene. Ani lenedagoni dagia dabu ogoni mini Tigatiga Latagi Haga laga wini.
JOS 23:1 Mali dewa peagola Anduane Homogohanda Isaraele wali agali bayale helo helene. Ani howa tigua tinaga waitigi bu hearu baba wai nabi haabo hene. Ani ho heangi Yosua ibu agali waheore berene.
JOS 23:2 Ani biruwa ibugua Isaraeleali bibahende olalu agali haguane bu hearubi agali ala hene miniwi hearubi godi hale halu dabaga hearubi wali agali biamogo biaga hearubi bibahende íbu ngoai hadaba lowa ibugua tihondo lamialu lalu, Ainde i̱ waheore harudagoni.
JOS 23:3 Anduane Homogo inanaga Ngode Datagaliwabehanda ina biamogo bulenaga waitigi bu hearuhondo bigi biyagoni tí de handai harimigoni. Anduane Homogo inanaga Ngode Datagaliwabe ibugua tí biamogo bialu wai bia hayagoni.
JOS 23:4 Ani binigo ai bi ogo baya hangu hale halimu. Hameigini tara taranaga dindi maru iname nakarule ngaru tí karulalimulo tehiru wirugo bibahende i̱na wai bialu karulaga birudagua tínime wai bialu karulai halimu. Tínaga dindi tubari Iba Yodana ni tagira ibiragohayagi pedagoria howa wima pialu iba solowara Medidereniana bedagoria ni paliragohayagi tagira pedagoni.
JOS 23:5 Anduane Homogo inanaga Ngode Datagaliwabe ibugua tínaga waitigi bu karu tí hondowa gi halu ibida piai helonaga mo gi haga bulebira. Ani biragola Ngode Datagaliwabehanda bulebero lalu lo wiyadagua tígua dindi bibahende karulai holeberami.
JOS 23:6 Ani bialu tígua Mosesehanda bi mana lowinigo mbugaha gilibu wini ngago baya hanguore hale howa talialu tínime handayaho hagahaga bilimu. Tígua ibunaga bi lo ngaru emene hangubi mbira mo wa nahalimu.
JOS 23:7 Ani bialu wali agali tara tí kamigoha yu wahene karu baba mandagi naholeore lalu tígua tinaga bi pupu wiaga ngagobi minibi heba nalalimuore laro. I̱na heneneore larogoni lowa tígua bi mo hongo holenaga mbira bi pupu wiago uruni minibi nalalimuore laro. Ani bialu mbirale urunihondo ge duli hanga halu bi pupu nawilimuore.
JOS 23:8 Tígua bialu haga wirimidagua biaabo halu Anduane Homogo ibuni kagoha haabo halu ibunihondo mini bilinaho haabo halimu.
JOS 23:9 Anduane Homogohanda tínaga waitigi timbuni hongohebi hayaruni bibahende bo batagi hai hayagoni. Ai tí bope holene hongohe mbira naholebira.
JOS 23:10 Anduane Homogo ibunime bulebero lalu bi lo wiyadagua bialu tí aria agali mbira hangume tínaga waitigi daosini mbira (1,000) mo gi haga beremigola ti ibida piai holebira.
JOS 23:11 Anigo áyu tínime mbirale bialu kamigo damene bibahende mamage howaore bialu halimu. Tígua Anduane Homogo tínaga Ngode Datagaliwabe kago gubaliniore ho halimu.
JOS 23:12 Ani bialu tígua Anduane Homogo inanaga Ngode Datagaliwabe kago erembira mialu puwa wali agali tara ti baba mandagi hamagamaga bialu ta nabi ha wali tara bedaru dabu bigibigi bialu harimiyagua
JOS 23:13 nde Anduane Homogo tínaga Ngode Datagaliwabehanda hameigini tara tara karu baba wai bule poramigola ti bo batagi naholebirago tíni manda bu halimu. Ani howa tí baba waitigi taraore holebira. Wali agali tara uruni ti uli pilolene gabua uli ngaligobi holebira. Tigua tínaga erekunini gewa tibume baradagua bialubi igibu anime deni ka haradagua bialubi tí mo tandaga halu haabo holebira. Ani bialu kamine dege Anduane Homogo tínaga Ngode Datagaliwabehanda dindi bayale ngiyagoria halu homoleberami, lalu Yosuahanda lene.
JOS 23:14 Yosua ibugua laabo halu lalu, Ainde tí helalu i̱ polene kaware ngelo bedogoni. Anduane Homogo inanaga Ngode Datagaliwabehanda mbirale bibahende nguleore lalu bi lo wiyaruni bibahende ngiaiore haya manda bu kamigoni. Buleore lalu lo wiyaru mbira mo habo nale biaiore hayagoni.
JOS 23:15 Heneneore larogo Anduane Homogo inanaga Ngode Datagaliwabehanda bule lalu lo winiru biaiore haya. Ani biyago nde ibugua bilimu lalu habo nalolene bi ti baba lo wiyago tígua mo habo lalu puwa mbirale bi pupu wule gime wabini ngaruhondo ge duli hanga ho biruwa bi pupu wialu harimiyagua Anduane Homogohanda tíhondo keba howa pani ngulebira. Ani pani ngialu kagola tí halimulo dindi bayale ibunime ti ngiyagoria ho lu nabi abale homoleberemi, lalu Yosuahanda Isaraele wali agali bibahende hearuhondo lamiai hene.
JOS 24:1 Yosua ibugua Isaraele wali agali hameigini hangu hangu hearu Segemeni olo ngoai hene. Ibugua agali ala hene miniwi hearubi haru hagane hearubi godi hale howa dabagane hearubi haru hagane maru hearubi ti bibahende Ngode Datagaliwabenaga deni olo ngoai hene.
JOS 24:2 Yosuahanda wali agali biaru bibahende olo ngoai howa lalu, Anduane Homogo Isaraelenaga Ngode Datagaliwabehanda bi ogobi larago hale hadaba. Bamba tínaga mamali ti iba Yuberedisi ange edeyagi heneyangi tigua bi pupu wule dama tara tara gime wabiniya. O heneda aria mbira Abarahama Nahola libu aba Tera heneyagoni.
JOS 24:3 Tínaga mamali Abarahama dindi ogoriani hearia howa Kenana dindi bibahendeni haru ibaga biai halu i̱na ibuhondo aguanene dewaore mirugoni. Ibu igini Aisagabi i̱na mirugoni.
JOS 24:4 I̱na Aisagahondo igini kira Yagaba Isola miru. I̱na Isohondo dindi Idomo harihayagi tu ho miru. Anigo tínaga mamali Yagaba ibu waneigini heba Iyibiha daliape halu piyagoni.
JOS 24:5 Mani hayagola i̱na Mosese Aronola ti hearia pudaba lowa Iyibi wali agali mo tandaga halu nahendene ale gibi bialu tí haru halu tagira pirugoni.
JOS 24:6 I̱na tínaga mamali Iyibi dindini hearia haru halu tagira pialu hewaria Iyibialime tinaga wai biagane garo ale karisi ge kirahe nogo hosime gililaga wiarumebi wai biaga agali nogo hosini biralu piagarumebi talima pene. Ani biyagola tínaga mamali biarume solowara mini Iba Daramabi bereagoria howa
JOS 24:7 i̱hondo biamogo bia lalu dugu biya. Ani biyagola i̱na ti baba Iyibiali biaru baba hengeneha aruma ngelaru. Iyibiali biaru iba solowara biagome dunga dambi helalu mo iba nai helaru. Iyibiali biaruhondo ogo ale biya tí manda bidamigoni. Dindi ko wali agali nahe biagoria mali lu dewaore harimi.
JOS 24:8 Ani hemiria i̱na tí Amoroali dindi Iba Yodana ni ibiragohayagi haru halu anda ibirugoni. Tí baba wai bialu hearia i̱na tí mo wayali ha harugoni. I̱na ti bope harugola tinaga dindi wiaru tígua karulama aribia harimigoni.
JOS 24:9 Ani bialu Moabalinaga Kini Balaga ibu Sibo igini howa ibugua tí baba wai biyagoni. Ibugua Beo igini Balama hearia bi pelalu tí ha habe laya.
JOS 24:10 Ibugua ha hole biyaria i̱na tí mo baya helo lowa ibuha howa i̱na mo turu halu tí ha nahe mo bayale haru. Ani binigo Balaga ibugua ko bule manda manda bu wiago nabilo tí gi mirugoni.
JOS 24:11 Tí Iba Yodana domalu Yarigo anda ibirimigola Yarigo agali hearume tí baba wai biyagoni. Amoroalibi Peresealibi Kenanalibi Hidialibi Giagasialibi Hibialibi Yabusualibi uruni ti bibahendeme tí baba wai dege biyagoni. Ani biyagonigo i̱na tí wayali halimulo bibahende baba wai birimingi wayali helaga birugoni.
JOS 24:12 Tígua ti heagoria hapara harimigola i̱na ti mo mogola harugoni. Amoroalinaga kini kira biagolabo warape lolenaga biru. Tinaga wai biagane ayu tibu ale yimigomebi danda yimigomebi bini ndo i̱nime birugoni.
JOS 24:13 Dindibi tí gime biabe bialu mo tiga bini ndo ngiru. Tano timbuni ngirurubi tíni gime bini ndo ngiru. Áyu dindi ogoriani kami. Ani bialu pu mbira lini daga mini gerebi nalu kamiruni tíni hengene ndo narami. Olibe lini ira ebere karubi tíni gime hengene ndo nalu kami lalu Anduane Homogohanda bi ogoni tíhondo larago laro, lalu Yosuahanda lamini.
JOS 24:14 Yosua ibugua lala ho wiyagoria howa lamialu lalu, Anigo áyu Anduane Homogonaga mini mo dunini halu ibugua laradagua mini bilinahe howa henemane bilimu. Tí mamaliru tigua dama tara tara ebere Mesobodemia dindini heneyaru bi pupu wiyarubi Iyibialinaga dama tara tarabi pupu wiyarubi bibahende yu wahai halimu. Ani buwa Anduane Homogonaga mini hangu mo dunini halimu.
JOS 24:15 Ogonidagua bule manda nabi kamiyagua mini mbiraore ogohondo wule lalu horo áyu ogoriani howa tíni dabolene nga. Mesobodemiani tí mamalinaga dama ka layaruyaguabi ndo dindi o kamigoriani Amoroalinaga dama ogoriani karuhondoyaguabi bi pupu wialu ogonaga hole lalu tínime dabalimu. I̱bi i̱naga andagani karu hebabi iname Anduane Homogonaga mini mo dunini halu ibunaga biabe bia halu holeberema, lene.
JOS 24:16 Ani layagola wali agali biarume ladai bialu lalu, Iname Anduane Homogo yu wahalu dama tara tara bi pupu wule napoleore berama.
JOS 24:17 Anduane Homogo inanaga Ngode Datagaliwabe ibugua inabi ina abarubi Iyibi dindi garabaya hearia golope halu haru halu ibini. Ibugua agalime nabiagane ale maru biyarubi de handarima. Dindi tara tarani bibahende bolangua halu pirimagolabi ibugua ina handaya ho haya.
JOS 24:18 Dindi ogo mule anda ibirimagolabi Anduane Homogohanda Amoroali ogoria paleneyaru bo purogo lelaya. Ani binigo inamebi Anduane Homogo mitangi bialu ibunaga biabe biahalu holeberema, lene.
JOS 24:19 Ani layagola Yosuahanda wali agali biaruhondo lalu, Ani laramigo tígua Anduane Homogonaga biabe bia naholigo Ngode Datagaliwabe ogoni agali ale ndo ibu tigabi taraore kago tígua ko birimiyagua ibu domo wanaholebira. Ibugua mbirali mende tara ibu kagobi kalo manda bilo hame nalaga ka.
JOS 24:20 Ani bialu tígua ibu erembira mialu wali agali tara taranaga damaru bi pupu wialu harimiyagua ibugua tí erembira ngialu pani ko ngulebira. Ala ibugua tíhondo bayale bialu hayagoni dege mani tígua kagua birimiyagua tí bo haealobaga bulebira, lalu Yosuahanda lene.
JOS 24:21 Wali agali biarume Yosuahondo hongo howa lalu, Ndoore iname Anduane Homogonaga biabe biaore halu holeberema, lene.
JOS 24:22 Ani layagola Yosuahanda ladai bialu lalu, Anduane Homogonaga biabe bia holeberema larimigoninaga au larima lolenebi tíni dege kamigoni. Ani layagola wali agali biarume lalu, E̱ au larima lolenebi inane dege harama, lene.
JOS 24:23 Bi ogonibi layagola Yosua ibugua bi hongohe tihondo lamialu lalu, Dindi tara tara wali agalinaga dama ebere bu payabu wimiru mo wahai hadaba. Ani bialu Anduane Homogo mbiraore Isaraelenaga Ngode Datagaliwabe ka lalu ogoni heba hangu hole lalu walia hadaba, lene.
JOS 24:24 Wali agali biarume Yosuahondo ladai bialu lalu, Anduane Homogo inanaga Ngode Datagaliwabe mini hangu mo dunini halu ibunaga biabe biahalu holeberema. Iname ibugua laradaguaore hale halu buleberema, lene.
JOS 24:25 Ani layago hale howa Yosuahanda wali agali biaru heba howa habo nalolene bi maru tigua hale halu bilo lowa lowini. O binidaruni dindi mini Segemeni howa hangu bini.
JOS 24:26 Habo nalolene bi lo winidaruni Yosuahanda muwa Ngode Datagaliwabenaga mana mbugani lowinigo wiagoni gilibu ngelene. Ani buwa ibugua ege to̱le̱ timbuni mbira dugu yamuwa ira mini oga mbira Anduane Homogonaga anda biagoha hapara howa heneyago andaneha hengene.
JOS 24:27 Yosuahanda wali agali biaruhondo lamialu lalu, Ege to̱le̱ ogonime horo ogoningi agua birima lalu mo mitangi bia helo hangaramagoni. Ege to̱le̱ ogonime Anduane Homogohanda bi inahondo langiyago hale hai haya. Ogoni tígua Ngode Datagaliwabe erembira mialu yu wahalu pirimiyagua ege to̱le̱ ogonime bi lo wirimigo mo mitangi bia holebira, lalu Yosuahanda lene.
JOS 24:28 Uruni biai halu Yosuahanda wali agali biaru tini andaga dai bidaba layagola tini dindi andaga hayadagua dai bigibigi bini.
JOS 24:29 Uruni bupe howa hearia Anduane Homogonaga biabe biahaga Nunu igini Yosua ibu mali handari mbirani pira (110) howa homene.
JOS 24:30 Homayagola tigua ibunaga dindi Timina Serani hora hene. Dindi Timina Sera ogoni Eberaiminaga hari bare Hari Gasa uyurayagi hora hene.
JOS 24:31 Yosua ibu heangi Isaraele wali agali hearume Anduane Homogonaga mini mo dunini halu ibunaga biabe bia haho wiaabo hene. Tinaga haru hagane Anduane Homogohanda Isaraelenaga nahendene ale bigi biyaru hendene biarume heangibi Isaraele wali agali tigua Anduane Homogonaga biabe dege bia ho wiaabo hene.
JOS 24:32 Yosebenaga kuni Iyibi howa yalu ibiniyago Segeme dindi emene mbira wiago bamba Yagabahanda Hamo iginirunaga yolo bu winiyagoria hora hene. Hamo ibu igini mbira Segeme hene. Dindi ogoni siliba muni handari mbirame (100) yolo bini. Ani binigo dindi ogoriani Yosebenaga aguaneneru tini hene.
JOS 24:33 Arono igini Eleasabi homayagola dindi Eberaiminaga hari gibuhayagi Gibea dindini hora hene. Dindi ogoni ala Eleasa igini Piniasahondo mini.
JDG 1:1 Yosua homayagola Isaraele wali agali tigua Anduane Homogohondo hale halu lalu, Ai Kenanaliru baba wai bule ina hameigini aiwa bamba holobadabe, lene.
JDG 1:2 Ani layagola Anduane Homogohanda ladai bialu lalu, I̱na dindi ogoni Yuda hameiginiruhondo minigo nde tinime bamba holene nga, lene.
JDG 1:3 Anidagua layagola Yuda hameigini tigua Simiono hameigini hearuhondo lamialu lalu, Tí ina baba ala mali̱ya. Ani puwa dindi ina tu wa ngini biagoria Kenanali karu baba wai bialu hami̱ya. Ani bialu mani dindi tí tu wa ngini biagoha wai bule mali̱ya, lene. Ani laya handala Simiono hameigini biaru tigua Yuda hameigini baba mandagi wai pole ma lalu pene.
JDG 1:4 Pialu Yuda tinime bamba howa wai biyagola Anduane Homogo ibunime Kenanali hearubi Pereseali hearubi bibahende tinaga giha minu ya hayagola horo ogoningi dege Yudalime tinaga waitigi daosini pira (10,000) Besege tano wiagoria bo wahai hene.
JDG 1:5 Yudali tigua Kini Adoni Besege halu ibunaga ami agaliru dindi ogoriani lola howa wai hongo howa bialu Yudali tigua bo poda hana hene.
JDG 1:6 Ani bialu howa Adoni Besege ibida pialu hearia Yudalirume talima pugupugu bialu ibu minu yania hene. Minu yania howa tigua ibunaga gi hondone angibiyane kirabali pugu wahalu ge hondone angibiyanebi kirabali pugu wa dege hene.
JDG 1:7 Ani biyagola Adoni Besegehanda lalu, Bamba i̱na kini dege pira karianaga (70) gi hondone ge hondonebi angibiyane kirabali bibahende pugu waheneru ti i̱naga tomo nalu biraga dagia andaneha tomo ibira ibira bidaru ilu nalu berelaga biruli. Ani biruligo áyu nde Ngode Datagaliwabehanda i̱na tihondo birulidagua i̱nihondo biadai biyada, lene. Anidagua bialu Yudali tigua Adoni Besege Yarusalemeha haru puwa helenego haabo halu homene.
JDG 1:8 Yudali tigua Yarusaleme anda puwa wai bialu bo poda hana halu dindi ti karulene. Wali agali bu hearu bo hilo wahai halu tinaga dindi anda wiaruni bibahende bo heda hai hene.
JDG 1:9 Ani biai halu mani Kenanali hari barebareha hearu bababi ni paliragohayagi hari bare emene wima pearuha hearu baba wai bialu unurayagi Negebe dindi wiagoha hearu bababi wai bia dege bini.
JDG 1:10 Ani buwa mani Kenanali maru Heberono tano bamba Kiriada Araba laga winigoria hearu baba wai bule pene. Anidagua bialu Yudali tigua wai bialu Sesai hameiginibi Ahimana hameigini palearubi Talamai hameigini palearu baba wai bialu bo poda hana hai hene.
JDG 1:11 Yudali biarume Heberono biaru bo poda hana hai halu ai Debiri hameigini hearu baba wai bule pene. Bamba tano ogoni Kiriada Sebe tano laga wini.
JDG 1:12 Yudali mbira mini Kalebe ibugua lalu, Agali mbirame Kiriada Sebe tano bo poda hana hayagua agali ogoni i̱ wane Agasa bedago ibu dabu bilo mulebero, lene.
JDG 1:13 Ani laya handala pialu agali mbira Kenasa igini Odoniele henegome tano ogoni bo poda hana haga bima anda pialu karulene. Kenasa ogoni ibu Kalebe hamene heyogone hene. Kalebehanda ibu wane Agasa Odoniele dabu bilo miyagola ibu dabu bu hene.
JDG 1:14 Agasa ibu Odoniele andaga ibiyagola Odonielehanda ibuhondo lalu, Í̠na í̠ aba Kalebehondo dindi mbira tu wa ngi labe, lalu hongo howa lene. Ani layagola Agasa ibu Kalebe hearia puwa ibu nogo dongini biralu penego daliape hayagola Kalebehanda hale halu lalu, Í̠ agi hamelalu ibiribe, lene.
JDG 1:15 Ani hale hayagola Agasahanda ibu abahondo ladai bialu lalu, Í̠na mbirale mbira i̱ ngibelo hameledo. Í̠na dindi mbira abene unurayagi tu wa ngirigoniha iba nabereyago ai iba hambiaga uliwi mbira ngibelo hameledo, lene. Ani layagola Kalebehanda dindi iba duguaga liyagi niyagi wiagobi kirabali ibu wane mini.
JDG 1:16 Mosese imane Keniali mbira henego ibunaga aguaneneru tibi Yuda agalibi ti haru Yarigo tano mini mende Ira Dedi Tano laga wiago wahalu Yuda dindihayagi dindi ko iba dalu naibaga wiagohayagi pene. Dindi ogoni abene unurayagi Arada tano wiagoha pialu ti Amelegeali bu hearu baba ogoniha ho hene.
JDG 1:17 Ani bialu Yuda hameigini Simiono hameiginiru tigua Kenanali Sebada tanoha bu hearu baba wai bialu bo poda hana halu dindi andaru bo haeala baga biai hene. Ani buwa tigua tano ogoni mini gahenge wia aribia halu mini Homa wini.
JDG 1:18 Ani bialu maru Gasabi Asagelonobi Egeronobi tano uruni dindi emene maru tano uruniha wia parapara bu wima pearubi heba ti karulai hene.
JDG 1:19 Anduane Homogohanda ti biamogo biyagola Yudali biarume dindi hari barebareha wiarubi heba karulai hene. Anigo waitigi maru iba angeha palearume tinaga wai biaga garo ale mini karisi aeaneme wabini wiago Yudalirume ti baba wai bialu ti bo podabe nahe hene.
JDG 1:20 Ani bialu Heberono tano ogoni bamba Mosesehanda lo winidagua Kalebe mini. Ani biyagola Kalebehanda Anaga aguanene hameigini tebira Heberono tanoha hearu bibahende bo batagi hai hene.
JDG 1:21 Anigo Beniyamini hameigini tigua Yabusu hameigini Yarusalemeha hearu bo batagi habe naheyagola Yabusu hameigini biaru ti Beniyamini hameigini baba mandagi Yarusalemeni haabo hene.
JDG 1:22 Ani howa Yosebe aguanene tigua Bedele tanoha hearu baba wai bule pene. Ogoningi tano ogoni mini Lusu laga wini. Tigua wai bu piyagola Anduane Homogohanda ti biamogo bialu hene. Ani bialu heagola Yosebe aguanene maru tigua tano ogoniha diri hondole pene.
JDG 1:24 Ani pialu hearia tigua agali mbira tano ogoniha howa tagira ibalu hearia hondowa ibuhondo lalu, Ina tínaga tanoha diri hondo ibuluma̱ya haru anda piriyagua iname í̠ naboleberema, lene.
JDG 1:25 Ani laya handala agali biagome ti tanoha anda pelo hariga walia hene. Ani walia hayagola tigua tano biagoha anda puwa wali agali bu hearu dewaore homelo bo wahai halu agali hariga walia hayago ibu damene bu hearu dege bo wa nahe helo wahene.
JDG 1:26 Ani biya handala agali ogoni ibu Hidi dindi wiagoha puwa tano mbira mo wialu tano ogoni mini Lusu wini. Tano ogoni áyubi wiaabo ka.
JDG 1:27 Manase hameigini bu hearume wali agali tara tara Bedesana tanohabi Tanaga tanohabi Do tanohabi Ibileama tanohabi Megido tanohabi tano uruniha tano emene wia parapara bu wiaruha hearu baba wai buwa Kenanali biaru wai hongo howa biyagola bo batagi nahe helo wahene.
JDG 1:28 Ani helowa Isaraeleali ti dewa hongohe howa tigua Kenana wali agali dindi anduane hearu tinaga garabaya biabe ale bialu helo helaga bini. Anigo Isaraeleali tigua Kenana wali agali uruni bo batagi hai nahe maru helene.
JDG 1:29 Eberaimi hameigini tigua nde Kenana wali agali Gese tanoha hearubi bo batagi habe naheyagola Kenana wali agali uruni ti Isaraeleali hearu baba mandagi hene.
JDG 1:30 Sebulunu hameigini tiguabi nde Kenanali dindi anduane Kidirono tanoha hearubi Nahalala tanoha hearubi bo batagi hai nahe helo ha dege bini. Ani binigo Kenana wali agali uruni ti tano ogoniha mandagi hene. Ani helowa Sebulunu hameigini tigua Kenana wali agali uruni tinaga garabaya biabe ale biahelo helene.
JDG 1:31 Ase hameigini tiguabi nde wali agali Ago tanohabi Saidono tanohabi Alaba tanohabi Agasibi tanohabi Heleba tanohabi Abege tanohabi Lehobo tanohabi dindi anduane bibahende bo batagi hai nahe helene.
JDG 1:32 Ani helowa Ase hameigini tigua Kenana wali agali uruni tini heba mandagi hamagamaga bu hene.
JDG 1:33 Nabadali hameigini tibi nde dindi anduane Bedesemese tanoha hearubi Bedanada tanoha hearubi bo batagi hai nahe ti baba mandagi hene. Ani helowa Nabadali hameigini tigua Kenana wali agali urunime tinaga garabaya biabe ale bialu helo helene.
JDG 1:34 Amorali hearu ti hongohe howa tigua Dana hameigini hearu uyura hari barebare dindi emene wiaruha helo warabagi ho helene. Tigua Dana hameigini dindi bayale ulini wiagoha ibulilono handaya hene.
JDG 1:35 Amorali hearu ti Ayalono tanohabi Salabimi tanohabi biralu Hari Herese heagoha dindi wiaruhabi tini dege haabo halu bini. Tinaga dindi tubari Agarabimi polene hariga hari nene wiagoha iraga halu peagoria howa pialu dindi mini Sela wiagoria bolangua halu uyura puabo hene. Anigo Yosebe aguanene biaru tigua handayaho howa tinaga garabaya biabe ale bialu helo helaga bini.
JDG 2:1 Anduane Homogo ibunaga dahuliyali mbiralime Giligolo dindi howa Bogimi dindi puwa Isaraelealiruhondo lalu, I̱na tí Iyibi dindi howa haru halu tagira pialu dindi bamba tínaga mamaliruhondo ngulebero lo wirugo o biagoria haru pirugoni. Ani bialu i̱na bi au lo wiru. I̱na habo nalolene bi tí baba lo wirago napuguleore lo wiru.
JDG 2:2 Tígua wali agali dindi ogoria karu heba habo nalolene bi mbira nalowilimu. Tinaga mbirale bo lomabu miaga dabu ngaru bo gialo waore halimu larugoni. I̱na ani bilimu larugoni tí nabi howa ai nalewadagua bu aribia halu harimida.
JDG 2:3 Ani bialu harimidago ai áyu i̱na larogo wali agali o karuni tígua i̱na bo batagi helo manda bu harimigoni bo batagi naholebero. Uruni tínaga waitigi ti halu tígua tinaga dama tara tararuhondo bi pupu wilimulo ti warape halu holebira, lene.
JDG 2:4 Dahuliyalime tihondo ogonidagua lamiyagola Isaraele wali agali bibahendeoreme taga halu dugu timbuni bini. Irane ogoninaga
JDG 2:5 dindi ogoriani dugu bini lalu mini Bogimi wini. Dindi ogoriani tigua Anduane Homogohondo mbirale bo loma bialu mini.
JDG 2:6 Yosuahanda Isaraele wali agali ti hariga pole piyagoria, Hangu hangu pugupugu bidaba, lalu agali homane mbira hangu hangu ibuninaga dindi tale bialu karulolenedagua karulaga laga bilo pelene.
JDG 2:7 Yosua heangi hama ibiyagoniha Isaraele wali agalime Anduane Homogonaga biabe bialu hene. Ani bialu mani ibu homehabi Anduane Homogonaga biabe biaho wini. Ogonidagua bialu henedagoni haru haga maru ti Anduane Homogohanda Isaraele wali agalihondo gibiore tara tara biyaru tinime hendenego hai heaore ani bialu hene.
JDG 2:8 Anduane Homogonaga biabe biahaga Nunu igini Yosua ibu luha dege biane mali handari mbirani pira (110) peagola homene.
JDG 2:9 Ibunaga tingini ibuni dindi gembone mbira mini Timina Sera hari bare Eberaimi dindi Hari Gasi weagoha hora hene.
JDG 2:10 Wali agali dabane ogoningi henedaruni bibahendeore homai halu dabane mende maha ha aribia hayarume ti Anduane Homogo embeda halu ibugua Isaraele wali agalihondo bima ibiyarubi embeda hai hene.
JDG 2:11 Ani bialu Isaraele wali agali biarume Anduane Homogohondo mana ko ngubiore bialu tigua Kenana wali agalinaga bi pupu wule gime wabini Balaruhondo mitangi bialu mo tene ho hene.
JDG 2:12 Tigua Anduane Homogo ti mamali henedaruninaga Ngode Datagaliwabe ti Iyibi dindi howa haru tagira ibiyago ogoni ibu embeda halu lotu nale wahalu tigua dama tara tara wali agali ogoriani ho mabu biarunaga damahondo bi pupu wule lowa wialu hene. Tigua dama urunihondo bulu palialu bi pupu wiyagome Anduane Homogo mo keba hene.
JDG 2:13 Ani bialu tigua Anduane Homogo mitangi bialu lotu lolenego hado wahalu tigua gime wabini mini Balarubi mende mini Asedarerubi tinaga biabe bialu hene.
JDG 2:14 Ani biyago hondowa Anduane Homogohanda Isaraele wali agaliruhondo keba kaubiore howa uruni pageali harigani karume balu mbirale henedaru tagu page bilo henge mini. Ibugua tinaga waitigi hearu kaware ti heagoria ho mabu bilalu tinaga hongo daligaore ho bolangua helene. Ani biagola Isaraeleali biaru tininaga tingini mo do halu ha do habe nahe wini.
JDG 2:15 Bibahendengi tigua wai bule tagira pugu biyagola Anduane Homogo ibu ti heba nahole lalu bi lo wiyadaguaore habagiho hene. Ani biyago hondowa tigua mini genda timbuniore halu hene.
JDG 2:16 Ani bu heagola Anduane Homogo ibugua Isaraelealiru pagealirume belo yupe hayaruni áyu pele milo haru haga maru dabo helene.
JDG 2:17 Ani biyagolabi Isaraeleali tigua tinaga haru haga helayarume bi layaruni bayuwa hale ho tiga nabiore hene. Isaraeleali uruni ti Anduane Homogohanda layadagua nabi howa tigua dama tara tararuhondo bi pupu wialu hene. Tinaga aba ala henerume Anduane Homogohanda bi layadaguaore bialu penego áyu dabane gahenge ha aribia hayagome ani nabi abale yu hado wahalu hene.
JDG 2:18 Anduane Homogohanda Isaraele wali agali haru helo haru haga mbira dabo mirangi Anduane Homogo ibugua haru haga ogoni biamogo biragola haru haga ogoni kangi ti waitigime nabelo pele miaga. Anduane Homogohanda tihondo dara henedagoni irane tigua mini burugu lowa tandaga nalu u̱lu̱ lalu dugu bialu heago hondowa ani bini.
JDG 2:19 Ani bialu heagola dege haru haga biago homaga biyagola wali agali biaru ti ko ala bialu hene biagoria bule dai bigi bialu hene. Uruni tigua ko ala henedarume binidadagua ndo ko ngubiore bialu hene. Tigua dama tara tararu mitangi bialu urunihondo bi pupu wialu hene. Ani bialu tigua tininaga mana ko ngubiore biaga wiyaru yu wahole manga ho hene.
JDG 2:20 Ani biyagola Anduane Homogo ibugua Isaraele wali agalihondo keba taraore howa lalu, Dindi hameigini ogome habo nalolene bi i̱na ogoria tinaga mamaliruhondo puguaore nabi yu halimu lo wirugo puguarimida, lene.
JDG 2:21 Ogoniore irane tigua i̱na bi lo wirudagua nabiyagome i̱na dindi hameigini mbira Yosua homedaha dindi ogoriani haho wiaabo karu wara tagi naholebero, lene.
JDG 2:22 I̱na Isaraele wali agali urunime tinaga mamalime i̱naga mana talialu binidagua áyu nde tigua birabe be nabirabe hondole haru holebero, lene.
JDG 2:23 Ani lowa Anduane Homogohanda dindi hameigini uruni dindi ogoniha helo henge mini. Ani bialu ibugua Yosuahanda hongo howa ti bope helo henge nami homehabi wara tagibi nahe dege helene.
JDG 3:1 Anduane Homogohanda agali tara maru Kenana dindi wiagoha Isaraele agaliru baba mandagi helo wahene. Ani binidagoni irane bamba Isaraeleali tigua Kenana dindi karulolenaga pigane wai biyangi igiri daliahe maru ti wai biyago nahendene heagola ti agali tara o henedaruni baba hongo manda bialu wai bilonaga ani helo wahene.
JDG 3:2 Anduane Homogo ibugua Isaraeleali igiri daliahe mbira mbirago wai biaga mana ti biawai holenaga ani bini.
JDG 3:3 Kenana dindini hameigini maru Anduane Homogohanda henemane helo wahenedaruni Pilidia tano duriani agali haguane bu hearubi Kenanali bibahendebi Saidonoalirubi Hibiali hameigini Lebanono hari hearuha palu yu pearubi Hari Balahemono heagoha howa palu yu puabo halu amura Hamada tanoha pole piaga hariga wiagoria hearubi uruni bibahende Kenana dindini helo wahene.
JDG 3:4 Ani helo wahayadaruni Anduane Homogo ibugua Isaraele wali agalime ibunaga bi mana talialu birabe be waharabe ba hondolenaga anidagua helo wahene. Ibunaga bi mana ogoni bamba Moseseha howa tinaga mamaliru mo mini biago wini.
JDG 3:5 Anidagua binigo Isaraele wali agali ti hameigini tara tara Kenanalibi Hidialibi Amoralibi Peresalibi Hibialibi Yabusualibi wali agali uruni heba mandagi hene.
JDG 3:6 Ani bu howa Isaraele wali agali ti uruni baba dabu bu iriari bini. Ani bialu howa tigua wali agali uruninaga dama mitangi bialu mbirale gime wabini wiaruhondo bi pupu wialu hene.
JDG 3:7 Isaraele wali agali tigua Anduane Homogonaga deni howa mana ko timbuniore bialu hene. Tigua Anduane Homogo tinaga Ngode Datagaliwabe erembira mialu dama mitangi bialu mbirale gime wabini mini Bala wiagohondobi dama wali beda mitangi bialu gime wabini mini Asera wiagohondobi bi pupu wialu hene.
JDG 3:8 Ani bialu heagola Anduane Homogohanda tihondo keba timbuni howa Mesobodemianaga Kini Kusana Lisadaimihanda ti bope helo ibilene. Ani ibilayagola Isaraele wali agali ti Kini Kusana Lisadaimi andaneha mali halira hene.
JDG 3:9 Ani hearia tigua Anduane Homogo mitangi bialu biamogo bia lalu olayagola Anduane Homogo ibugua tinaga bi hale howa agali mbira mini Odoniele henego ibugua ti kini ogoninaga giha howa haru dai bilo dabalu ibilene. Odoniele ogoni ibu Kalebe hamene heyogone Kenasa igini hene.
JDG 3:10 Anduane Homogonaga Dinini Odonieleha íbu heagola Odoniele ibu Isaraele wali agalinaga agali haguane hene. Ani howa ibugua Mesobodemianaga kini biagola wai bialu Anduane Homogohanda ibu hongo miyagola ibugua kini biagonaga hongo bope hene.
JDG 3:11 Wai o biyadagoni howa mani Isaraele dindini wai nabi mali pira maria (40) bayale hene. Ani halu Kenasa igini Odoniele homene.
JDG 3:12 Isaraele wali agali tigua Anduane Homogonaga deni mana ko lone bialu hene. Ani bialu hemiria Anduane Homogohanda Moabanaga Kini Egelono mo hongo hayagola ibunaga hongo ogonime Isaraelealinaga hongo bope hene.
JDG 3:13 Egelonohanda Amonoalibi Amelegealibi mo mogo bialu Isaraeleali baba wai bule puwa Yarigo tano mini mende Ira Dedi Tano laga wiagoria bo poda hana halu karulene.
JDG 3:14 Ani biyagola Isaraele wali agali ti Egelono andaneha mali pira mbirani halira (18) garabaya biabe ale bialu hene.
JDG 3:15 Ani bialu howa tigua Anduane Homogohondo biamogo bia lalu hongo howa olene. Ani olalu heagola Anduane Homogo ibugua ti biamogo bialu tinaga waitigi giha howa haru dai bilonaga agali mbira mini Ehudu henego dabalu ibilene. Ehudu ibu Beniyamini hameigini Gera henego igini howa ibu gi leme baga hene. Ani henego horo mbirungi Isaraelealime Moabanaga Kini Egelono mo turu halu mbirale maru wia hole manda bialu uruni Ehudu ibugua mo yalu pole pene.
JDG 3:16 Ehudu ibugua wai biaga ayu tibu mbira nene kirabaliha ne gadele wabu wini. Wai biaga ayu tibu ogoni luninaga magi sendimida pira duria (50) wini. Ani bu winigo ibugua ayu tibu ogoni aga labolabo bu heagome dambi howa gi tigahayagi mandibuha da hene.
JDG 3:17 Kini Egelono ogoni ibu agali hado timbuni mbira hene. Ibu hearia Ehudu ibugua mbirale tara tara Kini Egelononaga wia hayaru mo yalu pene.
JDG 3:18 Puwa mbirale tara tara Kini Egelono mo turu halu mule agali marume yalu pirimiruni Ehudu ibugua kini biagohondo mialu ti andaga dai bini.
JDG 3:19 Dai bialu hearia Giligala dindi kawareni ege to̱le̱ timbuni wiagoriani agalime bigiya kau wuwa wabu helaga biagoria tagira pene. Ani puwa ogoriani howa Ehudu ibu beregedalu Moabanaga Kini Egelono berearia dai bini. Dai bialu ibugua Kini Egelono bereago de hondowa ibuhondo lalu, Kini-o i̱na bi galone mbira í̠ni hangu hale habelo langule yido, lene. Ani layagola Kini Egelono ibugua agali maru biru wiaru bibahendehondo lalu, Iya hangu birulubaya tí tagira piai hadaba, lene. Ani laya handala agali biabe biahaga berearu bibahende tagira piai hayagola
JDG 3:20 kini ibuni hangu anda hobane daligani poboyogo nabiaga wiagoha dagiani berene. Ani bereagola Ehuduhanda ibuhondo lamialu lalu, I̱na Ngode Datagaliwabenaga bi mbira i̱ langiyago í̠hondo langule yido, lene. Ani layago hale halu kini ibu heyini.
JDG 3:21 Heyayagola Ehudu ibugua ibunaga wai biaga ayu tibu mandibuha da hayago abale gilila muwa kini biagonaga tinini nogoba hene.
JDG 3:22 Ani nogoba hayagola ayu tibu biagonaga dene erembirahayagi tagira pene. Ani piyagola Ehudu ibugua ayu tibu kini biagonaga tinini nogoba hene biago dugua nabi helo waheagola ayu tibu dene endenebi abeneme namu lai hene.
JDG 3:23 Ani biyagola Ehudu ibu abale tagira pialu panga bibahende logo hai halu ibuni tagira pene.
JDG 3:24 Ani bialu peha kininaga biabe biaga agali biaru ti dai buwa handalu hemiria panga bibahende payai hearia hondowa tigua manda bialu Kini ibu ti uliha piya bada manda bini.
JDG 3:25 Ani manda buwa kini ibirabe hondole luore haabo hemiria mbira ibalu panga dugua nabi dege wini. Ani biya handala tigua panga gi mo puwa panga dugualu anda puwa handalu hemiria tinaga kini homo wiaria de hendene.
JDG 3:26 Biabe biahaga agali biaru ti panga payu wiago duguilonaga tagirani hea tambu Ehudu ibu abale pialu pu wahene. Abale pialu harigani ege to̱le̱ni bigiya wabu helene wiago bolangua halu dindi mbira mini Seira wiagoha ibida pialu anda pene.
JDG 3:27 Ani anda puwa Isaraele dindihayagi Eberaimi hameiginirunaga dindiha hari barebare wiagoria howa Isaraelealiru wai tagira ibilonaga olalu mbelo biguli pulene. Ti íbu ngoai heagola Ehuduhanda tihondo lamialu lalu, Anduane Homogohanda tínaga waitigi Moabali bu karu tíninaga giha ya hayago ai wai bule mali̱ya i̱ porodagua maibidaba, lene. Ani laya handala tigua hari bare wiagoria howa dalipe halu abale Moabaliru iba Yodana domaede halu ibida pora bialu polilono hariga wiagoha hapai hole pene. Ani bialu tigua Moabaliru baba wai bialu mbira hangubi ibida pora bialu nape baiore hene.
JDG 3:29 Horo ogoningi Isaraelealirume Moabali ami hongohe hearuni aria daosini dege pira (10,000) agima bo wahai hene.
JDG 3:30 Horo ogoningi mbiraore hangubi mbira yo pialu nape baiore hene. Wai o binidagoniore halu Isaraeleali baba wai nabi dege heane mali pira halirani (80) ti bayale hene.
JDG 3:31 Ehudu ibu agali haguane henego mani agali mende Anada igini Samaga ibugua agali haguane ha aribia ho hene. Agali ogoni ibugua Pilidiali handari waragaria (600) bibahende nogo bulumaga wara daila haga yandare ale mbirame balu homelai hene. Agali ogoni ibuguabi nde Isaraele wali agaliru waitigiru giha hearia mo wialu ogonidagua bini.
JDG 4:1 Mani Ehudu homeagola Isaraele wali agalime Anduane Homogohondo mana ko ngubiore lone bini.
JDG 4:2 Ani bialu heariaAnduane Homogohanda ti Kenanali mbira Yabini henego ibu Hasora dindi timbuni wiago kini heangi ibugua Isaraelealiru ti bo podelo henge mini. Yabini ibunaga ami haru haga haguane mini Sisera hene. Ibu Harosede Hagoimi dindi wiagoria ho hene.
JDG 4:3 Yabini ibu wai biaga garo mini karisi hongohe aeaneme wabinigo handari dira (900) ge kirahe nogo hosini pongo bia howa gili laga wini. Ani buwa ibugua Isaraele wali agaliore mo ko howa mali pira kira (20) tandaga gibiore nelo mialu haru hene. Ani bialu heagola Isaraele wali agalime tandaga nalu Anduane Homogohondo yilalu, Biamogo bia, lene.
JDG 4:4 Ogoningi Labidodi one Debora ibu Ngode Datagaliwabe mana latagi haga mbira biruwa ibu Isaraelealirunaga godi hale hagane ogoninaga biabe bia haga berene.
JDG 4:5 Ibu dindi mini Lamala Bedelela dombeni ira ayage ale mini dedi mbira heago andaneha biraga wini. O biraradagoni Eberaimi dindi hari bare wiagoria berene. Ogoriani Isaraele wali agali ti ibu bedaria poragola ibugua tigua buleneru lamiagane wini.
JDG 4:6 Horo mbirungi Debora ibugua Abinoama igini Baraga Kedese dindi timbuni Nabadali wiagoria howa ibilo, Damu pu, lene. Ani buwa ibiyagola ibuhondo lalu, Anduane Homogo Isaraele wali agalinaga Ngode Datagaliwabe ibugua bi ogo lowia haya. Ibugua lalu, Agali daosini pira (10,000) hameigini Nabadalila Sebulunulaha howa haru halu Hari Tabo wedagoria haru halu pobe.
JDG 4:7 I̱na Yabini ami haru haga Sisera tí heba wai bilimulo iba Kisono poragoria haru ibaguago. Ibugua ibunaga wai biaga garo ale biagobi ami agaliru heba holebirago tígua wai wayali halimulo nguliya, laya lene.
JDG 4:8 Ani layagola Baraga ibugua ladai bialu lalu, I̱ iya haru mbaliyayagua polebero ani ndo í̠ naibiriyagua i̱ napoleberoore ndobe, lene.
JDG 4:9 Ani layagola Deborahanda ladai bialu lalu, Karulapego i̱ iya haru pu poleberebago í̠na mbirale mbira wai bu wayali haregonaga namulebere. Ogoni irane Anduane Homogohanda Sisera wali mbira gini ya helolebira, lene. Ogoninaga Debora ibu Baragala Kedese dindi pole pene.
JDG 4:10 Puwa Baraga ibugua Sebulunula Nabadalila hameigini kira ogoni olalu Kedese dindi ogoriani ami agali daosini pira (10,000) Baraga erembirani hene. Deborabi libu haru mandagi pene.
JDG 4:11 Aguani pialu heagola Keniali mbira mini Hebe ibu puwa balai anda mbira Kedese dindi kaware handa de̱le̱ ira mbira bai ale heagoria kaware Sananimu dindini bu hene. Hebe ibu Keniali Hobabanaga aguanene Mosese ibu balibuni hearu helalu pu bagi howa hene.
JDG 4:12 Sisera ibugua Baraga ibu Hari Tabo pu ka layago hale howa
JDG 4:13 ibunaga wai biaga garo ale mini karisi aeaneme wabinigo handari dira (900) biarubi ami agali biarubi bibahende olalu Harosede Hagoimi dindi wiagoria howa iba Kisono piyagoria pelene.
JDG 4:14 Ani biyagola Deborahanda Baragahondo lalu, Anduane Homogohanda í̠ haru bamba holebirago pu. Áyu ogoni Sisera ibu wayali nahelo í̠ wayali habelo ibugua hongo ngulebira, lene. Ani laya handala Baraga ibu Hari Tabo weagoria howa ibunaga ami agali daosini pira (10,000) biaru heba dalipe halu pene.
JDG 4:15 Baragahanda ibunaga ami biaru hebame Sisera ibunaga ami heba minu balu heagola Anduane Homogohanda Siserabi ibunaga wai biaga garo ale biarubi ami agalibi bibahendeore mo lungulungu bia halu lulu yu helene. Ani bilayagola Sisera ibu wai biaga garo ale biagoria howa dalialu ibida gerai lalu pene.
JDG 4:16 Baragahanda waitiginaga garo ale biarubi ami agali biarubi bibahende abale Harosede Hagoimi dindi biago wiagoria abale bo talini. Talialu Siseranaga ami agali mbiraorebi nayuwahe bo wahaiore hene.
JDG 4:17 Ani biya handala Sisera ibuni Keniali mbira mini Hebe henego one Yalenaga balai anda bu paleagoha ibida anda pene. Ogoni irane Hasoro dindini Kini Yabini ibugua haru heangi ti wai nabi Hebe ibu one waneigini ti gi nahe heago hondowa Sisera ibu uruni andaga ubanda hene.
JDG 4:18 Yalehanda Sisera ibiyaria lola howa ibuhondo lalu, Agali ibalu haribe. I̱ andaga tamuha ubandaha. Gi nahabe, lene. Ani laya handala ibu ubanda hayagola Yalehanda Sisera aga mbirame bu dambi helowa bira do helene.
JDG 4:19 Siserahanda Yalehondo lalu, Ibaore mbira noa kogo mbira noliya hambu ngiore bia, lene. Ani layagola ibugua nogo bulumaga andu iba be nogo dongoneme wabini mbiraha berelo winiyago ogoni po̱ya̱ duguwa nelo mini. Ani buwa lone bira do helene.
JDG 4:20 Ani bu biruwa ibugua Yalehondo lalu, Balai anda panga harabani hapai kegola mbirali ibuwa ogoniha mbira ai bedabe layagua mbira nabere labe, lene.
JDG 4:21 Sisera ibu erekui taraore howa u palue biyagola palia hondoore hene. Palia hondo hea tambu Yalehanda ira nduli baga mbira wiago mialu balai anda pu nguni ndibu laga ira dehe mende lowa mo yalu Sisera paleagoria hendore ubadaga hene. Ani buwa Siseranaga haguane ira dehe biagome dindila ba para helene.
JDG 4:22 Ai Baraga ibu Sisera tai bima ibalu hearia Yale ibu lola ho puwa lalu, Í̠na agali o tai beregoni i̱na walia holiya ogoria íbu, lene. Ani layagola puwa handalu hearia Sisera ira dehe balai anda pu ariba haga biagome haguane dindila ba para howa tongolo mu wiaria handa walia hene.
JDG 4:23 Horo ogoningi Ngode Datagaliwabehanda Isaraele wali agalihondo Kenanalirunaga Kini Yabini bo wahelo hongo mini.
JDG 4:24 Ani biyagola tigua hongo howa bo podama pialu Yabini baore bialu wahene.
JDG 5:1 Horo ogoningi Deborala Abinoama igini Baragalame mambolo balu iba gana ogodagua lene.
JDG 5:2 Haru haga hearume Isaraelealiru haru bamba halu wai tini buleore lalu turu howa binidago Anduane Homogo mini yaraga hama.
JDG 5:3 Kini kamiru hale hadaba Haru haga kamiru tí hale ho tiga bidaba. I̱na mambolo balu Ngode Datagaliwabe Isaraelealirunaga Anduane Homogohondo iba gana lo merogo.
JDG 5:4 Anduane Homogo í̠ hari Sia yu wahalu Edomo dindi hobane wiagoha howa tagira ibiringi dalu hari daligani howa ibalu dindi dumbidumbi biyagoni. E̱ iba li ginurunaga howa porabupe hayuagoni.
JDG 5:5 Anduane Homogo Hari Sainaini heagoria Anduane Homogo Isaraelenaga Ngode Datagaliwabe deni hari li hearuni ema bu handayagoni.
JDG 5:6 Anada igini Samaga heangibi Yale bereangibi harigani garo ale nogo hosini gili lalu wali agali biru yalu bolangua halu dindi ogoriani pobe nahe wini. Ani bialu harigaliru ti hariga leneha pu bagi halu pene.
JDG 5:7 Isaraele wali agaliru ema nabi hemigoria hope heagola Debora í̠na mo heya halu wali ai̱yali ai̱ya ibagadagua Isaraele wali agaliruhondo ibirigoni.
JDG 5:8 Ani biagola Isaraelealirume dama tara tara dabeneya. Dabayagola howa dindi ogoniha wai tagira ibini. Agali daosini hangu pira maria (40,000) Isaraeleni hayaru mbiralime humbi yandarebi mbira yu ibaga bu heabe.
JDG 5:9 I̱naga bu mini Isaraele ami haru haga hebabi Isaraele agali wai tinime bule turu halu biyaru hebabi heledogo. Anduane Homogo mini yaraga hama.
JDG 5:10 Ogoninaga tí nogo dongi pelerunaga biraga kamirubi geme dindi dindi piaga kamirubime la handadaba.
JDG 5:11 Hale hadaba. Wali agali dewaore iba hambiagane uli wearuha ho mabu bu hagahaga buwa bi anda halu Anduane Homogonaga hongome Isaraele wali agali mo wayali hayarunaga te lalu mambolo baruagoni. Anduane Homogonaga wali agali tininaga dindi timbuni biagoria howa mambolo bama yupe hene.
JDG 5:12 Haru bambaha Debora haru bambaha. Haru bamba halu iba gana la. Haru bambaha. Abinoama igini Baraga í̠naga garabaya biabe ale bilo agali mininiru haru bambaha.
JDG 5:13 Wali agali mini bilina helaradagua bialu haga hayaru tinaga haru bamba haga hearu heagoria ubadali haya. Anduane Homogonaga wali agali ibuni heagoria wai bule manda manda bialu ibiya.
JDG 5:14 Ti Eberaimi howa ibalu Beniyamini hameigini wali agali paleago ere mbirahayagi dindi guane mbirani íbu tagira pene. Ami haru haga biaru Magia dindi howa íbu daliyagola haru haga maru ti Sebulunu dindi howa dalini.
JDG 5:15 Isaganaga haru haga hearu Debora heba ibiya. E̱ Isagabi ibalu Baraga ibubi íbu dege bialu ti haru íbu talima ni guane wiagoniha yupe haya. Ti ani bialu heagola Lubene hameigini ti hanuni talebuki buwa tidu yu haga haga bu howa dege ti ibuabe be naibuabe toba howa mini kira wu hene.
JDG 5:16 Ti nogo sibi heba maha hadai bu hayago aginagabe. Nogo sibi haru hagarume nogo mbu lararu hale hole hadai biyadabe. E̱ Lubene hameigini ti hanuni talebuki buwa tidu yu haga haga bialu ti ibuabe be naibuabe toba howa mini kira wu hene.
JDG 5:17 Gada hameigini ti iba Yodana ni tagira ibiragohayagi heagola Dani hameigini ti iba sibi wiagoria haho wiya. Ase hameigini ti iba solowara ange ange ha a̱i̱ a̱i̱ bima piya.
JDG 5:18 Uruni ti ani bima peagola Sebulunu hameiginirubi Nabadali hameiginirubi ti tini homolene kaware wiagoria wai hamani hayada.
JDG 5:19 Tanaga dindini iba Megido angeni kini biaru ibalu wai biyagoni. Kenananaga kini biaru ibalu wai bia biyagoyu tigua muni silibabi mbira namo yalupe.
JDG 5:20 Yakundirume li hari daligani howa wai bialu uba a̱i̱ na̱i̱ bialu wai li hari daligani wai bini. Wai ogoni Siserala bu banga bialu hea.
JDG 5:21 Iba Kisono li wiagome ti hilo yalu pu wahaya. Iba Kisono ogoni hongoheore ndobe. I̱na ge mbarilo handarogo hongo howaore mbarilo handaro.
JDG 5:22 Ani bialu nogo hosirume gerai lalu ibalu tinaga ge habeme dindi biri lama gerai yu pepe biya.
JDG 5:23 Meroso tanobi Merosi tanoni karubi homai helo lalu Anduane Homogonaga dahuliyalime ha ho wia laragoni. Tigua Anduane Homogo biamogo bule ndo ibiniya. Ti ami ale howa ibunaga wai bia hole ndo ibiniya.
JDG 5:24 Wali maru beda lowabi waliore Keniali Hebe one Yale ibu ngui duguahe bereneya. Wali dewaore balai andaha bu bereneru wali mbira Yale hangu ngui duguahe bereneya.
JDG 5:25 Sisera iba nole hale halu berearia Yale ibugua nogo bulumaga andu iba hambu miya. Andu iba bayaleore be baya buruguleha hambu yu ibuwa miyagoni.
JDG 5:26 Ibugua balai anda pu dariba haga ira dehe gi mendeha yalu agalinaga ira nduli baga gi mendehabi yuwa ibugua Siseranaga haguane kuni dambialu ira dehe biagome haguane kuni bo bangalu baga bini.
JDG 5:27 Ani biyagola Siseranaga ge duli podape halu birupe hene. Pila podobaga buwa Yale geha ibira hene. Ibunaga geha ge duli podobagaore bialu dindini ibira hene. Ibira howa tongolo miya.
JDG 5:28 Sisera ai̱ya ibu anda windoha handa tagiho biru wiya. Ibu anda tamuha howa windo diriha handa tagiho wiaabo hene. I̱ igininaga wai biaga garo ale biago naibi wiaabo haruagoni irane agidabe, laya. Ibunaga nogo hosi biarume maniore íbu dai bule haruagoni irane agidabe, lalu berene.
JDG 5:29 Ani lalu berearia wali mini gigabiwiore berearume ibuhondo ladai bialu bereagola ibugua ibuni layago ale dege lone laga bialu laho wiaabo halu berene.
JDG 5:30 Tigua lalu, Uruni ti mbirale hangu tai bialu kago handa walia halu tale bule bialu ka. Ami agali mbirago ibu wandari mbiraha kiraha bigi bialu Siseranaga homogome biaga aga wiago ti mo halu ma gagua tongolo baga bialu maru maru wiago kuini walinaga mani wilo migi bialu ka, lene.
JDG 5:31 Anduane Homogo-o í̠naga waitigiru ogonidagua bialu homelogo í̠naga dameneru dege ngiri ngarale wá hama egerebagi ni tagira ibiradagua bilo helabe, lalu lai hene. Ani bialu wai paluwa dindi ogoriani hemine mali pira maria (40) pene.
JDG 6:1 Isaraele wali agalime mana ko ngubiore lone Anduane Homogohondo biyagola ibugua wali agali uruni Midianalime mali kariani haru helo helene.
JDG 6:2 Midianali uruni ti hongoheore lowa Isaraelealiru hongo emene nira hene. Ani heago hondowa Isaraele wali agali ti ha do hole lowa egeandahabi maruha ha do holene hari bare bareni karulape wiane hondowa ogoriani hene.
JDG 6:3 Isaraelealirume mbirale egene mbira polayagola howa Midianalirubi Amalegealirubi hameigini maru dindi ko dalu naibaga wiagoha hearubi tigua Isaraeleali bole ibaga hene.
JDG 6:4 Ibalu ti dindi ogoriani anda biade ho howa Isaraelealirunaga mbirale tomo damene hengedaru dugu pudubaga bima piaga hene. Gasa tano lene lenehabi dindi ogoriani hengearu bibahende dugu garalibu wahaga hene. Ani bialu tigua nogo sibibi bulumagabi dongibi nogo damene bibahendeore mbira Isaraelealiru nalu helo yu wa nahe haru halu tagira piai haga hene.
JDG 6:5 Uruni tigua ibalu nogo hinulene tara tararu anda bu palu holene balai andaru gibi nu bagini hanaga hanaga bialu tidini uburili mindibi mberabupe hama ibiradagua ibugu bini. Tinibi tinaga nogo kamelerubi dewa gibiore daga labe nahe ibugu bini. Tigua ibuwa dindi ogoni mo koore halu dugu payabu wahaga biaga hene.
JDG 6:6 Ani biyagola Isaraele wali agali biarume mbira biadai bibe naheore hene.
JDG 6:7 Ani bibe nahe howa Isaraele wali agali uruni tigua Anduane Homogohondo yi lalu, Midianalime o biragoni í̠na ina biamogo bia nabere, lene.
JDG 6:8 Ani layagola Anduane Homogo Isaraele wali agalinaga Ngode Datagaliwabehanda mana latagi haga mbira ti hearia dabo pelowa lalu, I̱na tí Iyibi dindi garabaya hemira haru halu tagira ibirugoni.
JDG 6:9 Ani bialu i̱na tí Iyibialirunaga garabaya biabe bia halu hemira gini mirugoni. Ani bialu dindi ogoria wali agali hearu hebabi wai bialu hemira tí biamogo birugoni, lene. I̱na wali agali ogoriani hearuni bo haealo batagi halu tinaga dindi tí karulalimulo mo ngirugoni, lene.
JDG 6:10 I̱na tíhondo, I̱ Anduane Homogo tínaga Ngode Datagaliwabe kogo tígua Amorali dindi tí áyu kamirunaga damaruhondo bi pupu nawilimu, lalu langirugoni. Ani larugoyu tí hale naharimi, lene.
JDG 6:11 Ani biyagola Anduane Homogonaga dahuliyali mbira ibuwa Obara dindini ira bai ale mbira Yoasanaga heago teneha berene. Yoasa ogoni ibu Abise hameigini hene. Yoasa igini Gidiono ibu Midianalirume de hondoligo lowa ibuni hangu ha do howa gerebi ira lini pingidaga wiagoha widi iraneru lini hondo ibira ibira bilo biabe bialu hene.
JDG 6:12 Ani bialu hearia Anduane Homogonaga dahuliyali ibu hapani howa ibuhondo lalu, Anduane Homogo ibu í̠ heba kago agali wai biaga hongohe gi nahaga kegoni, lene.
JDG 6:13 Ani layagola Gidionohanda ibuhondo lalu, Agali timbuni-o i̱na mbira í̠hondo hale habehedabe, lowa lalu, Anduane Homogo ibu ina heba kayagua nde inahondo o bidaruni irane aginagabe. Anduane Homogohanda baya burugule ogodagua biaga lalubi Iyibi dindi howa ogodagua haru tagira ibini lalubi ina abarume langiyagoni aguadabe. Ai Anduane Homogohanda ina yu wahalu Midianalirunaga giha ya heneda, lene.
JDG 6:14 Ani layagola Anduane Homogohanda Gidionohondo lalu, Áyu í̠na hongo timbuniore howa Isaraele wali agali Midianani karu gi mule pu. I̱ i̱nime í̠ pu larogoni, lene.
JDG 6:15 Ani layagola Gidionohanda ladai bialu lalu, Ani bia larego i̱na agua bialu Isaraele wali agali gini muabe. I̱ aria hameigini Manase karu gedaoreore halu i̱nibi mini lene ndo dindiha uruni aria ko, lene.
JDG 6:16 Ani layagola Anduane Homogohanda ladai bialu lalu, Í̠na bibehe larogoni irane i̱na í̠ biamogo bulebero. Í̠na Midianali uruni agali homane mbiraoreali baradagua bialu bo podo waore holebere, lene.
JDG 6:17 Gidionohanda ladai bialu lalu, Í̠na i̱hondo turu keyagua í̠ heneneore Anduane Homogo heneda loliya í̠na manane maru i̱hondo walia ha, lene.
JDG 6:18 Ani lowa lalu, Í̠ pu nabi i̱na ala tomo mbira í̠ ngule mo porogo ogoria hondo habe, lene. Ani layagola ibugua lalu, E̱ í̠ dai bibelo haore bidogoni, lene.
JDG 6:19 Ani laya handala Gidiono ibuni andaga ubanda howa nogo meme igini hungubalua mbira nai heagoni bo dawene. Ani bialu balawa nu mbira ale mberedi yidi nahe hirini. Ani bialu nogo mbirini nu mbiraha hanalu nogo mbirini dawenegonaga subu beha odo berelowa Anduane Homogonaga dahuliyali biago ira bai ale teneha berearia yalu ibuwa mini.
JDG 6:20 Ani miyagola dahuliyali biagome ogodagua bia lalu, Nogo mbirini mberedi biagobi ege to̱le̱ ogoriani wialu nogo mbirini dawenegonaga subu beha yayarume odo wia, lene. Gidiono ibugua o bia layadagua bini.
JDG 6:21 Ani biagola Anduane Homogonaga dahuliyali biagome ibunaga gi dogolo amu halu halimbu yu hayagome nogo mbirini mberedila biago nguini mendehayagi ela hene. Ani biyagola ira hungu ege to̱le̱ biagoha howa tagira ibalu nogo mbirini biagobi mberedi biagobi dai hene. Ani biya handala dahuliyali biago pu ereba hene.
JDG 6:22 Ani pu ereba heagola Gidiono ibugua manda bialu hearia o biagoni Anduane Homogonaga dahuliyaliore handaruda lowa gi taraore hene. Ani bu howa lalu, Anduane Homogo Bibahende Haru Haame Ho Haga kego-o í̠naga dahuliyaliorela dengui handaya haga bu hariba, lene.
JDG 6:23 Ani layagola Anduane Homogohanda ibuhondo lalu, Gi nahe bu mini palelo habe. Í̠ homa nabuleberego, lene.
JDG 6:24 Ani layagola Gidionohanda Anduane Homogonaga lomabu mulenenaga dabu mbira o biagoria bini. Dabu ogoni mini Anduane Homogo ibu Mo Palia haga ka wini. Lomabu mulene dabu ogoni Abise damenerunagayago amu Obara dindini wiaabo hea.
JDG 6:25 Mbiraga ogoningi Anduane Homogohanda Gidionohondo lamialu lalu, Í̠ abanaga nogo bulumaga wangabe kagobi nogo bulumaga wangabe mende mali karia pene kagobi haru halu puwa í̠ abanaga bi pupu wiaga mini Bala dabu ngago gialope habe, laya. Ani bialu dama wali beda mitangi bialu bi pupu wiaga mini Asera irame wabu hapara heledagonibi dibupe habe.
JDG 6:26 Ani dibu podobaga bu ibiraho ngagoriani Anduane Homogo í̠naga Ngode Datagaliwabenaga bo lomabu mulene dabu mbira bayuwaore ogoriani bia dambi halu bia aribia ho helabe. Ani bialu Asera ibu dama lowa wabu helene dibupe harigo ira dene delowa nogo bulumaga wangabe mendego homa hende bo lomabia halu delabe, lene.
JDG 6:27 Ani layagola Gidionohanda ibunaga biabe bia haga pirali haru puwa Anduane Homogohanda layadaguaore bini. O biyadagoni Gidiono ibu aria damenerubi wali agali maru dindi timbuni ogoriani hearubi deni gi howa horombe bialu kamaria ti de hondoligo lowa tigua mbi ge howa bini.
JDG 6:28 Wali agali dindi ogoriani palearu egerebagiore heyuwa handalu hearia Balanaga dabubi Asera gime wabini biagobi nahe dibu ibira ho wiaria hendene. O biagoriani lomabu mulene dabu mbira gahenge bia dambi howa nogo bulumaga wangabe mende biago homa hende bo delearia handa walia hene.
JDG 6:29 Tini hale hagahaga bialu o biyadagoni aiwadabe lagalaga bini. Tigua aiwa binidabe hondole guaru handalu hearia Yoasa igini Gidiono ibugua biniyane handa walia hene.
JDG 6:30 Ani handa walia howa tigua Yoasahondo lalu, Í̠ igini ogoria haru tagira íbu. Ani beregola iname ibu homelo boloma̱ya. Balanaga dabu gialo bagabu ibira heledagobi Asera wabu helene biago dibupe hayadagobi ogoni ibuguaore binida, lene.
JDG 6:31 Ani lalu peagola Yoasahanda ibunaga wanakuini handaya ho wiaruhondo lalu, Balanagaore heyuwa bi lahalu kamibe. Ogoninagaore hapai haramigonibe, lalu tihondo hale hene. Mbirali Balanaga heyuwa bi lahalu kago yawi egabi naledaore balu home lolebira. Bala ogoni ibu hongohe kayagua ibu ibunime bilo. Bo lomabu mulene dabu gialo bagabu ibira helayadagoni ibunagaore ndobe, lene.
JDG 6:32 Ogoningi howa Gidiono mini mende aribia halu Yarubala wini. Ogonidagua mini wiyadagoni irane Yoasahanda lalu, Bala ibu hongohe kayagua ibunaga bo lomabu mulene dabu gialope hayadagonaga ibu ibunime bilo tí wahadaba, lene.
JDG 6:33 Ai Midianali bibahendebi Amalegeali bibahendebi maru dindi ko dalu naibaga wiagoha howabi bibahende íbu ngoai howa Iba Yodana domowa Yaserili dindi guane wiape heagoria anda buwa hene.
JDG 6:34 Ani buwa heagola Anduane Homogonaga Dinini ibu Gidiono haru heagola ibugua mbelo biguli pu layagome Abise hameigini bibahende ibu talima ibilo mo ngoai hene.
JDG 6:35 Ani ngoai ho hearia Gidiono ibugua bi maru lo yalu Manase dindi abene mendeha mendehabi purogo lalu, I̱na larodagua bimi̱ya lole pudaba, lene. Ani bialu bi maru yalu Asera hameiginibi Sebulunu hameiginibi Nabadali hameiginibi uruni ti bibahendeore ibalu, I̱ heba ho gimbu bimi̱ya lole pudaba, lene. Ani layagola tibi ibalu ibu heba hogimbu bini.
JDG 6:36 Ani buwa Gidionohanda Ngode Datagaliwabehondo lalu, Í̠na i̱ha howa Isaraele wali agaliru gi mulebero larigoda.
JDG 6:37 Aniyagua i̱na nogo sibi iri mbira dindi amu widi iraneru lini hondo ibira ibira bilo beramaligoria wiaguago. Werogola egerebagiore dadimba dindini nawi nogo sibi iri biagoria hangu winiyagua nde Isaraele wali agali í̠na gini mibelo haru holiya larigoni aniore bulebedalo manda bu hagua, lene.
JDG 6:38 Ogoni layadaguaore biniya. Gidiono horo mendengi ibu egerebagiore heyalu puwa nogo sibi iri biago yamialu hearia iba dadimba bereneyago pingidayagola be mbira to̱lo tagi hene.
JDG 6:39 Ani biyagola Gidionohanda Ngode Datagaliwabehondo lalu, Í̠na i̱hondo kebaore nahabe. Bi halu mbira hangu lone loa kogo halu mbira hanguorego laro. Ai nde halu mbira hanguore nogo sibi iri ogonime bahondoliya. Ai áyu nogo sibi iri yobu wialu dindini dadimba berelo, lene.
JDG 6:40 Ogoningi mbiraga Ngode Datagaliwabehanda bi o layagonidagua bilene. Egerebagi hayagola nogo sibi iri biago yobu wialu dindi biago dadimba ibira howa ibahe wiaria hendene.
JDG 7:1 Horo mbirungi Gidionobi ibunaga agali bibahendebi egerebagiore heyalu puwa iba Harodo duguayagoria hapara howa ubanda ho hene. Ani biagola Midiana agali ti nde dindi ogoninaga dege hari bare mini More weagoria dindi guane wiagoria balai anda bu hene.
JDG 7:2 Ani biagola Anduane Homogohanda Gidionohondo lalu, Agali í̠na haru keruni Midianaliru baba wai bialu bo poda hana habelo i̱na ngule ngodagua ndo dewaoreda. Agali uruni ti bibahende piai howa wai bialu tigua bogo hana haragola i̱na ti biamogo nabi tini hangu hongome birima manda buligo.
JDG 7:3 Ani bulebirago í̠na agali wai polene gi ho karu ti áyubidaore andaga dai bulene nga lalu lope habe, lene. Ani layagola daosini pira kirani kira (22,000) tidi yalu andaga dai biyagola daosini pira mbira (10,000) hangu Hari Gileada teneha tidi yu hadai bini.
JDG 7:4 Ani bu heagola Anduane Homogohanda Gidionohondo lalu, Agali uruni dewa degedago, lowa, Ai i̱na dabo talebuki bu nguliya unu iba poragoria angeni haru dalia, lene. Ani buwa ogoriani agali ogo ibu í̠la pelo larogo ibu pelo agali ogo ibu í̠la napelo larogo ibu napelo lalu daboliya, lene.
JDG 7:5 Ani layagola Gidionohanda agali biaru iba piyagoria haru halu dalini. Ani biagola Anduane Homogohanda ibuhondo lalu, Agali iba heyu howa gi habeni talo mialu nararu baba bulu paluwa ge duli hanga howa nararu baba mo talebuki habe, lene.
JDG 7:6 Ai agali iba gi habeni talo mialu nayaru handari tebira (300) hangu halu dewaore agali iba ge duli hanga halu bulu paluwa nayaru hene.
JDG 7:7 Ani biyagola Anduane Homogohanda Gidionohondo lalu, Áyu Midianaliru baba wai bule agali handari tebira (300) iba heyu howa gime talo migi bialu nayaru heba hangu puwa wai bialu bo poda hana halimulo i̱na í̠ hongo ngialu biamogo bulebero, lene. Ani bialu agali maru ti bibahende tini andaga ibiyadadagua dai biai helabe, lene.
JDG 7:8 Ani buwa Gidionohanda Isaraelealiru bibahende andaga dai bilalu handari tebira (300) biaru ti hangu tomo noleneru mbelo biguli buleneru hangu wua hadai bini. Midianialiru ti nde ni guane wiagoria balai anda buwa hene.
JDG 7:9 Ogoningi mbiraga Anduane Homogohanda Gidionohondo, Ogodagua bia, lalu, I̱na Midianaliru í̠naga giha ya holeberogo áyu heyalu puwa wai bule pudaba.
JDG 7:10 Ani ndo. Í̠na bo anda polenego gi biyagua í̠naga biabe bia haga agali Pura ibula wai taya puwa handa ala bidaba.
JDG 7:11 Porabigola tigua bi mbira laragola hale holeberabigo hale howa miniha hongo anda ibira handala polebere, lene. Ani laya handala Gidiono ibunaga biabe bia haga Purala haru abale dalipe howa unu waitigi biaru anda mandaha abale bira para howa berene.
JDG 7:12 Ani buwa handalu hearia Midianalirubi Amalegealirubi dindi ko dalu naibaga wiagoha howa agali ibini hearubi nai tidiyu ibaga bu haame hearia nde daga labe nahego nai uburili mindibi mberabupe hama poradagua bialu naina tidiyu li ni leago hendene. Ani bialu tinaga nogo kameleru nde au lolebe labe naheore iba solowara angeni iba mu wima poradagua biago hendene.
JDG 7:13 Gidiono ibu puwa hale halu hearia agali mbirame ibu nenege mbirala biruwa ibugua emaga mbira hendenego te lalu birayuane hale hene. Ibugua emaga ogodagua handaru layua, Ai i̱na emaga handalu hewaria mberedi ladi ale balime wabini mbira homa hende pendo pendo inanaga anda bu kamagoria ibuwa balai anda mbirago baya, layua. Balai anda ogoni bayagola podobaga bialu dindini mbala pialu paliya, layua.
JDG 7:14 Ani layagola ibunaga nenege biago ibugua ladai bialu au layua, Ogoni Isaraelealirunaga wai biagane ayu tibu nene gadele ngaru handalu Yoasa igini Gidiono handaridago, layua. Mbirale mbira ndo ogoniore holebirago Ngode Datagaliwabehanda Midiana bo podalu inanaga ami agaliru bibahendeore bo haealo wahelo hongo mulubadago, lalu layuagola Gidiono ibu hale hene.
JDG 7:15 Gidionohanda agali ogonime emaga hendene ogonibi galone ogo ale lalu layuagobi hale hai howa ibu ge duli hanga howa Anduane Homogo kaore lalu ibunaga mini mo yaraga hene. Ani buwa ibugua Isaraelealiru balai anda bu hayagoria íbu dai buwa lalu, Ai heyadaba. Anduane Homogo ibugua Midianalirunaga ami áyu iname balu bo hana holoma̱ya hongo ngidagoni, lene.
JDG 7:16 Ani lowa Gidionohanda Isaraele agali handari tebira (300) hangu hayagoni hanuni talebu tebo buwa agali mbira mbira giha mbelo biguli pu lolenebi be mbira hale dolene tamuhahebi yagayaga bilowa tidi yu hagahaga bilene.
JDG 7:17 Ani buwa ibugua tihondo lamialu lalu, I̱na balai anda bu karunaga kaware hapara ho kogola tígua i̱ de handaya halu i̱na berogo ale dege bilimu, lamini.
JDG 7:18 Ani bialu wabuni i̱ halu tidiyu kogome mbelo biguli pu laramagola tínaga mbelo bigulibi bibahendeore pu lai damene halu anda bu karunaga bo mabu bupe halu Anduane Homogonaga minibi Gidiononaga minibi ladaga daga bialu wai huaro lalimu, lene.
JDG 7:19 Aguani lowa Gidiono ibu agali handari mbira (100) hayaru heba emene howa mbi hanuni hole lowa dege wiaria tigua balai anda bu hearunaga gembone wiagoria haparaho hene. Ogoriani mamageali maru áyu dege halu peha ti aribia hene. Ani bu howa tigua mbelo biguli yagayaga birimiru pu lalu Gidiono heba wabuni piyago be yarimirubi pambu lalu bini.
JDG 7:20 Ani biyagola tidi ki hayarumebi o biyarudagua dege biai hene. Tigua ira hale gi lehayagi yagayaga bialu mbelo biguli gi tigaha yuwa huaro ladaga daga bialu lalu, Wai biagane ayu tibu nehe ogoni Anduane Homogonagabi Gidiononagabi, lalu wai huaro lene.
JDG 7:21 Agali mbira mbira anda bu hearunaga hama pialu ho mabu bupe heagola waitigi ami agali biaru bibahendeore yiya lalu ibida gerai lalu pene.
JDG 7:22 Gidiono ibu agali biarume mbelo biguli pu lalu heaore Anduane Homogohanda waitigi ami agali biaru pialu tininaga wai biagane ayu tibu nene gadele yarimigome tini dibaga dibaga bima pelene. Ani bialu tini Saredani dindihayagi gerailo yu pialu kaundiaore Bedesida dindibi yu wahalu amuraore Aibele Mehola tano mbira Tabada dindi handade̱le̱ wiagoriaore ibida puabo hene.
JDG 7:23 Ani biagola hameigini Nabadali Asela hameigini Manase dindi abene mendeha mendehabi paliaga paliaga biaru olalu, Tígua Midianaliru bole talidaba, lene.
JDG 7:24 Gidiono ibugua maru abale waio Eberaimi dindi barebare wiaru bibahendeni pu banga bialu, Midianaliru baba wai bule dalidaba, lama pelene. Daluwa Iba Yodana poragobi iba maru emene porarunagabi Midianaliru domade halu pora bialu poligo lowa tigua iba uruni ange yani ho hama pialu amuraore Bedebarani hama puabo halimu, lene. Ani lowa Eberaimi agaliru olalu, Íbu ngoai hadaba, layagola tigua Iba Yodanabi iba maru emene piyarubi yaniho hama pialu amura Bedebarani hairi hene.
JDG 7:25 Ani bu howa tigua Midianali haguane kira mini Orebela Sebela minalu bogene. Tigua Orebe bogayagoria Orebe dinini helalu to̱le̱ mini Orebenaga To̱le̱ lene. Sebe bogayagoria Sebe dinini helalu ogoria mini Sebenaga Gerebi Ira Lini Pingidaga lene. Ani bialu tigua Midianali biaru bama talima piaho wialu Orebela Sebelanaga haguane puguwa yalu Gidiono ibu Iba Yodana piyagoha uyu ni tagira ibiragohayagi hearia yalu puwa mini.
JDG 8:1 Ani biagola Eberaimi agalirume Gidionohondo lalu, Í̠na Midianaliru baba wai bule pole pialu howa ina o nalarigoni irane aginagabe. Í̠na inahondo ogonidaguaore biriyagoni irane aginaga biribe, lene. Tigua ani lalu kebaore howa lai lalu hene.
JDG 8:2 Ani lalu heagola Gidionohanda lalu, I̱na bialu harudago tígua bialu harimidagola mo manda bu handabe naheore bido. Tí Eberaimi agalirume emene mbira birimiruni i̱naga hameigini bibahende heba iname bidamago dindiha lowa tígua bolangua howa daligaore bidami, lene.
JDG 8:3 Ai bia dege bialu howa maniore Ngode Datagaliwabenaga hongome tígua Midiana agali haguane kira Orebe Sebela minalu barimigoni. Ogoni birimigo i̱na agi birugola mo manda bu hondoledabe, lene. Gidionohanda ogonidagua layagola tigua kebaore gibi howa lalu hayago nimulope hene.
JDG 8:4 Ogoningi Gidiono ibu ibunaga agali handari tebira (300) biaru heba Iba Yodana piyagoria dalialu ange mendehayagi domalu ubade hene. Ti pu dege bialu ha̱lowa homabehe hayago helowa dege harugo lowa tigua waitigi biaru talima piaho wini.
JDG 8:5 Ani bialu ti Sugada tano anda íbu howa Gidionohanda agali tano ogoriani hearuhondo lalu, Mberedi maru hira ngamiyagua i̱naga agaliru ha̱lalu hina garibilo tongo ledago miaore bidaba, lene. Ani bialu ibugua, Sebala Salamunala Midianalirunaga kini ogoni labo talima pialu kogoni, lene.
JDG 8:6 Ani layagola Sugadaliru haru haga hearume lalu, Í̠naga ami agali uruni iname tomo mbira nelo mulene irane aginagabe. Tígua Seba Salamunala minalu ba nabi dege kamigonida, lene.
JDG 8:7 Ogonidagua layagola Gidionohanda lalu, Ogoni karulapego Anduane Homogohanda Seba Salamunala minalu i̱hondo ngirangi i̱na tí agubandu aniheme dindi ko dalu naibaga ngagoha howa yu ibalu tandaga nalimulo dambuliya hondo halimu, lene.
JDG 8:8 Ani lalu Gidiono ibu piaho wialu Penuele dindi anda pu howabi wali agali ogoriani hearuhondo bi ogonidagua dege hale hene. Ani hale hayagola uruni tiguabi Sugada agalime ladai biyadagua dege ladai bini.
JDG 8:9 Ani layagola Gidionohanda tihondo lalu, I̱na áyu pialu bayale dai buleberogo. Dai berongi i̱na tínaga wai pabeanda luni bima iri iri bidamiruni bo gialope holebero, lene.
JDG 8:10 Ani lowa pialu hearia Seba Salamunala kini biagolabo libunaga ami agaliru heba Kagori dindini heneya. Ami agali dindi ko dalu naibaga wiagoha howa ibiyaru daosini nguira (15,000) hangu nabe yu wahalu ami agali daosini handari mbirani pira kira (120,000) bibahendeore minalu bogai hayiya.
JDG 8:11 Ani biyiyagola Gidiono ibu dindi ko dalu naibaga wiagoha hariga mbira peadagua puabo halu pene. Ani bialu Noba Yogobeha dindi wiagoria ubanda howa ami agali biaru ogoriani hearia mo mogola halu minu bene.
JDG 8:12 Ani biya handala Midiana agali kini kira Seba Salamunala biago labo ibida pora bialu pene. Ani bialu hearia Gidionohanda talialu minuwa libunaga ami agali hearu bibahendeore mo talolaho helai helene.
JDG 8:13 Ani bialu Gidiono ibu Herese Hariga wiagoria dai bialu hearia Sugada agali daliahe mbira minuwa ibuhondo bi mbira hale hene. Hale hayagola agali biagome Sugada agali haru haga pira kariani karia (77) hearunaga mini Gidiono ibunaga gili biaha layagola gili bini.
JDG 8:15 Ani biya handala Gidiono ibu Sugada agali biaru hearia pene. Puwa ibugua lalu, Tígua i̱ mbaria mbiru biamogo nabule larimigoni manda bidamibe, lene. Tígua i̱naga ami agaliru hina garibi lalu ha̱lowa tongolo miyaruni irane agali kira Seba Salamunala namini degedago lowa hina tomo nelo mulene manga harimigoni. Ai o biagoni labo o kagodago handadaba, lene.
JDG 8:16 Ani lowa ibugua agubandu tibu aniheme dindi ko dalu naibaga wiagoha howa mo yalu ibuwa Sugada haru haga agali haguane hearu tandaga nelo dambini.
JDG 8:17 Ani bialu Penuele tano wai pabenda luni bima iri iri biaruni bo gialope halu agali ogoriani hearuni minalu homelo bo wahai hene.
JDG 8:18 Ani buwa Gidionohanda Seba Salamunalahondo hale halu agua lene, Agali uyu Taboni homelo bogarimigoni ai imaruyabe, lene. Ani layagola libugua ladai bialu lalu, Odaruni í̠ handalehe hanguya. Bibahendeore kini agali mbirago igini mbaule hanguya, lene.
JDG 8:19 Ani layagola Gidionohanda lalu, Uruni ti i̱ hamene i̱ni ai̱ya iginiruore. I̱na heneneore larogo tígua uruni nabe wa kamile nde i̱na libu homelo nabedole, lene.
JDG 8:20 Ani lowa Gidionohanda ibu igini wahene Yadehondo lalu, Ogoni labo bolenego ba, lene. Ani layagola igiri biagome wai biagane ayu tibu ne gadele yayago yamialu ba nabi hene. Ibu irane igiri emene heariane ba nabi handaya ho hene.
JDG 8:21 Ani biaria Seba Salamunalame Gidionohondo lalu, Í̠nime iya abale barene. Agali homane mbira hangume ibunaga biabe bulene mbira ibira haragola biaore biaga ndobe, lene. Ani layagola Gidionohanda o biagoni labo kirabali bo palu bialu libu nogo kamelenaga ma gagua wia hearu ibu golo yu pene.
JDG 8:22 Aguani biagola mani Isaraelealirume Gidionohondo lalu, Í̠nabi í̠naga mamali mani hararumebi ina haru helo. Ina Midianialirume bo wahai kalego ai í̠na pele ngiaore birigoni, lene.
JDG 8:23 Ani layagola Gidionohanda tihondo ladai bialu lalu, I̱bi i̱naga iginiru mani holebirarumebi iname tí naharu holeberemago Anduane Homogo ibugua tí haru helo, lene.
JDG 8:24 Ani lowa dege lalu, Bi mbiraore hangu tíhondo hale haro, lene. Tí bibahendeoreme hale ira o golo yarimiruni i̱hondo mo ngiai hadaba, lene. Wali agali uruni Midianalirumebi dindi ko dalu naibaga wiagoha howa ibini biarumebi tini hale ira ngolome wabini do haga hene.
JDG 8:25 Aguani hale hayagola wali agali tigua ladai bialu lalu, Iname turu halu í̠hondo ngiai holeberema, lene. Ani lowa tigua aga mbira dunga howa ogoriani tini hangu hangu howa hale ira mo yarimidagua tagu pebe bini.
JDG 8:26 Hale ira ngolome wabini biaru Gidiono ibugua minidagoni genda magi kilogarama pira kira (20) agima labehe mini. Ani bialu ibugua mbirale maru miniru daga nalego uruni mbirale damene wiaru mani wini ma gaguaru aga ngiringarale Midiananaga kinirume bini golo yayarubi dewaore mo yini. Ani bialu marubi nogo kamelenaga mani bobu mabu biaga wiaru heba mo yini.
JDG 8:27 Ani buwa Gidionohanda ngolo mo mogo biyagome mbirale mbira bi pupu wule wabuwa ibuninaga dindi Obara tanoni wabu helene. Ani biagola Isaraeleali biarume tinaga Ngode Datagaliwabe hado wahalu tigua gime wabini biagohondo bi pupu wule piaga hene. Ani biyagome Gidionobi ibunaga one waneiginirubi minulene gono bu hinini.
JDG 8:28 Anigo Isaraelealirume Midianali balu bo podaore biyagoni ai gi holene nawi hene. Dindi ogoriani mali pira maria (40) wai nabi ega bibilo wiane dege Gidiono homene.
JDG 8:29 Gidiono ibuni dalu andagani dai buwa hene.
JDG 8:30 Ibu wali dewaore dabu binigome igiri dewa pira karia (70) hono wini.
JDG 8:31 Ani bialu wali halu mende bereneru aria mbira Segeme dindini berenegomebi igiri mbira ibunaga hono winigo ogoni Gidiono ibugua mini Abimelege wini.
JDG 8:32 Yoasa igini Gidiono haho wiadege biane waheore homolene tuni homene. Homayagola ibu aba hora hayagoria dege hora hene. Egeanda Obara tano Abise hameigininaga dindi winigoria hora hene.
JDG 8:33 Mani Gidiono ibu homeha Isaraele wali agali hayarume Ngode Datagaliwabehondo mini mbiraore wu hayago lone yu wahalu tigua Balaberidinaga andaha puwa gime wabini Balaruhondo bi pupu wialu hene.
JDG 8:34 Tigua Anduane Homogo tinaga Ngode Datagaliwabe ibugua tinaga waitigirume ho mabu bupe hearia pele mialu ti haru halu tagira piyagonaga biabeore nabuleberema, lalu tigua Balanaga biabeore bialu hole lalu lowini.
JDG 8:35 Ani bialu tigua Gidiono waneigini dameneruhondo Isaraele wali agalinaga ibugua baya hangu dewaore bima piyagonaga turuore halu ka̱i̱ gibi lo kama lalu walia habehegoyu naheore hene.
JDG 9:1 Gidiono igini Abimelege ibu Segeme tano ibu ai̱ya damene heagoria pene.
JDG 9:2 Puwa ibugua ibu ai̱ya damene hearuhondo lalu, Tígua Gidiono igini pira karia (70) bibahendeme haru helo hamelo kamibe be agali homane mbiraore hangume haru helo hame ledamibe lalu Segeme agali tihondo hale halimu, lene. Ani lowa Abimelege ibugua lalu, Tíninaga darama gai bini tí hono wini mbira hayagoni i̱da manda bilimu, lene.
JDG 9:3 Ani layagola ibu ai̱ya damene biarume ibugua layadagua Segeme agaliruhondo lamule pu hene. Ogonidagua lamiyagola Segeme agali biarume Abimelege tini aria biagome layadago lowa ibugua laradagua bule manda bini.
JDG 9:4 Ani manda buwa tigua siliba muni pira karia (70) Balaberidinaga anda wiyagoha howa ilumogo buwa Abimelege mo mini. Ani biyagola muni ogonime ibugua agali ko anda anda biaga page bibi hearu yolo bialu ibu heba maibidaba lalu pene.
JDG 9:5 Abimelege ibugua ibu abanaga andaga Obarani pu howa Gidiono igini pira karia (70) ibuni hamene biaru to̱le̱ hombene mbirani mo mogo bu helowa bo home lai helene. Ani biyagola dege Gidiono igini emene heyogone Yodama ibu hangu bira do heneyagome nabe yu wahayiya.
JDG 9:6 Ani buwa agali Segemela Bedemilolani hearu bibahendeore mo mogo bialu ira mbira bai ale hada bia heneyago Segemeni heagoria ogoriani Abimelege kini helo lalu helayiya.
JDG 9:7 Yodamahanda ogoni biya layago hale howa ibu Hari Gerisimini iragaho howa tihondo ga̱la amu halu lalu, Segeme agaliru-o i̱na bi mbira larogo hale hadaba. Hale haramiyagua Ngode Datagaliwabehanda tígua laramigo nde hale holene wulebira, lene.
JDG 9:8 Ani lowa lalu, Horo mbirungiore hayagola ira damenego bibahendeoreme tininaga kini mbira dabole lowa mo ngoai hene. Ani howa tigua ira olibe heagohondo lalu, Í̠ inanaga kini ha, lene.
JDG 9:9 Ani layagola ira olibeme ladai bialu lalu, I̱na tí haru hole biruyagua i̱naga ibaneme damarubi agalirubinaga mini yaraga helo ibilaruligo naibiloloboda, lene.
JDG 9:10 Ani layagola ira biarume poge irahondo lalu, Í̠na inanaga kini hole íbu, lene.
JDG 9:11 Ani layagola poge irame ladai bialu lalu, I̱na tí haru hole biruyagua i̱naga ibiri baya dendebi biaru nadoloboda, lene.
JDG 9:12 Ani dege laya handala ira biarume pu mbira lini daga mini gerebi heagohondo lalu, Í̠na inanaga kini hole íbu, lene.
JDG 9:13 Ani layagola pu mbira biagome ladai bialu lalu, I̱na tí haru hole biruyagua waini iba damarubi agalirubi mo turu helo daga biruligo nadoloboda, lene.
JDG 9:14 Ani laya handala ira biaru bibahendeme irabu ani degehe wiagohondo lalu, Í̠na inanaga kini hole íbu, lene.
JDG 9:15 Ani layagola irabu ani degehe biagome ladai bialu lalu, Tígua i̱ tínaga kiniore holiya hamelo kamiyagua nde i̱naga andane gumbaha ubanda howa hole ibidaba, lene. Ani nabirimiyagua ira magane anihe karuha howa hungu kiaulo tagi halu ira tamia Lebanono dindini karuni dowaore holebira, lene.
JDG 9:16 Yodama ibugua laho wialu lalu, Áyu ogoninaga tígua Abimelege kini helo helarimigoni heneneore tiga tiga birimibe. Tígua Gidiono ibugua bima piyaru mitangiore buwa ibu one waneiginiruhondo baya hangu bialu harimibe, lene.
JDG 9:17 I̱ abahanda tínaga wai bia halu ibuni homolene gi nahe Midianalime tí balu hearia ibugua tí mo wialu haru ibiyagoni, lene.
JDG 9:18 Ibugua ani bini wiagoria tígua áyu heyalu i̱ aba one waneiginiru bole harimida, lene. Tígua ibu igini agali pira karia (70) biaru to̱le̱ hombene biagoria bo homelarimigoni. Ani birimigoni irane tígua Abimelege ibu i̱ abanaga biabe bia haga wali tíninaga damene biago iginiyane tíni dabalu Segemenaga kini ibu helama lalu helarimigoni.
JDG 9:19 Ani birimigonigo áyu tígua Gidionobi ibu one waneiginirubi tihondo birimigo bayale tigabiore birimiyagua nde Abimelegehondo turu halimu. Ibugua nde tíhondo turu helo.
JDG 9:20 Ani tigabi nabirimiyagua ira hungu Abimelegeha howa kiaulo tagi halu Segeme Bedemilola agaliru do wahelo, lene. Ani bialu Segeme Bedemilo agaliruha howabi ira hungu kiaulo tagi halu Abimelege do wahelo, lene.
JDG 9:21 Ani lowa Yodama ibugua ibu hamene Abimelegehondo gi howa ibuni ibida puwa Bea dindini pu hene.
JDG 9:22 Ani biagola Abimelege ibugua mali tebirani Isaraele wali agali haru hene.
JDG 9:23 Mani howa Ngode Datagaliwabehanda Abimelege ibu Segeme tanoali hearu baba keba haga haga bilo mo keba ha halu hene. Ani biyagola Segemeali bu hearume Abimelegehondo mine gibiore haga bialu hene.
JDG 9:24 Anidagua biyadagoni irane Abimelege halu Segemeali uruni tigua Abimelege hamene pira karia (70) Gidiono mini mende Yarubala igini hearu bameore bo wahai helo mo hongo hayagonaga anidagua bini.
JDG 9:25 Ani bialu Segemeali maru hari nene wiagoria Abimelege bo wahole mamage hole pene. Ani pu howa agali uruni tigua wali agali hariga ogonidagua pu íbu biyaru minu balu tinaga dabudabu yalu piyaru mo page bini. Ani bialu ka layago hale howa agali maru hearume Abimelege lamini.
JDG 9:26 Anigo Ebede igini Gala halu ibu hameneru ti Segeme dindi anda ibini. Ani ibiyagola Segemeali bu hearume agali uruni hondowa ti bia layadagua bialu hene.
JDG 9:27 Tigua tinaga pu mbira lini daga mini gerebi mabu winigoha pialu gerebi lini bogabi dearu dowa pingidalu mo waini iba howa tomo timbuni dawa nalu hene. Ani bialu tinaga mbirale bi pupu wulenaga gime wabinigo anda heagoha anda pu biruwa Abimelege mege bialu berene.
JDG 9:28 Ani bialu bereagola Gala ibugua lalu, Abimelege ibugua agi biagagonaga ina Segemeali ibu andaneha kamabe. Ibu ai iginibe. Ibu Gidiono igini howa ibunaga bi larago bamba howa bialu haga Sebulu hayagoni ndobe. Anigo ina Segeme aba Hamo hameigini bu karu andaneha holene nga. Ani bulene ngago wahowa Abimelege andaneha haabo kamago aginagadabe.
JDG 9:29 Agali o kamaruni bibahende i̱ andaneha hai hayagua nde i̱na Abimelege he̱latagi holebero. Ani buwa i̱na ibuhondo, Í̠naga ami agali bu karu haru halu ina baba wai bule tagira ibabe lolebero, lene.
JDG 9:30 Ani leagola tano ogoninaga agali haguane mini Sebulu ibugua Ebede igini Galahanda bi layago hale howa keba timbuni hene.
JDG 9:31 Ibugua keba howa Abimelege hearia agali maru ohalu bi lo yalu pudaba lowa lalu, Bi o larogo baya hanguore hale habe. Ebede igini Galahanda ibu hameneru haru halu Segeme dindiha íbu howa ibugua agali bu hearunaga mini mo heya halu í̠la wai bule manda bialu ka.
JDG 9:32 Ani bidago ai í̠naga agali hayadaru haru halu mbiraga ohalu puwa Segeme dindiha dangi timbuni kagoha ha do halimu.
JDG 9:33 Ani bialu gao laragola abale heyalu tanoha anda puwa wai bilimu. Gala halu ibunaga agalirume wai bule ibalu karia tígua abale minalu tihondo bua biradagua bilimu, lalu lawia hene.
JDG 9:34 Ani layiyago hale howa Abimelegehanda ibunaga agali biaru haru halu puwa agali ma halu tale buwa Segeme tano pabe heagoha pu haga haga bini.
JDG 9:35 Gao layagola Gala ibunaga agali biaru heba tagira pialu tanonaga pabe heagoha pu hearia Abimelege halu ibunaga agali biaru ha do hayagoha howa tagira ibini.
JDG 9:36 Ani tagira ibalu hearia hondowa Gala ibugua Sebuluhondo lalu, Agali hari neneni dalipe halu amu ibirago de handa, lene. Ani layagola Sebuluhanda ladai bialu lalu, Ogoni agali ndo hari nenenaga munini hayago hondowa agali handarube toba harida, lene.
JDG 9:37 Ani layagola Galahanda lone lalu, Ani ndo agaliore hari nene ngadagua daliape halu ibiragoni. Tidi mende agali halaga biagarunaga ira bai ale kagohayagi howa harigani ibiragoni, lene.
JDG 9:38 Ani layagola Sebuluhanda Galahondo lamialu lalu, Abimelege ogoni ibu aidane ina ibu andaneha kamabe larigo ai áyu í̠ni hongohe harigoni o kegonibe. Agali í̠na mege bialu harigoni amu ibiraruni ndobe. Ai uruni baba wai bule pu nabere, lene.
JDG 9:39 Ani layagola Galahanda Segemeali hearu haru halu ibuni bamba halu puwa Abimelegenaga agali biaru baba wai bule pene.
JDG 9:40 Ani pialu hearia Abimelege halu ibunaga agali biarume bama talima piyagola Gala halu ibunaga agali biaru ibida piai hene. Abimelege halu ibunaga agali biarume Gala aria biaru bo wahai hayagola tinaga tingini dewaore tanoha howa wima pialu tano pabe tagirayagi wima tagira pene.
JDG 9:41 Ani bialu Abimelege ibu dai buwa dindi Aruma tanoha hene. Ani heagola Sebuluhanda Gala halu ibu hameneru ti Segeme tanoha nahelo bo taliatagi hene.
JDG 9:42 Horo mendengi Segeme wali agali hearume tano wahalu tini mabuha pugu pugu bini. Ani puwa agali marume Abimelegehondo bi lamini.
JDG 9:43 Ani lamiya handala Abimelegehanda ibunaga agali biaru halu tebo tale bialu dangi timbuni heagoha bira do howa agali ibilo yu berene. Ani biruwa Abimelege ibugua wali agali tanoha howa mabu pole tagira ibiyagola ibunaga agali biarume abale tagira puwa homelo bai hene.
JDG 9:44 Ani bialu Abimelege halu ibunaga agali biaru abale pialu tanoha ubaanda tagi biaga wiagoria mamage hole pu hene. Ani pu heagola ibunaga agali tidi ki biaru tigua wali agali mabuha tagira pu hayaru baba wai bialu bibahende bo wahai hene.
JDG 9:45 Abimelege halu agali maru tanoha anda puwa wai bialu heane dege alendo hene. Ibugua wali agali tanoha hearu bo wahai halu tano ogoni karulene. Ani bialu ibunaga agali biaruhondo bidaba layadagua tigua tanoha andabi wai pabebi bo gialahole bialu tano ogoni madane bialu ibi ale taulopaya bini.
JDG 9:46 Wali agali maru Segeme tanoha ami agalinaga wai pabe hongohe heagoha ha do hene. Tigua wai bira layago hale halu ibida puwa dama mitangi bialu bi pupu wiaga gime wabini mini Balaberidi laga wiagonaga anda hongohe heagoha anda puwa bira do hai hene.
JDG 9:47 Ani heagola wali agali anda ogoniha ngoaiho ka layago Abimelege ibu hale hene.
JDG 9:48 Ani hale howa Abimelege halu ibunaga agali biaru haru halu Hari Salamono heagoha iraga halu pene. Puwa ayume ira magane gabuni hearu dandowa payani yini. Ani yu howa ibugua ibunaga agali biaruhondo lamialu lalu, I̱na o berogo de hendedemibe. Tíguabi nde abale ani dege bidaba, lene.
JDG 9:49 Ani layagola tigua Abimelegehanda biyadagua ira magane bo yaga yaga bialu puwa anda biago tagirani wu mabu bini. Ani buwa tigua anda biago heda hayagola wali agali daosini mbira (1,000) ale Segeme tanoha anda hongohe ogoni heba dai helayagola homai hene.
JDG 9:50 Ani bialu mani Abimelege halu ibunaga agali biaru tigua wai bule Tebese tano ho hagira bialu anda puwa karulene.
JDG 9:51 Anigo mamageali ti wa handa amu nana bu haga anda bu gimbu bima iraga hene hongohe mbira tano ogoniha hanuni hene. Ogoni heagoha wali agali bibahende ubaanda anda bialu bira do hai hene. Ti anda ogoniha ibida anda piai howa panga payai halu tini daliga biagoha iragaho birai hene.
JDG 9:52 Ani biyagola Abimelege ibuwa tanonaga anda hongohe ogoni karulole wai bialu hene. Ibugua anda biago heda hole lowa hapara hene.
JDG 9:53 Ani bialu hearia wali mbirame anda daliga biagoha howa ege to̱le̱ mbalape mbira balawa wabule widi dambiaga timbuni wiago bape halu Abimelegenaga embone taulene.
JDG 9:54 Ani bayagola Abimelegehanda igiri mbira ibuninaga wai biagane ya haga heago olalu abale ibiyagola ibuhondo lalu, Í̠naga wai biaga ayu tibu yidegonime i̱ homoliya gubaliniha nogoba ha. Marume lalu, Wali mbirame i̱ baya lelo hame naledogo abale ba, lene. Ani laya handala igiri biagome Abimelege nogoba hayagola ibu tongolo mini.
JDG 9:55 Isaraeleali biarume Abimelege homayago handalu tini dindiha dai bigibigi bini.
JDG 9:56 Ani binidaruni Anduane Homogo ibunime Abimelege ibu abahondo ko bialu ibuni hamene pira karia (70) irane nawini bo wahayagonaga pani nelo mialu ibuni homelo bo wahene.
JDG 9:57 Anduane Homogo ibugua Segeme agalime ko dewa biyagonagabi pani mialu ani bini. Bamba Gidiono igini Yodamahanda Segeme tano ha halu mo ko holebira layadagua ogoni heneneore lola hene.
JDG 10:1 Abimelege homayagola Isaga hameigini aria mbira mini Tola ibu Pua igini howa Dodo aguane hene. Tola ibugua Isaraeleali bu hearu ti waitiginaga giha hearia biamogo bule ibini. Ibu Eberaimi hameigini daluha hari barebare wiagoha Samia tano wiagoria haga hene.
JDG 10:2 Tola ibugua mali pira kirani tebira (23) agali haguane howa Isaraele wali agali haru hene. Ani howa homayagola tigua ibunaga tingini Samia tanoha hora hene.
JDG 10:3 Tola homayagola mani Gileadali Yairi ibu agali haguane ha aribia hene. Ibugua mali pira kirani kira (22) agali haguane howa Isaraele wali agali haru hene.
JDG 10:4 Ibu igini pira tebira (30) henego tigua nogo dongi pira tebirani (30) taho biralu harigani pu íbu bialu haga hene. Gileada dindiha tinaga tano dege pira tebira (30) wini. Tano uruni mini Yairi dindi laga winigo áyubi ani dege laga nga.
JDG 10:5 Mani Yairi homayagola ibunaga tingini tigua Kamono tanoha hora hene.
JDG 10:6 Isaraele wali agali tigua Anduane Homogonaga deni howa mana ko lone bialu hene. Tigua mana ko bialu mbirale dama mitangi bialu gime wabini mini Balaru dama wali beda mitangi bialu gime wabini mini Asedareru uruni Siria wali agalinaga damabi Saidono wali agalinagabi Moaba wali agalinagabi Amono wali agalinagabi Pilidia wali agalirunagabi uruni tinaga bi pupu wiaga wiaruhondo bi pupu wialu dege hene. Isaraele wali agali tigua mbirale urunihondo bi pupu wialu Anduane Homogohondo mitangi bialu lotu nale yu wahene.
JDG 10:7 Ani bialu hemigo hondowa Anduane Homogo ibugua keba timbuni howa Pilidialiru Amonoalirume Isaraele baba wai bule ibilayagola tigua Isaraele bope halu ti wayali hene.
JDG 10:8 Wai biyadagoningi tigua Isaraele wali agali mo ko halu bope hene. Pilidiali Amonoaliru tigua Isaraele wali agali mali pira mbirani halira (18) anidagua dege biaabo halu hene. Tigua Isaraele wali agali Iba Yodana doma edeyagi Amoroalinaga dindi Gileadaha bu hearu mo genda haabo halu hene.
JDG 10:9 Ani bialu howa Amonoali uruni tigua Iba Yodana domalu ibuwa Yuda hameiginiru Beniyamini hameiginiru Eberaimi hameiginiru ti bababi wai bule ibini. Anidagua bialu heagola Isaraele wali agali ti mo ko hayagola ti genda timbuniore ho hene.
JDG 10:10 Ani bialu heagola Isaraele wali agalime ti pele ngi lalu Anduane Homogo olalu hene. Tigua lalu, Iname í̠hondo ko timbuniore bialu harima. Inanaga Ngode Datagaliwabe í̠niore erembira ngialu puwa mbirale gime wabini mini Bala wiaruhondo bi pupu wialu harimago mana ko timbuniore bialu harimada, lene.
JDG 10:11 Ani layagola Anduane Homogohanda Isaraele wali agaliruhondo ladai bialu lalu, Bamba Iyibialirumebi Amoroalirumebi Amonoalirumebi Pilidialirumebi
JDG 10:12 Saidonoalirumebi Amalegealirumebi Maonoalirumebi tí bope howa mo ko timbuniore halu hayagoni. Ani bialu heagola tígua biamogo bia lalu i̱ olarimigola i̱na hale halu uruninaga giha hemiria tí haru daibirugoni ndobe.
JDG 10:13 Ani birugoyu tígua i̱ yu wahalu puwa mbirale dama mitangi bialu gime wabini wiaruhondo bi pupu wialu harimi. Anidagua birimigodago ai áyu i̱na tí lone biamogo nabulebero.
JDG 10:14 Tí genda yu kamingi biamogo bilonaga tínime dabowa bi pupu wialu haga harimigome ti biamogo bulebirago pudaba, lene.
JDG 10:15 Ani layago lelowa dege Isaraele wali agali tigua lone Anduane Homogohondo lamialu lalu, Iname mana koore birimago ai í̠na inahondo bule hamelo kego biai habe. Anigo áyu hanguore ina biamogo bibelo hameledema, lene.
JDG 10:16 Ani lowa Isaraele wali agali tigua bi pupu wiagane wiaru wahai halu Anduane Homogo lone mitangi bialu lotu lalu hene. Ani lalu heagola Anduane Homogo ibugua nde tinaga genda yu haabo heago hondowa ti nakarulape ka lo mitangi bialu tihondo dara timbuniore ho hene.
JDG 10:17 Ani bu hemigola Amonoali ami hearu mani wai bule manda manda bialu mo mogo buwa Gileada dindi wiagoria balai anda bu hene. Ani biyagola Isaraeleali ami hearu tibi nde mo mogo buwa Gileada dindiha Misiba tano wiagoria balai anda bu hene.
JDG 10:18 Balai anda bu heagola Isaraeleali bu hearubi Isaraele hameigini agali haguane hene bu hearubi ti bibahende tini degedege lagalaga bialu lalu, Ina Amonoaliru baba wai bule aiwa haru bamba halu holobadabe. Agali mbira ina haru halu wai bule bamba harago ibu Gileada dindi bibahendenaga agali haguane helo helami̱ya, lene.
JDG 11:1 Dindi Gileada wiagoha agali mbira mini Yabeda henego ibu wai biaga agali hongohe hene. Agali ogoni ibu ai̱ya bayanda wali berenego ibu aba mini Gileada hene.
JDG 11:2 Ani bialu Gileada one berenegome igiri maru taba henene. Igiri uruni ti anda hai howa tigua Yabeda bo taliatagi halu howa lalu, Í̠ ina abanaga paluni ngaru aria mbira nayuleberego í̠ wali mende igini kego pu, lene.
JDG 11:3 Ani laya handala Yabeda ibugua ibu hamene hearu helo wahalu tagira ibida pialu Tobo dindi wiagoha pene. Ogoniha pu howa ibugua agali ko bu hearunaga bu mini bamigi bialu heagola tigua ibu talima ibaga bini.
JDG 11:4 Mani howa Amonoali hearume Isaraeleali baba wai bule pene.
JDG 11:5 Wai bu pole howa Gileada agali haguane hearume Tobo dindiha Yabeda hearia damu pene.
JDG 11:6 Tigua puwa ibuhondo lamialu lalu, Iname Amonoaliru baba wai bu mali̱ya í̠na ina haru bamba hole íbu, lene.
JDG 11:7 Ani layagola Yabeda ibugua agali haguane biaruhondo lamialu lalu, Tígua i̱ handabe manga halu i̱ aba andagaha howa bo taliatagi harimigodago ai tíha genda anda ibiyagola i̱ hondo ibirimidagoni aginagabe, lene.
JDG 11:8 Ani layagola Gileada agali haguane biarume ibuhondo lalu, Bi ogoni tiga tigaore larigo áyu iname í̠ ina Amonoaliru baba wai bu mali̱ya hondo ibirima. Í̠ Gileada wali agalinaga agali haguane howa haru habelo lowa hale hole í̠ keria ibirima, lene.
JDG 11:9 Tigua anidagua layagola Yabeda ibugua Gileadanaga agali haguane biaruhondo lalu, Tígua i̱ haru dai beremigola i̱na tí haru howa Amonoaliru baba wai berogola Anduane Homogohanda i̱ biamogo bialu ina wayali harimayagua nde i̱na Gileada wali agali tínaga agali haguane holiya, lene.
JDG 11:10 Ani layagola agali haguane biarume lalu, Anduane Homogonaga deni howa iname heneneore laramago í̠na bia lalu inahondo langerego bibahende biai holeberema, lene.
JDG 11:11 Ani laya handala Yabeda ibu agali haguane biaru heba pialu Gileada agaliru bu hearia piyagola tigua Yabeda ibu tinaga agali haguane helo dabo helene. Ani dabo helayagola Misiba dindi ogoriani hearia Yabeda ibu Anduane Homogonaga deni howa ibugua agali biaruhondo hongo howa lalu, I̱ tínaga haguane haruyagua i̱na bia larogo hale halu buleberemi laro, lene.
JDG 11:12 Mani howa Yabeda ibugua agali maru Amononaga kini hearia bi mbira lo yalu pudaba layagola tigua puwa kinihondo hale halu lalu, Inahondo irane aginaga í̠na keba howa ina baba wai bule kebe, lene.
JDG 11:13 Ani layagola hale howa Amononaga kini biagome Yabedanaga bi yalu ibiyaruhondo ladai bialu lalu, Bamba Isaraele ti Iyibi dindiha howa tagira pialu ibuwa tigua inanaga dindi Iba Anono poragoria howa karulama pialu amuraore Iba Yabogo poragoria puabo halu Iba Yodana poragoria tagira piya. Anidagua biyagonaga keba ho kogo ai tígua inanaga dindi uruni ngiadai biyagua nde karulape. Ngiadai naberemiyagua nde wai bimi̱ya, lene.
JDG 11:14 Anidagua layiyago hale howa Yabeda ibugua agali maru Amononaga kini biago hearia lone, Bi yalu pudaba, lene.
JDG 11:15 Ani laya handala tigua pialu kininaga bi layago lamialu lalu, Yabeda ibugua bi ogodagua laya lalu, Isaraele wali agali uruni tigua Moaba wali agalinaga dindibi Amono wali agalinaga dindibi mbira ina karu naleore kama.
JDG 11:16 Isaraele ti Iyibi dindi howa tagira ibiyangi ti hariga dindi ko iba dalu naibaga wiadagua pialu iba mini Solowara Daramabi laga bereagoria tagira ibalu mani Kadese tano wiagoria anda íbu hene.
JDG 11:17 Ani íbu howa Isaraelealime agali maru Idomonaga kini heagohondo bi hale hole pudaba lowa lalu, Ina hariga í̠naga dindiha bolangua halu polene henge nguleberebe be nanguleberebe, hale hene. Ani hale hayagola Idomonaga kini heagome, Nangulebero, layagola Isaraelealiru tigua Moabanaga kini heago hale hole pene. Ani hale hayagola ibuguabi nde, Nangule, dege lene. Ani layagola ai Isaraele wali agali ti Kadeseha haabo hene.
JDG 11:18 Ani bialu mani ti dindi ko iba dalu naibaga wiagoha pialu howa Idomo dindi yu wahalu pialu Moaba dindibi bolangua halu pu dege bini. Pialu Moaba dindinaga abene ni tagira ibiragoha Iba Anono pedagohayagi bolangua halu pene. Tigua ogoriani pu howa Iba Anono doma ede halu polenego Moabala tubariyagola ti iba doma ede nahe ogoriani balai anda bu hene.
JDG 11:19 Ani bu howa Amoroalinaga Kini Sihono ibu Hesebono dindiha haru haga hearia Isaraeleali marume ibu hale hole pudaba, lene. Puwa ibuhondo hale halu lalu, Í̠ni i̱ dalu o ngagoha pu bolangua halu inane dalu pole poloma̱ya karulapebe, lalu hale hene.
JDG 11:20 Ani hale hayagola kini ibugua Isaraeleali ibunaga dindini bolangua halu pelo manga hene. Ani manga howa ibugua ibunaga ami agali bu hearu haru puwa Isaraeleali baba wai bule lowa Yahasa tano wiagoria puwa wai bialu hene.
JDG 11:21 Ani bialu heagola Anduane Homogohanda Isaraele wali agali biamogo biyagola tigua Kini Sihonobi ibunaga ami agali hearubi bibahende bope hai hene. Ani buwa tigua Amoroalirunaga dindi ogoniha wiaru karulai hene.
JDG 11:22 Tigua Amoro wali agalinaga dindi bibahendeore unurayagi Iba Anono pedagoria howa karulama pialu uyurayagi Iba Yabogo pedagoriabi karula dege bini. Ani bialu ogoriani howa ni tagira ibiragohayagi dindi ko iba dalu naibaga wiagoria howa pialu Iba Yodananaga abene ni paliragohayagi wiarubi karulaga bima puabo hene.
JDG 11:23 Ani binigo dindi uruni Anduane Homogo Isaraele wali agalirunaga Ngode Datagaliwabe ibunime Amoroali bo taliatagi howa dindi ogoni Isaraele ibuninaga wali agali mo mini.
JDG 11:24 Ani mo minigo áyu í̠na dindi ogoni mo yu dai buleberebe. Í̠ mbirale bibahende í̠ni bi pupu wiaga mini Kemoso ibugua ngiraru yu holebere. Ina nde Anduane Homogo inanaga Ngode Datagaliwabe ibunime inanenaga wilimu lalu ngini ngagoore yu holeberema.
JDG 11:25 Anigo í̠na manda bu handalu keria í̠ hongo timbuniore howa Moabali Siboro igini Kini Balaga henegonaga hongo bolanguahe kebe. Ibugua inahondo ibunaga dindi maru ngiadai bidaba lalu bi mbira nale wahenego agua. Ina baba waibi nabi wahene.
JDG 11:26 Ani biyagola Isaraele wali agali tigua Hesebono tanohabi Aroe tanohabi tano uruniha dindi emene maru wia para para bini ngarubi Iba Anono angeha tano wuyu pedaruhabi Isaraele wali agali ti mali handari tebirani (300) haru haabo hene ngago. Ai água biyagola dindi uruni abale ogoningi í̠ mo yu dai nabi henebe.
JDG 11:27 I̱na í̠hondo mana ko mbira biaede nahe í̠na dege i̱hondo mana ko bialu i̱ hewagoha wai biaede hole kegoni. Ani kego ainde Anduane Homogo ibugua mana bayale bialu kagobi mana ko bialu kagobi lalu mo tale biaga ka. Ai ibugua í̠na bialu kegobi i̱na bialu kogobi mo tale bilo laro, Yabedahanda layago lalu lamini.
JDG 11:28 Ani layago lelowa Amononaga kini heagome Yabedahanda bi lawia hayago hale howa donge hene.
JDG 11:29 Ani biya handala Anduane Homogonaga Dinini Yabedaha mo karula hayagola ibugua ami agaliru haru halu Gileada dindibi Manase dindibi Gileada dindiha Misiba tano wiagoria bolangua halu pene. Ani bialu Misiba yu wahalu puabo halu Amono dindihayagi anda pene.
JDG 11:30 Ani puwa Yabeda ibugua buleore lalu bi mbira Anduane Homogohondo lo wialu lalu, Í̠na i̱ biamogo bialu Amonoali bope halu wayali haruyagua nde
JDG 11:31 i̱na wai bialu dai buwa mbirale i̱ andagaha howa pigane tagira ibirago Anduane Homogo í̠ninaga loma bialu irame dai helo bo delolebero, lene.
JDG 11:32 Ani lowa Yabeda halu ibunaga ami agali biaru tigua iba domaede halu wai bule Amonoali dindihayagi ubaede halu pene. Puwa Anduane Homogohanda Yabeda biamogo biyagola tigua wai bialu wayali hene.
JDG 11:33 Tigua wai bialu howa Amonoali dewaore bo wahai hene. Tigua Aroe tano howa bama pialu wali agali tano pira kira (20) palearu bibahende bo wahai halu Minidi tano wiagoria pialu iba Abele Keramimi peagoria tagira pene. Yabeda halu ibunaga ami agali biarume Amono agali dewaore bo wahaiore hene.
JDG 11:34 Yabeda ibu Misiba tano dai bialu hearia ibu andagaha howa ibu wane abale gerai lalu ibu aba lola hole ibini. Ibugua turu howa irabitele ke̱le̱nge̱le̱ lalu iba gana lama ibini. Yabeda ibu waneigini maru nahe ibu wane mbira ogoni hanguore berene.
JDG 11:35 Yabeda ibu wane mbiraore biago ibiyago hondowa ibu mogo timbuni lowa ibunaga aga bu heago mini lerelowa lalu, Wane-o i̱naga gubaliniore mo ko haruagonidago daraba. Irane aginaga i̱naga gubalini mo ko holeore í̠ ibiribe. I̱na buleore lalu Anduane Homogohondo bi lo wirugo mo habo nalabehe kogoni, lene.
JDG 11:36 Ani layagola ibu wane biagome lalu, Aba-o í̠na Anduane Homogohondo mbira bule lalu lo winiyagua nde ibugua í̠ biamogo biyagola í̠na Amonoali waitigi biaru bo wahai halu wayali harigodago. Ainde í̠nime bi lo wiridadagua ani bibe.
JDG 11:37 Anigo i̱na mbira hangu ala buliya í̠na henge emene mbira ngibelo hameledo. I̱naga nenege bedaru baba hari barebare ngaruha ibaga bialu i̱ agali nape biralu homole berogonaga dara howa duguru bialu ege kira biruliya henge ngi, lene.
JDG 11:38 Ani hale hayagola ibu abahanda nde karulapego ani bule pu, lene. Ani lalu Yabedahanda ibu wane ege kirani ibagabu berelo henge mini. Ani berelo waheagola wandari biago ibu nde ibunaga nenege berearu haru howa ibu agali nape bedaore homolobadagonaga dara howa tigua dugu bialu tini dara haga haga bialu ege kira berene.
JDG 11:39 Ege kira ani berenego andaga ibu aba hearia dai biyagola ibu abahanda bule lalu Anduane Homogohondo bi lo wiyadagua bini. Wandari ogoni ibu agali nape wandari biraabo howa homene. Anidagua binigonaga Isaraele tinaga mana mbira ogodagua wini.
JDG 11:40 Isaraele wandari mabuage berearume ti andaga wahalu hari barebare wiaruha pu biruwa Gileadali Yabeda wanenaga dara howa dugu bialu biraga wini. Tigua mali bibahendengi horo mariani ani biaga wini.
JDG 12:1 Eberaimi hameigini hearume íbu ngoai howa mbirale wai biagaru mo yalu wai bu pole tidi yalu Iba Yodana doma ede halu puwa Sabono tano wiagoria anda pene. Puwa tigua Yabedahondo lalu, Tígua iba domalu Amonoaliru baba wai bu pole ina ma lalu langia nabi pirimiyago irane aginaga birimibe. Ai hale habe. Áyu iname í̠nibi í̠naga andabi heba bo heda holeberema, lene.
JDG 12:2 Ani layagola Yabedahanda ladai bialu lalu, I̱nibi i̱naga wali agalibi ina bibahendeme Amono wali agali baba keba timbuniore harima. Ani howa i̱na tígua ina biamogo bialu wai bule mali̱ya ibalimu lalu lawia harugo tí naibirimiya.
JDG 12:3 Ani buwa i̱na handalu hewaria tígua ina biamogo bule naibirimiya handala wahalu Amonoalirume i̱ bo wahayagua nde ani bo wahelo. I̱ni wai bule harugo lowa polene manda biru. Ani bialu iba doma ede halu wai bule piru. Ani pirugola Anduane Homogo ibunime i̱ biamogo biyagola i̱na Amonoaliru bo wahai halu wayali harugoni. Áyu irane aginaga tígua i̱ baba wai bule hamelo kamibe, lene.
JDG 12:4 Ani lowa Yabeda ibugua Gileada agali bibahende hearu mo ngoai howa Eberaimiali biaru baba wai bialu Yabeda halu hayadaru tigua Eberaimi hameigini hearu bope halu wayali hene. Ani binidagoni irane Eberaimi hameigini tigua ala lalu, Gileadali tí Eberaimi hameigini Manase hameiginila hengeneha howa tígua ina yu wahalu ibida piaga kami, layagome ani bini.
JDG 12:5 Eberaimiali uruni ti pora bialu tini dalu pole Iba Yodana domalu ibida polilono Gileadalirume iba domaga wiagoria harigani yu hai hene. Ani hearia Eberaimiali mbira wai hamani howa ibida pora bialu puwa iba domaga wiagoria ibuwa lalu, I̱ iba domaro, lalu hale hayagua nde Gileadali biarume ibuhondo lalu, Í̠ Eberaimialibe taralibe, lalu hale haga biyagola ibugua lalu, I̱ Eberaimiali ndo, layagua Gileadalirume ibuhondo lalu,
JDG 12:6 Í̠na mini Sihibolede lahanda bia, lalu laga laga bini. Ani layagola o biagome Sibolede layagua agali ogoni ibu la ko hayagome ibu Eberaimialida lo manda bialu tigua minu yania howa balu homelaga bini. Gileadali tigua ani laga bialu howa iba doma edene biaga wiagoria Eberaimiali daosini dege pira mariani kira (42,000) bibahende bo wahai hene.
JDG 12:7 Anigo Yabeda ibu agali haguane howa Isaraele wali agaliru mali waragaria haru halu homene. Homayagola tigua ibunaga tingini Gileada dindiha hora hene.
JDG 12:8 Yabeda homayagola Bedeleheme tanoali Ibisana ibu agali haguane ha aribia howa Isaraele wali agali haru halu hene.
JDG 12:9 Agali ogoni ibu igini pira tebira (30) halu ibu wanebi nde pira tebira (30) dege berene. Ani berenego ai wandari uruni agali hameigini maru hearume dabu bilo migi bini. Ani bialu ibu igini pira tebira biarume dindi tara wali berearu dabu bu haga bini. Ibisana ibu mali kariani Isaraele dindiha agali haguane howa ibugua Isaraeleali hearu haru haga hene.
JDG 12:10 Ani halu homayagola tigua ibunaga tingini Bedelehemeha hora hene.
JDG 12:11 Anigo nde Ibisana homayagola Sebulunuali mini Elono ibugua Isaraele wali agalinaga haguane ha aribia howa ibugua ti mali pirani haru halu hene.
JDG 12:12 Ibu homayagola tigua ibunaga tingini Sebulunu dindini Ayalono tanoha hora hene.
JDG 12:13 Elono homayagola Piradono tanoali Hilele igini Abadono ibu agali haguane ha aribia howa ibugua Isaraele wali agali haru halu hene.
JDG 12:14 Ibu igini pira maria (40) halu ibu aguaneru pira tebira (30) bibahende hene. Ani howa tigua Abadononaga nogo dongi pira karia (70) hearuni biralu pu íbu bialu haga hene. Abadono ibu mali halira Isaraele wali agalinaga haguane howa ibugua ti haru haga hene.
JDG 12:15 Ani howa ibu homayagola tigua ibunaga tingini Eberaimi dindini Piradono wiagoha hora hene. Dindi ogoni hari barebare Amalege dindihayagi winigo ogoniha hora hene.
JDG 13:1 Isaraeleali biarume lone Anduane Homogohondo mana ko ngubiore biyagola ibugua ti Pilidia agali haru haga hearume mali pira mariani (40) haru helo helene.
JDG 13:2 Ogoningi agali mbira mini Manoa ibu Sora tano mbira winigoria hene. Ibu hameigini mbira Dana henego aria hene. Ibu oneme waneigini mbira nahonowi biraabo bu berene.
JDG 13:3 Ani biaria Anduane Homogonaga dahuliyali mbira ibu berearia íbu hapani howa lalu, Í̠ waneigini hono wibe naheyagola berenedago áyu ogoni mbira tombeha biralu igiri mbira holebira, lene.
JDG 13:4 Ani bulebirago bayuwa hondo halu ogoni waini ibabi tomo maru nanabe lene ngarubi nane birabe, lene.
JDG 13:5 Ani bialu mani í̠ igini ogoni taba honowa í̠na ibunaga mandariore napodolebere, lene. Ogoni irane horo ibu taba hanarangi howa ibu Nasa aria Ngode Datagaliwabe lomabia halu ibunaga biabe bia haga mbira ilili bu holebira, lene. Ibugua tehinalu Isaraele wali agaliru Pilidialirunaga giha howa gini mialu haru tagira pole manda bulebira, lene.
JDG 13:6 Ani laya handala wali biagome ibu agalini hearia puwa lalu, Ngode Datagaliwabenaga agali mbira i̱ berewaria ibiyago ibu dengui gibi hondowa gi haru. Ngode Datagaliwabenaga dahuliyali handaleheya. I̱na ibu ani howa ibiribe nale. Ibuguabi ibunaga mini i̱ nalangi, lene.
JDG 13:7 Anigo ibugua i̱ gali tombeha biralu igiri mbira holebira lalu langiya, lene. Ibugua i̱na waini ibabi iba mbiabi tomo maru nanolene lo ngarubi nanabe lalu langiya, lene. Ogoni irane igiri ibu Nasa aria Ngode Datagaliwabenaga biabe biaga mbira ilili bu haho wiaabo helo lalu lomabia holene wulebira laya, lene.
JDG 13:8 Ani layagola Manoahanda Anduane Homogohondo hale halu bi lamialu howa lalu, Anduane Homogo-o í̠na Ngode Datagaliwabenaga agali o ibilariyagoni lone iya kabaria daibilabe, lene. Igiri ogoni taba hanaragola iyame ibuhondo bulenego ogo ale lalu ibugua langilo, lene.
JDG 13:9 Manoahanda aguani hale hayagola Ngode Datagaliwabehanda hale halu ibunaga dahuliyali biago wali biago mabuni berearia lone íbu daibilene.
JDG 13:10 Ani biyagola wali biago ibu agalini heba ndo ibuni hangu bereariayago abale heyalu gerai ibu agalini hondo pene. Ani puwa ibuhondo lalu. Hale ha. Agali mbira i̱ berewaria abale mbiru ibiya larugoni áyu lone i̱ hewaria íbu hapani ho kago hondo mbaíbu, lene.
JDG 13:11 Ani layagola Manoa heyalu ibu one piyadagua mama talima pene. Puwa ibugua agali biagohondo hale halu lalu, Í̠ agali mbaria mbiru i̱ one bi lamialu hariyagoni kebe, lene. Ani layagola ibugua, E̱ i̱ kogoni, lene.
JDG 13:12 Manoahanda hale halu lalu, Aniyagua í̠na bi lariru henene lola harangi igiri ogoni ibugua agi bulene ngabe. Ani bialu ibugua mana agi alego bialu holene ngabe, lene.
JDG 13:13 Ani layagola Anduane Homogonaga dahuliyali biagome ladai bialu lalu, Í̠ one ibugua bulene damene bibahende ibuhondo lamiai harugo ibugua manda biai holebira, lene.
JDG 13:14 Í̠ one ibu pu mbira lini daga mini gerebi mbirale mbira gerebi lini urunime wabinibi nanoleorebira, lene. Ani bialu waini ibabi iba mbiabi tomo maru nanolene lo ngarubi mbira nolene nawiore, lene. Ibugua bilo lalu lamirugo bibahendeore biai holene nga, lene.
JDG 13:15 Manoa ibu ogoni Anduane Homogonaga dahuliyalida manda nabi howa ibugua ibuhondo lalu, Iyame nogo meme igini hungubalua o karu mbira bo dawa manda manda berabago í̠na pu nabi hondohaore bibe, lene. Ani layagola dahuliyali biagome lalu, I̱na hadai bu haruyagua libunaga tomo ogoni i̱ nanolebero, lene. Anigo manda manda bule hamelo kabiyagua nde Anduane Homogohondo bo loma bialu delo milibu, lene.
JDG 13:17 Ani layagola Manoahanda ladai bialu lalu, Í̠naga mini iyahondo langi. Ani beregola i̱na bi lariru henene tagira porangi iyame í̠ heneneore laga ka lalu mini yaraga holobaya, lene.
JDG 13:18 Dahuliyali biagome hale howa lalu, Libugua i̱naga mini agi bulenaga manda bulubaya langi larabibe. I̱ mini baya buruguleorego, lene.
JDG 13:19 Ani layagola Manoahanda nogo meme igini hungubalua biago minuwa widi linila haru yalu puwa ege to̱le̱ dagia wiagoria Anduane Homogo baya burugule biaga kagohondo bo lomabu delene.
JDG 13:20 Ira hungu dabu biagoria biadaga halu wiagola Manoa ibu onela libugua Anduane Homogonaga dahuliyali biago ira hungu hegeneni dahuliya andaga iraga halu pole piyaria de hendene. Ai Manoa ibugua manda bu handalu hearia agali biagoni Anduane Homogonaga dahuliyaliore ibu henedago lo manda bini. Ani manda buwa ibu one libu haru dindini bulu palu ibira haribi. Ani buwa handalu hebira dahuliyali biago lone libu de hendelo hapani nahene.
JDG 13:22 Ani biyagola Monoahanda ibu onehondo lalu, Ai iyame irane Ngode Datagaliwabe de handaribagome iya homaore bibiyada, lene.
JDG 13:23 Ani layagola ibu one biagome ladai bialu lalu, Anduane Homogo ibugua iya homolobaya bole hamelo henedale nde ibugua iyanaga mbirale delo miribaru nadedale. Ani bialu ibuni iyahondo walia halu ho pana hayagobi mbirale maru ogodagua bulebira lalu áyu langiyarubi naledale, lene.
JDG 13:24 Mani wali biagome igiri mbira hono wialu ibu mini Samasono wini. Igiri emene biago anda halu Anduane Homogohanda biamogo bini.
JDG 13:25 Ani biyagola Anduane Homogonaga hongo holeneme ibu Sora Esedalola dindi hengeneni Dana hameigini balai anda bu heagoria hearia mo hongo hene.
JDG 14:1 Horo mbirungi Samasono ibu Timuna dindi yupe halu hearia Pilidia wandari mbira de hondo wini.
JDG 14:2 De hondo wialu ibu ai̱ya abala lamule andaga dai bini. Dai buwa ibu ai̱ya abalahondo lalu, Pilidia wandari mbira Timuna dindini berearia hondo wialu ebero, lene. Ogoni dabu bulene hamelo kogo damu pu hadaba, lene.
JDG 14:3 Ani layagola ibu aba ai̱yalame ibuhondo mbira hale halu lalu, Í̠na Pilidialiru Ngode Datagaliwabe mitangi nabiaga hearunaga wali damialu í̠ one hole hame laridago irane agibe. Í̠na wandari inane wali agali hameigini kamagoria bedaru aria handalu nadamibehedabe, lene. Ani layagola Samasonohanda ibu abahondo ladai bialu lalu, Í̠na i̱naga wali damia habelo hame ledogo ogoniorego ogoni damia habe, lene.
JDG 14:4 Ogonidagua layadagoni Anduane Homogo ibugua Samasonohanda Pilidiali heba wai bilo haru pole henge tai binigonaga Samasono aba ai̱yalame manda nabi hene. Ogoningi Isaraele wali agali Pilidialirume haru hene.
JDG 14:5 Ani binigo Samasono ibu ai̱ya abala heba Timuna dindi dalipe halu pene. Ogoniha pole pialu hemiria pu mbira mini gerebinaga lini dendebi daga mabu wiagoria budi gabua ale timbuni mini laiono daula mbira ngororo layuago ibu hale hene.
JDG 14:6 Abale hale hayaore Anduane Homogonaga hongo holeneme Samasono mo hongo hene. Ani biagola ibugua laiono biagoni ibunaga gi hangume nogo meme daula mbirago minu dogokihe laradagua bilene. Ani binigo ogoni ogodagua biru lalu ibugua biyagoni ibu ai̱ya abala nalamini.
JDG 14:7 Ani bialu ibu puwa wandari biago hame lowa mo bila hene.
JDG 14:8 Horo kira agima howa mani Samasono ibu lone dai buwa wandari biago dabu bule pene. Ani bule harigani pialu howa Samasono ibu hariga tene yu wahalu pu bagi howa laiono abale bo wialu piyago hondo pene. Puwa handalu hearia laiono biagoniha mone tara gibi tidiyu halu mone ibane dewaore laiono homene biago kabaneha dearia mogolo hendene.
JDG 14:9 Hondowa ibunaga gime mone ibane biago kedo mialu nama nama pene. Ani bialu ibu aba ai̱yala hearia pialu libubi maru kedo yalu puwa nelo mini. Ani biyagola libugua nenego Samasonohanda mone tara ibane ogoni laiono homene mbira kabaneha deneyago kedo yinigo lalu libuhondo nalamini.
JDG 14:10 Ani bialu Samasono aba ibu wandari biago andaga piyagola Samasonohanda tomo ogoniha daweneyago dewalime nene. Ogoni agali daliaheru tinaga mana mbira biaga winidagua bini.
JDG 14:11 Ibugua aguani bialu heago Pilidia agalirume de hondowa tigua agali daliahe pira tebira (30) ibu heba helo ibilene.
JDG 14:12 Ani biyagola Samasonohanda agali daliahe biaruhondo lalu, I̱na bi yobage mbira tígua dabalu galone ladai bilimulo lolene ngago larogo, lene. Ani lowa tígua galone ogoni langeramigola tí hangu hanguhondo ngule lowa labolabo bayaleore mbira mbirabi aga biagimbu bulene marubi bayaleru dabo wia ko, lene. Tígua nalangibehe harimiyagua wali dabu bialu horo karu tomo dawaganego kane bolangua nakaore aga labolaboru bulene bayale ogoni aribia halu tígua i̱ ngulene wulebira, lene. Ani layagola tigua lalu, Í̠naga bi yobage ogoni iname hale hole kamago langia berene, lene.
JDG 14:14 Ani layagola ibugua lalu, Naganeha howa mbirale nolene ale tagira ibini. Hongoheha howa mbirale dende bulene tagira ibini. Ai ogoninaga galone langilimu, lene. Ogoninaga galone ogo aleda lalu mbira dabalu ladai nabi dege hemine horo tebira bibahende piai hene.
JDG 14:15 Horo manegoria tigua Samasono onehondo lalu, Í̠na í̠ agalini mo hondo halu galone ogoni inahondo langule ogo ale lalu langi labe. Í̠na ogonidagua nalangiriyagua iname í̠ abanaga anda heda halu í̠ heba daanda heloleberema. Libu kirabalime ina ibalimu laribigoni inanaga mbirale mo page bule oharibibe, lene.
JDG 14:16 Ani layagola Samasono one dugu bima ibu hearia puwa lalu, Í̠na i̱ gubalini nahe i̱hondo handabe mangaho kegonida. Í̠na i̱ dameneruhondo bi yobage lowa lamirigoni galone ogo ale lalu i̱hondo nalangirigo, lene. Ani layagola ibugua lalu, I̱ni aba ai̱yala mbira nalami ngogodago i̱na í̠hondo langulenego irane aginagabe, lene.
JDG 14:17 Ogonidagua layagola horo karu dabu bialu tomo dawalu hayadagoniha dugu dege bialu berene. Ani dege bialu bereagola howa nde bi dugula haru biaho wiaabo ogoni mangabidago lowa ai horo kanengiore galone biago lamini. Lamiyagola ibugua Pilidiali biaruhondo lamini.
JDG 14:18 Lamiyagola Pilidia agali biaru horo kane ogoningi Samasono ibuni tamuha palue pole biyaria tigua ibuhondo lalu, Monenaga dendego dindiha lowa dendebiore agibe. Laiononaga hongogo dindiha lowa hongo daligaheore agibe, lene. Ani layagola Samasonohanda ladai bialu lalu, Tí i̱naga nogo bulumaga daluame dindi nagodongidale nde galone áyu ogoni manda nabi kamile, lalu lene.
JDG 14:19 Abale ani layaore Anduane Homogonaga hongome Samasono ibu mo hongo hene. Ani biya handala ibu Asagelono dindi daliape howa ogoriani agali pira tebiranaga aga bu hearu minu golalu homelo bo wahai hene. Ani bialu tinaga aga bayaore biaruni golalu agali maru tigua bi yobage biago ogo ale lalu lamiyaruhondo golo migi bini. Aguani buwa o biyarunaga keba gibiore ho yalu ibuni andaga dai bini.
JDG 14:20 Ani buwa ibu one biago agali ibu nenege mbira ibu wali dabu biyangi libu haru mandagi ho palu biribigo ibu hado mini.
JDG 15:1 Emene howa mani widi lini dolene tu hayagola Samasono ibu one biago berearia nenege pole pialu howa nogo meme igini daula mbira minu hana halu pene. Ani buwa ibu one biago abahondo lalu, I̱na i̱ one tamu paliaganeha anda poabago, layagola ibugua anda pelo henge namini.
JDG 15:2 Ibugua Samasonohondo lalu, I̱na mitangi berogola í̠na wali ogonihondo handabe mangaore harida lo manda buwa i̱na ibu í̠ nenege biagohondo hado mirugoni. Ibu hagibuni heyogone bayaore bedago í̠ ogoni ho aribia harene, lene.
JDG 15:3 Ani layagola Samasonohanda lalu, I̱ Pilidialiruhondo birulidagua i̱na áyu nabulene wulebira, lene.
JDG 15:4 Ani lowa ibugua biango dudu ale handari tebira (300) minini. Ani buwa kira kira erene pongo pongo bima puwa pongonegoha ira hale hedo pongobi lama pene.
JDG 15:5 Ani buwa biango dudu ale biaru ira hale deaore Pilidialinaga widi lini daga mabu wiagoha golope helene. Ibugua ogonidagua biyagome widi lini bogabi do wiarubi maru wene mabuni dearubi irame daiore halu olibe ira lini daga hearu heba daiore helene.
JDG 15:6 Ani biaria Pilidiali biarume, O bidagoni aiwa binidabe, lene. Ani lowa tigua manda bialu hearia, Samasono ibuguaore biniyane hendene. Ogoni irane ibu imane Timuna agali biagome Samasono one biago ibu nenege biago hado miyagonaga biniya. Ani biniyagola Pilidiali biarume puwa wali biago homelo bo delalu ibu aba damenemabi anda heba delo bo heda halu bini.
JDG 15:7 Ani biyagola Samasonohanda tihondo lalu, Tígua biaganedagua o bidamigonibe. Ogoniyagua i̱na lo werodaguaore bulego. I̱na naholego tíhondo paipai biaore bialu waholebero laro, lene.
JDG 15:8 Ani lowa ibu kebaore gibi howa Pilidiali dewaore minalu bo homelai helene. Ani bialu ibuni ibida puwa Edama hari bare weagoha egeandaha pu hene.
JDG 15:9 Pilidialiru ibuwa Yuda dindini anda pialu wali agali Lehi tanoni hearu minalu bene.
JDG 15:10 Ani biyagola Yuda agali hearume tihondo lalu, Tígua irane aginaga ina minu balu kamibe, lene. Tigua ladai bialu lalu, Ina Samasono minu ibalu ibugua inahondo bialu hayadagua iname nde ibuhondo bialu hole lowa ibirima, lene.
JDG 15:11 Ani laya handala Yuda agali daosini tebira (3,000) Edama hari bare egeanda biagoria Samasono berearia pene. Puwa Samasonohondo lalu, Pilidiali biaru ibuwa tigua ina haru hagane kago í̠ manda nabi kebe, lene. Í̠na inahondo agi bialu pu kebe, lene. Ani layagola ibugua tihondo ladai bialu lalu, Tígua i̱hondo biyadagua i̱na nde tíhondo bialu pu ko, lene.
JDG 15:12 Ani layagola tigua ibuhondo lalu, Iname ogoria ibirimadagoni í̠ minu daba howa tinaga giha ya hole lowa ibirima, lene. Ani layagola Samasonohanda tihondo lalu, Tígua i̱ heneneore Pilidialirunaga giha ya hole tínime naboleberema lalu bi henenego ladaba, lene.
JDG 15:13 Ani layagola tigua lalu, Ogoni karulapego iname í̠ minu daba hangu howa tinaga giha ya holeberema. Iname í̠ homabelo naboleberema, lene. Ani lowa tigua ibu pulimu gahenge hongohe kirame hari bare biagoha howa minu daba ho yalu ibuwa Pilidialiruhondo mini.
JDG 15:14 Samasono ibu Lehi tanoni íbu heagola Pilidiali biaru gerai lalu ibu heagoha bi hongo howa ladaga daga bima ibini. Ibiyagola Anduane Homogonaga hongo holeneme Samasono abaleore mo hongo hene. Ani biyagola ibugua pulimu gahenge hongohe ibunaga gini daba heago tongoloki halu irame pu payini do ganduloki haradagua bilene.
JDG 15:15 Ani biagola ibugua nogo dongi mbira ayure dege homeneyago ogoninaga ne hengene kuni mbira wiaria handa walia hene. Ibugua o biagoni mo yuwa ogonime agali daosini mbira (1,000) homelo bai hene.
JDG 15:16 Ani buwa Samasonohanda wai bi lalu agua lene. Nogo dongi ne hengene kuni mbiraore hangume i̱na agali daosini mbira (1,000) balu home larugo. Nogo dongi ne hengene kuni mbira hangume i̱na bo auya haga bigi buwa wima iri iri bu ngelarugoni, lene.
JDG 15:17 Aguani biai howa mani ibugua nogo dongi ne hengene kuni biago mo wahene. Dindi o bialu hayadagoni mini Lamadi Lehi.
JDG 15:18 Ani bialu hearia Samasono ibugua iba noaore timbuni howa ibu Anduane Homogo olene. Olowa lalu, Í̠na i̱hondo wayali holene gibi ogoni ngirigo áyu i̱ iba noa howa homo ngoria Pilidiali Ngode Datagaliwabe mitangi nabiaga o karunime minilo birida, lene.
JDG 15:19 Ani layagola Ngode Datagaliwabehanda Lehi tanoni dindi uli mbiraha howa iba dugua tagi helene. Ani biyagola Samasonohanda iba biagoni nayagola mini wá lalu ai dungulo daiore bini. Ani biyagola iba o dugui layagoni mini Hagore winigo áyu Lehini dugua ho wiaabo ka.
JDG 15:20 Pilidialime dindi ogoni de hondo heago helowa Samasonohanda Isaraele wali agali mali pira kira (20) haru haho wini.
JDG 16:1 Horo mbirungi Samasono Pilidia dindi timbuni Gasa wiagoria pene. Ogoriani pialu hearia bayanda wali mbira agali kayu yama ibaga bialu ibiyaria lola howa ibu ogonila yu palu hene.
JDG 16:2 Ani biaria Gasa wali agalime Samasono ogoniha hearia handa walia howa tigua ibu heagoria ho mabu bupe hene. Ogoni ibu tagira ibilo lowa tano timbuni ogoriani anda polene pabe haraba wiagoriani halu ho egabi lene. Tigua mbi lu ogoni bi mbira nale haho wialu iname egabi ledagola bami̱yago lo mitangi bu haga haga bini.
JDG 16:3 Ani bilowa Samasono ibu mbiraga tigi mbira hangu palialu mbi hanuni hayagola heyalu pene. Heyalu pialu howa tano timbuni ogoriani pabe hariga ubanda tagi biaga payago yani howa pangaru ira dunini wearubi gi logo hearubi bibahendeore gialo yai hene. Ibugua uruni ibunaga payani mo wiai howa bibahendeore yalu piaho wialu hari bare mbaria Heberono handa amu howa wiagoria yalu iraga hene.
JDG 16:4 Ani buwa mani Samasono ibu wali mbira mini Delaila Sorege dindi guane wiagoria biraga bereagohondo gubaliniho hene.
JDG 16:5 Ani buwa heagola Pilidialinaga kini durialime Delaila berearia puwa lalu, Í̠na Samasono mo hondo howa ibuhondo, í̠naga hongo hiriribidago ogoni irane agime birabe langi, labe. Iname ibu minu daba halu hongo naheore helo ibunaga hongo ogoni agua minupe habehedabe hondoloma̱ya hale habe, lene. Ani beregola i̱na hangu hangume siliba muni handari bearia (1,100) dege dege ilu mogo buwa nguleberema, lene.
JDG 16:6 Ani layagola Delaila ibugua Samasonohondo lalu, Ai í̠na hongo hiriribi ho kegoni ogoaleme mo hongo haga lalu i̱ langiore bibe. Mbiralime í̠ minu daba halu hongo nahabehe helole hamelo kayagua ibugua agua bibehebe, lene.
JDG 16:7 Ani layagola Samasonohanda ladai bialu lalu, Tigua i̱ danda hibu ale hongohe pu karia áyu dege tawe gahengego hondowa ogonime i̱ minu dabaho ngelayayagua i̱ hongo nahe maru karubi dege holebero, lene.
JDG 16:8 Ani layago hale howa Pilidialinaga kini biarume danda hibu ale hongohe pu karia áyu dege tawe gahengego hondowa Delaila berearia yalu ibiyagola ibugua Samasono minu daba ho ngelene.
JDG 16:9 Ani buwa ibugua agali maru anda hobane mendehayagi hondo helene. Ani buwa ibugua hongoore howa Samasono olowa lalu, Pilidialiru o ibiragoni, lene. Ani leagola ibu danda hibu ale hongohe pume dabaho ngelayagoni abale pu payini irame do moloki haradagua bialu tongoloki bilene. Ani biyagola tigua ibunaga hongo holene ogoninaga o heago tene handa walia nahe dege hene.
JDG 16:10 Ani biyagola Delailahanda Samasonohondo lalu, Í̠na i̱hondo henene nalangirigoni i̱ mini nawi luludane mo guya hene mbau laruago hendedebe, lene. Áyu mbiralime minu dabaho ngelolenego aguaore bulene nga lalu i̱ langiaore bia, lene.
JDG 16:11 Ani layagola ibugua ladai bialu lalu, Tigua pulimu ale gahengeore áyu dege tidu mialugome i̱ minu daba harimiyagua i̱ hongo nahe gedaore maru karubi dege holebero, lene.
JDG 16:12 Ani layagola Delailahanda pulimu ale gahenge tiduwa ogonime Samasono minu daba ho ngelene. Ani bu ngelowa hongo howa ladaga halu Samasono olowa, Pilidialiru ibiragoni, lene. Agali uruni anda hobane mendehayagi ibuwa hondo heneya. Delaila ani olayagola ibugua pulimume ibu gini daba ho ngeleagoni abaleore pu payini tongoloki haradagua bilene.
JDG 16:13 Ani biyagola Delailahanda Samasonohondo lalu, Í̠na o biagoni i̱hondo henene nalangi i̱ mo guya dege haho nge hendedeni, lene. Ai áyu í̠ mbiralime minu daba ho ngelolenego aguaore bulene nga lalu langiaore bia, lene. Ani layagola ibugua ladai bialu lalu, Í̠na i̱naga mandari girali karia kogoni labolabo wabiaga masini ngagoha mo dariba howa ira milime bo yani helariyagua i̱ hongo naheore gedaore maru karubi dege holebero, lene.
JDG 16:14 Ani layagola Delailahanda Samasono ma palia howa paleagola ibunaga mandari girali karia biago labolabo wabiaga masini wiyagoha mo dariba howa ira milime hongo howaore bo yani helene. Ani helowa wali biagome ladaga halu Samasono olowa, Pilidialiru ibiragoni, lene. Ani layagola ibu abale heyuwa ibunaga mandari masini biagoha mo dariba howa ira milime hongo howaore bo yaniho ngelayagoni hadabaga bu wahene.
JDG 16:15 Ani biyagola wali biagome ibuhondo lalu, Ai í̠na i̱hondo gubaliniore nahe howa ko agua labehebe, lene. Áyu í̠na i̱ halu tebo ke̱ halu mo guya howa í̠naga hongo gibi kegoni ogo aleme mo hongo haga lalu nalangi dege haabo ke, lene.
JDG 16:16 Ani lalu wali biagome yu wahole ndo yani howa horo bibahendengi hale haho wiaabo hene. Aguani biaabo hayago Samasono ibu hale dege halu manga halu erekui howa
JDG 16:17 ai nde ogoni mangabidago lowa maniore henene do hayago ibu lamini. Ibugua lalu, I̱naga mandari bamba napodenego haabo kogoni. I̱ ai̱yahanda i̱ taba hanayangi howa i̱ Nasa aria Ngode Datagaliwabenaga biabe bia haga mbira ilili bu holiya lomabia howa helenego kogoni. I̱naga mandari ogoni podayagua i̱naga hongo ereba halu i̱ hongo naheore maru karubi holebero, lene.
JDG 16:18 Áyu Delaila ibugua manda bu handalu hearia ibugua o layagoni henene laya manda buwa Pilidialinaga kini biaru hearia bi abale lo pelene. Ibugua lalu, Ai halu mbira hanguore lone dai bilimu, lowa, Áyu ibugua i̱hondo heneneore langiyago, lene. Ani layagola tigua ibalu howa muni yalu ibini.
JDG 16:19 Delaila ibugua Samasono ma palia howa ibunaga bani palia hondo helowa agali mbira olayagola ibugua ibuwa mandari girali karia biaruni minu podo wahene. Ani buwa ibugua Samasono hongo ereba heago hondowa mo tandaga hole tehinini.
JDG 16:20 Ani buwa ibugua hongo howa Samasono olowa lalu, Pilidialiru o ibiragoni, lene. Ani layagola ibugua heyuwa mitangi bu hondowa ai ibugua bibahendengi golope halu, Pirulidagua poleberoda, lene. Anduane Homogohanda ibu yu wahalu peago ibu manda nabi hene.
JDG 16:21 Ani biaria Pilidiali biarume ibuwa ibunaga de habane kirabali dugu piagalo mu wahene. Ani buwa tigua ibu minu yalu Gasa dindini puwa aeane ale mini boronosi seni pu hongoheme minu hende howa garabaya andaha widi lini dambiaga mbira wiagoha biabe bialu helene.
JDG 16:22 Ani bialu heatambu ibunaga mandari biagoni lone íbu ho karulene.
JDG 16:23 Pilidialinaga kini biaru mo mogo buwa mandagi tinaga dama Dagonohondo turu halu mbirale mbira bo delo mule manda bini. Tigua iba gana lalu, Inanaga dama ibugua waitigi Samasononaga hongo podalu wayali holoma̱ya hongo ngiyada, lene.
JDG 16:24 Ti tini dege dege turu haga bialu biruwa tigua lalu, Samasono olalu iname ibu mo taga halu hondo oba hami̱ya, lene. Ani lowa tigua Samasono garabaya anda hearia haru halu ibuwa tigua mo tagaha hondo obaha bigi bule lowa anda gene kira weagoria hengeneni haru íbu helene. Wali agali tigua ibu heago hondowa iba gana lalu tinaga Dagono mini yaraga halu lalu, Inanaga dama ibugua ina waitigi inanaga dindi embera ngelalu ina dewaore bo biba hayagoore iname balu wayali holoma̱ya hongo ngirida, lene.
JDG 16:26 Ani layagola Samasonohanda igiri emene ibu gini yalu haru ibiyagohondo lalu, Anda gene anda yaragaho kagoore i̱ mo ela hela, lene. Ani buwa i̱ ogoriani malia ho holiya, lene.
JDG 16:27 Anda ogoniha wali agali au lolebe dewaore biru gengeda tago bu berene. Ani bialu Pilidialinaga kini duriali biarubi wali agali daosini tebira (3,000) bibahende heba Samasono mo taga halu hondo oba hayaru hondole anda ogoniha hangu li daligani biru yu pene.
JDG 16:28 Ani biaria Samasonohanda Anduane Homogohondo bi lowa lalu, Anduane Homogo Bibahende Haru Haame Ho Haga í̠ kegoni. I̱ore mitangi bibe. Ngode Datagaliwabeore-o hongo biagoni halu mbira hanguore ngia dai berene, lene. Ani beregola halu mbira ogoni hangume hongo ha handarogola Pilidiali tigua i̱naga de kira duguayagonaga minaruyagua nde haru, lene.
JDG 16:29 Ani lowa Samasonohanda anda gene kira anda yaraga ho heleago laboni dombeni gi tale buwa hongo howaore yade̱le̱ bini.
JDG 16:30 Ani buwa bi hongo howa ladaga halu lalu, Pilidialiru heba homoliya homela, lene. Ani lowa ibugua ibunaga hongo holene bibahendeme anda gene biagoni labo yade̱le̱ biyagola anda biagoni kini agali duria biarubi wali agali maru birayaruni mbiraligo yo nape bibahendeoreni podo baga bu ibira helene. Ai Samasonohanda wali agali ibuni abale hayago howa bo home lama piyaru emene dindiha lowa áyu ibuni heba homa maga helo benedagoni dewaore bolangua howa homene.
JDG 16:31 Ani biaria ibunaga hamenerubi ibu damenerubi bibahende tini ibuwa tigua ibunaga tingini mo ibini. Ani bialu tigua ibunaga tingini mo yalu dai buwa Sorala Esedalola dindi hengene ibu aba Manoa hora hene egeanda wiagoria ibubi hora hene. Ibugua Isaraele wali agali haru heane mali pira kira (20) haru hene.
JDG 17:1 Eberaimi hameiginiru dalu hari barebare wiagoha agali mbira mini Maiga hene.
JDG 17:2 Ibugua ibu ai̱yahondo lalu, Mbiralime í̠naga muni siliba daosini mbirani handari mbira (1,100) mo page biyangi í̠na ha halu Anduane Homogo ibugua pageali ogoni bo homelelo lalu larigola i̱na bi ogoni hale harugoni. Ai muni ogoni i̱na mirugo o yu kogonigo de handa, lene. Ani layagola ibu ai̱yahanda lalu, I̱ igini-o Anduane Homogohanda í̠ mo bayale helo laro, lene.
JDG 17:3 Ani layagola Maigahanda ibu ai̱yanaga muni siliba biaru miadai bini. Miadai biyagola ibu ai̱yahanda lamialu lalu, I̱na ha halu bi larugome i̱ iginini ibira nahelo muni ogo Anduane Homogo ibuninagaore lalu loma bialu ibunihondo mero. Ani berogo ai i̱na muni ogo mbirale bi pupu wulenaga wabiaga mbira kagome wabilo muni ogoni ibuhondo mulebero. Ibugua mbirale mbira irame wabuwa mbirale ogoni silibame para hadambi helo. Ani bialu mende siliba degeme bilo mulebero, lene.
JDG 17:4 Ani lowa Maiga ai̱yahanda muni siliba Maiga ibugua miadai biyaru aria handari kira (200) agali mbirale silibame wabiaga heagohondo mini. Agali ogoni ibugua bi pupu wiaga mbira irame wabuwa silibame paraho dambi hene. Ani bialu mendego siliba degemeore wabini. Ani wabuwa tigua bi pupu wiaga ogonilabo Maiga andagaha mo ngelene.
JDG 17:5 Maiga ibuni daluha bi pupu wiaga anda mbira bu helene. Ani bu helowa loma binigo mo miaga agalinaga aga mini ebodi mbira wabu wialu mbirale marubi pupu wulenaga wabuwa bi pupu wiaga anda ogoniha ngelene. Ani bialu ibuni igini mbira bi pupu wiaga anda ogoniha ibunaga loma binigo mo miaga helo dabo helene.
JDG 17:6 Ogoningi Isaraele dindiha kini mbira nahe wini. Wali agali bibahende hearume tini hame leadagua bigibigi bialu haga hene.
JDG 17:7 Ogoningi igiri daliahe mbira Libai aria Yuda dindiha Bedeleheme tano wiagoha hene.
JDG 17:8 Ani howa ibu Bedeleheme wahalu ibu holene dindi gahenge mbira taya bima pene. Pialu Eberaimi hameigini dalu hari barebare wiagoha pialu Maiga anda heagoria tagira pene.
JDG 17:9 Ani pu hearia Maigahanda ibuhondo hale halu lalu, Í̠ agoha howa ibiribe, lene. Ani layagola Libaiali biago ibugua ladai bialu lalu, I̱ Libaiali Yuda dindiha Bedeleheme tano howa íbu kogoni. I̱ dindi gahenge mbira i̱ni holene taya bero, lene.
JDG 17:10 Ani layagola Maigahanda ibuhondo lamialu lalu, Í̠ i̱la oali habiya. Í̠ i̱naga mini mandaru talebu ngiaga mbira howa i̱naga loma binigo mo miaga agali habelo hameledo. Í̠na mali mbirani biabe ogoni beregonaga yolo muni siliba pira (10) ngialu aga tomobi i̱na ngialu buliya, lene.
JDG 17:11 Ani laya handala igiri ogoni ibu Maigahanda bi layagoni karulape lowa ibu Maigala mandagi hene. Ani howa ibu Maiga iginiore haradagua bini.
JDG 17:12 Maigahanda igiri daliahe ogoni ibunaga loma binigo mo miaga helene. Ani helayagola ibu Maiga andaga hene.
JDG 17:13 Ani heagola Maigahanda lalu, Ai Libaiali mbira ogoni i̱naga loma binigo mo miaga i̱la kabagome Anduane Homogohanda i̱ dalu mo bayale hai holobada lo manda bidogoni, lene.
JDG 18:1 Horo uruningi Isaraele wali agalinaga kini mbira nahe hene. Ani biangi Dana hameigini hearu tigua dindi bayale mbira tini holene taya bialu hene. Isaraele hameigini maru hearu tinaga dindi mo wigi biyagola Dana hameigini ti mbira mo wia nabi howa taya bialu hene.
JDG 18:2 Ani bialu howa Danali tigua tinaga hameigini duria hearunaga agali hongohe durialime Sora tano Esedaolo tanolani howa dabalu dindi bu wiaruha ibaga biai halu dindi hondo wule pudaba lene. Tigua agali urunihondo lamialu lalu, Tígua dindi bibahendeha ibaga biai halu dindi baya hanguore hondo wiai halimu, lene. Ani laya handala tigua pialu Eberaimi hameigini dindihayagi hari barebare wiagoria puwa Maiga anda heane hondowa ti Maiga heba ogoniha ho palene.
JDG 18:3 Ti Maiga andagaha puwa igiri daliahe Libaiali ogoninaga bi layago hale howa ibu Yudalida lo manda bini. Ani manda buwa tigua ibuhondo hale halu lalu, Í̠ ogoha agi bialu kebe. Í̠ aiwa haru ibini kebe, lene.
JDG 18:4 Ani hale hayagola ibugua ladai bialu lalu, Maigahanda i̱ haba layagola henego ko. I̱ ibunaga loma binigo mo miaga haruligo ibugua i̱ yolo bigi biaga, lene.
JDG 18:5 Ani layagola Dana hameigini biaru tigua loma binigo mo miaga biagohondo lalu, Áyu ina hariga poramago karulape holobadabe be nakarulape holobadabe lalu Anduane Homogohondo hale habelo hameledema, lene.
JDG 18:6 Ani hale hayagola loma binigo mo miaga biagome tihondo ladai bialu lalu, Tí ibaga bialu poramigoha Anduane Homogo ibunime handayaho holebirago tí gi nahalimu, lene.
JDG 18:7 Ani laya handala agali duriali biaru ti heyalu puwa Laisi tano anda pene. Ani puwa handalu hemiria Laisi tanoha wali agali bu hearume mbirale mbira mitangi nabi Saidono wali agali bayale bu headagua dege hearia hendene. Tigua wali agali mende baba keba nahaga deme handaga bu ema nabi hearia hendene. Tigua wai bulenebi mitangi nabi hearia hendene. Tinaga dindibi bayale dege wialu mbirale mbira burupalebi nabi hene. Ani howa tigua wali agali hameigini tara tara baba yolo mia yolo bia bialu doborobo nabiaga ti hanguore hearia hendene. Anigo tinaga dalu Saidono wali agali heagoha kaware ndo emene kaundiaha wiaria hendene.
JDG 18:8 Ani handai halu Danali duria biaru ti tini dalu Sora Esedaolola dai bialu hemiria tinaga hamene hearume tihondo hale halu lalu, Tígua mbirale agile dege handarimibe, lene.
JDG 18:9 Ani layagola agali duriali biaru tigua ladai bialu lalu, Iname wali agali tano mbirani hearia handarimago uruni baba wai bu mali̱ya abale íbu ngoai hadaba. Iname tinaga dindi baya taraore wiaria de handarima. Anigo tígua bira nabi abale heyalu dindi ogoriani puwa wai bialu karulami̱ya ma.
JDG 18:10 Tígua puwa handalu kamiria wali agali uruni ti wai bulene manda nabi bame biru ngaria hondoleberemi. Tinaga dindi timbuni wialu tinaga tano ogoniha mbirale mbira tubagi nahaga karia hondoleberemi. Ai dindi ogoni Anduane Homogo ibunime inahondo ngiyago abale ma, lene.
JDG 18:11 Ani laya handala Dana hameigini biaru agali handari waragaria (600) bibahendeme tinaga wai biaganealeru mo yai halu tini dindi Sora Esedaolola yu wahalu pene.
JDG 18:12 Tigua ani pu howa Yuda dindiha Kiriada Yarimi tano wiagoria balai anda bini. Ani binidago Kiriada Yariminaga tano abene ni paliragohayagi winigo tigua dindi ogoni mitangi bialu Dananaga Balai Anda Bini lalu mini winigo nga.
JDG 18:13 Ani buwa tigua dindi ogoni yu wahalu puwa Eberaimi hameigininaga dindi hombene barebare wiadagua pialu Maiga andaga pene.
JDG 18:14 Puwa agali duriali dindi diri hondo wule Laisi dindiha ibaga bu hene biarume tini hamene hearuhondo lamialu lalu, Dindi ogoriani anda bu karu mbiraha mbirale mbira bi pupu wulenaga irame wabuwa silibame para hadambi ho winibi mbirale mendebi bi pupu wulenaga siliba ibunime hangu wabini wiaria handarima. Ani bialu loma binigo mo miaganaga aga mini ebodi mbira wialu biaria hendene. Ani wialu dama mitangi bialu mbirale tara tara maru gime wabu wiaria hendene. Ani wiaria handarimago ai iname agua bulene ngabe, lene.
JDG 18:15 Ani lowa hariga peago yu wahalu pu bagi howa tigua Maiga andagaha pialu igiri daliahe Libaiali biagohondo lalu, Hambi-o horombe, lene.
JDG 18:16 Ti ani lalu heane Dana hameigini handari waragaria (600) biaru ti mbirale wai biaganeale biaru yalu Maiga daluha anda polene pabe haraba wiagoria hondo hene.
JDG 18:17 Ani heagola loma binigo mo miaga biago ibu ami agali handari waragaria (600) biaru baba pabe harabani hondo hea tambu agali duriali dindi diri hondo wule pene biaru tigua bi pupu wiaga andaha anda pene. Anda puwa tigua mbirale irame wabuwa silibame paraha dambi hene wiagobi loma binigo mo miaganaga aga mini ebodi wiagobi dama mitangi bialu bi pupu wule gime wabini maru wiarubi mbirale siliba degeme bi pupu wulenaga wiagobi uruni bibahende mo yule anda pene.
JDG 18:18 Ani anda piyagola loma binigo mo miaga biago ibu handalu hearia agali duriali biaru tigua Maiganaga bi pupu wiaga andaha puwa mbirale bi pupu wule wabini wiarubi loma binigo mo miaganaga aga wiagobi bibahende mo yalu tagira ibiyane hondowa ibugua tihondo hale halu lalu, Tígua ogoni agile beremibe, lene.
JDG 18:19 Ani layagola tigua ibuhondo ladai bialu lalu, Í̠ bi nale waha. Í̠ inanaga loma binigo mo miaga halu ina mini bogaru talebu ngiaga habelo ina haru mali̱ya. Be í̠ agali mbiraoreli hangunaga loma binigo mo miaga holebe. Ani ndo í̠ Isaraele hameigini ina kamarunaga loma binigo mo miaga holene bayale ndobe, lene.
JDG 18:20 Ani laya handala loma binigo mo miaga biago ibu turu halu anda biagoha mbirale bi pupu wiaga wiaru bibahende mo yai halu ibu ti heba pole pene.
JDG 18:21 Ani buwa ti beregedalu pole pialu howa tinaga waneiginirubi nogo sibi bulumagarubi haru halu dabudabu wiarubi bibahende mo yai halu ti bamba halu pene.
JDG 18:22 Danali biaru ti kaundiani pialu heagola Maigahanda agali maru ibu aria kaware hearu Danali baba waibu ma lalu olo ngoai hene. Ani bialu tigua talima pugu pugu bialu Danali biaru pialu hearia tali minini.
JDG 18:23 Agali Maiga aria biarume Danali biaruhondo bi hongo howa olayagola Danali biarume beregedalu handa dai buwa tigua lalu, Maiga-o agua biyabe. I̱na í̠naga agali dewaliore ina baba wai bule haru halu eberego agibe, lene.
JDG 18:24 Ani layagola Maiga ibugua ladai bialu lalu, Tígua i̱naga loma binigo mo miaga agali haru halu i̱naga dama mitangi bialu bi pupu wiaga gime wabini wirugobi mo yalu ibida pirimida. I̱naga mbirale marubi mo yai harimida. Ani birimidago buwa i̱hondo agua biyabe lalu hale haramigo agua laramibe, lene.
JDG 18:25 Ani layagola Danali biaru tigua ladai bialu lalu, Agali o karume keba halu í̠nibi í̠ one waneiginibi bo wahai holigo inahondo bi dewaore nale waha, lene.
JDG 18:26 Ani lalu Danali biaru ti pole piyagoha pene. Piyagola Maiga ibugua handalu hearia agali uruni baba wai bima labe nahe ti hongoheore gibiyane wahalu beregedalu ibuni dalu dai bini.
JDG 18:27 Danali biaru tigua Maiganaga mbirale bi pupu wulenaga wiaru mo yalu ibunaga loma bu minigo mo miaga agali biagobi haruha bialu Laisi tano pole pene. Ani pu hemigola Laisi tanoha wali agali bu hearume ti baba wai bulene mitangi nabi hendore hene. Ani heagola Danali biaruni tigua wali agali bo wahai halu tinaga tano wiagobi bo heda hai hene.
JDG 18:28 Laisi wali agali uruni ti dindi kaundiaha howa dindi maru ngaru baba ti mbirale yolobu pu íbu nabiaga. Saidono dindi polene kaundia wiagola mbiralime ti biamogo bule naibaga hene. Laisi tano ogoni dindi ulini panda panda Bederehobo tano wiago kawareni dege wini. Ani binigo Danali tigua tano biago lone bia tiga buwa tini ogoriani hene.
JDG 18:29 Ani karulo howa tigua tano ogoni mini Dana wini. Abale tano ogoni mini Laisi winigo ai tinaga mamali Yagaba igini henego mini embeda holilono tano ogoni mini Dana wia aribia hene.
JDG 18:30 Ani howa Danali biaru tigua mbirale bi pupu wulenaga gime wabini biaru mo yalu ibirimigo ogoniha ngelowa mbirale urunihondo bi pupu wialu hene. Mosese hameigini aria Gesomo igini Yonadana ibu Dana wali agalirunaga loma binigo mo miaga hene. Ani howa Dana hameiginirunaga loma binigo mo miaga Yonadana aguanenerume dege haabo howa Danali uruni dindi mendeha garabaya piyangi wahene.
JDG 18:31 Anduane Homogonaga Balai Anda Silo dindiha bu heangi Dana hameigini hearu tigua Maigahanda bi pupu wulenaga gime wabini biaruhondo bi pupu wialu haabo haga hene.
JDG 19:1 Horo uruningi Isaraele dindiha kini mbira nahe dege wiangi Libaiali dindiha Bedeleheme tano wiagoria wandari mbira berenego ibu one wabuni mende berelo dabu bu hene.
JDG 19:2 Anigo wali ogoni ibugua Libaiali biagola keba howa ibu aba andaga Bedeleheme tanoha puwa ege maria berene.
JDG 19:3 Ani berenego ibu agalinime wandari biago haru dai bule manda bialu ibunaga nogo dongi kira haru halu biabe biaga agali mbirala haru pene. Ani piyagola wandari biagome agali biago lola howa ibu aba andaga haru pene. Haru ibiyagola wandari biago abahanda agali biago hondowa ibu turu hene.
JDG 19:4 Turu howa wandari aba biagome ibu imane tini haru mandagi hamaore lene. Ani layagola tigua iba tomobi nagimbu bialu horo tebira ti haru mandagi hene.
JDG 19:5 Horo maneni Libaiali biagome andaga dai bulenaga egerebagiore heyuwa mbirale wiyaru mo manda manda bini. Ani manda manda bialu hearia ibu imane biagome lalu, Pole dege hongo helo iya tomo ala nabiya. Nalu pilimulo, lene.
JDG 19:6 Ani layagola libu haru tomo ibabi nalu biruwa wandari aba biagome lalu, Áyu mbiraga dege tomo ibabi nalu turu hagabu palima, lene.
JDG 19:7 Ani layagola Libaiali biago ibu pole heyiyagola ibu imane biagome hongo halu harugo palima lene. Ani layagola nde harugo lowa mbi mbira ogoni ho palene.
JDG 19:8 Horo daunini Libaiali biago poleore manda bini. Ani manda bialu hearia wandari aba ibu imane biagome lalu, Ainde alendo ni tabi laragola pole áyu tomoru nalu emene hondo birama, lene. Ani layagola libu haru tomo mandagi nalu berene.
JDG 19:9 Ani biralu polene tu hayagola Libaiali biago ibu onebi ibunaga biabe biaga agali biagobi ti polene manda bialu hearia wandari aba biagome lalu, Ai ni abale anda pialu alendo haragonidago yawi pole áyu dege harugo turu hagabu ho palima. Yawi gao laragola eregebagi heyalu tíni dalu puabo halu pilimulo, lene.
JDG 19:10 Ani layagola Libaiali biago ibu lone paluene manga howa ibubi ibu onebi heyalu pene. Nogo dongi biago labonaga erekunini mbirale dungaho biraga wiago mo paga howa ogoriani biralu Yabusu tano mini mende Yarusaleme lagago pole pene.
JDG 19:11 Alendo halu ni paliyagola ti pialu Yabusu tano ogoriani anda pene. Anda puwa ibunaga biabe biaga agali biagome lalu, Ina puabo nahe Yabusualinaga tano ogoha paluene karulapeda, lene.
JDG 19:12 Ani layagola Libaiali biagome lalu, Ani ndo ina Isaraele hameiginime agali tara karu dalu ngagoha paluene nakarulapego Gibea tanoha palimi̱ya.
JDG 19:13 Gibea tanohayaguabi Lama tanohayaguabi mendeni palimi̱ya abale ma, lene.
JDG 19:14 Ani lalu Yabusu tano yu wahalu ti emene pu dege bini. Ni anda pialu aruma hole biyagola Gibea tano Beniyamini hameiginiru dalu wiagoria anda pene.
JDG 19:15 Tigua hariga tene wahalu tanoha paluene anda taya bule anda pene. Ani puwa ti wali agali ngoai haga hama wiagoria pu berene. Ani berearia mbiralime ibu andaga palima ma lalu haru polene mbira naibini.
JDG 19:16 Ti bira dege biaria agali wahe mbira ibini. Agali ogoni ibu Eberaimi hameigini dindi hari barebare wiagoha hagago ogoni wahalu Gibea tano wiagoha íbu hene. Gibea tano ogoni Beniyamini hameigininaga wini. Agali wahe biago ibu mabuha biabe bu penego ai andaga dai bini.
JDG 19:17 Ibu dai bialu hearia Libaiali biago ibu onebi ibunaga biabe biaga agali biagobi ti wali agali ngoai haga hama wiagoria berearia hendene. Ani hondowa ibugua tihondo hale halu lalu, Tí agoha howa ibini bedemibe. Tí ani polenaga bedemibe, lene.
JDG 19:18 Ani layagola Libaiali biagome ladai bialu lalu, Ina Yuda dindi Bedeleheme tanoha howa ibirimago ai ina i̱ dalu Eberaimi hameigini dindini hari barebare ngagoha pole bedema. Ina Anduane Homogonaga anda kagoha pole bedemago ai mbirali ina ibu andaga áyu mbiraga hangunaga haru polene naheda.
JDG 19:19 Ina mbirale bibahende yai kama. Nogo dongi kira kago labonaga tani nolenebi i̱bi i̱ onebi i̱naga biabe biaga agali kagobi iname tomo nolene mberedi waini ibabi mbirale mbira buru palia nabi bibahende yai kama, lene.
JDG 19:20 Ani layagola agali wahe biagome lalu, Bayaledago i̱ andaga palimi̱ya. I̱na mbirale bibahende handayaho hai holeberogo ai ma. Tí wali agali ngoai haga hama ogoria mbiraga birulene nakarulapego maibidaba, lene.
JDG 19:21 Ani lalu ibu andaga haru pene. Haru puwa nogo dongi biagolabo tomo nelo mialu wali agali biarunaga ge wayawaya ba halu tomo ibabi nelo mialu bini.
JDG 19:22 Ani bialu ti turu hagabu beremiria agali ko biaga maru tano ogoniha haga hearume ibalu anda ti bereago ho mabubu howa anda panga hongo howa bene. Agali uruni ti mana ko ngubi tara tara dewa biaga henego tigua agali wahe biagohondo lalu, Agali í̠ andaga íbu bedagoni ina yuluma̱ya tagira ibila, lene.
JDG 19:23 Anidagua layagola agali wahe biagome tagira puwa lalu, Ani nabuleore. Agali i̱naga nenege i̱ andaga ibinigo ina haru padogoni. Tígua mana ko ogoni bulene nawi.
JDG 19:24 Ai i̱ wanebi agali ibiyago ibu one biagobi libu bedago i̱na libu haru tagira ibalu tígua libuhondo bulene hamelaramidagua nde bilimulo. Anigo agali ibiyagohondo mana ko ngubi ogoni nabilimu laro, lalu hongo howa lene.
JDG 19:25 Ani layago lelowa agali biarume agali wahe biagonaga bi layago hale nahene. Ani biyagola Libaiali biagome ibu one agali biaru mini. Ani miyagola agali biaru tigua wali biago haru puwa ti haru paligi bialu mana ko ngubi tara tara biaabo halu heane gao lene. Ani bialu yu wahalu pu lene.
JDG 19:26 Muna biyagola wali biago agali wahe biagonaga anda haneni ibu agalini paliyagoria odo ibiraho wini. Ani odo ibiraho wuwa paleane dege ni tagira ibini.
JDG 19:27 Egerebagi hayagola wali ogoni agalini ibu andaga polenaga panga dugualu tagira pene. Ibugua panga duguwa handalu hearia ibu one haneni palearia hendene. Wali biagome panga dugualu hearia duguabe naheyagola haneni ibiraho wini.
JDG 19:28 Ani palearia Libaiali biagome lalu, Ai heyalu ma, lene. Ani layagola wali biagome bi ladai nabi wiaabo hene. Ani biyagola Libaiali biagome wali biago tingini nogo dongi erekunini mo wialu ibuni daluha yalu pene.
JDG 19:29 Ibuni andagani anda puwa ibugua nabi mbira abale mo pene. Mo yu tagira ibuwa wali biago tingini hombe (12) pugu podo wini. Ani buwa ibugua Isaraele hameigini homberia (12) hayadagua pugu mbira pelaga bini.
JDG 19:30 Ani biyagola agali bibahendeme wali biago tingini podalu puguni pelaga biniyago hondowa tigua lalu, Mbiralime ogonidagua mbira ala biyane nahendeore harimagoni. Bamba Iyibi dindiha halu tagira ibirimangi howa mbiralime ogonidagua biyane nahendeneore kamagoni ndobe. Ai iname ogoni biyadagonaga mbira bimi̱ya. Agi bimi̱ya manda bu kamibe, laga bini.
JDG 20:1 Isaraeleali bibahendeme mana ko Gibealirume ogonidagua biya layago hale halu ti mini mbiraore howa agali wabuni mbiraore hangu ibalu ti bibahende Anduane Homogonaga deni Misiba tano wiagoria íbu ngoai ho hene. Ti Isaraele dindi bibahende abene uyurayaginaga Dana hameigini paleagoria howa hama ibalu unurayaginaga Beaseba tano wiagoria howa ibalu ibai hene. Ani ibalu Gileada dindi ni tagira ibiragohayagi hearubi ibai hene.
JDG 20:2 Isaraele hameigini bibahendenaga agali haguane hearubi Ngode Datagaliwabenaga wali agali mo mogobu hayadagua dege tibi íbu mogobu hene. Horo ogoningi ami agali wai biaga ayu tibu ne gadeleore yu hearu ti daosini dege handari maria (400,000) íbu ngoai hene.
JDG 20:3 Ani íbu ngoai ho heagola Beniyamini hameigini hearu ti hale halu hemiria Isaraeleali bibahende Misiba tanoni íbu ngoaiho ka layane hale hene. Ani howa Isaraeleali biarume Libaiali biagohondo hale halu lalu, Mana ko o biyadagoni agua bialu biyabe. Te ogoni ina hale holoma̱ya langi, lene.
JDG 20:4 Ani layagola Libaiali wali bo wahayago agalini biago ibugua lalu, I̱ one iya Beniyamini hameigini dindi Gibea tanoha mbi layagola palue anda piriba.
JDG 20:5 Ani anda pu berebagola mbiraga Gibeali hearume i̱ bole waraanda haya. Tigua ibalu anda i̱ palue berewagoha ho mabu bu haya. Ani buwa tigua i̱ nabe wahalu i̱ one berewago ti haru tagira puwa wali biago kayu yalu gao lowa homelaya.
JDG 20:6 Ani homelayagola i̱na ibunaga tingini andaga mo yalu dai buwa Isaraele hameigini bibahende hangu hangu hondo podo ta howa wia hai haru. Anidagua birudagoni irane agali uruni tigua ina Isaraeleali kamaru dombenegoha mana ko ngubiore biyagola ani biru.
JDG 20:7 Ai Isaraelealiru-o tí bibahendeme mitangi bayuwaore buwa bi lalimu. Mana ko o biyadagoni iname pani agobi bialu biadai bimi̱yabe, lene.
JDG 20:8 Ani layagola agali bibahendeme bi lo mbira halu, Ina íbu kamaru mbiraligo inanaga balai anda kagohabi anda ibuni kagohabi dai bulene nawiore larama.
JDG 20:9 Gibealiru tigua mana ko ogonidagua ina Isaraelealihondo biyadagonaga ina bibahendeme wai bu poleberema. Ani bulene ngago agali ái ibu polebadabe hondolenaga iname ege to̱le̱ baraga howa agalinaga mini ngagoria handaramago uruni dabami̱ya.
JDG 20:10 Isaraele hameigini agali handari mbiranaga (100) agali pira mbira dababagi halu daosini mbiranaga (1,000) agali handari mbira dababagi halu daosini pira mbiranaga (10,000) agali daosini mbira (1,000) dababagi halu bimi̱ya. Agali dababagi heneru tigua ami agali Gibea hameigini baba wai bule porarunaga tomo hanalu Gibea tano ngagoria pu helo. Ami agali ti Beniyamini hameigininaga dindi Gibea tano ngagoria anda puwa tigua Gibea agali mana ko ngubi o biyaruni tihondo pani ko biadai bilo, lene.
JDG 20:11 Ani lowa Isaraeleali bibahendeme tini mini mbiraore howa Gibea tanoha karu baba wai bu polenaga mo mbiraore ho ngoai hene.
JDG 20:12 Ani howa Isaraeleali tigua agali marume Beniyamini hameigini Gibea tanoha palearuhondo bi lo yalu pelo lawia halu lalu, Mana ko ngubi mbira tí kamigoha howa tagira piyadago agi birimibe.
JDG 20:13 Ai tígua agali ko ogoni biyadaruni Gibea tanoha haruaruni iname bo wahai halu mana ko ngubi ina Isaraele dindiha tagira ibiyadago biba helalu mo ereba heloloma̱ya haru ibalimu, lene. Ani layagola Beniyamini hameigini biarume Isaraele hameigini maru hayadaruninaga bi layago mo wahalu ti agali uruni haru tagira nape dongeho hene.
JDG 20:14 Ani howa Beniyamini hameigini uruni tigua Isaraele hameigini maru hayadaru baba wai bule lowa tininaga tano wiyadaru wahalu Gibea tanoni íbu ngoai ho hene.
JDG 20:15 Horo ogoningi Beniyamini hameiginirume ami agali tano bibahendeha howa íbu ngoai halu daosini dege pira kirani waragaria (26,000) bibahende ayu tibume wai biagaru ti mo mogobu hene. Ani heagola agali maru Gibea tanoali tini nde handari karia (700) wai biagaru ona tidiyu handa edene bu hene.
JDG 20:16 Agali handari karia (700) uruni ti gi leme wai biaga howa tigua ege to̱le̱ pume yuwa wai bialu nde koba nabiaga bila haga hangu hene.
JDG 20:17 Anidagua heagola Isaraele hameigini maru ti nde daosini dege handari maria (400,000) ayu tibume wai biagaru naina tidiyu hene. Beniyamini hameigini baba dagalamaga nahe tini hangu ogonidagua hene.
JDG 20:18 Isaraeleali ti Anduane Homogo mitangi bialu lotu lole Bedele tano wiagoria puwa tigua Anduane Homogohondo hale halu lalu, Ina hameigini kamaru aria mbira aiwa wai haru bamba halu Beniyamini baba wai bule polomabe, lalu hale hene. Ani hale hayagola Anduane Homogohanda ladai bialu, Yuda hameigini tigua wai haru bamba holene nga, lene.
JDG 20:19 Ani laya handala Isaraeleali biaru tigua egerebagiore heyalu puwa Gibea tano kawareni wai bule manda manda buwa tidiyu hene.
JDG 20:20 Tigua Beniyamini hameigini hearu baba wai bulenedagua manda manda bialu ona tidiyu haga haga bini.
JDG 20:21 Ani heagola Beniyamini hameigini biaru tibi nde Gibea tanoha howa tagira ibalu wai bini. Wai bialu Beniyamini hameigini biarume Isaraeleali daosini dege pira kirani kira (22,000) bo wahai hene.
JDG 20:22 Ani bo wahaya handala Isaraeleali biaru dai buwa Anduane Homogo mitangi bialu lotu laga wiagoria halu mende puwa Anduane Homogonaga deni bulu paluwa dugu bialu wiane dege alendo hene. Ani bulu paluwa tigua Anduane Homogo hale halu lalu, Ainde Beniyamini hameigini ina hamene karu baba wai lone bu poramabe be waharamabe, lene. Ani hale hayagola Anduane Homogohanda ladai bialu lalu, Wai lone bule dai bidaba, lene. Ani laya handala horo mendengi Isaraeleali biarume lone hongo halu dai buwa wai hama biagoria wai bule abale tidiyu haga haga bu harimigoria íbu hene.
JDG 20:24 Ani howa tigua Beniyamini hameigini baba wai halu mende bule pene.
JDG 20:25 Ani pu heagola Beniyamini hameigini biarume Gibea tanoha howa tidiyu tagira ibalu Isaraelealiru baba horo mende ogoningi wai bialu tigua Isaraeleali ami wai biaga ayu tibu yu hearu aria daosini mbirani pira halira (18,000) bibahende balu homelai hene.
JDG 20:26 Ani baya handala Isaraeleali biaru ti Bedele tanoni lone dai bialu puwa Anduane Homogonaga deni howa dugu timbuni bialu berene. Tigua tomo ibabi nane biralu alendo hene. Ani bialu tigua mbirale loma biniru irani dai helo bo delalu mbirale Anduane Homogola ho gimbu bulenagabi lomabu delalu bini.
JDG 20:27 Anduane Homogonaga Habo Nalolene Bi lo winigonaga Mbogoyi biago horo ogoningi Bedele tanoha ngelowa Eleasa igini Arono aguane Piniasahanda handayaho hene. Ani heagola Isaraeleali tigua Anduane Homogohondo lone hale halu lalu, Iname Beniyamini hameigini ina hamene karu baba lone wai bu poramabe be waharamabe, lene. Ani hale hayagola Anduane Homogohanda ladai bialu lalu, Yawi i̱na tí biamogo buleberogo tígua wai bialu bo poda hana hai holeberemigo pilimu, lene.
JDG 20:29 Ani laya handala Isaraeleali ami tidi mbira biarume ohalu puwa Gibea tano wiagonaga pabe heagoha ho mabu buwa bira do hene.
JDG 20:30 Horo tebone layagola Isaraeleali ami agali biaru Beniyamini hameigini biaru baba wai bule lone pene. Puwa abale biaga wiyadagua tinaga ami agali mo tahalu wai bulenedagua tidiyu haga haga bilene.
JDG 20:31 Beniyamini hameigini biarume wai bule tagira ibiyagola Isaraeleali tinaga ami agali hayadaru tigua tanoni hapara nahe emene haru gililo mialu puamu hene. Ani buwa Beniyamini hameigini tigua abale biyadagua dege Isaraele hearu haruru talima puwa Bedele polene hariga wiagoria bo waha maru Gibea polene hariga peagoria bo waha maru wai hama wiagoria bo paya paya bialu Isaraeleali pira tebira (30) agima bo wahene.
JDG 20:32 Ani bo wahowa Beniyamini hameigini biaru tigua lalu, Iname abale barimadagua dege bai harimago haruore, lalu hene. Ani lalu heaore Isaraeleali tigua nde wai tara hono howa lalu, Iname tano yu wahalu kaundiaha puwa wai haru halu hariga tene pedaruha pugu pugu bimi̱ya, lalu lo wini.
JDG 20:33 Ani lo winidagua bialu Isaraeleali ti lone dai buwa dindi mini Baladama laga wiagoria mo mogobu hene. Ti aria maru Gibea tanoha bira do howa tano abene ni paliragohayagi hene. Ani bira do heneru ti abale tagira ibalu wai hongo howaore bialu hene. Isaraeleali wai bayale biaga hongohe pari wayali daosini pira (10,000) daba bagiho berelayarume uruni abale tagira ibalu wai pora biai hene. Anigo Beniyamini hameigini biaru darabi mo ko howaore balu bo amo lolene wai hanalu tagira ibiyago manda nabi dege hene.
JDG 20:35 Anigo ogoningi nde Anduane Homogohanda ti biamogo biyagola tigua Beniyamini hameigini hearu balu bo poda hana hai hene. Horo ogoningi Isaraelealiru tigua Beniyamini hameigini biaru daosini dege pira kirani duriani handari mbira (25,100) bibahende bo wahai hene.
JDG 20:36 Ani biyagola Beniyamini hameigini tini mitangi bialu wai bibe nahe ti bai holobada lo manda bini. Isaraeleali maru Gibea tano kaware wiagohayagi o howa bira do halimu layaru helalu maru tigua Beniyamini hameigini hearu mo hondo howa ti ibida petingi halu Beniyamini hameigini uru haru gililo mialu tano yu wahalu pene.
JDG 20:37 Ani biyagola agali bira do hayarume heyalu Gibea tanoha abale anda puwa wali agali bu hearu bibahendeore bo hilo wahai hene.
JDG 20:38 Agali bira do hayadarume agali ibida petingi howa hayadaruhondo lamialu lalu, Iname Gibea tanoha anda puwa wai bialu anda heda haramagola hagua birane hondowa
JDG 20:39 tí beregedalu abaleore dai bilimu, lalu bi ala lowini. Anigo wai bialu howa Beniyamini hameigini tigua Isaraeleali hearu aria pira tebira (30) bowa tini lo mitangi bialu, Abale barimadagua dege barimada, lo mitangi bini.
JDG 20:40 Anigo tano biagoha ira hagua iraga hayago hondowa Beniyamini hameigini biarume lo manda bialu Gibea tano bo heda hayagola do wahayada lo manda bini.
JDG 20:41 Ani biyagola Isaraeleali ibida petingi haga biarume wai hongohe bialu íbu dai bini. Ani biyagola Beniyamini hameigini biarume handalu hearia Isaraeleali biaru lone dai biyago hondowa gi howa mogo lalu tinaga hongo pirilipe hai hene. Tiha mo ko halu homai holene áyu ogoni anda ibiyada lo manda biai hene.
JDG 20:42 Ani manda buwa ti ibida pialu dindi ko iba dalu naibaga wiagohayagi piai ho hene. Ani pole piyago ti ogoniha polene henge nawiore hene. Pialu hearia Isaraeleali halu mende tanoha anda pu hene biaru tagira ibiyagola mo dombeni howa Beniyamini hameigini biaru mbira pora bialu nape baiore hene.
JDG 20:43 Isaraeleali tigua Beniyamini hameigini bama talima pialu dindi mbira mini Menua wiagoha pialu bama talima pu dege bialu Gibea tanonaga abene ni tagira ibiragohayagi puabo hene.
JDG 20:44 Ani bialu horo ogoningi dege Beniyamini hameigini wai biaga hongohe hangu daosini pira mbirani halira (18,000) bibahende bai hene.
JDG 20:45 Beniyamini hameigini uruni aria maru dindi ko iba dalu naibaga wiagoha ibida pialu Limono egeanda wiagoha bira do hole pene. Ani ibida pialu hearia Isaraeleali biarume haruru talima pugu pugu bialu daosini duria (5,000) harigani bo wahai hene. Ani bialu Isaraeleali tigua talima pugu pugu biaho wialu dindi mini Gidomo wiagoria puabo halu ogoniha daosini kirabi (2,000) lone ba dege bini.
JDG 20:46 Horo ogoningi Isaraelealirume Beniyamini agali daosini pira kirani duria (25,000) bai hene. Agali homayadaruni wai biaga pari wayali haga binigo bibahende bai hene.
JDG 20:47 Ani bai haya handala Beniyamini hameigini handari waragaria (600) dege ibida pialu Limono egeanda wiagoha bira do hene. Ani bialu ti ege maria ogoniha biraabo hene.
JDG 20:48 Isaraeleali biaru tigua lone Beniyamini hameigini dindi íbu dai buwa wali agali bu hearubi nogo tara tara bu hearubi bibahendeore tinaga deni ngoalia hayago damene bibahende bo hilo wahai hene. Ani bialu Beniyamini hameigini tinaga tano wiago damene bibahende bo heda halu bo gialabagabu wahai haga bini.
JDG 21:1 Isaraele wali agali hearu Misiba tanoha ngoai ho heangi tigua Anduane Homogohondo habo nalolene bi mbira hongo howa lowialu lalu, Inanaga wane bedaru aria mbira Beniyamini hameigini karu aria mbirame dabu bilo namimi̱ya, lalu lowini.
JDG 21:2 Ani lo howa wai biai halu Isaraele wali agali ti Bedele tano wiagoria puwa Ngode Datagaliwabenaga deni biralu alendo hene. Ani biralu ti bi laraga halu dugu bialu berene.
JDG 21:3 Ani biruwa tigua lalu, Anduane Homogo inanaga Ngode Datagaliwabe-o mbirale o bidagoni irane aginaga tagira ibidabe. Ina hameigini mbira ibu damene lenego bibahende ereba hai holobadago irane aginagabe, lene.
JDG 21:4 Ani lalu biruwa horo mendengi egerebagiore hayagola wali agalime lomabu delaga dabu mbira dindi ogoriani bu helene. Ani buwa tigua mbirale loma bialu irani dai helo bo delalu Anduane Homogola ho gimbu bulenenaga lomabi bo dela dege bini.
JDG 21:5 Ani bialu howa tigua lalu, Ina Isaraele hameigini mbira Anduane Homogonaga deni naibuhe aidabe, lene. Tigua ani hale hayadagoni irane tigua ala habo nalolene bi mbira lo wialu, Hameigini mbira Anduane Homogonaga deni Misiba tanoni naibiyagua hameigini ogoni homelo bolene wulebira, lalu lowinigonaga ani hale hene.
JDG 21:6 Ani lowa ti hameigini mbirago ereba hai hayadago lalu tinaga hameigini Beniyaminiore dara timbuni ho hene.
JDG 21:7 Anigo tigua lalu, Ai iname Beniyamini hameigini yu wahene maru karunaga wali agua taya bia hami̱yadabe. Iname inane wane bedaru Beniyamini aria karume dabu bilo namimi̱ya lalu Anduane Homogohondo habo nalolene bi hongohe lo wirimagodago ai agua buledabe, lene.
JDG 21:8 Ani lowiyago manda buwa tini dege dege hale haga haga bialu lalu, Inanaga hameigini kamaru aria mbirali Misiba tano ngagoria Anduane Homogonaga deni ngoai nahe ai kabe, lene. Ani lowa tigua dabo handalu hemiria Gileada dindi wiagohayagi Yabese tanoha howa mbirali naibiyago manda bini.
JDG 21:9 Ani manda bialu ti mo ngoaiho henedangi Isaraele hameigini mbira ago íbu naibidabe hondolenaga mini olaga bini. Ogoningi Gileada dindini Yabese tano wiagoha howa mbirali dege naibiyane hendenego manda bini.
JDG 21:10 Ani manda bu dai bialu agali ngoaiho hayadago tigua ami agali hongoheru daosini homberia (12,000) Yabese tanoha pudaba lene. Ani pudaba lowa tigua bi hongohe mbira agali urunihondo lamialu lalu, Tígua Yabese tanoha pialu agali bibahendebi wali agali one bedarubi waneigini bu karubi bibahende bo wahai halu wandari mabuage dege berelalimu, lene.
JDG 21:12 Agali biaru tigua puwa ogonidagua biyagola wandari mabuage agalila nahene ti handari maria (400) berearia hendene. Ani berearia agali biaru tigua wandari uruni bibahende Kenana dindiha Silo tanoni tininaga balai anda bu hayagoria haru dai bini.
JDG 21:13 Ani buwa Isaraeleali biaru tigua Beniyamini hameigini ti wali agali nahaga wiagoha egeanda mbira mini Limono heagoha bira do hayago ibalimu lalu bi lawia hene. Tigua lalu, Iname tí baba wai bua nahe kamago ibalimu, lene.
JDG 21:14 Anidagua laya handala Beniyamini hameigini biaru ti bira do hayago wahalu dai bini. Dai biyagola Isaraeleali biarume wandari mabuage haru íbu berelayaru Beniyamini hameigini biaru ti dabu bilo mini. Wandari uruni ti Gileada dindi Yabese tano wiagoha wai biyagola yu wahene berearu haru íbu berelenego uruni mini. Ani miyagola wandari ndia halu agali dewaore hene.
JDG 21:15 Isaraeleali maru hearume mitangibu handalu hearia Anduane Homogohanda tinaga hamene mbira waratagi hayada manda bialu tigua Beniyamini hameigini dara hene.
JDG 21:16 Ani biyagola Isaraeleali agali haguane hearume lalu, Ai Beniyamini hameigini tini daluha wali dabu bulene naberedago agali maru karu tinaga wali agua taya bimi̱yadabe.
JDG 21:17 Ina Isaraele hameigini aria mbirago ereba holigo ai tinaga hameigini biba halu ereba nahelonaga ti wali dabu bulene nga.
JDG 21:18 Anigo agali urunime ina wane bedaru mbira dabu bulene nakarulapeore. Iname ala Anduane Homogohondo habo nalolene bi mbira lowialu, Agali ina kamaru aria mbirago ibu wane Beniyamini hameigini karume dabu bilo miyagua nde agali wandari abadago ibuha mo ko holene wulebira, lalu lo wirimagoni, lene.
JDG 21:19 Anidagua lowa agali haguane biaru tigua lalu, Anduane Homogo mitangi bulenenaga tomo dawalu nolene horo mali mbira poragola biagago horo ogoni tagira ibulene kaware hapara haragoni. Ai tomo ogoni dawa nalu holene Silo tano ngagoria tagira ibulebira, lene. Silo tano ogoni Bedele tano wiagonaga abene uyurayagi wialu dindi abene unurahayagi Lebona tano wiago kawareni wini. Ani bialu Segeme tano Bedele tanola wiago dombeneha hariga timbuni bolangua heagonaga abene ni tagira ibiragohayagi wini.
JDG 21:20 Ani winigo agali haguane biaru tigua Beniyamini hameigini biaruhondo lamialu lalu, Ai tí puwa gerebi mabu ngagoha bira do howa hondo halimu.
JDG 21:21 Tomo timbuni dawa nolene tu haragola Silo tanoha wandari bedaru iba gana lalu mali lule tagira ibulebira. Ibiragola tígua abale porabu tagi halu wandari mbira mbira tí dabu bule minu yalu tíni daluha haru halu puabo halimu.
JDG 21:22 Ani bidamigola wandari aba mbalinirume, Nakarulape beremi, lalu bi layagua nde iname tihondo ladai bialu, Iname wai timbuni birimagome biyagola tigua ina wane bedaru dabu bulene nawi hayagola biyadago, loloma̱ya. Ainde Beniyamini hameigini uruni dara halu wahadaba. Heneneore tínaga wandari bedaru tigua dabu biyadagonigo ai tígua henemane mero lalu mia ndo tinime minu yalu piyagome habo nalolene bi lowirimago pugua ndo birimigo wahadaba, loleberemago ani bilimu, lene.
JDG 21:23 Ani layagola Beniyamini hameigini biaru tigua agali haguane biarume layadagua bialu wandari iba gana lalu mali lule ibiyaruni ti taho minu yai halu tini dalu pene. Tini daluha dai buwa tano bo gialabaga bini biago lone bia aribia halu hene.
JDG 21:24 Ani binidangi Isaraeleali biaru tibi nde tini one waneiginirubi tinaga damene hearu Isaraele dindi bibahendeha howa ibinidagua dai bigibigi bini.
JDG 21:25 Horo uruningi Isaraele wali agalinaga kini mbira nahe howa tigua tinime hame ledagoale bigibigi bialu haga hene.
RUT 1:1 Isaraele wali agali handame haga kini nahe howa haguane henerume handaya ho heangi Yuda dindi ogoriani gaea timbuni bialu tomo gari timbuniore pene. Ani biyagola Yuda dindiha Bedeleheme tanoni agali mbira heneyagome ibu onebi igini kira heneyagobi ibuni heba dindi mendehayagi mali maruni hole manda buwa pene. Dindi o penedagoni mini Moaba.
RUT 1:2 Agali o penedagoni ibu mini Elimelege ibu one Naiomi berene. Libu igini biago labo mini Malono Kilionola hene. Tinaga hameigini Eberadali Bedelehemeha hene. Moaba dindi ogoniha pu hearia
RUT 1:3 Elimelege ibu one wali dalo berelalu igini biago labo hangu helalu homene.
RUT 1:4 Igini biago labome Moaba wali kira dabu bini. Wandari ogoni labo mini Oba Ludila. Ani dabu bu hearia mali pira agima pene.
RUT 1:5 Peagola Malono Kilionola kirabali homene. Homayagola Naiomi o biagoria ibu agalinibi iginibi nahe ibuni hangu berene.
RUT 1:6 Naiomi ibuni Moaba dindi biruwa hale halu berearia Anduane Homogohanda ibunaga wali agali mo turu halu gaea timbuni ala binigo mo bereba halu tomo bayale bu payabu nga layane hale hene. Ani hale howa ibugua ibunaga aruni kira biago labo haru halu Moaba wahalu pole manda manda bini.
RUT 1:7 Yuda dindi dai bule tini haru mandagi tagira pialu pole pene. Pu puwani dege hariga obeneni howa
RUT 1:8 Naiomihanda ibunaga aruni biago labohondo lalu, Libu ai̱ya baba birule andaga dai bidaba. Libugua i̱hondobi homayaruhondobi mana bayale biribigodagua Anduane Homogo ibuguabi bayale libuhondo bulebira.
RUT 1:9 Ani bialu agali mende andaga pilibulobi Anduane Homogo ibugua bayale haru helo laro, lene. Ani lame halu Naiomihanda kirabali yu nunu lalu, Hondo halibu, lene. Ani layagoyu wandari biago labome dugu bialu howa
RUT 1:10 Naiomihondo hongo howa lalu, Dai nabuleberaba iya í̠ hameigini karia í̠ poredagua mali̱ya, lene.
RUT 1:11 Ani layagola Naiomi ibugua ladai bialu lalu, I̱ wane labo libuguaore andaga dai bilibulo hame ledo. I̱ heba agimo mali̱ya. Libu dabu bilo waneiginibi hono wibehedane hendedabibe.
RUT 1:12 Beregedalu andaga dai bidaba. Agali pobebi nahe waheore bedogodago ani buwabi agali polene ngalo manda buwa áyu mbiraga dege agali puwabi igiri kira taba hanaruyaguabi
RUT 1:13 libugua igiri kira ogoni labome anda halu libu dabu bilo lowa biruleberabibe. Ani bialubi agali mende polene ngago mo hole nabiaruabe. I̱ wane labo-o nabibeheore o ngago hendedabini. Anduane Homogohanda i̱ erembira ngiyago libuhondobi o biyagonaga daraore timbuni harogo, lene.
RUT 1:14 Ogonidagua layago hale howa libugua dugu halu mende bini. Dugu bialu howa Obahanda ibu aruni biago yu nunu lalu pamibe lame halu ibuni dindi andaga dai bini. Ludihanda ibu aruni yani halu, Nadaibuleore, lene.
RUT 1:15 Ani layagola Naiomihanda ibuhondo lalu, Í̠ hagalene biago ibu ibuni hameiginibi ti mamalirunaga damabi karia dai biyago í̠nabi andaga o piyadagua dai bia, lene.
RUT 1:16 Ani layagola Ludi ibugua ladai bialu lalu, Í̠na i̱ wahalu dai bia nalabe. Í̠ i̱la mba la. Í̠ poredagua i̱ polebero. Í̠ biraregoria i̱ birulebero. Í̠naga hameigini haruagoni i̱naga hameigini holebira. Í̠naga Ngode Datagaliwabebi i̱naga Ngode Datagaliwabe holebira.
RUT 1:17 Í̠ homaregoria i̱ homolebero. Homarogoria hora helo. Homame hangu iya mo hangu hangu holebira. I̱naga hameme pubagi haruyagua Anduane Homogo ibunaga lembo holene hongoheore ngagome i̱ belo, lene.
RUT 1:18 Ani layagola Naiomi ibugua handalu hearia Ludi ibula mbaliya lowa hongoore hayago hondowa bi nale wahene.
RUT 1:19 Ani bialu wali biago labome pialu Bedelehemeni anda pene. Anda piyagola Bedeleheme wali agali bu hearume iae lo hondo ngoai hene. Hondo ngoai howa walirume lalu, Ogoni wali Naiomi biagoni ogonibe, lalu hale hene.
RUT 1:20 Ani layagola Naiomi ibugua ladai bialu lalu, I̱ mini Naiomi naladababe. I̱ mini Mara oladaba. Anduane Homogo bibahendenaga hongo haihe kagome i̱hondo kaubi dewa bialu i̱nibi mo kaubia haya.
RUT 1:21 I̱ oali howa pirungi homogo wali pirugo áyu Anduane Homogohanda o biaru mbiraore nayi yagibano bameore haru dai biya. Anduane Homogo bibahendenaga hongo haihe kagome genda ogonibi ngiyagodago i̱ mini Naiomi irane aginaga ololebe, lene.
RUT 1:22 Naiomi ibu aruni Moaba wali Ludi libu haru Moaba dindi howa dai binigo te ogoni. Libu Bedeleheme anda ibiyangi ladi ale mini bali ala hengeneyago tenialu gandu lalu heariaore anda ibini.
RUT 2:1 Agali homogo mini lene mbira ibu mini Boasa Naiomi ibu manda bini heneya. Boasala Naiomi agalini Elimelege homayagola libu hameigini mbiraoreha howa hamenela ale hene.
RUT 2:2 Horo mbirungi Ludihanda Naiomihondo lalu, I̱na ladi ale mini bali mabuni puwa bali gandu lagame gandu lalu biabe biragoria gandulo ibira ibira bu ngaru ilule porogo. Mbiralime ibunaga erembira mbira ilama ibabe lolene holebirago lo manda bidogo, lene. Ani layagola Naiomi ibugua ladai bialu lalu, I̱ wane-o í̠na ani bia, lene.
RUT 2:3 Ani laya handala Ludi ibugua puwa biabe biaga biaru erembira mbira bali lini ibira ibira bu wiaru mo yama pene. Bali mabu o wiyadagoni Elimelege damene Boasanaga winiya.
RUT 2:4 Emene howa Boasa ibuni Bedeleheme howa anda ibini. Ibugua anda ibalu howa biabe bialu hearuhondo lalu, Anduane Homogo ibu tí heba helo, lene. Ani layagola biabe biaga agali biaru tigua ladai bialu lalu, Anduane Homogohanda í̠bi biamogo bilo, lene.
RUT 2:5 Boasa ibunaga biabe haru haga heneyagohondo hale halu howa lalu, Wandari nai kagoni aibe, lene.
RUT 2:6 Ani layagola biabe haru haga biago ibugua ladai bialu lalu, Wandari ogoni Moaba dindi howa Naiomila oali ibiniya, lene.
RUT 2:7 Ibugua i̱hondo hale halu, Biabe biaga agali uruni erembira mbira bali lini ibira ibira bu ngaru mima ibuabe, laya. Ibugua egerebagiore howa biabe biaabo howa ayu ogoni ibu ira andaneha nai ha̱lo bedagoni, lene.
RUT 2:8 Ani layagola Boasa ibugua Ludi bereagoria puwa lalu, Wandari-o mabu maruha pua̱i̱ na̱i̱ buleni. Wali ogoria biabe biagaru baba bali ogoniha ilabe.
RUT 2:9 Agali tigua biabe agoria birabe hondowa waliru heba mandagiore biabe bima hama ibaga bibe. Agali ogoria karuhondo í̠hondo ko mbira bulemini ledogo. Iba noa biyagua iba tigua hambu wulebirago nabe, lene.
RUT 2:10 Boasahanda ogonibi layagola Ludi ibugua ibunaga wanakui dindiha bulu paluwa Boasahondo lalu, Í̠na i̱hondo mana bayale o berego irane aginaga berebe. Í̠na urunidaguabi mbira biahabe nahe dindi kaundiaore wali birarugo, lene.
RUT 2:11 Ani layagola Boasa ibugua ladai bialu lalu, Í̠ agalini homayiyangi howa mana bayale í̠ arunihondo biriyago hale haru. Í̠na í̠ ai̱ya ababi í̠ni dindibi wahalu wali agali í̠ni handabi mandabi heba nabiniru baba hole ibiriyago hale haru.
RUT 2:12 Mana bayale biriyagobi Anduane Homogohanda í̠hondobi ogonidagua dege bilo. Anduane Homogo ibu hearia hado hole ibiridagonaga emena timbuniore ngilo, lene.
RUT 2:13 Ludi ibugua ladai bialu lalu, Agali timbuni-o í̠naga biabe biaga bedaru baba ogobi dege dege ndo birarugo í̠na bi bayale i̱la larigome i̱ mo hongo hari. Ani bialu í̠na mana bayale i̱hondo bere, lene.
RUT 2:14 Tomo nolene tu hayagola Boasahanda Ludihondo lalu, Mberedi o ngaru maru gerebi lini ibane howa nole ogoria birule íbu, lene. Ani layagola Ludi ibu biabe biaga biaru baba bereagola Boasa ibugua bali lini hiriniyaru aria maru nelo mo mini. Miyagola Ludi ibugua ibuni tombe karulape nene. Nalu karula piyadagua maru ibira howa ngelene.
RUT 2:15 Ludi ibuni tomo biaru name halu bali lini ilala hayaru ilule pene. Peagola Boasahanda ibunaga igiri biaruhondo lamialu lalu, Ludi ibugua erembira mbira hangu ndo tígua gandu lo ngamigo maru mima ibulebirago tígua agua berebe lalubi mbira lolemini.
RUT 2:16 Huba bu weramigoria maru ibu mo yilo bame gandulo ngelalimu. Mbiralime ibuhondo bi hongohe mbira lolemini, lene.
RUT 2:17 Ludi ibugua biabe bialu heaore dege alendo hene. Alendo hayagola gandulo winiyaru hengedo yabu lagayadagua yabu lalu hearia nu mbira agima genda magi pira (10) kiloyane hendene.
RUT 2:18 Ibugua o biyadaruni bu hanalu andaga dai buwa ibu aruni biago berearia walia hene. Tomo horombe no ibira howa hanayarubi mini.
RUT 2:19 Ogonidagua biyagola Naiomihanda Ludihondo hale halu howa lalu, Bali mabu arahayagi ilaribe. Bali ai mabuhayagi biabe biribe. Agali o í̠hondo bayale biyadagohondo Ngode Datagaliwabe ibuguabi ibunaga mo turu holeneme mo turu helo laro, lene. Ani layagola Ludi ibugua, Agali mbira mini Boasa heneyagonaga bali mabuni biabe bialu haru, lene.
RUT 2:20 Ludi ibugua anidagua lamiyagola Naiomihanda lalu, Homayaru bababi karu bababi bulebero lo winigo habo nalaga Anduane Homogo kagome Boasa ibu nde mo turu helo laro, lene. Ibugua la dege bialu lalu, Boasa ibu iya hameiginiore kago iya hondo holene mana winigo bulene ibunaga nga, lene.
RUT 2:21 Ani layagola Ludi ibugua lalu, O biyadarunibi buwa dege i̱ ibunaga biabe biaga biaru baba mandagi bali lini biaru ilumogo bialu howa ti biai halu poradagua í̠ nde ilimaro bialu pobe laya, lene.
RUT 2:22 Naiomi ibugua Ludihondo lalu, Wane-o o layadadaguaore Boasa ibunaga biabe biaga wali karu baba mandagi ibunaga bali mabuni biabe bialu habe. Mendealinaga bali mabuha pogolamu keria í̠ mo ko holene tene wulebira, lene.
RUT 2:23 Ludi ibugua Boasanaga biabe biaga biaru baba bali gandulalu lini ilimu bialu hayadagua halu biai halu piyadagua ilimaro bialu pene. Anda paluenenaga ibuni aruni biagola palu ha ho wini.
RUT 3:1 Horo mbiru hayagola Naiomi ibugua Ludihondo lalu, Dindini bayuwa walime agali heba biragadagua birabelo agali mbira tai bulene horo hayada.
RUT 3:2 Agali Boasa biago ibunaga bali mabuni ibunaga biabe biaga waliru baba biabe bialu harigo agali o biago inanaga damenego manda bideni. I̱na bi mbira languleberogo bayuwa hale habe, lene. Ayu mbiraga haragola ibuni bali iraneru lini hondo ibira ibira bilo bo taulalu holebirago
RUT 3:3 í̠ni tingini wayawaya babe. Wayawaya bowa weli ngabi ha̱i̱ habe. Ani buwa aga debenebi bayuwa bibe. Ani bialu bal iraneru lini hondo ibira ibira bilo bo taulalu kagoha puwa í̠ kalo manda nabilo ha do howa habe. Ibugua biai howa hina ibaru nelo henge mu habe.
RUT 3:4 Nai halu palirago agoha yagidabe bayuwa handabe. Ibu padagoha puwa ibunaga balangiya geha yagi miale howa ogoniha palibe. Ani beregola ibunime au bibe lalu mani langulebirago, lene.
RUT 3:5 Ludi ibugua ladai bialu lalu, Í̠na laregodaguaore biagua, lene.
RUT 3:6 Ani lowa Ludi ibu arunime bibe layadagua biai halu bali bo taulalu hearia pene.
RUT 3:7 Boasa ibugua hina ibaru nayagola howa hongo halu dungu lene. Hongo halu dungu leagola bali halu hengedo wiaru yaa̱i̱ na̱i̱ buwa palene. Ani biagola Ludi ibu hendeore ge hogorale bialu puwa Boasanaga balangiya yi heago miale howa paleagoha hendeore gehayagi palene.
RUT 3:8 Mbi hanuni agima Boasa palu beregedalu howa handalu hearia waliore ibu geha yagi íbu paleneyane mogolo hendene.
RUT 3:9 Hondowa ibugua hale halu lalu, O padago aibe, lene. Ani hale hayagola Ludi ibugua ladai bialu lalu, Í̠naga biabe bia haga i̱ Ludi padogoni. I̱naga dameneru hondo haga í̠ kegonigo i̱ dabu bibelo hame ledo, lene.
RUT 3:10 Ani layagola Boasa ibugua lalu, Anduane Homogo ibugua í̠ mo turuore helo. Í̠na í̠ arunihondo birigobi ndo áyu i̱hondo í̠na mana debeneore bulene manda birida. Homogoyaguabi yagibanoyaguabi igiri ale hondolene waharida.
RUT 3:11 Ludi-o í̠ mini dege dindi holeni. Bibahende ogoria karume í̠ore wali bayaore ledago. I̱na í̠na bia laregoore biai holebero.
RUT 3:12 I̱na í̠ damene hondo holeneha kogonigo agali mbira í̠ handaya ho holene mbira kago ogonihondo henge ala mibehego
RUT 3:13 áyu mbiraga eberegoniha palibe. Egerebagi haragola damene biagome bulene ngadagua bero larabe be au larabe hondoliya. Ibugua í̠ hondo holiya layagua nde baya gibiore lolebira. Nabule layagua nde Anduane Homogonaga minini howa larogo dameneme hondo holene mana ngadagua bulene i̱naga ngago bulebero. Áyu ogoniha gao lelo palibe, lene.
RUT 3:14 Ani layagola Ludi ibugua Boasanaga ge wiagohayagi palenego egerebagiore Boasahanda layadagua wali agalime de nahendelo manda buwa ohalu abale heyabe layadagua abale pole heyini. Boasa ibugua wali agalime Ludi ibu paleagoha íbu palialu piyadalo manda nabilo ani lene.
RUT 3:15 Heyayagola Boasa ibugua lalu, Í̠na aga ogoriani dungu ha. Ludi ibugua ani biyagola Boasahanda bali lini biaru nu kira (20) kilo agima ale mo ya hene. Ludi henelo ibugua mo yaraga haya handala hanalu Bedeleheme tano dai bini.
RUT 3:16 Dai biyagola ibu aruni Naiomi ibugua, I̱ wane-o, lowa, Bia agua biyabe, lalu hale hene. Ani layagola Ludi ibugua Boasahanda layarubi biyarubi bibahende lamiai hene.
RUT 3:17 Ibugua lamaro bialu lalu, Boasa ibugua í̠ bederia bame gi walambo nadaibi lole lowa bali lini hilu hombedo ngiyadaruni, lene.
RUT 3:18 Naiomi ibugua Ludihondo lalu, Ai mini dege dindi nahe ema nabi hendeore birabe. O biragoni bialu au biatagi harabe hondole. Boasa ibugua mo tiga au bibehedabe hondole hariga hai bialu hangu kane. Hariga mbira handa walia haradagua ibu ha̱lo̱ holebira, lene.
RUT 4:1 Wali agali mo ngoai howa te laga Bedeleheme anda pugu bulene harabani winiyago Boasa ibu o biagoriani pu berene. Pu berearia Elimelege damene dege ala Boasahanda mana lo winidago bulene ibunaga nga lalu agali ka layago ibini. Ibiyagola Boasa ibugua ibu olowa lalu, Hambi-o ogoria birule íbu, lene. Ani layagola agali biago ibu ibuwa berene.
RUT 4:2 Ani bereagola Boasa ibugua dindi ogoriani agali haru haga pirali hearu hondowa íbu biradaba, lene. Ti íbu bereagola
RUT 4:3 Boasa ibugua agali ibu damene biagohondo lalu, Naiomi Moaba dindi howa dai buwa iya damene Elimelegenaga dindi biago yolo mialu nolene manda birago
RUT 4:4 í̠ manda bibelo langibeheyane langero, lene. Ani lowa, Í̠na mulene manda bideyagua agali haru haga pirali o bedaru deni howa mia. Namuleyagua namule la. Elimelegenaga paluni mulene ala í̠ harigoni í̠ howa i̱ harugoni, lene. Ani layagola agali biagome lalu, I̱na dindi ogoni ibu yolo bialu i̱ muliya, lene.
RUT 4:5 Ani layagola Boasa ibugua lalu, Dindi ogoni Naiomihondo í̠na yolo biriyagua nde Ludi Moaba wali dalo biago dabu bulenebi í̠naga nga. Ani buwa dindi í̠ meregoni agali homayagonaga minini wia ho wiaabo helo, lene.
RUT 4:6 Ogonibi layagola agali biago ibugua lalu, Ogonidagua bulene ngayagua i̱na mibeheme waharo. I̱na miruyagua mani i̱ waneiginime karu lolene tinaga ndo wulebirago i̱ namulebero, lene.
RUT 4:7 Horo uruningi Isaraele wali agali tinaga maname mbirale mbira mbiralinaga yolo buleyaguabi mbirale mbira ariari buleyaguabi walia agua haga wini. Yolo mo nole kago ibugua ge su golo muwa yolo biaga kagohondo yade haga. Ogonidagua bidagola maname mbirale biagoni yolo biyago ibunaga lolebira.
RUT 4:8 Anigo agali biago ibugua Boasahondo lalu, Í̠ yolo bialu mia, lowa lame halu ibunaga ge su golowa Boasahondo mini.
RUT 4:9 Ani biyagola Boasahanda agali haru haga pirali biarubi agali maru hondo íbu berearuhondobi lamialu lalu, O bedamiru tí bibahendenaga deni handai hene yolo berogoni. Naiomi ibugua Elimelegenaga dindibi mbirale wiyadarubi igini kira biago labo Kiliono Malonolanaga mbirale wiyadaruni heba i̱na miai harogoni.
RUT 4:10 Ani bialu Moaba wali Ludi ibu Malono homayagonaga one dalo biagobi i̱ one bu hinarogoni. Ani berogome dindibi walibi waneiginibi Malono ibuninaga minini wia ho wiaabo helo lalu áyu merogoni. Agali bedamiru tí de hendedamigoni, lene.
RUT 4:11 Ani biyagola agali haru haga pirali biarubi agali maru dehondo íbu hearubi tigua lalu, E̱ ina bibahendeme handarimagoni. Anduane Homogo ibugua wali o ibiragoni waneigini dewa hono wiaga Yaigaba one Laiselola Liala ale berelelo. Í̠ Eberada hameigini homogo howa Bedelehemeni wali agali karume í̠ manda biaiheore habelo.
RUT 4:12 Anduane Homogo ibugua wandari ogoniha waneigini ngiragome Yuda Tamalame hono wini inanaga aguanene Perese ale helo, lene.
RUT 4:13 Horo odangi howa Ludi ibu Boasa onene berene. Berearia Anduane Homogo ibugua Ludi mo turu halu igiri gali mbira mini.
RUT 4:14 Wali berearume Naiomihondo lalu, Anduane Homogonaga mini yaraga hama, lowa lalu, Ibugua í̠ hangu berelo wanahe aguane mbira í hondo helo ngiyada. Igiri ogoni ibunaga mini Isaraele wali agalime embeda nahe manda bia ho wiaabo helo.
RUT 4:15 Í̠ aruni biagome í̠ore gubalini howa karia hamenemame bulenedagua ndo ibugua dewaore bu bolangua hayada. Í̠ wahe bederia hongo ngilobi mamage helobi ibugua igiri aguane ogoni ngiyada, lene.
RUT 4:16 Naiomi ibugua igiri gali biago yamuwa ibuni buha yuhubi lene. Ani bialu ibugua gali biagoni ibuni hondo haabo hene.
RUT 4:17 Wali kaware berearume igiri biagoni mini Obede wini. Ani wuwa tigua loyogo lalu, Naiominaga igini mbira hono miyada, lene. Mani Obede ibugua Yasi hono wini. Yasi ibu Debidi aba hene.
RUT 4:18 Debidi ibu aguanene Perese howa ibuni ibule ibinidagua malu ogo. Tinaga aguanene Perese. Perese ibu igini Heserono. Heserono ibu igini Lama. Lama ibu igini Aminadaba. Aminadaba ibu igini Nasono. Nasono ibu igini Salamono. Salamono ibu igini Boasa. Boasa ibu igini Obede. Obede ibu igini Yasi. Yasi ibu igini Debidi uruni hama ibini.
1SA 1:1 Agali mbira mini Elegana ibu Eberaimi hameigini heago aria Lama tano mbira Eberaimi dindi hari bare wiagoriani hene. Ibu Yarohama igini howa Elihu aguane halu agali mini Tohu henego ibu aria hameigini emene laga bialu Subu aria hene.
1SA 1:2 Elegana ibu onene kira Hana Peninala berene. Penina ibu waneigini honowi bereagola Hana ibu nahonowi berene.
1SA 1:3 Mali mbira mbirani Elegana ibu Lama tano howa Anduane Homogo Hongo Haiheore kagohondo mbirale bo loma biaho miaga Silo dindi dunini wiagoria pene. Ogoriani Eli igini kira Piniasa Hobinila Anduane Homogonaga loma binigo mo miaga hene.
1SA 1:4 Horo bibahendeni Elegana ibugua mbirale bo loma biaho mialu howa mbirini maru podalu tale buwa Penina mialu ibu waneiginirubi hangu hangu podo tahalu miaga hene.
1SA 1:5 Ani bialu ibugua Hanaore ibunaga gubalini haga berenego ibuhondo nogo podalu emene kiralime nolenedagua hangu tale bialu miaga. Ogoni ibu Anduane Homogohanda ibu waneigini nahonowi henemane berelene.
1SA 1:6 Anigo Anduane Homogohanda Hana ibu waneigini hono wulene tombe payiyagola beda manda buwa Peninahanda Hana mo kebaha mo tagaha bigi biaga berene.
1SA 1:7 Ani bu bereane mali dewa pu a̱i̱a̱i̱ bialu Anduane Homogonaga andaha poramingi Peninahanda Hana mo keba haabo haragola Hanahanda dugu biaabo halu tomo kau howa nane biraga.
1SA 1:8 Ani bereagola ibu agalini Eleganahanda Hanahondo lalu, Í̠na dugu mbira berego ne tomo mende nane wahalu horo bibahendengi í̠na gendaho biraabo hariligo ogoni irane aginaga birilibe. Í̠na igiri pira hono ngele urunihondo gubalini ho bedelego dindiha lowa i̱hondo gubalini ho bamba ho bede lo manda bido, lene.
1SA 1:9 Horo mbirungi tigua Anduane Homogonaga anda Siloni tomo ibabi naiho biruwa mani Hana ibu heyini. Heyuwa ibunaga bu habaneha genda timbuniore ho biruwa ibugua dugu gibiore bialu Anduane Homogohondo bi lene. Ani bialu heagola loma binigo mo miaga Eli ibu ibuni biragane Anduane Homogonaga anda panga harabani berene.
1SA 1:11 Ani biagola Hanahanda bi lahondo nahole lalu mbira lo wialu agua lene. Anduane Homogo Hongo Haiheore kego í̠naga biabe biahaga i̱ handaya ha. I̱naga genda ngoru handalu i̱ embeda nahe mitangiore bibe. Í̠na igiri mbira i̱hondo ngiriyagua i̱na í̠hondo bi lahondo nahole lalu lo wirudagua igiri ogoni í̠hondo lomabia halu ibu í̠naga biabe biagaore helo ibunaga mandaribi podo tubagi naholeore, lalu lowini.
1SA 1:12 Hanahanda Anduane Homogohondo bi ogonidagua lalu laho wiyagola Eli ibu ne hambuni handayaho wini.
1SA 1:13 Hana ibu minime ne hambu ema bialu bi ladaga nahe lalu berene.
1SA 1:14 Ani bialu heago Eli ibu hondowa ogoni lulu iba nowa lalu kabe toba howa ibuhondo lalu, Lulu iba no ko lalu í̠ni walia halu kegoni nahe waha. Mani mini íbu howa lole daibule wahalu pu, lene.
1SA 1:15 Ani layagola Hanahanda ladai bialu lalu, Agali haguane-o i̱ lulu iba nowa ndo ko hendedeni. I̱ lulu iba nalu hene ndo i̱ wali i̱naga bu habaneha genda timbuni ho berenego Anduane Homogohondo haealo mialu ibula bi lalu haru.
1SA 1:16 Í̠na manda bialu keria i̱ wali ko habane napaleme laralo manda bidebe. I̱ mini burugu timbuni lo biruwa i̱na bi ogonidagua lalu berene bedogoni, lene.
1SA 1:17 Ani layagola Elihanda lalu, Isaraele wali agalinaga Ngode Datagaliwabehanda ibuhondo í̠na hale harida ale í̠hondo ngulebirago ai turu hama pu, lene.
1SA 1:18 Ani layagola Hanahanda ladai bialu lalu, Í̠na i̱ horo bibahendengi dara halu mitangi bibe, lene. Ani lalu ibu pialu tomo nalu miniha gendaho birayaru ereba hai hayagola berene.
1SA 1:19 Horo mendengi egerebagi hayagola Elegana ibu one waneigini heba heyini. Heyalu Anduane Homogo mo dunini halu lotu lalu mani tini andaga Lama dai bini. Dai buwa Elegana ibu one Hanala palu heagola Anduane Homogohanda Hanahanda bi layagoni hale halu bini.
1SA 1:20 O binidagoni Hana ibu wali gali tombeha biralu igiri mbira hono wini. Ibugua igiri ogoni mini Samuele wialu lalu, Mini ogoni irane i̱na Anduane Homogohondo hale halu ngi larugola ngini, lene.
1SA 1:21 Elegana ibu one waneiginibi ti Anduane Homogohondo mali bibahendeni mbirale bo delolenebi mende lomabia halu galonengi mule lo wiyagobi mule lowa horo ogoni tagira ibiyagola Silo tano biagoria pene.
1SA 1:22 Ani binigo ogoningi Hana ibu ti heba nape berene. Ibu agalinihondo lamialu lalu, Igiri ogoni andu nope howa ai hina tomo nole manda biragola i̱na Anduane Homogo andagani haru halu porogola ibu ogoriani haho wilo, lene.
1SA 1:23 Ani layagola Eleganahanda ladai buwa lalu, Ogoni karulapego í̠na bayale bule manda birida ale bule ibu anda helonaga andagani birabe. Ani bialu Anduane Homogohondo bi lahondo nahole lo wirigo henene lola helo, lene. Ani laya handala Hana ibu igini biago andu mialu andaga berene.
1SA 1:24 Mani igiri biago andu no wahalu hina nabehe haya handala Hanahanda Silo tano biagoriani haru halu pene. Pialu howa nogo bulumaga wangabe tebira haru halu balawa mbege mbira genda magi kilogarama pira agima mo yalu waini iba be nogo meme dongeneme wabini mbira to̱lowa ya bigi bialu pene. Ibugua Samuele emene hungubalua ogonibi heaore Anduane Homogo andaga Silo tanoni haru halu pene.
1SA 1:25 Ani pu howa nogo bulumaga wangabe haru halu piyago mbira ala bene. Ani buwa mani igiri hungubalua biagoni Eli hearia haru halu pene.
1SA 1:26 Puwa Hanahanda ibuhondo lalu, Agali haguane o ka aibe. Í̠na i̱ ogo kalo manda bu wiaabo kebe. I̱ wali mbira ogoriani heyu howa Anduane Homogohondo bi lamialu hewaria handarigoni íbu kogoni.
1SA 1:27 I̱na igiri ogoni ngi lalu ibuhondo hale harugola ibugua hale halu i̱hondo ngiyadagoni.
1SA 1:28 Ani biyagonaga i̱na áyu Anduane Homogo ibunihondo lomabia ho helole daibu kogoni. Ibu kangi howa Anduane Homogo ibunaga helo merogoni, lene. Ani lowa tigua Anduane Homogo mini mo dunini halu ogoriani lotu lalu hene.
1SA 2:1 Hanahanda Ngode Datagaliwabe mini yaraga halu agua lene. Anduane Homogohanda i̱naga bu habaneha turu holeneme to̱lai heledagome i̱ turu taraore ho bedogo irane ibugua biyagome. Ngode Datagaliwabehanda i̱ biamogo biyagonaga turu ogobiore ho ko lalu i̱naga waitigi karu hondowa i̱ oba halu kogoni.
1SA 2:2 Mbirali ibu Anduane Homogo mini baya gibiore kagobi nahe ibu ale mbiraorebi naheore. Ngode Datagaliwabe inanaga tigi pabe bu haga kagobi mbira naheore.
1SA 2:3 Ogoni Anduane Homogo ibu Ngode Datagaliwabe howa ibu manda biaihe mbira kagoni. Ibugua wali agali karume birago damene bibahende dabo handai haga ka. Anigo mine howa hongo halu bi nalabe. Mine bi mbira í̠ ne hariga howa tagira ibulani handabe.
1SA 2:4 Ami agali hongohe karunaga danda yidaru podene bame yu kagoyu hongo nahe karunaga hongo mo anda holebira.
1SA 2:5 Wali agali ala tomo nabe manga ho haabo hayarume áyu tomo nolenaga biabe bia halu ka. Wali agali maru tomo garibilo hayaru áyu karulape nelo Ngode Datagaliwabehanda biamogo bialu ka. Wali waneigini mbira nahonowi bereagome waneigini karia hono wiya. Waneigini dewa ai̱ya berenego ibuni hangu berelo yu wahene beda holebira.
1SA 2:6 Anduane Homogohanda mbira bo homelowa mo dére hodai biaga ka. Ibugua wali agali homene karu dindi humbirini andaga pelowa ibuni lone haru dai biaga ka.
1SA 2:7 Ibugua wali agali maru mo yagibano halu maru mo homogo helaga ka. Maru mo dindiha halu maru mo yaraga howa daliga helaga ka.
1SA 2:8 Ibugua yagibano karu himuni ngaria mo yaraga haga. Wali agali buru pale mini burugulo karu mo heya haga ka. Ibugua o biaru kini karunaga igini heba mandagi helalu ti daliga ogobi dege dege helolebira. Dindi o kamarunaga tiaga holene Anduane Homogo ibuni kago ogoriani ibugua dindi bibahende wabu heleda.
1SA 2:9 Ibunaga wali agali mini bilinahe karunaga holene ibugua ho tigi pabe bidagola ka. Ko biaga karu arumaha pu ereba halu kagoni. Agali mbira ibunaga hongo hangume mbirale mbira buwa wayali nahaga ka.
1SA 2:10 Anduane Homogonaga waitigi karu mo koore halu gurabaga bi lalu tihondo keba ho ko lalu bi dahuliya andaga howa hari kulu lalu ladali holebira. Anduane Homogohanda dindi bibahendeni karu tihondo ko birimida bayale birimida laga bialu dabo hondolebira. Ibugua ibunaga kini kagohondo hongo mialu ibunaga kini ibuni dabene ogoni ibu mo wayali helolebira, lalu Hanahanda bi ogoni lene.
1SA 2:11 Ai Elegana ibuni dindi Lama dai biya handala igiri Samuele ibu Silo dindini hondo halu ibugua loma binigo mo miaga agali Eli heagoria Anduane Homogonaga biabe bia halu hene.
1SA 2:12 Eli igini kira Piniasa Hobinila libu agali ko habane nabulene hene. Libugua Anduane Homogonaga bi hale halu bia nabiaga hene.
1SA 2:13 Ani bialu libugua loma binigo mo miagalirume wali agali bibahende karuhondo uru ale bilimu lalu lo ngaruni hale halu bia nabiaga. Ani biradagua loma binigo mo miaga agalirume tinaga mana biaga winidagua ndo libugua agali mbira ibunaga mbirale mbira bo lomabia howa delalu haga. Ani bialu karia loma binigo mo miaganaga biabe biahaga biago kanogo dene tebirahe yalu ibaga.
1SA 2:14 Ibuwa nogo tara bo delayagonaga mbirini wene dalu kaore dege ibugua kanogo biagome todobene biagoha nogoba ha dali haragola kanogoni dugubu yamirago o loma binigo mo miaga agali ibunaga laga wini. Isaraele wali agali bibahenderu Siloni mbirale bo lomabia halu delole ibiragola mana ko ogonidagua dege biaga hene.
1SA 2:15 Ani biaga henego mbirabi agua biaga. Nogo habane damenego podo dawale bialu karia loma binigo mo miaga agalinaga biabe biahaga biago ibaga. Ibuwa ibugua agali nogo podo delalu kagohondo lalu, Nogo mbirini maru loma binigo mo miaganaga hirilo podo ngidaba, laga. Loma binigo mo miaga ibu nogo mbirini todobeneha dawene meramigo nanolebirago gahenge hangu podo ngidaba, laga hene.
1SA 2:16 Ani laragola agalime ladai bialu agua lalu, Iname tigabi bulene ngadagua bialu nogo habane uruni ala delama mani í̠ni hame lededagua mo yule, layagua loma binigo mo miaganaga biabe biahaga biagome lalu, Ani ndo áyu ogoni ngi. Nangiriyagua i̱nime gingilo muliya, laga.
1SA 2:17 Eli igini biago labo libugua mana ko ogoni bialu hayagome Anduane Homogohondo nogo tara tara bo lomabia ho miaga wiaru mo nagalone bu hinalu Anduane Homogonaga deni kagua gibiore biaga hene.
1SA 2:18 Ani bialu heagola igiri emene Samuele ibu Anduane Homogonaga biabe biaho wialu ibu aga lomabia heneme biaga winigo karulo hene.
1SA 2:19 Mali bibahendeni ibu ai̱yahanda aga emene wabu hanalu ibu agalinila haru mali mbiranaga nogo bo lomabia ho mule piagane winidagua pialu howa ibuhondo aga gahenge yalu puwa miaga.
1SA 2:20 Ani biagago Eli ibugua Eleganabi ibu onebi mo turu howa Eleganahondo lalu, Anduane Homogohanda igiri mbira ibuhondo loma biaho miribigonaga wali ogohondo waneigini maru aribia halu ngilo, laya. Ani laya handala libuni andaga dai bini.
1SA 2:21 Bi ani layagoni heneneore Anduane Homogohanda Hana biamogo biyagola ibugua igiri tebira wandari kira lowa taba henene. Igiri Samuele ibu Anduane Homogonaga biabe bialu bu anda hene.
1SA 2:22 Eli ibu ai waheore hene. Ibu igini biago labome Isaraelealiruhondo mana ko damene bibahende libugua bialu ka layaru ibu hale haiho hene. Ani bialu libugua Anduane Homogonaga wanakuini wali maru Balai Anda harabani biabe bialu biraga berearu heba ho palu ka layarubi Eli ibu hale dege hene.
1SA 2:23 Ani layago hale howa Elihanda ibu igini biago labohondo lalu, Libugua ko urunidagua bialu kabi layaruni irane aginagabe. Libugua ko ngubi ogobi bialu kabi lalu bibahende hearume i̱ langiai hayago.
1SA 2:24 Ai i̱naga igini labo-o ogonidagua nabi waore halibu. Anduane Homogonaga wali agali bu karume libugua ogonidagua bialu kabigo ko ngubi ngaru bialu kabi lalu kagoni.
1SA 2:25 Agali mbirame agali mendehondo kagua mbira biyagua Ngode Datagaliwabehanda dombeni howa la holebiragoyu agalime Anduane Homogohondo kagua mbira biyagua dombeni howa aiwa la holebirabe, lene. Anigo ogolabo libu Anduane Homogohanda bo wahole manda bu henegome libu abanaga bi hale howa nahalehe tingi hene.
1SA 2:26 Libu ani bialu heatambu igiri Samuele ibu anda ho heagola Anduane Homogo ibuguabi wali agali hearumebi Samuelehanda bialu henego hondowa turu hai hene.
1SA 2:27 Ngode Datagaliwabenaga bi mana latagi haga mbirame Anduane Homogonaga bi ogo yalu Eli hearia ibini. Ibuwa ibuhondo lalu, Ala bambaore í̠naga mamali Aronobi ibunaga damenerubi ti Iyibi dindi kini heagonaga garabaya biabe ale biahalu heagola i̱ Anduane Homogo i̱ni kogoni lalu Aronohondo mo walia harugoni.
1SA 2:28 Ani bialu Isaraele hameigini bibahende hearu helowa i̱na Arononaga dameneru tigua i̱naga loma binigo mo miaga helobi nogo tara tara i̱naga bo lomabu delolene dabuni biabe biaga helobi hagua ngabiaga inisenesi delolenaga helobi helene. Ani bialu aga tara mini ebodi loma bia heneme buwa i̱hondo bi langule howa bu erekunila dambi helo mani pongo bilobi i̱na ti dabo helene. Ani bialu i̱na tihondo dabuni bo loma bialu delene wiaru bibahende tale bialu ti mo yulenego karulape lamiru.
1SA 2:29 Ani larugo lelowa i̱naga wali agalime nogo tara tara bo lomabia ho yalu ibaga ngarunaga í̠ hangu timbuni noa ho ngegoni irane agibe. Eli í̠na i̱naga wali agali karume nogo tara tara bo lomabia halu i̱hondo delararunaga bayale damenego í̠ igini kago labo libu no haba halu helowa í̠na i̱hondo mo galone hariligo emene lowa libugua biyago mo galone timbuni harigo irane agibe.
1SA 2:30 I̱ Isaraele wali agalinaga Anduane Homogo Ngode Datagaliwabe kogoni howa i̱na bi mbira bamba Aronohanda buleore lalu agua lo wiru. Í̠naga dameneru tigua loma binigo mo miaga howa i̱naga biabe biaho wilo laru. Ani larugonigo áyu bi mende lo aribia haro ogo. Marume i̱naga mini mo yaraga hararuhondo tinaga mini mo yaraga halu marume i̱naga mini mo dindiha hararuhondo tinaga mini nde mo dindiha helolebero.
1SA 2:31 Ai hale hadaba. Í̠naga igini damene agali daliahe karu mbira haho wiaabo nahelo abale halu homelai holene horo biagoni ha para hayada.
1SA 2:32 Ani biyadago i̱na Isaraele wali agali maru karu mo turu halu ti mo bayale harogola í̠naga miniha henge lolene tagira ibulebira. Ani bialu í̠naga igini damene karu mbirago lone mani ho lu bu naholebiraore.
1SA 2:33 Anigo i̱na í̠naga aguanene karu mbirago hadai bilarogola ibugua i̱naga loma binigo mo miaga howa biabe bulene ngadagua bialu holebira. Ani bialu kagoyu ibunaga dengali bialu mbirale bibahende nahandabehe halu bidagola í̠naga aguanene maru karuni hiriribi homo yu lo waholebira.
1SA 2:34 Ani bialu í̠naga igini kira Piniasa Hobinila kirabali horo mbirani hangu homo palu birangi mbirale bibahende i̱na langirugoni damenego heneneore layida labelo walia halu ani bulebira.
1SA 2:35 Ani biragola i̱na i̱naga loma binigo mo miaga mbira i̱na larodagua bialu mini bilinahe helo dabarogola ibugua i̱na bilo hameledoru bibahende biai holebira. Ani bialu i̱na ibuhondo aguaneneru merogola tigua horo bibahendengi i̱naga kini dabene kagonaga wanakuini biabe bialu haabo helo.
1SA 2:36 Í̠naga aguanene homa nabi haho ngaru ti loma binigo mo miaga ogoni karia puwa muni tomo nolenebi ngi lalu hale holene wulebira. Ani bialu loma binigo mo miaga karuhondo tomo nolenenaga biabe mbira ti biamogo bialu bulene ngabe lalu hale holene wulebira, lalu Anduane Homogo ibugua ibunaga bi mana latagi haga biagoha howa bi ogoni mbiwia hene.
1SA 3:1 Horo uruningi igiri Samuele ibugua Eli andaneha howa Anduane Homogonaga biabe bialu heagola Anduane Homogonaga mana lamulenebi de gandeba ale hondolenebi emene ale wini.
1SA 3:2 Mbiraga mbirungi Eli ibunaga de au halu ngaliore biai holebiyagola ibuninaga tamu paliaganeha palene.
1SA 3:3 Samuele ibu Balai Anda tamu hobane Habo Nalolene Bi lo winigonaga Mbogoyi hangu mo wiaga wiagoha palene. Ani biaria egabi lole dege wene lamu hale daho wiagola
1SA 3:4 Anduane Homogohanda Samuele olene. Olayagola ibugua ladai bialu, Agali-o ya laro, lene.
1SA 3:5 Ani lowa ibu abale heyalu Eli palearia puwa lalu, Í̠na i̱ olarigoni o íbu kogoni, lene. Ani layagola Elihanda ladai bialu lalu, I̱na í̠ onalego palue dai bia, lene. Ani laya handala Samuele ibu paliyagoha palue dai bini.
1SA 3:6 Anduane Homogohanda Samuele lone halu mende olene. Igiri Samuele ibu Anduane Homogohanda olarada manda nabi henego irane ala ibuhondo bi halu mbira nalenegome ani bini. Ani buwa ibu heyalu Eli palearia puwa lalu, Í̠na i̱ olarigoni o íbu kogoni, lene. Ani layagola Eli ibugua ladai bialu lalu, I̱ igini-o i̱na í̠ onalego í̠ni paliridagoha palue dai bia, lene.
1SA 3:8 Anduane Homogohanda Samuele lone halu tebone olene. Olaya handala heyalu Eli palearia puwa lalu, Í̠na i̱ olarigoni o íbu kogoni, lene. Ani layagola Elihanda manda bialu hearia ogoni Anduane Homogohanda igiri Samueleore olayada manda bini.
1SA 3:9 Ani manda buwa ibugua Samuelehondo lalu, Palirigoha palue dai bia. Ani beregola ibugua í̠ lone olayagua í̠na agua labe. Anduane Homogo-o í̠naga biabe biahaga i̱ hale ho kogo bi langi labe, lene. Ani laya handala Samuele ibuni paliyagoha palue dai bini.
1SA 3:10 Ani biaria Anduane Homogo o biagoria ibuwa ibugua abale olayadagua, Samuele-o Samuele-o lalu, olene. Ani olayagola Samuelehanda ladai bialu lalu, Í̠naga biabe biahaga i̱ hale ho kogonigo bi langi, lene.
1SA 3:11 Ani layagola Anduane Homogohanda ibuhondo lalu, Horo mbirungi i̱na mbirale mbira Isaraele wali agalihondo buleberogo ogoni hiriribiorego bibahendeme ogoni hale howa mogo lowa duru lolebira.
1SA 3:12 Horo ogoningi i̱na Eli damenehondo bule lalu ala lo wirugoriani howa bibahende bialu bu maro bulebero.
1SA 3:13 I̱na ibu dameneru ti pani miaho wule lalu Elihondo abale lamirugoni. Ogoni irane ibu igini biagolabo libugua i̱ mege bialu ko taraore i̱hondo biyago Eli ibu manda biai ho howa dege ibugua nabidababe lalu lamia nabiyagome ani bulebero.
1SA 3:14 Ani buleberogo i̱na bi ogo hongohe Eli damenehondo lalu mbirale i̱hondo ngiragomebi bo delararumebi ko ogoni biyaru nadomoleorebira lamirugoni, lalu lene.
1SA 3:15 Olayadaruni Samuele ibu tamuha paliaho wiane dege egabi laya handala heyalu puwa Anduane Homogonaga anda panga duguini. Duguwa de gandeba handayago ogodagua handaru lalu Elihondo puwa lamulenego ibu gi hene.
1SA 3:16 Ani bu hearia Elihanda ibu olowa, I̱naga igini Samuele-o, lene. Ani layagola Samuelehanda ladai bialu, Agali-o ya ebero, lene.
1SA 3:17 Ani ladai biyagola Elihanda hale halu lalu, Anduane Homogohanda í̠hondo bi agi langiyabe. O langiyadaruni mbira i̱hondo ya do nahabe. Ibugua í̠hondo langiyaru damene bibahendeore i̱hondo nalangiriyagua Ngode Datagaliwabehanda í̠ pani gibiore ngulebira, lene.
1SA 3:18 Ani layagola Samuelehanda ibuhondo lamiyagoni mbira ibuni hangunaga ya do nahe bibahendeore lamiai hene. Ani biagola Elihanda lalu, Ibu Anduane Homogo kago ibunime bayale bulene ngaru bulebira, lene.
1SA 3:19 Samuele ibu Anduane Homogola ho anda hadaga halu ibugua mbirale bibahende bulebira lalu lamiyaruni henene laya walia halu Anduane Homogohanda mo lola hai hene.
1SA 3:20 Ani biyago hondowa Isaraele wali agali dindi gimbuni mbirahayagi howabi mendehayagi howabi bibahende henedarume Samuele ibu Anduane Homogonaga mana latagi haga mbira ka manda biaiore ho hene.
1SA 3:21 Anduane Homogo ibu Silo dindini Samuele hearia ibu ala ho pani halu bi lamiyagoriani ibuni mo walia halu haabo hene. Samuelehanda bi mbira Isaraele wali agali lamiyagola ti bibahendeme hale hai hene.
1SA 4:1 Horo ogoningi Pilidialiru mo ngoai howa Isaraelealiru baba wai bima lole tidiyu ho manda bini. Ani biyago hondowa Isaraelialirume nde wai bima lalu wai hagira bini. Ani buwa Isaraelealiru ti Ebenese tanohayagi embera wiagoriani balai anda bu heagola Pilidiali ti nde Abege tanohayagi embera wiagoriani balai anda buwa hene.
1SA 4:2 Ani buwa Pilidiali ami agali aulolebe tobahe tidiyalu daba daba halu ibuwa Isaraelealiru baba wai bini. Wai gibiore bialu tigua Isaraeleali ami bo podalu agali daosini maria (4,000) agima wai hamani minalu bo homelai hene.
1SA 4:3 Maru yu wahene biaru unu ala balai anda buwa palirimigoria íbu dai bialu hemiria Isaraelealinaga haru haga biarume lalu, Áyu Anduane Homogohanda Pilidialime ina bo poda hana halu bai heledagoni irane agidabe. Ani biyadago áyu iname Anduane Homogonaga Habo Nalolene Bi lo winigonaga Mbogoyi uyu Siloni wiyago mo yalu ibami̱ya ma. Ani beremagola ibugua ina heba pialu inanaga waitigime bole bialu karia ibugua ina pele ngulebirago, lene.
1SA 4:4 Agali haru haga biaru tigua bi lai howa agali marume Silo dindi pelo, Anduane Homogo kagonaga Habo Nalolene bi lo winigonaga Mbogoyi mo pudaba, lene. Mbogoyi biagoni daligahayagi ngolome dahuliyali mitangi bialu wabini babaganehe kirali handa de̱le̱ bedagoria dombeni Anduane Homogo Hongo Haiheore kagonaga handame hagane biragane dagia laga winigo ogoni mo pudaba, lene. Ani biyagola Eli igini kirabali Piniasa Hobinila heba Mbogoyi biago mo yalu ibiyadagua ti haru mandagi ibini.
1SA 4:5 Mbogoyi biago mo yalu anda ibiyagola Isaraeleali biarume turu taraore howa bi mambolo balu bi hongohe ladagadaga biyagome dindi birilene.
1SA 4:6 Ani biayuago hale howa Pilidiali biarume lalu, Hiburualiru balai anda bu hayagoha bi gibi ladagadaga bialu haruago nde hale hama. Ogoni agi lalu laruabe, lene. Ani lowa tigua handalu hearia Anduane Homogonaga Mbogoyi biago Hiburuali biarunaga balai anda bu hayagoria yalu anda íbu ngeleago hendene.
1SA 4:7 Ogoni hondowa ti gi howa lalu, Mbirali tara bi pupu wulenaga tininaga balai anda bu heagoria íbu haruago. Ai ina yu wahene harimadagoni. Gibi o birago ale mbira ala ina hemaria biyane nahandarimagoni.
1SA 4:8 Ai tara hongo gibihe urunime ina nabelo aiwa pele ngulebiradabe. Urunime Iyibialiru dindi ko wali agali nahaga wiagoria homelo bo wahai hayagoni.
1SA 4:9 Pilidialiru-o ai gi nahe agalime wai hongohoore bimi̱ya. Ani nabirimayagua ina Hiburualinaga garabaya biabe ale biahaga ala ti inanaga bia halu hayadagua holeberema. Ani nabimi̱yanaga agaliore howa wai hongoheore bimi̱ya, lene.
1SA 4:10 Ani lowa Pilidiali biarume wai hongo howaore bialu Isaraeleali biaru bo purogo laya handala tininaga dindi gerai lo yalu pugupugu bini. Ani buwa aulolebe tobahe bo paya bialu Isaraelealinaga ami agali daosini pira tebira (30,000) minalu bogo homa hai hene.
1SA 4:11 Ani bialu Ngode Datagaliwabenaga Mbogoyi biagoni mialu Eli igini Piniasa Hobinila kirabali minalu bogo homelalu bini.
1SA 4:12 Ani biya handala agali mbira Beniyamini hameigini hearu aria amu wai hama biagoria howa gerai lo yu pialu horo ogoningi dege Siloni anda pene. Puwa ibu dara ogobiore ho ko walia halu ibuninaga aga budaki bialu dindi himu ibuninaga haguaneni dugu hiralu bini.
1SA 4:13 Eli ibu nde Mbogoyi biago mo yalu piyago agua biradabe lo mitangi tangi bialu hariga tene biraganeni berearia agali biago ibini. Ibuwa agali biagome agua biya lalu bi bibi yayago bibahende hearume ogoni hale hai howa
1SA 4:14 Elihanda, Bi o anda ho laruagoni agidabe, lalu hale hene. Hale hayagola agali biagome abale puwa bi bibi bibahende yayagoni Elihondo lamiai hene.
1SA 4:15 Ogoningi Eli ibu ai̱yahanda hono winingi howa hama ibinidagoni mali pira dirani halira (98) halu ibunaga de kohe mbirale bayuwa nahandabehe hene.
1SA 4:16 Aguanibigo berearia agali biagome ibuwa lalu, I̱ wai bialu henego ibida porabu tara halu gerai lo yu ibaabo henego áyu anda eberogoni, laya. Ani layagola Elihanda ibuhondo hale halu lalu, I̱ igini-o agua biya handala ibiru laribe, laya.
1SA 4:17 Ani layagola agali bi bibi yalu ibaga biagome ladai bialu howa lalu, Isaraeleali ti Pilidiali hondowa ti gibi bo podaore biyagola ibida piai haya. Ani bialu í̠ igini Piniasa Hobinila kirabali bogo homelalu Ngode Datagaliwabenaga Mbogoyi biagobi Pilidialirume mo yalu piya, lalu lamini.
1SA 4:18 Agali biagome Mbogoyi biago mo yalu piya lalu te layagola Eli ibu pabe haraba birayagoriani pilo daga ho ibira hene. Ibu agali waheore howa tingini gendabiyago pilo handa dagaho ibira hayagome ma podayagola homo tongolo mini. Eli ibu Isaraele wali agali haru haga mbira howa ibugua mali pira maria (40) haru hene.
1SA 4:19 Elinaga aruni Piniasa one ibu tombeha gali bere berenego ai ibu gali ogoni taba honolene horo kaware hapara hayagola berene. Ani biruwa hale halu hearia Ngode Datagaliwabenaga Mbogoyi biago mo yalu piyiya layago hale halu ibu agalinibi arunibi homai dege haya layagobi hale howa ibu mogo lowa gali abale taba honole pene.
1SA 4:20 Ibu tandaga nalu tongolo wiagola wali mbira ibu biamogo biyagome ibuhondo lalu, Gi nahabe igiri mbira taba hanaridago, lene. Anidagua layagoni ibu hale halu ladai nabi wini.
1SA 4:21 Ibugua igiri ogoni mini Igabodi winigo ogoni Ngode Datagaliwabenaga wá holeneme Isaraele wali agali yu wahalu piyada lalu wini. Ogoni Ngode Datagaliwabenaga Mbogoyi biagobi mia ibu agalinibi arunibi bibahendeore homai ha bigi biyaru mitangi bido lalu mini ogoni wini.
1SA 4:22 Ibugua lalu, Ngode Datagaliwabenaga wá holeneme Isaraele wali agali yu wahalu pedagoni irane Ngode Datagaliwabenaga Mbogoyi biago mo yalu piyagooremeda, lene.
1SA 5:1 Pilidiali biarume Ngode Datagaliwabenaga Mbogoyi biago Ebenese tano howa tininaga dindi timbuni Asadodo mo yalu pene.
1SA 5:2 Mo yalu puwa tininaga gime wabini dama mini Dagononaga bi pupu wiaga anda buwa heleagoria wia para howa ngelene.
1SA 5:3 Horo mendeni egerebagiore Asadodo wali agalime handalu hearia tinaga dama Dagono wabu helayago dindini bulu palu ibira howa Anduane Homogonaga Mbogoyi biago wiagoria wanakuini ibiraho wiaria hendene. Ani biaria hondowa tigua mo yaraga howa ibuni hene biagoria helo mo yaraga howa helene.
1SA 5:4 Horo mendengi egerebagi tigua lone handalu hemiria dama gime wabini agali helayago biago lone pilo ibira howa abale biyadagua dege Mbogoyi biago wiagoria wanakuini dege pilo podo baga bu ibira ho wiaria de hendene. Ai pilo ibira hayadagoriani ma ibu hangu gi kirabali libu nde hangu lowa podo baga buwa amu panga haraba ubanda tagi buleneni wialu tingini ibuni hangu ibira howa wiaria hendene.
1SA 5:5 Irane aguani binigonaga áyubi Dagono gime wabininaga loma binigo mo miaga karubi ogoninaga bi pupu wule piaga karubi ti dindi o binidagoriani pialu howa ge ogoriani dindi ela holani hondowa porabu angua haga bialu pialu haga.
1SA 5:6 Anduane Homogohanda Asadodo wali agali pani gibiore nelo mialu ti mo giore helene. Ibugua ti pani nelo mialu wali agali dindi ogoriani ha parapara biaru dere moge ale tara kabaneha howa darama ibalu bilene.
1SA 5:7 Ani biyago hondowa tigua lalu, Isaraelealinaga Ngode Datagaliwabehanda inabi inanaga dama Dagonobi pani ngiyada. Ani biyadago ai Mbogoyi o ngagoni iname lu ogoria wuwa habe naheda, lene.
1SA 5:8 Ani lowa tigua Pilidialinaga kini duriali biaru marume hondo pialu haru ibalimu lowa uruni ibiyagola tihondo hale halu lalu, Isaraele wali agalinaga Ngode Datagaliwabe kago ibunaga Mbogoyi biago agua bimabe, larimi. Ani layagola kini biarume ladai bialu howa lalu, Gede dindini mo yalu pudaba, lamini. Ani laya handala tigua Pilidialinaga dindi timbuni Gede winigoria mo yalu pene.
1SA 5:9 Ani buwa ogoriani ngelo hearia Anduane Homogohanda dindi timbuni ogoriani hearubi mo gibiaore timbuni haame helalu pani nai helene. Ani bialu Anduane Homogo ibugua wali agalibi wandari igiribi bibahendeore emene wahebi ta nabi dere moge ale kabaneha howa darama ibalu pani nelo mini.
1SA 5:10 Ani biyagola hondowa tigua Mbogoyi biagoni Pilidialinaga dindi timbuni mbira Egerono winigoria mo yalu pelene. Ani bialu ogoriani yalu anda puwa wiaria wali agali ogoriani hearu tigua gi howa dugu bialu lalu, Ina belo madane bialu Isaraele wali agalinaga Ngode Datagaliwabe kagonaga Mbogoyi biago ogoria yalu ibirimida, lene.
1SA 5:11 Ani layagola tigua lone Pilidialinaga kini biaru haru ibuwa lalu, Isaraele wali agalinaga Mbogoyi biago tininaga dindini wilo mo yalu dai bidaba. Ani beremigola inanebi inanaga one waneiginibi homoloma̱ya nabelo, lene. Dindi ogoriani hearuni Ngode Datagaliwabehanda pani gibiore nelo miyagola ti gi timbuniore halu durulai halu hene.
1SA 5:12 Wali agali maru nahome hearubi heba dere moge ale kabaneha howa darama ibalu heagola tigua tini hangunaga damahondo ti biamogo bia lalu olagalaga bialu hene.
1SA 6:1 Anduane Homogonaga Mbogoyi biago Pilidia dindini mo yalu ibu ngelo heagola ege karia pene.
1SA 6:2 Mani wali agalime tinaga loma binigo mo miaga hearubi gamugamu biaga hearubi olo ngoai howa lalu, Anduane Homogonaga Mbogoyi biago o ngagoni agua bimabe. Ibuni winidagoha ngelo dai birimayagua nde mbirale agi heba mandagi yalu polene ngabe, larimi.
1SA 6:3 Ani layagola tinaga loma binigo mo miaga biarubi gamugamu biaga biarubi tigua ladai bialu lalu, Tígua Isaraele wali agalinaga Ngode Datagaliwabe kagonaga Mbogoyi biago mo yalu dai birimiyagua buleneore mbira ngago ogo. Mbirale mbira tígua mana ko birimigonaga emena bame Ngode Datagaliwabenaga ogoni heba mandagi yalu pelalimu. Mbogoyi biago bame ibuni hangu mbirale mbira paga nahe nadaibi loleberemiore. Ogonidagua buwa handalu kamiria tí mo bayale halu ibugua tí pani nalimulo ngiaabo halu kagonaga irane handa walia holeberemi, lene.
1SA 6:4 Ogoninaga irane ibuhondo mbirale mbira bame agi ale yalu pelamabe, lalu wali agalime hale hene. Hale hayagola tigua ladai bialu lalu, Ngolome wabini moge ale duriali mende ngolome wabini huru ale duria lowa Pilidialinaga kini karu ta howa mbira mbira degedege wabu yalu pelalimu, lene. Homolene tara tara ogonime dege tí bibahendehondobi kini duriali karuhondobi ibilayagoni.
1SA 6:5 Ani biyagonaga tígua moge alebi huru alebi maru wabialu ogoni urunime tínaga dindi mo koore hayagonaga tígua Isaraelealinaga Ngode Datagaliwabehondo giho halimu. Ani beremigola ibugua tinibi tínaga mbirale gime wabini ngarubi dindibi pani ngialu kago nangi hondo holebira badago.
1SA 6:6 Ai tígua bu mini giambe hatagi howa Iyibi wali agaliru hayadaguabi tinaga kini hayadaguabi holenego irane agibe. Wali agali uruni Ngode Datagaliwabehanda mo luluya halu haabo heagola tigua mani Isaraele wali agali yupe halu tagira pelayagola wahenego ogoni embeda nahalimu.
1SA 6:7 Ogoni manda buwa garo ale ge mariahe mbira gahenge mo manda manda bialu nogo bulumaga angibuni kira mani dariba hamagamaga nabinigo hondowa garo ale ge mariahe biagoria gili lalu libuninaga igini biagolabo ogoriani gililo yalu puwa nogo anda henegoha haru dai buwa helo dariba halimu.
1SA 6:8 Anduane Homogonaga Mbogoyi biago garo ale ge mariahe ogoriani mo yalu puwa ngelaramigoria mbirale ngolome wabini biaru tínaga mana ko birimigonaga emena yalu pelaramigo mbogoyi emene mendeha wuwa wia palu palubu ngelowa yalu pelalimu. Ani bialu garo ogoriani mo ngelowa ibuni yalu pelo pelalimu.
1SA 6:9 Ani pelowa porago de handaya ho halimu. Pialu nguini Bedesemese tanoha bamba halu piyagua ogoni warago dere tara gibiore inani bima piyaruni Isaraelealinaga Ngode Datagaliwabehanda ibileneda manda bimi̱ya. Ani napeyagua nde tandagabi ibiyaruni ibugua ibilene ndo bame ibulene wiangi ibinida manda bimi̱ya, lalu lamini.
1SA 6:10 Tigua bilimu layadagua tigua nogo bulumaga angibuni kira haru puwa garo ale biagoriani dariba hamagamaga bialu libunaga igini biagolabo anda biagoha waranda howa dariba hene.
1SA 6:11 Ani bialu Mbogoyi biagoni garo biagoha mo banda howa emene huru alebi dere moge alebi ngolome wabiniru mbogoyi emene mendeha yu wiyaru heba mandagi wia para hene.
1SA 6:12 Nogo bulumaga biago labome hariga uba a̱i̱ na̱i̱ nabi tigatiga pialu Bedesemese tano puabo hene. Libugua harigani pialu howa gu̱ lamalama pene. Pilidialinaga kini duriali biaru ti talima mama piaho wialu amuraore Bedesemese dindi tuni handa amu ho hene.
1SA 6:13 Bedesemese wali agali ti nde ladi ale mini widi gandu lolene tu hayagola widi gandu lowa huba bialu howa lina handa daga halu hemiria Mbogoyi biago hondowa mogolo hendene. Tigua ogoni hondowa turu emene ndo timbuniore harimi.
1SA 6:14 Nogo bulumaga labome garo biagoni gili lalu agali mbira mini Yosua Bedesemese dindini henegonaga mabuni íbu wini. Ibuwa ege to̱le̱ timbuni mbira henegoria kaware hondo hapara hene. Ani biaria wali agali biarume garo biagoni irame wabiniyago tigua o biagoni dibu gingirulo baga bialu nogo bulumaga kira biagoni labo kirabali bo palu buwa Anduane Homogonaga bo loma buwa delene.
1SA 6:15 Ani bialu Libai aria tigua Anduane Homogonaga Mbogoyi biagobi ngolome wabiniru mbogoyi emene mendeha wiyarubi gime mo yaraga howa to̱le̱ timbuni biagoriani mo wini. Ani bialu Bedesemese wali agali tigua Anduane Homogohondo bo lomabu delaga ale delalu mbirale marubi lomabia ho mini.
1SA 6:16 Ani biyagola Pilidialinaga kini duriali biaru ti o biyadaruni tigua de handai halu ai tini dindi Egerono horo ogoningi dege íbu dai bini.
1SA 6:17 Ani buwa Pilidiali tigua dere moge ale ngolome wabini duria Anduane Homogonaga tigua mana ko biyarunaga emena dindi timbuni Asadodobi Gasabi Asagelonobi Gedebi Egerononagabi mbira mbira lowa yalu pelene.
1SA 6:18 Ani bialu huru ale emene ngolome wabini biarubi heba dindi timbuni Pilidiali kini duriali biarume haru hearunaga tano pabe bu mabubi hearubi nabi hearuhondobi mbira mbira lowa yalu pelene. To̱le̱ timbuni ogoni Yosuanaga mabuni Bedesemese tanoni Anduane Homogonaga Mbogoyi biago tigua ogoriani mo winigo áyu to̱le̱ ogoni ani bini lole ogoriani wiaabo ho nga.
1SA 6:19 Anduane Homogo ibugua Bedesemese agali pira karia (70) homelo benego ogoni irane tigua Mbogoyi biago tamuha de handa anda ho hearia ani bini. Ani biyagola wali agalime dugu gomogomo lalu binigo ogoni irane wali agali dewaore bo paya bialu homayaruni Anduane Homogohanda binida lowa ani bini.
1SA 6:20 Bedesemese agalime lalu, Anduane Homogo Ngode Datagaliwabe baya buruguleore kago ogoni ibunaga wanakuini heyu habehe ai kabe. Ibu ina kamagoria nahelo aniha pelo pelamabe, lene.
1SA 6:21 Ani lowa tigua bi bibi yalu maru Kiriada Yarimi tanonaga wali agali karia puwa agua lalimu lalu, Pilidiali tigua Anduane Homogonaga Mbogoyi biago mo yalu daibuwa wiago mo ibalimu lalimu, lene.
1SA 7:1 Ani laya handala Kiriada Yarimi wali agalime Anduane Homogonaga Mbogoyi biago mo yalu puwa agali mbira mini Abinadabanaga andaga hari bareni bu henegoria wini. Ani buwa tigua ibu igini Eleasa ogoriani heago ibugua Mbogoyi biago de hondo helo lomabia halu dabo helene.
1SA 7:2 Anduane Homogonaga Mbogoyi biagoni Kiriada Yarimi tanoni luore wiaho wiaabo halu mali pira kira (20) agima pene. Ogoningi Isaraeleali bibahendeoreme dara howa Anduane Homogohondo ti biamogo bibe lalu laabo halu hene.
1SA 7:3 Samuelehanda Isaraele wali agalihondo lalu, Tígua Anduane Homogohondo heneneore tínaga bu gubalinioreme mini beregedole manda birimiyagua nde tígua dindi taralinaga dama gime wabiniru tininaga hameme wabinigo dama wali ale mini Asedarebi yu wahaiore halimu. Ani bialu tíni Anduane Homogohondo lomabu miai halu ibu hangu mitangi bialu lotu lalu halimu. Ani birimiyagua ibugua tí Pilidialime hongo howa yaniho kagoha howa gi mulebira, lalu lamini.
1SA 7:4 Ani laya handala Isaraele wali agalime dama bi pupu wule gime wabini Balabi Asedarebi yu wahalu Anduane Homogonaga mini hangu mitangi bialu lotu lalu hene.
1SA 7:5 Ani biagola Samuelehanda Isaraelealiru bibahendeore Misiba tanoni ngoai hole pudaba lowa lalu, Tí ogoriani pu kamigola i̱na Anduane Homogohondo tínaga bi laholiya, lene.
1SA 7:6 Ani layagola ti bibahendeore Misibani mo ngoai howa hene. Tigua iba mbira hambuwa Anduane Homogohondo odo lomabu mialu hina tomobi mbira nane horo mbira ogoni hai hene. Ani bu howa tigua lalu, Iname mana ko ngubi birimaru Anduane Homogohondo bialu harimada, lalu lapani hene. Samuelehanda Isaraelealirunaga godi genda damene Misibani wiaruni mo palia halu hagane wini.
1SA 7:7 Pilidialiru ti hale halu hearia Isaraeleali biaru Misibani mo ngoai ho ka layago hale hene. Hale howa Pilidialinaga kini duriali biaru tinaga ami agali biaru haru howa wai hanalu bo podole pene. Ani bule ibira layago Isaraelealiru ti bi ogoni hale howa gi hene.
1SA 7:8 Gi howa tigua Samuelehondo lalu, Pilidialime ina nabelo Anduane Homogo inanaga Ngode Datagaliwabehanda ina pele ngilo í̠na ibuhondo bi laho wiaabo habe, larimi.
1SA 7:9 Samuelehanda nogo sibi igini mbira homa hende Anduane Homogohondo lomabia halu bo delene. Ani buwa ibugua Anduane Homogohondo lalu, Isaraele wali agali biamogo bibe, layagola Anduane Homogohanda hale halu biamogo bini.
1SA 7:10 Samuele ibu sibi igini biago bo lomabu mialu heagola Pilidiali biaru wai bialu bo podole ibalu heaore abale Anduane Homogohanda hari daligaha howa hari kulu lelene. Ani layuago hale howa ti mo luluyaore halu durulo yu pugupugu bilene.
1SA 7:11 Ani biyagola Isaraelealiru ti ge mbarilama Misiba howa tagira pialu Pilidiali biaru bama talima amuraore Bedegani puabo halu maru hariga obeneni minalu bo homelene.
1SA 7:12 Ani bima pirimigoria Samuelehanda ege to̱le̱ mbira muwa Misibala Senila tuni walu howa lalu, Anduane Homogohanda biamogo bima ibaabo hayagoni, lalu ibugua to̱le̱ biago mini Biamogo Biaganaga To̱le̱ wini.
1SA 7:13 Ani buwa Pilidiali biaru bo podalu ti Isaraeleali karuhayagi naibilo Anduane Homogo ibugua Samuele heangi ho hangaiho wiaabo hene.
1SA 7:14 Dindi timbuni bibahende Pilidialime bo karulaga bima Egerono Gedela hengeneha mo wima piyaruni Isaraeleali tini karulo dai bini. Ani bialu Isaraeleali tinaga dindi bibahendeore tini karulo dai biai hene. Ani bialu Isaraeleali ti Kenanali baba wai nabi bayale hene.
1SA 7:15 Samuele heangi ibugua Isaraele wali agali haru haho wiaabo hene.
1SA 7:16 Mali bibahendeni ibu Bedele dindibi Giligala dindibi Misiba dindibi uruni bibahendeni pumabu bialu howa maru mo palia halu dabolene ngaru dabalu mo tiga biaga hene.
1SA 7:17 Ani bialu ibu ibuni dindi Lama dai buwabi ibugua dabalu mo tiga bulenenaga biabe bialu hene. Ani bialu ibugua Lamani Anduane Homogonaga bo lomabu mulenenaga dabu mbira bu helene.
1SA 8:1 Samuele ibuni agali waheore haruda manda buwa ibu igini kirali libu Isaraelealirunaga mana dabalu mo tiga biaga helo helene.
1SA 8:2 Ibu igini wahenego mini Yoele wialu heyogonego Abaya wialu libugua Beaseba tanoni mana dabalu mo tiga biaga helo helene.
1SA 8:3 Ani binigo libugua bilo libu abahanda biawai hayadagua talialu nabi libu muni hangu dewa mulene nga manda bini. Ani buwa libugua marume godi lahelonaga muni miyaru mo yalu godi lolene wiadagua ndo ke̱ howa mo hondo halu laga hene.
1SA 8:4 Anidagua bialu heago hondowa Isaraeleali haru hagaru bibahende mo ngoai howa bi lo manda bini. Ani bialu ti Samuele hearia Lama dindi pene.
1SA 8:5 Puwa ibuhondo lalu, Í̠ wahe kego manda buwa í̠naga igini biago labome bilo í̠na biawai haridagua ndo bialu ka. Ani bidago í̠na kini mbira ina haru helo dabo hela. Ani beregola dindi maru ti kini helowa kadagua inabi kini mbira helowa hami̱ya, lene.
1SA 8:6 Tigua kini ogoni dabo ngi lalu Samuele ibuhondo hale hayadagoni ibu turu nahe howa ibugua Anduane Homogohondo bi lene.
1SA 8:7 Ani layagola Anduane Homogohanda lalu, Wali agalime í̠hondo bi larago bibahende hale hai habe. Tigua handabe manga hayago ogoni í̠hondo ndogo i̱ tinaga kini kogonaga handabe manga hara.
1SA 8:8 I̱na bamba Iyibi dindi howa haru tagira ibirungi howa tigua i̱ wahalu puwa dama maruhondo bi pupu wialu henego ka. Ai áyu tigua i̱hondo horo bibahendengi bialu hayagonidagua í̠hondo dege bialu ka.
1SA 8:9 Ani bidago tigua larago hale ha howa dege tinaga kini dabo helararume haru howa tihondo bulebirago damene agua bulebira lalu tinihondo lamiai habe, lalu Anduane Homogohanda Samuelehondo lamini.
1SA 8:10 Samuelehanda wali agali tinaga haru haga kini helo dabo ngi lalu hale hayaruhondo Anduane Homogohanda ibuhondo lamiyaru bibahende ti lamiai hene.
1SA 8:11 Samuelehanda tihondo lalu, Tínaga kini dabo helaramigome agua bigi bulebira, lalu ti bayuwa lamiai hene. Ibugua lamialu lalu, Tínaga iginiru ami helo helalu marume ibunaga wai biaga garo ale mini karisi nogo hosi gili lolene biabe bilo helalu marume nogo hosi erekunini bama polene biabe bialu marume nogo hosime garo ale biago gili lama mama ibilo tigua ala gerai lalu bamba helo helolebira.
1SA 8:12 Ibugua tí igini marubi agali daosini mbira (1,000) haru haga helalu marume agali pira duria (50) haru haga helalu bulebira. Ani bialu tínaga iginirume ibunaga mabu dindi aliaga helalu ibunaga tomo bogabiru miaga helolebira. Ani bialu marume ibunaga wai biagane alerubi ibunaga wai biaga garo ale nogo hosini gili laganaga mbirale marubi wabilo helolebira.
1SA 8:13 Tínaga wane bedarume ibunaga mbirale weli ngabi ngaru wabiagabi tomo dawalu mberedibi wabiaga berelo berelolebira.
1SA 8:14 Ibugua tínaga mabu bayaleore ngamirubi pu mbira lini daga mini gerebi mabu ngamirubi olibe lini daga bu karubi uruni bibahende ibunaga haru haga haguane biaru ti karulelo mo mulebira.
1SA 8:15 Tínaga ladi ale mini widibi pu mbira mini gerebi linibi pini dege dege yamuwa ibunaga agali haguane karubi haru haga maru karuhondobi mo mulebira.
1SA 8:16 Ibugua tínaga biabe bia haga karubi nogo bulumaga wangabe karubi nogo dongi karubi bayale damenego ibu haru halu puwa ibunaga biabe bilo mo bia holebira.
1SA 8:17 Ani bialu ibugua tínaga nogo sibi karu pini degedege ibu haru polebira. Ani bialu tínibi ibunaga garabaya biabe ale biahaga holeberemi.
1SA 8:18 Horo ogonidagua bulene tagira ibiragola tígua tandaga nalu howa yi lalu dugu gibi bialu holeberemigo ogoni irane tínime tínaga haru haga kini dabarimigome birago Anduane Homogo ibugua tínaga dugu yi lalu bialu kamigola hale halu ladai nabulebira, lalu Samuelehanda lamini.
1SA 8:19 Ani lamiyago lamilowa tigua lalu, Ina Samuelenaga bi hale naholeore. Ina kini mbira dindi hameigini tara tara ti haru helo heledadagua inabi nde ani helole hame ledama. Inanenaga kini ibugua ina haru helobi wai buluma̱ya haru bamba helobi heloleberema, lene.
1SA 8:21 Anidagua lalu tigua layaruni bibahendeore Samuele ibugua hale hai halu Anduane Homogo lamule pene.
1SA 8:22 Anduane Homogohanda ibuhondo ladai bialu lalu, Tigua hame laradagua bialu kini mbira dabole pu, lamiya. Ani lamiyagola Samuelehanda Isaraelealiruhondo lalu, Mani olarongi daibule áyu bibahendeore tíni andaga purogo ladaba, lene.
1SA 9:1 Agali homogo mini lene mbira Beniyamini hameigini aria henego ibu mini Kisi hene. Kisi ibu Abile igini hene. Abile ibu Sero igini hene. Sero ibu Begorada igini hene. Begorada ibu Abia igini hene.
1SA 9:2 Kisi ibu igini Solo hene. Solo ibu agali baya taraore dombaraleni ibu Isaraeleali hearu bibahende waradai biai halu ibu agali luni hongoheore hene.
1SA 9:3 Horo mbiru Kisinaga nogo dongi maru pu ereba hene. Ani biyagola ibugua Solohondo lalu, Biabe biahaga mbira haru halu libugua nogo dongi uruni tai bu pudaba, lene.
1SA 9:4 Ani laya handala libugua tai bima Eberaimi dindi barebare pu banga bialu Salisa dindi pua̱i̱ halu hebirabi mbira handa walia nahe dege hene. Handa walia nahe howa libu tai bima puabo halu dindi hobane mende Salimu dindihabi tai bima pu banga bialu hebirabi nogo dongi uruni naheoreyane taibu wahene. Ai naheoreya handala libu Beniyamini daluha tai bima bolangua halu hebira ogorianibi handa walia nahe dege hene.
1SA 9:5 Ai buruguledago lowa libu Subu dindi hobane wiagoria tagira pu howa Solohanda ibunaga biabe bia haga biagohondo lalu, I̱ abahanda nogo dongi pu ereba hayarunaga ndo iya agua biyabe toba howa mini dege dindi ho holigo ai andaga dai biba nalarego, lene.
1SA 9:6 Ani layagola ibunaga biabe biahaga biagome ladai bialu lalu, Hondoha. Tano o kabagoriani agali mbira Ngode Datagaliwabenaga mana baya gibi latagi halu mbiwia hagago wali agali bibahendeme ibu kalo manda biaihe dindi Subu ogoria kago ibugua larago bibahendeore lola hai haga ka. Ani biaga kago ogoni ibugua nogo dongi uruni ogoria kago handa walia holeberabi lalu langulebira badago ai ibu karia mba, lene.
1SA 9:7 Ani layagola Solohanda ibuhondo hale halu lalu, Iyame ibu karia piribayagua ibuhondo mbirale mbira agi yalu mbaliyabe. Iyanaga nuha tomobi ibuhondo mulenego mbira nahenedago iyame agi mibiyadabe, lene.
1SA 9:8 Ani layagola biabe biahaga biago ibugua ladai bialu lalu, I̱na muni kuni siliba emene mbira hangu yidogo ogoni merogola ibugua nogo dongi uruni ogoria ka lalu langilo, lene.
1SA 9:9 Ani layagola Solo ibugua biabe biahaga biagohondo ladai bialu lalu, Ogoni baya gibi larigo ai mba, lene. Ani lowa libu tano Ngode Datagaliwabenaga agali biago heagoriani pene. Tano ogoniha pole hari bare wiagoria iraga halu pialu hebira wandari maru iba hambu pole tagira ibalu hemira lola hene. Lola howa libugua wandari biaruhondo hale halu lalu, Mani bulebiragonaga de gandeba handaga mbira tano ogoriani kabe, lene. Ogoningi Ngode Datagaliwabe mana latagi haga mbira kago ibu mini de gandeba handaga ka laga. Ani laganego mbirali ibu Ngode Datagaliwabehondo mbirale mbira hale holene wirangi ibugua de gandeba handaga karia ma, laga wini.
1SA 9:12 Libugua wandari biaruhondo ani layagola tigua libuhondo ladai bialu lalu, E̱ kago ibu áyu ogoni poragonigo libugua gerai lalu piribiyagua abale tali minuleberabi. Ani bialu tanoha ubanda harabigola abaleore ibu ogoriani karia handa walia holeberabi. Ibu áyu dege tano ogoriani anda ibiyago ogoni irane wali agali tigua nai hari baregoha mbirale mbira bo lomabia howa dabuni mulebiragonaga ai íbu ka. Ani bidago wali agali tomo nami̱ya ibalimu lene íbu bedaru tigua ibu naibidaha tomo ala nanolebira. Ibuni anda ibiragola ibugua ala bo lomabia hole wiyaru biamogo bia habe lalu mo turu kagola tigua tomo nole birulebira. Libu áyu ogoni abale piribiyagua ibu tomo nole hari bare iraga nakaore handa walia holeberabi, lene.
1SA 9:14 Ani lamiya handala Solobi ibunaga biabe biahaga biagobi libu tano biagoria pole ubanda halu hebira Samuele ibu nde Ngode Datagaliwabe mitangi bialu lotu lole andaha pole ibalu hearia de hendene.
1SA 9:15 Abaleore Anduane Homogohanda Samuelehondo ogodagua lamini. Lamialu lalu,
1SA 9:16 Yawi horo ogodaguaore haragola ina agali mbira Beniyamini hameigini karu aria ibilaguago i̱naga Isaraele wali agalinaga kini helo weli haguani odo wia habe. Agali ogoni ibugua ti Pilidialirume nabelo gini mulebira. I̱na i̱naga wali agali tandaga nalu hearu de handaru. Tigua i̱hondo biamogo bia lalu dugu biayuago hale haru, lalu lamini.
1SA 9:17 Samuele ibu Solo ibiyago de hendeagola Anduane Homogohanda ibuhondo lalu, Agali i̱na larugoni ogonigo ibugua i̱naga wali agali haru holebira, lene.
1SA 9:18 Ani leagola Solo ibu Samuele pabe harabani heagola puamu howa lalu, De gandeba handaga agoha hagabe i̱ langi, lene.
1SA 9:19 Ani layagola Samuelehanda ladai bialu, De gandeba handaga i̱ kogoni. Áyu ina lotu laga anda kagoria mali̱ya libugua ala pialu hadaba. Ani bialu áyu libu kirabali i̱ baba tomo nami̱ya. Yawi egerebagi libugua i̱hondo hale harabiru bibahendeore ladai biai halu pole ibiribidagoha pilibulo.
1SA 9:20 Ai nogo dongi pu ereba ho heane horo tebira piyagonaga mini dege dindi nahe uruni bamba abale biago handa walia hayago. Ani bidago Isaraele wali agalime hame timbuniore lalu kago aibe. Ogoni í̠bi í̠ aba waneiginibi tí ndobe, lene.
1SA 9:21 Ani layagola Solohanda ladai bialu lalu, I̱ Beniyamini hameigini aria kogoni. Hameigini ogoni Isaraele hameigini emene mbira i̱ aba ai̱ya dameneru hameigini ogoninaga mini lene timbuni ndo emene dindiha karu aria ko. Ani bidogo í̠na i̱hondo bi ogonidagua lalu langirigoni irane agua lalu laribe, lene.
1SA 9:22 Ani layagola Samuelehanda Solobi ibunaga biabe bia haga biagobi haru halu puwa anda tamu hobane timbuni wiagoria dagiani pira tebira (30) ale tomo nole ibalimu lene berearu berelowa libu bamba ho berelene.
1SA 9:23 Ani buwa Samuelehanda tomo dawaga heagohondo lalu, Bulumaga mbirini i̱na podowa mo bagi ho wibe lalu ngirugo mo yalu íbu, lene.
1SA 9:24 Ani layagola tomo dawaga biagome bulumaga ge dolo wiyago mo yalu ibuwa Solo bereagoriani mo wini. Ani biyagola Samuelehanda lalu, Bulumaga ogoni í̠nagaore podo wia henego de handa. I̱na áyu agali mo ngoaiho bedadagua bedagola nabelo í̠naga ogoni mo bagiho ngelenego ai na, lene. Ani biniyago horo ogoningi Solo ibu Samuele heba tomo nalu berene.
1SA 9:25 Biruwa mani ogoriani lotu laga anda heneyagoria dalipe howa tigua anda mbira anda pialu anda dangi tigabi wiagoriani Solo ibu palelo tamu mo tigabia hene.
1SA 9:26 Ani biyagola Solo ibu ogoriani puwa palene. Ai egerabagiore egabi layagola Samuelehanda Solo uyu anda dangi tigabi wiagoria palearia puwa lalu, Ai pole birigoria pobelo ngua holiya heya nabere, lene. Ani layagola Solo ibu heyalu Samuele libu haru hariga peagoria mandagi pialu hene.
1SA 9:27 Ani bialu libu tano biagonaga gibuni wiagoria anda íbu howa Samuelehanda Solohondo lalu, Agali biabe biahaga ogoni ibu ala bamba halu pialu ha la, lene. Ani laya handala biabe biahaga biago ibu libu yu wahalu piyagola Samuele ibu bi layago laabo halu lalu, Í̠ emene hondo hadai bu ha. I̱na Ngode Datagaliwabehanda layadagua languliya, lene.
1SA 10:1 Ani lowa Samuelehanda ira olibe lininaga weli be heba yamuwa Solonaga haguani odo wia howa ibu nu̱nu̱ lowa lalu, Anduane Homogohanda ibunaga Isaraele wali agali haru habelo haguani odo wia haragoni. Í̠na ibunaga wali agali bayuwa haru halu tinaga waitigi karu bibahendeme boligo í̠na ha pai holebere. Ani layadagoni Anduane Homogohanda ibunaga wali agali haru habelo í̠ dabo helayadagoni lowa manane ogoni handabe.
1SA 10:2 Í̠na áyu ogoria i̱ yu wahalu pialu keria Selesa dindini Beniyamini daluni Leselonaga homali kaware kagoria agali kirali ibalu karia lola holebere. Libugua í̠ nogo dongi tai bialu harigoni handa walia haya lalu langulebira. Ani bialu í̠ abahanda nogo dongi ereba hayarunaga mini dege dindi nahe í̠naga agua biyabe toba howa mini dege dindi ho howa ibugua i̱ iginiore agua buledabe lalu ka lolebira, lene.
1SA 10:3 Samuelehanda laabo halu lalu, Ani bialu holebirago í̠na ogoriani howa piaho wialu Tabo dindini ira mbira hada bia hene heagoria tagira ibalu keria agali tebira Ngode Datagaliwabehondo mbirale bo lomabia ho mulenaga Bedele dindi pole pialu karia í̠na lola holebere. Lola halu mbirago ibugua nogo meme igini tebira haru halu pialu mendego ibugua mberedi tebira yalu pialu tebonego ibugua nogo dongoneme be wabini mbirani waini iba hambu to̱lai howa hanalu karia hondolebere.
1SA 10:4 Ani bialu tigua í̠ mo bila halu mberedi kirago í̠ nabelo ngulebirago yamialu nolebere.
1SA 10:5 Ani bialu í̠ Ngode Datagaliwabenaga hari bare Gibeani Pilidia amialirunaga balai anda dewa bu kagoria polebere. Tano ogoriani ubanda tagi bu haga ngagoria Ngode Datagaliwabe mana latagi haga maru bo lomabu mulene dabu hari bare ogoriani tigua dalialu howa ga̱wa̱bi tabagebi gulupobebi hiliyulabi lama ibalu karia lola holebere. Tigua mali lima bi hongo howa ladagadaga bima ibulebira.
1SA 10:6 Ani lama ibalu kagola í̠bi Anduane Homogonaga Dinini ibugua í̠ha anda ibalu mo hongo holebira. Ani bidagola tigua bialu kagoha í̠na ho gimbu buwa tinaga Ngode Datagaliwabenaga mini yaraga holene mana biaga ngagodagua bi ladagadaga bialu tama bialu mali luyu ibaga bialu kegola ogonime í̠ agali mende ale holebere, lene.
1SA 10:7 Ani lowa lalu, Urunidagua biragola Ngode Datagaliwabe ibugua hariga walia halu bia lara alego bibe.
1SA 10:8 Ani bialu i̱ ko handala í̠na ala pu bamba halu Giligala tanoni puwa i̱ maha í̠ lola hole ibuliya horo karu ogoriani hondo habe. Ibuwa i̱na mbirale bo loma bialu delai howabi mbirale ina Ngode Datagaliwabela ho gimbu buluma̱yanaga bo lomabu muwabi í̠na ogoale bulene ngago langulebero, lalu lamini.
1SA 10:9 Ani lowa Solo ibu Samuele yu wahalu pole piyagola Ngode Datagaliwabehanda Solo ibuhondo mini gahenge wulene mini. Ani miyagola Samuelehanda, Ogoale bulebira, lalu ibuhondo lamiyaru bibahendeore horo ogoningi biai hene.
1SA 10:10 Ani buwa Solobi ibunaga biabe biahaga biagobi libu Gibea tanoni anda pialu hebira Ngode Datagaliwabe mana latagi haga maru heneyaru ti ogoriani lola hene. Lola halu abale ibiyaore Ngode Datagaliwabe Dinini ibugua Solo haru howa bia layadagua bialu tigua mali lialu bi hongo howa ladagadaga bialu hene.
1SA 10:11 Ani bialu heago hondowa wali agali ibu hendene hearume tini hale ha a̱i̱ na̱i̱ bialu howa lalu, Ogoni Kisi igini biagodago agua binidabe. Solo ibu Ngode Datagaliwabe mana latagi haga mbira hole ho beregedenedabe, larimi.
1SA 10:12 Ani larimigola agali mbira ogoriani hene heagome hale howa lalu, Ngode Datagaliwabe mana latagi haga maru o karuni tibi ani alidabe. Tinaga aba urudalo tigua manda bidamibe, lene. Ani biyago hondowa mbira ogodagua laga, Solo ibubi Ngode Datagaliwabe mana latagi haga mbira ho aribia kabe, laga wini.
1SA 10:13 Ai Solo ibu bia maro bialu ibu puwa bo lomabu mulene dabu hari bare wiagoriani pene.
1SA 10:14 Ani pu hebira Solo aba hameneme Solola ibunaga biabe biahaga libu haru hearia hondowa lalu, Libu ani penego eberabibe, lalu hale hene. Solohanda ladai bialu lalu, Iya nogo dongiru maru ereba hayagola tai bialu hariba. Ani bialu henego handa walia nahabeheyagola Samuele hondo piriba, lene.
1SA 10:15 Ani laribigola Solo aba hamene biagome libuhondo hale halu lalu, Samuele ibugua libuhondo agi langiyabe, lene.
1SA 10:16 Solohanda ibuhondo ladai bialu lalu, Nogo dongi uruni handa walia henego ka lalu langiya, lalu lamini. Anigo Samuelehanda Solo ibu kini holebere lalu layago nalamini.
1SA 10:17 Samuelehanda Ngode Datagaliwabenaga deni wali agali bibahende hearu olowa Misiba tanoni mo ngoai hene.
1SA 10:18 Ani bu howa tihondo lalu, Anduane Homogo Isaraelealinaga Ngode Datagaliwabehanda tí Iyibi dindi howa haru halu tagira ibiyagola Iyibialirumebi wali agali maru hearumebi tí mo tandaga halu heagola ibugua gini mialu haru tagira ibiyagoni.
1SA 10:19 Ai tínaga Ngode Datagaliwabe tí genda yuwa hariga tai bialu hemigola pele mialu gini miaga biago kagoni. O biagoni heago helowa áyu tígua ibu manga howa ai kini mbira ngi lalu i̱hondo hale harimida. Ai anigo tíni hameiginibi damenebi harimidagua Anduane Homogonaga deni mo mogo bu hadaba, lalu Samuelehanda lamini.
1SA 10:20 Ani lowa Samuele ibugua hameigini hangu hangu hayadagua bamba halu ibu haga haga biyagola Anduane Homogohanda Beniyamini hameigini hangu dabene.
1SA 10:21 Ani bialu Samuelehanda Beniyamini hameigini lone emene dabaga bialu Madiri aria hearu dabo tagi ho helene. Ani biyagola Madiri aria ogoniha howa Kisi igini Solo dabene.
1SA 10:22 Tigua Solo tai bialu henego handa walia nahe howa Anduane Homogohondo hale halu lalu, Mbirali ogoriani karu aria mbira kane hendedebe, lene. Ani layagola Anduane Homogohanda ladai bialu lalu, Solo ibu ede mbirale ngarunaga erembirahayagi bira do kagoni, lene.
1SA 10:23 Ani laya handala tigua gerai puwa Solo wali agali bu heagoria haru halu tagira ibini. Ani biyagola tigua handalu hearia agali hearu bibahende tubagi dege lowa Solo ibu luniore hearia hendene.
1SA 10:24 Ani hondowa Samuelehanda wali agali hearuhondo lalu, Agali Anduane Homogohanda dabenego o kagoni. Ina kamaru aria mbira ibu ale nahe ibu kagobi ndo mbira ina kamagoni naheoreda, lene. Ani layagola wali agali bu hayaru bibahendeoreme bi hongo howa ladagadaga bialu lalu, Ibu kini mali dewaore helo, lalu lene.
1SA 10:25 Ani layagola Samuelehanda wali agali bu hearuhondo kinime biabe bulenebi wali agalime kininaga biabe bia holenebi uru ale nga lalu tihondo lo wála howa lamini. Ani lamuwa mani ibugua mbuga mbirani gili buwa anda mbira Anduane Homogonaga lomabia hene heagoha wia do helene. Ani buwa ibugua wali agali bibahendeore, Tíni andaga purogo ladaba, lene.
1SA 10:26 Solo ibubi agali hongohe marubi Ngode Datagaliwabehanda tinaga bu gubalinini ela haga biyaru Solo heba pumaga halu ibuni andaga Gibea dai bini.
1SA 10:27 Anigo agali habane nabulene maru hearume lalu, Agali ogobime ina agua pele mulubadabe, lene. Ani lowa tigua Solo yo hondowa ibuhondo mbirale maru turu halu mulene winigo nami wahene.
1SA 11:1 Ani binigo mani ege mbira ale peagola Amonoalinaga Kini Nahasahanda Yabese tanoni hearu baba wai bule lowa ibunaga ami agali hearu haru tagira pialu Gileada dindihayagi puwa ho mabu bupe hene. Ani biyagola Yabese agalime Nahasahondo lalu, Í̠na mbira ina heba bulenego lo wia. Ani beregola iname í̠ inanaga haru hagaore ke lo manda buluma̱ya, lene.
1SA 11:2 Nahasa ibugua ladai bialu lalu, I̱na tí heba bimi̱yago bi galone mbira lo wuleberogo i̱na tí bibahendenaga de habane tigahayagi bibahende dugu wahai holebero. Ani berogome Isaraele wali agali bibahendeore mo taga halu mo dindiha holene yu anda ibilonaga ani bulene wulebira, lene.
1SA 11:3 Ani layagola Yabese wali agali haru haga biarume lalu, Bi ogoni Isaraele dindiha hale hoyogole loloma̱ya ina horo karu henge ngibe. Ani beremagola ina pele mulene mbira naheyagua nde inane í̠ keria hatagi holoma̱ya, lene.
1SA 11:4 Ani lowa bi yalu piyaru Gibea dindi Solo henegoria anda ibini. Anda ibuwa bi biago tihondo ogodagua laya lalu lamiyagola wali agali hearume gi howa dugu bini.
1SA 11:5 Ani bialu hemiria Solo ibu nde áyu dege ibuni mabuha howa ibu nogo bulumaga wangayaru heba ibini. Ibuwa ibugua lalu, Agi biyadabe. Wali agali bibahende dugu biai halu kagoni aginagabe, lene. Ani layagola tigua ibuhondo Yabese dindi howa bi yalu ibuwa lamiyaruni ogodagua laya lalu Solo lamini.
1SA 11:6 Solo ibu bi biago hale hayagola Ngode Datagaliwabe Dinini ibalu ibuha karula hene. Ani biyagola Solo ibu keba timbuni hene.
1SA 11:7 Ani howa ibugua nogo bulumaga wangabe kira bo poda baga buwa bi yalu piaga hearume mo yalu Isaraele dindi bibahendeni, Bi ogo heba yalu purogo ladaba, lene. Bi ogoni mbirali Solo Samuelela wai bule poleberabago talima naibirago ibunaga nogo bulumaga wangabe karu ogonidagua bialu bo poda baga bulebira, laya lalu lamilimu, lene. Ani layagola Isaraele wali agali hearume Anduane Homogohanda agi bulebiradabe lowa gi timbuni ho hene. Ani howa ti bibahendeore mo ngoai ho hene.
1SA 11:8 Ani biaria Solohanda ti bibahende Besege dindini mo mogo bu helene. Ogoriani daosini dege handari tebira (300,000) Isaraele howa íbu halu daosini pira tebira (30,000) Yuda howabi íbu halu bini.
1SA 11:9 Ani bu howa tigua bi yalu ibaga Yabese howa ibini biaruhondo lalu, Yawi horombe hanuni nakaore ti gini mulebirago lalu tinaga wali agalihondo lamule pudaba, lene. Yabese wali agalime bi ogoni hale howa tigua turu timbuniore hene.
1SA 11:10 Ani buwa tigua Nahasahondo lalu, Yawi inane tagira ibuluma. Ani bidamagola í̠na inahondo bule manda bu wirida ale bibelo, lene.
1SA 11:11 Ogoningi mbiraga Solohanda ibunaga agali halu tebo tale buwa wabuni tebira tidiyu haga haga bilene. Ani buwa egerebagi egabi lole muna biyagola abale ti waitigi biarunaga balai anda bu paleagoria porabu anda anda buwa Amonoali palearu minalu bene. Horombe hanuni hayagola tigua aulolebe tobahe bo payapaya bini. Ani biyagola yu wahene hearu agali homane mbira ibuni hangu pugupugu bialu gerai ibida purogo lene.
1SA 11:12 Ani biyagola Isaraele wali agalime Samuelehondo lalu, Wali agali maru tigua Solo tinaga kini nahelo layaru agoha kabe. Uruni ina kamaria minu yalu ibidaba. Ani beremigola iname ti bo waholoma̱ya, lene.
1SA 11:13 Ani layagola Solohanda lalu, Horo áyu Anduane Homogohanda Isaraele wali agali pele ngiyadago mbirali homelo bolene nawi, lene.
1SA 11:14 Ani layagola Samuelehanda tihondo lalu, Ina bibahende Giligala dindi hangu piai howa ogoriani halu mbira lone Solo ibu inanaga kiniore ka lalu ladaga hami̱ya ma, lene.
1SA 11:15 Ani lowa ti bibahendeore Giligala dindi piai hene. Puwa Anduane Homogonaga deni howa tigua, Solo inanaga kini ka, lalu ladaga hene. Ani bialu tigua ti Anduane Homogola ho gimbu bulenenaga mbirale bo lomabia ho mialu Solobi Isaraele wali agali bibahende biarubi ti haru horo ogoningi tomo nalu turu ho hene.
1SA 12:1 Ani buwa Samuelehanda Isaraele wali agali biaruhondo lalu, Tígua i̱na buliya hale harimigoni birugoni. I̱na kini mbira tí haru helo ngirugoni.
1SA 12:2 Áyu ibugua tí haru bamba hole kagoni. Ai i̱ nde wahe halu dagua hayadago i̱naga iginiru tí heba kagoni. I̱na tí bamba igiri hagua deheni howa haru hama ibaabo halu áyu hamaro berogonida, lene.
1SA 12:3 Ai i̱ o kogonigo i̱na haru harugoni howa ko mbira bidoyagua Anduane Homogonaga denibi ibugua kini dabene o kagonaga denibi áyu í̠na kagua biri lalu tígua langidaba. I̱na mbiralinaga nogo bulumagabi nogo dongibi mbira page haru piruyabe. I̱na mo hondo howa mbiralinaga guru na mo tandaga ha bigi biruyabe. I̱na mbiralinaga mbirale mbira dindiha ohowa mo naruyabe. I̱na uruni mbira bidoyagua birudadagua yadai biai holiya langidaba, lene.
1SA 12:4 Ani layagola wali agalime ladai bialu lalu, Ani nabiore í̠na inanaga guru nabi mo tandagabi naheore hari. Ani bialu mbirale mbira mbiralinagabi mo yalu napeore hari, lene.
1SA 12:5 Ani layagola Samuelehanda ladai bialu lalu, Anduane Homogobi kini ibugua dabo helayagobi libugua áyu tígua i̱ tigabiore harigo manda bidama larimigo de hendeda, lene. Ani layagola tigua ladai bialu lalu, Anduane Homogo ibugua henene laralo manda bida, lene.
1SA 12:6 Ani layagola Samuele ibugua layadagua laho wiaabo halu lalu, Anduane Homogo ibu Mosese Aronola dabalu tínaga mamali heneru Iyibi dindi howa haru halu íbu tagira pene biagoni ka, lene.
1SA 12:7 Ani binigo áyu tí o kamigoriani hondo hadaba. Ani bidamigola Anduane Homogohanda tíbi tínaga mamali henerubi pele mule hongo henego bibahende agua hene lalu Anduane Homogonaga deni howa manda bilimulonaga tíha lo hana holiya, lene.
1SA 12:8 Ogoni Yagababi ibunaga one waneiginibi ti Iyibi dindi piyagola Iyibiali hearume ti mo tandaga hayagola tínaga mamali urunime Anduane Homogohondo biamogo bia lalu dugu bini. Ani biyagola ibugua Mosese Aronola ibilayagola libugua uruni ti Iyibi dindi howa haru halu tagira puwa dindi ogoriani helo helene.
1SA 12:9 Ani biyago bilowa wali agali biarume Anduane Homogo inanaga Ngode Datagaliwabe embeda hene. Ani bialu hemiria Anduane Homogohanda Pilidialibi Moabanaga kinibi Haso dindi timbuni wiagonaga ami haru haga haguane Siserabi tigua tínaga mamali uruni balu podelonaga ibugua uruninaga giha yahene.
1SA 12:10 Ani biyagola tigua Anduane Homogohondo dugu bu mialu howa lalu, Iname í̠ erembira ngialu gime wabini Balahondobi Asedarehondobi bi pupu wialu harimagomedago mana koore birimagoni. Anduane Homogo-o ina biamogo bia halu ina áyu inanaga waitigi bibahende karume boligo pele ngiore bibe. Ani beregola iname í̠ mitangi bialu lotu lalu holoma̱ya, lene.
1SA 12:11 Tigua ani layagola Anduane Homogohanda hale halu Gidionobi Baragabi Yabedabi ibilalu maniore Samuele i̱ ibilayagoni. Ani biyagola ina bibahendeme tínaga waitigi heagoha howa pele ngirimagola tí bayale ho harimi.
1SA 12:12 Ani bu howa dege tígua handalu hemiria Kini Nahasa Amonoali biagome tí minalu bolene kaware wiago hondowa Anduane Homogo tínaga kini helarimigohondo manga harimi. Ani buwa tígua i̱hondo lalu, Ina haru helo kini mbira hamelo kama, larimi, lene.
1SA 12:13 Ani larimigoni áyu kini tíni dabarimigo o kagonigo tígua ibu helo dabo ngi lalu hale harimigo áyu Anduane Homogohanda tíhondo ngiyadagoni.
1SA 12:14 Ani bidago tígua Anduane Homogo tínaga Ngode Datagaliwabenaga mini yaraga halu harimiyaguabi ibunaga biabe bialu ibugua bi larago hale halu ibunaga bi lo ngadaguaore biai halu tíguabi tínaga kini kagomebi Ngode Datagaliwabe talima pialu harimiyaguabi tígua mbirale bibahende damene beramigo bayale hangu hai holebira.
1SA 12:15 Ani nabi howa Anduane Homogohanda bi larago hale nahe ibugua bi lo ngaru mo wahalu harimiyagua ibugua tí bababi tínaga kini bababi turu nahe waitigi ho holebira.
1SA 12:16 Ani bulebirago o kamigoriani haho widaba. Ani howa handalu kamiria Anduane Homogohanda gibi daliga ngaru bulebirago áyu ogoni de hondoleberemi.
1SA 12:17 Áyu gaeangi harimagobe ani ndo harimabe. Aniyagua i̱na Ngode Datagaliwabehondo bi loleberogo ani larogola Anduane Homogohanda dalu hari dabala haru ibilelo. Ogonidagua birago hondowa tígua Anduane Homogohondo kini mbira tínaga haru haga helo dabo ngi lalu ibuhondo hale harimigo ogoni mana ko timbuni bialu harimadalo manda buleberemi, lene.
1SA 12:18 Ani lowa Samuelehanda Ngode Datagaliwabehondo bi layagola horo ogoningi dege Anduane Homogohanda dalu hari dabala haru ibilene. Ani biyago hondowa wali agali bibahende hearume Anduane Homogobi Samuelebi hondowa gi tara hene.
1SA 12:19 Ani bu howa tigua Samuelehondo lalu, Agali haguane-o ina nahomoloma̱ya Anduane Homogo í̠naga Ngode Datagaliwabehondo inanaga bi lahabe, lene. Ani lowa tigua lalu howa, Iname áyu manda bialu mana ko bibahende maru birimaru bu tago halu mana ko mbira kini mbira ngi lalu hale harimagonida, lene.
1SA 12:20 Ani larimigola Samuelehanda ladai bialu howa lalu, Gi nahalimu. Tígua ko ngubiore mbira bia birimigonigo Anduane Homogo dege yu wahalu handa tara nahe howa ibunaga biabe gubaliniore howa bialu halimu.
1SA 12:21 Ani bialu dama mbirale gime wabiniru talima napilimu. Uruni ti henene ndo gime wabini kagome tí biamogobi pele miabi heba nabulebira.
1SA 12:22 Ani bidago Anduane Homogohanda habo nalolene bi lo ngagome lalu, I̱na tí yu wanaholebero, leda. Ogoni irane tí ibuninaga wali agaliore halimulo manda bu wini ngago tí wa naholebiraore.
1SA 12:23 Ani bidago i̱na Ngode Datagaliwabehondo tínaga bi la naharuyagua Anduane Homogohanda i̱hondo ko bere lolebira. I̱na tíhondo bayale ogogo bilimu ko ogogo nabilimu lalu dabalimulo dege lawai holiya, lene.
1SA 12:24 Anduane Homogohanda bilimulo lo ngadagua bialu ibunaga biabe mini bilina howa gubaliniore halu bilimu. Ibugua gibi wiaru tínaga bia hama piyaru bayuwa manda buwa halimu.
1SA 12:25 Anigo tígua mana ko bialu harimidagua biaho wiaabo harimiyagua tíbi tínaga kinibi bo hilo wahai holebira, lalu Samuelehanda lai hene.
1SA 13:1 Solo ibu kini helo dabenedagoni ibu agali mini dingi dangialeni ibu ai̱yahanda hono wiyangi howa hama ibalu henego mali pira tebira (30) pene heagola dabene. Ibugua kini howa Isaraele wali agali mali pira mariani kira (42) haru hene.
1SA 13:2 Ogoningi Solohanda Isaraele agali daosini tebira (3,000) wai pole tidiyu hene. Daosini kirago (2,000) ibuni heba Migimasa tano Bedele dindi hari bare dege dindiha wiagoriani hadai bilene. Ani bialu daosini tebonego (1,000) Solo ibu igini Yonadana heba Gibea dindi Beniyamini hameigini daluhayagi tidiyalu pelene. Ani bialu Solohanda, Agali maru tíni andaga dai bidaba, lene.
1SA 13:3 Yonadanahanda Pilidia ami agali Geba dindini hearu minalu bo wahene. Ani biyago hale howa Pilidiali bibahendeme keba haiho hene. Ani buwa heagola Solohanda agali marume bi yalu pialu Hiburuali hearu olo pehalu wai bule mbelo biguli dindi bibahendeni pulame helo, Hondo pudaba, lene.
1SA 13:4 Solohanda Pilidia ami bo wahayagola Pilidialiru keba ho ka layago Isaraeleali ti hale howa hene. Ani bu howa agali bibahendeme Solohanda Giligalani mo ngoai hadaba lalu olayagola tigua hale halu ibalu ibu heba hogimbu bini.
1SA 13:5 Ani buwa heagola Pilidialiru ti nde Isaraelealiru baba wai bule mo ngoai ho hene. Ani bialu tigua wai biaga garo ale mini karisi nogo hosini gili lagane daosini pira tebira (3,000) wialu agali nogo hosini biruwa gerai lalu wai bulene daosini waragaria (6,000) halu ami agali aulolebe nalabehe iba angeni iba mu ale tidiyu halu bini. Ani buwa tigua tidiyalu Migimasa tano Bedabeneha ni tagira ibiragohayagi puwa ogoriani balai anda bu hene.
1SA 13:6 Ani buwa tigua Isaraeleali biaru bole lowa hongo gibi halu uruni mo ko howa badai bibe tobahe minalu bene. Ani biyagola Isaraeleali maru egeandaha puwa bira do halu maru gundu uli wiaruhabi dindi hau iba uli ege to̱le̱ wiaruha ibida puwa bira do hagahaga bini.
1SA 13:7 Maru Iba Yodana domalu ange edeyagi hameigini Gada Gileadala daluhayagi ubade halu pene. Solo ibu Giligalani haho winigo agali ibu baba hayarume gi howa duru dege dindi halu hene.
1SA 13:8 Solo ibu Samuelehanda ogoriani lola habiya layago ibilo lowa horo karu Giligalani hondo ho wini. Ani biaria Samuele ibu Giligalani naibi wiaabo hene. Ani biyagola agali biarume Solo helalu ti purogo lolebini.
1SA 13:9 Ani biyagola ibugua tihondo lalu, Mbirale bo lomabia howa delolenebi mbirale ina Anduane Homogola ho gimbu bulenaga bo lomabia ho mulenebi i̱ koria yalu ibidaba, lene. Ani layagola tigua yalu ibuwa ibuhondo miyagola ibugua bo lomabia ho delene.
1SA 13:10 Ani buwa áyu dege delomaro bialu heaore Samuele ibu anda ibini. Ani ibiyagola Solo ibu Samuelehondo turu halu lola hole pene.
1SA 13:11 Ani biaria dege Samuelehanda lalu, Í̠na agi bialu haribe, lene. Ani layagola Solohanda ladai bialu lalu, Agalime i̱ hangu helalu pialu í̠nabi ibule laridagua naibirigoni. Ani bialu Pilidialiru Migimasani mo ngoai howa ha bigi biyagola biru, lene.
1SA 13:12 Ani biyagola i̱na manda birugola Pilidia ami agalirume i̱ áyu Giligalani koria bole íbu daliragonida laru. Anduane Homogo ibugua agua bule manda bu kabe ibunaga hame nahende koore ibiragonida manda biru. Minime aguani manda buwa i̱na mbirale mbira bo lomabia howa mulene ibira haya, lene.
1SA 13:13 Ogonidagua layagola Samuelehanda ladai bialu lalu, Ogonidagua bialu haridagoni mini nawi howa bialu harida, lene. Í̠na Anduane Homogo í̠naga Ngode Datagaliwabehanda bibelo ngiyago mo wahowa bialu harida. Í̠na ibugua bibe layadagua bialu henedale nde ibugua í̠naga aguanene mani hararume Isaraele wali agali haru halu haho wiaabo helo henge ngidale.
1SA 13:14 Ai irane í̠na ibugua bibelo lo wiyadagua nabirigome í̠na haru haga harigoni áyu hamaro bulebere, lene. Ani bialu Anduane Homogo ibugua agali ibu hame ledagobi mbira ibunaga wali agali haru helo dabo aribia howa helolebira, lene.
1SA 13:15 Ani lamialu Samuele ibu Giligala tano yu wahalu Beniyamini dalu Gibea pene. Ani piyagola Solohanda ibunaga ami agali ibu heba hearu dagalo handalu hearia handari waragaria (600) ale heneya.
1SA 13:16 Ai Solobi ibu igini Yonadanabi libunaga agali biarubi balai anda buwa Beniyamini dalu Geba tanoni hene. Ani biagola Pilidialiru ti nde Migimasa tanoni balai anda buwa hene.
1SA 13:17 Howa Pilidiali ami tidi tebo wai taya pole anda bu paliyagoha howa íbu tagira pene. Tidi mbirago Obara tano wiago tigatiga Suala daluhayagi pene.
1SA 13:18 Tidi mendego Bedehorono tano tigatiga piyagola tidi tebonego Seboimu dindi guane wiagola dindi ko yobila tuni pu amu hene.
1SA 13:19 Ogoningi Isaraeleali hearu aria mbirame aeane timu yandarebi wabiaga mbira nahe hene. Nahenedago irane Hiburuali hearume wai biaga ayu tibu ne kirobahebi yandarebi mbira wabulilono Pilidialime mamage bayuwa haga hene.
1SA 13:20 Ani biaganego Isaraeleali tinaga mabu dindi aliaganebi ayu bigibi ayu pelebabi aeane nene garayabi ngarubi uruni bibahende mo tiga bilobi ne helobi Pilidiali ti karia hangu yalu piaga wini.
1SA 13:21 Ogoni biragonaga yolo ayu ne haragonagabi nogo bulumaga waraga ira homane luni mbira mo tiga biragonagabi yolo muni emene mbira miaga wini. Ani bialu muni kira mabu dindi aliaga aeanebi ayu bigi ne haragonagabi miaga wini.
1SA 13:22 Ani biaga wini biagoria wai bulene horo hayangi Isaraeleali biaru mbira giha ayu yandarebi mbira nayiore libu kirali Solola ibu igini Yonadanala libu hangu yandarebi ayu tibu ne kirobahe yu hene.
1SA 13:23 Ani biagola Pilidiali biarume, Ami agali tidi mbira Migimasa hariga dorogoneni hapai ho hole pudaba, lene.
1SA 14:1 Horo mbirungi Yonadanahanda agali daliahe mbira Yonadananaga wai biagane aleru yu heagohondo lalu, Iyame Pilidiali balai anda bu kagoriani ubade harabane, lene. Ani bule manda biribidagoni Yonadana ibu aba Solo nalamini.
1SA 14:2 Solo ibu Migirono dindini ira mini pomegaranade mbira heago andaneha ibunaga ami agali handari waragaria (600) agima biaru heba Gibea tano kaware ngelowa ogoriani balai anda bu hene.
1SA 14:3 Ogoningi loma binigo mo miaga Ahaya ibu Ngode Datagaliwabela bi lole howa aga mini ebodi karulaga winigo karulowa berene. Ibu Igabodi hamene Ahidubu igini hene. Ahidubu ibu Piniasa igini hene. Piniasa ibu Eli igini hene. Eli ibu Anduane Homogonaga loma binigo mo miaga Siloni halu bini. Ani binigo ogoningi agali harimirume Yonadanahanda ti yu wahalu penego ti manda nabi hene.
1SA 14:4 Migimasa pole hariga dorogone winigoria Yonadana ibu Pilidialiru balai anda bu heagoria ubade halu pole pene. Hariga dorogone ogoriani ege to̱le̱ dene bi̱a̱o̱le kira handa de̱le̱ buwa hariga abene tale buwa wene. Mbirago mini Bosese mendego mini Sene laga wini.
1SA 14:5 Mbirago ibu Migimasa handa amu howa hariga dorogone ogoriani gibunini wene. Mendego ibu gibuni mendeha Geba handa amu howa wene.
1SA 14:6 Ani biagoria howa Yonadanahanda agali daliahe biagohondo lalu, Pilidiali Ngode Datagaliwabe mitangi nabiaga ede balai anda bu kagoria ubade mba nalare. Anduane Homogohanda iya biamogo bulebira badago. Ibugua biamogo biyagua nde iya agali kirali hangu haribayaguabi ibunaga wayali holene iyahondo ngule binigo mbirale mbira agime ho hangai holebirabe, lene.
1SA 14:7 Ani layagola agali daliahe biagome ladai bialu lalu, Í̠na bule hame ledego ale bibiya i̱ iya haru kabagoni, lene.
1SA 14:8 Ani layagola Yonadanahanda lalu, Ogoni karulape. Iyame edegoriani pu banga bialu kabaria Pilidialiru tigua iya de hendelo.
1SA 14:9 De hondowa tigua iya kabagoria ibuluma̱ya ogoriani hondo hadaba layagua o kabagoriani hope habiya.
1SA 14:10 Ani ndo iyame ti kagoria ibidaba layagua ogoni Anduane Homogohanda wayali holene hongo ngidogoni lalu manane walia haragonigo iyame mbaliya, lene.
1SA 14:11 Ani lowa libuni Pilidialiru hendelo hapani haribi. Ani hebiria Pilidiali biarume libu hondowa lalu, Hiburuali maru gundu uliha bira do hayago ede tagira ibirago de handadaba, lene.
1SA 14:12 Ani lowa tigua Yonadanala agali daliahe biagola olade halu, Ogoria iname mbirale mbira langule yidamago languluma̱ya ibidaba, lene. Ani layagola Yonadanahanda agali daliahe biagohondo lalu, I̱na berodagua bibe. Anduane Homogohanda Isaraeleali wayali holene ngiyadago, lene.
1SA 14:13 Ani lowa Yonadanahanda hariga dorogone biagoriani gi ge hama iraga halu piyagola agali daliahe biagome piyadagua talima mama pene. Puwa Yonadanahanda Pilidiali biaru ho ibira hama piyagola agali wai biagane aleru yi biagome bo home lama aribia hene.
1SA 14:14 Yonadanala agali wai biagane aleru yi biago labome halu mbira pigane mabu tu mbiraoreni hangu minalu baribigoni agali pira kira (20) ale bo home laribiya.
1SA 14:15 Ani biya layago hale howa Pilidiali bibahende dindi leneha hama pearu gi gibi howa hene. Wai taya piaga biarubi ami agali biarubi balai anda bu hayaruni dindi bi lalu ema biyagola gi howa luluyu hai hene.
1SA 14:16 Ani biyagola Solonaga ami agali biaru ti Beniyamini dalu Gibeani howa handalu hearia Pilidiali biaru luluyu yalu gerai ibida pugupugu biyaria de hendene.
1SA 14:17 Hondowa Solohanda ibunaga agali ibu heba hayaruhondo lalu, Ami agali biaru mbira bereba ai hayadabe hondole dagalo handadaba, lene. Tigua ani layadagua dagalo handalu hemiria Yonadanala agali daliahe wai biagane aleru yu hayagola naheyane hendene.
1SA 14:18 Solohanda loma binigo mo miaga Ahayahondo lalu, Ngode Datagaliwabenaga Habo Nalolene Bi lo winigonaga Mbogoyi biago ogoria mo yalu íbu, lene. Horo ogoningi Ahaya ibu aga ebodi ogoni karulowa Isaraele wali agalinaga wanakuini pu bamba halu pene.
1SA 14:19 Solo ibu loma binigo mo miaga biagohondo bi lalu heagola Pilidialiru balai anda bu heagoha mo luluya hayago mo timbuniore hene. Solohanda loma binigo mo miaga biagohondo lalu, Anduane Homogo hale holenego horo henge nawida, lene.
1SA 14:20 Ani lowa ibunibi ibunaga ami agali biarubi ti haru tidiyu pialu Pilidiali baba wai bule pene. Pialu hearia Pilidialiru tini degedege lulu timbuniore yuwa tini yimi aleme bagabaga bialu badene bialu hearia hendene.
1SA 14:21 Hiburuali maru Pilidialihayagi henego ai ho beregedalu Solola Yonadanala heba hogimbu bialu Isaraelealihayagi hole daibini.
1SA 14:22 Isaraeleali maru Eberaimi hari bare wiaruha bira do hene biaru biruwa hale halu hearia Pilidiali biaru ibida gerai lalu pora layago hale howa tibi tagira ibalu Isaraeleali ti heba hogimbu buwa Pilidiali biaru minalu bama pene.
1SA 14:23 Ani bialu amuraore Bedabeneha ba amu halu bo pelene. Horo ogoningi Anduane Homogohanda Isaraelealiru biamogo timbuniore bini.
1SA 14:24 Isaraeleali biaru horo ogoningi tomo garibi lowa hongo nahe hene. Ogoni irane Solohanda bi mbira hongohe nabule lalu lowinigo ogoni agua lene. Mbirali áyu tomo mbira i̱naga waitigi agali pani bole ngogo badai nabidoore nalu hayagua ogoni ibu ha henego holebira, lene. Ani layagola horo ogoningi mbiralime mbirale mbira naneore hene.
1SA 14:25 Ani bu howa ti bibahende irabu wiagoria pialu hemira mone ibane aulolebe tobahe dewa do wiaria hendene.
1SA 14:26 Ira hama pearunaga mone ibaneme to̱lo tagi howa do wima pearia hondowa mbirame do na nabinigo ogoni irane ti bibahendeme Solohanda ha ho wiyago gi howa mbiralime mbira nadoneore hene.
1SA 14:27 Ani lo wiago Yonadana ibu abahanda agali mo gi halu ha hayadagoni ibu nahalehe hene. Ani bu howa ibugua ira kanogo mbira ibuni yu henego yamuwa mone ibane dendebi palu to̱lo tagi ho wiagoha pelowa maru dugu nene. Abale nayaore ibu mini dungu lalu tombe hene.
1SA 14:28 Ani buwa heagola ami agali hayaru aria mbiragome lalu, Ina tomo nane howa hongo nahe kamagoni í̠ abahanda ina mo gi halu lalu, Mbirali ibu tomo mbira áyu nayagua ogoni ibu ha ho wero lo nga, lene.
1SA 14:29 Ani layagola Yonadanahanda ladai bialu lalu, I̱ abahanda ogoni inanaga agali mo genda hole gibi mbira bialu heneda. I̱ kogo handadaba dungulo tombe howa kogoni irane i̱na mone ibane dendebi maru nowa ko.
1SA 14:30 Ai áyu inanaga agali karu tinaga waitigi hearu bo podalu tomo mo yalu ibirimaru nenedale nde tombe howa dungulo hama pedaleda. Ai nde tomo nowa hongo kagola tigua Pilidialiru auore lolebe tobahe bo bila kaledago manda bia handadaba, lene.
1SA 14:31 Horo ogoningi Isaraelealime Pilidialiru balu bo podama pu gimbu binigo Migimasa howa bama pialu Ayalononi bairi hene. Bairi hayagoria howa Isaraeleali biaru ai tomo nane hene biago ndobe garibi timbuni lowa hongo nahe hene.
1SA 14:32 Ani bu howa ai tini wai bialu howa nogo sibibi bulumagabi haru íbu helarimigoria gerai abale pene. Puwa nogo sibibi bulumagabi haru íbu helarimigoria yani howa abale balu bo podo baga buwa mbirini wiaru abale darama heaore dawa nalu hene.
1SA 14:33 Ani bialu heago ti maru hearume Solo lamialu lalu, Agali o karume Anduane Homogohondo mana koore bialu nogo mbirini wiaru darama kaore nalu kago de handa, lene. Ani layagola Solohanda ga̱ ladaga halu lalu, Tí Ngode Datagaliwabenaga mana pugualu ko biaga kamigoni. Ege to̱le̱ timbuni mbira duguwa i̱ kogoria pendo pendo ibiladaba, lene.
1SA 14:34 Ani lowa bi mende lalu, Agali karuha puwa tinaga nogo sibibi bulumagabi haru halu bibahende ogoria ibidaba lole pudaba. Tigua nogo uruni ogoria balu podo baga buwa dawa nai helo. Tigua Anduane Homogohondo mana koore bialu nogo mbirini darama heaore nayadagua nolene nawiore, lene. Ani layagola mbiraga ogoningi ti bibahendeme tinaga bulumaga biaru haru halu ibuwa ogoriani bo podo baga bini.
1SA 14:35 Ani biyagola Solohanda Anduane Homogohondo bo lomabu mulene dabu mbira pigane ogoningi bu helene.
1SA 14:36 Ani buwa Solohanda agali ibu heba hayaruhondo lalu, Ai áyu mbiraga Pilidialiru karia daluwa minalu bo hengedai halu mbira yu wanahelogo bibahendeore bo yulo waore halu kamaria egabile lami̱ya ma nalaramigo, lene. Ani layagola tigua ladai bialu lalu, Í̠na bulene bayaledane hendedego ale biai habe, lene. Ani leagola dege loma binigo mo miaga heagome lalu, Iname Ngode Datagaliwabe ala hale hami̱ya, lene.
1SA 14:37 Ani layagola Solohanda Ngode Datagaliwabehondo hale halu lalu, I̱na Pilidialiru minalu bolenego karulapedabe. Iname wayali holoma̱ya hongo ngulebe, lalu hale hene. Ogonidagua lalu hale hayadagoni hale helowa Ngode Datagaliwabe ibugua horo ogoningi dege ladai nabi hene.
1SA 14:38 Ani biagola Solohanda agali haru haga haguane hearuhondo lalu, Ogoria ibuwa mana ko mbira áyu agi binidabe dabo handami̱ya, lene.
1SA 14:39 Ani lowa ibugua buleorego lalu, Mbira Anduane Homogo haluhe kago ibugua Isaraelealiru wayali helo pele miaga kagonaga minini mbirali ibu mana ko ogoni bu kayaguabi i̱ni igini Yonadanayaguabi homelo bolene wulebira lowini, lalu lene. Anidagua layagola mbiralime mbira nale bi hundu wini.
1SA 14:40 Ani bu wiagola Solohanda tihondo lalu, Tí bibahende edegoria heyu hadaba. I̱ igini Yonadana iya nde ogohayagi heyu harabago, lene. Ani layagola tigua ladai bialu lalu, Í̠na bulene bayaledane hendedego ale biai habe, lene.
1SA 14:41 Solohanda Anduane Homogo Isarelealinaga Ngode Datagaliwabehondo lalu, Anduane Homogo-o í̠na i̱hondo áyu ladai nabi kego irane agibe. Anduane Homogo Isaraelealinaga Ngode Datagaliwabe-o í̠naga ege to̱le̱ mini Urimu Tumimula lomabia hene ngagoriani howa i̱hondo ladai bibe. Mana ko ogoni i̱na biniyaguabi Yonadanahanda biniyaguabi ogome biya lalu ege to̱le̱ mini Urimu lalu ladai bibe. Ndo í̠naga Isaraele agalime ko biniyagua ege to̱le̱ mini Tumimu lalu ladai bibe, lene. Ladai biyagola handalu hearia mana ko biagoni Yonadanala Solola libugua biniyane handalu agali ti ndoyane hendene.
1SA 14:42 Aniyagola hondowa Solohanda lalu, I̱ igini Yonadanala i̱la iyane manda bu hondolobaya, lene. Ani lowa handalu hebira Yonadana ibuyane handa walia hene.
1SA 14:43 Aniyagola Solohanda Yonadanahondo hale halu lalu, Í̠na mbira agi bu kebe, lene. Ani layagola Yonadanahanda ladai bialu lalu, I̱na mone ibane emene hangu mbira ira kanogo yu harugome duguwa naru. Ai i̱ o kogonigo i̱ni homole manda bu ko, lene.
1SA 14:44 Ani layagola Solohanda ibuhondo lalu, Í̠ bo home nalayagua nde Ngode Datagaliwabehanda i̱ bo home lolobada, lene.
1SA 14:45 Ani layago lelowa agali hearume Solohondo lalu, Yonadana ibugua Isaraele agali wai bialu wayali helo hongo howa haru hayago bo home lolebira laribe. Ndoyago. Iname Anduane Homogo haluhe kagonaga minini howa bilogoore lo weramago ibunaga haguaneni howa mandari gunguni mbiraorebi heba ereba naholebira larama. Ibugua áyu biyago Ngode Datagaliwabehanda biamogo biyagola biya, lalu lene. Ani layagola Yonadana homolene winigo agali biarume mo wialu pelene.
1SA 14:46 Ani biya handala mani Solo ibu Pilidialiru bo talima puabo nahe ti tini daluhayagi íbu dai biai hene.
1SA 14:47 Solo ibu Isaraele wali agali kini howa ibugua ibunaga waitigi bibahende hearu baba wai biame halu hene. Ibugua wai bialu henedaruni uru baba bini. Moabalibi Amonoalibi Idomoalibi Sobanaga kini hearubi Pilidiali hearubi wai biame halu bu wayali halu hene. Wai uruni bibahende baba bialu hayadagoni ibugua wai bialu wayali hangu hene.
1SA 14:48 Ani bialu ibugua wai yo hende elahe howa Amalege wali agali hearubi heba balu bo podalu wayali hene. Isaraelealiru bai hole biyaruni bibahende ibugua mo wiai hene.
1SA 14:49 Ogoningi Solo ibu igini Yonadana Isibi Malagisua imaru hene. Ani bialu ibu wane wahene mini Meraba biralu heyogoneore mini Migala berene.
1SA 14:50 Ibu one mini Ahinoama agali Ahimasa mbira henegonaga wane berene. Ani bialu ibunaga ami agali haru haga haguane henego mini Abane ibu Solo aba hamene mini Nere mbira henego igini hene.
1SA 14:51 Ani bialu Solo ibu aba Kisi hene Nere ibu aba Abane hene libu haru aba agali mini Abile mbira henegonaga igini hene.
1SA 14:52 Ani binigo Solo ibuni heangi Pilidiali baba wai gibi hongo howaore bialu hene. Ani bialu howa agali hongohebi elahebi mbira hearia handa walia hayago ibunaga wai biagane ami heba helo helatago bigi bini.
1SA 15:1 Samuelehanda Solohondo lalu, I̱ Anduane Homogo ibugua í̠na ibunaga Isaraele wali agali haru habelo weli ngabi tara haguaneni odo wia hole pu layago i̱ kogoni. Ani birugo áyu Anduane Homogo Hongo Haiheore kagome bi larago í̠na hale habe.
1SA 15:2 Áyu ibugua Amalege wali agali karunaga mamali hearume Isaraelealiru Iyibi dindi yu wahalu tagira ibiyagola tigua waitigi halu handabe manga hayagonaga ti tandaga nelo mulebira.
1SA 15:3 Ai í̠ áyu pialu Amalegealiru bibahendeore bo hilo wahaiore halu tinaga mbirale ngaru bibahendeore mo ko haiore hole pu. Ani bialu mbiraorebi mbira yu wa naholego wali agalibi wandari igiribi waneigini emene gali damene bibahendebi nogo kamelebi dongibi sibibi bulumagabi nogo uruni damene bibahendeore mbirago helo yu wa naholego homelo bo hilo wahai habe laya, lalu Samuelehanda Solo lamini.
1SA 15:4 Ani layagola Solohanda ibunaga ami agali biaru bibahende olowa Teleme tanoni dabo hendene. Handalu hearia ami agali Isaraele howa daosini handari kira (200,000) íbu halu Yuda howa daosini pira (10,000) íbu halu biaria hendene.
1SA 15:5 Hondowa Solohanda ibunaga ami agali heba Amalege tano timbuni wiagoria puwa iba piaga dindi yobi wiagoria bira do howa yu berene.
1SA 15:6 Ani bu howa ibugua Kenialiruhondo bi mbira agua lo pelene. Wali agali kamiru tínaga mamali henedarume Isaraele wali agaliru Iyibi dindi howa tagira ibiyangi tigua urunihondo turu halu bayale binigo aria kamiyagua Amalegealiru heba mandagi nahe wahalu abale tagira pilimu. Ani birimiyagua tí Amalegealiru baba bamaga halu naboliya, lalu lamini. Ani laya handala Keniali ti tagira pialu pene.
1SA 15:7 Ani peagola Solohanda Amalegealiru bo pehalu wayali hene. Wai bialu bama pu gimbu binigo ona ndo amuraore Habila howa Sua uyu ni tagira ibiragohayagi Iyibi dindi wiago tigatiga bama puabo hene.
1SA 15:8 Ani bialu Solohanda Amalegealinaga kini mini Agaga gime minu yalu wali agali bibahende bo homelai helene.
1SA 15:9 Ani bialu Solobi ibunaga ami agali biarubi tigua Kini Agaga bo home nale mo wini. Ani bialu nogo sibi bayale damenebi nogo sibi igini hungubalua damenebi bulumaga bayale damenebi bulumaga igini hungubalua damenebi bo hilo payabu wanahe helene. Ani bialu mbirale maru bayale damene wiaru mo ko nahe ngelalu ko habane nabulene damenego hangu dabalu mo ko hai hene.
1SA 15:10 Anduane Homogohanda Samuelehondo lalu,
1SA 15:11 I̱na Solo ibu haru haga kini helo hela larugo áyu i̱ genda ho ko. Ogoni ibugua i̱ erembira ngialu i̱na ibugua bilo lo wirudagua nabiyada, lene. Ani layagola Samuele ibu genda ho howa dugu bialu Anduane Homogohondo bi la ho wialu egabi lelene.
1SA 15:12 Ogoningi egerabagiore egabi layagola ibugua heyalu Solo tai bule pene. Puwa hale halu hearia Solo ibu Kamelo tano mbira winigoria ibuni mitangi bilonaga dabu mbira ibunime ogoriani buwa helalu Giligala dindi puabo halu piya layaria hale hene.
1SA 15:13 Puwa hearia Samuele ibu ogoriani pene. Pialu hearia Solohanda Samuele lola howa lalu, Samuele-o Anduane Homogo ibugua í̠hondo turu halu biamogo bilo. I̱na Anduane Homogohanda bi lo wiadagua bialu ho kogoni, lene.
1SA 15:14 Ani layagola Samuelehanda hale halu lalu, Aniyagua nogo bulumagarume gu̱ lalu nogo sibirume gi̱ga̱e̱ laruane hale kogo irane agidabe, lene.
1SA 15:15 Ani layagola Solohanda ladai bialu lalu, I̱naga agali hearume Amalegealirunaga haru hayada. Tigua nogo sibi bayale dameneru nogo bulumaga bayale dameneru í̠naga Anduane Homogo Ngode Datagaliwabe kagohondo bo lomabu mule lowa bo wahai nahe hela daibilalu maru bibahendeore bo wahaiore harima, lalu lamini.
1SA 15:16 Ani lamiyagola Samuelehanda lalu, Bi waha. Anduane Homogohanda áyu mbiraga mbira i̱hondo langiyago í̠ languliya hale ha, lene. Ani layagola Solohanda lalu, I̱ hale kogo o langi, lene.
1SA 15:17 Samuelehanda ladai bialu lalu, Í̠na manda bu handaregola i̱ agali mini lene ndo harudalo manda buwa keyaguabi í̠ Isaraele hameigini tara tara karunaga kiniore kolo manda bibe. Ani bialu Anduane Homogo ibugua í̠na Isaraelealinaga kiniore habe lalu weli ngabime haguaneni odo wia howa helayagoni ke.
1SA 15:18 Ani bialu ibugua Amalegeali mana ko biaga karuni bo hilo wahaiore hole pobe lene biagoni ke. Ibugua í̠hondo lalu wai bialu wali agali ogoriani karu bibahendeore bo hilo wahai halu wahabe layago kegoni.
1SA 15:19 Ani layago lelowa ogonidagua nabirigo irane agibe. Ani bialu mbirale damene mo ko halu bo haealo wahabe layago abale de hondo yalu gerai puwa kaguga pudadede bialu Anduane Homogo ibugua hame naleadagua birigo irane agibe, lene.
1SA 15:20 Ani layagola Solohanda ladai bialu lalu, I̱na Anduane Homogohanda bibe layadagua birudagoni. Ibugua, Pu, layadagua bialu Kini Agaga haru halu dai bialu Amalegeali bibahende bo hilo wahaiore harugoni.
1SA 15:21 Ani anigo i̱naga agaliru tigua nogo sibi bayale dameneru nogo bulumaga wangabe bayale dameneru tigua bo hilo wahai nahe haru halu pene. Baradagua tigua í̠naga Anduane Homogo Ngode Datagaliwabe kagohondo bo lomabu mule lowa Giligala tanoni haru halu ibiyadagoni, lene.
1SA 15:22 Ani layagola Samuelehanda lalu, Anduane Homogo ibugua hame ago ledabe. Ibugua ledadaguaore bulenegobe be mbirale bo lomabia halu mulene ngarube. Bayale bulene ngagoore ogo ibugua bibe laradaguaore bulenego hangu dunini. Mbirale nogo sibi bayalego ibuhondo bo mulenego dindiha.
1SA 15:23 Ani bialu ibuhondo doga ho holenego ko gamugamu biaga ale dege wialu tingini mine howa balagala holenego mana ko ngubiore dama gime wabinigohondo bi pupu wiaga ale nga. Ani bialu irane í̠na Anduane Homogohanda, Bibe, layadagua bule hame nalarigome ibugua í̠ kini habelo hame naledagoni, lene.
1SA 15:24 Ani layagola Solohanda ladai bialu lalu, E̱ i̱na mana ko ngubiore buwa haruda. Ai i̱na Anduane Homogohanda i̱na buliya lo wiago mo wahalu ani bialu í̠na i̱hondo, Ogodagua bibe, lalu langiriru nabiruda. Ani nabirudagoni irane i̱naga ami agali hearu hondowa gi halu tigua hame leadagua hangu biru.
1SA 15:25 Ani bialu harugo áyu í̠na i̱naga mana ko birudaruni la nabi embeda halu ai i̱na Anduane Homogo mitangi bialu lotu loliyanaga iya haru dai bibiya, lene.
1SA 15:26 Ani layagola Samuelehanda ladai bialu lalu, I̱ í̠la haru mandagi dai nabulebero. Í̠na Anduane Homogonaga bi lo wiago manga harigola ibugua nde í̠ Isaraele wali agalinaga kini haabo habelo hame naledagoni, lene.
1SA 15:27 Ani lalu bialu Samuele ibu beregedalu dai bule biyagola Solohanda ibunaga agani yaniho wiagola aga biagoni budini.
1SA 15:28 Ani biyagola Samuelehanda Solohondo lalu, Anduane Homogohanda Isaraele wali agali í̠na kini howa haru holenego áyu budu yalu puwa agali mbira tigabi í̠ ale ndo mbira heagohondo mo miya.
1SA 15:29 Isaraelealinaga Ngode Datagaliwabe Daliga taraore kago ibugua ke̱ nahagabi mini beregeda nabiagabi ka. Ani bialu ibu agali ale ndo howa ibunaga mini beregeda nabiaga kagoni, lene.
1SA 15:30 Ani layagola Solohanda ladai bialu lalu, I̱na mana ko ngubiore bialu haruda. Ani lowa dege halu mbira hangu i̱naga wali agali haru haga haguane hama pedarunagabi Isaraeleali bibahende karu wanakuinibi i̱ yo hondo nahe i̱naga mini mo yaraga habe. Ani bialu i̱na Anduane Homogo í̠naga Ngode Datagaliwabe mitangi bialu lotu loliyanaga iya haru dai bibiya, lene.
1SA 15:31 Ani layagola Samuele ibu Solola haru dai buwa Solo ibugua Anduane Homogo mitangi bialu lotu lalu hene.
1SA 15:32 Ani bialu heagola Samuelehanda lalu, Kini Agaga i̱ koria haru halu íbu, lene. Ani layagola Agaga gi howa duru lama ibu hearia pene. Pialu howa homoleneore gibidagolo ibuni hangu mitangitangi bima pene.
1SA 15:33 Ani biagola Samuelehanda lalu, Í̠naga wai biagane ayu tibu ne kirobahe biagome ai̱ya dewa waneigini nahe berelo berelarigo ai áyu í̠ ai̱yabi waneigini nahe birulebira, lene. Ani lowa ibugua Agaga Giligala tanoni bo lomabu delagane dabu biagoriani buhayagi howa bo podobaga bini.
1SA 15:34 Ani bialu Samuele ibu Lama dindi pialu Kini Solo ibuni andaga Gibea pole pialu hene.
1SA 15:35 Ani bialu Samuele ibu haho wiangi kini biago ibu lone de nahende ibunaga dara dege ho wia halu hene. Ogoni Anduane Homogo ibuguabi Solo Isaraele wali agalinaga kini helo mo helarugo darabi bialu haruda manda bini.
1SA 16:1 Anduane Homogohanda Samuelehondo lalu, Í̠na Solonaga dara howa mitangi bu kene dege lu agua ale ho holeberebe. I̱na ibu Isaraele wali agalinaga kini helo hame nale hondo waharugo ka. Ani bidogo áyu í̠na ira olibe lininaga weli maru hambu yalu Bedelehemeni puwa agali mbira mini Yasi kago karia pobe. Poregola i̱na ibu igini mbirago kini helo dabedogo holebira, lene.
1SA 16:2 Ani layagola Samuelehanda ibuhondo haleho dai bialu lalu, I̱na ogonidagua agua bialu buliyadabe. Solo ibu ogoni hale hayagua ibugua i̱ bolobadago, lene. Ani layagola Anduane Homogohanda ibuhondo ladai bialu lalu, Nogo bulumaga igini hungubalua kago mbira haru halu pobe. Puwa agua labe, I̱ ogoria íbu kogoni Anduane Homogohondo mbirale mbira bo lomabu mule ko, labe.
1SA 16:3 Ani lowa Yasi í̠na mbirale bo loma bialu kegoria ibilo, Íbu, labe. Ibu kagola í̠na mbira bulene ngago ogodagua bia lalu languliya. I̱na agali mbira kini helo ogo lalu mini larogo í̠na ira olibe lininaga ibane haguaneni odo wia habe, lalu Anduane Homogohanda Samuele lamini.
1SA 16:4 Samuele ibugua Anduane Homogohanda bibe layadagua bialu Bedeleheme pene. Dindi timbuni ogoriani wiagonaga haru haga haguane hearume Samuele ibiyagola ti lola hole gi howa durulo yalu ibuwa ibuhondo hale halu lalu, De gandeba handaga-o í̠na ogoria ibiridagoni mo palia hole ibiribe, lene.
1SA 16:5 Ani layagola Samuelehanda ladai bialu lalu, E̱ i̱na ibirudagoni Anduane Homogohondo mbira bo lomabia ho mule íbu ko. Ani bule íbu kogonigo tíni Anduane Homogonaga deni dodo nahe bayale helonaga mana bialu howa i̱ porodagua mali̱ya ibidaba, lene. Ani lalu ibugua, Yasi í̠bi í̠ iginiru tíbi tígua Anduane Homogonaga deni dodo nahe bayale helonaga mana bialu mbirale bo lomabia harogoria ibidaba, lene.
1SA 16:6 Uruni tigua ogoriani anda íbu heagola Samuele ibugua Yasi igini Eliaba de hondowa ibuni dege mitangi bialu, Agali o Anduane Homogonaga wanakuini heyu kagoni heneneore ibugua dabene biago ogonida, lo mitangi bini.
1SA 16:7 Ani mitangi bu heago hondowa Anduane Homogohanda Samuelehondo lalu, Agali luni baya dombaraleda lalu tiga nahandabe. I̱na ibu hame nale kogo irane i̱na agalime dabagadagua ndo dabaruli. Agalime dongone tagirahayagi hangu de handaga kago i̱na bu habaneha de handaruli, lene.
1SA 16:8 Ani layagola Yasihanda ibu igini Abinadaba olowa Samuele hearia haru halu ibini. Ani biago bilowa Samuelehanda lalu, Ibu ndo. Anduane Homogo ibugua ogoni ibubi nadabeda, lene.
1SA 16:9 Ani layagola Yasihanda Sama haru halu ibini. Haru ibiyagola Samuelehanda lalu, Ogonibi ndo dege Anduane Homogohanda ibubi nadabe, lene.
1SA 16:10 Aguani dege bima pialu Yasihanda ibu igini karia biaru bibahende Samuele hearia haru halu ibai hene. Ani biyagola Samuelehanda Yasihondo lalu, Ndo. Anduane Homogohanda uruni bibahende nadabene hanguda, lalu lamini.
1SA 16:11 Lamuwa Samuelehanda Yasihondo hale halu lalu, Í̠ igini maru kabe, lene. Ani layagola Yasihanda ibuhondo ladai bialu lalu, Mbiraore heyogone dege ha kago ibu tagirani nogo sibi haru harua, lene. Ani layagola Samuelehanda lalu, Ogoria ibabe lalu lamibe. Mbirale bo lomabia hole birimagoni nabi howa ibu ibiragola bimi̱ya, lene.
1SA 16:12 Ani lowa heagola Yasihanda igiri heyogone biago Samuele hearia ibilo, Mbiralime damu pu, lene. Ai igiri biago ibiyagola handalu hearia ibunaga tingini baya dombarale igiri daliaheni ibunaga de wále bayaore hearia hendene. Handalu hearia Anduane Homogohanda Samuelehondo lalu, O biagoni kagonigo ibunaga haguaneni olibe lininaga weli odo wiaha, lene.
1SA 16:13 Ani layagola Samuelehanda Debidi hamene hearunaga wanakuini haru bambaho helowa olibe lininaga weli biago yamuwa Debidinaga haguaneni odo wini. Ani biyaore Anduane Homogonaga Dinini ibugua Debidi haru halu ogoningi howa ibu heba halu haho wini. Ani biya handala Samuele ibuni Lama tano dai bini.
1SA 16:14 Anduane Homogonaga Dinini ibu Solo yu wahalu piyagola dama mbira Anduane Homogohanda ibula helo ibilo henge miyagola ibuwa Solo ibu mo lulu yu hene.
1SA 16:15 Ani buwa heagola ibunaga biabe biahaga hearume ibuhondo lalu, Ngode Datagaliwabehanda dama ibilo henge miyagome í̠ mo lulu ya halu kagoda lowa ina manda bu harima.
1SA 16:16 Ani biyadago agali haguane-o ogoni agua bialu mo tiga bulene nga lalu langibe. Langeregola iname agali mbira ga̱wa̱ timbuni ale laga mbira ai kabe handalu tai buluma̱ya. Dama í̠ni íbu kagoni agali ogoni ibugua ga̱wa̱ laragola í̠ lone karulape holebere, laya.
1SA 16:17 Ani layagola Solohanda agua bidaba laya, Agali mbira ga̱wa̱ bayaleore laga kago tai bialu i̱ koria haru halu ibalimu, laya.
1SA 16:18 Ani layagola Solo ibugua bi layago hale ho hayaru aria mbirame lalu, Bedeleheme tanoni agali Yasi kagonaga igini mbira kago ogoni ibugua ga̱wa̱ ladebe haga mbira ka, lalu lamini. Igiri ogoni ibu gi nahaga elaheni agali tingini baya dombarale mbira ka. Ani bialu ibu ami agali baya howa bi bayale lolene mbira ka. Ani bialu Anduane Homogo nde ibu heba ka, lene.
1SA 16:19 Ani biyagola Solohanda marume ibunaga bi yalu Yasi karia pelo tihondo lalu, Agua lalimu. Í̠ igini Debidi nogo sibi haru haga biago i̱ koria ibilabe lalu lamilimu, lene.
1SA 16:20 Ani layagola Yasihanda Debidi nogo meme igini hungubalua mbira heba nogo dongi erembirani mberedi hirini wiaru heba iba be nogo dongoneme wabini wiaruha waini iba heba hambu to̱lo yalu Solo hearia pelo, Pu, lene.
1SA 16:21 Ani biyagola Debidi ibu Solo hearia puwa ibunaga biabe biahaga hene. Ani heagola Solohanda Debidi gubalini timbuni howa ibunaga wai biagane aleru yuha haga agali helo dabo helene.
1SA 16:22 Ani helowa Solohanda Debidiore gubaliniho ko lalu Yasihondo bi mbira lo pelene. Ani bialu Debidi ibu Solo heagoha helo ogoriani hela lene.
1SA 16:23 Ogoningi howa dama Ngode Datagaliwabehanda Solo ibu karia ibilo henge midangi Debidi ibunaga ga̱wa̱ yamuwa laga hene. Ani biragola dama Solo ibuha hayago wahalu tagira pialu poragola Solo mini ibalu bayale ibuni abale hayagobi hodai biaga hene.
1SA 17:1 Pilidialiru wai bule lowa Sogo tano mbira Yuda dindini winigoria mo mogo buwa hene. Tigua dindi Sogo Asegala hengeneni dindi mbira mini Ebesedamimu winigoria balai anda bu hene.
1SA 17:2 Ani biagola Solobi Isaraeleali biarubi ti nde tidiyuwa Ela dindi uluni wiagoria balai anda buwa Pilidiali baba wai bule manda manda bu hene.
1SA 17:3 Ani buwa heagola Pilidialiru tidiyu hari bare mbirani ho dabadaba heagola Isaraeleali ti bare mendeni tidiyu dabadaba howa dindi uluni wiape heagome mo tu wia heagola hagahaga bini.
1SA 17:4 Agali mbira mini Golaidi ibu tano Gede wiagoha howa Pilidiali balai anda bu heagoha howa tagira ibalu Isaraele baba wai bia hondole ibini. Ibu agali lu gibiore ge magi mida tebira ale hene.
1SA 17:5 Ani bialu wai biagane aleru ege to̱le̱ mini boronosime wabinigo aga karulagadagua ibunaga tinginini haguanenibi ogoni genda timbuniore howa karulo hene.
1SA 17:6 Ibunaga ge dulinibi ege to̱le̱ boronosime wabini wiagome karulo dambi ho hene. Ani bialu yandare mende ale yabiabi kaundia polene boronosime wabini mbira yandare hanagaha honowa payani henene.
1SA 17:7 Ani bialu ibunaga yandare mende ale nguni de bi̱a̱o̱leni toheore yu halu ibunaga aeane manda dehe gendabiore karulo halu bini. Ani buwa heagola ami agali mbira ibunaga wai humbi yahagame bamba halu pene.
1SA 17:8 Golaidihanda heyu howa Isaraelealiru olade howa lalu, Ede tidiyu kamiru wai bule ibini ndobe. Solonaga garabaya biabe biahaga agaliru-o i̱ Pilidialiore ko. Agali tíni kamiruni aria mbira i̱la wai bulubaya abale dabalu ibiladaba.
1SA 17:9 Ani beremigola iyame wai bialu howa ibugua i̱ bo home layagua nde iname tínaga garabaya biabe biahaga holoma̱ya. I̱na ibu bo home laruyagua nde tí inanaga garabaya biabe biahaga halimulo.
1SA 17:10 Hale hadaba. I̱na áyu Isaraeleali baba hongo manda bia hondoliya. Tí mbirali i̱la wai bulubaya dabo ibiladaba, lalu lade hene.
1SA 17:11 Ogonidagua layago hale howa Solobi ibunaga wai biaga agali biarubi ti mogo lalu gi timbuni hene.
1SA 17:12 Debidi ibu hameigini agua hene. Ibu aba Yasi Ebarada dindi teneali howa Bedeleheme tano Yuda dindini wiagoha howa ibini hene. Yasi ibu igini halira hene. Solo ibu kini heangi Yasi ibuni agali waheore hene.
1SA 17:13 Ibu igini wahe tebirali ti Solo heba wai pole pene. Wahene Eliaba halu ibula palu bini Abinadaba halu ogoni ibula palu bini Sama halu ti pene.
1SA 17:14 Debidi ibu heyogoneore hene. Ani binigo igini wahene tebira biaru ti Solo heba ho hea handala
1SA 17:15 Debidi ibu Bedelehemeni ibu abanaga nogo sibiru de hondo hole íbu dai bigi biaga hene.
1SA 17:16 Egerebagi alendo Golaidihanda Isaraeleali hearuhondo wai bimi̱ya ibidaba lalu heane horo pira maria (40) pene.
1SA 17:17 Horo mbirungi Yasihanda Debidihondo lalu, Í̠na widi lini irani hirinigo ogoni nu mbira ale yalu mberedi homane pira mbira urubi mo yalu í̠ hameneru balai anda bu kagoria abale pu.
1SA 17:18 Ani bialu nogo bulumaga andu ibaneme wabini mini sisi pira wiarubi ami agali haru haga haguane kagohondo mibe. Ani bialu í̠ hamene uruni agua bialu kabe bayuwa hondowa ti bayale hearia de handaru lalu walia hole mbirale mbira mo yalu dai bibe.
1SA 17:19 Kini Solobi í̠naga hamenerubi Isaraeleali ami bibahende heba Ela dindi ulini wiagoria haame howa Pilidiali baba wai bialu ka, lalu lamini.
1SA 17:20 Egerebagi hayagola Debidi ibu abale heyalu ibunaga nogo sibi biaru mbiralime haru habe lalu tomo wiaru mo yalu Yasihanda pu layadagua pene. Ibu puwa balai anda bu heagoria anda pialu hearia Isaraele áyu dege tininaga wai hamani tagira pole wai huaro lama pialu hearia anda pene.
1SA 17:21 Pialu hearia Pilidiali amibi Isaraleali amibi wai hamani dindi mo wigiwigi buwa wai bule handa de̱le̱ buwa hagahaga bini.
1SA 17:22 Ani biagola Debidihanda tomo yalu piyago mbirale wu haga heagohondo mialu ibu abale gerai lalu wai bule hodugu bu heagoria puwa ibu hamene biaruhondo, Tí agua kamibe, lalu hale hene.
1SA 17:23 Ibugua hameneru heba bi lalu hearia Golaidi ibuwa Isaraeleali biaruhondo wai bimi̱ya ibidaba lalu laga biadagua dege lalu heago Debidi ibu hale hene.
1SA 17:24 Isaraeleali ti Golaidi hondowa gi timbuni howa gerai lalu ibida pene.
1SA 17:25 Isaraeleali tini degedege lagalaga bialu, Ni ibu kago de handadaba, lalu tini lade̱le̱ bialu hene. Ibugua ina yo handalu wai bi lalu kago hale hadaba. Kini Solo ibugua agali mbirame Golaidi balu homelaragohondo emena timbuniore mule laya. Ibunaga wanebi agali ogonihondo mule lalu dabu bilo lalu lowini. Ani bialu agali o biyagoni ibu hameiginiru ti muni dagiyibi nawilo lalu lowia dege bini, lalu tini lagalaga bialu hene.
1SA 17:26 Debidihanda agali ibunaga wanakuini hearuhondo hale halu lalu, Mbiralime Pilidiali ogoni bo homelalu Isaraelealihondo ko ngubi tagabi biragoni golope helayagua agali ogoni ibuhondo emena agi mulebira larimibe. Ani biyaguabi Pilidiali Ngode Datagaliwabe manda nabi ogonibime Ngode Datagaliwabe haluhe kagonaga ami agali o kagobi au bope holebe, lene.
1SA 17:27 Ani layagola tigua ibuhondo Golaidi bo homelarago ibuhondo agua bulebira lalu lamini.
1SA 17:28 Debidi hamene wahene Eliaba ibugua Debidi ibu agali uruni heba bi lalu hearia hale halu ibu keba timbuni howa Debidihondo lalu, Í̠ ogoria agi bialu kebe. Í̠naga nogo sibi wali agali nahagaruha hayaru aiwa haru kabe. Í̠ igiri emenedago í̠na mbira agi bule ibiribe. Í̠ bame wai birago hangu hondole ibirida, lene.
1SA 17:29 Ani layagola Debidihanda hale halu lalu, Ai i̱na agi birudabe. I̱na mbirale mbira halebi heba naholene wiaruabe, lene.
1SA 17:30 Ani lalu ibugua agali mende heagohondo ho beregedalu howabi bi ogonidagua dege hale hayagola ladai abale biyagola hale hayago dege hale hene.
1SA 17:31 Agali maru hearume Debidihanda bi layago hale howa Solo lamiyagola Solo ibugua lalu, Debidi ibilo damu pudaba, lene.
1SA 17:32 Íbu howa Debidihanda Solohondo lalu, Kini-o Pilidiali ogoni hondowa mbiralime gi holene nawigo i̱na áyu ibula wai bule polebero, lene.
1SA 17:33 Ani layagola Solohanda ladai bialu lalu, Í̠ aleme ibula wai agua bulebe nabule. Í̠ igiri emenedago ami agali bamba igiri emeneni howa hama ibini agali gibi ibu alela í̠la wai agua bulebe, lene.
1SA 17:34 Ani layagola Debidihanda lalu, Kini-o i̱na i̱ abanaga nogo sibi haru haruli. Haru koria budi ale gabua timbuni mini laionomebi biango dudu ale timbuni mini beamebi ibalu nogo sibi mbirago bo yalu piyagua
1SA 17:35 i̱na talima puwa minu balu nogo sibi biago mo wialu pelaruli. Ani bialu koria biango dudumebi budi laionomebi i̱ porabu para howa hayule bialu karia i̱na gime mani minuwa balu homelaruli.
1SA 17:36 I̱na budi ale laionorubi biango dudu ale bearubi baruligo ogonidagua Pilidiali Ngode Datagaliwabe manda nabiagame Ngode Datagaliwabe haluhe kagonaga ami agali mo tandaga halu kagoni i̱na ogonidagua dege boliya.
1SA 17:37 Anduane Homogohanda i̱ budi ale laionoru biango duduale bearumebi bo nolene winigo ibugua pele ngiyadagua Pilidiali ogonime i̱ nabelo pele ngulebirago manda bido, lene. Ani layagola Solohanda ladai bialu lalu, Karulapego pu. Anduane Homogo í̠ heba holebirago, lene.
1SA 17:38 Ani lowa Solohanda ibuninaga wai bule karulagane winiyaru Debidi karulelo mialu haguaneni karulagane boronosime wabini wiyago Debidinaga haguaneni karula halu wai bule tinginini karulaga ale mbira heba karula hene.
1SA 17:39 Ani biyagola Debidi ibu Solonaga wai biaga ayu tibu winiyago mo mialu tinginini wai bule karulayago heba karulo yalu pole manda bialu hearia ogoni ale mbira bu yu ibaga nabinigome bu yalu napobeheyane hendene. Ibugua Solohondo lalu, Uruni bu yalu wai bule pobe naheda. I̱ uruni ale mbira buwa hene ndo kogo, lowa o bu hayaruni bibahende golo wiai hene.
1SA 17:40 Ani buwa ibugua ibuninaga nogo sibi waraga gewa kango yu haga yiniyago yalu ege to̱le̱ mo̱lomo̱lo peyobigo hondowa duria iba emene piyayagoria howa ibuninaga nuha dugu hanalu bialu pene. Puwa aga aleme to̱le̱ pale lole manda manda bu yalu ibugua Golaidi lola hole pene.
1SA 17:41 Golaidi ibugua Debidi ibiyago hondowa ibu lola hole pene. Ani biyagola agali mbira Golaidinaga wai humbi yahaga biago ibu bamba halu pene. Puwa kawareore hapara howa
1SA 17:42 Debidi handalu hearia ibu igiri emene heago hondowa hondo mege bini.
1SA 17:43 Ibugua Debidihondo lalu, Gewa kango o yidegoni agi bule yidebe. Í̠na manda bu handaregola i̱ biango ka manda bidebe, lene. Ani lowa Pilidiali biagome ibunaga dama olalu Debidi ha hene.
1SA 17:44 Ani buwa ibugua Debidihondo lalu, Iyame bia handabiya íbu handa. Ani bialu í̠naga tingini i̱na nogo egarume nelo bo muliya, lene.
1SA 17:45 Ani layagola Debidihanda ladai bialu lalu, Í̠na i̱la wai bule wai biagane ayu tibubi yandare kirabi yalu eberego i̱na í̠la wai bule Anduane Homogo Hongo Haiheore Isaraeleali aminaga Ngode Datagaliwabe ogoni í̠na mege birigoninaga minini ebero.
1SA 17:46 Horo áyu ogoningiore Anduane Homogohanda í̠ i̱naga giha ya holebira. Ani biragola i̱na í̠ bo wahalu í̠naga ma pugu peholebero. Pilidia ami agali karubi homelo bai halu tinaga tingini i̱na nogo egarume nelo mulebero. Ani berogola wali agali dindi bibahendeni karume Isaraelealinaga Ngode Datagaliwabe heneda manda biai holebira.
1SA 17:47 Ani bialu bibahende ogoriani karume Anduane Homogo ibunaga wali agali wai biaga ayu tibu yandarebi uruni aleme pele mulene nawidane hendelo walia holebira. Anduane Homogo ibu wayaliore kago ibugua tí bibahendeore inanaga andaneha helolebira, lalu Debidihanda lene.
1SA 17:48 Ani layagola Golaidi ibu lone Debidi heagoha pu amu hene. Ani biyagola Debidi ibu nde abale gerai lalu Pilidiali wai tidiyu heagoha ibula wai bule pene.
1SA 17:49 Puwa ibunaga nuha gi ibira howa ege to̱le̱ hanayago mbira tagu yamuwa ogonime Golaidinaga embone tigatiga pelene. Ani biyagola ogonime puwa ibunaga wanakui tombe layagola haguane kuni bangu lalu Golaidi dindini ngui bidilo baga buwa ibira hene.
1SA 17:50 Golaidi bayago ogoni wai biaga ayu tibume ndo Debidihanda ege to̱le̱ emene mbira biago degeme aga aleha to̱le̱ pale lowa bope hene.
1SA 17:51 Bope howa ibu abale gerai lalu Golaidi wiagoria pene. Puwa Golaidinaga wai biaga ayu tibu yiagoni yamuwa Golaidi ibuninaga ma pugu pehene. Ai Pilidiali biaru tinaga wayali biago bo homelayago hondowa tini ibida pora bialu pugupugu bini.
1SA 17:52 Ani biyagola Isaraele agalibi Yuda agalibi ga̱lalu gerai lalu talima bama piaho wialu amura Gede dindi Egerono pabeni taliari hene. Ani biyagola Pilidiali uruni ibida pialu hearia maru hariga obeneni mo ko howa bo ibira ibira bima Saraimu pole hariga peagodagua piaho wialu amuraore Gedela Egeronolani bama puabo halu pene.
1SA 17:53 Isaraeleali biaru ti dai buwa Pilidialinaga balai anda bu hea handala piyagoha dabudabu wia handala piyiyaru mo yalu pene.
1SA 17:54 Ani bialu Debidi ibu Golaidinaga haguane mo yalu puwa Yarusaleme wali agali walia hole pene. Ani binigo Golaidinaga wai biagane aleru mo yayago dege Debidi ibuninaga balai andaha mo ngelalu pene.
1SA 17:55 Debidi ibu Golaidila wai bule lowa tagira piyago Solo ibu hondowa ami agali haru haga mini Abane heagohondo hale halu lalu, Abane-o igiri ogoni ibu ai iginidabe, lene. Ani layagola Abanehanda ladai bialu lalu, Kini-o i̱na manda nabialu nabido, lene.
1SA 17:56 Ani ladai biyagola Solohanda lalu, Aniyagua aidabe hondole pu, lene.
1SA 17:57 Debidi ibu Golaidi balu balai anda bu heagoria dai bialu hearia Abane ibugua Solo hearia haru halu pene. Debidi ibu Golaidinaga haguane gime yuwa dege hene.
1SA 17:58 Solohanda ibuhondo hale halu lalu, Igiri-o í̠ ai igini kebe, lene. Ani layagola Debidihanda ladai bialu lalu, I̱ í̠naga biabe bia haga Yasi igini Bedeleheme howa ibini kogoni, lene.
1SA 18:1 Solo Debidila libu bi lalu haribigoni lamaro bini. Ani buwa mani Solo igini Yonadana ibu Debidila mini mbiraore hayago hondowa ibugua Debidihondo gubalini taraore howa ibuni gubalini hagadagua hene.
1SA 18:2 Solo ibugua Debidi horo ogoningi howa ibuni andaga daibi nale ibu haru haho wiaabo hene.
1SA 18:3 Ani biyagola Yonadanahanda Debidi nenegeore haho wule lalu bi mbira lowini. Bi ogoni irane Yonadana ibu Debidioreni mini gubalinila paga howa ani lene.
1SA 18:4 Ani buwa Yonadanahanda ibunaga aga luni tara biagoni Debidi ibu golo mialu ibunaga wai biaga humbibi ayu tibubi danda timurubi nogo dongonebi uruni bibahende ibuhondo miai hene.
1SA 18:5 Ani biyagola Debidihanda wai hama bibahendeni wai bilo Solohanda pu layagoniha puwa ibugua wai budebe hai hene. Ani biyago hondowa Solohanda Debidi ibunaga ami agali haru haga mbira helo helene. Ogonidagua biyagola Solonaga ami agali hearubi haru haga hearubi ti turu howa hene.
1SA 18:6 Debidi ibu Golaidi bo homelalu ami agali biaru heba andaga íbu dai bialu hemiria tano bibahende Isaraele dindi wiaruni hangu hangu howa wali berearume Kini Solo lola hole ibini. Tigua turu taraore howa mali lialu irabetele kilinge̱le̱ laga alebi ga̱wa̱ ale marubi yuwa tigua iba gana turubiru lalu hene.
1SA 18:7 Ti mo ngoai howa harimidagoni howa walime iba gana lalu howa lalu, Solohanda agali daosini dewa dege bayagoyu Debidihanda daosini dewa bolanguaore howa bayagoni, lene.
1SA 18:8 Solo ibu o layadagoni hale howa hame naleore howa ibuha keba holene tagira ibini. Ani biyagola ibugua lalu, Tigua Debidihanda daosini auore lolebe tobahe balu i̱na daosini hangu baya larimibe. Aniyagua tigua ibu mani kini helo helole beremida, lene.
1SA 18:9 Ogoninaga Solo ibu nakarulape harudabe lowa ibugua Debidi horo ogoningi howa henge lalu agua homelabehedabe hondole de hondo hene.
1SA 18:10 Ani bialu hearia horo mendengi dama mbira Solo ibula haru ibaga bu helo Ngode Datagaliwabehanda henge mini. Ani biyagola ibuninaga anda tamuha biruwa agali lulume bi laradagua bialu bi lagimbu bialu berene. Debidi ibu nde horo bibahendeni ga̱wa̱ ale timbuni lalu biraga biadagua bereagola Solo ibu yandare mbira gime yu berene.
1SA 18:11 Ani bu biruwa Solo ibuni hangu bi lalu howa lalu, I̱na Debidi yandare ogome anda haila balu bo bolomogo buliya hondoha, lene. Ani lowa ibugua yandare yayagome haluki baamu halu hearia Debidi ibu abale igilo miyagola kirabali ko ba labolabo bini.
1SA 18:12 Ani biyagola Solo ibu Debidi hondowa gi timbuni hene. Ogoni irane Anduane Homogo ibu Solo yu wahalu peneyane ai Debidi heba kago hendene.
1SA 18:13 Anigo Solo ibugua Debidi ami agali daosini mbira (1,000) haru halu pubagi halu pelo pelene. Ani biyagola Debidihanda ibunaga ami agali biaruni wai bilo haru bamba halu pene.
1SA 18:14 Ani biyagola Anduane Homogo ibu heba heagome ibugua biyago bibahende budebe hai hene.
1SA 18:15 Solo ibu Debidihanda wai biyago budebeore hayago hondowa Debidihondo gi hayago ho timbuore hene.
1SA 18:16 Debidi ibu wai budebe helo haru haga baya mbira heago hondowa Isaraele wali agalibi Yuda wali agalibi bibahende hearume ibu gubalini timbuni ho hene.
1SA 18:17 Ani bialu Solohanda Debidihondo lalu, I̱ wane wahene Meraba o bedagoni í̠ one berelo hado nguliya í̠na i̱naga wai bia haga ami agali elahe mbira halu Anduane Homogonaga wai bibe, lene. Solo ibu ani manda bialu ogonidagua berogola Pilidialime Debidi belo ibunime nabole manda buwa ani lene.
1SA 18:18 Ani layagola Debidihanda ladai bialu lalu, I̱ ai kobe. I̱ kini imane holene i̱ aba ai̱ya ago aria howa holiyabe, lene.
1SA 18:19 Ani lowa hearia Meraba Debidi hado mulene horo biago tagira ibiyagola Debidi hado nami agali mbira Mehola howa ibini heago mini Aderele hado aribia halu mini.
1SA 18:20 Ani biyagola Solo wane Migala ibu Debidi hamelo aribia hene. Solo ibu ani bida layago hale howa turu ho hene.
1SA 18:21 Ani bu howa ibuni hangu bibi lalu howa lalu, I̱na Migala Debidi hado muliya. Ani bidogola ibu Pilidialime belo i̱ wane ogoriani gono wuliya, lene. Ani lowa Solohanda halu mendengi Debidihondo lalu, Í̠ i̱ imane holebere, lalu lamini.
1SA 18:22 Ani lowa ibunaga haru haga haguane hearuhondo, Debidi ibuni hangu karia puwa bi lamule pudaba. Puwa kinibi ibunaga haru haga karumebi ti bibahende í̠ hamelo hai kamago ibu wane ogoni dabu bulene horo henge áyu ngagoni, lene.
1SA 18:23 Tigua Debidihondo ogonidagua lalu lamiyagola ibugua ladai bialu lalu, Kininaga imane holenego gibi daliga mini lene ogonibigo emene yagibano i̱ aleme agua holedabe, lene.
1SA 18:24 Ani layagola haru haga biarume Debidihanda layagodagua Solohondo lo yalu ibuwa lamini.
1SA 18:25 Ani biyagola Solohanda tigua Debidihondo agua lole pudaba lalu lamini. Ibugua lalu, Kini ibugua hame ledago ogonigo wali wariabu maru ale nabulego biradagua Pilidiali waitigi agali handari mbira (100) pani bo homelowa tinaga dongone podo mabu bialu yalu ibabe, lene. Ogoni Solohanda Debidi Pilidialime belo nde lowa ogonidagua bialu manda manda bini.
1SA 18:26 Solonaga haru haga biarume Solohanda ogodagua laya lalu Debidi hearia loyu pene. Ani biyagola Debidi ibu kininaga imane holeyagola turu tara howa hene. Dabu bulene horo kaware ngelowa
1SA 18:27 Debidi ibunaga ami agali heba puwa Pilidiali handari kira (200) bo homelene. Ani buwa Pilidiali agali bo homelayarunaga dongone bibahendenaga podo mabu bialu yalu kini hearia puwa dagalo miai hene. Ibugua ogonidagua biruyagua kininaga imane holebero bada lowa ani bini. Ani biyagola Solohanda ibu wane Migala Debidi dabu bilo mini.
1SA 18:28 Solo ibu bayuwa manda bialu hearia Anduane Homogo ibu Debidi heba ka manda bialu ibu wane Migalahandabi Debidi hamelo bereago manda bialu bini.
1SA 18:29 Ogoninaga Solo ibu Debidi hondowa gi timbuni howa ibu headangi howa libu waitigi haho wini.
1SA 18:30 Pilidiali ami dewaore ibalu wai bia dege biagago wai bibahendeni Debidi ibu wayali haabo halu ibugua wai budebe hai hayagola Solonaga ami agali biaru ti wayali ogonibi ndo emene dindiha hene. Ani dege bialu heane Debidi ibu agali mini lene mbira tagira ibini.
1SA 19:1 Solohanda ibu igini Yonadanabi ibunaga haru haga agali bibahendebi tihondo lalu, I̱na Debidi homelo bole manda bialu ko, lalu lamiai hene. Anigo Yonadana ibu Debidi hame lowa
1SA 19:2 ibugua Debidihondo lalu, I̱ abahanda í̠ homelo bole manda bialu kago yawi egerebagi bayuwa de handalu hogorale buwa dindi de nahandabehe mbirani puwa ogoniha ha do ho habe.
1SA 19:3 Ani bidegola i̱na i̱ aba mabuni í̠ bira do kegoriani holebirago ogoriani ibu kagoria puwa ibuhondo í̠ lalu mbira laguago. Ani lowa i̱na mbirale mbira handa walia haro alego í̠hondo manda bibelo languliya, lalu lene.
1SA 19:4 Ani lowa Yonadanahanda Solohondo Debidinaga mini yaraga halu lalu, Aba-o í̠naga biabe bia haga Debidihondo mana liahe mbira nabibe. Ibugua í̠hondo mana liahe mbira bini nawiore howa ibugua biyaru damene bibahende í̠ biamogo bialu timbuni daliga mbira biyagoni.
1SA 19:5 Ibuni homoleneoreni howa ibugua Golaidi balu home layagoni. Ani biyagola Anduane Homogohanda Isaraeleali wayali helo hongo daliga mini. Ogoningi í̠ de hondowa turu ho harigoni. Ai áyu irane aginaga í̠na agali mbira ibu mana liahe mbira nabi kagoria iraneore mbira nawini tigua Debidi balu home loleberemibe, lene.
1SA 19:6 Yonadanahanda bi ogonidagua layagome Solonaga bu mini mo palia hayagola ibugua Anduane Homogonaga minini bule lalu bi mbira lo wialu howa ibugua lalu, Debidiore homelo nabolebero, lene.
1SA 19:7 Ani lo wiyagola Yonadanahanda Debidi olowa ibuhondo mbirale bulenego bibahende lamiai halu ibuni Solo hearia haru halu pene. Ani biyagola Debidihanda Solonaga biabe abale bialu hene biadagua dege bini.
1SA 19:8 Ani bialu heagola Pilidiali baba wai lone hadalu bini. Ani biyagola Debidihanda wai lone wayali halu ibugua ti balu bo poda hanaore hayagola ti ibida piai hene.
1SA 19:9 Horo mbirungi hayagola dama mbira Solo ibu mo luluya halu haru helo Anduane Homogohanda henge mini. Solo ibu yandare mbira gime yuwa ibuni andaga tamuha berene. Ani biagola Debidi ibu nde ga̱wa̱ ale timbuni mbira lalu ogoriani berene.
1SA 19:10 Ani biaria Solohanda Debidi yandare yu birayagome anda haila bapara hole balu hearia Debidihanda igilayagola yandare biago pialu anda haini bilina hene. Ani biya handala Debidi ibu ibida pora bialu pu yola hene.
1SA 19:11 Mbiraga ogoningi Solohanda agali maruhondo lalu, Debidi andagani puwa mamage ho halu egerebagi egabi laragola balimu, lene. Debidi ibu one Migalahanda ibuhondo lalu, Í̠ áyu mbiraga ibida pu yola halu napiriyagua yawi í̠ homaore bule kegoni, lene.
1SA 19:12 Ani lowa ibugua anda windo mbira heagoha pulimuni ibida yola halu pene.
1SA 19:13 Ani biagola Migalahanda mbirale bi pupu wulenaga gime wabini agali ale wiago muwa Debidi tamu paliaga dagiani nogo meme irinime wabini mbira haguanda helowa dambi haga mbirame bu dambi howa palelene.
1SA 19:14 Ani biaria Solonaga agali maru Debidi minule ibalu hearia Migala ibugua tihondo lalu, Ibu warago bo nga, lalu lamini.
1SA 19:15 Ani bida layago lelowa dege Solohanda lalu, Debidi tínime de hondo dai bidaba, lene. Ibugua tihondo lalu, I̱na balu home loliyago ibuni tamu paliagane ogoniha howa minu yalu ibu tagira ibalimu, lene.
1SA 19:16 Ani layagola tigua anda puwa handalu hearia mbirale bi pupu wulenaga gime wabini mbira o tamu dagia ibu paliagane biagoria nogo meme irinime haguandaha howa pali aribia helearia hendene.
1SA 19:17 Hondowa Solohanda Migalahondo hale halu lalu, Í̠na i̱ mo hondo halu i̱naga waitigi biagoni ibida pu yola heledegoni irane aginagabe, lene. Ani layagola ibugua ladai bialu lalu, I̱na ogonidagua bialu ibu biamogo bialu pu yola halu napelaruyagua í̠ homelo bo waholiya layagola biru, lene.
1SA 19:18 Ani biya handala Debidi ibu ibida pialu Samuele hearia Lama dindi puwa Solohanda ibuhondo biyaru bibahendeore ibu lamiai hene. Ani bialu mani ibu Samuelela Naiodi tano wiagoriani puwa libu haru ho hene.
1SA 19:19 Solo ibu howa hale halu hearia Debidi puwa Lama dindi Naiodi tano biagoria ka layago hale hene.
1SA 19:20 Hale howa ibugua agali maru hearuhondo lalu, Debidi minu yalu ibule pudaba, lene. Tigua puwa handalu hearia Ngode Datagaliwabe mana latagi haga maru hearume mali luyu ibaga bialu Samuele ibugua ti haru bamba howa bi hongo howa ladagadaga bialu hearia de hendene. Ani biyago de hondo hearia Ngode Datagaliwabe Dinini ibugua Solonaga agali biaru tibi mo tara heagola tiguabi mali luyu ibaga bialu bi hongo howaore ladagadaga bialu hene.
1SA 19:21 Solo ibu ti ogonidagua bialu ka layago hale howa ibunaga agali maru bi lone yalu pudaba layagola puwa uruni tibi mali lialu heagoha liatago halu tigua lialu bi hongo howa ladagadaga bialu heagodagua ho gimbu bini. Ani biyagola ibugua lone halu tebone bi yalu pelalu hearia uruni tibi maru abale pelayarume biyadagua dege bini.
1SA 19:22 Ani biyiyagola mani Solo ibunime Lama dindi pole pene. Puwa Segu tano mbira wiagoria iba bira hene bereagoria íbu howa Debidi Samuelela libu agoria kabe lalu ogoriani hearuhondo hale halu hearia libu Naiodi tanoni ka layagola hale hene.
1SA 19:23 Hale howa Solo ibu ogoniha pole pialu hearia Ngode Datagaliwabe Dinini ibugua ibu mo hongo halu haru heagola ibubi bi ladagadaga bialu mali lima piaho wialu Naiodi tanoni anda pene.
1SA 19:24 Ani bima pialu Samuele heagoria pu howa ibuninaga aga golo wahowa mali lialu bi ladagadaga bima ibaga bialu howa aga emene hangu bu howa horo mbiru dindini palia ho wialu mbi mbira wialu egabi lene. Bi mbira ogodagua lagane winiya. Solo ibubi Ngode Datagaliwabe mana latagi haga dege mbira bu hininidabe laga winiya.
1SA 20:1 Solo ibu Naiodi tano ibiya handala Debidi ibu ibida pora bialu Yonadana hearia pene. Ibugua hale halu howa lalu, I̱na agi bialu harudabe. I̱na ko mbira agi bu harudabe. I̱na ko mbira agi birugome í̠ abahanda i̱ belo kango tigi ho wirudabe, lene.
1SA 20:2 Ani layagola Yonadanahanda ladai bialu lalu, Ngode Datagaliwabehanda í̠ homabe nalenego ke. I̱ aba ibugua bulenego bibahende galone nagaloneyaguabi mbira do nahe i̱hondo langiaiore haga. Ani biagago henene ndo layada, lene.
1SA 20:3 Debidihanda ladai bialu lalu, Í̠na i̱ hame ogobiore lo kelo í̠ aba ibu manda biaiore kagoni. Ani bidago ibugua bule manda bu ngagome í̠ mo tandaga bulebirago manda buwa í̠ nalangulebira. I̱na Anduane Homogo haluhe kagoria howa í̠hondo heneneore larogo i̱ homolene lu ndo emene nemandi hangu ngelo kogoni, lene.
1SA 20:4 Ani layagola Yonadanahanda lalu, I̱na í̠ hame larego ale biai holebero, lene.
1SA 20:5 Ani layagola Debidihanda ladai bialu lalu, Yawi Ege Ngabulo Holene Horo holebiragonaga tomo nolene wulebira. Ani bulebirago i̱ kini heba tomo nole birulene wini. Anigo i̱na bi o larogo í̠na manda bialu karulapeyagua nde i̱na unu mabuni horo áyu bira do ho ngone dege ne lalu horo tebonegonaga alendo helo.
1SA 20:6 Í̠ abahanda handalu karia i̱ dagiani nabereda layagua í̠na au labe, Ibuni andaga Bedeleheme ibu ai̱ya aba dameneru bibahendeore mo ngoai howa mali mbira mbirani bo lomabia howa mulene horo hayadago abale poro layagola pu laru, labe.
1SA 20:7 Ani laregola ibugua lalu, Karulape, layagua i̱ karula polebira. Ani ndo ibu keba holene tagira ibiyagua ibugua i̱ mo ko hole ka lo mandabu habe.
1SA 20:8 Í̠na i̱naga bulenego ogoni í̠na Ngode Datagaliwabe deni howa i̱hondo habo nalolene bi mbira biaore bule lalu lo yaribago yu haabo habe. Ani buwa handalu keria i̱ha ko mbira ngane hondowa bo home lolene irane handariyagua í̠nime i̱ bo homelabe. Í̠ abahanda belo haru halu polenego irane aginagabe, lalu Debidihanda ani lene.
1SA 20:9 Ani lai hayagola Yonadanahanda ibuhondo ladai bialu lalu, Uruni ale mbira mitangi bialu haredagonidagua nahabe. I̱ abahanda í̠ heneneore bole kane handaroyagua i̱na í̠ langulebero, lene.
1SA 20:10 Ani layagola Debidihanda hale howa lalu, Í̠ abahanda keba halu bi ladai biya lalu i̱ aiwa langulebirabe, lene.
1SA 20:11 Ani layagola Yonadanahanda ladai bialu lalu, Mabu ngarunaga putagi halu porabane, lalu libu haru piribi.
1SA 20:12 Puwa Yonadanahanda Debidihondo lalu, Anduane Homogo Isaraele wali agalinaga Ngode Datagaliwabehanda ibu deni howa iya henene laga ka lelo horo áyu kabadagua yawibi lumabi i̱ aba hale halu hagua. Hale ha handarogola í̠hondo mini bayale wuwa heagua i̱na bi mbira í̠ keria lo ibilagua.
1SA 20:13 Ani bidogola i̱ abahanda í̠ bole lalu mbira lo manda bialu heneyagua nde i̱na í̠ languliya. Ani ndo i̱na langiabi ibida pobelo biamogobi heba nabiruyagua nde Anduane Homogohanda i̱ balu homelelo. Anduane Homogo ibu i̱ aba heba ho hayadagua áyu í̠ heba ho helo.
1SA 20:14 Ani bialu i̱ homa nabi haruyagua í̠na Ngode Datagaliwabe deni howa habo nalole buleorego lalu bi lo wirigo yu hado wanahe yaniore ho habe.
1SA 20:15 Ani ndo i̱ homaruyagua nde i̱hondo gubalini howa mini hana ho harilidagua i̱naga aba ai̱ya waneigini dameneruhondo walia halu haaboore habe.
1SA 20:16 Ani bialu Anduane Homogohanda í̠naga waitigi karu bo hilo wahaiore kago layaguabi iyanaga habo nalolene bi lo wigiwigi bu wiribagoniore poda nabi wiaaboore helo. Poda mbira bi lariyagua Anduane Homogohanda í̠ tandaga nelolebira, Yonadanahanda ani lai hene.
1SA 20:17 Halu mbira lone Yonadanahanda Debidihondo gubalini haabo hole lalu habo nalole lalu lowini. Yonadana ibuni gubalini ho henegobiore Debidihondo gubalini ho hene.
1SA 20:18 Ani buwa Yonadanahanda ibuhondo lalu, Yawi Ege Ngabulo Holene Horo holebiragonaga tomo naga wiyadago í̠ dagiani tomo nalu nabereyagua nde ogoninaga piyada manda bulebira.
1SA 20:19 Horo yawi howa luma í̠ piyadaore manda bulebirago ai puwa abale halu mbira pu bira do harigoha puwa ogoriani ege to̱le̱ wima irigi kagoria mbirahayagi puwa bira do habe.
1SA 20:20 Ani bidegoria i̱na timu lu tebo kaboro baradagua bialu bi ibiloliya.
1SA 20:21 Ani buwa i̱naga biabe bia hagahondo, Timu uruni dugule taibu pu, lolebero. Ani buwa i̱na ibuhondo, Timu uruni í̠ kegoriani ngago mia, laruyagua ogoni galone í̠ bolene nawidane hendedogo í̠ tagira íbu lalu laro. I̱na Anduane Homogo haluhe kagoria howa heneneore larogo lalu í̠ bolene nawulebira lolebero.
1SA 20:22 Aguani nale howa, Timu uruni amura bolangua howa nga, laruyagua nde Anduane Homogohanda í̠ pobelo peledagoni.
1SA 20:23 Ai bi habo nalole bibiyago lo wigiwigi biribagoni Anduane Homogo ibugua mo habo nale wiaaboore helo ibugua de hondo holebira, lalu Yonadanahanda lai hene.
1SA 20:24 Ani layagola Debidihanda mabuha puwa bira do hene. Ani biagola Ege Ngabulo Holene Horo holenaga tomo nolene tu hayagola Kini Solo ibu tomo no ibini.
1SA 20:25 Ibuwa anda haiha bira para howa ibuni horo bibahendengi ibalu biragane winigoria puwa berene. Ogoriani Abane ibu kini bereagoria biru palu biagola Yonadana ibu nde mendehayagi handade howa berene. Ani biagola Debidi ibu biraga dagia biagoria nabere wini.
1SA 20:26 Ani binigo Solohanda horo ogoningi bi mbira nale hene. Ogoni irane ibugua manda bialu hearia mbirale mbira Debidihanda buwa ibu ilili bu hayada mitangi bini.
1SA 20:27 Horo mendengi Ege Ngabulo Holene hayagonaga tomo nai howa handalu hearia Debidinaga dagia biraga biago henge wiaabo hearia hendene. Hondowa Solohanda Yonadanahondo hale halu lalu, Debidi ibu áyubi abebi tomo nole naibiyago irane aginagabe, lene.
1SA 20:28 Ani layagola Yonadanahanda ladai bialu lalu, Ibugua i̱hondo hongo howaore hale halu lalu, I̱ Bedeleheme puore buleberogo poliya pu la, laya.
1SA 20:29 Debidihanda au lalu, Ai puore buliyago ogoni irane i̱naga aba ai̱ya dameneru bibahendeore mo ngoai howa turu halu bo lomabia halu tomo nolebira. Ani bulebirago i̱ hamenegome ogoriani íbu habe laya. Anioreda í̠ i̱naga nenege keyagua i̱naga dameneru karia de hondo poliya pu labe, laya. Irane ani biyagola ibu í̠naga dagia ibuni biragane biagoriani nabere wiagoni, lalu Solo lamini.
1SA 20:30 Ani biagola Solo ibu Yonadanala kebaore tara kaubi howa ibuhondo lalu, Bi mo waholene dogahe mini dunubia naholene í̠ ai̱ya bereneya. Áyu i̱na manda berogola í̠ Yasi igini biamogo bule hame lowa ke. Ogonidagua bialu kegome í̠ agali ndo hene mbau lalu í̠bi í̠ ai̱yabi libu haru taga pani noleberabi.
1SA 20:31 Áyu Debidi ibu homa nabi kaore í̠na dindi ogonaga kini naholeberego ogoni manda bu kebe be nabi kebe. Áyu pialu Debidi ogoria haru halu ibule pu naberego ibu áyu homolene ngago, lalu Solohanda lene.
1SA 20:32 Ani layagola Yonadanahanda ladai bialu lalu, Ibu homolene irane aginagabe. Ibugua mbira agi biyabe, lene.
1SA 20:33 O layadangi Solohanda ibunaga yandare yamuwa Yonadana homelo bole bini. Ani biyagola Yonadanahanda manda bu handalu hearia ibu abahanda Debidi heneneore homelo bole manda bialu heneyane handa walia hene.
1SA 20:34 Yonadana ibu dagiani birayago heyalu ibu abala keba timbuni howa Ege Ngabulo henegonaga horo mendeni tomo nolene winigo ibu horo ogoningi mbira nane wahalu pene. Ogoni irane Solohanda Debidi lahirayagonaga Yonadana ibu gendaore timbuni Debidinaga ha howa hene.
1SA 20:35 Horo mendeni egerebagi hayagola Yonadana mabuni Debidila lola habiya lalu libuni abale lo mbiraore ho wiribigoriani lola hole pene. Ibu pialu howa igiri emene mbira haru halu penego ogoni ibuhondo lalu,
1SA 20:36 I̱na timu kaboro bo pelarogo tai bialu dugu ngule gerai lalu pu, lene. Yonadanahanda timu biaru amuraore bo pelayagola igiri emene biagome tai bialu mule gerai lalu pene.
1SA 20:37 Ani bialu puwa igiri emene biago kaware timu pu ibira ho wiagoriaore pu hapara ho heagola Yonadanahanda olamu halu lalu, Timu amuraore pu wahaya.
1SA 20:38 Ogoriani ha nabibe abale pu, lene. Igiri emene biagome timu biaru mo mogo bu yalu íbu dai buwa ibunihondo mini.
1SA 20:39 Yonadanahanda o layadaruni igiri emene biago ibu galone ogo ale laralo manda nabi Yonadanala Debidila libuni hangu galone lo wiribidagua manda biribi.
1SA 20:40 Yonadanahanda ibunaga wai biagane ale yayaru igiri emene biagohondo mialu, Uyu tanoni mo yalu dai bibe, lalu lamini.
1SA 20:41 Ani buwa mani igiri biago peagola Debidi unu to̱le̱ wima irigi hene biagoha hayago heyalu ibuwa ge duli hanga howa birupe hene. Ani bialu ibunaga dengui haguane dindini halu tebo bulu palialu heyaga bini. Ani bialu Debidi Yonadanabi libu haru dugu bigibigi bialu nu̱nu̱ lala bigi biribi. Ani bialu libu dara hagahaga buwa Debidihanda dara ho bolangua hene.
1SA 20:42 Ani buwa Yonadanahanda Debidihondo lalu, Ngode Datagaliwabe í̠ heba holebira. Anduane Homogohanda í̠bi i̱bi í̠naga aguanenerubi i̱nagarubi hondo halu yu wahaga nabi helo lalu lo wiribadagua wiaho wiaaboore helo, lene. Ani lalu Debidi ibuni mbiraha pu bagi halu Yonadana ibu tanoni íbu dai bini.
1SA 21:1 Debidi ibu loma binigo mo miaga Ahimelege hearia Nobo tanoni pene. Pialu hearia Ahimelege ibu duru lamalama ibu lola hole ibuwa hale halu lalu, Í̠ni hangu ibalu haridagoni irane agibe, lene.
1SA 21:2 Ani hale hayagola Debidihanda ladai bialu lalu, I̱ kinime biabe mbira mo ngiyagola ogoni bule ibiru. Kini ibugua i̱hondo lalu, Í̠ ogo ale bule pialu mbirali nalamibe, laya. Anigo ai i̱naga ami agali karu ti dindi mbirani lola hami̱ya lalu lamido.
1SA 21:3 Ani bidogo í̠na tomo maru agi ngebe. Í̠na mberedi hirini duria ngeyaguabi tomo maru ngego ale i̱ ngi, lene.
1SA 21:4 Ani layagola loma binigo mo miaga biagome lalu, I̱na mberedi ibuni mbira nawigo Ngode Datagaliwabehondo lomabu winigo dege ngago í̠naga ami agaliru ti one heba áyu dege mbira ho palia nabi hene kayagua ogoni mulene karulape, lene.
1SA 21:5 Ani layagola Debidihanda ladai bialu lalu, Ti wali heba palu naheore ndobe. I̱naga ami agali uruni ti horo bibahendengi tini ilili buore hagane winigo áyu wai bule lalu galone ogoni bialu howa tininaga tingini bayuwa hogorale nabi au habehebe, lalu lamini.
1SA 21:6 Ani biniyagola loma binigo mo miaga biagome Debidihondo mberedi Ngode Datagaliwabehondo loma bini biago mo mini. Ogoni irane mberedi maru nawi mbiraore loma bia ho winigo gahenge lomabu wiaga dagiani wia aribia howa ala tawe mo bagi ho winigo mo mini.
1SA 21:7 Solonaga nogo bulumaga haru haga agali karunaga haguane mini Doege Idomo dindi howa ibiniyago ibubi horo ogoningi dege Ngode Datagaliwabehondo lomabia henego mulene tu hayagola íbu hene.
1SA 21:8 Debidihanda Ahimelegehondo lalu, Í̠na wai biaga ayu tibu yandarebi mbira ngule ngebe. Kinihanda abale heyalu polene nga laya handala i̱naga wai biaga ayu tibubi wai biagane ale marubi mulene henge mbira nawiya handala ibiru, lene.
1SA 21:9 Ani layagola Ahimelegehanda ladai bialu lalu, Pilidiali Golaidi í̠na Ela dindi ulini biagoria hearia barigonaga dege wai biaga ayu tibu biago wu kogoni. Ogoni loma binigo mo miaganaga aga mini ebodi ngago erembirahayagi aga mbirame huba bu ngogo ogoni yuleyagua wai biagane ale ogoni hangu ngago mo yabelo, lene. Ani layagola Debidihanda lalu, Wai biagane ale bayale ogonibiore maruha nawigo ogoni mo ngi, lene.
1SA 21:10 Debidi ibu Solohanda bole biyagola gi howa ibida pora bialu Gedenaga Kini Agisi hearia pene.
1SA 21:11 Kininaga biabe bia haga hearume Agisihondo lalu, Agali ogoni ibu ibuni dindinaga Kini Debidi ndodabe. Agali ogoninaga walime iba gana lalu howa lalu, Solohanda agali daosini dewa dege bayagoyu Debidihanda daosini dewa bolanguaore howa bayagoni, lalu hayago íbu ndo kabe, lene.
1SA 21:12 Debidihanda tigua bi ogonidagua layuago hale howa ibu Kini Agisihanda boligo lowa gi timbuni hene.
1SA 21:13 Ani buwa ti deni howa Debidi ibu mini nawi luluyi tingi halu tano timbuni wiagonaga pabeni giligili bialu hangau ibuninaga angarini pudupebe bilene.
1SA 21:14 Ani bigi biyagola Agisihanda ibunaga biabe biaga biaruhondo lalu, Agali ogo luludago de handadaba. Irane agi bulenaga i̱ hewaria haru ibirimibe.
1SA 21:15 Agali lulu dewa hayaru naheyane handarimibe. Agi bulenaga lone mbira i̱ mo tandaga hole mini nawi lulu dege hearu i̱ andaganiore haru íbu tago bu helarimibe. Wahalu peladaba, Agisihanda ani lene.
1SA 22:1 Debidi ibu Gede tano timbuni wiagoriani howa ibida pora bialu puwa egeanda mbira Adulamanaga tano wiagoria kawareni pene. Ani biaria ibunaga hamenerubi ai̱ya aba dameneru ti bibahende hale halu hemiria ibu ogoriani íbu ka layago hale howa tibi ibu heba mandagi hole pene.
1SA 22:2 Ani biaria agali maru genda tara tara yu hearubi agali maru dano ho hene hearubi agali maru mendeali heba keba ho hene hearubi ti bibahende handari maria (400) agima Debidi hearia puwa tigua ibu tinaga haru haga haguane helene.
1SA 22:3 Ogoriani howa Debidi ibu Moaba dindini Misiba tano wiagoria pene. Puwa Moabanaga kini heagohondo lalu, I̱na Ngode Datagaliwabehanda i̱hondo agi bia harabe hondole kotambu i̱naga aba ai̱yala í̠ heba halimulo henge mbira ngiaore bibelo hameledo, lene.
1SA 22:4 Ani lalu Debidihanda ibu aba ai̱yala Moabanaga kini heba helo helalu puwa Debidi ibu egeandaha ha do heagola tibi ogoriani haho wini.
1SA 22:5 Ani biaria Ngode Datagaliwabe mana latagi haga agali mini Gada ibu Debidi hearia ibuwa lalu, Ogoriani nahe áyu ogoni Yuda dindini pobe, lene. Ani laya handala Debidi ibu dindi ogoni yu wahalu Herede dindinaga irabu wiagoha ubanda hene.
1SA 22:6 Horo mbirungi Solo ibu Gibea dindini hari hombene mbira wiagoria ira mbira mini tamarisigi heago teneha yandare gime yuwa berene. Ani bereagola ibunaga biabe biagaru bibahendeme ibu homabu bupe ho hene. Ibu hale halu hearia Debidi ibunaga agali biarubi handa walia henego ka layane hale hene.
1SA 22:7 Ani hale howa ibugua ibunaga biabe biaga biaruhondo lalu, Beniyamini agaliru-o hale hadaba. Tígua manda beremigola Debidihanda mabu dindiru pu mbira lini daga mini gerebi maburu tí bibahendehondo ngialu tí ibunaga ami agali karunaga haru haga halimulo helolebirabe.
1SA 22:8 Irane ogoni manda buwa tígua lo mbira howa i̱ bo wahole manda birimibe. Tí mbiralime i̱ni iginioreme i̱ bole Debidila gimbu bu ka lalu nalangirimigoni. Tí mbiralime i̱ kada manda nabini haruda. Ani bialu mbirame Debidi i̱naga agali mbira hayagome áyu ogoni bole henge mbira au ngabe hondole i̱ i̱ni igini biagome mo hongo haragola tai bialu ka nalarimi, lalu Solohanda lene.
1SA 22:9 Doege ibu Solonaga biabe biaga biaru heba ogoriani heneyago ibugua lalu, Debidi ibu loma binigo mo miaga Ahidubu igini Ahimelege hearia Nobo tanoni heago de handaru.
1SA 22:10 Ahimelegehanda Debidi ibugua agi bulebirabe lalu Anduane Homogohondo hale haya. Ani buwa ibugua Debidi tomo maru mialu Pilidiali Golaidinaga wai biaga ayu tibu biagobi mo miya, lalu lamini.
1SA 22:11 Ani biya layagola Solohanda loma binigo mo miaga Ahimelege ibunaga aria bibahende loma binigo mo miaga dege Nobo tanoni hearubi ibugua ibalimu layagola ti ibu hearia ibini.
1SA 22:12 Ibiyagola Solohanda ibuhondo lalu, Ahimelege-o bi larogo hale ha, lene. Ani layagola Ahimelege ladai bialu lalu, Bia larego bule ko, lene.
1SA 22:13 Solohanda ibuhondo hale halu lalu, Í̠la Debidila libugua i̱hondo ohowa wai hanalu kabigoni irane agibe. Í̠na Debidihondo tomo maru heba wai biaga ayu tibu mbira lowa mialu Ngode Datagaliwabehanda ibuhondo bi labe lalu í̠na hale ha haridago irane agibe. Ani birigome ibugua áyu i̱la waitigi halu i̱ balu homelole henge mbira au ngabe hondole hariga tai bialu kagonida, lene.
1SA 22:14 Ani layagola Ahimelegehanda ladai bialu lalu, Debidi ibu í̠naga biabe biaga agali mini bilinaheni tigabi hayagoni ndobe. Ani bialu í̠ imane í̠naga mamage haga karunaga haguane ndobe. Ani bialu ibu í̠naga andagani bibahende karume manda biaihe ibu agali tigabiore ka lalu ibunaga mini yaraga hene hayagoni ka.
1SA 22:15 Í̠na bi larigo i̱na ibunaga Ngode Datagaliwabehondo bi laharuyago ogoni áyu pigane ndoya hendedeni. I̱na í̠ bole ohowa Debidila wai hanalu ka lariyagoninaga laro. Agali haguane-o ogonidagua nabiorego i̱bi i̱naga damene karu aria mbirabi bame kedalu nalabe. Í̠na o larigoni i̱ mbira manda nabiore henego larida, lene.
1SA 22:16 Ani layagola kini biagome lalu, Ahimelege-o í̠bi í̠naga damenerubi homaiore holeberemi, lene.
1SA 22:17 Ani lowa ibugua ibunaga mamageali ibu wanakuini heyu hearuhondo lalu, Anduane Homogonaga loma binigo mo miaga o karuni homelo bai hadaba. Ti Debidi heba hene kago tigua ibu ibida pora bialu piyago pelowa i̱hondo langule íbu nabi ti manda buwa dege ibida pelayago, lene. Ani layagola mamageali biarume Anduane Homogonaga loma binigo mo miaga biaru homelo bolene gi hene.
1SA 22:18 Ani biyagola Solohanda Doegehondo lalu, Í̠na ti homelo bai ha, layagola Doegehanda bibahende homelo bai hene. Horo ogoningi ibugua loma binigo mo miaga agalime tinaga aga mini ebodi karulaga hearu pira halirani duria (85) homelo bo wahai hene.
1SA 22:19 Ani bialu Solohanda ibunaga ami agali biaruhondo lamialu lalu, Nobo dindi timbuni loma binigo mo miaga agali henerunaga dindi ogoriani wali agali maru karubi homelo bo wahalu waneigini wahebi emene galibi nogo bulumagaru dongiru sibirubi uruni bibahendeore bo hilo wahai halimu, lene.
1SA 22:20 Ani biya handala Ahimelege igini Abaiada ibu dege ibida yo pialu puwa Debidila hene.
1SA 22:21 Ibugua puwa Solohanda Anduane Homogonaga loma binigo mo miaga biaru homelo agua baya lalu Debidi lamiai hene.
1SA 22:22 Ani lamiyagola Debidihanda ibuhondo lalu, Horo Ahimelegela bi lalu harungi Doege ibu ogoriani heago i̱na manda birugola ibugua Solo lamulebiralo manda biru. Anigo í̠naga damene bibahende homelo bo wahai hayadaruni tene i̱na birugomeda.
1SA 22:23 Ai í̠ gi nahe i̱ kogoria iya mandagi habiya. Solohanda iya kirabali bole tai bialu kagoyu iya mandagi haribayagua nabulebira, lalu lamini.
1SA 23:1 Debidi ibu hale halu hearia Pilidialime Kelanaga tano bo gialalu tinaga widi lini áyu dege domogo bu wiaru mo page bira layane hale hene.
1SA 23:2 Hale howa ibugua Anduane Homogohondo hale halu lalu, I̱na Pilidiali uruni baba wai bule poabe, lalu hale hene. Ani hale hayagola Anduane Homogohanda lalu, E̱ Pilidiali balu Kela tano mo wule pu, lene.
1SA 23:3 Ani layagoyu Debidinaga agali biaru tigua ibuhondo lalu, Ina gi ho holene Yuda dindini bu ngago ngelalu Kela tanoni Pilidiali karu baba wai bu polenego gendabida, lene.
1SA 23:4 Ani layagola Debidihanda lone hale hayagola Anduane Homogohanda ibuhondo lalu, Í̠na Pilidialiru baba wai bu wayali habelo i̱na hongo nguleberogo Kelani puwa bo podoleberemi, lene.
1SA 23:5 Ani laya handala Debidi ibunaga agali heba Kela anda pialu Pilidiali bo podalu tigua agali au lolebe tobahe dewaore bo homelalu tinaga nogo bulumaga hearu ti haru halu dai bini. Ogonidagua bialu Debidihanda Kela tano mo wini.
1SA 23:6 Ahimelege igini Abaiada ibu ibida pialu Debidila Kela tanoni hole piyangi ibugua loma binigo mo miaga agalime aga mini ebodi karulaga biago mo yalu pene. Aga ogoniha to̱le̱ kira Anduane Homogonaga hame handaga biago labobi heba mandagi mo yalu pene.
1SA 23:7 Solo ibu hale halu hearia Debidi ibu Kela tanoni pu ka layago hale howa lalu, Ai turuba Ngode Datagaliwabehanda i̱naga giha ya hayadago Debidi ibu tano pabe bu mabubi panga haraba hongoheme paya tagi heagoha yo pialu pobe nahe do wule ogoniha pu ka, lene.
1SA 23:8 Ani biagola Solohanda ibunaga ami agali biaru olalu Kela tanoni tidu yalu pialu Debidibi ibunaga agali biarubi heagoria puwa homabu bupe hole pene.
1SA 23:9 Solohanda ani bulebira layago hale howa Debidihanda loma binigo mo miaga Abaiadahondo lalu, Aga ebodi biago ogoria mo yalu íbu, lene.
1SA 23:10 Ani lowa Debidihanda lalu, Anduane Homogo Isaralealinaga Ngode Datagaliwabe-o Solo ibu í̠naga biabe bia haga i̱ ogoria kogo hondowa Kela tano bo gialo paya bu waho ibule wai hanalu kagoni.
1SA 23:11 Anigo agali Kela dindi tene ogoriani hene karume i̱ Solohondo minu batagi helolene karulapedabe. Solo ibu ibulebira layane i̱ hale harudagua henene ibulebirabe. Anduane Homogo Isaraelealinaga Ngode Datagaliwabe-o í̠na i̱hondo ladaiore bibelonaga haya halu hale harogoni, lene. Ani layagola Anduane Homogohanda ladai bialu lalu, Solo ibulebira, lalu lamini.
1SA 23:12 Ani ladai biyagola Debidihanda lone hale halu lalu, Kela dindi teneali karume i̱bi i̱naga agalirubi minalu Solonaga giha minu ya holobadabe, lene. Ani layagola Anduane Homogohanda ladai bialu lalu, Tigua ani bulebira, lene.
1SA 23:13 Ani laya handala Debidi ibunaga agali handari waragaria (600) agima biaru heba Kela tano abale yu wahalu pene. Ani biagola Solo ibu hale halu hearia Debidi Kela tanoni nahe pu yola halu piya layago hale howa bole wai hanalu ibiyago wahalu dai bini.
1SA 23:14 Debidi ibu puwa dindi hari bare wali agali nahagaha Siba tano handa de̱le̱ wiagoriani ha do hene. Horo bibahendengi Solohanda Debidi handa waliaore holego lalu tai bialu henego Ngode Datagaliwabehanda Debidi minalu Solonaga giha ya nahene.
1SA 23:15 Debidi ibugua Solohanda ibuore homelo bo wahole íbu hayuago manda buore hene. Ani biyagola Debidi ibu Horese dindi wali agali nahagaha Siba handa de̱le̱ wiagoriani ha do hene.
1SA 23:16 Ani biaria Yonadana ibu Debidi hearia pialu Ngode Datagaliwabehanda biamogo biya lalu mo hongo hole pene.
1SA 23:17 Ibugua Debidihondo lalu, Í̠ gi nahabe. I̱ aba Solo ibugua í̠ bolene henge nawigo. Í̠ Isaraelialinaga kini hole tagira ibuleberego ibugua manda biaiore ho ka. Ani bialu i̱bi í̠ hapara holiyago manda bu ka, lalu lamini.
1SA 23:18 Ani lowa libu kirabalime nenege haribigoni hado wahalu pugupugu nabule lalu bi mbira lo wiribi. Lo wialu Debidi ibu Horese dindini hea handala Yonadana ibu andaga dai bini.
1SA 23:19 Ani biagola agali maru Siba howa Gibea tanoni Solo hearia puwa lalu, Debidi ibu inanaga dalu Horese dindi Hari Hagila wedagoha Yudalinaga dindi wali agali nahaga ngagoha puwa ogoni ha do ka, lalu lamini.
1SA 23:20 Í̠na agali ogoni minuleore bialu harigo ina manda bidama. Áyu ina daluni kago bayuwa minabelo iname í̠naga giha minu ya holoma̱ya ibabe, lene.
1SA 23:21 Ani layagola Solohanda tihondo ladai bialu lalu, Tígua i̱ biamogo baya gibiore birimigonaga Anduane Homogohanda tí biamogo bilo, lene.
1SA 23:22 Áyu halu mbira lone puwa heneneore hayadagoria kabe be nahedabe hondole abale hearia handalu ibiyadago heba puwa hondole pudaba. I̱na hale halu hewaria agali ogoni o gibiorehe layane hale harugo.
1SA 23:23 Tí bayuwa puwa ibu kago ogoriaore lo hondo wialu i̱ koria abaleore lama dai bilimu. Ani beremigola ina haru puwa ibu dindi hobane ogoni dege ho kayagua ina tai bima dalialu hameigini Yuda dindi ogoni bibahendeni tai bulene ngayaguabi taibume halu ibu minalu waholiya, Solohanda lene.
1SA 23:24 Ani bialu Solo ibu nde tai bima mama ibiya handala ti bamba halu Siba dindi dai bini. Debidi ibunaga agali biaru heba pialu Maono tayandaha wali agali nahaga dindi guane Yudalinaga tayanda wiagoria puwa hene.
1SA 23:25 Ani biaria Solo ibunaga ami agali biaru heba Debidi tai bule pene. Debidi ibu ogoni hale howa heyalu Maono ege to̱le̱ hari bare tayanda mbiraha puwa ogoniha hene. Solo ibu ani bida layago hale howa ibu Debidi heagoria pole pene.
1SA 23:26 Puwa Solo ibunaga agali biaru heba ti hari hombene biago abene mendehayagi heagola Debidi ibu nde ibunaga agali biaru heba ti abene mendehayagi lowa tu wuwa hangu hangu hagahaga bini. Debidi ibunaga agali biaru heba ti abale pole pialu hemiria Solo ibunaga agali biaru heba tigua abale talima ibalu minule hapara hene.
1SA 23:27 Ani buleore biyaria agali mbira abale bi yalu Solo hearia ibuwa lalu, Áyu ogoniore abale íbu dai bibe. Pilidialirume ina daluhayagi bo gialama anda ibiyadago, lene.
1SA 23:28 Ani biniyagola Solo ibu Debidi talima piyago wahalu puwa Pilidiali baba wai bule pene. Irane ogoni biyagonaga mitangi bialu dindi ogoni mini Putale Bini Hombene lalu mini wini.
1SA 23:29 Debidi ibu puwa Engedi dindi hobane wiagoha ha do howa hene.
1SA 24:1 Solo ibu Pilidiali heba wai bialu henego íbu daibuwa hale halu hearia Debidi ibu Engedi handa de̱le̱ tayanda wiagoria ka layago hale hene.
1SA 24:2 Hale howa Solohanda ami agali hongohe wayaliru Isaraeleni hearu tagalo migi buwa daosini tebira (3,000) haru halu Debidibi ibunaga agali biarubi tai bima ni tagira ibiragohayagi dindi ko mini Nogo Meme Gabua Haga Ege To̱le̱ laga wiagoha tai bima pene.
1SA 24:3 Ani bialu ibu nogo sibi pabe heagoria pialu egeanda mbira hariga teneni wiagoria ubanda howa ogoniha Debidi ibunaga agali biarubi anda puwa ha do heago nahende Solo ibu egeanda ogoniha dege ti to pene. Ogoriani abene mendehayagi Debidibi ibunaga agali biarubi ti egeanda habaneha anda puwa ogorianiore ha do howa hene.
1SA 24:4 Debidi agali biarume Debidihondo lalu, Ai Anduane Homogohanda í̠naga waitigi biago áyu í̠naga giha dinini helo henge ngiyadago í̠na ibuhondo bule manda bu wirigo bia, layadagua ai berene. Ani layagola Debidi ibugua hendeore ge hogarale bialu puwa Solo nahende ti talu berearia Solonaga aga luni biago mbira podo yamini.
1SA 24:5 Ani biyagoyu Debidinaga bu miniha mitangi mbira tagira ibiyagome, Nakarulape biruda, manda bini.
1SA 24:6 Mini ogoni tagira ibiyagola ibugua ibunaga agali biaruhondo lalu, I̱naga kini Anduane Homogohanda dabo helene kago i̱na mo tandaga naholiya Anduane Homogo ibugua i̱ haru helo hameledo. I̱na ibu mo ko hole mbira nabuleberogo ogoni irane ibu Anduane Homogohanda kini helo dabeneore ka, lene.
1SA 24:7 Ani layago Debidihanda ibunaga agali biaruhondo bi ogonibi layagome Solo homelo nabole lalu bilene. Solo ibu ti tai halu tagira pialu ibuni abale pole piyagoha pene.
1SA 24:8 Pialu heagola Debidi ibu nde talima tagira puwa ibuhondo olowa lalu, Kini-o, layagola Solohanda olayago hale howa ho beregedene. Ani buwa handalu hearia Debidi ibu Solo ibunaga agali timbuni daligaore ka lowa ge duli hanga ho bulu palearia hendene.
1SA 24:9 Ani bu howa Debidihanda Solohondo lalu, Wali agali marume i̱na í̠ bole manda bialu ka lalu karunaga bi hale halu hariligo irane agibe.
1SA 24:10 Ai áyu ogoni egeanda ogoniha howa Anduane Homogohanda i̱naga giha í̠ mo ya haya. I̱naga agali marume í̠ homelo ba lalu langiyagoyu i̱na í̠ daraore howa í̠ homabelo nabole laru. Ogoni irane í̠ Anduane Homogohanda kini habelo dabeneyane ani laru.
1SA 24:11 Ai i̱naga aba-o o yidogo de handa. Í̠naga aga budini mbira ogoni. I̱na í̠ boleneyagua nde abale bedoledagua í̠naga aga emene budini ogoni hangu podo yamirudagoni handa. Ani birudagome í̠la keba howa heneda lowabi bole heneda lowabi mbira manda nabibehe kegoni. I̱na í̠hondo ko mbira nabi kogoria í̠na dege i̱ bo wahole taya bialu kegoni.
1SA 24:12 Anduane Homogohanda iya mendealigome ko ogo ibugua bialu ka lalu dabelo. Ibugua í̠na i̱hondo kagua bule manda bialu harigonaga pani tandaga ngilo. I̱na í̠hondo tandaga mbira ngule manda nabiore haru.
1SA 24:13 Mbira ala agua lagane wiyago manda bidegoni. Ko ngubi ngaru agali ko ngubi biagame hangu biaga nga. Anigo i̱na í̠ nabolebero.
1SA 24:14 Isaraelealinaga kini í̠na i̱ talerego agibe. Ibugua mbira talima ibaga bialu kago agidabe handadaba. I̱ biango homene alebi tede alebi i̱ kogonidago.
1SA 24:15 Ani bialu iya mendealigome kagua bu kabago Anduane Homogohanda dabo hendelo. Í̠na i̱ mo ko nahabelo ibugua i̱ pele ngialu biamogo bia, lalu Debidihanda lene.
1SA 24:16 Debidi ibugua bi ogoni lai heagola Solohanda lalu, I̱ igini Debidi-o ogoni henene í̠ore kebe, lene. Ani lowa ibu dugu bini.
1SA 24:17 Ani bialu howa ibugua Debidihondo lalu, Í̠ agali bayale hegola kagua i̱na biruda. I̱na kagua uruni í̠hondo bialu hewagola í̠na i̱hondo bayale birida.
1SA 24:18 Áyu í̠na i̱hondo í̠ bayale ogobi ko lalu i̱hondo walia haridago ogoni irane Anduane Homogohanda i̱ í̠naga gi hongoheha mo ya hayagola í̠na i̱ bo home nale waharidagoni.
1SA 24:19 Mbiralime ibunaga waitigi minu yuwa ba nabi wahaga aibe. Í̠na i̱hondo áyu birigonaga Anduane Homogohanda í̠ mo bayale helo.
1SA 24:20 Áyu i̱na manda berogola í̠na Isaraelealinaga kini í̠ kegola dindi bibahende ngaru í̠naga andaneha ngelowa haru haho wulebere.
1SA 24:21 Anigoyu Anduane Homogonaga minini howa í̠na i̱naga aguaneneru mo ko halu mbira nabulebero lalu bi áyu lo wia. Ani beregola i̱nagabi i̱ one waneigini damenerunagabi mini mo embeda nahe wiaabobo helo.
1SA 24:22 Ani layagola Debidihanda lalu, Henene aniore bulebero, lo wialu ladai bini. Ani lowa Solo ibu ibuni andaga dai biyagola Debidibi ibunaga agalibi ti tininaga ha do hagane biagoniha ha do hole dai bini.
1SA 25:1 Mani Samuele homayagola Isaraele wali agali bibahende íbu ngoai howa ibunaga dugu bialu hene. Ani bialu tigua ibuni dindi Lama ogoriani hora hene. Ani hora heaha mani Debidi ibu Parana dindi ko yobi wali agali nahaga wiagoha pene.
1SA 25:2 Maono tanoali mbira mini Nabala hene. Agali ogoni ibu Kalebe hameigini aria howa ibunaga dindi podene mbira Kamelo tanoha wu hene. Ibu agali homogo gibi howa nogo sibi daosini tebira (3,000) hinalu meme daosini mbira (1,000) hinu hene. Agali ogoni ibu one wali bayale mini Abigele berenego ibunaga mini bogaru bayaleorewi berene. Anigo Nabala ibu agali mana bayale nabiaga koni kerahe mbira hene. Horo mbirungi Nabala ibu dindi Kamelo ogoniha howa ibugua ibunaga nogo sibirunaga irini podalu hene.
1SA 25:4 Debidi ibu dindi ko yobi wali agali nahaga wiagoha howa hale halu hearia Nabala ibu biabe ogoni bialu ka layane hale hene.
1SA 25:5 Ani hale howa ibugua igiri daliahe pirali hearuhondo lalu, Tígua Kamelo tano puwa Nabala karia pialu i̱naga minini howa íbu harida lalu mo bila halimu.
1SA 25:6 Mo bila howa Nabalahondo ogodagua lalimu, Debidi ibugua au laya. Í̠nibi í̠ one waneigini damene bu kamirubi í̠naga mbirale wu haridarubi tí bayaleore áyu kamigodagua manibi wu haabo halimulo hameledo, laya.
1SA 25:7 Ai Debidi ibu í̠naga nogo sibi irini áyu podalu ke layago hale hene. Í̠naga nogo sibi haru haga agali bu hearu ina heba Kameloni harimangi iname ti mo ko nahe mandagi bayaleore harimagoni. Ti Kamelo dindini harimangi tinaga mbirale wiarubi iname mbira mo kayu nabi dege harima.
1SA 25:8 Í̠nime tihondo hale hariyagua tiguabi nde bi mbiraore ogodagua dege ladai bulebira lalu lamibe, laya. Ai áyu í̠ tomo timbuniore dawalu ke layago hale howa Debidi ibugua ina í̠ keria pudaba laya handala ibirima. Ibugua lalu, Í̠ igini Debidihondobi ina bibahende í̠naga biabe biahaga kamagonigo inahondobi í̠na dara halu tomo maru wiagua nde nguleberebe, laya lalu lamilimu, lene.
1SA 25:9 Ani laya handala agali Debidihanda pu layaru ti pialu Debidinaga minini howa bi o layadagua Nabalahondo lamuwa agi birabe hondole hondo hene.
1SA 25:10 Ani hondo hearia Nabalahanda ladai bialu lalu, Agali Debidi Yasi igini larimigo ogoni ibu aigo kabe. I̱ ibu manda nabiore kogo. Áyu howa garabaya biabe ale biahaga agali dewa ibida pora bialu penerume dindi ogoniha ho to̱layada. Ibubi nde garabaya biabe ale biahaga mbirada lo manda bido.
1SA 25:11 Tí agoha howa ibini kamibe i̱ manda nabido. Anigo ai mberedibi ibabi nogo marubi agali i̱naga nogo sibi irini podalu karu ti tomo nelo wini ngaruni tí mo ngia nabulebero. I̱na ani nabuleore ndobe, lene.
1SA 25:12 Ani layagola agali Debidihanda pu lene biaru tigua Nabalahanda bi layaruni bibahende lo yalu dai buwa Debidi lamiai hene.
1SA 25:13 Ani layago hale howa Debidihanda lalu, Ai tí bibahendeore ayu tiburu yuwa wai bule manda manda bu halimu, lene. Agali biaru tigua Debidihanda layadagua manda manda bu hai heagola Debidi ibunibi ayu tibu abale mandibuha mo manda mandabu yini. Ani bialu ibunaga agali handari maria (400) haru pialu handari kirame (200) tinaga mbirale wiyadaru handayaho helo helene.
1SA 25:14 Horo ogoningi dege Nabalanaga biabe biahaga agali mbira heagome Nabala one Abigele bereria puwa lalu, Debidi ibu dindi ko yobi wali agali nahaga wiagoha howa inanaga agali haguane kagohondo mo bila hole agali maru pudaba layiya. Anidagua biyagola ibugua tihondo bi ko ladai biya.
1SA 25:15 Anigo bi ko ladai bulenego agali uruni tigua inahondo mana ko mbira nabiore. Tigua inahondo bayale dege biaabo halu haya. Ina haru mandagi amu dangite wiagoha harimangi tigua inanaga mbirale wirimaru mbira mo page nabiore haya.
1SA 25:16 Ina nogo sibiru haru hemangi Debidinaga agali urunime ina horombe mbiragabi baya hanguore mamage hayagola harima.
1SA 25:17 Anigo ai Debidihanda ibunaga agaliru áyu ogoniore haru halu ibuwa inanaga agali haguanebi wali agali ibu heba karu bibahendebi bo wahai holobadago manda bia. Ani bulubadago nabidaore í̠na áyu bulenego mbira abale manda bia nabere. I̱na í̠ bederia ibirudagoni irane Nabala ibu mine halu agalime bi laramago hale nahaga hayago manda bialu ibirudagoni, lene.
1SA 25:18 Abigele ibugua bi layago hale howa abaleore mberedi handari kirabi (200) iba be meme dongoneme wabini kiraha waini iba hambu to̱lowabi nogo sibi duria bo hirinibi widi hiru polene nu mbira alebi gerebi lini do gembe bini huba bigi bini handari mbirabi (100) poge lini ale do gembe bini hubane handari kirabi (200) tomo uruni bibahende nogo dongi marunaga erembirani mo paga hene.
1SA 25:19 Ani biai howa ibugua biabe biahaga agali hearuhondo lamialu lalu, Tígua nogo dongi uruni haru halu bamba hadaba. I̱ni tí poramidagua mani talima ibuliya, lene. Anigo mbirale o biyadaruni damene ibu agalinihondo ogoale mbira bero lalu nalami howa bialu hene.
1SA 25:20 Ani bialu Abigele ibuni nogo dongi mbirani biralu harigani Debidi lola hole pene. Ani piyagola Debidi halu ibunaga agali biaru tibi nde hariga mbiraore ogoninaga dege ibalu hene. Ani ibiyagola Abigele ibu hariga hari bare mbira wiagoria balalu pialu hearia Debidi ibiyagola lola hene.
1SA 25:21 Ani lola nahe howa Debidi ibu harigani ibalu howa ibu miniha mitangi bialu, Aiore nde ina dindi ko wiagoha howa agali biagonaga mbirale wiaruni page nabilo handayaho howa baya hangu mamage harimago nde aginaga harimadabe. Iname ibunaga mbirale mbira mo page nabiore harimadago. Ani hemagola ibunaga mbirale bibahende bayale wiai hayagonaga ai ibugua i̱hondo mana ko biadai biyadagonida. Ibunaga mana ogoni tiga nabioreda.
1SA 25:22 Anidago i̱na ibunaga agali bu karu bibahendeore áyu mbiraga bo wahai holiya. Ani nabiruyagua nde Ngode Datagaliwabehanda i̱ bo wahelo laro, lo mitangi bialu pene.
1SA 25:23 Abigele ibugua Debidi ibalu hearia hondowa ibu dongini biralu penego dindini porabupe hene.
1SA 25:24 Ani bialu Debidi heagoria pialu dindini bulu paluwa ibugua Debidihondo lamialu lalu, Agali haguane-o i̱na í̠la bi lolene hameledogo bi larogo hale habe. Bi gendabi biaruni i̱na bia ko heneme bida.
1SA 25:25 Ai Nabala ibunaga mana biagago damene bibahende ko ngubiorego ibunaga bi layadaruni mitangi nabibe. Ibu mini Nabala lenedagoni agali bayale tigabi ndo mini kowi lalu mini wini. Mana ibugua biaga ngarubi ko dege bialu haga ka. Agali haguane-o í̠na agali maru pu lariyaruni i̱ nahende haru.
1SA 25:26 Ainde hale habe. Anduane Homogo ibunime nabule lalu mo wahayagola í̠naga waitigi hearuhondo pani badai bialu tibi homelo bo wa nahariya. Anduane Homogo haluhe kagonaga minini howa i̱na í̠hondo bi hongo howa ogodagua laro. Anduane Homogohanda Nabalahondo pani nelo mulebiradagua dege í̠naga waitigi bu karu pani miai helo.
1SA 25:27 Ai agali haguane-o i̱na tomo yalu ibirudaruni nde í̠naga agali haru haridaruni mo mibelo hameledo.
1SA 25:28 I̱na í̠naga wanakuini mana liahe mbira bidoyagua nde i̱naga ko ogoni la nabi wahabelo hameledo. Anduane Homogohanda í̠naga waitigi mbiragola wai bule pu layagua nde bule piaga harigoni. Í̠na mana ko bulenego nabiaga kegoni i̱ manda bido. Anigo ai Anduane Homogo ibunime í̠ kini helolebira. Ani biragola mani Isaraele wali agalinaga kini í̠naga waneigini aguanenerume dege haabo holebira.
1SA 25:29 Mbiralime í̠ baba wai bialu í̠ bo wahole ibiyagua agalime tinaga mbirale galone ale bayale ngaru handayaho hagadagua Anduane Homogo í̠naga Ngode Datagaliwabehanda í̠ handaya ho holebira. Anigo í̠naga waitigi uruni ti agalime timu tegelape haragola minabe nahe poralidagua Anduane Homogohanda ti bo talu pelolebira.
1SA 25:30 Ani buwa Anduane Homogo ibunime í̠hondo bulebero lalu lo wiyadaguaore bialu ina Isaraele wali agali kamarunaga kini í̠ helolebira.
1SA 25:31 Í̠na mbirali homelo bame bo wanahaga howa mbiralihondo mana ko mbira nabi heagua Anduane Homogohanda í̠ kini helarangi í̠naga bu miniha mo genda holenebi í̠ taga holenebi mbira nawi holebere. Ani buleberego ai mo bayale ho helarangi i̱ mitangi halu biamogo bibe, lalu Abigelehanda Debidihondo ani lene.
1SA 25:32 Ani layagola hale howa Debidi ibugua Abigelehondo lalu, Anduane Homogo ina Isaraelenaga Ngode Datagaliwabe kago ibugua í̠ ogoria i̱ lola hole ibilayadagonaga i̱na turu timbuniore halu ibunaga mini mo yaraga harogoni.
1SA 25:33 Í̠na mini bayaleore wiridagonaga i̱na Ngode Datagaliwabehondo ka̱i̱ larogo ai ibunime í̠ biamogo bilo laro. Ani larogoni irane Nabala ibugua i̱hondo mana liahe biyagonaga i̱na Nabalanaga wali agali bu karu bibahende bo wahai hole birugo í̠na hapai haregonaga laro.
1SA 25:34 Í̠hondobi nde i̱na mo ko naholiya Anduane Homogohanda mo waharagoni. Anigo Anduane Homogo haluhe kagonaga minini howa i̱na heneneore bidolego laro. Í̠na i̱ ibalu hewaria abaleore ibiridago naibinidale egerebagi Nabala ibunaga biabe biahaga agali biaruni aria mbiraore hangubi dére mbira kane nahendedamile, lene.
1SA 25:35 Ani lowa Debidi ibugua mbirale Abigelehanda yu ibiyaruni yamialu howa ibuhondo lamialu lalu, Áyu í̠na bi langirigonidagua bialu Nabala bo wa naholeberogo í̠ andaga dai bialu embeda ho hole pamia, lene.
1SA 25:36 Ani laya handala Abigele ibu Nabala hearia andaga dai bini. Ani dai buwa handalu hearia Nabala ibu tomo timbuni dawa paya bialu agali haguane timbuni mini lene karume biagadagua dewali ngoai howa tomo timbuni nalu ha dege biane hendene. Ani nalu howa Nabala ibuni lulu iba dewa neneyago ai luluyu bereane hondowa Abigele ibugua bi mbira lamia nabi biruwa horo mendengi lamule waho berene.
1SA 25:37 Egerebalene egabi layagola iba nowa luluyu hayago ereba heagola Abigele ibugua Nabalahondo o biyaruni bibahende lamiai hene. Nabala ibu bi uruni hale howa ibunaga buhe̱ abale ereba halu tingini hongo nahe pirilape halu bini. Ani biyagola abale dindini odo ibira halu ema nabi dindini ege to̱le̱ wiradagua wiaho wini.
1SA 25:38 Ani wiane dege horo pira agima peagola Anduane Homogohanda Nabala bo homelene.
1SA 25:39 Debidi ibu Nabala homaya layago hale howa ibugua lalu, Anduane Homogo ibunime Nabalahanda mana ko i̱hondo biyago hondowa ai pani mialu ibu homelo bo wahayadagonaga i̱na turu halu ibunaga mini yaraga harogoni. Nabala ibunime mana ko biyagonaga Anduane Homogohanda mana bialu pani miyada. I̱ ibunaga biabe biahaga kogome mana ko mbira nabuliya Anduane Homogo ibuni i̱naga hariga hapai hayada, lene. Ani biyagola emene howa Debidihanda Abigele ibu dabu bule agali marume damu pudaba lene.
1SA 25:40 Ani laya handala biabe biaga agali biarume pialu Kamelo dindini anda puwa tigua Abigelehondo lalu, Debidihanda í̠ dabu bule hamelo howa ibugua inahondo í̠ damu pudaba laya handala ina í̠ haru dai bule ibirimago ai mali̱yabe, lene.
1SA 25:41 Abigelehanda bi uruni hale howa abale dindini ge duli hanga halu bulu paluwa lalu, I̱ agali haguanenaga biabe biahaga bedogo i̱na ibunaga biabe biahaga agali karunaga gebi wayawaya bia hole biruliya, lene.
1SA 25:42 Ani lowa ibugua ibunaga nogo dongi heagoria abaleore irigiho berene. Ani biruwa ibunaga biabe biahaga wandari duriali bereneru haru halu Debidinaga biabe biahaga agali biaru heba Debidi hearia pole pene. Puwa Debidi hearia anda pialu Abigele ibu Debidi one berene.
1SA 25:43 Abale howa Debidi ibugua Yaserili dindini wali mbira bereago mini Ahinoama dabu binigo ai wali mende Abigele dabu buwa wali kira ibu one berene.
1SA 25:44 Kini Solo wane Migala ibu ala Debidi one dege berenego mani ibu abahanda Galimi tano agali mini Laisi ibu igini Paladi henego ibu dabu bilo hado mini.
1SA 26:1 Agali maru Siba tano howa Gibea dindini Kini Solo hearia ibuwa ibuhondo lamialu lalu, Yuda dindiha dindi ko iba dalu naibaga Hari Hagila heagohayagi Debidi ibu ogoniha ha do hearia de handarima, lene.
1SA 26:2 Ani layago hale halu abaleore Solo ibunaga Isaraeleali ami agali bayaleru daosini tebira (3,000) haru halu dindi ko iba dalu naibaga Siba dindi wiagoha ti Debidi taya bima pene.
1SA 26:3 Puwa Solo ibugua hariga teneni Hari Hagila heagoria balai anda bu hene. Debidi ibu nde dindi ko ogoniha howa hale halu hearia Kini Solohanda ibu taya bima dindi ogoriani ibira layaria hale hene.
1SA 26:4 Ani hale howa ibugua agali maru Solo kabe hondole ohalu pudaba layagola hondo piyarume henene íbu ka layago hale hene.
1SA 26:5 Tigua íbu ka lama dai biyagola Debidi ibu heyalu Solo balai anda bu heagoha pole pene. Ani puwa Solobi ibunaga ami haru haga agali haguane Nere igini Abane henegobi libuore paleagoha puwa baya hanguore deme hendene. Ami maru hearu ti lenelene balai anda bu palelowa Solo ibuniore dombeneha balai anda bu palearia hendene.
1SA 26:6 Ani hondowa Debidi ibugua Hidiali Ahimelegebi Seruia igini Yoaba hamene Abisailabi libuhondo lalu, Libu mendealigo ái í̠naore Solonaga balai anda bu kagoha mbaliya hameledebe, lene. Ani layagola Abisai ibugua, I̱ore polene hameledo, lene.
1SA 26:7 Ani laya handala horo ogoningi mbiraga Debidi Abisaila libugua Solo halu ibunaga amiru balai anda bu heagoha hendeore ohalu anda pene. Anda puwa handalu hebiria ami maru ti lenelene paluyu pelowa Solo ibuni dombeni paluwa ibunaga yandare haguane wiagohayagi dindini wa hearia hendene. Ami haguane Abane halu maru ti paluyu mabu biaria hendene.
1SA 26:8 Ani hondowa Abisaihanda Debidihondo lamialu lalu, Áyu Ngode Datagaliwabe ibunime í̠naga waitigi biago í̠ninaga giha mo ya hayadagoni. Ibuninaga yandare ngagonime boliya waha. Halu mbira hangu nogoba harogola abale homolebirago baro. Halu mende nabolebero, lene.
1SA 26:9 Ani layagola Debidihanda lalu, Nababe waha. Agali Solo ogoni Anduane Homogo ibunime dabenego mbiralime Solo homelo bo wahayagua Anduane Homogo ibugua agali ogoni pani timbuni mulebirago nabe waha laro, lene.
1SA 26:10 Debidihanda laabo halu lalu, Anduane Homogo haluhe kagonaga minini howa heneneore larogo Anduane Homogo ibunime Solo homelo bo wahayaguabi ndo ibuninaga homolene horo ibiragola homayaguabi wai bialu kagola ibu waitigi bu karume wai hamaha bayaguabi nde uruni mbirago bulebira.
1SA 26:11 Anduane Homogo ibugua agali ogoni kini helo ibunime dabo helayago i̱na ibu mo ko halu bo wa naholebero. Ai ibunaga iba be yandarela ngagoni dege mo yalu mba, lene.
1SA 26:12 Ani lalu Debidihanda yandarebi iba bebi Solonaga haguane wiagohayagi wiago mo yalu Abisai libu haru tagira pialu pene. Ani biyago mbiralime handa nabi. Ti mbiralime ogoale birada manda nabi dege palene. Ani bialu hebiria agali paliyaru aria mbiralime heya nabi dege wini. Irane Anduane Homogohanda ti mo paliahondo hai heagola ti paliahondo haiore hene.
1SA 26:13 Ani bialu Debidi ibu dindi ulini hari labo hengene wiagoha pialu hari mende Solo paleago emene kaundia ale dege ngelowa irigiho hene.
1SA 26:14 Ani howa ibugua Abane halu Solonaga ami agali bu hearuhondo olaede howa lalu, Abane-o i̱na í̠ olarogo hale kebe nahe kebe, lene. Ani layagola hale howa Abanehanda ladai bialu lalu, Í̠ agali aigo howa kini olarebe, lene.
1SA 26:15 Ani layagola Debidihanda ladai bialu lalu, Í̠ Isaraele dindiha agali gibi pari wayaliore kebe. Í̠ ogoniore keyagua nde í̠na í̠naga agali haguane kini timbuni kago baya hangu handayaho ha nabi aginaga yu waho kebe. Áyu dege agali í̠naga haguane kini bo wahole tí balai anda bu hemigoha anda ibiyago.
1SA 26:16 Abane-o í̠naga biabe bulene wiago nabi hado waho haridagoni handa. Ami agali tí bibahendeme tínaga agali haguane Anduane Homogo ibunime ibu kini helo dabo helayago baya hangu mamage naharimida. Ani birimidagonaga i̱ Anduane Homogo haluhe kagonaga minini howa heneneore larogo tí bibahende homai halimulo kinihanda tí bo wahaiore holene karulapeda. Ai handadaba. Kininaga yandare biago agoha ngabe. Ibunaga iba be biagobi ibuni paliyagoria haguane wiagoria dege wiyagobi agoha ngabe, lene.
1SA 26:17 Ani layagola Solo ibugua hale halu hearia bi layuago Debidioreyane hondowa ibugua Debidi olowa lalu, I̱ igini Debidi-o ogoni í̠ore kebe, lene. Ani layagola Debidihanda ladai bialu lalu, Kini-o i̱ore kogoni.
1SA 26:18 Kini-o i̱na nde í̠hondo mana ko mbira agi birugonaga í̠naga biabe biahaga kogo talima ibaga bialu kebe.
1SA 26:19 Kini-o bi i̱na loleberogo baya hangu hale habe. Ainde Anduane Homogo ibunime i̱ bo wahole pu lenego ibiriyagua nde i̱na ibunaga loma mbira i̱ dara helonaga bo deloliya. Ani ndo agalime i̱ bame ndelenego ibiriyagua nde Anduane Homogohanda ndelaga uruni tini pani miadai bilo hameledo. Ani biyadaruni irane i̱ Anduane Homogo ibugua dindi Isaraele wali agali ina holoma̱ya ngiyago yu wahalu mbirale dama mitangi bialu gime wabini ngaruhondo bi pupu wima dindi tara ngaruha hama poliya tigua i̱ talu pelayada. Ani bialu dindi Anduane Homogohanda i̱naga winigo naholiyanaga biyada.
1SA 26:20 Ai Isaraelealinaga Kini-o í̠na agalime tede bole taya biagadaguabi irabuha ega bedaru bole taya biagadaguabi i̱ taya bima ibirigo aginagabe. Anigo i̱ Anduane Homogo yu wahalu dindi mendeha koore homoligo nababe, lene.
1SA 26:21 Solo ibu bi uruni hale howa ibugua Debidihondo lalu, Ai i̱na mana koore bialu harudago daraba. I̱ igini Debidi-o aiore i̱ni koria dai bibe. Áyu mbiraga í̠na i̱ bo wahabehego nabaridago ai i̱na í̠ bo waholene manda nabuleorego dai bibe. Mana i̱na bialu harugo damene ko hangu bialu haruda. Ko emene agima ndo i̱ha ngelo haruda, lene.
1SA 26:22 Ani layagola Debidi ibugua Solohondo lalu, Kini-o í̠naga yandare áyu i̱ giha yu kogo í̠naga ami agali karuni mbiragome mo pu labelo hameledo.
1SA 26:23 Anduane Homogohanda ibunaga bi mana lowini ngaru mbiralime bayuwa talialu bialu haga karu ti baya hangu helo biamogo biaga ka. Í̠ áyu ibugua i̱naga giha mo ya hayagoyu i̱na í̠ bo wanahe waharugo irane Anduane Homogo ibunime í̠ kini habelo dabo helayago manda buwa ani biru.
1SA 26:24 I̱naga miniha manda bialu i̱na Solo mo ko naholeore. I̱na ibu bayale helo wahole manda biru. Anidagua dege áyu Anduane Homogohanda i̱naga bu miniha genda timbuni ngelo koruni mo wahai halu i̱ bayale holiya biamogo bilo hameledo, lene.
1SA 26:25 Ani layagola Solohanda Debidihondo lalu, I̱ igini Debidi-o Anduane Homogohanda í̠ haru halu biamogo bilo. Ani biragola í̠na bulebereru damene bibahende bayale hai helo laro, lene. Ani lai halu Debidi ibu hari uruni yu wahalu piyagola Solo ibubi ibuni dalu dai bini.
1SA 27:1 Mani howa Debidihanda manda bu handalu hearia, Emene howa Solohanda i̱ bo waholobadago. Anigo Solo nahendedaha pora bialu Pilidia dindiha ha do hole poliya. Ani berogola Solo ibugua i̱ Isaraele dindiha taya bia dege bialu manga halu wahelo ani buliya, lo manda bini.
1SA 27:2 Ani lo manda bialu Debidibi ibunaga agali handari waragaria (600) biarubi ti pialu Gede dindinaga kini mbira Maiogo igini Agisi heago hearia pene.
1SA 27:3 Ani pialu Debidi ibunaga agali biarubi tínaga one waneiginirubi bibahende Gede dindi ogoriani pu hene. Debidi one kira Yaserili wali Ahinoamabi mende Kamelo wali Nabala homayago one dalo Abigelebi ti haru pu berene.
1SA 27:4 Debidi ibu Gede dindini ibida pu ka layago hale howa Solo ibugua Debidi lone taya bima ibaga nabi wahene.
1SA 27:5 Mani howa Debidihanda Agisihondo lamialu lalu, Í̠ i̱naga nenegeore keyagua nde í̠naga dindiha tano emene ngeruni hole poliya pu larene. Agali haguane-o i̱ iya haru í̠naga tano ogoriani mandagi holene nakarulape ndodabe, lene.
1SA 27:6 Ani layago hale howa Agisi ibugua ibu daluha tano emene mbira mini Sigilaga wiago Debidi mini. Ani binigo Sigilaga tano ogoni Yudanaga kini hararunaga wia ai̱ henego áyu wiaabo kagoni.
1SA 27:7 Debidi ibu mali mbirani ege maria Pilidia dindiha ho hene.
1SA 27:8 Ani howa Debidi halu ibunaga agaliru tigua Isaraeleali waitigi maru Gesua hameiginirubi Girisi hameiginirubi Amalege hameigini palearu bababi wai bu pugu bialu hene. Agali hameigini uruni ti Isaraeleali baba waitigiore henego ti abene unurayagi paliyu pialu Iyibi dindiha tubari dindi ko wali agali napaliaga mini Sua wiagoha paliari hene. Ti bambaore dindi ogonihaore haabo haga hene.
1SA 27:9 Ani hearia Debidi halu ibunaga agali biaru tigua uruni baba wai bialu wali agalibi bibahendeore bo wahai halu tinaga nogo sibiru bulumagaru dongiru kamele hearu ti haru hai halu tinaga aga wiarubi heba mo yai hene. Tigua anidagua bialu ti Agisi hearia dai bigi biaga hene.
1SA 27:10 Ani dai biragola Agisi ibugua Debidihondo hale halu lalu, Áyu í̠ wai bu pirigo dindi ani wai bu piribe, lalu hale haga biaga hene. Ani hale hayagola Debidi ibugua Agisihondo ke̱ halu lalu, Áyu Yudali baba wai bu pene dai bero, lalubi, Yarameleali baba wai bu pene dai bero, lalubi, Keniali baba wai bu pene dai bero, lalubi ibuni hameigini bu hearu baba wai bu pene laga bialu Agisihondo ke̱ haga bialu hene. Agali Debidi hameigini uruni ti Yuda dindinaga abene unurayagi hene.
1SA 27:11 Debidi ibugua wai bialu howa wali agalibi tanabi bo wahai haga bini. Ani bigi binidagoni irane wali agali mbiragome Gede dai buwa tigua bialu kagoni lamulilono ani bini. Debidi ibu Pilidia dindiha heangi anidagua dege biaabo halu haga hene.
1SA 27:12 Ani bialu heagola Agisi ibugua mitangi bialu Debidihanda heneneore lara lo mitangi bialu howa ogodagua manda bini. Ibugua ibuni damene Isaraeleru babaore wai bialu kagome tigua ibu hame nalolebirago ai i̱ biamogo bialu i̱naga biabe bialu haabo helo karulapeda lo manda bini.
1SA 28:1 Mani emene howa Pilidiali ami biaru Isaraeleali baba wai bule lowa mo mogo bu hene. Ani bu howa Agisihanda Debidihondo lalu, Í̠bi í̠naga agali karubi tí wai i̱hayagi holeberemigo ogoni manda buwaore kegoni, lene.
1SA 28:2 Ani layagola Debidihanda ladai bialu lalu, E̱ aniore bulebero ndobe. I̱ í̠naga biabe biahaga harugo í̠nime i̱na agua berobe hondole habe, lene. Ani layagola Agisihanda lalu, Bayalego i̱na í̠ i̱naga tingini mamage haabo habelo heloliya, lene.
1SA 28:3 Ala Samuele homayagola Isaraele wali agali bibahende mo ngoai howa ibunaga dugu biahalu hene. Ani bialu tigua ibuni dindi Lamani hora hene. Ala Solohanda wali agali maru gamugamu biagarubi halaga biagarubi homene dinini baba bi laga hearubi ti bibahendeore, Isaraele dindini naholego tagira piaiore hadaba, lene.
1SA 28:4 Ani bu howa Pilidialiru ti ami mo ngoai howa Sunemu tano handa de̱le̱ wiagoriani balai anda bu hene. Ani biagola Solo ibu nde Isaraelealiru ami mo ngoai howa Hari Giliboa wiagoria balai anda bu hene.
1SA 28:5 Solo ibugua Pilidiali ami hearu hondowa gi gibiore hene.
1SA 28:6 Ani bu howa ibugua Anduane Homogohondo agi buabe lalu hale hene. Hale hayagola Anduane Homogohanda ladai nabi mbira emagahabi ege to̱le̱ emene kira Urimu Tumimulamebi Ngode Datagaliwabe mana latagi halu mbiwia haga hearuha howabi mbira ladai nabiore wini.
1SA 28:7 Ani biyagola Solohanda ibunaga haru haga hearuhondo lamialu, Wali homene dinini baba bilaga mbira taibu pudaba. Ani beremigola i̱na ibu bedaria puwa bi lolobaya, lene. Ani layagola tigua ladai bialu lalu, Dindi Endoni mbira beda, laya.
1SA 28:8 Ani layago hale howa Solo ibugua kininaga aga golo ngelalu aga tara mende karula aribia halu aruma hayagola agali kira haru halu wali biago berearia hondo pene. Puwa ibugua wali biagohondo lalu, Í̠na mani ogo ale tagira ibulebira lalu agali mbira i̱na mini loleberogonaga mini dinini olalu hale habe, lene.
1SA 28:9 Ani layagola wali biagome ladai bialu lalu, Tígua Kini Solohanda biyagoni manda biaiore kamigoni. Ibugua wali agali gamugamu biagarubi halaga biagarubi homene dinini baba bi laga hearubi ti bibahende Isaraele dindini nahelo lalu bo ba tagi hayagoni. Ani biyagodago irane aginaga tígua ohowa i̱ belonaga ndelo wialu ibirimibe, lene.
1SA 28:10 Ani layagola Solohanda habo nalole lalu bi hongohe mbira lowini. Anduane Homogo haluhe kagonaga minini howa i̱na bi mbira habo nalole lalu, I̱na ogoni langerogonaga tandagabi mbira í̠ keria naibulebira, lene.
1SA 28:11 Ani layagola wali biagome hale halu lalu, I̱na ai mini lalu oloabe, lene. Solohanda ladai bialu lalu, Samuele mini ola, lene.
1SA 28:12 Ani layagola wali biagome Samuele hearia hendene. Hondowa mogo lalu koaba lowa Solohondo lalu, I̱ mo hondo halu haridago irane agibe. Í̠ Kini Solooredago, lene.
1SA 28:13 Kini biagome wali biagohondo lalu, Gi nahabe. Í̠na agi hendedebe, lene. Ani layagola ibugua ladai bialu lalu, I̱na homa dinini dindiha howa tagira ibiraria hendedo, lene.
1SA 28:14 Solohanda hale halu lalu, Ibu agi handalehedabe, lene. Ani layagola wali biagome ladai bialu lalu, Ibu agali wahe mbira iraga halu ibiragoni. Ibu aga luni bia gimbubi mbirada, lene. Ani layago hale howa Solo ibu mitangi bu handalu hearia ogoni Samueleda manda buwa íbu ka manda bialu dindini bulu palu ibira hene.
1SA 28:15 Ani biagola Samuelehanda Solohondo lalu, Irane agi bulenaga í̠na i̱ barila halu mo heya haribe, lene. Ani layagola Solohanda ibuhondo ladai bialu lalu, I̱na genda timbuniore yu kogoni. Pilidialime wai i̱ baba kaware haanda halu Ngode Datagaliwabehanda i̱ yu wahalu piyagola ko. I̱na ibu olarogola hale halu mbira emagahabi ibunaga mana latagi haga agali karuha howabi ladai nabiaga. Ani biyagola í̠na i̱ ogodagua bibe lalu langibelonaga olaru, lene.
1SA 28:16 Samuelehanda lalu, Anduane Homogohanda í̠ yu wahalu í̠ waitigi haya. Irane aginaga i̱ olaribe.
1SA 28:17 Anduane Homogohanda í̠hondo biyadagoni ibugua ani bule lalu í̠nihondo i̱ha howa langiyadagua biyada. Ibugua í̠na kini howa haru haga harigo mo wahalu Debidi ho aribia helolebira.
1SA 28:18 Í̠na Anduane Homogonaga bi mo wahalu Amalegeali bibahendeore bo hilo wahalu tinaga mbirale wiarubi mo hole bu waholene wiyago nabirigo. Irane ogoninaga Anduane Homogohanda áyu í̠hondo ogonidagua biragoni.
1SA 28:19 Ibugua í̠bi Isaraele wali agalibi minalu Pilidialiruhondo mulebira. Yawi í̠bi í̠naga iginirubi tí i̱ heba mandagi hami̱ya. Ani bidamigola Anduane Homogohanda Isaraelenaga ami agali karubi Pilidialihondo minu mulebira, lalu Samuelehanda lene.
1SA 28:20 Samuelehanda bi ogonidagua Solohondo layagonaga Solo ibu mogo gibiore lowa dindini durulo ibiraho wini. Horo ogoningi tomo mbira nane heneyagome ibu hongo nahe heneya.
1SA 28:21 Ani biyagola wali biago ibu Solo wiagoria puwa handalu hearia ibu mogo gibi lo wiaria hendene. Hondowa ibugua ibuhondo lalu, Agali haguane-o í̠na bia larigodagua bialu hewaria i̱ homoleneni pu kogo hendedeni.
1SA 28:22 Ai áyu i̱na í̠naga biabe buahagame bibe larodagua bibelo hameledo. I̱na tomo maru nabelo dawa manda manda bia harogo. Í̠na tomo ogoni naore bulebere nalu hongoore kegola hariga polebiridago pobelo, lene.
1SA 28:23 Solohanda tomo biagoni nolene manga howa lalu, Tomo mbira nanolebero, lene. Ani layagola agali kira ibu heba ibiyago labomebi wali biagomebi tigua ibuhondo lalu, Harugo naore bia, lene. Ani layagola ibu odo ibiraho wiyagoni heyuwa dagiani berene.
1SA 28:24 Ani bereagola wali biagome puwa nogo bulumaga igini hungubalua haba tigile mbira heneyago abale bo dawene. Ani bialu ibugua balawa wiago maru muwa mberedi yidi ibira nahene wabu hirini.
1SA 28:25 Wali ogoni ibugua tomo uruni Solobi ibunaga agali kira biago labobi nelo manda manda biagola ti nene. Nalu ti mbiraga ogoningi dege pene.
1SA 29:1 Pilidiali hearume tinaga ami agaliru haru halu Abege tano wiagoria tidiyu hene. Ani heagola Isaraelealiru tibi nde tidiyalu ibuwa iba duguaga Yaserili dindi ulini wiagoria balai anda bu hene.
1SA 29:2 Ani heagola Pilidialinaga kini duriali hearu tigua tinaga ami agali hearu handari mbira (100) halu mbira tagalo helalu daosini mbira (1,000) halu mende ona tagalo helaga buwa wai bule wai hamaha haru pene. Pilidia amidaru ti bamba halu piyagola Debidi halu ibunaga agali biaru ti mani Kini Agisi heba ibini.
1SA 29:3 Ani ibiyagola Pilidia ami haru haga haguane hearuni tigua Debidi halu ibunaga agali biaru ibiyago de hondowa lalu, Hiburuali uruni ti ogoha aginaga íbu kabe, lene. Ani layagola Agisihanda tinaga bi layago ladai bialu lalu, Agali o kago ibu Debidi ka. Ala ibu Isaraele wali agalinaga Kini Solonaga ami haru haga agali haguane mbira henego ai ibu ibalu i̱la luore henego kagoni. I̱la howa ibugua mana liahe mbira nabiore haabo hariba, lene.
1SA 29:4 Ani layago lelowa ami haru haga haguane uruni tigua Agisihondo keba halu lalu, Tano ibu helo miridagoria hole pelo áyu ogoni daibia larene. Debidi ibugua beregedalu ina Pilidiali kamaru baba wai biadai buwa boligo ina haru wai ma nalabe. Ibugua anidagua biragola Kini Solohanda ibuhondo turu halu lone haru dai bulene wulebira.
1SA 29:5 Abale walirume agali ogoni Debidi ibuhondo turu howa mambolo balu mali lialu iba gana ogodagua lene. Solohanda agali daosini dewa dege bayagoyu Debidihanda daosini dewa bolanguaore howa bayagoni, lenego agali ogoni ndobe, lene.
1SA 29:6 Ani layago hale howa Agisihanda Debidi olalu íbu lowa ibuhondo lalu, Anduane Homogo haluhe tí Isaraele wali agalinaga Ngode Datagaliwabe kagonaga minini howa i̱na í̠hondo bi heneneore laro. Í̠ agali tigabiore kegonigo i̱nime manda bialu ai i̱ biamogo bialu wai bule mba larugoni. Ala i̱ hewaria ibirigoni howa hama ibiribagoha í̠na mana ko liahe mbira nabiore harigo áyu kabagoni. Anigo ai kini maru karu tigua í̠ ina baba mandagi wai polene turu nahe kagoni.
1SA 29:7 Ainde tigua anidagua laragonaga í̠na kini biaru ti mo keba holenaga mbirale mbira nabi í̠ dai bialu hendore andaga hole pamia, lene.
1SA 29:8 Ani layagola Debidihanda Agisihondo lamialu lalu, Anigo i̱naga agali haguane-o i̱na mana ko mbira agi birugonaga laramibe. Abale í̠naga biabe pigane bialu harugo howa hama ibinigo áyu kogoniha howa mbira agile birube. I̱naga agali haguane Kini-o í̠nila haru mandagi pialu í̠naga waitigi bu haruaruni baba wai bule polene nawidago aginagaorebe, lene.
1SA 29:9 Ani layagola Agisi ibugua Debidihondo ladai bialu lalu, I̱naga deni howa í̠ha ko mbira nawiore Ngode Datagaliwabenaga dahuliyali aleore kegoni. Anigo agali haguane maru karu tigua í̠ ina baba napole lalu bi lo wahayagoni.
1SA 29:10 Ai Debidi-o haleha. Yawi egabi naledaore í̠bi Solonaga biabe biahaga agali karubi tínaga mbirale wirimidaru kabu bialu tano mbira i̱na tí halimulo ngirugoriani hole abale pilimu. I̱na í̠ agali bayaleore kegoni manda bidogo í̠na i̱la miniha genda holeni nahabe, lene.
1SA 29:11 Ani laya handala egabi layagola egerebagiore Debidi halu ibunaga agali biaru ti andaga tini haga Pilidia dindi biagoha hole dai biyagola Pilidia ami biaru ti Yaserili dindi pole pene.
1SA 30:1 Debidi halu ibunaga agali biaru bibahende pialu horo tebonengi tini dalu Sigilaga tano anda pene. Anda puwa handalu hemiria Sigilaga tano bibahende bo gialabaga biai hayiyane hendene. Anigo Debidi ibu Pilidiali baba heangi Amalegeali bu hearume Yuda wali agali maru unurayagi palearu baba wai bialu hene. Ani bialu tigua Sigilaga tanoha wai bialu bo podaga bima anda puwa tano wiagobi bo heda hai hene.
1SA 30:2 Ani bo heda halu tano ogoniha wali waneigini bibahende bu hearu mbira bo wanahe ti haru piaiore hene.
1SA 30:3 Ani peaha mani Debidi halu ibunaga agaliru ti andaga dai buwa handalu hemiria Sigilaga tanoha anda hayaruni bo heda hai halu ti one waneiginibi bibahende minu yalu piaiore hayiyane hendene.
1SA 30:4 Ani biyiyago hondowa Debidi halu ibunaga agali biarume dugu bia dege bialu naina hongo bibaho wima pene.
1SA 30:5 Debidi one wali kirabali Ahinoama Abigelelabi haru halu piyiyane hendene.
1SA 30:6 Ani haru halu piyiyago hondowa Debidinaga agali biaru tigua bu miniha genda howa keba halu Debidi ege to̱le̱me bole manda bini. Ani biyagola Anduane Homogo Debidinaga Ngode Datagaliwabehanda ibu biamogo bialu mini mo hongo hene.
1SA 30:7 Ani mo hongo heagola Debidi ibugua Ahimelege igini loma binigo mo miaga agali mini Abaiada lamialu lalu, Anduane Homogonaga hame hale habiya loma binigo mo miaganaga aga mini ebodi karulaga biago mo yalu íbu layagola ibugua aga ogoni mo yalu ibini.
1SA 30:8 Mo yalu ibiyagola Debidi ibugua Anduane Homogohondo hale halu lalu, Agali waitigi o piyadaruni talima poabe be nape wahoabe. Ainde talima piruyagua i̱na ti minuleberobe be naminuleberodabe, lalu hale hene. Ani hale hayagola Anduane Homogohanda ladai bialu lalu, Karulapego í̠na ti talima pole pu. Ani puwa tini balu tínaga wali waneigini uruni haru dai buleberemi, lene.
1SA 30:9 Anidagua laya handala Debidi halu ibunaga agali handari waragaria (600) biaru tigua piyiyadagua talima pene. Pialu iba Beso peagoria tagira puwa agali maru ti ogoriani hondo hene.
1SA 30:10 Agali handari kira (200) uruni tinaga ge ibira halu pobe manga hayagola ogoriani helalu Debidi halu agali handari maria (400) hangu baba pialu Amalegeali piyiyaru talima pole pene.
1SA 30:11 Ani pialu hemiria Debidinaga agali biaru tigua Iyibiali igiri daliahe mbira hearia handa walia howa Debidi hearia haru ibini. Ani haru ibuwa ibu mberedibi ibabi nelo mialu
1SA 30:12 poge lini ale do gembebu yiagobi huba mbira nelo mialu gerebi lini do gembebu yini hubakibi nelo mia dege bini. Igiri ogoni ibu iba tomobi nane dege horo tebiru howa ai tongolo mibeheore hene. Ani homaluore heariago tomo biaruni nowa hongo hene.
1SA 30:13 Ani heagola Debidi ibugua ibuhondo hale halu lalu, Í̠naga agali haguane aibe. Í̠ anialibe, lene. Ani hale hayagola igiri biagome ladai bialu lalu, I̱ Iyibialigo ai Amalegeali mbiranaga garabaya biabe ale biahaga kogoni. I̱ warago bayagola i̱naga agali haguane ogonime i̱ ogoha habe lalu piyagola horo tebiru i̱ni hangu haru.
1SA 30:14 Iname unugohayagi pialu Yuda dindiha wai bialu Keredealiru bababi Kalebeali hearu bababi wai buwa tinaga mbirale wiaru bibahende mo yai harima. Ani bialu Sigilaga dindiha puwa iname tano wiago bo heda harima, lene.
1SA 30:15 Anidagua layagola Debidihanda ibuhondo hale halu lalu, Í̠na ina Amalegeali uruni kagoria haru pu poleberebe, lene. Ani layagola ibugua lalu, I̱na tí haru polene karulape degego ai í̠na Ngode Datagaliwabenaga minini howa i̱ bo wa nahole lalu bi mendebi nde i̱naga agali haguane giha minu miadai nabule lalubi bi ogonidagua lalu henene lo wia, lene. Ani layagola Debidihanda nabuleore lalu bi ogoni heneneore lowini.
1SA 30:16 Ani lowiya handala Iyibiali igiri ogoni ibugua Debidi Amalegeali biaru hearia haru pene. Amalegeali biaru ti nde Pilidia dindihabi Yuda dindiha howabi mbirale dewaore mo yinigo odaruninaga turu howa tigua tomo dewa nagimbu bialu dindi ogoriani ho payapayabu hene.
1SA 30:17 Ani hearia hondowa Debidi halu ibunaga agali biaru tigua gao lelo paluwa horo mendengi egerebagiore pialu Amalegeali uruni baba wai bialu alendo hene. Ani bialu tigua Amalegeali uruni dewaore bo wahai hene. Ani bayagola Amalegeali uruni aria handari maria (400) hangu nogo kameleni biralu ibida pene. Anigo Amalegeali dewaore Debidi halu ibunaga agali biarume bo wahai hene.
1SA 30:18 Ani bialu Debidi ibugua ibu one kira biagolabobi wali marubi waneigini biarubi mbirale Amalegeali urunime mo yalu pene biarubi bibahendeore mo yu dai biai hene.
1SA 30:19 Tinaga mbirale mbira ereba naheore bibahende mo yu dai biai hene. Debidinaga agali biaru tinaga waneiginiru mbira ereba nahe bibahendeore hai hearia mo wialu haru dai bini.
1SA 30:20 Ani bialu tigua nde Amalegeali biarunaga nogo sibi bulumagarubi haru hene. Debidinaga agali biarume sibi bulumaga biaruni haru bamba halu howa tigua huaro lalu wai bi lama pialu howa lalu, Nogo sibi bulumaga uruni bibahende Debidinaga hanguda, laga bima pene.
1SA 30:21 Ani laga bima pialu agali handari kira (200) harigani ibalu howa hongo naheyagola amu iba Beso piyagoria helalu ibirimiru heagoria tagira pene. Ani pirimigola agali uruni tigua Debidi halu wali waneigini biaru ibiyago lola hole ibiyagola Debidi ibugua ti heagoria kaware puwa agua harimibe lalu ti mo bila hene.
1SA 30:22 Ani mo bila hayagola agali Debidi baba mandagi pene biaruni aria maru tinaga mini kowi howa tigua lalu, Agali uruni ti ina haru mandagi wai bule ma nalayago ai iname wai bialu mbirale mo yidamaruni aria maru ti natalebu muleberema. Ti nde tini one waneiginiru hangu haru pelo, lene.
1SA 30:23 Ani layagola Debidi ibugua ladai bialu lalu, I̱ hameneru-o mbirale uruni Anduane Homogo ibunime inahondo ngiyagodago ai tígua bi o larimidagua bulene nawi. Agali inanaga tano bo gialabaga bialu mo ko haga biaruni iname bo podo hana holoma̱ya Anduane Homogo ibunime ina handayaho halu biamogo biyagoni.
1SA 30:24 Ai tínaga bi o lalu kamiruni karulape aiwa lolebirabe. Tínaga bi uruni karulape larimi lolene agali mbira nahedago ai mbirale wai hamaha howa mo yarimaruni bibahende ina damene ogoria hayaru baba ogobi dege dege hanuni tale buleberema. Agali dabudabu handayaho hayaru ti nde wai piaga biaru ti yaradagua dege yilo talebu mimi̱ya, lene.
1SA 30:25 Ani lalu Debidi ibugua bi o layadagoni Isaraele dindiha mo mana henego tigua wai puwa mbirale mo yarago bibahende tale bialu ogobi dege dege yaga winigo wiaabo hene.
1SA 30:26 Ani layagola howa Debidi halu ibunaga agali biaru ti Sigilaga dai buwa Debidi ibugua wai bialu mbirale mo yu dai biyaruni aria maru Yuda dindiha agali haguane hearunaga talebu wia haga bialu howa tihondo bi lawia haga bialu lalu, Mbirale uruni iname Anduane Homogonaga waitigi bu hearu baba wai bialu mo yarimago ainde maru tínaga wia haga bero, lene.
1SA 30:27 Debidi ibugua mbirale uruni pelaga binidaruni agali haguane maru Bedele tanoha hearuhondobi Yuda dindiha unurayagi Lama dindi wiagoha hearuhondobi Yadiri dindiha hearuhondobi
1SA 30:28 Aroe dindiha hearuhondobi Sibimodo dindiha hearuhondobi Esedemoa dindiha hearuhondobi pelaga bini.
1SA 30:29 Ani bialu Lagala dindiha hearuhondobi talebu pelalu Yaramele dindiha hearuhondobi Keniali biaruhondobi maru wia haga bini.
1SA 30:30 Ani wia halu Homa dindihabi Borasana dindihabi Adaga dindihabi
1SA 30:31 Heberono dindihabi dindi uruniha hearuhondo talebu wia haga bini. Ani bialu bamba Debidi ibuni halu ibunaga agaliru ti pialu howa agali maru nenege haga bini dindi bibahendeha hearunaga dabudabu maru talebu wia haga bini.
1SA 31:1 Pilidiali amime Isaraeleali baba wai Hari Giliboa heagoria biyagola Isaraeleali dewa homene. Maru Solo ibunaga igini biaru heba ibida purogo lene.
1SA 31:2 Ani purogo layagola Pilidiali ami abale talima ibalu Solo igini tebira biaru Yonadana Abinadaba Malagisua imaru minalu bai hene.
1SA 31:3 Ani bialu Solo heagoria wai hongoheore minama minama anda ibalu waitigi hearunaga timume Solo bila hene.
1SA 31:4 Ani biyagola ibugua igiri wai biaga humbi yandarerubi yu heagohondo lalu, Pilidiali Ngode Datagaliwabe mitangi nabiaga nai ibirarume i̱ nabelo í̠naga ayu tibu yidegonime i̱ homoliya abale ba, lene. Ani layagola igiri biagome ani bolenego gi timbuni howa nabe wahene. Ani biyagola Solo ibuninaga wai biaga ayu tibu biago yamuwa deneni ibunime pili paga halu homene.
1SA 31:5 Ani biyagola igiri ibula ibaga bu haribigo ibugua Solo homayago hondowa ibuninaga wai biaga ayu tibu yu hayago yamuwa deneni ibuni pilo paga halu Solo homayadagua dege homa palu bini.
1SA 31:6 Ani bialu Solo ibunibi ibunaga igini tebirarubi ibunaga wai biaga humbi yandarerubi yu ibaga biaga biagobi Solonaga agali bibahendeore horo ogoningi hangu homai hene.
1SA 31:7 Ani biagola Isaraelealiru ti Yaserili dindi guagua wiagoria hene. Ani biagola ni tagira ibiragohayagi Iba Yodana piyagoha tigatiga howa Isaraeleali ami ibida purogo layagobi Solobi ibu iginirubi homaya layagobi hale halu hearia tigua nde tinaga dindi andabi wahalu ibida pene. Ani buwa ngelalu peagoria Pilidiali biaru ibalu ogoriani karulo hene.
1SA 31:8 Mani wai ogoni biai howa horo mbira peagola Pilidiali biaru puwa Isaraeleali balu homene biarunaga mbirale dabudabu yu wahalu pene wiaru ti mo yalu pene. Ani bialu howa handalu hearia Solobi ibunaga igini tebira biarubi tinaga tingini uyu Hari Giliboa tene wiagoha bo paya bu wiaria handa walia hene.
1SA 31:9 Ani bu wiaria hondowa tigua Solonaga haguane pugualu ibunaga wai bulenaga aeane karuleago ti golowa agali maru hearuhondo mialu bi baya mbira yidama lalu Pilidialinaga mbirale bi pupu wule gime wabiniruhondobi wali agalihondo lamule pudaba lene.
1SA 31:10 Ani lowa tigua Solo ibuninaga wai biagane timu humbi yandare uruni mo yalu puwa mbirale dama mitangi bialu gime wabini Asedarenaga bi pupu wiaga anda heagoha mo yalu puwa ngelene. Ani bialu Solonaga tingini Bedesana tanonaga pabeni milime bapara howa ngelene.
1SA 31:11 Yabese wali agalime Gileada dindini howa hale halu hearia Pilidiali biaru tigua Solohondo biyaru ogodagua biya lalu layago hale hene.
1SA 31:12 Ogoni hale howa agali pari wayali elahe hearume abale gerai lalu Bedesanani ibule ibalu heaore egabi lene. Ibuwa tigua Solobi ibu igini tebira biarunaga tingini biaru mo yalu Yabese dindini dai buwa irani delene.
1SA 31:13 Ani bialu kuni damene tigua mo yalu puwa ira mini tamarisigi mbira tanoni henego teneha hora halu tini dara howa horo karu tomo mbira nane duguanda ho hai hene.
2SA 1:1 Debidibi ibunaga ami agalirubi ti Amalegealiru baba wai bialu henego dai buwa horo kiru Sigilaga tanoha pu hene. Ani pu heaha Kini Solo ibu halu nde wai halu mende Pilidialiru baba bialu hearia tigua Kini Solo waime bene homayago Debidi ibu hale nahe dege hene.
2SA 1:2 Ani hale nahe hearia horo tebonengi igiri daliahe Kini Solo heba wai bialu henego aria mbira Solo dara howa ibunaga agaru budu bagabi bialu dongoma dindiru ibunaga haguaneni dugu hiralu Sigilaga tano anda ibini. Ibalu Debidi heagoria ibuwa Debidi geha bulu palialu kininaga mini yaraga halu ani bini.
2SA 1:3 Ani biyagola Debidihanda igiri biagohondo lalu, Í̠ agoha howa eberebe, lene. Ani layagola igiri daliahe biagome ladai bialu lalu, I̱ Isaraeleali ami hearu heba wai hama wiagoha henego ai pora bialu ibida ibiru, lene.
2SA 1:4 Ani layagola Debidihanda ibuhondo hale halu lalu, Wai bialu harimidagonaga te bibi maru hale holene hame ledogo langi, lene. Ani layagola igiri daliahe biago ibugua ladai bialu lalu, Isaraele ami agali heneru ibida piai hayagola dewaore Pilidiali hearume minalu bai haya. Kini Solobi ibu igini Yonadanabi kirabali bayagola homaya, lene.
2SA 1:5 Ani layagola Debidihanda ibuhondo hale halu lalu, Libu homaya lowa agua manda bialu larebe, lene.
2SA 1:6 Ani hale hayagola igiri daliahe biago ibugua ladai bialu lalu, I̱ Hari Giliboa heagoria howa handalu hewaria Solo ibugua ibunaga wai biaga yandare yiago dindini hanga howa ogoriani maliaho hearia handaru. Ani handalu hewaria ibunaga waitigi agalirume nogo hosini biralubi hosime gili laga mini karisini heyu halubi abale hapara hayane handaru.
2SA 1:7 Hapara hayagola Solo ibugua beregedowa handa dai bialu hearia i̱ erembirahayagi mama ibalu hewaria hondowa i̱ olaya. Olayagola i̱na lalu, Ya agali haguane-o ladai biru.
2SA 1:8 Ani ladai birugola ibugua lalu, Í̠ agohayagi howabe, layagola i̱na ladai bialu lalu, I̱ Amalegeali ko, laru.
2SA 1:9 Ani larugola ibugua i̱hondo lalu, I̱naga waitigi biarume i̱ bayago ai áyu dege homo tongolo mule ngogonigo abale ibalu í̠na i̱ homoliya ba, laya.
2SA 1:10 Ani layagola i̱na abale ibu heagoria puwa homelo bo tongolo milaru. Ani birudagoni irane i̱na manda bialu hewaria ibu yandare biagoria maliaho hayadago yu wahalu dindini ibira hayagua ibu homabehe heago hondowa ani biru. Ibu homayagola kini ibunaga tangi karuleagobi gi pagida karuleagobi uruni bibahende agali haguane í̠naga golo yahalu ibirugo ao í̠ni ngero, lene.
2SA 1:11 Bi ogoni layago hale howa Debidihanda ibunaga bu miniha genda timbuniore howa ibuninaga aga bu heago minu lerelene. Ani biyadagua Debidinaga ami hearu tiguabi nde ani dege bini.
2SA 1:12 Solobi Yonadanabi Isaraele ami biarubi Anduane Homogonaga wali agali biaru bibahendeorebi waime bai hayagola tigua dara howa dugu bia dara ha bialu tomoru nane wahowa horo mbiru halu alendo hene. Waime dewaore bai hayagola tigua anidagua bini.
2SA 1:13 Ani buwa Debidihanda igiri daliahe bi yalu ibini biagohondo lalu, Í̠ dindi aniali kebe, layagola igiri daliahe biagome ladai bialu lalu, I̱ Amalegealigo ai bamba i̱ aba ibu inane dindi wahalu ibuwa Isaraele dindiha ho tene heneyago kogoni, lene.
2SA 1:14 Ani layagola Debidihanda lone hale halu lalu, Anidago í̠na agali Anduane Homogo ibunime dabalu helene biagoni bolene gi nahe baridago agua biribe, lene.
2SA 1:15 Ani lowa Debidi ibunaga ami agali mbira heago íbu lowa lalu, Igiri ogo homelo ba, lene. Ani layagola ami biagome igiri daliahe biago ayu tibu wai biaga yu heagome dibayagola homene.
2SA 1:16 Igiri biagonaga tingini wiago hondowa Debidihanda lalu, Í̠nime bia ko haridagonaga pani naregoni. Í̠nime latagi halu agali Anduane Homogohanda dabalu helene biago baru larigome í̠ni homedegoni, lene.
2SA 1:17 Debidihanda dara howa dugu bialu iba gana ogo Solo ibunibi ibu igini Yonadanabi mitangi bialu lene.
2SA 1:18 Ani lowa Debidihanda Yuda wali agali bibahendeme iba gana ogoni lo manda bilo, Lo manda biaiore halimu, lalu hongo howa lamini. Iba gana ogoni mini Waime Benegonaga Dugubi laganego mbuga mbira mini Agali Tigabirunaga Mbuga laga ngagoha gilibu nga. Debidihanda iba gana ogoni ogodagua lene.
2SA 1:19 Ina Isaraele wali agalirunaga agali haguane hayaru hari nene wiaruha homayada. Inanaga ami agali hongohe biaru homai hayada.
2SA 1:20 Gede tanohabi Asagelono tanoha hariga pedarunaga howabi bi te ogoni lalu mbira latagi nahalimu. Pilidia wali bedarume bi ogoni hale howa ti turu holigo nalalimu. Ngode Datagaliwabe mitangi nabiaga karunaga wane bedarume bi ogoni hale howa tinaga bu miniha dungulo holigo nalalimu.
2SA 1:21 Ami agali hongohe biarunaga tinginibi tinaga wai biaga humbibi Hari Giliboa nene wiaruha bame wiaabo ka. Solonaga wai humbi biagobi welime baya hangu ha̱i̱ nahe ogoniha wiaabo ka. Ani bidagonaga iba dalubi mbiraga pibirabi hari nene ogoniha lone naibilo hameledo. Dindi ogoniha tomorubi bayale anda nahelo hameledo.
2SA 1:22 Yonadananaga dandame mbirale ko ba nabiaga gibiore wini. Solonaga wai biaga ayu tibu bame nawiaga. Wai bialu ami agali waitigi dewaore balu homelaga. Agalinaga darama dewaore ayu tibu ogoriani bu ka.
2SA 1:23 Solo Yonadanala libu agali bayaleore haga hene. Libuni haru mandagi haabo haga henego libuni haru mandagi dege homaribida. Ega bodo hariaweme ibunaga tomo naga ale ngagola minule abale yagalalu piagago emene nira dege lowa libugua gerai hongo howa laga hene. Libunaga hongo laiono gabua ale ndo hongo timbuniore bolanguahe hene.
2SA 1:24 Isaraele wali bedamiru-o Solohanda aga daramabi bayale tara wiago tí mo ngialu ngolome wabini yári tara tara wiarubi tí yári bilimulo mo ngiyagonaga ibu mitangi bialu dugu timbuniore bialu biralimu.
2SA 1:25 Ami agali wai biaga hongohe biaru homai hayada. Ti wai hamani homai hayadagoni. Yonadanabi homa dege bialu ibunaga tingini uyu hari nene ogoniha wiarua.
2SA 1:26 I̱naga hamene Yonadana-o í̠naga dugu bia harogoni. Ina í̠ gubalini haabo ho kogoni. Í̠nabi nde i̱ gubalini hagaore harigoni. Wandarime i̱hondo gubalini hagago dindiha lowa í̠naore i̱ gubalini timbuni ho harigoni.
2SA 1:27 Ami agali wai biaga hongohe biaru homai hayada. Tinaga wai biaga danda timu yandare yayarubi goba hai harua, lalu Debidihanda dugu bialu iba gana bi ogonidagua lene.
2SA 2:1 Mani Solo Yonadanala homeaha Debidihanda Anduane Homogohondo hale halu lalu, I̱na Yuda dindiha tano ngaruni mbiragoha hole polene karulapedabe be nakarulapedabe, lene. Ani layagola Anduane Homogohanda ladai bialu lalu, Karulapego mbirani hole pu, lene. Debidihanda lone hale halu lalu, I̱na tano agoria hole poabe, layagola Anduane Homogo ibugua ladai bialu lalu, Heberono tanoha hole pu, lalu lamini.
2SA 2:2 Ani laya handala Debidi ibu one Yaserili wali Ahinoamabi Kamelo tano wali Abigele berenegobi kirabali haru halu Heberono tanoha hole pene. Bamba wali Abigele ogoni ibu Nabala homayagonaga one berenego mani daloni Debidi ibu dabu bini.
2SA 2:3 Agali Debidi heba mandagi ibagabu haga hearubi uruni ti onerubi ti bibahende piai howa Heberono tanohabi dindi Heberono tano kaware wiaruhabi pu hai hene.
2SA 2:4 Ani pu heagola Yudali hearu ibuwa tigua Debidi tinaga kini helo dabalu ira olibe lininaga weli Debidinaga haguaneni odo wini. Ani biyagola Debidi ibu áyu dege kini howa hale halu hearia Yabese wali agali Gileada tanoha hearume Solo hora haya layago hale hene.
2SA 2:5 Ani hale howa Debidihanda Yabese wali agalihondo bi mbira lo pelalu howa lalu, Tígua mana bayaleore walia halu tínaga Kini Solo horo harimidagonaga Anduane Homogohanda tí mo turu halu mo bayale helo hameledo laro.
2SA 2:6 Áyubi nde Anduane Homogo ibuni tí heba biamogo bialu mandagi haabo helo hameledo laro. I̱nabi nde tígua Solohondo mana bayale bu walia harimidagonaga tíhondobi bayale dege bulebero.
2SA 2:7 Heneneore tínaga Kini Solo ibu homayagonigo áyu Yudali hearume i̱ tínaga kini holiya dabo helaya. Ani biyago ai tíha gi holene mbira nawi howa hongo ho haabo halimu, lalu Debidihanda lene.
2SA 2:8 Pilidiali hearume Solo bayangi howa Solonaga ami hearu haru haga haguane Nere igini Abane ibugua Solo igini Isibosede haru halu pene. Haru halu iba Yodana doma ede halu ederayagi Mahanaimi tano wiagoria anda pene.
2SA 2:9 Tano Mahanaimi ogoniha anda pu howa Abane ibugua Isibosede ibu dindi Gileadabi Asebi Yaserilibi Eberaiminagabi Beniyamininagabi Isaraele dindi bibahendehabi uruni bibahendenaga kini helo dabo helene.
2SA 2:10 Solo igini Isibosede ibu mali pira maria (40) hayagola tigua ibu Isaraele wali agalinaga kini helo dabo helayagola mali kirani hangu haru hene. Ani henegoyu Yuda wali agali tigua Kini Debidi baba haabo heagola
2SA 2:11 ibugua Heberono dindini howa mali kariani ege waragaria haru hene.
2SA 2:12 Abanebi Isibosedenaga ami agali biarubi ti bibahende Mahanaimi tano wahalu Gibeono tano pialu anda pene.
2SA 2:13 Ani anda íbu heagola Yoababi Debidinaga ami hearubi ti ibalu Gibeononi iba gorene mbira bereagoria kaware lola hene. Iba biagonaga ange mendehayagi Isibosedenaga ami agali biaru ti bereagola mendehayagi Debidinaga ami agali biaru heba wali mbira mini Seruia berenego igini Yoaba halu berene.
2SA 2:14 Ani bereagola Abanehanda Yoabahondo hale halu lalu, Inane hangu wai halu mbira bia handamabe. I̱naga igiri daliahe o karu aria maru tale bialu ibilarogo í̠naga igiri daliahe maru tale bialu wai bilo ibila, lene. Ani layagola Yoabahanda ladai bialu lalu, Karulapego ani bimi̱ya, lene.
2SA 2:15 Ani lalu Beniyamini hameigini aria homberiali (12) Isibosedenaga ami heneru tigua Debidinaga ami agali homberiali (12) biaru baba wai bule tagira ibini. Íbu howa Debidinaga ami agali mbira mbirame Isibosedenaga ami agali mbira mbira baba wai bialu bagabaga bini.
2SA 2:16 Ani wai bialu hongo manda bigibigi bialu howa ami agali mbira mbirame mendeali mandani yuwa ayu tibume habianeha nogoba haga bini. Ani bialu agali pira kirani mariali (24) biaruni bibahende dindini ibira halu homai hene. Ani binigo manda buwa Gibeono dindi ogoni mini Ayu Tibu Dindi laga winigo nga.
2SA 2:17 Horo ogoningi hameigini kira ogoni labome wai timbuni hiriribiore buwa Debidi aria hearume Isaraeleali Abane aria hearuni bo podahana halu ti wayali hene.
2SA 2:18 Wayali hayadangi Seruia igini tebira Yoababi Abisaibi Asahelebi henego uruni tini haru wai bialu hene. Asahele ibu agalime tali minalu babe nahe gerai purunulope halu nogo dea gabuame piagagobi polene mbira hene.
2SA 2:19 Ani howa ibu Abane piyadaguaore gerai lalu haruru pene.
2SA 2:20 Haruru ibiyagola Abanehanda handadai bialu hearia Asahelehanda ibu talima mama ibiyane hondowa ibugua lalu, Asahele ogoni í̠ore eberebe, lene. Ani layagola Asahelehanda ladai bialu lalu, E̱ i̱ eberogoni, lene.
2SA 2:21 Ani layagola Abane ibugua lalu, I̱ talima naibi wahalu ami agali daliahe poraruni aria mbirago talima pialu ibunaga mbirale yidaru gingilo mo yalu dai bule pu, lene. Ani lamiyago lelowa Abaneore talima puabo hene.
2SA 2:22 Talima pialu hearia Abanehanda lone ibuhondo lalu, I̱ porogoha talima naibi waha larugodago ai í̠ bo waholiyanaga pebera harebe. I̱na í̠ homabelo bo waharuyagua nde í̠ hamene Yoabala wanakui lola agua holiyadabe, lene.
2SA 2:23 Ani layagola Asahele ibugua donge halu talima pene. Pialu hearia Abane ibunaga yandare deneme Asahele talima ibiyagoha nogoba hadai biyagola yandareme ibunaga tinini nogoba hayagola yandare dene erembiraha bolatagi hene. Ani biyangiore Asahele ibu abale dindini ibira halu homo tongolo mini. Ami agali maru mani ibiyarume Asahele tongolo mini wiago hondowa ti o biagoria ha̱lope howa handayaho hene.
2SA 2:24 Ani helalu Yoaba Abisaila libuni Abane piyadagua talima puabo halu alendo ne layagola ni tagira ibagagohayagi hari Ama nene wiagoria pene. Dindi ogoni Gibeono dindiha iba dalu naibaga mbira wiagoha polene hariga peagoria dindi Gia mbira winigoria anda pene.
2SA 2:25 Ani pialu hebigola agali Beniyamini hameigini hearume Abane heagoria dai bialu hari bare hombene wiagoria wai bule tidiyu hene.
2SA 2:26 Ani tidiyu howa Abane ibugua Yoabahondo oladai bialu lalu, Wai bialu haabo hami̱yanaga talima ibiribe. Mana ogonidagua beramagola inaha genda timbuniore anda ibulebirago manda nabi kebe. Ina damene degedege howa darama mbiraore hangu yabulene kamagonidago ai í̠naga agali uruni wai wahadaba lalu angi lamuleberebe, lene.
2SA 2:27 Bi ogoni hale howa Yoabahanda ladai bialu lalu, Ngode Datagaliwabe haluhe kagonaga minini howa i̱na í̠hondo heneneore larogo. Í̠na bi o laregoni naledele i̱naga ami agali haru korunime tí talima ibalu kane dege yawi gao ledale ndobe, lene.
2SA 2:28 Ani lowa Yoaba ibugua ibunaga ami agalirume Isaraele amiru lone talima napelonaga mbelo biguli pu lene. Ani pu layagola tigua wai wahene.
2SA 2:29 Wai wahalu Abane halu ibunaga ami agali biaru tidi yalu Yodana dindi ulini tigabi wiadagua pene. Mbiraga hariga ogonidagua piaho wialu Iba Yodana domade hene. Domade howa pu dege bialu heane horombe hanuni Mahanaimi tano anda pene.
2SA 2:30 Abane halu ibunaga ami agali biaru ti peagola Yoabahanda ibunaga ami agali biaru mo mogo buwa dagalene. Dagalowa handalu hearia ami agali pira mbirani dira (19) bo wahai hayiyane hendene. Ani bialu Asahelebi homayiyane hendene.
2SA 2:31 Ani bialu Debidinaga ami agali uruni tiguabi nde Abane ibuhayagi hene Beniyamini hameigini biaru aria handari tebirani pira waragaria (360) bai hene.
2SA 2:32 Ani biyagola Yoaba halu ibunaga ami agali biaru tigua Asahelenaga tingini mo yalu Bedeleheme tanoha dai buwa ibu aba hora hene homali wiagoha dege hora hene. Hora halu tigua mbiraga piaho wialu gao layagola Heberono tano dai bialu anda pene.
2SA 3:1 Ogoningi howa ami agali Debidiha henela Kini Solohayagi henelame wai luore biaabo halu hene. Ani bialu howa Debidi aria hearu tinaga hongo hama iri iri bialu Solo aria hearu tinaga hongo ibira hama dalidali bini.
2SA 3:2 Debidi ibugua Heberono tanoha howa igiri waragaria hono wini. Igini mbira wahenego mini Amanono hene. Amanono ibu ai̱ya Yaserili tano wali mini Ahinoama berenego ogoni igini hene.
2SA 3:3 Debidi igini mende mini Kileaba hene. Kileaba ibu ai̱ya Nabala mbira homenego one dalo Kamelo tano wali mini Abigele berenego igini hene. Debidi igini tebone Abasolomo henego ibu ai̱ya Gesua dindi Kini Talamai mbira henego wane mini Maga berenego igini hene.
2SA 3:4 Ibu igini mane Adoniya hene. Adoniya ibu ai̱ya mini Hagidi berenego igini hene. Ibu igini dauni mini Sebadia hene. Sebadia ibu ai̱ya mini Abidala berenego igini hene.
2SA 3:5 Debidi igini waragane mini Idereama hene. Idereama ibu ai̱ya mini Egela mbira berenego igini hene. Debidi igini uruni bibahende Heberono tanoha howa taba henene.
2SA 3:6 Ami agali Debidi aria baba Kini Solo aria baba wai bialu haabo hene. Ogoningi Solo ariahayagi Abane ibu agali mini lene timbuni howa bolangua ho hene.
2SA 3:7 Ani heagola horo mbirungi Isibosedehanda lalu, Abane í̠na i̱ aba Solo one dalo Aia wane Lisiba bereago í̠ haridago aginaga haribe, lalu bi laede hene.
2SA 3:8 Ani laede hayagola Abane ibu keba timbuniore howa ibuhondo ladai bialu lalu, Í̠na manda bu handalu keria i̱ í̠naga biangodane hendedebe. Be í̠na manda bialu i̱na Yudali karu biamogo bialu ko lo manda bu kebe. Ani ndoyago i̱na í̠ aba Solo kini pigane hayangi howa ibubi ibu hamene damene bu kamirubi tínaga andaneha haabo harugo áyu kogoni. Ani howa Debidihanda í̠ minalu bo waholilono i̱na baya hangu handayaho haabo harugoyu áyu í̠na wali bereagoha i̱hondo bi bame aginaga laba haribe. Ai bi ogoni bamedago.
2SA 3:9 Anduane Homogohanda Debidihondo bi mbira buleore lalu lowialu, Í̠ aba Solo bo dugu wahalu í̠ dameneru mani Isaraelenaga kini naholebira, laya. Ai Debidi ibu kini ha aribia howa ibugua Isaraele dindihabi Yuda dindihabi bibahende handame ho holebira. Ani holebirago ai i̱na Anduane Homogohanda layadadagua Debidi ibu kini helonaga mo hongo halu biamogo nabi haruyagua i̱na heneneore larogo Ngode Datagaliwabe ibunime i̱ homoliya bo wahelo laro, lene.
2SA 3:11 Ani layagola Isibosede ibu Abanehondo gi timbuni howa ibugua bi mende labe nahe hene.
2SA 3:12 Horo ogoningi Debidi ibu Heberono tanoha heagola Abanehanda ibuhondo bi mbira lawia halu lalu, Dindi ogoria aiwa handayaho holebirabe laro. Í̠na i̱la habo nalolene bi mbira buleore lalu lo wibelo hamelo kogoni. Ani lo weregola Isaraele wali agali bibahende í̠ andaneha hai helo i̱na biamogo buliya lalu lawia haro, lene.
2SA 3:13 Anidagua layiyago hale howa Debidi ibugua Abanehondo ladai bialu lalu, Í̠na bi o laridagoni bayaledago. Ainde mbirale uruni buleore lalu habo nalolene bi ogoni mani lo wuliyanaga áyu í̠na bulene mbira ngago ala bibelo hamelo kogoni ogo. Solo wane Migala ala i̱ni koria haru dai bibelo hameledo. I̱na o bibe larogoni nabiriyagua i̱ í̠naga wanakui nahondoleberoore laro, lene.
2SA 3:14 Ani lalu Debidihanda Isibosedehondobi bi lawia halu lalu, Í̠na Migala ibu i̱ one berelo ibu wariabu agali handari mbira (100) wai bialu Pilidiali bo wahai harurunaga dongone podo mabu binigome hende hene i̱ oneore birayagodago ibu haru dai bibe laro, lalu lawia hene.
2SA 3:15 Bi ogonidagua lawia hayiyago hale halu Isibosede ibugua agali marume Migala ibu Laisi igini Paladile one berearia damu pudaba lene.
2SA 3:16 Ani layagola agali biarume Migala Debidi andaga haru pole piyagola Paladile ibu dugu bima ibu one Migala piyadagua talima pialu Bahurimi tano wiagoria anda pene. Ani piyagola Abanehanda ibuhondo lalu, Áyu ogoni andaga dai bia, lene. Ani laya handala bi hale halu ibu andaga dai bini.
2SA 3:17 Ani biyagola howa Abane ibugua Isaraele dindiha agali haguane hearu hearia puwa tihondo lalu, Bambaore howa tígua Debidi tínaga kini helolene hamelo harimigoni.
2SA 3:18 Ai áyu tígua ibu kini helolene henge o ngagoni. Bamba Anduane Homogohanda bi mbira lo wialu lalu, I̱nime i̱naga biabe biahaga agali Debidinaga hongoni howa i̱naga Isaraele wali agali tínaga waitigi Pilidialirunaga giha howabi waitigi maru karunaga giha howabi gingila mialu haru dai bulebero, lenego. Bi ani lenedagoni mitangi bialu Debidi ibu kini helo áyu dabo helolene nga, lene.
2SA 3:19 Ani lowa Abane ibugua Beniyamini hameigini bu hearuhondo bi ogonidagua dege lamule pene. Bi lamiai halu Heberono puwa ibugua Beniyamini hameiginirubi Isaraele wali agalirubi tigua ogoale bule manda bu ka lalu Debidi lamule pene.
2SA 3:20 Abane halu agali pira kira (20) bibahende bi yalu Debidi hearia Heberono tano anda ibiyagola Debidihanda ti mo turu halu tomo nelo dawa hene.
2SA 3:21 Emene biruwa Abanehanda Debidi lamialu lalu, Isaraele wali agali bibahende í̠ andaneha hai hole lalu habo nalolene bi lo wilo damu poro. Ani lo wiragola í̠nime kini howa bulene hame laridagua Isaraele dindi bibahende handameho habelo, lene. Ani leagola Debidihanda ibunaga agali bu hearuhondo lamialu lalu, Abaneore mbira mo ko holamini nahalimu, lene. Ani layagola Abane ibu andaga dai bini.
2SA 3:22 Debidihanda Abanebi agali ibiyarubi andaga pudaba lo heagola Yoaba halu Debidinaga ami agali maru hearume ogoningi dege waitigi mende hearu baba wai bialu howa dabudabu dewaore mo hilo yalu Heberono tanoha anda ibini.
2SA 3:23 Anda ibuwa Yoaba ibu hale halu hearia Abane ibu Kini Debidi hondo ibiniya layane hale hene. Kini Debidihanda Abane bolomini nabalimu laya layago hale howa
2SA 3:24 Yoaba ibu Kini Debidi hondole puwa ibuhondo lamialu lalu, Abane ibu í̠ heria ibiyagola í̠na ibuhondo mbira bia nabi bame dai bia lariyago aginagabe. Í̠na mana ogonidagua biridago bayale ndo lehe birida.
2SA 3:25 Abanehanda bule ibiyago heneneore í̠ manda bidegoni. Ibugua í̠ biamogo bule hetingi howa í̠na bule manda bu wiridaru handa í̠ ibagabu hagadaru hondo wia bule ibiyago manda nabi harida. Ogoni í̠ni manda bibeheore kegoni, lene.
2SA 3:26 Yoaba ibu Debidila bi lai halu tagira pene. Puwa ibugua agali maruhondo, Abane harigani pialu karia haru dai bule pudaba, lene. Ani laya handala pialu Abane ibu iba hambiaga uli wene mini Sira wiagoria pialu hearia tali minalu haru dai bini. Ani haru dai biyago Kini Debidi ibu hale nahe hene.
2SA 3:27 Abane ibu Heberono dai biyagola Yoabahanda Abanela ndi lole haru pubagi hetingi howa tanonaga pabe panga heagoria haru pene. Ani haru pubagi howa Yoabahanda wai biaga ayu tibu emeneme Abane tinini nogoba hayagola homene. Abale Abane ibugua Yoaba hamene Asahele bayagonaga pani Yoabahanda Abane ibuni homelo bene.
2SA 3:28 Abane bo wahaya layago hale howa Debidi ibugua lalu, Abane homayadagoni i̱na ndo bidogo Anduane Homogo ibu manda bu ka. Ko ogoni i̱naga wali agali bu karu tihabi para nahe. Ko ogoni Yoaba ibuni hanguha nga.
2SA 3:29 Ani ngago Anduane Homogo ibunime Yoaba ibunibi ibu one waneigini damenerubi ibu aguane mani holebirarubi bibahendehondo pani milo. Agali Yoaba ogoni ibu damene karu aria mbira mbira bibahendengi ge hamua bilobi dere hongohe dabi nahaga ale bilobi walime biabe biaga ngaru hangu bialu helobi tinaga waitigirume bo wahaga bilobi tomo noa noa lo haabo helobi Anduane Homogohanda Yoaba dameneru dabane mbira mbiranaga genda uruni mo migi bilo hameledo, lalu Debidihanda Yoaba damene ha halu ani lene.
2SA 3:30 Yoaba Abisailame libu hamene Asahele Abanehanda amu Gibeono iba bereagoria wai birimigoria bo wahenegonaga pani libugua Abane bo wahene.
2SA 3:31 Kini Debidihanda lalu, Yoaba damene bu kamiru bibahende Yoaba ibuni heba tígua Abane dara ho kama lowa walia halu tínaga aga bayale bidamiruni minu lerelo wahalu daraho howa aga biaga ngaru karulo halimu. Ani karulo howa Abanenaga dugu bia halimu, lene. Ani lalu Abane hora hole ibunaga tingini homaliha mo yalu piyadagua Debidi ibuni mama talima pialu hene.
2SA 3:32 Ani pialu tigua Heberono tanoha Abane hora halu kini ibuni ogoriani howa dugu hongohe biyagola wali agali bu hearu tibi nde dugu bia dege bini.
2SA 3:33 Ani bialu howa Kini Debidi ibugua Abanenaga dara howa dugu bialu ogodagua lene. Abane agali mini nawi lulu ale mbira homaradagua biyadagoni irane agomedabe.
2SA 3:34 Ibunaga gi mbira minu daba nahe. Ibunaga gebi minu paulalu daba nahe dege. Agali pagebibime bamuore bo waharadagua biyada, lalu Debidihanda dara howa dugu bialu bi ani lene. Ani biyago hondowa wali agali bu hearume dara howa dugu lone bialu hene.
2SA 3:35 Horo ogoningi howa Debidi ibu tomo mbira naneore heagola wali agali bu hearume ibuhondo, Tomo mbira narene, lalu hene. Ani layagola Debidihanda lalu, I̱na tomo lenego mbira nane kone alendo haragola nolebero. Ani nabiruyagua Anduane Homogohanda i̱ni bo wahelo, lalu bi hongohe lowini.
2SA 3:36 Kinihanda bi ogonidagua layadago hale howa wali agaliru tinaga bu miniha turu halu dungulo hai hene. Kini ibugua o biyadagoninaga hangu ndo ibugua biagago bibahende bayale dege bialu heagola wali agali ti turu howa bu miniha dungulo haga hene.
2SA 3:37 Anigo Isaraele wali agali hearumebi Kini Debidi ibunaga wali agali bu hearumebi ti bibahendeme Kini Debidihanda biyadagoni hondowa Abane homelo bo wahayadagoni ibula haru mini mbiraore howa bene ndoyane hendene.
2SA 3:38 Kini ibugua ibunaga agali haguane hearuhondo lamialu lalu, Uru-o hale hadaba. Horo áyu ina Isaraele wali agalinaga agali haguane hongohe mbira biago homayagoni.
2SA 3:39 Ainde heneneore Ngode Datagaliwabe ibunime i̱ kini holiya dabo helene kogonigoyu i̱nime Seruia igini kirali ogoni labo libu agali hongo gibihe kago hondowa i̱na libu pani babe nahe kogoni. Libugua mana ko biyadagonaga pani Anduane Homogo ibunime miadai bilo laro, lalu Debidihanda lene.
2SA 4:1 Isibosede ibu hale halu hearia Abane Heberono tanoha bo wahaya layago hale howa ibu gi timbuni ho hene. Isaraele wali agali bibahendebi mogolai ho hene.
2SA 4:2 Isibosedenaga ami agali kirali libu wai bu poragoha haguane howa agali maru haru haga hene. Libu mini Bana Legabala Berodo tanoali Limono mbira henego igini hene. Agali ogolabo libu Beniyamini hameigini aria haradagua binidagoni irane Berodo tano ogoni Beniyamini hameigini dindihayagi mo tago hene wiagola ani hene.
2SA 4:3 Wali agali ala bamba Berodo ogoniha dindi aba henedaru tini ibida pialu Gidaimi tano pu henego ka.
2SA 4:4 Kini Solo igini Yonadana biago ibu igini mbira mini Mebibosede henego ogoni ibu igiri emene mali duria hangu heangi ibu aguane Solobi ibu aba Yonadanabi kirabali bo wahene. Ani biyago hale howa agali Yaserili tanoha haga hearume Yonadana one waneiginiru berearia bi lawia halu lalu, Waitigime Yonadana bo wahaya, lene. Ani layiyago hale halu Yonadana damene wali mbira ibu Mebibosede handayaho biraga bereagome Mebibosede minu yalu ibida gerai pialu hearia pilowa Mebibosedenaga ge kuni habolene. Ani biyagola mani Mebibosede ibu wahe halu ge dugupehe haabo hene.
2SA 4:5 Horo mbirungi horombe Isibosede ibuni andagaha erekui dogolo palearia Legabala ibu hamene Banala libu ibu andaga pene.
2SA 4:6 Libu anda ogoniha widiru yolo bule piaga wiagoha widi yolo bule petingi howa anda tamuha anda pene. Ani anda puwa handalu hebiria Isibosede ibu ibuni andaga tamuha dagiani palearia hendene. Ani hondowa libugua hendeore puwa wai biaga ayu tibu tubagi yini yiagome Isibosedenaga tinini nogoba hayagola homene. Homayagola libugua ibunaga haguane pugu hanalu wali agali nahendeore ohalu tagira pene. Tagira puwa libu dindi tigabi Yodana dindi ulini wiagoria iba peadagua mbiraga hanguni puabo hene.
2SA 4:8 Ani pialu horo mendengi Heberono tano anda puwa libugua Isibosedenaga haguane pugu hanaribigo Kini Debidi berearia hanalu puwa mo walia hene. Mo walia halu lalu, Kini-o ogo de handa. Agali í̠naga waitigi í̠ bo wahole taya bialu haga Kini Solo igini Isibosedenaga haguane pugu yidabagoni. Abale Solohanda í̠ bo wahole taya bialu hayago ai Anduane Homogohanda Solo ibugua mana ko biyagonaga pani mialu ibu damene lenego bo wahai haya, lene.
2SA 4:9 Ani layagola Debidihanda ladai bialu lalu, Anduane Homogo ibu haluhe kago ibugua i̱ mo ko holene mbirale dewaore ngagoria howa i̱ haru dai biaga ka. Ibu ogonibi biaga kago i̱na ibunaga minini howa libuhondo bi heneneore ogodagua laro.
2SA 4:10 I̱ Sigilaga dindi wiagoria hewangi agali mbirame ibuwa i̱hondo Solo homaya lalu langini. Ibugua bi o layadagonime i̱ turu holobabe toba howa langialu hearia i̱ turu nahe haru. Turu nahe howa i̱na ami agali bu hearuhondo lamialu agali ogoni minu yania halu homelo bo wahadaba laru. Agali ogoni ibugua bi te ko i̱ hewaria hale holiya lo yu ibiyadagonaga yolo ogoni miru.
2SA 4:11 Anigo áyu agali mbira ibuha ko nawi mbira ibuni andagaha bame paleago homelo bo waharibida. Áyu libu agali koorene ko kabigoni. Libugua mandabu handalu kabiria i̱na libu yo pialu pelolobadalo manda bidabibe. Yo pialu napoleberabigo ndobe. I̱na libugua mana koore biribidagonaga pani ngialu libu dindi ogoria nahalibulo biba helolebero, lene.
2SA 4:12 Ani lai halu Debidihanda ibunaga ami agali bu hearuhondo lalu, Legaba Banala homelo bo wahole haru pudaba, lene. Ani laya handala ami agali biaru tigua puwa ogolabonaga gi geru dibu gandulo wahaga buwa Heberonoha iba gorene bereagonaga angeni libunaga tingini mo derelaho ngelene. Ani bialu ami agali biaru tigua Isibosedenaga haguane biago Heberono tanoha Abane hora hene homali heagoha dege mo hora hene.
2SA 5:1 Mani Isaraeleali hearume Kini Debidi Heberono tanoha hearia hondo ibini. Ibuwa tigua Debidihondo lalu, Ina wali agali bibahende í̠naga damene hangu darama mbiraore kama.
2SA 5:2 Abale Solo ibu kini heangibi ibu ani helalu dege í̠na inanaga ami agaliru haru halu wai bule piaga harigoni. Ani birigola Anduane Homogohanda bi lo wialu, Í̠na i̱naga wali agaliru haru habelo helarogola í̠ Isaraele wali agalirunaga kini helolebero layagoni, lene.
2SA 5:3 Ani lowa Isaraele wali agalirunaga agali haguane hearu bibahende Heberono tanoni Kini Debidi heagoria íbu ngoai hene. Íbu ngoai heagola ibugua Anduane Homogonaga deni howa bi hongohe mbira lowini. Ani lo wiyagola tigua Debidinaga haguaneni ira olibe lininaga weli odo wuwa ibu Isaraele wali agalinaga kini helene.
2SA 5:4 Debidi ibuni mali pira tebira (30) heangi ibu kini pigane hene. Ibu kini howa Heberono dindini mali kariani ege waragaria Yuda dindinaga kini hene. Ani bialu Yarusalemeni mali pira tebirani tebira (33) Yuda wali agalirubi Isaraele wali agalirubi bibahende handame howa haru hene. Lamaga howa ibugua mali pira mariani (40) kini howa haru hene.
2SA 5:6 Horo mbirungi Debidibi ibunaga ami agali hearubi tigua Yarusalemeha hearu baba wai bule pene. Yarusaleme Yabusuali hameiginirunaga dindi winigo ani wu howa Yabusuali hearume Kini Debidihanda tinaga tano nakarulolebira manda buwa tongoyungu bi lalu hene. Tigua lalu, Tí aleme inanaga dindi ngamagoha anda ibalu nakaruloleberemi. Agali de kohe karumebi kuduguhe karumebi urunibi hangume tí anda naibalimulo harigani hapai holebira, lene.
2SA 5:7 Tigua bi anidagua layagoyu mani Debidihanda ibunaga ami biaru haru pialu wai buwa bo podalu tano hongohe biagoni miyagola Yabusuali biarume bi layadagoni habo lene. Tano ogoni mini Saiono winigo mani Debidihanda wai bialu karulayagola dindi ogoni mini Debidinaga Tano laga wini.
2SA 5:8 Debidihanda tano ogoni karulenedangi anda pole howa ibunaga ami agali biaruhondo lalu, Tí kamirume i̱na Yabusualihondo handabe manga kodagua ho kamiyagua iname Yabusualirunaga tano ogoniore karulami̱ya. Ani karulami̱ya lo manda birimiyagua ai tíni iba hambu puíbu biaga dindi guabuwa hariga gonene wia do hene ngagoha anda puwa tanoha wali agali de kohebi kuduguhebi karu layiyago bibahende baba wai bialu bai hami̱ya, lene. Debidinaga bi layaruni manda buwa bi ogo, Anduane Homogonaga andaha de kohebi kuduguhebi karu anda polene nawi, lagane wini.
2SA 5:9 Mani Debidihanda bo podalu tanoha anda puwa ibugua Saiono tano ogoni mini Debidinaga Tano wini. Ani wialu Debidi ibuni tano ogoniha hene. Ani howa Debidihanda ibunaga agali biaruhondo tano ogoninaga lene leneni anda bu mabu bidaba layagola tigua dindi ulini mbira winigoria dindi duguwa mogo bialu mo dondelene wiagoria anda pigane bialu hene.
2SA 5:10 Anduane Homogo Hongo Haiheore Ngode Datagaliwabe kago ibugua horo bibahendengi Debidila haru mandagi hayagome Debidi ibu kininaga hongo holene mia tago haabo hama iraga halu hene.
2SA 5:11 Taianaga Kini Hiramahanda ibunaga agali maru Debidi hearia ibilene. Ani ibilowa ibugua ira tamia bayale dibu yalu agali anda biaga mandabi maru ege to̱le̱ podaga mandabi marubi, Tígua Kini Debidinaga anda timbuni mbira bule pudaba, lene.
2SA 5:12 Urunidagua biyago hondowa Kini Debidi ibugua manda bialu hearia Anduane Homogohanda i̱ heneneore Isaraele wali agalinaga kini helenego kogoni lo manda bini. Ani manda buwa Debidi ibugua Anduane Homogohanda ibunaga Isaraele wali agalirubi biamogo bulenaga biabe hongohe timbuni ogoni biyadalo manda bia dege bini.
2SA 5:13 Debidi ibu Heberono tano wahalu Yarusaleme hole piyangi howa ibugua wali maru dabu bialu waneigini dewa halu bini. Ibu one maru ala dabu biniru ti bira dege buwa uruni ti haru bibahende Yarusaleme mandagi pu berene. Ani pu biruwa ibu one urunime Yarusalemeni waneigini dewa dege taba henene.
2SA 5:14 Debidi igini Yarusalemeni taba henenedaruni tinaga mini uru Samua Sobaba Nadana Solomono
2SA 5:15 Ibahara Elisua Nebege Yabia
2SA 5:16 Elisama Eliada Elibelede imaru hene.
2SA 5:17 Pilidia wali agali hearume hale halu hearia Isaraele wali agalime Debidi tinaga kini heleda layago hale hene. Ani hale howa tigua tinaga ami agali hearume wai bialu Debidi minule pene. Ibu minule ibira layago hale howa Debidi ibu dalipe halu wai pabe hongohe heagoha hole abale anda pene.
2SA 5:18 Pilidia ami biaru abale ibalu Lebaimi dindi ulini wiagoria abale anda ibuwa mbirale bibahende wiaruni ti mo yai hene.
2SA 5:19 Ani anda íbu heagola Debidihanda Anduane Homogohondo hale halu lalu, I̱na Pilidia uruni baba wai bule poabe. Wai bule piruyagua i̱na ti bai halu wayali holiya í̠na i̱ biamogo buleberebe, lalu hale hene. Ani hale hayagola Anduane Homogohanda ladai bialu lalu, Karulapego i̱na í̠ wayali habelo waitigi uruni í̠naga giha mo ya holeberogo wai bule pu, lene.
2SA 5:20 Ani laya handala Debidi ibu Bala Perasimi dindini puwa Pilidiali biaru baba wai bialu wayali hene. Wayali howa Debidihanda lalu, Anduane Homogohanda iba li hongohe poradagua bialu i̱ waitigi hearu hanuni bo gialo yaga bima yupe hayagoni, lene. Anidagua binidagonaga dindi ogoni mini Anduanehanda Bo Gialo Yama Hanuni Yupe Haga laga wini.
2SA 5:21 Pilidia ami biaru ti ibida pialu tinaga dama mitangi bialu gime wabini yu heneyaru yu wahalu piyiyagola Debidi halu ibunaga ami biaru tigua mo yu dai bini.
2SA 5:22 Ani bialu pu heagola Pilidia ami biaru lone dai buwa Lebaimi dindi ulini biagoria hene.
2SA 5:23 Ani heagola Debidi ibugua Anduane Homogohondo hale halu lalu, I̱na agua buabe, lene. Ani layagola Anduane Homogohanda lalu, Tígua wai bule pudaba. Pialu howa ti kagoha abale pogolape halu napilimu. Ohalu tinaga erembira ngagohayagi puwa amu ira mini balasama bu karuha wai bule manda manda bu halimu.
2SA 5:24 Ani howa hale halu kamiria agali maru uyu ira biaru mane maneha tidiyu howa wai dagia balu haruane hale holeberemi. Ani balu haruane hale harimiyagua Pilidialiru baba wai bule i̱ni ala bamba halu piarua lo manda bialu tígua wai bule gerai pialu wai bilimu, lene.
2SA 5:25 Ani laya handala Debidi ibu Anduane Homogohanda layadagua bialu puwa Isaraeleali ami biarume Pilidiali ami biaru mo ko howa balu bo podama pialu Geba tano bo podahana halu piaho wialu amuraore Gese tano puabo hene.
2SA 6:1 Debidihanda wai biaga agali hongohe wai mandabi Isaraele dindiha hearu dabowa lone ibidaba lowa mo ngoai hene. Ami uruni daosini pira tebira (30,000) bibahende ibini.
2SA 6:2 Ani íbu heagola Debidihanda uruni bibahende haru halu Yuda dindinaga Bala tano wiagoria Anduane Homogonaga Habo Nalolene Bi lowinigo Mbogoyi biago mo yu dai bule pene. Mbogoyi ogoni Anduane Homogo Hongo Haiheore kagonaga mini laga wini. Mbogoyi ogoninaga daligahayagi dahuliyali handalehe kira wabu helowa ogoni Anduane Homogo ibuni handame ho howa biragane dagia ogoni laga wini.
2SA 6:3 Anigo Debidibi ibunaga ami biarubi ti Bala tanoha anda pialu Abinadaba andaga hari hombeneni heagoria pialu Anduane Homogonaga Mbogoyi biago wiaria pene. Puwa tigua Mbogoyi biago nogo bulumaga kirame dabudabu yaga karisi gahenge mbira wiagoria gili lalu yalu pole mo paga hene. Mo paga halu harigani yalu pialu howa Abinadaba igini kirali Usa Ahiola libugua dabudabu yaga karisi biago tigatiga yalu pelo mo tiga bigi bima pene.
2SA 6:4 Ahio ibu bamba halu karisi biago mani ibilo pene.
2SA 6:5 Debidibi Isaraele wali agali bibahendebi turu howa ngida balu iba gana lama karisi biago heba mandagi pialu Anduane Homogonaga mini yaraga hama pialu hene. Tigua pialu howa tabaga balu ngidabi balu ngi̱li̱nge̱le̱ laga bilonaga mbirale tara tara wiarubi mo emabia haga bima pialu hene.
2SA 6:6 Ani bima pialu widi iraneru lini hondo ibira ibira halu aeane puyabume yu pelonaga bo taulaga agali mbira Nagono henego ibu andaga wiagoria tagira pene. Dindi ogoriani nogo bulumaga biago labome Anduane Homogonaga Mbogoyi biago mo ema biyagola ibira habehe hene. Ani ibira hole biyagola Usahanda Mbogoyi biago abale yani hene.
2SA 6:7 Usahanda Anduane Homogonaga Habo Nalolene Bi lo winigonaga Mbogoyi biago bame mo yo hondowa yani hayagonaga Anduane Homogohanda keba howa Usa bayagola kaware ogoriani homene.
2SA 6:8 Ani biyagola Debidi ibugua Anduane Homogohanda ogoni biyago hondowa keba hene. Keba hayagola horo ogoningi howa dindi ogoni mini Perese Usa winigo nga.
2SA 6:9 Debidi ibugua ogoningi Anduane Homogohondo gi howa lalu, Anduane Homogonaga Mbogoyi ogo i̱na ngelo hole aguaore bialu mo yalu poliyadabe, lene.
2SA 6:10 Ani lowa Debidi ibugua Anduane Homogonaga Mbogoyi biago ibunaga tano Yarusaleme nayupe wahalu hariga mendeha yu pubagi halu pene. Puwa tano mbira mini Gede winigo ogoniali mbira mini Obededomo henego ogoni ibunaga andaga ngelene.
2SA 6:11 Agali Obededomo biagonaga andagaha ngelo heane ege tebira pene. Ani ngelo heagola Anduane Homogohanda Obededomobi ibunaga waneigini damenerubi bibahende mo bayale hai hene.
2SA 6:12 Mani howa Debidi ibu hale halu hearia Anduane Homogonaga Habo Nalolene Bi lo winigonaga Mbogoyi biago Obededomo andagaha ngelayagome ibu damene bibahende mo bayale hai haya layane hale hene. Ani hale halu Debidi ibu Obededomo andaga puwa Anduane Homogonaga Mbogoyi biago mo pialu Yarusalemeni yu dai bule pene. Anidagua yalu ibiyagola wali agalime turu timbuniore hene.
2SA 6:13 Turu timbuniore howa wali agalime Mbogoyi biago mo yalu pole pene. Mo yalu pole lowa ge waragaria hangu ha amu halu ti pialu hearia Debidihanda, Emene hondo hadaba, lowa bulumaga wangabe mbirala bulumaga dalua haba tigi mendela Anduane Homogohondo loma binigo bo delene.
2SA 6:14 Debidi ibuni aga pele taraore mbira loma binigo mo miaga hearunaga wiago ibu mo bo buwa turu halu Anduane Homogonaga mini yaraga halu mali lialu tama bima pene.
2SA 6:15 Tigua ogonidagua bialu Anduane Homogonaga Habo Nalolene Bi lo winigonaga Mbogoyi biago Debidibi Isaraele wali agalibi tigua Yarusaleme mo yalu pene. Tigua turu timbuni howa ga̱lalu pilipe ale biguli lama pene.
2SA 6:16 Tigua Mbogoyi biago Debidinaga tano biagoria yu anda ibiyagola Solo wane Migala ibu andaga windoha handatagi halu hearia ibu agalini Kini Debidi ibu pogola daga haga bialu tama buwa mali lima ibalu hearia hendene. Debidihanda anidagua biyago hondowa Migala ibugua turu nahe howa Debidihondo keba ho berene.
2SA 6:17 Yalu puwa Debidihanda balai anda mbira ala bu manda mandabu helenego ogoniha Anduane Homogonaga Mbogoyi biago mo yalu puwa ngelene. Ani ngelowa tigua loma biniru irame dai helo bo delalu Anduane Homogola ho gimbu bulenaga loma biniru bo mialu bini.
2SA 6:18 Loma biniru delai howa Debidihanda wali agali bu hayaruhondo lalu, Anduane Homogo Hongo Haiheore kago ibugua tí mo bayale helo, lene.
2SA 6:19 Ani lalu wali agali uruni tomo nelo Debidi ibugua mberedi mbira mbira ta halu nogo bo dawarimigonaga mbirinibi gerebi lini maru do gembeho winirubi wali agali hearu mbira mbira ta halu nai helo miyagola ti nalu tini andaga pugu pugu bini.
2SA 6:20 Ani bialu Debidi ibu ibuni andaga puwa ibu one waneiginiru Anduane Homogohanda ti mo bayale helo lowa bi lole anda pialu hearia ibu one Migala tagira ibuwa Debidihondo keba howa lai lade hene. Ibugua Debidi mege bialu lalu, Ainde Isaraele wali agalinaga kinime ibuni mini lene timbuni kogo lowa walia halu porabu daga daga bialu tama bima ibalu hea. Ani bialu ibunaga haru haga agali haguane hearunaga biabe biahaga wandari berearume kininaga tingini hendelonaga porabu daga hama ibalu hea. Agali lulu mini nawime biagadagua í̠na ani bialu hegoni, lene.
2SA 6:21 Ani layagola Debidihanda ladai bialu lalu, Anduane Homogohanda í̠ abanaga henge wiago i̱ mia aribia howa Isaraele wali agali bibahende haru holiya helayagonaga i̱na turu halu ibunaga mini yaraga hama ibiru. I̱na ibunaga mini yaraga halu ibu deni mali lone lialu tama bulebero.
2SA 6:22 Í̠ninaga deni i̱naga mini mo nagalone halu mo dindiha haabo holebero. Anigo í̠na wandari áyu lareruni tigua i̱naga mini daliga yaragaore holebira, lene.
2SA 6:23 Kini Solo wane Debidi one Migala ogoni ibu waneigini mbira taba hana nabi biraabo halu homene.
2SA 7:1 Isaraele wali agalirunaga waitigi hearume ti baba wai nabilo Anduane Homogohanda baya hangu handayaho heagola Debidi ibu nde ibuni andagaha bayale berene.
2SA 7:2 Ani biruwa ibugua Anduane Homogonaga bi mana latagi haga Nadanahondo lalu, I̱ andaga bayaleore ira tamia bayale binigoha bedogola Ngode Datagaliwabenaga Habo Nalolene Bi lo winigonaga Mbogoyi biago dege balai anda biagoha wiaruago ogoni tiga nabida, lene.
2SA 7:3 Ani layagola Nadanahanda ladai bialu lalu, Anduane Homogo ibu í̠la mandagi haabo kago í̠na mbirale mbira bule manda bidedagua nde bibe laro, lene.
2SA 7:4 Ani layagoyu horo ogoningi mbiraga Anduane Homogohanda Nadanahondo lalu,
2SA 7:5 I̱naga biabe biahaga Debidi karia puwa i̱naga bi ogo ibuhondo lamibe. Debidi-o i̱na agali i̱naga anda i̱ holiyanaga bia holene dabo heledogo í̠ ndo ke.
2SA 7:6 I̱ anda timbuniha nahaga kogoni. Bamba Isaraele wali agali Iyibi dindiha howa haru tagira pirugongi howabi maruha puíbu bialubi i̱ balai andaha dege haga biaga harugoni ko.
2SA 7:7 I̱ni Isaraele wali agali ti haru mandagi dindi dewani ibagabu haabo harimago howa tinaga agali haguane i̱na dabalu helarurunihondo lalu, Ira tamia bayale karume i̱naga anda mbira bia nahe kamigo agibe, lalu hale naharuligoni, lene.
2SA 7:8 Anduane Homogohanda Nadanahondo laabo halu lalu, I̱naga biabe biahaga Debidihondo au labe, Anduane Homogo Hongo Haiheore kago ibugua bi ogodagua í̠hondo larago hale habe. Í̠ bamba nogo sibi haru haga heria i̱nime í̠ dabalu í̠na Isaraele wali agali haru habelo agali haguane dabo helarugoni ke.
2SA 7:9 Dindi bibahende í̠ ibaga bialu piriruniha i̱ni iya haru mandagi ibagabu haabo haribagoni. Ani howa i̱nime dege í̠ waitigi ibiyaru wai bialu bo poda hana haga birugola í̠ wayali harigoni. Ai i̱nime í̠ agali mini lene timbuni dindi maruha karubi dege habelo i̱na í̠ mo yaraga holebero, laya labe.
2SA 7:10 I̱naga Isaraele wali agali tí bayaleore halimulonaga dindi hobane bayale mbira tínaga mo wia ko. Bambaore agali ko bu hearume tí mo ko haabo hayadagua mani tí mo ko naholebira. Tínaga mamalirume dindi ogo pigane karulayangi howa bialu henego bima ibalu i̱na tínaga agali haguaneru dabo helaga birugolabi tínaga waitigime ti mo ko haabo haya, laya labe. Ani biyago áyu i̱na uruni ti mo batara harogola urunidagua nabi tínaga dindi ogobi lone mo ko naholebira. Ani kamigola i̱na í̠ dameneru baya hanguore hai helarogola tigua í̠naga aguaneru dewaore helo hono wigi bulebira, laya lamibe, lalu Anduane Homogohanda Nadanahondo bi ogoni Debidihondo lamilo lamini.
2SA 7:12 Anduane Homogo ibugua laabo halu lalu, Debidi-o í̠ homaregola í̠naga mamaliru hora henegoha dege hora kangi í̠ igini mbira kini ha aribia helo dabo helolebero. Ani berogola ibu kini hongoheore mbiralime ibu bope halu handape habe nahe holebira.
2SA 7:13 Kini ogoni ibugua wali agali i̱ni koria kaware ibilonaga i̱naga anda bulebira. Ani biragola i̱na maninaga ibu igini aguanerume dege kini haabo helolebero.
2SA 7:14 Ani helowa ibu aba i̱ni kogola ibu i̱ igini holebira. Ani howa ibugua mana lehe mbira biyagua abame ibu igini mana lagadagua i̱na ibu mana lalu bolebero.
2SA 7:15 Ala Solohanda mana lehe biyagola i̱na ibuhondo erembira mialu ibunaga henge wiago i̱na í̠ mo ngirudagua mani í̠ iginihondo ani nabi gubalini haho wiaabo helolebero.
2SA 7:16 Ani helowa í̠naga waneigini aguaneru halu ereba nahe kini ha aribia haga bima puabo helolebero, laya lalu Debidi lamibe, lalu Anduane Homogohanda Nadanahondo lai hene.
2SA 7:17 Bi ogonidagua Anduane Homogohanda bi lamiyaruni Nadana ibugua hale howa Debidi lamiai hene.
2SA 7:18 Nadanahanda, Anduane Homogo ibugua bi anidagua laya, lalu lamiyagola Debidi ibugua hale halu Balai Anda Anduane Homogo ibuni heagoha pu biruwa lalu, Anduane Homogo Bibahende Haru Haame Ho Haga-o í̠na i̱hondo bayale dewaore birida. Ani bialu i̱nibi i̱naga waneigini damene bu karubi ina bayale ndo hemaria anidagua biridagoni.
2SA 7:19 Anduane Homogo Bibahende Haru Haame Ho Haga-o í̠na i̱hondo bialu hariruni bibahende bayale dege biaabo harigo ai uruni emene degeyane mbirale bayale áyu uruni lone ngiatago harida. Anduane Homogo-o í̠na i̱ dameneru mani íbu holebirarubi mo bayale holebero larigo ai i̱ agali nagaloneore kogoni ndobe. Ani ha holiya dege í̠na i̱hondo mbirale bayale timbuni i̱hondo bule ngeru walia harida.
2SA 7:20 Anduane Homogo Bibahende Haru Haame Ho Haga-o urunidagua biridagonaga i̱na í̠hondo bi agua loabe. I̱ í̠naga biabe biahaga agali kogoni í̠ni manda bide.
2SA 7:21 Ani manda buwa í̠na bi lo wirigonagabi í̠nime bule hame ledegonagabi áyu i̱hondo í̠naga mana bayale biaga ngego i̱ mo walia ho kegoni.
2SA 7:22 Anduane Homogo Bibahende Haru Haame Ho Haga-o í̠ duniniore kegoni. Í̠ ale mende naheore lowa Ngode Datagaliwabe í̠ hangu kegoni lalu ina mamalirume langigi biyane hale harima.
2SA 7:23 Ina Iyibi dindiha garabaya hemaria í̠na Isaraele wali agali bibahende garabaya golalu haru tagira ibuwa í̠ninaga wali agali holoma̱ya helarigoni. Ani helowa wali agali maru í̠naga wali agali ina kamarubi naheore. Ina dindini áyu kamagoria ibuluma̱ya í̠na mbirale bayale tara tara nahendene ale wiarubi biai harigola ina inanaga dindi ogoria ibinigo kamagoni. Wali agali dindi ogoriani ala hene hearu í̠na bo batagi hai halu tinaga dama mitangi bialu gime wabini wiaruni bo gialo wahai harigola dindi dabulu wiago ina mo ngirigola ibalu karulo harimago kamagoni. Anidagua birigome wali agali dindi bibahendeha karume í̠ mini lene taraore ke lowa í̠naga mini yaraga halu ka.
2SA 7:24 Anduane Homogo-o ina Isaraele wali agali kamaru í̠ninagaore holoma̱ya dabo helowa ina ani haabo holoma̱ya helarigoni. Í̠nibi nde inanaga Ngode Datagaliwabe haabo ho kegoni.
2SA 7:25 Anduane Homogo Ngode Datagaliwabe-o áyu í̠na i̱naga dameneruhondobi í̠naga biabe biahaga i̱nihondobi buleore lalu bi lo wiriruni biaaboore habelo hameledo. Í̠na bulebero lo wiridagua bibe laro.
2SA 7:26 Wali agali bu karume í̠na inahondo anidagua berego hondowa tigua í̠naga mini yaraga helo ani bibe laro. Ani hondowa tigua lalu, Anduane Homogo Hongo Haiheore kago ibu Isaraele wali agalinaga Ngode Datagaliwabe kagoni, lalu í̠naga mini yaraga holebira. Ani lalu kagola í̠na agali i̱naga aguane holebiraruha howa dege kini helo dabaga bialu haabo holebira.
2SA 7:27 Anduane Homogo í̠ Hongo Haiheore howa ina Isaraele wali agalinaga Ngode Datagaliwabe-o í̠na í̠naga biabe biahaga i̱hondo lalu, Í̠naga aguaneru bayale helonaga mo hongo holebero, lalu langirigonaga í̠naga biabe biahaga i̱ni kogome í̠hondo gi nahe howa bi langerogoni.
2SA 7:28 Anduane Homogo Bibahende Haru Haame Ho Haga-o í̠ni hanguore Ngode Datagaliwabe kegoni. Í̠na mbirale mbira bule lalu lo werego biaore biaga kegoni. Ani biagaore kegome áyu howa i̱hondo heneneore mbirale mbira bule lalu bi lo wirigoni.
2SA 7:29 Ani bule lalu lo wiridagua bialu i̱naga dameneru í̠ni andaneha howa bayale haabo helo helabe laro. Anduane Homogo Bibahende Haru Haame Ho Haga-o í̠na bi ogoni heneneore lo wirigome í̠naga turu howa biamogo buleneru i̱naga aguaneneruha wiaabo holebira, lalu Debidihanda Anduane Homogohondo bi anidagua lene.
2SA 8:1 Emene howa mani Debidi halu ibunaga ami agalirume Pilidialiru baba wai bini. Ani buwa tigua Pilidialiru bo poda hana hayagola Pilidialirume Isaraele dindi handayaho haga winigo wahalu pene.
2SA 8:2 Ani piyagola Debidi halu ibunaga ami agali biarume Moabaliru baba wai bialu urunibi bo poda hana hene. Bo poda hana howa Moabali uruni minu garabaya buwa ti bibahende dindini mo pale lene. Ani mo pale lowa tebira dege dege pale laga binidaru kira bo wahaga bialu tebonego helo yupe haga bini. Ani bialu Moabali yupe henedaruni ti Debidi andaneha howa ibu dagisi migi bialu helo helene.
2SA 8:3 Ani helalu mani Debidi halu ibunaga ami agaliru tigua Siriaha dindi mbira mini Soba wiagoha kini mbira Lehobo igini mini Hadadese heagola wai bule pene. Ogoningi Hadadese ibu ibunaga amiru haru halu ibunaga dindi mbira Iba Yuberedisi poragohayagi waitigime karulo henego ogoni mo yu dai bule wai bu pene. Ani pu heagola Debidi halu ibunaga ami agali biaru harigani lola howa
2SA 8:4 ti wai bialu Debidi ibu wayali hene. Ani buwa Debidi ibugua Hadadesenaga ami agali dindi dindi piaga daosini dege pira kira (20,000) minu wialu nogo hosini biruwa wai biaga agali daosini mbirani handari karia (1,700) minu wini. Ani bialu nogo hosime gili laga karisi handari mbira (100) mo wini. Ani buwa Debidi ibugua karisi uruni gili lalu pelonaga nogo hosi handari mbira (100) dege helalu hosi marunaga ge bo polaga biyagola ge hongo halu bayale pobe nahe hene.
2SA 8:5 Ogoningi Siriali maru Damasagasa dindiha hearu tigua Kini Hadadese biamogo bialu wai bule pene. Ani piyagola Debidi halu ibunaga ami agali biarume wai bialu Sirianaga ami agali daosini dege pira kirani kira (22,000) bo wahai hene.
2SA 8:6 Ani bo wahai howa Debidihanda ibunaga ami agali maru Sirialime lone heyalu wai nabilo Siria dindi wiyadagoha mamage hai helene. Ani heleagola Siria wali agali ti Debidi andaneha howa tinibi ibu dagisi migi bialu hene. Dindi mbira mbiraha Debidi wai bule pugu biyagola Anduane Homogohanda ibu biamogo biyagola ibunaga waitigi bope halu ibuni wayali haabo hene.
2SA 8:7 Wai bialu howa Debidihanda Kini Hadadesenaga ami agali haguane hearume humbi ngolome wabini yu haga biniyaru mialu Yarusaleme yu pudaba laga bini.
2SA 8:8 Ani bialu Debidi ibugua ege to̱le̱ boronosi dewaore Hadadesenaga tano kira Beda tanola Berodai tanolaha wiaria mo yini.
2SA 8:9 Ani bialu heagola Hamada dindinaga Kini Toi ibu hale halu hearia Debidihanda Kini Hadadesenaga ami agali bu hearu bibahende bope haya layago hale hene.
2SA 8:10 Ani hale howa Kini Toi ibugua Debidihanda o biyadagoni turu howa ibu igini Yorama Debidi hearia puwa í̠ bayuwaore birida lama pu lene. Kini Hadadesehanda Kini Toi ibu bibahendengi bope haabo haga henego ai Debidihanda Hadadese bope hayadagonaga turu howa ani lene. Ani pu laya handala Yorama ibugua yári tara tara ngolomebi silibamebi boronosimebi wabini wiaru mo yaga binigo uruni Debidi mo turu halu bame migi bini.
2SA 8:11 Debidi ibugua mbirale uruni yamialu Anduane Homogonaga mo loma biaho wigi bini. Debidi ibugua dindi maruha wai bialu ngolo silibaru mo yalu dai bigi bini wiarubi loma biaho ngelaga dege bini.
2SA 8:12 Debidi ibugua ngolo siliba uruni minidaru Idomo dindiha howabi Moaba dindiha howabi Amono dindiha howabi Pilidia dindiha howabi Amalege dindiha howabi mo yu ibugu bini. Ani bialu Soba dindinaga Kini Hadadesenaga wiarubi mo ya dege bini.
2SA 8:13 Ani bialu henego ai Debidi halu ibunaga ami agaliru tigua Idomoali hearu baba wai bule dindi mbira mini Dindi Ulini Ibi Wiaga laga wiagoria pene. Ani puwa tigua Idomoali ami dege daosini pira mbirani halira (18,000) bo wahai halu dai biyagola ogoningi Debidi ibu mini lene timbuniore ka laga hene.
2SA 8:14 Debidi ibugua ibunaga ami agali maru dabalu Idomo dindiha handayaho helo helene. Ani heleagola Idomo wali agali ti Debidi andaneha hene. Dindi bibahendeha Debidi ibu baba wai bialu heagola Anduane Homogohanda Debidi ibugua ibunaga waitigi bo podahana haga bilo biamogo biaabo halu hene.
2SA 8:15 Debidi ibugua Isaraele dindi bibahende handame ho howa ibunaga wali agaliru baba mana bayale tigabi bulene wiadagua dege bialu haga hene.
2SA 8:16 Ani bialu howa ibunaga ami agaliru haru bamba haga agali haguane wali mbira mini Seruia berenego igini Yoaba hene. Ahiludu igini Yahosabada ibu beba gili bia dagala biaga howa ibugua gabumanenaga mbugaru handayaho haga haguane mbira hene.
2SA 8:17 Ahidubu igini Sadogola Abaiada igini Ahimelegela libu Anduane Homogonaga loma binigo mo miaga agali hene. Seraia ibugua kininaga beba gili bia dagala biaga hene.
2SA 8:18 Ani bialu Yahoiada igini Benaia ibu nde ami agali maru Kini Debidi ibuni mamage haga Keredeali Peledealiru bu heago haru helo dabo helene. Debidi iginiru ti loma binigo mo miaga agali hene.
2SA 9:1 Horo mbirungi Debidihanda agali bu hearuhondo hale halu lalu, Kini Solo aria waneiginibi mbira yu wahene kabe nahebe. Mbirali yu wahene heagua Yonadana ibugua i̱hondo mana bayale bialu hayagonaga pani i̱na ibuhondo mana bayale biadai bulebero, lene.
2SA 9:2 Odagoningi Solo damenenaga biabe biahaga agali mbira mini Siba henego maru hearume ibu lamialu, Kini hondole pu, lene. Ani laya handala ibu kini hearia ibiyagola kini ibugua ibuhondo lalu, Í̠ Siba íbu kebe, lene. Ani layagola Sibahanda ladai bialu lalu, E̱ agali haguane-o i̱ agali ogoniore íbu kogoni, lene.
2SA 9:3 Ani layagola kini ibugua Sibahondo lone hale halu lalu, Solo aria maru yu wahene áyu mbira kabe nahebe. Yu wahene mbira heagua i̱na ibuhondo mana bayale buliya hameledo. Bamba i̱na Ngode Datagaliwabehondo ogodaguaore bule lalu bi lo wirugodagua biaore bulebero, lene. Ani layagola Sibahanda Debidihondo ladai bialu lalu, Yonadana igini mbira hangu kago ibu ge kohe ka, lene.
2SA 9:4 Ani layagola kini ibugua hale halu lalu, Ibu agoha kabe, lene. Ani layagola Sibahanda kinihondo lalu, Ibu Lodeba tano wiagoria Amiele igini Magia andagaha ka, lalu lamini.
2SA 9:5 Ani layago hale howa kini ibugua lalu, Agali marume Yonadana igini ogoni haru ibule damu pudaba, lene.
2SA 9:6 Agali ogoni mini Mebibosede ibu Yonadana igini Kini Solo aguane henego ibu Debidi bereagoria ibuwa ibugua Debidinaga mini yaraga halu ibu ge duli hanga howa bulu palialu denguime dindi ela hene. Ani biyagola Debidihanda ibuhondo lalu, Mebibosede-o horombe laro, lene. Ani layagola Mebibosedehanda ladai bialu lalu, Kini-o i̱ í̠naga biabe biahaga agali kogoni, lene.
2SA 9:7 Ani layagola Debidihanda ibuhondo lalu, Gi nahabe. I̱na í̠ aba Yonadana mitangi bialu í̠hondo mana bayale bule hame ledogo. Ai í̠ mama Solonaga dindi i̱na wu heneru í̠nihondo ngiadai biai holebero. Ani bialu í̠nibi tomo i̱ andagaha mandagi nalu habiya, lene.
2SA 9:8 Ani layagola Mebibosedehanda ibunaga ma podowa dengui dindini lone ela howa Debidinaga mini yaraga halu lalu, Kini-o agali nagaloneore i̱ kogonidago irane aginaga mbirale bayale uruni i̱hondo buleberebe. I̱ ko biango homo wahene ale ndobe, lene.
2SA 9:9 Mebibosede tagira piyagola kini ibugua Siba olalu anda íbu lowa ibuhondo lalu, I̱naga agali haguane Solo ibunaga dindi winiru bibahendebi ibu damenerunaga winirubi bibahendeore Solo ibuninaga aguane Mebibosede ibunihondo miadai bulebero.
2SA 9:10 Ani buleberogo ai í̠nibi í̠naga igini bu karubi í̠naga biabe biahaga karubi tígua Solonaga dindi wiyadagoria tomo hangalimu. Hongowa boga bidagola Solo damenerunaga bu hanalu ibugu bilimu. Ani beregome Solo dameneru ti tomo nolene buru palia nabi karulape holebira. Ai Mebibosede ibuni dege tomo i̱ni andagaha mandagi nalu haabo holeberaba, lene. Siba ibu iginiru nguira (15) halu ibunaga agali biabe biahagaru pira kira (20) hene.
2SA 9:11 Ani layagola Sibahanda Debidihondo lalu, Kini-o í̠na bia lareruni bibahende biai holebero, lene. Mani howa Mebibosede ibu kini igini haradagua bialu horo bibahendengi ibu tomo kini andagaha nalu haabo haga hene.
2SA 9:12 Mebibosede ibu igiri mbira henego ogoni ibu mini Miga hene. Ogoningi howa Siba ibu dameneru wali agalibi bibahende Mebibosede daluha biabe bialu hene.
2SA 9:13 Ani bialu heagola Mebibosede ibu ge kirabali ko kuduguhe howa ibuni tomo Kini Debidi andagaha mandagi nalu ibu Yarusalemeni haabo haga hene.
2SA 10:1 Amononaga Kini Nahasa homayagola ibu igini Hanunuhanda ibu abanaga henge mialu Amono dindini kini ha aribia hene.
2SA 10:2 Ani heagola Debidihanda lalu, Hanunu aba Nahasa ibugua i̱hondo mana bayale bialu hagadagua i̱nabi nde Hanunuhondo bayale dege bialu holebero, lene. Ani lowa Debidihanda agali maruhondo lalu, Hanunu karia puwa ibu aba homayadagonaga duguanda pialu daraba lole pudaba, lene. Ani laya handala ti pialu Amono dindiha anda piyagola
2SA 10:3 Amonoali agali haguane bu hearume Hanunuhondo lamialu lalu, Í̠na mandabu handalu keria Debidihanda agali o pu layadaruni heneneore í̠ aba dara halu ibunaga mini yaraga hole pudaba lene ibiyadalo manda bidebe. Anidagua ndooreyago. Mani ibunaga ami agaliru haru halu ibuwa ina baba wai bulenaga áyu agali urunime inanaga dindi ngamago abidabe diri hondo wule pudaba lenego íbu ka, lene.
2SA 10:4 Ani layago hale howa Kini Hanunu ibugua agali Debidihanda bi yalu pudaba lene biaru minu yania howa tinaga angari hearu mendehayagi podo wahalu mendeha helene. Ani bialu agali uruninaga aga luni biagimbu biaruni poda tubagi howa here panahe heagola tini dalu dai bilene.
2SA 10:5 Anigo agali biaru ti nde taga timbuni howa tini dalu dai bibe nahe hene. Anidagua biya layago Debidi ibu hale howa ibugua agali biaruhondo bi lo pelalu lalu, Tigua tíhondo o biyadagoninaga Yarusaleme dai bulenego taga nahalimu. Abale ibalu Yarigo tanoha tínaga angari lone ibilonaga emene hondo halimu. Mani tínaga angari bayale ibidagola nde Yarusaleme dai bilimu, lalu Debidihanda lawia hene.
2SA 10:6 Ani binigo Amonoali biaru tigua mandabu handalu hemiria tigua mana lehe o birimagonime Debidihanda ti baba keba helonaga mo tandaga harimadalo manda bu hene. Ani manda bialu tigua agali maru Siria dindiha Bederehobo tanoha bu hearu bababi agali maru Soba tanoha hearu bababi bi pongo bo wule pene. Tano uruniha hearu tigua ami agali daosini dege pira kira (20,000) Amonoaliru biamogo bialu wai bule ibilelonaga bi yalu pelene. Ani bialu tigua Amonoali uruni tigua Tobo tanoha ami agali daosini homberia (12,000) haru anda pene. Ani bialu Amonoali tigua dege Maga dindiha kini heago baba bi pongo bo wialu ami agali daosini mbira (1,000) wai bialu ti biamogo bilonaga haru anda ibini.
2SA 10:7 Ogonidagua wai bule agali mialu ka layago Debidi ibu hale howa ibugua ami haru bamba haga agali haguane Yoaba halu Isaraelenaga ami agali bibahende wai bule pudaba lene.
2SA 10:8 Ani piyagola Amonoali ami biaru tibi nde Laba tano wiagonaga pabe kawareni handayaho hene. Ani heagola Sirialirubi Toboalirubi Magalirubi ti nde ibuwa naina dangi wiagoria tidiyu hene. Tigua Isaraele ami agaliru baba dege wai bulenaga ona tidiyu haga haga bini.
2SA 10:9 Yoaba ibugua handalu hearia Isaraele baba wai bule ami agali tidiyu haga haga biago hondowa wai hama kirani talebuki howa wai bibeheyane hendene. Ani hondowa ibugua Isaraeleali hongoheru maru tale bialu Sirialiru amu dangi wiagoria tidiyu heago baba wai bule handayaho helowa ibunime haru hene.
2SA 10:10 Ibu hamene Abisaihandabi nde Isaraele ami agali hearu halu mende haru howa ibugua nde Amonoali hearu baba wai bule tidiyu naina handayaho hene.
2SA 10:11 Ani howa Yoaba ibugua Abisaihondo lalu, Wai bialu howa handalu keria Sirialirume ina bope habeheyane handarimiyagua nde tígua ina mo hongo halu wai bule abale ibalimu. Iname handalu kamaria Amonoalirume tí bope habehe biyagua nde inamebi abale ibalu tí biamogo buleberema.
2SA 10:12 Ani bimi̱yago tígua wai bialu howa gi nahe hongo ho halimu. Iname wai bialu howa inanaga wali agali waneigini andaga bu karubi inanaga tano Anduane Homogohanda ina ngini ngamarubi mitangi bialu wai hongo howaore bimi̱ya. Anduane Homogohanda nde ibunime hame ledadagua bilo laro, lene.
2SA 10:13 Ani lalu Yoaba halu ibunaga ami biaru tigua Siriali bu hearu baba wai bule hapara halu piyagola Sirialiru ti ibida pene.
2SA 10:14 Amonoali biaru tigua handalu hearia Siriali biaru tí ibida piyago hondowa Amonoali tibi nde Abisai halu ami agali biaru ibiya handala ibida pialu tanonaga wai pabe tamuha ha do hai hene. Ani biya handala Yoaba ibugua Amonoali uruni ani helo wahalu ibunaga ami agali biaru haru halu Yarusaleme dai bini.
2SA 10:15 Siriali biaru tigua handalu hemiria Isaraele agalirume ti bope hayiyane handalu tinaga ami agali hearu mo mogo bini.
2SA 10:16 Ani buwa Kini Hadadesehanda agali maruhondo, Siria ami agali maru Iba Yuberedisi angeha wai bialu hearu lone damu pudaba, layagola damu pialu bibahende haru daibu howa tidiyu hene. Ti bibahende dindi Helama mbira wiagoria íbu ngoaiho heagola Hadadesenaga ami agaliru haru haga agali haguane mbira mini Sobaga heagome ami agali uruni haru hene.
2SA 10:17 Siriali biaru ti Helama dindini tidiyu íbu ka layago hale howa Debidi ibugua ibunaga Isaraele ami agali bu hearu abale olo ngoai hene. Íbu ngoai heagola Iba Yodana abale doma ede halu Helama dindini wai bule pene. Ani piyagola Siriali biaru tigua ho dugu bialu Isaraele baba wai bini.
2SA 10:18 Ani biyagola Isaraele ami agali hearume wai hongo howaore bialu Siriali bo he̱ladai bini. Horo ogoningi Debidi halu ibunaga ami agalidarume Siria ami agali karisini heyu howa wai biaga hearu handari karia (700) bo wahalu nogo hosini biruwa wai biaga daosini dege pira maria (40,000) bo wahene. Ani bialu Sirianaga ami agaliru haru haga agali haguane Sobagabi wai hamani bope hayangiore tongolo mini.
2SA 10:19 Abale kini maru Sirianaga Kini Hadadese andaneha haga henerume handalu hearia Isaraeleali ti hongoheore howa Siriali bope hayago hondowa tigua Isaraeleali baba gi tigani bialu tini Isaraelenaga andaneha hene. Ani hayagola Siriali biaru tigua Isaraelealiru hondowa gi timbuni halu tigua Amonoaliru lone biamogo bulene manda nabi wahalu wahene.
2SA 11:1 Mali bibahendengi dindi uruniha kini hearume dagare biaga horo winigo piai haragola tinaga ami agaliru haru halu puwa tinaga waitigiru baba wai biaga wini. Debidihanda Sirianaga ami agali biaru baba wai biai howa mali mbira howa dagare biaga horo winigo piai hayagola ibugua ami haru haga agali haguane Yoababi ibunaga haru haga agali hearubi Isaraeleali agali haguane maru hearubi ti bibahende Amonoali ami agali hearu baba wai bule pudaba lene. Tigua puwa wai bialu bo podama piaho wialu uyura Laba tanoni podahana hene. Anigo ogoningi Debidi ibuni wai nape Yarusaleme tanoni hondo hene.
2SA 11:2 Ani hondo hearia horo mbirungi Debidi ibu palenego ai alendoore hayagola heyalu tagira pene. Ibuni anda ogoninaga daligaha wá handape hagabu biraga mbira wini. Ani wiagoria Debidi ibu iraga halu puwa ogoriani ibagabu hene. Ani ibagabu howa wá handa amunana bialu hearia wali baya mangabiore mbira amuna wayawaya balu hearia hendene.
2SA 11:3 Ani hondowa Debidihanda agali mbirahondo lalu, Wali ogoni aidabe hondole baya hangu goaru hondole pu, lene. Ani laya handala agali biagome puwa goaru handalu hearia wali biago ibu Eliama wane mini Badaseba Hidiali ami agali Uria mbira henego one bereneyane hondowa Debidi lamini.
2SA 11:4 Ani lamiyagola Debidi ibugua agali maruhondo lalu, Wali ogoni ibu i̱ koria haru ibule pudaba, lene. Horo ogoningi Badaseba ibunaga ege bolangua halu bayale dodo mbira para nahe birule lowa tinaga mana winidagua bialu berearia damu pene. Haru halu ibiyagola Debidi ibu haru palialu mani Badaseba ibu nde andaga dai bini.
2SA 11:5 Emene biruwa Badaseba ibugua handalu hearia ibuni ege habo lalu waneigini gali tombeha bere biraruyane hondowa Kini Debidi hearia bi lawia hene.
2SA 11:6 Ani biniyane handalu Debidihanda ami haguane Yoabahondo bi lawia halu lalu, Hidiali Uria biago i̱ koria abale pu labe, lene. Ani layago hale halu Yoabahanda Uria Debidi hearia dai bia lene.
2SA 11:7 Uria ibu Debidi hearia abale ibiyagola Debidihanda ibuhondo hale halu lalu, Yoaba halu ibunaga ami biaru bayale kabe. Wai agua bialu kabe. Iname bo podahana habehebe be agua bialu kabe, lene. Ani layagola Uriahanda bibahende wai hamaha biyaru Debidi lamiai hene.
2SA 11:8 Ani lamiai hayagola Debidihanda Uriahondo lalu, Ai te bayale hale harugonigo áyu í̠ni andaga puabo halu wayawaya balu emene ha̱lo hole pu, lene. Ani laya handala Uria ibu kini berea handala tagira pialu pene. Emene biruwa Debidihanda Uria mo turu hole mbirale bayale wiaru maru agali mbirame yalu pu lene.
2SA 11:9 Anigo Uria ibu andaga nape kininaga mamage haga agali maru kini andaga harabani palearu heba mandagi palu hene.
2SA 11:10 Agali marume Kini Debidi lamialu lalu, Uria ibu andaga nape ka, lene. Ani laya handala Debidihanda Uria hearia puwa lalu, Bambaore í̠ andaga yu wahalu tagira pu harigodago ai áyu andaga nape aginaga haribe, lene.
2SA 11:11 Ani layagola Uriahanda ladai bialu lalu, Isaraelenaga amirubi Yudanaga amirubi bibahende amu wai hamaha hai halu Anduane Homogonaga Habo Nalolene Bi lo winigonaga Mbogoyi biagobi ti heba wai hamaha yu ka. Inanaga ami haru haga agali haguane Yoababi agali haguane marubi ti bibahende wai hamaha hai kago ti ani helowa i̱ tomo ibabi nalu i̱ one heba mandagi palialu ani bulene nakarulape manda bido. Heneneore larogo anidagua nabuleore, lene.
2SA 11:12 Ani layagola Debidihanda lalu, Karulapego áyu ona halu paliabe. Yawi wai hama dai biloliya, lene. Ani laya handala Uria ibu Yarusalemeni ho paluwa horo mendengi alendo
2SA 11:13 Debidihanda Uria ibu andaga íbu lowa tomo ibabi nalu biruwa lulu iba Uria dewa nelo miyagola nowa luluyu helene. Ani biyagola Uria ibu ibuni andaga palima pu nabi ibuninaga balangiya heneneyagome yi howa ami agali maru kini mamage howa paliaga palearu heba mandagi palene.
2SA 11:14 Palialu egerebalene Debidihanda beba mbira Yoabanaga gilibu wia halu Uria ibugua mo yalu wai hamaha dai bialu beba ogoni Yoaba mibe lene.
2SA 11:15 Beba ogoniha Debidihanda bi ogodagua gilibu wini. Ibugua lalu, Uria ibu ami agali maru heba wai hongohe biragoria timu deneni minu bamba habe. Ani pu kagola Uria waitigime belo ami agali maru ti emene hadai bilimu, lene.
2SA 11:16 Yoaba halu ibunaga ami agali biaru Laba tano bo podama anda pialu tano ti karulole wai bialu hene. Ani howa Yoaba ibu Debidihanda beba gilibu wia hayiyago mialu hondowa Uria Amonoalirume wai hongo howa bialu heagoha minu bamba helene.
2SA 11:17 Ani minu bamba ho heleagola Amonoali ami hearume tano pabe yu wahalu tagira ibuwa Yoabanaga ami agali biaru baba wai bini. Wai ogoni biyadangi Debidinaga ami agali maru balu Uriabi nde bayagola ti haru homai hene.
2SA 11:18 Mani howa Yoabahanda wai biyarunaga te Debidi hearia lope hole
2SA 11:19 ibu agali mbira heagome te ogoni lamima pelo ibuhondo lamini. Ani lamialu lalu, Í̠na kini hearia puwa ibuhondo wai ogodagua birima lalu birimadagua bibahende lamiai habe.
2SA 11:20 Ani lameregola kini ibugua keba halu bi ogodagua lolebira. Tígua wai pabe anda heagoria wai kaware aguanaga anda pirimibe. Kaundiani howa wai bialu ha nabirimidago waitigi hayadarume wai pabe neneni howa timume badali halu tí bolebirago manda bidamigo buwa dege pirimida, lolebira.
2SA 11:21 Bamba Abimelege benegonaga te tí manda nabi henebe. Gideono igini Abimelege ibu Tebese tano wiagoria wai pabe kaware howa wai bialu hearia wali mbirame ege to̱le̱ balawa wabule widi dambiaga mbalape timbuni wiagome pabe neneni howa bape halu Abimelege bene. Ai te ogoni manda buwa agua bule wai kaware anda pirimibe, lalu layagua nde Uria heba bo wahaya lamibe, lene.
2SA 11:22 Ani laya handala agali te yalu abale piyago ibugua Debidi hearia puwa te lamini.
2SA 11:23 Ibugua lalu, Waitigi biarume tano tamuha howa wai hongo howa bima tagira ibalu hama dombe wiagoria hongo howa wai birima. Ani bialu howa inamebi nde wai hongo howa bialu ti tano pabe anda haraba wiagoha tali dai birima.
2SA 11:24 Ani bialu hearia Amonoali maru wai pabe neneni handape ho howa timu badali hayarume inanaga ami agali maru baya. Ami agali homayadaruni aria mbira Uria halu homaya, lalu kini lamini.
2SA 11:25 Ani layagola Debidihanda agali bi bibi yalu ibiyagohondo lalu, Í̠na Yoaba karia dai buwa ibu wai bilo mo hongo halu bi ogodagua labe. Agali abogo ibuore homolebira lowa ndo wai biaga. Agali maru homayagonaga í̠na miniha genda nahabe. Í̠na wai hongo howa bialu Amonoalirunaga tano ogoni bo podama anda pialu tano ogoniore emene nawuleore bo giala holebu wahai habe, lene.
2SA 11:26 Mani Badaseba ibu agalini Uria waime baya layago hale howa dara timbuni halu dugu bialu berene.
2SA 11:27 Duguanda hai howa dara embeda heagola Debidihanda, Badaseba ibu i̱ andaga haru ibule pudaba, lene. Haru ibiyagola Debidi ibu dabu buwa Badasebahanda Debidinaga igini mbira taba hono berene. Anigo Debidihanda mana ogonidagua biyagonaga Anduane Homogo ibu turu nahe hene.
2SA 12:1 Anduane Homogohanda ibunaga bi mana latagi haga Nadana Debidi karia pu layagola ibugua puwa ogodagua lamini. Ibugua lalu, Tano mbirani agali kirali heneya. Agali mendego ibu muni mbiraleru dewawi homogo timbuniore halu mendego ibu ko yagibano mbirale emene hangu wu heneya.
2SA 12:2 Agali homogo ogoni ibunaga nogo bulumaga sibiru dewaore hinu heneya.
2SA 12:3 Anigo yagibano biago ibu nde nogo sibi angibuni mbiraore hangu hinu heneya. Agali biago ibugua sibi ogoni munime yolo biniyago ibunaga waneigini heba mandagi halu ho anda heneya. Agali ogoni ibugua tomo nalu ibunaga sibibi ibuni nayago ale nala ho mialu iba agali biago ibuni gabo beha howa nelo miaga heneya. U palelo ibuni buha palelo palelaga heneya. Ogonidagua biagagome sibi ogoni ibu waneore haradagua biaga heneya.
2SA 12:4 Anigo horo mbirungi agali mbira agali homogo biago andaga nenege ibiniya. Ani ibiyagola homogo biago ibugua ibu nenege ibiyagonaga ibuni sibi hayaruni aria mbira bo dawa nahe helo wahowa agali yagibano biagonaga sibi mbiraore hangu hene biago bo puwa ibu nenege biagonaga nelo bo dawa heneya, lene.
2SA 12:5 Nadanahanda bi ogoni layago Debidi ibu hale howa agali homogo biagohondo keba timbuniore ho wia halu lalu, Anduane Homogo haluhe kagonaga minini howa heneneore larogo agali mana ko ogonidagua biagago ibu homelo bo waholene nga.
2SA 12:6 Agali homogo ogoni ibuha mendeali kago mitangi halu dara holene nawi howa bialu hayadagonaga ibugua ibuninaga sibi mariame dano hongolene nga, lalu Debidihanda ladai bini.
2SA 12:7 Ani layagola Nadanahanda Debidihondo lalu, Agali haguane ogoni í̠ni o kegoni ndobe. Anduane Homogo Isaraele wali agalinaga Ngode Datagaliwabe kago ibugua í̠hondo bi mbira ogodagua lara. I̱na í̠ Isaraele wali agalirunaga kini habelo dabo helaru. Ani helowa i̱na í̠ biamogo bialu hewagola Solohanda í̠ ba nabi bayale hari.
2SA 12:8 Ogonidagua helowa Solo andagabi ibu one berearubi ibunaga mbirale wiarubi bibahende í̠hondo ngiai harugo. Ani bialu i̱na Isaraelenagabi Yudanagabi kini í̠ hangu helarugoni. Uruni birugo bibahende nakarulapedale nde dewa dege ngiatago halu bidole.
2SA 12:9 Ani birugo irane aginaga í̠na i̱naga bi mo wahalu i̱naga deni mana ko ogoni biribe. Í̠na Amonoali waitigi biarume Uria bo wahelo tinaga giha minu ya halu ibu one í̠ aribia hariyago.
2SA 12:10 Ai baya hangu hale ha. Í̠na i̱ mo yo hondowa Hidiali Uria ibu one í̠ halu ibuni homelo bo wahariyago. Anidagua biriyagome maniore í̠ waneigini aguaneru mbira homelo bo waholene wiaabo holebira, lalu Anduane Homogo ibugua bi ogoni í̠hondo lara, lalu Nadanahanda Debidi lamini.
2SA 12:11 Nadanahanda Debidihondo lone lalu, Anduane Homogo kagome í̠hondo bi ogodagua larago hale habe. I̱na í̠ni igini bu karuni mbiragome genda timbuni yu anda ibilolebero. Ani bialu í̠ one bedaru agali mende hado merogo í̠na de hondolebere. Ani berogola ibugua wali uruni hama dombeni kayu yalu holebira.
2SA 12:12 Mana ko í̠na bialu haridago ohowa bialu harigoni. Í̠na mana ko ogoni biridagonaga pani i̱na biadai buleberogo Isaraele wali agali karu bibahendenaga deni howa horombe hama dombeni mo bia holebero, laya lene.
2SA 12:13 Nadanahanda bi ogoni layago hale howa Debidi ibugua Nadanahondo lalu, I̱na Anduane Homogonaga deni howa ibuhondo mana koore biru, lene. Ani layagola Nadanahanda ibuhondo ladai bialu lalu, Anduane Homogohanda í̠na mana ko birigo domo wahayago í̠ nahomolebere.
2SA 12:14 Ai í̠na ani birigome Anduane Homogonaga waitigi karume ibunihondo mine helonaga birida. Ani birigonaga í̠naga igini Badasebahanda taba honolebirago ibu homolebira, lene.
2SA 12:15 Nadana ibugua Debidihondo bi uruni lai halu ibu andaga pene. Mani Debidi igini Uria one ibu kayu bini Badasebahanda taba hanayago Anduane Homogohanda warago ko timbuni ibuha anda ibilene.
2SA 12:16 Igiri dabi helo Debidi ibugua igiri mo dabi helonaga Ngode Datagaliwabehondo bi la haabo halu hene. Ani lalu howa ibu iba hinaru nane wahalu aga balangiyaru mbira dunga nabi tamuni bame paliaga bini.
2SA 12:17 Ibunaga agali biabe biahaga ala hene wahe hearume Debidi palearia puwa mo heya hole bialu hearia nabibehe ibu mangaore hene. Agali uruni baba mandagi biruwa tomo nolenebi manga dege hene.
2SA 12:18 Ani howa sarere mbira peagola igiri gali biago homayagola agali biarume igiri homaya lalu Debidi lamulene giho hene. Tigua lo manda bialu lalu, Abale igiri warago hangu bo wiagola iname ibu mo bila agua hoabe tobahe wiagodago. Ai áyu igiri homaya aguaore lamimabe. Ibuni mo ko holene mbira buligo agua bimabe, lene.
2SA 12:19 Debidi ibunime handalu hearia tigua bi ohowa tini hangu la la bialu hemigo hondowa ibugua manda bialu ai igiri biago homayadalo manda bini. Ani manda buwa ibugua tihondo lalu, Igiri homayabe, lalu hale hene. Ani layagola tigua ladai bialu lalu, E̱ ibu homaya, lene.
2SA 12:20 Debidi ibu tamu dindi wiagoria bame palenego ai igiri homaya layago hale howa abale heyalu ibaha wayawaya bole pene. Bo puwa manda kumu bialu weli ngabi mini sanda wiago ibuni tinginini ha̱i̱ halu aga bayale wiaru mo karulene. Ani bialu Debidi ibu Anduane Homogonaga andaha lotu lole pene. Lotu lalu dai buwa ibunaga tomo dawaga igiri hearuhondo tomo noliya dugu talebu ngidaba lowa tomo dugu miyagola nene.
2SA 12:21 Debidinaga biabe biahaga agali hearume ibugua ogonidagua biyago hondowa ibuhondo lalu, Mana agigo í̠na beregonibe. Igiri homa nabi ngelowa í̠na ibunaga dugu biaabo halu tomo nane harigo. Áyu ibu homayagola í̠na heyalu tomo nalu kegoni mana agigo o beregonibe, lene.
2SA 12:22 Ani layagola Debidihanda tihondo ladai bialu lalu, I̱ igini nahomeha i̱na dugu bialu tomo nane harugoni irane Anduane Homogohanda i̱ dara howa i̱ igini mo dabi helonaga biru.
2SA 12:23 Ai áyu ibu homayadago tomo nane waholene aginaga. Tomo waharogola i̱ igini lone heyulebirabe. Ani ndoyago. I̱nibi nde mani ibu piyagoha dege pole kogoni ndobe. Anigo ibugua dege i̱ni koria dai nabulebira, lene.
2SA 12:24 Debidihanda ibu one Badaseba miniha gendaho biruligonaga mo palia halu bi bayale laga bialu hene. Mani Debidi ibu one heba mandagi palu howa Badasebahanda Debidi igini mbira taba henene. Debidi ibugua igiri gali ogoni mini Solomono wini. Anduane Homogohanda igiri gali ogoni gubalini timbuni ho hene.
2SA 12:25 Ani howa Anduane Homogohanda ibunaga bi mana latagi haga agali Nadanahondo lalu, Debidi karia puwa igiri gali ogoni mini Yadidia wibe lalu lamibe, lene.
2SA 12:26 Horo ogoningi ami haru haga agali haguane Yoabahanda ami haru howa Amonoalirunaga tano timbuni Laba wiagoria wai hongo howa bialu hene. Ani bialu howa lene mbirahayagi bo podama anda pialu karulene.
2SA 12:27 Anidagua bialu howa ibugua Debidihondo bi lo pelalu lalu, I̱na Labaliru baba wai hongo howa bialu tinaga iba hambiaga wiago karularu.
2SA 12:28 Ani birugo ai í̠na ami maru andaga Isaraele dindiha yu wahayaru mo mogo bialu haru halu abale ibalimu. Wai bialu Laba tano anda pialu karulai hami̱yago abaleore ibalimu. Ami agali i̱na haru kogome hangu anda pialu karularimayagua nde wali agalime tano ogoni mini wialu i̱naga mini lalu wulebira, lene.
2SA 12:29 Bi ogonidagua lama ibiyago Debidi ibu hale howa ibunaga ami agali mo mogo bialu haru halu puwa Laba tanoha wai bialu podama pialu anda puwa tano karulene.
2SA 12:30 Ani anda puwa Amonoali kini heagonaga manda ngolome wabini karulo bereago Debidi ibunioreme anda pialu golene. Kininaga manda ogoni ngolome wabini ibunaga genda magi manda pira tebirani duria agima (35) kilogarama wini. Manda ogoni to̱le̱ baya tara tara muni dewaoreme yolo biaga wiarume mo yáribia heneyago Isaraeleali ami agali biarume Debidinaga haguaneni mo karula hene. Ani bialu Debidi ibugua tano ogoniha muni mbiraleru dewaore winiru mo yalu pene.
2SA 12:31 Ani buwa ibugua wali agali Laba tano ogoniha heneyaru bibahende minalu biabe tara tara dindi aluenerubi ayume bulene wiarubi some podolene wiarubi biai helo mo ta hai hene. Marume anda bulenaga ege timeni ale mbirigi wabilo helene. Amono dindiha tano wiaru bibahendeni wali agali bu hearu anidagua dege biai hene. Ani biai halu mani emene howa Debidi halu ibunaga ami agali biaru ti Yarusaleme dai bini.
2SA 13:1 Debidi igini Amanono henego ibugua Debidi igini mende Abasalomo mbalini baya taraore mbira mini Tama bereago ibu dimagoli ho haga hene.
2SA 13:2 Anigo Tama ibu agali mbirali baba mandagi palia nabini berene. Ani bereagola Amanono ibugua Tama berearia puwa ibu minu yania holene henge nawiyagola hame lowa ibunaga miniha mini burugu lalu dimagoli warago bo wini.
2SA 13:3 Anigo Amanono ibu nenege mbira Debidi hamene Sama igini Yonadaba ibu mini ohewi henego ogoni ibugua biabe ohowa bulene hariga tara tara taya biaga hene.
2SA 13:4 Ani biaga henego horo mbirungi Yonadaba ibugua Amanonohondo lalu, Kini igini-o horo bibahendengi í̠ mini burugu lowa gendaho dege heria handarugo agua biyadabe, lene. Ani hale hayagola Amanonohanda ladai bialu lalu, I̱ore i̱ hamene Abasalomo mbalini Tamaore hame timbuni lo kogoni, lene.
2SA 13:5 Ani layagola Yonadabahanda lalu, Ai í̠ ke̱ howa warago bo wini tingi halu dagiaha palue pu. Ani paderia í̠ abahanda hondo ibiyagua ibuhondo au labe. I̱ mbalini Tama ogoria tomo dawale ibilo hameledo. Ani bialu i̱naga deni howa ibunime dawalu ibunaga gime yu ibalu i̱ noliya ngilo hameledo lalu lamibe. Í̠na kinihondo ke̱ howa bi ogonidagua lamiriyagua ibugua Tama í̠ bederia pu lolebirago ani labe, lene.
2SA 13:6 Ani layagola Amanono ibugua Yonadabahanda o layadagua bialu ibu warago bo ngo lalu ibuni dagiaha palene. Ani paleagola Kini Debidi ibu igini Amanono warago bo nga layago hale howa ibu Amanono andaga hondo pene. Ani piyagola Amanonohanda lalu, I̱ warago bo ngogo ai i̱ mbalini Tama i̱naga tomo kegiru mbira hira halu ibunime yu ibalu ngilo i̱ andaga pu labe, lene.
2SA 13:7 Ani layagola Kini Debidi ibugua Tama andaga berearia bi lawia halu lalu, Í̠ mbalini Amanono andaga puwa ibunaga tomoru dawa hole pobelo hameledogo pobe, lene.
2SA 13:8 Ani layagola hale halu Tama ibu mbalini Amanono andaga puwa Amonono ibuni dagiani palearia hendene. Ani paleagola Tamahanda balawa maru wabuwa parabane wiagoria hiralu berearia Amanono ibu handayaho berene.
2SA 13:9 Ani hirai howa Amanono ibuninaga beledi wiagoria dugu miyagola ibu nabe manga hene. Manga howa ibugua lalu, Agali tamuha hearu bibahende tagira piai hadaba, lene. Agali tamuha hearu bibahende bi ogoni hale halu tagira piai hene.
2SA 13:10 Tagira piai heagola Amanonohanda Tamahondo lalu, Kegi uruni noliya í̠nime i̱ paliaga tamu ogoria mo yalu íbu, lene. Ani laya handala Tamahanda kegi biaru ibuni palearia yalu anda pene.
2SA 13:11 Ani yalu anda piyagola Amanonohanda minu yania howa lalu, Mbalini-o dagiani palibiya íbu, lene.
2SA 13:12 Ani layagola Tama ibugua turu nahe howa hongo howa lalu, I̱ mbalini-o ani nabuleore í̠na i̱hondo mana ko ogonidagua biba lolene nawi. Ina Isaraele wali agalime mana ko ogoniale nabiaga ngagoni.
2SA 13:13 Í̠na mana ko ogoni biriyagua i̱ha taga timbuni halu wali agali bu karunaga deni ibagabu habe nahe holeberogo nabuleore. Í̠bi nde Isaraele wali agali bu karume í̠ mo ko halu mo ngubia holebirago nabule. Áyu bulene nawigo í̠na kinihondo ala hale holene nga. Ani hale haregola í̠na i̱ nadabubibe nalolebirago hale holene nga, lene.
2SA 13:14 Ani layago lelowa Amanono ibugua Tamahanda bi layago hale nahe tingi howa ibu hongo timbunihe heagome Tama minupe halu kayu yini.
2SA 13:15 Amanono ibugua ogonidagua biai howa mani Tama handabe manga hene. Abale howa ibugua Tama hame timbuni lo hayago áyu ibu hame nale howa handabe manga timbuniore ho hene. Ani manga howa ibugua bi hongo howa Tamahondo lalu, Í̠ abale ogoria nabere heyalu tagira pu, lene.
2SA 13:16 Ani layagola Tamahanda ladai bialu lalu, Ani ndo. Í̠na i̱hondo áyu birigo emene ale lowa i̱ pu lariyagua mana ko ogoni ko timbuniore bulebere, lene. Ani layagoyu Amanono ibugua Tamanaga bi uruni hale habe manga hene.
2SA 13:17 Ani howa ibugua ibunaga biabe biahaga agali heago olalu íbu lowa lalu, Wali o bedago abaleore minu batagi ha. I̱ ibuore nahondolego minu batagi howa panga payatagi habe, lene.
2SA 13:18 Ani layagola biabe biahaga agali biagome Tama minu batagi halu panga payatagi hene. Kini wanerunaga mana ti agali nape biruwa aga baya tara mbira gi lu biagimbu biaga winigo karulo haga wini. Ainde Tama ibu Amanono andaga pole howa aga ogoniale buyalu pene.
2SA 13:19 Anigo Amanono ibu andagaha howa minu batagi hayagola Tama ibu dara timbuniore ho berenego walia halu ibunaga aga bayale biago minu budalu ibunaga haguaneni bebi dugu wialu bini. Ani bialu ibunaga gi haguani paga howa dugu hongo howa bima pene.
2SA 13:20 Ani dugu bima pialu hearia hondowa Abasalomohanda ibu mbalini Tamahondo hale halu lalu, Dugu bima eberego agi. Í̠ mbalini Amanonohanda í̠hondo mana ko biyabe. Ani biyagua í̠ genda nahe ibu í̠ mbalini ndoyabe. Anigo ogoale biya lalu wali agali maru karu hale holani handabe, lene. Ani laya handala Tama ibu Abasalomo andaga puwa ogoniha berene. Ani biruwa ibunaga miniha genda yu biraabo hene.
2SA 13:21 Debidi ibugua Amanonohanda mana ko ogoni biya layago hale howa ibu keba timbuni hene.
2SA 13:22 Amanonohanda Abasalomo mbalini Tamahondo mana ko biyiyagola Abasalomo ibugua keba timbuniore howa ibu Amanonohondo bi bayalebi kobi mbira naleore hene.
2SA 13:23 Mali kira piyagola Abasalomonaga biabe biahaga agaliru Balahaso dindi wiagoria nogo sibi irini podalu hene. Dindi Balahaso ogoni Eberaimi tano kawareni dege wini. Ani podalu howa Abasalomohanda kini iginiru bibahende ibai halimu lene.
2SA 13:24 Abasalomo ibugua Kini Debidi hearia puwa lalu, Kini-o i̱naga biabe biahaga agali karume i̱naga nogo sibi irini podalu kago ainde i̱na tomo timbuni dawale manda bido. Anigo í̠naga agali haguane bu karu tomo nami̱ya í̠ni heba ibulene karulapebe, lene.
2SA 13:25 Ani layagola kini ibugua ladai bialu lalu, I̱ igini-o ina bibahende dewalidago ibai harimayagua iname í̠ mo genda holigo naibuleberema, lene. Anidagua layago lelowa Abasalomo ibugua harugo ibalimu lalu hongo howa laabo hayagolabi kini ibugua nde naibuleberema la dege bialu hene. Ani lowa lalu, Abasalomo-o í̠ turu halu pamia, lene.
2SA 13:26 Ani layagola Abasalomohanda lalu, Aniyagua nde i̱ hamene Amanono ibu dege ibilo wahabe, lene. Anidagua layagola kini ibugua lalu, Ibu hangu aginaga ibilobe, lene.
2SA 13:27 Ani layagola Abasalomohanda bi hongo halu ibiloore layagola nde kini ibugua Amanono halu kini igini maru hearubi pudaba lene.
2SA 13:28 Ani laya handala Abasalomo ibu Debidi helalu Balahaso dai buwa ibunaga biabe biahaga agali bu hearuhondo lalu, Tomo nalu bedamangi tígua Amanono baya hanguore mamage ho halimu. Ani howa ibu lulu iba dewa no bedago hondowa i̱na badaba laruyagua abale balimu. Tígua ibu bolene gi nahe howa balimu. I̱nime balimu lalu langerogoni ndobe. Ani manda bialu ibu bolene mogo nale hongo ho howa balu home lalimu, lene.
2SA 13:29 Abasalomohanda ani bilimu lamiyadagua agali biabe biahaga hearu ti tomo nalu Amanono ma yu biruwa Amanono ibu lulu iba dewa nalu luluyu bereago hondowa tigua gi nahe howa ibu homelo bo wahene. Ani biya handala kini igini maru biru hearu tigua tininaga nogo dongi heagoria iragaho biralu ibida pugu pugu bini.
2SA 13:30 Kini igini biaru ti wene harigani ibalu heaore dege agali maru kini hearia abale puwa ibuhondo lalu, Abasalomohanda í̠ igini biaruni bibahende mbiraoreli hangubi mbira pora bialu nape bibahendeore homelo bo wahai haya, lalu lamini.
2SA 13:31 Bi uruni layago hale howa kini ibugua mogo timbuni lalu ibunaga aga biago minu lerelaki bialu dindini paliape hene. Ani biyagola ibunaga biabe biahaga bu hearu tigua nde tinaga aga bu hearuni minu lerelai hene.
2SA 13:32 Ani heagola Debidi hamene Sama igini Yonadaba ibugua Debidihondo lalu, I̱naga haguane-o í̠na bi o layagoni mo henene nahabe. Tigua í̠ igini bibahende bai nahe mbiraore Amanono hangu baya. Amanono hangu bo wahayadagoni irane bamba ibugua Abasalomo mbalini Tama kayu biyagonaga keba ho haabo henego ani howa áyu bayadagoni. Abasalomo ibunaga denguini aruma howa keba ho haga biane hondowa ibugua ogoniore bule kalo manda binigobi áyu Amanono bo wahaya.
2SA 13:33 Ai kini-o bi o layaruni bame layalaya hangu layago henene layabe toba holeni. Í̠ igini bibahende hai ka. Amanono hangu homaya, lene.
2SA 13:34 Ani lalu heatambu Abasalomo ibu ibida pu hene. Yonadaba ibu Debidila bi lalu heagola ami agali wai pabeha mamage haga heago amu Horonaimi tanohayagi handa amu halu hearia agali dewaore hari nene wiagoria daliapebe biyane hendene. Ani handalu ibugua kini berearia abale puwa lalu, Agali dewaore amu Horonaimi hariga wiadagua hari nene wiagoria daliapebe bialu ibiragoni, lene.
2SA 13:35 Ani layagola Yonadabahanda Debidi lamialu lalu, O ibaruagoore i̱na langirugonidagua heneneore í̠ igini biaruni o ibaruagoni, lene.
2SA 13:36 Yonadabahanda bi ogoni lai hayagola Debidi igini biaru abale anda ibalu yiya lalu dugu bigibigi bini. Debidi halu agali ibunaga biabe biahaga bu hearu tiguabi nde dugu biamaga hene.
2SA 13:37 Abasalomohanda Amanono bo wahalu Gesua dindiha ibida puwa Amihudu igini Talamai hearia pu hene. Talamai ogoni ibu Gesuanaga kini heagola Abasalomo ibu ogoniha Talamai baba mali tebira hene. Kini Debidi ibu nde horo dewaore ibu igini Amanono homayagonaga dara ho haabo hene.
2SA 13:39 Mani Debidi ibu Amanononaga dara embeda howa ibu igini Abasalomobi nde dai bilo hamelo hene.
2SA 14:1 Seruia igini Yoaba ibugua manda bu handalu hearia Kini Debidihanda ibu igini Abasalomo hondoa howa bereago hendene.
2SA 14:2 Ani hondowa ibugua mbiralihondo, Dindi emene mbira Tegoa wiagoha wali mbira maru bedali ale ndo mini ohewi bogabi bereago haru ibule pu, lene. Ani laya handala ibugua puwa haru dai biyagola Yoabahanda wali ogonihondo lalu, Í̠ bu miniha dara hetingi halu mbirali homedagola genda yu biragadagua birabelo hameledo. Ani biruwa dara ho ko lowa walia halu aga karulaga ale karulalu mandari kumu nabibe. Mbirali homenegonaga dara howa horo dewa halu berene biragadagua birabe.
2SA 14:3 Ani bialu kini bedaria puwa bi i̱na ogodagua labe lalu langerogo labe, lene. Ani lowa Yoaba ibugua wali biagome kinihondo bi lamiloru ogodagua labe lalu lamiai hene.
2SA 14:4 Wali biago ibugua Yoabahanda bibe lalu lamiyaru bialu ibu kini berearia pene. Puwa ibugua kininaga mini yaraga halu dindini kininaga wanakuihayagi bulu paluwa lalu, Kini-o í̠na i̱ biamogo bibelonaga íbu bedogoni, lene.
2SA 14:5 Ani layagola kini ibugua wali biagohondo hale halu lalu, Í̠ha genda agi ngabe, lene. Ani layagola wali biagome ladai bialu lalu, Kini-o i̱ agalini homayagola i̱ hanguore dalo bedogoni.
2SA 14:6 I̱ igini kirali henego ainde horo mbirungi libu mabuha howa libuni keba haga buwa gungu biribiya. Ani bialu hebigola mbirali libu mo hadaki bia holene naheyagola mendeali hongo bolangua hayagome ibu hamene biago bo tongolo milayiya.
2SA 14:7 Ani binigo ainde áyu i̱ agalini damene bu karume i̱hondo keba timbuni halu lalu, Inanaga mana biaga wini ngadagua bialu í̠ igini ibu hamene bo wahayago ogoni ibunibi homelo bo waholoma̱ya ibilabe, lalu ka. Ani larago i̱na tinaga bi hale halu igiri ogoni pelaruyagua nde i̱ biamogo bialu handayaho holene igiri mbira naholobada. I̱naga ira dene emene dedago bo hundiaore holobada. Tigua ogonidagua biyagua nde i̱ agalini ibu damenego biba halu amolope holobada, lene.
2SA 14:8 Anidagua layago hale howa kini ibugua wali biago lamialu lalu, Emene ogoninaga mini burugu nale í̠naga genda ogoni i̱na mo tiga buliya dai bule áyu andaga pu, lene.
2SA 14:9 Anidagua layago lelowa wali biago ibugua lalu, Anigo i̱naga agali haguane kini-o i̱naga genda ngogo mo tiga bule hariga tara maru taya bulenego wahalu í̠na bulebererunaga pani nolene uruni i̱nibi i̱ dameneruhabi anda ibilo waha. Anigo í̠nibi í̠ one waneiginiruhabi genda nawi habelo, lene.
2SA 14:10 Ani layagola kini ibugua wali biagohondo lalu, Mbiralime í̠ mo ko holene bi mbira layagua nde ogoni ibuni i̱ koria haru ibabe. Haru ibiriyagua nde í̠ha mo genda holene mani nawulebira, lene.
2SA 14:11 Ani layago hale howa wali biago ibugua laabo halu lalu, Kini-o Anduane Homogo í̠naga Ngode Datagaliwabenaga minini howa í̠na bi henene larogoni lalu i̱ igini mende ogoni nabelonaga lahabe. Mana lowini ngagome agali ibuni hamene bo wahenego ibu dameneme ogoni ibuni bo wahaga ngagonigoyu harugo lowa i̱ iginiore bo wanahelo laro, lene. Ani layagola Debidihanda wali biagohondo lalu, I̱na heneneore Anduane Homogo haluhe kagonaga minini howa í̠ langerogo tigua í̠ iginihondo mbirale mbira nabulebiraore, lene.
2SA 14:12 Ani layagola wali biago ibugua lalu, I̱naga agali haguane kini-o i̱na í̠naga biabe biahaga bedogome í̠hondo bi mbiraore hangu loabe, lene. Ani layagola Kini Debidihanda ladai bialu lalu, Karulapego ladege bia, lene.
2SA 14:13 Ani layagola wali biagome Debidihondo bi tigatiga lamialu lalu, Í̠na Ngode Datagaliwabenaga wali agali bu karuhondo mana ogonidagua biriyago agua biyane biribe. Í̠na í̠ iginiore biago waratagi halu talu pelowa haru dai nabi dege kegoni. Anidagua bu kegome bi í̠na áyu i̱hondo langirigoni podene í̠niha o dai biragoni ndobe.
2SA 14:14 Iba hambu yinigo dindini odope hayagua lone mo yu dai bibe nahe wiralidagua ina homarimayagua lone heyabe nahe holeberemago mandabu kamagoni ndobe. Ai Ngode Datagaliwabehanda ina wali agalinaga holene bame mo wanahaga ka. Wali agali mbirago kaundiaha heagua ibugua uruni ibuni kagoria kaware haru halu dai bulene hame laga ka.
2SA 14:15 Anigo i̱naga agali haguane kini-o wali agali bu hearu tigua i̱ mo ko holeberema layagola gi halu í̠ heria ibiru. I̱nime mandabu handalu hewaria í̠hondo hale harogola í̠na hariga taya bialu i̱ biamogo bulebere lo manda bialu ibiru.
2SA 14:16 I̱na manda birugola í̠hondo hale haruyagua agali larugome i̱ igini iya mo ko naholobada lo manda bialu ibiru. Ibugua iya mo ko hayagua nde dindi Ngode Datagaliwabehanda ina ibunaga wali agali kamaruhondo ngini o ngagoria naholeberabada lo manda bido.
2SA 14:17 Ani manda buwa í̠na í̠naga biabe biahaga bedogo bayale holiya biamogo bule lalu bi hongohe lolebere lo manda bialuore ibiru. I̱naga agali haguane kini-o í̠ Ngode Datagaliwabenaga dahuliyali ale kego í̠na mana bayale tigabi ogoore nga mana lehe ogoore nga lowa tale bialu baya hangu manda biai ho kegoni. Anduane Homogo í̠naga Ngode Datagaliwabe ibu í̠ heba mandagi haabo helo laro, lene.
2SA 14:18 Wali biagome bi layaruni hale howa kini ibugua lalu, Bayale larigo ainde i̱na í̠hondo bi mbira hale harogo tigatigaore ladai bibe, lene. Ani layagola wali biagome lalu, I̱naga agali haguane kini-o karulapego i̱hondo bi hale harene, lene.
2SA 14:19 Ani layagola Debidi ibugua hale halu lalu, Í̠na bi áyu o lareruni Yoabahanda ani lole pu laya handala lole ibiribe, lene. Ani hale hayagola wali biago ibugua ladai bialu lalu, I̱naga agali haguane kini-o i̱na heneneore gi dolalu larogo í̠na i̱hondo hale haregoni habo naleorego i̱na ogoni ndo lalu mo ke̱bi naholebero. Í̠na bi larigoni heneneore. Í̠naga ami agaliru haru haga haguane Yoabahanda anidagua lole pu laya. Ibunime bi ogodaguaore labe lalu bibahendeore endeho ngiya handala í̠hondo langule ibinigo larugoni.
2SA 14:20 Anigo í̠naga ami haru haga Yoaba ibugua bi ogoni bame ndo Abasalomonaga genda ngago mo waholenaga laya. Anigo i̱naga agali haguane-o í̠ Ngode Datagaliwabenaga dahuliyali ale mini mandala bogabiore howa í̠na dindini bialu karu ogoale bira lalu manda biaihe kegoni, lalu wali biagome lai lene.
2SA 14:21 Mani wali biago ibu tagira peaha Debidihanda Yoaba íbu lowa lalu, Í̠na manda biridagoni karulape laro. Ai Abasalomo damu pialu haru daibule pu, lene.
2SA 14:22 Ani layagola Yoabahanda kini wanakuini bulu palialu denguime dindi ela halu kininaga mini yaraga halu lalu, I̱naga agali haguane kini-o Ngode Datagaliwabehanda í̠ mo bayale helo hameledo. I̱na í̠hondo bi hale harugo e̱ laridago nde í̠naga biabe biahaga i̱ kogohondo turu ho kedalo manda bido, lene.
2SA 14:23 Ani lalu Yoaba ibu heyalu abale Gesua tano puwa Abasalomo haru halu Yarusaleme dai bini.
2SA 14:24 Ani haru dai biyagola kini ibugua lalu, Abasalomo ibu kini andaga naibilo ibuni andaga hayadagoha holene nga, lene. Ani layagola nde Abasalomo ibu kininaga dengui hondole ibu heagoha nape ibuni andaga haabo hene.
2SA 14:25 Abasalomo ibu huliya igiri baya dege lalu do mbaraleni ibuha dere motudubi mbira nawi hene. Isaraele dindiha huliya igiri baya ibu ale mende naheyagola Isaraele wali agali tigua Abasalomo hondole turu timbuni haga hene.
2SA 14:26 Ibunaga mandari lu timbuni palango toheore hene. Mali mbira poragola ibunaga mandari ogoni podaganego genda magi handalu karia kilogarama kira ale wiaga.
2SA 14:27 Abasalomo ibu wali dabu binigo ibu igini tebira wane mbira berenego wanedago ogoni mini Tama berene. Wandari ogoni agali wanela tabetabe nabi baya taraore berene.
2SA 14:28 Abasalomo ibu dai buwa mali kira Yarusalemeni daibu howa ibu kininaga dengui nahende haabo hene.
2SA 14:29 Ani howa ibugua Yoabahanda kini hondole pelonaga ibu andaga ibabe lalu lawia hayagola Yoaba ibu naibi haabo hene. Ani biyagola Abasalomo ibugua Yoaba ibabe lalu bi halu mende lawia hayagobi Yoaba ibu naibi dege hene.
2SA 14:30 Naibu dege biyagola Abasalomo ibugua keba timbuniore howa ibunaga biabe biahaga agali hearuhondo, Yoabanaga balawa wabiaga mini bali mabu mbira ibuni mabu wiagoria dege mandagi handa a̱i̱ na̱i̱ winigo ogoni delo bo heda hole pudaba, lene. Ani layagola agali biabe biahaga hearume hale halu Yoaba mabuha bali heago delo bo heda hene.
2SA 14:31 Anidagua biya layago hale halu Yoaba ibu Abasalomo andaga puwa lalu, Í̠naga biabe biahaga agali hearume i̱ mabuha bame bali hengewago dai helayadago irane aginagabe, lene.
2SA 14:32 Ani layagola Abasalomohanda ladai bialu lalu, I̱na í̠ ibabelo hondo pudaba larugola í̠ naibiriyago ai i̱naga bi ogo kini bedaria yalu pobelo hameledo. Pialu howa i̱ Gesua dindiha pu hewago haru dai birimigo agi bulenaga Yarusaleme haru dai birimibe. I̱ Gesua dindiha henedale nde bayale kolego áyu ogoni kini abale hondole pu. Ibugua handalu karia i̱ha ko mbira ngane hondo heagua nde i̱ homoliya bo wahelo laro, lene.
2SA 14:33 Ani laya handala Yoaba ibugua kini berearia abale puwa Abasalomohanda bi layaruni bibahende kinihondo lamiai hene. Ani lamiai hayagola kini ibugua agali bu hearuhondo, Abasalomo haru ibule pudaba, lene. Tigua haru ibiyagola Abasalomohanda kininaga mini yaraga halu kininaga wanakuihayagi bulu palialu dindini palipe hene. Ani biyagola kini ibugua ibu nu̱nu̱ lene.
2SA 15:1 Anigo mani howa Abasalomohanda nogo hosime gili laga garo ale karisi mbirabi nogo hosi marubi agali pira duria (50) agima karisidago mani ibilo tigua ala bamba halu hariga ibu polebiragoha pelobi mo manda manda biai hene.
2SA 15:2 Horo bibahendengi egerebagiore Abasalomo ibu heyalu puwa tano anda ibaga panga haraba timbuni wiagoria pu haga bini. Ani kagola agali mbira ibu damene baba keba howa kinime mo tiga bilo kini bedaria pole ibiyagua Abasalomohanda agali ogoni íbu lowa lalu, Í̠ dindi agoha howa eberebe, lalu hale haga bini. Ani hale haragola agali ibiragome ibu ladai bialu lalu, I̱ Isaraele dindiha howa Isaraeleali hameigini ogo aria ko, lalu lamigi biaga.
2SA 15:3 Lamiragola Abasalomo ibugua agali ibiragohondo hale haga bialu lalu, Genda agile wiyagola ibiribe, laga bialu howa lalu, Ai hale habe. Í̠naga bi laregoni heneneoredago kini ibugua agali í̠naga bi ogoni hale howa tale bilo mbirali dabo hela nabira, laga bialu hene.
2SA 15:4 Ani laga bialu howa Abasalomo ibugua agali ibiragohondo laabo halu lalu, I̱nimeore bi ogoniale hale howa tigabi dabolene ngadagua dabaga bialu holene hamelo ko. I̱ ani haruyagua nde agali genda ogoni ale yalu ibiragola abale baya hanguore mo tiga bulebero, laga bialu hene.
2SA 15:5 Agali mbiralime ibunaga mini yaraga halu ibuha ge duli hanga hole ibiyagua Abasalomo ibugua agali ogoni gini mialu abale mo heya howa nu̱nu̱ laga bini.
2SA 15:6 Isaraeleali bibahende kini hearia tinaga godi hale helo ibiyaruni tihondo anidagua dege biai halu hene. Abasalomo ibugua mana ogonibi bialu hayagome Isaraeleali dewaore hearunaga bu mini bamiai hayagola tigua Abasalomo gubalini timbuni ho hene.
2SA 15:7 Mali maria peagola Abasalomohanda kini berearia puwa Kini Debidihondo lalu, I̱na bamba Anduane Homogohondo bi mbira buleore lalu lo wirugo bua kogo i̱ Heberono poabe.
2SA 15:8 Í̠naga biabe biahaga kogo i̱na bamba Siria dindiha Gesua tano wiagoria hewangi howa Anduane Homogohondo bi mbira ogodagua lowialu laru. Anduane Homogohanda i̱ Yarusaleme haru dai biyagua nde i̱na Heberono puwa Anduane Homogo mitangi bialu ibunaga mini yaraga halu lotu lolebero lalu lo wirugonaga poa ko, lene.
2SA 15:9 Ani layagola kini ibugua Abasalomohondo lalu, Karulapego mo palia holene í̠ heba kago pamia, lene. Ani laya handala Abasalomo ibu Yarusaleme wahalu Heberono pole pene.
2SA 15:10 Anigo ibu pole howa ibugua agali maruhondo lalu, Tí Isaraele hameigini palearu bibahendeha ndilalu bi lama purogo lalu bi ogodagua lalimu, Tígua biguli pu laruane hale harimiyagua hongo howa ga̱ ladaga haga haga bialu lalu, Abasalomo ibu Heberono tanoha howa kini ka, lalu hoaro ladaga halimu lalu lamiai hole pudaba, lene.
2SA 15:11 Ani pudaba lalu Abasalomo ibu Heberono tano pialu howa agali handari kira (200) Yarusaleme yu wahalu ibu heba ma laga buwa haru halu pene. Anigo agali ibu heba pole ma laga biyadaruni ti irane aginaga ma larabe manda nabi Abasalomo ibunaga mini wiagobi manda nabi howa bame pupe halu pene.
2SA 15:12 Ti Heberono anda pu howa Abasalomohanda Anduane Homogohondo nogo mbirale loma binigo bo delalu howa ibugua Kini Debidinaga mini mandaru talebu miaga agali mbira mini Ahidobele ibu Gilo tanoha haga henego ibilo agali marume damu pudaba lene. Ani layagola tigua agali biago Gilo tano yu wahalu Abasalomo hearia haru ibini. Agali mbira mbira ibugu bialu dewaore íbu tago hayagola Abasalomo heba agali dewa halu hongoheore tagira íbu hene.
2SA 15:13 Agali mbirame Debidi hearia gerai ibuwa ibuhondo lalu, Isaraeleali bibahende Abasalomohayagi anda íbu hai haya, lene.
2SA 15:14 Bi ogoni layagola hale howa Debidihanda agali haguane Yarusalemeha hearu olo mogo buwa lalu, Abasalomohanda ibalu ina bibahende bai holigo Yarusaleme yu wahalu áyu ogoni ibida ma. Abale napirimayagua Abasalomo halu ibunaga agali haru haruarume ibalu ina wali agali bibahende tano ogoha kamaruni bo wahai holebirago ina áyu ogoniore abale ma, lene.
2SA 15:15 Ani layagola Debidinaga agali haguane biarume ibunihondo lalu, Inanaga Kini Timbuni-o í̠naga biabe biahaga kamaru iname mbira bidabalo hameledego bibahende biai hole kama, lene.
2SA 15:16 Ani laya handala kinibi ibunaga agali haguane biarubi ibu one waneiginirubi ti Yarusaleme yu wahalu piai hene. Ani pialu howa kini ibu one wabuni halu mende berearu aria piralime ti dege kini andaga handaya howa mamage berelo berelalu pene.
2SA 15:17 Ani berelalu ibida pole pialu howa kini ibu dameneru ti bibahende Yarusaleme yu wahalu puwa emene kaware tano gibuniha anda mbira heagoria hondo hene.
2SA 15:18 Ani hondo howa handalu hearia kini ibugua ibunaga agali haguane biaru tidi yalu bamba hayagola ami agali kini mamage haga hearubi mani tidi yalu piyadagua pu dege bialu hearia de hendene. Ami agali uruni ti Kerede howabi Pelede howabi ami agali handari waragaria (600) abale Gede tano howa Kini Debidi heba íbu hene hearu tibi nde mandagi o piyaruni heba bamba halu pumaga halu pu dege bini.
2SA 15:19 Ani piyagola Kini Debidihanda ami agali Gede tano howa ibini biarunaga agali haguane Idai ibuhondo hale halu lalu, Tí ina haruru agibule eberemibe. Tínaga kini gahenge Abasalomo heba hole dai bidaba. Tí dindi tara kaundiaha howa ibirimigo nde lone aginaga ina haru mandagi ibagabu hami̱yabe, lene.
2SA 15:20 Tí dindi ogoha lu ndo harimidago ai i̱na tí horo lu haru ibagabu holene hame naledogoni. Ina dindi anda mbirani baya hangu birule ndo bibahendengi ibaga dege bialu haabo holeberemago. Í̠naga amiru í̠ dameneru haru halu tíni andaga dai birimiyagua karulapedalo manda bido. Ani dai bialu kamigola Anduane Homogohanda tí biamogo bialu baya hangu handayaho haabo helo hameledo, lene.
2SA 15:21 Ani layago lelo howa Idaihanda Debidihondo lalu, I̱naga Kini timbuni-o í̠ kedagua Anduane Homogo haluhe kagonaga minini howa i̱na heneneore larogo í̠ baba haabo hole kogoni. Ani howa í̠ dindi mbiraha piriyaguabi mbiralime í̠ bo wahayaguabi nde i̱bi iya haru bo wahelo laro, lene.
2SA 15:22 Ani layagola Debidihanda lalu, Karulapedago ina haru maibidaba, lene. Ani layagola Idaibi ibunaga ami agali biarubi ti one waneiginirubi bibahende maru piyadagua ti haru pole pene.
2SA 15:23 Debidibi ibu one waneiginirubi ibunaga agali haguane biarubi ti Yarusaleme tano yu wahalu pialu hemiria hondowa wali agali maru hearume dara howa dugu timbuniore bialu hene. Ani dugu bialu hea handala kinibi ibunaga wali agali biarubi ti iba mbira mini Kidirono peago domalu ederayagi dindi ko wali agali nahaga wiagoha be abalu titaule wiagoria pialu hene.
2SA 15:24 Ani pialu howa Debidi ibugua wali agali piyaru deme hondo hearia loma binigo mo miaga agali Sadogobi Abiadabi Libaiali bibahendebi piyaria hendene. Libaiali uruni tigua Habo Nalolene Bi lowini biagonaga Mbogoyi biago mo yalu ibuwa naina dindini mo ngelene. Ani ngelowa Abaiada ibugua loma o biagoria howa bo delalu heaore dege wali agali bibahende tano wahalu tagira ibai hene.
2SA 15:25 Ani tagira ibai heagola kini ibugua Sadogohondo lamialu lalu, Habo Nalolenenaga Mbogoyi ogoni tanoha ngelole lone yu dai bidaba. Anduane Homogohanda i̱hondo turuho heneyagua nde mani i̱ni lone tanoha haru dai bialu ibunaga Habo Nalolene Bi lo winigonaga Mbogoyi ogoni tanoha ibunaga Balai Anda biagoha wiraligo ngaria de hondoliya haru dai bulebirago yu dai bidaba.
2SA 15:26 Anigoyu Anduane Homogohanda i̱hondo turu nahe heagua nde i̱hondo ibunime bule hame layadago ale biai helo, lene.
2SA 15:27 Debidihanda Sadogohondo laabo halu lalu, I̱na í̠hondo bi larugoni miniha wá layabe be wá nale dege kebe. I̱na bi ogodagua larogo í̠nibi í̠ igini Ahimasabi Abaiada igini Yonadanabi tí bibahende Anduane Homogonaga mo palia holene heba tanoha dai bilimu.
2SA 15:28 I̱na dindi ko yobi wali agali nahaga ogo yu wahalu puwa amu iba domade haga biagoria holebero. Tígua Yarusaleme tanoha ogoale mbira bira lalu bi lo yalu dai beramigola hale hole iba doma edeyagi hondo hole porogo, lene.
2SA 15:29 Ani laya handala Sadogo Abaiadalame Habo Nalolene Bi lo winigonaga Mbogoyi biago yu dai bialu tini Yarusalemeni hene.
2SA 15:30 Kini Debidi ibunaga bu miniha genda timbuni howa ibunaga ge su nabi ibunaga haguane dambi ho yalu pialu dugu bima Hari Olibe heago iraga halu hariga peadagua pialu Yodana iba peagoha ubadali halu pene. Wali agali ibu heba piyarume ibugua biyadagua dege tinaga haguane dambi ho yalu dugu bima pialu hene.
2SA 15:31 Ti ani bima pialu howa Debidi ibugua hale halu hearia agali mbira mini Ahidobele henego ibu Abasalomo halu ibunaga agali haru hayadaru biamogo bule piya layane hale hene. Ani piya layago hale howa Debidihanda Anduane Homogohondo bi ogodagua lene. Anduane Homogo-o Ahidobelehanda bi larago damene bibahende la ko hai helo í̠na ibunaga bi lolebirago mo nagalone hai helabe, lene.
2SA 15:32 Ani lalu puwa hari nene wiagoha iraga halu Anduane Homogo mitangi bialu lotu laga mbira winigoria tagira pene. Ogoriani pu heagola Debidinaga nenege agali mbira mini Husai ibu dindi mini Aga tano howa Debidi hearia lola hole ibini. Ibu Debidi dara timbuni ho ko lowa walia halu ibunaga aga biaru minu lerelalu yayai dindi dugu hira bialu ibini.
2SA 15:33 Debidihanda agali biago hondowa lalu, Í̠ ina poramadagua ibulene manda biriyagua ina mo genda timbuni holebere. Iname í̠ handayaho habe nahe holeberema.
2SA 15:34 Anigo í̠na i̱ biamogo bule hamelo keyagua Yarusaleme tanoha dai buwa Abasalomo biamogo bialu howa bi ogodagua labe. Kini-o abale howa i̱na í̠ aba mini manda bayale ngaru talebu mialu ibu biamogo biaga harugonigo ai áyu i̱ í̠naga biabe biahaga mbira holebero, labe. Í̠na ogonidagua biriyagua Ahidobelehanda mini ko ngaru talebu migi bialu karia í̠na mo habo laga bulebere.
2SA 15:35 Agali kirali loma binigo mo miaga Sadogola Abaiadalabi nde Yarusaleme tanoha holebirago í̠na kini andagaha howa bi hale hareruni ogoale laya lalu agali kirali ogonilabohondo lamigi bibe.
2SA 15:36 Igiri kirali Sadogo igini Ahimasabi Abaiada igini Yonadanabi libu aba heba mandagi holebirago í̠na bi hale harego damene bibahende libuhondo lameregola libugua i̱ni koria abaleore langule ibilo, lene.
2SA 15:37 Debidihanda bi layago hale halu ibunaga nenege Husai ibu lone Yarusaleme dai bialu pialu hearia Abasalomobi nde Yarusaleme tanoha anda ibini.
2SA 16:1 Debidi ibu Husaila bi lalu henego lai halu ibu hari nene wiago yu wahalu emene daliape halu ulini mbira wiagoria pialu hene. Ani pialu hearia Mebibosedenaga biabe biaga agali mbira Siba henego ibu Debidi lola hole ibini. Sibahanda beredi handari kirabi (200) gerebi lini do gembe bini kabu bigi buwa kabuni dege handari mbirabi (100) poge lini anidagua dege do gembebu winigo kabu buwa kabuni handari mbirabi (100) nogo meme dongoneme be wabini mbiraha waini iba hambu to̱lo berelo ya bialu nogo dongi kiranaga erekunini mo paga howa Debidinaga ya halu ibini.
2SA 16:2 Ani ya halu ibiyagola Debidihanda ibuhondo hale halu lalu, Mbirale uruni i̱ hewaria aginaga yalu ibiribe, layagola Sibahanda bi ladai bialu lalu, Nogo dongi kira ogonilabo í̠ one waneiginiru biralu pelonaga haru ibiru. Tomobi ira linibi yidoruni í̠naga agaliru ti nelonaga yidogoni. Waini iba hambu berelo yidogobi í̠naga agaliru ti dindi ko wali agali nahaga ngagoria pialu kamigola ti kembobe lebola halu tingini ngoe̱ laragola nelo hambu berelo yido, lene.
2SA 16:3 Ani layagola kini ibugua lalu, Bayaleore biridago ai í̠naga agali haguane Solo aguane Mebibosede ibu agua kabe manda bule hame ledogo áyu ibu agoha kabe, lene. Ani layagola Siba ibugua kinihondo ladai bialu lalu, Ibu Yarusaleme tanoni ka. Abale ibu aguane Solo kini hayadagua Isaraele wali agalirume ibu tinaga kini helaragola ibugua Isaraele wali agali haru hole manda buwa ka, lene.
2SA 16:4 Sibahanda anidagua layagola hale howa kini ibugua lalu, Henenebe. Anidagua biyadagonaga i̱na Mebibosedenaga mbirale wiyadaruni bibahende í̠ mo ngerogoni, lene. Ani layagola Sibahanda Kini Debidihondo lalu, I̱naga Kini timbuni-o i̱ agali nagaloneore kogonigo mbira í̠na i̱hondo bererume i̱na í̠hondo turu habelonaga dege biaabo holebero, lene.
2SA 16:5 Debidi ibu Sibala bi layago lai halu Debidibi ibunaga wali agali biarubi ti pialu dindi mbira Bahurimi wiagoria anda pene. Ogoriani anda pirimigola Solo aria agali mbira heneyago ibu tagira ibalu Debidi lola hole ibini. Agali ogoni ibu Gera igini Simai henego ibugua Debidihondo handabe manga howa bi ko lama tagira ibini.
2SA 16:6 Ani lalu lama ibalu howa ibugua ege to̱le̱me Debidibi ibunaga ami agali biarubi bama ibini. Debidi bole biyagola ibunaga ami agali hearumebi ibuninaga tingini mamage haga hearumebi hapai halu helowa ibugua nde hibu lowa bama íbuore bini.
2SA 16:7 Simaihanda mege bialu bi ko hongo howa laabo halu lalu, Debidi í̠ agali ko ngubiore agali homelo bama ibaga biaga koore o porego í̠ puaboore habe.
2SA 16:8 Í̠ agali koore howa í̠na Solo bo batagi halu ibunaga henge wiago karulalu í̠ni kini ho aribia harigoni. Ani bialu Solonaga agali nenege bu hearubi bamuore homelo bo wahai harigoni mana bayale biribe. Anidagua birigonaga Anduane Homogohanda í̠ pani áyu ngiragoni ndobe. Ibugua í̠ bo batagi halu í̠ igini Abasalomo ibu kini ho aribia howa Isaraele wali agali handame ho kagoni ndobe. Í̠na agali homelo bo wahariligonaga í̠ koorene ko kegoni, lalu lene.
2SA 16:9 Ani layago hale howa Seruia igini Abisai ibugua Debidihondo lalu, I̱naga Kini timbuni-o irane aginaga agali ko biango ale ogome í̠hondo bi ko ngubi uruni lalu helowa kebe. I̱na ibunaga ma pugu wahole porogo, lene.
2SA 16:10 Ani layagola kini ibugua Abisaihondobi ibu hamene Yoabahondobi bi lamialu lalu, Ogoni libunaga biabe ndogo ani lalu helo wahadaba. Anduane Homogo ibugua agali ogonihondo bi ani lolene nga layagua nde agali mendeme bi ogoni ago larebe lalu hale holene nawigo waha, lene.
2SA 16:11 Ani lowa Debidi ibugua Abisaibi ibunaga agali haguane hearu bibahendehondo lalu, Hale hadaba. I̱ni igini biagomeore i̱ni bo wahole kagonidago agali mende tara Beniyamini hameigini ogonime bame bi ko lalu kago hondowa iname mogolo handabe nahedago wahadaba, lene. Anduane Homogo ibunime i̱hondo bi ko uruni lole pu lenedago keba howa bi ko uruni ani lalu helo waha.
2SA 16:12 Anduane Homogohanda i̱naga ko ngaru bibahende manda biai ho kago ai ibugua bi ko i̱hondo áyu lalu kagoni mo beregedalu i̱hondo mana bayale bua biyagua nde anidagua bulebira, lene.
2SA 16:13 Debidi ibugua bi ogoni lai halu ibu damene biaru heba ti heyalu pole piyagoha pene. Hariga ti pialu henedagoni hari kaware hapara howa pialu hemigola Simai ibugua emene uyura bare bareni pialu howa bi ko lama Debidi piyagoha ege to̱le̱ bape haga bima pialu dindi himu wiarubi dugu pelama ti piyadagua haruru pene.
2SA 16:14 Anigo kinibi ibu agali biarubi ti pialu tini pole piyagoria anda pene. Ti piyago pu dege bialu erekui biyagola dindi ogoriani ha̱lo berene.
2SA 16:15 Abasalomobi Isaraeleali maru biarubi ti Yarusaleme anda ibalu Ahidobelebi ti haru ibini.
2SA 16:16 Ani buwa maha Debidi ibunaga nenege Husai Abasalomo lola hole piyago anda ibuwa ibugua Abasalomohondo bi ladaga halu lalu, Kini-o í̠ore lu haho wialu hodagua habelo, lene.
2SA 16:17 Abasalomo ibugua Husaihanda bi layago hale howa ladai bialu lalu, Agali-o í̠ Debidinaga nenege heneneore mbira harigodago ibu heba pu nabi hadai biridago agua biribe. Agali í̠ nenege heneneore henegonaga mana ogonidagua biaga ngabe, lene.
2SA 16:18 Ani layagola Husai ibugua Abasalomohondo lalu, Ani ndogo Anduane Homogohandabi Isaraele wali agalimebi wali agali áyu o mo ngoaiho karubi bibahendeme tinaga kini gahenge mbira dabayagua nde i̱ kini ogoni ibula halu ibunaga andaneha holene nga.
2SA 16:19 I̱ í̠naga biabe biahaga naharuyagua nde agali mende ai kagonaga biabe biahaga hole haleho poliyadabe. Abale í̠ abanaga biabe biahaga harugo áyu ibu igini í̠ninaga biabe biahaga hole kogoni ndobe, lene.
2SA 16:20 Ani layagola Abasalomohanda beregedalu Ahidobelehondo lalu, Áyu ogoale bulene nga lalu i̱na buliyago langi, lene.
2SA 16:21 Ani hale hayagola Ahidobele ibugua ladai bialu lalu, Í̠ abahanda ibu one wabuni halu mende kini andaga handayaho berelonaga berelo wahalu piyadaruni í̠ni haru paliai hole pu. Í̠na ogonidagua biriyagua Isaraele wali agali bibahendeme í̠ aba í̠nila libu mo waitigi haridane handai holebira. Ani handai howa wali agali áyu í̠hayagi bu karuni tiguabi í̠ hangu talima ibule hongo ho holebira, lene.
2SA 16:22 Ahidobele ibugua bi ogoni lai hayagola agali marume kini anda heagonaga dangini wiagoria balai anda mbira bia hene. Anda bia heagola wali agali bibahende bu hearunaga deni howa ti de hendeaore Abasalomo ibu balai anda daliga bia hayagoha anda pene. Anda pu bereagola tigua ibu aba one wabuni halu mende kini andaga handayaho berelo berelene biaru Abasalomo berearia mbira haru ibugu biyagola Abasalomo ibu haru paligi bini.
2SA 16:23 Horo ogoningi agali maru hearume Ahidobele ibugua bi layaruni Ngode Datagaliwabehanda la lene bi henene layabe toba howa ibugua bidaba layaru bibahende talialu biaiore hene. Abale Debidi ibu Ahidobelenaga bi larago bibahende talialu biai hagadagua áyu Abasalomo ibuguabi nde Ahidobelenaga bi laradagua talialu biai holene nga manda bini.
2SA 17:1 Mani howa Ahidobele ibugua Abasalomo lamialu lalu, I̱na agali daosini homberia (12,000) haru halu áyu mbiraga Debidi piyadadagua haruru talima poliya pu la.
2SA 17:2 Áyu Debidibi ibunaga agalirubi ti hariga dege pialu henego mini burugu lalu ngoe̱ lalu mbirani paluebira. Padaria puwa i̱na wai berogola ti mogolalu ibunaga ami padaru bibahende ibida piai holebirago. Ani biragola i̱na kini ibuni hangu minalu bo waholiya.
2SA 17:3 Bo wahalu wali agali maru karu bibahende wandari mbirago áyu dege agali penego ibu agalinila manga halu ibida pu puwa nde lone ibu agalini karia dai biagadagua i̱na ibunaga wali agali uruni í̠ni keria haru dai buliya. Wali agali bibahende í̠ni keria dai bilo agali mbiraore hangu bolene hame ledegoni ndobe. Aniyagua wali agali maru í̠ni keria dai biai helo Debidi dege homelo bo waharegola maru ti bayale karulape hai holebira, lene.
2SA 17:4 Abasalomo halu Isaraelenaga agali haguane hearume mandabu handalu hearia bi ogoni bayale tigabioreyane manda bini.
2SA 17:5 Ani manda buwa Abasalomo ibugua lalu, Aga tanoali Husai ibugua nde agua larabe hale hami̱ya ibu ibilo oladaba, lene. Ani layagola tigua Husai olowa íbu lene.
2SA 17:6 Husai anda íbu bereagola Ahidobelehanda bi layaruni bibahende Abasalomo ibugua Husaihondo lamiai hene. Abasalomo ibugua bi uruni lai howa Husaihondo hale halu lalu, Iname ogonidagua bulene karulapedabe be nakarulapedabe. Í̠na mandabu handalu keria nakarulapeyagua nde iname bimi̱yago í̠na manda biridago ogo bulene nga lalu latagi ha, lene.
2SA 17:7 Husai ibugua Abasalomohondo ladai bialu lalu, Áyu ogoningi Ahidobelehanda ogobi bibeheda lalu mo walia hayadagoni tigabi ndodane hendedo.
2SA 17:8 Í̠ aba Debidi ibunaga ami agalirubi ti pari wayali agali wai biaga hongohe hayago í̠ni manda bide. Áyu ogoni ibu keba timbuni howa biango dudu ale timbuni mini beame ibu igini agalime page minu yalu piai kagola keba howa tandaga timbuni ho hagadagua ka. Í̠ aba ibu wai biaga mana manda timbunibi kago ibu mbiraga wali agali heba mandagi napaliaga ka.
2SA 17:9 Áyu ibu egeanda ngaruhabi dindi tara ngarunaga lene mbirahayagibi puwa ha do ka. Áyu iname puwa wai bule pialu kamaria inanaga ami agali karu aria maru ibugua bayagua wali agali bu karume hale howa lalu, Abasalomo aria biaru mo ko howa baya lolebiarua.
2SA 17:10 Ani biyagua í̠naga ami agali maru karume bi ogoni hale howa nde tigua gi timbuni holobada. Tigua hongo taraore howa wai bule laiono hagadagua hagayaguabi áyu gi holebira. Isaraele wali agali bibahendeme í̠ aba ibu ami agali wai biaga haguane halu ibunaga ami biaruni ti wai biaga pari wayali hayagoni manda biai ka.
2SA 17:11 Áyu i̱na ogodagua bulene hameledo. Í̠na Isaraele dindi Dana howa olama pialu Beaseba anda pialu dindi uruni bibahendeha agali bu karu bibahendeore olomogo buwa agali dewaore ibamu ale daga labe nahe ala helolene nga. Ani íbu mogobu kagola bibahende tidu yalu waibu pole í̠nime bamba howa agali mo yalu Debidi baba wai bule polene nga.
2SA 17:12 Ani puwa Debidi taya bima pialu kamaria mbirani lola hayagua ibunaga wali agali karu mo ko howa bami̱ya. Anidagua beremagola iba dalu mbiraga ibiraligobi ibalu agalime hapai habe nahe pialu Debidibi ibunaga wali agali bu karubi bibahendeore bo wahai holeberemago ani bimi̱ya.
2SA 17:13 Ani beremagola ti tano mbiraha ibida anda piyagua Isaraeleali inanaga ami dewa karunime bu yalu puwa wai pabe hongohe kago pume hende howa dindi ulini ngagohayagi gialo yameremagola tano ogoni giala hole bialu mo ko hai hene wulebira. Ani beremagola tano ogoninaga ege pabe henedago aria emene gindu lenebi mbira ibira naholebiraore, lalu Husaihanda Abasalomo lamini.
2SA 17:14 Husai ibugua bi ogoni lai hayagola Abasalomo halu Isaraeleali hearu bibahendeme lalu, Bi abale Ahidobele ibugua layago bagi hene lowa bi galone áyu Husaihanda laragoni, lalu hene. Anduane Homogo ibunime Abasalomo bo wahole manda bu howa ti Husaihanda bi layago talialu bilo mo hongo hene. Ahidobele ibugua bi layago nde bayale degegoyu Anduane Homogohanda tigua bi ogoni talialu bilo hame nalene.
2SA 17:15 Emene howa Husai ibugua Abasalomo halu ibunaga agali haguane biaruhondo bi lamiyago ogodagua larima lalu loma binigo mo miaga Sadogo Abaiadala libu hearia lamule pene. Ani lamialu ibugua Ahidobele ibu bi lene biagobi nde libuhondo lamia dege bini.
2SA 17:16 Ani lamialu lalu, Bi ogoni mbiralime Debidi ibuni karia abale lama pu lalibu. Bi ogodagua lawia halibu. Kini-o áyu ogoni Iba Yodana doma de̱le̱ biaga ngagoria napalibe. Tigua ibalu í̠nibi í̠naga wali agali bibahendebi bo wahai holigo abale pobe laro, lalu lawia hene.
2SA 17:17 Yonadana Ahimasala libu Yarusaleme tano tagirahayagi iba Enerogele peagoria hondo hene. Libu loma binigo mo miaga igini howa wali agalime libu tanoha anda porago hondolino ohowa ani ha do howa hene. Libu ani heagola biabe biahaga wandari mbirame tanoha ogoale bira lalu libu ohalu ibuwa mbirale bialu karunaga te lamiragola libugua Kini Debidi karia abale lamule polene wini.
2SA 17:18 Ani biaga henegoyu horo ogoningi igiri mbirame libu handa walia howa ibugua Abasalomo lamule pene. Ogonidagua biya handala igiri kirali biagolabo abale ibida pialu Bahurimi dindi agali mbira andaga heagoha pene. Anda mbira ogoniha anda piribidagoria iba biraga uli tombo wini mbira winiyagoha Yonadana Ahimasala libu ogoniha anda puwa bira do hene.
2SA 17:19 Libu anda puwa bira do heagola agali anda anduanedago one bereneyagome labolabo yalu ibalu iba uli biago bu yi hene. Ani buwa labolabo biagoria widi lini wiaru haeala payabu ngelene. Anidagua biagola agali ibirarume libu ogoniha bira do harualo manda bibe nahe hene.
2SA 17:20 Mani howa Abasalomonaga agali maru libu talima ibiniru wali biago berearia ibuwa ibuhondo lalu, Yonadana Ahimasala agoha piyabe, lene. Ani layagola wali biago ibugua ladai bialu lalu, Libu abale iba domade halu piya, lene. Ani laya handala agali biaru tigua Yonadana Ahimasala taya bialu hemiria handa walia nahole degeyagola wahalu Yarusaleme dai bini.
2SA 17:21 Ami agali biaru ti dai biyagola Yonadana Ahimasala iba biraga uli biagoha howa tagira ibalu Debidi hearia puabo hene. Puwa libugua Debidihondo lamialu lalu, Í̠ dindi ogoria habe naheorego í̠nibi í̠naga wali agali bu karubi bibahende iba abale domade halu ederayagi piai hadaba, lene. Ani lowa libugua Ahidobelehanda Debidi mo ko halu bolene bi lalu heneyaru bibahende Debidi lamiai hene.
2SA 17:22 Debidi ibugua bi uruni hale howa ibunaga wali agali biaru haru halu Iba Yodana domade hene. Gao layagola agali mbiraorebi mbira yu wanahe bibahendeore iba domade halu mendehayagi pu hai hene.
2SA 17:23 Ahidobele ibunaga bi layago Abasalomohanda talialu bia nabi mo wahayago hondowa ibuninaga nogo dongi heagoria biralu ibuninaga tanoha dai bini. Dai bialu ibunaga mbirale wiaru bibahende mo tigabu ngelai howa ibuni eanogo dalu homene. Homayagola ibu damenerume ibunaga tingini mo yalu puwa ibu aba hora hene homali wiagoha dege hora hene.
2SA 17:24 Abasalomo halu ibunaga ami Isaraeleali biarume heyalu abale pialu Iba Yodana doma edeyagi peagola Debidi ibu ibunaga wali agali biaru heba ti pialu Mahanaimi tano abale anda pene.
2SA 17:25 Abasalomo ibugua agali Amasa ibu ami haru haga haguane henegoria Yoaba ho aribia howa ami haru helo dabo helene. Amasa ibu Isimaeleali Yade igini hene. Yade ibugua Nahasa wane Abigele berenego ogoni dabu bini. Abigele ibu hagibuni Nahasa wane mende Seruia berenego ogoni ibu igini Yoaba hene.
2SA 17:26 Abasalomo halu ibunaga Isaraele ami agali biaru ti Iba Yodana doma edeyagi piyagola howa ti Gileada anda puwa balai anda bu hene.
2SA 17:27 Debidi ibu Mahanaimi anda pu heagola Amono dindi Laba tano wiagoha haga Nahasa igini Sobi ibubi Lodeba tano wiagoha howa Amiele igini Magiribi Gileada dindi Logelimi tanoha howa ibini Basilaibi ti tebirali uruni Debidi lola hole ibini.
2SA 17:28 Tigua todobene beru belediru dindime wabini wiarubi dagia paliaga wiarubi uruni Debidi halu ibunaga agali biaru ti mule yalu ibini. Ani bialu tomo maru widiru baliru balawaru widi irani hiriniru mule yalu ibini. Ani bialu paboro tara tara ale kiranagabi mone ibanebi bulumaga andu ibabi bulumaga andu ibame wabini mini sisibi yalu ibalu nogo sibirubi haru halu Debidi mule haru ibini. Tigua Debidi halu ibunaga wali agaliru hariga dindi ko lebolahe wali agali nahaga iba dalu naibaga wiagoha lu ibiyagola ti iba noa howa kembobe lebola halu tomo garime homabeheore howa hongo erebahai halu gamaea bu nga manda bialu ani bini. Tomo uruni nowa Debidi halu ibunaga wali agali ibuni heba piyadaruni hongoheore holobada manda buwa tomo uruni yalu íbu mini.
2SA 18:1 Debidihanda ibunaga ami agali hearu daosini mbira (1,000) naina tidiyu hela handari mbira (100) ona tidiyu hela bigi bialu tinaga haru haga agali haguane dabo helaga bini.
2SA 18:2 Dabo helalu ibugua agali hearuni wabuni timbuniore halu tebira tidiyu helene. Ani helowa ibugua ami agali tidi mbirago Yoaba ibugua haru helo helalu tidi mendego Yoaba hamene Abisai ibugua haru helo helalu tidi tebonego Gedeali Idai ibugua haru helo helene. Ani helowa Debidihanda ibunaga ami biaruhondo lamialu lalu, I̱nibi nde ina haru wai bimi̱ya ma, lene.
2SA 18:3 Ani layagola tigua ibuhondo lalu, Ani ndo ina baba nape í̠ wahalu hondo habe. Ina wai bialu howa ibida piai harimayaguabi tigua ina maru bo wahayaguabi uruni mo dunubia naholebira. Uruni bame nagalone dege holebira. Anigo í̠ ina haru mandagi wai pialu kamaria í̠ bayagua nde tigua ami agali daosini pira (10,000) bene ale holebirago í̠ wahalu tano ogoha hondo habe. Ani hondo howa inaha agali tubagi hayaguabi maru ale tubagi hayaguabi nde í̠na inahondo tubagi hara alego ina mo hongo helo ibilabe, lene.
2SA 18:4 Ani layagola kini ibugua ladai bialu lalu, Karulapedago tígua laramidagua bialu i̱na wahalu hondo kogo tí karulapego pudaba, lene. Ani lalu Debidi ibu wai pabe timbuni tano bu mabu bini ege pabe heagonaga panga haraba wiagoria handa tagiho heagola ibunaga ami biaru wai bu pole tidi yalu tagira piyaru hondo hene. Ami uruni tini hayadagua pugu bialu daosini mbira (1,000) pialu handari mbira (100) pialu buwa tini henedagua pugu bini.
2SA 18:5 Ani pugu biyagola Debidihanda Yoaba Abisai Idai imaruhondo lamialu lalu, Tígua i̱ni mitangi bialu igiri daliahe Abasalomo nde dara halimu, lene. Debidihanda ibunaga ami agali haguane biaruhondo bi ogonidagua lamiyago ami agali hearu maru ti bibahende hale hene.
2SA 18:6 Ani biyagola howa Debidinaga ami biarume Isaraeleali Abasalomonaga ami biaru baba wai bule puwa Eberaimi dindini irabu timbuni wiagoha wai bialu hene.
2SA 18:7 Tigua wai biaho wialu Debidinaga ami biarume Isaraele ami hearu dewaore bai hene. Wai bia timbu halu dindi hobane ogoni bibahendeha wai biame hene. Ami agali maru irabu timbuni wiagoha pu luluya halu homai hene. Anidagua biyagola agali maru waime bene homayaru emene degego irabuha pu luluya halu dewaore homene. Horo wai biyadagoningi ami agali daosini dege pira kira (20,000) homene.
2SA 18:9 Abasalomo ibu pialu heagola ibugua Debidinaga ami agali maru biaru ibalu hearia hondowa tigua ibu babeheyagola ibunaga nogo dongini biralu gerai lalu ibida pole pene. Ani pialu hearia nogo dongi biagome ira mbira timbuni heneyago andaneha genge lalu pole pialu hearia Abasalomonaga mandari lu timbuni heago ira biagonaga magane gebaga biagoha hana hene. Ani hanaho wia handala nogo dongi biago ibu gerai lalu pu wahene.
2SA 18:10 Debidinaga ami agali mbirame Abasalomo ani hana howa iraha do wiago hondowa ibu ami haru haga haguane Yoaba lamule pene. Ani puwa ibugua Yoabahondo lalu, Áyu ogoniore Abasalomo ibu ira timbuni heagonaga magane mbiraha hana howa do wiaria handalu eberogoni, lene.
2SA 18:11 Ani layagola Yoaba ibugua ladai bialu lalu, Í̠na heneneore de handaribe. Ani hondowa agi bule ibu bo wanaharibe. Í̠na ibu homelo bo wakele nde i̱na muni kina handari mbira (100) ngialu nogo dongone mandibu bayaleore wai bialu wayali kagonaga mbira ngialu bidoleda, lene.
2SA 18:12 Ani layagola agali biagome Yoabahondo lalu, Í̠na muni siliba daosini kina pira (10,000) i̱naga ngela kelebi i̱na kini iginihondo mbirale mbira nabidoleore. Ani larogoni irane kini ibugua í̠hondobi Abisai Idaila libuhondobi bi langiyagoni ina bibahendeme hale hai harimagoni ndobe. Ibugua ogodagua laya. Tígua i̱ mitangi bialu igiri daliahe Abasalomo dara halimu, laya.
2SA 18:13 Anigo i̱na ibunaga bi ogoni mo wahalu Abasalomo bedole nde kini ibunime te bibahende hale hai hagago i̱na ogonidagua biya lene hale howa kini ibugua i̱ manani heledale. Í̠na nde ogoni hondowa i̱ biamogo nabideledalo manda bido, lene.
2SA 18:14 Ani layagola Yoabahanda lalu, I̱na í̠la bi dewa labe mangabago waha, lene. Ani lalu Yoaba ibugua yandare lu tebira mo yalu Abasalomo do wiagoria puwa homa nabi dege winiyago yandare tebira yiarume Abasalomonaga gubalinini nogoba hene.
2SA 18:15 Ani biyagola ami agali pirali Yoabanaga danda timu yandareru wai bilonaga yahaga heneyago uruni tigua ibalu Abasalomo lone ba dege bialu bo tongolo milene.
2SA 18:16 Abasalomo homeagola Yoabahanda ami agali mbira heagohondo, Debidinaga ami wai bialu hayaru wahalu ibai helo biguli pula, lene. Ani pulayagola Debidinaga ami biaru ti hale halu Isaraele ami biaru talia nabi wahalu abale íbu ngoai hene.
2SA 18:17 Tigua Abasalomonaga tingini mo yalu puwa irabuha gundu uli timbuni mbira wiagoha bape hene. Ani buwa ege to̱le̱ dewa dugualu gundu uli biagoha wua to̱lene. Ani bialu Isaraele ami biaru ti ibida purogo laya handala Debidinaga ami biaru ti tini andaga pugu pugu bini.
2SA 18:18 Abale Abasalomo ibu homa nabi howa dindi tigabi bayale mbira mini Kininaga Dindi laga winigoria ege to̱le̱ luni mbira ibuninaga mini mo wule dindi ogoriani mo hengene. Ani hongowa lalu, Isaraele wali agalirume i̱ni mitangi biaabo holenego nde i̱ igini mbira i̱ni pani ho aribia holene nahonowi harudago, lene. Ani lowa Abasalomohanda ege to̱le̱ ogoni ibuninaga mini Abasalomo wini. Ege to̱le̱ ogoni wali agalime Abasalomonaga Ege To̱le̱ laga winigo áyu wiaabo ka.
2SA 18:19 Mani Abasalomo homeagola Sadogo igini Ahimasahanda Yoabahondo lalu, Anduane Homogohanda Kini Debidi ibunaga waitigi biarunaga hongo bo podaya lalu bi galone bayale ogoni ibuni lamule porogo, lene.
2SA 18:20 Ani layagola Yoabahanda lalu, O ndo áyu ogoni í̠na kini karia bi galone bayale lo yalu napoleberego waha. Mani mbirungi lama piriyagua karulape. Ibu igini biagoore homayagodago áyu napole laro, lene.
2SA 18:21 Ani lowa Sudanali mbira ona hearia Yoabahanda ibuhondo lalu, Áyu ogoni gerai lalu kini karia puwa mbirale bibahende í̠ni handaridaruni kinihondo lamiai hole pu, lene. Ani laya handala Sudana agali biago ibugua bulu paluwa Yoabanaga mini yaraga halu kini lamule gerai lalu pene.
2SA 18:22 Ani piyago pelowa Sadogo igini Ahimasahanda hongo howa Yoabahondo lalu, Harugo kini ibugua i̱hondo bua birago ale bilo i̱bi kini hale helo bi ogoni lamule Sudanali ogoni piyadagua poro, lene. Ani layagola Yoabahanda lalu, Igini-o aguanaga í̠na pole hame ledebe. Í̠na bi lamule poregonaga mbirale bayale í̠hondo mbira nangulebira ndobe, lene.
2SA 18:23 Ahimasahanda ladai bialu lalu, I̱ha bulubadaruni waha i̱ polebero, lene. Ani layagola Yoaba ibugua lalu, Aniyagua nde pu, lene. Pu laya handala Ahimasa ibugua gerai lalu Yodana ibahayagi yu dindi tigabi wiagoha pialu Sudanali biago naibi wiaore dege ibu ala anda pene.
2SA 18:24 Horo ogoningi Debidi ibu tanonaga ege pabe biagonaga uba andatagi biaga panga haraba wiagoria handatagiho berene. Ani bereagola agali tano mamage haga mbira heagome ege pabe biagonaga nene wiagoria iraga howa handa amu halu hearia agali mbiraore hangu gerai lalu ibiyaria hendene.
2SA 18:25 Ani ibiyaria hondowa ibugua kini olowa lalu, Agali mbira ibuni hangu gerai lalu ibira, lene. Ani layagola kini ibugua lalu. Agali mbiraoreli hangu ibiyagua ibu bi bayale galone yalu ibulebira, lene. Tano mamage haga biagome handalu hearia agali biago tanoha kaware dege ibiyane hendene.
2SA 18:26 Agali mamage haga biago ibugua lone handa amu halu hearia agali mendebi gerai lalu ibiyaria hondowa pabe panga handayaho haga heagohondo lalu, Agali mendebi ibuni hangu dege maha gerai lalu ibira, lene. Ani layago hale howa kini ibugua lalu, Agali mendebi ibugua bi galone bayale dege yalu ibulebira, lene.
2SA 18:27 Tano mamage haga biago ibugua lone lalu, Agali bamba halu ibirago Sadogo igini Ahimasahanda gerai lalu ibagadagua ibirago ogoni ibunibe be mendealibe tobaneda, lene. Ani layagola kini ibugua lalu, Ahimasa ibu agali bayaleorego ibugua bi galone bayale mbira yalu ibaruabe tobaneda, lene.
2SA 18:28 Ani lalu heaore Ahimasa ibu kaware ibuwa kinihondo bi laamu halu lalu, Ina bayale holeberema, lene. Ani lalu ibuwa dindini bulu palialu kininaga mini yaraga hene. Ibugua lalu, I̱naga agali haguane kini-o áyu ogoni Anduane Homogo í̠naga Ngode Datagaliwabehanda í̠ baba hongo howa wai bule hayaruni inanaga giha minu ya hayagonaga iname ibunaga mini yaraga hami̱ya. Ibugua ani biyagome ina wayali harima, lene.
2SA 18:29 Ani layagola kini ibugua Ahimasahondo hale halu lalu, I̱ igini Abasalomo ibuni karulape kabe be agua biyabe, lene. Ani hale hayagola Ahimasahanda ladai bialu lalu, Kini-o Yoabahanda agali í̠naga biabe biahaga amu ibirago iyame í̠ keria bi ogoni yalu pu layadangi agali dewalime bi hongo howa pu dagadaga biayuago hale harugo agua bidabe tobara, lene.
2SA 18:30 Ani layagola kini ibugua lalu, Í̠ amugoria habagi ha, layagola Ahimasa ibu habagiho hene.
2SA 18:31 Ani habagiho hayaore dege Sudanali biago ibu abaleore anda ibuwa ibugua kinihondo lalu, I̱naga agali haguane kini-o i̱na bi bayale mbira langule yalu ibirugo í̠ hale habe. Agali í̠ bo batagi hole hongo halu hayaruni ai áyu dege Anduane Homogohanda í̠ biamogo biyagola tigua í̠ lone bo batagi holene henge nawulebira, lalu lamini.
2SA 18:32 Bi ogoni lamiyagola kini ibu hale howa lalu, I̱ igini Abasalomo ibu bayale kabe be agua biyabe, lene. Sudanali biagome ladai bialu lalu, Kini-o agali í̠naga waitigi hayaruni bibahende igiri ogonihondo biyadagua tihondobi ani biai kale nde i̱na karulapedale manda bido, lene.
2SA 18:33 Bi ogoni hale howa kini ibunaga miniha genda timbuni howa pabe heagoha anda hobane mbira daligahayagi heagoha iraga halu puwa dugu bialu hene. Ibugua dugu timbuniore bialu howa lalu, I̱ igini Abasalomo-o Abasalomo-o í̠ homaridago wahalu i̱ni homedole nde karulapedale. I̱ igini Abasalomo-o i̱ igini-o, laga bialu dugu timbuniore bialu hene.
2SA 19:1 Agali marume Yoabahondo lalu, Debidi ibu igini Abasalomo dara howa dugu timbuni bialu ka, lalu lamini.
2SA 19:2 Ani lamiyago hale howa Debidinaga ami agali bu hearu bibahendeme tigua wai bialu wayali harimago bayale ndo birimadalo manda buwa tini turu nahe miniha genda haiho hene.
2SA 19:3 Ani howa ami agali biaru tanoha dai bialu howa tigua tinaga waitigirume ti mo ko howa baragola ibida purogo lenego andaga dai bialu taga hama dai biagadagua ti taga hama dai bini.
2SA 19:4 Odagoningi kini ibugua ibunaga de ngui bu yi howa dugu timbuni bialu, Ae i̱ igini Abasalomo-o i̱ igini-o, lalu dugu bia dege bialu hene.
2SA 19:5 Ani dugu bialu heagola Yoaba ibugua kini andaga puwa ibuhondo lalu, Bi larogo hale harene. Í̠naga ami agali biarume horo áyu dege howa í̠ timbuniore pelengidagola í̠nime ti mo taga halu kegoni. Í̠nibi í̠ one waneiginirubi í̠ one wabuni halu mende bedarubi ti bibahendeore homai kamile ndobe.
2SA 19:6 Anigo agali maru í̠ handabe manga hagaru í̠na tihondo gubalini halu í̠hondo gubaliniho hagaru handabe manga haga kegonida. Mana í̠na bialu kegonime í̠naga ami agali bu karubi ami agali haguane bu kamarubi bibahende mo nagalone harida. Abasalomo ibu nahome halu ina bibahende homai heneyagua ogonime í̠ mo turu kaledabe.
2SA 19:7 Ai hale habe. Áyu ogoni í̠nime pialu í̠naga ami agali bu karunaga mini mo palia hole pu nabere. I̱na Anduane Homogonaga minini howa heneneore larogo. Í̠na anidagua nabiriyagua áyu mbiraga í̠ yu wahalu ibida piai haragola í̠ni genda timbuniore yu holebere. Genda abale í̠ni igiri emeneni howa yu hama ibalu genda yu haridaruni goyane lowa áyu genda timbuniore yu holebere, lene.
2SA 19:8 Yoaba ibugua bi uruni lai heagola kini ibuni abale heyalu puwa tanonaga ege pabe panga haraba ubaanda tagi biaga wiagoria birule pene. Ami agali biaru ti kini tagira ibuwa tanonaga panga haraba biagoria beda layago hale halu ti ibuwa ibu heba mandagi hene. Odagoningi dege Isaraele agali biaru ti ibida pugu pugu bialu tini andaga dai bigi bigi bialu purogo lene.
2SA 19:9 Dindi bibahendeha Isaraele wali agali hearu tini degedege lai lagalaga bialu hene. Ani lalu howa marume lalu, Kini Debidihanda ina biamogo biyagome Pilidialibi inanaga waitigi maru hearubi tigua ina bolene winigo mo wahene. Áyu ibuni Abasalomo handalu ibunaga dindi andaru yu wahalu ibida piyada.
2SA 19:10 Iname Abasalomo ibunaga haguaneni weli odo wialu inanaga kini helarimago ai waime bayagola homaya. Anigo agali marume Kini Debidi lone haru dai nabibehedabe, lene.
2SA 19:11 Agali marume bi ogodagua laya lama Kini Debidi hearia lo yalu ibini. Ani layagola Debidi ibugua hale howa loma binigo mo miaga Sadogobi Abaiadabi libu haru puwa lalu, Libugua Yudali haguaneru karia i̱naga bi ogo yalu puwa ogodagua laya lalibu. I̱ oali howa hale halu hewaria Isaraele wali agali hearume ogodagua layuane hale harugo ai Yuda wali agali tígua i̱ abale dai bia labehegoyu dai bia nale hemigola Isaraele wali agali tigua ala latagi halu i̱ i̱ni andagani birule daibia lelo kamigo irane agibe.
2SA 19:12 Ina nde darama mbiraore yabuleneore harimagodago tígua lolenedagua mendeali kagome lelo kamigo agibe, lene.
2SA 19:13 Ani lowa Debidihanda loma binigo mo miaga agali kirali biago labohondo lalu, Amasahondo ogodagua lalibu. Iyaore darama mbiraore yabulene haribagonidago ina heneneore larogo. Yoaba ibu ami agali karu haru haga hayadagua í̠na ho aribia habelo heloliya laro. Henene ogonidagua nabiruyagua Ngode Datagaliwabe ibunime i̱ bo wahelo laro laya lalu lamibe, lene.
2SA 19:14 Debidinaga bi lama pudaba layagome Yudali hearunaga bu miniha kika hayagola tigua Debidihondo bi yalu dai bilo ogodagua ladai bini. Tigua lalu, Í̠nibi í̠ one waneiginirubi í̠ damenerubi bibahende Yarusaleme dai bilimu larama, lalu lawia hene.
2SA 19:15 Ani layiyago hale howa Debidi ibu damene biaru heba ti Yarusaleme dai bule pialu Iba Yodana angeni pialu hene. Yudaliru tigua Debidi halu ibu dameneru Iba Yodana domaragola lola hole lowa ti pialu Yodana iba kaware dege Giligala tanoni pu hene.
2SA 19:16 Ani pu howa Gera igini Simai ibu Beniyamini hameigini howa dindi emene Bahurimiali henego ibugua Yudaliru halu Kini Debidi lola hole abale ibini.
2SA 19:17 Ibu heba Beniyamini hameigini daosini mbira (1,000) tibi Solonaga biabe biahaga agali mbira Siba henego ibubi nde ibu igini nguira (15) henerubi ibunaga biabe biahaga agali pira kira (20) henerubi ti haru abale Kini Debidi ibu Iba Yodana heaore dege hondo pene.
2SA 19:18 Ani íbu howa tigua kini damenerubi kini one waneiginirubi bibahende ibani gi yalu haru doma ede halubi kini ibugua bidaba lalu hame layadaguabi biai halu hene. Kini ibu iba domalu ubaede hole pialu hearia agali mbira mini Simai henegome kininaga wanakuihayagi ibalu dindini bulu palu ibira hene.
2SA 19:19 Ani buwa Simaihanda kinihondo lalu, I̱naga agali haguane timbuni-o í̠ Yarusaleme wahalu tagira ibiringi i̱na í̠hondo mana bayale ndo birugonaga mo wiaho ha nabi i̱ni dara halu o birudagoni mo embeda habe. I̱ha anidagua bini lalu miniha manda bu wiaabo nahabe.
2SA 19:20 Kini-o í̠naga biabe biahaga i̱ kogo i̱na ko timbuniore birudane manda bialu wali agali hameigini i̱ aria uyurayagi padarunaga agali mbiraoreali i̱na ala bamba halu i̱naga kini í̠ ala lola hole ibirudagoni, lene.
2SA 19:21 Ani layagola Seruia igini Abisaihanda ladaga halu lalu, Anduane Homogo ibunime kini helo mbirali dabalu helene biagohondo bi ko lagayago agali ogoni ibuni homelo bolene ngago ai Simai ibugua ani biyagonaga ibuni homelo, lene.
2SA 19:22 Ani layagola Debidi ibugua Abisaibi ibu hamene Yoabahondobi lamialu lalu, Seruia igini-o mbirale uruni libunaga biabe ndogo libugua irane aginaga i̱la mo waitigi harabibe. Áyu i̱ hangu Isaraele wali agalinaga kini kogonigo agali ogoni ibu áyu mbiralime ela halu bolene nawi, lene.
2SA 19:23 Ani lowa ibugua Simaihondo lamialu lalu, I̱naore bi larogonigo mbiralime í̠ homabelo bo wa naholebiraore laro, lene.
2SA 19:24 Ogoningi dege Solo aguane Mebibosede ibu Kini Debidi lola hole ibini. Mebibosede ibugua Kini Debidi Yarusaleme wahalu tagira piyangi howa ibunaga gebi agabi wayawaya nabe haho wialu angaribi nami dege haho winiyago ai ibu Debidi lola hole ibini.
2SA 19:25 Mebibosede ibu Yarusaleme yu wahalu kini heagoria anda ibiyagola kini ibugua ibuhondo hale halu lalu, Mebibosede-o iya haru ibida mba nalarigo aginaga biribe, lene.
2SA 19:26 Ani layagola Mebibosedehanda ladai bialu lalu, I̱naga agali haguane kini-o í̠naga biabe biahaga kogo i̱ agali ge kohe harugoni í̠ manda bide. Horo í̠ tagira piringi i̱na i̱naga biabe biahaga agali Siba heagohondo i̱bi ti poradagua kini heba poliya i̱naga nogo dongini biralu polenaga mo manda manda bia habe larugo lelalu ibugua i̱ mo hondo halu piyiya.
2SA 19:27 Ani pialu ibu í̠ hearia ibuwa ke̱ halu i̱naga mini mo ko howa bi dewa langiyiya. Anigo i̱naga agali haguane kini-o í̠ handalu koria í̠ Anduane Homogonaga dahuliyali ale kegoni. Anigo i̱hondo mbirale mbira bule hame lededagua biai habe.
2SA 19:28 Í̠na i̱ aba waneigini dameneru ina bibahende bai holene winigo ai í̠na i̱ dara howa í̠ andagaha tomo mandagi nabiya íbu larigola nalu haruligoni. Ani biruligo manda bialu áyu í̠hondo lone mbirale mbira ngi lolene nawi manda bido, lene.
2SA 19:29 Ani layagola kini ibugua ladai bialu lalu, Solonaga dindi andaru mbirale ngelalu homene paluniru Siba libu mo talebia holene manda bidogo í̠na bi mbira lolene nawigo waha, lene.
2SA 19:30 Ani layagola Mebibosedehanda lalu, Mbirale uruni Siba ibu hai helo waha. I̱naga kiniore homa nabi bayale halu dai biridagoninaga karulape ogoni, lene.
2SA 19:31 Gileada dindiha howa agali mbira mini Basilai henego ibu Logelimi tano howa dalipe halu kini Iba Yodana domade hayagola ibu kini heba mandagi iba domade hole ibini.
2SA 19:32 Basilai ogoni ibu agali bambaore hene ibunaga mali pira halira (80) heneyago ibini. Agali ogoni ibu mbirale dewawi howa muniru dewawi halu Kini Debidi ibida puwa Mahanaimi pu heagola ibugua Debidi halu ibunaga damene piyaru ti tomo dewaore nelo mialu ti baya hangu handayaho hene.
2SA 19:33 Basilai ogoni ibiyagola hondowa kini ibugua ibuhondo lalu, I̱na í̠ baya hangu handayaho holiya Yarusaleme ina haru ma, lene.
2SA 19:34 Ani layagola Basilaihanda ladai bialu lalu, Kini-o i̱ mali lu halu homole ndodago ina haru mandagi Yarusaleme hama polene nakarulapedago wahalu waharo.
2SA 19:35 Bi larogo hale habe. I̱ hama ibinigo mali áyu pira halira (80) kogonigo ani howa ai i̱na mbirale ngaru kobi bayalebi lalu mbira minime tale bibe nahe ko. Tomo ibabi bayale ngaru nalu howabi nde dendebida magubida lalubi dababe nahe dege ko. Wali agalirume iba gana lalu karu bayale larabe be ko larabe baya hangu hale holenego hale tuluhe ko. Ainde ogonibigome i̱naga agali haguane kini-o i̱na í̠ erekuibi mo ngule agi bule mbaliyadabe.
2SA 19:36 Kini-o irane agonaga í̠na i̱hondo mana bayale urunidagua buleberebe. Ani nabibe. Iyane haru Iba Yodana domalu emeneore tigimandi hangu pialu nde ti porami handala i̱ andaga dai bulebero.
2SA 19:37 Ani buwa i̱ni andaga dai bialu emene hangu howa homalu nde i̱ninaga homali i̱ aba mamaru hora hene ngagoha mandagi hora helo dai buliya waha. I̱ igini Kimihama o kago ibu dege i̱naga agali haguane kini í̠la hole pilibulo laro. Í̠na ibu biamogo bule hame lederu bibahende biai habe, lene.
2SA 19:38 Ani layagola kini ibugua ibuhondo ladai bialu lalu, Bayale larigo Kimihama ibu i̱na haru puwa í̠na ibuhondo buliya hame lederu bibahende biai holiya. I̱na í̠nihondo buliya hame lederubi biai holebero, lene.
2SA 19:39 Uruni lai howa Debidibi wali agali biarubi bibahende Iba Yodana doma ede hai hene. Ani buwa Debidi ibu Basilai nu̱nu̱ lalu ibu mo bayale helonaga bi la halu biya handala Basilai ibu ibuni andaga dai bini.
2SA 19:40 Kini Debidi ibu Yudali bibahendebi Isaraeleali marubi ti haru Iba Yodana domalu pialu agali Kimihama mbira henegobi ti heba puwa Giligala dindi pene.
2SA 19:41 Debidi ibu Giligala dindi anda pu heagola Isaraeleali bibahende ibu hearia ibuwa tigua ibuhondo lalu, Agali haguane-o irane aginaga ina hamene Yuda tigua kini haru eberema lalu ina nde hale holoma̱ya langia nabi ohowa í̠bi í̠ one waneiginirubi í̠naga ami agalirubi haru halu abale Iba Yodana domalu ibiyabe, lalu hale hene.
2SA 19:42 Ani hale hayagola Yudali hearume ladai bialu lalu, Kini ibu ina Yudali kago manda bialu iname henemane haru ibirimago ai tí inahondo irane agome tandaga halu kamibe. Ani birimagola kini ibugua inanaga tomo yolo bialubi mbirale marubi mbira inahondo ngia nabi ka, lene.
2SA 19:43 Ani layagola Isaraeleali biarume lalu, Agali mbira kini hayagua nde ogoni ibu ina dindinaga ka. Ina Isaraele hameigini pira dindi mbiraoreha kamagola tí Yuda mbiraore hangu kamigoni. Heneneore Debidi ibu Yudalime kini kagoyu ibu ina bibahendenaga kini ka. Ina Isaraele hameigini pira howa ina wali agali dewaore bolanguahe kamago ai irane aginaga tígua ina Isaraele hameigini mo nagalone harimibe. Kini ibu dai bilonaga te ala ina Isaraeleali kamagome lene manda bulene nga, lalu hene. Ani layago lalu helowa Yudali biarume hongoore howa Isaraeleali biaru bime bo hengedalu hene.
2SA 20:1 Horo ogoninaga Isaraele dindiha agali ko mbira mini Seba hene. Ibu Beniyamini hameigini howa agali Bigiri henego igini hene. Seba ibugua pilipe ale biguli pu lalu hongo howa ga̱lalu ogodagua lalu, Debidi ogoni nahelo waha. Ina Debidi talima napole kama. Ina agali Yasi igini Debidi ibu aria ndo kama. Ina Isaraele wali agali kamaruni Debidi ogoni wahalu inane daluha dai bima, lene.
2SA 20:2 Ani layago hale halu Isaraele wali agali tigua Debidi yu wahalu Bigiri igini Seba talima pialu tini daluha dai bini. Ani piya handala Yudaliru tini Debidi andaneha howa tigua Debidi ibiyadagua talima ibalu Yodana angeha howa hariga wiadagua ibalu Yarusaleme anda ibini.
2SA 20:3 Ti Yarusaleme tano anda ibalu Debidi ibu ibuni kini andaga biagoha anda pialu ibu one pira wabuni mende berene biaru ti kini andaga mamage berelalu piyaru haru dai buwa anda mbiraha berelowa agali marume ti mamage helo helene. Ani bialu ti tomo nelo mialu mamage helo helowa kini ibuni wali uruni baba abale paliaga winidagua napale ti bame ani biralu homelo berelene. Ani bereleagola ti agalini homene wali dalo biragadagua berene.
2SA 20:4 Mani kini ibugua Amasahondo lamialu lalu, Í̠na puwa Yudali bibahende olo mogo bialu yawi lumayaguabi í̠bi ti heba i̱ koria ibule lamule pobe, lene.
2SA 20:5 Ani laya handala Amasa ibugua pialu agali olo mogo buwa horo ibabe layangi dai nabi hene.
2SA 20:6 Amasa ibu abale dai nabiyagola kini ibugua Abisaihondo lalu, Abasalomohanda ina genda timbuni mo ngiyago goyane lowa Bigiri igini Sebahanda ina genda tara timbuniore mo ngulubadago. Í̠na í̠naga ami agali bu karuni haru halu puwa minu yania halimu. Ibunaga agali haru hayadago haru halu puwa tano pabe hongohe kagoha hayagua iname ibu minabe nahe holebirago abale minule pudaba, lene.
2SA 20:7 Ani laya handala Abisai ibugua Yoabanaga ami agali hearubi ami maru kini ibu mamage haga Keredeali Peledeali hearubi ami agali maru wai hongo howa biaga hearubi bibahende Yarusaleme tano yu wahalu Seba minule taya bima pole pene.
2SA 20:8 Tigua pialu Gibeononi ege to̱le̱ timbuni wiagoria tagira pialu hemigola Amasa ibalu hearia lola hene. Yoaba ibu wai bule aga karulaga wiago karulo howa wai biaga ayu tibu nogo dongone mandibuha dahene. Ayu tibu ogoni andaneha yuwa mandibuha dahenego Yoaba ibu Amasa lola hole uba amu hayagola ayu tibu biago golowa ibira hene.
2SA 20:9 Ani biyagola Yoaba ibugua Amasahondo lalu, Hamene-o í̠ karulape kebe, lene. Ani lowa ibugua Amasa nu̱nu̱ lole biatingi howa angarini gi tigame yania hene.
2SA 20:10 Ani yania howa Yoaba ibugua ayu tibu nene gadele tubagi mbira gi lehayagi yiago Amasa ibu nahende hene. Ani heagola Yoabahanda Amasanaga tombeneni nogoba hayagola Amasanaga tini dindini haeala paya bialu ogoningiore halu mende nogoba naheaore abale tongolo mini. Tongolo miyago hondowa Yoababi ibu hamene Abisaibi libugua Bigiri igini Seba taya bima pole piyagoha pene.
2SA 20:11 Ani piyagola Yoabanaga ami agali mbiragome Amasa tingini harigani ibiraho wiagoria howa ibugua bi ladaga halu lalu, Agali Yoaba Debidilahondo turuho kamiru tí Yoaba poradagua pudaba, lene.
2SA 20:12 Anigo daramame Amasanaga tingini gobahego harigani wiaabo hene. Ani wiagola ami agali maha ibiyaru ti ogoni handalu ogoriani hondo hene. Ani hondo heago hondowa Yoabanaga ami agali biagome Amasa tingini harigani wiago gililo yalu pubagi howa tani heagoria wialu agame bu dambi ho ngelene.
2SA 20:13 Amasanaga tingini harigani howa mo bagi heagola ami agali bibahende biaru ti Yoaba piyadagua talima pialu Bigiri igini Seba taya bima pole pene.
2SA 20:14 Seba ibu nde Isaraele hameigini dindi wiaruha piai halu Abele Bedemaga tano kaware ngelowa dindi lene wiagohayagi anda pene. Ani piyagola Beri hameigini hearume ibu piyadagua ti haruru pialu tanoha anda pene.
2SA 20:15 Ti anda pu heagola Yoaba halu ibunaga ami agali hearu ti hale halu hearia Seba ibu tano ogoniha ka layane hale hene. Ani ka layago hale howa tigua tano ogoni ho hagira bialu tanonaga ege pabe heago iraga holenaga dindi dugu hanama iraga hene. Ani bialu marume ege pabe heago podo ibira helonaga dindiha tombe lalu hene.
2SA 20:16 Ani bialu heagola wali mini bayalewi mbira tano ogoniha bereneyagome ege pabe biagoria handapeho howa lalu, Uru-o hale hadaba laro. I̱na Yoabahondo bi mbira lamuleberogo ibu ogoria ibilo lamidaba, lene.
2SA 20:17 Ani layagola Yoaba ibu wali biago heagoria kaware pu heagola wali biagome lalu, Í̠ Yoababe, lene. Ani layagola Yoabahanda ladai bialu, E̱ i̱ Yoaba kogoni, layagola wali biagome Yoabahondo lalu, Agali haguane-o i̱na bi lole yidoru loleberogo baya hangu hale habe, lene. Ani layagola Yoaba ibugua lalu, Karulape. Í̠naga bi uruni i̱na hale holiya la, lene.
2SA 20:18 Ani layagola wali biagome Yoabahondo lamialu lalu, Bamba bi mbira laganego ogo lalu, Í̠ mini tumutumu ho keyagua Abele tano ngagoha pobe, laga. Ani laragola pialu karia wali agali Abele tanoha bu karume tinaga mini mo wála halu mo tiga bia haga.
2SA 20:19 Ai bi larogo hale habe. Inanaga tano ogo Isaraele dindiha tano mini lene mbira wiyagoni nga. Inanaga tano ogoha keba ha wai bia gungu biaru mbira nabiagaore tano mini lene bayale mbira o ngamagoni. Iname inanaga kini kago hangu talima piaga henego kama. Ani hene kamagoyu áyu í̠na inanaga tano bo gialo wahole bialu kegoni. Mbirale Anduane Homogo ibunaga ngago irane aginaga bo gialo waharebe, lene.
2SA 20:20 Ani layagola Yoaba ibugua ladai bialu lalu, I̱na tano ogo bo gialo bagabu waholene hame nale ko.
2SA 20:21 Anigo iname agali mbiraoreli hangu Bigiri igini Seba hangu taya berema. Ibu Eberaimi hameigini dindiha amu hari bare wiagoha howa ibini kago. Agali ogoni ibugua agali maru hearume Kini Debidi bo wahelo ndelalu hayiyago ai Seba ogoni minu ngilimulo hame ledama. Ani minu ngeremigola iname tínaga tano ngelo wahalu poleberema, lene. Ani layagola wali biagome lalu, Heneneore buleberemago larogo hale habe. Iname agali ogoni balu ibunaga haguane tano pabeha howa batagi haramagola tí hondoleberemi, lene.
2SA 20:22 Anidagua lalu wali biago tanoha puwa ibugua wali agali tanoha bu hearuhondo ibunaga mini wiago tihondo lamiai hene. Ani lamiai hayagola tigua ibunaga mini wiago talialu Seba bole pene. Balu tigua Sebanaga haguane pugu yalu ibuwa Yoaba halu ibunaga ami agaliru bu hearia batagi hene. Anidagua biya handala Yoaba ibugua pilipe biguli pu layagola ami agali biaru ti tano ogoni wahalu tini dalu dai bini. Yoaba ibu nde Kini Debidi hearia Yarusaleme dai bini.
2SA 20:23 Isaraelenaga ami agaliru handame howa haru haga haguane Yoaba ibu hene. Yahoiada igini Benaia ibugua ami agali kini ibuni mamage haga Keredeali Peledeali biaru haru haga hene.
2SA 20:24 Adonirama ibugua agali maru kini ibunime ibunaga biabe bia helo dabo helaga birago haru haga hene. Ahiludu igini Yahosabada ibugua mbirale bibahendeore Debidihanda birago damene gilibu wiai haga hene.
2SA 20:25 Ani bialu Seheba ibu kininaga beba gili bia dagala biaga hene. Sadogola Abaiadala libu loma binigo mo miaga agali hene.
2SA 20:26 Ani bialu Yairi hameigini agali mbira mini Ira henego ibubi nde Debidinaga loma binigo mo miaga helo dabo helalu bini.
2SA 21:1 Debidi ibu kini heangi gaea timbuni biyagola Isaraele wali agalibi Yuda wali agalibi ti mali tebirani tomo garilo hene. Ani biyagola irane aginaga tomo gari ogoni tagira porabe lalu Debidi ibugua Anduane Homogohondo hale hene. Hale hayagola Anduane Homogo ibugua ladai bialu lalu, Tomo gari timbuni o poragoni irane bamba Kini Solohanda Gibeono wali agali bo wahayagonaga pani áyu ibu waneigini bu karume nalu kagoni ndobe, lene.
2SA 21:2 Ani layago hale howa Debidihanda, Gibeono wali agali olalu ibidaba, lene. Gibeono wali agali uruni ti Isaraele wali agali ndo ti Amono wali agali hene. Amono wali agali maru ereba hai halu yu wahene emene uruni ti hangu hene. Bamba Isaraele wali agali tigua Amono wali agalihondo, Tí mo ko naholeore, lalu habo nalolene bi hongoheore lowini. Ani lowini wiago mo wahalu Solohanda Gibeono dindiha Isaraele wali agali Yuda wali agaliru hangu hai helo lowa ibugua Gibeono wali agali bibahende bo mburi lai hole biyagola emene mbira ti hangu yo pialu pene.
2SA 21:3 Gibeono wali agali olayagola uruni ti Kini Debidi berearia ibiyagola ibugua tihondo lamialu lalu, Ina Anduane Homogo ibunaga wali agali bu kamaru biamogo bilo tígua ibuhondo inanaga bi la halimulo áyu iname mana ko mbira tíhondo bini ngago mo tiga buleberema. Ani buleberemago ai iname mana ko birimadago mo tiga bialu agileore buluma̱ya hamelo kamibe, lene.
2SA 21:4 Ani layagola Gibeonoali biarume Debidihondo ladai bialu lalu, Í̠na muni ngolo silibaru inahondo ngia ngiriyaguabi urunime Solobi ibu damene bu karubi ti baba ina baba genda wu kamaruni mo ereba naholebira. Iname í̠hondo Isaraele wali agali bu karu aria maru homelo bo wahabi naloleberema, lene. Ani layagola Debidihanda lalu, Aniyagua nde i̱na tíhondo agile buliya hamelo kamibe, lene.
2SA 21:5 Ani hale hayagola tigua ibuhondo lalu, Bamba Solohanda ina aria lenego mbira Isaraele dindini naholoma̱ya bibahendeore bo wahai holene hamelo hene.
2SA 21:6 Ibugua ani binigo manda bialu í̠na ibu igini aguaneru aria kariali ina ngibelo hamelo kama. Ani ngeregola iname Gibea tano haru poleberema. Gibea tano haru poledagoni irane agali kini helo Anduane Homogohanda Gibeali Solo dabo helene manda bialu ani haru poleberema. Ani haru pialu tano ogoriani Anduane Homogo ibuninaga deni agali uruni homelo irani bo derela holeberema, lene. Ani layagola Debidihanda lalu, Karulapego i̱na agali kariali uruni tí nguliya, lene.
2SA 21:7 Anduane Homogonaga minini howa Debidi ibugua Solo igini Yonadanala habo nalolene bi mbira lowinigo ogoni lone mitangi bu dai bini. Ani mitangi bialu ibugua Solo aguane Yonadana igini Mebibosede ibu Gibeonoali biaru minu mia nabi wahene.
2SA 21:8 Ibugua Solo igini Amonila Mebibosede mendela libu Aia wane Lisibahanda taba henene henego minu mialu bini. Lisiba ogoni ibu Solo one wali wabuni halu mende berearu aria berene. Solo wane mini Meraba mbira berenego ibu igini duria henego minu mialu bini. Meraba ibu Meholali Basilai mbira henego igini Adarielela pu biruwa igiri duria uruni hono winigo minu mini.
2SA 21:9 Debidihanda agali karia uruni Gibeonoali biaru minu miya handala tigua agali uruni haru halu puwa hari nene wiagoria Anduane Homogonaga deni howa agali biaruni ira dibu hongowa bo derela hayagola bibahendeore homai hene. O biyadagoni mabuha bali lini boga biyagola wali agali hearume lini do wulenengi hayagola ani bini.
2SA 21:10 Ainde agali homayadaruni aria igini kiraligo ai̱ya mini Lisiba berenego ibugua aga labolabo ko haragaya wiaru mo yalu agali bo derela hene hari nene biagoha irigi halu pene. Puwa ibugua aga ko biarunime pingi pongo buwa balai anda emene mbira ege to̱le̱ wiagoria bia howa ibuni ogoniha berene. Ani bialu ibuni agali bo derela heago mamage biraabo heane ege dewa dege peagola iba dalu ibalu agali kariali bo derela hayarunaga kuni wiago damini. Lisiba ibugua agali kuni uruni ega biango nogo gabuarume nolino mbiraga horombebi mamage baya hangu haabo haga hene.
2SA 21:11 Mani howa Aia wane Lisiba ibu mamage ani beda layago hale howa
2SA 21:12 Debidi ibu Yabese tano wali agaliru Gileada dindini bu hearia puwa Solonaga kunibi Solo igini Yonadananaga kunibi mo pene. Abale ogolabo Pilidialirume Hari Giliboa wiagoha bo wahalu libunaga tingini Bedesana tano wiagoha mo yalu puwa wali agali mo ngoai haga hama wiagoria mo paga ho ngelene. Ani wiagola Yabeseali marume Bedesana tano puwa ogolabonaga kuni mo page yalu pene.
2SA 21:13 Ani bini winigo ai Debidihanda agali biabe biaga hearuhondo lalu, Libunaga kunibi mo yu pialu agali kariali Gibeonoalirume bo derela hayarunaga kunibi mo yu pu dege bilimu.
2SA 21:14 Ani bialu Beniyamini hameigini daluha Sela tano ngagoria Solo aba Kisinaga homali kagoha Solo Yonadanalanaga kunibi ogoniha hora halimu, lene. Agali biaru tigua puwa Debidihanda bilimu lalu lamiyadagua biai hene. Ani biai howa tigua Ngode Datagaliwabehondo tinaga dindi mo bayaleha lalu bi layagola Ngode Datagaliwabe ibugua tinaga bi hale halu biamogo bialu hene.
2SA 21:15 Mani Pilidiali Isaraelealila wai lone bialu howa Debidi halu ibunaga ami agaliru Pilidialiru baba wai bule tidiyu pene. Ti wai bialu ha dege binigo Debidi ibu tingini hongo ereba halu gamaea biyagola wai bibe nahe hene.
2SA 21:16 Ani biyagola Pilidiali lu timbuni mbira mini Isibibenobo henegome Debidi bole ibini. Isibibenobo ogoni ibu Pilidiali agali lu timbuni dege dege hayadaruni aria mbirago íbu hene. Ibunaga yandare yiagonaga dene boronosime wabini. Boronosi ogoninaga genda magi kilogarama tebira howa bolanguahe yu hene. Ani buwa Isibibenobo ibunaga wai biaga ayu tibu gahengeore andane ho yu hene.
2SA 21:17 Anigo Seruia igini Abisai ibugua agali ogoni ibiyago handalu Debidi mo wule ibini. Ani ibuwa Abisai ibugua Pilidiali timbuni ogonila wai bialu bo homelene. Ani biyagola Debidinaga ami agali biarume ibuwa Debidihondo hongo howa lalu, Ina wai bule poramagoha í̠ lone naibabe. Í̠ ina Isaraele wali agalinaga wá hagane hale ale kego ai í̠ bayagua inanaga hale ogoni mo hundia haradagua bulubadago naibabe, lene.
2SA 21:18 Mani Isaraeleali tigua Pilidialiru baba wai lone bini. Horo ogoningi dindi mbira mini Gobo wiagoria wai bialu hene. Ani bialu howa ogoningi Isaraele dindi mbira Husa wiagoha howa ibini agali mbira mini Sibegai henegome Pilidiali agali timbuni biaru aria mbira mini Saba heago bene.
2SA 21:19 Halu mendengi Isaraelealiru tigua Pilidialiru baba Gobo dindini wai bialu hene. Ani bialu howa Bedelehemeali Yairi igini Elehanana ibugua Pilidia ami agali mbira Gede tanoali mini Golaidi heago balu homelene. Golaidi ibunaga yandare endene timbuniore kuluba ale mbira yu henego agali ogoni bene.
2SA 21:20 Gede tanoha dege wai mendebi bialu hene. Horo ogoningi agali timbuni gibi mbira luoreni ibunaga gi hondone waragaria labolabo halu ge hondonebi waragaria degehe hene. Gi hondonebi ge hondonebi lamaga halu pira kirani mariahe (24) hene.
2SA 21:21 Agali ogoni ibugua Isaraele wali agali mege bialu heagola Debidi hamene Sama igini Yonadanahanda agali ogoni balu homelene.
2SA 21:22 Agali timbuni mariali uruni Pilidiali Gede dindiha abale bamba heneru aria hearia Debidi halu ibunaga agali uruni tigua bo wahene.
2SA 22:1 Debidi ibu Solohanda bo waholene wiyangibi ibunaga waitigi maru hearume bo waholene wiyangibi Anduane Homogohanda mo wahaga biyagonaga turu howa ibugua Anduane Homogohondo iba gana ogodagua lene.
2SA 22:2 Anduane Homogo ibuni i̱naga wai pabe hongoheore kagoni. Ibu ege to̱le̱ ale howa i̱ ho gehalu waitigirunaga giha howa i̱ mo wiaga ka.
2SA 22:3 I̱naga Ngode Datagaliwabe ibu i̱naga ha do haga. Ibu hari nene ngaligobi kagoha i̱ pialu ibuha ha do haruli. Anduane Homogo ibu i̱naga humbi howa i̱ hapai haga ka. Ibugua i̱ mo wialu handayaho holene hongo karulapeore kagoni. Ibu i̱naga wai pabebi i̱naga ha do andabi ibuni hangu ka. I̱naga waitigirume i̱ minalu bolebiragola i̱ biamogo bialu mo wiaga ibuniore kagoni.
2SA 22:4 Anduane Homogonaga mini yaraga hami̱ya. I̱na ibu olalu haruli. Ibugua hale halu i̱ biamogo bialu i̱naga waitigirunaga giha howa i̱ mo wiaga kagonaga iname ibunaga mini yaraga holene nga.
2SA 22:5 Iba solowarame yaribu timbuni tanguialu tita̱la amu nana biagadagua bialu homolene pume dariba haradagua i̱ dariba hayagoni.
2SA 22:6 Homolene dameneme i̱ mabu bupe howa pume dariba haradagua biyagoni. Homalime i̱ minule mandabu hayagoni.
2SA 22:7 I̱naga miniha genda ho howa Anduane Homogo olalu harugoni. I̱naga Ngode Datagaliwabehondo i̱ biamogo bia lalu harugoni. Ibuni andaga howa i̱naga bi hale haya. Ibuhondo i̱ biamogo bia larugo hale hayagoni.
2SA 22:8 Ngode Datagaliwabe ibugua keba timbuni howa dindi mo dumbirumbi bilaya. Dindi hari timbuni wearu mo ema bia hayagola ema bia gimbu biya.
2SA 22:9 Anduane Homogonaga ngui harigaha howa ira hagua tagira ibalu ne harigaha howa ira hungu datagitagi biyagome mbirale wiaru bibahende do mundu laya.
2SA 22:10 Ibugua hari daliga buda edene bialu daliape haya. Daliape hayagola hari beraliba mindibi ibu geha hai haya.
2SA 22:11 Ibunaga dahuliyali mbiranaga erekunini biralu yagalalu dalipe haya. Puyabu ega babagane aleheme ibu yalu abaleore daliape haya.
2SA 22:12 Aruma holeneme ibu dambi hai haya. Hari beraliba mindibigome ibuni ho ge hayagoni.
2SA 22:13 Ibuha howa wá timbuni wá hatagi halu hari daba ira hungu dalu heaore ba tagitagi biya.
2SA 22:14 Anduane Homogo ibuni hari daligaha howa bi hongo howa hari kilikulu laradagua biayua. Ngode Datagaliwabe Hongo Haiheore kagome bi layuago hale hene.
2SA 22:15 Ibugua ibunaga timu edalu ba amunana biyagome waitigi purogo laya. Hari dabame bayagola ti ibida bilibulu piai haya.
2SA 22:16 Anduane Homogohanda ibunaga waitigi hearuhondo keba hayagome puyabu hongohe ale howa ti puloyu purogo laradagua biya. Iba solowara timbuni bereago hundiai hayagola dindi andaneha gene wiyago bame ha pana ho haya.
2SA 22:17 Anduane Homogo ibu daligaha howa gi yupe halu i̱ minu yania haya. Iba solowara timbuni bereagome i̱ dambi hearia ibugua i̱ gini miya.
2SA 22:18 I̱naga waitigi hongoheore hearunaga giha hewaria ibugua ibuninaga gime i̱ mo wiya. Agali marume i̱ handabe manga ho hearu i̱na ti bo podabe nahe hewariabi ibugua i̱ mo wialu haru dai biya.
2SA 22:19 Bamba i̱ha genda ngelo hewangi tigua i̱la wai bule ibiya. Ani ibiyagoyu Anduane Homogohanda i̱ handayaho haabo hayagoni.
2SA 22:20 I̱ homolene wiagoha kaware hewaria ibugua i̱ biamogo biya. Ibugua i̱ gubaliniore ho kagome i̱ gini minigo ko.
2SA 22:21 I̱na mana bayale tigabi wiaru talialu bialu hewago hondowa Anduane Homogohanda i̱hondo bayaleore biaga. I̱na mana ko mbira nabi hewago hondowa ibugua i̱hondo mana bayale biaabo haga ka.
2SA 22:22 Anduane Homogonaga mana tigabi ngaru i̱na taluwa bialu harugoni. I̱na i̱naga Ngode Datagaliwabe erembira mialu mana ko wiaru nabi harugoni.
2SA 22:23 Ibunaga bi mana lo ngaru i̱na baya hangu talialu bialu haru. Ibugua bia layadagua i̱na mo wa nahe biaabo haruli.
2SA 22:24 I̱na ibu deni howa ko mbira nabiorego ibu manda bu ka. I̱na mana ko mbira buli lowa i̱ni ibagabu harugoha mamage haluore haruli.
2SA 22:25 Ibugua i̱na mana bayale tigabi wiaru talialu bialu hewago hondowa i̱na mana ko mbira nabi hewago hondowabi Anduane Homogohanda i̱hondo bayaleore biaga.
2SA 22:26 Anduane Homogo-o mbiralime í̠ wahalu nape talima ibalu heagua í̠nabi nde ogoni ibu yu wahalu napiaga ke. Mbiralime ko mbira nabiaga howa ibuha ko nawi heagua nde í̠nabi ogoni ibuhondo mana bayale biadai biaga kegoni.
2SA 22:27 Mbiralime mana tigabi dege biaga heagua í̠nabi nde ogoni ibuhondo mana tigabi dege biadai biaga ke. Anigo mbiralime mana ko biaabo haga heagua í̠na ibuhondo handabe manga haga kegoni.
2SA 22:28 Wali agali tini mo dindiha haga karu í̠na ti biamogo bialu haru dai biaga ke. Wali agali maru tini mo dunini howa mine haga karu í̠na ti mo dindiha haga kegoni.
2SA 22:29 Anduane Homogo i̱naga wá hagane haleore í̠ kegoni. I̱ arumaha kogola í̠na aruma holene mo wahaga kegoni.
2SA 22:30 I̱na waitigi bu karu bope halu wayali holiya í̠na i̱ hongo ngiaga ke. I̱na waitiginaga tano ngaruha ege pabe hongohe timbuni karu pogola anda poliya í̠na i̱ hongo timbuniore ngiaga kegoni.
2SA 22:31 Ngode Datagaliwabe ogoni ibunaga mana baya buruguleore biai haga ka. Ibugua bi laragobi heneneore dege laga ka. Ibunime wali agali waitigi handalu ibida porarunaga humbi kago ti bibahende ibuha ha ge hai haga ka.
2SA 22:32 Anduane Homogo ibuni hangu Ngode Datagaliwabeore kagoni. Inanaga ha do holene anda ege to̱le̱ ale hongohe Ngode Datagaliwabe ibuni hanguore ka.
2SA 22:33 Ibugua i̱naga ha do anda hongoheore kagonigo i̱ ibaga bu koria ibugua hariga bayale mo tiga biaga ka.
2SA 22:34 Ibugua i̱ nogo gabua mini dia ibagabu poralidagua pialu holiya i̱ handayaho haga ka. Hari nene ngaruha pialu koria ibugua handayaho kagome i̱ pi nalaga ko.
2SA 22:35 Ibugua i̱ wai bulene biawai haragome danda boronosime wabini hongoheore hibuhe ngago i̱na edalu babehe kogoni.
2SA 22:36 Anduane Homogo-o i̱naga waitigi hearunaga giha hewaria í̠naga humbi i̱hondo ngirigola i̱ wayali harugoni. Í̠na i̱ biamogo birigome i̱ wali agali karunaga deni agali mini leneore kogoni.
2SA 22:37 Í̠na hariga bayale mo wirigome i̱ porogoha i̱naga ge gondo lalu pi nale bayale kogoni.
2SA 22:38 I̱na waitigi hearu talima pialu minu yania hai haruli. I̱na ti talima pugu pugu bialu ti baiore hole wahalu dai nabi haruligoni.
2SA 22:39 I̱na ti bogaiore hewagola homo ibira hai haga. Ibira halu i̱naga geha wiai howa lone heyabe nahe wiaga.
2SA 22:40 I̱na waitigi baba wai buliya í̠nime hongo ngirigoni. Í̠na i̱ biamogo birigome i̱naga waitigi hearu i̱na ti bo podahana hai harugoni.
2SA 22:41 I̱ waitigi biaru i̱ handalu ibida purogo lelo í̠na mo bia hari. I̱na i̱ handabe manga haga hayaru bo wahai harugoni.
2SA 22:42 Uruni ti mbiralime pele milo agali maru taya biyagoyu ti biamogo bulene mbira handa walia naheya. Tigua ti biamogo bilo Anduane Homogo olayagoyu ibugua tinaga bi hale nahaya.
2SA 22:43 I̱na ti bo tagadabaga biwagola ti be abalu ale howa dindini wini. Ba dege bialu bo hengeda halu hariga teneni waru wiraligobi haya.
2SA 22:44 Wali agali ko hearume i̱ bo waholilono í̠na abale ibalu i̱ biamogo biri. I̱na wali agali hameigini tara tara bu hearu handayaho holiya í̠na i̱ dabo helarida. Wali agali tara tara i̱na nahendene hearu áyu i̱ andaneha íbu hai ka.
2SA 22:45 Wali agali dindi taraha íbu hene karume i̱naga wanakuiha ibalu ge duli hanga haga ka. Tigua i̱na bi larugola abale hale halu i̱ talima ibaga.
2SA 22:46 Tinaga hongo ibira howa tigua tano wai pabe hongohe hearu wahalu tini duru lagalaga bima i̱ hewaria ibaga.
2SA 22:47 Anduane Homogo ibu haluheore kagoni. Ibu i̱naga ege to̱le̱ ale hongohe kago ibunaga mini yaraga hami̱ya. Ngode Datagaliwabe hongoheore ogoni ibu i̱ pele ngiaga kagonigo ibunaga mini timbuni yaraga haabo hami̱ya.
2SA 22:48 Ibugua i̱ biamogo bialu waitigi hearu bope halu i̱ mo wayali haga ka. Wali agali hameigini dindi tara tarani hearu i̱ andaneha helai haga ka.
2SA 22:49 Ibugua i̱naga waitigiru giha hewaria i̱ biamogo bialu i̱ mo wiaga ka. Anduane Homogo-o í̠na i̱ pele ngialu i̱naga waitigiru mo dindiha helalu i̱ mo wayali helarigoni. Í̠na agali bo wahaga bu hearume i̱ bo wahole biyaria i biamogo birigoni.
2SA 22:50 Anidagua birigonaga i̱na wali agali hameigini tara tara karunaga deni howa í̠naga mini yaraga holebero. I̱na í̠naga mini yaraga halu iba gana lolebero.
2SA 22:51 Anduane Homogohanda Debidi i̱ kini dabo helayago i̱naga waitigiru bope holiya i̱ mo wayali helaga ka. Ibugua i̱niore kini dabo helene kogohondo gubaliniore haabo haga kagoni. I̱naga waneigini aguanene mani holebiraru tihondobi ibugua gubalini ho haabo holebira, lalu Kini Debidihanda iba gana ogoni lene.
2SA 23:1 Debidi ibugua bi lamaro bialu lalu, I̱ Yasi igini Debidi kogome bi ogo laro. Anduane Homogo Daligaorene Daliga kago ibugua wali agali dewa bu hearunaga deni howa i̱ mini lene helaya. Yagabanaga Ngode Datagaliwabehanda i̱ kini holiya dabo helayago kogo. I̱na Isaraeleali howa iba gana dewa laga kogoni.
2SA 23:2 Anduane Homogonaga Dinini ibugua i̱naga ne harigaha howa bi latagi haya. Ibugua bi uruni tí languliya i̱hondo langiaga ka.
2SA 23:3 Isaraele wali agalinaga Ngode Datagaliwabe ibugua i̱hondo bi laya. Ibugua inanaga ha do haga ege to̱le̱ pabe ale kagome i̱hondo ogodagua laya. Kini kagome Ngode Datagaliwabe andaneha howa ibunaga wali agali haru halu mana tigabi bialu baya hangu handayaho hayagua
2SA 23:4 egerebagi ginu haguame ni ge nahe ni baya taraore daraligobi kini ibugua biabe birago wali agalinaga deni wále bayale biragola tigua turu hai hene bulebira. Iba dalu ibalu henego bo daragola ni daba haragome dataniru ngiringara lalu bayale haraligobi ibu holebira.
2SA 23:5 Ogonidagua Ngode Datagaliwabe ibugua i̱naga waneigini aguaneneru mo hongo holebero lalu habo nalolene bi mbira hongohe i̱la lo winigo nga. Ibugua bi lo winidagoni mo habo lalubi mo iriaribi nabulebiraore. Bi lo winidagoni wiaaboore holebira. Mbirale i̱ha tubagiho koru Ngode Datagaliwabe ibugua ngilo hamelo kogoni. Ani ngiragola i̱ wayali haabo howa bolangua hene holebero.
2SA 23:6 Wali agali maru Ngode Datagaliwabe mitangi nabiaga karu uruni ti pu anihe ale kagola bo batagi haga biaga winigo nga. Pu ani ngaru wali agalime giha nayuhaga ndobe.
2SA 23:7 Wali agalime anihe ngaru mo wahole manda biyagua tigua gime ndo kanogo hongohe ngarume mo ilu mogo biaga. Mbirani ngelowa irame dai helo delolebira, lalu Debidihanda lamaro binigo ogoni.
2SA 23:8 Debidinaga ami agali hongohe mini lene heneru mini uru hene. Mbirago Tagemono hameigini Yosebe Basebede ibu ami agali hongohe mini lene tebira henego aria mbira haguane ibu hene. Horo mbirungi Yosebe Basebede ibugua yandare hangume agali handari halira (800) baba wai bialu agali uruni bibahende bo wahai halu wayali hene.
2SA 23:9 Agali Ahohi hameigini Dodo igini Eleasa ibu agali mini lene tebira henedaruni aria haguane mendego ibu hene. Horo mbirungi ibu Debidi heba Isaraelealirubi ti hemiria Pilidialirume wai bule amuna tidiyu hearia hendene. Ani hearia hondowa Isaraeleali uruni tigua wai bule tingi howa de buyu howa bi lalu henego ai Pilidialirume wai hapara haya handala Isaraeleali ti gi halu ibida piai hene.
2SA 23:10 Maru ibida piyagola Eleasa ibu hangu hongo ho howa ibugua Pilidiali dewaore bo wahai hene. Ani ba dege bialu henego ibunaga gi amburi bialu hiribula hayagola wai bialu hene ayu tibu yu hayago yupe habe nahe hayagola giha yaho hene. Horo ogoningi Anduane Homogohanda Pilidiali hearunaga hongo bopeore hene. Ani biyagola Isaraeleali biaru tigua Eleasa hearia lone dai buwa handalu hemiria Eleasahanda Pilidiali biaru balu bai hayiyane handalu tinaga biabe bulene mbira dege wiaria hendene. Tinaga biabe bulene ogoni Pilidiali bo paya biarunaga wai pole karulaga agaru dabudabu damene karulearuni ti golo yai hene.
2SA 23:11 Agali hongohe tebira uruni aria tebonego Hara dindiha howa ibinigo Age igini mini Sama hene. Horo mbirungi Pilidialiru ti ibuwa dindi mini Lehi mbira wiagoria agali mbiranaga paboro gama wiagoria tidiyu hene. Ani tidiyu íbu heago handalu Isaraeleali hearu ti ibida piai hene.
2SA 23:12 Ani piai hayagola Sama ibu gi nahe Pilidiali urunime tinaga dindi karu nalelo mabu dombeni howa wai hongoore howa bialu hene. Wai bialu ibugua Pilidiali uruni bibahendeore balu homelai hene. Anidagua biyadagonime Anduane Homogohanda Pilidiali waitigiru bope haiore howa wayaliore hene.
2SA 23:13 Debidinaga ami agaliru haru haga ami agali hongohe pira tebira (30) laga hene. Horo mbirungi Debidi ibu Adulama dindiha egeanda mbira heagoha hearia ami agali hongohe pira tebira (30) uruni aria tebiralime Debidi hondo pene. Horo ogoni mabuha tomo hengearu boga biyagola bu wulene tu hene. Ogoningi dege Pilidialirume Lebaimi dindi ulini wiagoha íbu howa balai anda bu hene.
2SA 23:14 Tigua Debidi minabe nahe wiagoha ha do heagola Pilidiali uruni tigua Bedeleheme tano bo podama anda ibalu ti karulo hene.
2SA 23:15 Ani karulo heagola Debidi ibugua Bedelehemeha iba bayale nagane winiru mitangibu dai buwa lalu, Daraore nde biaruago ainde Bedeleheme tanonaga uba andatagi biaga harabani iba hambiaga uli biagoha iba bayale biago hambu nedole nde i̱ turuho koleda, lene.
2SA 23:16 Ani layagola hale howa ami agali hongohe hearu aria tebirali biaru ti heyalu pene. Pialu ti Bedeleheme anda puwa Pilidiali iba hambiaga biagoria bu hearuni helowa Debidi ibu iba noaba layagohaore bereago hambu yalu dai bialu Debidi nelo mini. Ani miyagola ibugua iba ogoni nane wahalu Anduane Homogohondo lomabu mialu dindini odo wahene.
2SA 23:17 Ani buwa ibugua lalu, Anduane Homogo-o i̱na iba ogoni nanolebero. Ani larogoni irane agali o karu ti iba ogo hambu piyagola bo wa kaleda. Ani bo wa kagola i̱na tinaga darama porago naradagua buledago nane waharogoni, lene. Ani lalu Debidi ibugua iba ogoni nane waore hene. Ami agali tebirali uruni tigua gibi bibe nahe mbira o binidagoni.
2SA 23:18 Abisai ibu ami agali hongohe pira tebira (30) henedarunaga haru haga haguane hene. Ibu Yoaba hamene howa libu ai̱ya Seruia mbira berene. Horo mbirungi Abisai ibugua yandare hangume waitigi agali handari tebira (300) bo homelai hene.
2SA 23:19 Ani henego maniale ibu mini leneore timbuni pudaga halu ibugua agali mini lene hongohe tebirali uruninaga haru haga haguane hene. Anigo ibu agali tebirali dabene mini lene aria mbira ndo howa ti mini lene henegobi dege hene.
2SA 23:20 Kabasele tanoali Yahoiada igini Benaia mbira henego ibubi nde ami agali hongohe uruni aria dege mbirago hene. Ibugua wai biraha wai hongo howa taraore mbira biaga howa ibugua horo mbirungi Moabali ami agali hongohe kira bo palu bini. Horo mbirungi nde Benaia ibugua dege Isaraele dindiha dindi guni ibira halu dagare biaga wiangi egeandaha gundu uli mbira wiagoha anda puwa gabua mbira budi ale timbuni mini laiono hearia handa walia halu bo wahene.
2SA 23:21 Horo mbirungi nde ibugua dege Iyibiali timbuni mbira balu homelene. Iyibiali ogoni ibu yandare timbuni mbira yu heagola Benaia ibu kango hangu yu henego ogoni yalu hapara howa libu bagabaga bialu howa ogoni Benaia ibugua agali biago ibuninaga yandare yiago gingila muwa ibuni yandare ogonime nogoba hayagola homene.
2SA 23:22 Benaia ibugua nabibehe maru urunidagua bigi binigome ibubi nde agali hongohe mini lene tebirali hearu aria ale dege hene.
2SA 23:23 Ani howa ibu pudaga dege halu ai ami agali hongohe mini lene pira tebira (30) hayarunibi yu wahalu ibu bolanguahe hene. Anigo ibu agali tebirali hongoheore mini lene gibi biarubi aria ndo howa dege hene. Ani heagola Debidihanda Benaia ibugua ami agali kini mamage haga hearu haru haga helo dabo helene.
2SA 23:24 Ami agali hongohe henedaruni tinaga mini uru hene. Asahele Yoaba hamene biago halu Dodo igini Elehanana Bedeleheme tanoali biago hene.
2SA 23:25 Ani bialu Harodo dindiha howa ibini Sama Eligala halu
2SA 23:26 Pelede tanoha howa ibini Helese halu Tegoa tano howa ibini Igese igini Ira imaru hene.
2SA 23:27 Anadodo tanoali Abiesebi Husa dindiha howa ibini Mebunaibi
2SA 23:28 Aho hameigini aria mbira Salamonobi Maharai
2SA 23:29 Helebela libu Nedoba tanoha howa ibinigo libubi hene. Helebe ogoni ibu Bana igini hene. Ani bialu Beniyamini hameiginiru daluha Gibea tano wiagoha howa ibini Libai igini Idaibi
2SA 23:30 Piradono tanoali Benaiabi hari Gasa wiagoha kaware dege dindi ulini mbira wiagoha howa ibini Hidai imarubi hene.
2SA 23:31 Ani bialu Araba tanoali Abialabonobi Bahurimi dindiha howa ibini Asamabedebi
2SA 23:32 Salabono tanoali Eliababi Yasenela Yonadanala igini hearubi
2SA 23:33 Hara dindiha howa ibini Samabi Sara igini Ahiamabi hene.
2SA 23:34 Ani bialu Maga dindiha howa ibini Ahasabai igini Elibeledebi Gilo howa ibini Ahidopele igini Eliamabi
2SA 23:35 Kamelo tanoali Heserobi Araba howa ibini Parai imarubi haga bini.
2SA 23:36 Soba tanoali nde Nadana igini Igala halu Gada hameigini ariabi nde Bani hene.
2SA 23:37 Amonoali dindihayagi howa ibini mbira nde Selege mbira henegobi Berodo tanoali Yoabanaga yandare timuru yahaga Naharai mbira henegobi
2SA 23:38 Yadiri hameigini aria kirali Irala Garebela henego labobi hene.
2SA 23:39 Hidiali mbira Uraia henegobi uruni bibahende ami agali hongohe mini lene hene. Ami agali hongohe mini lene uruni bibahende dagalamaga halu pira tebirani karia (37) bibahende hene.
2SA 24:1 Anduane Homogohanda Isaraele wali agaliru baba lone keba howa ibugua Debidihanda ti genda mo milonaga mo mini wia hene. Ibugua Debidihondo lalu, Isaraele wali agalibi Yuda wali agalibi bibahende dagalai hole pu, lene.
2SA 24:2 Ani layagola Debidi ibugua agali mbira ibunaga ami haru hagane agali haguane Yoabahondo lamialu lalu, Í̠na ami agali haguane maru hayaruni lamialu tígua inanaga Isaraele wali agaliore bibahende dagalai hole pudaba. Pigane dindi gibuni uyurayagi Dana tano howa dagalama pialu dindi gibuni unurayagi Beaseba tanoni dagala iri halimu. Wali agali agira agima palirimadabe hondolego anidagua bilimu lalu, lamini.
2SA 24:3 Ani layagola Yoabahanda Debidihondo ladai bialu lalu, Kini-o ai Anduane Homogo í̠naga Ngode Datagaliwabe ibugua inanaga wali agali mo dewaore helo. Anidagua birago í̠ni keore dege handabelo hameledo. Anigo iname wali agali daga lolene ogoni inanaga biabe ndo ngagoria í̠na irane aginaga daga lolene hamelo kebe, lene.
2SA 24:4 Ani layagoyu kini ibugua Yoaba halu ami agali haguane maru biaruhondo bi hongo howa lamialu, I̱na o bule pudaba larudaguaore bilimu, lene. Ani layago hale halu ami haru haga biaru tigua kini helalu Isaraele wali agali bibahendeore hearu dagalai hole pene.
2SA 24:5 Ti Iba Yodana domalu puwa Gada hameigini dindini Aroe tano dindi tigabi yuyu bayale wiagoria puwa tano abene unurayagi balai anda bu hene. Ani bialu mani puwa Yase tano mbira Aroe tano abene uyurayagi wiagoria anda pene.
2SA 24:6 Mani tigua Yase tano yu wahalu Gileada dindihayagi pialu Hidiali dindi puabo halu Kadese anda pene. Ani pialu mani Dana pu mabu bialu nairia ni paliragohayagi Saidono anda pene.
2SA 24:7 Ani pialu mani dai buwa unurayagi Taia tano ege pabe bu yu mabu bini tano hongohe biagoha anda ibini. Ogoniha howa pialu wali agali Hibi hameigini palearuhabi Kenana hameiginiru tinaga tano wiaruhabi piai hene. Maniore Yuda dindi gibuni unurayagi dindi mbira Beaseba wiagoria anda pene.
2SA 24:8 Tigua Yuda dindi bibahendeha ibaga biai halu Yarusaleme dai bini. Ege dirani horo pira kira (20) bibahendeni biabe ogoni bini.
2SA 24:9 Ti dai buwa Yoaba ibugua bialu henedaru bibahende ogodagua birima lalu kini hale helo lamialu lalu, Isaraeleali agali ami habeheru daosini dege handari halira (800,000) halu Yudali daosini dege handari duria (500,000) hearia daga larima, lene.
2SA 24:10 Ogoni biai howa mbirale ogoni biyagonaga Debidi ibuni bu miniha genda timbuni yu howa ibugua Anduane Homogohondo bi lalu howa lalu, I̱na mini nawiale howa agali daga larudagome i̱na mana ko timbuniore bu haruda. Ani birudago ai Anduane Homogo-o i̱na ko birudago mo wahabe, lene.
2SA 24:11 Anigo horo ogoningi dege Anduane Homogohanda agali ibunaga bi mana latagi halu mbiwia haga Gadahondo lalu, Í̠na Deibidihondo bi ogodagua lole pobe. I̱ Anduane Homogo i̱naore laro. I̱na hariga tebira mo ngerogo í̠nime mbirago ogo karulape lalu dababe. Í̠nime ogo bia lalu i̱hondo langerego i̱na í̠hondo buliya langibe, lene. Anduane Homogohanda bi ogoni layago
2SA 24:13 Gada ibugua hale halu egerebagi Debidi ibu heyu bereria Anduane Homogohanda ogodagua laya lalu lamule pene. Ibugua puwa Debidihondo lamialu lalu, Anduane Homogohanda í̠na bi tebira uru mbirago bilonaga e̱ labelo hameledago. Ai mali kariani tomo gari timbuniore Isaraele dindini tagira pelo hameledebe be tínaga wai tigirume wai bima lole ibiragola ege tebirani tí ibida pialu ha do holene hameledebe be horo tebirani í̠naga dindi bibahendeha warago timbuni tagira ibilo hame ledebe. Bi uruniore baya hangu mandaore buwa mbirago ogo bilo larego Anduane Homogo ibunihondo lamule poliya langibe, lene.
2SA 24:14 Ani layagola Debidi ibugua Gadahondo lamialu lalu, Í̠na bi áyu langiriruni hale howa genda timbuniore yu bedogoni. Ani bidogo ainde Anduane Homogo ibunime ogoale bule lalu ibugua bule hameledadagua o inahondo bilo waha. Irane ibunime ina dara hai haga kagodago. Anigo agalime ina mo ko halu belo hame naledo, lene.
2SA 24:15 Ani layagola Anduane Homogohanda warago ko timbuniore horo ogoningi howa Isaraele dindi bibahendeha ibilalu maro bulebira layangiore ereba hene. Warago timbuni ogonime Isaraele dindiha wali agali daosini dege pira karia (70,000) bibahende Isaraele dindinaga abene uyurayagi Dana tano howa homama pialu abene unura Beaseba tanoni homa iri hene.
2SA 24:16 Ani bialu Anduane Homogonaga dahuliyali mbira wali agali bo wahama ibiyadagoni Yarusaleme tanoha wali agali bo wahole anda ibini. Ani ibalu hearia Anduane Homogohanda wali agali mo ko holene bu hearu hondowa uruniha hearu dara howa dahuliyali biagohondo lalu, Ai karulapego waha, lene. Ani laya handala dahuliyali biago ibu wahowa widi iraneru lini hondo ibira ibira halu aeane puyabume yu pelonaga bo taulalu tale biaga wiagoria íbu hene. Dindi ogoni Yabusu hameigini aria agali Arauna mbira henegonaga wini.
2SA 24:17 Debidi ibugua dahuliyali ogoni hondowa Anduane Homogohondo lalu, I̱na mana koore birugome ai áyu pani nolene ngagonida. Anigo wali agali darabi uruni tigua ko mbira agi biyagonaga ti pani nelo miribe. I̱nibi i̱ one waneiginiru inanehondo pani ngia nabiridago, lene.
2SA 24:18 Ani lalu hearia Anduane Homogonaga bi mana latagi haga Gada ibugua Debidi hearia puwa ibuhondo lamialu lalu, Áyu ogoni Yabusuali Araunanaga widi bo taulalu lini aeanela mo tale biaga biagoria puwa Anduane Homogonaga loma biniru bo delaga dabu mbira bia hole pobe, lalu lamini.
2SA 24:19 Ani laya handala Debidi ibu heyalu Anduane Homogohanda bibe laya lalu Gadahanda lamiyadagua bule dindi hobane mbira widi lini do ngelowa lini aeanela mo tale biaga wiagoha pole pene.
2SA 24:20 Arauna ibu nde biabe bialu haga wiagoria howa handape halu hearia kini halu ibunaga ami haru haga agali haguanerubi heba ibiyane de hendene. Ani ibiyaria handalu ibu ti lola hole abale puwa ibu ge duli hanga halu kininaga mini yaraga halu ma podope hene.
2SA 24:21 Ani buwa ibugua lalu, I̱naga agali haguane-o í̠naga biabe biahaga agali i̱ hewaria aginaga ibiribe, lene. Ani layagola Debidi ibugua ladai bialu lalu, I̱na í̠naga dindi podene mbira widi biabe biaga o ngegoni yolo bule ibiru. Wali agali warago hongoheore áyu balu karuni bibahende Anduane Homogohanda mo wahelonaga i̱na ibunaga loma biniru bo delaga dabu mbira dindi ogoria bu wulene hameledo, lene.
2SA 24:22 Ani layagola Araunahanda Debidihondo lalu, Kini-o dindi ogoni yolo bibelo hame naledogo bame í̠ habelo ngero. Mbirale mbira lomabu mule hameledego alebi bo delabe. Nogo bulumaga kagobi lomabu mule irani dai helo bo delabe. Ani bialu ira widi bo taulaga ngagobi ira nogo bulumaga dariba ha magamaga biaga ngagobi bibahende gabuwa lomabu mule ira ogonime delo delabe.
2SA 24:23 Kini-o i̱na mbirale uruni bibahende í̠hondo ngiai harogoni, lene. Ani lowa Arauna ibugua laabo halu lalu, Anduane Homogo í̠naga Ngode Datagaliwabehanda loma ogoni í̠na bo merego turu timbuni helo hameledo, lene.
2SA 24:24 Ani layagola kinihanda ibuhondo lamialu lalu, I̱na mbirale i̱nime erekui biabe bialu mini ndo ngago Anduane Homogohondo lomabu mia nabulebero. Ani buleneore hameledogodago ai í̠naga mbirale uruni i̱na yolo buleorebero, lene. Anidagua lalu Debidi ibugua Araunanaga dindibi nogo bulumagabi bibahende muni siliba kina handari duria (500) aleme yolo bini.
2SA 24:25 Ani buwa Debidi ibugua Anduane Homogonaga loma biniru bo delaga dabu mbira dindi ogoriani bia howa loma biniru irani dai helonaga bo delalu Anduane Homogola ho gimbu bulenaga bo delalu bini. Ani biyagola mani Anduane Homogohanda wali agali biarume tinaga dindi mo bayale habe lalu bi layago hale howa ibugua Isaraele wali agali tinaga dindiha warago ko timbuni íbu wiago mo wahai hene.
1KI 1:1 Kini Debidi ibu waheore hayagola ibu tingini dagare haabo halu hene. Tigua ibunaga tingini balangiyarume baya hangu mo tongo biya tiraga ibu dagare dege haabo hene.
1KI 1:2 Ani bialu heagola ibunaga agali haguane biarume Debidihondo lalu, Kini-o í̠ baya hangu handayaho berelonaga wandari mbira taya bia holene hamelo kamago. Ibu libu haru mandagi padabigola ibugua í̠naga tingini mo poboyogo bia helo, lene.
1KI 1:3 Ani lowa tigua wandari bayale mbira agoha bedabe hondole Isaraele dindi bibahendeha taya biame hene. Ani taya bima pialu hemiria dindi emene mbira Suneme winiyagoha wandari baya taya bialu hayagobi mbira ibu mini Abisaga berearia handa walia howa haru ibini.
1KI 1:4 Wandari baya Abisaga ogoni ibugua kini baya hangu handayaho bereagola kini ibugua wandari ogonila waneigini hono wulene manda nabi ibu tigatiga waneigini haru paliradagua haru paliaga hene.
1KI 1:5 Adoniya ibu Debidi Hagidila igini hene. Abasalomo ai̱yahanda Abasalomo taba hanayangi dege Hagidihanda Adoniya taba henene. Adoniya ibu huliya igiri baya mangabiore henego ibu igiri emeneni hama ibinidangi howa ibu abahanda mbirale bia ko hara lalu mbira mo tiga nabiaga hene. Ani bini howa áyu ibuniore kini hole lowa miniha hongo timbuni ho hene. Ani howa ai ibu mbiraha tagira pale lowa ibugua garo ale mini karisi wiaru mo manda manda bialu nogo hosi hearubi agali pira duria (50) ibu poledagoha ibira laga bima bamba helo dabo helalu bini.
1KI 1:7 Ani bialu ibugua ogoale bero lama wali mini Seruia igini Yoaba hearia puwa bi lamialu agali loma binigo mo miaga mbira Abaiada lamialu biyagola libugua karulapeda lowa mini mbiraore hene.
1KI 1:8 Anigo loma binigo mo miaga Sadogobi Yahoiada igini Benaiabi Ngode Datagaliwabenaga bi mana latagi haga Nadanabi Simaibi Laibi ami agali Debidi ibuni mamage haga hearubi lamiai hayagola tigua Adoniya heba mini mbiraore nahe hene.
1KI 1:9 Horo mbirungi Adoniya ibugua loma biniru bo delole lowa dindi mbira Enerogele iba peagoha Nogombi To̱le̱ laga winigoria pene. Puwa nogo sibiru bulumaga wangaberu bulumaga igini hungubalua haba tigirubi Ngode Datagaliwabehondo loma biniru bo delole pene. Ani pu howa ibugua Debidi igini hearu ibai halimu lalu Yudali kininaga ami hene hearu bibahendebi ibugua lalu, Tomo timbuni ogoni bo loma bialu dawedogo nami̱ya ibalimu, lalu lawia haga bini.
1KI 1:10 Anigo agali maru Ngode Datagaliwabenaga bi mana latagi haga Nadanabi Benaiabi ami agali kini mamage haga biarubi ibu hamene Solomonobi urunihondo dege ibalimu nalene.
1KI 1:11 Ngode Datagaliwabenaga bi mana latagi haga Nadana ibugua Solomono ai̱ya Badaseba berearia puwa lalu, Hagidi igini Adoniya ibunime kini haya layago Kini Debidi hale nahe haruago í̠ hale haribe be nahalehe bedebe.
1KI 1:12 Ai í̠nibi í̠ igini Solomonobi bo wahelo hame nale bereyagua i̱na bia larogodagua bulebere.
1KI 1:13 Áyu ogoni Kini Debidi bedaria puwa ogodagua labe. Abale i̱hondo bi heneneore lalu i̱ igini Solomono kini í̠ henegoria ho aribia holebira lalu lo wirigodago áyu Adoniya ibu agua bialu kini haruabe lalu hale habe.
1KI 1:14 Libu wene lalu bedabiria bi ogoni mo hongo hole i̱ abale anda ibagua, lalu Nadanahanda lene.
1KI 1:15 Ani laya handala Badaseba ibugua kini ibuni tamuha palearia hondo pene. Kini ibu waheore wiagola Suneme wandari Abisaga ibugua handayaho berearia pene.
1KI 1:16 Ani puwa Badaseba ibugua kini paleagoria puwa bulu paluwa Kini Debidihanda hale halu lalu, Í̠ agi hamelo kebe, lene.
1KI 1:17 Ani layagola Badasebahanda lalu, I̱naga kini-o abale í̠na Anduane Homogo í̠naga Ngode Datagaliwabenaga deni howa buleore lalu bi mbira lo wirigoni. Í̠na lalu i̱ igini Solomonoore í̠ homaregola ibugua kini howa í̠ biraga kininaga dagia ngagoria ibu mialu bira aribia helo larigo.
1KI 1:18 Ai áyu Adoniya ibu kini hayadago hale nahe bedegoni.
1KI 1:19 Áyu ibugua bulumaga dewaru sibi dewaru bulumaga hungubalua habahe dewaru loma biniru bo dawalu ka laya. Ibugua loma binigo mo miaga Abaiadabi ami agali haru haga haguane Yoababi ibugua tomo dawaruagoni dugu nami̱ya ibalimu laya handala pirimiya. Í̠ waneiginirubi bibahende piai hayiyago Solomono dege ibabe nalayiya.
1KI 1:20 I̱naga kini-o hale ha. Isaraele wali agali bibahendeore í̠ kini henegoria abogo ibuore ha aribia helarogoni lalu latagi harego hale holoma̱ya lowa hondo hama pedago.
1KI 1:21 Ai í̠na tihondo hale helo latagi nahe biralu homariyagua nde tigua i̱bi i̱ igini Solomonobi iya haru wali agali mana ko biaga mbira o kagoni lowa iya bo waholobada, lene.
1KI 1:22 Badasebahanda bi ogoni wene lalu bereaore dege Nadana ibu kini andaga ibini.
1KI 1:23 Ani ibiyagola agali kininaga biabe bia haga heagome kini berearia anda ibuwa lalu, Ngode Datagaliwabenaga bi mana latagi haga Nadana ibu í̠ hondole íbu ka, lene. Kinihanda Nadana anda ibilo karulape laya handala Nadana ibugua tamuha anda ibuwa kininaga mini yaraga halu dindini bulu palu ibira hene.
1KI 1:24 Ani buwa ibugua Kini Debidihondo lalu, I̱naga kini-o Adoniya ibu kini howa í̠naga henge ibu mialu kininaga dagia biraga ngagoria berelo karulape laribe.
1KI 1:25 Ani larogo irane áyu dege Adoniya ibu dindi mbiraha puwa bulumaga wangabe dewabi sibi dewabi bulumaga igini hungubalua habahe dewabi Ngode Datagaliwabehondo loma buwa bo dawalu ka layane hale haru. Tomo uruni nole í̠ igini bibahendebi í̠naga ami haru haga haguane Yoaba ibubi loma binigo mo miaga Abaiadabi uruni bibahende piai haya layane hale haru. Ai áyu ogoni tigua turu howa tomo nalu bi hongo howa ladagadaga bialu Adoniyahondo lalu, Adoniyaore kini kane dege luore haabo halu hodagua helo, lalu hayuane hale haru.
1KI 1:26 Anigo tomo nami̱ya ibalimu lalu i̱hondobi loma binigo mo miaga Sadogobi Benaiabi Solomonobi inahondo nalangi.
1KI 1:27 Ai kini-o ogoni aguadabe. Mana ogonidagua biyadago í̠na karulapedalo manda bidebe. Ani manda bu heneyagua nde Adoniya ibugua kini halu í̠naga henge mulebira lalu í̠naga agali haguane hearu lamia nabiriya, lene.
1KI 1:28 Ani layago hale howa Kini Debidi ibugua ibunaga biabe bia haga agali heagohondo lamialu, Badaseba lone daibilo oladaba, lene. Ani layagola Badaseba ibalu kini bereagoria kaware íbu hene.
1KI 1:29 Ani íbu heagola kini ibugua Badasebahondo lalu, Anduane Homogo Haluhe kagome i̱ genda tandaga tara tara wiarunaga hewagola ibugua i̱ haru dai biaabo haga kagoni.
1KI 1:30 I̱na í̠hondo heneneore larogo horo áyu ogoniore i̱na biaore bule lalu Anduane Homogo Isaraele wali agalirunaga Ngode Datagaliwabe kagonaga minini howa lo wirugo bulebero. I̱na abale í̠hondo lalu í̠ igini Solomono ibugua i̱naga henge mialu kini ha aribia howa kininaga dagiani birulebira larugoni ndobe, lene.
1KI 1:31 Ani layago hale howa Badasebahanda kininaga geha duli hanga ho biruwa dindini bulu palialu howa lalu, Kini-o í̠ore i̱naga agali haguane kegonigo í̠ luore haabo habelo, lene.
1KI 1:32 Kini Debidihanda ibunaga biabe bia haga agali hearuhondo lamialu lalu, Benaiabi loma binigo mo miaga Sadogobi Ngode Datagaliwabenaga bi mana latagi haga Nadanabi i̱ni bedoria ibilo lamule pudaba, lene.
1KI 1:33 Odaruni ibiyagola kini ibugua tihondo lamialu lalu, Tígua puwa i̱ igini Solomono i̱ninaga nogo dongini berelalu ami agali i̱ni mamage haga karubi ti haru mandagi unu Gihono iba duguaragoha pilimu.
1KI 1:34 Ani puwa loma binigo mo miaga Sadogola Ngode Datagaliwabenaga bi mana latagi haga Nadanala libugua Solomono ibu Isaraele wali agali bibahendenaga kini helo ira olibe lininaga weli ibunaga haguaneni odo wia halimu, lene. Tígua urunidagua biai howa pilipe ale biguli pu lalu hongo howa ladaga howa lalu, Solomono ibu kini luore haabo helo lowa huaro lalimu.
1KI 1:35 Tígua ani lama ibu ibiradagua haruru ibalu ibugua i̱ni biragane kininaga dagia ngagoria birulebira. I̱na ibu kini helo dabarugo ai ibugua i̱naga henge mialu Isaraele Yudala wali agalirunaga kini i̱ henegoria ha aribia holebira, lalu Debidihanda lene.
1KI 1:36 Benaiahanda ladai bialu lalu, Anidagua bayaleoredago Anduane Homogo í̠naga Ngode Datagaliwabe ibugua í̠na laregonidagua biaiore helo.
1KI 1:37 Ani bialu Anduane Homogo ibuni í̠nila haru howa í̠ biamogo bialu haga wiyadagua dege Solomonolabi anidagua mandagi howa biamogo bilo. Ani bialu kagola Solomono ibu Ngode Datagaliwabehanda mo hongo halu abale í̠ni mini lene timbuni harigo bolangua howa helo, lene.
1KI 1:38 Ani lalu Sadogobi Nadanabi Benaiabi kininaga mamage haga ami agali haga hearubi bibahendeme Kini Debidinaga nogo dongi heagoria Solomono berelalu Gihono iba duguaragoha haru halu pole pene.
1KI 1:39 Sadogo ibugua Anduane Homogonaga Balai Anda heagoha olibe lininaga weli hambu berelo wini wiago mo puwa yalu pene. Mo yalu Gihono iba puwa tigua Solomono ibu kini helo loma bia halu ibunaga haguaneni odo wini. Ani buwa tigua pilipe ale biguli pu layagola wali agali dewaore ibuwa lalu, Solomono ibu kini luore haabo helo, lene.
1KI 1:40 Wali agali ti Solomono haruru Yarusaleme dai bialu turu howa biguli pu lalu hongo howaore ga̱ lalu huaro lamalama piyagome dindi biri lalu ema bini.
1KI 1:41 Adoniya halu ibunaga agali biaru ti tomo dawayaru nai ho howa hale halu hearia ga̱ lalu huaro timbuni ladagadaga biayuago hale hene. Bigulirume pi̱pe̱ layuago Yoaba ibu abale hale howa lalu, Yarusalemeha bi timbuni pudagadaga biaruago agile biaruadabe, lene.
1KI 1:42 Yoabahanda bi ogonidagua lalu heaore dege loma binigo mo miaga Abaiada igini Yonadana ti heagoria ibini. Ibiyagola Adoniyahanda ibuhondo lalu, Abale íbu. Aiore í̠ agali bayaleore kegonigo í̠na bi te bayale galone ina hemaria lo yalu ibiribe tobanedago, lene.
1KI 1:43 Ani layagola Yonadanahanda ibuhondo ladai bialu lalu, Darabago i̱na bi te bayale ndo lo yalu ibiru. Inanaga agali haguane Kini Debidihanda Solomono ibu kini helo helaya.
1KI 1:44 Debidihanda loma binigo mo miaga Sadogobi Ngode Datagaliwabenaga bi mana latagi haga Nadanabi Benaiabi ami agali kini ibuni mamage haga bu hearubi ti bibahende Solomono heba pirimiya. Ti pole howa Solomono ibu Kini Debidinaga nogo dongi erekunini biralu pirimiya.
1KI 1:45 Pialu Gihono iba piyagoria anda puwa Sadogo Nadanalame olibe lininaga weli Solomononaga haguani odo wialu ibu kini helaya. Ani biai halu tigua turu howa huaro lalu ga̱ lama Yarusaleme dai birimigola wali agali Yarusalemeha hearumebi turu howa bi hongo howa ladagadaga bialu haruagoni. Áyu laruane hale haramigoni ogoni lalu ka.
1KI 1:46 Ai áyu ogoni Solomono ibu kininaga haru howa biragane dagia wiagoria beda.
1KI 1:47 Kini Debidinaga agali haguane hearume Debidi ibuni berearia ibalu turu harimiya. Tigua turu howa lalu, Ngode Datagaliwabehanda Solomono ibu mo hongo howa ibu kini bayale hongoheore helobi í̠ni mini lene timbuni harigo nira lowa ibu timbuni mini lene bolanguahe helobi hameledama, laya. Ani layagola Kini Debidi ibuninaga dagiani howa ibugua bulu palialu Ngode Datagaliwabenaga mini yaraga halu lotu lalu ibuhondo bi lalu,
1KI 1:48 Áyu Anduane Homogo Isaraele wali agalirunaga Ngode Datagaliwabe kagonaga mini yaraga hama. Ibugua i̱ni kini harugoria ha aribia helo i̱ igini mbira i̱ni hendedoore dege dabalu heledagonidago. Ibugua i̱niore hondoliya anidagua biyadagonaga Ngode Datagaliwabehondo turu timbuni hama laya, lalu Yonadanahanda Adoniya lamini.
1KI 1:49 Ani layagola agali maru Adoniya heba tomo nalu birayarume Yonadanahanda bi ogoni layago hale howa gi timbuni hene. Ani howa tigua Adoniya helalu ti bibahende mbira puyola haga bialu ibida purogo lene.
1KI 1:50 Adoniya ibunibi Solomonohondo gi timbuni howa ibu abale Anduane Homogonaga Balai Anda heagoha lomabu delaga dabu heagoria nguni mariani mbirale bulumaganaga ne gayane ale winiru hongo howa yaniaho berene.
1KI 1:51 Anidagua biagola agali marume Solomono hale helo lamialu howa lalu, Adoniya ibu í̠hondo gi howa ibu bayale holenaga Anduane Homogonaga Balai Anda biagoha puwa lomabu delaga dabu biagonaga nguni maria wiago mbirani yaniho ka. Ani yaniho howa ogodagua lalu, I̱ ogo yu wahalu pu nabi kone dege Kini Solomonohanda Anduane Homogonaga minini howa heneneore i̱ bo wanahole lara handala yupe halu pole laya, lene.
1KI 1:52 Ani layago hale howa Solomono ibugua ladai bialu lalu, Ibugua mana tigabi hangu bialu hayagua i̱na ibu bo wanaholebero. Ai ibugua mana ko biyagua ibu homelo bo waholebero, lene.
1KI 1:53 Ani lowa Solomonohanda agali maru hearu lamialu, Adoniya namu Anduane Homogonaga Balai Anda biagoha lomabu delaga dabu wiagoria yaniho holebirago haru halu ibule pudaba, lene. Ani laya handala pialu tigua Adoniya haru halu ibiyagola Adoniyahanda Kini Solomononaga deni ibu ge duli hanga hene. Ani biyagola Kini Solomonohanda ibuhondo lamialu lalu, Í̠ni andaga pamia, lene.
1KI 2:1 Debidi ibuni homolene horo kaware dege biraruyane handalu ibugua ibu igini Solomono olowa ibuhondo bi ogo lamini.
1KI 2:2 Ibugua lalu, Áyu i̱ kaware homole bedogonidago. Ainde í̠na hongo halu agaliore howa í̠ninaga biabe bulene ngagoore bialu habe.
1KI 2:3 Ani howa Anduane Homogo í̠naga Ngode Datagaliwabe ibugua bia lalu langirago biai halu habe. Ibugua hariga bayale ina poloma̱ya mo walia haragoria pialu ibunaga bi mana bayale Moseseha howa langiyaruni mbirago pugua nabi howa baya hangu talialu biai halu habe. Ani bialu hariyagua nde mana í̠na berego bibahende bayale hangu bialu haabo holebere.
1KI 2:4 Anduane Homogohanda i̱hondo buleberoore lalu bi hongohe mbira lo wialu lalu, Debidi-o í̠ waneiginiru tigua bibahendengi hongo howa i̱ talima ibalu haabo halu i̱ninaga deni tigabi ibaga bialu haabo hayagua nde i̱nime í̠ igini aguaneru aria hangume Isaraele wali agalinaga kini helo dabalu helaabo holebero lalu, Anduane Homogohanda ani layago. Ai Solomono-o Anduane Homogo ibugua layadagua í̠na bialu hariyagua nde i̱hondo bulebero langiyadagua bulebiraore, lalu lamini.
1KI 2:5 Bi marubi wia dege bidago laro. Solomono-o hale habe. Ai Seruia igini Yoaba biago ibugua mana lehe bialu Isaraeleali ami kirali bo wahayagoni í̠ manda bideni. Ibugua ami agali dege kirali Nere igini Abanela Yade igini Amasala bo wahaya. Ti wai hamani wai bialu howa ndo bame hearia bo wahayagonaga pani nolene ibuniha ngelo ka.
1KI 2:6 Ani bidago ai ibu lu haludagua helo ndo í̠nime bulene ngago bialu pani abale mibe.
1KI 2:7 Ani bialu agali mbira Gileada dindi howa Basilai igini biaruhondo dege mana bayale bialu ti tomo í̠ dameneru baba mandagi nalu hami̱ya ibidaba labe. Agali uruni tigua í̠ hamene Abasalomohanda i̱ bole biyangi ibida pu hewagola tigua i̱ baya hangu handayaho henegonaga ani bibe laro.
1KI 2:8 Agali mendebi Beniyamini hameigini Bahurimi tano howa ibini Gera igini Simaibi nde kagoni. Ibugua i̱ Mahanaimi dindi ibida pirudangi howa i̱hondo ha̱ halu bi ko lowa lai lenego. Ani binigoyu mani ibu i̱la Iba Yodana lola haribangi i̱nime ibu homelo bo wa naholebero lalu Anduane Homogonaga minini howa bi henene lo wirugodago i̱na babe nahego.
1KI 2:9 Ai í̠na agali ogoni ibu pani mbira nami yo pialu napelabe. Ibu homelo dindini lu nakaore abale babe. Ibu bolene hariga ogoda lalu tale bulene í̠ha ngago minime ibu homelo bolene ngagoria babe, lalu Debidihanda Solomonohondo paluni bi ani lamaro bini.
1KI 2:10 Mani howa Debidi homayagola tigua ibunaga tingini Yarusaleme ogoni Debidinaga tano laga wiagoha hora hene.
1KI 2:11 Kini Debidi ibu mali pira maria (40) kini howa Isaraele wali agali haru hene. Mali kariani Heberono tanoni howa haru halu mali pira tebirani tebira (33) Yarusalemeni howa haru hene.
1KI 2:12 Debidi ibuni homayagola ibu igini Solomono ibugua ibu aba henegoria kini ha aribia hene. Ani howa Solomono ibu kini hongoheore mbirale mbirame ibu bope halu mo pila habe nahe hene.
1KI 2:13 Horo mbirungi Hagidi igini Adoniya ibu Solomono ai̱ya Badaseba berearia ibini. Ani ibiyagola Badaseba ibugua hale halu lalu, Í̠ bi bayale mbira lole yalu ibiribe, lene. Ani hale hayagola Adoniya ibugua ladai bialu lalu, E̱ i̱na bi bayale dege lolenaga íbu kogoni, lene.
1KI 2:14 Ani lowa Adoniya ibugua lalu, I̱na bi emene mbira hangu hale harogo, lene. Ani layagola Badasebahanda ibuhondo lamialu lalu, Karulapego i̱hondo langerene, lene.
1KI 2:15 Ani layagola Adoniya ibugua ladai bialu lalu, Abale nde Isaraele wali agali bibahendeme i̱ tinaga kini holobada lo manda bu hai hayagoni í̠ manda bide. Ainde i̱ kini ani ha kole degego ai Anduane Homogo ibunaga hame leagome i̱ hamene Solomono ibugua kini hayagola i̱ nahe waharugoni.
1KI 2:16 Anigo áyu i̱na bi mbiraore hale hole ibirugo ai i̱na bi ogoni í̠na karulape labelo hameledo, lene. Ani layagola Badasebahanda lalu, Í̠na bi ogoni i̱ hale holiya langi, lene.
1KI 2:17 Ani layagola Adoniyahanda lalu, Suneme wali Abisaga bedago i̱ dabu buliya kini ibugua e̱ lelonaga í̠na Kini Solomono lamule pobelo hameledo. Kini ibugua í̠naga bi larego mo wa naholebiralo manda bidogo lamule puore bia, lene.
1KI 2:18 Ani layagola Badasebahanda Adoniya lamialu lalu, Karulapego i̱na ibuhondo hale hole poliya, lene.
1KI 2:19 Ani laya handala Badaseba ibugua Kini Solomono berearia puwa Abisaga Adoniya dabu bilo mia lalu hale hole pene. Piyagola kinihanda Badaseba ibiyago hondowa ibu abale heyalu ibu ai̱yanaga mini yaraga halu ge duli hanga howa bulu palene. Ani bialu heyalu puwa kini biragane dagia wiagoria pu biruwa agali biabe biaga hearuhondo lamialu dagia mbira mo yalu ibuwa ibu ai̱ya berelo kininaga gi tigahayagi mo ngeladaba layagola Badaseba ibu ogoriani berene.
1KI 2:20 Ani biruwa Badasebahanda lalu, I̱na í̠hondo bi emene bame mbira dege hale holeberogo ogoni í̠na e̱ labelo hameledo, lene. Ani layagola Solomonohanda ladai bialu lalu, Ai̱ya-o í̠na i̱hondo hale harego i̱na ndo naloleberogo. I̱na hale hole hame laridago la, lene.
1KI 2:21 Ani layagola Badasebahanda lalu, Wali Abisaga í̠ hamene Adoniya ibu dabu bilo hameledo, lene.
1KI 2:22 Bi ogonidagua layago kini ibugua hale howa ibu keba timbuni halu lalu, Irane aginaga í̠na i̱hondo Abisaga i̱ hamene Adoniya ibu dabu bilo lalu hale haribe. Ani bulene ngayagua nde ibu i̱ hamene wahene kagodago i̱ kini kogo wahalu ibugua kini ha aribia helo i̱nihondo tigatiga waha lalu langerene. Ani bialu ogoni hangu ndo loma binigo mo miaga agali Abaiadanagabi Seruia igini Yoabanagabi heba hale hamaga harene, lene.
1KI 2:23 Ani lai howa Kini Solomono ibugua Anduane Homogonaga minini howa bi hongohe latagi halu lalu, Adoniya ibugua bi ogoni latagi hayadagome ibuha ko timbuni nga. Ani ngagome ibu homelo bo waholebero. Ibu bo wa naharuyagua nde Ngode Datagaliwabe ibunime i̱ni homoliya bo wahelo laro.
1KI 2:24 Anidagua larogoni irane Anduane Homogo ibunime i̱ biamogo bialu mo hongo haya. Ani biyagola i̱ aba Debidinaga henge i̱ni mialu ainde i̱ni kini ho aribia howa kogoni. Ani kogoni bamba Anduane Homogo ibunime i̱hondo lalu i̱ kini halu i̱naga damenerume ha aribia holebira lalu i̱ni langini. Ani langinigo ai Anduane Homogo haluhe kagonaga minini howa i̱na heneneore bulego larogo Adoniya ibu áyu ogoni homolebira, lene.
1KI 2:25 Ani lowa Kini Solomono ibugua bia layagola Benaia ibugua Adoniya homelo bo wahole pene.
1KI 2:26 Solomono ibugua loma binigo mo miaga agali Abaiadahondo lalu, Í̠ninaga dindi Anadodo tanoha wiyadagoria hole pobe. Í̠ha ko mbira ngagome i̱na í̠ homabelo bo waholene ngagonigo nde wahalu waharogo pobe, lene. Ani larogoni irane bamba i̱ aba Debidi heba howa í̠na Ngode Datagaliwabenaga Habo Nalolene Bi lo winigonaga Mbogoyi biago yu ibaga biaga harigoni. Ani bialu i̱ aba Debidinaga genda wiaru í̠nimebi ya dege birigonigo mitangi bialu i̱na í̠ ba nabi waharo, lene.
1KI 2:27 Ani lalu Solomono ibugua Anduane Homogonaga loma binigo mo miaga agali Abaiada ibu biabe ogoni mani nabilo duguini. Anidagua binidagoni bamba Anduane Homogo ibugua Silo dindini loma binigo mo miaga agali Eli dameneruhondo bi mbira lowinigo lola hene.
1KI 2:28 Abale Yoaba ibugua Abasalomola nahaga henegoyu ai ibugua Adoniya biamogo bialu hene. Ani howa hale halu hearia Adoniya Abaiadalahondo mbirale biya layago hale howa ibu gi timbuni hene. Gi howa ibu ibida pialu Anduane Homogonaga Balai Anda heagoha anda puwa lomabu delaga dabu heago nguni mariani nogo bulumaganaga ne gayane ale heagoria yaniho berene.
1KI 2:29 Ani bereagola agali marume puwa Kini Solomonohondo lalu, Yoaba ibu ibida gerai lalu Anduane Homogonaga Balai Anda heagoha puwa lomabu delaga dabu heagoria yaniho beda, lene. Ani layago hale howa Solomonohanda Benaiahondo Yoaba homelo bo wahole pu, lene.
1KI 2:30 Ani laya handala Benaia ibugua Anduane Homogonaga Balai Anda biagoha Yoaba berearia puwa ibuhondo lamialu lalu, Kini ibugua í̠ Balai Anda ogoniha bedego wahalu tagira pobe laya, lene. Ani layagola Yoaba ibugua ladai bialu lalu, Ndo i̱ tagira napolego ogoria bedore ba, lene. Ani laya handala Benaia ibugua kini berearia dai buwa Yoabahanda layadagua lamini.
1KI 2:31 Ani lamiyagola Solomonohanda ladai bialu lalu, Karulapego ibuninaga hame ngago talialu ogoriani howa bo wahole pu. Balu ibunaga tingini mo yalu puwa hora halimu. Yoabahanda agali bolene irane nawini agali ko nawi hearu bame homelo bo wahaya. Ani biyagome ogoninaga i̱nihabi i̱ aba one waneigini bu karuhabi pani nolene para kagoni. Ani bidago ai ko ibugua binidagoni inaha para ho wiaabo nahelo ibuniha pani mialu bo wahole pu.
1KI 2:32 Ai Yoaba ibugua mana ko uruni bialu hayadagonaga pani nelo Anduane Homogo ibunime miragoni. Yoaba ibugua Nere igini Abane bameore bo wahalu Yade igini Amasabi bame bo wahaya. Abane ibu Isaraelenaga ami agali haru haga agali haguane mbira halu Amasa ibu Yudanaga ami agali haru haga agali haguane henego. Agali ogonilabo libugua mana ko mbira nabiagaore howa libu tigabiore hene. Mana bayale libugua biagago Yoabahanda biaga wiagobi ndo biaga hene. Ani henego ai Yoaba ibugua i̱ aba Dedidi ala hale nahe howa ibuninaga hameme bo wahene.
1KI 2:33 Ainde Anduane Homogo ibunime Yoabahanda mana ko binidagoni mitangi biaabo halu mo wiaho howa Yoaba ibunibi ibu aguane mani holobadaruhabi pani mialu haabo helo laro. Anigo Anduane Homogo ibunime Debidinaga waneigini aguane hama polebiraru ti bayale hangu helo biamogo bialu Debidi aguanerume kini holebiraru biamogo bialu haabo helo laro, lene.
1KI 2:34 Benaia ibugua bi uruni hale hai halu Anduane Homogonaga Balai Anda biagoha dai buwa Yoaba homelo bo wahene. Ani biyagola tigua Yoabanaga tingini ibuni dalu dindi ko iba dalubi naibaga wiagoha yalu puwa ibuni andaga kawareni hora hene.
1KI 2:35 Ani biyagola kini ibugua Benaia ami agaliru haru haga haguane Yoaba hayagoria ho aribia helo dabo helene. Benaia ibu Yahoiada igini henego ogoni dabo helene. Ani helowa loma binigo mo miaga agali Abaiada hayadagua Sadogo ha aribia helo kini ibugua dabo helene.
1KI 2:36 Yoaba homeagola kini ibugua Simai olalu íbu lowa ibuhondo lamialu lalu, Í̠na Yarusaleme ogoriani anda mbira buwa holene nga. Ani buwa í̠ Yarusaleme yu wahalu tagira ibaga bialu polene nawiore.
1KI 2:37 I̱na ani larogo lelowa í̠na Yarusaleme wahalu tagira puwa Kidirono iba domalu mbira piriyagua nde í̠ homabelo bo waholebero. Bi o larogo mo wahalu poregome í̠ni homolebere, lene.
1KI 2:38 Ani layagola Simaihanda ladai bialu lalu, Kini-o í̠na bi bayale o laregonidagua buliya, lene. Ani lowa Simai ibu Yarusalemeha luore haabo hene.
1KI 2:39 Ani heane dege mali tebira piyagola Simainaga garabaya biabe ale biahaga agali kirali ibida pialu Gede tanoha Maga igini Kini Agisila pu hene. Ani pu heagola agali marume Simai lamialu lalu, Agali kirali í̠naga garabaya biabe ale biahaga biagolabo Gede tanoha pu hea, lalu lamini.
1KI 2:40 Ani layago hale halu Simai ibugua nogo dongini biralu ibunaga agali garabaya biabe ale biahaga ogonilabo taya bima Kini Agisi hearia abaleore Gede tano pole pene. Puwa agali ogonilabo kirabali hearia handa walia howa haru halu Yarusaleme dai bini.
1KI 2:41 Ani binigo Kini Solomono ibu hale halu hearia Simai Yarusaleme wahalu tagira puwa Gede tanoha peneyago Yarusalemeni lone daibu ka layane hale hene.
1KI 2:42 Ani layago hale howa ibugua Simai olalu íbu lowa ibuhondo lamialu lalu, Ala i̱na í̠hondo Yarusaleme tano wahalu tagira napole lalu Anduane Homogonaga minini howa bi hongohe lo wia halu bi hongo howaore langiru. I̱na í̠hondo bi hongo howaore lalu, Í̠ tano wahalu tagira piriyagua abale ogoningiore bo waholebero lalu langirugoni. Anidagua larugola í̠na ladai bialu karulape i̱na í̠naga bi langeregonidagua bulebero lari.
1KI 2:43 Ani larigo nde í̠na Anduane Homogo ibunaga minini howa buleore lalu bi lowirigo habo lalu i̱naga bi larugobi irane aginaga mo waharibe.
1KI 2:44 Ainde i̱ aba Debidihondo mana ko í̠na bialu heneyarubi í̠ni manda bide. Ai áyu Anduane Homogo ibunime í̠na mana ko bialu haridaruninaga pani ngulebira.
1KI 2:45 Anigo Anduane Homogo ibugua i̱hondo bayale hangu biaabo halu Debidi aguanerume hangu kini haabo helo helaga bulebira, lene.
1KI 2:46 Ani lowa Simai piyagola kini ibugua Benaiahondo Simai homelo bole pu lene. Ani laya handala Benaia ibugua tagira pialu Simai homelo bo wahene. Anigo Kini Solomono agali mendeme hengedape habe nahe hongohe gibi tara mbira hene.
1KI 3:1 Solomonohanda Iyibi wali agali baba wai nabi nenege hole lalu Iyibinaga kini heago wane mbira Kini Solomono ibu dabu buwa wandari ogoni ibu one berelo Yarusaleme Kini Debidinaga tano biagoha haru ibini. Wali ogoni ibu bereagola Solomono ibugua Yarusalemeha ibuni andaga bialu Anduane Homogonaga andabi bialu tano ogoni ibuni ege pabe hongohe bu mabu bupe howa bu yaanda hene.
1KI 3:2 Abale howa Anduane Homogonaga anda mbira nahe howa Isaraele wali agali tigua lotu lalu loma binigo bo mulene harangi hari nene ngaruha puwa uruniha howa lotu lalu loma biniru bo delaga hene.
1KI 3:3 Solomono ibugua Anduane Homogo gubalini timbuni howa ibu aba Debidihanda biagadagua dege ibuguabi mana bayale tigabi wiaru talialu bialu habe lalu lamiyadagua bialu hene. Ani henegoyu ibuguabi nde lotu laga wiaruha Anduane Homogohondo nogo tara tara loma biniru bo delaga dabu mbira mbira wiagoria lomabu mialu haga hene.
1KI 3:4 Tinaga lotu laga dindi dunini mbira Gibeono winigoha Anduane Homogohondo bulumagarubi sibirubi bo delaga dabu wiagoria horo mbirungi Solomono ibu dindi ogoniha bulumagaru sibirubi loma biniru bo delole pene. Ibugua ala bulumaga handari dewaore aulole Anduane Homogohondo loma biniru mialu delaga dabu heagoria bo delai hene.
1KI 3:5 Ani bialu horo ogoningi mbiraga Solomono ibu palearia Anduane Homogohanda emagaha Solomonohondo lalu, I̱na í̠hondo mbirale mbira ngi lalu hale harego nguliya agile ngi loleberebe, lene.
1KI 3:6 Ani layagola Solomonohanda lalu, I̱ aba Debidi í̠niore baya hangu talima ibaga bialu howa ibugua mana bayale tigabi hangu bialu hayago. Ani biyagome í̠na bibahendengi ibu gubalini halu mbirale bayale hangu biaabo haga kegoni. Áyubi nde í̠na mana bayale ogonidagua dege bialu i̱ni ibu iginioreme ibunaga henge mialu kini holiya dabo helarigoni.
1KI 3:7 I̱naga Anduane Homogo Ngode Datagaliwabe-o í̠nime i̱ abanaga henge i̱ni mialu i̱ kini ha aribia holiya dabalu helarida. Anigo ainde i̱ igiri daliahe mbirale manda biai nahe hewangi í̠naga wali agali baya hangu agua haru holebe tobaho kogoni.
1KI 3:8 Áyu i̱ í̠naga wali agali í̠nime dabo helene biaru heba hatago ho hewaria ainde ti daga labe nahe dewaore bu kagoni.
1KI 3:9 Ai í̠naga wali agali uruni i̱na baya hangu haru holiya i̱ha mini manda gigabiwi holiya mo tale bulene bayale ngibelo hameledo. Ani ngeregola i̱na mana ogo tigabi ogo tiga nabi lalu baya hangu talebu ki holene karulape holebero. Nangiriyagua i̱na nde í̠naga wali agali dewaore labe nahe o bu karuni agua haru holiyadabe, lene.
1KI 3:10 Solomonohanda bi layadagoni hale howa Anduane Homogo ibugua bayaleore laya manda bialu ibunaga bu miniha dungulo hene.
1KI 3:11 Ani howa ibugua Solomonohondo lalu, Í̠na au lalu, I̱na Isaraele wali agali baya hangu haru holiya mini mandabi gigabi wu holene ngi larigo, bayuwa lari. Í̠na dindini luore holiya biamogo bibe lalubi ndo muni mbirale bu ngaru dewa ngi lalubi ndo í̠naga waitigi bu karuni bo wahabe lalubi ndo hale harigo bayuwaore larigoni.
1KI 3:12 Ogoni heneneore larigo í̠na mbirale i̱hondo ngi lalu hale harigoni nguliya. Áyu ogoni howa í̠ha mini mandala timbuniore gigabi wu holene yu habelo ngulebero. Abale agali mbira manda timbuniwi mbira ha nabini. Manibi nde agali mini mandala timbuni gigabiwi í̠ ale mende naholebiraore.
1KI 3:13 Í̠na i̱hondo mini lene holenebi muni mbiraleru yu holiya ngi lalu ndo larigo i̱nime mbirale uruni bibahende ngiai harogola mo yu holebere. Ani yu kegola kini mini lene maru karubi ndo í̠ bolangua howa mini lene daligaore holebere.
1KI 3:14 Ani howa í̠ aba Debidihanda bialu henedagua í̠nabi hariga tigabi ngarunaga pialu howa mana bayale ngogoria halu i̱naga bi hale haabo hariyagua nde i̱na í̠ dindi ogoria luore halu hodagua habelo helolebero, lalu Anduane Homogohanda Solomonohondo lene.
1KI 3:15 Anduane Homogohanda bi ogoni lai hayagola Solomono ibu heyuwa handalu hearia emaga handaruyane hendene. Ani handalu mani Solomono ibu Yarusaleme dai buwa Anduane Homogonaga Balai Anda biagoha Habo Nalolene Bi Lo winigonaga Mbogoyi wiagoria kaware puwa ibugua Anduane Homogohondo bulumagarubi sibirubi loma biniru bo delaga dabuni dai helo delalu Anduane Homogola ho gimbu bulenaga lomabu mini. Anidagua biai howa Solomono ibunaga agali haguane hearubi ibunaga ami haru haga hearubi bibahende mo turu halu tomo timbuni nelo dawa hene.
1KI 3:16 Horo mbirungi bayanda wali kayu bima ibaga biaga kirali libunaga genda kinihanda mo tiga bilo ibu hearia ibini.
1KI 3:17 Wali mbirago ibugua lalu, I̱naga kini-o hale ha. Wali ogo iya anda mbiraoreha paliagago ani palu howa ai i̱na igiri gali mbira taba hanaru.
1KI 3:18 Ani taba hono biruwa wali ogo iya haru dege birariba. Ani biruwa horo kiru peagola ibubi nde igiri gali mbira taba hanaya. Ani taba honowa horo ogoningi anda ogoniha wali agali maru napale iyane hanguore paliriba.
1KI 3:19 Mbiragaore hayagola wali o kago ibu palia hondo howa palu beregedayagola ibu igiri gali biago palia dambi hayiya.
1KI 3:20 I̱ palia hondo hewaha wali ogome ibalu i̱ igini biago ibu dagiaha mo pale lalu ibu igini homene biago mo yalu ibuwa i̱ buha mo aribia ho paleleneya.
1KI 3:21 Gao layagola i̱ igini andu mule handalu hewaria homene wiaria handaru. Ani wiagola i̱na handa tiga bialu hewaria i̱ igini i̱nimeore taba henene biago ndoyane handaru, lene.
1KI 3:22 Wali ogoni ibugua bi lai hayagola wali mende biago ibugua lalu, Ani ago. Igiri homene ogoni í̠nagaore i̱ igini nahome ogoyago, lene. Ani layagola wali pigane layagome laabo halu lalu, Ndoore igiri homenego í̠nagaore larogoni nahomego i̱naga, lene. Wali mbiragome, I̱naga, layagola mendegomebi nde, I̱naga, dege layagola libugua kininaga deni lai lalu hene.
1KI 3:23 Ani lalu hebigola kini ibugua lalu, Ai nde libugua igiri nahome bedago i̱naga lowa igiri homenedago í̠naga lowa bi ngirini ngerene lalu haaabo kabigoni, lene.
1KI 3:24 Ani lowa ibugua, Ayu tibu mbira mo yalu ibidaba, lene. Ani layagola tigua mo pialu kini berearia ayu tibu mo yalu ibini.
1KI 3:25 Mo yalu ibiyagola ibugua lalu, Waneigini nahome ogoni ayu tibu ogonime hanuni dagabuki howa dagane wali mbirago mialu mendeha wali mendego midaba, lene.
1KI 3:26 Ani layagola igiri ai̱yaoredagome ibu igini dara timbuni howa kinihanda bo wahelo turu nahe biruwa ibugua kinihondo lalu, Kini-o igiri ogoni homelo nabe wahalu wali ogoni ibu helo mia, lene. Ani layagola wali mende biago ibugua lalu, Ndoore ibubi namulego i̱bi nangulego wahalu hanuni daga biaha. Ibu mende helo i̱ dagane mende holiya anidagua bia, lene.
1KI 3:27 Ani layagola kini ibugua lalu, Igiri homelo nababe layago ogoni ibuni igiri ai̱ya berenedago ai igiri wali ogoni ibuni mo midaba. Ibu igini ogoni ai̱yaore bedago ibu igini bo dagabia nahadababe, lene.
1KI 3:28 Mani Isaraele wali agali bu hearume hale halu hemiria Kini Solomono ibugua wali kirali mo tiga agua buabe tobahe gibi ogoni mo tiga biya layago hale howa ibunaga manda baya tara winiyago hondowa mogo lai hene. Mini mandala bayale ogonime wali agaliha gendaru ibiragola godi lalu kini ibugua manani ngadagua baya hangu mo tale bigi bilonaga Ngode Datagaliwabe ibunime mini gigabiwi mo wia hayadalo manda manda bini.
1KI 4:1 Kini Solomonohanda Isaraele dindi bibahende handame howa haru hene.
1KI 4:2 Ibunaga agali haguaneru uru haga bini. Sadogo igini Asaria ibu loma binigo mo miaga agali hene.
1KI 4:3 Sisa igini kirali Elihorebe Ahiyala libugua kininaga beba gilibia dagala biaga hene. Ahiludu igini Yahosabada ibugua kinime birarunaga te bibahende gilibu wiaga hene.
1KI 4:4 Yahoiada igini Benaia ibu ami agali bu hearu haru haga haguane hene. Sadogo Abaiadala libu loma binigo mo miaga hene.
1KI 4:5 Nadana igini Asaraia ibu biabe biaga agali bu hearu haru haga hene. Loma binigo mo miaga Nadana igini Sabudu heago ibugua mini bogaru kini talebu miaga hene.
1KI 4:6 Ahisa ibugua kini andagaha agali biabe biaga hearu handayaho haga hene. Abada igini Adonirama ibugua agali maru kininaga biabe bilo minu helarago handayaho haga hene.
1KI 4:7 Kini Solomono ibugua agali haguane homberiali (12) Isaraele dindiha dindi podene hobane homberia (12) ngagoha handayaho helo dabo helaga bini. Agali uruni tinaga biabe tini dindi podene hobane haru hayadagoha howa tomo bu mogo bialu kini halu wali agali Yarusalemeha hearunaga mali bibahendengi ege mbira mbira bibahendeni bu pelaga biaga hene.
1KI 4:8 Agali haguane uruni tinaga mini uru hene. Benehu ibugua Eberaimi hameigini daluha dindi ege bare bare wu yu peagoha haru haga hene.
1KI 4:9 Bendege ibugua Magasa tanobi Salabimi tanobi Besemese tanobi Elono tanobi Bedehanana tanobi uruni haru haga hene.
1KI 4:10 Benehesede ibugua Arubodo tanobi Sogo tanobi dindi bibahende Hebe tanoha wiarubi uruni haru haga hene.
1KI 4:11 Benabinadaba ibugua Doro dindiha hari bare wiaru haru haga howa ibu Solomono wane Tabada agalini hene.
1KI 4:12 Ahiludu igini Bana ibugua Tanaga tanobi Megido tanobi Bedesana dindi wiaru bibahendebi Saredana tanoha dindi kaware kaware wiarubi uruni Yaserili tano abene unurahayagi winigo uruni haru hene. Dindi uruninaga tubari amuraore ni tagira ibiragohayagi Abelemehola tano ngagoria howa pialu unura ni paliragohayagi Yogomeama tano ngagoria wiairi haga bida.
1KI 4:13 Manase hameigini aria Bengebe mbira heago ibugua Gileada dindiha Lamodo tano wiagobi Yairi hameigininaga dindi bu wiarubi handayaho hene. Dindi urunibi nde Gileada dindiha dege wigi bini. Ani bialu Basana dindiha Agobo mbira wiagobi handayaho ha dege bini. Dindi ogoniha tano timbuniru pira waragaria (60) wini. Tano uruniha ege pabe hongohe bu mabu bialu wai pabe panga hongohe helowa tamuha howa panga payatagi holenenaga bengena ege to̱le̱ boronosime wabini hongoheme payaga hene.
1KI 4:14 Ido igini Ahinadaba ibugua Mahanaimi tano haru haga hene.
1KI 4:15 Ahimasa ibu Solomono wane mende Basemada dabu bu howa ibugua Nabadali hameiginirunaga dindi haru hene.
1KI 4:16 Ani heagola Husai igini Bana ibugua Ase hameigini hearu handayaho halu Bealodo tanobi handayaho ha dege bini.
1KI 4:17 Parua igini Yahosabada ibugua Isaga hameiginirunaga dindi wiaru handayaho hene.
1KI 4:18 Ela igini Simai ibugua Beniyamini hameigini hearunaga dindi wiaru handayaho hene.
1KI 4:19 Uri igini Gebe ibugua nde Gileada dindi handayaho hene. Bamba Gileada dindi ogoni Amoronaga Kini Sihono ibunaga wialu Basana dindinaga Kini Oga ibunaga wialu binigo ai Gebe ibugua handayaho hene. Agali haguane homberia (12) uruni dindi ani haru haga biagola agali haguane timbuni mbirame dindi uruni bibahende handayaho hai hene.
1KI 4:20 Yuda wali agali Isaraele wali agalibi dagala mibe nahe dewaore iba angeni iba mu wiraligobi hene. Ti bayaleore halu tinaga tomo nolene iba nolenebi bibahende wiai heagola ti turu haga bu hene.
1KI 4:21 Ani henego Kini Solomono ibugua Isaraele dindi bibahendeha handayaho hene. Tubari ni tagira ibiragohayagi Iba Yuberedisi poragoria howa pialu mendeha ni paliragohayagi Pilidialiru baba tubari wiagoria wiairi hene. Unurayagi Iyibila dindi tubari wini. Wali agali dindi uruniha haga hearu tigua Solomonohondo dagisi mialu haabo haga howa mani Solomono homayagola wahene.
1KI 4:22 Horo bibahendengi Solomono ibu tomo mo wiagago balawa kilo daosini waragaria (6,000) mo wialu balawa bayaleru kilo daosini tebira (3,000) mo wialu biaga wini.
1KI 4:23 Nogo bulumaga pira kira (20) haru íbu helalu bulumaga habatigi baya hangu hinu heneru pira mbira haru íbu helaga bini. Ani bialu nogo sibi handari mbira (100) haru íbu helalu nogo tara tara mini dia gabua bu hearubi ega gogorogo habatigirubi yalu ibalu migi biaga wini.
1KI 4:24 Solomono ibugua dindi dewaore Isaraele dindiha howa pialu amuraore Iba Yuberedisi poragoha tubari ngagoria handaya howa haru hene. Ani bialu ibugua handaya howa haru haga tubari Iba Yuberedisi angeni Tibisa tano ngagoria howa pialu ni paliragohayagi Gasa tano ngagoria tubari wini. Dindi tara uruniha wiapara para wiarunaga kini bu hearume Solomono baba waitigi nahaga hene.
1KI 4:25 Solomono ibu kini heangi Yuda wali agali bibahendebi Isaraele wali agali bibahendebi ti tininaga mabu anda wiyadagoha halu tinaga pu mbira mini gerebi mabu wiarubi poge ira hearubi uruni teha ganini handaga bialu mbirale mbira gi holene nawi howa hada payabu hene.
1KI 4:26 Solomononaga wai biaga garo mini karisi wiaru gili laga nogo hosiru palelo anda dewa bu helene. Nogo hosi uruni paliaga anda hobane haihe hene. Anda uruniha nogo hosi daosini dege pira maria (40,000) palelaga hene. Ani bialu Solomono ibunaga ami agali nogo hosini biruwa wai biaga hosi daosini homberia (12,000) hene.
1KI 4:27 Agali haguane homberiali (12) dindi homberiani (12) handayaho howa haru haga biaru tigua tomo mbiraleru ege mbiranaga Solomonohanda ogongi yalu ibalimu lenedangi tigua mo yalu ibaga hene. Tomo uruni kini ibuni halu maru ibu andagaha tomo nalu hagadaru ti nalu helo mo yalu ibugu biaga hene. Agali haguane uruni tigua tinaga biabe bayaleore bialu henegome kini ibu andagaha tomo emene hangubi mbira ndia nahaga wini.
1KI 4:28 Ege ogongi yalu ibalimu lalu kini ibugua larangi tigua nogo hosi wai biaga karisi gili laga hearubi hosi maru hearubi ti nelonaga balawa wabiaga mini bali linibi tanibi gandulo yalu ibugu biaga wini. Datani uruni tano mbira mbirani nogo hosi haga binidagoha yalu pugu biaga wini.
1KI 4:29 Ani biagago Ngode Datagaliwabehanda Solomonohondo mini giga bulene taraorebi marume nahandabehego hondolenebi manda bulene timbuniore magi manda bibenaheorebi miai hene.
1KI 4:30 Solomononaga mini giga bulenego timbuniore agali maru mini gigabi ni tagira ibiragohayagi hearubi Iyibi dindiha hearu ariabi ibu ale mbira nahe ibugua bibahende bolangua haihe hene.
1KI 4:31 Solomononaga manda timbuniore dindi bibahendeha agali manda timbunibi hearu bolangua haihe hene. Ibunaga manda timbuniore agali manda timbunibi maru Esera aria Edana halu Maholo igini Hemana Kalagolo Dada imaru halu tinaga manda timbunibi heneru Solomono ibugua bolanguahe hene. Ani heagola wali agali dewaore Isaraele dindi kawareha hearume ibu mini lene ani ka layago hale hai ho hene.
1KI 4:32 Ainde Solomono ibugua bi bayaleru tubagi mini gigabu wulenenaga bi tagala pugu buwa daosini dege tebira (3,000) gilibu wialu iba gana daosini mbira (1,000) bolangua howa gilibu wini.
1KI 4:33 Ibunaga bi urunime bibahende lo dambi hai halu Lebanono dindiha ira tamia karu garea lalu ira emene ko mbira mini hisobo pabeni anda ho haga karu garea laga bialu gilibu nga. Ani bialu nde ema bialu piagane damene ega bedarubi tombeme piaga tara tara bedarubi iba wena bedarubi ogo ale beda lalu garea lowa gilibu nga.
1KI 4:34 Ani binigo dindi tara tara bu wiarunaga kini bu hearume hale halu hearia Solomononaga mini giga bulenebi manda bulenebi timbuniorebi ka layago hale howa tigua tinaga agali haguane maru Kini Solomono hearia ibugua bi bayale larago hale helo ibilaga bini.
1KI 5:1 Taia dindinaga kini mbira mini Hirama henego ibu abale Debidi kini heangi Debidinaga nenege henego ai Debidi homayagola ibu igini Solomono kini ibu aba henegoria ha aribia howa ka layagola hale hene. Ani hale howa Hirama ibugua agali haguane ibunaga biabe biaga hearu Kini Solomono hondole pudaba lene.
1KI 5:2 Ani ibileneyago hondowa Solomono ibugua Kini Hiramahondo bi ogodagua lo pelene.
1KI 5:3 I̱ aba Debidi ibu kini heangi ibunaga waitigi bu hearume ibalu wai biaabo halu heagola Anduane Homogo ibunaga Ngode Datagaliwabenaga anda mbira bibe naheore henego í̠ manda bu kegoni. Ani bialu howa ainde Anduane Homogohanda wai uruni mo palia haragola anda ogoni buliya lo manda bu hene.
1KI 5:4 Anigo áyu Anduane Homogo i̱naga Ngode Datagaliwabe ibugua wali agali dindi bibahendeha bu hearu waitigi holene manda nabi mini mo mbiraore hai howa ina baba mandagi bimagaho heleda. Wali agali tara tara urunime ina baba waitigi holene manda nabi kagome inaha mo ko holene mbira anda naibulebira.
1KI 5:5 Ani ngane hondowa i̱na áyu Anduane Homogo i̱naga Ngode Datagaliwabenaga anda mbira bulene hameledo. Bamba Anduane Homogohanda i̱ abahondo bi mbira lo wialu lalu, I̱na í̠ igini mbira í̠ni henegoria ho aribia howa kini helolebero. Ani helarogola ibugua i̱naga wali agaliru i̱ mitangi bialu lotu lole kaware ibai holenaga i̱naga anda mbira bulebira, lalu ani lenego. Ai áyu i̱na ibunaga anda ogoni bulebero.
1KI 5:6 Ani buleberogo í̠na agali biabe biaga maru Saidonoali biaru Lebanono irabuha ira hongohe tamia anda ogoni buliyanaga dibu pu helo hameledo. I̱naga biabe biaga agali karu tigua Saidonoali uruni biamogo bialu biabe bilo. Saidonoali uruni í̠nime ti yolo bibe lo manda bidegobi yolo buliya laro. Ai i̱naga agali biabe biaga karu ti í̠naga agali ira dibalu biabe biaga mandabi karu ale ndo ti manda nabiore kagoni í̠bi handalu manda bide, lalu bi ogoni lawia hene.
1KI 5:7 Hirama ibugua Solomonohanda bi ogoni yalu pu layiyago hale howa ibunaga bu miniha dungulo howa turu timbuni hene. Ibugua lalu, Isaraele dindi timbuni ngago haru helonaga Anduane Homogohanda Debidihondo igiri bayale mbira ibuni henegoria ho aribia helo miyadagonaga ina Anduane Homogonaga mini yaraga holene nga. Debidi igini ogoniore mini mandaru bayale gigabiwiore kagoni, lene.
1KI 5:8 Ani lowa Hirama ibugua Solomono bedaria bi lama pudaba lowa lalu, Í̠na bi lariyago hale howa i̱na ogoni karulape laru. Ira tamiaru guraya aleru dibu yalu pudaba lolebero.
1KI 5:9 Ira i̱naga biabe biaga agali karume Lebanono irabuha dibalu iba solowara bedagoria yu tagira pu ngelolebira. Yu wiai howa tigua pume dewa daba homaga maga buwa ibani ibilalu í̠nime yu ibabe lariyagoria mo yu ibulebira. Yu anda ibiragola agali i̱naga biabe biagaru tinaga pu hado yaragola í̠ninaga biabe biaga agali hayaru tinime mo yulebira. I̱na mbira hangu bibelo hame ledogo dege laro. I̱naga agali uruni heba ina tomo nalu holoma̱ya maru wia habe, lalu bi lawia hene.
1KI 5:10 Ani lowa Hirama ibugua ira tamia guraya alerubi dibu ngibe layadagua dibu wia hene.
1KI 5:11 Solomono ibuguabi nde agali biabe bialu howa tomo nelo widi mali mbira mbirani nalu howa biabe bilo genda magi daosini kira (2,000) wia halu olibe lininaga welibi ani dege lida magi daosini maria (4,000) nalu helo wia hene.
1KI 5:12 Anduane Homogohanda mini mandala gigabi wulene bayale Solomonohondo ngulebero layadagua miyagola ibugua Hiramala habo nalolene bi mbira lo wialu libuore nenege haabo habiya lalu lowini.
1KI 5:13 Solomono ibugua agali daosini dege pira tebira (30,000) Isaraele dindiha hearu minalu biabe ogoni bilo minu helene.
1KI 5:14 Ani buwa ibugua agali uruni halu tebo tale buwa daosini pira (10,000) dege dege helene. Wabuni mbirago ibu ege mbira Lebanono dindiha biabe bu pialu ege mendeni dai biragola wabuni mendego ibu biabe bu aribia hole pugu biaga wini. Wabuni tebira uruni tigua biabe bu iriari biaga hene. Ani biyagome ege mbira hangu biabe bialu ege kira andaga ha̱lo haga wini. Ani bialu heagola agali mbira mini Adonirama henego ibugua biabe ogoni handayaho helo helene.
1KI 5:15 Ani bialu agali daosini pira halira (80,000) ege to̱le̱ podelo dabo helayagola uruni ti hari bare wiagoha puwa ege to̱le̱ ira podaga so aleme to̱le̱ podalu hene. Agali maru daosini pira karia (70,000) tigua ege to̱le̱ podo winiru mo yu tone bilo dabo helene.
1KI 5:16 Ani bialu agali daosini tebirani handari tebira (3,300) ege to̱le̱ biabe ogoni bialu karu haru helo dabo helene.
1KI 5:17 Agali uruni tigua Solomonohanda bi layago hale halu hari bare ege to̱le̱ bayale heagoha puwa ege to̱le̱ timbu dege dege podo paya bini. Ege to̱le̱ bayaleore uruni Yarusaleme mo yalu puwa mo daba daba howa Anduane Homogonaga anda bule wiyagoria yu pu ngelaga bini.
1KI 5:18 Agali biabe ogoni biyaru ti Hirama ariabi Solomono ariabi maru Bibiloso tanoni haga ariabi ti mandagi biabe bialu Anduane Homogonaga anda ogoni bule howa irabi ege to̱le̱bi uruni baya hangu manda manda bu wiai hene.
1KI 6:1 Pigane Isaraele wali agali Iyibi dindi wahalu tagira ibiyangi howa hama ibinigo áyu ogoningi mali handari mariani pira halira (480) hene. Horo ogoningi Solomono ibu Isaraele wali agalinaga kini hama ibinigo mali maneni howa ogoninaga ege mende layagola Solomonohanda Anduane Homogonaga anda ogoni tehinalu bini.
1KI 6:2 Anduane Homogonaga anda tamuha hobane loma bia hene ogodagua helaga bini. Tamu hobene lunaga manda mida pira kirani karia (27) halu arane yangalenaga manda mida dira wialu daliga handadaga halu manda mida haleria (13) howa bolanguahe wini.
1KI 6:3 Anda hobene mbira anda harabahayagi helenego ogoninaga arane timbuni manda ogodagua manda mida dira abale hobene loma bia hene biagonaga wiyagobi dege howa luninaga manda mida mariani bolanguahe helene.
1KI 6:4 Anda mandahayagi windo tamuha timbuni tagiraha emene lowa helama pene. Windo uruni diri emene emene winidagoha wá holene anda tamuha anda ibilonaga ani bini.
1KI 6:5 Ani bialu Anduane Homogonaga anda biagoha manda labolabo kira bialu tibihayagi tebone biamini. Anda ogoni ibuha halu tebo bu gimbu bima irigi hene. Anda bima irigi henedagoha hobene dewa helene.
1KI 6:6 Tigua anda ogoni bialu howa dagia dabira duninidaru Anduane Homogonaga anda biagoria paga howa bu gimbu nabule lo manda bini. Ani manda buwa anda be mende daliga bu gimbu bima iraga hole biyadagonaga dagia dabiradago helole howa anda mandadagoha emene mbira lone gene helolenedagua bima anda pene. Ani biyagola dagia dabira wulene karulape hene. Anda be tebone daliga bu gimbu bule howabi anidagua dege bini. Anidagua biyagome anda be dindiha biago arane yangalenaga manda mida kira emeneore bolanguahe hene. Anda be mende daligago ibunaga arane yangalenaga manda mida kira emene timbuni bolangua halu anda be daligaore tebonego ibunaga arane yangalenaga manda mida tebira emene bolangua halu hene.
1KI 6:7 Agali ege to̱le̱ podaga biaru tigua to̱le̱ podalu howa baya hanguore hari biagoha howa podo bebena bialu mo tigabu ngelaga bini. Ani tigabu ngeleagola mani Anduane Homogonaga anda ogoni bule mo yalu ibugu bini. Ani binigo irane anda bialu heagola nde hamaru ayuru biabe biaga ale maru aeaneme wabini wiaru pigipoga ngi̱li̱ ngi̱la̱u̱ naleore howa biabe bigibigi bialu helonaga ani bini.
1KI 6:8 Anda ogoninaga panga haraba unurahayagi ubanda tagi biaga winigo ogoni anda piaga wini. Haraba mbiraore ogoniha anda pialu anda be kira daligaha henego labonaga pangabi ogoniha dege anda pialu egageria mbira ogoni ale degeni howa iraga halu piaga wini.
1KI 6:9 Kini Solomononaga biabe biaga hearume anda biago dindiha bulenenaga biai hene. Anda be mbirago biai howa anda be mendego biadambi holenaga dabira ira tamia timbuni wiarume ala gililo pelowa ira tamia dege peleneme dungini.
1KI 6:10 Anda ogoni tagirahayagi bu mabu bupe henego ai bima iraga howa be tebo bu helene. Anda be tebo bu gimbu bima iraga henedaruni bibahende mbiraoregobi dege dege hene. Anda uruni bule dangini howa anda bima irigi holenaga pigane dagia mbiragonaga dungule howa ira tamia timbuni gililo wiyarume dagia dabira Anduane Homogo ibunaga anda loma bia hene biagonaga mandaha gimbu biade haga bini.
1KI 6:11 Mani Anduane Homogohanda Solomono lamialu lalu,
1KI 6:12 Áyu í̠na i̱naga anda bia halu kegonaga bi mbira langero. Í̠na i̱naga bi mana hale halu baya hangu talialu bialu hariyagua i̱na bamba í̠ aba Debidihondo buleore lalu lo wirugo lola helo í̠ biamogo bialu haabo holebero.
1KI 6:13 Ani bialu i̱na anda ogoni í̠na beregoha howa i̱naga Isaraele wali agali tí bababi haabo holebero. Ani howa i̱na tí yuwa naholeberoore, lene.
1KI 6:14 Anidagua bialu Solomono ibugua Anduane Homogonaga anda biago biai hene.
1KI 6:15 Anda biaga biarume ira tamia pelo mbaralo wini wiarume anda ogoni tamuha hái dindini howa ala para howa para hama iralu anda dabiraha paradaga halu ege to̱le̱ bibahende para hodambi hai hene. Ani bialu ira guraya ale pelo mbaralo wiyarume tamu dindiha dungu mbaralo wahene.
1KI 6:16 Ani buwa tamu hobane timbuni wiago hanunini hobaki hene. Tamu habaneoreha hobane kago Loma Bia Heneore Hobane laga hene. Hobane ogoniha tamu yangale dege magi manda bialu mida dira hene. Hobane Loma Bia Hene dege mendego ibu timbuniore hene. Ogoni ibu yangale magi manda bialu mida pirani halira (18) hene. Tamu ogoni hobaki henedagoni ira tamia pelene biaru ariame dege dindini howa para hama iralu daligaha para homaro bini.
1KI 6:18 Ira tamia pelene biarunime anda hái para hayagome ege to̱le̱ biaru dambi ho waheagola ege to̱le̱ mbira pana kane handabe nahe hene. Ani para hai howa tigua ira pelene mbalape ogoriani mo yári bialu mbaguali alebi palawaya ale tara tararubi wabu helaga bini.
1KI 6:19 Anda ogoninaga hobane tamu habaneha heago Loma Bia Heneore lagago ogoniha Anduane Homogonaga Mbogoyi biago ngelole bu helene.
1KI 6:20 Tamu hobane Loma Bia Hene ogoninaga arane yangalebi lunaga mandabi handadagabi mbiraore ogobi dege dege hene. Mida magi manda bialu dira dege dege bu helene. Anda hái ira peleneme bini heago bibahende ngolo bayale marume para hodambi hene. Hobane ogoninaga panga haraba kaware wiagoria bo lomabu delaga dabu mbira ira tamia pelene baya tara wiarume bu helowa ogonibi nde ngolo bayale wiagome ira dambi hai helene.
1KI 6:21 Hobane Loma Bia Hene ogoninaga anda hái hearu bibahendeore ngolome budambi hai helene. Ani buwa ngolome seni pu maru wabuwa tamu hobane Loma Bia Heneore laga biagonaga pangani gerela haga bini. Ani buwa anda hái bibahende ngolome biadambi hai heagola
1KI 6:22 ai tamu hobane Loma Bia Heneore ogonihabi bo lomabu delaga dabu heagobi bibahendeore tamu ogoniha wiaru ngolome dambi hai hene wini.
1KI 6:23 Ani buwa tigua dahuliyali handalehe kira babaganehe ira olibeme dibu mbara lowa tamu hobane Loma Bia Heneore ogoniha ngelole wabialu hene. Dahuliyali handalehe wabini ogoni labo libu ogobi labolabo howa luninaga magi manda bialu mida maria howa emene bolanguahe wini. Libunaga babagane yanga lowa tiga tiga haragahe helene. Babagane lunaga magi manda bialu mida kira howa bolanguahe hene. Babagane nguni mendeha howa mendehayagi luninaga manda bialu mida maria wini.
1KI 6:27 Tigua ogonibi wabiai howa Anduane Homogonaga hobane Loma Bia Heneore biagoha mo yanda howa helene. Dahuliyali handalehe wabini biagolabo tamu hobane hanuni ogoniha heleagola libunaga babagane mende mendeme anda hái ela howa wialu mendego labome tamu hanuni libuni ela hagabu helene.
1KI 6:28 Ani wabu helowa tigua dahuliyali handalehe biagolabo ngolome para hodambi hai hene.
1KI 6:29 Ani bialu tamu hobane kira mbirago Loma Bia Hene laga mendego Loma Bia Heneore lagago ogoni labonaga anda háini dahuliyali handalehe wabini dewaoremebi ira ayage ale mini dedi manda bialu wabini dewaoremebi palawaya ale manda bialu wabini dewaoremebi mo yári biaho ngelene.
1KI 6:30 Ani buwa tamu hobane kira ogoni labonaga dindiha ge holene wiagoria bibahendeore ngolome para hodambi hai hene.
1KI 6:31 Hobane Loma Bia Heneore ogoninaga panga ira olibe dibu pelo mbaralene wiagome wabini. Wabuwa panga haraba biagoria manda biaho ngelene. Tigua panga kira wabuwa mende mendehabi kirabali helenego payaragola kirabalime ibalu paya ndibu laga biaga wini. Panga ogoninaga gembone duria hene.
1KI 6:32 Panga kira ogoni labobi nde mbirale dahuliyali handalehe ira ayage ale manda bialubi palawaya ale manda bialubi dewa dege wabu helowa ngolome panga biagobi mbirale biarubi hadambi hai helene.
1KI 6:33 Ani bialu tamu hobane Loma Bia Hene tagiraha mende hayagonaga pangabi ira olibe pelene mbaraleme dege wabuwa helene. Panga ogoni ibunaga gembone maria hene.
1KI 6:34 Ani wabu helowa ira guraya ale pelowa panga kira wabini. Panga ogoni mende mendehabi kira helo wabini. Wabuwa abale tamu hobane Loma Bia Heneore laga biagonaga wabu helayadagua dege wabu helene.
1KI 6:35 Ani helowa panga biagoria tigua dahuliyali handalehe ira ayage ale mini dedi mitangi bialubi palawaya alebi ala wabu helayadagua dege wabu helaga bini. Ani biai howa ira panga biago ngolome para hodambi hai hene.
1KI 6:36 Ani biai howa tigua ege to̱le̱ baya hangu podaga buwa bogo tigabu wigi binigome muwa anda ibulene haraba wiagoria pabe bialu howa ege to̱le̱ uruni duguni tebira mbirago wiadambi haga bima irigi halu tebira wiai hene. Wiai howa ira tamia pelo wiyarume mbaralalu tiga bilo wiadambi haga bini. Ani dege ege to̱le̱ halu tebira wialu ira wia bima iralu anda pabedago biaiore hene.
1KI 6:37 Pigane Solomono ibu kini henegoria howa hama ibalu mali manegonaga ege mende layagola tigua Anduane Homogonaga anda ogoni bini. Isaraeleali tigua ege ogoni mini Sibi laga hene. Ege ogoningi Anduane Homogonaga anda bulenedagoria ege to̱le̱ mbalapeme dindini pigane dunga hama pene.
1KI 6:38 Agali anda biaga uruni tigua anda ogoni bialu heagola mali karia pene. Ai Solomono ibu kini heagola mali beane (11) ogoninaga ege halini layagola anda bibahendeore bumaro biai hene. Agali biabe biaga biarume anda baya hanguore biyagola anda bayaleore Kini Solomono ibunime ogodaguaore bilimu lalu lamiyadagua biaiore hene.
1KI 7:1 Solomonohanda ibuninaga anda timbuni mbira ibuni henedagoria bu helene. Anda ogoni ibunaga biabe bia hagarume bialu heane mali haleria (13) pene.
1KI 7:2 Ani bialu Solomononaga biabe biahaga agali hearume anda timbuni ogoni binigo mini Lebanono Irabu Anda laga hene. Anda ogoni lunaga mida magi pira mariani maria (44) halu arane timbuninaga mida magi pira kirani kira (22) halu bima iraganaga mida magi haleria (13) bolanguahe hene. Anda gene ira tamiame duguni maria hengene. Ani buwa ira tamia luorerume gene wa hayagoria togoriane pale lama pene.
1KI 7:3 Ani bialu ira uruni aria degeme harua halu tebira lone ala helayago dambi halu ubaedene bilene. Ani bialu ira tamia biarunaga kambu laga bini wiarume holalu wini.
1KI 7:4 Ani bialu anda ogoninaga manda mende mendehabi windo tebira helene. Manda mendenaga windo heago ho iriari nabi mendeyagi heagobi dege helaga bini. Anda ogoninaga haraba maria ogobi dege dege helene.
1KI 7:6 Ani bialu tigua anda timbuni ogoniha anda mende damuwa anda ogoni mini Anda Gene Timbuniru laga hene. Anda ogoni lunaga mida magi pira kirani kira (22) wialu aranenaga mida magi haleria (13) hene. Anda ogoni ibu gene daligani bu helene.
1KI 7:7 Ani bialu anda damini mendebi mini Kininaga Biragane Dagia Anda lalu mini mende Godi Hale Hagane Anda laga helo bini. Anda ogoniha Solomono ibugua wali agali godi hale hole ibiraru hale haga hene. Anda ogoninaga hái bibahende ira tamia pelene mbarale wiarume para haga bima iraga halu dindiha howa daligahayagi para ho maro bini.
1KI 7:8 Ani bialu Solomono ibuni andaga dindi hobane anda maru bu helayagoniha dege godi anda heago erembirahayagi bu helene. Ogonibi nde anda maru biyagobi dege bu helene. Solomono one Iyibi dindinaga kini heago wane berenego ogoni ibunaga andabi ogonibi dege bu helene.
1KI 7:9 Anda uruni mo yáribia halu ege to̱le̱ baya tara tara muni dewame miaga wiarume dindiha howa bima iraga halu danginiha mo yáribia halu pabe timbuni mbirabi dindi hobane wali agali ngoai haga wiago bu mabu bini. Pabe ogoni bulenaga ege to̱le̱ baya hangu some podalu lene lene baya hangu podo tiga bialu bini.
1KI 7:10 Tigua ege to̱le̱ timbu damene dewa podalu dindiha anda bulenedagoria dugu wima pene. Ege to̱le̱ uruni maru timbuniore lunaga magi mida tebira maru mida mariaru wigi bini.
1KI 7:11 Dindiha dugu wima puwa tigua ege to̱le̱ bayale damene wiyagomebi ira tamia manda manda bu wiyagomebi anda bini.
1KI 7:12 Ani bialu dindi hobane anda hayagoha ege pabe bu mabu bini. Pabe ogodagua bini. Tigua ege to̱le̱ bayaleore podo tiga bini wiyagome duguni halu tebira dunga hene. Ani buwa ira tamia podo wiyagome wiadambi hama pene. Tigua anidagua dege bialu pabe bu maro bini. Tigua pabe ogoni ala wali agali ngoai haga anda Anduane Homogonaga anda harabani heagobibi mende anda hobane Anduane Homogonaga anda heagobi dege bu helene.
1KI 7:13 Agali mbira ibu mini Hurama henego ibu Taia tanoha haga hene. Agali ogoni ibu ege to̱le̱ boronosime mbirale tara tara ngaru wabiaga mugubeyi hene. Hurama ibu aba Taiali dege howa homenego ibuguabi nde boronosime mbirale tara tara anidagua wabiaga mugubeyi dege hene. Hurama ibu ai̱ya Nabadali hameigini aria berene. Anigo Solomonohanda Hurama ibabe lalu lawia hayagola ibini. Íbu howa ege to̱le̱ boronosime mbirale tara tara ogoale wabibe lalu Solomono ibugua lamiyadagua bialu hene.
1KI 7:15 Hurama ibugua boronosime anda gene luni kira ogobi labolabo wabu helene. Luninaga magi mida halira halu timbuninaga mida duriani maru bolangua hene wabu helene.
1KI 7:16 Ani wabuwa anda gene kira ogoni labonaga nguni daligahayagi hela dambi holenebi wabu wini. Daliga wiadambi holene ogoni luninaga magi mida kirani bolanguahe wini.
1KI 7:17 Ani buwa mbirale nu ale mbira boronosime wabuwa anda gene biagonaga nguni daligahayagi mabu buwa mo yáribia halu gerelapebe bu helene. Anda gene kirabalinaga nu ogoniale karia labolabo girigerelo helene.
1KI 7:18 Ani bu helowa ibugua boronosime ira mbira mini pomegaranade lini ale dewaore wabuwa uruni nu ale wabu helayagoria gerelapebe bialu anda gene biagolabo mo yári bia hene. Gene biago labo kirabalinaga ira lini ale ogoni duguni kira labolabo wabu helene.
1KI 7:19 Anda gene uruninaga nguni daligahayagi palawaya ale lini yanga nale wene bayale hondoabi mbira daraligobi handalehe helalu palawaya ale irane handalehe ogoninaga luni magi mida mbirani bolanguahe helene.
1KI 7:20 Anda genedago labonaga nguni daligayagi dege nguni mabubu helowa Huramahanda nu ale wabu wiyago odagoriani wiadambi hene. Ani ngelowa ibugua ira pomegaranadenaga lini ale wabu wiyago nu ale ogoriani duguni kirani pongobia haga bini. Anda gene mbira mbiranaga pomegaranade lini handalehe ogoni ale handari kira (200) labolabo helaga bini.
1KI 7:21 Hurama ibugua anda gene kira ogonilabo wabiai hayagola tigua mo yalu puwa Anduane Homogonaga anda haneni talebu helene. Anda gene helenedagoni mendego mini Yagini lalu anda haraba abene unurayagi wiagoria helene. Anda gene mende mini Boasa lenedagoni abene uyurayagi helene.
1KI 7:22 Ani helowa anda gene biago labonaga nguni daligahayagi mbirale palawaya handalehe biago heaore helene. Ani bialu anda gene ogoni labonaga biabe bulene winigo bu maro bini.
1KI 7:23 Hurama ibugua ege to̱le̱ boronosime iba dange mbira wagororobi wabini. Be ogoni ibunaga daligahayagi manda bialu mida kirani bolanguahe halu aranenaga mida mariani bolanguahe dege wialu timbuninaga mida haleria (13) bolangua hene wini.
1KI 7:24 Ani bialu iba dange ogoninaga neneni mbirale mbira geromi lini handalehe wabuwa duguni kira mabubupe helene. Ani bialu dombeneha mida mbira mbira yu wahaga buwa bigiya pira pigane iba dange wabialu howa wabumaga henego uruni mo helene.
1KI 7:25 Hurama ibugua nogo bulumaga wangabe handalehe homberia (12) wabu winigoria erembirani iba dange biago mo wini. Ani mo wiagola bulumaga uruninaga herenehayagi iba dange biago tibinime dambi helalu wanakui handa tagitagibu helaga bini. Mbirale bulumaga handalehe uruni aria tebira ni tagira ibiragohayagi handa amuho helalu tebira mende ni paliragohayagi handa daibu helalu tebira dege tebone uyurahayagi handa uyuho helalu tebira dege mane unurahayagi handa unuho helene.
1KI 7:26 Iba dange biagonaga tamuhayagi howa tagirahayagi tohenaga magi sendimida halira gi hondone dunuyanego ale wini. Ani wiagola iba dange biagonaga poneni palawaya ale lini yanga nale wene dedaligobi wini. Iba dange ogoniha iba timbuniore lida magi daosini pira maria (40,000) birulene wabu wini.
1KI 7:27 Hurama ibugua wilibaro ale pira iba dange emene wiaru yulenaga wabu wini. Wilibaro uruninaga arane bibahendeha ogobi dege dege magi manda bialu mida mbirani bolangua hene halu daliganaga mida mbirani bolangua hene dege dege wabu wini.
1KI 7:28 Pigane ogodagua wabini. Pigane wilibaro irane ala wabuwa mani howa boronosime bigiya budi gabua timbuni laiono handalehebi nogo bulumaga wangabe handalehebi dahuliyali mitangi bialubi uruni ale wabu wigi binigo ai uruni wilibaro biagonaga hai bialu para haga bini. Ani buwa wilibaro iranedago para hadambi hai nahe dege wini. Wilibaro uruninaga iranedagoria henge mbira mbalo ale yárinaga ngelaga bini. Mbalo ale henge ngelaga binidagoni laiono bulumagala heago andaneha ngelaga bini. Ani bialu mbalo aleni yári biagoria laiono bulumagala heagonaga daligahayagibi andanehabi ngela dege bini.
1KI 7:30 Wilibaro ale uruninaga gene maria ege to̱le̱ boronosime dege wabuwa ge polenenaga wabu helene. Wilibaro ale uruninaga gibuni mariani iba dange biaru yani helonaga boronosime wabuwa helaga bini. Uruni bibahendenaga giligilibi maru mbalo ale wabu helaga bini.
1KI 7:31 Ani bialu boronosime wabini wagororobi mbira wabuwa gene boronosime dege wabuwa ogoriani mo pagaho ngelene. Ani ngelowa iba dange biago ogoriani mo pagaho ngelene. Ani buwa wilibaro ale biagoria howa iraga halu iba dange biago berelolenenaga mbirale wagororobi wabu wiyagonaga tibinihayagi howa magi manda bialu sendimida pira mariani duria (45) wini. Anigo ai wilibaro ale biagoria howa manda bialu uyura iba dange biraga mabubi biagonaga daligahayagi daliganaga magi manda bialu sendimida pira waragariani huniane karia (67) wini. Mbirale iba dange wiaga mabubi ogoninaga windonaga bigiya hai helowa windodagoha bigiya tara tara buhe wini.
1KI 7:32 Wilibaro ale uruninaga ge mbira mbirago timbuninaga sendimida pira waragariani huniane karia (67) wini. Ani bialu ge mbira mbira helaga biaga boronosime wabini homane uruni Hurama ibugua tara wabialu yapara halu helene ndo wilibaro ibuni wabialu howa wabumaga hene wini. Ge uruni ti laiono handalehe wabu helayago andaneha wabu helene.
1KI 7:33 Ge uruni ti wai bu polenenaga garo ale mini karisinaga ge heagobi dege wabu helaga bini. Ani bialu mbirale marubi wilibaro ge uruni hongo helonaga yania haga bulene ale bibahende boronosime hangu wabuwa helai hene.
1KI 7:34 Ainde Hurama ibugua mbirale wagororobi iba dange berelolene biagobi mbirale homane iba dange yani holene biagobi bibahende hangu hangu wabuwa wilibaro ale biagoria bapara hene ndo bibahende mbiraore hangu wilibaro ale wabiyangi wabumaga hene. Iba dange wulene wagororobi biagonaga magi iraganaga sendimida pira kirani kira (22) wini.
1KI 7:36 Iba dange yania haga biagoria windo ale hama piyagoria bigiya tara tara dahuliyali manda bialubi laionobi ira ayage ale mini dedibi iba dangenaga gene heagoriabi Hurama ibugua uruni ale wabu helaga bini. Bigiya wabibehe henge wigi biagoria Hurama ibugua mbirale uruni ale wabu helaga bini. Ani wabu helowa mbirale wagororobi mbalo handalehe biagoria bigiya odaruni wabu mabu bini.
1KI 7:37 Hurama ibugua wilibaro ale pira uruni ogobi dege dege wabu ngelowa bigiya wabu helalu yári tara tara helaga biyarubi nde mbiraore ale dege helai helene.
1KI 7:38 Hurama ibugua iba dange pira wilibaro ale pirani ta howa ngelolenaga wabu wini. Iba dange uruni aranenaga magi mida mbirani bolanguahe wabu wini. Ani bialu iba dange uruni mbira mbiraha iba timbuniore berelolenaga magi lida handari halira (800) hambu yabehe wabu wini.
1KI 7:39 Hurama ibugua mbirale uruni wabiai howa wilibaro ale duria Anduane Homogonaga anda hái abene unurahayagi heagoria wini. Ani bialu duria mende anda hái abene uyurahayaginaga heago kawareni wiapara howa ngelene. Ani ngelowa iba biraga dange timbuni biago anda tagira abene unurahayaginaga gibuni wiagoria mo ngelene.
1KI 7:40 Hurama ibugua wayawaya bulene ndisibi nama tabulirubi ndisi emenerubi bibahende wabiai hene. Ani bialu Hurama ibugua Anduane Homogonaga andaha biabe uruni bibe lalu Kini Solomonohanda mo miyaruni bibahende biai hene.
1KI 7:41 Hurama ibugua wabinidaruni bibahende lamaga halu uru ale. Anda gene luni boronosime wabini kira wabialu ogoni labonaga nguni daligahayagi dambi holene manda ale kirabi nu ale nguni daliga dambi hayago mo yári bia holene biarubi wabini.
1KI 7:42 Ani buwa ira mini pomegaranade lininaga bigiya handari maria (400) nu ale wabu helayagoria mo yári bia halu pongo bia haga bulenerubi anda gene mbira mbiranaga lini biagonaga bigiya duguni kira labolabo wabu helalu bini.
1KI 7:43 Ani bialu wilibaro ale pira wabialu iba dangebi nde wilibaro ogoriani pira dege wabu wini.
1KI 7:44 Ani bialu iba dange timbuni biagobi nogo bulumaga ale homberia (12) iba dange ogoni yu heleagobi wabini.
1KI 7:45 Ani bialu ndisirubi nama tabulirubi ndisi emenerubi wabiai hene. Hurama ibugua Solomonohanda anidagua bibe layagola Anduane Homogonaga andaha wulene ale uruni bibahende wabu wiai hene. Mbirale uruni boronosime wabu wiai howa mo bayale helonaga mbirale ha̱i̱ hagame baya hanguore ha̱i̱ howa domo mbaralo wahai ho ngelene.
1KI 7:46 Kini Solomono ibugua Huramahondo mbirale wabia layagoni dindi ulini panda panda mbira Iba Yodana angeha Sugodo tanoha Saredana tanola hengene wiagoha howa wabialu hene. Dindi abene orahayagi mbirale uruni wabialu holene karulapeyane hondowa ani bini.
1KI 7:47 Ani buwa Hurama ibugua mbirale boronosime wabinidaruni dewaore wabu wini. Ani biyagola Solomono ibugua agali maru hearuhondo mbirale wabiyadaruninaga boronosi genda magi agiradabe hondole genda magi daga ladaba nale wahene. Uruninaga genda magi ogodagua lalu agali mbiramebi mbira manda nabi hene.
1KI 7:48 Solomono ibugua agali biabe biaga hearuhondo Anduane Homogonaga andaha ngelole ngolome mbirale maru wabidaba lene. Ani layagola agali biabe biaga hearume lomabu delaga dabubi wali agalime mberedi Anduane Homogohondo minigo mo wiagane dagiabi ngolome wabu helene.
1KI 7:49 Ani bialu ngolo bayaleore wiarume lamu hale irane pira helowa Anduane Homogo Andanaga Hobane Loma Bia Heneore laga heagonaga anda háini lamu delo wigi bulenaga wabu wini. Lamu hale uruni duria gi tigahayagi paga halu duria mende gi lehayagi paga hene. Ani bialu ngolome dege palawaya ale wabialu lamu wabialu ira tabolene perobi wabu wia dege bini.
1KI 7:50 Ani bialu ngolo bayale wiarume nogo darama loma bini hambu yulenenaga gabo bebi ndisi marubi mbirale mbira lamu mo hundia haga alebi ira hagua ngabiaga inisenesi delolene beledi bebi ira dene hedo yulene beledibi wabigi bini. Ani buwa anda Hobane Loma Bia Heneore laga heagonaga panga wabiaga alebi hobane mende Loma Bia Hene laga heagonaga panga wabiaga alebi bibahende ngolome dege wabu helaga bini.
1KI 7:51 Kini Solomono halu ibunaga biabe biaga agali hearubi tigua Anduane Homogonaga andaha biabe bulene wiago biai hene. Biai howa Solomono ibugua silibabi ngolobi ndisibi mbirale bibahende ibu aba Debidihanda Anduane Homogonaga loma biaho wini wiaru uruni ale Anduane Homogonaga anda hobane tamu heagoha mo yu puwa ngelaga bini.
1KI 8:1 Kini Solomonohanda Isaraele hameigini bibahende hearunaga agali haguane hearuhondobi hameigini emene emenenaga agali haguane hearuhondobi uruni ti bibahendeore ibuni koria Yarusaleme ibai halimu lama pudaba lene. Uruni tigua Debidinaga tano Saiononi Anduane Homogonaga Habo Nalolene Bi lo winigonaga Mbogoyi biago Anduane Homogonaga anda Yarusalemeni ngelo mo yalu ibule pudaba lolenaga ani lamule bi yalu purogo ladaba lene.
1KI 8:2 Ani laya handala lamima purogo layagola bi ogoni hale halu agali uruni tigua mali ogoninaga ege kane layagola Isaraele wali agali ti Anda Nemandaruha Palu Holene Horo winigo ogoningi ti bibahende íbu ngoai hene.
1KI 8:3 Agali haguane biaru íbu ngoai heagola loma binigo mo miaga hearu tigua Mbogoyi biago mo yalu
1KI 8:4 Anduane Homogonaga anda heagoria yalu pene. Ani buwa loma binigo mo miaga biarubi Libai agali hearubi tigua Anduane Homogonaga Balai Anda heago gialo yalu Balai Anda ogoniha wiaga wiaru bibahende mo yai halu Anduane Homogonaga anda heagoria kaware pene.
1KI 8:5 Ani mo yalu ibiyagola Solomonobi Isaraele wali agali bibahendebi Mbogoyi biago mo yalu ibiyagoria kaware mo ngoai ho hene. Ani mo ngoai howa tigua nogo sibirubi bulumaga wangaberubi dewaore daga labenahe Anduane Homogohondo loma biniru bo delalu hene.
1KI 8:6 Ani bo delai halu loma binigo mo miaga biaru tigua Mbogoyi biago Anduane Homogonaga anda biagoha tamu Hobane Loma Bia Heneore biagoha mo yalu anda puwa dahuliyali handalehe wabini biago labonaga babagane andaneha ngelene.
1KI 8:7 Babagane yabulalu haradaguabi wabu helayagome Mbogoyi biagobi iraho yaga ira luni kira biagolabobi bibahende babagane kira biagolabome dambi hai helene.
1KI 8:8 Ira kira Mbogoyi iraho yaga ogoni labo lunioreyagola anda tamu Hobane Loma Bia Hene laga mende tagirahayagi heagoria howa ira ogoni labonaga nguni panigi handabehe wini. Anigo tagirahayagi howa handabe nahe wini. Ira ogoni labo anidagua wiaho wiaabo haga wini.
1KI 8:9 Mbogoyi ogoniha ege to̱le̱ kira Anduane Homogonaga bi mana gilibu wini biagolabo dege wini. Bamba Isaraele wali agali Iyibi dindi wahalu Hari Sainai heagoria íbu heangi Anduane Homogohanda ti heba Habo Nalolene Bi mbira lowinigo ogoni ege to̱le̱ kirani gili buwa Mosesehanda Mbogoyi ogoniha yu ngelene.
1KI 8:10 Ani bialu loma binigo mo miaga agali biaru tigua Mbogoyi biago tamuha mo ngelalu tini tagira ibiyagola beraliba aleme Anduane Homogonaga anda biagoha íbu to̱lai hene.
1KI 8:11 Anduane Homogo ibunaga wá taraore holeneme beraliba biagoha howa wá timbuni demborerebi hatagi hene. Ani hayagome loma binigo mo miaga biarume tinaga biabe bulene wiaru bule dai bibe nahe hene.
1KI 8:12 Ani biyagola Solomono ibugua Anduane Homogohondo bi ogodagua lalu, Anduane Homogo-o í̠nime lalu, I̱ beraliba hari mindini ngaruha holebero, larigoni.
1KI 8:13 Anigo ai áyu i̱na í̠naga anda baya taraore bia kogonigo í̠ni ogoniha haaboboore habelo kagoni, lene.
1KI 8:14 Kini Solomono ibugua Anduane Homogohondo bi lai howa wali agali bu hearuha handa amu howa Ngode Datagaliwabehanda ti mo bayale helo lowa bi lahene.
1KI 8:15 Ibugua lalu, Anduane Homogo ina Isaraele wali agali kamarunaga Ngode Datagaliwabe kago ibunaga mini mo yaraga hama. Ibugua bamba i̱ aba Debidihondo mbira buleberogo lo winigo áyu biyada. Debidi ibugua Isaraele wali agaliru ti Anduane Homogo inanaga Ngode Datagaliwabe mitangi bialu ibuhondo lotu lalu ibuni kagoha kaware hole ibilonaga anda mbira bule manda bialu hene. Ani bule biyagola Anduane Homogohanda ibuhondo lalu, I̱na i̱naga wali agaliru Iyibi dindi howa haru tagira ibirungi hama ibinigo ibalu áyu ogoni howa tigua íbu ngoai howa i̱nihondo mitangi bialu lotu lalu holene anda mbira Isaraele dindiha tano wiyaru mbirani bilimu lalu nalami haru. Debidi í̠na i̱naga wali agaliru haru habelo dabo helaro. Í̠na i̱naga anda timbuni mbira bia hole manda birigoni bayale dege.
1KI 8:19 Anigo mani howa í̠ igini mbirame wali agali i̱ni koria ibalu i̱ mitangi bialu lotu lelonaga anda ogoni bilo áyu í̠nime i̱naga anda nabulebere, lalu Anduane Homogo ibugua Debidihondo lamiyago, lalu Solomonohanda lene.
1KI 8:20 Ibugua laho wialu lalu, Anduane Homogohanda bi ogonidagua lowinigo áyu heneneore lola hai helayada. Ai ina bibahende ibuni kagoria kaware pialu lotu lami̱yanaga i̱na Anduane Homogo Isaraele wali agalinaga Ngode Datagaliwabenaga anda mbira bidogoni.
1KI 8:21 Anda ogoniha Anduane Homogonaga Habo Nalolene Bi lo winigonaga Mbogoyi biago tamuha mo yu íbu ngeledogoni. Mbogoyi ogoniha bamba inanaga mamali Iyibi dindiha howa haru tagira ibiyangi ege to̱le̱ kirani Anduane Homogohanda ina baba Habo Nalolene Bi gilibu wini biagolabo ogoniha nga, lalu Solomonohanda ani lene.
1KI 8:22 Ani lai howa Solomono ibugua Isaraele wali agali bibahendenaga deni lomabu delaga dabu wiagoria pu howa ibunaga gi yaraga halu lalu,
1KI 8:23 Anduane Homogo ina Isaraele wali agali bibahendenaga Ngode Datagaliwabe-o dahuliya andagahabi dindihabi mbira í̠ kegobi mende naheore. Ani kegobi howa iname mana beremaru í̠ninaga deni bayale hangu bialu howa mana ko ngaru mitangi nabi kamagola í̠na í̠ninaga Isaraele wali agali baba habo nalolene bi lo wirigo mitangi bialu ina gubalini haabo haga ke.
1KI 8:24 Í̠na bamba í̠naga biabe bia haga i̱ aba Debidihondo bulebero lalu bi mbira lo wirigo mitangi bialu áyu bi ogoni heneneore lola helarida.
1KI 8:25 Ai Anduane Homogo ina Isaraele wali agalinaga Ngode Datagaliwabe-o áyu i̱na í̠hondo bi mbira hale harogo. Bamba i̱ aba Debidihondo mbira bulebero lalu bi mende lo wiriyago manda bibe. Í̠na ibuhondo lalu, Debidi-o í̠ igini aguaneru tigua i̱ni baya hangu talima ibaabo halubi i̱naga deni ibagabu halu í̠na bialu haga wiridagua biyagua nde í̠naga aguane uruni ariame hangu Isaraele wali agalinaga kini haabo holebira, lariyago.
1KI 8:26 Ai ina Isaraele wali agalinaga Ngode Datagaliwabe-o í̠na i̱ aba Debidi í̠naga biabe biahaga biagohondo ani buleore lalu bi ogonidagua lo wiriyagobi heneneore lola helonaga ani bibe lalu langero.
1KI 8:27 Anigo Anduane Homogo-o heneneore dindi o ngagoha í̠ holene karulapedabe. Dahuliya andaga timbuniore howa ogoniha í̠ holene nakarulape ngegodago ai i̱na anda emeneore áyu o bu hela kogo í̠ holene karulape agua holedabe.
1KI 8:28 Ai Anduane Homogo i̱naga Ngode Datagaliwabe-o í̠naga biabe biahaga kogonigo áyu i̱naga bi ogoale bibe larogo hale habe. I̱na í̠hondo hale halu bibe lalu langerogo bibe.
1KI 8:29 Í̠nime í̠naga anda ogonigo wali agaliru ti anda ogoniha anda ibalu í̠ni kegoria kaware ibilo dabarigoni. Aniyagua horo bibahendengi anda ogoniha de handape haga bibe. I̱na horo bibahendengi anda ogoniha handa amuho howa í̠hondo biamogo bibe larogola í̠na i̱naga bi hale halu bibe.
1KI 8:30 Anduane Homogo-o i̱nibi í̠naga Isaraele wali agali bu kamarubi iname í̠naga anda ogoniha handa amu howa í̠nihondo bi mbira laramagola í̠na dahuliya andagaha kegoriani howa inanaga bi laramago hale halu iname ko birimadaru domo wahaga bibe, lene.
1KI 8:31 Solomonohanda laabo halu lalu, Mbirali ibu damene mendeali kagome ibuhondo í̠ kagua mbira biri laragola ogoni ibugua anda ogoha anda ibuwa í̠naga lomabu delaga dabu ngagoria kaware ibalu ibu bi heneneore laro lalu i̱ kagua nabi layagua nde
1KI 8:32 Anduane Homogo-o í̠ dahuliya andaga howa mbirali ibunaga bi ogoni larago hale halu í̠na mana tigabi ngadagua bialu mo tiga bibe. Agali mana kagua biaga hayadago ibugua biyadagonaga pani mibe. Wali agali bu karunaga deni agali biagome ko mbira nawi kago ibuha ko para nahe kagoni lowa walia halu ibuhondo bayale bibe.
1KI 8:33 Í̠naga Isaraele wali agali kamarume inanaga waitigi baba wai bialu kamaria iname í̠hondo mana ko birimagome inanaga waitigime ina balu wayali helaregola iname ko birimadarunaga mini beregedalu í̠ni keria anda ogoha ibuwa í̠hondo bi lalu, Inanaga ko birimaru domo wahabe larimayagua
1KI 8:34 Anduane Homogo-o í̠ dahuliya andaga howa í̠naga wali agali bu kamarunaga bi hale halu ko birimago domo wahabe. Ani bialu inanaga waitigi karume ina dindi tara mendeha haru piyago í̠nime dindi bamba ina mamaliruhondo minigo ina dindiore ogoria lone haru dai bibe.
1KI 8:35 Ina wali agali í̠naga bu kamarume í̠hondo mana ko mbira bialu kamaria ina pani ngialu inanaga dindi ogoria iba dalu naibilo gaea hangu biaho ngelaregola mani ina mini beregedalu anda o kagoha í̠ni keria handa amu howa bi larimayagua
1KI 8:36 Anduane Homogo-o í̠ dahuliya andaga howa í̠naga Isaraele wali agali bu kamaru dara halu inamebi kini kagomebi ko birimadaru domo wahabe. Ani bialu iname mana tigabi bayale ngaru hangu talialu bialu holoma̱ya lawai habe. Ani bialu dindi ogo inanaga dindi ogoniore ngelo í̠na bamba inanaga mamaliruhondo mini wirigoria iba dalu ibilabe.
1KI 8:37 Solomonohanda laabo halu lalu, Inanaga dindi ogoria hina gariangi timbuni piyaguabi warago hongohe tara tagira ibiyaguabi puyabu poboyogobi hongohe tara mbira ibalu inanaga mabuha tomo hengene andaho karu mo ko hayaguabi pagaya ale dewaore ibalu mabuha tomo andaho karu nai hayaguabi inanaga waitigirume ibalu inanaga tanoruha kamaria ina bole ho hagirabu yanda hayaguabi warago tara tara ngaru inaha anda ibalu ina mo ko hayaguabi
1KI 8:38 í̠hondo bi laramagola hale habe. Í̠naga Isaraele wali agali ina kamaru aria mbirame í̠hondo ko biyagonaga mitangi bialu bu miniha genda howa dara halu anda ogo kagoha í̠ keria handa amu howa gi dogolalu í̠hondo bi layagua
1KI 8:39 Anduane Homogo-o í̠ í̠ni dahuliya andaga howa tinaga ko biyago domo wahalu tigua bi larago hale habe. Í̠nime hangu wali agali bibahendenaga bu miniha mitangi bu kagobi manda biai ho ke. Ani manda biai ho kegome wali agali tigua mana koyaguabi bayaleyaguabi biyadagua dabalu pani miadai bibe.
1KI 8:40 Ai í̠naga wali agali kamaru í̠na dindi ogoni inanaga mamaliruhondo mirigo ogoriani howa ina bayale tigabi bialu í̠ni andaneha haabo holoma̱ya ogonidagua bibe.
1KI 8:41 Dindi tara tara ngaruha howa wali agali bu karume í̠naga mini timbuni daliga mini lene ngago hale halubi biabe timbuni í̠naga wali agali bu kamaru biamogo biridago hale halubi mbiralime ibunaga dindi yu wahalu í̠ mitangi bialu lotu lole lowa anda ogoha ibuwa í̠nihondo lotu lalu bi layagua
1KI 8:43 Anduane Homogo-o í̠ dahuliya andaga howa o biagome í̠hondo bia lalu hale harago ale bibe. Í̠naga Isaraele wali agalirume í̠ andaneha kamadagua wali agali dindi tara taraha karume í̠ manda biai halu í̠ andaneha ibalu hai helo ani bibe. Ani bialu howa i̱na anda o bidogo í̠naga andaore kagonidalo manda bialu wali agali bibahende anda o kagoha ibalu í̠ni mitangi bialu lotu lolene ngago manda biai holebira.
1KI 8:44 Í̠na inahondo, Dindi mendeha tínaga waitigi karu baba wai bule pudaba, laregola bialu howa ina dindi tara ta nabi kamagoha howa i̱na anda ogo Anduane Homogo í̠naga helo binigobi tano ogoni í̠na dabo ngelarigobi ogoniha handa dai bu howa ina ẖ́ondo bi larimayagua nde
1KI 8:45 Anduane Homogo-o í̠na dahuliya andaga howa inanaga bi laramaru hale howa ina dara halu inanaga waitigiru balu wayali holoma̱ya ina pele ngibe.
1KI 8:46 Wali agali bibahendeme ko biai haga kamago ai í̠naga wali agali iname í̠hondo ko bialu kamaria í̠na inahondo keba howa inanaga waitigi karume ibalu ina baba wai buwa ina bo garabaya bu yalu dindi tara kaundia kawarehayagibi minu yalu piyagua í̠naga wali agali bu kamarume í̠hondo bi laramago hale habe.
1KI 8:47 Mani inanaga waitigi dalu dindi tara uruniha howa inanaga ko birimaruni mitangi bu dai bialu inane mini beregedarimayagua nde Anduane Homogo-o í̠na inanaga bi laramago hale habe. Heneneore inanaga waitigi dindi ngaruha pu howa í̠nihondo hongo howa mini mbiraore wuwa í̠ hangu mitangi biaabo halu inane mini beregedai howabi ainde bamba í̠na dindi ina mamaliruhondo mini biagohabi í̠ninaga tano dabo helarigohabi i̱na í̠naga anda wali agaliru ti ogoniha ibalu í̠ni keria ibilo bia harugohabi handa daibu howa í̠hondo bi lalu, Iname mana ko bulene wiaruha pu pebe bialu howa ko dewaore bialu harimago, lapani halu langirimayagua
1KI 8:49 í̠ dahuliya andaga howa iname bi laramagola hale halu ina dara halu biamogo bibe.
1KI 8:50 Ani bialu nde í̠naga wali agali bu kamarume mine halu mana ko bialu harimaru bibahende í̠na domo wahai halu inanaga waitigi karume ina dara halu biamogo bilo í̠nime mo manda bia habe.
1KI 8:51 Anidagua bulenego irane ina í̠naga Isaraele wali agaliore kamagoni ndobe. Ina Iyibi dindiha ira hongohe daraligobiha kuni duguabe naheore wiagoha hemaria í̠nime ina dugu ede halu haru tagira ibirigoni.
1KI 8:52 Anduane Homogo Bibahende Haru Haame Ho Haga Kego-o í̠naga wali agali bu kamarume í̠hondo bi lalu kamarubi inanaga kini kagome í̠hondo bi lalu kagobi iname í̠hondo ina biamogo bia lowa bi lalu kamago bibahende handalu dara howa hale habe.
1KI 8:53 Irane wali agali maru hearuni helowa ina Isaraele wali agali dege dabowa í̠ninaga wali agaliore daba bagiho helowa í̠nime ani bule lalu lo wirigonidagua bibelo. Í̠ninaga biabe biahaga Mosesehondo inanaga mamaliru bamba Iyibi dindi howa haru tagira ibiringi buleore lalu lo wirigodago anidaguaore bibelo laro, lalu Solomonohanda Anduane Homogohondo bi ogoni lene.
1KI 8:54 Solomono ibu ge duli hangaho biruwa ibunaga gi kirabali dogoladaga howa lomabu delaga dabu wiagoria Anduane Homogohondo bi lalu berenego lai halu heyuwa
1KI 8:55 ibugua Ngode Datagaliwabehanda Isaraele wali agali bibahende mo bayale helonaga bi wali agali bibahendeme hale hai helo hongo howa ladaga halu hene.
1KI 8:56 Ibugua lalu, Anduane Homogonaga mini yaraga hama. Ibugua buleore lalu bamba lo winidagua mo palia holenebi gi nahe hada payabu holenebi ibunaga Isaraele wali agali ina kamaruhondo ngiyada. Buleore lalu bamba ibunaga biabe biahaga Moseseha howa lo winiru mbira wanahe biaiore hayada.
1KI 8:57 Anduane Homogo inanaga Ngode Datagaliwabe ibu bamba inanaga mamaliru baba mandagi hama ibinidagua áyubi nde ibugua ina yu wanahe ina baba mandagi haabobo helo.
1KI 8:58 Iname ibu mitangi biaabo halu ibu gubalini holoma̱ya mo manda biaabo haragola iname ibunaga hariga bayale mo wia kagoria pialu howa ibunaga bi mana bamba inanaga mamaliruhondo lamini ngaru baya hangu taluwa bialu holoma̱yanaga hameledo.
1KI 8:59 Ai horo bibahendengi Anduane Homogo inanaga Ngode Datagaliwabe ibunime i̱na ibuhondo bi áyu laruruni mitangi biaabo helo laro. Ani buwa ina ibunaga Isaraele wali agali kamarubi inanaga kinibi horo mbiru buru padamadagua ibugua ina dara howa biamogo biaabo helo.
1KI 8:60 Ani bialu kago hondowa dindi tara tarani wali agali hameigini bu karume hondowa Ngode Datagaliwabe tara mende nahe Anduane Homogo ibuni hangu heneneore henedane hondolebira.
1KI 8:61 Ai ibunaga wali agali kamiru tígua horo bibahendengi Anduane Homogo inanaga Ngode Datagaliwabe ibuni kago mitangi biaabo halu ibu andaneha hangu hai halimulo hameledo. Áyu howa ibunaga mana lowini ngaru baya hangu taluwa bialu kamidagua mani ani biaabo halu halimulo hameledo laro, lalu Solomonohanda lai lene.
1KI 8:62 Kini Solomono halu ibunaga wali agalirume Anduane Homogohondo nogo tara tara lomabu miniru bo delene.
1KI 8:63 Ibugua bulumaga daosini pira kirani kira (22,000) bo delalu nogo sibi daosini dege handari mbirani pira kira (120,000) Anduane Homogola ho gimbu bulenaga lomabu miniru bo delene. Kini biagobi wali agali bibahende hearubi tigua ogonidagua bialu anda biago Anduane Homogonagaore helo loma bia ho helene.
1KI 8:64 Horo ogoningi dege dindi henge timbuni mbira Anduane Homogonaga anda ogoni heagoria winigo ogonibi ibunaga ngelo lowa ibuni loma bia howa ngelene. Ani binigo ai dindi odagoria Solomono ibugua nogo maru irani delai holene loma wiarubi widi lomabu mulene wiarubi nogo o biarunaga habane Anduane Homogola ho gimbu bulenaga lomabu delolene wiarubi ogoriani delai hene. Dindi odagoria lomabu miniru bo delenedagoni irane lomabu mialu bo delaga dabu boronosime wabini henedago emene halu lomabu miniru delai habe naheyagola anidagua bini.
1KI 8:65 Horo ogoningi Isaraele wali agalinaga Anda Nemandaruha Palu Holene Horo hayagola Solomonobi Isaraele wali agali bibahendebi mo ngoai howa Yarusalemeni hene. Ti horo karu ala mo ngoai ho howa horo karu halu mende ngoai halu biyagola horo deru (14) bibahende íbu ngoaiho hene. Wali agali Isaraele dindi bibahendeha howa íbu ngoai hene. Uyurayagi dindi gibuni Hamada tano polene hariga tagira pedagoria howa pialu unurayagi Iyibi dindiha tubaria ngagoria howa hilalu ibaiore howa íbu hene.
1KI 8:66 Horo timbuni uruni hai halu Solomono ibugua wali agali uruni tini dalu dai bidaba lene. Ani biyagola nde wali agali tigua Solomono ibugua biyarunaga ka̱i̱ lalu Anduane Homogohanda Solomono mo bayale helonaga bi lahalu pene. Ti andaga pugu pugu bialu howa Anduane Homogohanda ibunaga biabe biahaga Debidi lamialu buleore lalu lo winiyago ibunaga Isaraele wali agali biamogo bialu biaore biyadagonaga turu haga bima tini dalu dai bigi bini.
1KI 9:1 Solomono ibugua Anduane Homogonaga andabi kininaga andabi anda maru bule manda binirubi bibahendeore biai hene.
1KI 9:2 Ani biai howa heagola Anduane Homogo ibu bamba Gibeono tanoni Solomono ibuni hearia hapani henedagua lone hapani hene.
1KI 9:3 Ani buwa Anduane Homogohanda ibuhondo lalu, Í̠na bi larigo abale hale harugo ai í̠na anda bia haridagoni i̱naga anda ogoni lomabu heledo. Wali agali ti anda ogoniha anda ibalu i̱ni mitangi bialu lotu lolebira. I̱nabi handa dali halu horo bibahendengi anda ogoni handaya howa mitangi biaabo holebero.
1KI 9:4 Anigo í̠nime i̱ hangu mitangi biaabo halu i̱naga mana tigabi dege talialu bialu bamba í̠ aba Debidihanda bialu haabo henedagua bialu hariyagua
1KI 9:5 i̱na buleore lalu bamba í̠ aba Debidihondo lamialu Isaraele wali agalirunaga kini í̠naga igini aguanerume haabo helo dabolebero larudaguaore dabo helaabo holebero.
1KI 9:6 Anigo Solomono-o í̠bi í̠naga igini aguane mani hama polebirarubi tígua i̱nibi i̱naga bi mana tigabi bayale ngarubi yu wahalu puwa dama karu mitangi bialu uruni mo tene hama pirimiyagua
1KI 9:7 nde i̱na Isaraele wali agali bibahende dindi i̱na tíhondo ngini áyu kamigoriani nahalimulo bo batagi holebero. I̱na anda i̱ninagaore helo lowa loma biaho helarugoni yu wahalu handa tara holebero. Anidagua berogola wali agali dindi tara tarani bu karu tigua handalu tí mo ngubia halu mege tara bialu holebira.
1KI 9:8 Áyu anda ogo timbuni mini lene ha ani kagonigo mani bo gialo haealabagabu ngagola wali agali hariga ogonidagua pole bolangua hararume de hondowa mogo lalu gi timbuni holebira. Tigua ani hondowa lalu, Irane aginaga Anduane Homogohanda dindibi anda bayale ogobi mo ko hayadabe, lolebira.
1KI 9:9 Ani laga biragola wali agali marume ladai bialu lalu, O bidaruni irane Isaraele wali agali tigua Anduane Homogo tinaga Ngode Datagaliwabe yu wahalu piyagola bida. Bamba tinaga mamaliru Iyibi dindiha hearia ibugua tí dindi ogoria helo haru ibinigo ai áyu tigua Ngode Datagaliwabe yu wahalu puwa dama mitangi bialu bi pupu wiaga wiaruha puwa urunihondo bi pupu wialu hemiria hondowa Anduane Homogo ibugua mbirale mo ko holene ogoni Isaraele wali agali tiha ibilayiya lolebira, lene.
1KI 9:10 Solomonobi ibunaga biabe biaga agali hearumebi Anduane Homogonaga anda biago biai halu ibuninaga anda bialu hene. Mali pira kirani (20) biabe uruni damenego bialu hene.
1KI 9:11 Taianaga Kini Hiramahanda Solomono ibu anda uruni bilonaga ira tamiabi guraya alebi dewaore dibu mialu ngolobi dewa dege anda ogoni bilonaga migi bini. Ani binigo mitangi bialu Solomono ibugua tano pira kira (20) Galilihayagi wiaru bame Hirama tu wa mini.
1KI 9:12 Ani miyagola Hirama ibugua Taia tano howa Galilihayagi tano o miyadaruni hondo ibuwa ibu tano uruni hame nale hene.
1KI 9:13 Ani howa ibugua Solomonohondo lamialu lalu, Tano agi alego i̱ ngeregonibe, lene. Anidagua lenego mitangi bialu wali agalime dindi ogoni mini Kabulu laga winigo nga.
1KI 9:14 Hirama ibugua ngolo Solomono miniru dewaore genda magi timbuni tono mariani maru bolanguahe mini.
1KI 9:15 Kini Solomono ibugua agali dewaore minuwa ti ibunaga biabe hongohe bialu helo helene. Ibugua agali uruni marume Anduane Homogonaga andabi ibuninaga andabi biabe ogoni bialu helo marume Yarusaleme tanonaga pabe biago bu mabu bialu helobi minu helene. Ani bialu marume dindi dugu yuwa Yarusaleme tanoha dindi ulini wupe heyago bo dondo lalu mo tiga bilo minalu bidaba lene. Ani bialu Haso tanobi Megido tanobi Gesa tanobi mo tiga bialu bidaba layago bialu hene.
1KI 9:16 Bamba Gesa tano ogoni Kenanalinaga winigo ai Iyibi kini heagome ibalu wai buwa wali agali bo wahai halu tano ogoni bo heda hene wini. Ani winigo Kini Solomono ibugua Iyibinaga kini biagonaga wane dabu biyangi Iyibi kini biagome Gesa tano ogoni holali ale ibu wane mo turu halu bame mini.
1KI 9:17 Mani howa Solomono ibugua Gesa tano ogoni mo tiga bialu bu aribia haga bialu hene. Ani bialu Bedehorono tano unuyagi laga wiagobi
1KI 9:18 Balada tano wiagobi arema bialu Tama tanobi arema bialu lone biadai bigi bialu hene. Balada Tama tanola Yuda dindihayagi dindi ko iba dalu naibaga wiagohayagi wini.
1KI 9:19 Tano maru wai biaganaga dabudabu mo mogo bu wiagarubi wai biagane garo ale hosime gili laga karisi mo mogobu wiaga tanobi wai biaga nogo hosi helaga tanobi bu helalu bibahende ale Yarusalemehabi Lebanonohabi dindi bibahende ibugua handayaho henegoha bule lo manda bu winiru biaiore hene.
1KI 9:20 Wali agali maru dindi tara tagiraha howa Isaraele dindini íbu hene. Wali agali uruni Amoroalirubi Hidialirubi Peresealirubi Hibialirubi Yabusualirubi íbu haga bini.
1KI 9:21 Bamba Isaraele wali agalime hameigini uruni aria bo wahai henego ai uruni aria yu wahene maru haga bini. Ani heagola Solomono ibugua wali agali yu waheneru ti aguanene uruni garabaya biabe ale bialu helo minu helai henego áyubi ani bialu haabo ka.
1KI 9:22 Anigo Solomono ibugua Isaraele wali agali garabaya biabe ale bialu helo hela nabini. Ami agali holenebi gabumane agali haguane holenebi ami agaliru haru haga agali haguanebi uruni bibahende Isaraele tinime howa birago bialu helo lowa ani helo wahene. Marume ami agali karisini heyu howa wai biaga hearu handayaho halu marume nogo hosini biruwa wai biaga hearu handaya ho halu bini.
1KI 9:23 Solomono ibunaga biabe biagaru bibahende handaya ho haga agali haguane handari duriani pira duria (550) hene.
1KI 9:24 Solomono one ibu Debidinaga Tano biago wahalu Solomonohanda anda gahenge biyagoha pu berene. Wali ogoni ibu Iyibinaga kini heago wane berene. Emene howa Solomono ibugua agali bu hearuhondo Yarusaleme tanonaga lene mbirahayagi dindi ulini wiago dindi dugu yuwa bo dondo ladaba layagola ani bialu hene.
1KI 9:25 Solomono ibugua Anduane Homogonaga lomabu delaga dabu ibunime bu helenegoria mali mbiranaga loma halu tebira bo lomabu delaga biaga hene. Ibugua loma uruni irame dai helobi Anduane Homogola ho gimbu bulenaga lomabi bowa delaga biaga hene. Ibugua Anduane Homogohondo mbirale ngabilo mini inisenesibi lomabu delaga bialu lotu lalu holenagabi Solomono ibugua ani bu helene. Ani bu helenego manda bialu ai ibugua loma pigane bo delalu howa anda ogoni bialu howa ogo ale bule lo manda bu winigobi tagira piai helene.
1KI 9:26 Kini Solomono ibugua iba sibi dewaore Esiongebe tanoni wabu wini. Esiongebe tano ogoni Idomo dindiha Elada tano kaware ngelowa iba solowara mini Daramabi laga bereago angeni Agaba dindi wiagoria wabialu hene.
1KI 9:27 Ani bialu heagola Kini Hiramahanda ibunaga agali iba sibiha biabe mugubeyi maru hearu Kini Solomononaga iba sibiha biabe biaga hearu baba sibi uruniha biabe mandagi bialu helo ibilene.
1KI 9:28 Ani bialu iba sibi uruni dindi mende tara Obiri pialu ngolo wiaru mo yalu Solomono hearia yu dai bigi biaga wini. Ngolo dewaore genda magi timbuni tono pirani maria (14) mo yu ibugu biaga wini.
1KI 10:1 Seba dindinaga kuini wali berenegome hale halu hearia Anduane Homogohanda Solomono mo bayale hayagola ibu mini lene timbuni ka layane hale hene. Ani layago hale howa kuini wali ogoni ibugua Solomononaga manda wiaru ba handalu ibugua bi ladai bibe naheru maru Solomono hale hole ibini.
1KI 10:2 Kuini wali ogonime ibunaga biabe biahaga agali dewaliore haru halu nogo kamelerubi dewaore haru ha bialu Yarusaleme anda ibini. Nogo kamelenaga erekunini ngolo dewaorebi mbirale tara pauda ale nga bayale tara tara biaga wiarubi ege to̱le̱ bayale yolo timbunime miaga wiaru alebi mo paga howa yalu ibini. Anda ibalu ibugua Kini Solomono lola howa bi maru Solomonohanda ladai bibe nahe manda manda bu yalu hale hole ibinidaru hale hene.
1KI 10:3 Ani hale hayagola Solomono ibugua mbirale hale hayaruni bibahende tiga tigaore wiadagua ladai biai hene. Bi hale hayadaruni Solomono ibugua ladai bibe nahe mbira nawi bibahende karulape ladai biai hene.
1KI 10:4 Ani lai hayagola kuini wali ibugua Solomononaga manda timbuni mini gigabi wiagobi kininaga anda timbuni biniyarubi bibahende handai hene.
1KI 10:5 Ani handalu kuini wali biagome Solomono ibugua horo bibahendengi tomo bayale dege naabo halu haga wiagobi ibunaga agali haguaneru ti haga bayale wiagobi bibahendeore hendene. Kini ibunaga biabe biahaga agali hearubi tinaga aga bayale tara tara biaga wiarubi agali waini iba odo tale biaga hearubi hendene. Uruni hondowa Solomonohanda nogoru Anduane Homogonaga andaha loma biniru bo delaga dabu wiarubi hendene. Mbirale uruni biaga wiaru handai howa mogo lalu ibugua bi mbira labe naheore hene.
1KI 10:6 Ani howa ibugua Solomono lamialu lalu, I̱ni dindiha howa hale harugola í̠naga mini mandaru bayale timbuni wu howa í̠na mbirale bayale bereyarubi bibahende hale hai harugo áyu bi layadaruni heneneoredane handa walia ko.
1KI 10:7 Abale i̱na bi hale harudaruni mo henene nahe henego áyu ibuwa i̱nime handalu ai heneneoredane hendedo. Heneneore abale bi hangu hale harugo goyane lowa i̱ni deme taraoredane hendedogoni. Í̠naga mini mandala gigabi ngerubi í̠naga muni ngerubi bibahende dewa timbuni gibioredane hendedo.
1KI 10:8 Ai í̠naga agali bu karuni ti turu hagabu haabo halu í̠naga agali haru haga haguane karuni tibi nde í̠naga mini mandala bayale ngegome ti haru kegola í̠ni heba turu ho haradane hendedo.
1KI 10:9 Anduane Homogo í̠naga Ngode Datagaliwabe ibugua í̠hondo ibunaga miniha howa turu halu Isaraele wali agalirunaga kini habelo dabo helayadagonaga i̱na ibunaga mini yaraga harogoni. Isaraele wali agali tíha ibunaga gubalini holene timbuniore horo mbiruorebi ereba naholene wiaabo howa í̠na manda timbuni bidegomebi mini tigabi bayale ngegomebi manani tigatiga tale bialu ti haru habelo í̠ kini helayada, lalu kuini walime lai hene.
1KI 10:10 Ani lowa Seba dindinaga kuini wali biagome ngolo dewa daga labe naheore genda magi timbuni tono maria Solomono mini. Ege to̱le̱ tara tara yolo timbunime miaga wiarubi pauda ale mo ngabia haga ale tara tara dewabi mia dege bini. Mbirale mo ngabia haga uruni ale Isaraele dindiha ala yalu naibagadaguabi mani nayalu ibulebiradaguabi kuini wali biagome timbuniore yalu ibini.
1KI 10:11 Kini Hiramanaga iba sibi wiaru Obiri dindiha pialu ogoniha howa ngolo dewaorebi ira bayale tara mbiranaga podene dewabi ege to̱le̱ tara yolo timbunime miaga wiarubi dewaore Isaraele dindiha mo yalu ibini.
1KI 10:12 Ani mo yalu ibiyagola Solomonohanda agali ibunaga biabe biahaga hearuhondo lalu, Ira bayale urunime Anduane Homogonaga andabi i̱ni andagabi mo yári bia hadaba, lene. Ira bayale uruni aria maru agalime iba gana lalu ngida ale belo wabidaba, lalu lamini. Uruni biai halu Isaraele dindiha ira bayale urunibi mbira mani nayalu anda ibini.
1KI 10:13 Kini Solomonohanda Seba dindinaga kuini wali biago nde mbirale tara tara dewaore ibuni hame lalu ngi layaru damene miai halu marubi wali agali dindi tara howa ibagaruhondo miagadagua ibugua mia tago halu mini. Ani miya handala mani kuini wali biagobi ibunaga biabe biahaga ibinidarubi bibahende tini dindi dai bini.
1KI 10:14 Mali bibahendengi Solomono ibugua ngolo dewaore genda magi timbuni tono pira kirani tebira (23) mo yu anda ibugu bialu hene.
1KI 10:15 Muni marubi nde agali biyinaya biaga hearume dagisi bu miraru mo yu anda ibaga hene. Arebia dindiha kini hearumebi Isaraele dindiha dindi dunini mbira mbira handayaho haga hearumebi muni yu ibalu ibu miaga hene.
1KI 10:16 Solomono ibugua agali biabe biahaga hearuhondo lalu, Ira pelene mbalapayabi wiarume wai humbi timbuni wabidaba, layagola tigua humbi handari kira (200) wabini. Wabu ngelowa ngolome paraho dambi hai hene. Ngolo para hayadaruninaga genda magi kilogarama karia ale humbi mbira mbirani para hene.
1KI 10:17 Ani bialu humbi maru emene hangu handari tebira (300) wabuwa ngolome paraho dambi hene. Ngolo paraho dambi hayadaruninaga genda magi kilogarama kira hene. Ani biai heagola Solomonohanda agali ibunaga biabe biahaga biaruhondo lalu, Humbi uruni anda hobane mbira mini Lebanono Irabu Anda laga henegoha mo yaanda howa ngeladaba, lene.
1KI 10:18 Ani bialu Solomonohanda kini biraga dagia mbira wabidaba layagola wabini. Ani buwa kini biragane dagia ogoni ngoloru nogo elebeninaga ne gayane garayabirume mo yári bia howa ngelene.
1KI 10:19 Kini biragane dagia ogoni daliga ngelowa ogoriani birule iraga holenaga ge holene egageria waragaria wini. Ge halu iraga holene mbira mbiranaga lene laboha laiono handalehe mbira mbira talebu helama pene. Daga lamaga halu laiono handalehe homberia (12) wabu helene. Biragane dagiadagonaga erembirahayagi mabu bupehe wialu ogoriani biruwa gi paga holenebihe wini. Gi paga holene kirabaliha laiono handalehe mbira mbira lowa kira wabu helene. Kini dindi tara maruha hearu bibahendenaga kini biragane dagia baya gibiore ogonibi mbira nawi mbiraore ogoni hangu wini.
1KI 10:21 Solomononaga gabo berubi bibahende ngolome wabu wini. Anda hobane mini Lebanono Irabu Anda laga biagoha sibunirubi naibirubi ngolo hangume wabuwa wiai hene. Kini Solomono henedangi siliba nagalonedalo manda buwa mbirale mbirale uruni ale ngolo hangume wabiai hene.
1KI 10:22 Solomononaga iba sibi dewa iba solowara timbuniha piaga winiru Kini Hiramanaga iba sibi wiaru heba mandagi dindi bibahendeha ibaga biai haga wini. Iba sibi urunime iba solowarani dindi tara taraha piai halu mali tebirani dai nabi tagira dege ibagabu howa ngolobi silibarubi dewaore mo yalu nogo elebeninaga ne gayane garayabi dewa mo yalu mbirale biango handalehe mini mongi tara tararu minu yalu Isaraele dindi dai bigi biaga wini.
1KI 10:23 Kini Solomono ibugua munimebi mbirale tara tara maru ale wiarumebi ibunaga mini bayale gigabi wiagomebi kini maru hearu bibahende bolangua haihe hene.
1KI 10:24 Agali haguane dindi bibahendeha hearume Anduane Homogohanda mini bayale gigabi Solomono minidago ti hale hene. Hale howa tigua Solomonohanda bi larago hale hoa howa ibu hearia ibugu biaabo haga hene.
1KI 10:25 Mali bibahendengi agali dindi tara tarani howa ibalu mbirale mbirale maru Solomono mule yalu ibugu biaga wini. Tigua ibugu bialu howa mbirale ngolome wabini silibame wabinirubi aga bayalerubi wai biaga yandarerubi mbirale pauda ale mo ngabia haga ale tara tararubi nogo hosiru dongirubi Kini Solomono mule yalu ibugu biaabo haga wini.
1KI 10:26 Solomono ibugua bibahendengi wai biagane garo ale karisirubi ibunaga ami agalirunaga nogo hosirubi dewaore yolo bu hela ngela bigi bini. Ani buwa ibugua karisirubi hosirubi tale bialu maru dindi ibugua handayaho haga maru wiyadaruha tale bu pelalu maru Yarusalemeni ngelo hene. Wai biagane karisi daosini mbirani handari maria (1,400) wialu wai biaga ami agalirunaga hosi daosini homberia (12,000) hene.
1KI 10:27 Solomono kini henedangi muni siliba dewaore daga labenahe ege to̱le̱ dugu paya biradagua bialu Yarusaleme yu anda ibugu biaga wini. Ira tamiabi aulolebe tobahe bame Isaraele dindi hari bare wiaruha howa ira hearu damene bibahendeore dibu yu ibai hene wiradagua bini.
1KI 10:28 Solomono ibugua agali biyinaya biaga hearuhondo ibunaga hosiru Silisia dindiha howabi Musiri dindiha howabi yolo bule pudaba laga hene.
1KI 10:29 Ani lara handala biyinaya biaga agalidarume Musiri dindi puwa wai biaga karisirubi hosirubi yolo mule piaga hene. Karisi mbira mbira hangunaga yolo muni siliba kina ale daosini waragaria (6,000) aleme miaga. Hosi mbira hangunaga yolo muni siliba kina ale daosini mbirani handari duria (1,500) aleme yolo miaga hene. Yolo ani mialu agali uruni tigua hosiru haru ha karisiru mo ya bialu Hidiali kini karia pialu Siriali kini kariabi pu bigi biragola ogoni labo libugua mbirale yalu piagadaruni munime yolo bigi biaga hene.
1KI 11:1 Solomono ibugua dindi tara tara wali berearu dewa hame lalu hene. Ibugua Iyibi dindi kini heago wane mbira dabu ala binigo mani ibugua Moaba walibi Amono walibi Idomo walibi Saidono walibi Hidi walibi dindi tara tara uruni bibahendeha wali berearu dabu biai hene.
1KI 11:2 Anigo wali uruni ti Anduane Homogo kago mitangi nabiaga bereagola abale howa Anduane Homogohanda Isaraele wali agalihondo lamialu lalu, Tígua wali agali dindi mende tara karu nadabu bilimu, lalu lamini. Ibugua lamialu, Isaraele wali agali tígua wali agali Anduane Homogo mitangi nabiaga karu uruni dabu bialu harimiyagua nde tigua i̱ yu wahalu pilimulo haru halu pu tara holebirago heneneore langero. Ani haru halu poragola tígua wali agali uruninaga mbirale dama mitangi bialu gime wabini ngaru talima pialu i̱ni helo waholeberemi, lene. Anduane Homogohanda bi urunibi lo wini wiago ngelowa Solomono ibugua dindi tara tara wali berearu hame lowa wali uruni dabu bigi bini.
1KI 11:3 Solomono ibu one wali handari karia (700) berelalu wali wabuni mende bereneru handari tebira (300) berene. Wali urunime Solomono mo luluya halu ibunaga mini mo batara hayagola ibugua Anduane Homogo erembira mialu yu wahene.
1KI 11:4 Ani bialu ibu agali wahe halu hama dai biyaha wali urunime ibunaga mini mo ba taraore halu mbirale dama mitangi bialu gime wabini wiaruhondo bi pupu wialu hene. Ani biyadagome ibu aba Debidinaga mana bayale wiago mo wahalu ibugua Anduane Homogo ibunaga Ngode Datagaliwabe talia nabi yu wahalu bini.
1KI 11:5 Ani howa ibugua Saidono wali agalinaga dama wali beda mitangi bialu gime wabini mini Asadare laga wiagobi Amono wali agalinaga dama mitangi bialu gime wabini ko ngubiore mini Molege laga wiagobi urunihondo bi pupu wialu hene.
1KI 11:6 Mana ko ogonidagua bialu hayadagome Solomono ibugua Anduane Homogonaga deni mana ko bini. Ibugua Debidihanda Anduane Homogo baya hangu talima pialu hagadagua nape yu wahene.
1KI 11:7 Ibugua Moaba wali agalinaga dama mitangi bialu gime wabini ko ngubiore mini Kemoso wiagonaga bi pupu wiaga henge mbira mo wia hene. Dindi ogoni ibu Yarusaleme tanonaga abene amu ni tagira ibiragohayagi hari nene wiagoha mo wini. Ani bialu Amono wali agalinaga dama mitangi bialu gime wabini ko ngubi mini Molege laga wiagonaga bi pupu wule dindi henge mendebi mo wialu bini.
1KI 11:8 Ani buwa ibu one Anduane Homogo mitangi nabiaga berearunaga dama mitangi bialu gime wabini tigua urunihondo bi pupu wialu ira hagua nga biaga mini inisenesi delalu lomaru bo delaga bilonaga dindi maru tu wu ngelalu bini.
1KI 11:9 Ala Anduane Homogo Isaraele wali agalinaga Ngode Datagaliwabe ibuni Solomono hearia halu kira hapani howa ibuhondo lalu, Mbirale urunihondo bi pupu nawibe, lene. Ani layago lelowa Solomono ibugua Anduane Homogo erebira mialu hene. Ani biyagola Anduane Homogohanda Solomonohondo keba howa
1KI 11:11 ibuhondo lamialu lalu, Hale habe. Í̠na í̠ninaga hame ledego hangu talialu howa i̱naga habo nalolene bi lo wirugo mo habo lalu i̱naga bi mo waharidago. Anidagua biridagonaga i̱na í̠ dindi ogoria kini nahabelo mo waholene manda bido. Ani bialu í̠naga haru haga agali haguane mbirame kini í̠ henegoria ha aribia helolebero.
1KI 11:12 Anigo i̱na mbirale uruni áyu dege biai naholebero. Í̠ aba Debidi mitangi bialu í̠ homedeha í̠ igini mbirame kini ha aribia ho kagola anidagua bulebero.
1KI 11:13 Anigo i̱na i̱naga biabe biahaga Debidi mitangi bialubi Yarusaleme tano i̱ninaga loma bia hene ngago mitangi bialubi í̠naga iginime ibu kini kagola ibu haru holene mo wahaiore nahe Isaraele hameigini mbiraore hangu haru helo helolebero, lene.
1KI 11:14 Anduane Homogohanda Idomo agali mbira mini Hadada ibu Solomononaga mo waitigi helene.
1KI 11:15 Abale Kini Debidi ibugua Idomoaliru baba wai bini. Isaraelerunaga ami agali haru haga Yoabahanda wai o binidagoniha agali Idomo dindini homene wiaru mo hora hene.
1KI 11:16 Ani bialu Yoaba halu ibunaga ami agali hearu heba Idomo dindiha ege waragaru wai bialu howa agali Idomo dindini hearu bo wahai hene.
1KI 11:17 Horo ogoningi Hadada ibu igiri emene heangi agali bo wahai haya handala ibu abanaga biabe biahaga agali hearu baba ibida pora bialu pene. Ti Iyibi dindiha ibida pole
1KI 11:18 pialu howa Midiana dindi yu wahalu pialu dindi ko iba dalu naibaga dindi mini Parana wiagoria pialu hene. Ani pialu tigua agali maru Parana ogoniha hearu heba haru hamaga halu Iyibi dindi pene. Ti Iyibi anda piyagola Iyibinaga kini heagome dindi mbira Hadada tu wu mialu andabi mialu tomo nolenebi mialu baya hangu handayaho hene.
1KI 11:19 Iyibinaga kini heagome Hadadahondo turu timbuni howa wali mbira kini ibu one kuini mini Tabenese bereago hagibuni bereago dabu bilo mini.
1KI 11:20 Ani dabu bu heagola Hadada oneme igiri mbira taba hanayagola igiri mini Genubada wini. Anigo Kuini Tabenese ibugua igiri emene Genubada ogoni ibuni andaga haru puwa ibu igini maru hearu heba mandagi kini andagaha haga hene.
1KI 11:21 Hadada ibugua Iyibi howa hale halu hearia Kini Debidibi Isaraelenaga ami haru haga agali haguane Yoababi homaya layane hale hene. Ani hale howa ibugua Iyibinaga kini biago hearia puwa lalu, Ainde i̱ni dalu dai bulene hame ledogo pu larene poabago, lene.
1KI 11:22 Ani layagola kinihanda ibuhondo hale halu lalu, Irane aginaga í̠ dalu dai bulene hame ledebe. Iya haru oali kabaria í̠ mbirale mbira burupale kebe, lene. Ani layagola Hadada ibugua ladai bialu lalu, I̱ mbirale mbira buru palia nabi kogonigo nde i̱ni daluore dai bia labelo hameledo, lene.
1KI 11:23 Ngode Datagaliwabehanda agali mendebi Eliada igini Lesono ibu nde Solomononaga mo waitigi helene. Agali Lesono ogoni ibu abale Soba dindi puwa agali wai biagabi page biagabi hearu uruninaga haru bamba haga agali haguane ibu hene.
1KI 11:24 Debidihanda wai bialu Hadadesenaga ami agali hearu bibahende balu bo biba hai hayagola Lesono ibu ibunaga dameneru baba ibida pialu Damasagasa tanoha pu hene. Ani pu hearia ibu damenerume ibu biamogo bialu Sira dindiha kini helo mo helene.
1KI 11:25 Ani howa Lesono ibugua Hadadahanda Isaraeleru baba waitigi halu hagadagua ibuguabi waitigi halu hene. Lesono ibu Sirianaga kini howa ibugua Isaraele wali agaliru handabe manga halu turu nahe hene.
1KI 11:26 Solomono ibunaga agali haguane mbira henegome Solomono ibuni erembira mialu ibula waitigi hene. Agali ogoni ibu mini Yaroboama henego ibu aba mini Nebada ibu ai̱ya mini Serua layaru hene. Anigo ibu aba Nebada homene howa Yaroboama ibuni Eberaimi hameigini dindini Sereda tano wiagoria haga hene.
1KI 11:27 Yaroboama ibugua Kini Solomono bope hoa halu henedagoni irane ogo. Solomono ibugua Yarusaleme tanonaga lene mbiraha dindi ulini laga ni tagira ibiragohayagi wiago dindime bomogo bialu hene. Debidinaga tano ege pabe heagobi baya hangu bu tiga bule bialu heagola ogoningi
1KI 11:28 Yaroboama ibugua biabe bayale hongo howa bialu haga hene. Ani bialu heago hondowa Solomono ibugua Yaroboama ibu agali Manase hameiginibi Eberaimi hameiginibi kinihanda tí minuwa biabe ogo bidaba lalu mo mini bialu hearu handayaho helo dabo helene.
1KI 11:29 Ani helayagola howa horo mbirungi Yaroboama ibu Yarusaleme howa hariga wiagoria pialu hearia Ngode Datagaliwabenaga bi mana latagi haga mbira Siloali mini Ahiya lola hene. Ogoningi agali mende tara mbira nahe libuni hanguore harigani hene.
1KI 11:30 Lola hayagola Ahiya ibugua ibunaga aga gahenge bayale mbira bu heneyago ogoni golowa naina homberia (12) podobagabu ngelene.
1KI 11:31 Ani buwa ibugua Yaroboamahondo mbiwia halu lalu, Aga budini biaru í̠naga pira ogo mo ya. Ogoni irane Anduane Homogo Isaraele wali agalirunaga Ngode Datagaliwabehanda i̱ langialu ogodagua laya. I̱na Solomono kini nahelo dugu wahole manda bu ko. Isaraele hameigini pira uruni í̠na haru habelo hamelo ko, laya.
1KI 11:32 Anigo i̱naga biabe biaga agali Debidi mitangi budai bialubi i̱naga loma bia hene Yarusalemebi nde dindi maruha tano maru ngelowa Yarusalemeore i̱ninaga loma bia hene ngelarugodane Solomono ibugua hameigini mbiraore handayaho helo helolebero.
1KI 11:33 Isaraele wali agalihondo ogonidagua buleberodagoni irane tigua i̱ni erembira ngialu puwa Saidono wali agalinaga dama wali beda mitangi bialu gime wabini mini Asadarehondobi Moaba wali agalinaga dama mitangi bialu gime wabini mini Kemosohondobi Amono wali agalinaga dama mitangi bialu gime wabini mini Molegehondobi uruni bibahendehondo mitangi bialu bi pupu wiaga ka. Tigua mana bayale talialu bialu helo helarugo mo wahowa mana mirurubi bi lamirurubi bibahende mo wahai haya. Tigua Debidihanda mana bayale biaga wiaruni mo wahalu i̱na tigua bilo hamelo kogobi nabi wahai haya.
1KI 11:34 Anigo Solomono ibuni kini kago bo dugu wanaholebero. Kini Debidi ibu agali i̱ninaga biabe biagaore helo lowa dabo helarugo ibugua i̱naga bi hale howa i̱naga mana baya hangu taluwa bialu hayago mitangi bulebero. Ani manda bialu Solomono ibu kini kane dege homalu waholebira.
1KI 11:35 Mani Solomono homaragola ibu igini kini ha aribia holebira. Ani birangi i̱na Isaraele hameigini pira ibunaga giha howa gingilo mialu í̠naga giha mo ya holebero.
1KI 11:36 Anigo Solomono igini mbira kini helowa ibugua Isaraele hameigini mbira hangu handayaho helolebero. Ani berogome i̱naga biabe biahaga Debidinaga wá holene hale dedago nahundulebira. Debidi aguanene hangume i̱naga tano Yarusaleme wali agalirume i̱ mitangi bialu lotu lole ibilonaga anda i̱nime loma biaho helarugo handayaho helo kini mbira dabalu helaabo holebero.
1KI 11:37 Yaroboama í̠na Isaraele dindi í̠nime handayaho hole hamelo keruni handayaho howa Isaraele wali agalinaga kini habelo helolebero.
1KI 11:38 Ai í̠na Debidihanda bialu henedagua dege i̱naga mana ngaru talialu i̱naga bi hale howa hariga tigabi i̱nime pobe ledogoria pialu mana tigabi i̱na hame ledogo bialu haabo hariyagua nde i̱na í̠ baba mandagi haabo holebero. Ai í̠ Isaraele wali agalinaga kini habelo dabo helolebero. Ani bialu Debidi aguanene hangume kini helo larudagua í̠na mana uruni talialu biriyagua mani í̠naga aguanene hangume Isaraele wali agalirunaga kini helo dabalu helaabo holebero.
1KI 11:39 Ai Solomono ibugua mana ko biyagonaga i̱na ti mana bialu Debidi aguanene mani holebiraru ti pani muleberogo mialu haabo naholebero laya, lalu Ahiyahanda Yaroboamahondo lamini.
1KI 11:40 Mani Solomono ibugua Yaroboama bo wahole manda bu hene. Ani manda bu heago hondowa Yaroboama ibu abale ibida pialu Iyibi dindiha puwa Iyibinaga Kini Sisaga hearia pene. Ani puwa Solomono homelotagi ibu Iyibi dindiha haabo hene.
1KI 11:41 Mbirale tara tara Solomono ibugua binirubi ibunaga mini mandala bayale wiarubi bibahende mbuga mbira mini Solomononaga Te laga ngagoha gilibu nga.
1KI 11:42 Solomono ibu mali pira maria (40) Yarusalemeha kini howa Isaraele wali agali handaya ho hene.
1KI 11:43 Ani halu homayagola tigua ibunaga tingini Yarusaleme Debidinaga tano laga wiagoha hora hene. Homayagola Solomono ibuni igini Lehoboama ibugua ibu abanaga henge ibuni mialu kini ha aribia hene.
1KI 12:1 Lehoboama ibu Isaraele wali agali bibahendeme ibu tinaga kini helole lowa Segeme tanoha íbu ngoai ho heagoria pene.
1KI 12:2 Ala Nebada igini Yaroboama ibugua Kini Solomono ibu bole heago hondowa ohalu Iyibi dindi pu henego. Ai Isaraele wali agali tigua Lehoboama tinaga kini helo dabo helara layago hale howa ibu Iyibi dindi wahalu ibuni dindi dai bu hene.
1KI 12:3 Yaroboama dai bialu anda ibiyagola ibuni halu Isaraele wali agali bibahendebi Lehoboama hearia puwa tigua ibuhondo lamialu lalu,
1KI 12:4 Í̠ aba Solomono ibugua ina biabe ndelahe wiaru mo ngiyagola iname biabe erekuibi mangabiore bialu harima. Ai áyu í̠na inahondo mbirale bayale hendore bulene ngadagua bialu gendabi ndelahe ngaru mo wahabelo hamelo kama. Í̠na ogonidagua biriyagua ina haru habelo í̠ andaneha holeberema, lene.
1KI 12:5 Ani layago hale howa Lehoboama ibugua tihondo lalu, Horo tebiru andaga halu i̱naga mini ngogo tí languliya dai bule áyu andaga pudaba, lene. Ani laya handala ibu helalu ti andaga pugupugu bini.
1KI 12:6 Ani piya handala Lehoboama ibu andaga puwa agali haguane ala hene mini bogabi maru abale ibu aba Solomono mini bayaleru talebu miaga heneru hearia puwa lalu, Wali agali o biarunihondo bi agua ladai buliya hamelo kamibe, lene.
1KI 12:7 Ani hale hayagola tigua ibuhondo lalu, Í̠ wali agali uruninaga biabe biaga bayale halu ti biamogo bulene hamelo keyagua nde áyu tihondo bi bayale lolene nga. Í̠na ogonidagua biriyagua ti í̠ andaneha holebira, lalu lamini.
1KI 12:8 Ani layago hale howa bia nabi mo wahalu Lehoboama ibugua agali ibuni mini bayale talebu miaga igiri haguane daliahe mini bogabi ndo ibunila haru mandagi andaho hene hearu hearia pene.
1KI 12:9 Puwa ibugua tihondo lalu, Wali agali biarunime tiha genda maru bamba i̱ abahanda mo ya hene wiaru mo waholiya hamelo ka. Anigo áyu i̱na tihondo agua ladai buliya hamelo kamibe, lene.
1KI 12:10 Ani hale hayagola igiri haguane daliahe biaru tigua ibuhondo lalu, Í̠na bamba í̠ aba ibugua wali agali uruniha genda mo ya henedaru mo wahole manda buwa tihondo bi ladai bule hamelo keyagua tihondo bi ogodagua lolene nga. I̱ abahanda tí genda mo ngiyalo manda bu kamiyagua ogoni genda nabi emene hangu. I̱naga gi hondone mbiraore hangunaga hongo kagome i̱ abanaga hongo ogoni bolangua hene ka.
1KI 12:11 I̱ aba ibugua tí heneneore genda mo ngiyagonigo i̱na tí genda timbuniore ngulebero. I̱ aba ibugua tí tibu emeneme bayago i̱na tí tibu timbunime hongo howaore bolebero lalu lamibe, lene.
1KI 12:12 Ani layagola horo tebira hai halu Yaroboamabi Isaraele wali agali biarubi bibahende Lehoboama ibugua horo tebiru halu ibalimu layadagua ibu hearia ibuni hondole ibini.
1KI 12:13 Ani íbu heagola kini ibugua agali haguane ala hene mini bogabi hearume labe layadagua nale wahalu igiri haguane daliahe ibuni ale hearume labe layadagua wali agali biaruhondo bi hongohe lamini. Ibugua tihondo lamialu lalu, Henenore i̱ abahanda tíhondo genda mo ngiyagonibi ndo i̱na tí genda timbuniore mo ngulebero. I̱ abahanda tibu emene hangume tí bayago ai i̱na tibu timbunioreme tí minu bolebero, lene.
1KI 12:15 Anduane Homogo ibunime bilo hame lenedagua lola helonaga Lehoboama ibugua wali agali biarunaga bu miniha hame ngelo hearu talia nabi mo wahene. Anduane Homogo ibunime agali mbira ibunaga bi mana latagi haga Silo dindini haga mini Ahiyaha howa Nebada igini Yaroboamahondo ogo bulebira lalu mbiwia ho wiyago lola helonaga anidagua bini.
1KI 12:16 Ani layagola wali agali biaru tigua manda bu handalu hemiria kini ibugua tinaga bi layago hale habe naheyane tigua bi hongo howa ladaga halu lalu, Ina Debidi damenerunaga andaneha holene manga ho kama. Ina Debidi ariabi ndo ibu igini áyu o kago ibu ariabi ndo dege kamagonigo Lehoboama ibuni hondo holene nde ibunaga biabedago áyu ina Isaraele wali agali kamaru inane daluha pugupugu bima, lalu pene. Tigua Lehoboama erembira mialu tini daluha pene.
1KI 12:17 Ani piyagola Isaraeleali maru Yuda dindihayagi Yuda hameigini hearu uruni ti dege Kini Lehoboama andaneha haabo hene.
1KI 12:18 Mani howa Kini Lehoboama ibugua agali mbira Adonirama ibu kininaga biabe biaga agali hearu handayaho haga henego ogoni ibu Isaraele wali agaliru hearia pu lene. Adonirama ibu Isaraele wali agali biaru hearia piyagola tigua ibu ege to̱le̱me bo homelene. Ani biya layago hale howa Kini Lehoboama ibu ibunaga wai biagane garo ale mini karisini iraga halu abale Yarusaleme ibida dai bini.
1KI 12:19 Horo ogoningi howa Isaraele wali agali uyurahayagi hama ibiniru tigua mine halu Debidi aguaneneru mbiragome kini hayagua urunime ti haru helo hame naleore haga hene.
1KI 12:20 Horo mbirungi Yaroboama ibu Iyibi dindi wahalu andaga ibiya layago hale howa Isaraele wali agali ti mo ngoai howa Yaroboamahondo, Ina kamaria ibabe, lalu lawia hene. Bi ogoni lawia hayagola Yaroboama ibu ti hearia anda ibiyagola tigua ibu Isaraele wali agali bibahendenaga kini helo dabo helene. Yuda hameigini hearu ti dege Debidi aguanene kini hearume ti handayaho helo helene.
1KI 12:21 Lehoboama ibu Yarusaleme anda puwa ibugua ami agali hongohe Yuda hameiginibi Beniyamini hameiginibi hearu bibahende olomogo bini. Agali ogoningi íbu ngoai henedaru dagalalu daosini handari mbirani pira halira (180,000) íbu hene. Lehoboama ibugua ami agali urunime Isaraele wali agali uyurahayagi palearu baba wai bialu wali agali uruni ibuni andaneha helo lone haru dai bule pelo manda buwa ani bule pudaba lene.
1KI 12:22 Anigo Ngode Datagaliwabehanda ibunaga bi mana latagi haga Semaiahondo lamialu lalu,
1KI 12:23 Í̠na áyu ogoni puwa Kini Lehoboamabi wali agali Yuda hameiginibi Beniyamini hameiginibi ti bibahende karia puwa tihondo bi ogodagua lamibe.
1KI 12:24 Anduane Homogo i̱na larogo tí hameneore Isaraele karu baba wai nabibe. Áyu tí bibahende andaga piai hadaba. I̱nime hame lewadagua Isaraele wali agali tigua tí yu wahalu tini hangu hatara hayagoni. Anidagua biyagoni i̱nime biru, lene. Ani laya handala Semaia ibugua pialu Anduane Homogonaga bi urunidagua latagi hayagola ti wahalu tini andaga pugupugu bini.
1KI 12:25 Kini Yaroboama ibugua Segeme tano Eberaimi hameigini dindiha hari bare nene wiaruha ege pabe biaru hongo helo mo tiga bialu hene. Ani bialu howa ibu tano ogoniha horo maru haga bini. Ani biai halu tano ogoni wahalu tano mende Penuele puwa ogoninaga ege pabe bu mabu bini wiarubi hongo helo mo tiga bialu hene.
1KI 12:26 Yaroboama ibugua manda bialu i̱naga wali agalime áyu ti Anduane Homogonaga anda Yarusaleme dai buwa ibuhondo loma biniru bo delalu kadagua mani nde tinaga mini beregedalu i̱ yu wahalu puwa tinaga agali haguane Yudali Kini Lehoboama kago andaneha hole i̱ homoliya bo wahalu ibu karia dai bulubada lo manda bini.
1KI 12:28 Yaroboama ibu minime uruni manda bu bolangua howa ibugua bulumaga ale wangabe kira ona ngolome wabu ngelene. Ani wabu ngelo howa ibugua wali agaliruhondo lamialu lalu, Tígua Yarusaleme lotu lole puabo harimigo ai áyu lone polene irane nawulebira. De handadaba. Ai Isaraele wali agali tínaga bi pupu wiagane o kagoni. Iyibi dindiha howa ti haru tagira ibini tínaga bi pupu wiagane o kagonigo tí bibahendeme ogolabohondo bi pupu wilimu, lalu lamini.
1KI 12:29 Ani lowa ibugua bulumaga ale ngolome wabini mbirago Bedele tanoha ngelalu mende Dana tanoha wini.
1KI 12:30 Ani wiagola wali agaliru tigua bulumaga ale ngolome wabini kira ogonilabohondo bi pupu wule Dana tanohabi Bedele tanohabi puabo haga hene. Mana ogonidagua biyagome mana ko timbuniore bialu hene.
1KI 12:31 Ani bialu Yaroboama ibugua bi pupu wulenenaga dindi maru hari nene wiaruha mo wigi bini. Ani buwa agali maru loma binigo mo miaga helo dindi uruniha dabo helaga bini. Agali odaruni hameigini Libai aria ndo agali ta nabi minu helaga bini.
1KI 12:32 Yaroboamahanda ege halininaga horo pirani duria (15) layagola lotu lolene horo mbira mo wini. Horo ogoningi Yuda wali agali tinaga lotu laga horo timbuni mbira winigodagua Yaroboama ibugua i̱na wero lowa mo wini. Ani buwa ibugua bulumaga ale kira wabu ngelayagonaga lomabu bo delaga dabu wiagoria nogo mbirale bo loma buwa delene. Ibugua ogoni binidagoni Bedele dindini bini. Ani bialu howa agali maru ibunime loma binigo mo miaga helo dabo helayaru bibahendehondo bi lo pelalu, Tí Bedeleni tínaga biabe uruni bule ibalimu, lalu lawia hene.
1KI 12:33 Ai ege halinigonaga horo pirani duria (15) layagola horo ogoni Isaraele wali agali tinaga lotu lolene horo timbuni ogoni lalu lo wiyangi Yaroboama ibuni Bedele tanoha lomabu bo delaga dabu bia hayagoria puwa ibunime nogo loma biniru bo delene.
1KI 13:1 Yaroboama ibu bo lomabu delaga dabu bu heleagoria heyu howa bo lomabu delalu hearia Anduane Homogonaga bi mana latagi haga agali mbira Yaroboama hearia ibini. Agali ogoni ibu Yuda dindiha haga hearia Anduane Homogohanda ibu Yuda dindi yu wahalu Bedele pu laya handala ibini.
1KI 13:2 Anduane Homogonaga bi mana latagi haga agali biagome bo lomabu delaga dabu heagohondo mbiwia halu lalu, Bo lomabu delaga dabu-o Anduane Homogohanda la layadagua i̱na í̠hondo bi mbira larogo. Agali mbira mini Yosaia ibu Debidi aguanene holebirago ibu kini harangi ibugua loma binigo mo miaga agali í̠ni bo lomabu delaga holebiraru ti bibahende bo paga hai holebira. Agali uruninaga kuni í̠ni delalu í̠ mo ko halu í̠ ko ngubiore holebere, lene.
1KI 13:3 Ani lowa Anduane Homogonaga bi mana latagi haga ogoni ibugua bi maru mbiwia halu lalu, Áyu i̱na í̠hondo bi langirugoni Anduane Homogo ibuninaga biore i̱ha howa layago manda bibelo manane mbira Anduane Homogo ibuni bulebirago larogo. Bo lomabu delaga dabu ogoni gialo hole biragola loma bo delene be ira pungaru dabu daligani ngaruni dindini haealapaya bu wulebira, lene.
1KI 13:4 Yaroboama ibu bo lomabu delaga dabu biagoria heyu howa dege bi ogoni hale hene. Ani hale howa ibugua agali Anduane Homogonaga bi mana latagi haga biago gi dola howa lalu, Agali ogoni minu yamia hadaba, lene. Ani layangiore Yaroboamanaga gi dogo layago lone pau labe nahe hongohe hene.
1KI 13:5 Ani bialu Anduane Homogonaga bi mana latagi haga agali biagome Anduane Homogonaga minini howa mbiwia hayadagua bo lomabu delaga dabu biago gialo ibira halu ira punga beru dabuni wiago haealabaga bialu dindini ibira hai hene.
1KI 13:6 Anidagua biyagola Kini Yaroboama ibugua agali biagohondo lamialu lalu, Í̠na Anduane Homogo í̠naga Ngode Datagaliwabehanda i̱ biamogo bialu i̱naga gi lone mo bayale helo ibuhondo i̱naga bi laha, lene. Ani layagola agali biago ibugua Anduane Homogohondo kininaga gi mo bayale ha lalu bi lamiyagola kininaga gi mo bayale hayagola gi karulape paulene.
1KI 13:7 Ani biyagola howa kinihanda ibuhondo lalu, Áyu i̱ andaga ibalu iya haru mandagi tomo nalu birabiya hameledo. Ani bialu mbirale mbira í̠ mo turu halu ngulebero, lene.
1KI 13:8 Ani layagola Anduane Homogonaga bi mana latagi haga agali biagome ibuhondo ladai bialu lalu, Anigo í̠naga muni ngeruni hanuni yabulaki howa mende i̱ ngero lariyaguabi í̠la haru í̠ andaga napolebero. Ani bialu Bedele dindi ogoria howa i̱ iba tomobi nane holebero.
1KI 13:9 Ani larogoni irane Anduane Homogohanda i̱hondo dindi ogoha howa mbirale mbira nanabe lalu i̱ni dai bule howa hariga ibirudagoha ndo hariga mendeha dai bibe laya, lene.
1KI 13:10 Ani lai halu agali ogoni ibu hariga ibiyadagua dai nabi hariga mendeni dai bialu ibuni andaga pole pene.
1KI 13:11 Horo ogoningi bi mana latagi haga agali wahe mbira Bedele dindiha haga hene. Ani hearia agali ogoni ibu igini hearume horo ogoningi Bedele dindini Anduane Homogonaga bi mana latagi haga agali Yuda dindiha howa ibini biagome Kini Yaroboamahondo bi layarubi maru biyarubi bibahende lamiai hene.
1KI 13:12 Ani layagola agali wahe ogoni ibugua ibu iginiruhondo hale halu lalu, Anduane Homogonaga bi mana latagi haga agali ogoni ibu hariga agoha dai biyabe, lene. Anidagua hale hayagola ibu igini biaru tigua agali ogoni ibu dai biyago hondo henego ai ogodagua piya lalu ti aba walia hene.
1KI 13:13 Ani layagola ibugua tihondo lamialu lalu, Ai i̱naga nogo dongini biragane biago mo paga hole pudaba, lene. Tigua anidagua biya handala ibu ibunaga nogo dongini biralu pene.
1KI 13:14 Ibugua Anduane Homogonaga bi mana latagi haga Yudali biago talima pialu hearia hariga obeneni ira bai ale mbira heago andaneha berearia hendene. Ani hondowa ibugua lalu, Í̠ Anduane Homogonaga bi mana latagi haga agali Yuda dindiha howa ibiriyagonibe, lene. Ani layagola ibugua ladai bialu lalu, E̱ i̱ ogoni bedogoni, lene.
1KI 13:15 Ani layagola agali wahe biagome ibuhondo lamialu lalu, Ai i̱ andaga pialu tomo nole mbaliya hameledo, lene.
1KI 13:16 Anigo Anduane Homogonaga bi mana latagi haga Yudali biagome ibuhondo lalu, I̱na í̠ andaga lone dai biba nalolebero. I̱na dindi ogoha howa tomo ibabi mbira nanolebero.
1KI 13:17 Ani larogoni irane Anduane Homogohanda i̱ langialu lalu, Iba tomobi nanabe lalu ai harigabi mendeni dai bialu andaga pobe layago ogonidagua bialu ai hariga mendeni dai bialu andaga porogo, lene.
1KI 13:18 Ani layagola bi mana latagi haga agali wahe biagome laabo halu lalu, I̱bi nde Anduane Homogonaga bi mana latagi haga í̠ kegoni ale dege kogoni. Ai Anduane Homogohanda í̠ tomo ibaru nelo mule i̱ andaga haru pobe lalu ibunaga dahuliyali mbirame bi yalu pu leneyago ibalu langiya handala í̠ damu ibiru, lene. Anigo agali wahe ogoni ibugua bi o layadagoni henene ndo ke̱ howa lamini.
1KI 13:19 Anduane Homogonaga bi mana latagi haga biago ibugua mitangi bialu hearia agali wahe biagome bi layadagoni hale howa agali ogoni andaga dai buwa tomo ibabi nalu berene.
1KI 13:20 Libu tomo nalu bereria bi mana latagi haga agali wahe biagohondo Anduane Homogohanda bi mbira lamini.
1KI 13:21 Ani lamiyagola ibugua Anduane Homogonaga bi mana latagi haga agali Yuda dindiha howa ibini biagohondo bi hongo howa lalu, Anduane Homogohanda lalu, Í̠na ibugua bi layadagua nabi ibunaga bi mo waharida, laya.
1KI 13:22 Ai lone dai buwa dindi ibugua tomo ibabi nanabe layagoria biruwa narida. Anidagua biridagome í̠ homolebere. Ani homaregola í̠naga tingini í̠ni dalu í̠naga damenerunaga homali henedagoha mandagi horo naholebira, laya lene.
1KI 13:23 Anduane Homogonaga bi mana latagi haga Yudali biago ibu tomo nai heagola agali wahe biago ibugua ibuninaga nogo dongi biago mo manda manda bialu Yudali biago biralu pelo mini.
1KI 13:24 Pialu hearia gabua mbirame budi ale mini laiono harigani lola howa ogonime agali biago bo wahene. Harigani bo wiagoria nogo dongi biago handayaho hene. Laiono biago ibubi nde handayaho ha dege bini.
1KI 13:25 Mani agali maru hariga ogonidagua ibalu hearia agali homene tingini wiagoria laiono handayaho hearia handalu anidagua biane handarima lalu Bedele puwa wali agali bu hearu lamini.
1KI 13:26 Agali wahe bi mana latagi haga biagome te ogoni hale halu lalu, Ogoni Anduane Homogonaga bi mana latagi haga agali biagooredago. Ibugua Anduane Homogonaga bi mo wahayagonaga Anduane Homogohanda bulebero layadagua laionome lola howa bo wahelayada, lene.
1KI 13:27 Ani lowa ibu igini biaruhondo lalu, I̱ nogo dongini biragane biago mo paga hadaba, lene. Ani layago tigua ibu layadagua bini.
1KI 13:28 Ani biyagola ibu nogo dongini biralu hariga peadagua puwa handalu hearia agali biagonaga tingini harigani wiaria hendene. Nogo dongi biagobi laionobi kaware handayaho hearia hendene. Laiono biagome agali tingini wiago nane halu nogo dongi biagohondobi mbirale nabiore heane hendene.
1KI 13:29 Ai bi mana latagi haga agali wahe o biago ibugua agali homene tingini wiago ibunaga nogo dongini mo wialu Bedele dindini duguru bialu baya hangu homaliha hora holenenaga mo yalu dai bini.
1KI 13:30 Mo yu dai buwa bi mana latagi haga agali wahe biago ibunaga homali wabu wini wiagoha aribia halu hora hene. Ani hora halu howa ibu igini biarubi ti harume dugu bialu, I̱naga hamene i̱naga hameneore, laga bialu nde hora hene.
1KI 13:31 Tigua agali hora hai howa ibugua ibu iginiruhondo lamialu lalu, I̱ homarongi tígua i̱naga tingini Anduane Homogonaga bi mana latagi haga agali o hora harimagoha dege mandagi hora halimu.
1KI 13:32 Anduane Homogohanda bulebero lalu ibunaga bi mana latagi haga agali biagonaga ne harigaha howa latagi hayaruni bibahende ogonidaguaore biai holebira laro. Bo lomabu delaga dabu Bedeleha karubi Samaria tanoha bi pupu wiaga ngaru bibahendebi Anduane Homogohanda bo gialo wahai holebiraore, lene.
1KI 13:33 Yaroboama ibugua mbirale bulebira layaruni bia hayane handa hondowa dege ibugua mana ko bialu haga wiyaruni yu wanahe bialu haabo hene. Ibugua agali maru loma binigo mo miaga dabo helalu dindi tara tara bi pupu wiaga ibunime dabo wigi biyagoria biabe bialu helo helaga bini. Agali ta nabi loma binigo mo miaga hoa hayaru ibugua biabe uruni bialu helo dabo helaga bini.
1KI 13:34 Yaroboama halu ibu dameneru tigua mana ko uruni bialu hayagome ko timbuni tiha ngelo hene. Anidagua biyagonaga Anduane Homogohanda Yaroboama damene bibahende mo ko halu bo wahaiore hene.
1KI 14:1 Odagoningi Kini Yaroboama igini Abaya warago timbuni bo ibira hene.
1KI 14:2 Ani biyagola Yaroboamahanda ibu onehondo lamialu lalu, Wali agali marume í̠ i̱ onedalo manda nabilo aga yári tara ngaru bialu Silo tano pole pu. Dindi ogoniha ala i̱ Isaraele wali agalinaga kini holebere mbiwia halu lalu langini Anduane Homogonaga bi mana latagi haga agali Ahiya biago ibu ogoniha kagoni.
1KI 14:3 Í̠na pialu mberedi pirabi mbisigedi marubi mone ibane dendebi be mbirabi mo yalu puwa ibuhondo mibe. Mialu ibuhondo iyanaga igini homo ngago ogodagua bulebira lalu ibugua langiai holebirago aguaore bulebirabe lalu ibuhondo hale habe, lene.
1KI 14:4 Anidagua laya handala Yaroboama one ibu abale pialu Ahiya andaga Silo anda pene. Ogoningi Ahiya ibu agali waheore halu deru baya hangu handabe nahe berene.
1KI 14:5 Ani berearia Anduane Homogohanda wali biago anda naibi wene harigani ibalu heagola Ahiyahondo lamialu lalu, Yaroboama igini warago timbuniore bo ngelalu Yaroboama one ibugua ibu igini homolebirabe be dabi holebirabe lalu í̠hondo hale hole harigani ibalu kago ibulebira, lene. Ani lowa Ahiya ibugua wali ogoni ibuhondo bi ogodagua lamibe lalu Anduane Homogohanda Ahiyaha bi lamu helene. Wali ogoni wali tara tingi halu ibini.
1KI 14:6 Yaroboama one ibu wene Ahiya andaga anda ibule harabani kau lama ibayuago hale howa ibugua lalu, Yaroboama one-o tamuha anda íbu, lene. Ani lowa lalu, Í̠ Yaroboama onedane hendedogo. Wali tara tingi halu eberego agibe. Í̠naga bi te hale halu i̱na í̠hondo bi gendabi hale habelo mbira langulebero.
1KI 14:7 Bi ogoni Yaroboama hale helo lamule dai bia. Anduane Homogo Isaraele wali agalirunaga Ngode Datagaliwabehanda Yaroboama ibuhondo lalu, I̱na í̠ Isaraele wali agali maru hearu aria dege heria ai i̱naga Isaraele wali agalinaga kini habelo dabo helaru.
1KI 14:8 I̱na Kini Debidi damene lenego haru nahelonaga mo wahalu í̠ni haru habelo dabo helaru. Ani birugo ainde i̱naga biabe biahaga agali bayale Debidihanda biyadagua í̠na nabi kegoni. Debidi ibugua i̱naga bi mana baya hanguore hongo howa talialu mana tigabi i̱naga deni howa bulene ngaru bialu haabo haga hene.
1KI 14:9 Anigo í̠na mana ko kini ala henerume bialu henedaru emene dege lowa ko timbuniore bialu kegoni. Í̠na i̱ erembira ngialu puwa ege to̱le̱me dama mitangi bialu gime wabini ngaruhondo bi pupu wialu kegoni. Í̠na mana ogonibi bialu kegome i̱ mo keba timbuni halu kegoni ndobe.
1KI 14:10 Anidagua birigonaga heneneore í̠naga damene lenego bibahende mo ko halu bo wahai holebero. Yaroboama í̠ damene igiri daliaheyaguabi agali waheyaguabi bibahende Isaraele dindini kago bo wahai holebero. Wali agalime ti to wini mbira emeneorebi mbira ibira holani handalu hilo wahagadagua í̠ damene lenego bo hilo wahaiore holebero.
1KI 14:11 Í̠ damene maru tano pabe tamuha homo ngagola tinaga tingini biangome nalu tano pabe tagirahayagi homo ngaru ega bodo hariawe timbuni bedarume nolebira. I̱ Anduane Homogo i̱na bi o ledogoniore, laya lene.
1KI 14:12 Ani lowa Ahiyahanda Yaroboama onehondo laabo halu lalu, Áyu pialu í̠ andaga anda pialu kegola í̠ igini ibu homolebira.
1KI 14:13 Ani homaragola Isaraele wali agalirume dugu bialu nde hora holeberemi. Yaroboama damene bu kamiruha howa igiri mbiraore ogoni ibu hangu mana bayale tigabi bialu kagola Anduane Homogo Isaraele wali agalirunaga Ngode Datagaliwabehanda ibu hondowa turu haga hene. Anigo ibuni hangu bayale hora holene ngadagua hora holeberemi.
1KI 14:14 Anduane Homogohanda Isaraeleali mbira aribia howa kini helolebirago ogoni ibugua Yaroboama damene lenego mbira yu wa nahole bibahendeore bo wahai holebira. Áyu ogoni anidagua bulebira laro.
1KI 14:15 Isaraele wali agali tígua dama wali beda mitangi bialu gime wabini mini Aserahondo bi pupu wialu kamigome Anduane Homogohanda tínihondo tandaga helonaga tínime tandaga mo ha harimigo. Ani birimigome Anduane Homogohanda tí mo gi timbuni haragola tígua gi timbuniore howa iba angeni gambe karu ibame mo ema bia haragola duru lalu ema ema bialu haralidagua tígua duru timbuni lalu holeberemi. Ani kamigola Anduane Homogohanda Isaraele wali agali ti dindi bayale tínaga mamaliruhondo mini biagoria nahalimulo balu purogo lelolebira. Ibugua tí Iba Yuberedisi porago yu wahalu amurahayagi mo giligalale lolebira.
1KI 14:16 Yaroboama ibunime mana ko wiaru bialu howa ibugua Isaraele wali agali maru hearu ko bilo mo bia halu hayago. Ani biyagonaga Anduane Homogohanda tigua mana ko binidaru mitangi bialu Isaraele wali agaliore erembira mialu yu waholebira, lalu Ahiyahanda wali biago lamini.
1KI 14:17 Yaroboama one ibu bi uruni layago hale hai halu Tisa tano dai bini. Dai bialu ibuni andaga anda polene kaware pialu heaore ibu igini warago bo wiyago tongolo mini.
1KI 14:18 Ibu tongolo miyagola Isaraele wali agali bu hearume duguanda íbu ngoai howa dugu bu halu nde hora hene. Anduane Homogonaga bi mana latagi haga agali Ahiyaha howa Anduane Homogo ibunime bi mbiwia hayago heneneore lola hene.
1KI 14:19 Bi te maru Kini Yaroboama ibugua bialu henedaru mbuga mbira mini Isaraele Kini Henerunaga Bi Te laga ngagoha gilibu winigo nga. Mbuga ogonime kini ibugua waitigiru baba wai binirubi Isaraele dindi handayaho howa bialu henedarubi garealo nga.
1KI 14:20 Yaroboama ibugua mali pira kirani kira (22) Isaraele dindiha kini hene. Mani ibu igini Nadabahanda Isaraele dindini kini ho aribia hene.
1KI 14:21 Kini Solomono igini Lehoboama agali daliahe ibu taba henenegoria howa hama ibinigo mali pira mariani mbira (41) layagola kini hene. Anduane Homogohanda Isaraele dindi bibahende wiaru aria mbiragome Isaraele wali agali tigua ibuni kagoria kaware ibalu lotu lelonaga dabalu loma biaho ngelene Yarusaleme wiagoria Lehoboama ibugua mali pira mbirani karia (17) kini howa haru hene. Lehoboama ibu ai̱ya Amono wali mini Nama berene.
1KI 14:22 Ibu kini heangi Yuda wali agalime mana ko dewaore bialu hene. Tigua ani biyagome Anduane Homogohanda tihondo keba hayagonaga irane tinime mo keba hene. Abale tinaga mamalirume mana ko bialu ha henego tigua wali agali áyu urunime Anduane Homogo mo keba halu hayadagua ndo timbuniore bialu hene.
1KI 14:23 Ogoningi Yuda wali agalirume tinaga bi pupu wiaga hari nene wiaruhabi ira timbuni hearu teneha gumbahe wiaruhabi mo wiai hene. Ani buwa tigua ira tigini mbira ona gombedo hongowabi mbirale dama wali beda mitangi bialu gime wabini mini Asera lagago ogoni alebi ona ngelowa urunihondo bi pupu wialu hene.
1KI 14:24 Ani bialu mana ko ngubi mbira ogoningi bialu hene. Mana ko ngubi ogoni wali agali maru bi pupu wiaga ogoniha tinaga biabe wali agali kayu yu paligi bilonaga mo wini. Yuda wali agalime mana ko ngubiore wali agali abale dindi ogoriani henedarume bialu haga wiadagua dege bialu hene. Wali agali abale dindi ogoriani henedaruni Anduane Homogohanda bo taliatagi halu dindi Isaraele wali agali ti karulo helo mope hene.
1KI 14:25 Lehoboama mali daunini hangu kini howa hearia Iyibinaga Kini Sisagahanda ibunaga amiru haru halu Yarusalemeni wai bule ibini.
1KI 14:26 Ani ibalu tigua Yarusaleme bo podalu anda puwa Anduane Homogonaga andaha kini andagahabi mbirale bayale wiago damene bibahende mo yai hene. Wai humbi Solomonohanda wabuwa ngolome paraho dambi hene wiarubi mo yai halu Iyibi dindiha yalu pene.
1KI 14:27 Ani mo yalu peagola mani Kini Lehoboamahanda agali ibunaga biabe biahaga hearuhondo wai humbi Iyibiali biarume mo yalu piyadago aribia holenenaga maru ege to̱le̱ boronosime wabidaba lowiagola ami agali maru kini andaga harabani mamage haga hearume handayaho helo mini.
1KI 14:28 Ai kini ibu Anduane Homogonaga anda loma biahene biagoha pole porangi ami mamage haga uruni ti heba humbi yu pialu dai birangi ti haru dege yalu dai bialu anda hobane ibuni wiagadagoha ngelaga biaga hene.
1KI 14:29 Bi te maru Kini Lehoboama ibugua bialu henedaru mbuga mbira mini Yuda Kini Henerunaga Bi Te laga ngagoha gilibu winigo nga.
1KI 14:30 Lehoboama Yaroboamala kini hebingi libu wai bialu haabo haga hene.
1KI 14:31 Ani bialu mani Lehoboama ibu homayagola ibu tingini ibu mamaliru homali Debidinaga Tano biagoha winigo ogoniha hora hene. Homayagola ibu igini Abiyahanda ibu aba henegoria ho aribia howa kini hene. Ai Lehoboama ibu ai̱ya Amono wali Nama berene.
1KI 15:1 Yaroboama ibu mali pira mbirani karia Isaraele dindiha kini henego howa halini (18) hayagola Abiya ibu mini mende Abiyama henego ibu nde Yuda dindiha kini pigane mali ogoningi hene.
1KI 15:2 Ani howa ibugua mali tebirani kini howa Yarusalemeni haru hene. Abiya ibu Abasalomo wane Maga berenegonaga igini hene.
1KI 15:3 Abiya ibugua mana ko tara tara dewaore ibu abahanda biaga wiadagua bialu haga hene. Ibugua bamba ibu mamali Debidihanda bialu haga wiadagua nabiagabi ibunaga Anduane Homogo ibunaga Ngode Datagaliwabela mini mbiraore nahagabi hene.
1KI 15:4 Anigo Anduane Homogo ibunaga Ngode Datagaliwabehanda ibunaga biabe biahaga agali Debidi mitangi bialu Abiyahondo igiri mbira Abiya ibu henegoria ha aribia howa kini helonaga mini. Debidinaga hale hundu tegelape nahelonaga ani mini. Ani bialu Anduane Homogo ibunime Yarusaleme bayale ngelonaga anidagua bini.
1KI 15:5 Anduane Homogohanda Debidi mitangi biaabo haradagoni irane Debidi ibugua mana bayale tigabi dege Anduane Homogonaga deni howa biaabo haga heago hondowa ani bini. Ani bialu Debidihanda Anduane Homogonaga bi ledago bibahendeore talialu bialu haga hene. Anigo halu mbiru dege Debidi ibugua Hidiali Uriahondo mana ko bini.
1KI 15:6 Abiya Yaroboamala libu kini hebingi wai biaabo halu haga hene.
1KI 15:7 Mbirale bibahende Kini Abiya ibugua bialu henedaru mbuga mbira mini Yuda Kini Henerunaga Bi Te laga ngagoha gilibu winigo nga.
1KI 15:8 Mani Abiya homayagola tigua ibunaga tingini Debidinaga tano wiagoha hora hene.
1KI 15:9 Yaroboama ibu Isaraele dindiha kini mali pira mbirani dira (19) henego ai pira kira (20) hayagola Asa ibu Yuda dindinaga kini pigane hene.
1KI 15:10 Asa ibugua kini howa mali pira mariani mbira (41) Yarusalemeni haru hene. Asa ibu ai̱ya Abasalomo wane Maga biago aguane berene.
1KI 15:11 Asahanda mana bayale tigabiru bamba ibu mamali Debidihanda biaga wiadagua talialu biaga hene.
1KI 15:12 Ibugua dama mitangi bialu gime wabinirunaga bi pupu wialu wali agali kayu yu palue íbu ngoai haga anda hearuni bibahende bo gialo wahai hene. Ani bialu ibuninaga mamalirume bi pupu wulenaga dama mitangi bialu mbirale gime wabini wiaruni bibahende mo wahai hene.
1KI 15:13 Asahanda ibu ai̱yanaga ai̱ya Maga biago ibunaga biabe bo dugualu ibu mini lene kini ai̱ya beda lene birayago wahalu wali maru bedaru ale dege berelo bope halu bini. Ani biyadagoni irane wali Maga ogoni ibu mbirale dama wali beda mitangi bialu gime wabini mini Asera wabu wiaria ani bini. Asahanda agali bu hearuhondo lalu, Mbirale gime wabini ko ngubi ogoni dibalu gabu dangiala hole bialu yalu tagira puwa unu Kidorono iba dindi ulini ngagoha delole yalu pudaba, lene.
1KI 15:14 Asa ibugua mbirale dama mitangi bialu gime wabini ngarunaga bi pupu wule ngoai haga anda bu hearuni bo gialo wahai nahe dege henegoyu ibugua Anduane Homogo gubalini timbuniore halu Anduane Homogo andaneha haabo haga hene.
1KI 15:15 Ani bu howa Asa ibugua mbirale ibu abahanda Anduane Homogonaga lalu mo bagiho wini wiarubi ibunime Anduane Homogonaga lalu wia bagiho wini wiarubi bibahende mo yalu puwa Anduane Homogonaga andaha wini. Mbirale o mo winidaruni ngolo silibarubi ndisi be tara tararubi mo wiai hene.
1KI 15:16 Ogoningi Basa ibu nde Isaraele dindinaga kini hene. Asa Basala libu kini hebingibi nde Isaraeleali Yudalila wai bialu haabo haga hene.
1KI 15:17 Ani howa horo mbirungi Basa ibugua ami agaliru haru halu Yudaliru baba wai bule pene. Puwa tigua Lama tano karulo howa ai wali agali tano ogoniha howa Yuda dindiha puíbu nabilonaga hapai halu tanonaga ege pabe heago baya hangu arema butiga bialu hene.
1KI 15:18 Ani bialu heagola Kini Asa ibugua muni siliba ngoloru Anduane Homogonaga andaha wiarubi kini andagaha wiarubi maru yamini. Ani yamialu muni uruni ibunaga agali haguane hearuhondo mo mialu Sirianaga Kini Benehadada Damasagasani hearia mule yalu pelo mini. Benehadada ibu Tabirimono igini howa Hesiono aguane hene. Ani heagola Kini Asa ibugua ibunaga agali haguane biarume Benehadada lamilo lawia halu lalu,
1KI 15:19 Bamba iya aba libu nenegealiore heneyagodagua áyu iyabi nde nenege dege habiya hameledo. Ani habiya lowa áyu i̱na muni siliba ngolo uru í̠naga bame wia haro. Ani berogo ai í̠na Isaraelenaga Kini Basala nenegeore habiya lalu bi hongohe lo wiribigoni wahalu wahabe. Ani beregola ibunaga ami agaliru haru halu i̱naga dindi yupe halu tagira pelo ani bibe, lene.
1KI 15:20 Kini Benehadada ibugua Kini Asahanda bi lawia hayiyago hale howa bi ogoni karulape lene. Karulape lowa ibugua ami agali haru hagane haguane hearuhondo lalu, Tínaga ami agali hayadaru haru halu puwa Isaraelenaga tano ngaruha wai bule pudaba, lene. Ani laya handala tigua puwa wai bialu Iyono tano bo poda hana halu Dana tanobi Abele Bedemaga tanobi bo poda hana hai hene. Ani bialu dindi maru Galili iba kuyama bedagoha wiaru karulai halu Nabadali hameigininaga dindi wiarubi karulai hene.
1KI 15:21 Ani binigo Kini Basa ibu hale halu hearia Sirialime anda ibalu Isaraelenaga tano wiaruha wai bialu ka layago hale hene. Ani hale howa Kini Basa ibugua Lama tano wahalu Tisa tanoha hole ibida pene.
1KI 15:22 Ani biyago manda buwa Kini Asahanda ibunaga agali haguane Yuda dindiha bu hearuhondo lamialu, Tí bibahende Lama tano piai halimu, lene. Ani layagola tigua Lama tano pialu ege to̱le̱bi pabe bulene ira bibahendebi Kini Basahanda Lama tano mo hongo halu wai paberu bule ira ege to̱le̱ru yu wiaruni mo yalu ibini. Asa ibugua Misiba tanonaga wai pabebi Beniyamini hameiginiru dalu Geba tanonaga wai pabebi uruniha arema bulene ngaru bilonaga mo yu ibini.
1KI 15:23 Te maru Kini Asahanda bialu henedaru bibahende mbuga mbira mini Yuda Kini Henerunaga Bi Te laga ngagoha gilibu winigo nga. Mbuga ogoniha howa ibugua biabe hongohe bialu henerubi biabe maru tano wiarunaga wai pabe hongohe bu helaga bialu henerubi gilibu wigi bida. Anigo Asa ibu agali waheore hayagola ibunaga ge kuduguhe hene.
1KI 15:24 Ani henego mani homayagola tigua ibunaga tingini ibu mamaliru hora haga Debidinaga tano laga wiagoha hora hene. Hora halu ibu igini Yahosabadahanda ibu abanaga dagia mialu kini ha aribia hene.
1KI 15:25 Asa ibu Yuda dindinaga kini mali mbira henego mali mende hayagola Yaroboama igini Nadaba ibu Isaraelenaga kini pigane hene. Nadaba ibu mali kirani hangu Isaraelenaga kini hene.
1KI 15:26 Ani howa ibu abahanda mana ko bialu haga wiaru bialu hene. Ibugua Anduane Homogonaga deni howa mana ko dewa bialu howa Isaraele wali agali bu hearumebi bilo mo bia halu hene.
1KI 15:27 Ani bialu heagola Isaga hameigini Ahiya igini Basahanda Nadaba bo wahole hariga taya bialu hene. Ani taya bialu henego ai horo mbirungi Nadababi ibunaga ami agali ti Pilidialiru baba wai bule pene. Ani puwa Gibedono tano wiago ho hagira biai ho heagola Basa ibugua Nadaba hearia puwa Nadaba balu homelene.
1KI 15:28 Ani bo wahalu puwa ibuni Isaraelenaga kini ha aribia hene. Asa ibu Yudanaga kini henego mali tebone hayagola bo wahene.
1KI 15:29 Ani bo wahalu Basa ibugua Yaroboama damene hearu bibahende homelo bo wahai hene. Mbiraoreali hangubi pora bialu nape bai hene. Anidagua binidagoni bamba Anduane Homogohanda ibunaga bi mana latagi haga agali Ahiyahanda Silo tanoni howa mbiwia henego henene lola hene.
1KI 15:30 Yaroboama ibu dameneha genda tagira ibinidagoni irane ogo. Abale Yaroboama ibunime Anduane Homogo Isaraele wali agalinaga Ngode Datagaliwabe ibu deni howa mana ko bialu hayaruni Isaraele wali agali bu hearume bilo mo bia haga hene. Yaroboamahanda mana ko bialu hayadagonime Anduane Homogo mo tandaga hayagola Anduane Homogohanda nde Yaroboama damene lenego bibahende bo wahai hene.
1KI 15:31 Te maru Kini Nadaba ibugua bialu henedaru bibahende mbuga mbira mini Isaraele Kini Henerunaga Bi Te laga ngagoha gilibu winigo nga.
1KI 15:32 Asa ibubi Basa ibubi libu kini heangi Yudali Isaraelealila wai biaabo haga hene.
1KI 15:33 Asa ibu Yudanaga kini henego mali tebone hayagola Ahiya igini Basa ibu nde Isaraelenaga kini pigane hene. Ani howa ibugua mali pira kirani maria (24) Tisa tanoni howa haru hene.
1KI 15:34 Yaroboamahanda mana ko bialu haga wiaru nde Basa ibuguabi talialu bialu haga hene. Anduane Homogonaga deni ibunime mana ko bialu howa Isaraele wali agali bu hearumebi nde mana ko dege bilo mo bia haga hene.
1KI 16:1 Horo mbirungi agali mbira Anduane Homogonaga bi mana latagi haga Hanani igini Yihu heagohondo Anduane Homogohanda bi ogodagua Kini Basahondo mbiwia halu lamule pu lalu lamini.
1KI 16:2 Ibugua bi ogodagua lamialu, Basa í̠na bi ogo baya hangu hale ha. Abale í̠ agali damene bu hearu ale dege mbirago heria i̱nime í̠ dabalu i̱naga Isaraele wali agali haru habelo kini helarugoni. Anigo ai í̠na mana koore Yaroboamahanda bialu haga wiagobi dege bialu howa wali agali bu karumebi nde mana ko dege bilo mo bia haga kegoni. Ainde tinaga mana ko uruni bialu hagahaga bidarume i̱ mo tandaga timbuniore halu ka.
1KI 16:3 Ani bialu kamigonaga i̱na Yaroboama damene bo biba halu amo lelarudagua í̠nibi í̠ damene lenego bibahendebi bo amo lolebero.
1KI 16:4 Ani berogola í̠ damene maru tano tamuha homayagua tinaga tingini biango bu karume nolebira. Tano tagiraha homayagua tinaga tingini ega bodo hariawe bedarume nalu holebira, lalu lamini.
1KI 16:5 Te maru Kini Basahanda bialu henedaru bibahende mbuga mbira mini Isaraele Kini Henerunaga Bi Te laga ngagoha gilibu winigo nga. Mbuga ogoniha ibugua biabe hongohe bialu henerubi gilibu nga.
1KI 16:6 Mani Kini Basa homayagola tigua ibu tingini Tisa tanoha hora hene. Ani hora howa ibu igini mbira mini Ela henegome kini ha aribia hene.
1KI 16:7 Basa ibugua Anduane Homogonaga deni howa mana ko bamba Kini Yaroboamahanda bialu hagadagua dege bialu hene. Basa ibugua mana ko ogoni bialu henedagonime Anduane Homogo mo tandaga timbuni halu hene. Ani heagola Basahanda Yaroboama damene bu hearuni bibahendeore bo wahaiore hayagolabi Anduane Homogohanda ibunaga bi mana latagi haga agali Yihu Basa hearia pu lalu, Anduane Homogohanda í̠ mo ko halu bo waholebira. Í̠ damene lene bu karubi bibahende bo wahai holebira, lalu lamule pu, lene.
1KI 16:8 Asa ibu Yudanaga kini heane dege mali pira kirani duria howa waragane (26) hayagola Basa igini Ela ibubi nde Isaraelenaga kini pigane hene. Ani howa ibugua Tisa tanoni howa mali kira hanguni haru halu hene.
1KI 16:9 Ani haru heagola Ela ibunaga agali haguane mbira mini Simiri henegome Ela ibuni bo wahole hariga taya bialu hene. Simiri ibugua kininaga wai biagane garo ale nogo hosime gili laga mini karisi maru ibugua handayaho haga hene. Horo mbirungi Kini Ela ibu agali mbira kini andaga handaya ho haga mini Arasa heago andaga pene. Puwa ogoniha kini ibu lulu iba dewaore nowa lulu yu wini.
1KI 16:10 Ani lulu yu wiaria Simiri ibugua anda ogoniha anda puwa Ela balu homelene. Ani balu homelowa Simiri ibuni kini ha aribia hene. Asa ibu Yudanaga kini heane dege mali pira kirani waragaria howa kane (27) heangi Simiri ibugua Kini Ela ogoni homelo bo wahene.
1KI 16:11 Simiri ibu kini halu abaleore ibugua Basa damene hearu bibahende bo wahai hene. Ani bialu Basa nenege hearubi ibu aria hearubi bibahende bo wahaiore hene. Basa damene lenego mbiraore hangubi mbira yu wanahe bo wahaiore hene.
1KI 16:12 Simirihanda Basa damene bibahende bo amo lene. Anidagua biyadagoni Anduane Homogonaga bi mana latagi haga agali Yihuha howa mbiwia halu latagi hayago henene lola hene.
1KI 16:13 Basa ibu dameneha mo ko holene tagira ibiyadagoni irane Basabi ibu igini Ela heagobi libugua Anduane Homogo Isaraele wali agalinaga Ngode Datagaliwabenaga deni howa mana ko bialu mbirale dama mitangi bialu gime wabini wiaruhondo bi pupu wialu hene. Ani bialu howa Isaraele wali agali bu hearumebi mana ko bilo mo bia halu haga hene. Libugua mana ko bialu hayadarunime Anduane Homogo mo tandaga hene. Ani mo tandaga hayagola Anduane Homogohanda Basa damene lenego bibahende bo wahai hene.
1KI 16:14 Te maru Kini Ela ibugua bialu henedaru bibahende mbuga mbira Isaraele Kini Henerunaga Bi Te laga ngagoha gilibu winigo nga.
1KI 16:15 Yudanaga Kini Asa ibu kini heane mali pira kirani waragaria henego ai kane (27) heagola Simiri ibu Isaraelenaga kini pigane hene. Ani howa ibu Tisa tanoni horo karu hangu kini howa haru halu hene. Ogoningi Isaraelenaga ami bu hearume Pilidia dindiha Gibedono tano wiago ho hagira buwa tano ogoni karulolenaga wai bialu hene.
1KI 16:16 Tigua ani bialu howa hale halu hearia Simirihanda mana ko lehe timbuniore bialu kini bo wahaya layago hale hene. Ani hale howa ai Isaraele ami agali biarume ami haru haga agali haguane mbira mini Omiri heago Isaraelenaga kini dabo helene.
1KI 16:17 Ani helalu Omiri halu ibunaga ami agali bibahende Gibedono wahalu dai buwa Tisa tano mo yu dai bulenaga tano ogoni ho hagira buwa wai bialu hene.
1KI 16:18 Ogoningi Simiri ibu Tisa tanoha henego Omiri halu ibunaga ami agali biarume hongo howa wai bialu hene. Ani bialu heagola ibunaga agali hearuni bo podalu tano karulaya handala ibuni kini andagaha wai pabe hongohe mbira henegoha anda puwa kini andaga bu heagoni heda hene. Ani bialu ibunibi anda heba damaga hene.
1KI 16:19 Simiri ibuha genda timbuni ogoni tagira ibiyadagoni irane ibugua mana ko Kini Yaroboamahanda biaga wiaru taluwa bialu hearia ani bini. Ibunime Anduane Homogonaga deni howa mana ko bialu Isaraele wali agalibi nde mana ko uruni bilo mo bia halu hene.
1KI 16:20 Te maru Kini Simiri ibugua bialu henedaru bibahende mbuga mbira mini Isaraele Kini Henerunaga Bi Te laga ngagoha gilibu winigo nga. Ibugua Kini Ela bope henegobi lalu gilibu winigo nga.
1KI 16:21 Kini Simiri homayagola Isaraele wali agali talebuki hene. Talebuki howa mendegome agali mbira Ginada henego igini Tibini heago tinaga kini helo hamelo hene. Tale buwa mende hearume tinaga kini Omiri helo hamelo hene.
1KI 16:22 Ani lalu howa mani Omirihayagi hene hearu tigua Tibini aria hearu bope halu wayali hene. Tibini homayagola Omiri ibu Isaraelenaga kini hene.
1KI 16:23 Asa ibu Yuda dindiha mali pira tebirani kini henego ai huniane mbira (31) hayagola Omiri ibu nde Isaraelenaga kini pigane hene. Ani howa Omiri ibu mali homberia (12) Isaraelenaga kini howa haru hene. Pigane Tisa tanoha mali waragariani howa haru hene.
1KI 16:24 Ani bialu Omiri ibugua mani dindi podene mbira hombene badagahe wiago yolo buwa ogoniha ege pabe hongohe bu mabu buwa tano ogoni mo wini. Dindi ogoni agali mbira mini Seme henegonaga wiaria Kini Omiri ibugua muni siliba dege daosini waragariame (6,000) dindi ogoni yolo bini. Ani yolo buwa Kini Omiri ibugua agali Seme ogoni mitangi bialu tano ogoni mini Samaria wini.
1KI 16:25 Anduane Homogonaga deni Omiri ibugua mana ko dewaore bialu hene. Mana ko ibugua bialu henedaru kini ala henedarume bini ngago emene dege lowa ibu dewaore bialu hene.
1KI 16:26 Ibugua mana ko Kini Yaroboamahanda bialu henedaguaore bini. Anduane Homogo Isaraele wali agalinaga Ngode Datagaliwabenaga deni howa ibugua mana ko dege bialu haabo hene. Ani bialu howa ibugua Isaraele wali agaliru haru pu tara howa dama mitangi bialu gime wabini mbirale wiaruhondo bi pupu wule mana ko timbuni ogoni biawai hene. Anidagua bialu ibugua biyagome wali agaliru biyagomebi tigua Ngode Datagaliwabe mo tandaga halu ibugua tihondo keba ho hene.
1KI 16:27 Te maru Kini Omiri ibugua bialu henedaru bibahende mbuga mbira mini Isaraele Kini Henerunaga Bi Te laga ngagoha gilibu winigo nga. Mbuga ogoniha ibugua biabe hongohe bialu henegonaga ogodagua bini lalu garealo nga.
1KI 16:28 Mani Omiri homayagola tigua ibu tingini Samaria tanoha hora hene. Hora howa ibu igini Ahabahanda ibu abanaga dagia mialu kini ha aribia hene.
1KI 16:29 Asa ibu Yuda wali agalinaga kini mali pira tebirani halira (38) heagola Omiri igini Ahaba ibu Isaraele dindiha kini hene. Ibugua kini howa Samariani mali pira kirani kira (22) Isaraele wali agali haru halu hene.
1KI 16:30 Ani haru howa Kini Ahaba ibugua Anduane Homogonaga deni howa mana koore wiaru dewaore biaabo halu hene. Kini abale halu homayarume mana ko bialu hayaru emene nira dege lowa ibugua ko ngubiore bialu hene.
1KI 16:31 Ko ibugua binidaruni Yaroboamahanda bialu henedagua dege biyagoyu ibunime manda bialu hearia uruni bame degebe tobaho hene. Ani bialu howa ai wali mbira mini Yasebele Saidononaga Kini Edabala henego wane bereago Ahaba ibu dabu bini. Ani dabu bu howa ibugua Saidono wali agalinaga dama mitangi bialu gime wabini mini Balahondo bi pupu wiagane wiagoha bi pupu wialu hene.
1KI 16:32 Ani wialu howa Ahaba ibugua Balanaga bi pupu wiagane anda mbira Samaria tanoha buwa anda ogoniha Balahondo loma biniru bo delaga dabu mbira bu helalu bini.
1KI 16:33 Ibugua gime wabini dama wali beda mitangi bialu bi pupu wiaga mini Aserabi wabu ngelene. Ahaba ibugua mana koorene ko o binidarunime Anduane Homogo Isaraele wali agalinaga Ngode Datagaliwabe mo keba timbuni hene. Urunidagua biyagome mana ko kini abale hayarume binidaru emene dege lowa ibugua biyadaru ko timbuniore bini.
1KI 16:34 Ahaba ibu kini heagola Bedele tanoali mbira mini Hile henego ibugua Yarigo tano mo tiga bialu lone biadai bialu hene. Hile ibugua tano ogoni wene bule lowa bialu heaore ibu igini wahene Abirama heago homene. Ani biai howa ai tano pabenaga panga haraba dunini wiaru wabialu heagola Hile ibu igini heyogone Segubu heago homene. Ogonidagua binidagoni bamba Anduane Homogohanda Nunu igini Yosuaha howa bi mbira mbiwia henego lola hene.
1KI 17:1 Gileada dindiha Tisibe tano wiagoha howa Anduane Homogonaga bi mana latagi haga agali mbira mini Elaya hene. Ani henego nde horo mbirungi ibugua Kini Ahaba berearia puwa ibuhondo lamialu mbiwia halu lalu, I̱ Anduane Homogo Isaraele wali agalinaga Ngode Datagaliwabe kagonaga biabe biaga agali kogoni. Ngode Datagaliwabe ibu haluhe haabo haga kagonaga minini howa i̱na í̠hondo heneneore langerogo. Dindi ogoria iba dalu naibule ngane dege mali kira tebirabi polebira. Naibi ngane dege i̱na dalu íbu larogola ibulebira, lalu mbiwia hene.
1KI 17:2 Mani Anduane Homogohanda Elayahondo bi ogodagua lamini.
1KI 17:3 Í̠ áyu ogoni howa ibida pialu Iba Yodana poragoria ni tagira ibiragohayagi puwa iba emene mbira mini Keridi bedagoha ha do habe.
1KI 17:4 Í̠ iba ogoni naga bialu birabe. Í̠naga tomo nolene i̱na ega bedaruhondo yalu pilimu lalu lamiru, lene.
1KI 17:5 Ani laya handala Elaya ibu abale heyalu Anduane Homogohanda layadagua amu Iba Yodana peagoria ni tagira ibiragohayagi pialu iba Keridi bereagoria puwa ha do ho hene.
1KI 17:6 Ani pu heagola horo bibahendengi egerebagibi mbiragabi ega berearume mberedirubi nogo egarubi mo yalu ibaga biyagola ibugua uruni nalu iba o bereagoni naga bialu hene.
1KI 17:7 Ai nde Isaraele dindiha iba dalu naibi wiaabo hayagola emene howa iba o nalu hayadagoni hundiaiore hene.
1KI 17:8 Iba Keridi hundiai hayagola Anduane Homogohanda Elayahondo lalu,
1KI 17:9 Í̠ heyalu pialu Saidono dindiha Sarebada tano ngagoha hole pu. Tano ogoniha wali dalo mbira ibu agalini homene bedago ogoni ibugua í̠ tomo nolenebi ibabi ngilo i̱na dabo bereledo, lene.
1KI 17:10 Ani lamiya handala Elaya ibu heyalu Sarebada tano pole pene. Pialu tano pabenaga panga harabaha ubanda tagi bulene wiagoria howa handalu hearia wali mbira ira delolene ilu ngoai halu hearia hendene. Elaya ibugua manda bialu wali ogoni ibu agalini homene wali dalo o kagonida lo manda bini. Ani hondowa ibugua wali biago olowa lalu, I̱ iba noabago maru í̠naga iba beha i̱ noliya hambu ngerebe, lene.
1KI 17:11 Ani layagola wali biagome hale halu iba hambu pole pialu hearia Elaya ibugua lalu, Mberedi emene mbirabi i̱ noliya mo yabe, lene.
1KI 17:12 Ani layagola wali biagome ladai bialu lalu, Anduane Homogo í̠naga Ngode Datagaliwabe haluhe kagonaga minini howa heneneore larogo. I̱ mberedi mbira nawiore bedo. Balawa emene mbira ndisi beha wialu olibe lininaga weli emene mbira iba beha berelo wialu bido ai ogoni hirulenaga ira o ilu yalu porogoni. I̱ igini iya tomo nalu holene mbira nawiore. Emene ogoniore winigo áyu namaro bialu tomo nolene mende nawidagola nde iya homoleberaba, lene.
1KI 17:13 Ani layagola Elayahanda wali biagohondo lalu, Í̠na tomo emene hangu wiruda manda bialu gi nahabe. Áyu puwa tomo hirule poro larigonidagua hirule pu. Anigo balawa ogoni ariabi olibe lininaga weli emene mbira tale bu hiruwa mberedi emene mbira i̱ noliyanaga ala yalu ibule pu. Ani bialu mani í̠ igini libuni nolene hirabe.
1KI 17:14 Irane ogoninaga Anduane Homogo Isaraele wali agalinaga Ngode Datagaliwabe kago ibugua lalu, Balawa emene hangu ndisi beha ngegobi olibe lininaga weli emene hangu iba beha biraruagobi kirabali biba naholebira. Ogoni karulape nalu kabine dege Anduane Homogo i̱na iba dalu lone ibilolebero laya, lene.
1KI 17:15 Ani laya handala wali dalo biagome Elayahanda lamiyadagua bule pene. Ani bialu mani Elayabi wali biagobi ibu iginibi ti tomo horo dewaru nalu holene karulapeore wiaabo hene.
1KI 17:16 Anduane Homogo ibunime Elayaha howa latagi hayadagua heneneore balawabi olibe lininaga welibi biba nahe dewa degeme wiaho wini.
1KI 17:17 Ani howa mani wali dalo ogoni igini biago warago timbuni bo wialu warago ba timbu halu igiri ogoni tongolo mini.
1KI 17:18 Ani biyagola wali biagome Elayahondo lalu, Anduane Homogonaga agali-o í̠na áyu i̱hondo mana ogonidagua aginaga berebe. Í̠ ogoha ibiridagome i̱naga mana ko binidaru Anduane Homogohondo mo mitangi bia harigome i̱ igini ogo homayada, lene.
1KI 17:19 Ani layagola Elayahanda lalu, Igiri biago i̱hondo ngi, lene. Ani lowa ibugua igiri homene tingini ibu ai̱ya giha yiago yamuwa mo yalu anda hobane daliga Elaya ibuni paliaga heagoha irigi howa ibu dagiani mo ngelene.
1KI 17:20 Ani ngelowa ibugua Anduane Homogohondo bi hongo howa lamialu lalu, I̱naga Anduane Homogo-o wali ogo ibugua i̱ore baya hangu handayaho hagago ai nde irane aginaga í̠na ibu mo genda halu igiri ogo homelaribe, lene.
1KI 17:21 Ani lalu Elaya ibugua igiri homene biagonaga tingini wiagoria halu tebira palia dambi haga bialu howa lalu, Anduane Homogo i̱naga Ngode Datagaliwabe-o ai nde igiri ogo ibunaga holene miadai bibe, lalu hene.
1KI 17:22 Ani layagola bi layago hale halu igiri biagonaga holene lone miadai biyagola ibu heyini.
1KI 17:23 Ani heyiyagola Elaya ibugua igiri ibu ai̱ya berearia haru daliape howa ibu ai̱yahondo mini. Ani mialu howa Elayahanda igiri biago ai̱yahondo lamialu howa lalu, Í̠naga igini ogoni ibu dabi halu bayale kago de handa, lene.
1KI 17:24 Ani layagola igiri ai̱ya biagome lalu, Henemaneore í̠ Ngode Datagaliwabenaga biabe biaga agali mbira henedane hendedogoni. Heneneore Anduane Homogo ibugua í̠ha howaore bi latagi hagadane hendedo, lene.
1KI 18:1 Gaea timbuni ogoni biaho ngelowa dege mali tebone hayagola Anduane Homogo ibugua Elayahondo lamialu lalu, Í̠ni Kini Ahabahanda hendelo ha pani hole pu. Ani poregola i̱na iba dalu ibiloleberogo, lene.
1KI 18:2 Ani laya handala Elaya ibu heyalu kini hearia pole pene. Ogoningi dege Samaria dindihabi hina gari timbuni piyagola
1KI 18:3 Kini Ahaba ibugua agali mini Obadaia olalu, I̱ koria ibabe, lalu lawia hene. Obadaia ogoni ibugua kini andagaha mbirale wiaru handaya howa mamage haga hene. Ani howa ibu horo bibahendengi Anduane Homogo andaneha haabo howa ibu mitangi bialu lotu laga hene.
1KI 18:4 Ani howa horo mbiru kuini wali Yasebelehanda agali Anduane Homogonaga bi mana latagi haga heneru bo wahai hole heangi Obadaia ogoni ibugua Anduane Homogonaga agali uruni aria handari mbira (100) bibahende egeanda hearuha minu do hai hene. Ibugua pira duria (50) egeanda mbiraha minu do halu pira duria (50) egeanda mendeha minu do hai howa tomo ibaru nelo migi bialu baya hangu handayaho hene.
1KI 18:5 Obadaia ibu Kini Ahaba berearia ibiyagola Kini Ahaba ibugua Obadaiahondo lalu, Áyu iyame dindi bibahendeha ibaga biai halu iba berene uliru iba emene emene abale piaga winiru bibahende taya biame habiya. Nogo hosi dongiru ti tani nolene maru uruniha anda holoba badago. Uruniha datani kane handa walia haribayagua nde iyanaga nogo uruni bo wahai naholeberaba, lene.
1KI 18:6 Ani lowa libuni bi lo mbiraore halu dindi maruha Ahaba ibugua taya bima piyagola dindi lene maruha Obadaia ibugua taya bima pole lowa libu mo tale bialu libuni polene wiyagoha pugupugu bini.
1KI 18:7 Ani pialu Obadaia ibu abale lola habiya lo wiribigoria pialu hearia ibu Elaya harigani ibalu hearia lola hene. Ani lola howa Obadaia ibugua Elayaoreyane hondowa ibu dindini bulu palu ibira halu Elayahondo hale halu lalu, Í̠ i̱naga agali haguane Elayaore kebe, lene.
1KI 18:8 Ani layagola Elaya ibugua ladai bialu lalu, E̱ i̱ Elaya kogo í̠na áyu ogoni dai bialu Kini Ahabahondo Elaya íbu ka lalu lamule pu, lene.
1KI 18:9 Ani layagola Obadaiahanda ibuhondo lalu, Agali haguane-o i̱na ko mbira agi birugonaga Kini Ahabahanda i̱ bo wahelonaga bi ogoni laribe.
1KI 18:10 Anduane Homogo í̠naga Ngode Datagaliwabe haluhe kagonaga minini howa i̱na heneneore larogo. Kini Ahaba ibugua í̠ hondoleore lowa dindi bibahendeha taya biame halu ka. Dindi mbiranaga agali haguane mbirame í̠ dindi ogoniha nahe layagua kini ibugua agali haguane o biagohondo, Hongo howa heneneore í̠ nahe la, lowa hongo halu bi laga.
1KI 18:11 Anigo áyu í̠na i̱ kini karia dai buwa í̠ ka lalu lama poliyabe. I̱ napoleore ndobe.
1KI 18:12 I̱na í̠ helo wahalu pialu koria Anduane Homogonaga dininime í̠ mo yalu dindi i̱ manda nabiniha pu tara hayagua Kini Ahaba ibu í̠ ogoria ka lalu lamerogoria hondole ibalu karia í̠ nahedane hondowa keba halu i̱ bo waholobadago áyu í̠na i̱ ibu karia pu nalabe. Horo bibahendengi i̱ Anduane Homogo andaneha haabo haga kogo í̠na i̱ dara holene nga. I̱ bambaore igiri emeneni howa bialu henego áyu kogoni howa ibu andaneha haabo halu ibu hangu mitangi bialu lotu lalu haruli.
1KI 18:13 Halu mbira kuini wali Yasebelehanda Anduane Homogonaga bi mana latagi haga agali bu hearu bo wahai hole heangi i̱na uruni aria handari mbira (100) egeandaha minu do haru. Pira duria (50) egeanda mbiraha minu do halu pira duria (50) egeanda mendeha minu do halu biru. Ani bialu i̱nime ti tomo ibaru nelo migi bialu handayaho haru. I̱na biabe bayale uruni bialu harudaruni í̠ manda bide.
1KI 18:14 Anigo áyu i̱na kini karia pialu í̠ daibu ka lama poliya hame larida. Áyu í̠na pu laregonidagua puwa lamerogola kini ibu ibuwa handalu karia í̠ naheyagua i̱ bo waholobada, lalu Obadaiahanda Elayahondo lamini.
1KI 18:15 Ani layago lelowa Elaya ibugua ladai bialu lalu, Í̠ gi nahabe. I̱ Anduane Homogo Hongo Haiheore howa haluhe kagonaga biabe biaga kogo ibunaga minini howa heneneore laro. Ahaba ibu ibalu horo áyu i̱ ogoria koria hondolebira, lene.
1KI 18:16 Ani layagola Obadaia ibugua dai buwa Kini Ahabahondo Elaya ka lalu lamiya handala kini ibu Elaya hearia pene.
1KI 18:17 Ahaba ibugua Elaya hearia pialu ibu lola howa lalu, Áyu Isaraele dindiha genda timbuni mo yu anda ibaga biagoni í̠ o kegonida, lene.
1KI 18:18 Ani layagola Elaya ibugua Ahabahondo ladai bialu lalu, I̱ ndo í̠nibi í̠ abahandabi Anduane Homogonaga bi mana lowini wiaru yu wahalu puwa dama mitangi bialu gime wabini Bala wiagohondo bi pupu wima tagira pirimigome genda ogoni mo yu anda ibirimi.
1KI 18:19 Áyu Isaraele wali agali bu karu bibahende í̠nime olalu haru halu amu Hari Kamelo kagoria i̱ lola hole íbu ngoai halimu lalu lamibe. Ibalu howa Balanaga bi mana latagi haga agali handari mariani pira duria (450) biarubi dama wali beda mitangi bialu gime wabini mini Aseranaga bi mana latagi haga agali handari maria (400) kuini wali Yasebele ibugua biamogo bialu ti tomoru nelo mialu biraga biarubi bibahende haru halu ibai halimu, lene.
1KI 18:20 Ani laya handala Ahaba ibugua Isaraele wali agali bibahendeore mo mogo bialu amu Hari Kamelo kagoria ibalimu layagola ti bibahendeore íbu ngoai ho hene. Balanaga bi mana latagi haga biarubi Aseranaga bi latagi haga biarubi ti haru íbu ngoai ho hene.
1KI 18:21 Ani íbu ngoai ho heagola Elaya ibugua wali agali hearia irigi halu puwa lalu, Wali agali tombene hondo kihe kamiruni mini mbiraore angi wuleberemibe. Anduane Homogo ibu Ngode Datagaliwabeore heagua nde ibunihondo hangu lotu lalu halimu. Bala ibu Ngode Datagaliwabeore heagua nde ibunihondo hangu lotu laramine, lene. Ani layagola wali agali bu hearume ibuhondo bi mbira ladai nabi hene.
1KI 18:22 Bi ladai nabiyagola Elayahanda lalu, Anduane Homogonaga bi mana latagi haga yu wahene mbiraore hangu i̱ kogoni. Ai Balanaga agali handari mariani pira duria (450) bibahende o kamirunida.
1KI 18:23 Ai bulumaga kira haru ibidaba. Mende Balanaga bi latagi haga o karu tigua balu podobaga bialu lomabu delolene ira gabu ngelowa ogoriani delole paga howa ngelalimu. Ani buwa ira dene nadelalimu. Bulumaga mendegobi i̱na ogonidagua dege buliya.
1KI 18:24 Ani bu mandabu ngelowa Balanaga bi mana latagi haga agali karuni tigua tinaga Balahondo bi pupu wilo. I̱nabi nde Anduane Homogohondo bi lolebero. Ani laramagola mendealinaga loma manda mandabu ngago ira minana dalipe halu loma binigo ogoni darago hondowa o biago ibuni Ngode Datagaliwabe heneneore henego ka lami̱ya, lene. Ani layago wali agali biaru tigua hale howa, Ogoni karulapeoredago ani bima, lai hene.
1KI 18:25 Ani layagola Elaya ibugua Balanaga bi mana latagi haga hearuhondo lalu, Tí dewalidago tígua ala bulumaga mbira balu podobaga buwa loma binigo delole ira gabu winidagoria pagaho ngeladaba. Ani ngelowa ira hedape nahe howa tínaga Bala hayadagome loma bini ogoni ira minana hedape halu delelo ibuhondo dela lalu bi pupu wilimu, lene.
1KI 18:26 Ani leagola agali Balanaga bi mana latagi haga biaru tigua wali agalime bulumaga mbira haru ibiyago balu podobaga buwa loma binigo bo delole manda manda bu wini. Ani mandabu ngelowa tigua tinaga dama mitangi bialu gime wabini Bala biagohondo ira hedape halu loma bini ogoni dela lowa bi hongo howa bi pupu egerebagi howa lalu heane dege horombe hanuni hene. Tigua hongo howa lalu, Bala-o í̠na inanaga bi laramago hale ha, laabo halu ga̱lalu tigua loma binigo delole dabu bia hene biago leneleneha pogola dagadaga bialu mali luyu ibaga biyagolabi hale halu mbirale mbira bia nabi wiyagobi dege wini.
1KI 18:27 Ai horombe hayagola Elayahanda ti mege buwa tongoyungu bi lalu, Bi hongo howa ga̱lalu ladaba. Ibu heneneore ka larimigo ndobe. Bi hongo howaore ladaba. Ibu mbirale tara mbira mitangi bialu biruwa tínaga bi nahale haruabe be mbiraha manga biyagola ibaga bialu tagira piyabe tobaheda. Ani ndoyagua ibu dindi kaundiaha tagira pialu piyabe be u palia hondo haruabe tobahedago bi hongo howa lalu barila hadaba, lene.
1KI 18:28 Elaya ibugua ani layagola Balanaga bi latagi haga agali biarume hongoore howa bi lalu ga̱lalu dabarume tinaga tingini minu podalu hene. Ani bialu wai biaga ayu tibu nene gadele emene tubagi yiarume tininaga tingini Balanaga bi pupu wialu mana biaga winidagua bialu darama ibilo podaga bialu hene. Ani bialu hemigola darama timbuni tinaga tinginini pigipugu lalu hene.
1KI 18:29 Uruni biyago bilowa harugo lowa hibu laga bialu lalu ha dege biane ai alendo halu bi emeneorebi nale mbira ladai nabi wiane dege alendonaga loma binigo delagane tu hene.
1KI 18:30 Ani biyagola Elaya ibugua wali agali hearuhondo lalu, Ai i̱ kogoria kaware ibidaba, layagola ti bibahende ibu heagoria íbu ngoai ho hene. Ani íbu heagola Elaya ibugua Anduane Homogonaga loma biniru bo delaga dabu abale tigua bu gialo wahene wiago lone mo tiga buwa biadai bini.
1KI 18:31 Ani buwa ibugua ege to̱le̱ homberia (12) Yagaba igini homberiali (12) biaru manda bialu mo yini. Yagaba ibu bamba Anduane Homogohanda mini gahenge wia aribia halu ibu mini Isaraele wialu mani wali agali tigua í̠naga mini Isaraele lolebira lenego.
1KI 18:32 Ai Elaya ibugua ege to̱le̱ urunime Anduane Homogohondo mitangi bialu lotu lolenaga loma biniru bo delolene dabu bule mo yini. Ibugua dabu bia howa iba ganarua dabu ange wiadagua iba gorene timbuni iba mbagedi be karia agima to̱labehe birulene bini.
1KI 18:33 Ani buwa Elaya ibugua ira gabuwa loma biniru bo delolene dabu biagoriani manda mandabu ngelowa bulumaga biago balu podobaga buwa ira manda mandabu wiyagoriani mo paga hai hene. Ani buwa ibugua wali agali biaruhondo lamialu mbagedi be mariani iba hambu yalu ibuwa bulumaga loma binigo bo delole manda mandabu ngagoriabi ira gabini bulumaga delo dindiha ngarubi bibahendeni odoba hai hadaba layagola tigua anidagua biai hene.
1KI 18:34 Ani biyagola ibugua tihondo lalu, Lone hambu odoba hadaba, layagola tigua ani bini. Ibugua lone lalu, Halu mbira lone hambu odoba hadaba, layagola tigua lone dege hambialu odoba hene.
1KI 18:35 Anidagua biyagola loma binigo delole dabu manda mandabu wiyagoria howa iba pugu lalu piyagome ganarua lenelene bu wiyagoria iba timbuni biruyu mabu bini.
1KI 18:36 Alendonaga loma biniru delolenengi hayagola Elaya ibugua loma biniru bo delaga dabu bu helayagoria kaware pu howa lalu, Anduane Homogo-o Abarahamanagabi Aisaganagabi Yagabanagabi Ngode Datagaliwabeore í̠ni kegoni. Í̠ hanguore Isaraelenaga Ngode Datagaliwabe kegonibi í̠naga biabe biahaga agali mbiraore i̱ore henedalo hendelobi mbirale uru í̠nime bia lalu kedagua bialu harudane hendelobi ti mo walia ha.
1KI 18:37 Anduane Homogo-o i̱naga bi larogo hale halu i̱na bia lalu kogo bibe. Ani beregola wali agali o karu tigua Anduane Homogo í̠ni hanguore Ngode Datagaliwabe henene henedane hendelo. Ani beregome wali agali urunaga bu mini mo beregedalu í̠ni keria haru dai buleberego manda bilo ani bia, lene.
1KI 18:38 Ani layagola Anduane Homogohanda ira dene ibira hayagola loma binigo wiyago dai halu ira wiarubi ege to̱le̱me dabu biyarubi dalu dindi angeni wiarubi bibahende do tauladaga hene. Iba ganarua bini biagoha biruyu mabu biyaruni heba dalu do yobiai hene.
1KI 18:39 Wali agali bu hearume anidagua biyago hondowa tini dindini palipe hai howa bi ladaga halu lalu, Anduane Homogo ibuni Ngode Datagaliwabeore kagoni. Anduane Homogo ibuni Ngode Datagaliwabeore kagoni, lalu lene.
1KI 18:40 Ani leagola Elayahanda lalu, Balanaga bi mana latagi haga agali o karuni mbirali pora bialu napelo bibahendeore minai hadaba, lene. Ani layagola tigua agali uruni bibahendeore minai hene. Ani biyagola Elaya ibugua agali uruni haru halu Kisono ange wiagoria dalipe howa bibahendeore bo wahai hene.
1KI 18:41 Ani buwa Elayahanda Ahabahondo lamialu lalu, Ai iba dalu timbuniore ue lalu ibaruane hale kogo áyu ogoni abale andaga pialu tomo nole gerai lalu pu, lene.
1KI 18:42 Ahaba ibu tomo nole abale andaga piya handala Elaya ibunaga biabe biahaga agali mbira heba Hari Kamelo nene wiagoria iraga howa dindini bulu paluwa ibunaga wanakui ge duli labo hengeneha paga howa berene.
1KI 18:43 Ani biruwa ibugua agali ibunaga biabe biahaga biagohondo lalu, Í̠na puwa iba solowara bedagoha handa amu hole pu, lene. Ani laya handala agali biago ibu puwa handa amu halu dai buwa lalu, Mbirale mbira biyaria nahende, lene. Ani layagola Elayahanda lalu, Lone hondole pu, laya handala agali biabe biahaga biagome lone hondole pene. Anidagua dege bialu ka halu pu íbu bialu hene.
1KI 18:44 Ai nde kanegoria agali biago ibugua dai bialu howa lalu, I̱na amu iba solowara bereagoria hari beraliba mbira emene dege agalinaga gi ale amura ibiyane handaru, lene. Ani layagola Elayahanda agali ibunaga biabe biahaga biagohondo lamialu lalu, Áyu ogoni abaleore Kini Ahaba karia puwa í̠naga garo ale karisi nogo hosime gililaga biagoria biralu iba dalu naibidaore andaga abale pu lalu lamule pu, lene.
1KI 18:45 Emeneore howa ginu mindibirume iba dalu ibule abaleore aruma hai hene. Ani bialu puyabu hongohe pulalu iba dalu abaleore ibira hene. Ani biya handala Ahaba ibu abale karisi biagoria iragaho biralu andaga pole Yaserili tano polene hariga wiadagua pene.
1KI 18:46 Ani pialu heagola nde Elaya ibuha Anduane Homogonaga hongo mo karula hayagola ibunaga aga luni bu heago gambalibu tubagi halu andaga pole Ahabanaga nogo hosi baba gerai lowa ibu mo bamba halu puwa libu haru mandagi Yaserili tanoha anda pene.
1KI 19:1 Kini Ahaba ibu andaga Yaserili dai buwa ibu one kuini wali Yasebelehondo Elayahanda biyaruni bibahende lamiai halu dama Balanaga bi mana latagi haga agali bo wahai hayarubi bibahendeore lamiai hene.
1KI 19:2 Ani layago hale howa Yasebele ibugua Elayahondo bi lawia halu lalu, I̱na í̠bi nde agali uruni homayadadagua homabelo yawi bo waholiya. I̱na í̠ yawi nabaruyagua nde dama maru bu karunime i̱ni bo wahelo laro, lene.
1KI 19:3 Ani layago hale howa Elaya ibu gi halu agali ibunaga biabe biahaga biago libu haru ibida pialu Yuda dindihayagi dindi emene mbira Beaseba wiagoha anda pene. Anda pialu ibunaga biabe biahaga biago ogoniha helalu
1KI 19:4 ibuni dindi ko iba dalu naibaga wiagoha horo mbiru hangu pialu anda pene. Pu dege bialu ira mbira heneyago andane gumba heagoha anda íbu biruwa bi ogodagua lene. Anduane Homogo-o genda dewaore i̱ha áyu ibirarunigo ai karulape i̱ homolene hangu hamelo bedogoni. Áyu i̱ agali bayale ndo agali ko bamba i̱ mamali henerubi dege ko kogodago, lene.
1KI 19:5 Ibugua bi lai halu de umu layagola ira tene gumba heagoha emene palene. Ani palearia dahuliyali mbirame abale ibuwa ibu ela halu barila howa lalu, Heyalu tomo na, lene.
1KI 19:6 Elaya ibu heyuwa handa a̱i̱na̱i̱ bialu hearia mberedi mbira ege to̱le̱ poboheme hirini ibu haguanda wiyagohayagi wialu iba be mbiraha iba hambu wialu biaria hendene. Ibugua mberedi ibabi nalu lone paliadai bini.
1KI 19:7 Palearia Anduane Homogonaga dahuliyali biago lone ibalu ibu barila howa lalu, Í̠ hariga polene lu dege wuligo ai pole heyalu tomo na naberego, lene.
1KI 19:8 Ani layagola Elaya ibu lone heyuwa tomo ibabi nene. Tomo ogoni nowa hongo heagola ibugua horo pira mariani (40) mbiraga horombebi heba pialu Ngode Datagaliwabenaga hari loma bia hene Sainai mini mende Horebe laga heagoria anda pene.
1KI 19:9 Ani pialu mbi layagola Elaya ibu egeanda mbira heneyagoha anda puwa palene. Ibu ani palearia Anduane Homogohanda hale halu lalu, Elaya-o í̠ ogoha agi bialu kebe, lene.
1KI 19:10 Ani layagola Elayahanda ladai bialu lalu, Anduane Homogo Hongo Haiheore Ngode Datagaliwabe-o i̱ í̠ninagaore biabe biahaga henego kogoni. I̱na Isaraele wali agali bibahendeme í̠naga bi mana hale halu bilo mo walia haga henego ai tigua í̠ erembira ngialu habo nalolene bi bamba lo wirigo puguaya. Tigua í̠naga loma biniru bo delaga dabu wiaru gialabagabu wahalu í̠naga biabe biahaga agali hearuni bibahende bo wahai haya. I̱ hangu yu wahene hewagola ai i̱bi nde bo wahole ka, lene.
1KI 19:11 Ani layagola Anduane Homogohanda lalu, Í̠ tagira pialu li hari nene i̱naga wanakui ngogoria pu ha. Ogoriani keria i̱na ibalu í̠ni pu bolangua holeberogo, lene. Ani pu heagola puyabu hongoheore timbuni mbira ibalu harini ege to̱le̱ wiaruni kambulu baga bini. Anigo Anduane Homogo ibuni puyabu ogoniha nahe wini. Mani howa puyabu piai heagola dindi dumbirumbi timbuni bini. Ani biyagola Anduane Homogo ibu dindi dumbirumbi ogonihabi nahe wini.
1KI 19:12 Mani howa ira hungu ibinigo ai Anduane Homogo ibu ira hungu ogonihabi nahe dege wini. Mani uruni biai heagola bi emeneore hale habe nahe hagarere bi layuane hale hene.
1KI 19:13 Bi ogoni layuago hale halu Elaya ibu ibuninaga aga luni biagome dengui bu yihalu egeanda biagoha hayago yu wahalu emene harabani ale tagira pene. Ani tagira piyagola bi mbira layuagome lalu, Elaya-o í̠ ogoria agi bialu kebe, lene.
1KI 19:14 Ani layuago hale howa Elaya ibugua ladai bialu lalu, Anduane Homogo Ngode Datagaliwabe Hongo Haiheore-o i̱ hangu í̠naga biabe biahaga howa Isaraele wali agali bibahende í̠naga bi mana hale halu bilo mo walia haga henego ai tigua í̠ erembira ngialu habo nalolene bi bamba lo wirigo puguaya. Tigua í̠naga loma biniru bo delaga dabu wiaru gialo bagabu wahai halu í̠naga bi mana latagi haga agali hearuni bibahende bo wahai haya. I̱ hangu yu wahene hewagola ai i̱bi nde bo wahole ka, lene.
1KI 19:15 Ani layagola Anduane Homogohanda lalu, Áyu ogoniore í̠ni ibiridagua dai bialu tano Damasagasanaga dindi lene mbira wali agali napale ngagoha pobe. Ani pu howa mani tano ngagoha anda pialu agali mbira mini Hasaele holebirago ogoni karia puwa ibu Siria dindiha kini helo ibunaga haguaneni weli odo wia habe.
1KI 19:16 Ani bialu agali mende Nimisi hameigini aria Yihu holebirago ogoni ibu Isaraele wali agalinaga kini helo ibunaga haguaneni weli odo wia habe. Ani buwa Sabada igini Elaisa ibu Abele Mehola tano howa ibini kago ogoni ibu í̠ni henegoria ho aribia howa i̱naga bi mana latagi haga helo dabo helabe.
1KI 19:17 Ai Hasaele ibu kini harangi ibugua wali agali dewaore bo waholebira. Maru ibida pora bialu piyagua Yihu ibugua bo waholebira. Maru Yihuhanda bara handala ibida pora bialu poraru Elaisa ibugua bo waholebira.
1KI 19:18 Anigo Isaraele dindini wali agali daosini karia (7,000) hangu dama mitangi bialu gime wabini Balanaga mini yaraga halu ge duli hanga nahagabi tinaga ne hambume Bala nu̱nu̱ nalaga karubi ti hangu helo yupe holebero, lene.
1KI 19:19 Elaya ibugua Anduane Homogohanda bi layago hale halu ibu Hari Sainai wahalu Isaraele dindiha dai bini. Ani dai buwa handalu hearia Sabada igini Elaisa ibu agali beriali (11) haru howa mabuha biabe bialu bulumagame mbirale tara dindi aliaga aleme dindi alilo bulumagame mbirale uruni gililo yu ibaga bilonaga mo tiga bigi bialu hemiria hendene. Agali beriali (11) uruni ti tinaga bulumagame biabe bilo mo tiga bima bamba halu piai hayagola Elaisa ibu dege ibunaga bulumaga kira heba biabe bilo mo tiga bima mani ibini. Ani ibiyagola Elayahanda ibunaga aga luni biagimbu biaga mbira biago golowa Elaisa mo karula hene.
1KI 19:20 Anidagua bialu Elaya ibu piyagola Elaisa ibu biabe bialu hayago wahalu gerai lalu Elaya piyago haruru puwa ibuhondo lalu, Mbaliya dege i̱ aba ai̱yaru karia ala dai buwa i̱ porogo tí hondo halimu lole poliya ani bia larene, lene. Ogonidagua hale hayagola Elayahanda ibuhondo lalu, E̱ karulape i̱na í̠ napobe naloleberogo pu, lene.
1KI 19:21 Elaisa ibu abale andaga dai buwa ibunaga bulumaga kira bene. Ani buwa mbirale dindi aliaga irame wabini bulumagani dariba hamaga kagola dindi aliaga ogoni biago gabuwa bulumaga bayagonaga mbirini wiaru ogonime hiruwa wali agali biru hearu nelo migi biyagola ti nene. Anidagua biai halu ibuni Elaya piyadagua talima pialu Elayanaga biabe biahaga hene.
1KI 20:1 Sirianaga Kini Benehadada ibugua Isaraelealiru baba wai bu pole howa ibunaga ami agali bu hearu mo manda manda bu helene. Ani heagola kini dege pira tebirani kira (32) heba tinaga wai biaga garo ale karisirubi nogo hosirubi Benehadada biamogo bulenaga haru halu íbu mogo bu hene. Ani bialu puwa tigua Samaria tano ho hagira buwa wai bialu hene.
1KI 20:2 Benehadada ibugua agali maru Kini Ahaba ibu Samaria tanoha hearia bi lamule yalu pudaba lowa lalu, Kini Benehadadahanda í̠hondo bi ogodagua lara.
1KI 20:3 Í̠naga muni siliba ngolobi í̠naga wali bedarubi í̠naga waneigini hongohe karubi bibahende i̱ ngiai habe, laya lalu lole pudaba, lene.
1KI 20:4 Anidagua layiyago hale howa Kini Ahaba ibugua Benehadadahondo ladai bialu lalu, I̱naga agali haguane Kini Benehadada-o í̠na i̱hondo o bibe laridagoni biai holebero i̱nibi i̱naga mbirale ngoru bibahendebi uruni í̠naga dege wiai kagoni, lene.
1KI 20:5 Mani agali bi yalu piagarume bi lama dai biyagola Kini Benehadadahanda agali urunihondo lone lama dai bidaba lowa bi lawia halu lalu, Abale hale harugo í̠naga muni siliba ngolorubi í̠naga wali biru ngarubi í̠ni waneigini hongohe karubi ngibe laru.
1KI 20:6 Ani larugo ai áyu i̱naga agali haguane karu tinime í̠ andagahabi í̠naga agali haguaneru ti andagahabi tinime anda ibalu mbirale í̠nime hamelaga wiridaru tinime mo yai helo. Yawi ni áyu ogonidagua haragola anda ibulebira, lene.
1KI 20:7 Bi ogoni layiyago hale howa Kini Ahabahanda ibunaga agali bu hearu ibidaba lowa tihondo hale halu, Ala agali ogo ibugua i̱naga wali biru ngarubi i̱naga waneigini hongohe karubi i̱naga muni siliba ngolobi bibahende ngiai habe laya. Ani layagola i̱na bi uruni karulape aleda lo manda bialu e̱ larugo ai áyu bi lone lo beregedayada. Ani biyadagome ibugua ina mo ko halu bolene manda biyada, lene.
1KI 20:8 Ani layagola agali haguane hearumebi wali agali maru hearumebi Ahabahondo lamialu lalu, Ibunaga bi o layadagoni hale halu talia nabi waha. Í̠na mana ogonidagua bulene nawigo wahalu waha, lene.
1KI 20:9 Ani layago hale howa Ahaba ibugua Benehadadanaga agali ibiyaruhondo lamialu lalu, Tígua Kini Benehadada karia pialu ogodagua lalimu. Í̠na bi pigane lariyago karulape degeda lo manda birugo ai áyu bi mende laridagoni i̱na e̱ nalolebero ndoore laro, lene. Ani laya handala agali biaru tigua puwa Ahabahanda layadagua Benehadada lamini.
1KI 20:10 Bi ogoni layago lelowa Benehadada ibugua agali biaru Ahaba hearia bi lone lo yalu dai bidaba lowa lalu, Áyu i̱na ami agali dewaore haru halu ibuwa í̠naga tano ogoni bo gialabaga bialu bole eberogoni. Tigua í̠naga tano ogoni bo gialabaga bialu haealabagabu waholebira. I̱na anidagua nabiruyagua i̱naga bi pupu wiaga dama karu tinime i̱ bo wahelo laro, lene.
1KI 20:11 Ani layagola Ahaba ibugua agali bi yalu ibiyaruhondo lalu, Tígua Benehadadahondo ogodagua lalimu. Agali mbira ibu ami agali henene howa ibunaga wai biaga ayu tibu andaneha yuwa yári maru maru karulalu howabi balagala howabi wai bi ladaga halu haga ndo. Ibugua wai biai howa bo poda hana howa turu halu wai bi laga, lene.
1KI 20:12 Kini Benehadada halu kini marubi ti Sugodo tano wiagoria lulu iba nalu berene. Ani biru hemiria agali Ahabanaga bi layaru lamule yalu anda pene. Ani layago hale halu puwa ibunaga ami agali hearuhondo Samaria tanoha wai bule pudaba lene. Ani laya handala tigua Sugodo tano wahalu wai bule pene.
1KI 20:13 Puwa horo ogoningi Anduane Homogonaga bi mana latagi haga agali mbira Ahaba hearia pialu ibuhondo lamialu lalu, Anduane Homogohanda ogodagua laya. Benehadadanaga ami agali dewaliore ibiragoni de handa. Áyu i̱na uruni bo poda hana helolebero. Ani berogola í̠na i̱ Anduane Homogo i̱niore ogoni henedane hondolebere laya, lene.
1KI 20:14 Ani layagola Ahaba ibugua Anduane Homogonaga bi mana latagi haga agali biagohondo hale halu lalu, Aiwa wai bu pialu bo poda hana holobadabe, lene. Ani hale hayagola agali biago ibugua kinihondo lalu, Anduane Homogohanda bi ogodagua laya. Ndisigiri mbira mbirani haru haga hearume igiri daliahe haru howa tigua bo poda hana holebira laya, lene. Ani layagola kini ibugua lone hale halu lalu, Tí wai bule pudaba lalu aiwa wai hono miragola bule polobadabe, lene. Ani hale hayagola Anduane Homogonaga bi mana latagi haga biagome lalu, Í̠na wai hono mulebere, lene.
1KI 20:15 Ani layagola kini ibugua igiri daliahe biaru olalu íbu ngoai hadaba lene. Igiri daliahe uruni ti handari kirani pira tebirani kira (232) hene. Ani heagola mani Isaraele ami agali bibahende íbu ngoai hadaba lene. Ami agali uruni bibahende daosini karia (7,000) hene.
1KI 20:16 Horombe hanuni hayagola Kini Benehadada halu agali kini maru pira tebirani kira (32) biaru ti nde Sugodo tanoni lulu iba nalu henego ai ti iba biagome mo luluya heaore dege Isaraeleali tigua wai bule anda ibini.
1KI 20:17 Benehadadahanda ibunaga ami agali marume Isaraelealiru mamage hole pudaba layagola tigua puwa handalu hemiria Isaraelenaga agaliru ti heagoha ibule ibiyaria hendene. Ani handalu dai buwa tigua Kini Benehadadahondo lamialu lalu, Agali maru Samaria howa tagira ibalu ibira, lene.
1KI 20:18 Ani layago hale howa Benehadadahanda ibunaga ami agali biaruhondo lamialu lalu, Tígua pialu minu yania hole pudaba. Tigua ina baba wai bule ibiniyaguabi wai nabule lama ibiniyaguabi tanabi minu yania halimu. Anigo tígua mbirali homelo nabalimu, lene.
1KI 20:19 Isaraelenaga ami igiri daliahe biaru tigua bamba halu piyagola ami agali marume mama talima pialu tigua Siriali biaru baba wai bule pene.
1KI 20:20 Puwa Isaraele ami agali biaru tigua wai hongoheore bialu howa agali ti baba ba edene bialu wai biyaru bibahende balu home laiore hene. Ani biyagola Siriali biaru ibida piai hayagola Isaraele ami tigua haruru talima pene. Anigo Kini Benehadada ibu nogo hosini biralu agali maru nogo hosini biruwa wai biaga hearu baba mandagi ibida piai hene.
1KI 20:21 Ani piyagola Kini Ahaba halu ibunaga ami agaliru tigua Siriali karisini howa wai biagabi nogo hosini biruwa wai biaga biarubi ti baba wai bule pene. Puwa tigua Siriali dewaore bo wahai halu ti wayali hene.
1KI 20:22 Ani bu heagola mani agali Anduane Homogonaga bi mana latagi haga biagome Kini Ahaba hearia puwa ibuhondo lone lamialu lalu, Áyu ogoni dai buwa í̠naga ami agaliru mo hongo hole pu. Ani bialu howa Siriali uruni baba wai ogodaguaore bule lowa wai hanalu hole pu. Anidagua larogoni irane Sirianaga kini kagome mali edegonaga í̠la wai bule lone dai bulebirago o larugonidagua bule pu, lene.
1KI 20:23 Wai halu mbira ogoni bu howa Kini Benehadada ibunaga agali haguane biarume ibunihondo lamialu lalu, Isaraele wali agali tinaga mbirale bi pupu wiaga dama hearu ti dindi hari bare bare wiagoha haga wiagome ina hari bare bare wiagoha wai bialu hemaria urunime ti biamogo biyagola ina balu bo poda hana haya. Ai iname yu dindi ngagoria ti baba wai birimayagua ina ti bo podalu wayali holeberema ndobe.
1KI 20:24 Ani bialu í̠na kini agali biaru tigua ami haru helo hela nabibe. Wahalu í̠naga ami agali haru haga haguane karuni tinime ami agali haru bamba helo helabe.
1KI 20:25 Helowa ami agali ala haraligobi ho karulelo agali maru minu tago holene nga. Ani bialu nogo hosibi nogo hosime gili laga garo ale karisibi bo gialo wahai hayaruni mo aribia halu abale wiagadagua ngelo yolo bulene nga. Ani biai halu iname dindi tigabi yu dindi ngagoria pialu Isaraelealiru baba wai birimayagua iname ti bo podalu ina wayali holeberama, lene. Agali haguane biarume ani bulene nga lalu lamiyadagua Kini Benehadadahanda biai hene.
1KI 20:26 Ani bialu mali mende hayagola Kini Benehadadahanda ibunaga ami agaliru haru halu Isaraelealiru baba wai bule Abege tano wiagoria anda pene.
1KI 20:27 Anda ibiyago handalu Isaraelenaga Kini Ahabahanda ibunaga ami agali hearu olo ngoai howa wai biagane ale damenego mo manda manda bu hene. Ani biai halu ti amu Siriali biaru baba wai bule ti heagoha kaware pu hene. Pu howa tibi nde balai anda halu ki bini. Isaraele ami agaliru emene hanguore nogo meme wabuni haradagua bini. Anigo Siria ami ti dewaore dagalabe nahe dindi wiagoria bibahendeha ho paya paya biame hene.
1KI 20:28 Ani heagola Anduane Homogonaga bi mana latagi haga agali mbira ibugua Kini Ahaba hearia puwa ibuhondo lamialu lalu, Anduane Homogohanda bi ogodagua laya. Siriali bu karume i̱ hari nene ngarunaga hangu Ngode Datagaliwabe ka i̱ dindi tigabinaga Ngode Datagaliwabe ndo ka lalu kago. Ai tí Isaraele wali agali bu kamirume i̱ni Anduane Homogoore henedalo manda bilimulonaga Siriali ami timbuni dewa bu karuni bo podalu wayali halimulo i̱na tí biamogo bulebero laya, lene.
1KI 20:29 Siriali Isaraelealibi tininaga balai anda bu hayadagoria horo waragaru ho hagahaga bu henego ai horo kane hayagola tigua wai pigane pora bialu wai bini. Wai bialu howa horo ogoningi dege Isaraeleali biarume Siriali ami biaru daosini dege handari mbira (100,000) bo wahai hene.
1KI 20:30 Bo wahai hayagola Sirianaga ami agali maru pora bialu ibida Abege tanoha anda piai hene. Anda pialu hearia tano pabe timbuni heago podo ibira howa daosini dege pira kirani karia (27,000) lone batago halu bai hene. Benehadada ibunibi nde ibida pialu tano biagoha anda mbira heagonaga hobane mbiraha bira do hene.
1KI 20:31 Ani bereagola ibunaga agali haguane hearume hondo puwa ibuhondo lamialu lalu, Iname bi mbira hale harimago ai Isaraelenaga kini karu tigua agali dara holene irane nawini tigua dara haga ka layane hale harima, lene. Ani layago ai iname wai mbira hono ngama. Iname dara kama lalu mana walia hole aga biaga ale karulalu pume inanaga mani hendeho labelabe bialu Isaraelenaga kini karia polene manda bu kama. Anidagua polene hamelo kamago ina pudaba loleberebe be napole loleberebe. Iname ogonidagua birimayagua Kini Ahaba ibugua í̠ dara halu bo wanaholebira, lene.
1KI 20:32 Benahadada ibugua karulapego anidagua bidaba layagola tigua dara ho howa aga karulaga ale karulalu pume tininaga mani hendeho labelabe bini. Ani bialu tigua Kini Ahaba hearia puwa lalu, Í̠naga biabe biahaga agali Benehadada ibu dara halu bo wanahabelo hamelo beda, lene. Ani layagola Ahabahanda tihondo hale halu lalu, Ibu homa nabi kabe. Kayagua nde bayale ibu i̱ hameneore ale kagoni, lene.
1KI 20:33 Benehadadanaga agali haguane ohe biaru tigua Ahaba ibunaga bi layago baya hanguore hale ho hearia ibu i̱ hameneore layagola tigua manda bialu mbirale birimago bayale mbira hariga wini birimadago ai karulape holobada lo manda bu hene. Ani manda buwa tigua Ahabanaga bi layago abale yamuwa tigua ibuhondo lalu, Heneneore Benehadada ibu í̠ hameneore ka, lene. Ani layagola Ahabahanda tihondo lalu, Ibu i̱ni koria haru halu ibule pudaba, lene. Ani laya handala tigua Benehadada lamule piyagola Benehadada ibu Ahaba hearia pene. Piyagola Ahabahanda Benehadada ibunaga garo ale karisi biagoria iraga ha, lene.
1KI 20:34 Ani layagola Benehadada ibugua Ahabahondo lamialu lalu, Bamba iya aba libu wai bialu howa í̠naga tano maru karulo hene ngamaru í̠nihondo ngiadai biai holiya. Ani bialu bamba i̱ aba ibugua Samariani bialu henedagua í̠na Damasagasa tanoha tanabi howa biyinayaru bialu habelo, lene. Ani layagola Ahaba ibugua ibuhondo lamialu lalu, Í̠na henene o laregoni buleyagua nde i̱na í̠ pobelo yupe holebero, lene. Ani lalu Ahaba Benehadadala libugua habo nalolene bi lo wialu Benehadada pelo wahene.
1KI 20:35 Benehadada ibu peagola Anduane Homogohanda ibunaga bi mana latagi haga agali heagohondo bi galone mbira mo walia hayagola ibugua agali ibunaga biabe mandagi biaga mbira heagohondo lamialu lalu, Í̠na i̱ babelo hameledogo ba, lene. Ani layagola Anduane Homogonaga bi mana latagi haga agali mende biagome, Nabole, lalu ibu nabe wahene.
1KI 20:36 Wahayagola ba laga biago ibugua agali mende nabole laga biagohondo lamialu lalu, Bi i̱na langerogoni Anduane Homogo ibuninaga bi langero. Ani langirugo í̠na i̱naga bi larugo mo waharigo ai í̠na i̱ wahalu pole pialu keria harigani budi ale gabua timbuni laionome í̠ bolebira, lene. Ani laya handala Anduane Homogonaga bi mana latagi haga agali biago ibu andaga pole harigani pialu hearia laionome bo wahene.
1KI 20:37 Mani Anduane Homogonaga bi mana latagi haga agali biagome agali mende hearia puwa lalu, I̱ babelo hameledogo ba, lene. Ani layagola agali ogonime hongo howa Anduane Homogonaga bi mana latagi haga agali biago mo ko howaore bene.
1KI 20:38 Ani bayagola ibugua agali marume ibu Anduane Homogonaga bi mana latagi haga agalida lo manda nabilo ibunaga dengui aga budinime bu dambiho yalu pene. Puwa ibu hariga tene wiagoria Kini Ahaba ibilo hondo hene.
1KI 20:39 Kini ibiyagola Anduane Homogonaga bi mana latagi haga agali biago ibugua bi hongo howa ladaga halu lalu, Kini-o bi larogo hale ha. I̱ wai pu hewagola inanaga ami agali mbirame inanaga waitigi agali mbira haru halu ibuwa i̱hondo langialu lalu, Í̠na agali ogo baya hanguore handayaho habe, laya. Agali ogoni ibida pelo hariyagua i̱na í̠ homabelo bo waholebero. Í̠ homabelo bo wanaharuyagua nde muni siliba daosini tebira (3,000) ngulebere, laya. Ami agali ogoni ibugua i̱hondo bi ogonidagua langialu ibuni piya.
1KI 20:40 Ai kini-o i̱na agali ogoni baya hangu handayaho nahe biabe maru bialu kaundiani dege hewaria ibu pora bialu ibida piyiya, lene. Ani layagola kini biagome lalu, Í̠nimeore mana ko bu howa latagi harigoni. Anidagua latagi harigome ai í̠niha ogo ale ibulubada lo manda bu kegoni, lene.
1KI 20:41 Anidagua layagola Anduane Homogonaga bi mana latagi haga agali biago ibunaga dengui agame bu yi heago mo wahayagola kini biagome Anduane Homogonaga bi mana latagi haga agali biago ibu heneyane handa walia hene.
1KI 20:42 Anduane Homogonaga bi mana latagi haga agali biagome kinihondo lalu, Anduane Homogohanda ogodagua laya. I̱ Anduane Homogo i̱na lalu, Tígua wai bialu howa tínaga waitigi bibahende bo wahai halimu lalu langirugo. Ai anidagua nabi í̠na Kini Benehadada minu yuwa yupe halu ibunaga ami agali bu hearubi ibida piai helariya. Anidagua biriyagonaga pani Benehadada ibu homolene winidagua í̠ni homalu ibunaga ami agali ibida piyaru homolenedaguabi í̠naga ami agali bu karu tigua homa aribia holebira, lene.
1KI 20:43 Kini ibugua bi o layadaruni hale howa ibunaga bu miniha genda howa keba hama ibuni dalu Samaria dai bini.
1KI 21:1 Yaserili tanoha Kini Ahaba andaga timbuni heago kawareni Yaseriliali mbira mini Nabodo henegonaga gerebi mabu mbira wini. Wai timbuni Sirialiru baba biyago biai howa
1KI 21:2 Kini Ahaba ibugua Nabodohondo lalu, Í̠ mabu ogoni i̱ anda mandahadago ainde i̱ nemaru hongole gama wuliya ngi. I̱na gerebi mabu ogobi ndo bayaleore mbira í̠ nguliya. Ai mabu ndo muni nguliya hame lariyaguabi nde muni karulapeore yolo buliya, lene.
1KI 21:3 Ani layagola Nabodo ibugua ladai bialu lalu, Mabu ogoni bamba i̱ aba mama mamaliru tinagaore wialu tini hondo hama ibini ngogo. Áyu i̱na Anduane Homogonaga minini howa heneneore larogo mabu ogoni í̠ nangulebero, lene.
1KI 21:4 Ahaba ibugua Nabodohanda bi ogonidagua ladai biyago hale howa ibunaga bu miniha tandaga timbuniore howa keba hama pene. Ibuni andaga Samaria dai buwa ibuni dagiani pialu palene. Ani paluwa ibu tomobi nane tagiraha de handatagi ho palene.
1KI 21:5 Ani palearia ibu one Yasebele ibu kini paleagoha puwa lalu, Í̠ bu miniha genda yuwa tomo nane wa kego irane agibe, lene.
1KI 21:6 Ani hale hayagola ibugua Yasebelehondo lalu, Yaseriliali Nabodo ibunaga gerebi mabu wiago i̱na mabu mende aribia holiya ngi larugolabi ibu muni karulapeore nguliya ngi larugolabi ibugua nanguleore laya, lene.
1KI 21:7 Ani layagola Yasebele ibugua ibuhondo lalu, Isaraele dindiha kini mendeali mbira kabe be í̠ kegoni. Áyu genda nahe waha. Heyalu tomo na. Nabodonaga gerebi mabu ogoni i̱na í̠ mo ngulebero, lene.
1KI 21:8 Ani lalu Yasebele ibugua beba mbira Ahabanaga minini gili buwa kininaga magi helalu buwa agali haguanerubi agali haguane dabo helenerubi Yaserili tano Nabodo haga wiagoha hearuhondo pelene.
1KI 21:9 Beba uruniha bi uru gilibu wia hene. Tigua tomo nane holene horo mbira pongo bo ngelowa horo ogoningi Yaserili wali agali bibahende íbu ngoai halimu lalu lamilimu. Ani íbu ngoaiho kagola Nabodo ibu dagia dunini bambaho ngagoria berelalimu.
1KI 21:10 Ani berelowa agali ko ke̱ haga dogahe kirali ibu heba mandagi berelalimu. Agali ko kirali ogoni libugua ke̱ howa Nabodohondo lalu, Nabodo í̠na Ngode Datagaliwabehondobi kinihondobi bi ko larigoni, lelo dabo berelalimu. Ani ledagola tigua Nabodo tano tagirahayagi haru tagira puwa ege to̱le̱me balu homelelalimu, lalu gilibu wia hene.
1KI 21:11 Ani layagola hale howa Yaserili tanoha agali haguanebi dabo helene hearubi tigua Yasebele ibugua bilimu lalu layadagua bialu
1KI 21:12 horo mbirungi tomo nane hami̱ya lalu horo pongo bo wini. Horo pongo bo wiyadangi wali agali bibahende íbu ngoai halimu lene. Horo ogoningi wali agali íbu ngoai ho heagola tigua dagia dunini bamba howa Nabodo berelene.
1KI 21:13 Ani berelowa agali ke̱ haga dogahe kirali Nabodo bereagoria kaware íbu berelene. Ani biruwa libugua wali agali íbu ngoaiho hearunaga deni ke̱ howa Nabodohanda bi ko laya lowa libugua lalu, Nabodohanda Ngode Datagaliwabehondobi kinihondobi bi ko laya, lene. Ani layago hale howa wali agali bu hearu bibahendeme Nabodo tanoha howa haru tagira puwa ege to̱le̱ dugualu bo homelayagola Nabodo homene.
1KI 21:14 Homeagola tigua Yasebele berearia bi ogodagua lama pudaba lowa lalu, Iname Nabodo ege to̱le̱me barimagola homaya, lalu lawia hene.
1KI 21:15 Nabodo homaya lalu lawia hayiyago Yasebele ibu hale halu abale Ahaba bereria puwa lalu, Nabodo ibu áyu nahe homayago ai gerebi mabu yolo berogo ngi larigola nangule layiyago mabu ogoni bame ngago abale karulole pu, lene.
1KI 21:16 Ani lamiyago hale halu Ahaba ibu abale heyalu gerebi mabu ogoni karulole pene.
1KI 21:17 Horo ogoningi Anduane Homogohanda ibunaga bi mana latagi haga Elaya ibuni dalu Tisibe tanoha hearia lamialu lalu,
1KI 21:18 Isaraele wali agalinaga Kini Ahaba karia abale pu. Ibu áyu ogoni Samaria tano howa pialu Nabodonaga gerebi mabu wiagoha karulole manda bialu pu karia handa walia holebere.
1KI 21:19 Ani handa walia howa ibuhondo bi ogodagua labe. Anduane Homogo i̱nioreme larogo lalu, Í̠na Nabodo homelo bo waharigo ai áyu ibunaga gerebi mabu paluni ngagobi í̠ karulole dege kebe. Ani biridago nde i̱na heneneore mbiwia halu langerogo dindi ogoriani biangome Nabodonaga darama pende biyagoria dege í̠naga daramabi pende bulebira labe, lene.
1KI 21:20 Anduane Homogohanda anidagua lamiya handala Elaya ibu hale halu ibu Ahaba hearia abale pole pene. Ahabahanda Elaya ibiyago hondowa ibugua lalu, I̱naga waitigi biago i̱ hewaria lone dai biribe, lene. Ani layagola Elaya ibugua ladai bialu lalu, E̱ i̱na í̠ hondo ibirudagoni irane í̠naga bu mini hame ngerunime Anduane Homogonaga deni mana ko ngaru hangu bule hongo halu haabo kegonaga í̠ hondole ibiru.
1KI 21:21 Ai Anduane Homogo ibugua í̠hondo bi ogodagua laya, I̱ Anduane Homogo kogome í̠ pani ngulebero. Í̠ damene agali mini lenerubi agali miniwi karubi agali daliahe karubi igiri emene karubi í̠ damene bibahendeore bo wahai holebero.
1KI 21:22 Í̠na wali agali bibahendeore mana ko wiaru bilo mo bia harigome i̱ mo keba harida. Ani biridagonaga i̱na í̠ pani mialu í̠ one waneiginirubi bibahende ala Nebada igini Kini Yaroboamahondo birudagua bialu Ahiya igini Kini Basahondo birudagua í̠hondobi mana mbiraore ogonidagua dege bulebero, laya.
1KI 21:23 Yasebelehondobi nde Anduane Homogohanda bi ogodagua laya, Ai Yasebele homarangi Yaserili tanonaga pabe tagirahayagi ibunaga tingini biangorume nalu holebira, laya.
1KI 21:24 Ahaba-o í̠ damene maru tanoha homayagua biango bu karume tinaga tingini nolebira. Maru tano pabe tagirahayagi homayagua nde ega nene ale biru karume tinaga tingini nolebira, lalu Anduane Homogohanda laya, lalu Elayahanda Ahabahondo anidagua lamini.
1KI 21:25 Ahaba ibu kini heangi ibunaga bu minimebi hamemebi hongoore halu Anduane Homogonaga deni howa mana ko wiaruni hangu mo tene howa bialu hene. Ibugua mana ko bialu henedarunibi abale henedarume mbira nabiaga wini. Ibu one Yasebele ibuore mana ko uruni bilo mo biahaga berene.
1KI 21:26 Ahaba ibugua Amoro wali agali bamba dindi ogoriani henedarume biagadagua dama mitangi bialu gime wabini wiaruhondo bi pupu wialu mana ko ngubi wiaru hangu bialu hene. Anduane Homogohanda bamba Amoro wali agali uruni bo batagi halu dindi ogoni Isaraele wali agaliru ti berelo mope hene.
1KI 21:27 Elayahanda ani layago Ahaba ibu hale howa ibunaga bu miniha genda timbuniore howa ibunaga aga biniyaru bibahende lerelabaga bini. Ani bialu dara ho howa walia halu aga tara biaga wiago mo karulowa tomoru nane hene. Horo bibahendengi aga ko bidaore palialu ibunaga dengui ibira halu mine nahe genda timbuni ho hene.
1KI 21:28 Ani heagola Anduane Homogohanda ibunaga bi mana latagi haga Elayahondo lalu,
1KI 21:29 Áyu Ahaba ibugua i̱naga deni ibuni mo dindiha ho kago í̠ hendedebe nahende kebe. Ainde ibugua mana ogonidagua biragome i̱na ibu áyu mo ko nahe waharogo. Mani ibu iginime kini ha aribia harangi i̱na ibu dameneore holebiraru tihondo pani mulebero, Anduane Homogohanda lene.
1KI 22:1 Siria Isaraeleru tini wai bialu heneru wahalu mali kirani wai paluwa ema nabi hene.
1KI 22:2 Ani howa mali tebone hayagola Yudanaga Kini Yahosabada ibugua Isaraelenaga Kini Ahaba hearia nenege pole pene.
1KI 22:3 Ahaba ibugua ami haru haga agali haguane hearuhondo lalu, Gileada dindiha Lamodo tano ngago bamba inanagaore winigo ai Siria ti karulo kagoni. Anigo iname tano ogoni inane karulole Sirianaga kini kagonaga giha howa mo yu dai bibe nahe kamago nde aginagadabe, lene.
1KI 22:4 Ani lowa Ahaba ibugua Yahosabada lamialu lalu, I̱ Lamodo tano ogoni mo yu dai bulenaga wai bu polene hamelo kogonigo í̠na i̱ biamogo buleberebe nabuleberebe, lene. Ani layagola Yahosabada ibugua ladai bialu lalu, Í̠na hame lederu ale talialu bulene karulape dege manda bu ko. I̱ biamogo bulene i̱naga wai biaga ami agalirubi nogo hosirubi bibahende manda mandabu hai ka.
1KI 22:5 Anigo iname mbirale uruni bule howa Anduane Homogo ibunaga hame ngago ala hale holene nga, lene.
1KI 22:6 Ani layagola Ahaba ibugua mbiwia haga agali hearu íbu ngoai hadaba lene. Mbiwia haga agali uruni handari maria (400) bibahende íbu ngoai hayagola ibugua tihondo hale halu lalu, I̱na Lamodo tano mo yu dai bule wai bu polene karulapebe be nakarulapebe, lene. Ani hale hayagola tigua ibuhondo ladai bialu lalu, Karulapego wai bule pu. Anduane Homogohanda í̠ biamogo biragola í̠na wai buwa wayali holebere, lene.
1KI 22:7 Ani layago lelowa Yahosabadahanda Ahabahondo hale halu lalu, Anduane Homogonaga bi mana latagi halu mbiwia haga mbira kabe nahebe. Mbira heagua nde iname Anduane Homogo ibuninaga hame ala handami̱ya, lene.
1KI 22:8 Ani layagola Ahabahanda ladai bialu lalu, Agali mbira Imila igini Migaia ibu Anduane Homogonaga bi mana latagi halu mbiwia haga ka. Anigo agali ogoni ibugua i̱hondo mbiwia halu bi bayale ndo langigi biagago i̱na ibuhondo turu naheore haruli. Ibugua mbiwia halu mo ko holene tagira ibulebira lalu i̱ langiaabo haga ka, lene. Ani layagola Yahosabada ibugua lalu, Í̠na bi ogonidagua lolene nawi, lene.
1KI 22:9 Ani layago hale howa Ahabahanda ibunaga haru haga agali haguane mbira heago íbu lowa lalu, Í̠na áyu ogoni gerai lalu puwa Imila igini Migaia abale haru ibule pu, lene.
1KI 22:10 Kini Ahaba Yahosabadala libu haru kininaga aga biaga mo karulai howa kininaga biragane dagia Samaria tanonaga tagirahayagi hama tigabi widi iraneru lini hondo ibira ibira bilo bo taulalu aeane puyabume yu pelonaga dindi wiagoria mo yalu pu ngelowa libuni ogoriani berene. Mbiwia haga agali hearume libu bereagoria haparaho howa mbiwia halu bi dewa lalu hene.
1KI 22:11 Mbiwia haga agali handari maria (400) henedaruni aria mbira Kenana igini Sedegaia hene. Ani howa ibugua aeane homane mbira wiago mo paulaki howa bulumaganaga haguaneni ne gayane heagobi wabuwa ibuninaga emboneni mo pagaho yalu Ahaba berearia ibuwa lalu, Í̠na wai buwa Siria ami karu bope halu í̠ wayali holebere. Í̠ bulumaganaga ne gayane ogonibi howa bama pialu mbiraorebi mbira yu wanahe bibahende bai halu bo maro bulebere, lalu Anduane Homogohanda laya, lene.
1KI 22:12 Ani layagola mbiwia haga agali maru hearumebi nde bi lo mbira howa lalu, Heneneore Anduane Homogohanda í̠ biamogo biragola í̠na wai bialu Lamodo tano mo yu dai buleberego wai bule pu, lene.
1KI 22:13 Ani lalu beremiria haru haga haguane mbira abale Ahabahanda Migaia hondo pu layago ibugua Migaia haru ibini. Libu wene harigani ibule ibalu howa agali haguane biago ibugua Migaiahondo lalu, Mbiwia haga agali maru karume lalu, Kini ibugua wai bialu wayali holebira, lai hayago í̠nabi nde kinihondo bi bayale ogonibi dege lamibe, lene.
1KI 22:14 Ani layago lelowa Migaia ibugua haru haga agali haguane biagohondo lalu, Anduane Homogo Haluhe kagonaga minini howa i̱na í̠hondo heneneore larogo Anduane Homogo ibugua i̱hondo bi ogo la lalu langirago dege latagi holebero, lene.
1KI 22:15 Migaia ibu Kini Ahaba bereagoria anda ibiyagola kini ibugua Migaia hale halu lalu, Iname Lamodo tano mo karulole wai bu poramabe be waharamabe, lene. Ani layagola ibugua kinihondo lalu, Karulape í̠na tano ogoni mo karulelo wai bule pu. Í̠na wai bialu wayali habelo Anduane Homogohanda biamogo bulebirago pu, lene.
1KI 22:16 Ani layagola Ahabahanda ibuhondo lalu, Ke̱ halu mbira nalabe. Í̠na Anduane Homogonaga minini howa heneneore labe lalu abale howa langiaabo haruligoni í̠ manda bu kegodago ai i̱naga bi ogoni angi hale holeberebe, lene.
1KI 22:17 Ani layagola Migaia ibugua Ahabahondo lamialu lalu, I̱na handalu hewaria Isaraele ami biaru nogo sibi haru haga nahe haradagua hari nene wiaruha ho giligala lo hearia handaru. Ani hondo hewagola Anduane Homogohanda bi mbira ogobi layua, Agali uruni tinaga haru haga agali haguane mbira nahe kago ai ti wai paluenaga wai wahalu tini andaga dai bialu pugupugu bulene nga layuane hale haru, lene.
1KI 22:18 Ani layago hale howa Kini Ahaba ibugua Kini Yahosabada lamialu lalu, I̱na í̠ abale langirugoni ogoniyago. Anduane Homogonaga bi mana latagi haga agali ogoni ibugua i̱hondo mbiwia halu bi bayale mbira nalangiaga. Ibugua i̱ mo ko holene hangu laabo haga larugoni, lene.
1KI 22:19 Migaia ibugua bi laabo halu lalu, Áyu Anduane Homogohanda mo walia hayago languliya baya hangu hale mia howa hale ha. I̱na handalu hewaria Anduane Homogo ibuni dahuliya andagani haru howa biragane dagia wiagoria bereagola dahuliyali bibahendeme ibu bereagoria ho mabu bupe hearia handaru.
1KI 22:20 Ani heagola Anduane Homogohanda tihondo hale halu lalu, Ahaba ibu Lamodo tanoha bo wahelonaga ohowa ndelalu karulapego pu lolene mbirali ai kebe, laya. Ani hale hayagola dahuliyali mbira mbira tininaga bi Anduane Homogohondo ladai bigibigi biya.
1KI 22:21 Tigua ani ladai bigibigi bialu heagola dinini mbira ibu Anduane Homogo bereagoria kaware puwa lalu, I̱na ibu mo hondo hole polebero, laya.
1KI 22:22 Ani layagola Anduane Homogohanda ibuhondo hale halu lalu, Í̠na Ahaba mo hondo agua holeberebe, layagola dinini biago ibugua Anduane Homogohondo ladai bialu lalu, I̱na puwa Ahaba ibunaga mbiwia haga agali karume bi henene ndo ke̱ howa lamilo mo la holebero, laya. Ani layagola Anduane Homogohanda dinini ogonihondo lamialu lalu, Í̠na pialu í̠naga bi henene larebe toba howa mo heneneho helonaga ibu mo hondo hole pu laya, lene.
1KI 22:23 Ani lowa Migaia ibugua Ahabahondo bi tiga tiga lamialu lalu, Anduane Homogohanda í̠ homabelo hamelo howa ai dinini ogoni ibugua í̠naga mbiwia haga agali biarume í̠hondo bi henene ndo í̠ mo hondo halu bi langilonaga ibilayadagome í̠ mo hondo hayada, lalu lamini.
1KI 22:24 Ani lamiyagola mbiwia haga Sedegaia henegome Migaiahanda bi layago hale howa ibugua ibunaga gi habeme Migaia to̱a̱ balu howa lalu, Anduane Homogonaga dinini i̱ agua yu wahalu puwa bi ogoni í̠hondo langiyabe, lene.
1KI 22:25 Ani layagola Migaia ibugua Sedegaiahondo ladai bialu lalu, I̱na í̠hondo heneneore larogo mani waitigime ibalu ina Isaraele bo podaragola í̠ ibida puwa anda hobane mbiraha bira do holebere. Horo ogoni ibirangi heneneore Anduane Homogohanda bi ogoni i̱hondo langiyago i̱na latagi henedane hondolebere, lene.
1KI 22:26 Ani layagola Kini Ahaba ibugua ami haru haga agali haguane heagohondo lalu, Mbiwia haga agali Migaia o kago minu yalu agali haguane Amonola i̱ igini Yoasala karia haru pudaba.
1KI 22:27 Ani haru puwa libuhondo lamialu, Agali ogo i̱ni wai bialu dai buliya libugua garabaya andaha tomo emene hangu migi bialu handayaho halibu laya lalimu, lene.
1KI 22:28 Migaiahanda Ahabahondo lone lamialu lalu, Í̠ waiha homa nabi bayale dai biriyagua nde Anduane Homogohanda i̱ha howa bi lene ndodalo manda bibe, lene. Migaia ibugua laabo halu lalu, Wali agali bibahende kamiru tígua bi larogoni hale hai hadaba, lene.
1KI 22:29 Ani bialu Isaraelenaga Kini Ahaba Yudanaga Kini Yahosabadala libu haru mandagi libunaga ami agali hearu haru halu Gileada dindiha Lamodo tanoni Siriali waitigi anda íbu hearu baba wai bule pene.
1KI 22:30 Wai bule wene dege howa Ahaba ibugua Yahosabadahondo lamialu lalu, Wai hamani tagira pole howa waitigime i̱ kinidalo manda nabilo kininaga aga bidogo golo iriari bialu ami agali mbira pene tingi holiya. Í̠ harugo kininaga aga bidegoni biaabo habe, lene. Ani lalu Kini Ahaba ibu aga tara wiaru bialu wai bule pene.
1KI 22:31 Wai anda piyagola Sirianaga kini heagome ibunaga ami agali wai biaga garo ale mini karisini howa pira tebirani huniane kira (32) hearu olalu ibidaba lowa lalu, Tígua wai bialu hongo howa Isaraeleali kini kago baba hangu wai bilimu. Agali maru ibinidaru baba nabilimu, lene.
1KI 22:32 Ani laya handala puwa tigua Yudanaga Kini Yahosabada biago Isaraelenaga Kini Ahababe toba howa wai hongo howa bialu hearia Yahosabada ibunime howa wai huaro ga̱ hongo howa ladaga hayagome mo walia hayagola
1KI 22:33 ti manda bialu ogoni ibu Isaraelenaga kini ndoyane hondowa bialu tigua ibula wai hongo howa nabi yupe hene.
1KI 22:34 Tigua wai hongoheore ua laga bialu howa Siriali ami mbirame timu mbira Isaraeleru heagoha bo ibilayagome Kini Ahabanaga tingini mbiraha aga wai pole biaga aleme bia dambi nahe wiagoria bila hene. Ani bila hayagola Ahabahanda agali ibunaga nogo hosime karisi gililo yu ibaga bilo handayaho haga agali heagohondo lalu, Ai timu hombeniore ho kogo karisi abale beregedalu wai hama yu wahalu tagira mba, lene.
1KI 22:35 Ani layagoyu ami mende mendehabi wai hongoheore biribigola Ahaba wai hama yu wahalu tagira pobe nahe wini. Ani biyagola ibunaga garo ale karisi biagoria ibunaga ami agali biarume gini mo maliaho heleagola amu Siriali biaru wai ibiyagoha handa amu ho hene. Ani heagola darama timbuni Ahabaha howa pora bialu ibunaga karisi ibuni heyu heago daramame goba hai hene. Ani heane dege alendo hayagola Ahaba homene.
1KI 22:36 Ani homayagola howa ni paliyagola Isaraele ami hearubi Yuda ami hearubi bibahendeme huaro lalu howa lalu, Áyu ogoni inane dindiha dai bialu inane dalu wigi birimagoha purogo lami̱ya ma, lai hene.
1KI 22:37 Kini Ahaba homayagola tigua ibu tingini Samaria tanoha yalu dai buwa homaliha hora hene.
1KI 22:38 Ani hora howa ibunaga karisi biago Samariaha iba gorene bereagoha wayawaya bu wahene. Ani biyagola biango bu hearume ibunaga darama bu payabu wiaru pende bini. Ani bialu bayanda wali berearu tibi nde ibalu iba ogoniha dege wayawaya bini. O biyadaruni Anduane Homogohanda ogodagua bulebira lalu lo wiyago lola hene.
1KI 22:39 Kini Ahaba ibugua biniru bibahende mbuga mbira mini Isaraele Kini Henerunaga Bi te laga ngagoha gilibu nga. Mbuga ogoniha howa ibugua anda mbira buwa nogo elebeninaga ne gayanerume mo yári bia henego bi te lo wialu maru ibugua tano maru wiarunaga ege pabe mo hongo howa bia tiga binirunaga bi teru lo wialu bida.
1KI 22:40 Ahaba ibuni homayagola hora howa ibu igini Ahasaia ibugua ibu abanaga tamu henge ibuni mialu kini ha aribia hene.
1KI 22:41 Mali mariani Ahaba ibu Isaraele dindiha kini hene lowa Asa igini Yahosabada ibu nde Yuda dindiha kini hene.
1KI 22:42 Ibu taba henenegoria howa mali pira tebirani duria (35) hayagola ibugua Yarusalemeni mali pira kirani duria (25) kini howa haru hene. Yahosabada ibu ai̱ya agali mini Sili wane Asuba berene.
1KI 22:43 Yahosabada ibugua ibu aba Asahanda biaga wiadagua bialu Anduane Homogonaga deni howa mana tigabi bayale hangu talialu bialu haga hene. Ani bialu ha howa dege ibugua mbira wiago nabi henego dama mitangi bialu bi pupu wiaga anda bu hearu dege bo gialo wanahe helo wahene. Ani helo waheagola wali agali tigua anda uruniha mbirale ira hagua nga bilo delaga mini inisenesi wiaru mbirale maru loma binirubi bo delalu haabo hene.
1KI 22:44 Yahosabada ibu kini heangi Isaraele hameigini Yuda hameiginila wai nabi bayale haabo hene. Yahosabada ibugua Isaraelenaga kini heagola gi tigani bialu ti baya hangu hene.
1KI 22:45 Kini Yahosabada ibugua biniru bibahende mbuga mbira mini Yuda Kini Henerunaga Bi te laga ngagoha gilibu nga. Mbuga ogoniha howa ibugua biabe hongohe binirubi dindi tara tara hearu baba wai binirubi bibahende gilibu wigi bida.
1KI 22:46 Bamba Yahosabada aba Asa ibugua dama mitangi bialu gime wabini wiaru anda heagoha wali agalirume bi pupu wialu howa tini uruniha kayu yu palu ngoai haga hearu bibahende bo gialo wahai henego ai maru yu wahene hearu Yahosabada ibugua bo giala maro bini.
1KI 22:47 Horo ogoningi hameigini tara Idomo palearu tinaga kini mbira nahe wiagola Yudanaga kini ibugua dege agali haguane mbira dabalu Idomo wali agali haru helo helene.
1KI 22:48 Kini Yahosabada ibugua agali biabe biaga hearuhondo dindi kaundia Obiri ngolo taya bima polenaga iba sibi wabidaba layagola wabini. Ani wabu yalu tagira pole tano Esiongebe wiagoria pialu hearia puyabu hongohe ibiyagome iba sibi biaru kambulobaga biyagola ibani yu tagira napene.
1KI 22:49 Ani biya layago Isaraelenaga Kini Ahasaia ibu hale howa ibugua Yahosabadahondo lawia halu lalu, Í̠na iba sibi lone pelo manda bideyagua nde agali iba sibiha biabe biaga i̱na talebu nguliya. I̱naga agali ti haru mandagi biabe bilo, lene. Ani layagola Yahosabada ibugua ogonidagua bulene manga hene.
1KI 22:50 Mani howa Yahosabada homayagola tigua ibunaga tingini ibu aba mamaliru hora haga homali Debidinaga tano wiagoha hora hene. Ani homayagola ibu igini Yahorama ibu kini ha aribia halu ibu abanaga henge ibuni mini.
1KI 22:51 Yahosabada ibu Yuda dindiha mali pira mbirani karia (17) kini hene heagola Ahasaia ibubi nde Isaraele dindiha kini hene. Ibu mali kira hangu Samaria tanoni Kini howa wali agali haru halu hene.
1KI 22:52 Ibugua ani haru howa mana ko ngubi ibu aba Ahaba ibu ai̱ya Yasebele ogolabome biaga wiadagua bialu bamba Nebada igini Kini Yaroboama Isaraele wali agali haru halu mana kohayagi pubagi henedaguabi bialu hene. Ahasaia ibugua Anduane Homogonaga deni mana ko bialu
1KI 22:53 dama mitangi bialu gime wabini Balahondo bi pupu wialu hene. Ibugua mana ko ogoni biyagome abale ibu aba Ahabahanda Anduane Homogo Isaraele wali agalinaga Ngode Datagaliwabe kago mo keba hayadagua ibuguabi mo keba hene.
2KI 1:1 Mani Isaraelenaga Kini Ahaba homayagola Moaba hameigini tigua Isaraele hameigini hearume ti haru helo hame nale hene. Ani howa tigua wai bialu Isaraele bo talia tagi hene.
2KI 1:2 Horo mbirungi Isaraele wali agalinaga Kini Ahasia ibu ibuni andaga daligaha wa hondo haga wiagoria hene. Kini ibu ani hearia anda daligaha howa pilalu mo paraho dindini ibira howa ibu tingini mo ko ho hene. Ani biyagola ibugua agali maru bi abale Pilidia dindiha Egerono tano wiagoha lo pelalu, Dindi ogoniha Pilidia wali agali tigua dama mitangi bialu bi pupu wiaga gime wabini mini Balasebubu laga wiagoha i̱ dabi holobadabe be homolobadabe lalu halaga bilo lamule pudaba, layagola pene.
2KI 1:3 Anigo Anduane Homogonaga dahuliyali mbirame Tisibeali Anduane Homogonaga bi mana latagi haga Elayahondo lalu, Áyu ogoni abaleore pialu agali maru Samarianaga kini kagome Egerono dindi pudaba layagola harigani pialu karu lola hole puwa tihondo ogodagua labe. Irane aginaga tígua Egerono wali agalinaga dama mitangi bialu gime wabini Balasebubuhondo bi halaga bule pialu kamibe. Tíni dalu Isaraele dindiha Ngode Datagaliwabe ibuni nahedane taya bima poramibe.
2KI 1:4 Ani bule poramiyagua nde i̱na bi langerogo hale hadaba. Anduane Homogohanda Kini Ahasiahondo bi ogodagua laya. Í̠ dabi halu heyalu napolebere. Ani paliaho ngene dege homolebere, laya lalu lamule pu, lene. Ani lamiyago hale halu Elaya ibugua puwa agali biaruhondo bi ogoni labe layadagua lalu lamini.
2KI 1:5 Elayahanda bi ogonidagua lamiyago hale halu agali biaru ti abale kini berearia íbu dai biyagola kinihanda tihondo hale halu lalu, Tí agua biyagola abale dai birimibe, lene.
2KI 1:6 Ani hale hayagola tigua ladai bialu lalu, Harigani agali mbira lola harimago ibugua Anduane Homogonaga bi í̠hondo lamule yalu dai bidaba, laya. Ai bi ogoni ogodagua laya. Irane aginaga í̠na agali maru Egerono wali agalinaga dama mitangi bialu gime wabini Balasebubuhondo bi halaga bule pudaba laribe. Tíni dalu Isaraele dindiha Ngode Datagaliwabe ibuni nahedane taya bima poramibe, laya. Heneneore í̠ lone dabi naholebere. Í̠ anidagua paliaho wiaabo howa homolebere laya, lalu lamini.
2KI 1:7 Anidagua lamiyago kini hale howa ibugua tihondo lalu, Agali tíhondo bi ogonidagua langiyadagoni ibuni agali ago biyabe, lene.
2KI 1:8 Ani layagola tigua kini lamialu lalu, Agali ogoni ibu nogo dongoneme aga bialu mandibu nogo dongoneme degewi heneya, lene. Ani layago hale howa kini ibugua lalu, Agali ogoni Anduane Homogonaga bi mana latagi haga Elayadago, lene.
2KI 1:9 Ani lalu kini ibugua ami haru haga agali haguane mbira heago heba ami agali pira duria (50) hearume Elaya minu yalu ibule pudaba laya handala pene. Tigua pialu Elaya heagoria puwa ami haru haga agali haguane biago ibugua handalu hearia Elaya ibu hari nene emene mbira heagoria berearia hendene. Ani hondowa ibugua Elayahondo lalu, Agali Ngode Datagaliwabenaga bi mana latagi haga kegoni í̠ áyu ogoni dalialu kini ibu hondole ibabe layago pole íbu, lene.
2KI 1:10 Ani layagola Elayahanda ladai bialu lalu, Heneneore i̱ Ngode Datagaliwabenaga bi mana latagi haga koyagua áyu ogoni dahuliya andagaha howa ira dene dalipe halu í̠bi í̠naga ami agali pira duria (50) haru haridarunibi bibahende bo heda hai helo laro, lene. Ani layaore ira abaleore aube tobane ibalu dahuliya andaga howa dalipe halu ami haru haga agali haguane biagobi ibu heba ibini ami agali pira duria (50) biarubi bibahende irame dai hayagola homai hene.
2KI 1:11 Mani kini ibugua ami haru haga agali haguane mende heago ami agali pira duria (50) heba Elaya hearia pudaba layagola puwa ami haguane biago ibugua Elayahondo lalu, Agali Ngode Datagaliwabenaga bi mana latagi haga-o áyu ogoni kinihanda abale ibabe layago pole íbu, lene.
2KI 1:12 Ani layagola Elayahanda ladai bialu lalu, Heneneore i̱ Ngode Datagaliwabenaga bi mana latagi haga koyagua áyu ogoni dahuliya andagaha howa ira dene dalipe halu í̠nibi í̠naga ami agali pira duria (50) haru haridarunibi bibahende bo heda hai helo laro, lene. Ani layaore Ngode Datagaliwabenaga ira dene dalipe halu ami agali haguane biagobi ibunaga ami agali pira duria (50) biarubi bibahende irame dai hayagola homai hene.
2KI 1:13 Ani biyiyagola kini ibugua ami agali haguane mbira heago heba agali pira duria (50) halu tebone lone dege Elaya hearia pudaba, lene. Ani laya handala tigua puwa ai ami haru haga agali haguane biago ibu puwa Elayanaga wanakuihayagi ge duli hangaho biruwa ibuhondo lalu, Agali Ngode Datagaliwabenaga bi mana latagi haga-o i̱nibi i̱naga ami agali haru korunibi bibahende dara halu í̠na ina mo ko nahabe.
2KI 1:14 Dahuliya andaga howa ira dalipe halu agali ami haru haga haguane kirali biagobi libunaga ami agali hayarubi bibahende irame dai hayago manda bidogoni. Ainde í̠na i̱ore dara halu i̱ mo ko nahabe, lene.
2KI 1:15 Ami haru haga agali haguane biago ibugua bi ogoni lai hayagola Anduane Homogonaga dahuliyali mbirame Elaya lamialu lalu, Í̠na gi nahe ami haguane ogoni ibu karia dalipe halu pu, lene. Ani lamiya handala Elaya ibu dalipe halu ti haru mandagi kini hearia pole pene.
2KI 1:16 Ani pialu Elaya ibugua kini berearia puwa lalu, Anduane Homogohanda ogodagua laya, Í̠na mandabu handalu heria Isaraele dindiha Ngode Datagaliwabe naheyagola Egerono wali agalirunaga dama mitangi bialu gime wabini Balasebubuhondo halaga bule agali maru pudaba laribe. Anidagua biridagome í̠ lone dabi naholebere. Anidagua paliaho wia dege bialu homolebere laya, lalu lamini.
2KI 1:17 Mani howa Ahasia homayagola Anduane Homogonaga bi Elayaha howa latagi hayago heneneore lola hene. Ahasia ibu igini mbira naheyagola ibu hamene Yoramahanda Ahasianaga henge mialu Isaraele wali agalinaga kini ho aribia hene. Yahosabada igini Yahorama ibugua Yuda dindiha mali kira haru heagola Yorama ibugua Isaraele wali agalinaga kini hene.
2KI 1:18 Kini Ahasia ibugua binirunaga bi te mbuga mbira mini Isaraelenaga Kini Henerunaga Bi te laga ngagoha gilibu nga.
2KI 2:1 Anduane Homogo ibugua humbirini wai hongohe mbirame Elaya dahuliya andagaha mo yalu pole manda bu heagola Elaya ibu Elaisa haru Giligala dindi wahalu pene.
2KI 2:2 Pialu howa Elaya ibugua Elaisahondo lalu, I̱ Anduane Homogohanda Bedele ibabe layadago porogo í̠na ogoria hondo habe, lene. Ani layagola Elaisa ibugua ladai bialu lalu, Anduane Homogo haluhe kagonaga minini howa i̱na heneneore larogo i̱na yu wanahe í̠ poregoha iya haru poleberaba, lene. Ani laya handala libu haru Bedele pole pene.
2KI 2:3 Pialu hebiria Anduane Homogonaga bi mana latagi haga agali maru Bedeleha heneyaru ogolabo lola hole tagira íbu howa Elaisahondo lamialu lalu, Anduane Homogohanda í̠naga agali haguane áyu haru polebirago manda bu kebe, lene. Ani layagola Elaisa ibugua ladai bialu, E̱ i̱ manda bidogo tígua bi ogoninaga lone nalalimu, lene.
2KI 2:4 Ani lalu libu Bedeleni howa Elaya ibugua Elaisahondo lalu, Anduane Homogohanda i̱ Yarigoha ibabe layadago porogo í̠ ogoria hondo habe, lene. Ani layago lelowa Elaisa ibugua lalu, Anduane Homogo haluhe kagonaga minini howa heneneore larogo i̱na í̠ poregoha talima ibulebero, lene. Ani laya handala libu haru Yarigo tano pole pene.
2KI 2:5 Yarigo tanoha Anduane Homogonaga bi mana latagi haga agali maru heneyaru ti Elaisa lola hole ibuwa lalu, Áyu Anduane Homogohanda í̠naga agali haguane haru halu polebirago. Ai í̠na manda bu kebe be namandabi kebe, lene. Ani lamiyagola Elaisa ibugua tíhondo ladai bialu lalu, I̱ manda bu kogo tígua bi ogoninaga lone nalalimu, lene.
2KI 2:6 Libu Yarigo tanoha howa dege Elaya ibugua Elaisahondo lamialu lalu, Anduane Homogohanda i̱ Iba Yodana ibabe layadago porogo í̠na ogoria hondo habe, lene. Ani layago lelowa Elaisa ibugua Elayahondo lalu, Anduane Homogo haluhe kagonaga minini howa i̱na í̠ poregoha talima ibulebero, lene. Ani laya handala libu haru pene.
2KI 2:7 Libu pole piribidagua Anduane Homogonaga bi mana latagi haga agali hayadaruni aria pira duria (50) libu piyadagua ti haruru pialu hene. Ti pialu Iba Yodana angeni tagira pialu libuni hangu iba angeni hebigola agali maru biaru ti emene kaundiani ale hene.
2KI 2:8 Ani pu howa Elaya ibugua aga luni bia gimbu biago golowa minu ndelalu mo homabia ho yuwa ogonime Iba Yodana bene. Ani bayagola iba peago bira migimigi bialu hanuni dindi yobi pana hene. Ani biyagola libu bolangua halu iba ange mendehayagi ubaede halu pene.
2KI 2:9 Libu ederayagi pu howa Elaya ibugua Elaisahondo lamialu lalu, Anduane Homogohanda i̱ haru polene kawareore ngelo kabagonigo ai áyu i̱na í̠ biamogo bialu mbirale mbira agile buliya hamelo kebe, lene. Ani hale hayagola Elaisa ibugua ladai bialu lalu, Í̠na Anduane Homogonaga hongo karulo howa ibunaga biabe bialu harigoni ndobe. Ainde agalime ibunaga mbirale ngaruni bibahende ibu igini wahenehondo miai hagadagua hongo ogoni í̠na yu harigoni i̱ ngibelo hamelo ko. I̱na hongo ogoni yu howa bi mana latagi hagane agali mbira i̱ ho aribia holiya ngi, lene.
2KI 2:10 Ani layagola Elaya ibugua lalu, Áyu í̠na i̱hondo ngi lalu hale harigoni i̱na í̠ abale mo ngulene ale ndogo. Anduane Homogohanda i̱ haru porane handariyagua ngi larigoni mo yu holebere. I̱ haru porago nahandariyagua namo yulebere, lene.
2KI 2:11 Libu bi lama pialu hebiria libuni hengene wiagoria ira hungu timbuni kikiau lene. Ira hungu biago dombeneha garo ale karisi mbira nogo hosime gililo yalu piyagoria humbirini wai hongoheme Elaya dahuliya andaga mo yalu iraga hene.
2KI 2:12 Ani biyagola Elaisa ibugua Elaya piyago hondowa hongo howa ga̱ ladaga halu lalu, Aba-o i̱naga aba-o í̠ Isaraele wali agali biamogo bule bambaore haga hongohe nogo hosi karisiru ale mbira harigo ai áyu poregoni, lene. Ani lalu ai Elaya piyagola Elaisa ibu lone handabe nahe hene. Ani howa ibu miniha dara timbuni howa ibu dara heago walia halu ibuninaga aga lu biagimbu bu heago hanuni lerelaki hene.
2KI 2:13 Elaya ibu piyagola ibunaga aga luni bia gimbu biago dindini golo ibira hene. Elaisa ibu aga ogoni mo yalu dai buwa Iba Yodana angeni pu hene.
2KI 2:14 Ani pu howa iba biago Elayanaga aga yayagome abale Elayahanda bayadagua dege balu howa lalu, Anduane Homogo Elayanaga Ngode Datagaliwabe agoha haruabe, lene. Ani layangiore iba biago abale bira migimigi biyagola Elaisa ibu ange mendehayagi uba dai bini.
2KI 2:15 Agali pira duria (50) Anduane Homogonaga bi mana latagi haga Yarigo howa ibini biaru ti iba ange mendehayagi hayagoria hondo howa Elaisa ibugua o biyadagoni handai hene. Hondo howa tigua lalu, Anduane Homogohanda hongo abale Elaya miyago áyu Elaisa ibugua yu aribia kagoni, lene. Ani lalu ti abale Elaisa lola hole kaware ibuwa ti dindini bulu palialu Elaisanaga mini yaraga hene.
2KI 2:16 Ani buwa tigua Elaisahondo lalu, Ina aria agali hongoheru pira duria (50) kamago Anduane Homogonaga dininime í̠naga agali haguane mo yalu puwa hari nene ngaruhabi dindi uli ngaruhabi yu waholigo tayabu mali̱ya, lene. Ani layagola Elaisa ibugua ladai bialu lalu, Wahadaba. Ibu taya bule napilimu, lene.
2KI 2:17 Ani layago hale howa dege agali biarume hongo haabo hayagola Elaisa ibugua lalu, Karulapego tígua laramidagua taya bule pudaba, lene. Ani laya handala agali pira duria (50) biarume horo tebirani taya bialu howa handa walia nahe tayabu wahene.
2KI 2:18 Agali uruni tigua taya bialu dai bilonaga Elaisa ibu Yarigoni hondo hene. Tigua tayabu wahalu dai biyagola Elaisa ibugua tihondo hale halu lalu, I̱na bi agua larune tígua i̱naga bi larugo nahale harimibe, lene.
2KI 2:19 Elaisa ibu Yarigo tanoha heagola wali agali tano ogoniha heneyarume ibuwa lalu, Agali haguane-o tano bayale o ngago de handa. Anigo iba dege ko burupale kamagoni. Wali gali tombeha bere biruwa iba uruni hambu nayagua waneigini gali tombeha bedaru taba honolene tu ndo timbu nahe ngaore abale taba hanaga biaga. Anidagua biragola waneigini homaga biaga, lalu lamini.
2KI 2:20 Ani layagola Elaisa ibugua lalu, Áyu ogoni puwa ndisi be gahenge mbirani ibi maru haealo ngelowa i̱ koria yalu ibule pudaba, lene. Ani lamiyagola tigua layadagua yalu ibini.
2KI 2:21 Ani yalu ibiyagola Elaisa ibugua ibi ndisi beni berelo yalu ibiyago iba hambiaga uli iba bereagoha haealape halu lalu, Anduane Homogohanda ogodagua lara, Anduane Homogo i̱na iba ogo mo bayale harogo. Iba ogome wali agali homelaga winidagobi waneigini taba honolene tu ndo taba hanaragola homagadagobi lone nahomolebira, larua, lene.
2KI 2:22 Ai Elaisa ibugua bi o layadangi howa iba mo bayale henedagome áyubi bayale wiaabo ka.
2KI 2:23 Mani nde Elaisa ibu Yarigo howa Bedele pole pene. Pole pialu hearia igiri daliahe dewaore tanonaga pabe tagirahayagi biru heneyarume Elaisa ibiyago hondowa tigua ibu mege bialu lalu, Agali ko mandari nahe dogadogabi nai porago. Ina dalu ogoria nahe áyu ogoni pu, lalu hene.
2KI 2:24 Anidagua layagola Elaisa ibugua handa dai bialu de tandagabime ti handayaho howa ha halu lalu, I̱na tíhondo heneneore bulebirago langero. Anduane Homogohanda ti mo ko helo laro, lene. Ani layaore biango ale gabua mini bea timbuni kira irabuha howa gerai tagira ibuwa igiri bi lalu hayaru aria pira mariani kira (42) bibahende hayai halu no buda hole bini.
2KI 2:25 Ani biya handala Elaisa ibu pialu Hari Kamelo nene wiagoha hama puabo hene. Ogoni halu nde mani Hari Kamelo wahalu Samaria dai bini.
2KI 3:1 Yahosabada ibu Yuda dindiha kini heane mali pira mbirani halira (18) peagola Ahaba igini Yorama ibu Isaraele dindiha kini howa ibugua Samaria tanoni mali homberia (12) haru halu hene.
2KI 3:2 Yorama ibugua Anduane Homogonaga deni howa mana ko dewa bialu ha henegoyu ibu ababi ibu ai̱ya Yasebelebi libugua mana koorene ko bialu henedagua ndo dege bini. Ibugua bamba ibu abahanda dama mitangi bialu bi pupu wulenaga mbirale mbira gime wabu wini mini Bala wiago mo wahene.
2KI 3:3 Ani binigo ai Yorama ibugua mana ko maru abale Nebada igini Kini Yaroboamahanda bialu hagadagua bialu hene. Yaroboama ibugua mana ko uruni ale Isaraele wali agalirume bialu helo biawai haga hene. Ani biyadagua Yorama ibugua ko urunibi bialu yu wahole ndo bialu haabo hene.
2KI 3:4 Moaba wali agalinaga Kini Mesa ibugua nogo sibi dewaore hinu hene. Ani hinu howa ibugua mali bibahendeni nogo sibi igini hungubaluaru daosini dege handari mbira (100,000) dagisi ale Isaraelenaga kini heagohondo miaga hene. Ani bialu howa nogo sibi wangabe daosini dege handari mbira (100,000) Isaraele kini biagonaga naina dagala bagiho helowa uruninaga irini podalu Isaraelenaga kini karia dagisi ale dege mialu podo pelaga biaga hene.
2KI 3:5 Ani bialu haga henego mani Isaraelenaga Kini Ahaba homayagola Mesa ibugua Isaraelenaga kini gahenge ha aribia hene heagohondo mine halu dagisi nami wahene.
2KI 3:6 Ani biyago hondowa Isaraelenaga Kini Yorama ibugua Samaria tano yu wahalu puwa ibunaga ami agali bu hearu abale mo mogo bini.
2KI 3:7 Ani mo mogo bialu howa Yorama ibugua Yudanaga Kini Yahosabadahondo bi lo pelalu lalu, Moabanaga kini biagome i̱hondo mine hayagola i̱na wai bule porogo í̠na iya haru wai bu mbaliya ibuleberebe be mangabe, lalu hale hene. Ani hale hayagola Yahosabada ibugua ladai bialu lalu, Iya haru mbaliya i̱na í̠naga hame ngego talialu bule manda manda bu ko. I̱naga ami agalirubi i̱naga wai biaga nogo hosi karubi ti bibahende í̠ biamogo bule manda manda bu ka.
2KI 3:8 Anigo ina hariga agodagua pialu mali̱yabe, lene. Ani layagola Yoramahanda ladai bialu lalu, Ina hariga Idomo dindiha iba dalu naibaga ko ege kelekele dindi ngadagua pialu mali̱ya, lene.
2KI 3:9 Kini Yoramabi Yudanaga kinibi Idomonaga kini heagobi ti haru mandagi tinaga ami agaliru haru halu pene. Ti piyagoha hariga luoreni pialu horo kariani handa paligi bima pialu heagola tinaga iba hambu yinidaru biba hene. Ani biyagola tinaga ami hearubi tinaga nogome dabudabu yalu pelonaga erekunini mo paga haga hearubi ti bibahende iba nolene nawioreni pene.
2KI 3:10 Ani biyago hondowa Kini Yoramahanda lalu, Ai agoda Anduane Homogohanda ina kini tebirali harimago bibahende mo mogo bialu Moabali kini kagonaga giha mo ya hayadago mogolo kogoni, lene.
2KI 3:11 Ani layagola Kini Yahosabada ibugua Kini Yoramahondo ladai bialu lalu, Anduane Homogonaga bi mana latagi haga ogoriani mbira kabe. Agali ogoni heagua nde ina agua beramabe lalu ibugua Anduane Homogohondo hale helonaga lamimi̱ya, lene. Ani layagola Yoramanaga ami haru haga agali haguane mbira heagome abale ladai bialu lalu, Sabada igini Elaisa ibu abale Anduane Homogonaga bi mana latagi haga Elaya biamogo biaga henego ka, lene.
2KI 3:12 Ani layago Yahosabada ibugua hale howa lalu, Elaisa ogoni ibu Anduane Homogonaga bi mana latagi haga heneneore ka, lene. Ani laya handala kini tebirali biaru Elaisa hearia pole pene.
2KI 3:13 Ani pialu hemiria Elaisa ibugua Isaraelenaga kini biagohondo lalu. Abale í̠ aba mamarume mbiwia haga agali maru hearuhondo halaga bilo piagadagua pu nabi i̱ hewaria agibule ibiribe, lene. Ani layagola Kini Yoramahanda ladai bialu lalu, Ani ndo Anduane Homogo ibunime ina kini tebiraligo bibahende mo mogo buwa Moabalinaga giha mo ya hole biniyane handalu ai í̠ bereria ibirima, lene.
2KI 3:14 Ani layagola Elaisahanda Yoramahondo lamialu lalu, I̱ Anduane Homogo Hongo Haiheore haluhe kagonaga biabe biahaga bedogoni. I̱na ibunaga minini howa heneneore langerogo ai Yahosabada ibu í̠ heba mandagi naibinidale i̱na í̠naga dengui nahendedole. Í̠la bibi naledolego ai Yahosabada ibu agali tigabi dege kagodago nde i̱na í̠naga bi laregoni hale haro.
2KI 3:15 Áyu ogoni abale pialu agali ngida baga mbira haru ibule pudaba, lene. Ani layagola tigua agali ngida baga mbira heago haru ibiyagola ibugua ngida bene. Ani balu bereagola Anduane Homogonaga hongo Elaisaha mo karula hene.
2KI 3:16 Ani mo karula heagola Elaisa ibugua tihondo mbiwia halu lalu, Anduane Homogohanda bi ogodagua larago, Dindi mbira abale iba piagago hundini dindi yobi lebolahe ngagoria iba uli dewaore walimu.
2KI 3:17 Tígua ani waramigola iba dalu puyabubi mbira ibirane nahondoleberamigoyu iba ibu minana iba uli warimigoha to̱latagi kane hondoleberemi. Ani hondowa tínibi tínaga nogo bulumagabi dongibi bibahendeore iba nai holene karulape birulebirago ani bilimu laya, lene.
2KI 3:18 Ani lowa Elaisahanda laabo halu lalu, Tí iba nalimulo ngulenego Anduane Homogohanda bulene ogoni taibi ndo emene hangudane hendeda. Anidane handalu ibugua tíhondo timbuni mbira bule ngeleda. Tí Moabaliru baba wai beremingi tígua bama podama anda pialu
2KI 3:19 tinaga tano ege pabe hongoheme bu mabu bini ngaru karulalimulo ngulebira. Ani biragola tinaga ira bayale hengedaru dibai halu iba hambiaga uli ngaru bibahende mogo biai holeberemi. Tinaga tomo hangaga mabu ngaruha ege to̱le̱ dugu payapaya bidamigola mani tini tomo hangabe nahe wulebira, laya lalu Elaisahanda lene. Elaisahanda bi uruni lai haya handala kini tebirali biarume ibu helalu pene.
2KI 3:20 Horo mendengi egerebagiore gao lalu wá hayagola horo ogoni egerebaginaga loma binigo bo delolene tu hayagola Idomo dindihayagi howa iba ibalu dindi wiago biru to̱lai heneyane hendene.
2KI 3:21 Moaba wali agali biaru ti hale halu hemiria kini tebirame ti baba wai bule ibira layane hale halu agali maru ami howa wai bibehe damene wahebi igiri daliahebi bibahende hearu olo ngoai hene. Ani íbu ngoai heagola bibahendeore tidiyalu pialu amu Moaba Idomola dindi tubaria wiagoria wai bule manda manda bu hene.
2KI 3:22 Horo ogoningi Anduane Homogohanda Isaraeleali biaru heagoha iba ibilayangi dege Moabali biaru ti egerebagiore gao layagola heyini. Ani heyuwa handa amu halu hemiria ni tagira ibiyagome iba biagoria daba hayagola iba biago daramabi agali darama ale wiago Moabali biaru ti kaundiaha howa hendene.
2KI 3:23 Ani hondowa tigua ga̱ lowa lalu, De handadaba-o ogoni daramaoredago waitigi tebiralime tini baga baga bialu agali dewaore bo homelayagola uruninaga darama wiaruabe tobanedago. Ai gerai lalu tinaga balai anda bu kagoha dabudabu ngelo waholebirago abale mo ma nalarami, lene.
2KI 3:24 Ani lalu puwa anda pialu hemiria Isaraele ami biarume wai hongo howa bialu Moaba tininaga dindiha bo podama pialu Moabali dewaore bo hana haga bialu
2KI 3:25 tinaga tano wiaruni bo giala hole bialu mo wai labu helene. Ani bialu ai Isaraele ami agali biaru tigua Moaba dindi wiaruni bibahendeha pialu piai hene. Puwa mabu bayale mbira ngane handa walia hayagua ami agali bibahendeme ege to̱le̱ dugualu mabuha ba anda halu mabu lone hangabe nahe ege to̱le̱me wua to̱ladaga helaga bima pene. Ani bialu ira lini daga bayale hearuni dibai halu iba hambiaga uli wiarunibi dindi alumogo bigi bima pene. Tigua ani bima pialu tano bibahende bo gialo wahai hene. Moabalinaga tano timbuni mbiraore mini Kiheresi winigo dege mo ko nahe bayale wiaabo hene. Ani wiagola ami agali marume ege to̱le̱ pume yuwa bo pelalu wai biaga mugube hearume tano ogoninaga ege pabe neneni biruwa ege to̱le̱ puni yuwa tanoha ba anda haga bini.
2KI 3:26 Ani biyago hondowa Moabanaga kini biago ibugua manda bu handalu hearia wai bibe nahe tigua ibu bo poda hana habeheyane hendene. Ani handalu ai ibunaga ami agali hongo howa ayu tibume wai biagaru handari karia (700) bibahende haru halu Idomonaga kini biago heagoha tininaga tano yu wahalu ibida pole manda bialu heariabi nakarulapeyane hendene.
2KI 3:27 Ani hondowa Moabanaga kini biago ibugua ibu igini wahene mani ibuni homaragola kini ho aribia holene mbira heago kini ibunime bene. Bowa Moaba wali agalinaga dama mitangi bialu gime wabini wiagohondo bo loma buwa irani dai helo tanonaga ege pabe nene heagoria bo delene. Anidagua biyago hondowa Isaraeleali hearu ti gi hai howa wai nabi wahalu tini dalu dai biai hene.
2KI 4:1 Horo mbirungi Anduane Homogonaga bi mana latagi haga agali mbira homenego ibu one dalo Elaisa hearia ibini. Ibuwa ibugua Elaisahondo lamialu lalu, Agali haguane-o i̱ agalini homaya. Ibu Anduane Homogo andaneha haabo haga hayagoni í̠ manda bu kego. Ai ibu agali mbirala dano ho howa heneyago nde i̱na agali ogoni ibunaga dano ho halu homayadagoni hongolene muni nawiore bedogoni. Ani berewagola agali ogoni ibunaga dano henedagonaga i̱ igini kirali kago ogoni labo ibunaga garabaya biabe ale bia halu helo dano hangalu ogoni labo minu ngi laya, lene.
2KI 4:2 Ani layago hale howa Elaisa ibugua wali biagohondo lalu, I̱na í̠ agua biamogo buliyadabe. Í̠ andagaha mbirale agi dege ngebe, lalu hale hene. Ani hale hayagola wali biagome ladai bialu lalu, I̱ andagaha mbirale mbira nawiore. Be emene mbiraha olibe lininaga weli emene dege mbira berelo ngeledo, lene.
2KI 4:3 Ani layago hale howa Elaisahanda wali biagohondo lalu, Áyu ogoni pialu í̠naga nenege bu karuhondo iba be timbunibi emenebi ta nabi dewaore ngadagua ngi laga bule pu. Ngigi biragola í̠na iba be uruni mo mogo bialu í̠ni andaga tamuha mo yalu pu ngelabe.
2KI 4:4 Ani bialu í̠bi í̠ igini labobi tí anda tamuha pialu panga payatagi habe. Ani buwa í̠nibi í̠ iginibi tí haru biruwa olibe lini weli emene wiaruagoni iba be uruniha odo berelaga bilimu. Iba be mbiragoha to̱laragola mendegoha odo berelaga bialu be bibahendeha berelaiore halimu, lene.
2KI 4:5 Bi ogonidagua layago hale howa wali biago ibu pialu ibunaga nenege kaware bu hearuhondo iba be ngidaba laga buwa ibuni andagaha mo yalu pene. Mo yu pialu ibu igini biago labo heba anda tamuha mandagi anda puwa panga payatagi hene. Payatagiho biruwa igiri biago labome iba be mo yu ibugu biyagola libu ai̱yahanda iba be ala wini biagoha howa olibe lini weli be maruha odo berelaga bialu be wiaru bibahende biru to̱lai helene.
2KI 4:6 Ai odo to̱lai howa wali biagome lalu, Be mende mo yalu íbu, lene. Ani layagola igiri biago labome ladai bialu lalu, Ai̱ya-o be mende nawi bibahendeore to̱lai hayagoni ndobe, lene. Ani layaore olibe lini weli be biagoha bereago iba be maruha lone hambulene nakarulape emene ala birayago hangu berene.
2KI 4:7 Ani hambu to̱lai ho ngelalu wali biago ibugua Anduane Homogonaga bi mana latagi haga Elaisa hearia puwa ibuhondo hale halu lalu, Ai olibe lini weli beha odo yobu wiai ko, lalu Elaisa lamini. Ani lamiyagola Elaisahanda wali biagohondo lalu, Ai dai buwa olibe lini weli uruni yalu puwa muni mibe. Muni mialu í̠ agalininaga dano henedagoni hangalu muni maru ibira holebirago í̠bi í̠ igini biago labobi tíni tomo mulene ngelalimu, lene.
2KI 4:8 Horo mbirungi hayagola Elaisa ibu Suneme tano pene. Homogo wali mbira muni mbiraleru dewawi Suneme tano ogoniha berene. Wali ogoni ibugua Elaisa ibu andaga tomo nami̱ya íbu lene. Ani bigi biaga henego horo bibahendengi Elaisa ibu Suneme tano pialu ibu tomo wali ogoni andaga nole pugu biaga hene.
2KI 4:9 Horo mbirungi wali ogonime ibu agalini lamialu lalu, Agali ina andaga tomo nole ibiraligoni ibu agali loma bini mbira howa ibu Ngode Datagaliwabenaga bi mana latagi haga heneneore heneyane handaru.
2KI 4:10 Ai ibu ani ibugu bialu palelo ibunaga tamu hobane mbira daligaha bu manda mandabu helami̱ya. Ani bialu tamu ogoniha paluene dagiabi birulene dagiabi dagia tebolobi mo ngelowa lamu halebi mo ngelami̱ya hameledo. Agali ogoni ibu ibirangi tamu hobane ogoniha ibalu bira palia bilo, lene. Ani lowa tigua tamu hobane ogoni manda mandabu helene.
2KI 4:11 Horo mbirungi Elaisa ibu Suneme dindi ibalu ibunaga anda hobane manda mandabu helene biagoha erekui dogolalu dagia bia heagoria emene palene.
2KI 4:12 Ibu ani paluwa ibunaga biabe biaga agali mbira mini Gehasi henego ibuhondo lalu, Unu dindiha dalialu puwa wali i̱naga anda tamu bia halu hayadago i̱na íbu layago pu lole pu, lene. Ani laya handala Gehasi ibugua pialu wali biago lamibe layadagua lamiyagola wali biago ibu abale ibuwa harabani handa andaho hene.
2KI 4:13 Ani íbu heagola Elaisa ibugua Gehasihondo lalu, Í̠na wali ogoni karia puwa ogodagua labe. Í̠na biabe ndelahe bialu iyanaga anda hobane mbira manda mandabu helaridagonaga emena Elaisa ibugua kini lamilo hame ledebe be ami haru haga haguane kagohondo mbirale bayale mbira í̠naga bia habe lalu lamilo hame ledebe. Be agiore bulubaya hame ledebe lalu hale hole pu, lene. Ani laya handala Gehasi ibugua pialu lamibe layadagua lamiyagola wali biago ibugua ladai bialu lalu, I̱ damene dewaorehe biruwa i̱ha mbirale mbira buru palia nabi bedogoni, lene.
2KI 4:14 O ladai binidaruni Gehasi ibugua Elaisa lamiai hayagola Elaisa ibugua Gehasihondo hale halu lalu, Anidago nde ibugua iyahondo mana bayale biyagonaga agi bibehedabe, lene. Ani hale hayagola Gehasi ibugua ladai bialu lalu, Ibu waneigini mbira nahe biruwa ibu agalini agali waheore hayiya, lene.
2KI 4:15 Ani layagola Elaisa ibugua Gehasihondo lalu, Wali biago ibilo lamule pu layagola Gehasi ibugua wali biago hondo pialu haru ibiyagola li harabani íbu hene.
2KI 4:16 Ani íbu heagola Elaisahanda ibuhondo lamialu lalu, Mali edegonaga ege áyu kamago aleni í̠na igiri mbira taba honowa í̠ninaga gini tabayu birulebere, lene. Ani layagola wali biago ibugua ladai bialu lalu, Ai i̱naga agali haguaneore-o í̠ Ngode Datagaliwabenaga agali heneneore kegonigo i̱hondo ke̱ore holeni nahabe, lene.
2KI 4:17 Anigo mani emene howa wali biago ibu tombeha gali bere berene. Ani biruwa mali mendegonaga horo Elaisahanda ogongiore lalu wali biago ibugua igiri mbira taba yu birulebere layadagua heneneore taba yu berene.
2KI 4:18 Ainde igiri biago ibu emene anda halu wahe ale howa horo mbirungi ibu aba mabuha hearia hondo pene. Horo ogoni widi gandulo wulenengigo ai ibu aba mabuha ibunaga biabe biahaga agali hearu baba hene.
2KI 4:19 Ai igiri emene biago ibu agali biabe bialu hearu handayaho henego abaleore ibu aba olowa lalu, Aba-o i̱naga haguane tandaga timbuniore bida. I̱naga haguane tandaga timbuniore bida, laabo hene. Ani layago hale howa igiri aba biagome agali mbira ibunaga biabe biaga ona heagohondo lamialu lalu, Igiri ogo ibu ai̱ya bedaria minu yalu pu, lene.
2KI 4:20 Ani laya handala igiri ibu ai̱ya berearia minu yalu dai biyagola ibu ai̱ya bani paliaho wiaabo halu horombe hanuniore hayagola igiri emene biagoni homene.
2KI 4:21 Homayagola ibu ai̱yahanda homene tingini tamu hobane daligaha yu irigi howa Elaisanaga dagia wiagoria mo ngelene. Ani ngelowa panga payaanda halu ai̱ya ibu tagira pene.
2KI 4:22 Puwa ibu agalini olalu íbu lowa lalu, Biabe biaga karuni aria mbirame nogo dongi i̱ koria áyu ogoni haru pu lole pu. I̱na Anduane Homogonaga bi mana latagi haga agali biago hondo pialu abale dai bule poleberogo, lene.
2KI 4:23 Ani layagola ibu agalini biagome lalu, Irane aginaga áyu dege abale polebere. Sabada horonagabi horo timbu mbira Ege Ngabulo holebiragonaga tomo nolenebi tagira ibirago áyu ndogo hondo pole larigo irane aginagabe, lene. Ani layagola wali biago ibugua ladai bialu lalu, Uruni waha. I̱ áyuore poleberogo í̠ hendore harene, lene.
2KI 4:24 Ani leagola biabe biaga agali biagome nogo dongini biragane ale mo paga hayagola wali biago ibu dongini iragaho biruwa biabe biaga agali biagohondo lalu, Iya hariga pialu howa dongi mo daila habe. I̱na dongi hendore pelo manda biruyagua nde í̠hondo langulebero, lene.
2KI 4:25 Ani lalu wali biagobi biabe biahaga agali biagobi Hari Kamelo heagoha Anduane Homogonaga bi mana latagi haga Elaisa hearia pole pene. Libu wene kaundiani ibalu hebiria Elaisa ibugua libu ala hondowa ibunaga biabe biaga agali Gehasihondo lalu, Suneme wali biago amu ibirago handa.
2KI 4:26 Í̠na abale gerai lalu lola hole puwa ibu agalinibi ibu iginibi bayale dege kama larabe hondole hale hole pu, lene. Ani laya handala Gehasi ibugua abale lola hole puwa wali biagohondo hale hayagola wali ibugua ladai bialu lalu, Ina bayale karulapeore kama, lene.
2KI 4:27 Ani lalu ibuwa dege Hari Kamelo neneni Elaisa heagoria ibuwa Elaisanaga ge dulini yani howa yu bulu palene. Ani biyago Gehasi ibu hondowa ibugua wali biago he̱lo pelole bialu hearia Elaisa ibugua ibuhondo lalu. Ibuha genda timbuniore mbira wiyagola biradalo manda bidogo ibu ani bilo waha. Anigo Anduane Homogohanda wali ogo ibuha genda ogoale mbira nga lalu i̱ nalangigo, lene.
2KI 4:28 Ani layagola wali biago ibugua lalu, Agali haguane-o i̱na í̠hondo mbirale mbira ngi lalu hale nahe. Í̠na bi larigome Ngode Datagaliwabehanda igiri ogoni ngiya. Anigo i̱hondo ke̱ore nahabe larugoni, lene.
2KI 4:29 Ani layago Elaisa ibu hale howa ibugua Gehasihondo lalu, Í̠naga aga gambalibu tubagi halu áyu ogoni i̱naga halimbu o ngago mo yalu abale Suneme tano pole pu. Pialu keria mbirali harigani lola hayagua uruni baba te nale puabo habe. Marume í̠hondo agali-o hondoha layaguabi í̠na tihondo ladai nabi pialu wali ogo andaga puabo habe. Ani pialu i̱naga halimbu ogo igiri emene biagonaga wanakuini dambi habe, lene.
2KI 4:30 Ani layago hale howa igiri ai̱ya biago ibugua mandabu handalu hearia Elaisa napole biayuane manda buwa ibugua Elaisahondo lalu, Anduane Homogo haluhe kagonaga minini howa i̱na í̠ yu wahalu napoleorebero, lene. Ani layago hale halu Elaisa ibu heyalu Suneme wali biago heba pole pene.
2KI 4:31 Gehasi ibu abale bamba halu piyago puwa Elaisahanda bibe layadagua halimbu biago igiri biagonaga wanakuiha wia dambi hayagola mbirale mbira bia nabi wiadagua wiaabo hene. Ani biya handala Gehasi ibu dai bini. Ani dai bialu hearia wali biago Elaisala ibalu hebiria lola howa ibugua libuhondo lalu, Igiri biago o bibe lalu langirigodagua birugola dabi halu heya nabiya, lene.
2KI 4:32 Elaisa ibu ibalu ibuninaga paliaga tamu hobane biagoha handa anda halu hearia igiri biago tongolo miniyago ibu paliaga dagia biago wiaria hendene.
2KI 4:33 Ani wiago handalu tamu hobaneha anda puwa panga paya tagiho biruwa Anduane Homogohondo bi lene.
2KI 4:34 Bi lalu dagiani iraga howa igiri homene wiagoria ge duli hanga ho biruwa igiri wiagoria palia paga howa ibunaga denguibi nebi gibi igiri biagonaga denguibi nebi gibi wiagoria pali dambi hai hene. Elaisa ibugua anidagua biyagola igiri biagonaga tingini poboyogo emene bini.
2KI 4:35 Ani biya handala Elaisa ibu heyalu anda tamu biagoha emene ibagabu hene. Ani ibagabu halu lone dai buwa igiri biagoria lone palia paga hene. Ani biyagola igiri homo tongolo mini biagome kiame kahalu balu de ngala hene.
2KI 4:36 Anidagua biyagola Elaisa ibugua Gehasi olalu íbu lowa lalu, Í̠na áyu ogoni puwa igiri ogo ai̱ya íbu lole pu, lene. Ani laya handala Gehasi ibugua pialu igiri ai̱ya lamiyagola wali biago ibu abale anda hobane daliga biagoha iraga halu tamuha anda pene. Ani biyagola Elaisahanda ibuhondo lalu, Ai í̠ igini minu yalu pu, lene.
2KI 4:37 Ani layagola wali biago ibugua kaware ibuwa Elaisanaga geha duli hanga ho biruwa bulu palialu Elaisanaga mini yaraga hene. Ani bialu ibu igini minu yalu pene.
2KI 4:38 Horo mbiru Isaraele dindiha gaea timbuni bialu hina gari timbuni pene. Ogoningi Elaisa ibuni dalu dai buwa ibu Giligala tanoni hene. Ani howa ibugua igiri daliahe Anduane Homogonaga bi mana latagi haga maru lawai halu hene. Ani lawai halu howa ibugua ibunaga biabe biahaga agali mbira heagohondo lamialu lalu, Todobene timbuni ngagoha tomo subuore igiri uruni heba nami̱ya dawabe, lene.
2KI 4:39 Ani lamiyagola Anduane Homogonaga bi mana latagi haga igiri biaru aria mbirame irabuha nema maru subu heba dawale tayabu pene. Ani pialu hearia bambo ale minana anda hene maru dearia handa walia howa ogoni tomo nolene bayalebe toba hene. Ani buwa ibugua bambo ale uruni aria dewaore nendebu dowa ibunaga labolabo to̱lowa do yini. Ani do yalu dai buwa podabaga buwa subu daweagoha dege mandagi biamaga howa dawene.
2KI 4:40 Subu dai heagola Anduane Homogonaga bi mana latagi haga igiri biaru nelo tinaga beledini dugu ta hene. Dugu ta hayagola igiri biaru tigua nalu hemiria kau biyagola tigua Elaisahondo lalu, Anduane Homogonaga bi mana latagi haga-o tomo subu ogo kaubi tomia aledago ina homoligo nanoleberema, lene. Ani lowa tigua tomo biago nolene manga hai hene.
2KI 4:41 Ani layagola Elaisahanda tihondo lalu, Balawa maru widime wabini wiagua mo yalu ibidaba, lene. Tigua mo yalu ibiyagola Elaisahanda todobene be subu bereagoha ibira hene. Ani ibira howa ibugua biabe biahaga agali biagohondo lalu, Ai Anduane Homogonaga bi mana latagi haga igiri biaru nelo beledini dugu ta habe, lene. Ani layadagua dugu ta hayagola nalu hemiria subu biago kau nabi bayale dendebiyagola nene.
2KI 4:42 Horo mbirungi Balasalisa dindi howa agali mbira Elaisa hearia ibini. Horo ogoningi mabuha bali widiru boga biyagola gandulo wulenengi hene. Ani binigo ai agali Elaisa berearia ibiyadago ibugua bali pigane gandu layago mberedi emene mi̱li̱mo̱lo̱le hirini uruni pira kirabi (20) hanalu widi pigane gandu layadago aria marubi hanalu ibuwa Elaisahondo mini. Ani miyagola Elaisahanda ibunaga biabe biahaga biagohondo lalu, Tomo uruni Anduane Homogonaga bi mana latagi haga igiri o karuni nelo talebu mibe, lene.
2KI 4:43 Ani layagola biabe biahaga biagome lalu, Tomo ogoni emenekodago igiri daliahe handari mbira (100) o karuni agua no karulo polobadabe, lene. Ani layagola Elaisahanda ladai bialu lalu, Tale bialu mia dege bia. Irane Anduane Homogohanda lalu, Tí no karulape halu ibira hene maru wulebira layago mibe, lene.
2KI 4:44 Ani layagola biabe biahaga agali biago ibugua Anduane Homogonaga bi mana latagi haga biaru nelo mo miyagola ti nene. Nayagola Anduane Homogohanda bulebira layadagua ti nalu karula piyagola maru ibira hene.
2KI 5:1 Naimana ibu Sirianaga ami haru haga agali haguane hene. Anduane Homogohanda Naimana biamogo biyagola ibugua ami bu hearu haru halu bamba howa ibunaga waitigi hearu baba wai bialu ibugua bo hana haga biyagola Siria dindiha kini heagome ibu gubalini timbuni haga hene. Naimana ibu ami agali bayaleore henegoyu ibu tinginiha ge hamuabi hene.
2KI 5:2 Horo mbirungi Siriali tigua Isaraele dindiha wai bule puwa Isaraele wandari mbira berearia ti minu yu dai bini. Ani biyagola wandari ogoni ibu Naimana onenaga biabe bia haga berelene.
2KI 5:3 Mani howa Isaraele wandari ogoni ibugua Naimana onehondo lalu, Samaria dindini Anduane Homogonaga bi mana latagi haga agali mbira kago ogoni ibugua ge hamua bidagoni mo dabi holebirago í̠ agalini ibu agali ogoni karia piyagua nde karulapeda, lene.
2KI 5:4 Naimana ibugua bi ogoni layago hale howa ibu kini berearia puwa Isaraele wandari biagome bi leneyago kinihondo lamini.
2KI 5:5 Bi ogoni lamiyago hale howa kini ibugua lalu, I̱na Isaraelenaga kini kagonaga beba mbira gilibu wia holiya í̠na mo yalu puwa mibelo, lene. Ani lalu kini ibugua beba gili bialu Naimanahondo mini. Ani biyagola Naimana ibugua muni kina ale siliba daosini dege handari pira tebira (300,000) mo yalu muni ngolo genda magi kilogarama daosini pira waragaria (60,000) mo yalu aga baya tara tara wiaru aria pira mo ya bialu Samaria pole pene.
2KI 5:6 Pialu Naimana ibugua Sirianaga kini biagome Isaraelenaga kini heagonaga bi bebani gilibu wia hayago yalu puwa ibunihondo mini. Beba gilibu wia henedagoni ibugua bi ogobi gilibu wini. Bi o gilibu wia harogo irane i̱naga ami haru haga agali haguane Naimana ogo ibuha ge hamua biyadago í̠na mo dabi habe lalu gilibu wia haro, lene.
2KI 5:7 Ani layiyago Isaraelenaga kini biago ibu handalu ibunaga bu miniha mogo lalu genda yu kogoni lowa walia halu ibuninaga aga biaga bu heago hanuni lerelaki hene. Ani buwa ibugua lalu, Agali ibuni Sirianaga kini kagome irane aginaga i̱hondo ibunaga agali ogoha warago ngago mo dabi habe lalu lawia hayadabe. Ibugua mandabu handalu hearia i̱ Ngode Datagaliwabe howa i̱na agali bayale helo mo bayale holene hongo yu halu maru home lolenenaga hongobi yu kabe toba hayadabe be agua layada. Ibugua bi o layadagoni i̱la wai biba lolenaga hariga hangu biyadane hendedo, lene.
2KI 5:8 Ani biyagola Ngode Datagaliwabenaga bi mana latagi hagane agali Elaisa ibu hale halu hearia kini ibu bu miniha mogo lalu genda howa ibunaga aga biaru lerelo ngelowa beda layane hale hene. Ani hale howa Elaisa ibugua kinihondo lawia halu lalu, Irane aginaga í̠na agaru minu budalu genda yu bedebe. I̱na Ngode Datagaliwabenaga bi mana latagi haga agali mbiraore hangu Isaraele dindiha ka lalu ibu mo walia holiya i̱ koria abale pu labe, lalu lawia hene.
2KI 5:9 Ani lawia hayago hale howa kini ibugua Naimana lamiyagola Naimana ibunaga garo ale karisi biagoria biralu pene. Nogo hosini garo ale karisi gililo yalu ti abale pialu Elaisa andaga haraba wiagoria pu hene.
2KI 5:10 Ani pu heagola Elaisa ibugua ibunaga biabe biahaga agali mbira heagohondo Naimana hearia lama pelo bi ogodagua lamini. Iba Yodanaha wayawaya kahalu bole pu. Ani beregola í̠naga warago bayadago dabi halu tinginibi bayale holebira lamibe, laya handala agali biago ibugua puwa Naimana lamini.
2KI 5:11 Ani lamiyagola Naimana ibu hale howa ibugua keba timbuni howa Elaisa andaga yu wahalu pole tagira pialu howa lalu, Ainde Elaisa ibugua i̱hondo tagira ibuwa ibunaga Anduane Homogohondo i̱naga bi la halu ai i̱naga tingini mo ko haga bidarunaga gi gamuru bigi bialu i̱ mo dabi holobadalo manda birugo. Ai anidagua bule ndoda.
2KI 5:12 Ibugua i̱hondo Yodana ibaha wayawaya bole pu laya. Anidago Damasagasaha iba Abana poragobi iba Paba poragobi iba ogoni labo Isaraele dindiha iba Yodana ale ndo iba gagahe baya taraore poragodago. Ibame i̱ mo dabi holene wiagua nde i̱ni dindiha howa iba bayale kira ogoni laboha i̱naga warago mo dabi helo wayawaya bialu holene wiago ibiruda, lene. Naimana ibugua bi ogonidagua lalu keba halu tandaga hama pene.
2KI 5:13 Ani piyagola agali ibunaga biabe biahaga haru hayarume ibuni heagoria kaware hapara howa ibuhondo lalu, Agali haguane-o Ngode Datagaliwabenaga bi mana latagi haga biago ibugua í̠na biabe timbuni mbira bibelo mo ngidale nde harugo laga bialu biaore bideledalo manda bidama. Anigo ibugua í̠ biabe timbuni mbira bibelo mo ngia ndo bame wayawaya hangu bole pu layagoni ndobe. Ai ibugua bibe lalu langiyago bulene karulape, lene.
2KI 5:14 Tigua bi ogonidagua lamiyago hale halu harugo lowa ainde Yodanaha wayawaya kahalu babe lalu Elaisa ibugua layadagua kahalu bayagola ibunaga tingini ge hamua biago ereba hai halu dabi hene. Ani biyagola ibunaga tingini baya dege lalu waneigini galinaga tingini baya kaligobi hearia hendene.
2KI 5:15 Ani handalu ibunaga haru ibiyaru heba Ngode Datagaliwabenaga bi mana latagi haga Elaisa biago hearia lone dai bini. Dai buwa Naimana ibugua Elaisa lamialu lalu, Ngode Datagaliwabe mende mbira dindi bibahendeha naheoreyane hendedo. Isaraele wali agali tinaga Ngode Datagaliwabe kago ibu dege dindi bibahendenaga ibu hangu henedane handa walia ko. Ani bidogo ai i̱naga agali haguane Elaisa í̠ mbirale maru í̠ mo turu halu ngulebero, lene.
2KI 5:16 Ani layagola Elaisa ibugua ladai bialu lalu, Ndo. I̱ Anduane Homogo haluhe kagonaga biabe biaga howa ibunaga minini howa heneneore larogo í̠na mbirale ngulebereru aria mbiraore hangubi mbira mo ya nabulebero, lene. Ani layagola Naimana ibugua hongoore howa Elaisahondo mbirale uruni mo ya layagolabi Elaisa ibu ndo lowa nayuleore lalu wahene.
2KI 5:17 Ani biyagola Naimana ibugua lalu, I̱na í̠hondo mbirale mo turu halu ngulebiruruni nayuleyagua nde waha. Anigo Isaraele dindiha dindi ngaru aria maru i̱naga nogo dongi kira karulape dugu yulene hame ledogo. Ainde í̠na karulape lariyagua dugu yuliya. Dindi ogoni i̱ daluha dugu yu pu ngelowa Anduane Homogo kagonaga loma biniru bo delolene dabu mbira bia holebero. Ani bu helowa i̱na Anduane Homogo ibuni hangunagaore loma biniru bo delai halubi loma marubi bo mialu holebero. Dama mitangi bialu gime wabiniruhondo loma nabo deloleberogo.
2KI 5:18 Ai i̱naga genda yu henedaru í̠na manda biai haregola i̱na ko bialu harodaruni Anduane Homogohanda domo wahai helo lamulene hamelo kogoni. I̱naga kini ibu dama mitangi bialu gime wabini mini Limonohondo bi pupu wule poragola i̱ ibu heba mandagi holeneore nga. Iya haru mandagi andaha anda puwa kini ibugua i̱naga gini yaniaho yalu anda piaga. Anda pialu howa ibugua mbirale dama mitangi bialu gime wabini Limono ogoninaga mini yaraga halu ge duli hanga haragola i̱nabi nde ibugua birago talialu bamenaga ani dege bialu holebero. Ainde i̱na ogoni buleberodago Anduane Homogohanda domo wahelo laro, lene.
2KI 5:19 Ani layagola Elaisahanda ibu lamialu lalu, Í̠ bu miniha genda nahe mo palia holene í̠ha karulalu pamia, lene. Ani laya handala Elaisa helalu Naimana ibu ibuni dalu dai bini.
2KI 5:20 Ani dai bialu kaundia nape wene dege pialu hearia Elaisanaga biabe biahaga agali Gehasi biago ibugua ibuni hangu lo mitangi bialu lalu, I̱naga agali haguane ibugua mbirale Naimanahanda miyaru mbira mo ya nabi wahalu yu dai bilo wahayago aginagada. Anduane Homogo haluhe kagonaga minini howa i̱na henene buleorego laro. I̱na áyu Naimana piyadagua talima pialu mbirale yiaru aria maru mo yu dai buliya, lene.
2KI 5:21 Ani lalu abaleore Naimana piyadagua talima pene. Naimana ibugua handa dai bialu hearia agali mbira gerai lalu ibu piyadagua talima ibiyane handalu nogo hosime gili laga karisi biagoria howa dalipe halu emene hondo hene. Ani hondo hearia Gehasi gerai lalu ibu heagoria ibini. Ani ibiyagola Naimanahanda ibuhondo lalu, Mbirale mbira agi biya handalu ibiribe, lene.
2KI 5:22 Ani hale hayagola Gehasi ibugua ladai bialu lalu, Mbirale mbira nabi bayale kamago bi mbira dege i̱naga agali haguane ibugua au laya. Anduane Homogonaga bi mana latagi haga agali kirali ibu andaga íbu bedago. Agali kirali ogoni libu Ngode Datagaliwabenaga bi mana latagi haga maru Eberaimi dindiha hari nene wiaruha hearu aria ibiyagola ai siliba nu mbira aga kira lowa agali ogonilabo muliya ngibe laya, lene.
2KI 5:23 Ani layagola Naimana ibugua ladai bialu, Nu mbira hangume agua bule ndodago harugo nu kira mo ya, lene. Gehasihondo hongo howa mo ya lalu hongo hayagola nde Gehasi ibugua, Ogoni karulape, lene. Karulape layagola Naimana ibugua siliba nu kiraha muni kina ale daosini pira waragaria (60,000) talebu henela hene. Agabi nde baya taraore kira mialu buwa agali Naimana ibunaga biabe biahaga kiralime Gehasi ibu maha ibilo, Libu bamba halu Elaisa andaga yalu pole pudaba, lene.
2KI 5:24 Pialu ti Samaria dindiha hari nene wiagoria iraga halu Gehasi ibugua siliba nu kira biago labobi aga kira biago labobi yamialu Elaisa andaga mo yalu anda pene. Ani bialu agali biabe biahaga kirali biagolabo, Naimana hearia dai bidaba, lene.
2KI 5:25 Agali biago labo peaha Gehasi ibu lone andaga tamuha anda pialu hearia Elaisahanda ibuhondo hale halu lalu, Gehasi-o í̠ agoha pialu eberebe, lene. Ani layagola Gehasi ibugua ladai bialu lalu, Agali haguane-o i̱ mbiraha nape henego ko, lene.
2KI 5:26 Ani layagola Elaisahanda ibuhondo lalu, Í̠ ke̱ nahe waha. Í̠na manda beregola i̱na í̠ nahende kobe toba kebe be. I̱naga dinini ibu í̠ heba mandagi haribigoni howa ibugua agali karisi biagoria berenego dalialu harigani í̠ lola hole daliyagoni handarugo ndobe. Gehasi-o horo áyu muni mo yu kegonime aga yolo buleneru ira olibe gama ngaru yolo buleneru gerebi gama yolo buleneru nogo sibi bulumagaru yolo buleneru wandari igiri biabe biahaga helo yolo bulenerubi bibahende nakarulapeore kegoni ndobe.
2KI 5:27 Anigo áyu Naimananaga muni mbiraleru mo yu kegoni. Anidagua biridagome Naimanaha ge hamua biyagoni í̠ha bulebira. Ani bialu í̠naga waneigini damene mani hama polebirarubi bibahendeha ge hamua biai halu biaabo holebira, lene. Ani layagola Gehasi ibu Elaisa andaga yu wahalu tagira piyagola ibunaga tingini pagaya bialu pagabua bugimbu biai halu ge hamua bini.
2KI 6:1 Horo mbirungi Anduane Homogonaga bi mana latagi haga agali maru Elaisa ibugua haru haga heneru tigua ibuhondo lalu, Anda ogoha ina bibahende paliai habe nahe emeneoredago
2KI 6:2 ai ina bibahende paliai holene anda timbuni bimi̱ya ina Yodana iba angeha pialu ira dibule poramabe lalu, hale hene. Ani layagola Elaisa ibugua tihondo lalu, Karulapego ani bule pudaba, lene.
2KI 6:3 Ani layagola agali mbirago ibugua Elaisahondo hale halu lalu, Inanaga agali haguane-o harugo í̠bi nde ina haru ma, lene. Elaisa ibugua ladai bialu, E̱ ina haru ma, lene.
2KI 6:4 Ani lalu ti haru mandagi puwa Yodana iba ange wiagoha ira hearu dibalu hene.
2KI 6:5 Ti ira dibalu hemiria Anduane Homogonaga bi mana latagi haga agali mbira heagonaga ayu ibaha golo ibira hene. Agali ogoni ibunaga ayu mibe naheyagola ibugua lalu, I̱naga agali haguane-o ayu ogoni i̱naga ndo agali mendealinaga mo yalu ibinigo ai ibaha golo wahayagoni, lene.
2KI 6:6 Elaisahanda agali biagohondo hale halu lalu, Ayu agoria ibira hayabe, lene. Ani hale hayagola ibugua, Ayu ogoriaore ibira haya, lalu Elaisa mo walia hene. Ogoriaore ibira haya lalu walia hayagoria Elaisa ibugua ira magane mbira podowa ayu ibira hayadagoria bape hene. Ani biyagola ayu biago ibame yaraga hene.
2KI 6:7 Ani biyagola Elaisa ibugua agali biagohondo lalu, Í̠na ayu biago yamialu mo ya, lene. Ani lamiyagola agali biago ibugua gi dogoladali halu ayu biago yamini.
2KI 6:8 Sirianaga kini heagome ibunaga ami agaliru haru halu Isaraeleali baba wai bule ibini. Ani ibalu howa kini ibugua ibunaga ami biaruhondo lalu, Balai anda ogoriaore bimi̱ya, lalu lamini.
2KI 6:9 Balai anda ogoriaore bulubada lalu Elaisa ibugua manda bu bamba howa Isaraelenaga kini heago ala lamialu lalu, Isaraele wali agali bu kamiru tí dindi ogoniha kaware napilimu. Pialu kamiria Siriali karume tí bo waholigo napilimu, lalu kini lamini.
2KI 6:10 Ani lamiyagola kini ibugua hale howa ibunaga ami agali hearuhondo lalu, Siriali ti anda bulenedagoria tí ala pudaba, lene. Siriali biaru ti ibuwa handalu hemiria Isaraele ami biaru ala íbu heagola ti anda bule manda biyago nabibeheyane handalu ti wahalu pene. Horo bibahendengi dindi ti balai anda bule manda biyagoria ani dege bini.
2KI 6:11 Ani dege biyagola Sirianaga kini biago ibu mini dege dindiho hene. Ani howa ibunaga ami haru haga haguane hearu bibahende olalu ibidaba lowa tihondo hale halu lalu, Tí kamiruni aria mbirali ai í̠na Isaraelenaga kini biamogo bialu kamibe, lene.
2KI 6:12 Ani hale hayagola ami haru haga haguane mbira heagome ladai bialu lalu, Kini-o mbirale ogoni ina kamaru ariame ndo berema. Mbirale o bialu kagoni Isaraele dindini Anduane Homogonaga bi mana latagi haga Elaisa mbira kago ibugua hangu bialu ka. Mbirale iname bule paraho ngamaruni ibugua ogoale bulebira lalu Isaraelenaga kini kago lamiaga ka. Í̠ paliaga tamu hobane ngagoha bira do howa lariyaguabi Elaisa ibu manda biai hagaore ka, lene.
2KI 6:13 Bi ogonidagua layago kini ibu hale hai howa ibunaga ami haru haga agali haguane biaruhondo lalu, Tígua Elaisa taya bima pudaba. Mbiraha kane handa walia harimiyagua ami bu karu haru halu ibu minule pilimulo, lene. Tigua goaria handalu hemiria Elaisa Dodana tanoha hearia hendene.
2KI 6:14 Ani handalu kini ibugua ami agali dewaore nogo hosini biralubi nogo hosime gililaga wai biagane karisini heyu howabi Dodana tano pudaba, lene. Tigua mbiraga puwa tano biago ho mabubupe hene.
2KI 6:15 Egerebagi gao layagola Elaisanaga biabe biahaga agali mbira heago ibu tagira puwa handa tagi halu hearia Siriali ami dewaore nogo hosini biralubi wai biagane karisini heyu howabi ibuwa tano biago ho mabubupe hearia hendene. Handalu abale andaga dai buwa Elaisa lamialu lalu, Agali haguane-o Sirialirume ibuwa ina ho mabubupe hayadago ai ina agua buledabe, lene.
2KI 6:16 Ani layagola Elaisa ibugua lalu, Gi holene nawi. Heneneore tinaga ami dewaore íbu ha ani kagonigo inanaga amiru dewaore ina mo wule ka, lene.
2KI 6:17 Ani lowa Elaisa ibugua Anduane Homogohondo bi lamialu lalu, Anduane Homogo-o agali ogo ibugua bi áyu larugo handa walia helo ibunaga de mo ngala ha, lene. Ani layaore Anduane Homogohanda biabe biahaga agali biagonaga de mo ngala hayagola ibugua handalu hearia nogo hosibi wai biagane karisibi dewaore hari bareha Elaisa bereago ho karulape hearia hendene. Nogo hosi karisidaruni ira hungu bialuhe handalehe hearia hendene.
2KI 6:18 Siriali biarume Elaisa minule anda ibiyagola ibugua Anduane Homogohondo lalu, Anduane Homogo-o agali o ibiraruni i̱ nahendelo tinaga de mo aruma ha, lene. Ani layagola Anduane Homogohanda Siriali biarunaga de mo aruma hai helene.
2KI 6:19 Ani heagola Elaisa ibu heyalu Siriali biaru hearia puwa ibugua tihondo lalu, Agaliru-o tí tano pole pirimigoni ogo ndogo íbu luluya harimidago ai karulapego i̱ porodagua maibidaba. I̱na tí agali taya bima ibirimidagoni karia haru poliya, lene. Ani laya handala ti ibu piyadagua talima pialu Samaria tano haru anda pene.
2KI 6:20 Ani haru anda pu helowa Elaisa ibugua Anduane Homogohondo, Tinaga de mo ngala ha, lalu bi layagola Siriali biarunaga dengala hai hene. Ani howa handalu hemiria ti Samaria tanoni anda pu harimayane hendene.
2KI 6:21 Isaraelenaga kini biagome uruni íbu heago hondowa ibugua Elaisahondo lalu, Agali haguane-o agali uruni homelo bo wahai hoabe, lene.
2KI 6:22 Ani layagola Elaisa ibugua ladai bialu lalu, Ani nabulego í̠na wai hamani wai bialu howa waitigi agali minareru bo wa nahariligoni ndobe. Ani biaga harigonidago ai agali áyu o karuni nabolego í̠na ti tomo nelo mialu tininaga kini karia daibilabe, lene.
2KI 6:23 Ani layagola Isaraelenaga kini ibugua Siriali biarunaga tomo dewaore manda manda bia howa tomo ibabi karulape nelo mialu, Tininaga kini hearia Siria dai bidaba, lene. Ani binidagoni be nirayagi Sirialirume Isaraele baba wai bule lone dai nabi wahene.
2KI 6:24 Mali dewa peagola Sirianaga Kini Benehadada ibugua ibunaga ami hearu haru halu puwa Isaraele baba wai bule Samaria tano ho hagira biai hene.
2KI 6:25 Ani biyagome Samaria tanoha tomo bu yalu anda ibabe naheyagola Samaria wali agali ti hina gari timbuni ho hene. Tomo biba halu tubagi hayagola ai nogo dongi haguane mbirago muni pira halira (80) agimame yolo bibehe wini. Agalime awa kauni ale minalu anda hagane kaubi karu genda magi emene emeneore muni siliba duriame yolo biaga hene.
2KI 6:26 Horo mbirungi kini ibu tanonaga ege pabe biagonaga neneni ibaga bialu hearia wali mbira ibu hondowa ibugua kinihondo lalu, I̱naga agali haguane-o i̱ biamogo bia, lene.
2KI 6:27 Ani layagola ibugua ladai bialu lalu, Anduane Homogohanda í̠ biamogo nabiyagua nde i̱na í̠ agua bialu biamogo buliyabe. I̱na widi waini ibarubi ngelo kone í̠ de hendedebe, lene.
2KI 6:28 Ani lowa ibugua wali biagohondo hale halu lalu, Í̠ha genda agile wu biruwa larebe, lene. Ani layagola wali biagome ladai bialu lalu, Wali o bedago iyame bi lo mbira halu i̱ waneigini ala bo naba ibu waneigini horo mendengi bo nabiya lariba.
2KI 6:29 Ani lowa i̱ igini ala bo dawalu nariba. Ani nowa horo mendengi ibu igini bo dawaba lalu hewaria ibu igini mbiraha mo do hayaya, lene.
2KI 6:30 Ani layago hale howa kini ibugua genda timbuni howa ibunaga aga bu heago budaki hene. Ani biyagola wali agali maru pabe gibugibu berearu ti de handalu hearia kini ibugua ibunaga aga biago andaneha aga mende dara ho howa biaga ale bia dambiho heane ti de hendene.
2KI 6:31 Ani howa kini ibugua lalu, Genda timbuni o ibiragoni tene Elaisa ibuorego ai agali ogoni homelo bo waholiya. Ibu homelo bo wanaharuyagua nde Anduane Homogohanda i̱ni bo wahelo laro, lene.
2KI 6:32 Ani lalu ibugua, Agali mbirame Elaisa bo wahole pu, lene. Horo ogoningi Elaisa ibu ibuni andagaha Samariali agali haguaneru heba berene. Agali mbira kinihanda Elaisa bo wahole pu layago ibu wene harigani ibalu heagola Elaisa ibugua agali haguane biaruhondo lamialu lalu, Inanaga kini ibu wali agali homelo bo wahaga kagome áyu ibugua agali mbira i̱naga ma pugu wahole pu laya handala ibira. Agali ogoni ibiragola ibu tamuha naibilo panga hongo howa paya tagi ho halimu. Ani bu kamaria ibunaga kini ibuni abale ibalu erembiraha íbu kane hondoleberemi, lene.
2KI 6:33 Elaisa ibugua bi lai naheaore dege agali kinihanda pu lene biago ibalu kini ibunibi maha talima ibini. Ani ibuwa kini ibugua Elaisahondo lalu, Anduane Homogo ibunime inaha genda áyu ogoni ibilayadago. Ai ibugua ina biamogo bialu mbirale mbira bilo iname ibuha maliaho habe nahe kamagoni, lene.
2KI 7:1 Ani layagola Elaisahanda ladai bialu lalu, Anduane Homogohanda heneneore bulebira lalu bi layago larogo hale habe. Yawi ni ogodaguaore harangi wali agalime tano pabe haraba ngagoria tagira puwa balawa bayaleore widime wabini nu mbira ale muni siliba kuni pira hangume yolo bialubi ladi ale mini bali nu kira ale muni siliba kuni pira hangume yolo bialubi mbirago bulebira, lene.
2KI 7:2 Kininaga mamage haga agali kini heba ibini heagome Elaisahanda bi layago hale howa lalu, Áyu o laregonidagua nabulebiraore. Anduane Homogo ibunime dahuliya andagaha howa tomo anda timbuni kagonaga panga dugupe halu tomo haealape hayaguabi iname muni emene ogonidaguame namuleberamaore, lene. Ani layagola Elaisa ibugua agali ogonihondo lalu, Í̠ ogoni birane handa hondoleberegoyu heneneore í̠na tomo uruni aria na nanolebere, lalu lamini.
2KI 7:3 Horo ogoningi agali ge hamuabi mariali Samaria tanonaga ege pabe timbuni heagonaga panga haraba wiagoria tagirahayagi berene. Ani biruwa tini hangu laedene bialu lalu, Ina aginaga ogoria bame biralu homole birarimadabe.
2KI 7:4 Ai tomoru taya bima ma nalarami. Anigo ina Samaria tanoha tomo nawigo ogoniha anda pirimayagua ina tomo garime homaramagoni degedago. Ai harugo ina Siriali amiru balai anda bu kagoha polene karulapeda. Tigua ina bo wahayagua nde karulape dege. Anigo ina bo wanahayagua nde bayaleore, lalu hene.
2KI 7:5 Ani lalu ne layagola ti Siriali biaru balai anda bu heagoha pole pene. Puwa anda bu heagoria handalu hemiria mbirali mbira naheore
2KI 7:6 Siriali ami biaru bibahendeore ibida piai hayiyane hendene. O ibida piyadagoni irane Anduane Homogohanda alendoore hayagola Siriali biaru tigua hale helo nogo hosini agali biralu ibiragolabi hosime karisi gililo yalu ibini ale bialubi kilikulu timbuni lalu ami agali tinaga waitigi dewaore ibiradagua bilene. Ani biyago hale howa Siriali ami biarume lalu, Isaraelerume ina baba wai bilo lowa Hidinaga kinibi Iyibinaga kinibi yolo biyagola libugua libunaga ami haru halu ibiyada, lene.
2KI 7:7 Siria ami biaru tigua bi ogonidagua lalu ti abaleore ibida piai hene. Tinaga balai andabi nogo hosi dongibi bibahende ngelo wahalu tininaga mbirale mbira nayiore bibahende wia handala tini dege pora bialu ibida piai hene.
2KI 7:8 Agali ge hamuabi mariali biaru ti balai anda mbira heagoha anda puwa handalu hemiria Siria ami biarunaga tomoru ibaru ona bu wiaria hondowa nendebu nene. Nalu ngolo silibarubi aga bayale wiarubi mo yalu puwa mbiraha mo do hene. Mo do halu dai buwa balai anda mendeha wiarubi ani dege mo yu puwa do hene.
2KI 7:9 Mani tini lo manda bialu lalu, Iname beremagoni bayale ndo beremadago. Iname áyu ogoni bayaleore mbira handa walia harimagoni wali agali lamimi̱ya ma. Iname latagi nahe donge ho kamaria horo mende bolangua hayagua inaha ko holene wulebira. Áyu ogoni abale pialu ami haru haga agali haguane kago lamimi̱ya ma, lene.
2KI 7:10 Ani lo manda bialu tigua mbiraga ogoningiore abale Samaria tanoha dai buwa tanonaga wai pabe panga mamage haga hearu olowa tihondo lalu, Ina Siriali ami biarunaga balai anda bu hearuha puwa handalu hemaria mbirali mbira naheore. Bi mbira layuane halebi nahe dege. Siria amidaruni tini piai howa tinaga mbirale yinidaruni balai andaha wiai heane handarima. Tinaga nogo hosi dongiru dariba haga binidaru hadape nahe bibahende dariba henedagoria handarima. Tomo damene bibahendeore balai andaha wiai hea, lene.
2KI 7:11 Agali wai pabe mamage haga biaru tigua bi ogoni hale howa wali agali tanoha hearu ola amu howa lalu, Bi ogoni kini andaga lo yalu pudaba, lene.
2KI 7:12 Kini ibugua bi ogoni mbi dombeni hale howa ibunaga ami haru haga agali haguane heagohondo lamialu lalu, Siriali uruni tinaga miniore i̱na baya hanguore manda biai kogo. Ina daluha tomo nawi kamago manda bialu tigua ina tanoha howa tagira ibulebira manda bialu ani tagira eberamagola ina minalu inanaga tano karulole manda bialubi tinaga balai anda wahalu puwa dangite ngaruha bira do holebira, lene.
2KI 7:13 Ani layagola ami haru haga haguane mbirame kinihondo lalu, Agali mbirame Siriali uruni ti agua biyadabe hondole pudaba labeheda. Ani hondole pudaba laramaru Siriali urunime bayagua nde karulape. Ina tamuha kamarubi ogonidagua dege homole kamagonidago. Agali marume hosi yu wahene karu aria duriani biralu pudaba lama, lene.
2KI 7:14 Ani layagola kini ibugua agali maru dabalu wai biagane karisi kirani nogo hosi maru talebu mialu lalu, Siria ami uruni agua biyadabe hondole pudaba, lene.
2KI 7:15 Agali uruni ti puwa handalu hemiria Siriali ami biaru ibida piyiyane hendene. Tigua peneyadagua talima piaho wialu amuraore Yodana angeni howa handalu hemiria uruninaga agaru wai biaga ayu tibu yandareru yu wahalu piyiyane hendene. Ani biyiyago handalu dai buwa tigua ogodagua biyiya lalu kini lamiai hene.
2KI 7:16 Agali handalu dai biyarume bi layago hale howa wali agali tanoha hearume Sirialirunaga balai anda heagoha gerai lalu puwa mbirale yu wahalu pene wiaruni ti mo yai hene. Abale howa Anduane Homogohanda bulebira layadagua lola halu balawa bayale genda magi nu mbira alebi bali bayale genda magi nu kira alebi muni siliba kuni pira hangu mialu tigua migimigi bini.
2KI 7:17 Kini ibugua ibuninaga mamage haga agali mbira biagome ami agali maru wai pabeni mamage haga hearu handayaho helo helene. Ani helayagola mamage haga agali ogoni ibugua wai pabe panga heagoria howa wali agali Siria ami biarume mbirale wahalu peneyane mo piyago handayaho hene. Ani hearia wali agali dewaore tanoha howa pabe haraba biagoha gengedatago bialu tagira pole piyarume mamage haga agali biago harabani handayaho hayago he̱la yahaga biyagome agali ogoni pilayagola wali agali bibahendeme hengedalu dege tagira piyagola agali o biagoni homo tongolo mini. Abale kini ibu Elaisa hondo piyangi Elaisa ibugua mbiwia halu ogonidagua bulebira layagoni heneneore lola hene.
2KI 7:18 Elaisa ibugua kinihondo lalu, Yawi ni áyu ogodagua haragola wali agali tigua tanonaga panga haraba ngagoria puwa balawa bayaleoreru genda magi nu mbira alebi bali genda magi nu kira alebi muni siliba kuni pira hangume yolo bulebira, laya.
2KI 7:19 Ani layagola kini ibuninaga mamage haga agali o biago homayadagoni ibugua Elaisahanda bi layago hale howa ladai bialu lalu, Anduane Homogohanda dahuliya andaga howa tomo anda timbuni kagonaga panga dugupe halu tomo haealape hayaguabi iname muni emene ogonidaguame namuleberamaore, lene. Ani layagola Elaisa ibugua agali ogonihondo lalu, Í̠na ogoni birane handa hondoleberegoyu heneneore í̠ tomo uruni aria na nanolebere, layagoni.
2KI 7:20 Ani layago heneneore Elaisahanda bi layago lola hene. Kini ibuni mamage haga agali o biago ibu tanonaga pabe panga wiagoria handa tagiho hearia wali agali tanoha howa tagira piyarume he̱la yahayagola ibu pilo wiaria wali agali dewaore tagira piyarume hengedayagola homene.
2KI 8:1 Horo mbirungi Elaisa ibu Suneme wali mbira bamba ibu igini homayagola Elaisa ibugua mo dabi hene biago ibu ai̱yahondo bi lamule pene. Ibugua wali ogonihondo lalu, Ina dindiha tomo gari timbuniore tagira ibiragola wali agali tomo nane gariho kane dege mali karia polebira lalu Anduane Homogohanda laya. Ani layago ai í̠naga waneigini dameneru haru halu mani tomo karulape ngagola dai bule áyu dindi taraha togoloyu pilimu, lene.
2KI 8:2 Ani laya handala wali ogoni ibu damene bibahende haru hai halu dindi mende Pilidia dindiha mali karia layadagua hole pene.
2KI 8:3 Ani pu hai halu mali karia biago piai heagola ibu dameneru heba Isaraele dindiha dai bini. Dai bialu kini berearia abale puwa ibunaga dindi andaru abale ibuni haraligo ngi lole pene.
2KI 8:4 Wali biago ibu wene pole harigani pialu heagola kini ibu Elaisanaga biabe biahaga agali Gehasila bi lalu berene. Kini ibugua Gehasihondo hale halu lalu, Elaisa ibugua biabe nahendene ale timbuni maru bigi binidaru te langigi bibelo hamelo kogoni, lene.
2KI 8:5 Ani layagola Gehasi ibugua bite bamba Elaisahanda Suneme wali biago igini homo tongolo mini wiaria mo dabi hene biago kinihondo lamialu berene. Gehasi ibugua bite biago lai nahe dege wene lalu bereagola wali biago ibugua nde kinihondo ibunaga mabu anda biaru ibuni ngiadai bia lole kini berearia ibini. Gehasi ibugua wali biago ibiyane hondowa ibugua kinihondo lalu, Kini-o handa. Te áyu langerogoni wali ogoni ibuni o ibiragoni. Ibu igini ala homayagola Elaisahanda mo heya henego o kagoni, lalu lamini.
2KI 8:6 Ani layago hale howa kinihanda wali biagohondo bi hale hayagola wali biago ibugua ogodagua biya lalu bi te binidaru bibahende kinihondo lamiai hene. Hale hai howa mani kinihanda ibunaga ami agali haguane mbira heago olalu íbu lowa lalu, Í̠na wali ogoni ibu mabu anda mbirale winidaru ibuni mo yu dai bilo biamogo bule pu. Ani bialu mali kariani ibu mbiraha pu heagola ibunaga mabudagoha tomo bu nalu harimaruni karulape muni mialu bibe, lalu kinihanda lene.
2KI 8:7 Horo mbirungi Elaisa ibu Siria dindiha tano timbuni Damasagasa wiagoria pene. Horo ogoningi Sirianaga Kini Benehadada ibu warago timbuniore bo wiangi dege pene. Elaisa ibu Damasagasa dindi anda ibiyagola wali agali hearume kinihondo lalu, Agali mbira mini Elaisa ibu Anduane Homogonaga bi mana latagi haga biago áyu ogoni Damasagasani íbu ka, lalu lamini.
2KI 8:8 Ani lamiyagola kinihanda ami haru haga haguane mbira mini Hasaele heagohondo lamialu lalu, Mbirale bayaleru agali ogoni ibu mo turu halu mule maru mo yalu ibu kagoria pobe. Puwa kini warago timbuniore bo ngago dabi holobadabe naholobadabe lalu Anduane Homogohondo bi hale ha labe, lene.
2KI 8:9 Ani lamiya handala Hasaele ibuni Damasagasa dindiha yári damene wiaru dewaore nogo kamele pira maria (40) uruninaga erekunini yulene karulapedagua mo paga howa yalu Damasagasa tanoha Elaisa hearia pole pene. Pialu Elaisa heagoria anda puwa ibuhondo lalu, Agali haguane-o í̠naga biabe biahaga Kini Benehadada henego ai ibugua ibunaga warago dabi holobadabe naholobadabe lalu í̠hondo hale hole pu laya handala hale hole ibiru, lene.
2KI 8:10 Ani layagola Elaisahanda ladai bialu lalu, Anduane Homogohanda i̱ walia halu kini ibu homolebira layagoyu í̠na dai bialu kininaga warago dabi holebira lalu lamule pu, lene.
2KI 8:11 Ani lai howa Elaisa ibugua Hasaele deme hongo howa handayaho wiaabo hayagola Hasaele ibu mini dege dindiho hene. Ani heagola Elaisa ibu dugu bini.
2KI 8:12 Dugu biyagola Hasaele ibugua Elaisahondo hale halu lalu, Agali haguane-o í̠na aginaga dugu berebe, lene. Ani layagola Elaisahanda ibuhondo lamialu lalu, I̱na áyu dugu berogoni í̠na mani mana ko timbuniore bialu Isaraele wali agali mo ko holobedane bero. Í̠naga ami agaliru haru halu ibuwa tano ege pabe hongohe bu mabu bidaru bo giala hole bulebeda. Ani bialu Isaraele dindiha igiri daliahe bu karuni bo wahai halu waneigini emene bu karu dindini mo paraho waholeberemida. Tígua wali gali tombeha bere bedaru ayu tibume tombene dibu haealo waholeberemidago uruninaga dugu bero, lalu lamini.
2KI 8:13 Hasaele ibugua bi uruni hale hai howa Elaisa lamialu lalu, I̱ agali habane nabulene ale dege kogonidago. I̱na mbirale bulebere lalu áyu langiriruni agua bialu bulubodabe, lene. Ani layagola Elaisahanda lalu, Í̠ Sirianaga kiniore holebere lalu Anduane Homogo ibunime i̱ mo walia haya, lalu lamini.
2KI 8:14 Libu bi uruni lai halu Hasaele ibu Sirianaga Kini Benehadada hearia dai bini. Dai biyagola kini ibugua hale halu lalu, Elaisahanda bi agua layabe, lene. Hasaelehanda ladai bialu lalu, Elaisa ibugua heneneore í̠naga warago ogoni dabi holebira laya, lalu kini lamini.
2KI 8:15 Ani lowa horo mendengi Hasaelehanda kini bo wahole manda bini. Ani manda buwa ibugua balangiya mbira ibaha mo iba howa kini berearia mo yalu puwa ogonime kininaga dengui minu huba biai hene. Ani buwa kini bu he̱ mulino ibugua balangiya biago hongo howa yu ndibulo heagola kini abale homo tongolo mini. Homayagola mani Hasaele ibuni Sirianaga kini ha aribia hene.
2KI 8:16 Ahaba igini Yorama ibu Isaraele dindiha kini heane dege mali dauni layagola Yahosabada igini Yahorama ibu nde ibu abanaga henge ibuni mialu Yuda dindiha kini ibu hene.
2KI 8:17 Ibu ai̱yahanda taba hanayangi howa hama ibinigo mali pira tebirani kira (32) hayagola ibu kini pigane hene. Ibugua kini howa Yarusalemeni mali halirani haru hene.
2KI 8:18 Ani howa ibu one Isaraelenaga Kini Ahaba wane mbira bereago dabu bini. Anidagua buwa ibugua mana ko Ahaba damenerumebi Isaraele wali agalirunaga kini henerumebi bialu haga wiago talialu Anduane Homogonaga deni mana ko dewaore bialu hene.
2KI 8:19 Ani bialu heago helowa Anduane Homogohanda Yuda dindi mo ko nahe dege hene. Ani binidagoni irane Anduane Homogohanda bamba ibunaga biabe biahaga agali Debidihondo habo nalolene bi mbira lo wialu lalu, Bibahendengi Debidi ibu damene hangume kini haabo holebira. Ani biragola Debidinaga hale lamu nahundilonaga ani bulebira, lalu lowini.
2KI 8:20 Yahorama ibu Yuda dindiha kini heangi Idomo wali agali bu hearu tigua Yudanaga kini heago andaneha henego mani howa tini mine halu hene. Mine howa tigua tininaga kini mbira dabo helayagola kini ogonime Idomo wali agali haru hene.
2KI 8:21 Ani biyago hondowa Kini Yahoramahanda ibunaga ami agali wayali karisini heyu howa wai biagane hearu haru halu Idomo dindiha dindi mbira mini Sairi wiagoria wai bule pene. Ani pu heagola Idomonaga ami agali bu hearume ti baba wai bule ho hagira biai hene. Ani bu heagola Yahorama halu ibunaga ami agali haguane karisi handayaho hearume Idomo baba wai timbuni mbiraga bialu tigua Idomoali hayadaruni bo hiladai bini. Ani bialu heago helalu ibunaga ami agali maru hearume ti wai wahalu tini andaga ibida dai bini.
2KI 8:22 Ani biyagome Yuda ami tigua Idomo bo poda hana habe nahe hene. Anidagua biyagome Idomo tigua tinaga dindi tinime haru henego áyu haabo ka. Ani binidagoningi dege Libina tanoha hearu tibi nde Yudanaga kini kagome handayaho nahelonaga tibi mine halu Yuda andaneha nahe tini hangu hene.
2KI 8:23 Bi te maru Kini Yahorama ibugua bialu henedaruni mbuga mbira mini Yudali Kini Henerunaga Bi Te laga ngagoha gilibu nga.
2KI 8:24 Mani Kini Yahorama homayagola tigua ibunaga tingini ibu mamalirunaga homali Debidinaga tanoha winigo ogoniha dege hora hene. Hora halu ibu igini Ahasaia Yudanaga kini ha aribia hene.
2KI 8:25 Ahaba igini Yorama ibu Isaraele dindiha kini mali homberia (12) hene heagola Yahorama igini Ahasaia ibu mali ogoningi Yuda dindiha kini pigane hene.
2KI 8:26 Ahasaia ibu dindini henego ibunaga mali pira kirani kira (22) hayagola kini henego ai ibugua kini howa Yarusalemeni mali mbira hanguni haru hene. Ahasaia ibu ai̱ya Isaraelenaga Kini Ahaba wane Adalia mbira berenego ibu Isaraelenaga Kini Omiri aguane berene.
2KI 8:27 Ahasaia ibu ai̱ya mana ko biaga Isaraelenaga Kini Ahaba aria bereagome Kini Ahasaia ibubi mana ogoni aria talialu Anduane Homogonaga deni ibugua mana ko dewaore Ahaba ariame bialu hagadagua bialu hene.
2KI 8:28 Horo mbirungi Kini Ahasaia ibu Isaraelenaga Kini Yoramala haru Sirianaga Kini Hasaele wai bule mba lalu libu pene. Puwa Gileada dindiha Lamodo tano wiagoria wai bialu hemiria Siria ami mbirame Kini Yorama timume bayagola timu ho hene.
2KI 8:29 Timu ho yu puwa dabi harabe hondole Yaserili tanoni pu wini. Yaserili tanoha wiagola Kini Ahasaia ibu de hondo pole pene.
2KI 9:1 Kini Yorama ibu Yaserili tanoni heangi Anduane Homogonaga bi mana latagi haga Elaisa ibugua igiri daliahe bi mana latagi haga mbira heago olalu íbu lowa ibuhondo lamialu, Í̠naga aga baya hangu paulo tubagi halu olibe lininaga weli be ogoha bedago mo ya. Ani mo yalu bialu Gileada dindiha Lamodo tano pole pu.
2KI 9:2 Lamodo tano anda puwa Yahosabada igini Yihu ibu Nimisi aguane kago taya bibe. Taya bialu keria ibu nenegeru baba dewali bereagua ibuni hangu anda hobane mbiraha haru halu pubagi habe.
2KI 9:3 Ani haru pubagi howa olibe lininaga weli beha hambu yaregoni ibunaga haguaneni odo wialu howa ibuhondo lamialu ogodagua labe. Anduane Homogohanda í̠ Isaraelenaga kini habelo dabo helarogoni laya, labe. Anidagua biai halu abaleore panga dugualu tagira pialu gerai lalu dai bibe, lalu lamini.
2KI 9:4 Elaisahanda bi uruni lai haya handala Anduane Homogonaga bi mana latagi haga igiri daliahe biago ibu Lamodo dindi pole pene.
2KI 9:5 Ani puwa handalu hearia Yihu ibu ami haru haga agali haguane maru hearu baba bi te lalu biru hearia de hendene. Ani hondowa ibugua lalu, Ami haru haga agali haguane-o i̱na í̠hondo bi mbira lolebero, lene. Ani layagola Yihuhanda ibuhondo hale halu lalu, Í̠na bi aihondo loleberebe, lene. Ani ladai biyagola ibugua lalu, I̱na bi í̠hondo lole laru, lene.
2KI 9:6 Ani lalu libu haru anda hobane mbira heagoha anda puwa Anduane Homogonaga bi mana latagi haga biagome olibe lini weli hambu yayago Yihunaga haguaneni odo wialu howa ibuhondo lamialu lalu, Anduane Homogo ina Isaraele wali agalinaga Ngode Datagaliwabehanda lalu, Áyu i̱na í̠ Isaraele wali agalinaga kini habelo dabo helarogonigo i̱naga wali agali uruni haru habelo helaro.
2KI 9:7 Ani bu howa Kini Ahaba abale í̠ ibunaga biabe bialu ibunaga amiru haru haga agali haguane harigoni ibu damene bibahendeore homelo bo wahai habe. Anidagua bo wahai haregome kuini wali Yasebele ibugua mana ko dewa bialu hayagonaga pani nelo mialu ani bibe. Wali ogoni ibugua i̱naga biabe biahaga agali bu hearu bo wahai halu i̱naga agali maru bi mana latagi haga hearubi bo wahai henegonaga pani ogoni mibe.
2KI 9:8 Ahaba ibu damene lenego bibahendeore bo wahai holebero. Heneneore bulego laro. Ahaba ibu damene lenego yu wahenebi mbira Isaraele dindini naholebira. Agali Ahaba ibu aria karu igiri emenebi agali waheyaguabi bibahendeore bo wahai holebero.
2KI 9:9 Tihondo mana i̱na abale Kini Yaroboama Nebada igini biago ibu damene bibahendehondo birudaguabi Ahiya igini Kini Basa halu ibu dameneruhondo birudaguabi bialu bo hilo wahai holebero.
2KI 9:10 Yasebele ibu homolebira. Homaragola ibunaga tingini mbiralime mo hora naholebiraore. Ibunaga tingini Yaserili tano kawareni dege biangome nalu holebira, lalu Anduane Homogohanda laya, lene. Anduane Homogonaga bi mana latagi haga biago ibugua bi uruni lai howa panga dugualu abale gerai lalu pu wahene.
2KI 9:11 Ani piya handala Yihu ibu ami agali haguane maru biaru hearia dai biyagola tigua ibuhondo hale halu lalu, Mbirale mbira agi biyiya. Agali lulu biago ibu agi bule ibiniyabe, lalu hale hene. Ani layagola Yihuhanda ladai bialu lalu, Agali uruni aleme biagago ti manda bidami. Uruni aleme bi nagalone ngaru hangu laga ndobe, lene.
2KI 9:12 Ani layagola tigua lalu, Inahondo bi tigatiga langi. Bi mo do howa ke̱ nahabe, lene. Ani layagola Yihu ibugua ami haru haga agali haguane biaruhondo bi tigatiga lamialu lalu, Agali ogoni ibugua i̱hondo bi ogodagua langiya. Anduane Homogohanda lalu, I̱na í̠ Isaraele wali agalinaga kini habelo dabo helarogoni laya lalu, langiya, lene.
2KI 9:13 Ami haru haga agali haguane biarume bi ogoni layago hale howa abaleore tinaga aga amime biaga bu hearuni golalu anda harabani ge halu ubandatagi biaga egageria wiagoria dunga howa Yihu ogoriani heyu helene. Ani heagola tigua pilipe biguli pu lalu hongo howa ladagadaga bialu lalu, Yihu ibu kini haya, lowa huaro lalu hene.
2KI 9:14 Yihu ibu Lamodo tanoni howa ibunaga ami haru haga agali haguane biaru baba bi lo mbira halu Kini Yorama homelo bo wahalu ibuni kini ha aribia holenaga bi pongo bo wini. Anigo odagoningi Kini Yorama ibu Yaserili tanoha haabo hene. Irane abale Sirianaga Kini Hasaele baba wai timbuni biyangi Kini Yorama ibu timu bo winigo ai dabi nahe wiaabo hene. Ani wiaabo heagola Yihuhanda ibunaga ami agali haguane biaruhondo lamialu lalu, Tígua i̱nila mini mo mbiraore ho hemiyagua nde mbirali Lamodo tanoha howa Yaserili pialu iname mbirale bule ngamaruni lo yalu poligo polani hondo halimu, lene.
2KI 9:16 Ani lalu Yihu ibuni ibunaga wai biagane karisini irigi halu ibunaga ami agali maru heba Yaserili pole Lamodo tano yu wahalu pene. Yaserili dindini Kini Yorama ibunaga timu bo wiyago dabi nahe dege wuwa ibuni dagiani palene. Horo ogoningi Yudanaga Kini Ahasaiabi nde Yorama timu wiago hondo ibinigo Yaserili tanoha libu haru berene.
2KI 9:17 Agali mamageali mbira Yaserilinaga ege pabe heagonaga neneni mamage handa amu nana bu haga wiagoria howa handa amu halu hearia Yihu halu ibunaga agali biaru ibiyaria hendene. Hondowa agali tanoha hearuhondo oladali howa lalu, Agali dewaore tidi yalu ibira, lene. Agali biaru tigua puwa Yorama lamiyagola Yoramahanda tihondo lalu, Ami agali mbira kagohondo ibunaga nogo hosini biralu abale harigani lola ho pialu bibahende karulapebe lole pu ladaba, lene.
2KI 9:18 Ani laya handala ami agali mbira heago ibu abale nogo hosini biralu harigani lola hole puwa Yihuhondo lalu, Kini ibugua mbirale bibahende bayale degebe lalu ibu manda bulenaga hale hole pu laya, lene. Ani layagola Yihuhanda ladai bialu lalu, Ogoni í̠naga biabe ndogo í̠ ina poramadagua mali̱ya íbu, lene. Mamage handa amu nana bu haga tanonaga ege pabe nene wiagoria haga biago ibu handalu hearia ami agali kini ibugua pu laya handala piyago dai nabiyane hendene. Ani hondowa ibugua agali tanoha hearume kini bedaria bi lo yalu pelonaga ibugua lalu, Kini í̠na ami agali mbira lola hole pu lari handala piyago ibu ti ibiyago lola hayago dai nabi lalu kini lamule pudaba, lene.
2KI 9:19 Ani layagola kini ibugua ami agali mendeme lone lola hole pu lene. Pu laya handala pialu ibugua Yihuhondo hale halu lalu, Kini ibu hale holenaga mbirale bibahende karulape ngabe laya, lene. Ani layagola Yihuhanda lalu, Ogoni í̠naga biabe ndo ngago í̠ ina poramadagua talima ibu dege bia, lene.
2KI 9:20 Mamage haga biago ibugua handalu hearia agali piyagobi dai nabi dege biyago hondowa ibugua kinihondo lawia halu lalu, Ami agali mende mani pu larigobi dai nabi dege. Ai agali mbira wai biagane karisini heyu howa ibirago ibu handabe mangabi agali lulume bulene ale bima ibirago ibu Nimisi hameigini Yihuhanda biagadagua bima ibira. Ibugua nogo hosi bo wara daila halu karisi gililo yalu ibira, lene.
2KI 9:21 Ani layagola Yoramahanda lalu, I̱naga karisi mo manda manda bidaba, lene. Ani manda manda bu ngeleagola ibuni karisini irigiho halu Yudanaga Kini Ahasaiabi karisi mendeni irigi ho ha bialubi libu haru Yihu lola hole pene. Pialu dindi hobane mbira Nabodonaga wiagoria lola hene.
2KI 9:22 Yorama ibugua Yihu lola howa ibuhondo hale halu lalu bibahende karulape degebe be agua biyabe lalu hale hene. Ani hale hayagola Yihu ibugua ladai bialu lalu, Í̠ ai̱ya Yasebele ibugua mana ko damene ngaru bialu dama mitangi bialu gime wabini ngaru hangu mo tene halu tomia biaga mana ngago bialu biraabo heagua mbirale bibahende agua bialu bayale holeda. Í̠ ai̱yanaga mana ko ogoni pu timbu haragoni ndobe, lene.
2KI 9:23 Ani ladai biyago hale halu Yorama ibunaga karisi biago beregedalu ibida pole pene. Pialu howa ibugua Ahasaia olowa lalu, Ahasaia-o agali ogome iya bope hole ibiyada, lene.
2KI 9:24 Ani layaore dege Yihuhanda timu abale tegelape halu Yoramanaga erembirani bene. Ani bayagola timume Yoramanaga gubalini lilini daga biyagola ibuninaga karisi biagoria ibira halu tongolo mini.
2KI 9:25 Tongolomu wiagola Yihu ibugua ami haru haga agali haguane mbira mini Bidiga heagohondo lalu, Ibunaga tingini Yaseriliali Nabodo dalu ngagoha bape hadaba. Bi mbira Anduane Homogohanda Yorama aba Kini Ahabahondo laminigo manda bidami. Ala iya karisini maha talima pialu hebaria Anduane Homogohanda Ahabahondo lamialu lalu,
2KI 9:26 Abe dege Anduane Homogo i̱ni de hondo hewagola agali maru í̠naga hame ngeru taliaga hearume Nabodo halu ibu igini hearu bo wahai hayago. Ai Anduane Homogo i̱naore henene bulego larogo, Í̠na mana ko birigonaga pani dindi ogoria howa dege ngulebero layagoni, lene. Yihuhanda Bidigahondo laabo halu lalu, Anduane Homogohanda bi lo wiyago lola helo Yoramanaga tingini ngago Nabodo dalu ngagoha mo peha, lene.
2KI 9:27 Yudanaga Kini Ahasaia ibu nde Kini Yorama homaya handala abale ibunaga karisi biagoria heyu halu Bedehagana dindi wiagohayagi ibida pole pene. Ani piyagola Yihu halu ibunaga ami agali biarume haruru talima puwa Yihuhanda ibunaga ami agali hearuhondo lalu, Ibubi homelo dandame bogalimu, lene. Ani layagola tigua talima pialu Ibileama dindiha hari mini Guru nene wiagoria karisini pialu hearia tali minalu bogene. Bogaya handala Ahasaia ibu timu ho yalu ibida puabo halu mani Megido tano wiagoria tongolo mini.
2KI 9:28 Homayagola ibunaga tingini ami haru haga agali hearume karisini mo paga howa Yarusaleme yu dai bini. Ani buwa tigua ibunaga tingini ibu mamalirunaga homali Debidinaga tano winigo ogoniha hora hene.
2KI 9:29 Isaraele dindiha Ahaba igini Yorama ibu mali bearia (11) agima hene heagola Ahasaia ibu Yudanaga kini hene.
2KI 9:30 Yihu halu ibunaga ami agali biaru tigua Ahasaia talu wahalu Yaserili lone dai bini. Kuini wali Yasebele ibubi nde dindi ogoniha dege bereangigo Yorama homaya layago ibu hale ho berene. Ani hale howa Yasebele ibunaga de mandariru mo yári bia howa kini andaganaga windoha unu harigahayagi handatagi ho hene.
2KI 9:31 Ani handatagi ho heagola Yihu anda ibiyane hondowa ibugua lai latagi halu lalu, Simiri-o i̱naga agali haguane bo wahaga ni eberego. Irane aginaga íbu kebe, lene.
2KI 9:32 Yihu ibu bi layuago hale howa windo wiagoha handadagaho howa ladaga halu lalu, Maru i̱ kogohayagi ibule kamiru aibe, lene. Yihuhanda bi ani layuago hale halu agali kininaga biabe biaga maru anda tamuha heneyaru abale ibalu windoha handatagi ho hene.
2KI 9:33 Ani handatagi ho heagola Yihuhanda tihondo lalu, Wali o kagoni windoha howa dindini minu bape hadaba, lene. Ani layagola agali biarume Yasebele dindiha minu bape hene. Ani bape hayagola wali biagonaga darama piago pialu daramame anda hai hearu goba halu Yihunaga nogo hosi biagobi goba hene. Ani wiagola Yihuhanda ibunaga nogo hosi karisilame Yasebelenaga tingini hengedo tagadabaga bilene.
2KI 9:34 Ani bialu Yihu ibuni kini andaga tamuha anda puwa tomo nene. Nai howa ibugua agali berearuhondo lamialu lalu, Wali ko ogoni ibu homoleneore nga, lalu Anduane Homogohanda laya. Anigo nde wali ogoni ibu agali kini mbirago ibu waneore birayagodago ibunaga tingini mo hora hole pudaba, lene.
2KI 9:35 Ani laya handala ibunaga tingini mo hora hole tagira pene. Ani puwa handalu hemiria ibunaga tingini mbira nawi haguane kuni gi ge kuniru hangu ona ibira hearia hendene.
2KI 9:36 Ani biyiyago handalu tigua dai buwa Yihu lamialu hemiria ibugua tihondo lalu, O biyadaruni bamba Anduane Homogohanda ibunaga biabe biaga Tisibe tanoali Elayaha howa latagi hayago lola hayada. Anduane Homogohanda bi ogoni ogodagua lene. Yasebele ibu homaragola ibunaga tingini Yaserili tanonaga dindi ngagoria dege biangorume nai holebira.
2KI 9:37 Ani biragola ibunaga tingini budini mbira mbira biango ti heba to wiai holebira. Anidagua bidagola agalime Yasebelenaga tinginida lalu dababe nahe holebira, lalu Anduane Homogohanda Elayaha howa mbiwia ho wini, lalu Yihuhanda lene.
2KI 10:1 Kini Ahaba ibu waneigini aguanerubi pira karia (70) bibahende Samaria tanoha hene. Tano ogoniha heagola Yihu ibugua beba maru gili buwa agali haguane dindi ogoniha haru haga hearuhondobi mana handayaho haga hearuhondobi Ahaba dameneru mamage haga hearuhondobi gilibu pelene. Beba ogoniha bi ogodagua gilibu wini.
2KI 10:2 Kini waneigini aguaneru tígua haru halu wai biagane karisirubi wialu nogo hosirubi halu danda timu yandarebi wialu tanoha ege pabe hongoheme bu mabu biniha kamigoni. Anigo i̱na bi o gilibu ibilarogo mialu tígua
2KI 10:3 Ahaba igini bu karu aria tigabi mbira dabalu ibu kini helalimu. Ani helowa kini ibu bayale helonaga tínime wai bialu ibu biamogo bilimu, lene.
2KI 10:4 Ani layiyago hale howa Samaria tanoha mana handayaho haga hearubi wali agali dindi ogoniha haga karu haru haga hearubi tigua Yihuhondo gi timbuni ho howa lalu, Yihu ibugua kini kirali biago labo bope hayagodago ai ina aleme Yihu agua bope hami̱yadabe. Iname mbira bibe nahe kamagoni, lene.
2KI 10:5 Ani lowa agali kini andaga mamage haga heagobi tano handayaho haga agali haguane heagobi agali haguane maru hearubi agali haguane maru Ahaba waneiginiru mamage haga hearubi ti bibahendeme Yihuhondo bi ladai bialu lalu, Ina bibahende í̠naga biabe biaga howa í̠nime bia larego biai hole kamagoni. Iname kini mbira dabo helolene manda nabi kamago í̠nime karulapeda lo manda bidego bia dege bibe, lene.
2KI 10:6 Ani ladai biyiyago hale howa Yihuhanda beba mende lone gilibu pelowa lalu, Tígua heneneore i̱ andaneha holene manda bu hemiyagua Ahaba waneigini aguane karu bibahende bo wahai halimu. Ani bialu yawi egerebagi ni áyu ogodagua dege haragola tinaga haguane bibahende pugu yai halu Yaserilini i̱ni koria ibalimu, lene. Ahaba waneigini aguane pira karia (70) uruni ti Samaria tanonaga agali haguane hearu baba ho howa agali haguane uruni tigua mana tini manda bida ale biawai halu haga hene.
2KI 10:7 Ani henego ai tigua Yihunaga bi gilibu pelayago hale howa Ahaba waneigini aguane pira karia (70) uruni bibahende homelo bai hene. Balu homayagola uruninaga haguane puguwa mbasigedi nuha honowa Yihu hearia hanalu pene.
2KI 10:8 Wali agali Ahaba damene uruninaga haguane uruni hanalu ibira layago hale howa Yihu ibugua agali bu hearu lamialu lalu, Wali agali homenerunaga haguane uruni talebuki howa halu kirani unu tano pabe tagirahayagi wialu gao lelo ngeladaba, lene.
2KI 10:9 Gao layagola horo mendengi Yihu ibu abale heyalu tano pabenaga panga haraba wiagoria pialu wali agalinaga haguane pugu hono ibini biaruni wiaria hendene. Ani hondowa wali agali dewaore íbu ngoaiho hearia hondowa Yihu ibu heyu howa tihondo lamialu lalu, I̱naga agali haguane Yoramaore i̱nime bope hole lo manda bialu henego ai áyu ibu homelo bo waharu. Ai tígua agali mbira bo wanahe kamidalo manda bidogo ai áyu wali agali balu haguane o pugu yalu íbu ngaruni aiwa benedabe ina manda nabi kamagoni.
2KI 10:10 Anigo bi mbira Anduane Homogohanda bamba Ahaba dameneru ogodagua bulebira lalu lo wiyago áyu ogo heneneore lola harane hendedamagoni. Anduane Homogo ibunaga bi mana latagi haga Elayanaga ne harigaha howa layago áyu lola haragoni, lene.
2KI 10:11 Ani lalu mani Yihu ibugua Ahaba damenerubi nenegerubi ibunaga agali haguane helenerubi agali loma binigo mo miaga hearubi Yaserilini hene hearuni bibahende bo wahai hene. Mbiraore hangubi mbira yu wanahe bibahendeore bo wahai hene.
2KI 10:12 Yihu halu ibunaga ami agaliru Yaserili yu wahalu Samaria pole pene. Pialu dindi emene mbira mini Nogo Sibi Haru Hagaru Mo Ngoai Haga laga wiagoria anda pene.
2KI 10:13 Dindi ogoriani agali maru lola hayagola ibugua tihondo hale halu, Tí agohayagi howa ibirimibe, lene. Ani layagola tigua nde ladai bialu lalu, Ina Kini Ahasaia aria eberama. Ina Yaserili dindiha Kini Yorama damenerubi kuini wali Yasebele damenerubi handama pole porama, lene.
2KI 10:14 Ani layago hale howa Yihuhanda ibunaga ami agali biaruhondo, Agali uruni minu yania hadaba, lene. Ani layagola ami agali biaru tigua agali biaruni minu yalu dindi ogoniha gundu uli timbuni mbira wiagoha minu yalu pene. Agali uruni pira mariani kira (42) mbiraore hangubi yu wanahe bibahendeore uli ogoriani howa bo wahai hene.
2KI 10:15 Yihu ibunaga ami agali biaru heba ti dindi o biago yu wahalu pialu hemiria harigani agali mbira Legaba igini Yonadaba henego lola hene. Lola howa Yihu ibugua agali ogonihondo ibiribe lowa lalu, Í̠ hame ngelo kegoniore i̱na hame timbuni lo kogonigo ai í̠na nde agua wu kebe. I̱na bialu kogoni hondowa turu ho kebe nahe kebe, lene. Ani hale hayagola Yonadaba ibugua Yihuhondo ladai bialu lalu, Í̠na bialu kegoninaga i̱na í̠la mini mbiraoreho kogoni, lene. Ani layagola Yihu ibugua lalu, Ai bayaledago. Ani heneyagua gi tigani bibiya gi ngi, lene. Gi miyagola Yihuhanda ibunaga karisi biagoria irigi helo Yonadaba gilila mini.
2KI 10:16 Ani buwa Yihuhanda ibuhondo lamialu lalu, I̱na bialu koruni Anduane Homogo ibuni hanguore talima polenaga hongoore howa ani bialu henedalo í̠na handabelo i̱ porodagua iya haru mba, lene. Yonadaba ibugua, Karulapego mba, laya handala libu haru karisi biagoria iraga ho halu puwa Samaria tanoni anda pene.
2KI 10:17 Samaria tanoha anda puwa Yihuhanda Kini Ahaba aria maru yu wahene damene hearu bibahendeore bo hilo wahai hene. O biyadagoni abale bi mbira Anduane Homogohanda ibunaga biabe biahaga agali Elayaha howa bulebira lalu lowinigo heneneore lola hene.
2KI 10:18 Yihuhanda Samaria wali agali bu hearu bibahende olalu ibidaba lowa lalu, Ahabahanda dama mitangi bialu gime wabini Balanaga biabe bia holene ngago emene hangu biagago ai i̱na dewaore bu bolangua howa bulebero.
2KI 10:19 Ai agali Balanaga bi mana latagi haga karubi ibuhondo bi pupu wiaga karubi ibunaga loma binigo mo miaga agali bu karubi bibahendeore íbu ngoai helo oladaba. I̱na Balahondo loma timbuniore áyu loma bu deloleberogo mbiraligo mbira naibida lole ndo bibahende ibai halimu. Mbirali naibiyadago ibu homelo bo waholebero, lene. Yihuhanda ogonidagua lenedagoni ibugua wali agali Balahondo bi pupu wiaga karu bibahende bo wahai holenaga ohowa bi ogoni lene.
2KI 10:20 Ani lowa Yihuhanda laabo halu lalu, Ai iname Balahondo bi pupu timbuniore mbira wimi̱ya horo mbira pongo bo wima, lene. Ani lalu tigua bi pupu ogongi wimi̱ya lalu horo pongo bo wini.
2KI 10:21 Ani bialu Yihu ibugua Isaraele dindi bibahendeha bi lo yalu purogo ladaba layagola hale halu wali agali Balahondo bi pupu wiaga hearu mbiraorebi mbira yu wanahe bibahendeore íbu ngoai hene. Ibalu mbirale dama mitangi bialu gime wabini Balanaga bi pupu wiaga anda timbuni heagoha anda piai hayagola wali agali biru gengedatago bialu henge emene mbira nawi berene.
2KI 10:22 Bibahende tamuha birai heagola Yihu ibu puwa bi pupu wiaga haru haga heagohondo lalu, Ai bi pupu wule howa aga biaga wiridago bilo wali agali Balahondo bi pupu wule ibiyadaruhondo mo taha, lene. Ani layagola bi pupu wilo haru haga biago ibugua Yihuhanda bia lalu lamiyadagua bini.
2KI 10:23 Mahaore Yihu ibu Legaba igini Yonadaba libu haru bi pupu wiaga anda tamuha anda pene. Anda pu howa Yihuhanda wali agali biru hearuhondo lalu, Anduane Homogo mitangi bialu lotu laga mbira ina haru ogoha biramaga holigo dengui baya hangu handa amu nana bialu handai halimu. Ina wali agali Balahondo bi pupu wiaga hangu anda ogoha birami̱ya hameledo, lene.
2KI 10:24 Ibugua bi lai halu Yonadaba libu haru loma biniru bo delaga dabu wiaga tamu hobane wiagoha anda puwa loma biniru irame dai helo bo delolebi loma maru maru Balahondo bu mulebi anda pene. Egerebagi wali agali íbu ngoai nahe wiangi ibunaga ami agali pira halira (80) bibahende uyuna anda o biago haneni manda manda bu helene. Ani helowa tihondo lamialu lalu, Wali agali Balahondo bi pupu wiaga uruni bibahendeore homelo bo wahai halimu. Ami agali mbirame mbiraoreali hangu ibida pora bialu pelo wahayagua mani ami agali ogoni ibuni homolene wulebira, lalu lamiai hene.
2KI 10:25 Yihu ibugua loma biniru irani dai helaga wiago mo delalu tagira puwa ibunaga ami haru haga agali hearuhondo bi lamialu lalu, Áyu ogoni abale anda pialu bibahendeore homelo bo wahai hole pudaba. Mbiraore hangubi mbira pora bialu poligo napelo bo wahaiore halimu, lalu lamini. Ani laya handala tigua anda puwa bibahendeore wai biagane ayu tibume dibalu bo wahai hene. Mani dibu payapaya bini wiaru tanoha howa yu tagira puwa tagiraha mo wahai hene.
2KI 10:26 Ani bialu bi pupu wiaga anda biagoha anda hobane hanuni ha puwa gene mbira loma binigo wali agalime bi pupu wiagane biagobi dugu yalu tano tagirahayagi yu puwa irani dai helene.
2KI 10:27 Ani bialu tigua dama mitangi bialu gime wabini Bala wiagobi ogoni ibunaga bi pupu wiaga anda timbuni heagobi bo gialo haealabaga bu wahene. Ani bialu tigua bi pupu wiaga anda ogoni mo ko halu ti uli anda helenego áyu ogoni wiaabo ka.
2KI 10:28 Anidagua bialu Yihuhanda Balanaga bi pupu wiaga wiaruni bibahende bo gialo wahai hayagola Isaraele dindiha wali agalirume dama mitangi bialu gime wabini Balahondo bi pupu lone nawiaga hene.
2KI 10:29 Anduane Homogohanda Yihuhondo lalu, Í̠ i̱naga hame lewagobi talialu Ahaba dameneruhondo birigoni mana bayaleore biridalo manda bido. Anidagua birigonaga í̠ igini aguaneru tigua kini maninaga ma halu agima ha aribia helaga bulebero, lene. Ani bialu mani howa Yihu ibugua mana ko bamba Kini Yaroboamahanda biaga wiyadagua bialu hene. Kini Yaroboama ogoni ibugua mana ko uruni Isaraele wali agalime bilo biawai halu haga hene. Bamba Kini Yaroboama ibugua nogo bulumaga handalehe kira ngolome wabuwa mbirago Bedele tanoha ngelalu mendego Dana tanoha wini. Ani wiagola Yihu ibuguabi Isaraele wali agali tiguabi ogoni labohondo bi pupu wialu helo ngelene.
2KI 10:31 Ani bialu Yihu ibunibi nde Anduane Homogo Isaraele wali agalirunaga Ngode Datagaliwabenaga bi mana lowini wiaru baya hangu hongo howa yu ha nabi ibuni mini gedaore halu yu wahene. Ani bialu ibugua mana koore bamba Isaraele wali agali mana ko bilonaga haru pubagi haga Kini Yaroboamanaga biaga wiaru talialu bialu hene.
2KI 10:32 Yihu ibu kini heangi Anduane Homogohanda dindi taraha hameigini tara tara paligi biarume Isaraele baba wai buwa bo podalu dindi lenelene wiaru maru ti karulaga bini. Sirianaga Kini Hasaele ibugua Isaraele dindi bibahendeore
2KI 10:33 amu Iba Yodana ni tagira ibiragohayagi ibu karulai hole manda buwa Isaraele baba wai bialu hene. Ani buwa Hasaele ibugua Isaraele dindi bibahendeore unurayagi Aroe tano Iba Anono peagoria howa bo poda hana haga bima anda ibalu uyurayagi Gileadabi Basanabi bo podaga bima pene. Dindi uruni Gada hameiginirunagabi Lubene hameiginirunagabi maru nde ni tagira ibiragohayagi Manase hameigini tinaga wialu binigo uruni bibahende bo poda hana halu karulai hene.
2KI 10:34 Bi te maru Kini Yihu ibugua biniru bibahende mbuga mbira mini Isaraele Kini Henerunaga Bi Te laga ngagoha gilibu wini nga. Mbuga ogonime kini ibugua biabe hongohe mani biniru hangu gilibu nga.
2KI 10:35 Kini Yihu ibuni homayagola ibu damenerume ibunaga tingini Samariaha hora hene. Ani buwa ibu igini Yahoahasahanda ibu abanaga henge mialu kini ha aribia hene.
2KI 10:36 Yihu ibugua Isaraele wali agalirunaga kini howa Samariani mali pira kirani halira (28) haru hene.
2KI 11:1 Kini Ahasaia ai̱ya Adalia ibugua ibu igini Ahasaia bo wahaya layago hale howa ibugua abaleore ami agali bu hearu lamialu lalu, Yudanaga kini heneru aria agali bu karu damene bibahendeore bo wahai hole pudaba, lene.
2KI 11:2 Ani biyagoyu Kini Ahasaia igini Yoasa ibu dege bo wanahene. Irane Kini Ahasaianaga mbalini Kini Yahorama wane Yahosebahanda wandari mbira igiri Yoasa handayaho haga heba Anduane Homogonaga andaha paliaga hobane mbira heagoha bira do heleagola ami agali uruni tigua Yoasa handa walia nahayagome ibu bo wanahene.
2KI 11:3 Ani biyagola Yahoseba ibugua Anduane Homogonaga andaha mali waragaria mo do ho haabo hene. Ani mo do ho heangi Adalia ibu Yuda dindiha kuini wali berene.
2KI 11:4 Anigo Adalia ibu Yuda dindiha kuini wali bereane mali kane hayagola loma binigo mo miaga agali Yahoiada ibugua ami agali haguane kuini wali mamage haga hearubi kini andagaha mamage haga bu hearubi bibahende Anduane Homogonaga anda ibilo hondo pudaba lene. Tigua hondo piyaru haru ibiyagola Yahoiada ibugua tihondo habo nalolene bi hongohe mbira lowini. Ibugua mbirale mbira buleore lalu agali o biaruhondo bi lo wiyagola tiguabi nde buleore lalu Anduane Homogonaga minini howa, Í̠na inahondo bia lalu langerego bibahende biaiore holeberama, lalu lowini. Ani lai heagola mani Yahoiada ibugua Kini Ahasaia igini Yoasa tinaga deni haru tagira ibuwa tihondo mo walia hene.
2KI 11:5 Ani mo walia howa ibugua tihondo bi maru urudagua lamigi bini. Ibugua lalu, Áyu Yoasa kini dabo helami̱ya hame ledogo ai iname bulene maru ngago laro. Tí tidi tebirame biabe bialu howa Sabada horo haragola tidi mbirago ibu aribia haga bialu mbirago ibu ha̱lo haga biaga kamigoni. Ha̱lo kagola mendego ibu biabe bia aribia haga kamigoni. Anigo ai Sabada horo áyu holeberemagonaga tidi tebira harimigoni bibahende Anduane Homogonaga anda loma bia hene ogoha ibai halimulo hameledo. Agali maru Sabada horongi biabe bialu kini andaga mamage haga hayarubi maru panga haraba mbira mini Su laga biago mamage haga biarubi maru karunaga erembiraha panga haraba mamage haga hayarunibi bibahendeore ibai halu Kini Yoasa mamage hole Anduane Homogonaga anda ibai halimu. Ami agali bibahendeore wai biaga ayu tibu yai howa Anduane Homogonaga anda ibalu Kini Yoasa hangu bibahendeha mamage hai halimu. Ibu mbiraha polene hame layagua ami bibahendeme ibu poradagua mandagi pilimu. Ami bu kamiru tígua agali maru karu aria mbira ibu kagoria kaware ibulani handaluore halimu. Agali mbira ibu kagoha kaware ibiyagua agali ogoni ibu homelo bo wahalimu, lene.
2KI 11:9 Sabada horongi ami agali haguane biarume loma binigo mo miaga Yahoiada ibugua tihondo bilimu layadagua bialu ami agali maru tinaga biabe biai howa horo odangi ha̱lo hole hearubi maru biabe bu aribia hole hearubi bibahendeore loma binigo mo miaga Yahoiada hearia Anduane Homogonaga andaha haru halu ibai hene.
2KI 11:10 Ibai hayagola Yahoiadahanda Kini Debidinaga yandarebi ibunaga wai biagane humbibi ogoningi Anduane Homogonaga andaha winigo ami agali haguane biaruhondo yilo mo migi bini.
2KI 11:11 Ani miya handala ami biaru tigua Anduane Homogonaga andaha ni tagira ibiragohayagi howa mamage hama pialu ni paliragohayagibi bibahendeha haame hene. Tigua bo lomabu delaga dabu heagoriabi anda heagoriabi mamage kawareore hai hene.
2KI 11:12 Ami agali biaru ti manda manda bialu mamage haiore heagola loma binigo mo miaga Yahoiadahanda Yoasa haru tagira ibuwa kini manda ibunaga haguaneni karula hene. Ani buwa mbuga mbira bi mana gilibuwi wiago Yoasa mo mialu mani Yoasanaga haguaneni kini helonaga dabo helalu olibe lininaga weli odo wia hene. Ani biai howa heagola wali agali bu hearume turu howa bi hongo howa ladagadaga bialu gi habe balu tigua Kini Yoasaore kini haabo halu luore howa hodagua helo lowa mambolo balu hene.
2KI 11:13 Ami agali bu hearumebi wali agali maru hearumebi bi pu dagadaga buwa lalu hayuago kuini wali Adalia hale halu ibu andaga howa Anduane Homogonaga anda wali agali íbu ngoaiho heagoha abaleore pene.
2KI 11:14 Pialu tamuha anda puwa handalu hearia Anduane Homogonaga anda haneni anda gene mbira heagoria hapara howa kinime hagadagua kini gahenge mbira ona hearia hendene. Ani bialu ami haru haga agali haguanerubi agali maru pilipe ale biguli pu lagarubi ti kini heagoria kaware hapara ho hearia hendene. Wali agali bu hearume turu taraore halu hearia handalu marume biguliru pu lalu hearia hendene. Ani hondowa Adalia ibugua bu miniha tandaga timbuni howa ibunaga aga minu lerelene. Ani bialu howa ibugua lalu, Tí wali agali koore kamigoni howa tígua i̱hondo mana koore lehe bialu harimida, lene.
2KI 11:15 Yahoiada ibugua Adalia Anduane Homogonaga andaha bo wahelo hame nale howa ibugua ami haru haga agali haguane hearuhondo lalu, Adalia minu yalu Anduane Homogonaga anda howa tagira pialu ami agali ho dugu bu karia dombeneha minu yalu pudaba. Agali mbira ibu poradagua talima piyagua agali ogoni homelo bo wahalimu, lene.
2KI 11:16 Ani laya handala tigua Adalia minu yalu pialu kini andagaha anda polene hariga mbira nogo hosi uba andatagi biaga hariga wiagoha minu yalu pene. Minu yalu pialu tano tagirahayagi yalu puwa homelo bo wahene.
2KI 11:17 Loma binigo mo miaga Yahoiada ibugua Kini Yoasabi wali agali bu hearubi tihondo bi lalu, Anduane Homogola habo nalolene bi mbira tíni ibunaga wali agaliore holeberema lalu lo widaba, lene. Ani lowa bi mende wali agali tinibi kini ibubi tihondo lalu, Tígua tíni dege dege habo nalolene bi lo wialu bidaba, lene.
2KI 11:18 Ani laya handala wali agali hearume dama mitangi bialu gime wabini mini Balanaga bi pupu wiaga anda heagoha puwa bo gialo wahai hene. Balanaga lomabu delaga dabu anda ogoniha heagobi dama mitangi bialu Balanaga mbirale wabu wiarubi bibahende nde bo gialo wahai hene. Ani buwa tigua agali mbira Balanaga loma binigo mo miaga heago mini Madana ibu lomabu delaga dabu heagoria kaware bo ngelene. Ani biai heagola Yahoiadahanda ami agali maru Anduane Homogonaga anda mamage helo dabo helene.
2KI 11:19 Ani dabo helai halu Yahoiadabi ami haru haga agali haguane hearubi ami agali maru kini mamage haga hearubi ami agali maru kini andaga mamage haga hearubi tigua Anduane Homogonaga andaha howa kini haru halu kini andaga pole pene. Tigua pole pialu heagola wali agali bibahende mama talima pialu hene. Ti kini andaga anda puwa Yoasa ibu panga haraba mbira mini Ami Agalinaga Mamage Haga Panga Haraba laga winigo ogonidagua pialu kini biragane dagia wiagoria pu berene.
2KI 11:20 Ami agali biarume kini andaga kaware heagoria howa Adalia bo wahayagola wali agali bibahende hearu ti turu howa bu miniha dungu lowa turu hagabu Yarusalemeni hene.
2KI 11:21 Yoasa ibu ai̱yahanda taba hanayangi howa hama ibinigo mali kane hayagola ibu Yuda wali agalinaga kini pigane ogoningi hene.
2KI 12:1 Yihu ibu Isaraele dindiha kini heangi mali kane hayagola Yoasa ibu nde Yuda dindiha kini pigane hene. Ani howa ibugua mali pira maria (40) Yarusalemeni kini howa haru hene. Ibu ai̱ya Beaseba tano wali mini Sibia berene.
2KI 12:2 Yoasahanda ibu kini heangi mana bayaleore Anduane Homogonaga deni turu holene wiaru hangu bialu haabo henego irane loma binigo mo miaga agali mbira mini Yahoiada ibugua ibunaga mini mandaru baya hangu mo tiga binigome ani biaga hene.
2KI 12:3 Ani bialu ha howa dege Kini Yoasa ibugua damahondo bi pupu wiaga anda hearu bo gialo wanahe helo waheagola wali agali tigua damahondo bi pupu wialu nogo bo lomabu mialu ira hagua ngabi mini inisenesirubi lomabu delaga bialu hene.
2KI 12:4 Ani bialu howa Yoasa ibugua loma binigo mo miaga agali hearuhondo lamialu lalu, Wali agalime Anduane Homogonaga andaha dagisi muni mule yalu ibirarubi tigua Anduane Homogohondo turu halu mule lalu yalu ibirarubi bibahende mo mogo buwa baya hangu ngelalimu, lene.
2KI 12:5 Loma binigo mo miaga agali mbira mbira tinime wali agali hearume muni mule lalu yalu ibiraru baya hangu handaya ho haga hene. Muni yalu ibiyaru mo ngelo howa tigua Anduane Homogonaga anda loma bia hene biagoha mbira ko halu arema bulene wiagua muni urunime anda mo arema biaga agali karu yolo mulenaga mo wini.
2KI 12:6 Ani mulene winigoyu Yoasa ibu kini heane mali pira kirani tebira (23) hayagola ibugua handalu hearia loma binigo mo miaga agali biarume Anduane Homogonaga anda biago mbira mo arema nabi dege hearia hendene.
2KI 12:7 Ani hondowa ibugua loma binigo mo miaga agali Yahoiadabi maru hearubi olowa tihondo hale halu lalu, Irane aginaga Anduane Homogonaga anda kago mbirahayagi mo ko hene ngaru lone mo arema nabi dege kamibe. Muni mo wialu haabo harimiruni bame mo ngelowa holene nawigo ngelo harimidago ai agali biabe ogoni bulene karu tigua yu howa Anduane Homogonaga anda mo arema bulene ngaru bilo ngidaba, lene.
2KI 12:8 Ani layagola loma binigo mo miaga agali hearu tigua manda bialu kinihanda bi layadagoni karulapeda lo manda bialu lalu, Wali agalinaga muni lone mo wia nabimi̱ya. Anduane Homogonaga anda kagoha mo arema bulene biabe ngarubi iname handaya ho nahami̱ya, lalu tini bi lo mbira hene.
2KI 12:9 Emene howa Yahoiada ibugua mbogosi mbira mo yu puwa daliga panga heagohayagi diri mbira tombelo wini. Ani buwa ibugua Anduane Homogonaga anda pole wali agali uba anda tagi biaga harabani lomabu delaga dabu heagoria kaware gi tigahayagi ngelene. Ani ngeleagola loma binigo mo miaga agali anda pangani handaya ho haga hearu tigua wali agalime muni migi biyaru mbogosi ogoniha mo baanda haga bini.
2KI 12:10 Loma binigo mo miaga agali mbogosi muni handaya ho haga uruni tigua handalu kamiria muni to̱layadago handalu loma binigo mo miaga haguane heagobi kininaga beba gili bia dagala biaga heagobi lamiragola libugua nu yalu ibalu muni nuha haeala hanalu puwa daga laga biaga wini.
2KI 12:11 Ani daga lai howa libugua muni siliba uruni Anduane Homogonaga anda biagoha gobaha mo koha bigi bini wiaru arema bilo haru haga agali hearuhondo mo migi biaga wini. Ani miyagola haru haga agali biarume kabeanda biabe biaga hearubi
2KI 12:12 ege to̱le̱me anda biaga mugubeyi hearubi agali maru hari wiagoha howa ege to̱le̱ anda bule podaga hearubi tihondo yolo miaga wini. Ani bialu ira pelene mbalapaya wiarubi ege to̱le̱ marubi anda ogoni bulenaga yolo biaga wini. Biabe ogoni alego maru bulene wiyaguabi nde yolo bia dege biaga wini.
2KI 12:13 Tigua muni urunime Anduane Homogonaga andaha silibame wabini gaborubi ndisi berubi pilipe laga bigulirubi lamu hale delowa mo emeneha mo timbuniha bigi biaga wiarubi mbirale tara tara maru anda o biagoha ngelo lowa siliba ngolorume wabini wiarubi uruni wabulenaga muni mbira namiore.
2KI 12:14 Tigua muni uruni bibahendeore biabe biaga agali hearu yolo bialu mbirale biabe ogoni bulene wiaru hangu yolo biai hene.
2KI 12:15 Biabe biaga agali haru haga hearu ti nde muni page bulene manda nabi tigabioreme handaya ho heagola tígua muni agoha dege pelarimibe lalu hale nahaga hene.
2KI 12:16 Anigo muni maru wali agalirume tini ko biyagonaga mo tiga bialu loma wiyarubi tinaga ko wiaru domo wahelonaga loma wiyarubi uruni damenego Anduane Homogonaga andaha mbogosi wiagoha wia nabi loma binigo mo miaga agali hearu tinaga mo wigi bini.
2KI 12:17 Kini Yoasa ibugua Anduane Homogonaga anda biagoha biabe bilo agali maru dabo helaga bialu heaore dege Sirianaga Kini Hasaelehanda Isaraele dindiha wai bule anda ibini. Anda ibuwa Gede tano bo podalu karulowa wai bialu hene. Ani bialu howa uruni bo poda hana hai halu beregeda dai bialu Yarusalemeni wai bule pene.
2KI 12:18 Ani piyagola Yudanaga Kini Yoasa ibu Kini Hasaelela wai nabule lowa ibugua Hasaele mo palia holenaga muni yári tara tararubi dewaore Hasaele hearia yu pudaba lene. Mbirale dabudabu bamba Kini Yoasanaga mamali Yudali Kini Yahosabadahanda mo wini wiarubi Yahoramahanda mo wini wiarubi Ahasaiahanda mo wini wiarubi uruni bibahende tigua Anduane Homogonaga lalu daba bagiho wini wiarubi Yoasa ibugua mo wiai hene. Ani mo wiai howa Kini Yoasa ibunime mbirale bayale damenego Anduane Homogonaga lalu daba bagiho wini wiarubi heba mandagi wiamaga ho wini. Ani bialu ngolo muni damenego Anduane Homogonaga andaha wini wiarubi kini ibuninaga andagaha wini wiarubi bibahendeore Kini Hasaele mo palia hole lowa mo miai hene. Ani mo miai hayagola Kini Hasaele ibugua mbirale uruni mo yai halu wai nabi wahalu ibuni dalu dai bini.
2KI 12:19 Biabe maru Kini Yoasahanda bialu heneru mbuga mbira mini Yuda Kini Henerunaga Te laga ngagoha gilibu winigo nga.
2KI 12:20 Horo mbirungi Kini Yoasanaga haru haga agali haguane hearume kini bo wahole lo manda bialu hene. Agali uruni aria kirali Simeada igini Yosagabi Some igini Yahosabadabi libugua Kini Yoasa Sila dindiha pole piaga hariga wiagoria anda mbira heagoria bo wahene. Anda ogoni Yarusalemenaga leneha dindi ulini wiaria dindi dugu yalu ibuwa mogo bini winigoha henego ogoriani Yoasa bo wahene. Yoasa homayagola ibunaga tingini ibu mamalirunaga homali Debidinaga tanoha hora haga wini wiagoha dege hora hene. Ani hora hayagola ibu igini Amasaiahanda ibu abanaga henge mialu kini ha aribia hene.
2KI 13:1 Ahasaia igini Yoasa ibu Yuda dindiha kini heane mali pira kirani kira henego tebone (23) hayagola Yihu igini Yahoahasa ibu nde Isaraele dindiha kini pigane hene. Ibugua Samaria tanoha howa mali pira mbirani kariani (17) haru hene.
2KI 13:2 Ani haru howa ibugua Anduane Homogonaga deni howa mana ko timbuni Yaroboamahanda biaga wiadagua dege bialu hene. Ala bamba howa Yaroboama ibugua Isaraele wali agalime mana ko uruni ale bilo biawai henedagua dege Kini Yahoahasa ibuguabi nde mana ko uruni yu wanahe bialu hene.
2KI 13:3 Anidagua bialu heagola Anduane Homogohanda Isaraele wali agaliru baba keba timbuni hene. Keba timbuni howa ibugua Sirianaga Kini Hasaelehanda Isaraele baba wai bule dewa halu ibugu bilo henge migi bini. Mani Kini Hasaele homayagola ibu igini Benehadada kini ha aribia howa ibuguabi nde Isaraele baba wai bialu haabo hene.
2KI 13:4 Ani bialu heagola Kini Yahoahasa ibugua Anduane Homogohondo bi lene. Bi layagola nde Siriali biarume Isaraele wali agali mo koore hayago hondowa Anduane Homogohanda Yahoahasanaga bi layago hale hene.
2KI 13:5 Ani hale howa Anduane Homogohanda agali mbira Isaraele wali agali biamogo bilo dabo helayagola agali ogoni ibugua Isaraele wali agali Sirialinaga giha howa gingilo mialu mo wini. Ani mo wiyagola Isaraele wali agali ti abale wai nabi bayale hagadagua hodai bialu tini dindini hene.
2KI 13:6 Anigo tigua mana ko bamba Kini Yaroboamahanda biawai hayagola bialu hene wiaru yu wanahe bialu haabo hene. Tigua dama wali beda mitangi bialu mbirale gime wabini mini Asera laga Samaria dindiha wiago mo wanahe ngelo hene.
2KI 13:7 Ogoningi Sirianaga kini heagome Isaraelenaga ami agali daliahe bu heneru bo wahaiore heagola Kini Yahoahasa ibunaga ami dewa nahe wini. Ibunaga ami agali hosini biruwa wai biaga pira duriabi (50) wai biaga karisi pira hangubi ami agali maru daosini dege pirabi (10,000) uruni hangu ona hene.
2KI 13:8 Biabe maru Kini Yahoahasa ibugua bialu henedarunaga te mbuga mbira mini Isaraele Kini Henerunaga Te laga ngagoha gilibu winigo nga.
2KI 13:9 Kini Yahoahasa homayagola ibu tingini Samaria dindiha hora hene. Ani hora hayagola ibu igini Yahoasahanda ibu abanaga henge ibuni mialu kini ha aribia hene.
2KI 13:10 Yudanaga Kini Yoasa ibu Yuda dindiha kini heane dege mali pira tebirani waragaria henego kane (37) hayagola Yahoahasa igini Yahoasa ibu nde Isaraele dindiha kini pigane ogoningi hene. Ani haru howa ibugua Samariani mali pira mbirani waragaria (16) haru hene.
2KI 13:11 Yahoasa ibugua haru heangi Anduane Homogonaga deni howa mana ko Yaroboamahanda bamba bialu hagadagua dege bialu hene. Ala bamba howa Yaroboama ibugua Isaraele wali agalime mana ko wiaru bialu helo biawai halu haga hene.
2KI 13:12 Biabe maru Yahoasahanda bialu heneru mbuga mbira mini Isaraele Kini Henerunaga Te laga ngagoha gilibu winigo nga. Mbuga ogoniha Yahoasa ibugua Yudanaga Kini Amasaiala wai hongohe napalueneore ua laga bialu henegonaga te gilibu nga.
2KI 13:13 Kini Yahoasa homayagola tigua ibunaga tingini Samaria tanoha kini maru hora haga wini wiagoha hora hene. Ani hora halu mani ibu igini Yaroboama mende henego ibugua ibu abanaga henge mialu Isaraelenaga kini ha aribia hene.
2KI 13:14 Yahoasa ibu kini heangi Elaisa warago timbuni bo wini. Ai homoleore wiagola Kini Yahoasa ibu hondo pole pene. Yahoasa ibugua Elaisa dara timbuni halu dugu bialu lalu, Aba-o i̱naga aba-o í̠ore Isaraele wali agali mo wiaga hongo tarahe howa nogo hosiru karisiru ale harigoni, lene.
2KI 13:15 Ani layagola Elaisa ibugua kinihondo lamialu lalu, Danda timuru mo yalu ibule pu, laya handala Kini Yahoasa ibugua pialu mo yalu ibini.
2KI 13:16 Ani biyagola Elaisa ibugua ibuhondo lalu, Danda mo yuwa edaho ha, layagola kini ibugua Elaisahanda bia lalu lamiyadagua biyagola Elaisa ibunaga gi kininaga gini dogolo paga hene.
2KI 13:17 Ani buwa mani Elaisa ibugua kinihondo lalu, Windo mbira amu ni tagira ibiragohayagi kago dugua hole pu, lene. Ani laya handala Yahoasa ibugua danda timu edaho hayagoni yupe halu windo layago dugule pene. Dugua heagola Elaisa ibugua lalu, Danda edalu timu batagiha, lene. Yahoasa ibugua timu biago tegelape halu batagi heagola Elaisahanda lalu, Sirialiru bope halu wayali holene Anduane Homogonaga timu í̠nida. Ai í̠na Sirialiru baba Abege tanoha wai berengi í̠na ti baiore holebere, lene.
2KI 13:18 Ani lowa Elaisa ibugua kinihondo lamialu lalu, Timu maru ngaruni mo yalu timu urunime dindi o ngagoni ba, lene. Ani layagola Kini Yahoasa ibugua timu biarume dindi halu tebira bene.
2KI 13:19 Kini Yahoasahanda o bayadagoni hondowa Elaisa ibu keba timbuni howa kinihondo lamialu lalu, Í̠na dau halu waraga halubi mbira babe naheyane biribe. Anidagua bidele nde í̠na Siria baba wai buwa ti bai halu í̠ wayali kelego ai wahalu í̠na ti halu tebira hangu balu wayali holebere, lene.
2KI 13:20 Ani biyagola howa mani Elaisa ibu homene. Homayagola tigua ibunaga tingini homali egeanda mbira wabu winiyagoha mo hora hene. Mali bibahendengi Moabali hearume Isaraele dindiha anda pialu wali agali hearu mo ko halu haabo haga wini.
2KI 13:21 Horo mbirungi Isaraele wali agali ti homa mbira hora halu hemiria tigua Moabali maru ibiyaria hendene. Ani hondowa tigua agali homene biagonaga tingini Elaisa hora hene homali agali kuniru buwi wiagoha bape halu tini ibida pene. Ani bape halu ti piyagola agali tingini biago Elaisanaga kuni bu wiaruha wia dambi hayagola kuni uruni ela hayagome agali homene tingini biagoha buhe̱ lolene lone karula hayagola ibu lone heyini.
2KI 13:22 Yahoasa aba Yahoahasa ibu Isaraele dindiha kini heangi Sirianaga Kini Hasaele ibugua Isaraele wali agali mo mini burugula halu wai bialu haabo hene.
2KI 13:23 Ani bialu heago helowa Anduane Homogohanda nde Isaraele wali agali mitangi halu dara haga hene. Ibugua bamba Abarahamalabi Aisagalabi Yagabalabi habo nalolene bi lo winigo mitangi bialu Isaraele mo ko nahelo ibunime ti biamogo bigi bialu hene. Isaraele wali agali uruni ti ibunaga deni nahelo dindi kaundiaha bo talialu pe nale ti biamogo bini.
2KI 13:24 Mani howa Sirianaga Kini Hasaele homayagola ibu igini Benehadadahanda ibu abanaga henge ibuni mialu Sirianaga kini hene.
2KI 13:25 Ani heagola Isaraelenaga Kini Yahoasabi ibunaga ami hearubi tigua Sirianaga Kini Benehadada halu ibunaga ami agali hearu baba wai bini. Tigua wai timbuni halu tebirago ua laga bialu buwa Isaraele kini halu ibunaga ami agali biaru tigua Siria bo poda hana hene. Ani bialu bamba Kini Hasaelehanda Isaraele baba wai bialu dindi maru Siria tigua karulo hene wiaru tini bo yu dai bini.
2KI 14:1 Yahoahasa igini Yahoasa ibu Isaraele dindiha kini heane mali mbira henego mende hayagola Yoasa igini Amasaia ibu nde Yuda dindiha kini hene.
2KI 14:2 Amasaia ibu ai̱ya Yarusaleme tano wali mini Yahoadini ibuni taba henenegoria howa hama ibinigo mali pira kirani duria (25) hayagola Amasaia ibu kini pigane hene. Kini howa ibugua Yarusalemeni mali pira kirani dira (29) haru hene.
2KI 14:3 Amasaia ibugua Anduane Homogonaga deni mana bayale tigabiru bialu henegoyu ibu mamali Debidihanda biaga wiadagua nabini. Ibugua ibu aba Yoasahanda bialu hagadagua dege bialu hene.
2KI 14:4 Ibugua mbirale dama mitangi bialu gime wabinirunaga bi pupu wiaga anda hearu bo gialo wanahe helo wahene. Ani helo waheagola wali agali hearume anda uruniha puwa damanaga lomaru wialu mbirale ira hagua ngabilo delaga mini inisenesiru lomabu delaga bialu hene.
2KI 14:5 Kini Amasaia ibu Yuda dindiha howa baya hangu hongo howa haru heangi ibugua agali bu hearuhondo bidaba layadagua bialu tigua agali haguane abale ibu aba Kini Yoasa bo wahayaru bibahende bo wahai hene.
2KI 14:6 Anigo agali haguane uruni ti waneigini bu hearu bo wanahe helo wahene. Ibugua anidagua binidagoni irane bamba Anduane Homogonaga bi mana Mosesehanda gilibu wini biagoha wiago talialu ani bini. Anduane Homogonaga bi mana uruni ogodagua gilibu nga. Waneiginime mana ko biyagua ogoninaga pani aba ai̱yalahondo mialu bo waholene nawi. Anidagua dege aba ai̱yalame mana ko biyagua ogoninaga pani waneigini mia aribia halu waneigini bo waholene nawi. Mana ko biyagome ibuni dege homelo bo waholene nga, lalu ogonidagua gilibu winigo nga.
2KI 14:7 Horo mbirungi Kini Amasaia halu ibunaga ami agali heba dindi mbira mini Dindi Ulini Ibi Wiaga laga wiagoriani wai bialu howa tigua Idomonaga ami agali daosini dege pira (10,000) bo wahai howa Sela tano wiago ti karulene. Karulowa Kini Amasaia ibugua tano ogoni mini gahenge wia aribia halu Yogodele mo wini. Mini ogoni áyubi wiaabo ka.
2KI 14:8 Mani Amasaia ibugua Isaraelenaga Kini Yahoasa hearia bi lo pelalu lalu, Ina baba wai bimi̱ya ibidaba, lene. Yahoasa ogoni ibu Yahoahasa igini howa Yihu aguane hene. Agali bi yalu piyaru tigua Yahoasa hearia puwa Amasaiahanda bi layadagua lamini.
2KI 14:9 Ani lamiyagola Kini Yahoasa ibugua Amasaianaga bi layiyago ladai bialu bi yobage mbira tihondo ogodagua lene. Bamba Lebanono dindi hariha ira emene ko anihe mbira heneyagome ira timbuni tamia heagohondo bi lo pelalu lalu, Í̠ wane bedago i̱ igini kagome dabu bilo ngibelo hamelo ko, laya. Ani lo heagola nogo gabua timbuni mbira ibu hariga ira anihe ogoni heagoha bolangua halu piyaria ibunaga geme ira anihe ogoni hengedayagola gabu hayiya, lene.
2KI 14:10 Yahoasa ibugua bi yobage ogoni lai howa bi maru Amasaiahondo ladai bialu lalu, Amasaia-o í̠na Idomoali baba wai buwa wayali hari layane hale harugo ai í̠naga bu miniha turu timbuni halu kulo howa í̠ninaga mini yaraga halu kedalo manda bu ko. Dindi ogoniha howa wai bialu wayali harigome í̠ mini lene harigo ai í̠ninaga dindi wiridagoria howa turu hagabu halu í̠ni andagani hondo holene nga. Bameore ina baba wai bule ibalu keria í̠ni mo ko halu Yuda wali agalibi heba mo ko hai holene yu anda ibuligo ema nabi hendore holene nga, lalu ladai bini.
2KI 14:11 Ani layago lelowa Amasaia ibugua bi ogoni mo wahene. Ogonidagua biyiyago handalu Isaraelenaga Kini Yahoasa ibugua ibunaga ami agali hearu haru halu Yuda dindiha Bede Semese wiagoria puwa ibugua Amasaia halu ibunaga ami agali hearu baba wai bialu hene.
2KI 14:12 Wai biaho wialu Isaraele ami biarume Yuda ami hearu bo poda hanaore hayagola Yuda ami biaru tini dindiha pora bialu ibida piai hene.
2KI 14:13 Ani piai hayagola Yahoasahanda Amasaia minu yalu garabaya bu helene. Ani bialu Kini Yahoasa ibugua ibunaga ami agali biaru ti Bede Semese yu wahalu tidi yalu Yarusaleme tano anda pene. Anda pialu tigua tanonaga ege pabe timbuni wiagonaga panga haraba mbira mini Eberaiminaga Panga lagane henegoria howa bo gialama amuraore pialu pabe pau layagoria panga mende mini Pau lagane wiagoria gialairi hene. Wai pabe gialenedago lunaga magi manda mida handari kira (200) agima gialai hene.
2KI 14:14 Gialai halu tanoha anda puwa Kini Yahoasa ibugua muni ngolo silibaru bibahende tanoha wiaru damene mo yai hene. Ani mo yai halu Anduane Homogonaga andaha anda puwa gabo bebi ndisi bebi bibahende wiaru mo yalu muni mbiraleru kini andagaha wiarubi mo yai dege hene. Ani bialu agali haguane maru Yuda dindiha hearu minu garabaya biai howa ibugua Amasaiahondo lalu, Amasaia-o í̠na ina Isaraele baba wai lone bule manda nabibe. Wai bulene manda biriyagua nde í̠naga agali haguane o garabaya haru halu poramaruni bibahende homelo bo wahai holebero, lene. Ibugua bi ogoni lai howa Yuda agali haguane biaru garabaya haru ha mbirale mo yayaruni ya bialu Samaria tano dai bini.
2KI 14:15 Biabe maru Kini Yahoasa ibugua bialu henedarunaga te mbuga mbira mini Isaraele Kini Henerunaga Te laga ngagoha gilibu winigo nga. Mbuga ogoniha ibugua biabe hongohe bialu henegonagabi Yudanaga Kini Amasaia baba wai binidagonagabi te gilibu wigi bida.
2KI 14:16 Mani Kini Yahoasa homayagola tigua ibunaga tingini kini maru heneru hora haga homali Samaria tano wiagoha dege hora hene. Ani biyagola ibu igini Yaroboama mende henegome ibu abanaga henge mialu kini ha aribia hene.
2KI 14:17 Isaraelenaga Kini Yahoasa ibu homeagola Yudanaga Kini Amasaia ibu mali pira mbirani duria (15) halu homene.
2KI 14:18 Amasaiahanda biabe maru bialu henedarunaga te mbuga mbira mini Yuda Kini Henerunaga Te laga ngagoha gilibu winigo nga.
2KI 14:19 Kini Amasaia ibu Yarusaleme tanoha heagola agali maru hearume ibu homelo bo wahole ndilalu hene. Tigua bi uruni lalu ka layago hale halu Amasaia ibu Yarusaleme yu wahalu Lagisi tano ibida pene. Ani pu heagola ibunaga waitigi hayadarunime agali maru hearuhondo lamialu, Kini ibu Lagisi tanoha holebirago bo wahole pudaba, laya handala puwa tigua Amasaia hearia pialu ibu bo wahene.
2KI 14:20 Ani bo wahayagola agali maru hearume Amasaianaga tingini hosinaga erekunini mo paga halu Yarusaleme mo yu dai bini. Mo yu dai buwa ibu mamalinaga homali Debidinaga tano wiagoha winigo ogoniha dege hora hene.
2KI 14:21 Hora hayagola Yudali bu hearume Amasaia igini Usia mini mende Asaraia henego ogoni ibu abanaga henge ibuni mialu Yuda dindiha kini ha aribia helo dabo helene. Usia ibunaga mali pira mbirani waragaria (16) heagola Yudanaga kini pigane hene.
2KI 14:22 Mani ibu kini ho howa ibugua wai timbuni mbira bialu tano mbira mini Elada winigo ogoni waitigirunaga giha howa ibuni mo yu dai bini. Ani bialu tano ogoniha maru giala hole bu wiaruni mo tiga bialu lone arema bialu hene.
2KI 14:23 Yoasa igini Amasaia ibu Yuda dindiha kini heane mali pira mbirani maria henego dauni (15) hayagola Yahoasa igini Yaroboama mende ibu nde Isaraele dindiha kini pigane hene. Ibugua mali pira mariani huniane mbira (41) kini howa Samaria tanoni haru hene.
2KI 14:24 Ibugua Anduane Homogonaga deni mana ko timbuni bialu bamba Nabada igini Kini Yaroboama mbira henegome bialu hagadagua dege bialu hene. Kini Yaroboama mbira ala henegome ibu Isaraele wali agali haru pubagi halu Anduane Homogonaga deni mana ko bialu helo mo biahaga hene.
2KI 14:25 Kini Yaroboama mende ibu kini nahe heangi waitigi bu hearume Isaraele wali agalinaga dindi dewaore ti page bialu karulo hai hene. Ani heagola Kini Yaroboama mende ogoni ibugua wai bialu tinaga dindi karulo henedaruni Hamada tanoha polene hariga wiagoria howa wai bialu tini mo yu dai bigi bima pialu unurayagi iba kuyama mini Homene Iba laga bereagoria wai bialu dindi mo yu dai bigi bima pene. Ani binidagoni bamba Anduane Homogo Isaraelenaga Ngode Datagaliwabehanda ibunaga biabe biahaga Amidai igini Yonaha howa bi mana latagi halu mbiwia henego henene lola hene. Bi mana latagi haga Yona ogoni ibu bamba Gada Hebe tanoali hene.
2KI 14:26 Anduane Homogo ibu handa dali howa Isaraelenaga waitigi bu hearume ibalu Isaraele genda timbuni mo mialu wali agali dewaore bo wahai heagola yu wahene mbira mbira hangu hama pearia hendene. Ani handalu ibugua ti biamogo bulene agali bayale mbira nahe degeyane hendene.
2KI 14:27 Ani hondowa Anduane Homogo ibugua Isaraele wali agali bibahende bo wahaiore holene manda nabi hene. Ibugua Yahoasa igini Yaroboama mende biagoha howa ibunaga Isaraele wali agali biamogo bialu haru dai bilonaga kini ogoni dabo helene.
2KI 14:28 Biabe maru Kini Yaroboama mende ibugua bialu henedarunaga te mbuga mbira mini Isaraele Kini Henerunaga Te ngagoha gilibu nga. Mbuga ogoniha Kini Yaroboama mende biago ibugua tano kira Damasagasa Hamadala mo yu dai bulenaga wai bialu henegobi biabe hongohe maru bialu henerunagabi gilibu wigi bida.
2KI 14:29 Yaroboama mende biago homayagola tigua ibunaga tingini kini maru heneru hora haga homali wiagoha dege hora hene. Ibu igini Segaraiahanda ibu abanaga henge mialu Isaraelenaga kini ha aribia hene.
2KI 15:1 Yaroboama mende ibu Isaraele dindiha kini heane mali pira kirani waragaria henego kane hayagola (27) Amasaia igini Usia ibu nde Yuda dindiha kini pigane hene. Usia ogoni ibunaga mini mende Asaraia wini.
2KI 15:2 Ibu ai̱yahanda taba hanayangi howa hama ibinigo ibunaga mali pira mbirani huniane waragaria (16) hayagola ibu kini howa ibugua mali pira duriani huniane kira (52) Yarusaleme tanoha howa haru hene. Ibu ai̱ya Yarusaleme tano wali mini Yagolia berene.
2KI 15:3 Usia ibugua Anduane Homogo turu helo ibunaga deni howa mana bayale ibu aba Amasaiahanda bialu haga wiadagua taluwa bialu haga hene.
2KI 15:4 Ani bialu henegoyu mbirale dama mitangi bialu gime wabinirunaga bi pupu wiaga anda hearu dege bo gialo wanahe helo wahene. Ani helo waheagola wali agali hearume anda uruniha puwa damanaga lomaru wialu mbirale ira hagua ngabilo delaga mini inisenesiru lomabu delaga bialu hene.
2KI 15:5 Horo mbirungi Anduane Homogohanda Kini Usianaga tingini ge hamua ale bilene. Ge hamua ale ogoni dabi habe naheore bu haabo hene. Ani biya handala Usia ibu kini andaga yu wahalu ibuni hangu anda mendeha hene. Ani piyagola ibu igini Yodamahanda kininaga biabe bulene wiaru bialu kini andagabi Yuda dindi bibahendebi ibuni handaya ho hene.
2KI 15:6 Biabe maru Kini Usiahanda bialu henedarunaga te mbuga mbira mini Yuda Kini Henerunaga Te laga ngagoha gilibu winigo nga.
2KI 15:7 Kini Usia homayagola tigua ibunaga tingini Debidinaga tanoni ibu mamaliru hora haga wini wiagoha dege hora hene. Ani hora halu ibu igini Yodamahanda ibu abanaga henge mialu Yuda dindiha kini ha aribia hene.
2KI 15:8 Usia ibu Yuda dindiha kini heane mali pira tebirani karia henego huniane halini (38) hayagola Yaroboama mende biago igini Segaraia ibu Isaraele dindiha kini pigane hene. Ani howa ibugua ege waragaria hanguni kini howa Samaria tanoni haru hene.
2KI 15:9 Ani haru howa Segaraiahanda ibu mamalirume Anduane Homogonaga deni howa mana ko wiaru bialu hagadagua dege ibuguabi bialu hene. Bamba Nebada igini Yaroboama mbira ibugua Isaraele wali agalime Anduane Homogonaga deni howa mana ko uruni ale bialu helo haru pubagi howa mo biahaga henedagua Segaraia ibuguabi ani dege bialu hene.
2KI 15:10 Ani bialu heagola Yabese igini Salumu halu agali maru hearume Kini Segaraia homelo bo wahole hariga taya bialu hene. Mani howa Salumuhanda Ibileama dindiha wali agali bu hearu bibahendenaga deni howa Kini Segaraia homelo bo wahalu ibuni kini ha aribia hene.
2KI 15:11 Biabe maru Kini Segaraiahanda bialu henedarunaga te mbuga mbira mini Isaraele Kini Henerunaga Te laga ngagoha gilibu winigo nga.
2KI 15:12 Bamba Anduane Homogohanda Kini Yihuhondo lamialu lalu, Í̠naga aguanenerume ma daba hanguni kini howa Isaraele wali agali haru holebira, lalu bi lowini. Bi ogoni lo winidagua heneneore lola hene.
2KI 15:13 Usia ibu Yuda dindiha kini heane mali pira tebirani halira henego dini (39) hayagola Yabese igini Salumu ibu Isaraele dindiha kini pigane howa ibugua Samaria tanoni ege mbira hanguni haru hene.
2KI 15:14 Ogoningi dege Gadi igini Menaheme ibu Tisa tano howa Samaria tano ibalu ibugua Kini Salumu bo wahalu ibuni kini ha aribia hene.
2KI 15:15 Biabe maru Kini Salumuhanda bialu henedarunaga te mbuga mbira mini Isaraele Kini Henerunaga Te laga ngagoha gilibu winigo nga. Mbuga ogoniha biabe maru Salumu halu agali marubi tigua Kini Segaraia homelo bo waholenaga bialu henedaru ogodagua bialu hene lalu te gilibu wigi bida.
2KI 15:16 Menaheme halu ibunaga agali haru halu Tisa tano yu wahalu Samaria tano pole Tibisa tano wiagoria anda pene. Ani pialu hearia Tibisali bu hearume tinaga tanoha anda naibule lene. Ani layagola Menaheme halu ibunaga agali ibinidarunime Tibisa tano ogoni mo ko halu bo gialahole bini. Ani bialu tigua wali agali Tibisa tano ogoniha haga hearubi maru tano kaware ngelo haga bu hearubi bibahende homelo bo wahai hene. Ani buwa tigua wali maru tombeha gali bere berearunaga tombene podo haealaga biyagola homaga bini.
2KI 15:17 Usia ibu Yuda dindiha kini heane mali pira tebirani halira henego dini (39) hayagola Gadi igini Menaheme ibu nde Isaraele dindiha kini pigane howa ibugua mali pirani Samaria tanoni haru hene.
2KI 15:18 Ani haru howa ibu Anduane Homogonaga deni mana ko wiaru bamba Nebada igini Kini Yaroboama mbira henegome ibuni ko bialu wali agali hearumebi Anduane Homogonaga deni ko bialu helo mo biahagadagua dege Menaheme ibuguabi nde ani dege bialu hene. Ibugua mana ko ngubi urunidagua biaabo halu ibuni homolene ibilo hene.
2KI 15:19 Menaheme ibu kini heangi Asirianaga Kini Tigilada Pilese ibugua Isaraele baba wai bule ibini. Tigilada Pilese ibu mini mende Pulu hene. Wai bule ibiyagola Menaheme ibugua muni siliba kina ale milini tebira (K3,000,000) Tigilada Pilesehondo mini. Ani minigo irane Tigilada Pilese ibugua Kini Menaheme baba wai nabi wahelobi Menaheme ibuni Isaraele dindiha kini bayale hongohe holenaga biamogo bilobi yolo uruni ibugua Tigilada Pilesehondo mini.
2KI 15:20 Muni siliba uruni ilu mogo bulenaga Menaheme ibugua agali homogo muniwi hearuha dagisi ale ngidaba laga bini. Ibugua agali mbira mbirahondo muni siliba kina lalu pira duria (K50.00) ale dege dege ngidaba laga bialu miyagola Menahemehanda Kini Tigilada Pilesehondo mo migi bini. Ani mo miya handala Tigilada Pilese ibu Isaraele dindi yu wahalu ibuni dalu dai bini.
2KI 15:21 Biabe maru Menahemehanda bialu henedarunaga te mbuga mbira mini Isaraele Kini Henerunaga Te laga ngagoha gilibu winigo nga.
2KI 15:22 Menaheme homayagola hora halu ibu igini mbira mini Pegahiahanda ibu abanaga henge mialu kini ha aribia hene.
2KI 15:23 Usia ibu Yuda dindiha mali pira duriani (50) kini heagola Menaheme igini Pegahia ibu Isaraele dindiha kini pigane howa mali kira hangu Samaria tanoni haru hene.
2KI 15:24 Ani haru howa ibugua Anduane Homogonaga deni mana ko bialu bamba Nebada igini Kini Yaroboama mbira ibugua mana ko wiaru bialu wali agali hearumebi bialu helo mo biahaga henedagua dege Pegahia ibuguabi ani bialu hene.
2KI 15:25 Anidagua bialu heagola ibunaga ami agali haguane mbira Lemalia igini Pega henego ibugua Gileada tanoali pira duria (50) hearu heba ndilalu Pegahia homelo bo wahami̱ya lene. Ani lalu pialu tigua Samaria tanoha kini andaga anda hongohe tigi pabe bu yaanda hene wiagoha Pegahia berearia anda puwa Pegahia homelo bo wahene. Ani bialu agali kirali Agobo Arialabi bo wahalu Pega ibuni kini hole ibugua Pegahianaga henge mialu Isaraele dindiha kini ha aribia hene.
2KI 15:26 Biabe maru Pegahiahanda bialu henedarunaga te mbuga mbira mini Isaraele Kini Henerunaga Te laga ngagoha gilibu winigo nga.
2KI 15:27 Usia ibu Yuda dindiha kini heane mali pira duriani mbira henego mende (52) hayagola Lemalia igini Pega ibu kini pigane howa ibugua mali pira kirani (20) Samaria tanoni haru hene.
2KI 15:28 Ani haru howa ibugua Anduane Homogonaga deni howa mana ko bialu bamba Nebada igini Kini Yaroboama mbira ibugua mana ko wiaru bialu wali agali hearumebi bialu helo mo biahaga henedagua dege Pega ibuguabi ani bialu hene.
2KI 15:29 Pega ibu Isaraelenaga kini heangi Asirianaga Kini Tigilada Pilese ibugua Isaraele baba wai bialu hene. Wai bialu ibugua Iyono tanobi Abele Bedemaga tanobi Yanoa tanobi Kedese tanobi Haso tanobi bo poda hana halu karulai hene. Ani bialu ibugua Gileada dindibi Galilihayagibi Nabadali hameigininaga dindi wiaru bibahendebi bo poda hana hai halu karulai hene. Ani karulai howa dindi uruniha wali agali bu hearu bibahende minalu Asiria dindiha garabaya bu yalu piai hene.
2KI 15:30 Usia igini Yodama ibu Yuda dindiha mali pira kirani (20) kini heagola Ela igini Hosia halu agali maru heba ndilalu Kini Pega homelo bo wahami̱ya lene. Ani lalu puwa mani Hosia ibugua Kini Pega homelo bo wahalu ibuni Isaraele dindiha kini ha aribia hene.
2KI 15:31 Biabe maru Kini Pegahanda bialu henedarunaga te mbuga mbira mini Isaraele Kini Henerunaga Te laga ngagoha gilibu winigo nga.
2KI 15:32 Pega ibu Isaraele dindiha kini heagola mali mendeni Usia igini Yodama ibu Yuda dindiha kini pigane hene.
2KI 15:33 Yodama ibu ai̱yahanda taba hanayangi howa hama ibalu ibunaga mali pira kirani huniane duria (25) hayagola ibu kini howa ibugua Yarusaleme tanoha mali pira mbirani waragaria (16) haru hene. Ibu ai̱ya mini Yarusa ibu agali mbira henego mini Sadogo wane berene.
2KI 15:34 Yodama ibugua kini howa ibu aba Usiahanda bialu henedagua Anduane Homogo turu helo ibu deni howa mana bayale tigabi wiaru bialu hene.
2KI 15:35 Ani bia bialu howa dege mbirale dama mitangi bialu gime wabinirunaga bi pupu wiaga anda hearu dege bo gialo wanahe helo wahene. Ani helo waheagola wali agali hearume anda uruniha puwa lomaru wialu mbirale ira hagua ngabilo delaga mini inisenesiru delaga bialu hene. Yodama ibugua ibunaga biabe biahaga hearuhondo bidaba layagola tigua Anduane Homogonaga anda biago daliga uyurahayagi heagonaga panga haraba mini Daliga Panga laga heago wabu helene.
2KI 15:36 Biabe maru Yodamahanda bialu henedarunaga te mbuga mbira mini Yuda Kini Henerunaga Te laga ngagoha gilibu winigo nga.
2KI 15:37 Yodama ibu Yuda dindiha kini heangi Anduane Homogohanda Sirianaga Kini Lesinila Isaraelenaga Kini Pegalame libunaga ami agali bu hearu haru halu Yudali baba wai pigane bule tidi yalu pelene.
2KI 15:38 Mani Yodama homayagola tigua ibunaga tingini ibu mamalirunaga homali Debidi tanoni wini wiagoha hora hene. Hora hayagola ibu igini Ahasahanda ibu abanaga henge mialu kini ha aribia hene.
2KI 16:1 Pega ibu Isaraele dindiha kini heane mali pira mbirani waragaria henego kane (17) hayagola Yodama igini Ahasa ibu Yuda dindiha kini pigane hene.
2KI 16:2 Ahasa ibu ai̱yahanda taba hanayangi howa hama ibalu ibu mali pira kira (20) hayagola kini howa Yarusaleme tanoha mali pira mbirani waragaria (16) haru hene. Ani haru howa ibu mamali Kini Debidihanda mana bayale biagadagua nabi howa ibugua Anduane Homogo ibunaga Ngode Datagaliwabe turu helo ndo ibunaga deni mana bayale bulene wiaru nabi hene.
2KI 16:3 Ani nabi howa ibugua Isaraelenaga kini ala hene biarume ko bialu henedagua bialu haga hene. Ani bialu howa ibugua mana ko lehe dewa dege dindi ogoriani wali agali tara abale henerume biaga mana wiaru talialu bialu hene. Anduane Homogohanda wali agali ala bambaore dindi ogoniha henedaruni bo taliatagi halu Isaraele wali agaliru tihondo dindi ogoni mo mini. Ani binigo Kini Ahasa ibugua wali agali tara urunime mana ko abale bialu henedadagua dege bialu ibuni igini mbira henego damahondo loma buwa irani bo delene.
2KI 16:4 Ani bialu Ahasa ibu dama mitangi bialu mbirale gime wabinirunaga bi pupu wiaga anda hearuha piaga hene. Bi pupu wiaga anda uruni dindi hari nene wiaruha wialu ira timbuni hearunaga tene gumba heagohabi wiaga wini. Ani wiaga wiagoha howa Ahasa ibugua lomaru bo delalu ira hagua ngabilo delaga mini inisenesiru lomabu delaga bialu hene.
2KI 16:5 Ani bialu heagola Sirianaga Kini Lesinila Isaraelenaga Kini Pegalame libunaga ami agali hearu haru halu ibuwa Yarusaleme tano ho hagira bini. Ani buwa tigua Yarusalemeni wai bialu hemiria Ahasa halu ibunaga ami agali hearu bo podabe nahe hongoheore hearia hendene.
2KI 16:6 Ti ani bialu hea tambu Idomonaga kini ibugua Elada tano mo yu dai bulenaga wai bule puwa Elada tanoha Yudali hearu bo taliatagi halu tano ogoni karulene. Ani bialu Idomo wali agali bu hearu Elada tano ogoniha hole pudaba lenego ti áyubi ogoriani haabo ka.
2KI 16:7 Kini Lesinila Kini Pegalame Yarusaleme ho hagira bu yaanda howa haabo hea handala Yudanaga Kini Ahasa ibugua Asirianaga Kini Tigilada Pilese hearia bi yalu pelo lawia halu lalu, I̱ Kini Ahasa í̠naga biabe biahagabi í̠ iginibi kogo. Áyu Sirianaga kinibi Isaraelenaga kinibi libu harume i̱ baba wai bialu kamagoni. Ai libugua i̱ baba wai nabilo ina bo wahai nahelobi í̠na wai bule ibabelo hamelo ko, lalu lawia hene.
2KI 16:8 Ani lalu Kini Ahasa ibugua muni siliba ngoloru Anduane Homogonaga andaha wini wiarubi kini andagaha wini wiarubi bibahende Asirianaga kini heago wai bule ibilonaga yolo ogoni wia halu yalu pudaba lene.
2KI 16:9 Ani layago hale howa Asirianaga Kini Tigilada Pilese ibugua ibunaga ami agali haru halu ibuwa Damasagasa tanoni wai bialu bo poda hana halu tano ogoni karulene. Ani karulowa ibugua Kini Lesini biago bo wahalu Damasagasa wali agali bu hearu bibahende Kia tanoha garabayabu yalu pene.
2KI 16:10 Mani howa Kini Ahasa ibu Damasagasa tanoha Kini Tigilada Pilese hearia hondo pene. Ani pu howa tano ogoniha lomabu delaga dabu bia heago hendene. Ani hondowa ibugua ogobiore lalu wiagobiore bebani wabu yalu bimebi ogodagua bini wia lalu gilibu yini. Ani buwa ibugua beba ogoni agali mbira mini Uria ibu loma binigo mo miaga agali henego ibu Yarusalemeni hearia lomabu delaga dabu mbira ogonidagua wabu helabe lalu beba biago ibu hearia Yarusaleme pelene.
2KI 16:11 Ani pelayagola Uria ibugua lomabu delaga dabu gahenge Damasagasani henedagobi dege wabu helene. Kini Ahasa ibu Yarusaleme dai nabi heaore dege Uria ibugua dabu ogoni abale wabu helene.
2KI 16:12 Ahasa ibu Yarusaleme dai buwa handalu hearia dabu gahenge biago abale wabu helearia hendene. Ani hondowa ibugua dabu ogoriani mbirale bo lomabu delole lowa dabu heagoria pene.
2KI 16:13 Ani pu howa ibugua loma dai helo bo delalu widirubi lomabu delalu waini ibarubi odo delalu bini. Ani bialu ibugua Anduane Homogola ho gimbu bulenaga loma bo delenenaga darama hambu wiarume lomabu delaga dabu heagoria odo delaga bini.
2KI 16:14 Ahasahanda loma uruni bo delaga dabu gahenge biagoria bo delai howa lomabu delaga dabu ala hene ege to̱le̱ boronosime wabini heago mo yalu pubagi halu yalu puwa dabu gahenge biagonaga lene mbira uyurahayagi mo wini. Abale lomabu delaga dabu boronosime wabini ogoni ibu dabu gahenge biagola Anduane Homogonaga anda haraba wiagola hengene wiagoria mo ngelene.
2KI 16:15 Ani mo ngelowa Kini Ahasahanda Uriahondo lalu, Í̠na loma biniru bo delarengi i̱naga dabu timbuni gahenge ogoriani dege bo delaabo habe. Egerebagi bibahendengi loma irani dai helo bo delalu alendo widiru lomabu delabe. Kininaga lalubi bo delalu wali agali bibahendenaga lalubi bo delalu bibe. Loma uruni irani dai helaga alebi widi lomabu delaga alebi bu delaga bibe. Ani bialu wali agali bibahendenaga waini iba odo dela halu biaga wiyadagua bibe laro. Nogo tara tara loma biniru bo delaregonaga darama damene bibahende hambuwa lomabu delaga dabu gahenge ogoriani dege odoba habe. Anigo dabu boronosime wabini ngago dege i̱ninaga ngelabe laro. Ogoriani howa i̱na mbirale bule ngorunaga mini mo tiga bialu haru habe lalu i̱ni hangu bi lolene ngelo ngelarogoni, lalu Kini Ahasahanda bi uruni lai hene.
2KI 16:16 Kinihanda bi uruni layago hale howa Uria ibugua horo bibahendengi bibe layadagua bialu haabo haga hene.
2KI 16:17 Mani Kini Ahasahanda agali biabe biagaruhondo lamialu lalu, Anduane Homogonaga andaha anda puwa mbirale wilibaro ale ge kirahe bamba Kini Solomonohanda boronosime wabini ngaru gialo yalimu, layagola ani bini. Tigua iba berelaga ndisi be wilibaro ogoriani mo paga howa yaga wiagobi mo yini. Ani bialu iba be timbuni dange be ale bulumaga ale boronosime wabini homberia (12) uruninaga erekunini wiaru mo yuwa ege to̱le̱me dagia ale bu wiagoriani mo wini.
2KI 16:18 Ani biai howa mani Anduane Homogonaga anda kawareni dege anda biradagua emene mbira Sabada horongi nime hongo howa daba nahelonaga ni mo gehelo bu helene. Ani bu helenego wali agalime kini dengui nahendelo mo beregedo helene. Ani bialu kini ibu Anduane Homogonaga andaha pu íbu biaga kininaga hariga wiagohayagi mbirale mbira yári bayale winigo ogonibi wali agali nahendelo mo beregedo helene. Asirianaga kini heagonaga hame wiaru talialu Kini Ahasahanda urunidagua bini.
2KI 16:19 Biabe maru Kini Ahasahanda bialu henedarunaga te mbuga mbira mini Yuda Kini Henerunaga Te laga gilibu winigo nga.
2KI 16:20 Kini Ahasa homayagola tigua ibunaga tingini ibu mamalirunaga homali Debidinaga tano biagoha winigo ogoniha hora hene. Ani hora hayagola ibu igini Hesegaiahanda ibu abanaga henge mialu kini ha aribia hene.
2KI 17:1 Yuda dindiha Ahasa ibu kini heane dege mali hombeane (12) hayagola Ela igini Hosia ibu nde Isaraele dindiha kini howa Samaria tanoni mali dira haru hene.
2KI 17:2 Ani haru howa Kini Hosia ibugua mana ko maru Anduane Homogonaga deni howa bialu ha henego kini maru abale henedarume ko ngubiore dewa bialu henedagua ndo emene dege bini.
2KI 17:3 Ibu kini heangi Asirianaga Kini Salamanese ibugua ibalu Isaraele baba wai bini. Wai bialu Asiriame Isaraele bo poda hana hayagola Hosia ibugua Salamanese andaneha howa mali bibahendengi dagisi muni miaabo halu hene.
2KI 17:4 Anigo horo mbirungi Hosiahanda agali maruhondo lalu, Iyibinaga Kini So karia bi yalu lama pialu i̱ biamogo bule ibabe laya lole pudaba, lene. Ani lo howa Hosia ibugua mali bibahendengi dagisi mialu haralidagua mali ogoninaga Salamanesenaga dagisi nami wahowa hene. Ani heagola Salamanese ibugua manda bu handalu hearia Hosiahanda bi e̱ lo wialu puguayiyane handalu ibugua ami agali hearuhondo lalu, Hosia minu garabaya bule pudaba, layagola tigua ani bini.
2KI 17:5 Asiriali biarume Hosia minalu garabaya helowa Salamanese ibugua ibunaga ami agaliru haru halu Isaraele dindi bibahendeha wai biame hole pene. Tigua puwa Samaria tano anda pialu tano wiago ho mabubupe howa mali tebirani wai bialu hene.
2KI 17:6 Ani bialu howa Hosia ibu mali dirani Isaraele dindiha kini hene heagola Asirianaga kini heagome wai buwa Samaria tano bo podalu ti karulo hene. Ani karulowa Isaraele wali agali hearu haru halu Asiria dindiha puwa wali agali maru Hala tanoha helalu maru Gosana dindini Habo Iba pedago angeni helalu marubi nde Media dindiha helalu bini.
2KI 17:7 Isaraele wali agaliha genda timbuni uruni ibinidaruni irane tinime Anduane Homogo tinaga Ngode Datagaliwabe helo wahalu piyagome ani ibini. Tinaga mamaliru Iyibi dindiha garabaya biabe bialu hemiria Anduane Homogohanda ti Iyibinaga kini heagonaga giha howa mo wiyagoni manda nabi ti embedaho hene. Ani howa tigua mbirale dama mitangi bialu gime wabini wiaruhondo bi pupu wialu howa
2KI 17:8 mana koore tinaga kinirume biawai hayaru bialu hene. Ani bialu mana koore wali agali dindi ogoriani abale henedarume bialu henedadagua dege bu karulalu hene. Anduane Homogohanda wali agali dindi ogoni aba henedaru tini bo purogo lelalu dindi Isaraele wali agali tihondo mo mini.
2KI 17:9 Isaraele wali agalime ko tara tara Anduane Homogohanda hame nalearu ale dege bialu hene. Tigua mbirale dama mitangi bialu gime wabinirunaga bi pupu wiaga dindi bibahendehabi tano bibahende wiaruhabi mo wiai hene.
2KI 17:10 Ani bialu tigua hari neneruha iraga halubi ira timbuni hearu andanehabi ege to̱le̱ mbira dindini hanga howabi mbirale dama wali beda mitangi bialu gime wabini mini Asera wiarubi uruni bibahendehondo bi pupu wialu hene.
2KI 17:11 Damahondo bi pupu wiaga mana wali agali tara abale dindi uruniha bamba henedarume biaga wiadagua bialubi tigua ira hagua ngabilo delaga ale mini inisenisirubi delaga bialu hene. Isaraele wali agalirume mana koorene ko o bialu henedarunime Anduane Homogo mo tandaga hene.
2KI 17:12 Abale Anduane Homogohanda tihondo lamialu lalu, Tígua mbirale dama mitangi bialu gime wabini ngaruhondo bi pupu nawilimu, lenego ai tigua bi ogoni mo wahalu mbirale urunihondo bi pupu wialu hene.
2KI 17:13 Anduane Homogohanda Yuda dindiha Isaraele dindihabi ibunaga bi mana latagi haga agali maru pudaba lowa lalu, Tígua mana ko bialu kamiruni wahai howa bu mini beregedalu i̱naga bi mana ngaru bibahende taluwa bialu halimu. I̱naga mana bamba tínaga mamaliruhondo laminigo wialu i̱naga bi mana latagi haga hearuha howa latagi heneru lo nga, lene.
2KI 17:14 Ani lenegoyu Isaraele wali agalime mine howa tinaga mamalirume bialu heneda ale dege bialu hene. Tinaga mamali uruni tiguabi nde Anduane Homogo tinaga Ngode Datagaliwabenaga bi mana hongo howa yu ha nabi wahene.
2KI 17:15 Isaraele wali agalime Anduane Homogonaga bi layago mo wahalu habo nalolene bi bamba tinaga mamaliru baba lowini biago habo lalu bini. Ani bialu bi hongohe maru lowini wiaru damene bibahendeore mo bagi hai hene. Tigua bi mo bagi haiore halu mbirale dama mitangi bialu gime wabini wiaruhondo bi pupu wiaga uruni galone nabulene wini. Anidagua biyagome wali agali tinibi nde galone nahe urunibi dege hai hene. Ala bamba Anduane Homogohanda tihondo lamialu, Tígua wali agali dindi ogoriani hene karunaga mana natalilimu, lalu laminigoyu Isaraele wali agali tigua donge howa wali agali dindi tara tarani bu henerunaga mana uruni talialu bialu hene.
2KI 17:16 Ani biyagome tigua Anduane Homogo tinaga Ngode Datagaliwabenaga mana lowiniru bibahendeore puguai hene. Tigua nogo bulumaga igini ale kira aeaneme wabuwa o biago labohondo bi pupu wialubi dama wali beda mitangi bialu gime wabini mini Asera wabu ngelowa ogonihondo bi pupu wialubi hene. Tigua yakundi bu karuhondobi bi pupu wialu dama mitangi bialu gime wabini mini Balahondobi bi pupu wialu ha dege bini.
2KI 17:17 Ani bialu howa tigua tinaga waneiginiru wali agali tara tara bu hearunaga dama mitangi bialu gime wabini urunihondo lomabu mialu irani bo delaga bialu hene. Ani bialu howa tigua wali agali de gandeba handaga hearu hearia pialubi wali agali homenerunaga dininihondo bi laga hearuha halaga bia helo hondo pugu bialu hene. Isaraele wali agali tigua mana ko bulene dameneru dewaore tinaga bu miniha hongo hene. Tigua urunidagua bialu heago hondowa Anduane Homogohanda tihondo keba timbuniore ho hene.
2KI 17:18 Uruni biyago hondowa Anduane Homogohanda Isaraele wali agali ti handabe manga timbuni howa ibugua Isaraele wali agali tininaga dindi yu wahalu dindi tara kaundia wiaruha balu purogo lelene. Ani biyagola Isaraele wali agali tininaga dindini mbiraore henenebi mbira naheore wini. Yuda wali agali dege tininaga dindini haabo hene.
2KI 17:19 Anigo Yuda wali agali tibi nde Anduane Homogo tinaga Ngode Datagaliwabe kagonaga bi mana mo wahalu tigua Isaraele wali agalirume mana ko bialu henedagua dege bialu hene.
2KI 17:20 Isaraele wali agalirume ani bialu heagola Anduane Homogo ibugua ti bibahende erembira mini. Ibugua ti pani timbuniore nelo mialu tinaga waitigirume ibalu ti mo ko helo helene. Ani biyagolabi Isaraele wali agali tigua mana ko bialu haabo hayagola Anduane Homogo ibugua ti handabe manga howa tininaga dindi anda henene wiaru yu wahalu dindi tara wiaruha balu purogo lelene.
2KI 17:21 Abale Isaraele wali agali Yuda wali agalibi bibahende Kini Debidi andaneha hai hene. Ani hai henego mani howa Anduane Homogohanda Isaraele wali agalirume Yuda wali agaliru yu wahalu ti hoba mialu haga haga bilene. Ani howa Isaraele wali agali tigua Nebada igini Yaroboama tinaga kini helo dabo helene. Ani dabo heleagola Yaroboamahanda Isaraele wali agali Anduane Homogo yu wahalu mana ko wiaru bia timbuore helo mo bia halu hene.
2KI 17:22 Yaroboama ibugua mana ko biawai hayadagua bialu Isaraele wali agalime mana ko uruni wahole ndo bia timbuore hene.
2KI 17:23 Ani bialu heagola Anduane Homogohanda ibunaga bi mana latagi haga agali henerume mbiwia halu bulebero lenedagua ibunaga bi hale nahalu hearia tinaga dindi wahalu dindi kaundiaha bo purogo lelene. Asirialime ibalu Isaraele wali agali bibahendeore Asiria dindiha garabaya haru piai henego ogoniha ka.
2KI 17:24 Asirianaga kini heagome wali agali Babilono tano howabi Kuda tano howabi Iba tano howabi Hamada tano howabi Sebabaimi tano howabi wali agali tano uruniha hearu bibahendeore Samaria dindiha Isaraele wali agalinaga tano wima pearuni bibahendeha karulo hai helene. Ani binigo ai wali agali tara uruni ti Isaraele dindini haabo hene.
2KI 17:25 Wali agali uruni ti Isaraele dindini pigane íbu heangi ti Anduane Homogo mitangi bialu lotu nalaga hearia Anduane Homogohanda budi ale gabua timbuni mini laiono dewa ibilalu laiono urunime wali agali maru bo wahaga bini.
2KI 17:26 Ani biyagola wali agali marume Asirianaga kini hearia puwa lalu, Wali agali í̠na Samaria dindiha helo haru puwa helariruni ti dindi ogoni wali agalime mbirale dama mitangi bialu bi pupu wiaga mana manda nabini obene pu heagola mbirale dama dindi ogoniha hene heagome laiono ibilalu wali agali bo wahalu ka, lalu lamini.
2KI 17:27 Ani layago hale howa kini ibugua ibunaga ami haru haga agali haguane mbira heagohondo lamialu lalu, Agali dindi ogoniha minu yalu ibirimago aria loma binigo mo miaga mbira heagua agali ogoni ibu Samaria dindi dai bialu ibugua dindi ogoninaga dama biagohondo bi pupu wiaga mana bialu haga winidadagua biawai helo damu pu labe, lene.
2KI 17:28 Ani laya handala loma binigo mo miaga agali mbira Samaria howa ala minu yalu penego o biago ibu dai bia laya handala dai buwa Bedele dindini howa Anduane Homogonaga bi mana lawai halu ibunihondo mitangi bialu lotu lolene mana wiadagua mana lawai halu hene.
2KI 17:29 Ani layagoyu wali agali tara tara uruni tigua mbirale dama mitangi bialu gime wabiniruhondo bi pupu wulenaga tinime wabini. Wabuwa tigua mbirale uruni Isaraele wali agalime Anduane Homogo mitangi bialu lotu lagane wabu wiaruha wiai hene. Dindi tara tara howa ibiyarume tininaga bi pupu wiaga wabu winidaru ale wabigi bigi biai hene.
2KI 17:30 Babilono wali agali hearu tigua tinaga dama mitangi bialu gime wabini mini Sugodobenodo wabini. Kuda wali agali tigua tinaga dama mini Negala wabialu Hamada wali agali hearume mbirale ogoni ale dege mini Asima wabini.
2KI 17:31 Iba wali agali tigua tinaga dama mini Nibasabi Tadagabi kira wabini. Sebabaimi wali agalirume tinaga dama mitangi bialu mbirale kira mini Adaramelege Anamelegela gime wabialu ogolabohondo tinaga waneiginiru balu loma bialu irani bo delo migi bialu hene.
2KI 17:32 Ani bialu ha howa wali agali urunime Anduane Homogo mitangi bialu ibuhondobi lotu lalu dege hene. Tigua tini aria agali maru ta nabi Anduane Homogonaga loma binigo mo miaga helo dabo helaga bini. Loma binigo mo miaga agali uruni tigua dama mitangi bialu bi pupu wiaga wiyadagoria howa wali agalime loma yalu ibiraru mo lomabu migi bialu hene.
2KI 17:33 Ogonidagua bialu tigua Anduane Homogo mitangi bialu ibuhondo lotu lalu ha howa dege mana tini daluha howa bialu haga wiaru yu wanahe mbirale dama mitangi bialu bi pupu wiaga wiaruhondobi bi pupu wialu ha dege bini.
2KI 17:34 Áyubi nde tigua mana ogonidagua dege bialu ka. Tigua Anduane Homogo mitangi bialu ibuhondo lotu baya hangu nalalu hene. Ani bialu tigua Anduane Homogonaga bi layarubi mana Yagaba aguane bu hearuhondo bialu halimu lalu lowini wiarubi talialu bia nabi dege hene. Bamba Anduane Homogohanda Yagaba ogoni ibu mini Isaraele wia aribia heneyago ogoni ibu hene.
2KI 17:35 Abale Anduane Homogohanda Isaraele wali agali baba habo nalolene bi mbira lowialu tihondo hongo howa bi ogodagua lamialu lalu, Tígua mbirale dama mitangi bialu gime wabini ngaruhondo bi pupu nawilimu. Dama uruni andaneha howa tinaga wanakuiha ge duli hanga halu bulu palia nabilimu. Tígua mbirale uruninaga biabe bia naholebi urunihondo lomabu namuleorebi larogoni.
2KI 17:36 Tígua i̱hondo mitangi bialu i̱na bia larodagua bialu i̱ni andaneha haabo halimu. Anduane Homogo i̱ninaga hongooreme tí Iyibi dindiha hemigoria howa haru tagira ibirugoni. Ani birugo mitangi bialu tígua i̱nihondo hangu ge duli hanga ho biruwa mbirale lomabu ngilimu, lene.
2KI 17:37 Ibugua lalu, I̱naga mana gilibu ngirugobi i̱naga bi langirugobi baya hanguore talialu bialu halimu. Mbirale dama mitangi bialu gime wabini ngarunaga mana nabilimu.
2KI 17:38 I̱na tí baba habo nalolene bi lowirugo embeda nahalimu.
2KI 17:39 Tígua Anduane Homogo tínaga Ngode Datagaliwabe i̱ni kogonigo i̱na bi larodagua hale halu bialu haabo halimu. Tígua anidagua bialu harimiyagua i̱na tí baya hangu handayaho kogola tínaga waitigirume tí bo hilo wanaholebira, lene.
2KI 17:40 Anduane Homogohanda anidagua lenego uruni mo bagi howa wali agalime tininaga mana ala tawe biaga wiaru dege bialu haabo hene.
2KI 17:41 Wali agali tara tara Samariani íbu henedarume Anduane Homogo mitangi bialu ibuhondo lotu lalu tininaga mbirale dama mitangi bialu gime wabini wiaruhondobi bi pupu wialu ha dege bini. Ani bialu áyubi nde tinaga aguanenerume mana ogoni taluwa anidagua dege bialu ka.
2KI 18:1 Ela igini Hosia ibu Isaraele dindiha kini heane mali kira henego tebone hayagola Ahasa igini Hesegaia ibu Yuda dindiha kini pigane hene.
2KI 18:2 Ibu ai̱yahanda taba hanayadangi howa hama ibinigo mali pira kirani duria (25) hayagola ibu kini pigane howa mali pira kirani huniane dira (29) Yarusalemeni haru hene. Ibu ai̱ya mini Abiya ibu Segaraia wane berene.
2KI 18:3 Hesegaia ibugua ibunaga mamali Kini Debidihanda Anduane Homogo turu helo ibunaga deni mana bayale wiaru bamba bialu haga henedagua dege ibu ani bialu hene.
2KI 18:4 Hesegaiahanda damahondo bi pupu wiaga wiaruni bibahende bo gialo wahai hene. Mbirale dama mitangi bialu bi pupu wule ege to̱le̱me gene wawa wabu helene wiaru bo gindulo baga bialu dama wali beda mitangi bialu ira dibalu pelowa gime wabini mini Asera wabu helearuni dibu gabini. Ani bialu bamba Mosesehanda puya ale ege to̱le̱ boronosime wabini mini Nehusadana laga wiagobi dambu gingirulo baga bini. Ogoningi Isaraele wali agali hearume damanaga bi pupu wialu howa puya ale ogonihondo ira hagua ngabilo delaga mini inisenesiru lomabu delaga hene.
2KI 18:5 Hesegaia ibugua Anduane Homogo Isaraelenaga Ngode Datagaliwabeore kagohondo mini mbiraore hongohe wu hene. Yuda dindiha kini ala henerubi mani ha aribia ho henerubi Hesegaiahanda Anduane Homogohondo mini mbiraore hongoheorewi henedagua mende ibu ale nahene. Ibugua ti bibahende bolangua haihe hene.
2KI 18:6 Ibuore Anduane Homogohanda bi lowinigo mbira wanahe ibugua mini bilinahe howa ibuha hapara ho haabo haga hene. Ani howa bamba Anduane Homogohanda Mosesehondo bi lowini wiaru Hesegaia ibugua uruni bibahende baya hangu talialu bialu haga hene.
2KI 18:7 Anidagua bialu heagome Anduane Homogohanda ibu heba howa biamogo biyagola mbirale bibahende ibugua biyaru damene bayale dege bialu hene. Hesegaia ibugua Asirianaga kini heagome Yuda ti handaya ho helo ibu manga ho hene.
2KI 18:8 Ani howa Hesegaia ibugua ibunaga ami agaliru haru halu puwa tigua Pilidialiru baba wai bialu dindi tano emene timbunibi bibahendeha wiagoria wai biame halu hene. Ani bialu tigua Pilidialiru bo poda hana hama pialu amuraore Gasa tano wiago kaware palearubi bibahende bo podama pene.
2KI 18:9 Hesegaia ibu Yuda dindiha kini heane mali mane hayagola ogoningi dege Hosia ibubi Isaraele dindiha kini heane mali kane hene. Mali ogoningi Asirianaga Kini Salamanese ibugua ibunaga amiru haru halu anda ibuwa Isaraele dindiha wai bini. Tigua Samaria tano ho hagirabu anda howa tano ti karulole wai bialu hene.
2KI 18:10 Mali tebirani tigua Samaria tano ho hagirabu ya andaho haabo howa mani wai bialu Asiria tigua Samaria tano karulene. Hesegaia ibu mali waragaria kini heagola Hosia ibu nde mali dira kini heagolabi Samaria tano ogoni ani karulene.
2KI 18:11 Ani bialu Asirianaga kini ogoni ibugua Isaraele wali agali garabayabu yalu puwa maru Hala tanoha helalu maru Habo Iba porago angeha dindi emene Gosana wiagoria helene. Maru haru puwa Media dindiha tano maru wiaruha helaga bini.
2KI 18:12 Isaraele wali agali tiha genda timbuni o anda ibinidagoni irane tinime Anduane Homogo tinaga Ngode Datagaliwabenaga bi mo wahowa ti heba habo nalolene bi lo wiyagobi pugualu Anduane Homogonaga biabe biahaga Mosesehanda bi mana lowini biarubi mo hengedo wahalu bini. Tigua Anduane Homogonaga bi hale nahaga howa nabiagaore henegome tiha genda tara anda ibini.
2KI 18:13 Hesegaia ibu mali deria (14) kini hene heagola Asirianaga Kini Senageribi ibugua ibunaga ami hearu haru ibalu Yuda hearu baba wai bialu Yuda dindiha tano wai pabe hongohe bini wiaru karulai hene. Anigo Yarusaleme dege karu nale wini.
2KI 18:14 Senageribi ibu Lagisi tanoni heagola Hesegaia ibugua bi au lo pelene. I̱na í̠hondo mine harugome ai áyu i̱ni pani nolene wiaruago í̠na i̱la wai nabi wahalu i̱ dindibi wahalu í̠ni dalu dai bibe. I̱na ogonidagua biriyagua i̱hondo mbirale ngi larego ale ngulebero, lalu lawia hene. Ani layiyago hale howa Senageribi ibugua Hesegaiahondo, Siliba genda magi kilogarama daosini pira (10,000) ngialu ngolo genda magi kilogarama daosini mbira (1,000) ngibe, lene.
2KI 18:15 Anidagua laya layago hale howa Kini Hesegaia ibugua Anduane Homogonaga andaha muni wiaru bibahendebi kininaga andaga muni wiagaha muni wiaru bibahendebi Kini Senageribi hearia mo pelai hene.
2KI 18:16 Ani buwa ngolome Anduane Homogonaga anda biagoha anda panga paraho dambi hene hearubi anda gene panga kaware heago paraho dambi hearubi bibahende gialai hene. Uruni bibahende biabe biaga agali hearuhondo ibunime para hadaba layagola anda panga anda genebi paraho dambi henego ngolo uruni gialowa bibahende Kini Senageribinaga mo pelai hene.
2KI 18:17 Senageribi ibugua ngolo siliba uruni mo yuwa dege ibunaga ami haru haga haguane tebirani ami agali dewaore Lagisi tano howa, Yarusaleme pudaba, lene. Ami agali uruni ti Yarusaleme anda puwa tano ogoniha iba dadabu yu anda piaga wiagoria pu hene. Iba hariga ogoni abene aga wabiaga wiagoha pole hariga pu íbu biaga peagohayagi wini.
2KI 18:18 Asiria ami biaru ti ogoriani pu howa Kini Hesegaia ibilo lamule pudaba layagola Hesegaia ibugua ibunaga haru haga agali haguane tebiralime Asiriali uruni hondole pudaba lene. Ibugua pudaba lenedaru mbira Hiligaia igini kini ibuni andagaha mamage haga Eliagimubi kininaga bi gilibu wiaga Sebenabi Asaba igini kini ibugua biraru bibahende gilibu wiai haga Yoabi tigua Asiriali o íbu hayadaruni hondo pudaba lene.
2KI 18:19 Ti pialu Asiriali biaru hearia piyagola Asiriali ami haru haga haguane mbira heneyagome bi hongo howa tihondo lalu, Tígua dai bialu Asirianaga kini hongohe biagonaga bi ogo Hesegaia lamule pudaba. Ibugua ogodagua laya, Hesegaia í̠naga hongo abiale howa i̱naga andaneha holene hame nale kebe.
2KI 18:20 Bi bame lo payapaya beregome wai bialu agali bo wayali hagabe. Í̠na i̱hondo mine harigo. Í̠ biamogo bulene mbira ai ibulubada lo manda buwa i̱hondo mine halu kebe.
2KI 18:21 Iyibiali karume ibalu í̠ biamogo bialu wai bule ibilo malia howa handayaho kegoni i̱ manda bido. Anigo i̱na í̠hondo langerogo Iyibiali uruni bame gambe hale podalahe ngaligobi ka. Gambe hale ogonibigome halimbu yulene karulapebe toba howa mo yu kegola gambe hale ogoni tagala puwa í̠ninaga gi kenda poralidagua bulebira. Iyibinaga kini kago ibugua mana biagago manane gambe hale ogonibi biaga ka. Ani kagome ibugua í̠ pele ngialu wai bule naibulebira, lene.
2KI 18:22 Asiriali haru hagane biagome laabo halu lalu, Anigo Isaraele wali agali tígua lalu, Tínaga Ngode Datagaliwabe kago tínaga Anduane Homogoore ka lalu yu tiga biagaore hemiyaguabi ibugua tí biamogo nabulebira. Irane Hesegaia í̠nime Anduane Homogonaga lotu anda hearu bo gialalu lomabu delaga dabu hearu gialo wahai harigoni. Ani bialu í̠na Yuda wali agali bu hearu bibahende Yarusaleme hangu ibai halu lomabu delaga dabu mbiraore ogoni hanguni lotu lole ibai hadaba larigoni.
2KI 18:23 I̱naga kini ibugua bi marubi la dege bialu lalu, Kini Hesegaia í̠na agali nogo hosini biruwa wai bulene ami agali daosini kira (2,000) karulape taya bibeheyagua nde hosi daosini kira (2,000) heba ngulebira laya.
2KI 18:24 Anigo i̱na manda bialu koria í̠na agali urunidagua naheore kegoni. Ani howa í̠na mandabu handalu keria Iyibime nogo hosirubi wai biagane karisirubi heba ibuwa í̠ biamogo bialu wai bulebirabe tobaho kegoni. Anigo ti naibulebira ndobe. Ani bulebirago ai í̠ni hangu kegoni howa ina ami emene hangu hemayaguabi í̠na ina bope habe naheore kamagoni ndobe.
2KI 18:25 I̱ íbu kogoni i̱ninaga minime í̠ baba wai bialu í̠na dindi ngego bo labu hole íbu kobe toba kebe. Ani ndoyago. Anduane Homogo ibunime i̱ langialu í̠ baba wai bialu dindi anda o ngaruni bo gialabaga bialu mo labu habe lalu i̱ langiya.
2KI 18:26 Bi ogoni layago Eliagimubi Sebenabi Yoabi tigua hale howa Asiriali ami haru haga haguane biaruhondo lalu, Tígua bi ogoni Siria bi lalu langidaba. Ina Siria bi hale haga kamagoni. Hiburu bi lowa wali agali maru uyu pabe neneni karu tigua bi laramigoni hale holigo nalabe, lene.
2KI 18:27 Ani layagola bi laga ami agali haguane biagome ladai bialu lalu, I̱naga kini kagome bi o larogoni tíhondobi tínaga kinihondo hangubi lamule pu lene ndo laru. Maru uyu pabe neneni karuni tibi bi ogoni hale helo laro. Ani larogoni irane iname ibalu Yarusaleme wai bule ho hagirabu anda haramangi genda timbuni tí bibahendeha ibulubadane laro. Maru áyu pabeni handape ho karuni ti tomo nolene nawidagola tininaga ti to wuwa nalu iba noa biragola pu to nolebira. Tí kamirunibi ani dege buleberemi, lene.
2KI 18:28 Asiriali ami haru haga agali haguane bi lalu hayago ibugua agali maru pabe neneni handa daliho hearuhondo Hiburu bi lalu bi hongo howa ladaga halu lalu, Agali kini hongohe Asirianaga kini biago ibugua bi layago languliya baya hangu hale mia howa hale hadaba.
2KI 18:29 Ibugua lalu Hesegaia ibugua tíhondo ke̱ halu mo hondo helo nahalimu. Tí bayale halimulo mo wialu Hesegaia ibugua i̱ bope habe nahe ka.
2KI 18:30 Anduane Homogohanda tí biamogo biragola Asirialime tí mo ko halu tínaga tano Yarusaleme karu nalolebira layagua bi ogoni henene ndo larago mo henene nahalimu.
2KI 18:31 Tígua Hesegaianaga bi larago hale howa i̱la wai bulene manda nabilimu. Tí bayale howa tíninaga iba hambiaga iba uli ngamiruha howa hambu nalu tínaga mabuha pu mbira mini gerebi lini dedarubi poge lini dedarubi do nalu bayale holene manda bu hemiyagua nde tínaga tano i̱ karuloliya wahalimu, laya.
2KI 18:32 Ani kamiria i̱na ibalu tínaga tano karulalu tínibi dindi mende baya gibiore tínaga dindi o kamigobi dege ngagoha haru pu heloliya laya. Dindi mende bayaleore ogoniha gerebi gama dewa wialu mberedi wabulenenaga nde widi maburu dewa dege nga. Uruni dege ndo dindi ogoniha ira olibe lini dagabi olibe lininaga welibi mone ibane dendebi tarabi dewaore wiai ka laya. Ibugua lalu, Tígua i̱naga bi larogo hale harimiyagua tí homa nabi bayale holeberemi. Hesegaia ibugua tíhondo lalu Anduane Homogohanda tí biamogo biragola tígua ina bope holeberema layagua ibunaga bi ogoni mo henene nahalimu.
2KI 18:33 Tígua manda bialu hemiria dindi maru wiarume ina Asiria baba wai biyagola tinaga dama tara maru hearume ti biamogo biyane handarimibe. Nabiore ndobe.
2KI 18:34 Ina pialu Hamada tanohabi Abada tanohabi Sebabaimi tanobi Henabi Ibabi uruni baba wai birimangi tinaga dama henedago agohayagi pu howa wali agali biamogo nabiyabe. Ani bialu iname Samaria anda puwa wai birimangi tinaga dama henedarume ti mo wialu ina bope hayane handarimibe. Nabiore ndobe.
2KI 18:35 Dindi dewaore tinaga dama henedaru helowa ina baba wai birimago. Anigo tinaga dindi bayale ngelo tinaga dama urunime ti biamogo bialu ina bope nahego. Ai Yarusaleme wali agali tígua aginaga tínaga Anduane Homogohanda biamogo biragola tígua ina bope holeberema manda bu kamibe laya, lene.
2KI 18:36 Asirianaga ami haru haga agali haguane biago ibu bi lai hene. Ani lai heagola wali agali wai pabe neneni handape ho hayaru tigua bi mbira ladai nabi handayaho haabo hene. Ani hayadagoni irane Kini Hesegaia ibugua tihondo bi mbira Asiria urunihondo nalalimu lenego manda buwa ti bi nale hene.
2KI 18:37 Anigo Asiriali biago ibugua bi layagome Eliagimu Sebena Yoa imarunaga bu miniha genda timbuni ho hene. Ani howa tinaga aga minu budalu Kini Hesegaia bereria puwa Asiriali biagome bi layaruni bibahende kinihondo lamiai hene.
2KI 19:1 Hesegaia ibugua Asiriali biagome bi ogodagua laya lalu ibu lamiyago hale howa ibunaga bu miniha genda timbuniore yu howa ibunaga aga minu lerelaki hene. Ani buwa ibu daraho howa walia halu aga biaga wiago mo karulalu Anduane Homogonaga andaha anda pene.
2KI 19:2 Ani puwa Hesegaia ibugua kini andaga mamage haga agali Eliagimubi kininaga beba gili biaga Sebenabi loma binigo mo miaga ala hene maru hearubi uruni bibahende olalu ibidaba lene. Ani lowa ibugua tihondo Emoso igini Anduane Homogonaga bi mana latagi haga Aisaia hondole pudaba lene. Agali uruni tibi nde dara ho howa walia halu aga karulaga wiago karulo hene.
2KI 19:3 Ani bialu Hesegaiahanda tihondo bi ogo Aisaiahondo lamilo lawia halu lalu, Horo áyu bu miniha genda yu holene wiyada. Asirialime ina mege timbuni biyagola taga timbuni ho kamagoni. Ai walime gali taba honolene tu biruwa ibu hongo nakarulape howa taba hanabe nahedagola genda timbuni ho biraga ale ina bedamagoni.
2KI 19:4 Asiria kini kagome ibunaga ami haru haga agali haguane heago ibu inanaga Ngode Datagaliwabe haluhe kagohondo bi ko lole pu layada. Ani layadagoni Anduane Homogohanda bi ko o layadaruni hale halu agali bi ko lagadago ibunime mana bilo. Ani bilonaga ina wali agali emene dagalene hangu yu wahene kamaru biamogo bilonaga í̠na Ngode Datagaliwabehondo bi lamibe, lalu Aisaiahondo lamule pudaba, lene.
2KI 19:5 Aisaia ibugua Hesegaianaga bi layadago hale howa
2KI 19:6 ibugua agali bi yalu ibiyadaruhondo lamialu lalu, Tígua kini bedaria dai bialu Anduane Homogonaga bi ogo ibuhondo lamilimu. Anduane Homogohanda ogodagua laya. Í̠na bi o layadaruni miniha mo pehalu gi halu genda holeni. Í̠hondo bi ko o layadaruni Asiria kini kagonaga biabe biahaga agali damene bu hearume layadago wahabe.
2KI 19:7 Ani larogoni irane Anduane Homogo i̱nime Asiria kini kagonaga mini mo luluya helolebero. Ani berogola ibugua bi mbira hale halu ibuni dalu dai bulebira. Dai buwa ibuni dalu Asiriani pu kagola i̱na agali mbirame ibu bo waha lolebero, laya lalu lamilimu lowa, Aisaiahanda lene.
2KI 19:8 Asiria ami haru haga agali haguane biago ibugua Kini Senageribi ibu Lagisi tano yu wahalu piya layane hale hene. Ani layane hale halu ami haru haga agali haguane ogoni ibu Yarusaleme yu wahalu dai buwa hale halu hearia kini ibu Libina dindiha wai bialu ka layago hale halu ibu hondole pene.
2KI 19:9 Asiria ti wai bialu hearia agali maru ibuwa Kini Senageribihondo lalu, Idiobia dindinaga Kini Tihagahanda ibunaga amiru haru halu í̠la wai bule ibira, lene. Ani layago hale howa Senageribi ibugua Yarusaleme karulole manda bu heaorego ai beba mbira abale gili bialu Hesegaia hearia yalu pelene.
2KI 19:10 Bi o gilibu wia henedagoniha bi ogodagua lalu gili bini. Tínaga dama yu tigabu kamigoni ibugua lalu, I̱na tí bope halu Yarusaleme karuloliya yupe naholebero layago. Bi ogoni ke̱ haya henene ndo layago ibunaga bi ogoni mo dunubia nahabe.
2KI 19:11 I̱na Asirianaga kini kamarume biaga mana wiyaruni í̠ni manda biaiho kegoni. Iname dindi mbiraha wai bu puwa uruniha karu ngarubi bibahendeore bo haealabagabu waharamaligo í̠ manda bide. Í̠na mitangibu handalu keria i̱na í̠ daluha ogonidagua nabulubada lo manda bidebe.
2KI 19:12 Bamba i̱naga mamaliru tigua wai bialu Gosana tanobi Harana tanobi Lesebe tanobi bibahende bo haealabaga bialu hameigini mbira Bededene ti Telasa tanoha palearubi bo wahai hene. Ani biyagola tinaga dama bu hearume ti bayale helonaga biamogo mbira nabiore.
2KI 19:13 Hamada tanonaga kini henerubi Abada tanonaga kinirubi Sebabaimi tanonaga kinirubi Hena tanonaga kinirubi Iba tanonaga kinirubi mbira áyu heabe. Naheore ndoyabe. Iname uruni bo wahai harimagoni, lalu gilibu wia hene.
2KI 19:14 Kini Senageribi ibugua bi gilibu wia henedagoni yalu pu lenedarume yu ibiyagola Kini Hesegaia yamini. Yamialu bi gilibu wiyadaruni daga lai howa beba ogoni Anduane Homogonaga andaha mo yu anda pene. Yu anda puwa ibugua beba ogoni Anduane Homogonaga wanakuini mo tiga buwa angalaho ngelene.
2KI 19:15 Ani ngelowa Hesegaia ibugua Anduane Homogohondo lalu, Anduane Homogo-o í̠na Isaraelenaga Ngode Datagaliwabe howa dahuliyali bu karu bolangua hene í̠ howa í̠ninaga haru howa biragane ngegoria bedegoni. Í̠ hangu Ngode Datagaliwabeore henene howa í̠na dindi bibahende ngaruniha handame ho haga kegoni. Dindibi hari daligabi í̠nime wabiai hene.
2KI 19:16 Anduane Homogo-o i̱naga bi larogo baya hangu hale howa inaha mo ko holene o tagira ibiragoni í̠nime de handabe. Senageribi ibugua bi ko Ngode Datagaliwabe haluhe í̠ kegohondo layadarunibi hale habe.
2KI 19:17 Anduane Homogo-o Asirianaga kini hearume dindi maru wiaruha anda puwa wai bialu wali agali dewaore bo wahai halu mo ko hai hayaruni manda bu kama.
2KI 19:18 Ani bialu wali agali tinaga dama mitangi bialu gime wabini wiaru iraha mo delai haya. Dama mitangi bialu gime wabini uruni ti Ngode Datagaliwabe henene ndogome tini mo ko hai haya. Mbirale uruni agalime ira dibalu pelowabi ege to̱le̱ poda tiga buwabi wabini wini.
2KI 19:19 Ai Anduane Homogo inanaga Ngode Datagaliwabe-o áyu ina biamogo bialu Kini Senageribinaga giha howa yamibelo hameledo. Wali agali dindi bibahendeni karume Anduane Homogo í̠ni hanguore Ngode Datagaliwabe heneneore henedane hendelo aniore bibelo hamelo kogoni, lene.
2KI 19:20 Anduane Homogonaga bi mana latagi haga Aisaia ibugua Hesegaiahondo bi lawia halu lalu, Anduane Homogohanda í̠naga bi larigoni hale howa
2KI 19:21 ibugua lalu, Yarusalemeha karume Senageribi í̠ mo ngubia howa mege bialu hondo oba haragoni.
2KI 19:22 Senageribi í̠na mege bialu bi ko lalu mine howa í̠ninaga mini yaraga halu biriruni aihondo bero lalu biribe. Uruni bialu harigoni i̱ Isaraele wali agalinaga Ngode Datagaliwabe mana bayale tigabi hangu biaabo haga kogohondo birigoni.
2KI 19:23 Í̠na ami haru haga agali haguane hearuhondo bi ogoni lole pu larigola tigua í̠naga mini yaraga halu i̱hondo mege biya. Senageribi í̠na í̠naga biabe biahaga agali biarunaga bime i̱hondo mine halu lalu, I̱na i̱naga karisi wigoria heyu halu Lebanono dindi hari nene daligaore ngaru áyu dege iralu pirugoni, lalu lamule pudaba lalu lamiri. Ani lowa mine dege halu lalu, I̱na Lebanono irabu timbuni ngago dombeneha anda pu howa ira mini lene bayale luni damene tamiabi guraya alebi hearu bibahende i̱ni dibai harugoni ndobe, lari.
2KI 19:24 Dindi tara maruha piringi í̠ iba noa nahe haru lari. Dindi yobi iba nabere wiagoha harugo lowa í̠na uli tombo wigoha iba birayagola í̠naga damene biaru ti iba karulape naiore howa Iyibi dindiha iba Naili timbuni pedaru í̠naga ami agali biarume domalu piyagola tinaga geme iba mo hundiai haya larigoni, lalu Anduane Homogohanda lene.
2KI 19:25 Ibugua laabo halu lalu, Senageribi-o bambaore howa i̱nime manda bialu í̠na o bialu keruni bibelo i̱na í̠ dabenego manda nabi kegoni ndobe. Tano pabe hongohe bu mabubi hearuni í̠na bo gialabaga bibelo i̱na í̠ hongo ngirugoni ndobe. I̱naga mini wiwago hangu talialu tano biaruni bo gialabagabu waharigola áyu ege to̱le̱ timbuni wiaruni gindulo payabu wialu nagalone bu hinu ngagoni.
2KI 19:26 Wali agali tano uruniha hearu ti gi timbuni hayagome tinaga mini ndibu lalu hongo biba haya. Ti hongo nahe amu ni tagira ibiragoha howa puyabu poboyogobi ibiragome datani puloba haragola gabu hagagobi halu datani anda dangini andaho karu hongo nahe karunibi hayagoni, lene.
2KI 19:27 Anduane Homogo ibugua lalu, Anigo i̱na í̠naga mini manda bideru bibahende manda biai halu í̠ mbira bialu kegobi ibaga bialu keriabi bibahende handai haga kogoni. Ani bialu í̠na i̱hondo tandaga timbuni ho kegonibi manda bu ko.
2KI 19:28 Í̠na i̱hondo tandaga ho kegoni i̱ manda bialu í̠na mine bi lalu í̠ninaga mini yaraga hole bima ibaga bialu keruni i̱ manda biaho kogoni. Ani howa áyu í̠hondo i̱na bi hongohe mbira langero. Mbirale wena hugu aleme í̠ nguiha walango bialu nogo hosinaga ne harigaha banga bia helaga ngagome í̠naga ne harigaha bangabia helolebero. Ani buwa í̠ni abale ibirigoha dai bibelo gililo yalu haru dai bulebero, Anduane Homogohanda ani laya, lalu lene.
2KI 19:29 Ani lowa Aisaia ibugua Kini Hesegaiahondo Anduane Homogohanda Senageribihondo bulebero layago heneneore layada manda bilonaga mo walia halu manane mbira hendelonaga bi ogo lamini. Aisaia ibugua lalu, Tígua mali áyu kamagonagabi mali edegonagabi tínaga mabuha tomo mbira hanga nabi kamigola mabuha widi minana andaho kagola do nalu holeberemi. Ai mali ederagonaga widi tínime widi hangalu do noleberemi. Pu mbira lini daga mini gerebi egenebi hongowa do noleberemi.
2KI 19:30 Ani howa Yuda wali agali waitigime bo wahai halu yu wahene emene dagalene hangu kamaruni mani ira lini daganaga pini dindihaore anda puwa lini bayale dewaore daga labe nahe ngalirubi holebira.
2KI 19:31 Yarusalemehabi Hari Saionohabi wali agali waitigirume nabe yu wahene haabo holebira. Ani haabo helo Anduane Homogohanda ogonidagua manda bu ka, lene.
2KI 19:32 Anduane Homogo ibugua bi maru la dege bialu lalu, Asirianaga kini ibugua ibunaga ami karu haru halu Yarusalemeha lone naibulebira. Tinaga timu mbira hangubi tano ogoha baanda naholebira. Ami agali uruni tigua humbi yalu tano ogoria kaware naibulebira. Tanonaga wai pabe karu andaneha ami uruni ti heyu howa wai bule lowa dindi dugu hanama irigi naholebira.
2KI 19:33 Asirianaga kini ibu tano ogoha anda ibabe nahe howa beregedalu ibuni hariga ibiyadagoha dai bulebira. I̱ Anduane Homogo i̱nime bi o ledogoniore.
2KI 19:34 I̱na anidagua buleberogo irane agali i̱naga biabe biahaga Debidila buleore lalu lo wirugo mitangi bialu i̱ninaga mini leneore kogoni mitangi bialu anidagua bulebero, lalu Anduane Homogohanda ani laya, lalu Aisaia ibugua lene.
2KI 19:35 Horo ogoningiore mbiraga Anduane Homogonaga dahuliyali mbira Asiriali amiru paleagoha puwa ami agali daosini dege handari mbirani pira halirani duria (185,000) bibahende bai hayagola homai hene. Horo mendengi gao layagola Senageribi ibu heyuwa handalu hearia o homayadaruninaga tingini ona wima pearia hendene.
2KI 19:36 Ani biya handala ibugua ibunaga ami agali maru yu wahene hearu heba ibiyadagua beregedalu dai bialu Niniba tanoha pu hene.
2KI 19:37 Ani pu howa horo mbirungi ibuninaga dama mitangi bialu gime wabini Nisirogonaga bi pupu wiaga anda heagoha anda puwa ogonihondo bi pupu wialu berene. Ani berearia ibu igini kirali Adaramelegela Sareselame ayu tibu wai biaga wiagome ibu dibayagola homene. Dibalu libuni ibida puwa Ararada dindiha ha do hole hene. Ani biyagola mani ibu igini tebone mini Esaradono ibugua ibu abanaga henge mialu ibuni Asirianaga kini hene.
2KI 20:1 Asirialirume Yudali baba wai bialu mo ko halu heangi Kini Hesegaia ibu warago timbuniore bowa homabeheore wini. Ani homabehe wiaria Emoso igini Aisaia ibu Anduane Homogonaga bi mana latagi haga heagome kini warago wiago hondo puwa Hesegaiahondo lalu, Anduane Homogo ibugua í̠hondo bi ogodagua laragoni. Í̠naga warago ogoni dabi nahe ani bo wiaho wialu homolebere. Ani homoleberego manda buwa ai wali agali í̠ andagaha haga karuni lamialu tínaga biabe biaga wiyadagoni mo tiga biai hadaba lamibe laya, lalu lamini.
2KI 20:2 Bi ogoni layago hale howa Kini Hesegaia ibu beregedalu dengui anda hái heagoha handa amuho wialu ibugua Anduane Homogohondo bi lamialu lalu,
2KI 20:3 Anduane Homogo-o i̱na í̠ni hanguore talima ibalu í̠naga biabe hangu biahalu harugoni. Í̠naga hame wiru bibahende i̱na talialu biai harugoni manda bibe, lene. Ani lai howa ibugua dugu timbuni hongo howa bialu berene.
2KI 20:4 Aisaia ibu nde kini andaga yu wahalu tagira pialu pene. Puwa ibu kini andaga pabe heago bolangua halu tagira nape dege wene pialu hearia Anduane Homogohanda ibuhondo lalu,
2KI 20:5 Í̠na áyu ogoni Hesegaia i̱naga wali agalirunaga kini biago hondo dai buwa ibuhondo bi ogodagua lamibe. I̱ Anduane Homogo í̠naga mamali Debidinaga Ngode Datagaliwabe kogome í̠nime bi larigobi hale halu dugu bialu de iba ibirigobi handarugoni. Ani birigonaga i̱na í̠ mo dabi holebero. Ani berogola horo tebira howa í̠na i̱ mitangi bialu lotu lole i̱naga anda lomabia hene biagoha polebere laro.
2KI 20:6 I̱na í̠ abale home nale mali pira mbirani duria (15) í̠ helalu mani nde í̠ homolebere. Ai Asirianaga kini kagomebi nde ibalu wai buwa í̠ bope halu Yarusaleme nakarulolebira. Ani larogoni irane i̱ninaga mini timbuni mini leneore kogo mitangi bialubi ala i̱na i̱naga biabe biahaga Debidila habo nalolene bi lo wirugo mitangi bialubi ani bulebero, laya lalu lamibe, Anduane Homogohanda Aisaiahondo ani lamini.
2KI 20:7 Ani lai hayagola Aisaiahanda kinihondo bi lamibe layadagua lamiai howa ibugua kininaga biabe biahaga agali hearuhondo lamialu lalu, Tígua pogeli do gedaore hene maru mo yu ibule pudaba, lene. Tigua mo yu dai biyagola ibugua tihondo lalu, Hesegaianaga moge hongohe biagoria wai haramigola moge biago abale dabi holebira, lene.
2KI 20:8 Ani layagola Hesegaia ibugua Aisaiahondo hale halu lalu, Ai i̱ dabi halu horo tebira howa Anduane Homogonaga anda poleberodago henene lalu manane mbira áyunaga i̱hondo agi ale walia holebiradabe, lene.
2KI 20:9 Ani hale hayagola Aisaiahanda ladai bialu lalu, Anduane Homogohanda manane mbira í̠ mo walia holebirago ogo. Egageria mbirani ni horombe ale ndoda lalu ni ogoria ka lalu mo walia haga amu ngago handa. Ai bi ogoni heneneda lalu manda bibelonaga ni munini daga laga ngagoria howa abale pu bolangua haga bialu hobane pira gerai lalu bolangua helo lariyaguabi ndo hobane pira hama dai bilo loleyaguabi mbirago larene, lene.
2KI 20:10 Ani layagola Hesegaiahanda lalu, Ni munini ogoria ka lalu manane handaga ngagoria abale bolangua haga bialu polene ngagohayagi pu holenego taibi ndogo i̱na ni ibiyagohayagi hobane pira agima abale gerai lalu daibu helo hameledo, lene.
2KI 20:11 Ani layagola Aisaiahanda Anduane Homogohondo bia lalu bi layagola egageria ni munini kagoria manane handaga biagoria abaleore ni manane hobane pirani dai biyaria hendene. Egageria ogoni bamba Kini Ahasa ibugua wabu wini.
2KI 20:12 Babilononaga kini mbira Baladana igini Merodaga henegome hale halu hearia Hesegaia warago timbuni bo nga layane hale hene. Ani hale howa ibugua beba mbira gilibu wia halu yári tara tara bayale wiaru maru Kini Hesegaia mo turu halu mule Yarusaleme yalu pudaba layagola bi yalu piaga agali tigua mo yalu ibini.
2KI 20:13 Yalu ibiyagola Hesegaia ibugua agali ibiyarunaga bi hale hai howa agali uruni haru halu puwa ibunaga anda timbuni heagoha mbirale tara tara ale bibahende mo wiaga wiagoha haru pene. Haru puwa ibugua ibunaga muni silibaru ngoloru dewaore wiarubi ira hagua ngabilo delaga mini inisenesi wiarubi tingini ha̱i̱ hagane weli ngabiaga wiarubi mbira mbira padua ale mini sanda wiarubi uruni bibahende walia hai howa agali bi yalu ibiyarume de handaiore hene. Ani walia halu ibugua ibunaga danda timubi humbi yandarebi wai biagane ale bibahende wiaruni mo walia hai hene. Hesegaia ibugua mbira mbira wiago mo do nahe bibahende kini andagaha wiaruni mo walia hai halu Yuda dindi bibahendeha wiaruni bibahendeore agali biaruhondo mo walia hai hene.
2KI 20:14 Ani handai howa Babilonoali biaru ti dindi dai biahaore Anduane Homogonaga bi mana latagi haga Aisaia ibu Kini Hesegaia hearia pialu ibugua hale halu lalu, Agali o ibiyaruni ti aniali ibiyabe. Ti bi agi dege layabe, lalu hale hene. Ani hale hayagola Kini Hesegaiahanda ladai bialu lalu, Tini dindi kaundiaore uyura Babilono wiagoha howa ibiniya, lene.
2KI 20:15 Ani layagola Aisaiahanda lalu, Tigua í̠ andagaha agile dege handayabe, lene. Ani layagola Hesegaia ibugua ladai bialu lalu, I̱na tinaga deni mbirale mbira mo do nahe i̱naga mbirale wiwaru ale bibahende tihondo mo walia hai haru, lene.
2KI 20:16 Ani layagola Aisaiahanda mbiwia halu Hesegaiahondo lamialu lalu, Áyu Anduane Homogo Hongo Haiheore kagome bi layago languliya.
2KI 20:17 Anduane Homogo ibugua ogodagua lalu, Horo mbira tagira ibulebirago horo ogoningi mbirale bibahende kini andagaha wini ngarubi bamba í̠ mamalirume mo wigi bini dabudabu anda timbuni kagoha wini ngarubi mo yai halu Babilono dindiha yalu polebira. Emeneorebi mbira ibira nahe bibahendeore Babilono dindiha mo yalu piai holebira.
2KI 20:18 Ani bialu igiri daliahe maru í̠ni damene karunibi garabayabu yalu pu dege bulebira. Igiri uruni haru puwa tinaga pindu nogo pindu miradagua bialu mo wahowa Babilono dindi kini andagaha biabe biahaga helo helolebira, lalu Anduane Homogohanda bi ogoni laya, lalu lamini.
2KI 20:19 Hesegaia ibugua bi uruni hale howa Aisaiahondo lalu, Anduane Homogonaga bi áyu langiriruni bayaleore langiri, lene. Ani lenedagoni irane genda uruni ibuni kagola ndo mani ibulubayane hondowa lene. Ibugua lo manda bialu áyu i̱ kongi mbirale mo ko holene uruni naibulebirago ina wairu nabi bayaleore holeberema lo manda bini.
2KI 20:20 Biabe maru Kini Hesegaiahanda bialu henedaru mbuga mbira mini Yuda Kini Henerunaga Te laga ngagoha gilibu winigo nga. Mbuga ogoniha howa ibugua biabe hongohe bialu heneru garea lalu biabe timbuni mbira ibugua Yarusaleme tanoha iba dadabu yalu haru anda ibulenaga gana timbuni tano pabe tagirahayagi howa dindi andaneha gana wayalu tamuha anda ibini. Ani bialu tanoha iba dadabu yalu anda ibinigonaga te gilibu wialu bida. Ani bialu tamuha iba berelonaga uli mbira ibugua wa winigobi te gilibu wia dege bida.
2KI 20:21 Mani Hesegaia homayagola ibu igini Manasehanda ibu abanaga henge mialu kini ha aribia howa Yuda dindiha haru hene.
2KI 21:1 Manase ibu igiri emene dege mali homberia (12) hangu howa kini pigane hene. Ani howa ibu mali pira duriani huniane duria (55) kini howa Yuda dindiha haru hene. Ibu ai̱ya mini Hebesiba mbira berene.
2KI 21:2 Manase ibugua mana bayale wiaru nabiaga hene. Mana ko ngubi bamba wali agali henerume biyagola Anduane Homogohanda uruni ti dindi ogoriani howa bo taliatagi halu Isaraele wali agaliru tihondo mo minigo mana ko odaruni biaga wiadagua dege Manase ibugua bialu hene. Manase ibugua mana ko ngubi uruni bialu hayadagome Anduane Homogonaga deni howa ko timbuniore bini.
2KI 21:3 Manase ibugua mana ko maru ogodagua bialu hene. Bamba ibu aba Hesegaiahanda damahondo bi pupu wiaga wiaruni bo gialo wahai henego anda uruni ibugua lone mo tene howa biadai bigi bini. Mbirale dama mitangi bialu gime wabini mini Bala laga wiagonaga lomabu delaga daburubi bu hela hene. Ani buwa bamba Isaraelenaga Kini Ahabahanda dama mbira wali beda mitangi bialu gime wabini mini Asera wabu wialu bini. Urunidagua bialu howa ibugua yakundi li bu karunihondobi bi pupu wialu haga hene.
2KI 21:4 Ani wialu howa ibugua dama mitangi bialu gime wabini uruninaga loma biniru bo delaga dabu Anduane Homogonaga anda heagoha bu helalu bini. Anigo bamba howa anda ogoninaga Anduane Homogohanda bi ogodagua lowini. Yarusalemeni anda timbuni o kagoni wali agalime i̱ni hangu mitangi bialu lotu laga karu tinaga ka lowinigo nga.
2KI 21:5 Anigo Manase ibugua Anduane Homogonaga anda pabe tamuhayagi hama timbuni kira wiagoria yakundi bu hearuhondo bi pupu wule lowa lomabu delaga dabu bu helaga bini.
2KI 21:6 Ibugua loma biniru bo delagadagua ibu igini mbira dabu ogoriani bo delene. Ani buwa ibugua agali homenenaga dininime ibu biamogo bilo olalu agali de gandeba handaga hearuhondo ibu biamogo bilo olalubi gamu gamu tara tara wiarubi bialu hene. Manase ibugua Anduane Homogonaga deni howa mana koorene ko dewaore bialu haabo heagola ogonime Anduane Homogo mo tandaga halu mo keba hene.
2KI 21:7 Anidagua bialu Manase ibugua dama wali beda mitangi bialu gime wabini mini Asera mo yu ibuwa Anduane Homogonaga anda biagoha mo wini. Anigo bamba Anduane Homogohanda Debidila ibu igini Solomonolahondo lamialu lalu, I̱na Isaraele hameigini homberia (12) karunaga dindi handai howa Yarusaleme tanoha anda o kagoni i̱ninagaore helo dombeneha loma biaho helarogoni. Horo bibahendengi Isaraele wali agali bu kamiruni tígua ibalu i̱ mitangi bialu i̱ni hanguhondo lotu lole lalu halimulonaga helaro.
2KI 21:8 Ai nde i̱naga wali agali bu kamirume i̱naga bi langerogo bia i̱naga biabe biahaga agali Mosese ibugua bi lowinigo talialu bialu ha birimiyagua nde tí dindi ogo i̱na bamba tínaga mamaliruhondo mo mirugo ogoni howa bo taliatagi nahe ogoriani haabo halimulo helolebero, lalu Anduane Homogohanda lene.
2KI 21:9 Anidagua lowini wiago ngelowa dege Yudali tigua bi uruni bayuwa talialu bia nabi hene. Manase ibugua wali agali haru pu tara halu mana ko wiaru mo bia timbu halu hene. Mana ko bamba wali agali tara henerume biyagola Anduane Homogohanda uruni ti dindi ogoriani howa bo taliatagi halu Isaraele wali agaliru tihondo mo mini. Ala hene urunime mana ko biaga winidaru nira dege lowa Yuda wali agali tigua ko timbuniore bialu hene.
2KI 21:10 Kini Manasehanda mana ko urunidagua bialu heago hondowa Anduane Homogo ibugua ibunaga bi mana latagi haga bu hearuha howa bi lalu,
2KI 21:11 Kini Manasehanda mana ko timbuniore wiaru bialu kagoni bamba Amoro wali agalime bialu heneru nira dege lowa ibugua ko timbuniore bialu ka. Ibugua dama mitangi bialu gime wabu helowa urunihondo bi pupu wialu kagome Yuda wali agali bibahendeme i̱ninaga deni mana ko ngaru bialu helo mo bia halu kagoni.
2KI 21:12 Anidagua bialu kagonaga Anduane Homogo Isaraele wali agalinaga Ngode Datagaliwabe kogo i̱naore mbira bulego laro. I̱na Yarusaleme tanobi Yuda dindi bibahendebi mo ko hai halu mo ngubia holebero. Anidagua berogola wali agali dindi tara tarani bu karume i̱na birugonaga te hale hararume ogoni agua biyadabe lowa mogolalu mini dege dindi ho holebira.
2KI 21:13 Yarusalemeore yo pialu poro lolene nawi i̱na Kini Ahaba ibu dameneru heba Samaria tano bo haealabaga bialu mo ko harudagua Yarusaleme emene mbirahayagi bayale wero nawiore mo ko halu bo haealabaga biai holebero. Ani berogola Yarusaleme tano winigoria mbirale mbira nawi beledi dodo wayawaya bo wahene dodo nahe mo beregedalu wiraligobiore ngelolebero.
2KI 21:14 Ani bialu wali agali yu wahene maru dindi ogoriani heagua i̱na ti biamogo nabuleore bero. I̱na tinaga waitigi agalinaga giha ti minu yahaga bulebero. Waitigi agali urunime tini mo ko halu tinaga mbirale yu holebiraru mo page biai helolebero.
2KI 21:15 I̱na urunidagua bule ngeledogo irane i̱naga wali agali bu karuni tigua i̱naga deni howa mana ko ngubi wiaruni hangu mo tene howa bamba tinaga mamali Iyibi dindi yu wahalu tagira ibiyangi howa bima ibalu henego áyu karumebi bialu haabo ka. Tigua ogonidagua bialu kagome i̱ mo tandaga timbuniore halu kagoni, lalu Anduane Homogohanda ibunaga bi mana latagi haga hearuha howa mbiwia halu latagi hene.
2KI 21:16 Manase ibugua Yuda wali agali bu hearu haru halu pubagi hayagola tigua Anduane Homogonaga deni howa ko dewa bialu hene. Anidagua bialu howa ibunaga wali agali hearubi nde tini dege dege mo waitigi helaga bialu hene. Ani buwa ibugua Yarusaleme tanoha wali agali ko nabiaga tigabi hearubi ko biaga heba homelo bo wahai hene. Ani biyagola Yarusaleme dindi bibahendeni homenerunaga darama wiame hene.
2KI 21:17 Biabe maru Kini Manasehanda bialu henedaru mbuga mbira mini Yuda Kini Henerunaga Te laga ngagoha gilibu winigo nga. Mbuga ogoniha mana ko damene ibugua bialu henedaru ogodagua bini lalu garealo nga.
2KI 21:18 Manase ibu homayagola ibunaga tingini kini andaga pabe bu yaanda hene wiagoha dindi henge mbira Usanaga mabu lagane wiagoha hora hene. Ani hora hayagola ibu igini mbira mini Amono henego ibu abanaga henge mialu kini ha aribia hene.
2KI 21:19 Amono ibu ai̱yahanda taba hanayangi howa hama ibinigo mali pira kirani kira (22) hayagola ibu kini pigane hene. Ibugua kini howa mali kira hanguni Yarusalemeni haru hene. Ibu ai̱ya Yodoba tanoali Harusi mbira henegonaga wane Mesulemede berene.
2KI 21:20 Amono ibugua mana ko timbuni ibu aba Manasehanda Anduane Homogonaga deni howa bialu hene wiadagua dege bialu hene.
2KI 21:21 Ibugua mana ko ngubi ibu abahanda biaga wiaruni talialu bialubi mbirale dama mitangi bialu gime wabini wiaruhondo ibu abahanda bi pupu wialu henedagua bialubi uruni biai hene.
2KI 21:22 Ibugua Anduane Homogo ibu mamalirunaga Ngode Datagaliwabe heago erembira mialu Anduane Homogonaga bi mana lowini wiarubi talialu bia nabi yu wahai hene.
2KI 21:23 Horo mbirungi Amononaga agali haguane bu hearu tigua ndilalu Amono homelo bo wahami̱ya lalu henge hai bialu hene. Ani henge hai bialu howa mani Amono ibu kini andaga tamuha berearia anda puwa tigua homelo bo wahene.
2KI 21:24 Ani biyagola Yudali hearume agali haguane Amono homelo bo wahaya biaru bibahende minalu tinibi homelo bo wahai hene. Ani bialu tigua Amono igini Yosaia ibu abanaga henge mialu Yuda wali agali tinaga kini helo dabo helene.
2KI 21:25 Biabe maru Kini Amonohanda bialu henedaru mbuga mbira mini Yuda Kini Henerunaga Te laga ngagoha gilibu winigo nga.
2KI 21:26 Amono homayagola tigua ibunaga tingini homali mbira Usanaga mabu wiagoha winigo ogoniha hora hene. Hora hayagola ibu igini Yosaia ibu abanaga henge ibuni mialu Yuda dindiha kini ha aribia hene.
2KI 22:1 Yosaia ibu mali halira hayagola ibu Yudanaga kini pigane howa ibugua mali pira tebirani mbira (31) Yarusalemeni Yuda wali agali haru hene. Ibu ai̱ya Bosogada tano wali Adaianaga wane Yadida berene.
2KI 22:2 Yosaia ibugua Anduane Homogonaga deni mana bayale hangu biyagola Anduane Homogohanda ibuhondo turu ho hene. Ibugua mana bayale ibu mamali Kini Debidihanda bialu haga winidagua bialu howa Anduane Homogonaga bi mana hale halu hongo howa biaabo haga hene.
2KI 22:3 Yosaia ibu kini heane mali pira mbirani halini (18) hayagola ibugua agali beba gili bia dagala biaga Sabana ibu Anduane Homogonaga andaha bi yalu pu lene. Sabana ibu Mesulama aguane howa Asalia igini hene. Ani heagola Yosaiahanda ibuhondo lamialu lalu,
2KI 22:4 Í̠na loma binigo mo miaga Haguane Timbuni Hiligaia karia puwa loma binigo mo miaga maru Anduane Homogonaga anda panga mamage haga hearu tigua wali agalime muni migi bini mo winidaruni dagala lalu lamibe.
2KI 22:5 Daga lalu Anduane Homogonaga anda mo ko hene wiaru agali maru lone arema biraru yolo bilo agali biabe handayaho haga karu mo mibe, laya labe.
2KI 22:6 Tigua muni ogonime kabenda biabe biaga karubi ege to̱le̱me biabe biaga karubi ti yolo bialu irarubi ege to̱le̱rubi Anduane Homogonaga anda ogoni arema bilonaga yolo bibe.
2KI 22:7 Agali anda bilo haru haga karu ti mini tigabi dege ka manda bidogo í̠na tihondo muni ogonime agi bialu harimibe lalu hale nahabe laya labe, lalu Yosaiahanda lene.
2KI 22:8 Ani laya handala Sabana ibugua puwa lamibe layadagua lamini. Ani lamiyago hale howa Hiligaia ibugua Sabanahondo lalu, Anduane Homogonaga anda biagoha mbuga mbira Anduane Homogonaga bi mana lowinigo gilibuwi wiaria handa walia haru, lene. Ani lowa ibugua mbuga ogoni Sabanahondo miyagola Sabana ibugua mbuga ogoni daga lene.
2KI 22:9 Ibugua dagalo handalu Kini Yosaia hearia yalu puwa ibuhondo lalu, Í̠naga biabe biaga agali biaru tigua Anduane Homogonaga andaha muni wiaruni bibahende agali anda áyu arema bialu karu handayaho haga hearu mo miai haya, lalu lamini.
2KI 22:10 Sabana ibugua laabo halu lalu, Kini-o loma binigo mo miaga Haguane Timbuni Hiligaia ibugua mbuga ogo ngiya, lowa ibugua kini hale helo mbuga ogoniha bi lo wiaru daga lene.
2KI 22:11 Kini ibugua Anduane Homogonaga bi mana lowinigo mbuga ogoniha gilibu winiyago daga layago hale howa ibunaga bu miniha genda timbuni halu ibunaga aga bu heago mini lerelene.
2KI 22:12 Ani buwa loma binigo mo miaga Hiligaiabi Sabana igini Ahigamabi Migaia igini Agabobi kininaga beba gili bialu daga lalu biaga Sabanabi kininaga biabe biahaga Asaiabi olalu ibidaba lene. Íbu ngoaiho heagola ibugua tihondo lalu,
2KI 22:13 Mbuga áyu o mo yidogome Anduane Homogohanda mana iname bialu holene ogobi nga lalu lo winiyane handa walia kogoni. Anigo inanaga mamali heneyaru tigua mana uruni talialu bia nabi heneyagome Anduane Homogohanda miniha tandaga timbuni inahondo ho henego ka. Anigo áyu iname Anduane Homogonaga mbuga ogo handa walia harimago inabi Yuda wali agali bibahendebi iname agua bialu holoma̱ya hamelo kebe lalu Anduane Homogo ibuhondo hale hole pudaba, lene.
2KI 22:14 Agali biaru tigua kinihanda bi layago hale halu abale tano gahenge Yarusaleme biagoha puwa Anduane Homogonaga bi mana latagi haga wali mbira mini Huluda berenego ogoni ibu berearia pene. Wali ogoni ibu agalini Salumu howa ibu Harasa aguane Tigiba igini hene. Ibugua loma binigo mo miaga hearunaga aga wiaga tamu hobane heago handayaho haga hene. Agali ibiyarume bi layaru hale howa Huluda ibugua
2KI 22:15 tihondo ladai bialu lalu, Tígua áyu ogoni kini tí pudaba layadago ibuni bedaria dai buwa Anduane Homogo ibugua bi ogodagua laya lalu,
2KI 22:16 I̱ Anduane Homogo kogome i̱naga bi mana mbuga ogoniha gilibu wini kini ibugua daga layadagonidagua heneneore Yarusaleme bo gialabagabu waholebero. Wali agali uruniha kamirubi bibahende ko biyarunaga pani mulebero, laya.
2KI 22:17 Wali agali tigua i̱ erembira ngialu puwa dama mitangi bialu gime wabini wiaruhondo bi pupu wialu mbirale tara tara lomabu mini. Tigua mana ogonibi biyagome i̱na tihondo keba holiya tinime i̱ mo keba haya. I̱na Yarusaleme wali agali tihondo tandagaore ho kogoni. I̱naga tandaga ogoni ereba naholebira.
2KI 22:18 Anduane Homogo i̱ Isaraele wali agalinaga Ngode Datagaliwabe kogome tínaga kini biagohondo bi ogodagua laro. Tigua í̠hondo bi mbuga ogoniha gilibu wiaru dagalo ngiyago hale halu
2KI 22:19 i̱na Yarusaleme bo gialabagabu wahowa wali agali tano ogoniha karu tihondobi buleore manda bu ngogo laruyago hale howa í̠ mini beregedalu i̱naga deni í̠ni mo dindiha hari. Í̠na dugu timbuni bialu í̠naga aga lerelalu birigo i̱ de handaru. I̱na Yarusaleme mo ko helarogola wali agali marume tinaga waitigiruhondo ha halu Yarusaleme mini lalu howa ogodagua lolebira. Yarusaleme mo ko hayadagua ti mo ko helo lolebira. Anigo kini-o í̠hondo larogo í̠na i̱hondo dugu birigoni hale harugo
2KI 22:20 ai í̠ kengi Yarusaleme mo ko holene ogoni tagira naibi í̠ bayale dege holebere. Anigo mani í̠ homaregola tigua í̠ hora kaha mo ko holene ogoni Yarusalemeha ibilolebero lalu Anduane Homogohanda ani laya, lalu wali biagome lene. Anduane Homogonaga bi mana latagi haga wali Huluda ibugua mbiwia halu Anduane Homogonaga bi ogoni agali biaru tihondo lamiya handala tigua kini hearia bi uruni lo yalu dai bini.
2KI 23:1 Kini Yosaia ibugua agali haguane Yarusalemeha hearubi Yuda dindiha hearubi bibahende íbu ngoai hadaba lene.
2KI 23:2 Íbu ngoai hayagola kini ibugua Anduane Homogonaga bi mana latagi haga bu hearubi loma binigo mo miaga hearubi wali agali homogobi yagibanobi ti bibahendeore Anduane Homogonaga andani mo ngoai hene. Ani íbu heagola ibugua mbuga habo nalolene bi lowinigo Anduane Homogonaga andaha wiaria handa walia hene biago mo yuwa bi ogoniha gilibu wiaru wali agali ti hale hai helo daga latagi hene.
2KI 23:3 Ani daga latagi heagola kini ibu anda gene luni Anduane Homogonaga andaha heagoria heyu howa habo nalolene bi mbira Anduane Homogohondo lo wialu ibugua lalu, I̱naga minimebi gubalinimebi Anduane Homogonaga mbuga ogoniha bi gilibu wini ngaruni talialu biaiore holebero, lene. Ani layagola wali agali tiguabi nde, Habo nalolene bi mbuga ogoniha gilibu ngaru talialu biaiore holeberema, lalu bi lowini.
2KI 23:4 Ani lowialu Kini Yosaia ibugua lalu, Loma binigo mo miaga Haguane Timbuni Hiligaiabi loma binigo mo miaga maru ibu andaneha haga hearubi agali maru Anduane Homogonaga anda panga haraba mamage haga hearubi bibahende Anduane Homogonaga andaha anda puwa mbirale dama mitangi bialu gime wabini mini Balanaga bi pupu wiagane wiarubi dama wali beda mitangi bialu gime wabini mini Aseranaga bi pupu wiagane wiarubi yakundihondo bi pupu wiagane wiarubi bibahende mo yu tagira ibai halimu. Ani bialu tano pabe tagiraha yu tagira pialu Kidirono dindi ulini unu ngagoha irani delaiore halimu, lene. Ani delowa dai halu ira punga halu be kagola Bedele tano dugu yalu pilimu, lene.
2KI 23:5 Ani lowa dama mitangi bialu gime wabini wiarunaga loma binigo mo miaga agali bu hearu bibahende Kini Yosaia ibugua bo duguai hene. Agali uruni ti abale Yudali kini henedarume dama mitangi bialu gime wabini uruninaga bi pupu wiaga andaha lomaru mo mialu helo dabo helaga bini. Mbirale uruninaga bi pupu wiaga anda Yarusalemenibi Yuda dindiha tano wiaru bibahendenibi hai hene. Ibugua agali maru Balahondo bi pupu wiaga hearubi nihondobi egehondobi yakundihondobi urunialehondo bi pupu wiaga hearu bibahende bo duguai hene.
2KI 23:6 Mbirale dama wali beda mitangi bialu gime wabini mini Asera Anduane Homogonaga anda tamuha wiago mo yalu tagira pialu Kidirono dindi ulini iba peagoha yalu puwa irani delai hene. Ani dai halu ira punga wiagola baya hangu dambu gindu lowa mo be abaluore helene. Ani buwa be abaluore wiagola Yarusaleme wali agali daga nalene homenerunaga homali wiagoha taulo payabu wahene.
2KI 23:7 Ani biai howa Yosaia ibugua bidaba lalu layadagua Anduane Homogonaga andaha hobane mbira mbira wali agali kayu yu paliaga bu helearuni bibahende gialo wahaiore hene. Anda hobane uruni walirume dama wali beda mitangi bialu gime wabini mini Aserahondo bi pupu wulenaga aga karulagaru wabiaga wiagoria henego uruni bibahende bo gialo wahaiore hene.
2KI 23:8 Yuda dindi bibahendeha Yosaia ibugua damarunaga lomabu delaga dabu bu helearu bibahende bo gialabaga bima uyurahayagi Geba tanoha howa delama pialu unurahayagi Beaseba tanoha delama tagira pene. Ani buwa dama mitangi bialu gime wabinirunaga bi pupu wiaga anda hearu bibahende mo koore hai hene. Ani biai halu dama mitangi bialu gime wabinirunaga loma binigo mo miaga dindi uruniha hearu bibahende Yarusaleme tano haru ibai hene. Lomabu delaga dabu mbira Yarusaleme tanoha panga mbiranaga harabani kaware dege bu helenego ogoni bo gialo wahai hene. Panga ogoni Yosua ibu Yarusaleme tanonaga hondo haga agali heangi ibugua Yarusaleme tano uba andatagi biaga panga dunini timbuni heagonaga abene gi lehayagi wabu helene.
2KI 23:9 Loma binigo mo miaga biaru kinihanda Yarusaleme haru anda ibiyaru ti loma binigo mo miaga Yarusalemeni karu baba mandagi howa mberedi yidi nahe hirini nalu holene wini. Anigo Anduane Homogonaga andaha lomabu delaga dabu heagoria lomabu delaga biabe tigua bulene nawi hene.
2KI 23:10 Kini Yosaia ibugua dama mbira mini Tobede lagagonaga bi pupu wiaga Hinomo dindi uliha wali agalinaga deni mo ko halu mo ngubia hai haga wiago bo gialabaga bini. Ani biyagola wali agalirume tinaga waneigini dama mitangi bialu gime wabini mini Molegehondo loma bialu bo mibe nahe wini.
2KI 23:11 Ala howa Yudanaga kini hearume ni ibu dama mbira kagoni lowa tigua nihondo bi pupu wiaga hene. Tigua nogo hosiru karisiru maru ninaga loma bia howa Anduane Homogonaga anda heagonaga pabe tagirahayagi helene. Dindi tu wa bagi hene mbirale uruni helenedaruni kininaga biabe haru haga haguane Nadana Melege henego ibu dalu pabe tamuhayagi wini. Ani winigo Yosaiahanda nogo hosi biaruni talia tagi halu karisi wiaruni bibahende irani delai hene.
2KI 23:12 Kini Ahasa andaga daliga danginiha bamba Yudanaga kini henedarume lomabu delaga daburubi Kini Yosaiahanda gialabaga bini. Ala Kini Manase ibuguabi nde lomabu delaga dabu Anduane Homogonaga anda biagonaga tamuha wali agali mo ngoaiho haga henge timbuni wiagoria bu helenego ogonibi Yosaia ibugua bo gingirulobaga bu wahene. Bo gingirulobaga bu wahene wiaru baya hangu iluwa Kidirono dindi ulini iba peagoha yu wahene.
2KI 23:13 Ani bialu bamba Kini Solomonohanda lomabu delaga dabu dewaore Yarusaleme tanonaga abene unura Hari Olibe kagohayagi bu helene uruni Yosaiahanda gialo wahene. Dabu uruni Solomono ibugua dama mitangi bialu gime wabiniru mbirago Saidono wali agalinaga dama wali beda mini Asadarebi mendego Moaba wali agalinaga dama mini Kemosobi tebonego Amono wali agalinaga dama mini Molegebi wabu helaga bini. Anigo uruni bibahende Anduane Homogonaga deni ko ngubiore wini.
2KI 23:14 Yosaia ibugua ege to̱le̱ anda genenibi ira anda genenibi dama wali beda mitangi bialu mini Asera gime wabu helearu bibahende dibu gialo wahai hene. Ani buwa Yosaia ibugua homa kuni wiaru dindi ogoniha mo yu paya payabu ngelalu dindi ogoniha lone bi pupu wibe nahe wali agalinaga deni mo ngubia ho ngelene.
2KI 23:15 Bamba Nebada igini Yaroboama heangi lotu laga dindi mbira Bedele tanoha mo ngelalu lomabu delaga dabu mbira bu helalu bini. Yaroboama ogoni ibu kini heangi ibugua Isaraele wali agali Anduane Homogonaga deni howa mana ko wiaru bilo mo bia halu haga hene. Ani binigo Yosaia ibugua Bedele tano puwa lomabu delaga dabu wiago agali bu hearuhondo, Gialo wahadaba, lene. Gialo wiago irani delowa ira punga wiago dambu gingirulobaga buwa be abalu helene. Ani bialu dama wali beda mitangi bialu gime wabini mini Asera wabu heleagobi irani delene.
2KI 23:16 Ani buwa Yosaia ibuni uruni biyago handayaho henego beregedowa handa dai bialu hearia homali maru naina hari nene wiaruha hearia hendene. Ani hondowa biabe biaga agali hearuhondo, Homa kuni homali uruniha wiaru dugu pudaba, lene. Dugu puwa yalu dai biyagola Yaroboama ibugua lomabu delaga dabu ala bu helene biagoria homa kuni biaru irani delene. Ani biyadagome wali agali bu hearunaga deni dabu ogoni mo ngubiaore hene. O biyadaruni bamba Kini Yaroboama ibu lomabu delaga dabu biagoria hearia Anduane Homogonaga bi mana latagi haga mbira henegoha howa mbiwia henego henene lola hene. Yosaia ibugua homa kuni biaru irani delai howa lone handa dai bialu hearia homali mende hearia hendene.
2KI 23:17 Hondowa ibugua agali hearuhondo hale halu lalu, Homali ogoni ainagadabe, lene. Ani layagola Bedeleali hearu tigua ibuhondo ladai bialu lalu, Homali ogoni Yudali mbira Anduane Homogonaga bi mana latagi haga bamba henego ibugua áyu í̠na lomabu delaga dabu ogoni o beregonidagua bulebira lalu bamba mbiwiaho bolangua henegonaga homali ka, lalu lamini.
2KI 23:18 Ani layagola Yosaia ibugua tihondo lalu, Tígua ibunaga homali ogoni mo ko holomini. Ibunaga homali baya hangu helalu ibunaga kuni ibuni homaliha ela nahe baya hangu ngelalimu, lene. Ani laya handala tigua ibunaga kunibi Anduane Homogonaga bi mana latagi haga mende Samaria dindiha henegobi libunaga kuni mo dela nabi ngelo wahene.
2KI 23:19 Bamba Isaraele wali agalinaga kini henerume dama mitangi bialu bi pupu wiaga tano bibahende wiaruha mo wiagola tigua mana ogonidagua binidagonime Anduane Homogo mo tandaga hene. Ani binigo Kini Yosaia ibugua Bedele tanoha biyadagua dege dama mitangi bialu bi pupu wiaga wiaru bibahende bo gialo wahai hene.
2KI 23:20 Ani buwa dama mitangi bialu bi pupu wiaga uruninaga loma binigo mo miaga hearu bibahende tininaga lomabu delaga dabu bu helaga biagoria tinibi bo delai hene. Ani bialu homa kuni wiarubi dabu odaruniha mo delaga bini. Ibugua biabe uruni biai halu Yarusaleme dai bini.
2KI 23:21 Kini Yosaia ibugua wali agali bibahende hearuhondo bi lo pelalu lalu, Bolangua Halu Penegonaga horo mitangi bialu tomo nolene habo nalolene bi mbuga ngagoha gilibu ngadagua bamba ina mamaliru Iyibi dindiha bayale helo helenego mitangi bialu tomo nolene winingi nami̱ya, lene. Ani layagola wali agali tigua kinihanda layadagua biai hene.
2KI 23:22 Bambaore agali haguanerume haru haga heangi howa hama ibalu Isaraele Yudanagabi kiniru heangi Bolangua Halu Penegonaga Horo tomo nolene ogoni mitangi bu haga winigo áyu ogonidagua nane lu haabo hene.
2KI 23:23 Anigo áyu mali pira mbirani halini (18) hayagola Yosaia ibu kini hene lowa tigua mbuga biagoha bi gilibu wiadagua talialu tomo ogoni Yarusalemeni dawa nene.
2KI 23:24 Yosaia ibugua homene dininiha wali agalime halaga biaga wiarubi dama mitangi bialu gime wabini wali agali tini andagaha hangu hangu wu hearubi gime wabini maru wiarubi bibahende mo wahai hene. Yarusalemenibi Yuda dindi bibahendehabi wali agali bibahendeme mana ko ngubi dama mitangi bulenaga mana tara tara biaga wiaru mo wahai hene. Ibugua ogonidagua binidaruni irane ibugua wali agalime Anduane Homogonaga mana mbuga loma binigo mo miaga Haguane Timbuni Hiligaiahanda Anduane Homogonaga andaha wiaria handa walia hene biagoha lo wiadagua talialu bilonaga ani bini.
2KI 23:25 Yosaia ibu kini bayaleore howa ibunaga bu minimebi mandamebi hamemebi mo mbiraore hangu howa Anduane Homogo hongo howa talialu bi mana Mosesehanda gilibu wini wiaru buleore hamelo hene. Bamba Kini Yosaia ale mbira nahene manibi nahe dege. Ibu hangu kini bayaleore hene.
2KI 23:26 Yosaia ibugua mana bayale dewa bialu henegoyu Anduane Homogohanda Kini Manase ibugua mana ko dewaore bialu henego mitangi bialu ibunaga bu miniha Yuda wali agali baba tandaga ho howa embeda nahe haabo hene.
2KI 23:27 Ani embeda nahe howa Anduane Homogo ibugua lalu, I̱na Isaraele wali agalihondo birugonidagua Yuda wali agalihondobi ani dege bulebero. I̱na ti handabe manga timbuni ho kogo ai ti dindi taraha hama pelo bo batagi holebero. I̱ninaga tano loma biahene Yarusaleme biago erembira mialu waholebero. Wali agali i̱ni koria ibalu i̱ mitangi bialu lotu laga anda i̱ninaga loma bia hene biagobi wa dege holebero, lene.
2KI 23:28 Biabe maru Kini Yosaia ibugua bialu henedaru mbuga mbira mini Yuda dindiha Kini Henerunaga Bite laga ngagoha gilibu winigo nga.
2KI 23:29 Yosaia ibu kini heangi Iyibinaga Kini Nego ibugua ibunaga ami haru halu Asiria baba wai bule tidu yalu Iba Yuberedisi peagoria pu hene. Ani pu ka layago hale howa Kini Yosaia ibugua ibunaga ami agali hearu haru puwa Iyibiali biaru baba wai bule pene. Tigua pialu Megido tano wiagoria puwa wai bialu hemiria Iyibi ami agali biarume Kini Yosaia bene.
2KI 23:30 Ani benego homaya handala ibunaga ami agali haguane bu hearume ibu tingini wai biaga karisi wiagoria mo yalu Yarusaleme dai bini. Yalu dai buwa ibu Yudanaga kiniru hora haga homali heagoha hora hene. Yudaliru tigua ani hora howa ibu igini Yoahasa dabalu kini helo ibunaga haguaneni weli odo wia hene.
2KI 23:31 Yoahasa ibu mali pira kirani tebira (23) hayagola Yuda wali agalinaga kini pigane hene. Ani howa ibu Yarusalemeni ege tebira hangu haru hene. Ibu ai̱ya mini Hamudala ibu Libina tanoali Yaremaia henego wane berene.
2KI 23:32 Yoahasa ibugua ibu mamalirume mana ko wiaru bialu henedagua ibugua Anduane Homogonaga deni howa mana ko dewa bialu hene.
2KI 23:33 Ani bialu heagola Iyibinaga Kini Negohanda ibalu Yoahasa kini heago bo dugualu Hamada dindiha Libila tano wiagoha garabaya heleagola Yoahasa lone kini habe nahe hene. Ani helowa Kini Nego ibugua Yuda wali agalime dagisi muni siliba genda magi kilogarama daosini tebirani handari maria (3,400) ngialu ngolo genda magi kilogarama pira tebirani maria (34) ngi lalu hene.
2KI 23:34 Ani buwa Kini Nego ibugua Yosaia igini mende Eliagimi dabalu Yuda dindiha Yosaianaga henge mialu kini helo helene. Ani heagola Kini Nego ibugua Eliagiminaga mini mende wia aribia halu Yahoiagimi wini. Ani helalu Nego ibugua Yoahasa Iyibi haru halu puwa helenego ai Yoahasa Iyibi dindiha halu homene.
2KI 23:35 Kini Yahoiagimi ibugua ibunaga wali agali bibahendehondo lalu, Ngolo silibaru Kini Nego dagisi mo mule tínime mulene karulape yidamidagua ngilimu, lene. Ani layagola muni dewawi hearu tigua wiadagua miyagola emenewi hearu tiguabi nde emene wiadagua mini. Ani mo mogo biyagola Yahoiagimi ibugua muni uruni bibahende mo mogo bialu Negonaga mo pelai hene.
2KI 23:36 Yahoiagimi ibu mali pira kirani duria (25) hayagola Yuda dindiha kini pigane howa ibugua mali beriani (11) Yarusalemeni haru hene. Ibu ai̱ya Luma tanoali Pedaia mbira henego wane Sebida berene.
2KI 23:37 Kini Yahoiagimihanda bamba ibu mamalirume mana ko bialu henedagua dege ibugua Anduane Homogonaga deni mana ko ngubi wiaru bialu haabo haga hene.
2KI 24:1 Yahoiagimi ibu Yuda dindiha kini heangi Babilononaga Kini Nebugadenesa ibugua ibunaga ami hearu haru halu ibuwa Yuda dindiha wai bini. Ani buwa ibugua Yudali hearu bope halu Kini Yahoiagimi ibu andaneha helo helene. Ani howa mali tebira peagola Kini Yahoiagimi ibu pubagi halu Nebugadenesa andaneha holene manga howa ibu hatara hene.
2KI 24:2 Ani biyadangi howa Anduane Homogohanda Kini Yahoiagimi baba wai bilonaga ami agali Babilono howabi Siria howabi Moaba howabi Amono howabi ibilaga bini. Tigua ibalu wai buwa Yuda wali agali balu dindi anda bo labu hai hene. Anidagua biyadagoni abale Anduane Homogo ibunaga bi mana latagi haga biabe biahaga agali maru heneruha howa bi latagi halu mbiwia henego heneneore lola hene.
2KI 24:3 Anduane Homogohanda anidagua binidagoni irane ibugua Yuda wali agaliru handabe manga howa ibunime waitigi agalidaru mo mini wia hayagola tigua wai bialu dindi bo labu halu wali agali dindi mendeha hama pelo bo batagi hene. Anduane Homogo ibugua Kini Manasehanda mana ko timbuni bialu heneru mitangi bu haabo hene.
2KI 24:4 Mendebi nde Manase ibugua dege wali agali tiha ko mbira nawini mana tigabi bialu Yarusalemeha hearu bame homelo bo wahaga biyagola Anduane Homogohanda Manasenaga ko urunibi mitangi bu haabo howa waitigi ani ibilene.
2KI 24:5 Biabe maru Kini Yahoiagimihanda bialu henedaru mbuga mbira Yuda Kini Henerunaga Bite laga ngagoha gilibu winigo nga.
2KI 24:6 Kini Yahoiagimi homayagola ibu igini mbira Yahoiagini henego ibugua ibu abanaga henge mialu kini ha aribia hene.
2KI 24:7 Horo odaruningi howa Babilononaga kini heagome dindi dewaore abale Iyibinaga kini heagome handa gimbubu heneru bibahendeore Iyibi baba dindi tubaria wiagoria howa pialu uyura Yuberedisi Iba angeni tubaria wuwa ibugua karulowa handameho hene. Ani handameho heagola Iyibinaga kini henedago ibugua dindi mendeha wai bule tagira piaga winidagua pobe nahe wiyagola ibu nape waho hene.
2KI 24:8 Yahoiagini ibu mali pira mbirani halira (18) hayagola Yarusalemeni kini pigane howa ege tebira hanguni ibu Yarusalemeha haru hene. Ibu ai̱ya Yarusalemeali Elinadana mbira henego wane mini Nehusa berene.
2KI 24:9 Yahoiagini ibugua ibu abahanda biagane mana wiadagua Anduane Homogonaga deni howa mana ko wiaru mo tene howa bialu haga hene.
2KI 24:10 Yahoiagini ibu kini heangi Babilononaga Kini Nebugadenesanaga ami haru haga agali haguane hearume Babilononaga ami agali hearu haru halu ibuwa tigua Yarusaleme bibahendeore ho hagira bia anda howa tano karulole wai bule hene.
2KI 24:11 Babilononaga ami biarume Yarusaleme ho hagirabu heagola Kini Nebugadenesa ibuni ibalu ti haru mandagi hene.
2KI 24:12 Nebugadenesa ani íbu heago handalu Kini Yahoiaginibi ibu ai̱yabi ibunaga ami haru haga agali haguane hearubi agali kini andaga mamage haga hearubi bibahende tano yu wahalu Babilononaga Kini Nebugadenesa hearia puwa ti wai bibe manga ho kama lole pene. Ani layagola Nebugadenesa ibugua Kini Yahoiagini minu garabaya bini. Nebugadenesa ibu Babilono dindiha kini howa mali halini heangi wai ogoni bini.
2KI 24:13 Ani bialu ibugua Anduane Homogonaga anda anda puwa mbirale maru bamba Kini Solomonohanda ngolome wabu wini wiaru mo yai hene. Anduane Homogonaga andaha ngolo wiarubi kini andagaha ngolo wiarubi bibahendeore Babilono mo yu piai hene. Ani binidagonidagua bulebira lalu Anduane Homogohanda lowinigo lola hene.
2KI 24:14 Ani bialu Kini Nebugadenesa ibugua Yarusaleme wali agali bu hearubi ami haru haga hearubi ami agali hongohe daosini pira (10,000) bu hearubi bibahende haru tagira pene. Agali manda timbunibi hearubi agali maru biabe tara tara mugubeyi hearubi aeaneme biabe biaga mugubeyi hearubi haru pu dege bini. Uruni bibahende garabaya haru halu Babilono piai hene. Wali agali maru burupale hayaru dege Yuda dindiha helo yu wahene.
2KI 24:15 Kini Nebugadenesa ibugua Yahoiaginibi ibu ai̱yabi ibu one biru wiarubi ibunaga agali haguane hearubi bibahendeore Babilono dindiha garabayabu yalu piai hene.
2KI 24:16 Nebugadenesa ibugua ami agali hongohe hearu daosini karia (7,000) haru pene. Agali maru manda timbunibi hearubi agali maru biabe tara tara mugubeyi hearubi mbirale aeaneme biabe biaga mugubeyi hearubi bibahende lamaga halu daosini mbira (1,000) Babilono haru halu pene. Agali uruni hongohe ami holene karulaperu dege pene.
2KI 24:17 Nebugadenesahanda Yahoiagini aba hamene heyogone Madania henego ogoni ibu nde Yarusalemeni kini helo dabo helowa ibunaga mini Madania wiyago wahalu mini mende Sedegaia wia aribia hene.
2KI 24:18 Sedegaia ibu mali pira kirani mbira (21) hayagola ibugua Yudanaga kini pigane howa mali bearia (11) hanguni Yarusalemeha haru hene. Ibu ai̱ya Libina tanoali Yaremaia mbira henego wane mini Hamudala berene.
2KI 24:19 Ani howa Kini Sedegaia ibugua mana ko ngubi abale Kini Yahoiagimihanda bialu henedagua dege Anduane Homogonaga deni mana ko wiaru bialu haga hene.
2KI 24:20 Wali agali Yarusalemeni haga hearumebi Yuda dindiha haga hearumebi mana ko wiaru hangu mo tene halu biaabo hayagome Anduane Homogo mo tandaga timbuni halu hene. Ani biyagola Anduane Homogo ibugua ti handabe manga howa tininaga dindiore yu wahalu dindi tara kaundiaha hama pelo bo talia tagi hene.
2KI 25:1 Kini Sedegaia ibugua Babilononaga kini heagome ibu handayaho helo habe manga howa ibu habagi halu ibuni hangu hene. Ani heagola Sedegaia ibu kini henego mali dininaga ege pini hayangi ege ogoninaga horobi nde pini dege hayagola Babilononaga Kini Nebugadenesa ibunaga ami hearu bibahende haru halu ibalu Yarusaleme tano ho hagira buwa tano karulole wai bialu hene. Tigua ani ho mabu biai howa tini heyu howa wai bulene ege pabe daliga heagoha dindi dugu wima irigi hene.
2KI 25:2 Mali mbirani ege waragaria agima Yarusaleme tano ho hagira bia andaho hene. Ani andaho howa mali beriani Sedegaia ibu kini hene lowa
2KI 25:3 mali ogoninaga ege manenaga horo dini hayagola Yarusaleme wali agali tanoha hayaru tomo nolene nawi biba hayagola tomo garime homalu hene.
2KI 25:4 Ani bu heagola Babilonoali biaru tigua tanonaga pabe heagonaga gibuni mbiraha bangu lalu Yarusaleme tanoha anda pene. Ani biyagola Kini Sedegaiabi Yarusaleme tanoha haga ami hearubi bibahende ibida pora bialu polene manda buwa kininaga gama wiagohayagi pialu pabe kira bugimbu bini wiagoha panga mbira wia do henegoha tagira pole pene. Babilononaga ami hearume pabe gibugibu mamage tidiyu ibaga bialu heago helowa dege Yarusaleme ami biaru ti tidiyalu Yodana iba polene hariga peadagua pole pene.
2KI 25:5 Ani piyagola Babilono ami hearume Kini Sedegaia piyadagua haruru pugupugu bialu Yarigohayagi dindi tigabi mbira wiagoria talima pialu minini. Ani minaya handala Sedegaianaga ami biaru tigua kini yu wahalu ibida pugupugu biai hene.
2KI 25:6 Babilono ami biarume Kini Sedegaia Babilononaga Kini Nebugadenesa Libila tanoni hearia minu yalu pene. Ani minu yalu pu heleagola Nebugadenesa ibugua Sedegaia hondowa lalu, Í̠nime ko biridagonaga pani noleneore nga, lene.
2KI 25:7 Babilono ami biarume Sedegaia one waneigini bu hearubi heba Libila tano minu yalu ibini. Ani minu yalu ibiyagola Nebugadenesa ibugua ami biaruhondo bidaba lalu lamiyadagua tigua Sedegaia igini hearu bibahende ibuninaga deni howa bo homelai hene. Ani bo homelai heagola kini ibugua lalu, Sedegaianaga de kirabali dugu wahadaba, layagola tigua ani bini. Ani biai halu ibunaga gi gebi seni pume minu kabu buwa Babilono dindiha garabayabu yalu pole pene.
2KI 25:8 Nebugadenesa ibu Babilono dindiha kini heane mali pira mbirani dira (19) hene. Mali ogoninaga ege dauninaga horo kane hayagola ami haru haga haguane mbira mini Nebusaradana mbira henego ibu Yarusaleme ibini. Nebusaradana ibugua ami agali maru kini mamage haga hearu haru haga hene.
2KI 25:9 Ibugua ibuwa Yarusalemeha Anduane Homogonaga anda heago delalu Yudanaga kini andagabi delalu agali haguane Yarusalemeha haga hearunaga andarubi bibahendeore bo heda halu delai hene.
2KI 25:10 Ani biai howa Babilono ami Nebusaradana heba ibiyarume Yarusaleme tanoha ege pabe bu mabu bini hearuni bibahende bo gialo delaiore hene.
2KI 25:11 Ani gialo delai halu Nebusaradana ibugua Yarusalemeni wali agali maru yu wahene hearubi wali agali maru hearubi bibahendeore Babilono garabayabu yalu piai hene. Yuda wali agali maru wai biyangi Yarusaleme yu wahalu tagira puwa ami bu hearunaga balai anda heagoha pu hene hearubi bibahendeore garabaya biai halu Babilono dindiha haru piaiore hene.
2KI 25:12 Anigo Yuda wali agali maru mbirale yalu polene nawi yagibanoore hayaru Nebusaradana ibugua wali agali uruni ti gerebi maburu widi mabu wiaruha biabe bialu helo helene.
2KI 25:13 Ani bialu Babilono ami biarume Anduane Homogonaga andaha anda puwa anda gene to̱le̱ boronosime helene hearu gialo yalu mbirale iba dange be wiaga wilibaro ale timbuni boronosime wabini wiagobi gialo yini. Ani gialo yalu tigua iba dange be timbuni mbira boronosime wabu wini wiagobi bo pambu laga buwa yalu pene. Boronosi uruni bibahendeore Babilono mo yalu piai hene.
2KI 25:14 Babilonoali biaru tigua dege todobene be aleru nama tabuli ale lomabu delaga dabuni ira punga beru ngago hilu wahaga wiarubi mbirale lamu hale delowa mo emeneha mo timbuniha bigi biaga wiagobi ira hagua ngabilo delaga mini inisenesinaga beledi wiarubi ndisi be mbirale bo lomabu delaga biarunaga darama hambiaga wiarubi mbirale Anduane Homogonaga andaha biabe biaga boronosime wabini wiaru bibahendeore mo yai hene.
2KI 25:15 Nebusaradana ibugua mbirale ngolome wabini silibame wabinirubi bibahendeore mo yai halu ira hedo yaga beledi ale wiagobi heba mo yini.
2KI 25:16 Bamba Kini Solomonohanda boronosime anda gene kira ogoni labo wabu helalu iba dange be timbuni ogoni wabu ngelalu mbirale iba dange be emene emeneru wilibaro aleni mo paga howa yaga ogoni wabu wialu bini. Ani biai howa Solomono ibugua biabe biaga agali hearuhondo mbirale uruni Anduane Homogonaga andaha mo ngeladaba layagola mo winigo áyu Babilonoali biarume mbirale uruni bo bangulo baga bialu boronosi para hene heago damene bibahende mo yaiore hene. Boronosi uruninaga genda magi agalime manda bialu daga labe nahe dewaore mo yalu pene.
2KI 25:17 Biabe biaga agalirume anda gene boronosime wabu heleadagoni kirabali ogobi labolaboore wabu helene. Wabu helayadagoni luninaga ge magi manda mida halira hene. Gene ogoni labonaga nguni daligahayagi boronosime para howa mo timbu heagonaga daligahayagi timbuni hene. Daligahayagi boronosi hangume bia para haga bima iraga halu magi manda mida mbira howa bolanguahe hene. Ani wabu helowa tigua ogoni mo yaribia halu hanuni boronosime dege yári taraore bialu ira mbira mini pomegaranade lini aleru wabu helaga bini. Ani wabu helowa boronosime dege nu ale mbira wabuwa ogonime wu mabu bini. Anidagua buwa ogoni anda gene biago labonaga nguni daligahayagi wia dambi helenego ani hene.
2KI 25:18 Babilononaga amiru haru haga agali haguane Nebusaradana biago ibugua loma binigo mo miaga haguane Seraiabi ibu biamogo biaga agali Sebanaiabi agali Anduane Homogonaga anda panga mamage haga agali tebirali hearubi ti bibahende minu garabayabu yalu pene.
2KI 25:19 Ani bialu Yarusalemeha ami agali hearu haru haga agali haguane heago minu yini. Yudanaga kini mini bogaru talebu miaga duriali uruni ti Yarusalemeni hearia hondowa minu yini. Agali mbira ami haru haga haguane heagome agali maru ami holene dabalu mini gili biaga heagobi minu garabayabu yini. Ani biai howa Yarusalemeni agali mini lene pira waragaria (60) hearu hondowa urunibi minu garabayabu ya dege bini.
2KI 25:20 Ani bialu Nebusaradana ibugua uruni bibahende minu yai halu Babilononaga kini ibuni Libila tanoha hearia pole pene.
2KI 25:21 Dindi ogoni hameigini Hamada hearunaga wini. Dindi ogoriani howa kini ibugua agali uruni homelo badaba layagola tigua o biaruni bibahendeore homelo bo wahai hene. Ani biai halu mani howa Babilonoali biarume Yuda wali agali maru hearu Babilono dindiha garabayabu yalu pole pene.
2KI 25:22 Kini Nebugadenesahanda agali mbira mini Gedalia henego ogoni ibugua Yuda wali agali maru Yuda dindiha helo wahalu ibiyaru haru helo dabo helene. Gedalia ogoni ibu Sabana aguane howa Ahigama igini hene.
2KI 25:23 Ani helayagola howa Yudanaga ami haru haga agali haguane marubi ami agali marubi ala ibida puwa dindi gibuni maru wiaruha ha do haga bini. Tigua ha do ho hearia Babilononaga kini ibugua Gedalia ibu Yuda dindiha haru haga helo dabo heleda layago hale howa tigua Gedalia Misiba tanoni hearia hondole pene. Agali ami haru haga haguanedaruni tinaga mini uru hene. Nedania igini Isimaelebi Karea igini Yohananabi Nedoba dindiali Tanumede igini Seraiabi Maga dindi howa ibini Yasanaiabi uruni ti pene.
2KI 25:24 Gedalia ibu ti ibiyago hondowa ibugua tihondo lalu, Heneneore langerogo tí Babilono kini kagohondo gi nahe tíni dindi ogoria hendore halimu. Ani howa tígua Babilononaga kini kago andaneha howa tíni bayale holeberemi, lalu lamini.
2KI 25:25 Ani lamiyagola howa Elisama aguane Nedania igini Isimaele ibu Yudanaga kini henerunaga aria mbira henego mali ogoninaga dege ege kane hayagola ibugua agali pirali haru halu Misiba dindi anda ibuwa Gedalia homelo bo wahene. Ani bialu tigua Yudalibi Babilono ami maru Gedalia heba haga Misiba dindini hearubi bibahendeore homelo bo wahaiore hene.
2KI 25:26 Ani bayagola mani howa Yuda wali agali hearubi ami hearubi bibahende Babilono kini biagohondo gi halu ti Iyibi dindiha ibida piai hene.
2KI 25:27 Kini Yahoiagini ibu Babilonoha mali pira tebirani karia (37) garabaya dege haabo hene. Ani heagola mali ogoningi agali kini mbira mini Ebili Merodaga henego ogoni ibu Babilonoha kini ho aribia hene. Ani heane dege mali ogoninaga ege hombeanenaga horo pira kirani karia (27) hayagola Ebili Merodaga ibugua Yahoiagini dara timbuniore ho howa ibu garabaya hayago golope hene.
2KI 25:28 Ebili Merodagahanda mana bayaleore bialu Yahoiagini heba kini maru ti haru mandagi Babilono dindiha garabaya henerunaga deni ibu mo yaraga howa agali mini lene mbira helene.
2KI 25:29 Ani heleagola Yahoiagini ibu garabayanaga aga biaga wiaru nabi aga maru bayale biaribia hene. Ani howa ibu Babilononaga kini heago andagaha tomo nalu haabo hene.
2KI 25:30 Mani Babilononaga kini ibugua Yahoiagini ibu karulapeore mbirale mbira burupale nabi helonaga muni yáriru migi bilimu lalu wali agali bu hearuhondo lamigi biyagola tigua milimu laya aleru mialu haabo heane dege Yahoiagini homaya handala wahene.
1CH 1:1 Adamani howa hama ibalu Abarahamani hairi henego uru. Adama igini Sede Sede igini Inoso Inoso igini Kenana Kenana igini Mahalalele Mahalalele igini Yarede Yarede igini Inogo Inogo igini Medusela Medusela igini Lamege Lamege igini Noa Noa igini tebira Seme Hama Yabede imaru hene.
1CH 1:5 Yabede ibu igini ogodagua hene. Gome Magogo Madai imaru Yabana Tubala Mesege Tirasa imaru ti wali agali maha ha aribia hayarume tinaga mamali mini mo hameigini mini henego wiaabo ka.
1CH 1:6 Ani henego ai Gome ibunaga aguanene Asagenasali Libadali Togamali imaru ti dindi uruninaga wali agali hene.
1CH 1:7 Yabana ibunaga aguanene Elisali Sebenali Saibarasali Lodesealiru ti dindi uruni wali agali hene.
1CH 1:8 Hama ibu igini henego uru. Kusuali Iyibiali Libiali Kenanali haga biniru ti wali agali maha ha aribia hayarume mini uruni tinaga mamali mo hameigini mini laga bima ibinigo nga.
1CH 1:9 Ai Kusu ibu aguanene Sebali Habilali Sabadali Lamali Sabadegaliru hene. Lama ibu aguanene Seba hameiginibi Dedana hameiginibi howa tinaga dindi minibi ogoni labo dege wini.
1CH 1:10 Kusu igini mbira ha dege binigo ibu mini Nimirodo henego ibu dindi bibahendeha agali pari wayali haguane mbira nahe wiangi piganeore ibu hene.
1CH 1:11 Iyibinaga aguanene Lidia hameiginirubi Anama hameiginirubi Lehaba hameiginirubi Nabadu hameiginirubi
1CH 1:12 Padarusu hameiginirubi Kasalu hameiginirubi Kiridi hameiginirubi hene. Pilidia wali agali ti Kiridi hameiginime hono winigo Kiridi aguanene hene.
1CH 1:13 Kenana igini wahene Saidono igini mende Hedebi libu wali agali maha ha aribia hayarume mini uruni tinaga mamali mo hameigini laga bima ibinigo nga.
1CH 1:14 Yabusu hameiginibi Amoro hameiginibi Giagisa hameiginibi
1CH 1:15 Hibi hameiginibi Aga hameiginibi Sini hameiginibi
1CH 1:16 Abada hameiginibi Semara hameiginibi Hamada hameiginibi ti bibahendenaga mamali Kenana ibu hene.
1CH 1:17 Seme igini uru hene. Elama Asua Abagasada imaru Ludu Arama Usu imaru Hulu Gedere Mesege imaru ti nde wali agali maha ha aribia hayarume mini uruni tinaga mamali mo hameigini mini laga bima ibinigo nga.
1CH 1:18 Abagasada igini Sela Sela igini Ebe hene.
1CH 1:19 Ebe ibu igini kira henego mende mini Pelege hene. Pelege ibu heangi wali agali dindi bibahendeha hearu ti tini headagua hoba migimigi bialu haga haga bini. Ebe igini mendego mini Yogodana hene.
1CH 1:20 Yogodanahanda hono wini ibu aguanene urudagua hene. Alamodadalibi Selebealibi Hasamabedealibi Yaralibi Hadoramalibi Usalalibi Digilalibi Ebalalibi Abimaelealibi Sebalibi Obialibi Habilalibi Yobabalibi uruni bibahendeore Yogodanahanda hono winiru howa ibu aguanene dege bu hene.
1CH 1:24 Hameigini Semenaga aguanene hama ibinigo ti mini uru. Seme igini Abagasada Abagasada igini Sela Sela igini Ebere Ebere igini Pelege Pelege igini Leu Leu igini Serugu Serugu igini Naho Naho igini Tera Tera igini Abarama ibu mini mende Abarahama hene.
1CH 1:28 Abarahama ibu igini kira Aisaga Isimalela hene. Isimale igini mini uru. Nebaiodo Keda Adabele Mibisama Misima Duma Masa Hadada Tema Yadua Nabisi Kedema imaru hene. Agali homberia (12) uruni ti hameigini homberianaga haguane hene.
1CH 1:32 Abarahama ibu wali tebone mani dabu binigo mini Kedura berenego ogoni ibu igini mini uru. Simirana Yogosana Medana Midiana Isibaga Sua imaru hene. Yogosana igini kira Seba Dedanala hene.
1CH 1:33 Midiana ibu igini duria Eba Ebe Hanogo Abida Eleda imaru hene.
1CH 1:34 Abarahama igini Aisaga henego ibu igini kira Iso Yagabala hene. Iso igini mini uru. Elibasa Leule Yausu Yalama Korabi imaru hene. Elibasa igini Temana Oma Sebi Gadama Kenasa Timina Amalege imaru hene. Leule igini Nahada Sera Sama Misa imaru haga bini.
1CH 1:38 Sia ibu igini ogodagua hene. Lodana Sobala Sibeono Ana Disono Ese Disana imaru hene.
1CH 1:39 Lodana ibu igini Hori Homamala hene. Lodana mbalini mbira mini Timina berene.
1CH 1:40 Sobala ibu igini ogodagua hene. Alabana Manahada Ebala Sebi Onama imaru hene. Sibeono ibu igini Aia Anala hene.
1CH 1:41 Ana ibu igini Disono hene. Disono igini henedaruni Hamarana Esebana Idirana Kerana hene.
1CH 1:42 Ese ibu igini ogodagua. Bilihana Sabana Yagana hameigini tebira uruni hene. Disana ibu igini Usu Aranala hameigini kira hene.
1CH 1:43 Isaraele wali agalinaga kini mbira naheangi Idomo dindiha agali uru tigua kini ala hene. Bero igini Bela ibu kini howa Dinihaba tano wiagoria haru hene.
1CH 1:44 Ani howa Bero homayagola Bosara tanoali Sera igini Yobaba ibu kini ho aribia hene.
1CH 1:45 Ani howa Yobaba homayagola nde Temanali dindi wiagoha agali Husama henego ibu kini ha aribia hene.
1CH 1:46 Ani howa Husama homayagola nde Bedada igini Hadada henego ibu kini ha aribia hene. Hadada ibu Moaba dindiha puwa Midianali hearu baba wai bialu ti bo podahana hene. Hadada ibu kini howa Abidi tanoha hene.
1CH 1:47 Hadada halu homayagola Masarega tanoali Samala henego ibu kini ha aribia hene.
1CH 1:48 Samala halu homayagola iba Yuberedisi pedago kawareha Lehobodo tanoali Saulu mbira henego ibugua kini ha aribia hene.
1CH 1:49 Saulu halu homayagola Agabo igini Balahanana mbira henego ibu kini ha aribia hene.
1CH 1:50 Ani halu Balahanana homayagola Hadada mbira henego ibu kini ha aribia howa Pau tano wiagoria hene. Hadada one mini Mehedebale ibu Maderede wane Mesehaba aguane berene.
1CH 1:51 Hadada halu homayagola Idomo hameigini tale bialu haguane tara tara haru haga hene. Agali haguane haga biniru mini uru. Timina Alaba Yadede Oholibama Ela Pinono Kenasa Temana Mibisa Magadiele Irama imaru hene.
1CH 2:1 Isaraele iginirunaga mini uru Lubene Simiono Libai Yuda Isaga Sebulunu Dana Yosebe Beniyamini Nabadali Gada Ase hene.
1CH 2:3 Yuda hameigini heneru ti mini Erebi Onanabi Selabi hene. Igiri tebirali uruni ai̱ya mini Badasua ibu Kenana wali berene. Yuda igini wahene mini Ere henego ibugua mana ko biyagola Anduane Homogohanda ibu homelo bo wahene.
1CH 2:4 Ani bialu Ere homayagola Yuda igini kirabi ha dege binigo mini Sera Peresela hene. Libu ai̱ya dalo berenego mini Tama ibu Yuda imane bereria mani Yuda ibugua dabu bia aribia hene. Ani buwa Yuda igini duria uruni hene.
1CH 2:5 Agali Perese igini kira mini Heserono Hamulula hene.
1CH 2:6 Perese hamene Sera ibu igini duria henerunaga mini uru. Simiri Edana Hemana Kalagolo Dada imaru hene.
1CH 2:7 Agana ibu Kami igini henego ibu Sera aria dege. Ani howa ibugua mbirale Isaraele wali agalime Anduane Homogonaga lalu loma biaho wiaru mo page bini. Ibugua mana ogonidagua binigome Ngode Datagaliwabehanda Isaraele wali agali pani timbuniore nelo mialu mo ko hai hene.
1CH 2:8 Edana igini mbiraore hangu henego mini Asaraia hene.
1CH 2:9 Heserono igini tebira hene. Ti mini Yaramele Lama Kalebe imaru hene. Lama igini Aminadaba Aminadaba igini Nasono henego ibu Yuda wali agalinaga agali haguane mbira hene. Ani bialu Nasono igini Salamono Salamono igini Boasa Boasa igini Obede Obede igini Yasi hene.
1CH 2:13 Yasi ibu igini kariali hene. Ibu igini wahene Eliaba mende Abinadaba tebone Simea henego ibu mini mende Sama laga hene.
1CH 2:14 Yasi igini manego Nedanele dauni Ladai hene.
1CH 2:15 Waragane Oseme halu kanego Debidi hene.
1CH 2:16 Ani bialu Yasi ibu wanebi kira berenego mini Seruia Abigelela berene. Seruia ibu igini nde tebira henego mini Abisai Yoaba Asahele imaru haga bini.
1CH 2:17 Agali mbira Isimaele aria mini Yade heagome Abigele dabu binigo ibu igini mbira hangu henego mini Amasa hene.
1CH 2:18 Heserono igini Kalebehanda wali Asuba bereago dabu bini. Ani biyagola Asubahanda wandari mbira mini Yariodo taba henene. Ani bialu Yariodo ibu igini tebira mini Yaserebi Sobababi Adonobi taba henene.
1CH 2:19 Asuba homayagola Kalebe ibu Eberada dabu bini. Mani biruwa Eberadahanda igini mbira mini Hua taba henene.
1CH 2:20 Ani biyagola mani Hua ibu igini Uri henego ibu Besalele aba hene.
1CH 2:21 Heserono ibunaga mali pira waragaria (60) hayagola agali mbira Magiri henegonaga wane bereago dabu bini. Wali ogoni ibu agali mbira mini Gileada henego mbalini berene. Mani wali ogoni ibugua igiri mbira mini Segubu taba henene.
1CH 2:22 Segubu ibu Yairi aba hene. Mani Yairi ibugua Gileada dindiha tano pira kirani tebira (23) wiaru handaya ho haga hene.
1CH 2:23 Anigo Gesua hameigini hearubi Siriali bu hearubi tigua ibalu wai buwa Yairi ibugua tano handaya ho hearubi Kenada tanobi karulalu tano maru kawareni wiarubi karulalu tigua tano pira waragaria (60) uruni karulai haga bini. Tano uruni bibahende Gileada aba Magiri waneigini aguaneru tinaga winigo karulene.
1CH 2:24 Heserono ibu Kalebe Eberada tanoha homeagola ibu one Abiya ibu wali gali tombeha bere berene. Mani Abiyahanda gali taba hanalu igiri mini Asua wini. Mani Asuahanda Tegoa tano pigane mo wini.
1CH 2:25 Heserono igini wahene mini Yaramele henego ibu igini duria hene. Igini wahenego mini Lama maru mini Buna Orene Oseme Ahiya imaru hene.
1CH 2:26 Lama ibu igini tebira mini Masa Yamini Ege imaru hene. Agali Yaramele ibu one mende dabu binigo mini Adara berene. Adarahanda igiri mbira taba henenego mini Onama hene.
1CH 2:28 Onama ibu iginigo labo mini Samai Yadala hene. Samai ibu igini kira dege henego mini Nada Abisuala hene.
1CH 2:29 Abisua ibu wali mini Abihaili mbira berenego dabu bini. Ani biyagola Abihailihanda igiri kira Abana Molidila taba henene.
1CH 2:30 Abisua hamene Nadaba ibu igini kira henego mini Selede Abaimila hene. Selede ibu waneigini mbira nahe heaore homene.
1CH 2:31 Anigo ai Abaimi ibu igini mbira hangu mini Isi hene. Isi ibu igini mini Sesana hangu hene. Sesana ibu iginibi nde mbiraore dege mini Alai hene.
1CH 2:32 Samai hamene Yada ibu igini kira henego mini Yadere Yonadanala hene. Ani henego ainde Yadere ibu waneigini mbira nahe heaore homene.
1CH 2:33 Anigo Yonadana ibu igini kira henego mini Pelede Sasala hene. Agali uruni ti Yaramele aguanene hene.
1CH 2:34 Sesana ibu igini mbira nahe wandari dege aba hene. Ani bialu Iyibiali mbira ibunaga biabe biahaga henego ibu mini Yara hene.
1CH 2:35 Ani buwa Sesana wane mbira bereago Yarahanda dabu bini. Ani biyagola libu igini mbira mini Adai hene.
1CH 2:36 Adai ibu igini Nadana hene. Ani bialu Nadana igini Sabada Sabada igini Ebelala Ebelala igini Obede hene. Obede igini Yahu Yahu igini Asiraia Asiraia igini Helese Helese igini Eleasa hene. Ani buwa Eleasa igini Sisimai Sisimai igini Salumu Salumu igini Yagamaia Yagamaia igini Elisama hene.
1CH 2:42 Kalebe ibu Yaramele hamene howa ibu igini wahenego mini Mesa hene. Mesa igini Sibi Sibi igini Maresa Maresa igini Heberono hene.
1CH 2:43 Ainde Heberono ibu igini maria henego mini Kora Tabua Legeme Sema laga biyaru hene.
1CH 2:44 Sema igini Lahama Lahama igini Yogeama hene. Sema hamene Legeme ibu igini Samai Samai igini Maono Maono igini Bedesu hene.
1CH 2:46 Kalebe ibu one halu mende bereneru aria mbirago mini Eba berene. Eba ibu igini tebira hene uru. Mbira Harana mende Mosa tebone Gasese hene. Ani bialu Harana ibu igini mbira mini Gasese dege hene.
1CH 2:47 Agali mbira mini Yadai ibu igini waragaria heneru ti mini Legeme Yodama Gesana Pelede Eba Saba imaru haga bini.
1CH 2:48 Kalebe ibu one halu mende berenedaru aria mende mini Maga berene. Ai wali Maga ogoni ibu igini kira taba henenego mini Sebe Tihanala hene.
1CH 2:49 Mani ibugua igiri kira taba henenego mini Saba Sebala hene. Ani howa Sabahanda Madamana tano pigane mo wialu Seba ibugua nde Magabena tanobi Gibea tanobi pigane mo wini. Mani Kalebe wane mbira mini Agasa berene.
1CH 2:50 Ani bialu Kalebe ibu waneigini marubi ha dege bini. Kalebe ibu one Eberadala libu igini mbira mini Hua hene. Hua ibu igini ogodagua hene. Mbira mini Sobala ibugua Kiriada Yarimi tano pigane mo wini. Mendego mini Salama ibugua Bedeleheme tano pigane mo wini. Tebone mini Harebe ibuguabi nde Bedegade tano mo wini.
1CH 2:52 Sobala ibu Kiriada Yarimi tano mo wini biago ibu hameigini Haroebi Menuhodo hameigini marubi tinaga mamali hene.
1CH 2:53 Sobala aguanene maru Kiriada Yarimi tanoha heneru ti mini Idirabi Pudubi Sumadabi Misirabi uruni ti hene. Ani bialu wali agali Sora tanoha bu hearubi Esedaolo tanoha hearubi ti hameigini uruni aria dege hene.
1CH 2:54 Ainde wali agali Bedeleheme tanoni hearubi Nedoba tanoha hearubi Adarodo Bedeyoaba dindiha hearubi Manahada hameigini hearu aria maru Soro hameigini laga hearubi ti bibahende Salama aguanene dege hene.
1CH 2:55 Hameigini tara nde Yabese tanoha henego uruni ti beba gili biaga manda timbunibi hene. Ogoniha hameigini tebira mini Tira Simea Sugada imaru hene. Hameigini uruni ti Keneali howa tinaga mamali Hamada hene. Legaba hameigini tibi nde Hamada aguanene dege hene.
1CH 3:1 Debidi ibu Heberono tanoha heangi ibu igini marubi henego tinaga mini uru. Igiri mbira Amanono hene. Amanono ai̱ya Yaserili tano wali mini Ahinoama berene. Ibu igini mende Kamelo tano wali mini Abigele berenego igini mini Daniele hene.
1CH 3:2 Ibu igini tebone mini Abasalomo hene. Abasalomo ai̱ya ibu Gesu dindiha kini mini Talamai henego wane mini Maga berene. Debidi igini mane mini Adoniya hene. Adoniya ai̱ya Hagida berene.
1CH 3:3 Debidi igini dauni Sebadaia hene. Ibu ai̱ya Abidala berene. Debidi igini waragane mini Idireama hene. Ibu ai̱ya Egela berenego igini hene.
1CH 3:4 Debidi ibu Heberono tano mali kariani ege waragaria haru heangi igiri waragaria uruni taba henene. Ani bialu Yarusalemeni mali pira tebirani tebira (33) haru howa
1CH 3:5 igiri dewa hono wigi bini. Amiele wane Badaseba ibu Debidi one biruwa igiri maria taba henenego tinaga mini Simea Sobaba Nadana Solomono imaru hene.
1CH 3:6 Ani heagola Debidi igini dira maha heneru tinaga mini Ibara Elisua Elebelede Noga Nebege Yabia Elisama Eliada Elibelede imaru haga bini.
1CH 3:9 Debidihanda igiri uruni hono wini. Ani bialu Debidi ibu one halu mende bereneru ariame igiri maru taba hana dege bini. Debidi ibu wane mbira mini Tama berene.
1CH 3:10 Kini Solomono igini aguane henerunaga mini uru. Solomono igini Lehoboama Lehoboama igini Abiya Abiya igini Asa Asa igini Yahosabada Yahosabada igini Yahorama Yahorama igini Ahasaia Ahasaia igini Yoasa Yoasa igini Amasaia Amasaia igini Usia mini mende Asaria laga hene. Usia igini Yodama Yodama igini Ahasa Ahasa igini Hesegaia Hesegaia igini Manase Manase igini Amono Amono igini Yosaia hene.
1CH 3:15 Yosaia ibu igini maria henego tinaga mini uru. Yohanana Yahoiagimi Sedegaia Salumu imaru hene. Salumu ibu mini mende Yoahasa laga hene. Yahoiagimi ibu igini kira Yahoiagini Sedegaiala hene. Yahoiagini ibu mini mende Yagonia laga hene.
1CH 3:17 Yahoiagini ogoni ibu kini hearia waitigime dindi taraha garabaya bu yalu penego ogoni ibu igini karia uru hene. Seadeli Malagirama Pedaia Senasa Yagamaia Hosama Nedabaia imaru hene.
1CH 3:19 Pedaia ibu igini kira Serubabele Simaila hene. Ai Serubabele igini kira dege Mesulama Hananaiala ibu wane mbiraore mini Selomidi berene.
1CH 3:20 Maha Pedaia igini duria henego uru Hasuba Ohele Beregaia Hasadaia Yusabahesede imaru hene.
1CH 3:21 Hananaia ibu igini kira Peladaia Yasaiala hene. Yasaia ibu igini Lebaia Lebaia igini Anana Anana igini Obadaia Obadaia igini Seganaia.
1CH 3:22 Seganaia igini mbira Semaia hangu hene. Ai Semaia ibu igini duria ti mini Hadusu Igala Baraia Nearaia Sabada imaru hene.
1CH 3:23 Nearaia igini tebira Elioenai Hisigaia Asarigama imaru hene.
1CH 3:24 Ani howa Elioenai ibu igini karia hene mini Hodabaia Eliasibi Pelaia Agubu Yohanana Delaia Anani layaru hene.
1CH 4:1 Yuda aguanene maru henego uru. Perese Heserono Kami Hua Sobala imaru hene.
1CH 4:2 Sobala igini Leaia Leaia igini Yahada Yahada igini kira Ahumai Lahadala hene. Agali uruni ti wali agali Sora tanoha bu henerunaga mamali hene.
1CH 4:3 Kalebe one Ebaradahanda ibu igini wahene mini Hua taba henene. Huahanda Bedeleheme tano pigane mo wini. Hua ibu igini tebira henego uru. Edama Penuele Esere imaru hene. Edama igini tebira Yaserili Isima Idibasa imaru hene. Igiri uruni ti mbalini mini Haseleboni berene. Ai Penuele ibugua Gedo tano pigane mo wini. Ani bialu Esere ibugua nde Husa tano pigane mo wini.
1CH 4:5 Agali Asu ibugua Tegoa tano pigane mo wiaga biago ibu one kira Hela Narala berene.
1CH 4:6 Narahanda igiri maria taba henenego uru. Ahusama Hebe Temeni Hahadari layaru hene.
1CH 4:7 Ai Asu one mende Hela ibugua igiri tebira taba henenego Serede Isiha Edenana layaru hene.
1CH 4:8 Koso igini kira Anubu Sobebala hene. Koso ibu Harumu igini Ahahele hameigininaga mamali hene.
1CH 4:9 Agali mini Yabese henego ibugua mana bayaleore biyagome ibu hamenerume bayale biyaru bolangua haihe hene. Anidagua bialu heagola wali agali maru bu hearume ibunaga mini yaraga halu hene. Ibu ai̱yahanda taba hanayangi ai̱ya ibu tandaga timbuniore nalu taba henene lowa ibu mini Yabese wini.
1CH 4:10 Horo mbirungi Yabesehanda Isaraele wali agalinaga Ngode Datagaliwabehondo bi lalu, Ngode Datagaliwabe-o í̠na i̱ biamogo bialu dindi dewaore ngibe. Ani bialu mbirale ko tara tara ngarume i̱ mo tandaga nahelo í̠ni i̱ heba mandagi haabo halu handayaho habelo hameledo, lene. Ani layagola Ngode Datagaliwabehanda Yabese ibunaga bi layago hale halu ibunime bia layago ale biai hene.
1CH 4:11 Suha hamene Kalebe ibu igini mbira Mehi hene. Mehi igini Esedono Esedono igini tebira henego mini Bederaba Pasea Tehina layaru hene. Tehina ibugua Nahasa tano pigane mo wini. Agali hameigini uruni ti dindi Lega winigonaga abene mbirahayagi hene.
1CH 4:13 Kenasa ibu igini kira Odoniele Seraiala hene. Odoniele ibu nde igini kira Hadada Meonodaila hene.
1CH 4:14 Meonodai igini Obora hene. Seraia igini Yoaba henego ibu wali agali dindi ulini mbira mini Agali Biabe Biahaga Dindi Ulini laga wiagoha hearunaga mamali hene. Dindi ogoni mini winidago irane agali dindi ogoniha heago tigua mbirale tara tara wabiai haga mini lene gibiore henegonaga mini ogoni wini.
1CH 4:15 Yabune igini Kalebe ibu igini tebira henego mini Iru Ela Nama layaru hene. Ani howa Ela igini Kenasa hene.
1CH 4:16 Agali mini Yahalele ibu igini maria heneru ti mini Sibi Siba Tiria Asarele laga biyaru hene.
1CH 4:17 Ai Esera igini maria henego uru. Yade Merede Ebe Yalono imaru hene. Merede ibu Iyibi kini heago wane mini Bidaia bereago dabu bini. Libu wane mini Miriama berene. Libu igini kira Samai Isibala hene. Isibahanda tano mini Esedemoa pigane mo wini. Ani bialu Merede ibu Yuda wali mbira dabu buwa libu igini tebira mini Yarede Hebe Yagudiele imaru hene. Yaredehanda Gedo tano mo wialu Hebehanda Sogo tano mo wialu Yagudielehanda Sanoa tano mo wialu tigua tano uruni pigane mo wigi bini.
1CH 4:19 Hodaiahanda Nahama mbalini dabu bini. Libu aguaneneme Garama hameigini Keila tanoni tagira íbu hene. Mende Magada hameigini Esedemoa tanoni tagira íbu halu bini.
1CH 4:20 Simono ibu igini maria henego mini Amanono Lina Benehanana Tilono imaru hene. Agali mini Isi ibu igini kira Sohede Benesohedela hene.
1CH 4:21 Yuda igini heneru mbira mini Sela hene. Sela ibu igini uru hene. Mbira Ere henego ibugua Lega tano pigane mo wialu mende Lada ibugua Maresa tano pigane mo wini. Bedeasabea tanoha hameigini hearu ti labolabo bayaleore wabiaga henego ti Lada aguanene hene. Ani bialu igini tebone mini Yogimi mane Yoasa dauni Saraba layaru hene. Yoasa Sarabala libugua Moaba wali dabu buwa Bedeleheme dindini hene. Ani howa libugua Moaba dindibi Yasubilaheme dindibi handayaho hene. Wali agali Nedaimi tanoha hearubi Gedera tanoha hearubi tigua todobene be dindime wabiaga howa kininaga biabe bialu hene. Bi ogoni agalime bambaore gilibu winiya.
1CH 4:24 Simeono ibu igini duria henego mini uru. Nemuele Yamini Yaribi Sera Saulubi laga biyaru hene. Saulu igini Salumu Salumu igini Mibisama Mibisama igini Misima Misima igini Hamuele Hamuele igini Sagu Sagu igini Simai Simai ibu igini nguirani mbira (16) halu ibu wane waragaria berene. Anigo ibu hameneru ti waneigini dewa nahonowi hene. Anidagua biyagome Simeono aria Yuda waneigini dewa headagua ndo hene.
1CH 4:28 Simeono hameigini ti Beaseba tanohabi Molada tanohabi Hasasuala tanohabi Biliha tanohabi Eseme tanohabi Tolada tanohabi Beduele tanohabi Homa tanohabi Sigilaga tanohabi Bede Magabodo tanohabi Hasasusimi tanohabi Bedebiri tanohabi Saraimi tanohabi ti bibahende uruniha hai hene. Simeono hameigini uruni ti tano uruniha heane dege Debidi ibu kini hene.
1CH 4:32 Ani bialu ti tano duria uruhabi ha dege bini. Edama Aini Limono Togene Asana tano uruniha hene.
1CH 4:33 Ani bialu dindi emene tano uruniha wiapara para biaruhabi hama pialu Balada tano hama tagira pene. Tano uruniha Simeono ibu waneigini aguaneru dege hene. Ani bialu Simeono hameigini ti mamali hama ibinidagua malu gilibu wigi bini.
1CH 4:34 Simeono hameiginiru aria agali haguane henerunaga mini uru. Mesobaba Yamalege Amasaia igini Yosa Yoele Yosibia igini Yahu uruni hene. Yosibia ibu Seraia igini halu Seraia ibu Asiele igini hene. Elioenai Yagoba Yasohaia Asaia Adiele Yasimiele Benaia Sibi igini Sisa imaru hene. Sibi ibu Alono igini halu Alono ibu mamali Yadaiabi Simiribi Semaiabi hene. Agali haguane uruni ti ho dame bialu dewaore hayagola ainde tinaga nogo bulumaga sibiru tani nelo bayale agoria kabe hondole taya bialu hene. Ani taya bialu tigua dindi ulini biagonaga abene ni tagira ibiragohayagi dindi mbira mini Gedo wiago kawareha taya bima pene.
1CH 4:40 Ani puwa handalu hearia tani bayale dindi ulini ogoniha andaho hearia hendene. Ani bialu dindi ulini bayale timbuni wuyu peago hendene. Ai ti dindi ogoniha pu heagola ti mo genda holene mbira nawi bayaleore mbira hene. Bamba Hama hameigini dindi ogoniha haga wini.
1CH 4:41 Hesegaia ibu Yuda dindiha kini heangi Simeono hameigini agali haguane uruni tigua dindi bayale tani anda haga biaga wiaria handa walia hene. Ani hondowa tigua Hama hameigini bababi Meuni hameigini hearu bababi wai bule pene. Ani puwa tigua wali agali bo wahai halu tinaga balai anda bu hearu bo gialo wahai halu mbirale mbira yu wanahe Simeono hameigini tigua dindi ogoni karulo hene.
1CH 4:42 Ani anda pu howa Simeono hameigini agali handari duria (500) bibahende Idomo dindini Hari Sia hearuha pene. Agali haguane uruni Isi iginiru tigua haru bamba hene. Isi iginidaru ti mini Peladaia Nearaia Lebaia Usiele imaru hene.
1CH 4:43 Bamba wali agali Amalege hameigini emene maru hangu dindi ogoniha heneyaru ai Isaraele wali agali handalu Idomo dindi Hari Sia hearuha ibida piai hene. Ani pu hearia Isaraele tigua bo wahai halu dindi ti karulo hene.
1CH 5:1 Yagaba ibu mini mende Isaraele ibu igini wahene Lubene hene. Lubene ibu aba one halu mende berenego aria mbira page biyagome igiri waheneme paluni holene winigo wahalu Yosebe ibu ha aribia hene.
1CH 5:2 Ani binigoyu Yuda hameigini tigua hameigini maru bolanguahe halu ti bibahendenaga kini mbira tiha howa tagira ibini.
1CH 5:3 Lubene ibu Yagaba igini wahene howa ibu igini maria henego mini Hanogo Palu Heserono Kami imaru hene.
1CH 5:4 Yoele ibu damenego ogodagua hama ibini. Yoele igini Semaia Semaia igini Gogo Gogo igini Simai Simai igini Maiga Maiga igini Leaia Leaia igini Bala Bala igini Bera hene. Bera ibu Lubene hameigininaga agali haguane mbira hearia Asirianaga Kini Tigilada Pilese ibugua ibalu Bera minu garabaya bu yalu Asiria dindi pene.
1CH 5:7 Lubene ibu hameigininaga agali haguane henegonaga mini uru. Mbira Yaiele mende Segaraia tebone Bela hene. Bela ibu Asasa igini Asasa ibu Sema igini Sema ibu Yoele igini hene. Bela hameigini uruni ti Aroe tanoha palima pialu Aroe tano abene uyurahayagi Nebo tanobi Balameono tanohabi palima puabo hene.
1CH 5:9 Ti Gileada dindihayagi howa nogo bulumaga sibiru bayale dewa hinalu hene. Ani biyagola ti maru nde dindi abene ni tagira ibiragohayagi dindi ko iba dalu naibaga Iba Yuberedisi poragoha hapara howa hene.
1CH 5:10 Solo ibu kini heangi Lubene hameigini uruni tigua Haga hameigini hearu baba wai bialu bo wahai halu dindi ti karulai hene. Dindi ogoni Lubene hameigini dindi wiagonaga abene ni tagira ibiragohayagi Gileada dindiha wini.
1CH 5:11 Gada hameigini ti Lubene hameigininaga dindi abene uyurahayagi Basana dindi wiagoha hene. Tinaga dindi tubari ni tagira ibiragohayagi Salega tano wiagoria wiatagi hene.
1CH 5:12 Gada hameigini maru ti nde Basana dindiha hene. Hameigini duninigonaga haguane Yoele ibu howa haguane mende Sabama hene. Yanai Sabadala libugua hameigini maru haru haga howa Basana dindiha dege hene.
1CH 5:13 Ani heagola Gada hameigini maru ha dege binigo tinaga mini uru hene. Maigele Mesulama Seba Yorai Yagana Sia Ebere imaru hene.
1CH 5:14 Agali uruni ti Huri igini Abihaili henegonaga aguanene hene. Abihaili ibu Huri igini Huri ibu Yaroa igini Yaroa ibu Gileada igini Gileada ibu Maigele igini Maigele ibu Yasisai igini Yasisai ibu Yado igini Yado ibu Busu igini hene.
1CH 5:15 Ani heagola hameigini uruninaga agali haguane mini Ahi ibu Abadiele igini howa Guni aguane hene.
1CH 5:16 Hameigini karia uruni ti Gileada dindini tano wiaruhabi Basana dindini tano wiaruhabi howa tinaga nogo bulumaga sibiru tani bayale Sarono dindini heago nalu helene.
1CH 5:17 Gada hameigini ogodagua hene lalu malu gili binidagoni Yudanaga Kini Yodama ibu heangi Isaraelenaga Kini Yaroboama ibu heangibi gili bu wini.
1CH 5:18 Isaraele hameigini tebira Lubene Gada Manase imaru ti Iba Yodana abene ni tagira ibiragohayagi henego uruni tinaga wai biaga ami agali bayaleru daosini pira mariani maria handari kariani pira waragaria (44,760) hene. Tigua wai pialu humbi yuwa ayu tibume agali dibalu danda timumebi agali baga wayali dege dege hene.
1CH 5:19 Ani howa tigua hameigini maria tara tara Haga hameiginibi Yadu hameiginibi Nabisi hameiginibi Nodaba hameiginirubi baba wai bule pene.
1CH 5:20 Wai bu pole howa Isaraele hameigini uruni tigua Ngode Datagaliwabeha hana howa ibuhondo biamogo bibe lalu hene. Ani layagola nde Ngode Datagaliwabehanda ti biamogo biaore biyagola tigua waitigi uruni bope hai hene.
1CH 5:21 Ani bialu Isaraele tigua wayali howa waitiginaga nogo tara tara bu hearu bibahende haru hai hene. Nogo kamele daosini dege pira duria (50,000) haru halu sibi daosini dege handari kirani pira duria (250,000) haru halu nogo dongi daosini kira (2,000) haru hene. Ani bialu waitigi agali daosini dege handari mbira (100,000) minai hene.
1CH 5:22 Anigo Ngode Datagaliwabe ibunime wai ogoni bilo handaya ho heagome tinaga waitigi dewaore waiha homai hene. Ani bialu Isaraele tigua dindi ogoni ti karulo heane dege waitigi tara mende heago ibalu Isaraele wali agali dindi taraha garabaya bu yu piai hene.
1CH 5:23 Manase hameigini halu mende hayadago ti timbuniore hene. Tinaga dindi Basana wiagoria howa wima pialu dindi abene uyurahayagi pialu Balahemono wiagoria puabo halu Hari Seniri mini mende Hari Hemono heagoria tagira pene.
1CH 5:24 Ti hameigininaga agali haguane uru hene. Ebe Isi Eliele Asariele Yaremaia Hodabaia Yadiele imaru hene. Agali haguane uruni agali bayale mini leneore howa wai biaga ami agali hongohe gibioreru hene.
1CH 5:25 Hameigini Lubene Gada Manase hameigini halu mende hayadaru tigua mana koore bialu walime ti agalini helalu agali maru bu karu baba kayu bima ibaga biagadagua bialu tinaga mamalirunaga Ngode Datagaliwabe kagonaga bi mo wahalu mana ko bialu hene. Pigane Isaraele hameigini ti dindi ogoriani anda ibiyagola nde Ngode Datagaliwabehanda wali agali dindi ogoni anduane hearu bo taliatagi hai hene. Ani binigo ai Isaraele hameigini uruni tigua wali agali ala henegome mbirale dama mitangi bialu gime wabini wiaruhondo bi pupu wiagadagua wialu hene.
1CH 5:26 Anidagua bialu heagola Ngode Datagaliwabehanda Asirianaga Kini Pulu mini mende Tigilada Pilese heagonaga miniha mo heya hayagola Asiriali tigua Isaraele baba wai bule ibalu Isaraele bope halu ti wayali hene. Ani bialu Asiriali tigua Isaraele wali agali bibahende garabaya bu yalu puwa dindi maru mini Hala wiagohabi Habo wiagohabi Iba Gosana peago kawarenibi hari mini Hara heago barebare dindi wuyu peagohabi helaga bini. Anidagua bigi binigo áyu haabo ka.
1CH 6:1 Libai igini tebira henego mini uru. Gesono Kohada Merari laga biyaru hene.
1CH 6:2 Kohada igini maria henego Amarama Isiha Heberono Usiele imaru hene.
1CH 6:3 Amarama igini Arono Mosesela halu wane mbiraore Miriama berene. Arono igini Nadaba Abihu Eleasa Idama laga biyaru hene.
1CH 6:4 Eleasa igini Piniasa Piniasa igini Abisua Abisua igini Bugi Bugi igini Usi Usi igini Serahaia Serahaia igini Meraiodo Meraiodo igini Amaraia Amaraia igini Ahidubu Ahidubu igini Sadogo Sadogo igini Ahimasa Ahimasa igini Asaraia Asaraia igini Yohanana Yohanana igini Asaraia mende hene. Kini Solomonohanda Ngode Datagaliwabenaga anda Yarusalemeni bialu heangi Asaraia ogoni ibu loma binigo mo miaga haguane hene.
1CH 6:11 Asaraia ogoni ibu igini Amaraia Amaraia igini Ahidubu Ahidubu igini Sadogo Sadogo igini Salumu Salumu igini Hiligaia Hiligaia igini Asaraia Asaraia igini Seraia Seraia igini Yahosadaga hene.
1CH 6:15 Ani henego ainde horo mbirungi Anduane Homogohanda Kini Nebugadanesanaga mini mo heya hayagola Babilono agali hearume ibalu Yudalirubi Yarusalemealirubi garabaya bu yalu Babilono penego ogoningi Yahosadagabi ti heba garabaya bule minu yalu pene.
1CH 6:16 Libai igini tebira Gesono Kohada Merari imaru hene. Uruni ti iginibi nde henego mini uru. Mbira Gesono ibu igini Libini Simeila hene.
1CH 6:18 Kohada ibu igini maria Amarama Isiha Heberono Usiele layaru hene.
1CH 6:19 Merari ibu igini Mali Musila hene. Agali uruni ti Libai igini aguaneru hene.
1CH 6:20 Gesono igini aguaneru henego urudagua hama ibini. Gesono igini Libini Libini igini Yahada Yahada igini Sima Sima igini Yoa Yoa igini Ido Ido igini Sera Sera igini Yaderai laga biyaru hene.
1CH 6:22 Kohada ibu damene hama ibinigo uru. Kohada igini Aminadaba Aminadaba igini Kora Kora igini Asiri Asiri igini Elegana Elegana igini Ebiasaba Ebiasaba igini Asiri mendego Asiri ogoni igini Tahada Tahada igini Uriele Uriele igini Usia Usia igini Saulu layaru hene.
1CH 6:25 Elegana ibu igini kira Amasai Ahimodola hene. Ahimodo igini Elegana mendego Elegana ogoni igini Sobai Sobai igini Nahada Nahada igini Eliaba Eliaba igini Yarohama Yarohama igini Elegana tebonego Elegana ogoni igini Samuele hene.
1CH 6:28 Samuele igini kira henego wahene Yoele heyogone Abiyala hene.
1CH 6:29 Libai igini Merari ibunaga igini aguaneru ogodagua hama ibini. Merari igini Mali Mali igini Libini Libini igini Simei Simei igini Usa Usa igini Simea Simea igini Hagia Hagia igini Asaia hene.
1CH 6:31 Agali maru Anduane Homogonaga andaha iba gana lalu ngida ale tara tararu balu helonaga Kini Debidi ibugua ti dabo helene. Kini Debidi ibugua Anduane Homogonaga Habo Nalolene Bi lo winigonaga Mbogoyi biago mo yalu Anduane Homogonaga Balai Anda Yarusalemeni bu helayagoha ngelole ibiyangi Debidi ibugua agali uruni dabo helene.
1CH 6:32 Kini Solomono ibugua Yarusalemeni Anduane Homogonaga anda nabi howa Balai Anda hangu bu heangi agali uruni tigua tinaga biabe ogoni biaga hene. Wali agalirume Anduane Homogonaga Balai Anda bu heagoha ngoai hayangi agali uruni tigua ngidaru balu iba ganabi lalu haga hene.
1CH 6:33 Agali tebiralime ngida aleru balu iba gana lelonaga biabe ogoni haru haga helo ti dabo helene. Ani biyagola mani agali uruni ti igini aguanerumebi biabe ogoni dege bialu hene. Kohada hameigini agali haguane hayadago mini Hemana hene. Ibugua iba gana lolene mugube howa iba gana laga agali wabuni mbira heneru haru haga hene. Hemana ibu Yoele igini Yoele ibu Samuele igini Samuele ibu Elegana igini Elegana ibu Yarohama igini Yarohama ibu Eliele igini Eliele ibu Toa igini Toa ibu Subu igini Subu ibu Elegana igini Elegana ibu Mahada igini Mahada ibu Amasai igini Amasai ibu Elegana igini Elegana ibu Yoele igini Yoele ibu Asaraia igini Asaraia ibu Sebanaia igini Sebanaia ibu Tahada igini Tahada ibu Asiri igini Asiri ibu Ebiasaba igini Ebiasaba ibu Kora igini Kora ibu Isiha igini Isiha ibu Kohada igini Kohada ibu Libai igini Libai ibu nde Yagaba igini hene.
1CH 6:39 Debidi ibugua Asaba ibu iba gana lagaru wabuni halu mende haru helo dabo helene. Ibu Hemanala libu biabe mandagi biaga hene. Iba gana lole ngida bolene harangi Asaba ibunaga agali urunime Hemana ibunaga agali biarume gi tigahayagi heyu haga hene. Asaba ibu Beregaia igini Beregaia ibu Simea igini Simea ibu Maigele igini Maigele ibu Basea igini Basea ibu Malagiya igini Malagiya ibu Edeni igini Edeni ibu Sera igini Sera ibu Adaia igini Adaia ibu Edana igini Edana ibu Sima igini Sima ibu Simei igini Simei ibu Yahada igini Yahada ibu Gesono igini Gesono ibu Libai igini hene.
1CH 6:44 Merari hameigini agali haguane mini Edana ibugua iba gana lagaru wabuni halu tebone heneru haru helo Debidihanda dabo helene. Agali uru tigua iba gana lalu ngidaru bole howa Hemana hameiginirunaga gi lehayagi heyu haga hene. Edana ibu Kisi igini Kisi ibu Abadi igini Abadi ibu Malugu igini Malugu ibu Hasabaia igini Hasabaia ibu Amasaia igini Amasaia ibu Hiligaia igini Hiligaia ibu Amasi igini Amasi ibu Bani igini Bani ibu Seme igini Seme ibu Mali igini Mali ibu Musi igini Musi ibu Merari igini Merari ibu Libai igini hene.
1CH 6:48 Anduane Homogonaga andaha biabe maru bulene wiaru damene bialu helonaga Libai agali maru tigua dabo helaga bini.
1CH 6:49 Arono halu ibu igini aguaneru tigua Anduane Homogonaga lomabu delaga dabu wiagoria ira hagua ngabilo inisenesibi nogo tara tara loma biniru dai helonagabi biabe bialu haga hene. Ani bialu anda tamu Hobane Loma Bia Heneore biagohabi Anduane Homogo mitangi bialu biabe bialu haga hene. Ani bialu tigua Isaraele wali agalime ko biyaru domo wahelonaga lomabu delaga hene. Tigua biabe uruni bialu howa Anduane Homogonaga biabe biaga Mosesehanda ogodagua bilimu lalu Aronohondo lamiyadagua bialu hene.
1CH 6:50 Arono igini aguaneru uru hene. Arono igini Eleasa Eleasa igini Piniasa Piniasa igini Abisua Abisua igini Bugi Bugi igini Usi Usi igini Serahaia Serahaia igini Meraiodo Meraiodo igini Amaraia Amaraia igini Ahidubu Ahidubu igini Sadogo Sadogo igini Ahimasa hene.
1CH 6:54 Isaraeleali tigua Arono aguanene Kohada hameiginihondo dindi tanobi tu wu minidaru mini uru gilibu nga. Isaraele tigua Libai hameigini dindi tu wu mulenaga hameigini emene haga biadagua ago ibu dindi ala mulubadabe hondolenaga ege to̱le̱ emeneni mini gili buwa baraga halu hene. Anidagua biyagola Arono aria hearu ti dindi ala mulene wiaria hendene.
1CH 6:55 Ani hondowa tigua Heberono tano Yuda dindihayagi wiago ti helo mini. Ani bialu dindi emene Heberono tanobi dindi emene ogonihayagi wiapara hearubi heba Arono aria ti helo mia dege bini. Dindi uruniha tinaga nogo sibi bulumagaru tani nolene bayale andahohe wiaru mini.
1CH 6:56 Anigo Isaraele tigua Heberono tanoha mabu bayale wiapara hearuni Arono aria hearu nami Yabune igini Kalebe heagohondo mini.
1CH 6:57 Isaraeleali tigua Heberono tano Arono aria hearu mini. Heberono tano ogoni Isaraele tigua agali bo waholilono ibu ibida pialu ha do helonaga tano dabo wini mbirago ogoni wini. Ani bialu tigua Arono aguane heneruhondo tano uru mia dege bini. Yadiribi Libinabi Esedemoabi Hilenebi Debiribi Asanabi Bedesemesebi tano uruni migi bini. Dindi emene maru tano uruniha wiapara hene wiaru tinaga nogo bulumaga sibiru tani nalu helo tani bayale anda haga wiaru heba migi bini.
1CH 6:60 Ani bialu Isaraeleali tigua tano maru Beniyamini hameigini dindi wiagohayagi wiarubi Libai hameiginiru mia dege bini. Tano uruni mini Gebabi Alemedebi Anadodobi wini. Ani bialu tano uruninaga dindi taniru bayale anda haga wiaru heba mia dege bini. Tigua tano haleria (13) bibahende Arono aria tu wu mini.
1CH 6:61 Ani bialu Isaraeleali tigua ege to̱le̱ dindi walia helonaga lone baraga halu tano pira Kohada hameigini hearunaga tu wiabagi hene. Tano uruni Manase dindiha dindi abene ni paliragohayagi wiaru tu wu migi bini.
1CH 6:62 Ani bialu tigua tano haleria (13) bibahende Gesono hameigini hearunaga tu wiabagi ho wini. Tano uruni hameigini Isaga dindihabi Ase dindihabi Nabadali dindihabi Manase hameigini halu mende Basana dindiha hearunaga dindihabi tu wu mini.
1CH 6:63 Ogonidagua tigua Merari hameigini hearuhondo tano hombearia (12) tu wu mini. Tano uruni Lubene dindiha howabi Gada dindiha howabi Sebulunu dindiha howabi tu wu migi bini.
1CH 6:64 Isaraele agali tigua anidagua bigi bialu Libai hameigini hearuhondo tanobi dindi maru tani bayaleru anda haga wiaru tinaga nogo bulumaga sibiru nelobi tu wu migi bini.
1CH 6:65 Tano uruni Yuda dindihabi Simeono dindihabi Beniyamini dindihabi howa tu wu migi binigonaga mini gilibu ngaruni tigua dindi walia helonaga ege to̱le̱ emene baraga halu ogonime mo walia haga biyagola tano ogoni dabaga bini.
1CH 6:66 Tano maru Kohada hameigini ti migi binidaru Eberaimi hameigini dindiha wini.
1CH 6:67 Segeme tano wiago Kohada hameigini tu wu miyadaruni Eberaimi dindi hari bareha wini. Tano ogoni Isaraele tigua agali bo waholilono ibida pialu ha do haga winigo Kohada hameigini mo mini. Tano maru Kohada hameigini minidaru Gesebi Yogomeamabi Bedehoronobi Aiyalonobi Gadarimonobi wigi bini. Tano uruni Kohada hameigini tu wu mialu howa dindi maru tani bayale anda haga nogo bulumaga sibiru nalu holene dindi tano kaware wiaru heba mia dege bini.
1CH 6:70 Kohada tinaga tano maru Manase hameigini halu mende hearu dindihabi wia dege biniru Ane Bileamabi wini. Tano uruni heba dindi bayale nogo bulumagabi sibirubi tani nolene anda haga wiaru nelonaga mia dege bini.
1CH 6:71 Tano maru Isaraele tigua Gesono hameiginihondo minidaruni dindi bayale tani anda haga wiaru nogo bulumaga sibirubi nelonaga mini. Manase hameigini halu mende hearu daluhayagi tano wiaru tu wu mini. Basana dindiha tano kira Golana Asadarodola wiagobi mini.
1CH 6:72 Isaga dindiha tano Gedese Daberada Lamodo Aneme winiru migi bini.
1CH 6:74 Ase dindiha tano mini Masala Abadono Hugogo Lehobo winiru migi bini.
1CH 6:76 Nabadali dindiha tano wiaru mini Kedese Galili dindihayagi wiagobi Hamono Kiriadaimila wiagobi mia dege bini.
1CH 6:77 Libai aria dege Merari hameigini hearu tano minidaruni dindi tani bayale anda haga wiaru heba tu wu migi bini. Sebulunu dindiha tano Limono Tabola winigo mini.
1CH 6:78 Lubene dindiha tano winidago mini Bese Iba Yodana doma edera ni tagira ibiragohayagi Yarigo tano kaware dege lowa dindi ko iba dalu naibaga wiago mini. Tano Yasa Kedemodo Mebadaru tu wu migi bini.
1CH 6:80 Gada hameigini dindiha tano maru mini Lamodo Gileada dindiha wiagobi Mahanaimi Hesebono Yaseru wigi bini. Anidagua bialu Isaraele tigua tano maru ti helo mialu tano kawareni tinaga nogo bulumaga sibirume nelonaga dindi bayale tani anda haga wiaru heba Merari hameigini tu wu migi bini.
1CH 7:1 Isaga igini maria henego mini Tola Pua Yasubu Simirono laga biyaru hene.
1CH 7:2 Tola igini waragaria henego mini Usi Lebaia Yariele Yamai Ibisama Semuele imaru hene. Agali uruni ti ami agali hongoheore howa ti Tola aria hearunaga agali haguane hene. Debidi ibu kini heangi Tola hameigini aguaneneru ti ami agali habehe dege daosini pira kirani kira handari waragaria (22,600) hene.
1CH 7:3 Usi ibu igini mbiraore dege henego mini Isirahaia hene. Ani howa Isirahaia ibu igini maria henego mini Maigele Obadaia Yoele Isaia laga biyaru hene. Agali uruni ti nde tini hameigininaga agali haguane hene.
1CH 7:4 Agali uruni ti wali dewa dabu bialu tinaga waneiginibi dewaore henego ti ami agali habeheru dege daosini pira tebirani waragaria (36,000) hene.
1CH 7:5 Isaga hameigini bibahende daga lamaga halu gilibu wiaru handalu hearia agali ami habeheru dege daosini pira halirani karia (87,000) gilibu wini.
1CH 7:6 Beniyamini ibu igini tebira henego mini Bela Bege Yadiaele layaru hene.
1CH 7:7 Bela ibu igini duria henego mini Esebono Usi Usiele Yarimodo Iri imaru hene. Agali uruni ti hameigini hearunaga haguane dege howa ami agali hongohe mini lene hene. Hameigini uruni tinaga aguanene bibahende daga lamaga howa agali hongohe ami habeheru dege daosini pira kirani kira halu huniane pira tebirani maria (22,034) hene.
1CH 7:8 Bege ibu igini dira henego mini Semira Yoasa Eliese Eleonai Omori Yaremodo Abiya Anadodo Alemede imaru hene.
1CH 7:9 Agali uruni ti aguanene heneru daga lamaga howa ami agali habeheru dege daosini pira kirani handari kira (20,200) hene.
1CH 7:10 Yadiaele ibu igini mbiraore Bilihana hangu hene. Bilihana ibu igini karia henego mini Yausu Beniyamini Ehudu Kenana Sedana Tasisi Ahisaha imaru hene.
1CH 7:11 Agali uruni ti Yadiaele hameigininaga agali haguane howa ti ami agali hongohe mini leneru hene. Ai ti damene bibahende daga lamaga howa handalu hearia agali hongohe ami habeheru dege daosini pira mbirani kariani handari kira (17,200) hene.
1CH 7:12 Iri aguanene Subimi hameiginibi Hubimi hameiginibi hene. Ani bialu Ahe aguanene ti Husimi hameigini hene.
1CH 7:13 Nabadali igini maria henego mini Yasiele Guni Yase Salumu layaru hene. Ti wali mini Biliha berenego aguanene hene.
1CH 7:14 Manase igini kira Asariele Magiala hene. Libu ai̱ya Manase one halu mende bereneru aria mbira Aramea wali berene. Magia ibu igini Gileada hene.
1CH 7:15 Magia ibugua wali mbira Hubimi wali mende Subimi wali dabu bia hene. Magia mbalini mini Maga berene. Magia igini mende mini Selobehada henego ibu igini nahe wandari hangu aba hene.
1CH 7:16 Ani bialu Magia one mini Maga dege berenego ogoni ibugua igiri kira taba henene. Ibu igini kira Perese Seresela hene. Serese igini kira Ulama Lagemela hene.
1CH 7:17 Ulama ibu igini mbiraore Bedana hangu hene. Wali agali uruni ti Gileada aguanene dege hene. Gileada ibu Magia igini halu Magia ibu Manase igini hene.
1CH 7:18 Gileada mbalini Hamolegede berenego ibugua igiri tebira taba henenego mini Isihodo Abiese Mala laga biyaru hene.
1CH 7:19 Semida igini heneru mini Ahiana Segeme Ligi Aniama imaru hene.
1CH 7:20 Eberaimi aguanene heneru mini uru. Eberaimi igini Sudela Sudela igini Berede Berede igini Tahada Tahada igini Eleada Eleada ogoni igini Tahada dege mende Tahada ogoni igini Sabada Sabada igini Sudela dege mende hene. Eberaimi igini kira mani henego mini Ese Eleadala hene. Ani henego ai horo mbiru libugua hameigini tara Gede hearunaga nogo sibi bo page bule Gede dalu wiagohayagi daliape halu pu hearia Gedeali hearume libu homelo bo wahene.
1CH 7:22 Ani homayagola libu aba Eberaimihanda dara timbuni howa dugu bialu biraabo heagola ibu damene maru hearu ibalu ibunaga bu miniha mo palia haga bialu hene.
1CH 7:23 Mani howa Eberaimi one ibu yamu ko biruwa ibugua igiri mbira taba henene. Ani taba hanayagola Eberaimihanda igiri ogoni mini Beraia wini.
1CH 7:24 Eberaimi wane mbira mini Seraha berene. Ibuni heba ibu damenerume tano Bedehorono Daliga lagago pigane mo wialu tano mende Bedehorono Dindiha lagago mo wialu Useneseraha tanobi pigane mo wia dege bini.
1CH 7:25 Eberaimi igini mbira mini Leba hene. Leba igini Lesebe Lesebe igini Tela Tela igini Tahana Tahana igini Ladana Ladana igini Amihudu Amihudu igini Elisama Elisama igini Nunu Nunu igini Yosua hene.
1CH 7:28 Eberaimi tinaga dindiha Bedele tanobi dindi maru wiapara para bini wiarubi dindi bibahende Narana tano ni tagira ibiragohayagi howa wima pialu ni paliragohayagi Gese tano wiagoria wima tagira pialu dindi maru Gese kaware wiapara para bini wiaru bibahende tinaga dege wia. Ani bialu Segeme tano heba dindi maru wiapara para bini wiarubi Aya tano heba dindi emene wiapara para bini wiarubi tinaga dege wia. Ani bialu Aya tano heba dindi wiapara hene wiarubi tinaga dege wini.
1CH 7:29 Manase aguaneneru tigua Bedesana tanobi Tanaga tanobi Megido tanobi Doro tanobi tano maru dindi emene wiapara hene wiarubi tinaga wini. Ani winigo Yagaba igini Yosebe aguaneneru ti nde dindi uruniha hai haga hene.
1CH 7:30 Ase igini maria henego mini uru. Imina Isiba Isibi Beraia layaru hene. Ani bialu Ase wane mbira Sera berene.
1CH 7:31 Beraia igini kira Hebe Malagielela hene. Malagiele igini Bisaidi hene.
1CH 7:32 Hebe igini Yabalede Some Hodama imaru halu ibu wane mbira Sua berene.
1CH 7:33 Yabalede ibu igini tebira henego mini uru Pasaga Bimihala Asabada imaru hene.
1CH 7:34 Yabalede hamene Some ibu igini tebira dege henego uru Loga Yahuba Arama layaru hene.
1CH 7:35 Ibu hamene Hodama igini maria henego mini Soba Imina Selese Amala imaru hene.
1CH 7:36 Soba igini uru hene. Sua Hanebe Suala Beri Imira Bese Hodo Sama Silisa Idirana Bera layaru hene.
1CH 7:38 Yade igini uru hene. Yabune Pisiba Ara layaru hene.
1CH 7:39 Ula igini uru hene. Ara Haniele Lisia layaru hene.
1CH 7:40 Agali uruni ti Ase aguaneneru howa tinaga hameigini mbira mbiranaga agali haguane howa ti ami agali hongohe bayaleore mini leneru hene. Ase hameigini bibahende daga lo winigo ami agali hongoheru dege daga lowa ti daosini pira kirani waragaria (26,000) hene.
1CH 8:1 Beniyamini ibu igini duria hene. Bela Asabele Ahara Noha Laba layaru hene.
1CH 8:3 Bela ibu igini mini uru. Ada Gera Abihudu Abisua Namana Ahoa Gera Sebubana Hurama layaru hene.
1CH 8:6 Ehudu igini aguaneru henego uru. Namana Ahiya Gera imaru hene. Agali uruni ti Geba tanoha howa hameigini emene bu hearunaga agali haguane hene. Ti ani heangi Gerahanda ibu hameneru ti waneigini damene heba bo taliatagi haya handala ti pialu Manahada tanoha pu hene. Gera ibu Usa Ahihudula aba hene.
1CH 8:8 Saharaimi ibu Moaba dindiha howa ibu one kira Husimi Barala wahene. Ani buwa mani ibu wali Hodese dabu bu aribia howa ibu igini karia hene. Igiri uruni mini Yobaba Sibia Mesa Malagama Yausu Sagia Mirima imaru hene. Uruni ti tinaga hameigini hearunaga agali haguane hene.
1CH 8:11 Ala Saharaimi one Husimihanda igiri kira taba henenegobi ha dege bini. Libu mini Abidubu Elebalala hene.
1CH 8:12 Elebala ibu igini tebira henego uru. Ebe Misama Semede layaru hene. Semede halu ibu damene bu hearu tigua Ono tanobi Lodo tanobi pigane mo wialu dindi emene marubi mo wia dege bini.
1CH 8:13 Beraia hameigini Sema hameiginibi ti Aiyalono tano wiagoria hene. Libu damene bu hearunaga agali haguane libuni howa Gede tanoha hearu baba wai bialu libugua wali agali ogoniha haga hearu bo batagi hai hene.
1CH 8:14 Beraia igini uru hene. Ahio Sasaga Yaremodo Sebadaia Arada Ede Maigele Isiba Yoha imaru hene.
1CH 8:17 Elebala igini mini uru Sebadaia Mesulama Hisigi Hebe Isimerai Isilia Yobaba layaru hene.
1CH 8:19 Simai igini mini uru. Yagimi Sigiri Sabadi Elienai Siledai Eliele Adaia Beraia Simirada layaru hene.
1CH 8:22 Sasaga igini mini uru. Isibana Ebe Eliele Abadono Sigiri Hanana Hananaia Elama Andodiya Ibidea Penuele imaru hene.
1CH 8:26 Yarohama igini ogodagua hene. Samaserai Seharaia Adalia Yaresaia Elaya Sigiri layaru hene.
1CH 8:28 Agali uruni Yarusalemeni heangi ti agali timbuni mini leneru howa ti hameigininaga agali haguane haga bini.
1CH 8:29 Yaiele ibugua Gibeono tano pigane mo wialu ibu one Magala libu Gibeono tanoni hene.
1CH 8:30 Ibu igini wahene mini Abadono hene. Ibu igini maru mini Sua Kisi Bala Nere Nadaba Gedo Ahio Segaraia Migilodo layaru hene. Ai Migilodo ibu Simea aba hene. Agali uruni ti Yarusaleme tano kawareni Beniyamini hameigini heagoria dege hene.
1CH 8:33 Nere igini Kisi Kisi igini Kini Solo hene. Solo ibu igini maria hene. Yonadana Malagisua Abinadaba Esebala henego ibu mini mende Isibosede hene.
1CH 8:34 Yonadana igini Meribala hene. Meribala ibu mini mende Mebibosede henego ibu igini Maiga hene.
1CH 8:35 Maiga ibu igini maria Pidono Melege Tarea Ahasa imaru hene. Ahasa igini Yahoada Yahoada igini tebira Alemede Asamabede Simiri imaru hene. Simiri igini Mosa Mosa igini Binea Binea igini Laba Laba igini Eleasa Eleasa igini Asele hene.
1CH 8:38 Asele ibu igini waragaria henego mini Asarigama Bogeru Isimaele Searaia Obadaia Hanana layaru hene.
1CH 8:39 Asele hamene Esege ibu igini tebira Ulama Yausu Elibelede imaru hene.
1CH 8:40 Ulama igini ti wai biaga wayali howa danda yandarerume agali baga hene. Ulama igini aguaneru lamaga halu handari mbirani pira duria (150) hene. Agali mini o gilibu ngaru ti bibahende Beniyamini hameigini hene.
1CH 9:1 Isaraele wali agali bibahende heneru ti hameigini mbira mbira mini lalu mbuga mbira mini Isaraelenaga Kini Henerunaga Bi Te laga ngagoha gilibu nga. Wali agali Yuda dindiha hearume mana ko wiaru bialu howa Anduane Homogo erembira mini. Anidagua biyagola Anduane Homogohanda Babilono ami agali ibilalu tigua wali agali uruni minu garabaya bu yalu ti Babilono dindiha piai hene.
1CH 9:2 Ani penego mani howa wali agali maru garabaya golalu tini dindi wiyagoria dai bini. Isaraele wali agali maru ala dai biyaruni heba loma binigo mo miaga hearu ariabi Libai aria hearubi wali agali Ngode Datagaliwabenaga andaha biabe bialu haga heneru ariabi dai bigi bini.
1CH 9:3 Wali agali Yuda hameigini ariabi Beniyamini ariabi Eberaimi ariabi Manase ariabi Yarusaleme tanoha daibu hai hene.
1CH 9:4 Yuda hameigini aria handari waragariani pira dira (690) bibahende ibalu Yarusalemeni hene. Tinaga agali haguane mini Udai hene. Udai ibu Amihudu igini Amihudu ibu Omiri igini Omiri ibu Imiri igini Imiri ibu Bani igini hene. Wali agali uruni ti Yuda igini Perese aguaneneru hene. Agali haguane mende mini Asaia hene. Yuda igini wahene Sela aguanene hearunaga agali haguane Asaia hene. Yuda igini Sera henego ibu aguanene bu hearunaga agali haguane Yuele hene.
1CH 9:7 Beniyamini hameigini Yarusalemeni henerunaga agali haguane mbira mini Salu hene. Salu ibu Mesulama igini Mesulama ibu Hodabaia igini Hodabaia ibu Hesenua igini hene. Beniyamini hameigininaga agali haguane mende mini Ibinea hene. Ibinea ibu Yarohama igini Yarohama ibu Ela igini Ela ibu Usi igini Usi ibu Migiri igini hene. Agali haguane tebone mini Mesulama dege mende hene. Mesulama ibu Sebadaia igini Sebadaia ibu Luele igini Luele ibu Ibiniya igini hene.
1CH 9:9 Beniyamini hameigini bu heneru ti bibahende handari dirani pira duriani huniane waragaria (956) henerunaga agali haguane mini uruni.
1CH 9:10 Loma binigo mo miaga hearunaga agali haguane maru haga binigo mini uru. Yadaia Yahoiaribi Yagini Asaraia layaru hene. Asaraia ibu Ngode Datagaliwabenaga anda handayaho haga agali haguane mbira hene. Asaraia ibu Hiligaia igini Hiligaia ibu Mesulama igini Mesulama ibu Sadogo igini Sadogo ibu Meraiodo igini Meraiodo ibu Ahidubu igini hene. Agali haguane mini Adaia henego ibu Yarohama igini Yarohama ibu Pasuru igini Pasuru ibu Malagiya igini hene. Agali haguane mini Masai henego ibu Adiele igini Adiele ibu Yasera igini Yasera ibu Mesulama igini Mesulama ibu Mesilemidi igini Mesilemidi ibu Ime igini hene.
1CH 9:13 Loma binigo mo miaga daosini mbirani handari kariani pira waragaria (1,760) heneru ti hameigini emene haga haga biyarunaga agali haguane tini hene. Loma binigo mo miaga haguane uruni tigua Ngode Datagaliwabenaga andaha biabe tara tara bulene wiaru bibahende manda biaihe hene.
1CH 9:14 Libai agali marume Libai hameigini bu hearunaga agali haguane howa Yarusalemeni hene. Agali haguane mbira Hasubu igini Semaia hene. Hasubu ibu Asarigama igini Asagirama ibu Hasabaia igini hene. Agali uruni ti Merari hameigini dege agali haguane hene.
1CH 9:15 Agali haguane maru nde uru hene. Bagabaga Herese Galala Madanaia layaru hene. Madanaia ibu Miga igini Miga ibu Sigiri igini Sigiri ibu Asaba igini hene.
1CH 9:16 Agali haguane mbira mini Obadaia henego ibu Semaia igini Semaia ibu Galala igini Galala ibu Yadudunu igini hene. Agali haguane dege mini Beregaia ibu Elegana aguane howa Asa igini hene. Beregaia ibu dameneru ti Nedoba tano kawareni dindi emene wiagoha hene.
1CH 9:17 Wali agali garabaya pu henego golalu dai buwa agali maru Ngode Datagaliwabenaga anda mamage haga heneru aria Yarusaleme dai bu hene. Agali uruni tinaga mini Salumu Agubu Talamono Ahimana imaru ti damene heba biabe mandagi biagaru dai bini. Salumu ibu agali uruninaga haguane hene.
1CH 9:18 Bamba Yarusaleme tano bo gialabaga nabi wiangi hameigini uruni tigua Ngode Datagaliwabenaga anda biagonaga panga ni tagira ibiragohayagi mini Kininaga Panga Haraba laga heago mamage haga hene. Bambaore howa Isaraele wali agali dindi ko dalu naibaga wiagoha heangi hameigini uruni tigua Libai hameigininaga balai anda bu hearu mamage haga hene.
1CH 9:19 Horo ogoningi Kora hameigini hearu tigua Anduane Homogonaga Balai anda haraba wiagoria mamage haga hene. Eleasa igini Piniasa ibugua agali biabe uruni biaga hayadaru handayaho hayangi Anduane Homogo ibu heba hene. Ai Debidi ibu kini heangi Kora hameigini aria agali mbira mini Salumu mende heago heba ibu damenerume Anduane Homogonaga Balai Anda haraba panga heago mamage haga hene. Agali Salumu ogoni ibu Kore igini howa Ebiasaba aguane hene.
1CH 9:21 Agali mbira Meselemaia igini Segaraia heago ibubi Anduane Homogonaga Balai Anda haraba wiago mamage haga hene.
1CH 9:22 Agali handari kirani pira mbirani kira (212) hearu tigua Anduane Homogonaga Balai anda pabe haraba wiaru mamage howa biabe ogoni bialu helo dabo helene. Hameigini uruni aria ti dindi mbira mbirani headagua ti mini gilibu wuwa daga lamaga hene. Biabe uruni bilonaga Kini Debidibi agali Anduane Homogonaga bi mana latagi haga Samuelebi libugua biabe ogoni bilo mo mini.
1CH 9:23 Ani helayagola agali uruni tigua Anduane Homogonaga anda pabe panga harabani mamage haga hene. Mani howa tinaga igini aguanene hearume biabe ogoni dege bialu haga hene.
1CH 9:24 Agali uruni tigua pabe panga haraba maria uyurahayagi heagobi unurahayagi heagobi ni tagira ibiragohayagibi ni paliragohayagibi bibahende mamage haga hene.
1CH 9:25 Horo marungi nde ti hamenerume tini dalu wahalu ibalu biabe uruni biamogo bialu ha aribia haga hene. Agali ti hamene biabe biamogo bule ibalu ti horo karu hangu biabe bialu halu tini andaga dai bigi biaga hene.
1CH 9:26 Anigo Libai hameigini agali mariali henego tigua agali biabe biaga uruni handayaho haga hene. Tigua Anduane Homogonaga andaha hobane tara tara hearubi mbirale tara tara mo wiaga anda hobane hearubi handayaho haga hene.
1CH 9:27 Agali uruni tigua anda hobane uruni handayaho howa egerebagi gao laragola panga dugua holenaga ti Anduane Homogonaga anda kawareni anda maru hearuha paliaga hene.
1CH 9:28 Abale Yarusaleme bo gialabaga nabi wiangi Libai hameigini maru hearu tigua belediru ndisirubi Anduane Homogonaga andaha wiaru handayaho haga hene. Anduane Homogo mitangi bialu lotu larangi biabe bulene belediru ndisirubi mbirale uruni mo yu poragola yu dai biragolabi Libai agali o biaruni tigua uruni mbirago ereba nahelo baya hanguore daga lalu handayaho haabo haga hene.
1CH 9:29 Libai hameigini maru hearu tigua mbirale tara tara Anduane Homogonaga wiabagi ho wiarubi handayaho haga hene. Ani bialu agali uruni tigua balawa wiarubi waini iba hambu wiarubi olibe lininaga weli hambu wiarubi ira hagua nga bilo delagane mini inisenesi wiarubi pauda bayale tara tara wiarubi handayaho haga hene.
1CH 9:30 Anigo pauda tara tara wiaru biamaga halu mo mbiraore helonaga biabe loma binigo mo miaga hearu ti hangume biaga wini.
1CH 9:31 Agali mbira mini Madidaia ibu Libai aria Kora hameigini henego ibugua balawa loma bulenaga hiraga biabe biaga hene. Madidaia ibu Salumu igini wahene hene.
1CH 9:32 Agali Libai hameigini dege Kohada aria hearu tigua Sabada horo bibahendengi Anduane Homogonaga andaha ibuhondo mberedi lomabu mulenaga mo manda manda bu wiaga hene.
1CH 9:33 Libai hameigini aria maru tigua Anduane Homogonaga andaha ngida aleru balu iba gana lalu haru haga hene. Libai hameigini uruninaga agali haguane tigua horo bibahendengi mbiraga horombebi biabe biaabo haga howa ti Anduane Homogonaga anda heago kawareni anda maru hearuha paliaga hene. Tinaga biabe tara mende bulene nawi mbiraore ogoni dege biaga hene.
1CH 9:34 Libai aria agali garabaya golalu dai binidaru maru ti hameigini headagua agali haguane howa Yarusalemeni hene.
1CH 9:35 Yaiele ibugua Gibeono tano pigane mo wialu ibu one Magala libu Gibeono tanoni hene.
1CH 9:36 Ibu igini wahene mini Abadono igini maru mini Sua Kisi Bala Nere Nadaba Gedo Ahio Segaraia Migilodo layaru hene. Ai Migilodo ibu Simea aba hene. Agali uruni ti Yarusaleme tano kawareni Beniyamini hameigini heagoria dege hene.
1CH 9:39 Nere igini Kisi Kisi igini Solo hene. Solo ibu igini maria hene. Yonadana Malagisua Abinadaba Esebala henego ibu mini mende Isibosede hene.
1CH 9:40 Yonadana igini Meribala hene. Meribala ibu mini mende Mebibosede henego ibu igini Maiga hene.
1CH 9:41 Maiga ibu igini maria Pidono Melege Tarea Ahasa imaru hene. Ahasa igini Yara Yara igini tebira Alemede Asamabede Simiri imaru hene. Simiri igini Mosa Mosa igini Binea Binea igini Lebaia Lebaia igini Eleasa Eleasa igini Asele hene.
1CH 9:44 Asele ibu igini waragaria henego mini Asarigama Bogeru Isimaele Searaia Obadaia Hanana layaru hene.
1CH 10:1 Pilidiali amime Isaraeleali baba Hari Giliboa heagoria wai biyagola Isaraeleali dewa homene. Maru Solobi ibunaga igini biarubi heba ibida purogo lene.
1CH 10:2 Ani purogo layagola Pilidiali ami abale talima ibalu Solo igini tebira biaru Yonadana Abinadaba Malagisua imaru minalu bai hene.
1CH 10:3 Ani bialu Solo heagoria wai hongoheore minama minama anda ibalu waitigi hearunaga timume Solo bila hene.
1CH 10:4 Ani biyagola ibugua igiri wai biaga humbi yandarerubi yu heagohondo lalu, Pilidiali Ngode Datagaliwabe mitangi nabiaga nai ibirarume i̱ boligo í̠naga ayu tibu yidegonime i̱ homoliya abale ba, lene. Ani layagola igiri biagome ani bolene gi timbuni howa nabe wahene. Ani biyagola Solo ibuninaga wai biaga ayu tibu biago yamuwa deneni ibunime pili paga halu homene.
1CH 10:5 Ani biyagola igiri biago ibula ibaga bu haribigo ibu nde ibuninaga wai biaga ayu tibu yu hayago yamuwa deneni ibuni pili paga halu Solo homayadagua dege homa palu bini.
1CH 10:6 Ani bialu Solo ibunibi ibunaga igini tebirarubi homai hayagola mani ibunaga aguanene heneru mbiralime kini nahene.
1CH 10:7 Ani biyagola Isaraelealiru ti Yaserili dindi guagua wiagoria hearume Isaraeleali ami ibida purogo layagobi Solobi ibu iginirubi homaya layagobi hale halu tinaga dindi andabi wahalu ibida pene. Ani biyagola Pilidiali biaru ibalu dindi karulene.
1CH 10:8 Mani wai ogoni biai howa horo mbira peagola Pilidiali biaru puwa Isaraeleali balu homene biarunaga mbirale dabudabu yu wahalu pene wiaru ti mo yalu pene. Ani bialu howa handalu hearia Solobi ibunaga igini tebira biarubi tinaga tingini uyu Hari Giliboa wiagoha bo paya bu wiaria handa walia hene.
1CH 10:9 Ani bu wiaria hondowa tigua Solonaga haguane pugualu ibunaga wai bulenaga aeane karuleago ti golowa agali maru hearuhondo mialu bi baya mbira yidama lalu Pilidialinaga mbirale dama mitangi bialu bi pupu wule gime wabiniruhondobi wali agalihondobi lamule pudaba lene.
1CH 10:10 Ani lowa tigua Solo ibuninaga wai biagane timu humbi yandare uruni mo yalu puwa tinaga dama mitangi bialu mbirale gime wabini anda heagoha mo wialu Solonaga haguane biago tinaga dama mini Dagononaga bi pupu wiaga anda heago tamuha gerela ho wini.
1CH 10:11 Yabese wali agalime Gileada dindini howa hale halu hearia Pilidiali biaru tigua Solo ogodagua biya lalu layago hale hene.
1CH 10:12 Ogoni hale howa agali pari wayali elahe hearume abale gerai lalu puwa tigua Solobi ibu igini tebira biarunaga tinginiru mo yalu Yabese dindini dai buwa ira bai ale mbira heago teneha hora halu tini dara howa horo karu tomo mbira nane dugu bialu haabo hene.
1CH 10:13 Solo ibu homayago irane ibu Anduane Homogo mo tene nahe wahalu homenenaga dinini mo bila hayagome ibuni homene.
1CH 10:14 Ibugua Anduane Homogohondo i̱na agi buabe lalu hale naheyagola Anduane Homogo ibugua Solo bo wahalu Isaraele wali agalinaga kini helo Yasi igini Debidi dabo aribia ho helene.
1CH 11:1 Mani Isaraeleali hearume Kini Debidi Heberono tanoha hearia hondo ibini. Ibuwa tigua Debidihondo lalu, Ina wali agali bibahende í̠naga damene hangu darama mbiraore kama.
1CH 11:2 Abale Solo ibu kini heangibi ibu ani helalu dege í̠na inanaga ami agaliru haru halu wai bule piaga harigoni. Ani birigola Anduane Homogo í̠naga Ngode Datagaliwabehanda bi lo wialu í̠na ibunaga wali agaliru haru habelo helarogola í̠ Isaraele wali agalirunaga kini helolebero layagoni, lene.
1CH 11:3 Ani lowa Isaraele wali agalirunaga agali haguane hearu bibahende Heberono tanoni Kini Debidi heagoria íbu ngoai hene. Íbu ngoai heagola ibugua Anduane Homogonaga deni howa bi hongohe mbira lowini. Ani lowiyagola tigua Debidinaga haguaneni ira olibe lininaga weli odo wuwa ibu Isaraele wali agalinaga kini helene. Ani biyagome ala Samueleha howa Anduane Homogohanda bi layadagua bini.
1CH 11:4 Horo mbirungi Debidibi Isaraelealiru bibahendebi tigua Yarusalemeha hearu baba wai bule pene. Yarusaleme Yabusuali hameiginirunaga dindi winigo tano ogoninaga mini Yabusu wini.
1CH 11:5 Ani wu howa Yabusuali hearume Kini Debidihanda tinaga tano nakarulolebira manda buwa tongoyungu bi lalu hene. Tigua bi anidagua layagoyu mani Debidihanda ibunaga ami biaru haru pialu wai buwa bo podalu tano hongohe biagoni karulene. Tano ogoni mini Saiono winigo mani Debidihanda wai bialu karulayagola dindi ogoni mini Debidinaga Tano laga wini.
1CH 11:6 Debidihanda ami agali biaruhondo lalu, Tí mbiralime Yabusuali pigane bo waharago ibu ami agali bibahendenaga haguane helolebero, lene. Ani layagola wali mini Seruia igini Yoaba ibugua bamba halu wai bialu wayali hayagola ami agali bibahendenaga haguane ibu hene.
1CH 11:7 Tano ogoriani Debidi ibu hole piyagola wali agalime tano mini Debidinaga Tano laga wini.
1CH 11:8 Debidihanda ibunaga agali biaruhondo tano ogoninaga lene leneni anda bu mabu bidaba layagola tigua dindi ulini mbira winigoria dindi duguwa mogo bialu mo dondelene wiagoria anda pigane bialu hene. Ani bialu Yoaba ibugua tano ogoni mendehayagi mo tiga bialu hene.
1CH 11:9 Anduane Homogo Hongo Haiheore kago ibugua horo bibahendengi Debidila haru mandagi hayagome Debidi ibu kininaga hongo holene mia tago haabo hama iraga halu hene.
1CH 11:10 Debidinaga ami agali hongohe mini lene heneru ti mini uru. Isaraele wali agalirumebi agali hongohe mini lene biarumebi ti bibahende Debidi biamogo biyagola Debidi ibu kini hongohe hene. Ani biyago Anduane Homogohanda bi layago lola hene.
1CH 11:11 Agali mbirago Hagamono hameigini Yasobeama ibu ami agali hongohe mini lene tebira heneru aria mbira haguane ibu hene. Horo mbirungi ibugua yandare hangume agali handari tebira (300) baba wai bialu agali uruni bibahende bo wahai halu wayali hene.
1CH 11:12 Dodo igini Eleasa ibu Ahoho hameigini agali mini lene tebira henedaruni aria haguane mendego ibu hene.
1CH 11:13 Horo mbirungi Eleasa ibu Debidi heba Isaraelealirubi ti Pasadamimi dindi hemiria Pilidialirume wai bule amuna tidiyu hearia hendene. Ani hondowa Isaraeleali uruni tigua widi ale mini bali mabuha anda íbu hearia Pilidialirume wai hapara haya handala Isaraeleali maru ti gi halu ibida piai hene.
1CH 11:14 Maru ani ibida piyagola Eleasa ibubi ibunaga agalirubi hangu mabuha hongo ho howa tigua Pilidiali dewaore bo wahai hene. Horo ogoningi Anduane Homogo ibugua biamogo timbuniore biyagola ti wayali hene.
1CH 11:15 Debidinaga ami agaliru haru haga agali hongohe pira tebira (30) hene. Horo mbirungi Debidi ibu Adulama dindiha egeanda mbira heagoha hearia ami agali hongohe pira tebira (30) uruni aria tebiralime ibu hondo pene. Ogoningi dege Pilidialirume Lebaimi dindi ulini wiagoha íbu howa balai anda bu hene.
1CH 11:16 Tigua Debidi handalu minabe nahe wiagoha ha do heagola Pilidiali uruni tigua Bedeleheme tano bo podama anda ibalu ti karulo hene.
1CH 11:17 Ani karulo heagola Debidi ibugua Bedelehemeha iba bayale nagane winiru mitangibu dai buwa lalu, Daraore nde biaruago ainde Bedeleheme tanonaga ubaandatagi biaga harabani iba hambiaga uli biagoha iba bayale biago hambu nedole nde i̱ turuho koleda, lene.
1CH 11:18 Ani layagola hale howa ami agali hongohe hearu aria tebirali biaru ti heyalu Bedeleheme anda puwa Pilidiali iba hambiaga uli biagoria bu hearuni helowa Debidi ibu iba noaba layagohaore bereago hambu yalu dai bialu Debidi nelo mini. Ani miyagola ibugua iba ogoni nane wahalu Anduane Homogohondo lomabu mialu dindini odo wahene.
1CH 11:19 Ani buwa ibugua lalu, Anduane Homogo-o i̱na iba ogoni nanolebero. Ani larogoni irane agali o karu ti iba ogo hambu piyagola bo wa kaleda. Ani bo wa kagola i̱na tinaga darama porago naradagua buledago nane waharogoni, lene. Ani lalu Debidi ibugua iba ogoni nane waore hene. Ami agali tebirali uruni tigua gibi bibe nahe mbira o binidagoni.
1CH 11:20 Yoaba hamene Abisai ibu ami agali hongohe pira tebira (30) henedarunaga haru haga haguane hene. Horo mbirungi Abisai ibugua yandare hangume waitigi agali handari tebira (300) balu homelai hene.
1CH 11:21 Ani buwa ibubi nde ami agali hongohe mini lene pira tebira (30) biarunaga haguane ibu hene. Anigo ibu agali tebirali dabene mini lene daliga hayagobi ndo howa mini lene dege hene.
1CH 11:22 Kabasele tanoali Yahoiada igini Benaia mbira henego ibubi nde ami agali hongohe uruni aria dege mbirago hene. Ibugua wai biraha wai hongo howa taraore mbira biaga howa ibugua horo mbirungi Moabali ami agali hongohe kira bo palu bini. Horo mbirungi nde Benaia ibugua dege Isaraele dindiha dindiguni ibira halu dagare biaga wiangi egeandaha gundu uli mbira wiagoha anda puwa gabua mbira budi ale timbuni mini laiono hearia handa walia halu bo wahene.
1CH 11:23 Horo mbirungi nde ibugua dege Iyibiali mbira timbuni luore magi mida kira heago balu homelene. Iyibiali ogoni ibu yandare timbuni mbira yu heagola Benaia ibu kango hangu yu henego yalu hapara howa libu baga baga bialu howa Benaia ibugua agali biago ibuninaga yandare yiago gingila muwa ibuni yandare ogonime nogoba hayagola homene.
1CH 11:24 Benaia ibu Yahoiada igini howa ibugua nabibehe maru urunidagua bigi binigome ibubi nde agali hongohe mini lene tebirali biarubi dege hene.
1CH 11:25 Ani howa ibu ami agali hongohe mini lene pira tebira (30) biaruni yu wahalu ibu bolanguahe hene. Anigo ibu agali tebirali dabene mini lene daliga hayagobi ndo howa ibu mini lene dege hene. Ani heagola Debidihanda Benaia ibugua ami agali kini ibuni mamage haga hearu haru haga helo dabo helene.
1CH 11:26 Ami agali hongohe henedaruni marunaga mini uru. Yoaba hamene Asahelebi Bedeleheme tanoali Dodo igini Elehananabi hene. Ani bialu Harodo dindiha howa ibini Samodo Pelede tanoha howa ibini Helese Tegoa tano howa ibini Igese igini Ira imaru hene. Anadodo tanoali Abiesebi Husa dindiha howa ibini Sibegaibi Ahoho hameigini aria mbira Ilaibi Maharai Heledela libu Nedoba tanoha howa ibinigo libubi hene. Helede ogoni ibu Bana igini hene. Ani bialu Beniyamini hameiginiru daluha Gibea tano wiagoha howa ibini Libai igini Idaibi Piradono tanoali Benaiabi hari Gasaha wiagoha kaware dege dindi ulini mbira wiagoha howa ibini Hurai imaru hene. Ani bialu Araba tanoali Abielebi Bahurumu dindiha howa ibini Asamabedebi Salabono tanoali Eliababi Gisono dindiha howa Hasemebi Hara dindiha howa ibini Sagi igini Yonadanabi Saga igini Ahiamabi hene. Ani bialu Uru igini Elibala ibini Megera dindiha howa Hebebi Pelono dindiha howa Ahiyabi Kamelo tanoali Heserobi Esebai igini Narai imaru haga bini. Nadana hamene Yoelebi Hagari igini Mebihabi Amonoali dindihayagi howa ibini mbira nde Selege mbira henego ibubi Berodo tanoali Yoabanaga yandare timuru yahaga Naharai mbira henegobi Yadiri hameigini aria kirali Ira Garebela henego labobi hene. Hidiali mbira Uraiabi Ahalai igini Sabadabi Sisa igini Adinabi ibu Lubene hameigini howa amiali pira tebira (30) haru henegobi Maga igini Hananabi Midanali Yosabadabi Asaderali Usiabi Aroe tanoha howa Hodama igini Sama Yailela ibinirubi Simiri igini Yadiele Yohala Tisi tanoha howa ibinirubi Mahaba dindiali Elielebi Elenama igini Yaribai Yosabiala libubi Moaba dindiali Idimabi Sobali Eliele Obede Yasiele tibi uruni bibahende ami agali hongohe mini lene hene.
1CH 12:1 Kisi igini Solohanda Debidi bo wahole talima ibaga bialu heangi Debidi ibu ibida puwa Sigilaga tanoha ha do hene. Ani ha do hearia ami agali hongohe marume Debidinaga wai bia hole ibini.
1CH 12:2 Tigua danda timume bolenebi ege to̱le̱ emene pume yuwa bolenebi gi tigame balu gi lemebi baga mugubeore heneya. Agali uruni ti Beniyamini hameigini Solo ibu aria dege heneya.
1CH 12:3 Tinaga ami agali haru haga Ahiesebi ibu hamene Yoasabi libu kirabali Gibea tanoali Sema henego igini hene. Ami agali maru henedarunaga mini uru. Asamabede igini Yasiele Peledela libubi Anadodo tanoali Beraga Yahula libubi Gibeono tanoali Isimaiabi hene. Isimaia ibu Debidinaga ami agali hongoheore mini leneru pira tebira (30) hearunaga haru haga agali haguane hene. Beniyamini hameigini agali maru mini Yaremaia Yahasiele Yohanana Yosabada imaru uruni ti Gedera tanoali hene. Agali maru Elusai Yarimodo Bealaia Semaraia Sebadaia imaru ti Haribiali hene. Kora hameigini Elegana Isaia Asarele Yoese Yasobeama imaru hene. Yoelabi Sebadaiabi libu Gedo dindiali Yarohama igini hene.
1CH 12:8 Debidi ibu dindi ko iba dalu naibaga wiagoha ha do hole pu hearia ami agali hongoheore Gada hameigini maru hearu Solo helalu ibini. Agali uruni ti ami agali hongohe gibiore howa ti humbi yandarebi yuwa wai biaga pari wayali hene. Tigua wai pora birangi tinaga dengui nogo gabua laiono ale hiriribi gibiore howa wai biaga. Ani buwa gerai ledaha agali gerai ndo aube toba pialu biango dudu hari bareha hagame dai laradagua biaga hene.
1CH 12:9 Agali uruni ti mini uru. Agali haguane mini mbira Ese mende Obadaia tebone Eliaba mane Misimana dauni Yaremaia waragane Adai kane Eliele halini Yohanana dini Elesabada pini Yaremaia mende beane Magabanai layaru hene.
1CH 12:14 Gada hameigini agali uruni ti ami agali bayale dege hene. Ani howa ti maru wai biaga mandabi hearume wai bialu agali mbira hangume ami agali daosini mbira (1,000) haru haga hene. Maru wai bulene bayuwa manda nabi hearume ti ami agali handari mbira (100) haru haga howa wayali habehe dege hene.
1CH 12:15 Mali mbiranaga ege mbira layagola Iba Yodana li timbuni daligaore wiangi agali uruni tigua Iba Yodana domaede halu puwa wali agali iba doma edeyagi dindi ulini panda panda wiagoha abene ni tagira ibiragohayagibi ni paliragohayagibi hearu baba wai bialu bibahende bo taliatogo layagola ibida pugu pugu bini.
1CH 12:16 Horo mbirungi Yuda hameigini marubi Beniyamini hameigini marubi ti Debidi ibu dindi ko dalu naibaga wiagoha ha do hearia ibini.
1CH 12:17 Debidihanda ti lola ho puwa tihondo lalu, Tí nenegeme ibagadagua ibalu i̱ biamogo bule ibirimiyagua nde i̱ tínaga nenege holene turuho kogoni. Ani ndo tígua i̱ waitigi karuhondo mini mule ibirimiyagua nde bi ogo tíhondo heneneore larogo hale halimu. I̱na tí mo ko holene mbira nabiore kogola i̱hondo ko ogoni bule ibirimiyagua ina mamalirunaga Ngode Datagaliwabe kago ibugua manda bu howa tí ko beremi lowa pani ngulebira, lene.
1CH 12:18 Ani layagola agali mbira mini Amasai heagoha Ngode Datagaliwabenaga dinini karula hayagola Amasaihanda Debidihondo lamialu lalu, Yasi igini Debidi-o ina í̠ aria kamagoni. Í̠naga Ngode Datagaliwabehanda í̠ biamogo bialu handayaho kagome agali í̠ heba haga karu tígua wai bialu wayali haabo halimulo hameledo, lene. Ani layagola Debidihanda agali uruni ibunaga ami agali haguane helo helai hene. Mani howa Amasai ibu Debidinaga ami agali hongoheore pira tebira (30) hearunaga haguane helo dabo helene.
1CH 12:19 Debidi ibu Pilidialiru heba Solo baba wai bule piyagola Solonaga ami agali Manase hameigini maru hearu Debidi baba hamaga halu pene. Anigo ai Pilidialinaga kini hearume Debidi ti heba napole layagola wahene. Anidagua layadago irane Debidi ibu abale Solonaga biabe biahaga hayago Pilidiali ti manda buwa Debidi ti heba Solo baba wai bule piyagua Debidihanda beregeda dai bialu Pilidiali ti baba wai bulubada lo manda bialu waha lene. Pilidiali kini hearu tigua bi dindiha ohowa lo mbira halu Debidi ibu Sigilaga dindini daibilene.
1CH 12:20 Debidi ibu Sigilaga dai bialu howa Manase hameigini ami agali biaru ti haru mandagi dai bini. Agali o piyadaruni mini Adana Yosabada Yadiele Maigele Yosabada mende Elihu Siledai imaru pene. Ami agali uruni Manase dindiha howa ti hangu hangume ami agali daosini mbira mbira (1,000) haru haga henego Debidi hearia ibugu bini.
1CH 12:21 Agali uruni ti ami agali bayale hongohe heago hondowa Debidihanda ti ibunaga ami agali haru haga helo helaga bini. Debidihanda agali pagebibi wai biaga hearu baba wai bule piyangi ami agali uruni tigua Debidi biamogo bialu wai bule pene.
1CH 12:22 Horo bibahendengi agali mbira mbira ibugu bialu Debidinaga ami agali hole ibaabo hene. Ani biyagola Debidinaga ami agali dewaore hene.
1CH 12:23 Debidi ibu Heberono tanoha hearia ami agali dewaore ibalu Anduane Homogohanda layadagua tigua Debidi Solo henegoria kini ha aribia helo dabo helole ibini. Ti ibalu wai biagane ale bibahende mo yai halu ibini. Ti ibinidaruni daga ogodagua.
1CH 12:24 Yuda hameigini ami agali daosini dege waragariani handari halirame (6,800) wai humbi yandareru yalu ibini.
1CH 12:25 Ani bialu Simeono hameigini ami agali daosini kariani handari mbira (7,100) ibini. Agali uruni ti ami agali hongo howa wai biagane mana baya hangu manda biaihe ibini.
1CH 12:26 Libai hameigini daosini mariani handari waragaria (4,600) ami agali dege anda ibini. Ti heba Arono aria Yahoiada ibu agali haguane henego ibu aria ami agali daosini tebirani handari karia (3,700) ibini.
1CH 12:28 Ani bialu igiri daliahe mbira mini Sadogo ibu Libai hameigini dege howa ami agali hongohe henego ibu heba ibu aria agali pira kirani kira (22) haru ibalu ti ami agali haru haga hongoheru dege ibini.
1CH 12:29 Solo ibuni aria Beniyamini hameigini hearubi ami agali dege daosini tebira (3,000) anda ibini. Abale howa agali uruni ti Solo baba haganego wahalu Debidi hearia ibini.
1CH 12:30 Eberaimi hameigini ami agali daosini dege pira kirani handari halira (20,800) anda ibini. Agali uruni tini dindiha howa ti dameneme ti agali hongoheore heago de hendene.
1CH 12:31 Manase hameigini halu mende ni paliragohayagi hagaru ti daosini pira mbirani halira (18,000) ibini. Agali uruni ti dameneme dabalu Debidi kini helole Heberono pudaba laya handala ibini.
1CH 12:32 Isaga hameigini handari kira (200) ti ami agali haru haga dege howa tinaga ami agali tini andaneha haga hearu bibahende haru ibini. Ami agali haru haga uruni mini gigabiwi howa tigua Isaraelealime bilonaga hariga mo walia holene ti mandabi hene.
1CH 12:33 Sebulunu hameigini ami agali daosini pira duria (50,000) ti hongoheore hangu ibini. Tigua wai biagane aleru bibahende mo yai halu mini mbiraore halu Debidi pele muleore eberemagoni lalu ibini.
1CH 12:34 Nabadali hameigini ami agali haru haga haguane dege daosini mbira (1,000) ibalu tinaga ami agali daosini dege pira tebirani karia (37,000) haru ibini. Tigua wai humbi yandarerubi mo yai halu ibini.
1CH 12:35 Dana hameigini ami agali daosini dege pira kirani halira handari waragaria (28,600) ibini. Agali uruni ti wai bule manda mandabu haabo haga hene.
1CH 12:36 Ami agali Ase hameiginiru daosini pira maria (40,000) ibini. Agali uruni tibi nde wai bule manda manda bu hagago dege ibini.
1CH 12:37 Lubene hameiginibi Gada hameiginibi Manase hameigini halu mende biarubi ti Iba Yodana ni tagira ibiragohayagi haga hearu bibahende wai biagane danda timu yandareru mo yai halu ami agali daosini dege handari mbirani pira kira (120,000) ibini.
1CH 12:38 Ami agali uruni tigua wai biagaru ale mo yai halu Heberono tanoha íbu ngoai hene. Ti bibahendeme mini mbiraore howa Debidi ibu Isaraele wali agali bibahendenaga kini helolenego dege mandabu yalu ibini. Isaraele wali agali maru hearume nde ani dege manda biaiho hene.
1CH 12:39 Agali uruni ti Debidi heba horo tebiru Heberononi hene. Ani heagola tinaga wali agali bu hearume tomo dewa dawa manda manda biyagola tigua tomo uruni nalu hene.
1CH 12:40 Anidagua bialu heagola Isaraele wali agali bibahendeore hameigini uyura paliamaro bini Isaga dindiha hearubi Sebulunu dindiha hearubi amuraore Nabadali dindiha hearubi bibahendeoreme turu timbuni halu tigua tomo tara tara yalu Heberono tanoni íbu ngoai hene. Tigua balawa bayalerubi gerebi lini do gembe bu winirubi poge lini ale do gembe bu winirubi waini ibabi olibe lininaga welibi dewaore yalu ibugu bini. Tigua tomo uruni nogo dongi kamele bulumagarunaga erekunini mo pagaho ngelowa yalu ibugu bini. Ani bialu nogo sibi bulumagaru wali agali ti bo dawa nelo haru íbu dege bini.
1CH 13:1 Debidihanda ami agali ti marume ami agali daosini mbira (1,000) haru haga hearubi handari mbira (100) haru haga hearubi bibahende mo ngoai hene.
1CH 13:2 Ani íbu heagola Debidihanda tihondo lalu, I̱na bi larogo hale howa tí bibahendeme e̱ laramiyaguabi Anduane Homogo inanaga Ngode Datagaliwabe ibugua hame layaguabi ina Isaraele wali agalihondobi loma binigo mo miagahondobi Libaiali tihondobi ti bibahende ina kamaria ibai helo bi lo pelami̱ya.
1CH 13:3 Ti ani ibai howa Ngode Datagaliwabenaga Habo Nalolene Bi lo winigonaga Mbogoyi Solo ibu kini heangi nagaloneda lowa harimago ogoni ai iname mo mali̱ya, lene.
1CH 13:4 Ani layagola hale howa wali agali bibahendeme turu halu, Ani bimi̱ya, lalu lai hene.
1CH 13:5 Debidihanda Habo Nalolene Bi lo winigonaga Mbogoyi Kiriada Yarimi dindi wiaria Yarusaleme tanoni yalu ibilo ibugua Isaraele wali agali iba Siho peago Iyibi dindi tubari unugohayagi henerubi Hamada dindi uyugohayagi henerubi mo ngoai hene.
1CH 13:6 Ani íbu heagola Debidihanda wali agali uruni bibahende haru halu Yuda dindinaga Bala tano wiagoria Ngode Datagaliwabenaga Habo Nalolene Bi lo winigonaga Mbogoyi biago ogoniha wiagola mo yu dai bule pene. Mbogoyi ogoni Anduane Homogonaga laga wini. Mbogoyi ogoninaga daligahayagi dahuliyali handalehe kira wabu helowa ogoni Anduane Homogo ibuni handame ho howa biragane dagia ogoni laga wini.
1CH 13:7 Anigo ti Abinadaba anda heagoria pialu Anduane Homogonaga Mbogoyi biago wiaria hendene. Hondowa tigua Mbogoyi biago nogo bulumaga kirame gili laga garo ale mini karisi gahenge mbira wiagoria yalu pole mo paga hene. Mo paga halu harigani yalu pialu howa Abinadaba igini kirali Usa Ahiolame gili laga garo ale karisi biago haru halu pene.
1CH 13:8 Debidibi Isaraele wali agali bibahendebi turu howa mali lialu ngida ale balu tabagabi balu ngi̱li̱nge̱le̱ laga bilonaga mbirale tara tara wiarubi mo ema bia halu mbelo biguli ale pulalu iba gana lama garo ale karisi biago heba mandagi pialu Anduane Homogonaga mini yaraga hama pialu hene.
1CH 13:9 Ani bima pialu widi lini ibira halu aeane puyabume yu pelonaga bo taulaga agali mbira mini Kidononaga anda heagoria tagira pene. Dindi ogoriani nogo bulumaga biago labome Anduane Homogonaga Mbogoyi biago mo ema biyagola ibira habehe wini. Ani ibira hole biyagola Usahanda Mbogoyi biago abale yania hene.
1CH 13:10 Usahanda Anduane Homogonaga Habo Nalolene Bi lo winigonaga Mbogoyi biago bame mo yo hondowa yania hayagola Anduane Homogohanda keba timbuniore howa Usa bayagola abale ogoriani homo ibira hene.
1CH 13:11 Ani biyagola Debidi ibugua Anduane Homogohanda ogoni biyago hondowa keba hene. Horo keba hayadangi howa dindi ogoni mini Perese Usa laga winigo nga.
1CH 13:12 Debidi ibugua ogoningi Anduane Homogohondo gi howa lalu, Anduane Homogonaga Habo Nalolene Bi lo winigonaga Mbogoyi ogo i̱na aguaore ngelo hole mo yalu poliyadabe, lene.
1CH 13:13 Ani lowa Debidi ibugua Anduane Homogonaga Mbogoyi biago ibunaga tano Yarusaleme nayupe wahalu hariga mendeha yu pubagi halu pene. Puwa tano mbira mini Gede winigo ogoniali mbira mini Obededomo henego ogoni ibunaga anda mo ngelene.
1CH 13:14 Agali Obededomo biagonaga andaha ngelo heane ege tebira pene. Ani ngelo heagola Anduane Homogohanda Obededomobi ibunaga waneigini damenerubi bibahende mo bayale hai hene.
1CH 14:1 Taianaga Kini Hiramahanda ibunaga agali maru Debidi hearia ibilene. Ani ibilowa ibugua ira tamia bayale dibu yalu agali anda biaga mandabi maru ege to̱le̱ podaga mandabi marubi tihondo lalu, Tígua Kini Debidinaga anda timbuni mbira bule pudaba, lene.
1CH 14:2 Urunidagua biyago hondowa Kini Debidi ibugua manda bialu hearia Anduane Homogohanda i̱ heneneore Isaraele wali agalinaga kini helenego kogoni lo manda bini. Ani manda buwa Debidi ibugua Anduane Homogohanda ibunaga Isaraele wali agalirubi biamogo bulenaga biabe hongohe timbuni ogoni biyadalo manda bia dege bini.
1CH 14:3 Debidi ibu Heberono tano wahalu Yarusaleme hole piyangi howa ibugua wali maru dabu bialu waneigini dewa halu bini. Ibu one maru ala dabu biniru ti bira dege buwa uruni ti haru bibahende Yarusaleme mandagi pu berene. Ani pu biruwa ibu one urunime Yarusalemeni waneigini dewa dege taba henene.
1CH 14:4 Debidi igini Yarusalemeni taba henenedaruni tinaga mini uru Samua Sobaba Nadana Solomono Ibihara Elisua Elebelede Noga Nebege Yabia Elisama Beliada Elibelede imaru hene.
1CH 14:8 Pilidia wali agali hearume hale halu hearia Isaraele wali agalime Debidi tinaga kini heleda layago hale hene. Ani hale howa tinaga ami agali hearume wai bialu Debidi minule pene. Ibu minule ibira layago hale howa Debidi ibu Pilidiali baba wai bule pene.
1CH 14:9 Pilidia ami biaru abale ibalu Lebaimi dindi ulini wiagoria anda ibuwa mbirale bibahende wiaruni ti mo yai hene.
1CH 14:10 Ani anda íbu heagola Debidihanda Anduane Homogohondo hale halu lalu, I̱na Pilidiali uruni baba wai bule poabe. Wai bule piruyagua i̱na ti bai halu wayali holiya í̠na i̱ biamogo buleberebe, lalu hale hene. Ani hale hayagola Anduane Homogohanda ladai bialu lalu, Karulapego i̱na í̠ wayali habelo waitigi uruni í̠naga giha minu ya holeberogo wai bule pu, lene.
1CH 14:11 Ani laya handala Debidi ibu Bala Perasimini dindi puwa Pilidiali biaru baba wai bialu wayali hene. Wayali howa Debidihanda lalu, Anduane Homogohanda iba li hongohe poradagua bialu i̱ waitigi hearu bo gialo yaga bima yupe hayagoni, lene. Anidagua binidagonaga dindi ogoni mini Anduane Homogohanda Bo Gialo Wahene laga wini.
1CH 14:12 Pilidiali biaru ti ibida pialu tinaga dama mitangi bialu bi pupu wulenaga gime wabini yu heneyaru yu wahalu piyiyagola Debidi halu ibunaga ami biaru tigua mo yuwa irani delai hene.
1CH 14:13 Ani bialu pu heagola Pilidia ami biaru Lebaimi dindi ulini biagoria wai taya lone dai buwa mbirale wiaru mo yalu hene.
1CH 14:14 Ani heagola Debidi ibugua Anduane Homogohondo hale halu lalu, I̱na agua buabe, lene. Ani layagola Anduane Homogohanda lalu, Tígua wai bule pudaba. Pialu howa waitigi kagoha abale pogolape halu napilimu. Ohalu ti erembira ngagohayagi puwa amu ira mini balasama kagoha wai bule manda manda bu halimu.
1CH 14:15 Ani howa hale halu kamiria agali maru uyu ira manemaneha tidiyu howa wai dagia ale balu haruane hale holeberemi. Anidagua balu haruane hale harimiyagua Pilidialiru baba wai bule i̱ni ala bamba halu piarua lo manda bialu tígua wai bule gerai pialu wai bilimu, lene.
1CH 14:16 Ani laya handala Debidi ibu Anduane Homogohanda layadagua bialu puwa Isaraeleali ami biarume Pilidiali ami biaru mo ko howa bo podama pialu Gibeono tanoni bo podahana halu amuraore Gese tano puabo hene.
1CH 14:17 Dindi tara taraha hameigini tara hearume Debidihanda biyagoni hale hayagola Anduane Homogohanda ti mo gi hene.
1CH 15:1 Debidihanda ibunaga anda dewa Yarusalemeni binigo ai Yarusaleme Debidinaga tano laga wini. Ani bialu ibugua Ngode Datagaliwabenaga Habo Nalolene Bi lo winigonaga Mbogoyi biago wulene dindi henge mo manda manda buwa ogoriani balai anda bu helene.
1CH 15:2 Ani buwa Debidi ibugua lalu, Anduane Homogohanda Libai hameigini dabowa ti hangume Habo Nalolene Bi lo winigonaga Mbogoyi ogoni mo yulenebi tigua ibunaga biabe bialu haabo holenebi nga laya, lene.
1CH 15:3 Ani lowa Debidihanda Isaraele wali agali bibahende olo mogo buwa Habo Nalolene Bi lo winigonaga Mbogoyi ogoni ibugua henge mo manda manda bu wiyagoria ngelo mo yu pudaba lole olene.
1CH 15:4 Ani bialu ibugua loma binigo mo miaga Arono aria bu hearubi Libaiali hearubi mo ngoai hene.
1CH 15:5 Libaiali uruni tinaga mini uru. Kohada hameigini Uriele henego ibu haguane howa ibugua agali ibuni aria handari mbirani pira kira (120) haru haga hene.
1CH 15:6 Ani bialu Merari hameigini Asaia henego ibu haguane howa ibugua agali ibuni aria handari kirani pira kira (220) haru haga hene.
1CH 15:7 Gesono hameigini Yoele henego ibu haguane howa ibugua agali ibuni aria handari mbirani pira tebira (130) haru haga hene.
1CH 15:8 Elisabana hameigini Semaia henego ibu haguane howa agali ibuni aria handari kira (200) haru haga hene.
1CH 15:9 Heberono hameigini Eliele henego ibu haguane howa ibugua agali ibuni aria pira halira (80) haru haga hene.
1CH 15:10 Usiele hameigini Aminadaba henego ibu haguane howa ibugua agali ibuni aria handari mbirani hombearia (112) haru haga hene.
1CH 15:11 Ani bialu Debidihanda loma binigo mo miaga Sadogobi Abaiadabi heba Libai hameigininaga agali haguane waragaria Uriele Asaia Yoele Semaia Eliele Aminadaba biaru bibahende ibilo olene.
1CH 15:12 Ibiyagola ibugua tihondo lamialu lalu, Libai hameigini agali haguane kamiru tíni heba tí aria bu karuni bibahende Anduane Homogonaga deni tíni dodo nahe hole biaga mana ngadagua bilimu. Anidagua biai howa Anduane Homogo Isaraelenaga Ngode Datagaliwabe kagonaga Habo Nalolene Bi lo winigonaga Mbogoyi biago Yarusalemeni dindi i̱na mo manda manda bidogoria ngelo mo yalu ibalimu.
1CH 15:13 Ai iname pigane mo pirimangi tí baba mandagi mo pu nabirimagoni ndobe. Iname mo yu ibalu howa Anduane Homogo inanaga Ngode Datagaliwabehondo agua yalu ibuleberemabe lalu hale nahe howa mana tigabi bulene wiadagua nabi bame yu ibalu hemaria ibugua inahondo keba halu minu baya, lene.
1CH 15:14 Ani layagola Libai hameigini hearumebi loma binigo mo miaga hearumebi Anduane Homogo Isaraele wali agalinaga Ngode Datagaliwabe ibunaga Habo Nalolene Bi lo winigo Mbogoyi biago mo yule howa tini Anduane Homogo deni dodo nahe holenaga mana biaga winigo bini.
1CH 15:15 Ani buwa Libai hameiginidarume Mbogoyi ogoni mo yalu ibule howa tigua bamba Anduane Homogohanda Mosesehondo lalu, Habo Nalolene Bi lo winigonaga Mbogoyi ogoni mo yule howa mana ogodagua bilimu, lalu lowinigo bialu mo yule pene. Tigua Mbogoyi ogoni iraho yulenaga ira helagago payani yalu pene.
1CH 15:16 Ani bialu Debidihanda agali Libai aria biaruhondo lamialu, Agali marume Habo Nalolene Bi lo winigonaga Mbogoyi mo yalu ibalu howa ngida aleru balu iba ganaru lama mo yalu ibalimu, lalu lamini. Tígua ngida aleru hongo howa balu pilipe hongo howa pulalu ngi̱li̱nge̱le̱ lagane beledi boronosime wabini ngaru hongo howa balu tí turu timbuni kamigo walia halu lama ibalimu, lene.
1CH 15:17 Ai agali haguane biaru tigua agali mbira mini Yoele igini Hemana dabalu ibu damene Beregaia igini Asababi Kusaia igini Edanabi ti dabene. Agali uruni tigua iba ganaru lalu beledi boronosime wabiniru ngi̱li̱nge̱le̱ lagane belo dabene. Ani biyagola Libaiali marume agali tebirali uruni biamogo bialu tigua ngida ale tara bi daliga ladaga haga wiaru belo dabene. Agali ngida uruni ale baga biaru ti mini Segaraiabi Yasielebi Semiramodobi Yahielebi Unibi Eliababi Maseabi Benaiabi dabo helene. Ani bialu agali marume ngida ale tara bi dindihaore ladali haga wiago belo dabene. Agali uruni ti mini Madidaiabi Elibelehubi Miginaiabi Asasaiabi dabalu Obededomo Yaelela libu agali Anduane Homogonaga anda haraba wiago mamage haga biagobi dabene.
1CH 15:22 Agali mbira mini Kenanaia heago ibu iba gana lolenebi ngida ale tara tara bolenebi manda biaihe henego ibugua Libaiali uruni bibahende biabe ogoni bayuwa bilo handayaho haabo helo dabo helene.
1CH 15:23 Ani dabalu agali mariali Beregaiabi Eleganabi Obededomobi Yahaiabi tigua Habo Nalolene Bi lo winigonaga Mbogoyi handaya howa mamage helo dabo helene. Loma binigo mo miaga marume Mbogoyi yalu poragola ti bamba halu biguli pu lama pelo dabo heleneru ti mini uru. Sebanaia Yosabada Nedanele Amasai Segaraia Benaia Eliesa laga biyaru hene.
1CH 15:25 Mani howa Kini Debidi ibubi Isaraele agali haguanerubi ami haru hagarubi ti bibahende Obededomo andaga puwa Anduane Homogonaga Mbogoyi biago Yarusalemeni mo yu dai bule pene. Anidagua yalu ibiyagola wali agalime turu timbuniore hene.
1CH 15:26 Ngode Datagaliwabehanda Libaiali Mbogoyi biago mo yalu piyaru biamogo biyagonaga tigua nogo bulumaga wangabe kariabi sibi dalua haba tigi kariabi ibuhondo loma bialu bo delene.
1CH 15:27 Debidi ibunibi Libaiali Mbogoyi biago yu hayarubi iba gana lalu hagarubi tinaga haru haga agali mini Kenanaia ibubi aga pele taraore mbira mbira karulaga bini. Debidi ibu aga mende loma binigo mo miaga agalinaga aga mini ebodi karulowa turu halu Anduane Homogonaga mini yaraga halu turu hama pene.
1CH 15:28 Ti ogonidagua bialu Anduane Homogonaga Habo Nalolene Bi lo winigonaga Mbogoyi biago Debidibi Isaraele wali agalibi tigua Yarusaleme mo yalu pene. Tigua turu timbuni howa ga̱ lalu ngida ale tara tara balu pilipe ale pulalu bigulibi pu lama pene.
1CH 15:29 Tigua Mbogoyi biago Debidinaga tano biagoria yu anda ibiyagola Solo wane Migala ibu andaga windoha handatagi halu hearia ibu agalini Kini Debidi ibu turu howa mali lima pogoladaga haga bima ibalu hearia hendene. Anidagua biyago hondowa Migala ibugua turu nahe howa Debidihondo keba howa yo hondo berene.
1CH 16:1 Tigua Mbogoyi biago yalu puwa Debidihanda balai anda mbira ala bu manda mandabu helenegoha mo ngelene. Ani ngelowa tigua loma biniru irame dai helo bo delalu Anduane Homogola ho gimbu bulenaga loma binirubi bo mialu bini.
1CH 16:2 Loma uruni delai howa Debidihanda wali agali bu hearuhondo lalu, Anduane Homogo kago ibugua tí mo bayale helo, lene.
1CH 16:3 Ani lowa Debidihanda wali agali uruni tomo nelo mini. Debidi ibugua tihondo mberedi mbira mbira ta halu nogo bo hiririmigonaga mbirinibi gerebi lini maru do gembe bu wiarubi wali agali hearu mbira mbira ta halu nai helo miyagola nalu tini andaga pugu pugu bini.
1CH 16:4 Debidi ibu Libaiali maru ti Habo Nalolene Bi lo winigonaga Mbogoyi wiagohayagi puwa Anduane Homogo Isaraele wali agalinaga Ngode Datagaliwabe mini mo yaraga halu iba gana lelo dabo helene.
1CH 16:5 Asaba ibu haguane howa haru helobi Segaraia ibu biamogo bilobi dabo helalu agali maru Yaiele Semiramodo Yahiele Madidaia imaru Eliaba Benaia Obededomo Yaiele imaru ti nde ngida ale baga helobi Asaba ibu ngi̱li̱nge̱le̱ lagane beledi boronosime wabini balu helobi dabo helaga bini.
1CH 16:6 Ani buwa Habo Nalolene Bi lo winigonaga Mbogoyi wiagohayagi puwa loma binigo mo miaga Benaia Yahasielela libu biguli pulalu helo Debidihanda dabo helene.
1CH 16:7 Debidi ibugua biabe uruni pigane Asababi Libaiali marubi ti Anduane Homogonaga mini yaraga haga bilo dabo helene.
1CH 16:8 Iname Anduane Homogohondo turu howa ka̱i̱ lalu ibu daliga gibiore ka lalu lamiai hami̱ya. Wali agali hameigini dindi tara tarani paluyu pedaru ti bibahendehondo ibugua gibiore uruale biya laga bialu hale hai helo loyogo laga bimi̱ya.
1CH 16:9 Iname ibunaga mini mo yaraga halu iba gana lalu hami̱ya. Ibugua mbirale bayale bigi biyarunaga bibahende hale hai helo laraga halu lamiai hami̱ya.
1CH 16:10 Anduane Homogo ibu mini tigabiore kago ina ibunaga kamago iname ibuhondo turu hami̱ya. Wali agali Anduane Homogohanda hame ledadagua biaga kamaru ina turuho holene nga.
1CH 16:11 Anduane Homogohanda ina biamogo bilonaga ibu karia puabo hami̱ya. Iname Anduane Homogo ibu kagoha kaware haparaho haabo hami̱ya.
1CH 16:12 Anduane Homogonaga biabe bia hagane Abarahama aguanene kamirubi Anduane Homogo ibunime dabene Yagabanaga aguanene kamirubi tígua Anduane Homogohanda manane tara tara agalime nabiagane ale bigi biyarubi wali agali ko biaga hearuhondo pani migi biyarubi mitangiore biaabo halimu.
1CH 16:14 Anduane Homogo ibu inanaga Ngode Datagaliwabe kagoni. Ibunaga mana lo ngaruni wali agali dindi bibahendeha bu karume bilonaga lo nga.
1CH 16:15 Ibugua habo nalolene bi lowinigo ngaruni wia ai̱ ai̱ore bulebira. Ibugua bi lo wialu ogoale bulebero laga bialu lo ngaruni mani hama porarume handaga bialu karia wia ai̱ ai̱ore bulebira.
1CH 16:16 Ibugua Abarahamala habo nalolene bi lo wialu Aisagahondo ogoale bulebero lenegobi heneneore bulebira.
1CH 16:17 Anduane Homogo ibugua Isaraelehondo habo nalolene bi lowinigo ogoni wali agalirume bialu haabo helonaga lowini.
1CH 16:18 Anduane Homogo ibugua Isaraelehondo lalu, I̱na tíhondo Kenana dindi karulalimulo ngulebero. Dindi ogoni tíbi tínaga waneigini mani holebirarubi tíninaga dindi ogoniore halimulo ngulebero, lene.
1CH 16:19 Ala Ngode Datagaliwabenaga wali agali ti dewa ndo henedaruni ti emene mbira hangu Kenana dindini hene. Ti dindi tene ndo mendeali dindini bame igiri yango pu haradagua bini.
1CH 16:20 Ti dindi mbirani baya hangu ho dambolo hene ndo. Ti togolo yalu pialu dindi wiaruni bibahendeha ge hai haga hene. Kini mbiragonaga dindiha puwa emene tigimandi dege halu lone hili yalu pialu kini mende heagonaga dindiha pu halu ani bigi bialu hene.
1CH 16:21 Ti ani bu ha heagolabi hameigini maru hongohe hearume ibunaga wali agali uruni hengedope holilono Ngode Datagaliwabe ibugua ti mamage hene. Mamage howa ibugua kini hearu talialu ibunaga wali agali urunihondo kagua mbira bulumini lalu lamini.
1CH 16:22 Ibugua lalu, I̱naga biabe biahaga i̱nime dabene karu mo ko holemini. I̱naga mana latagi haga karuore mbira ela nahalimu, lene.
1CH 16:23 Anduane Homogohondo iba gana gahenge lolene nga. Ibugua ina haru dai bialu pele ngiyagoni lalu horo bibahendengi wali agali bibahendeme hale hai helo lamiaaboore halimu.
1CH 16:24 Ibu daliga gibiore ka lalu hameigini bibahende paluyu pedaru hale hai helo lamilimu. Ibugua biabe timbuni bayale bima piyarunaga wali agali lamiai halimu.
1CH 16:25 Anduane Homogo ibu daliga gibiore kagoni. Iname ibunaga mini uyura mo yaraga haabo halu hami̱ya. Mbirale wali agalime dama mitangi bialu gime wabini ngaru hondowa ina gi holene nawi. Anduane Homogo ibu dege daliga gibi kago iname ibu hondowa dege giho holene nga.
1CH 16:26 Wali agali hameigini tara tarame mbirale dama mitangi bialu tini gime wabiniruhondo bi pupu wiagaru uruni bibahende ke̱ howa hangu bialu kagoni. Inanaga Anduane Homogo ibugua hari daligabi mbirale bibahende hariha karubi ngarubi wabinigo ibuni hangu daliga gibiore kagoni.
1CH 16:27 Anduane Homogo ibu kini howa wá holenebi mini mo yaraga holenebi ibunaga hangu ngagoni. Ibunaga anda lomabu heleneni mbirale bu ngarume Anduane Homogo ibuni hongohe howa ibuni baya buruguleore agi loabe tobahe kagobi walia ho nga.
1CH 16:28 Wali agali dindini bu kamiru bibahendeme Anduane Homogonaga mini mo yaraga halimu. Ibunaga wá holenebi hongo holenebi daliga gibiore nga lalu ibunaga miniore yaraga halimu.
1CH 16:29 Anduane Homogo ibunaga mini timbuni daligaore ngago mo yaraga halimu. Anduane Homogohondo mbirale mbira lomabu migi bule yalu ibunaga andaha anda ibugu bilimu. Wali agali bibahende kamiru Anduane Homogo ibu baya buruguleore kagoria ibalu bulu palialu ibunaga lotu lalu halimu.
1CH 16:30 Ibu gibiore kago hondowa tí duru ala lalu halimu. Dindi timbuni o ngagoni ibunime wabu winidagua ema bialu girigurabi mbira nabuleore ngagoni.
1CH 16:31 Dindi timbuni ogo í̠bi hari li kego í̠bi libu nde turu halibu. Wali agali tara tara bibahende bu hama pedaru lamialu, Anduane Homogo ibu kini ka, lalimu.
1CH 16:32 Iba solowara í̠ nde tigitugu lalu í̠ninaga bi dalimu labe. Mbirale iba solowaraha biru ngamiru tí nde bi ladagadaga bialu tíninaga bi ladaba. Mabu wima pedamirubi mbirale mabuni andaho hama pedamirubi tí bibahende turu timbuniore ho halimu.
1CH 16:33 Anduane Homogo ibuni dindi ogo bibahende handagimbu buwa haru hole ibulene tu harangi ira teha ira bu karume turu gibiore howa tininaga bi lalu bi dalimu lagalaga bulebira.
1CH 16:34 Anduane Homogohanda mana bayale biaabo haga kagonagabi ibunaga gubalini holene ha ho wiaabo haga kagonagabi iname ibuhondo ka̱i̱ lalu hami̱ya.
1CH 16:35 Iname Ngode Datagaliwabe inanaga Pele Ngiaga kagohondo bi ogodagua lami̱ya. Í̠na ina bibahende mo mogo bialu waitigi karunaga giha howa yamialu inanaga dindini lone holoma̱ya haru dai bu helabe. Iname í̠hondo turu halu ka̱i̱ lalu í̠naga mini baya buruguleore yaraga halu holoma̱ya í̠na ani bibe larama.
1CH 16:36 Anduane Homogo Isaraele wali agalinaga Ngode Datagaliwabe kago ibu mini yaraga hami̱ya. Áyubi maniore howabi ibunaga mini yaraga haaboore hami̱ya. Wali agali bibahendeme ani lowa tigua, Henene aniore bilo. Anduane Homogonaga mini yaragaore hama, lalu hene.
1CH 16:37 Kini Debidi ibugua Anduane Homogonaga Habo Nalolene Bi lo winigonaga Mbogoyi wiaria agali mini Asababi Libaiali marubi ti lotu lolene haru haabo helo dabo helene. Horo bibahendengi ti biabe ogoni bulene ngadagua biaabo helo helene.
1CH 16:38 Yadudunu igini Obededomobi ibu hameigini pira waragariani halirabi (68) tigua Asaba biamogo bilo Debidihanda ti dabo helene. Hosa Obededomola libugua panga haraba mamage haga hene.
1CH 16:39 Debidihanda loma binigo mo miaga Sadogobi ibu ariabi tigua Gibeono tanoha Anduane Homogo mitangi bialu lotu lolenaga haru helo dabo helene.
1CH 16:40 Anduane Homogohanda mana lo wialu Isaraele wali agalihondo minigodagua tigua horo bibahendengi egerebagi alendobi nogo bulumaga sibiru lomabu delaga dabu heagoriani nogo bo delai haga wini.
1CH 16:41 Agali uruni heba Hemana Yadudunula agali maru hearubi ti nde ala Debidihanda Anduane Homogo gubalini haabo hagagonaga mitangi bialu ibu mini yaraga halu iba gana lalu helo dabeneru ti hene.
1CH 16:42 Hemana Yadudunula libugua biguli alebi ngi̱li̱nge̱le̱ lagane belede boronosime wabu wiarubi bi lagane marubi iba gana lalu Anduane Homogo mini yaraga halu howa baga heneru bibahende haru haga hene. Yadudunu hameigini hearume Anduane Homogonaga anda panga haraba wiagoriani mamage haga hene.
1CH 16:43 Ani biaiore halu wali agali bibahende andaga pugupugu bini. Debidi ibubi nde ibu one waneiginiru Anduane Homogohanda ti mo bayale helo lowa ibuni andaga hama pene.
1CH 17:1 Debidi ibu ibuni andagaha howa mani ibugua Anduane Homogonaga bi mana latagi haga Nadanahondo lalu, I̱ni anda ira tamia bayalegome binigoha bedogodago Anduane Homogonaga Habo Nalolene Bi lo winigonaga Mbogoyi biago dege balai anda biagoha wiaruago tiga nabida, lene.
1CH 17:2 Ani layagola Nadanahanda ladai bialu lalu, Anduane Homogo ibu í̠la mandagi haabo kagoni. Í̠na mbirale mbira bule manda bidedagua nde bibe laro, lene.
1CH 17:3 Anigo horo ogoningi mbiraga Anduane Homogohanda Nadanahondo lalu,
1CH 17:4 Í̠na i̱naga biabe biahaga Debidi karia puwa i̱na bi o larogo ibuhondo lamibe. Debidi-o í̠ agali anda i̱ holiyanaga bia helo dabo heledogo ndo ke.
1CH 17:5 I̱ anda timbuniha nahaga kogoni. Bamba Isaraele wali agali Iyibi dindiha howa haru tagira pirugongi howabi maruha pu íbu bialubi i̱ balai andaha dege haga harugoni ko.
1CH 17:6 I̱ni Isaraele wali agali ti haru mandagi dindi dewani ibagabu haabo harimago howa tinaga agali haguane i̱na dabalu helarurunihondo lalu, Ira tamia bayale karume i̱naga anda mbira bia nahe kamigo agibe, lalu hale naharuligoni, lene.
1CH 17:7 Anduane Homogohanda Nadanahondo laabo halu lalu, I̱naga biabe biahaga Debidihondo au labe, Anduane Homogo Hongo Haiheore kago ibugua í̠hondo bi ogodagua layago hale habe. Í̠ bamba nogo sibi haru haga heria i̱nime í̠ dabalu í̠na Isaraele wali agali haru habelo agali haguane dabo helarugoni ke.
1CH 17:8 Dindi bibahende í̠ ibaga bialu piriruniha i̱ni iya haru mandagi ibagabu haabo haribagoni. Ani howa i̱nime dege waitigi ibiyaru wai bialu bo podahana haga birugola í̠ wayali harigoni. Ai i̱nime í̠ agali mini lene timbuni dindi maruha karubi dege habelo i̱na í̠ mo yaraga holebero, laya.
1CH 17:9 I̱naga Isaraele wali agali tí bayaleore halimulonaga dindi hobane bayale mbira tínaga mo wia ko. Bambaore agali ko bu hearume tí mo ko haabo hayadagua mani tí mo ko naholebira. Tínaga mamalirume dindi ogo pigane karulayangi howa bialu henego bima ibalu i̱na tínaga agali haguaneru dabo helaga birugolabi tinaga waitigime ti mo ko haabo haya, laya. Ani biyago áyu i̱na uruni ti mo batara harogola urunidagua nabi tínaga dindi ogobi lone mo ko naholebira. Ani kamigola i̱na í̠ dameneru baya hanguore hai helarogola tigua í̠naga aguaneru dewaore helo hono wigi bulebira, laya.
1CH 17:11 Í̠ homaregola í̠naga mamaliru hora henegoha dege hora kangi í̠ igini mbira kini ha aribia helo dabo helolebero. Ani berogola ibu kini hongoheore mbiralime ibu bope habe nahe holebira.
1CH 17:12 Kini ogoni ibugua wali agali i̱ni koria kaware ibilonaga i̱naga anda bulebira. Ani biragola i̱na maninaga ibu igini aguanerume dege kini haabo helolebero.
1CH 17:13 Ani helowa ibu aba i̱ni kogola ibu i̱ igini holebira. I̱na ala Solonaga henge wiago í̠hondo ngule ibu erembira mirugodagua í̠ iginihondo ani nabi gubalini haho wiaabo helolebero.
1CH 17:14 Ani helowa ibunaga waneigini aguaneru halu ereba nahe kini ha aribia haga bima puabo helolebero, laya lalu Debidi lamibe, lalu Anduane Homogohanda Nadanahondo lene.
1CH 17:15 Anduane Homogohanda bi ogonidagua lamiyaruni Nadana ibugua hale howa Debidi lamiai hene.
1CH 17:16 Nadana ibugua Anduane Homogohanda bi anidagua laya lalu lamiyagola Debidi ibugua hale halu Balai Anda Anduane Homogo ibuni heagoha pu biruwa lalu, Anduane Homogo Bibahende Haru Haame Haga-o í̠na i̱hondo bayale dewaore birida. Ani bialu i̱nibi i̱naga waneigini damene bu karubi ina bayale ndo hemaria anidagua biridagoni.
1CH 17:17 Anduane Homogo Bibahende Haru Haame Ho Haga-o í̠na i̱hondo bialu hariruni bibahende bayale dege biaabo harigo ai uruni emene degeyane mbirale bayale áyu uruni lone biatago harida. Anduane Homogo-o í̠na i̱ damene mani holebirarubi mo bayale holebero larigo ai i̱ agali nagaloneore kogoni ndobe. Ani ha holiya dege í̠na i̱hondo mbirale bayale timbuni i̱hondo bule ngeru walia harida.
1CH 17:18 Í̠na urunidagua biridagonaga i̱na í̠hondo bi agua loabe. Í̠naga biabe biahaga agali i̱ kogoni í̠ni manda bide.
1CH 17:19 Ani manda buwa í̠na bi lo wirigonagabi í̠nime bule hame ledegonagabi áyu i̱hondo í̠naga mana bayale biaga ngego i̱ mo walia kegoni.
1CH 17:20 Anduane Homogo-o í̠ duniniore kegonigo í̠ ale mende naheore. Ngode Datagaliwabe í̠ hangu kegoni lalu ina mamalirume langigi biyane hale harima.
1CH 17:21 Ina Iyibi dindiha garabaya hemaria í̠na Isaraele wali agali bibahende garabaya golalu haru tagira ibuwa í̠ninaga wali agali holoma̱ya helarigoni. Ani helowa wali agali maru ina kamarubi naheore. Ina dindi áyu kamagoria ibuluma̱ya í̠na mbirale bayale tara tara nahendene ale wiarubi biai harigola inanaga dindi ogoria ibinigo kamagoni. Wali agali dindi ogoriani ala hene hearu í̠na bo batagi hai halu tinaga dama mitangi bialu gime wabini wiaruni bo gialo wahai harigola dindi dabulu wiaru mo ngirigola karulo kamagoni. Anidagua birigola wali agali dindi bibahendeha karume í̠ mini lene taraore ke lowa í̠naga mini yaraga halu ka.
1CH 17:22 Anduane Homogo-o ina Isaraele wali agali kamaru í̠ninagaore holoma̱ya dabo helowa ina ani haabo holoma̱ya helarigoni. Í̠nibi nde inanaga Ngode Datagaliwabe haabo ho kegoni.
1CH 17:23 Anduane Homogo-o áyu í̠na i̱naga dameneruhondobi í̠naga biabe biahaga i̱nihondobi buleore lalu bi lo wiriruni biaaboore habelo hameledo. Í̠na bulebero lo wiridagua bibe laro.
1CH 17:24 Wali agali bu karume í̠na inahondo anidagua berego hondowa tigua í̠naga mini yaraga helo ani bibe laro. Ani beregola tigua lalu, Anduane Homogo Hongo Haiheore Kago ibu Isaraele wali agalinaga Ngode Datagaliwabe kagoni, lalu í̠naga mini yaraga holebira. Ani lalu kagola í̠na i̱naga aguane holebiraruha howa dege kini helo dabaga bialu haabo holebira.
1CH 17:25 I̱naga Ngode Datagaliwabe-o í̠naga biabe biahaga i̱hondo lalu, Í̠naga aguaneneru bayale helonaga mo hongo holebero, lalu langirigonaga í̠naga biabe biahaga i̱ni kogome í̠hondo gi nahe howa bi ogoni langerogoni.
1CH 17:26 Anduane Homogo í̠ni hanguore Ngode Datagaliwabe kegoni. Í̠na mbirale mbira bule lalu lo werego biaore biaga kegoni. Ani biagaore kegome áyu howa i̱hondo heneneore mbirale mbira bule lalu bi lo wirigoni.
1CH 17:27 Ani bule lalu lo wiridagua bialu i̱naga damene mani holebirarubi í̠ni andaneha howa bayale haabo helo helabe laro. Anduane Homogo-o í̠na bi ogoni heneneore lo wirigome turu howa biamogo buleneru i̱naga aguaneneruha wiaabo holebira manda bido, lalu Debidihanda Anduane Homogohondo bi anidagua lene.
1CH 18:1 Mani emene howa Debidibi ibunaga ami agalirubi tigua Pilidialiru baba wai bini. Ani buwa tigua Pilidialiru bo poda hana hayagola Pilidialirume Gede tanobi tano emene maru kawareni wiarubi handayaho haga winiru wahalu pene.
1CH 18:2 Ani piyagola Debidibi ibunaga ami agali biarubi tigua Moabaliru baba wai bialu urunibi bo poda hana hene. Ani bialu Moabali uruni minu garabaya buwa ti ibu dagisi migi bialu helo helene.
1CH 18:3 Ani helowa mani Debidibi ibunaga ami agalirubi tigua Siria dindi mbira mini Soba wiagoha Kini Hadadese heagola wai bule pene. Ogoningi Hadadesehanda ibunaga amiru haru halu dindi mbira iba Yuberedisi poragohayagi waitigime karulo henego ogoni mo yu dai bule wai bu pene. Ani pu heagola Debidibi ibunaga ami agali biarubi tigua harigani lola howa
1CH 18:4 ti wai bialu Debidi ibu wayali hene. Ani buwa Debidi ibugua Hadadesenaga ami agali dindi dindi piaga daosini dege pira kira (20,000) minu wialu nogo hosini biruwa wai biaga agali daosini mbirani handari karia (1,700) minu wini. Ani bialu nogo hosime gili laga karisi handari mbira (100) mo wini. Ani buwa Debidi ibugua nogo hosi maru karisi handari mbira (100) gili lalu polenaga helalu marunaga ge bo polaga biyagola ge hongo halu pobe nahe hene.
1CH 18:5 Ogoningi Siriali maru Damasaga dindiha hearu tigua Kini Hadadese biamogo bialu wai bule pene. Ani piyagola Debidibi ibunaga ami agali biarubi tigua wai bialu Sirianaga ami agali biaru daosini dege pira kirani kira (22,000) bo wahai hene.
1CH 18:6 Ani bo wahai howa Debidihanda ibunaga ami agali maru Sirialime lone heyalu wai ibulilono Siria dindi wiyadagoha mamage hai helene. Ani heleagola Siria wali agali ti Debidi andaneha howa tinibi ibu dagisi migi bialu hene. Dindi mbira mbiraha Debidi wai bule pugu biyagola Anduane Homogohanda ibu biamogo biyagola ibugua waitigi bope halu ibuni wayali haabo hene.
1CH 18:7 Wai bialu howa Debidihanda Kini Hadadesenaga ami agali haguane hearume humbi ngolome wabini yu haga biniyaru mialu Yarusalemeha yalu pudaba laga bini.
1CH 18:8 Ani bialu Debidi ibugua ege to̱le̱ boronosi dewaore Hadadesenaga tano kira Tibihada Kunulaha wiaria mo yini. Mani Solomonohanda boronosi ogonime iba dangebi anda gene luni kirabi mbirale tara tara Anduane Homogonaga andaha wiagarubi wabini.
1CH 18:9 Ani bialu heagola Hamada dindinaga Kini Toi ibu hale halu hearia Debidihanda Kini Hadadesenaga ami agali bu hearu bibahende bope haya layago hale hene.
1CH 18:10 Ani hale howa Kini Toi ibugua Debidihanda o biyadagoni turu howa ibu igini Yorama Debidi hearia puwa, Í̠na bayuwaore birida lole pu, lene. Kini Hadadesehanda Kini Toi ibu bibahendengi bope haabo haga henego ai Debidihanda Hadadese bope hayadagonaga turu howa ani lene. Ani pu laya handala Yorama ibugua yári tara tara ngolomebi silibamebi boronosimebi wabini wiaru mo yaga binigo uruni Debidi mo turu halu bame migi bini.
1CH 18:11 Debidi ibugua mbirale uruni yamialu Anduane Homogonaga loma biaho wigi bini. Ibugua dindi maruha wai bialu ngolo silibaru mo yalu dai bigi bini wiarubi loma biaho ngelaga dege bini. Ani bialu ibugua ngolo siliba uruni minidaru Idomo Moaba Amono Pilidia Amalege dindi uruniha howa mo yu ibugu biyaruni loma dege bini.
1CH 18:12 Ani bialu henego Abisai ibu ai̱ya Seruia berenego ibu ami agaliru haru halu tigua Idomoali hearu baba wai bule dindi mbira mini Dindi Ulini Ibi Wiaga laga wiagoria pene. Ani puwa tigua Idomoali ami dege daosini pira mbirani halira (18,000) bo wahai hene.
1CH 18:13 Debidi ibunaga ami agali maru dabalu Idomo dindiha handayaho helo helene. Ani heleagola Idomo wali agali ti Debidi andaneha hene. Dindi bibahendeha Debidi ibu baba wai bialu heagola Anduane Homogohanda Debidi ibugua wai buwa waitigi hearu bo podalu bai helo biamogo biaabo halu hene.
1CH 18:14 Debidi ibugua Isaraele dindi bibahende handame ho howa ibunaga wali agaliru baba mana bayale tigabi bulene wiadagua dege bialu haga hene.
1CH 18:15 Ani bialu heangi agali mini Yoaba ibu ai̱ya Seruia berenego igini ibugua ami agaliru haru bamba haga hene. Ahiludu igini Yahosabada ibu beba gili bia dagala biaga howa ibugua gabumanenaga mbugaru handayaho haga haguane mbira hene.
1CH 18:16 Ahidubu igini Sadogola Abaiada igini Ahimelegela libu Anduane Homogonaga loma binigo mo miaga hene. Seraia ibugua kininaga beba gili bia dagala biaga hene.
1CH 18:17 Ani bialu Yahoiada igini Benaia ibu nde ami agali maru Kini Debidinaga mamage haga Keredeali Peledeali bu hearu haru helo dabo helene. Debidi iginiru ti kininaga biabe hondo haga hene.
1CH 19:1 Amonoalinaga Kini Nahasa homayagola ibu igini Hanunuhanda ibu aba henegoria Amono dindini kini ha aribia hene.
1CH 19:2 Ani heagola Debidi ibugua lalu, Hanunu aba Nahasahanda i̱hondo mana bayale bialu hagadagua i̱nabi nde Hanunuhondo bayale dege bialu holebero, lene. Ani lowa Debidihanda agali maruhondo lalu, Hanunu karia puwa ibu aba homayadagonaga duguanda pialu daraba lole pudaba, lene. Ani laya handala ti Amono dindiha anda pialu Hanunu hearia ibiyagola
1CH 19:3 Amonoali agali haguane bu hearume Hanunuhondo lamialu lalu, Í̠na mandabu handalu keria Debidihanda agali o pu layadaruni heneneore í̠ aba dara halu ibunaga mini yaraga hole pudaba lene ibiyadalo manda bidebe. Ani ndoyago. Mani ibunaga ami agaliru haru halu ibuwa ina baba wai bulenaga áyu agali urunime inanaga dindi ngamago abidabe diri hondo wule pudaba lenego íbu ka, lene.
1CH 19:4 Ani layago hale howa Kini Hanunu ibugua agali Debidihanda bi yalu pudaba lene biaru minu yania howa tinaga angari hearu podo wahene. Ani bialu agali uruninaga aga luni biagimbu biaruni podo tubagi howa here panahe heagola tini dalu dai bilene.
1CH 19:5 Anigo agali biaru ti nde taga timbuni howa tini dalu dai bibe nahe hene. Anidagua biya layago Debidi ibu hale howa ibugua agali biaruhondo bi lo pelalu lalu, Tigua o biyadagoninaga Yarusaleme dai bulenego taga nahalimu. Abale ibalu Yarigo tanoha tínaga angari lone ibilonaga emene hondo halimu. Mani tínaga angari bayale ibidagola nde Yarusaleme dai bilimu, lalu Debidihanda lawia hene.
1CH 19:6 Ani binigo Kini Hanunubi Amonoali biarubi tigua mandabu handalu hemiria mana lehe o birimagonime Debidihanda ina baba keba helonaga mo tandaga harimadalo mandabu hene. Ani manda bialu tigua agali maru Siria dindiha hearu Mesobodemia dindiha bu hearu bababi agali maru Soba tanoha hearu bababi bi pongo bo wule pene. Dindi uruniha hearu tigua muni siliba kilogarama daosini dege pira tebirani duria (35,000) Mesobodemiali tihondobi Siriali tihondobi wia halu lalu wai biagane garo ale nogo hosime gili lagabi ami agalibi wai bule ibilelonaga bi yalu pelene.
1CH 19:7 Ani bialu tigua Amonoali uruni biamogo bialu wai biagane garo ale mini karisi daosini dege pira tebirani kirabi (32,000) Kini Maganaga amibi tigua Medeba tano kawareni ibuwa balai anda bu hene. Ani bialu Amonoali tiguabi tinaga ami agali haru halu wai bule anda ibini.
1CH 19:8 Ogonidagua bialu wai bule agali mo mogo bialu ka layago hale howa Debidi ibugua ami haru bamba haga haguane Yoababi Isaraelenaga ami agali bibahendebi wai bule pudaba lene.
1CH 19:9 Ani piyagola Amonoali ami biaru tibi nde Laba tano wiagonaga pabe kawareni handayaho hene. Ani heagola tinaga kiniru wai mogo ibiyadaruni ti nde naina dangi wiagoria tidiyu hene. Ani buwa ti bibahendeme Isaraele ami agaliru baba wai bulenaga dege ona tidiyu haga haga bini.
1CH 19:10 Yoaba ibugua handalu hearia Isaraele baba wai bule ami agali tidiyu haga haga biaru hondowa wai hama kirani talebu ki howa wai bibeheyane hendene. Ani hondowa ibugua Isaraeleali hongoheru maru tale bialu amu dangi wiagoria tidiyu hearu baba wai bule handayaho helowa ibunime haru hene.
1CH 19:11 Ibu hamene Abisaihandabi nde Isaraele ami agali hearu halu mende haru howa Amonoali hearu baba dege wai bule tidiyu naina handayaho hene.
1CH 19:12 Ani heagola Yoaba ibugua Abisaihondo lalu, Wai bialu howa handalu keria Sirialirume ina bope habeheyane handarimiyagua nde tígua ina mo hongo halu wai bule abale ibalimu. Iname handalu kamaria Amonoalirume tí bope habeheyagua nde inamebi abale ibalu tí biamogo buleberema.
1CH 19:13 Ani bimi̱yago tígua wai bialu howa gi nahe hongoho halimu. Iname wai bialu howa inanaga wali agali waneigini andaga bu karubi inanaga tano Anduane Homogohanda ina ngini ngamarubi mitangi bialu wai hongo howaore bimi̱ya. Anduane Homogohanda nde ibunime hame ledadagua bilo laro, lene.
1CH 19:14 Ani lalu Yoababi ibunaga ami biarubi tigua Siriali bu hearu baba wai bule hapara halu piyagola Sirialiru ti ibida pene.
1CH 19:15 Amonoali biaru tigua handalu hearia Siriali biaru ibida piyago hondowa Amonoali tibi nde Abisaibi ami agali biarubi ibiya handala ti ibida piai halu tanonaga wai pabe tamuha ha do hai hene. Ani biya handala Yoaba ibugua Amonoali uruni ani helo wahalu ibunaga ami agali biaru haru halu Yarusaleme dai bini.
1CH 19:16 Siriali biaru tigua handalu hemiria Isaraele agalirume ti bope hayiyane hondowa tinaga ami agali hearu mo mogo bini. Ani buwa tigua agali maruhondo, Siria ami agali maru iba Yuberedisi ange ni tagira ibiragohayagi wai biaga hearu damu pudaba, layagola damu pialu bibahende haru daibu howa tidiyu hene. Ti bibahende íbu ngoaiho heagola Kini Hadadesenaga ami haru haga agali haguane mbira mini Sobaga heagome ami agali uruni haru hene.
1CH 19:17 Siriali biaru ti ogonidagua tidiyu íbu ka layago hale howa Debidi ibugua ibunaga Isaraele ami agali bu hearu abale olo ngoai hene. Íbu ngoai heagola Iba Yodana doma ede halu Helama dindini ti wai bule pene. Ani piyagola Siriali biaru tigua ho dugu bialu Isaraele baba wai bini.
1CH 19:18 Ani biyagola Isaraele ami biarume wai hongo howaore bialu Siriali bo badai bini. Horo ogoningi Debidibi ibunaga ami agalidarubi tigua Siria ami agali karisini heyu howa wai biaga hearu daosini karia (7,000) bo wahalu nogo hosini biruwa wai biaga daosini dege pira maria (40,000) bo wahene. Ani bialu Sirianaga ami haru haga agali haguane Sobagabi wai hamani bope hayaore abale tongolo mini.
1CH 19:19 Abale kini maru Sirianaga Kini Hadadese andaneha haga henerume handalu hearia Isaraeleali ti hongoheore howa Siriali bope hayago hondowa tigua Isaraeleali baba wai palialu ti Debidinaga andaneha hene. Ani buwa Siriali biaru tigua Isaraelealiru hondowa gi timbuni halu tigua Amonoaliru lone biamogo bulene manda nabi wahene.
1CH 20:1 Mali bibahendengi dalu dagarebi ereba haragola ami agali wai bu piaga wini. Mali mbira howa ani bu piaga winingi dege ami haru haga agali haguane Yoabahanda ami haru howa Amonoalirunaga tano timbuni Laba wiagoria wai hongo howa bialu bo podama anda pialu karulene. Debidi ibu dege wai nabupe Yarusalemeni hondo hene. Ami biaru tigua ho mabu buwa wai bialu Laba tano bo haealabaga bini.
1CH 20:2 Ani anda puwa Amonoali kini heagonaga manda ngolome wabini karulo bereago Debidi ibunioreme golo yini. Manda ogoni ngolome wabinigo genda magi kilogarama pira tebirani duria (35) agima wini. Manda ogoni to̱le̱ baya tara mbira muni dewaoreme yolo biaga wiagome yári bia heneyago Isaraeleali ami biarume Debidinaga haguaneni mo karula hene. Ani bialu Debidi ibugua tano ogoniha howa muni mbiraleru dewaore mo yalu pene.
1CH 20:3 Ani buwa ibugua wali agali Laba tano ogoniha heneyaru bibahende minalu biabe tara tara dindi aluenerubi ayume bulene wiarubi some podolene wiarubi biai helo mo ta hai hene. Amono dindiha tano wiaru bibahendeni wali agali bu hearume ogonidagua biai hene. Ani biai halu mani emene howa Debidibi ibunaga ami biarubi ti Yarusaleme dai bini.
1CH 20:4 Emene howa Pilidiali Isaraelealila wai bialu howa Debidibi ibunaga ami agalirubi ti Pilidialiru baba wai bule tidiyu pene. Ti Gese tano kaware puwa Isaraele agali mbira mini Sibegai ibu Husa tanoali howa ibugua wai bialu Pilidiali lu timbuni ala henerunaga aguanene mbira mini Sibai heago bo wahene. Ani bo wahalu Isaraeleali ti wayali hene.
1CH 20:5 Wai halu mende biyangi Isaraelealiru tigua Pilidialiru baba wai bialu howa Bedelehemeali Yairi igini Elehanana ibugua Pilidiali mbira Gede tanoali mini Lami ibu Golaidi hamene heago bo wahene. Agali o biago ibunaga yandare endene timbuniore kuluba ale mbira yu haga henego bene.
1CH 20:6 Gede tanoha dege wai mende bialu hene. Horo ogoningi agali timbuni gibi mbira luoreni ibunaga gi hondone waragaria labolabo halu ge hondonebi waragaria degehe hene. Gi hondonebi ge hondonebi lamaga halu pira kirani mariahe (24) hene. Ibu agali lu timbuni ala henerunaga aguanene hene.
1CH 20:7 Agali ogoni ibugua Isaraele wali agali mege bialu heagola Debidi hamene Sama igini Yonadanahanda agali ogoni bene.
1CH 20:8 Agali lu timbuni tebira uruni Pilidiali Gede dindiha bamba heneru aria hearia Debidibi ibunaga agali biarubi tigua bo wahene.
1CH 21:1 Isaraele wali agaliru mo ko holene hamelowa dama Heyolabeme Debidi mo manda bia halu Debidihanda Isaraele wali agalibi Yuda wali agalibi bibahende daga lolene manda bini.
1CH 21:2 Ani manda buwa Debidi ibugua ibunaga ami haru hagane agali haguane Yoabahondo lamialu lalu, Í̠na ami agali haguane maru hayaruni haru tígua Isaraele wali agaliore bibahende dagalai hole pudaba. Pigane dindi gibuni uyurayagi Dana tano howa dagalama pialu dindi gibuni unurayagi Beaseba tanoni daga lairi halimu. Wali agali agira palirimadabe hondoliya anidagua bilimu, lalu lamini.
1CH 21:3 Ani layagola Yoabahanda Debidihondo ladai bialu lalu, Kini-o ai inanaga Anduane Homogo Ngode Datagaliwabe ibugua wali agali áyu kamarubi ndo mo dewaore helo. Wali agali uruni bibahendeore ti í̠ninaga andaneha hai kagoni. Anigo iname wali agali daga lolene ogoni inanaga biabe ndo ngagoria í̠na irane aginaga daga lolene hamelo kebe, lene.
1CH 21:4 Ani layagola kini ibugua Yoababi ami agali haguane maru biarubi tihondo bi hongo howa lamialu, I̱na o bule pudaba larudaguaore bilimu, lene. Ani layago hale halu ami haru haga biaru ti Isaraele dindiha puame halu wali agali bibahende hearu dagalai howa Yarusaleme dai bini.
1CH 21:5 Tigua dai buwa Yoaba ibugua bialu henedaru bibahende ogodagua birima lalu kini hale helo lamialu lalu, Isaraeleali ami habeheru miliono mbirani daosini dege handari mbira (1,100,000) halu Yudali daosini dege handari mariani pira karia (470,000) hearia daga larima, lene.
1CH 21:6 Yoaba ibu Debidihanda wali agali dagalolenenaga te layago hame nale howa ibugua Libai hameiginibi Beniyamini hameiginibi daga nale hene.
1CH 21:7 Ngode Datagaliwabehanda Debidi ibugua ko timbuniore biyago hondowa ibugua Isaraele wali agali pani mialu mo ko hene.
1CH 21:8 Ogonidagua biyagonaga Debidi ibuni bu miniha genda timbuni yu howa ibugua Anduane Homogohondo bi lalu howa lalu, I̱na mini nawi ale howa agali daga larudagome i̱na mana ko timbuniore bu haruda. Ani birudago ai Anduane Homogo-o i̱na ko birudago mo wahabe, lene.
1CH 21:9 Ani layagola horo ogoningi dege Anduane Homogohanda agali bi mana latagi halu mbiwia haga mini Gadahondo lalu,
1CH 21:10 I̱na bi o larogo í̠na Debidi lamibelonaga langero. I̱ Anduane Homogo i̱naore hariga tebira mo ngerogo í̠nime mbira ogo karulape lalu dababe. Í̠nime ogo bia lalu i̱hondo langerego i̱na í̠hondo buliya langibe, lene.
1CH 21:11 Anduane Homogohanda bi ogoni layago hale howa Gada ibugua egerebagi Debidi ibu heyu bereria Anduane Homogohanda ogodagua laya lalu lamule pene. Ibugua puwa Debidihondo lamialu lalu, Anduane Homogohanda í̠na bi tebira uru mbirago bilonaga e̱ labelo hameledo laya.
1CH 21:12 Ai mali tebirani hina gari timbuniore Isaraele dindini tagira ibilo hameledebe be tí waitiginaga amirume wai bima lole ibiragola ege tebirani tí ibida pialu ha do holene hameledebe be horo tebiru Anduane Homogohanda ibunaga wai bulene ayu tibu aleme tí balu ibunaga dahuliyalime tínaga dindi bibahendeha warago timbuni tagira mo ibilelo hame ledebe. Ai bi ogoni bayuwa mandaore buwa mbira ogo bilo larego Anduane Homogo ibunihondo lamule poliya langi, lene.
1CH 21:13 Ani layagola Debidi ibugua Gadahondo lalu, Í̠na bi áyu langiriruni hale howa genda timbuniore yu bedogoni. Ani bidogo ainde Anduane Homogo ibunime ogoale bule lalu ibugua bule hameledadagua o inahondo bilo waha. Irane ibunime ina dara hai haga kagodago agalime ina mo ko halu belo hame naledo, lene.
1CH 21:14 Ani layagola Anduane Homogohanda warago ko timbuniore horo ogoningi howa Isaraele dindi bibahendeha ibilene. Ani ibilayagola warago timbuni ogonime Isaraele wali agali daosini dege pira karia (70,000) homai hene.
1CH 21:15 Ani bialu dahuliyali mbira wali agali bo wahama ibiyadagoni Yarusaleme tanoha wali agali bo wahole anda ibini. Ani ibalu hearia Anduane Homogohanda wali agali mo ko hene bu hearu hondowa dara howa dahuliyali biagohondo lalu, Ai karulapego waha, lene. Ani laya handala dahuliyali biago ibu wahalu widi iranela bo taulalu lini aeanela tale biaga wiagoria hene. Dindi ogoni Yabusu hameigini agali Arauna mbira henegonaga wini.
1CH 21:16 Dahuliyali ogoni ibu dindi harila dombeneha howa ibugua ayu tibu yiagome Yarusaleme bolenaga gi dogolo hearia hondowa Debidibi Isaraeleali wahe miniwirubi tigua dara howa biagane aga wiaru bu howa dindini bulu palu ibira hene.
1CH 21:17 Ani bu wuwa Debidihanda Anduane Homogohondo lalu, I̱nime wali agali daga ladaba lalu mana koore ogoni birugome ai áyu pani noloma̱ya ngirigonida. Anigo wali agali darabi uruni tigua ko mbira agi biyagonaga ti pani nelo miribe. Ai tihondo pani merego wahalu i̱bi i̱ one waneiginirubi inanehondo pani ngia nabiridago, lene.
1CH 21:18 Ani lalu hearia Anduane Homogonaga dahuliyali biagome mana latagi haga Gadahondo lalu, Í̠na Debidi karia puwa ibuhondo ogodagua lamibe, Áyu ogoni Yabusuali Araunanaga widi gandulo ngelowa bo taulalu lini aeanela mo tale biaga ngagoria puwa Anduane Homogonaga lomabu delaga dabu mbira bia hole pobe, lalu lamibe, lene.
1CH 21:19 Ani laya handala Debidi ibu heyalu Anduane Homogohanda bibe laya lalu Gadahanda lamiyadagua bule dindi podene mbira widi lini do ngelowa lini aeanela mo tale biaga wiagoha pole pene.
1CH 21:20 Araunabi ibu igini maria biarubi biabe bialu haga wiagoria howa handape halu hearia dahuliyali mbira hearia hondowa mogo lalu ibu igini maria biaru ibida pialu bira do hene.
1CH 21:21 Araunahanda Kini Debidi ibiyago de hondowa ibu lola hole puwa ge duli hanga howa kininaga mini yaraga halu ma podope hene.
1CH 21:22 Ani buwa Debidi ibugua Araunahondo lalu, I̱na í̠naga dindi podene mbira widi biabe biaga o ngegoni yolo bulebero. Wali agali warago hongoheore áyu balu karuni bibahende Anduane Homogohanda mo wahelonaga i̱na ibunaga lomabu delaga dabu mbira dindi ogoriani bulene hameledo, lene.
1CH 21:23 Ani layagola Araunahanda Debidihondo lalu, Kini-o dindi ogoni yolo bibelo hame naledogo bame í̠ habelo ngero. Mbirale mbira lomabu mule hameledego alebi nogo bulumaga o kagobi lomabu mialu irani dai helo bo delabe. Ani bialu ira widi lini bo tanda laga ngagobi ira nogo bulumaga dariba homagamaga biaga ngagobi bibahende gabuwa lomabu mialu ira ogonime delo delalu widi lini ngarubi Anduane Homogohondo miaiore habe. Kini-o i̱na mbirale uruni bibahende í̠hondo ngiai harogoni, lene.
1CH 21:24 Ani layagola kini ibugua ibuhondo lalu, I̱na mbirale i̱nime erekui biabe bialu mini ndogo Anduane Homogohondo lomabu mia nabulebero. Ani buleneore hame naledogo ai í̠naga mbirale uruni i̱na yolo buleore bero, lene.
1CH 21:25 Anidagua lalu Debidi ibugua Araunanaga dindibi nogo bulumagabi bibahende muni siliba kina handari duria (500) aleme yolo bini.
1CH 21:26 Ani buwa Debidi ibugua lomabu delaga dabu mbira dindi ogoriani bia howa loma biniru irani dai helonaga bo delalu Anduane Homogola ho gimbu bulenenaga loma biniru bo delalu Anduane Homogohondo bi lalu hene. Ani biyagola Anduane Homogohanda loma uruni dai helo hariha howa ira hedope hene.
1CH 21:27 Ani buwa Anduane Homogohanda dahuliyalihondo lalu, Í̠naga ayu tibu yaganeha yabe, lalu lamiyagola dahuliyalime hale howa ani yini.
1CH 21:28 Ani biyago hondowa Debidi ibugua Anduane Homogohondo i̱na bi larugo hale halu ladai biyadalo manda bini. Ani manda buwa Debidihanda Arauna dindini lomabu delaga dabu wabiyagoria ogonidagua nogo tara tara Anduane Homogohondo loma bialu bo migi bini.
1CH 21:29 Ogoni biyangi Anduane Homogonaga Balai Andabi lomabu delaga dabubi Mosesehanda dindi ko iba dalu naibagaha howa wabinigo yalu ibalu Gibeono tanoni mo ngelenego wiaabo hene.
1CH 21:30 Ani winigo Debidi ibu Anduane Homogonaga dahuliyalime ayu tibu yu hayago mitangi bialu gi timbuniore howa ibugua Gibeono dindini Anduane Homogo mitangi bialu lotu lolenaga pobe nahe hene.
1CH 22:1 Ani bialu Debidi ibu Arauna dindini haabo howa ibugua lalu, Iname Anduane Homogo Ngode Datagaliwabenaga anda ogoria bimi̱ya. Ani bialu lomaru delolene dabu ogoria dege bu helalu bimi̱ya. Ani beremagola Isaraeleali tigua dindi ogoria ibalu lomaru bu delaga bilonaga ani bu helami̱ya, lene.
1CH 22:2 Agali tara tara Isaraele wali agali baba íbu haga heneru Debidihanda ti bibahendeore íbu ngoai howa ti biabe bilo mo mini. Marume ege to̱le̱ some podelo dabo helowa tihondo lamialu lalu, Tíguaore Ngode Datagaliwabenaga anda biago bule ege to̱le̱ baya hangu some podalu mo tigabu wigi bilimu, lene.
1CH 22:3 Ani bialu Debidihanda ege to̱le̱ aeane dewaore mili wabulenebi panga irame wabiniru mo hongo holene aeane marubi mo manda mandabu wiai hene. Ani bialu ege to̱le̱ boronosi dewaore agalime genda magi handabe naheore dewa mo manda manda bini.
1CH 22:4 Ani bialu Taia dindiha howabi Saidono dindiha howabi ira tamia anda ogoni bilonaga Debidi hearia dibu yalu ibinigo dewaore mbiralime daga labe naheore yalu ibini.
1CH 22:5 Debidi ibu nahome heangi Anduane Homogonaga anda bulene mbirale bibahende mo manda mandabu wiai hene. Ibugua lalu, I̱ igini Solomono ibu igiri daliahe howa biabe tara tara bulene ngago manda biai nahe dege ka. Anigo ainde Solomono ibugua Anduane Homogonaga anda ogoni bayaleore biragola wali agali dindi tara tara ngaruha bu karume ibalu anda bayale ogoni de hondowa ti turu timbuni halu tigua ibunaga mini yaraga helo hameledo, lalu Debidihanda lene.
1CH 22:6 Debidihanda ibu igini Solomono íbu olowa ibugua ibuhondo lalu, Í̠na Anduane Homogo Isaraele wali agalinaga Ngode Datagaliwabe kagonaga anda ogoni bibe, lalu lamini.
1CH 22:7 Ibugua Solomonohondo lalu, I̱ igini-o ainde Isaraele wali agalime Anduane Homogo i̱naga Ngode Datagaliwabe mini yaraga helo i̱na ibunaga anda mbira bule hamelo harugoni.
1CH 22:8 Ani hame larugoyu Anduane Homogohanda i̱hondo lalu, Debidi-o í̠na wai biaabo halu agali dewa bo waharigo ai i̱naga anda ogoni í̠na bule mandabu kego nabibelo hameledo.
1CH 22:9 Í̠ igini mbira ibu kini harangi ibugua haru howa mbirale bayaleru wali agalihondo bialu kagola i̱na hameigini dindi tara taraha padarume ibu baba waitigi nahelolebero. Í̠ igini ogoni ngule larogo haragola ibu mini Solomono wibe. Mini Solomono larogo irane ibu kini kangi i̱na Isaraele wali agali bu miniha mo palia howa bayale holene ibiloleberogo manda bialu laro.
1CH 22:10 Wali agalime i̱naga mini yaraga hole i̱ni koria kaware ibilonaga anda ogoni Solomono ibugua bulebira. Ibu i̱ igini kagola i̱ nde ibu aba holebero. Ibu igini aguaneneru hangume kini helaabo holebero, lalu Anduane Homogohanda ani laya, lalu Debidihanda lene.
1CH 22:11 Debidi ibugua Solomonohondo laabo halu lalu, Ai i̱ igini-o Anduane Homogo kago ibugua í̠ heba haabo helo hameledo. Ibugua bi ogoni lenedadagua ibunime í̠ biamogo bialu Anduane Homogo í̠naga Ngode Datagaliwabe kagonaga anda layago í̠na bayaleore mbira bulebere.
1CH 22:12 Anduane Homogo ibunime í̠ kini helarangi í̠na ibunaga mana lo ngaru baya hangu taluwa bialu howa Isaraele wali agali tigatigaore haru habelo í̠hondo mini gigabi wulenebi manda timbuni bulenebi ngilo hameledo.
1CH 22:13 Solomono-o Anduane Homogohanda mana bayale bibahende Isaraele wali agalime bilo Mosesehondo lamiyaru í̠na bayuwa talialu bialu hariyagua nde mbirale í̠na berego damene bibahende bayale hangu holebira. Í̠ gi nahe hongo ho haabo habe. Mbirale tara tara ngaru hondowa gi halu mogo nale habe.
1CH 22:14 I̱na biabe erekuibiore bialu muni ngolo dewaore genda magi timbuni tono dege daosini tebirani handari duria (3,500) wialu muni siliba genda magi timbuni tono dege daosini pira tebirani duria (35,000) ngogo ogonime Anduane Homogonaga anda ogoni bulenaga mo ngo. Ani bialu boronosibi aeanebi dewaore agalime genda magi manda bibe naheore mo ngo. Ani bialu irabi ege to̱le̱bi dewaore mo ngogo ainde maru í̠nime mo tago holene wulebira.
1CH 22:15 Í̠naga agali biabe biaganebi dewa dege bu kagoni. Agali maru ege to̱le̱ podagabi maru ege to̱le̱mebi iramebi anda biaga mandabi karubi marume biabe tara tara bulene ngago damene bibehe kagoni.
1CH 22:16 Agali uruni tigua ngolo silibarumebi boronosimebi aeanemebi biabe tara tara biaga mandabi kagoni. Anduane Homogo ibuni í̠ heba mandagi haabo holebirago ai í̠na biabe ogoni bibe, lalu Debidihanda Solomonohondo lene.
1CH 22:17 Debidihanda bi uruni lai howa mani Isaraele wali agali tigua Solomono biamogo bilimu lalu lamini.
1CH 22:18 Ibugua tihondo lamialu lalu, Anduane Homogo tínaga Ngode Datagaliwabe ibu tí heba haabo kagoni. Ibugua wali agali tara dindi ogoniha haga heneru bope holiya yupe hayagola i̱na ti bope harugoni. Ani birugola wali agali uruni ti Anduane Homogo andanehabi tí andanehabi kagoni. Anidagua bialu tíha holene bayale mo ngiyagola waitigime tí baba wai bibe nahe kagoni ndobe.
1CH 22:19 Anidagua biyago manda bialu áyu tígua Anduane Homogo tínaga Ngode Datagaliwabe ibuni hameledago tí bu minimebi hongomebi bua timbuni halu baya hanguore bialu haabo halimu. Anidagua bule ai tígua Anduane Homogonaga anda ogoni áyu howa bidaba. Ani biai howa mani wali agali tigua anda ogoniha ibuni karia kaware ibalu ibu mitangi bialu lotu lelonaga Habo Nalolene Bi lo winigonaga Mbogoyi biagobi mbirale tara tara biabe ogoni bulenaga wiabagi ho ngaru mo yalu ibalu anda ogoniha ngelalimu, lalu Debidihanda lene.
1CH 23:1 Debidi ibuni waheore heangi ibugua ibu igini Solomono Isaraele wali agalinaga kini helo dabo helene.
1CH 23:2 Kini Debidihanda Isaraeleali agali haguane hearubi loma binigo mo miaga hearubi Libaiali hearubi bibahende mo mogo bini.
1CH 23:3 Ani buwa ibugua, Libai agali bu hearu bibahende daga ladaba, lene. Tigua Libaiali mali pira tebira (30) bolangua hene hearu bibahende daga lalu hearia ti daosini dege pira tebirani halira (38,000) hene.
1CH 23:4 Ani biyagola Debidihanda agali uruni aria daosini dege pira kirani maria (24,000) hearume Anduane Homogonaga anda biabe bulene wiago damene bibahende handayaho hai helo dabene. Daosini waragaria (6,000) hearume beba gili bia dagala bialu helobi godi hale haga helobi dabo helene.
1CH 23:5 Ani bialu Libaiali dege daosini maria (4,000) hearu tigua Anduane Homogonaga anda mamage helo dabo helalu daosini maria (4,000) halu mende hearume Anduane Homogonaga mini mo yaraga halu ngida aleru balu piliperu lalu iba gana laga helo dabo helene. Ani helowa Debidi ibugua tihondo ngida ale boleneru pilipe lolenerubi uruni bibahende ti ani bilonaga miai hene.
1CH 23:6 Libaialiru ti hameigini tebira henego mini Gesonobi Kohadabi Meraribi uruni tigua biabe bilonaga Debidi ibugua mo ta haga bini.
1CH 23:7 Ai Gesono ibu igini kira Ladana Simaila hene.
1CH 23:8 Ladana ibu igini tebira Yahiele Sedama Yoele laga biyaru hene.
1CH 23:9 Agali tebira uruni ti Ladana hameigini hayadarunaga agali haguane hene. Simai igini tebira henegonaga mini Selomodo Hasiele Harana layaru hene.
1CH 23:10 Simai igini maria henego tinaga mali hayadagua ti mini uru. Yahada Sina ibu mini mende Sisa Yausu Beria layaru hene. Yausu Beriala libu aguanene palia timbu nahe emene dege hayagola libunaga hameigini mo mbiraore ho hene.
1CH 23:12 Kohada igini maria henegonaga mini uru Amarama Isiha Heberono Usiele layaru hene.
1CH 23:13 Wahene Amarama ibu igini Arono Mosesela hene. Anduane Homogohanda Aronobi ibu igini aguanenerubi tigua mbirale tara tara Anduane Homogonaga lowa wiabagi ho winigo handayaho haabo howa biabe ogoni bialu helo dabo helene. Ani helayagola tigua Anduane Homogo mitangi bialu lotu lalu howa bibahendengi ira hagua nga bilo inisenesi lomabu delaga howa Anduane Homogonaga biabe bia haga hene. Ani bialu tigua Anduane Homogonaga minini howa wali agali bu hearu biamogo bilo lalu la haga hene.
1CH 23:14 Anigo Ngode Datagaliwabenaga agali Mosese ibu igini kira henego Gesomo Eliesela libu Libaiali maru hearubi dege helene.
1CH 23:16 Gesomo igini wahene Sebuele hene.
1CH 23:17 Eliese ibu igini mbiraore hangu henego mini Lehabia hene. Lehabia ibu aguanene dewaore hene.
1CH 23:18 Kohada igini mende Isiha ibu igini Selomidi hene. Selomidi ibu agali haguane hene.
1CH 23:19 Kohada igini tebone Heberono henego ibu igini maria Yaraia Amaraia Yahasiele Yagameama layaru hene.
1CH 23:20 Ani bialu Kohada igini mane Usiele henego ibu igini kira Maiga Isaiala hene.
1CH 23:21 Merari ibu igini kira Mali Musila hene. Ai Mali igini kira dege Eleasa Kisila hene.
1CH 23:22 Eleasa ibu igini mbira nahe wandari dege aba halu homene. Ani buwa wandari uruni ti agali Kisi igini tini damene dege bu hearume dabu biai hene.
1CH 23:23 Merari igini mende Musi ibu igini tebira henego Mali Edere Yaremodo layaru hene.
1CH 23:24 Agali uruni ti bibahende Libai aguanene howa ti Libai hameigini emene emene headagua mbira mbiranaga agali haguane haga bini. Libaiali bu hearu agali mbira mbirago tini hama ibinidadaguaore dabo wabia howa daga lalu mini gilibu wigi bini. Libaiali o biaruni ariago tinaga mali pira kira (20) bolangua henego ti Anduane Homogonaga andaha biabe bialu haga hene.
1CH 23:25 Debidi ibugua lalu, Anduane Homogo Isaraele wali agalinaga Ngode Datagaliwabe kago ibugua ibunaga wali agali holene bayaleni helowa ibuni Yarusalemeni haabobo bu holebira.
1CH 23:26 Anidagua buwa ainde Libaiali tigua Anduane Homogonaga Balai Andabi ibu mitangi bialu lotu lolenaga mbirale tara tara wiarubi ala mo yalu ibaganego áyu biabe ogoni bulene nawulebira, lene.
1CH 23:27 Ani leagola mani Debidihanda layadagua tigua Libai agali bibahende daga lai halu mini gilibu wini. Walime igiri taba hanayaru tinaga mali pira kira (20) bolangua haga biyagola agali uruni ti Anduane Homogonaga andaha Libaialime biabe bulene wiago bialu helo dabo helaga bini.
1CH 23:28 Libaiali tinaga biabe bulene winigo ogo. Tigua Arono aguanene loma binigo mo miaga hearu biamogo bialu Anduane Homogonaga andaha biabe bulene winidagua bialu hene. Anda tamuha hobane haga haga bidarubi wali agali ngoaiho biraga pabe andaneha Anduane Homogonaga anda heagoria kaware wiagonibi handayaho haga hene. Mbirale tara tara Anduane Homogonagaore lowa wiabagi ho wiaru mbirago Anduane Homogo deni dodohe wiagua nde Libaiali uruni tigua mbirale uruni dodo nahe bayale ngelonaga bulene mana winidagua bialu mo bayale haga wini. Ani bialu Anduane Homogonaga andaha tinaga biabe bulene maru wia dege bini.
1CH 23:29 Tinaga biabe maru mberedi Anduane Homogo lomabu mulene wiago handayaho halu balawa lomabu delolene wiagobi handayaho halu mbisigedi yidi nahe howa hirini wiaru loma bialu iraha delolene wiarubi balawa maru olibe lininaga weli odo biamaga hene wiarubi bibahende handayaho haga hene. Ani bialu mbirale Anduane Homogohondo lomabu mulene damenego bibahende mo tale bigi bialu genda magi hondo ngelaga bialu haga hene.
1CH 23:30 Ani bialu tinaga biabe buleneore horo bibahendenaga egerebagi alendobi tigua Anduane Homogonaga andaha pialu ibuhondo turu halu ibunaga mini yaraga haga bialu hene.
1CH 23:31 Ani bialu horo Sabadangibi horo timbuni maru ege pigane ngabulo kagolabi mbirale Anduane Homogohondo lomabu delolenebi horo maru lotu lolene ngangibi tigua mana ogonidagua dege bialu hene. Biabe uruni bulenego Libaiali bibahendeme horo mbira mbiranaga agali ogodaguame bilo lalu mana winidagua talialu biaga wini. Horo bibahendengi Libaiali tinaga biabe Anduane Homogo mitangi bialu lotuore laabo haga wini.
1CH 23:32 Libaiali tinaga biabe Anduane Homogonaga Balai Anda heago handayaho holenebi Anduane Homogonaga anda heagobi handayaho haga wini. Ani bialu tigua tini damene Arono aguanene loma binigo mo miaga maru hearu biamogo bialu Anduane Homogonaga andaha biabe biaabo haga wini.
1CH 24:1 Arono igini aguaneneru ogodagua talebu helene. Arono igini maria mini Nadaba Abihu Eleasa Idama layaru hene.
1CH 24:2 Anigo Nadaba Abihula libu aba Arono homa nabi heangi libu waneigini mbira nahe howa homene. Ani biyagola Arono igini Eleasa Idamala libu dege loma binigo mo miaga hene.
1CH 24:3 Ani henego ai Debidi ibu kini heangi ibugua loma binigo mo miaga hearu tinaga biabe bulene wiago bilonaga ti hangu hangu mo tahaga bini. Ani bialu Debidi ibugua Eleasa aguane Sadogobi Idama aguane Ahimelegebi libugua Debidi biamogo bilo dabo helene.
1CH 24:4 Tigua ani bialu hemiria Eleasa aguaneneru agali haguane dewa heago hondowa ti aria wabuni pira mbirani waragaria (16) helene. Ani buwa Idama aguanene agali haguane dewa naheyagola ti aria wabuni halira helene.
1CH 24:5 Eleasa aguanenerubi Idama aguanenerubi tinaga aria maru loma binigo mo miagarubi maru Anduane Homogonaga andaha biabe biagarubi hene. Ti ani heago hondowa Debidi ibugua biabe bulene winigo aiwa buledabe Anduane Homogonaga hame hale holenaga ege to̱le̱ emeneni mini gili bialu badaga halu mini walia hayadagua dabo helaga bini.
1CH 24:6 Agali Eleasa aguanenerubi Idama aguanene biarubi ti bibahende agali dabo iriari bialu loma binigo mo miaga helo dabo helaga bini. Libaiali mbira Nedanele igini Semaia ibu beba gilibia dagala bialu haga henego ibugua agali mini wia pani hayaru bibahendenaga mini gilibu wini. Ani gilibu wialu hearia Kini Debidi ibubi ibunaga haru haga agali bu hearubi loma binigo mo miaga Sadogobi Abaiada igini Ahimelege heagobi Libai hameigini hearubi loma binigo mo miaga maru hearubi ti bibahende de hondo heaore Semaiahanda mini uruni gilibu wini.
1CH 24:7 Tigua ege to̱le̱ emene uruni mini gili bialu baraga howa handalu hearia Yahoiaribi aria ala dabene. Ani bialu halu mende Yadaia aria hearu dabalu tebone Harimi aria dabalu mane Seorimi aria dabene. Ani bialu dauni Malagaia aria dabalu waragane Miyamini aria dabalu kane Hagoso aria dabalu halini Abiya aria dabene. Ani bialu dini Yasua aria dabalu pini Seganaia aria dabalu pira mbirani mbira (11) Eliasibi aria dabalu pira mbirani mende (12) Yagimi aria dabene. Ani bialu pira mbirani tebone (13) Huba aria dabalu pira mbirani mane (14) Yasebeaba aria dabalu pira mbirani dauni (15) Biliga aria dabalu pira mbirani waragane (16) Ime aria dabene. Ani bialu pira mbirani kane (17) Hesiri aria dabalu pira mbirani halini (18) Habisese aria dabalu pira mbirani dini (19) Pedahia aria dabalu pira mende (20) Yasegele aria dabalu bini. Ani bialu pira kirani mbira (21) Yagini aria dabene. Pira kirani mende (22) Gamulu aria dabalu pira kirani tebone (23) Delaia aria dabalu pira kirani mane (24) Masia aria dabene.
1CH 24:19 Loma binigo mo miaga uruni ti dabalu tinaga mamali Aronohanda Anduane Homogonaga andaha biabe bialu henedagua bialu helo helene. Bamba Anduane Homogo Isaraele wali agalinaga Ngode Datagaliwabehanda Aronohondo ani bulene nga layadagua tigua ani bialu hene.
1CH 24:20 Libai hameigini agali haguane maru henegonaga mini uru. Yadeaia ibu Amarama hameigini Sebuele ibu mini mende Subaele henego aguanene hene.
1CH 24:21 Lehabaia aguanene Isihia hene.
1CH 24:22 Yahada ibu Isara hameigini Selomidi henego aguanene hene.
1CH 24:23 Ani bialu Heberono igini maria heneru Yaraia Amaraia Yahasiele Yagameama layaru ti agali haguane dege dege hene.
1CH 24:24 Samiri ibu Usiele hameigini Maiga henego aguanene hene.
1CH 24:25 Maiga hamene Segaraia ibu Usiele hameigini Isaia henego aguanene hene.
1CH 24:26 Merari igini Mali Musila hene. Merari igini dege mbira Yasaia henego ibu igini maria Beno Sohama Saguru Ibiri layaru ti hene.
1CH 24:28 Mali igini kira Eleasa Kisila hene. Eleasa ibu igini mbira nahe hene. Kisi igini Yaramele hene.
1CH 24:30 Musi igini tebira Mali Edere Yaremodo layaru hene. Uruni ti Libaiali dege hene.
1CH 24:31 Libaiali agali haguane uruni hearubi ti hamene heyogone hearubi ti hameigini Arono aguaneneru loma binigo mo miaga biarume ti biabe agi bilodabe hondolenaga ege to̱le̱ emeneni mini gili buwa baraga halu dabayadagua agali uruni tibi ani bini. Ani bialu hearia Kini Debidibi Sadogobi Ahimelegebi loma binigo mo miaga hearunaga agali haguane hearubi Libaiali agali haguane hearubi ti de handayaho hene.
1CH 25:1 Debidibi Libaiali agali haguane hearubi tigua Libai hameigini marume Anduane Homogonaga andaha lotu lolenaga biabe bulene damene wiaru handaya howa haru haga helo dabenego uru. Asaba ariabi Hemanabi Yadudunubi hameigini emene uruni tigua biabe uruni bilo dabo helene. Tigua Anduane Homogonaga bi mana wali agalihondo lamialu helo dabo helalu ngida ale tara tara wiaru balubi ngi̱li̱nge̱le̱ lagane beledi ale wiaru balubi helo ani dabo helene. Agali biabe biaga uruninaga minibi tinaga biabe ogoale biagabi gilibu wini.
1CH 25:2 Asaba igini maria henego tinaga mini Sagu Yosebe Nedanaia Asarela layaru hene. Asaba ibunime ti haru howa kinihanda Anduane Homogonaga bi mana lamidaba laradagua lamiaga hene.
1CH 25:3 Yadudunu igini waragaria henego mini Gedalaia Seri Yasaia Simai Hasabaia Madidaia layaru hene. Ti aba Yadudunuhanda ti haru halu tigua Anduane Homogonaga mana latagi haga hene. Tigua ngida aleru balu howa Anduane Homogohondo ka̱i̱ lalubi ibunaga mini yaraga halubi iba gana laga hene.
1CH 25:4 Hemana igini pira mbirani maria (14) henego mini Bugaia Madanaia Usiele Sebuele Yarimodo Hananaia Hanani Eliada Gidaladi Lomamadiese Yosobegasa Malodi Hodiri Mahasiodo layaru hene.
1CH 25:5 Hemana ibugua kinihondo Anduane Homogonaga bi mana latagi haga heagola Ngode Datagaliwabehanda Hemana biamogo bialu mo timbu halu ibuhondo bayale buleore lalu lo winidagua ibu igini pira mbirani maria (14) uruni mialu wandaribi tebira mini.
1CH 25:6 Hemana igini uruni bibahende tigua Anduane Homogonaga andaha Ngode Datagaliwabe mitangi bialu lotu larangi ngida ale tara tararu balu ngi̱li̱nge̱le̱ lagane beledi aleru baga baga bialu iba gana laga hene. Ani bialu heagola ti abahanda handayaho howa haru haga hene. Debidihanda Asababi Yadudunubi Hemanabi urunihondo bidaba layadagua tigua ani bialu haga hene.
1CH 25:7 Agali pira kirani maria (24) uruni ti manda timbunibi hene. Libaiali biaru tigua iba gana lolenebi ngida ale bolenebi uruni ale tara tara manda biaiorehe hene. Agali uruni daga lamaga halu ti handari kirani pira halirani halira (288) hene.
1CH 25:8 Bibahende ani dabo helai howa biabe ala ai ibugua pigane bibehedabe hondolenaga ege to̱le̱ emeneni mini gili bialu baraga hene. Agali uruni igiri daliahe heaguabi waheore heaguabi tinaga biabe iba gana lolenebi ngida ale bolenebi manda biaihe heaguabi manda biai nahe wene manda bialu heaguabi tanabiore ege to̱le̱ baraga hayagola karulape lalu dabarago ibugua biabe pigane bilo helaga wini.
1CH 25:9 Agali handari kirani pira halirani halira (288) uruni ti igini damenerubi tini headagua agali pira mbirani kira (12) dege dege dabo helalu ti wabuni bibahende agali pira kirani maria (24) hene. Tigua ege to̱le̱ baraga hayago handalu hemiria Asaba igini Yosebe ibu igini damenerubi pigane dabene. Mende dabayago Gedalaia ibu iginiru damenerubi dabene.
1CH 25:10 Tebone dabayago Saguru halu ibu iginiru damenerubi dabene.
1CH 25:11 Mane dabayago Seri ibu mini mende Isiri halu ibu iginibi damenerubi dabene.
1CH 25:12 Dauni dabayago Nedanaia halu ibu igini damenerubi dabene.
1CH 25:13 Waragane dabayago Bugaia halu ibu igini damenerubi dabene.
1CH 25:14 Kane dabayago Asarela ibu mini mende Yasarela henego ibu igini dameneru dabene.
1CH 25:15 Halini dabayago Yasaia igini damenerubi dabene.
1CH 25:16 Dini dabayago Madanaia ibu igini damenerubi dabene.
1CH 25:17 Pini dabayago Simai igini damenerubi dabene.
1CH 25:18 Pira mbirani mbira (11) dabayago Usiele ibu mini mende Asarele henego igini damenerubi dabene.
1CH 25:19 Pira mbirani mende (12) dabayago Hasabaia igini damenerubi dabene.
1CH 25:20 Pira mbirani tebone (13) dabayago Sebuele ibu mini mende Subaele henego igini damenerubi dabene.
1CH 25:21 Pira mbirani mane (14) dabayago Madidaia igini damenerubi dabene.
1CH 25:22 Pira mbirani dauni (15) dabayago Yarimodo igini damenerubi dabene.
1CH 25:23 Pira mbirani waragane (16) dabayago Hananaia igini damenerubi dabene.
1CH 25:24 Pira mbirani kane (17) dabayago Yosobegasa igini damenerubi dabene.
1CH 25:25 Pira mbirani halini (18) dabayago Hanani igini damenerubi dabene.
1CH 25:26 Pira mbirani dini (19) dabayago Malodi igini damenerubi dabene.
1CH 25:27 Pira kira (20) Eliada igini damenerubi dabene.
1CH 25:28 Pira kirani mbira (21) dabayago Hodiri igini damenerubi dabene.
1CH 25:29 Pira kirani mende (22) dabayago Gidaladi igini damenerubi dabene.
1CH 25:30 Pira kirani tebone (23) dabayago Mahasiodo igini damenerubi dabene.
1CH 25:31 Daba maro pira kirani mane (24) dabayago Lomamadiese igini damenerubi dabene.
1CH 26:1 Libaiali maru Anduane Homogonaga anda mamage haga helene. Agali maru ti Kora hameigini howa Kore igini Meselemaia henego ibu Asaba damene hene.
1CH 26:2 Meselemaia ibu igini karia henego mini uru. Segaraia Yadiele Sebadaia Yadaniele Elama Yahohanana Elioenai layaru hene.
1CH 26:4 Agali mbira Obededomo henego Ngode Datagaliwabehanda ibu mo turu halu biamogo biyagola ibu igini halira henegonaga mini uru. Igiri wahene Semaia howa maru Yahosabada Yoa Saga Nedanele Amiele Isaga Peuledai layaru hene.
1CH 26:6 Obededomo igini wahene Semaia ibu igini waragaria henego ti bibahende agali bayale mandabi howa ti hameigini hearunaga agali haguane hene.
1CH 26:7 Agali uruninaga mini Odoni Labaele Obede Elesabada Elihu Semagaia layaru hene. Elihu Semagaiala libu mbirale tara tara buleneru mugube gibi yu hene.
1CH 26:8 Obededomo ariaru daga lamaga howa pira waragariani kira (62) hearu tibi ti igini aguaneru damenerubi bibahende mamage holene biabe ogoni manda biaihe hene.
1CH 26:9 Meselemaia damene ti agali pira mbirani halira (18) howa tigua biabe bulene wiago manda biaihe hene.
1CH 26:10 Merari hameigini howa agali mini Hosa ibu igini maria henegonaga mini uru. Simiri henego ibu Hosa igini wahene ndogoyu ibu abahanda ibu agali haguane helo helene.
1CH 26:11 Hosa igini maru Hiligaia Tebalaia Segaraia imaru hene. Hosa ibu damene dege pira mbirani tebira (13) heneru ti bibahende Anduane Homogonaga anda mamage haga hene.
1CH 26:12 Agali uruni ti Libaiali maru hearume Anduane Homogonaga andaha biabe bialu helo ti damene tale bialu wabuni mbira mbira headagua tigua Anduane Homogonaga anda mamage holene biabe bilo tibi tale bialu wabuni mbira mbira helalu biabe uruni bialu hene.
1CH 26:13 Agali uruni tigua Anduane Homogonaga anda panga haraba ago ai ibugua handayaho holobadabe hondolenaga ege to̱le̱ baraga halu daba hendene. Ti damene mbira mbira headagua mbirago dewa heaguabi mbirago emene heaguabi harugo lowa biabe tinagaore talebu mini.
1CH 26:14 Tigua ege to̱le̱ biaru baraga halu ai dameneme anda panga ni tagira ibiragoha heago handaya holobadabe handalu hemiria Selemaia ariame handayaho helo dabene. Mani Segaraiahanda panga abene uyurahayagi heago handayaho holene wiaria hendene. Segaraia ibu Selemaia igini howa ibugua mini manda bayaleru talebu miaga hene.
1CH 26:15 Ani bialu mani ege to̱le̱ biaru baraga howa handalu hemiria Obededomohanda panga abene unurahayagi heago handayaho halu ibu iginiru tigua tamu hobane dabudabu wiaga heagoha handayaho helo dabayayane hendene.
1CH 26:16 Ani buwa mani Subimi Hosala libugua anda panga ni paliragohayagi heago handayaho halu panga mende mini Salegede laga heago handayaho helo dabo helene. Panga Salegede ogoni hariga irigi halu piaga wiago kaware dege hene. Agali uruni damene bibahende headagua biabe bulene mbira mbira dabo helalu ti iriari bialu maru tigua bu aribia halu panga uruni handayaho iriari biaga hene.
1CH 26:17 Horo bibahendengi Libaiali uruni waragarialime panga haraba ni tagira ibiragohayagi heago mamage haga hene. Agali mariame panga haraba abene uyurahayagi heago mamage halu maria mendeme panga abene unurahayagi heago mamage halu bini. Ani bialu maria dege teboneme anda tamu hobane dabudabu wiaga heago mamage hene. Anda tamu hobane mbira heago kirame mamage halu hoba mende heago agali kira mendeme mamage hene.
1CH 26:18 Ani bialu agali waragariame panga haraba ni paliragohayagi mamage halu kirame anda heago mamage heagola mariame hariga wiago mamage haga hene.
1CH 26:19 Libaiali uruni ti Kora hameiginibi Merari hameiginibi dege howa mamage holene biabe ogoni bialu hene.
1CH 26:20 Agali maru hearu Libaiali dege howa tigua Anduane Homogonaga andaha muni wiagane wiago handayaho howa dabudabu bayale wali agalime Ngode Datagaliwabenaga lomabu mini wiarubi handayaho haga hene.
1CH 26:21 Agali mbira mini Ladana henegonaga aguanene Gesono hameigini mini Yahiele henego ibu igini kira Sedama Yoelela heba uruni tinaga biabe Anduane Homogonaga andaha muni wiagane hobanebi dabudabu tara tara wiaga hobanebi heago handayaho haga hene.
1CH 26:23 Ani bialu hameigini maru Amarama Isiha Heberono Usiele heneru ti aguanene hearume biabe bulene wia dege bini.
1CH 26:24 Agali mbira mini Sebuele ibu Mosese igini Gesomo hameigini mbira henego ibu Anduane Homogonaga andaha muni wiagane hobane heago handayaho haga agali haguane hene.
1CH 26:25 Sebuele ibu Gesomo hamene Eliese aguanene howa ibu Selomidi damene hene. Eliese igini Lehabaia Lehabaia igini Yasaia Yasaia igini Yorama Yorama igini Sigiri Sigiri igini Selomidi hene.
1CH 26:26 Selomidi ibu damene hearu tigua dabudabu mbirale bayale damene Ngode Datagaliwabenaga lomabia ho wiaru handayaho haga hene. Mbirale bayale uruni Kini Debidihandabi hameigini mbira mbiranaga agali haguane bu hearumebi ami haru haga agali haguane hearumebi tigua Anduane Homogonaga loma bialu wiabagiho wini.
1CH 26:27 Tigua wai bialu bo podama anda puwa tigua waitiginaga dabudabu bayale tara tara wiaru mo yalu dai bigi buwa mbirale bayale uruni Anduane Homogonaga lalu loma bia howa Anduane Homogonaga andaha biabe bulene wiago bilonaga mo wigi biaga hene.
1CH 26:28 Mbirale bayale uruni ale Anduane Homogonaga andaha wiaru bibahende Selomidibi ibu damene hearubi tigua handayaho haga hene. Abale howa Anduane Homogonaga bi mana latagi haga Samuelebi Kini Solobi Nere igini Abanebi Seruia igini Yoababi agali uruni tigua mbirale bayale uruni bibahende Ngode Datagaliwabenaga lowa lomabu minigo wini.
1CH 26:29 Isiha aguanene bu hearu aria Kenanaiabi ibu igini bu hearubi tigua gabumane biabe bilo dabo helene. Uruni ti marume beba gili bia dagala biaga helalu marume Isaraele wali agalinaga godi hale haga hene.
1CH 26:30 Heberono aguanene bu hearu Hasabaiabi ibu damene agali daosini mbirani handari karia (1,700) hearubi tigua Isaraele dindiha abene Iba Yodana ni paliragohayagi gabumane biabe bulene winigo handayaho haga hene. Agali uruni ti biabe bulene wiaru damene manda biaihe howa tigua kini heagonaga biabe bulene wiagobi Anduane Homogonaga biabe bulene wiagobi handayaho haga hene.
1CH 26:31 Heberono aguanene agali mbira mini Yaraia henego ibu tinaga agali haguane hene. Debidi ibu kini dege heane mali pira maria (40) pene lowa Heberono hameigini lenego bibahende hearu mandabi ai kabe hondole taya bialu hene. Ani taya bialu hemiria hameigini ogoni aria agali dewaore Gileada dindihayagi Yase tano wiagoha hearia handa walia hene. Agali uruni ti wai wayali haga hongoheore hene.
1CH 26:32 Ani heago hondowa Kini Debidi ibugua Yaraia aria agali haguane hearu daosini kirani handari karia (2,700) bibahende dabo helene. Ti agali bayale tigabiore howa ti Isaraele dindiha Lubene hameiginibi Gada hameiginibi Manase hameigini halu mende hearubi Iba Yodana ni tagira ibiragohayagi hearu tigua Ngode Datagaliwabenaga biabe bulene wiarubi kini heagonaga biabe bulene wiarubi bibahende handayaho helo helene.
1CH 27:1 Agali mini ogoha gilibu ngaruni Isaraele wali agali bibahendenaga haguane henerunaga minibi hameigini mbira mbiranaga agali haguane minibi ami haru haga haguane henerunaga minibi gilibu nga. Agali uruni tigua biabe biaga agali tale buwa wabuni pira mbirani kira (12) dege dege helene. Agali wabuni mbira mbirani ti ege mbira mbirani biabe biaga hene. Wabuni mbira mbiraha agali biabe biaga daosini pira kirani maria (24,000) dege dege hene.
1CH 27:2 Agali haguane o henedarunaga mini uru. Ege mbirani Sabadiele igini Yasobeama ibugua agali daosini pira kirani maria (24,000) biabe bilo haru hene.
1CH 27:3 Yasobeama ibu Yudali howa ibu Perese hameigini aria hene.
1CH 27:4 Ege mendeni Ahohi aguanene aria Dodaihanda agali daosini pira kirani maria (24,000) halu mende hearu biabe bilo haru ha aribia howa handayho hene. Agali mbira mini Migilodo henego ibugua Dodai haru hamogo bialu biabe handayaho haga mende ibu hene.
1CH 27:5 Ege teboneni agali loma binigo mo miaga Yahoiada henego igini Benaia ibugua agali biabe biaga daosini pira kirani maria (24,000) halu tebone hearu haru hene.
1CH 27:6 Benaia ogoni ibu Debidinaga ami agali hongohe dege dege pira tebira (30) heneru aria mbira howa ibugua ami agali uruni haru haga hene. Anigo ibu igini Amisabada ibu agali biabe biaga halu tebone biaru ibugua haru ha aribia hene.
1CH 27:7 Ege maneni Yoaba hamene Asahele ibugua agali biabe biaga daosini pira kirani maria (24,000) ma halu hearu haru hene. Mani howa ibu igini Sebadaiahanda ibu aba Asahelenaga henegoria ha aribia halu haru haga hene.
1CH 27:8 Ege daunini Isiha aguanene Samahuduhanda agali biabe biaga daosini pira kirani maria (24,000) dau halu hearu haru hene.
1CH 27:9 Ege waraganeni Tegoali Igese igini Ira ibugua agali biabe biaga daosini pira kirani maria (24,000) waraga halu hearu haru hene.
1CH 27:10 Ege kaneni Eberaimi hameigini aria mbira Pelonoali Helese ibugua agali biabe biaga daosini pira kirani maria (24,000) ka halu hearu haru hene.
1CH 27:11 Ege halinini Husa dindiali mini Sibegai ibugua agali biabe biaga daosini pira kirani maria (24,000) hali halu hearu haru hene. Sibegai ibu Yudali howa Sera hameigini aria hene.
1CH 27:12 Ege dinini Anadodo tanoali Abiese ibugua agali biabe biaga daosini pira kirani maria (24,000) dini halu hearu haru hene. Abiese ibu Beniyamini hameigini aria hene.
1CH 27:13 Ege pinini Nedoba tanoali Maharai ibugua agali biabe biaga daosini pira kirani maria (24,000) pini halu hearu haru hene. Maharai ibu Sera hameigini aria hene.
1CH 27:14 Ege beaneni Piradono tanoali Benaia ibugua agali biabe biaga daosini pira kirani maria (24,000) beane halu hearu haru hene. Benaia ibu Beniyamini hameigini aria hene.
1CH 27:15 Ege hombeaneni Nedoba tanoali Heledai ibugua agali biabe biaga daosini pira kirani maria (24,000) hombeane halu hearu haru hene. Heledai ibu Odoniele aguanene hene.
1CH 27:16 Isaraele hameigini mbira mbira henerunaga handayaho haga agali mini uru. Lubene hameigini hearu Sigiri igini Eliesehanda handaya ho haga hene. Simeono hameigini hearu Maga igini Sebadaia ibugua handayaho haga hene.
1CH 27:17 Libai hameigini hearu Kemuele igini Hasabaiahanda handayaho haga hene. Arono aria hearu Sadogohanda handayaho haga hene.
1CH 27:18 Yuda hameigini hearu Debidi hamene mbira mini Elihu henego ibugua ti handayaho haga hene. Isaga hameigini hearu Maigele igini Omirihanda handayaho haga hene.
1CH 27:19 Sebulunu hameigini hearu Obadaia igini Isimaia ibugua ti handayaho haga hene. Nabadali hameigini hearu Asariele igini Yaremodohanda handayaho haga hene.
1CH 27:20 Eberaimi hameigini hearu Asasaia igini Hosea ibugua ti handayaho haga hene. Manase hameigini halu mbira ni paliragohayagi hearu Pedaia igini Yoelehanda handayaho haga hene.
1CH 27:21 Manase hameigini halu mende ni tagira ibiragohayagi Gileada dindiha hearu Segaraia igini Ido ibugua handayaho haga hene. Beniyamini hameigini hearu Abane igini Yasielehanda handayaho haga hene.
1CH 27:22 Dana hameigini hearu Yarohama igini Asarele ibugua ti handayaho haga hene. Agali haguane urunime Isaraele hameigini bibahende handayaho haga hene.
1CH 27:23 Anduane Homogohanda buleore lalu lo wialu Isaraele wali agali dewaore harini yakundi daga labe nahe bu karubi helo mo dewa holebero lalu lowinigo manda buwa Debidi ibugua agali mali pira kira (20) bolangua nahe hearu daga nalene.
1CH 27:24 Wali mbira mini Seruia berenego ibu igini Yoaba ibugua Isaraeleali bibahende daga lai hole bialu hearia daga lamaro nabini. Ngode Datagaliwabehanda Isaraeleali daga lelo hame nale heagola tigua daga lalu hemiria hondowa ibugua Isaraeleali bibahende pani nelo mini. Ani binigome mbuga mbira Kini Debidihanda bialu henegonaga te gilibu wini ngagoha agali daga lamaga henegonaga gilibu wiai nahe winigo nga.
1CH 27:25 Adiele igini Asamabedehanda kininaga anda hobane hearuha tomo dabudabubi wiaru handayaho haga hene. Usia igini Yonadanahanda tomo mbirale tara tararu wiagane anda Isaraele dindi bibahendeha tanoni heagobi tagiraha dindi emeneha heagobi wai mamage haga anda lu hongohe bu heagoha mbirale wiarubi bibahende ibugua handayaho haame haga hene.
1CH 27:26 Kelubu igini Eseri ibugua agali mabuha biabe biaga hearu bibahende handameho haga hene.
1CH 27:27 Kininaga pu mbira lini daga mini gerebi mabu Lama tanoali Simai henego ibugua handayaho haga hene. Sebama tanoali mini Sabadi ibugua waini iba wabulenaga gerebi lini do wiarubi waini iba hambu berelo wiaganebi anda hobane heago handayaho haga hene.
1CH 27:28 Gedere tanoali Balahanana ibugua dindi abene ni paliragohayagi dindi hombene bare bare wiaruha ira oliberu ira maru mini sigamo poge ale hearu handayaho haga hene. Yoasa ibugua olibe lininaga weli hambu wiaga anda hobane heago handayaho haga hene.
1CH 27:29 Sarono yu dindi wiagoria Saronoali Sidiraihanda nogo bulumaga bibahende dindi ogoniha bu hearu handayaho haga hene. Adalai igini Sabada ibugua dindi guagua wiaruha nogo bulumaga hearu handayaho haga hene.
1CH 27:30 Isimaele hameigini aria Obili ibugua kininaga nogo kamele hearu handayaho haga hene. Meronodoali Yadeaia ibugua kininaga nogo dongi hearu handayaho haga hene. Hagara hameigini hearu aria Yasisi ibugua kininaga nogo sibi memeru handayaho haga hene.
1CH 27:31 Agali uruni ti Kini Debidinaga mbirale tara tara wiarubi hearubi handayaho hagarunaga haguane hene.
1CH 27:32 Debidi aba hamene Yonadana ibu mini gigabiwiore howa mbirale bayuwaore manda biaihe howabi ibugua mini manda bayaleru Kini Debidi talebu miaga hene. Yonadana ogoni ibula Hagamoni igini Yahielela libugua kini igini bu hearu mana tara tara wiaru lawai haga hene.
1CH 27:33 Ahidobele ibugua kini mini giga bulene manda bayaleru talebu miaga hene. Aga dindiali Husai ibu kininaga nenegeore howa ibugua ogo bulene bayaleda ogo bayale ndoda lalu Debidi lamiaga hene.
1CH 27:34 Mani Ahidobele homayagola Abaiadabi Benaia igini Yahoiadabi libu Ahidobele henegoria ha aribia hene. Ani bialu Yoaba ibu kininaga ami agali bu hearu bibahende haru haga haguane hene.
1CH 28:1 Kini Debidihanda Isaraeleali agali haguane bu hearu bibahendeore Yarusalemeni ngoai hadaba lene. Ani layago hale howa Isaraele wali agali hearunaga haru haga haguane bibahendebi kininaga biabe bulene wiaru handayaho haga bu hearubi hameigini mbira mbira hearunaga agali haguane bu hearubi kinibi ibu igini bu hearunaga dabudabu wiarubi nogo bulumaga sibi bu hearubi handayaho haga hearu tibi kini andaga mamage haga hearubi ami agali haru haga hearubi agali haguane mini lene hearubi bibahende Yarusalemeni íbu ngoai hene.
1CH 28:2 Ani íbu ngoaiho hai heagola Debidihanda heyu howa tihondo lamialu lalu, I̱ hamenerubi i̱naga wali agali bu kamirubi tíhondo i̱na bi áyu larogo baya hangu hale halimu. Inanaga Anduane Homogo anda bayaleore mbira Habo Nalolene Bi lo winigonaga Mbogoyi biago ogoniha mo ngelolenaga bule i̱na mandabu haru. Mbogoyi ogoni inanaga Ngode Datagaliwabe kagonaga ge wilonaga wini. I̱na anda ogoni bulenaga mbirale bibahende mo manda mandabu wiai haru.
1CH 28:3 Anidagua mandabu hewaria dege Anduane Homogohanda i̱hondo langialu lalu, Debidi-o i̱naga wali agali i̱ni koria íbu ngoai holene anda ogoni bulene í̠ ndo dabaru. Irane í̠ ami agali howa í̠na agali dewaore homelo bo wahai halu darama pelarigoni ndobe, laya.
1CH 28:4 Anigo Anduane Homogo ina Isaraele wali agalinaga Ngode Datagaliwabe kago ibugua i̱bi i̱ igini aguanene holebirarubi inane hangume Isaraele wali agali handayaho howa haru haabo holoma̱ya dabaya. Pigane Yuda hameigini hangume Isaraele wali agalinaga haguane howa haru helo Anduane Homogohanda dabene. Ani binigo ai Yuda hameiginiha howa ibugua i̱ ababi ibu damenerubi tigua haru helo dabaya. Ani bialu mani Anduane Homogo ibunime bulene hame leadagua bialu ibugua i̱ hamene bu hearu ti dombeneha i̱ hewaria dabalu Isaraele bibahendenaga kini holiya dabo helene kogoni.
1CH 28:5 Ani bialu i̱hondo igiri dewaore ngiyaru mbira Solomono dabo helayago Anduane Homogonaga Isaraele wali agali ibuni handameho hagaha Solomono ibugua haru helo dabo helaya.
1CH 28:6 Ani buwa Anduane Homogohanda i̱hondo langialu lalu, Í̠ igini Solomono ibugua i̱naga anda ogoni bialu ege pabe hongoheme anda ogoni bu mabu bulebira. Anidagua bulebirago irane ibu i̱ iginiore helo dabarugo i̱ni nde ibu abaore holebero.
1CH 28:7 Ibugua áyu bialu kadagua i̱naga mana lowini ngogobi i̱naga bi larogobi hale howa talialu biaabo hayagua nde ibu igini aguaneneru hangume kini helo dabo helaabo holebero, lalu Anduane Homogohanda laya lene.
1CH 28:8 Ani lowa Debidihanda laabo halu lalu, Ai Anduane Homogo deni howabi ibunaga Isaraele wali agali bu kamiru tínaga deni howabi tí bibahendeore kamiruhondo i̱na bi hongo howa laro. Inanaga Anduane Homogo ibugua bi mana bayaleore iname bialu halimu lalu langiyaru baya hangu taluwa bialu haabo halimu. Tígua anidagua bialu haabo harimiyagua nde tí dindi bayale o ngagoria haabo halu tínaga aguanene mani holebirarunagabi wiaabo holebira, lene.
1CH 28:9 Ani lowa ibu igini Solomonohondo bi hongo howa ogodagua laya. I̱ iginiore-o í̠na biabe bulenego mini ogoriani dunubia howa í̠ abanaga Ngode Datagaliwabe kago ibu andaneha haabo hole manda bu habe. Ani bialu ibunaga hame ngago talialu haabo holenenaga biabe bulene ngago hongo howa bialu haabo habe. Anduane Homogohanda inanaga mini ngamarubi hame ngamarubi bibahende manda biaiho kagoni. Ibu ogonibi kago manda buwa í̠na ibunaga hame ngago buleore hongo haabo hariyagua nde í̠na ibuni bayaleore ogobi ka handa walia holebere. Anigo í̠na ibu erembira mialu piriyagua nde ibugua í̠ taliatagi howa erembira ngialu haabo holebira.
1CH 28:10 Ai áyu baya hangu hale habe. Anduane Homogohanda í̠ dabalu wali agali íbu ngoai howa ibu mitangi bialu ibunihondo lotu lelonaga anda ibunaga loma biahene ogoni í̠na bibelo dabaya. Anidagua biyago ai í̠na biabe ogoni hongo howa bialu biai habe, lalu Debidihanda lene.
1CH 28:11 Debidihanda bi ogoni lai halu Solomonohondo anda biagane mana damenego ogodagua bibe lowa mo walia hai halu mbirale maru tara tara bulene damenego bigiya mo walia hai halu bini. Ani bialu ogoale bibe lalu bi gilibu manda manda bu wiyadago Solomono mo mini. Anda haneni hobane helobi mbirale dabudabu wulenenaga anda hobane helaga bulenedarubi hobane emene emene maru daligahayagi helolenerubi hobane timbuni dindiha helolenedarubi Hobane Loma Bia Heneore ogoniha Habo Nalolene Bi lo winigonaga Mbogoyi biago mo wulenegobi bibahende bigiya wabu manda manda buwa gilibu winigo mo mini. Habo Nalolene Bi lo winigonaga Mbogoyi ogoriani howa Ngode Datagaliwabehanda wali agalinaga ko domo wahaga wini.
1CH 28:12 Ani bialu mbirale anda ogoniha ogoale bibe lalu Ngode Datagaliwabenaga Dinini ibugua Debidihondo mo walia halu wali agali ngoaiho holene hama Anduane Homogonaga anda kawareni ogobi wibe lalubi tamu hobane dewa wali agali ngoai haga ogoniha bu mabu bia holenebi ogodagua bibe lalu walia hene. Ani bialu Ngode Datagaliwabenaga andaha muni wulene tamu hobane helolenebi wali agalime mbirale bayale damene Anduane Homogonaga loma bialu wia bagiho ngelene wiaru mo wulene tamu hobanebi helabe lalu uruni bibahende gilibu wigi biniru mo walia hai hene.
1CH 28:13 Ani bialu Libaiali hearubi loma binigo mo miaga hearubi tinaga biabe ogoale bilo lalu bebani gilibu mandabu winidarubi Anduane Homogonaga andaha biabe ogodagua bulene lalu mana gilibu winidarubi mo walia dege hene. Ani bialu Anduane Homogonaga andaha mbirale tara tara biabe bulenaga wabulene mana mo walia hene.
1CH 28:14 Ani bialu gabo belediru wabulenaga ngolo silibaru ogodaguame karulape lalu mo walia ha dege bini.
1CH 28:15 Ani bialu lamu hale wabulenebi lamu hale mo wiagane bu helolenebi dagia silibame wabulenebi Anduane Homogonaga mberedi loma bia hene wiagane dagia ngolome wabu wulenebi lamiai hene.
1CH 28:17 Ani bialu ngolo bayale daga ogodaguame mbirale kanogo ale tomo dugulene dehe wabulenebi ndisi be wabulenebi gabo be wabulenebi ani bialu ngolo silibabi ogodaguame ndisi be maru wabulenebi mo walia halu lamini.
1CH 28:18 Daga gilibu wiyadagoha ngolo bayale ogodaguame ira hagua nga bilo delaga inisenesi lomabu delolene dabu wabulenebi lamialu ngolo ogodaguame dahuliyali handalehe kira wabuwa libunaga babaganeme Anduane Homogonaga Habo Nalolene Bi lo winigonaga Mbogoyi biago yabula dambiho helole wabilonaga ngolo dagabi lamini. Dahuliyali handalehe ogonilabo libu Anduane Homogo ibuninaga karisi laga wabu wini.
1CH 28:19 Ani lamiai howa Kini Debidihanda lalu, Bigiya beba ogoniha wabu wirudaruni Anduane Homogo ibunime i̱ mo walia hayadagua bibahende wabu wiai haru, lene.
1CH 28:20 Ani lowa ibugua ibu igini Solomono lamialu lalu, I̱naga Anduane Homogo Ngode Datagaliwabe kago ibugua í̠ heba mandagi haabo holebirago í̠na biabe uruni bulene gendame í̠ bope haragola mini dege dindi holeni gi nahe hongo howa bialu habe. Í̠na Anduane Homogonaga anda ogoni biamaro bibelo ibugua í̠ wahalu nape biamogo bialu haabo holebira.
1CH 28:21 Iname loma binigo mo miaga karubi Libaiali karubi tigua Anduane Homogonaga andaha biabe tara tara bigibigi bialu helo dabo helaiore kamagoni. Biabe tara tara ngago damene bigibigi bulene agali mugubeyi dewaore í̠ biamogo bulene manda mandabu hai heledema. Ani bialu hameigini mbira mbiranaga agali haguane karubi wali agali bibahendebi í̠naga bi larego hale halu buleore manda mandabu hai kagoni, lalu Debidihanda Solomonohondo lamiai hene.
1CH 29:1 Kini Debidihanda wali agali bibahende bu hearu lamialu lalu, Ngode Datagaliwabehanda ibunaga anda bilonaga i̱ igini Solomono dabenego ai Solomono ibugua anda ogoni bulenaga manda dewa nabi wene dege kagoni. Anduane Homogo Ngode Datagaliwabenaga anda ogoni bulenego bame agalime kininaga anda biagadagua bule ndo biabe erekuibi ndelaheore bialu bulene ngagoni.
1CH 29:2 Ani bulene ngago ai i̱na ngolo silibabi boronosi aeanebi ira bayalerubi bibahende Anduane Homogonaga anda ogoni bule ala mo manda manda bu harugoni. Ani buwa ege to̱le̱ bayale tara tara muni dewaoreme yolo miaga ngarubi mo wia dege birugoni.
1CH 29:3 Uruni mo tago halu i̱na ngolo siliba maru ngorunibi ngia dege biru. Ani birudagoni irane i̱na Anduane Homogonaga anda bu helo hame timbuniore lowa anidagua bule lowa manda manda birugoni.
1CH 29:4 Ngolo bayale i̱na wirudarunaga genda magi timbuni kilogarama daosini handari mbira (100,000) silibabi genda magi timbuni dege kilogarama daosini handari kirani pira maria (240,000) ngogo ogonime Anduane Homogonaga anda ogoni tamuha anda hái yári bule ngo.
1CH 29:5 Ani bialu anda biaga agali mandabi karume anda ogoni bigiya wabu ngarunaga silibame mo yári bia holene ngarubi ngolome mo yári bia holene ngarubi bulene ngadagua bigi bilonaga ngogoni. Ai uruni bulenaga turu halu Anduane Homogohondo loma bialu mbirale bame migi bule ái dege kamibe.
1CH 29:6 Kini Debidihanda bi ogoni layago hale howa Isaraele hameigini mbira mbiranaga agali haguane hearubi ami agali daosini agima haru haga agali haguane hearubi ami agali handari agima haru haga agali haguane hearubi kininaga mbirale wiaru handayaho haga hearubi bibahendeoreme anda ogoni bulenaga mbirale bame mule turu timbuni howa tinaga bu miniha dunguloore hene.
1CH 29:7 Ani howa tigua ngolo dewaore genda magi kilogarama daosini dege handari mbirani pira karia (170,000) bolangua howa wialu siliba kilogarama daosini dege handari tebirani pira maria (340,000) bolangua howa wini. Ani wialu boronosibi nde kilogarama daosini dege handari waragariani pira kira (620,000) wialu aeanenaga genda magi timbuniore kilogarama milini tebirani daosini dege handari maria (3,400,000) wini.
1CH 29:8 Ani buwa wali agali bu hearume ege to̱le̱ tara tara muni timbunime yolo bialu miaga wigi biniru Anduane Homogonaga anda muni wiaga wiagoha ngelo mo migi bini. Gesono hameigini agali mbira mini Yahiele henego ogoni ibugua anda hobaneha muni wiaga ogoni handayaho haga hene.
1CH 29:9 Wali agali tigua handalu hemiria tinaga agali haguane bu hearume uruni damenego wule turu howa wialu heago de hondowa tibi nde turu timbuni ho hene. Kini Debidi ibunibi nde uruni hondowa turu timbuniore ho hene.
1CH 29:10 Wali agali bibahende íbu ngoai ho hearunaga deni howa Debidi ibugua Anduane Homogonaga mini mo yaraga halu lalu, Anduane Homogo-o í̠ore ina mamali Yagabanaga Ngode Datagaliwabe kego wali agali bibahende bu kamarume í̠naga mini yaraga haabobo halu holene nga.
1CH 29:11 Í̠ bibahendenaga hongo haihebi wá holenebi baya buruguleorebi mini lene daliga timbuniorebi kegoni. Mbirale dindini ngarubi karubi dahuliya andagaha ngarubi karubi bibahende í̠naga hangu hai kegoni. Ai mbirale uruni bibahendenaga kini dunini timbuniore howa í̠ni handame ho kegoni.
1CH 29:12 Í̠ni hangume bibahende bayale ngaru inahondo ngiai howa í̠nime bibahende haru hai ho kegoni. Í̠ hanguore bibahendenaga hongo bolangua haihe howa í̠nime dindini wali agali bu karu mo hongo ho helowa mini leneore helaga kegoni.
1CH 29:13 Inanaga Ngode Datagaliwabe-o iname í̠ bayaleore lalu í̠naga mini yaraga halu ka̱i̱ larama.
1CH 29:14 I̱naga wali agali bu karumebi i̱nimebi mbirale bibahende áyu í̠hondo ngeremarunaga anduane inane howa ngerema labe naheore kama. Inaha galone mbira nahe howa mbirale uruni inanenaga labe naheore kamagoni. Mbirale uruni bibahende í̠ninaga hangu wiaiore ka. Ala mbirale uruni í̠nime inahondo ngiriruni áyu iname í̠nihondo lone ngiadai berema.
1CH 29:15 Anduane Homogo-o áyu wali agali dindini bu kamaruni bibahende ina dindi mbirani baya hangu ho dungulo haga ndo inanaga mamali heneru ti bamba dindi mbira mbirani palia edede dege bima ibaga bialu hagadagua haga kamago í̠ manda bu kegoni. Ani howa inanenaga holene minu yania habe naheore howa balawaya dowa daabo nahe abale do gilopebe biraligobi kama.
1CH 29:16 Anduane Homogo inanaga Ngode Datagaliwabe-o iname mbirale bibahende áyu ngelo bedamaruni í̠naga mini timbuniore lene kegoni lalu anda bulenaga mo mogo buwa ngelo kamagoni. Anigo mbirale uruni bibahendeore í̠niha howa ibini í̠ninaga hangu wiai ka.
1CH 29:17 Í̠na wali agali bu karu bibahendenaga bu miniha agi winidabe hondole bahandai halu mbirali ibu mana tigabi bialu kago hondowa í̠naga bu miniha turuho haga kegoni. I̱na uruni mitangi bialubi mende í̠ mini leneore kego mitangi bialubi í̠naga miniha mbirale mbirale uruni í̠hondo ngua timbuniore howa ngero. Ai áyu anidagua dege í̠naga wali agali bu karu tiguabi nde mbirale uruni í̠hondo turu halu nguaore howa ngiragoni. Tigua ani ngirago hondowa i̱naga bu miniha turu timbuni ho kogoni.
1CH 29:18 Ai Anduane Homogo-o í̠ ina mamali Abarahama Aisaga Yagaba imarunagabi inanagabi Ngode Datagaliwabeore kego í̠nime í̠naga wali agali bu kamarume biabe urunidagua buluma̱ya inanaga bu miniha mo hongo haabo habe. Ani bialu wali agali uruninaga bu mini í̠niha hana ho haabo helo helabe.
1CH 29:19 I̱ igini Solomono ibugua í̠naga bi laregobi mana lowini ngagobi talialu anda ogoni bilo mini mandaru bayale bulene talebu mibe, lalu Debidihanda Anduane Homogohondo lene.
1CH 29:20 Ani lowa Debidihanda wali agali bu hearuhondo lamialu lalu, Anduane Homogo tínaga Ngode Datagaliwabe mini yaraga hai hadaba, lene. Ani layago hale howa wali agali bu hearume ge duli hanga howa dindini bulu paluwa Anduane Homogo tinaga mamali ala hama ibinirunaga Ngode Datagaliwabenaga mini yaraga halu Debidinaga minibi yaraga halu bini.
1CH 29:21 Ani bialu horo mendengi wali agali tigua nogo bulumaga wangabe daosini mbira (1,000) sibi wangabe daosini mbira (1,000) sibi igini hungubalua nde daosini mbira (1,000) dege lowa uruni bibahende Anduane Homogohondo loma buwa irani bo delai hene. Ani buwa waini ibabi loma bialu odo dela dege bini. Ani bialu Isaraele wali agali bibahendenaga loma marubi bo dela dege bini.
1CH 29:22 Horo ogoningi wali agali ti tomo ibabi loma binidaruni nalu tinaga bu miniha Anduane Homogonaga deni ti turu timbuni ho hene. Anidagua bialu howa horo ogoningi dege tigua Anduane Homogonaga deni howa Solomono ibu tinaga kini helo halu mende lowa ibunaga haguaneni weli odo wini. Ani bialu agali mbira mini Sadogo heagobi loma binigo mo miaga helo dabo helalu bini.
1CH 29:23 Ani bialu Solomono ibu kini halu ibu aba Debidi kini henegoria ha aribia howa kininaga biragane Anduane Homogohanda helenegoria biruwa ibugua wali agali bu hearu handame ho hene. Ani howa ibugua biabe biyaru bayale dege biyagola Isaraele wali agali bu hearu bibahendeme ibunaga bi hale halu ibu andaneha hai hene.
1CH 29:24 Ani howa kininaga biabe biaga agali haguane bu hearubi ami agali haguane hongohe bu hearubi heba Debidi igini maru bu hearubi ti bibahendeme Kini Solomono andaneha hai hole lalu bi hongohe lo wiai hene.
1CH 29:25 Anduane Homogohanda Isaraele wali agali bu hearunaga deni Solomononaga mini yaraga halu mo duniniore ho helene. Ani bialu Solomono ibu kini mini leneore howa Isaraele dindiha kini ala henedaru bolanguahe timbuniore hene.
1CH 29:26 Yasi igini Debidi ibu Isaraele dindi bibahendenaga kini howa
1CH 29:27 ibugua mali pira mariani (40) haru hene. Ibugua Heberono dindini mali kariani kini halu Yarusalemeni howa mali pira tebirani tebira (33) haru hene.
1CH 29:28 Ibu wali agali bibahendenaga deni mini lene timbuniore halu ibunaga munirubi dabudabu tara tarabi dewaorewi hene. Ani wi howa ibu waheore biru wialu homene. Homayagola ibu igini Solomono ibunime ibu aba hayadagua kini ha aribia hene.
1CH 29:29 Debidi ibu kini pigane henedangi howa bima ibalu homayangi maro binigonaga te Samuelenaga mbuga ngagohabi mbuga mende Anduane Homogonaga bi mana latagi haga Nadananaga mbugahabi gilibu wialu Gadanaga mbugahabi gilibu wigi bida.
1CH 29:30 Mbuga uruniha howa Debidihanda biabe hongoheore wiaru bialu henegobi ibuni kiniore kagonida lo manda bialu Isaraele dindi baya hanguore handayaho henegobi te uruninaga gilibu wigi bida. Ani bialu nde mana ibugua bialu hene maru wiarubi Isaraele wali agali baba biabe bialu hene wiarubi dindi maru Isaraele dindiha wia mabu bialu wia parapara biaru baba biabe bialu hene wiarunaga te lo wigi bida.
2CH 1:1 Anduane Homogo Kini Debidi igini Solomononaga Ngode Datagaliwabehanda Solomono biamogo timbuniore biyagola ibu kini hongoheore hene.
2CH 1:2 Kini Solomonohanda ami agali daosini mbira (1,000) haru haga hearubi handari mbira (100) haru haga hearubi ibunaga gabumane haru haga hearubi hameigini haru haga haguane hearubi Isaraele wali agali bibahendeore mo ngoai hene.
2CH 1:3 Mo ngoai heagola ibugua tihondo lalu, Anduane Homogo mitangi bialu inanaga lotu laga dindi dunini mbira Gibeono ngagoha mali̱ya, lene. Dindi ogoriani Anduane Homogo lola holenaga Balai Anda ala Mosese ibugua dindi koha bu helene.
2CH 1:4 Ani helayagoyu Anduane Homogonaga Habo Nalolene Bi lo winigonaga Mbogoyi dindi ogoriani nawini. Ala Kini Debidihanda Mbogoyi biago Kiriada Yarimi tanoha howa yalu ibalu Yarusalemeni balai anda mendeha ngelene.
2CH 1:5 Gibeono dindiha lomabu delaga dabu mbira Uri igini Besalele ibu Hua aguanene henego ibugua dabu ogoni boronosime wabinigo Anduane Homogonaga Balai Anda haneni bu helenegoria Solomono ibubi wali agali bibahendebi Anduane Homogo mitangi bialu lotu lalu hene.
2CH 1:6 Ani bialu howa Solomono ibugua dabu boronosime wabini heagoha bulumaga sibirubi daosini mbira (1,000) loma bialu bo delai hene.
2CH 1:7 Ani bialu horo ogoningi mbiraga Solomono ibu palearia Anduane Homogohanda emagaha howa lalu, I̱na í̠hondo mbirale mbira ngi lalu hale harego nguliya agile ngi loleberebe, lene.
2CH 1:8 Ani layagola Solomonohanda lalu, I̱ aba Debidi í̠nioreme ibu gubalini halu mbirale bayale hangu biaabo haga kegoni. Áyubi nde í̠na ibu kini henegoria i̱ ha aribia holiya dabo helarigoni.
2CH 1:9 Anigo i̱naga Anduane Homogo Ngode Datagaliwabe-o i̱ igiri emene mana manda biai nahe kogo í̠naga wali agali baya hangu agua haru holedabe tobaho kogoni. Áyu i̱ í̠naga wali agali í̠nime dabo helene biaru heba mandagi hewaria ainde ti daga labe nahe dewaore bu kago ai í̠nime i̱ abahondo buleore lalu bi lo wirigo
2CH 1:10 í̠naga wali agali uruni i̱na baya hangu haru holiyanaga í̠na mini gigabi wulenebi manda bayale bulenebi ngibelo hame ledo. Ani ngeregola i̱na mana ogo tigabi ogo tiga nabi lalu baya hangu tale bulene karulape holebero. Nangiriyagua nde í̠naga wali agali dewaore labe nahe o bu karuni i̱na agua haru holiyadabe, lene.
2CH 1:11 Solomonohanda bi layadagoni hale howa Anduane Homogo ibugua bayaleore laya manda bialu ibunaga bu miniha dungulo hene. Ani howa ibugua Solomonohondo lalu, I̱na Isaraele wali agali baya hangu haru holiya mini gigabi wulenebi manda bayale bulenebi ngi larigo bayuwa lari. I̱na dindini luore holiya biamogo bibe lalubi ndo muni mbiraleru dewa ngi lalubi ndo í̠naga waitigi bu karuni bo wahabe lalubi ndo hale harigo bayuwaore larigoni.
2CH 1:12 Ogoni heneneore larigo í̠na mbirale i̱hondo ngi lalu hale harigoni i̱na ngulebero. Áyu ogoni howa í̠ha mini mandala timbuniore gigabiwi habelo ngulebero. Abale agali mbira manda timbuni ogonibi mbira ha nabini. Manibi nde agali mini mandala timbuni gigabiwi í̠ ale mende naholebiraore. Í̠na i̱hondo mini lene holenebi muni mbiraleru yu holiya ngi lalu ndo larigo i̱nime mbirale uruni bibahende ngiai harogola yu holebere. Ani yu kegola kini mini lene maru karubi ndo í̠ mini lene daligaore holebere, lalu Anduane Homogohanda Solomonohondo lamini.
2CH 1:13 Mani Solomono ibu Gibeono dindini Anduane Homogo mitangi bialu Balai Anda heagoha lotu laga winigo ngelalu Yarusaleme dai buwa ibugua Isaraele wali agali haru haga hene.
2CH 1:14 Solomono ibugua wai biagane garo ale karisirubi ibu ami agalirunaga nogo hosirubi dewaore yolo bu hela ngela bigi bini. Ani buwa ibugua karisirubi hosirubi tale bialu maru dindi ibugua handayaho haga wiyadaruha talebu pelalu maru Yarusalemeni ngelo hene. Wai biagane karisi daosini mbirani handari maria (1,400) wialu wai biagane ami agalirunaga hosi daosini mbirani hombearia (12,000) hene.
2CH 1:15 Solomono ibu kini henedangi muni ngolo silibaru dewaore daga labe nahe ege to̱le̱ dugu paya biradagua bialu Yarusalemeni yu anda ibugu biaga wini. Ira tamiabi aulolebe tobahe bame Isaraele dindi hari bare wiaruha howa ira hearu damene bibahendeore dibu yu ibai hene wiradagua bini.
2CH 1:16 Solomono ibugua biyinaya biaga agali hearuhondo ibunaga hosiru Silisia dindiha howabi Musiri dindiha howabi yolo bule pudaba laga hene.
2CH 1:17 Ani lara handala biyinaya biaga agalidarume Musiri dindiha puwa wai biaga karisirubi hosirubi yolo mule piaga hene. Karisi mbira mbiranaga yolo muni siliba kina dege daosini waragaria (6,000) aleme mialu hosi mbira hangunaga yolo muni siliba kina daosini mbirani handari duria (1,500) aleme yolo miaga hene. Yolo ani mialu agali uruni tigua hosiru haru ha karisiru mo ya bialu Hidiali kini karia pialu Siriali kini kariabi pu bigi biragola ogonilabo libugua mbirale yalu piagadaruni munime yolo bigi biaga hene.
2CH 2:1 Kini Solomonohanda anda mbira Anduane Homogo mitangi bialu lotu lolebi anda mende ibuninagabi bule manda bini.
2CH 2:2 Ani manda buwa hari bareha to̱le̱ poda tiga bilo ibugua agali daosini pira halirame (80,000) bilimu lalu agali daosini pira kariame (70,000) to̱le̱ irabi yu tono bigi bilo dabo helene. Biabe biraru handayaho helo ibugua agali daosini tebirani handari waragaria (3,600) dabo helene.
2CH 2:3 Solomonohanda Taianaga kini mbira mini Hirama heagohondo bi lo pelowa lalu, Abale i̱ aba Kini Debidi heangi í̠na ibu biamogo bialu ibuni anda bayaleore bilo ira tamia dewa dibu miridagua ai i̱bi nde biamogo bialu ira dibu ngibelo hame ledogoni.
2CH 2:4 Anigo i̱na Anduane Homogo i̱naga Ngode Datagaliwabe kago ibunaga mini yaraga helo anda timbuniore bialu kogoni. Anda ogoni loma biahene tara halu i̱bi i̱naga wali agali karubi iname Anduane Homogo mitangi bialu lotu lole hagua nga bilo inisenesi delalu mberedi loma bia howa ibu de hendelo migi bulene wulebira. Ani bialu egerebagi alendobi Sabada horongibi horo timbuni Ege Mbira Ngabulo harangibi horo marunagabi bibahendengi nogo loma bialu bo delaga bulene wulebira. Anduane Homogo ibugua ogodagua lalu, Isaraele wali agali tígua ani biaabo holene nga, lene.
2CH 2:5 Anda timbuni taraore buleberogo irane Ngode Datagaliwabe ibuni hangu daligaore mini lene kago ibu ale mende naheore kagonaga.
2CH 2:6 Anigo Ngode Datagaliwabe ibu helo anda mbira aiwa bibehe kabe. Ibuni holene hari daliga bibahendeha nakarulape degego i̱na anda emeneore áyu bule kogo ibu agua holobadabe. Anda berogo nga biagane inisenesime ibuhondo delolene hangu holebira.
2CH 2:7 Ai agali mbira ibu giligili bulene mugubeyi ngolo silibamebi ege to̱le̱ boronosimebi aeanemebi mbirale mbirale wabulene mugubeyibi labolabo hari mindini handalehebi tagalitayabi daramabibi wabulene mugubeyibi kago i̱ kogoria ibilabe. Ala i̱ aba Debidihanda Yudalibi Yarusalemealibi mugubeyi hearu hondowa dabeneru ibu ti heba biabe bilo.
2CH 2:8 Ani bulebirago i̱na í̠naga agali ira dibaga mugubeyi kane hendedogo maru Lebanono irabuha ira tamiabi guraya alebi yuluba alebi dibalu ibilaga bibe. I̱naga biabe biaga agali karu í̠naga biabe biaga agali biamogo bilo pudaba lolene manda bu kogoni.
2CH 2:9 Anda ogoni berogo timbuni taraore buleberogo ira dewa manda manda bu wulene holebira.
2CH 2:10 Í̠naga biabe biaga agali karu tigua tomo nelo i̱na widibi balibi genda magi tono daosini kira (2,000) dege degebi waini iba lida magi daosini handari mariabi (400,000) olibe lininaga weli lida magi daosini handari mariabi (400,000) ibilolebero, lalu bebani gilibu wia hene.
2CH 2:11 Hirama ibugua Solomonohanda beba ogoni gilibu wia hayago muwa beba gilibu dai bialu lalu, Anduane Homogo ibugua Isaraele wali agali gubalini timbuniore howa í̠ tinaga kini helo dabo helayiya.
2CH 2:12 Anduane Homogo Isaraele wali agalinaga Ngode Datagaliwabe ibugua haribi dindibi wabiai henego kago ibunaga mini yaraga hai holene nga. Ibugua Kini Debidi igini mbira mini bayale gigabiwi manda timbunibi holene miyiya. Ibu igini ogoni í̠ kego í̠na Anduane Homogonaga andabi í̠ninaga andabi bule manda manda bu ke, lene.
2CH 2:13 Ani lowa Hiramahanda lalu, Agali mbira mini Hurama kago ibu ai̱ya Dana hameigini berenego ibu aba Taia tanoali hene. Agali ogoni ibugua mbirale tara tara ngolo silibameru boronosimeru aeanemeru ege to̱le̱meru irameru wabiaga mugubeyi kago ibugua labolabo tara tara hari mindini handalehebi tagalitayabi daramabibi wabulene mana mandabi kago ibu í̠ keria ibilo pu larugoni. Ibugua giligili baya gibi biaga kago bigiya wabu ngadagua bibeheore kagoni. Ibugua í̠naga biabe ogonibi bulene mandabi karubi biabe biaga maru í̠ aba Kini Debidinaga heneru tibi bibahende mandagi howa í̠naga biabe bilo bilabe.
2CH 2:15 Anigo ai í̠na widi balibi waini iba olibe lininaga welibi ngulebero larigo abale wia habe.
2CH 2:16 Ina Lebanono hari irabuha puwa i̱naga biabe biaga agali karume ira tamia í̠ hamelededagua dibalu iba solowara bedagoria yu tagira pu ngelolebira. Tigua ani yu íbu wiai howa pume daba homagamaga buwa ibani ibilalu í̠nime Yoba tanoni yu ibabe lariyagoria mo yalu ibulebira. Ani yu íbu ngelaragola í̠ninaga biabe biaga agali karu tinime mo yalu Yarusaleme polene nga, lalu Kini Hiramahanda beba ogoni Solomonohondo ibilene.
2CH 2:17 Solomono ibugua Isaraele dindini agali dindi tara taraha howa íbu hearu abale ibu aba Debidihanda dagalayadagua dagalai howa agali daosini dege handari mbirani pira duriani tebira halu handari waragaria (153,600) hene.
2CH 2:18 Ani dagalai howa ibugua agali daosini pira halira (80,000) ti hari bare wiagoha ege to̱le̱ podelo dabo helalu agali daosini pira karia (70,000) tigua ege to̱le̱ podo winiru mo yu tono bilo dabo helalu biabe uruni haru halu handayaho helo agali daosini tebirani handari tebira (3,300) dabo helene.
2CH 3:1 Solomonohanda Anduane Homogonaga anda Yarusalemeha hari mini Moraiani anda ogoni tenialu bini. Ala dindi ogoriani Yabusuali Araunanaga widi iraneru lini hondo ibira ibira halu lini aeanela mo tale biaga wiagoria Anduane Homogo ibu Debidi hearia hapani hayangi Debidihanda ogoriani Anduane Homogonaga anda bulene nga manda bu hene.
2CH 3:2 Solomono ibu kini mali tebira howa manegonaga ege mende layagola biabe ogoni pigane bini.
2CH 3:3 Solomonohanda Anduane Homogonaga anda lunaga mida magi pira kirani karia (27) halu arane yangalenaga mida magi dira manda bini.
2CH 3:4 Anda hobane mbira harabahayagi helenego ogoninaga arane timbuni mida magi dira dege howa daliganaga mida magi pira duriani maria (54) hene. Tamu hobane ogoni ngolo bayale wiagome ira hela dambi hai hene.
2CH 3:5 Hobane Loma Bia Hene tamuhayagi Solomonohanda ira guraya ale pelowa anda háini bapara howa ngolo bayalegome ira paraho dambi hai hene. Ani buwa ngolo ogoriani bigiya dewa ayage alebi pu seni alebi giligili bini.
2CH 3:6 Kini ibu ngolo ogoni dindi mini Parabaimiha howa minigomebi ege to̱le̱ tara tara muni dewaore miagagomebi Anduane Homogonaga anda biago yári tara tara helaga bini.
2CH 3:7 Anda ogoni tamuha anda daligahabi háibi harababi pangabi bibahende ngolo bayaleme hela dambi hai hayagola biabe biaga mugubeyi biarume anda háini dahuliyali handalehenaga bigiya dewa wabigi bini.
2CH 3:8 Anda biagonaga yangale magi winidagua Hobane Loma Bia Heneorenaga arane yangale mida magi dira wialu lunaga mida magi dira dege wini. Hobane Loma Bia Heneorenaga hái hela dambi helo ngolo genda magi tono pira kirame (20) helene.
2CH 3:9 Milinaga haguane dambi helo ngolo genda magi garama handari waragaria (600) mialu anda tamu hobane daliganaga háiha ngolo degeme dambi hai hene.
2CH 3:10 Solomonohanda ibunaga biabe biahaga agali biarume mbirale dahuliyali handalehe kira babaganehe wabu ngelowa ngolome para hodambi hai halimu lene. Tigua ogonidagua biai howa Anduane Homogonaga anda Hobane Loma Bia Heneore biagoha mo yanda howa ngelene.
2CH 3:11 Dahuliyali handalehe wabini biagolabo tamu hobane hanuni ogoniha mandagi heleagola libu tamu hobane biagonaga pangaha handade ho ngelene. Libu babagane kira kirahe howa libunaga babagane yanga lowa haragaho helowa babagane lunaga mida magi kira bolanguahe hene. Dahuliyali handalehe biago labonaga babagane mende mendeme anda hái ela howa mendego labome tamu hanuni libuni ela hagabu helene. Babagane maria biaru yangalai howa mida magi dira ale hene.
2CH 3:14 Anda Hobane Loma Bia Henebi Hobane Loma Bia Heneorebi hobaki hole labolabo baya taraore timbuni mbira wabini. Labolabo timbuni ogoni pu tara tarame biamaga howa kala mindibime guyini hari mindini handalehe wiarumebi tagalitayame guyini wiarumebi daramabime guyini wiarumebi mo yári bia hene. Ani buwa dahuliyali handaleheru labolabo ogoriani yári bia ho helaga bini.
2CH 3:15 Solomonohanda ibunaga biabe biahaga agalirume ege to̱le̱ boronosime anda gene luni kira wabuwa Anduane Homogonaga anda haneni helalimu lene. Gene biago labonaga luni mida magi duriani maru bolangua halu ogoni labonaga nguni daligahayagi hela dambi holene wabu wiyago luni mida magi kirani bolanguahe wini.
2CH 3:16 Daligahayagi dege yári pu seni ale boronosime wabigi bialu ira mbira lini mini pomegaranade lini handalehe handari mbira (100) pu senini helaga bini.
2CH 3:17 Anda gene kira ogoni labo wabiai howa anda haneni talebu helene. Anda gene mende mini Yagini lalu anda haraba unurayagi wiagoria helene. Anda gene mende mini Boasa lenego abene uyurayagi helene.
2CH 4:1 Kini Solomonohanda lomabu delaga dabu timbuni wabinigo luninaga magibi yangalenaga magibi mbiraore mida dira bolanguahe dege dege wialu daliganaga magi mida maria bolanguahe wini.
2CH 4:2 Iba dange mbira wagarorobi boronosime wabialu daliganaga mida magi kirani bolanguahe halu aranenaga mida magi mariani bolanguahe dege wabu wini. Ani bialu timbuni mabubinaga mida magi pira mbirani tebira (13) bolanguahe wini.
2CH 4:3 Iba dange ogoninaga neneni mbirale mbira nogo bulumaga wangabe handalehe wabuwa duguni kira mabubupe helene. Ani buwa dombeneha mida mbira mbira yu wahaga buwa bigiya pira pigane iba dange wabialu howa wabumaga henego uruni mo helene.
2CH 4:4 Nogo bulumaga wangabe handalehe pira mbirani kira (12) wabu winigoria erekunini iba dange biago mo wini. Ani mo wiagola bulumaga uruninaga herenehayagi iba dange biago tibinime dambi helalu wanakui handa tagitagibu helaga bini. Mbirale bulumaga handalehe uruni aria tebira ni tagira ibiragohayagi handa amuho helalu tebira mende ni paliragohayagi handa daibu helalu tebira dege tebone uyurahayagi handa uyu howa helalu tebira dege mane unurahayagi handa unuho helene.
2CH 4:5 Iba dange biagonaga tamuhayagi howa tagirahayagi tohenaga magi sendimida halira gi hondone dunuyanego ale wini. Ani wiagola dange biagonaga poneni balawaya ale lini yanga nale wene dedaligobi wini. Iba dange ogoniha iba timbuniore lida magi daosini dege pira waragaria (60,000) birulene wabu wini.
2CH 4:6 Tigua iba dange emene pira wabu wini. Uruni wabiai howa duria Anduane Homogonaga anda manda abene unurahayaginaga heagoria wialu duria mende anda manda abene uyurahayaginaga heagoria wini. Iba dange pira biaru nogo podene ngago irame dai helonaga dange uruniha wayawaya ala biaga hene. Iba dange timbuni biago loma binigo mo miaga ti wayawaya bilo wini.
2CH 4:7 Tigua lamu hale delaho ngelolenaga irane pira ngolome wabulene winidagua wabialu dagia pirabi ngolome anidagua wabuwa bibahende Anduane Homogonaga anda tamu Hobane Loma Bia Henegoha duria dege dege uyurahayagibi duria dege dege unurahayagibi ngelaga bini. Ndisi be handari mbira (100) ngolome wabigi bini.
2CH 4:9 Ani biai howa tigua loma binigo mo miaga ngoai haga hama emene godo wialu wali agalibi ngoai helonaga hama timbuni godo wini. Ani buwa ege to̱le̱ pabe kira hama hangu hangu wilo wamabu bini. Ege to̱le̱ pabe kiranaga panga boronosime paraho dambi hai hene.
2CH 4:10 Iba dange timbuni biago Anduane Homogonaga anda tagiraha abene unurahayaginaga gibuni wiagoria mo ngelene.
2CH 4:11 Huramahanda wayawaya bulene ndisibi nama tabulirubi ndisi emenerubi bibahende wabiai hene. Ani bialu Hurama ibugua Anduane Homogonaga andaha biabe uruni bibe lalu Kini Solomonohanda mo miyaruni bibahende biai hene. Huramahanda wabinidaruni bibahende lamaga halu uru ale dege.
2CH 4:12 Anda gene luni boronosime kira wabuwa ogoni labonaga nguni daligahayagi dambi holene manda ale kira wabuwa nu ale nguni daliga dambi hayago mo yári bia holenebi wabini.
2CH 4:13 Ira mini pomegaranade lini handalehe bigiya handari maria (400) nu ale wabu helayagoria mo yári bia halu pongo bia haga bulenerubi anda gene mbira mbirani pomegaranade lini handalehe biagonaga bigiya duguni kira labolabo wabu helalu bini.
2CH 4:14 Ani bialu wilibaro ale pira wabialu iba dangebi wilibaro ogoriani pira dege wabu berelaga bini.
2CH 4:15 Ani bialu iba dange timbuni biagobi nogo bulumaga handalehe pira mbirani kira (12) iba dange ogoni yu heleagobi dege wabini.
2CH 4:16 Ndisirubi nama tabulirubi kanogo deherubi ndisi emene emenerubi wabiai hene. Hurama ibugua Solomonohanda anidagua bibe layagola mbirale uruni boronosime wabu wiai howa ngiringara lelo mbirale ha̱i̱ hagame baya hanguore ha̱i̱ howa domo mbaralo wahowa Anduane Homogonaga andaha wulene ale uruni bibahende wabu wiai hene.
2CH 4:17 Kini Solomono ibugua Huramahondo mbirale wabia layagoni dindi ulini mbira iba Yodana angehayagi Sugodo Seredaha tanola hengene wiagoha howa wabialu hene.
2CH 4:18 Ani buwa Hurama ibugua mbirale boronosime wabinidaruni dewaore wabu wini. Ani biyagola Solomonohanda agali maru hearuhondo boronosime mbirale wabiyadaruninaga genda magi agiradabe hondole daga ladaba nale wahene. Uruninaga genda magi ogodagua lalu agali mbiramebi manda nabi hene.
2CH 4:19 Solomono ibugua agali biabe biaga hearuhondo Anduane Homogonaga andaha ngelole ngolome mbirale maru wabidaba lene. Ani layagola biabe biaga agali hearume lomabu delaga dabubi wali agalime mberedi Anduane Homogohondo minigo mo wulene dagiabi ngolome wabu helene.
2CH 4:20 Ani bialu ngolo bayaleore wiarume lamu hale iraneru wabu helowa Anduane Homogonaga anda Hobane Loma Bia Heneore laga heagonaga anda hái tagirahayagi lamu hale delo wigi bulenaga manda manda bialu lo wiyadagua wabu wini.
2CH 4:21 Ani bialu ngolome dege balawaya handalehe wabialu lamu hale wabialu ira tabolene perobi wabu wigi dege bialu
2CH 4:22 nogo darama loma binirunaga darama hambu yule gabo bebi ndisi marubi mbirale mbira lamu hale mo hundia haga alebi ira hagua ngabiaga inisenesi delolene beledibi ira dene hedo yulene beledibi uruni bibahende ngolo bayaleme wabigi bini. Anduane Homogonaga anda panga tagirahayagibi tamuha Hobane Loma Bia Heneoreha anda polene pangabi ngolome dege paraho dambi hai hene.
2CH 5:1 Kini Solomonobi ibunaga biabe biaga hearubi tigua Anduane Homogonaga andaha biabe bulene winigo biai hene. Biai hayagola Solomono ibugua ngolo silibabi mbirale tara tarabi ibu aba Debidihanda Anduane Homogonaga loma biaho winiru bibahende anda hobane uruni ale wiagane heagoha mo yu puwa ngelaga bini.
2CH 5:2 Kini Solomonohanda, Isaraele hameigini hearunaga agali haguane bibahende hearubi hameigini emene emenenaga agali haguane hearubi ti bibahendeore i̱ni koria Yarusaleme ibai halimu lalu lama pudaba, lene. Uruni tigua Debidinaga tano Saiononi Anduane Homogonaga Habo Nalolene Bi lo winigonaga Mbogoyi biago ibunaga anda Yarusalemeni ngelole mo yalu ibule pudaba lolenaga ani lamule bi yalu purogo ladaba lene.
2CH 5:3 Ani laya handala bi ogoni hale halu agali uruni tigua mali ogoninaga ege kane layagola Isaraele wali agali ti ege ogoningi Horo Timbuni Anda Nemandaruha Palu Holene winigo ti bibahende íbu ngoai hene.
2CH 5:4 Agali haguane biaru íbu ngoai heagola Libaiali hearu tigua Mbogoyi biago mo yalu
2CH 5:5 Anduane Homogonaga anda heagoria yalu pene. Ani buwa loma binigo mo miagarubi Libai agali hearubi tigua Anduane Homogonaga Balai Anda heago gialo yalu Balai Anda ogoniha wiaga wiaru bibahende mo yai halu Anduane Homogonaga anda heagoria kawareni pene.
2CH 5:6 Ani mo yalu ibiyagola Solomonobi Isaraele wali agali bibahendebi Mbogoyi biago mo yalu ibiyagoria mo ngoai ho hene. Ani mo ngoai howa tigua nogo sibi bulumaga wangaberubi dewaore daga labenahe Anduane Homogohondo loma biniru bo delalu hene.
2CH 5:7 Ani bo delai halu loma binigo mo miaga biaru tigua Mbogoyi biago Anduane Homogonaga anda biago tamu Hobane Loma Bia Heneore biagoha mo yalu anda puwa dahuliyali handalehe wabini biagolabonaga babagane andaneha ngelene.
2CH 5:8 Babagane yabulalu haradaguabi wabu helayagome Mbogoyi biagobi iraho yaga ira luni kira biagolabobi bibahende babagane kira biagolabome dambi hai helene.
2CH 5:9 Ira kira Mbogoyi iraho yaga ogonilabo lunioreyagola anda tamu Hobane Loma Bia Hene laga mende tagirahayagi heagoria howa ira ogonilabonaga nguni panigi handabehe wini. Ani binigo tagirahayagi howa handabe nahe wini. Ira ogonilabo ogoriani wiaabo haga wini.
2CH 5:10 Mbogoyi ogoniha ege to̱le̱ kira Anduane Homogonaga bi mana gilibu wini biagolabo dege wini. Bamba Isaraele wali agali Iyibi dindi wahalu Hari Sainai heagoria íbu heangi Anduane Homogohanda ti heba Habo Nalolene Bi mbira lowinigo ogoni ege to̱le̱ kirani gili buwa Mosesehanda Mbogoyi ogoniha yu ngelene.
2CH 5:11 Ani ngelowa loma binigo mo miaga biaru ti Hobane Loma Bia Hene heagoha howa tagira ibini. Ani ibuwa loma binigo mo miaga tanabi bibahende hearu tini Anduane Homogonaga deni dodo nahelonaga mana bulene winigo biai hene. Libaiali iba gana lagaru ngida ale tara tara bagaru Asaba Hemana Yahudunu imaru ti igini damenerubi labolabo bayale tara karulowa ni tagira ibiragohayagi lomabu delaga dabu wiagoria heyu hene. Tigua heyu howa ngida ale tara tararu ngi̱li̱nge̱le̱ lagane beledi ale boronosime wabiniru yalu ti heba loma binigo mo miaga handari mbirani pira kira (120) hearume bigulibi yuwa mandagi hene. Iba gana laga hearume ti iba gana lalu howa marume biguli aleru pulalu marume ngi̱li̱nge̱le̱ lagane belediru balu ti bibahende mandagi howa Anduane Homogonaga mini yaraga halu lalu, Anduane Homogohanda bayale biaga kagonaga iname ibuhondo ka̱i̱ timbuni lami̱ya. Ibugua ina gubalini haho wiaaboore haga kagoni, lalu hene. Ani bialu loma binigo mo miaga biaru tigua Mbogoyi biago tamuha mo ngelalu tini tagira ibiyagola beraliba aleme Anduane Homogonaga anda biagoha to̱lai hene. Anduane Homogonaga wá taraore holeneme beraliba biagoha howa wá timbuni demborerebi hatagi hene. Ani biyagome loma binigo mo miaga biarume tinaga biabe bulene wiaru bule dai bibe nahe hene.
2CH 6:1 Ani biyagola Solomono ibugua Anduane Homogohondo bi ogodagua lene. Anduane Homogo-o í̠nime lalu, I̱ hari beraliba mindini ngaruha holebero, larigoni.
2CH 6:2 Anigo ai áyu i̱na í̠naga anda baya taraore bia kogonigo í̠ni ogoniha haaboore habelo, lene.
2CH 6:3 Kini Solomono ibugua Anduane Homogohondo bi lai howa wali agali bu hearuha handa amu howa Ngode Datagaliwabehanda tí mo bayale helo lowa bi la hene.
2CH 6:4 Ibugua lalu, Anduane Homogo ina Isaraele wali agali kamarunaga Ngode Datagaliwabe kago ibunaga mini mo yaraga hama. Ibugua bamba i̱ aba Debidihondo mbira bulebero lo winigo áyu biyada.
2CH 6:5 Anduane Homogohanda Debidihondo ogodagua layagoni. I̱na i̱naga wali agaliru Iyibi dindi howa haru tagira ibirungi hama ibinigo ibalu áyu ogoni howa tigua íbu ngoai halu i̱ni mitangi bialu lotu lalu holene anda mbira Isaraele dindiha tano wiyaru mbirani bilimu lalu nalami haru. I̱naga wali agaliru haru habelo agali mbirabi dabo nabi dege.
2CH 6:6 Anigo mani howa i̱na wali agali i̱ni koria ibalu i̱ mitangi bialu lotu lolene dindi Yarusaleme dabalu Debidi ibubi Isaraele wali agali haru haga helo dabalu birugoni, lalu Anduane Homogo ibugua Debidihondo lamini lalu, Solomonohanda lene.
2CH 6:7 Ibugua laho wialu lalu, Bamba i̱ aba Debidi ibugua wali agalime Anduane Homogo Isaraelealinaga Ngode Datagaliwabe mitangi bialu ibuhondo lotu lelo ibunaga anda mbira bule manda bialu hene.
2CH 6:8 Ani bule biyagola Anduane Homogohanda ibuhondo lalu, Í̠na i̱naga anda mbira bia hole manda birigoni bayale degego
2CH 6:9 anda ogoni í̠na nabulebere. Í̠ iginiore mbira kago ibugua i̱naga anda ogoni bia holebira, lene.
2CH 6:10 Ani lamiyadagua Anduane Homogo ibugua bi lo winigo áyu heneneore lola hai helayada. Ai ina bibahende ibuni kagoria kaware pialu lotu lami̱yanaga i̱na Anduane Homogo Isaraelealinaga Ngode Datagaliwabe kagonaga anda mbira bidogoni.
2CH 6:11 Anda ogoniha Anduane Homogonaga Habo Nalolene Bi lo winigonaga Mbogoyi biago tamuha mo yu íbu ngeledogoni. Mbogoyi ogoniha bamba inanaga mamali Iyibi dindiha howa haru tagira ibiyangi ege to̱le̱ kirani ina baba Habo Nalolene Bi gilibu wini biagolabo ogoniha nga, lalu Solomonohanda lene.
2CH 6:12 Ani lai howa Solomono ibu Isaraele wali agali bibahendenaga deni howa lomabu delaga dabu heagoria pu howa ibugua gi yaraga halu Ngode Datagaliwabehondo bi lalu hene.
2CH 6:13 Solomono ibugua dagia mbira boronosime wabu helayago lunaga magi aranenaga magibi mbiraore mida kira bolangua halu dege daliga magi mida mbira bolanguahe ogoni iraga hene. Iraga howa wali agali bibahende ngoaiho hearume ibu handaiore helo ibugua ge duli hangaho biruwa gi kirabali yaraga halu lalu,
2CH 6:14 Anduane Homogo ina Isaraele wali agali bibahendenaga Ngode Datagaliwabe-o dahuliya andagahabi dindihabi í̠ kegobi mende naheore. Ani kego howa iname mana beremaru í̠ninaga deni bayale hangu bialu howa mana ko ngaru mitangi nabi kamagola í̠na í̠ninaga Isaraele wali agali baba habo nalolene bi lo wirigo mitangi bialu ina gubalini haabo haga ke.
2CH 6:15 Í̠na bamba í̠naga biabe biahaga i̱ aba Debidihondo bulebero lalu bi mbira lo wirigo mitangi bialu áyu bi ogoni heneneore lola helarida.
2CH 6:16 Ai Anduane Homogo Isaraelealinaga Ngode Datagaliwabe-o áyu i̱na í̠hondo bi mbira hale harogo. Bamba i̱ aba Debidihondo mbira bulebero lalu bi mende lo wiriyagobi manda bibe. Í̠na ibuhondo lalu, Debidi-o í̠ igini aguaneru tigua i̱ni baya hangu talima ibaabo halubi i̱naga deni ti tigatiga ibagabu halubi í̠na bialu haga wiridagua biyagua nde í̠naga aguanene uruni aria hangume Isaraele wali agalinaga kini haabo holebira, lariyagoni.
2CH 6:17 Ai ina Isaraele wali agalinaga Ngode Datagaliwabe-o i̱ aba Debidi í̠naga biabe biahaga biagohondo ani buleore lalu bi ogonidagua lo wiriyagobi heneneore lola helonaga ani bibe lalu langero.
2CH 6:18 Anigo Anduane Homogo-o í̠ dindi ogoria ina wali agali kamaru heba mandagi habehe kebe. Dahuliya andaga timbuniore ngagoha í̠ holene nakarulape kegodago ai anda emeneore i̱na áyu o bu hela kogoha í̠ agua holebe.
2CH 6:19 Ai Anduane Homogo i̱naga Ngode Datagaliwabe-o áyu i̱naga bi ogoale bibe lalu í̠hondo hale harogo í̠naga biabe biahaga i̱ kogonigo i̱na bibe lalu langerogo bibe.
2CH 6:20 I̱nime lalu í̠naga anda ogonigo wali agaliru ti anda ogoniha anda ibalu í̠ni kegoria kaware ibilo dabarigoni. Ani birigo horombe mbiragabi bibahendengi anda ogoha de handape haga bibe. Ani beregola i̱na horo bibahendengi anda ogoha handa amuho howa í̠hondo biamogo bibe larogola í̠na i̱naga bi hale halu bibe.
2CH 6:21 Anduane Homogo-o í̠ni dahuliya andagaha kegonigo i̱nibi í̠naga Isaraele wali agali bu kamarubi iname í̠ anda ogoha handa amu howa í̠nihondo bi mbira laramagola inanaga bi laramago hale halu iname ko birimadaru domo wahaga bibe, lene.
2CH 6:22 Solomonohanda laabo halu lalu, Mbirali ibu damene mendeali kagome í̠ kagua mbira biri laragola ogoni ibugua anda ogoha anda ibuwa í̠naga lomabu delaga dabu kagoria kaware ibalu ogoni ibu bi heneneore laro lalu i̱ kagua nabi layagua
2CH 6:23 nde Anduane Homogo-o í̠ dahuliya andaga howa mbirali ibunaga bi ogoni larago hale halu í̠na mana tigabi ngadagua bialu mo tiga bibe. Mbirali mana ko birago ibuni biyadagobi pani mibe. Wali agali bu karunaga deni ko mbira para nahe kago ibu tigabi ka lalu pelabe.
2CH 6:24 Í̠naga Isaraele wali agali kamarume ina waitigi baba wai bialu kamaria iname í̠hondo mana ko birimagome waitigime ina balu ti wayali helaregola iname ko birimadarunaga mini beregedalu í̠ni keria anda ogoha ibuwa í̠hondo bi lalu, Inanaga ko birimaru domo wahabe larimayagua
2CH 6:25 í̠na dahuliya andaga howa í̠naga wali agali bu kamarunaga bi hale halu ko birimago domo wahabe. Ani bialu waitigi karume ina dindi tara mendeha haru piyagua í̠nime dindi bamba ina mamaliruhondo miriyago dindi ogoria ina lone haru dai bibe.
2CH 6:26 Ina wali agali í̠naga bu kamarume í̠hondo mana ko mbira bialu kamaria ina pani ngialu inanaga dindi ogoria iba dalu naibilo gaea hangu biaho ngelaregola mani ina mini beregedalu anda o kagoha í̠ni keria handa amu howa bi larimayagua
2CH 6:27 Anduane Homogo-o í̠ dahuliya andaga howa í̠naga Isaraele wali agali bu kamaru dara halu iname ko birimadaru domo wahabe. Ani bialu iname mana tigabi bayale ngaru hangu talialu bialu holoma̱ya lawai habe. Ani bialu ai Anduane Homogo-o dindi ogo inanaga dindi ogoniore ngelo í̠na bamba inanaga mamaliruhondo mini wirigoria iba dalu ibilabe.
2CH 6:28 Solomonohanda laabo halu lalu, Inanaga dindi ogoria hina gari timbuni piyaguabi warago hongohe tara tagira ibiyaguabi puyabu poboyogobi hongohe tara mbira ibalu inanaga mabuha tomo andaho karu mo ko hayaguabi pagaya ale dewaore ibalu mabuha tomo karu nai hayaguabi ina waitigirume ibalu inanaga tanoruha kamaria ina bole ho mabu bupe hayaguabi warago tara tara ngaru inaha anda ibalu ina mo ko hayaguabi
2CH 6:29 í̠hondo bi laramagola hale habe. Í̠naga Isaraele wali agali ina kamaru aria mbirame í̠hondo ko biyagonaga mitangi bialu bu miniha genda howa dara halu anda o kagoha í̠ keria handa amu howa gi dogolalu í̠hondo bi layagua
2CH 6:30 í̠na dahuliya andaga howa tinaga ko biyadago domo wahalu tigua bi larago hale habe. Í̠nime hangu wali agali bibahendenaga bu miniha mitangi bu kagobi manda biai ho kegoni. Ani bu kegome wali agali tigua mana koyaguabi bayaleyaguabi biyadadagua dabalu pani miadai bibe.
2CH 6:31 Ai í̠naga wali agali kamaru í̠na dindi ogoni inanaga mamaliruhondo miriyago ogoriani howa ina bayale tigabi bialu í̠ni andaneha haabo holoma̱ya ogonidagua bibe.
2CH 6:32 Dindi tara tara ngaruha howa wali agali bu karume í̠naga mini timbuni daliga mini lene kego hale halubi biabe timbuni í̠naga wali agali bu kamaru biamogo biridago hale halubi mbiralime ibunaga dindi yu wahalu í̠ mitangi bialu lotu lole anda ogoha ibuwa í̠nihondo bi layagua
2CH 6:33 í̠na dahuliya andaga howa ibugua í̠hondo bia lalu hale harago ale bibe. Í̠naga Isaraele wali agalirume í̠ andaneha kamadagua wali agali dindi tara taraha karume í̠ manda biai halu í̠ andaneha ibalu hai helo ani bibe. Ani bialu howa i̱na anda o bidogo í̠ andaore kagonidalo manda bialu wali agali bibahendeme anda o kagoha ibalu í̠ni mitangi bialu lotu lolene ogoha ngalo manda biai holebira.
2CH 6:34 Í̠na inahondo, Dindi mendeha waitigi karu baba wai bule pudaba, laregola bialu howa ina dindi tara tanabi kamagoha howa anda ogo Anduane Homogo í̠naga helo binigobi tano ogoni í̠na dabo ngelarigobi ogoniha handa dai bu howa bi larimayagua nde
2CH 6:35 í̠na dahuliya andaga howa inanaga bi laramaru hale howa dara halu ina waitigiru balu wayali holoma̱ya pele ngibe.
2CH 6:36 Wali agali bibahendeme ko biai haga kamago ai í̠naga wali agalime í̠hondo ko bialu kamaria í̠na i̱nahondo keba howa ina waitigi karume ibuwa ina bo garabaya bu yalu dindi tara kaundia kawarehayaguabi minu yalu piyagua í̠naga wali agali bu kamarume í̠hondo bi laramago hale habe.
2CH 6:37 Mani ina waitigi dindi tara uruniha howa inanaga ko birimaruni mitangi bu dai bialu inane mini beregedarimayagua nde Anduane Homogo-o í̠na inanaga bi laramago hale habe.
2CH 6:38 Heneneore ina waitigi dindi ngaruha pu howa í̠nihondo mini mbiraore wuwa í̠ hangu mitangi biaabo halu inane mini beregedai howabi bamba í̠na dindi ina mamaliruhondo mini biagohabi í̠ninaga tano dabo wirigohabi i̱na í̠naga anda wali agaliru ti ogoniha ibalu í̠ni keria ibilo bia harugohabi handa daibu howa í̠hondo bi lalu, Iname mana ko dewaore bialu harimago, lapani halu langirimayagua
2CH 6:39 í̠na dahuliya andaga howa iname bi laramagola hale howa dara halu biamogo bialu ko birimarubi domo wahabe.
2CH 6:40 Ai i̱naga Ngode Datagaliwabe-o í̠na iname anda ogoriani kamaria de handalu í̠hondo bi laramago hale habe.
2CH 6:41 Anduane Homogo Ngode Datagaliwabe-o í̠ni í̠naga Mbogoyi biago heba anda ogoriani haabo hole ibabe. Mbogoyi ogonime Anduane Homogo í̠ hongo gibihe kego walia ho ngagoni. Í̠naga loma binigo mo miaga karu tigua mana tigabi bilo biamogo bibe. Ani bialu í̠naga wali agali bu karume í̠na tihondo bayaleore birigonaga mitangi bialu turu timbuniore helo hamelo kogoni.
2CH 6:42 Anduane Homogo Ngode Datagaliwabe-o í̠naga biabe biahaga Debidi gubalini timbuniore ho harigoni mitangi bialu Kini í̠nime dabo helene kogoni handa tara halu erembira nguleni, lalu Solomonohanda Anduane Homogohondo bi ogoni lai hene.
2CH 7:1 Solomonohanda Anduane Homogohondo bi layago lai heagola dahuliya andagaha howa ira hedope halu loma bini wiaru irani dai helo loma bini maru wiarubi bibahende irame dai helene. Ani bialu Anduane Homogonaga wá holene hongoheore anda biagoha anda ibalu to̱latagi helene.
2CH 7:2 Anduane Homogonaga wá holene hongo taraore ogonime anda biagoha to̱latagi heagola loma binigo mo miaga agali bu hearu tigua anda ogoni tamuha anda pobe nahe hene.
2CH 7:3 Isaraele wali agali bu hearu tigua dahuliya andagaha howa ira minalu hungu bialu heaore ibira hayago hondowabi Anduane Homogonaga wá holene hongoheore anda biagoha to̱latagi hayago hondowabi ti anda haneni ege to̱le̱ mo dabadaba ho wini wiagoria howa ge duli hanga halu dindini bulu palene. Ani buwa tigua Anduane Homogohondo lotu lalu ibunaga mini yaraga halu lalu, Anduane Homogo ibu bayaleore biaga kagoni. Horo bibahendengi ibugua inahondo gubalini ho haabo haga kagoni, lalu lene.
2CH 7:4 Ani lowa Solomono halu ibunaga wali agali bu hearume Anduane Homogohondo loma bini maru tara tarabi irani delelo mia dege bini.
2CH 7:5 Solomonohanda Anduane Homogola ho gimbu bulenaga loma bule bulumaga wangabe daosini dege pira kirani kirabi (22,000) sibi daosini dege handari mbirani pira kirabi (120,000) haru ibalu bo lomabu mini. Kini Solomonobi ibunaga wali agali bibahendebi tigua anda biagoni Anduane Homogonaga andaore ka lene helo habagi howa tigua mo loma biaho helene.
2CH 7:6 Loma binigo mo miaga biaru ti mendehayagi ho dabadaba bu heagola Libai agali hearu tibi nde ngida ale tara tara baga wabu wiaru yuwa mendehayagi ho dabadaba bu hene. Abale Kini Debidihanda Anduane Homogonaga mini yaraga halu bi laga biyagola Libai agali uruni tigua ngida uruni baga bialu Anduane Homogohondo ka̱i̱ lalu ibunaga mini yaraga halu iba gana laga bini. Tigua iba gana mbira laga winigo ogo. Anduane Homogonaga gubalini holene wiaabobo ka, laga wini. Ani laga winigo wali agali ti heyu heagola Libai agali biaru tigua iba gana ogoni lalu hearia handa de̱le̱ bialu hearia loma binigo mo miaga biaru tigua pilipe ale mini biguli pu laanda halu hene.
2CH 7:7 Horo ogoningi Solomonohanda Anduane Homogonaga anda haneni dindi podene mbira wali agali mo ngoai ho haga wiago hanuni Anduane Homogo ibuninaga tu wabagi ho ngelene. Ani ngelowa dindi podene ogoriani Solomono ibugua loma biniru irani dai helo delagane alerubi widirubi delalu nogo abeneru Anduane Homogola ho gimbu bulenenaga loma binirubi bu delaga bini. Tigua lomabu delaga dabu anda haraba boronosime bu helayagoria loma biniru dewa ogonidaguago delai habe naheyagola tigua tagirani lomabu mini biagoria loma bini uruni delai hene.
2CH 7:8 Isaraele wali agali Yarusalemeni ngoai heneru ti dindi uyurahayagi Hamada polene hariga peagoria howabi ibalu unurahayagi Iyibi dindila tubari wiagoria howabi bibahendeore hilalu ibai hene. Ani ngoai howa horo karu Solomono halu anda biagoni Anduane Homogonaga andaore ka lole ngoai hene.
2CH 7:9 Horo karu uruni ha maro buwa tigua Ngode Datagaliwabenaga loma biniru delaga dabu biago ibunaga wiabagi heneore ngelonaga mo loma bia hene. Ani buwa horo karu mende Solomono heba Isaraele wali agali bibahendeore Horo Timbuni Anda Nemandaha Palu Holene mana laga winigo tigua bilonaga Yarusalemeni lone hadai bini. Ti horo deria bibahende hai howa lone dege halu mbira dewaliore mo ngoaiho hene.
2CH 7:10 Ogoni hai halu ege kanenaga horo pira kirani tebira (23) hayagola Solomonohanda Isaraele wali agali bu hayaru bibahende tini daluha pugu pugu bialu andaga dai bidaba lene. Ani laya handala tigua turu timbuni hama andaga pugu pugu binigo irane Anduane Homogohanda Debidihondo bayale dege biaabo hayagonagabi Solomonohondo biyagonagabi Isaraele wali agali bibahendehondo biyagonagabi tigua turu timbuni hama tini andaga pugu pugu bini.
2CH 7:11 Kini Solomonohanda Anduane Homogonaga anda bu helalu ibuni andabi bu helene. Anda kira ogoni laboha bulene manda bu heneru bibahende biaiore hene.
2CH 7:12 Biai ho heagola mani Anduane Homogo ibuni mbiraga Solomono hearia hapani howa lalu, Í̠naga bi i̱hondo larigoni hale harugo ai anda ogoni wali agalime i̱nihondo loma biniru yalu ibalu delaga bigi bilonaga helarogoni.
2CH 7:13 Anigo tígua mine halu mana ko biaabo harimiyagua i̱na dalu naibilo mo waharogolabi tínaga mabuha tomo hengedemiruni pagaya aleme nai helo ibilarogolabi i̱naga wali agali bu kamiruniha warago ko mbirame ti belarogolabi irane tígua ko birimigonaga.
2CH 7:14 Horo ogoningi i̱naga wali agali i̱na dabo helene tí kamirume ko bialu harimirunaga tíni mo dindiha howa mini beregedarimiyaguabi i̱hondo bi henene larimiyaguabi nde i̱na dahuliya andaga howa tínaga bi laramigo hale halu tínaga ko wu harimidagobi domo wahai halu tínaga dindibi lone mo gumbila helolebero.
2CH 7:15 Horo bibahendengi i̱na anda ogoniha handaya ho holebero. Tígua anda ogoniha anda ibalu i̱nihondo bi laramigo bibahende i̱ni kaware tí heba íbu howa hale hai holebero.
2CH 7:16 Ani larogoni irane i̱na anda ogoni i̱ninaga miniore yaraga haabo helonaga dabo helarugoni. Ani birugo ai wali agalime i̱nihondo mitangi bialu bi lole i̱ni kogoria anda ogoniha ibaabo helo. I̱naga anda ogoniha horo bibahendengi handa dali howa handaya ho haabo halu mitangi biaabo holebero.
2CH 7:17 Anigo Solomono í̠na i̱ninaga deni howa tigatiga ibagabu haabo habe. Ani bialu í̠ aba Debidihanda i̱naga bi mana lowini ngago bibahende baya hangu taluwa bialu henedagua i̱na í̠hondo bi langerogoni bayuwa taluwa bialu habe.
2CH 7:18 Í̠na urunidagua bialu hariyagua nde i̱na buleore lalu í̠ aba Debidila habo nalolene bi lo wirudagua biai holebero. Ibuhondo bi ogodagua lamirugo, Debidi í̠ igini aguaneneru degeme kini ha aribia haabo helo helaga bulebero, lalu lamirudagua bulebero.
2CH 7:19 Anigo Isaraele wali agali tígua i̱ yu wahalu puwa i̱naga bi mana tíhondo langirugo talialu bialu ha nabi howa mbirale dama mitangi bialu gime wabini ngaruhondo bi pupu wima pirimiyagua nde
2CH 7:20 dindi i̱na tí ngirugoriani kamiria bo batagi holebero. Ani bialu i̱na anda i̱ninagaore helo lowa loma bia ho helarugoni yu wahalu handa tara holebero. Ani berogola wali agali dindi tara tarani bu karume ibuwa anda ogoni mo ko heago de hondowa mege bulebira, lalu Anduane Homogohanda lene.
2CH 7:21 Anduane Homogohanda laabo halu lalu, Áyu anda ogoni mini lene kagonigo ai tígua i̱ni yu wahalu pirimiyagua anda ogoni mo ko holebira. Wali agali hariga anda henedagoria bolangua halu pugu birarume ko hene ngago hondowa mogo timbuni lolebira. Mogo lowa tigua lalu, Anduane Homogohanda dindi ogobi anda bayale ogobi mo ko hayadago aginaga biyadabe, lolebira.
2CH 7:22 Anidagua laragola wali agali marume ladai bialu lalu, O biyadagoni irane Isaraele wali agali tigua Anduane Homogo tinaga mamalirunaga Ngode Datagaliwabe bamba ti Iyibi dindiha garabaya hemiria golalu haru tagira ibalu dindi ogoha helo haru ibini. Ani haru íbu heleagola tigua ibuni yu wahalu puwa mbirale dama mitangi bialu gime wabini wiaruhondo bi pupu wialu uruni talima piyagola Anduane Homogo ibunime mo ko hene nga, lalu lamigi bulebira, lalu Anduane Homogohanda lene.
2CH 8:1 Solomonobi ibunaga biabe biaga agali hearumebi mali pira kira (20) biabe biaabo halu Anduane Homogonaga anda biagobi ibuninaga andabi biai hene.
2CH 8:2 Biai halu mani ibugua tano maru Kini Hiramahanda ibuhondo miniru mo tiga bialu bu aribia haga biai howa Isaraele wali agali maru tano uruniha helaga bini.
2CH 8:3 Solomonohanda wai bule puwa Hamada dindibi Soba dindibi bo podai halu ibu karulai hene.
2CH 8:4 Ibugua dindi ko dalu naibagaha tano mbira mini Tadamoro mo tiga buwa bu aribia halu Hamadaha tano marubi wai biagane alerubi tomorubi do holene anda hearu mo tiga bialu hene.
2CH 8:5 Ani bialu ibugua Bedehorono tano hari barehayagi wiagobi Bedehorono tano dindihayagi wiagobi mo tiga bialu ege to̱le̱me wai pabe wamabu bialu wai pabe pangaru hongohe helo tamuha howa panga payatagi holenenaga bengena aeaneme wabinigo payaga hene.
2CH 8:6 Balada tano wiagobi tano maruha wai biaga aleru tomorubi do hagane anda hearubi mo tiga bialu tano maruha ibunaga wai biaga garo ale mini karisibi nogo hosibi helaga bilo tano uruni mo tiga bialu hene. Solomonohanda anda dewaore bialu Yarusalemehabi Lebanono dindihabi dindi bibahende ibugua handayaho henegoha bule lo mandabu winiru biaiore hene.
2CH 8:7 Wali agali Isaraele dindiha hene Kenana aguanene Amoroaliru Hidialiru Peresealiru Hibialiru Yabusualiru ti haga bini. Bamba Isaraele wali agalime hameigini uruni bo wahai henego aria yu wahene maru haga bini. Ani heagola Solomono ibugua wali agali yu wahene uruni garabaya biabe ale bialu helo minu helai henego áyubi ani bialu haabo ka.
2CH 8:9 Anigo Solomonohanda Isaraele wali agali garabaya biabe bialu helo hela nabini. Ami agalibi ami haru haga agali haguanebi marume karisini heyu howa wai biaga hearu handayaho halu marume nogo hosini biruwa wai biaga hearu handayaho halu bini.
2CH 8:10 Solomono ibunaga biabe biagaru bibahende handayaho haga agali haguane handari kirani pira duria (250) bibahende hene.
2CH 8:11 Ainde Solomono one Iyibi kininaga wane berenego ibu Debidinaga Tano biago wahalu Solomonohanda anda gahenge biyagoha pu berene. Ibugua lalu, I̱ one biago ibu Isaraelenaga Kini Debidi andagaha habe nahego irane ala Habo Nalolene Bi lo winigonaga Mbogoyi ogoriani wini. Ani winigoria bibahende loma biaho wini nga, lo mitangi bialu ani lene.
2CH 8:12 Solomono ibugua lomabu delaga dabu Anduane Homogonaga anda haneha ibunime bu helenegoria nogo bulumaga sibiru loma bialu bo delaga bini.
2CH 8:13 Ibugua Mosese heangi mana lo winidagua Sabada horongibi Ege Ngabulo harangibi mali mbira mbirani Horo timbuni tebira uru Mberedi Yidi Nahe Hirinigo Nolenengibi Mabuha Widi Lini Denego Gandu Lolenengibi Anda Nemandaruha Palu Holene Horongibi Solomonohanda horo uruni bibahendengi nogo bulumaga sibiru bo lomabu mialu delaga bini.
2CH 8:14 Ibu aba Debidihanda mana bulene lo winidagua Solomono ibugua loma binigo mo miaga biaru horo bibahendengi tinaga biabe bulene winidagua bilo ti haru halu Libaiali maru ti loma binigo mo miaga biamogo bilobi iba gana lolene lamogo bilobi ibu haru halu biabe mo talebu tahaga hene. Solomono ibugua Libaiali marume Anduane Homogonaga andaha horo bibahendengi mamage helo tibi nde haru howa biabe mo talebu tahaga hene. Ibugua bibahende biyago Ngode Datagaliwabenaga agali Debidihanda lo winidagua bialu halimu layadagua
2CH 8:15 loma binigo mo miagarubi Libaialirubi tigua biabe bayuwaore bialu mbirale mbirale mo do hagane andabi muni andabi mamage halu hene.
2CH 8:16 Solomonohanda biabe bulene bibahende manda manda bu wiyadagua biai hene. Anduane Homogonaga anda gene pigane wayangibi howa bumaro biningibi bibahende bayaleore bialu hene.
2CH 8:17 Mani Solomono ibu Idomo dindiha pialu Esiongebe tanobi Elada tanobi wiagoria pene. Tano ogonilabo iba solowara mini Daramabi bereagoria Agabahayagi iba biraanda hene wiagoria wini.
2CH 8:18 Ani pu heagola Kini Hiramahanda ibunaga iba sibirubi agali iba sibiruha biabe biaga hearubi Solomononaga biabe biaga agali hearu baba biabe mandagi bialu helo ibilene. Ani bialu iba sibi uruni Obiri dindiha pialu ngolo wiaru mo yalu Solomono hearia yu dai bigi biaga wini. Ngolo dewa genda magi timbuni tono pira mbirani waragaria (16) mo yu ibugu biaga wini.
2CH 9:1 Seba dindinaga kuini wali berenegome hale halu hearia Solomono ibu mini lene timbuni ka layane hale hene. Ani layago hale howa kuini wali ogoni ibugua Solomononaga manda biaru ba handalu ibugua bi ladai bibe naheru maru Solomono hale hole ibini. Kuini wali ogonime ibunaga biabe biahaga agali dewaore haru halu nogo kamelerubi dewaore haru ha bialu Yarusaleme anda ibini. Tigua ngolo dewaorebi mbirale tara tara pauda ale tomo mo dende bia haga wiarubi ege to̱le̱ bayale yolo timbunime miaga wiaru alebi nogo kamelenaga erekunini mo paga howa yalu ibini. Ani yalu anda ibalu ibugua Kini Solomono lola howa bi maru Solomonohanda ladai bibe nahe manda manda bu yalu ibinidaru hale hene.
2CH 9:2 Solomono ibugua mbirale hale hayaruni bibahende tiga tigaore wiadagua ladai biai hene. Bi hale hayadaruni Solomono ibugua ladai bibe nahe mbira nawi bibahende ladai biai hene.
2CH 9:3 Ani lai hayagola kuini wali biagome Solomononaga manda timbuni mini gigabi wiagobi kininaga anda timbuni biniyarubi bibahende handai hene.
2CH 9:4 Ani hondowa kuini wali biagome Solomono ibugua horo bibahendengi tomo bayale dege naabo haga wiagobi ibunaga agali haguaneru ti haga wiarubi bibahendeore hendene. Kini ibunaga biabe bia haga agali hearubi tinaga aga bayale tara tara biaga wiarubi agali waini iba odo tale biaga hearubi hendene. Uruni hondowa Solomonohanda Anduane Homogonaga andaha nogo tara tara loma biniru bo delaga dabu wiarubi hendene. Mbirale uruni biaga wiaru handai howa mogo lalu ibugua bi mbira labe naheore hene.
2CH 9:5 Ani howa ibugua Solomono lamialu lalu, I̱ni dindiha howa hale harugola í̠naga mini mandaru bayale timbuniwi ke layane bibahende hale hai harugo áyu bi layadaruni heneneoredane handa walia ko.
2CH 9:6 Abale i̱na bi hale harudaruni mo henene nahe henego áyu i̱nime handalu hewaria ai heneneoredane hendedo. Heneneore abale bi hangu hale harugo goyane lowa i̱ni deme taraoredane hendedogoni. Í̠naga mini mandala gigabi ngeru layane hale dege harugo emene nira lowa í̠naga mini gigabi bayale timbuniore ngego hendedo.
2CH 9:7 Ai í̠naga biabe biahaga agali bu karuni ti turu hagabu haabo kagoni. Agali haguane haru haga karuni tibi nde í̠naga mini mandala bayale ngegome ti haru kegola í̠ni heba turu ho haradane hendedo.
2CH 9:8 Anduane Homogo í̠naga Ngode Datagaliwabe ibugua í̠hondo ibunaga miniha howa turu halu Isaraele wali agalirunaga kini habelo dabo helayadagonaga i̱na ibunaga mini yaraga harogoni. Ibugua Isaraele wali agali tíha ibunaga gubalini holene timbuniore horo mbiruorebi ereba naholene wiaabo howa í̠na manda timbuni bidegomebi mini tigabi bayale ngegomebi manani tigatiga tale bialu ti haru habelo í̠ kini helayada, lalu kuini wali biagome lai hene.
2CH 9:9 Ani lowa Seba dindinaga kuini wali biagome ngolo dewa daga labe naheore genda magi timbuni manda bialunaga tono maria Solomono mini. Ege to̱le̱ tara tara yolo timbunime miaga wiarubi padua ale tomo mo dende bia haga tara tara wiarubi mia dege bini. Mo dende bia hagane uruni ale Isaraele dindiha ala nayalu ibinidagua kuini wali biagome timbuniore yalu íbu mini.
2CH 9:10 Kini Hiramanaga iba sibini biabe biaga hearume Obiri dindiha pialu ogoniha howa ngolo dewaorebi ira bayale mbiranaga podenerubi ege to̱le̱ tara yolo timbunime miaga dewaore wiarubi Isaraele dindiha mo yalu ibini.
2CH 9:11 Ani mo yalu ibiyagola Solomonohanda agali ibunaga biabe biahaga hearuhondo lalu, Ira bayale urunime Anduane Homogonaga andabi i̱ni andanagabi egageria bia hadaba, lene. Ira bayale uruni aria marume iba gana lalu ngida aleru belo wabidaba, lalu lamini. Uruni ale Yuda dindini ala nawini.
2CH 9:12 Seba dindinaga kuini wali biagome mbirale Solomonohondo miyadarubi ndo Kini Solomono ibugua mbirale tara tara dewaore kuini wali biago ibuni hame lalu ngi layaru damene miai halu marubi wali agali dindi tara howa ibiraruhondo miagadagua mia tago halu mini. Ani miya handala kuini wali biagobi ibunaga biabe bia haga ibu heba ibinidarubi bibahende tini dindi dai bini.
2CH 9:13 Mali bibahendengi Solomono ibugua ngolo dewaore genda magi timbuni tono pira kirani tebira (23) dindi tara taraha howa mo yu anda ibugu bialu hene.
2CH 9:14 Muni marubi nde agali biyinaya biaga hearume dagisi bu mirarubi mo yu anda ibaga hene. Arebia dindiha kini hearumebi Isaraele dindiha dindi dunini mbira mbira handayaho haga hearumebi ngolo silibabi yalu íbu migi biaga hene.
2CH 9:15 Solomono ibugua agali biabe bia haga hearuhondo lalu, Ira pelene wiarume wai humbi timbuni wabidaba, layagola tigua humbi timbuni dewa handari kira (200) wabini. Wabu ngelowa ngolome paraho dambi hai hene. Ngolo para hayadaruninaga genda magi kilogarama karia ale humbi mbira mbirani para hene.
2CH 9:16 Ani bialu humbi maru emene handari tebira (300) wabuwa ngolome paraho dambi hene. Ngolo paraho dambi hayadaruninaga genda magi kilogarama kira dege dege hene. Ani biai heagola Solomonohanda agali ibunaga biabe bia haga biaruhondo lalu, Humbi uruni anda hobene mbira mini Lebanono Irabu Anda laga henegoha mo yaanda howa ngeladaba, lene.
2CH 9:17 Ani bialu Solomonohanda kini biragane dagia mbira wabidaba layagola wabini. Ani buwa kini biragane dagia ogoni ngoloru nogo elebeninaga ne gayaneme mo yári bia howa ngelene.
2CH 9:18 Kini biragane dagia ogoni daliga ngelowa ogoriani birule iraga holenaga ge holene egageria waragaria wialu ge dogolo wiaganebi ngolome wabini dege wini. Ge halu iraga holene lene laboha laiono handalehe mbira mbira wabuwa talebu helama pene. Laiono handalehe bu helearu daga lamaga halu homberia (12) wabu helene. Biragane dagiadagonaga gi paga holene wini. Gi paga holene kirabaliha laiono handalehe lene laboha wabu helene. Dindi tara maruha kini hearu bibahendenaga biragane dagia baya gibiore ogonibi mbira nawi mbiraore ogoni hangu wini.
2CH 9:20 Solomononaga gabo berubi bibahende ngolome wabu wini. Anda hobene mini Lebanono Irabu Anda laga biagoha peledi alerubi ngolo hangume wabu wiai hene. Kini Solomono henedangi siliba nagalonedalo manda buwa mbirale mbirale uruni ale ngolo hangume wabiai hene.
2CH 9:21 Solomononaga iba sibi dewa solowara timbuniha piaga winiru Kini Hiramanaga iba sibi wiaru heba mandagi dindi bibahendeha yalu piai haga wini. Iba sibi urunime solowarani dindi tara taraha piai halu mali tebirani dai nabi tagira dege ibagabu howa ngolo silibarubi dewaore mo yalu nogo elebeninaga ne gayane dewa mo yalu nogo mongi tara tararu minu yalu Isaraele dindi dai bigi biaga wini.
2CH 9:22 Kini Solomono ibugua munimebi mbirale tara tara maru ale wiarumebi ibunaga mini bayale gigabi wiagomebi kini maru hearu bibahende bolangua haihe hene.
2CH 9:23 Agali haguane dindi bibahendeha hearume Anduane Homogohanda mini bayale gigabi Solomono miniyago ti hale hene. Tigua Solomonohanda bi larago hale hoa howa ibu hearia ibaabo haga hene.
2CH 9:24 Mali bibahendengi agali dindi tara tarani howa ibalu mbirale mbirale maru Solomono mule yalu ibugu biaga wini. Tigua ibugu bialu howa mbirale ngolo silibarume wabinirubi aga bayalerubi wai biaga yandarerubi tomo mo dende bia haga pauda ale tara tararubi nogo hosiru dongirubi Kini Solomono mule yalu ibugu biaabo haga wini.
2CH 9:25 Solomono ibugua wai biagane garo ale mini karisirubi ibunaga ami agalirunaga nogo hosirubi dewaore yolo buwa hela ngela bigi bialu daosini maria (4,000) andaha helo anda dewa bini. Ani buwa ibugua karisirubi hosirubi tale bialu maru dindi ibugua handayaho haga wiaruha talebu pelalu maru Yarusalemeni hela ngela bialu wai biaga ami agalirunaga hosi daosini homberia (12,000) hene.
2CH 9:26 Ani howa Isaraele dindi bibahendeha tubari ni tagira ibiragohayagi Iba Yuberedisi poragoria howa pialu mendeha ni paliragohayagi Pilidialiru baba tubari wiari halu unurayagi Iyibila dindi tubari wiagoria Solomono ibugua handame ho hene.
2CH 9:27 Solomono ibu kini henedangi muni siliba dewaore daga labenahe ege to̱le̱ dugu paya biradagua bialu Yarusaleme yu anda ibugu biaga wini. Ira tamiabi aulolebe tobahe Isaraele dindi hari bare wiaruha howa ira damene bibahendeore dibu wiradagua bini.
2CH 9:28 Solomono ibugua agali biyinaya biaga hearuhondo hosiru Iyibi dindiha howabi dindi bibahendeha howabi yolo bialu haru ibule pudaba laga hene.
2CH 9:29 Mbirale tara tara Solomono ibugua biniru bibahende mbuga mbira mini Mana Latagi Haga Nadananaga Bi Te laga ngagohabi mbuga mende mini Mbiwia Haga Siloali Ahiyanaga Bi Te laga ngagohabi mbuga tebone mini Mana Latagi Haga Ido Ibugua De Gandeba Hendenegonaga Bi Te laga ngagohabi gilibu nga. Mbuga tebira uruniha Nebada igini Yaroboama ibugua binigo tebi gilibu nga.
2CH 9:30 Solomono ibu mali pira maria (40) Yarusalemeha kini howa Isaraele wali agali handame ho hene.
2CH 9:31 Ani halu ibu homayagola tigua ibu Yarusalemeni Debidinaga tano laga wiagoha hora hene. Homeagola Solomono igini Lehoboama ibugua ibu aba henegoria kini ha aribia hene.
2CH 10:1 Lehoboama ibu Isaraele wali agali bibahendeme ibu tinaga kini helole lowa Segeme tanoha íbu ngoai ho heagoria pene.
2CH 10:2 Ala Nebada igini Yaroboama ibugua Kini Solomonohanda ibu bole heago hondowa ohalu Iyibi dindi pu henego ai Isaraele wali agali tigua Lehoboama tinaga kini helo dabo helara layago hale howa ibu Iyibi dindi wahalu ibuni dalu dai bu hene.
2CH 10:3 Ani manda bu heagola Isaraele wali agalirume Yaroboama dai bilo agali marume, Lama pudaba, lene. Yaroboama anda ibiyagola ibubi Isaraele wali agali bibahendebi Lehoboama hearia puwa tigua ibuhondo lamialu lalu,
2CH 10:4 Í̠ aba Solomono ibugua ina biabe ndelahe wiaru mo ngiyagola iname biabe erekuibi mangabiore bialu harima. Ai áyu í̠na inahondo mbirale bayale hendore bulene ngadagua bialu gendabi ndelahe ngaru mo wahabelo hamelo kama. Í̠na ogonidagua biriyagua ina haru habelo í̠ andaneha holeberama, lene.
2CH 10:5 Ani layago hale howa Lehoboama ibugua tihondo lalu, Horo tebiru andaga halu i̱naga mini ngogo tí mani languliya dai bule áyu andaga pudaba, lene. Ani laya handala ibu helalu ti andaga pugupugu bini.
2CH 10:6 Ani piya handala Lehoboama ibu andaga puwa agali haguane ala hene miniwi ti ibu aba Solomono mini bayale talebu miaga heneru hearia puwa lalu, Wali agali o biarunihondo bi agua ladai buliya hamelo kamibe, lene.
2CH 10:7 Ani hale hayagola tigua ibuhondo lalu, Í̠na wali agali uruni dara halu ti biamogo bulene hamelo keyagua nde áyu tihondo bi bayale lolene nga. Í̠na ogonidagua biriyagua ti í̠ andaneha holebira, lalu lamini.
2CH 10:8 Ani layago hale howa bia nabi mo wahalu Lehoboama ibugua igiri daliahe haguane mini bogabi ndo ibunila haru mandagi andaho hene hearume ibuni mini bayale talebu milo hearia pene.
2CH 10:9 Puwa ibugua tihondo lalu, Wali agali biarunime tiha genda maru bamba i̱ abahanda mo ya hene wiaru mo waholiya hamelo kago ai áyu i̱na tihondo agua ladai buliya hamelo kamibe, lene.
2CH 10:10 Ani hale hayagola igiri haguane daliahe biaru tigua ibuhondo lalu, Í̠na bamba í̠ aba ibugua wali agali uruniha genda mo ya henedaru mo wahole manda buwa tihondo bi ladai bule hamelo keyagua tihondo bi ogodagua lolene nga. I̱ abahanda tí genda mo ngiyalo manda bu kamiyagua ogoni timbuni ndo emene dege ngiya. I̱naga gi hondone mbiraore hangunaga hongo kagome i̱ abanaga hongo ogoni bolangua ka.
2CH 10:11 I̱ aba ibugua tí heneneore genda mo ngiyagonigo i̱na tí genda timbuniore ngulebero. I̱ aba ibugua tí tibu emeneme bayago i̱na tí tibu timbunime hongo howaore bolebero lalu lamibe, lene.
2CH 10:12 Ani layagola horo tebiru hai halu Yaroboamabi Isaraele wali agali biarubi bibahende Lehoboama ibugua dai bilimu layadangi ibuni hearia dai bini.
2CH 10:13 Ani íbu heagola kini ibugua agali haguane ala hene miniwi hearume labe layadagua nale wahalu igiri daliahe haguane ibuni ale hearume labe layadagua wali agali biaruhondo bi hongohe lamini. Ibugua tihondo lamialu lalu, Heneneore i̱ abahanda tíhondo genda mo ngiyagonibi ndo i̱na tí genda timbuniore mo ngulebero. I̱ abahanda tibu emeneme tí bayago ai i̱na tibu timbunioreme tí minu bolebero, lene.
2CH 10:15 Anduane Homogo ibunime bilo hame lenedagua lola helonaga Lehoboama ibugua wali agali biarunaga bu miniha hamelo hearu talia nabi mo wahene. Anduane Homogo ibunime agali mbira ibunaga bi mana latagi haga Silo dindini haga mini Ahiya ibuha howa Nebada igini Yaroboamahondo agua bulebira lalu ala mbiwia ho wiyago lola helonaga anidagua bini.
2CH 10:16 Ani layagola wali agali biaru tigua manda bu handalu hemiria kini ibugua tinaga bi layago hale habe naheyane tigua bi hongo howa ladaga halu lalu, Ina Debidi damenerunaga andaneha holene manga ho kama. Ina Debidi ariabi ndo ibu igini áyu o kago ibu ariabi ndo dege kamagonigo Lehoboama ibuni hondo holene nde ibunaga biabedago áyu ina Isaraele wali agali kamaru inane daluha pugupugu bima, lene. Ani lowa tigua Lehoboama helalu tini daluha pene.
2CH 10:17 Ani piyagola Isaraeleali maru Yuda hameigini heba Yuda dindihayagi hayaruni ti dege Kini Lehoboama andaneha haabo hene.
2CH 10:18 Mani howa Kini Lehoboama ibugua agali mbira Adonirama ibu kininaga biabe bia haga agali hearu handayaho haga henego ogoni ibu Isaraele wali agali wahalu pene biaru hearia pelo pu lene. Adonirama ibu Isaraele wali agali biaru hearia piyagola tigua ibu ege to̱le̱me bo homelene. Ani biya layago hale howa Kini Lehoboama ibuninaga wai biagane garo ale mini karisini iraga halu abale Yarusaleme ibida pene.
2CH 10:19 Horo ogoningi howa Isaraele wali agali uyurahayagi hama piyaru tigua doga halu Debidi aguaneneru mbiragome kini hayagua urunime ti haru helo hame naleore haga hene.
2CH 11:1 Lehoboama ibu Yarusaleme anda puwa ibugua ami agali hongohe Yuda hameigini hearubi Beniyamini hameigini hearubi ti bibahende olayagola íbu ngoai hene. Ogoningi agali íbu ngoai ho henedaru dagalalu daosini dege handari mbirani pira halira (180,000) íbu hene. Lehoboama ibugua ami agali urunime Isaraele wali agali uyurahayagi palearu baba wai bialu wali agali uruni ibuni andaneha helo haru dai bule manda buwa ani bule pudaba lene.
2CH 11:2 Anigo Anduane Homogohanda bi mana latagi haga Semaiahondo lamialu lalu,
2CH 11:3 Í̠na áyu ogoni puwa Kini Lehoboamabi Yuda hameiginibi Beniyamini hameiginibi wali agali dindi ogoniha karubi ti bibahende karia puwa ogodagua lamibe.
2CH 11:4 Anduane Homogo i̱na larogo tí hameneore Isaraele karu baba wai nabilimu. Áyu tí bibahende andaga dai bidaba. I̱nime hame lewadagua Isaraele wali agali tigua tí yu wahalu tini hangu hatara hayagoni. Anidagua biyagoni i̱nime biru, lene. Ani laya handala Semaia ibugua pialu Anduane Homogonaga bi ogonidagua latagi hayagola hale howa ti bibahende Yaroboama baba wai bule nape tini andaga pugupugu bini.
2CH 11:5 Lehoboama ibu Yarusalemeni howa agali biabe biaga hearuhondo lamialu, Yuda dindiha tano wiarunaga wai pabe bu mabubu wiaru hongo helo mo tiga bidaba, lene.
2CH 11:6 Ani layagola tigua Bedeleheme tanobi Edama tanobi Tegoa tanobi
2CH 11:7 Bedesu tanobi Sogo tanobi Adulama tanobi
2CH 11:8 Gede tanobi Maresa tanobi Sibi tanobi
2CH 11:9 Adoraimi tanobi Lagisi tanobi Asega tanobi
2CH 11:10 Sora tanobi Aiyalono tanobi Heberono tanobi uruni bibahendeni wai pabe baya hangu hongohe helo bia dai bini. Tano uruni bibahende hameigini Yuda Beniyaminila libu dindiha dege wini.
2CH 11:11 Tigua tano uruninaga wai pabe hongohe helo bialu hene. Ani biai hayagola Kini Lehoboama ibugua tano uruni bibahendeha ami agali marume tidi mbira agima howa handayaho helo agali haguane mbira tano mbira mbirani helaga bini. Ani bialu tomo tara tara dewaorebi olibe lininaga welibi waini ibabi
2CH 11:12 humbi yandare dewabi mo manda mandabu wini. Anidagua buwa ibugua tano uruni mo hongo halu Yuda hameiginibi Beniyamini hameiginibi haru hai hene.
2CH 11:13 Loma binigo mo miaga hearubi Libaiali hearubi ti bibahendeme Yuda dindi bibahendeha howa tini dalu wahalu Lehoboama baba hole ibini.
2CH 11:14 Ti ani ibinidagoni irane Isaraele wali agalinaga Kini Yaroboamabi kini maru maha ha aribia henedarubi tigua loma binigo mo miaga biarubi Libaiali biarubi ti Anduane Homogonaga biabe biaga wiago bo dugualu purogo lelowa haga haga bini. Ani biyagola tigua tinaga dindi andaru wahai halu Yarusalemenibi Yuda dindi wiaruhabi hole ibini.
2CH 11:15 Yaroboamahanda loma binigo mo miaga uruni bo taliatagi hai howa ibugua Libaiali ndo agali tara ibuni aria hearu minalu mbirale dama mitangi bialu bi pupu wule gime wabini wiarunaga loma binigo mo miaga helo dabo helaga bini. Ani biyagola loma binigo mo miaga ha aribia heleneru uruni tigua dama tara tarabi Yaroboama ibugua nogo bulumaga wangabe handalehe wabu wiaruhondobi bi pupu wialu haga hene.
2CH 11:16 Isaraele hameigini bibahende hearume Anduane Homogo tinaga Ngode Datagaliwabehondo mitangi bialu lotu henene lole hamelo heneru tigua loma binigo mo miagabi Libaiali biarubi heba Anduane Homogo ti mamalirunaga Ngode Datagaliwabehondo lotu lole Yarusaleme piyadagua talima pene.
2CH 11:17 Wali agali uruni ti Yuda wali agali baba howa tigua mo hongo halu hene. Ani bialu mali tebirani tigua Solomono igini Lehoboama heba mandagi howa Kini Debidi Kini Solomonolame bialu henedagua bialu hene. Anidagua biyagome Kini Lehoboama ibu hongoheore helene.
2CH 11:18 Lehoboama ibu wali mbira Yarimodo wane mini Mahalada dabu bini. Yarimodo ibu Kini Debidi aguane hene. Mahalada ai̱ya ibu Yasi igini Eliaba wane Abihaili berene.
2CH 11:19 Mahalada ibugua igiri tebira Yausu Semaria Sahama layaru taba hanaga bini.
2CH 11:20 Mani howa Lehoboamahanda wali mende Abasalomo wane Maga dabu buwa libu igini maria henego mini Abiya Adai Sisa Selomidi layaru hene.
2CH 11:21 Ani heagola Lehoboama ibu wali pira mbirani halira (18) dabu bialu ibu one henene berene. Ibu wali halu mende bereneru aria pira waragaria (60) biralu bini. Ani biruwa wali uruni tigua igiri pira kirani halira (28) taba hanalu wandari pira waragaria (60) taba henene. Lehoboama ibu wali dewaore dabu binigoyu ibugua Magaore gubalini timbuni ho haga hene.
2CH 11:22 Ani howa Lehoboama ibugua lalu, I̱ homarogola i̱ one wali Maga igini Abiyahanda i̱ henegoria kini ho aribia helo, lowa dabo helene. Ani helowa ibugua Abiyaore ibu hamene bu hearunaga deni mo duniniore howa helene.
2CH 11:23 Ani buwa Lehoboama ibu miniwi howa ibugua tanonaga wai pabe hongohe helonaga bu tiga buwa ibu igini bu hearume Yuda dindihabi Beniyamini dindihabi tano wiaru handayaho howa haru helo dabo helaga bini. Ani helowa ibugua tano uruniha tomo dewaore mo wialu ibu iginirubi wali dabu bilo dabo migi bini.
2CH 12:1 Lehoboama ibu haru haga hongoheore heangi ibugua Anduane Homogonaga bi mana yu wahayagola Yuda wali agali tiguabi ani dege bini.
2CH 12:2 Tigua ani biyagola Lehoboama ibu mali duria hangu kini hearia Anduane Homogohanda tihondo pani mialu Iyibialinaga Kini Sisaga ibunaga amiru haru halu ti Yarusalemeni wai bule ibilene.
2CH 12:3 Kini Sisaganaga ami uruni tinaga garo ale mini karisi daosini mbirani handari kira (1,200) heba ami agali nogo hosini biralu piaga ti daosini dege pira waragaria (60,000) uruni heba ami agali maru Libialibi Sugialibi Sudanalibi ti daga labe nahe dewalioreme wai bule pene.
2CH 12:4 Iyibialinaga kini ogoni ibu ami agali biaruni heba pialu Yuda tano wai pabe hongohe bu hearu karulama pialu Yarusaleme anda polene kaware hene.
2CH 12:5 Ani biyagola Anduane Homogonaga mana latagi haga agali mini Semaia ibugua Kini Lehoboamabi Yudalinaga agali haguane hearubi ti Sisaga ibulilono Yarusalemeha ibida pialu ngoai ho hearia anda pene. Anda puwa ibugua tihondo lalu, Anduane Homogohanda bi ogo langiyago tí langero, Tígua i̱ erembira ngialu wahalu pirimigo ai i̱na tí wahalu Sisaganaga giha mo ya helo helaro, laya lalu lamini.
2CH 12:6 Ani lamiyagola Kini Lehoboamabi agali haguane biarubi tigua ko biyago lapani halu tini mo dindi howa lalu, Anduane Homogo ibugua inahondo mana tigabi biragoni, lene.
2CH 12:7 Tigua ani layagola hale howa Anduane Homogo ibugua bi halu mende Semaiahondo lalu, Yudali karu tigua ko biyagonaga lapani hayago i̱na ti bo wahai naholebero. Sisaga ibu ami agali heba wai bule ibuwa tigua Yudali bo wa nahelo i̱na ti baba keba haho wiaabo naholebero.
2CH 12:8 Anigoyu Sisaga ibugua ti ibu andaneha helaragola tigua i̱ andaneha holenego bayaledane handalu dindi agali haguane andaneha holenego erekuibi ndelahedane hondolebira, lalu lene.
2CH 12:9 Kini Sisaga ibu Yarusaleme anda puwa ibugua Anduane Homogonaga andahabi kininaga andahabi mbirale bayale wiaru damene bibahende mo yai hene. Wai humbi Solomonohanda wabuwa ngolome paraho dambi hene wiarubi mo yai halu Iyibi dindiha yalu pene.
2CH 12:10 Ani mo yalu peagola mani Kini Lehoboamahanda agali ibunaga biabe biahaga hearuhondo wai humbi Iyibiali biarume mo yalu piyadago aribia holenenaga maru ege to̱le̱ boronosime wabidaba layaru wabu wiagola ami agali maru kini andaga harabani mamage haga hearume handaya ho helo mini.
2CH 12:11 Kini ibu Anduane Homogonaga anda loma biahene biagoha pole porangi ami mamage haga uruni ti heba humbi yalu pialu dai bialu anda hobane humbi uruni wiagadagoha ngelaga biaga hene.
2CH 12:12 Lehoboamahanda Anduane Homogonaga andaneha lone ho dai biyagola Anduane Homogonaga keba holeneme ibu bo wanahe helalu Yuda wali agali tibi bayale helene.
2CH 12:13 Lehoboamahanda Yarusaleme tanoni kini heangi ibunaga haru holene hongo timbunihe hene. Ibu ai̱yahanda taba henenegoria howa hama ibinigo mali pira mariani mbira (41) layagola kini pigane hene. Anduane Homogohanda Isaraele dindi bibahende wiaru aria mbirago Isaraele wali agali tigua ibuni kagoria kaware ibalu lotu lelonaga Yarusaleme loma biaho ngelalu Lehoboama ibu Yarusaleme ogoriani kini howa mali pira mbirani karia (17) haru hene. Ibu ai̱ya Amono wali mini Nama berene.
2CH 12:14 Lehoboama ibugua Anduane Homogonaga hame wiago hai nabi howa mana ko timbuni biaabo halu hene.
2CH 12:15 Lehoboamahanda pigane howa bialu hama ibiniru tebi ibunaga malubi Anduane Homogonaga mana latagi haga mini Semaia Idola libugua bialu henegonaga mbugaha gilibumaga ho nga. Lehoboama Yaroboamala libu kini hebingi wai bialu haabo haga hene.
2CH 12:16 Lehoboama ibu homayagola tingini ibunaga mamali maru kini halu homenerunaga homali Debidinaga Tano winigoha hora hene. Homayagola ibu igini Abiyahanda ibu aba henegoria ho aribia howa kini hene.
2CH 13:1 Yaroboama ibu mali pira mbirani karia (17) Isaraele dindiha kini henego mali pira mbirani halini (18) hayagola ogoningi Abiya ibu Yuda dindini kini pigane hene.
2CH 13:2 Ibugua mali tebirani kini howa Yarusalemeni haru hene. Ibu ai̱ya mini Migaia ibu Gibea tanoali Uriele wane berene. Abiya Yaroboamala libu waitigi howa wai bialu hene.
2CH 13:3 Abiyahanda ami daosini dege handari maria (400,000) ho mandamanda bialu Yaroboama ibugua ami daosini dege handari halira (800,000) ho mandamanda bialu waitigi howa wai bialu hene.
2CH 13:4 Ami agali uruni ti Eberaimi dindi hari heagoria ngoai ho hearia Abiya ibugua Hari Semaraimiha irigi howa Yaroboamabi Isaraelealirubi olamu halu lalu, I̱na bi o larogo tí hale hadaba, lene.
2CH 13:5 Anduane Homogo Isaraele wali agalinaga Ngode Datagaliwabe ibugua Debidila habo nalolene bi lo wialu lalu, Debidibi ibunaga aguanenerubi ti Isaraele wali agalinaga kini haabo holebira, lalu lowinigo tí manda nabi kamibe, lene.
2CH 13:6 Abiyahanda laabo halu lalu, Nebada igini Yaroboama ibugua Kini Solomononaga bi mo wahaga hene.
2CH 13:7 Solomono igini Lehoboama ibu igiri mini boga nabi howa Yuda wali agali haru habe nahe hene. Ani howa agali mana ko biaga ibu heba hayaru tigua ko bima laragola ibugua i̱ nabule labe nahe hene.
2CH 13:8 Ai áyu tígua Anduane Homogohanda habo nalolene bi lo wialu Debidinaga aguanenehondo haru holene hongo minigo baba wai bule kamigo agibe. Tínaga ami agali timbuni dewaore helalu nogo bulumaga wangabe ale dama mitangi bialu bi pupu wulenaga Yaroboamahanda ngolome wabiniru yu kamigoni.
2CH 13:9 Tígua Arono aguanene Anduane Homogonaga loma binigo mo miagarubi Libaialirubi ti bo batagi harimi. Ani buwa uruni henegoria tígua hameigini tara dindi tarani karume tini dabalu loma binigo mo miaga helagadagua helaramili. Mbirali ta nabi kagome nogo bulumaga wangabe haru ibalu nogo sibi kariaru haru ibiyagua o biago ibu tínaga mbirale dama mitangi bialu bi pupu wulenaga wabu ngaruhondo loma binigo mo miaga helo dabo helaramili, Abiyahanda lalu hene.
2CH 13:10 Abiya ibugua laabo halu lalu, Tígua ani bialu haramiligoyu iname nde Anduane Homogo inanaga Ngode Datagaliwabe wahalu pu nabi ibunaga biabe bialu haabo kamagoni. Agali maru Arononaga aguanene karume Anduane Homogonaga loma binigo mo miaganaga biabe bialu Libaialirubi ti heba biabe mandagi biaga ka.
2CH 13:11 Horo bibahendengi egerebagi alendobi tigua Anduane Homogohondo mbirale ngabilo delaga mini inisenesi lomabu delalu nogo sibi memeru bo loma bialu poda nabi howa bibahende lomabu delaga dabuni delai haga ka. Tigua mberedi loma bialu tebolo dagia dodo nahe ngagoriani mo wialu alendo haragola hale lamu irane ngolome wabu ngagoriani hale lamu ngaru delalu biaga kagoni. Iname Anduane Homogohanda bulene nga lowinigo ngadagua bialu kamagoyu tígua ibu wahalu pirimigoni.
2CH 13:12 Inanaga haguane timbuni Ngode Datagaliwabe ibuni kagoni. Ibunaga loma binigo mo miaga ina heba karume tí baba wai bulenaga mbelo biguli yu karu pu lole kagoni. Anigo Isaraelealiru-o tígua Anduane Homogo tí mamalirunaga Ngode Datagaliwabe baba wai nabilimu. Tí wayali habe nahe kamigoni, lalu Abiyahanda lene.
2CH 13:13 Abiya ibu ani lalu heatambu Yaroboama ibugua Isaraele ami maru Yudali ho heaore marume Yudali erembirahayagi wai bule ohalu pelene.
2CH 13:14 Yudali hearume beregedowa Isaraele ami biaru ti ho mabu bu hearia de hendene. De hondowa mogo lalu tigua Anduane Homogo olalu, Ina biamogo bia, lalu loma binigo mo miaga biarume tinaga mbelo buguli dalimuore pu lalu hene.
2CH 13:15 Ani bialu tigua bi dalimuore lalu Abiya ibugua ti haru halu Isaraele ami biaru baba wai bialu hene. Ngode Datagaliwabe ibugua ti biamogo biyagome tigua Isaraele ami agalinaga hongo bolangua hene.
2CH 13:16 Ani biyagola Isaraele ami biaru gerai ibida pialu hearia Ngode Datagaliwabehanda Yuda ami agaliru wayali helo biamogo bini.
2CH 13:17 Abiyabi ibunaga ami agalirubi tigua hongo timbuni halu wayali howa Isaraele ami agali wai hongo howa biaga mugube hearu bo wahalu daosini dege handari duria (500,000) homai hene.
2CH 13:18 Ani biyagola Yudalirume Isaraelealiru baba wai bialu wayali hayago irane tigua Anduane Homogo ti mamalirunaga Ngode Datagaliwabe mitangi bialu hanaho henegome ani bini.
2CH 13:19 Abiyahanda ibunaga ami agali heba Yaroboama baba wai bima talima pialu tano timbuni Bedelebi Yasanabi Eberonobi tano maru emene emene wia parapara bu wiarubi karulai hene.
2CH 13:20 Yaroboama ibugua Yudalinaga kini Abiya heangi lone haru holenenaga hongo nahe hearia Anduane Homogohanda ibu bayagola homene.
2CH 13:21 Ani biyagoyu Abiya ibu hongo timbuni howa haru haabo hene. Ibugua wali pira mbirani maria (14) dabu bialu ibunaga igini pira kirani kira (22) halu ibunaga wane pira mbirani waragaria (16) berene.
2CH 13:22 Abiya ibu Yudalinaga kini heangi bialu henedarubi bi lenedarubi mbuga mbira mini Mana Latagi Haga Idonaga Bi Te laga ngagoha gilibumaga ho nga.
2CH 14:1 Kini Abiya homayagola tigua ibunaga tingini Debidinaga tano wiagoha hora hene. Hora howa ibu igini Asahanda ibu aba henegoria kini ha aribia hene. Asa ibu kini howa Yuda dindini haru heangi Yuda dindi wai mbira nabi dege mali pirani bayale hene.
2CH 14:2 Asa ibugua Anduane Homogo ibunaga Ngode Datagaliwabenaga deni howa mana bayale tigabi wiaru hangu bialu haga hene.
2CH 14:3 Asahanda Yuda dindiha mbirale wali agali dindi tara hearunaga dama mitangi bialu bi pupu wulenaga lomabu mulene dabu wabu helearu bo gialabagabu wahai hene. Ani bialu mbirale dama mitangi bialu bi pupu wiaga ege to̱le̱me anda gene ale wabu heleagobi bo pambulo wahalu dama wali beda mitangi bialu bi pupu wiaga mbirale ira mbira dibuwa dindini wene mini Asera laga helearubi dibu gabu wahai halu bini.
2CH 14:4 Ani buwa ibugua Yuda wali agalihondo lamialu lalu, Tígua Anduane Homogo tí mamalirunaga Ngode Datagaliwabe kagonaga hameledago baya hangu bialu halimu. Ani bialu howa ibunaga bi laragobi ibunaga mana lowini ngagobi taluwa bialu halimu, lalu lamini.
2CH 14:5 Ani lamuwa ibugua Yuda dindiha tano wiaru bibahendeni mbirale dama mitangi bialu bi pupu wule gime wabini wiarunaga anda bu helene hearu bibahende bo gialo wahai halu ira hagua ngabilo delaga mini inisenesi dabu bu heleagobi bo gialo wahai hene. Ani buwa ibugua Yuda dindini wali agali baya hangu haru heagola wai mbira nabi bayaleore hene.
2CH 14:6 Asa ibugua Yuda wali agali bu hearuhondo lalu, Ai tano maru maru ngarunaga ege pabe hongohe bu mabu bialu mamageali handa de̱le̱bu holenaga anda bima irigi halu bu helaga bimi̱ya. Ani bialu tanonaga panga hongohe wabialu ndibulo payulenaga panga bengena aeaneme wabu helaga bimi̱ya. Áyu ina dindini bayale kamagoni irane iname Anduane Homogo inanaga Ngode Datagaliwabenaga hame ngago baya hangu taluwa bialu kamagome bida. Ani bialu Ngode Datagaliwabe ibunime inanaga dindi baya hangu handayaho kagome inaha genda mbira naibi bayale kamagoni, Asahanda lene. Ani lalu Asa ibugua agali biabe biaga hearume Yuda dindiha tano wiaru bibahende ege pabe bu mabu bule pudaba lene. Tigua biabe uruni bialu heangi wai mbira nabi ti bayale dege henego irane Anduane Homogohanda tinaga waitigi mbira anda ibuligo lowa handayaho haabo heagome anidagua bini. Ani howa Yudali biaru tigua biabe bigi biyaru bayaleore bialu hene.
2CH 14:8 Ani bialu henego Kini Asanaga ami agali Yuda hameigini hearu ti daosini dege handari tebira (300,000) howa tigua wai biaga yandare yalu humbi timbunibi yu haga hene. Beniyamini hameigini ti daosini dege handari kirani pira halira (280,000) howa tiguabi humbi emene yuwa danda timubi yaga hene. Ami agali uruni ti hongo timbunihe howa wai biaga mana mandabi bayaleore hene.
2CH 14:9 Asa ibu Yuda dindini kini heangi Sudana dindinaga agali haguane Serahanda ami agali dewaore haru halu Yudaliru baba wai bule ibini. Sera ibunaga ami agali milini mbira (1,000,000) haru halu wai biaga garo ale mini karisi dege handari tebira (300) nogo hosime gili lama ibuwa Maresa tano wiagoria anda ibini.
2CH 14:10 Ani íbu heagola Kini Asa ibugua nde ibunaga ami agaliru haru halu wai bule pene. Yuda ami uruni ti Maresa tano kaware ngelowa dindi ulini buguni buguni mini Sebada laga wiagoria Seranaga amidaru lola hole pene. Anda puwa ami agali kirabalime wai bule mo manda manda buwa tidiyu haga haga bu hene.
2CH 14:11 Ani bu heagola Asahanda Anduane Homogo ibunaga Ngode Datagaliwabe olowa lalu, Anduane Homogo-o i̱naga ami agali hongo nahe howa dewa ndo o kamagonigo Sera ibunaga ami agali dewaore kagoni í̠ manda bide. Anigo ami hongohe kagome bope habehegoyu ai ina hongo nahe kamagome bope holoma̱ya biamogo birilidagua áyu ina biamogo bibe larama. Iname í̠ni hanaho howa í̠ minini ami agali hongo gibihe o kagoni baba wai bule eberemagoni. Anduane Homogo-o inanaga Ngode Datagaliwabe í̠ore kego mendealime í̠ bo wahowa wayali habe nahe ka manda bidamagoni, lene.
2CH 14:12 Asa ibugua Anduane Homogohondo bi lai halu ibunibi Yuda ami biaru heba Sudana ami biaru baba wai bule pene. Ani wai biyagola Anduane Homogohanda Sudana ami biaru bope hayagola ti ibida piai hene.
2CH 14:13 Ani ibida piyagola Asa halu ibunaga ami agali biarume talima haruru pialu Gera tano anda puwa ami agali dewaore minalu bogai hene. Ani bo wahai hayagola Sudana ami biaru ti dewa nahe howa wai biadai bibe nahe hene. Anduane Homogohanda ibunaga ami biaru biamogo biyagola tigua Sudana ami agali biaru bo podahana halu uruninaga dabudabu dewaore wiaru Yuda ami ti mo yai hene.
2CH 14:14 Ani bialu Anduane Homogohanda Gera tanoha wali agali bu hearu tiha gi holene mo wia hayagola ti gi ho heaore dege Kini Asanaga ami agali biarume tano ogoni hi nahe karulene. Tano ogoniha dabudabu bayale tara tararu winigo Asanaga ami agali biarume mo yalu piai hene.
2CH 14:15 Ani bialu puwa Asanaga ami agali urunime dindi ogoniha nogo sibi hinaga agali hearu baba wai bialu uruninaga nogo sibi kameleru bibahende ti haru hai halu Yarusaleme dai bini.
2CH 15:1 Horo mbirungi Ngode Datagaliwabenaga Dinini ibu Odede igini Asaraiaha mo hongo hole ibini.
2CH 15:2 Ani mo hongo haya handala Asaraia ibu Kini Asa lola hole puwa ibugua olamu halu lalu, Kini Asabi Yuda hameiginibi Beniyamini hameiginibi tí bibahende bi o larogo hale hadaba. Tí Anduane Homogoha haparaho harimiyagua nde ibu tí heba mandagi holebira. Tígua ibu taya bialu harimiyagua nde ibu tí kamigoha kaware holebira. Anigo tígua ibu erembira mialu harimiyagua nde ibugua tí wahalu polebira.
2CH 15:3 Bambaore howa Isaraele wali agali ti heba Ngode Datagaliwabe ibuniore mandagi nahe winigo irane tinime ibu erembira miyagola ani bini. Ani bialu hearia Ngode Datagaliwabenaga loma binigo mo miaga nahe howa bi mana lawai holenebi nahe dege ibunaga mana lo winigobi nawiore hene.
2CH 15:4 Ti ogonibi hearia genda tandaga tara tara Isaraele wali agaliha anda ibiragola tigua Anduane Homogo ina Isaraele wali agalinaga Ngode Datagaliwabe mitangi bialu ibu karia abale dai biaga hene. Tigua ibu taya bialu ti ibuni karia dai bilo yupe haga hene.
2CH 15:5 Horo uruningi Isaraele wali agali hearu tigua mana ko tara tara tagira ibiyagome wali agali dindi tara taraha bu hearu bibahende mo ko hai haga wini. Ani wiagago mbirali ibu ibuni dindi wahalu dindi mendeha togo lalu ibida pole harigani pialu karia agali ko karume mo ko halu minu baga hene.
2CH 15:6 Horo uruningi dindi mbirahayagi hearume dindi mendeha hearu baba wai buwa mendego bope halu tano mbirahayagi hearume tano mendeha hearu baba wai bialu mendego bope haga hene. Ani henego irane Ngode Datagaliwabe ibunime wali agali bibahende genda mo mulenaga uruni bibahende ibilaga hene.
2CH 15:7 Anigo ai áyu tígua bayale bule hongoho haabo halimu. Anduane Homogohanda tí bayale bule hongoho kamigo de hondowa tínaga bayale holene wulebirago mitangi bialu anidagua bialu halimu, lalu lamini.
2CH 15:8 Odede igini Asaraiahanda bi ogoni lamiyagola hale howa Kini Asa ibu ibunaga miniha hongoho hene. Ani biyagola ibugua mbirale bi pupu wulenaga dama mitangi bialu gime wabini Yuda hameigini dindihabi Beniyamini hameigini dindihabi wiaru bibahende bo gialo wahai hene. Ani bialu Eberaimi dindi bare bare wiaruhabi dindi maru ibugua wai bialu karulene wiaruhabi pialu dama mitangi bialu bi pupu wiaga uruni ale bibahende bo gialo wahai hene. Mbirale bi pupu wule gime wabini uruni Ngode Datagaliwabe deni ko ngubiore wini. Ani bialu Asa ibugua bidaba layagola tigua lomabu delaga dabu mbira Anduane Homogonaga anda haneni heago baya hangu mo tiga bialu arema bidaba layagola tigua ani bini.
2CH 15:9 Anidagua biyagola Eberaimi hameiginibi Manase hameiginibi Simeono hameiginibi tigua handalu hemiria Anduane Homogo ibu Asa heba heago hondowa tini dindi Isaraele wahalu Yuda dindiha dindi abene unurahayagi anda ibalu Kini Asa baba Yuda dindiha hene. Ani íbu heagola Asa ibugua wali agali o ibiyadarunibi Yuda hameiginibi Beniyamini hameiginibi bibahende íbu ngoai hadaba lene.
2CH 15:10 Asa ibu kini heane mali pira mbirani dauninaga (15) ege tebone layagola wali agali bibahende Yarusalemeni íbu ngoai hene.
2CH 15:11 Horo ti íbu ngoai hayadangi nogo bulumaga handari karia (700) nogo sibi daosini kariabi (7,000) bibahende haru íbu ngoai hene. Nogo uruni aria maru wai bialu waitiginaga nogo hearu haru henego uruni bibahende tigua Anduane Homogohondo loma bialu bo miai hene.
2CH 15:12 Ani buwa tigua Anduane Homogo ti mamalirunaga Ngode Datagaliwabe mitangi bialu tinaga minimebi mandamebi hongomebi ibugua laradagua biaabo hole lalu bi hongohe lowini.
2CH 15:13 Ani buwa tigua lalu, Mbiralime bi uruni talialu nabiyagua ogoni ibu wandari igiri daliaheyaguabi wali agali waheyaguabi ta nabi homelo bo wahami̱ya.
2CH 15:14 Aniore bule lalu tigua Anduane Homogonaga deni bi hongohe lowini. Ani lalu tigua hoaro ladagadaga bialu pilipe ale biguli hongo howa pu lagalaga bialu hene.
2CH 15:15 Ani lalu tinaga bu miniha turu timbuni howa Yuda wali agali tigua Anduane Homogo talima pole hongo ho hene. Tigua Anduane Homogo talima polene hame timbuni lo hemigola nde Anduane Homogohanda ibuni karia ibilo yupe hene. Ani bialu ti daluha genda anda naibilo ibunime baya hangu handayaho hene.
2CH 15:16 Asa aguabuni Maga bereago ibugua mbirale dama wali beda mitangi bialu bi pupu wulenaga mini Asera gime wabu wiaria hondowa Asa ibugua biabe ogoni nabilo bo duguini. Ani bo duguayagola wali ogoni ibu kini ai̱ya mini lene birayago mo wahene. Asahanda agali bu hearuhondo lalu, Mbirale gime wabini ko ngubiore ogoni dibalu gabu dangiala hole bialu yalu tagira puwa unu Kidirono iba dindi ulini wiagoha irani delole yalu pudaba, lene.
2CH 15:17 Anidagua bialu Asahanda mbirale dama mitangi bialu gime wabini wiarunaga bi pupu wule ngoai haga anda bu hearuni bo gialo wahai nahe dege henegoyu ibugua Anduane Homogo gubalini timbuniore halu Anduane Homogo andaneha haabo haga hene.
2CH 15:18 Ani bu howa Asa ibugua mbirale ibu aba Abiyahanda Anduane Homogonaga lalu mo bagiho wini wiarubi ngolobi silibabi ndisi be tara tara ibunime Anduane Homogonaga mo bagiho wini wiarubi bibahende Anduane Homogonaga andaha mo wiai hene.
2CH 15:19 Horo ogoningi howa hama pialu Asa ibu Yuda dindiha kini heangi mali pira tebirani duria (35) wai nabi ti bayale hene.
2CH 16:1 Asa ibu Yudanaga kini heane dege mali pira tebirani duria howa waragane (36) hayagola Isaraelenaga Kini Basahanda ami agaliru haru halu Yudaliru baba wai bule pene. Tigua puwa Lama tano karulalu wali agali tano ogoniha howa Yuda dindiha pu íbu nabilonaga hariga hangai halu tanonaga ege pabe heago baya hangu arema bu tiga bialu hene.
2CH 16:2 Ani bialu heagola Kini Asa ibugua muni ngolo silibaru Anduane Homogonaga andaha wiarubi kini andagaha wiarubi maru yamini. Ani yamialu muni uruni ibunaga biabe biaga agali hearuhondo mo mialu Sirianaga Kini Benehadada Damasagasani haru ho hearia mule yalu pelo mini.
2CH 16:3 Ani mialu howa ibugua ibunaga agali biarume Benehadada lamilo lawia halu lalu, Bamba iya aba libu nenegeore heneyadagua áyu iyabi nde nenege dege habiya hameledo. Ani habiya lowa áyu muni ngolo silibaru bame í̠naga wia haro. Ani berogo ai í̠na Isaraelenaga Kini Basala nenegeore habiya lalu bi hongohe lo wiribigoni wahabe. Ani beregola ibugua ibunaga amiru haru halu i̱naga dindi yupe halu tagira pelo ani bibe, lalu lamini.
2CH 16:4 Kini Benehadada ibugua Kini Asahanda bi lawia hayiyago hale howa bi ogoni karulape lene. Karulape lowa ibugua ibunaga ami agali haru hagane haguane hearuhondo lalu, Inanaga ami agali hayadaru haru halu puwa Isaraelenaga tano ngaruha wai bule pudaba, lene. Ani laya handala tigua puwa wai bialu Iyono tano bo poda hana halu Dana tanobi Abele Bedemaga tanobi Nabadali dindiha tano maru wai biagane danda timurubi tomorubi do haganeru karulai hene.
2CH 16:5 Ani biya layago hale howa Kini Basa ibugua Lama tano mo tiga bialu hayago biabe biala halu wahalu pene.
2CH 16:6 Ani biyago manda buwa Kini Asahanda ibunaga biabe biaga agali Yuda dindiha howa haru ibai hene. Ani haru ibalu tigua Lama tano pialu ege to̱le̱bi pabe bulene ira bibahendebi Kini Basahanda Lama tano mo hongo halu wai paberu bule ira ege to̱le̱ru yu íbu wiaruni mo yalu ibini. Asa ibugua Geba tanobi Misiba tanobi wai pabe podo winigo arema bialu mo hongo haga bini.
2CH 16:7 Horo uruningi mana latagi haga agali mbira mini Hananai ibugua Kini Asa hearia puwa ibuhondo lalu, Í̠na Anduane Homogo í̠naga Ngode Datagaliwabe mo tene nahe howa Sirialinaga kini kago mo tene harigo ai Isaraele wali agalirunaga kini ibunaga ami í̠na balu minabe nahe ti ibida piyagoni.
2CH 16:8 Idiobialirubi Libialirubi tinaga ami agalibi garo ale mini karisibi nogo hosini biralu piaga ami agalibi ti dewaore daga labe nahe hene ndobe. Ani henegoyu ti baba wai bu pirimingi í̠na Anduane Homogo mo tene harigonaga ibugua tí mo hongo hayagola wayali harimigoni.
2CH 16:9 Anduane Homogo ibugua wali agali ibuhondo mini mbiraorewi karu ti mo hongo holenaga ibu dindi bibahendeore handa amunana bu haabo kagoni. Í̠na mini nawi howa birigome áyu ogoni howa waitigiru í̠ baba wai bule ibaabo holebira, lalu lamini.
2CH 16:10 Hananaihanda bi ogoni lamiyago hale howa Asa ibugua keba timbuniore howa ibunaga biabe bia haga agali hearuhondo lalu, Tígua agali o kago minalu seni pume dariba hadaba, lalu lamini. Ogoningi dege Asahanda ibunaga wali agali hearu mo tandaga haabo hayagola ti genda timbuni ho hene.
2CH 16:11 Te maru Kini Asahanda pigane howa bialu henedaru bibahende mbuga mbira mini Yuda Kinibi Isaraele Kinibi Henerunaga Bi Te laga ngagoha gilibumaga ho winigo nga.
2CH 16:12 Asa ibu kini howa mali pira tebirani dini (39) hayagola ibunaga ge ko halu warago timbuni bo wini. Warago timbuni ogoni bayagola Asa ibu Anduane Homogohondo biamogo bia nale anogoda hangu mitangi bini.
2CH 16:13 Ani henego ibu mali pira mariani mbira (41) haru haabo howa homayagola
2CH 16:14 tigua ibu tingini ibu mamaliru hora haga Debidinaga tano laga ege anda ibuni guabu winigo wiagoha hora hene. Tigua pauda ale nga biagane tara tarabi weli mbagua ale ngabi ibunaga tinginini ha̱i̱ halu ibu homayagonaga dugu bilo tigua ira timbuniore delayagoria dugu bialu hene.
2CH 17:1 Yahosabada ibugua ibu aba Asa henegoria Yuda dindiha kini ho aribia hene. Ani howa ibugua Yuda dindiha Isaraelealime wai anda ibulilono ami agali mo hongo halu dewaore helene.
2CH 17:2 Ibunaga ami agaliru Yuda dindiha tano wai pabe hongohe bu mabubi hearuha helalu Yuda dindi bibahendehabi helai dege hene. Ani bialu ibugua ami agali maru ibu aba Asahanda Eberaimi dindiha wai bialu dindi karulowa tano bu wiaruha helaga bini.
2CH 17:3 Kini Yahosabada ibugua kini howa mana bayale ibu abahanda kini pigane heangi bayale bialu hagadagua bialu hene. Ani bialu Yahosabada ibu mbirale dama mitangi bialu gime wabini mini Bala wiagohondo bi pupu nawiaga hene. Ani bialu heagola Anduane Homogo ibu heba mandagi howa biamogo bigi bialu hene.
2CH 17:4 Yahosabada ibugua ibu abanaga Ngode Datagaliwabe talima pialu Anduane Homogonaga bi mana bayale lowini wiaru taluwa bialu howa ibugua Isaraelenaga kini bu hearume mana ko tara tara bialu hagadagua nabiaga hene.
2CH 17:5 Ani heagola Anduane Homogohanda Yahosabada mo hongo halu kini hongoheore heleagola ibu Yuda dindiha kini hongohe howa handayaho hene. Wali agali bibahendeme ibu mo turu halu mbirale tara tara bame mule yalu ibugu biyagome muni mbiralebi dewa wu howa Yuda wali agalinaga deni ibu timbuni mini lene mbira hene.
2CH 17:6 Yahosabada ibugua hongo howaore Anduane Homogo talima pialu howa ibu Yuda dindi bibahendeha ibaga biai halu dama mitangi bialu mbirale gime wabini wiaruhondo bi pupu wiaga andabi wali dama beda mitangi bialu gime wabini mini Asera wiarubi bibahende bo gialo wahai hene.
2CH 17:7 Yahosabada ibu kini howa mali tebonengi ibugua agali haguane marubi Libaiali diralibi maru loma binigo mo miaga kiralibi heba Yuda dindinaga tano bibahendeha piai hadaba lene. Ani layagola agali uruni tigua Anduane Homogonaga bi mana gilibu winigo mo yalu Yuda dindiha tano bibahendeni wali agali bu hearu lawai hole pene. Agali haguane piyaru mini uru Benehaili Obadaia Segaraia Nedanele Migaia imaru pene. Libaiali piyaru mini uru Semaia Nedanaia Sebadaia Asahele Semiramodo Yahonadana Adoniya Tobia Tobadoniya imaru pene. Agali loma binigo mo miaga kirali Elisama Yahoramalabi ti haru Yuda dindiha ibaga biai halu Anduane Homogonaga bi mana gilibu wini wiago lawai hole pudaba layagola yalu pene.
2CH 17:10 Yahosabada ibu kini heangi dindi tara taraha hameigini dewaore Yuda dindiha hapara para bu hearu bibahendenaga kini hearubi agali haguane hearubi bibahendeore Anduane Homogohanda mo gi hai heagola tigua gi halu Yuda baba wai nabi hene.
2CH 17:11 Pilidiali bu hearume siliba maru Yahosabadanaga dagisi muni yu ibugu bialu dabudabu marubi ibu bame mule yalu ibugu dege bini. Ani bialu Arebiali bu hearu tiguabi nde nogo sibi wangabe daosini kariani handari karia (7,700) haru ibalu nogo meme wangabe daosini kariani handari karia dege (7,700) Kini Yahosabadahondo mulenaga haru ibini.
2CH 17:12 Ani biyagola Kini Yahosabada ibu hongo emene haga bima irigi halu hongo gibihe hene. Ani howa ibugua agali maru Yuda dindini tano bu wiaruha purogo lelaya handala tigua puwa tomoru wai biagane aleru do holenaga anda dewa tano uruniha bu helaga bini. Ani bialu tigua wai tigiru anda ibulilono ami agalime mamage ho helonaga pabe hongohe bu helaga bini.
2CH 17:13 Ani bu helowa Yahosabada ibugua ami agalirunaga dabudabu dewaore anda uruniha mo wiai hene. Ani mo wiai howa Yahosabada ibugua ami agali hongohe maru hearu Yarusaleme tanoha helene.
2CH 17:14 Ami agali uruni ti one waneigini heba mandagi howa agali haguane haru haga mbira mbirame ami agali daosini mbira (1,000) dege dege haru haga bini. Yuda tinaga ami agali haguane haru haga mini Adana ibugua ami agali hongoheru daosini dege handari tebira (300,000) handayaho howa haru haga hene.
2CH 17:15 Agali haguane dege mende ibu Adana andaneha howa haru haga henego mini Yahohanana hene. Ibugua ami agali hongoheru daosini dege handari kirani pira halira (280,000) handayaho howa haru haga hene.
2CH 17:16 Ami agali haguane dege tebone Sigiri igini Amasaia hene. Agali ogoni ibugua Anduane Homogonaga biabe biahole lalu ibuni lomabia halu ami agali hongoheru daosini dege handari kira (200,000) handayaho howa haru haga hene.
2CH 17:17 Beniyamini hameigini tinaga ami agali haguane haru haga henego mini Eliada ibuore ami agali hongo gibihe mbirago howa ibugua ami agali hongohe maru humbi danda timuru yuwa wai biaga daosini dege handari kira (200,000) handayaho howa haru haga hene.
2CH 17:18 Ami agali haguane dege Eliada erembiraha howa biamogo biaga mende mini Yahosabadi henego ibugua ami agali daosini dege handari mbirani pira halira (180,000) handayaho howa haru haga hene. Horo bibahendengi ami agali uruni ti wai bule manda manda bu haabo haga hene.
2CH 17:19 Ami agali uruni ti Yarusalemeni howa kininaga biabe bialu haabo haga hene. Ani bialu kini ibunaga ami agali marubi Yuda dindi bibahendeha tano wai pabe hongohe bu hearuha hai helene.
2CH 18:1 Yahosabada homogo mini lene timbuniore howa ibugua Isaraelealinaga Kini Ahabala mini mbiraore holenaga ibu iginime Ahaba wane dabu bilo manda bu howa ani bini.
2CH 18:2 Mali maru howa Yahosabada ibugua Samaria tano Isaraelealinaga Kini Ahaba hearia nenege pole pene. Ani piyagola Ahabahanda nogo bulumaga sibirubi dewaore Yahosabada halu ibu ariarubi ti nelo bo dawene. Ani binigo irane Ahabahanda ibu Gileada dindiha Lamodo tano karulolenaga Yahosabada ibula wai biamogo bilo mo turu hene. Ani buwa ibugua Yahosabada mo bila halu lalu,
2CH 18:3 Í̠na i̱ pele ngialu Gileada dindiha wai bialu Lamodo tano karulole mandagi mali̱yabe, lene. Ani layagola Yahosabada ibugua ladai bialu lalu, Í̠na hamelederu ale talialu bulene karulape dege manda bu ko. I̱ biamogo bulene i̱naga wai biagane ami agalirubi nogo hosirubi bibahende manda mandabu hai ka.
2CH 18:4 Anigo iname mbirale uruni bule howa Anduane Homogo ibunaga hame ngago ala hale habiya, lene.
2CH 18:5 Ani layagola Ahaba ibugua mbiwia haga agali hearu íbu ngoai hadaba lene. Mbiwia haga agali uruni handari maria (400) agima íbu ngoai hayagola ibugua tihondo hale halu lalu, I̱na Lamodo tano karulole wai bu polene karulapebe be nakarulapedabe, lene. Ani hale hayagola tigua ibuhondo ladai bialu lalu, Karulapego wai bule pu. Anduane Homogohanda í̠ biamogo bialu í̠na wai wayali holebere, lene.
2CH 18:6 Ani layago lelowa Yahosabadahanda Ahabahondo hale halu lalu, Anduane Homogonaga bi mana latagi halu mbiwia haga mbira kabe nahebe. Mbira heagua nde iname Anduane Homogo ibuninaga hame ala hale hami̱ya, lene.
2CH 18:7 Ani layagola Ahabahanda ladai bialu lalu, Agali mbira Imila igini Migaia ibu Anduane Homogonaga bi mana latagi halu mbiwia haga ka. Anigo agali ogoni ibugua i̱hondo mbiwia halu bi bayale ndo langigi biagago i̱na ibuhondo turu naheore haruli. Ibugua mbiwia halu mo ko holene tagira ibulebira lalu i̱ langiaabo haga ka, lene. Ani layagola Yahosabada ibugua lalu, Í̠na bi ogonidagua lolene nawigo nalabe, lene.
2CH 18:8 Ani layago hale howa Ahabahanda ibunaga haru haga agali mbira heago íbu lowa lalu, Í̠na áyu ogoni gerai lalu puwa Imila igini Migaia abale haru dai bule pu, lene.
2CH 18:9 Kini Ahaba Yahosabadala libu haru kininaga aga biaga biago mo karulai howa kini biragane dagia Samaria tanonaga tagirahayagi hama tigabi widi iraneru lini hondo ibira ibira bilo bo taulalu aeane puyabume yu pelonaga dindi wiagoria mo yalu pu ngelowa libuni ogoriani berene. Libu bereagoria mbiwia haga agali hearume haparaho howa mbiwia halu bi dewa lalu hene.
2CH 18:10 Mbiwia haga agali henedaruni aria mbira Kenana igini Sedegaia heago ibugua aeane homane mbira wiago mo paulaki howa bulumaganaga haguaneni ne gayane heagobi wabini. Ani wabuwa ibugua ibuninaga emboneni mo paga howa lalu, Í̠na bulumaganaga ne gayane ogonibime wai buwa Siria ami agali karu bama pialu mbiraorebi mbira yu wanahe bibahende bo wahai halu bo maro bulebere lalu Anduane Homogohanda laya, lene.
2CH 18:11 Ani layadagua dege mbiwia haga agali maru hearumebi nde bi lo mbira howa lalu, Heneneore Anduane Homogohanda í̠ biamogo biragola í̠na wai bialu Lamodo tano karuloleberego wai bule pobe, lene.
2CH 18:12 Ti ani lalu beremiria haru haga agali mbira abale Ahabahanda Migaia haru daibule pu layago haru ibini. Libu wene harigani ibalu howa haru haga agali biago ibugua Migaiahondo lalu, Mbiwia haga agali maru karume lalu, Kini ibugua wai bialu wayali holebira, lalu mbiwia hayago í̠nabi nde kinihondo bi bayale ogonibi dege lamibe, lene.
2CH 18:13 Ani layago lelowa Migaia ibugua haru haga agali biagohondo lalu, Anduane Homogo haluhe kagonaga minini howa i̱na í̠hondo heneneore larogo Anduane Homogo ibugua i̱hondo bi ogo la lalu langiradagua dege latagi holebero, lene.
2CH 18:14 Migaia ibu Kini Ahaba bereagoria anda ibiyagola kini ibugua Migaia hale halu lalu, Migaia-o iname Lamodo tano karulole wai bu poramabe be waharamabe, lene. Ani layagola Migaia ibugua kinihondo yageyage paluwa lalu, Karulape í̠na tano ogoni karuloleberego wai bule pu. Í̠na wai bialu wayali habelo Anduane Homogohanda biamogo bulebirago pobe, lene.
2CH 18:15 Ani layagola Ahabahanda ibuhondo lalu, Ke̱ halu mbira nalabe. Í̠na Anduane Homogonaga minini howa heneneore labe lalu abale howa langiaabo haruligoni í̠ manda bu kegodago ai i̱naga bi ogoni angi hale holeberebe, lene.
2CH 18:16 Ani layagola Migaia ibugua Ahabahondo lamialu lalu, I̱na handalu hewaria Isaraele ami biaru nogo sibi haru haga nahe haradagua hari bare bare wiaruha ho giligala lo hearia handaru. Ani hondo hewagola Anduane Homogohanda bi mbira ogobi layua, Agali uruni tinaga haru haga agali haguane mbira nahe kago ai ti wai paluenaga wahalu tini andaga dai bialu pugu pugu bulene nga, layuane hale haru, lene.
2CH 18:17 Ani layago hale howa Kini Ahaba ibugua Kini Yahosabada lamialu lalu, I̱na í̠ abale langirugoni ogoniyago. Anduane Homogonaga bi mana latagi haga agali ogoni ibugua mbiwia halu i̱hondo bi bayale mbira nalangiaga. Ibugua i̱ mo ko holene hangu laabo haga larugoni, lene.
2CH 18:18 Migaia ibugua bi laabo halu lalu, Áyu Anduane Homogohanda i̱hondo mo walia hayago languliya baya hangu hale mia howa hale ha. I̱na handalu hewaria Anduane Homogo ibuni dahuliya andagani haru howa biragane dagia wiagoria bereagola ibunaga dahuliyali bibahendeme ibu bereagoria ho mabu bupe hearia handaru.
2CH 18:19 Ani heagola Anduane Homogohanda tihondo hale halu lalu, Ahaba ibu Lamodo tanoha bo wahelonaga ohowa ndelalu karulapego pu lolene mbirali ai kebe, laya. Ani hale hayagola dahuliyali mbira mbira tininaga bi Anduane Homogohondo ladai bigibigi biya.
2CH 18:20 Tigua ani ladai bigibigi bialu heagola dinini mbira ibu Anduane Homogo bereagoria kaware puwa lalu, I̱na ibu mo hondo hole polebero, laya. Ani layagola Anduane Homogohanda ibuhondo hale halu lalu, Í̠na Ahaba mo hondo agua holeberebe, layagola
2CH 18:21 dinini biago ibugua Anduane Homogohondo ladai bialu lalu, I̱na puwa Ahabanaga mbiwia haga agali karume bi henene ndo ke̱ howa lamilo mo la holebero, laya. Ani layagola Anduane Homogohanda dinini ogonihondo lamialu lalu, Í̠na pialu í̠naga bi henene larebe toba howa mo henene ho helonaga ibu mo hondo hole pu laya, lene.
2CH 18:22 Ani lowa Migaia ibugua Ahabahondo bi tiga tiga lamialu lalu, Anduane Homogohanda í̠ homabelo hamelowa dinini ogoni ibugua í̠naga mbiwia haga agali biarume í̠hondo bi henene ndo mo hondo halu bi langilonaga ibilayadagome í̠ mo hondo hayada, lalu lamini.
2CH 18:23 Ani lamiyagola mbiwia haga Sedegaia henegome Migaiahanda bi layago hale howa ibugua ibunaga gi habeme Migaia to̱a̱ balu howa lalu, Anduane Homogonaga dinini i̱ agua yu wahalu puwa bi ogoni í̠hondo langiyabe, lene.
2CH 18:24 Ani layagola Migaiahanda Sedegaiahondo ladai bialu lalu, Mani waitigime ibalu ina Isaraeleali bo podaragola í̠ ibida puwa anda hobane mbiraha bira do holebere. Ani bira do keria Anduane Homogohanda bi ogoni heneneore i̱hondo langiyago i̱na latagi henedane hondolebere, lene.
2CH 18:25 Ani layagola Kini Ahaba ibugua ami haru haga agali haguane heagohondo lalu, Migaia o kago minu yalu tanonaga agali haguane Amonola i̱ igini Yoasala karia haru pudaba.
2CH 18:26 Ani haru puwa libuhondo lamialu, Agali ogo i̱ni wai bialu dai buliya libugua ibu garabaya andaha tomo emene migi bialu handayaho halibu laya, lene.
2CH 18:27 Migaiahanda Ahabahondo lone lamialu lalu, Í̠ waiha homa nabi dai biriyagua nde Anduane Homogohanda i̱ha howa bi lene ndodalo manda bibe, lene. Migaia ibugua laabo halu lalu, Wali agali bibahende kamiru tígua bi larogoni hale hai hadaba, lene.
2CH 18:28 Ani bialu Isaraelenaga Kini Ahaba Yudanaga Kini Yahosabadala libu haru mandagi libunaga ami agali hearu haru halu Gileada dindiha Lamodo tanoni Siriali hearu baba wai bule pene.
2CH 18:29 Wai nape howa Ahaba ibugua Yahosabadahondo lamialu lalu, Wai hamani tagira pole howa wai tigime i̱ kinidalo manda nabilo kininaga aga bidogo golo iriari bialu ami agali mbira pene tingi holiya. Í̠ nde harugo kininaga aga bidegoni biaabo habe, lene. Ani lalu Kini Ahaba ibu aga tara wiaru bialu wai bule pene.
2CH 18:30 Wai anda piyagola Sirianaga kini heagome ibunaga ami agali wai biaga garo ale mini karisini hearu olalu ibidaba lowa lalu, Tígua Isaraeleali kini kago baba hangu wai hongo howa bilimu. Agali maru ibinidaru baba nabilimu, lene.
2CH 18:31 Ani laya handala puwa tigua Yudanaga Kini Yahosabada biago Isaraelenaga Kini Ahaba be toba howa wai hongo howa bialu hearia Yahosabada ibunime howa ga̱ hongo howa ladaga hayagome mo walia hayagola
2CH 18:32 ti manda bialu ogoni ibu Isaraelenaga kini ndoyane hondowa tigua ibula wai hongo howa nabi wahene.
2CH 18:33 Tigua wai hongoheore ua laga bialu howa Siriali ami mbirame timu mbira Isaraeleru heagoha bo ibilayagome Kini Ahabanaga tingini mbiraha aga wai pole biaga aleme bia dambi nahe wiagoria bila hene. Ani bila hayagola Ahabahanda agali ibunaga nogo hosime karisi gililo yu ibaga bilo handayaho haga heagohondo lalu, Ai timu hombeni ho kogo karisi abale beregedalu wai hama yu wahalu tagira mba, lene.
2CH 18:34 Ani layagoyu ami mende mendehabi wai hongoheore biribigola Ahaba wai hama yu wahalu tagira pobe nahe wini. Ani biyagola ibunaga garo ale karisi biagoria ibunaga ami agali biarume gini mo maliaho heleagola Siriali biaru wai ibiyagohayagi handa amu ho hene. Ani heane dege alendo ni paluene tu hayagola Ahaba homene.
2CH 19:1 Yudanaga Kini Yahosabada ibu mo ko nahe wai hamani howa ibuni andaga Yarusaleme dai bini.
2CH 19:2 Horo ogoningi agali Anduane Homogonaga bi mana latagi haga Hananai igini Yihu ibu Yahosabada lola hole puwa ibugua kinihondo lamialu lalu, Í̠na mandabu handalu keria agali ko biaga karu biamogo bialu Ngode Datagaliwabehondo gubalini nahaga karu baba mandagi holenego karulapeda lo mandabu kebe. Í̠na mana ogonidagua bialu harigonaga Anduane Homogohanda í̠hondo turu naheore kago ndobe.
2CH 19:3 Ani bia bialu kegoyu í̠na mana bayale ngagobi nde bia dege birili. Í̠na mbirale dama wali beda lowa bi pupu wule gime wabini mini Asera í̠ dalu Yuda dindi bibahendeha wiaru bo gialo wahai harigoni. Ani bialu Ngode Datagaliwabenaga hame wiago baya hangu talialu hole hongoho harigoni, lene.
2CH 19:4 Kini Yahosabada ibu Yarusalemeni howa halu mbiru nde ibunaga wali agaliru de handama Yuda dindi bibahendeha ibaga biai halu dindi abene unurahayagi mini Beaseba tano wiagoria piai halu abene uyurahayagi Eberaimi hameigini dindi ege barebare wuyu peagoria piai haga hene. Ani puwa ibunaga wali agalihondo Anduane Homogo ti mamalirunaga Ngode Datagaliwabe ibuni karia dai bidaba laga bima piaga hene.
2CH 19:5 Ani bialu ibugua agali maru godi hale halu mo tale biaga helo dabaga bialu Yuda dindi bibahendeha tano wai pabe hongohe bu mabubi wiaruha howa godi hale halu helo helaga bini.
2CH 19:6 Ani heagola ibugua agali urunihondo lamialu lalu, Tígua biabe ogoni buleberemigo ai godi hale halu mo tale beremingi tiga tiga lolene ngadaguaore lalimu. Biabe ogoni agalinaga ndo Anduane Homogonaga biabeorego ibuni hongoni beremadalo manda buwa bialu halimu. Tígua godi lo tiga bialu kamingi Anduane Homogo ibuni ti heba mandagi haga ka.
2CH 19:7 Anduane Homogo inanaga Ngode Datagaliwabe ibugua agali mendeali kago ke̱ halu mo guya howa godi laga kagobi tinaga damenego mo wialu biamogo buwa godi laga kagobi nogo muniru yolo bialu ngiragola ke̱ howa godi la haga kagobi mana uruni aleru ibu turu naheore ka. Ani biaga kago ai agali godi hale haga kamiru tí Anduane Homogo ibuni andaneha haabo howa mana tígua bialu kamiru baya hangu mamage halu de hondo halimu, lalu lamigi bini.
2CH 19:8 Yahosabada ibu ani ibaga bialu howa Yarusalemehabi ibugua Libai agaliru loma binigo mo miagaru hameigini emene haga binidadagua agali haguane mbira mbira bu hearubi tigua Yarusalemeni howa wali agalime Anduane Homogonaga mana puguarago godini hale helobi wali agali Yarusaleme tanoha bu hearunaga bi lai lalu keba hene wiaru mo tiga bialu helo dabo helene.
2CH 19:9 Ani dabo helowa Yahosabada ibugua agali godi hale haga biaruhondo lamialu lalu, Tígua biabe uruni bialu howa tíni Anduane Homogo andaneha howa ibunaga bi mana lowini ngago bayuwa talialu bialu halimu. Ani bialu biabe ogoni mini bilina howa baya hangu biaabo halu halimu.
2CH 19:10 Godi hale haga tíni aria bu karume tí biamogo bialu godi hale hole ibidaba layagua nde tígua agali uruni bayuwa biamogo bialu godini tiga tiga hale holene ngadagua hale halu mbiralime agali homelo bo waheneyaguabi mana tara maru ngaru puguiniyaguabi tanabi mo tiga bulene ngadagua bialu halimu. Tiha bia ko hene mbira Anduane Homogo deni nawi howa manani ngadagua hale howa mo tale bialu halimu. Ani nabirimiyagua nde tíbi tí hameiginirubi Anduane Homogonaga keba holene tíha biba helolebira. Tígua tiga tiga bulene ngadagua birimiyagua nde tíni ko mbira para naholebira.
2CH 19:11 Agali kirali tínaga haguane howa godi larago damene baya hangu haru hai helo helalimu. Wali agalirume Anduane Homogonaga mana puguarago hale halu mo tale bulene agali mbira Loma Binigo Mo Miaga Haguane Timbuni mini Amaraia ibu holebira. Agali mende Isimale igini Sebadaia ibu Yuda dindiha gabumane haguane kago ibugua wali agalirume gabumanenaga mana puguarago hale halu mo tale bule ibu holebira. Libai agali tigua godinaga biabe bulene ngago biaiore helo Anduane Homogo ibuni mbirali mana bayale biaga kago baba haabo haga kago manda bialu tígua hongo ho howa mana bayale ngago bialu haabo halimu, lene.
2CH 20:1 Mani howa Moabalibi Amonoalibi agali hameigini maru Amono dindiha hene bu hearubi ti bibahende Yuda baba wai bule mo mogo buwa tidi yalu anda ibini.
2CH 20:2 Marume Kini Yahosabada hearia ibuwa ibuhondo lamialu lalu, Siria ami agali dewa iba mini Homene Iba laga bedagoria ina baba wai bule anda ibiragoni ndobe. Ani bialu ti Hasasono Tama tano ngagoria áyu ogoni anda íbu ka, lene. Hasasono Tama tano ogoni Engedi tano ngagonaga mini mende ogoni wini.
2CH 20:3 Bi ogoni layagola hale howa Kini Yahosabada ibu gi timbuniore ho hene. Ani gi ho howa dege ibugua Anduane Homogonaga hame ngago ala hale holene hame lowa ibugua wali agali Yuda dindi bibahendeha bu hearuhondo bi lo pelalu, Tomo nane howa Anduane Homogohondo bi hongo howa lalu holene nga, lene.
2CH 20:4 Ani laya handala Yuda wali agali bibahende tini dindi wahai halu Anduane Homogohanda ti biamogo bilo ibuhondo biamogo bia lalu bi lole Yarusaleme piai hene.
2CH 20:5 Ti Yarusaleme pialu wali agali bu hearu heba wali agali íbu ngoai ho haga hama gahenge mbira Anduane Homogonaga anda hane winigoriani ti mandagi ngoai ho hene. Ani ngoai ho hearia Kini Yahosabada ibugua wali agali hearu dombeneha pu howa
2CH 20:6 Anduane Homogohondo bi lalu, Anduane Homogo ina mamalirunaga Ngode Datagaliwabe-o í̠na dahuliya andaga howa wali agali bibahendeore handayaho hai haga kegoni. Ina mbiralime í̠la wai bialu bope habe naheore kamago í̠ hongo gibihe ke.
2CH 20:7 Í̠ore inanaga Ngode Datagaliwabe kegoni. Ina Isaraele wali agali bibahende dindi ogoriani anda ibirimagola í̠na wali agali ogoria abale henedaru bo taliatagi howa dindi ogo inanaga wiaabo helo ina mamali Abarahama ibu í̠naga nenege agali henego ibuhondo dindi ogo miriya.
2CH 20:8 Ani mirigola ina dindi ogoria luore harima. Wali agalime í̠ mitangi bialu í̠ni keria kaware ibalu lotu lalu helonaga bamba inanaga damene bu henerume anda timbuni ogo biniya. Tigua anda ogoni biai howa í̠hondo bi ogodagua laya.
2CH 20:9 Anduane Homogo-o mo ko holene mbira inaha anda ibiyaguabi waitigirume ina baba wai bule ibiyaguabi inaha warago ko tara ngaru ibiyaguabi hina gari timbuni tagira ibiyaguabi uruni damene bibahende mbirago tagira ibiyagua nde ina í̠ni wanakuihayagi anda ogoni haneni íbu holoma̱yanaga anda ogoni bini. Ani íbu howa inaha genda ngago mitangi bigi bialu genda ogoni mo waha lalu í̠nihondo bi loleberema. Anidagua laramagola nde í̠na inanaga bi laramago hale halu biamogo bulebere, lene.
2CH 20:10 Yahosabadahanda Anduane Homogohondo bi laabo halu lalu, Anduane Homogo-o Amono hameiginibi Moaba hameiginibi Idomo hameiginibi bibahende mo mogo bialu ina baba wai bule ibirago í̠ de hendedegoni. Bamba ina mamaliru ti Iyibi wahalu dindi ogoha ibule ibalu howa tigua hameigini uruninaga dindini wai bule anda pelo hame nale harigo manda buwa dindi urunihayagi anda nape wandialu peneya.
2CH 20:11 Anigo ainde tigua inanaga mamalirume tihondo mana bayale biyago mitangi nabiyada. Ani manda nabi howa tigua mana ko bialu ina baba wai bule ibiragonida. Dindi ina holoma̱ya í̠na ngirigoria kamaria bo batagi hole ibiragoni ndobe.
2CH 20:12 Inanaga Ngode Datagaliwabe-o ami agali uruni ti dewaoreme ina baba wai bule ibiragonida. Ai nde iname ti baba wai bulene hongo naheore kamago í̠na waitigi uruni minu bai habe. Ani bialu iname mbirale mbira beregedalu bibe naheorego í̠na ina biamogo bibelo í̠ dege malia howa handayaho kamagoni, lene.
2CH 20:13 Yuda agali bibahende ti one waneigini heba mandagi Anduane Homogo wanakuiha ibuni anda haneni íbu ngoaiho hene.
2CH 20:14 Ani ngoai ho hearia Libaiali mbira mini Yahasiele heago ibu nde wali agali bu hearu dombeneha hene. Yahasiele ibu Segaraia igini hene. Segaraia ibu Benaia igini hene. Benaia ibu Yahiele igini halu Yaiele ibu Madania igini hene. Agali uruni ti Asaba aguanene halu Asaba ibu Libaiali dege mbira hene. Yahasiele ibu hearia Anduane Homogonaga Dinini ibalu Yahasieleha karula halu mo hongo hayagola
2CH 20:15 ibugua lalu, Kini Yahosabadabi Yarusaleme wali agali kamiru tíbi Yuda wali agali bibahendebi tígua bi o larogo baya hangu hale hadaba. Anduane Homogohanda lalu, Tígua ami agali dewaore o ibiragoni hondowa mogo lalu gi nahe halimu. Wai bulene ogoni tínaga biabe ndogo Ngode Datagaliwabe ibunaga ngago tígua gi halu miniha mogo nale halimu.
2CH 20:16 Yawi waitigi agali uruni tí baba wai bule Hari Sisi wedagoha hariga ibidadagua ibulebira. Ani ibulebirago ai tígua abale pialu dindi ulini panda panda ni tagira ibiragohayagi dindi ko iba dalu naibaga mini Yaruele ngagoria lola holeberemigo pilimu.
2CH 20:17 Ani puwa wai dege tínime ndo buleberemi. Tígua wai hamani tagira puwa bame handayaho kamigola Anduane Homogohanda tí mo wialu wai buwa ibugua wayali halu waitigi agali bo hilo wahai harane de hondoleberemi. Yarusaleme wali agali kamirubi Yuda wali agali bibahendebi tígua gi howa miniha genda nahalimu. Yawi tígua wai bu poramigola Anduane Homogo ibuni tí heba mandagi poleberemi, lene.
2CH 20:18 Ani layago hale howa Kini Yahosabadabi wali agali bu hearubi tigua dindini ge duli hanga howa bulu palu biruwa Anduane Homogonaga mini yaraga halu lotu lalu hene.
2CH 20:19 Ani lalu howa Libaiali Kohada aguanene hearubi Kora aguanene bu hearubi tigua heyuwa bi hongo howaore ladaga halu Anduane Homogo Isaraele wali agalinaga Ngode Datagaliwabenaga mini mo yaraga halu hene.
2CH 20:20 Ani bialu heane gao layagola horo mendengi tigua heyalu dindi ko iba dalu naibaga Tegoa tano kaware wiagoha pole manda manda bini. Ti Yarusaleme tanoha tagira nape wene pole dege howa Kini Yahosabada ibugua tihondo lamialu lalu, Yudalibi Yarusalemealibi tí bi o larogo baya hangu hale halimu. Tígua Anduane Homogo inanaga Ngode Datagaliwabe kagoha hanaho harimiyagua nde tí bayale hongohe haho wuleberemi. Tígua Ngode Datagaliwabenaga bi mana latagi haga bu karume bi larago hale harimiyagua nde tígua waitigi karu bope halu wayali holeberemi, lene.
2CH 20:21 Ani bialu Kini Yahosabada ibugua wali agali tinaga hame hale howa mani Libai agali maru dabalu tigua Anduane Homogonaga mana bayale tigabiore ngagonaga lalu aga loma binigo karulowa ami agaliru mama ibilalu ti bamba halu iba gana ogodagua lama pene. Tigua lalu, Anduane Homogo ibugua ina gubalini haabo ho haga kagonaga iname ibunaga mini yaraga halu ka̱i̱ larama, lama pene.
2CH 20:22 Kini Yahosabada halu ibunaga ami agaliru piyagola agali iba gana lagane biaru tigua Anduane Homogonaga mini yaraga halu iba gana lama pialu heaore Anduane Homogohanda Amono ami hearubi Moaba ami hearubi Idomo ami agalibi bibahende tini dege dege mo lulu ya halu mo wai bia hene.
2CH 20:23 Pigane Amono amibi Moaba amibi tigua Idomo ami bo wahai hene. Ani bialu mani Amono Moabala libuni wai bialu dewaore timu ho wiai hene.
2CH 20:24 Ani bialu heagola Yuda ami agali biaru ti pialu dindi ko wali agali nahaga iba dalu naibaga wiagoria ami agali mamage haga anda mbira heagoria tagira pene. Puwa tigua anda ogoriani irigi howa handa amu nana hemiria waitiginaga tingini bo wahene bame dindini wima pearia mogolo hendene. Mbiraore hangubi nahome mbira wiaria nahene bibahende homene hangu wiai hearia hendene.
2CH 20:25 Ani wiagola Kini Yahosabada halu ami agali biaru tigua homene tingini wiagoha handama pialu hemiria dabudabu dewaore heba wiaria hendene. Ani hondowa nogo bulumaga dewaore hearubi tomo wiarubi aga bayale wiarubi dabudabu bayale tara tara wiarubi bibahende mo yai hene. Dabudabu dewaore wiagola tigua horo tebiru mialu hene.
2CH 20:26 Ani mialu howa horo manengi tigua dindi ulini mbira panda panda wiagoria puwa tihondo mbirale Anduane Homogohanda biyadagonaga ka̱i̱ lalu ibunaga mini mo yaraga hene. Irane ti anidagua biamogo biyagonaga tigua dindi ogoni mini Anduane Homogonaga Mini Yaraga Hagane lalu wini.
2CH 20:27 Ani buwa Yahosabada halu ibunaga ami agali biarubi bibahende ti Anduane Homogo ibugua ti biamogo bialu waitigi bo wahai hayagonaga turu timbuni hama Yarusaleme dai bini.
2CH 20:28 Ti Yarusaleme anda pialu howa ngida balu pilipe biguli pu lalu Anduane Homogonaga andaha puabo halu ibunaga mini yaraga hene.
2CH 20:29 Kinirubi agali haguanerubi dindi tara tara haga haga biaru bibahende Anduane Homogohanda Isaraele biamogo bialu tinaga waitigi bo homelai haya layane hale hayaru ti gi hai hene.
2CH 20:30 Ani bialu Yahosabada ibu kini heangi Isaraele dindiha wai mbira nabi wiaabo henego irane Ngode Datagaliwabehanda Isaraele dindi handayaho haabo heagome ani wini.
2CH 20:31 Yahosabada ibu mali pira tebirani duria (35) hayagola ibu Yuda wali agalinaga kini pigane hene. Ibu kini howa mali pira kirani duria (25) Yarusaleme dindini haru haga hene. Kini Yahosabada ai̱ya ibu agali Silihi wane mini Asuba berene.
2CH 20:32 Yahosabada ibugua ibu aba Asahanda biaga wiadagua bialu Anduane Homogonaga deni howa mana tigabi bayale talialu bialu haga hene.
2CH 20:33 Ani bialu ha howa dege ibugua bulene mbira wiago nabi henego dama mitangi bialu bi pupu wiaga anda bu hearu bo gialo wahai nahe helene. Ani bialu mendebi nde wali agalime ti mamalinaga Ngode Datagaliwabe kago mitangi bialu ibu talima polenego manda nabi hene.
2CH 20:34 Yahosabada ibu kini pigane henedangi howa bialu heneru bibahendenaga te mbuga mbira mini Hananai igini Yihunaga Bi Te laga wini ngagoha gilibu wiai henego nga. Ani binigo ai te ogoni mbuga timbuni mbira mini Isaraele Kini Henerunaga Bi Te laga ngagoha gili bumaga ho nga.
2CH 20:35 Horo mbirungi Yuda wali agalinaga Kini Yahosabada ibugua Isaraelenaga kini ko tara tara wiaru biai haga mini Ahasaia heago baba biabe mandagi bulene hamelo hene.
2CH 20:36 Ani bialu howa libugua iba sibi timbuniru Tasisi dindiha dabudabu yu pu íbu bilonaga wabini. Iba sibi ogoni wabiaga agali hearume Esiongebe tanoni howa wabialu hene.
2CH 20:37 Ani bialu hemiria Maresa tanoali Dodabahu igini Eliesehanda Yahosabadahondo bi hongo howa lalu, Í̠na kini ko Ahasaiala mandagi howa biabe bialu haridagonaga Anduane Homogohanda libunaga iba sibi uruni bibahende mo ko halu bo gialo wahai holebira, lene. Ani layadagua nde iba sibi uruni bibahende ko hai hayagola tigua Tasisi dindiha pole manda biyago napene.
2CH 21:1 Mani howa Yahosabada homayagola tigua ibu mamaliru hora haga homali Debidinaga tano wiagoha hora hene. Ani homayagola ibu igini Yahorama ibu aba henegoria kini ha aribia hene.
2CH 21:2 Yahosabada igini Yahorama ibu hamene waragaria heneru Asaraia Yahiele Segaraia Asariahu Migaele Sebadaia imaru hene.
2CH 21:3 Ti abahanda ngolo silibabi dabudabu tara tara dewaorebi tihondo mialu Yudanaga tano wai pabe ho mabu biniru ti haru helo hangu hangu mini. Ani buwa Yahosabada ibugua ibu igini wahene Yahorama ibu kini ha aribia helo dabo helene.
2CH 21:4 Mani Yahorama ibu kini hongoheore heangi ibugua ibunaga hamenerubi Isaraele haru haga maru hearubi homelo bo wahene.
2CH 21:5 Yahorama ibu hama ibinigo mali pira tebirani kira (32) hayagola ibu kini pigane hene. Ibu Yarusalemeni kini heane mali halira hene.
2CH 21:6 Ani howa ibu one Isaraelenaga Kini Ahaba wane mbira dabu bini. Anidagua buwa ibugua mana ko Ahaba damenerumebi Isaraele wali agalirumebi bialu haga wiago talialu Anduane Homogo deni mana ko dewaore bialu hene.
2CH 21:7 Ani bialu heago helowa Anduane Homogohanda Yuda dindi mo ko nahe dege hene. Ani binidagoni irane Anduane Homogo ibugua bamba ibunaga biabe biahaga Debidihondo habo nalolene bi mbira lo wialu lalu, Bibahendengi Debidinaga damene hangume kini haabo holebira. Ani haragola Debidinaga hale lamu nahundilonaga ani bulebira, lalu lowini.
2CH 21:8 Ala Yahorama ibu Yuda dindiha kini heangi Idomo wali agali bu hearu tigua Yudanaga kini andaneha henego mani howa ti doga halu hene. Doga howa tigua tininaga kini mbira dabo helayagola kini ogonime Idomo wali agali haru hene.
2CH 21:9 Ani biyago hondowa Kini Yahoramahanda ibunaga ami agali karisini heyu howa wai biaga hearu haru halu Idomo dindiha wai bule anda pene. Ani pu heagola Idomonaga ami agali bu hearume ti baba wai bule ho hagira biai hene. Ani biyagola Yahoramabi ibunaga ami agali haguane karisi handayaho hearubi tigua Idomo baba wai timbuni mbiraga bialu Idomoali hayadaruni bo hiladai bialu ibida pene.
2CH 21:10 Ani biyagome Yuda ami tigua Idomo bo poda hana habe nahe hene. Anidagua biyagome Idomo tigua tinaga dindi tini henego áyu haabo ka. O binidagoningi dege Libina tanoha hearu tibi nde Yudanaga kinime handayaho nahelonaga tibi mine halu doga howa Yuda andaneha nahe tini hangu hene. Ani binigo irane Yahorama ibugua Anduane Homogo ibu mamalirunaga Ngode Datagaliwabe erembira mialu wahalu penegome ani bini.
2CH 21:11 Anigo ibugua dama mitangi bialu bi pupu wulenaga anda dewa hariruha biyagome Yuda wali agalirubi Yarusaleme wali agalirubi tigua Anduane Homogonaga mana wahai helo mo bia hene.
2CH 21:12 Anduane Homogonaga mana latagi haga Elayahanda beba mbira gili buwa Yahoramanaga wia hene. Ibugua lalu, Anduane Homogo í̠ mamali Debidinaga Ngode Datagaliwabe ibugua au laya, Í̠na í̠ aba Kini Yahosabadabi ibu aba Kini Asabi libugua bialu henedagua ndo bialu harigoni.
2CH 21:13 Isaraelenaga kini henerume Isaraele wali agaliru tigua Anduane Homogo erembira mialu helo mo bia hagadagua í̠na Yuda wali agaliru Yarusaleme wali agalirubi ani bilo mo bia halu kegoni. Kini Ahababi ibu ariabi tigua Isaraele wali agali Anduane Homogonaga mana wahelo mo bia haganego í̠na nde bialu kegoni. Í̠naga hameneru í̠ kegobi ndo ti agali bayaleore hearia í̠na ti bibahende bo wahai harigoni.
2CH 21:14 Ani birigonaga Anduane Homogohanda í̠naga wali agalirubi í̠naga waneiginirubi í̠naga onerubi tihondo pani mialu í̠naga dabudabubi bibahende mo ko hai holebira.
2CH 21:15 Í̠nibi warago balu í̠naga tini mo ko halu horo bibahendengi warago ogoni ko timbuni bama anda poragola í̠naga tinibi dugu tagi holebira, laya lene.
2CH 21:16 Horo uruningi dege Anduane Homogohanda Pilidiali Arebialibi ti Sudana dindi solowara angeha haga biaru mo keba hayagola tigua Yahorama baba wai bule ibini.
2CH 21:17 Wai bialu tigua Yahorama andaga puwa ibunaga dabudaburu mo yalu one iginirubi bibahende minalu haru piai hene. Yahorama igini heyogoneore Ahasaia ibu dege helalu pene.
2CH 21:18 Ani binigo Anduane Homogohanda Yahoramanaga tiniha warago timbuni ibilene.
2CH 21:19 Mali kirani warago timbuni ba ho wialu ibunaga tini tagira pialu tandaga tara nalu homene. Yahorama mamali ala homayarunaga dara howa ira timbuni delagadagua Yahorama homayagonaga Yuda wali agalirume ira dela nabi wahene.
2CH 21:20 Yahorama ibunaga mali pira tebirani kira (32) hayagola ibu kini pigane hene. Kini howa ibu Yarusalemeni mali halira hangu haru halu homene. Ibu homayagola wali agalirume dara nahe hene. Tigua ibu kini maru hora henegoria ndo Debidinaga tano ogoniha dege hora hene.
2CH 22:1 Ala Yahorama ibu kini henedangi Arebialime wai bule ibuwa tigua Yahorama igini maru homelo bo wahalu heyogone mini Ahasaia ibu dege nabe helene. Ani binigo Yarusaleme wali agalirume Ahasaia ibu aba henegoria kini ha aribia helene.
2CH 22:2 Ahasaia ibu mali pira kirani kira (22) hayagola kini pigane hene. Ibu kini howa Yarusalemeni mali mbira hangu haru hene. Ahasaia ai̱ya ibu Isaraelenaga Kini Ahaba wane Adalia berenego ibu Isaraelenaga Kini Omiri aguane berene.
2CH 22:3 Ahasaia ai̱ya ibu mana ko biaga Isaraelenaga Kini Ahaba aria bereagome Kini Ahasaia ibubi mana ogoni ale dege mo bia halu hene.
2CH 22:4 Ibugua Anduane Homogonaga deni mana ko dewaore Kini Ahaba ariame bia layadagua bialu hene.
2CH 22:5 Tigua bia layadagua bialu horo mbirungi Kini Ahasaia ibu Isaraelenaga Kini Yorama haru halu Sirianaga Kini Hasaele baba wai bule mba lene. Puwa Gileada dindiha Lamodo tano wiagoria wai bialu hemiria Siria ami mbirame Kini Yorama timume bayagola timu ho hene.
2CH 22:6 Timu ho yu puwa dabi harabe hondole Yaserili tanoni pu wini. Yaserili tanoha wiagola Kini Ahasaia ibu de hondo pole pene.
2CH 22:7 Ahasaia ibu Yorama hondole Yaserili tanoni anda pu heagola Ngode Datagaliwabehanda agali marume Ahasaia belo henge mini. Ahasaia Yoramala libu haru pialu hebira Nimisi igini Yihu lola hene. Yihu ogoni ibugua Ahaba damene igiri agaliru bibahende bo wahai helo Anduane Homogohanda abale manda manda bu helene.
2CH 22:8 Yihuhanda Ahaba aria ani homelo balu hearia ibu Yudalinaga haru haga agali marubi Ahasaia hamene iginirubi Ahasaia heba ibiyaria lola hene. Lola howa Yihu ibugua ti bibahende bo wahai hene.
2CH 22:9 Ani bai howa Yihunaga amialirume Ahasaia haibu pialu hemira Samaria tanoni ha do hearia handa walia hene. Tigua handa walia howa Yihu hearia minu yalu piyagola Yihuhanda Ahasaia abale homelo bene. Ahasaia homayagola ibuni dameneme ibu Yarusaleme yalu puwa hora hene. Ani binigo irane Ahasaianaga mamali Yahosabada ibu Anduane Homogonaga mana bayale talialu henego mitangi bialu ani bini. Ahasaia damene hongo nahe howa ti mbiralime Yudanaga kini habe nahe hene.
2CH 22:10 Kini Ahasaia ai̱ya Adalia ibugua ibu igini Ahasaia bo wahaya layago hale howa ibugua abaleore ami agali bu hearu lamialu lalu, Yudanaga kini heneru aria agali bu karu damene bibahendeore bo wahai hole pudaba, lene.
2CH 22:11 Ani layagola Kini Ahasaia igini Yoasa ibu dege bo wanahe hene. Irane Kini Ahasaianaga mbalini Yahoseba ibu loma binigo mo miaga agali mini Yahoiada one berenego ibugua Ahasaia igini mbira Yoasa ibu damene maru heba bo waholigo lowa haru pene. Haru pialu wandari mbira ibu handayaho haga heba Anduane Homogonaga andaha paliaga hobane mbira heagoha ha do heleagola Adalia ibugua Yoasa handa walia nahayagome ibu bo wanahene.
2CH 22:12 Ani biyagola Yahoseba ibugua Yoasa Anduane Homogonaga andaha mali waragaria ha do ho helene. Ani ha do ho heangi Adalia ibu Yuda dindiha kuini wali berene.
2CH 23:1 Anigo Adalia ibu Yuda dindiha kuini wali bereane dege mali kane hayagola loma binigo mo miaga Yahoiada ibugua ami agali haguane duriali Yarohama igini Asaraiabi Yahohanana igini Isimaelebi Obede igini Asaraiabi Adaia igini Maseabi Sigiri igini Elisabadabi bibahende mo ngoai howa tihondo habo nalolene bi hongohe mbira lo wini.
2CH 23:2 Duriali o biarume Yuda tano bibahendeha puwa Libaialirubi hameigini tara tara haru haga agalirubi Yarusalemeha haru dai bini.
2CH 23:3 Dai buwa ti Anduane Homogonaga andaha ngoai hayagola Yahoiada ibugua ti Kini Yoasa andaneha hole lowa habo nalolene bi hongohe mbira lo wini. Yahoiadahanda Kini Ahasaia igini Yoasa tinaga deni haru tagira ibuwa tihondo mo walia halu lalu, Anduane Homogohanda abale Debidi aguanene kini haabo holebirago lalu lowinigo ai Yoasa o kago ibu kini holebira.
2CH 23:4 Anigo iname bulene maru ngago laro. Anduane Homogonaga loma binigo mo miagarubi Libaialirubi tidi tebirame biabe bialu howa Sabada horo haragola tidi mbirago ibu aribia haga bialu mbirago ibu ha̱lo haga biaga kamigoni. Ha̱lo kagola mendego ibu biabe bia aribia haga kamigoni. Anigo ai Sabada horo áyu holeberemagonaga tidi tebira harimigoni tidi mbiragome Anduane Homogonaga anda panga haraba mamage halu,
2CH 23:5 tidi mendegome kini andaga mamage halu tidi tebonegome panga haraba mbira mini Su laga biago mamage halu hai holeberemi. Wali agali bibahende Anduane Homogonaga anda tagirayagi ngoai haga hama ngagoria ngoai holebira.
2CH 23:6 Loma binigo mo miagarubi Libaialirubi tini hangu loma bia howa biabe bulene wini ngago Anduane Homogonaga anda tamuha pobehe holebira. Anduane Homogohanda bi lowinigo ngadagua talialu wali agali maru tanabi tagira holene nga.
2CH 23:7 Libaialiru bibahendeme wai biaga ayu tibu yuwa Anduane Homogonaga andaha Kini Yoasa mamage kamiria ibu mbiraha pole hame layagua nde Libaialime haru polene nga. Agali maru karu aria mbira ibu kagoria kaware ibulani handaluore halimu. Agali mbira ibu anda ibiyagua ogoni ibu homelo bo wahalimu, lene.
2CH 23:8 Sabada horongi Libaialirubi Yudali haguanerubi tigua loma binigo mo miaga Yahoiada ibugua tihondo bilimu layadagua bialu mamageali maru tinaga biabe biai howa horo odangi ha̱lo hole hearubi maru biabe bu aribia hole hearubi bibahendeore Yahoiada hearia Anduane Homogo andaha haru ibai hene.
2CH 23:9 Ibai hayagola Yahoiadahanda Kini Debidinaga wai biagane yandarebi humbibi Anduane Homogonaga andaha winigo ami agali haguane hearuhondo yilo mo migi bini.
2CH 23:10 Ani miya handala ami agali biaru tigua Anduane Homogonaga andaha kini bayuwa mamage holenaga anda unurahayagi howa hama pialu uyurahayagibi bibahendeha haame hene. Tigua loma biniru delaga dabu heagoriabi anda heagoriabi mamage hai hene.
2CH 23:11 Ani haiore heagola loma binigo mo miaga Yahoiadabi ibunaga iginirubi tigua Yoasa haru tagira ibuwa kininaga manda ibunaga haguaneni mo karula hene. Ani buwa mbuga mbira kininaga haru holene mana gilibuwi wiago Yoasahondo mini. Ani muwa tigua Yoasanaga haguaneni kini dabo helolenenaga olibe lininaga weli odo wia hene. Ani biai hayagola wali agali bu hearume turu halubi hongo howa ladagadaga bialu gi habe balu lalu, Kini Yoasaore ibu kini luore haabo howa hodagua helo, lalu hene.
2CH 23:12 Wali agali bibahende bu hearume bi lagadaga bialu kini mini yaraga halu lalu hayuago hale howa kuini wali Adalia ibu andaga howa Anduane Homogonaga anda wali agali íbu ngoaiho heagoha abaleore pene.
2CH 23:13 Ani puwa ibugua Anduane Homogonaga anda haneni anda gene mbira heagoria hapara howa kinime hagadagua kini gahenge mbira ona hearia hendene. Ani handalu hearia ami agali haguanerubi agali maru pilipe ale biguli pu lagarubi ti kini heagoria kaware hapara ho hearia hendene. Ani hondowa Adalia ibu miniha keba timbuni howa ibunaga aga minu lerelene. Ani bialu howa ibugua lalu, Tí wali agali koore kamigoni. Tígua i̱hondo mana koore lehe bialu harimida, lene.
2CH 23:14 Ani biyagola Yahoiada ibugua Anduane Homogonaga andaha Adalia bo wahelo hame nale howa ami agali haguane hearuhondo lalu, Adalia minuwa Anduane Homogo andaha howa tagira haru pialu ami agali ho dugu bu karia dombeneha minu yalu pudaba. Agali mbirame wali biago pele mule manda bialu ibu poradagua talima piyagua agali ogoni homelo bo wahalimu, lene.
2CH 23:15 Ani laya handala tigua Adalia minu yalu pialu kini andagaha anda polene panga mbira mini Nogo Hosi Panga uba andatagi biaga hariga wiagoha minu yalu pene. Minu yalu pialu tano tagirahayagi puwa homelo bo wahene.
2CH 23:16 Loma binigo mo miaga Yahoiada ibugua Kini Yoasabi wali agali bu hearuhondobi lalu, Anduane Homogola habo nalolene bi mbira tíbi i̱bi ina bibahendeme ibunaga wali agaliore holeberema lalu lo wimi̱ya, lene.
2CH 23:17 Ani laya handala wali agali hearume dama mitangi bialu gime wabini mini Balanaga bi pupu wiaga anda heagoha puwa bo gialo wahai hene. Lomabu delaga dabu anda ogoniha heagobi dama Bala wiagobi bibahende bo gialo wahai hene. Ani buwa tigua Balanaga loma binigo mo miaga mbira mini Madana heago ibu lomabu delaga dabu kaware heagoria bo ngelene.
2CH 23:18 Ani biai heagola Yahoiadahanda loma binigo mo miaga agalirubi Libaialirubi Anduane Homogonaga andaha biabe bulene winiru bilo ala Debidihanda biabe mo tahayadagua ibugua tahaga bini. Mosese heangi bi mana lowinigo tigua loma biniru Anduane Homogohondo bo delolenebi wali agali ngoai harangi iba gana haru helobi dabo helene.
2CH 23:19 Ani dabo helai halu Yahoiadahanda Anduane Homogonaga anda panga haraba bibahendeni agali Anduane Homogonaga deni ko dodohe hearu anda naibilo agali mamage helaga bini.
2CH 23:20 Ani buwa Yahoiadabi ami haguane hearubi agali mini lene hearubi wali agali haru haga haguane hearubi Yuda wali agali bibahende hearubi tigua Anduane Homogonaga andaha howa kini haru halu kini ibuni andaga pole pene. Tigua pole pialu heagola wali agali bibahende mama talima pialu hene. Ti kini andaga panga haraba dunini wiagoria anda puwa Yoasa ibu kini biragane dagia wiagoria pu berene.
2CH 23:21 Adalia bo wahayagola wali agali bibahende hearu ti turu howa bu miniha dungu lowa turu haga bialu Yarusalemeni hene.
2CH 24:1 Yoasa ibu ai̱yahanda taba hanayangi howa hama ibinigo mali kane hayagola ibu Yuda wali agalinaga kini pigane ogoningi hene. Ibu ai̱ya Beaseba tano wali mini Sibia berene. Yoasahanda mali pira maria (40) Yarusalemeni kini howa haru hene.
2CH 24:2 Ibu kini heangi mana bayaleore Anduane Homogonaga deni turu holene wiaru hangu bialu haabo henego irane loma binigo mo miaga Yahoiada henegome ibunaga mini mandaru baya hangu mo tiga binigome ani biaga hene.
2CH 24:3 Ani bialu Yahoiadahanda wali kira dabalu libu Yoasa one biruwa waneigini taba hanaga bini.
2CH 24:4 Maniore howa Yoasa ibugua Anduane Homogonaga anda mo tiga bulene nga manda bini.
2CH 24:5 Ani manda buwa loma binigo mo miagarubi Libaialirubi olo ngoai howa lalu, Wali agalime Anduane Homogonaga anda arema bulenaga dagisi muni mali bibahendengi mulene winigo milo Yuda tano bibahendeha abale mo pialu yalu dai bilimu, lene. Ani layago hale howa Libaialirume abale nape emene hondo hene.
2CH 24:6 Ani hondo hemiria Yoasahanda loma binigo mo miaga haguane Yahoiada olowa lalu, Libaialirume dagisi muni Anduane Homogonaga biabe biahaga Mosese heangi mulene lo winigo Yuda dindihabi Yarusalemehabi abale mule pudaba larugo nape hondo harimigo irane aginagabe, lene. Dagisi muni ogoni Anduane Homogonaga anda arema bulenaga mo wiaga hene.
2CH 24:7 Ala wali ko biaga Adalia ibunaga aria Anduane Homogonaga anda mo ko halu mbirale maru Anduane Homogonaga loma bini wiaru mo yalu dama mini Balanaga bi pupu wule yalu pene.
2CH 24:8 Kini Yoasahanda Libaialiruhondo lalu, Mbogoyi mbira wabialu daligani diri mbira tombelowa Anduane Homogonaga anda panga harabaha mo widaba, layagola tigua ani bialu mo wini.
2CH 24:9 Ani biyagola ibugua wali agali Yarusalemeha hearumebi Yuda dindi bibahendeha hearumebi Ngode Datagaliwabenaga biabe biahaga Mosese heangi lo winigodagua dagisi muni Anduane Homogonaga andaha yalu ibilo beba gilibu wia haga bini.
2CH 24:10 Agali haguane hearubi wali agali hearubi ti bibahendeme turu howa muni siliba yalu ibugu bialu mbogoyi biagoha mo wini.
2CH 24:11 Horo bibahendengi Libaiali hearume mbogoyi biago muni handaya ho haga agali hearia yalu ibiyagola tigua handalu hemiria muni to̱layago hendene. Ani hondowa loma binigo mo miaga haguane timbuni heagobi kininaga beba gili bia dagala biaga heagobi libugua muni siliba haealai halu mbogoyi biago mo wiaganeha yalu dai biaga wini. Ani bigi biyagola muni siliba dewaore wini.
2CH 24:12 Yoasa Yahoiadala libugua muni siliba uruni Anduane Homogonaga anda biago goba halu mo ko hene wigi bini wiaru arema bilo haru haga agali hearuhondo mo migi biaga wini. Ani miyagola haru haga agali biarume irame anda biaga hearubi ege to̱le̱me anda biaga mugubeyi hearubi agali maru hari wiagoha howa ege to̱le̱ anda bule podaga hearubi tihondo yolo miaga wini. Biabe ogoni alego maru bulene wiyaguabi nde yolo bia dege biaga wini.
2CH 24:13 Tigua anda bayuwa arema bigi bialu Anduane Homogonaga anda ala hongohe hayagobi helo bia dai bini.
2CH 24:14 Biabe ogoni biaiore howa muni ngolo silibarubi ibira hayago kinibi Yahoiadabi libuhondo mialu libugua Anduane Homogonaga andaha wulene mbirale irani delelobi ndisirubi ngolo silibame wabigi bilo muni biaru mini. Yahoiada ibu nahome heangi mbirale loma biniru Anduane Homogonaga andaha lomabu delaga dabuni delaabo haga hene.
2CH 24:15 Yahoiada ibu mali handari mbirani pira tebira (130) halu homene.
2CH 24:16 Yahoiadahanda Ngode Datagaliwabenaga manani howa hongohe haabo halu Isaraele wali agali biamogo bialu Anduane Homogonaga andabi mo hongo halu mana bayaleore biaga henego mitangi buwa tigua ibu Debidinaga tano wiagoha kini hora haganegoria ibubi hora hene.
2CH 24:17 Yahoiada homayagola Yuda dindini haru haga haguanerume Yoasa ko bilo mo bia halu hene.
2CH 24:18 Ani biyagola Yuda wali agalime Anduane Homogo ti mamalinaga Ngode Datagaliwabe mitangi nabi ibunaga andaha napiaga hene. Tigua dama mitangi bialu bi pupu wule mbirale gime wabinirubi dama wali mitangi bialu mbira mini Asera irame wabialu helenego ogonihondo bi pupu wiaga hene. Tigua ko ogoni biyagola Anduane Homogohanda Yuda wali agalibi Yarusaleme wali agalibi tihondo keba timbuni hene.
2CH 24:19 Keba timbuni howa Anduane Homogo ibugua ibunaga mana latagi haga agali hearume wali agalihondo ibunaga bi mana lamule ibilayagola wali agali biaru hale habe manga ho hene.
2CH 24:20 Ani biyagola Ngode Datagaliwabenaga Dinini ibugua Yahoiada igini Segaraiaha karulayagola ibu wali agali deni heyu howa lalu, Anduane Homogo Ngode Datagaliwabe ibugua bi ogodagua layago hale hadaba. Tígua ibunaga mana waharimigome tíha ko timbuni anda ibilolebirago manda bilimu. Tígua ibu erembira mialu wahalu pirimigo ai ibugua nde tíhondo ani dege biragoni, lalu lamini.
2CH 24:21 Ani lamiyagola Kini Yoasahandabi agali maru hearumebi Segaraia bo waholene nga layagola wali agali hearume Anduane Homogonaga anda ngoai haga hama wiagoria howa ibu ege to̱le̱me bo wahene.
2CH 24:22 Yoasahanda Segaraia aba Yahoiada ibugua biamogo timbuniore biaga henego mitangi nabi howa Segaraia bo waholene nga manda bini. Segaraia ibu homolene kaware hayagola ibugua bi dalimu lalu, Anduane Homogohanda tí beremigo hondowa pani ngilo hameledo, lene.
2CH 24:23 Mali gahenge hayagola Sirianaga amime Yuda dindibi Yarusaleme tanobi wai bule anda ibuwa agali haguane bibahende bo wahene. Ani bo wahowa tigua Yudalinaga dabudabu bayale damene bibahende mo yalu puwa tinaga kini Damasagasani heagohondo mini.
2CH 24:24 Siria ami agali dewaore ndo emene hangu henego Anduane Homogohanda tigua Yuda ami agali dewaore hearu bo wahelo henge mini. Ani binigo irane Yoasabi Yuda wali agalirubi tigua ti mamalinaga Ngode Datagaliwabe erembira mialu wahalu penegonaga ani bini. Ani binigonaga pani Kini Yoasahondo mini.
2CH 24:25 Wai bialu hearia Siria amime Yoasa hongo howa baya. Ani bo ngelalu mani ibunaga haru haga agali kirame ibu paliaganeni paleria pialu bo wahene. Ani binigo irane abale ibu loma binigo mo miaga Yahoiaida igini Segaraia bo wahayago mitangi bialu pani bene. Yoasa homayagola ibu Debidinaga tanoha kini hora haga wiagoria ndo mendeha hora hene.
2CH 24:26 Ibunaga haru haga agali kira ibu bo wahayago labo mbira ibu Amono wali mini Simeada berenego igini Sabada hene. Mendego Moaba wali mini Simiridi berenego igini Yahosabadi hene.
2CH 24:27 Ibu igini henerunaga bi tebi mana latagi haga agalime ibu mitangi bialu bi lenegobi Anduane Homogonaga anda ibugua arema binigobi te bibahende Kini Henerunaga Bi Te laga ngagoha gili bumaga ho nga. Yoasa igini Amasaiahanda ibu aba henegoria kini ha aribia hene.
2CH 25:1 Amasaia ibu ai̱ya Yarusaleme tano wali mini Yahoadinihanda taba henenegoria howa hama ibinigo mali pira kirani duria (25) hayagola Amasaia ibu kini pigane halu mali pira kirani dira (29) Yarusalemeni haru hene.
2CH 25:2 Amasaia ibugua Anduane Homogonaga deni mana bayale bialu henegoyu ibu mini mbiraore nawi howa bini.
2CH 25:3 Kini Amasaia ibu Yuda dindiha hongo howa haru heangi ibugua agali bu hearuhondo bidaba layadagua tigua agali haguane ala ibu aba Kini Yoasa bo wahayaru bibahende bo wahai hene.
2CH 25:4 Anigo agali haguane uruni ti waneigini bu hearu bo wa nahe helo wahene. Ibugua ani binidagoni irane bamba Anduane Homogonaga bi mana Mosesehanda gilibu wini wiago talialu ani bini. Anduane Homogonaga bi mana uruni ogodagua gilibu nga. Waneiginime mana ko biyagua ogoninaga pani aba ai̱yalahondo mialu bo waholene nawi. Anidagua dege aba ai̱yalame mana ko biyagua ogoninaga pani waneigini mia aribia halu bo waholene nawi. Mana ko birago ibuniore homelo bo waholene nga, lalu ogonidagua gilibu winigo nga.
2CH 25:5 Amasaiahanda Yuda hameiginibi Beniyamini hameiginibi agali mali pira kira (20) pene hearu mo ngoai hadaba lowa dagalene. Ani dagalai howa daosini dege handari tebira (300,000) agali uruni wai yandare humbibi yabeheru hondowa amiali daosini mbira (1,000) haru hagabi handari mbira (100) haru hagabi ti hameigini headagua tale biaga bini.
2CH 25:6 Ibugua Isaraelenaga wai biaga agali daosini dege handari mbira (100,000) biamogo bilo muni siliba timbuni genda magi tono tebira ale yolo mini.
2CH 25:7 Ani biyagola Ngode Datagaliwabenaga mana latagi haga agali mbira kini hearia ibuwa ibugua kinihondo lalu, Isaraele agali Eberaimiali o karume Anduane Homogonaga andaneha nahaganego ibugua ti biamogo nabulebirago ti í̠ heba wai bu polene nawi.
2CH 25:8 Tínaga hongoni í̠ polene manda biriyagua Anduane Homogo ibugua biamogo nabiragola í̠ waitigiru ti wayali holebira. Ngode Datagaliwabe ibugua biamogo bulenebi mo dindiha holenebi ibunaga hongome dege bibehe kagoni, lene.
2CH 25:9 Ani layagola Amasaia ibugua ladai bialu lalu, Ai muni siliba timbuniore tihondo mirugo agi buledabe, lene. Ani layago hale howa mana latagi haga agali biagome lalu, Anduane Homogo ibugua muni ngiatago halu dewa ngibehe kagonigo muni ogoni waha, lene.
2CH 25:10 Ani layagola Amasaiahanda Isaraele ami ibiyaruhondo, Tí andaga dai bidaba, laya handala ti Yuda wali agalihondo keba timbuniore halu andaga pole pene.
2CH 25:11 Ani piyagola Amasaia ibugua miniha mo hongo halu ibunaga ami heba dindi mbira mini Dindi Ulini Ibi Wiaga laga wiagoria pene. Ani puwa tigua wai bialu Idomo ami agali daosini pira (10,000) bo wahai hene.
2CH 25:12 Ibugua waitigi maru daosini pira (10,000) dege minuwa Sela tanoha haru pialu hari bareni howa he̱lope hayagola ti to̱le̱ni ibira halu bibahende homai hene.
2CH 25:13 Amasaia ani bialu heatambu Isaraele amiali Amasaia heba wai nape biaru ti andaga dai bialu howa Yuda tano maru Samaria tano Bedehorono tanola dombeniha wiaru baba wai bule anda pugupugu bini. Ani puwa tigua agali daosini tebira (3,000) bo wahalu dabudabu dewaore yalu piai hene.
2CH 25:14 Amasaia ibugua Idomoali bo wahai halu ibu Yarusaleme dai buwa Idomonaga dama mitangi bialu gime wabini wiaru mo yalu dai bini. Ani yalu dai buwa ibugua dama biaru helai howa tihondo bulu palialu bi pupu wialu inisenesi ngabilo lomabu delaga bini.
2CH 25:15 Ibugua ani biyagola Anduane Homogohanda keba howa ibunaga mana latagi haga agali mbira Amasaia hearia pu layagola ibugua Amasaia hale halu lalu, Tígua Idomoali baba wai birimigola Idomoalinaga damame tini biamogo nabinigo ai í̠na dama urunihondo bi pupu wialu kego irane aginagabe, lene.
2CH 25:16 Ani lalu heaore Amasaiahanda la pugua bialu lalu, Bi nalabe. Iname kininaga mini mandaru talebu miaga mbira í̠ habelo angi dabo helarimabe. Bi lone lariyagua i̱na í̠ bo waha loleberogo ai í̠na bi nale waha, laya. Ani layagola mana latagi haga agali biago ibugua bi nale wahole manda buwa wahabe naheyagola bi galone mbira ala lalu, Í̠na dama biaruhondo bi pupu wialu harigonagabi i̱na bi larugo í̠ hale habe manga harigonagabi ogoni birigonaga Ngode Datagaliwabe ibugua í̠ bo waholebirago manda bido, lene.
2CH 25:17 Yudalinaga Kini Amasaia ibugua Isaraelenaga Kini Yahoasa hearia bi lo pelalu lalu, Ina baba wai bimi̱ya ibidaba, lene. Yahoasa ogoni ibu Yahoahasa igini howa Yihu aguane hene. Agali bi yalu piyaru tigua Yahoasa hearia puwa Amasaiahanda bi layadagua lamini.
2CH 25:18 Ani lamiyagola Kini Yahoasa ibugua Amasaianaga bi layiyago ladai bialu bi yobage mbira tihondo ogodagua lene. Bamba Lebanono dindiha ira emene ko anihe mbira hari wiagoha heneyagome ira tamia timbuni heagohondo bi lo pelalu lalu, Í̠ wane bedago i̱ iginime dabu bilo ngibelo hamelo ko, laya. Ani lo heagola nogo gabua timbuni mbira ibu hariga ira anihe heagoha bolangua halu piyaria ibunaga geme ira anihe ogoni hengedayagola gabu hayiya, lene.
2CH 25:19 Yahoasa ibugua bi yobage ogoni lai howa bi maru Amasaiahondo ladai bialu lalu, Amasaia-o í̠na Idomoali baba wai buwa wayali hari layane hale harugo ai í̠naga bu miniha turu timbuni halu kulo howa í̠ninaga mini yaraga halu kedalo manda bu ko. Dindi ogoniha howa wai bialu wayali harigome í̠ mini lene harigo ai í̠ninaga dindi wiridagoria howa turu halu í̠ni andagani hondo holene nga. Bameore ina baba wai bule ibalu keria í̠ni mo ko halu Yuda wali agalibi heba mo ko hai holene yu anda ibuligo ema nabi hendore holene nga, lalu ladai bini.
2CH 25:20 Ani layago lelowa Amasaia ibugua bi ogoni mo wahene. Ani mo wahayago irane Amasaia ibugua Idomoalinaga dama mo tene howa tihondo bi pupu wialu hayagola Ngode Datagaliwabehanda Amasaia pani nelo ibunaga mini mo giambe hayagome ibu Yahoasanaga bi mo wahene.
2CH 25:21 Ani biyagola howa Isaraelenaga Kini Yahoasa ibugua ibunaga ami agali hearu haru halu Yuda dindiha Bede Semese tanoni puwa Amasaianaga ami agali hearu baba wai bialu hene.
2CH 25:22 Wai biaho wialu Isaraele ami biarume Yuda ami hearu bo poda hanaore hayagola Yuda ami biaru tini dindiha pora bialu ibida piai hene.
2CH 25:23 Ani piai hayagola Yahoasahanda Amasaia minu yalu ibubi ibunaga ami agali biarubi ti Bede Semese tano yu wahalu Yarusaleme tano anda pene. Anda pialu tigua tanonaga ege pabe timbuni wiagonaga panga haraba mbira mini Eberaiminaga Panga lagane henegoria howa bo gialama amuraore pialu pabe paulayagoria panga mende mini Paulagane wiagoria gialairi hene. Wai pabe gialenedago lunaga magi mida handari kira (200) agima gialai hene.
2CH 25:24 Gialai halu tanoha anda puwa Kini Yahoasa ibugua muni ngolo silibaru bibahende tanoha wiaru damene mo yai hene. Ani mo yai halu Anduane Homogonaga andaha anda puwa gabobi ndisibi bibahende Obededomo aguaneneme handaya ho hene wiaru mo yalu muni mbiraleru kini andagaha wiarubi mo yai dege hene. Ani bialu agali haguane maru Yuda dindiha hearu minu garabaya biai howa ibugua agali haguane biaru garabaya haru ha mbirale mo yayaruni ya bialu Samaria tano dai bini.
2CH 25:25 Isaraelenaga Kini Yahoasa ibu homeha Yudanaga Kini Amasaia ibu homa nabi mali pira mbirani duria (15) howa homene.
2CH 25:26 Amasaiahanda biabe maru pigane binirubi bu maro binirubi bialu henedarunaga te mbuga mbira mini Yuda Kinibi Isaraele Kinibi Henerunaga Te laga ngagoha gili bumaga ho winigo nga.
2CH 25:27 Kini Amasaia ibugua Anduane Homogonaga bi mana mo wahalu ibu Yarusaleme tanoha heagola agali maru hearume ibu homelo bo wahole ndilalu hene. Tigua bi uruni lalu ka layago hale halu Amasaia ibu Yarusaleme wahalu Lagisi tano ibida pu hene. Ani pu heagola waitigi biarume agali maru hearuhondo lamialu lalu, Kini Amasaia ibu Lagisi tanoha holebirago bo wahole pudaba, laya handala tigua Amasaia hearia puwa ibu bo wahene.
2CH 25:28 Ani bo wahayagola agali maru hearume Amasaianaga tingini nogo hosini mo paga halu Yarusaleme mo yu dai bini. Mo yu dai buwa ibu mamalirunaga homali Debidinaga tano winigoha hora hene.
2CH 26:1 Yudali bu hearume Amasaia hora howa ibu igini Usia ibu aba henegoria kini ha aribia helo dabo helene. Usia ibu mali pira mbirani waragaria (16) hayagola Yudanaga kini hene.
2CH 26:2 Ibu aba Amasaia homayagola ibu kini howa ibugua wai timbuni bialu tano mbira mini Elada winigoria ogoni waitigirunaga giha howa ibuni mo yu dai bini. Ani bialu tano ogoniha mbirale giala hole bu wiaruni mo tiga bialu lone arema bialu hene.
2CH 26:3 Usia ibu ai̱yahanda ibu taba heneneyangi howa hama ibinigo ibunaga mali pira mbirani waragaria (16) hayagola ibu kini howa ibugua mali pira duriani kira (52) Yarusaleme tanoha haru hene. Ibu ai̱ya Yarusaleme wali mini Yagolia berene.
2CH 26:4 Usia ibugua Anduane Homogo turu helo ibunaga deni howa mana bayale ibu aba Amasaiahanda bialu haga wiadagua talialu bialu haga hene.
2CH 26:5 Segaraiahanda Kini Usia mini mandaru talebu miaga heangi Usia ibugua Anduane Homogo mana bayuwa talialu biaga hene. Ani bialu heangi Ngode Datagaliwabehanda ibuhondo turu halu biamogo bini.
2CH 26:6 Ani biaga howa Usia ibugua Pilidiali baba wai bu pialu wayali howa Gada tanobi Yabane tanobi Asadodo tanobi tano uruninaga ege pabe biaru gialo wahene. Ani buwa Asadodo kawareha Pilidia dindi maruha tano gahenge wabialu ege to̱le̱ pabe bigi bini.
2CH 26:7 Ngode Datagaliwabehanda Usia biamogo timbuniore biyagola ibugua Pilidialibi Meunualibi Arebiali Gurubala tanoha henerubi bibahende bo podalu wayali hene.
2CH 26:8 Usia ibu hongo timbuniore hayagola Amonoalirume ibu andaneha howa ibuhondo dagisi muni miaga hene. Wali agali hapara para bu hearume ibu agali mini lene lalu Iyibi dindihayagi wali agali bu hearumebi ani laga hene.
2CH 26:9 Usiahanda Yarusalemeha wai mamage anda lu ege pabeni panga mini Pau Lagane Panga heagoriabi Uliyane Panga heagoriabi pabe bu mabu bini heagoriabi bialu mamage helo mo hongo hene.
2CH 26:10 Ibugua dindi ko dalu naibagahabi wai mamage haga anda luni bigi bini. Ibunaga nogo tara tara dewaore hininigo ti iba karulape nelonaga ibugua iba uli dewa dindi bare barehabi dindi bugubugu wiaruhabi tombo wigi bini. Usiahanda e hongolene hame timbuni lowa ibunaga biabe biahaga wali agalime pu mbira mini gerebi mabu barehabi dindi bayale ibane berehabi bilo helaga bini.
2CH 26:11 Usia ibunaga ami agali dewaore wai biagane mana mandabi hongohe bayaleore hene. Usiahanda ibunaga beba gili bia dagala biaga agali Yaiele Maseala libugua biabe ogoni bilo agali mbira Hananaia ibugua libu haru hene.
2CH 26:12 Ibunaga ami agali daosini dege handari tebirani karia halu handari duria (307,500) heneru tinaga haru haga agali daosini kirani handari waragaria (2,600) hene. Ti bibahende hongo taraore howa kini waitigi hearu hongo nakarulape hene.
2CH 26:14 Usiahanda ami agalihondo yandarebi humbibi mandabi tingini dambi haganebi danda timubi ege to̱le̱ ba amu holenebi miaga bini.
2CH 26:15 Yarusalemeha agali mandabi maru hearume wai pabeha howa timubi to̱le̱ timbunibi hono gerela howa ba amu holenaga gurayagu̱ ale wabiaga hene. Anduane Homogohanda Usia biamogo timbuniore biaabo hayagola ibu hongoore haabo howa dindi bibahendeha wali agalime Usia ibu mini leneore ka laga hene.
2CH 26:16 Usia ibu agali hongohe heagola ibunaga mine holeneme ibuni mo ko hene. Ibugua Anduane Homogo ibunaga Ngode Datagaliwabe yo handalu ira hagua ngabilo mini inisenesi loma binigo delaga dabuni delole Anduane Homogonaga andaha pene.
2CH 26:17 Loma binigo mo miaga agali pira halira (80) Asaraia heba Usia haruru pene.
2CH 26:18 Ani haruru puwa tigua ibuhondo lalu, Usia-o í̠na ira hagua ngabilo inisenesi Anduane Homogohondo delolene nawiorego loma binigo mo miaga Arono aguanene kamaru iname dege ani bulenaga loma bini kama. Anduane Homogonaga mana puguarigo ibugua í̠ biamogo nabulebira. Í̠ ibunaga anda loma binigo ogoriani howa abale tagira pu, lene.
2CH 26:19 Usia ibu inisenesi delagane be yalu lomabu delagane dabu kawareni heyu howa ibugua loma binigo mo miaga biaruhondo keba timbuni hene. Keba timbuni ho hearia ibunaga wanakuini ge hamua ale tagira ibini.
2CH 26:20 Ani biyagola Asaraiabi loma binigo mo miaga maru biarubi Usia handawa bialu mogo timbuni lowa ibuhondo abale tagira pu lene. Anduane Homogohanda pani ngiyago hondowa Usia ibu abaleore tagira pene.
2CH 26:21 Ge hamua ale ogoni dabi habe naheore bu haabo haganego Usia ibu kini andaga yu wahalu ibuni hangu anda mendeha hama pialu Anduane Homogonaga andahabi pobe nahe hene. Ani hayagola ibu igini Yodamahanda kininaga biabe bulene wiaru bialu kini andagabi Yuda dindi bibahendebi ibuni handaya ho hene.
2CH 26:22 Biabe maru Kini Usiahanda bialu henedarunaga Anduane Homogonaga mana latagi haga Emoso igini Aisaia ibugua mbuga mbira ngagoha gilibu winigo nga.
2CH 26:23 Kini Usia homayagola tigua ibu ge hamua ale biyago hondowa ibu kini hora hagaha ndo ibu mamaliru hora haga dindi wini wiagoha dege hora hene. Ani hora hayagola ibu igini Yodamahanda ibu aba henegoria Yuda dindiha kini ha aribia hene.
2CH 27:1 Yodama ibu ai̱yahanda taba heneneyangi howa hama ibalu ibunaga mali pira kirani duria (25) peagola ibu kini howa ibugua Yarusalemeha mali pira mbirani waragaria (16) haru hene. Ibu ai̱ya mini Yarusa ibu agali mbira Sadogo wane berene.
2CH 27:2 Yodama ibugua kini howa ibu aba Usiahanda bialu henedagua Anduane Homogo turu helo ibu deni howa mana bayale hangu wiaru bialu hene. Ibu abahanda Anduane Homogonaga andaha pialu ira hagua ngabilo inisenesi delolene manda biyadagua ibu nabini. Anigo wali agali hearu tigua nde mana ko bialu dama mitangi bialu gime wabu wiaruhondo lomabu mialu mbirale delaga bialu hene.
2CH 27:3 Yodamahanda ibunaga biabe biahaga hearuhondo bidaba layagola tigua Anduane Homogonaga anda biago daliga uyurahayagi heagonaga panga haraba mini Daliga Panga laga bu helene. Ibugua Yarusaleme tanoha dindi hombene mini Obele ege pabe ogonihayagi arema bialu mo tiga bini.
2CH 27:4 Yuda dindi harihabi ibugua tano dewa bu helalu irabuhabi ami agalinaga andabi mamage holene anda hongohe luorebi bu helaga bini.
2CH 27:5 Yodamahanda Amonoali baba wai bialu wayali hene. Ani wayali howa ibugua Amonoalime ibuhondo mali tebiranaga muni siliba genda magi tono tebirabi widi tono daosini mbirabi (1,000) widi ale mini bali tono daosini mbirabi (1,000) ngilo mo bia hene.
2CH 27:6 Yodama ibugua Anduane Homogo ibunaga Ngode Datagaliwabe mitangi bialu ibu andaneha haabo howa ibu kini hongo timbuniorehe hene.
2CH 27:7 Biabe maru binirubi wai binirubi mana maru lo winirubi Yodamahanda bialu henedarunaga te mbuga mbira mini Isaraele Yudala Kini Henerunaga Te laga ngagoha gilibumaga ho winigo nga.
2CH 27:8 Yodama ibunaga mali pira kirani duria (25) peagola ibu kini howa ibugua Yarusalemeha mali pira mbirani waragaria (16) haru hene.
2CH 27:9 Mani Yodama homayagola tigua ibu mamalirunaga homali Debidinaga tano wiagoha ibu hora hene. Hora heagola ibu igini Ahasahanda ibu aba henegoria kini ha aribia hene.
2CH 28:1 Ahasa ibu ai̱yahanda taba heneneyangi howa hama ibalu ibunaga mali pira kira (20) peagola ibu kini howa Yarusaleme tanoha mali pira mbirani waragaria (16) haru hene. Ani haru howa ibu mamali Kini Debidihanda Anduane Homogo turu helo ibunaga deni mana bayale bialu henedagua ndo ibugua bayale bulene wiaru nabi hene.
2CH 28:2 Ani nabi howa ibugua Isaraelenaga kini ala hene biarume ko bialu hagadagua bialu haga hene. Ahasa ibugua bi pupu wulenaga dama mini Bala boronosime dewa wabialu
2CH 28:3 dindi mini Hinomo Ulini wiagoha howa ira hagua ngabilo inisenesiru damahondo lomabu delaga bialu hene. Anduane Homogohanda wali agali dindi ogoniha bamba henedaruni bo taliatagi halu Isaraele wali agaliruhondo dindi ogoni mo miyagola urunime mana ko bialu henedagua ibugua ibunaga iginirubi damahondo lomabu delaga bini.
2CH 28:4 Ani bialu Ahasa ibu dama mitangi bialu mbirale gime wabinirunaga bi pupu wiaga andaruha piaga hene. Bi pupu wiaga anda uruni dindi hari wearuha wialu ira timbuni hearunaga tene gumba hearuhabi wiaga wini. Ani wiaga wiagoha howa Ahasa ibugua lomaru bo delalu ira hagua ngabilo inisenesi lomabu delaga bialu hene.
2CH 28:5 Kini Ahasahanda mana ko dewa bialu heagola Yuda wali agalimebi nde Anduane Homogo ti mamalirunaga Ngode Datagaliwabe erembira mialu pene. Ani bialu heagola Sirianaga kini heagome ibunaga ami agali haru ibalu tigua Ahasa halu ibunaga ami agali hearu bo poda hana helo Anduane Homogohanda ibilene. Wai buwa Siria tigua Yuda wali agali dewaore Damasagasa garabaya bu yalu pene. Ani peagola mani Anduane Homogohanda Lemalaia igini Isaraelenaga Kini Pega heago ibunaga ami hearu heba Yuda dindiha wai bule ibilayagola tigua ibalu Kini Ahasabi ibunaga ami agali hearubi ti baba wai bialu horo ogoningi Yuda ami agali hongoheoreru daosini dege handari mbirani pira kira (120,000) bibahende bo wahai hene.
2CH 28:7 Isaraele ami agali hongohe mbira mini Sigiri heagome Yuda dindiha agali haguane tebirali hearu homelo bo wahene. Agali haguane uruni Kini Ahasa igini Maseabi kini andaga handayaho haga Asarigamabi kini biamogo bialu haga Eleganabi uruni bo wahene.
2CH 28:8 Isaraele agalime ti hameneore Yudaliru dara nahe howa tigua Yuda wali waneiginirubi bibahende daga lamaga halu daosini dege handari kira (200,000) bibahende garabaya haru pialu dabudabu bayale damene wiarubi bibahende mo yai halu tini dalu Samaria tano dai bini.
2CH 28:9 Horo uruningi Samaria tanoha agali mbira mini Odede ibu Anduane Homogonaga bi mana latagi halu mbiwia haga hene. Isaraele ami agali biaru wai hamaha howa andaga dai biyagola Odede ibugua lola hole puwa tihondo lamialu lalu, Anduane Homogo ina mamalirunaga Ngode Datagaliwabehanda Yuda wali agalihondo keba howa tínaga giha minu ya haya. Anidagua biyagoyu tígua nde keba timbuniore howa Yuda wali agali uruni mo ko howa bo waharimigoni. Anduane Homogo ibugua mana ko lehe ogoni birimigo handaya.
2CH 28:10 Ani buwa tígua Yuda wali agalibi Yarusaleme wali agalibi tínaga garabaya biabe biaga helole hame ledemigonidago ai agua manda bu kamibe. Tígua manda bu handalu kamiria Anduane Homogo tínaga Ngode Datagaliwabenaga deni bayale tigabiore kamabe toba ho kamibe. Mana ko ngubi uruni tí hamene mbalini biaruhondo birimigo Anduane Homogo ibuhondobi ko birimidalo manda nabi kamibe.
2CH 28:11 Ainde bi o larogo hale hadaba. Áyu ogoni howa tígua wali waneiginiru garabaya bu yalu ibirimidaruni tíni hamene mbaliniru ndobe. Anigo tígua tini dalu dai bilo yupe halu pu ladaba. Ani nabirimiyagua Anduane Homogohanda tandaga halu tíhondo keba timbuniore howa tí bo wahai holebira, lalu lamini.
2CH 28:12 Isaraele agali haguane marialime Isaraele ami agalime mana ko ogoni biyadago tibi turu naheore hene. Agali uruni mini Yahohanana igini Asaraiabi Mesilemodo igini Beregaiabi Salumu igini Yahisigaiabi Hadalai igini Amasabi tigua turu nahe hene.
2CH 28:13 Agali haguane mariali uruni tigua ami agali biaruhondo lamialu lalu, Tígua wali agali uruni garabaya bu yalu oali naibalimu. Anduane Homogo deni iname ko birimagonaga ibugua inahondo keba timbuni howa pani karulape ngibehe ndobe. Ai tígua mana ogonidagua birimiyagua nde inaha genda timbuniore Anduane Homogonaga deni wulebira, lene.
2CH 28:14 Ami agali biaru tigua bi ogoni hale howa Yuda wali agali garabaya haru hayarubi dabudabu mbirale mo yu ibiyarubi bibahende yupe halu agali haguane biarubi Isaraele wali agali bu hearubi tinaga giha ya hene.
2CH 28:15 Ani piyagola agali haguane mariali biaru tigua garabaya wali agali uruni handayaho howa aga maru ami agalime wai bialu dabudabu mo yu ibiyaru aria maru wali agali aga nabi hearu bilo mo migi bini. Ani bialu ge subi karulo helo migi dege bialu ti tomobi ibabi nelo mialu dere biarubi olibe lininaga welime ha̱i̱ halu kabu bigi bini. Ani bialu wali agali tini polene hongo nahe hearu bibahende nogo dongini berelalu garabaya wali agali bibahende tini dindiha ti dameneru hearia haru dai biai hene. Tigua haru pialu Yarigo tano wiagoria ira ayage ale mini dedi dewa bu heagoria yupe halu Isaraeleali ti Samaria dai bini.
2CH 28:16 Isaraelealiru tigua Yudali bope halu peagola mani howa Idomoalirume ibalu wai lone bialu Yudali bo poda hana hene. Bo poda hana halu puwa Yuda wali agali garabaya biabe ale bialu haga helo minu yalu pene. Ani biyago hondowa Kini Ahasa ibugua bi lawia halu Asiria kini heago mini Tigilada Pilese heago ibugua biamogo bule ibabe lalu agali marume bi lo yu pelene.
2CH 28:18 Ogoningi dege Pilidiali tiguabi nde Yuda dindiha abene ni paliragohayagi tano emene hari barebare wiaruhabi dindi unurahayagibi wai bialu hene. Tigua ani anda ibuwa wai bialu Yuda wali agali bo poda hana halu Bedesemese tanobi Ayalono tanobi Gederodo tanobi ti karulene. Ani bialu Sogo tanobi Timina tanobi Gimiso tanobi dindi emene wiapara para bu wiaru heba karulai halu Pilidiali tigua tano uruni tininagaore wilo lowa mo wiai hene.
2CH 28:19 Kini Ahasa ibuhabi Yuda wali agalihabi genda ogoni anda ibiyadagoni irane Ahasa ibugua mana ko dewaore bialu Anduane Homogo erembira miyagola ibugua nde Yuda wali agali bope holenaga genda uruni henemane ani ibilene.
2CH 28:20 Mani howa Asiriali Kini Tigilada Pilese ibu Yuda dindi ibinigoyu ibugua Ahasa pele mia nabini. Ibubi ibunaga ami agali haru hayadarumebi tigua Ahasa mo ko halu hene.
2CH 28:21 Anidagua biyago hondowa Ahasa ibugua Kini Tigilada Pilese mo palia hole manda bialu ngolo damenego Anduane Homogonaga andaha wini wiarubi kini andagaha wini wiarubi agali haguane bu hearu andagaha wini wiarubi bibahende Tigilada Pilese mo miai hene. Ani miai hayagome Ahasa mbira biamogo nabini.
2CH 28:22 Kini Ahasa ibu genda timbuniore ho heangi ibugua Anduane Homogo mitangi nabi hene. Ibugua Anduane Homogo erembira mialu mana ko dewaore biaabo halu hene.
2CH 28:23 Ibugua lalu, Sirianaga dama mitangi bialu bi pupu wiaga bu wiarume Siriali biamogo biyagoni ndobe. Ainde i̱bi dama urunihondo mbirale lomabu miruyagua urunime i̱ biamogo bulebira bada, lene. Ani lo manda buwa Kini Ahasahanda Sirialinaga dama mitangi bialu gime wabini wiaruhondo mbirale lomabu mialu hene. Ibugua anidagua binidagome ibunihabi Isaraele wali agalihabi mo ko holene timbuniore anda íbu wini.
2CH 28:24 Ani bialu Kini Ahasahanda ndisi beledirubi bibahende Anduane Homogonaga andaha wiaga wiaru bo pambulo wahai hene. Ani buwa ibugua Anduane Homogonaga anda biago pangaru bibahende payu wahene. Ani buwa dama mitangi bialu bi pupu wulenaga lomabu delaga dabu Yarusaleme tano bibahendeha bu helai hene.
2CH 28:25 Ani bialu Yuda dindiha tano wiaru bibahendeha wali agalime dama mitangi bialu bi pupu wiaga anda dewa bu helene. Anda uruniha wali agalirume dama mitangi bialu mbirale gime wabini urunihondo bi pupu wialu ira hagua ngabilo delaga mini inisenesiru lomabu delaga bialu hene. Mana ko ogonibi bialu hayadagome ibuniha Anduane Homogo ibu mamalirunaga Ngode Datagaliwabehanda tandaga timbuniore anda ibilene.
2CH 28:26 Biabe maru Kini Ahasahanda bialu henego ibu kini pigane hayangi howa hama ibalu homalu wahenegonaga te damene bibahende mbuga mbira mini Yuda Isaraelela Kini Henerunaga te lo ngagoha gilibumaga ho winigo nga.
2CH 28:27 Ahasa ibu homayagola tigua ibu Yarusalemeha Debidinaga tano laga wiagoria hora hene. Kini Ahasa homayagola ibu igini Hesegaia henego ogonime ibu aba henegoria kini ha aribia hene.
2CH 29:1 Hesegaia ibu ai̱yahanda taba heneneyangi howa hama ibalu mali pira kirani duria (25) hayagola ibu kini pigane howa mali pira kirani dira (29) Yarusalemeni haru hene. Ibu ai̱ya mini Abiya ibu Segaraia wane berene.
2CH 29:2 Hesegaia ibugua ibunaga mamali Kini Debidihanda Anduane Homogo turu helo ibunaga deni mana bayale wiaru bialu haga henedagua dege ibu ani bialu hene.
2CH 29:3 Hesegaia ibu kini halu mali piganenaga ege mbira layagola ibugua Anduane Homogonaga anda panga lone dugua hai howa panga uruni bayuwa mo tiga biai hadaba lene.
2CH 29:4 Ani lowa ibugua loma binigo mo miaga hearubi Libaiali bu hearubi bibahende Anduane Homogonaga anda hane ni tagira ibiragohayagi wali agali ngoai haga hama wiagoria mo ngoai hene.
2CH 29:5 Ani mo ngoai howa ibugua tihondo lamialu lalu, Libaiali kamiru tígua tíni Anduane Homogo ina mamalirunaga Ngode Datagaliwabehondo lomabu mialu ibunaga anda ogoni ibuni deni bayaleore helo mo tiga bia halimu. Ani bialu mbirale tara anda ogoniha Anduane Homogo deni mo dodo holene damene ngane hendedemigo bibahende mo wahai halimu.
2CH 29:6 Ina mamalirume Anduane Homogo inanaga Ngode Datagaliwabenaga bi hale halu talialu bia nabi ibunaga deni mana ko dewaore bialu haga hene. Tigua Ngode Datagaliwabe erembira mialu puwa anda ibuni hagaore biagobi wahalu pu dege bini.
2CH 29:7 Ai tigua Anduane Homogonaga anda panga bibahende payai halu hale lamu daho ngelaga biaru hundi hai halu bini. Tigua ira hagua ngabilonaga inisenesi lomabu delaga biaru dela nabi wahalu Isaraele wali agalinaga Ngode Datagaliwabenaga lomabu delaga dabu heagoria loma marubi nadele wahene.
2CH 29:8 Yuda Yarusaleme wali agali bu hearu tigua mana ogonidagua bialu heagola Anduane Homogohanda ti baba keba timbuni halu waitigi bu hearu ibilalu ina mamaliru bo wahai helene. Ani bialu inanaga wali waneiginirubi minu yalu dindi taraha piai hene. Bi te ogonidagua biya layago wali agali tara tara bu hearume hale howa ti mini dege dindi halu gi hai ho hene. Mbirale uruni binidaruni ina manda biai ho kamagoni, lalu Hesegaiahanda lene.
2CH 29:10 Hesegaia ibugua laabo halu lalu, Anidagua binigo ai áyu Anduane Homogo Isaraele wali agalinaga Ngode Datagaliwabehanda ina baba lone keba nahelonaga i̱na habo nalolene bi hongohe mbira lo wulebero.
2CH 29:11 Ainde loma binigo mo miaga kamirubi Libaiali kamirubi tígua Anduane Homogonaga biabe bialu halimulo dabo helayago manda bilimu. Tígua Anduane Homogonaga deni howa ibunaga biabe ngago bialu wali agalime ibuni mitangi bialu lotuore lalu helobi ira hagua ngabilonaga inisenesiru lomabu delelobi baya hangu mo tiga bialu haru halimu. Anidagua bulene ngago manda bialu biabe uruni bialu halimu, lene.
2CH 29:12 Libaiali kininaga bi hale ho henedaruni tinaga mini uru Amasai igini Mahadabi Asaraia igini Yoelebi libu Kohada aria hene. Ani bialu Abadi igini Kisibi Yahalele igini Asariabi libu Merari aria hene. Simina igini Yoabi Yoa igini Idenebi libu Gesono aria hene.
2CH 29:13 Ani bialu agali kirali Simiri Yuelela libu Elisabana aria hene. Segaraia Madanaiala libu Asaba aria hene.
2CH 29:14 Yahuele Simaila libu Hemana aria hene. Ani bialu Semaia Usielela libu Yadudunu aria hene.
2CH 29:15 Libaiali uruni tini aria hearia puwa tigua Anduane Homogo deni tiha ko mbira para nahe holenaga biaga mana winidagua bima lalu bibahende biai hene. Tiha dodo mbira para nahe howa tigua Anduane Homogonaga mana talialu Kini Hesegaiahanda bilimu lalu lamiyadagua Anduane Homogonaga anda mo tiga bini.
2CH 29:16 Ani bialu loma binigo mo miaga hearu tigua Anduane Homogonaga anda tamuha puwa mbirale Anduane Homogo deni ko dodohe wiaru bibahende mo wahai hene. Tigua mbirale ko uruni mo yalu Anduane Homogonaga anda haneni hama timbuni wali agali ngoaiho haga wiagoria yu tagira pene. Ani bialu Libai agali biaru tigua tanoha howa yu tagira pialu Kidirono Dindi Uli laga wiagoha wahene.
2CH 29:17 Tigua Anduane Homogonaga anda bayale helo mbirale ko dodohe wiaru mo waholenaga biabe ogoni ege mbiranaga horo mbira layagola pigane bialu howa horo haliningi biabe ogoni biai halu anda haneni bima tagira ibini. Ani buwa anda ogoniha Anduane Homogo mitangi bialu lotu lolenaga anda bayale helo biabe ogoni horo haliru mende bialu hene. Ani biai halu horo pira mbirani waragaria (16) hayagola anda ogoniha bulene winigo biaiore hene.
2CH 29:18 Ani biaiore halu loma binigo mo miagarubi Libaiali biarubi tigua Kini Hesegaia berearia puwa lalu, Iname Anduane Homogonaga anda biago ibuninaga deni dodo nahe ngelonaga biabe bialu harimago bibahende biai harima. Ai loma biniru delai haga dabubi mberedi Anduane Homogohondo lomabu wulenenaga tebolo dagiabi mana ogoni bulenaga mbirale tara tarabi bibahende ibunaga deni dodo nahe bayale nga.
2CH 29:19 Ani bialu iname ndisi belediru mbirale tara tararu Kini Ahasahanda Anduane Homogo erembira mialu piyangi mo waheneru yu dai biai harima. Ani yu dai buwa iname Anduane Homogonaga deni dodo nahe ngelo mo bayale howa ibunaga andaha lomabu delaga dabu kagoria kawareni dege ngeledema, lene.
2CH 29:20 Kini Hesegaia ibugua bi ogoni hale howa horo mendengi gao layagola heyuwa Yarusalemeha agali haguane hearu mo ngoai hene. Ani ngoai ho heagola ti bibahende Anduane Homogonaga andaha pene.
2CH 29:21 Tigua nogo bulumaga wangabebi sibi wangabebi sibi iginibi meme wangabebi karia dege dege haru pene. Nogo urunime Yuda wali agalinaga ko domo wahelonagabi kinibi ibu one waneiginirubi tinaga ko domo wahelonagabi Anduane Homogonaga anda dodo nahe bayale helonagabi bo lomabu delole haru halu pene. Ani haru puwa Kini Hesegaia ibugua loma binigo mo miaga Arono aguanene bu hearuhondo lalu, Nogo uruni Anduane Homogonaga lomabu delaga dabu kagoria bo lomabu delalimu, lene.
2CH 29:22 Ani layagola tigua bulumaga wangabe karia biaru ala balu darama loma binigo mo miaga hearuhondo miyagola tigua darama mialu lomabu miaga dabu heago odo tindi tanda lalu hene. Ani buwa nogo sibi karia biarubi sibi igini karia biarubi bowa darama lomabu delaga dabu biagoriani ani dege bini.
2CH 29:23 Ani bialu meme wangabe karia biaru kini halu agali marubi hearia haru pialu tigua meme uruninaga haguaneni gi wigi bini.
2CH 29:24 Loma binigo mo miaga biaru tigua nogo meme uruni balu darama lomabu delaga dabu heleagoria odope hene. Anidagua binidagoni irane kini ibugua lalu, Loma ogoni Isaraele wali agali bibahendenaga ko domo wahelo irame dai holene lomabi Isaraele wali agali bibahende biamogo bilonaga delami̱ya, lalu layadagua ani bini.
2CH 29:25 Kini Hesegaia ibu Anduane Homogohanda ala ibunaga bi mana latagi haga agali Gada Nadanalaha howa bi mbira Kini Debidi laminigo hale howa ibugua talialu ogodagua bini. Ibugua Libaiali hearu lamialu, Tígua ngida tara tara wiaru mo yalu Anduane Homogonaga anda tamuha hole pudaba, lene.
2CH 29:26 Ani laya handala Libaiali biaru tigua Anduane Homogonaga andaha pialu ngida tara tara Kini Debidinaga ala winiru mo yu howa loma binigo mo miaga hearu tiguabi nde pilipe biguli wiaru yuwa heyu ha dege bini.
2CH 29:27 Ti ani manda manda bu heagola Kini Hesegaiahanda loma binigo mo miaga hearuhondo lamialu, Loma irame dai helonaga lomabu delolene dabu biagoriani deladaba, lene. Ani delalu heagola wali agali hearume Anduane Homogonaga mini yaraga halu iba ganaru lalu hene. Tibi loma binigo mo miaga hearubi tigua biguli pu lalu Libaiali biaru tigua ngida tara tara Debidinaga wini biaru balu hene.
2CH 29:28 Wali agali tigua iba gana lalu Libaiali tigua ngida tara tara balu loma binigo mo miaga biarume pilipe biguli pu lalu ti bibahende hearume Anduane Homogo mitangi bialu lotu lalu hene. Ani lalu heane dege loma irame dai helonaga delayago bibahende daiore hene.
2CH 29:29 Tigua loma uruni bu miai heagola Kini Hesegaia halu wali agali bu hearubi bibahendeore tigua ge duli hangaho birai howa Anduane Homogo mitangi bialu lotu mandagi lalu hene.
2CH 29:30 Ani lalu howa Kini Hesegaiabi agali haguane hearubi tigua Libaiali hearuhondo lalu, Tígua iba gana bamba Debidibi Anduane Homogonaga bi mana latagi haga mini Asababi libugua Anduane Homogonaga mini yaraga halu iba gana lolene gilibu wini uruni ladaba, lalu lamini. Ani lamiyagola Libaiali biaru tigua turu timbuni halu ge duli hangaho biruwa Anduane Homogo mitangi bialu iba ganaru lalu lotu lalu hene.
2CH 29:31 Ti ani ngoai ho hearia Hesegaiahanda wali agali hearuhondo lamialu lalu, Áyu tíni Anduane Homogohondo loma bia halu Anduane Homogonaga bo lomabu mulenebi ibuhondo ka̱i̱ lalu loma mulenebi uruni Anduane Homogonaga andaha yalu ibalimu, lene. Ani layagola wali agali tigua kininaga bi layago hale howa loma uruni yalu ibini. Ani bialu wali agali marume tini manda bialu loma irame dai helo delole nogo tara tara haru ibini.
2CH 29:32 Tigua nogo bulumaga wangabe pira karia (70) sibi wangabe handari mbira (100) sibi iginibi handari kira (200) uruni bibahende bo loma bialu irame dai helonaga haru halu ibini.
2CH 29:33 Ani bialu tigua bulumaga wangabe handari waragaria (600) nogo sibi daosini tebira (3,000) Anduane Homogonaga lomabu mulene haru halu ibini.
2CH 29:34 Loma binigo mo miaga hearu ti dewa ndo howa tigua nogo tara tara haru ibiniru bo delolene biabe timbuni ogoni bibe naheyagola Libai agali maru hearume biabe ogoni abale biai holenaga ti biamogo bialu nogo balu podo manda manda bini. Tigua ogonidagua binidago irane Libaiali tigua Anduane Homogonaga deni tini dodo nahe holenaga mana biagadago abale biai hene. Tigua ani biyadagua loma binigo mo miaga maru ti nabi heneya. Mani loma binigo mo miaga uruni tini mo tiga biai halu Anduane Homogo deni dodo nahe holene mana biai hayagola Libaiali tigua biamogo bialu nogo bo manda manda bialu hayago wahene.
2CH 29:35 Loma binigo mo miaga hearu tigua loma irame dai helonaga delalu biabe ogoni hangu ndo dewaore bini. Tigua Anduane Homogola ho gimbu bulenaga loma nogo abene wiaru podo delalu wali agalime loma irame dai helonaga yu ibiyadagua waini ibabi hambu yu ibalu biyagola urunibi odo lomabu delalu bini. Ani biai howa Anduane Homogonaga andaha dai buwa mana ala binidagua lone bialu lomabu mialu Anduane Homogo mitangi bialu lotu lalu hene.
2CH 29:36 Tigua ani bialu hayago irane Ngode Datagaliwabehanda ti biamogo biyago manda bialu Kini Hesegaiabi wali agali bu hearubi tigua ibuhondo turu timbuniore ho haabo hene.
2CH 30:1 Kini Hesegaiahanda Isaraele wali agali Yuda wali agalibi bibahendehondo lalu, Anduane Homogonaga anda kagoria Yarusalemeni íbu ngoai howa Ngode Datagaliwabehanda biamogo biyagome Bolangua Halu Penegonaga Horo mitangi bialu tomo nole ibalimu, lalu lawia hene. Ani bialu ibugua Eberaimi hameigini hearubi Manase hameigini hearubi ti bibahendehondo beba gilibu wia halu ibalimu lene.
2CH 30:2 Tigua tomo ogoni ege mbira pigane ngabu laragola dawaga winigo ai ogoningi loma binigo mo miaga maru hearu ti Ngode Datagaliwabenaga deni dodohe henego mo tiga nabi dege heagola ti nakarulape hene. Ani bialu wali agali dewa Yarusalemeni íbu ngoai nahe wini. Ani biyagola kinibi agali haguane bu hearubi tigua bi lo mbira halu horo mitangi bialu tomo nolene ogoni ege mendegonaga mo baede hene.
2CH 30:4 Kinibi wali agali bibahendemebi bi ogoni lo mbira halu karulapeda manda buwa turuho hene.
2CH 30:5 Tigua Isaraele dindi gibuni bibahendeha hearu unurahayagi Beaseba tano wiagoria howa bi loyogo lalu abene uyurahayagi Dana tano wiagoria lama tagira pene. Tigua wali agali bibahendehondo lawia halu lalu, Bibahendeore Yarusaleme íbu ngoai howa Anduane Homogo Isaraele wali agalinaga Ngode Datagaliwabe ibugua Isaraele wali agali Iyibi dindiha hearu ti ba nabi Bolangua Halu Penegonaga Horo mitangi bialu tomo nolene winigo nole íbu ngoai halimu, lalu bi loyogo lelene. Ngode Datagaliwabenaga mana lowini ngadagua Isaraele wali agali ala mbiraore hangume mana ogoni talialu ngoai hagadagua ndo ogoningi ti bibahendeore ngoai hai hene.
2CH 30:6 Kini Hesegaiabi agali haguane bu hearubi tigua bebani bi gili bialu Isaraele dindi Yuda dindibi bibahendeha yu purogo lelene. Bi bebani gilibu winidago ogodagua. Isaraele wali agali Asiria amime bo wanahe emene yu wahene kamiru tí hale hadaba. Tí bibahende Anduane Homogo tí mamali Abarahama Aisaga Yagaba imarunaga Ngode Datagaliwabe ibuni karia dai bulene nga. Ani dai birimiyagua nde ibugua tí heba mandagi haabo holebira.
2CH 30:7 Ai tínaga mamali henerubi tí aba hamenerubi tigua mana ko bialu henedagua nabilimu. Tigua Anduane Homogo tinaga Ngode Datagaliwabe kago erembira mialu hearia ibugua ti pani nelo mialu bo wahai hene. Mbirale uruni biyago tínime de handarimigoni ndobe.
2CH 30:8 Tigua Anduane Homogonaga bi layaru hale habe manga hayadagua tígua ani nabi howa ibu andaneha haabo halimu. Tígua Yarusalemeni Anduane Homogonaga anda kagoria ibalimu. Anda ogoni ibuninaga haabo helo ibugua loma bia ho helene. Tígua anda ogoniha puwa Anduane Homogo inanaga Ngode Datagaliwabe kago mitangi bialu lotu lalu holene nga. Ibugua tí baba keba halu miniha tandaga nahelo ogonidagua bulene nga.
2CH 30:9 Ai waitigime tí daluha ibalu tí one waneigini damenerubi bibahende garabaya haru piai hayago tíni manda bidami. Anigo ainde tígua Anduane Homogo ibuni karia dai birimiyagua nde ibugua waitigi uruniha dara holene mo wia haragola tigua tínaga damene one waneigini garabaya haru piyaruni golope halu pudaba laragola tíni dalu ngagoria lone dai bilolebira. Anduane Homogo inanaga Ngode Datagaliwabe kago ibu dara holene irane nawiore ngagoria howa ina dara timbuni haga ka. Ani biaga kago manda bialu tígua mini beregedalu ibuni karia dai birimiyagua nde ibugua tí haru dai bialu tíhondo lone erembira nangulebira, lalu gilibu wia hene.
2CH 30:10 Agali marume beba ogoni yalu tano maru Eberaimi hameigini dindi wiaruhabi Manase hameigini dindi wiaruhabi uyuraore puabo halu Sebulunu hameigini dindi wiaruhabi pu layadagua yu purogo lai hene. Ani puwa tigua kininaga bi ogoni wali agali bibahende hale hai helo beba daga latagi hayagola wali agali maru hearume hondo oba howa mege bialu handabe mangaho hene.
2CH 30:11 Ani biyagoyu wali agali Ase hameiginibi Manase hameiginibi Sebulunu hameiginibi uruni marume Anduane Homogo ibuni deni tini mo dindiha halu ti Yarusaleme pole manda bini.
2CH 30:12 Tini ani biyagola Ngode Datagaliwabe ibunime Yuda wali agali mini mo mbiraore hayagola tigua bi hale halu Anduane Homogonaga manani howa tomo dawa nolene nga lalu kinibi agali haguane biarumebi layadagua Yarusalemeha pene.
2CH 30:13 Ege mende horo pongo bo wiyangi wali agali dewaore Mberedi Yidi Nahe Hirinigonaga Horo mitangi bialu tomo ogoni nole Yarusalemeni íbu ngoai hene.
2CH 30:14 Ani íbu ngoaiho howa tigua Yarusalemeha dama mitangi bialu mbirale gime wabini wiaru bi pupu wulenaga nogo tara tara bo lomabu mulene dabu hearubi maru ira hagua ngabilo mini inisenesiru lomabu delolene dabu hearubi uruni bibahendeore gialo yu tagira puwa Kidirono Dindi Ulini laga wiagoha yalu pu wahai hene.
2CH 30:15 Ege mende ogoninaga horo dene (14) layagola Bolangua Halu Penegonaga Horo tomo nolenengi tigua nogo sibi igini biaru Anduane Homogohondo bo lomabu mini. Horo ogoningi loma binigo mo miaga hearubi Libai agali bu hearubi tigua Anduane Homogo deni ti dodo nahe holenaga mana wiago abale nabi henegome tini taga halu mo tiga bule pene. Mo tiga biai howa Anduane Homogo deni tiha dodo nahe bayale howa tigua loma irani dai helolenaga Anduane Homogonaga andaha pene.
2CH 30:16 Loma binigo mo miaga biarubi Libaiali biarubi ti Ngode Datagaliwabenaga mana Mosese heangi lowini wiadagua biai halu ti Anduane Homogonaga andaha pu hene. Ani puwa Libai agali biarume nogo darama yu heago yamialu loma binigo mo miaga biaruhondo miyagola tigua yuwa nogo daramame lomabu delaga dabu heagoni tandalo ba hai hene.
2CH 30:17 Wali agali dewaore Anduane Homogo deni dodo nahe holenaga mana nabi howa tigua Bolangua Halu Penegonaga Horo mitangi bialu nogo sibi igini bo lomabu mibe nahe hene. Ani heagola Libaiali hearu tigua wali agali uruninaga nogo sibi igini ba halu Anduane Homogonaga loma bia heneore helo mo loma biaho ngelaga bini.
2CH 30:18 Ani bialu wali agali dewaore nogo sibi bo loma bini wiago nalu bereneru ti Anduane Homogo deni tini dodo nahe holenaga mana wiago nabi hene. Wali agali ani nabi hayadaruni maru Eberaimi Manase Isaga Sebulunu hameiginiru aria hene. Ti ogonibi heago hondowa Kini Hesegaiahanda wali agali uruninaga bi Anduane Homogohondo ogodagua lahalu lalu,
2CH 30:19 Anduane Homogo ina Isaraele mamalirunaga Ngode Datagaliwabe-o wali agali o karu ti í̠naga deni dodo nahe holenaga mana biaga wiago nabi í̠naga andaha íbu karuni í̠ni manda bide. Anigo ti í̠ni keria ibalu í̠ mitangi bialu lotu lole hame timbuni lalu íbu kagoni. Ti ani kago handalu Anduane Homogo-o í̠ni baya buruguleore kegonigo wali agali uruninaga ko ngago domo wahabe, lalu lahene.
2CH 30:20 Ani lahayagola Anduane Homogohanda Kini Hesegaianaga bi layago hale howa wali agali uruninaga ko wiago domo wahalu ti bo wa nahe helene.
2CH 30:21 Wali agali Yarusalemeni horo karu bibahende ngoai howa Mberedi Yidi Nahe Hirinigonaga Horo ogoni mitangi bialu ngoaiho howa turu timbuni ho hene. Ani howa loma binigo mo miaga hearubi Libai agali bu hearubi tigua Anduane Homogonaga andaha ngida tara tararu mo bila holene wiaru mo yuwa Anduane Homogonaga mini yaraga halu balu hene. Ngida tara tararu tigua balu hayadaruni bi hongoheore lagarume balu hene.
2CH 30:22 Anduane Homogohondo loma bayuwa bu milonagabi lotu bayale lelonagabi Libaiali tigua biabe bayaleore bialu tigatiga haru hene. Ani bialu heago hondowa Kini Hesegaiahanda Libaialiruhondo bayale birimida lalu bi bayale lamini. Wali agali tigua horo karuni tomo ogoni nalu Anduane Homogo mitangi bialu lotu bayaleore laabo halu hene. Tigua Anduane Homogo ti mamalirunaga Ngode Datagaliwabe kago mitangi bialu ibunaga mini yaraga halu turu howa ka̱i̱ lalu hene.
2CH 30:23 Mberedi Yidi Nahe Hirinigonaga Horo karia harimigo uruni piai heagola wali agalime bi lo mbira halu lalu, Iname horo karia mendeni ogonidagua dege Anduane Homogo mitangi bialu lotu lami̱ya, lene. Ani lowa ti horo karia mendeni turu howa ani bialu hene.
2CH 30:24 Wali agali tigua bo lomabu milonaga Kini Hesegaia ibugua nogo bulumaga wangabe daosini mbira (1,000) sibi daosini karia (7,000) mialu agali haguane hearu tigua nde bulumaga wangabe daosini mbira (1,000) sibi daosini pira (10,000) lowa wali agalirume bo lomabu milonaga mini. Horo ogoningi loma binigo mo miaga hearu aria dewaore Anduane Homogo deni tini dodo nahe holenenaga mana biaga wiadagua nabi henego ai tigua mana ogoni biai hayagola tini Anduane Homogo deni bayale hene.
2CH 30:25 Loma binigo mo miaga hearubi Libaiali hearubi Yuda wali agali bu hearubi Isaraele wali agali dindi abene uyurahayagi howa ibini hearubi wali agali tara dindi tara tara wiaruha howa Yuda dindini hole íbu henerubi Isaraele dindini hole íbu henerubi ti bibahende Yarusaleme íbu ngoaiho howa turu timbuniore hai hene.
2CH 30:26 Yarusaleme tanoha wali agali bu hearume turu holene to̱lai henedagoni irane bamba Kini Debidi igini Solomono ibu kini heangi ogonidagua binigo maha nabi wiaabo henego lowa horo áyu ogoni hangu tagira ibiyada manda bialu wali agalirume turu hai hene.
2CH 30:27 Mani Libaiali hearubi loma binigo mo miaga hearubi tigua heyuwa Anduane Homogohondo lalu, Wali agali uruni biamogo bialu mo bayale habe, lalu bi lahene. Ani la hayagola nde Anduane Homogo ibugua dahuliya andaga howa loma binigo mo miagarubi Libaialirubi tigua bi layago hale howa wali agaliru mo bayale hene.
2CH 31:1 Anduane Homogo mitangi bialu lotu lalu holene horo timbuni biaru piai hayagola wali agali Yarusaleme íbu ngoai hayarume Yuda dindi tano wiaru bibahendeha purogo lai hene. Tano uruniha dama mitangi bialu ege to̱le̱ mo hanga ho wiarubi dama wali beda lo mitangi biaga mbirale gime wabini mini Asera wiarubi damanaga lomabu delaga dabu hearubi dama mitangi bialu bi pupu wule ngoai hagane anda hearubi uruni bibahendeore wali agali bu hearume bo gialobaga bialu mo wahai hene. Ani buwa tigua Yuda dindi marubi Beniyamini hameigini dindibi Manase hameigini dindibi Eberaimi hameigini dindibi bibahendeha ibaga biai halu mbirale dama mitangi bialu biaga wiago damene bibahende gialobaga bialu mo wahai hene. Ani biai howa pugu pugu bialu tini andaga dai biai hene.
2CH 31:2 Ani biyagola Kini Hesegaia ibugua loma binigo mo miaga hearubi Libaiali hearubi hameigini mbira mbira bibahende headagua mo tahaga bialu tinaga biabe ala biagadagua bialu helo helene. Tinaga biabe loma irame dai helo delolenebi Anduane Homogola ho gimbu bulenaga lomabu delaga wini. Ani bialu Anduane Homogonaga andaha ibu mitangi bialu lotu lolenebi ibuhondo ka̱i̱ lalu mini yaraga holenebi ibunaga andaha biabe bulene bibahende winigo bialu helo wini.
2CH 31:3 Ani bialu kini ibugua loma binigo mo miaga biaruhondo lamialu, Loma egerebagi alendobi bibahendengi irame dai helo delolenebi Sabada horongi loma bialu bo delolenebi Ege Pigane Ngabu laragola horo timbuni tagira ibirangi loma bialu bo delolenebi horo timbuni lotu lolene maru tagira ibirangibi Anduane Homogonaga mana lowini ngadagua bule nogo bulumagarubi sibirubi memerubi i̱ninaga pabeha karu aria balimu, lalu lamini.
2CH 31:4 Ani bialu kini ibugua Yarusaleme wali agali hearuhondo lamialu, Loma binigo mo miaga karumebi Libai agali karumebi tinaga biabe Anduane Homogonaga mana ngagome bibe lalu lowini ngadagua bilo tígua ti tomo nelonaga yalu ibugu bilimu, lene.
2CH 31:5 Kini ibugua bi ogoni Yuda dindi bibahendeha loyogo layagola wali agali hearume widi lini bayaleore dewabi waini ibabi olibe lininaga welibi mone ibanebi tomo tara tara ti mabuha hayadaru alebi uruni bibahende loma binigo mo miaga hearume Libaiali hearumebi ti nelonaga yu ibugu bini. Ani bialu tigua tinaga tomo uruni pihalu tale buwa pinigo loma binigo mo miaga hearubi Libaiali hearubi ti nelo mini.
2CH 31:6 Ani bialu wali agali Yuda dindiha bu hearu tigua bulumaga pinigobi sibinaga pinigobi haru ibugu bini. Ani bialu tinaga dabudabu wiaru pihalu tale buwa pinigo Anduane Homogo tinaga Ngode Datagaliwabenaga loma biaho ngelaga bini. Ani buwa tigua yalu ibuwa dewaore wua haealadaga helene.
2CH 31:7 Wali agalime mbirale uruni ege teboneni howa yu ibalu wiatagoha dege bialu heane ege kane pene.
2CH 31:8 Mani Kini Hesegaiabi agali haguanerubi tigua wali agalime mbirale yu íbu wiyadaru hondowa turu timbuni halu Anduane Homogonaga mini yaraga halu Isaraele wali agalihondo turu timbuni howa ka̱i̱ lalu hene.
2CH 31:9 Ani bialu howa kini ibugua loma binigo mo miaga hearubi Libaiali hearubi tihondo hale halu, Tígua tomo dewaore o ngamigoni agua binibe, lene.
2CH 31:10 Ani hale hayagola Loma Binigo Mo Miaga Haguane Timbuni Sadogo aguanene Asaraia ibugua ladai bialu lalu, Anduane Homogohanda ibunaga wali agali biamogo bialu mo bayale hayagola tigua tomo dewaore Anduane Homogonaga andaha bu yalu ibiya. Tomo uruni aria dewaore iname nalu harimago ainde nai habe nahe ngamagoni ndobe. Ani binigo áyu tomo dewaore bu payabu ngagoni, lene.
2CH 31:11 Kini Hesegaia ibugua bidaba layadagua agali biabe biaga hearume Anduane Homogonaga andaha mbirale mbirale do holenenaga tamu hobane maru bu helene.
2CH 31:12 Ani heleagoha tigua tomo dewa biaru wali agalime mbirale maru Anduane Homogohondo lomabu mini wiarubi bibahende tamu hobane bu helaga biyadaruha mo wigi bini. Ani buwa tigua agali mbira Libaiali mini Konanaia henego ibugua handayaho helo helalu ibu hamene mende Simaihanda Konanaia biamogo bilobi helene.
2CH 31:13 Ani helalu Kini Hesegaiabi Anduane Homogonaga anda handayaho haga haguane mini Asaraiabi libugua Libaiali pira dabalu Konanaia Simaila biamogo bilo dabo helene. Agali uruni mini Yahiele Asasaia Nahada Asahele Yarimodo Yosabada Eliele Isimagaia Mahada Benaia layaru dabo helene.
2CH 31:14 Ani bialu Libaiali mbira ibu Anduane Homogonaga anda panga haraba ni tagira ibiragohayagi wiago handayaho haga mini Imina hene. Agali ogoni igini Korehanda wali agali hearume tini hameme mbirale Anduane Homogohondo lomabu yalu ibiyagobi wali agalime mbirale maru Anduane Homogonaga loma bia hene wiabagiho wiarubi ibugua mialu loma binigo mo miaga hearu mo tahaga bilo dabo helene.
2CH 31:15 Loma binigo mo miaga maru hearu tinaga tanoha Libaiali maru hearu tigua biabe ogoni bulene wiago Kore biamogo bialu mbirale bu wiaru mo tale bia haga bialu hene. Libaiali uruni mini Idene Miniamini Yasua Semaia Amaria Segania layaru hene. Tigua loma binigo mo miaga tano uruniha hearu tomo talebu miai hayagola igiri emene agaliyaguabi bibahende karulape yaiore hene.
2CH 31:16 Loma binigo mo miaga uruni ti igini mali pira tebira (30) piyagua igiri uruninaga mini loma binigo mo miaga dege helo mini gilibu wiagagoria gilibu winiru tigua Anduane Homogonaga andaha biabe bulene winigo bialu haga heneyagua nde tibi tomo nelo talebu ta hai haga hene.
2CH 31:17 Tigua loma binigo mo miaga hearunaga mini gilibu wialu howa tini hameigini hama ibidadagua mandagi dindiha gilibu wiaga wini. Ani biagadago irane biabe bulene wirangi tini damene baba mandagi bilonaga mini mandagi gilibu wini. Libaiali uruni ti igiri daliahe mali pira kira (20) bolangua hayagua nde loma binigo mo miaga tinaga biabe biaga mini gilibu wiagoha gilibu wigi biaga wini.
2CH 31:18 Agali uruni tini mini gilibu wiagoha ti one waneigini heba mandagi gilibumaga ho wiaga hene. Ani bialu wali agali uruni tini Anduane Homogo deni dodo nahe holenaga mana biaga wiaru biaabo haga hene.
2CH 31:19 Loma binigo mo miaga Arono aguanene maru hearu ti nde loma binigo mo miaga maru hearunaga tano wiagoria kaware palia para para biaruhondo loma binigo mo miaga marume tomo mo tale bia haga hene. Loma binigo mo miaga o biaru tinaga mini Libaialinaga mini gilibu wini wiagoha dege gilibu winirubi ti tomo nelo talebu miaga dege hene.
2CH 31:20 Kini Hesegaiahanda Yuda dindi bibahendeha mini bilinahe howa mana tigabi bayale hangu biaabo halu Anduane Homogo ibunaga Ngode Datagaliwabenaga hame leadagua talialu haga hene.
2CH 31:21 Kini Hesegaia ibugua bialu henego bibahende Anduane Homogonaga andaha biabe bulene wiago biaabo halu Mosese heangi mana lowinigo wiadagua biai halu ibunaga miniha Ngode Datagaliwabenaga hame leago baya hangu talialu hole miniha hongo timbuniho hene. Anidagua bialu henegome ibunaga biabe bialu hayaru bibahende bayale hai hene.
2CH 32:1 Hesegaiahanda Anduane Homogonaga andaneha howa mana baya hangu bialu heangi Asirianaga Kini Senageribi ibugua ibunaga ami hearu haru ibalu Yudali baba wai bialu Yuda dindinaga tano wai pabe hongohe bini wiaru karulai hene.
2CH 32:2 Senageribi ibu Yarusalemeha wai bule anda ibulebirago manda buwa Hesegaiahanda ibunaga agali haguanerubi ami haru hagarubi ti bi lo mbiraore howa Senageribinaga ami agalirume Yarusaleme hapara haragola iba nolene nawilo tagirahayagi iba payape hole lo manda bini. Tigua agali dewa Yarusaleme howa tagira haru pialu iba duguaga bibahende paya pai haga bini.
2CH 32:5 Ani buwa tigua Yarusalemenaga ege pabebi mo hongo halu arema bigi bialu hene. Pabe ogoriani mamage haga anda lu bialu ege pabe mendebi bini. Yarusaleme tanonaga pabe ni tagira ibiragohayagi uli mogo binidagoria mo hongo helo arema bini. Hesegaiahanda agali mugubeyi hearuhondo, Tígua yandare humbibi wabidaba, lene.
2CH 32:6 Kini ibugua Yarusaleme agali bibahende hearu haru helo ami agali haru hagaru ti bibahende ngoai haga hama tanonaga panga haraba kaware wiagoria mo ngoai hene. Mo ngoai howa tihondo lalu,
2CH 32:7 Tí bibahende hongo howa mini dunubia ho halimu. Asirianaga kinibi ibunaga amibi urunihondo gi holene nawi. Tinaga hongo ina kamarunaga hongo kamagobi ndo ti nakarulapeore ka.
2CH 32:8 Ti tininaga hongoni ibulebirago iname Anduane Homogo inanaga Ngode Datagaliwabenaga hongo timbunioreni howa wai bimi̱ya kamagoni, lene. Kini Hesegaiahanda bi ogoni layago hale howa agali bibahendeme miniha dungulo hene.
2CH 32:9 Asirialinaga Kini Senageribi ibunaga ami agali dewaore heba Lagisi tanoha howa ibugua ibunaga ami haru haga agali maru hearuhondo, Yarusaleme pudaba, lalu Hesegaiabi Yuda wali agali ibu heba Yarusalemeha ngoai ho hearubi tihondo bi mbira lawia hene. Tigua Yarusaleme ibuwa Hesegaiabi Yuda wali agalibi tihondo lalu,
2CH 32:10 Senageribi i̱ Asirialinaga Kini kogoni. Tínaga hongo abiale howa i̱ andaneha holene hame nale kamibe. Bi bame lo payapaya beremigome wai bialu agali balu wayali hagabe. Yarusalemeha karulape halu tí biamogo bulene mbira ai ibulubadalo manda buwa i̱hondo mine halu kamibe.
2CH 32:11 Hesegaiahanda tíhondo lalu, Anduane Homogohanda tí biamogo biragola tígua ina bope holeberama, larago lolene nawi. Ibugua tí mo hondo haragoni. Tí bibahende Yarusalemeha howa iba hinabi nane halu homoleberemi.
2CH 32:12 Hesegaia ibunime Anduane Homogonaga lotu anda hearu bo gialalu lomabu delaga dabu hearubi gialo wahai hayagoni. Ani bialu ibugua Yuda wali agali bu hearu bibahende Yarusaleme ibai halu lomabu delaga dabu mbiraore ogoni hanguni ira hagua ngabilo mini inisenesi lomabu delalimu layagoni.
2CH 32:13 I̱nabi i̱naga mamalirumebi wali agali tara tara palima pedaru bo wahai halu wayali haga harimago hale naharimibe. Ani birimago wali agali biaru tinaga damame ti pele miyagola Asirialinaga kini i̱ kogome ti bo wa naharuyabe.
2CH 32:14 Dindi dewaoreha tininaga dama henedaru helowa ina baba wai birimago ai tinaga dindi bayale ngelo tinaga dama urunime ti biamogo bialu ina bope nahego. Anigo Yarusaleme wali agali tí Anduane Homogohanda biamogo biragola tígua aginaga ina bope holeberemalo manda bu kamibe.
2CH 32:15 Hesegaiahanda tí mo hondo holigo ibunaga bi mo henene nahalimu. Wali agali tara tara hearume tinaga dama mo tene howa dama urunime ti biamogo nabibeheyagola ina wayali harima. Ogonigo tínaga Ngode Datagaliwabe ibunimebi tí biamogo bibe nahe holebira, lalu lamini.
2CH 32:16 Asiriali haru haga agali biarume Anduane Homogo Ngode Datagaliwabenaga minibi ibunaga biabe bia haga Hesegaianaga minibi mege timbuniore bigi bini.
2CH 32:17 Senageribi ibugua beba gilibu wia henedago Anduane Homogo Isaraele wali agalinaga Ngode Datagaliwabe mo yo hondowa lalu, Wali agali tara taranaga damame ti mo wibe naheyagola i̱na bolangua halu wayali harugonigo ainde Hesegaianaga Ngode Datagaliwabe ibunibi i̱naga giha howa ti mo wibe nahe holebira, lalu Senageribihanda gili bini.
2CH 32:18 Asiria ami haru haga agali biarume wali agali wai pabeni hearu gi hai halu ba dai nabilonaga bi uruni hale helo Hiburu bi lalu hongo howa ga̱ lalu lene.
2CH 32:19 Agali biarume bi ogoni layago Yarusaleme wali agalinaga Ngode Datagaliwabe mege bialu wali agali tara taranaga dama gime wabiniru ale dege mitangi bialu lene.
2CH 32:20 Tigua ani layago hale howa Kini Hesegaia ibubi Emoso igini mana latagi haga Aisaiabi libugua Ngode Datagaliwabehanda Yarusaleme wali agali biamogo bilo ibuhondo bi lalu hene.
2CH 32:21 Libugua ani layago hale halu Anduane Homogo ibugua dahuliyali mbira ibilayagola dahuliyali biagome Asirianaga amibi tinaga haru hagabi bibahendeore bo wahai hene. Ani biyagola Kini Senageribi ibu taga timbuniore halu Asiria dindi dai bini. Ani daibu howa horo mbirungi ibugua ibunaga dama mitangi bialu gime wabini bi pupu wiaga anda heagoha anda puwa ogonihondo bi pupu wialu hearia ibu igini maru hearu tigua wai biagane ayu tibu yiarume Senageribi dibu homelene.
2CH 32:22 Ani binigo Kini Hesegaia halu Yarusaleme wali agalibi ti Asirialinaga Kini Senageribibi waitigi maru henerubi tinaga giha hearia Anduane Homogohanda ti biamogo timbuniore bialu mo wigi bini. Ani biyagola ti luore wai nabi bayaleore hene.
2CH 32:23 Wali agalime dindi tara taraha howa mbirale mbira mo yalu Anduane Homogohondo lomabu miaga bialu Kini Hesegaiahondobi mbirale mbiraleru migi bini. Ogoningi howa wali agali hameigini dindi tara taraha hearume Hesegaia ibu agali timbuni mini leneore ka lalu hene.
2CH 32:24 Horo uruningi Kini Hesegaia ibu warago timbuniore bowa homabeheore wini. Ani wuwa ibugua Anduane Homogohondo bi layagola Anduane Homogohanda hale howa ibu dabi holebira manda bilo manane mbira walia hene.
2CH 32:25 Ani biyagola ibugua Anduane Homogohanda ibuhondo bayale bigi biyaru mitangi nabi mine haga hene. Mine hayago hondowa Anduane Homogohanda turu nahe howa Hesegaiabi Yuda wali agalirubi Yarusaleme wali agalirubi ti bibahendeha mo ko holene anda ibilene.
2CH 32:26 Maniore Hesegaiabi wali agalirubi tini mo dindi halu, Iname nakarulapeore birimada, layagola Anduane Homogo ibugua Hesegaia kini heangi pani namini.
2CH 32:27 Hesegaia ibu homogo timbuniore hayagola wali agali bibahende hearume ibu mini leneore ka manda bini. Ibunaga ngolo silibarubi ege to̱le̱ tara tara muni timbunime minirubi mbirale padua ale nga bayale tara tara biagarubi wai humbirubi mbirale bayale tara tara muni timbunime miagarubi uruni bibahende wiai holenaga do hagane anda dewa bini.
2CH 32:28 Widibi waini ibabi olibe lininaga welibi mo wiagane anda bialu nogo bulumaganaga anda timbunirubi nogo sibirunaga pabe dewarubi bu helaga bini.
2CH 32:29 Ani bu heleagola Ngode Datagaliwabehanda Hesegaia biamogo biaabo hayagola ibugua nogo sibi memerubi bulumagarubi yolo bigi bialu tano dewarubi mo wigi bini.
2CH 32:30 Biabe maru Kini Hesegaiahanda bialu henedaru mbira ibugua iba duguaga mini Gihono Yarusaleme tanoha iba dadabu yalu anda ibulenaga gana timbuni tano pabe tagiraha howa dindi andaneha gana wayalu tamuha anda ibini. Ibugua bibahende biyaru bayale hangu bini.
2CH 32:31 Babilono dindinaga haru haga agaliru ti Ngode Datagaliwabehanda agalime nabiagane ale mbira Yuda dindiha biya layago hale howa tigua agali maruhondo Kini Hesegaia hearia bayuwa hale hole pudaba lene. Tigua hale hayagola Ngode Datagaliwabehanda Kini Hesegaia ibugua agi birabe hondole ibuhondo bi mbira nale helene.
2CH 32:32 Biabe maru Kini Hesegaiahanda bialu henedarubi ibugua Anduane Homogo mitangi bialu ibu andaneha howa binirubi Emoso igini Anduane Homogonaga mana latagi haga Aisaianaga mbuga ngagoha gilibu wialu mbuga mende Yuda Isaraelela Kini Henerunaga Te lo ngagoha gilibumaga ho winigo nga.
2CH 32:33 Hesegaia ibu homayagola tigua ibu tingini dindi hombene Kini Debibinaga aguanene hora heagoria hora hene. Yuda wali agalirumebi Yarusaleme wali agalirumebi dugu bialu Hesegaianaga mini yaraga halu hene. Hesegaia igini Manase ibu aba henegoria kini ha aribia howa Yuda dindiha haru hene.
2CH 33:1 Manase ibunaga mali homberia (12) hayagola ibu kini pigane hene. Ani howa ibu kini heane Yarusaleme dindiha mali pira duriani duria (55) haru hene.
2CH 33:2 Manase ibugua mana bayale wiaru nabi mana ko ngubi bamba wali agali henerume biyagola Anduane Homogohanda uruni ti dindi ogoriani howa bo taliatagi halu Isaraele wali agaliru tihondo mo minigo mana odaruni biaga wiadagua dege Manase ibugua bialu hene. Mana ko uruni bialu hayadagome Anduane Homogonaga deni howa ko timbuniore bini.
2CH 33:3 Bamba ibu aba Hesegaiahanda damahondo bi pupu wiaga wiaruni bo gialo wahai henego anda uruni ibugua lone mo tene howa biadai bigi bini. Mbirale dama mitangi bialu gime wabini mini Bala laga wiagonaga loma bo delaga daburubi bu hela bini. Ani buwa dama wali beda mitangi bialu gime wabini mini Asera wabu wialu bini. Urunidagua bialu howa ibugua yakundi bu karuhondobi bi pupu wialu haga hene.
2CH 33:4 Ani wialu howa ibugua dama mitangi bialu gime wabini uruninaga loma biniru bo delaga dabu Anduane Homogonaga anda heagoha bu helalu bini. Anigo bamba howa anda ogoninaga Anduane Homogohanda bi ogodagua lowini. Yarusalemeni anda timbuni o kagoni wali agalime i̱ni hangu mitangi bialu lotu laga karu tinaga ka lowinigo nga.
2CH 33:5 Anigo Manase ibugua Anduane Homogonaga anda pabe tamuhayagi hama timbuni kira wiagoria yakundi bu hearuhondo bi pupu wule lowa lomabu delaga dabu bu helaga bini.
2CH 33:6 Ibugua loma biniru bo delagadagua dindi uli mini Hinomoha ibu iginiru dabu ogoriani bo delene. Ani buwa ibugua agali homenenaga dininime ibu biamogo bilo olalu agali de gandeba handaga hearume ibu biamogo bilo olalu gamu gamu tara tara wiarubi bialu hene. Manase ibugua Anduane Homogonaga deni howa mana koorene ko dewaore bialu haabo heagola ogonime Anduane Homogo mo tandaga hayagola keba hene.
2CH 33:7 Anidagua bialu Manase ibugua dama mitangi bialu mbirale gime wabiyago mo yu ibuwa Anduane Homogonaga anda biagoha mo wini. Bamba Anduane Homogohanda Debidi ibu igini Solomonola libuhondo lamialu lenego ogo, I̱na Isaraele hameigini homberia (12) karunaga dindi handai howa Yarusaleme tanoha anda o kagoni i̱ninagaore helo dombeneha loma biaho helarogoni. Horo bibahendengi Isaraele wali agali bu kamiruni tígua ibalu i̱ mitangi bialu i̱ni hanguhondo lotu lalu halimulonaga helaro.
2CH 33:8 Anigo i̱naga wali agali bu kamirume i̱na bi langerogo bia i̱naga biabe biahaga agali Mosese ibugua mana lowinigo talialu bialu ha birimiyagua nde tí dindi ogo i̱na bamba tínaga mamaliruhondo mo mirugoria howa bo taliatagi nahe ogoriani haabo halimulo helolebero, lalu Anduane Homogohanda lene.
2CH 33:9 Manase ibugua wali agali mana ko wiaru bia timbu helo haru pu tara halu hene. Mana ko bamba wali agali henerume biyagola Anduane Homogohanda uruni ti dindi ogoriani howa bo taliatagi halu Isaraele wali agaliru tihondo mo mini. Ala hene urunime mana ko biaga winidaru nira dege lowa Manase halu Yuda wali agali tigua ko timbuniore bialu hene.
2CH 33:10 Kini Manasehanda mana ko urunidagua bialu heago hondowa Anduane Homogo ibugua ibunaga bi mana latagi haga bu hearuha howa bi layagola Manasebi Yuda wali agali tibi hale howa bia nabi hene.
2CH 33:11 Tigua ani nabiyagola Anduane Homogohanda Asiriali ami haru haga hearume ti Yuda dindi anda ibilalu Manase minilo henge mini. Tigua Manase minuwa ibunaga nguiha hugu helalu pu senime huba buwa Babilono dindi haru pene.
2CH 33:12 Manase tandaga timbuni nalu howa ibu mini beregedalu mini mo dindi howa ibugua Anduane Homogo ibunaga Ngode Datagaliwabehondo biamogo bibe lene.
2CH 33:13 Ani layagola Anduane Homogohanda Manase heneneore mini beregedayago hondowa Manase ibu kini hadai bilo Yarusaleme haru dai bini. Ani biyago hondowa Manase ibugua Anduane Homogo ibu Ngode Datagaliwabeore ka manda bialu bayale hene.
2CH 33:14 Mani Manasehanda Yarusalemenaga ege pabe ni tagira ibiragohayagi bu helenego arema bialu daliga bima irigi hene. Pabe arema binigo dindi ulini Gihononaga iba duguagagoha howa buyu pialu pabe panga haraba mini Wena Panga lagago bolangua halu hari mbira mini Obele bu mabu bialu mo tiga bini. Yuda dindinaga tano ege pabe bu mabu bini wiaru bibahendeha Manasehanda ami agali haru helo helaga bini.
2CH 33:15 Anduane Homogonaga andaha dama mitangi bialu mbirale gime wabini helearubi dama wali beda mitangi bialu ira lu ibunime abale wabu helenegobi uruni Manase ibugua bo gialo wahene. Ani buwa ibugua damahondo mbirale lomabu delaga dabu Anduane Homogonaga anda tagiraha kaware binirubi Yarusalemeha mbira mbirahayagi binirubi bo gialowa Yarusaleme tagirahayagi wahene.
2CH 33:16 Ani buwa Manasehanda Anduane Homogonaga lomabu delaga dabu arema bialu Anduane Homogola ho gimbu bulenenaga bo lomabu delolenebi ibuhondo ka̱i̱ lolenaga loma bialu bo delolenebi migi bini. Ibugua Yuda wali agali bibahendehondo lalu, Tígua Anduane Homogo Isaraele wali agalinaga Ngode Datagaliwabe mitangi bialu ibuni hanguhondo lotu lalu halimu, lene.
2CH 33:17 Ani layagola wali agalime hale howa ani bialu hene. Tigua loma maru Anduane Homogonaga andaha ndo tini daluha howa tininaga lomabu delaga dabu winiruha loma bialu bo delaga bialu Anduane Homogonaga dege bo delaga bini.
2CH 33:18 Kini Manasehanda biabe maru bialu henedarubi ibunaga Ngode Datagaliwabehondo bi lenegobi Anduane Homogonaga mana latagi haga henerume Anduane Homogo Isaraele wali agalirunaga Ngode Datagaliwabe minini howa ibuhondo bi lenerubi mbuga mbira mini Isaraele Kini Henerunaga Te lo ngagoha gilibumaga ho winigo nga.
2CH 33:19 Te maru Manase ibu Ngode Datagaliwabehondo bi lenegobi Ngode Datagaliwabehanda ladai binigobi Manase mini beregeda nabi heangi mana ko damene ibugua bialu henedarubi dama dewahondo bi pupu wule anda binirubi dama wali mbira mini Aseranaga ira luni helaga binirubi bibahendeore mbuga mbira mini Anduane Homogonaga Mana Latagi Haga Agali Henerunaga Te lo ngagoha gilibu winigo nga.
2CH 33:20 Manase homayagola ibu kini anda pabe bu yaanda hene wiagoha hora hene. Ani hora hayagola ibu igini mini Amono ibu aba henegoria kini ha aribia hene.
2CH 33:21 Amono ibu ai̱yahanda taba heneneyangi howa hama ibinigo mali pira kirani kira (22) peagola ibu mali kira hanguni Yarusalemeni kini hene.
2CH 33:22 Amono ibugua mana ko timbuni ibu aba Manasehanda Anduane Homogonaga deni bialu hene wiadagua dege bialu hene. Ibugua mana ko ngubi ibu abahanda biaga wiadagua bialubi mbirale dama mitangi bialu gime wabini wiaruhondo ibu abahanda bi pupu wialu henedagua dege bialu hene.
2CH 33:23 Ibugua ibu abahanda mini beregedalu mini mo dindi howa Anduane Homogohondo mini mbiraore wiyadagua nawi hene. Ani nawiyagome ibu koore bia tago halu ko ala biniru bolangua hene.
2CH 33:24 Horo mbirungi Amononaga agali haguane bu hearu tigua Amono homelo bo wahami̱ya lalu henge hai bialu hene. Ani bialu howa mani Amono ibu kini andaga berearia anda puwa tigua ibu homelo bo wahene.
2CH 33:25 Ani biyagola Yudali hearume agali haguane Amono homelo bo wahaga biaru bibahende minalu tinibi homelo bo wahai howa tigua Amono igini Yosaia ibu aba henegoria Yuda wali agalinaga kini ha aribia hene.
2CH 34:1 Yosaia ibunaga mali halira hayagola ibu Yuda dindiha kini pigane howa ibugua mali pira tebirani mbira (31) Yarusalemeni Yuda wali agali haru hene.
2CH 34:2 Yosaia ibugua Anduane Homogonaga deni howa mana bayale hangu bialu haabo haga hene. Ibugua mana bayale tigabi bamba ibu mamali Kini Debidihanda bialu hagadagua bialu haabo hene. Ani bialu ibugua Anduane Homogonaga bi mana hale halu hongo howa talialu bialu haabo haga hene.
2CH 34:3 Yosaia ibu ibunaga mali halini layagola kini pigane hene. Ibu igiri emene ale dege heane mali nguini (15) hayagola ibugua ibu mamali Kini Debidinaga Ngode Datagaliwabe mitangi bialu lotu lalu hene. Ani bialu ibuni kini howa mali homberia (12) hayagola ibugua agali biabe biaga hearuhondo lamialu lalu, Tígua Yuda dindi bibahendehabi Yarusaleme bibahendehabi ibaga biai halu mbirale dama mitangi bialu gime wabini ngarubi bi pupu wulenaga anda bu karubi dama wali beda mitangi buwa mbirale gime wabini mini Aseranaga ira luni karubi maru tara tara bi pupu wule aeaneme wabinibi irame wabinibi ngaru bibahende bo gialo wahai halimu, lene.
2CH 34:4 Ibugua bia layadagua agali biabe biaga uruni tigua bi pupu wule gime wabini mini Balanaga lomabu delaga dabu hearubi ibunaga ira hagua ngabilo mini inisenesi lomabu delaga dabu kawareni bu helearubi bo gialo wahai hene. Tigua dama wali beda lo mitangi bialu mini Aseranaga ira luni wabu wiarubi dama mitangi bialu bi pupu wiaga maru wiarubi bibahendeore bo gingirulobaga bialu be abalu helene. Ani biai halu be abalu uruni mo yalu tagira puwa wali agali bamba mbirale urunihondo bi pupu wialu haga henedaru ti hora hene homalidagoriani bape hene.
2CH 34:5 Ani bialu ibugua dama mitangi bialu bi pupu wiaga uruninaga loma binigo mo miaga homenerunaga kuni wiaru mo yu puwa tininaga lomabu delaga dabu hayadagoriani delaga bini. Ibugua mbirale uruni biai hayagola Yuda dindibi Yarusalemebi Ngode Datagaliwabe deni dodo nahe lone bayale wini.
2CH 34:6 Kini Yosaia ibugua ani biyadagua dege tano maru Manase hameigini dindihabi Eberaimi hameigini dindihabi Simeono hameigini dindihabi piai halu uyuraore Nabadali hameigini dindihabi dama mitangi bialu bi pupu wiaga dindi waitigime bo giala togolene wiaruha lomabu delaga dabu hearu bo gialo wahaiore hene.
2CH 34:7 Ibugua Isaraele dindi uruni bibahendeha ibaga biai halu damanaga nogo mbiraleru bo lomabu delaga dabu hearubi dama wali beda mitangi buwa bi pupu wiaga Aseranaga ira luni wabu wiarubi dama mitangi bialu gime wabini maru wiarubi bibahende bo gingirulobaga bialu be abalu helene. Ani bialu ira hagua ngabilo inisenesi lomabu delaga dabu hearubi ani dege biai hene. Ibugua biabe uruni biai halu Yarusaleme dai bini.
2CH 34:8 Yosaia ibu kini heane dege mali pira mbirani halira (18) peagola dama mitangi bialu bi pupu wiaga wiaru bibahende bo gialo wahai howa Yuda dindibi Anduane Homogonaga andabi Anduane Homogonaga deni dodo nahe lone bayale wiadai bilene. Ani bialu ibugua Asalia igini Sabanabi Yarusaleme hondo haga Maseabi agali beba gili bia dagala biaga Yoahasa igini Yoabi tihondo lalu, Anduane Homogonaga anda arema bule pudaba, lene.
2CH 34:9 Libaiali maru Anduane Homogonaga anda panga mamage haga hearu tigua wali agalime Manase hameigini howabi Eberaimi hameigini howabi Isaraele dindi howabi Yuda dindi howabi Beniyamini hameigini dindi howabi Yarusaleme howabi muni migi bini Anduane Homogonaga andaha mo winidaruni agali tebira biarume Loma Binigo Mo Miaga Haguane Timbuni Hiligaia heagohondo mo mini.
2CH 34:10 Ani miyagola Hiligaia ibugua Anduane Homogonaga anda mo ko hene wiaru agali maru lone arema biyaru yolo bilo agali biabe handayaho haga tebira biaru mo miya.
2CH 34:11 Tigua muni ogonime irame anda biabe biaga hearubi ege to̱le̱me anda biabe biaga hearubi ti yolo bialu irarubi ege to̱le̱rubi Yudanaga kini ala henerume Anduane Homogonaga anda ogoni nagalone hayagola ko henego arema bilonaga yolo milo muni mini.
2CH 34:12 Agali anda bialu haga hearu ti mini tigabiore howa biabe bayale bialu hene. Biabe uruni haru helo Libai agali maria dabene Merari hameigini howa Yahada Obadaiala dabalu Kohada hameigini howa Segaraia Mesulamala dabene. Libai agali uruni tigua iba gana haru helo ngida tara tarabi pilipe tabagebi mugubeyi hene.
2CH 34:13 Libai agali marume anda ogoni arema bulenaga ege to̱le̱ irabi yalu ibilo haru haga halu marume biabe uruninaga bebani gili bigi bialu marume anda harabani mamage haga hene.
2CH 34:14 Loma Binigo Mo Miaga Haguane Timbuni henego mini Hiligaia ibu Anduane Homogonaga anda hobane muni do hayagoha howa muni mialu hearia ibugua Anduane Homogonaga bi mana Mosese heangi lowinigonaga mbuga mbira wiaria handa walia hene. Handa walia howa ibugua beba gilibia dagala biaga agali Sabana hearia puwa lalu,
2CH 34:15 Anduane Homogonaga anda biagoha mbuga mbira bi mana Mosese heangi lowinigo wiaria handa walia harugo o ngero, lalu mini.
2CH 34:16 Ani miyagola Sabanahanda mbuga ogoni kini hearia yalu puwa ibuhondo lalu, Í̠na bidaba laridagua birimagoni.
2CH 34:17 Í̠naga biabe biaga agali biaru tigua Anduane Homogonaga andaha muni wiaruni bibahende agali anda áyu arema bialu karunaga handayaho haga karuhondo mo mialu biabe bayale bialu ka, lalu lamini.
2CH 34:18 Ani lowa Sabana ibugua laabo halu lalu, Kini-o Loma Binigo Mo Miaga Haguane Timbuni Hiligaia ibugua mbuga ogo i̱ ngiya, lowa ibugua kini hale helo mbugadagoniha bi lo wiaru daga lene.
2CH 34:19 Ani daga layago hale howa Kini ibugua ibunaga bu miniha genda timbuni halu ibuninaga aga bu henego mini lerelene.
2CH 34:20 Ani buwa kini ibugua Hiligaiabi Sabana igini Ahigamabi Migaia igini Abadonobi kininaga beba gili bia daga la biaga Sabanabi kininaga biabe biahaga Asaiabi ti olalu ibidaba lene.
2CH 34:21 Ti íbu ngoaiho heagola ibugua tihondo lalu, I̱na mbuga áyu o yidogome Anduane Homogohanda mana iname bialu holene ogobi nga lalu lowiniyane handa walia kogoni. Anigo inanaga mamali heneyaru tigua mana uruni talialu bia nabi heneyagome Anduane Homogohanda miniha tandaga timbuni howa inahondo keba ho henego ka. Anigo áyu mbuga ogo handa walia harimago Anduane Homogohanda i̱bi Isaraele Yudala dindiha wali agali bibahende karubi iname agua bialu holoma̱ya hamelo kabe manda bule ibuhondo hale hole pudaba, lene.
2CH 34:22 Kini Yosaiahanda bi ogoni layagola hale howa Hiligaiabi agali maru biarubi tigua Yarusaleme tanoha anda gahenge mbira binigoha abale puwa Anduane Homogonaga bi mana latagi haga wali mbira mini Huluda berenego berearia pene. Wali ogoni ibu agalini Salumu henego ibu Harasa aguane Tigiba igini howa ibugua loma binigo mo miaga hearunaga aga Anduane Homogonaga andaha howa biaga tamu hobane heagoha wiaru handayaho haga hene. Agali ibiyarume Huludahondo bibahende biyaru te lamiai hene.
2CH 34:23 Bi layaru hale howa Huluda ibugua tihondo ladai bialu lalu, Tígua áyu ogoni kini bedagoria dai buwa
2CH 34:24 Anduane Homogo ibugua bi ogodagua laya lalu, I̱ Anduane Homogo kogome i̱naga bi mana mbuga ogoniha gilibu ngaru kini hale helo daga layadagonidagua heneneore Yarusaleme bo gialabagabu waholebero. Wali agali Yarusalemeha kamirubi bibahende ko birimirunaga pani mulebero, laya.
2CH 34:25 Wali agali tigua i̱ erembira ngialu puwa dama mitangi bialu mbirale gime wabini wiaruhondo bi pupu wialu mbirale tara tara lomabu mini. Tigua mana ogonibi biyagome i̱na tihondo keba ho kogoni. Keba ogonime i̱na Yarusaleme wali agalihondo mo tandaga harago ereba naholebira.
2CH 34:26 Anduane Homogo Isaraele wali agalinaga Ngode Datagaliwabe i̱ kogome tínaga kini biagohondo bi ogodagua laro. Hiligaiahanda í̠hondo mbuga ogoniha bi gilibu ngaru dagalo ngiyago hale harigoni.
2CH 34:27 Ani hale harigonaga i̱na Yarusaleme bo gialabagabu wahowa wali agali tano ogoniha karu tihondobi buleore manda bu ngo laruyago hale howa í̠ mini beregedalu i̱naga deni í̠ni mo dindiha halu dugu timbuni bialu í̠naga aga lerelalu i̱hondo bi larigo hale haru.
2CH 34:28 Anigo i̱na í̠ kengi Yarusaleme mo ko holene ogoni tagira naibilarogola í̠ bayale dege holebere. Mani í̠ homaregola tigua í̠ homedaha mo ko holene ogoni Yarusalemeha ibilolebero, lalu Anduane Homogohanda ani laya, lalu wali biagome lene. Anduane Homogonaga bi mana latagi haga wali Huluda ibugua mbiwia halu bi ogoni agali biaru tihondo lamiya handala tigua kini hearia lamule dai bini.
2CH 34:29 Kini Yosaia ibugua agali haguane Yarusalemeha hearubi Yuda dindiha hearubi bibahende íbu ngoai hadaba lene.
2CH 34:30 Íbu ngoai hayagola kini ibugua loma binigo mo miaga hearubi Libaiali hearubi wali agali homogo yagibanobi bibahendeore Anduane Homogonaga andaha mo ngoai hene. Ani íbu ngoai ho heagola ibugua mbuga habo nalolene bi lowinigo Anduane Homogonaga andaha wiaria handa walia hene biago mo yuwa bi ogoniha gilibu wiaru wali agali ti hale hai helo daga latagi hene.
2CH 34:31 Ani daga latagi halu kini ibu Anduane Homogonaga andaha anda gene luni heagoria heyu howa habo nalolene bi mbira Anduane Homogohondo lowialu lalu, I̱na Anduane Homogonaga andaneha howa i̱naga minimebi gubalinimebi Anduane Homogonaga mbuga ogoniha bi gilibu wini ngaruni talialu biaiore holebero, lalu lowini.
2CH 34:32 Ani lowa ibugua Beniyamini hameiginirubi Yarusaleme wali agalirubi tigua habo nalolene bi ogoni talima pelo tihondo bi hongo howa lene. Ani layagola tiguabi nde, Habo nalolene bi mbuga ogoniha gilibu ngaru talialu biaiore holeberama, lalu lowini. Ani lowiyadagua Yarusaleme wali agalirume ti mamalirunaga Ngode Datagaliwabe andaneha hene.
2CH 34:33 Kini Yosaiahanda Isaraele dindi bibahendeha dama mitangi bialu mbirale gime wabu wini wiaru bo gialo wahai hene. Kini Yosaia ibu nahome heangi wali agalime Anduane Homogo ti mamalirunaga Ngode Datagaliwabe talima pelo hongo howa haru hene.
2CH 35:1 Kini Yosaia ibugua Anduane Homogonaga mini yaraga halu Bolangua Halu Penegonaga Horo tomo Yarusalemeha nole manda bini. Ege mbiranaga horo pira mbirani maria (14) haragola nogo sibi igini dewa loma bialu bo miaga wini.
2CH 35:2 Loma binigo mo miagaru ti Anduane Homogonaga andaha biabe mbira mbira bayuwaore bilo Yosaiahanda tahaga bini.
2CH 35:3 Ani buwa ibugua Libaiali tini Anduane Homogohondo loma bia howa Isaraele wali agalinaga lawai haga heneru tihondo lalu, Tígua Anduane Homogonaga Habo Nalolene Bi lo winigonaga Mbogoyi payani mo yalu ibaga bialu haramilidagua lone nabuleberemi. Mbogoyi ogoni Anduane Homogonaga anda Debidi igini Solomonohanda binigoha ngelalimu. Ani ngelowa tígua Anduane Homogo tínaga Ngode Datagaliwabenagabi ibunaga Isaraele wali agalirunagabi biabe biahaga halimu.
2CH 35:4 Anduane Homogonaga andaha hameigini hangu hangu howa biabe mbira mbira bulene Isaraelealinaga Kini Debidibi ibu igini Kini Solomonobi libugua ta howa gilibu winidagua tígua bule mandamanda bialu halimu.
2CH 35:5 Ani buwa wali agali Anduane Homogo mitangi bialu lotu lole íbu kagola tígua ti biamogo bigi bulenaga mandamanda bialu halimu.
2CH 35:6 Tígua Anduane Homogonaga deni howa dodo nahe halimulo mana bulene ngadagua bialu howa wali agali urunime nogo sibi iginiru memerubi haru ibirago Bolangua Halu Penegonaga Horo nogo biaru Anduane Homogohanda Mosese heangi bi mana lowini ngadagua bo mulene manda bilimu, lalu lamini.
2CH 35:7 Kini Yosaia ibugua ibunaga nogo sibirubi sibi iginirubi meme iginirubi daosini dege pira tebira (30,000) bulumaga igini wangabe daosani tebirabi (3,000) Bolangua Halu Penegonaga Horo ogoni wali agalirume bo lomabu mialu nelo mini.
2CH 35:8 Yosaianaga agali haguane hearu tigua loma binigo mo miaga hearubi Libaiali hearubi wali agali hearubi tihondo nogo tara tara bo lomabu mialu nelo mini. Anduane Homogonaga anda handayaho haga Loma Binigo Mo Miaga Haguane Timbuni Hiligaiabi Segaraiabi Yahielebi tigua loma binigo mo miaga hearuhondo nogo sibi memerunaga iginiru daosini kirani handari waragaria (2,600) mialu bulumaga igini wangabe handari tebira (300) bo milo mini.
2CH 35:9 Libai agalinaga haguane Konanaia Semaia ibu hamene Nedanele imaru Hasabaia Yaiele Yosabada imaru tigua Libai wali agaliruhondo nogo sibi memerunaga igini daosini duria (5,000) nogo bulumaga wangabe handari duria (500) Bolangua Halu Penegonaga Horo ogoninaga bo mule mini.
2CH 35:10 Bolangua Halu Penegonaga Horo mandamanda biai hayagola loma binigo mo miagarubi Libaialirubi tigua Kini Yosaiahanda tihondo layadagua tinaga biabe bulene winigo bule hondo hai hene.
2CH 35:11 Libai agalirume nogo sibi memerunaga igini balu dongone laga lalu howa darama hambuwa loma binigo mo miaga hearuhondo darama ogoni miyagola tigua bo lomabu delaga dabuni tandaloba haga bialu hene.
2CH 35:12 Ani buwa tigua nogo sibi memeru bulumagarubi podagadagua podo wigi bialu wali agali bibahende hameigini wabuni hearuhondo talebu migi bini. Ani buwa tigua Mosese heangi bi mana lowinigo ngadagua bialu loma irame dai helonaga dabuni delaga bigi bialu hene.
2CH 35:13 Libai agali tigua mana lowinigo ngadagua Bolangua Halu Penegonaga Horongi nogo sibi memeru hiruwa nogo bulumaga mbirini todobene be tara taraha dawaga bini. Ani dawaga buwa wali agalime nelo abale ta hagahaga bini.
2CH 35:14 Ani biai howa Libai agali biarume tininaga tomobi loma binigo mo miaga Arono aguanene hearunaga tomobi dawa ta haga bini. Tigua ani binigo irane loma binigo mo miaga biarume nogo sibi memeru bo loma bialu irame dai helo dabuni delaga bialubi nogo habane delai haga bialubi haabo hayagome tininaga tomo dawalene henge nawiyagola Libaiali biarume ti biamogo bialu ani bini.
2CH 35:15 Ala Kini Debidibi Asababi Hemanabi Anduane Homogonaga mana kinihondo latagi haga Yadudunu ibubi tigua iba gana lolebi ngida bolebi biabe uruni Anduane Homogonaga andaha bule mandamanda bu wini. Ani mandabu winidagua Asabanaga aguanene ti ngida balu iba gana laga hearume Anduane Homogonaga andaha biabe ogoni bulene wiaru bule hondo hene. Libai agali maru Anduane Homogonaga anda haraba mamage haga hearu tiguabi biabe bulene wiaru wanahe tibi Bolangua Halu Penegonaga Horo nolene Libai agali biarume dawa ta haga bini.
2CH 35:16 Kini Yosaiahanda bilimu layadagua horo ogoningi wali agali bibahendeme Anduane Homogo mitangi bialu ibuhondo nogo sibi meme bulumagarubi bo loma bialu irani dai helo dabuni delai haga bialu Bolangua Halu Penegonaga Horo biabe bulene ti bayuwaore biai hene.
2CH 35:17 Isaraele wali agali bibahende hearume horo karu Bolangua Halu Penegonaga Horobi Mberedi Yidi Nahe Hirinigonaga Horobi Anduane Homogo mitangi bialu nalu hene.
2CH 35:18 Bolangua Halu Penegonaga Horo ogoningi binidagoni bambaore Anduane Homogonaga mana latagi haga agali mini Samuele ibu homayangi howa bima ibalu áyu turu halu henedagua nabi hene. Kini Yosaiahandabi loma binigo mo miagabi Libai agalibi Yuda wali agalibi Isaraele wali agalibi Yarusaleme wali agalibi tomo ogoningi nalu henedagua Isaraelealibi Yudalibi tinaga kini ala henerume nane lu haabo hene.
2CH 35:19 Anigo Yosaia ibu kini heane mali pira mbirani halini (18) hayagola Bolangua Halu Penegonaga Horo mitangi bialu tomo ogoni dawa nene.
2CH 35:20 Kini Yosaiahanda Anduane Homogonaga andaha mana bulene wiaru mo tiga biyagola Iyibinaga Kini Negohanda ibunaga ami haru halu Asiria baba wai bule Iba Yuberedisi peagoria tano mini Kagemisini pene. Ani pu ka layago hale howa Yosaia ibu Negola wai bule pialu hearia
2CH 35:21 Negohanda bi lawia halu lalu, Yudanaga Kini-o i̱na í̠la wai bule ndo ibirugo Ngode Datagaliwabehanda i̱ni waitigi baba abale wai bule pu layagola pole ko. Í̠na i̱la wai biriyagua Ngode Datagaliwabe ibu i̱ heba kago ibugua í̠ pani ngulebirago wai nabibiya, lalu bi lawia hene.
2CH 35:22 Ani lawia hayago hale halu Yosaia ibu donge howa wai buleorelo manda bini. Ani manda buwa ibugua Iyibi amialime ibudalo manda nabilo labolabo tara karulalu yu dindi Megido wiagoria wai bule pene.
2CH 35:23 Wai bialu hearia Iyibi ami agali biarume Kini Yosaia timume bayagola ibugua ibunaga biabe biahaga agali biaruhondo lalu, I̱ bayago ai i̱ abale yalu pudaba, lene.
2CH 35:24 Ani layago hale howa tigua Yosaia ibunaga wai biagane karisini howa ibu mo yaraga halu karisi mendeni ngelalu Yarusaleme yalu dai bialu hearia homaya. Homayagola tigua ibu mamalinaga homali wiagoria hora howa Yuda wali agalibi Yarusaleme wali agalirubi bibahende dugu bialu hene.
2CH 35:25 Anduane Homogonaga mana latagi haga agali Yaremaiahanda Yosaia mitangi bialu dara howa iba gana mbira gilibu wini. Ani gilibu winidangi howa wali agali hama ibalu áyu Isaraele dindini karumebi Yosaia mitangi bialu iba gana ogoni lalu haabo haga. Mbuga mbira mini Yarusalemenaga Dugu gilibu winigoha dara howa iba gana ogoni gilibu winigo nga.
2CH 35:26 Biabe maru Kini Yosaiahanda bialu henedarubi ibu Anduane Homogo mitangi bialu ibunaga mini yaraga halu lotu laabo henegobi ibu Anduane Homogonaga bi mana gilibu winigo ngadagua bayale bialu henegobi
2CH 35:27 ibu kini pigane henedangi howa bima ibalu henedarubi bibahendeore mbuga mbira mini Isaraele Yudala Kini henerunaga Bi Te laga winigoha gilibu winigo nga.
2CH 36:1 Yosaia homayagola Yuda wali agali hearume ibu igini Yoahasa kini ho aribia helo ibunaga haguaneni weli odo wia hayagola ibu Yarusalemeni kini hene.
2CH 36:2 Yoahasa ibunaga mali pira kirani tebira (23) peagola kini pigane howa ibu Yarusalemeni ege tebira hangu haru hene.
2CH 36:3 Ani bialu heagola Iyibinaga Kini Negohanda ibuwa Kini Yoahasa bo dugualu Yuda wali agalime dagisi muni siliba genda magi kilogarama daosini tebirani handari maria (3,400) wialu ngolo genda magi kilogarama pira tebirani mariabi (34) wilimu lene.
2CH 36:4 Ani buwa Kini Nego ibugua Yoahasa hamene Eliagimi dabalu Yuda dindiha kini helo helene. Ani helowa Kini Nego ibugua Eliagiminaga mini mende wia aribia halu Yahoiagimi wini. Ani bialu Nego ibugua Yoahasa Iyibi dindiha garabaya haru pene.
2CH 36:5 Yahoiagimi ibunaga mali pira kirani duria (25) peagola Yuda dindiha kini pigane howa ibugua mali bearia (11) Yarusalemeni haru hene. Kini Yahoiagimihanda Anduane Homogonaga deni mana ko ngubi wiaru bialu haabo haga hene.
2CH 36:6 Yahoiagimi ibu Yuda dindiha kini heangi Babilononaga Kini Nebugadenesa ibugua ibunaga ami hearu haru ibuwa Yuda dindiha wai bialu Kini Yahoiagimi minuwa pu senime huba bialu Babilono haru pene.
2CH 36:7 Horo uruningi dege Nebugadenesahanda Anduane Homogonaga andaha puwa mbirale tara tara muni dewame miagane wiaru mo yalu Babilono dindi ibu andagaha wule yalu pene.
2CH 36:8 Kini Yahoiagimihanda biabe maru binidarubi mana ko ngubiore bialu henedarubi bibahende mbuga mbira Isaraele Yudala Kini Henerunaga Bite laga winigoha gilibumaga ho winigo nga. Ibu igini mbira mini Yahoiagini henego ibu aba kini henegoria ha aribia hene.
2CH 36:9 Yahoiagini ibunaga mali pira mbirani halira (18) peagola Yarusalemeni howa ege tebirani horo pira hanguni kini hene. Yahoiagini ibugua Anduane Homogonaga deni howa mana ko wiaru mo tene howa bialu haga hene.
2CH 36:10 Horo uruningi Kini Nebugadenesa ibugua ibunaga ami agaliruhondo lalu, Yahoiagini mini yalu Anduane Homogonaga andaha mbirale bayaleore ngarubi mo yalu Babilono ibalimu, lene. Ani buwa Nebugadenesahanda Yahoiagini aba hamene Sedegaia henego ogoni ibu Yuda dindihabi Yarusalemehabi kini helo dabo helene.
2CH 36:11 Sedegaia ibunaga mali pira kirani mbira (21) peagola ibugua Yudanaga kini howa Yarusalemeni mali bearia (11) hanguni kini hene.
2CH 36:12 Ani howa Kini Sedegaiahanda Anduane Homogonaga deni mana ko wiaru bialu haga hene. Anduane Homogonaga mana latagi haga Yaremaiahanda bi mana layago hale howa ibuni mo dindi holene manda nabiore hene.
2CH 36:13 Kini Sedegaia ibugua Babilono kini heagonaga andaneha habe manga howa ibu habagi halu ibuni hangu hene. Abale Nebugadenesahanda Sedegaiahondo lalu, Í̠na Ngode Datagaliwabenaga minini howa i̱na bia larodagua biaiore holebero larene, lalu hongo howa layagola Sedegaia ibugua, E̱ ani bulebero, lalu ladai bini. Sedegaia ibu mini giambeore howa mini beregedalu Anduane Homogo Isaraelenaga Ngode Datagaliwabe karia dai bule hame nale hene.
2CH 36:14 Loma binigo mo miaga hearubi Yuda wali agalinaga haguane hearubi tigua Anduane Homogo erembira mialu hameigini dindi tara tarani hearume dama mana koorene ko bialu mbirale gime wabiniruhondo bi pupu wiagadagua wialu Anduane Homogonaga anda loma biahene heago mo mebia hene.
2CH 36:15 Anigo Anduane Homogo Isaraele wali agali bibahendenaga mamali Ngode Datagaliwabe kagome ibunaga wali agalibi ibunaga andabi mo ko holene hame nale howa ibugua ibunaga mana latagi haga dewame bi hongo howa lamilo ibilaga bini.
2CH 36:16 Ibunaga bi mana latagi haga mana uruni hale hayagola wali agalime hale howa mo nagalone halu mege biaabo hayagola Anduane Homogo ibu keba timbuniore halu ti pani mulene manda bini.
2CH 36:17 Ani manda buwa Anduane Homogohanda Babilononaga kini baba wai bilo ibilayagola Nebugadenesa ibugua Yuda agali daliahe hearu balu Anduane Homogonaga andaha ha do hearubi bo wahaga bini. Nebugadenesahanda dara nahe howa wali agali wahebi waneiginirubi walibi agalibi ta nabi hongoherubi waragoberubi bibahendeore bo wahaga bilo Ngode Datagaliwabehanda kini biagonaga giha ya hai hene.
2CH 36:18 Nebugadenesa ibugua Anduane Homogonaga andaha lotu lolenaga mbirale wiarubi ngolo silibaru do hagane hobaneha wiarubi kininaga andaha ngolo siliba wiarubi agali haguanerunaga andaha wiarubi bibahendeore mo yai halu Babilono dindiha yalu piai hene.
2CH 36:19 Ani buwa ibugua Anduane Homogonaga anda heago delalu Yudanaga kini andagabi anda bayale hearubi bibahendeore bo heda hai halu Yarusaleme tanobi ege pabebi bo gialo delai hene.
2CH 36:20 Ani gialo delai howa ibugua wali agali maru yu wahene hearu bibahendeore garabaya bu yalu Babilono piai hene. Tigua Babilononi howa Nebugadenesanagabi ibu aguanerunagabi garabaya biabe ale biaabo halu hearia mani Pesianaga kini ibugua Babilono baba wai bialu wayali howa ti golope hene.
2CH 36:21 Bamba Yuda wali agalime mali waragariani biabe bialu kanengi tinaga dindi bayale wilo biabe nabi ha̱lo holene mana lo wiadagua nabi ti biabe biaabo haga hene. Ani nabinigonaga pani ti Babilono dindiha mali pira karia (70) garabaya heagola dindi ogoni dabulu wiaabo hene. Ani binidagoni Anduane Homogohanda ala Yaremaiaha howa mbiwia hayago lola hai hene.
2CH 36:22 Pesianaga Kini Sairusi ibu kini heane mali mbira peagola Anduane Homogo ibugua ibunaga mana latagi haga Yaremaiaha howa mbiwia henego lola hene. Ibugua Kini Sairusi mo mitangi bia howa bi ogobi gili bibe lalu mo walia hayagola wali agali dindi bibahende ibugua hondo heagoria hongo howa lo pela layadagua lo pelene. Ani layago ibugua bi lo pelenedaru uru.
2CH 36:23 Pesianaga Kini Sairusihanda wali agali tígua bilimulo bi mbira laro. Anduane Homogo dahuliya andaganaga Ngode Datagaliwabehanda i̱na dindi bibahende handa gimbu buliya i̱hondo hongo ngiya. Ani bialu ibugua ibunaga anda mbira Yuda dindiha Yarusalemeni bibe laya. Ngode Datagaliwabenaga wali agali kamiru tí bibahende Yarusaleme dai bilimulo golope haro. Anigo Anduane Homogo tínaga Ngode Datagaliwabe ibu tí heba mandagi helo hameledo, lalu gilibu pelene.
EZR 1:1 Pesianaga handame haga Kini Sairusi ibu hearia mali mbira peagola Anduane Homogo ibugua bulebero lalu Ngode Datagaliwabe mana latagi haga Yaremaiaha howa lo winiyadagua lola hene. Anduane Homogo ibugua Kini Sairusinaga miniha howa bi ogobi gili bibe lalu mo walia hayago wali agali dindi bibahende kini ibugua hondo heagoria hongo howa lo pela layadagua lo pelene. Ani layagola ibugua bi lo pelene uru.
EZR 1:2 Pesianaga handame haga Kini Sairusihanda wali agali tígua bilimulo bi mbira laro. Anduane Homogo dahuliya andaganaga Ngode Datagaliwabe ibugua i̱na dindi bibahende handa gimbu buliya i̱hondo hongo ngiya. Ani bialu ibugua i̱hondo anda mbira Yuda dindiha Yarusalemeni bibe laya.
EZR 1:3 Ngode Datagaliwabe ibuninaga wali agali tí heba mandagi helo hame ledo. Tígua Yarusaleme dindini dai buwa Anduane Homogo Isaraelenaga Ngode Datagaliwabe kagonaga anda biadai bule poleberemi. Ngode Datagaliwabe ogoni ibunaga mini Yarusalemeni yaraga halu lotu lolene nga.
EZR 1:4 Ibunaga wali agali maru dai bilo mbirale tumagi kayagua tinaga nenegeme silibabi ngolobi maru nayi aleru milimu. Mbirale yalu pelo nogo hosibi dongibi milimu. Ani buwa Anduane Homogonaga andaha Ngode Datagaliwabehondo mbiraleru loma bia howa Yarusalemeni wilobi milimu, lalu bi lo pelene.
EZR 1:5 Ani layagola agali haguane maru Yuda hameigini howabi maru Beniyamini hameigini howabi loma binigo mo miaga hearubi Libaiali hearubi wali agali maru Ngode Datagaliwabe ibunime tini gubaliniha hangu hangu elahaga bigi biyarubi tigua Anduane Homogonaga anda biago biadai bule pole manda manda bini.
EZR 1:6 Tinaga nenege hearume dabudabu dewa mialu biamogo bini. Ndisi silibame wabinirubi ngolobi tomo nolenebi dawalenebi dabudabu yalu pelo hosi dongibi maru maru dewa mini. Anduane Homogonaga andaha mbirale tara tara Ngode Datagaliwabenaga loma biaho wilobi mia dege bini.
EZR 1:7 Kini Sairusi ibugua ndisi bebi gabo bebi Kini Nebugadenesahanda Yarusalemeni Anduane Homogonaga andaha wiaria ibunaga dama andaha wule mo yalu piyaru yadai bini.
EZR 1:8 Ibugua uruni muwa kininaga muni handaya ho haganaga haguane Mideredahondo mini. Ibugua ilumogo bialu bebani mo tiga bu howa Yuda gabumane haru haga heago Sesebasahondo mini. Ogodagua mini.
EZR 1:9 Ndisi be ngolome wabiniru daga pira tebira (30). Ndisi be silibame wabiniru daga daosini mbira (1,000). Ndisi be tara ale maru winiru daga pira kirani dira (29). Ndisi be ngolome wabini emene dameneru daga pira tebira (30). Ndisi be silibame wabini emene dameneru daga handari mariani pira mbira (410). Tomo naganebi dawaganebi daga daosini mbira (1,000).
EZR 1:11 Ngolome wabiniru silibame wabiniru maru tara tara wiaru heba bibahende daga lamaga howa daosini duriani handari maria (5,400) mini. Urunidagua ilumogo buwa miya handala Sesebasabi Babilono howa garabaya henerubi ti mandagi uruni mo yalu Yasusaleme dai bini.
EZR 2:1 Isaraele wali agali dewaore Babilono dindi yu wahalu tini dalu Yarusalemehabi Yuda dindi maru wiaruhabi hole dai bini. Bambaore Kini Nebugadanesa heangi ibugua wai bialu Yuda wali agali garabaya bu yalu Babilono penego ogoniha ti haabo hene.
EZR 2:2 Yudali agali haguane minu yalu penedaruni maru Serubabele Yosua Nehemaia imaru Seraia Lelaia Modegai imaru Bilisana Misiba Bigibai imaru Lehumu Bana imaru pu hene. Ani howa Isaraele wali agali garabaya pu henego golalu Yarusaleme dai biniru hameigini mbira mbiranaga daga ogodagua.
EZR 2:3 Paroso aria daosini kirani handari mbirani pira kariani kira (2,172) hene. Sebadia aria handari tebirani pira kariani kira (372) hene. Ara aria handari kariani pira kariani duria (775) hene. Yasua Yoabala aguanene Pahadamoaba aria daosini kirani handari halirani pira mbirani kira (2,812) hene. Elama aria daosini mbirani handari kirani pira duriani maria (1,254) hene. Sadu aria handari dirani pira mariani duria (945) hene. Sagai aria handari kariani pira waragaria (760) hene. Bani aria handari waragariani pira mariani kira (642) hene. Bebai aria handari waragariani pira kirani tebira (623) hene. Asagada aria daosini mbirani handari kirani pira kirani kira (1,222) hene. Adonigama aria handari waragariani pira waragariani waragaria (666) hene. Bigibai aria daosini kirani pira duriani waragaria (2,056) hene. Adini aria handari mariani pira duriani maria (454) hene. Ade (ibu mini mende Hesegaia) aria pira dirani halira (98) hene. Besai aria handari tebirani pira kirani tebira (323) hene. Yora aria handari mbirani pira mbirani kira (112) hene. Hasama aria handari kirani pira kirani tebira (223) hene. Giba aria pira dirani duria (95) hene.
EZR 2:21 Yuda wali agali o dai biyadaruni tinaga mamalinaga tano mini uru wigi binigoha dai bialu haga haga bini. Bedelehemeha handari mbirani pira kirani tebira (123). Nedobaha pira duriani waragaria (56). Anadodoha handari mbirani pira kirani halira (128). Asamabedeha pira mariani kira (42). Kiriada Yarimihabi Kebirahabi Berodohabi handari kariani pira mariani tebira (743). Lamahabi Gebahabi handari waragariani pira kirani mbira (621). Migimasaha handari mbirani pira kirani kira (122). Bedelehabi Aihabi handari kirani pira kirani tebira (223). Nebeha pira duriani kira (52). Magabisiha handari mbirani pira duriani waragaria (156). Elama mendeha daosini mbirani handari kirani pira duriani maria (1,254). Harimiha handari tebirani pira kira (320). Lodohabi Hadidihabi Onohabi handari kariani pira kirani duria (725). Yarigoha handari tebirani pira mariani duria (345). Senaha daosini tebirani handari waragariani pira tebira (3,630). Tano uruniha ti daibu haga haga bini.
EZR 2:36 Loma binigo mo miaga agali Yarusalemeni daibu henedaru tinaga minibi dagabi ogodagua. Yasua aguane Yadaia aria handari dirani pira kariani tebira (973) hene. Ime aria daosini mbirani pira duriani kira (1,052) hene. Pasahuru aria daosini mbirani handari kirani pira mariani karia (1,247) hene. Harimi aria daosini mbirani pira mbirani karia (1,017) hene.
EZR 2:40 Libai hameigini Yarusaleme daibu heneru minibi dagabi ogodagua Hodabia aguane Yasua Kadamielela aria pira kariani maria (74) hene. Anduane Homogonaga andaha iba gana laga biaga heneru Asaba aria handari mbirani pira kirani halira (128) hene. Anduane Homogonaga andaha mamage haga heneru Salumu ariabi Ade ariabi Talamono ariabi Agubu ariabi Hadida ariabi Sobai ariabi handari mbirani pira tebirani dira (139) hene.
EZR 2:43 Garabaya howa golalu dai binidaruni Anduane Homogonaga andaha biabe bialu haga agali urunaga aguane dai binigo uru. Siha Hasuba Tabaodo Keroso Siaha Padono Lebana Hagabaha Agubu Hagaba Samalai Hanana Gidele Gaha Leaia Lesini Negoda Gasama Usa Pasea Besai Asana Meunimi Nebisimi Bagabugu Haguba Hahu Basaludu Mehida Harasa Bagoso Sisera Tema Nesia Hadiba uruni aguaneneru daibu ha dege bini.
EZR 2:55 Solomononaga biabe biahaga aria henerunaga aguanene garabaya golalu tini daluha daibu henedaru uru. Sodai Hasoberede Peruda Yala Dagono Gidele Sebadia Hadili Pogerede Hasebaimi Amila uruni aguaneneru haga bini.
EZR 2:58 Anduane Homogonaga andaha agali biabe biaga aguanene henerubi Solomononaga biabe biahaga aguanene henerubi bibahende garabaya golalu dai buwa henego dagalamaga howa handari tebirani pira dirani kira (392) tini daluni dai bu hene.
EZR 2:59 Ani howa Delaia hameigini Tobia hameigini Negoda hameiginiru ti bibahende dagalamaga halu handari waragariani pira duriani kira (652) hene. Ti bibahende Telemela tanohabi Teleharasa tanohabi Kerubu tanohabi Adana tanohabi Ime tanohabi tano uruniha howa daibu hene. Ani daibu howa agali hameigini uruni ti tininaga mamali hama ibinigo Isaraele hameigini henedaru aria mbirago mini labe nahe howa ti Isaraele aria kamabe tara kamabe toba howa dege hene.
EZR 2:61 Loma binigo mo miaga agali maru heneru tigua ti mamalirunaga mini mbugaha agua ngabe hondole tai bialu hearia tinaga minigo mbira wiaria handa walia nahe dege hene. Agali mini taibu wahenedaru tinaga mini uru. Hobaiabi Hagosobi Basilai imaru hene.
EZR 2:62 Loma binigo mo miaga agali uruni tinaga mamali heneru mini nawiyago hondowa agali haguane henerume ti loma binigo mo miaga nahelo lene.
EZR 2:63 Ani heagola Yuda agali gabumane agali haguane heagome lalu, Agali uruni ti wali agalime Anduane Homogohondo tomo lomabu mini ngaru nanelo, lalu bi lowini. Agali haguane ogoni ibugua lalu, Loma binigo mo miaga agali haguane mbira íbu kangi ibugua Anduane Homogonaga hame ngago hale hole halaga biaga ege to̱le̱ kira mini Urimu Tumimula ngagoha howa hale helo. Ani hale howa ibugua agali uruni tigua loma binigo mo miaga holene nga layagua nde tigua biabe ogoni bialu helo. Ai nabilo layagua nde wahelo, lene.
EZR 2:64 Isaraele wali agali garabaya golalu dai binidaruni bibahende daga lamaga halu daosini dege pira mariani kira halu handari tebirani pira waragaria (42,360) tini daluni daibu hene. Tinaga biabe biahaga wali agali bibahende daosini dege kariani handari tebirani pira tebirani karia (7,337) haru halu dai bini. Wali agali iba ganaru lalu ngida balu piliperu pulalu biaga handari kira (200) bibahende daibu hene. Tinaga nogo hosi handari kariani pira tebirani waragaria (736) haru halu ibini. Nogo hosi dongilame igini hono winiru mini muele laga handari kirani pira mariani duria (245) haru halu ibini. Nogo kamele handari mariani pira tebirani duria (435) haru halu ibini. Nogo dongi daosini dege waragariani handari kariani pira kira (6,720) haru dai bialu ibini.
EZR 2:68 Ani ibalu Yarusalemeni Anduane Homogonaga anda heagoria anda ibugu bialu howa tini hameigini ibugu biyadagua agali haguane mbira mbirame Anduane Homogonaga anda biago biadai bilonaga turu halu munibi mbirale marubi bame migi bini. Tigua Anduane Homogonaga anda ogoni abale hene biagoria dege biadai bulene manda buwa ani bini.
EZR 2:69 Ani mialu howa mbirale dewa yu hearume dewa mialu emene yu hearume emene migi bini. Isaraele wali agalime anda ogoni bilonaga ngolo genda magi kilogarama handari duria (500) mialu muni siliba genda magi kilogarama daosini dege kirani handari halira (2,800) mo mogobu mini. Ani mialu loma binigo mo miaga agalime aga karulagane handari mbira (100) mo mialu bini.
EZR 2:70 Ani bialu Libai hameigini loma binigo mo miaga bu hearubi wali agali marubi ti Yarusalemeha anda ibalu maru tano ogoniha hene. Ti maru emene kawareha pu hene. Wali agali iba ganaru lalu ngida balu pilipe pulalu biaga hearubi mamage haga agali hearubi Anduane Homogonaga andaha biabe biaga hearubi ti bibahende Yarusaleme tano kaware wiaruha haga haga bini. Ani heagola Isaraele wali agali maru ti nde tininaga tano wiyaruha hama pugu pugu bini.
EZR 3:1 Ege kane layagola Isaraele wali agali tinaga dindi winiyagoria daibu hene. Ani buwa ti bibahende Yarusaleme dindini ngoai hene.
EZR 3:2 Ngoai hearia Yahosadaga igini Yosuabi loma binigo mo miaga ibu aria hearubi Seadeli igini Serubabelebi ibu hameigini hearubi tigua bo lomabu delolene dabu mbira Isaraelenaga Ngode Datagaliwabehondo nogo tara tara bo loma bia helo wabini. Ani binigo irane Ngode Datagaliwabe ibugua ani bilimu lalu ibunaga agali Mosese heneyangi Mana lo winigoha gilibu winigo nga.
EZR 3:3 Garabaya golalu ibiyarume wali agali dindi ogoriani hearu hondowa gi howa dege tigua nogo tara tara bo lomabu delolene dabu ogoni ala wabu helenenaga gumuni wiagoria dege wabu helene. Ani wabu helowa tigua ogoriani mbirale bo loma bialu delaga winiyadagua lone egerebagi alendobi bo delaabo halu hene.
EZR 3:4 Anda Nemandaha Palu Holene Horo wiangi tomo turu halu nalimu lalu lo wiadagua tigua ani bule ngoai hene. Ani buwa horo uruningi nogo tara mbira mbira bo lomabu mulene mana lo wiadagua lone loma bigi bialu hene.
EZR 3:5 Ogoni biai howa tigua maru marunaga bo loma bialu delaga winiya ale loma buwa homane hangu hangu delai holenebi Ege Mbira Ngabulo kagonaga horongi loma biagane winiyadaguabi bini. Anduane Homogonaga horo mbira lomabu mule lowa tu wu winiyangi lomabu mini. Mialu Anduane Homogohondo bame turu halu miagarubi tigua yalu ibuwa mia dege bini.
EZR 3:6 Tigua Anduane Homogonaga anda gahenge wene bule howa Anduane Homogohondo ala lomabu delagane winiyagoria ege kanegonaga horo mbira layagola ogoriani lomabu delene.
EZR 3:7 Wali agali tigua to̱le̱ dambu tiga biaga hearuhondobi anda biaga hearuhondobi biabe biyagonaga muni mini. Ani bialu wali agali Taia tanoni hearumebi Saidono tanoni hearumebi ira tamia hongohe Lebanononi dibayaru tihondo miyagola tigua tomo tara tararu ira lini ibaneru olibe lininaga welibi miniya. Ira uruni dibuwa iba solowarani yalu dindi Yobani anda ibule mandabu wini. O binidaruni Pesia handame haga Kini Sairusi ibugua bilimu layagola ani bini.
EZR 3:8 Yarusaleme dai buwa mali mendegonaga ege mende layagola tigua Anduane Homogonaga anda bule lowa bialu hene. Serubabelebi Yosuabi tinaga damenerubi loma binigo mo miaga hearubi Libaiali hearubi wali agali garabaya howa golalu dai bini bibahende hearubi tigua anda biagoni bima lalu mandagi howa bialu hene. Libai agali mali pira kira (20) bolangua hene hearu tigua Anduane Homogonaga anda biago biadai bilo handaya howa ti helene.
EZR 3:9 Libaiali mbira ibu mini Yasuabi ibu iginirubi ibu damenerubi Kadamielebi ibu igini ti Yuda hameiginirubi tigua anda biyago bilo Libaiali hayaru baba hogimbu buwa handaya ho hene. Libaiali hameigini Henadada heneyarumebi biamogo bialu hene.
EZR 3:10 Agali biarume dindi mo tiga bialu gene hangayagola loma binigo mo miaga biaru tigua tininaga aga galonengi biagane winiyaru mo karulowa mbelo biguli pu laganeru giha yuwa tini holeneni hagahaga bini. Hameigini Asabalinaga Libai agali heneyaru ti bi ngilingele laga beledi ale winiyaru aria kira dege dege gime yu hene. Tigua Anduane Homogonaga mini yaraga ogodagua halimu lalu Kini Debidi halu heangi henerume lo winiyadagua lalu hene.
EZR 3:11 Tigua Anduane Homogonaga mini yaraga howa iba gana ogodagua lalu, Anduane Homogo ibu bayaore ka. Ibugua Isaraele wali agalihondo gubalini ho wiaabo ka, lalu hene. Anduane Homogonaga anda biago bule dindi mo tiga bialu gene hangayagonaga turu howa bibahendeme hongo howa ga̱ lalu Anduane Homogonaga mini yaraga halu hene.
EZR 3:12 Anda gene hangalu hearia alali loma binigo mo miaga hearubi Libaiali hearubi hameigini hangu hangu haguane hearubi tigua Anduane Homogonaga anda ala hene hendene biago mitangi bialu dugu timbuni bialu heagola maru hearume ti turu howa ga̱ lalu hene.
EZR 3:13 Ogonibi biyagola dugu biyabe be turu howa ga̱ layabe toba howa tale nabibehe hene. Tale nabibehedagoni ga̱ layagobi dugu biyagobi hongo howa daligaore biyagola udura amura hearume hale hai hene.
EZR 4:1 Yuda Beniyaminila hameiginirunaga waitigi bu hearume hale halu hearia Isaraele wali agali Yarusaleme daibu howa tigua Anduane Homogo tinaga Ngode Datagaliwabenaga anda biadai bialu ka layane hale hene.
EZR 4:2 Ani layago hale howa tigua Serubabelebi Isaraeleali hameigini haguane mbira mbira hearubi hondo puwa tihondo lalu, Inabi nde tí haru mandagi howa Anduane Homogonaga anda bimi̱ya. Inabi nde tínaga Ngode Datagaliwabehondo lotu laga henego kama. Bamba Asirianaga Kini Esaradonohanda ina dindi ogoha hole pudaba layangi howa hama ibinigo iname tínaga Ngode Datagaliwabehondo lomaru bo mialu haga kamagoni, lene.
EZR 4:3 Ani layagola Serubabele Yosuala libuguabi agali haguane bu hearu tiguabi ladai bialu lalu, Tígua Anduane Homogo inanaga Ngode Datagaliwabe kagonaga anda ogoni nabuleberemi. Kini Sairusi ibugua bilimu lalu inahondo langiyadagua Anduane Homogo ina Isaraele wali agalinaga Ngode Datagaliwabenaga anda inaneme buleberema, lene.
EZR 4:4 Ani ladai biyagola agali tara dindi ogoriani luore hene hearu tigua Yudali hearu handabe manga howa ti anda bialu hearia wahalu pelonaga mo gi haga bule manda bini.
EZR 4:5 Ani bulenaga tigua Pesianaga gabumane agali hearume Yudaliru anda bialu heago mo ko halu bo gialo wahelonaga muni mini. Tigua Kini Sairusi heangi howa anidagua bialu heane dege Pesia dindiha Dariusi ibu kini ha aribia hene.
EZR 4:6 Pesianaga Kini Dariusi homayagola Segesihanda Pesia dindinaga kini ha aribia hene. Ani heagola Yudanaga waitigi bu hearume Kini Segesihondo beba mbira gili buwa Yarusaleme wali agali bu karumebi Yuda dindi maruha bu karumebi ko biya lalu gilibu pelene.
EZR 4:7 Ani pelo heagola Pesianaga Kini Segesi homene. Homayagola Adasegesi ibu kini ha aribia hene. Ani heagola Bisilamabi Midiredadabi Tabelebi ti baba biabe mandagi biaga hearubi tigua beba mende Aramaigi bi lalu gili buwa Pesia dindini kini hearia gilibu pelene. Ani gilibu pelayagola Pesia dindini howa Aramaigi bi laga hearume dagalowa kini hale helo bi lo beregedalu Pesia bi lalu lamini.
EZR 4:8 Mani agali kira dindi ogoniha gabumane haru haga agali haguane Lehumu henego mende dindi ogoniha beba gili bia dagala biaga Simisai henego libuguabi nde Yarusaleme wali agali bu karume ko biya lalu beba mbira Kini Adasegesi hearia gilibu pelene. Beba gilibu pelalu howa bi ogodagua lowini.
EZR 4:9 Kini-o bayale kebe. I̱ Lehumu dindi ogoha gabumane agali haguane kogomebi dindi ogonaga beba gili bia dagala biaga Simisai ibubi dindi ogoha agali haguane maru godi lalu mana dabaki biaga karumebi í̠naga agali haguane Eregeali karumebi Babilonoali karubi Elama dindiha Susa tanoali karumebi ina bibahendeoreme beba ogo gilibu wia harama.
EZR 4:10 Wali agali bamba agali kini hongohe mini lene Asubanibala ibugua tini dindiha howa tali tagi haya handala dindi ogoha tagira íbu heneru maru Samaria tanoha karu maru Iba Yuberedisi poragoha bu karu ti bibahendemebi nde bi ogoni lo mbira halu beba ogoni gilibu wia harama.
EZR 4:11 Tigua beba ogodagua gilibu pelene. Kini Adasegesi-o ina í̠naga biabe biahaga howa Iba Yuberedisi ange orayagi kamarume í̠nihondo bi mbira loaho howa bi ogo gilibu ibilarama.
EZR 4:12 Kini-o iname bi ogodagua lalu larama. Yuda wali agali dindi í̠na handaya ho hene tara tara wiaruha howa daibu karu tigua tano mo ko hene biago lone biadai bialu ka. Wali agali bamba tano ogoniha henedaru tigua ko bialu kininaga bi mo wahaga hene. Ani biaga henego áyu tigua tano pabe lone biadai birago ai emene howa biamaro bibehe nga.
EZR 4:13 Anigo ai kini-o bi ogore bayuwa hale habe. Yuda wali agalime tano ogoninaga wai pabe hongohe bu mabu biyagua tigua í̠hondo dagisi muni nangulebira. Anidagua biragola í̠naga dindiha biabe bulenego muni nawi tubagi ho holebere.
EZR 4:14 Í̠nime inahondo mbiraleru ngialu bayuwa handayaho hariligodane Yudalime mani í̠ mo ko nahelonaga langerema. Anidagua bialu kane hondowa iname bi ogo í̠naga gilibu wia harama.
EZR 4:15 Ai í̠naga agali beba gili bia dagala biaga kagohondo gabumanenaga mbugaha bi bamba í̠ mamaliru heangi bini damene gilibu winidaru dagala labe. Ani dagalaragola hale halu keria wali agali Yarusaleme tano ogoniha henedaru ti ko mine haga mbira henedane hale holebere. Bamba ti mamaliru henedangi wali agali uruni tigua kini hearuhondo genda mo mialu agali dindi podene mbira handayaho haga hearuhondobi genda mo mia dege bini. Yarusaleme wali agali tigua kininaga bi mo wahaga bialu hearia kini ibugua tano ogoni bo gialo wahene.
EZR 4:16 Ani bini ngago ai kini-o iname bi ogodagua lawia harama. Ai tigua tano mo tiga bialu pabe hongohe biyagua nde Iba Yuberedisi abene orayagi dindi podene mbira ogoni í̠na handayaho naholebereda lalunaga lowia harama, lene.
EZR 4:17 Tigua beba gilibu pelayadagoni hondowa Kini Adasegesi ibugua nde ladai bialu gili binigo ogo, Gabumanenaga haguane agali Lehumubi beba gili bia dagala biaga Simisaibi libu baba biabe mandagi biaga Samaria tanoha kamirubi dindi podene maru wigi bidaruha hene Iba Yuberedisi abene orayagi haga kamirubi tí bibahendehondo horombe laro. Ai tígua bi lo ibilarimiyago ladai bero.
EZR 4:18 Tígua bi gilibu ibilarimiyago marume dagalowa Pesia bi lowa dagalo beregedalu i̱ langiya.
EZR 4:19 Ani langiyagola i̱na agali beba gili bia dagala biaga hearuhondo lamialu, Tígua ogoni henenedabe taya bialu handadaba, laru. Ani larugola tigua handalu hearia Yarusaleme wali agalime mine halu kininaga bi mo wahalu haabo haga lalu gilibu wiaria handaya. Heneneore tano ogoniha agali ko dewaore bu heneya.
EZR 4:20 Bamba kini hongohe Yarusalemeni howa dindi dewa Iba Yuberedisi orayagi ibugua handameho haga heneya. Ani handayaho howa tigua wali agalihondo dagisi muni tara tara ngidaba laga heneya.
EZR 4:21 Ani heneyago ai tigua biabe biaruagoni mani i̱nime bilimu larogola bule áyu nabilimu laya lalimu.
EZR 4:22 Tigua biabe bialu howa mani i̱ni mo ko holene wuligo áyu ogoni abale ti karia pialu nabilimu lalu lamilimu laro, lene.
EZR 4:23 Ani laya handala maru hearume Kini Adasegesinaga bi layago bebani gilibu yalu puwa Lehumu Simisaibi agali maru libu baba biabe mandagi biaga hearubi ti hearia yalu puwa hale helo dagalalu hene. Kininaga bi dagalayagola agali gabumane haguane uruni tigua hale hene. Hale halu abaleore ami agali hearu heba Yarusaleme pialu Yuda wali agaliru biabe bialu hayaru wahadaba lene.
EZR 4:24 Bamba Kini Sairusi heangi howa Yudali tigua Anduane Homogonaga anda bialu hayagoni tinaga waitigi bu hearume wahadaba layagola Yarusalemeha anda bialu hayago waho hene. Anda biala ha ho dege biane Kini Dariusi ibu Pesia dindinaga kini mali kirani haru hene.
EZR 5:1 Mali ogoningi dege bi mana latagi haga Hagai Ido igini Segaraiala libugua Yuda dindihabi Yarusaleme tanohabi Anduane Homogonaga bi mana latagi halu hene.
EZR 5:2 Seadeli igini Serubabelebi Yahosadaga igini Yosuabi libugua bi mana latagi haga agali kirali biago labonaga bi layago hale halu libugua agali maru hearu haru howa Yarusalemeni Anduane Homogonaga anda biago lone bialu hene. Ani bialu hebigola bi mana latagi haga agali biagolabo libugua biabe biamogo bialu hene.
EZR 5:3 Ani bialu hemigola Iba Yuberedisi abene orayagi dindi mbira mbira wiarunaga haru haga gabumane haguane mbira mini Tadenai heagobi Seda Bosenai ibu ami agaliru haru haga agali haguane heagobi libu heba biabe mandagi biaga agali maru hearubi tigua hale halu hearia Isaraeleali biarume biabe bialu ka layane hale hene. Ani hale halu tigua abale Yarusaleme pene. Puwa tigua agali Anduane Homogonaga anda bulenaga biabe bialu hearuhondo hale halu lalu, Tígua anda ogoni bialu harimidaruni tí aiwa bilimu layabe.
EZR 5:4 Agali biabe ogoni handayaho haga ai ima dege kamibe mini langidaba, lene.
EZR 5:5 Tigua ani layagola Ngode Datagaliwabe ibunime Yudanaga agali haguane biaru baya hangu handayaho heagola Pesianaga agali haguane biarume tinaga biabe bialu hearu nabidababe labe nahe hene. Ani labe nahe howa tigua nabidababe lalu agi buabe tobaho howa tigua Kini Dariusi hearia beba mbira gili bialu Yudali biarume bialu hayadaruninaga ogodagua bira lalu gilibu pelene.
EZR 5:6 Ani gilibu pelowa kini ibunaga bi ladai bilo hondo hene. Tigua kinihondo bi gilibu pelenedagoni ogoale bira lalu beba gilibu pelene. Kini Dariusi-o í̠ bayaleore haabo habelo.
EZR 5:8 Kini-o ina Yuda dindiha puwa handalu hemaria tigua tininaga Ngode Datagaliwabe hongohe kagonaga anda biago lone bialu hearia handarima. Tigua ege to̱le̱ timbuniru podo yu ibalu urunime anda bialu irarume baya hangu ala dunga haga bialu anda ndo baya taraore mbira bialu ka.
EZR 5:9 Anidagua bialu heagola iname tinaga agali haguane hearuhondo hale halu lalu, Tígua Ngode Datagaliwabenaga anda bialu kamirubi biabe maru bialu kamirubi aiwa bilimu layabe, lalu hale harima.
EZR 5:10 Ani lalu, Agali biabe ogoni bilo handayaho haga uruni tinaga mini í̠ langulenaga ai ima dege kabe, lalu hale harima.
EZR 5:11 Ani hale harimagola Yudali biaru tigua ladai bialu lalu, Ina Ngode Datagaliwabe dindi hari bibahende ngaruni handayaho haga kagonaga biabe biahaga kama. Bambaore inanaga kini hongoheore mbira henegome anda ogoni bini. Ani binigo inanaga waitigi bu hearume bo gialabaga bialu mo ko hai henego ainde lone biadai bialu kamagoni.
EZR 5:12 Anidagua bialu kamagoni irane ogodagua. Inanaga mamali hearume Ngode Datagaliwabe dahuliya andaga kago mo keba halu hene. Ani mo keba halu heagola ibugua Kaladeali Nebugadanesa Babilononaga kini heagome ina baba wai bilo ibilaya. Ani ibilayagola ibugua ibalu ina mo ko howa bai halu bo podahana haya. Ani buwa Anduane Homogonaga anda heago bo gialo wahai halu wali agali bibahende Babilono dindiha helo garabaya buwa haru piaiore haya.
EZR 5:13 Ani bialu Kini Nebugadanesa ibugua Ngode Datagaliwabenaga biabe bulenaga mbirale ngolomebi silibamebi wabini Anduane Homogonaga loma bia howa ibunaga andaha wiaga wiaru bibahende Babilonoha mo yu piai howa ibunaga mbirale dama mitangi bialu gime wabini Babilono dindiha wiaru bi pupu wiaga andaha ngelole mo yu piai haya. Ani biagola mani Sairusi ibu Babilononaga kini ha aribia haya. Ibu mali mbirani kini pigane howa Anduane Homogonaga anda ogoni bule pudaba laya. Ani lowa Kini Sairusi ibugua inanaga mbirale bibahende bi pupu wiaga andaha wiago mo yalu penedaruni inanaga agali haguane mbira mini Sesebasa heagohondo miadai biai haya. Ani buwa Kini Sairusi ibugua Sesebasa dabalu ibilenedagoni ibugua Yuda dindinaga gabumane haru haga howa handayaho habe laya.
EZR 5:15 Ani lowa kini ibugua Sesebasahondo lamialu lalu, Mbirale uruni Yarusaleme mo yalu dai bialu Anduane Homogonaga anda abale henedagoriaore helo bia aribia halimu, laya.
EZR 5:16 Ani laya handala yalu ibinigo ai Sesebasa ibugua mbirale uruni anda gahenge ogoniha ngelolenaga ibuni nde Yarusaleme íbu howa ibunime biabe ogoni handayaho halu Anduane Homogonaga anda ogoni bialu kamagoni. Abale biai nahe wene bulene ngelowa dege bialu kamagoni, lalu ladai biya.
EZR 5:17 Yudali biaru tigua bi ogonidagua layago ai Kini-o karulapeyagua nde í̠naga beba gili bia dagala biaga karuhondo Kini Sairusinaga bi ogoni henenedabe hondole gabumanenaga mbugaha dabalu handadaba labe. Ani handaragola Yudali uruni tinaga bi henene layada hawa layada lalu tigatiga handa walia holebere. Ani hondowa anda ogoni bilo lalubi ndo nabilo lalubi bi ladai bibe, lene.
EZR 6:1 Ogoni layagola Kini Dariusihanda lalu, Babilononaga kinirume biniru mbugani gilibu wiagaha Anduane Homogonaga anda bilimu lene lo ngabe hondole hai bidaba, lene.
EZR 6:2 Hai bialu hearia Babilononi handa walia nahe howa dindi timbuni Egebadana ogoni Mediahayagi beba mbira gilibu wiagoha bi ogobi lo wiaria handa walia hene.
EZR 6:3 Sairusi ibugua mali pigane handame haga heneyangi Yarusalemeni Anduane Homogonaga anda bilonaga bi ogo leneyane hendene. Anduane Homogonaga anda ogoni nogo tara tara bo loma bia ho mulenebi irani bo delolenebi anda ogoni helo gumuni mo tiga bialu biadai bilimu. Anduane Homogonaga anda ogoni daliganaga magi mida pira kirani karia (27) holebira. Aranenaga magi mida pira kirani karia (27) dege holebira.
EZR 6:4 Anda hái bulenenaga to̱le̱ tongo tebira para howa ira tongo mbira para holebira. Uruni bibahendenaga yolo kininaga muni anda howa yolo mo mulebira.
EZR 6:5 Ndisi be tara tara ngolomebi silibamebi wabini Yarusalemeni Anduane Homogonaga andaha wiaria Kini Nebugadanesa ibu mo yalu Babilono dindini winiyarubi mo yalu dai buwa Yarusaleme Anduane Homogonaga andaha wiagadagoria ngelo yu dai bilo, lalu lo wiane hendene.
EZR 6:6 Bi ogoni lo wiago hondowa Dariusi ibugua ogodagua ladai bini. Iba Yuberedisi ange ni paliragohayagi gabumane agali haru haga Tadenaibi Seda Bosenaibi libu heba biabe mandagi biaga kamiru tihondo larogo, Anduane Homogonaga anda biragoha hapai nahe henge milimu.
EZR 6:7 Yuda dindinaga gabumane agali haru hagabi agali tininaga haguanerubi heba tini Anduane Homogonaga anda abale henedagoria bia dai bilo.
EZR 6:8 Áyu i̱na tigua anda ogoni bilo biamogo bilimu lalu bi hongohe langero. Biabe biaga uruni tinaga hame lararu ale mulene wali agali Iba Yuberedisi ange ni paliragohayagi karu tigua muni dagisi kinihondo miragome yolo bulebira. Ani biragome biabe bialu kago pugu holo nabulebira.
EZR 6:9 Horo bibahendengiore loma binigo mo miaga agali Yarusalemeni karume Ngode Datagaliwabe dahuliya andaga kagohondo bo lomabu delole hame ledama lara ale miai halimu. Nogo bulumaga iginibi sibibi sibi iginibi ladi ale mini widibi ibibi waini ibabi olibe lininaga welibi milimu.
EZR 6:10 Tígua ogonibi beramigola uruni tigua Ngode Datagaliwabe dahuliya andaga kagohondo nogo tara tara bayale ibu turu haga aleru milobi ibuhondo i̱nagabi i̱ iginidarunagabi bi la haragola ina mo gumbila helo.
EZR 6:11 I̱na bi hongohe mende larogome mbiralime bi larogo aribia haga biyagua ibuninaga anda ira mbira gialo muwa ngunihayagi de howa ibuni ogonime nogoba helo. Ani buwa ogoni ibunaga andabi ko ngubi wahagane ale helo.
EZR 6:12 Ngode Datagaliwabe ibunaga mini Yarusalemeni yaraga helo lenedagome kinibi hameigini dindi tara tararubi mbiralime bi o larogo mo aribia haragobi Anduane Homogonaga anda gialo wahole manda birago ibubi bope helo lalu bi ogoni Dariusi i̱na laro. I̱naga bi ogoni bibahende hale halu biloore laro, lene.
EZR 6:13 Ogonibi layagola gabumane agali haru haga Tadenaibi Seda Bosenaibi haru haga marubi ti bibahendeme handame haga Kini biagome layadagua bini.
EZR 6:14 Yu wali agalinaga haguane biarume anda biagoni ala bigi bialu bayuwa bini. Anduane Homogonaga bi mana latagi haga agali kira Hagai Segaraialame mo hongo hayagola tigua ani bini. Isaraelenaga Ngode Datagaliwabehanda layadagua ani buwa Pesianaga handame haga Kini Sairusi Adasegesila ala henerumebi Dariusi heagomebi tigua bi hongoheme bilimu layadagua bialu biai hene.
EZR 6:15 Handame haga Kini Dariusi ibugua handame ho hearia mali waragane layangi tininaga ege daga mini Ada layagola horo tebonengi Anduane Homogonaga anda ogoni bu maro bini.
EZR 6:16 Ani biai howa Isaraele wali agalibi loma binigo mo miaga biarubi Libaiali biarubi wali agali maru maru garabaya ale howa dai bini hearubi heba ti bibahendeme turu timbuni halu Anduane Homogonaga anda biagoni Ngode Datagaliwabehondo loma bia hene.
EZR 6:17 Loma biyadagoni nogo bulumaga wangabe handari mbirabi (100) nogo sibi handari kirabi (200) sibi igini dalua handari mariabi (400) bo mini. Ani buwa wali agali tini ko biyaru domo wahelo lowa nogo meme wangabe pira mbirani kira (12) bo mini. Pira mbirani kira (12) bo minidagoni irane Isaraele hameigini pira mbirani kira hayagonaga manda buwa bo mini.
EZR 6:18 Mosese heneyangi agua bilimu lalu Mana lowinigo gilibu ngadagua tigua loma binigo mo miaga hearubi Libaiali biarubi Yarusaleme Anduane Homogonaga anda biagoria howa bulene winigo bilo mo manda manda bini.
EZR 6:19 Mali mbira howa ege mbirangi horo pira mbirani maria (14) hayagola wali agali garabaya biabe ale bialu hene dai biyaru tigua Bolangua Halu Penegonaga Horo mitangi bialu tomo nene.
EZR 6:20 Loma binigo mo miaga hearubi Libaiali hearubi tigua ilili bulene wiadagua ilili bialu Ngode Datagaliwabenaga deni ko domo wahowa gagahe hene. Ani buwa Libaiali biaru tigua nogo sibi igini dalua damene biaru Bolangua Halu Penegonaga Horo mitangi bialu wali agali bibahende garabaya biabe ale bialu howa daibiyarunagabi loma binigo mo miaga biarunagabi Libaiali tininagabi bo lomabia hene.
EZR 6:21 Nogo tara tara dalua bo loma biyaruni Isaraele wali agali garabaya biabe ale bialu howa daibu henerumebi wali agali dindi ogoriani hene tininaga mana ko wiaru wahai halu Anduane Homogo Isaraelenaga Ngode Datagaliwabe mini yaraga halu ibunaga lotu lole ibiyaru baba ti mandagi nalu hene.
EZR 6:22 Horo karuni Mberedi Yidi Nahe Nolenenaga Horo hayagola tigua ogoningi turu howa tomo nalu hene. Tigua turu henedagoni Anduane Homogohanda Asirialinaga kini biago mini mo beregedayagola ibugua Isaraele wali agali Anduane Homogonaga anda biyago bilo biamogo biyagonagabi ti turu hene.
EZR 7:1 O binidaruni biaha mali dewaore pialu Pesianaga handame haga Kini Adasegesi heangi agali mbira ibu mini Esera Babilono dindini hene. Ibunaga mamali loma binigo mo miaga haguane timbuni Arono heneya aria hene. Esera ibu Seraia igini Seraia ibu Asaria igini Asaria ibu Hiligaia igini Hiligia ibu Salumu igini Salumu ibu Sadogo igini Sadogo ibu Ahidubu igini Ahidubu ibu Amaria igini Amaria ibu Asaria mende igini Asaria ibu Meraiodi igini Meraiodi ibu Serahia igini Serahia ibu Usi igini Usi ibu Bugi igini Bugi ibu Abisua igini Abisua ibu Piniasa igini Piniasa ibu Eleasa igini Eleasa ibu Arono igini hene. Agali uruni ti Esera mamali hene.
EZR 7:6 Esera ibu Anduane Homogo Isaraelenaga Ngode Datagaliwabehanda Mana lowinigo Mosesehondo miyagoore manda timbunibi howa lawai haga hene. Anduane Homogohanda Esera biamogo biyagola Esera ibugua kini biagohondo hale hayaru bibahende miai hene. Handame haga Kini Adasegesi ibugua Babilono heane mali kane layagola Esera ibugua Babilono howa Yarusaleme pole Isaraele wali agali maru heba pene. Piyadaruni loma binigo mo miaga marubi Libaiali marubi Anduane Homogonaga anda iba gana lagabi Anduane Homogonaga anda mamage hagabi biabe biagabi ti heba pene.
EZR 7:8 Tigua ege piganegonaga horo mbira layagola Babilono wahalu Yarusaleme pole tagira pialu pene. Anduane Homogo ibugua ti biamogo biyagola abale ege daunigonaga horo mbira layagola Yarusalemeni anda pene.
EZR 7:10 Agali Esera ogoni ibugua Anduane Homogonaga Mana lowinigo lawai haga howa mana ogonime ledadaguaore bayuwa bule hongo howa lomanda biaga hene. Ani buwa ibugua Isaraele wali agali hearume Mana bulenebi nabulenebi lo ngadagua bilo lawai haga hene.
EZR 7:11 Esera ibugua loma binigo mo miagabi Anduane Homogohanda Mana lowinigo Isaraelealiruhondo minigo manda biaihe howa lawai hagabi heago hondowa handame haga Kini Adasegesihanda Eserahondo beba mbira gili buwa minigome bi ogo lowini.
EZR 7:12 I̱ handame haga Kini Adasegesi kogo i̱na loma binigo mo miaga agali Esera dahuliya andaganaga Ngode Datagaliwabe Mana lowinigo lawai hagabi í̠hondo beba ogo gili bu ibilaro.
EZR 7:13 I̱na bi hongohe lo ibilarogome ogobi laro. I̱na dindi bibahende handa gimbu bu kogoria Isaraele wali agali bibahende karubi loma binigo mo miaga karubi Libaiali karubi tigua Yarusaleme dai bule manda bidarume í̠ heba dai bilo.
EZR 7:14 I̱ heba i̱naga ganisolo agali kariali biarubi mandagi lo mbiraore halu tínaga Ngode Datagaliwabe ibugua Mana lowini ngago tíhondo handayaho halimu lalu ngiyago wali agali Yarusalemeha karubi Yuda dindi bibahendeha karubi tigua mana ogoni bayuwa layadagua bialu handaya howa au kabe hondole pilimu larama.
EZR 7:15 I̱bi i̱naga ganisolo biarubi iname Isaraelenaga Ngode Datagaliwabe ibunaga anda Yarusalemeha kago ibuhondo ngolobi silibabi mu winigo mirimago mo yalu pobelo hame ledama.
EZR 7:16 Babilono wali agali dindi bibahendeni hearume silibarubi ngolorubi ilu wiyaruni Isaraele wali agali tinimebi tinaga loma binigo mo miagamebi tinaga Ngode Datagaliwabe andaha wilo miyarubi bibahende mo yalu pobe.
EZR 7:17 Muni uruni bayuwa podaga buwa ogonime nogo bulumaga wangaberu nogo sibi wangaberu sibi igini daluaru ladi ale tara tarabi waini ibabi uruni yolo buwa Yarusalemeni tinaga Ngode Datagaliwabe andaha bo lomabu mulene dabuni mo milimu.
EZR 7:18 Ngolobi silibabi maru uruni bialu ibira harago í̠nabi í̠naga hameiginirumebi Ngode Datagaliwabe ibunaga hameni howa bua birago ale tígua bilimu.
EZR 7:19 Ndisi tara tara tomo yagane alebi dawagane bebi ngiyaru damenego Ngode Datagaliwabehondo muwa Yarusaleme Anduane Homogonaga andaha yalu puwa ogoriani biabe bulene ngaru bule Ngode Datagaliwabe Yarusalemeni kago ibuhondo milimu.
EZR 7:20 Anduane Homogonaga andaha bulene mbira ndia hayagua kininaga muni wiaga biagoha muni maru ngilo.
EZR 7:21 Iba Yuberedisi ange ni paliragohayagi tinaga hondo haga karuhondo i̱na bi hongohe lalu dahuliya andaga Ngode Datagaliwabe kagonaga Mana lowinigo lawai hagabi loma binigo mo miagabi Esera ibugua mbirale mbira tihondo hale hayagua hale harago damene abaleore milimu.
EZR 7:22 I̱na magi o ngelarogo bolangua nahe unuyagi milimu. Silibanaga genda daosini tebirani handari maria (3,400) kilo mialu ladi ale mini widi nu handari duria (500) agima mialu waini iba lida magi daosini kira (2,000) mialu olibe lininaga weli lida magi daosini kira (2,000) mialu bulene nga. Ani bialu ibi tíninaga hame laradagua mo milimu.
EZR 7:23 Dahuliya andaganaga Ngode Datagaliwabehanda ibunaga anda bilonaga mbirale hameledaru bayuwa Eserahondo miai halimu. Ogonibi beremigome Ngode Datagaliwabehanda i̱hondobi mani i̱ homedoha handame haga kini aribia hararubi heba keba nahelo ani bilimu.
EZR 7:24 Tígua loma binigo mo miaga karubi Libaiali karubi Anduane Homogonaga andaha iba gana laga karubi mamage haga karubi biabe biaga agali karubi biabe maru anda ogoniha bialu karubi ti bibahendehondo dagisi muniore ngi nalalimu, lene.
EZR 7:25 Esera í̠ha í̠naga Ngode Datagaliwabehanda mini bayale gigabi wia hayagome gabumane agali hondo hagarubi godi hale hagarubi dabo helabe. Tigua wali agali Iba Yuberedisi ange ni paliragohayagi í̠naga Ngode Datagaliwabe Mana lowini ngago biaga karu haru helo ani dabo helabe. Mana lowinigo ogoni manda nabi karuhondo bayuwa manda bilo lawai habe.
EZR 7:26 Wali agali marume Ngode Datagaliwabenaga mana lo ngago mo wahayaguabi dindi bibahende i̱ handame ho kogonaga mana lo ngago mo wahayaguabi ogoni ibu pani abaleore mulene nga. Pani ogoni bo homelolene ngayaguabi dindi mendeha bo pelolene ngayaguabi ibunaga mbirale ngaru mo garabaya biyaguabi ibuni garabaya biyaguabi urunidagua mbira bulene nga. Bi ogoni lalu Kini Adasegesihanda gilibu mini.
EZR 7:27 Esera ibugua lalu, Anduane Homogo ina mamalirunaga Ngode Datagaliwabe kago ibunaga mini yaraga hama. Ibugua kininaga mini mo heya halu kini ibugua Anduane Homogonaga anda Yarusalemeni biyago mo baya bialu kagoni.
EZR 7:28 Ngode Datagaliwabe ibunaga biamogo bia holeneme i̱ dara halu biamogo biya. Ani buwa kini biagobi ibunaga ganisolo agali biarubi haru haga agali maru biarumebi biamogo timbuni biya. Anduane Homogo i̱naga Ngode Datagaliwabe ibugua i̱ biamogo bialu hongo ngiyagola i̱na Isaraele hameigini dewa biarunaga haguane Yarusaleme dai bima larugola ti i̱ heba dai buleberema layagoni, lene.
EZR 8:1 Mini ogoha gilibu ngaruni Adasegesi ibu kini heangi Esera i̱ni heba Yudali hameigini mbira mbira henedagua agali haguane heba dai bigi binigo mini uru
EZR 8:2 Piniasa hameigini Gesomobi Idama hameigini Danielebi Debidi hameigini Segania igini Hadusubi Paroso hameigini Segaraiabi ibuni hameigini maru agali handari mbirani pira duriabi (150) uruni bibahende Esera heba Yarusaleme dai bini.
EZR 8:4 Pahadamoaba hameigini Serahia igini Elioenai ibu heba agali handari kira (200) dai bini.
EZR 8:5 Sadu hameigini Yahasiele igini Segania ibu heba agali handari tebira (300) dai bini.
EZR 8:6 Adini hameigini Yonadana igini Ebede ibu heba agali pira duria (50) dai bini.
EZR 8:7 Elama hameigini Adalia igini Yasaia ibu heba agali pira karia (70) dai bini.
EZR 8:8 Sebadia hameigini Maigele igini Sebadaia ibu heba agali pira halira (80) dai bini.
EZR 8:9 Yoaba hameigini Yahiele igini Obadaia ibu heba agali handari kirani pira mbirani halira (218) dai bini.
EZR 8:10 Bani hameigini Yosibia igini Selomidi ibu heba agali handari mbirani pira waragaria (160) dai bini.
EZR 8:11 Bebai hameigini Bebai igini Segaraia ibu heba agali pira kirani halira (28) dai bini.
EZR 8:12 Asagada hameigini Hagadana igini Yohanana ibu heba agali handari mbirani pira (110) dai bini.
EZR 8:13 Adonigama hameigini Elibeledebi Yuelebi Semaiabi agali pira waragariaru (60) ti agali tebira biaru heba dai bini ndo emene maha dai bini.
EZR 8:14 Bigibai hameigini Udaibi Sagubi libu heba agali pira karia (70) hene. Hameigini uruni bibahende Yaruseleme dai biai hene.
EZR 8:15 I̱ Esera i̱na agali uruni Ahaba tanoha iba dalialu piaga hariga wiagoria howa agali bibahende mo mogo bialu balai anda buwa horo tebiru ogoriani harima. Ani howa handalu hewaria loma binigo mo miaga agali maru ogoriani bu hearia handarugo ai Libai hameigini mbira nahandaru.
EZR 8:16 Ani nahende howa i̱na agali haguane dirali olalu i̱ni koria ibidaba laru. Agali ibiyadaruni tinaga mini Eliese Ariele Semaia Elenadana Yaribi Elenadana mendebi Nadana Segaraia Mesulama imaru uruni bibahende olalu íbu ngoai hadaba laru. Ani bialu agali kira mana bayale lawai haga Yoiaribi Elenadanalabi ibidaba laru.
EZR 8:17 Ani ibiyagola tigua Kasibia dindiha agali haguane mbira mini Ido ibu Anduane Homogonaga anda handaya ho haga heneru aria kago hondo pudaba laru. Ani hondo puwa agali maru ibu heba biabe bialu haga hayadarubi haru halu Anduane Homogonaga andaha biabe bimi̱ya ibalimu laru.
EZR 8:18 Ngode Datagaliwabehanda ina dara timbuni howa biamogo biyagome tigua Mali hameigini Libaiali mbira mini Serebaia henego ibilaya. Ibu agali bayaleore howa ibugua biagaru bibahende tigabi hangu biaabo haga hene. Ani henego ai ibu iginirubi ibu hamenerubi pira mbirani halira (18) henego uruni bibahende haru halu ibai haya.
EZR 8:19 Ani ibiyagola Ido ibugua nde agali kirali Hasabia Yasaiala libu Merari hameigini henego ibilalu libu dameneru pira kira (20) haru halu ibiniya.
EZR 8:20 Ani bialu agali maru handari kirani pira kira (220) Anduane Homogonaga andaha biabe biaga hearubi ibilalu biya. Bamba Kini Debidi halu ibunaga agali haguane heneru ti heangi ibugua agali uruni aria Libai hameiginiru baba biabe biamogo mogo bialu helo dabo helene. Agali uruni henedaru tinaga mini marunaga mini wiagadagoha gilibu winigo nga, lalu Eserahanda lene.
EZR 8:21 Esera ibugua Iba Ahaba peago kawareni dege howa wali agali bibahende hearuhondo lamialu lalu, Ina bibahendeme tomo nane haga mana bialu Ngode Datagaliwabenaga deni inane mo dindiha howa ibuhondo lalu, Ina Yarusaleme pole poramagoha inanebi inanaga waneiginirubi mbirale yidamarubi harigani baya hangu handayaho habe, lama laro, laya.
EZR 8:22 Esera i̱na tihondo lamialu, Ina harigani haru pelo ami agali hosini biralu ina haru pelo i̱na kinihondo ngi lolene taga howa ngi nalarudagoni irane ala i̱na kini heba mandagi howa ibuhondo bi ogodagua laru. Inanaga Ngode Datagaliwabe ibugua wali agali ibuniore talima pialu haga karu baya hangu handayaho haga ka. Anigo wali agali maru ibuhondo erembira mialu poraruhondo keba timbuni halu tini pani nelo mialu mo ko howaore baga ka, lalu kini lamiru. Ani lamu howa mani ibuhondo ami agali maru ina harigani mamage helo ngi lolene taga biya handala waharu.
EZR 8:23 Ani birugo ai áyu iname tomo nane howa ina hariga poramagoha baya hangu haru habe lalu Ngode Datagaliwabehondo bi lamirimagola ibugua hale halu harigani pialu hemagola handaya ho halu biamogo biaore biya, lalu Eserahanda lene.
EZR 8:24 Serebaia Hasabiala heba loma binigo mo miaga agali piralibi ibidaba laru.
EZR 8:25 Ani íbu hemigola kini ibuguabi kini biamogo biaga hearumebi ibunaga agali haguane hearumebi Isaraele wali agali bu hearumebi ngolo silibaru mbirale tara tara Anduane Homogonaga andaha biabe bule mo wulene ngigi biyaruni bibahende i̱na genda magi hondowa loma binigo mo miaga hearu tigua handayaho helo talebu ta haru.
EZR 8:26 Mbirale tigua handayaho helo mo ta harudaruninaga genda magi ogodagua. Muni siliba timbuni genda maginaga tono pira kirani kira (22) wialu ngolonaga genda magi kilogarama daosini tebirani handari maria (3,400) mialu ndisi be silibame wabini handari mbirabi (100) miru. Ndisi be mbira mbiranaga genda magi kilogarama pira tebirani maria (34) ale dege dege miru. Ani bialu ndisi be ngolome wabini pira kirabi (20) mialu ndisi be uruninaga genda magi emene kilogarama halira ale dege degebi miru. Ani bialu ndisi be kira boronosime baya taraore wabinigo yolo timbunime mibehe winigobi miru. Yolo ngolome wabini ndisi be kira miaga winidagua dege mibehe wiagobi mirugola mo yaga biya.
EZR 8:28 I̱na mbirale uruni bibahende loma binigo mo miaga agali homberiali hearuhondo mo talebu tahalu howa tihondo lalu, Ai tígua Anduane Homogo ina mamalirunaga Ngode Datagaliwabenaga biabe bia hole lomabia hene ha kamigonigo hale hadaba. Ai ndisi be ngolo silibarume wabini Anduane Homogo turu halu mua howaore miniru uruni bibahende ibuninagaore wiabagi ho ngagoni.
EZR 8:29 Mbirale uruni baya hanguore yalu puwa Anduane Homogonaga andaha yu anda poleberemi. Yalu puwa loma binigo mo miagarunaga haru haga karubi Libai hameigini haru haga karubi Isaraele wali agali haru haga karubi uruni bibahendenaga deni ngolo silibabi ndisi berubi genda magi lone handadai buwa tihondo mo milimu, laru.
EZR 8:30 Bi uruni lai halu loma binigo mo miaga bu hearubi Libai hameigini aria bu hearubi tigua ngolo silibabi ndisi be biarunibi mo yai halu ina haru Yarusaleme puwa Anduane Homogonaga andaha yalu ibirima, lalu Eserahanda lene.
EZR 8:31 Ege mbiranaga horo hombeane (12) layagola ina Iba Ahaba yu wahalu Yarusaleme pole piaga hariga wiadagua pirima. Ani pialu hemagola Ngode Datagaliwabe ibunime ina harigani baya hanguore handayaho haya. Ani handayaho heagola inanaga waitigi bu hearumebi pageali bu hearumebi mbira harigani howa ina balu inanaga mbirale yalu ibirimarubi mbira gingila mia nabi bayale ibalu anda ibirima.
EZR 8:32 Ani ibalu Yarusalemeni anda ibuwa horo tebiru ha̱lo̱ harima.
EZR 8:33 Horo maneni ngolo silibabi ndisi be biarubi bibahende Anduane Homogonaga andaha yalu puwa genda magi handarima. Genda magi agiradabe handai howa mbirale uruni loma binigo mo miaga agali Uria igini Meremodo henegobi Piniasa igini Eleasa henegobi Libai hameigini aria kira Yasua igini Yosabadabi Binui igini Noadiabi tihondo miai harima.
EZR 8:34 Mirimagola tigua mbirale uruni bibahende baya hangu dagalayagola bibahendeore wiai heneya. Ani wiagola mbirale uruninaga daga mbuga mbirani gili bialu mo winidagua wiaabo helo ani birima.
EZR 8:35 Agali Babilono dindiha garabaya golalu dai biyadaruni ti Yarusalemeni anda íbu howa tigua Anduane Homogo ina Isaraele wali agalinaga Ngode Datagaliwabehondo nogo maru loma bialu irame dai helonaga bo mule haru ibiya. Tigua Isaraele hameigini homberia (12) henego manda bialu bulumaga wangabe homberia (12) haru ibiya. Nogo sibi wangabe pira dirani waragaria (96) haru halu ibuwa sibi igini hungubalua pira kariani kariabi (77) haru halu ibuwa lomabu bo delaya. Nogo meme wangabe homberia (12) tininaga ko biniru domo wahai helonaga loma bialu bo delaya. Loma uruni bibahende irame dai helo bo delai haya.
EZR 8:36 Ani bo delai halu Babilononaga Kini Adasegesi ibugua beba mbira i̱hondo gilibu ngiyagola mo yalu ibinigo ai i̱na gabumane Iba Yuberedisi abene orayagi haru haga heagobi ibunaga agali haguane bu hearuhondobi ti hendelo lowa yalu pudaba laru. Agali haguane uruni tigua beba ogoni hondowa iname Anduane Homogonaga anda loma biahene ogoni baya hangu buluma̱ya biamogo bialu haya, lalu Eserahanda lene.
EZR 9:1 Eserahanda laabo halu lalu, Iname loma uruni delai howa inanaga agali haguane bu hearume ibuwa i̱hondo langialu lalu, Isaraele wali agalirubi inanaga loma binigo mo miaga agalirubi Libai hameiginirubi tigua wali agali tara ina aria ndo hearu hondowa tini hangu habagi nahe ta nabi mandagi haya. Tigua Kenana wali agalirubi Hidi wali agalirubi Perisi wali agalirubi Yabusu wali agalirubi Amono wali agalirubi Moaba wali agalirubi Iyibi wali agalirubi Amoro wali agalirubi ti bibahende mana koorene ko biagadagua bialu hene ka.
EZR 9:2 Ani bialu inanaga agali haguane Yudali bu hearume dindi uruniha wali berearu dabu bigi biyagome ina wali agali Ngode Datagaliwabe ibuninaga loma biaho helene harimagoni ina ko halu dindi tara wali agali biaru haradagua bidama. Agali haguane hearubi haru haga hearubi tigua mana ko urunidagua bialu heagola hondowa wali agali maru hearumebi ti biyadagua talialu bialu ka, lalu i̱ langiya.
EZR 9:3 Tigua bi ogoni layago hale howa i̱na i̱naga bu miniha genda timbuniore haru. Genda howa i̱ninaga aga bu hewago lerelalu mandari angaribi minu dogai halu i̱ minibi naibiore bame ona biru wiru.
EZR 9:4 Ani berewane dege alendo halu alendonaga loma bo delolenengi haya. Wali agali hearume manda bialu tigua mana ko biyagonaga Isaraele wali agalinaga Ngode Datagaliwabehanda ina baba keba timbuni haga kago manda bialu ti gi ho haya. Ani gi howa ti dewaliore i̱ berewagoria íbu ngoai ho birarimagoni.
EZR 9:5 Ani biraabo howa loma bo delolenengi hayagola i̱ aga minu lerelene biago bu berenego biwaore heyalu ge duli hanga ho biruwa i̱naga gi kirabali Anduane Homogo i̱naga Ngode Datagaliwabehondo dogoladaga haru.
EZR 9:6 Ani bu biruwa i̱na Ngode Datagaliwabehondo bi agua laru, I̱naga Ngode Datagaliwabe-o i̱na taga timbuniore ho kogoni. Ai i̱na í̠ kegoria ibalu í̠hondo bi labe naheore ko lo manda bido. Iname ko dewaore bialu harimada. Ani birimagome inanaga mana ko uruni dewaore wu to̱lalu hari daliga ela habehe wiyada.
EZR 9:7 Inanaga mamali alaore henedangi howa í̠naga wali agaliruore heneru tigua mana ko dege bima ibalu henego áyu inamebi nde mana ko timbuniore bialu harimada. Ani bialu hemagola inanaga waitigi kini bu hearu ibilarigola tigua ibuwa inanaga mbirale wu hemaru ti mo yai halu inanebi inanaga kinirubi loma binigo mo miagarubi minu bai halu maru garabayabu yalu ti daluha piai haya. Ani biyagola bamba inanaga mamalirume taga timbuni henedagua inabi nde tagaho dege kamagoni.
EZR 9:8 Anigo Anduane Homogo inanaga Ngode Datagaliwabe-o í̠na ina lone mitangi bu dai bialu dara howa ina wali agali emene mbira mbira o daibu kamaruni hangu garabaya harimago golalu i̱ninaga dindi baya gibi Yarusalemeni hole dai bidaba lari. Ina agali hameigini taranaga biabe biahaga hene harimago í̠na ina biamogo birigome bayale kamagoni.
EZR 9:9 Heneneore ina hameigini tara bu karunaga garabaya biabe biahaga hemaria í̠na ina yu wahalu embeda nahaga haabo kegoni. Í̠nime ina dara timbuni howa Pesianaga kini bu hearume ina baba turu ho helo tinaga mini mo paliaho helari. Anidagua birigome iname dai bialu í̠naga anda loma bia hene abale gialo wahayago lone biadai bule ibuluma̱ya haru dai biri. Iname anda ogoni buluma̱yanaga hongo holene í̠na karulapeore ngialu baya hangu handayaho kegola ina Yarusalemehabi Yuda dindi maruhabi bayaleore kamagoni.
EZR 9:10 Anigo inanaga Ngode Datagaliwabe-o í̠na mbirale bayale uruni bialu kegoni helowa iname í̠naga mana lowini ngeru pugualu ko bialu haabo haga kamagonidago iname bi agi lolebe. Ina taga timbuni ho kamagoni.
EZR 9:11 Í̠naga bi mana latagi haga agali hearu tigua í̠ninaga bi mana wiaruni mo yu howa inahondo langialu haya. Tinaga ne harigaha howa í̠nime inahondo bi ogodagua lari. Tínaga dindi áyu pialu karuloleberemigo i̱naga deni bayale ndo nga. Anidagua larogoni irane wali agali dindi ogoniha haga karume mana koorene ko ngubiore ngaru mo tene howa dindi ogoni bibahendeha bialu haga nga, lari.
EZR 9:12 Anidagua biaga kago tígua dindi ogoniha wali bedaruni dabu nabilimu. Tí wali bedamirubi agali dindi ogoniha karu dabu bilo namilimu. Ti bayale helo biamogo bulenebi tigua mbirale mbira bule bialu karu biamogo bulenebi uruni bibahende nabilimu laro. Tígua i̱naga bi larogo hale halu taluwa bialu harimiyagua nde tí dindi ogoniha bayale halu hongoheore holeberemi. Ani bialu mani tínaga waneigini aguanene holebiraru tigua dindi ogoniha bayale haabo holebira, lalu larigoni ndobe.
EZR 9:13 Heneneore inanaga Ngode Datagaliwabe-o í̠na inahondo bi ogonidagua langirigo mo wahowa iname mana ko liahe wiaru dege bialu harima. Ani bialu hemaria í̠nime ina bibahende mana lalu pani ngiri. Ani bialu ina mo ko halu bo amo lolene winigo ai ani nabi í̠naga wali agali dara timbuni ho howa ina emene mbira mbira hangu helo yupe hari.
EZR 9:14 Ani birigo ai ina yu wahene emene kamarume í̠naga bi lo winidaru lone mo wahowa dindi tara wali agali mana ko tara tara biaga bu karu dabu bigi bialu harimayagua ogoni mana ko timbuni buleberemada mandabu kama. Iname wali agali ogonidagua dabu bigi bialu harimayagua nde í̠na inahondo keba timbuniore halu wali agali emene yu wahene kamaruni bibahende bo wahai holebereda mandabu kamagoni. Ani bo wahai haregola ina aria lenego mbiraore hangubi mbira naholobada.
EZR 9:15 Anduane Homogo ina Isaraele wali agalinaga Ngode Datagaliwabe-o í̠ mini bayale tigabiore howa í̠na emene mbira mbira hangu yu waharigo ina o kamagoni. Ai ina bibahende wali agali yu wahene kamarumebi mana ko dege biaga kamago í̠ni kegoria kaware ibabe naheore kamagoni, lalu Eserahanda Ngode Datagaliwabehondo bi ani lamaro bini.
EZR 10:1 Esera ibu Anduane Homogonaga anda lomabia hene heagoha harabani howa ibugua Ngode Datagaliwabehondo bi lalu dindini bulu paluwa dugu bialu mana ko bialu heneru bibahende latagi hai hene. Ani lalu hearia Isaraele wali agalibi waneiginirubi dewali íbu ngoai halu Esera ho mabu buwa tibi nde ko biyarunaga dara howa dugu bigibigi bialu hene.
EZR 10:2 Ani bialu heagola Elama hameigini Yahiele mbira henego igini Segania ibugua Eserahondo lalu, Iname Ngode Datagaliwabenaga mana lo wiago pugualu hameigini tara tara Ngode Datagaliwabe mitangi nabiaga hearu aria wali berearu dabu birimagoni. Ani birimagoyu ina Isaraele wali agali kamarume mana ko ogoni domo wahelonaga bulene mbiraore hangu nga.
EZR 10:3 Bulene mbiraore ogoni iname buleore lalu bi hongohe mbira Ngode Datagaliwabenaga deni howa lo wialu iname dindi tara tara wali dabu birimarubi waneigini hayadarubi bibahende haru halu tini aba ai̱ya andaga dai biai helami̱ya. Ai í̠nabi agali maru Ngode Datagaliwabenaga mana talima pialu haga kamirubi tígua ina kamaruhondo ogoale bidaba lalu langilimu. Ani langeremigola iname langeremidagua bialu Ngode Datagaliwabenaga bi mana lo ngago bialu holeberama.
EZR 10:4 Genda áyu ogoni mo tiga bulene biabe ogoni í̠naga ngagoni. Ani ngago ai í̠na gi nahe abale heyalu mo tiga bia. Ani beregola ina í̠ heba kamarunime mini mo mbiraore halu í̠na inahondo bidaba lalu larego biai holeberema, lalu Esera lamini.
EZR 10:5 Ani layagola Esera ibugua bi hongohe mbira loma binigo mo miaga agali haru haga hearuhondobi Libai hameigini haru haga hearuhondobi Isaraeleali haru haga hearuhondobi Segania ibugua layadaguaore bule lalu Ngode Datagaliwabehondo lo widaba layagola tigua anidagua buleore lai hene.
EZR 10:6 Ani laya handala Esera ibu Anduane Homogonaga anda harabani birayago heyalu Eliasibi igini Yahohanananaga tamu hobane mbira heagoha anda pene. Ani pu howa Isaraele wali agali hearume mana ko timbuni biyagonaga daraore timbuni howa dugu bialu hene. Ani bialu howa ibugua horo ogoningi hobane ogoniha tomobi ibabi naneore biraabo hene.
EZR 10:7 Ani heagola Yuda agali haguane bu hearume bi ogo yalu pudaba lene. Wali agali garabaya golalu dai bini Yarusalemehabi Yuda dindi bibahendehabi bu karu Yarusalemeni hangu íbu ngoai hadaba lole pudaba, lene. Tigua lalu, Horo tebiru bolangua nahelo abaleore Yarusalemeni íbu ngoai halimu. Mbirali ibu naibi dongeho hayagua ogoni ibunaga mbirale wu karu ina karulai halu ibuni ina Isaraele wali agali bu kamaru aria ndo lalu bo taliatagi hami̱ya, lene.
EZR 10:9 Tigua bi uruni yalu peagola Yuda hameigini bu hearubi Beniyamini hameigini bu hearubi horo tebiru biago bolangua naheaore Yarusalemeni ibuwa ege dininaga horo pira mende (20) layagola ti bibahende Anduane Homogonaga anda haraba wali agali ngoai haga wiagoria íbu ngoai ho hene. Ani ngoai ho hearia iba dalu timbuniore ibiyagome agali íbu ngoai ho hearu bibahende damu wahayagola dagare howabi bi galoneore mbira lolebirayane mitangi howabi duru laga laga bialu bu hene.
EZR 10:10 Ani ngoai ho heagola loma binigo mo miaga Esera ibugua heyu howa lalu, Tígua dindi tara tara wali agali Ngode Datagaliwabe mitangi nabiaga hearu dabu bigi birimidagome Ngode Datagaliwabenaga bi mana lowini wiaru puguai harimida. Ani birimidagome ina Isaraele wali agali bibahendenaga mana ko tígua mo timbuniore harimida.
EZR 10:11 Anidagua birimidago ai hale hadaba. Anduane Homogo tí mamalirunaga Ngode Datagaliwabe ibunihondo lapani halimu. Lapani halu mana bayale ibu hameledadagua taluwa bialu halimu. Anidagua bialu howa dindi tara wali agali tí daluni karu heba mandagi nahalimu. Ani bialu dindi tara tara wali tígua dabu bini bedaru wahalu tini dalu pudaba lalimu, lene.
EZR 10:12 Ani layagola wali agali biaru tigua bi hongo howa ladaga halu lalu, Í̠na bi ogoni heneneore larigo iname ogonidagua buleberema, lai hene.
EZR 10:13 Anidagua bia bimi̱yagoyu ai ina dewaliore kamago iba dalume damu wakago ina tagirani dalu damuyu howa mana ko dewaore birimadaru abale mo tiga bibe naheda.
EZR 10:14 Anidago ai inanaga agali haguane bu karu tinime mbirale uruni mo tiga bule Yarusalemeni helo. Tigua agali maru dindi tara tara wali Ngode Datagaliwabe mitangi nabiaga berearu dabu bu hayadaruni tinime horo mbira mbirangi Yarusaleme ibalu mo tiga bilo. Ani mo tiga bule ibalu tininaga tanoha agali haguane karubi godi hale halu mo tale biaga karubi haru halu ibugu bilo. Iname ogonidagua birimayagua Ngode Datagaliwabehanda keba ho hayago naholebirago anidagua bimi̱ya, lene.
EZR 10:15 Bi ogoni layagola hale howa agali bibahendeme anidagua bimi̱ya lalu e̱ lai heagola agali kiralime dege e̱ nale hene. Agali kira ogoni labo Asahele igini Yonadanala Tigiba igini Yahesiala libugua e̱ nalene. Ani nale heagola agali kira mende Mesulama Libai aria Sabedaila libuguabi agali kira Yonadana Yahesialame bi layago dege lo hongo halu hene.
EZR 10:16 Tigua agali mariali bi mo wahaga uruni ti ani helowa agali maru tigua tinaga genda ogoni agali haguanerume mo tiga bilo lalu hene. Agali haguane uruni Esera halu tinaga mini mbuga mbiraha gilibu wini. Ani buwa ege pininaga horo pigane layagola agali mbira mbira dindi tara wali Ngode Datagaliwabe mitangi nabiaga berearu dabu bu hayadaruni tinaga mana uruni mo tiga bule ibidaba lalu olaga bini.
EZR 10:17 Tigua biabe ogoni ege tebirani bu maro bini.
EZR 10:18 Loma binigo mo miaga agaliru wali tara dabu bu henerunaga mini uru. Yosua ibu hamenerunaga hameigini aria Yahosadaga igini Masea Eliese Yaribi Gedalia imaru ti wali tara dabu bu hene.
EZR 10:19 Agali uruni tigua ti one waholeore lalu bi lowini. Ani lowialu tinime ko bu harimada lo manda bialu tigua nogo sibi wangabe mbira dege dege tinaga ko bialu hayadarunaga Ngode Datagaliwabehanda domo wahelonaga loma bialu bo delole haru ibini.
EZR 10:20 Ani bialu Ime hameigini aria Hanani Sebadiala libubi ani bini.
EZR 10:21 Harimi hameigini aria Masea Elaya Semaia Yahiele Usia imaru tibi nde ani dege bini.
EZR 10:22 Pasuru hameigini aria Elioenai Masea Isimaele Nedanele Yosabada Elasa imaru tibi ani bini.
EZR 10:23 Libaiali aria dindi tara wali Ngode Datagaliwabe mitangi nabiaga berearu dabu bu henedaru tinaga mini uru. Yosabadabi Simaibi Kelaia ibu mini mende Kelida ibubi Pedahia Yuda Eliesebi tigua nde ani dege bini.
EZR 10:24 Agali iba gana lalu ngida ba pilipe la bigi biaga howa dindi tara wali Ngode Datagaliwabe mitangi nabiaga bereago dabu bu henego ibu mini Eliasibi hene. Anduane Homogonaga anda mamage haga agali tebirali Salumu Teleme Uri imaru tibi nde anidagua dege dabu bu hene.
EZR 10:25 Isaraeleali maru wali tara dabu bu henerunaga mini uru. Paroso hameigini aria Lamia Isia Malagiya Miyamini Eleasa Malagiya mendebi Benaiabi uruni tibi dabu bu hene.
EZR 10:26 Ani heagola Elama hameigini aria nde waragariali Madania Segaraia Yahiele Abadi Yaremodo Elaya imaru tibi nde ani dabu bu hene.
EZR 10:27 Sadu hameigini aria nde waragariali dege Elioenai Eliasibi Madania Yaremodo Sabada Asisa imaru tibi ani dabu bu hene.
EZR 10:28 Bebai hameigini aria tibi nde mariali henego ti mini Yahohanana Hanania Sabai Adalai uruni ti dabu bu hene.
EZR 10:29 Bani hameigini aria waragariali Mesulama Malugu Adaia Yasubu Seala Yaremodo uruni hene.
EZR 10:30 Pahadamoaba hameigini aria halirali Adana Kelala Benaia Masea Madania Besalele Binui Manase uruni hene.
EZR 10:31 Harimi hameigini aria nde Eliese Isiya Malagiyabi Semaia Simeono Beniyaminibi Malugu Semariabi uruni ti dabu bu hene.
EZR 10:33 Hasumu hameigini aria nde Madenai Madada Sabada Elibelede Yaremai Manase Simai imaru tibi dabu bu hene.
EZR 10:34 Bani hameigini aria Madai Amarama Uele Benaia Bedia Keluhi Bania Meremodo Eliasibi Madania Madenai Yosu imaru tibi dabu bu haga bini.
EZR 10:38 Binui hameigini aria nde Simai Selemia Nadana Adaia imaru hene. Ani bialu Maganadebai Sasai Sarai Asarele Selemia imaru hene. Ani bialu Semaria Salumu Amaria Yosebe imarubi uruni ti bibahende dabu bu hene.
EZR 10:43 Nebo hameigini aria nde Yaiele Madidia Sabada Sebina Yadai Yoele Benaia imaru uruni ti hene.
EZR 10:44 Agali mini o daga larimaruni bibahendeme dindi tara wali Ngode Datagaliwabe mitangi nabiaga berearu dabu bu henego wali waneiginirubi bibahende, Tíni dalu wahalu pudaba, lai hene.
NEH 1:1 Hagalia igini Nehemaiahanda bi lo winiyago gilibu ngago ogo. Kini mini Adasegesi Pesia dindi mali kira haru hearia ege mini Kisalebe hayagola i̱ Nehemaia Pesianaga dindi tano timbuni Susa wiagoriani hewaria
NEH 1:2 i̱ hamene mbira ibu mini Hanani ibu Yuda dindi howa agali maru heba ibiniya. Ibiyagola i̱na tihondo Yarusaleme dindibi Yu wali agali Babilono garabaya howa dai biyarubi ti abi kabe lalu hale haru.
NEH 1:3 Anidagua hale harugola tigua ladai bialu howa lalu, Wali agali tini dindini daibu hearuni genda timbuniore handalu hea. Isaraele wali agali baba wali agali taratara palu paraparabu hearumebi hondo yoabu waorehe hea, lalu langiya. Yarusaleme dindi ege to̱le̱ pabe bu yandaho heleneyarubi podobaga bialu haraba payaga biarubi arema nabi heda heneyangi howa podobagabu wiaabo hene wia, lalu langiya.
NEH 1:4 Ogonibi ladai biyago hale howa i̱na dugu timbuniore bialu biraabo haru. Tomo nane howa Ngode Datagaliwabehondo bi lalu haru. Horo maru dara howa dugu bialu tomo nane Ngode Datagaliwabehondo bi lalu haru. Ibuhondo bi larudagoni au laru.
NEH 1:5 Anduane Homogo Ngode Datagaliwabe Dahuliya andaga kego í̠ daliga gibi minime mandabu mibe nahe kegoni. Í̠ gubalini halu í̠na bia laredagua gubalini howa bialu karu baba baya hangu bulebero lalu habo nalolene bi lo wirigo kagoni.
NEH 1:6 Anduane Homogo i̱ handalu i̱na í̠hondo bi larogoni hale habe. I̱na mbiragangibi horombengibi laabo halu Isaraele wali agali í̠naga biabe bia haga biarunaga la halu kogoni. Ina Isaraele wali agalime ko birima lalu i̱na í̠hondo lapani halu langero. I̱ aguanene biarumebi i̱nabi ko timbuni birima.
NEH 1:7 Bambaore í̠naga biabe bia haga Moseseha howa bi mana iname buluma̱ya lamirigo talialu bia nabi harima. Iname í̠na bilimu laridagua nabi erembira ngialu í̠naga deni howa mana ko timbuni bialu harima.
NEH 1:8 Í̠ni Mosesehondo lamialu lalu, Tígua i̱na larodagua ndo birimiyagua dindi taratara tí wali agali maru karuha bo purogo lolebero.
NEH 1:9 Ani berogola tígua ko birimada lalu mini beregedalu i̱na bilimu larudagua birimiyagua dindi gimbuni ngaruha purogolo kamigoni dege i̱ninaga lotu lalu halimulo helarugoria i̱nime haru dai buwa helolebero, lowiri. Anduane Homogo í̠nime bi abale ogonibi lo wiriru mitangi bialu áyu ina biamogo bia.
NEH 1:10 Anduane Homogo-o wali agali uruni ti í̠ninaga wali agali í̠naga biabe bia hagabi biaruya hendedeni. Ani bialu í̠ninaga hongome gini miriru o karuni.
NEH 1:11 Áyu wali agali í̠naga biabe bia haga maru í̠naga mini mo yaraga hole manda buwa í̠hondo bi lalu karunagabi i̱na langerogobi hale habe. Áyu kini biago ibugua dara halu biamogo bilo í̠nime anidagua mo bia habe, lalu lamini. Horo uruningi i̱ kini biagonaga waini iba yu pu íbu biabe biaga haru.
NEH 2:1 Ege maria peagola horo mbiru Kini Adasegesi ibu tomo nalu berearia i̱na waini iba yalu puwa miru. Kini biagome i̱ wanakuini dara howaore hewaria ala nahendegome
NEH 2:2 ibugua hale howa lalu, Í̠ wanakuini daraore timbuni ho kegoni irane aginaga bu kebe. Warago nabe harigodago ko í̠ hame nalegobi mbira biyabe, lene. Ogonibi layagola i̱na mogo timbuni lowa ibuhondo ladai bialu lalu,
NEH 2:3 Kini-o í̠ luore haabo habe. Dindi i̱naga aguaneneru hora henego gialo paya bialu paberubi irame do haealabaga bu nga layago hale haru. Ogonibi bu ngagola i̱na turu howa au holiyabe, laru.
NEH 2:4 Ogonibi larugola kini ibugua i̱hondo hale halu lalu, I̱na agi buliya hame ledebe, laya. Ani hale hayagola i̱na abaleore Ngode Datagaliwabe Dahuliya andaga kagohondo bi laru.
NEH 2:5 Ani lowa i̱na kini biagohondo lalu. I̱na birurunaga turu keyagua nde i̱na hale harogodagua bia lolebere Yuda dindini Yarusaleme timbuni i̱ aguaneneru hora henegoria dai bia labelo hame ledo. Ani buwa i̱na tano gialobagabu wiaruaru arema bule dai buliya, laru.
NEH 2:6 Kini biago ibu onela tomo nalu mandagi bereneyago ibugua o hale harudagua bibe laya. Ani bialu horo agiru bialu howa dai bulebe layagola aguadagua hole lalu lamiru.
NEH 2:7 Ani lamialu howa beba maru Iba Yuberedisi ange ni paliragohayagi handaya ho haga karuhondo i̱ ti daluni bolangua halu pu lelo beba maru ngi laru.
NEH 2:8 Ani bialu beba mende kininaga irabu hondo haga Asabahondo gilibu wiaha laru. Ira maru dibuwa Anduane Homogonaga andahayagi mamage haga pabe harabaru mo tiga buliyabi tano timbuni ibuninaga wai pabe podayaru biadai buliyabi anda i̱ni paluene anda mo tiga buliyabi ira dibu ngilo beba bo wiaha lalu hale harugola ibugua ani biya. I̱na ngi larudagua ngiyago irane Ngode Datagaliwabe i̱ heba ka handayagome ani biya.
NEH 2:9 Kini biago ibugua ami haru haga marubi ami hosini biruwa wai biaga marubi i̱ baba pudaba laya. Ani biya handala iname Iba Yuberedisi ange ni paliragohayagi puwa beba biago dindi uruni handayaho haga hearuhondo miru.
NEH 2:10 Ani birugola Bedehoronoali mbira mini Sanabaladibi agali mbira dindi Amono handagimbu bu haga mini Tobiabi libugua handalu hearia agali mbirame Isaraele wali agali bayale helonaga biabe bule íbu ka layago hale hene. Ani hale howa libugua henge daliga timbuniore lo hene.
NEH 2:11 Yarusaleme dindi puwa horo tebiru haru.
NEH 2:12 Horo tebiru howa horo mbiru mbiragangi agali i̱ heba mandagi henedaru maru haru tagira piru. Ngode Datagaliwabehanda i̱hondo bule pu lalu gubaliniha wia hayago mbirali nalamiore haru. Mbiraga tagira pialu pirimadangi nogo dongi mbira i̱ birarudago hangu haru pirima.
NEH 2:13 Mbiraga ogoningi dege tano ngelalu Uliyane Panga hariga ni paliragohayagi winigoria howa tagira piru. Ani bialu gi lehayagi Abagua Iba Duguaga layagoria bolangua halu pialu Mburuma Wahaga Panga kaware piru. Pirudagoni pialu howa Yarusaleme tanonaga pabe podo ibiraho wiarubi panga irame do pirilibagabu wiarubi bayuwa handawa biru.
NEH 2:14 Ani bialu tano lene ni tagira ibiragoha gi lehayagi piru. Pialu panga mini Iba Duguaga poragohayagi pialu Kininaga Iba Goreyane bereagoria puabo haru. Ogoriani howa nogo dongi biagome hariga pobe nahe pabe podope heneyarume gege biniyagola
NEH 2:15 hariga Kidirononaga ulinihayagi dalia dai buwa pabe ogonihayagi handama nogo dongi biagoria biralu piru. Handalu hariga ibirudagua dai bialu tanoha anda pole hariga Uliyane Panga biadagua anda piru.
NEH 2:16 O birudaruni bibahende dindi ogoriani haru haga hearume manda nabiore hene. I̱ni aria Yu wali agali hearubi loma binigo mo miaga hearubi wali agali haru haga hearubi handagimbu bu haga hearuni tihondo biabe uruni mandagi bima lolene hayadarunibi lamia nabi howa bialu haru.
NEH 2:17 Ani buwa áyu i̱na tihondo hongo howa lamialu lalu, Yarusalemenaga pabe podo baga bialu pangarubi gialo payabu ngagome inahondo ko genda timbuni ya kago handadaba. Urunibi bu ngagome tagabi aledago pabe pirilibagabu ngagoni wa dai bima, laru.
NEH 2:18 Ani bialu i̱na Anduane Homogo ibugua biabe buliya biamogo biyagobi kini biago ibugua langiyarubi tihondo lamiai haru. Tigua hongo howa ladai bialu lalu, Mo gini bialu biadai bimi̱ya, larimi. Ani lowa tigua ani bule manda manda biya.
NEH 2:19 Agali maru Sanabaladibi Tobiabi Arebiali mbira ibu mini Gesemebi tigua iname bule manda manda birimago hale hene. Hale howa tigua ina hondo oba halu mege bialu lalu, Tígua ogoni agi bule manda buwa beramibe. Pabe lone biadai bialu hongo howa kini baba wai bule beramibe, laya.
NEH 2:20 Ogonibi layagola i̱na ladai bialu lalu, Dahuliya Andaganaga Ngode Datagaliwabe kago ina ibunaga biabe bia haga kamago biabe bayuwa buluma̱ya ibugua hongo ngulebira. Ani biragola iname biabe ogoni buleberema. Anigo tí mbirale mbira Yarusaleme dindini ngagonaga anduanebi dindi ogo ababi ndo Yarusalemenaga malumebi manamebi ogo kami lowa manda nabiorego tí kamigoni, laru.
NEH 3:1 Yarusaleme tanonaga ege pabe ogodagua biadai bini. Loma binigo mo miaga Haguane Timbuni Eliasibi henego loma binigo mo miaga maru bu hearubi tigua pabe lene mbirahayagi panga haraba mini Nogo Sibinaga Panga laga wiagoria kaware dege bialu hene. Biai howa tigua pabe ogoni Anduane Homogo ibuninagaore helo tigua ibuhondo lotu lalu mo loma bia ho helene. Ani buwa tigua panga damene bibahende ala helaga winigoria hela dai bigi bini. Pabedagoni bima pialu amuraore pabe bu gimbubu migi bima irigi halu bamba wiagane mini Handari Mbirame (100) Mamage Haga laga wiagoria bima pialu amuraore pabe bu gimbubu migi bima iraga halu mamageali handa amunana bu haga agali bamba henego mini Hananelenaga laga heagoria biairi hene. Ani bialu tigua pabe ogoni Anduane Homogo ibuninagaore helo lowa lotu lalu ibunihondo loma bia hene.
NEH 3:2 Ani buwa loma binigo mo miaga biaru tigua pabe biairi hayagoria howa Yarigo tanoali hearume bu yolo mialu hene. Ani bialu heagola Imiri igini Saguru halu agali marume nde Yarigo tanoali uruni tigua biairi holobadagoria howa bu yolo mialu bima pene.
NEH 3:3 Ani bialu heagola Hasena igini bu hearume nde Saguru halume bialu hayadagoria howa bu yolo mialu pabe panga mbira mini Wena Panga laga henegoria bialu hene. Ani bialu howa tigua panga harabarunaga ira helalu pangaru wabu helalu panga logobi hongohe hela tamuha howa panga gedene hatagi holenenagabi aeane mbira luni hela bigi bini.
NEH 3:4 Meremodo halu agali marume Wenanaga Panga laga panga haraba biago abene mendehayagi bima pene. Meremodo ibu Uria igini howa Hagoso aguane hene. Ani bialu hemigola Mesulama halu agali marume Meremodo halu ibunaga agaliru tigua bialu heagoria howa bu yolo mialu bini. Mesulama ogoni ibu Beregia igini Mesesabele aguane hene. Ani bialu heagola Bana igini Sadogo halu agali marume Mesulama halu bialu heagoria howa bu yolo migi bialu hene.
NEH 3:5 Ani bialu heagola Tegoa tanoali bu hearu tigua ibuwa nde Sadogo halume bialu heagoria howa bu yolo migi bialu hene. Ani bialu howa Tegoa tano haru haga agali hearu tigua hangu haru haga agali haguane hearunaga bi hale habe manga howa biabe ogoni nabi bame hene.
NEH 3:6 Pasea igini Yoiadala Besodea igini Mesulamala libu nde agali maru haru howa Tegoa halu bialu hayagoria howa dege bialu hene. Tigua panga mini Yasananaga laga wiagoria bialu hene. Ani bialu tigua panga wabialu logobi hongohe helalu tamuha howa gedene hatagi holenenaga aeane luni hongohe mbira helalubi bini.
NEH 3:7 Ani bialu heagola Gibeono tanoali Meladiala Meronodo tanoali Yadonola libugua nde agali maru Gibeono howabi Misiba howabi haru howa Yoiada Mesulamalame bialu heagoria howa bu yolo mialu gabumane haru haga agali haguane timbuni heagonaga anda Iba Yuberedisi ange ni paliragohayagi heagoria bialu hene.
NEH 3:8 Hahaia igini Usiele halu agali maru haru howa tigua nde Meladia Yadonola libugua bialu hayadagoria howa bu yolo mialu hene. Usiele ibu ngolome mbirale tara tararu wabiaga hene. Hananaia halu agali marume Usiele halu bialu hayagoria howa bu yolo mialu amurayagi pabe mini Yangale Timbuni laga wiagoria biairi hene. Hananaia ogoni ibugua padua ngabi tara mbira mini sanda wabiaga hene.
NEH 3:9 Hua igini Lebaia halu agali maru hearume Hananaia halu bialu hayagoria howa bu yolo mialu hene. Lebaia ogoni ibu Yarusaleme tano mendehayagi gabumane agali haguane mbira hene.
NEH 3:10 Ani bialu heagola Harumaba igini Yadaia halu agali marume nde ibuni andaga kaware heagoria dege bialu hayagoria bu yolo migi bialu hene. Ani bialu heagola Hasabanea igini Hadusu ibugua nde agali maru haru howa Yadaia halu bialu hayagoria howa bu yolo mialu bima pialu hene.
NEH 3:11 Ani bialu heagola agali kira Harimi igini Malagiya Pahadamoaba igini Hasubu libugua nde agali maru haru howa Hadusu halu bialu hayagoria howa bu yolo mialu hene. Ani bialu howa tigua anda daligaha bu gimbubu migi bima irigi halu mini Mberedi Hiraga Anda laga wiagoria bialu hene.
NEH 3:12 Ani bialu heagola Halohese igini Salumu ibugua nde agali maru heba Malagiya Hasubulame bialu hayagoria howa bu yolo mialu bima pialu heagola ibu wane berearumebi nde biabe ogoni biamogo bialu berene. Salumu ogoni ibu nde Yarusalemenaga gabumane agali haguane mende howa ibugua dindi lene mbirahayagi haru haga hene.
NEH 3:13 Ani bialu heagola Hanunu ibu Sanoa tanoali maru heba tigua agali marume bialu hayagoria howa bu yolo mialu howa pabe panga mbira mini Uliyane Panga laga wiago wabini. Wabuwa panga haga wiagoria wabu helowa logobi hongohe helalu aeane luni hongohe mbirame panga gedene hatagi holenenagabi helalu bini. Ani bialu tigua pabe panga abene mendehayagibi bima pialu panga haraba mbira mini Mburuma Wahaga Panga laga wiagoria bima puabo hene. Ogoni luore mita magi handari mariani pira maria (440) wini.
NEH 3:14 Ogonidagua bialu heagola Legaba igini Malagiya halu ibunaga agali bu hearu tiguabi nde ogoriani howa bima pialu pabe panga mbira mini Mburuma Wahaga panga laga wiago wabialu logobi hongohe helalu tamuha howa gedene hatagi holenenagabi aeane hongohe luni mbira helene. Malagiya ogoni ibu dindi lene mbiraha mini Bede Hagereme wiagonaga gabumane haru haga agali haguane hene.
NEH 3:15 Kolohose igini Salumu ibu dindi lene mbiraha mini Misiba wiagonaga gabumane haru haga agali haguane hene. Ani howa ibugua agali maru haru howa pabe panga mini Iba Duguaga laga wiagoria howa bialu hene. Tigua ani bialu howa panga biagonaga ira emene marume hagira biadaga halu bini. Ani buwa tigua panga wabu helowa logo hongohebi helalu tamuha howa gedene hatagi holenenagabi aeane luni hongohe mbira helalu bini. Ani buwa pabe bima pialu iba mbira mini Selanaga Iba laga bereagoria bu mabu bini. Pabe ogoni kininaga mabu gama kaware wiagoria bialu hene. Ogoriani howa bima piaho wialu Debidinaga tanoha anda pole piaga egageria wiagoria bialu hene.
NEH 3:16 Ani bialu heagola Asabugu igini Nehemaia ibu dindi lene mbira mini Bedesuru wiagonaga gabumane haru haga agali haguane henego howa agali marume Salumu halu bialu hayagoria howa bu yolo migi bialu hene. Tigua nde bima pialu Debidinaga homali heagoria ami agali mini lenerunaga anda henegoriabi iba uli winigoria bima tagira pene.
NEH 3:17 Libai aria maru hearu tigua nde tano pabe mendehayagi bialu hene. Agali tinaga mini uru Bani igini Lehumu halu Libai aria maru hearu tigua nde Nehemaia halu bialu heagoria howa bu yolo mialu bima pialu hene. Ani bialu heagola Keila dindiha dindi lene mbira wiaru haru haga agali haguane Hasabaia mbira heago ibugua agali maru heba tinaga daluhayagi bu yolo mialu bima pialu hene.
NEH 3:18 Ani bialu heagola Henadada igini Babai ibu Keila dindiha gabumane agali haguane mende henego ibu halu Libai agali maru heba tigua Hasabaia halu bialu hayagoria howa bu yolo muwa bialu hene.
NEH 3:19 Yasua igini Ese ibu nde Misiba tanoha agali haguane henego ibugua bu yolo muwa bialu hene. Ani buwa mbirale wai biaga damene tara tararu wiagane anda heagoria howa tigua bima pialu pabe gimbuni pau lenegoria biairi hene.
NEH 3:20 Ani bialu heagola Sabai igini Barugu halu Libai aria Ese halu marume bialu heagoria howa bu yolo muwa bialu hene. Tigua minime biabe bule lowa hongo howaore bima pialu amuraore loma binigo mo miaga Haguane Timbuni Eliasibinaga anda harabani biairi hene.
NEH 3:21 Ani biairi heagola Uria igini Meremodo ibu Hagoso aguane henego ibugua Libai agali maru haru howa biabe bu yolo mini. Tigua loma binigo mo miaga Haguane Timbuninaga anda haraba biagoria howa bima pialu anda abene mendehayagi bu bolangua hene.
NEH 3:22 Loma binigo mo miaga agali dindi Yarusaleme kaware wiapara para biaruha haga maru hearu tigua pabe ala Meremodo halume bialu hene wiagoria howa bu yolo mialu bini.
NEH 3:23 Loma binigo mo miaga kira Beniyamini Hasubula libugua agali maru haru howa wai pabe libuni anda hane kawareni howa bialu hene. Loma binigo mo miaga dege Masea igini Asaraia ibu Ananaia aguane henego ibu nde agali maru haru howa ibuni anda hane kawareni dege pabe bulene wiagoria bialu hene.
NEH 3:24 Ani bialu heagola loma binigo mo miaga Henadada igini Binui halu agali marume Asaraianaga anda heagoria howa bu yolo mialu bima pialu pabe pau lenegoria mini Pabe Pau laga wiagoria biairi hene.
NEH 3:25 Ani bialu heagola Usai igini Palala halu agali marume pabe pau leagoria howa bima pialu kininaga anda mende daliga bu gimbu bima iraga hene heagoria howa bima pialu hene. Anda bu gimbu bima iraga hene ogoni mamage haga agali hearunaga anda kawareni bialu hene.
NEH 3:26 Ani bialu heagola Paroso igini Pedaia halu agali maru hearu tigua nde biabe ala bini wiagoria howa bu gimbubu migi bima pialu amuraore panga haraba mini Iba Hambu Piaga laga wiagoria bima pene. Ani bialu anda bu gimbu bima iraga hene heago daligani agali maru Ngode Datagaliwabenaga anda mamage haga wiagoriani biairi hene. Pabe panga ogonibi agali mamageali handa amunana bu haga ogonibi kirabali pabe bialu hayagonaga abene ni paliragohayagi hene. Pabe o bialu henedagoni Yarusalemeha dege dindi hombene mbira mini Obele kawareni agali Ngode Datagaliwabenaga andaha biabe bialu haga hearu tini dalu wiagohayagi bialu hene.
NEH 3:27 Tegoa tanoali hearume ibuwa nde Pedaia halu bialu hayagoria howa bu yolo mialu bima pialu hene. Agali uruni tigua pabe halu mende ogoni bialu howa Ngode Datagaliwabenaga anda mamage haga anda bu gimbu bima iraga hene biagoria howa bima pialu pabe abene uyurayagi pabe panga mbira mini Nogo Hosinaga Panga laga dindi hombene mbira mini Obele kawareni dege bialu hene.
NEH 3:28 Loma binigo mo miaga maru hearu tigua nde Nogo Hosinaga Panga laga wiagoria bialu howa tininaga anda headagua bu yolo migi bialu biaanda haga bialu hene.
NEH 3:29 Ani bialu heagola Imere igini Sadogo ibu nde agali maru heba loma binigo mo miaga maru biarume bialu hayagoria howa bima pialu Sadogo ibuni anda heagoria bialu hene. Ani bialu heagola Segania igini Semaia ibu Ngode Datagaliwabenaga anda panga mbira ni tagira ibiragohayagi heago mamage haga howa ibugua agali marume pabe bialu heagoria howa bu yolo mialu bima pialu hene.
NEH 3:30 Selemaia igini Hananaiala Salaba igini waragane Hanunula libugua agali maru haru howa Semaia halu pabe bialu heagoria howa bima pialu hene. Libugua pabe halu mende ogoni bialu hene. Beregaia igini Mesulama ibu agali maru heba tigua agali maru pabe bialu heagoria howa bu yolo mialu Mesulama ibuninaga anda kawareni dege bialu hene.
NEH 3:31 Malagiya ibu mbirale tara tara ngolome wabiaga henego ibu agali maru heba tigua marume pabe bialu hayagoria howa bu yolo mialu hene. Tigua ogoriani howa bima pialu Ngode Datagaliwabenaga andaha biabe bialu hagarubi agali biyinaya biabe biagarubi tininaga anda kaware heagoria pabe bialu haga winigoria bialu hene. Anda ogoni Ngode Datagaliwabenaga anda panga haraba mbira mini Mamage Haganaga Panga laga winigo ogoni ibu hobane daligahayagi pabe pau leagoria hene.
NEH 3:32 Agali maru mbirale ngolome wabiaga hearubi agali biyinaya biabe biaga hearubi tigua pabe gimbuni ogoriani howa bima pialu amuraore pabe panga mini Nogo Sibinaga Panga laga wiagoria biairi hene.
NEH 4:1 Sanabaladi ibu hale halu hearia iname ege to̱le̱ hagira pabe biago biadai bira layago hale halu lembo howa keba timbuniore hene. Biabe uruni habane nabulene ale berami lalu mo yo handalu hondo oba hene.
NEH 4:2 Ibuni baba biabe mandagi biaga biarubi Samarianaga ami agali hearubi uruni tinaga deni howa lalu, Emenerume agi beramalo manda bu birabe. Tigua hagira podo ngagoni bibahende biadai biai holobadabe. Mbirale loma biragome Ngode Datagaliwabehondo bo mialu biabe uruni horo mbiru hangu biai holeberema lo manda biruabe. To̱le̱ dodobagabu wialu irame bini wiaru damenego ira dayagome do pirilibagabu ngarudago tigua uruni bibahende biadai buwa abale henedagobi helolebadabe, lene.
NEH 4:3 Agali mbira henego mini Tobia Sanabaladila heneyago ibugua lalu, Tigua pabe ogoni agi ale bule manda buwa biaruadabe. Pabe elole biraruni biango dudu emene ko mbirame irigi haragola podobaga bulebira, lene.
NEH 4:4 Libugua bi ogonidagua lalu heagola i̱na Ngode Datagaliwabehondo bi ogodagua laru. Ngode Datagaliwabe-o tigua ina lahirarago hale habe. Yo hondowa oba halu karu taga pani tini nelo mibe. Tinaga mbirale ngaru bibahendeore pagealime mo page bilalu dindi nalene mendeha garabaya hama pelabe.
NEH 4:5 Tigua mege bialu hondo oba halu lahirayarubi ko tigua biyaruni embeda holeni. Iname pabe biadai bule bialu kamago hondowa tigua mege timbuni biyagonaga, lalu laru.
NEH 4:6 Ngode Datagaliwabehondo bi lai halu puwa wali agali biarume biabe hongo howaore bule gubalini heneneore howa pabe biagoni luore winigo biai hole bini bulela hanuniore harima.
NEH 4:7 Ani bialu hemaria Sanabaladibi Tobiabi Arebiali biarumebi Amonoali biarumebi Asadodoali hearumebi Yarusalemenaga pabe biadai bule biabe bayale bialu ka lalu podopeho wiaru mo pai hai haya layago hale howa keba timbuniore hene.
NEH 4:8 Tigua keba ho howa wali agali Yarusalemeni hearuni mo talola halu mini burugulo helole manda buwa Yarusaleme wali agali bole manda manda bini.
NEH 4:9 Ani biyagoyu inanaga Ngode Datagaliwabehondo bi larima. Bi lowa mbiraga horombebi heba iname agali maru mamage helo helarima.
NEH 4:10 Ina Yuda wali agalime biabe bialu howa iba gana laga winigo ogo Iname biabe uru bialu hangu hemaria hongo ibira hara. Ege pabe biago podo ibira ibira binigo ilu waholene dewaore wiaruagome pabe biago áyu biai au hami̱yadabe, lalu hene.
NEH 4:11 Waitigiali biarume ina nahende hemaria mo mogola howa bo wahole manda bialu biabe birimago gialo wahole manda biniya.
NEH 4:12 Yu wali agali maru inanaga waitigi uruni baba hatagobu henerume wai hanaga biyago tigua ina langiaabo haya.
NEH 4:13 Ani bira layago hale howa i̱na wali agali biaru wai biagane ayu tibubi yandarebi danda timurubi yuwa waitigi agali ibiragola wai bilo tini hameigini paleadagua pabe biai nahe wiagohayagi mamage helama piru.
NEH 4:14 I̱na handalu hewaria wali agali hearuni mini dege dindi howa ho hearia i̱na tihondobi tinaga haru haga hearubi handa gimbu bu haga hearubi tihondo ogodagua lamiru. I̱nanaga waitigialiru hondowa gi nahadababe. Anduane Homogo ibu gibi kago manda buwa tí dindinagabi tí waneigininagabi tí onenagabi tíni andanagabi wai beremalo manda buwa bimi̱ya, laru.
NEH 4:15 I̱nanaga waitigiali biarume ina bole manda manda bu hearu handa walia harimago hale haya. Ani buwa tigua handalu hearia Ngode Datagaliwabehanda tinaga wai hono wirimigoni gialobagabu waheneyane handayiya. Ani biyiya handala ina bibahendeme pabe biala ho wirimago lone bule dai birima.
NEH 4:16 Ogoningi howa i̱naga agali biaruni talebuki howa mendeme biabe biyagola mendeme wai biaganeru ale karulowa humbi yandarebi danda timurubi yuwa wai bule mamage hene. Inanaga haru bamba haga biarume wali agali pabe bialu
NEH 4:17 hearumebi gi mendehayagi biabe bialu gi mendehayagi wai bulene mbirale yu howa biabe bini.
NEH 4:18 Pabe bialu hearume wai biagane ayu tibu biago nogo dongoneha darali howa biabe bini. Agali mbirame waitigi ibira lowa walia halu mbelo biguli laga biago i̱la mandagi hariba.
NEH 4:19 Wali agali biaruhondobi haru haga haguane biarubi handa gimbubu haga biarubi ti bibahendehondo ogodagua lamiru. I̱na lalu, Pabe bulene biago luore wirago ai wali agali dindi ogoriani biabe bialu haramago bilibolo lowa pabe biago bialu harama.
NEH 4:20 Waitigiali ibira lalu walia haga mbelo biguli hale harimiyagua i̱ kogoria ngoai halimu. Ani beremigola inanaga Ngode Datagaliwabe ibugua wai i̱nanaga bia holebirago bia helo, lalu lamiru.
NEH 4:21 Horo bibahendengi muna biyagola tagira puwa tale bialu marume pabe biago biyagola marume yandare yuwa mamage ho harima. Ani bialu ne lai hayagola yakundiru hale yuwa Yarusalemeni haho wirima.
NEH 4:22 Uruningi pabe bialu agali biabe birimadaru tihondobi handayaho henedaru tihondobi ogodagua lamiru. Tíbi tínaga biabe bia hagaru heba tíni andaga dai nabi Yarusalemeni palu howa mbiraga mamage hole halu horongi biabe bule hami̱ya, laru.
NEH 4:23 I̱nibi i̱ heba biabe mandagi biaga harimadarubi i̱naga biabe biaga agali hayadarumebi i̱naga mamage haga hayadarumebi inanaga aga dongoneni birimadaruni gola nabi biaabo ho harima. Wai bulenenaga yarimadaruni giha waya bole howabi yaho wiaabo harima.
NEH 5:1 Mani Yuda wali agali maru hearume tini dege dege buru pale howa maruhondo gimigomo bi lagalaga bialu hene.
NEH 5:2 Ti marume lalu, Ina waneigini dewa howa tomo nolene ndia wu kama. Ina tomo maru mo wia nabi harimayagua homoleberama, lalu hene.
NEH 5:3 Ani layagola marume lalu, Iname inanaga damene bu hearuha tomo yolo bule muni mo dano harima. Ani birimago ai tinaga muni dano yadai nabirimayagua nde inanaga mabu andaru ti karulolobada, lene.
NEH 5:4 Ani layagola marume lalu, Ina marume kinihondo dagisi mule howa muni ina damene hearunaga mo dano harimago. Ainde muni dano yadai nabirimayagua inanaga dindibi pu mbira lini daga mini gerebi mabu ngamarubi ti karulolobada.
NEH 5:5 Inane dameneore Yuda wali agali dege bu harimarume genda uruni mo ngialu kagoni. Tigua mandabu handalu hearia ti duniniore halu ina nagalone mbira kabe toba hayadabe. Tinibi inabi inanaga waneiginirubi ina bibahende ogobi dege dege kamagoni ndobe. Anigo iname bulene mbira nawida. Aniyagome inanaga waneigini maru minalu agali maru bu hearunaga garabaya biabe ale bialu helo muni mirimagoni. Anidagua birimagola agali urunime ina wane berearubi tinaga garabaya biabe ale bialu berelo minu yalu pu dege biya. Ani bialu inanaga dindibi pu mbira lini daga mini gerebi mabu wimarubi ti karulayagola iname mo yu dai bulenaga mbirale mbira bibe naheore kamagoni, lene.
NEH 5:6 I̱na tinaga bi uruni layago hale howa keba timbuni haru.
NEH 5:7 Keba howa i̱na genda uruni mo tiga bulene hariga taya biru. Mana liahe o bialu hayadagoni agali haguane hearubi haru haga maru hearubi tigua ogoni biyada manda bialu íbu ngoai hadaba lowa i̱na tihondo bi hongo howa lamialu lalu, Tígua tíni hameneore karu hengedape halu mo koore haga kamigoni, laru. Ani lowa lalu, Genda ogoninaga bi lami̱ya wali agali bibahende hearu íbu ngoai halimu, laru.
NEH 5:8 Ti íbu ngoai hayagola i̱na tihondo lamialu lalu, Ina damene marume Yu wali agali ndo wali agali tara tara karunaga garabaya biabe ale bialu hearu munime golalu haru dai bulenego muni tai timbuni bialu haru dai birimagoni. Ani birimago ai áyu tígua tínaga dameneru mo ko halu ti tínaga garabaya biabe ale bialu helalimulo tíha yahayada, laru. I̱na anidagua larugola agali haguane bu hearume bi ladai bulene mbira nawiyagola de mbolaho howa ema nabi hene.
NEH 5:9 Ani hemigola i̱na tihondo lalu, Tínaga mana bialu haga ngamiruni kooredago ai tígua Ngode Datagaliwabe andaneha howa mana tigabi ngaru bialu haramine. Tígua anidagua bialu harimiyagua nde inanaga waitigi agali tara tara bu karume mana iname biaga ngamago hondowa mege nabulebira.
NEH 5:10 I̱nibi i̱ damenebi i̱naga biabe biaga agali bu karubi iname wali agali marunaga muni tomobi dano helo karulape larima. Ani birimago ai áyu ina bibahendeme inanaga dano harimago yadai bidaba nale wahami̱ya.
NEH 5:11 Inanaga dano uruni embeda halu waholene nga. Ani beremagola tigua muniyaguabi widiyaguabi waini ibayaguabi olibe lininaga weliyaguabi mbirale uruni bibahende ngiadai nabilo. Wali agali uruninaga dindibi gerebi mabubi olibe mabubi andabi uruni bibahende tígua karulo harimidarubi bibahende áyu ogoni miadai biai hadaba laro, laru.
NEH 5:12 Ani larugola agali haguane bu hearu tigua ladai bialu lalu, Í̠na ogodagua bilimu lalu lariruni biai holeberama. Ina damenerunaga mbirale karulo harimadaruni miadai biai halu inanaga dano hayadaruni ngi nale waholoma, laya. Ani layagola loma binigo mo miaga hearu olalu, Ibidaba, laru. Íbu heagola agali haguane biaruni tigua bule lalu lo wiyaruni loma binigo mo miaga biarunaga deni howa, Heneneore buleberema, lalu lo wilo, Bi lo widaba, laru. Ani larugola tigua ani bule lalu lo wiya.
NEH 5:13 Anidagua leagola i̱na labolabo mbira mandibu ale bobu henego hadowa be abalu maru para hearu taulopebe bilo titau lagadagua labolabo ogoni titau laru. Anidagua bialu i̱na tihondo lamialu lalu, Tígua mbirale bule lalu lo wirimiru nabirimiyagua i̱na labolabo biago titau larudagua Ngode Datagaliwabehanda tínaga andabi mbirale yu kamirubi bibahende titau lalu mo wahai haragola tíni mbirale mbira nawi bame labolabo hangu ogobiore ona holeberemi, laru. Ani larugola ti bibahende hearume lalu, Bayaleore. Ngode Datagaliwabehanda aniore bilo, lai hene. Ani lowa tigua Anduane Homogonaga mini mo yaraga hai halu tini andaga dai buwa mbirale buleore lalu lo wiyaruni biaiore hene.
NEH 5:14 Nehemaiahanda lalu, I̱ Yudanaga gabumane haru haga haguane hewane dege mali homberia (12) haru. Adasegesi ibu mali pira kira (20) kini hene heagola i̱ biabe ogoni pigane biru. Biabe bialu hewane ibunaga mali bibahende pira tebirani kira (32) ibu kini hene. Mali homberia (12) uruni i̱ hewaore kini ibugua ibunaga gabumane agali haguaneru tomo nelo talebu miagane winiru aria i̱bi i̱ damenerubi iname mbira nane haabo harimagoni.
NEH 5:15 Gabumane haru haga agali haguane ala henedarume wali agali genda timbuni mo miaga heneya. Uruni tigua wali agaliha tomobi waini ibabi gingila mialu muni kina dege handari mariabi (400) ngi laga heneya. Ani biyagola agali uruninaga biabe biaga bu hearubi tigua wali agali bu hearu mo nagalone halu hengedape haga biniya. Tigua ani biniyagoyu i̱na Ngode Datagaliwabe andaneha howa mana ogonidagua nabi haru.
NEH 5:16 I̱bi i̱ damene bu hearubi iname dindi mbira yolo nabi howa i̱na Yarusaleme tanonaga ege pabe biago biadai bule biabe hongo howa biamogo bialu haru. Ani bialu i̱naga biabe biaga agali i̱ andagaha hearu tiguabi nde pabe biago hongo howa biamogo bialu haya.
NEH 5:17 Ani binigo i̱na horo bibahendengi wali agali biabe bialu harimadaru handari mbirani pira duria (150) bibahende i̱ andaga tomo nalu haabo harima. Uruni tinaga agali haguanerubi Yuda wali agali tinibi heba tomo nalu harima. Wali agali dindi maruha howa i̱ hondo ibiraru tibi nde i̱ andaga dege tomo naga beremali.
NEH 5:18 Ani biagago manda buwa agali i̱naga tomo dawaga hearuhondo lamialu horo bibahendengi tomo dawalu howa nogo bulumaga mbirabi sibi bayaleoreru waragariabi ega dewaorebi dawalimu laruli. Ani bialu wali agali uruni ti waini iba nelonaga horo piru howa mo migi bilimu laruli. Yuda wali agali tiha genda timbuniore ngane handalu i̱naga tomo yolo bulene winigo kini ibuhondo ngi nale harugoni. Wali agaliha dagisi muni ngi labe lenego ai ogoni ngidaba nalaruli. I̱ tomo nalu holene i̱ninaga munime yolo bialu nalu haruli.
NEH 5:19 Ngode Datagaliwabe-o i̱na wali agali uruni mitangiore halu mana bayale uruni bialu harudagoni manda bialu i̱hondo bayale biadai bibe laro, lalu Nehemaiahanda lene.
NEH 6:1 Agali Sanabalada Tobia Geseme imarubi inanaga waitigi maru hearubi tigua hale halu hearia tanonaga pabe biago biai haya. Panga dege wa nabi ka layago hale hene.
NEH 6:2 Ani hale ho howa Sanabalada Gesemela libugua i̱ hewaria bi mbira lawia halu libu kabaria unu yu dindi mini Ono wali agali pale mbira ngagoria ibabe laribiya. Ani laribiyago hale howa i̱na manda bu handalu hewaria libugua bi ogoni henene ndo i̱ bole ohowa layada lo manda biru.
NEH 6:3 Ani manda bialu i̱na agali maru libu hearia bi yalu pelo ogodagua lawia haru. Nehemaia ibu áyu biabe timbuniore mbira yu wahalu pobe nahe bialu ka. Biabe biala halu libu lola hole ibabe naheore ka. Ibugua biabe ogoni ngelalu ibiyagua ibunaga agali biabe biaga karume biabe ogoni wahalu pugupugu bulubadago naibulebero laya lalimu, laru.
NEH 6:4 Ani larugo hale howa dege agali kira ogoni labome i̱hondo lone ibabe laga bialu ma halu hale haabo hayagola i̱nabi nde libuhondo bi mbira o larugoni dege laabo haru.
NEH 6:5 Mani howa Sanabalada ibugua i̱hondo bi maru lawia hayiya. Ogoningi bebani bi gilibu wia hayadago andaneha pale nale agali ibunaga biabe biaga mbirame bame yalu pu layiya.
NEH 6:6 Bi beba ogoniha gilibu winidagoni ogodagua gilibu winiya. Sanabalada i̱na hale halu hewaria Geseme ibugua lalu, Agali maru ina baba haga dege bu karunime bi laya laya maru lalu hemi, laya. Tigua bi lalu haruagoni ogodagua, Í̠ halu Yudali bu kamirubi tígua kini andaneha holene manga howa gabumane tíni halu kini baba wai bule kami, laya. Ani bule manda buwa tígua tanoha ege pabe hongohe bialu kami, laya. Wai ani bialu í̠nime dege i̱ kini kogoni lolebere, laya.
NEH 6:7 Ai í̠na agali Anduane Homogonaga bi mana latagi haga Yarusalemeha hearuhondo lamialu lalu, Áyu Yuda ti tininaga kini hangu ka lalimu, lariya. Ani lariyago í̠naga bi ko uruni kini ibu hale holigo abale iyane lo tiga bibiya ibabe laru, lalu gilibu wia heneya.
NEH 6:8 Ani layagola i̱na ladai bialu lalu, Í̠na bi o gilibu wia hariyaruni henene ndo laga biriya. Bi uruni í̠ni degeme mandabu yinigo gilibu wia hariya, lalu i̱na bi ogonidagua gili buwa beba ibuni hearia yalu pudaba laru.
NEH 6:9 I̱na manda bu handalu hewaria Sanabalada halu ibu damene bu hayadarume bi ogoni ina mo gi holenaga layada. Ai gi ho howa iname pabe biamaro nabuluma̱yanaga layada lo manda biru. Ani manda buwa i̱na Ngode Datagaliwabehondo bi lamialu lalu, Ngode Datagaliwabe-o tinaga bi lalu karuni ani lalu helo waha. I̱na biabe ogo dege biamaro buliya hongo ngibe, lalu haru.
NEH 6:10 Ani lowa i̱na mani Mehetabele aguane Delaia igini Semaia ibuni andagaha tagira ibabe nahe hearia hondo piru. Hondo pu hewaria ibugua i̱hondo langialu lalu, Iyane hanguore ohalu Ngode Datagaliwabe anda hobane mbira Loma Bia Hene kagoha ha do hole mba. Í̠naga waitigi bu karume mbiraga ibalu í̠ bo waholebirago iya anda ogoniha puwa panga payatagi ho habiya, laya.
NEH 6:11 Ani layagola i̱na ibuhondo ladai bialu lalu, I̱ agali mbiralihondo gi nahaga kogodago ai i̱ ibida pialu ha do holenedago ai hondowabe. I̱na Ngode Datagaliwabe andaha pialu ha do naholebero ndobe, laru.
NEH 6:12 Mani i̱na mandabu handalu hewaria Semaianaga bi ogoni Ngode Datagaliwabehanda lamini ndoda lo manda biru. Ibunaga bi ogoni Tobia Sanabaladala libugua ogodagua labe lalu ndelowa muni hana hayada lo manda biru.
NEH 6:13 Libugua manda bialu Semaiahanda bi ogoni laragome i̱ mo gi haragola i̱na Ngode Datagaliwabe andaha palue porogome i̱na mana pugualu ko timbuni mbira bilo manda biyiya. Anidagua berogola tigua i̱naga mini mo ko howa nagalone halu i̱ hengedape holenaga layada lo manda biru.
NEH 6:14 Ani layada lo manda bialu i̱na Ngode Datagaliwabehondo bi lalu, I̱naga Ngode Datagaliwabe-o áyu Tobia Sanabaladalame mana ko i̱hondo bule bialu kagoni manda bialu libuni mo ko habe. Ani bialu i̱ mo gi halu í̠naga mana henene ngadagua ndo latagi haga wali mini Noadia o bedagonibi mana latagi haga agali maru bi tara tara lalu i̱ mo gi haga bu karubi bibahende mitangi biai habe laru, lalu Nehemaiahanda lene.
NEH 6:15 Iname Yarusaleme tanonaga pabe biago bialu hemane dege horo pira duriani kira (52) piya. Ani peagola ege mini Elulunaga horo pira kirani dauni (25) layagola pabenaga biabe bulene damene bibahende biaiore harima.
NEH 6:16 Ani biai hemagola inanaga waitigi dindi tara tara kawareni bu hearu tigua hale halu hearia iname tanonaga pabe biago biai haya layago hale howa Ngode Datagaliwabe ibunime ina biamogo biyagola biai hayada lo manda bini. Ani manda buwa tigua inahondo mana ko bule manda bu hayaru habo layada lo manda bu hene. Ani manda buwa tinaga mini mo dindi halu nagalone hayada lo manda bialu tini gi ho hene.
NEH 6:17 Tobia ibugua Seganaia wane Ara aguane bereago dabu bu hene. Ani heagola Tobia igini Yahohanana ibugua Mesulama wane Beregaia aguane bereago dabu bu hene. Ani howa iname tano pabe bialu hemagola inanaga agali haguane uruni tigua Tobia hearia beba dewaore gilibu pela ibuguabi nde gilibu ibila biaga hene. Horo uruningi Tobia ibu Yudali ti imane henegome Yudali agali haguane Yarusalemeha haga hearume ibu biamogo bulene manda biya.
NEH 6:19 Ani bialu howa inanaga agali haguane uruni tigua lalu, Tobia ibugua mana bayale hangu biaga ka, lalu i̱hondo langiaabo haga hene. Ani lalu howa mbirale bi i̱na larogo damene bibahende tigua Tobia lamiaga hene. Anigo Tobia ibugua i̱ mo gi holenaga beba dewaore gilibu ibilaabo halu hene.
NEH 7:1 Iname pabe bialu harimago biai howa pabe panga damene bibahende helai harima. Ani helai howa agali maru pabe panga mamage helo dabo helarima. Ani helowa agali marume Ngode Datagaliwabenaga mini yaraga halu iba gana lalu tinaga biabe ogoni bialu helo dabo helarima. Libai hameigini tibi nde tinaga biabe bialu helo helarima.
NEH 7:2 Ani bialu heagola i̱na agali kira Yarusaleme tano bibahendeha handayaho helo dabo helaru. Agali mbirago i̱ni hamene Hanani henego dabo helalu mendego Yarusalemeni ami agali bibahende haru haga Hananaia henego dabo helaru. Hananaia ogoni ibu agali baya tigabi howa ibu Ngode Datagaliwabe andaneha haabo haga hene. Ibugua mana bayale biragome maru hearume biraru bu bolangua haga hene.
NEH 7:3 Ani hebigola i̱na libuhondo lamialu lalu, Agali Yarusaleme tanonaga pabe panga handayaho haga karuhondo egerebagiore pabe panga nadugualimu lalu lamilibu. Tigua ni dalu bodopaya biragola pabe panga dugua helo ani lalibu. Agali panga haraba mamage haga uruni ti biabe biai halu andaga polene tu haragola tigua panga payalu aeane luni ngagome panga gedene hongo howa hatagi halimu, lalu lamilibu. Libugua agali maru Yarusalemeha haga bu karuni aria marume haru haga helo dabo helalu marume tini andaga karuha howa mamage haga haga bilo dabo helalibu, laru.
NEH 7:4 Yarusaleme tano timbuni winigoyu wali agali dewa naheyagola tanoha anda dewa nabi dege hene.
NEH 7:5 Anigo Ngode Datagaliwabehanda agali haru haga hearubi agali haguane bu hearubi bibahende íbu ngoai hadaba lowa tinaga damenerubi bibahendeore dagalalu mini mbuga mbirani gilibu wulene nga lalu i̱ miniha mo manda bia haya. I̱na ogonidagua bule mandabu hewaria wali agali Babilono dindiha howa garabaya golalu Yuda dindiha ala daibu hene biarunaga mini mbuga mbirani gilibu wini wiaria handa walia haru.
NEH 7:6 Bamba Kini Nebugadanesahanda Isaraele wali agali dewaore Babilonoha garabaya bu yalu pene. Ani binigo mani howa wali agali dewaore Babilono yu wahalu maru Yarusalemehabi maru Yudahabi daibu hai hene. Ti dai buwa tini mamalirunaga tano wiagoha haga haga bini.
NEH 7:7 Ti Babilono yu wahalu dai binidangi tinaga agali haguane Serubabele halu Yosua Nehemaia Asaraia Lamaia Nahamani Modegai Bilisana Misiberede Bigibai Nehumu Bana imaru uruni bibahende dai bini. Isaraele wali agali Yarusalemehabi Yuda dindihabi daibu henerunaga mini ogoha gilibu wialu dagabi gilibu wini ngago ogodagua.
NEH 7:8 Paroso hameigini agali daosini kira halu handari mbirani pira kariani kira (2,172) hene. Sebadaia hameigini agali handari tebirani pira kariani kira (372) hene. Ara hameigini agali handari waragariani pira duriani kira (652) hene. Pahadamoaba hameigini Yasua Yoabalanaga aguanene agali daosini kira halu handari halirani pira mbirani halira (2,818) hene. Elama hameigini agali daosini mbira halu handari kirani pira duriani maria (1,254) hene. Sadu hameigini agali handari halirani pira mariani duria (845) hene. Sagai hameigini agali handari kariani pira waragaria (760) hene. Binui hameigini agali handari waragariani pira mariani halira (648) hene. Bebai hameigini agali handari waragariani pira kirani halira (628) hene. Asagada hameigini agali daosini kira halu handari tebirani pira kirani kira (2,322) hene. Adonigama hameigini agali handari waragariani pira waragariani karia (667) hene. Bigibai hameigini agali daosini kira halu pira waragariani karia (2,067) hene. Adini hameigini agali handari waragariani pira duriani duria (655) hene. Ade ibu mini mende Hesegaia hameigini agali pira dirani halira (98) hene. Hasumu hameigini agali handari tebirani pira kirani halira (328) hene. Besai hameigini agali handari tebirani pira kirani maria (324) hene. Haribi hameigini agali handari mbirani pira mbirani kira (112) hene. Gibeono hameigini agali pira dirani duria (95) hene.
NEH 7:26 Yuda wali agali maru dai binidaruni ti mamalirunaga tanoha mini dagaru gilibu ngaru ogodagua Bedeleheme Nedoba tanoha agali handari mbirani pira halirani halira (188) hene. Anadodo tanoha agali handari mbirani pira kirani halira (128) hene. Bede Asamabede tanoha agali pira mariani kira (42) hene. Kiriada Yarimi Kebira Berodo tanoruhabi agali handari kariani pira mariani tebira (743) hene. Lama Gebala tanoha agali handari waragariani pira kirani mbira (621) hene. Migimasa tanoha agali handari mbirani pira kirani kira (122) hene. Bedele Aila tanoha agali handari mbirani pira kirani tebira (123) hene. Nebo tano mendeha agali pira duriani kira (52) hene. Elama tano mendeha agali daosini mbira halu handari kirani duriani maria (1,254) hene. Harimi tanoha agali handari tebirani pira kira (320) hene. Yarigo tanoha agali handari tebirani pira mariani duria (345) hene. Lodo Hadidi Ono tanoruhabi agali handari kariani pira kirani mbira (721) hene. Sena tanoha agali daosini tebira halu handari dirani pira tebira (3,930) hene.
NEH 7:39 Hameigini maru loma binigo mo miaga agali Yarusaleme daibu heneru tinaga mini dagaru ogodagua. Yasua aguane Yadaia hameigini agali handari dirani pira kariani tebira (973) hene. Ime hameigini agali daosini mbira halu pira duriani kira (1,052) hene. Pasuru hameigini agali daosini mbira halu handari kirani pira mariani karia (1,247) hene. Harimi hameigini agali daosini mbira halu pira mbirani karia (1,017) hene.
NEH 7:43 Libai hameigini Yarusaleme dai biniru tinaga mini dagaru ogodagua. Hodabia aguanene Yasua Kadamielela aria pira kariani maria (74) hene. Agali maru Ngode Datagaliwabenaga andaha ngida balu iba gana lagaru Asaba aguaneneru aria handari mbirani pira mariani halira (148) hene. Ngode Datagaliwabenaga andaha mamage haga Salumu Ade Talamono imaru Agubu Hadida Sobai imaru uruni ti aguaneneru aria handari mbirani pira tebirani halira (138) hene.
NEH 7:46 Agali maru Yarusalemeni Ngode Datagaliwabenaga andaha biabe biagaru uru Siha Hasuba Tabaodo imaru Keroso Sia Padono imaru Lebana Hagaba Salamai imaru Hanana Gidele Gahara imaru Leaia Lesini Negoda imaru Gasama Usa Pasea imaru Besai Meunimi Nebusesimi imaru Bagabugu Haguba Harahuru imaru Basalidi Mehida Hasa imaru Bagoso Sisera Tema imaru Nesia Hadibala hameigini uruni ti bibahendenaga aguaneneru haga bini.
NEH 7:57 Solomononaga biabe biahaga agali henerunaga aguaneneru tibi nde tini dalu wiyagoria daibu ha dege biniru mini uru Sodai Soberede Perida Yala Dagono Gidele Sebadia Hadili Pogerede Hasebaimi Amono imaru aguanene uruni ti daibu hene.
NEH 7:60 Ngode Datagaliwabenaga andaha biabe bialu heneru ariabi Kini Solomononaga andaha biabe bialu heneru ariabi daibu henego dagalamaga halu handari tebirani pira dirani kira (392) bibahende daibu hene.
NEH 7:61 Agali hameigini tebira Delaia Tobia Negoda ima heneru ti aguanene daibu henedaru bibahende dagalamaga halu handari waragariani pira mariani kira (642) hene. Uruni ti Telemela Telehasa Kerubu Adono Ime tano uruniha howa íbu hene. Anigo agali uruni ti abogo aguaneneore kama lolenebi tinaga mamali Isaraeleali agali haguane ogo heneru aria kama lalu mo walia holenegobi ti manda nabi hene.
NEH 7:63 Ani heagola loma binigo mo miaga maru hearu tigua agali uruni loma binigo mo miaga ariadabe hondole tinaga mamalirunaga mini gilibu wiaga mbuga wiagoha tayabu handalu hemiria mbira handa walia nahe dege hene. Ani tayabu wahayagola ti loma binigo mo miaga kama lalubi ndo ti tara kama lalubi mbira labe nahe dege hene. Agali uruni tinaga hameigini mini Hobaia Hagoso Basilaibi uruni hene. Ani henego agali hameigini Basilai uruni tinaga mamali mbira mini Basilai henegome Gileada dindiha hameigini mende mini Basilai dege henego wane dabu bini. Hameigini ogonime ti mamali imanenaga mini Basilai ogoni manda bu hama ibaabo hene. Ani binigo nde agali hameigini tebira uruni tinaga mamali ogo lalu baya hangu mo walia habe naheyagola agali haguane bu hearume lo manda bialu howa agali uruni ti loma binigo mo miaga habe nahedago ti agali maru bame bu karuni ale dege helo manda bini.
NEH 7:65 Ani manda buwa Yudanaga gabumane haru haga agali haguane heagome agali uruni ti tomo Ngode Datagaliwabehondo lomabu mini ngaru nanalimu lene. Ibugua lalu, Loma binigo mo miaga haguane mbira ibilo hondo hama. Agali ogoni ibiragola agali o karu loma binigo mo miaga aria kabe be agali mende tara kabe lalu ege to̱le̱ kira mini Urimu Tumimula Ngode Datagaliwabe ibunihondo hale haga biagome halaga bialu bi hale ha lami̱ya. Ani hale haragola Ngode Datagaliwabe ibunime agali uruni tigua loma binigo mo miaga howa biabe bialu helo nabi helo lalu bi tigatiga langulebira, lene.
NEH 7:66 Isaraeleali daibu heneru bibahende daosini dege pira mariani kira halu handari tebirani pira waragaria (42,360) daibu hene.
NEH 7:67 Ani bialu wali agali tinaga biabe bia hagaru daosini karia halu handari tebirani pira tebirani karia (7,337) daibu hene. Ani heagola wali agali ngida balu iba gana lagaru handari kirani pira mariani duria (245) daibu hene.
NEH 7:68 Ani bialu nogo hosi handari kariani pira tebirani waragaria (736) haru halu nogo kamele handari mariani pira tebirani duria (435) haru íbu hene. Ani bialu nogo dongi daosini waragariani handari kariani pira kira (6,720) haru halu hosi dongilame hono wini mini muele laga handari kirani pira mariani duria (245) haru íbu hene.
NEH 7:70 Wali agali dewaoreme Ngode Datagaliwabenaga anda biago lone biadai bilo lowa muni mbiralerubi dewaore migi bini. Ani biyago hondowa gabumane agali haguane heagome muni ngolo genda magi kilogarama halira mialu ndisi be ngolome wabini pira duria (50) mialu aga loma binigo mo miaga hearume biagane ale handari duriani pira tebira (530) mialu bini. Ani miyagola Yuda hameigini mbira mbiranaga agali haguane bu hearume muni ngolo genda magi kilogarama handari mbirani pira waragariani halira (168) mialu siliba muni genda magi kilogarama daosini mbirani handari kirani pira duria (1,250) mini. Wali agali maru hearume muni ngolo genda magi kilogarama handari mbirani pira waragariani halira (168) mialu muni siliba genda magi kilogarama handari mbirani pira maria (140) mialu aga loma binigo mo miaga agalirume biagane ale pira waragariani karia (67) mialu bini.
NEH 7:73 Ani bialu loma binigo mo miaga hearubi Libai hameigini bu hearubi mamage haga hearubi Ngode Datagaliwabenaga anda biabe bialu haga hearubi wali agali ngida balu iba gana laga hearubi Isaraele wali agali maru hearubi ti bibahendeore Yuda dindiha tininaga tano mbira mbira wigi biyadagua hangu hangu hama purogo lene. Ani pugu pugu bialu ege kane hayagola tini daluha daibu haga haga bini.
NEH 8:1 Ege kane agima hayagola Isaraele wali agali Babilono howa dai biyaruni bibahende tano winiyagoria pu haga haga biai howa hene. Ege kane biagonaga horo mbira hayagola wali agali bibahende biaru tigua Yarusalemeni ngoai ho hene. Ngoai haga hama mbira pabe panga mini Iba Haraba kaware ogoni tamuha ngoai hene. Ani ngoai ho howa tigua Eserahondo, Mosese heneyangi Mana lowinigo wali agalime bilo Anduane Homogohanda Mosesehondo lamiyago mbuga ogoni mo yalu íbu, lene. Esera ibu agali loma binigo mo miagabi mana lowinigo lawai hagabi hene.
NEH 8:2 Eserahanda wali agalime layadagua tini mo ngoai ho heagoria mbuga biago mo yalu ibini. Wali agalibi waneigini mini bogabirubi bibahende ogoriani mo ngoai howa hene.
NEH 8:3 Gao layagola Eserahanda wali agali bu heagohayagi handamu howa mana lowinigonaga mbuga angalalu dagalo mini. Dagalalu heane hangu horombe hanuni hene. Wali agalime bayuwa hale ho hene.
NEH 8:4 Esera ibu dagia mbira irame wabuwa galone biagane lalu helo lowa wabu winiyagoriani heyu howa dagalene. Ibugua dagalayangi agali maru Madidaia Semabi Anaiabi Uriabi Hiligaiabi Maseabi ti Esera gi tigahayagi hene. Pedaiabi Misaelebi Malagaiabi Hasumubi Hasabadanabi Segaraiabi Mesulamabi ti Esera gi lehayagi hene.
NEH 8:5 Esera ibugua dagia daliga wabu winiyagoria heagola wali agali biarume de ibuni hangu handaya ho wini. Ani buwa ibugua Mana lo winigonaga mbuga biago anga layagola ti bibahendeme heyai hene.
NEH 8:6 Esera ibugua lalu, Anduane Homogo Ngode Datagaliwabe timbuni gibiore kagonaga mini yaraga hama, lene. Ani layagola wali agali bibahende hearume gi hariha yaraga hai howa hongo howa lalu, Aniore bima aniore bima, lene. Ani lowa tigua ge duli hanga howa bulu paliai howa Ngode Datagaliwabe mitangi bialu ibunaga lotu lalu hene.
NEH 8:7 Ani biai howa heyuwa tini heneyagoria haga haga bini. Libai agali maru Yasuabi Banibi Serebaiabi Yaminibi Agubabi Sabedaibi Hodaiabi Maseabi Kelidabi Asaraiabi Yosabadabi Hananabi Pelaiabi tigua Mana lowinigo lo beregedalu wali agali mo wála howa lamini.
NEH 8:8 Tigua Mana lowini biago Hiburu bi lalu gilibu wiago Arama bi lalu lo beregedowa lamialu ogodagua lo nga lalu lamini.
NEH 8:9 Wali agali biarume Mana ogoni hale howa dugu timbuniore bini. Ani biyagola gabumane hondo haga Nehemaiabi loma binigo mo miaga howa mana lowinigo lawai haga Esera ibubi Libai agali biarubi ti bibahendeme wali agali biaruhondo lalu, Horo áyu ogoni Ngode Datagaliwabe ibuhondo loma bia harimagoni ngago tígua dugu nabidababe.
NEH 8:10 Ai andaga puwa turu halu tomo timbuni dawa nalimu. Tomobi waini ibabi dewa ngamigome mbiraore ale ngaru baba tale bialu nalimu. Horo áyu ogoni inanaga Anduane Homogo ibunaga helo loma bia henego nga. Ani bidago tígua dara howa nahadababe. Anduane Homogo ibugua turu holene ngiragome tí mo hongo holebira, lene.
NEH 8:11 Libaiali agali biaru tigua wali agali bu hearu dombeniha ibaga bialu howa lalu, Horo áyu ogoni galone gibi mbira wirimagonigo tígua ogoriani daraho nahadababe, lalu lamima ibaga bini.
NEH 8:12 Ani lamiyagola wali agali biarume tini andaga dai buwa turu timbuniore howa tomobi waini ibabi tale bialu nalimu layadagua nalu berene. Tigua ani binidagua irane mana daga layago agua laya lalu manda biyagome ani bini.
NEH 8:13 Horo mendengi hameigini hangu hangunaga haguanebi loma binigo mo miaga hearubi Libai agali hearubi tigua Esera heagoria puwa Mana lowinigo Anduane Homogohanda Mosesehondo laminigo handa daba bigi bule pene.
NEH 8:14 Tigua dabalu hearia mana ogonime lo wialu lalu Anda Nemandaha Palu Holene Horo haga biragola Isaraele wali agalime anda nemanda buwa nemandaha hangu palima pilimu lo wiaria handa walia hene.
NEH 8:15 Ani lo wiago hondowa tigua Yarusalemehabi tano emene timbunirunibi wali agali heagoria bi ogobi lo pelene. Hariha purogo lowa ira olibe maganerubi ira tara tara yunihe maganerubi mialu howa ira yuni anda nemanda bilimu lalu Mana lowinigonaga mbugani gilibu wiyadagua bu yalu ibai halimu, lalu lo pelene.
NEH 8:16 Ani buwa tigua ira magane hearu dando yalu ibuwa nemanda biaruni tininaga anda daliganibi anda kaware heagoriabi Anduane Homogonaga anda pabe tamuhabi ngoai hagane hama mbira pabe panga mini Iba Harabahayagibi mende Eberaimi Harabahayagibi anda nemanda biai hene.
NEH 8:17 Wali agali Babilono dindini garabaya howa dai biyaru bibahendeme nemanda biai howa ogoriani hene. Ogonidagua bambaore Nunu igini Yosua heangi hangu biaga winigo. Ai mani nabiore heneyago wali agalime áyu turu timbuniore howa lone bule bialu hene.
NEH 8:18 Horo pigane harimidangi howa Ngode Datagaliwabenaga Mana lowiniyago daga laho dege halu ho hamaro binidangi dagalo maro bini. Tigua uruni bialu horo karu hene. Horo halini hayagola ho maro bulenenaga mana lo wiadagua bialu bu maro bini.
NEH 9:1 Ege o bagoninaga dege horo pira kirani maria (24) hayagola Isaraele wali agalime tini ko biyadaru daraho howa walia halu aga biaga wiago mo karulalu horo ogoningi hina tomobi naneore hene. Dindi tara tara wali agali baba Isaraele wali agali baba mandagi nahe abale hangu hangu haga haga biaga wini. Tigua ko timbuni birimadarunaga dara kama lalu be abalu duguwa taga dugu hiralu biruwa biaga ale bialu haguani be dugu hirame howa hene. Ani bu howa ko tigua biyarubi ti mamalirume biyarubi bibahende lapani hai hene.
NEH 9:3 Horo aua tebira agima Anduane Homogo tinaga Ngode Datagaliwabenaga Mana lo winiyaru dagalo miya. Ani bialu horo aua tebira mende ogonidagua dege tigua tininaga ko birimiru lapani halu Anduane Homogo tinaga Ngode Datagaliwabe mitangi bialu ibunaga lotu lalu hene.
NEH 9:4 Dindi o harimidagoriani dagia mbira Libaialiru helo lowa wabu winiya. Ogoriani heyuwa Yasuabi Banibi Kadamilebibi Sebanaiabi Bunibi Serebaiabi Bani dege mendebi Kenanibi ti bibahende hai heneya. Uruni tigua Anduane Homogo tinaga Ngode Datagaliwabehondo bi hongo howa lalu hene.
NEH 9:5 Libaiali tigua wali agalihondo Ngode Datagaliwabe mitangi bialu ibunaga lotu lalu hami̱ya ibidaba lenego mini uru Yasuabi Kadamilebi Banibi Hasabanaiabi Serabaiabi Hodaiabi Sebanaiabi ani bialu Pedahaiabi tigua ani lene. Tigua lalu, Heyuwa Anduane Homogo Ngode Datagaliwabenaga mini yaraga hadaba. Ibunaga mini baya burugule yaraga ha ho wiaabo helo wali agalime mini yaraga haramarubi emene yabiabi degego ani bilo ibunaga mini daliga taraorego wali agali bibahendeme mo yaraga hama, lalu hene.
NEH 9:6 Ani buwa Isaraele wali agali tigua Ngode Datagaliwabehondo bi ogodagua lene. Anduane Homogo-o í̠ hanguore Anduane Homogo ke. Í̠na hari daligaha wabialu yakundi harini li hearubi í̠na wabiniya. Dindibi dindini ngarubi iba solowara bedarubi iba uruniha ngarubi í̠nime wabirigoni. Ani bialu tinaga holene í̠nime tiha wia hari. Dahuliyali hongohe karume ge duli hanga ho biruwa í̠hondo lotu lalu kagoni.
NEH 9:7 Anduane Homogo Ngode Datagaliwabe í̠na Abarama dabarigoni. Ani bialu Babilononaga dindi emene mini Ua howa haru halu tagira pirigoni. Haru halu tagira puwa ibunaga mini gahenge Abarahama wirigoni.
NEH 9:8 Í̠na handalu heria ibugua í̠ha mini bilinaheore heane handariyagoni. Ani hondowa ibula habo nalolene bi mbira lo wirigoni. Bi lo wialu Kenanali dindibi Hidiali dindibi Amoroali dindibi Pereseali dindibi Yabusuali dindibi Giagisali dindibi Abarahama aguanenerume karulai helo ngulebero lalu lo wirigoni. Í̠na mini bilinahe kegome bi lo wirigonidaguaore karulayagoni.
NEH 9:9 Inanaga mamali biaru Iyibi dindini genda handalu tandaga nayaru handariyagoni. Tigua í̠hondo biamogo biaha lalu iba solowara mini Iba Daramabi bereagoria howa olayagola hale hariyagoni.
NEH 9:10 Í̠na agalime nabiagane ale gibi Iyibiali kinihondobi handa gimbubu haga hearuhondobi wali agali ogoriani hearuhondobi birigoni irane í̠naga wali agali biaru mo ko hayagonigo manda buwa biri. Í̠ni mini lene timbuni ogobi ko lalu walia harigoni áyubi haho wiaabo kegoni.
NEH 9:11 Í̠na bi larigome iba solowarani í̠naga wali agali pelo iba bira migi migi bilowa hariga ba heneyagoni. Ani bialu dindi yobini haru halu ubade halu peneya. Ti bole talima ibiyaru to̱le̱ ibaha haradagua iba nai heneya.
NEH 9:12 Horombe beralibame haru piriyagoni mbiraga hayagola ira hungunaga wáme haru piriyagoni.
NEH 9:13 Hari Sainaini í̠ni daluwa í̠ninaga wali agali baba bi lalu í̠naga mana bayale biaru bayuwa lawai halu lamiriyagoni.
NEH 9:14 Sabada horo í̠naga taraorego bayuwa mandabu halimu lalu lawai halu lamiriyagoni. Ani bialu biabe biahaga Mosesehondo í̠naga mana biaru wali agalihondo lamiriya.
NEH 9:15 Tomo noa hayagola í̠na tomo dahuliya andaga tawe miriya. Iba noa hayagola ege to̱le̱ha howa iba dugu tagi helariyagoni. Ani bialu dindi ngulebero lo wirigo karuladaba lalu lamiriya.
NEH 9:16 Anigo inanaga mamali biaru tigua mine halu í̠naga mana bilimu lalu lamiriyaruni mo wahayiya. Tigua mana bilimu lalu lo wiridagua nabiyiya.
NEH 9:17 Í̠naga mana lamiriyaru embeda halu tihondo agalime nabiagane ale biriyarubi embeda hai hayiya. Tini mine hayagobi Iyibi dindini garabaya dege lone hole lowa ti haru dai bilo agali haguane mbira tinime dabarimiya. Ani biyagoni ina ko birimaru domagane Ngode Datagaliwabe í̠na biamogo biahalu gubalini haga howa lembobi abaleore nahaga harigoni. Í̠naga dara howa biamogo bia holene timbuniore wirigome wali agali biaru yu wanahe harigoni.
NEH 9:18 Tigua mbirale mbira bi pupu wulenaga nogo bulumaga ale ngolome wabuwa heleneyagoni. Tigua hongo howa lalu nogo bulumaga ngolome wabini biagoni tinaga bi pupu wiaga mbirale ti Iyibi dindini garabaya hemaria haru halu ibini ogonime leneya. Anduane Homogo-o tigua í̠ mo yo timbuniore handayagoni.
NEH 9:19 Ani biyagola dindi ko yobi biagoha homelo yupe nahe í̠naga dara howa biamogo bulene timbuniore biagome haru harigoni. Í̠na hariga walia haga kira wiyago beraliba horombenaga ira hungu mbiraganaga lowa wiyagolabo mo yu bereba nahe haabo helarigoni.
NEH 9:20 Í̠ bayale hegome ogodagua bulene nga lalu lamirigoni. Menabi ibabi nelo miriyagoni.
NEH 9:21 Dindi ko yobi wiagoria mali pira maria (40) haru hariyangi tinaga mbirale burupale wiyago miai hariyagoni. Ani birigola tinaga aga biarubi ko nahe wialu ge tandaga halu tobi nahe hene.
NEH 9:22 Dindi kinime handayaho hearubi dindi hameigini tara taranaga wiarubi karulai helo hongo miriyagoni. Kini Sihono imarume handayaho hene Hesebono karulayiya. Kini Oga imarume handayaho hene Basana dindi wiaru karulayiya.
NEH 9:23 Ai tihondo waneiginibi dewaore dagala mibe nahe yakundi ale miriya. Ngulebero lalu ti mamaliruhondo lamiriyadagua karulelariya.
NEH 9:24 Kenana dindi tigua karulaya. Wali agali ogoriani paleneyaruni í̠na mo emene hai hari. Kenana wali agalirubi kinirubi tihondo í̠naga wali agali tininaga hameme bilo hongo miri.
NEH 9:25 Í̠naga wali agalime tano ege to̱le̱ pabe hongohe anda pobe nahe wiaruni anda pialu karulaya. Dindi bayale tomo anda haga wiaru karulai hene. Dindi anda bibahende dabu dabu wiaore karulaya. Iba hambiagane uli wearubi karulaya. Ira olibebi lini do nolene ale irarubi pu mbira lini daga mini gerebi mabu gamarubi bibahende wiaore karulaya. Tigua wiago nolenegobi nowa anda haya. Ani bialu baya turu biniore helariyagoni.
NEH 9:26 Ani birigoni dege í̠naga wali agali biarume í̠ baba mine halu í̠na bi lariru hale nahayagoni. Í̠naga Mana lowini biagoni tigua í̠ erembira ngiya. Ala í̠naga mana latagi hama piaga biaru tigua kagua beremigo nabidababe lalu í̠ keria dai bidaba layaru bo wahai hayagoni. Tigua í̠naga mini mo ko halu mege timbuni bigi biya.
NEH 9:27 Ani biyagola tinaga waitigi biarume ti balu dindiru karulalu tinibi wali agali marume handaya ho helarigoni. Tini ko biagoha howa biamogo bia lalu í̠ olayagoni. Olayagola dahuliya andaga howa í̠nime hale halu bia layadagua biriya. Í̠ninaga dara holene timbuniore wigome biamogo bialu agali haru hagane haguane maru mirigoni. Ani birigola waitigi baba wai bialu wali agali biaruni koni hearia tigua biamogo biniya.
NEH 9:28 Bayale hene biagodagua dege howa tigua ko lone biadai biyagoni. Ani biyagola waitigi agalime bole ibilaga biadagua dege ibilarigola baga biadagua dege bayagoni. Bayagola tigua í̠hondo ko birimada lalu mini beregedalu í̠ olowa hale halu biamogo bia layagola í̠na dara howa biamogo timbuniore bigi biri.
NEH 9:29 Í̠naga manaore hale habehe nga larigola tini mine halu balagala holenerume í̠naga bi biagoni hengedo wahaya. Haabo holene í̠naga Mana lo winigoha ngagoyu tininaga embone giambe mini wá nale heagome í̠naga mana biago yu wahaya.
NEH 9:30 Nabidababe lalu lamialu hangu heane mali dewaore piya. Í̠naga bi mana latagi halu lama piagarumebi lelo mo laharigoyu ti hale paihe haradagua bu haya. Ogonibi biyagola í̠na waitigialime ibuwa tini balu dindi andabi karulai helarigoni.
NEH 9:31 Ani birigoni degego í̠naga dara halu biamogo bulene timbuniore wigome í̠na ti embeda halu bibahende bo hilu wahai naharigoni. Ngode Datagaliwabe-o í̠naga biamogo bia holenebi dara holenebi timbuniorewi í̠ni kegoni larama.
NEH 9:32 Inanaga Ngode Datagaliwabe-o í̠ni hangu hongo timbuni gibiorehe kegoni. I̱na bulebero lalu habo nalolene bi lo wiriru puguaore nabiaga biago kegoni. Asirialinaga kini biarume ina bo hengedayangi howabi áyu ogoningibi iname tandaga dewaore narima. Inanaga kinirubi loma binigo mo miagarubi í̠ mana latagi hagarubi inanaga mamalirubi inanaga wali agalirubi bibahendeore tandaga narima. Bibahendeore tandaga narimagoore dara halu mitangi bibe.
NEH 9:33 Í̠na ina pani ngirigo ngulene wiagoria tigabi ngiri. Iname í̠hondo ko birimagoyu í̠na inahondo tigabi hangu biadai birili.
NEH 9:34 Inanaga mamalirumebi kinirumebi haguanerumebi loma binigo mo miagarumebi í̠naga Mana lowini biago bayuwa handaya howa nahe. Í̠naga bi mana agua bilimu lalubi ko holemini lalubi lamiriru hale nahe haya.
NEH 9:35 Í̠na dindi baya hini mirigoria howa í̠naga biamogo bulene timbuni biagome kini biarume í̠naga wali agali handaya ho hayagoni. Ani birigoni dege tigua ko birimada lalu mini beregedalu í̠naga biabe bia holenebi manda nabi haabo hayagoni.
NEH 9:36 Ani birimagome dindi hini bayale ina tomo anda haga biagoria inane agali taranaga garabaya biabe ale bia halu kamagoni.
NEH 9:37 Dindi ogoninaga ibanego dindi taranaga kiniru iname ko birimangi handaya ho helarigo tiha pora. Inahondobi tinaga hame laradagua bialu inanaga nogo bulumagarubi tinaga hame laradagua biragola ina mini burugu lowa kama, lalu Ngode Datagaliwabehondo bi lai hene.
NEH 9:38 O biyagoni manda buwa ina Isaraele wali agalime beba gilibu wialu howa lalu Ngode Datagaliwabehanda laradaguaore bule lalu gilibu wialu howa inanaga haru hagarubi Libaialirubi loma binigo mo miagarubi tigua tinaga gi magi wialu gilibu wini.
NEH 10:1 Mbugani mini gilibu winigo ala gabumane agali haguane Hagalia igini Nehemaia ibugua ibunaga mini gilibu wini. Nehemaia ibu mini gili biyagola Sedegaia ibugua ibunaga mini gili bini. Ani gili biyagola mani agali maru mini gilibu wigi bini.
NEH 10:2 Loma binigo mo miaga maru heneru ti mini gilibu winigo uru Seraia Asaraia Yaremaia imaru Pasuru Amaraia Malagiya imaru Hadusu Sebanaia Malugu imaru Harimi Meremodo Obadaia imaru Daniele Ginedono Barugu imaru Mesulama Abiya Miyamini imaru Masia Biligai Semaia imaru uruni bibahende tinaga mini gilibu wiai hene.
NEH 10:9 Libai hameigini maru heneru tinaga mini gilibu winigo uru Asanaia igini Yasuabi Henadada hameigini Binui ibubi Kadamiele Sabanaia Hodaia imaru Kelida Pelaia Hanana imaru ti mini gilibu wini. Miga Lehobo Hasabaia imaru Saguru Serebaia Sebanaia imaru Hodaia Bani Beninu imaru ti mini gilibu wiai hene.
NEH 10:14 Wali agalinaga agali haguane hearu tinaga mini gilibu winigo uru Paroso Pahadamoaba Elama Sadu Bani imarubi Buni Asagada Bebai Adoniya Bigibai Adini imaru tinaga mini gilibu wini. Ade Hesegaia Asuru imaru Hodaia Hasumu Besai imarubi Haribi Anadodo Nebai imaru Magabiasa Mesulama Hesiri imarubi ti mini gilibu wini. Mesesabele Sadogo Yadua imaru Peladaia Hanana Anaia imaru ti mini gilibu wini. Hosea Hanania Hasubu imaru Halohese Piliha Sobege imarubi Lehumu Hasabana Masea imaru Ahia Hanana mendebi Anana imarubi tinaga mini gilibu wini. Malugu Harimi Bana imarubi uruni bibahende tinaga mini gilibu wigi bini.
NEH 10:28 Ina Isaraele wali agalime habo nalolene bi ogo bebani gilibu wirima. Ina loma binigo mo miaga kamarubi Libai hameigini kamarubi Ngode Datagaliwabenaga anda mamage haga kamarubi biabe bialu haga kamarubi ngida balu iba gana laga kamarubi wali agali maru bu kamarubi ina bibahendeore Ngode Datagaliwabenaga bi mana taliai halu wali agali ibuni mitangi nabiaga ina daluha karu baba mandagi nahole lalu ina habagi harima. Ina one bedarubi waneigini miniwi bu karubi bibahendeme inane heba bi baya hangu hale halu buleberama.
NEH 10:29 Iname ina damene darama mbiraore bu kamarubi inanaga agali haguane bu karubi ina bibahendeoreme habo nalolene bi hongoheore lo weramagoni. Ina bibahende mo ngoai howa bi hongohe ogoni Ngode Datagaliwabenaga bi mana bamba ibugua ibuninaga biabe bia haga agali Moseseha howa inanaga mamaliruhondo lamini ngago iname talialu bialu hole lalu lo werama. Inanaga Anduane Homogohanda inahondo bilimu layadagua iname buleberama. Ibugua mana lowinigo iname mitangi bialu bi hongohe lo wialu talialu buleore larama. Ani buleore lalu habo nalolene bi ogoni lo weramago puguarimayagua nde Ngode Datagaliwabe ibunime ina kamagoria mo ko holene ibilelo larama, lene.
NEH 10:30 Ani lalu iname wali tara ina daluha Ngode Datagaliwabe mitangi nabiaga bedaru dabu nabuleore lo werama. Ina wanebi agali Ngode Datagaliwabe mitangi nabiaga karu namuleberema.
NEH 10:31 Agali tara maru ina dindiha Ngode Datagaliwabe mitangi nabiaga karume Sabada horongibi horo timbuni maru inanaga lotu larangibi widi mbirale maru yalu ibiyagua iname uruni yolo nabimi̱ya lo werama. Ani bialu mali kane haga biragola ina mabuha tomo nahenge howa ina baba dano mbira ho heneyagua mali ogoni tagira ibirangi dano yadai bia nale wahami̱ya lo werama.
NEH 10:32 Mali mbira mbirani muni siliba emene maru Ngode Datagaliwabenaga andaha biabe bulene ngaru bilonaga migi buleberema.
NEH 10:33 Muni siliba ogonime Ngode Datagaliwabenaga deni dagia tebolo ngagoria mberedi wulene yolo bilobi horo bibahendenaga widi lomabu delolene yolo bilobi horo bibahendengi nogo loma buwa irame dai helolene yolo bilobi Sabada horongi loma biaga ngaru bilonagabi maru ale Ege Gahenge Pigane Ngabulo kagola loma bialu miaga ngaru bilobi horo timbuni tara tara tagira ibiragola uruningi biaga ngaru bilobi mimi̱ya. Ina Isaraele wali agalinaga ko ngaru domo wahelo nogo loma bo delolene yolo bulenebi loma marunaga yolo bulenebi maru tara tara Ngode Datagaliwabenaga andaha biabe bulene ngaru bilonaga yolo bulenebi uruni bulenenaga muni siliba tagu wuleberama.
NEH 10:34 Ani bialu mana lowini ngadagua Anduane Homogo inanaga Ngode Datagaliwabenaga lomabu delaga dabu ngagoria lomaru wali agalime yalu íbu migi birago delolenenaga ira hameigini agome bo yulene wiaruabe hondole wali agali bibahendebi loma binigo mo miaga karubi Libai aria karubi ina bibahendeme mana lowini ngadagua bialu tadu biradagua bimi̱ya larima.
NEH 10:35 Ani bialu mali bibahendengi inanaga mabuha widi pigane hini denegobi ira lini ala boga biragobi uruni damenego iname Anduane Homogonaga andaha bu yalu ibuleberama larima.
NEH 10:36 Ani buwa inanaga igiri wahene taba hanarago iname Ngode Datagaliwabenaga andaha taba yalu puwa loma binigo mo miaga karia igiri ogoni Ngode Datagaliwabenaga loma bia hene helo muleberama. Ani bialu bulumaga igini wangabe pigane wiragobi sibi memeru igini wangabe pigane wirago damene bibahendebi Ngode Datagaliwabe ibuninagaore loma bia hene helo haru ibuleberama. Mbirale uruni bibahende Ngode Datagaliwabenaga maname lowini ngadagua bialu ani buleberama.
NEH 10:37 Ani buwa mali bibahendengi ina mabuha widi pigane denego balawa helo damberemago ariabi ira lini tara tara pigane denegobi gerebi lini pigane denegonaga waini ibabi olibe lini pigane denegonaga welibi uruni bibahende iname Ngode Datagaliwabenaga andaha do hole yalu puwa loma binigo mo miaga karuhondo lomabu muleberema. Ani bialu Libai agaliru tigua tomo mbirale pini piniru mima ina mabuha ibiragola uruni muleberema, lene.
NEH 10:38 Loma binigo mo miaga Arono aria mbira kago ibu Libai agali tomo tale bialu pini piniru mulenengi ti mandagi polene nga. Ani mo puwa Libai agali biaru tigua tomo pini piniru mo yayago tale bialu pini Ngode Datagaliwabenaga andaha tomo do haga hobane ngagoria yalu daibu wilo.
NEH 10:39 Ogoni irane wali agalirumebi Libai ariarumebi tomo damenego pigane boga birago widibi gerebi lininaga waini ibabi olibe lininaga welibi uruni damene Ngode Datagaliwabenaga anda tamu hobaneha tomo wiaga dabu ngagoria yalu pu wiagaha wulene nga. Ndisi berubi tamu hobane ogoniha dege wiaga wini. Anda ogoninaga tamu hobane maru loma binigo mo miaga hearu tinaga halu maru Ngode Datagaliwabenaga anda mamage haga agali hearu tinaga halu maru Ngode Datagaliwabenaga andaha ngida balu iba gana laga bu hearubi tinaga hene. Iname Ngode Datagaliwabenaga anda ogoni yu wanahe baya hangu handayaho holene ngadagua handayaho hami̱ya lalu habo nalolene bi ogoni lo wirima, lalu wali agalinaga lahalu Nehemaiahanda lene.
NEH 11:1 Horo uruningi Isaraele agali haguane bu hearu ti Yarusalemeni holene nga manda bini. Ani manda buwa wali agali maru tanoha hearu tigua tini damene hayadagua mo mogo bigi buwa damene pira halu mbira biraga buwa pini ai ibu damenego Yarusalemeni Ngode Datagaliwabenaga tano loma biahene biagoha holobadabe handami̱ya lowa tadu bialu hene. Ani buwa maru ti tano wiaruha hama pelonaga ani bini.
NEH 11:2 Ani bialu maru ti nde tini hameme Yarusaleme tanoha hole laga biyaru Isaraele wali agali bu hearume tihondo bayale larimi lalu turu haga bini.
NEH 11:3 Ani biyagola Isaraele wali agali maru hearubi loma binigo mo miaga bu hearubi Libai hameigini bu hearubi Ngode Datagaliwabenaga andaha biabe bialu haga hearubi agali ala Kini Solomononaga biabe bia haga henerunaga aguanene bu hearubi ti bibahendeore Yuda tano tini dindi wiyadaruha hama pugu pugu bini.
NEH 11:4 Yuda hameigini aria agali haguane kira Adaia Maseala hene. Adaia ibu Usia igini howa Segaraia aguane hene. Adaia ibunaga mamali maru hama ibiniru ogodagua. Amaraia Sebadaia Mahalalele imaru hene. Uruni ti Yuda igini Perese mbira henegonaga aguaneneru hene.
NEH 11:5 Masea ibu Barugu igini Kolohose aguane hene. Masea ibunaga mamali maru uru Hasaia Adaia Yoiaribi Segaraia imaru haga bini. Uruni ti Yuda igini mende Selanaga aguaneneru hene.
NEH 11:6 Perese ibu aguaneneru agali hongohe dege dege handari mariani pira waragariani halira (468) ti Yarusalemeni hene.
NEH 11:7 Beniyamini hameigini nde agali haguane heneru mini uru Salu ibu Mesulama igini howa Yoede aguane hene. Ibu mamali maru Pedaia Kolaia Masea Idiele Yasaia ima uruni haga bini.
NEH 11:8 Gabai Salaila libu Salu damene hene. Ani henego wali agali Beniyamini hameigini Yarusaleme heneru bibahende handari dirani pira kirani halira (928) hene.
NEH 11:9 Yoele ibu Sigiri igini howa ibu Beniyamini hameigini uruni tinaga agali haguane hene. Ani heagola Hasenua igini Yuda ibubi nde Beniyamini hameigini uruni aria howa Yarusalemeha hearu haru haga agali haguane mende hene.
NEH 11:10 Loma binigo mo miaga hearunaga agali haguane heneru mini uru Yoiaribi igini Yadaia ibubi Yaginibi libu hene.
NEH 11:11 Ani heagola Mesulama aguane Hiligaia igini Seraia hene. Ibunaga mamali maru Sadogo Meraiodobi loma binigo mo miaga agali haguane timbuni Ahidububi ti hene.
NEH 11:12 Agali uruni ti aria handari halirani pira kirani kira (822) bibahende Ngode Datagaliwabenaga andaha biabe bialu hene. Adaia ibubi nde Yarohama igini howa Pelalaia aguane hene. Ibunaga mamali hama ibinigo mini uru. Amasi Segaraia Pasuru imaru Malagiya imaru haga bini.
NEH 11:13 Uruni ti aria dagalamaga halu handari kirani pira mariani huniane kira (242) hene. Agali haguane Amasai ibu Asarele igini howa Asai aguane hene. Ibunaga mamali marubi Mesilemodo Imela hene.
NEH 11:14 Agali hameigini uruni aria handari mbirani pira kirani halira (128) uruninaga agali haguane Sabadiele ibu dameneru ti howa ti ami agali hongo gibiorehe mini lene hene.
NEH 11:15 Yarusalemeni Libai hameigini agali haguane henerunaga mini uru Semaia ibu Hasubu igini howa Asarigama aguane hene. Ibunaga mamali marubi Hasabaia Bunila hene.
NEH 11:16 Ani heagola Sabedai Yosabadala libubi nde Libai hameigini agali haguane howa libugua Ngode Datagaliwabenaga anda biagonaga biabe tagirahayagi bialu haga agali hearu handayaho haga hene.
NEH 11:17 Agali haguane dege mbira Miga igini Madanaia ibu Asaba aguanene aria mbira Sabadi henego aguane hene. Ani howa Ngode Datagaliwabenaga andaha wali agalime lotu lalu howa ka̱i̱ lalu iba gana lagaru Madanaia ibu haru haga haguane hene. Ani haru heagola agali haguane mbira Bagabugaia ibugua nde Madanaia biamogo biaga hene. Yadudunu hameigini aria Galala mbira henego aguane Samua igini Abada ibubi agali haguane dege hene.
NEH 11:18 Libai hameigini Ngode Datagaliwabenaga tano Yarusaleme biagoha heneru bibahende handari kirani pira halirani maria (284) hene.
NEH 11:19 Agali haguane kirali Ngode Datagaliwabenaga anda Yarusalemeni heago mamage haga henego libunaga mini Agubu Talamonola hene. Libu aria bibahende dagalamaga halu handari mbirani pira kariani kira (172) hene.
NEH 11:20 Ani heagola Isaraele wali agali maru hearubi loma binigo mo miaga maru hearubi Libai hameigini maru hearubi ti bibahende Yuda dindi tini dalu winidaruha haga haga bini.
NEH 11:21 Ani heagola Ngode Datagaliwabenaga andaha biabe bialu haga agali hearu ti nde Yarusalemeni dege dindi hombene mbira mini Obele wiagoria hene. Tigua biabe ogoni bialu helo agali kira Siha Gisibala libugua ti handayaho haga bini.
NEH 11:22 Usi ibu nde Bani igini howa Hasabaia aguane hene. Ani howa ibugua Libai hameigini Yarusalemeni hearu handayaho haga hene. Usi ibu Asaba hameigini henego ibu mamali marubi nde Madanaia Migala hene. Asaba hameigini hearume Ngode Datagaliwabenaga andaha lotu lolenaga ngida balu iba gana lolene tigua haru haga hene.
NEH 11:23 Ani bialu helonaga kini hama ibinirume agali hameigini urunime Ngode Datagaliwabenaga andaha ngida balu iba gana laga bilo horo mbira mbiranaga haru holenedagua dabo wigi bini. Horo bibahendengi ani bialu helonaga kini henedarume mana wabu wini.
NEH 11:24 Yuda hameigini aria Mesesabele igini Pedahaia ibu Sera hameigini mbira hene. Ani howa Pedahaia ibu Pesia dindiha howa Isaraele wali agalinaga bi lahaga hene.
NEH 11:25 Wali agali dewaore tano kawareni tininaga dindi wigi binidagoria haga haga bini. Yuda hameigini aria maru Kiriada Ababi Dibonobi Yagabaselebi tano tebira uruniha halu maru nde tano uruni kaware dege dindi wigi biaruha hene.
NEH 11:26 Ani heagola maru nde tano timbuni maru wiaru Yasua tanobi Molada tanobi Bedebelede tanobi
NEH 11:27 Hasarasuala tanobi Beaseba tanobi Beaseba tano wiagohayagi dindi emene wiapara para bu wiaruhabi Yuda hameigini biaru ti uruniha haga bini.
NEH 11:28 Ani heagola maru nde tano timbuni Sigilagaha halu maru Megona tanoha halu maru nde dindi emene Megona tano wiapara para biaruha haga bini.
NEH 11:29 Maru nde Enerimono wiagoha halu maru Sora wiagoria halu marubi Yaramudu wiagoha hene.
NEH 11:30 Ani halu maru Sanoa Adulamala tano maru nde dindi emene emene tano uruni wiapara para bu wiaruha haga bini. Ani heagola maru Lagisi tano wiagohabi halu tano ogoniha dindi emene maru wiapara para bu wiaruhabi haga bini. Marubi nde Asega tanoha halu maru tano ogoni kawareha dindi emene wiapara hearuhabi haga bini. Anigo Yuda wali agali ti Beaseba dindiha tano abene unurahayagibi Beaseba dindi dombenehabi Hinomohayagi dindi ulini wupe hene wiagohabi uyurahayagibi bibahendeha paliame hene.
NEH 11:31 Beniyamini hameigini maru ti nde Geba tanohabi Migimasa tanohabi Ai tanohabi Bedele tanohabi paluyu pialu dindi emene Bedele tano wiapara para biaruhabi paliyu pene.
NEH 11:32 Maru nde Anadodo tanohabi Nobo tanohabi Ananaia tanohabi
NEH 11:33 Hasoro tanohabi Lama tanohabi Gedaimi tanohabi
NEH 11:34 Hadidi tanohabi Seboimi tanohabi Nebalada tanohabi
NEH 11:35 Lodo tanohabi Ono tanohabi dindi ulini tigabi wiagoha mini Mbirale Tara Tara Wabiaga dindi ogoni wiaruhabi hai hene.
NEH 11:36 Ani heagola agali haguane hearume Libai aria maru Yuda dindini hearu tihondo lamialu lalu, Tí maru Beniyamini hameigini baba hole pudaba, lalu lamini.
NEH 12:1 Loma binigo mo miagabi Libai ariabi dewaore ti Seadeli igini Serubabele heba loma binigo mo miaga haguane timbuni Yosuabi heba Babilono yu wahalu Yarusaleme dai bini.
NEH 12:2 Seraia Yaremaia Esera Amaraia Malugu Hadusu imaru ibini. Seganaia Lehumu Meremodo imaru Ido Ginedoi Abiya imaru ibini. Miyamini Madaia Biliga imaru Semaia Yoiaribi Yadaia Salu Amogo Hiligaia Yadaia mende imarubi ibini. Yosua ibu loma binigo mo miaga haguane heangi agali mini o gilibu ngaruni tigua loma binigo mo miaga maru hearu haru haga hene.
NEH 12:8 Libai aria daibu heneru ti mini uru. Yasua Binui Kadamiele imaru Serebaia Yuda Madanaia imaru uruni tigua Ngode Datagaliwabehondo ka̱i̱ lalu iba gana laga heneru haru haga hene.
NEH 12:9 Libai aria Bagabugaia Unola libu aria marubi uruni tigua iba gana halu mbira laga lai kagola Bagabugaia Unola libugua nde libu hameneru heba iba gana halu mende lolene ngagoria ladai biaga hene.
NEH 12:10 Yosua igini Yoiagimi hene. Yoiagimi igini Eliasibi Eliasibi igini Yoiada
NEH 12:11 Yoiada igini Yonadana Yonadana igini Yadua hene.
NEH 12:12 Yoiagimi ibu Loma Binigo Mo Miaga Haguane Timbuni heangi agali maru ti loma binigo mo miaga haguane dege howa tini damene hangu haru haga uru hene. Seraia hameigini aria loma binigo mo miaga Meraia hene. Yaremaia hameigini aria Hananaia hene. Esera hameigini aria Mesulama hene. Amaraia hameigini aria Yahohanana hene. Malugi hameigini aria Yonadana hene. Sebanaia hameigini aria Yosebe hene. Harimi hameigini aria Adana hene. Meraiodo aria Helegaia hene. Ido hameigini aria Segaraia hene. Ginedono hameigini aria Mesulama hene. Abiya aria Sigiri hene. Miniamini Moadiala hameigini aria Pilidai hene. Biliga hameigini aria Samua hene. Semaia hameigini aria Yahohanana hene. Yoiaribi hameigini aria Madenai hene. Yadaia hameigini aria Usi hene. Salai hameigini aria Kalai hene. Amogo hameigini aria Ebere hene. Hiligaia hameigini aria Hasabaia hene. Yadaia hameigini aria Nedanele hene.
NEH 12:22 Loma binigo mo miaga haguane timbuni Eliasibi Yoiada Yonadana Yadua imaru ti heangi loma binigo mo miaga haguane maru henedaru tinaga mini mbuga mbiraha gilibu wini. Ani bialu Libai hameigini aria bu hearunaga minibi mbuga Yuda dindiha mbirale uru ale bialu ka lalu te gilibu wini. Tigua anidagua bialu gilibu wigi bima ibinigo Eliasibi aguane Yonadana ibu loma binigo mo miaga haguane heangi mini gilibu wiaga winidagua mani gili nabi wahene. Kini Dariusu ibu Pesia dindinaga kini heangi mini uruni mbuga biagoha gilibu maro bini.
NEH 12:24 Ngode Datagaliwabenaga mini yaraga halu howabi ibuhondo ka̱i̱ lalu howabi bamba Kini Debidi ibu Ngode Datagaliwabenaga agali howa ibugua iba gana lalimu lenedagua lalu hene. Libai aria tigua duguni kira howa duguni mbiragome iba gana dugu mbira ngago laragola dugu mendegome iba gana dugu mende ngago ladai biaga hene. Ani laga winigo Hasabaia Serebaia Yasua Kadamiele uruni tigua iba gana lelo haru haga hene.
NEH 12:25 Madanaia Bagabugaia Obadaia Mesulama Talamono Agubu imaru tinaga biabe Ngode Datagaliwabenaga anda handaya ho haga howa tigua dabudabu wiaga anda hobane wiaruha uruninaga panga harabani mamage haga hene.
NEH 12:26 Libai agali uruni ti loma binigo mo miaga haguane timbuni Yosua igini Yoiagimi ibu Yahosadaga aguane biago heangibi gabumane agali haguane Nehemaia heangibi loma binigo mo miaga Esera ibu Ngode Datagaliwabenaga mana lo wini ngago manda biaihe henego ogoni heangibi biabe ogoni bialu hene.
NEH 12:27 Yarusaleme ege pabe biago bu yaanda hai howa tigua lotu lalu pabe ogoni Ngode Datagaliwabe ibuninagaore helo loma biaho helene. Tigua lotu ogoni lole howa Libai agali bu hearu bibahendeore tini henedagoha howa Yarusaleme íbu ngoai halu ti heba lotu lalu Ngode Datagaliwabehondo turu halu ka̱i̱ lowa iba gana lole ibai hene. Ibai howa Libai agali uruni tigua iba gana larangi ti marume beledi ale kira gabame wabini biago labo ngi̱li̱nge̱le̱ lelonaga balu marume ngida tara tara balu hene.
NEH 12:28 Anidagua bulene wiya handala Libai agali Ngode Datagaliwabenaga andaha ngida balu iba gana laga hearuni bibahende tini dindi Nedobabi Bedegiligalabi Gebabi Asamabedebi maru wiaruha howabi bibahende Yarusaleme íbu ngoai hene. Dindi uruni Yarusaleme tano kaware dege wigi bini.
NEH 12:30 Ani íbu ngoaiho howa loma binigo mo miaga hearubi Libai agali hearubi tigua Ngode Datagaliwabenaga deni tiha ko mbira nawi holenaga mana biaga winida ale bini. Ani bialu wali agali bibahendebi Yarusaleme tanonaga ege pabe biagobi tano pabenaga panga haraba heagobi bibahendeore Ngode Datagaliwabenaga deni ko mbira para nahelonaga mana biaga winida ale biai hene.
NEH 12:31 Nehemaia i̱na Yudanaga agali haguane hearu ege pabe biago daligaha mbalape wiagoria haru iraga howa ti bibahende halu kira tale buwa ho dugubu helaru. Ani helowa tigua pabe daliga biagoria Ngode Datagaliwabehondo ka̱i̱ lalu iba gana lama pumabu bidaba laru. Tidi mbira layagome gi tigahayagi lama pialu pabenaga panga mini Mburuma Yu Wahaga laga wiagoria pilimu laru.
NEH 12:32 Hosaia halu Yudali agali haguane maru hayadarume agali iba gana lama porago tígua talima pudaba laru.
NEH 12:33 Ani bialu loma binigo mo miaga maru hearume ti poradagua mama mbelo biguli pu laga bima pudaba laru. Agali piyadaru tinaga mini uru Asaraia Esera Mesulama Yuda Beniyamini Semaia Yaremaia uruni ti pene. Ani piyagola Semaia aguane Yonadana igini Segaraia ibugua ti piyadagua mama talima pene. Segaraia ibunaga mamaliru ogodagua hama ibini. Madanaia Migaia Saguru Asaba imaru hene.
NEH 12:36 Ani piyagola Segaraia damene hearu tibi nde Segaraia piyadagua pene. Agali uruni tinaga mini Semaia Asarele Milalai imarubi Gilalai Mai Nedanele imarubi Yudabi Hananibi uruni ti pene. Agali uruni tigua ngida balubi mbirale iba gana lalu mo bila hagane tara tara wiarubi bibahende bamba Ngode Datagaliwabenaga agali Debidihanda laga winidagua lama pene. Wabuni halu mbira tidu yalu piyadagonaga loma binigo mo miaga Esera ibu mana mandabi agali howa ibugua ti haru halu pene.
NEH 12:37 Tigua piaho wialu panga mbira mini Iba Duguaga laga wiagoria bolangua halu pialu tano anda polene egageria bama iraga heagoha iraga halu Debidinaga tano laga wiagoria anda pene. Pialu Debidinaga anda timbuni heago bolangua halu pialu ni tagira ibiragohayagi panga mbira mini Iba Haraba laga wiagoria tagira pene.
NEH 12:38 Libai agali wabuni mende hayago ti nde daligaha iraga halu pabe mbalape wiagoriani gi lehayagi pudai bule piyagola i̱bi ti piyagoha pu tago halu piru. Ani pirugola agali dewaliore i̱ pirudagua mama talima ibalu ina haru pialu anda bu gimbu bima iraga hene mini Mberedi Hiraga Anda heago bolangua halu pialu pabe Yangale Timbuni heagoria tagira pirima.
NEH 12:39 Ani pialu iname panga mini Eberaiminaga laga heago bolangua halu pialu Yasana Panga laga heagobi bolangua halu Wena Panga laga heagobi bolangua halu anda bima iraga hene mini Hananelenaga laga heagobi bolangua halu pu dege birima. Ani pialu anda bima iraga hene mende mini Mamageali Handari Mbira (100) Haga laga wiagobi bolangua halu pu dege bialu Nogo Sibinaga Panga laga heagobi bolangua harima. Ani piaho wialu Ngode Datagaliwabenaga anda biago mandaha pabe heagoria tagira pialu pabe panga mbira mini Mamagealirunaga laga heagoria lola haga birima.
NEH 12:40 Ani bialu Libai agali wabuni kira biaru Ngode Datagaliwabenaga andaha anda pialu tini ho dugubu hagadagua haga haga buwa Ngode Datagaliwabehondo turu halu ka̱i̱ lowa iba gana lalu hene. Agali i̱ heba anda pirimaru aria maru agali haguane hearu aria
NEH 12:41 pialu maru loma binigo mo miaga aria penego tigua mbelo biguliru pu laga bima anda pirima. Loma binigo mo miaga piyadaruni tinaga mini uru Eliagimi Masea Miniamini Migaia Elioenai Segaraia Hananaia imarubi pirima.
NEH 12:42 Agali maru pirimadarunaga mini Masea mendebi Semaiabi Eleasa Usi Yahohanana Malagiya Elama Ese imarubi pirima. Yaserahaia ibugua iba gana lagaru haru halu ti bibahende iba gana baya gibi laraga halu hene.
NEH 12:43 Horo ogoningi Ngode Datagaliwabehanda turu holene tiha mo to̱la hayagola tigua loma dewaore Ngode Datagaliwabehondo mialu hene. Wali waneigini bu hearu bibahendeme turu hai hene. Tigua turu howa ga̱lalu iba gana ladagadaga biyaru wali agali kaundiaha hearume hale habehe lalu hene.
NEH 12:44 Horo uruningi agali marume wali agali tigua Ngode Datagaliwabehondo mbirale migi biragobi Ngode Datagaliwabenaga andaha mbirale wiarubi uruni wiaga tamu hobane haga haga bidaru handayaho helo dabo helaga bini. Anda hobane uruniha tinaga mabuni widi pigane denerubi ira lini damene pigane boga binirubi wali agalime tinaga mbirale wiarunaga pini pini Ngode Datagaliwabehondo minirubi bibahende mo miaga wini. Agali uruni tinaga biabe wali agali ti kagoha pialu mana lo ngadagua mbira tale bialu loma binigo mo miaga karubi Libai karubi talebu milimu lene ngaru mima ibaga biaga hene. Yuda wali agali tigua loma binigo mo miaga hearubi Libaiali hearubi tinaga biabe biyago bayaleore biyago hondowa turu timbuni hene.
NEH 12:45 Loma binigo mo miagabi Libaialibi tigua wali agali Ngode Datagaliwabenaga deni tiha ko mbira para nahe helobi Ngode Datagaliwabe ibunime lalimu lalu lowini ngadaguabi lotu uruni lalu haga wini. Ani bialu heagola agali maru Ngode Datagaliwabenaga andaha ngida balu iba gana laga hearu tigua tinaga biabe ogoni biaga winidagua bialu hene. Bamba Kini Debidibi ibu igini Kini Solomonobi libugua agali uruni tinaga mamaliruhondo ogodagua bialu halimu lamini wiadagua bialu hene.
NEH 12:46 Agali ngida balu iba gana laga uruni tinaga mamali abale henerume Kini Debidibi ngida balu iba gana laga agali Asababi heangi howa Ngode Datagaliwabehondo turu halu ka̱i̱ lowa iba gana lolene agali marume haru helo dabo helene.
NEH 12:47 Ani bialu Serubabele heangibi Nehemaia heangibi Isaraele wali agali tigua horo bibahendengi tomo yalu ibalu agali ngida balu iba gana laga urunibi agali Ngode Datagaliwabenaga andaha mamage haga urunihondobi miaabo haga hene. Ngode Datagaliwabe ibunihondo lomabu mialu tigua Libai agali bu hearuhondo tomo bu mialu haga hene. Ani miragola Libai agali uruni tigua mana lo winigodagua bialu tomo loma bini uruni aria maru tale bialu loma binigo mo miaga hearu ti mo miaga hene.
NEH 13:1 Horo ogoningi wali agali íbu ngoai ho heagola Libai agali hearume Ngode Datagaliwabenaga bi mana Mosesehanda gilibu wini wiago dagalatagi hene. Tigua dagalalu hearia bi mbira ogodagua lo wiaria hendene. Amono wali agalibi Moaba wali agalirubi tigua Ngode Datagaliwabenaga wali agali karu baba hatago holene nawiore lalu gilibu wiaria dagalene.
NEH 13:2 Mana ogonidagua lo winidagoni irane Isaraele wali agali ti Iyibi dindiha howa garabaya golalu tagira ibiyangi Amono Moabalirubi tigua iba tomobi mbira Isaraele wali agalime nelo mia nabiyagonaga mana ani gilibu wini. Ani nabi howa tigua agali bi mana henene ngadagua ndo latagi halu mbiwia haga Balama mbira heagome Isaraele wali agali Ngode Datagaliwabehanda mo ko helonaga ibuhondo muni mialu bi la hole íbu lowa lamini. Lamiyagola Balama ibugua mo ko helonaga bi lolebiyaria Ngode Datagaliwabehanda Isaraele wali agali mo bayale helonaga bi lelo mo lahene.
NEH 13:3 Isaraeleali tigua mana lowini dagalayago hale howa wali agali uruni tinaga mamali tarali heneyagola ti baba nahole lalu bibahende bo taliatagi haga bini.
NEH 13:4 Loma binigo mo miaga Eliasibi ibugua Ngode Datagaliwabenaga anda dabudabu wiaga hobane heago handayaho helo dabo helayagola ibugua Tobiala nenege hinuwa biabe mandagi bialu hene.
NEH 13:5 Ani bialu howa Eliasibi ibugua Ngode Datagaliwabenaga andaha tamu hobane timbuni mbira heago ogoni Tobia ibu helo mini. Hobane timbuni ogoniha ala widiru lomabu delolene mo wiagabi ira hagua nga bilo lomabu delaga mini inisenesiru mo wiagabi Ngode Datagaliwabenaga andaha biabe buleneru damene mo mogobu wiagabi wali agalime loma bialu tomo loma biniru mo miaga hearu ti nelonaga migi biniru mo wiagabi wali agali tigua widibi waini ibabi olibe lininaga welibi Ngode Datagaliwabehondo miniru Libai aria hearumebi agali ngida balu iba gana laga hearumebi anda biago mamage haga hearumebi ti nelonaga mo wiagabi uruni bibahende hobane ogoniha wilo mo wiaga hene.
NEH 13:6 Mbirale uruni biyadaru Nehemaia i̱ Yarusaleme nahewangi binigo i̱ handa nabi haru.I̱ Pesia dindiha Kini Adasegesi heagohondo mbirale ogodagua bialu kama lalu te lamule pu hewagola tigua uruni bialu hayiya. Kini ibu Babilono dindiha mali pira tebirani kira (32) haru hene hearia piru. Pu howa i̱na kinihondo hale halu Yarusaleme dai bero larugola e̱ dai bia laya.
NEH 13:7 Dai bia laya handala i̱ Yarusalemeni íbu hewaria Eliasibi ibugua Ngode Datagaliwabenaga anda tamuha hobane timbuni heago Tobia mo walia haya layane hale howa o biyadagoni mana ko liaheore biyada lo manda biru.
NEH 13:8 Ani biyiyago hondowa i̱na keba timbuni howa tamu hobane timbuni ogoniha anda puwa Tobianaga mbirale wiaruni damene bibahendeore mo batagi hai haru.
NEH 13:9 Ani mo batagi hai howa i̱na biabe biaga hearuhondo lalu, Tamu hobane ogoni Ngode Datagaliwabenaga deni bayale ngelonaga mana tigabi biaga winidagua bidaba, laru. Anidagua biai heagola mbirale Ngode Datagaliwabenaga andaha biabe biagane damene wiarubi widi lomabu delolene wiarubi ira hagua nga bilo lomabu delaga inisenesi wiarubi bibahende ala winiru mo batagi hayaruni lone mo yu dai bialu wilo lowa i̱na, Tamu hobane o biagoha mo wiai hadaba, laru.
NEH 13:10 I̱na bi mende hale halu hewaria Libai agali hearubi agali Ngode Datagaliwabenaga andaha ngida balu iba gana laga hearubi ti bibahende wali agalime tomo nangira lalu Yarusaleme wahalu tini daluha hama pugupugu biya layane hale haru.
NEH 13:11 Ani hale howa agali haguane bu hearuhondo i̱na keba howa lalu, Tígua irane aginaga Ngode Datagaliwabenaga anda bame helo waharimibe, laru. Ani lowa i̱na Libai agalibi agali Ngode Datagaliwabenaga andaha ngida balu iba gana laga biarubi bibahende haru dai bialu tigua biabe bialu haga wiyaruha daibu helaga biru.
NEH 13:12 Ani helewagola Yuda wali agali tigua lone widibi waini ibabi olibe lininaga welibi bibahende yalu ibalu anda hobane timbuni Ngode Datagaliwabenaga andaha biabe biagane damene wiaga wiaruha wigi bini.
NEH 13:13 Ani biyagola i̱na loma binigo mo miaga agali Selemaiabi mana lowini ngago lawai haga Sadogobi Libaiali Pedaiabi agali uruni tigua tamu hobane timbuni ogoniha handayaho helonaga dabo helaga biru. Ani helowa agali mbirabi ti biamogo bialu helonaga Saguru igini Madanaia aguane Hanana heago dabo helaru. Agali maru hearume lalu agali uruni ti tigabi bayaleore bialu haga ka layago hale howa i̱na ti dabo helaga biru. Marume agali ti heba biabe mandagi biaga hearunaga tomo mbiraleru mo tale bilo lowa helaru.
NEH 13:14 Ani helowa i̱na lalu, I̱naga Ngode Datagaliwabe-o í̠naga anda baya hangu handayaho holenenagabi í̠ mitangi bialu lotu lolenenaga mana mo tiga bulebi i̱na o biruruni mitangi bibe, laru.
NEH 13:15 Horo uruningi dege howa handalu hewaria Yudali maru hearume Sabada horongi waini iba wabulenaga gerebi lini geme hengedalu hemiria handaru. Yudali maru hearumebi nde Sabada horongi dege tomobi waini ibabi gerebi linibi poge linibi marualebi bibahende nogo dongi erekuinini mo paga howa Yarusalemeha yalu pole pialu hemiria handaru. Ani biyago hondowa i̱na bi hongo howa tihondo lamialu lalu, Tígua mbirale yalu pialu kamiruni Sabada horongidago yolo nabuleore, laru.
NEH 13:16 Agali maru Taia tano howa Yarusalemeha íbu hene. Agali uruni tigua Sabada horongi inanaga wali agalirume ti yolo muluma̱yanaga wena bo yalu dabudabu marualebi yalu Yarusaleme ibugu biaga hene.
NEH 13:17 Ani bialu heago hondowa i̱na Yudali agali haguane hearuhondo keba howa tihondo lamialu lalu, Tígua mana koore bialu Sabada horo mo ko halu horo maru bame ngaru ale dege bu hinarimidago irane agibe.
NEH 13:18 Bamba inanaga mamaliru tigua nde ogonidagua dege biyagola Ngode Datagaliwabehanda ti pani mialu tano ogo mo ko halu bo giala hole binigo. Ai tígua nde mana ko ogoni ale dege birimidagome Ngode Datagaliwabehanda Isaraeleali inahondo keba lone ha timbu holobadagonaga, ani laru.
NEH 13:19 Ani lowa i̱na tihondo bi hongo howa lamialu lalu, Sabada horo holenaga bibahendengi alendo ni paliragola tanonaga pabe panga dameneru payai halimu. Sabada horo hai howa alendo haragola panga damene dugua holene nga, laru. Ani lalu i̱naga biabe biaga agali hearuhondo lalu, Tígua tanonaga pabe panga mamage halu agali marume mbirale muni mulene aleru Sabada horongi mo yalu anda naibilo mamage halimu.
NEH 13:20 Ani birimagola horo marungi agali marume mbirale muni mule yalu ibalu hearia tanonaga pabe panga payarimago hondowa ti horo mendengi ina panga duguilo lowa ti pabe tagirahayagi palu haga hene.
NEH 13:21 Ti ani palu heago hondowa i̱na tihondo bi hongo howa lalu, Tí tagira ogoria agile bialu kamibe. Áyu ogoni tíni andaga pudaba. Halu mende Sabada horongi ibirimiyagua i̱na tí mana loleberogo lone naibalimu, lalu lamiru. Ani lamirugola ti mani naibi wahene.
NEH 13:22 Ani biyagola mani i̱na Libai agali hearuhondo lamialu, Tígua Ngode Datagaliwabenaga deni tíniha ko mbira para nahe holenaga mana biaga winidago bilimu. Anidagua bialu tíni bayale tigabi howa wai pabenaga panga haraba bibahende ngagoria mamage hole pilimu. Ani bialu kamigola agali bu karume Ngode Datagaliwabenaga Sabada horonaga mana ngago pugua nabi baya hangu talialu agali tara tara bu karume tanoha mbirale yalu anda naibilo handayaho halimu, lalu lamiru. Ani lai howa i̱na lalu, I̱naga Ngode Datagaliwabe-o í̠na wali agali gubalini timbuniore howa dara holene irane nawini dara timbuni haga kegoni. Anigo i̱na biabe bayale maru bialu haruliru mitangi bialu í̠na i̱ dara habe, laru.
NEH 13:23 I̱na horo uruningi dege maru wiaria handa walia harugo uru. Yudali maru hearume Asadodo wali berearubi Amono wali berearubi Moaba wali berearubi dabu bu hearia handaru.
NEH 13:24 Tinaga waneigini marume Asadodo wali agalinaga bi laga wiaru lalu hearia handaru. Marume dindi tara tara wiarunaga bi tara tara laga wiaru laga bialu hea. Ani lalu hearume ina Yuda wali agalinaga bi laga winiru ti manda nabi hearia handaru.
NEH 13:25 Ani heago hondowa i̱na agali urunihondo keba timbuni howa ti maru minu balu maru tinaga mandari dogo waharu. Ani buwa i̱na tíhondo lamialu lalu, Tígua mana ko ogoniore bialu harimida. Ani bialu harimidagonaga Ngode Datagaliwabehanda tíha mo ko holene anda ibilo, lalu lamiru. Ani lowa i̱na agali urunihondo bi hongo howa lamialu, Tínimebi tínaga waneigini bu karumebi dindi tara tara wali agali bu karu baba dabu nabule lalu Ngode Datagaliwabenaga minini howa bi hongohe lo widaba, laru.
NEH 13:26 Ani lowa i̱na tihondo laabo halu lalu, Tígua mana ko Kini Solomonohanda bialu haga biagaore bialu harimida. Abale Ngode Datagaliwabehanda Solomono gubalini ho howa ibu Isaraele wali agalinaga kini helo dabo helaya. Ani helowa Ngode Datagaliwabe ibugua Kini Solomonoha mini bayale gigabi timbuniore mo wia heagola kini maru dindi bibahendeha hearunaga mini gigabi wiaru nira dege lowa Solomono ibu bolangua timbuniorehe hene. Ani howa ibugua dindi tara wali Ngode Datagaliwabe mitangi nabiaga berearu dabu biyagoni. Ani dabu bu heagola wali urunime ibunaga mini mo batara hayagola Solomono ibugua mana ko bini.
NEH 13:27 Ani binigo iname nde mana tígua bialu kamiruni talialu dindi tara tara wali bedaru dabu birimayagua nde Ngode Datagaliwabenaga bi mana lowini ngago mo wahole beremada. Anigo iname ogonidagua bulenego bayaledalo manda bidamibe, laru.
NEH 13:28 Loma Binigo Mo Miaga Haguane Timbuni Eliasibi igini Yoiada henego ibu igini mbira henegome dindi tara wali uruni aria mbira dabu bu hene. Wali ogoni ibu agali Sanabalada mbira heago wane Bedehorono tanoni berene. Ani dabu bu heagola i̱na Yoiada igiri daliahe ogoni Yarusaleme tanoha nahelo bo taliatagi haru.
NEH 13:29 Ani buwa i̱na i̱naga Ngode Datagaliwabehondo lalu, Í̠nime loma binigo mo miaga karunime mana ko bialu karuni handabe. Tigua loma binigo mo miaga biabe bulene ngago mo ngubia helaya. Ani biyagome í̠nime habo nalolene bi loma binigo mo miaga karu bababi Libai agali karuni bababi lo wirigo habo lalu mo ko hayada, laru.
NEH 13:30 Anidagua biyagonaga i̱na loma binigo mo miaga hearubi Libai agali hearubi ti Ngode Datagaliwabenaga deni ko nahe bayale helonaga dindi tara wali agali hearunaga mana ko tiha wiyadaru bibahende mo wahai harugoni. Ani bialu i̱na ti mbira mbiranaga biabe bialu helo tu wu ngelarugoni.
NEH 13:31 I̱na wali agali marume lomabu delolenaga ira gabilo dabo helalu gabuwa ogongiore yalu ibalimu lalu henge mo bagiho ngelarugoni. Ani bialu tinaga mabuha widi pigane denegobi ira tara tara karunaga lini ala boga birarubi do yu ibalu lomabu mule wilimu, lalu lamiru. Anidagua lowa i̱na Ngode Datagaliwabehondo bi lalu, I̱naga Ngode Datagaliwabe-o mana bayale uruni i̱na birugo mitangi bialu i̱hondo turu halu biamogo bibe, lalu Nehemaiahanda lene.
EST 1:1 Kini Segesisi ibu Pesia dindini kini heangi Pesianaga tano timbuni Susa wiagoria ibu biragane dagia wiagoriani handame ho berene. Ani biruwa ibugua dindi handari mbirani pira kirani karia (127) bibahende India howa piaho wialu Idiobia handa gimbu bu berene.
EST 1:3 Ibu mali tebira kini handameho howa ibugua gabumane agali dindi emene emene hondo biraga bibahenderubi gabumane agali haguane bibahenderubi mo ngoai howa ti tomo timbuni nelo dawa manda manda bini. Ami agali Pesia dindi howabi Midia dindi howabi haru haga hearu dindi mbira mbiranaga agali haguane hearu tibi bibahende íbu ngoai haga bini.
EST 1:4 Agali haguane uruni ti íbu ngoaiho hearia kini ibugua ege waragariani horo bibahendengi ibunaga andaha bibahende wiarubi homogo holene wiarubi anda yári biaru bibahendebi agali ibiyarume de hendelo walia haga bini. Tigua uruni bibahende hondowa baya burugule taraoreyane de hendene.
EST 1:5 Anidagua buwa Kini Segesisihanda agali homogo yagibanorubi Susa tanoha hearu bibahendeme tomo nole ibilo halu mende ibunaga anda pabe tamuha hama timbuni wiagoriani dawa manda manda bini. Tigua tomo ogoni nalu heane dege sarere mbira piai hene.
EST 1:6 Tigua tomo nalu hayadagoriani yári bayaleore tara tara bu wini. Bamba agali marume to̱le̱ daramabimebi mindibimebi tagalitaya alemebi pelemebi halepange ale winigobi to̱le̱ tara dege mbira ngalasi ale winigobi uruni dindini duguni mo ngelaga buwa tigua dagia yári biru ogoriani wabu wini. Tigua tomo nole howa ogoniha aga pele mindibi tagalitaya alemebi yári bia howa pu bayaleme pongobia hene. Ani bialu tigua silibame yania holene gi pagida ale ngiringarale agani heaore windohayagi gerelape halu to̱le̱ gene bayale bu heagoria pongobia hene. Ti tomo nalu birayagoria biragane dagia ngolo silibame wabinirubi ona bu payabu ngelene.
EST 1:7 Agali biarume gabo be ngolome wabini tara tara ale wiaru mbira mbira mialu waini iba berelowa nalu berene. Kini ibugua agali uruni ti waini iba dewaore nelo mini.
EST 1:8 Waini iba tigua nayadago magi manda bibe naheore nene. Kinihanda ibu andagaha biabe biahaga bu hearuhondo lalu, Agali mbira mbirame tini noa biradagua nelo hambu milimu, lene.
EST 1:9 Horo ogoningi dege kini ibugua ibunaga tomo nalu heatambu kuini wali Basidi ibugua nde wali bibahende kininaga andagaha biru wiaru nelo tomo timbuni ibuni andagaha dawa manda manda bini.
EST 1:10 Kini ibu tomo nalu heane horo kane hayagola ibu waini iba nayagome emene lulu yu hene. Lulu yu howa ibu andagaha biabe biahaga igiri karia biaru ibidaba lene. Igiri uruni tinaga mini uru. Mehumana Bisida Habona imaru Bigida Abagada Seda Kagasa imaru hene.
EST 1:11 Kini ibugua tihondo lalu, Kuini Basidi ibu kuininaga manda karulalu haru ibalimu, lene. Kuini ibu wali bayaleorego ibunaga yári bidagome kini ibugua ibunaga agali haguanerubi agali maru tomo nami̱ya ibalimu layarubi bibahende mo walia hole manda bini.
EST 1:12 Anigo biabe biahaga igiri biarume kininaga bi lowia hayago lamiyagola kuini ibugua bi mo wahalu pobe manga hene. Ani biyagome kini mo kebaore hene.
EST 1:13 Kuini wali ibu bi mo wahayagonaga kini ibugua agali kinihondo mitangi bayale í̠na ogodagua bibe lalu talebu miaga heneru olo ngoai hene. Agali ti howa ogoale bulene nga manda bu helobi dindini howa gabumane mana lo wulenebi kini mitangi bayale talebu milo agali mitangi bayale talebu miaga hale holene ogoni kini ibunaga mana ogonidagua biaga wini.
EST 1:14 Kinihondo mitangi bayale talebu miaga heneru tinaga mini uru. Kasena Seda Adamada imaru Tasisi Merese Masena Memugana imaru hene. Agali haguane karia uruni ti Pesia dindinagabi Midia dindinagabi haguane howa kinihanda handameho kagoria biabe daliga duniniru bialu kini ibu tigua laradagua hale halu biaga hene.
EST 1:15 Ani biaga henego ibugua agali biaruhondo lalu, I̱ Kini Segesisi i̱na i̱naga biabe bia hagaruhondo bi lawia halu Kuini Basidi ibu i̱ hame ledodagua bilo ibabe larugola ibu i̱naga bi mo wahaya. Mana lo ngagome ibuhondo agi bulene lalu lo ngabe, laya.
EST 1:16 Memuganahanda kinihondobi ibunaga agali haguane biaruhondobi lalu, Kini-o hale ha. Kuini wali Basidihanda ko ogoni í̠hondo hangu ndo biya hendedeni. Ibugua kininaga agali haguane hearuhondobi dindi í̠na hondo kego bibahendeha agali karuhondobi ko ogoni biyagoni.
EST 1:17 Wali bibahendeore dindi í̠na hondo kegoha biru ngarume kuini walime biyiyago te hale harangi tigua ti agalini mo yo hondolene tagira ibulebira. Tigua howa lalu, Kini Segesisihanda Kuini Basidi ibu koria ibabe lalu bi lo wia hayiyago mo wahayiya, lolebira.
EST 1:18 Kuini walime mana ko ogoni biyiyago Pesia dindihabi Midia dindihabi agali haguane karu tinaga onerume hale harangi tinaga agaliniru lamulebira. Ani lamialu howa wali bibahendeme ti agalini yohandalu tinaga bi mo wahalu laibi laabo haragome ti agalini mo keba holebira.
EST 1:19 Kini í̠ni manda bialu iname bi o langeremago bayaleyagua wali agali í̠na hondo kego bibahendeha bu karuhondo bi mbira au lowia ha. Kuini wali Basidi mani i̱ koria ibulene nawi, lalu lowia ha. Bi ogoni Pesia dindihabi Midia dindihabi mana mbugaha lo wini ngagoria wiaabo helo gilibu wibe. Mana ogoni lone lo beregeda nabi wiaabo helo laro. Ani buwa í̠na Kuini Basidi dugu wahalu wali bayale mbira taya bialu kuini berela aribia habe.
EST 1:20 Bi ogoni lowia haregola dindi bibahende í̠na hondo kegoha wali bibahende bedarume hale hai howa ti agalini homogoyaguabi yagibanoyaguabi ta nabi yo nahende bi bayuwa hale holebira, lalu kinihondo lamiya.
EST 1:21 Kinibi ibunaga agali haguane biarubi tigua Memuganahanda ogodagua bibehedabe layago bayaleyagola hame lowa kini ibugua Memugananaga bi talialu bini.
EST 1:22 Ani bialu dindi bibahende kini ibugua handayaho hearuha wali agali bibahende hearuhondo tininaga bi tara tara lagadagua lalu beba gilibu wia hai hene. Ibugua lalu, Agali ibu one waneiginirunaga haguane ibuni howa ibugua bi laragola tigua hale holene nga, lalu Kini Segesisihanda lo wini.
EST 2:1 Kini ibu ala keba ho hayago emene hadayagola ibugua Basidihanda mbirale ibunihondo biyaru mitangibu dai bini. Ani buwa ibugua Basidiore kuini wali naberelo dugu wahenegobi manda bini.
EST 2:2 Ani manda bialu berearia agali maru ibuhondo mini manda bayaleru talebu miaga hearume ibuni bereagoria birapara ho biruwa ibuhondo lamialu lalu, Í̠na wandari bayaleore bedaru taya bibeheda.
EST 2:3 Dindi í̠na handayaho hene ngaru bibahendeha í̠naga agali haguane bu karu tihondo wandari bayaleore bedaru taya bialu gabumanenaga dindi haguane timbuni mini Susa tano ngagoria haru halu ibuwa í̠naga waliru mo mogobu berelaga anda kagoha bereladaba labe. Ani berelowa í̠naga wali uruni mamage haga agali Hegai ibugua mamage howa handayaho helo. Anda ogoniha biruwa wandari uruni tininaga tingini weliru baya hangu ha̱i̱ halu yáriru bialu bedagola ti baya taraore helonaga ani bialu berelo.
EST 2:4 Anidagua bialu bedagola í̠nime mbira hameore larago dabalu Kuini Basidi berenegoria bira aribia halu kuini berelo dababe, lalu lamini. Anidagua layagola kini ibugua bi ogoni karulapeda lo manda bialu tinaga bi layago hale halu bibe layadagua bini.
EST 2:5 Susa tano ogoniha Yudali mbira Beniyamini hameigini aria ibu mini Modegai hene. Modegai ibu Yairi igini howa Simai aguane hene. Ani howa ibu Kisi aguanene hene.
EST 2:6 Bambaore Babilononaga Kini Nebugadenesa ibugua Yudanaga Kini Yahoiagini halu Yuda wali agali dewaore Yarusaleme howa Babilono dindiha garabaya bu yalu penego. Ani biyangi Modegai ibubi uruni heba mandagi garabaya pumaga halu pene.
EST 2:7 Ani howa Modegai aba hamene heyogonenaga wane mbira mini Eseda berene. Eseda ogoni ibu mini Hiburu bi lalu Hadasa laga berene. Ani berenego ai wandari biagonaga ai̱ya abala homayagola Modegai ibugua Eseda mo mondo bialu ibuni waneore biraradagua berene. Ani bereagola Eseda ibu wandari maru berearu bababi bia tabe nahe wandari bayaore mbira ona berene.
EST 2:8 Horo mbirungi Kini Segesisi ibugua dindi bibahendeha bi lope halu wali agali bibahendeme wandari bayaleore mbira bereagua ogoni Susa tano haru ibai halimu lalu bi lope hene. Ani layagola tigua wandari maru haru ibiyadagua Esedabi nde haru ibini. Haru ibuwa anda mbira kini ibuni dalu piagone wandia heagoha wandari maru biaru bereagoha dege Esedabi ti haru berelene. Ani berelowa Hegai ibugua wali uruni mamage howa handayaho hene.
EST 2:9 Hegai ibugua Eseda wandari bayaoreyane hendene. Ani hondowa ibugua Esedahondo yári wiaru abale mo mialu ibunaga tingini bayale helonaga tomo bayale tara tara wiarubi nalu berelo dawa migi bini. Ani buwa wali wandia biagoha paliaga hobane dunini mbira heneyagoha Eseda ibu palelo mo mini. Mo mialu kini andagaha wandari kariali berearume Eseda biamogo bialu helo dabo berelene.
EST 2:10 Abale howa Modegai ibugua Esedahondo ibu Yuda wali bedo nalabe lalu bi lamini. Anidagua lenego mitangi bialu Eseda ibugua nde ibu aba Modegaihanda bi layago hale howa berene.
EST 2:11 Ani berenego Modegai ibu horo bibahendengi wali wandia biagonaga pabe haraba wiagoria bolangua haga bialu pu íbu biaga hene. Ani binigo irane Eseda ibu agua biraruabe hondolebi Esedahondo mbira agile bulubadabe te hale holebi ani pu íbu biaga hene.
EST 2:12 Mali mbira agimani wandari biaru bayale berelonaga tinginini welime ha̱i̱ ha mo yári biaha tomo dawaha bialu hene. Ege waragariani tigua wandari biaru ira mbira mini muwe kagonaga ibaneme ha̱i̱ halu ege waragaria mendeni tigua weli mbirale ha̱i̱ haga nga baya taraore biaga wiagobi biamaga howa ogonime ha̱i̱ halu hene. Anidagua biai halu tigua wandari uruni Kini Segesisihanda hendelo ibu berearia mbira mbira haru pugu bini.
EST 2:13 Wandari mbirago ibu kini bedaria pole howa agabi yáribi ibunime bulene hame ledago ale bu yalu pugu bini.
EST 2:14 Alendo haragola wandari mbira mbira hangu kini bedaria pialu kini ogoni andagaha bedane egabi laga biaga. Ani biragola wandari kini bedaria pialu dai birago ibu kininaga wali wabuni halu mende agali mbira mini Sasagasa henegome ti mamage haga biru wiagoha berelo haru pugu bini. Wali uruni ti anda ogoniha biruwa kini bedaria napiaga biruwa horo mbiruore kini ibunime wali mbirago mini lalu í̠ore i̱ koria ibabe lalu olayadago ibuore pugu biaga berene. Ibugua wali mbirago mini naleyagua nde wali ogoni ibu kini bedaria polene nawiore wini.
EST 2:15 Ai Eseda ibu kini hondo polene horo tagira ibini. Eseda ibu Modegai aba hamene heyogone Abihaili wane berene. Eseda aba homayagola Modegai ibu haru puwa mo mondo bialu ibu wane biraradagua berene. Ani bereagola agali hearume Eseda de hondowa ti turu timbuni haga hene. Anigo Eseda ibu kini hondo polene tu hayagola ibugua yári ibunime hame leago ndo bini. Ibu yári wali biaru mamage haga Hegai ibugua ogoale karulabe lalu lamiyadagua karulene.
EST 2:16 Horo ogoningi Kini Segesisi ibu mali waragaria kini hene heagola mali kane ogoninaga ege pini mini Tebede layagola tigua Eseda ibu kini berearia haru pene.
EST 2:17 Ani haru piyagola kini ibugua Eseda de hondowa ibu hame timbuni lene.Ibugua wali maru hame lenedadagua ndo ibu Eseda hame timbuniore lo hene. Ibugua handalu hearia Eseda ibu wandari maru berearubi ndo ibu baya taraore mbira bereneyane hendene. Wandari maru ibiyarume kininaga gubalini bamia nabi degego ai Esedahanda ibunaga gubalini bamiyagola kini ibu abale puwa kuininaga tangi wiago Esedanaga haguaneni mo karula hene. Anidagua biyagola Eseda ibu Basidinaga henge mialu ibu kuini wali bira aribia ho berene.
EST 2:18 Ani bereagola kini ibugua Eseda ibiyagonaga turu halu agali haguane bu hearu bibahendeore tomo mandagi nami̱ya ibidaba lowa tomo timbuniore dawene. Ani buwa dindi ibunime hondo haga wiaruha wali agali bibahende hearu horo ogoningi biabe nabi ha̱lo hai halimu lene. Ani lowa kini ibugua turu howa mbirale tara tara bayale wigi biaru wali agali bu hearu tale bialu migi bini.
EST 2:19 Ogoningi dege Kini ibugua Modegai ibunaga anda hondo haga helo dabo helene.
EST 2:20 Bamba Modegaihanda Eseda lamialu, Í̠ Yu wali bedo lalu wali agali nalamibe, lene. Anigo Eseda ibu wandari emeneni howa Modegaihanda de hondo heangi ibugua bi layaru hale howa biaabo haga berenedagua Modegaihanda bi ogoni layago hale halu Eseda ibugua wali agali mendealihondo, I̱ Yu wali bedo, lalu nalami berene.
EST 2:21 Modegai ibu kininaga andagaha biabe bialu heangi agali kiralime Kini Segesisi handabe manga howa bo wahabiya lalu ndelo hene. Agali kirali ogonilabo libunaga mini Bigadana Teresela libunaga biabe kini andaga paliagane hobane heagoha panga haneni mamage haga hene.
EST 2:22 Modegaihanda agali kira biago labome ndelo hearia handa walia hayago kini lamilonaga Kuini Esedahondo lamiai hene.
EST 2:23 Agali kira biagolabome biyiyago henenedabe dabo handalu hearia henene ndelo winiyagola hondowa agali biagolabo irani bo manogo bia hayagola libu homene. Ani biyagola kini ibugua ibunaga agali haguane hearuhondo lamialu lalu, Mbirale o biyagoninaga bi gabumane mbugani gilibu widaba, layagola tigua ogonidagua gilibu wini.
EST 3:1 Mani howa agali mbira ibu mini Hamana henego ibu gabumane haru haga haguane helo Kini Segesisihanda dabo helene. Hamana ibu Hamedada igini howa Agaga aguanene hene.
EST 3:2 Kini ibugua ibunaga agali haguane bibahende hearuhondo lalu, Tígua Hamananaga mini yaraga halu ibuhondo ge duli hanga howa bulu palilimu, lalu lamini. Ti bibahendeme kini ibugua layadagua biai hayagola Modegai ibu hangu Hamanahondo ge duli hanga holene ogoni manga howa nabi hene.
EST 3:3 Mani kininaga agali haguane maru hearume de hondowa tigua Modegaihondo hale halu lalu, Í̠na kininaga bi layadagua nabirigo irane agibe, lene.
EST 3:4 Tigua horo dewa haluore Modegai lamialu, Í̠na mana ogonidagua biaabo hariligo nabibe, laga bini. Ani lamiyagola ibugua tinaga bi hale nahene. Modegaihanda tihondo lamialu lalu, I̱ Yu agali howa Hamanahondo ge duli hanga halu bulu palia nabibehe kogoni, lene. Modegaihanda bi o layadagoni hale howa agali haguane biarume Hamana lamini. Modegai ibu Hamanahondo ge duli hanga harabe be nahe bame harabe hondole tigua hondo hene.
EST 3:5 Hamana ibugua handalu hearia Modegaihanda ibunaga mini yaraga halu ibuhondo ge duli hanga nahe hearia hondowa ibu keba taraore hene.
EST 3:6 Mani Hamanahanda Modegai ibu Yu agaliore heneyane handa walia howa ibu homelo bo wahole lo manda bu hene. Hamana ibu Modegai hangu bo wahole mitangi bu hene ndo Yu wali agali bibahendeore Pesia dindini hearunibi bo wahaiore hole manda bu hene.
EST 3:7 Kini Segesisi ibugua haru heangi mali hombeanegonaga (12) ege mbira mini Nisana hayagola Hamanahanda lalu, Yu wali agali bo waholene horo ege agonaga harabe dabo handami̱ya iname tadu bima, lene. Tigua tadu buwa handalu hearia ege hombeane (12) Adanaga horo halene (13) laragola Hamanahanda ti bo wahelo lalu lo wini.
EST 3:8 Ani lo howa Hamanahanda kini hearia puwa ibuhondo lamialu lalu, Wali agali hameigini mbira dindi í̠na handayaho kego bibahendeha paliame hearia handaru. Ai tigua mana bialu hearu dindi í̠na handameho kegonaga mana lowini ngadagua ndo biragoni. Ti ani bialu kago í̠na dindi ogoriani ti haabo helariyagua ani beregome wali agali í̠na hondo kego biamogo ndo bere.
EST 3:9 Kini-o í̠na bi o larodagua bulene hame ledeyagua í̠na wali agali bibahende karuha bi lo pelai habe. Ani lo pelaregola tigua wali agali uruni bibahende homelo bo wahai helo. Anigo í̠na ogonidagua biriyagua i̱na í̠hondo heneneore larogo í̠naga muni wiagane andaha siliba muni dewaore miliono pira duria (50 miliono) agima i̱na wia holebero. Ani werogola muni ogonime í̠na gabumanenaga biabe bibelo, lene.
EST 3:10 Hamanahanda ibu bi o layago hale hai howa Kini ibugua ibunaga gini gi magi mbira wu henego ogonime mana lo wule wabu wiraru ibunaga minini howa magi ngelaga wu henego ogoni ibuninaga gi hondoneni howa golalu Yu wali agalirunaga waitigi agali Agaga aguanene Hamedada igini Hamanahondo mini.
EST 3:11 Ibugua ani mialu howa Hamanahondo lalu, Muni ngia nabi wahalu í̠na wali agali urunihondo bule hamelede ale bibe, lene.
EST 3:12 Ege mbiranaga horo halene (13) layagola Hamanahanda kininaga beba gili biaga bibahende hearu olalu ngoai hadaba lene. Ibunaga bi bibahende tihondo lamiai hayagola tigua gilibu wigi bini. Tigua dindi ogoni bibahendeha wali agali bu hearu tininaga bi hangu hangu lalu gili bini. Beba gilibu wiyaruni haru hagarubi agali haguanerubi gabumane biabe biaga bibahenderubi tihondo wia hene. Beba gilibu wia hayago bibahendeni Kini Segesisinaga gi magi Hamanahondo golo miyagome magi ngela hayagola kini ibunioreme gili bini mbau lene.
EST 3:13 Agali beba yalu piaga biarume dindi kini ibugua handameho heago andaneha dindi mbira mbira wiarunaga agali haguaneru hearia yalu pene. Beba gili bialu pelayaru bibahendeni bi ogodagua lo wini. Ege mini Adanaga horo halene (13) laragola tígua Yu wali agali bibahende homelo bo wahai halimu. Horo ogoningiore wandari igiri daliaherubi wali agali waherubi waneiginirubi bibahendeore homelo bo hilo wahai holene wulebira. Tí dara nahe howa bibahende bo hilo wahai halu tinaga mbirale bibahende ngarubi mo yai halimu.
EST 3:14 Agali haguanerume wali agali bibahende hale helo beba ogoni dagalope holene nga. Bibahendeme hale hai howa horo ogoni tagira ibirangi tigua Yu wali agali bo wahai hole manda mandabu helo, lalu gilibu wini.
EST 3:15 Agali beba yalu piaga biarume beba biagoni yalu dindi bibahendeha abaleore pume hene. Tigua bi yalu piyagoni tano timbuni Susa wiagoriabi lope hayagola wali agalime hale hai hene. Hamana kinila libu hangu bu miniha dungulo biruwa waini iba nalu berene. Anigo wali agali Susa tanoha bu hearume bi ogoni lope hayago hale howa mogo lalu ti mini dege dindiho hene.
EST 4:1 Modegai ibu bi ogoni layago hale howa gi timbuni ho hene. Ibunaga bu miniha genda timbuni halu mini burugu layagola ibunaga aga bu heago minu lerelene. Ani buwa aga ko wiago mo karulalu ibunaga haguaneni be abalu dugu ngelene. Anidagua biai halu tanoha anda puwa kiabu dugu hongo howa bima ibaga bialu hene.
EST 4:2 Ani bima pialu kini andaga haneni bolangua hene. Ibu kini andaga anda polenego maname aga ko bu yalu kini andagaha anda napiaga winigo mitangi bialu nape tagiraha hene.
EST 4:3 Horo ogoningi kinihanda bi ogodagua laya lalu latagi hayago dindi bibahendeha Yu wali agali bu hearu ti hale hai hene. Hale howa ti bibahende hearume genda timbuni halu mini burugulo hai hene. Ani howa tigua tomo nane wahalu kiabu dugu hongo howa bialu haga haga bini. Yu wali agali dewalioreme aga ko budabagabi wiaru karulowa be abalu wiagoria palima pene.
EST 4:4 Wali agali Esedanaga biabe biahaga bu hearume Modegai ibugua anidagua bialu ka lalu lamiyagola Eseda ibu genda timbuni howa mini burugu lo berene. Ani biruwa ibugua aga bayale wiaru Modegai ibu aga ko bu hayadago golo wahalu karula aribia helonaga mule yalu pudaba lene. Ani mule piyagola Modegai ibugua aga uruni yamialu karula nabi hene.
EST 4:5 Ani biya handala Eseda ibugua ibunaga biabe biahaga agali mbira mini Hadaga kinihanda dabo helenego ogoni íbu lowa ibuhondo lalu, Modegai ibugua irane aginaga biyadabe hondole ibuni karia hale hole pu, lene.
EST 4:6 Ani laya handala Hadaga ibugua Modegai ibu kini andaganaga pabe tagirani wali agali íbu ngoaiho haga hama wiagoria berearia hondo pene.
EST 4:7 Ani biyagola Modegai ibugua mbirale biyaru bibahende Hadagahondo lamiai hene. Ani lamialu, Yu wali agali bibahende bo wahai hayagua muni ogodagua kininaga muni andaha wulebero lalu Hamanahanda layaya, lalu lamia dege bini.
EST 4:8 Ani lalu Modegai ibugua beba Hamanahanda gilibu ta hayadaruni aria mbira yu heneyago Hadaga mo mini. Mo miyagola handalu hearia beba ogoniha howa Yu wali agali bibahende bo wahai halimu lalu gilibu wiaria hendene. Modegai ibugua Hadagahondo beba ogoni Eseda mule yalu pelo mialu mbirale uruni bibahendenaga te Eseda hale helo lawia hai hene. Ani bialu kini ibugua Yu wali agaliru bo wahai nahe dara helo Eseda í̠na kini lamule pobe lalubi lawia halu bini.
EST 4:9 Ani laya handala Hadaga ibugua Eseda berearia pialu bi o layaruni lamiai hene.
EST 4:10 Ani lamiyagola Eseda ibugua Hadagahondo bi mbira Modegai lamule pu lalu lamini.
EST 4:11 Ibugua lawia halu lalu, I̱na kini bedaria napobehe bedo. Mbirali kini ibunime ogo í̠ ibabe larago ibu dege kini andaga pugu biaga.Ibugua ibabe naledago bame anda piyagua ogoni homelo bo wahaga nga. Anigo mana ogoni wandialu polene hariga mbiraore hangu nga. Mana ogoni mbirali kini bedaria ibabe nalego bame anda poragola kini ibugua kininaga kango ngolome wabini ngago mo yaraga halu ogonime mbirali bame anda porago yaangua hayagua ogoni ibu bo wa naholebira. Mana ogoni wali agali kininaga biabe biaga karubi wali agali bibahende bu karubi ti manda biaihe ka. Anigo ainde kini ibugua ege mbira agima i̱ ibabe lalubi o nale henego ka, lalu Modegai lamibe, lene.
EST 4:12 Modegai ibugua Esedahanda bi lawia hayayago hale howa
EST 4:13 ibugua ladai bialu lalu, Í̠ kini andagaha bira bedegonigo í̠ ani biruwa nahomoleberobe toba holeni. Ina Yu wali agali maru kamaru mo ko holene wulebiradagua dege í̠bi nde mo ko holene dege wulebira.
EST 4:14 Anigo áyu í̠na bi nale birariyagua nde ina biamogo bulene mbira taraha howa ibulebira. Anigo í̠bi í̠ damene lenegobi mbira yu wa naheore bibahende homai holebira. Anigo í̠ kuini wali birarigo bame ndo horo ko áyu o ibiragonaga ina Yu wali agali biamogo bialu mo wule bede bada, lene.
EST 4:15 Ani layayago hale howa Eseda ibugua Modegaihondo lawia halu lalu,
EST 4:16 Í̠na áyu ogoni Susa tanoha ibaga bialu Yu wali agali bibahende lamiai halu ti bibahendeme i̱ mitangi bialu horo tebiru mbi tebiru lowa tomobi ibabi naneore halimu. I̱nibi wali maru i̱naga biabe biahaga bedarubi iname nde tomobi ibabi nane ani dege holeberama. Ani biai howa mani kininaga mana ngago pugualu i̱na kini bedaria polebero. Anidagua berogola ibugua i̱ bo wahayagua nde karulapego homoliya waha, lene.
EST 4:17 Esedahanda bi ogoni lawia hayagola Modegai ibugua hale halu bibe layadaguaore bule kini andaga pabe tagirahayagi henego wahalu pene.
EST 5:1 Eseda ibu tomobi ibabi nane dege horo tebiru berene. Ani berenego horo tebonengi ibu kuininaga aga biaga wiaru mo karulalu kini andaganaga hobane tamuha anda pialu kininaga tamu hobane timbuni wiagoha anda puwa kini biraga dagia wiagoha anda polenaga harabani handa anda ho hene. Ani handa anda ho heagola kini ibu kininaga biraga dagia wiagoriani biruwa panga harabahayagi handa tagi hene.
EST 5:2 Handa tagi howa handalu hearia Eseda tagirani íbu hearia hondowa kini ibu miniha turu howa abale gi dogola amu halu kango ngolome wabini biago yaamu halu Eseda ibilo karulape lalu walia hene. Ani biya handala Eseda ibu abale kini bereagoria kaware ibalu kango ngolome wabini biago ngunini ela hene.
EST 5:3 Ani biyagola kini ibugua lalu, Kuini Eseda-o í̠ agile hame lowa íbu kebe. Dindi bibahende i̱na haru kogo í̠ tuwu ngi lariyaguabi nde nguliyago agi nguabe, lalu hale hene.
EST 5:4 Ani hale hayagola Eseda ibugua ladai bialu lalu, Kini-o Hamana libu haru áyu alendo ina tomo timbuniore mandagi nami̱ya ibulene turu ho keyagua nde libu ibalibulo hame lo kogoni, lalu hale hene.
EST 5:5 Ani layago hale howa kini ibugua Hamana olalu ibuhondo lalu, Eseda andaga tomo mandagi nami̱ya abale ne naledaore mbaliya ibabe, lalu lamini. Ani bialu kinibi Hamanabi libu haru Eseda ibugua tomo manda manda bialu dawenego mandagi nole pene.
EST 5:6 Pialu ti waini iba nalu biruwa kini ibugua Esedahondo hale halu lalu, Í̠na i̱hondo mbirale mbira ngi lalu hale harego ta nabi ngiai holeberogo ai nguliya agile hame lo bedebe. I̱hondo ngi larego bibahendeore ngiai holebero. I̱naga dindi timbuni ngelowa handame ho kogo tuwu ngi lariyaguabi nde mendeyagi í̠na handame howa haru habelo nguleberogo la, lene.
EST 5:7 Ani layagola Eseda ibugua kinihanda bi layago ladai bialu lalu,
EST 5:8 Kini-o i̱na í̠hondo hale holeberogo damene e̱ lai holeoreyagua nde yawi alendo tomo lone dawa manda manda biaguago Hamana libu haru tomo halu mende nole dai bilibu. Ani nole eberabigola i̱naga hame wirudago languliya, lene.
EST 5:9 Hamana ibu tomo nalu birayago biralu puwa ibu miniha turuore howa dungulo hene. Ibu pialu howa handalu hearia Modegai ibu kininaga andaga panga haraba kawareni naina berearia hendene. Anigo Modegai ibu Hamana timbuni daliga hayago hondowa heyalu ai horombeore ibirida lowa ibuhondo bi mbira naleore berene. Ani biyagola Hamana ibu keba taraore ho hene.
EST 5:10 Hamana ibu miniha keba taraore ho donge howa ibugua mbirale mbira bia nabi andaga pene. Ibu andaga dai buwa ibunaga nenegeru olo ngoai halu ibu one Seresebi ti heba birami̱ya ibabe lene.
EST 5:11 Ti íbu birai heagola Hamanahanda ti deni howa ibuninaga mini mo yaraga hene. Ibugua tihondo lamialu lalu, I̱ mbirale dewaore bu wialu munibi dewaore wialu igiribi dewaore bu heledogoni. Ai kini ibugua i̱ mo yaraga halu biabe timbuniore mo ngialu kininaga biabe biaga agali haguaneru bibahende i̱ andaneha ka, lene.
EST 5:12 Hamanahanda la dege bialu lalu, Kuini wali Esedahanda tomo timbuni kini iyanaga hangu dawa haya ndobe. Ibugua wali agali maru tomo nami̱ya ibalimu nale kini iya hangu yawibi lone tomo nami̱ya ibalibu lenego iya turu howa polebereba.
EST 5:13 Anigo i̱na Yu hameigini Modegai biago kini andaga panga haraba kaware naina bereago de handarogola i̱naga miniha handabe manga holene tagira ibalu ai i̱na manda berogola mbirale bayale uruni galone ndo mbau larua, lene.
EST 5:14 Ani layagola Hamana one Seresehandabi ibunaga nenege biaru tiguabi ibuhondo lamialu lalu, Mini burugu nale waha. Agali marume ira luniore mida magi manda pira kira (20) ale dibuwa hengelo lamerene agi biaruabe. Anigo yawi egerebagiore haragola kini hale howa Modegai homelo irani bo manogo bia halu í̠ miniha turu howa dungu lalu tomo dawa nama pobelo, lene. Bi o layadago hale howa mitangi bialu Hamana ibu bayaleda manda buwa ibugua agali maru lamiyagola agali biaru tigua Modegai bo manogo bu gerela holenaga ira dibu hengene.
EST 6:1 Mbi ogoningi kini ibu u̱ palia nabi yange yange bu wiaabo howa ibugua ibunaga beba dagalaga hearuhondo lamialu, Dindi ogoriani mbirale maru ala binirunaga te gilibu winigonaga mbuga biago i̱hondo tigua bi maru dagalo ngule mo yalu ibidaba, lene.
EST 6:2 Tigua te daga layagoha agali kira Bigadanabi Teresebi libugua kininaga anda haneru mamage henegonaga dagalope hene. Agali kira ogoni libugua kini bo wahole lowa hariga mbira tai bialu hene. Ani bialu henego mani Modegaihanda libugua mitangi bu heago handa walia howa libu manani helene, lalu gilibu wini wiago daga lalu lamini.
EST 6:3 Ani daga layago hale howa kini ibugua lalu, Modegaihanda biabe ogoni biyagonaga ibu mini yaraga halu iname bayale mbira ibuhondo agi mirimayabe, lene. Ani layagola agali biarume ibuhondo lalu, Iname mbirale mbira ibuhondo nami, lalu ladai bini.
EST 6:4 Ani layagola kini ibugua tihondo ogodagua hale hene. I̱naga agali haguane maru anda ogoniha kabe nahebe, lene. Ti bi ogoni lalu heaore Hamana ibugua ira dibuwa hongo manda biaho helayagoria Modegai bo manogo bia hole lowa kini hale hole pabe tamuha ubaanda halu ibini.
EST 6:5 Ani ibiyagola hondowa agali biabe biahaga biarume kinihondo ogodagua lamini. Hamana ibu áyu dege ibuwa í̠ heba bi lole o hondo kagoni, lene. Ani layagola kini ibugua lalu, Ibu haru anda ibidaba, lene.
EST 6:6 Hamana anda ibiyagola kini ibugua ibuhondo lamialu lalu, Agali mbira i̱na ibu timbuni helo mini mo yaraga holiya ona haruagoni. I̱na ibuhondo bayale maru agi bulene ngabe manda nabi kogonigo í̠na agi buliya hamelo kebe, lene. Ani layagola Hamanahanda ibuni hangu mitangi bialu kini ibugua mbirali timbuni helo yaraga holebiaruago aidabe agali mende nahego i̱oredalo manda bini.
EST 6:7 Ani manda buwa ibugua kinihondo ogodagua ladai bini. Aga kini í̠ninaga biagane biago agali ogonihondo mibe. Ani buwa í̠ninaga nogo hosini biragane ale pume dariba halu kininaga yári nogo hosi haguaneni biahalu agali biago ibu ogoriani berelabe.
EST 6:9 Í̠naga agali haguane hayaru aria mbirago ibugua agali ogoni í̠naga aga biagome yári bia helo dababe. Agali ogoni ibu yári bia howa nogo hosini berelalu agali haguane mbiragome haru halu tanonaga mo ngoai hagane hama timbuni ngagoria haru pelo. Libu pialu howa agali haguane ogoni ibugua bi hongo howa ogodagua ladaga halu lalu, Agali ogo de handadaba. Kini ibugua agali timbuni mbira mo yaraga heloa biyago o heledago de handadaba. Ibuhondo mana bayaleore biyadago de handadaba, laga bialu helo, lalu lamini.
EST 6:10 Hamanahanda bi o layagoni hale hai howa kini ibugua ladai bialu lalu, Í̠na abaleore gerai puwa nogo hosibi haru halu agabi mo yalu ibuwa i̱naga biabe biahaga Modegai mo mibe. Yu agali ogoni ibu i̱ anda haraba panga kawareni biabe bialu hagago ibu timbuni helo mo yaraga halu mbirale bibahendeore áyu i̱na o larugonidagua ibuhondo biai habe, lene.
EST 6:11 Ani layagola Hamanahanda kininaga agabi mo yalu nogo hosibi haru halu ibuwa kininaga aga biago Modegaini karula hene. Ani buwa Modegai nogo hosini berelalu Hamana ibugua hama timbuni mo ngoai hagane wiagoria haru pene. Libu pialu howa Hamanahanda wali agali hearuhondo bi hongo howa ladaga halu, Agali ogo de handadaba. Kini ibugua agali timbuni mbira mo yaraga heloa biyago o heledago de handadaba, lalu haga bima pialu hene.
EST 6:12 Ogoni biai howa mani Modegai ibu kininaga biabe bule dai bini. Anigo Hamana ibu taga gibiore howa bu miniha gendaho yalu ibunaga dengui handa dindi ho yalu gerai abale ibuni andaga dai bini.
EST 6:13 Andaga dai buwa ibugua mbirale bibahende ibuhondo biyago damene ibunaga nenegerubi ibu onebi lamiai hene. Ani lamiyagola ibu onebi ibunaga nenege mini gigabiwi biarubi tigua ibuhondo ladai bialu lalu, Áyu í̠naga hongobi mini lene harigobi ereba halu Modegai ibu í̠ bolangua hole biyada. Ibu Yu agali kago í̠na ibunaga hariga ha pai holene henge nawiore. Í̠naga hongo ereba halu Modegaihondo mia aribia holobada, lalu lene.
EST 6:14 Ti wene bi lalu heaore dege kininaga biabe biahaga biaru ti Hamana haru halu Eseda andaga tomo nelo haru pole lowa abale ibini.
EST 7:1 Horo mende biangi Hamana kinila libu haru Eseda andaga tomo nole pene.
EST 7:2 Pu biruwa ti waini iba nalu biruwa kini ibugua Esedahondo hale halu lalu, Kuini Eseda-o í̠ore agi hamelo bedebe. Mbirale í̠na ngi lowa hame lo bedego nguliya la. Dindi timbuni i̱na handame howa haru kogo tuwu ngi lariyagua nde ngia dege bulebero, lene.
EST 7:3 Ani layagola Kuini Eseda ibugua ladai bialu lalu, Kini-o í̠na i̱ gubalini timbuni howa i̱hondo mana bayaleore mbira bulene hame lo keyagua nde ogodagua bia. I̱nibi i̱naga damene bu karubi ina bibahende homolene hame nale bedogoni.
EST 7:4 Agali mbirame i̱bi i̱naga wali agali bu karubi ina bibahende homai holoma̱ya bo wahai hole ndindelalu hayaya. Tigua ina minu garabaya bialu tinaga garabaya biabe ale bialu holoma̱ya heloledale nde i̱naga bi lolene nawi karulape degeda lo manda bidole. Nagalonedale i̱na í̠ mo genda nakolego. Ai ani ndo tigua ina bibahendeore bo wahai holebiragonaga bi ogoni latagi haro, lene.
EST 7:5 Eseda ibu bi ogoni layago hale howa Kini Segesisi ibugua Kuini Esedahondo hale halu lalu, Ko urunidagua gi nahe howa bulenego agali o bialu haruagoni ibu aibe. Agali ogoni ibu agoha kabe langi, lene.
EST 7:6 Ani layagola Esedahanda ladai bialu lalu, I̱na bi ogoni larugo agali Hamana o bedago ibugua biniya laro. Ibugua ina baba waitigi howa ina mo ko halu bo wahai hole ka, lene. Ani layagola Hamana ibu hale howa mogo lowa duru timbuni lalu berene.
EST 7:7 Kini ibugua bi ogoni hale howa keba timbuni halu tomo nalu berenego wahalu ibu anda mandaha mabu wiagoha tagira pialu pene. Ani piyagola Hamana ibugua handalu hearia kini tagira piyago irane ibu mo ko howa bolene wiyada lo manda bini. Ani manda buwa Hamana ibugua Kini Segesisihanda ibu mo ko holene nawilonaga Kuini Esedahondo i̱ dara halu biamogo bia lalu berene.
EST 7:8 Ani lalu ibugua Eseda ibu tomo nalu dagia o bereagoriani bulu palu wini. Ani wiaria kini ibu mabuha ibagabu halu andaga tomo nalu birayagoha dai buwa ibugua Hamana de hendene. Hamana ibu dara halu biamogo bia lowa Esedahondo hale halu berearia kini ibugua bi hongo howa ladaga halu lalu, Ae agali ogo ibugua i̱ andagani kuini wali o bedago i̱naga deni howa kayu bule mbauleda, lene. Kini ibugua bi ani lalu heaore dege agali biabe biahaga hearume labolabo mbira mo yalu ibuwa Hamananaga haguane bu yi hai hene. Ani binidagoni irane kini ibugua mbirali homelo bo waholobadane hondowa mana ogoni biaga winidagua bini.
EST 7:9 Ani biyagola agali biabe biahaga mbira mini Habona henegome kinihondo lalu, Hale habe. Agali Hamana o kagome ibuni andagani ira luni mbira Modegai ogoriani bo manogo bia hole lowa dibu hengedago manda bidebe. Anigo bamba kini í̠naga waitigime í̠ bo wahole ndelalu hearia Modegai ibugua handa walia howa í̠ni langiyagome í̠ biamogo biyagoni ndobe, lene. Ani layagola kini ibugua lalu, Hamana ibuni ira dibu hangayadagoogoriani ibuni homelo bo manogo bia hole haru pudaba, lene.
EST 7:10 Ani laya handala tigua Hamana haru puwa ibunime Modegai bo manogo bia hole ira dibu hengene heagoria bo manogo bini. Tigua anidagua biyagome kini ibu keba timbuni ho hayago ereba hene.
EST 8:1 Horo ogoningi dege Kini Segesisi ibugua Yu wali agalirunaga waitigi Hamana ibunaga andabi mbirale bibahende wiarubi Kuini Esedahondo mo miai hene.Ani bu howa mani Esedahanda kinihondo lalu, Modegai ibu i̱ hameigini mbiraore ka, lalu lamini. Ani layago hale howa kini ibu andaga Modegai ibu nenege ibugu bilo lene.
EST 8:2 Ani buwa kini ibunaga gi magi mbira Hamana wu henego ogoni ibuni golo yu henego Modegainaga gi hondoneni mo karula hene. Gi magi ogoni kini ibuni hangunaga magi heaore mini. Ani biyagola Eseda ibugua Modegaihondo Hamananaga mbirale wiaru bibahende handayaho hai helo helene.
EST 8:3 Ani bialu mani Eseda ibugua kini berearia puwa ibunaga geha bulu paluwa dugu bialu berene. Ani bialu biruwa ibugua Agaganaga aguanene Hamanahanda Yu wali agaliru bo wahai holene nga manda bialu bi lo wiyago nabilo kinihondo mo waha lalu berene.
EST 8:4 Ani lalu bereagola kini ibugua ibunaga kango ngolome wabini biago mo yuwa Esedahondo dogola amu hayagola ibugua kango biago ela halu bi lole heyini.
EST 8:5 Heyuwa lalu, Kini-o Hamana ibugua Yu wali agali í̠ daluha karu bibahende bo wahaiore halimu lalu lo wini. Anigo í̠na i̱hondo gubalini ho halu i̱na bi larugo bayaleyagua nde agali bu karume Hamananaga bi ko lo wiyago talialu buligo nabilonaga bi abale lo yalu purogo lelo ani bidaba la.
EST 8:6 Tigua i̱naga hameigini bibahende uruni bo wahai hayagua nde i̱ bayale agua birulebodabe, lene.
EST 8:7 Ani layagola Kini Segesisi ibugua Kuini Eseda Modegaila libuhondo lamialu lalu, Hale hadaba. Hamanahanda Yu wali agali mo ko holobada lo manda bialu i̱na ibuni bo waharugoni. Ani bialu ibunaga mbirale wiaruni bibahende Eseda í̠hondo mo ngiai harugoni.
EST 8:8 Ani birugo tigua i̱naga minini howa bi gili bialu i̱naga gi magi wialu binidago ai lone i̱na mo iriari bibe nahe ko. Anigo libugua Yu wali agaliruhondo beba mbira gili bialu purogo leloleyagua nde karulapego ani bidaba. Libugua bi ogoni i̱naga minini howa gili bialu i̱ninaga gi magibi ngelalu bilibu, lene.
EST 8:9 Libugua ege tebone mini Sibananaga horo pira kirani tebira (23) layagola ogodagua bini. Modegaihanda kininaga beba gili biahaga bibahende olo ngoai hene. Ti íbu heagola ibunaga bi lamiyago tigua bebani gilibu wini. Ibugua beba uruni Yu wali agalihondobi gabumane dindi emene emene hondo biraga hearuhondobi gabumane agali haguane bibahendebi gabumane biabe biahaga bibahendebi dindi handari mbirani pira kirani karia (127) India howa piaho wialu Idiobiani hearu bibahendenaga gili bini. Tigua beba ogoni gili bialu howa Yu wali agali tinaga bi lalubi dindi mbira mbira ngaru tininaga bi lalu gili biagane wiadagua gili bini.
EST 8:10 Modegaihanda tihondo lamialu, Beba ogoni Kini Segesisinaga minini howa gili bialu kininaga gi magibi ngelalu bilimu, lene. Agali beba yalu piaga biaru ti nogo hosi hongohe kininaga pabe tamuha hearu haru tagira puwa nogo hosini biralu beba biagoni yalu dindi bibahendeha purogo lai hene.
EST 8:11 Bebani bi ogodagua gilibu wini. Kini Segesisihanda lalu, Yu wali agali tano bibahendeha kamiru tínaga one waneiginibi tínibi waitigi agalime bo wahole ibiragola tígua nde ti baba wai bule lowa manda manda bu halimu. Agali dindi ogoriani haga karumeyaguabi agali dindi tara mendeha howayaguabi Yu wali agali tí baba wai bule ibiragola tígua wai biadai bialu tíni mo wilimu. Ani bialu ti bibahende bo hilo wahai halu tinaga mbirale bibahende ngaruni Yuali tí mo yai halimu.
EST 8:12 Hamanahanda Yu wali agali bibahende bo wahai hole lalu horo pongo bo wirangi tígua Pesia dindi bibahendeha anidagua bule lowa manda mandabu halimu. Tígua ege hombeane (12) Adanaga horo halene laragola anidagua bilimu.
EST 8:13 Tígua dindi dunini mbira mbira wiyago bibahendeha wali agali bibahende karuhondo kininaga mana lo wiyago bi ogoni lope holene nga. Horo ogoni tagira ibirangi Yu wali agali ti waitigi baba wai biadai bule lowa manda manda bu helonaga, lalu bi ogoni gilibu wini.
EST 8:14 Kinihanda layadagua agali bi yalu piaga biarume nogo hosini biralu abaleore gerai lalu pene. Susa tano timbuni wiagoriabi wali agali bibahende bu hearuhondo bi biagoni lope hai hene.
EST 8:15 Kininaga aga mindibi hari mindini alebi pelebi Modegai biahowa tigua ibu aga luni tagalitaya ale mbirame bia dambi helene. Ani buwa manda timbuni ngolome wabini yári taraorebi wiago ibunaga emboneni karula hene. Ibu yári biai halu kini andaga yu wahalu tagira piyagola Susa tanoha wali agali hearume de hondowa turu halu mambolo balu bi timbuni ladagadaga bialu hene.
EST 8:16 Ani bialu Yu wali agali ti turu howa bu miniha dungulo hene. Ti wayali harimagoni manda buwa lone bope holobada lomanda nabi turuore ho hene.
EST 8:17 Dindi dunini mbira mbira biarunaga tano bibahendeha howa Yu wali agalime kininaga bi lope hayago hale howa tigua ha̱lo biruwa turu timbuni halu tomo nolene horo mbira pongo bo wini. Wali agali tara tara dewa bu hearume Yu wali agali hondowa gi halu Yu hameiginiha ho tago bigi bini.
EST 9:1 Ala kini ibugua bi lo wialu ege Adanaga horo halene (13) laragola waitigi agalirume Yu wali agali bo wahai helo lalu bi lo winigo horo o biagoni tagira ibini. Ibiyagola waitigirume Yu wali agali bole hayago ndo Yu agalime beregeda dai buwa wayali halu waitigi bo hengedape hene.
EST 9:2 Kini Segesisi ibugua dindi handame ho heago tano wiaru bibahendeha Yu agali hearume agali ti bo wahole ibiraru baba wai bule lowa manda mandabu hama pene. Ani biyagola wali agali dindi bibahendeha bu hearume Yu wali agali hondowa gi halu tigua mbirale mbira tihondo bibe nahe hene.
EST 9:3 Gabumane dindi emene emene hondo biraga bibahende hearubi gabumane agali haguane hearu bibahendebi kininaga biabe hondo haga bibahende hearumebi Modegaihondo gi howa tigua Yu wali agali biamogo bialu hene.
EST 9:4 Kini biagome hongo holene timbunibi mini lenebi Modegaihondo minigo dindi ibugua handame ho heagoha agali bibahende hearume manda biai hene.
EST 9:5 Yu agali tigua waitigihondo hame laya ale bialu wai biagane ayu tibu ne gadele yu howa waitigi baba wai bialu agali dewaore bo wahai hene.
EST 9:6 Susa tano timbuni wiagoha hangu Yuali tigua waitigi agali handari duria (500) bo wahene.
EST 9:7 Wai ogoni bialu howa tigua Yu wali agali waitigi Hamana igini pirabi bo wahalu binigo tinaga mini uru. Pasandada Dalobono Asabada imaru Porada Adalia Aridada imaru Pamasada Arisai Aridai Baisada imaru Hamana igini uruni bo wahai hene. Anigo Yu agali hearume ti waitigi bo wahai halu tinaga mbirale wiaru mo ya nabi wahene.
EST 9:11 Susa tanoha horo o biagoningi dege Yu agalime waitigi bo wahayaru kini hale helo daga lamini.
EST 9:12 Lamiyagola kini ibugua Kuini Esedahondo lalu, Yu agalime Susa tanoha dege waitigi agali handari duria (500) bo wahai halu tigua Hamana igini pirabi bo wahai hayiyago ai i̱na manda berogola dindi emene emene maru wiyagoha wali agali daga aulole dewaore bo wahai ka bada manda bidogonigo ai áyu í̠ agi hamelo kebe. Í̠ni hameledego ale yuleberego i̱ ogoale hameledo lalu langia hangu berene, lene.
EST 9:13 Ani layagola Esedahanda kinihondo ladai bialu lalu, Kini-o i̱na larogo bule í̠ hameledeyagua Yuali tigua áyu biyadagua yawibi ti waitigi karuhondo ani dege bilo bilabe. Ani bialu Hamana igini pira biarunaga tingini tigua ira wa helayagoria bo manogo bia helo, lene.
EST 9:14 Ani layagola hale howa Kini ibugua lalu, Ogonidagua bilimu, lene. Ani lowa ibugua Susa tanonaga haru haga agali hearuhondo bi lowia hayagola tigua Hamana igini pira biarunaga tingini wali agali bibahendeme de hendelo irani bo manogo buwa gerela hene.
EST 9:15 Ege Adanaga horo dene layagola Yu agali Susa tanoha hayaru lone mo ngoai howa agali handari tebira (300) bo wahalu tinaga mbirale wiaru mo ya nabi wahene.
EST 9:16 Yu agali dindi dunini mbira mbira wiaruha bu hearume ti wayali howa holenaga wai hongo howa bialu hene. Tini mo wialu waitigi wali agali ti handabe manga haga biaru daosini pira kariani duria (75,000) bo hilo wahai hene. Ani bialu ti waitigi biarunaga mbirale wiaru mo ya nabi wahene.
EST 9:17 Ege Adanaga horo halene (13) layagola wai ogoni binigo ai horo dene (14) layagola tigua wai nabi howa horo ogoningi tomo timbuni dawa nalu turu taraore ho hene.
EST 9:18 Ani buwa Yu wali agali Susa tanoha hearume horo nguiningi (15) ti turu howa ha̱lo birulene horo pongo bo wini. Ani binigo irane tigua ti horo halenengi (13) denengibi (14) waitigi bo wahalu horo nguiningi wai nabi wahene.
EST 9:19 Irane ogoninaga Yu wali agali tano pabe nahe emene emene ngaruha tigua ege Adanaga horo dene (14) ogoningi ha̱lo biralu turu howa tomo timbuni dawa nalu maruhondo tomo mbirale tini bame turu halu talebu migi migi bulene horo pongo bo wini.
EST 9:20 Modegaihanda mbirale bibahende horo áyu dege biyagonaga te gili buwa Yu wali agali Kini Segesisihanda handame ho heagoha dindi kawarenibi kaundianibi bibahendeha hearuhondo beba gilibu purogo lelene.
EST 9:21 Ibugua tihondo lamialu lalu mali bibahendengi ege Adanaga horo dene (14) nguinila (15) harangi horo ogonilabo timbuni lowa turu halu ha̱lo birulene pongo bo wilimu.
EST 9:22 Horo kiru ogoningi Yu agali tigua ti waitigi biaru bo wahaga bialu hene. Ege ogoningi dege tinaga bu miniha genda halu daraho hayarubi bibahende ereba hai halu Yu wali agali ti miniha dungulo hene. Ani heagola Modegaihanda tihondo lamialu lalu, Horo kiru ogoningi tomo timbuni dawalu tinaga nenege karubi wali agali yagibano tomo nolene nawi burupale karubi tale bialu bame migi bilimu, lene.
EST 9:23 Ani layagola Yu wali agalirume Modegaihanda bi layadagua bialu howa mani tinaga mana bu hinuwa mali bibahendengi turu halu biaabo haga hene.
EST 9:24 Bamba Agaga aguanene Hamedada igini Hamana ibu Yu wali agali baba waitigi howa Yu wali agali bibahende homelo bo waholene horo agongidabe dabo hondole tadu bini. Hiburu bi lalu tadu ogoni mini Purimi laga wini. Hamanahanda Yu wali agali bibahende bo wahai hole lalu lo wini.
EST 9:25 Anigo Eseda ibugua kini hearia lamule piyagola kini ibugua beba mbira gilibu wialu Hamanahanda Yu wali agaliru bo wahole lo winigo mo beregedalu ibuni homelo bo wahole lowini. Ogoninaga tigua ibuni ira wa helayagoria bo manogo bialu mani ibu igini biarubi bo manogo bia dege hene.
EST 9:26 Irane ogoninaga tigua ha̱lo holene horo kiru ogoni mini Purimi laga wini. Purimi ogoninaga galone tadu lalu laga wini. Tigua ogonidagua biaganego irane tihondo mbirale tara biyagonagabi Modegaihanda tihondo beba purogo lelalu ti horo ogoningi ha̱lo biralimu lenegonagabi ani biaga wini.
EST 9:27 Yu wali agalime horo timbuni Purimi ogoni tini manda bialu howa ti aguanene mani holebirarubi wali agali tara tara bu karu Yu hameiginiha ho tago holebirarubi bibahendenaga bi lowini. Mali bibahendenaga horo kiru ogoningi Modegaihanda bi layadagua mitangi bialu iname bialu hami̱ya lowini.
EST 9:28 Tigua bi lo wialu lalu, Yu hameigini bibahende mani hama polebiraru wali agalibi waneiginibi wali agali dindi mbira mbiraha paliyu pedaru bibahendebi tano timbuni ngaru bibahendemebi horo timbuni Purimi ogoni mitangi bialu mali bibahendengi ha̱lo birulene nga, lalu lowini.
EST 9:29 Abihaili wane Kuini Esedala Modegailame bi mbira bebani gili bialu beba ala Modegai ibugua pigane gili bialu horo kiru tomo dawa nalu holene mini Purimi laga ogoninaga bi lo pelenego mo hongo halu lone libugua bi ogoni gilibu pelene.
EST 9:30 Libugua bi ogoni gili bialu Yu wali agali bibahende Pesia dindi bibahende handari mbirani pira kirani karia (127) wiaruniha gilibu purogo lelene. Beba ogoniha bi ogodagua lalu gilibu pelene. Tínaga bu miniha mo palia ho holene karulo howa wai bulene mbira manda nabi howa tí bayale halimu.
EST 9:31 Ai tínaga waneigini mani ho aribia holebiraru tigua nde tomo nane howa dara ho halu dugu bialu hene biago mitangi biaho holebiradagua horo kiru Purimi manda bialu horo ogonilabo tagira ibirangi tomo timbuni dawalu nolene ogoni mitangi bialu helo biawai halimu. Modegai i̱bi Kuini Esedabi iyame mana ogoni gili bialu tí bibahendehondo wia haraba, lene.
EST 9:32 Kuini Esedanaga mana ogonime Horo Purimi ogoni mo hongo halu tigua beba mbirani gilibu wini.
EST 10:1 Kini Segesisihanda agali iba solowara angeha haga bu hearubi agali dindi ibugua hondo haga tamuha hearubi ti bibahende minuwa dindi ibugua handame heagoha garabaya biabe ale bia helo helene.
EST 10:2 Ibugua Modegai mo yaraga halu mini lene helonaga mbirale bibahende bayale taraorebi timbunibi bialu bi bibahende layagobi mana biyagobi uruni bibahende Pesia dindinagabi Midia dindinagabi kinirunaga mbugani gilibu wini.
EST 10:3 Ani buwa handame haga kini mbira Segesisi ibu hangu howa mende Yu agali Modegai ibu helenego kini ibugua hangu Modegai bolanguahe hene. Yu wali agalime Modegai hameore lowa ibu mini yaraga haga hene. Ibugua biabe biyagome Yu wali agaliru mitangi bialu ti bayale helonagabi ti hameigini mani hama polebirarubi mbirale mbiranaga gi nahe baya hangu hama pelonaga biamogo bialu hene.
JOB 1:1 Dindi Usu mbira winigoha agali mbira ibu mini Yobo hene. Yobo ibu agali bayale tigabi howa Ngode Datagaliwabenaga deni ibuha ko mbira nawi hene. Ibugua Ngode Datagaliwabe mitangi bialu lotu lalu ibunaga tuha haabo howa bibe laradaguaore bialu haga hene. Ani howa ko mbira ibugua bini nawi hene.
JOB 1:2 Ibu oneme igiri karia wandari tebira lowa taba henene.
JOB 1:3 Ibunaga nogo sibi daosini karia (7,000) nogo kamele daosini tebira (3,000) bulumaga daosini mbira (1,000) nogo dongi angibuni handari duria (500) laga buwa hinu hene. Ani bialu ibunaga biabe biahaga wali agali dewaore halu bini. Ani heagola ni tagira ibiragohayagi wali agali bu hearume ibunaga mini yaraga halu haga howa ibu agali mini lene timbuniore hene.
JOB 1:4 Yobo igini uruni tigua tini andaga mbira mbira hayagoria horo mbirungi tomo nole bibahende anda mbiragoria ala ngoai howa tomo naga biaga wini. Mbirago ibugua tomo dawa howa tini hamenerubi ti mbalini tebira biarubi olo ngoai howa tomo mandagi naga wini.
JOB 1:5 Ti tomo nai kagola Yobo ibugua lalu, Ngode Datagaliwabenaga deni ko mbira tíha nawi halimulo tínaga loma bo delalu bi la holiya i̱ andagani ibalimu, laga wini. Ai horo mendengi egerebagiore Yobo ibugua abale ega bi naleha heyuwa nogo mbira lomabu mialu irani dai helo bo delaga biaga wini. Waneiginiore bibahende dagalai howa bibahendenaga loma bo delaga biaga. Ibugua waneigini mbiragome Ngode Datagaliwabehondo bi ko mbira lo heagua ogoni Ngode Datagaliwabenaga deni mana ko biyadago lowa ani biaga wini.
JOB 1:6 Horo mbirungi dahuliyaliru Anduane Homogonaga wanakuini íbu ngoai ho heagola dama Heyolabe ibubi nde íbu ha dege bini.
JOB 1:7 Ani íbu heagola Anduane Homogohanda ibuhondo hale halu lalu, Í̠ agoha howa íbu kebe, lene. Ani layagola dama Heyolabe ibugua ladai bialu lalu, I̱ dindi mbiraoreni halu ndo ebero. Dindi bibahende ngaruha ibaga bu halu ebero, lene.
JOB 1:8 Ani layagola Anduane Homogohanda lalu, Agali i̱naga biabe bia haga Yobo heago handaribe nahendebe. Yobo ibu agali tigabi bayaleore howa ko mbira i̱naga deni ibuha nawiore ka. Bibahendengi ibugua i̱ninaga tuha haabo howa i̱ni mitangi bialu lotu lalu bi ledogo bibahende talialu biaore biaga ka. Dindi bibahende ngaruha mana tigabiore biaga agali ogonibi mende naheore ibu hangu kagoni, lene.
JOB 1:9 Ani layagola dama Heyolabe ibugua lalu, Í̠na manda bialu keria Yobo ibu í̠na mbirale mbira nami kegola ibugua í̠ mitangi bialu lotu lalu holebirabe. Ndoyago.
JOB 1:10 Horo bibahendengi í̠na ibunibi ibunaga damene one waneiginirubi ibunaga dabudabu ngarubi bibahende baya hanguore de handayaho haabo kegoni. Ani bialu nogo bulumaga dewaore mirigola dindi timbuni wiaruha ho karulapedagoni. Ani bialu kegome ibu bayale kagoni.
JOB 1:11 Ai mbirale áyu yu howa homogo karuni mo wahai hariyagua ibugua í̠hondo keba howa erembira ngialu polebirago hondolebere, lene.
JOB 1:12 Ani layagola Anduane Homogohanda dama Heyolabehondo lalu, Hale harene. Ibunaga mbirale bibahende áyu wu karuni mo ko hai habelo í̠naga giha ya harogo. Ai ibuni dege mo ko naholebere, lene. Anduane Homogohanda ani laya handala ibu helalu dama Heyolabe ibu pene.
JOB 1:13 Horo mbirungi Yobo waneiginiru bibahende igiri wahene biago andaga tomo timbuniore dawenego nole mo ngoaiho berene.
JOB 1:14 Ai biabe biahaga agali mbirame Yobo berearia bi yalu ibuwa lalu, Í̠naga nogo bulumagame dindi tombalu harima. Ai nogo dongi ti nogo pabe mendeha ogoriani dege tani nalu helo harima.
JOB 1:15 Ani helo hemaria Sabealirume abaleore ibalu nogo dongirubi bulumagarubi page haru halu agali í̠naga biabe biahaga biaruni bibahende bo wahai halu piyagola i̱ hangu pora bialu ibida puwa í̠ni langule ibirudagoni, lene.
JOB 1:16 Agali ogoni ibunaga bi lai naheaore dege agali biabe biahaga mende ibuwa lalu, Hari daba timbuni biyagome í̠naga nogo sibi bibahendebi agali nogo haru haga bibahendebi bo wahai hayago. Mbiraoreli i̱ hangu nabe puwa í̠ni langule ibirudagoni, lene.
JOB 1:17 Ani lowa wene lalu bereaore dege agali tebone anda ibuwa lalu, Kaladia dindiha howa hameigini tebira bibahende ibuwa nogo kamele haru hai halu agali biabe biahaga bibahende bo wahai hayagola i̱ hangu pora bialu puwa í̠ni langule ibiru, lene.
JOB 1:18 Ani lalu berearia dege agali mane ogoria anda ibuwa lalu, Í̠ waneigini bibahende í̠ igini wahene biago andagaha hangu mo ngoai howa tomo timbuni dawa nalu berearia
JOB 1:19 puyabu timbuni mbira amu wali agali nahe mbirale mbira anda nahaga dindi ko wiagoha howa abale aube tobane ibuwa anda podo dambi halu í̠ waneigini biaru bibahende bo dambi hayagola homai haya handala i̱ hangu pora bialu puwa í̠ni langule ibiru, lene.
JOB 1:20 Bi uruni laga biyago hale howa Yobo ibunaga bu miniha genda timbuni tagira ibalu mini burugu layagola ibugua dara holene walia halu ibunaga agaru minu lerelalu mandari angariru pundu lalu bini. Ani buwa ibugua ge duli hangaho biruwa ma bulu palialu handa dindiho biruwa Ngode Datagaliwabehondo bi lene.
JOB 1:21 Ibugua lalu, I̱ ai̱yahanda taba hanayangi mbirale mbira nayi ibirugo mani homalu nde ogonibi dege poleberogoni. Anduane Homogo ibunime mbirale uruni bibahendeore ngiai hayago ai áyu ibuni mo yalu dai biyadagoni. Ani biyadago nde i̱na ibunaga mini yaraga holene ngagoni, lene.
JOB 1:22 Genda timbuni urunime Yobo mo tandaga hayagola ibugua tandaga howa Ngode Datagaliwabehondo bi ko mbira nale hene.
JOB 2:1 Horo mbirungi dahuliyaliru lone Ngode Datagaliwabenaga wanakuini ngoaiho heagola dama Heyolabe ibubi nde lone íbu hene.
JOB 2:2 Ani íbu heagola Anduane Homogohanda lalu, Dama Heyolabe í̠ agoha howa íbu kebe, lene. Ani layagola dama Heyolabe ibugua ladai bialu lalu, I̱ dindi mbira hanguha howa ndo íbu ko. I̱na dindi bibahendeha ibaga biai halu íbu kogoni, lene.
JOB 2:3 Ani layagola Anduane Homogo ibugua hale howa lalu, Agali i̱naga biabe biahaga Yobo handaribe. Agali ogoni ibuore i̱naga deni ko mbira nawiore kago abiya. Ibuore i̱naga tuha haabo haga howa i̱ni mitangi bialu lotu laabo halu i̱naga mana ngogo taliaiore haga ka. Ibugua mana ko mbira nabiaga ka. Dindi bibahende ngaruha agali tigabi ibu ale mende nahe. Í̠na ibu mo ko hole poro lalu hale haabo harigola irane nawini howa ibu mo ko habelo yupe harugoni ndobe. Ai áyu ibu genda halu i̱ wanahe ibu abale haralidagua haabo kagonidago, lene.
JOB 2:4 Ani layagola dama Heyolabe ibugua lalu, Henene laribe. Aniyagua nde agali mbira ibu homolene henge wiagua ibunaga mbirale wiyaruni bibahendeoreme ibunaga homolene mo wahalu ibuninaga holene mo yu dai biagago aguabe.
JOB 2:5 Ai nde agua birabe handabiya ibunaga tingini mo ko ha handa. Ani beregola ibugua í̠hondo bi koorene ko lolebirago, lene.
JOB 2:6 Ani layagola Anduane Homogohanda dama Heyolabe biagohondo lalu, I̱na í̠naga giha ya harogo. Ai í̠ni bua birago ale ibu tinginiha bibe. Anigo ibuni dege bo home nalabe, lene.
JOB 2:7 Ai dama Heyolabe biagome Anduane Homogo ibu helalu Yobonaga tingini mo ko halu dere pi̱po̱lo ngelole abale pene.
JOB 2:8 Yobo ibu tanonaga gibuni mburuma yu wahaga wiagoria puwa be abalu wiagoria berene. Ani biruwa todobene be dindime wabini mbira pambulo wahene winiyagome ibunaga dereru duru bigi bialu berene.
JOB 2:9 Ani bialu berearia ibu one ibuwa lalu, Ai Ngode Datagaliwabeore yu tiga bialu haabo kebe. Wahalu í̠ abale homole Ngode Datagaliwabe yu wahalu ibuhondo bi ko la naberego, lene.
JOB 2:10 Ani layagola Yobohanda ladai bialu lalu, Í̠na bi laregoni wali lulume mbira lagadagua laridago. Ai iname mbirale bayale bibahende Ngode Datagaliwabehanda ngiyaru yu harimagodago nde gendabi iname yu holoma̱ya ngiraru yu wahalu polene ngabe, lene. Heneneore genda tandagabi timbunioreme Yobo bo hengedape hayagoyu ai nde ibugua Ngode Datagaliwabehondo bi ko nale howa hibuore lalu yu hene.
JOB 2:11 Yobonaga nenege tebirali urunime ibu genda timbuniore yu ka lalu layago hale howa ainde tigua de hondo pole horo pongo wini. Ani buwa horo mbirungi tinaga dindi wahalu Yobo berearia puwa ibu heba dara hagabu birama ibunaga bu mini mo palia haga bialu birama lole pene. Agali penedaruni tinaga mini uru Temana tano howa Elibasa pene. Suha dindi howa Bilidada pialu Soba ibu Nama dindi howa pialu bini.
JOB 2:12 Ti pialu amura wene pialu howa handa amu halu hemiria Yobonaga tingini mo ko halu mo tara howa bereagola agali haraligo ndoyane ai tara bedabe toba habehe berene. Ani hondowa dara timbuniore howa tinaga mini tigi layagola tigua hondo howa dugu biadaga halu hene. Ani bialu tinaga aga biaruni budu lerela baga bialu tinaga haguaneni be dugu wialu bini.
JOB 2:13 Biai howa nde ti horo karu Yobo ibu genda timbuni yuwa bereagola tibi nde bi nale biraabo hene.
JOB 3:1 Horo karu piai hayagola Yobohanda horo ogoningi bi pigane latagi halu ibu ai̱yahanda taba henenedagoni horo koore lalu bime mo ko hene.
JOB 3:2 Ibugua bi ogodagua lene.
JOB 3:3 Ngode Datagaliwabe ibugua horo i̱ ai̱ya ibu wali gali bere birulenaga horo pigane berenedagobi horo i̱ taba hanayadangibi mo ko habe naheyane henedabe.
JOB 3:4 Ibugua horo ogongi nime wá nahe aruma hangu haho ngela nabinidago. Horo ogonibi nde embeda halu mo waha nabiyada.
JOB 3:5 Horo ogoningi dindi ogoria ni nadelo ginu hagua mindibime dambi hai halu wá holene mo waha nabinidago.
JOB 3:6 Ainde horo i̱ ai̱ya ibu i̱ hono wule mbiraga i̱ abala palenedago horo ogoni Ngode Datagaliwabehanda mo wakale nde abiyane wahenedabe. Mali egerunaga agalime horo nigoni daga nalelo Ngode Datagaliwabehanda mo wahenedale nde bayale karulape.
JOB 3:7 Mbiraga ogoningi wali agali turu hagabu mandagi paluwa wali ege habolela nabi wakale nde haru.
JOB 3:8 Agali maru gamugamu biaga karume dama abagua ale mini Lebiadana mo heya howa horo ogoni mo ko hela nde nabiada.
JOB 3:9 Mbiraga ogoningi nde mbi laho wiaabo howa harini yakundi da nabi wahalu ega bi nale wahenedale nde karulapeda.
JOB 3:10 Heneneore mbi mbira ogoni mo koore halu mo embeda halu i̱ ai̱yahanda taba honole ege habo nalelo mo waha nabinida. Ai urunidagua nabinidagome i̱ genda dewaore wiagoha yaho kogoni, lene.
JOB 3:11 Ainde i̱ ai̱yanaga tombeha berewaria homa nabini. I̱ ai̱yahanda taba hanayangi homa nabinidago nde aginagada.
JOB 3:12 I̱ ai̱yahanda bani palelo biruwa andu ngialu berenedaru agibuleda.
JOB 3:13 Ai i̱ homenedale nde áyu ogoni bayaleore padoleda.
JOB 3:14 Ai nde kiniru agali haguaneru ti homaliha dungule padarudagua padoleda. Tigua tano timbuniru marume bo gialo wahayagola lone bu karulaga heneru homalu áyu ti homaliha ha̱lo padagoni.
JOB 3:15 Kini iginiru maru muni ngolo silibaru ti andagani to̱lo ngelalu homayadagua homowa áyu ogoni homaliha ha̱lo padoleda.
JOB 3:16 Nime wá kago nahende i̱ ai̱ya tombeha howa homa nde nabinida.
JOB 3:17 Homenerunaga dindiha nde agali mana ko biaga heneru nde áyu ko nabi halu maru biabe erekuibi bialu haga heneru nde áyu ti bayale ha̱lo holene handa walia haga.
JOB 3:18 Garabaya biabe bialu heneru golope henego turu ho ka. Tinaga haru haga ala henerume biabe bia lenedagua áyu nahale ka.
JOB 3:19 Dindi ogoniha puwa agali mini lene homogo heneyaguabi yagibano agali mini lene ndo heneyaguabi ti ogobi degedege ka. Agali mendenaga garabaya biabe ale biahaga heneyaguabi nde dindi ogoniha howa áyu ibu golope hene ka.
JOB 3:20 Ngode Datagaliwabe ibugua maru genda yu howa tandaga nalu karu aginaga helo wahagabe. Maru genda yu karu ti karia wá holene helagadago aginagabe.
JOB 3:21 Agali genda uruni yu karu homolene hamelo karia homela nabiaga. Agali urunime tininaga homolene taya biaga ka. Marume muni ngolo dindiha wiaruagola uli walu taya biagadagua tigua nde tininaga homolene taya bialu kagoni.
JOB 3:22 Ai homalu hora haragola turu timbuni holebira.
JOB 3:23 Ngode Datagaliwabehanda agali uruni ti ibagabu holene hariga bibahendeha hangai hai kagola ibaga bialu polene henge nawiore. Ainde tigua awe bialu holene toba harago irane Ngode Datagaliwabehanda walia nahe do haruada.
JOB 3:24 I̱ tomo nane kogola i̱naga kabaneha dugu bialu haabo kogoni. I̱ mo koore kagola ga̱lalu dugu bigi berogoni. I̱naga bu miniha genda gana habaneha iba biruwa to̱lalu piagadagua poragoni.
JOB 3:25 Abale uruni ale mbira i̱ha anda ibuli lowa gi halu hagaru ai áyu i̱ni anda ibai howa i̱ mo ko halu kagoni.
JOB 3:26 Ani bidagola i̱naga bu miniha mo palia nahe howa i̱ni baya hangu nabere ko. Horo bibahendengi genda dege ibaho ngagoni, lalu Yobohanda lene.
JOB 4:1 Elibasa ibugua Yobonaga bi layaru hale howa ibugua ogodagua ladai bini.
JOB 4:2 Yobo-o í̠hondo bi emene mbira lole hamelo kogo larogola i̱hondo keba holeberego nde harugo ani bibelo. I̱na bi loleberogo yamaga habe nahego larogo lowa lalu,
JOB 4:3 Yobo-o í̠na wali agali dewaore mini bayale talebu mialu wali agali hongo nahe karu mo hongo hariligoni.
JOB 4:4 Agali maru genda timbuni wiarume bopeore hayaru í̠na tihondo bi bayale laga birigome ti lone mo hongo hariligoni. Í̠na ani birigola ti hongo howa hayadagua hodai biaga biyagoni.
JOB 4:5 Anigo aiore daraba. Genda gibiore wirunime í̠ni bope ibuni heagola í̠naga mini mo luluya heagola bedegoni.
JOB 4:6 Í̠ore Ngode Datagaliwabe yutiga biaga kegoni. Í̠na ibu hangu mitangi bialu lotu lalu ibunaga tuha haabo haga howa mana bayale tigabi ngaru hangu bialu haga harigoni. Ai áyubi nde ibugua í̠ biamogo bilo ibunihondo mini dunu biaho holene ngagoni.
JOB 4:7 Yobo-o agali mbira mini tigabi ibuha ko mbira nawi howa genda tandagala timbuniore yalu homene mbira í̠na manda bidebe. I̱na manda bialu koria mbirali mbira ani homene nawi.
JOB 4:8 Anigo agali maru dege mana ko wiaru bialu hemiria genda tandaga urunibi yuhaga biyaria handaga biru. Uruni manane agali mbira ibu mabuha tomo egene bayale hangayagua agali ogoni ibu tomo bayale bialu naga. Tomo egene ko hangarago ibu tomo ko bialu naga.
JOB 4:9 Agali ko biaga karu Ngode Datagaliwabehanda ira yobu wahe delaragola tebone nawule do taulo waharalidagua mo ko halu bo amolaga.
JOB 4:10 Agali ko karu tigua agali mende kago mo ko howa tini turu howa budi ale gabua timbuni laionome tomo nolene bo yuwa ngororo lagadagua laga ka. Ani bialu karia Ngode Datagaliwabehanda agali ogoni ibuni mo ko halu bope haga. Ani biragola agali uruni ale budi laiono ne hondo wahene howa ai nogoru lone neme babe nahe kaligobi haga.
JOB 4:11 Ani bidagola laionome ibu tomo bo naga ale nabe nahe howa ibuni homalu ibunaga igini hono wiyaru tibi purogo laga. Manane ogonibi agali ko biaga karuha anda ibaga, lalu Elibasahanda lene.
JOB 4:12 Elibasa ibugua laabo halu howa lalu, Horo mbirungi bi hendore mbira layagola hale habe nahego hale haru.
JOB 4:13 Bi ogoni mbi hanuni agali paliahondo hai hagangi hale haru. I̱ palewaria mini dewaore i̱naga emboneha pu íbu biya.
JOB 4:14 Ani biyagola palewaria mbirale mbirame i̱ mo gi bia hayagola mogolo puwa i̱naga tingini bibahende duru lagimbu biya.
JOB 4:15 Ani biyagola puyabu emeneore mbira ibalu i̱naga denguini pulaede haya. Aniore biyagola ai gi timbuni bialu ma iriru piripereore laya.
JOB 4:16 Aniore biyagola handalu hewaria mbirale mbira ona hearia hongo howa de handaya harugoyu baya hanguore ogoaleda lalu handawa bibe nahe howa giligelebi mbira nalaya. Ai anigo mani howa bi mbira ogobi layane hale haru.
JOB 4:17 Ngode Datagaliwabehanda wali agali bibahende wabiniru ibunaga tuha hai ka. Anigo uruni aria mbira tigabiore ko mbira para nahe Ngode Datagaliwabe ibuniale mbira ibunaga deni nahe layuago hale haru.
JOB 4:18 Dahuliyali bu karu ti Ngode Datagaliwabe heba mandagi howa ibuninaga biabe biahaga kago. Marungi nde tinaga biabe baya hangu nabiaga kagola Ngode Datagaliwabe ibunime dahuliyali uruni marume biabe baya hangu nabiyadane handaga.
JOB 4:19 Anigo í̠na manda bialu keria wali agali dindini heneme ko ngaru nabiore howa dahuliyaliru bolangua howa Ngode Datagaliwabenaga deni wali agali ko nawi mbira kada manda bidebe. Ngode Datagaliwabehanda agali dindi duguwa wabinigome agali abaleore wali agalime biripabua geme hengedaragola homagadagua homagago agua.
JOB 4:20 Agali mbirago ibu egerebagi bayale howa alendo homaga. Homedagola mani wali agali marume o homayagoni embedaho wahaga.
JOB 4:21 Wali agali maru manda bogaru nabi dege wene kaore homa ibu abale ibuwa agalime balai anda nguni pume amuna dariba henego hadape haragola anda dangi abale ibira haralidagua biaga.
JOB 5:1 Elibasa ibugua laabo halu lalu, Yobo-o ai biamogo bia lalu bi la naberego. Í̠na bi laregola hale halu biamogo bulene mbirali ibulebirabe. Ai dahuliyali mbirame ibalu í̠ biamogo bulebirabe.
JOB 5:2 Agali mbira ibu miniwioreme bulene ngago nabi howa ibuninaga miniha tandaga timbuni howa mini ko wu haabo hayagua mana ogonibi biragome ibuni balu homelaga nga.
JOB 5:3 I̱na agali maru tininaga dindi hobane winidagoha haabo haga hearia hendenego ai aniha howa tigua mana tiga nabi dewa bialu hearia hondowa Ngode Datagaliwabehondo agali ogonibi bialu heago abale bo waha larugoni.
JOB 5:4 Ani biragola tinaga waneiginiru ha ko holebira. Agali korume manani dabole haru poragola waneigini uruni tinaga bi la holene mbirali naholebira.
JOB 5:5 Wali agali hina gariho karubi iba noa howa dendepe lebolaho karubi ti agali ko uruni mabuha tomo damene bibahende ngaru nalu pu anihe karunaga lini dedaru heba ti do naiore holebira. Ani nai howa agali ko uruninaga muni do henedaru mia dege bule lowa taya bialu holebira.
JOB 5:6 Genda bame tomo nolene ale dindini anda nahaga ina manda bidamagoni ndobe.
JOB 5:7 Genda damene ngaru yu anda ibulene tene wali agali inane kamagoni. Be irani deledagola tula lalu duni ibaneru bilibulu purogo laralidagua bilo ko ngaru inaneme bero lalu bialu haramaligoni, lene.
JOB 5:8 Elibasa ibugua la dege bialu howa lalu, Anigo i̱na genda í̠ yu kegonidagua yu howayagua nde Ngode Datagaliwabehondo pele ngi lalu i̱na genda yu kogoni mo waha lalu bi lolebero.
JOB 5:9 Ibugua agalime nabiagane ale dewaore biai haga kago iname daga labe nahe kamagoni. Inanaga ngamaru bolangua howa ngagola iname baya hangu manda biai habe naheore kama.
JOB 5:10 Ibugua iba dalu dindini ibilaragome mabuha iba pialu mo gomba helaga.
JOB 5:11 Ibugua agali mini nawi karu mini lene ho aribia helalu maru genda yu howa dugu bialu karu mo wahalu ti mo turu howa bayale hadai bilaga.
JOB 5:12 Agalime bogabi tingi howa wali agali maru mo hondo halu mo luluya haga karu tigua lone nabilo Ngode Datagaliwabehanda uruni biagadarunaga mini mo talola haga biaga ka.
JOB 5:13 Agali marume wali agali maru karu mo ko hole mini dewa wu karia Ngode Datagaliwabehanda tigua bule manda bu wiyaruni tiniha daibilaga. Manane agalime gabua tara tara ge gono wiyagoha ibuni dai bialu dagadagua tiniha dai biragola bule manda bu wiyaru wahaga.
JOB 5:14 Tinaga mini mo luluya kagola mbirale mbira bibe nahe haga. Ega bi lalu ni deaguabi uruni tigua hariga handabe nahe arumahaore haradagua biaga.
JOB 5:15 Anigo Ngode Datagaliwabehanda agali maru mbirale burupale karu biamogo biragola agali timbuni hongohe ha heaguabi agali burupale darabi uruni mo ko habe nahe haga.
JOB 5:16 Ani biragola agali yagibano mini nalene uruni Ngode Datagaliwabehanda ti biamogo bilo maliaho haga. Ani bidagola agali ko biaga karume ti mo ko holene henge nawi haga.
JOB 5:17 Ai nde Ngode Datagaliwabe Hongo Haiheore Kagome agali mbira mana ko bialu kago mo tiga biyagua agali ogoni ibu turu howa miniha dungulo holene nga. Ai áyu í̠ mo tiga bule bialu karia í̠nime ibu erembira mialu holeni.
JOB 5:18 Ngode Datagaliwabe ibugua í̠ mana bialu genda mo ngiyagua mani í̠ mo bayale holebirago ina manda bidamagoni.
JOB 5:19 Ibugua í̠ biamogo dewa bialu kagola mani í̠ mo ko holene mbira nawulebira.
JOB 5:20 Hina gari timbuni piyaguabi ibugua í̠ tomo karulape nalu habelo ngulebira. Wai birangibi ibugua í̠ baya hangu handayaho kagola waitigirume í̠ nabolebira.
JOB 5:21 Agali marume í̠naga mini mo ko hole bi layagua Ngode Datagaliwabehanda í̠ biamogo biragola tigua bi laragome í̠naga mini mo ko naholebira. Mo ko holene mbira í̠ha anda ibiyagua Ngode Datagaliwabe ibunime í̠ handayaho kagola í̠ gi nahe holebere.
JOB 5:22 Hina gari timbuni mbira porangibi genda tara maru tagira ibirangibi Ngode Datagaliwabehanda í̠ turu howa dungulo habelo biamogo bialu haru holebira. Ibugua ani haru kagola í̠ nogo gabuarume bo noligonaga gi naheore holebere.
JOB 5:23 Í̠ mabuha e hongole dindi alialu keria í̠naga nama to̱le̱me nigi nabulebira. Nogo gabua karume í̠ bo nanolebira.
JOB 5:24 Ani biragola í̠naga mbirale wiriruni baya hangu wiai kagola í̠ turu howa í̠ninaga balai andaha dungulo birulebere. Í̠naga nogo sibiru mbira ereba nahe bibahende hai karia hondolebere.
JOB 5:25 Í̠naga waneigini aguaneru dewaore dindini datani bu karunidagua holebira.
JOB 5:26 Í̠nibi nde howaore halu maniore homolebere. Agalime tinaga mabuha widi hongowa boga bialu nolene tu haragola dagadagua í̠ howaore halu homolene tu haragola homolebere.
JOB 5:27 Ai Yobo-o ina minime manda bialu kamaria ogoni heneneoredane hendedama. I̱na bi áyu larogoni í̠ biamogo bilo larogo baya hangu hale mia howa hale halu miniha tale bibe, lalu Elibasahanda ani lene.
JOB 6:1 Elibasahanda bi ani layagola Yobohanda bi ladai bialu lalu,
JOB 6:2 Aiore nde i̱naga genda damene bibahende genda magi handagane ale ngagoriani mo ngelowa handaruyagua
JOB 6:3 iba mu ngarunaga genda emene nira lowa i̱na tandaga tara tara o ngaruninaga genda timbuniore yu kogoni. Ani yu howa keba ho kogome bi dewa tara tara lalu kogoni ndobe.
JOB 6:4 Ngode Datagaliwabe Hongo Haiheore kago ibugua timu tomiaherume i̱ baya. Timu uruni tomiame i̱naga tinginiha anda piyagola i̱naga miniha mo ko henego bedo. Ngode Datagaliwabehanda mbira i̱ mo gi bia holene ko tara tara wiaru ibilalu i̱ mo gi haya.
JOB 6:5 Nogo dongi bulumagarume tinaga tomo nolene datani karulape heagua ti bi ladagadaga nabiaga ndobe.
JOB 6:6 Ina wali agalime tomo magubi wiagua nde ibi nahe howa bame nalu holene karulape ngabe. Anidagua nabiaga ndobe. Ega habanaga ibane bedago nolene dendebi ngabe. Nabiore ndobe.
JOB 6:7 I̱naga tiniha tomo uruni ale noa nabiore bedo. I̱na tomo urunibi de hondowa koorene ko dege nga.
JOB 6:8 Ngode Datagaliwabehondo bi hale harugola ibugua i̱hondo ladai nabi. I̱na bi ibuhondo biaore larodagua bilo hameore lo bedo.
JOB 6:9 Ibugua i̱ore bo hengedo warubaga bialu bo tongolo milelo hameledo.
JOB 6:10 I̱na genda timbuniore yu ha kogo howanibi turu howa yagaloyu ibaga bibehe kogoni. I̱na Ngode Datagaliwabe ibu mana bayale tigabi hangu biaabo haga kago ibu andaneha i̱ haabo haga kogoni.
JOB 6:11 I̱naga hongo bibahende ereba hai haragodago ainde i̱ha lone bayale mbira agile tagira ibilonaga mini dunu biaho holedabe. I̱ dindi ogoria lone holene nawi ngagodago ai irane aginaga miniha dunubia ho holedabe. I̱naga holene ereba hayagua nde bayale ogoni.
JOB 6:12 Í̠na manda agua bidebe bialu keria i̱naga hongo gibiore ege to̱le̱ alebi ege to̱le̱ boronosi alebi mbira kane hendedebe. Ani ndoyago.
JOB 6:13 I̱naga hongo bibahende ereba hai haragome i̱ni bayale holenaga mbirale mbira bibe naheore bedogoni ndobe.
JOB 6:14 Mbirali ibu genda yu kago hondowa ibunaga nenege karume kaware íbu haga. Ibugua Ngode Datagaliwabe Hongo Haiheore kagohondo erembira mu heaguabi ibu andaneha haabo heaguabi ibu nenege heneneore kaware haabo haga.
JOB 6:15 Anigo tí i̱naga nenege bu kamiru tígua i̱hondo ke̱ timbuniore halu kamigoni. Tíore iba emene dewa poraru gaea birangi iba hundiai hene lebolahe ngaligobi kami.
JOB 6:16 Dalu ibirangi iba emene dewa poraru biru to̱latagi halu pugulalu piaga.
JOB 6:17 Gaea timbuni birangi iba emene dewa poraru hundiai haga ndobe.
JOB 6:18 Marungi nde agalime ibunaga nogo kamele haru halu dindi kaundiaha dabudaburu mo yalu pialu karia ti iba nolene nawidagola hariga pole piyago yu wahalu pubagi halu iba goreyane biragane ngagoha iba taya bima piagaya. Iba taya bima pialu karia iba nabere hundiai hayadago hondowa maruha bedabe hondole taya bima ibaga dege bialu karia handa walia nahe howa tini dindi ko ogoniha homa ereba haga nga.
JOB 6:19 Tano kira Temali karubi Sebali bu karubi tigua nde urunidagua dege bialu iba porabe toba howa tinaga nogo kameleru haru pialu karia iba hundiai hayadago hondowa mogo timbuni laga. Mogolalu tinaga miniha mo ko heneore haga.
JOB 6:21 Ainde i̱na manda bu handalu koria tí iba uruni alebe tobaneda. Tígua i̱ biamogo bule ibalu hemiria ai i̱ mo ko heneore berewago de hondowa mogo timbuni lo bedemigonida.
JOB 6:22 Ogo manda bidaba. I̱na mbirale mbira ngidaba lalu tíhondo hale haruyabe. Be tígua agali mende kagome i̱ muni mbiraleru mbira ngilonaga hale halimu lalu tí hale haruyabe.
JOB 6:23 Be i̱na tíhondo i̱ waitigi giha howa biamogo bialu mo widaba laruyabe be kini ko mbiranaga garabaya biabe ale biaga howa i̱ munime goladaba larube. Anidagua naleore ndobe.
JOB 6:24 Anigo i̱na mana ko agi birudabe manda buliya áyu ogoniore i̱hondo abale langidaba. Ani langirimiyagua i̱naga ne hariga ndibulo biruwa bi laramigo hale holebero.
JOB 6:25 Tínaga bi heneneyagua nde bi ogonime i̱naga miniha mo heya haragola i̱na mini mbiraore wu holebero. Anigoyu i̱na mana ko mbira nabiore kogola tígua ne harigaha howa bi bame dege lope halu kamilo manda bido.
JOB 6:26 Genda ogonime i̱ mo ko heneore kogoni ndobe. Ani bidago hondowa tígua i̱naga bi larogo lako halu bi larogoni bame puyabu pipulalu kabe toba kamigonida. Ani manda bu howa tígua i̱ mo tiga buleberemabe tobaho kamibe.
JOB 6:27 Ani ndoyago. Tígua aba ai̱ya homene waneigini hono wahene bu karu garabaya biabe ale bilonaga ai ibu mirabe hondole gadi tadu biaga kami. Ani bialu tí muni mo yule tínaga nenege karu pu laga kami.
JOB 6:28 I̱na tíhondo ke̱ halu mo hondo naholeberogo nde i̱ deni handade halu mo tale bidaba.
JOB 6:29 Tígua bi uruni ale wahalu mana tiga nabi laramigo wahalu mana bayale tigabiore ngagoria howa i̱ mo tale bilimu. I̱na mana ko mbira nabiore kogo i̱ bo hengedape nahalimu.
JOB 6:30 Tígua manda bu handalu kamiria i̱naga bi larogo tigabi ndodabe. Be tígua manda bu handalu kamiria i̱na mbirale ko bayalela ngago mo tale nabibehe kobe toba kamibe, lalu Yobohanda lene.
JOB 7:1 Yobohanda lalu, Wali agali dindi ogoria kamangi ina ami agali helonaga mbiralime gililo yu puwa mo hela hene ale kama. Ina mbiralinaga biabe biahaga howa biabe hangu bialu haabo haga kama.
JOB 7:2 Ina garabaya biabe ale biahaga karume tinaga tingini gomba helonaga ni abale palia nabira lowa haga ale kama. Biabe bialu hagame tinaga biabe biyagonaga yolo ngilo hondo ho hagadagua kamagoni.
JOB 7:3 Ainde Ngode Datagaliwabehanda ege bibahendengi i̱ ko dege haabo holiya helayada. Mbiraga bibahende i̱naga miniha genda yu haabo kogoni.
JOB 7:4 I̱ni dagiani paluwa u baya hangu paliahondo nahe abale gao lelonaga yange yangebu paliruli. Ani padoria egabi abale nale mbi lu dege wiaabo kagola dagiani palu beregeda beregeda bialu ngone dege gao laga.
JOB 7:5 I̱naga tinginini dere bidagoha bunguna himirume orabe toba kagoni. Dere lebola kagola dabi hayabe toba koria ndo dabi nahe habaneha dere angibu berenedago lone tugudatagi haga biaga.
JOB 7:6 Ainde i̱ dindi ogoriani holene horo abaleore pu bolangua hai haga biragola i̱naga tingini mani bayale hadai bulene nawi bada, lene.
JOB 7:7 Yobo ibugua laabo halu lalu, Ngode Datagaliwabe-o i̱ dindi ogoriani holene horo tubagi haragoni í̠ manda bide. I̱naga ngui harigaha howa buhe̱ latagi haroni ale ndobe. Ainde i̱naga turu holene mani naibulubada.
JOB 7:8 Wali agali áyu i̱ handalu karunime mani i̱ nahondolebirada. I̱ hai biyaguabi handa walia naholebira.
JOB 7:9 Harini ginu pobo wialu abale pu ereba hagadagua mbirali homarago homalu homenerunaga dindiha abale piaga. Ani pu kago ibu dindi ogoriani hole lone dai nabiaga.
JOB 7:10 Ibu lone dai bialu ibuni andaga hayagoha pu nabulebira. Ani bialu ibunaga damene ibu mandabi henerume embeda ho waholebira.
JOB 7:11 I̱naga bu miniha ogoni mitangi bu howa bi nale i̱naga ne hariga paiho naholebero. I̱naga bu miniha dugu timbuni bialu kogome i̱ni genda timbuniore yu kogo. Ani yu howa i̱na bi lalu haabo holebero.
JOB 7:12 Ainde í̠na i̱ mamage haabo kego agibe. Í̠na manda bu handalu keria i̱ puya dama ibaha wiaga biagobi howa i̱na mbirale ngaru mo ko hai habehedane hendedebe.
JOB 7:13 I̱na uore paliahondo haruyagua ogonime i̱ha tandaga ngago emene mo embeda holobada lo manda biruli.
JOB 7:14 Anigo i̱ paliahondo howa emaga handalu hewaria dama ko tara tara bu hearu í̠na i̱ mo walia haga birigoni. Ani mo walia haga birigome í̠na i̱ mo gi timbuni hari.
JOB 7:15 Ani beregome i̱naga tingini ogo ho howa genda tandaga tara ngaruni yu habe mangabago uruni wahalu homoliya mbiralime i̱naga ma gingimabu wahayagua nde karulapeda.
JOB 7:16 Ainde mangaba. I̱ dindi ogoria holene mangaore kogoni. Ngode Datagaliwabe-o í̠na i̱hondo genda lone mo ngia nabibe. Ai i̱naga holene henge emene hanguore ngagonidago i̱ bame holiya helabe.
JOB 7:17 Í̠na galone aginaga ina wali agali mitangi haabo haga kebe. Í̠naga deme ina handayaho haabo haga kego irane agibe.
JOB 7:18 Egerebagi bibahendengi iname bialu harimaru í̠na dabaki bialu haabo haga kego irane agibe. Í̠na emene mbira ha nabi bibahendengi ina ba handalu haabo kego agibe.
JOB 7:19 Ainde hamiaga emene mbedogo buliya í̠ handayaho haabo nahe emene hangu de handa taraho habelo hameledo.
JOB 7:20 I̱naga mana kome í̠ mo ko hayagola í̠na i̱ mo genda hangu halu hole mitangi bu ke bada. Í̠naga timu kaboro baregome bila helonaga bo manda biaga ira tili ale i̱ harudabe. Dandayi wadarume garabaya haru hagadagua í̠na ina wali agali haru haga hegola i̱na í̠ mo keba timbuni halu haruyabe.
JOB 7:21 Mana ko wiaru bialu harugonaga í̠na domo wanaholebe. I̱na kagua biniru i̱ha ngago irane aginaga domo wanaholebe. Ainde i̱ tigimandi hangu halu nde homaliha poleberoda. Pedoha í̠na i̱ taya bialu keria i̱ lone nahondolebereda, lalu Yobohanda lene.
JOB 8:1 Yobohanda bi lai heagola Sua dindiha howa agali mbira mini Bilidada heago ibugua lalu,
JOB 8:2 Í̠na bi lalu keruni mini nawi howa larego puyabu pu laradagua laabo halu kegoni ndobe. Mana ogoni angi waholeberebe.
JOB 8:3 Ngode Datagaliwabe Hongo Haiheore kago ibugua ibunaga mana bayale tigabi bialu haga ngago lone mo iriari bialu ina mo hondo nahaga ka. Horo bibahendengi ibugua mana bayale tigabi dege biaabo haga kagoni.
JOB 8:4 Í̠naga waneigini bu hearume Ngode Datagaliwabe deni howa mana ko mbira biyago hondowa ibugua ko biyagonaga pani nelo miyada.
JOB 8:5 Ani binigo ai í̠na Ngode Datagaliwabe Hongo Haiheore kagohondo i̱ biamogo bia lalu holene nga.
JOB 8:6 Í̠ agali tigabiore howa Ngode Datagaliwabe deni í̠ha ko mbira nawi keyagua nde ibugua í̠ biamogo bule ibulebira. Ala í̠ni andagani bayale hariligobi habelo biamogo bulebira.
JOB 8:7 Í̠naga mbirale bayale dewa yu harigo ereba hayaru emene nira dege lowa ibugua uruni bolangua howa dewaore yu habelo ngulebira.
JOB 8:8 Í̠na agali ala halu homeneru ti mini gigabi wu henerunaga tene baya hangu goaru handalu mamali henerunaga manda bu heneru mo tale bu handabe.
JOB 8:9 Ina wali agali dindi ogoriani tigi mandi hangu howa inanaga manda emene ko dege ngama. Egerebagi ni daragola munini dindini hagadagua halu abaleore ereba hagadagua inabi ereba haga kama.
JOB 8:10 Agali ala heneyaru ti mini gigabi timbuniwi heneya. Ani heneyago manda bialu í̠na mini manda bayale uruni ina mamalime manda bu heneyago mitangibu dai bibe.
JOB 8:11 Tigua bi maru ogodagua laga. Iba nabere ngagoria tola damberu anda nahaga. Uruni iba bedagoha dege bayale anda hai haga.
JOB 8:12 Anigo ai iba bedago hundiyagua nde tola dambe uruni agalime gandu lalu mbirale galone mbira bibe nahe holebira. Ti wene emene dege kangi gabu halu ereba hayago. Datani maru karu ti tola dambe uruni gabu haradagua nahaga ka.
JOB 8:13 Mbirali Ngode Datagaliwabe erembira mialu piaga kago ibu tola damberu iba nabereni hagagobi ka. Agali uruni ale kago ibu Ngode Datagaliwabe embedaho wahayago ai mbiralihondo dunubia holene nahedago homolene harigani pialu haga ka.
JOB 8:14 Tinime inane hangu howa bayale holeberema lo manda bu haga ka. Anigo tigua yu tiga ogonidagua bu kago habo laga. Ti lulu mini nawiore mbira ona howa gamuni anda kago gibu yalu irigi haradagua bialu kago ai gamuni andadago abaleore tongo laragola agali ogoni mo ko howa pilope holebira.
JOB 8:16 Agali urunibi ti mabuha datani hongohe kaligobi hayagoni. Ti bayale anda halu tinaga pini mabuha dindi bayale wiagoha purogo laga.
JOB 8:17 Uruninaga pini ege to̱le̱ ngaruha anda pialu mabubu hinigi bidagola duguabe nahe hongohe haga.
JOB 8:18 Anigo mbiralime datani ogoni ale dugu waharagola mani ho aribia hararume datani hongohe mbira ogoriani heneda lo manda nabulebira.
JOB 8:19 Anigo mbirali Ngode Datagaliwabe erembira miaga karu ti turu hagabu holene henge emene tigimandi hangu ngelo ka. Tini homarangi mendealime dindi ibu henedagoria ho aribia holebira.
JOB 8:20 Mbiralime Ngode Datagaliwabehondo mini bilina haabo ho kayagua ibugua o biago embeda ho wahalu napolebira. Mbirali ibu mana ko ngaru bialu haga kayagua nde Ngode Datagaliwabehanda ogoni ibu erembira mialu biamogo nabulebira.
JOB 8:21 Yobo-o hale ha. Ngode Datagaliwabehanda í̠naga mana bayaledane hondowa í̠naga bu miniha mo palia haragola í̠na turu howa oba halu ga̱lalu holebereda.
JOB 8:22 Ani bulebiragoyu ibugua agali maru í̠ handabe manga haga karu bo hengedape haragola ti taga tene handalu holobada. Ko biaga karu tinaga mbirale wu karu heba homalu ereba hai holobada, lalu Bilidadahanda lene.
JOB 9:1 Yobohanda Bilidadahondo ladai bialu lalu,
JOB 9:2 Í̠naga bi tigabi degego ai agali mbira ibu Ngode Datagaliwabenaga manani howa mo tale bilo pu heagua nde Ngode Datagaliwabehanda agali ogoni ibugua bialu kago tigabida lo hondolebirabe.
JOB 9:3 Mbirali ibu Ngode Datagaliwabela lai lolene hamelo heagua nde Ngode Datagaliwabehanda ibuhondo bi daosini mbira (1,000) agima hale hayaguabi agali biagome bi mbira ladai bibe nahe holebira.
JOB 9:4 Ngode Datagaliwabe ibuha mini mandabi dewaore gigabi wialu hongo gibiorehe ka. Ani kago ai mbiralime ibunaga mini gigabiwi hongo timbunihe kagobi aiwa bope halu bolangua habehe kabe.
JOB 9:5 Ngode Datagaliwabehanda hari timbuni wedaruni he̱la amu habehe ka. Ibunaga keba holeneme hari biaru bo haealabagabu wahaga kagoni ndobe.
JOB 9:6 Ibugua dumbirumbi bia gimbu bilo dindi mo ema bia haga ka. Dindi andaneha dindi hongo helo pini karu mo ema bia halu habolope haga.
JOB 9:7 Ibugua bi laragome ni tagira naibulebira. Yakundi bu karu dindini wá nahelo ibugua wá holene mo ge haga ka.
JOB 9:8 Hari daliga li karuni ibuni hangume yangalo helene ka. Iba solowara timbuni bedarume yaribu timbuni bialu ta̱la amunana bialu kagoria ibuni geme halu ibagabu haga ka.
JOB 9:9 Ngode Datagaliwabehanda yakundi wabialu tinaga mini hangu hangu wiai halu daligaha helame ho karuni.
JOB 9:10 Ibugua biabe hongohe tara tara agalime nabiagane ale biai haga kago inanaga mini emeneore ngamagome manda bibe nahe kama. Ibugua nahendene ale bibahende wabini ngaru iname dagalai habe naheore kamagoni ndobe.
JOB 9:11 Ngode Datagaliwabe ibugua i̱ bedogoria kawareore ibalu pu bolangua hayaguabi i̱na ibu de handabe naheore ko.
JOB 9:12 Ibunime mbirale hameleda alego yamiragola mbiralime hangai habe nahe ka. Mbiralime ogoni agi berebe lalu ibuhondo bi labehe ai kabe.
JOB 9:13 Ngode Datagaliwabehanda ibunaga lembo holene ya andaho ha nabiagaore ka. Ibugua puya dama mbira mini Lahaba iba solowaraha biraga biagohondobi ibunaga nenege ibu damene biaruhondobi biyago manda bibe. Ibugua waitigi uruni bibahende bope halu ibu andaneha dege hai heledagoni ndobe.
JOB 9:14 I̱ hongo naheore kogo i̱na Ngode Datagaliwabehondo bi mbira ladai au buledabe tobaho kogoni. I̱na Ngode Datagaliwabenaga manani haruyagua nde bi i̱na ibuhondo agilego lolobodabe.
JOB 9:15 I̱na mbirale mbira ko nabi bayale dege hene hewayaguabi i̱na manani bolangua halu yo pole bi mbira labe naheore kogoni. Ngode Datagaliwabe ibuni hangu tigatiga mo dabaki biaga kago manda buwa i̱na ibuhondo i̱ dara howa biamogoore bibelo hameledo lalu lolebero.
JOB 9:16 I̱na ibuhondo manani howa bi lo tiga bule íbu laruyagua ibugua ibuwa i̱naga bi hale naholobada.
JOB 9:17 Ibugua i̱ bope hole iba dalu puyabu timbuniru ibilaga ka. I̱nime mitangi bu handalu koria i̱ha ko mbira nawiore kodalo manda bu kogoyu ibugua i̱ mo genda halu haabo ka.
JOB 9:18 Ibugua i̱ yu wahalu pu nabi haabo kagome i̱ emene ha̱lo birabe naheore bedo. Ibugua i̱hondo o bialu kagonime i̱ mo genda timbuniore halu ka.
JOB 9:19 I̱na Ngode Datagaliwabela hongo manda biruyagua nde ibunaga hongo timbunihe kagome i̱ mo nagalone holebira. I̱na ibu manani íbu lalu olaruyagua nde ibu godi lole ibilo aiwa haru ibulubadabe.
JOB 9:20 I̱ha ko mbira nawi howa i̱na mana kobi mbira nabi howa ibuhondo mini bilinahe haabo harugoni. Ani bialu harugoyu i̱na Ngode Datagaliwabenaga manani pu haruyagua i̱naga bi lako hai harogome i̱ni manani holene wulebira.
JOB 9:21 Heneneore larogo i̱ha ko mbira nawiore ko. Ainde i̱ habane nabulene harudalo habe mangaho ko.
JOB 9:22 I̱na manda bidogo ko mbira iname bini wiaguabi nabi hemayaguabi tanabi Ngode Datagaliwabehanda ina bo wahai haga ka.
JOB 9:23 Mbirali bayale kagoha mo ko holene anda ibiyagua nde Ngode Datagaliwabe ibu de hondowa turu dege haga ka.
JOB 9:24 Agali mana ko biaga bu hearume dindi ogo haru howa handayaho helo Ngode Datagaliwabe ibunime dabalu helaga bini ka. Ibugua agali manani howa bi lo tale biaga karunaga mini mo luluyu haragola tigua manani mo tale bialu bi lolene ngadagua nalaga ka. Ngode Datagaliwabe ibunime mbirale ogoni mo bia naheyagua nde aiwa mo bia hene biagabe.
JOB 9:25 I̱ ema bu holene horo winigo abale piai haragonida. Horo daiore lalu agali bi lo yu pole poralidagua bolangua halu poragoni. Anidagua biragome mani i̱ha bayale holene henge mbira nawulubada.
JOB 9:26 I̱ dindini holene abaleore piai halu iba talu ibani dai lalu piagadaguabi ega neneme mbirale nolene ale dindini bedagola hondowa abale yulope halu minule piagadagua piai haragonida.
JOB 9:27 I̱ha genda íbu ngaru yu wahai halu bame haruyagua nde bayaleoreda manda bido. Anigo i̱ bayale holene manda bu ha koria genda tandagala i̱ha ngagome i̱ mo gibia haragola haabo kogoni. Ani bidogo irane Ngode Datagaliwabe í̠naga deni i̱ha ko mbira ngane hondowa yu heledegoni.
JOB 9:29 Ani ngane hendedego i̱nime mini nawi tingi halu latara howa harudago i̱naga bi bame lo waharudane hendedo.
JOB 9:30 Ainde i̱na tobo bayaleore ngago mo yalu iba gagahe bedagoha puwa í̠naga deni i̱ha dodo emene mbira para nahe bayaleore holenaga wayawaya baruyagua nde ogoni berogomebi bame dege boleberoda manda bido. Irane í̠na i̱ minalu dindi ko waru tabu ngagoha bape haregola warubaga bialu dodohe dege wulubada. Ani beregola i̱naga aga karuledorume manda bu handalu karia i̱naga tingini ko ngubiore mbira wiagoria karulo harudalo manda bialu i̱naga aga ibu i̱ tinginini bulene turu naheore wulebadalo manda bido.
JOB 9:32 Ngode Datagaliwabe ibu agali kagobi dege henedale nde i̱na ladai bialu iyame manani pialu bi lo dabaki kabalego.
JOB 9:33 Ainde mbiralime dombegua howa i̱ Ngode Datagaliwabela iyanaga bi hale howa mo tale bilo hameledo.
JOB 9:34 Mbirali o biagome Ngode Datagaliwabehondo lamialu i̱ pani ngialu minu baabo nahe wahalu i̱ha mo gi holene ngaru naibilabe lalu lamia holene naheore ndodabe.
JOB 9:35 Mbiralime ogonidagua lolene kale nde i̱na Ngode Datagaliwabehondo gi nahe howa i̱ha genda ngelo kogoni bibahende latagi hai kole. Anidagua larogo irane i̱ni miniha ko mbira nawiore manda bido laro, lalu Yobohanda lene.
JOB 10:1 Yobohanda laabo halu lalu, I̱ dindini holeneore mangaba. Homaruyagua nde karulapeore ogoni. I̱naga genda timbuni yu kogonaga bi latagi halu holene nga lo manda bido.
JOB 10:2 I̱na Ngode Datagaliwabehondo ogodagua lolebero. Í̠na i̱ bame manani íbu nahelabe. Í̠na i̱hondo keba ho keyagua nde i̱na ko birudago tigatiga langibe.
JOB 10:3 Ainde í̠na mandabu handalu keria agali í̠nime wabinigo mo ngubia halu mo ko holenego mana ogoni bayaleda lo manda bidebe. Ani bialu howa agali ko biaga karume mana ko bialu karu hondowa í̠naga miniha dungulo haga kebe.
JOB 10:4 Ina wali agali kamarume mbira mitangi bialu manda beramalidagua í̠na manda birilibe.
JOB 10:5 Ina wali agali kamarunaga holene emene tigi mbira hangu halu homaramalidagua í̠ ogonibi dege kebe.
JOB 10:6 Ani ndoyagua irane aginaga í̠na i̱ha ko mbira ngabe hondole taya bialu haabo kebe.
JOB 10:7 I̱ha ko bini mbira nawiore kogo í̠ manda bedegoni. Ani manda buwa mbiralime i̱ í̠naga giha howa mo wialu pele mulene naheorego í̠ni manda bu kegoni.
JOB 10:8 I̱naga tingini bibahende í̠naga gimeore wabiai hariyago ai í̠ni gi degeme i̱ mo ko halu kegonida.
JOB 10:9 Í̠na i̱naga tingini agalime dindi duguwa todobene be wabiagadagua wabirigoni. Ainde áyu i̱ mo dodobaga bialu lone dindi abalu ale holiya hameledebe.
JOB 10:10 Í̠nime i̱ ai̱yanaga tombeha wia halu wabirigoni.
JOB 10:11 I̱naga kunibi gungubunibi i̱ tinginiha helai harigola i̱naga tingini gimbu bialu hongohe haya. Ani bialu kuni gungubunila dambi helonaga mbirini dongoneru wabu heladambi hariya.
JOB 10:12 Í̠na i̱ha holene mo karula howa i̱hondo gubalini timbuniore ho harigoni. Í̠na i̱ baya hanguore handayaho hegola i̱ homa nabi haabo kogoni.
JOB 10:13 Í̠na i̱ bayuwa handaya ho keore nde i̱ áyu mo ko haregoni hole manda bu dege henedalo manda bido.
JOB 10:14 Í̠na i̱ handayaho kegola i̱na ko mbira bidole nde í̠na ko ogoni birugo domo wanahole ledeleda.
JOB 10:15 I̱na mana ko ngago biruyagua nde í̠na i̱ pani ngialu minu bole kegoni. Anigo i̱na mana bayale bialu haga howa ko mbira i̱ha nawi hewayagua nde í̠na i̱ bayale harudago hondowa turu halu bayale birida nalaga kegoni. I̱ha genda dewa anda ibalu i̱ mo ko haragome i̱ taga timbuni ho kogoni.
JOB 10:16 Anigo ainde i̱ni bayale kogoni mitangi bialu turu halu ibaga bu haruyagua nde laiono gabuame nogo mbira abaleore talialu bagadagua í̠na i̱ talima ibaga bialu bope hole kegoni. Ani bialu i̱ bope holenaga agalime nabiagane aleru dewa biaga kegoni.
JOB 10:17 Í̠na i̱la keba ho kego mo walia halu i̱ha genda dewa ibilarili. Ani bialu í̠naga miniha keba holene ogoni timbuniore halu i̱ha tandaga dewaore ami agali dewaore tidiyu ibalu i̱la wai bule ibiradagua ibilalu kegoni.
JOB 10:18 Ngode Datagaliwabe-o irane aginaga í̠na i̱ ai̱yahanda taba henelo wahenebe. Wali agali mbirame i̱ hondo manda nabilo ai̱ya tombeha biru homedole nde karulapeda lo manda bu kole.
JOB 10:19 I̱ ai̱ya tombeha berewangi homalu i̱naga tingini ohowa mo yu pialu homaliha hora henedale nde karulapedale. I̱ dindini naibu haradagua ogoni.
JOB 10:20 Ngode Datagaliwabe-o i̱naga holene tubagiore ngago í̠ manda bide. Ani manda bialu i̱hondo genda dewa nangibe. I̱naga bu miniha mo palia holene emene karulo howa nde homoliya helabe.
JOB 10:21 Mani howa nde i̱ homalu dindi ko arumahe ngagoha pu howa dindi ogoria hole lone dai nabuluboda.
JOB 10:22 Dindi i̱ poleberogoha ngaruni mbirago tigabi nawi bibahende mo libilabale hangu mini burugu lolenebi wiai ka. Wá holene naheore aruma holene degeme dindi ogoni haru hai kagoni ndobe, lalu Yobohanda lene.
JOB 11:1 Nama dindiha howa ibini Soba ibugua Yobohanda bi layago hale howa Yobohondo lamialu lalu,
JOB 11:2 Yobo-o í̠na bi dewa laabo halu bedegoni iname í̠naga bi dewa laabo haregome í̠ ko nabiaga agali bayaleore mbira heneda loloma̱yanaga lalu bedebe.
JOB 11:3 Í̠na manda bu handalu keria í̠naga bi urunime inanaga ne hariga ndibulo birulubabe toba kebe. Mini bayale wuleneru í̠na mo ko halu bi lai harigo ainde í̠ni manda bu handalu keria urunidagua larigonaga í̠ mo taga holene mbirali nahedalo manda bidebe. I̱naga ne hariga ndibulo bira nabi howa í̠na bi larigoni damene ladai bulebero.
JOB 11:4 Í̠nime bi lariruni bibahende bayale hangu laru lari. Ani lalu í̠na ko mbira nabi kogome Ngode Datagaliwabenaga deni í̠ha ko mbira nawi ko larigoni.
JOB 11:5 Ainde galonedago i̱na bi ogoni Ngode Datagaliwabe ibunime í̠hondo ladai bilo karulapeda lo manda bido.
JOB 11:6 Ibugua í̠hondo ladai bidale nde ibunimeore mini gigabi wulenebi manda bulene bayale ngarubi irane ogo lalu wia do hene ina agalime manda bibe nahe ngaru ibunime í̠hondo langiai kale. Yobo-o Ngode Datagaliwabehanda í̠na ko biridagonaga pani timbuniore mo ngia nabi emene mo ngiyadalo manda bibe.
JOB 11:7 Í̠na manda bu handalu keria Ngode Datagaliwabe Hongo Haiheore kagonaga mini gigabi ngagobi manda timbuni bidagobi í̠na manda biai halu emene timbunibi ogobi nga lalu magi ogodagua lalu manda biai habehebe.
JOB 11:8 Ngode Datagaliwabe ibunaga manda hari daligaore damindini ale wialu dindihaore daliape halu homeneru haga humbirini andaga bolanguahe ngagoni. Í̠na ibunaga mini manda ngaru handa walia holenaga agi buleberebe.
JOB 11:9 Ibunaga mini luniore dindi ngago bibahende bolanguahe nga. Iba solowara timbuni bedago bolangua haihe nga.
JOB 11:10 Ngode Datagaliwabe ibunime í̠la godi laba lole minu yalu piyagua í̠ mini yalu napelo hapai holene karulape ai kabe.
JOB 11:11 Ngode Datagaliwabe ibugua agali abogo ibu habane nabulene ka lo manda biaiho ka. Tigua mo hondo halu mana ko bialu kago manda buwa ibugua tinime ko biyagonaga mo tale biaga ka.
JOB 11:12 Nogo dongi gabua angibuni mbirame igini dambole nawiagadagua agali mbirame mini nawiore howa mini gigabi wibe nahe ka.
JOB 11:13 Yobo-o í̠na mini beregedalu Ngode Datagaliwabehondo bi lalu í̠nime i̱ dara halu biamogo bia lolene nga.
JOB 11:14 Í̠na mana ko birigo erembira mialu waholene nga. Mana ko ngago í̠la hole lone naibilo wahai holene nga.
JOB 11:15 Í̠na mana ogonidagua biriyagua nde í̠ha ko mbira nawi howa í̠ dengui handadaga halu taga nahe holebere. Í̠ hongohe howa mbirale mbira hondowa gi nahe holebere.
JOB 11:16 Í̠ha genda tandaga ngaruni embeda hai holebere. Ibalime ira yuni dataniru yu poragola embeda hagadagua mbirale uruni embeda hai holebere.
JOB 11:17 Í̠naga holene bibahende beregedalu bayale holebere. Í̠naga holene bayaleore horombe hanuni ni dedaligobi holebere. Í̠ha genda bibahende ibai halu timbuniore aruma ale wiyago ai bodopaya bialu egerebagi ale holebira.
JOB 11:18 Ani beregola Ngode Datagaliwabe ibugua í̠ baya hangu handayaho holebirago hondolebere. Ibuhondobi í̠ mini dunubiaho holebere. Í̠na gi holene mbira nawiore howa í̠ u paliahondo holebere. Ani bialu kegola dewalime í̠na ti biamogo bibelo hondo ibugu bulebira.
JOB 11:20 Wali agali mana ko tara tara ngaru bialu haga karu ti dege Ngode Datagaliwabenaga lembo holene ngagoria yo pialu pole hariga tara tara taya bialu ha holebirago handa walia naholebira. Ani bialu howa ti homa hangu maliaho holebira, lalu Soba ibugua lene.
JOB 12:1 Ani lai heagola Yobohanda ladai bialu lalu,
JOB 12:2 Heneneore tí tebirali hangu mini bayalebi manda timbunibi tíha hangu wiarua. Tí homaramingi mini gigabi wulene bayale uruni ngaore homalu tíni heba yamaga halu ereba holobada.
JOB 12:3 Ani ndoyago. I̱bi nde mandabi dege kogoni. Manda tígua bidamigome manda i̱na bidogo bolangua nahe kami. Tígua bi larimigoni damene wali agali bibahendeme manda biai ka.
JOB 12:4 Anigo ai tí i̱naga nenegeha kamigoni howa i̱hondo mege bialu kami. I̱ mana tigabi ngago bialu howa Ngode Datagaliwabenaga deni i̱ha ko mbira nawi ko. Abale howa ibugua i̱naga bi larogo hale hagago áyu nde tígua ibalu i̱hondo mege beremi.
JOB 12:5 Maru ti bayale halu genda ngaru tiha anda naibi howa maru darabi genda yu karu hondowa ti oba haga ka. Ti ohe howa maru harigani pilole bialu kago hondowa pilape helo baya hangu he̱lope haga ka.
JOB 12:6 Anigo agali pagebibi karubi Ngode Datagaliwabenaga bi mo wahaga karubi ti bayale mbira ka. Tigua handalu karia tinaga minibi dindini holenebi ngago karulapeore kama lowa tininaga hongo mo tene halu Ngode Datagaliwabe ale helaga ka.
JOB 12:7 Ega nogo wenaru ema bialu piaga maru biru ngaru tigua tí lawai helo pudaba. Ani ndoyagua nde dindini haga urunime tíhondo Ngode Datagaliwabenaga mana ngago lawai helo hale hadaba.
JOB 12:9 Ti bibahendeme Anduane Homogo ibugua ti wabinidalo manda biaiho ka.
JOB 12:10 Wali agalinaga holenebi maruale uruni tinaga holenebi ibugua wabinigo bibahende ibuni giha hai ka.
JOB 12:11 Iname tomo nabehedabe nanabehedabe hondole nahanda ala beremali. Anidagua dege inanaga haleme bi bayaledabe kodabe hondole hale haramali.
JOB 12:12 Agali ala hene wahe ti mini gigabiwi mandabi dewa ka. Ngode Datagaliwabenaga mini gigabi wulene ngagome agali wahe ala hene uruninaga manda ngago bolangua haihe ka. Ani bialu ibunaga hongo timbuniorehe mbirale ibugua bule hameledago bia dege biaga ka.
JOB 12:14 Ngode Datagaliwabehanda mbirale mbira gialobaga biyagua mbiralime biadai bibe naheore. Ibugua mbirali minalu garabaya helayagua nde mendealime ibalu ibu golope habe naheore.
JOB 12:15 Ibugua iba dalu naibilo hangai hayagua nde gaea dege biaho wialu dindini ngago damene bibahende gau lai holebira. Ibugua iba dalu dege ibaho wiaabo helayagua nde iba li timbuni birame helaragola dindi dewaore namulai holebira.
JOB 12:16 Ngode Datagaliwabe ibu hongo gibiorehe howa wayali holene ibunaga nga. Agali mo hondo haga karubi mendealime mo hondo hene karubi ti bibahende Ngode Datagaliwabenaga giha hai ka.
JOB 12:17 Wali agali ibugua haru haga karunaga mini gigabi wiaru mo wahowa mini nawi ale helalu agali haguane wali agali manani helowa daba ki biaga karu tibi mo luluya haragola tinibi lulu karume biagadagua bilo helaga ka.
JOB 12:18 Ibugua kini karunaga biabe bo dugualu tinaga aga golowa ti garabaya biabe biaga karunaga labolabo bobu hagadagua bu helaga.
JOB 12:19 Ngode Datagaliwabehanda dege agali loma binigo mo miaga karubi agali haguane karubi bope halu mo dindiha helaga ka.
JOB 12:20 Agali mbira ibunaga bi wali agalime hale haga heagua nde Ngode Datagaliwabehanda agali ogoninaga ne hariga ndibu lelaga. Agali wahe miniwi karunaga mini gigabi ngago ibugua mo wahai haga ka.
JOB 12:21 Ibugua agali haguane karu bope howa ti mo ngubiore halu taga timbuni ho helaga. Agali haru haga karunaga hongo biba hai helaga ka.
JOB 12:22 Ngode Datagaliwabe ibunime dege mbirale wia do hene ngaru mo paniho ngelalu arumaho ngaru wá helalu biragola wá hai haga.
JOB 12:23 Ibugua hameigini mbira hongo nahe karu mo hongo halu mini lene mbira helowa mani mo ko halu bo haealabaga bu wahaga. Ibugua dege hameigini emene karu mo dame bia howa dewaore helalu dindi taraha garabaya minalu pelaga.
JOB 12:24 Ibugua dege dindi bibahendeni agali haguane karunaga mini mo luluya howa ti mini burugulo luluyu ibagabu helaga.
JOB 12:25 Ti arumaha howa gi minaga bialu hariga taya bima ti agali lulu iba neneme ge pu ko hagadagua ibagabu heleda.
JOB 13:1 Bi bibahende tígua latagi harimigoni damene i̱na bambaore howa deme handalu haleme hale haabo haga dege kogoni. Mbirale uruni i̱ manda biaiho kogoni ndobe.
JOB 13:2 Tígua manda bidamigo damene bibahende i̱na manda biai ko. Manda tígua ngamigome i̱naga manda ngogo bolangua nahe kami.
JOB 13:3 Ani kamigo ainde i̱ tí heba bi lolene manga ho ko. Ngode Datagaliwabe Hongo Haiheore kago ibula hangu bi lolene hameledo. I̱naga genda timbuni o yu bedogo tiga bulenaga ibuhondo bi laba lolene hamelo bedo.
JOB 13:4 Tígua manda nabi howa ke̱ holene bi dewaore laramigome tí mandabi tingi ho haga kamigoni. Tí anogoda mbira wali agali warago bo ngago biamogo bulene manda nabi kagobi dege kamiria hendedogoni.
JOB 13:5 Ani kamigonigo ai tí lone bi nale harimiyagua nde wali agali maru karume tí agali mini gigabiwi mbira ka lolebira bada.
JOB 13:6 I̱na bi ladai berogonaga tí bayuwaore hale halimu.
JOB 13:7 Tígua bi nagalone dewa ke̱ halu laabo halu kamigo ai bi ogoni aleme Ngode Datagaliwabe biamogo bialu la harama mitangi bidamibe.
JOB 13:8 Tígua bi laramiru bibahendeme i̱ bo hengedape halu Ngode Datagaliwabehayagi howa ibu biamogo bialu laramibe tobaneda. Ainde tígua godini howa ke̱ holene bi urunime Ngode Datagaliwabe ibunaga lahalu mo hongo hole ho kamibe.
JOB 13:9 Ani beremigo begelo hondowa Ngode Datagaliwabehanda tíha mbirale bayale hondolebirabe. Tígua agali dindini hene karu mo hondo haramilidagua Ngode Datagaliwabebi mo hondo hole mandabu kamibe.
JOB 13:10 Tínaga miniha Ngode Datagaliwabe biamogo bialu i̱ bope holene hangu manda bu kamigo mini ogoni tíha haabo hemiyagua nde Ngode Datagaliwabehanda tíhondo keba holebiralo manda bido.
JOB 13:11 Ani biragola ibunaga hongo timbuni kago hondowa tí mogolalu gi timbuni holeberemi.
JOB 13:12 Bi uruni galonebe toba howa lalu kamigo ai bame habane nabulene be abalu ale nga. Bi uruni hongo naheore iba waru tabu ale bame dege nga.
JOB 13:13 Yobohanda laabo halu lalu, Bi i̱na hangu loliya tígua bi nale biradaba. Mbirale i̱ha bulubadago bibahende biai helo i̱na bi nale naholebero.
JOB 13:14 I̱ gi naheore bedo. I̱na harugo lowa homolene wiagua nde homole. Ai Ngode Datagaliwabela bi lole manda manda bu kogoni.
JOB 13:15 Ainde Ngode Datagaliwabehanda i̱ homelo bo wahayagua nde ibunime hame ledadagua bilo. I̱na mendealihondo mini dunubia holene nahe howa nde harugo ibuhondoore mini dunubia ho haabo holebero. Ani nabidaore i̱na ibunaga deni tigatiga laede halu, I̱na ko mbira nabi kogoni, lolebero.
JOB 13:16 Anioredago i̱na gi nahe howa Ngode Datagaliwabela bi laruyagua ibugua i̱ agali ko nabiaga ka lo manda buwa i̱ dara halu homa nabi emene bayale holiya helo waholebira. Ani larogo irane agali ko biaga karume Ngode Datagaliwabela bi lole gi haga ka.
JOB 13:17 I̱na mbirale i̱naga miniha ngogo latagi harogo tígua i̱naga bi o larogo baya hangu hale hole biralimu.
JOB 13:18 I̱na biako hene mbira nawi kogome i̱ni godini howa yo pialu polebero. Anigo agalime godi lo pole howa bi lo manda biagadagua i̱na Ngode Datagaliwabela bi lole manda bu yido.
JOB 13:19 Ngode Datagaliwabe-o í̠na i̱la bi wai bialu howa ko bini mbira ogo lalu mo walia holeberebe. Mbira wiagua nde i̱ bi nale ne hariga ndibu lalu homolene karulape.
JOB 13:20 Ngode Datagaliwabe-o í̠na i̱hondo kira bibelo hale haro. Hale harogo e̱ lariyagua nde i̱na gi howa ha do holene manda nabulebero.
JOB 13:21 Í̠hondo bi kira hale holeberogo ogo. Í̠na i̱ mo tandaga nahabelo hame ledo. Bi mende mbirale i̱ mo gi holene damene nangelabe.
JOB 13:22 Í̠na ogonidagua buleyagua nde i̱na ladai buliya i̱hondo bi labe. Ani ndoyagua nde í̠nime ladai bibelo i̱na bi ala lolebero.
JOB 13:23 I̱ha ko mbira agi ngabe. Mana ko mbira agi biruyabe. Mbirale mbira wiagua nde í̠na i̱ langibelo hameledo.
JOB 13:24 Í̠na i̱ handa tara howa i̱la waitigi ho haradagua bialu erembira ngialu piriligo irane aginagabe.
JOB 13:25 I̱ habane nabulene bameore ira yuni dogolope hene alebi datani gaule ale bame puyabume dindini pulo yu pu íbu bialu hagagobi kogoni. Ani kogodago ainde irane aginaga í̠na i̱ talima ibaga bialu mo gi halu kebe.
JOB 13:26 Ainde i̱ igiri emene hewangi ko i̱na bini mbira wiagola áyu mo wu howa genda timbuni ngaru i̱ha mo ngialu kegoni bada.
JOB 13:27 I̱ ibaga bialu napoliyanaga í̠na i̱naga ge pu senime minu kabubu ngelaga kegoni. Anigo ainde i̱ heyalu piruyagua i̱ porogoha agohayagi porobe hondole haruru ibaga bialu i̱naga ge pirudagoha handaya halu goarima ibaga ke.
JOB 13:28 Ina wali agali kamaruni ira pubume nedagola togo bidaligobi halu bombome aga nedagola budaraligobi howa abaleore mo ko haga kamagoni ndobe.
JOB 14:1 Yobo ibugua lalu, Ina wali agali ina ai̱yahanda taba hanayangi howa horo emene tubagi niruniha hangu dindini kamagola genda dewaore tagira ibaga.
JOB 14:2 Ina balawaya baya egerebagi bayale dedane handarigo ai alendo handalu karia yogo bialu ko haraligobi kamagoni. Ani bialu ni dedagola inanaga munini kane handaramaligo ai ni beralibame ge haragola munini biago ereba haraligobi kamagoni.
JOB 14:3 Ani bidamago í̠ iname ko biniru aginaga dabalu kebe. Ngode Datagaliwabe-o i̱ galone nahe mbirago kogodago í̠na i̱ aginaga dabalu kebe.
JOB 14:4 Ina wali agali mana ko biaga dodohe kamago. Í̠naga deni bayale helo ko birimadaru domo wahabehe mbira ai kabe. Mbirali naheoreyago.
JOB 14:5 Wali agali ina dindi ogoria holenenaga horo ege malibi ogodaguaore helo lalu pongo bo wirigo mbiralime ibuore bolangua howa lu hole lalu ibunaga holene horo ege malibi dewa lone mo tago habehe ai ibu kabe.
JOB 14:6 Ai agali garabaya biabe ale bia hagame ibunaga biabe bulenego bu maro buwa alendo ibuni turuho hagadagua i̱bi nde bu miniha turu hagabu holiya yupe habelo hamelo kogoni.
JOB 14:7 I̱na manda bialu koria ira dibinigonaga teneha karulapeyagua lone ogoriani dongoria biaga ndobe.
JOB 14:8 Ira ibunaga pini bambaore heneyaguabi tene ibu gabu hayaguabi
JOB 14:9 ira teneha dindi ibane bere wiagua nde ira dibayagonaga teneha howa lone dongoria biaga ndobe. Ani anda howa gini gene halu ira gahenge lone anda haga.
JOB 14:10 Anigo wali agali ogonidagua biaga ndo. Ina homaramagola mani holebiraru tigua ina hendelo ndo homalu ereba haramagoniore.
JOB 14:11 Manane iba gorene timbuni bereneru hundialu iba ema bialu piagaru hundu tege laraligoni.
JOB 14:12 Ogonidagua dege wali agali homeneru lone heya nabiaga. Dindi harila piyaguabi ti heyulene henge nawi howa paliaho wulebira.
JOB 14:13 Wali agali homayaruni lone dére holene henge nawi bada. Anigo ai Ngode Datagaliwabe-o mani kebaho keruni embeda helonaga áyu í̠ wali agali abale homenerunaga dindiha mo do howa horo mbiru nde i̱ mitangi bulene horo mo ngelabe. I̱na dindi ogoni holiya henge ngiridago piai helo hondo holebero.
JOB 14:15 Horo uruni piai haragola nde í̠nimeore wabini i̱ yu wanahe í̠ni kegoria kawareore haparaho holiya hamelo holebere. Ani buwa í̠nime i̱ olaregola homene dindi uruni wahalu í̠ni keria ibulebero.
JOB 14:16 Ani buwa ogoningi i̱na ibaga bialu kogo baya hangu mamage halu ko biruruni mo embeda holebere.
JOB 14:17 Wali agalime nuha mbirale mbira kabubu honowa embeda haralidagua ko i̱na biruruni manda biaho wia nabi í̠na domo wahai holebere.
JOB 14:18 Hari timbuni wedaru podarangibi ege to̱le̱ timbuni bedaru pendege lalu porangibi ibame ege to̱le̱ ngaru gindulobaga bialu dindi bibahendeha hilo yai halu porangibi ani buwa iba dalu timbuni ibalu dindi bayale ngaru hilo yalu piai halu bulebira. Agali dege lone heyule lowa mini dunubia ho karia uruni mo waholebere bada.
JOB 14:20 Í̠ninaga hongo timbuni daligaore ngegome ti bope halu homelarili. Ti homalu tinaga denguiru mo tara halu aibe tobahe ngagola ai ti homenerunaga dindiha hama pudaba lariligoni.
JOB 14:21 Ti ani pu kagola dindini ti igini helalu homayaru nde agali mini lene homogo hayaguabi yagibano kagola wali agalirume mo taga howa mo ko halu hayaguabi homene tigua handa dai bialu manda bibe nahe holebira.
JOB 14:22 Tigua tininaga tinginiha tandaga timbuni nalu karunagabi tiniha genda ibiyarunagabi dugu bialu biraabo holebira, lalu Yobohanda lene.
JOB 15:1 Yobo ibugua bi lai heagola Temana tanoali Elibasa ibugua ladai bialu lalu,
JOB 15:2 Yobo-o i̱na í̠ agali mini gigabiwi kebe toba harugo. Ai áyu í̠naga bi bame puyabu ale halu nagalone dege lopaya berego agibe.
JOB 15:3 Í̠na lai hangu laabo harilidagua agali mini gigabiwi kagome ani lalubi nagalone ladai biaga kabe.
JOB 15:4 Bi ogoni ale lariligome wali agali mo luluya haragola tigua Ngode Datagaliwabehondo gi howa ibu andaneha halu bi nalolebira.
JOB 15:5 Í̠na bi dewa lalu kegome í̠ni ko biridaruni mo walia harili. Í̠naga biore baya wále marume ko bu howa uruni dambi holenaga bi lalu hagagobiore lariligo manda bido.
JOB 15:6 I̱na í̠ manani howa lo dabalu ko biri lolenego i̱naga biabe ndo. Í̠ninaga bime mo dabaki halu í̠ni bope harigoni. Ani bialu í̠na ko biri lalu mo walia ho nge.
JOB 15:7 Agali mende naheha í̠ ai̱yahanda í̠ ala taba henene kebe. Í̠na manda bu handalu keria Ngode Datagaliwabehanda dindi hari nawabiha í̠ni dindi ogoriani ala hene haribe.
JOB 15:8 Ngode Datagaliwabehanda mbirale bu ngaruni wabule manda manda bialu bi lalu heangi í̠ hale ho henebe. Agali mini gigabiwi í̠ hangu kebe.
JOB 15:9 Í̠naga manda ngegome inanaga manda ngamago bolangua naheore. Mbirale í̠na manda bidego damene bibahende iname manda biai kama.
JOB 15:10 Agali waheore dagua peleoreru ina baba mandagi kama ndobe. Tinaga mali luore í̠ aba ibunaga mali henedago bolangua hene kama.
JOB 15:11 Yobo-o Ngode Datagaliwabe ibugua í̠naga genda yu kegoni mo dabiabia halu í̠ miniha mo palia ho habelo hamelo ka. Ngode Datagaliwabehanda í̠hondo bi lolebiradagua iname bi hendore langialu galone laga birima. Ani larimago ai mbirale Ngode Datagaliwabehanda í̠hondo bule ngago nagalonedane í̠na turu nahe kebe.
JOB 15:12 Í̠na mogolo hondowa Ngode Datagaliwabehondo keba timbuni halu de darama bialu ibuhondo bi ko tara tara ngaru lalu kego irane aginaga bialu kebe.
JOB 15:14 Wali agali mbiraliha ko nawi mbira kabe. Ngode Datagaliwabenaga deni wali agali bayale tigabi lenego mbirali habehe kabe.
JOB 15:15 Dahuliyali bu karu ti dege bayale kagoyu ainde Ngode Datagaliwabe ibugua dahuliyali marume mana tigabi ndo bialu hearia handa walia hene. Ani bialu mbirale hari daligaha ngaru maru bayale ndo nga.
JOB 15:16 Wali agalime kembobe lebola haragola iba noa hagadagua ina mana ko ngago bua timbuni haga kama. Anigo ina dindi wali agali lene kamago bayale tigabiore ndo ko ngubiore howa habane nabulene kamagoni.
JOB 15:17 Yobo-o i̱na bi o larogo í̠ baya hangu hale harene. I̱na deme mbirale handarugobi bi hale howa lo manda birugobi garea lowa languliya í̠ hale habe.
JOB 15:18 Agali mini gigabiwi karume ti abahanda manda bulenebi mini wulenebi ti lawai heneyaru i̱hondo lawai haya. Tigua i̱ lawai halu howa bi mbirago mo do naheore bibahende i̱ langiai haya.
JOB 15:19 Agali uruni ti tininaga dindiore winidagoria haabo haga heneya. Ti heagoha agali dindi taraha howa bame íbu pehene mbira tinaga mini mo luluya halu mo batara holene mbira ti baba mandagi nahaga hene.
JOB 15:20 I̱na bi ogodagua laro. Mana ko biaga karu tigua wali agali maru karu madane bialu bo hengedope halu mo ko haga biragonaga pani nalu kane dege tini homolebira.
JOB 15:21 Tigua bi gibi mbira mogole hale howa nde ti mo ko holene ko tara tara ibarua lalu minime mogo lowa giho birulebira. Ani biruwa tiha gi holene embeda howa bame hadapaya bu karia pagealime nendebu howa ti minu balu tinaga mbirale maru ngaru mo pagebu yalu polebira.
JOB 15:22 Anidagua biragola aruma holeneme dindi aruma hai hagadagua ko tara tara ngarume mo ko holene anda ibiyada lo manda biaga. Waitigi ti ayu tibu ne gadele yu kagome ti dibulebadalo minime dege manda bialu ti yo pialu polene henge nawidane handaga.
JOB 15:23 Mana ko biaga uruni ti bame ibaga biaabo halu karia ega bodo hariawe ale timbunime ne nolene taya bialu homene tingini nole yagalo yu ibaga. Ani biyago hondowa tigua aruma holeneme dindi bibahende dambi hai hagadagua mo ko holeneme ti abaleore minulene kaware ibirago lo manda biaga.
JOB 15:24 Ti miniha tandaga holenemebi mini burugu timbuni lolenemebi mo gi ho haga. Anidagua biragome tinaga miniha bope halu kini hongohe kagome waitigi mo ko howa baradagua bini haga.
JOB 15:25 Mo ko holene uruni wali agali ko biaga bu karuha anda ibagago irane tinime mitangi bialu ti Ngode Datagaliwabe Hongo Haiheore kago bolangua halu ti daligaore kamabe tobaho howa ibu ba handalu karia genda uruni tiniha anda ibugu biaga.
JOB 15:26 Tigua mine howa doga halu wai biaga ale karulalu wai humbiru yalu Ngode Datagaliwabela wai bule gerai poradagua biaga ka.
JOB 15:27 Ai ti bayale howa dabudabu tara tara ale dewaore mo tago halu wua kagoni.
JOB 15:28 Ani kago mani mo ko halu tinaga anda karu gialapaya bini wialu tano ogoniha wali agali mbira naholebira.
JOB 15:29 Tinaga muni mbirale ngarubi wiaabo nahe bibahende ereba hai holebira.
JOB 15:30 Aruma holeneme dindi bibahende dambi hai haralidagua mo ko holene íbu ngagola ti yo pialu napolebira. Bo daragola ira yuni abalu puyabume yu purogo laralidagua Ngode Datagaliwabenaga keba holene ngagome ti bo ereba helolebira.
JOB 15:31 Tigua mana ko ngago yu kagome mbirale bayale ngaru mo yu anda ibulebirabe toba haga. Ani ndoyago. Ko bulene ogoni ale ngagome mbirale bayale mo yu anda naibaga tigua ko biyagonaga lini ogonibi dolebira.
JOB 15:32 Ani biragome tini mali dewa nahe wene dege kaore agalime ira hongone anda halu kago dibu wahagadagua abale homolebira.
JOB 15:33 Wali agali uruni ti pu mbira mini gerebi lini daga bayale do girigerelo ngagoyu ainde boga nabi wene dedaore ko halu tagalopebe biagagobi ka. Ti ira olibe lini dole pabua balu kagoyu lini bayale nade ko halu tagalo wahai hagagobi dege ka.
JOB 15:34 Wali agali Ngode Datagaliwabehondo mini mbiraore nawiaga bu karu tinaga waneigini aguaneru naholebira. Ani bialu wali agali maru mana tigabi nabiaga hearume ti muni mbiraleru ohowa mo yu hayaru tinaga anda irame dai holebira.
JOB 15:35 Waneigini ai̱ya tombeha biru anda hagadagua mo hondo holenebi ke̱ holenebi ko bulene mana tara tara bu miniha howa anda halu biatagi haga. Tinaga miniha mana ko bulene wu to̱lotagi kagome mana ko tara tara ngaru bialu haga ka, lalu Elibasa ibugua bi ogoni Yobohondo lamini.
JOB 16:1 Yobo ibugua Elibasahondo ladai bialu lalu,
JOB 16:2 Bi ogoniale i̱ hale haabo henego ai lone hale habe mangaore ko. Tígua bi ogoni larimigome i̱ biamogo ndo beremi.
JOB 16:3 Tígua bi nagalone ngago laabo halu kamigo ai lamaro angi buleberemibe. Tígua mini agialego wu howa i̱la lai loa haabo kamibe.
JOB 16:4 Anigo i̱na tíhondo langerogo nde tí i̱ bedogoria biralu i̱ nde tí kamigoria kole nde áyu tígua i̱hondo bialu kamidagua dege i̱na tíhondo bialu kole. I̱na tí daraho kogo mo walia halu bi dewa lalu kole. Tíha mo ko holene anda íbu winidagola mogolo hendedogoni lowa walia halu i̱na ma bonge lalu bi laga bidole.
JOB 16:5 I̱naga ne harigaha tí mo hongo holene bi lalubi tandaga nalu bedemigo emene ibira helonaga bi lalubi bi dewaore ledole. Ainde i̱na anidagua bialu haruyagua nde ogonidagua berogome tí biamogo agua bilodabe.
JOB 16:6 Anigo ainde i̱nime ogodagua manda bido. I̱na bi lalu biraruyaguabi nale waharuyaguabi uruniha galone mbira nawi dege. Uruni mbira berogola i̱ biamogo bialu tandaga bidago ereba naholebira.
JOB 16:7 Ngode Datagaliwabe-o heneneore í̠na i̱naga hongo bo pirilape hai harigoni. Ani bialu í̠na i̱naga waneigini homai helarigoni.
JOB 16:8 Í̠na i̱la waitigi howa mo obiore helalu i̱naga tingini yólalu kuni dege kogoni. Ani bidago agali bu karume i̱ de hondowa i̱na ko mbira birugola pani ngialu kebe tobaho ka.
JOB 16:9 Ngode Datagaliwabe ibugua i̱ handabe manga howa i̱la waitigi haya. Ibugua i̱hondo keba timbuni howa biango dudume nogo tiaru balu neme no didabaga biagadagua i̱ mo ko halu i̱naga tingini bo budabaga binigo ngogoni.
JOB 16:10 Agali marume i̱ mo ko holenaga i̱ bedogoria ho mabu bialu tigua i̱ hondo oba howa mege bialu tinaga gi habeme i̱naga denguini balu ka.
JOB 16:11 Ngode Datagaliwabehanda agali mana ko biaga hearunaga giha i̱ minu ya haya.
JOB 16:12 Bamba nde i̱ bayaleore hewaria Ngode Datagaliwabehanda ibuwa i̱ mani yuwa bayagola ai bameore homo wahene tungulo mule ngogoni. Ibugua i̱ mo ira lago ale mbira heledagola
JOB 16:13 ami agalirume ba ba lalu timume i̱ duduraga howa balu kagoni. Ibugua i̱naga tombe dabame poda haealape helayagola tini dindini odopaya bida. Ngode Datagaliwabehanda i̱ nde dara nahe kagoni ndobe.
JOB 16:14 Ami agalime waitigi handabe manga timbuniore halu wai hongo howa bialu baabo hagadagua Ngode Datagaliwabehanda i̱ hagira bialu hongo howa i̱la wai bialu ba dege bialu haabo ka.
JOB 16:15 Bamba nde i̱ agali mini lene mbira harugo ainde áyu i̱ yagibano howa taga pani nalu dindi abaluni bedo. Ani biruwa i̱naga yári aga bayaleru golo wahalu dara howa aga karulaganenaga ngaru mo karulo bedogoni.
JOB 16:16 Dugu dege bialu hewagola ainde i̱naga de darama bialu to howa i̱naga dengui arumahe koore bedogoni.
JOB 16:17 I̱ha ko bini mbira nawiore kogoyu genda ogoni i̱ha bameore íbu nga. I̱na mendeali kago mo ko holenaga mbirale mbira nabi henego ko. Ani bialu Ngode Datagaliwabehondo bi lalu howa i̱naga bu miniha ko mbira do nabi howa ibunaga deni tigabiore halu bi lalu henego ko.
JOB 16:18 Dindi-o i̱na bi larogo hale habe. I̱ homaragola i̱naga darama odo paya birago í̠na darama ogoni hora hadambi nahabe. Darama o ngagome i̱hondo ko biniru Ngode Datagaliwabe lamialu mo tiga bulenaga olelo ngelabe.
JOB 16:19 Anigo áyu ogoni mbirali i̱naga bi lahaga dahuliya andagaha ka. I̱ ko mbira nabi kogo ibu manda bu ka. Ani manda buwa ibugua i̱ manani helalu i̱naga bi hongo howa laharagola wayali holebero.
JOB 16:20 I̱naga nenege bu karume i̱ hame nale howa mo nagalone haga ka. Anigo i̱na Ngode Datagaliwabehondo bi lalu dugu biaabo haruli.
JOB 16:21 Agalime ibunaga nenege kago biamogo biagadagua i̱naga bi lahaga biagome i̱ Ngode Datagaliwabela bi lotiga buliya i̱ biamogo bilo hamelo ko.
JOB 16:22 Irane i̱ dindi ogoriani holene horo emene tubagi mali mbirabe be kirabe tobane ngagoni. Anigo nde i̱ homene piaga hariga ngagoha poleberogo dindi ogoria i̱ lone dai bulene nawulebira manda bido.
JOB 17:1 I̱naga hongo piai haruago i̱ homolene kaware hapara haragoni. Ai homalime i̱ ibilonaga maliaho nga.
JOB 17:2 Agali maru tigua i̱ ho mabu bu howa mege bialu karia hendedo.
JOB 17:3 Ngode Datagaliwabe-o i̱na í̠la godi lalu bolangua habe nahe kogo. Mbirali mbira dombegua howa i̱ha ko mbira nawida lalu i̱naga henge muwa bi lahelo helolene karulape. Anigo agali mbira ogonidagua bia holene naheda. Anidago ai í̠ni degeme i̱naga bi laholene agali ogoni haradagua habelo hameledo.
JOB 17:4 I̱naga nenege o karume i̱ biamogo bibe nahe kago irane í̠nime agali uruninaga mini bayale gigabi wiaru mo wahai harigola tigua i̱ bope holene dege mandabu ka. Anidagua bini kago í̠na ti bolangua nahelabe.
JOB 17:5 Ngode Datagaliwabe-o bamba bi mbira lagane ngago ogo, Mbiralime muni mbirale ngaru hame lowa ibu nenege kago bameore manani haru pu helayagua agali ogonibi ibu waneigini bu karubi tigua ko bibahende agali o biagome biyagonaga pani nolebira, lagane ngago manda bibe.
JOB 17:6 Áyu Ngode Datagaliwabe ibugua genda ogoni i̱ mo ngidago hondowa wali agali bu karume i̱naga denguiha hamiaga toloba halu kagoni ndobe. Ti bibahendeme i̱hondo mege bialu lalu, Ai Yobohanda mana ko timbuniore bu heneyagonaga pani nalu kagonida, laga bialu ka.
JOB 17:7 I̱naga bu miniha genda timbuni howa dugu biaabo halu kogome i̱naga de to halu mbirale ngaru handabe nahe kogoni ndobe. Ani bialu i̱naga tinginibi obu wahalu kuni hangu bedogoni.
JOB 17:8 Wali agali mini bayalewi karume i̱ha bidago hondowa ti mogo lowa lalu, Ibu Ngode Datagaliwabe mitangi nabiaga ka, laga.
JOB 17:9 Anigo ainde maru mana bayale tigabi bialu haga karu tigua mana ogoni wanaholebira. Tigua mana tigabi dege hongo howa bialu haabo holebirago waha.
JOB 17:10 Ai bi lone ladaba. Ani laramigo i̱na hale howa tí bibahende mbiraoreli hangubi mbira mini gigabi wulenebi manda timbunibi nawi degedane hondolebero.
JOB 17:11 I̱ dindi ogoria holene abale ereba haragonida. Mbirale i̱na bule lowa hame timbuni lo wirugo damene ai nabibehe ko.
JOB 17:12 I̱ arumaha bedogola ai i̱naga nenege bedarume lalu, Ani ndo í̠ wá kagoha bedegoni, laga ka. Tigua lalu, Wá holene tagira ibulebirago í̠ genda nahabe, laga. Ani laragola i̱na handalu koria aruma dege ngane hendedo.
JOB 17:13 Ainde homenerunaga dindiha hangu polene maliaho kogo dindi ogoni i̱naga anda holebira. I̱ dindi ogoniha padogola arumame i̱ bu dambi holebira.
JOB 17:14 I̱na homalihondo i̱ aba lolebero. Ngoe bomborume i̱naga tingini nalu bedaru ti i̱ ai̱ya mbaliniru lolebero.
JOB 17:15 Ani loleberogo ai genda tandaga bu ngaruni ereba halu mani i̱ bayale holene mbira wiarua lo manda nabi kogo i̱ aginaga mini dunubiaho holeberobe. I̱ mani bayale holebere, lalu aiwa langulebirabe.
JOB 17:16 I̱na handalu koria i̱ lone bayale ho dai bulenaga mini dunubia ho holene homenerunaga andagaha pu kogoria wulubadabe, lalu Yobohanda lene.
JOB 18:1 Yobohanda bi lai hayagola agali Suha dindiha howa ibini Bilidada ibugua lalu,
JOB 18:2 Yobo í̠na bi nale ne hariga ndibulo angi birulebe. Í̠na minime mitangi ala buwa bi lariyagua nde iname í̠ baba bi loleberema.
JOB 18:3 Ina manda nawi nogo bulumaga aleda lo manda berego agi.
JOB 18:4 Í̠naga miniha keba holene ngelo bedegome í̠ni mo ko haregoni ndobe. Yobo í̠na agua manda bide. Í̠na manda bu handalu keria Ngode Datagaliwabe ibugua ibunaga mana biaga ngago wahalu í̠na hameledego hangu bilo hameledebe. Ibugua mbirali ko biragonaga pani nelo mialu genda mo miaga ngago ibunaga mana ogoni mo aribia naholebira. Ibugua mbirale bibahende wabiai howa dindini heledaruni mo wahalu dindi dege ngelo karulapedabe. Ibugua dindi hari wedaru he̱la amu howa dindi hangu ngelolene ngabe. Anidagua nabulebira ndobe.
JOB 18:5 Agali ko biaga karu ti ira hale lamu hundia hagadagua Ngode Datagaliwabehanda uruni ti mo hundia hai holebira. Ti lone nadolebira.
JOB 18:6 Anidagua biragola maru karume ko biaga uruni andagaha hale lamu dowa wá ho ngaria nahondolebira.
JOB 18:7 Agali ko biaga uruniale karume tini ala hongo howa ibaga bu hayago ai áyu genda yu halu ma podope halu hendeore ibaga bu hagaya. Tigua agali mende kago ko bilonaga lo manda bu hayagome tiniha dai bialu tini mo ko hagaya.
JOB 18:8 Agali ko biaga urunime uliha niao̱ wa ngagoria gabua minagadagua tigua ko biragome tini minaga.
JOB 18:9 Gono ngagoha nogo egaru dedaligobi agali ko biaga uruni tinaga ge do wiaabo haga.
JOB 18:10 Ti hariga poragoha agalime ega yari ge gono ngagoha do ngaligobi wulebira.
JOB 18:11 Mbirale mo gi holene tara tara ti ibagabu kagoha ibai halu talima ibaga biaga.
JOB 18:12 Bamba agali ko biagaru ti homogo karulape henego áyu tiha tubagi hai halu yagibano ka. Ai ko holeneme ti poragoha mo ko hole manda manda bida.
JOB 18:13 Homolenenaga warago nahendene ko tara mbira agali ko uruni tiha anda ibalu tinaga gi ge tinginiru mo ko halu homelolebira.
JOB 18:14 Agali ko biaga ibugua manda bialu ibunaga anda munirume ibu holene mo bayale hene holeberobe tobaho karia dege ibu homolebira. Ibu homenerunaga andaha wali agali mo homa haga karia puwa ogoni ibu baba holebira.
JOB 18:15 Ibu ani homedagola mani ibu waneigini damenerubi ibu aria lenego mbira howa ibu andaga ogoniha napaluebira. Anda tabuanda karia wali agali maru bu karu tigua ibalu anda ogoniha ngubidagola ege to̱le̱ dambini pauda ale mini saloba ngagome anda ogoni ngubirago mo ereba helonaga delolebira.
JOB 18:16 Agali ko biaga bu karuni ira piniha manda biragola yuni gilope halu gau lagadagua ti homai holebira.
JOB 18:17 Ani homaragola ti ala mini lene henego mani nde wali agali bu karume ti mitangi nahe embedaho waholebira.
JOB 18:18 Ti homa nabi dindini heangi nime wá hayagoha heneya. Anigo tiha homa anda ibirangi ti aruma kagoha warape holebira.
JOB 18:19 Ti biragola ti aria lenego mbira waneiginiyaguabi ti aguaneyaguabi mbira nahe bibahende homai holebira.
JOB 18:20 Anidagua bidagola wali agali ni tagira ibiragohayagibi ni paliragohayagibi bibahende karume ogonidagua biya larago hale howa ti mogolai halu gi timbuni ho holebira.
JOB 18:21 Wali agali Ngode Datagaliwabehondo mini mbiraore nawi howa yu tiga nabiaga karu tiha mo ko holene uruni ale anda ibugu bulebira, lalu Bilidadahanda Yobohondo lene.
JOB 19:1 Bilidada ibugua bi lai heagola Yobohanda ogodagua ladai bini.
JOB 19:2 Tígua bi laramirunime i̱ biamogo nabi howa i̱ha tandaga mo ngirimigo angi lamaro buleberamibe.
JOB 19:3 Ainde tígua i̱ warape halu mo ko dewa harimigo tíni taga nabidabe.
JOB 19:4 Ainde Ngode Datagaliwabenaga deni ko mbira i̱na bu hewagua nde tínaga ndogo i̱ninaga koyane ndodabe.
JOB 19:5 Tígua handalu kamiria i̱ agali ko halu tíni bayale haruabe. Genda ni yu koruni hondowa ai i̱ agali ko kagoni lowa tígua i̱ mana laramibe.
JOB 19:6 Anigo i̱na ko mbira nabiore henego o kogoni ndo laruyagoda. Genda uruni Ngode Datagaliwabehanda ibunaga hameme ibiledagoni. I̱ áyu ibuninaga gonoha do wiwaria hadedagoni.
JOB 19:7 Ainde Ngode Datagaliwabehanda i̱ mo ko halu baore bidagoni. Ani biragola i̱na nde i̱ nabe wahalu waha lowa ibuni olalu kogoni. Ani larogola ibugua mana tigabi bialu i̱na larogoni hale howa ladai nabi ka.
JOB 19:8 Ibugua i̱ polenegoha pabe helai kagola ai i̱ polene diri nahende kogoni. Hariga wiaruni aruma holeneme dambi hai heleagola hariga handabe naheore kogoni.
JOB 19:9 Ibugua i̱naga mini mo ko heagola ainde wali agali bu karunime i̱ agali ko biaga kalo manda bidagoni.
JOB 19:10 Agalime anda mbira gialabaga biagadagua ibugua i̱ mo gialabagabu wa kagoni. Ibugua i̱ bayale holiya biamogo bulubadalo manda bu harugo. Ainde mini ogoni wirudaruni gialabaga bu wa kagoni.
JOB 19:11 Ngode Datagaliwabehanda i̱hondo keba halu ibunaga waitigihondo bulene wiadagua i̱hondo bialu kagoni.
JOB 19:12 Ibunaga wai biaga ami agaliru i̱ andagaha hariga bama anda ibuwa abale ho mabu bialu i̱ minu bayagoni.
JOB 19:13 Ngode Datagaliwabehanda i̱ hamenerume i̱ yu wahalu kaundiaha heleda. I̱naga nenegerume i̱ embeda haya. I̱naga deni i̱ dindi tarali hene mbaule haya.
JOB 19:14 I̱ninaga darama mandagiorerunibi nenegeore henerubi bibahendeme i̱ yu wahalu piai haya.
JOB 19:15 Agali maru abale i̱ andaga ibuwa palu hagarume áyu i̱ mo embeda haya. Wali i̱naga biabe bia halu biragarume i̱ agali tara handale halu piya.
JOB 19:16 Agali i̱naga biabe biahaga hearu olalu hewaria mbiralime ya lalu i̱ni hewaria naibiya. I̱na bi bayaleore lalu hewariabi tigua i̱ dara halu hondo íbu nabiya.
JOB 19:17 Bi lole ne ha̱ larogola ne harigaha howa ngu tagira ibirago handalu wali i̱ni one bedagome i̱ bedogoria kaware naibi ohaya. I̱ni hameneorerume i̱ ko tara ale mbira hende tingi haya.
JOB 19:18 Waneigini biru hearume i̱ mo ko halu mege biya. I̱ heyalu dindi mbiraha pialu hewaria i̱hondo bi ko laya.
JOB 19:19 I̱niore nenegerume i̱ mangaore haya. Maru i̱na gubalini harulirume i̱ handa tara halu erembira ngialu i̱ warape holene manda biya.
JOB 19:20 Ainde i̱ obi kuni hanguore kogoni. Mo koore helayagome homabehe biru ngogonidago. Ainde i̱ homolene hariga agileme pai haruabe.
JOB 19:21 Wali agali i̱naga nenegeru-o Ngode Datagaliwabe ibuninaga gime i̱ minu bayago. Ainde i̱ dara halu are ladaba.
JOB 19:22 Tíguabi nde Ngode Datagaliwabehanda i̱ mo ko halu biyadagua dege beramibe. Áyu mo koheore bedogoni hendedamigo hondowa nde tínaga bime i̱ bope dege haramigo agi.
JOB 19:23 Ainde i̱naga bi ogo ereba nahe manda biaabo helonaga agali marume mbugaha gilibu wiyagua karulapeda.
JOB 19:24 I̱naga bi ogoni ereba nahelo agalime ege to̱le̱ timbuni ngarunaga nabi tara to̱le̱ podagame bi ogoni wiaabo helonaga gilibu wiyagua nde karulapeore ogoni.
JOB 19:25 Anigo ai Mbirali i̱hayagi howa tigatiga lalu biamogo bulene kalo manda bido. Mani ogoni ibunime bi lotiga buliya biamogo bule ibulebira.
JOB 19:26 I̱naga tingini ogo ibu togo biyaguabi i̱na Ngode Datagaliwabe de handaore bulebero.
JOB 19:27 Wali agali maru tigua hangume dege nahondolebira. I̱ninaga deoreme Ngode Datagaliwabe handaore bulebero. Ibuore hondoame homo tongolo handalu kogoni.
JOB 19:28 Tígua ogodagua lalu kamigo nde genda ibalu karuni tene Yobo ibunigo ai iname i̱ ko biyagonaga manani dabami̱ya lalu kamigoni.
JOB 19:29 Anigo tíni de handalu dege halimu. Bi urunidagua laramigome Ngode Datagaliwabenaga miniha ka lalu kamiria tíni nde handa dai buligo. Ani biragola wali agali mana ko biaga kamiru Ngode Datagaliwabehanda ibunaga mana tigabi dabaga ngagoria íbu holene winidalo handa walia holeberamiore, lalu Yobohanda ladai bialu lene.
JOB 20:1 Yobohanda bi lai heagola Namali Sobahanda ladai bialu lalu,
JOB 20:2 Yobo-o í̠ hale harene. Í̠na bi larigome i̱ mo keba harigola ainde mini burugulo bedo. Anigo í̠na bi larigonaga abale ladai bero.
JOB 20:3 Í̠na keba bi larigome ina mo taga henego bedema. Anigo i̱na í̠naga bi uruni tigatiga ladai bulene manda bido.
JOB 20:4 Bambaore Ngode Datagaliwabehanda wali agali dindini pigane wabu helayangi howa hama ibalu áyu kamagoria tagira ibidago
JOB 20:5 agali mana ko biaga kago ibu turu howa miniha dungulo holene henge emene tubagi dege wiagago í̠ manda bidegoni ndobe.
JOB 20:6 Agali ko biaga ogonibi kagome ibu abale timbuni halu wali agali marunaga deni mini lene daliga haga. Hari daligaore hari beralibaha bolanguahe kaligobi haga.
JOB 20:7 Anigo agali o biago ibuni ti to ngago ngu bialu ereba hagagobi mo ko halu erebaore holebira. Ani ereba kagola maru ibu mandabi karume agali ogoriani haraligo agua biya. Áyu ibu ani kabe lolebira.
JOB 20:8 Agali ko biaga ogonibi kago ibu mbiraga emaga hendenego ereba hagadagua ibu ereba halu wali agali karume ibunaga dengui lone nahondolebira.
JOB 20:9 Ibu daluni ala hearia hendenego ai nahe lone nahondolebiraore.
JOB 20:10 Anigo agali ogoninaga waneiginiru ti aba ibugua yagibano karu mo hondo howa tinaga mbiraleru page bigi bini biaru yadai bule yagibano uruni ti karia puwa dara halu biamogo bia lama polebira.
JOB 20:11 Ibu igiri wene daliahe kaore ibunaga hongo biba halu abale homalu dindi abalu ale holebira.
JOB 20:12 Agali mana ko biaga kagome ko uruni hame timbuni lowa wali agalime tomo dendebiru mbira nalu howa abale mbedogo nabi ne harigaha hayu yu biragadagua mana ko yu haabo hagaya.
JOB 20:14 Anigo mana ko bialu kagome tomo bayale narago mbedogo biragola tomo ogoni ko tomia ale heba naragola tinaga tiniha howa mo ko haralidagua mana ko biragome kaubialu ti mo ko holebira.
JOB 20:15 Agali ko biaga kago ibugua muni dabudaburu dewaore page minigo wu karia Ngode Datagaliwabehanda agali ogoni tomo dewa no karia tombeha balua howa magu taguiralidagua mbirale tara tara wu karu mo wahai holebira.
JOB 20:16 Agali ogoniale kago nogombi tomia pale ngagome mbirali hayaragola homaralidagua tinaga mbirale ilo mu bu ngarume ibuni bo waholebira.
JOB 20:17 Ibugua mbirale uruni mo mogobu wialu howa ibuni turu howa bayale holobobe tobaho heaore homalu turu holene ogonibi nahondolebira.
JOB 20:18 Ibugua muni mbiraleru erekui biabe bialu mo mogobu wialu hayaru ai mbirale uruni mo ngelowa turuho ha nabulebirago irane Ngode Datagaliwabehanda mbirale uruni agali mendeme mo yu pelolebira.
JOB 20:19 Agali ko ogoni ibugua yagibano bu hearu dara nahe howa ti hengedape halu tihondo mana ko bialu o tara tara howa ke̱ halubi tinaga anda bu hearu ti karulo haga biya.
JOB 20:20 Horo bibahendengi agali ogonibime mbirale mendealinaga ngago de dimagoli hama ibaga biaabo halu bame ha nabi hame dege timbuni lowa taya biaabo haga. Anidagua bialu kagola Ngode Datagaliwabehanda ti mbirale uruni yu helo wa naholebira ndobe.
JOB 20:21 Wali agalime tomo bayaleru ngagola abale nai hagadagua agali ko ogonime mbirale dimagoli harago mo ya dege bialu mani mo yulene nawulebira. Anigo ibunaga holene ogoni tigi mbira hanguni halu ereba holebira.
JOB 20:22 Ibugua mbirale bayale dewa uruni mo wu kangi genda timbuni ibuha anda ibiragola ibuni dambi halu bope holebira.
JOB 20:23 Agali ogoni ibugua mbirale dewaore mo wulene hamelo kaore Ngode Datagaliwabehanda ibu mbirale mulubadaruni keba timbuni ho howa genda tandaga tara tara ngaru mo ya haragola ibuha wu to̱lo holebira.
JOB 20:24 Ibugua waitigirume wai biaga ayu tibu ne gadele aeaneme wabini mo yalu ibira handala ibu dibulilono ibida pialu karia timu boronosime wabini yayagome bade halu nogoba holebira.
JOB 20:25 Ani nogoba haragola timume erembirahayagi dene ngarale bolatagi kagola dugulebira. Ani duguwa handalu karia agali ko biago ibunaga darama timu biagoria kago hondowa ibuni gi timbuni holebira.
JOB 20:26 Ibunaga muni dabudaburu bayale mo mogobu wiyaruni bibahende mo ko hai holebira. Agali ko biaga biagobi ibu waneigini damene bu karubi bibahende ira dalude timbuni dedagoria dai helolebira.
JOB 20:27 Ai hari daligame agali ogoninaga ko ngaru bibahende ha pani haragola dindi ngagome agali biago manani howa ko birigoni lalu latagi helolebira.
JOB 20:28 Ngode Datagaliwabehanda ibu baba keba timbuni haragome iba li timbuni ibalu mbirale mbira yu wa nahe yu piai hagadagua ibunaga muni mbirale wiyaru mbira ibira nahe hilu yalu piai helolebira.
JOB 20:29 Ngode Datagaliwabehanda agali ko biaga karunaga pani ogonidagua mule lowa manda manda bu kago ti kagoha ibilalu bo wahai holebira, lalu Sobahanda Yobohondo lene.
JOB 21:1 Yobohanda Sobahondo ladai bialu lalu,
JOB 21:2 Tígua i̱na bi larogo baya hangu hale hadaba. Ai tígua ogonidagua birimiyagua i̱naga bu miniha mo palia holeberemi.
JOB 21:3 I̱na bi ala loliya hondo bira. I̱na bi lai kogola Soba í̠na i̱ mege bialu bi loa biyagua nde ani labelo.
JOB 21:4 I̱na bi o larogo agalihondo ndo laro. I̱na Ngode Datagaliwabehondo bi lalu kogola ai ibugua i̱hondo bi ladai nabi kagome i̱naga miniha tandaga timbuni biragola kogoni.
JOB 21:5 Tígua i̱ handayaho biruwa tínaga gi hayalu mogolo biralimu.
JOB 21:6 Mbirale ko gendabi damene i̱ha ibiyaru mitangi bu dai bialu koria i̱ni mogo lowa tingini duru laruli.
JOB 21:7 Agali ko biaga karu Ngode Datagaliwabehanda ti dindini lu halu hodagua helagayago aginaga helagabe. Ani helalu tini mo timbu halu mbirale muni dewa mialu mo homogo helo helagadago irane agibe.
JOB 21:8 Agali uruni tinaga waneiginibi aguanebi dewaore bu karu ibu kane dege ti anda hai harago hendelo helolebira.
JOB 21:9 Ngode Datagaliwabehanda agali ko uruni ti kagoria genda mbira naibilaga kagoni. Ti one waneiginibi bayale dege halu tiha gi holene mbira nawiagaya.
JOB 21:10 Tinaga nogo bulumaga wangabe karume angibuni karu hende laragola urunime igini wiraru mbira ko nahe bayale dege hono yu haga ka.
JOB 21:11 Agali uruni tinaga waneigini dewaore karume nogo sibi igini pora bialu gini biagadagua turu hagahaga bialu ka.
JOB 21:12 Agali maru ngida bagaru tabage bagaru pilipe lagaru tigua mbirale uruni biragola waneigini uruni tigua turu howa mali lialu iba ganabi lalu haga ka.
JOB 21:13 Agali ko uruni ti dindini holene bayale dege wiaabo hagaya. Ti homarangi tini genda tandagabi mbira nahe bayale paliagadagua homalu homenerunaga andagaha hole piagaya.
JOB 21:14 Tigua Ngode Datagaliwabehondo lamialu lalu, Iname í̠ talima ibule ndo kamago í̠ ina helalu pobe, laga ka.
JOB 21:15 Tigua la dege bialu lalu, Ngode Datagaliwabe Hongo Haiheore ka layago iname ibunaga biabe biahaga holoma̱ya ibu aigo kabe. Iname ibuhondo bi larimayagua nde mbirale ibuha howa ibini bayale agile mo yu holeberemabe.
JOB 21:16 Agali ko biaga uruni tinaga hongoni howa mbirale bayale ngaru ngelo hagago uruni tinime erekui biabe bialu mini ndo yu haga. Ani biaga kago manda bialu i̱na tinaga bi hale howa talialu nabulebero.
JOB 21:17 Ngode Datagaliwabehanda agali ko biaga karu halu dewa balu homelaga ndo bada. Ani bialu mo ko holene ngarubi tiha dewa naibilaga. Ibugua agali ko biagarume ko biyagonaga keba howa tiha genda dewa mo miaabo nahaga ka.
JOB 21:18 Datani ko gaule ngaru puyabu ibiragome hilo yu piagadagua Ngode Datagaliwabehanda agali ko uruni pani miaabo nahagaya.
JOB 21:19 Tígua bi ogodagua laga kami, Ngode Datagaliwabehanda agali ko biaga bu karume ko biyarunaga pani tinaga waneiginime na aribia helaga, laramili. Anigo i̱na mandabu handalu koria anidagua bulenego tiga nabidago Ngode Datagaliwabe ibunime agali ko biaga karu tini ko biyagonaga pani nolene mo ngiyadalo manda bilo pani tiniore nelo mulene nga manda bido.
JOB 21:20 Tinimeore ko biragola Ngode Datagaliwabe Hongo Haiheore kagonaga keba holene mo walia hayadalo manda bilo pani tini nelo mulene nga.
JOB 21:21 Agali uruni ti dindini holene ha maro birangi homalu tinaga one waneigini helalu homayago agua haruabe lo manda bulebirabe.
JOB 21:22 Dahuliyaliru ti nde ina agali kama ale ndo kagoyu Ngode Datagaliwabehanda uruni tibi mo tale biaga ka. Anidagua biaga kagodago ainde iname ibuhondo mbirale bayale ogo ale bibe lalu lawai habehe mbirali ai kabe.
JOB 21:23 Wali agali maru ti dindini holene bayaleoreni hearia handaru. Tiha genda tandaga holeneru mbira anda naibi haabo halu tinginibi ko nahe homolene tuore hayagola homame ngola haga biya.
JOB 21:25 Wali agali maru nde ti dindini holene koore haga biyaria handaru. Wali agali uruni ale heagome tiha turu holene nawi tandaga gendala haabo halu homame ngola haga biya.
JOB 21:26 Anigo wali agali bibahendeore homagane howa homaliha palialu ti ogobi dege dege haga. Tinaga tingini ngagoria himi ngoerume biru ngoai haga.
JOB 21:27 Ai tínaga mini ngamigo i̱ manda biaiho ko. Tígua i̱ bope holene dege mandabu bedemi.
JOB 21:28 Tígua bi laramigo mbirale mo ko holene ngago damene agali timbuni ko biaga ibuha ibalu ibu damene bu kagoha mo ko halu maru karume lone handa nabi ereba hai holebira, larimi.
JOB 21:29 Anigo tígua agali dindi mbira mbirani pu íbu biraruhondo lalu agali ko biaga karu tiha agi biagabe lalu bi hale nahe kami bada.
JOB 21:30 Uruni tigua tí langialu, Ngode Datagaliwabehanda keba halu wali agali dindi mbira mbirani bu karu pani nelo mirangi ibugua wali agali ko biaga karu pani mialu bo wanahe ti bayale helo wahaga, lalu langigi bulebira.
JOB 21:31 Anidagua biaga kagodago ai agali ko biaga kagohondo, Tí ko birimi, lowa dabaki bulene ai kabe. Tigua ko birimi lolenebi ko biyagonaga pani nelo mulenebi mbirali naholebira.
JOB 21:32 Agali ko biaga uruni ti homarangi wali agali dewaore íbu ngoai howa homenenaga tingini homaliha mo yu puwa hora haga. Ani bialu agali marume tinaga homali baya hangu handayaho helagaya. Ani bidagola agali ko uruni ti tinaga homaliha ema nabi palu wiagaya.
JOB 21:34 Mbirale uruni biaga wiago mitangi berogola tí agali bi nagalone dewa laga heago ale howa i̱hondo ke̱ halu kamida lo manda bido. Tígua mandabu handalu kamiria bi ogoni aleme i̱naga miniha mo hongo holobadalo manda bidemibe. Daraba bi ogonime i̱ emeneorebi mbira biamogo nabiore ndobe, lalu Yobohanda lene.
JOB 22:1 Yobohanda bi lai heagola Temana tanoali Elibasahanda Yobohondo lalu,
JOB 22:2 Ina agali damene kamarume Ngode Datagaliwabe kago mbirale mbira biamogo bibehe kamabe. Ani nabibehe kama. Agali mini gigabiwi karumebi nabibehe dege ka. Agali tini hangunaga biamogo bigi bibehe kagoni.
JOB 22:3 Í̠na mandabu handalu keria í̠naga mana tigabiore bialu kegome ainde Ngode Datagaliwabe ibunaga biabe bilo biamogo bia holebirabe. Ani bialu í̠na mana bayale beregomebi Ngode Datagaliwabe ibu bayale helonaga biamogo biagabe. Ani ndoyago.
JOB 22:4 Í̠na Ngode Datagaliwabe Hongo Haiheore kagonaga andaneha howa ibu mitangi bialu lotu lalu haga keyagua í̠na mandabu handalu keria ani bialu kegonaga ibugua í̠ manani helowa mo tiga bulebirabe. Anidagua nabulebira.
JOB 22:5 Yobo-o í̠na ko dewaore bialu haridagome í̠ha ko ngelo bedegoni ndobe. Anidagua biridagome Ngode Datagaliwabehanda í̠ manani heledagoni.
JOB 22:6 Í̠na mana ogodagua birida. Í̠naga nenege hearume mbirale wiaru dano hole ngi layagola dano helo muwa mani dano hanga lalu tinaga mbirale mbira yu howa tinihondo miadai nabi yu haabo harida. Marume tinaga aga golo ngiyagola í̠na tinaga aga dano haridago yadai nabi yu haabo harigome tinaga tingini dagare ho helarigoni.
JOB 22:7 Mbirali iba noa howa kembobe lebolaho heago hondowa iba nelo hambu mia nabirida. Mendeali garibilo heago hondowa tomo nelo namirida.
JOB 22:8 Í̠ agali timbuni mini lene howa mbirale bibahende í̠ni hameledego ale bulene karulape manda birilida. Agali mendenaga dindi wiaru í̠na bame karulo harida.
JOB 22:9 Agali homeneru one dalo berearume ti biamogo bia lama ibiyagola í̠na ti biamogo nabi howa bo pelarida. Waneigini ai̱ya abala homene karubi nde ani dege bialu ti biamogo bulene nahe howa bayale helonaga í̠na biamogo nabi bame helo waharida.
JOB 22:10 Í̠na mana urunidagua bialu harigome ai áyu í̠ minu yania halu mo ko holene abale íbu ho mabu biai halu í̠ mo gi haragoni ndobe.
JOB 22:11 Aruma ale timbunime í̠ bu dambi heagola í̠na mbirale mbira handa amunana bialu handabe nahe bedegoni. Ani bialu iba li timbuni aleme í̠ bu dambi henego bede.
JOB 22:12 Yobo-o í̠na yakundi bu karuni de handadaga halu hari daligaha kago hendedegoni. Ngode Datagaliwabe kago ibu daligaore howa yakundi biaruni handadali howa de handaga ka.
JOB 22:13 Urunime í̠naga mini mo heya haragola í̠na ogodagua laga ke. Ngode Datagaliwabehanda agile dege manda bidabe. Ibu hari daligaoreni ibagabu kagola hari beraliba mindibigome ibu ho ge halu aruma holene ngagomebi dambi halu bidagola ibugua inanaga dengui nahondolebira. Ibugua mana iname beremago de hondowa ko birimago agua hondolebirabe.
JOB 22:15 Anigo Yobo í̠ agua manda bide. Í̠ hariga ko ala tawe agali mana ko biaga hearu ti pene ngagoria lone pole hongo ho kebe.
JOB 22:16 Agali uruni ti dindini lu haludagua nahe heaore dege abale Ngode Datagaliwabehanda tinaga dindi ogoria holene biba helaga biya. Anda mbira iba angeni haparaho kago iba li timbuni hongoheore ibalu anda gialabaga bialu ibame yu piai hagadagua agali uruni mo ko halu bo wahai haya.
JOB 22:17 Agali uruni tigua Ngode Datagaliwabe erembira mialu lalu, Ngode Datagaliwabe Hongo Haiheore kago ibugua inahondo agi bulubadabe, lene.
JOB 22:18 Anigo tigua Ngode Datagaliwabe ibunime mbirale bayale wiaru yu helaga biyago manda nabiya. Anidagua biyagonaga i̱na agali ko uruninaga bi larago hale nahe wahalu tinaga mini ngago i̱ talia nabulebero.
JOB 22:19 Agali ko nabiaga tigabi karu tigua Ngode Datagaliwabehanda agali ko biaga uruni pani mirago hondowa ti turuho haga. Mbirali ibuha ko bini mbira nawi kagome ko biaga karu hondo oba halu mege biagaya.
JOB 22:20 Tigua mege bialu lalu, Waitigi uruni mo ko hai haya. Ani bialu tinaga mbirale bayale wiaru damene bibahende iraha dai hayagoni ndobe, laga ka.
JOB 22:21 Anigo Yobo-o hale habe. Ai áyu Ngode Datagaliwabela bi mo tiga bialu lone mini mo mbiraore habe. Anidagua biriyagua nde ibugua í̠ lone biamogo biragola bayale holebere.
JOB 22:22 Ibugua í̠hondo lawai holebirago bayuwa mo yalu ibunaga bi langirago í̠naga miniha yu tiga bibe.
JOB 22:23 Anigo í̠na genda yu keruni wahalu mini mo dindi halu Ngode Datagaliwabe Hongo Haiheore kagoha dai biriyagua nde ibugua í̠naga holene lone mo bayale helolebira. Ani bialu mana ko í̠ni andaga bialu haridaru wahai halu ko ngagoria nahe wandialu habe.
JOB 22:24 Í̠naga ngolo bayale mo ngeru dindi ko ngagoha mo waholene nga.
JOB 22:25 Ani bialu Ngode Datagaliwabe ibuni ngolo siliba bayale uruni wiyagoria ho aribia helo helabe.
JOB 22:26 Í̠na ogonidagua bialu Ngode Datagaliwabe Hongo Haiheore kagohondo mini mbiraore wia daibu hariyagua nde ibugua í̠hondo bayale biragola í̠ha mo palia holene karulo holebere.
JOB 22:27 Í̠na Ngode Datagaliwabehondo bi laregola ibugua í̠naga bi larego hale halu mbirale ngi larego ngulebira. Ani biragola í̠na mbirale buleore lalu Ngode Datagaliwabehondo bi lo wirigo turu howa biai holebere.
JOB 22:28 Ani bialu í̠na mbirale mbira bule lalu miniha magoyu harengi Ngode Datagaliwabe ibugua bule manda bu keru mo bayale holebira. Ani biragola í̠ hariga poregoha wá kagoria pialu puabo holebere.
JOB 22:29 Ngode Datagaliwabehanda mbirali ibuni mo yaraga halu kago bope halu mendeali ibuni mo dindiha haga kago pele mialu haru dai bulebira.
JOB 22:30 Ibunaga deni í̠ha ko mbira para nahe mana tigabi bialu kego hondowa ibugua wali agali ko biaga karu dara howa pele mialu haru dai biagadagua í̠bi ko mbira nabi keyagua í̠ mo wialu haru dai bulebira, lalu, Elibasahanda lene.
JOB 23:1 Yobohanda Elibasahondo ladai bialu lalu,
JOB 23:2 Hale hadaba. Áyubi nde i̱na miniha genda yu haabo kogonaga Ngode Datagaliwabela bi dewa lalu haabo ko. I̱na dugu bialu kogo wahole manda bialu koria habe naheore haragoni.
JOB 23:3 I̱na Ngode Datagaliwabe ibu agoha kabe hondole hamelo kogoni. Ibuni godi hale hagani kalo manda bidole nde áyu ogoni abale ibu wanakuini pu kole.
JOB 23:4 Ani pu howa agalime godi hale haga deni howa bi lagadagua genda yu korunaga bi i̱ni biamogo bilonaga latagi kole.
JOB 23:5 I̱na bi ani ledole ibugua i̱naga bi ladai bialu agi larabe hondowa ibunaga miniha ogoale wiarua lo manda bidole.
JOB 23:6 Tígua manda bialu kamiria Ngode Datagaliwabehanda i̱la waitigi halu ibunaga hongo gibiorehe kagome i̱ bo hengedape holebirabe toba kamibe. Anidagua nabulebira manda bido. Ibugua i̱na bi larogola hale mia howa bayuwa hale holebira.
JOB 23:7 I̱ agali tigabi howa ibunaga deni godi lole pu kole i̱ ibula bi ladene bialu ledole. Ani bialu i̱naga bi hale howa ibugua tigatiga latagi halu i̱ha ko bini mbira nawida lolebira. Ani bialu i̱la godi lolene winigo bibaore holebira.
JOB 23:8 Ngode Datagaliwabe ibu ni tagira ibiragohayagi kabe toba howa hondo pirugola ogoniha ibu naheya. Ni paliragohayagi kabe toba howa hai bialu hewaria ogonihabi ibu nahe degeya.
JOB 23:9 Ngode Datagaliwabehanda ibunaga biabe dindi uyurahayagibi dindi abene unurahayagibi bialu hagago ai urunihabi hearia i̱ nahende dege.
JOB 23:10 Anigo Ngode Datagaliwabe ibugua i̱na hariga porogoha bibahende ibu manda biai ka. Ibugua i̱ abidabe hondole ba handayagua nde bayaleore ngolo aledane hondolebira.
JOB 23:11 I̱na hariga tiga tigaore ibuni piaga ngagoriani ibagabu haruli. I̱na hariga ogoni wahalu mendeni pu tara nahe ko.
JOB 23:12 Ibugua bi ledaruni i̱na mbira wanahe bibahende ledadagua taluwa bialu haabo haruli. Ibunaga bi dendebiore tomo dendebi tara tara ngaru bagi hene lowa nga.
JOB 23:13 Anigo Ngode Datagaliwabe ibugua mbirale mbira bule manda biyagua nde aiwa nabibe labehe kabe. Ibugua bule hame ledago biaore bulebira.
JOB 23:14 Ani biaga kago ibugua i̱ha mbirale bule manda manda bu ngago biaiore holebira. Ibu miniha manda tara tara ngaru bibahende iname manda nabibeheore kamagoni.
JOB 23:15 I̱ áyu ibunaga wanakuihayagi howa ibugua mana ogonibi biaga kago manda bialu koria i̱ gi howa i̱naga gubaliniha duru lalu bedo.
JOB 23:16 Ngode Datagaliwabe Hongo Haiheore kago ibugua i̱naga hongo bibahende bo pirilope hayagola i̱ gi timbuni ho kogoni ndobe.
JOB 23:17 Abale i̱ ogonidagua ndo henego ai áyu ibugua aruma holene timbuni i̱ha ibilayagola i̱ mo ko hene ndo. I̱ Ngode Datagaliwabe kago mitangi bialu mogolo kogoni ndobe, lalu Yobohanda lene.
JOB 24:1 Yobohanda laabo halu lalu, Ngode Datagaliwabe Hongo Haiheore kagome wali agali mana ko biaga karu manani howa ko biya lalu dabaki bulene horo pongo nawi kagonida. Ainde wali agali Ngode Datagaliwabehondo mini mbiraore wu karume ibugua ko biaga karu manani abale nahelaga kagonaga irane ti manda nabi ka.
JOB 24:2 Mana ko biaga maru bu karume mendeali kagonaga dindi ti page karulole tubarini ege to̱le̱ berelama pedago emene he̱la amu haga bialu tinaga dindi ogonibe toba helo ani biaga ka. Ani bialu mendealinaga nogo sibi kago hado page bialu tinaga nogo sibi kagoha mandagi biamaga ho helaga.
JOB 24:3 Agali ko biaga urunime waneigini ai̱ya abala homene karunaga nogo dongi kago hado page biaga ka. Ani bialu wali dalo bedarume mbirale dano haragola agali ko biaga urunime wali dalo uruninaga nogo bulumaga kago dano hangaragola yadai bule dano ko lalu wali uruni tini mitangi bu helonaga haru halu piaga.
JOB 24:4 Agali ko biaga urunime wali agali muni mbiraleru burupale karu mo gi haragola tini hameme mbirale mbira bibe nahe haga. Tigua gi timbuni halu agali ko biaga uruni kagoha nahe ti kaundiaha ha bagi haga ka.
JOB 24:5 Wali agali yagibano darabi uruni ti dindi ko wali agali nahaga ngagoha hama piaga. Ani pu howa ti mbirale mbira nolene nawioredagola nogo dongi gabuame tomo nagane aleru hai bima ibagadagua ti waneiginirunaga taya bima ibaga bialu holebira.
JOB 24:6 Tigua mendeali dalu ngagoha pialu tomo ko yu wahene ngaru ilu mogo bima piaga ka. Agali ko biaganaga pu mbira lini daga mini gerebi mabuha lini bogabi dedago agali biabe biahaga karume do yalu piai heagola yagibano uruni ti nde mani íbu aribia howa ko maru yu wahaga bini dedaru do naga.
JOB 24:7 Mbiraga tinaga tingini yi ho paluene mbirale mbira nawidagola bame dagareho paliaga.
JOB 24:8 Ti dindi hari ngagoha pu karia iba dalu ibiragome ti damiaga. Ani biragola tinaga anda mbira naheore bame howa ti hari uruniha egeanda kagoha pialu dalu tu biraga.
JOB 24:9 Agali ko biaga urunime wali dalo bedagoha pialu tinaga waneigini karu gililo yalu puwa tinaga garabaya biabe ale biaga helo haru piaga. Ani bialu wali agali yagibano karuhondo dano helo muwa ogoninaga waneiginiru mani dano hangaragola miadai bule dano ka lalu manda biaabo helonaga manane waneigini ogoni minu yalu piaga.
JOB 24:10 Anigo yagibano uruni ti aga bulene nawiore darabi mbira biraga. Ani biruwa mendeali mabu ngagoha widi gandulo ngago mo mogo bulene biabe hangu bialu howa tini tomo nolene mbira nangiragola garibi timbuniore lo haga.
JOB 24:11 Tigua ira olibe bu karu dombeneha howa olibe lini dambialu ibane weli helo wabiaga. Ani bialu marume gerebi lini dedago dalu waini iba wabule ege to̱le̱ni uli guabini ngagoha do ngelowa pingidelo geme hengedalu haga. Ainde ti ira lini uruni ibane mbira nole ndo biabe hangu bame bialu howa tinaga dendepe lebola ho haga.
JOB 24:12 Tanoha agali ko biaga urunime wali agali mo ko hene hearubi homo wiarunagabi tigua dugu bialu ti biamogo bia lalu Ngode Datagaliwabe olalu ka. Ani olaragola ibugua tinaga genda wu hayadaruni mitangi nabi tinaga bi hale nahaga ka.
JOB 24:13 Ngode Datagaliwabehanda mana hameledago marume bulene hame nalaga. Ti doga halu mana bayale bulene ngago baba waitigi halu bibe manga haga ka. Ti wá holene hariga ngagoria pobe manga howa arumanaga mana ngago hangu bialu haga ka.
JOB 24:14 Egerebagiore ni natagira ibidaha agali ko biaga karume yagibano karu bo wahole tagira piaga. Ani bialu mbiraga mbirale ngaru mo page bule taya bialu haga ka.
JOB 24:15 Agali one bedaru kayu biaga karume ne lelo howa ne laragola ti abale pialu agali mende one baba kayu yu palue piaga. Tigua ani pialu mendealime i̱ abogodalo manda nabilo tinaga dengui minu kabu bialu piaga.
JOB 24:16 Mbiraga pagealime anda ti dalu anda puwa mbirale uruni mo page biaga. Ani bialu horombe tinaga biabe biagadago bulene nakarulapedagola tini andagaha bira do haga ka.
JOB 24:17 Agali maru karume mbiraga ibagabu holene gi hagadagua agali ko biaga urunime ti mbiraga ibaga bialu horombe ibaga bulene gi haga ka. Aruma holeneme ti mo turu haga ka.
JOB 24:18 Agali mana ko biaga karu ti dindini lu naholebira. Iba li abaleore ibalu hilo yalu piai holebira. Tinaga dindi ngago Ngode Datagaliwabehanda ko ha laragola mo ko hai holebira. Ani mo ko hai hene ngagola mbiraoreli hangubi mbira tinaga gerebi mabu ngagoha biabe bule pialu karia nahondolebira.
JOB 24:19 Ni tandagabi dadali harangi dindiguni ngago do iba halu ereba hagadagua dege homeneru dalu ngagoha ko bialu hene homararu ti ogoniha haru pialu pu erebahaga nga.
JOB 24:20 Tinaga tingini ngago himiru ngoe bedaru tinaga tomo nolene dendebi taraore mbira nga. Ani bialu agali uruni mbirali abogo ogoria hene nalolebira. Ti ai̱yaore bedagome embedaho waholebira. Ani bialu mana ko tigua bialu haga ngagobi ereba hai holebira.
JOB 24:21 Anigo i̱na bi ogodagua laro. Agali ko biaga karu tigua wali maru waneigini taba hanabe nahe bedaruhondo mana ko biaga hene. Ani bialu wali dalo agalini homene bedaru dara howa biamogo nabiaga dege hene.
JOB 24:22 Anigo Ngode Datagaliwabehanda ibunaga hongome agali mini lene timbuni karu bope halu homelabehe kagoni. Ibugua ko biaga karu ti dindini lu helo nahelaga ka. Ti homolene nga manda biragola ibugua tinaga holene maro bilaga ka.
JOB 24:23 Agali ko urunime tini lo mitangi bialu lalu, I̱ha genda naibagago i̱ bayale kogoni, laga ka. Ti ani mitangi bu karia Ngode Datagaliwabehanda horo bibahendengi agali urunime mana bialu karuni handayaho haabo haga ka.
JOB 24:24 Ti dindini tigimandi hangu tininaga mini yaraga ho kaore balawaya dedaru abale gaulalu dogolo ibira hagadagua dege ti homalu ereba haga ka. Widi lini bogabi dedagola agalime irane gandulo wiagagobi ka.
JOB 24:25 Ai i̱na bi larogo henene ndoyagua nde i̱ ke̱ howa laregoni lalu aiwa lolebirabe. I̱naga ne harigaha howa bi larogoni bame bi dege larego lalu aiwa mo walia holebirabe, lalu Yobohanda lene.
JOB 25:1 Yobohanda bi lai heagola Suha dindi howa ibini Bilidada ibugua ladai bialu lalu,
JOB 25:2 Ngode Datagaliwabe ibu hongo timbunihe howa ibugua wali agali handame ho haga ka. Wali agali bibahendeme ibu gibiore kago hondowa duru lai haga ka. Anigo ibugua hari daligaha karubi ngarubi bibahende mo palia holene karulo helaga ka.
JOB 25:3 Dahuliya andagaha dahuliyali Ngode Datagaliwabenaga biabe biahaga karu daga labe nahe dewaore ka. Ngode Datagaliwabenaga wá holeneme wali agali karia wá hadali nahaga agoha ngabe.
JOB 25:4 Ani kago ai ina dindi wali agali bu kamarume inane mo bayale halu Ngode Datagaliwabenaga deni dodo mbira nahe bayale agua holedabe.
JOB 25:5 Ibugua ege yakundi karunaga wá holene de hondowa emene ko hangu manda biyagua ainde ina wali agali dindinaga himibi ngoebi ale kamago de hondowa ina nagalone kamane hondolebira ndobe, lalu Bilidadahanda lene.
JOB 26:1 Yobohanda Bilidadahanda bi layago ladai bialu ogodagua lene.
JOB 26:2 Í̠ore nde mbirali hongo nahe kago biamogo biaga agaliore mbirago í̠ henedabe.
JOB 26:3 Ani bialu agali mini mandabi nawi i̱ kogo hondowa í̠na agali mini gigabiwibi manda timbunibibi kegome i̱ biamogo bialu harida. I̱na hale ho berewagola í̠na bi bayale dewaore latagi harigoni ndobe.
JOB 26:4 Í̠na bi bayale uruni latagi habelonaga aiwa lamogo biyadabe. Í̠na i̱ biamogo birigo ainaga dininime mo walia hayabe.
JOB 26:5 Agali homenerunaga dinini ti humbirini andaga dindi andane iba bedagoha ha do hayaguabi tigua Ngode Datagaliwabenaga deni ha do habe nahe. Ti Ngode Datagaliwabenaga deni dege howa ibugua ti de handaya haragola ti gi halu mogo lowa durulalu haga ka.
JOB 26:7 Ngode Datagaliwabehanda hari li kago wabuwa mbirale mbira naheha helene ka. Ani bialu ibugua dindi ogonibi dege wabu ngeleda. Dindi ogo ibuni wulenedagoria ngelowa minu yaniaho haga mbira naheore ibuni winigoria wiaabo heleda.
JOB 26:8 Ani bialu Ngode Datagaliwabehanda hari daliga beraliba kagoha iba payadaga ho berelaga ka. Iba ogoni gendabiore bedagoyu ibame hari beraliba kago budalu pugulope nahaga.
JOB 26:9 Ainde ibugua ibunaga handame ho hagane dagia ngago hari beralibame mo ge haga nga.
JOB 26:10 Ani bialu iba solowara bedago biruleneore ngagoria berelo tubari winigoria birimida dai bileda. Iba bira maro biledagoha mbiraga horombela ngola hagane tubari ogoni nga.
JOB 26:11 Ainde Ngode Datagaliwabe ibugua keba harangi hari daliga li kago mogo timbuni lowa duru lalu haga.
JOB 26:12 Bamba puya timbuni dama mbira mini Lahaba wiago ibugua Ngode Datagaliwabehondo mine hene. Ani biyagola Ngode Datagaliwabe ibuninaga hongo timbuni heagomebi mini gigabi wiagomebi Lahabanaga hongo heago bope halu iba solowara timbuni bereagobi ema nabi hendore berelo berelene.
JOB 26:13 Ngode Datagaliwabehanda ibunaga buhe̱ loleneme hari beraliba timbuni heago pulo wahai halu hariha lone wá helene. Ani bialu Ngode Datagaliwabe ibuninaga gime puya dama ogoni ibida pialu hearia balu homelene.
JOB 26:14 Mbirale emene uruni Ngode Datagaliwabe ibugua binidaru iname manda bialu miniha mo pehalu beremagome Ngode Datagaliwabe ibuninaga hongo timbuni ngago emene mbirahayagi manda bu kamagoni. Anigome inanaga manda ngamago bolangua ho nga. Ani ngago ainde ibugua ibunaga hongo ngago bibahende inahondo mo pani hai hayagua nde iname bi emeneorebi mbira labe nahe wulebira, lalu Yobohanda lene.
JOB 27:1 Yobohanda bi laabo halu lalu,
JOB 27:2 Ngode Datagaliwabe ibugua i̱hondo mana tiga nabi wiago biyagola áyu i̱ mo ko henego kogoni ndobe. Ibugua i̱naga bi baya hangu hale howa ko birida nabida lalubi mo tale nabiyagola i̱naga miniha genda timbuni ho kogoni. Anigo Ngode Datagaliwabe Hongo Haiheore howa ibu haluhe kagonaga minini howa heneneore larogo.
JOB 27:3 Horo bibahendengi ibugua i̱ homa nabi buhe̱ lolene ngiaabo haragome
JOB 27:4 i̱na bi kobi i̱naga ne harigaha howa ke̱ holenebi mbira nalole kogoni.
JOB 27:5 Anigo i̱na bi larogo hale hadaba. Áyu tígua i̱hondo bi larimigo damene heneneore larimida lalu nalolebero. I̱ ai̱yahanda taba hanayangi howa hama ibinigo áyu kogoni howa i̱ha ko mbira nawi i̱naga bu miniha Ngode Datagaliwabenaga deni ko mbira nabi bayale henego kodalo manda bido. I̱na bi mbiraore ogoni dege laabo halu howa homalu waholebero.
JOB 27:7 Agali maru i̱la waitigi halu karu nde Ngode Datagaliwabehanda pani mialu bo wahelo hameledo. Mana tigabi nabiaga karu pani mialu bagadagua dege mege biaga urunibi pani mialu belo hameledo.
JOB 27:8 Maru nde Ngode Datagaliwabehondo mini mbiraore nawi howa ibu talima napiaga karu ti dindi ogoriani holene ngago Ngode Datagaliwabehanda biba helarangi tinaga mini dunubia holene agua wulebirabe.
JOB 27:9 Tiha genda mbira anda ibirangi tigua ibuhondo biamogo bia lalu olaragola ibugua tinaga bi larago hale holobadabe. Hale naholebiraore ndobe.
JOB 27:10 Agali uruni ale kagome Ngode Datagaliwabe Hongo Haiheore kagoha turu holene handa walia holebirabe. Ibugua Ngode Datagaliwabehondo bi lalu holebirabe. Naholebira ndobe.
JOB 27:11 Tígua Ngode Datagaliwabenaga hongo timbuniore kago manda bilimulo i̱na tí lawai holiya hale hadaba. Ibugua mbira bule manda mandabu ngago damene languliya hale hadaba.
JOB 27:12 Anigo Ngode Datagaliwabenaga mana ngago tíni handarimi. Ani handarimigo hondowa lone aginaga bi lako halu kamibe.
JOB 27:13 Ngode Datagaliwabe Hongo Haiheore kago ibunime agali ko biaga karubi mendeali kago bo wahaga karubi tihondo genda tandagabi tara tara nelo mule manda manda bu ngeledago uru.
JOB 27:14 Agali ko uruni ti waneigini dewaore heaguabi tinaga waitigirume ibalu bo wahai holebira. Ani bialu ti waneiginiru tomo nolene ndia holebira.
JOB 27:15 Agali maru yu wahene karu mani ti warago timbuni baragome homolebira. Ani homaragola ti onerume dara howa dugu bialu birulene henge nawulebira.
JOB 27:16 Agali ko uruni tigua muni silibaru dewa daga labe nahe tini andagaha mo wua howa agaru mo wua ha dege buwa tini andagaha timbuni dewaore wiaga. Ani wialu mbirale uruni tinaga miniha nagalone ale ngama lo mitangi bu holebira.
JOB 27:17 Ani wua holebirago mani howa agali mini tigabi karume aga uruni karulo halu agali maru tigatiga biaga karume muni silibaru mo yuwa tini talebu tahaga bulebira.
JOB 27:18 Agali ko biaga karume anda bia bulebirago anda ogoni hongohe lu haabo naholebira. Anda ogoni gamuni anda abale budahole biradagua bialu mabuha andira nemanda bidago gialahole biralidagua bulebira.
JOB 27:19 Mbiraga tini palue howa tinaga mbirale wiyaruni bayale ngelalu paluebira. Ai egerebagi heyuwa handalu karia tinaga mbirale wiyaruni nawidane hondowa mogo lolebira.
JOB 27:20 Iba li timbuni ibalu dindi anda bibahende namulai hagadagua mo ko holene tara tara ko biaga karuha ibai holebira. Mbiragangi mo ko holene urunime ti puyabu hongoheme pulo waharadagua biragola tini dindi anda ngagoria naholebira.
JOB 27:21 Ni tagira ibiragohayagi howa puyabu hongo howa ibalu ti bibahendeore puloyu piaiore holebira.
JOB 27:22 Puyabu hongohe ogonime ti mo ko howaore baragola tigua puyabu hongohe ogoni ibalu pelo ti ibida pole manda bulebira.
JOB 27:23 Anigo tigua puyabunaga hongo ngago he̱labagi habe naheore holebira. Puyabume ti hondo oba halu mbelebagabu yu pu waholebira, lene.
JOB 28:1 Agalime dindiha uli timbuniore tombama anda puwa ngolo silibaru duguaga. Ani bialu tigua ira timbuni delowa ngolo silibaru ira ogoriani delalu dodo para karu do taulo waharagola ngolo siliba uruni baya ngiringarale wiaga.
JOB 28:2 Ani bialu tigua ege to̱le̱ aeane taya bulebi nde dindiha uli timbuni tombama anda piaga. Ani bialu tigua ege to̱le̱ goba palego irani delaragola goba ibuni tagira ibaga.
JOB 28:3 Tigua uli unuraore ege to̱le̱ tara tara dindihaore padago mule tombama anda piaga. Tigua hale lamu yalu pialu uli ogoniha wá haragola ege to̱le̱ panigi ngaria dugu yu tagira ibaga.
JOB 28:4 Tigua uli uruni kaundiaoreha wali agalime napiaga ngagoria tombaga. Ti hangume howa uli ogoni tombaga. Tini pume hende howa daliape halu biabe ogoni biaga ka.
JOB 28:5 Agali marume nde dindini tomoru hangalu haga. Anigo maru dindi ogoni uliha biabe bialu ege to̱le̱ ngago bo polobaga bialu dindi ngago mo beregeda beregeda buwa dindi andaneha irame do taulobagabu ngelaga.
JOB 28:6 Agalime ege to̱le̱ mindibi hari mindini handalehe baya taraore mbira mini sabaea laga ngago dindiha ege to̱le̱ ngagoha padaria duguaga. Ani bialu ngolobi dindiha dege duguaga nga.
JOB 28:7 Ega nenebi bodo hariawe bedarumebi gundu uli dindiha tombama anda penedago nahende beda.
JOB 28:8 Budi gabua laiono karubi nogo biango gabua tara tara bu karubi ti bibahende gundu uli uruniha anda napene haga bida.
JOB 28:9 Agalime dindi hongohe ege pale ngagoha tombalu hari tene ngaru bo haealabaga biai haga.
JOB 28:10 Ani bialu ege to̱le ngagoha uli tombama anda piaga. Tigua tombama anda pialu howa ege to̱le̱ bayale tara tara padaria handa walia hole bayuwa handaga. Ege to̱le̱ uruni muni timbunime miagaru wiaga.
JOB 28:11 Agali biabe biaga karume uli tombalu karia iba tagira ibiyagua iba uli ogoniha biru to̱lolilono payapai haga. Ani bialu mbirale bayale tara dindiha wia do hene ngago mo yalu tagira ibaga.
JOB 28:12 Anigo ainde iname mini gigabi wulene manda bulenela agoha ngaria mo mali̱yabe. Mini gigabi wulenebi manda bulenebi mulene dindi mbira agoha ngabe.
JOB 28:13 Mini gigabi wulenebi manda bulenebi galone taraore mbira muni tara alebi bolangua hai hene dunini taraore mbira nga. Anigo wali agalime ogoni manda nabi ka. Ani bialu mini gigabi wulenebi manda bulenebi dindini wali agali kagoria nawi.
JOB 28:14 Solowara bedagola dindi iba andaneha ngago libugua ogodagua lara. Mini gigabi wulene manda bulenela dindi ogohayagi nawi lara.
JOB 28:15 Iname ngolo siliba dewame yolo bule manda nabi wahama. Iname mini gigabi wulene manda timbuni bulenela munime yolo bibe naheore ndobe.
JOB 28:16 Ainde heneneore larogo iname ngolo baya taraore dindi mini Obia ngagoha howa duguini ngagome yolo bulene wiaguabi iname mini gigabi wulene manda timbuni bulenela yolo bibe naheore.
JOB 28:17 Iname mini gigabi wulene manda timbuni bulenela mule lowa ege to̱le̱ baya burugule tara ngarumebi ngolo bayaleme wabini yári tara tarabi ngaru yolo birimayaguabi urunime yolo bibe naheore daraba.
JOB 28:18 Mini gigabi wulene manda timbuni bulenela yolo bulene mbirale iba solowaraha wini yári baya taraore ngarumebi ege to̱le̱ peleore iba wa̱i̱ ale ngarumebi yolo bibe naheore nga. Wali agalime halepangeha paliaga mbira mini pealo ogoni muni dewaoreme miaga. Anigo pealo yolo biaga ngadagua mini gigabi wulenebi manda timbuni bulenebi yolo mibe naheore.
JOB 28:19 Ainde ege to̱le̱ ambuabi mini tobasa Sudana dindiha howa dugu yaga ngagobi ngolo irani delene baya taraore yolo miaga ngagobi ogonilabomebi mini gigabi wulene manda timbuni bulenela ngago yolo bibe nahe dege nga.
JOB 28:20 Ai iname mini gigabi wulene manda timbuni bulenela agiha taya bulene wiaruabe. Mini gigabi wulene manda timbuni bulenela dalu mbira agoha ngabe.
JOB 28:21 Mini gigabi wulene manda timbuni bulenela libuni daluha bira do kagola wali agalimebi mbirale ema bialu piaga maru biru ngarumebi ogonilabo nahondolebiraore. Ega hari daligaha yagaloyu ibagabu hagago urunimebi nole handabe nahe dege nga.
JOB 28:22 Homene dindi humbirini andaga ngagome ogodagua leda. I̱nabi nde mini gigabi wulene manda timbuni bulenela mini emene hale ha harugo ainde i̱na deme handa nabi ko, leda.
JOB 28:23 Ainde hale haramine. Ngode Datagaliwabe ibuni hangume mini gigabi wulene manda timbuni bulenela libu daluha kago de hendeda. Ani bialu hariga ogoniha polene ngago manda bida.
JOB 28:24 Irane ibugua dindi bibahendeha de handai halu hari daliganaga andaneha ngarubi bibahende manda biai ka.
JOB 28:25 Bambaore howa Ngode Datagaliwabehanda magi manda bialu puyabunaga hongo mo tale buwa ibu karulape ngelene. Iba bedarubi magi manda buwa mo tale bialu iba solowara timbuni ngagoha birulene karulape ngadagua biradaba lene.
JOB 28:26 Ani bialu Ngode Datagaliwabehanda iba dalu ibunaga mana mialu hari beralibabi hari dababi hari kulubi uruni ti hariga polene ngagobi mo mialu bini.
JOB 28:27 Ngode Datagaliwabehanda mbirale uruni bialu henedangi ibugua mini gigabi wulene manda timbuni bulenela ngola hene. Ngola halu ibugua minibi mana wiagobi mo tale bini. Ani bialu mini gigabi wulene manda bulenela hongohe wiaabo helalu ibugua karulape lalu bini.
JOB 28:28 Ainde Ngode Datagaliwabehanda i̱na dindi wali agali bu hemaruhondo langialu lalu, Mbirali ibu Anduane Homogo i̱ni andaneha howa ko bulene ngaruhondo erembira mialu haga kagome ibu mini gigabi wialu manda timbunibi ka, lalu Yobohanda lene.
JOB 29:1 Yobohanda bi la dege bialu lalu,
JOB 29:2 Ainde i̱ abale bayale henegobi haruyagua nde karulapeda. Abale hewangi Ngode Datagaliwabehanda i̱ baya hanguore handayaho hene.
JOB 29:3 Ibugua i̱ bayale wá kagoria ibagabu holiya aruma wiagoha wá holene hale lamu ibuni heagoria ibagabu haru.
JOB 29:4 Ainde i̱ daliahe howa hongohe abale henegobiore hoa lo manda bido. Ngode Datagaliwabe ibuni i̱naga nenegeore howa ibugua i̱ one waneiginiru i̱ andagaha mbirale wiarubi baya hangu handayaho haya.
JOB 29:5 Horo uruningi dege Ngode Datagaliwabe Hongo Haiheore kago ibu i̱la haabo heagola i̱naga waneiginirubi i̱ni heba mandagi haabo harima.
JOB 29:6 Ani howa i̱naga nogo bulumaga memerunaga andu ibaneru hambigi bialu haru. Ani bialu olibe lininaga weli i̱na be timbuni ege to̱le̱me wabu wiwagoha hambu to̱lo wigi biru.
JOB 29:7 Horo uruningi i̱ tanonaga agali ala hene miniwi mbira howa tanonaga pabe panga haraba kawareni wali agali ngoai haga hama timbuni wiagoria tagira puwa agali ala hene miniwi maru wali agalinaga godi larago hale hole berearu baba mandagi biraruli.
JOB 29:8 Ainde i̱ harigani porogola igiri daliahe hearume i̱ ala bolangua holiya henge ngialu ti habagi haga biaga. Agali wahe ale berearume i̱naga mini yaraga howa i̱ anda eberogola ti heyalu i̱ biruliya henge ngiaga hene.
JOB 29:9 Wali agalinaga agali haguane karume i̱na bi larogo hale hole ti bi nale birama piaga.
JOB 29:10 Agali timbuni bu hearumebi bi nale dege biraga hene.
JOB 29:11 Wali agalime i̱na bi larogo hale howa tigua i̱naga mini yaraga haga. Tigua mbirale i̱na mana bayale berogo damene hondowa ti turu hai haga hene.
JOB 29:12 Ani biradago yagibano bu hearume ti biamogo bia lalu heago i̱na hale howa biamogo biruli. Waneigini ti ai̱ya aba homene hearu ti biamogo bulene mbira nahe burupale bu hearu i̱na ti dara howa biamogo biruli.
JOB 29:13 Ani bialu wali agali ti mo ko holene kaware wiagola i̱na ti biamogo birugola ti turu howa Ngode Datagaliwabehondo ka̱i̱ lalu i̱ mo bayale habe lalu bi la haga biaga. Wali dalo berearu i̱na biamogo bigi birugola ti turu halu tinaga bu miniha dungulo biraga.
JOB 29:14 Horo bibahendengi i̱na mana bayale tigabi ngaru hangu bialu haabo hewagola mana bayale tigabi uruni i̱ni tingini yári ale karulo haru.
JOB 29:15 I̱ maru de kohe hearunaga de hendelo de ale halu ge kohe ibaga bialu napiaga hearunaga ge ale i̱ haru.
JOB 29:16 I̱ yagibano hearunaga aba ale howa i̱na ti baya hangu handayaho haru. Agali maru i̱ manda nabi de nahendeneru godini haru ibugu biyagola i̱na biamogo bialu tinaga bi la haru.
JOB 29:17 I̱na agali ko biaga hearunaga hongo bope halu burupale darabi bu hearu agali uruni giha hearia mo wialu pelaga biru.
JOB 29:18 I̱na mandabu handalu hewaria ainde i̱ dindi ogoria lu howa ho dagua halu i̱ni andagani miniha mo palia holene karulo biruwa homa hangu maliaho biruloboda manda bu haru.
JOB 29:19 Ira hongoheme pini dindiha pialu iba dindi andaneha bedago mialu mbiraga pibiya ibira haragome yuni iba mialu biragola ira hongohe kaligobi i̱ holeberobe tobaho haru.
JOB 29:20 Wali agali bibahendeme i̱ mitangi bialu agali mini leneore lalu haga heneya. I̱naga hongo karulape kogonaga turu halu biabe hongohe ngaru biaabo halu holeberobe toba haru.
JOB 29:21 I̱na maru hearu mana bayale ogobi bulene nga lalu lamigi birugola tigua bi nale baya hangu haleho biraga biya.
JOB 29:22 Iba dalu ibalu dindiha anda poralidagua i̱na bi laga birugo wali agali tiha anda pugu biya. I̱na bi lai harugola bi laru aria latago holene mbira tigua nayi degeya.
JOB 29:23 Ani howa tigua i̱naga bi larugo baya hangu haleho bira dege biya. Tigua iba dalu naibi gaea biaho winigo ai iba dalu pigane ibiragola turu hagadagua i̱na bi laga birugo hale howa turu timbuni haga biya.
JOB 29:24 Agali damene hearu tihondo hambi-o hondo habe laga birugola agali timbuni mbirame ti mo bila hayabe toba howa mogolo handaga biya. Ani bialu i̱naga wanakui wálo mialu ti baba bi lalu oba tabirini halu birugome i̱na tinaga miniha mo hongo haga biru.
JOB 29:25 I̱ tinaga agali haguane haradagua howa i̱na ti bayale helonaga tinaga mini haru helo mo tiga bialu haruli. Kinime ibunaga ami agaliru baba hagadagua i̱na ti baba haabo haruli. Mbirali homaragola dara dege howa dugu bialu bedaria miniha mo hongo hole bi lagadagua i̱na ti baba bi ani laruli, lalu Yobohanda lene.
JOB 30:1 Yobohanda laabo halu lalu, Ainde áyu agali yagibano waneigini bu karume ibalu i̱ mege bialu hondo oba haga bira. Ti aba nde wali agali bu hearunaga deni ko yagibano howa tigua mbirale bayale mbira bibe nahe hene. Ani heagola i̱naga biangome nogo sibi haru heago biamogo bibe nahe kago manda buwa ti nogo haru hole pudaba nalaruli.
JOB 30:2 I̱na handalu koria ti biabe bulene hongo nahedane hondowa i̱naga biabe bia hole ibidaba nalaruli.
JOB 30:3 Agali uruni ti tomo nolene nawi howa obiore halu tinaga tiniha tomo noa haabo ho haga hene. Ani howa ti dindi ko wali agali nahaga iba dalu naibaga ngagoha ibida pialu ogoniha tomo nolene ko nanabehe ngaru ilu yuwa naga hene.
JOB 30:4 Ani bialu mbirale ko kaubi anda ho karunaga yuni pinibi bu naga hene.
JOB 30:5 Ani nalu haga henego ai andaga wali agali bu kagoria dai biragola wali agali bu karume pageali bo taliradagua bialu talu pelaga hene.
JOB 30:6 Anidagua bira handala ti ibida pialu dindi hau̱ ngaruhabi egeanda karuhabi ho palia edede bima ibaga bu haga hene.
JOB 30:7 Tigua dindi ko wali agali nahaga ngagoha ira yuni tilatilabi bu karu teneha ibagabu howa nogo dongime korana lagadagua lama ibaga bialu haga ka. Ani bialu tini ira karu andaneha gumba biru ngoai haga ka.
JOB 30:8 Wali agali andagaha bu hearume ti bo taliya handala ibida pu henego ai ti ko yagibano mini nawiore bu ka.
JOB 30:9 Ani biaga biarume i̱ mege buwa iba ganame i̱ guralu ka. Tigua i̱ ko habane nabulene mbira o bedagonida lo manda buwa i̱naga mini lalu i̱ mo ko haga bialu ka.
JOB 30:10 Tigua i̱ koore mbirada lo manda bialu i̱ de hondolene mangaho ka. Ani bialu tigua i̱ bedogoria kaware nahe kaundia ka. Ani howa tigua kaware ibiyagua nde i̱naga denguiha hamiaga toloba hole ibaga ka.
JOB 30:11 Ngode Datagaliwabehanda i̱ bope halu i̱naga hongo bibahende ereba hai helaya. Anidagua biyagola tigua i̱ mege bialu gi nahe howa i̱hondo ko dewa bialu ka.
JOB 30:12 Agali ko ngubi urunime i̱hondo mogo nale howa dege bialu ka. Tigua i̱ bedoria ibalu i̱la gungu bialu i̱ bo talialu ka. Ani buwa tigua i̱ bo waholenaga mbirale tara tara bialu ka.
JOB 30:13 Tigua i̱ polene hariga ngaru hapai haga bidagola i̱ ibida pobe nahe ko. I̱ mo ko hene koore bedogo ainde mo koorene ko hole bialu ka. Tini hongo nahe kane hendedogoyu ainde tigua hongohe tingi howa i̱ mo ko halu kagoni ndobe.
JOB 30:14 Ami agali dewaoreme tanoha wai pabe kago bo giala anda halu wai bule gerai lalu pugu pugu biagadagua tigua ibalu i̱ baba wai bialu ka. Iba solowara bedago ibalu iba angeni puduhole biagadagua tigua ibalu i̱ baba wai bialu ka.
JOB 30:15 Mbirale ko tara tara wiaru i̱ha ibalu i̱ mo gibia halu ka. Puyabume ira yuni yu piagadagua i̱ mini timbuni lene hewago ereba hayagonida. Hari beraliba kago piai halu hari mindini hangu haralidagua i̱naga mbirale wiwaru damene bibahende ereba hai hayagoni ndobe.
JOB 30:16 Homolene kaware ngagola i̱naga tinginiha tandaga dege handalu biraabo kogonida.
JOB 30:17 Mbiraga i̱naga tingini bibahende tandaga biai halu timume baradagua biaga. Ani bialu tandaga ogoni biaho wia dege bialu ereba nahaga.
JOB 30:18 Ngode Datagaliwabehanda ibunaga hongo gibiorehe kagome i̱naga tingini mo tara ale ho ngeledagonida. Agani yuwa ma mini ndibu lagadagua i̱ hongo howa minu garabayabu ngeledagoni ndobe.
JOB 30:19 Ngode Datagaliwabehanda dindi waru wiagoha i̱ minu bape hayagola ai áyu i̱na galoneore mbira be abalu alebi dindi himu alebi bedogonida.
JOB 30:20 Ngode Datagaliwabe-o í̠naga deni heyu howa i̱ biamogo bia lalu kogoyu de handa hondowa i̱naga bi í̠hondo larogo hale nahaga kegonida.
JOB 30:21 Í̠na i̱ dara emeneorebi nahaga kegonida. Í̠naga hongo ngegome i̱ mo ko holenego dege mandabu kegoni ndobe.
JOB 30:22 I̱ dabiabi ira yuni ale daliga baraga haregola i̱ puyabume yalu pobehe bedogoni ndobe. Puyabume i̱ yu pu waholebira.
JOB 30:23 Í̠na i̱ mo homa halu i̱ dindi mbira wali agali bibahendenaga tu wia homanda mandabu wirigoha hama pu lolebereda lo manda bido.
JOB 30:24 Mbiralime ibu mo ko holene kaware ngagola ibu biamogo bia lalu dugu bialu kagola ainde mendealime ibalu agali ogoni mo ko halu minu bolene karulapebe. Ani bulene nakarulapeore ndobe.
JOB 30:25 Bamba nde agali genda yu hearu i̱na ti dara haga biruli. Maru mbirale nawi tubagiho karu dara timbuni haruli.
JOB 30:26 I̱ bayale haabo holeberobe tobaho hewaria ainde mo ko holene i̱ha abale anda ibidagonida. I̱ wá holeneha dege holeberobe toba ho hewaria ainde aruma holeneme ibalu i̱ budambi haragonida.
JOB 30:27 I̱naga miniha genda yu bedogome horo bibahendengi i̱ha genda tandagala ibalu haabo ka.
JOB 30:28 I̱ hako kogola i̱naga dengui mo beregedalu mindibiore tara kagoni ndobe. Nime dalu ndo bame warago bedagome bida. Wali agali bu karu ti dege dombeneha howa i̱ biamogo bidaba lalu hale halu kogola tigua i̱ biamogo nabi kagoni.
JOB 30:29 I̱ tandaga timbuni nalu howa i̱na dugu biango dudume dua laradagua bialu ega yarime kua laradagua bialu kogoni.
JOB 30:30 I̱naga tingini mindi bialu yogo biragola i̱naga dongone o lagalopaya bialu kogonida. Ani bialu warago ogonime i̱naga tingini mo poboyogo bia ka.
JOB 30:31 Bamba nde i̱ bayale hewangi i̱na ngida balubi tabaga balubi pilipe lalubi turu holenenaga iba ganaru lalu haruli. Anigo ainde mbirale ngida balu pilipe lalu biaruane hale haruligo ai áyu homene dara holenenaga lo aribia hole íbu ngagonida, lalu Yobohanda lene.
JOB 31:1 Yobohanda bi laho wialu lalu, I̱na wandari bedaru dimagoli howa handayaho wiaabo nahole lalu bi hongohe lo winigo nga.
JOB 31:2 Ngode Datagaliwabe Hongo Haiheore kagonime ina wali agali bibahende ta nabi kamarume birimagonaga inahondo ibunime inaha bua birago ale biai hagabe.
JOB 31:3 Ibugua wali agali ko biaga karu genda yu helo mo miaga ndobe. Ani biragola genda ogoni ibugua wali agali uruni mana bialu bo hilo wahaga.
JOB 31:4 Anigo ai Ngode Datagaliwabe ibugua i̱na bialu hagago bibahende handai halu harigani porogobi manda biai halu de handai ka.
JOB 31:5 I̱na wali agalihondo ke̱ howa mbiraligo mbira mo hondo nahe kogoni.
JOB 31:6 Ngode Datagaliwabehanda i̱na biagaru baya hangu manda biai ho heagua nde i̱na ko lehe bini mbira handa walia naholebira.
JOB 31:7 Anigo i̱na hariga tigabi ngaru wahalu de ibu ko ngaru hendedagoha pupe halu haruyaguabi Ngode Datagaliwabenaga deni i̱ dodohe hewane handayagua nde
JOB 31:8 Ngode Datagaliwabe ibugua kayualime tomo i̱ mabuha ngaru bu hanalu mabu dugua hai helelo.
JOB 31:9 Ai i̱ nenegeali mbira ibu one i̱na dimagoli howa agalidago ibuni tagira poragola wali bedago kayu bule mayu haruyagua nde
JOB 31:10 i̱ one bedago ibu agali wali agalinidagonaga garabaya biabe ale biahaga biruwa balawa wabule widi lini dambia halu berelobi agali maru karu haru palia ariri bilobi.
JOB 31:11 Ani bialu i̱na agali mbira ibu one bedagoha mana ko biruyagua nde i̱ni godini haru pialu mana timbuniore ngagoria pu helolebira.
JOB 31:12 Mana ko uruni ira hungu ale howa wali agali daga. I̱na nde ko uruni ale mbira biruyagua i̱ra hungu ogome i̱nibi i̱naga mbirale wirudarubi bibahende do gindulo wahara handala i̱ni nde homalu homenenaga dindiha pu helolene nga.
JOB 31:13 Abale wali agali i̱naga biabe bia hagarume i̱hondo mbirale mbiranaga bi mbira leagola i̱na tinaga bi hale nahene wiagua
JOB 31:14 nde Ngode Datagaliwabehanda i̱na ko ogoni birudagonaga manani dabole ibirangi i̱na agua ladai buliyadabe.
JOB 31:15 Ngode Datagaliwabehanda i̱ ai̱yanaga tombeha howa i̱ wabialu wali agali urunibi nde ti ai̱yanaga tombeha howa wabini. Ngode Datagaliwabe mbiraore ogoni ibu hangume ina bibahende wabinigo ai ina bibahende mbiraligo bolangua nahe ogobi dege dege kamagoni.
JOB 31:16 Wali agali yagibano burupale hearuni ti i̱na biamogo buwa miaabo halu haruli. Wali mbira ibu agalini homene dalo bereagua i̱na ogoni ibu bame berelo wanahe biamogo biruli.
JOB 31:17 I̱naga tomoru i̱ni hangu nole lowa habua buwa wia nabi waneigini aba ai̱ya homalu hono wahene karubi talebu mialu naruli.
JOB 31:18 Bambaore i̱ igiri emeneni howa waneigini aba ai̱ya homalu howa hono wahene karu wali dalo bedarubi bibahende biamogo bialu haabo haruli.
JOB 31:19 Ai agali mbira ibu aga nabi howa dagare halu duru lama pialu hearia i̱na dagarenaga aga nami pelaruyabe.
JOB 31:20 Napele howa i̱ninaga nogo sibi herunaga irinime wabini dagarenaga aga winiru miruligo agua. Aga mirugome ibunaga tingini dambi halu poboyogo biragola i̱nihondo turu halu ka̱i̱ lama piaga.
JOB 31:21 Ainde bi laruruni agali haguane karume henene lagane lelonaga ani biaga tingi halu ke̱ halu waneigini aba ai̱ya homene karunaga mbirale ngaru mo page biruyagua nde
JOB 31:22 Ngode Datagaliwabehanda i̱ni pani ngialu i̱ninaga gi kirabali payaneha dogo mialu ibira helolene nga. Ani biruyagua nde i̱naga gi kirabali ani dogo wahelo waha.
JOB 31:23 I̱na Ngode Datagaliwabenaga hongo timbuni gibiore ngagome wali agali mana ko bialu karuni tiha ko genda tandaga bulene ngarume ti mana bialu yu helaga ka. Ani biagagonaga i̱na gi timbuniore howa mana tigabi wiaru hangu bialu haruli.
JOB 31:24 I̱na biabe hongo howa bialu munibi mbirale bibahende wiaru dewaore mo wirugo. Ai dewa uruni yu haruda lowa mine naharuli. I̱naga ngolo muni mbirale bibahende urunimebi i̱ni bayale holiyanaga bulubadalo manda nabi haruli.
JOB 31:26 Nime wá bayale halu egemebi wá hadege biagola i̱na turu halu libunaga mini yaraga howa gamu gamu nabiruli. Libunaga mini yaraga halu ni egela kaundia kagoda lowa ibu nu̱nu̱ laradagua i̱naga gibi heba nu̱nu̱ nalaruliore.
JOB 31:28 Ai urunidagua bialu howa ke̱ haruyagua Ngode Datagaliwabe Hongo Haiheore kago erembira mirudago. Anidagua birudagonaga i̱ni godini haru pialu mana bulene nga.
JOB 31:29 I̱naga waitigi heneru pani nalu mo ko haga biragola i̱na urunidagua biragonaga miniha haruore biyadalo manda nabiruli.
JOB 31:30 I̱na nde waitigi bu karuni ti mo ko halu bo wahabe lalu Ngode Datagaliwabehondo bi heba nalaruli. Horo mbiru i̱na ani bini wiagua ogoni kaguaore bu kogoni.
JOB 31:31 I̱naga agali biabe biagarume lalu, Agali ibiraruni tomo ta nabi miai haga ka, lene howa i̱na maru nane napelaruli.
JOB 31:32 Agali maru dindi taraha íbu howa agoha paluebe tobaho hearu tagira palelo wanahe i̱ andaga haru paliruli.
JOB 31:33 Agali marume mana ko ngaru buwa ya doho haga. Ogonidagua i̱nabi nde ko buwa doho haruyagua nde i̱ wali agali baba bi lole tagira ibaga nabi i̱ni andagaha bira do holene karulape. Ani bule birugo irane wali agalime i̱naga ko mo doho harugo handa walia howa mo taga halu mege tara bulebiragonaga i̱ bira do holene karulape. Anigo i̱na ko mbira buwa do naheore kogoni.
JOB 31:35 Aiore nde agali mbiralime i̱naga bi larogo baya hangu hale mia howa hale helo hameledogoni. I̱na ko mbira nabiore kogo lalu bi ogoni mo hongo halu ogodagua laro. I̱na mana ko ngaru mbira buwa dongeho haruyagua Ngode Datagaliwabe Hongo Haiheore kagome bi larogo ladai bilo hameledo. Ibugua i̱ manani íbu helaga kago. Ai i̱na ko birugola i̱ pani ngiyaruni uru birigoni lalu walia hole bebani gilibu ngeledale
JOB 31:36 i̱na ogoni payani yu halu emboneni kininaga manda karularadagua karulo koleda.
JOB 31:37 Ani bialu i̱na Ngode Datagaliwabenaga deni kini igini taga nahe pu hagadagua pu howa i̱na bialu harudaruni latagi hai halu koleda.
JOB 31:38 Ai i̱na mana tigabi ndo mbira bialu agali mbiranaga dindibi tomo hengenerubi bibahende karulowa yolo nabi haruyagua nde anduane ogoni ibu tomo nolene nawi howa i̱hondo keba emene ndo holebira.
JOB 31:40 Ai nde tomo balawa wabiaga mini widibi mende mini balibi mbiraleru hengedogoha ani puru datani karu andaho helo, lalu lene. Ani lalu Yobohanda bi lenego ogoria lamaro bidagoni.
JOB 32:1 Yobonaga nenege agali tebirali biaru tigua handalu hearia Yobo ibuha ko mbira nawi ibu tigabi bayaleore ko lalu lo hongo hayagola tigua balalu bi maru lolene nawiyagola ti Yobonaga bi layago ladai nabi hangaho biraabo hene.
JOB 32:2 Ani lalu beremigola igiri daliahe mbira ti bi lalu beremigoria biruwa hale ho berene. Igiri ogoni Baragele igini Elihu bereneya. Elihu ibu Lama hameigini howa Busu bamba henegonaga aria hene. Ani biruwa Elihu ibugua Yobohanda ibuha ko mbira nawi tigabi ko lalu Ngode Datagaliwabehanda i̱hondo ko bialu ka layago hale howa keba timbuni hene.
JOB 32:3 Ibugua Yobonaga nenege tebirali biaru tigua Yobonaga bi layago ladai nabiyagola keba dege hene. Tigua lalu Yobo ibugua mana ko biyagome ko bini dewa nga lalu beremigo hondowa ibu keba halu bini.
JOB 32:4 Elihu ibu agali wahe ala hene tebirali biarume bi lelo hale ho berenego ainde ti lai heagola ibugua Yobohondo bi lamule manda bini.
JOB 32:5 Ibugua keba timbuniore henego irane agali tebirali biaru tigua bi layagome Yobohondo bi baya hangu ladai nabiyago hondowa keba hene. Ani hale ho biruwa Baragele igini Busu aguane Elihu ibugua lalu,
JOB 32:6 I̱ igiri daliahe dege kogola tí nde agali wahe kami. Ani kamigo manda buwa i̱na tíhondo bi lolene taga howa biraabo haru.
JOB 32:7 I̱na mandabu handalu hewaria tí mali lu dewaore hene howa tíha mini bayale gigabi wulenebi manda timbunibi wu kamigoyane latagi halimulo biraru.
JOB 32:8 Anigo ainde mini bayale gigabi wulene agali ala hene kagoha dege ndo wiagada. Ai Ngode Datagaliwabe Hongo Haiheore kagonaga Dinini inaha ibalu ibugua dege ina mini bayale gigabi wulene ngiaga hayada. Anidagua bidagome ai agali ala hene wahe kago hangume ko bayalela mo tale biaga ndodane hendedo.
JOB 32:10 Anidago i̱na nde i̱naga mini ngogo latagi harogo tí hale hadaba.
JOB 32:11 I̱na tígua bi larimigo baya hangu hale halu mo tale birugoni. Tígua ndelaheore handalu biabe erekuibi bialubi mini bayale gigabiwi manda timbunibi taya bialu Yobo biamogo bule lalu harimigoni. Ani lalu hemigo hondowa i̱na tínaga bi larimigo bayuwa hale haru.
JOB 32:12 Ai i̱na handalu hewaria tí bedemiru aria mbirame Yobohanda bi layago ko laya lalu mo walia naharimi. Ani bialu tígua ibunaga bi layago bayuwa ladai nabirimi.
JOB 32:13 Anigo tígua mitangi bialu lalu, Ainde Ngode Datagaliwabe ibunime Yobohondo ladai bilo ina waholene karulapeda. Ina agalime ladai bulenego nakarulapedago wahama, loleberemi.
JOB 32:14 Yobo ibugua i̱la bi nale howa ibugua tí baba dege bi laya. Anigo ibugua bi ogoni i̱hondo lenedale nde i̱na tígua ladai birimidagua ndo ladai bidole.
JOB 32:15 Ai Yobo-o de handa. Í̠naga nenege agali o bedarunaga mini emene tubagioreda. Ani bidago hondowa í̠na ti bime bope harigoni. Tigua bi mbira lone labe nahe tinaga ne hariga ndibulo biru wima pedagoni.
JOB 32:16 Ai bame bi nale heyu kago handa. I̱na manda bialu koria tigua bi lone lolene nayi ka lo manda bidogo ai i̱na handayaho birulene nakarulapego
JOB 32:17 í̠hondo bi maru lolebero.
JOB 32:18 I̱na nde bi maru í̠hondo lolene manda bidogo ai i̱naga miniha yu donge holene hame naledo.
JOB 32:19 I̱ bi lolene dewaore i̱naga bu miniha yidogo ai miniha yaanda ho bedoria i̱naga tombene nogo dongone beha waini iba hambu yidaria waini biru to̱lowa nogo dongone be pambulalu waini iba purogo lagadagua bibehe ko.
JOB 32:20 Ainde i̱naga miniha genda nabi yabia bilo bi ogoni latagi holebero.
JOB 32:21 I̱na mbiralinaga bi lahowa nalolebero. I̱na mbirali la debodebo bialu bi dendebi nalolebero.
JOB 32:22 I̱na bi nagalone ngaru dewa laabo halu mendeali la debodebo bialu bi nalaruli. Mana ogonidagua biruyagua nde Ngode Datagaliwabe i̱ni wabiaga kago ibunime i̱ homoliya bo waholebira, lene.
JOB 33:1 Elihuhanda laabo halu lalu, Yobo-o hale harene. Áyu i̱naga bi í̠hondo larogo bibahende baya hangu hale hai habelo hameledo.
JOB 33:2 I̱na bi yidogo áyu ogoni dege latagi haro.
JOB 33:3 I̱na bi latagi harogome í̠ mo walia holebirago ogo. I̱ Ngode Datagaliwabenaga deni agali tigabi howa i̱na mini tigabi bu habaneha wu kogo latagi haruli.
JOB 33:4 Ngode Datagaliwabe Hongo Haiheore kago ibunaga Dinini kagome i̱ wabialu ibunaga buhe̱ lolene i̱ha pulaanda hayagome i̱ holene karulo howa ema bialu ibaga bu ko.
JOB 33:5 Yobo-o í̠na abale heyalu i̱la lai la nabere. Í̠na ladai bulene karulapeyagua bi i̱na larogo ladai bibe.
JOB 33:6 Ngode Datagaliwabenaga deni iya ogobi labolabo kabagoni ndobe. Ibugua i̱ dindime wabialu í̠bi dindime dege wabini kegoni.
JOB 33:7 Anidagua binigo manda bialu í̠na i̱ hondowa gi nahabe. I̱na í̠ha genda timbuni mo ya halu mo gi naholebero.
JOB 33:8 Í̠na bi larigo damene i̱ hale hai harugoni. Í̠na bi hongo howa ogodagua lari.
JOB 33:9 I̱na mana ko mbira nabiore howa i̱ Ngode Datagaliwabenaga deni ko mbira nawiore kogoni lari.
JOB 33:10 Ani kogola Ngode Datagaliwabe ibugua i̱ waitigi mbira haradagua bialu ko biaga kagohondo genda mo miagadagua i̱ mo ngialu ka lari.
JOB 33:11 Ibugua i̱naga ge seni pume minu kabu biya. Ani bialu i̱ ibagabu kogoha i̱naga ge ibugua guariama ibaga bialu mayu ka, lalu larigoni.
JOB 33:12 Ani larigo ai Yobo-o hale harene. Í̠na bi uruni larigo tigabi ndo lari. Ani larigo ai i̱na í̠naga bi lariruni ladai bulebero. Ngode Datagaliwabe ibu duniniore kago ibunaga mandabi hongobi timbuniore wali agalinaga ale ndo bolanguahe ka.
JOB 33:13 Í̠na lalu, Iname Ngode Datagaliwabehondo bi laramago ibu hale nahagaya, lariligo irane aginagabe.
JOB 33:14 Ngode Datagaliwabe ibugua inahondo bi hariga tara tarani langigi biaga ka. Anigo ibugua bi larago iname yu tiga nabi haramali.
JOB 33:15 Wali agali mbiraga padaria Ngode Datagaliwabehanda emagaha howabi de gandebaha howabi bi lamiaga.
JOB 33:16 Uruniha howa ibugua iname ko birimago mo walia halu ina lawai halubi mini bayale wulene mo walia haga. Ibunaga bi ogoni inanaga bu miniha hongohe haabo helo ani helaga.
JOB 33:17 Anidagua biragome mana ko lone nabuluma̱yanaga mo gi haga ka. Ani bialu ina mine naholoma̱yanagabi ani biaga ka.
JOB 33:18 Ani bidadago irane iname mine halu kamaria inanaga waitigi bu karume ibalu ina bo waharagola ina homalu humbirini andagaha napoloma̱yanaga anidagua biaga ka.
JOB 33:19 Marungi nde Ngode Datagaliwabehanda ina wali agali mo tiga bulenaga mana ogobi nga. Mbirali ibuha warago timbuni ibilaragola ibu dagiani paliaho wiaabo halu ibuha palibe nahe halu tingini tandaga timbuni biaabo haga nga.
JOB 33:20 Ani wuwa tomo nolene magu timbuni haga ka. Maru bu karume tomo bayaleru dawa yalu ibiragola warago bo wiyago ibu magu halu uruni tomo ndo tara ale handaradagua biragola nanaga.
JOB 33:21 Tingini obialu kuni bibahende pani haihe wiaga.
JOB 33:22 Agali uruni homolene kaware ngagola ti abale homalu humbirini andagaha hole piaga.
JOB 33:23 Anigo Ngode Datagaliwabenaga dahuliyali daosini dewaore bu karu aria mbirago ibugua ibalu agali biagome mana bayalego bialu helo bi lamulebira.
JOB 33:24 Ani lamuwa ibugua dahuliyali biagome Ngode Datagaliwabehondo agali biago dara halu biamogo bia lowa bi lamialu, Í̠na agali ogoni ibu dai bulene hariga mbira wiaria handa walia harugo ainde agali ogoni humbirini andaga hole napelo dara habe, lolebira.
JOB 33:25 Ani laragola agali biago bayale halu abale igiri daliahe haraligobi holebira.
JOB 33:26 Agali ogonime Ngode Datagaliwabehondo bi laragola ibunaga bi larago hale halu howa ibu turu howa Ngode Datagaliwabe kagoha kaware holebira. Ani kagola Ngode Datagaliwabehanda ibuha mo ko hene ngago damene bibahende mo tiga biai holebira.
JOB 33:27 Anidagua biragola agali ogoni ibugua wali agali maru karuhondo lamialu lalu, I̱na mana ko dewa wiaru bialu haru. Ani bialu hewaria Ngode Datagaliwabehanda i̱ minu bolene winigo ai ibugua i̱ dara halu bo wanahaya.
JOB 33:28 Ibugua i̱ haru dai biyagome i̱ humbirini andaga nape homa nabi kogoni ndobe lolebira.
JOB 33:29 Ngode Datagaliwabehanda wali agalihondo dewa halu ogonidagua bia dai dai bialu ka.
JOB 33:30 Ibugua ti biamogo bialu mo wiragola ti homa nabiaga. Homa nabi howa Ngode Datagaliwabehanda wali agalinaga holene miadai biragola ti turuho haga.
JOB 33:31 Yobo-o ai i̱na í̠hondo bi maru larogo hale hole ema nabi hale ho birabe.
JOB 33:32 Ainde í̠na bi lolene maru yu bereyagua i̱ hale holiya latagi habe. Irane wali agali bu karume í̠ha ko mbira nawi bayale ko lalu mo walia habelo hameledo.
JOB 33:33 Bi lolene nayi bereyagua nde i̱na bi larogo dege hale hole ema nabi birabe. I̱na mini gigabi howa holene mana langiai holeberogo bayuwa hale habe, lene.
JOB 34:1 Elihuhanda laabo halu lalu,
JOB 34:2 Agali manda timbunibi mini gigabiwi kamiru tígua i̱na bi o larogo baya hangu hale hadaba.
JOB 34:3 Iname tomo dende bidabe be magu bidabe hondole nahanda ala beremali. Anidagua dege iname bi hale howa kobe bayalebe mo tale beremali.
JOB 34:4 Ai iname bi hale harimaru bayale tigabi agodabe hondole mo tale bimi̱ya.
JOB 34:5 Yobo ibugua ogodagua laga, I̱na biako hene mbira nawiorego ai Ngode Datagaliwabehanda i̱hondo mana tigabi ndo biya.
JOB 34:6 I̱na kagua mbira nabiore howa ko mbira i̱ha nawiore ko. Anigo Ngode Datagaliwabe ibugua i̱ ke̱ hagane mbira kagoni lo manda buwa i̱ mo ko henego kogoni ndobe. I̱ ibunaga yandareme nogoba haradagua biyagola i̱ dabi halu bayale habe nahe kogoni, lalu ogodagua layagoni.
JOB 34:7 Mana ko Yobohanda biyadagua bini mende ai kabe. Yobohanda Ngode Datagaliwabehondo mege timbuni biya.
JOB 34:8 Ibu mana ko biaga karu baba mandagi haga kagoni.
JOB 34:9 Mana uruni biagadago irane ibugua lalu, Iname mana tara tara Ngode Datagaliwabehanda hameledago bialu harimayagua mbirale bayale mbira agile yadai bimi̱yadabe. Ina yadai bulene mbira nawidalo manda bido, laya.
JOB 34:10 Yobohanda ani laya lowa Elihu ibugua laabo halu lalu, Agali mini gigabiwi bedemiru tígua bi o larogo hale halimu. Ngode Datagaliwabe Hongo Haiheore kago ibugua mana ko nabiaga ka.
JOB 34:11 Iname mana bialu harimadagua ibugua bayuwa mo tale bialu inaneme bialu harimagobi karulape mo ta haga ka.
JOB 34:12 I̱na heneneore larogo, Ngode Datagaliwabe Hongo Haiheore kago ibugua mbirali ko nabiaga kagohondo mo ko halu mana liahe nabiaga ka.
JOB 34:13 Ngode Datagaliwabehondo dindi ogo handayaho habe lalu biabe ogoni bilonaga hongo mo miyadago aiwabe.
JOB 34:14 Ngode Datagaliwabehanda holenenaga buhe̱ lolene ngiyago ibuni mo yu dai biyagua nde ema bialu piaga bibahende abaleore homai halu ina wali agalibi nde abale dindi tago buleberema.
JOB 34:16 Yobo-o í̠ hale harene. Í̠ mini gigabiwi ngeyagua nde bi o larogo baya hangu hale ho birabe.
JOB 34:17 Ngode Datagaliwabe ibugua mana bayale tigabi ngago hame nalagayagua nde ibuni duniniore haabo howa dindi ogo ibugua handameho habehe kabe. Anigo Ngode Datagaliwabe ibu hongo timbunihe howa mana bayale tigabi ngaru bialu haabo haga ka. Ani biaga kago ai í̠na ibu ko bira lalu ibugua bialu kago manani howa mo tale bialu kego irane agibe.
JOB 34:18 Agali mbirame kinihondo í̠ ko habane nabulene mbira kegoni lalu aiwa labehe kabe. Agali haguane mbira kagohondo lalu, Í̠ agali ko mbira kegoni, labehe ka aibe.
JOB 34:19 Ngode Datagaliwabehanda wali agali bibahende wabiai hene kago ibugua dege ogonidagua lolebira. Ibunaga deni wali agali bibahende mbirale dewawi heaguabi nawi heaguabi bibahende ogobi dege dege ka.
JOB 34:20 Agali mini lene timbuni howa hongohe heaguabi ibugua urunibi kago abaleore homelaga ka. Mbiraga padagola Ngode Datagaliwabehanda agali uruni ale handia nahe tinaga holene abaleore biba helalu homelaga.
JOB 34:21 Ngode Datagaliwabehanda ina wali agalinaga mana bialu kamaru de handai halu ina ibagabu kamarubi manda biaiho haga ka.
JOB 34:22 Agali ko uruni ti Ngode Datagaliwabehanda de nahendelonaga bira do holene arumahe mbira nawiore ndobe.
JOB 34:23 Ngode Datagaliwabe ibugua mana iname bialu kamago manda biai ka. Ani kagome ibugua iname ko biyadabe be nabidabe hale holenaga manani haru pu nahelaga.
JOB 34:24 Ibugua agali haguane karu bope halu dugu wahole howa ti agali abiore kabe lalu dabo hondolene henge nawiore. Ibuni manda biaiore ka. Ibugua agali uruni bo dugualu agali mende haguane hela aribia haga ka.
JOB 34:25 Tigua mana ko biaga ngago manda biaho howa mbiraga ti padaha ibugua ti mo mogola halu bo hengedapeore haga.
JOB 34:26 Ibugua wali agalinaga deni howa agali urunime mana ko biyadalo manda biai helonaga ti pani mialu bope haga ka.
JOB 34:27 Ngode Datagaliwabehanda ti bope hagadago irane tigua ibu erembira mialu mana bulene winigo wahalu ko wiaru bialu hayagonaga pani ogoni miaga ka.
JOB 34:28 Tigua wali agali yagibano hearu mo ko haga biyagola yagibano biarume Ngode Datagaliwabehondo biamogo bia layago ibu hale haga ka.
JOB 34:29 Anigo Ngode Datagaliwabehanda pani uruni namule manda biyagua nde pani nami harida lalu ibuhondo bi aiwa lolebirabe. Ibunaga dengui handa taraho heagua nde wali agali biamogo bulene naholebira. Anigo ibugua wali agalibi dindibi bayuwa handayaho haga ka.
JOB 34:30 Ibugua ani biagago irane agali ko bu karume kini howa wali agali mana ko ngagoha haru halu napelonaga handayaho haga ka.
JOB 34:31 Tí mbirali hale ho beremigola Yobo ibugua Ngode Datagaliwabehondo lalu, Í̠na genda i̱hondo mo ngiriru yu harugo ai mana ko lone nabuleore, lalu layabe.
JOB 34:32 Mana i̱na bialu harugo damene ko bialu haruyagua nde waholiya mbirale i̱ha wá nale harudaru mo walia habe, lalu bi layane ai hale harimibe.
JOB 34:33 Anigo Yobo í̠na mbirale Ngode Datagaliwabehanda í̠hondo birago turu nahe ke. Ani kego mitangi bialu Ngode Datagaliwabe ibugua í̠na hameledego bulubada lo mitangi nabibe. Anigo dabolenego i̱naga biabe ndo í̠ninaga nga. Ainde í̠ha manda bayale wiagua nde ina hale holoma̱ya í̠naga manda bayale ogoni latagi harene.
JOB 34:34 Agali mini gigabiwi manda timbunibi karu tigua i̱naga bi ogoni hale howa i̱hondo agua laga,
JOB 34:35 Yobohanda bi bame lopebe bialu kago bi ko dege lalu ka. Ibunaga bi lalu kago miniha mo tale nabi bameore lope halu ka, laga.
JOB 34:36 Yobohanda bi lalu karuni agali mana ko biaga karume lagadagua lalu ka. Ani lalu kagonaga Yobo ibugua bi uruni lalu kago wahelonaga Ngode Datagaliwabehanda Yobo lone ba hondole hamelo ka.
JOB 34:37 Ibugua mana ko bialu howa Ngode Datagaliwabehondo lone mine gibiore halu kagoni ndobe. Ibugua inahondo lai laabo halu Ngode Datagaliwabela keba howa lai dege lalu kagoni, lalu Elihuhanda lene.
JOB 35:1 Elihuhanda laabo halu lalu,
JOB 35:2 Yobo í̠na bi ogodagua larigo, Mana i̱na bialu hagago bayale tigabi Ngode Datagaliwabehanda biaga ngago bolangua hene biruli, lalu kegoni ndobe. Í̠na manda bialu keria bi ogoni alego tigabidabe.
JOB 35:3 Ani bialu í̠na bi ogodagua lalu, Ngode Datagaliwabe-o i̱na mana ko mbira nabi hewayagua nde ogonime í̠ biamogo agua bulubadabe. Ani bialu i̱ha bayale mbira agile tagira ibulubadabe, larigoni.
JOB 35:4 Yobo-o ai í̠na bi larigobi í̠naga nenege bedarume bi layarubi i̱na ladai biai holebero.
JOB 35:5 Ai hari daligaha handa daga halu hari beraliba ngaru de handa. Ti li daligaha ngagoni ndobe. Ogonidagua dege Ngode Datagaliwabe ibu daligaore kagoni.
JOB 35:6 Anigo í̠na mana ko biriyagua ogonime Ngode Datagaliwabe mo ko naholebira. Í̠na mana ko dewaore biaabo hariyaguabi ani beregome ibu mo ko agua holobadabe.
JOB 35:7 Anigo í̠na mana bayale tigabi dewa beregome Ngode Datagaliwabe agua biamogo buledabe. Ani bialu í̠naga giha howa mbirale bayale mbira ibu agile mo yulubadabe.
JOB 35:8 Í̠na mana ko mbira biriyagua nde ogonime ina agali kamago dege mo ko holebira. Ani bialu mana bayale ngago biriyagua ogonimebi nde ina wali agali dege biamogo bulebira.
JOB 35:9 Agali hongohe bu karume agali maru hongo nahe karu bope halu hengedape haabo haga ka. Anidagua biragola agali hongo nahe uruni tigua dugu tara bialu mbiralime ti biamogo bilonaga olalu haga ka.
JOB 35:10 Ai urunibi karume Ngode Datagaliwabe ti wabu helenego ibuhondo bi nalaga ka. Anigo ina genda yu kamangi ibugua inanaga miniha mo hongo haga biragola iname turu howa iba gana lalu haramali.
JOB 35:11 Ngode Datagaliwabehanda inahondo manda timbuniore nogo egabi tara tara bibahende biru karunaga manda ngarubi ndo bolanguahe ngiaga ka. Ani kagoyu iname ibu kagoria dai naberemali.
JOB 35:12 Wali agalime Ngode Datagaliwabehanda ti biamogo bilo olaga kagoyu tinime mine halu ko bialu kagonaga ibugua biamogo nabiaga ka.
JOB 35:13 Tiha mini tigabi nawi kagola Ngode Datagaliwabe Hongo Haiheore kagome tigua ibuhondo bi lalu kago hale nahaga ka.
JOB 35:14 Ngode Datagaliwabehanda tinaga bi hale nahaga kayagua Yobo-o ibugua í̠naga bi larego hale naholobadago irane í̠na ibu de nahende ko larigonagada. Ani lalu í̠na Ngode Datagaliwabe ibu í̠naga genda yu harigo biamogo bilo lowa luore hondo harigoyu ibugua í̠naga bi hale nahaya lari.
JOB 35:15 Í̠na lalu, Ngode Datagaliwabehanda agali ko biaga karu pani nelo ba nabi helo wahalu tigua mana ko birago hondowa la nabi wahaga ka, lari.
JOB 35:16 Yobo í̠ha galone napale howa bi anda dege halu bi larego irane manda nabi howa bame lopebe biaga kegoni, lalu Elihuhanda lene.
JOB 36:1 Elihuhanda laabo halu lalu,
JOB 36:2 Yobo-o i̱na baya hangu lawai holiya í̠ ema nabi hale ho birabe. I̱na bi maru Ngode Datagaliwabehanda laradagua lalu í̠hondo lolebero.
JOB 36:3 Ngode Datagaliwabe i̱ wabini kago ibugua mana tigabi hangu biaabo hagago i̱naga miniha manda tara tara to̱ledogo í̠ mo walia halu latagi holebero.
JOB 36:4 I̱ ke̱ nahaga kogo i̱na heneneore laro. I̱ agali manda timbuniorebi mbira í̠la mandagi bedabagoni.
JOB 36:5 Ngode Datagaliwabe ibu hongo timbunihe howa ibugua wali agali mitangi bialu handape nahaga ka. Ibu mini timbuni gibiorewi kagome harihabi dindihabi bibahende ibugua manda biai ho ka.
JOB 36:6 Wali agalime mana ko biraru hondowa ibugua ko biaga uruni dindini lu ibagabu haabo nahelaga. Ani bialu yagibano karu biamogo bialu ti mo tigabu helaga ka.
JOB 36:7 Ibugua wali agali tigabi karu handayaho kagola kininaga mini yaraga hagadagua wali agali uruninaga mini mo yaraga holebira.
JOB 36:8 Anigo wali agali pume gi ge minu kabubu ngelagadagua mo ko holene mbira tagira ibiragome ti daribaho ngelayagua nde Ngode Datagaliwabehanda tihondo lamialu ogodagua laga. Mo ko holene tíha íbu ngaruni irane tígua tíninaga mini mo yaraga halu mana ko tara tara dewa bialu haabo harimigonaga ani anda ibilaga biaga, laga.
JOB 36:10 Ani bialu ibugua ti mana bayale bialu helogo lawai halu mana ko tara tara ngaru erembira mialu pilimu laga ka.
JOB 36:11 Ainde tigua ibunaga bi mana lamirago baya hangu hale howa bialu ibu andaneha heagua nde ti holene bayale taraore haabo helaga ka.
JOB 36:12 Anigo tigua bi hale nahayagua nde waitigi bu karu ibalu ti bo wahai haragola tigua mbirale bule wiyaru manda nabiaga ka.
JOB 36:13 Wali agali Ngode Datagaliwabe erembira mu haga karume ibugua tiha genda timbuni ngago anda ibilo hondo kagola tigua tandaga ho howa Ngode Datagaliwabehondo biamogo bia lalu bi nalaga ka.
JOB 36:14 Anidagua biaga howa tigua wali agalinaga deni mana koorene ko ngaru bialu hayagua tini wene waneigini daliahe dege kaore abale homaga.
JOB 36:15 Anigo Ngode Datagaliwabehanda tihondo mana bayale tigabi ngaru taluwa bialu helonaga biawai hole ibugua wali agaliha genda tandaga ibiraru ibilo wahaga ka. Ibugua anidagua bialu haru dai buwa bayale helo helaga biaga.
JOB 36:16 Yobo-o í̠ genda timbuniore yu howa áyu dege ereba hole bedegoni. Anigo ainde Ngode Datagaliwabe ibugua í̠ haru dai bialu bayale berelalu í̠hondo tomo mbirale bayale ngaru ngialu biragola mbirale ngarume í̠ hapai helo hame naleore kagoni ndobe.
JOB 36:17 Anigo áyu Ngode Datagaliwabehanda í̠ ko biaga mbira keria hendeda. Ani hondowa ibugua í̠ ko birida lalu í̠ tandaga handabelo minu baragoni ndobe.
JOB 36:18 Anidagua bidago í̠naga miniha tandaga holene ngelo kegome í̠na Ngode Datagaliwabe mege bulene bi mbira loligo de hondowa bi labe. Í̠ni mo homogo holenego duniniorebe toba howa í̠naga Ngode Datagaliwabe kago yu waholeni de hondo habe.
JOB 36:19 Í̠na Ngode Datagaliwabehondo i̱ biamogo bia lalu ibu olariyaguabi í̠ninaga hongome mo bayale hole hariga taya biriyaguabi urunime áyu í̠ mo ko hene kegoni ereba naholebira.
JOB 36:20 Ani bialu í̠na aruma holene abale ibilo hame lolene nawigo irane aruma holene ogoni ale ngagoha ko tara tara wali agali kagoha abaleore anda ibaga nga.
JOB 36:21 Í̠ha genda áyu dege anda íbu ngaruni hondowa turu nahe bedegonigo ainde í̠na mana ko bule ngaru turuore howa bialu hariya. Ani biriyago manda bialu í̠ ko ngagoha haabo holigonaga de handalu mamage ho holene nga.
JOB 36:22 Ai hale ha. Ngode Datagaliwabe ibu daliga hongo timbuniorehe ka. Ibugua ina biawai hagadagua aiwa biawai holebirabe.
JOB 36:23 Ngode Datagaliwabehondo í̠na ogoale bia lalu bi lamibehe mbirali ai kabe. Ngode Datagaliwabe í̠na mana tigabi ndo birida lalu labehe mbirali ai kabe. Urunidagua lolenego mbirali naheore ndobe.
JOB 36:24 Wali agalime mbirale Ngode Datagaliwabehanda wabini ngaru de hondowa ti turu halu ibunaga mini yaraga halu iba gana laga ka. Anidagua biagago manda bialu í̠nabi nde anidagua dege bulene nga.
JOB 36:25 Wali agali bibahendeme Ngode Datagaliwabehanda bini ngaru handa hondowa biabe binidago irane baya hangu manda nabiore ka, lene.
JOB 36:26 Elihuhanda laabo halu lalu, Ngode Datagaliwabe ibu dunini daligaore ka. Iname ibu baya hangu manda biai habe naheore ibunaga malibi agirabe iname manda nabiore kama.
JOB 36:27 Ibugua iba dindini bedaru hariha haru irigi howa mo iba dalu bu hinilaga ka.
JOB 36:28 Ani bialu iba hari beralibaha howa dindini ibira haragola wali agali dindini bu kamarume iba bayale dewaore berelo haramali.
JOB 36:29 Hari beraliba timbuni ngagome hari bibahende bu dambi hai halu Ngode Datagaliwabenaga balai anda haradagua biaga ngago agua bialu biagabe ina manda nabiore kama. Ani bialu hari beraliba andaneha howa hari daba bialu kilikulu lagago agua bialu lagabe ina manda nabiore kamagoni ndobe.
JOB 36:30 Ibugua dege hari dabanaga wá timbuni datagi helaragome hariha wá haame halu iba solowara bedago andaneha aruma ho wiaga. Ani bialu wá haragome mbirale bibahende ngaru panigi ona wiai haga.
JOB 36:31 Ngode Datagaliwabehanda hari beraliba iba dalubi handayaho howa haru haga ka. Anidagua dege dindini wali agali hameigini tara tara bi tara tara laga bu karu handameho howa haru hai haga ka. Ani bialu mabuha tomo damene bayale mo anda hai helaragola wali agali tomo nalu holene karulape helaga.
JOB 36:32 Ibugua wá holene hari daba giha yu howa ibu de hendedagoha bilina howa timu baradagua bope haga ka.
JOB 36:33 Hari daba birangi iba dalu puyabula hongoheore ibulebirago mo walia haga nga. Ani biragola nogo bulumaga bu karu tibi nde dalu timbuni ibarua manda bu haga ka.
JOB 37:1 Hari daba bialu hari kulu laragola i̱ mogo timbuni lalu i̱naga gubaliniha duru lalu haabo haga.
JOB 37:2 Hari kulu laruago hale hadaba. Ogoni Ngode Datagaliwabehanda ga̱ lalu bi hongo howa ladaga haruagoni.
JOB 37:3 Ibugua hari daba biragome beraliba ngaru dindi gimbuni ngaru bibahendeha piai helaga ka.
JOB 37:4 Ani bialu mani ibugua bi hongo howa ladaga haruagola iname ibunaga hongo ogobioreda lo manda beremali. Ngode Datagaliwabehanda ogonidagua birangi hari daba migimege lalu purogo lelaga.
JOB 37:5 Ngode Datagaliwabehanda bi latagi harago bayaleore tara mbira latagi haga ka. Ani bialu ibugua inanaga mini ngamago bolangua howa mbirale tara tara iname manda nabini ngaru biaga ka.
JOB 37:6 Ibugua bi laragola dalu dindiguni ibira haga. Ibunime dege bi laragola iba dalu timbuniore ibaga.
JOB 37:7 Anidagua bialu ibugua wali agalime biabe biala ho ngaru nabilonaga hapai haga. Ibugua biaga ngago damene wali agali bu karume manda bilonaga ani biaga.
JOB 37:8 Ogonidagua bigi birangi nogo ega tara tara ema bialu piaga karume tini paliaga ngagoha pu haga haga biaga.
JOB 37:9 Puyabu hongoheore tini daluha howa heyalu puloyu ibagaya. Ani bialu puyabu ogonime dagare bulene puloyu ibaga.
JOB 37:10 Ai Ngode Datagaliwabe ibunime hongo howa pu laragola puyabume dindiguni ibira helaragola iba bedaru mo dindiguni bu hinalu giambe helaga ka.
JOB 37:11 Ibugua hari beraliba timbuni ngagoha iba mo mogobu berelowa ogoni dombeneha hari daba bape haragola dindi tara tara ngagoha purogo lelaga.
JOB 37:12 Ngode Datagaliwabe ibunime bidaba laradagua hari beraliba dindi bibahendeha purogo lalu ibugua bibe lalu lamirago bule piai hagaya.
JOB 37:13 Marungi nde wali agali bu karume mana bialu karu damene mo tiga bule dalu pudaba lalu lamiaga. Marungi nde wali agali mo bayale hole dalu pudaba laga. Marungi nde dindi bibahende ngago lone mo bayale holenaga dalu ibilaga.
JOB 37:14 Yobo-o í̠ hale ho biruwa Ngode Datagaliwabehanda biabe hongohe tara tara biaga ngago bayuwa manda bibe.
JOB 37:15 Ngode Datagaliwabe ibugua hari beraliba ngagoha hari daba bidaba lagago agua biaga manda bidebe.
JOB 37:16 Ani bialu Ngode Datagaliwabehanda hari beraliba bameore lina ngeledago ogoaleni ngeledalo í̠ manda bidebe. Ainde Ngode Datagaliwabe ibu bibahendeore manda biaihe howa ibugua biabe bayale tara tara ngaru biai haga ka. Ani bidago í̠na uruni bibahendenaga manda nabiore kegoni ndobe.
JOB 37:17 Ainde puyabu poboyogobi puladaga haragola í̠naga aga tinginibi poboyogo biragola lone mo dagare bia holenaga mbira bibe naheore kegoni.
JOB 37:18 Ainde Ngode Datagaliwabehanda hari li kago wabialu ibuni holene ngagoria hongo howa helo heleda. Ani kagola hari mindini ogoni wabini ngaru iba wa̱i̱ handaradagua bulene heleda. Ai í̠na agua manda bide. Í̠na ibu biamogo bia halu biabe uruni maru bibehe kebe.
JOB 37:19 Í̠na bibehe keyagua nde iname Ngode Datagaliwabenaga godi lolene ngagoria pu howa ibu baba bi ogodagua lolene nga lalu ina inanaga miniha wá nalebi manda nabibi ibula bi lolenego iname manda manda bibe nahe kamago í̠na langulene karulape kegoni.
JOB 37:20 Ainde Ngode Datagaliwabehondo i̱na bi larogola ibugua hale hayagua nde i̱ bo waholigo i̱na bi lole kogo nalolebero.
JOB 37:21 Puyabume hari beraliba wiaru pulo wahai hayagola hari mindini pani halu ni hongohe darago demborerebi iname de handabe naheore kamagoni ndobe.
JOB 37:22 Dindi abene uyurahayagi hariha howa wá hongohe hadali kagonaga wá ogoni ngolo handalehe ka. Ogoni Ngode Datagaliwabehanda ibunaga yári heledagola wá timbuni holene ibunaga hongo holene heba ibirago handalu iname mogolo hondowa gi haramali.
JOB 37:23 Ngode Datagaliwabe Hongo Haiheore kago ibu daligaore kagoria iname kaware hapara halu pobe nahe kama. Ibu tigabiore howa hongo timbunihe ka. Ibu mana tigabi hangu biaga kago ibugua ina bame bope naholebira.
JOB 37:24 Ani biaga kago manda bialu wali agali bu karume ibuhondo gi hai haga ka. Ani bialu mbirali ibu mini gigabiwi ko lo mitangi bu karume bi larago ibu hale nahaga ka, lalu Elihuhanda lene.
JOB 38:1 Elihu ibugua bi lai heagola Anduane Homogo ibuni hari daba bialu iba dalu timbuni ibiyagoha howa ibugua Yobohanda bi lalu hayaru ladai bialu lalu,
JOB 38:2 Yobo-o í̠ mini bayalebi manda bayalebi nawioredago. Í̠ agali agobime bi dewa lama ibaga bialu howa i̱naga biabe bule ngoru mo habo lalu kebe.
JOB 38:3 Ai áyu í̠ agalioreyagua naigoria heyu howa bi maru ladai bibelo hale haro.
JOB 38:4 I̱na dindi ogo wabialu mo hongo halu harungi í̠ agoha haribe. Bi te í̠na baya hangu mandabu keyagua nde i̱ langerene.
JOB 38:5 Dindi ogobiore wiloda manda bialu wabinidago aiwabe. Dindi ogoninaga magi manda bule hagane pu yalu mandabu penedago ai kabe. Í̠na manda bidebe.
JOB 38:6 Dindi ogo hongo howa yu helonaga gene agohayagi kabe. Dindi wabulenaga gene ege to̱le̱ dindiha ala ngelenedago aiwabe.
JOB 38:7 Dindi ogoni pigane wabialu heangi yakundi bu hearume turu halu iba gana layagola dahuliyali hearume turu howa iba gana ladaga halu hene.
JOB 38:8 Iba timbuni solowara bedaru dindinaga tombeneha howa tidatagi halu ibiyagola ai naibi harula lalu iba ibu birulene ngagoria biradaba lenedago aiwabe.
JOB 38:9 Iba solowara pigane íbu bereagola hari beralibame iba ibu aga biradagua bia howa yári buwa berelene. Wali ai̱yame waneigini agame yári bia hagadagua hari beraliba mindibime iba dambi helenego i̱na ndobe.
JOB 38:10 Ani bialu iba ibu birulenegoha biru wahelo pabe bu mabu bido.
JOB 38:11 Ani berelowa iba solowara ibuhondo bi ogobi lamido. Iba yaribu bialu howa í̠ninaga hobane ngelarogoria ibalu dai bibe. Dindi mendeha pogolo amu nahabe, ledogoni.
JOB 38:12 Yobo-o la naberego agua biya. Halu mbira í̠na bi larigola mbiraga winigo ega bi layabe. Be horo bibahendengi egerebagi hangu wiaaboha larilibe.
JOB 38:13 Arumame mbiraga balangiya aleme dindi dambi hai kagola wali agali ko biaga karume ko bule mbiraga ibagabu hagago. Ai horo mbirungi mbiraga pageali ko biagaru íbu heagola uruni ibida pelo í̠na ega bi la larigola ega bi layagola agali ko bialu ibida piai hayabe.
JOB 38:14 Ega bi laragola ni dedagome wá haragola mbiraga arumaha wia do hayaru wá kagoria baya hanguore handai holeberema.
JOB 38:15 Uruni agali ko karunaga mana ko ngaru turu howa bialu haga horombe ale nga. Anigo horongi tinaga biabe ko biradaruni wahalu bibe nahedagola bame haga.
JOB 38:16 Ai iba solowara bedagonaga andaneha anda puwa iba andane dindiha ibagabu halu iba dugu daga haga ngago handaribe.
JOB 38:17 Agua biyabe. Í̠na dindi andaneha puwa wali agali homeneru piaga panga haraba arumame ndibulo wahe wiago handaribe.
JOB 38:18 Dindi ogoni timbuniore ngago ai dindi ogoninaga lene lene gimbuni ngaruha handai kebe. Hondowa manda biai keyagua nde i̱ langia nabere.
JOB 38:19 Ai wá holene ibu nde ibuni dalu pole piagago hariga í̠ hendedebe. Mbiraga ibuni dalu agoha ngabe.
JOB 38:20 Wá holene aruma holenela libu libuni dalu dai bilonaga hariga ogodagua pudaba lowa walia halu lone dai bidaba loleberebe.
JOB 38:21 Yobo-o í̠ agali waheoredago í̠na libu dalu ogo lalu walia holeberegoni. Irane i̱na wá holenebi aruma holenebi wa nabi hewangi í̠ ai̱yahanda í̠ ala taba henenedago.
JOB 38:22 Iba dalu dindigunila mo mogobu ngelaga ngago í̠ hondo piribe.
JOB 38:23 I̱na uruni wali agalime mine howa wai bialu baga baga bialu karu bolenaga manda mandabu ngeledogoni.
JOB 38:24 Ni pigane dole hoai lalu bibahendeha datogo mani lole piganeore hoai lagago hariga agoha pole porabe. Ni tagira ibiragoha howa puyabu ibuwa bibahendeha pume hagago ibunaga hariga a ngagobe.
JOB 38:25 Dindi ogoria iba ibilonaga hari daligaha howa iba gana bialu aiwa dadabu ibilagabe. Hari daba ale timbuni kilikulu laga bialu purogo layaruni pelo hariga aiwa bo wia kabe.
JOB 38:26 Dindi wali agali nahaga ngagoha iba dalu ibilayaruni aiwabe.
JOB 38:27 Abale dindi ogoniha dindi hangu wialu mbirale anda nahaga winigo ai dalu ibalu dindi mo karulape howa dataniru anda harago aiwa mo bia hagabe.
JOB 38:28 Mbiraga dalubi pibiyabi ibira hagayago libu aba kabe nahe.
JOB 38:29 Dalu dindiguni ibira hagarubi kewaro bagarubi ti ai̱ya bedabe nabere.
JOB 38:30 Dagare bulene horo tagira ibirangi iba bedaru giambe ege to̱le̱ ale halu dindigunime iba solowara bedaru bu dambi hai haga ngagoni.
JOB 38:31 Ai nde Yobo í̠na yakundi karuni bibahende mo mogo buwa mbiraore hanguni helai holeberebe be yakundi maru mandagi dariba homaga hene ngaru hadape halu purogo ladaba loleberebe.
JOB 38:32 Í̠na yakundi maruhondo hariga mo walia halu mali mbiragonaga hariga ogodagua ibabe loleberebe.
JOB 38:33 Yakundi li harini karuni tinaga mana talialu haga ngaru í̠ manda bidebe. Dindini ngarubi nde mana mbira yakundiru ti biaga ale dege bidaba loleberebe.
JOB 38:34 Í̠na hari beraliba kagohondo iba dalu í̠ni damulenaga ibila lowa hongo howa larego hale halu beralibame iba ani ibilolebirabe.
JOB 38:35 Ani bialu hari dabahondo í̠ mbiraha pu laregola ibugua ladai bialu lalu, Í̠na bia laredagua biai hole kogoni, lolebirabe.
JOB 38:36 Ega gabiago ale ma luhe bedaruhondo iba li timbuni ibulebira lalubi ega gogologo bedaruhondo ega bi larago bi la lalubi manda aiwa talebu miniyabe.
JOB 38:37 Harini beraliba karuni iba hambu to̱lo wiaga todobene be ale ngago. Uruni ai aleme daga labehebe. Iba uruni dindini odope hole agali aiwa polebirabe.
JOB 38:38 Ani biragola dindini be abalu titaulo ngaruni mo gede halu dindini para helonaga aiwa lamibehebe.
JOB 38:39 Anduane Homogohanda laabo halu lalu, Yobo-o í̠na ema bialu piaga bedaru budi gabua ale laiono ti ege gundu bira do haga ngaruha bedaria bo nelo haru eberegola laiono tigua karulapeore bo nalu berelo mirilibe.
JOB 38:41 Ega hombo hagau bedaru tomo nolene nawidagola dindi kaundiaruha tomo taya bima pedaha tinaga iginirume i̱hondo tomo ngi lowa olalu bedagola ti tomo nelo aiwa miagabe, Anduane Homogohanda Yobohondo bi ani lene.
JOB 39:1 Aguanaga. Nogo meme irabuha gabua karu ti igini ogoni hono wiaga kalo manda bialu nogo gabua meme ale mini dia karu ti igini wirago í̠ hendedebe.
JOB 39:2 Nogo meme hari bare ngaruha haga karubi nogo dia karubi tinaga igini ege ogodagua ti ai̱ya tombeha biralu horo ogongiore hono wulebiralo manda bidebe.
JOB 39:4 Nogo uruni ti ai̱ya baba hari bare ngaruhabi dangi te ngaruhabi ibagabu biralu anda haga. Ti anda halu hongo kagola ti ai̱ya wahalu tini hangu hama piaga. Ani bialu dai nabi puabo haga.
JOB 39:5 Nogo gabua dongi dariba karu tini hame ledagoha pupe halu pelo golope holene ai kabe.
JOB 39:6 Dindi ko wali agali nahaga tayanda amu ngaruni tinaga dindi ogoni halu ti ogoniha ibagabu helo midogoni.
JOB 39:7 Nogo dongi uruni ti andagani hayagua agalime hende ho dariba howa ba talia bigi bialu tinaga biabe bia helo helaga. Ani biagayane handalu tanoha bi dewa lalu giligele dewa laga ogoriani ti habe manga haga.
JOB 39:8 Ani bira handala ti hari wali agali nahaga irabu te ngaruha puwa tinaga tomo datani ira yuni ngaru nalu haga.
JOB 39:9 Yobo-o nogo bulumaga gabua karume í̠naga biabe biahalu hagabe. Ne laragola anda palelo manda mandabu wirigoha tini manda bialu palue piagabe.
JOB 39:10 Í̠na ti pume hende howa haru halu dindi ulini unu ngaruha tomo hongole dindi alilo haru pu poleberebe.
JOB 39:11 Tinaga hongo timbunihe ndoyabe. Anidagola í̠na manda bialu keria tinaga hongo timbuni gibiorehe kagome í̠naga biabe timbuni ngaru bia holebiralo manda bidebe.
JOB 39:12 Nogo bulumaga gabua karume í̠naga mabuha puwa tomo widi lini bogabi dedaru gandulo yalu ibuwa amu yuni iraneru yu wahaga ngagoria yalu ibule pudaba laregola tigua hale halu pu polebirabe.
JOB 39:13 Ainde ega yari ale bedaru ti turuho kangi tinaga babaganeme yabu yabu laga. Ani bialu howa ega gabiago ale ma luhe bedaru tinaga igini bedaru baya hangu handayaho biragadagua ega yari ale uruni tinaga igini baya hangu handayaho ha nabiaga beda.
JOB 39:14 Ega yari ale uruni tinaga habaneru wialu howa egame dambiho paliagadagua palia nabi dindime mo poboyogo bia helo dindini ngelaga beda.
JOB 39:15 Anidagua bialu wali agalimebi ema bialu piaga gabua maru bedarumebi ibalu tinaga habane ngago hengedowa togodolobadago manda nabiaga.
JOB 39:16 Ega yari ale urunime tinaga igini gali karu baya hangu handayaho ha nabi mendenaga haru haradagua biaga. Homayaguabi homelo wahalu piaga. Ti bame habane wirago dege halu handa dai nabi wahalu piaga.
JOB 39:17 I̱nime ti mini mandabi nawi ogonibi helo henemane heledo.
JOB 39:18 Anigo ega yari ale uruni ti heyalu gerai larangi tinaga babaganeme giligele lalu hongo howa piaga. Tigua gerai lalu howa agali nogo hosini biralu gerai lararu yu wahalu ibu bolangua habehe piaga.
JOB 39:19 Yobo-o ai agua biya. Í̠na nogo hosi karu hongo mialu tinaga mani irini luni karuni í̠na heledebe.
JOB 39:20 Nogo hosi karuni tigua pagayame daligaore pogola daga hagadagua pogo lelonaga hongobi bi hongo howa lalu kagoni wali agali mo gi haga biagadagua bilonaga hongobi í̠na minibe.
JOB 39:21 Hosi urunime tinaga hongo timbuni kagonaga parali howa turu halu tinaga gi gindi bame dindi godalu halu howa wai bule gerai lalu piaga.
JOB 39:22 Hosi uruni ti mogo lalu gi nahaga ka. Wai timbuniore biyaguabi ti gi halu ibida pu nabiaga.
JOB 39:23 Hosirume ami agali wai bilo tinaga erekunini berelalu gerai lalu piaga. Ani pialu howa timu nu nogo dongoneme wabiniha henedarume giligele lalu aminaga yandare yidarume ngiringara lalu bialu kaore yalu piaga.
JOB 39:24 Nogo hosime pilipe ale biguli bi hale hayagua tinaga minaha habe nahe ka haragola abale wai pole hongo tara halu piaga.
JOB 39:25 Pilipe ale biguli biago bi hale hayagua bi hongo howa lalu hosime wai biaruabe hondole nga haga. Ami haguane kagome bi ledagola ami agali karume ga̱ ladaga halu wai bule porabupe halu piaga.
JOB 39:26 Yobo-o ega nene bedaru ti unurayagi pole howa babagane agua yabu loabe lalu í̠hondo hale hagabe.
JOB 39:27 Ainde ega bodo hariawe alerume ti hari nene ngaruha anda bule pole howa í̠hondo hale halu piagabe.
JOB 39:28 Ega bodo hariawe uruni tinaga ha do anda hari nene urunihadane ege to̱le̱ kaba ngaruha tinaga anda uruniha biaga.
JOB 39:29 Uruni tinaga anda biagoha bira do howa handa tagi halu tomo naga ale maru balu nole handa a̱i̱ na̱i̱ biaga. Kaundianibi kawarenibi ngaru handa waliaore haga.
JOB 39:30 Agali wai bialu bo homelenenaga tinginiru dindini wima pedarunaga ega uruni ti abale ibuwa biru mabu biaga. Tinaga igini bedarume homene tingini ngarunaga darama nole turu howa tama bialu biraga, lalu Anduane Homogohanda lene.
JOB 40:1 Ani lowa Anduane Homogohanda Yobo hale halu lalu,
JOB 40:2 Ai Yobo-o í̠na i̱ Ngode Datagaliwabe Hongo Haiheore kogohondo lai lalu kegobi i̱na mana tiga nabi birida larigobi bibahendenaga bi áyu í̠hondo hale haroru ladai biai habelo henge ngerogo ladai buleberebe be bape halu waharebe, lene.
JOB 40:3 Ani layagola Yobohanda Anduane Homogohondo ladai bialu lalu,
JOB 40:4 Anduane Homogo-o i̱ nahabane galone naheore kogoni howa bi la ko haruda. Ani buwa í̠hondo agua ladai buabe. I̱na bi mbira larolono labe naheore kogoni.
JOB 40:5 I̱na bi dewaore larugonigo ai bi lone naloleore, lene.
JOB 40:6 Anduane Homogo ibuni iba dalu hari puyabu timbuni biyagoha howa lalu,
JOB 40:7 Ai í̠ agaliore heneyagua i̱na í̠hondo bi hale haga berogo ladai bule heyu habe.
JOB 40:8 Ai í̠na hongo howa lalu, I̱ agali ko nabiaga tigabiore kogoni, larigodago irane agome í̠na i̱hondo kagua biridago manani dababa laribe.
JOB 40:9 Í̠ hongo timbunihe i̱ni kogobi dege kebe be í̠na bi laregola í̠naga bi hari daba bialu kulu kala laradagua biagabe.
JOB 40:10 Í̠na bibehe karulape keyagua nde i̱naga henge í̠ mialu yári bayaleru mini lene holeneru hongo timbuni holenerubi yu howa wali agali bu karu handame howa í̠ daliga birabelo.
JOB 40:11 Ani biruwa handalu keria agali mine haga karume tininaga mini yaraga howa mine hayagua nde í̠na tandaga timbuniore howa tihondo mana bialu hengedope habe.
JOB 40:12 Ai aniore bialu agali mana ko biaga karu bope habe. Ani bialu ko biaga uruni tini henegoria kaore dege helowa bo hengedope habe.
JOB 40:13 Ani hengedope howa wali agali maru karume lone hondoligo nahendelo dindi dugudambi halu hora habe.
JOB 40:14 Í̠na uruni biai harego hondowa í̠ninaga hongome i̱ bolangua halu wali agali ko biaga karu bope howa pani midegola ai i̱na í̠naga mini yaraga holebero, lene.
JOB 40:15 Anduane Homogohanda laabo halu lalu, Yobo-o ai í̠na nogo gabua tara timbuni mbira mini hibobodamusi kago hondole pu. I̱nime uruni ti wabialu í̠bi nde wabia dege birugo kegoni. Hibobodamusi uruni tinaga tomo nogo bulumaga karume datani naralidagua tibi datani naga ka.
JOB 40:16 Ani howa tinaga tingini hongo timbuniore howa tinaga erembirahabi tombehabi hongo timbuniorehe ka.
JOB 40:17 Tinaga erene hongoheore ira tamia ale halu tinaga gi ge hongo gibiheore ka.
JOB 40:18 Tinaga kuniru giambeore ege to̱le̱ mini boronosime wabini anda gene ale howa tinaga gi geru hongohe giambe nama kuluba timbuni ale ka.
JOB 40:19 Ai Ngode Datagaliwabe i̱nime ema bialu piagaru wabialu howa nogo mini hibobodamusi uruni ti daliga timbuniore bolanguahe helo wabinigo ka. Wabini anduane i̱ni hangu uruni bibahende bolangua haihe kogoni.
JOB 40:20 Nogo hibobodamusi uruni tinaga tomo nelo datani hari barebare ngaruha nogo tara tara maru karu ti ibagabu howa nalu haga ngaruha ibubi nalu holebira.
JOB 40:21 Ani howa ti paliaga ira anihe tilitili karu teneha palialu tolate iba pugua ngaruha ha do haga biaga ka.
JOB 40:22 Ani howa nde iba angeni ira karu teneha pialu paliaga ka.
JOB 40:23 Ti ani karia iba li timbuniore hongohe ibalu tinaga ma namu lai hayaguabi tiha gi holene mbira nawi howa embedaho haga ka.
JOB 40:24 Ti ani kagola agali abi aleme tinaga de mo ge howa minabehebe. Agali abime ti gonoha hadabehe kabe, lene.
JOB 41:1 Anduane Homogohanda Yobohondo laabo howa lalu, Ai Yobo-o í̠na wena baga hugime Lebiadana minabehebe be ogoninaga hége minu palu dariba habehebe.
JOB 41:2 Ibunaga ngui harigaha diri bolo wuwa pu ogoniha hende halu haru poleberebe. Ani ndoyagua nde pume ibunaga ne hanganeha hende holeberebe.
JOB 41:3 Í̠ urunidagua bibehe kebe. Í̠na ogonidagua bialu ibu minu yania hariyagua nde í̠hondo bi darabini lalu, Ai nde i̱ poliya í̠na dara halu i̱ yupeha, lolebirabe.
JOB 41:4 Ibugua í̠nila bi lo pongobo wialu í̠naga biabe bulene ngago ibugua bia holiya lolebirabe.
JOB 41:5 Ega hinini bedagola mo gini bia hagadagua ogoni ibu mo ginibia holeberebe. Be í̠ wane emenerume mo gini bia helo í̠na ibunaga mani hende howa haru poleberebe.
JOB 41:6 Agali wena minaga muni dewawi karume ogoni ibu yolo ogodagua mibeheda lowa bi wai bialu ai tigua bo podaga buwa muni tagulebirabe.
JOB 41:7 Ainde í̠na ibu boga dege bialu timu agirabe tobahe ibunaga tingini embonerunaga hai heloleberebe.
JOB 41:8 Ibunaga tinginini gi wialu ela ha handa. Ani beregola ibugua hongo timbuni howa wai birago handaregola ibu bedagoha halu mende ela nahole labelo mbira bulebirago hondolebere.
JOB 41:9 Abagua mini Lebiadana ogoni minule lo manda bideyagua nde mini ogoni áyu yu waholene nga. Irane í̠na ibu bame handaba haregola í̠naga gi ge ala duru lalu mogolowa hongo nahe pandina ibira holebere.
JOB 41:10 Abagua ogoni ibu padaria agali mbirame mo heya howa balu wayali habe nahe ka. Abagua ogoni balu wayali holene mbirali naheyagua nde agali abi aleme i̱ bolangua holobadabe.
JOB 41:11 Áyu dindini ngaruni bibahende i̱ninaga ngagoni. Mbiralime i̱hondo mbirale mbira ibunihondo mani ngiadai bulenaga yuha lalu ngini mbirali ai kabe.
JOB 41:12 Ai abagua ogoni ibunaga tingini hongobi ogobiore beda lalu garea laro.
JOB 41:13 Agali abi aleme abagua ogoninaga tingini o ligilaga ledago lagalo wahabehebe. Ibunaga ne gibiore ho bedagoria í̠ agali abi aleme hapara holeberebe.
JOB 41:14 Ibunaga ne gibiore dewa kago hondowa agali gi taraore haga. Anigo aiwa ibunaga ne mo halabehebe.
JOB 41:15 Ibu tinginini o ligilaga ledarume ibunaga tingini humbi ale halu mo hongo kagola ibuni turu taraore haga beda.
JOB 41:16 O ligilaga ledagome tingini bibahende dambi hai halu ndibulo wa kagola ibu kabaneha puyabu emene mbira anda pobe nahe beda.
JOB 41:17 Ani bialu hongo howa ndibulo wa kagola mbiraleme dongone ligilaga ledago lagalowa taulo wahabe nahe.
JOB 41:18 Ibu kiame baragola wá timbuni ibunaga ngui harigaha howa tagira ibalu yabulo togo laga. Ani buwa ibunaga debi handalu keria egerebagi ni tagira ibiraligobi haga.
JOB 41:19 Ibunaga ne harigahabi howa ira hungu kiau latagi howa dido lalu purogo laga.
JOB 41:20 Ani bialu ira hagua pobo timbuni biraligobi ibunaga ngui harigaha howa tagira ibaga.
JOB 41:21 Ibugua ne hariga ha̱ laragola ira hungu bialu kikiau latagi haga.
JOB 41:22 Ibunaga ma hongo taraore kago hondowa agalime gi taraore haga.
JOB 41:23 Ibunaga tingini o ligilaga ledaru baya hanguore tinginiha paraho wa kagome ibu mogoore nale biraga beda.
JOB 41:24 Ibunaga bu mini giambe dege lalu ege to̱le̱ ale biruwa ibu mbirale mbira gi holene manda nabi beda.
JOB 41:25 Abagua ogoni ibu heyaragola agali hongohe pari wayaliore heneyaguabi gi taraore howa duru lalu ibida pobe nahe haga.
JOB 41:26 Danda timu yandare yidaru bibahendeme bai hayaguabi ayu tibu nene gadeleme dibayaguabi ibu mutudu nawulebira.
JOB 41:27 Ibugua uruni bibahende nagalonedane yohondo biraga beda. Aeane yandareme bayaguabi ogoni dangi yuni gabuni ale haga. Boronosi yandare hongohe giambeoreme bayaguabi ogoni bame yohondowa ira magane goba ale haga.
JOB 41:28 Danda timu yandarerume bayaguabi ibu gi howa mogo lalu ibida napiagaore. Ege to̱le̱ dugualu bayaguabi uruni bame ibunaga tinginini ira yu gilope haradagua biaga beda.
JOB 41:29 Wai biaga kango yiaguabi ogoni bame perabo gabuni ale handale halu timu yandareru ngilingele layagua uruni nagaloneda lowa mo yohondo wiaga.
JOB 41:30 Abagua ogoni ibunaga tombehayagi o ligilagalo kago todobene be dindime wabinigo pambu lene yapara hene mbaule nene gadele ka. Ibu dindi waru ngagoria poragola tombeha o kagome dindi godama iba ganarua biradagua bima piaga.
JOB 41:31 Solowaraha do̱ lalu poragola iba bedago ta̱la a̱i̱ na̱i̱ bialu todobeneha iba kidikodo lalu ta̱la tagitagi baradagua biaga.
JOB 41:32 Ibani ibu do̱ lalu penegoria iba pele agali waherunaga dagua pelaragobi biaga.
JOB 41:33 Abagua ogoni ibuore mbirale mbirago hondowa gi holene nawiore biruwa ema bialu piaga maru bedaru aria mbira ibu ale nabereore.
JOB 41:34 Ema bialu piaga bedaru aria maru mini lene timbuni bereaguabi ibugua uruni mo awadale halu handa angua howa beda. Ema bialu piaga maru bedarume tininaga mini yaraga hayaguabi uruni bame degedago lowa ibuni bibahendenaga kini beda, lalu Anduane Homogohanda lene.
JOB 42:1 Anduane Homogohanda bi ani lai hayagola Yobo ibugua Anduane Homogohondo ladai bialu lalu,
JOB 42:2 Anduane Homogo-o í̠nime hangu mbirale bibahende biai hagaore kego manda bu kogoni. Í̠ni biabe mbira bule lo manda bidego mendealime nabibe nalaga.
JOB 42:3 Í̠na i̱hondo bi mbira ogodagua hale halu lalu, Agali minibi mandabi nawi mbirame í̠naga biabe buleberogoha hapai kago aidabe, lari. I̱na bi dewaore irane nawini howa bi ko dewa lalu harudagonaga daraba laro. Bi tara maru lalu harudaruni i̱ninaga mini mandala bolanguahe larudago ai uruni baya hangu manda budai buliya.
JOB 42:4 Ani bialu í̠na i̱hondo lalu, Yobo-o i̱na bi larogo bibahende baya hangu hale hai howa ladai bibe, larigoni.
JOB 42:5 Ainde Anduane Homogo-o abale howa agali degeme bi layaru hale howa í̠ kegoda lalu manda bu harugo ai áyu i̱ninaga deme í̠ handaore bidogoni.
JOB 42:6 Ani hondowa i̱nime bi lalu harugonaga taga henene ho kogoni. Taga howa mini beregedo kogo walia halu be abalu dugu hiruwa bedogoni, lalu Yobohanda lene.
JOB 42:7 Anduane Homogohanda Yobohondo bi lai howa ibugua Temana tanoali Elibasahondo bi ogodagua lene. Elibasa í̠bi í̠naga nenege agali kirali biago labohondobi kebaore ho kogoni. Irane tígua mana galone i̱na biagaru i̱naga biabe biahaga agali Yobohanda layadagua ndo la ko harimi.
JOB 42:8 Ai tígua áyu ogoni puwa nogo bulumaga wangabe karia nogo sibi wangabe karia lowa i̱naga biabe biahaga agali Yobo karia haru halu ibule pudaba. Haru ibuwa i̱naga bo lomabu ngialu irani delai halimu. Ani bidamigola Yobo ibugua tígua ko birimigonaga i̱nihondo dara halu biamogo bibe lowa bi larago i̱na hale howa tígua bi la ko harimigonaga mana bialu pani nanguliya ani bule pudaba. Irane i̱naga biabe biahaga agali Yobohanda bi layadagua ndo larimigodane ani bidaba laro, lene.
JOB 42:9 Anidagua laya handala Temana tanoali Elibasabi Suba dindiali Bilidadabi Nama dindiali Sobabi ti bibahendeme Anduane Homogo ibugua bilimu layadagua biai hene. Biai heagola Yobohanda ti dara halu biamogo bilo Anduane Homogohondo tinaga bi la hene. Biamogo biya handala tini andaga pugu pugu bini.
JOB 42:10 Yobohanda ibunaga nenege tebirali biaru biamogo bia lalu bi lo heagola Anduane Homogohanda Yobo bayale helonaga lone biamogo bini. Anduane Homogohanda Yobo mbirale abale wu hayaruni emene hangu lowa mani dewaore miatago halu mini.
JOB 42:11 Ani heagola Yobo ibunaga damene hearubi ibuni hamene mbalini bu hearubi bibahendeore ibu andaga tomo nole ngoai hene. Tigua Yobo ibu genda timbuni Anduane Homogohanda mo miyagonaga mitangi halubi ogoninaga Yobo dara halubi Yobonaga bu mini mo hongo hole ani ngoai hene. Ani biruwa ti bibahendeme muni silibabi gi magi ngolome wabinirubi mbira dege dege Yobo migi bini.
JOB 42:12 Horo ogoningi howa Anduane Homogohanda Yobo mo bayale halu hene. Hamaro bulenehayagi abale haraligobi ndo lowa bayaleore helene. Ibunaga nogo sibi daosini deria (14,000) hinalu nogo kamele daosini waragaria (6,000) hinalu bulumaga daosini kira (2,000) hinalu nogo dongi angibuni daosini mbira (1,000) hinu halu bini.
JOB 42:13 Ani howa ibu igiri karia hono wialu wandari tebira hono wini.
JOB 42:14 Wandari wahenego mini Yamima wialu mendego mini Kesia wini. Tebonego mini Kerene Habugu wigi bini.
JOB 42:15 Wandari uruni baya dege lalu ti dindi ogoniha wandari bayale ti ale mbira nabere lowa ti hangu bayale berene. Ai Yobohanda ibunaga paluni wiaru ibu iginiru tale biahaga bialu howa ibu wane tebirali biarubi nde tale bialu mini.
JOB 42:16 Yobo ibu mali handari mbirani pira maria (140) karulape howa ibunaga aguanerubi tinaga waneigini hayarubi bibahende handaiore hene.
JOB 42:17 Ani handalu nde Yobo ibu biru wia dege bialu waheore hayagola biru mo la a̱i̱ halu homene.
PSA 1:1 Mbirali mana ko biaga karume ko bia larago hale halu nabiagabi tigua ko biradagua nabiagabi Ngode Datagaliwabe deni habane nabuleneme mege bialu bedagoria nabiragabi kago ibu turu ho ka.
PSA 1:2 Ani nabi ibugua Anduane Homogohanda bi ledadagua bulenegoha turu holene ngaria handa walia howa mbiraga horombebi daga lalu mitangi biaabo haga ka.
PSA 1:3 Ira iba angeni bu karu anda halu lini dolenengi dalu yuniru gau nalagadagua ibugua mbirale bigi birago bayale haga bulebira.
PSA 1:4 Ai ko biaga kago ibu ogonibi ndo ka. Ibu puyabume abalu hilu yalu piaganego ale ka.
PSA 1:5 Ani bidago Ngode Datagaliwabehanda godi larangi ko biaga karu tí koore biaga kamigoni lalu ibuninaga wali agali karu heba mandagi habe nahedagola ti dabo bagi holebira.
PSA 1:6 Mini tigabiwi karu Anduane Homogohanda ti haru howa mamage haga. Ko biaga karume hariga pialu karu homoleneni tagira pole pora.
PSA 2:1 Hameigini tara tara palu ngarume handabe manga hami̱ya lalu lo manda bialu kago aginagabe. Wali agali urunime aguaore bami̱ya lalu ndi nde lalu karu irane aginagabe.
PSA 2:2 Anduane Homogohondobi mbirali kini helo ibugua dabayagohondobi wali agali tinaga kinirume wai bule manda bu ka. Haru hagarumebi mandagi mo mogobu biruwa handabe manga halu ti hoba mialu kagoni.
PSA 2:3 Wali agali o biarume lalu, Libugua ina haru hole dariba hayago hado wahami̱ya, lalu ka. Libugua ina haru nahelo yu wahami̱ya, lalu ka.
PSA 2:4 Anidagua lalu kagoni. Anduane Homogo ibu dahuliya andaga ibuninaga dagiani handadaliho biruwa ti hondo oba halu ka. Tigua ni lo manda biraruni bame de gangabi henene halu buluba ndodagola ibugua mo yo hondo ka.
PSA 2:5 Ani bialu ti bayale bidabani keba holeneme ti mini wilo mo gi halu ka.
PSA 2:6 Ibugua keba howa lalu, I̱naga Hari Saiono loma bini ngagoria i̱naga kini ibu ogoriani tagira íbu heledo, lene.
PSA 2:7 Kini ogoni ibugua agua lolebira. Anduane Homogohanda ledadagua latagi halu larogo. Ibugua i̱hondo lalu, Í̠ i̱ igini kegoni. Áyu i̱ í̠ aba harogoni.
PSA 2:8 Wali agali hameigini tara tara palu ngaru bibahende i̱na haru hoabe lariyagua ani bia lolebero. Dindi bibahendebi mbirale bibahende ngarunibi í̠naga dege holebira.
PSA 2:9 Uruni bibahende í̠na kangome bo podolebere. Mbodoli be gingiru laradagua bibahende bo gingirulo paya paya bulebere.
PSA 2:10 Bi hiriribi urunibi lene ngago manda buwa dindini kini harimidaru tíni tiga bialu halimu. Haru haga bibahende harimidaru tíbi hale halu bayuwa manda bilimu.
PSA 2:11 Gi howa Anduane Homogonaga biabe bialu halimu. Duru lalu ma podope halu ibu igini mitangi bialu lotu lalimu. Ibu abale keba haragola tí homo tongolodaga holigo tí mini wialu ogonidagua bilimu. Ibuha mo humbi howa ha do ho karu ti turubioreni ka.
PSA 3:1 Anduane Homogo-o i̱naga waitigi dewaore bu kagoni. Tigua i̱ bole manda mandabu kagoni.
PSA 3:2 Tigua i̱ lo guralu howa lalu, Ngode Datagaliwabehanda í̠ biamogo nabulebira, lalu ka.
PSA 3:3 Ti ani laragoyu Anduane Homogo-o í̠ i̱naga wai humbi ale howa i̱ ho hangai haga kegoni. Í̠nime i̱ wayali holiya biamogo biaga ke. Í̠nime i̱naga genda bu ngago mo wahalu i̱ mo hongo haga kegoni.
PSA 3:4 I̱na Anduane Homogohondo, I̱ biamogo bia, lalu olaruli. Ibuninaga hari loma biahene biagoria howa ibugua i̱na bi larogo ladai biaga ka.
PSA 3:5 Mbiraga i̱ paliahondo kogola Anduane Homogohanda i̱ handayaho haga ka.
PSA 3:6 Ami agali daosini pira agimame (10,000) i̱ ho hagira biragola i̱na ti hondowa gi naholebero.
PSA 3:7 Anduane Homogo-o í̠ ibabe. I̱naga Ngode Datagaliwabe-o i̱ biamogo bule ibabe. I̱naga waitigi karu baba wai biaga í̠ kegoni. Agali ko karume i̱ mo ko nahelo tinaga ne bo hondaga kegoni.
PSA 3:8 Anduane Homogo í̠ni hangume í̠naga wali agali karu haru dai biaga kegoni. Ti bayale helo í̠na biamogo bibelo hamelo ko.
PSA 4:1 Ngode Datagaliwabe-o í̠na i̱ mo wayali haga kegoni. I̱na í̠ olarogola í̠na i̱naga bi larogo hale habe. Bamba i̱naga miniha genda yu hewagola í̠na i̱naga genda mo wahai harigoni. Í̠na áyubi i̱ dara holene irane nawini howa i̱naga bi hale halu biamogo bibe.
PSA 4:2 Agali bu kamiru tígua i̱naga mini mo ko haga bialu horo agiru holeberemibe. Ko ngaru hangu mo tene halu mana henene bulene ngaru nabi horo agiru holeberemibe.
PSA 4:3 Tígua bi ogoninaga irane manda bilimu. Wali agali Anduane Homogonaga andaneha haga karu ti ibuninagaore helo dabene ka. Horo bibahendengi i̱na ibuhondo olalu haabo kogola ibugua i̱na olarogo hale haga ka.
PSA 4:4 Tígua mana ko bialu kamigo wahalu Anduane Homogohondo gi ho holene nga. Tígua dagiani paluwa bi maru nale mana ogoni baya hangu manda bilimu.
PSA 4:5 Tígua Anduane Homogo ibugua hame laga aleru ibunihondo lomabu milimu. Ibunihondo tí mini mbiraore wu halimu.
PSA 4:6 Wali agali dewalime lalu, Anduane Homogo-o í̠naga mo bayale holene ngibelo. Í̠na ina dara halu biamogo bibelo hamelo kama, lalu lagane ka.
PSA 4:7 Tomo widi gerebi liniru dewa andaho kagola mabu anduane karume ti turuho haga. Anigoyu í̠na i̱ha turu holene wia harigome tinaga turu holene bolangua heneore ngirigoni.
PSA 4:8 Anduane Homogo-o í̠nimeore i̱ handayaho kegome i̱ bayaleore kogoni. I̱ dagiani palialu howa mbirale mbirahondo gi nahe miniha dungulo howa paliahondo haruli.
PSA 5:1 Anduane Homogo-o i̱na gendaore howa í̠hondo bi larogo hale habe.
PSA 5:2 I̱naga Ngode Datagaliwabebi Kinibi í̠ni hanguore kego mitangi bialu í̠na i̱ biamogo bibelo í̠hondo bi ogoni larogo bayuwa hale habe.
PSA 5:3 Anduane Homogo-o egerebagi bibahendengi i̱na í̠hondo bi laruli. Ni dolene tu haragolabi i̱na í̠hondo bi laabo haruli. I̱na bi larugo ladai bibelo i̱ hondo kogoni.
PSA 5:4 Ngode Datagaliwabe-o wali agalime mana ko birago hondowa í̠na turu nahagaore kegoni. Wali agali mana ko biaabo haga karu ti í̠ kegoria haparaho habe naheore ka.
PSA 5:5 Wali agali mine haga bu karu ti í̠naga deni helo turu nahaga ke. Wali agali ko biaga karu tihondo handabe manga haga ke.
PSA 5:6 Wali agali ke̱ howa bi laga karu í̠na ti bo wahaga ke. Darama hangu noa haga karubi bi nagalone ngago lo payapaya biaga karubi í̠na urunihondo handabe manga haga kegoni.
PSA 5:7 Í̠na i̱hondo gubalini timbuni ho kegonaga i̱na í̠naga anda kegoha ibulebero. Í̠naga anda loma biahene kagoria howa i̱na ge duli hangaho biruwa í̠ mitangi bialu lotu lalu birulebero.
PSA 5:8 Anduane Homogo-o i̱naga waitigi dewaore kagonigo i̱na í̠naga bi mana bayale ngagoria talialu holiya í̠na i̱ haru habe. I̱ ibagabu kogoha í̠na hariga bayale tigabi ngago mo walia habe.
PSA 5:9 I̱naga waitigi bu karu tiha henene lolenego nawi howa tigua agali ta nabi karu bo waholene hangu manda bu kagoni. Tinaga ne hariga homaliha homa ngu ale bialu helo howa tigua agali maru karu mana ko bulene ngago bilo bime ladebodebo biaga ka.
PSA 5:10 Ngode Datagaliwabe-o í̠na agali uruni tini ko biragonaga pani nelo mibe. Tinaga mini wu kago mo wahabe. Tigua í̠ handabe manga howa mana ko ngaru bialu kago agali ko uruni ti í̠ kegoha nahelo kaundiaha bo batagi ho helabe.
PSA 5:11 Wali agali maru í̠na ti handayaho habelo haga karume ti turu timbuniore ho holebira. Tinaga bu miniha turu holene to̱lai ho howa tigua iba gana turu halu lolebira. Í̠na wali agali í̠ gubalini haga karu ti baya hangu handayaho habe. Tigua í̠ bayale kegonaga turu timbuni ho howa í̠naga mini yaraga holebira.
PSA 5:12 Anduane Homogo-o wali agali í̠naga bi mana taluwa bialu haga karu tihondo mana bayale biaga kegoni. Í̠naga gubalini holeneme wai humbi ale howa ti ho ge haga kegoni.
PSA 6:1 Anduane Homogo-o í̠naga keba ho kegome i̱hondo keba nahabe. Í̠ miniha keba ho kegonigo i̱ pani nolene na mo ngibe.
PSA 6:2 Anduane Homogo-o i̱ hongo nahe kogo í̠na i̱ dara howa biamogo bibe. I̱naga hongo biba halu ereba hayago í̠nime i̱ lone mo hongo habe.
PSA 6:3 I̱ miniha genda timbuniore ho kogo Anduane Homogo-o ai agua bidebe. I̱ genda yu agiru holiya karulapedabe.
PSA 6:4 Anduane Homogo-o í̠na i̱ biamogo bialu gi mibe. I̱ nahomoliya í̠na dara howa abale pele ngibe.
PSA 6:5 Homene dindiha karume í̠ mitangi nabiagaya Tini haga haga bidagoha howa í̠naga mini yaraga nahagaya.
PSA 6:6 I̱na olalu haabo kogola i̱naga hongo biba hai haya. Mbiraga bibahendengi i̱naga de ibame dagia goba ho wiaga. I̱na dugu bialu haabo kogola i̱naga haguanda de ibame goba ka.
PSA 6:7 I̱naga waitigi dewaore bu kagola i̱na dugu bialu haabo kogome i̱naga de to howa mbirale mbira bayuwa handabe nahe kogoni.
PSA 6:8 Anduane Homogo ibugua i̱na dugu berogo hale ho kagoni. Wali agali mana ko biaga kamiru tí i̱ kogoria hapara nahe purogo ladaba.
PSA 6:9 I̱na Anduane Homogo olalu i̱ biamogo bia larogola ibugua hale halu i̱ biamogo biaga ka.
PSA 6:10 I̱naga waitigi bu karu ti genda timbuni yu holebira. Gi timbuniore howa ti taga timbuni ho holebira. Tigua i̱ abale yu wahalu puwa tini pu luluya hama ibaga bulebira.
PSA 7:1 Anduane Homogo i̱naga Ngode Datagaliwabe-o waitigi bu karume i̱ handa walia nahelo í̠niha ha do hole eberogoni. Agali i̱ minule talima ibalu karume i̱ bo wa nahelo biamogo bialu i̱ mo ko nahelo í̠na i̱ pele ngibe.
PSA 7:2 Laiono gabuame wali agali bo budabaga biagadagua i̱naga waitigi karume i̱ bo budabagabu waholani. Tigua dindi ko mbirali i̱ biamogo bulene nahe ngagoha minu waholigo i̱ pele ngibe.
PSA 7:3 Anduane Homogo i̱naga Ngode Datagaliwabe-o i̱ha biako hene mbira wiaguabi i̱na mbirali kagohondo ko mbira bini wiaguabi
PSA 7:4 i̱na i̱naga nenege mendeali kago ndelene wiaguabi waitigi karuhondo bame ko biaede hene wiaguabi urunidagua i̱na bini wiagua nde
PSA 7:5 waitigime i̱ minilo wahabe laro. Tigua i̱ bo hengedo wahalu i̱naga tingini bo budabaga bialu dindini bame baa̱i̱ halu pelo wahabe.
PSA 7:6 Anduane Homogo-o í̠nime keba howa heyabelo hamelo ko. I̱naga waitigime i̱la wai hongo howa bialu karu ti mo ko halu bai habe. Í̠na mana tigabi hangu biaga kegoni ndobe. Ani kego ai í̠na abale ibalu i̱ biamogo bibe.
PSA 7:7 Í̠ni dahuliya andaga biragane dagia ngegoriani biruwa í̠na wali agali bibahende karu í̠ni kegoha mo ngoai halu handame ho habe.
PSA 7:8 Anduane Homogo-o í̠na wali agali bibahendeme mana ko birago mo tale bialu dabaga ke. I̱na mana bayale tigabi wiago bialu haabo halu harugo manda buwa í̠nime i̱ dababe.
PSA 7:9 Ngode Datagaliwabe-o í̠ bayale tigabi biaga kegoni. Í̠na wali agali bibahendenaga bu miniha manda buwa mo tale bialu dabaki biaga kegoni. Wali agali mini kowi karume mana ko biraru í̠nime mo wahai habe. Dabaki bialu wali agali tigabi karu ti bayale helo í̠na ti biamogo bigi bibe.
PSA 7:10 Ngode Datagaliwabe ibu i̱naga haru hagaore kagoni. Ibugua wali agali mana tigabi biaga karu biamogo biaga kagoni.
PSA 7:11 Ngode Datagaliwabe ibu mana tigabi ngadagua tigatigaore mo tale bialu dabaga ka. Wali agali mana ko biaga karu ibugua ti bope haabo haga ka.
PSA 7:12 Wali agali ko biaga karu tigua mana ko wahai halu mini beregeda nabi heagua nde Ngode Datagaliwabe ibugua ibunaga wai biagane ayu tibu baya hangu nage wialu ne holebira. Ibugua ibunaga danda ngago wai bule manda manda bu wulebira.
PSA 7:13 Ibugua wali agali uruni bo waholenaga manda manda bialu timu edaho kagoni.
PSA 7:14 Wali agali ko biaga karume ogobi ka manda bidaba. Tigua mana ko ngaru bulenaga buleore lalu miniha hongo haga ka. Tigua mana ko ngaru hangu bialu haabo holenaga ke̱ haabo haga kagoni.
PSA 7:15 Agali mende kago minule lowa gundu uli tombo wu haga ka. Uli ogoni tombo wu kagoha tini pu aribia holebira.
PSA 7:16 Anidagua dege ko tigua biyagome tiniha wiadambi hai holebira. Agali mende kagola keba howa lai lalu gungu bule mandabu heagua nde o biagohondo bule mandabu kago tiniha biadai bulebira.
PSA 7:17 Anduane Homogo ibugua tigabiore bialu haabo haga kagonaga i̱na ibuhondo ka̱i̱ lalu ko. Anduane Homogo Daligaorene Daliga kagonaga mini yaraga halu i̱na iba gana bayaleru laga bialu holebero.
PSA 8:1 Anduane Homogo inanaga Anduane-o wali agali dindi bibahendeni bu karume í̠ hongohe gibiore panigi ke lowa manda biai kagoni ndobe. Mbirale í̠nime wabiriru bibahendeme í̠naga mini mo yaraga haragoni ibalu dahuliya andaga í̠ni kegoria anda ibirane hale ho kegoni.
PSA 8:2 Wandari igiri emenemebi gali andu nalu karumebi heba í̠naga mini dege yaraga halu iba gana lo ngialu kagoni. Í̠naga waitigi karu í̠ kegoria naanda ibilonaga wai pabe ndo gibiorego payatagi howa í̠ni handatagi ho kegoni. Mbirali mbirame í̠na bigi berego ha hangai halu í̠la waitigi hole manda biyagua ogoni bulilono hapai haga kegoni.
PSA 8:3 I̱na hari daliga í̠na wabini li kagoni de handadaga howa handarogola egebi yakundibi li bu karubi helo í̠nime helenedagoriaore li bu karia hendedogoni.
PSA 8:4 Ani hondowa nde mitangi bialu koria ai ina wali agali nde emene ko bameore handini o bu kamarunidago í̠na mitangi halu handayaho habe nahego nde agiorenaga ina mitangiho haruadabe lo manda bigi biruli.
PSA 8:5 Nde abule emene bame ogonibiore kamagoni manda buwa dege ina wali agali í̠ni ale degegoyu ina emeneore nira holoma̱ya wabu heledegoni. Ani wabu helowa í̠ninaga wá holenemebi mini yaraga holenemebi í̠nani manda karulo haradagua karulaho heledegoni.
PSA 8:6 Ina wali agalime í̠na mbirale bibahende wabini dameneru hondo halu ina haguane holoma̱ya heledegoni.
PSA 8:7 Nogo sibi bulumagabi hinini damenego bibahendebi gabua tagiraha haga damene bibahendebi
PSA 8:8 ega damene bibahendebi wenabi ibaha biraga damene bibahendeorebi uruni bibahendeore wali agalime hondo hai helo heledegoni.
PSA 8:9 Nde aniore bidegome Anduane Homogo inanaga Anduane-o í̠naga hongo holene gibiorehe panigi ke lowa wali agali dindi bibahendeni karume manda biaho kagoni ndobe.
PSA 9:1 Anduane Homogo-o i̱naga bu miniha i̱na í̠hondo ka̱i̱ timbuniore lo kogoni. Í̠na baya taraore bialu harigonaga i̱na wali agali bu karu lamigi bulebero.
PSA 9:2 I̱na í̠ mitangi bialu turu ho holebero. Anduane Homogo Daligaorene Daliga kego i̱na í̠ mini yaraga halu iba gana lolebero.
PSA 9:3 Agali i̱ baba waitigi hayaru í̠ de handalu ti ibida piai haya. Ti pilalu homai haya.
PSA 9:4 Í̠na dabagane dagiani biruwa mana mo tale biagadagua tigatiga hangu mo tale biaga kegoni. I̱na bialu hewaru hondowa í̠na mo tale bialu heria i̱ tigabi bolanguahe hewaria handari.
PSA 9:5 Wali agali í̠ mitangi nahaga hearu í̠na ti mo dabaki harigoni. Wali agali ko biaga o biaru ti abogo ogoria hene lalu mani te mbira nalelo í̠na bo wahai harigoni.
PSA 9:6 Ngode Datagaliwabe í̠na inanaga waitigi uruni bo wahai halu tinaga tano wiaru bibahende bo gialo wahai harigoni. Uruni bibahende mo ko hene wiaabobo bu ngago manibi mitangi bulene mbira naholebiraore.
PSA 9:7 Anduane Homogo ibu kiniore haluhe haabo ka. Ibugua godi hale hole dagiani birule manda manda bu ka.
PSA 9:8 Ibugua mana tigabiore biaga halu wali agali bibahende handayaho howa haru hai ka. Ibugua mana tigabiore ngagoria howa hameigini tara tara karume bialu hayaru bibahende mo talebuki bulebira.
PSA 9:9 Anduane Homogo ibuniore anda hongohe kaligobi kagoni. Mbirali ibunaga waitigime bole taliragola ibu kagoha pu holebira. Genda tagira ibirangi ibu kagoha pialu ha do holebira.
PSA 9:10 Anduane Homogo-o wali agali í̠ni keria ibiraru erembira mialu napiaga kegoni. Í̠ ogonibi kegonigo wali agali í̠ mini manda bu karume í̠hondo mini mbiraore wu holebira.
PSA 9:11 Anduane Homogo ibu Saiono tanoni kini kago ibunaga mini yaraga halu ibuhondo iba gana lolene nga. Ibugua biabe hongohe tara biyarunaga wali agali hameigini tara tara karume hale hai helo bi loyogo lolene nga.
PSA 9:12 Wali agali genda yu karu Anduane Homogo ibugua ti mitangi ho haga kagoni. Ibugua wali agalime dugu bialu karu helalu handa tara nahaga kagoni. Wali agali uruni mo ko haga karu ibugua ti pani nelo miaga ka.
PSA 9:13 Anduane Homogo-o í̠na i̱ dara habe. Genda tandagala i̱ waitigime mo ngirago í̠na de handabe. I̱ homolene kaware wiagoria pu hewaria í̠na i̱ haru dai bialu mo wirigoni.
PSA 9:14 Í̠na uruni bibahende biai haga kegonaga i̱na bi te loyogo lai halu í̠naga mini mo yaraga holebero. I̱na Saiono tanonaga pabe haraba ngagoria heyu howa í̠na biriru bibahende latagi halu i̱ mo wirigonaga turuho holebero.
PSA 9:15 Wali agali hameigini tara tara í̠ mitangi nahaga karume I̱ uli pelonaga uli tombo wu hearia habolo puwa tini ogoniha pilaya. Tigua wena nuha minule nu wiaho hearia tini nu ogoniha do wiya.
PSA 9:16 Anduane Homogohanda manani tigatiga mo tale birangi ibunaga mini tigabi ngago mo walia haga ka. Wali agali ko biaga bu karume maru mo ko hole lowa wai hanalu bu karu mo habo lalu tini mo ko henego polebira.
PSA 9:17 Wali agali hameigini tara tara mana ko biagaru Ngode Datagaliwabe erembira miaga bu karu ti bibahende humbirini andaga pu hai holebira.
PSA 9:18 Ngode Datagaliwabehanda wali agali yagibano bu karu embeda nahe mitangi biaabo haga ka. Genda yu karu Ngode Datagaliwabehanda ti biamogo bilo ibuhondo mini dunu biaho kagola ibugua ti genda yuwa lu helowa naholebira.
PSA 9:19 Anduane Homogo-o dindini wali agali bu karume í̠hondo ngui higi buyu helo wanahe í̠ni abale heyalu ibabe. Wali agali hameigini tara tara í̠ mitangi nabiaga karu ti í̠naga deni íbu helowa í̠ni manani tigatiga mo dabaki habe.
PSA 9:20 Anduane Homogo-o í̠na wali agali uruni mo gi hai habe. Wali agali hameigini tara tara bu karu tini habane nabulene kamarunida lo manda bilo helabe.
PSA 10:1 Anduane Homogo-o irane aginaga ina helalu í̠ kaundia kebe. Ko ina kamaria íbu ngagola í̠ ha do ho kego irane agibe.
PSA 10:2 Wali agali mini kowi karume mine halu wali agali yagibano karu mo ko hole talima ibaga bialu ka. Tigua uli tombo wuwa maru uli pelo ngaria habo lalu tini uli ogoniha uli pelo hame ledo.
PSA 10:3 Wali agali ko biagarume tinaga miniha mana ko hame lararunaga mine haga ka. Mbiralime mbirale bu ngaru dimagoli hai haga karume Anduane Homogohondo bi ko lalu erembira miaga ka.
PSA 10:4 Wali agali ko karume Anduane Homogo mitangi nabiaga ka. Tigua mine howa lalu, Ngode Datagaliwabe ibugua i̱ ko birugonaga pani nangulebira, laga ka.
PSA 10:5 Mini kowi karume biraru damene bibahende mbirale dewa mo mogo biaga ka. Anduane Homogo-o í̠naga mini wu kego ti manda nabiore kagoni. Tigua tinaga waitigi karu mege biaga ka.
PSA 10:6 Tigua hangu hangu mitangi bialu, I̱ hongoheore kogoni. Mbirale tara tara ngarume i̱ bope naholebiraore. I̱ kogoha genda mbira anda naibulebira, lo mitangi biaga ka.
PSA 10:7 Bibahendengi tigua bi ko laabo halu maru karu ha haga ka. Ke̱ howa mendeali kago mo gi hole bi laabo haga ka. Mana ko bulenenaga bi ko ngaru tigua abale yamialu lo pebe bialu haga ka.
PSA 10:8 Wali agali ko ogonidagua biaga karume wali agali maru bayale kago bo wahole ohowa harigani bira do haga. Mbirali hongo nahe kago mo ko hole ohowa harigani bira do haga ka.
PSA 10:9 Laionome ibu nagane ale ibirago balu nole ohowa yu biragadagua ti biraga ka. Wali agali yagibano porago minule harigani ohowa yu biraga ka. Ibalu karia gono wiyagoha do ngaria abale hado yalu piaga ka.
PSA 10:10 Tigua hendore oho biruwa tinaga hongo timbuni daligaorehe kagome mbirali hongo nahe kago abale mo ko haga ka.
PSA 10:11 Wali agali ko urunibi karu tigua lo manda bialu, Mana i̱na berogo Ngode Datagaliwabe ibu mitangi nabiaga kagoni. Ibu de muguliho kagonigo i̱na berogo de nahondolebira ndobe, laga biaga kagoni.
PSA 10:12 Anduane Homogo-o í̠na ko biaga karu bole í̠naga gi yaraga howa nende biaho habe. Ngode Datagaliwabe-o í̠na hongo nahe karu biamogo bule embeda nahabe.
PSA 10:13 Wali agali ko biaga karume Ngode Datagaliwabe í̠ mege bialu erembira ngiaga kagoni. Tinaga miniha lo manda bialu, I̱na ko berogonaga pani nangulebira, laga biaga kagoni ndobe. Mini urunibi wiaga karuni í̠na bo wahai habe nahedane kebe.
PSA 10:14 Í̠na wali agali ko biaga urunime mana biaga ngago manda biaiho ke. Ko urunibi kagome wali agali maru bu karu genda mo miaga ngago damene í̠ manda biaiho kegoni. Í̠na wali agali genda uruni yu karu biamogo biaga kegoni. Wali agali hongo nahe karubi waneigini aba ai̱yala homene karubi í̠na ti biamogo biaga kego manda buwa ti í̠niha hanaho kagoni.
PSA 10:15 Wali agali mana ko biaga urunime ko birago mani nabilo tinaga hongo kago bo podai habe.
PSA 10:16 Anduane Homogo ibu kini haluheore kagoni. Wali agali hameigini tara tara bibahende ibu mitangi nabiaga karu ibunaga dindi ngagoria howa bo taliatagi halu ereba hai helolebira.
PSA 10:17 Anduane Homogo-o í̠na wali agali í̠ni andaneha karume bi larago hale howa tinaga bu mini mo hongo harili.
PSA 10:18 Waneigini aba ai̱yala homene karumebi wali agali genda yu karumebi dugu bialu í̠hondo bi lalu karu hale harili. Tinaga godi tigabi lolene ngadagua lelo í̠na ti biamogo bulebere. Í̠na ogonidagua beregola dindiali karume ti lone mo ko holene mbira nawulebira.
PSA 11:1 Anduane Homogohanda i̱ handayaho holebiragonaga mini mbiraore wu ko. Egame agali ibirago handalu ibida piagadagua tígua i̱hondo, Hari bare ngaruha ha do hole ibida pu, laga kamiruni tí lulu mini nawi be tobaheda.
PSA 11:2 Tígua lalu, Agali ko biagome agali bayale kago bole ibu aruma kagoha howa timu edaho kagoni.
PSA 11:3 Wali agali bibahendeme mana tigabi ngago nabiaga heagua nde mbirali tigabi kago ibugua ago bulene wiaruabe, lalu kami.
PSA 11:4 Anduane Homogo ibu ibunaga anda lomabia heneha kagoni. Ibu dahuliya andaga kini howa ibugua wali agali bibahende bu karu de handaiore ka. Wali agalime bialu karuni ibu manda biaiore kagoni.
PSA 11:5 Anduane Homogo ibugua wali agali ko biaga bayale biagabi manda bu ka. Ibugua wali agali mana lo ngaru wahaga karu handabe manga haga ka.
PSA 11:6 Wali agali ko biaga bu kagoha ibugua ira hungubi ege to̱le̱ ambuabi mini soloba dedaore hedope holebira. Puyabu pobo timbuniorebi ibilalu ti pani nalu holebira.
PSA 11:7 Irane Anduane Homogo ibuni mini tigabi howa mana bayale tigabi biraru hondowa turuho haga ka. Wali agali mana bayale tigabi biaga karu tigua ibuninaga wanakui hondolebira.
PSA 12:1 Anduane Homogo-o í̠na i̱ biamogo bibe. Mbirali bayale mbira naheorego. Tigabi biaga mbira karia nahondolebere.
PSA 12:2 Wali agali bibahendeme ke̱ dege haga ka. Tigua mendeali kago mo guya halu bi ladebodebo biaga ka.
PSA 12:3 Anduane Homogo-o wali agali bi ladebodebo biaga karunaga ne harigabi mine haga karunaga hégebi bibahende bo ndibu lai habe.
PSA 12:4 Wali agali ko biaga uruni tigua lalu, Inanaga hégeme wayali holeberama. Inanaga ne hambu anduane aibe. Ina handayaho haruago aibe, laga biaga ka.
PSA 12:5 Anduane Homogo ibugua lalu, Ko biaga bu karume yagibano karu hengedape hayadago hondowabi burupale karu ti dugu biaruago hale howabi i̱ni abale ibulebero. Tini bayale holenenaga maliaho karu i̱na ti ogoriani mo helolebero, laya.
PSA 12:6 Anduane Homogonaga bi lo winigo bibahende heneneore lo nga. Ibunaga bi bayaleore laganego siliba irani ka halu delene ngarale ngaligobiore ngagoni.
PSA 12:7 Anduane Homogo-o í̠nime ina bu kamaru baya hangu de handayaho habe. Ko biaga karume ina mo ko holigo í̠na ina baya hangu mamageho haabo habe.
PSA 12:8 Ko biaga karu tigua dindi bibahendeha mine halu ibaga biame haga ka. Wali agali bibahende karume mana ko bulenego hame lowa mana ogoni bayaleda mitangi biaga ka.
PSA 13:1 Anduane Homogo-o í̠na i̱ angi mitangi bule kebe. Í̠na i̱ embeda halu yu waore haribe. Í̠naga dengui lone hondoliya i̱hondo angi mo walia holeberebe.
PSA 13:2 I̱ genda yu kogonigo angi mo waholeberebe. I̱ miniha tandaga ngelo koruni horombe mbiragabi agiru hondo holeberebe. I̱ waitigi karunaga andaneha naholiya í̠na i̱ angi biamogo buleberebe.
PSA 13:3 Anduane Homogo i̱naga Ngode Datagaliwabeore-o Í̠na i̱ mitangi halu i̱naga bi larogo hale habe. I̱ nahomoliya i̱naga de mo ngalalu lone mo hongo habe.
PSA 13:4 I̱ homaruyagua i̱naga waitigime lalu, Iname ibu bope harimadagoni, loligo nalelo. Tigua i̱ pilarogo hondowa turu holigo nahelo.
PSA 13:5 Ani lolebiragoyu í̠na i̱ gubalini holebeda lo manda bialu mini mbiraore wu kogoni. Í̠na i̱ pele ngiaabo holeberegonaga i̱ turu timbuniore ho kogoni.
PSA 13:6 Anduane Homogo í̠na i̱hondo bayale dege biaabo harigonaga i̱na í̠naga mini yaraga halu iba gana laga bialu holebero.
PSA 14:1 Wali agali mitangi yole biaga karume tini miniha mandabu donge halu Ngode Datagaliwabe ogoni nahe laga ka. Wali agali mini urunibi wu karuni tini ko ngubi habane nabuleneore howa ko tara tara ngaru bima polenaga ani lalu ka. Mana tigabi hangu biaga mbirali naheore.
PSA 14:2 Anduane Homogohanda dahuliya andaga howa handadali halu wali agali bibahende bu karu de handame howa mbirali miniwi galone manda biagabi Ngode Datagaliwabe kalo manda bu hagabi au haga bidabe hondole handadali ho ka.
PSA 14:3 Ani handalu karia mbirali bayale naheore ti bibahende ko biai hene ogobi dege dege hoyu pedaria hendeda. Hariga tigatiga polene wiadaguaore pene mbirali naheore bibahende putagi halu piai hene dege hearia hendene. Mana tigabi hangu biaga mbira naheore. Mbiraoreorebi mbira naheore lama agini.
PSA 14:4 Anduane Homogohanda lalu, Wali agali ko biaga uruni ti mini nawidabe. Ti galone mbira manda nabiagadabe. Wali agali ko biaga urunime i̱naga wali agali bameore ti tomo naradagua budu nalu kagoni. Ani bialu howa tigua tinaga bu minime i̱hondo bi mbira nalagaore kagoni, lalu ka.
PSA 14:5 Ani bialu ha kagoyu Ngode Datagaliwabe ibuni wali agali ibugua bi larago hale halu biaga karu baba howa biamogo bigi birago hondowa ti gi timbuniore howa duru ala lalu holebira.
PSA 14:6 Wali agali ko biaga karume wali agali maru abogo ka nalene karunaga minime mbirale bule mandabu wigi bidaru mo pere laga biaga ka. Ani bia biyaguabi wali agali abogo ka nalene uruni tinaga ha do holene Anduane Homogoha ngagome ti bayale holebira.
PSA 14:7 I̱na Isaraele wali agali bibahende pele ngialu haru dai biai helo Ngode Datagaliwabehanda mbirali Saiono howa ibi nalara. Anduane Homogohanda ibunaga wali agali biamogo biragola ti bayuwa ho dungulo halu tigua mbirale bigi biraru bayale hangu haga birago hondowa tini turuore nde au holobadabe.
PSA 15:1 Anduane Homogo-o mbirali í̠naga andaha anda ibabehe ai kabe. Mbirali Hari Saiono wali agali ge nahaga í̠ni dege haga ngegoria íbu howa í̠ mitangi bialu í̠hondo bi labehe ai kabe.
PSA 15:2 Mbirali Ngode Datagaliwabehanda bibe ledadaguaore hale howa biai halu mana tigabi bulene ngadaguaore bialu ibugua bi larago henene hangu lalu ibu bu miniha ke̱ holene mbira nawi kago ibuore anda pobehe ka.
PSA 15:3 Tindule mbiralinaga mini mo ko hole ndinde lowa agua laya laya lama ibaga nabiaga kago ibu anda pobehe ka. Mbirali ogonibi kago ibugua ibunaga damenehondo kagua nabiaga ka. Wali agali mendeali lo guralu diburibu lama ibaga nabiaga ka.
PSA 15:4 Ani bialu wali agali maru Ngode Datagaliwabehanda handabe manga halu erembira mini karu mbirali ogoni ibuguabi handabe manga halu erembira dege mulebira. Anduane Homogo ibugua bibe ledadagua hale halu biaga karu hondowa ibu turu halu wali agali uruninaga mini mo yaraga haga ka. Ibugua mbirale mbira buleore lalu lo winiyagua o lenedagoni gendabi bibe naheoreyaguabi tanabi biaore bulebira.
PSA 15:5 Mbiralime ibuhondo mbirale mbira dano habiya ngibe layagua mialu danoali biagome yadai biragola nde huniane mbira pu helowa ndo ibugua miyagobiore yadai bia lowa mo yulebira. Marume ibuhondo dange hana howa mendeali kagua nabini tigabi kago ndelo ngibe layagua ibu ani nabiaga ka. Mana bayale urunibi biaga karu ti ema nabi haabo holebira.
PSA 16:1 Ngode Datagaliwabe-o i̱ í̠ha ha doho howa bayale holebero manda buwa í̠ kegoria eberogo í̠na i̱ de hondo habe.
PSA 16:2 I̱na Anduane Homogohondo au laro. Í̠ i̱naga Anduane kegoni. Mbirale bayale bayale o bu ngoruni í̠naga gini howa ibini hangu o bu ngoruni laro.
PSA 16:3 Anduane Homogonaga wali agali mini bilinahe karu ti wali agali bayaore bu kagoni. I̱ ti heba mandagi howa turu timbuniore ho haga biruli.
PSA 16:4 Wali agali maru mbirale gime wabiniru tinaga bi pupu wiagane ogoni lowa uruni hendehende gerai piaga karu tigua genda yulene dewaore bu wulebira. I̱na ti heba mandagi howa bi pupu wiagane urunihondo mbirale bo lomabu miradagua namulebero. Mbirale gime wabini uruni tinaga bi pupu wiagane ogoni lowa uruninaga mini mo yaraga haradaguabi i̱ naholebero.
PSA 16:5 I̱ mbirale galone yu haradagua bu kogo Anduane Homogo í̠bi í̠naga bi manabi ogoni dege galone yido lowa yu kogoni. I̱ mbirale buru pado alego í̠na ngiaiore hariligoni. I̱ mani hama polobodagoni í̠na haru holebere lowa í̠ha hanaho kogoni.
PSA 16:6 Í̠na i̱hondo mbirale bayale bayaleru turu halu ngigi birigoni. Í̠na o ngigi biriyaruni nde baya taraore ngigi biriyago hondowa i̱ turuore ho kogoni.
PSA 16:7 Anduane Homogo ibugua i̱ mo tiga bialu haru haganegonaga i̱na ibunaga mini mo yaraga haro. I̱ mbiraga padoria i̱naga bu miniha howa bi langiaga.
PSA 16:8 Anduane Homogo ibuni kawareore i̱ heba o kagonida lo manda buore haabo haruli. Ibuni kaware i̱ heba howa i̱ mo hongo haga kago manda buwa i̱ gi halu mogo nale holebero.
PSA 16:9 Anigo i̱ turu howa i̱naga bu miniha dunguore lowa mbirale mbira hondowa gi naholeore kogoni.
PSA 16:10 I̱ homolene winigoria howa homanaga hongome yani nahelonaga í̠na i̱ gi miriligoni. I̱na í̠naga biabe bialu mini bilina ho harugonaga í̠na i̱ humbirini andaga homa dinini bu karu baba holiya wahalu yupe naholebere lo manda bido.
PSA 16:11 Í̠nime i̱hondo haabo holene hariga ogodagua lalu walia holebere lo manda bido. Í̠ni i̱ heba kegome i̱ miniha turu bialu dunguore laragola turuho haabo haruli.
PSA 17:1 Anduane Homogo-o í̠na i̱naga bi larogo hale habe. I̱ tigabi ibaga bu henego ai i̱naga genda ngaru í̠ keria mo yalu eberogoni. I̱na í̠hondo bi ke̱ howa ndo larogo hale habe.
PSA 17:2 Í̠na i̱ biamogo beregome i̱na godi lalu wayali holebero. Í̠na mana bayale ogo nga de handabelo hame ledogoni.
PSA 17:3 I̱naga miniha ngogo í̠ manda biaiho ke. Í̠na mbiraga ibuwa i̱ ba handariyagua mini ko i̱ha mbira ngaria handa nabulebere ndobe. I̱na i̱ninaga ne harigaha howa bi ko nalolebero lo wirugoni.
PSA 17:4 Agali maru karume bi ko lagadagua i̱ nalaga kogoni. I̱na í̠naga bi lowini ngago hongo howa yu halu keba holenebi wai bulene ngarubi bibahende erembira miai harugoni.
PSA 17:5 I̱na í̠naga hariga ngagoria pialu kogome i̱naga geme hariga mendeha pubagi nahene kogoni.
PSA 17:6 Ngode Datagaliwabe-o i̱na í̠hondo bi larogola í̠ hale harili. Ani kego manda bialu i̱na í̠hondo bi áyu larogo haleore habe.
PSA 17:7 Í̠naga gubalini holene timbuniore ngego ina kamagohondo mo walia habe. Í̠na í̠naga gi tigame ina yania haga kegonigo ina waitigi hondoligo í̠ni andaneha ha do kama.
PSA 17:8 Í̠ninaga deore baya hangu handayaho harilidagua i̱ handayaho habe. Ega angibunime ibu igini babaganeme dambi hagadagua i̱ mo do howa handayaho habe.
PSA 17:9 Agali ko karume i̱ mo ko nahelobi i̱naga waitigi ho mabu bupe karume i̱ bo wa nahelobi ani handayaho habe.
PSA 17:10 Tigua agali mende kago dara nahagaore ka. Tigua bi hongo howa laabo halu tininaga mini hangu yaraga halu bi laga kagoni.
PSA 17:11 Tigua i̱ ge porogoha talima ibaga bialu i̱ ho mabu bupe haiho kagoni. Tigua i̱ gi dolaho yu ibaga bialu i̱ bope hole manda mandabu ka.
PSA 17:12 Ti laiono gabua ale howa mbirale ema bialu porago minu bo nole lowa ha do haga ka. Laiono daluame mbira bo nole yu bira do ho hagadagua i̱ bo wahole manda manda bu hai ka.
PSA 17:13 Anduane Homogo-o í̠ ibalu waitigi bu karu baba wai bialu ti bope hai habe. Í̠naga ayu tibu ne gadele biago yu ibalu waitigi karu bo wahai habe. Agali ko uruninaga giha howa i̱ mo wialu haru dai bibe.
PSA 17:14 Anduane Homogo-o agali ko uruni ti dindini wini ngaru hangu mo tene haga bu karu tinaga giha koria í̠naga hongome i̱ mo wialu biamogo bibe. Wali agali í̠ hame nalaga ho karu ti pani karulape nelo mibe. Tinaga waneigini aguanene maha holebiraruhondobi pani mia dege bibelo hameledo.
PSA 17:15 Ai i̱ni agali tigabiore kogodago mani í̠ninaga denguiore hondolebero. De ngalalu heyu howa í̠ kegobi hondowa i̱ turu timbuniore holebero.
PSA 18:1 Anduane Homogo-o í̠na i̱ mo hongo haga kegoni. I̱na í̠hondo gubaliniore ho kogoni.
PSA 18:2 Anduane Homogo ibuni i̱naga wai pabe hongoheore kagoni. Ibu ege to̱le̱ ale howa i̱ ho gehalu waitigirunaga giha howa i̱ mo wiaga. Ibu i̱naga humbi ale howa ibugua i̱ hapai haga ka. Ibugua i̱ mo wialu handayaho holene hongo karulapeore kagoni.
PSA 18:3 Anduane Homogonaga mini yaraga hami̱ya. I̱na ibu olalu haruli. Ibugua hale halu i̱ biamogo bialu i̱naga waitigirunaga giha howa i̱ mo wiaga kagonaga iname ibunaga mini yaraga holene nga.
PSA 18:4 I̱ homolene kawareni harugoni. Homolene pume dariba haradagua i̱ dariba hayagoni. Iba li hongoheme ibalu dambi haradagua agali ko bu karume i̱ bo wahole ani biyagoni.
PSA 18:5 Homolene dameneme i̱ mabu bupe howa pume dariba haradagua biyagoni. Homalime i̱ minule mandabu hayagoni.
PSA 18:6 I̱naga miniha genda ho howa Anduane Homogo olalu harugoni. I̱naga Ngode Datagaliwabehondo i̱ biamogo bia lalu harugoni. Ibuni andaga howa i̱naga bi hale haya. Ibuhondo i̱ biamogo bia larugo hale hayagoni.
PSA 18:7 Ngode Datagaliwabe ibugua keba timbuniore howa dindi mo dumbirumbi bilaya. Dindi hari timbuni wearu mo emabia hayagola ema bia gimbu biya.
PSA 18:8 Ibunaga ngui harigaha howa ira hagua tagira ibalu ibunaga ne harigaha howa ira hungu datagitagi biyagome mbirale wiaru bibahende do mundu laya.
PSA 18:9 Ibugua hari daliga buda edene bialu daliape haya. Daliape hayagola hari beraliba mindibi ibu geha hai haya.
PSA 18:10 Ibunaga dahuliyali mbiranaga erekunini biralu yagalalu daliape haya. Puyabu ega babagane aleheme ibu yalu abaleore daliape haya.
PSA 18:11 Aruma holeneme ibu dambi hai haya. Hari beraliba mindibigome ibuni ho ge hayagoni.
PSA 18:12 Hari daba timbuni ibu heagoha bialu kulu megelalu wá timbuni hama ibu mo bamba halu piya. Iramebi dalu dindi kunimebi beraliba mindibi biago bo haealabaga bialu ibira helaya.
PSA 18:13 Anduane Homogo ibuni hari daligaha howa bi hongo howa hari kilikulu laradagua biayua. Anduane Homogo Daligaorene Daliga kagonaga bi layuago hale hene.
PSA 18:14 Ibugua ibunaga timu edalu ba amunana biyagome waitigi purogo laya. Hari dabame waitigi bu hearu bayagola ti ibida bilibulu lalu piai haya.
PSA 18:15 Anduane Homogo í̠na waitigi hearuhondo keba harigome í̠naga ngui harigaha buhe̱ tagira ibiyagome puyabu hongohe pulo yu purogo laradagua biya. Iba solowara timbuni bereago hundiai hayagola dindi andaneha gene wiyago bame ha pana ho haya.
PSA 18:16 Anduane Homogo ibu daligaha howa gi yupe halu i̱ minu yania haya. Iba solowara timbuni bereagome i̱ dambi hewaria ibugua i̱ gini miya.
PSA 18:17 I̱naga waitigi hongoheore hearunaga giha hewaria ibugua ibuninaga gime i̱ mo wiya. Agali marume i̱ handabe manga ho hearu i̱na ti bo podabe nahe hewariabi ibugua i̱ mo wialu haru dai biya.
PSA 18:18 Bamba i̱ha genda ngelo hewangi tigua i̱la wai bule ibiya. Ani ibiyagoyu Anduane Homogohanda i̱ handayaho haabo hayagoni.
PSA 18:19 I̱ homolene wiagoha kaware hewaria ibugua i̱ biamogo biya. Ibugua i̱ gubaliniore ho kagome i̱ gini minigo ko.
PSA 18:20 I̱na mana bayale tigabi wiaru talialu bialu hewago hondowa Anduane Homogohanda i̱hondo bayaleore biaga. I̱na mana ko mbira nabi hewago hondowa ibugua i̱hondo mana bayale biaabo haga ka.
PSA 18:21 Anduane Homogonaga mana tigabi ngaru i̱na taluwa bialu harugoni. I̱na i̱naga Ngode Datagaliwabe erembira mialu mana ko wiaru nabi bayale harugoni.
PSA 18:22 Ibunaga bi mana lo ngaru i̱na baya hangu talialu bialu haru. Ibugua bia layadagua i̱na mo wa nahe biaabo harugoni.
PSA 18:23 I̱na ibu deni howa ko mbira nabiore ibu mandabu ka. I̱na mana ko mbira buli lowa i̱ni ibagabu harugoha mamage haluore haruli.
PSA 18:24 Ibugua i̱na mana bayale tigabi wiaru talialu bialu hewago hondowa i̱na mana ko mbira nabi hewago hondowabi Anduane Homogohanda i̱hondo bayaleore biaga.
PSA 18:25 Anduane Homogo-o mbiralime í̠ wahalu nape talima ibalu heagua í̠nabi nde ogoni ibu yu wahalu napiaga ke. Mbiralime ko mbira nabiaga howa ibuha ko nawi heagua nde í̠nabi ogoni ibuhondo mana bayale biadai biaga kegoni.
PSA 18:26 Mbiralime mana tigabi dege biaga heagua í̠nabi nde ogoni ibuhondo mana tigabi dege biadai biaga ke. Anigo mbiralime mana ko biaabo haga heagua í̠na ibuhondo handabe manga haga kegoni.
PSA 18:27 Wali agali tini mo dindiha haga karu í̠na ti biamogo bialu haru dai biaga ke. Wali agali maru tini mo dunini howa mine haga karu í̠na ti mo dindiha haga kegoni.
PSA 18:28 Anduane Homogo i̱naga wá hagane haleore í̠ kegoni. I̱ arumaha kogola í̠na aruma holene mo wahaga kegoni.
PSA 18:29 I̱na waitigi bu karu bope halu wayali holiya í̠na i̱ hongo ngiaga ke. I̱na waitiginaga tano ngaruha ege pabe hongohe timbuni karu pogola anda poliya í̠na i̱ hongo timbuniore ngiaga kegoni.
PSA 18:30 Ngode Datagaliwabe ogoni ibunaga mana baya buruguleore biai haga ka. Ibugua bi laragobi heneneore dege laga ka. Ibunime wali agali waitigi handalu ibida porarunaga humbi kago ti bibahende ibuha hage hai haga ka.
PSA 18:31 Anduane Homogo ibuni hangu Ngode Datagaliwabeore kagoni. Inanaga ha do holene anda ege to̱le̱ ale hongohe Ngode Datagaliwabe ibuni hanguore ka.
PSA 18:32 Ibugua i̱naga ha do anda hongoheore kagonigo i̱ ibaga bu koria ibugua hariga bayale mo tiga biaga ka.
PSA 18:33 Ibugua i̱ nogo gabua mini dia ibagabu poralidagua pialu holiya i̱ handayaho haga ka. Hari nene ngaruha pialu koria ibugua handayaho kagome i̱ pi nalaga ko.
PSA 18:34 Ibugua i̱ wai bulene biawai haragome danda boronosime wabini hongoheore hibule ngago i̱na edalu babehe kogoni.
PSA 18:35 Anduane Homogo-o i̱naga waitigi hearunaga giha hewaria í̠naga humbi i̱ ngirigola i̱ wayali harugoni. Í̠na i̱ biamogo birigome i̱ wali agali karunaga deni agali mini leneore kogoni.
PSA 18:36 Hariga i̱ polene wiagoha í̠na handayaho kegome waitigime i̱ mina nabi. Í̠na hariga bayale mo wirigome i̱ porogoha i̱naga ge gondo lalu pi nale bayale kogoni.
PSA 18:37 I̱na waitigi hearu talima pialu minu yania hai haruli. I̱na ti talima pugupugu bialu ti baiore hole wahalu dai nabi haruligoni.
PSA 18:38 I̱na ti bogaiore hewagola homo ibira hai haga. Ibira halu i̱naga geha wiai howa lone heyabe nahe wiaga.
PSA 18:39 I̱na waitigi baba wai buliya í̠nime hongo ngirigoni. Í̠na i̱ biamogo birigome i̱naga waitigi hearu i̱na ti bo podahana hai harugoni.
PSA 18:40 I̱ waitigi biaru i̱ handalu ibida purogo lelo í̠na mo bia hari. I̱na i̱ handabe manga haga hayaru bo wahai harugoni.
PSA 18:41 Tigua mbiralime ti biamogo bilo ga̱ lalu hayagoyu ti biamogo bulene mbira ai kabe. Mbirali naheore ndobe. Tigua ti biamogo bilo Anduane Homogo olayagoyu ibugua tinaga bi hale nahaya.
PSA 18:42 I̱na ti bo tagadabaga biwagola ti bame be abalu ale wialu puyabume yu purogo labehe hayagoni. Ba dege bialu bo hengeda halu hariga teneni waru wiraligobi haya.
PSA 18:43 Wali agali ko hearume i̱ bo waholilono í̠ni abale ibalu i̱ biamogo biri. Í̠na wali agali hameigini tara tara bu hearu handayaho holiya í̠na i̱ dabo helarida. Wali agali tara tara i̱na nahendene hearu áyu i̱ andaneha íbu hai ka.
PSA 18:44 Wali agali dindi taraha howa íbu hene karume i̱naga wanakuiha ibalu ge duli hanga haga ka. Tigua i̱na bi larugola abale hale halu i̱ talima ibaga.
PSA 18:45 Tinaga hongo ibira howa tigua tano wai pabe hongohe hearu wahalu tini duru lagalaga bima i̱ koria ibaga.
PSA 18:46 Anduane Homogo ibu haluheore kagoni. Ibu i̱naga ege to̱le̱ ale hongohe kago ibunaga mini mo yaraga hami̱ya. Ngode Datagaliwabe hongoheore ogoni ibu i̱ pele ngiaga kagonigo ibunaga mini timbuni yaraga haabo hami̱ya.
PSA 18:47 Ibugua i̱ biamogo bialu waitigi hearu bope halu i̱ mo wayali haga ka. Wali agali hameigini dindi tara tarani hearu i̱ andaneha helai haga ka.
PSA 18:48 Ibugua i̱naga waitigiru giha hewaria i̱ biamogo bialu i̱ bayale mo wiaga ka. Anduane Homogo-o í̠na i̱ pele ngialu i̱naga waitigiru mo dindiha helalu i̱ mo wayali helarigoni. Í̠na agali bo wahaga bu hearume i̱ bo wahole biyaria i̱ biamogo birigoni.
PSA 18:49 Anidagua birigonaga i̱na wali agali hameigini tara tara karunaga deni howa í̠naga mini yaraga holebero. I̱na í̠naga mini yaraga halu iba gana lolebero.
PSA 18:50 Anduane Homogohanda Debidi i̱ kini dabo helayago i̱naga waitigiru bope holiya ibugua i̱ mo wayali helaga ka. Ibugua i̱niore kini dabo helene kogohondo gubaliniore haabo haga ho kagoni. I̱naga waneigini aguanene mani holebiraru tihondobi ibugua gubalini ho haabo holebira.
PSA 19:1 Hari daligani li bigi biragome Ngode Datagaliwabe ibuninaga mini mo yaraga holene inahondo bayuwaore walia haga bialu kagoni. Mbirale li harini bu karu bibahendeme Ngode Datagaliwabe ibugua bayaore wabiniyaru panigiore mo walia haga bidagoni.
PSA 19:2 Horo mbira mbira haga beramago bibahendeme inahondo Ngode Datagaliwabe ibugua mbirale wabini harini li bu karunaga lalu langigi bialu ka. Mbiragabi mbi mbira mbira bibahendengi bi langialu dege kagoni.
PSA 19:3 Horobi mbibi libuni ne hariga nawi bi nalabehe kagoni. Ogoni labo libugua bi mbira lararia hale naharamaligoni.
PSA 19:4 Bi hale naharamaligoyu horola mbila libugua bigi biragome wali agali bibahendeme de handalu manda bilonaga lamialu kagoni. Libunaga bi ogoni dindi bibahendeni pume haragola wali agali bibahende hale haiho kagoni. Ngode Datagaliwabehanda li harini hona ni ibu palelonaga balai anda mbira bu heledagoni.
PSA 19:5 Igiri mbirame wandari dabu buwa ibu andaga haru pialu igiri ibu turu hama piagadagua ni ibu egerebagi turuho yalu tagira ibugu biaga. Agali gerai lagame gerai lo yalu hariga pu bola galo nabi tiga tigaore polene ngadagua ni ibu hariga ibuni piaga ngadaguaore turu halu piaga.
PSA 19:6 Ni ibu lirayagi howa tagira ibalu nairayagi anda piaga. Ani biagago mbirale mbira ni ibunaga tandaga biragome daba nahelo mo do habe nahe nga.
PSA 19:7 Anduane Homogonaga bi lowini ngago baya gibi tigabiore lowini ngagoni. Ibunaga bi ogonime wali agali holene gahenge ngialu ina mo hongo hodai biaga. Anduane Homogonaga bi lo ngaru ina hanaho habehe kama. Wali agali mini nawi karu ibunaga bi ogonime mini gigabi mo wia haga.
PSA 19:8 Anduane Homogonaga bi lowigi bidaru tigabiore lowigi bidagoni. Bi uruni hale halu biaga karu ti turuho haga ka. Anduane Homogonaga bi lo ngaru duniniore lo ngagoni. Bi urunime ina manda bayale bulene ngiaga nga.
PSA 19:9 Anduane Homogohondo giho holenego mana bayaleore ogoni. Ibuhondo giho holenego mana ogoni wali agalime bialu haho wiaaboore holebira. Anduane Homogohanda bi o langiradaruni henenebi tigabiorebi langiaabo haga ka.
PSA 19:10 Anduane Homogonaga biore baya duniniore wali agalime hame loabi muni ngolo dindiha lowa nga. Muni ngolo uruni koda lowa ibunaga bi ogoni baya gibiore ngago iname gubaliniore howa hame lolene nga. Anduane Homogonaga biore dendebi tombehe mone ibane dendebiore mbaria ngaru magubida lowa bi ogoni dende taraorebi ngagoni.
PSA 19:11 Anduane Homogo í̠naga bi lowigi bidegome i̱ í̠naga biabe biaga kogoni mana lalu mo tiga bigi biaga. I̱na í̠naga bi lo ngegodagua hale halu bigi berogola í̠na nde i̱hondo turu halu i̱ buru pado alego tiga handalu ngiaiore hariligoni.
PSA 19:12 Mbiralime ibuninaga ko biyago ibunime handabe nahe ka. Mana ko mbira bigi buwa i̱nime bu dambiho ko lo manda nabi koyagua mana ko o birudarunigo í̠na domai habe. Ani beregola í̠naga deni i̱ dodo nahe holebero.
PSA 19:13 Mana ko mbira i̱na bero lalu buligobi í̠na i̱ yaniho habe. Ko bulene tara tara ngarume i̱ mo pila haabo haragola i̱ ko andaneha haabo holigo í̠na i̱ gi mibe. Ani beregola i̱ ko mbira para nahe tigabiore holebero.
PSA 19:14 Anduane Homogo-o í̠ i̱naga ha do haganebi i̱ gi miaganebi kegoni. I̱na bi larogobi mitangi berogobi í̠naga deni karulape helo hame ledo.
PSA 20:1 Í̠ genda yu kengi Anduane Homogohanda biamogo bilo. Yagabanaga Ngode Datagaliwabehanda í̠ handayaho helo.
PSA 20:2 Ibugua ibuni anda Saiononi kagoria howa í̠ baya hangu handayaho halu mo hongo helobi hamelo ko.
PSA 20:3 Ibugua í̠na lomabu mererubi loma irani dai helo bu delaregobi bibahende hondowa turuho helo.
PSA 20:4 Í̠ mbirale hamelo keru bibahende ibunime ngilo. Biabe maru biaore bule lalu miniha mandabu keru ibugua í̠ biamogo bilo hamelo ko.
PSA 20:5 Í̠na wai bialu wayali harengi iname turu hai howa inanaga Ngode Datagaliwabe kagonaga mini yaraga holeberema. Anduane Homogo ibunime í̠naga bi lareru bibahende hale hai helo hamelo ko.
PSA 20:6 Anduane Homogohanda mbirali ibunime dabo helene kago biamogo biagago i̱ manda bu kogoni. Ibuni dahuliya andaga bayale ngagoria howa ibugua i̱naga bi larogo hale hagaore ka. Hale howa ibuninaga hongomeore i̱ pele ngiragola i̱na wai bialu wayali haruli.
PSA 20:7 Hameigini maru bu karume wai biaga garo ale ngagoria tinaga mini hanaho haga ka. Marume wai biaga nogo hosi karunaga hongoni mini hanaho haga ka. Iname nde Anduane Homogo inanaga Ngode Datagaliwabe kagonaga minini hanaho haga kamagoni.
PSA 20:8 Agali uruni ti ibira halu ereba hai holebiragoyu iname heyalu hongohe ho aribia holeberema.
PSA 20:9 Anduane Homogo-o í̠na inanaga kini kago wayali helo mo hongo habe. Iname í̠ olalu kamangi í̠na hale howa biamogo bibe.
PSA 21:1 Anduane Homogo-o í̠na kini kago mo hongo harigonaga ibu turuho kagoni. Biamogo bialu wayali helarigonaga ibugua í̠hondo turu timbuniho kagoni.
PSA 21:2 Í̠na ibunaga bu miniha hamelo heago ale miai hariya. Ibu wayali holenaga pele ngi layagola hale halu í̠na nangule nale miaore birigoni.
PSA 21:3 Í̠na ibu mo bayale hagane aleru ibu hearia ibilariyagoni. Kininaga manda ngolome wabini wiago ibunaga haguaneni í̠na mo karula hariya.
PSA 21:4 Ibugua holene bayale ngibe lalu hale hayagola í̠na anidagua miriya. Ibu dindi ogoriani holene luore helo mo wia hariya.
PSA 21:5 Í̠na ibu biamogo birigome ibu agali mini lene mbira ka. Ibuha hongo holenebi mini lenebi kago í̠nime mirigoni.
PSA 21:6 Í̠na ibuhondo bayale holeneru wiaabo helo mirigoni. Í̠ni ibu heba kaware haabo kegome ibu mo turu haabo haga ke.
PSA 21:7 Kini ibugua Anduane Homogohondo mini mbiraore hongohe wu kagoni. Anduane Homogo Daligaorene Daliga kago ibugua kini gubalini ho haabo haga kagome ibu hongohe ha ho wiaabo holebira.
PSA 21:8 Kini ibugua waitigi bu karu bibahende minu yania hai holebira. Agali ibu handabe manga haga karu hondowa ibugua garabaya helai holebira.
PSA 21:9 Ibuni hamani hapani ho howa ibugua irame bo dalu mbirale ngaru dai hagadagua waitigi karu bo wahai holebira. Anduane Homogohanda ti baba keba halu bope haragola ti bibahende irame dalu do amo lai holebira.
PSA 21:10 Kini ibugua tinaga waneigini bu karu bo wahai holebira. Tinaga waneigini aguanene mani holebirarubi mbira naheore ereba halu amo lai holebira.
PSA 21:11 Tigua kini ibu mo ko hole lowa dindiha hendore ndi lama ibaga bialu howabi tigua mo henene halu ibu bope naholebira.
PSA 21:12 Kini ibugua danda tege lalu ti kagoha timu baede haragola tigua gi halu ibida piai holebira.
PSA 21:13 Anduane Homogo-o í̠ hongo haabo holene taraore kego inaha ibilariligo ina í̠naga mini yaraga holeberema. Iname iba gana lalu í̠naga mini yaraga holeberema.
PSA 22:1 I̱naga Ngode Datagaliwabe-o I̱naga Ngode Datagaliwabe-o í̠na i̱ aginaga wahalu piribe. I̱ biamogoore bibelonaga dugu bialu bi larugolabi hale nahole í̠ kaundia uyuraore haruago irane aginagabe.
PSA 22:2 I̱naga Ngode Datagaliwabe-o i̱na horombe olalu kogo í̠na ladai nabi ke. Mbiragabi nde olaabo halu kogoyu í̠na i̱naga genda mo wanahe haabo kegoni.
PSA 22:3 Anigoyu í̠ Ngode Datagaliwabe Kini Loma Bia Hene howa haru kegoni. Í̠ Kini kegola Isaraele wali agalime í̠naga mini mo yaraga haga.
PSA 22:4 Inanaga mamali heneyarume í̠ni hanaho haga biniya. Tigua í̠ ani hanaho hemiria í̠na ti pele migi biniya.
PSA 22:5 Tini kooreni howa í̠ olaga biyagome tinaga waitigirunaga giha howa yo pialu pugu biniya. Tigua í̠ni hanaho haga biniyangi ti heagoria buru pale mbira nawi heneya.
PSA 22:6 Áyu wali agali bu karu bibahendeme i̱ore handabe manga halu kerekere lalu ka. Tigua ani lalu kagome i̱ agali abale haruligobi ndo áyu ngoe dindini pialu ngaligobi ko.
PSA 22:7 I̱ handaya haga biraru bibahendeme i̱ mege bialu tinaga ngui yogo bialu i̱hondo hége doma bigi biaga ka.
PSA 22:8 Anidagua bigi bialu howa tigua i̱hondo lalu, Í̠ Anduane Homogoni hanaho hegodago ibugua í̠ genda yu keruni yamogo nabiradago aginagabe, laga. Anduane Homogo ibugua í̠ kalo manda bidayagua í̠ biamogo nabiradago aginagabe, laga.
PSA 22:9 I̱ pigane i̱ ai̱yahanda taba hanayangi howa í̠naga gi habeni halu anda harugo kogoni.
PSA 22:10 I̱ pigane hono wiyangi í̠naga gi habeni honope henego i̱naga Ngode Datagaliwabe í̠ni hanaho halu dege anda harugo áyu o kogoni ndobe.
PSA 22:11 Ai gendabi tara tara i̱ kogoria hapara kago i̱ biamogo bulene mbirali nahego í̠ dege ke lo kogoni.
PSA 22:12 Waitigi dewa bulumaga gabua agali hayaga alerume ho mabu bupe kagola i̱ dombeneha ko. Bulumaga wangabe gabua hongohe hiriribiore Basana dindini bu heane hendene ogobioreme i̱ ho mabu bupe kane ko.
PSA 22:13 Laiono gabuame agali bo tidu bagabu nole ne ha̱la howa ngororo lagadagua tigua i̱ bo nole ogonidagua bialu ka.
PSA 22:14 I̱naga hongo holene ereba haya. Iba dindini odo paya bini pu ereba hagadagua i̱naga hongo bibahende ereba hai halu pirilipe haya. I̱naga kuni damenego bibahende hibi habo lai halu i̱naga gubalini nira nama anda piarua.
PSA 22:15 I̱naga kembobe yobi abalu ale halu i̱naga hégene dugu tagi halu ne hambuni dugu bandalape ka. Anduane-o ani bidago i̱ durumbu o ngagoha homo tongolo muliya ngeledegoni.
PSA 22:16 Agali ko biagaru biango dudu tidiyu haradagua tidiyu howa i̱ ho mabu bupe ka. Tinaga ne tandagabigome i̱naga gi geru hayama iri dali bialu tinaga neme i̱ haya bolomogo bida.
PSA 22:17 Tigua i̱naga kuniru panaga karia hondowa i̱ yo handalu bame kuni hanguore o kagonida lowa handayaho ka.
PSA 22:18 Tigua i̱naga aga ti mo tale bialu aga luni mbira daliga biagane wiwago ti ái ibu harabe hondole tadu bira.
PSA 22:19 Anduane Homogo-o í̠na i̱ hangu helo wanahabe. I̱ biamogo bulene í̠ dege kegonigo i̱ biamogo bule abale íbu.
PSA 22:20 I̱naga waitigi karume ayu tibume i̱ ma puguligo pele ngibe. Biango ale o bu karume i̱ bo homa boligo í̠na i̱ abale pele ngi.
PSA 22:21 Laiono o bu karume i̱ bo nabeheore halu bulumaga wangabe gabua o bu karumebi i̱ bayagua i̱ yo pialu pobe naheore kogonigo i̱ gini mia.
PSA 22:22 Í̠na gi mialu i̱ biamogo ogodagua biya lalu i̱na i̱naga wali agali karu hale helo loyogo loliya. Ti mo ngoai ho bedagoria howa i̱na í̠naga mini yaraga holebero.
PSA 22:23 I̱na ogodagua lolebero. Anduane Homogonaga biabe biahaga kamirume ibunaga mini yaraga hadaba. Yagabanaga waneigini kamirume Anduane Homogohondo ka̱i̱ ladaba. Isaraele hameigini kamirume Anduane Homogo ibu mitangi bialu lotu ladaba.
PSA 22:24 Ibugua yagibano karu biamogo bulene ha do waha tigua tandaga nalu karu hondowa nahende tingiha nabiaga kagoni. Ani nabi howa tinime biamogo bia lalu olaragola ibugua hale halu biamogo biaga ka, lolebero.
PSA 22:25 Bibahendeore ngoai ho kagoria í̠na birirunaga lalu i̱na í̠naga mini yaraga holebero. Í̠hondo turu halu mbirale bo ngulebero lalu lo wirugo wali agali í̠hondo gihe biru ngaru bibahendenaga deni howa ngulebero.
PSA 22:26 Yagibano damene íbu ngoai ho bedaru bibahendeme ti noabiradagua nendebu nolebira. Anduane Homogo mitangi bule íbu ngoai ho bedaru bibahendeme ibunaga mini yaraga holebira. Wali agali uruniore bayale hangu hama puabo helo aniore bilo laro.
PSA 22:27 Wali agali hameigini tara tara paluyu pedaru bibahendeme Anduane Homogo ka manda bialu ibu karia ibalu ibu mitangi bialu lotu lai holebira.
PSA 22:28 Anduane Homogo ibu kini howa hameigini tara tara paluyu pedaru bibahende ibugua handame ho kagoni.
PSA 22:29 Wali agali minehe dindini holene mo tene ho karu bibahende ibalu Anduane Homogonaga geha bulu paliai holebira. Homalu dindi tago bulebirago manda buwa bibahendeme ani biai holebira.
PSA 22:30 Mani dabane hama porarume Anduane Homogonaga biabe bia holebira. Tigua Anduane Homogo lalu maha anda ho aribia hene karu lamulebira.
PSA 22:31 Maha taba honolebiraru tibi lamialu, Anduane Homogohanda ibunaga wali agali pele miya, lalu lamulebira.
PSA 23:1 Anduane Homogo ibu i̱naga haru haga kagoni. Ani kagome i̱ buru pale mbira ngagola ibunime karulape ngulebira.
PSA 23:2 Ibugua i̱ tani gahenge kagoriabi iba gagahe bedagoriabi ema nabi biruliya haru haga ka.
PSA 23:3 Ibugua hongo gahenge i̱ ngiaga. Ibugua ala bulebero lalu lo wiyadagua i̱ hariga tigabini haru piaga ka.
PSA 23:4 I̱ homolene ngagoria kaware pu haruyaguabi i̱ gi naholebero. Anduane Homogo-o í̠ore i̱ heba haabo haga kegoni. Í̠naga kango halimbubi yidegome i̱ biamogo biaga.
PSA 23:5 I̱naga waitigi karu handaya ho helowa í̠na i̱ tomo karulapeore noliya manda manda bu ngiaabo harili. Agali haguaneru tomo nabiya ibabe lowa bulenedagua habane nabuleneore i̱ kogohondo biaga ke. I̱naga iba beha iba hambu to̱la tagiore howa ngiaga ke.
PSA 23:6 Í̠naga gubalini haho wiaabo holenebi dara howa biamogo bulenebi i̱ porodagua mandagi ibagabu haaboore holebiralo manda bido. I̱na Anduane Homogo í̠ andagaha haabo holebero.
PSA 24:1 Dindi bibahendebi mbirale dindini karubi ngarubi bibahendeore Anduane Homogo ibunaga hangu nga. Wali agalibi mbirale tara tara dindini ema bialu piaga damenerubi bibahendeore Anduane Homogo ibunaga hangu ka.
PSA 24:2 Anduane Homogohanda iba andaneha berelowa dindi ogo daliga wabu ngeleda. Dindi ogonaga gene dunini iba solowara timbuni bedago andaneha wa namu lowa dindi ogo pagaho ngeleda.
PSA 24:3 Mbirali Anduane Homogo mitangi halu hari nene kagoria iraga halu polene karulape ai kabe. Anduane Homogonaga anda lomabia hene hari neneni kago ge nahaga ogoniha ge yaanda halu polene karulape ai kabe.
PSA 24:4 Mbirali ibu gime mana ko mbira nabiagabi ibu bu minime mana ko mbira mitangi nabiagabi mbirale gime wabiniru mitangi nabiagabi tindule ogoale buliya lowa lahondo nahagabi uruniale nabiaga kago ibuni iraga halu polene karulape ka.
PSA 24:5 Wali agali urunibi karu Anduane Homogohanda ti pele mialu mo bayale holebira. Ngode Datagaliwabe ibugua tíha ko mbira nawi tí tigabiore kamigoni lolebira.
PSA 24:6 Wali agali urunibi karume Ngode Datagaliwabe mitangi bialu ibu kagoria ibaga. Yagabanaga Ngode Datagaliwabe kago mitangi bialu ibuni kagoria kaware ibugu biaga.
PSA 24:7 Kini gibi kago ibu anda ibilo. Panga payapai kamiruni amura dugu amu nana bidaba. Panga haraba bambaore howa payaho wiaabo hene karuni dugupe hadaba. Kini gibi biago ibilo ani bidaba.
PSA 24:8 Kini gibi ogoni ibu ai kabe. Kini ogoni ibu Anduane Homogo hongo gibihe biago kagoni. Anduane Homogo ogoni ibu wai bialu wayali haga gibi biagoni ka.
PSA 24:9 Kini gibi kago ibu anda ibilo. Panga payapai kamiruni amura dugu amu nana bidaba. Panga haraba bambaore howa payaho wiaabo hene karuni dugupe hadaba. Kini gibi biago ibilo ani bidaba.
PSA 24:10 Kini gibi ogoni ibu ai kabe. Anduane Homogo Bibahendeore Haru Haame Ho Haga biago ibuniore Kini gibi ogoni kagoni.
PSA 25:1 Anduane Homogo-o i̱na i̱naga miniha mitangibu kogonaga í̠hondo bi larogoni.
PSA 25:2 Í̠ i̱naga Ngode Datagaliwabeore kegoni. I̱na í̠hondo mini mbiraore wu kogoni. I̱ wai wayali naharogonaga taga pani nanelabe. Waitigi karume i̱ bope halu wayali howa i̱ hondo oba nahelabe.
PSA 25:3 Wali agali í̠hondo mini mbiraore wialu mini dunubiahe karu ti wai wayali naharagonaga taga naholebira. Wali agali mine halu mana ko biaga karu tini dari halu taga holebira.
PSA 25:4 Anduane Homogo-o í̠naga mana bayale ngeru i̱ lawai halu hariga tigabini pialu holiya mo walia habe.
PSA 25:5 Í̠na bi mana henene lo ngego talialu bialu holiya i̱ lawai habe. Ngode Datagaliwabe í̠na i̱ haru dai bialu pele ngiaga kegonaga i̱na ani bibe laro. Horo bibahendengi í̠na i̱ biamogo bibelo mini dunubiaho haruligo kogoni.
PSA 25:6 Anduane Homogo-o í̠naga dara holenebi gubalini holenebi irane nawini haga kego mitangi bibe. Í̠naga mana ogoni bambaore howa wiaga biago áyu wiaabo kagoni.
PSA 25:7 Anduane Homogo-o i̱ igiri daliahe hewangi ko dewa bialu harugobi mine harugobi mitangi nahabe. Anduane Homogo-o í̠ bayaleore haabo kegonigo í̠naga gubalini holeneme i̱ dara halu mitangi bibe.
PSA 25:8 Anduane Homogo ibu bayale tigabiore kagoni. Wali agali mana ko biaga bu karume mini beregedalu mana bayale bialu helo ibugua biawai haga ka.
PSA 25:9 Ibugua wali agali tini mini mo dindi haga karu bayuwa haru haga ka. Tigua ibunaga mana tigabi ngaru hangu bialu helo ibugua biawai haga ka.
PSA 25:10 Anduane Homogohanda ibunaga habo nalolene bi lowini ngagobi ibunaga mana ngagobi wali agali talialu biaga karu ibugua tihondo gubalinibi mini bilinahebi howa ti hariga tigabini haru haabo haga ka.
PSA 25:11 Anduane Homogo-o í̠ni mini tigabi howa bule lalu lo wiridagua mana ko bialu harugo domo wahabe. I̱na ko timbuniore biruru nde í̠na domo wahaiore habe.
PSA 25:12 Wali agali Anduane Homogo mitangi bialu mogolo haga karu aibe. Uruni ti mana bayale dabalu bialu helo ibugua hariga tigabi mo walia halu holebira.
PSA 25:13 Wali agali urunibi karu ti bayale halu tinaga waneigini aguanenerubi dindi ogoria howa bayale holebira.
PSA 25:14 Anduane Homogo ibugua wali agali ibuni andaneha karu nenegeore haga kagoni. Ibugua ibunaga habo nalolene bi lowini ngaru tihondo lawai haga kagoni.
PSA 25:15 I̱na horo bibahendengi Anduane Homogohanda i̱ biamogo bilo ibuhondo mini dunubia ho haga kogoni. I̱ mo ko holene bu ngagoria kogola ibugua i̱ pele ngialu mo wiaga kagoni.
PSA 25:16 Anduane Homogo-o i̱ni hangu howa i̱naga hongo ereba hayadago í̠na i̱ dara halu biamogo bule abale ibabe.
PSA 25:17 I̱ hendore holene ngadagua holiya i̱ha genda bu ngelo koruni í̠na mo wahabe. Mini tumutumu bulene ngarume i̱ bope nahelo í̠na i̱ abale biamogo bibe.
PSA 25:18 I̱ha genda tandagaru ngelo koru mitangi bialu i̱na ko bini ngoru bibahende í̠na domo wahai habe.
PSA 25:19 I̱naga waitigi dewaore bu karu de handa. Tigua i̱ handabe manga timbuni kagobi de handabe.
PSA 25:20 I̱naga waitigi karume i̱ bo wanahelo í̠na i̱ handayaho halu pele ngibe. Tigua i̱ mo taga nahelo i̱na í̠ kegoha ha do hole ibulebero.
PSA 25:21 I̱na í̠hondo mini mbiraore wu kogo i̱naga mana bayale tigabi bulene ngorume i̱ haru haabo helo hamelo kogoni.
PSA 25:22 Ngode Datagaliwabe-o í̠naga Isaraele wali agali bu karunaga genda tara tara ngarume ti bo hengeda nabilo í̠na ti pele mialu haru dai bibe.
PSA 26:1 Anduane Homogo-o i̱na í̠hondo mini mbiraore wu haabo howa mana tigabi hangu bialu harugo í̠na i̱ bayale ka labe.
PSA 26:2 Anduane Homogo-o i̱na bialu haga ngoru í̠na bibahendeni howa i̱ ba handabe. I̱naga bu minibi baya hangu dabo handaga bigi bibe.
PSA 26:3 Í̠naga dara halu gubalini holeneme i̱ handayaho haga kegoni. Í̠ mini bilinahe kegome i̱ poleberogoha pu bamba halu í̠na i̱ yu wahalu napiaga kegoni.
PSA 26:4 I̱ agali ko biaga karu heba naharuli. Agali tombene hondokihe karu baba i̱ nenege nahaga kogoni.
PSA 26:5 I̱ agali mini kowi karu baba ibaga bibe manga howa mana ko biaga karu helalu habagi ho haruli.
PSA 26:6 Anduane Homogo-o i̱ha ko mbira nawiore kogo walia halu i̱na i̱naga gi wayawaya bo waharogoni. I̱ í̠naga lomabu delaga dabu bu kagoria pu mabu bialu howa i̱na í̠ mitangi bialu lotu lalu kogoni.
PSA 26:7 I̱na anidagua bialu howa í̠hondo ka̱i̱ lalu iba ganaru larogoni. Í̠na mbirale bayale bialu hariruni wali agali bibahendeme hale helo i̱na lamiai harogoni.
PSA 26:8 Anduane Homogo-o í̠naga anda í̠ni kegoha kago i̱ hame timbuni ledo. Í̠ mini timbunibi wá holenebi haabohe ngagoria kego i̱naga gubalinime hame timbuni lo kogoni.
PSA 26:9 Mana ko biaga karu heba í̠na i̱ bo wanahabe. Mendeali homelo bo wahaga karu í̠na ti bo waharengi i̱ ti heba homoliya ba nabi helabe.
PSA 26:10 Uruni tigua mana ko ngubiore ngaru biaabo haga kagoni. Tigua wali agali bayale kago mo ko halu agali tara karume bame bo wahelo ohowa muni hana haga kagoni.
PSA 26:11 Anigoyu i̱nime mana bayaleore ngaru taluwa bialu haga kogonigo í̠na i̱ dara howa biamogo bialu haru dai bibe.
PSA 26:12 I̱ mana tigabi yani ho howa hongoheore haga kogo mbirale mbirame i̱ mo ko habe nahe. Wali agali Anduane Homogo mitangi bialu lotu lole ngoaiho bedagoria howa i̱na ibunaga mini yaraga halu holebero.
PSA 27:1 I̱naga wá holenebi i̱ pele ngulenebi Anduane Homogo ibuni hangu kagoni. Ani kagola i̱ mbirali hondowa gi naholebero. Anduane Homogo ibugua mbirali gibi ale bu ngarunaga howa i̱ mo wiaga kagola i̱na mbiralihondo gi naholebero.
PSA 27:2 Agali ko i̱naga waitigi karume i̱ de handaya halu bo wahole manda biyagua tiniha dai bulebira.
PSA 27:3 Agali wai tidiyu henego bibahendeoreme i̱ore bole lowa ho mabubupe ho kayaguabi i̱ gi naholebero. I̱naga waitigi karume i̱ baba wai kama layaguabi ti ani lo helo i̱ Anduane Homogohondo mini mbiraore wiaabo howa miniha dungulo holebero.
PSA 27:4 I̱ Anduane Homogohondo bi lalu mbirale mbira hangu bulene hamelo ko lalu lamiru. Ogonigo i̱ dére emabu kongi Anduane Homogo ibu andagani haabo holene hame ledo lalu lamiru. Ani lowa Anduane Homogonaga biamogo bulenebi baya turubini bulenebi mana bayale uruni alego bayuwaore handa tiga bialu i̱ hama polenego ogodagua hama pobe lalu bi langigi bilo hame laru.
PSA 27:5 Gendabi mini burugule wigi bidangi ibugua i̱ bira do helolebira. Ibugua ibuninaga andaha i̱ bayale holiya mo do holebira. Ani bialu ibugua i̱ taba muwa ege to̱le̱ hari wedagoria neneoreni bo iraga holene tobaheni minu berelolebira.
PSA 27:6 Anidagua bigi biragola i̱na i̱naga waitigiru bope halu i̱ wayali holebero. I̱na turu howa ali iwaru lalu Anduane Homogonaga andaha ibunaga lomaru bo delolebero. I̱na Anduane Homogonaga mini yaraga halu iba gana lolebero.
PSA 27:7 Anduane Homogo-o i̱na í̠ olarogola hale halu ladai bibe. Í̠na i̱ dara nahabehe kogoni harugo i̱ dara halu bi larogo hale halu ladai bibe.
PSA 27:8 Í̠na i̱hondo lalu, I̱ mitangi bialu lotu lole i̱ kogoria ibabe, larigola i̱na, E̱ Anduane Homogo-o ibulebero, lalu ladai birugoni.
PSA 27:9 Anduane Homogo í̠na i̱hondo manga halu erembira nguleni. Anduane Homogo-o i̱ í̠naga biabe biahaga harugonigo í̠na i̱hondo keba halu erembira ngialu poleni. I̱naga Ngode Datagaliwabe i̱naga Pele Ngiaga-o i̱ biamogo biaga í̠ harigonigo i̱ helalu erembira ngialu poleni laro.
PSA 27:10 I̱ aba ai̱yalame i̱ handabe manga halu bo batagi hayaguabi Anduane Homogo ibugua i̱ ibunaga adogeha yamuwa de hondo holebira.
PSA 27:11 Anduane Homogo-o i̱naore bialu holiya í̠na manda bu ngedagua i̱hondo walia habe. I̱naga waitigi dewa bu karume i̱ boligo i̱ hariga gibi hiriribini haru nape hariga tigabini haru pobe.
PSA 27:12 I̱naga waitigi i̱ bolene kagoria i̱ hangu helo wahalu poleni. Tigua tindule i̱ nabinigobi bame dibade halu i̱ mo gi̱la halu bi lai damene haragola ti bime i̱ bo ngoai haga kago Anduane Homogo í̠na i̱ yu wahalu poleni laro.
PSA 27:13 Anduane Homogo ibunaga mana baya gibiore áyu ina kamangi bigi birago i̱ hondole holebero manda bido.
PSA 27:14 Anduane Homogohanda biamogo bulebira manda bialu ibuhondo mini mbiraore wu halimu. Bu miniha genda nahe hongo ho halimu. Anduane Homogohanda biamogo bulebira manda bialu ibuhondo mini mbiraore wu halimu.
PSA 28:1 Anduane Homogo-o í̠ ege to̱le̱ ale hongohe kego í̠na i̱ biamogo bibelo olalu kogoni. I̱na í̠ olarogo haleore habe. Í̠na i̱naga bi larogo hale halu i̱ biamogo nabiriyagua nde i̱ agali homene dindiha pu karu ale holeberodalo manda bido.
PSA 28:2 I̱na i̱ biamogo bia lalu í̠ olalu kogola í̠na i̱naga bi hale habe. I̱na í̠ninaga anda loma bia heneha í̠ keria i̱naga gi yaraga halu í̠hondo bi lalu kogola hale habe laro.
PSA 28:3 Í̠na mini kowi karu heba i̱ bope nahabe. Uruni tigua mana ko biaga howa bi bayale dege lalu miniha handabe manga holene ngaru doho haga kago i̱ ti heba mo ko hamaga nahabe.
PSA 28:4 Tigua ko uruni biyagonaga pani nelo mibe. Ko biaganego pani nelo mo mibe. Tinime mana ko bibahende biyarunaga tini biyagobi pani nelo migi bibe.
PSA 28:5 Agali ko uruni tigua Anduane Homogohanda biabe timbuni bini ngaru mitangi nahagabi bibahende wabini ngaru mitangi nahagabi ka. Tigua ani bialu kagonaga pani mialu ibugua ti bo wahaiore holebira.
PSA 28:6 Anduane Homogohanda i̱na dugu bialu biamogo bia lalu olalu harugola ibugua hale hayagonaga i̱na ibunaga mini yaraga harogoni.
PSA 28:7 Anduane Homogo ibugua i̱ handaya howa i̱naga humbi ale kagoni. Ibu karulapeore kago mitangi bialu i̱ ibuha hanaho kogoni. Ibugua i̱ biamogo biaga kago i̱na turu halu iba ganaru lalu ibunaga mini yaraga halu kogoni.
PSA 28:8 Anduane Homogohanda ibunaga wali agaliru baya hangu handayaho haga. Ibugua agali kini helo ibunime dabo helayagobi biamogo bialu mamage ho haga ka.
PSA 28:9 Anduane Homogo-o í̠naga wali agali pele mialu ti í̠ninagaore helo dabo helarigo í̠nime bayuwa biamogo bibe. Nogo sibi haru haga ale howa í̠na wali agali uruni tinaga haru haganeore í̠ni howa ti bayuwa handaya halu haru haabo habe.
PSA 29:1 Dahuliyali kamiru-o Anduane Homogo kagonaga mini mo yaraga hadaba. Wá taraore holenebi hongo holenebi ibuni hangu kago turu timbuni hadaba.
PSA 29:2 Anduane Homogo ibuni baya buruguleore kagonaga mini yaraga hadaba. Ibu mitangi bialu ibunaga wanakuihayagi bulupalialu ibunaga mini yaraga halu lotu ladaba.
PSA 29:3 Anduane Homogonaga bi larago iba solowara bedarume hale hai haga. Ngode Datagaliwabe ibuni mini leneore kagome ibunaga bi hari kulu laradagua biayua. Iba solowara berearuha daligani ibunaga bi timbu hari kili kulu laradagua biayuagoni.
PSA 29:4 Anduane Homogonaga bi hongohe gibi taraore layuagoni. Wali agali bibahende bu hearume ibunaga bi laragola hale howa mogo lalu gi hai haga.
PSA 29:5 Anduane Homogo ibunaga bime ira tamia hearu bo dangia lahole biagaya. Ira tamia Lebanono dindi hene heaguabi aniore biagaya.
PSA 29:6 Anduane Homogohanda Lebanono dindiha hari timbuni wearu mo emabia haragola nogo bulumaga iginime pogoladagadaga biagadagua bilaga ka. Hari Hemono wedago nogo bulumaga wangabe daluame pogoladagadaga biradagua ani bilaga ka.
PSA 29:7 Anduane Homogohanda bi laragola hari daba migimege lalu wá timbuni hagimbu biagaya.
PSA 29:8 Ibunaga bi laragome dindi ko wali agali nahaga ngaru mo birila gimbu biagaya. Kedese dindi ko iba dalu naibaga ngaru mo birila gimbu biagaya.
PSA 29:9 Anduane Homogohanda bi hongo howa laragola nogo gabua karume hale halu mogolo puwa igini abale wupe hagaya. Ibugua bi hongo howa laragome ira yuni karu gilopaya bilagaya. Ibunaga anda kagoha wali agali bibahendeme lalu, Ngode Datagaliwabe ibu mini leneore ka, lagaya.
PSA 29:10 Anduane Homogo ibugua iba solowara timbuni bedaru handameho haga. Ibu Kini timbuniore howa hondo haabo haga kagoni.
PSA 29:11 Anduane Homogohanda ibunaga wali agali bu karu mo hongo haabo haga kagoni. Ibugua ti mo bayale heledagola ti mo palia holene karulo haabo haga ka.
PSA 30:1 Anduane Homogo-o í̠na i̱ waitigi hearume i̱ bo hengedalu turu nahelo i̱ pele ngialu haru dai birigonaga i̱na turu timbuniore howa í̠naga mini yaraga halu kogoni.
PSA 30:2 Anduane Homogo-o í̠ i̱naga Ngode Datagaliwabeore kegonigo i̱na í̠hondo biamogo bia lalu olarugola hale hari. Hale howa í̠na i̱ biamogo bialu mo dabi ho helarigo ko.
PSA 30:3 Anduane Homogo-o i̱ homene ale hewaria í̠na i̱ lone mo heya harigoni. I̱ homene dininiru pu hagaha hewaria í̠na i̱ha holene karula halu ngia dai birigoni.
PSA 30:4 Anduane Homogonaga wali agali mini bilinaheore kamiru-o tígua ibu mini yaraga halu iba gana lalu hadaba. Mbirali mini Baya Buruguleore kago ibunime tíhondo mbirale bigi biyarunaga mitangi bialu ibunihondo ka̱i̱ lalu hadaba.
PSA 30:5 Ibugua keba tigimandi hangu ho haga kagoyu ina dindini kamangi ina mitangitangi bialu biamogo biaabo haga kagoni. Mbiraga de iba ibalu palu heyalu horo mendengi turu ha aribia holebira.
PSA 30:6 I̱ni hangu mitangi bialu lalu, I̱ karulapeore kogo i̱naga waitigi karume i̱ mo para nahabehe ko, laru.
PSA 30:7 Anduane Homogo-o í̠na i̱hondo bayale bialu haabo kegoni. Í̠na anda hongohe hari neneni hagagobi howa i̱ helarigo kogoni. Ani birigoyu i̱ helalu pialu í̠ ha do harigola i̱ha gi holene timbunime bo hengeda dambi haga biya.
PSA 30:8 I̱na Anduane Homogo í̠ olarugoni. I̱ dara howa biamogo bia, hongo howa lalu harugoni.
PSA 30:9 I̱ homaruyagua nde i̱ha howa bayale mbira agi tagira ibulubadabe. I̱ homaliha piruyagua nde bayale agi bia tagi holobadabe. Homenerume í̠naga mini yaraga holobadabe. Í̠na bayale biaabo haga kegonaga tigua latagi agua holobadabe.
PSA 30:10 Anduane Homogo-o í̠na i̱naga bi larogo hale howa dara habe. Anduane Homogo-o í̠na i̱ biamogo bibe laro.
PSA 30:11 Í̠na i̱ha genda wiwaru bibahende mo wahai harigola turu howa mali lulene wia aribia helarigoni. Abale i̱ mbirali homaragola daraho hagagobi hewaria í̠na i̱ha dara holene uruni mo wahai halu i̱naga bu miniha turu holene mo wia aribia helarigoni.
PSA 30:12 Ainde i̱na í̠hondo bi nale holebero ndo i̱na í̠naga mini yaraga halu iba ganaru lalu holebero. Anduane Homogo-o í̠ i̱naga Ngode Datagaliwabeore kegonaga i̱na í̠hondo ka̱i̱ lalu haabo holebero.
PSA 31:1 Anduane Homogo-o i̱na í̠ kegoha ha do hole eberogoni. I̱ waitigi karume i̱ bope nahelo í̠na biamogo bibe. Í̠naga mini tigabiore kegonigo i̱ pele ngibe laro.
PSA 31:2 I̱naga bi larogo hale habe. Í̠na i̱ pele ngule abale ibabe. I̱ ha do holene egeanda ale í̠ kegoni. I̱naga waitigirume i̱ bope holigo í̠na i̱ ho hagira bu habe.
PSA 31:3 Heneneore í̠ i̱naga ha do anda ale howa i̱ baya hangu handayaho kegoni. I̱ hariga polene ngagoria pialu kogola í̠na haru holebero lalu abale lo wiridagua i̱ haru halu bamba habe.
PSA 31:4 Waitigi karume i̱ gonoha delo gono wiaho ngagoria pialu do wuligo í̠ i̱naga ha do anda kegonigo í̠na handayaho habe.
PSA 31:5 I̱ni í̠ha ya harogoni. Anduane Homogo-o í̠ Ngode Datagaliwabe mini bilinaheore kegonigo i̱ pele ngialu haru dai bulebere.
PSA 31:6 Wali agali dama mitangi bialu gime wabini ngagohondo bi pupu wiaga karu hondowa í̠ turu nahaga kegoni. I̱na nde í̠hondo mini mbiraore wu haga kogoni.
PSA 31:7 Í̠na i̱ gubaliniho haabo haga kegonaga i̱na í̠hondo turu timbuni ho kogoni. I̱ genda yu kogo í̠ hendede. Mo ko holene íbu ngago í̠ manda bu kegoni.
PSA 31:8 Waitigi bu karume i̱ minu garabaya bilo í̠na i̱ yupe nahe handayaho haabo harigola i̱ bayale kogoni.
PSA 31:9 Anduane Homogo-o i̱ genda timbuniore yu kogo í̠na i̱ dara halu biamogo bibe. I̱na dugu bialu haabo hewaria i̱naga de tohe kogoni. I̱naga hongo bibahende pirilape haya.
PSA 31:10 I̱ miniha genda yu kogome i̱naga holene mo tubagi holobada. I̱na dugu hongo howa bialu haabo kogome i̱ dindini lu haabo naholeda. I̱ha genda timbuniore ngelo kogome i̱naga hongo ibira halu ereba haya. I̱naga kunibi gedaore haragoni.
PSA 31:11 Waitigi bu karume i̱ mege bialu ka. I̱ damene karume i̱hondo bi ko lalu kagoni. I̱ mandabi karume i̱ hondowa gi hara. I̱ harigani pialu koria wali agali lola haga birarume i̱ handalu ti ibida pugupugu biaga.
PSA 31:12 Wali agali bu karume agali homenego embeda ho wahagadagua tigua i̱ embeda hai haya. I̱ iba be pambulo wahene ngaligobi harudane hendedo.
PSA 31:13 Waitigi dewa karume i̱ mege timbuni bialu hearia hale haru. Tigua i̱ mo gibia timbuniore hole haragoni. Tigua mo ngoai howa i̱ mo ko hole manda bialu i̱ bo waholenaga bi pongo balu ka.
PSA 31:14 Anigo uruni bialu helowa Anduane Homogo-o i̱na í̠hondo mini mbiraore wu ko. I̱naga Ngode Datagaliwabeore í̠ kegoni, lalu ko.
PSA 31:15 Horo bibahendengi í̠naga giha i̱ haabo kogoni ndobe. Í̠na i̱ waitigi karunaga giha koria agali i̱ mo ko hole talima ibaga bu karunaga giha koriabi i̱ yamibe.
PSA 31:16 Í̠naga biabe biahaga agali kogo hondowa i̱ dara habe. Í̠na gubalini timbuni haga kegome i̱ pele ngibe.
PSA 31:17 Anduane Homogo-o i̱na í̠ olalu kogonigo waitigi bu karume i̱ bope helo yupe nahabe. Agali ko uruni tini mo ko hai helabe. Ti homenerunaga dinini pu hagaha pialu tinaga ne harigaha bi nalelo mo ereba habe.
PSA 31:18 Agali uruni tigua mine halu mege bialu agali tigabi karuhondo bi ko laga kagoni. Tigua ke̱ holene bi ngaru dege laabo haga ka. Tinaga ne harigaha bi lagadaru ereba helo ti bo wahai habe.
PSA 31:19 Wali agali í̠ni andaneha karu bayale helonaga í̠na baya hanguore bialu kegoni. Wali agali í̠nihondo mini mbiraore wu haga karu í̠na baya hangu handayaho haga kegoni. Wali agali bibahende bu karume de handai helo í̠na ani bialu kegoni.
PSA 31:20 Wali agali maru bo wahole manda bialu karume ti gingila mialu babe nahe helo í̠na í̠naga wali agali í̠ninaga gubaliniha mo do ho kegoni. Tinaga waitigi karume ti mege bialu bope nahelo í̠na wali agali uruni í̠ni andaneha bayaleore helo mo do ho kegoni.
PSA 31:21 Anduane Homogonaga mini yaraga holene nga. I̱naga waitigi karume i̱ bo wahole ho mabu bu heagola ibugua i̱ gubalini howa ibunaga hongome i̱ biamogo biya.
PSA 31:22 Bamba i̱ gi timbuni ho howa í̠ni kegoria naholiyanaga í̠na i̱ bo taliatagi harida lo manda biru. Ani bu howa i̱na í̠hondo i̱ biamogo bia lalu dugu bialu hewaria í̠na hale halu biamogo birigoni.
PSA 31:23 Anduane Homogonagaore wali agali mini bilinaheore kamiru-o tígua ibunihondo gubalini hoore halimu. Wali agali ibu talima pialu mini bilinahe karu ibugua ti handayaho haga ka. Wali agali mine haga karu ibugua ti pani tini biyagobi nelo mo miaga ka.
PSA 31:24 Wali agali Anduane Homogohondo mini dunubiaho kamiru-o tí gi nahe elahe howa hongo haabo ho halimu.
PSA 32:1 Mbirali ibunaga ko biniru Anduane Homogohanda domo wahalu mana liahe biniru mo wahene kago ibu turubiore ka.
PSA 32:2 Mbirali Anduane Homogohanda ko bira lene nabiagabi ibuni miniha mo hondo holene mbira nawiore kagobi ogoni ibu baya turubiore ka.
PSA 32:3 I̱na ko biruru ogo biru lalu lapani nahe donge ho howa mbiraga horombebi miniha u̱lu̱ lalu haabo hewaria i̱naga tingini bia ko halu homabeheore haru.
PSA 32:4 Anduane Homogo-o mbiraga horombebi í̠na i̱ pani ngiaabo hari. Ani birigome i̱naga hongo bibahendeore pirilipe hai haya. Dadimba tanini bereneru gaeangi poboyogo biragome yo biaganedagua i̱naga hongo ogonidagua biya.
PSA 32:5 Ani biyagola i̱na ko biniru Anduane Homogo í̠ langirugoni. Ko mbira do nahe howa binirubi tigatiga langiai harugoni. Ko biruru Anduane Homogo í̠hondo lapaniore hole lo manda bu henegobi lapani hai harugoni. Ani birugola í̠na ko biruruni domo wahai harigoni.
PSA 32:6 Ani biaga kago manda buwa Anduane Homogo í̠naga wali agali mini bilinahe karu bibahendeme ti burupale kangi í̠hondo bi lolene nga. Genda timbuni iba li ale ti kagoria anda íbu ngangi í̠hondo bi layagua genda timbuni ogoni ti namu nalolebira.
PSA 32:7 I̱naga ha do anda í̠ kegoni. Gendabi ngangi í̠na i̱ biamogo birili. I̱ homedolego ibugua ogodagua mo wiya lalu maru hale helo iba gana dalimu lalu lamulebero. Í̠na i̱ mo wiriligonaga ani lolebero.
PSA 32:8 Anduane Homogohanda lalu, Í̠ hariga pobelogo i̱na walia haga bulebero. I̱na í̠ handaya ho howa ogodagua bia ogodagua nabibe laga bialu langulebero.
PSA 32:9 Nogo hosi dongirume mini nawi howa piagadagua pialu keria í̠ hariga polene ngadagua pobelo ege pu ne hanganeha magui howa pume hende howa haru poliya holeni, lalu leda.
PSA 32:10 Mini kowi karu ti tandaga timbuni nalu haga. Anigo Anduane Homogoha hanaho haga karu ti ibunaga gubalini holenehayagi howa yo pialu pugu biaga.
PSA 32:11 Anduane Homogohanda bigi biyago mitangi bialu mini tigabiwi kamiru ti gubaliniha turuore halimu. Ibugua bi ledadagua bialu kamiru tí turuore howa ga̱ lalu ladaga halimu.
PSA 33:1 Tí mini tigabiwi kamiru bibahendeme Anduane Homogohanda bigi biyagonaga turuore howa ga̱ lalu ladaga halimu. Tí Anduane Homogohanda ledadagua hale halu biaga kamirume ibunaga mini yaraga halimu. Wali agali mini tigabiwi karume mana ogonibi bulene nga.
PSA 33:2 Ga̱wa̱ hiliyularume Anduane Homogonaga mini yaraga halu ibuhondo iba gana lo milimu.
PSA 33:3 Iba gana gahenge wabuwa Anduane Homogohondo lo mialu howa hiliyula ga̱wa̱ru lagane mugubeoreme lalu turuore halu hongo howa ladaga halimu.
PSA 33:4 Anduane Homogonaga bi damenego bibahende henene hanguore lo nga. Ibugua mbirale galone bigi bulebero ledagobi heneneore bulebira lowa ibuha hanaho habehe kama.
PSA 33:5 Anduane Homogo ibu mana tigabi bulenebi henene lolenebi gubalini haga ka. Ibunaga gubalini haabo holeneme dindi bibahendeha to̱lai ka.
PSA 33:6 Anduane Homogohanda hari daliga li kagoni ibunaga bime ani ha lowa ni ege yakundiru li bu karunibi ani hadaba layagola heneru ka.
PSA 33:7 Ibugua iba dameneru mbiraore hanguni mo mogo buwa berelene. Iba solowaranaga guru kuyama uli gibiruha panga payanda ho ngelama poradagua bini.
PSA 33:8 Dindi bibahendeni bu kamirume Anduane Homogo mitangi halu ibunaga mini yaraga hadaba. Wali agali dindi bibahendeni kamirume ibu daligaore ka manda bialu ibunaga mini yaraga hai hadaba.
PSA 33:9 Ogoni irane ibugua bi hangu layagola mbirale bibahende dindini ngaruni íbu helene. Ibunaga bime mbirale ogoale tagira íbu ha laga biyagola tagira íbu haga bini nga.
PSA 33:10 Dindini hameigini tara tara paluyu pedarume mbirale nagalone bule mandamanda bu wigi bidaru nabilonaga Anduane Homogohanda mo pere laga. Tigua bule miniha manda bu yidaru bualono burugu lelo ibugua mini yaniho haga.
PSA 33:11 Anigo Anduane Homogo ibugua bule manda bu winiru mbira ereba nahe wiaabo holebira. Ibugua bule manda bu yinigo mbirale mbirame mo ereba habe nahe hongoheore wiaabo holebira.
PSA 33:12 Hameigini mbira tinaga Ngode Datagaliwabe mende nahe Anduane Homogo ibuni hangu ka lowa yu tigabu karu ti turubiore ka. Wali agali Anduane Homogohanda ibuninagaore helo lowa dabene karu ti turubiore ka.
PSA 33:13 Anduane Homogohanda dahuliya andaga howa de handadali halu wali agali bibahende bu kamaruni handai ho ka.
PSA 33:14 Ibugua kini howa haru kagoria howa de handadali halu ina dindini wali agali bu kamaruni de handai ka.
PSA 33:15 Wali agali damene bibahendenaga mitangi bulene pigane ibugua mo wia howa tigua birago damene bibahende ibuni manda biai ho ka.
PSA 33:16 Kini ibunaga ami hongohe kago hangume agalila wai bialu ibu wayali haga ndo. Wai biaga ami agali mbira ibu wai bialu wayali haganego ibuninaga hongo hangume ndo.
PSA 33:17 Wai biagane agalime nogo hosini biruwa wai biyaguabi wayali naholebira. Hosi uruninaga hongo gibi ha kagome agali pele mia nabulebira.
PSA 33:18 Anduane Homogohanda wali agali ibugua bia ledadagua hale halu biaga karu ibunime bayuwa de handayaho ka. Ibugua ti gubalini haho wiaabo haga ka manda buwa ibuhondo mini mbiraorewu karu ibugua mamage halu handayaho haga ka.
PSA 33:19 Wali agali urunibi karu homolilono ibugua ti pele miaga ka. Hina gari timbuni porangi ti tomo karulape nalu helo mulebira.
PSA 33:20 Iname Anduane Homogoha hana howa ibuni mini dunu bia ho kamagoni. Inanaga pabe tigibi ina biamogo biagabi Anduane Homogo ibuni hangu kagoni.
PSA 33:21 Ibu kagome ina ibuha hanaho howa turuho baya kamagoni. Ibunaga mini baya buruguleore hongohe ngagoria ina hanaho kamagoni.
PSA 33:22 Anduane Homogo-o ina í̠ni mini dunu bia ho kamagonigo í̠na ina gubalini haho wiaaboore habelo hamelo kama.
PSA 34:1 I̱na Anduane Homogohondo ka̱i̱ore laabo halu holebero. I̱na ibunaga mini yaraga nahe naholebero.
PSA 34:2 Ibugua bigi biyarunaga i̱na ibunaga mini mo yaraga halu holebero. Wali agali marume hengedope haragola genda ho haga kamiru tí i̱na bi o larogoni hale howa turu halimulonaga laro.
PSA 34:3 Tíbi i̱bi ina Anduane Homogo ibu daliga gibiore ka lama. Ibunaga mini ina haru mandagi mo yaraga hama.
PSA 34:4 I̱na Anduane Homogohondo bi larugola ibugua hale halu ladai biya. I̱ gi bulene tara tarame daribaho wiaria ibugua i̱ golope haya.
PSA 34:5 Marume hengedope haragola miniha gendaho haga karu ti Anduane Homogo ibugua biamogo birago hondowa turu haga. Anigo ti miniha genda howa turu nahe mbira naholebiraore.
PSA 34:6 Hongo nahe karume Anduane Homogo olaragola ibugua hale halu biamogo biagaore ka. Ti genda tara tara yu haga bidaria ibugua ti pele miaga ka.
PSA 34:7 Wali agali Anduane Homogohanda laradagua hale halu biaga karu ibunaga dahuliyalime mamage helaga biaga. Uruni ti kagoria gendabi hiriribiru íbu wigi bidagoria howa ti ibunime gi miaga ka.
PSA 34:8 Anduane Homogo baya gibiore ka laramagoni heneneore leneda lole í̠nime manda bialu handabe. Ibuha ha doho karu ti bayale holene handa walia howa turuho ka.
PSA 34:9 Anduane Homogonaga wali agali kamiru bibahendeme ibunaga andaneha halimu. Ibugua bia laradagua hale halu biaga karu ti mbirale mbira buru palia nabi karulapeore holebira.
PSA 34:10 Tomo garibilo habe nahe laiono hongoheru heba mbiru garibilo hagagoyu wali agali Anduane Homogohanda bia laradagua biaga karu ti mbirale bayale damenego mbira buru palu naholebira.
PSA 34:11 I̱ nenege kamiru-o i̱na bi larogo hale hole ibidaba. Tí Anduane Homogonaga andaneha halimulonaga bulene i̱na lawai holiya ibidaba.
PSA 34:12 Tí turu ho holene hamelo kamibe. Tí luore bayale halu hodagua holene hamelo kamibe.
PSA 34:13 Anidagua holene hamelo kamiyagua tínaga ne harigaha howa bi ko nale tindule ke̱bi naheore halimu.
PSA 34:14 Ko bulene ngaru erembira mialu mana bayale bialu halimu. Tínaga gubalinioreme mbirale mo palia howa bigi bulenego dabalu bialu halimu.
PSA 34:15 Wali agali mini tigabiwi karu Anduane Homogo ibunime de handaya howa mamage haga ka. Tigua genda yu howa ibu olaga biragola ibunime hale halu biamogo biaga ka.
PSA 34:16 Mana ko biaga karu hondowa Anduane Homogo ibu turu nahaga ka. Ko biagaru homaragola wali agalime uruni ti abaleore embedaho waholebira.
PSA 34:17 Mini tigabiwi karume Anduane Homogo olaragola ibugua hale halu ladai biaga ka. Ti genda tara tara yu howa ibu olaga biragola ibugua hale halu biamogo bigi biaga ka.
PSA 34:18 Wali agali mini dege dindi howa turu nahe karu Anduane Homogo ibu ti kagoria kaware ka. Miniha hanaho holene mbira nawioredagola agini hanaho hoabe tobaho karu ibugua pele miaga ka.
PSA 34:19 Mbirali mini tigabiwi kago ibu tandaga nolenebi genda yulenebi handalu holebira. Ibu ani tandaga nalu kariabi genda yu kariabi Anduane Homogo ibunime ibu pele mulebira.
PSA 34:20 Anduane Homogo ibunime mbirali mini tigabiwi kago hondo haga ka. Ibunaga kuni emeneorebi mbira bu lolani handalu ibunime yaniho holebira.
PSA 34:21 Ko bulene bibahende ngarume wali agali ko biaga karu bo home lolebira. Wali agali mini tigabiwi karuhondo handabe manga haga karu Anduane Homogohanda ti pani mulebira.
PSA 34:22 Anduane Homogohanda ibuninaga wali agali pele mulebira. Ibuha ha do hole ibu karia poraru ti bayale holebira.
PSA 35:1 Anduane Homogo-o agali i̱la manga halu hoba migimigi bu karu í̠na tihondo manga halu hoba mu habe. I̱naga waitigi bu karu baba í̠na nde ti baba wai bialu habe.
PSA 35:2 Í̠na wai biagane ale ngeru mo karulalu humbi mo yalu i̱ biamogo bule ibabe.
PSA 35:3 I̱ bo wahole talima ibiraru hondowa í̠na ayu yandarebi mo yalu i̱ pele ngule abale ibabe. Í̠na i̱hondo lalu, Í̠ biamogo biaga i̱ kogoni, labe.
PSA 35:4 Agali uruni tigua i̱ bo wahole kagola í̠na ti bope halu mo taga habe. Tigua i̱ bo waholenaga wai hanalu kago í̠na agali uruni talima pialu mo luluya habe.
PSA 35:5 Anduane Homogo-o í̠naga dahuliyalime agali ko uruni bo talia togolalu puyabume datani pulo waharadagua bilabe.
PSA 35:6 Í̠naga dahuliyalime ti bama talima pialu kagola agali ko biagarunaga hariga poragoria aruma helalu mo ko habelo hameledo.
PSA 35:7 I̱na ti mo ko naheore hewaria tigua i̱ gonoha delo gono wia do ho kagoni. I̱ pilo ngelo gundu uli tombo wiaho ka.
PSA 35:8 Tigua ani bu kagoyu tini nahende kaore mo ko holene abale íbu ngelabe. Gono i̱ delo wiyadagoha tini da aribia helabe. I̱ uli pelo gundu uli tombo wiyadagoha tini uli pelo hameledo.
PSA 35:9 Anduane Homogo í̠na anidagua beregola i̱ turu timbuni ho holebero. Í̠na i̱ pele ngeregola i̱naga bu miniha dungulo holebero.
PSA 35:10 I̱na Anduane Homogohondo ka̱i̱ lalu, Anduane Homogo-o í̠ ale mende ai kabe. Í̠na wali agali yagibano karu biamogo bialu agali hongohe karunaga giha howa biamogo bialu mo wirili. Agali homogo hongohe karume yagibano karu mo ko holilono í̠na pele mialu mamage ho harili.
PSA 35:11 Agali ke̱ haga bu karume i̱hondo bi laede halu i̱na mana ko nabinigo tigua i̱na ko biya laga ka.
PSA 35:12 I̱na tihondo mana bayale bialu kogola tigua i̱hondo ko biadai biaga ka. Anidagua bialu haragome i̱naga bu miniha genda ho kogoni.
PSA 35:13 Ti warago timbuni bo ngangi i̱na ti dara halu i̱ni mo dindiha howa dara holene aga karulalu tomo nane haruli. Tomo nane howa i̱na Anduane Homogohondo tinaga bi la halu harugoni.
PSA 35:14 I̱na i̱ni aba hamene haniniru baba miniha gendaho hagadagua ti dara halu gendaho ibaga bialu harugoni. I̱ agali darabi ai̱ya homene igini haradagua buwa dugu bialu i̱naga bu miniha genda yu harugoni.
PSA 35:15 I̱ genda yu hewangi ti mo mogo buwa i̱ hondo oba halu turu haga biya. Tigua i̱ mo ko holenaga mo ngoai ho hayagoni. Agali maru i̱ de nahendene hearume i̱ mo ko holenaga bi ko lalu i̱ baabo haya.
PSA 35:16 Tigua i̱ mege biaabo halu haya. Tigua i̱ handabe manga halu ngui higi bu yu ibagabu hayagoni.
PSA 35:17 Anduane Homogo-o tigua agira halu ogonidagua bialu haabo helo heloleberebe. Tigua i̱ mo ko nahelo tinaga giha howa í̠na i̱ pele ngibe. Ti laiono gabua ale howa i̱ bo wahole kago tinaga giha kongi í̠na i̱ mo wibe.
PSA 35:18 Í̠na i̱ biamogo birigonaga i̱na wali agali dewa ngoaiho karia howa ti hale helo í̠hondo ka̱i̱ lolebero. Wali agali dewaliore bu karunaga deni howa í̠naga mini yaraga halu holebero.
PSA 35:19 Agali maru i̱la waitigi bame irane nawini ho karume i̱ mege bialu bope helo nahelabe. Tigua i̱ bameore handabe manga ho karume i̱ hondo oba halu mini ko wialu mine helo nahelabe.
PSA 35:20 Agali uruni tigua mendeali karu baba bayale holenenaga bi nalaga ka. Tigua wali agali bayale karu baba karia ko mbira nabini kago mo yapara howa bo wahole bi lalu haga ka.
PSA 35:21 Tigua i̱hondo bi hongo howa ladagadaga bialu lalu, Heneneore í̠na ko birigo ina handarima, lalu haga ka.
PSA 35:22 Anduane Homogo-o tigua ani biyaruni í̠ de handarigo í̠na bi nale nahabe. Anduane Homogo í̠na i̱ helalu kaundiaha nahabe laro.
PSA 35:23 Anduane Homogo-o í̠ore abale heyalu i̱ biamogo bule ibabe. I̱naga Ngode Datagaliwabe-o í̠ heyalu i̱na bi lalu koru mo hongo halu lahabe.
PSA 35:24 Anduane Homogo-o í̠ mini tigabiore kego í̠na i̱ mana mbira ko nabini kogo latagi habe. Waitigi karume manda bilo i̱ biamogo bialu i̱naga bi lahabe. Agali uruni tigua i̱ hondo oba halu bi ko lalu mine helo nahelabe laro.
PSA 35:25 Tigua tini lo mitangi bialu lalu, Mbirale bilo hamelo harimago ai tagira piyagoni. Agali o biago iname mo ko ho waharimagoni, nalelo í̠na i̱ handayaho habe laro.
PSA 35:26 I̱ha genda ibiyagonaga turuho haga karu í̠na ti taga helo mo luluya ho helabe. Tigua i̱ bope halu tininaga mini yaraga haga karu í̠na ti bope halu mo taga ho helabe.
PSA 35:27 Í̠na i̱ agali tigabi ka labelo hamelo karu tigua turu ho howa tinaga bu miniha dungulo helo helabe. Horo bibahendengi tigua lalu, Anduane Homogo ibu dunini heneneore mbira ka. Ibugua ibunaga biabe biahaga kago bayale helo hame laabo haga ka, lolebira.
PSA 35:28 I̱na í̠ mana bayale bialu mini tigabi kego lalu horo bibahendengi howa latagi halu í̠naga mini yaraga halu haabo holebero.
PSA 36:1 Mana kome mini kowi karunaga bu miniha bi lamiaga. Mana ko biaga karume Ngode Datagaliwabehondo gi nahaga howa erembira mialu yo handaga ka.
PSA 36:2 Ko biaga uruni tigua mine howa tini lalu, I̱ duniniore mbirago kogoni, laga ka. Ngode Datagaliwabehanda tigua ko biyaru handa walia halu dabaki nabulebiralo manda biaga ka.
PSA 36:3 Horo bibahendengi ogoni ale biaga karume mana ko bulenenaga bi mo tene howa ke̱ halu bi laabo haga ka. Mana bayale bulenenaga mini bayale mbira tiha nawiore kagoni ndobe.
PSA 36:4 Dagiani u paluwa mana ko bulenenaga miniha mitangitangi bialu paliaga ka. Tigua mana ko bulenego bibe manga nahaga howa ko bulene ngagoha haabo haga ka.
PSA 36:5 Anduane Homogo-o í̠naga gubalini haabo holene emene ndoore hari daliga elahe wu kegoni. Í̠naga mini bilinahe ngego timbuni yangale howa hari mindini elahe wu kegoni.
PSA 36:6 Í̠naga mini tigabi timbuniore ngego dindi hari ngaru bolanguahe ngegoni. Í̠naga mana tigabiore mo dabaki haga ngegobi ina kamarume manda biai habe nahe kama. Ogoni iba solowara uli unuraore ngaligobi nge. Anduane Homogo-o í̠nime wali agalibi ema bialu piaga bedarubi nogo tara tarabi handayaho hai haga kegoni.
PSA 36:7 Ngode Datagaliwabe-o í̠naga gubalini haabo holene baya buruguleore ngegoni i̱ hame timbuni lo ko. Í̠ ogonibi kego wali agali bu karu tanabi ti í̠ni kegoha kaware ibiragola ega angibuninaga babaganeme igini dambiho paliagadagua í̠na ti dambiho haga kegoni.
PSA 36:8 Í̠ andaga tomo dewa bu payabu ngegome wali agali tomo garibi nale haga ka. Í̠naga turu holene iba bayale timbuni duguaragobi ngego wali agalime nelo miaga kegoni.
PSA 36:9 Ina bibahendenaga holene tene Anduaneore í̠ kegoni. Í̠ni wá taraore holene Anduane kegome í̠niha howa ina wá bayaleore de hondo kamagoni larama.
PSA 36:10 Wali agali í̠ mandabi karu í̠na ti gubalini ho haabo habe. Wali agali mini tigabi karu ti bayale haabo helo í̠nime ti biamogo bialu habe.
PSA 36:11 Agali mine haga bu karume i̱ bo hengedope holani handabe. Mini kowi bu karume i̱ bo batagi holani handabe.
PSA 36:12 Agali ko biaga biaru ebere pilo ngaruni de handa. Ti lone heyabe naheore ngagoni.
PSA 37:1 Mini kowi karume birago hondowa tí mini dege dindi nahalimu. Tigua bira larago hale howabi ti biradagua bua nahalimu.
PSA 37:2 Irane ti tani gau laralidagua emene howa gau lolebira. Uruni ti gaeangi tomo gau laralidaguaore gau lalu ereba holebira.
PSA 37:3 Anduane Homogoni hanaho howa mana bayale bialu halimu. Ani birimiyagua tínaga pabe tigila Anduane Homogo ibuni kagola tí ibuha bayale holeberemi.
PSA 37:4 Turu holene Anduane Homogohayagi hai bialu halimu. Ani birimiyagua ibugua tínaga gubalinime hameledami aleru ngulebira.
PSA 37:5 Í̠ni Anduane Homogoha hanaho habe. Ani kegola ibugua í̠ biamogo bulebira.
PSA 37:6 Í̠na mini tigabiwi howa mana bayale bigi bereruni wali agalime de handai helo horombe hanuni ni dedagola wá haame haralidagua helo wále ibugua ani mo helolebira.
PSA 37:7 Anduane Homogo ibugua bule ngago bilo í̠ ema nabi hondo habe. Maru ti ho timbu halu ho yanga laragola í̠ mini dege dindi nahabe. Mini kowi karume ko bule lo manda bu heneru bigi birago hondowa í̠ mini dege dindi nahabe.
PSA 37:8 Mini dege dindi holene ngagolabi keba holene ngagolabi mogo nalabe. Urunime genda dege yu anda ibaga.
PSA 37:9 Mini kowi karu ti bo batagi halu Anduane Homogoni hanaho karume dindi karulolebira.
PSA 37:10 Emene howa mini kowi karu ereba haiore holebira. Ti kabe hondole hagadagoria hai birimiyaguabi handa walia nahe ereba ho waore holebira.
PSA 37:11 Tini mo dindiha howa deme handagabu karume dindi ogoni karulolebira. Mo palia holene ti karula howa mbirale dewa turuho wu holebira.
PSA 37:12 Mini kowi karume mini tigabiwi karu mo ko holenaga ndi nde lalu handabe manga howa ne gengero lalu ka.
PSA 37:13 Ani bialu helowa Anduane Homogohanda mini kowi uruni handaya howa oba halu ka. Tinaga homo ereba holene horo hapara harago hondowa ibu oba halu ka.
PSA 37:14 Mini kowi karume yagibanorubi buru pale darabi karubi dibule ayu tibu gililomi bogole danda edaha bira. Mana tigabi biaga karu bo wahole ani bialu ka.
PSA 37:15 Tigua ani bialu karia tininaga ayu tibu yidago yamuwa tini bo wahalu danda edaho ngaru minu podo waholebira.
PSA 37:16 Mini kowi karume dabudabu dewa bu hombedo wu karuni galone nabulene lowa mini tigabiwi karume mbirale emene wu kago baya galoneore wu ka.
PSA 37:17 Ogoni irane Anduane Homogo ibugua mini kowi karunaga hongo mo ereba hai halu mini tigabiwi karu ibunime handaya ho holebira.
PSA 37:18 Anduane Homogo ibugua ibunaga bi larago hale halu biaga karu ibunime handaya ho haabo halu dindi ogoni tinagaore wiaabo helolebira.
PSA 37:19 Mo ko holene wigi bidangi ti tandaga nanolebira. Hina gari birangibi ti nolene karulape wulebira.
PSA 37:20 Ani wulebiragoyu mini kowi karu ti homolebira. Anduane Homogonaga waitigi karu balawaya minana anda hene mbira dedaligobi dowa gilope halu ereba haralidagua ti ereba holebira. Ira hagua pu ereba haralidagua ereba holebira.
PSA 37:21 Mini kowi kagome mbirale dano howa yadai nabi nalu puabo haga. Bayale biaga kagome ibunaga mbirale ngaru habua nabi mo guaila howa tale biaga.
PSA 37:22 Anduane Homogohanda mo turu hene karume dindi karulolebira. Ibugua ha hene karu ti bo batagi holebira.
PSA 37:23 Anduane Homogohanda wali agali hangu hanguhondo hariga ogodagua pobe lalu walia haga. Ibu turu helo hangu biaga kagonaga pabe tigila Anduane Homogo ibuni holebira.
PSA 37:24 Uruni ti pilope hayaguabi pilo ibiraho wiaabo naholebira. Anduane Homogo ibunime ti gini mialu lone mo heya ho helolebira.
PSA 37:25 I̱ igirini howa hama ibalu ai áyu agali waheore kogoni. Henego manda berogola áyu agima ndogo luore haruda manda bido. O hama ibiwadagoriani howa handalu hewaria wali agali mini tigabiwi hearu mbira Anduane Homogohanda yu wanahayane handaru. Tinaga waneiginibi ti hina noa howa mendeali hina nayago tagamini handadeho heariabi heba nahende dege haru.
PSA 37:26 Tigua tinaga mbirale karulape wuwa maru buru pale haga bidaru turu halu talebu migi biaga. Ti waneigini baya bu karu hondowabi ibuni turu ho haga biaga.
PSA 37:27 Ko bulene erembira mialu mana bayale bilimu. Ani birimiyagua tínaga aguanenerume dindini luore haabo holebira.
PSA 37:28 Anduane Homogo ibu mana bayale bulene gubalini haga kagome wali agali ibuhondo mini bilinahe karu yu wanahaga ka. Tinaga pabe tigila ibuni haabo holebira. Mini kowi karu tinaga aguaneneru bo batagi holebira.
PSA 37:29 Mini tigabiwi karume dindi karulalu ogoriani haho wiaabo holebira.
PSA 37:30 Mbirali mini tigabiwi kagonaga ne harigaha howa bi latagi hararu mini gigabiwi howa bi laga. Ibunaga hégeme mana tigabi bulene dege bi latagi haga.
PSA 37:31 Ngode Datagaliwabenaga mana lowinigo ibunaga bu miniha mo hengedagome ibu ge gundu lalu pi nalaga.
PSA 37:32 Mini kowi kagome mini tigabiwi kago ma yu howa bo wahole manda biaga.
PSA 37:33 Ani biagagoyu bo wahelo Anduane Homogohanda yupe naholebira. Godi lalu kariabi ibugua ko bini mbira ngaria handa walia naholebira.
PSA 37:34 Anduane Homogoha mini dunu bia ho howa ibugua bibe ledadagua bialu habe. Ani biriyagua ibugua í̠ mo yaraga halu dindi í̠ karulabelo ngulebira. Ani biragola mini kowi karu pani narago í̠ deme handa a̱i̱ ho holebere.
PSA 37:35 Bamba mbiru agali mini kowiore ibuni hangu hongohe karulape ko mitangi howa wali agali mo gi halu ge pera bai haga mbira heane hendewane. Lebanono dindini ira tamia mbira luni panigi pudagaho hagadagua agali ogonime maru hearu hengedope howa ibuore pudagaho heane hendewane.
PSA 37:36 Mani halu mbiru dindi odagoriani lone bolangua halu pialu hewaria agali odagoni naheya. Kabe hondole i̱na hai bialu hewariabi ibu nahe erebaore hayiya.
PSA 37:37 Wali agali mana bayale biaga karu handalimu. Mini tigabiwi karume mana bayale bigi birago handawa bilimu. Mo palia haga karu ti aguanene dewa ho dame bulebira.
PSA 37:38 Ko biaga karu aria bibahende homai halu tinaga aguanene bibahendeore homa mundulanda holebira.
PSA 37:39 Wali agali mini tigabiwi karu Anduane Homogohanda ti pele mulebira. Gendabi timbuni ngangi ti ibida pialu ha do hagane Anduane Homogo ibuni holebira.
PSA 37:40 Anduane Homogohanda ti biamogo bialu gi miaga. Mini kowi karume ti mo ko hole ibirangi ti ibu karia ibida poragola ibugua ti mo wiaga.
PSA 38:1 Anduane Homogo-o í̠na keba ho kegonigo i̱hondo keba howa i̱ minu boleni.
PSA 38:2 Í̠na í̠naga timume i̱ bogalu í̠naga gime i̱ bope ho heledegoni.
PSA 38:3 Í̠na i̱hondo keba harigola i̱naga tingini tandaga timbuni handalu kogoni. I̱na ko bini ngogome i̱ha warago timbuni balu ngogoni.
PSA 38:4 Ko i̱ha ngagome i̱ bo dambi hai haragola nu gendabi ale howa yu habe nahe kogoni.
PSA 38:5 I̱ni mini nawi howa mana liaheore birugome i̱naga tinginini dere bidaru ibane timbuni tuguda tagitagi bialu ngu taraore biragoni.
PSA 38:6 I̱ miniha genda timbuni yu kogome i̱ni handa dindi ho bedogoni. Horo bibahendengi dara howa dugu biaabo halu kogoni.
PSA 38:7 I̱naga tinginiha poboyogo timbuni bialu irame daradagua bidagola i̱ warago timbuniore balu kogoni.
PSA 38:8 Mbirale tara mbirame i̱ bo hengedaradagua bidagome i̱ hongo nahe kogoni. I̱naga miniha mo ko henego tandaga howa ya lalu ngogoni.
PSA 38:9 Anduane Homogo-o í̠na i̱naga hame hongohe ngelo kogoni manda biai kegoni. I̱naga bu miniha dugu bialu koru mbira do naheore í̠na haleme hale hai ho kegoni.
PSA 38:10 I̱naga bu hongo howa ala duguaga bialu i̱naga hongo pirilape ka. I̱naga de aruma hai kagome mbirale mbira handabe naheore kogoni ndobe.
PSA 38:11 I̱ tinginini dere ko ngubi bidarume i̱naga damene nenegeru i̱ni kogoria ibua nahaya. I̱ one waneiginirubi ti kaundianiore haruruni ndobe.
PSA 38:12 I̱naga waitigi bu karume i̱ gonoha delonaga gono wu kagoni ndobe. Agali i̱ mo ko halu bole karume i̱ bo wahami̱ya laga bialu ka. Horo bibahendengi tigua i̱hondo mana ko hangu bulene manda bialu haga kagoni.
PSA 38:13 I̱ hale tuluhe ale howa tigua bi lararu hale habe nahe ko. I̱naga bi ndibulo wahene ale howa ne hariga ha̱ lalu bi labe nahe ko.
PSA 38:14 I̱ agali hale tuluhe haraligobi howa tigua bi lararu i̱na ladai bibe naheore kogoni.
PSA 38:15 Anduane Homogo-o i̱na í̠hondo mini mbiraore wu kogoni. Anduane Homogo i̱naga Ngode Datagaliwabeore-o í̠na i̱naga bi larogo ladai biaga kegoni.
PSA 38:16 Waitigi bu karume wai hanalu i̱ bope holenaga mine bi lelo nahelabe. I̱ emene pilope harogola ti turu helo nahelabe laro.
PSA 38:17 I̱ tandaga timbuni handaabo halu kogome i̱ pilolene kawareore ngagoni.
PSA 38:18 I̱na ko bialu haruru í̠hondo latagi hai harugoni. I̱ni mana liahe birudarunaga dara timbuniore ho kogoni.
PSA 38:19 I̱ waitigi dewaore hongo gibihe bu ka. I̱ bame handabe manga haga karu ti dewaore daga labenahe ka.
PSA 38:20 I̱na mana bayale hangu bialu kogola tigua i̱hondo mana ko biadai biaga kagoni. I̱na mana bayale ngago talialu bialu kogola tigua i̱ baba bameore mo waitigi haga kagoni.
PSA 38:21 Anduane Homogo-o í̠na i̱ yu wanahabe laro. I̱naga Ngode Datagaliwabe-o i̱ helo wahalu kaundia nahabe.
PSA 38:22 Anduane Homogo-o i̱ Pele Ngiaga í̠ni hanguore kego i̱ biamogo bule abaleore ibabe.
PSA 39:1 I̱na bi lo wirugo ogo, I̱nime bi ko loligo mana berogobi baya hangu mamage howa bialu holebero. Agali mana ko biaga i̱ koria kaware kangi i̱na ti baba bi mbira nalolebero, larugoni.
PSA 39:2 I̱na i̱naga ne hariga ndibulo howa bi mbira nale haru. Bi bayalenaga lalubi mbira nale dege harugoni. Anigoyu i̱ha genda timbuniore ngelo hene.
PSA 39:3 I̱na mini tumutumu bu harugoni. I̱na mitangitangi bialu haabo hewagola i̱naga miniha mo ko haiore hene. Ai i̱na i̱naga ne hariga ndibu lowa ndo i̱na bi lolebero manda biru.
PSA 39:4 I̱na Anduane Homogohondo hale halu lalu, Anduane Homogo-o i̱naga holeneha i̱ mali agira agima holeberobe. I̱ angi homoliyadabe. I̱ dindini holene tubagi dege wiaruabe be ludabe i̱ni langibe, laru.
PSA 39:5 I̱naga holene tigimandi hangu ngeledegonida. Í̠naga deni i̱naga holene emene ogoni nagaloneoredane hendede. Wali agali bibahendenaga holene lu ndo mbiralime ne harigaha buhe̱ halu mbira hangu latagi hagagobi dege nga.
PSA 39:6 Ni daragola ina mbiralinaga munini ale kama. Dindini mbirale bayale wini ngaru mule biabe erekuibi bia bialu howa bame nagalone bialu haga. Iname mbirale dewaore mo mogo bialu kamagoyu ái ibu holebirabe manda nabi kama.
PSA 39:7 Ai Anduane Homogo-o i̱na agilenaga mini dunubia ho holiyabe. Í̠na hangu i̱ biamogo bibelo lowa i̱na í̠nihondo mini dunubia ho kogoni.
PSA 39:8 Í̠na i̱ pele ngialu i̱na ko biruru domo wahabe. Agali ko mini nawi ale karume i̱ hondo oba halu mege bialu helo nahelabe.
PSA 39:9 I̱na i̱naga ne hariga ndibu lowa bi mbira nale holebero. Ogonaga irane i̱na tandaga uruni narogo í̠nime i̱hondo ibilaridagonaga bi nalolebero.
PSA 39:10 Ainde i̱ lone nababe laro. Í̠na i̱ pani ngirigome ai homabeheore kogoni ndobe.
PSA 39:11 Wali agalime mana ko birarunaga í̠na pani mirili. Bombome aga labolabo nalu budabaga biagadagua í̠na inanaga mbirale hameledamaru mo wahai haga kegoni. Heneneore larogo wali agali bibahendenaga ne harigaha buhe̱ halu mbira hangu latagi hagagobi dege ka.
PSA 39:12 Anduane Homogo-o i̱naga bi larogo hale habe. I̱na bi lalu kogoni baya hangu hale ho habe. I̱na dugu bialu koria de iba ibirago hondowa í̠na i̱ biamogo bibe. I̱naga mamaliru ti nde dindi ogoria tigi mbira hangu halu homayadagua i̱nibi nde dindi ogoria tigimandi hangu holeberogo í̠ manda biaiho kegoni.
PSA 39:13 I̱ lone mo tandaga nahe emene hangu nde i̱naga bu miniha dungulo holiya helabe laro. Mani i̱ homalu nde dindi ogo wahalu poliyadago ani helabe laro.
PSA 40:1 Anduane Homogo ibugua i̱ biamogo bilonaga i̱ mini dege dindi nahe ema nabi haru. Ani hewaria nde ibugua i̱na bi larugo hale halu biamogo biya.
PSA 40:2 I̱ gundu uli gibi hiriribiha pilo wiwaria ibugua hale halu gililo miya. Uli unuraore lumburaha homole yupe halu hewaria ibugua i̱ gililo miya. Ibugua i̱ gililo muwa ege to̱le̱ni mo heya ho helalu i̱ yo pialu poliya ani biya.
PSA 40:3 Ibugua i̱na iba gana gahenge mbira i̱nanaga Ngode Datagaliwabe kagonaga mini yaraga halu loliya lawai haya. Ani biyaego hondowa wali agali dewaoreme mini wialu ti Anduane Homogohondo mini mbiraore wulebira.
PSA 40:4 Wali agali Anduane Homogohondo mini mbiraore wuwa mbirale tara gime wabiniru mitangi nahe mbirale uruniale mitangi haga karume biagadagua nabiaga karu ti turuho ka.
PSA 40:5 Anduane Homogo inanaga Ngode Datagaliwabe-o í̠na inanaga mbirale dewaore gibi bia haga birigoni. Í̠ aleore mende nahe manda bidama. Iname bima lama hama polomadagonaga dewaore í̠naga miniha magoyu kegoni. Hama ibirimahayagibi walia hama ibirigoni. Í̠na inanaga bia hama ibirigoni manda bialu howa ina daga au loabe tobahe gibiore bia harigoni mandabu kama.
PSA 40:6 Ogoni bia harigonaga iname í̠hondo turu halu mbirale lomabu ngulenegobi mbirale homa hende loma delagane dabuni bo delo ngulenegobi uruni alego í̠ hame nalagayagoni. Inanaga ko domabelo lowa mbirale mbira bo delo ngulenegobi í̠ hame nalaga degeyagoni. I̱na í̠naga bi larego hale halu buliyanaga í̠na i̱naga hale kira wabuwa dugua ho heledegoni.
PSA 40:7 Í̠na ani bidego manda buwa i̱na buliya damenego í̠naga mbugani mana lo ngegonidagua i̱na bule kogoni laru.
PSA 40:8 I̱naga Ngode Datagaliwabe-o i̱na í̠na hame ledegodaguaore bule turuho kogoni. Í̠naga bi mana lo ngeru i̱na i̱naga bu habaneha mo hengedogoni.
PSA 40:9 Anduane Homogo í̠naga wali agali mo ngoaiho bereagoria i̱na ina kamaru pele ngiaga í̠ kego lalu bi baya turubi ogoni ti hale hai helo lamiru. I̱na bi ogoni dege lalu kone lairi naholeberogo í̠ manda bidegoni.
PSA 40:10 Anduane Homogo í̠na wali agali pele miaga kegonaga bi te ogoniore i̱ni yu donge nahe lamiru. Í̠na biamogo biaabo hariligonagabi í̠ mini bilinahe kegonagabi wali agali lamiaabo haru. Í̠naga wali agali bibahende mo ngoaiho bereagoria Anduane Homogohanda ina handaya haho wiaabo halu gubalini haho wiaabo haga ka lalu i̱na yu donge nahe lamiaiore haru.
PSA 40:11 Anduane Homogo-o í̠na i̱ dara howa biamogo bulene nawi howa dara howa biamogo biaabo hariligoni. Ogoninaga biairi naholebeda lo manda bido. Í̠naga gubalini holenemebi mini bilinahe holenemebi i̱ yani ho wiaabo kegola i̱ bayale karulapeore holoboda lo manda bido.
PSA 40:12 Genda bulene tara tara dewaore i̱ kogoria bu payabu ngagola kogoni. Genda bulene dewaore wu mabu bupe kagola i̱ dombeneha kogoni. Genda bulene uruni daga aulole nalabehe dewaore ngagoni. Mana ko i̱na bigi birurume i̱ni bope henego kogoni. I̱ni ko uruni birugome i̱ mininaga de au henego mbirale bayuwa handabe nahe kogoni. I̱na ko biruruni dagalabe nahe i̱ninaga haguaneni mandari li bu karubi ndo gibiore birugoni. I̱naga miniha hongo mbira naheore pirilipe ho wahenego kogoni.
PSA 40:13 Ani bidane kogo Anduane Homogo-o í̠na i̱ pele ngibe. Áyu ogoniore i̱ mo wia.
PSA 40:14 Agali marume i̱ bo wahole manda bialu karu í̠na ti bope halu tinaga miniha mo talola howa mini burugulo helabelo hamelo kogoni. I̱ genda timbuni yu kogo hondowa wali agali maru ti turu haga ka. Wali agali urunibi biaga karu í̠na bo badai bialu tinaga mini ti taga ho helo bope habelo hamelo ko.
PSA 40:15 Wali agali urunime i̱naga mini lahiralu i̱ mege biaga karuore í̠na ti mo taga haho wiaabo habelo hameledo. Í̠na ani berego handalu tini taga halu tini mana bialu hayadago mitangi budai bilo mo taga habelo hamelo kogoni.
PSA 40:16 Wali agali maru í̠ keria ibiraru ti bibahende turuho helo hameledo. Í̠na ti pele mirigonaga turu howa ka̱i̱ lalu karume Anduane Homogo ibu gibi daligaore ka lai helo hameledo.
PSA 40:17 Anduane Homogo-o i̱ ko yagibanoni hongo naheore kogoni. Í̠ ani kogonigoyu í̠na i̱ embeda nahe mitangi bu kegoni. Í̠ i̱naga Ngode Datagaliwabebi i̱naga pele ngiagabi kegonigo i̱ pele ngule áyu ogoni abale ibabe laro.
PSA 41:1 Yagibano karu mitangi bialu biamogo biaga karu ti turubiore holebira. Uruni tiha genda timbuni tagira ibirangi Anduane Homogohanda ti biamogo bulebira.
PSA 41:2 Anduane Homogohanda ti biamogo bialu handayaho holebira. Ibugua ti dindini turu ho helo baya hangu handayaho holebira. Tinaga waitigi karume mo ko helo ibugua ti yupe naholebira.
PSA 41:3 Wali agali uruni ti warago timbuni bo ngangi Anduane Homogo ibugua handayaho haabo holebira. Anduane Homogohanda ti warago bararu mo dabi halu bayale helo mo hongo holebira.
PSA 41:4 I̱na bi ogodagua laru. Anduane Homogo-o i̱na í̠hondo ko timbuniore birugoni. I̱na ani birugo í̠na i̱ dara howa biamogo bialu i̱ha warago timbuni ngago mo dabi habe.
PSA 41:5 I̱naga waitigi karume i̱hondo bi tandagabi lalu kagoni. Tigua lalu, Ibu abale homa nabirago ina embedaho wahami̱ya, laga bialu ka.
PSA 41:6 Agali i̱ warago bo ngoria de hondo ibirarume dara hetingi howa hondo ibaga. I̱ warago ko timbuni bo ngogonaga te hale holene hame laga. Hale halu tagira puwa bibahendeha i̱naga warago ogoninaga te loyogo laga.
PSA 41:7 I̱ handabe manga haga karume i̱ warago ogoninaga hagarere bi lagalaga bialu haga. Tigua mitangi bialu ko timbuniore mbirame i̱ mo ko haragonida lo mitangi biaga.
PSA 41:8 Tigua lalu, Warago ko tara mbirame minidagonigo ibu lone heyulene nawi homolebira, laga bialu kagoni.
PSA 41:9 I̱naga nenegeore mbira henego iya haru mandagi ibagabu halu tomobi mandagi nalu biraga henego ogoni ibuguabi nde i̱ handabe manga dege halu handa tara haya.
PSA 41:10 Anduane Homogo-o ainde í̠na i̱ dara howa biamogo bialu i̱naga warago ngogo mo dabi habe. I̱naga waitigi biarume i̱hondo biyarunaga pani i̱na biadai buliya ani bibe.
PSA 41:11 Waitigi bu karume i̱ bope nahayagua nde í̠na i̱ gubaliniore ho kedalo mandabu holebero.
PSA 41:12 I̱na mbirale beroru tigabi bialu koria de hondowa í̠na i̱ biamogo bulebere. I̱ í̠niha haparaho holiya í̠na i̱ handayaho haabo holebere.
PSA 41:13 Anduane Homogo Isaraele wali agalinaga Ngode Datagaliwabe kago ibunaga mini áyu ogoni yaraga holene nga. Wali agali mani hama polobadarumebi ani dege bialu haabo helo. Aniore bilo laro.
PSA 42:1 Nogo meme ale mini dia gabuame iba noa howa hége lebola ho yalu iba libule porago hendehende gerai piaganedagua Ngode Datagaliwabe-o i̱ í̠ kegoria haparaho hole ibulene hameore lo ko.
PSA 42:2 Ngode Datagaliwabe í̠ holenehe kegoni. Iba noa biradagua i̱naga minime í̠ kegoria haparaho holeneore hamelo kogoni. I̱na í̠ kego de handalu í̠naga mini yaraga hole angi ibuliyadabe.
PSA 42:3 Mbiraga horombebi i̱ dugu biaabo halu tomo nane tomo i̱ninaga de iba no paliruli. Horo bibahendengi wali agali i̱naga waitigi karume i̱hondo, Í̠naga Ngode Datagaliwabe hayuagoni agoha kabe, laabo haga.
PSA 42:4 Ala bialu haruligo mitangi budai berodagua nde i̱naga gubaliniha tandagaore bialu habe naharagola haruli. Wali agali maru heba wabuni Ngode Datagaliwabenaga andaha pole poramaligobi ti maha ibilo i̱na haru bamba haruligobi nde mitangiore halu ko. Wali agali turuhe damene wabuni buyu pialu iba ganaru lagalaga bialu Ngode Datagaliwabenaga mini yaraga hagahaga bima ibunaga andaha pole poramaligoore mitangi haabo halu ko.
PSA 42:5 Ai nde áyu i̱ore miniha turu naheore haabo kogoni aginagadabe. I̱naga miniha genda bialu lungulungu biaruagoni agiorenagadabe. Ani biaruagoni bilo i̱na i̱naga Ngode Datagaliwabeni mini hanaho holebero. I̱naga Pele Ngiagabi i̱naga Ngode Datagaliwabebi kagonaga mini i̱na lone mo yaraga holebero.
PSA 42:6 I̱ i̱ninaga dindini hewaria bo ba tagi haya handala dindi taraha o pu kogoni koria i̱naga gubaliniha tandagaore bialu tumbudu biragola kogoni. Ani biragola i̱naga mitangi mo tiga bialu Ngode Datagaliwabe kagohayagi pelaruli. Ibugua dara bulenego iba yaribu bu yu ibilaradagua i̱naga mini dara buleneme bu dambi haga. Genda tara tara bulenego Hari Hemono howabi Hari Misa howabi iba dugutagi halu ue lama Yodanaha pugulupebe biradagua biragola birama iralu i̱ namu labehe kogoni.
PSA 42:8 Ani kogonigo Anduane Homogo gubalini haho wiaabo haga kago ibugua horongi ibunaga gubalini holene ogoni walia helo hameledo. Ibugua ani birago hondowa i̱na mbiraga iba gana lo mialu i̱ holene ngiagane tene Ngode Datagaliwabe kago ibuhondo bi ogoni lolene hameledo.
PSA 42:9 I̱naga waitigirume bolilono i̱naga mo wiaga Ngode Datagaliwabe kagohondo, Í̠na i̱ aginaga embedaho waharibe, laro. I̱naga waitigi karume i̱ bo hengedo waharagola tandaga narogo naabo holiya kego aginagabe.
PSA 42:10 Tigua i̱hondo, Í̠naga Ngode Datagaliwabe hayuago agoha kabe, lalu mege biaabo haragome i̱ore hengedope haabo haragola kogoni.
PSA 42:11 Ai nde áyu i̱ore miniha turu naheore haabo kogoni aginagadabe. I̱naga miniha genda bialu lungulungu biaruagoni agiorenagadabe. Ani biaruagoni bilo i̱na i̱naga Ngode Datagaliwabeni mini hanaho holebero. I̱na i̱naga Pele Ngiagabi i̱naga Ngode Datagaliwabebi kagonaga mini i̱na lone mo yaraga holebero.
PSA 43:1 Ngode Datagaliwabe-o í̠ erembira ngialu piaga karume i̱ bope hole manda bialu ka. Tini koore howa tinaga bi ke̱ halu la hole bialu kago i̱na mana tigabi bialu kogo tigua hendelo í̠na mo walia habe. Í̠na i̱ biamogo bialu agali ko uruninaga giha howa yamibe laro.
PSA 43:2 Í̠nime hangu i̱ handayaho haga kegonigo irane aginaga í̠na i̱ mo embedaho kebe. I̱naga waitigi bu karume i̱ bope halu i̱naga mini mo ko haga kagonaga i̱ tandaga haabo haruligo irane agibe.
PSA 43:3 I̱ heyalu Hari Saiono í̠ninaga hari loma bia hene wedagoria tigatiga puabo halu poliyabi í̠ninaga anda í̠ kegoria ibuliyabi í̠na í̠ninaga wá holenemebi henene lolenemebi i̱ haru haabo habelo hameledo.
PSA 43:4 Ngode Datagaliwabe-o í̠ninaga lomabu delaga dabu bu heledagoria polebero. Í̠na i̱ mo turu halu miniha dungulo helariligodago anidagua bibe laro. I̱naga Ngode Datagaliwabe í̠ore kegoni. I̱na ngida ale balu í̠naga mini yaraga halu iba ganaru lalu holebero.
PSA 43:5 Ai nde áyu i̱ore miniha turu naheore haabo kogoni aginagadabe. I̱naga miniha genda bialu lungulungu biaruagoni agiorenagadabe. Ani biaruagoni bilo i̱na i̱naga Ngode Datagaliwabeni mini hanaho holebero. I̱na i̱naga Pele Ngiagabi i̱naga Ngode Datagaliwabebi kagonaga mini i̱na lone mo yaraga holebero.
PSA 44:1 Ngode Datagaliwabe-o í̠na biabe hongoheore bialu harigo inanaga haleme hale harimagoni. Ina mamali ala dindini heneyarume bamba heneyangi í̠ni binigo te inahondo langiya.
PSA 44:2 Í̠na dindi aba ala ogoria hene hearu bo taliatagi halu inanaga mamaliru dindi ogoriani haru íbu helariya. Wali agali tara tara bu hearume biyagonaga í̠na ti pani mialu inanaga mamaliru biamogo bialu mo dewa halu bayale helo helariya.
PSA 44:3 Inanaga mamaliru tigua wai bialu howa tininaga wai biaganeme dindi ogo karulene ndo. Tininaga hongome wai buwa wayali hene ndoore. Í̠nime ti gubalini ho howa í̠naga wá holene helarigomebi í̠naga hongoni howa ti wayali ho hene.
PSA 44:4 I̱naga Kinibi i̱naga Ngode Datagaliwabebi í̠ore kegoni. Í̠nime bi ledegola Yagabanaga hameigini karume wai bialu wayali haga.
PSA 44:5 Í̠naga hongoni howa iname waitigi bu karu bo batagitagi beramali. Ina í̠naga minini howa waitigi bope halu wayali haramali.
PSA 44:6 I̱naga danda timu yandareru wia ngogo urunime i̱na wai bialu wayali harodalo manda nabiore kogoni. Wai bialu ayu tibu yu ha kogonigo ogonimebi i̱ wayali holiyanaga biamogo nabiaga manda bidogoni.
PSA 44:7 Mbirale urunime ndo í̠na ina biamogo birigola waitigi bope harima. Waitigime ina handabe manga ho hearia í̠na ti bope haga bialu mo taga harigoni.
PSA 44:8 I̱name Ngode Datagaliwabe í̠ninaga mini dege yaraga halu í̠na birigonaga ka̱i̱ lalu haabo holeberema.
PSA 44:9 Ani birigoyu ai í̠na ina mo nagalone halu erembira ngirigoni. Inanaga ami agaliru heba í̠ wai nape. Anidagua bialu kego irane aginagabe.
PSA 44:10 Í̠na ogonidagua birigome inanaga waitigiru ibiyagola ina ibida pirimagoni. Ibida pirimagola tigua inanaga mbirale wimaru mo yalu piai haya.
PSA 44:11 Tigua nogo sibi bo wahagadagua ina bo homelelo ale helarigoni. Inane dindini hemaria í̠na ina bo taliatagi halu wali agali dindi tara tarani bu hearu ti dege dombeneha hama pelarigoni ndobe.
PSA 44:12 Í̠naga wali agali biaru wali agali dindi tara tarani bu hearunaga garabaya biabe ale bialu helo pelarigoni. Dindi tarani hearu tigua í̠ yolo emene hangu bigi biyagome í̠na muni timbuni namo yi kegoni.
PSA 44:13 Í̠na ogonidagua birigola wali agali ina baba mandagi haga karume ina hondo mege bialu ka. Wali agali bu hama pedarume inahondo oba haga birago í̠na ina mo taga helo birigoni.
PSA 44:14 Í̠na wali agali dindi tara taraha karu mo heya harigola tigua ina mini lalu mo taga halu ka. Inaha mbirale mbira biragola tigua ina hondo oba halu kagoni.
PSA 44:15 Agalime i̱hondo mege bialu bi koru lalu kagola i̱ tagabi howa handa dindi ho kogoni. I̱naga waitigirubi agali i̱ handabe manga haga karubi i̱na ti handarodagua i̱naga miniha mo ko halu i̱ taga timbuni ho kogoni ndobe.
PSA 44:17 Ngode Datagaliwabe-o iname í̠ embeda nahe howa í̠naga habo nalolene bi lowini biagobi mo habo nale kama. Ani birimagola mbirale genda uruni inaha anda ibiragoni.
PSA 44:18 Iname í̠ erembira ngialu pu nabi í̠naga harigani polenegobi yu wanahe kamagoni ndobe.
PSA 44:19 Ina ani bialu kamagoyu í̠na ina gabua tara tara haga ngagoha helowa arumaha homolene ngagoria helaridagoni.
PSA 44:20 Iname inanaga Ngode Datagaliwabe kago erembira mialu puwa mbirale gime wabini ngaruhondo bi pupu wialu henedale nde í̠nime manda bidele. Ina bu kamarunaga miniha wia do hene ngamaru bibahende í̠ni manda biai ho kegonigo í̠ ani manda bidele.
PSA 44:22 Ina í̠ninaga wali agaliore kamagonaga tigua ina bo wahalu haabo kagoni. Tigua ina handalu karia nogo sibi ale dege bo waholene ale kamaria hendedagoni.
PSA 44:23 Anduane Homogo-o í̠ abale heyabe. Aguanaga paliahondo kebe. Ina wahalu erembira ngialu puabo nahabe.
PSA 44:24 Irane aginaga ha do ho kebe. Agali bu karume ina mo ko haragola ina tandaga timbuni halu genda dewaore yu kamago embeda nahabe.
PSA 44:25 Ina dindini pilo ibira halu inanaga tingini homene ale dindi himuni wima pedemagoni ndobe.
PSA 44:26 Ngode Datagaliwabe-o abale heyalu ina biamogo bule ibabe. Í̠naga gubalini haabo holene ngegome ina mitangi bialu ina homoligo abale pele ngibe laro.
PSA 45:1 Bi bayale maru i̱naga miniha yu ko. I̱na iba gana ogoni podo yuwa kini kagohondo mulene manda bido. Beba bayale gili biaganaga peni ale howa i̱naga hégeme bi bayale lalu ko.
PSA 45:2 Í̠ agali bayaore kegoni. Agali mende í̠ ale naheore. Í̠na bi laga biriligo baya tigabiore larili. Ngode Datagaliwabehanda í̠ mo bayale halu haabo kagome í̠ ogonibi kegoni.
PSA 45:3 Í̠ kini timbuni hongoheore kegoni. Í̠ baya burugule tara howa mini lene timbuni kegoni. Í̠naga wai biagane ayu tibu yaganeha yuwa wai bule manda manda bu habe.
PSA 45:4 Í̠ kini dunini mbira mini leneore kegoni. Í̠na henene lolene ngagobi mana tigabi dege bulene ngagobi ogoni wayali helonaga wai bule í̠naga nogo hosini biralu pobe. Í̠na wai hongo howa beregome í̠ni wayali holebere.
PSA 45:5 Í̠naga timu de bi̱a̱o̱le ngerume waitigi bu karunaga gubalinini bolomogo biaga ngegoni. Í̠na dindi tara taranaga hameigini karu baba wai bialu bope haregola ti í̠ andaneha hai holebira.
PSA 45:6 Ngode Datagaliwabe-o í̠ kini haluhe haabo haga kegoni. Wali agali í̠na hondo hene karu mana tigabi ngagoria helo haru haga kegoni.
PSA 45:7 Í̠ mana tigabi bulene ngago hamelowa mana ko ngago manga haga kegoni. Irane ogoninaga í̠naga Ngode Datagaliwabe ibugua í̠ dabo helene. Dabo helalu kini maru karu turu hagadagua ndo ti bolangua halu í̠naga haguaneni weli odo wiyagola í̠ mo turu taraore ho helene.
PSA 45:8 Í̠naga aga bayale luni biagimbu bu kegoni nga baya taraore mini muwe kasiala ngabini mbauleda. Kini andagaru nogo elebeninaga ne gayaneme mo yáribia halu anda uruniha tigua í̠ mo turu holenaga ngida aleru lalu kagoni.
PSA 45:9 Kini waneru wali mini lene berearu heba í̠ andagaha biru hayua. Í̠naga gi tigahayagi kuini wali ibu bedagoni. Ibu ngolo Obira dindi tawame yári wabini ngaru karulo beda.
PSA 45:10 Kini one wandari mabuage-o i̱na bi o larogo hale halu manda bibe. Í̠ damene bu karubi wali agali maru bu karubi mitangi budai nabibe.
PSA 45:11 Í̠na ogonidagua bialu í̠ wandari bayaleoreda de hondowa kini ibugua í̠ gubalini timbuni ho holebira. Ibu í̠naga agali haguane ka manda buwa í̠na ibunaga bi larago hale halu birulene nga.
PSA 45:12 Taia wali agali bu karume í̠ mo turu holene aleru yalu ibulebira. Wali agali homogo karumebi í̠ mo turu holene marubi yalu ibalu í̠hondo mulebira.
PSA 45:13 Kininaga wandari mabuage biago kini andaga tamu hobaneha bedago ibu baya gibiore mbira bedagoni. Ibu aga baya taraore pu ngolo aleme wabini mo karulo bedagoni.
PSA 45:14 Wandari o biago ibu aga baya taraore ogoni karula howa tigua ibu kini berearia haru halu piya. Wandari maru ibu baba biraga berearubi ti haru kini andaga pole haru piya.
PSA 45:15 Tigua turu timbuni halu bu miniha dungulo howa kini andaga anda piai haya.
PSA 45:16 Kini-o í̠ igini dewaore holebiraru tigua í̠ mamaliru henedagoria kini ha aribia holebira. Í̠na ti mini leneore helowa tigua wali agali dindi bibahendeha karu haru helo helolebere.
PSA 45:17 Í̠ mini lene timbuni kego lalu i̱na iba gana ogoni latagi harogola wali agali mani holobadarume í̠ mitangi biaabo holebira. Ani mitangi bialu wali agali bibahende bu karume í̠naga mini yaraga ho haabo holebira.
PSA 46:1 Ngode Datagaliwabe ibu inanaga ha do hagabi ina hongo ngiagabi ka. Gendabi tara tara handaga beremangi ina biamogo bule ibu hapara howa manda mandabuore haga kagoni.
PSA 46:2 Ibu ani kago manda buwa ina gi naholeberema. Dindi dumbirumbi biyaguabi hari wedaruninaga pinipodo baga bialu iba solowara hanunini podopai hayaguabi ina gi naholeberema.
PSA 46:3 Iba solowararume iba tangu bahalu togo layaguabi iba ue timbuni lagimbu biyaguabi iba hai ngoda timbuni wiame hayaguabi ina gi naholeberema. Iba yaribu bu yu puíbu bialu hari wedaru mo emabi haga biyaguabi ina gi naholeberema.
PSA 46:4 Ibaore mbira porago iba ogonime Ngode Datagaliwabenaga tano Yarusaleme mo turu halu Ngode Datagaliwabe Daligaorene Daliga kago ibuni hangu haga anda loma buwa habagi ho helene kagobi mo turu haga iba ogoni pora.
PSA 46:5 Ngode Datagaliwabe ibu tano odagoniha kagome tano ogoni mo ko halu bo ereba naholeorebira. Egabi lole muna biraore ibunime ibalu tano ogoni biamogo bulebira.
PSA 46:6 Hameigini tara tara paluyu pedarume gi gibi howa duru ala lalu holebira. Handame haga kini bu karubi wali agali tigua haru haga karubi bibahende bo purogo lelolebira. Ngode Datagaliwabehanda bi timbuni hari kulu laradagua laragola dindi bibahendeni wali agali bibahende bu karuni bo haeala baga bialu ereba hai helolebira.
PSA 46:7 Anduane Homogo Hongo Haiheore kago ibuni ina heba ka. Yagabanaga Ngode Datagaliwabe ibuni inanaga ha do hagane kagoni.
PSA 46:8 Anduane Homogohanda bigi biyadago de handami̱ya bibahende ibai hadaba. Anduane Homogo ibugua dindi bibahendeni mbirale mogolo handabehe binidaru de handadaba.
PSA 46:9 Dindi bibahendeni wai bialu karu ibugua mo hundia haga kagoni. Agalinaga danda minu podaki halu yandare podo gingirulo baga bialu humbi yiniyaru yamuwa irani mo delaga kagoni.
PSA 46:10 Ibugua lalu, Wai nabilimu. Ngode Datagaliwabe i̱ore kogonigo manda bilimu, lalu ka. Dindi bibahendeoreha wali agali paluyu pedarume i̱naga mini tini kaha howa mo yaraga hagahaga bialu kagola kogoni tíni manda bilimu, lalu kagoni.
PSA 46:11 Anduane Homogo Hongo Haiheore kago ibuni ina heba ka. Yagabanaga Ngode Datagaliwabe ibuni inanaga ha do hagane kagoni.
PSA 47:1 Wali agali bu kamiru bibahendeme Ngode Datagaliwabehondo turu halu gi habe bo midaba. Turu howa ibunaga mini mo yaraga halu iba gana dalimu lo midaba.
PSA 47:2 Anduane Homogo Daligaorene Daliga gibiore kagohondo iname gi habehe kamagoni. Ibu kini timbuni gibiore howa wali agali dindi bibahendeni bu kamaru de handa gimbu buwa haru kagoni.
PSA 47:3 Iname wali agali maru karu bope halu wayali holoma̱ya ibugua ina mo wayali helaya. Hameigini tara tara palu ngaru iname de hondo howa haru holoma̱ya helayagoni.
PSA 47:4 Ina dindi kamagonibi ibugua dege, Tí ogoria hadaba, lalu mo ngiyagoria bu kama. Ibugua ina gubalini howa ani mo ngiyagome ina nde dindi bayaore ogoriani howa miniha turu halu yangalo kamagoni.
PSA 47:5 Ngode Datagaliwabe ibu handame haga kini howa ibuninaga biragane dagiani birule iraga haragoni. Anduane Homogo ibu ani iraga harago hondowa wali agalime turuore gibi howa bi timbuni ga̱ lowa ladaga daga bialu mbelo biguliru bibe̱ laga biragoni.
PSA 47:6 Ngode Datagaliwabenaga mini yaraga halu ibuhondo iba gana lo midaba. Inanaga kini ibu hangu kago ibunaga mini yaraga halu iba gana lo midaba.
PSA 47:7 Ngode Datagaliwabe ibu wali agali dindi bibahendeni bu karunaga kini kago ibunaga mini mo yaraga halu iba gana laga bialu halimu.
PSA 47:8 Ngode Datagaliwabe ibu kini kago howa kininaga biragane dagia loma bia heneni biruwa ibugua mana tigabi dege lalu biraga. Ogoriani biruwa ibugua hameigini tara tara dindi bibahendeni bu kamaru haru haga kagoni.
PSA 47:9 Hameigini bibahende dindi tara tarani karunaga haru haga dameneru bibahendebi Abarahamanaga Ngode Datagaliwabe hene kago ogoni ibunaga wali agali bu karubi heba ti mandagi mo ngoaiho haga. Ngode Datagaliwabe ibu ami hongohe dindini bu karubi ndo hongo gibiorehe howa haru haga ka. Ibu haru haga hongohe daligaore kagoni.
PSA 48:1 Anduane Homogo ibu mini leneore kagonigo ibunaga mini yaraga holene nga. Ngode Datagaliwabenaga tano ngagoria anda puwa ibunaga hari loma bia hene ngagoria ibunaga mini yaraga hami̱ya.
PSA 48:2 Ngode Datagaliwabenaga hari loma bia hene ogoni daliga timbuniore bayale nga. Dindi abene uyurahayagi Saiono tano ogoni kini dunini kagonaga ngago lalu wali agali dindi bibahendeha karume turu timbuni ho kagoni.
PSA 48:3 Ngode Datagaliwabenaga tano ogoniha wai anda ibiragola ibugua wali agali ibu heba haga karu abale biamogo bialu ti bayale haga ka.
PSA 48:4 Bamba kini tara tara bu hearume mo mogo bialu Saiono tanoha hearu baba wai bule ibiya.
PSA 48:5 Ti ibalu tano biago de hondowa mogolo handaya. Mogolo hondowa gi halu ibida pugupugu biai haya.
PSA 48:6 Ti mogo timbuni lalu walime gali taba honole tandaga timbuniore hagagobi hayagoni.
PSA 48:7 Puyabu timbuniore ni tagira ibiragohayagi howa ibiragome Tasisi tanonaga iba sibi timbuni bu ngaru bo gingirulo wahai hagadagua Ngode Datagaliwabe ibugua waitigi uruni bo amo lai hayagoni.
PSA 48:8 Ngode Datagaliwabehanda bamba biniyago ina haleme hale ho harimagoni. Anduane Homogo Hongo Haiheore kagome ibuninaga tanoha mbirale uruni biniyago ai ina deme handai harima. Ibugua ibunaga tano ogoni mo hongo haragome bayale wiaabo holebira.
PSA 48:9 Ngode Datagaliwabe-o ina í̠naga andaha biruwa í̠naga gubalini haabo holene mana ngego mitangi bialu bedema.
PSA 48:10 Wali agali dindi bibahendeha bu karume í̠naga mini yaraga halu kagoni. Í̠ mini leneore kegonaga dindi bibahendeha wali agali karume loyogo leda. Í̠na í̠naga mana tigabi ngegome wali agali bu karu handayaho haga kegoni.
PSA 48:11 Hari Saiononi wali agali bu karu ti bibahende turu hai helo helabe. Wali agali tinime mana biragobi í̠na tigatiga ngadaguaore mo tale biaga kegoni. Yuda dindiha tano ngaruha karu ti bibahende turu hai helo helabe.
PSA 48:12 Ngode Datagaliwabenaga wali agaliru tígua Hari Saiono kagoria tanonaga ege pabe kadagua pu mabu bilimu. Pu mabu bialu pabe daligani mamagealinaga anda lu bima iraga halu bu heledaru bibahende dagalai halimu.
PSA 48:13 Tígua Saiononaga ege pabe kagobi anda hongohe bu karubi bayuwa handa kia bu helalimu. Wali agali mani holobadaru te lamulenaga baya hanguore handalimu.
PSA 48:14 Tígua mani holobadaruhondo ogodagua lamilimu. Ngode Datagaliwabe ibu inanagaore kagoni. Ibu inanaga Ngode Datagaliwabeore haluhe haabo holebira. Horo bibahendengi ibugua bamba halu ina hariga poloma̱yago walia halu haaboboore holebira, lalu lamilimu.
PSA 49:1 Wali agali bibahendeme bi o larogo hale halimu. Tí wali agali dindini bu kamiru bibahendeoreme i̱na bi larogo hale hole hale miaho halimu.
PSA 49:2 Wali agali timbuni mini lenebi mini nalenebi homogobi yagibanobi tí bibahendeme i̱na bi o larogo baya hanguore hale halimu.
PSA 49:3 I̱naga bu miniha mitangi bulene bayale hangu palu to̱ledago. I̱na mini gigabiwi holenenaga bi loleberogo ogoni tí wále helonaga lolebero.
PSA 49:4 I̱na pigane bi yobage lowa ala lolebero. Lalu howa ngida balu iba ganabi lalu bi yobage larugonaga irane mo walia halu langulebero.
PSA 49:5 Mbirale gibi hiriribi wigi bidangi i̱ gi naharuli. Waitigime i̱ bole lowa hoyu mabu biyaguabi i̱ gi naharuli.
PSA 49:6 Agali ko biaga karume dindi dabudabu dewa wuwa mine halu lalu, Ai homogo karulapeore kogoda, lowa dindi dabudabu urunini hanaho howa tininaga mini mo yaraga haga karume i̱ bole manda biaga ka. Ti ani bialu kago helowa i̱ ti hondowa gi naharuli.
PSA 49:7 Mbirali mbirame ibuninaga holenego munime yolo bibe nahe ngagoni manda bidama. Ibugua muni wiyadagome Ngode Datagaliwabehondo i̱ nahome holego í̠ muni ngerogo labe nahe ka manda bidama. Ani nabibeheore nga.
PSA 49:8 Ani bibe nahedagoni irane wali agalinaga holene buhe̱naga yolo gibi daligaorene daligago yolo bibe naheore nga. Ibugua Ngode Datagaliwabe yolo mule manda bulubadagoni nakarulapeore holebira.
PSA 49:9 Ibu homa nabi dére haaboore holego lalu Ngode Datagaliwabe munime yolo nabibeheore holebira.
PSA 49:10 Wali agali mbirale mandabi mini gigabiwi karubi homaga birane hendedama. Mini nawibi lulu alebi bibahende homa dege birane hendedama. Tigua mbirale dindini howa ilu wialu hayaruni tinaga aguanene holebiraru ti helo ngelalu tini homaga birane hendedamagoni.
PSA 49:11 Ala dindini hayangi tininaga dindini hayagonigo ai homalu pialu howa tinaga dindi anda tene homali biago bu hinalu homali biagoniha haaboore holebira.
PSA 49:12 Mbirali mini lene timbuni heneyaguabi homa anda ibidangi yo pialu pobe nahe holebira. Ani nabibeheore nga. Homa anda ibidangi nogo biango homagadagua homolebira.
PSA 49:13 Wali agali tini hangu howa karulape kama manda bialu karu tihondo agi birabe handami̱ya. Tininaga mbirale ngagoria mini hanaho karu homolebirago de handami̱ya.
PSA 49:14 Wali agali urunibi karu ti nogo sibi homagadagua homalu Homa ibu tinaga haru haga haguane holebira. Ti homaragola tinaga tingini abale togo bialu tinaga dindi haraligo yu wahalu tinaga dinini kaundiaore humbirini andaha polebira. Anidagua bigi birago hondowa wali agali mini tigabiwi karu ti turu halu holene nga.
PSA 49:15 Anigo Ngode Datagaliwabehanda i̱ gini mulebira. Ibugua homolenenaga hongome i̱ yani nahelo pele ngulebira.
PSA 49:16 Wali agali mbirali ibunaga dabudabu dewa wiatago halu ibu homogo hayagua ogonidagua biragonaga í̠ mini dege dindi ho nahabe.
PSA 49:17 Ibu homalu ibunaga mbirale wiyadaruni ibuni yalu napolebira. Dabudabu ilu wiyadarume tinaga anduane homaliha anda poradagua tibi homaliha dege anda porama nalolebira.
PSA 49:18 Ibu dindini kangi ibu turu howa dungulo kayaguabi ibu erekui biabe bialu mbirale dewa mo wiragola marume ibunaga mini yaraga halu ibu bayaore awadaga handalu kayaguabi
PSA 49:19 mbirali homogo ogoni ibubi homalu ibunaga mama mamali ala homalu peneru aruma haho wiaabo hagaha kadagua ibunibi ogoniha dege pu holebira.
PSA 49:20 Mbirali mini lene timbuni heneyaguabi homa anda ibidangi yo pialu ibida pobe nahe holebira. Ani nabibeheore nga. Homa anda ibidangi nogo biango homagadagua dege homolebira.
PSA 50:1 Ngode Datagaliwabe Hongo Haiheore Anduane Homogo kago ibugua bi laragoni. Wali agali ni tagira ibiragohayagi karubi ni paliragohayagi karubi dindi bibahendeha ibugua ti olalu kagoni.
PSA 50:2 Ngode Datagaliwabe ibu Saiono tano dunini dindi bayaleoreni howa ibugua ibunaga wá holene taraore biago wá haame halu kagoni.
PSA 50:3 Inanaga Ngode Datagaliwabe o ibaruagoni. Ibu ebero lalu panigi ibaruagoni. Mbirale ngaru dai helonaga ira dene ala bamba halu puyabu timbuni iba dalu dindi guni heba ibuha ho mabu bialu ibarua.
PSA 50:4 Ibugua dindibi hari daligabi olowa libuhondo lamialu lalu, I̱naga wali agalime bialu hayarunaga dabaki berogo hondole ibidaba, laruagoni.
PSA 50:5 Ngode Datagaliwabehanda lalu, I̱naga wali agali i̱nihondo mini mbiraorewi karu tigua i̱hondo nogo bo lomabu delalu howa i̱nila habo nalolene bi lo wiyaru ti i̱ni heba mandagi holoma̱ya mo mogo bialu ibidaba, laruagoni.
PSA 50:6 Hari daligame latagi halu lalu, Ngode Datagaliwabe ibu tigabiore ka. Ibugua tigatiga dabaki biaga ka leda.
PSA 50:7 Ngode Datagaliwabehanda lalu, I̱naga wali agali bu kamiru-o bi loleberogo bayuwa hale halimu. Isaraele wali agaliru-o i̱na tíhondo bi lolene yidogo tígua ko birimiru latagi holebero. I̱ni hangu Ngode Datagaliwabe howa tínaga Ngode Datagaliwabeore kogoni.
PSA 50:8 I̱na tígua lomabu yalu ibirimigonaga ndo dago bero. Horo bibahendengi tígua loma irani dai helaga bialu kamigoni i̱nime de hondo kogoni.
PSA 50:9 I̱na tínaga nogo pabeha nogo bulumaga memeru wangabe kago i̱ yamulenego burupalia nabi kogoni.
PSA 50:10 Nogo gabua irabuha haga karubi dindi hari daosini dewaore daga labe nahe ngaruha nogo bulumaga karubi bibahendeore i̱ninaga kago ndobe.
PSA 50:11 Ega gabua bedaru bibahendebi dindi bibahendeni ema bialu piaga bedarubi uruni bibahende ininagaore beda.
PSA 50:12 I̱ tomo garibilo koyagua tíhondo mbira ngi nalolebero. Dindi bibahende ngagobi ogoniha wini ngarubi bibahende i̱ninagaore wiai ka.
PSA 50:13 I̱ bulumaga wangabenaga mbirini naga kobe be nogo memenaga darama naga kobe. Uruni ale i̱ nanagaore ndobe.
PSA 50:14 Tígua i̱hondo ka̱i̱ore lalu lolene nga. Uruniale tígua i̱nihondo lomabu ngulene karulape nga. Ngode Datagaliwabe Daligaorene Daliga kogo i̱nihondo mbirale mbira ngule lalubi lo wirimigo damene nguleneore ngagoni.
PSA 50:15 Tígua tíniha genda tagira ibirangi i̱ni abale olalimu. Olaramigola i̱na hale halu tí biamogo bulebero. I̱na tí biamogo berogola tígua i̱naga mini yaraga halu holeberemi, lalu layagoni.
PSA 50:16 Ngode Datagaliwabehanda wali agali mana ko biaga karuhondo bi ogodagua laragoni. Tígua i̱naga mana lo wini ngoru bame lo payapaya bialu habo nalolene bi lo ngagonaga tebi lalu kamigo aginaga laramibe.
PSA 50:17 I̱na tí mo tiga buliya ha nabi tígua i̱naga bi mo wahalu haabo kamigoni.
PSA 50:18 Tígua agali page biaga karu lola howa abale mo nenege haga kami. Wali agali kayu yama ibaga biaga karu baba mandagi ibagabu haga kami.
PSA 50:19 Tígua ne harigaha howa ke̱ holene lalu bi ko dege lalu haabo haga kamigoni ndobe.
PSA 50:20 Tí damene bu karu baba godi lalu tí ai̱ya igini bameore mege bialu kamigoni.
PSA 50:21 Tígua anidagua bialu kamigonaga i̱na bi mbira nale harugoni ndobe. I̱ ani hewagola tígua mandabu handalu hemiria i̱ nde tí ale dege kabe toba harimi. Ani birimigonaga i̱na tí dago berogoni. I̱na tí panigi handalimulo ko birimiru latagi holebero.
PSA 50:22 Wali agali i̱hondo erembira ngiaga kamiru tí bi o larogo hale hadaba. Tígua hale naharimiyagua nde tíha mo ko holene anda ibiragola tí biamogo bulene mbirali naholebiraore.
PSA 50:23 Mbiralime i̱hondo ka̱i̱ lalu lomabu ngialu kago ibugua i̱naga mini yaraga halu haga kagoni. Wali agali i̱naga bi hale halu i̱ andaneha haga karu ti i̱na pele mulebero, laragoni.
PSA 51:1 Ngode Datagaliwabe-o gubalini haho wiaabo haga kego í̠na i̱ore dara howa biamogo bibe. Í̠na wali agali dara nahabeheorego dara hagayagodago i̱ dara halu ko biruru domo wahabe.
PSA 51:2 I̱na ko biruru bibahende domo wahalu i̱ dodo nahe helabe.
PSA 51:3 Ko ngubiore birulo manda bialu miniha tagaore biaabo haragola haruli.
PSA 51:4 I̱na ko biruruni í̠hondo birugoni. Mendealihondo biru lole ndo í̠hondoore birugoni. Í̠naga deni ko ngubiore birugoni. Ani birugonaga í̠na i̱hondo i̱ mana pugualu ko birigo pani nolene nga larego nde tigatiga labehedaguaore larego i̱ balolene henge nawiore manda bido.
PSA 51:5 I̱ pigane i̱ ai̱yahanda taba hanayangi howa ko hangu bialu haho winigo áyubi bialu dege kogoni. I̱ ai̱yanaga tombeha biruwabi mini kowi dege biraru.
PSA 51:6 Í̠na henene hangu lagabi miniha ko do nahebi kago hondowa turu haga kegoni. Ani biaga kego í̠naga mini giga buleneme i̱naga miniha to̱lotagi helabe.
PSA 51:7 Dodo nahe holiya ko biruru domo wahabe. Bu miniha peweleore holiya i̱ wayawaya bia habe.
PSA 51:8 Bi baya turubiru halu mbira hale holiyanaga henge ngialu i̱na ko biruru domo wahabe. Í̠na i̱ hengedo mbaralo wahalu i̱naga kuniru minu bu̱ larigoyu i̱ lone heyalu turuho holebero.
PSA 51:9 I̱na ko ngubi biruruni í̠ de handa tara howa í̠na bibahendeore domo wahai habe.
PSA 51:10 Ngode Datagaliwabe-o i̱naga bu habaneha mini gahenge wabu wia habe. Í̠naga bi larego hale halu bua holenego gahenge i̱ha wabu wia habe.
PSA 51:11 Í̠na i̱ kodago wahalu pu lowa bo batagi holeni. Í̠naga Dinini tigabi i̱ha heledego tagira peloleni.
PSA 51:12 Pele ngini kogoni manda buwa turu ho haruligo turu biagoni ereba hayago lone ngiadai bibe. Bi larego hale halu biaga holiya biamogo bibe.
PSA 51:13 Ani beregola i̱na ko biaga karuhondo í̠naga bi lo ngedagua tihondo lawai holiya. Lawai harogola hale halu tigua í̠ni keria dai bulebirago bilo.
PSA 51:14 I̱na ko birurunaga homolenego hame naledogo Ngode Datagaliwabe-o i̱ pele ngibe. Ani beregola i̱na turu halu í̠ tigabi biaga ke lalu wali agali bi mana lamuliya.
PSA 51:15 I̱na í̠naga bi mana loliyabi Anduane Homogo í̠nime lamogo bibe. Ani berego handalu i̱na í̠naga mini mo yaraga holebero.
PSA 51:16 Í̠na mbirale bo lomabu ngilo hame lagadale i̱na bo lomabu ngidolego ai í̠ hame nalagayago. Mbirale ngabi í̠ nga habelo lowa bo lomabu delaga dabuni delarogomebi í̠ mo turu nahagaya. Aniyagodago i̱na í̠hondo loma ngiradagua i̱ni í̠hondo ngerogoni.
PSA 51:17 Ngode Datagaliwabe-o í̠naga bi larego hale halu biaore bule lalu i̱ni áyu ngerogoni. I̱ni mo yadindi halu bu mini henene beregedalu i̱ni ngerogola í̠na nayamia nabulebere manda buwa áyu ngerogoni.
PSA 51:18 Ngode Datagaliwabe-o Saiono tano podope hayadago wali agali karu dara halu biamogo bibe. Yarusaleme wai pabe biago podo bagabu ibira ho ngago waitigi anda ibuligo í̠na ege pabe ogoni lone biadai bibe.
PSA 51:19 Anidagua bu howa mbirale bo lomabu ngulene ngadagua ngirimayaguabi mbirale bo lomabu delaga dabuni delarimayaguabi í̠ turu holebere. Nogo bulumaga wangaberubi í̠naga bo lomabu delaga dabuni bo deloleberema.
PSA 52:1 Agali timbuni hongohe tingiho kego í̠nime mana ko bialu kegonaga turu howa mine haabo harego irane aginagabe. Ogonibi biaga kego Ngode Datagaliwabenaga deni í̠ koorene ko biaga kegoni. Ngode Datagaliwabe ibu mini bilinahe howa wali agali urunibihondo dara haabo haga kagoni.
PSA 52:2 Í̠na horo bibahendengi mendeali kago mo ko holene hangu manda bialu haga kegoni. Í̠naga hége leda ne gadele ale howa wali agali mende kago podaga kegoni ndobe. Ke̱ howa lolene hangu wai hanalu haabo harili.
PSA 52:3 Í̠na mana ko bulenego hame lalu mana bayale bulenego manga halu haga ke. Ke̱ holene damenego turu haga howa bi henene lolenego manga haga kegoni.
PSA 52:4 Í̠ ke̱ hagaore kegoni. Í̠na bi ko laregome wali agali karu mo tandaga haabo haga kegoni.
PSA 52:5 Ngode Datagaliwabehanda í̠ni andagaha bederia mo ko howa bo gililo batagi holebira. Ibugua í̠ wali agali dindi ogoria karu baba nahabelo bo waholebira.
PSA 52:6 Wali agali bayale tigabi bu karume í̠ha mbirale uruni birago hondowa ti gi timbuni ho holebira. Tigua í̠ hondo oba halu lalu,
PSA 52:7 Agali o kagome Ngode Datagaliwabehanda ibu biamogo bialu mo hongo helo ibuha hana nahe ka. Ibugua ibunaga muni mbirale ngaru hangu mo teneho howa mana ko bialu kogome i̱ biamogo biragola karulape holebero lo manda biaga kago de handa, lolebira.
PSA 52:8 Anigo i̱ ogonibi ndo kogoni. I̱ Ngode Datagaliwabenaga anda haneni ira olibe haradagua bidogoni. Ngode Datagaliwabe ibugua i̱ gubalini ho haabo haga kagonaga i̱na ibuhondo mini mbiraore wu haabo kogoni.
PSA 52:9 Ngode Datagaliwabe-o í̠na i̱ biamogo bialu haga kegonaga i̱na í̠hondo ka̱i̱ laabo holebero. Í̠naga wali agalirunaga deni howa i̱na í̠naga mini yaraga halu Ngode Datagaliwabehanda bayaleore biaga kagoni lalu latagi halu holebero.
PSA 53:1 Wali agali mitangi yole biaga karume tini miniha mandabu donge halu Ngode Datagaliwabe ogoni nahe laga ka. Wali agali mini urunibi wu karuni tini ko ngubi habane nabuleneore howa ko tara tara ngaru bima polenaga ani lalu ka. Mana tigabi hangu biaga mbirali naheore.
PSA 53:2 Ngode Datagaliwabehanda dahuliya andaga howa handadali halu wali agali bibahende bu karu de handai howa mbirali miniwi galone manda biagabi Ngode Datagaliwabe kalo manda bu hagabi au haga bidabe hondole handadali ho ka.
PSA 53:3 Ani handalu hearia mbirali naheore ti bibahende ko biai hene ogobi dege dege hoyu pearia hendeda. Hariga tigatiga polene wiadagua pene mbirali naheore bibahende putagi halu piai hene dege hearia hendene. Mana tigabi hangu biaga mbira naheore. Mbiraorebi mbira naheoreya.
PSA 53:4 Ngode Datagaliwabehanda lalu, Wali agali ko biaga uruni ti mini nawidabe. Ti galone mbira manda nabiagadabe. Wali agali ko biaga urunime i̱naga wali agali bameore ti tomo naradagua budu nalu kagoni. Ani bialu howa tigua i̱hondo bi mbira nalagaore kagoni, laragoni.
PSA 53:5 Ani bialu ha kagoyu Ngode Datagaliwabe ibugua ti mo gi timbuni taraore holebira. Abale ti gi ogonibi nahenedagua gi ho helo irane ibugua tínaga waitigi karu bo wahai halu tinaga kuni dindini hora nahe bu payapayabu ngelolebira. Ibugua wali agali uruni ti erembira miai hayagome ai ti mo ko howa bo wahai holebira.
PSA 53:6 I̱na Isaraele wali agali bibahende pele ngialu haru dai biai helo Ngode Datagaliwabehanda mbirali Saiono howa ibi nalara. Ngode Datagaliwabe ibugua ibunaga wali agali biamogo biragola ti bayuwa ho dungulo halu tigua mbirale bigi biraru bayale hangu haga birago hondowa tini turuore au holobadabe.
PSA 54:1 Ngode Datagaliwabe-o í̠naga hongome i̱ pele ngialu gi mibe. Í̠naga hongo timbunihe kegome i̱ golope hene holiya golope habe.
PSA 54:2 Ngode Datagaliwabe-o í̠na i̱naga bi larogo hale habe. I̱na bi larogo hale habelo hame ledogoni.
PSA 54:3 Agali minehe karu tigua i̱la wai bule íbu kagoni ndobe. Agali uruni ti wali agali maru bo wahole hamelo kagoni. Agali ko biaga uruni tigua Ngode Datagaliwabe í̠ nagalonedalo manda biaga kagoni.
PSA 54:4 Ngode Datagaliwabe ibunime i̱ biamogo biagaore kagoni ndobe. Anduane Homogo ibunime i̱ mo wialu hotali wiagane humbi ale haradagua biaga kagoni.
PSA 54:5 Ngode Datagaliwabehanda i̱naga waitigirume mana ko i̱hondo bialu hayaru tiniha daibu wiai helo. Ngode Datagaliwabe í̠ mini bilinahe kegome i̱naga waitigi karuni bo wahai habe.
PSA 54:6 Anduane Homogo-o i̱na í̠hondo turu howa mbirale ngoru lomabu ngule kogoni. Í̠ bayaleore kegonaga i̱na ka̱i̱ timbuniore larogoni.
PSA 54:7 I̱ha genda timbuni anda ibiyagola í̠na i̱ biamogo bialu harigoni. Í̠na i̱naga waitigi hearu bo waharigo i̱ de handarugoni.
PSA 55:1 Ngode Datagaliwabe-o í̠na i̱naga bi larogo hale habe. I̱na dugu bialu bi larogo hale naholenaga hale pai nahabe.
PSA 55:2 Aiore i̱naga bi larogo baya hangu hale howa ladai bibe. Genda i̱ha ngagome i̱ni bope holene tiga birane hendedo.
PSA 55:3 Waitigi bu karume i̱ mo ko holenaga bi hongo howaore lalu kagoni ndobe. Agali ko karu tigua i̱ bopeore hole kagola i̱naga bu miniha mo ko henego kogoni. Tigua keba timbuni haragome i̱ha genda dewaore mo wiaga.
PSA 55:4 I̱ ti hondowa gi timbuni halu i̱ni miniha homolenenaga gi holene íbu ngagoni.
PSA 55:5 I̱ ani giho kogola i̱naga tingini duru laragoni. Gi holene timbunime i̱ bope kagola kogoni ndobe.
PSA 55:6 Anigo i̱na ogodagua laro, Ainde i̱ babagane halu polene ega aleore hoa ho kogoni. I̱ ogonibi kole i̱na yagalo yu pialu mini ibilo dindi mbiraha ha̱lo birule manda bidole.
PSA 55:7 Yagalo yu pialu dindi kaundiaha wali agali mbira nahaga ngagoha puwa haabo hole manda bidole ndobe.
PSA 55:8 Iba dalu puyaburu hongoheore ibiragola i̱ abale yagalalu puwa bira do ho kole.
PSA 55:9 Anduane Homogo-o i̱na tanoha agali maru gungu bialu karia hendedogo í̠na tinaga bi larago mo luluya halu ti bo ereba hai habe.
PSA 55:10 Mbiraga horombebi tigua tanonaga ege pabe bidagoria daligani puíbu bialu haga ka. Wali agali tano ogoniha bu karume mana ko dewa mo ko holene ngaru biaabo haga kagoni.
PSA 55:11 Tano ogoniha wali agali bu karume tini bagabaga bialu mbirale ngarubi mo ko haga ka. Hariga gebage ngagoriabi ngoai haga hamanibi wali agali bu karume mendeali kago bame bime bope haga bialu tinaga mbirale yu kago yamule mo hondo haga bialu ka.
PSA 55:12 I̱ waitigi mbira kagome i̱hondo bi ko laede hayagua i̱na bi uruni lelo wahabehe ko. I̱ handabe manga haga kagome i̱ hondo oba halu mege biyagua i̱na ibu i̱ nahendelo bira do habehe kogoni.
PSA 55:13 Ai ani ndo o biyaruni í̠na birigoni. Í̠ i̱naga nenegeore howa i̱la haabo haga kegoni ndobe. Iya haru haabo haga berebali ndobe.
PSA 55:14 Bamba iyane haru mandagi ibagabu halu te bayaleru lalu wali agali maru heba Ngode Datagaliwabenaga anda biago heagoria mandagi haribagoni ndobe.
PSA 55:15 I̱naga waitigi bu karunaga minihabi ti andagahabi mana ko dewaore wu to̱leda. Ti homolene tu ndo wene kaore abale homalu homene dininiru pu hagagoha piai helo hamelo kogoni.
PSA 55:16 I̱na Anduane Homogo i̱ninaga Ngode Datagaliwabehanda biamogo bilonaga olalu haabo kogoni. Ibugua i̱ pele ngialu mo wulebira.
PSA 55:17 Gendame i̱ bo hengedalu haabo kagonaga i̱na egerebagi horombe mbiragabi ibuhondo dugu bu mialu haabo haruli. I̱na bi larogola ibugua hale holebira.
PSA 55:18 Waitigi dewaoreme i̱la wai bialu haga karu helowa ibunime i̱ bayale mo wialu haru dai bigi bulebira.
PSA 55:19 Tigua ibuhondo gi nahaga howa ko biyarunaga mini beregedolene manga haga ka. Ngode Datagaliwabe ibu kini henego áyubi haabo kagoni howa ibugua i̱naga bi lamerogo hale halu waitigi karu bope hai howa wayali holebira.
PSA 55:20 I̱naga nenege ala henego ogoni ibugua ibuninaga nenege bu karu baba wai bialu haya. Ibu baba buleore lalu bi abale lo wiyaru mo habolaya.
PSA 55:21 Ibunaga ne harigaha bi bayale dendebi lalu miniha i̱la waitigi haya. Ibunaga bime i̱ miniha dungulo helaga biyagoyu bi ogoni ayu tibu ne gadeleore ale howa bo podaga nga.
PSA 55:22 Í̠ genda yu keruni bibahende Anduane Homogo ibunaga giha mo yaholene nga. Ibugua í̠naga genda uruni mo yalu í̠ mo hongo holebira. Anduane Homogo ibugua agali ko bu karume mana tigabi biaga karu bibahende mo ko helo yupe naholebira.
PSA 55:23 Ngode Datagaliwabe-o í̠na agali ko mendeali homelo bo wahaga bu karubi ke̱ halu mo hondo haga karubi ti holene ha maro nabi hongohe kaore dege homaliha ereba hai helo bo talu pelai habe laro. I̱ nde í̠hondo mini mbiraore hongohe wu haabo holebero.
PSA 56:1 Ngode Datagaliwabe-o í̠na i̱ dara howa biamogo bibe. Agali bu karume i̱ talima ibaga bialu bo wahole kagoni. Waitigime i̱ mo ko hole manda bialu haabo kagoni.
PSA 56:2 Waitigi karume egerebagi howa i̱ bole bialu heane alendo haga bialu haabo kagoni ndobe. Ti dewalioreme i̱ baba waitigi ho ka.
PSA 56:3 Anduane Homogo Daligaorene Daliga kego-o i̱ha gi holene anda ibirangi i̱na í̠hondo mini mbiraore wialu haabo haruli.
PSA 56:4 I̱na Ngode Datagaliwabehondo mini mbiraore wu kogome mbirale ngaru hondowa i̱ gi naharuli. I̱na ibunaga bi henene lo ngaru mitangi bialu ibunaga mini yaraga haabo halu kogoni. Agali karume i̱hondo bulene mbira nawigo agi bulubadabe.
PSA 56:5 I̱na mbira bule kogola waitigi karume mo ko hole manda biaabo haga ka. Tigua i̱ mo tandaga hole hariga taya bialu haabo ka.
PSA 56:6 Ti mo ngoai halu ha do howa i̱na mbira bule bialu koria de yu howa tigua i̱ bo wahole hamelalu ani biaabo haga ka.
PSA 56:7 Ngode Datagaliwabe-o tigua mana ko bialu kagonaga pani nelo mibe. Í̠na tihondo keba timbuni howa bope habe.
PSA 56:8 I̱naga genda yu kogobi bu miniha mo ko hene kogobi í̠ manda bu kegoni. I̱na dugu birugonaga de iba ibiyago í̠na í̠naga iba beha berelo kegoni. Í̠na uruni mitangi bu haabo howa í̠naga mbugaha gilibu ngegoni.
PSA 56:9 I̱na í̠ olarongi i̱naga waitigi ibida piai holebira. Ngode Datagaliwabe-o ti ani biragola i̱na mbira manda bidogoore ogo í̠na i̱hayagi haabo kegoni mandabu kogoni.
PSA 56:10 I̱na Ngode Datagaliwabenaga bi henene lo ngaru mitangi bialu ibu mini yaraga halu kogoni. I̱na Anduane Homogonaga bi lo ngarunaga ibu mini yaraga halu kogoni.
PSA 56:11 I̱na ibuhondo mini mbiraore wu kogome mbirale ngaru hondowa gi naholebero. Agali uruni tigua i̱hondo mbira bulene nawigo agi bulubadabe.
PSA 56:12 Ngode Datagaliwabe-o i̱na mbira bule lalu í̠hondo lo wirugoni biaore bulebero. I̱na í̠hondo turu howa ka̱i̱ lolenaga loma mbira ngulebero.
PSA 56:13 Irane i̱ homole hewaria í̠na pele ngialu mo wirigonagabi waitigirume i̱ bope nahelo i̱ handaya halu biamogo birigonagabi i̱na loma ogoni ani ngulebero. Ngode Datagaliwabe-o í̠ heba ibagabu kogome i̱na í̠naga wá holene ngegoria í̠naga deni haaboore holebero.
PSA 57:1 Ngode Datagaliwabe-o í̠na i̱hondo dara howa biamogo bibe. Í̠na i̱ handayaho habelo í̠ni keria eberogoni. Ega bawalime igini babaganeha tongo bidagola bayale biragadagua i̱ í̠niha kogola bayale holebero. Dalu puyabubi timbuniore ibagadagua i̱ mo ko holene íbu ngago ereba hai helonaga i̱ í̠ni andaneha haabo holebero.
PSA 57:2 I̱na Ngode Datagaliwabe Daligaorene Daliga kagohondo i̱ biamogo bia lole olalu haabo haruli. Ibugua mbirale bibahende i̱ha tubagiho kogo damene ngiai haga ka.
PSA 57:3 Ibugua dahuliya andagaha howa i̱naga bi larogo hale halu i̱ pele ngulebira. Ibugua agali i̱ mo ko hole karu bope hai holebira. Ngode Datagaliwabehanda ibunaga gubalini haabo holenebi mini bilinahe holenebi i̱ walia halu ibugua i̱ yu wahalu napolebiraore.
PSA 57:4 Laiono gabuame wali agali bo nole nendebu hagadagua i̱ koria waitigirume ho mabu bu kagoni. Tinaga ne timu yandareru ale taraore ho ka. Tinaga hége wai biaga ayu tibu ne gadele ale ho ka.
PSA 57:5 Ngode Datagaliwabe-o í̠ni timbuniore dunini kego wali agali handai helo hari daligani mo walia habe. Dindi bibahendeha í̠naga wá holenebi mini lene holenebi panigi mo walia ho ngelabe.
PSA 57:6 Waitigi bu karume i̱ delo gono wia do ho kagome i̱ genda timbuni yu kogoni. Tigua hariga i̱ polenego uli tombo wu kagoha gabua pilagadagua i̱ pilelo winigo uli ogoniha tini pilai haya.
PSA 57:7 Ngode Datagaliwabe-o i̱na mini bilinahe howa í̠hondo mini mbiraore hongohe wu kogonigo i̱na iba ganaru lalu í̠naga mini yaraga halu holebero.
PSA 57:8 I̱ni padogoria heyuwa i̱na ngida aleru barogome ni tagira ibilo mo heya holebero.
PSA 57:9 Anduane Homogo-o i̱na dindi tara tara ngaruha pu howa í̠hondo ka̱i̱ laabo holebero. Hameigini tara tarabu karuha pialu i̱na í̠naga mini yaraga hama polebero.
PSA 57:10 Anduane Homogo-o í̠naga gubalini haabo holene emene ndoore hari daliga elahe wu kegoni. Í̠naga mini bilinahe ngego timbuni yangale howa hari mindini elahe wu kegoni.
PSA 57:11 Ngode Datagaliwabe-o í̠ni timbuniore dunini kego wali agalime handai helo hari daligani mo walia habe. Dindi bibahendeha í̠naga wá holenebi mini lene holenebi panigi mo walia ho ngelabe.
PSA 58:1 Agali haguane bu kamiru-o tígua godi hale halu howa bi tigabi lolene ngadagua laramilibe. Tígua wali agali bibahende tigatiga dabaki biaga kamibe.
PSA 58:2 Ani ndoore. Tínaga miniha ko bulene hangu wu to̱latagi ho kamigoni ndobe. Tígua dindi bibahendeha wali agali bu karu homelo bo wahaga biaga kamigoni.
PSA 58:3 Mini kowi karume dindini ibagabu kangi ko dege biaabo haga kagoni. Ti ai̱yahanda ti taba hanayangi howa ke̱ dege halu henego áyubi anidagua dege bialu haabo ka.
PSA 58:4 Tinaga bi larago damene bibahende nogombi taranaga tomia ale ka. Tinaga hale tuluho wahene nogombi ale howa bi larago mbira hale habe nahe ka.
PSA 58:5 Agali maru manda timbunibi karume nogombi heyalu mali lilonaga iba gana laragola nogombime hale nahagadagua ko biaga uruni ti hale nahaga ka. Agali manda timbunibirume nogombi heyalu mali lilonaga pilipe laragola hale nahagdagua agali uruni ti hale nahagaore ka.
PSA 58:6 Ngode Datagaliwabe-o agali ko uruni bo wahai habe. Anduane Homogo-o agali uruni ti laiono gabua kebahe agali hayaga ale kago tinaga ne bo gingirulo baga bialu ne bibahende dugu wahai habe.
PSA 58:7 Iba dindini ibira haragola abale yo bialu ereba hagadagua agali ko uruni ereba hai helabe. Datani gahenge harigani anda harago geme hengedaragola gaulai hagadagua agali ko uruni bo hengedai habe.
PSA 58:8 Gangade dindiha biralu homaragola ngu biagadaguabi waneigini gali ai̱ya tombeha bedaore homenego taba hanaragola wá nahende arumaha dege biralu homaraligobi agali ko uruni homai helabe.
PSA 58:9 Agalime ira emene karu dibu waharadagua Ngode Datagaliwabehanda agali ko uruni abale bo wahai holebira. Ti homa nabi kaore Ngode Datagaliwabehanda tihondo keba timbuni halu durumbu hilo waharadagua bulebira.
PSA 58:10 Ngode Datagaliwabehanda ko biaga karu bo waharangi mini tigabi karume turu timbuniore ho holebira. Turu howa tigua ko biaga uruninaga daramame tininaga ge wayawaya bulebira.
PSA 58:11 Wali agali bu karume lalu, Heneneore Ngode Datagaliwabehanda wali agali mini tigabi howa bayale biaga karuhondo bayale dege biaga ka. Heneneore Ngode Datagaliwabe kago ibuguaore wali agali godini howa manani tigatiga dabaga ka, lolebira.
PSA 59:1 I̱naga Ngode Datagaliwabe-o waitigi karunaga giha howa i̱ mo wialu biamogo bibe. Tigua i̱ bo wanahelo í̠na i̱ baya hangu handayaho habe.
PSA 59:2 Agali ko karume i̱hondo ko nabilo í̠na i̱ biamogo bialu mo wibe. Ti darama hangu noa haga karunaga giha howa i̱ gingila mialu mo wibe.
PSA 59:3 Agali uruni tigua i̱ bo wahole bira do haga bidagoni de handa. I̱na ko mbira birugonaga ndo tigua i̱la bame wai bule kagoni.
PSA 59:4 Anduane Homogo-o i̱na ko mbira nabi biako henebi nawi kogoyu tigua i̱la wai bialu bo waholeore abale íbu hapara ho kagoni.
PSA 59:5 Anduane Homogo Hongo Haiheore Ngode Datagaliwabe-o í̠na i̱ biamogo bule abale ibabe. Í̠ Isaraele wali agalirunaga Ngode Datagaliwabeore kego í̠na agali o karu de handabe. Í̠ni abale ibalu agali bu karuni pani mibe. Í̠na ti dara holeni nahabe. Wali agali mana bayale bule kama lalu ha howa tigua mana ko bule mitangi bialu kago manda bibe.
PSA 59:6 Mbiraga agali uruni tigua tanoha dai bialu wai pabe gibuni gibuni ibagabu howa biangome gi̱gau̱ laradagua lama ibagabu ka.
PSA 59:7 Uruni tigua bi ko lalu mege biraru hale habe. Tinaga bi nehe howa wai biaga ayu tibu ale laga ka. Tigua bi ko laga bialu, Iname bi laramago aiwa hale holebirabe, lalu ka.
PSA 59:8 Anigo Anduane Homogo-o í̠na ti hondowa oba haga ke. Dindi tara taranaga hameigini bibahende karu í̠na ti mege biai haga kegoni.
PSA 59:9 Í̠na hangu i̱ mo hongo halu handayaho haga kegoni. Ngode Datagaliwabe-o í̠ni kegoha ibalu i̱ bira do haruli.
PSA 59:10 I̱naga Ngode Datagaliwabe ibunime i̱ gubalini timbuni ho howa ibugua i̱ biamogo bule ibulebira. Ibugua i̱naga waitigi karu bope halu howa i̱ni de hondoliya walia holebira.
PSA 59:11 Ngode Datagaliwabe-o i̱naga wali agalirume mbirale uruni embedaho waholigo waitigi biaru homelo bo waholene nakarulapeda. Anduane Homogo-o í̠ ina wali agali haru haga kego í̠naga hongome waitigi bu karu bo waratagi halu bope hai habe.
PSA 59:12 Tigua mana ko bulene hangu mo tene halu tinaga ne hambuni howa bi ko dege lalu haabo haga kagoni ndobe. Tigua í̠naga mini mo ko howa bi ko ngaru lalu ke̱ howa bi dewa lalu haga kagonaga í̠na ti mine halu kagoria tini pani nelo ngelabe.
PSA 59:13 Í̠na bi ko laga karunihondo keba howa ti bo waholene karulape nga. Agali ko uruni bo wahaiore habe. Anidagua beregola wali agali bu karu bibahendeme manda bialu Ngode Datagaliwabe í̠nioreme Isaraele wali agalirunaga haru haga kegoni manda bulebira. Wali agali dindi bibahendeha karubi í̠na dindi bibahendeni haru kegonigo tigua manda biai helo lo yanga lolebira.
PSA 59:14 Mbiraga i̱naga waitigi tigua tanoha dai bialu wai pabe gibuni gibuni ibagabu howa biangome gi̱gau̱ laradagua lama ibagabu ka.
PSA 59:15 Tigua puíbu bialu nolene taya bialu haabo howa tinaga tombeha tomo noa biaabo hayagua nde ti ngiriningerene lalu haga ka.
PSA 59:16 Ti ani biagagoyu i̱na í̠naga hongo timbuni ngegonaga iba gana lalu holebero. I̱na egerebagi bibahendengi í̠na i̱hondo gubalini ho haabo haga kego mitangi bialu iba gana hongo howa lalu holebero. Abale i̱ha genda tara tara ibiyagola í̠na i̱ handayaho haabo howa i̱naga wai pabe ale harigonaga i̱na iba gana ani lolebero.
PSA 59:17 I̱naga hongo holene í̠niore kegoni ndobe. Í̠ ani kegonaga i̱na í̠naga mini yaraga halu iba gana lolebero. Ngode Datagaliwabe-o i̱naga wai pabe hongoheore í̠ni howa í̠na i̱ gubalini ho haabo haga kegoniore laro.
PSA 60:1 Ngode Datagaliwabe-o í̠na ina bo taliatagi halu inanaga waitigime bo podahana helo yu wahai harigoni ndobe. Í̠na inahondo keba timbuniore ho harigonigo áyu ina kamagoha abale dai bialu ina pele ngibe.
PSA 60:2 Í̠na inanaga dindi wiago mo dumbirumbi bia halu gai buki bilalu dindi hadene biyagola uli timbuni wupe helarigoni. Ai áyu dindi mo ko hai habehe ngago í̠na lone motiga bibe.
PSA 60:3 Í̠naga wali agali bu kamaru í̠nime genda timbuniore mo ngidegoni. Í̠na waini iba timbuni hambu ngidegola no howa ina luluyu ibagabu haradagua bidamagoni ndobe.
PSA 60:4 Wali agali í̠ni andaneha karume waitigi ibira handala ti abale í̠ni kegoha hole ibilo walia holenaga í̠na hagua delagadagua delalu walia harigoni.
PSA 60:5 Í̠na ina gubalini timbuni ho haga kegonigo bayale hai holoma̱ya i̱naga bi larogo hale habe. Í̠naga hongo timbuni ho kegome ina pele ngibe laro.
PSA 60:6 Ngode Datagaliwabehanda ibuni andaga howa lalu, I̱na wai bialu bo podahana hai halu wayali harugo Segeme dindibi Sugodo dindiha dindi ulini bugubugu wuyu pedarubi dindi uruni i̱naga wali agaliru ti helo i̱na ti tuwu ta hai holebero.
PSA 60:7 Gileada dindibi Manase dindibi i̱ninagaore nga. Eberaimi ibu i̱naga ege manda ale nga. Yuda ibu kininaga haru haga gewa ale nga.
PSA 60:8 Moaba dindi i̱naga wayawaya bulene ndisibe ale wialu Idomo dindi i̱nagaore ngo lalu i̱na i̱naga ge su golowa dindi ogoriani ba amu holebero. I̱na Pilidialiru balu wayali howa turu halu ga̱ lalu harogoni, laya.
PSA 60:9 Ngode Datagaliwabe-o ege pabe hongohe bu mabubi tano ngagoha i̱ aiwa haru anda polobadabe. Idomo dindiha i̱ aiwa haru polobadabe.
PSA 60:10 Ngode Datagaliwabe í̠na ina erembira ngiribe. Í̠na inanaga ami agali karu biamogo nabuleorebe.
PSA 60:11 Agalinaga hongome ina biamogo bulene nakarulapego iname waitigi bu karu baba wai buluma̱ya í̠nioreme ina biamogo bibe.
PSA 60:12 Ngode Datagaliwabe ibu ina heba kayagua nde iname wai bialu wayali holeberema. Ibunime waitigi karu bope hai holebira.
PSA 61:1 Ngode Datagaliwabe-o i̱na í̠ olarogo hale habe. I̱na bi larogo baya hangu hale habe.
PSA 61:2 I̱ dindi kaundiaha pu koria i̱naga miniha genda timbuni yu kogo í̠na i̱ biamogo bibelonaga í̠ olalu kogoni. Waitigi bu karume i̱ bo wanahelo i̱ ha do holiya bayuwa haru pu helabe.
PSA 61:3 Í̠nime i̱ handayaho haga kegonigo ani bibe laro. Í̠ i̱naga wai pabe hongoheore kego waitigirume ibalu i̱ bo wanaholebira.
PSA 61:4 Í̠naga anda kegoha i̱ bayale haabo halu homolene hame timbuni lo kogoni. Ega bawali iginime ti angibuni babaganeha bayale bira do hagadagua i̱ í̠ni andaneha bayale holene hamelo kogoni.
PSA 61:5 Ngode Datagaliwabe-o i̱na í̠hondo ogoale bule lalu lowigi birugo bibahende í̠ hale hai harigoni. Wali agali í̠naga mini yaraga haga karuhondo migi biaga birilidagua í̠na i̱bi karulape ngiaga kegoni.
PSA 61:6 Kini ibu dindini tubagi helo ndo mali dewaore helo helabe. Ibu dindini luore helo helabe.
PSA 61:7 Ngode Datagaliwabe-o kini ibu í̠naga deni luore haabo helo helabe. Í̠na gubaliniore ho haabo haga kegome ibu baya hangu handayaho haabo habe.
PSA 61:8 I̱na bamba í̠hondo ogoale buleore lalu bi lowirugo damene horo bibahendengi i̱na talialu bialu í̠naga mini yaraga halu iba ganaru lalu haabo holebero.
PSA 62:1 I̱naga Ngode Datagaliwabe mbiraore kago ibugua i̱ pele ngilo hondo ko. I̱na ibu hanguniore hanaho haga kogoni.
PSA 62:2 I̱ haru hagabi pele ngiagabi ibuni hanguore kagoni. Ibu hangu i̱naga wai pabe ale hongohe kagoni. I̱na wai bialu koria waitigirume i̱ bope habe naheore holebero.
PSA 62:3 Tígua i̱ mo ko halu bo waholenaga horo agiru wai bialu holeberemibe. Paberu gialohole bialu dindini podo ibiraho wiagadagua i̱ mo ko helo hamelo kamibe.
PSA 62:4 I̱ mini leneore kogodago tígua i̱naga mini mo ko hole bialu kamigoni. Tígua ke̱ halu mo hondo holene mana hamelo kami. Tínaga ne harigaha howa bi lalu Ngode Datagaliwabehanda i̱ mo bayale helo lalu kamigoyu tínaga bu miniha Ngode Datagaliwabehanda i̱ mo ko hayagua karulapeoreda lo mitangi bialu kamigoni ndobe.
PSA 62:5 I̱naga Ngode Datagaliwabe mbiraore kago i̱na ibuni hanguni hanaho howa mini dunubia ho kogoni.
PSA 62:6 I̱ haru hagabi pele ngiagabi ibuni hanguore kagoni. Ibu hangu i̱naga wai pabe ale hongohe kagoni. I̱na wai bialu koria waitigirume i̱ bope habe naheore holebero.
PSA 62:7 I̱ pele ngiagabi i̱ mini lene ka lelobi Ngode Datagaliwabe ibuni hanguha hanaho haruli. Ibu i̱naga haru haga hongohe ka. Ibuni i̱naga wai pabe ale hongohe kagola waitigirume ibalu i̱ babe nahe holebira.
PSA 62:8 I̱naga wali agali bu kamiru tígua Ngode Datagaliwabehondo mini mbiraore wu haabo halimu. Genda howa tí mini dege dindi ho kamiru bibahende ibuhondo lamiai halimu. Ibu inanaga ha do haga kago ina ibuha howa bayale haabo holeberema.
PSA 62:9 Wali agali bibahende bu karuni ne harigaha howa buhe̱ bame latagi hagagobi hangu bu kagoni. Wali agali mini lene bu karubi emene karubi habane nabulene bame dege bu ka. Wali agaliru ti holenenaga galone mbira ngabe nawi hondole magi handarimayagua tinaga galone nawi bame dege ka. Ti bibahendenaga galone magi handalu genda magi emeneore ne harigaha buhe̱ laraligobi bameore nagalone dege ka.
PSA 62:10 Tígua mitangi bialu howa wai beremagome ina biamogo biaga lalu mbirale mo page bini ngamaru urunimebi ina mo homogo holobadalo mitangi nabilimu. Tínaga muni dabudaburu dewaore wu hemiyagua nde urunime tí hongo karulape ngulubadalo ogoriani mini hanaho nahalimu.
PSA 62:11 Ngode Datagaliwabehanda lalu, I̱ hongo daligahe i̱ ale mende nahe i̱ni hanguore kogoni, lenego hale haabo harugoni.
PSA 62:12 Ibugua lalu, I̱naga wali agali karu gubalini haabo haga kogoni, lalu hayuago i̱ hale haabo haru. Anduane Homogo-o wali agali bibahendeme biabe bialu harimadagua í̠na ina hangu hanguhondo emena karulape ngiadai biaga kegoni.
PSA 63:1 Ngode Datagaliwabe-o í̠ i̱naga Ngode Datagaliwabe kegoni. I̱na í̠ handa walia hole lowa miniha hongo howaore hai bialu kogoni. I̱naga minimebi tinginimebi í̠ hebaore hole hame timbuniore lo kogoni. Wali agalime dindi koore yobi iba nabereni howa iba noa timbuni halu hége lebolaho hagadagua i̱ni í̠ hebaore hoa howa hame timbuniore lo kogoni.
PSA 63:2 Í̠ í̠ninaga anda loma biahene kagoha haga kego í̠ kegoniore i̱ de hondoa ho kogoni. I̱na í̠naga hongo holene gibiore ngegobi í̠naga wá holene tara baya agiore loabe tobahe ngegobi de hondoleore hameledo.
PSA 63:3 Dindini holiyanaga holene ngirigo yuwa bayale dege turuho kogoyu ogoni goyane lowa í̠na i̱ gubalini haho wiaabo hariligo baya daligaore ngegoni. Í̠ ani biaga kegonaga i̱na í̠naga mini mo yaraga holebero.
PSA 63:4 I̱ dindini emabu kongi í̠hondo ka̱i̱ lalu í̠naga mini mo yaraga haabo halu kone dege i̱ni homalu waholebero. I̱naga gi í̠hondo yaraga halu bi lolebero.
PSA 63:5 Tomo bayaleru karulapeore nowa tombe howa dungu lo holenedagua i̱naga dininime dinini tomo karulapeore nowa dunguore lowa holebero. Ani bialu i̱na iba gana baya turubiru turuore howa í̠naga mini mo yaraga halu lolebero.
PSA 63:6 I̱ mbiraga tamuni paluwa í̠ore mitangi biruli. Mbiraga lu biagoniha i̱naga minime í̠ hangu mitangitangi biruli.
PSA 63:7 Ani mitangitangi biaabo haruligo irane í̠na i̱ biamogo biaaboore hariligonaga i̱na ani mitangitangi biruli. Ega angibunime ibu iginiru ibuninaga babaganeme minu tongo biagadagua í̠naga babagane andane gumba kagoha howa i̱ turu halu iba gana turubiru laruli.
PSA 63:8 I̱na í̠ni yu paraguabu ngogola í̠naga gime i̱ baya hanguore yaniho haga kegoni.
PSA 63:9 Agali marume i̱ bo waholeore manda bialu karuni tini homalu humbirini andaga homene dinini pu haga ngagoha pu holebira.
PSA 63:10 Agali odaruni waiangi agali waime homelo bo yongobu wahalu pedaria biango dudurume ti buduyu pugu pugu bulebira.
PSA 63:11 Ani bulebiragoyu ai i̱ kini kogoni howa wai bigi berongi Ngode Datagaliwabehanda i̱ wayali holiya biamogo biaganegonaga i̱ turu ho holebero. Wali agali maru Ngode Datagaliwabenaga mini lalu, Í̠ore talima ibule, laga karume turu halu í̠naga mini mo yaraga holebira. Wali agali ke̱ haga karunaga ne hariga í̠na mo ndibu lolebere.
PSA 64:1 Ngode Datagaliwabe-o i̱na genda timbuniore howa í̠hondo bi larogo hale habe. I̱ waitigi karu hondowa gi ho kogoni. Tigua i̱ bo waholigo í̠na i̱ handayaho habe laro.
PSA 64:2 Agali ko biaga karume ndelalu hariga tai bialu i̱ bo wahole mo mogobu kagoni. Tigua i̱ mo ko nahelo í̠na i̱ handayaho habe.
PSA 64:3 Tinaga hége ayu tibu ne gadelehe ale howa tigua bi ko lararume i̱ timume bogole edaho hagadagua kagoni.
PSA 64:4 Tigua ha do ho howa agali bayale kagoha timu bo pelagadagua ndelalu kagoni. Agali urunime gi nahaga howa ke̱ gibi hararume timu ala baga biagadagua balu kagoni.
PSA 64:5 Tigua mana ko uruni bulenaga tini mo hongo hagahaga bialu ka. Agali bayale karu gonoha delonaga tigua gono ogoha wimi̱ya laga bialu kagoni. Tigua gono wuwa lo mitangi bialu, O beremagoni mbiralime nahondolebira, laga ka.
PSA 64:6 Mana ko ngaru bule tigua pongo bo wialu howa lalu, Iname mana ko gibiore mbira bulene hariga handa walia harimagoni, lalu ka. Agalinaga bu habaneha mini wia do ho kago o gibihego iname handabe naheore kamagoni.
PSA 64:7 Agali korume bi ogonibi laragoyu Ngode Datagaliwabehanda ibunaga timume ti baragola ti abale ibira holebira.
PSA 64:8 Tigua agali maru karu bo wahole layagonaga Ngode Datagaliwabehanda tini bo wahai holebira. Wali agali maru karume ti de handaya howa mege bialu tinaga ma bonge laga bulebira.
PSA 64:9 Wali agali bibahendeme Ngode Datagaliwabehondo gi hai holebira. Tigua Ngode Datagaliwabehanda biyarunaga te laga bialu howa mitangi bu haabo holebira.
PSA 64:10 Wali agali tigabi biaga karume Anduane Homogohanda biyarunaga turu holebira. Tigua ibuha ha do ho howa bayale holebira. Wali agali mini bayale karume Ngode Datagaliwabenaga mini yaraga haabo helo laro.
PSA 65:1 Ngode Datagaliwabe-o iname Saiono tanoni í̠naga mini yaraga holene karulapeore nga. Iname í̠hondo bi laramago hale halu ladai biaga kegonaga í̠hondo buleore lalu lo wirimaru biaore buleberama. Wali agali dindi tara tarani karume ko bigi biyarunaga í̠ keria ibugu bulebira. Iname ko beremarume inane bope haga biragola kamaria í̠na domo wahaga biriligoni.
PSA 65:4 Wali agali í̠nime dabaga bialu í̠naga andaha í̠ni kegoria helo dabaga bereru ti turuore ho ka. Í̠na ti haru anda eberegola mbirale bayale tara tara damene í̠naga anda loma binigo kagoha bu ngaru hondowa ina miniha hina ale tombe howa dungulo holeberema.
PSA 65:5 Ngode Datagaliwabe-o iname í̠hondo bi laramago hale halu í̠na gi migi biriligoni. Í̠na ina pele ngulenaga mbirale baya tara tara nahendene aleru bigi biriligoni. Wali agali dindi bibahendeni paluyu pedarubi iba solowara domalu dindi kaundiani bu karubi ti bibahendeme í̠hondo mini mbiraore wialu í̠ha mini hana ho haga ka.
PSA 65:6 Í̠ hongo gibihe kegome dindi hari gibi wa yu pedaruni í̠na wene wedagoni. Í̠naga hongo timbuni ngego mo walia halu ani wedagoni.
PSA 65:7 Iba solowarame bi timbuni tigi tugua lararubi yaribu bialu lararubi mo hundia halu wali agalime bi timbuni awa lalu ladagadaga bialu karu mo hundia haga kegoni.
PSA 65:8 Í̠na gibi urunidagua bigi bialu kego hondowa ina wali agali dindi bibahendeni bu hama pedamarunaga bi nawidagola í̠na bigi berego dege hondole bame ne angala howa de handaya ho hama pedamagoni. Í̠na bigi berego handalu turu halu ogodagua biya lalu loyogo laramagola wali agali pali maro bidarumebi heba bi ladagadaga bialu holebira.
PSA 65:9 Í̠na wali agali palu ngamaru handaya ho ko lalu hariha howa dalu ngialu inanaga dindiru mo baya halu mo ibane berela halu kegoni. Iba nagane gendo ngamaruha iba duguaho wiaabo helalu iba maru piagaru hundia nabi pia ho wiaabo heledagoni. Inanaga tomo hengedamarubi baya gumbile wiaabo heledegola bu dawalu naabo haramagolabi tene haho wiaabo kagoni. Urunidagua bialu kegome ina wali agali dara howa biamogo bule handaya ho ko lalu walia halu kegoni.
PSA 65:10 Tomo hongole howa dindi alu ngamaria hariha howa daluore ngigi birili. Dalu ibilaregome dindi damiai haga. Dalu emene haburalu ibilaga biriligomebi dindi ibane biralu mo gomba haga beregola tomo hengedamaru bayuwa anda haga.
PSA 65:11 Í̠na ani bigi beregome tomo au lolebe tara gibi bu ngaria bu hono puwa dawaga beramali. Í̠na biamogo berego damene bibahende ani biai haregola tomo nolene bu payabu wiaabo haga.
PSA 65:12 Nogo sibi bulumagaru hagaha nogo wabuni haabo halu dindi hombenerunaga wá hondo holene bayaore ngagoni.
PSA 65:13 Tagira nogo sibiru tanini bu haame halu dindi ulini guagua ngaruha tomo tara tara anda halu gumbilo tagiho ngagoni. Uruni bibahendeore inahondo ngiridarumebi wali agali bibahendemebi í̠hondo turu timbuniore howa iba gana dalimu ladaga halu í̠hondo lo ngeremagoni.
PSA 66:1 Wali agali dindi bibahendeni bu kamiru-o tí turu halu hongo howa ladaga halu Ngode Datagaliwabenaga mini yaraga halimu.
PSA 66:2 Iba ganaru lalu ibu mini leneore kago lalu latagi holene nga. Ibunaga mini timbuni ngago mo yaragaore holene nga.
PSA 66:3 Tígua Ngode Datagaliwabehondo lamialu lalu, Mbirale í̠na biagago damene bibahende dunini hangu biai haga kegoni. Í̠ hongo timbuni daligaore kego hondowa í̠naga waitigi bu karume mogo lalu í̠ wanakuihayagi ibalu bulupaligi bialu haga ka.
PSA 66:4 Wali agali dindi bibahendeha bu karume í̠ mitangi bialu lotu lalu ka. Tigua í̠hondo iba ganaru lalu í̠naga mini yaraga halu ka, lalu lamilimu.
PSA 66:5 Ngode Datagaliwabehanda biyadaru tí de hondole ibidaba. Wali agali bu hearu dombeneha howa tarale timbuni biyadaru de handadaba.
PSA 66:6 Ibugua iba solowara timbuni bereago hundiai helalu dindi mo yobia haya. Dindi yobialu pani helayagola inanaga mamaliru ti geni dindi dindi ibiyagoni. Ibugua biyagonaga iname ogoriani ibuhondo turu timbuni hene.
PSA 66:7 Ngode Datagaliwabe ibu hongo gibihe howa ibu kini haluhe haabo haga ka. Ibugua hameigini tara tara hama pedaru bibahende ibunaga deme de handa amu haga ka. Wali agali maru ibunaga mana hale howa doga haga karu ti mini timbuni bolanguahe kama loligo henge namilimu.
PSA 66:8 Wali agali hameigini tara tarani palima pedemiru tí bibahendeme inanaga Ngode Datagaliwabe kagonaga mini yaraga hadaba. Wali agali bibahendeme hale hai helo tígua ibunaga mini mo yaraga hai hadaba.
PSA 66:9 Ina koha pi naloloma̱ya ibunimeore baya hangu handayaho hayagome ina homa nabi bayale kamagoni.
PSA 66:10 Ngode Datagaliwabe í̠nime ina ba handarigoni. Agalime siliba dodo para kago do taulo wahelonaga irani deledagola baya tara wiagadagua í̠na ina kamaruhondo ani biridagoni.
PSA 66:11 Í̠nime ina wena nu aleha minu hanarigoni. Inanaga erembirani genda timbuni mo ya harigoni.
PSA 66:12 Waitigi bu hearume ina bo hengedelo waharigoni. Ina ira deagoriabi iba li timbuni peagohabi ibagabu harimagoni. Í̠na ani birigoyu ai ina dindi bayale ngagoria haru íbu heledegoni.
PSA 66:13 Bamba genda i̱ha tagira ibiyangi i̱na í̠hondo loma mbira irani dai helo bo delole lalu bi lo wirugoni. I̱na bi ogoni larugo mitangi bialu ai loma uruni bu yalu ibulebero. I̱na nogoru í̠naga andaha haru ibalu irani bo delolebero.
PSA 66:15 Nogo sibi habatigiru i̱na í̠nihondo lomabu ngialu irani bo delolebero. I̱na bulumaga wangabe karubi meme wangabe karubi í̠hondo loma bialu irani bo delolebero. Uruni delarogola nga bayale birago í̠ nga ho holebere.
PSA 66:16 Wali agali Ngode Datagaliwabe andaneha haga bu kamiru-o tí i̱na bi larogo hale hole ibidaba. Ngode Datagaliwabehanda i̱ biamogo biyaru bibahende langiai holiya ibidaba.
PSA 66:17 I̱na ibuhondo i̱ biamogo bia lalu olalu harugoni. Ibunaga mini yaraga halu i̱na iba ganarubi larugoni.
PSA 66:18 Mana ko birugo bu donge ho kole nde Anduane Homogohanda i̱naga bi larugo hale nakale.
PSA 66:19 Ngode Datagaliwabehanda i̱na ibuhondo bi larugo haleore haya. Ibugua i̱naga bi larugo heneneore hale howa ladai biya.
PSA 66:20 Ngode Datagaliwabehanda i̱ erembira nangi. Ibugua i̱naga bi larugo hale halu i̱ gubalini hayago wanahe haabo hayagonaga i̱na ibu mini yaraga harogoni.
PSA 67:1 Ngode Datagaliwabe-o í̠na ina dara nahabehego harugo lowa dara halu biamogoore bibe. Ina de hondo halu pele ngulene ngadagua pele ngibe. Ani beregola wali agali dindi bibahendeni karumebi í̠naga hame ogobi wiyada manda bilo ani bibe. Hameigini tara tara paluyu pedaru bibahendemebi í̠na ti pele mirida manda bilonaga ani bibe.
PSA 67:3 Ngode Datagaliwabe-o wali agali karume í̠naga mini mo yaraga helo hameledo. Wali agali bibahendeoreme í̠naga mini mo yaragaore helo hameledo.
PSA 67:4 Hameigini tara tara paluyu pedarume tinaga miniha turu halu yanga lowa iba gana lelo. Í̠na wali agali tale nabi bibahendehondo ogobi dege dege biaga kegonaga ani lelo. Dindi bibahendeni hameigini paluyu pedamaru í̠na bayuwaore haru hariligonaga iba gana lo ngilo hameledo.
PSA 67:5 Ngode Datagaliwabe-o wali agali karume í̠naga mini mo yaraga helo hameledo. Wali agali bibahendeoreme í̠naga mini mo yaragaore helo hameledo.
PSA 67:6 Dindini tomo hangaramaru damene bibahende anda haragola nalu kamagoni. Ngode Datagaliwabe inanaga Ngode Datagaliwabeore kago ibugua ina mo gumbila hayagome ina turu halu dungulo kamagoni.
PSA 67:7 Ngode Datagaliwabehanda inahondo turu howa mo gumbila halu kagoni. Wali agali ona kaware karumebi dindi lene leneha paluyu pedarumebi bibahendeme ibunaga mini mo yaraga haiore helo hameledo.
PSA 68:1 Ngode Datagaliwabe ibuni abale heyalu ibunaga waitigi bu karu talia togo laragoni. Ibuhondo handabe manga haga karu ti ibida piai haragoni.
PSA 68:2 Puyabume hagua pulo yalu purogo lagadagua dege Ngode Datagaliwabehanda waitigi bu karu bo taliatogo lai haragoni. Wagaya ira dene hondowa elalu ereba hagadagua wali agali ko karu Ngode Datagaliwabenaga deni howa mo ko hai haga.
PSA 68:3 Wali agali mini tigabi karu ti dege turubiore howa Ngode Datagaliwabenaga deni miniha dungulo halu ti turu timbuni ho haga.
PSA 68:4 Ngode Datagaliwabehondo iba gana ladaba. Ibunaga mini yaraga halu iba ganaru lalu holene nga. Ibu hari beralibani biralu piaga kago ibilo hariga mo tiga bia holene nga. Ibunaga mini Anduane Homogo ka. Iname ibunaga deni howa turu hami̱ya.
PSA 68:5 Ngode Datagaliwabe ibu ibuni andagaha howa ibugua waneigini aba ai̱yala homene karubi wali dalo agalini homene bedarubi ti bibahende handayaho haga ka.
PSA 68:6 Wali agali tini hangu haga karu ti anda mo migi bialu bayale berelaga ka. Wali agali garabaya bu helene karu ti golope howa ibugua tini daluha haru dai bialu ti turu ho helo helaga biaga. Agali doga haga bu karu ti dindi ko yobi iba dalu naibaga ngagoha pu haabobo bu holebira.
PSA 68:7 Ngode Datagaliwabe-o bamba í̠na í̠naga wali agali haru tagira ibalu ti dindi ko wali agali nahaga wiagoha haru halu ibirigoni.
PSA 68:8 Horo ogoningi Ngode Datagaliwabe ibu Hari Sainai ala íbu hariligoria áyu íbu kegoni. Isaraele wali agalinaga Ngode Datagaliwabe í̠ni ibirigola dindi dumbirumbi bialu hari daligaha howa iba dalu timbuniore ibiniya.
PSA 68:9 Ngode Datagaliwabe í̠nime í̠naga dindini iba dalu timbuniore ibilarigola dindi ala ko wiyago lone mo bayale harigoni.
PSA 68:10 Í̠naga wali agali ti dindi ogoni karulayagoni. Í̠ baya gibiore kegome wali agali burupale hearuhondo tomo dabudaburubi migi birigoni.
PSA 68:11 Anduane Homogohanda bi layagola wali dewa biru wiarume bi te uruni lamima piyagoni.
PSA 68:12 Bi te lamima piyadagoni ogodagua, Kini karu heba tinaga ami bu karubi bibahende ibida piai haragoni. Agali tigua wai labuha howa mbirale mo yalu ibiyaru wali andaga berearu baba talebu ta haga biya.
PSA 68:13 Ega malibu ale silibame wabiniru babagane ngolome hoai laradaguabi wiaru tigua mo tale bigi bini. Ainde irane agome agali maru wai nape pabeha nogo sibi heba hayabe, laga biya.
PSA 68:14 Ngode Datagaliwabe Hongo Haiheore kagome Hari Salamono ogoniha kini hearu bo taliatagi halu purogo lelowa ibugua dalu dindi guni timbuni hari ogoniha ibilaya.
PSA 68:15 Hari Basananaga ibu hari timbuniore weda. Hari ogoninaga hombene bolebolene dalidali bigi bida.
PSA 68:16 Hari timbuni hombene dewa bolebolene hagahagabi kego-o í̠na hari emene Ngode Datagaliwabe ibuni birulenaga dabo heledago de hondowa irane aginaga henge larebe. Anduane Homogo ibu hari ibuni dabenego ogoniha haabobo bu holebira.
PSA 68:17 Anduane Homogo ibuni Hari Sainai wahalu ibuni anda loma bia hene biagoha íbu kagoni ndobe. Ibunaga ami agaliru wai biaga garo ale nogo hosime gililo yalu piaga mini karisiru daosini dagalabe nahe dewaoreni hagahaga bialu ti haru ibiyagoni.
PSA 68:18 Ngode Datagaliwabe ibu ibunaga hari daligaore wiagoria iraga halu agali dewaore minalu haru halu piya. Agali dogahe wai biaga hearume ibu mo turu halu mbirale migi biyaru mo yaya. Anduane Homogo Ngode Datagaliwabe ibuni hari daligaore ogoniha haabo holebira.
PSA 68:19 Iname Anduane Homogonaga mini yaraga hami̱ya. Ibugua inanaga genda ngelo kamaru horo bibahendengi ya haga kagoni. Ina pele ngialu mo wiaga Ngode Datagaliwabe ibuni hanguore kagoni ndobe.
PSA 68:20 Inanaga Ngode Datagaliwabe ibunime ina pele ngialu haabo kagome ina bayale kamagoni. Anduane Homogo ibu inanaga Anduane Homogo kago ibugua ina homa nabi bayale holoma̱yanaga pele ngiaga kagoni.
PSA 68:21 Ngode Datagaliwabehanda ibula waitigi haga karubi mana ko ngaru hangu mo tene haga karubi ti bibahende bo wahai holebira.
PSA 68:22 Anduane Homogohanda lalu, Tínaga waitigi amu Basana dindini bu karu minu yudai bulebero. Ti unuraore iba solowara timbuni bedago andanehaore heaguabi harugo lowa i̱na minu yudaiore bulebero.
PSA 68:23 Tínaga waitigi uruni baiore howa tí bu miniha dungulo halimulo tínaga biango bu karume waitigi uruninaga darama na dege bialu no karulapelobi i̱na ani minu yudai bulebero, laya.
PSA 68:24 I̱naga Ngode Datagaliwabe-o í̠na wai bialu wayali harigo de hondowa manda bu kama. Ngode Datagaliwabe i̱naga kini kego í̠ninaga anda loma bia heneha turu halu anda porego ina bibahendeme de handai ho kama.
PSA 68:25 Iba gana lagarume bamba halu ngida ale lagaru ti maha ibiragoni. Wandarime irabitele ale maru yuwa tigua bama dombeni ibiragoni.
PSA 68:26 Tigua iba gana laraga halu howa lalu, Wali agali íbu ngoaiho kamarume inanaga Ngode Datagaliwabenaga mini yaraga hama. Ina Isaraele wali agali bu kamarume Anduane Homogonaga mini mo yaraga hama, lama ibiragoni.
PSA 68:27 Beniyamini hameigini emene hayaru tigua mo bamba hara. Yuda hameigininaga agali haguane bu hearu tigua Beniyamini hameigini erembiraha pora. Sebulunu hameiginibi Nabadali hameigini tinaga haguane bu hearubi tigua o piyaru mama talima poragoni.
PSA 68:28 Ngode Datagaliwabe-o í̠ninaga hongo inahondo mo walia habe. Bamba í̠naga hongo ogonime ina mo wirigonigo áyu walia habe.
PSA 68:29 Í̠ni anda Yarusalemeha kagoria kini tara tara bu hearume í̠ mo turu hole mbirale mbirale bame í̠hondo ngule mo yalu ibiragoha howa í̠na í̠naga hongo walia habe.
PSA 68:30 Nogo gabua timbuni iba puguaha haga biago hongo howa talibe. Nogo bulumaga wangaberu bulumaga igini heba haradagua helaga karubi hongo howa talibe. Tinaga muni siliba yu karu í̠hondo ngialu í̠ni kegoha ibalu bulupalialu ge duli hanga helonagaore í̠na hongo howa talibe. Hameigini tara tara wai bule hamelo karu ibida bilibulu purogo lelo bo taliatagi hai habe.
PSA 68:31 Iyibinaga kinime ibunaga agali haguane bu karu ti í̠naga bi larego hale helo Yarusalemeni ibilaga bulebira. Idiobialirume gi yaragaho howa í̠hondo bi lolebira.
PSA 68:32 Wali agali dindi tara tarani bu kamiru aibe. Tígua Ngode Datagaliwabehondo iba ganaru lagalaga bidaba. Anduane Homogonaga mini yaraga halu iba gana ladaba.
PSA 68:33 Mbirali ibu hari daligaha beralibani ge halu piaga kago ibunaga mini yaraga hadaba. Ibunaga bi hongo howa hari kulu laradagua biaruago hale hadaba.
PSA 68:34 Wali agali bu kamiruni bibahendeme Ngode Datagaliwabenaga hongo timbuni kago lalu latagi halu hadaba. Isaraele wali agalirunaga kini daligaore ibu kagoni. Ibunaga hongo taraore hari daligani walia harane de hondo kama.
PSA 68:35 Ngode Datagaliwabe-o í̠ tara baya burugule gibiore howa í̠ninaga anda loma bia heneha kegoni. Isaraele wali agalirunaga Ngode Datagaliwabe ibugua ibunaga wali agali bu karuhondo hongo miaga ka ndobe. Ina Ngode Datagaliwabe mini yaraga hai hami̱ya.
PSA 69:1 Ngode Datagaliwabe-o i̱ gi mibe. Iba birama irayagola ai ibame namu lelo ma paho kogonigo gi mibe.
PSA 69:2 Waru lumburani hewaria unura waruha yalu anda porane kogoni. Ge hade holene dindi giambe mbira nawida. Iba uli bereagoha ge hape halu ko. Ani bialu koria iba yaribu bu yu ibalu i̱ bu dambi haragola iba nalu homole kogoni.
PSA 69:3 Ai homaore biruda handala Ngode Datagaliwabe-o í̠na i̱ biamogo bibelonaga i̱na í̠ o dege lalu hewane ai i̱naga kembobe pu kagoni. Í̠ eberebe hondole lowa de handayaho wia dege biwane ai i̱naga de tandaga bialu hongo bibahende pirilipe kagoni.
PSA 69:4 Wali agalime irane nawioreni i̱ bame handabe manga haga karu ti dewaore daga labe nahe kagoni. I̱naga haguaneni mandari li bu karuni goyane lowa ti dewaore daga labe nahe kagoni. I̱naga waitigi urunime tindule i̱na agua biya lalu ti bi degeme mo para halu kagoni. Tigua hongo gibi howa i̱ bo waore hole manda bialu kagoni. Ti bi degeme i̱ kayu nabini wiwago tindule, Í̠ kayu biri, lalu ka. Ti bime mo para hayagola mbirale i̱naga wiwago irane nawini bameore ti mirugoni.
PSA 69:5 Ngode Datagaliwabe-o i̱na i̱ ko nabiaga kogoni lalu ndo laro. I̱ ko biaga dege ha kogonigoyu nde i̱na ko biruruni mbira í̠ deni wia do hene nawi tigatiga binigobi lapani hai harugoni ndobe. I̱ mini nawi howa birurubi í̠ manda biai ho kegoni.
PSA 69:6 Anduane Homogo í̠ Hongo Haiheore howa Bibahende Haru Haame Ho Haga kegoni. I̱na mana ko mbira berogome wali agali í̠ni hana ho karu taga helo mbira buligo í̠naga gime i̱ yaniore habe. Isaraele wali agalinaga Ngode Datagaliwabe í̠ kegonigo i̱na mana ko berorume wali agali í̠ mitangi bialu lotu laga karu taga halu de handa dindi hai helo i̱na mbira buligo í̠na i̱ mamage habe.
PSA 69:7 I̱na í̠ talima ibalu kogonaga wali agalime i̱ lo guralu mege bialu i̱ mo taga halu kagoni.
PSA 69:8 I̱ninaga hameneorerume i̱ kogoni agali tara dindi tarali ka manda bidagola kogoni. I̱ninaga aba ai̱ya hamene mbalinirume i̱ kogoni tiha howa tagira peneda ndo agali tara mbira dindi kaundiali íbu kagoni ledaha kogoni.
PSA 69:9 Í̠naga anda bayale haabo helo i̱na hame timbuni lalu kogome i̱naga bu habaneha ira daradagua biragola haruli. Wali agali karume í̠ mege bialu bi laga biragoni i̱ni laba halu kagoni.
PSA 69:10 Í̠naga deni i̱nime i̱ni mo dindiha halu tomo nane haruli. Ani berogola wali agalime hondowa i̱ mege bialu lo guraga.
PSA 69:11 Dara howa duguanda howa aga biaganedagua bu kogola tigua i̱ hondo oba halu lo guraga.
PSA 69:12 Ti hariga hariga mo mogobu kago howa i̱ kedalu dege lalu kagoni. Lulu iba nowa tibaga lowa karumebi ti ne harigaha howa iba gana ende haga bialu laga birago i̱ lo guralu hangu laga biragoni.
PSA 69:13 Ti ani lo helowa i̱na Anduane Homogo í̠hondo bi lolebero. Ani larogo hale halu Ngode Datagaliwabe-o í̠nime ogoangi ladai bule lo manda bidengi ladai bibe. Í̠na hale halu ladai bulebeda lo manda bidogo irane í̠na i̱ gubalini timbuniore ho kego manda bidogome. Ani bialu í̠ ke̱ nahagaore kego manda buwa heneneore i̱ pele ngulebereda lo manda bu kogoni.
PSA 69:14 Waru lumburani kogola ge namulai halu i̱ni waruha anda piai habehe bu hinarago í̠na i̱ gi mibe. I̱naga waitigirume i̱ bo waholigo í̠na i̱ de hondo habe. Iba uli ngagoha i̱ ibaha namulai holigo í̠na i̱ de hondo habe.
PSA 69:15 Iba li timbuni ibiragome i̱ namu lalu hilu yalu poligo í̠na i̱ de hondo habe. Iba uli bedagoha i̱ namu lolani í̠na i̱ de hondo habe. Homalime i̱ mo mbedogo buligo í̠na i̱ de hondo habe laro.
PSA 69:16 Anduane Homogo í̠na i̱ horo bibahendengi gubalini haho wiaaboore haga kegome i̱na bibe larogo hale halu ladai bibe. Í̠naga gubalini haho wiaabo holene ogoni mana bayaore gibi ogoniya. Í̠naga dara holene gibi ngegome i̱ handaya halu i̱na bibe larogo hale halu ladai bibe.
PSA 69:17 Í̠naga biabe bia haga o kogo ko handala í̠ ha do nahabe. I̱ genda timbuniore yu kogonigo i̱na bi larogo hale halu áyu ogoni abale ladai bibe.
PSA 69:18 Áyu ogoni i̱ kogoria kaware ibalu i̱ gini mibe. I̱naga waitigi karume ibalu i̱ yani nakaore í̠na abale ibalu i̱ gini mibe.
PSA 69:19 Agali bu karume i̱ mege bialu lo guralu karu í̠ mandabide. Tigua i̱ mo taga halu mo yo hondo wahalu ti ge waraha heledagoni í̠ de hendedegoni. I̱naga waitigi bibahende karu í̠ de handaiore ho kegoni.
PSA 69:20 Tigua i̱ mege biyago mitangi bialu hewaria i̱naga miniha genda gibi halu i̱naga gubaliniore tumbudu bidagoni. Hongo mbira hole ndo aiore hongo pirilipe haiho kogoni. Ai i̱ darahe mbiraorebi nde holebira lo manda biwaria mbira naholeoreya. I̱naga mini mo dungulo dai bulene bi lolene mbira holebirabe toba hewaria mbiraoreorebi mbira naholeoreyane handaru.
PSA 69:21 I̱ tomo garibilo hewaria tomo kaubi tara mbira na lalu ngiya. Iba noaho harugola waini iba ko kaubi na lalu hambu ngiya.
PSA 69:22 Ani biyago ti turu halu tomo timbuni dawa payabu nalu bedaria tini ogoningi homai nahara. Turu ogoriani hairi halu tomo loma bini ngaru narolo manda bidaria bibahende homa hilai nahara.
PSA 69:23 Uruni bibahende arumaha luluyu helo ti bibahendenaga de mo ndibulai habe. Ti bibahende ere pode ulahe helo tinaga erene kuni mo gedaore haabo habe.
PSA 69:24 Í̠na tihondo keba timbuniore halu ti mini wilo mana halu mbira labe. Í̠naga keba holeneme ti bo ereba hai helabe.
PSA 69:25 Ti balai anda karuha mbiraorebi mbira yu waheloleni. Bibahende bo mburi labe. Balai andaru ti haradago bame dabulu ngelabe.
PSA 69:26 Agali maru ti ala ko biyagola í̠na ti pani mini hayaruni ai agali ko biaga karume agali o biaruni lone áyu mo tandaga halu ka. Ani bialu agali maru ala ko biyagola í̠na ti pani mialu tinginini motudu wilarigo agali biaruni áyu agali ko biaga karu tigua lone mege bialu mo tandaga halu ka.
PSA 69:27 Agali ko biaga uruni tigua ko biraru bibahende í̠na baya hangu de hondo howa ilu wigi bibe. Ko biaga uruni mbiraligo í̠naga waneigini pele miniyi karuhayagi anda ibulani.
PSA 69:28 Ko biaga uruni tinaga mini haabo holenenaga mbugani gilibu wulani domo wahabe. Í̠naga wali agali mini tigabiwi karunaga mini gilibu ngegoria ko biaga uruninaga miniore mbira mbuga ogoriani gilibu wulani.
PSA 69:29 Ai i̱ genda timbuniore yuwa tandaga nalu kogoni. Ngode Datagaliwabe-o í̠na i̱ gini mialu lone mo heyu helabe.
PSA 69:30 I̱na iba gana mbira lalu Ngode Datagaliwabenaga mini mo yaraga holebero. I̱na ibuhondo ka̱i̱ lalu ibu timbuni daligaore gibi ogobi ka lalu maru lamulebero.
PSA 69:31 Ogonidagua berogo hondowa Anduane Homogo ibu turuore holebira. Nogo bulumaga dewaru bo lomabu merogo hondowa turu hagadagua ndo ibugua turu timbuniore holebira. Bulumaga wangabe habaheore timbunigo bo lomabu mialu delaruyaguabi hondowa ibugua turu emene holebirago o larogodaguaore biruyagua turu timbuniore holebira.
PSA 69:32 Wali agali gendayu karume ogonidagua berogo hondowa ti turu holebira. Wali agali Ngode Datagaliwabe dunini kago mitangi bialu lotu laga karu ti turu halu miniha elahe holebira.
PSA 69:33 Anduane Homogo ibugua wali agali mbirale buru pale karume ibuhondo bi larago hale halu biamogo biaga ka. Ibugua ibunaga waneigini garabaya andaha karubi embeda nahaga ka.
PSA 69:34 Hari daligabi dindibi iba solowarabi mbirale iba solowaraha bedarubi tí bibahendeme Ngode Datagaliwabenaga mini mo yaraga hai halimu.
PSA 69:35 Ngode Datagaliwabehanda ibunaga Yarusaleme wali agali pele mialu Yudanaga tano mo ko hene ngaru lone bia aribia holebiragonaga tigua ibunaga mini mo yaraga holene nga. Ibunaga wali agali ti turu halu tano odaruniha ho halu dindi ogoni ti karulalu tinagaore holebira.
PSA 69:36 Ibunaga biabe biaga karunaga waneigini aguane mani hararume dindi ogoni karulolebira. Wali agali ibu gubalini heneneore haga karume dindi ogoni karulowa haabo holebira.
PSA 70:1 Ngode Datagaliwabe-o ainde i̱ore pele ngibe. Anduane Homogo-o í̠na áyu ogoni i̱ biamogo bule íbu.
PSA 70:2 Agali marume i̱ homelo bo wahole karu tiore taga halu pelo í̠na ti bope halu mo luluya habe. Agali marume i̱ genda yu kogonaga turuho karu í̠na ti taliai halu tinaga mini bope halu mo dindiha ho helabe.
PSA 70:3 Agali i̱ mege bima ibaga bialu karuni mana tinime bialu karu nagalone bialu harimada lowa mogolo hendelo í̠na ti mo taga habe.
PSA 70:4 Wali agali í̠ keria ibaga karu ti dege turubi howa í̠niha mini hanaho helo. Wali agali í̠nime pele mirigonaga turu haga karu uruni tigua bibahendengi laabo halu lalu, Ngode Datagaliwabe ibu duniniore ka, lalu helo.
PSA 70:5 Ngode Datagaliwabe-o i̱ninaga hongo nakarulape kogonigo i̱ koria abale ibabe. I̱naga Anduane Homogobi Pele Ngiagabi í̠niore kego i̱ biamogo bule emene handayaha nabi abaleore ibabe.
PSA 71:1 Anduane Homogo-o i̱ í̠la mandagi haabo kogola waitigi karume i̱ mo ko habe nahe ko. Tigua i̱ bope halu wayali helo yupe nahabe.
PSA 71:2 Í̠ tigabiore kegonigo i̱ waitigirunaga giha koria pele ngialu haru dai bibe. I̱na bi larogo hale halu i̱ pele ngibe.
PSA 71:3 I̱naga wai pabe hongohe alebi anda hongohe alebi í̠ habe. I̱ ibida pialu í̠ha dege ha do hole eberogola handayaho habe. Í̠nime dege i̱ baya hangu handayaho kegola i̱ bayale holebero.
PSA 71:4 I̱naga Ngode Datagaliwabe-o agali mini kowi karunaga giha koria i̱ haru dai bibe. Agali hongoheore tara howa mana koorene ko ngago biaga karunaga giha kogola pele ngibe.
PSA 71:5 Anduane Homogo Bibahende Haru Hame Ho Haga-o i̱ í̠ha mini dunubia ho kogoni. I̱na igiri daliaheni howa í̠hondo mini mbiraore wu henego kogoni.
PSA 71:6 Bibahendengi i̱na í̠ha hanaho harugo kogoni. I̱ ai̱yahanda taba hanayangi howa í̠na i̱ handayaho haabo harigoni. Ani harigonaga i̱na í̠naga mini yaraga halu haabo holebero.
PSA 71:7 Wali agali bu hearu dewalime i̱ de hondowabi í̠na i̱hondo biriru hondowabi í̠na i̱ hongo howaore handayaho kagonida lomanda biai ho ka.
PSA 71:8 Horo bibahendengi i̱na wali agali bu karu hendelo í̠naga mini yaraga halu í̠ mini leneore kegoni latagi halu haabo haruli.
PSA 71:9 Áyu i̱ agali waheore howa hongo hodai bule ndo biru ngogo í̠na i̱ erembira ngialu yu waholeni nahabe laro.
PSA 71:10 I̱ waitigi bu hearu tigua i̱ bo waholenaga mo mogobu howa ndelalu kagoni.
PSA 71:11 Tigua lalu, Ngode Datagaliwabehanda agali ogoni yu wahayadago abale minami̱ya. Ibu biamogo bulene mbira naheoredago iname abale talima pugupugu bialu minu yania hami̱ya, laga bialu kagoni.
PSA 71:12 Ngode Datagaliwabe-o i̱ hangu helalu í̠ kaundia nahabe. I̱naga Ngode Datagaliwabe-o í̠na i̱ biamogo bule abale ibabe.
PSA 71:13 Agali i̱hondo bi laedede bialu karuni í̠nime ti bope halu ereba hai helabe. Tigua i̱ mo ko hole wai hanalu kago ai tini taga helo mo ko hai halu mo luluya ho helabe.
PSA 71:14 Anigo í̠na i̱ biamogo bibelonaga í̠hondo mini dunubia ho kogoni. I̱na í̠naga mini yaragaore haabo holebero.
PSA 71:15 Í̠na mana tigabi bigi biriruni wali agali bu karu lamialu holebero. Í̠na pele ngialu haru dai biriruninaga tene i̱ manda biai nahego nde harugo lowa te ogoni horo bibahendengi tihondo lamiaabo holebero.
PSA 71:16 Anduane Homogo Ngode Datagaliwabe kego í̠ hongo timbuniore kegonaga i̱na í̠naga mini yaraga halu holebero. Í̠ni hangu mana bayale tigabiore biaga kego lalu i̱na latagi halu holebero.
PSA 71:17 Ngode Datagaliwabe-o i̱ bamba igiri emeneni hewangi í̠na i̱ lawai haabo hariligoni. Áyubi nde í̠na mbirale bayale tara tara bererunaga i̱na latagi halu haabo kogoni.
PSA 71:18 Ainde i̱ agali waheore halu i̱naga mandariru daguame be duguame haradagua biyadago Ngode Datagaliwabe-o í̠na i̱ yu wanahabe laro. I̱na wali agali mani holobadaruhondo í̠naga hongo timbuni ogobiore ka lalu lamigi buliya í̠ni i̱la haabo habe.
PSA 71:19 Ngode Datagaliwabe-o í̠na mana bayale tigabi biriruni wali agali bibahendenaga deni panigi wiai ka. Í̠na biabe hongohe timbuniore bini ngegoni ndobe. Agali dindini hene karu í̠ ale mbira nahe í̠ni hangu bolangua haiheore kegoni.
PSA 71:20 Í̠na i̱ha genda tandagabi tara tara ibilaga birigoni. Í̠nime i̱ lone mo hongo holebere lo manda bu kogoni. I̱ homaliha ngoria í̠nime i̱ lone mo heya holebere.
PSA 71:21 Í̠na i̱ mini lene winigo mo yaragaore ho ngelalu i̱naga bu miniha mo palia holebere.
PSA 71:22 I̱naga Ngode Datagaliwabe-o í̠naga mini bilinahe haabo kegonaga i̱na ngida ale balu í̠naga mini yaraga halu iba gana lolebero. Isaraele wali agalinaga Ngode Datagaliwabe baya buruguleore kego i̱na ngida ale balu í̠naga mini yaraga halu iba ganaru lalu holebero.
PSA 71:23 I̱na lalu howa turu timbuniore halu bi hongo howa ladaga holebero. Í̠na i̱ pele ngialu mo wirigonaga i̱na ne hariga hangume ndo i̱naga minimebi gubalinimebi í̠hondo iba gana lalu latagi holebero.
PSA 71:24 Agalime i̱ mo ko hole wai hanalu henego ai tini ko halu mo taga hai hayagonaga i̱na horo bibahendengi í̠naga mana bayale tigabi biaga kego lalu wali agali bu karuhondo lamiai holebero.
PSA 72:1 Ngode Datagaliwabe-o kini kagome í̠naga mana tigabi bulene ngeru bayuwa manda bilo biawai habe. Mana tigabi bulenego bayuwa manda buwa wali agalime godi lararu ibugua hale howa tigabiore dabaki bilo biawai habe. Í̠na tigabiore dabaga kedagua kini ibuguabi wali agalinaga godi larago hale halu tigabi dege dabaga helo biawai habe.
PSA 72:2 Í̠na biawai haregola ibugua mana tigabi bulene manda buwa í̠naga wali agali karu ibugua bayuwa hondo helo. Wali agali yagibano darabi karu agali hongohe karume hengedope haragola dindiha haga karuhondo mana tigabi bialu haru helo.
PSA 72:3 Wali agali tinime mbirale bigi birago bayale helobi tinaga mini dungulo haabo helobi biamogo bibe. Tigua mana tigabi hangu bigi bigi bialu haabo helo helabe.
PSA 72:4 Kini kagome wali agali yagibano darabi karunaga genda yu karu handalu yamogo bialu yagibanorume buru pale ka aleru biamogo bialu mo milo hameore ledo. Wali agali yagibano darabi uruni hengedope haga agali ko karuni tinde kini agali ibugua warape halu hengedo mbaralo wahelo hameore ledo.
PSA 72:5 Ni dedago dalu kaore ege dedagobi dalu wá kaore í̠naga wali agali bu karume í̠ mo dunini halu mitangi bialu lotu laabo helo hameledo.
PSA 72:6 Kini ibugua mana bayale biragome dalu ibuwa mabuni tomo hengedaru damume haragola tomo bayale anda hagadagua wali agali bu karu ibunaga maname anda helo í̠na kini kago mo bayale habe.
PSA 72:7 Ibu kini kangi wali agali bu karuha mana tigabi bulene dungume halu anda helo. Ege dalu kangi mbirale bigi birago lini dalu bayale haga bilo biamogo bibe.
PSA 72:8 Kini ibugua handame howa haru holenego wali agali iba solowara biru paluyu pedaru bibahendeoreyagi howa paluyu pialu solowara ange ederayagi karu bibahende ibugua handairi holebira. Wali agali dindini paluyu pedarubi bibahende iba Yuberedisi duguaragoria howa paluyu pialu dindi wia maroha wali agali palumaro bidagoria handairi holebira.
PSA 72:9 Wali agali dindi ko ege kelekele wini haga karume kini ogonihondo bulu palialu ti kini ogoni ibu andaneha holebira. Kini ogoni ibunaga waitigi karu tinime dindini mbala puwa mo ko howa palipe holebira.
PSA 72:10 Sebenanaga kini kagomebi kini maru iba solowara biruyu mabu bilowa dindi dombeneha ngarunaga karumebi tigua kini ogonihondo mbirale debene maru ibu mo turu halu mulebira. Arebia dindinaga kini kagomebi Idiobia dindinaga kini kagomebi libugua mbirale debeneru mo mogobu yalu ibuwa kini ogoni dege mulebira.
PSA 72:11 Kini bibahendeore karume ibu wanakuiha tinaga ge duli podalu bulu paliai holebira. Hameigini tara tara dindi bibahendeni hoyu pedaru bibahendeoreme kini ogoni ibunaga biabe bia hai holebira.
PSA 72:12 Ani bulebirago irane wali agali yagibano darabi karume kini ogoni olaragola ibugua tinaga bi hale halu biamogo biagaore ka. Wali agali maru buru paleore marume namiaga hondo wahene karu kini ogoni ibunime de handalu migi biaga ka.
PSA 72:13 Kini ogoni ibugua wali agali hongo naheru mbirale nawi yagibano darabi karu daraore halu ibunime ti biamogo biaga ka. Wali agali mbirale nawi buru paleore karu ibunime ti gi miaga ka.
PSA 72:14 Maru mini kowi karume wali agali darabi urunibi karu hengedope halu mo ko hole bialu karia kini ogoni ibunime ti gini miaga ka. Kini ibugua wali agali uruni gubalini timbuniore ho kagome ti ani biamogo biaga ka.
PSA 72:15 Ani biaga kago manda buwa kini baya ogoni ibuore ha ho wiaaboore helo hameledo. Muni ngoloru Arebia tawego kini ogoni turu halu milo hameore ledo. Wali agali bu karume kini ogoninaga Ngode Datagaliwabehondo bi la helo hameledo. Kini ogoni biamogo biaabo helonaga wali agali karume habe lalu lamulebira. Ani larago hale halu Ngode Datagaliwabe ibugua kini ogonihondo bayale dege bialu ibu bayale helo biamogo bilo hameledo.
PSA 72:16 Dindi bibahende ngaruha widi balirubi tomo nema maru alebi anda hagahaga bialu dindi bare bare ngaruni nema hangume andaho namu lelo. Lebanono dindiha mbira tomo anda haga ngadagua anda heloore hameledo. Tano ngaruha wali agali dewa palu to̱ lalu bo dene ngagoria dangi anda hagahagadagua anda halu to̱lotagi helo hameledo.
PSA 72:17 Wali agali bu karume kini baya ogoninaga miniore embeda nahelo. Ibunaga mana baya biaga kini ogoni ka lalu lolenego lairi nahe honani li harini daho ngadagua wali agalime kini ogoninaga mini mo yaraga haho wiaaboore helo hameledo. Ani bialu wali agali dindi tara tarani palu ngarume Ngode Datagaliwabehondo bi lamialu, Kini biagohondo bayale dege bialu bu anda helo mo bayale hiridagua inabi nde bayale holoma̱ya mo bayale habe, lalu lamigi bilo hameledo.
PSA 72:18 Anduane Homogo Isaraele wali agalinaga Ngode Datagaliwabe kago ibunaga mini mo yaragaore halimu. Ibuni hangume mbirale bayaleore turubi o laruruni bigi biaga kagoni.
PSA 72:19 Ngode Datagaliwabe ibunaga mana bayaore gibi biaga kago ibunaga mini baya taraore ogoni mo yaraga haho wiaaboboore wilo. Ibunaga mini mo yaraga holenemebi ibunaga wá holenemebi dindi bibahendeha dungume halu to̱lotagi heloore hameledo. Henene aniore bilo bi labe.
PSA 72:20 Yasi igini Debidihanda Ngode Datagaliwabehondo bi laga binigo ai lairi ogoni.
PSA 73:1 Ngode Datagaliwabehanda Isaraele wali agalihondo bayaore gibi turubini hangu biaga kagoni. Ibugua wali agali tinaga bu habaneha mana ko mbira nawi tigabiore karuhondo baya turubiniore bigi biaga kagoni.
PSA 73:2 Ibugua ani biaga kagoyu ai i̱ore mana ko bialu pilalu penego habo laru. I̱ ge gundu lalu pilope halu mini mbiraore wu harugoni hadogoea lowa yu wahalu tagira pobehe haru.
PSA 73:3 Ani harudagoni irane i̱na handalu hewaria wali agali mini kowi hearu tigua mbirale bigi biyaru bayale haga bialu ti homogo hama piyago hondowa ani haru. Tigua biyago handarugola tinaga wiago degeni i̱naga miniha i̱ nayido agini henge lolenego hongohe tagira ibiya. Ani biyagome i̱ mini mbiraore wu harugoni yu wahalu tagira pobehe haru.
PSA 73:4 Ani handalu hewariabi wali agali ko biaga uruni ti warago bolenebi tandaga nolenebi mbira nahende tinaga tinginibi bayaore hongohe hearia handaru.
PSA 73:5 Wali agali maru karume tandaga nalu kadagua wali agali ko biaga uruni ti kagoria tandaga nane kane handaga biruli. Wali agali maru kagoria genda bulene tara tara íbu wigi biagadagua wali agali ko biaga uruni ti kagoria naíbu wiraya.
PSA 73:6 Ti genda mbira nahende howa mine timbuni halu tinaga tingini ganini wialu balagala hama ibaga biaga ka. Ani bialu tigua wali agali maru karu bame irane nawinini motudu wini balu mo ko haga ka.
PSA 73:7 Tinaga bu miniha mana ko ngubi tara tara buleneru hangu wai hanalu tinaga bu habaneha ko buleneme to̱lotagihe ka.
PSA 73:8 Tigua wali agali maru karu mege bialu hondo oba halu bi ko tara tara biaga ka. Tigua mine gibiore halu wali agali maru karu hengedope halu mo tandaga holenego agua habehedabe hondole hariga hai bialu haga ka.
PSA 73:9 Ani bialu tigua Ngode Datagaliwabe dahuliya andaga kago lalubi lo guralu haga ka. Tininaga mini mo yaraga halu tigua hame ledadagua hangu wali agali marume bilo bidaba lalu hongo howa lamiaga ka.
PSA 73:10 Anidagua lamiragola nde Ngode Datagaliwabenaga wali agali karumebi heba mini kowi urunime bi larago hale halu turu howa yu tiga biaga ka.
PSA 73:11 Agali ko urunime bi urudagua laga ka. Iname mbirale bigi beremaruni Ngode Datagaliwabe ibu manda nabulebira. Ngode Datagaliwabe Daligaorene Daliga kago ibugua iname beremarubi laramarubi goarialu handa walia holenego hariga nawiore laga ka.
PSA 73:12 Wali agali mini kowi karu tigua mana urunibi bigi biaga ka. Tinaga mbirale dewa bu payabu wia ngagoyu uruni ngelowa dege maru lone mo te dege bule hai bialu kagoni.
PSA 73:13 Ko biaga uruni ti ani bialu kagodago ai i̱ mana ko mbira nabiore i̱nime i̱ni mini haru halu ko nabi tigabi harugoni o kogoni. Ai ti ko biyadagua i̱ nde bua nale hogoralebu harudagoni nde irane nawini aginaga haruyabe.
PSA 73:14 Ngode Datagaliwabe-o í̠na mbiraga horombebi i̱ tandaga dege ngiaho wialu egerebagi bibahendengi í̠na i̱ minu baho ngegoni irane aginagabe.
PSA 73:15 Wali agali mini kowi biaru tigua layadagua i̱na mbira lenedale i̱na í̠naga wali agalime lolenedagua ndo ledole.
PSA 73:16 Ko biaga uruni tigua mbirale bigi biragonaga teneorego agidabe hondole lowa handalu hewaria i̱na handa walia habe nahe erekuibioreyane handaru.
PSA 73:17 Mitangi bialu tenego minime daba dege bialu howa handa walia nahe henego maniore Ngode Datagaliwabe í̠naga andaha anda pirugola tenego handa walia haru. Í̠naga andaha anda pirugola i̱naga mini biagoni wá layagola mbirale bayuwa manda bibehe haru. Wali agali ko biaga uruni tibi nde mani ogobini tagira polobada lalubi mitangi tagira íbu dege biya.
PSA 73:18 Ngode Datagaliwabe í̠na wali agali mini kowi uruni ti hariga gindigunduleore ngarunaga pelo pelolebere. Hariga gindigundule uruninaga pialu karia ge kundu lowa mo paraho pilope halu homo tongolo milolebere.
PSA 73:19 Ti abaleore homo tongolo mu daga holebira. Agali homaradagua ndo mo koore howa homolebira.
PSA 73:20 Anduane Homogo-o ko biaga uruni ti bame mbiraga emaga andaha mbaria dange harigi yu haganedagua yu kago egerebagi gao laragola ereba haganedagua yu karu ereba hai holebira.
PSA 73:21 I̱naga miniha tandaga bialu tinibi toga layagola
PSA 73:22 i̱ bu habaneha keba dege dindi halu nogo gabua mini nawi hagadagua howa í̠ mitangi bulene ereba halu i̱na mana biruru í̠ deni ogonibi bialu harugoni.
PSA 73:23 Ani bialu howa dege i̱na Ngode Datagaliwabe í̠ yu wanahe í̠ hegoha kaware haparaho harugola í̠na nde i̱naga gini yaniho hariligoni.
PSA 73:24 Í̠na i̱ aguaore habe lalu í̠naga bi mana bayaoreru langialu mo tiga bialu kegoni. Ani mo tiga bialu howa i̱ hamaro berongi nde í̠na i̱hondo turu halu habiya íbu lole kegoni.
PSA 73:25 I̱ de handayaho haga dahuliya andagani mende ai kabe. Mendeali nahe Ngode Datagaliwabe í̠ hangu kegoni. Í̠ hangu kego manda buwa i̱na í̠ gubalini timbuniore ho kogoni. Mbirale dindini bu payabu ngaru gubalini holene agi ngabe. I̱na í̠ore gubaliniho kogoni.
PSA 73:26 I̱naga minibi tinginibi hongo nahe gedaore hayaguabi Ngode Datagaliwabe í̠ i̱naga hongo holene tene kegome i̱ karulapeore haabo holebero.
PSA 73:27 Ngode Datagaliwabe í̠ yu wahalu piaga karu ti pu erebaho wahalu homolebira. Wali agali ala í̠hondo mini mbiraore wuwa í̠ talima ibaga howa áyu í̠ erembira ngialu tagira pu karu heneneore pani mialu ereba hai helolebere.
PSA 73:28 Uruni ani buleberegoyu i̱ dege Ngode Datagaliwabe í̠ kegoha hapara ho kogome bayaore turubi i̱ hoale ngagoria kogoni. Anduane Homogo Bibahende Haru Haame Ho Haga-o i̱naga pabe tigila í̠ni kegome kogoni howa mbirale í̠na bigi biriru agua biri lalu latagi hai holebero.
PSA 74:1 Ngode Datagaliwabe-o í̠na inahondo erembira ngialu kego irane agibe. Í̠naga wali agali bu kamaruhondo keba ho haabo holeberebe.
PSA 74:2 Í̠na í̠naga wali agali bu kamaru mitangi bibe. Bambaore howa í̠na í̠ninaga wali agaliore ina holoma̱ya dabo helarigoni. Í̠nime ina haru dai birigome í̠naga wali agaliore kamagoni ndobe. Hari Saiono í̠ni hene biago mitangi bibe.
PSA 74:3 Ina waitigi bu hearume í̠naga anda hayago mo ko hai hayagoni. Mbirale mo ko hayadaruni í̠ni hondole ibabe.
PSA 74:4 Í̠la waitigi biarume í̠naga anda í̠ ina baba lola haga biagoha howa wai bi dalimu lalu mambolo balu mbirale wiaruni mebia haya. Í̠naga mbirale wiruni mo batagi halu tininaga mbirale wiaru wia aribia ka.
PSA 74:5 Agalime irabuha ayume ira dibu paya biagadagua tigua í̠naga andaha ani biyagoni.
PSA 74:6 Ira pelo mbaraleni giligili bialu kau wuwa anda ogoniha mo yaribiaho helaga bini hearuni waitigi biaru tigua ayume diba hamame bo giala bigi biya.
PSA 74:7 Tigua í̠naga anda biago giala baga bialu irame heda haya. Dindi andabi í̠ni holene lomabia ho wini biago tigua mebia hai haya.
PSA 74:8 Urunime ina bopeore holene mitangi bialu anidagua biya. Ina dindiha Ngode Datagaliwabe mitangi bialu lotu lolenaga loma biahene bibahende hearu anidagua biya.
PSA 74:9 Iname í̠ mitangi bulenaga manane waliaho wini biaru bibahende mo wahai haya. Í̠naga bi mana latagi haga agali mbira áyu nahe kamagoni ndobe. Ina ogonibi dege kamaore genda uruni angi ereba holobadabe ina kamarume manda bibe nahe kamagoni ndobe.
PSA 74:10 Ngode Datagaliwabe-o waitigi uruni tigua í̠ hondo oba halu lu agua holobadabe. Tigua í̠naga mini lo mege bialu bi ko lalu haabo holebirabe.
PSA 74:11 Í̠na ina biamogo nabi kego irane agibe. Í̠ bame bira dege bidego agibe.
PSA 74:12 Anigo Ngode Datagaliwabe-o bambaore howa í̠ inanaga kini henego haabo kegoni. Í̠na pele ngiaabo harigola ina waime ba nabi harimagoni.
PSA 74:13 Í̠ninaga hongo timbuni gibihegome iba solowara timbuni bereagoha hanuni ina poloma̱yanaga iba bira migimigi bilarigoni. Iyibi agali wena timbuni solowaraha biraraligobi hearia bo wahai hari.
PSA 74:14 Ani bialu í̠na abagua ale timbuni mini Lebiadananaga haguaneru bo tagadaga birigoni. Ibunaga tingini dindi ko iba dalu naibaga wiagoha nogo gabua hearu nelo mirigoni.
PSA 74:15 Í̠na iba dindiha howa ibilarigola dugualu pugu biya. Iba timbuni pialu hearu hundu tegelope helaga birigoni.
PSA 74:16 Í̠na mbiraga horombela tu wialu ni egela hari daligaha helaga biriya.
PSA 74:17 Í̠na iba dindila tubari ngelalu bigi biriyagoni. Mali bibahendenaga gaea bulene horobi dalu ibulene horobi tuwu ngelariyagoni.
PSA 74:18 Anduane Homogo-o í̠na ani birigola í̠la waitigi bu karume í̠ hondo oba halu karuni mitangi bibe. Tini mini nawi kariane tigua mitangi bialu í̠ kego bame degeda lomanda bialu mege biaga ka.
PSA 74:19 Í̠naga wali agaliru hongo nahe bu kamagonigo waitigi bu karume ina bope halu mo ko holigo í̠na ina yu wa nahabe. Waitigi karume í̠naga wali agali kamaru mo ko halu kago í̠na erembira nangi ina mitangibu haabo habe laro.
PSA 74:20 Inanaga dindi lenelene ngamaru bibahendeha waitigime wai mo ko howaore biaga kago manda bialu í̠na habo nalolene bi ina baba lo wirigoni manda bibe.
PSA 74:21 Agali ko karume wali agali hongo nahe bo hengedene karu í̠na ti yu wanahabe. Wali agali yagibano burupale bu karume í̠naga mini mo yaraga halu helo í̠nime ti biamogo bigi bibe.
PSA 74:22 Ngode Datagaliwabe-o í̠nime abale ibalu waitigi karuhondo bi hongo howa labe. Agali ko minehe bu karume í̠ mege bialu hondo oba haabo haga kago mitangi bibe.
PSA 74:23 Í̠ waitigi bu karume bi ko hongo howa lalu í̠ mege bialu kagoni. Tigua ga̱ lama ibaga bialu haabo haga kago Ngode Datagaliwabe-o tigua ani bialu karu hondo donge nahabe.
PSA 75:1 Ngode Datagaliwabe-o iname í̠hondo ka̱i̱ lalu kama. Í̠hondoore iname ka̱i̱ laabo halu kamagoni. Iname í̠ mini leneore kego latagi halu mbirale bayale tara tara í̠na biriru te lalu kamagoni.
PSA 75:2 Ngode Datagaliwabehanda lalu, Godi lolene horo mbira daba bagiho ngeledo. I̱na godi larogo tigabiore lalu wali agali ta nabihondo ogobi dege dege laruli.
PSA 75:3 Wali agalibi nogo tara tarabi dindini bu karuni bibahende gi hai howa duru layaguabi dindibi dumbirumbi bialu ema biyaguabi i̱na dindinaga gene dunini karu yania ho kogola hongohe wiaabo holebira.
PSA 75:4 I̱na wali agali mana ko biaga hearuhondo, Tíore mine nahe halimu, lalu wali agali balagala haga hearuhondo, Tíninaga mini yaraga nahe halimu.
PSA 75:5 Tígua tíni mandabi tingi howa mine nahalimu, lalu laragoni.
PSA 75:6 Wali agalime bialu karu manani dabaki bule ni tagira ibiragohayagi howabi ni paliragohayagi howabi uyurahayagi howabi unurahayagi howabi ndo ibaga.
PSA 75:7 Ngode Datagaliwabe ibunimeore daba ki biaga ka. Ibugua agali mendego mo dindiha halu mendego mo yaraga haga ka.
PSA 75:8 Anduane Homogohanda ibunaga gini gabo be mbira yu haga. Gabo be ogoniha ibunaga keba holene waini iba ale biru to̱leda. Ibunime odope haragola wali agali ko biaga karume naiore haga.
PSA 75:9 I̱na horo bibahendengi Yagabanaga Ngode Datagaliwabe kagonaga mini lalu howa ibunaga mini yaraga halu iba gana lalu haabo holebero.
PSA 75:10 Ibugua wali agali ko biaga karunaga hongo bo ereba halu wali agali tigabi karunaga hongo holene ibugua mo tago halu timbuniore helolebira.
PSA 76:1 Yuda dindiha karu tigua Ngode Datagaliwabe ibu kaore lalu manda biai ho ka. Isaraele dindiha karubi tigua ibu mini leneore ka lalu mo yaraga haga ka.
PSA 76:2 Ibunaga anda Yarusalemeha ka. Ibu Hari Saiono kagoha haabo haga kagoni.
PSA 76:3 Ibu ogoniha howa ibugua waitigirunaga danda timuru bo gingirulo wahaya. Yandarerubi humbibi wai biagane ale dameneru bibahendeore ibugua bo gingirulo wahai haya.
PSA 76:4 Ngode Datagaliwabe-o í̠ wá holene taraore kegoni. Í̠ mini lene howa kini duniniore kegoni. Í̠ daligaore howa hari mini lene timbuni wedaru dindiha lowa í̠ bolanguahe daligaore kegoni. Hari uruniha howa í̠na waitigi baba wai bialu wayali halu dai bu kegoni.
PSA 76:5 Tigua ti baba wai bialu wayali hayarume ami agali hongohe hearunaga wai biagane mbirale karulo hayaru yu wahai hayiya. Ani bialu ti homaiore hayiya. Tinaga hongobi wai bulenaga mugube yu hayarubi bameore habane nabulene haya.
PSA 76:6 Yagabanaga Ngode Datagaliwabe-o í̠na tihondo bi hongo howa larigola tinaga nogo hosibi agali nogo hosini berearubi ti bibahende homai halu tingini dindini wima piyiya.
PSA 76:7 Anigo Ngode Datagaliwabe-o ina bibahende í̠hondo giore haga bu kamaruni ndobe. Í̠ keba ho kegola mbirali ai ibugua í̠naga deni íbu holobadabe. Mbirali naholebira ndobe.
PSA 76:8 Í̠ dahuliya andagaha howa wali agali ko birimi lalu latagi harigola ti bibahendeore hearume gi timbuni howa bi nale ema nabi haya.
PSA 76:9 Horo ogoningi wali agali marume mo ko hene hearu í̠na biamogo bule heyu hariya.
PSA 76:10 Agali keba timbuni haragome wali agali maru karu tigua í̠naga mini mo yaraga helo haga. Agali waiha homa nabi karume í̠ mitangi bialu lotu lolene ngadagua lalu holebira.
PSA 76:11 Tígua Anduane Homogo tínaga Ngode Datagaliwabehondo mbirale mbira mule lalu lo wirimidagua ibuhondo miaore bilimu. Wali agali tara tara dindi kawareni kamiru tíguabi ibuhondo mbiraleru turu halu milimu. Ngode Datagaliwabehanda wali agali ibuhondo gi helo mo gi haga ka.
PSA 76:12 Ibugua kini mine haga karu mo dindiha halu kini maru dindi tara tarani karubi ibugua ti mo gi haga ka.
PSA 77:1 I̱na Ngode Datagaliwabehondo hongo howa olalu kogoni. I̱na ibuhondo bi larogo hale habe lalu olalu kogoni.
PSA 77:2 Genda anda ibirangi i̱na Anduane Homogohondo bi laruli. Mbiraga bibahendengi i̱na gi yaraga halu Anduane Homogohondo bi laruligoyu i̱ha mo palia holene nawi dege kogoni.
PSA 77:3 I̱na Ngode Datagaliwabe mitangi biaabo halu koria i̱naga bu miniha dugu bialu haruli. I̱na mitangitangi bialu mini hurula bialu kogola i̱naga miniha genda dege dindi ho haruli.
PSA 77:4 Ibugua i̱ palia hondo nahe mo yangayangabu helaga kagoni. I̱naga bu miniha genda yu kogome bi labe naheore kogoni.
PSA 77:5 Ainde i̱ni bamba bayale hama ibiniru mitangibu dai bialu haruli. Mali ala bolangua halu peneru mitangiore bialu haruli.
PSA 77:6 Mbiraga paluwa i̱na mitangitangi dege biruli. I̱naga miniha mini hurula bu howa i̱nihondo bi ogobi laruli,
PSA 77:7 Anduane Homogohanda inahondo erembira ngialu haabo holebiradabe. Inahondo turu lone naholobadabe.
PSA 77:8 Ibugua ina dara howa gubalini haraligo hairi áyu kagonidabe. Ibugua buleore lalu bi lo wiyaru habo layadabe.
PSA 77:9 Ngode Datagaliwabehanda ina dara howa biamogo bulene embeda hayabe tobaheda. Ibunaga dara holene winigo ai keba holene wia aribia hayadabe, lo mitangi bu harugoni.
PSA 77:10 I̱na urunidagua mitangibu howa lalu, Ngode Datagaliwabe Daligaorene Daliga kago ibugua ina áyu pele ngulenego manga hayada. Ibu ogonibi haruada mitangi bialu i̱naga bu miniha tandaga timbuniore ho kogoni ndobe, larugoni.
PSA 77:11 Anduane Homogo-o biabe timbuni í̠na biriruni mitangibu dai bulebero. Bambaore í̠na mbirale tara nahendene ale bigi biriru mitangi budai bulebero.
PSA 77:12 Biabe bibahendeore í̠na biriru damene mitangi biaiore holebero. Í̠na biabe hongohe taraore bigi biriruni mitangi biai holebero.
PSA 77:13 Ngode Datagaliwabe-o í̠na bigi biriligo bibahende bayale tigabiore birili. Mbirale bi pupu wule dama mitangi bialu gime wabini ngaruni bibahendeore í̠ ale mbira nawiore. Í̠na uruni bolangua haihe kegoni.
PSA 77:14 Ngode Datagaliwabe-o mbirale nahendene ale agalime bibe nahe ngaru biai haga í̠ni hanguore kegoni. Bamba í̠na wali agali dindi tara tarani bu hearuhondo í̠ninaga hongo timbuni walia harigoni.
PSA 77:15 Yagaba Yosebelanaga aguanene í̠ninaga wali agali mani andaho aribia hene hearu í̠ninaga hongooreme pele mialu haru dai birigoni.
PSA 77:16 Ngode Datagaliwabe-o bamba iba berearume í̠ hondowa gi hai haya. Iba solowara timbuni berearumebi duru lalu biraya.
PSA 77:17 Beralibame iba dalu timbuniore ibira halu hari kilikulu timbuniore layuagobi hari daba migimege laga bialubi uruni bibahende biai haya.
PSA 77:18 Humbirini wai biyago dombeneha howa hari kilikulu timbuni lelarigoni. Hari daba migimege lelarigome dindi bibahendeha wá hagimbu biyagola dindi ogo mogo lalu dumbirumbi biagimbu biya.
PSA 77:19 Iba yaribu biyagoria í̠ni iba daligani pirigoni. Iba solowara timbuni bereagoha hariga bo wialu pirigoni. Í̠ penegoha ge ngane nahandabeheya.
PSA 77:20 Í̠ni haru haganeore howa bamba halu pirigola í̠naga wali agali í̠ talima ibagaya. Mosese Aronola haru haga helarigome libugua wali agaliru haru howa handayaho hayagoni.
PSA 78:1 I̱naga wali agaliru-o i̱na tíhondo bi lawai harogo tígua bayuwa hale haiore halimu. I̱na bi larogo hale dugua halu baya hangu hale halimu.
PSA 78:2 I̱na bi yobageru hangu lolebero. Mbirale nahendene ale tara tara bamba wia do ho winiru i̱na áyu garea lalu manane walia halu langulebero.
PSA 78:3 Bamba ina mamalirume te uruni inahondo langiyagola iname hale howa mandabu harima.
PSA 78:4 Iname nde bi uruni ina waneiginiruhondo lamia nabi ya do holene nakarulapeore. Anduane Homogonaga hongo timbuniorehe kagonagabi biabe hongohe damene binigonagabi agalime nabiaga ale bigi binigonagabi iname ina waneigini aguanene mani holebiraru lamuleberema.
PSA 78:5 Ibugua ibunaga bi mana lowinigo Isaraele wali agaliruhondo lamigi bini. Ibunaga mana bulene winigo Yagaba aguanenerume taluwa bialu helo lamini. Ibugua bamba ina mamaliruhondo lalu, Tígua tínaga waneiginihondo i̱naga bi mana ogoni lawai halimu, lalu lamini.
PSA 78:6 Tí waneigini aguaneru mani holobadarume hale halu lo manda bilo. Tigua ti waneiginiru maniore hama polobadaru lawai hama puabo haragola ti manda biai helobi lawai halimu, lene.
PSA 78:7 Tigua anidagua lawai hama puabo hayagua nde mani holobadaru tigua Ngode Datagaliwabehondo mini mbiraore wu halu ibugua biabe hongohe bialu henedaru embeda nahe yu haabo holebira. Yu haabo howa tigua ibunaga mana bulene ngaru taluwa bialu haabo holebira.
PSA 78:8 Tinaga mamalime ala bialu henedagua naholebira. Tinaga mamalime doga haga howa Ngode Datagaliwabenaga bi mo wahalu ibuhondo mini mbiraore hongo howa nawi halu mini bilina nahe hene.
PSA 78:9 Bamba Eberaimi hameigini tigua danda timu yandarerume wai hongo howa bule pialu hearia baya handala ibida piai hene.
PSA 78:10 Ngode Datagaliwabehanda habo nalolene bi lowinigo tigua habo lalu ibunaga bi mana bulene winirubi talialu bia nabi hene.
PSA 78:11 Ibugua tininaga deniore howa mbirale biyaru damenebi agalime nabiagane ale biyaru bibahendebi tigua embeda hai heneya.
PSA 78:12 Tinaga mamaliru Iyibi dindiha dindi emene mbira mini Soana wiagoria heagola ti de hendeaore dege Ngode Datagaliwabehanda agalime nabiagane ale dewa biniya.
PSA 78:13 Ibugua iba solowara timbuni bereago mo bira li ni bilowa Isaraele wali agaliru dombeni haru pene. Iba bira li ni biyagola iba ibuni bira amu nana bialu pabe ale hene.
PSA 78:14 Horombe ibuni hari beraliba mbiraha howa ti haru bamba halu mbiraga ibuni ira hungu mbiraha howa ti haru halu pu bamba haga biniya.
PSA 78:15 Ibugua dindi ko iba naibaga wiagoria howa ege to̱le̱ bayagola iba duguatagi helayagola wali agali ti iba ogoni nalu hene.
PSA 78:16 Ibugua ege to̱le̱ha howa iba ibilayagola iba timbuni piagagobi pupe halu piya.
PSA 78:17 Ibugua ani biyagolabi tigua Ngode Datagaliwabe kagohondo mana ko hangu bialu haabo haya. Dindi ko iba dalu naibaga wiagoha howa tigua Daligaorene Daliga kagohondo mine halu doga haabo haya.
PSA 78:18 Tigua Ngode Datagaliwabe ba handalu tomo ti hame timbuni layaru ibuhondo hongo howa ngi lalu haya.
PSA 78:19 Tigua Ngode Datagaliwabe mege bialu lalu, Ngode Datagaliwabehanda ina dindi ko ogoria kamagoha tomo dewa ngia ngulebadabe, lalu heneya.
PSA 78:20 Ibugua abale heneneore ege to̱le̱ bayagola iba bayale timbuni tagira ibilayagodago ai dindi ko ogoriabi nogo ega mberediru ngulene karulapedabe, laga bialu hene.
PSA 78:21 Tigua bi ogoni lalu heago hale howa Anduane Homogo ibu keba ho hene. Ibugua keba halu Yagaba aguane biaru bu heagoha ira hedope hene. Ani buwa ibugua keba ala hayago timbuniore ho hene.
PSA 78:22 Keba henedagoni irane tigua ibuhondo mini mbiraore nawiyagonaga ibu keba hene. Ti bayale holenaga ibuhondo ina pele ngi lalubi mini mbiraorebi nawiore hene.
PSA 78:23 Uruni biyadaruni waha lowa ibugua hari li kagohondo bi layagola hari haedene bialu henge winiya.
PSA 78:24 Ibugua hariha howa tomo ibira helayagola tomo ogoni dahuliya andaga tawe mini mena ti nelo mini.
PSA 78:25 Tigua dahuliyalinaga tomo ogoni mialu nene. Ngode Datagaliwabehanda tihondo tomo dewaore miyagola ti nalu no karula pene.
PSA 78:26 Mani ibugua puyabu hongohe ni tagira ibiragohayagi howa puloyu ibilene. Ibunaga hongome dege puyabu dindi abene unurahayagi howa puloyu ibilene.
PSA 78:27 Ibugua ega dewaore be abalu dugupe haradagua bialu iba angeni iba mu wiradagua bialu ti heagoria odo ibira ibira bilene.
PSA 78:28 Ngode Datagaliwabehanda ega uruni ti heagoria ibira helalu ti balai anda bu hemigoha manda manda tagira wiaru bibahendeha biru mabu bilene.
PSA 78:29 Wali agali tigua tomo uruni nalu no karula pene. Mbirale uruni ngi lalu wali agalime dugu bialu hayaruni Ngode Datagaliwabehanda mini.
PSA 78:30 Tigua tomo uruni na nalu hayagoyu tinaga noa holene hame ereba nahe tomo na dege bialu heaore
PSA 78:31 Ngode Datagaliwabehanda tihondo keba timbuniore ho howa Isaraeleali miniwi hongohe bu hearubi igiri daliahe hearubi bibahende bo wahaiore hene.
PSA 78:32 Ngode Datagaliwabehanda tihondo agalime nabiagane ale uruni biyago hondowa wali agali bu hearume mana ko dege bialu haya. Tigua ibuhondo mini mbiraore nawi dege haya.
PSA 78:33 Tigua ani bialu heagola ibugua ti abaleore ne harigaha howa buhe̱ latagi haradagua bialu bo wahaiore hene. Ibugua ti heagoria ko gibi anda ibilayagome ti dindini holene winigo abaleore mo ereba ho wahai hene.
PSA 78:34 Ngode Datagaliwabehanda maru ani bo wahai hayago de hondowa maru hearume ibu mitangibu dai bialu tinaga mini beregedalu mini mbiraore wiai halu ibuhondo bi hongo howaore lalu hene.
PSA 78:35 Ngode Datagaliwabe ibunime ti haru hagaore howa tigua ibu tinaga humbi ale ka lo mandabu hene. Ibu Daligaorene Daliga kago ibugua ti biamogo biagaore kalo manda bu hai hene.
PSA 78:36 Tigua ani manda biyagoyu tinaga ne harigaha howa ibuhondo bi henene ndo bame bi degeme lalu hene.
PSA 78:37 Tinaga bu miniha ibula mini hana haga nabi hene. Tigua ibunaga habo nalolene bi lo wiyaru pugualu ha dege bini.
PSA 78:38 Ani biyago bialu helowa Ngode Datagaliwabe ibugua ti dara howa tinaga ko wiago domo wahai halu ti bo wa nahe helene. Tigua ko biyago hondowa ibugua keba ho donge howa ibunaga mini haru haga bialu wahaga bini.
PSA 78:39 Ibugua mitangi budai bialu ti wali agali ha kagonigo ti bame puyabu mbira abaleore ibalu pu bolangua hagagobi dege kagonidalo mitangi bini.
PSA 78:40 Horo bibahendengi tigua dindi ko iba dalu naibaga wiagoha howa ibunaga bi mo wahalu ti doga haga hene. Tigua halu dewaore ibu mo genda haga bialu hene.
PSA 78:41 Tigua Ngode Datagaliwabe ba handalu haabo haga hene. Isaraelealinaga Ngode Datagaliwabe mini tigabi baya burugule kago tigua mo genda haga bini.
PSA 78:42 Tigua ibu hongo gibihe kago embeda halu ibugua ti waitigi giha hearia haru dai biyagobi mitangi nabi hene.
PSA 78:43 Ogoningi ibugua Iyibi dindiha dindi emene mini Soana wiagoria agalime nabiagane ale dewaore bialu hayagobi ti embeda hene.
PSA 78:44 Iba bibahende peago ibugua mo darama bume hai helayagola Iyibi wali agali hearume iba nolene nawini.
PSA 78:45 Bunguna tawalina dewa ibilayarume ti hayaga bini. Yago dewabi ibilayagola yago biarume tinaga mabuha tomo hengearu mo ko hai hene.
PSA 78:46 Ngode Datagaliwabehanda pagaya ale tara dewa ti hearia ibilayagola Iyibi wali agalirunaga mabuni tomo hengearu damene nai hene.
PSA 78:47 Ibugua dalu dindiguni timbuni ibilayagome tinaga pu mbira lini daga mini gerebi hearu bibahende bo gindulo wahaiore helene. Ira poge ale bu hearubi kewaro ibirahayagome bo gilo wahai helene.
PSA 78:48 Dalu dindiguni timbuni ibilayagome tinaga nogo bulumaga bo homelalu hari daba ibilalu nogo sibi damenerubi bo wahaiore helene.
PSA 78:49 Ibugua Iyibi wali agali biaruhondo keba timbuniore ha ho wiaabo halu dahuliyalirume ti mo ko holene tara tara ibilaga bini.
PSA 78:50 Ibugua ibunaga keba holene wanahe tiha warago timbuni mbira ibilayagome wali agali homa dege dindi hene.
PSA 78:51 Iyibi wali agalinaga igiri wahene damene bibahende bu hearu ibugua homelo bo wahai hene.
PSA 78:52 Mani ibugua ibuni nogo sibi haru haga ale howa ibunaga wali agali biaru haru tagira pialu dindi ko iba dalu naibaga wiagoha howa ibuni bamba halu hariga walia hama pene.
PSA 78:53 Ibugua ti haru halu piyagola tiha gi holene mbira nawi howa bayaleore hene. Ti waitigi biaru dege iba solowarame bo nai helene.
PSA 78:54 Ibugua ti ibunaga dindi loma biaho wiagoha haru halu ibini. Dindi ogoni dindi hari ibuninaga hongomeore mo wini.
PSA 78:55 Ibunaga wali agaliru haru ibalu howa wali agali tara tara dindi ogoriani hene bu hearu bo talia togolene. Dindi ogoni Isaraele hameigini bibahendehondo tu wa tahalu ibugua dindi andabi ti helo mo migi bini.
PSA 78:56 Ibugua ogoni biai hayagola Isaraele wali agali tigua Ngode Datagaliwabe Daligaorene Daliga kagohondo doga howa ibu ba hendene. Tigua ibunaga mana bulene winigo talia nabi dege hene.
PSA 78:57 Tinaga mamalirume bamba bialu henedagua tiguabi nde doga howa ibunaga bi mo wahaga bialu hene. Wali agali uruni ti tiga nabiore timu yole ngaligobi hene.
PSA 78:58 Dama mitangi bialu mbirale gime wabini wiaruhondo bi pupu wulenaga anda bu helaga biyagome Ngode Datagaliwabe mo keba haya. Tigua dama mitangi bialu mbirale bi pupu wulenaga gime wabigi biyagome Ngode Datagaliwabe mo keba ha haya.
PSA 78:59 Ngode Datagaliwabehanda tigua mana bialu hearu hondowa ibu keba timbuniore ho howa Isaraele wali agali erembira mialu wahene.
PSA 78:60 Ibugua ibunaga Balai Anda Silo tanoni heagobi wahene. Anda ogoniha howa ibu wali agali dege dombeneha haabo haga henego wa dege hene.
PSA 78:61 Ina baba waitigi hearume ibunaga Habo Nalolene Bi lo winigonaga Mbogoyi biago mo yalu pelo wahene. Mbogoyi ogoriani howa ibunaga hongo holenebi wá holenebi timbuniore tihondo walia haga wini.
PSA 78:62 Ibunaga wali agaliru baba keba timbuniho howa ti waitigime ibalu bo wahai helo yupe ho hene.
PSA 78:63 Igiri daliahe hearu waime bo wahai hayagola wandari mabuage berearu ti dabu bulene igiri mbira nahene.
PSA 78:64 Agali loma binigo mo miaga hearu bo wahai hayagola ti oneme dara howa dugu bialu birulene henge nawini.
PSA 78:65 Aniore biagola Anduane Homogo ibu agali dagiani palene heyaradagua bialu agali hongoheme waini iba dewa nalu bi hongo howa lagadagua lalu biya.
PSA 78:66 Ibugua waitigi hearu baba wai bialu ti bo talia dai bini. Ti bopeore hayagola tigua taga timbuni halu wai lone bibe nahe hene.
PSA 78:67 Yosebe aguanene bu hearu erembira mialu ibugua Eberaimi hameigini hearu ariabi mbira dabo hela nabi wahene.
PSA 78:68 Ti wahalu ibugua Yuda hameigini aria dabo helalu hari ibuniore gubalini ho haga Saiono biagobi dabene.
PSA 78:69 Hari hombene ogoriani ibugua ibunaga anda Dahuliya andagaha kagobi bini. Ibunaga anda ogoni hongohe dindi ogo hongohe ngagobi haabo helo ibugua bu helene.
PSA 78:70 Ngode Datagaliwabehanda ibunaga biabe biahaga helo Debidi dabaya. Ibugua Debidi nogo sibiru haru haga hearia dabo helayiya.
PSA 78:71 Ngode Datagaliwabehanda Debidi ibu Isaraele wali agaliru haru haga kini helo dabo helayiya.
PSA 78:72 Debidi ibu mini tigabi howa wali agaliru haru haga hene. Ibugua haru holene mugube yu howa ti baya hangu haru halu handayaho hayiya.
PSA 79:1 Ngode Datagaliwabe-o wali agali tara tara í̠ mitangi nabiaga karume í̠naga dindi wai bialu karulole íbu ka. Tigua anda í̠nagaore helo loma biaho helarigoha anda puwa mebia haya. Yarusalemebi mo ko halu bo gialo wahai haya.
PSA 79:2 Tigua í̠naga wali agali bo wahalu ega bodo hariawe aleme nelo tinaga tingini ngelalu pene. Í̠naga biabe biahaga wali agali hearu bo wahai hayagola nogo gabua bu hearume tinaga tingini nalu kagoni ndobe.
PSA 79:3 Waitigi biarume í̠naga wali agali biaru bo wahayagola uruninaga darama Yarusaleme tanoha iba poradagua pialu kagoni. Homayaru mo horo holene agali mbira naheoreya.
PSA 79:4 Hameigini tara tara ina kamagoria kaware bu karume ina mege buwa hondo oba halu bi koru laga bialu ka.
PSA 79:5 Anduane Homogo í̠na inahondo keba ho haabo holeberebe. Í̠naga kebago hongohe ira hungu ale dalu hundia nabulene kebe be agua bidebe.
PSA 79:6 Hameigini tara tara í̠ mitangi bialu lotu nalagabi í̠nihondo bi nalagabi karu tihondo keba hariyagua nde karulapeda.
PSA 79:7 Wali agali uruni tigua í̠naga wali agali hearu bo wahai halu í̠naga dindi andaru mo ko halu mo labu hai haya.
PSA 79:8 Inanaga mamalirume mana ko bialu hayagonaga pani nolene winigo inahondo nguleni nangibe. Ina mini dege dindi ho kamago hondowa dara halu inanaga mini mbiraore ngamago mo hongo habe.
PSA 79:9 Ngode Datagaliwabe-o ina pele ngiaga í̠ore kegoni. Í̠ mini leneore kegome ina mitangi bialu biamogo bibe. Iname ko birimaru domo wahalu ina haru dai bibe.
PSA 79:10 Hameigini tara tara bu karume lalu, Tínaga Ngode Datagaliwabe agoha kabe, laga bialu kago irane aginaga í̠na ti ani leledebe. Hameigini tara tara uruni tigua wali agali í̠naga biabe biahaga bu hearu bo wahai halu tinaga darama piyadagua tininaga darama ani pelo í̠na tini bo waharego ina hondole hamelo kama.
PSA 79:11 Garabaya andaha bu karume dugu biaruago hale habe. Waitigi bu karume inanaga wali agali garabaya karu ti homelo bolene nga layago nahomelo í̠ninaga hongo timbuni ngegome ti haru dai bibe.
PSA 79:12 Anduane Homogo-o waitigi agali uruni tigua í̠hondo bi ko laabo hayagonaga í̠na tihondo pani ka halu miadai bibe.
PSA 79:13 Í̠na ani beregola ina nogo sibi ale howa í̠naga wali agali bu kamarume í̠hondo ka̱i̱ laabo holeberema. Inanaga waneigini aguaneneru mani hama polobadaru tiguabi í̠naga mini yaraga halu hadege bulebira.
PSA 80:1 Isaraele wali agalinaga Haru Haga-o iname bi langeremaru hale habe. Ina nogo sibi ale bu kamarunaga haru haga í̠ni kegonigo iname dugu bialu laramaru hale habe. Dahuliyali babaganehe kirali kago labo dindiha helowa í̠ni de handape howa handayaho kegoni.
PSA 80:2 Ina Eberaimi hameiginibi Beniyamini hameiginibi Manase hameiginibi bu kamaruhondo í̠ni mo walia halu í̠naga dara holene ogoni inahondo mo walia habe. I̱naga hongo holene timbuniore ngegoni mo walia halu ina bayale holoma̱ya biamogo bibe.
PSA 80:3 Ngode Datagaliwabe-o ina lone í̠ni keria haru dai bibe. Ina bayuwa holoma̱ya í̠naga dara holene walia halu ina biamogo bibe.
PSA 80:4 Anduane Homogo Ngode Datagaliwabe Hongo Haiheore-o i̱naga wali agali kamarume í̠hondo bi laramago hale howa í̠ dara nahe handa taraho kegoni dege keba haho wiaaboore hole kebe.
PSA 80:5 Dara holene ngirigo tomo ale nalu de iba ngirigo iba ale nalu kamagoni.
PSA 80:6 Hameigini tara tara ina baba mandagi handa a̱i na̱i palearume anda ibalu inanaga dindi wimago ti i̱ hole lowa garere bilo í̠na mo garere bia harigoni. Ani biyago handayagola inanaga waitigi bu hearume inanaga dongone hondo wahalu mege bialu hondo oba hayagoni.
PSA 80:7 Ani biyago Ngode Datagaliwabe Hongo Haiheore-o í̠naga dara holene walia halu ina lone haru dai bibe. Í̠na ina dara halu lone pu ereba naholoma̱ya haru daibu helabe.
PSA 80:8 Pu mbira lini daga mini gerebi mbira Iyibi dindini hearia egene dogodo yalu ibuwa maru dindi ogoriani hene hearu dugu ba tagitagi buwa gerebi lini daga pu ogoni dugu ba tagi hariru henedagoria hongo aribia harigoni.
PSA 80:9 Gerebi lini daga pu ogoni ibu bayuwa anda helonaga hama ba a̱i̱ na̱i̱ buwa hangarigoni. Hengegola pu o biagoni anda halu pini dindiha unuraore dalipe halu bayaore anda hayagoni. Pu biagonaga yuni maganeru yulume hayagola dindi bibahende namulai hayagoni.
PSA 80:10 Ibunaga maganerume hari wiaru angua hai halu ibunaga maganeme ira tamia timbuni gibi hearu angua hai hayagoni.
PSA 80:11 Gerebi lini daga pu ogoni ibunaga magane yulu yalu pialu amu iba solowara mini Medidereniana bedagoria dogolo paga hayagoni. Ani bialu hoyulo yalu pialu puni Iba Yuberedisi poragoria yulu paga hayagoni.
PSA 80:12 Bayaore ani anda hayagoyu ai gerebi lini mabu ogoninaga pabe ho mabu biago aginaga podope haribe. Pabe biagoni podope hariyagome ai wali agali ti hariga o biagoniha pume halu gerebi lini do wiaruni bame gi dege palia habehe ngagoni.
PSA 80:13 Nogo gabua bu karume geme hengedo ngagola ema bialu piaga ale karume nama aribia halu kagoni.
PSA 80:14 Ani bidago Ngode Datagaliwabe Hongo Haiheore-o ainde lone mini wiadai bialu ina darabi o bu kamagoni lone daraho dai bibe. Í̠na Dahuliya andagani kegoni howa ina kamago de handadali halu ina biamogo bule ibabe. Irane ina í̠naga pu gerebi lini daga ale í̠nime hangarigo kamagoni.
PSA 80:15 Pu mbira lini daga mini gerebi biago í̠ninaga hongome hangarigoni ina o bu kamagonigo ina pele ngule ibabe. Pu o biagoni áyu dege hongone hongo halu anda helo mo anda harigonibi kamagoni.
PSA 80:16 Inanaga waitigi hearume gerebi lini daga pu biagoni dibupe howa ira bo delalu kagoni. Tigua ani bialu kago Ngode Datagaliwabe í̠na inanaga waitigi uruni handabe manga halu bibahendeore bo mburilai habe.
PSA 80:17 Uruni ani bo mburi lalu ina í̠ninaga waneigini holoma̱ya dabene biago kamaruni ina mo anda halu mo hongo harigoni kamago ai áyu ina de hondo halu biamogoore bibe.
PSA 80:18 Í̠na ani biamogo biriyagua iname í̠ helo wahalu lone napoleore beremagoni. Ani buleberemago í̠na ina hongohe helabe. Í̠na ani heledegola iname í̠naga mini mo yaraga halu haabo holeberema.
PSA 80:19 Anduane Homogo Ngode Datagaliwabe Hongo Haiheore-o í̠na í̠ni keria ina haru dai bibe. Ina nahome yo pialu poloma̱ya ina dara halu biamogo bibe.
PSA 81:1 Ina mo hongo haga Ngode Datagaliwabe kagohondo turu howa bi dalimu lama. Yagabanaga Ngode Datagaliwabe kagonaga mini yaraga halu iba gana lami̱ya.
PSA 81:2 Irabitele kilingele lalu bayuwa bami̱ya. Ga̱wa̱ ale yugulelerubi baya hangu hibu howa mo bila hama.
PSA 81:3 Ege pigane ngabu laragolabi ege do hanuni haragolabi turu halu mandagi ngoai howa lotu lolene horo tagira ibiragonaga biguliru pu lolene nga.
PSA 81:4 Ina Isaraele wali agalime mana bulene ngago ogoni. Yagabanaga Ngode Datagaliwabe ibunime mana ogoni bulene inahondo nginigo anidagua bulene nga.
PSA 81:5 Horo mbiru Ngode Datagaliwabe ibugua Iyibiali baba wai bu piyangi mana ogoni tehinuwa ina Isaraele wali agali kamaruhondo ngiya. Mbiralime bi mbira laruago hale kogo aiwa laruabe i̱ manda nabi ko.
PSA 81:6 Bi laruagome lalu, Tínaga payani mbirale gendabi yu harimiruni i̱na mo wahai haru. Tígua erekui biabe timbuni biaga kamiru dindini ibiraho ngeladaba laru.
PSA 81:7 Tígua genda yu howa i̱ olarimingi i̱na tí biamogo birugoni. Hari kilikulu larago dombeneha howa i̱na tínaga bi larimigo hale haru. Bamba tí Meriba iba bereagoria hemingi i̱na tí ba handarugoni.
PSA 81:8 I̱naga wali agaliru-o i̱na tíhondo bi hongohe mbira langerogo hale halimu. Isaraele wali agaliru-o tígua i̱naga bi larogo hale halimulo hamelo kogoni.
PSA 81:9 Wali agali tara tara bu karunaga dama mitangi bialu mbirale gime wabini ngaru tígua talima napilimu. Mbirale uruni alehondo bi pupubi nawilimu larogoni.
PSA 81:10 Anduane Homogo tínaga Ngode Datagaliwabe i̱ni hangu kogoni. Tí Iyibi dindiha hemiria i̱nioreme haru tagira ibirugoni. Tínaga ne harigaha tomo yaanda haga buliya ai ne ha̱ladaba larugoni.
PSA 81:11 I̱na bi larugola i̱naga wali agalime hale habe manga haya. Isaraele wali agali tigua i̱na bi larugo talialu bia nabi haya.
PSA 81:12 Tigua ani bialu heagola i̱na ti mini giambe haabo hayagola helo waharu. Wali agali urunime tini hameleago ale bialu helo yupe ho waharugoni.
PSA 81:13 I̱naga wali agali bu karume i̱naga bi hale helo i̱ hameore ledo. Isaraele wali agali tigua i̱na hameledogo talialu bilo hamelo kogoni.
PSA 81:14 Tigua anidagua bidale nde i̱na ti waitigi karu abaleore bope hai kole. Ti waitigi bibahende karu baba wai bialu bopeore hai kole.
PSA 81:15 Wali agali i̱ handabe manga haga karume i̱hondo gi timbuni howa i̱naga buha ibalu bulu palialu ge duli hanga ho bedale. Tigua ko biyarunaga pani nelo mirugoni nalu haabo kale.
PSA 81:16 I̱na tíhondo ladi ale mini widi bayaleore nalu halimulo ngialu irabuha mone tara dedarunaga ibanerubi nalu halimulo ngia dege berogola tígua karulapeore nalu kamile, lalu layuane hale haru.
PSA 82:1 Dahuliya andagani dahuliyali hondo hagaru ngoai ho bedagoria Ngode Datagaliwabe ibuni duniniore howa haru ka. Ibugua dahuliyali o biarume bi lararu hale howa tinaga bi dabaki bialu lamiaga ka.
PSA 82:2 Ibugua lalu, Tígua godi dabaramiligo tigatiga ndo ke̱ howa daba ko haramiligo nahalimu. Tígua agali ko biaga karunaga laharamiligo wahalimu.
PSA 82:3 Tígua wali agali yagibano karubi waneigini ti ai̱ya abala homene karubi biamogo bialu halimu. Wali agali maru genda yu howa hako karubi hongo nahe karubi ti mitangi bialu tihondo mana bayale bialu halimu.
PSA 82:4 Wali agali uruni mbirale burupale howa ti agali ko biaga karunaga giha karia haru daibu helalimu.
PSA 82:5 Tí mini nawi howa manda nabiore bu kamigoni. Tí ko biaga howa arumaha ibagabu kamigola wali agalime mana tigabi talialu bulene ngago nabiaga ka.
PSA 82:6 Tí dahuliyali howa Daligaorene Daliga i̱ kogonaga iginiore kamigoni ndobe laro.
PSA 82:7 Tí ani kamigoyu wali agali dindini karu homagadagua dege homoleberemi. Kini waneiginiru homagadagua dege tíbi homoleberemi, lene.
PSA 82:8 Ngode Datagaliwabe-o dindi bibahendeni wali agali bu karu handameho hole í̠ abale ibabe. Wali agali hameigini tara tara padaru bibahende í̠naga dege kagoni.
PSA 83:1 Ngode Datagaliwabe-o í̠naga ne ndibulo nahabe. Í̠ore bi nale nahabe. Í̠ ema nabi nahabe.
PSA 83:2 Í̠ waitigi biarume í̠la wai bule kagoni de handa. Agali í̠ handabe manga haga karume í̠hondo doga halu kagoni.
PSA 83:3 Tigua bira do howa í̠naga wali agali mo ko holenaga ohowa ndindelalu kagoni. Í̠naga wali agali uruni í̠na handayaho haga kego mo ko hole miniha magoyu kagoni ndobe.
PSA 83:4 Tigua lalu, Isaraele wali agali bu karuni mani holobadarume abogo hene lalu manda nabilo bo wahai hami̱ya, lalu ka.
PSA 83:5 Tigua ogonidagua bulenaga mini mo mbiraore ho ka. Ti mandagiore howa í̠ bope hole kagoni.
PSA 83:6 Urunidagua bule haruaruni Idomoalirubi Isimaelealirubi Moabalirubi Hagarialirubi
PSA 83:7 Gebalailirubi Amonoalirubi Amalegealirubi Pilidialirubi Taialibi uruni bibahendeme í̠ bope hole kagoni.
PSA 83:8 Asiria wali agali tibi nde uruni baba hamagamagabu dege ka. Hameigini hongohe uruni tigua Lode aguanene Amonoalibi Moabalibi biamogo bule hamagamagabu ka.
PSA 83:9 Tigua anidagua bule kago í̠na uruni pani mialu bamba Midianalihondo biridaguabi Sisera Yabinialilahondo Iba Kisono poragoria howa biridaguabi bialu ti bo wahai habe.
PSA 83:10 Í̠na ogoningi Endoni tano howa agali bo wahai harigola tinaga tingini dindini wu togo bialu ngu biai haya.
PSA 83:11 Tinaga ami agali haru haga bu karuhondo í̠na abale agali Orebe Sebelahondo biridagua bibe. Tinaga agali haguane bu karuhondo í̠na Seba Salamunala bo waharidagua bo wahabe.
PSA 83:12 Agali uruni tigua lalu, Iname Ngode Datagaliwabenaga dindi ogo inanaga dindi dege ngelo karulami̱ya, layago bo waharigoni.
PSA 83:13 I̱naga Ngode Datagaliwabe-o agali uruni bo purogo lelalu be abalu taulotogo laradaguabi puyabume widi aeane yuniru pu lo yu purogo laradaguabi bialu bo taliatogo lelabe.
PSA 83:14 Irame irabu ngaru bo dai hagadaguabi dindi hombeneni dangi bu karu bo dagadaguabi
PSA 83:15 agali o bu karuni ti gi halu ibida purogo lelo í̠na iba dalu timbuni ibilalu puyabu hongohe ti kagoha pelo pelabe.
PSA 83:16 Anduane Homogo-o tigua í̠naga hongo hondowa taga halu í̠ni kegoha dai bilo í̠na ti bope hai habe.
PSA 83:17 Tigua í̠hondo gi timbuni ho haabo helo í̠na ti bope habelo hamelo kogoni. Tigua taga timbuni halu tini homade helo hameledogoni.
PSA 83:18 Í̠ni hanguore Anduane Homogo howa Daligaorene Daligabi kego manda bilobi í̠na dindi bibahendeha handameho howa í̠ni hanguore heneda lomanda biai helobi hame timbuni lo kogoni.
PSA 84:1 Anduane Homogo Hongo Haihe-o i̱na í̠naga andaore gubalini timbuniore ho kogoni.
PSA 84:2 Í̠naga anda ogoniha i̱ ho palu holeneore hame timbuni lo kogoni. I̱ mbirale marunaga hame nawigo Anduane Homogo í̠naga andaha holenegoorenaga hame bibahende ogoniha piai helowa kogoni. I̱naga minimebi tinginimebi bibahendeme i̱na turuore halu iba gana turubiru bibahendeorenaga holene tene Ngode Datagaliwabe haluhe kagohondo lo mialu kogoni.
PSA 84:3 Anduane Homogo í̠ Hongo Haihe i̱naga kinibi i̱naga Ngode Datagaliwabebi í̠ hangu kegoni. Ngode Datagaliwabe í̠naga andaha bo lomabu miaga dabu ngagoria ega emene yatagoberu anda bia para howa tini palu ngagoni. Tinaga iginiru ogoniha palelonaga ma palia kagoni.
PSA 84:4 Wali agali í̠naga andaha haga karu ti baya turubiore kagoni. Tigua turu howa í̠naga mini yaraga halu iba ganaru laabo halu kagoni.
PSA 84:5 Wali agali Hari Saiono kagoria pole turu howa kulo karu tinaga hongo holene tene í̠ kegonigo lowa uruni ti turu haaboho holebira.
PSA 84:6 Ti Hari Saiono pole pialu Baga dindi ulini iba nabere mbira ngagoria tagira poragola dindi yobi iba nabere wiyagoni ndo iba tagira ibulebira. Dindi ulini ngarunaga iba birumaga ladaga halu iba gendo ngarunaga iba dugutagi hagahaga bulebira.
PSA 84:7 Ti iba ani bedaria nama pialu ti hongo ho yalu polebira. Ti Hari Saiono anda pialu howa Ngode Datagaliwabe karia hondolebira. Ngode Datagaliwabe ibu wali agalime bi pupu wule mbirale gime wabini heledaru ale ndo ibu daligaore gibi henedane ti hondolebira.
PSA 84:8 Anduane Homogo Hongo Haihe Ngode Datagaliwabe-o i̱na í̠hondo bi larogo hale habe. Yagabanaga Ngode Datagaliwabe-o i̱na bi larogo bayuwaore hale habe.
PSA 84:9 Ngode Datagaliwabe-o í̠nime inanaga kini helo dabo helene kagoni ibugua ina de hondo mamage haga kago í̠na ibuhondo bayuwa turubini dege bigi bibe.
PSA 84:10 Í̠naga andaha horo mbiru hangu andapu harogome horo daosini mbira tagira maruha haroruni bolangua hai holebira. Ai wali agali mini kowi karu baba mandagi ti andagani palu holenego i̱ hame nale kogoni. I̱naga Ngode Datagaliwabenaga anda panga harabaniore heyu haabo hole hamelo kogoni.
PSA 84:11 Anduane Homogo Ngode Datagaliwabe ibu inanaga mamage haganebi inanaga kini howa wá haganebi kagoni. Ibugua inahondo bayale turubini dege bigi bialu ina mo yaraga halu kagoni. Ibunaga deni wali agali mana tigabi hangu bialu haga karuhondo ibugua mbirale bayale ngaru mbira nangule nalaga kagoni.
PSA 84:12 Anduane Homogo Hongo Haiheore-o wali agali í̠hondo mini mbiraore wuwa í̠ni hanaho karu ti turuoreho kagoni.
PSA 85:1 Anduane Homogo-o í̠ninaga dindi ngago hondowa dara halu biamogo birigoni. Isaraele wali agali bayaleore helo í̠na ti mo bayale hodai bilarigoni.
PSA 85:2 Tiha ko wiaru domo wahalu tigua mana ko biyarubi domo wahai harigoni.
PSA 85:3 Bamba í̠na tihondo keba timbuni ho harigo wahalu í̠na tandagaore ala harigobi ai nahe kegoni.
PSA 85:4 Ngode Datagaliwabe-o inanaga Pele Ngiaga í̠ kego ina haru dai bibe. Inahondo kebaore holeni nahabe.
PSA 85:5 Inahondo keba ho haabo holeberebe. Í̠ keba ho kegoni ereba naholebirabe.
PSA 85:6 Ina wali agali kamaru turu holoma̱ya inanaga holene mo hongo habe. Í̠na ani beregola iname í̠naga mini yaraga halu holeberema.
PSA 85:7 Anduane Homogo-o í̠nime ina gubalini ho haabo kego hondoloma̱ya walia habe. Ina bayale holoma̱yabi í̠na pele ngialu haru dai bibe.
PSA 85:8 Anduane Homogo Ngode Datagaliwabehanda bi larago i̱na hale ho haga kogoni. Iname mana ko ala bialu harimadagua lone biadai nabi harimayagua ibugua ibunaga wali agali ina kamaruhondo mo paliaho holene ngialu bayale holoma̱ya helolebira.
PSA 85:9 Wali agali ibunaga mini mo dunini ho haga karu ibugua ti pele mialu haru dai buleore mandabu kagoni ndobe. Ibugua ina haru dai bialu inanaga dindi ngagoria ibunaga pele mulene ina heba mandagi wiaabo holebira.
PSA 85:10 Horo ogoningi Anduane Homogonaga gubalini holenebi mini bilinahe holenebi lola halu hogimbu bialu mbiraore holebira. Anduane Homogonaga mini tigabi wulenebi mo palia holenebi biamaga howa tiha wulebira.
PSA 85:11 Wali agali Anduane Homogohondo mini bilina ho haragome dindini howa hama iraga holebira. Ngode Datagaliwabenaga mini tigabiwi kagome dahuliya andaga howa handadali holebira.
PSA 85:12 Anduane Homogohanda ina mo bayale ho helaragola mbirale iname beremaru bayale hai holebira. Inanaga dindiha tomoru bayale andaho hai holebira.
PSA 85:13 Wali agali tigua mana tigabi biragome Anduane Homogo ibilonaga hariga mo manda mandabu wulebira.
PSA 86:1 Anduane Homogo-o i̱na bi larogo hale howa ladai bibe. I̱ hongo nahe howa i̱ni biamogo bibe naheore kogo í̠na i̱ biamogo bibelo hamelo ko.
PSA 86:2 I̱na í̠ talima ibalu haga kogonigo i̱ homoligo pele ngialu abale gi mibe. I̱ í̠naga biabe biahaga howa í̠hondo mini mbiraore wu kogonigo í̠nime i̱ pele ngibe laro.
PSA 86:3 I̱naga Anduane Homogo í̠ni hangu kego í̠na i̱ dara howa biamogo bia habe laro. Egerebagi alendobi bibahendengi howa i̱na í̠hondo bi laabo haruli.
PSA 86:4 Anduane Homogo-o i̱na í̠hondo bi laabo haga kogonigo í̠naga biabe biahaga i̱ kogo mo turu habe.
PSA 86:5 Í̠ni bayale biaga howa iname ko birimaru domo wahaga ke. Wali agali í̠hondo bi laga karu tihondo í̠na gubalini timbuni haabo ho kegoni.
PSA 86:6 Anduane Homogo-o i̱naga bi larogo bayuwa hale haore bibe. I̱ biamogo bia lalu í̠ olalu kogo hale habe.
PSA 86:7 I̱ biamogo bia larogola í̠na i̱ biamogo biaga kego mitangi bialu i̱ genda yu kongi biamogo bia lalu í̠nihondo bi laruli.
PSA 86:8 Anduane Homogo-o í̠ni ale mende naheore bibahende bolangua haiheore kegoni. Biabe í̠na biriligodagua bulene agali mbira naheore.
PSA 86:9 Hameigini tara tara í̠nime wabu helariru bibahendeme í̠nihondo ge duli hanga hole ibuwa tigua í̠ timbuniore kego lalu í̠ninaga mini yaraga halu holebira.
PSA 86:10 Í̠ni hanguore hongo timbunihe howa mbirale baya gibi tara tara ngaru í̠nime biaga kegoni. Ngode Datagaliwabe henene í̠ni hanguore kegoni.
PSA 86:11 Anduane Homogo-o mana i̱na bialu holiya hamelo kego biawai habe. I̱na horo bibahendengi mini bilinahe howa í̠na laredagua bialu holiya ani biawai habe. I̱naga mini í̠ha paga howa í̠naga biabe biaabo halu holiyabi í̠na i̱ biamogo bigi bibe.
PSA 86:12 Anduane Homogo i̱naga Ngode Datagaliwabe-o i̱naga miniha howa í̠naga mini yaraga haabo holebero. Ngode Datagaliwabe í̠ timbuniorebi mini lenebi kego, lalu i̱na wali agali karuhondo lamiaabo holebero.
PSA 86:13 Bibahendengi í̠na i̱hondo gubalini ho haabo kegoni. Í̠nime i̱ homolilono pele ngialu haru dai birigome i̱ homalu humbirini andaga nape kogoni.
PSA 86:14 Ngode Datagaliwabe-o wali agali minehe bu karume i̱la wai bule íbu kagoni ndobe. Agali ko mendeali kago dara nahaga karume i̱ homelo bo wahole bialu kagoni. Uruni tigua í̠naga bi hale habe manga haga kagoni.
PSA 86:15 Tigua ani biagagoyu Anduane Homogo í̠na dara holene irane nawini dara holene timbuni í̠ha to̱ledagome keba abale nahaga kegoni. Í̠na ina gubalini timbuniore ho howa bi ledego lone lo iriari nabiagaore í̠ mini bilinahe kegoni.
PSA 86:16 Í̠na i̱ koria dai bialu dara habe. I̱ ai̱yahanda biabe biaga wiyadagua bialu kogonigo i̱ mo hongo halu pele ngibe.
PSA 86:17 Anduane Homogo-o í̠naga mana bayaleore biaga ngego i̱hondo walia habe. I̱ waitigi bu karume manane ogoni de hondowa í̠nime i̱ biamogo bialu mo hongo ho heledagonida lo manda bialu tini taga timbuniore ho holebirago helo ani bibe.
PSA 87:1 Anduane Homogo ibugua ibuninaga tano mbira hari hombene loma bini winigoria bini.
PSA 87:2 Ibugua Isaraelenaga dindi maru bu ngaru gubalini ho kagobi ndo Yarusaleme tanoore gubalini timbuniore ho kagoni.
PSA 87:3 Ngode Datagaliwabenaga tano odagoriani wali agali bu kamiru-o Ngode Datagaliwabe ibugua tí lalu bi baya turubioreru mbira laga birago hale halimu.
PSA 87:4 Ngode Datagaliwabe ibugua ogodagua laya. Wali agali i̱naga bi larogo hale halu biaga karu damenego dagalama porongi i̱na Iyibi wali agalibi Babilonia wali agalibi dagalamaga dege holebero, leda. Pilidia wali agalibi Taia wali agalibi Idiobia wali agalibi uruni tibi Yarusaleme wali agali heba dege dagalamaga holebero, leda.
PSA 87:5 Yarusaleme tano lalu agua lolebira. Hameigini tara tara paluyu pedaru ti bibahendenaga dindi duniniore ogoni holebira, leda. Ngode Datagaliwabe Hongo Haiheore kagome Yarusaleme heyu helalu dindi ogoni hongoheore helo mo hongoho helolebira.
PSA 87:6 Anduane Homogo ibugua wali agali maru dindi tara tarani karunaga minibi gili buwa Yarusaleme wali agalinaga minibi heba gilibumaga howa daga lamaga holebira.
PSA 87:7 Yarusaleme wali agali bu karume turuore howa iba gana lalu, Iname mbirale bayale bayale yu kamarunaga tene Yarusalemeha ngagoni, lalu holebira.
PSA 88:1 Anduane Homogo Ngode Datagaliwabe-o i̱naga pele ngiagaore í̠ni kegoni. Horo bibahendengi i̱ biamogo bia lalu olaabo haruli. Mbiraga ngagoha howabi í̠hondo bi laabo haruli.
PSA 88:2 I̱naga bi larogo hale ha. I̱ pele ngi lowa olalu kogoni hale habe.
PSA 88:3 I̱ha genda damene dewaore íbu ngagome i̱ homolene kawareni pu kogoni ndobe.
PSA 88:4 I̱naga hongo holene ereba hai halu i̱ agali áyu dege homole bu karu ale homole kogonida.
PSA 88:5 Tigua i̱ yu wahayagola agali homeneru baba mandagi kogonida. I̱ agali marume bo wahalu pene ale howa homaliha wiradagua bidogoni. Agali mbira mbirali abogo lalu embedaho wahene biamogo bibe nahe aibe tobahe hagadagua i̱ haruda laro.
PSA 88:6 Í̠na i̱ gundu uli timbuni unuraore arumahe wiagoha bape ho waharigonida.
PSA 88:7 Í̠naga keba holene timbuni wigome i̱ dambi halu iba solowara timbuni bedagome dambi haradagua bu heledegonida.
PSA 88:8 Í̠na i̱naga nenegerume i̱ erembira ngialu piai heledegonida. Í̠na i̱ mo koorene ko howa hiriri bini heledegola tigua i̱ handa tara haga ka. Í̠na ani bidegome i̱ dariba ho heledegola hadalu pobe nahe kogoni.
PSA 88:9 I̱ genda yu kogome i̱naga de ko halu au hara. Anduane Homogo-o i̱na horo bibahendengi i̱naga gi yaraga howa í̠ olalu i̱ biamogo bia lalu haabo kogoni.
PSA 88:10 Í̠na wali agali homene ngaru mo heya halu agalime nabiagane aleru birilibe. Wali agali homenerume lone heyu howa í̠naga mini yaraga hagabe.
PSA 88:11 Wali agali homaliha ngarume, Í̠na gubaliniore ho kegoni, lagabe. Dindi mo ko heneha karume, Í̠ mini bilinahe kego, lagabe.
PSA 88:12 Arumaha karume í̠na agalime nabiaga ale biriliru de handagabe. Dindi ina embedaho waheneha pu karume í̠na mana bayale tigabi bereru de handagabe.
PSA 88:13 Anduane Homogo-o í̠na i̱ biamogo bibelo í̠ olalu ko. Egerebagi bibahendengi i̱na í̠hondo bi lalu haabo haruli.
PSA 88:14 Bi ani laruligo Anduane Homogo í̠na irane aginaga i̱ erembira ngialu kebe. Í̠na irane aginaga i̱ handa tara halu ha do kebe.
PSA 88:15 Bamba i̱ igiri emeneni hewangi genda dege yama ibalu henego áyu nde homolene kawareni haabo kogoni. Í̠na i̱ pani ngirirume i̱naga hongo holene bo pirilape henego kogoni ndobe.
PSA 88:16 Í̠naga keba holene timbuni ngegome i̱ bo dambi henego kogoni. Í̠na i̱hondo pani ngirigo nguwa dege babi bo baulo waharigoni ndobe.
PSA 88:17 Horombe mbiragabi urunidagua biaabo harigola iba li timbuni ibalu bibahende dambi hai hagadagua kome i̱ bo dambi helarigoni. Dindi bibahendeha howa waitigime i̱ bole ho mabu bu hagadagua ko dewa uruni i̱ koria ibaabo haga.
PSA 88:18 I̱naga nenegealiore hearume i̱ erembira ngialu í̠na piai helarigola ainde i̱naga nenege aruma holene dege ngeledegonida.
PSA 89:1 Anduane Homogo-o í̠na ina gubalini haho wiaaboore haga kegonaga i̱na iba ganaru lalu laaboore holebero. Í̠na mbirale mbira bigi bulebero lalu lowirigo pugua nabi biaiore haga kegonaga lalubi i̱na latagi halu laaboore holebero.
PSA 89:2 Í̠naga wali agali gubaliniho haga kegoni haho wiaaboore holebira manda bido. Í̠na bi lo wigi bideruni mbira lo aribia halu mendeale nalagaore hari ema bibe nahe li de hendedemagobi hongohe wiaabo ho ngagoni.
PSA 89:3 Í̠na lalu, I̱na agali mbira dabenego ogoni ibula habo nalolene bi mbira lowinigo ngo, lariyagoni. I̱naga biabe biahaga Debidihondo bi lowirigo pugua nabulebiraore lalu lamido, lariyagoni.
PSA 89:4 Isaraele wali agalinaga kini maha hama polebiraru bibahendeore Debidi í̠ha howa tagira pene hangume haga bulebira. Hameigini mendeme hapugua nabulebiraore, lamiriyagoni.
PSA 89:5 Ani laga biriyago Anduane Homogo-o dahuliyali dahuliya andagani bu karume í̠na mbirale baya gibi hangu bigi biriligonaga laga bialu turu howa iba ganame í̠naga mini mo yaraga halu kagoni. Anduane Homogo í̠ mini bilinahe howa mbira bulebero lo ngego biagaore kegonaga lalu iba ganaru tigua laga bialu kagoni.
PSA 89:6 Anduane Homogo-o dahuliya andagani bu karuni í̠ ale mbira nahe. Dahuliyali bu karunibi í̠ ale mbira naheore.
PSA 89:7 Dahuliyali haguane tini dege dege ngoaiho biruwabi tigua Anduane Homogo í̠ hondowa gi timbuniore haga ka. Dahuliyali Anduane Homogo í̠ ho mabubu haga karu tibi nde gi timbuni howa pandi hinu haga kagoni.
PSA 89:8 Anduane Homogo Ngode Datagaliwabe Hongo Haiheore-o hongo gibiorehe í̠ kegobi mbirali naheore. Anduane Homogo-o í̠na mbirale mbira bule ledego lo beregeda nabi biaore biaga howa í̠ mini bilinahe kegoni.
PSA 89:9 Iba solowara hongohe bedaru í̠na de hondo haga kegoni. Iba solowara ibu yaribu hongohe bialu bi lalu li̱le̱ laragola bi nale ema nabi berelo í̠na mo palia haga kegoni.
PSA 89:10 Iyibi wali agalinaga hongo holene tene gibi biago bo podalu bibahende mo ko haiore harigoni. Í̠naga hongo holene gibime í̠naga waitigi hearu bibahende bope hai harigoni.
PSA 89:11 Dahuliya andagabi dindi bibahendebi í̠ninaga dege nga. Í̠nime dindi timbuni ogo wabialu mbirale bibahendeore dindini wilo wabu wiriyarunibi í̠ninaga dege o bu ngaruni.
PSA 89:12 Mbirale uyurayagi ngarubi karubi unurayagi ngarubi karubi bibahendeore í̠nime wabini nga. Hari Tabo Hari Hemonolame Anduane Homogo í̠hondo turuore gibi halu iba gana lo ngiragoni.
PSA 89:13 Anduane Homogo í̠ hongo gibiorehe kegoni nde aguada. Í̠naga hongo holenego magi manda bibe nahe hongo gibiorehe kegoni aguadabe.
PSA 89:14 Í̠ kini howa wali agali bibahende haru kegonigo mana tigabi bulenenibi mana tigatiga dabolenenibi tiagaho biruwa haru kegoni. Í̠na mbirale bibahende bigi beregoria í̠naga gubalini holenebi mini bilinahe howa bulebero laridagua bulenegobi walia haabo halu haga kegoni.
PSA 89:15 Wali agalime í̠ duniniore kego mitangi bialu í̠hondo iba gana lo ngiaga karu ti í̠naga dara halu biamogo buleneni ibagabu ka. Wali agali uruni ti wá holeneha ibagabu haradagua bidago ti turuore au ho haruadabe.
PSA 89:16 Anigo í̠na tihondo baya turubini dege bigi bialu kegonaga tigua egerebagibi alendobi mbiragabi bibahendengi í̠naga mini mo yaraga halu haabo kagoni.
PSA 89:17 Inanaga hongo holene tene í̠ kegonaga iname í̠hondo turu timbuniore ho kama. Inanaga waitigi karu baba wai bialu kamaria í̠na ina gubalini halu dara howa wai buluma̱ya mo hongo haregola inanaga waitigiru bope halu ina wayali haga beremali.
PSA 89:18 Anduane Homogo-o í̠na waitigime bolilono ina mamage holene mbira í̠nime dabo helariya. Í̠ mana bayale tigabiorego hangu biaga ina Isaraele wali agalinaga Ngode Datagaliwabe baya buruguleore kegoni. Inanaga kini mbira ina haru helogo í̠nime ngirigoni.
PSA 89:19 Ala bambaore í̠na í̠naga biabe biahaga mini bilinaheore heago de gandeba mbira hendelo mialu de gandeba ogoniha howa í̠na bi ogodagua lariya. Wai biagane ami agali mini lene mbira i̱na dabaru. Wali agali bu hearu helowa ibu hangu dabalu ibunaga haguaneni kininaga manda mo karula haru. Karula howa haru haga kininaga dagiani berelaru, lariya.
PSA 89:20 I̱naga biabe biahaga Debidi hearia hondowa i̱na ibu tinaga kini helo dabo helalu weli loma binime ibu haguaneni odo wiru.
PSA 89:21 I̱na ani buwa i̱naga hongo holene ibu heba haaboore helolebero. I̱naga gime ibu mo hongo harogola ibu hongoheore haabo holebira.
PSA 89:22 Ani berogola ibunaga waitigirume ibu baba wai bialu ibu bope halu mo taga habe nahe holebira. Wali agali mini kowi karumebi ibu minupe habe naheore holebira.
PSA 89:23 I̱na ibunaga waitigi karuni geme hengedo mbaraho wahalu i̱naga kini ogoni handabe manga haga karuni bibahende homelo bo wahai holebero.
PSA 89:24 I̱na ibu gubalini timbuniore halu ibu heba haho wiaaboore holebero. Ibugua ibunaga waitigiru baba wai bigi birangi ibu wayali hangu haabo helolebero.
PSA 89:25 Dindi iba solowara mini Medidereniana bedagoria howa wima pialu iba timbuni mini Yuberedisi poragoria wiape kagoni bibahendeore Kini Debidi ibunaga halu ibugua handa gimbu bilo mulebero.
PSA 89:26 I̱na ani berogola ibugua i̱hondo ogodagua lolebira. I̱naga ababi i̱naga Ngode Datagaliwabebi í̠ kegoni. I̱ de handayaho howa mamage hagabi i̱naga pele ngiagabi í̠ hangu kegoni, lolebira.
PSA 89:27 I̱na ibu i̱ igini wahene helolebero. Kini maru karubi ndo ibu mo duniniore helolebero.
PSA 89:28 I̱naga gubalini haho wiaabo kogome ibu yu wa naholebero. I̱na ibula habo nalolene bi lo wuleberogo bi ogoni pugua nabi wiaabobo bu wilonaga lo wulebero.
PSA 89:29 Bibahendengi ibu damene hangume kini haabo holebira. Isaraelenaga kini hameigini mendeme ha pugua nabi Debidi ibuniha howa tagira pene hangume ho aribia haga biaabo holebira. Hari damindini haabo hene li kadagua haaboore hama polebira.
PSA 89:30 Ani ani bulebirago ai mani Debidi ibunaga aguanene hama porarume i̱na mana lo ngogo hale halu bia nabi mo wahalu i̱na bilimu lalu bi ledodagua nabiyaguabi
PSA 89:31 i̱na bi laga berogo hale howa mo yo handaga bialu tigua i̱naga erembira ngialu puguabo hayaguabi
PSA 89:32 nde i̱na tigua ko biraruni ilu wu ha dege buwa pani mulebero. Tigua mana liahe dewaore biyagonaga tandaga nalu howa manda bilo i̱na gewa tibume mana lalu bolebero.
PSA 89:33 Ani ba boleberogoyu i̱na Debidi gubaliniho kogoni nde ogoningibi gubalini haho wiaaboore holebero. I̱na ibu yu wanahe ibuhondo habo nalolene bi lo wirugobi pugua nabulebero.
PSA 89:34 I̱na ibula habo nalolene bi lo wirugobi napugulebero. Bulebero lalu lo wirugo ariabi mbiraore hangubi habo nalolebero.
PSA 89:35 I̱ Ngode Datagaliwabe mana bayale tigabioreru hangu biaga kogo howa habo nalolene bi ogoni lo wirugoni. I̱na bi halu mbira hangu lo ngogoni mani wia ai̱ai̱ bilonaga lo ngeledogoni. I̱na Debidihondo bi lowirugo ke̱ halu habole naloleberoore.
PSA 89:36 Debidinaga aguanene ti ho tawe hama puaboore holebira. Kini Debidinaga haru holene ngagoria ibunaga aguanene maha hararu mbiragome mia aribia haga bima piaho ngane honani dalu haho ngadagua tigua wali agali haru haho wiaaboore holebira. Ti ani haru helonaga i̱na handayaho holebero.
PSA 89:37 Kini Debidi ibu ariame dege wali agali haru haho ngane ege mbiraga tagira ibuwa dalu wáho kalidagua haru haaboore holebira. Ege li harini kagonime mbirale bibahende de handai ho howa wali agali bibahendehondo i̱na bi lo ngoruni henene hanguore leda lalu lo pana haga ege ibu li harini kagoni.
PSA 89:38 Anigo áyu í̠naga kini í̠nime dabo helarigo ibula kebaho kegoni. Kini ibuni hangu helo wahalu í̠ erembira mialu pedegoni.
PSA 89:39 Í̠naga biabe biahaga biagola habo nalolene bi lo wirigoni í̠nime puguarigoni. Pugualu kininaga manda golo muwa waruha ba horo helarigome ai kininaga manda biagoni mebia halu angu to̱lobu wahayagoni.
PSA 89:40 Ibunaga tanonaga ege pabe biaruni gialo payabu waharigome ai ibunaga anda hongohe bu helearuni bibahende mo ko hai hayada.
PSA 89:41 Ani bidagola ibunaga dabudabu panigi bu payabu ngaria wali agali hariga puíbu birarume mo page yalu pugu bira. Wali agali ibula mandagi handa ai̱ na̱i padarume ani birago handaragola ibuhondo mege bialu oba halu kagoni.
PSA 89:42 Í̠na ibunaga waitigirume kini biagoni balu bope helalu waitigi biaru ti miniha turu halu mambolo bama pelariyagoni.
PSA 89:43 Kini biagonaga wai biagane ami agali hayarunaga hongobi tinaga wai biagane ale wiaru bibahendenaga hongobi pirilipe hai helariya. Ibu wai bialu hearia bope helalu dari helariyagoni.
PSA 89:44 Ani helalu ibu kini howa wali agali haru haga hayagoni ogoningi hairi helalu ibuni dindiha minupeho berelariyagoni.
PSA 89:45 Í̠na ibunaga mali gadia dai bialu ibuni abaleore mo agali wahe helarigome ibu mo taga holene gibioreme dambiho heledegoni.
PSA 89:46 Anduane Homogo-o í̠ ha do ho kegoni nde ani haaboore hole kebe. Í̠naga keba holene gibi ira daradagua dalu kagoni dairi agoangi holebirabe.
PSA 89:47 Anduane Homogo-o ina wali agali dindini bu kamaruni nde lu ndo emene tigimandi hangu halu homaga kamagonidago manda bibe laro. Í̠na ina bu kamaruni wabiriyago áyu nde ina bibahende bu kamaruni mini homa biago kamago homalu ereba hai hole kamagonidago manda bibe.
PSA 89:48 Mbirali nahome haho wiaaboore holego ai kabe. Mbogoyi heba uliha yaanda haragola i̱ mangabago heyalu poro labehe mbirali ai kabe.
PSA 89:49 Anduane Homogo-o ainde agua berebe. Ai áyu ina gubalini naheore kebe. Debidihondo habo nalolene bi lo wialu ogoale bulebero lo wigi biriruni agua buleberebe.
PSA 89:50 Anduane Homogo-o í̠naga biabe biahaga o kogo nde mitangi bibe. Wali agali í̠ mitangi nabiaga bu karume i̱ mege bialu kagoni. Tigua i̱hondo bi ko tara tara lalu tandaga ngiragola i̱ genda yu howa dongeho haruli.
PSA 89:51 Anduane Homogo-o í̠na i̱ kini holiya dabo helarigoni kogola í̠naga waitigi karume i̱hondo bi ko lalu ka. I̱ porogoha bayale mbira nawi i̱ mege bialu mo ko haga karia dege iraga haga bialu kogoni.
PSA 89:52 Iname Anduane Homogonaga mini mo yaraga haaboore halu hami̱ya hameledo. Ani bilo. Aniore bilo laro.
PSA 90:1 Anduane Homogo-o í̠ inanaga andaore haradagua bidegoni. Inanaga mamali heneyaru tibi í̠ha dege howa heneyago ai áyu inabi í̠ha dege howa bu kamagoni.
PSA 90:2 Dindini hari wedarubi nawe howa mbirale bibahende dindini ngarubi nawabi howa Ngode Datagaliwabe í̠niore ala haabo heneyago áyubi haabo kego manibi haho wiaaboore hole kegoni.
PSA 90:3 Wali agali bu kamaruni homalu lone dindi tagobi lelariligoni. Í̠na inahondo, Dindi wali agali bu kamiruni tí dindime wabinigo homalu lone dindiho dai bilimu, lalu kegoni.
PSA 90:4 Iname mali daosini (1,000) mbira bolangua hayago lu laramaligo í̠na ogoni lu ndo bame abe harimago handaradagua birili. Mbiraga agalime mamage ho ariari bialu mbiraoregome mamage tigimandi haraligobi tigimandidane handaga kegoni.
PSA 90:5 Iba li ibalu wali agali hiliyalu poragola iba nalu homagadagua í̠na wali agali hiliyalu pirili. Ina emene tigimandi hanguni emaga handaradagua bialu halu homaramali. Ina egerebagi tani mbira áyu dege delatagi howa
PSA 90:6 ala anda haga bialu lini dalu ni handaragola yo bialu alendo gaulo daga hagadagua ina ani bialu kamagoni.
PSA 90:7 Í̠na inahondo handabe mangaho kegonaga iname í̠ hondowa gi timbuniore ho kamagoni. Í̠naga keba holeneme ina handayaho kegome ina bibahende do ereba hai haramagoni.
PSA 90:8 Inanaga mana ko tara tara beramaliruni bibahendeore í̠ de handaiho kegoni. Mana ko maru ohowa bia do hene birimarubi bibahendeore í̠ deni panigi mo ngelowa kegoni.
PSA 90:9 Ina wali agali dindini lu holenego í̠naga keba holeneme mo tubagi halu inanaga bu̱he bame halu mbira hangu laradagua abaleore lalu bolangua haragoni.
PSA 90:10 Ina wali agali dindini mali pira karia hangu haramali. Hongohe harimayagua nde mali pira halira haramali. Anigo áyu o haramadagoniha genda bulene erekui biabe bulenela dege ngaria handalu haramali. Mali podo nginidadagua hai halu bialu inane abaleore pu ereba haramali.
PSA 90:11 Í̠naga keba holenenaga hongo gibi ngegoni de handai hene ai kabe. Wali agalime mana ko biraru hondowa í̠na handabe mangaho kegola wali agalinaga bu miniha gi timbuni bulene tagira ibaganego aiwa manda bidabe.
PSA 90:12 Ina dindini lu ndo emene tigimandi hangu hole harimada manda buluma̱ya í̠na lawaiha biawaiha bibe. Inanaga horo dagalo wia heneni harimada manda bialu miniwi holoma̱ya í̠naga mini dingi dangia lolenego inanaga bu habaneha wia habe.
PSA 90:13 Anduane Homogo-o í̠na inahondo kebaho haabo kegoni agoangi hairi hole kebe. Ina í̠naga biabe biahaga kamaru hondowa dara habe.
PSA 90:14 Ina horo bibahendengi dindini hama poramangi miniha turu halu dungu lowa iba gana lalu haabo holoma̱ya í̠na egerebagi bibahendengi í̠naga gubalini haho wiaabo holeneme inaha to̱lotagiho helaga bibe.
PSA 90:15 Í̠na mali dewani ina genda yu dindihaore warapeho helarigonigo ai áyu ina lone mo turuho helabe. Ina genda yu hemane mali piyago daga lowa mali o biagoni taheni turuho hama poloma̱ya ina mo turu habe.
PSA 90:16 Í̠na biabe hongohe gibi beredaru í̠naga biabe biahaga kamaru ina hondoloma̱ya walia habe. Inanaga waneigini maha hararu tibi í̠naga hongo holene baya tara tara ngeru hendelo mo walia habe.
PSA 90:17 Anduane Homogo inanaga Ngode Datagaliwabe-o iname í̠ duniniore ke mitangi bialu haramaligo í̠na inahondo dara halu baya turubini bigi bibe. Iname mbirale bigi beramaru bayale haga bialu lini daga bilo buluma̱ya mo hongo habe.
PSA 91:1 Mbirali Anduane Homogo Daligaorene Daliga kagoha ha do hole porago ibu Anduane Homogo Bibahende Hongo Haiheore kagonaga tuha puwa baya turubini pu holebira.
PSA 91:2 Anduane Homogonaga tuha howa ibugua ibuhondo ogodagua lolebira. Í̠na i̱ bu dambi halu i̱naga pabe tigila í̠ howa i̱ baya hangu handayaho hariligoni. I̱naga Ngode Datagaliwabe í̠ kegoni. I̱na í̠ni hanaho kogoni, lolebira.
PSA 91:3 Heneneore Ngode Datagaliwabe ibugua í̠ baya hangu handayaho halu mamage holebira. Damame agalimeyaguabi gono wia do hene ngaruha í̠ do wia nabulebere. Warago hiriribi tara tara wali agali bo home laganeale ngarumebi í̠ ela naholebira.
PSA 91:4 Ega angibunime ibunaga babaganeme ibu igini bu dambi hagadagua Anduane Homogo ibugua í̠ bu dambiho holebira. Ani biragola í̠ ibunaga tuha howa bayaleore holebere. Anduane Homogohanda bule ledago biaga mini bilinahe kago ibugua í̠naga humbi howa ibu erembiraha mo ngelowa hatali wu holebira.
PSA 91:5 Mbirale mbira mbiraga bulubada lowa í̠ miniha gigi howa palulene nawi. Horombe howabi í̠ nahende keria abale ibuwa í̠ balu polobada lowa í̠ gigi howabi holene nawi.
PSA 91:6 Dama ko tara tara bu karume mbiraga horombebi wali agali bo wahama ibaga bialu kago í̠na dama uruni hondowabi gi holene nawi.
PSA 91:7 Áyu dege í̠ deni wali agali daosini mbira (1,000) bibahende homa hilayaguabi daosini pira (10,000) í̠ kegohayagi homai hayaguabi í̠ ela naholebirago giho holene nawi.
PSA 91:8 Anduane Homogohanda wali agali ko biaga karume mana ko biyagonaga pani mirago í̠ni deme handalu hondolebere.
PSA 91:9 Í̠na Anduane Homogo í̠naga mamage haga helalu í̠naga Ngode Datagaliwabe Daligaorene Daliga kago hatali wiagane humbi helarigoni.
PSA 91:10 Ani helo waharigome mo ko holene tara tara ngarume í̠ kegoria anda naibulebira. Warago ko tara tara gendabi ngarubi í̠ andagani anda naibulebira.
PSA 91:11 Ngode Datagaliwabe ibugua ibunaga dahuliyaliru lamialu í̠ ibagabu kegoha, Tí mamage hama ibagabu hole pudaba, lalu lamulebira.
PSA 91:12 Ege to̱le̱ ngagome í̠naga ge nabehedagola dahuliyali uruni tinaga gime í̠ taba yaraga holebira.
PSA 91:13 Í̠naga geme laionobi nogombibi laiono hungubaluabi puya tomia palebi bibahende hengeda hai holebere.
PSA 91:14 Ngode Datagaliwabehanda ogodagua larago, Wali agali i̱ gubalini heneneore ho karu i̱nime ti haru dai bialu pele mulebero. I̱ tinaga Anduane Homogo ka lowa henene yu tigabu karu tinaga hatali wiaga humbi i̱nime holebero.
PSA 91:15 Tigua i̱ olaragola i̱na tinaga bi larago hale halu ladai bulebero. Ti kagoria gendabi íbu ngangi i̱ni ti heba haabo holebero. Ina ti gi mialu haru dai bialu ti mo yaragaho helolebero.
PSA 91:16 Tinaga holene lu hama pelo tinaga mali mo tago holebero. Tigua bima ibiyagonaga yolo uruni mulebero. Ina ti pele mialu i̱ni ti heba haabo holebero, lene.
PSA 92:1 Anduane Homogo-o í̠hondo ka̱i̱ lolene bayaleoreda. Í̠ Ngode Datagaliwabe Daligaorene Daliga kegoni lalu í̠ mini yaraga halu iba gana lolene bayaleore ngagoni.
PSA 92:2 Egerebagi bibahendengi í̠na i̱ gubalini ho haabo kegonaga lolene karulape ogoni. Mbiraga bibahendengi i̱na í̠ mini bilinahe kegonaga lolebero.
PSA 92:3 I̱na ngida ale tara tararu balu í̠naga mini yaraga holebero.
PSA 92:4 Anduane Homogo-o í̠na biabe hongohe biriru mitangi bialu i̱ turuho kogoni. Í̠na bayaleore dewa birigonaga i̱na turuore halu iba ganaru lolebero.
PSA 92:5 Anduane Homogo-o í̠na biabe biriliru timbuniore hongohe biaga ke. Í̠naga miniha mitangi bideru iname manda bibe nahe kamagoni.
PSA 92:6 Wali agali mini nawi karumebi mini giga nabi karumebi mbirale uru manda nabibehe ka.
PSA 92:7 Wali agali mini kowi bu karu ti datani bu hagagobi ka. Ko biaga bu karume mbirale ngago damene yu howa homogo ha holebira. Ani bulebiragoyu ti mo ko hai halu erebaore holebira.
PSA 92:8 Anduane Homogo-o í̠ni kini haluhe haabobo hagaore kegome ti ani bulebira.
PSA 92:9 Agali í̠la waitigiho karu ti homalu agali mini kowi karu bope hai holeberego ina mandabu kamagoni.
PSA 92:10 Í̠na nogo bulumaga wangabe gabuanaga hongo kaligobi i̱ha hongo timbuni helari. Í̠na i̱hondo bayale birigonaga turuore ho kogoni.
PSA 92:11 I̱ waitigi bu hearu mo ko hai harigo de handalu agali ko hearu yiya lalu dugu biayuago hale haru.
PSA 92:12 Wali agali mini tigabi bu karu ti ayage timbuni andaho karubi holebira. Ti Lebanono irabuha ira tamia bayale timbuni bu karubi holebira.
PSA 92:13 Ti Anduane Homogonaga anda haneni ira hengene mbira haradagua bida. Inanaga Ngode Datagaliwabe ibunaga andaha howa ti bayaleore holebira.
PSA 92:14 Ti lu ho waheneore heaguabi lini bayale daabo haga kagoni. Tinaga yuniru gahenge halu ti hongohe haabo howa gabu nahaga ka.
PSA 92:15 Ti ogonibi kagome Anduane Homogo ibu mini tigabiore kago hendelo mo walia ka. I̱naga hapai haga kago ibuha lehe mbira nawiore.
PSA 93:1 Anduane Homogo ibu kini kagoni. Ibunaga mini mo yaraga holenebi hongo gibihe holenebi karulowa kagoni. Dindi timbuni o ngagoni ibunime wabu winiyadagua ema bialu girigurabi mbira bule ndoore ngagoni.
PSA 93:2 Anduane Homogo-o bambaore mbirale bibahende nawiangi í̠na handame ho haabo hene kegoni. Í̠ ala henerunagabi áyu kamarunagabi mani holebirarunagabi kini haluhe haabo kegoni.
PSA 93:3 Anduane Homogo-o iba solowararu uli unuraoreha berenerume ai áyu bi timbuniore hongo howa tilitula lalu la ho nga.
PSA 93:4 Anduane Homogo í̠na mbirale bibahende dahuliya andagani ngagoni í̠naga hongo gibihe kegome yani howa handayaho kegoni. Iba solowara tilitula lalu kadu bararaga bialu karuni hongo emene bamedago lowa í̠ hongo gibiorehe kegoni. Iba solowara yaribu buyu ibalu iba angeni hongo howa haealo bade haga bialu karuni emene bamedago lowa í̠ hongo gibiorehe kegoni.
PSA 93:5 Anduane Homogo í̠naga mana lo ngeruni bibahendeore wialu wiaabobore bulebira. Í̠naga anda loma biniore kagoni ibu haho wiaaboore holebira.
PSA 94:1 Anduane Homogo í̠ Ngode Datagaliwabeore howa wali agali mana ko biaga karume biyarunaga pani nelo mirili. Áyu í̠naga lembo holene ngego tihondo mo walia habe.
PSA 94:2 Wali agali bibahende í̠naga deni íbu hai helolebere. Wali agali mine haga karume mana ko biyarunaga pani nelo abale mule ibabe.
PSA 94:3 Mana ko biaga bu karume mana ko bialu turuho helo henge agua agima muleberebe. Anduane Homogo-o tinaga henge agira ngabe.
PSA 94:4 Agali ko biaga karume mana ko biyagonaga turu haga bialu mine ho helo horo agiru heloleberebe.
PSA 94:5 Anduane Homogo-o uruni tigua í̠naga wali agali bo hengedape halu genda timbuni mo mialu kagoni ndobe.
PSA 94:6 Wali dalo berearubi waneigini ai̱ya abala homene karubi tigua bo wahai haga ka. Wali agali dindi taraha howa inanaga dindini íbu hene karu homelo bo wahai halu biaga.
PSA 94:7 Tigua lalu, Anduane Homogohanda ina de nahendeda. Isaraele wali agalinaga Ngode Datagaliwabehanda iname bialu kamarunaga manda nabi bame kago waha, laga ka.
PSA 94:8 I̱naga wali agaliru-o tígua mana ko dege biaabo halu kamigo agua beremibe. Tí wali agali mini nawi lulu ale kamigo angi mini wiadai buleberemibe.
PSA 94:9 Ngode Datagaliwabehanda inanaga hale wabu helenego ibu bi hale habe nahe kabe. Ibugua inanaga de wabinigo ai ibu de handabe nahedabe.
PSA 94:10 Hameigini tara tara dindi bibahendeha karume ko biragola ibugua ti mo tiga bialu pani namulebirabe. Ibugua wali agali lawai haga kago ibuha manda mbira nawi kabe.
PSA 94:11 Anduane Homogo ibugua wali agalinaga miniha bibahende ngaru manda biaiho ka. Tigua ogoale bule lomanda manda bu kago hondowa ibugua mbirale uruni bibahende tagira napolebira mandabu ka.
PSA 94:12 Anduane Homogo-o í̠na wali agali mo tiga biriru ti turuho ka. Í̠naga mana lowini ngego lawai hene karu tibi turuho ka.
PSA 94:13 Í̠na ogonidagua bini karu ti miniha dungulo kane dege agali ko biaga karu ti homai halu homaliha piai helo í̠ maliaho haga ke.
PSA 94:14 Anduane Homogohanda ibunaga wali agali yu wa nahaga ka. Heneneore ibugua ibunaga wali agali bu karu erembira mialu yu wanahagaore ka.
PSA 94:15 Mani howa agali godi lararume tigatiga dege lolebira. Ani laragola hale howa wali agali tigabi karume bi ogoni talialu bialu holebira.
PSA 94:16 Mbiralime i̱ biamogo bialu agali ko hearu bope hayago aibe. Mbirali i̱la mandagi howa agali ko biaga hearu ko nabilonaga i̱ biamogo biyago aiwabe.
PSA 94:17 Anduane Homogohanda i̱ biamogo nabinidale nde i̱ homene dininiru piagagoha abale pu kole.
PSA 94:18 I̱na lomanda bialu koria i̱ ge harogoria gondo lalu i̱ pilarogonigo laru. Ai Anduane Homogo-o í̠naga gubalini haabo hariligome í̠naga gime yania harigola i̱ pi nale bayale kogoni.
PSA 94:19 Horo i̱ genda ho kongi howabi ko ngarunaga mini dege dindiho hewagolabi í̠nime i̱naga mini mo palia halu i̱ turuho helarigoni.
PSA 94:20 Agali haguane tigabi ndo ko dabaga karu baba í̠ biabe mandagi nabiaga kegoni. Agali ko uruni tigua wali agalime mana ko biraru hondowa karulape dege bira lalu ani bialu helo wahaga ka.
PSA 94:21 Tigua wali agali ko nabi bayale biaga karu mo ko hole ndinde laga ka. Wali agali tiha ko nawi karu homelo bo wahole ko biaga urunime manani helalu kagua dabaga ka.
PSA 94:22 Anigo Anduane Homogohanda hongoheore howa i̱ biamogo biaga ka. I̱naga Ngode Datagaliwabehanda i̱ baya hanguore handayaho haga kagoni.
PSA 94:23 Tigua mana ko dewaore biyagonaga ibugua emena ko ngaru tihondo mo mulebira. Tinaga ko biyaru mitangi bialu tini homelo ibugua ti bo wahai holebira. Anduane Homogo inanaga Ngode Datagaliwabehanda ti bo wahaiore holebira.
PSA 95:1 Uru-o ti ibidaba. Anduane Homogonaga mini mo yaraga halu iba gana lami̱ya ibidaba. Ngode Datagaliwabe ibugua ibunaga hongome ina haru dai bialu pele ngiyago mitangi bialu ibuhondo turu halu iba gana lo mimi̱ya ibidaba.
PSA 95:2 Iname ibu kagoria kaware hapara howa ibuhondo ka̱i̱ lo mali̱ya ibidaba. Iba gana baya turubiru ibunaga mini mo yaraga halu ibuhondo lo mimi̱ya ibidaba.
PSA 95:3 Anduane Homogo ibu Ngode Datagaliwabe hongohe kagoni. Ibu kini hongo gibihe howa dama mitangi bialu wali agali gime wabini karubi ndo ibu daligaore gibi kagoni.
PSA 95:4 Ibugua gundu uli unura wiape karuha howa handame hama iralu hari daligaore wedarunaga neneni handairi howa dindi bibahendeha handame ho kagoni.
PSA 95:5 Ibugua wabini iba solowara bedarubi dindi bibahende ngarubi bibahende ibunime dege handame ho kagoni.
PSA 95:6 Uru-o ti ibidaba. Iname inanaga ma podope halu Anduane Homogo ibu duniniore kago mitangi bialu ibuhondo lotu lami̱ya. Anduane Homogo ibu ina Wabiaga kago iname ibu kagoria kaware ibuwa ge duli hangaho biruwa ibu mitangi bialu lotu lami̱ya ibidaba.
PSA 95:7 Ibu inanaga Ngode Datagaliwabe kagoni. Ibugua ibunaga wali agali bu kamaru nogo sibi haru haradagua haru haga kagoni. Ina tomo noloma̱ya ibugua ngiaga kagoni. Ibugua áyu bi o larago hale hadaba.
PSA 95:8 Ngode Datagaliwabehanda tihondo bi lamialu lalu, Tinaga mamali ala henerume i̱naga bi hale howa nahe tingi halu tinaga bu miniha anda polani hondowa i̱la waitigi ho hene. Tigua dindi ko wali agali nahaga mini Meriba Masala wiagoria i̱na ti biamogo timbuni birugo de hendene. Ani anigo i̱na ti haru halu hewagola tigua i̱naga hongo ba handalu hene. Ti ani binigo i̱na bi larogo tígua áyu hale howa tínaga mamali binidagua bulemini nabilimu.
PSA 95:10 Dindi ko o biagoria mali pira mariani (40) i̱na ti haru howa bima ibiruru bibahende handai dege howa tigua i̱ abi haruabe hondole ba handalu hene. Wali agali urunime horo bibahendengi hariga koha pialu haabo halu i̱naga bi lo wirugoni hale halu bibe manga haga karunida lowa
PSA 95:11 i̱na tihondo lemboore howa bi hongohe mbira bule lalu lo wirugo ogo. Wali agali uruniore i̱na ti mini íbu ha̱lo birulene muleberogoria anda napolebiraore, lalu Ngode Datagaliwabehanda ani lene.
PSA 96:1 Anduane Homogohondo iba gana gahenge lo mulene nga. Dindi bibahendeni bu kamirume Anduane Homogohondo iba gana lo mulene nga.
PSA 96:2 Anduane Homogohondo iba gana lo mialu ibunaga mini mo yaraga halimu. Ibugua ina haru dai bialu pele ngiyagoni lalu horo bibahendengi wali agali bibahendeme hale hai helo lamiaaboore halimu.
PSA 96:3 Ibu daliga gibiore ka lalu hameigini bibahende paluyu pedaru hale hai helo lamilimu. Ibugua biabe timbuni bayale bima piyarunaga lalu wali agali bibahende lamiai halimu.
PSA 96:4 Anduane Homogo ibu daliga gibiore kagoni. Iname ibunaga mini uyura mo yaraga haabo halu hami̱ya. Mbirale wali agalime dama mitangi bialu gime wabini ngaru hondowa ina gi holene nawi. Anduane Homogo ibu dege daliga gibi kago iname ibu hondowa dege giho holene nga.
PSA 96:5 Wali agali hameigini tara tarame mbirale dama mitangi bialu tini gime wabiniruhondo bi pupu wiagaru uruni bibahende ke̱ howa hangu bialu kagoni. Inanaga Anduane Homogo ibugua hari daligabi mbirale bibahende hariha karubi ngarubi wabinigo ibuni hangu daliga gibiore kagoni.
PSA 96:6 Anduane Homogo ibu kini howa wá holenebi mini mo yaraga holenebi ibunaga hangu ngagoni. Ibunaga anda lomabu heleneni mbirale bu ngarume Anduane Homogo ibuni hongohe howa ibuni baya buruguleore gibi agi loabe tobahe kagobi walia ho nga.
PSA 96:7 Wali agali dindini bu kamiru bibahendeme Anduane Homogonaga mini mo yaraga halimu. Ibunaga wá holenebi hongo holenebi daliga gibiore nga lalu ibunaga miniore mo yaraga halimu.
PSA 96:8 Anduane Homogonaga mini timbuni daligaore ngago mo yaraga halimu. Ibuhondo mbirale mbira lomabu migi bule giha yaga bialu ibunaga andaha anda ibugu bilimu.
PSA 96:9 Wali agali bibahende kamiru Anduane Homogo ibu baya buruguleore kagoria ibalu bulu palialu ibunaga lotu lalu halimu. Wali agali dindi bibahendeni kamiru tígua ibu gibiore kago hondowa duru ala lalu halimu.
PSA 96:10 Wali agali hameigini tara tara bibahende bu hama pedaru lamialu, Anduane Homogo ibu kini ka, lalimu. Dindi timbuni o ngagoni ibunime wabu winidagua ema bialu girigurabi mbira nabuleore ngagoni. Ani kago howa mani ibugua ibalu wali agali bibahende baba godi lalu tigatigaore dabolebira, lalu lamilimu.
PSA 96:11 Dindi timbuni ogo í̠bi hari li kego í̠bi libu nde turu halibu. Iba solowara í̠nde tigitugu lalu í̠ninaga bi dalimu labe. Mbirale iba solowaraha biru ngamiru tínde bi ladagadaga bialu tíninaga bi ladaba.
PSA 96:12 Mabu wima pedamirubi mbirale mabuni andaho hama pedamirubi tí bibahende turu timbuniore ho halimu. Anduane Homogo ibuni dindi ogo bibahende handagimbu buwa haru hole ibulene tu harangi mbirale urunime bi urunidagua lagalaga bulebira. Ira teha ira bu karume turu gibiore howa tininaga bi lalu bi dalimu lagalaga bulebira. Ibugua dindini wali agali bu kamaru mana tigabiore buleneni haru holebira. Bi heneneore loleneni howa ti dabolebira.
PSA 97:1 Anduane Homogo ibu kiniore howa handame ho ka. Dindi o ngego í̠na turu holene nga. Dindi iba dege dombeneha ngamiru tíguabi turu haga bidaba.
PSA 97:2 Beraliba arumalame ibu ho mabu bida. Ibugua wali agali ta nabi karu mana tigabi ngagome haru howa handaya ho haga ka.
PSA 97:3 Ira hungu bamba halu puwa waitigi ho mabu bidaru dai helaga ka.
PSA 97:4 Ibugua hari daba migimege lalu dindi bibahende ngago wá hame helaga ka. Dindi ngarume uruni hondowa duru laga.
PSA 97:5 Anduane Homogo ibu dindi bibahende ngarunaga Anduane ka. Dindi hari ngarume Anduane Homogonaga deni wagaya do elagadagua do elai haga nga.
PSA 97:6 Hari daliga li karume ibunaga mini tigabiore nga lalu latagi ka. Hameigini tara tara dindi bibahendeni karume ibunaga wá taraore harago de handai haga ka.
PSA 97:7 Wali agali mbirale dama mitangi bialu gime wabini ngaruhondo bi pupu wiaga karu ti mo taga timbuniore holebira. Gime wabini ngarume Anduane Homogo hondowa bulu paliai holebire.
PSA 97:8 Anduane Homogo-o í̠naga mana tigabi hangu ngegome wali agali dabaga kego manda buwa wali agali Saiononi karubi Yuda dindiha tano dewa wima pedaruha bu karubi ti bibahendeme í̠hondo turu halu miniha dungulo haga ka.
PSA 97:9 Anduane Homogo Hongo Haiheore-o í̠na dindi bibahende handameho kegoni. Í̠ore mini lene daligaorene daliga howa bi pupu wulenaga gime wabu ngaru bibahende bolangua haihe kegoni.
PSA 97:10 Anduane Homogohanda wali agali mana ko ngaru hame nalaga karu tihondo gubalini ho haga ka. Ibunaga wali agali karu handayaho haga ka. Ibugua ti agali ko biaga karunaga giha karia gingila mialu haru dai biaga ka.
PSA 97:11 Anduane Homogonaga wá holeneme wali agali mini tigabi karuni wá hadali haga ka. Turu holeneme wali agali bayale biaga karu tinaga bu miniha mo turuho helaga ka.
PSA 97:12 Wali agali mini tigabiwi kamiru tí turu ho hadaba. Tígua Anduane Homogohanda bayale biyarunaga turuho hadaba. Ngode Datagaliwabe ibu mini baya buruguleore kago ibugua uruni biyaru mitangi bialu tígua ibuhondo turu halu ka̱i̱ ladaba.
PSA 98:1 Anduane Homogohondo iba gana gahenge lama. Ibugua mbirale baya tara tara biai hayagoni. Ibuninaga hongo timbuni kagomebi ibunaga mana baya burugule ngagomebi ibugua waitigi bope hai hayagoni.
PSA 98:2 Anduane Homogohanda wai buwa i̱na wayali haru lalu latagi haya. Ibugua Isaraele wali agaliru pele mialu haru dai bulenaga hongo timbuni wali agali tara tara bu hearuhondo walia hayagoni.
PSA 98:3 Ibugua ibunaga bi lowiniru mitangi bialu Isaraele wali agalihondo gubalini haabo halu ti yu wanaheore heneya. Inanaga Ngode Datagaliwabehanda ina waitigi bope halu ina haru dai biyago wali agali dindi bibahendeha bu hearume hale halu manda biaiore haya.
PSA 98:4 Wali agali dindi bibahendeni kamiru tígua Anduane Homogohondo turu halu iba gana ladaba. Bu miniha dungulo holenaga iba gana turu howa dalimu lalu ibunaga mini yaraga hadaba.
PSA 98:5 Anduane Homogonaga mini yaraga halu iba gana ladaba. Ngida aleru baya hangu balu bi bayaleru lelo badaba.
PSA 98:6 Pilipe biguliru pu lalu bi hongo howa ladaga halu Anduane Homogo ibuni inanaga kini kago lalu ibunaga mini yaraga hadaba.
PSA 98:7 Iba solowara bedego í̠bi ibaha wena tara tara bedamirubi tígua bi hongo howa ladaga hadaba. Dindi í̠bi wali agali dindini kamirubi tí bibahendeme iba gana ladaba.
PSA 98:8 Iba timbuni poramiru tíguabi nde gi habe badaba. Dindi hari wedemiru tíguabi nde turu howa Anduane Homogonaga deni iba ganaru ladaba.
PSA 98:9 Irane ibugua dindi bibahendeni handameho howa haru hole ibiragonaga ani bidaba. Ibugua ibunaga mini bayale tigabi ngagome wali agali bibahende haru haabo holebira.
PSA 99:1 Anduane Homogo ibu kiniore howa handame ho ka. Wali agalirume ibuhondo gi howa duru lalu haga. Dahuliyali babaganehe kirali kago labo dindiha helowa ibu de handape howa handayaho kagola dindi dumbirumbi bialu haga.
PSA 99:2 Anduane Homogo ibu Saiononi howa hongo timbunihe kagoni. Ibugua hameigini tara tara dindi bibahendeha karu handame howa haru hai ka.
PSA 99:3 Wali agali bibahendeme ibu kini duniniore howa mini lene ka lalu ibunaga mini yaraga holebira. Ibu mini tigabi baya buruguleore kagoni.
PSA 99:4 Kini hongo haiheore-o í̠ mana bayale tigabi ngago dege hame laga kegoni. Í̠na mana bayale tigabi lo ngegoni ina Isaraele wali agalirume bialu haabo holoma̱ya ngirigoni. Wali agali tara karume biraru hondowa iname tigatiga mo tale bialu holoma̱ya mo walia hari.
PSA 99:5 Anduane Homogo inanaga Ngode Datagaliwabe kagonaga mini yaraga holene nga. Ibuni kagoha hapara howa ibu mitangi bialu lotu lalimu. Ibu mini tigabi baya buruguleore kagoni.
PSA 99:6 Mosese Aronola libu Anduane Homogonaga loma binigo mo miaga agali hene. Samuele ibugua ibuhondo bi laga hene. Uruni tigua Anduane Homogo olayagola ibugua tinaga bi hale haga hene.
PSA 99:7 Ibuni hari beraliba timbuni heagoha howa ibugua tihondo bi lamigi bini. Ibugua ibunaga mana bulene winiru ti lamigi biyagola tigua hale halu biai haga hene.
PSA 99:8 Anduane Homogo inanaga Ngode Datagaliwabe-o í̠naga wali agalirume í̠hondo bi layaru hale halu ladai birigoni. Tigua mana ko birarunaga pani nelo miaga kego howa dege í̠ni Ngode Datagaliwabeore howa ko uruni domo wahai haga kego ti walia harigoni.
PSA 99:9 Anduane Homogo inanaga Ngode Datagaliwabe kagonaga mini yaraga hama. Ibunaga hari loma bini kagoria howa ibu mitangi bialu lotu lama. Anduane Homogo inanaga Ngode Datagaliwabe ibu tigabi howa baya buruguleore kagoni.
PSA 100:1 Wali agali dindi bibahendeni paluyu pedamirume Anduane Homogohondo turu howa iba gana lo milimu.
PSA 100:2 Turu howa iba gana turubiru lama lama ibu mitangi bialu lotu lole ibunaga wanakuini íbu halimu.
PSA 100:3 Anduane Homogo ibu Ngode Datagaliwabeore ka manda bilimu. Ibugua ina wabinigo ina ibunagaore kama. Ibunaga wali agali howa ina ibunaga nogo sibi kamagoni. Anigo ibugua nogo sibi haru hagadagua ina haru haga ka.
PSA 100:4 Ibunaga anda loma bia henegonaga harabani anda ibalu ibuhondo ka̱i̱ lalu iba ganaru lama lama anda mali̱ya. Ibunaga mini yaraga hama hama anda tamuha anda mali̱ya. Ibuhondo ka̱i̱ lalu ibunaga mini mo yaraga hami̱ya.
PSA 100:5 Anduane Homogo ibu bayaore gibi kago ibunaga gubalini holene ngagome ina gubalini haho wiaabo kagoni. Ibugua ibunaga wali agaliruhondo, Bulebero, lowiniru mbira mo habo nale ibu mini bilinahe howa biaiore haga kago ibunaga mini yaraga hami̱ya.
PSA 101:1 Anduane Homogo-o i̱na iba gana lalu bi lo wirugo buleore lalu larudaguabi í̠naga mana tigabi bulene ngadagua bulebi i̱na í̠ mitangi bialu iba gana ogo í̠hondo lalu kogoni.
PSA 101:2 I̱na mana ko nabi bayale dege bialu holeberogo Anduane Homogo-o í̠na biamogo bule i̱ koria angi ibuleberebe. I̱ damenerunaga deni howa mana tigabi dege biaabo holebero.
PSA 101:3 I̱na mana ko bulene ngago bibe mangaore holebero. Wali agali Ngode Datagaliwabehondo erembira mialu haga karuhondo turu naheore kogoni. I̱ ti heba mandagi ibagabu naholebero.
PSA 101:4 Ke̱ hagane mana biaga ngagobi i̱na nabulebero. Agalime mana ko biaga ngagobi mitangi naholebero.
PSA 101:5 Wali agali mendeali ndelalu haga karu i̱na ti bope holebero. Mine haga karubi i̱na handabe manga holebero.
PSA 101:6 Ngode Datagaliwabehondo mini bilinahe karu tihondo i̱na turu haabo holebero. Mana bayale bialu henene laga karu ti degeme i̱naga biabe biaga helo i̱ andagaha helolebero.
PSA 101:7 Wali agali ke̱ haga bu karu ti i̱naga anda timbuni kagoha naholebira. Wali agali tombene hondokihe karu ti i̱la naholebiraore.
PSA 101:8 Horo bibahendengi i̱naga dindi ngagoha ko biaga karu i̱na mo ko halu bo batagi haga bulebero. Wali agali ko biaga karu damene Anduane Homogonaga tano ngagoria nahelo i̱na ti bo talu pelai holebero.
PSA 102:1 Anduane Homogo-o i̱na í̠hondo bi larogo hale habe. Í̠na i̱ biamogo bibelonaga í̠ olalu kogo hale habe.
PSA 102:2 I̱ genda timbuni yu kongi í̠na i̱ yu wahalu napobe. I̱na í̠ olarogola bi larogo hale halu abale biamogo bibe.
PSA 102:3 I̱naga holene emene tigi mbira hangu ira hagua bialu abaleore pu ereba hagagobi kogoni ndobe. I̱naga tingini poboyogo bialu ira timbuni dedagola poboyogo biraligobi bialu helo kogoni ndobe.
PSA 102:4 Datani gaule agalime hengedalu piagadagua Ngode Datagaliwabehanda i̱ hengedo wahenego kogoni. I̱naga tiniha tomo nolene garibi nale ko.
PSA 102:5 I̱ tandaga timbuni howa e̱ lalu ngogoni. I̱naga tingini timbuni nahe yólalu kuni hangu haragonida.
PSA 102:6 I̱ mo ko henego koore dindi ko wali agali nahaga ngagoha ega e̱wa̱tia biragagobi dindi labu ngagoha ega halengau biragagobi bedogonida.
PSA 102:7 I̱ dagiani palia padogoyu ai i̱ paliahondo nahe yangayanga bu wiaabo kogoni ndobe. Ega warakuli anda dangini hangu biragadagua i̱ni hanguore bedogonida.
PSA 102:8 Mbiraga horombebi waitigi bu karume i̱hondo bi ko dege lalu haabo ka. Tigua i̱ mini lowa mege bialu ha haga bialu ka.
PSA 102:9 Í̠na i̱hondo keba timbuni ho kegome i̱ nde beru dugu nalu de iba pugulope halu gabo beha iba biraradagua bedago nalu bedogonida. Í̠na i̱ minalu mbirale ko ngaru mo wahagadagua mo wahenego bedogonida.
PSA 102:11 I̱ dindini lu holene nawi tubagiore alendo halu ni dadai biraligobi kogoni. Datani gaule ngaligobi bedogonida.
PSA 102:12 I̱ ogonibigoyu nde Anduane Homogo-o í̠ kini haluheore kegoni. Wali agali maha ho aribia holebirarume í̠ manda biai holebiragoni ndobe.
PSA 102:13 Í̠na Saiono tano ngago mitangi bialu dara holeberego manda bido. Í̠na dara howa biamogo bulene horo biagoni abale tagira ibiyada. Horo ogoni áyu ngagoniore ndobe.
PSA 102:14 Saiono tano bo gialabagabu wahayago í̠naga biabe biahaga karume tano ogoni mitangi timbuni bialu hamelo ka. Áyu tano ogoni mo ko hai hene ngagoyu tigua dara ho haabo ka.
PSA 102:15 Hameigini tara tara dindi bibahendeni palima pedarume Anduane Homogohondo gi hai holebira. Dindi bibahendeni kini karume ibunaga hongo timbuni kago hondowa ti gi hai holebira.
PSA 102:16 Mani howa Anduane Homogohanda Saiono tano lone biadai birangi ibunaga hongo ogobi lalu walia holebira.
PSA 102:17 Ibugua ibunaga wali agali yu wahene karume olaragola hale holebira. Tigua ibuhondo bi lararu hale howa erembira mialu napolebira.
PSA 102:18 Anduane Homogohanda mbirale áyu inahondo biraruni ina waneigini aguanene mani holobadarume hendelo mbugani gilibu widaba. Wali agali mani holebirarume Anduane Homogohanda biniru te hale howa ibunaga mini yaraga halu holebira.
PSA 102:19 Iname bi ogodagua gilibu wimi̱ya. Anduane Homogo ibuni haga daligaoreha howa handape haya. Ibu dahuliya andagani howa dindiha handadaliho haya.
PSA 102:20 Wali agali garabaya bini hearume tandaga nalu howa dugu biayuago hale haya. Hale howa ibugua agali godi hale hagame bo waholene nga lene hearu ti homa nabilonaga biamogo bialu golope haya, lalu gili bulene nga.
PSA 102:21 Ibugua ani biyago hale howa Saiono dindini wali agali bu karume Anduane Homogonaga mini latagi halu Yarusalemeni howa ibunaga mini yaraga halu holebira.
PSA 102:22 Hameigini tara tara dindi bibahendeni palima pedarubi tinaga kini karubi ti bibahendeme Anduane Homogo mitangi bialu lotu lole íbu ngoai harangi ani lalu holebira.
PSA 102:23 I̱ wene igiri daliahe dege hewaria Anduane Homogohanda i̱naga hongo bope ho heledagonida. Ibugua i̱ dindi ogoriani lu naholiya i̱naga holene mo tubagi ho heledagoni ndobe.
PSA 102:24 I̱naga Ngode Datagaliwabe-o í̠ haluhe haabobo bu kegoni. I̱ agali wahe ndo wene igiri daliahe dege kogonigo í̠na i̱ áyu ogoni yamia nabibe.
PSA 102:25 Bambaore í̠na dindi bibahende wabiniyagoni. Í̠ninaga gimeore hari daliga li kago wabialu mbirale karubi ngarubi bibahende wabiai hariya.
PSA 102:26 Aga labolaboru goba halu budahole biagadagua dindi harila mo ko holebiragoyu í̠ni hangu haabobo bu haga kegoni. Agalime aga labolabo goba haragola wahagadagua dindi harila ereba hai haragola lone nahondoleberemaore.
PSA 102:27 Í̠naga holene ala henegobi dege haho wiaabo haga kegoni.
PSA 102:28 Í̠ ani kegoni howa inanaga waneiginiru ti bayale helo í̠na handaya ho holebere. Tinaga aguanene maniore hama polobadarubi ti í̠ni andaneha bayale haabo holebira.
PSA 103:1 I̱na Anduane Homogonaga mini mo yaraga holebero. I̱naga minimebi tinginimebi mbirale i̱ha kago damenego bibahendeme ibunaga mini baya buruguleore kago mo yaraga haabo holebero.
PSA 103:2 I̱na Anduane Homogonaga mini mo yaraga holebero. Ibugua i̱hondo turu halu bayale dege bigi biaga kago embeda naholeorebero.
PSA 103:3 Ibugua i̱na ko beroru bibahendeore domo wahai haga ka. I̱ni warago tara tara anda íbu wigi bidangi mo dabi haga kagoni.
PSA 103:4 Anduane Homogo ibugua i̱ore homoliya yupe nahe haru dai biaga ka. Haru dai bialu ibugua i̱ gubalini halu dara timbuni haga kagoni.
PSA 103:5 I̱ ani ho ko lalu walia halu i̱ dindini kongi ibugua mbirale bayale dewa bu hombedo ngiragola i̱ karulapeore wu haabo haruli. Ibugua ani bigi biragome i̱ lone igiriho dai bialu hongohe ega bodo hariawe ale haruli.
PSA 103:6 Wali agali darabi dindiha haga karu maru karume ti hengedope haragola Anduane Homogohanda tinaga bi tigatiga lahaga ka. Ibugua ti mo yaraga halu ti holene ngadagua helolebira.
PSA 103:7 Anduane Homogo ibugua Isaraele wali agali biamogo bulenenaga ibu miniha manda manda bu yu heago damenego Mosese walia hene. Walia halu Anduane Homogo ibugua biabe hongohe bigi biyaru Isaraele wali agali ti de hendelene.
PSA 103:8 Anduane Homogo ibugua ina dara howa biamogo biagabi gubalini timbuniore hagabi ka. Ibu keba ala awane nahaga howa ibugua ibunaga gubalini haho wiaabo holeneme ina yaniho wiaabo helowa haga kagoni.
PSA 103:9 Iname mana ko liahebi beramarunaga Anduane Homogo ibugua ina ba talia bia biaganegoyu ani bialu haabo nahaga. Ibugua ibunaga wali agalihondo handabe manga howa keraho haabo nahaga kagoni.
PSA 103:10 Iname mana ko gibi dewaore bidamaria ko birimarunaga pani ogonibi tahe ngulene ngadagua ndo ibugua pani emene hangu ngiaga kagoni. Iname mana ko liahebi birimarunaga pani timbuniore nabehegoyu ibugua ina yopialu pelaga bialu kagoni.
PSA 103:11 Hari daliga li kagome dindi bibahende ngagoni dambi hai kadagua Anduane Homogo ibugua wali agali ibuhondo mitangi bialu giho haga karu ibunaga gubalini holene timbuniore ogonibime ti gubalini ho kagoni.
PSA 103:12 Uyu ni tagira ibagagoha howa namu ni paliagagoha polenego kaware ndo kaundiaore gibi ngagoni. Ani ngadagua Anduane Homogohanda iname ko birimaru bu wu kamaria ibugua domalu hiliyalu pialu kaundiaore gibi namura ona agima ndooreni yalu pu wahaga kagoni.
PSA 103:13 Abame ibunaga waneigini gubalini howa baya hanguore handayaho hagadagua Anduane Homogohanda wali agali ibuhondo mitangi bialu giho haga karu baya hangu ogonidaguaore gubalini howa ibuni handayaho haga kagoni.
PSA 103:14 Ibugua ina ogo aleme wabirugo ni bu karuni lalu ibuni manda bidagoni. Bame dindi dugualu wabirugo ni bu kagoni lalu ibuni manda bu kagoni.
PSA 103:15 Ina wali agali bu kamaruni inanaga holenego emene tubagi tigimandi hangu tani mbuambua andaho kalidagua kamagoni. Tani mbuambua minalu anda howa lini do haganedagua ina bu kamagoni.
PSA 103:16 Tani mbuambua lini biago dedaria puyabume pulo ba haragola dindini dogolope haga. Dindini dogolope hayagua o piyagoni haga. Dogolope henego lone dene biagoria dodai bidaria nahandaga.
PSA 103:17 Ani biagagoyu ai wali agali Anduane Homogo andaneha howa ibuhondo mitangi bialu giho haga karu ibugua ti dara halu gubalini haho wiaaboore haga kagoni. Uruni tinaga waneigini dabane mani hama polebirarubi ibugua ti gubalini halu tihondo bayale dege biaabo halu holebira.
PSA 103:18 Anduane Homogonaga habo nalolene bi lo winidagua bialu karu ibugua bia lenedagua hale halu birarubi nde tihondo bayale dege biaabo halu holebira.
PSA 103:19 Anduane Homogo ibu dahuliya andagani kini biruwa mbirale bibahende ibugua handame ho kagoni.
PSA 103:20 Dahuliyali hongo gibihe kamiru Anduane Homogo ibugua bi larago baya hanguore hale halu bia larago biaga kamiruni tíbi turuore gibi halu Anduane Homogonaga mini mo yaraga hadaba.
PSA 103:21 Dahuliya andaga howa Anduane Homogohanda laradagua hale halu ibunaga biabe biahaga kamiru tiguabi turuore halu Anduane Homogonaga mini mo yaraga hadaba.
PSA 103:22 Mbirale bibahendeore Anduane Homogo ibuni wabini ngamirubi kamirubi tí bibahendeorenaga kini ibuni howa ibugua tí handame ho kago tígua turuore halu ibunaga mini mo yaraga hadaba. Ani bidaba. I̱nabi Anduane Homogonaga miniore mo yaraga holebero.
PSA 104:1 I̱na Anduane Homogonaga mini mo yaraga holebero. Anduane Homogo i̱naga Ngode Datagaliwabe-o í̠ daliga gibiore kegoni. Í̠ kini daliga gibiore howa mini mo yaraga holenebi duniniore holenebi aga karularadagua karulo kegoni.
PSA 104:2 Wá holene gibioreme í̠ni aga karu laradagua karulo howa haru kegoni. Agalime balai anda dungume howa anda biagadagua í̠na hari daliga li kagoni wabuwa dungume ho heledegoni.
PSA 104:3 Ani buwa í̠ninaga andaga iba bedago yarali howa uyuraore daligani bu kegoni. Í̠ hari beraliba ngarunaga biralu eberegola puyabume í̠ yalu ibirayagoni.
PSA 104:4 Puyaburume í̠naga bi yalu ina kamaria pu lareya. Hari daba biralirubi í̠naga biabe dege bia ha lareya.
PSA 104:5 Dindi timbuni ogo í̠nime wabuwa winiyagobiore hongohe ngagoni. Dindi ogo imi ema emene mbira nabi girigurabi mbira nabulebiraore.
PSA 104:6 Iba solowarame dindi timbuni ogo bibahende bu dambi haiho winiya. Iba ogonime hari hearubi bibahende biru namulaiho winiya.
PSA 104:7 Ani dambi haiho wiaria í̠naga bi hongoheme iba solowara taliriya. Taliri handala iba ibu gerai ibida puabo hayiya. Iba solowara ibu í̠naga bi hongohe biago hale halu bia laridagua bialu ibida piyiya.
PSA 104:8 Ibida pialu hari hearu yu wahalu porabu pebe bialu dindi ulini wiaruha í̠nime tini berelo wabu winiyarunaga pu birayiya.
PSA 104:9 Iba uruni biru bolangua nahelonaga í̠nime tu winiyagoriani iba áyu ogoriani birairi kagoni. Áyu ibame ala bibahende namulaiho winiyadagua lone namulai naholebira.
PSA 104:10 Dindi uliniruha howa iba dugutagi helalu hari labo dombeneruha howa iba duguaga duguaga bilalu unura pugulu pebe biledegoni.
PSA 104:11 Ani biledegoria nogo gabua tara tara karume iba uruni naga naga bialu kagoni. Nogo dongi gabua karumebi iba noa howa hége lebolaho henedagobi karulapeore nalu kagoni.
PSA 104:12 Iba uruni angeni ira bu karuha egarume tininaga anda bigi bigi bialu biruwa iba ganaru turu howa laga laga bialu biru ngagoni.
PSA 104:13 Hariha howa dalu hari hombene ngarunaga dalipe helaga bialu kegoni. Ani bigi beregome dindini mbirale bayale bayale bu paya bu ngagoni.
PSA 104:14 Nogo bulumagarume nelo tani mo anda helalu ina wali agalime nalu holoma̱yanaga tomo inaneme hengedamaru mo anda haga beregola nalu kamagoni.
PSA 104:15 Ani bialu iname ina mabuni pu mbira lini daga mini gerebi hangalu linime pingidowa waini iba wabu nalu ina miniha turuore halu dungu lo kamagoni. Ira olibe lininaga ibane hambuwa denguinibi haguanibi haiho kamagola inanaga dengui haihe wále bu kamagoni. Widi hangalu dowa mberedi wabuwa dawa no kamagola ina tinginiha hongo ngidagola kamagoni.
PSA 104:16 Lebanono dindini ira tamia bu karuni hariha howa dalu ibaabo haragome damiaabo haga kagoni. Ira tamia uruni Anduane Homogo ibugua bamba hengenego ibuninaga ira bu kagoni.
PSA 104:17 Ira tamia uruniha egarume tininaga anda bigi bigi biaga beda. Ai ega ma luhe mbira bedarume tinaga anda ira guraya ale karuha biaga bedagoni.
PSA 104:18 Meme gabua karu ti hari timbuni wedarunaga neneni ibagabu haga kagoni. Tia amala horia ale bedaru ti egeandaha bira do haga bedagoni.
PSA 104:19 Harini ege wabu helariyagome tagira ibuwa ngoaho haga bialu mali mbiragonaga ege biagoni ogoaleneda lalu ibuni langialu kagoni. Ai ni ibu nde ogoangi anda pialu dadai bialu palue ibuni manda bu kagoni.
PSA 104:20 Í̠na aruma helaregola mbiraga nogo ega gabua tara tara ti bibahende tagira ibuwa ibaga bu haga kagoni.
PSA 104:21 Laiono hungubaluarume tomo taya bialu howa ne noani bi hongo howa ladaga halu larayagoni. Ngode Datagaliwabe í̠na tomo ti nelo mereyago ogoni mbira agini ngabe hondole taya bialu howa bi ani larayagoni.
PSA 104:22 Ti ani bialu howa ni dara handala uliha tini paliradagoha palima dai biaga.
PSA 104:23 Ani pedaha wali agali ti heyalu biabe bu puwa biabe bialu kane dege alendo ni palira handala ti andaga piaga.
PSA 104:24 Anduane Homogo-o í̠na mbirale dewaore wabiriyagoni. Í̠ mini gigabiwi gibiore kegome mbirale uruni bibahende í̠nime wabiriyagoni. Dindi timbuni ogoni mbirale tara tara í̠ni wabiriyarunime wu to̱lotagi kagoni.
PSA 104:25 Iba solowara timbuniore gibi bedagoni. Iba o bedagoniha wena timbuniore gibirubi wena emenebi dewa daga labenaheore biralu mbirale marualebi ogoniha dege biru ngagoni.
PSA 104:26 Iba solowara daligani iba sibi puíbu daibu biaga. Iba unura dindiha wena gibi hiriribi bamba í̠ni wabu berelene o bedagome gini biaga bedagoni.
PSA 104:27 Uruni bibahendeme ti tomo noa biaruangi í̠na dege mibelo í̠naga gi handayaho biraga bedagoni.
PSA 104:28 Í̠na ti tomo nolene meregola ti naga. Ti tomo merego karulapeore nalu tombeore hara handala piaga.
PSA 104:29 Í̠na ti erembira meregola ti giho haga. Í̠naga buhe̱ tiha helarigo yameregola ti homo tongolo daga halu lone dindi tago biaga.
PSA 104:30 Í̠na ti buhe̱ lolene meregola ti emabu haga. Í̠na dindini mbirale bibahende gahenge hangu tagira íbu helaga bialu kegoni.
PSA 104:31 Anduane Homogonaga hongo holenebi ibunaga wá holenebi wiaaboore helo hame ledo. Anduane Homogo ibugua mbirale ibunime wabu helaga biyadaru handaga bialu ibuni turuore helo hame ledogoni.
PSA 104:32 Anduane Homogo ibugua dindi timbuni o ngagoni de handaya haragola dindi ogoni duru laga. Ibunaga gime hari karuni ela haragola hari karuni hagua hungula bulebira.
PSA 104:33 I̱ dindini emabu kongi i̱na Anduane Homogohondo iba ganaru lo mulebero. I̱na i̱naga Ngode Datagaliwabe kagonaga mini mo yaraga halu iba ganaru laho ngoore dege i̱ni homalu lairi holebero.
PSA 104:34 Anduane Homogo ibugua i̱ mo turu haga biragola haruligo i̱na iba gana lo meroruore ibu hale halu turuore helo hame ledo.
PSA 104:35 Anduane Homogo-o wali agali mana ko biaga bu karuniore dindini nahelo balu bo ereba habelo hame ledo. Wali agali ko ngubiore uruni ereba hai helo hame ledo. I̱na Anduane Homogonaga miniore mo yaraga holebero. Anduane Homogonaga mini mo yaraga hama.
PSA 105:1 Iname Anduane Homogohondo turu howa ka̱i̱ lalu ibu daliga gibiore ka lalu lamiai hami̱ya. Wali agali hameigini dindi tara tarani paluyu pedaru ti bibahendehondo ibugua gibiore uruale biya laga bialu hale hai helo loyogo laga bimi̱ya.
PSA 105:2 Iname ibunaga mini mo yaraga halu iba gana lalu hami̱ya. Ibugua mbirale bayale bigi biyarunaga bibahende hale hai helo laraga halu lamiai hami̱ya.
PSA 105:3 Anduane Homogo ibu mini tigabiore kago ina ibunaga kamago iname ibuhondo turu hami̱ya. Wali agali Anduane Homogohanda hame ledadagua biaga kamaru ina turuho holene nga.
PSA 105:4 Anduane Homogohanda ina biamogo bilonaga ibu karia puabo hami̱ya. Iname Anduane Homogo ibu kagoha kaware haparaho haabo hami̱ya.
PSA 105:5 Abarahama aguanene Anduane Homogonaga biabe bia hagane kamirubi Yagabanaga aguanene Anduane Homogo ibunime dabene kamirubi tígua Anduane Homogohanda manane tara tara agalime nabiagane ale bigi biyarubi wali agali ko biaga hearuhondo pani migi biyarubi mitangiore biaabo halimu.
PSA 105:7 Anduane Homogo ibu inanaga Ngode Datagaliwabe kagoni. Ibunaga mana lo ngaruni wali agali dindi bibahendeha bu karume bilonaga lo nga.
PSA 105:8 Ibugua habo nalolene bi lowinigo ngaruni wia ai̱ ai̱ore bulebira. Ibugua bi lo wialu ogoale bulebero laga bialu lo ngaruni mani hama porarume handaga bialu karia wia ai̱ ai̱ore bulebira.
PSA 105:9 Ibugua Abarahamala habo nalolene bi lo wialu Aisagahondo ogoale bulebero lenegobi heneneore bulebira.
PSA 105:10 Anduane Homogo ibugua Isaraelehondo habo nalolene bi lowinigo ogoni wali agalirume bialu haabo helonaga lowini.
PSA 105:11 Anduane Homogo ibugua Isaraelehondo lalu, I̱na tíhondo Kenana dindi karulalimulo ngulebero. Dindi ogoni tíbi tínaga waneigini mani holebirarubi tíninaga dindi ogoniore halimulo ngulebero, lene.
PSA 105:12 Ala Ngode Datagaliwabenaga wali agali dewa ndo henedaruni ti emene mbira hangu Kenana dindini hene. Ti dindi tene ndo mendeali dindini bame igiri yango pu haradagua bini.
PSA 105:13 Ti dindi mbirani baya hangu ho dambolo hene ndo. Ti togolo yalu pialu dindi wiaruni bibahendeha ge hai haga hene. Kini mbiragonaga dindiha puwa emene tigimandi dege halu lone hili yalu pialu kini mende heagonaga dindiha pu halu ani bigi bialu hene.
PSA 105:14 Ti ani bu ha heagolabi hameigini maru hongohe hearume ibunaga wali agali uruni hengedope holilono Ngode Datagaliwabe ibugua ti mamage hene. Mamage howa ibugua kini hearu talialu ibunaga wali agali urunihondo kagua mbira bulumini lalu lamini.
PSA 105:15 Ibugua lalu, I̱naga biabe bia haga i̱nime dabene karu mo ko holemini. I̱naga mana latagi haga karuore mbira ela nahalimu, lene.
PSA 105:16 Anduane Homogohanda ti dindini tomo wiago damene bibahende mo yu ereba hai halu hina gariore gibi tagira pelene.
PSA 105:17 Ani ibilole howa dege ti maha ibilonaga ibugua Yosebe ala bamba halu Iyibi dindi pu helene. Ibu hamene biarume Yosebe ti muni tagu wialu agali maru hearu tinaga garabaya biabe ale bia haga helo minu mini.
PSA 105:18 Tigua ibunaga ge kirabali pu senime minu huba biagola ge tandaga timbuni hene. Ani bialu aeane gendabi mbira ibunaga mani hende hene.
PSA 105:19 O biyadaruni Anduane Homogo ibugua ala Yosebehondo emagaha howa bulebira lamiyadagua henene tagira pene.
PSA 105:20 Ani biyagola Iyibi dindinaga kini heagome Yosebe gololenaga agali mbira heagome lama pu lene. Iyibi dindinaga kini wali agali dewaore haru haga heagome Yosebe golope hene.
PSA 105:21 Golope howa kini biagome ibunaga gabumane agali haguane helo Yosebe dabo helene. Dabi helowa Yosebe ibu Iyibi dindi bibahende hearunaga haguane helo helene.
PSA 105:22 Kininaga gabumane haru haga hearubi kinihondo mitangi talebu miaga hearubi uruni bibahende de hondowa haru holene hongo ibugua Yosebehondo mini.
PSA 105:23 Mani Yagaba ibu Iyibi dindi pialu ogoriani ho ibira howa hene.
PSA 105:24 Ibu ani hearia Anduane Homogohanda Yagaba hameigini biamogo bialu ti waneigini dewa tagira íbu helene. Yagaba hameigini uruni ti hongoheore helalu tinaga waitigi hearunaga hongo dindiha helo helene.
PSA 105:25 Anduane Homogo ibugua Iyibi wali agalime ibunaga wali agali handabe manga helo helene. Ani helayagola Iyibi wali agali tigua Anduane Homogonaga biabe biahaga hearu mo hondo hole henge taya bialu helo helene.
PSA 105:26 Mani Anduane Homogohanda ibunaga biabe biahaga ala dabene Mosesebi Aronobi heba libu haru Iyibi dindi pelene.
PSA 105:27 Puwa libugua Iyibi dindini howa Ngode Datagaliwabenaga biabe hongoheore bialu manane tara tara agalime nabiagane ale dewa bialu hene.
PSA 105:28 Ngode Datagaliwabehanda aruma holeneme Iyibinaga dindi bu dambi hayagola wali agali hearu ti arumaha hene. Iyibi wali agali arumaha hayagoyu tigua Ngode Datagaliwabehanda bidaba layadagua nabi ibunaga bi mo wahene.
PSA 105:29 Ibugua tinaga iba berearuni mo darama biai halu wena ibaha berearuni bibahende bo homelai hene.
PSA 105:30 Yago dewaore gibi tidi yalu ibilalu tinaga dindini yago dege birame helalu kininaga andaga hearuhabi heba yago degeme to̱lotagi helene.
PSA 105:31 Ngode Datagaliwabehanda bungunabi hinabibi alebi tidi yalu pudaba layagola ti tidi yalu puwa Iyibi dindi damenego pedegone mbira wuwa nahe bibahendeoreha to̱lotagi hene.
PSA 105:32 Ibugua tinaga dindini dalu ibuni ibi nale dalu dindi kunibi hari dababi gibiore ibilene.
PSA 105:33 Ogoni ibiyagome Iyibi wali agalinaga mabuni pu mbira lini daga mini gerebi hongo wiarubi podai halu poge ira hearubi podai halu ti dindini ira hearu damenego bibahendeore podai hene.
PSA 105:34 Ibugua bi hangu layagola pagaya ale dewaore gibi daga labe nahe tidi yalu tagira ibini.
PSA 105:35 Tagira ibuwa tigua dindini tomo bibahende hengearu damenegonaga yuni tugu naiore halu mbirale andaho hearu damene tene heba na anda hene.
PSA 105:36 Ngode Datagaliwabe ibugua Iyibi wali agalinaga igini wahene damenego bibahende homelo bo wahai hene.
PSA 105:37 Mani ibugua Isaraele wali agali Iyibi dindi yu wahalu haru tagira pene. Tinaga giha muni ngoloru silibaru yalu tagira pene. Isaraele wali agali ti bibahendeore bayale hongohe hangu tagira pene.
PSA 105:38 Iyibi wali agalime Isaraele wali agali hondowa giho henego Isaraele wali agali tagira pialu piyagola ti turuore halu dungulo daibu hene.
PSA 105:39 Ngode Datagaliwabehanda hari daligani ibunaga wali agali hearu tigatiga hari beraliba mbira ngelowa ibunaga wali agali uruni andaneha helene. Mbiraga harini ira hangu delayagola ogonime wá hadali hayagola Isaraele wali agali ti wáni bayale hene.
PSA 105:40 Tigua Ngode Datagaliwabehondo tomo noa kama layagola ibugua ti nelo hariha howa ega de̱wa̱re ale ibilayagola ti ega uruni balu nene. Ti tomo nelonaga ibugua dahuliya andaga howa mberedi dalilayagola ti karulapeore nowa tombeho hene.
PSA 105:41 Ti iba nelonaga to̱le̱ timbuni mbiraha howa iba tagira pelene. Dindi ko dalu naibagaha iba timbuni biagoni tayandaha dugutagi haradagua bialu o biagoriani gerai yupe helene.
PSA 105:42 Anduane Homogo ibugua ala bamba howa habo nalolene bi hongohe mbira ibunaga biabe biahaga Abarahamahondo lowinigo ogoningi mitangi bini.
PSA 105:43 Anduane Homogo ibugua anidagua bialu ibunaga wali agali dabeneru haru halu tagira pene. Haru tagira piyagola ti turu hama iba gana ladaga halu mambolo bama pene.
PSA 105:44 Anduane Homogo ibugua wali agali hameigini tara maru hearunaga dindi wiaru muwa ibunaga wali agali uruni mo mini. Wali agali tara uruninaga mabu wiarubi muwa ibunaga wali agali uruni ti karulelene.
PSA 105:45 Ibugua ogonidagua binidagoni irane Anduane Homogohanda bi lenedarubi ibunaga mana lowinidarubi bibahende Isaraele wali agalime talialu biai helonaga ani bini. Anduane Homogonaga mini mo yaragaore hama.
PSA 106:1 Anduane Homogonaga mini yaraga hama. Ibugua mana bayale biaabo haga kagonagabi ibunaga gubalini holene ha ho wiaabo haga kagonagabi iname Anduane Homogohondo ka̱i̱ lama.
PSA 106:2 Ibugua mbirale timbuni bigi binirunaga garealalu aiwa lai habehedabe. Mana bayale biniru mitangi bialu ibunaga mini yaraga karulapeore hai habehe aiwadabe.
PSA 106:3 Wali agali ibunaga bi hale halu bia laradagua biaga karubi mana tigabi ngaru biaga karubi ti turu ho holene nga.
PSA 106:4 Anduane Homogo-o í̠naga wali agali biamogo berengi i̱bi nde mitangi bibe. Í̠na ti pele mialu haru dai berengi i̱bi nde haru dai bibelo hameledo.
PSA 106:5 Í̠naga wali agali ti bayale howa mbirale bayale damene ngaru mo wuwa tigua turu haga bialu kadagua i̱bi nde ti heba turu hamaga ho holeneore hamelo ko. Ina turu holene ogoni irane ina í̠ninaga wali agaliore henene kamagome mini mbiraore halu mandagi howa turu haga bu holeberama.
PSA 106:6 Bamba ina mamalirume mana ko bialu heneyadagua inamebi nde mana ko tara tara dewa wiaru bialu harimagoni.
PSA 106:7 Inanaga mamalirume Iyibi dindini heangi í̠na biabe nahendene ale biriruni ti manda nabi haya. Í̠na í̠naga gubalini holene walia halu ti biamogo biriruni tigua embeda hai halu iba solowara Daramabi bereagoria heangi tigua Anduane Homogo Hongo Haiheore haabo kego í̠ni erembira ngiya.
PSA 106:8 Tigua ani biyagoyu Anduane Homogohanda ibunaga hongo timbuni winigo mo walia halu ibugua ti biamogo bule lalu bi lowinidagua pele mialu gi mini.
PSA 106:9 Ibugua iba solowara Daramabi bereagohondo bi lamiyagola iba biagome bira migimigi bialu dindi pani hene. Pani hayagola ibugua wali agali haru halu ti iba biraga biagoria bame dindi hanguni poradagua bini.
PSA 106:10 Agali ti handabe manga haga hearume ti mo ko holebiyaria ibugua ti pele mini. Ti waitigi hearunaga giha hearia ibugua pele mialu haru dai bini.
PSA 106:11 Iba solowara timbuni biagome waitigi biaru bo tangu dambi hai halu ibame nai helene. Mbiraoreli hangubi mbira pora bialu napene.
PSA 106:12 Anduane Homogohanda anidagua biyagola ibunaga wali agali biarume ibugua buleore lalu lowigi biniru heneneore biragonida manda bini. Manda bialu ibuhondo mini mbiraore wiai halu tigua ibunaga mini yaraga halu iba ganaru lalu hene.
PSA 106:13 Ibugua ani biyago bilowa dege tigua uruni biyaru abaleore embeda hai hene. Tigua mbirale bule manda biyaria Anduane Homogohondo haleha nabi tini miniha tagira ibiyaru ale dege bialu hene.
PSA 106:14 Dindi ko iba dalu naibaga wiagoria howa tinaga miniha tomo noa dege halu tigua Ngode Datagaliwabe ba hendene.
PSA 106:15 Tigua ibuhondo bi haya halu ngi laabo hayagola ibugua ngi layago mialu tiha warago timbunibi tagira ibilene.
PSA 106:16 Ti dindi ko iba dalu naibaga wiagoria howa tigua Mosesebi Anduane Homogonaga biabe biahaga helo loma bia hene Aronobi libuhondo henge lalu hene.
PSA 106:17 Ti ani bialu hemigola dindi mo gaibuki hayagola gundu uli timbuni mbira o biagoria wu pehene. Ani biyagola Dadanabi Abiramabi libu one waneigini damene bu hearubi bibahendeore gundu uli o biagoha uli piai hene. Uli piai hayagola dindi ibunime lone mo gegebu dambi hene.
PSA 106:18 Wali agali maru ko biaga biaru talima pialu hearuni ira hedo ibira halu ti dai helene.
PSA 106:19 Tigua Hari Horebe wiagoria howa nogo bulumaga ale mbira ngolome wabu ngelowa dama ogonida lowa bi pupu wialu hene.
PSA 106:20 Tigua Ngode Datagaliwabe ibu duniniore mini lene kago mitangi bialu lotu laga henego wahalu nogo bulumaga datani nalu haga heago ale wabu ngelowa ogoni mitangi bia aribia halu ibuhondo bi pupu wialu hene.
PSA 106:21 Ngode Datagaliwabehanda ti Iyibi dindini hearia ibugua nahendene ale tara tara bialu Isaraele wali agali Iyibialirunaga giha hearia mo wini. Ibugua ani biyagoyu Isaraele wali agalirume ibu mo embeda ho hene.
PSA 106:22 Ngode Datagaliwabehanda Iyibi dindini agalime nabiagane ale timbuni dunini wiaru bialu iba solowara Daramabi bereagoria ibugua nahendene ale tara tara biyagola wali agali tigua mogolo hendene.
PSA 106:23 Ngode Datagaliwabehanda ibunaga wali agaliru bo wahole layagola ibunaga biabe biahaga helo dabo helene Mosese ibugua Ngode Datagaliwabenaga deni heyu howa Isaraele wali agali biamogo bialu Ngode Datagaliwabehanda bo wanahelo ibunaga keba holene wiago ha pai hayagola Ngode Datagaliwabehanda ibunaga wali agali ba nabi wahene.
PSA 106:24 Ngode Datagaliwabehanda bulebero lalu lowiyago tigua yu tiga nabi howa dindi bayale ibugua ti ngulebero layago mo waho hene.
PSA 106:25 Tigua tinaga balai andaha ho palu howa bi gomogomo lalu Anduane Homogohanda tihondo bi layago talialu bia nabi wahene.
PSA 106:26 Ti ani heagola Ngode Datagaliwabehanda tihondo bi hongohe lalu, Tí dindi ko ege to̱le̱ hangu wiaga ngagoha i̱na tí home lelolebero.
PSA 106:27 Tínaga waneigini aguanene mani holobadaru ti dindi taratara ngaruha talia togo lelarogola ti hameigini tara tara Anduane Homogo manda nabi bu karu heba howa dindi tara ogoniha halu homolebira, lene.
PSA 106:28 Mani tigua Peo dindini howa dama mitangi bialu gime wabu wini mini Balahondo bi pupu wialu hene. Tigua mbirale ema nabulene bi nalaga ogonihondo lomabu mini tomo wiaru nalu hene.
PSA 106:29 Tigua mana ogonidagua bialu hayagome Anduane Homogo mo keba hayagola ibugua warago koore mbira tiha anda ibilaya.
PSA 106:30 Warago ogoni ibilayagola Piniasahanda heyuwa mana ko bialu hearu bibahende minu baga biyagola warago timbuni biago ereba haya.
PSA 106:31 Piniasahanda mbirale o binidaruni bayale biya lalu wali agalime mitangi biaho kadagua maniore wali agali holebirarumebi anidagua dege mitangi biaabo holebira.
PSA 106:32 Isaraele wali agalime iba Meriba peagoria howa Anduane Homogo mo keba halu heneya. Tigua ani biyagome pani tini nolene winigo genda ogoni Mosesehanda tinaga yu aribia heneya.
PSA 106:33 Tigua Mosese mo tandaga timbuni hayagola ibugua bayuwa mitangi nabi howa bi bayale ndo mbira lene.
PSA 106:34 Anduane Homogohanda tihondo wali agali tara karu homelo bo wahai halimu lalu lamiyago tigua nabe wahene.
PSA 106:35 Isaraeleali tigua wali tara berearu dabu bigi buwa tinaga mana ko wiago taluwa bialu haga heneya.
PSA 106:36 Tigua dama mitangi bialu gime wabu wiaruhondo bi pupu wialu hayagome Ngode Datagaliwabehanda tini mo ko helo helene.
PSA 106:37 Tigua dama mitangi bialu gime wabini Kenana dindini wiaruhondo tinaga waneiginiru bu hearu bo lomabu miaga heneya.
PSA 106:38 Ti waneigini urunime ko bini mbira nawioregoyu tigua bameore homelo beneyago waneigininaga daramame Ngode Datagaliwabenaga deni dindi ogoni mebiahe winiya.
PSA 106:39 Tigua mana ko ogonidagua biyagome tini Ngode Datagaliwabenaga deni dodohe halu ibu erembira mialu ibuni talima nape wahene.
PSA 106:40 Anduane Homogohanda ibunaga wali agali urunihondo keba timbuni howa ibugua ti handabe mangaore heneya.
PSA 106:41 Anduane Homogohanda Isaraele wali agali yupe howa ti hameigini tara tara hearunaga giha helene. Ani biyagola ti waitigi biarunaga andaneha hene.
PSA 106:42 Waitigi urunime ti genda dewaore mo ya heagola ti waitiginaga andaneha haabo hene.
PSA 106:43 Anduane Homogohanda ibunaga wali agali biamogo biaabo hayagoyu ti doga howa ibugua bi layago mo wahalu mana ko dewaore bialu hene.
PSA 106:44 Tigua ani biaabo hayago helowa Anduane Homogo olalu ibuhondo bi layagola ibugua hale howa tiha genda wiago de handalu ti dara haga biniya.
PSA 106:45 Ibugua tihondo dara timbuni halu habo nalolene bi ala lowiyago mitangi biniya. Ibugua tihondo gubalini haabo hayagome lone mitangi bialu ti dara heneya.
PSA 106:46 Anduane Homogohanda ti waitigi bu hearunaga miniha mo wála hayagola tigua Isaraeleali hondowa daraho dai bini.
PSA 106:47 Anduane Homogo inanaga Ngode Datagaliwabe kego í̠na ina waitigi karunaga giha howa yamialu inanaga dindini lone holoma̱ya haru dai bu helabe. Í̠na anidagua beregola iname í̠hondo turu halu ka̱i̱ lalu í̠naga mini baya buruguleore yaraga halu haabo holeberema.
PSA 106:48 Anduane Homogo Isaraele wali agalinaga Ngode Datagaliwabe kago ibu mini yaraga hami̱ya. Áyubi maniore howabi ibunaga mini yaraga haaboore hami̱ya. Ina wali agali bibahendeme lalu, Heneneore Anduane Homogonaga mini yaragaore hama, lalu aniore laabo hami̱ya.
PSA 107:1 Anduane Homogo ibugua inahondo baya gibi dege bigi biaga ka. Ibugua ina gubalini haho wiaaboore haga kagoni. Ibugua ani biaga kagonaga iname ibuhondo ka̱i̱ lolene nga.
PSA 107:2 Ala tínaga waitigi hearunaga gime tí minu yaniho hearia Anduane Homogohanda gingila mialu haru dai bini kamiru tígua i̱na larodagua dege lalu ina haru Anduane Homogonaga mini mo yaraga hami̱ya.
PSA 107:3 Tí dindi haluni taraha hemiria ibugua haru dai biyagoni. Dindi tara tara ni tagira ibiragohayagibi ni paliragohayagibi uyurahayagibi unurahayagibi dindi uruni bibahendeni hemiria ibugua tí haru dai biai hayagoni.
PSA 107:4 Wali agali maru dindi ko wali agali nahaga wiagoha pupe halu pene. Piyago puwa hariga nawiaha pu lulu yuwa wali agali pale andahe mbira nawiaha iraga howa pu taluaho hene.
PSA 107:5 Pu taluaho howa hina gari gibiore bialu iba noa howa hége lebolaho daga hayagola ai tongoore lole ogonida lo manda bini.
PSA 107:6 Tini darabi ogonibiore howa Anduane Homogo olayagola ibugua ti biamogo bigi bialu genda yu hearuni yamuwa mo wahaga bini.
PSA 107:7 Ani bialu ibugua ti hariga tigabini pelo haru pialu tano mbira ti holene winiyagoria haru pu helene.
PSA 107:8 Anduane Homogohanda ti gubalini haho wiaabo halu tinaga mbirale baya gibi turubini hangu bia haga bialu hayagonaga tigua Anduane Homogohondo ka̱i̱ore lolene nga.
PSA 107:9 Wali agali iba noa howa hége yobu karu iba nelo ibugua miragola ti iba karulapeore nowa dungulo helo miaga ka. Wali agali tomo noaho karu nelo tomo dewaore miragola ti haruore nowa tombe to̱lo haga kagoni.
PSA 107:10 Wali agali maru arumaore dumbiliniha howa pu senime gi ge minu hubabu wiagola garabayaore howa gendaho hene.
PSA 107:11 Ti ogonibiha henedagoni irane tinime Ngode Datagaliwabe Hongo Haiheore kagome ogoale bibe nabibe lalu laga biyagola tigua ibunaga bi erembira mialu piyagome tini ogonibiha pu hene.
PSA 107:12 Pu howa ti erekui biabe biadege bialu hongo bibahende pirilipe hai hayagola hene. Hongo bibahende ereba hai halu dindini pilo ibira haga biyagola ti gi mulene mbirali nahene.
PSA 107:13 Tini darabi ogonibiore howa Anduane Homogo olayagola ibugua ti biamogo bigi bialu genda yu hearuni yamuwa mo wahaga bini.
PSA 107:14 Anduane Homogohanda ti arumaha mini burugule ogoniha hearia pu seni biaru hadape halu ti garabaya hayago lone hodai nabilo golope halu pelene.
PSA 107:15 Anduane Homogohanda ti gubalini haho wiaabo halu tinaga mbirale baya gibi turubini hangu bia haga bialu hayagonaga tigua Anduane Homogohondo ka̱i̱ore lolene nga.
PSA 107:16 Ibugua aeane hongohe mini boronosime panga payadaruni duanialu aeaneme garabaya anda hobanda karuni podo gingirulo bagabu ibira ibira bile laga ka.
PSA 107:17 Wali agali maru ti kedange howa tinime mana ko tara tara dewa bigi biyagome warago balu tandaga nalu hene.
PSA 107:18 Ti tomo noa nahe magu gibi halu tomoore de handaya haga biyagola tongolo mialu dai bigi bini.
PSA 107:19 Tini darabi ogonibiore howa Anduane Homogo olayagola ibugua ti biamogo bigi bialu genda yu hearuni yamuwa mo wahaga bini.
PSA 107:20 Anduane Homogo ibunaga bime ogoale bia layagola tinaga tingini biaruni lone mo dabiho dai bialu homalihaore anda pole biyaria ibugua ti gililo mu yudai bigi biyagoni.
PSA 107:21 Anduane Homogohanda ti gubalini haho wiaabo halu tinaga mbirale baya gibi turubini hangu bia haga bialu hayagonaga tigua Anduane Homogohondo ka̱i̱ore lolene nga.
PSA 107:22 Tigua Anduane Homogohondo ka̱i̱ lalu mbirale ibuhondo bo lomabu mulene nga. Tigua iba gana turu halu lalu wali agali maru karu hale helo Anduane Homogohanda mana bayaore bigi biyarunaga mo yaraga halu lamiaga bulene nga.
PSA 107:23 Agali maru ti iba sibini palu howa iba solowara angeni gago taguape hama ibaga bialu dindi ngagoha ibaga biai halu tinde muni biabe ogoni biaga hene.
PSA 107:24 Agali iba sibini biabe bialu haga uruni tiguabi Anduane Homogohanda bigi biyago handaga bini. Anduane Homogo ibugua iba solowarani mbirale bayaore bigi biyago handaga bini.
PSA 107:25 Anduane Homogo ibugua ani bia layagola puyabu hongoheore pu lalu iba solowara yaribu gibiore bini.
PSA 107:26 Ani biyagome iba sibiru uyura daligaore mo baraga halu lone unura mo baraliore haga bini. Hiriribi ogonidagua bigi biyago handayagola agali iba sibini biabe biaga biarume aiore áyu homarimadagoni manda buwa gi timbuniore ho hene.
PSA 107:27 Tinaga mini bibahende puguai halu homolene anda ibiyagola lulu iba nowa mini ereba howa sibaga lo haradagua ti iba sibi biagoriani ibagabu hene.
PSA 107:28 Tini darabi ogonibiore howa Anduane Homogo olayagola ibugua ti biamogo bigi bialu genda yu hearuni yamuwa mo wahaga bini.
PSA 107:29 Anduane Homogo ibugua puyabu hongohe pu layagoni pulairi helalu iba yaribu gibiore biyagoni mo hundia halu iba solowara ema nabi bayale berelene.
PSA 107:30 Iba solowarame ema nabi bayaore birape hayago hondowa agali biaru ti turuore halu hene. Anduane Homogo ibugua ti bayuwa haru pialu iba sibi anda pu wiaga wiagoria ubandaho ngelene.
PSA 107:31 Anduane Homogohanda ti gubalini haho wiaabo halu tinaga mbirale baya gibi turubini hangu bia haga bialu hayagonaga tigua Anduane Homogohondo ka̱i̱ore lolene nga.
PSA 107:32 Uruni tigua Ngode Datagaliwabenaga wali agali mandagi ngoaiho bedagoria Anduane Homogo ibu daligaore gibi kagoni lalu bibahende hale hai helo lope holene nga. Agali haguane dege dege ngoaiho bedarubi hale hai helo ogoriani ibunaga mini laraga holene nga.
PSA 107:33 Anduane Homogo ibugua iba poraruni hundilai helalu iba dindiha howa dugualu karuni bibahende hundi tege lelaga hene.
PSA 107:34 Dindi bene bere mbirale anda holene ngaruni mo beregedowa mbirale mbira anda habe nahe koore ibi dindi kuni panaho ngelaga hene. Ogonidagua biaganego irane wali agali dindi ogoriani hearume ko gibiore biyagola ti genda ogoni yilo Anduane Homogo ibugua miaga hene.
PSA 107:35 Dindi ko mbirale mbira anda nahaga ngarunaga iba goroyane tagira íbu berelalu dindi yobu dagahe ngarunaga iba dugutagi helaga bini.
PSA 107:36 Ibugua dindi bene bere ogoriani wali agali ala tomo nolene nawi buru palu haga hearu dindi ogoriani haru ibalu tigua anda bu hene.
PSA 107:37 Ti ogoriani hope ho howa ti mabuni tomo hangalu pu mbira lini daga mini gerebi dewa hongo wini. Hongowa tomo dewaore ti mabuni bu ngaria bialu gerebi lini dewaorebi daga hene.
PSA 107:38 Anduane Homogo ibugua ibunaga wali agalihondo baya gibiore bialu ti mo gumbila hayagola tinaga waneigini dewaore hene. Ibugua tinaga nogo tara tara hearubi dewaore ho dame bilene.
PSA 107:39 Anduane Homogonaga wali agali biaru tinaga waitigi hearume bo hengedalu mo taga hayagola tandaga nalu dindihaore darabi hearia hondowa
PSA 107:40 ibugua ibunaga wali agali biaru bope haga agali haguane hearu mo habane nabulene helalu ti dindi ko hariga nawi wiagoha luluyu ibagabu helo helene.
PSA 107:41 Ani biyagoyu wali agali yagibano darabi ha ko howa hearu ibunime ti biamogo bigi bini. Tinaga waneigini dewaore nogo sibi ale tagira íbu helo biamogo bini.
PSA 107:42 Wali agali mini tigabiwi karume Anduane Homogohanda baya turubi urunibi bigi biaga kago hondowa ti turuore halu miniha dunguore lo haga ka. Wali agali mini kowi karu tinaga bi mbira lolenego nawioredagola ti bame ne hambu ndibu lowa hama pedagoni.
PSA 107:43 Anigo ai wali agali mini gigabiwi karume bi o laruruni damenego bibahendeore baya hangu mitangi biai helo hameledo. Anduane Homogo ibugua ti gubalini gibiore haho wiaabo haga kago ogoninaga laluore maru karu hale hai helo hameledo.
PSA 108:1 Ngode Datagaliwabe-o i̱ mini bilinahe howa í̠hondo mini mbiraore hongohe wu kogonigo i̱na iba ganaru lalu í̠naga mini yaraga halu holebero.
PSA 108:2 I̱ni padogoria heyuwa i̱na ngida aleru barogome ni tagira ibilo mo heya holebero.
PSA 108:3 Anduane Homogo-o i̱ dindi tara tara ngaruha pu howa í̠hondo ka̱i̱ laabo holebero. Hameigini tara tarabu karuha pialu i̱na í̠naga mini yaraga hama polebero.
PSA 108:4 Anduane Homogo-o í̠naga gubalini haabo holene emene ndoore hari daliga elahe wu kegoni. Í̠naga mini bilinahe ngego timbuni yangale howa hari mindini elahe wu kegoni.
PSA 108:5 Ngode Datagaliwabe-o í̠ni timbuniore dunini kego wali agalime handai helo hari daligani mo walia habe. Dindi bibahendeha í̠naga wá holenebi mini lene holenebi panigi mo walia habe.
PSA 108:6 Í̠na ina gubalini timbuni ho haga kegonigo bayale hai holoma̱ya i̱naga bi larogo hale habe. Í̠naga hongo timbuni ho kegome ina pele ngibe laro.
PSA 108:7 Ngode Datagaliwabehanda ibuninaga andaha howa lalu, I̱na wai bialu bo podahana hai halu wayali harugo Segeme dindibi Sugodo dindiha dindi ulini bugubugu wuyu pedarubi dindi uruni i̱naga wali agaliru ti helo i̱na ti tu wu ta hai holebero.
PSA 108:8 Gileada dindibi Manase dindibi i̱ninagaore nga. Eberaimi ibu i̱naga ege manda ale nga. Yuda ibu kininaga haru haga halimbu ale nga.
PSA 108:9 Moaba dindi i̱naga wayawaya biaga ndisibe ale wialu Idomo dindi i̱nagaore ngo lalu i̱na i̱naga ge su golowa dindi ogoriani ba amu holebero. I̱na Pilidialiru balu wayali howa turu halu ga̱ lalu harugoni, laya.
PSA 108:10 Ngode Datagaliwabe-o pabe hongohe bu mabubi tano ngagoha i̱ aiwa haru anda polobadabe. Idomo dindiha i̱ aiwa haru polobadabe.
PSA 108:11 Ngode Datagaliwabe í̠na ina erembira ngiribe. Í̠na inanaga ami agali karu biamogo nabuleorebe.
PSA 108:12 Agalinaga hongome ina biamogo bulene emene nakarulapego ina waitigi bu karu baba wai buluma̱ya í̠nioreme ina biamogo bibe.
PSA 108:13 Ngode Datagaliwabe ibu ina heba kayagua nde iname wai bialu wayali holeberema. Waitigi karu ibunime bope hai holebira.
PSA 109:1 Ngode Datagaliwabe-o i̱na í̠naga mini yaraga halu bi larogo haleore howa ladai bibe.
PSA 109:2 Agali ko bu karumebi ke̱ hagane bu karumebi i̱ handabe manga howa ke̱ halu i̱ mege bialu kagoni ndobe.
PSA 109:3 Tigua i̱ mini lalu ke̱ howa bi koore lalu ka. Tigua irane mbira nayi howa bi ko ogoni lalu ka.
PSA 109:4 I̱na nde ti gubalini ho howa Anduane Homogohondo tinaga bi lahalu kogoni. I̱na ani berogo bilowa tigua nde i̱ handabe manga haga ka.
PSA 109:5 I̱na tihondo mana bayaleru bialu kogola tigua i̱hondo mana ko biadai biaga ka. I̱na tihondo gubalini ho kogola tigua i̱hondo gubalini nahe handabe manga haga ka.
PSA 109:6 I̱ waitigi kagonaga bi larago mo tale bilonaga agali ko mbira dabo helabe. Ibuninaga waitigi kagome ibuni godini haru pu helelo helabe.
PSA 109:7 Agali godi hale haga kagome agali godini pu kagola ko bini mbira ngane handalu garabaya helelo hameledo. Agali ogonime Ngode Datagaliwabehondo bi laradagobi ko dege bini lalu walia holebira.
PSA 109:8 Ibu dindini lu nahe abale homelo hameledo. Biabe ibugua bialu haga ngaru agali mendealime bia aribia halu helo hameledo.
PSA 109:9 Agali ogoninaga waneigini ti aba nahe helo ibu onebi wali dalo berelo hame ledogoni.
PSA 109:10 Ibunaga waneiginiore tinaga anda mbira nahe yagibanoore howa ibaga hangu bialu ngi ngi laabo haga helo hamelo kogoni. Ti anda koha palu karia agali marume ibalu ti bo taliatagi helo hamelo kogoni.
PSA 109:11 Waitigi agali ogoni ibu baba agali maru dano ho heneme ibunaga dindibi mbirale wiyadarubi ti karulai helo hameledo. Agali dindi taraha howa íbu hene karume ibunaga biabe bialu hayagonaga yolo ti mo nelo hameledo.
PSA 109:12 Maru karume agali ogoni biamogo nabilo ibu waneigini helalu homeneru mbiralime dara howa biamogobi nabilo hamelo kogoni.
PSA 109:13 Ibunaga waneigini aguanenerubi homai halu dabane mani holebirarume ibunaga mini embedaho wahelo hamelo kogoni.
PSA 109:14 Anduane Homogohanda agali biagonaga mamali bamba henerume ko biyaru mitangi bu wiaabo halu ibu ai̱yahanda ko biyarubi domo wanahelo hameledo.
PSA 109:15 Anduane Homogo ibugua urunime ko bibahende biyaru mitangi bu wiaabo halu marume ti hameigini heneru embeda ho wahelo hameledo.
PSA 109:16 Agali o biago ibugua mendeali kago dara holene mitangi nabiaga hene. Ibugua yagibano hearubi mbirale nayi burupale hearubi hongo nahe genda yu hearubi ti mo tandaga halu bo wahaga hene.
PSA 109:17 Bamba ibugua agali maru hearu mo ko helonaga ha haga hene. Áyu marume nde ibuni ha helo hameledo. Ibugua Ngode Datagaliwabehondo agali mende kago biamogo bibe lalu bi laholene mangaho haga hene. Ibuni nde maru karume turu howa biamogo nabilo hameledo.
PSA 109:18 Horo bibahendengi ibugua aga karulo haabo hagadagua ibu mendeali kago ha holene mugube hene. Ibugua maruhondo ha haragome ibuni tinginiha iba ale anda pialu ibu kuniha weli ale anda pelo hameledo.
PSA 109:19 Ha holene bi ogonime ibuni tingini aga biadambi haradagua bialu ibuni mandibu wu haradagua bilo hameledo.
PSA 109:20 Anduane Homogo-o waitigime i̱hondo bi ko ogonibi laga kago tini ko helo pani ogonidagua nelo mibe.
PSA 109:21 I̱naga Anduane Homogo Bibahende Haru Hame Ho Haga-o í̠na i̱ biamogo bulebero lalu lo wiridagua biamogo bibelo hamelo kogoni. Í̠naga gubalini holenemebi bayaleore bulenemebi i̱ pele ngialu haru dai bibelo hamelo kogoni.
PSA 109:22 I̱ bu miniha genda tandagabi yu haabo kogome i̱ yagibano howa burupale kogoni.
PSA 109:23 Alendo ni anda poragola ni munini biago abale ereba haralidagua i̱ abale pu wahole kogoni ndobe. I̱ore bame hinabibi ale bedoria puyabume pulo wahabehe kogoni ndobe.
PSA 109:24 I̱ tomo nane kogome i̱naga ge duli hongo nahe kogoni. I̱ni obu wahalu i̱naga kuni bibahende pirilape hai ka.
PSA 109:25 Wali agali i̱ de handararume i̱ hondo oba halu mege bialu ma tandalaga bialu kagoni ndobe.
PSA 109:26 Anduane Homogo i̱naga Ngode Datagaliwabe-o i̱ biamogo bibe. Í̠na i̱hondo gubalini timbuni ho haabo haga kegome i̱ pele ngibe.
PSA 109:27 I̱ waitigi bu karume i̱ pele ngiaga í̠ni kegonida manda bilo walia habe.
PSA 109:28 Tigua i̱ Ngode Datagaliwabehanda mo ko helo laga bialu ha holebiragoyu í̠na i̱ biamogo biaabo haga kegoni. Agali i̱ mo tandaga haga karu tini mo tandaga habelo hamelo kogoni. Í̠naga biabe biahaga i̱ kogo i̱naga miniha dungulo holiya mo dungula habe.
PSA 109:29 I̱ waitigi biaru ti taga pani timbuni nalu helo hameledo. Tigua aga lu biagimbubi karulagadagua ti taga harago wali agali karume hendelo í̠na taga holeneme ti karulagimbu bu helabelo hamelo kogoni.
PSA 109:30 I̱na bi hongo howa ladaga halu Anduane Homogohondo turu howa ka̱i̱ timbuni lalu holebero. Wali agali dewali Anduane Homogo mitangi bialu lotu lole ngoai ho kagoria i̱na Anduane Homogonaga mini yaraga holebero.
PSA 109:31 Ibugua wali agali yagibano karu biamogo biaga ka. Wali agali marume godi deni haru tagira puwa uruni ti bo waholene nga nalelobi ibugua ti handayaho halu tinaga lahaga ka.
PSA 110:1 Anduane Homogohanda i̱naga Anduane Homogo kinihondo ogodagua laya. Í̠ waitigi karu í̠naga geme hengedai habelo i̱na mo heloliya í̠ i̱naga gi tigahayagi ogoria birabe, laya.
PSA 110:2 Anduane Homogo ibugua í̠na handayaho habelo Saiono howa dindi dewaore mo tago holebira. Ibugua ogodagua lalu, Í̠na í̠ waitigi karuni í̠ andaneha í̠na handayaho habe, leda.
PSA 110:3 Í̠na í̠ waitigi karu bo pole wai tagira porengi í̠naga wali agali karume wai í̠ha anda ibalu tini hameme wai ina haru bu ma lolebira. Mbiraga dadimba ibiragome tanini damiragola tani ibuha hongo gahenge anda ibagadagua dege í̠naga igiri daliaheru tiha hongo holene gahenge anda ho howa Ngode Datagaliwabenaga hari kago iraga halu í̠ keria ibulebira.
PSA 110:4 Anduane Homogohanda í̠hondo bulebero lowialu mbira ogodagua layagoni. Loma binigo mo miaga mbirali Ngode Datagaliwabehondo loma binigo mo miaga Melegesedege heneyagobi dege í̠ haho wiaabo holebere, lalu lowini. Anduane Homogohanda bi ogoni heneneore henene ledago ibugua bi ogoni lone mende ale lo aribia naholebira.
PSA 110:5 Anduane Homogo ibugua í̠naga gi tigahayagi mo hongo holenaga ibuni í̠ heba hapara ho kagoni. Ibu keba harangi ibugua kini tara tara karu balu bope hai holebira.
PSA 110:6 Ibugua wali agali dindi tara tarani bu karume ko biyarunaga pani tini nelo dabo mulebira. Ani bialu wai biagane wai hamani agali dewaore homene bo payapaya bulebira. Dindi bibahendenaga kini hama pedaruni bibahende ibugua bope hai holebira.
PSA 110:7 Ani bialu kini ogoni ibu agali balu pialu iba kaware hariga teneni poragoni dalipe howa hambu nolebira. Ani bigi biyarume kini ibu hongohe halu wai bigi biragola wayali haabo holebira.
PSA 111:1 Anduane Homogonaga mini yaraga hami̱ya. I̱na ibunaga wali agali ngoaiho kagoria pialu ibuhondo gubalini timbuni howa ka̱i̱ lalu holebero.
PSA 111:2 Anduane Homogohanda biabe nahendene ale gibiore biaga ka. Wali agalime biabe uruni birago hondowa turuho haga bu karu tigua biabe uruni bayuwa manda bule begelo handaga ka.
PSA 111:3 Ibugua biabe biraru damene bibahendeme ibu mini leneorebi ibu haru haga kiniorebi ka lalu walia haga nga. Ibunaga mana tigabi ngagoni wiaabobo bu wulebira.
PSA 111:4 Anduane Homogo ibunime mbirale biniru damene wali agalime mitangi biaabo helo ibugua tinaga miniha mo wála halu haabo haga ka. Ibugua inahondo dara holene nawi howa ina dara halu bayale biamogo biaabo haga ka.
PSA 111:5 Ibugua wali agali ibu mo dunini ho karuhondo tomo nelo miaabo haga ka. Ibugua wali agalihondo habo nalolene bi bamba lowinigo embeda nahagaore ka.
PSA 111:6 Ibugua i̱ hongo ogobi ko lalu walia halu wali agali maru bu hearunaga dindi wiaru ibunaga wali agaliruhondo mo mini.
PSA 111:7 Ibugua mana biaga ngaru damene bibahende mini bilinahe howa tigabiore biai haga ka. Ibugua mana bulene nga leneru iname mo dunu bia howa talialu bulene nga.
PSA 111:8 Anduane Homogo ibugua bi mana urunibi lo wiyaru ibu heneneorebi bayale tigabibi howa lowiyago bi uruni wiaabobo bu wulebira.
PSA 111:9 Ibunaga wali agaliru ibunime golope halu haru dai bialu tihondo habo nalolene bi wiaaboore helo lowini. Anduane Homogo ibu baya burugule mini leneore ka.
PSA 111:10 Mbirali ibu mini bayale gigabiwi hoa hayagua ala Anduane Homogo gibiore ka lalu ibu mo dunini holene nga. Wali agalime ibuni hamelo kago bialu kane hendedagohondo ibugua mini bayale gigabi wuleneru talebu miaga ka. Ibu ogonibi ka manda bialu ibunaga mini yaraga haaboore holene nga.
PSA 112:1 Anduane Homogonaga mini yaraga holene nga. Mbirali ibu Anduane Homogo mitangi bialu mo dunini haga kago ibu turuore ho haga ka. Anduane Homogonaga bi mana talialu bulene hamelo haga kago ibu turuore ho ka.
PSA 112:2 Agali bayale biaga kagonaga waneiginiru ti wali agali maru bu karuha howa mini lene haga bulebira. Agali ogoninaga aguane holebiraru Ngode Datagaliwabehanda ti biamogo bialu bayale biaabo holebira.
PSA 112:3 Ibu damene ti muni mbiraleru dewawi howa ibu homogo bayale haabo holebira.
PSA 112:4 Arumaho ngagoha wali agali bayaleru biamogo bulenaga wá holene tagira ibaga. Wali agali mendeali dara howa biamogo biagabi maruhondo bayale biagabi tigatiga hangu biagabi ti kagoha wá haabo holebira.
PSA 112:5 Mbirali ibu mbirale dewawi kagome ibunaga mbirale ngaru maru karume dano helo turu howa miagabi ibunaga biyinaya birago tigabi hangu biagabi howa ibu turubiore haga ka.
PSA 112:6 Wali agali bayale biaga kago ibu pinale mini bilinahe kagola wali agali marume ibu embeda nahe mitangi bu haabo holebira.
PSA 112:7 Genda timbuni mbira yu anda ibira larago hale howa ogoni ibugua gi nahe haga ka. Ibugua Anduane Homogohondo mini mbiraore hongo ho wu haga ka.
PSA 112:8 Ibugua mbirale biraru hondowa mogolalu gi nahaga ka. Waitigi ibirarume wai bialu wayali nahe bame degedane ibu de hondolebira.
PSA 112:9 Ibugua yagibano karuhondo mbirale dewa talebu miaga ka. Ibugua wali agali maru dara howa biamogo biagago wiaaboore holebira. Ibu dindini mini lene mbira kagola wali agalime ibunaga mini yaraga halu holebira.
PSA 112:10 Wali agali ko biaga karume bayale biaga o biago hondowa ti keba ho holebira. Tigua wali agali bayale o biagobi handabe manga haragome mani tinibi mo ko holebira. Ko biaga karu ti mbirale bayale mo yule hamelo hayaruni nayi dege howa pu ereba holebira.
PSA 113:1 Anduane Homogonaga mini yaraga holene nga. Ibunaga biabe biahaga kamiru tígua Anduane Homogonaga mini yaraga hadaba.
PSA 113:2 Ibunaga mini áyubi manibi yaraga haaboore holene nga.
PSA 113:3 Ni tagira ibiragohayagi howabi ni paliragohayagi howabi wali agali bibahendeme Anduane Homogonaga mini yaraga holene nga.
PSA 113:4 Anduane Homogohanda hameigini tara tara dindi bibahendeni karu handayaho howa haru haame haga kagoni. Ibunaga wá holene hari daliga bolangua howa daligaorene daliga kagoni.
PSA 113:5 Mbirali Anduane Homogo inanaga Ngode Datagaliwabe ale mbira naheore. Ibu daligaorene daligaha kagoni.
PSA 113:6 Ibu de handadali halu hari daligabi dindibi handape haga kagoni.
PSA 113:7 Ibugua yagibano dindiha karu mo yaraga halu wali agali maru burupale karu ti gendayu karia mo heyu howa bayale helaga ka.
PSA 113:8 Ibugua wali agali urunibi mini lene helalu ibunaga wali agali haguane karu baba mandagi helo helaga biaga ka.
PSA 113:9 Wali waneigini nataba hanaga bedaru biamogo buwa ibugua wali urunibi turuore ho berelo waneigini dewaore miaga ka. Anduane Homogonaga mini yaraga hama.
PSA 114:1 Bamba Isaraele wali agalime Iyibi dindi wahalu tagira pene. Yagaba aguaneru ti dindi tarani howa wahalu tagira pene.
PSA 114:2 Ogonidagua piyangi Yuda wali agali ti Anduane Homogonaga helo dabo helene. Isaraele wali agali tibi nde ibunaga wali agaliore helene.
PSA 114:3 Iba solowara Daramabi bereagome de hondowa ibida pene. Iba Yodana ibu ema bialu pu nabi berene.
PSA 114:4 Dindi hari timbuni wearume nogo memerume pogolama ibaga biradagua bialu hari emene wearume nogo sibi iginime pogo laradagua bini.
PSA 114:5 Iba solowara Daramabi-o í̠ agua biyane ibida piribe. Iba Yodana í̠bi nde agua biyagola pu nabi biraribe.
PSA 114:6 Hari timbuni wedemiru-o tígua nogo memerume pogolama ibaga biradagua bialu harimigo irane agibe. Hari emene wedemiru-o tíbi nogo sibi iginime pogo laradagua bialu harimigo aginagabe.
PSA 114:7 Dindi-o Anduane Homogo áyu o ibiragonigo í̠ gi howa duru lalu wia. Yagabanaga Ngode Datagaliwabe o ibiragoni hondowa í̠ duru lalu ema bialu wulene nga.
PSA 114:8 Ibugua ege to̱le̱ timbuni ngago mo iba hambiaga goriane berelalu dindi hariha ege to̱le̱ timbuni kago mo iba timbuni pelaga kagoni.
PSA 115:1 Anduane Homogo-o í̠na ina horo bibahendengi gubalini haho wiaaboore halu mini bilinahe howa ina yu wanahagaore kegoni. Í̠ aniore biaga kegonaga iname inanenaga mini mo yaraga holene nawiore. Iname í̠naga mini hanguore mo yaraga haabo holene nga.
PSA 115:2 Wali agali hameigini tara tara paluyu pedarume inahondo hale halu, Tínaga Ngode Datagaliwabe hayuagoni agoha kabe, lalu kagoni irane aginagadabe.
PSA 115:3 Inanaga Ngode Datagaliwabe ibu dahuliya andagani kagoni. Ibu hongo haihe howa ibuni mbirale mbira bule manda biyagua ta nabi biai habehe kagoni.
PSA 115:4 Wali agali tara tara karume muni ngolomebi silibamebi mbirale mbira gime wabuwa tinaga bi pupu wiagane uruni laga ka. Bame wali agali tini degeme wabu helene urunihondo tinaga bi pupu wiagane laga kagoni.
PSA 115:5 Mbirale gime wabini uruni ti ne hariga wia ngagoyu bi nalabehe. De kagoyu tinaga deme nahandabehe.
PSA 115:6 Tinaga hale kagoyu hale nahabehe. Ngui hariga ngagoyu nguime nga nahabehe.
PSA 115:7 Tinaga gi kagoyu ema bialu mbirale mbira ela nahabehe. Ge kagoyu ibaga bialu pobe nahe. Tinaga ne harigaha howa bi mbira latagi habe nahe kagoni.
PSA 115:8 Wali agali uruni wabiaga karumebi mo dunini haga karu tinibi mbirale tini wabini urunibi dege helo hame ledo.
PSA 115:9 Isaraele wali agali kamiru tí Anduane Homogohondo mini pagaho halimu. Ibugua tí biamogo bialu de handayaho haga kagoni.
PSA 115:10 Ngode Datagaliwabenaga loma binigo mo miaga Arono aria kamiru tí Anduane Homogohondo mini pagaho halimu. Ibugua ti biamogo bialu de handayaho haga kagoni.
PSA 115:11 Wali agali ibu mitangi bialu lotu laga kamiru tí Anduane Homogohondo mini pagaho halimu. Ibugua ti biamogo bialu de handayaho haga kagoni.
PSA 115:12 Anduane Homogo ibugua ina mbirale burupale kama aleru mitangi bialu biamogo biaga kagoni. Ibugua Isaraele wali agalibi Ngode Datagaliwabenaga loma binigo mo miaga karu ariabi ibunime ti mo gumbila holebira.
PSA 115:13 Anduane Homogo ibugua wali agali emene timbunibi ibu mitangi bialu ibu andaneha haga karu ibunime ti mo gumbila holebira.
PSA 115:14 Anduane Homogo ibugua tíhondo waneigini dewaore ngialu tinaga waneigini mani hama poraru tihondobi waneigini dewaore milo hamelo kogoni.
PSA 115:15 Anduane Homogo dindibi hari daligabi bibahende wabini kagome tí mo gumbilaore helo hamelo kogoni.
PSA 115:16 Hari daliga bibahende Anduane Homogo ibuni hangunaga ngagonigo ai dindi timbuni o ngagoni ina wali agali holoma̱yanaga ngini.
PSA 115:17 Wali agali homalu dinini humbirini andaga pugu biyagoni tigua humbirini andaga pu howa Anduane Homogonaga mini mo yaraga nahaga.
PSA 115:18 Ai ina wali agali dindini dére emabu kamaru iname Anduane Homogonaga mini mo yaraga halu ibuhondo ka̱i̱ lami̱ya. Áyu kamangibi manibi ka̱i̱ laaboore hami̱ya. Anduane Homogonaga mini mo yaragaore haabo holene nga.
PSA 116:1 I̱na Anduane Homogohondo bi larugo ibugua hale halu biaga kagonaga i̱na ibuhondo gubalini ho kogoni. I̱na ibuhondo bi larogo haleore haga ka.
PSA 116:2 I̱na ibu olarongi ta nabi haleore halu biaga ka. Ibu ani biagagodago i̱ dére emabu kongi ibu olaho wiaabo holebero.
PSA 116:3 I̱ homoleneore gi biyagome mo dombe wia hayagola dombeneha haru. Homaliha horo heago hondowa homali hondowabi gi ogonibi dege biyagola haru. Miniha gi dege dindiho mini tumutumu bu ho wiru.
PSA 116:4 I̱ aniore howa nde i̱na Anduane Homogo olalu, Anduane Homogo-o homaore bidogo gi mia, lalu olaru.
PSA 116:5 Anduane Homogo ibugua i̱na dara nahabehego dara howa biamogo biagabi bayaore bigi biagabi ka. Inanaga Ngode Datagaliwabe ibu wali agali dara hagaore kagoni.
PSA 116:6 Wali agali ko hongo nahe paipai biadai bibe nahe karu Anduane Homogo ibugua ti biamogo biaga ka. I̱ homolene wiagoria hewaria ibugua i̱ gi miya.
PSA 116:7 Ai i̱ de dege dindiho naholebero. Miniha dungulo dai buwa bu ibira ho holebero. Anduane Homogohanda i̱hondo bayaore biyago manda bialu ani holebero.
PSA 116:8 Anduane Homogohanda i̱ homolene wiagoria hewaria gi mialu i̱naga de iba domaya. I̱ pilole hewaria ibugua i̱ gini yani ho haya.
PSA 116:9 Ibugua ani binigome ai áyu i̱ Anduane Homogonaga deni howa wali agali maru dére karu kadagua mandagi kamagoni.
PSA 116:10 I̱ homolene kawareore wiago hondowa aiore nde homaruda manda buwa dege i̱na Anduane Homogohondo mini mbiraore wiaaboore haru.
PSA 116:11 Homolene giore halu wali agali bu harimaruni mbiraligomebi i̱ pele ngulenego mbira nahayuago, lalu hanguore i̱ homoleda manda buwa dege Anduane Homogohondo mini mbiraore wiaaboore haru.
PSA 116:12 Anduane Homogohanda i̱hondo bayale dege bima ibiyagonaga i̱na ibuhondo agi muledabe.
PSA 116:13 I̱ homoleore kaware hewaria gi miyagonaga ka̱i̱ lalu i̱na waini iba lomabu mule ibu karia hambu yalu ibulebero.
PSA 116:14 Ibunaga wali agaliru mo mogobu biru ngagoria puwa i̱na ibuhondo mulebero lalu lowirugo miaore bulebero.
PSA 116:15 Anduane Homogo ibugua ibunaga wali agali mbirago homaga biragola ibu miniha tandaga haore biaga ka.
PSA 116:16 Anduane Homogo-o i̱ í̠naga biabe biahaga kogoni. I̱ ai̱yahanda í̠naga biabe biahalu bereneyadagua áyu i̱na í̠naga biabe biahalu ko. I̱ homoleore hewaria í̠na i̱ gini mialu bayale heledagoni.
PSA 116:17 I̱na í̠hondo ka̱i̱ore lalu mbirale mbira lomabu ngialu í̠hondo bi lolebero.
PSA 116:18 Yaruseleme í̠naga anda ngagoria anda puwa í̠naga wali agali bibahende íbu ngoai ho bedaria i̱na í̠hondo, Ngulebero, lalu lowirugo lomabu ngiaore bulebero. Anduane Homogonaga mini mo yaragaore holene nga.
PSA 117:1 Wali agali hameigini tara tara bu kamiru tí bibahendeme Anduane Homogonaga mini yaraga hadaba. Wali agali dindi tara tara bibahendeha bu kamiru tígua ibunaga mini yaraga hadaba.
PSA 117:2 Ibugua ina gubalini timbuniore ho haabo haga kagoni. Ibugua bi lowiyago habo nale mini bilinaho haabo haga kagoni. Iname ibunaga mini yaraga hama.
PSA 118:1 Iname Anduane Homogohondo ka̱i̱ore lalu hami̱ya. Ibugua inahondo mana bayale hangu bigi biyagonaga ani lalu hami̱ya. Ibugua ina gubalini ho kago haho wiaaboore hole kagonaga ibuhondo ka̱i̱ore lalu hami̱ya.
PSA 118:2 Isaraele wali agali kamirume, Anduane Homogo ibugua horo bibahendengi ina gubalini ho kago haho wiaaboore haga kagoni, lalimulo hameledo.
PSA 118:3 Ngode Datagaliwabenaga loma binigo mo miaga kamirume, Anduane Homogo ibugua horo bibahendengi ina gubalini ho kago haho wiaaboore haga kagoni, lalimulo hameledo.
PSA 118:4 Wali agali Anduane Homogo mitangi halu lotu laga kamirume, Anduane Homogo ibugua horo bibahendengi ina gubalini ho kago haho wiaaboore haga kagoni, lalimulo hameore ledo.
PSA 118:5 I̱ genda gibiore yu hewangi Anduane Homogo olarugola ibugua hale halu i̱naga genda yu hewagoni mo wahalu i̱ golope hayagoni.
PSA 118:6 Anduane Homogo ibu i̱ heba hapara ho haabo haga kagonigo i̱ gi naholebero. Wali agalime i̱hondo mbirale mbira agi bulubadabe.
PSA 118:7 I̱ biamogo biaga Anduane Homogo ibuni kagoni. Ibu ani kagome i̱naga waitigi karu Anduane Homogo ibugua bope haragola i̱ de hondolebero.
PSA 118:8 Wali agali tini dege dege hanaho holenego goyane lowa Anduane Homogoniore hanaho holenego duniniore nga.
PSA 118:9 Dindini haru haga karubi agali haguane karubi tini hanaho holenego goyane dege lowa Anduane Homogoni hanaho holenego duniniore nga.
PSA 118:10 I̱naga waitigi dewaoreme i̱ bole homabu bupe hearia Anduane Homogonaga hongome i̱na uruni bibahende bope hai haru.
PSA 118:11 Ti bibahendeme i̱ bole ho mabu bupe howa i̱ mo dombe wia hearia Anduane Homogonaga hongome i̱na uruni bibahende bope hai haru.
PSA 118:12 Mone tidu yalu ibiradagua waitigi bibahende tidu yalu ibuwa i̱ni mbulupe hayagoyu o biaruni irame gaeangi bo daradagua bialu bibahende bo mburi lai haya. Anduane Homogonaga hongome i̱na uruni bibahende bope hai haru.
PSA 118:13 Tigua i̱ bole anda ibalu mo ko howaore bayagola i̱ bope habehegoyu Anduane Homogo ibugua i̱ biamogo biya.
PSA 118:14 Anduane Homogo ibugua i̱ mo hongo helagaore ka. Ibunime i̱ gi mialu biamogo biyagoni.
PSA 118:15 Ngode Datagaliwabenaga wali agali karume agali balu ibuwa tinaga balai anda tamuha tini wai mambolo baruago hale hadaba. Anduane Homogonaga hongo gibigome ina mo hongo hayagola bibahende bai harimagoniyago, lalu biraruago hale hadaba.
PSA 118:16 Anduane Homogonaga hongo gibi biagome ina biamogo biyagola ina wai bialu wayali harimagoni.
PSA 118:17 I̱ ala awane nahomolebero. Nahome howa dére emabu kongi Anduane Homogohanda bigi biyaru ogodagua biya lalu te laga bulebero.
PSA 118:18 Anduane Homogo ibugua i̱ mini wuliya mana lalu pani hiriribiore ngia nguwa i̱ bo home nalayagoni.
PSA 118:19 I̱ Anduane Homogonaga mini mo yaraga halu ibuhondo ka̱i̱ lo poleberogo ibunaga anda panga karuni dugupe hadaba.
PSA 118:20 Anduane Homogonaga anda anda pole panga haraba o kagoni. Wali agali mini tigabiwi karu hangume panga o duguaho ngagoniha anda pobehe ka.
PSA 118:21 Anduane Homogo-o í̠na i̱na bi larugo hale halu biamogo birigome i̱ wayali ho kogoni. Biamogo birigonaga i̱na í̠naga mini mo yaraga holebero.
PSA 118:22 Ege to̱le̱ mbira anda biagame galone nabibehedago lowa dabo wahenego ege to̱le̱ ogoniore mo timbuni duniniore ho heleda.
PSA 118:23 Ogoni Anduane Homogo ibunioreme mo yu daibu helenego iname de handalu handawa bu kamagoni.
PSA 118:24 Áyu ogoni Anduane Homogohanda inanaga waitigi bope hayagonaga iname ibuhondo turu gibiore halu bi te lalu mitangi biaabo hami̱ya.
PSA 118:25 Anduane Homogo-o ina gi mialu haru dai bia, larama. Iname mbirale bigi beremago damene bibahendeore bayale halu lini daga bilo buluma̱ya Anduane Homogo-o biamogo bibe, larama.
PSA 118:26 Mbirali Anduane Homogonaga minini howa ibirago Ngode Datagaliwabehanda ogoni ibuhondo turu halu bayale bilo larama. Anduane Homogonaga andani howa iname ibunaga mini mo yaraga harama.
PSA 118:27 Anduane Homogo ibu hangu Ngode Datagaliwabe heneneore kagoni. Ibugua ina baya hanguore de hondo hayagoni. Ira magane giha podo yagayaga bialu bo lomabu miaga dabu ngagoria pu mabu bidaba.
PSA 118:28 Í̠ i̱naga Ngode Datagaliwabe kegonigo i̱na í̠hondo ka̱i̱ore lalu ko. Í̠ i̱naga Ngode Datagaliwabe kegonigo i̱na í̠ timbuniore kego wali agali lamialu í̠naga miniore mo yaraga holebero.
PSA 118:29 Iname Anduane Homogohondo ka̱i̱ore lalu hami̱ya. Ibugua inahondo mana bayale hangu bigi biyagonaga ani lalu hami̱ya. Ibugua ina gubalini ho kago haho wiaaboore hole kagonaga ibuhondo ka̱i̱ore lalu hami̱ya.
PSA 119:1 Wali agali tiha ko mbira nawiore howa tigatigaore ibaga bu karu ti turu ho haga ka. Tigua Anduane Homogonaga bi mana lo ngadagua bialu haga kago ti turuore haga kagoni.
PSA 119:2 Wali agali ti Anduane Homogohanda mana urubi bulene nga lene ngaru minime talialu bialu haga karu ti turuore ho haga ka.
PSA 119:3 Wali agali urunidagua biaga karu tigua mana ko ngaru nabiaga howa Anduane Homogonaga mana lo ngaru hangu biaga ka.
PSA 119:4 Anduane Homogo-o í̠nime inahondo í̠naga bi mana damenego langiai halu lalu, I̱naga bi uruni bayuwa taluwa biaabo halu halimu, larigoni.
PSA 119:5 I̱naore mini bilinahe howa í̠naga bi mana ogoni taluwa bialu haabo holenego hamelo ko.
PSA 119:6 I̱na í̠naga bi mana taluwa bialu haabo haruyagua i̱ha taga holene emeneorebi mbira nawulebira lo manda bido.
PSA 119:7 I̱na í̠naga mana bayale tigabi ngego manda bialu kongi i̱naga bu miniha ko mbira nawi howa í̠naga mini yaraga halu holebero.
PSA 119:8 Í̠naga bi mana debene bibahende ngeru taluwa bialu holebero. I̱na ani bialu holiyago í̠na i̱ yu wanahabe.
PSA 119:9 Wandari igiri daliaherume tini mo dodo nahe tigabiore agua habehebe. Í̠na ogo bibe lalu laga birigo hale halu bigi biyagua ti tigabi ogonibi holebira.
PSA 119:10 I̱naga gubalinioreme Anduane Homogo í̠naga biabe bule bialu ko. Í̠naga bi mana lo ngego mbira i̱na puguligo haru habe.
PSA 119:11 I̱na í̠ deni ko mbira nabulenaga í̠naga bi mana lo ngegoni i̱naga gubalinini mo hengedo.
PSA 119:12 Anduane Homogo-o í̠naga mini mo yaraga harogo í̠naga hame ngego i̱hondo biawai habe.
PSA 119:13 Í̠naga bi mana lo ngego bibahende lone loyane bialu laho wiaabo holebero.
PSA 119:14 Dindi daburabu dewaore wu howa turu holenego emene lowa turu timbuniore holenego í̠naga bi lo ngedagua hale halu bulenegoha ngaria handaga bialu ko.
PSA 119:15 Ogodaguaore bibe lalu lo ngego bayuwa lo manda biruli. Í̠naga bi mana lawai haragobi mo yule lowa bayuwaore hale halu mitangi bialu haruli.
PSA 119:16 Í̠naga bi mana bayale lo ngeru hondowa i̱ turu halu daga laruli. Ogo ale bibe lalu lo ngeru i̱na embeda naholebero.
PSA 119:17 Anduane Homogo í̠naga biabe biahaga i̱ kogo í̠na i̱ biamogo bibelo hamelo kogoni. Irane i̱ homa nabi howa í̠naga bi mana ngego baya hangu talialu bialu holiyanaga ani bibe laro.
PSA 119:18 Í̠naga mana lowini ngegoha bi bayale heneneore ngago manda biai holiya i̱naga miniha de mo ngala habe.
PSA 119:19 I̱ nde dindi ogoriani lu haho wule ndo kogo manda bialu í̠naga bi mana bayale lo ngego i̱naga deni mo do nahabe.
PSA 119:20 Horo bibahendengi i̱naga bu minime í̠naga bi mana bayale lo ngeru i̱na talialu buaore howa homalu kogoni ndobe.
PSA 119:21 Wali agali mine haga bu karu í̠na ti talialu mo tiga bigi birili. Í̠naga bi mana lowini ngego erembira mialu tinime hameledago ale bima piaga karume ti koha polebira.
PSA 119:22 I̱na í̠naga bi mana debene lo ngeru taluwa bialu kogonaga tigua i̱hondo mege bialu bi koru lalu helo nahelabe.
PSA 119:23 Agali haguane bu karume mo mogobu howa i̱ bo waholenaga hariga tai bialu karuni helowa i̱na í̠naga bi mana tigabi bayale ngego hangu mitangi bialu lo manda biaabo holebero.
PSA 119:24 Í̠naga bi mana tigabi ngeru hangume i̱ mo turu halu haru haabo haga kagoni. Í̠naga bi mana urunime i̱ lawai halu haabo haga.
PSA 119:25 Tigua i̱ bope hayagola dindi abaluha padogoni ndobe. Í̠nime bulebero lalu bi lo wiridagua i̱ lone heyuliya mo hongo habe.
PSA 119:26 I̱na mana biruru bibahende í̠hondo langiai harugola í̠na nde i̱hondo bi ladai birigoni. Í̠naga mana ngeruni bibahende i̱ lawai habe.
PSA 119:27 Í̠naga bi mana ngeruni i̱na manda buliya biamogo beregola i̱na í̠naga bi mana bayale uruni bibahende mitangi biaabo halu holebero.
PSA 119:28 I̱naga miniha genda yidogome i̱ dambi kagola kogoni. Í̠nime mo hongo holebero lalu abale langiridagua i̱ mo hongo habe.
PSA 119:29 Í̠naga hariga ngego wahalu i̱ pu tara holigo baya hangu handayaho habe. Í̠na i̱hondo mana bayale bialu í̠naga mana tigabi ngeru i̱ lawai habe.
PSA 119:30 I̱na í̠naga bi lo ngego taluwa bialu hole lalu bi lo wirugoni. Horo bibahendengi í̠naga bi mana hangu hale halu mitangi bu kogoni.
PSA 119:31 Anduane Homogo-o í̠na bi langiriruni talialu biaabo haruli. Mbirale mbirame i̱ mo taga helo nangelabe.
PSA 119:32 Í̠na manda bulene dewaore i̱hondo ngirigome i̱na í̠naga bi lareru buaore howa bialu holebero.
PSA 119:33 Anduane Homogo-o i̱na í̠naga bi mana taluwa bialu holiya í̠na mana ogoni irane ngaru baya hangu i̱ mo wála habe.
PSA 119:34 Í̠naga bi mana baya hangu taluwa bialu holiya galone ngago i̱ garealo ngialu lawai habe. I̱naga miniha í̠nime mo heya haregola i̱na bi mana lo ngago bibahende buaore howa taluwa bialu holebero.
PSA 119:35 I̱ í̠naga bi mana taluwa bialu howa turu haga kogonigo ainde í̠naga bi mana bulene hariga pedadagua pialu holiya i̱naga ge baya hangu haru habe.
PSA 119:36 I̱naga miniha mbirale ngaru dimagoli ho holiya ndo í̠naga bi lo ngego i̱na talialu buaore holiyanaga hame lolene ngibe.
PSA 119:37 Mbirale ko habane nabulene ngaru erembira mialu holiyanaga i̱ biamogo bibe. Í̠nime i̱hondo bayale bule lalu abale bi lo wiridagua i̱ biamogo bibe.
PSA 119:38 Í̠ni mitangi bialu mbirali í̠na bia laredagua biaga karuhondo bayale buleore lalu bi hongohe lo wiaga kegoni. Í̠na bi hongoheore ogoni bulebero lalu lowirigo í̠naga biabe biahaga i̱ kogohondo biai habelo hamelo kogoni.
PSA 119:39 I̱hondo bi ko lalu kago bibahende giho kogonigo bi ko urunime i̱ bope holigo í̠na i̱ biamogo bibe. Í̠naga bi mana tigabi ngeru baya gibiore ngegoni.
PSA 119:40 Í̠naga bi mana damenego i̱na talialu bialu hole hamelo kogoni. Í̠na mana tigabiore biaga kego i̱hondo holene gahenge ngibe.
PSA 119:41 Anduane Homogo-o í̠na i̱ gubalini ho kego i̱ walia habe. Í̠nime i̱ mo wialu pele ngulebero lalu bi lo wiridagua bibe.
PSA 119:42 Í̠na bi heneneore larigo manda buwa i̱na í̠hondo mini mbiraore wu kogome wali agali i̱hondo bi ko lararu ladai buliya í̠na i̱ pele ngulebere.
PSA 119:43 Í̠na bi tigabiore larigonaga i̱na mini dunubia ho kogome i̱na bi heneneore hangu wali agali karuhondo latagi haabo holiya i̱ mo hongo habe.
PSA 119:44 Í̠naga bi mana lo ngego i̱na taluwa bialu haabo holebero.
PSA 119:45 Í̠naga bi ledegoore i̱na talialu bule bialu kogonigo mbirale ngarume hapai nahelo hameledo.
PSA 119:46 I̱na í̠naga mana lamulene nga lariruni kini bu karu lamule i̱ taga nahe howa lamulebero.
PSA 119:47 I̱na í̠naga bi mana lowini ngego hame timbuni lo howa talialu buaore ho kogoni.
PSA 119:48 Í̠naga bi mana uruni bayaleoreda lo manda bu howa i̱na hame timbuni lo kogoni. I̱na bi mana debene tigabi uruni bia laridagua bialu haabo holebero.
PSA 119:49 Bamba í̠nime ogoaleore bule lalu í̠ninaga biabe biahaga i̱hondo lo wirigo mitangi bibe. Í̠na ogoni biaore buleberedalo manda buwa i̱ mini dunubia ho kogoni.
PSA 119:50 I̱ha gendaru anda ibugu biyangi í̠na bulebero lalu bi lo wirigome i̱ mo dengalaho helarigola homa nabi halu i̱naga bu miniha mo palia holene karulo haru.
PSA 119:51 Wali agali mine haga bu karume i̱ mege bialu karu helowa i̱na í̠naga bi mana lowini ngago erembira mialu napiruli.
PSA 119:52 Anduane Homogo-o í̠na i̱hondo bi ala langigi biriruni mitangi budai bigi berogome i̱ mo hongo haga biaga.
PSA 119:53 Wali agali ko biaga karume í̠naga bi mana lo ngego puguarago hondowa i̱ bu miniha keba timbuni haruli.
PSA 119:54 I̱ni dindi ogoriani kogoni howa i̱na í̠naga mana ngegonaga iba gana minime manda bialu laabo holebero.
PSA 119:55 Anduane Homogo-o mbiraga í̠ mitangi bialu i̱na í̠naga mana ngago lo manda biruli.
PSA 119:56 Í̠naga mana bibahende i̱na taliai halu bialu kogola i̱naga miniha dungulo haruli.
PSA 119:57 Anduane Homogo-o í̠ore hamelo kogoni. Í̠naga mana ngeru taluwa biaiore hole lalu bi lo werogoni.
PSA 119:58 Í̠na i̱hondo dara howa biamogo bulebero lalu bi lo wirigodago i̱ dara holene irane nawigoria nde harugo i̱ dara howa biamogo bibe laro.
PSA 119:59 I̱nime bialu harudaru manda biaiho howa i̱na í̠na bia laredagua talialu biai hole lalu í̠hondo bi lo wero.
PSA 119:60 I̱na awe buliya lalu hondo ha nabi abaleore í̠naga bi ledego talialu bulebero.
PSA 119:61 Agali ko bu karume i̱ bialu kogoha hapai howa tinaga mana ngagoha i̱ haru pubagi holenaga bialu ka. Tigua ani bialu kagoyu i̱na í̠naga bi mana lowini ngego embeda nahe ko.
PSA 119:62 Mbi hanuniore i̱ heyu biruwa í̠na bi mana tigabiore ngadagua lope haga kegonaga i̱na í̠naga mini yaraga haruli.
PSA 119:63 Agali í̠naga biabe biahaga howa í̠naga mana ngago talialu haga karu i̱ ti baba ibagabu haruli.
PSA 119:64 Anduane Homogo-o wali agali dindi bibahendeni bu karuha í̠naga gubalini holene to̱ledago í̠naga mana ngego damene manda buliya i̱ lawai habe.
PSA 119:65 Anduane Homogo-o í̠naga biabe biahaga i̱hondo mana bayaleore birigoni ndobe. Í̠na buleore lalu bi abale lo wiridagua biaore birida.
PSA 119:66 Í̠naga mana lo ngego mitangi bialu mini mbiraore wu kogo í̠na mini bayale gigabi wulenebi manda bayale bulenebi i̱hondo ngibelo hameledo.
PSA 119:67 Í̠na i̱ abale pani ngia nabi heha í̠naga harigani polene winigo wahalu i̱ pubagi harugoyu ai áyu i̱na í̠naga bi mana bayaleore ngeru bialu kogoni.
PSA 119:68 Í̠ bayaleore howa i̱ dara habe naheoreni dara haga kegoni. Í̠naga bi mana bayaleore lo ngeru i̱ lawai habe.
PSA 119:69 Wali agali mine haga bu hearume i̱ mini lalu ke̱ halu bi ko dewa layagoyu i̱na í̠naga bi mana dege talima pialu bu miniha buaore howa biaabo halu kogoni.
PSA 119:70 Wali agali uruni tiha mini bayale wia aribia holene nawiore kagoyu i̱na nde í̠naga mana lo ngeru hangu hamelo kogoni.
PSA 119:71 Í̠na i̱hondo pani ngialu minu barigoni bayaleore birida. Ogoni birigome i̱na í̠naga bi mana bayuwa lo manda birugoni.
PSA 119:72 Muni bu ngaru gubalini holenego dindiha lowa í̠naga mana lo ngeru galone duniniore lo mitangi bu haruli.
PSA 119:73 Í̠nime i̱ o kogobi wabuwa baya hangu handayaho haga kegoni. Í̠naga mana lo ngego bayuwa lomanda biai holiya i̱ha manda bayale bulene ngibe.
PSA 119:74 Í̠na bulebero lalu lowiriru i̱na talialu bialu kogo hondowa wali agali í̠ mo dunini ho karume turu ho holebira.
PSA 119:75 Anduane Homogo-o í̠naga bi mana ngeru tigabiore wiai kegoni i̱ manda bido. Í̠ mini bilinaheore kegome i̱na mana lehe birugonaga i̱hondo genda mo ngiridalo manda bu kogoni.
PSA 119:76 Í̠naga biabe biahaga i̱ kogonigo í̠na i̱hondo gubalini ho haabo holebero lo wirigodagua gubalini halu i̱naga bu mini mo hongo habe.
PSA 119:77 I̱na í̠naga bi mana lo ngeru bialu howa i̱ turuore ho kogonigo í̠na i̱ dara howa biamogo biriyagua i̱ha holene bayale yu holebero.
PSA 119:78 Wali agali mine haga bu karu ti ke̱ howa i̱ bame godini íbu helaga biaga kagonigo ti mo taga habelo hameledo. I̱na nde í̠naga mana lowini ngeru mitangi biaabo halu holebero.
PSA 119:79 Wali agali í̠ mitangi bialu mo dunini howa í̠naga mana ngeru mandabi karu ti i̱ koria ibilo hamelo kogoni.
PSA 119:80 Í̠na mana bulene nga larigoni mbira wanahe i̱na biaiore holiya biamogo bibe. I̱na mana bulene ngago mbira nabi koria taga pani noligo í̠naga mana damene ngeru bayuwa bialu hole hamelo ko.
PSA 119:81 Anduane Homogo-o í̠na i̱ pele ngibelo ha dege biwane i̱naga bu miniha genda timbuni bialu i̱naga hongo ereba haya. I̱na í̠naga bi mana lowini ngego mitangi bialu mini mbiraore hongohe wu kogoni.
PSA 119:82 Í̠na buleore lalu lo wiriruni berebe hondole dege handayaho hewagola ai i̱naga de tandaga bida. Ai ogonidagua bidago í̠na i̱ angi biamogo buleberebe lalu kogoni.
PSA 119:83 I̱ mo ko henego ai nogo meme dongoneha waini iba hambu berelaganego ko haragola budubagabu wahene ngaligobiore kogoni. I̱ ogonibi kogo howa í̠naga bi mana lowini ngeru embeda nahe kogoni.
PSA 119:84 Mali ege horobi agira i̱ maliaho holedabe. Agali i̱ mo ko halu karu ti pani angi nelo muleberebe.
PSA 119:85 Wali agali mine hagabi í̠naga bi mana lo ngeru nabiagabi karu tigua i̱ gonoha do ngogola minulenaga mana maru ohowa bialu ka.
PSA 119:86 Í̠naga bi mana bibahende lo ngeru heneneore lo ngego iname mini mbiraore wiai habehe kama. Agali maru karume i̱ hondowa ke̱ halu bi ko lararume i̱ mo tandaga halu ka. Tigua ani bialu kago i̱ biamogo bibelo hamelo kogoni.
PSA 119:87 Tigua i̱ bo waholebiyaria habo layago i̱na í̠naga bi mana wanahe yu tiga bu kogoni.
PSA 119:88 I̱na í̠naga bi mana bibahende lo ngeru taluwa biai holiya í̠na gubalini haabo ho kego i̱ bayale holiya handayaho habe.
PSA 119:89 Anduane Homogo-o í̠naga bi mana ngego hari daligaha mbirale bibahende hongo ho wiaabo kadagua wiaabo holebira.
PSA 119:90 Í̠ni mini bilinahe kegome bi ledegoore áyu manibi wiaabobo bu wulebira. Í̠na dindi o wabu ngego ibuni wuleneore ngagoria wilalu wia amu nana nabi wiaabo haga ngagoni.
PSA 119:91 Mbirale ngaruni bibahende aniore wiai helo lalu í̠nime laridagua wiaabo henego ngagoni. Irane mbirale urunime í̠ninaga biabe biai hagago ani wiai henego nga.
PSA 119:92 I̱naga turu holene tene í̠naga bi mana ngagoha nawidale í̠nime i̱ genda tandagala mo ngirigome i̱ homedoleda.
PSA 119:93 I̱na í̠naga bi mana lo ngego yu wanaholeberogo irane i̱na mana ogoni taluwa bialu kogome i̱ homa nabi bayale heledegoni.
PSA 119:94 I̱ í̠nagaore kogonigo ai í̠na i̱ pele ngibe. I̱na í̠naga bi mana lo ngeru talialu bu manda biaabo haga kogoni.
PSA 119:95 Agali ko bu karume i̱ bo wahole bira do haga bida. Tigua ani bule kagoyu i̱na í̠naga bi mana lo ngeru bibahende mitangi bialu haabo holebero.
PSA 119:96 Mbirale bibahende ngaru wiaabo nahagayane handarugoyu í̠naga bi lo ngeruni dege duniniore baya burugule wiaabo holebira manda bu ko.
PSA 119:97 Anduane Homogo í̠naga bi mana lo ngeruni i̱na gubalini timbuniore ho kogoni. I̱na í̠naga bi mana lo ngeruni mbiraga horombebi mitangi biaabo haruli.
PSA 119:98 Í̠naga bi mana lo ngerunime i̱ heba haabo howa i̱hondo manda bulene dewaore ngiaga. Í̠naga bi mana lo ngerume i̱ manda bulene gibiore ngiragola i̱naga waitigi karunaga manda bidarubi ndo i̱ manda bu bolanguahe holiya biamogo biaga.
PSA 119:99 Horo bibahendengi í̠naga bi mana lo ngeruni mitangitangi bialu i̱naga miniha mo pehaga bialu haabo kogoni. I̱ ani bialu kogome i̱naga miniha manda bulene bayaore anda ibiragola i̱naga lawai haga karume manda bidagobi ndo i̱ manda daligabi kogoni.
PSA 119:100 Í̠na bibe lededagua bialu kogome i̱naga manda bulenego agali wahe karume manda bidagobi ndo i̱ mini gigabi wulene bolanguahe kogoni.
PSA 119:101 Í̠naga bi mana lo ngedagua hangu bulenaga i̱na mana ko bulenego bibahendehondo igilaga bialu wandialu kogoni.
PSA 119:102 Anduane Homogo i̱naga lawai haga í̠ kegoni howa í̠nime i̱ lawai haga bialu kegoni. Anigo í̠na bi lawai haga bereruni i̱na mbira hale howa mo wanahe kogoni.
PSA 119:103 Anduane Homogo í̠naga bi mana baya dendebiore ngagoni. Mone ibane mbira narogola neha dende gibi biaganego goyane lowa Anduane Homogo í̠naga bi mananaga dendeore gibi biaga ngagoni.
PSA 119:104 Anduane Homogo í̠naga bi mana lo ngegome i̱hondo mitangi bulene baya gibiore ngiaga ngagoni. Ani ngiagagome i̱ mana ko bulene damenego i̱na bibahendeore manga bialu magu biragola haruli.
PSA 119:105 Anduane Homogo í̠naga bi mana lamu hale ale ngagome i̱ hariga tigabini poliya biamogo bialu haru haga ngagoni. I̱ hariga polenego ogodagua pu lalu ge mugu mo wá hagane hale ale ngagoni.
PSA 119:106 Anduane Homogo í̠naga bi tigabiore lo wigi bideruni handalu langeredagua i̱na hale halu biaore bule lalu lo ngogoni. Bi lo wirugo ogoni pugua nabuleorebero.
PSA 119:107 Anduane Homogo-o i̱ tandaga gibiore hiriribi nalu kogonigo tandaga nalu homa nabuliya í̠na i̱ biamogo bulebero laridagua biamogoore bibe.
PSA 119:108 Anduane Homogo-o i̱na í̠hondo bi lalu turuore halu ka̱i̱ larogoni. I̱na í̠hondo ka̱i̱ larogoni yamialu í̠naga bi lo ngeruni i̱hondo bayuwaore biawai habe.
PSA 119:109 Horo bibahendengi i̱ homolene kawareore ngagoria pu haga biruligoyu í̠naga mana lo ngeruni embeda naharuli.
PSA 119:110 Agali mini kowi hearume i̱ do wuliyanaga gono weneyago de handarugoyu i̱na Anduane Homogo í̠naga bi lo wiriyaruni mbira pugua nabi kogoni.
PSA 119:111 I̱naga dabudabu wia ai̱ ai̱ore bulenego Anduane Homogo í̠naga bioreda manda bialu í̠naga biore hongo howa yaniho kogoni. Ani yaniho kogola í̠naga bigome i̱ore mo turu gibiore haga.
PSA 119:112 Anduane Homogo í̠naga bi mana lo ngedagua i̱na bialu mbira mo wanahe bia dege bialu kone homaluore wahole kogoni manda bu ko.
PSA 119:113 Wali agali karume ke̱ howa í̠ talima ibaga tingi haga karu i̱na ti handabe manga ho kogoni. I̱na í̠naga bi mana ngeru mitangi bialu hame timbuni lo kogoni.
PSA 119:114 Í̠ni hangu i̱ handayaho haga howa i̱naga humbi ale kegoni. Í̠na buleore lalu bi lo wigi biriruni manda bialu i̱na mini dunubia ho kogoni.
PSA 119:115 Wali agali mana ko biaga kamiru tí i̱ kogoria nahe pudaba. I̱naga Ngode Datagaliwabe bi mana ngago taluwa bialu holebero.
PSA 119:116 Í̠na mo hongo holebero lalu lo wirigonidagua i̱ mo hongo habe. Mo hongo hariyagua i̱ homa nabi bayale holebero. I̱na í̠hondo mini dunubia ho kogoni bame mo hole buligo í̠naga hongo ogoni ngibe.
PSA 119:117 I̱ bayale holiya i̱naga gini yaniho habe. Í̠na bi larego i̱na hale halu bialu holebero.
PSA 119:118 Wali agali í̠naga bi mana mo wahaga karuhondo erembira mialu haga kegoni. Tigua ke̱ howa mana bule ngaru bame habane nabulene wialu ereba hai holebira.
PSA 119:119 Í̠na wali agali mana ko biaga karu ko ngubi nagalone dege kagoni lo mandabu kegoni. I̱na í̠naga bi mana ngeru hameore lo kogoni.
PSA 119:120 I̱na í̠ gibiore kego manda buwa i̱ gi halu duru lalu kogoni. Í̠naga godi tigabiore lole ngego mitangi bialu i̱ giho kogoni.
PSA 119:121 I̱na mana bayale tigabi ngaru dege bialu haru. Waitigi bu karume i̱ mo ko helo í̠na i̱ yu wa nahabelo hameledo.
PSA 119:122 Í̠naga biabe biahaga kogonigo í̠na i̱ biamogo buleore lalu bi lowibe. Wali agali mine haga karume i̱ mo genda nahelo hameledo.
PSA 119:123 Bamba í̠na i̱ bayale holiya biamogo buleore lalubi i̱ pele ngialu haru dai buliya lalu lo wirigodagua bibelobi i̱ í̠ha maliaho haabo kogome i̱naga de tandaga biragoni.
PSA 119:124 Í̠naga gubalini holeneme i̱ dara howa biamogo bialu í̠naga bi mana debene ngeru i̱ lawai habe.
PSA 119:125 I̱ í̠naga biabe biahaga kogonigo í̠naga bi mana baya hangu manda buliya mini bayaleru talebu ngibe.
PSA 119:126 Anduane Homogo-o wali agalime í̠naga bi mana ngeru angua halu piagaya. Tigua ani bialu karunaga í̠na ti pani nelo mulene tu áyu ogoni.
PSA 119:127 I̱na í̠naga bi mana gubaliniore ho ko. I̱na ngolo bayale ngago hameledogobi emene dindiha lowa ogoni bolangua howa í̠naga bi mana ngeru i̱na gubalini timbuniore ho kogoni.
PSA 119:128 I̱na í̠naga bi mana ngeru bibahendeore talialu biaiore haruli. Hariga í̠ kegohayagi ndo mendeha pubagi halu polene hame naleore kogoni.
PSA 119:129 Anduane Homogo í̠naga bi mana lo ngeru bayaore gibi lo wigi bidegoni. Anidane hondowa i̱na i̱naga gubalinioreme turu howa í̠na bibe lededagua bialu kogoni.
PSA 119:130 Í̠nime í̠naga bi mana lo ngeruninaga galonego mo walia halu kegome wali agali tinaga miniha wá laga biragola bu kagoni. wali agali mini timbuni nawi karu í̠naga bi maname mini mo dingi dangia lenego ai miniwi bogabi bu kagoni.
PSA 119:131 Í̠naga bi mana lo ngeru gubalini gibiore ho kogome í̠na mbira i̱hondo bia lare alego bia dege bulenaga i̱na i̱naga bu miniha heyuwa manda manda bu kogoni.
PSA 119:132 Anduane Homogo í̠na wali agali í̠ gubalini haga karu dara howa biamogo birilidagua i̱ de handaya halu i̱bi dara howa biamogo bibe.
PSA 119:133 I̱ mana ko bialu pilolilono de handayaho halu mamage holebero lo wiridagua í̠na i̱ mamage habelo hameledo. Ko buleneme i̱ bope holigo í̠na i̱ yaniho habe.
PSA 119:134 Í̠naga bi lo ngerudagua hale halu biaiore holiyanaga wali agali mini kowi karume i̱ hengedope halu mo ko holigo í̠na i̱ yaniho habe.
PSA 119:135 Í̠ i̱ kogoria kaware hapara howa í̠naga bi mana lo ngeru i̱hondo lawai halu í̠na i̱ mo gumbila habe.
PSA 119:136 Wali agalime Anduane Homogo í̠naga bi mana lo ngedagua nabi puguabo halu kagonaga i̱ dugu dege beroria i̱naga deha deiba iba ale dugualu haabo kogoni.
PSA 119:137 Anduane Homogo-o í̠ tigabiore kegoni howa í̠naga bi mana lo ngeruni damenego bibahendeore tigabiore lo ngegoni.
PSA 119:138 Í̠na inahondo bi mana ngideruni damenego bibahendeore tigabiorebi bayaorebi hangu ngagoni.
PSA 119:139 I̱naga waitigi karume í̠naga bi lo ngeruni ti mitangi nabiagaore kagoni. Ti ani kago handarodagua i̱naga bu habane nigoniha keba gibiore ira daradagua biragola haruli.
PSA 119:140 Anduane Homogo í̠na bulebero laga bialu bi lo wigi bideruni heneneore biagayane i̱na haruore handama ibido. Bulebero lo ngedagua heneneore bigi birigo hondowa turuore howa yaniho kogoni.
PSA 119:141 I̱ agali mbira abogo ka nalene emene ko dindihaore howa marume i̱ mege biaga kogoyu i̱na Anduane Homogo í̠naga bi mana dege ha do wanaharuli.
PSA 119:142 Anduane Homogo í̠naga mana tigabi bulenego wia ai̱ ai̱ bialu í̠naga bi mana lo ngeruni henene hanguore lo wigi bidegoni.
PSA 119:143 I̱ kogoria genda bulenebi mini dege dindi holenebi dewaore íbu wia ngagoyu i̱na í̠naga bi lo ngeru hondowa nde turuore bigi biragola haruli.
PSA 119:144 Í̠naga bi lo ngeruni tigabi hanguore wia ai̱ ai̱ binigo lo ngegoni. Í̠naga bi lo ngedagua biruyagua i̱ haabo holeberogo lededaguaore baya hangu manda bialu buliyanaga biamogoore bibe. Í̠na ani beregola i̱ bayale dunguleore holebero.
PSA 119:145 Anduane Homogo-o i̱na í̠ hongo howaore olarogoni. Í̠na mana bulene nga lalu lo ngeru i̱na talialu holiya i̱na í̠hondo bi larogo hale habe.
PSA 119:146 I̱na í̠ olalu kogoni. Í̠naga bi mana lo ngego taluwa bialu holiya i̱ pele ngialu haru dai bibe laro.
PSA 119:147 I̱na gao naledaha i̱ biamogo bibelo í̠ olaruli. Í̠na buleore lalu bi lo wigi birirunaga i̱na mini dunubia ho kogoni ndobe.
PSA 119:148 Mbiraga i̱ dengala ho wialu í̠naga bi mana debene lo ngeru dege mitangi biaabo haruli.
PSA 119:149 Anduane Homogo-o í̠ gubalini haabo ho hariligo i̱naga bi hale habe. Í̠na dara howa biamogo biriligo walia halu i̱ homa nabi bayale holiya handayaho habe.
PSA 119:150 Agali marume mini ko wu howa i̱ bo wahole bialu hayaru í̠naga mana mo tene nahaga karubi tini kaware o ibiragoni ndobe.
PSA 119:151 Anduane Homogo-o í̠naga bi mana bibahende henene wiaabo haga ngelowa í̠ni i̱ kogoha kaware haabo kegoni.
PSA 119:152 Bambaore howa í̠naga bi mana lowiriru mandabi harugoni ndobe. Í̠na bi uruni lo wialu wiaabo helo nge.
PSA 119:153 I̱na í̠naga bi mana lo ngeru embeda nahe kogo í̠na i̱ha genda timbuni ngaru de hondowa i̱ biamogo bibe.
PSA 119:154 Í̠nime pele nguleore lalu lo wiridagua i̱ pele ngibe. Godi lalu koria i̱ bo waholene nga loligo í̠na i̱naga lahabe.
PSA 119:155 Ko biaga karu tigua í̠naga bi mana lo ngeru talialu nabiagaore kago í̠na ti pele mialu haru dai nabule kegoni.
PSA 119:156 Anduane Homogo-o í̠naga dara holene timbuniore ngegome í̠na dara howa biamogo bulebero lalu bi lo wiridagua áyu ogoni i̱ biamogo bibelo hameledo.
PSA 119:157 Waitigi dewaoreme i̱ baba waitigi ho halu mo ko haga bidagoyu ainde i̱na í̠naga bi mana galoneore lo ngeru yu wahalu nape kogoni.
PSA 119:158 Agali ko biaga biarume í̠na mana bayale bulene nga lo wiriruni nabiaga karu hondowa i̱na tihondo turu nahe handabe manga timbuni ho haruli.
PSA 119:159 Anduane Homogo-o í̠naga bi mana bulene nga larigo i̱na gubaliniore howa bua haabo kogoni manda bibe. Í̠naga gubalini holene ho haabo haga kegonigo ainde i̱ dara halu pele ngibe.
PSA 119:160 Í̠naga bi mana ngerunaga irane henene lolene dege lo nge. Í̠naga bi mana lo ngeruni tigabiore wiaabobo bu wiaga nga.
PSA 119:161 Irane nawini agali haguane bu karume i̱ mo ko halu kagoyu i̱na í̠naga bi mana lo ngeru mitangiore bu haga kogoni.
PSA 119:162 Mbiralime ngolo dewa handa walia howa turu hagadagua í̠na buleore lalu lo wigi birirunaga mitangi bialu i̱ turu timbuniore ho kogoni.
PSA 119:163 Ke̱ hagane mana koorene ko ngago i̱ mangaore ho kogoyu i̱na í̠naga bi mana lo ngeru hangu gubalini timbuniore ho kogoni.
PSA 119:164 Í̠na mana tigabini howa bi lolene ngadagua laga kegonaga i̱na horo bibahendengi í̠hondo kahalu ka̱i̱ laruli.
PSA 119:165 Wali agali í̠naga bi mana gubalini ho haga karu ti bayale halu mbirale mbirame ti mo pila holene nawulebira.
PSA 119:166 Anduane Homogo-o í̠na i̱ pele ngialu haru dai bibelo maliaho howa mana í̠nime bibe lalu lo wirigo i̱na bialu kogoni.
PSA 119:167 Í̠naga bi mana lo ngeru i̱na taluwa bialu hagaore kogoni. Bi mana uruni gubaliniore howa bua timbuni ho kogoni ndobe.
PSA 119:168 I̱na í̠naga mana lo ngerubi bulene nga lalu bi lederubi bibahendeore talialu biai halu kogoni. I̱na mana ogoni bialu koria í̠ de handai ho kegoni.
PSA 119:169 Anduane Homogo-o i̱ biamogo bia lalu olalu kogo hale habe. Abale howa í̠na i̱hondo manda bulene nguleore lalu bi lo wiridagua i̱ manda bulene timbuni mo ngibe.
PSA 119:170 Ainde i̱na í̠hondo bi larogo baya hangu hale halu í̠na pele ngialu haru dai bule laridagua áyu i̱ pele ngibe.
PSA 119:171 Í̠na í̠naga mana lo ngeru i̱ lawai haabo haga kegonaga i̱na í̠naga mini yaraga haabo halu holebero.
PSA 119:172 Í̠naga bi mana damenego bayale tigabi dege ngegonaga i̱na mana ogoni lalu iba gana la halu holebero.
PSA 119:173 Í̠naga bi mana damenego bibahende talialu bialu kogonigo ai nde í̠na i̱ biamogo bule manda bu haabo habe.
PSA 119:174 Anduane Homogo-o i̱ pele ngialu haru dai bibelonaga ha dege biwane i̱naga bu miniha tandaga bialu i̱ hongo ereba haragoni. Í̠naga bi mana lo ngegome i̱ mo turu haga biaga ngagoni.
PSA 119:175 Í̠naga mini yaraga halu holiya í̠na i̱ha holene bayaleore ngibe. Í̠naga bi lo ngegome i̱ biamogo bia helo hameledo.
PSA 119:176 I̱ hariga bayale yu wahalu pu tara howa i̱ nogo sibi pu ereba hene ale ko. I̱na í̠naga bi mana lowini ngeru yu wanahagaore kogo manda buwa í̠na í̠naga biabe biahaga i̱ kogonigo i̱ taya bibe.
PSA 120:1 I̱ha genda timbuni anda ibiyangi i̱na Anduane Homogo olarugola ibugua i̱ biamogo biya.
PSA 120:2 I̱na Anduane Homogohondo bi lalu, Anduane Homogo-o agali ke̱ haga karume i̱ mo hondo holigo i̱ biamogo bibe, larugoni.
PSA 120:3 Ke̱ haga bu kamiru tíhondo Anduane Homogohanda agua bulubadabe. Tí pani nalimulo aguaore ngulubadabe.
PSA 120:4 Ibugua tí aminaga yandarerume nogoba halu ira hedope halu tí delolebira.
PSA 120:5 I̱ tí dege dombeneha kogoni Mesege dindibi Keda dindibi wali agali ko biaga karu baba haradagua bidogoni.
PSA 120:6 Agali maru wali agali bu karu baba mandagi habe manga haga karu i̱ ti heba mandagi luore haabo haruda.
PSA 120:7 I̱na mo palia holenenaga bi lalu koria tigua wai bule dege manda biaga kagoni ndobe.
PSA 121:1 I̱na hari wedaruha de handadaga berogoni. I̱ ani bia berogonigoyu mbirali i̱ biamogo bule ibulubadago agohayagi howa ibulubadabe.
PSA 121:2 Anduane Homogo ibugua hari daligabi dindi timbuni o kamagobi wabinigo ibunime dege i̱ biamogo biaga kagoni.
PSA 121:3 Ibugua í̠ pilope nahabelo handayaho holebira. Ibu u napaliaga howa í̠ mamage kaore dege halu egabi laga biaga kagoni.
PSA 121:4 O larogo bayuwa hale habe. Anduane Homogo ibu Isaraele wali agalinaga mamage haga kago howa ibu u emene mbira napaliagaore ka. Ibu umubi heba nalagaore kagoni.
PSA 121:5 Anduane Homogo ibugua í̠ kegoha kaware haparaho howa í̠ mamage haabo haga kagoni. Ibu ani kagola í̠ ibu gumbaha howa bayaleore dungulo holebere.
PSA 121:6 Horombe ni tandagabi daragome í̠ daba halu mo ko naholebira. Mbiraga ege daragomebi í̠ mo ko naholebira dege.
PSA 121:7 Mbirale ko hiriribi tara tara ngarume í̠ mo ko mbira holilono Anduane Homogo ibugua í̠ handayaho mamage holebira.
PSA 121:8 Í̠ í̠ni andagani palialu tagira pu haregoriani ibugua mamage hama ibagabu holebira. Í̠ andagani daibu paleregolabi ibugua dege mamage holebira. Áyubi awebi ibugua ani biaabo holebira.
PSA 122:1 Tigua i̱hondo, Anduane Homogonaga anda mali̱ya ma íbu, layagola i̱ turuore haru.
PSA 122:2 Ani layagola ina pialu ai áyu Yarusaleme anda puwa pabe tamuha o kamagoni handadaba.
PSA 122:3 Yarusaleme tano biagoni lone bu aribia hene baya gibiore de hondoabi kagoni.
PSA 122:4 Isaraele hameigini tara tara palu ngaru ti bibahendeme Anduane Homogo ibuhondo ka̱i̱ lole ogoriani íbu ngoai halimu lenedagua ka̱i̱ lole ibugu biaga kagoni.
PSA 122:5 Dindi ogoriani godi anda kago ogoniha Isaraele wali agalinaga kinirume biruwa godi hale halu mo tiga biaga kagoni.
PSA 122:6 Yarusaleme dindini gendabi mbira nawi mo paliaho wilo Anduane Homogohondo bi ogodagua lalu halimu. Wali agali Yarusaleme tano mitangi timbuni ho karu ti bayaleore helo biamogo bibe.
PSA 122:7 Wali agali Yarusaleme tanonaga pabe tamuhayagi bu kamiru tí tíni dege dege ngeke̱ nale gungu nabi bayuwaore mo paliaho helo biamogo bibe. Kinibi ibunaga agali haguane karubi uruni andagahayagi haga karu tibi turuho mo paliaho dege helo biamogo bibe, lalu ani laga bilimu.
PSA 122:8 I̱ damenebi i̱ ariabi igiri yangobi Yarusalemeni íbu karu mitangi bialu bi ogo Yarusalemeni kamiru tíhondo larogoni, Tí ngeke̱ nale gungu nabi bayuwaore mo paliaho halimu, laro.
PSA 122:9 I̱na Anduane Homogo inanaga Ngode Datagaliwabe kago ibunaga anda kagoore i̱na mitangi timbuni ho kogoni. Ngode Datagaliwabehanda Yarusaleme wali agaliore biamogo bialu mo bayale helonaga ibuhondo bi lahalu kogoni.
PSA 123:1 Anduane Homogo-o í̠ni dahuliya andaga haru kegoha i̱na handa daga halu í̠hondo bi lalu kogoni.
PSA 123:2 Biabe biahaga agali kagome ibunaga anduane kagoha mini hana ho hagadaguabi biabe biahaga wali bedagome ibunaga anduane bedagoha mini hanaho biragadaguabi Anduane Homogo inanaga Ngode Datagaliwabe-o í̠na dara howa biamogo bibelo ina í̠ha hanaho holeberema.
PSA 123:3 Anduane Homogo-o ina de hondowa dara habe. Wali agali bu karume ina mo ko hayago ai í̠na daraore howa biamogo bibe.
PSA 123:4 Agali homogo mbirale dewawi hearume ina mege bialu haabo haya. Agali mine haga hearume ina bope halu haabo haga kagoni.
PSA 124:1 Anduane Homogohanda ina biamogo nabinidale ina nde abiore kamaledabe. Bi o larogoniore Isaraele wali agali tígua bi ogodagua ladai bidaba-o.
PSA 124:2 Inanaga waitigi hearume ina bo anda ibiyangi Anduane Homogo ibugua ina mo wialu biamogo nabinidale
PSA 124:3 inanaga waitigi biarume tinaga keba holeneme ina bibahende mo ko howaore bo wahai kale.
PSA 124:4 Iba li ibalu mbirale ibame hilu dambiho yalu puabo hagadagua inanaga waitigirume ina bamba bo mburi lalu erebaho wa heledale ndobe.
PSA 124:5 Iba li hongoheore ibiyagome ina bibahende mbelelo yalu pialu yu ereba kagola homai kamale ndobe. Homabehego nahome yopene harimago kamagoni, lalu ladai bilimu.
PSA 124:6 Inanaga waitigi bu hearume ina bibahende bo mburi laihe nale Anduane Homogo ibunime ina bibahende hatali wu haabo hayagonaga iname ibuhondo ka̱i̱ laaboore hami̱ya.
PSA 124:7 Agalime ega gono wedaria ega mbira gono dagoha da puda halu kundulo mialu ibida porayadagua ina pirimagoni kamagoni. Ina gono wearuha do ngamalego Anduane Homogo ibugua gono kundulupe helaga biyagome ina yo pialu pene kamagoni.
PSA 124:8 Anduane Homogo ibugua hari daligabi dindi timbuni o kamagobi wabinigo ibunime dege ina biamogo biaga kagoni.
PSA 125:1 Wali agali Anduane Homogoha mini mbiraore wu karu ti Hari Saiono ale imiema nabi durubi nalaga hongo haabo haga ka.
PSA 125:2 Hari wedarume Yarusaleme ho hagira bu kadagua Anduane Homogohanda ibunaga wali agali handayaho howa ho mabu bu haabo holebira.
PSA 125:3 Wali agali ko biaga karume wali agali mana tigabi biaga karu handayaho haabo naholebira. Tigua handayaho haabo hayagua nde wali agali tigabi karume tibi nde mana ko biaga holobada.
PSA 125:4 Anduane Homogo-o wali agali bayale í̠naga mana ngeru taluwa bialu haga karu tihondo í̠na mana bayale biadai bibe.
PSA 125:5 Í̠na wali agali ko biaga karunaga pani nelo mialu howa wali agali maru í̠naga mana ngeru mo wahalu piaga karubi ti bibahende pani nelo miai habe laro. Isaraele wali agaliru tiha mo palia holene wia helo hameledo.
PSA 126:1 Anduane Homogohanda ina dindi taraha garabaya hemaria haru dai bialu Yarusalemeni lone helayagoni Ibugua ani biyagonaga iname ogoni henene ndo emaga handarimabe toba harimaya.
PSA 126:2 Ina Yarusalemeni daibu howa turuore gibi halu oba hangu haho wiaabo halu turu howa iba ganaru podaga podaga bialu gibiore laho wiaabo harimagoni. Ina ani birimago hondowa wali agali hameigini tara tara paluyu pearume tini dege dege lade̱le̱ bialu au laya. Anduane Homogohanda ibunaga Isaraele wali agali biamogo bule gibiore nabibehe wiagoni biya hendedemini, laya.
PSA 126:3 Ogoni heneneore ndobe. Anduane Homogohanda ina biamogo bulenaga biabe gibiore biyagoni. Ibugua ani biyagonaga ina turuore gibi halu ina miniha dunguore lo harimagoni.
PSA 126:4 Anduane Homogo-o ina ala turuho dunguore lo haramalidagua holoma̱ya hela dai bibe. Iba hundiragola gana iba piagagoha yobu ngaria dalu lone ibiragola iba piaga wiyadagua lone piaga. Ogonidagua Anduane Homogo í̠na ina áyu kamaru lone mo gumbilo dai bibe.
PSA 126:5 Wali agali deiba ibalu howa tomo hangalu karume mani tomo hangaragoni bu ngaria turuore halu bu hanaga bilo hameledo.
PSA 126:6 Wali agali dugu bialu tomo egene hongole yalu pialu hangayarume mani tomo uruni bu ngaria bu hombedo hanalu turu hama iba gana lamalama andaga dai bulebira.
PSA 127:1 Anda biaga gabendame anda bialu karuni Anduane Homogo ibunime bialu kaha ndo tini hangu hongome bialu kayagua ti bame biabe bu wahole bialu kagoni. Mamage haga agalime tano handayaho karuni Anduane Homogo ibugua mamage kaha ndo tini hangunaga hongome kayagua ti bame irane nawini mamage halu egabi lo kagoni.
PSA 127:2 Egabiore lara handala heyalu munibi tomobi mitangi bialu biabe bule tagira poramali. Biabe bialu ne lo wákaha mbiraga andaga dai bialu u palia puda haramali. Urunidagua bialu kamaruni nde irane nawini dege bame hongo bibaho bialu kamagoni. Irane Anduane Homogo ibugua wali agali ibuni gubalini ho karu ti mbiraga u padaha ibunime ti tomo nolenebi mbirale wu holenebi manda mandabu wia haga kagoni.
PSA 127:3 Anduane Homogo ibugua inahondo baya turubini bialu waneigini ngidaruni turu halu mbirale bame ngiradagua bidagoni. Waneigini bu karuni ibugua ina mo gumbila halu inahondo ngidagoni.
PSA 127:4 Agali daliaheme ibu igini igiri hono wu haga bidago ogoni wai biagane agalime ibu giha timu ayagu yu hagadagua yu ka.
PSA 127:5 Timu ayagu ogoniale dewaore wu kago ibu baya turubiore ka. Ibunaga waitigi karu baba bi godi laga birangi ibu igini dewa urunime lamogo biragola ibunaga waitigidarume ibu godi lo wini labe naheore holebira.
PSA 128:1 Wali agali Anduane Homogohanda hame ledadagua bialu karu ibunaga bi mana lo ngadagua bialu hagabi karu ti turuore ho ka.
PSA 128:2 Í̠ ogonibi keyagua í̠naga biabe bereruha howa karulape mo ngialu mbirale burupale keru yu holebere. Mbirale í̠na bereru damene bibahende bayale hai haragola í̠ni turubiore holebere.
PSA 128:3 Í̠ one ibu nde gerebi lini dewaore daga kaligobi birulebira. Ira olibe hongone dewa ira teneha anda ho mabu biralidagua í̠naga waneiginiru ti í̠naga andagani ira dedagoria biru mabu bulebira.
PSA 128:4 Heneneore mbirali Anduane Homogonaga bi ledago taluwa biaga kago ibuha mo turu holene ogonibi migi bulebira.
PSA 128:5 Anduane Homogo ibugua Saionoha howa í̠ mo bayale helo. Í̠ dindini homa nabi wene keore Yarusalemeni mbirale uruni heneneore biaabo halu kane handabelo hameledo.
PSA 128:6 Í̠ dindi ogoria luore haabo howa í̠naga waneigini aguaneru de handabelo hameledo. Isaraele wali agaliru tiha mo palia holene wia helo hameledo.
PSA 129:1 Isaraelealiru-o bambaore howa tí waitigirume pigane hemingi howa mo ko hama ibalu haabo henego te langibe.
PSA 129:2 I̱na í̠hondo langialu lalu, I̱ daliahe dege hewangi waitigime mo ko hama ibalu haabo henego áyu kogoni. Tigua ani binigoyu i̱ bope nahe kogoni.
PSA 129:3 Tigua i̱ pu payini tibume minu bayagola i̱naga tingini erembiraha poda gaibu baga biya. I̱naga tingini bayago dere tibu bene wiadagua luni biagimbu bigi bialu iba ganarua ale pupe haga biya.
PSA 129:4 Tigua ani biyagoyu Anduane Homogo ibu tigabiore kagome i̱ biamogo bialu waitigi biarunaga garabaya biabe ale bialu haga ndo i̱ golope hene ko, lalu langerogoni.
PSA 129:5 Waitigirume Saiono handabe manga haga bu karu tini daluha bo taliadai bimi̱ya hamelo ko.
PSA 129:6 Tiore anda dangini gondo anda ho hagadagua hayagua bayaleda. Mbiralime gondo ogoni dugu wanahe kaore minalu abale gau laga.
PSA 129:7 Gondo anda dangini anda hene ogoni mbiralime gandu lowa mo kabubu yalu napiaga ndobe.
PSA 129:8 Wali agali kaware bolangua halu porarume tihondo ogodagua lalu, Anduane Homogohanda tí mo bayale helo. Iname nde Anduane Homogonaga minini howa tí mo bayale helo hameledama, lalu nalolebira ndobe.
PSA 130:1 Anduane Homogo-o i̱naga bu miniha gendaore gibi ho howa í̠hondo bi larogoni.
PSA 130:2 Anduane-o i̱na í̠hondo duguore bialu bi larogoni hale habe. Í̠na i̱ biamogo bia lalu olarogoni hale habe.
PSA 130:3 Í̠na iname ko birimaruni damenego bibahendeore mo ilu wiai ho kele ina kamaruni mbira pani nane yo pialu ai pedalebe.
PSA 130:4 Ina mbiraorebi yo napobeheore kamalegoyu í̠na iname ko beramaru domo wahaga kegoni. Iname í̠ hondowa giho holoma̱yanaga ko beremaru í̠na domo wahaga bialu kegoni.
PSA 130:5 I̱ore Anduane Homogohanda biamogo bilo lowa ibuha hana howa miniha didiho haruli. Ibugua biamogo bulebero lalu ibunaga bi lo wiyagoria yaniho haabo haruli.
PSA 130:6 I̱ore Anduane Homogohanda biamogo bulebira lowa miniha didiore howa haruli. Mbiraga mamageali mbira egabi ala la lowa hale gogabu haradagua ndo i̱ miniha didi gibiore biyagola dugudaga howa yangayangabu haruli.
PSA 130:7 Isaraele wali agaliru-o Anduane Homogo ibugua ina gubalini gibiore haho wiaabo haga kago manda bialu iname ibuhondo mini mbiraore wialu ibuha hanaho holene nga. Ina mbira mo ko holani handalu ibugua biamogo biaga kagoni.
PSA 130:8 Ibugua Isaraele wali agali ibuninaga ka lalu tigua ko binidaru domo wahai halu ti gi mialu haru dai biai haga kagoni.
PSA 131:1 Anduane Homogo-o i̱na mine halu haruligo wahalu i̱ni bayale kogo mitangi bialu balagala haruligobi waharu. I̱na mana timbuni i̱ manda bibe nahe ngarubi mbirale nahendene ale bulene taibiore ngarubi uruni i̱ mitangi nabi holebero.
PSA 131:2 I̱na ani nabi howa ai i̱ karulape í̠naga mo palia holeneha bedogoni. Waneigini gali ti ai̱ya bani bayale paliagadagua i̱naga miniha nde hadape howa dungulo kogoni.
PSA 131:3 Isaraele wali agaliru-o tígua Anduane Homogohondo mini mbiraore hongohe áyu ogoni howa wu haabo ho halimu.
PSA 132:1 Anduane Homogo-o Debidihanda erekui biabe ndelaheore bialu hayagoni mitangi bialu í̠na ibuore embeda holeni.
PSA 132:2 Anduane Homogo-o Debidi ibugua ogo ale buleore lalu Isaraele wali agalinaga Ngode Datagaliwabe Hongo Gibihe kego í̠hondo bi lo wigi biyagoni í̠na mitangi budai bibe.
PSA 132:3 Ibugua bi ogodagua lo wigi biyagoni. I̱na i̱ andaga napolebero dagianibi u napaluebero.
PSA 132:4 Ha̱lo birabi mbirale mbirani malia howa paliabi nabulebero.
PSA 132:5 Isaraele wali agalinaga Ngode Datagaliwabe Hongo Gibihe kagonaga andaore mbira bu heore lolego buwa Anduane Homogo ibu anda ogoniha kagola i̱ i̱ni andaga u palue polebero, lalu Debidihanda bi uruni leanego mitangi bibe.
PSA 132:6 Anduane Homogonaga Habo Nalolene bi lo winigonaga Mbogoyi biagoni dindi ogoha nga lalu ina Bedelehemeni hemaria langiyane hale harima. Mbogoyi biagoni Yarimu dindini wiaria handa walia harima.
PSA 132:7 Handa walia howa iname lalu, Ai Mbogoyi ogo mo yalu Anduane Homogonaga andani ma nalarami, larima. Anduane Homogonaga biragane dagia ngagoria kaware hapara howa ina bulu palialu ibunaga mini mo yaraga halu lotu lami̱ya ma, lalu larima.
PSA 132:8 Anduane Homogo-o í̠naga Mbogoyi biagoni heba í̠ninaga andani haabo hole íbu habe. Mbogoyi ogonime Anduane Homogo í̠ hongo gibihe kego walia halu manane ogoni ngagoni.
PSA 132:9 Í̠naga loma binigo mo miaga agali karu tiguabi mana tigabi hangu bilo hameledo. Í̠naga wali agali bu karume turuore gibi howa bi ladagadaga bilo hamelo kogoni.
PSA 132:10 Anduane Homogo-o í̠naga biabe bia haga Debidiore mitangi bibe. Kini í̠nime dabene ogonihondo handa tara halu erembira muleni.
PSA 132:11 Anduane Homogo-o ala í̠na bi hongoheore mbira Debidihondo lo wiriyagoni pugua nabuleore kegoni. Ala í̠na Debidihondo ogodagua lariyagoni, Debidi í̠ni halu homedeha mani í̠ igini hararu aria mbirago kini í̠ pani ho aribia helo dabo helolebero, lariyagoni.
PSA 132:12 Í̠na Debidihondo laabo halu lalu, Í̠naga igini hararume i̱na habo nalolene bi pongo bo wirudagua bialu ogoale bilimu ogo ale nabilimu lalu lamerodagua biyagua nde mani í̠naga aguane hararu ti iginime kini dege halu í̠naga dagia í̠niha tagira pene degeme mia aribia haga bulebira, lalu lo wiriyagoni.
PSA 132:13 Anduane Homogohanda Saiono tano ibuninagaore helo ibunime dabene. Ibu Saionooreni ho teneho hole hameleda.
PSA 132:14 Ibugua lalu, I̱ tano ogoriani haho wiaaboore holebero. I̱na dindi ogoriani howa i̱ni kini howa haru holenaga dindi ogoni dabedo.
PSA 132:15 I̱na Saiono tanoni wali agali bu karu buru pada ale dewaore bu hombedo mulebero. Ogoniha wali agali yagibano tomo noanoalo bu karu tibi tomo karulapeore nelo mulebero.
PSA 132:16 Saiononi loma binigo mo miaga karume i̱naga wali agali gi mialu haru dai bulene biabe bayale bilo biamogo bulebero. Saiononi wali agali bu karu ti turu halu iba gana lalu bi ladagadaga bu holebira.
PSA 132:17 I̱na dindi ogoriani howa Debidi ibuha howa tagira pene mbira kago kini gibiorene gibi helo dabo helolebero. Kini ogoni lamu hale daabo hagadagua ibugua wali agali handame holene ereba nahe wiaaboboore holebira.
PSA 132:18 Kini ogoninaga waitigi karu i̱na ti mo taga halu taga pani timbuniore nelolebero. Ai wali agali kini ogoni ibugua handayaho hene karu i̱na ho timbu hama baya hama puabo helolebero, lalu Anduane Homogohanda ani lene.
PSA 133:1 Ngode Datagaliwabenaga wali agali ti baya hangu mini mo mbiraore howa mandagi hayagua nde mana ogoni bayaleore halu ti miniha dungulo holebira.
PSA 133:2 Tigua mana ogonidagua bulenego bayaore olibe lini ibaneme weli baya tara wabini mbira Arononaga haguaneni odo wiyagola pugulalu ibunaga angarini pora bialu aga lu biagoria pugulope hayagobi holebira.
PSA 133:3 Mini mo mbiraore holene mana ogoni Hari Hemononi dadimba mbiraga ibira haraligobi halu Saiononaga hari bu karuha ibira hagagobi holebira. Dindi ogoniha Anduane Homogohanda wali agali mini mo mbiraore ho karu tihondo bayale dege bialu holebero lo winigo nga. Bi lowinigo ogo, Tí haabo holene yu halimulonaga ngulebero, lene.
PSA 134:1 Anduane Homogonaga andaha mbiraga biabe biahaga kamiru ibunaga mini yaraga hole ibidaba.
PSA 134:2 Tígua ibunaga andaha howa gi yaraga halu Anduane Homogohondo bi lalu ibunaga mini yaraga hadaba.
PSA 134:3 Anduane Homogo ibu hari daligabi dindi o kamagonibi wabini kago ibugua Saionoha howa tí mo bayaleore helo laro.
PSA 135:1 Anduane Homogonaga mini yaraga hami̱ya. Anduane Homogonaga biabe biahaga kamiru tígua ibunaga mini yaraga hadaba.
PSA 135:2 Tí Anduane Homogo inanaga Ngode Datagaliwabenaga anda pabe timbuni kago tamuha haga kamiru tígua ibunaga mini yaraga hadaba.
PSA 135:3 Ibu bayaleore kagonaga iname ibunaga mini yaraga hami̱ya. Ibugua inahondo dara howa bayale biaabo haga kagonaga iname ibunaga mini yaraga halu iba ganaru lami̱ya.
PSA 135:4 Anduane Homogohanda Yagaba ibunaga helo dabenedagua ibugua Isaraele wali agali ibuninagaore helo dabo helene ka.
PSA 135:5 Anduane Homogo ibu mini leneore howa dama mitangi bialu bi pupu wulenaga gime wabini ngaruni ibugua bolangua haiheore kago i̱ manda bidogoni.
PSA 135:6 Anduane Homogohanda mbirale ibunime bule hame ledadagua hari daligahabi dindinibi biaga ka. Iba solowarahabi iba andanehabi bibahendeoreni ibugua bua biradagua biai haga ka.
PSA 135:7 Ibugua harini ginu dindi bibahendeha wiame helalu hari daba bilaragola howa iba dalu ibilalu puyabu tara tara ibuni andagaha wia do ho winiru mo heya halu dindi bibahendeha pulame helo pelaga ka.
PSA 135:8 Iyibi dindini Iyibialinaga igini wahene bibahende bo wahai halu tinaga nogo igini pigane wini hearubi bibahende bo wahai hene.
PSA 135:9 Iyibi dindiha dege ibugua kinibi ibunaga agali haguane hearubi bibahende pani nelo mialu agalime nabiagane alebi nahendene ale dewaorebi bialu hene.
PSA 135:10 Anduane Homogohanda hameigini tara tara dindi dewaoreni hearu bo wahaga bialu kini hongohe bu hearunibi bo wahai haga bini.
PSA 135:11 Ibugua Amoro wali agalinaga Kini Sihono bo wahalu Basana wali agalinaga Kini Oga bo wahalu Kenana dindiha kini dewa bu hearubi bo wahai halu bini.
PSA 135:12 Ibugua dindi uruni ibunaga wali agaliruhondo mini. Isaraele wali agali hearu tihondo dindi uruni bibahende miai hene.
PSA 135:13 Anduane Homogo-o wali agali bibahendeme í̠ Ngode Datagaliwabeore kagonida lalu latagi haabo holebira. Wali agali mani holebirarubi ti bibahendeme í̠ ogonibiore ke lalu manda bulebira.
PSA 135:14 Anduane Homogohanda ibunaga wali agali handayaho haabo holebira. Ibugua dara holene nawi howa ibunaga biabe biahaga karu dara haabo holebira.
PSA 135:15 Hameigini dindi tara taraha bu hearume dama mitangi bialu mbirale bi pupu wulenaga ngolo silibarume wabu helaga biaga. Mbirale uruni tininaga gi degeme wabigi bini.
PSA 135:16 Mbirale uruni wabu helayaru tinaga ne hariga ngagoyu bi nalaga nga. Tinaga de heledagoyu mbirale deme nahandaga nga.
PSA 135:17 Tinaga hale wabu heledagoyu bi hale nahagabi tiha bu he̱bi nalagabi nga.
PSA 135:18 Mbirale uruni ale wabu helayarubi uruni yu tiga biaga agali karubi tini nde mbirale urunibi dege helo hamelo kogoni.
PSA 135:19 Isaraele wali agaliru-o Anduane Homogonaga mini yaraga hadaba. Anduane Homogonaga loma binigo mo miaga kamiru tíguabi ibunaga mini yaraga hadaba.
PSA 135:20 Libai agali kamiru tíguabi Anduane Homogonaga mini yaraga hadaba. Wali agali Anduane Homogo mitangi bialu lotu laga kamiru tí bibahendeme ibunaga mini yaraga hadaba.
PSA 135:21 Anduane Homogo ibunaga dalu Saiono Yarusalemeha howa wali agali bu kamiru tígua ibunaga mini yaraga hai hadaba.
PSA 136:1 Anduane Homogohanda inahondo bayale bialu haga kagonaga iname ibuhondo ka̱i̱ timbuni lolene nga. Ibugua ina gubalini ha ho wiaaboore haga kagoni.
PSA 136:2 Anduane Homogo ibu mbirale bi pupu wulenaga gime wabini ngaru bolangua haihe kago iname ibuhondo ka̱i̱ lama. Ibugua ina gubalini ha ho wiaaboore haga kagoni.
PSA 136:3 Anduane Homogo ibu dindini haguane hene karu bolangua haihe kago iname ibuhondo ka̱i̱ lama. Ibugua ina gubalini ha ho wiaaboore haga kagoni.
PSA 136:4 Agalime nabiagane aleru ibugua dege biaga ka. Ibugua ina gubalini ha ho wiaaboore haga kagoni.
PSA 136:5 Hari daliga li karuni ibunaga mini bayale gigabi wiagome wabini. Ibugua ina gubalini ha ho wiaaboore haga kagoni.
PSA 136:6 Ibugua iba andaneha berelowa dindi daliga wabu ngeleda. Ibugua ina gubalini ha ho wiaaboore haga kagoni.
PSA 136:7 Ibugua ni egebi wabini. Ibugua ina gubalini ha ho wiaaboore haga kagoni.
PSA 136:8 Ibugua nime horombe wá halu hondo helo heleda. Ibugua ina gubalini ha ho wiaaboore haga kagoni.
PSA 136:9 Ibugua egebi yakundirubi urunime mbiraga dalu hondo helo heledagoni. Ibugua ina gubalini ha ho wiaaboore haga kagoni.
PSA 136:10 Ibugua Iyibi wali agalinaga igini wahene bo wahai hene. Ibugua ina gubalini ha ho wiaaboore haga kagoni.
PSA 136:11 Ibugua Isaraele wali agali Iyibi wahalu haru tagira pene. Ibugua ina gubalini ha ho wiaaboore haga kagoni.
PSA 136:12 Ibunaga hongo timbuniore heagome ti ani haru tagira pene. Ibugua ina gubalini ha ho wiaaboore haga kagoni.
PSA 136:13 Ibugua iba solowara Daramabi laga bereago bira migimigi bilene. Ibugua ina gubalini ha ho wiaaboore haga kagoni.
PSA 136:14 Ibuni bamba halu ibunaga wali agali haru halu iba solowara Daramabi domaede hene. Ibugua ina gubalini ha ho wiaaboore haga kagoni.
PSA 136:15 Ibugua ani biyagoyu Iyibinaga kinibi ibunaga ami agali hearubi iba ogoniha iba nalu homai helene. Ibugua ina gubalini ha ho wiaaboore haga kagoni.
PSA 136:16 Ibugua dindi ko wali agali nahaga wiagoria ibuni bamba halu ibunaga wali agali haru halu pene. Ibugua ina gubalini ha ho wiaaboore haga kagoni.
PSA 136:17 Ibugua kini hongohe hearu bo wahai hene. Ibugua ina gubalini ha ho wiaaboore haga kagoni.
PSA 136:18 Ibugua kini mini lene hearubi bo wahai hene. Ibugua ina gubalini ha ho wiaaboore haga kagoni.
PSA 136:19 Ibugua Amoro wali agalinaga Kini Sihono bo wahene. Ibugua ina gubalini ha ho wiaaboore haga kagoni.
PSA 136:20 Basana wali agalinaga Kini Ogabi bo wahene. Ibugua ina gubalini ha ho wiaaboore haga kagoni.
PSA 136:21 Kini uruninaga dindi wiaru ibunaga wali agaliruhondo mini. Ibugua ina gubalini ha ho wiaaboore haga kagoni.
PSA 136:22 Ibugua dindi uruni ibunaga biabe biahaga Isaraelealiruhondo mini. Ibugua ina gubalini ha ho wiaaboore haga kagoni.
PSA 136:23 Waitigime ina bopeore hayagola ibugua ina embeda nahene. Ibugua ina gubalini ha ho wiaaboore haga kagoni.
PSA 136:24 Ina waitiginaga giha hemaria ibugua ina mo wialu haru dai biya. Ibugua ina gubalini ha ho wiaaboore haga kagoni.
PSA 136:25 Ibugua wali agalibi ema bialu piaga damene bibahendebi tomo karulape nelo miaga ka. Ibugua ina gubalini ha ho wiaaboore haga kagoni.
PSA 136:26 Ngode Datagaliwabe dahuliya andaga kagohondo iname ka̱i̱ lami̱ya. Ibugua ina gubalini ha ho wiaaboore haga kagoni.
PSA 137:1 Babilono dindini iba piyarunaga angeni ina bira bigi bu harima. Ogoriani biruwa nde inanenaga dindi Saionoore mitangi harima. Iname dindi biago mitangiore harimadagua nde daraore howa inane dindinaga duguore bu wia harima.
PSA 137:2 Iname inanaga ngida ga̱wa̱ hiliyularu iba angeni ira hiribi ale hearunaga maganeni derela ho ngelowa ina labe manga biyagola nale bame biru wirima.
PSA 137:3 Agali ina garabaya biaga biarume inahondo lalu, Tígua iba gana maru ina mo turu holenaga laga bidaba. Tíninaga dindi Saionoore lalu ka̱i̱ laga bialu mbira ina hale holoma̱ya la handadaba, laga biya.
PSA 137:4 Ti ani laga biyagoyu ina dindi taraha garabaya pu howa ina Anduane Homogonaga iba ganago bame laholo au bulebe. Ani nabuleore ndobe.
PSA 137:5 Yarusaleme-o i̱na í̠ embeda haruyagua o ngidaru lone aginaga bole ndodago nabolebero.
PSA 137:6 Yarusaleme-o i̱na í̠ embeda halu i̱naga turu holene tene Yarusaleme mitangi harogome tagira ibaga manda bidogobi heba embeda dege haruyagua o i̱ iba gana lone mani nalolego i̱naga bi mo pu helabe laro.
PSA 137:7 Anduane Homogo-o Babilonoalime Yarusaleme bo gialo paya bialu bayangi Edomoali ti wai Babilonoha anda puwa tigua bi laga biyagoore bayuwa mitangi bibe. Tigua ogodagua laga biyagoni. Weagua tira dindi hangu ibira helo bibahende bo gialo bagabu wahadaba, lalu laga biyagoni í̠ hale harigoni.
PSA 137:8 Babilono-o bi o larogo hale habe. Í̠ nde bo mburi lolebirago lelo ani habe. Í̠na inahondo koore birigonaga paipai mbirali ibugua í̠hondo bulebirago handabe. Mbirali inanaga paipai bia haga kago ibu turu holene nga.
PSA 137:9 Agali inanaga wai puhaga haruago ibugua ibalu Babilono í̠naga waneigini emene hono yu hama pederuni yamuwa ege to̱le̱ni embone tuguduki haga bulebirago ani bilo hono yu habe.
PSA 138:1 Anduane Homogo-o i̱ninaga miniha hongo timbuniore howa í̠hondo ka̱i̱ larogoni. I̱na mbirale dama mitangi bialu gime wabini ngagoria howa í̠naga mini yaraga halu iba gana lalu kogoni.
PSA 138:2 Í̠naga anda loma bia hene kago handade halu i̱na ge duli hanga ho biruwa í̠naga mini yaraga halu kogoni. Í̠naga gubalini holene wiaabo kegonagabi í̠ mini bilinahe kegonagabi i̱na ani lalu kogoni. Í̠naga minibi í̠na mana ogo bulene nga lenerubi duniniore nga lalu inahondo mo walia harigonaga i̱na iba gana ogo lalu kogoni.
PSA 138:3 I̱na í̠ olarugola í̠na i̱naga bi hale howa í̠ninaga hongo timbuniore kegome i̱ mo hongo haabo harigola kogoni.
PSA 138:4 Kini dindini bu karu bibahendeme í̠na bi lowiriru hale howa tigua í̠naga mini yaraga holebira.
PSA 138:5 Tigua í̠na bibahende birirunaga iba ganabi í̠ mini timbuni lene kegonaga iba ganabi lalu holebira.
PSA 138:6 Anduane Homogo-o í̠ daliga duniniore kegoni howa wali agali mini mo dindiha haga karu mitangi bu haga ke. Wali agali mine haga karu ti nde í̠naga deni ha do habe nahe ka.
PSA 138:7 I̱ha genda íbu mabu biragola í̠nime i̱ handayaho halu pele ngiaga kegoni. Waitigi bu karume i̱hondo keba haragola í̠na i̱ pele ngialu í̠ninaga hongome i̱ bayuwa mo wiaga kegoni.
PSA 138:8 Anduane Homogo-o mbirale i̱hondo bulebero lalu lo wiriruni biaiore holebere lo manda bido. Í̠naga gubalini holene wiaabo haga kegoni. Í̠na biabe bule biriruni bibahende bu maro bibelo hameledo.
PSA 139:1 Anduane Homogo-o í̠na i̱ ba handalu ai ogobiore kalo manda biaiore kegoni.
PSA 139:2 I̱na mbirale bigi berogo bibahendeore í̠ manda biaiore ke. Í̠ kaundiaore uyura howabi i̱naga miniha mitangi berogo damene bibahendeore manda biai kegoni.
PSA 139:3 I̱ biabe bialu koyaguabi o ha̱lo bedoyaguabi í̠na i̱ handaya kegola dege bialu kogoni. I̱na bigi berogo damene bibahendeore manda biai ho kegoni.
PSA 139:4 Bi mbira naledoore ogo ale lolebira lowa í̠ abale manda bu bolangua kegoni.
PSA 139:5 Í̠na i̱ homabu bupe halu í̠naga hongome i̱ pabe tigila haradagua bidegola kogoni.
PSA 139:6 Í̠na i̱ ogobiore kagoni lowa baya hanguore bilibele lo manda biai ho kegoni. Manda bulene daligaore ogonibi i̱na mandabu mibe naheoreda.
PSA 139:7 Í̠ ke handala i̱ ibida pole pialu ha do hole ani pobehe kobe. Í̠ nahego mbira dindi agohayagi ngabe.
PSA 139:8 Dahuliya anda iraga halu ibiruyagua í̠ ebere ke. Humbirini andaga dalipe halu ni bu karu baba bia tagoho hole yupe haruyaguabi í̠ niguniha ha dege bulebere.
PSA 139:9 Yagalo yalu pialu ni tagira ibagahayagi ha do hole piruyaguabi o ndo ni paliagahayagi pu haruyaguabi
PSA 139:10 dindi gibuni gibuni urunihabi í̠ ha dege bulebere. Í̠na i̱ biamogo bulebi haru holebi ha dege bulebere.
PSA 139:11 Aruma holeneme i̱ budambi heladaba lalu wá emeneore mbira nahe aruma dumbilinioreha ha do hole lalu manda biruyaguabi í̠ ha dege bulebere.
PSA 139:12 Í̠na i̱ arumaha ndo koria hondolebere. Mbiraga dumbilini mbauleyaguabi í̠na i̱ horombe hau hanunini koria handaradagua hendede. Handalu keria wá arumala tu nangaria hendede. Mbiragabi horombeni handaradagua dege hendede.
PSA 139:13 I̱naga tingini gi gebi embone minibi tara tara hama pedaruni í̠na wabu helene kogoni. Í̠na i̱ ai̱ya tombeha i̱ mo gimbu bialu berelariyagoni.
PSA 139:14 Í̠na mbirale bigi berego taraore bigi biagayagonagabi í̠ timbuni gibi baya buruguleore howa i̱ manda biai ho kegonagabi i̱na í̠naga mini mo yaraga haro. Ina wali agalime í̠ hondowa mo yo handabe nahe kamagoni.
PSA 139:15 I̱ ai̱ya tombeha biruwa i̱naga kuni dameneru wene hole mo gimbu gimbu bigi bialu heagola i̱ tombeha bira do howa anda haga bialu hewago í̠ manda bu harigo kegoni.
PSA 139:16 I̱ ai̱yahanda i̱ taba nahene tombeha berewago í̠ handarigoni. Í̠na ani bialu nde i̱ dindini howa mali ogodagua holebira ogoangi homolebira lalu manda buwa í̠naga mbugani gilibu wu kegoni. I̱ ai̱yahanda i̱ taba naheneha abogo ibu lu ogodagua helo lalu mali podo manda bu winigo í̠naga mbugani gilibu wiai kegoni.
PSA 139:17 Anigo Ngode Datagaliwabe-o í̠naga mitangi bulene daligaore tara i̱ aleme manda bibe nahedagolabi daga labe nahedagolabi i̱ mogolo kogoni.
PSA 139:18 Daga laruyagua iba angeni iba mu ngaru emene karulape lowa í̠naga mitangi bulene daga nalabeheore la dege bialu lo umulowa paliahondo howabi dengala howabi í̠ heba dege halu i̱na í̠ manda biai habe naheore kogoni.
PSA 139:19 Ngode Datagaliwabe-o wali agali mini kowi bu karuore homelo bowaore ha nabira lalu kogoni. Wali agali bame irane nawini bo wahama ibaga biaga karu ti baba i̱ mandagi habe mangabago tiore erebaha nabira lalu kogoni.
PSA 139:20 Ko biaga uruni tigua í̠ lalu bi ko laga bialu í̠naga mini mo ko hole lalu lo guraga bialu ka.
PSA 139:21 Anduane Homogo-o í̠ handabe manga haga karu i̱na uruniore handabe manga ho ko. Í̠hondo waitigi ho karu i̱na ti mo yo hondowa de handape ho kogoni.
PSA 139:22 I̱na ti handabe manga timbuniore ho ko. Ti i̱ waitigi ka lo kogoni.
PSA 139:23 Ngode Datagaliwabe-o í̠na i̱naga bu habanehabi minihabi hai bialu ko mbira ngabe hondole mitangihabi tayabume halu manda bibe.
PSA 139:24 Í̠na ani taya bialu mana ko mbira i̱ha au ngabe handalu í̠naga haabo holene harigani puabo holiya i̱ haru habe.
PSA 140:1 Anduane Homogo-o wali agali ko biaga karume i̱ mo ko holigo pele ngibe. Agali bo wahaga karume i̱ baba waitigi nahelo biamogo bibe.
PSA 140:2 Tigua mana ko bulenaga ndindi laabo halu wali agali bu karu tini keba haga haga bilo mo keba haga ka.
PSA 140:3 Tinaga hége ne gadele puyanaga ne ale howa tigua bi lararume nogombi ko tomia pale ngagonaga tomia ale tinaga ne hambuni ngagoni.
PSA 140:4 Anduane Homogo-o agali ko karunaga hongome i̱ bope nahelo í̠na i̱ handayaho habe. Agali bo wahaga karume i̱ mo ko holenaga bi ndindi lalu kago i̱ ba nabilo hapai habe.
PSA 140:5 Mine haga bu karume i̱ gonoha doliya gono wu kagoni. Tigua gono ogoni pu payini timbuni mbirame i̱naga geni do ngelonaga i̱ hariga poleberogoha gono wia do ka.
PSA 140:6 I̱na Anduane Homogohondo lamialu lalu, I̱naga Ngode Datagaliwabeore í̠ni kegoni. Anduane Homogo-o i̱na biamogo bia lalu olalu kogo hale habe.
PSA 140:7 Anduane Homogo Bibahende Haru Haame Ho Haga-o i̱ haru dai biaga hongoheore í̠ kegoni. I̱na waitigiru baba wai bialu hewangi í̠na i̱ handayaho harigoni.
PSA 140:8 Anduane Homogo-o agali mini kowi karume bule hameledaru buligo nabilabe. Tigua ko bulenaga bi pongo balu karuni biatagi nahelabe.
PSA 140:9 Waitigi bu karume i̱ bope halu balagala howa ibaga bu nahelabe. Tigua i̱ bo waholenaga mo gi halu karuni tiniha biadai bilabe.
PSA 140:10 Ira dedaore tinaga haguaneni ibira helolene karulapeda. Ti gundu uli ngagoha uli pu wiaabo helo minu bape habe.
PSA 140:11 Agali ko urunime ke̱ howa wali agali maru karu bame godi deni heledago tigua godi lalu bolangua nahelabe. Agali bo wahaga bu karu tiha mo ko holene mbira ibilalu ti bo ereba hai helabelo hamelo kogoni.
PSA 140:12 Anduane Homogo-o wali agali ko urunibi karume wali agali yagibano karu mo ko holebiragola í̠na yagibano karu biamogo biaga kegoni. Wali agali burupale karu tihondobi bayale bulene ngadagua biriligo i̱ manda bu kogoni.
PSA 140:13 Wali agali mana tigabi biaga karume í̠naga mini yaraga halu í̠ni kegoha haabo holebira.
PSA 141:1 Anduane Homogo-o i̱na í̠ olarogo áyu ogoniore i̱ biamogo bibe. I̱na í̠ olalu kogola í̠na i̱naga bi haleore habe.
PSA 141:2 I̱naga bi í̠hondo larogoni ira hagua ngabi mini inisenesinaga hagua irigi haragola nga halu turu harilidagua turu halu hale habe. Mbiraga í̠hondo mbirale lomabu delene yamirilidagua i̱naga gi yaraga halu í̠hondo bi larogo yamibe.
PSA 141:3 Anduane Homogo-o i̱naga ne hariga howa bi latagi haroru mamage habe. I̱naga ne hambuni bi loleberoru damene handayaho habe.
PSA 141:4 Mana ko ngago bulenaga i̱naga bu miniha heyuligo mamage habe. Wali agali ko biaga karume mana ko biradagua i̱ ti heba howa ko biamaga halu holigo i̱ nahelabe. Ti dawe halu tomo nalu bedagoha i̱ ti heba mandagi naberelabe.
PSA 141:5 Wali agali mini tigabi kagome i̱ dara howa mo tiga bialu pani ngiyagua nde ogoni karulape. Wali agali ko karume i̱naga mini yaraga holene manda biyagua i̱ mangaba lolebero. Irane i̱na í̠hondo lalu wali agali ko karume ko biyagonaga pani mibe laabo haruligonaga i̱ manga holebero.
PSA 141:6 Agali marume wali agali ko uruni mo ko howa minu baragola tigua Anduane Homogonaga bi layago heneneoreda lo manda bulebira.
PSA 141:7 Agalime ira kambulalu dangialabaga biagadagua bialu agali uruninaga kuni gingirulobaga buwa homali ngagoha waholebira.
PSA 141:8 Anduane Homogo Bibahende Haru Haame Ho Haga-o i̱na í̠hondo mini mbiraore wu haabo kogoni ndobe. I̱na í̠ha ha do kogonigo i̱ nahome helabe.
PSA 141:9 Agali ko karume gono ngagoha i̱ do wuligo handayaho halu í̠nime i̱ baya hangu pabe bu habe.
PSA 141:10 Agali ko uruni tininaga gono ngagoha tini do nga handala i̱ poleberogoha mo pila holene mbira nawi howa bayale yo pialu poliya helabe.
PSA 142:1 Anduane Homogohanda i̱ biamogo bilonaga i̱na ibu olalu kogoni. I̱na i̱ biamogo bia lalu haya howa bi lalu kogoni.
PSA 142:2 I̱ha genda ngangi i̱na ibu karia genda ogoni yalu piruli. I̱ mini burugulo koru bibahende ibuhondo lamiai haruli.
PSA 142:3 I̱ mini dege dindi halu homolene kawareda lo manda bu kongi Anduane Homogo ibugua i̱ ogoale bulene ngalo mandabu kagoni. Waitigi karume i̱ gonoha do wuliya hariga poleberogoha gono wia ho ka.
PSA 142:4 I̱ni kogoria kaware handa ai nai bialu koria mbirali i̱ biamogo bulene mbira naheda. Agali ko karume i̱ bo waholilono mbirali i̱ handayaho howa mamage holenebi naheoreda. I̱ dara howa biamogo bulenebi mbira naheoredane hendedo.
PSA 142:5 Anduane Homogo-o í̠na i̱ biamogo bibelo olalu kogoni. Í̠ni hanguore i̱ handayaho haga kegoni. I̱ homa nabi kongi í̠nila habiya hamelo kogoni.
PSA 142:6 I̱na biamogo bia lowa í̠ olalu kogonigo hale habe. I̱naga bu miniha mini dege dindi ho howa lalu kogoni. Agali i̱ mo ko hagadaruni ti hongo timbuniorehe kago i̱na ti bope habe naheore kogoni ndobe. I̱ tinaga giha koria í̠na gi mialu yamibe.
PSA 142:7 Gendaru íbu ngagoha kogo bayaleore holiya í̠na i̱ biamogo bia laro. Í̠naga wali agali ngoai ho kagoria i̱na tinaga deni í̠naga mini yaraga halu holebero. Í̠na i̱hondo bayale birigonaga i̱na ani bulebero.
PSA 143:1 Anduane Homogo-o i̱na í̠hondo bi larogo hale habe. Í̠ mini tigabiorebi mini bilinahebi kegome i̱na biamogo bia lalu koru hale habe.
PSA 143:2 Í̠na godi larengi í̠naga biabe biahaga i̱ kogo godini heloleni nahelabe. Í̠naga deni mbirali ibuha ko nawi mbira naheore ndobe.
PSA 143:3 Waitigi bu karume i̱ talima ibaga bialu i̱ bopeore henego ko. Tigua i̱ arumaha minu dariba ho wiradagua bidagola i̱ wali agali bamba homo gialo wahene ngaligobi kogoni ndobe.
PSA 143:4 I̱ ani bidagome i̱ mini tumutumu bialu mini dege dindi ho kogoni.
PSA 143:5 Bambaore biniru i̱na lone mitangibu dai bero. Mbirale bayale damene bibahende í̠na biriruni mitangi bialu biabe bayale birirubi mitangibu dai berogoni.
PSA 143:6 I̱na i̱naga gi yaraga halu í̠hondo bi lalu kogoni. Wali agalime iba noa howa kembobe lebola haradagua i̱naga dininime í̠naga bi mana lo ngeru noa halu hame timbuniore lo kogoni.
PSA 143:7 Anduane Homogo-o i̱na mini dunubia ho harugo ereba harago ainde i̱na bi larogo áyu ogoni abale hale habe. I̱ abale homalu homene dininiru piagane ngagoha poligo í̠ ha do nahabe.
PSA 143:8 I̱na í̠hondo mini mbiraore wu kogonigo egerebagi bibahendengi í̠naga gubalini holene ngegoni i̱ mo mitangi biaabo helabe. I̱na í̠hondoore bi lalu haga kogonigo ai hariga i̱na pialu holiyago í̠nime mo walia habe.
PSA 143:9 Anduane Homogo-o í̠na i̱ handayaho habelo í̠ni keria eberogoni. Waitigi bu karunaga giha koria i̱ mo wialu haru dai bibe.
PSA 143:10 I̱naga Ngode Datagaliwabe í̠niore kego i̱na í̠naga hame ngego hangu taluwa bialu holiya i̱ lawai habe. Í̠na i̱hondo bayale bialu i̱ tigabi holene ngagoria ibagabu holiya haru habelo hamelo kogoni.
PSA 143:11 Anduane Homogo-o í̠nime bule lalu abale lo wiridagua i̱ mo wialu bayuwa haru dai bibe. Í̠ bayaleore biaga kegome i̱ha genda bibahende íbu ngagoria kogola í̠nime i̱ pele ngibe.
PSA 143:12 I̱ í̠ninaga biabe biahaga kogo manda buwa í̠na i̱hondo gubaliniore ho haga kegonigo i̱ waitigi bu karu homelo babe. I̱ bope haga karu bibahendeorebi bo wahai habe.
PSA 144:1 I̱na Anduane Homogonaga mini yaraga harogoni. I̱ biamogo biaga hongo timbunihe ibu kagoni. Ibugua i̱ wai buliya baya hangu biawai halu i̱ mo manda mandabu helaga kagoni.
PSA 144:2 Ibugua i̱ handayaho haga howa ibunime i̱ ho hagira bu haga ka. I̱naga humbi alebi pele ngiagabi ibu hanguore kagonigo i̱na ibuha mini mbiraore wu kogome ibugua i̱ mo wialu haru dai biaga kagoni. Ibugua hameigini tara tara dindi bibahendeha karu i̱ andaneha hai helaga kagoni.
PSA 144:3 Anduane Homogo-o ina wali agali agi ale kamagola í̠na mitangi ho haga kebe. Ina bame nahabane mbira kamagonidago ainde í̠na irane aginaga ina mo galone harilibe.
PSA 144:4 Ina wali agali bameore ne harigaha buhe̱ halu mbira hangu tagira pialu ereba hagagobi kamagoni ndobe. Inanaga dindini holene tubagiore bame ni daragola munini emene howa abale ereba haraligobi kamagoni.
PSA 144:5 Anduane Homogo-o hari li kagoni kambulaki bialu abale dalia. Í̠naga gime dindi hari wedaru ela hariyagua ira hagua timbuni tagira ibulebira.
PSA 144:6 Hari daba mo bia halu waitigi bu karuni bo purogo lela. Ti gerai lalu ibida purogo lelo í̠naga timume bo pelabe.
PSA 144:7 Í̠na hari daligaha howa gi dogolape halu i̱ iba andaneha bedogo wahalu tagira ibuliya gini yamia. Agali dindi tarani howa ibini bu karunaga andaneha koria í̠na i̱ abale mo wialu golope habe.
PSA 144:8 Agali uruni tiha henene lolene mbira nawiore howa tigua gi doladaga halu henene larama lowa ke̱ dege hagane ka.
PSA 144:9 Ngode Datagaliwabe-o i̱na iba gana gahenge wabialu í̠hondo lolebero. I̱na ngida ale balu í̠hondo iba gana lolebero.
PSA 144:10 Í̠na kinirume wai bialu wayali helo biamogo biaga howa í̠naga biabe biahaga Debidi i̱nibi nde biamogo bialu haru dai biaga kegoni.
PSA 144:11 Waitigi i̱ bope haga bu karunaga giha koria haru dai bibe. Agali dindi taraha howa ibini bu karunaga andaneha koria í̠na i̱ abale mo wialu golope habe. Agali uruni tiha henene lolene mbira nawiore howa tigua gi doladaga halu henene larama lowa ke̱ dege hagane ka.
PSA 144:12 Ina igini igiri daliahe kaore ira hongone karu hongohe anda hagagobi helo hamelo kamagoni. Ina wane bedarubi baya dege halu kini andaga kagoha mo yári bia hene ngagobi berelo hamelo kamagoni.
PSA 144:13 Inanaga tomo wiaga andaha tomo bayale dewaore wu to̱latagi helo hamelo kama. Inanaga dindini nogo sibi karume igini daosini dewaore honoyu helo hamelo kama.
PSA 144:14 Nogo bulumaga bu karumebi igini dewa honoyu kagola mo ko nahelobi maru homa nabilobi hamelo kamagoni. Inanaga hariga polene ngagoria wali agaliyaguabi waneiginiyaguabi mbiragome ibuha genda tandagaru tagira ibiragola dugu bima pelo hame naledema.
PSA 144:15 Dindi mbiraha wali agali bayale urunibi bu karu ti turu ho ka. Wali agali Ngode Datagaliwabe ibuni tinaga Anduane Homogo ka lalu haga karu tibi turuore ho kagoni.
PSA 145:1 I̱naga Ngode Datagaliwabebi i̱naga kinibi í̠ kegonigo i̱na wali agali bibahendehondo í̠ daliga gibiore ka lalu lamulebero. I̱na í̠hondo ka̱i̱ lalu laaboore holebero.
PSA 145:2 Horo bibahendengi i̱na í̠hondo turu halu ka̱i̱ laabo halu holebero. I̱na í̠naga mini mo yadagadaga haabo haluore holebero.
PSA 145:3 Anduane Homogo ibu mini lene daliga gibiore kago bibahendeme ibunaga mini mo yaraga holene nga. Ibu daliga gibiore haruagoni iname ogobiore ka lowa manda biai habe nahe kama. Inanaga manda bulenego emene ko tubagi kamagoni.
PSA 145:4 Í̠naore mbirale bigi biriruni wali agali áyu karume agua bigi biya lalu í̠naga mini mo yaraga halu ka. Wali agali dabane mani hararu tiguabi nde tinaga waneigini lamiragola uruni tiguabi nde í̠naga mini mo yaraga halu dege holebira. Tigua í̠na biabe hongoheore gibi bigi biriruni agua bigi biya lalu bi te lalili bima puabo holebira.
PSA 145:5 Wali agalime í̠naga hongo baya gibi holenenaga lalubi í̠ kini gibi kego lalubi bite laabo holebira. Í̠na biabe hongohe gibiorebi agalime nabibeheru bigi birigonaga i̱na miniha mitangidangi bialu haabo holebero.
PSA 145:6 Í̠naga hongo gibioreme biabe bigi birigonaga wali agali tigua bite laga bulebira. I̱nabi nde í̠ daligaore gibi kagoni lalu maru karu lamulebero.
PSA 145:7 Tigua í̠naga mana baya gibiore biaga kegonaga maru lamialubi í̠naga dara holene ngegonaga garea lalubi iba ganaru lalu holebira.
PSA 145:8 Anduane Homogo ibugua ina gubalini timbuniore hagabi dara howa biamogo biagabi ka. Ibu keba abale tungulope nahaga howa ibugua ibunaga gubalini haho wiaabo holeneme ina yaniho wiaabo helowa haga kagoni.
PSA 145:9 Ibugua wali agali bibahendehondo mana bayale ogobi degedege bialu mbirago bume hembome nalagaore kagoni. Mbirale tara tara ibunime wabiniru bibahendeore dara howa ibuni handayaho haga kagoni.
PSA 145:10 Anduane Homogo-o mbirale mbirale ema bialu piaga í̠ni wabini karu bibahendeoreme í̠ninaga mini mo yaraga haiore holebira. Í̠naga wali agali bibahendeoreme í̠nihondo turu halu ka̱i̱ lalu lai holebira.
PSA 145:11 Í̠na dindi bibahende de handame howa baya buruguleore haru kegonaga tigua maru hale helo lamialu í̠naga hongo holene gibiore ngegonagabi lalu lamulebira.
PSA 145:12 Wali agali karu bibahendeme Anduane Homogo í̠na biabe hongohe gibi bigi biriruni manda biai helo ani lamulebira. Í̠ kini baya buruguleore hongohe howa í̠naga mini daliga gibiore ngegoni manda biai helobi ani loyogo lalu holebira.
PSA 145:13 Í̠naga handame holene wiaaboore howa wali agali bibahende haru haho wiaaboboore haga kini holebere. Anduane Homogo ibugua mbirale mbira bulebero laga bialu lo wigi binigo mbira pugua nabi lo beregedabi nabi ibu mini bilinahe howa bulebero lenedagua biaiore haga kagoni. Ibugua ina dara gibi haga howa mbirale bigi biraru ina biamogo bulenaga dege bigi biaga kagoni.
PSA 145:14 Wali agali genda yu howa mini burugulo karu bibahende biamogo bialu wali agali yangoneme hengedope haragola dindiha haga karubi ibunime ti mo yaragaho helolebira.
PSA 145:15 Mbirale dindini emabu bedaru damene bibahendeme í̠naga gi hangu hondole hanaho beda. Ti tomo noa harangi í̠na ti karulape nelo miaga kegoni.
PSA 145:16 Í̠na ti bibahende tomo karulapeore nelo mialu ti mbirale maru buru pada alebi mulene ngadagua miaga kegoni.
PSA 145:17 Anduane Homogo ibu mini tigabiore howa ibugua mbirale bigi biraru damene tigabi bialu ina daraore howa biamogo bigi biaga kagoni.
PSA 145:18 Wali agalime ti miniha tigabi howa heneneorenaga Anduane Homogo olalu karu ibuni ti kagoria kawareore íbu haga kagoni.
PSA 145:19 Wali agali Anduane Homogohondo giho haga karu ti burupale ngaru ibunime tiga handaga haga. Ti genda yu howa ibuhondo bi laragola ibunime hale halu gi miaga ka.
PSA 145:20 Wali agali Anduane Homogo ibuore gubalini haga karu ibunime ti baya hanguore handayaho halu mamage haga ka. Wali agali mana ko biaga karu ibugua ti bibahende bo mburi lai holebira.
PSA 145:21 I̱na Anduane Homogonaga mini mo yaraga haabo holebero. Ibugua mbirale ema bialu piaga ibuni wabini karu bibahendeoreme ibunaga mini baya buruguleore kago mo yaraga haaboore holene nga.
PSA 146:1 Anduane Homogonaga mini yaraga hama. I̱ni bu miniha howa ibunaga mini yaraga harogoni.
PSA 146:2 I̱ dindini kogoni howa ibunaga mini yaraga haabo holebero. I̱na i̱naga Ngode Datagaliwabe mini yaraga halu iba gana laabo halu kone dege i̱ni homalu waholebero.
PSA 146:3 Dindini agali haguane karuha mini hanaho nahabe. Agali dindini hene bu karu tigua í̠ pele ngialu haru dai nabibehe kagoni.
PSA 146:4 Agali uruni ti homarangi lone dindi dege hodai bulebira. Ti homarangi mbirale ogoale bule lalu lo wiyaruni budai nabulebiraore.
PSA 146:5 Wali agali ti Yagabanaga Ngode Datagaliwabe kagome ti biamogo bilonaga ibuhondo mini mbiraore wu karume ti turu ho haga ka. Uruni tigua Anduane Homogo tinaga Ngode Datagaliwabehondo mini dunubia ho kagome ti turuore ho kagoni.
PSA 146:6 Ngode Datagaliwabe ogoni ibugua hari daligabi dindibi iba solowarabi wabialu uruniha karubi ngarubi wabiai henego ibugua mbirale ibuni buleore lalu bi lowiniru bibahende biaiore haga ka.
PSA 146:7 Wali agali maru ti waitigi andaneha bope ho karu Anduane Homogo ibunime ti biamogo biaga ka. Maru tomo nane garibilo karuhondo ibugua ti tomo nelo miaga. Anduane Homogo ibugua maru garabayaha karu ti golope haga biaga.
PSA 146:8 Ibugua wali agali de kohe karu de hendelo mo ngala halu wali agali gendame bo dambi karu genda mo wahai halu mo hongo haga ka. Anduane Homogohanda ibunaga wali agali bayale tigabi karu gubalini ho haga ka.
PSA 146:9 Wali agali dindi taraha howa ina dindini íbu hene karubi ibugua handayaho haga ka. Wali dalo bedarubi waneigini ai̱ya abala homene karubi ibugua ti baya hanguore handayaho haga ka. Ibugua ani biagagoyu agali ko biaga karume mana ko bule manda bialu karu mo libilabala halu mo luluya haga ka.
PSA 146:10 Anduane Homogo ibu kini haluhe haabo kagoni. Saiono wali agaliru-o tínaga Ngode Datagaliwabe ibu kiniore haabobo bu ka. Iname Anduane Homogonaga mini yaraga hami̱ya.
PSA 147:1 Anduane Homogonaga mini yaraga hami̱ya. Iname inanaga Ngode Datagaliwabe mini yaraga halu ibuhondo iba ganaru lolene bayaleore ogoni. Iname ibunaga mini yaraga holene bayale tigabiore nga.
PSA 147:2 Anduane Homogohanda Yarusaleme lone mo heya ho helowa ibunaga wali agali dindi taraha garabaya pu haga bini hearu haru dai biragoni.
PSA 147:3 Wali agali tini bu miniha genda timbuni yu haga bidaru ibugua mo karulape helaga ka. Ibugua tinaga dere bidaru dabi helo kabu bia haga kagoni.
PSA 147:4 Ibugua yakundi hari daligani bu karuni bibahende daga lai howa ti mbira mbiranaga mini lai haga ka.
PSA 147:5 Inanaga Anduane Homogo ibu mini leneore howa hongo haiheore ka. Ibunaga mini gigabi ngago iname manda biai habe nahe kama.
PSA 147:6 Ibugua wali agali tini mo dindiha haga karu mo yaraga hagago nde wali agali ko biaga karu ti dindiha hengedape haga ka.
PSA 147:7 Anduane Homogonaga mini yaraga halu ibuhondo iba ganaru lolene nga. Inanaga Ngode Datagaliwabehondo ngida ale balu bi bayale mo bila howa bayale bolene nga.
PSA 147:8 Ibugua hari daligaha beraliba helame haga. Iba dalu dindini ibilaragola hari bare bare ngaruha datani bayale anda helaga biaga ka.
PSA 147:9 Ibugua ema bialu piaga karubi bedarubi tomo nelo mialu ega igini bedarume tomo noa halu bi laragola hale howa ibugua ti tomo nelo mia dege biaga ka.
PSA 147:10 Anduane Homogohanda nogo hosinaga hongobi ami agalinaga hongobi hondowa turu haga ndo ka.
PSA 147:11 Wali agali ibu mitangi bialu mo dunini howa ibunaga gubalini holene wiaabo ka manda bialu ibuhondo mini mbiraore wiaga karu ti hondowa ibugua turuho haga ka.
PSA 147:12 Yarusaleme wali agaliru-o Anduane Homogonaga mini yaraga hadaba. Saiono wali agaliru-o tínaga Ngode Datagaliwabenaga mini yaraga holene nga.
PSA 147:13 Ibugua Yarusalemenaga pabe panga kago mo hongo howa wali agali bu karu bayaleore biamogo bialu haga ka.
PSA 147:14 Ibugua tínaga dindi tubari handayaho halu widi bayaleru tí mabuha anda haga biledagola tígua widi lini dewaore nalu tombeho haga kamigoni.
PSA 147:15 Ibugua bi mbira dindihondo laragola bi ogoni hale halu abaleore biai haga.
PSA 147:16 Ibugua dindiguni timbunirume dindini dungume helalu puyabume abalu pulo yalu piagadagua pibiya pulo yu purogo lelaga ka.
PSA 147:17 Iba angeni iba mu wiame kadagua ibugua dalu ibilaragola dindiguni wiame helaga biaga. Ibugua dindini dagare ogonibi ibilaragola mbiralime dagare bidago bilowa dagare nahe tingi halu donge ho habe naheore ka.
PSA 147:18 Mani howa ibugua bi laragola dindiguni ngaru mo iba bu hinilaga. Ibugua puyabu ibilaragome iba bedago mo ema bia halu pelaga ka.
PSA 147:19 Ibugua ibunaga bi lowiniru Yagabahondo lamini. Ibunaga bi mana Isaraele wali agaliruhondo mini.
PSA 147:20 Ogonidagua ibugua hameigini tara tara dindi bibahendeha karuhondo nalami. Tigua ibunaga bi mana lo ngago manda nabi ka. Iname Anduane Homogonaga mini yaraga hami̱ya.
PSA 148:1 Anduane Homogonaga mini mo yaraga hadaba-o. Tí hari daligaha kamiru bibahendeme Anduane Homogonaga miniore mo yaraga hadaba.
PSA 148:2 Ibunaga dahuliyali kamiru tí bibahendeme ibunaga miniore mo yaraga hadaba. Dahuliya andaganaga ami kamiru bibahendeme ibunaga mini mo yaraga hai hadaba.
PSA 148:3 Ni egela li kabigo libugua ibunaga mini mo yaraga hadaba. Yakundi harini li ngiringaralo bu kamiru tíguabi ibunaga mini mo yaraga hadaba.
PSA 148:4 Dahuliya andaga da habaneoreha kamiru tínime ibunaga mini mo yaraga hadaba. Hari daliga yarali howa iba uyura bedamirumebi ibunaga mini mo yaraga hadaba.
PSA 148:5 Mbirale uruni bibahendeore Anduane Homogo ibunaga bime tagira íbu hadaba laga biyagola tagira íbu haga binigo ka. Ibugua ani binigo uruni bibahendeoreme ibunaga mini mo yaraga hai holene nga.
PSA 148:6 Ibunaga bime ti hangu hangu abogo ogoria ha laga biyadagua haabo henego ka. Ti mbiragome ibunaga bi mo wahabe nahe kagoni.
PSA 148:7 Dindini kamirumebi iba solowara guru kuyama unura bedarumebi wena gibiore wialuwiore unura bedamirumebi
PSA 148:8 hari dabamebi dalu dindigunimebi pibiyamebi hari beralibamebi puyabu hongoheore Anduane Homogonaga bi larago hale haga kamirumebi tí bibahendeoreme ibunaga mini mo yaraga haiore hadaba.
PSA 148:9 Dindi hari timbuni wedamirumebi dindi hari emene wedamirumebi ira lini nagane ale daga kamirumebi irabu ira kamirumebi
PSA 148:10 nogo hinini dambole kamirumebi nogo gabua tagira hope hene kamirumebi mbirale tombeme piaga ngamirumebi ega bibahende bedamirumebi ti bibahendeoreme Anduane Homogonaga mini mo yaraga haiore hadaba.
PSA 148:11 Kini kamirumebi wali agali bibahende bu kamirumebi gabumane kamirumebi agali haguane kamirumebi
PSA 148:12 igiri daliahe bu kamirumebi wandari daliahe bedamirumebi wali agali wahe kamirumebi wandari igiri emene kamirumebi tí bibahendeoreme Anduane Homogonaga mini mo yaraga haiore hadaba.
PSA 148:13 Ti bibahendeme Anduane Homogonaga mini mo yaraga haiore holene nga. Wali agali marunaga mini ngagobi ndo ibunaga mini daligaore ngagoni. Ibunaga mini baya burugule daliga gibiore ibu ale mende naheorego dahuliya andaga angua hai halu dindi bibahendebi angua hai kago ibu hangunaga mini mo yaraga haiore holene nga.
PSA 148:14 Anduane Homogo ibugua ibunaga Isaraele hameigini gubaliniore halu yabu howa mo hongo hayagola tigua ibunaga mini mo yaraga haga kagoni. Anduane Homogonaga miniore mo yaraga hai hadaba-o.
PSA 149:1 Anduane Homogonaga mini yaraga hama. Ibuhondo iba gana gahengeru lami̱ya. Wali agali ibuhondo mini bilinahe haga kamiru tígua ibu mitangi bialu lotu lole ngoai ho kamigoria ibunaga mini yaraga hadaba.
PSA 149:2 Isaraele wali agaliru-o ibugua tínaga Wabiaga ka mitangi bialu turuho hadaba. Saiono wali agaliru-o tínaga kini ibu kagonaga turu timbuni ho hadaba.
PSA 149:3 Tígua mali lialu ibunaga mini yaraga hadaba. Tabageru balubi ngida ale balubi ibunaga mini yaraga hadaba.
PSA 149:4 Anduane Homogohanda ibunaga wali agaliruhondo gubalini ho kagoni. Ibugua wali agali tini mo dindiha haga karunaga mini yaraga halu wai bialu wayali helo biamogo biaga ka.
PSA 149:5 Ngode Datagaliwabenaga wali agali tí wayali harimigonaga turuho holene nga. Mbiraga tíninaga dagiani biruwa tígua turu halu iba ganaru laabo holene nga.
PSA 149:6 Tigua Ngode Datagaliwabenaga mini yaraga halu bi dalimu lalu wai biagane ayu tibu ne gadeleru tíni gime yu howa ga̱ ladagadaga bialu turu ho holene nga.
PSA 149:7 Tígua ayu tibu yu howa hameigini tara tara dindi bibahendeha karu baba wai bialu wali agali Anduane Homogo manda nabi karu ti ko biyarunaga pani mialu bo wahai holene nga.
PSA 149:8 Waitiginaga kinibi agali haguane bu karubi pu seni aeaneme wabini ngagome tinaga gi geru minu dabaho helolene nga.
PSA 149:9 Ngode Datagaliwabehanda hameigini tara tara dindi bibahendeha bu karu pani mulene nga layadagua tígua milimu. Ngode Datagaliwabenaga wali agali kagome wayali ogonibi holebira. Anduane Homogonaga mini yaraga hami̱ya.
PSA 150:1 Anduane Homogonaga miniore mo yaraga hai hami̱ya. Ngode Datagaliwabe ibu ibunaga andaha kago ibu mini mo yaraga hami̱ya. Dahuliya andagani ibu hongo gibiore ho kago ibunaga miniore mo yaraga hami̱ya.
PSA 150:2 Ibugua biabe hongohe gibiore bigi biyarunaga iname ibunaga mini mo yaragaore hami̱ya. Dunini gibi daligaorego ibuni hangu kago manda bialu ibu hangunaga mini mo yaraga hami̱ya.
PSA 150:3 Mbelo biguli pu lalu ibunaga mini mo yaraga hami̱ya. Ngida aleru balu mbirale kelengele laga irabitele aleru balu ibunaga mini mo yaraga hami̱ya.
PSA 150:4 Tabageru balu gi geru ema bialu mali lialu Anduane Homogonaga miniore mo yaraga hami̱ya. Ngida aleru balu pilipe aleru lalu howa ibunaga mini mo yaraga hami̱ya.
PSA 150:5 Mbirale ngi̱li̱nge̱le̱ lagane haeagobi ngaru hongo howa tilitola lalu balu howa Anduane Homogonaga mini mo yaraga hami̱ya.
PSA 150:6 Mbirale dindini emabu bu kamiru damenego bibahendeoreme Anduane Homogonaga mini mo yaraga hai halimu. Anduane Homogonaga mini mo yaraga haaboore hami̱ya.
PRO 1:1 Mbuga ogoha bi bayaore lowigi bidago ogoni Debidi igini Isaraele wali agalinaga Kini Solomonohanda laga binigo lo nga.
PRO 1:2 Bi baya gibiore lowigi bidarunime ina mitangi bulene bayaleore ngialu ina mana bayale bulene biawai haga nga. Ani bialu tígua mbirale bibahende bi lo ngarunaga tene handarimiyagua bi uruninaga irane bayuwa manda buleberami.
PRO 1:3 Mbuga ogoha bi baya lo ngarume tí wali agali miniwi howa mbirale bigi bialu halimulonaga lo nga. Ani bialu mana bayalebi tigabibi bialu wali agali bibahendehondo mana tigabi mbiraore ogobi dege dege bilimulo biawai haga nga.
PRO 1:4 Ani bialu bi ogonime wali agali maru manda emenebi karu ti manda bayuwa bilo biamogo bulebira. Ani bialu wandari igiri daliahe karubi ti mana bayale bialu helo walia haga.
PRO 1:5 Mbuga ogoha bi lo ngarume wali agali mini dingi dangiale karunaga minibi mo gigabiaore halu wali agali sigulu bini karumebi mbirale manda bayuwa buwa mana bayale bigi bilo biawai haga.
PRO 1:6 Mini giga bulene bi lo ngarunaga galone palia do karu bi yobage lowa lowigi bidago uruninaga galonego handa walia halu agali wahe miniwirume genda ngaria handaga bidago lamogo bibehe holebira.
PRO 1:7 Mbirale bayuwa manda bule hame lariyagua ala Anduane Homogo ibu gibiore ka manda buwa ibu andaneha habe. Wali agali mbirale bayuwa manda nabiaga mini nawi karume ti mini bayale gigabi holenego hame nale howa mbirale lo manda bua nahaga ka.
PRO 1:8 I̱naga igini-o í̠naga aba ai̱yalame bi langiragoore bayuwa hale halu mo wanahe laradagua bibe.
PRO 1:9 Í̠naga mandani yári baya bidegomebi í̠naga mani gurubu gele baya ngegomebi í̠naga dengui mo baya hagadagua í̠naga aba ai̱yalame bi larago hale halu mana bayale beregome í̠ mo baya holebira.
PRO 1:10 I̱naga igini-o mana ko biaga layagoli kagome í̠ ko bibelo ndole biyagua tigua bi larago hale halu bima laradagua buleni nabibe.
PRO 1:11 Tigua í̠hondo lalu, Wali agali mbira homelo bo wahami̱ya maíbu nabulenebe, lolebira. Harigani yu bira do howa wali agaliyaguabi mbira ibirago tanabi bami̱ya. Bo waholene irane nawiniyaguabi bame agali boanaga halu mbira bo wahami̱ya maibu, lolebira.
PRO 1:12 Homame abaleore ibalu wali agali bo yalu humbirini andaga piagadagua mbirali dinini liahe ibirago abaleore porabu ede howa bo wahalu mali̱ya maibu, lolebira.
PRO 1:13 Wali agali uruninaga mbirale tara tara bu yidaru gingila mialu yalu puwa ina andagani mo hombedo to̱lo tagiho ngelami̱ya.
PRO 1:14 Iname wali agalinaga pagepage bialu mima ibaga beremago bibahende mo yu ngoai howa inane talebu yu pugupugu beremagola pagepage bini degeme homogo hami̱yago í̠ maibu, lolebira.
PRO 1:15 I̱ igini-o pagebibi layagoli karume í̠hondo bi ogonidagua layagua tigua bi laragoni haleore holeni nahabe. Tigua bi larago hale nahe í̠ wahalu pobe.
PRO 1:16 Horo bibahendengi agali ko biaga uruni aleme ko tara tara bulenego hangu manda bialu ko bule hame timbuniore lo haga. Ti horo bibahendengi howa wali agali bo waholenego hangu manda bialu haga ka.
PRO 1:17 Ani biagago áyu agali uruni ti tini hai biragoni ale mo mulebira. Ti do wulenenaga gono tini wama ibaga biragoni holebira. Ega bedaru ti dehe miniwi beda. Agali mbirame ibu bole lowa danda edararia handayagua ega ibu biraabo nahe ibida polebira. Egame ani biagago áyu ai pagebibi layagoli hearuni ti ega ale ndoya. Ti mana ko bule hongo gibi howa bialu heagome ti do wialu homolenenaga gono tinime waga bialu heagoni.
PRO 1:19 Pagepage biagabi wali agali bo wahagabi agali ko anda andabi ogoni ale biagago lu naholebira. Pagepage biyadaruni ibuni homolenenaga kango tigi hene holebira.
PRO 1:20 Agalime hariganibi magedinibi howa olagadagua mini bayale gigabi wuleneme wali agalihondo olalu ka.
PRO 1:21 Tano timbuni ngagoha wali agali ubanda tagi biaga harabani howabi wali agali dewa mo ngoaiho haga ngarunaga howabi mini bayale gigabi wuleneme olowa agua lalu ka.
PRO 1:22 Wali agali mini nawi karu aibe. Tí mini nawi ogonibi dege haabo hole hame ledamibe. Tí wali agali lulu ale kamigoni. Tí manda bayale bulenego hame nale howa manda bayale tigabi bulenego mege bialu kamigoni. Mana ko o bialu kamigoni angi yu wahole kamibe.
PRO 1:23 Tí mana ko yu kamigoni wahalimulo i̱na tí talialu bi hongo howa loleberogo hale halimu. I̱na tíhondo mbirale agua bidaba lalu langialu i̱naga manda bulene bayaleru tí talebu nguleberogo tígua bayuwa hale halimu.
PRO 1:24 I̱na tí i̱ kogoria ibidaba lalu olalu haabo harugoyu tí hale hoa nahe harimi. Tí i̱ kogoria ibulenego manga harimi.
PRO 1:25 I̱na tíhondo agua bidaba lalu langirugo tí hale howa nahe tingi halu i̱na tí mo tiga buliya hame naleore harimigoni.
PRO 1:26 Ani birimidago karulapego i̱na nde tígua birimidagua dege bulebero. Genda bulene tara tara tí kamigoria anda íbu ngagola genda timbuni yu kamingi i̱na tí hondo oba hagua. Tí genda timbuni yu kamingi i̱na tí lo guralu mege biagua.
PRO 1:27 Genda bulenego gibi hiriribiore dalu puyabula haru ibiradagua ibuwa tí bu dambi haragola tandaga nalu gendaore yu kamingi i̱na tí hondo obaore halu mege biagua.
PRO 1:28 Gendaore yu howa tígua i̱na biamogo bule íbu lalu mini gigabi wulene ololeberemigoyu i̱na hale halu tí biamogo nabuleorebero. Tígua i̱ hai bialu taya bume holeberemigoyu i̱ handa walia naholeberemi.
PRO 1:29 Tí mini bayale gigabi wulenego hame naleore halu Anduane Homogo andaneha howa giho halu ibugua laradagua hale halu bulenego mangaore haabo ho harimigoni.
PRO 1:30 Mbirale agua bidaba lalu i̱na tíhondo bi bayale langigi biruru tí hale holene hame naleore halu i̱na tí bayale halimulo mo tiga birugola tí hame nale i̱ erembira ngirimigoni.
PRO 1:31 Ani birimigonigo ai tíni mana ko bialu harimigonaga emena ko nolene winigo tíni noleberemi.
PRO 1:32 Wali agali mini nawi odahe karume i̱ mini bayale gigabi wulene kogo hame nalagaya. Hame nale howa tigua i̱ erembira ngiaganego mana ani biragome tini bo home lagane. Wali agali marume ti mbirale bibahende manda biaihe kama lo manda biaganego uruni ti lulu ale ka. Tininaga mitangi ogonibi bu kagome tini balu home lolebira.
PRO 1:33 Ani bulebiragoyu ai wali agali i̱na bi larogo baya hanguore hale halu bialu karu ti bayaleore holebira. Uruni tigua mbirale ko ngarubi gendabi ngarubi mbira ti kagoria naibu wulebira manda buwa ti genda mbira nayi gi nahe hada payabu baya holebira.
PRO 2:1 I̱ igini-o i̱na mana lawai haga berogo embeda nahe í̠naga bu miniha baya hangu mo yai habe.
PRO 2:2 Mini bayale gigabi wulene bi larago bibahende hale halu mo yai hole manda bibe.
PRO 2:3 Í̠na mini bayale gigabiwi holenebi manda bulenebi tai bibe.
PRO 2:4 Muni silibarubi mbirale wia do hene ngaru deborebo buwa taya birilidagua mini gigabi wulene galoneorego baya hangu taya bibe.
PRO 2:5 Anidagua biriyagua Anduane Homogo ibu gibiore ka manda bu holenego agua holene wiarua lowa bayuwaore manda bulebere.
PRO 2:6 Mini gigabi wulene Anduane Homogo ibugua ngiaga. Mbirale tara tara manda bu kamarubi galone ogo aleda lalu miniha wálo holenebi uruni Anduane Homogo ibugua ngiaga. Anduane Homogo ibugua mo manda bia haga ka.
PRO 2:7 Wali agali mini tigabiwi ko mbira miniha do nahe karu Anduane Homogo ibunime biamogo bialu pabe tigila ibunime hatagiho haga ka.
PRO 2:8 Wali agali maru karuhondo mana tigabi bulene ngadaguaore biaga karuhondo Anduane Homogo ibunime ti mamage haga ka. Ani bialu Anduane Homogo ibunaga heneneore karu ibunaga erembiraha mo ngelowa ibuni mamage howa handa tagiho haga ka.
PRO 2:9 Ani biaga kago áyu i̱na bi larogo hale halu larodagua biriyagua mana tigabi henene hanunigoria bulene wigi bidago manda bulebere. Agua buabe tobatoba ndo miniha ogo ale bulene wiyada lo manda bulebere.
PRO 2:10 Í̠ mini bayale gigabiwi howa í̠naga manda bulene ngegome í̠ mo dungula holebira.
PRO 2:11 Mitangi bayale buleneme í̠ pabe bianda halu manda bayale buleneme í̠ mamage holebira.
PRO 2:12 Ani biragola í̠na agali mana ko biaga karubi bi ko tiga nabi laga karubi talima napolebere.
PRO 2:13 Agali uruni tigua hariga tigabi pedago yu wahalu hariga arumahe ngagoria pialu ka.
PRO 2:14 Ti mana ko tara tara habane nabulene ngaru bule turu haga ka.
PRO 2:15 Agali uruni tigua birago mana tigabi ndo mo hondo howa biaga ka.
PRO 2:16 Anigo agali mendeali oneme í̠la kayu yaba lole í̠ kegoha ladebodebo bima ibiragola mini gigabi wuleneme í̠ pabe bu yaanda kagola wali ogoninaga bi larago hale halu bibe nahe holebere.
PRO 2:17 Wali ogonibime ibu wandarini agali pene biago wahene biraga. Libu wahalu nambaliya lalu Ngode Datagaliwabenaga deni habo nalolene bi lo wiyago mitangi nabi biraga.
PRO 2:18 Anigo í̠na wali ogonibi bedago andaga pialu hariyagua í̠ agali homenerunaga harigani pialu haradagua bulebere.
PRO 2:19 Agali wali ogoni heba nenege hagaru ti dai nabiaga. Ti bayale holenenaga harigani pobe nahe holebira.
PRO 2:20 Anigo í̠na agali bayale biaga karunaga harigani pialu howa agali mini tigabiwi karume biradagua bialu habe.
PRO 2:21 Wali agali mini tigabi karubi mana tigatiga biaga karubi ti dindi ogoria bayale haabo holebira.
PRO 2:22 Anigo Ngode Datagaliwabehanda wali agali ibu talima naibaga karubi mana ko biaga karubi uruni ti agalime ibuninaga mabuha datani anda harago dugu wahagadagua dugu waholebira.
PRO 3:1 I̱naga wanebi iginibi i̱na í̠hondo bi langigi buleberogo bi uruni embedaore nahabe. Embeda nahe horo bibahendengi i̱na bibe larugoni mitangi biaabo halu habe.
PRO 3:2 Ani bialu i̱na bi larodaguaore bialu hariyagua dindini mali luore haabo halu í̠na mbirale bigi bereru baya hangu haga bulebira.
PRO 3:3 Wali agali maru gubalini holenegobi mini bilinahe howa nenegeho haabo holenegobi hado waholeni kongi henedagola haabo habe. Mana bayale bulene uruni hado wanahe mani magagua wiradagua wu haabo habe. Í̠naga gubalinini gilibu ngelowa bialu habe.
PRO 3:4 Aniore bialu hariyagua dindini wali agali karumebi í̠hondo turu halu Ngode Datagaliwabe ibuguabi í̠hondo turuha bigi biragola í̠na mbirale bigi bereru bayale haga bulebira.
PRO 3:5 Í̠na í̠naga Anduane Homogohondo mini mbiraore hongo howa wu habe. I̱ni hangu miniwi karulape kogo manda nabibe.
PRO 3:6 Mbirale bibahende bigi bereru bialu howa Anduane Homogo ala mitangi haga bibe. Ani biriyagua í̠ polene hariga tigabigo ibugua walia haga bulebira.
PRO 3:7 Í̠nime i̱ni mini gigabiwi kobe toba holeni. Ani mitangi nabi Anduane Homogonaga andaneha howa ibugua bia laradagua hale halu bialu mana ko bulene mangaore gibi ho habe.
PRO 3:8 Ani bialu hariyagua mana ogoni beregonime í̠ni biamogoore bialu tingini mo ko henego marasinime mo dabi halu mo baya hagadagua í̠ni mo bayaore holebira.
PRO 3:9 Í̠na Anduane Homogonaga mini mo yaraga halu í̠ mabuni tomo hangareru damene bibahendeorenaga hini degedegeru loma bialu ibu bu mibe.
PRO 3:10 Anidagua biriyagua nde Anduane Homogohanda í̠naga mabuni tomo hengederuni bibahende wu dame bilo mo anda helolebira. Í̠ mabuni tomo ani bu payabu ngelaragola tomo biaru namibe nahe maru wiatogo bialu helolebira. Waini iba pingidowa odo berelaga be timbuni a kegonibi waini iba biru to̱lotagi halu odo pebe bulebira.
PRO 3:11 I̱ wanebi iginibi Anduane Homogohanda í̠ mo tiga bialu mana layagua handabe manga halu keraho holeni o biagoni í̠ mini wibelonaga biya manda bibe.
PRO 3:12 Irane abame ibu igini gubalini howa dege mana liahe mbira biragola mana lagadagua dege Anduane Homogohanda wali agali ibuni gubalini ho karu mini wilo mana laga kago í̠ keba nahabe.
PRO 3:13 Wali agali mbirale bayuwa manda buwa mini gigabi karu ti turuho holene nga.
PRO 3:14 Ani bulene ngago irane mini gigabi holenego ibu mbirale taratara muni daligame miagane ngolobi silibabi ale ndo uruni bolangua howa daligaore ngagoni.
PRO 3:15 Ani bialu dindini mbirale taratara bayaore í̠ hame lagane ale maru ngaru alebi ndo mini gigabi ibu daligaore ngagoni.
PRO 3:16 Mini gigabi holeneme í̠ biamogo biragola í̠ dindini luore haabo holebere. Ani bialu mini gigabi holeneme í̠ mini lene holenebi homogo holenebi ngulebira.
PRO 3:17 Mini giga buleneme í̠ dindini holenego turu howa dungulo bayuwaore hama pobelo haru hama pialu í̠ haru hairi holebira.
PRO 3:18 Mini giga bulenegome holene miaga ira ale nga. Ani ngago wali agali mini gigabi holenego yu tigabu karu ti miniwi howa holene bayaore yu howa turuho ka.
PRO 3:19 Anduane Homogohanda ibunaga mini gigabi wiagome dindi wabini. Ibunaga manda bulene wiagome haribi wabu helene.
PRO 3:20 Ani bialu ibunaga mini gigabi wiagome dindi ogoria iba mo dugua halu mo pelaga ka. Hari beralibaha howa iba mo mogo bialu dalubi mo ibila haga ka.
PRO 3:21 I̱ wanebi iginibi í̠naga manda bayalebi mini gigabi wulenebi baya hanguore yu waholeni hondowa yu habe.
PRO 3:22 Manda bayale mini gigabi wulenela libugua í̠naga holene bayale mo ngialu í̠ yári baya taraore bu haradagua bu holebere.
PRO 3:23 Ani bu howa í̠ poleberegoha mbiraleme í̠naga ge bobidi lolene mbira nawi hariga bayaleni hangu polebere.
PRO 3:24 Andaga paleregohabi í̠ gi holene mbira nawi embedaho howa u bayaleore pu paluebere.
PRO 3:25 Í̠naga waitigirume í̠ ho mabu bupe halu gono wiradagua bidagoha nadelo Anduane Homogohondo mini mbiraore hongo howa wu habe. Ani beregola ibugua í̠ baya hangu mamage holebira. Ani biragola mo ko holene bu ngarume mbirali ko biaga karuha mo ko holene abaleore iba dalu puyaburu hongohe ibiraligobi ibiyaguabi í̠ gi nahe holebere.
PRO 3:27 Mbiralime mbirale mbira buru pale howa í̠hondo ngi lalu hale hayagua nawi nale howa mulene wiagua nde mulene nga.
PRO 3:28 Í̠ dameneme í̠hondo mbirale hale harago ale áyu dege mulene wiagua ngelo howa í̠na ibuhondo yawi nguliya mo ibule áyu pu, nalabe.
PRO 3:29 Í̠naga nenege maru í̠ni baba handa a̱i̱ na̱i̱ padaru ti í̠naga nenegeore kamagoni lo mitangi bu kago í̠na ti mo ko hole mbira bulene manda nabibe.
PRO 3:30 Mbiralime í̠hondo ko mbira nabi kayaguabi í̠la keba nahe kayaguabi bame o biagohondo lai nale holene nga.
PRO 3:31 Agali wai biaga karu tigua biagadagua ko bule lowa bu miniha kiau nale holene nga. Ani bialu tigua hariga piagadagua polene nawi.
PRO 3:32 Irane Anduane Homogo ibugua agali urunibi karuhondo turu nahaga ka. Anigo maru mana tigabi ngadagua bialu haga karuhondo Anduane Homogohanda turu haga ka.
PRO 3:33 Anduane Homogo ibugua ko biaga dameneru ti mo ko hai holebira. Maru mana bayale biaga karu ti ibunime handayaho halu mo bayale holebira.
PRO 3:34 Maru balagala haga karuhondo Anduane Homogohanda mana tinime bialu ka ale dege biadai bulebira. Anigo maru mana tigabi bialu tini mo dindiha haga karuhondo ibugua ti biamogo biaga ka.
PRO 3:35 Mini gigabiwi karu hondowa wali agalime ti mini lene ka lolebira. Anigo mini nawi karume tininaga mini nawi howa taga pani nolebira.
PRO 4:1 I̱ waneigini-o tí abahanda bi larago baya hangu hale halimu. Ani birimiyagua tí mini bayalewi holeberemi.
PRO 4:2 Bi i̱na tí langigi beroru bayaleorego tígua mo wa nahalimu.
PRO 4:3 I̱ ai̱yahanda waneigini mende nahonowi i̱ hangu hono winigome
PRO 4:4 igiri emeneni hewagola i̱ abahanda i̱ lawai halu bi ogodagua langini. I̱na bi laga berogo í̠naga bu habaneha mo yai howa bialu hariyagua í̠ bayale holebere.
PRO 4:5 Í̠ mini bayale gigabiwi holenebi manda bulenebi mo yu habe. I̱na bi larogo hale howa nahe tingi nahe bayuwa mitangi bialu embeda nahabe.
PRO 4:6 Mini bayale gigabi wulene yu wa nahe hame laabo hariyagua ogonime í̠ bayale haru holebira.
PRO 4:7 Í̠na mo yu holene duniniore mbira mini bayale gigabiwi holene ogoni nga. Í̠na mbirale ngaru dewa heneneore mo yu habehego duniniore mini gigabiwi holene ngago ogoni mo yu habe.
PRO 4:8 Mini bayale gigabi wulene ogoni í̠na hameore lalu hongo howa yu ndibulo hariyagua ogonime í̠naga mini yaraga halu mo timbu holebira.
PRO 4:9 Ani bialu ogoni ibu í̠naga emboneni yári taraore bini mbau lalu kininaga manda ale holebira, lalu i̱ abahanda i̱hondo bi ani lene.
PRO 4:10 I̱ igini-o i̱na bi larogo baya hangu hale hariyagua dindi ogoria lu haabo holebere.
PRO 4:11 Í̠ mini bayale gigabiwi habelobi hariga tigabini pobelobi i̱na lawai halu mo tiga birugoni.
PRO 4:12 Í̠na hariga tigabi ogoriani pialu hariyagua mbirale mbirame hapai habe nahe howa í̠ gerai lalu piriyaguabi pilo ibira nahabehe holebere.
PRO 4:13 I̱na bi bayale ogoni lawai harugo yu ndibulo habe. Mana uruni í̠naga holene ibuniorego manda buwa bayuwa de hondo habe.
PRO 4:14 Agali ko biaga karu hariga poradagua í̠ nape tigua biradaguabi nabibe.
PRO 4:15 Í̠na hariga ogoriani nape wandialu habagi halu pobe.
PRO 4:16 Agali ko biaga karume ko mbira nabiyagua ti palia nabi yanga yanga bu haabo haga. Tigua agali maruhondo ko bialuore palue lowa haga ka.
PRO 4:17 Mana ko bulenebi wali agali maru bo waholenebi ogoni tinaga hina ibala ale bu hinaga.
PRO 4:18 Agali mini tigabiwi karunaga hariga ni egerebagi howa dalu horombeni hongohe daraligobi nga.
PRO 4:19 Agali ko biaga karunaga hariga arumahe wiagagobi nga. Ti pilo ibira ho wialu tinaga ge bidi larago ogo aleme bidi laralo manda nabi piaga.
PRO 4:20 I̱ igini-o í̠naga hale dugua ho howa bi laga beroru baya hangu hale haga bibe.
PRO 4:21 I̱na bi laga birugo embeda holigo bayuwa manda bu howa í̠naga bu habaneha mo peho habe.
PRO 4:22 Anigo í̠na i̱naga bi laga beroru baya hangu manda buwa bialu hariyagua bi urunime í̠hondo holene ngialu hongo habelo mo hongo holebira.
PRO 4:23 Í̠na horo bibahendengi í̠naga bu miniha mitangi bulene bayuwa mamage haabo habe. Ani bialu hariyagua iba uliha howa bayale tagira ibagadagua í̠naga miniha howa mitangi bayale tagira ibulebira.
PRO 4:24 Bi larego lalu howa tindule lalu mbira lolene nawi. Í̠naga ne harigaha howa ke̱ halu bi ko maru heba lolene nakarulape.
PRO 4:25 Í̠na hariga pole manda birigoria tigatiga hondo yalu puabo habe. Handa a̱i̱ na̱i̱ nabi hendedegoria hondo yalu puabo habe.
PRO 4:26 Mbirale mbira bule howa ala miniha bayuwa manda manda bibe. Anidagua manda biriyagua mani í̠na mbirale berego bayale holebira.
PRO 4:27 Ko ngagoria hondo wandialu hariga tigatiga hendedegoria hondo yalu puabo habe. Hariga gi tigaha pedagoria pialu gi leha pedagoria ge ha amu nahe tigatiga puabo habe.
PRO 5:1 I̱ igini-o i̱na bi larogo bayuwa hale habe. I̱na mini bayale gigabi wulenebi manda bulenebi í̠hondo ngule hame ledo.
PRO 5:2 Ogonigo í̠na mana tigabi bialu howa í̠naga bi larego bibahende agali manda bayalewime laradagua bulebere.
PRO 5:3 Wali mana ko biaga bedago ibugua í̠ haru pole lowa dimagoli bi dewa laabo haragome í̠naga bu bamulebirago de hondo habe.
PRO 5:4 Í̠na ibunaga bi layago hale halu biriyagua mani handalu keria mbirale kaubi wiagagobibi ayu tibu alemebi í̠ nogoba haragola tandaga biraligobi bulebira.
PRO 5:5 Wali ogonibigome í̠ haru halu homene dinini pu hagaha haru tagira polebira.
PRO 5:6 Ibu haabo holenenaga hariga tigabi pedagoria napiaga beda. Ibu hariga ko pedagoha pialu haruda manda nabi howa pupebe dege biaga beda.
PRO 5:7 I̱ igini-o ai i̱na bi larogo bayuwa hale halu embeda nahabe.
PRO 5:8 Wali ogonibi bedagoria habagi howa kaundia habe. Ibu anda haneni ge bolanguabi heba nahabe.
PRO 5:9 Í̠ mini bayale wirigo yu waholenego dege de hondo habe. Wali biagonaga anda haneni bolangua hariyagua agali ko karume í̠hondo dara naholebiraore ndobe. Í̠ igiri daliahe keore bo waholebira.
PRO 5:10 Í̠naga mbirale biabe erekuibi bialu bayale mo wereru agali marume mo yalu pialu tinaga holebira.
PRO 5:11 Waragome í̠ minaragola kuni hangu wulebere. Ani bialu homole wuwa dagiani paluwa dugu taraore bialu wulebere.
PRO 5:12 Ani wuwa í̠na ogodagua lolebere. I̱ luluyu kogo i̱na mine halu agali marume i̱ mo tiga nabilarugoni irane aginagabe.
PRO 5:13 I̱naga lawai hagame bi layago hale nahe tingi halu donge harugoni.
PRO 5:14 Áyu i̱ wali agali bibahende deni ko hai kogoni, lalu lolebere.
PRO 5:15 Í̠ agali mendealinaga iba uli ngagoha napobe. Agali mbirame iba uli ibuninaga ngagoha nalu hagadagua í̠ one mbiraore ogonila mandagi halu ibu hangu gubalini holene nga.
PRO 5:16 Wali í̠ one ndoru baba waneigini hono wima ibaga biriyagua mani waneigini urunime í̠ biamogo nabulebira. Ani manda buwa í̠ onela hangu í̠naga waneigini hono wulene nga.
PRO 5:17 Wali kayu dewa yalu waneigini hono wereruni wali biaru ti aria ho tago holebirago ani bulene nawi.
PRO 5:18 Ngode Datagaliwabehanda í̠ oneore mo turu halu biamogo binigo beda. Í̠ one ibu í̠naga iba uli ale bedago í̠na ibuhondo turuho holene nga.
PRO 5:19 Ibu bayaleore biruwa ibunaga mana bayaleore biragome í̠ mo turu helo. Ibugua í̠ gubalini hayago ogoninaga í̠na ibu mitangi bialu gubalini haabo habe.
PRO 5:20 I̱ igini-o í̠na wali mendehondo gubalini holene irane aginagabe. Í̠na agali mende oneme bi laragome í̠naga mini daraga bilo kego aginagabe.
PRO 5:21 Anduane Homogo ibugua mbirale bibahende í̠na beregoni manda biai halu í̠na hariga poregohabi handai haga ka.
PRO 5:22 Agali mana ko biaga kagonaga mana ko biragome ibuni gono wiaga. Ibugua ko biyagome gono wiyagoha ibuni do wiaga.
PRO 5:23 Agali ogonibi ibuninaga mini haru nahaga howa ibugua lulume biagadagua biaabo haragome ibuni bo homelaga.
PRO 6:1 I̱ igini-o agali mbirame mendealila dano ho heagola dano yadai nabiyagua í̠na nguliya lalu lo wiriyagua mana ogoni nakarulapeore.
PRO 6:2 Í̠na dano henego nguliya lalu lo wirigome í̠ni garabaya ale bialu gono í̠ni wia harigome do wulebere.
PRO 6:3 I̱ igini-o anidagua buliya lalu lo wiriyagua í̠ agali ogoni ibu andaneha taga pani nalu garabaya holene nakarulapego ibu karia gerai puwa i̱ golopeha lalu lamibe.
PRO 6:4 Í̠na p̱alia nabi ha̱lo birabi nabi abale pole manda bibe.
PRO 6:5 Ega nogorume gono ngago hondowa ti ibida piagadagua í̠ abale ibida pole anidagua bulene wulebira.
PRO 6:6 Wali agali biabe nabiaga mangahe kamiru tíhondo i̱na bi mbira langulene yido. Tí uburulime bialu heagoni de handalu o bialu heagonidagua bule manda bialu tí mo yalimu.
PRO 6:7 Uburuli biaruni tinaga de handameho hagabi haguanebi ogoale bidaba lowa haru hagabi mbira nahego handabe.
PRO 6:8 Ani nahegoyu tini hangu hangu mini wialu tomo bu payabu ngangi bu hombedo yalu pialu tomo gari porangi nalu hole lowa bu wia do haga kagoni.
PRO 6:9 Ani biaga kago ai wali agali mangahe kamiru tí tamuni u palu ngamigoni wene paliaho wiaabo dege hole hame ledamibe. Tínaga tamu yu wahalu angi heyulenaga paliaho dege ngamibe.
PRO 6:10 U palu hameledogo emeneore lone palu wuliya laga kamigoni. Gi geru mo muli haga buwa u emeneore paluwa nde heyuliya laga kamigoni.
PRO 6:11 Anidagua birimiyagua tínaga mbirale ngamiruni abaleore ereba hai haragola tí mbirale mbira nawi yagibanoore holeberami. Pagealime anda bangu lalu mbirale ngaru bibahendeore hilu gangalibu yalu piai haragola mbirale mbira nawiore hagadagua tí ogonibi holeberami.
PRO 6:12 Wali agali habane nabulene mana ko hangu biaga karume ke̱ hangu hama ibaga biaga.
PRO 6:13 Tigua bi tigatiga latagi nahe howa tini mitangi bidago gimebi gemebi demebi mana tara tara biragome ti aria maru karu manda bilo walia haga.
PRO 6:14 Ani bialu howa tigua mana ko hangu biaabo hole mitangi bialu wali agali maru karu ko bilo mo bia haga ka.
PRO 6:15 Anidagua biragome ti kagoria mo ko holene abaleore íbu wialu mo ko haragola ti lone mo bayale holene henge nawulebira.
PRO 6:16 Anduane Homogo ibu handabe mangaore hagane mana koore karia ngago uruni wali agalime bilo hame nalagaorego mana uru. Mbira: Mine halu wali agali maru karu nagalone ka mitangi biagabi Mende: Ne harigaha howa ke̱ hagabi Tebone: Wali agali bame irane nawini bo wahagabi Mane: Ko bule miniha magoyu hagabi Dauni: Ko bule abale porabu hagabi Waragane: Godi lalu ke̱ howa lagabi Kane: Hamene damenemabi hoba mu hagahaga bilo ndelope hagabi Mana urunibi Anduane Homogo ibu hame nalagaore ka.
PRO 6:20 I̱naga igini-o í̠ abahanda bia larago hale howa bialu í̠ ai̱yahanda mana lawai harago mo embeda nahabe.
PRO 6:21 Libugua bi í̠hondo langirago í̠naga bu miniha mo hongowa talialu bialu haabo holene nga. Ani mo hongo howa biriyagua bi mana ogoni í̠naga mani magagua wirilidaguabi mandani yári birilidaguabi wu haabo holebere.
PRO 6:22 Í̠ ibaga bialu poregoha bi ogonime í̠naga hariga mo walia halu í̠ u paleregohabi ogonime í̠ mamage holebira. Palialu heyaregola bi ogoni degeme í̠ mini bayale wulene ngulebira.
PRO 6:23 Í̠ aba ai̱yalanaga bi mana larago hariga mo walia haga wá holene hale ale holebira. Bi mana ogonime í̠ mo tiga biragola í̠na mana bayale tigabi ngago bialu bayale dege haabo habelonaga bulebira.
PRO 6:24 Libunaga bi mana langiragome í̠ wali ko biaga arume mo pila nahelonagabi mendeali ti one bedarume í̠ dimagoli howa ndole biyagua hale nahabelonagabi langulebira.
PRO 6:25 Wali tingini bayale bedaru de hondowa dimagoli nahabe. Tinaga deme í̠ handaya hayagua ti bedagoha poleni napobe.
PRO 6:26 Mbirali ibu wali agali kayu biaga baba kayu biyagua ogoni ibunaga yolo timbuni ndo emene dege tomo halu mbira hangu nolene karulape yu waholebira. Anigo mbiralime agali mendeali one baba kayu biyagua ogoni ibunaga yolo timbuni dewaore yu waholebira. Ibuninaga holene yupe halu homoleneore wulebira.
PRO 6:27 Ira dedaore í̠naga galukunini ya para hariyagua irame í̠naga tingiliya bidego nadolebirabe.
PRO 6:28 Ira timbuni dedagoria daligani ibagabu kegola í̠naga ge habe nadolebirabe.
PRO 6:29 Ogonidagua dege mbirali agali mendeali one bedago kayu biriyagua tigua í̠ yo pialu pe nalolebira mo ko howa baore bulebira.
PRO 6:30 Mbirali ibu tomo garibi laragola mendealinaga tomo wialu pedago mo nayagua nde tomo anduane biagome bi ko mbira nalolebirabe.
PRO 6:31 Anigo ibugua binida lalu handa walia hayagua anduane biagome manani haru poragola ibugua ibu wu heneda ale bibahendeore anduanedagohondo miai holebira.
PRO 6:32 Anigo mbiralime agali mendeali one bedago kayu biyagua nde mana ogoni tigabi ndogo lulu howaore bulebira. Agali mana ko ogoni ale biaga kago ibugua ibuni mo ko hagaore ka.
PRO 6:33 Ani biragola marume ibu mo ko howaore balu ibuhondo bi ko lamialu biragola taga timbuniore ho haabo holebira.
PRO 6:34 Agali mbirali ibu one agali mendeme kayu biyagua agalinime keba timbuniore haga ngagoni. Ai ogonidagua dege wali agalinidago ibugua keba timbuni howa ibu one kayu biaga biago pani nelo mo ko howaore bolebira. Ibugua dara holene mbira nawulebiraore.
PRO 6:35 Nogo muniru dewaoreme ibu one tawa bo miyaguabi urunime ibunaga lembo holene timbuni ngago mo ereba naholebiraore.
PRO 7:1 I̱ igini-o i̱na í̠hondo bi larogo hale halu embeda nahe í̠naga miniha bayuwaore mo yabe.
PRO 7:2 Ani bialu i̱na bi larogodagua bialu hariyagua í̠ bayale holebere. I̱naga bi larogoni baya hanguore yani ho habe. Í̠ninaga de kira kegoni mo ko holani hondowa hogorale bu hondo harilidaguaore hondo habe.
PRO 7:3 I̱na bi laga beroru í̠naga miniha mo yuwa haabo habe. Mani magagua wiradagua wu haabo habe.
PRO 7:4 Mini bayale gigabi wulenegobi manda bayale bulenebi í̠ mbalini nguinioregohondobi í̠ dameneoregohondobi mitangi tigabi birilidagua bibe.
PRO 7:5 Anidagua mitangi bu hariyagua wali ibu agali one bedagome í̠hondo page bibiya mbaibu lowa ndole biyagua mini bayale gigabi wulene ogonime í̠naga pabe tigila dibidagola í̠ porabutagi halu puwa walime laradagua hale halu bibe nahe holebere.
PRO 7:6 Horo mbiruore i̱ i̱ni andagani howa anda windoha de handatagi ho haru.
PRO 7:7 Ani howa handalu hewaria igiri daliahe dewaore mini nawi odahe urubi degedegeru dewa harigani puíbu biyaria handaru. Maru haru dege lowa mini nawi lulu andaore igiri daliahe mbiraore panigi bendo lalu piyaria handaru.
PRO 7:8 Igiri daliahe odagoni ibu pialu wali koore mbira bereago andagani anda hanehane kaware pu banga biyaria handaru.
PRO 7:9 Ne̱ lo waheaha arumaha piyaria handaru.
PRO 7:10 Wali biago ibu yári bayanda walime biagadagua bu berenego ibugua igiri odagoni haru palue lowa ndole bule manda bini. Ani manda buwa igiri biago pialu hearia hondowa wali biagome abale lola hole tagira ibini.
PRO 7:11 Wali odagoni ibu elahe taga nahagaore biruwa andagani biru dambo nalaga hariga hariga hangu ibagabu haabo haga berene.
PRO 7:12 Wali odagoni ibu horo bibahendengi agali dege taya bima hariganibi magedi hamarunagabi ibaga bume haga berene.
PRO 7:13 Ani biaga berenego wali odagonime igiri daliahe o biagoni minu yani howa nu̱nu̱ laya. Nu̱nu̱ lowa igiri biagonaga deni tigatiga handaya howa au laya.
PRO 7:14 I̱ áyu mbirale loma bini mbira bo delalu henego o delarudagonaga nogo mbirini maru i̱ andagani dawa ngelalu ibiru, laya.
PRO 7:15 Anidagua dawa ngelalu ai í̠ lola harabe hondole hai bima ibalu hewaria ndodabe. Ai áyu ibalu heria lolaore kogoni, laya.
PRO 7:16 Ani bialu i̱ andagani paluene tamu bayaore mo ginibu ngelalu ibiru. Tamunguru aga bayaore Iyibi dindi tawe kala tara taraherume dungua ho ngeledo, laya.
PRO 7:17 Ani bialu tamu odagoriani padua tara tara nga baya tara tara biagaru odope howa baya ngabu ngeledo, laya.
PRO 7:18 Ani bidogo iya gini bialu turuho bedabaore egabile labiyago mbaibu, laya.
PRO 7:19 I̱ agalini ona andagaha nahego ibulubada lowa gi nahabe. I̱ agalini ibu dindi kaundiaore mbiraha ho hama piyagoni.
PRO 7:20 Ibu muni dewaore hombedo yalu piyago abale dai nabulebira. Sarere kira ale hai halu dai bulebira manda bido, laya.
PRO 7:21 Wali biagome igiri daliahe biago ndole bu mialu igiri biagonaga bu mini mo heya holenaga bi hale hoabi tara tara dewaore lene.
PRO 7:22 Wali biagome bi ani layagola igiri ibugua hale halu ibu abale wali biago andaga piyadagua haruru pene. Nogome ibu bo dawale haru piarua manda nabi howa nogo anduanenaga geha haruru piagadagua ibu wali biago haruru pene. Agali luluyu karia garabaya helo gi minu huba buwa garabaya haru poradagua bini.
PRO 7:23 Igiri odagoni ibugua manda bialu ibu timu mbirame ibunaga gubalini mogo bianeoregoria bolomogo biragola ibu bo ibira holobada lowa ibu manda nabi pene. Nogo gabuame ni̱a̱o̱ weda manda nabi howa gerai mabu dugua hole pupe halu karia ibuni ni̱a̱o̱ wedagoha do wiaganedagua do wialu homole porogonida ibu manda nabini.
PRO 7:24 Ani biyane handarugo ai i̱naga iginiru-o tígua i̱na bi larogo baya hanguore hale hoa howa hale halimu.
PRO 7:25 Wali ko ngubi ogonibime tínaga bu mini ba mulani tí gi howa igilo muwa halimu.
PRO 7:26 Agali igini dewaore wali ko ogoni aleme mo ko hai halu agali dagalabe nahe dewaore balu homelai hene ngago wali ko ogoni ale bedagoria tí kaware hapara nahe gi howa igilo mialu tí kaundia halimu.
PRO 7:27 Bayanda wali andaga pole hariga pedagoni homaliha anda pole hariga poradagua bida. Wali ko ogoni ale bedago andaga pole pirimiyagua o homene dinini pu hagaha pole poramigoni.
PRO 8:1 Mini bayale gigabi wuleneme wandari mbira heyu howa olaradagua ina olalu ka. Manda buleneme bi larago ina hale habehe kama.
PRO 8:2 Ibugua hariga bare hombene ngarunagabi hariga gebage ngarunagabi heyu howa ina olalu ka.
PRO 8:3 Tanoha anda pole wali agali ubanda tagi biaga panga haraba dugu a̱i̱ kagoria howabi inahondo agua lalu ka.
PRO 8:4 Dindi wali agali kamiru bibahendehondo i̱na tí olalu kogoni.
PRO 8:5 Wali agali miniha boga nabi kamiru tí ogoni mo yule i̱ kogoria ibidaba. Wali agali mitangi bayuwa tigabi nabiaga kamiru tí ogoniore mo yule i̱ kogoria ibai hadaba, lalu ka.
PRO 8:6 I̱na tíhondo bi baya buruguleorebi tigabiorebi langigi berogo bayuwa hale hadaba.
PRO 8:7 I̱na horo bibahendengi bi henenego hangu laga kogoni. Ke̱ holenebi bi yole ko tara tara ngarubi i̱ hame nalagaore kogoni.
PRO 8:8 I̱na bi laga bialu kogoni bibahende tigabi hanguore lalu kogoni. Bi ke̱ howabi wali agali mo guya holebi mbira nalagaore kogoni.
PRO 8:9 Wali agali tinaga mitangi bulenebi manda bulenebi wále tigabi karume i̱na bi larogonaga tenego manda biai ka. Tigua i̱na bi larogoni henene laralo manda bulebira.
PRO 8:10 I̱naga bi tíhondo langialu kogoni muni ngolo silibabi ale ndo i̱naga bi ogoni ibu galone daligaore pale ngago tígua ogoni duniniore lowa yamilimu.
PRO 8:11 I̱ mini Bayale Gigabi kogoni. Dindini to̱le̱ ale tara tara ngiringarale palido hene duguwa muni milo wabu ngarubi ndo kogoni. Mbirale mbira baya tí hame lagane ale dindini ngarubi ndo i̱ baya gibi daligaore kogoni.
PRO 8:12 I̱ mini Bayale Gigabi kogoni. Mana bayale wále agua bialu holene nga lalu i̱na manda bidogoni. I̱na mbirale bibahende bayuwaore manda biai howa mbirale baya hangu dabaga bulenego manda bidogoni.
PRO 8:13 Wali agali Anduane Homogo andaneha howa ibugua laradagua bialu haga karume mana ko bulene handabe manga holebira. Mine holeneru i̱ninaga mini mo yaraga holeneru mana ko tara tara buleneru ke̱ holeneru mana uruni aleru i̱ hame nalagaore kogoni.
PRO 8:14 I̱na mbirale bule lalu manda mandabu wuwa bule ledogonidagua biruli. I̱ mitangi bayuwa tigabiore biaga howa hongo gibihe kogoni.
PRO 8:15 Kini agali karumebi agali haguane karumebi tininaga dindi bayuwa hondo helo i̱na biamogo bialu dindi mo baya holenenaga bi mana bayuwa wabu wilo biamogo biruli.
PRO 8:16 Dindini wali agali hondo haga agali haguane karu damenego bibahendeore ta nabi i̱na biamogo bigi berogome tigua wali agali haru kagoni.
PRO 8:17 Wali agali i̱ hondole lowa hongo howa taya bialu karume i̱ handa walia holebira. Wali agali i̱ gubalini haga karu i̱na ti gubalini timbuniore haga kogoni.
PRO 8:18 I̱na wali agali mo homogo holene mbirale dewaorebi mini mo yaraga holenebi tihondo mule kogoni. Ti mana bayale tigabi bima pialu ti homogo holenenaga mbirale bayale bayale handa walia helo hamelo kogoni.
PRO 8:19 I̱na mbirale tihondo miagane ngogo muni ngolo silibaru emene bayale lowa baya daligaore miaga kogoni.
PRO 8:20 Horo bibahendengi i̱na mana tigabi hangu bialu haga kogoni. Dabolene tigabi dege dabaga kogoni.
PRO 8:21 Wali agali i̱ gubalini haga karu i̱na tihondo homogo holenenaga dewa mialu ti andagani mbirale bayale bayaleme wu to̱lo tagi helaruli.
PRO 8:22 Ala bambaore Anduane Homogohanda mbirale wabule lowa i̱ore ala wabini. Ani buwa mani ibugua mbirale maru maru wabini.
PRO 8:23 Ala bambaore Anduane Homogohanda dindi nawabi howa piganengi i̱ore ala wabiyagola i̱ ala hene.
PRO 8:24 Anduane Homogohanda iba solowarabi iba bedaru damene bibahendeorebi nawabi howa i̱ore ala tagira íbu helenego kogoni.
PRO 8:25 Hari emene wedarubi timbuni wedarubi nawabi howa i̱ore ala wabu helenego kogoni.
PRO 8:26 Dindi bibahende ngarubi mabu wima pedarubi uruni bibahende nawiaha i̱ ala wabini.
PRO 8:27 Anduane Homogohanda hari daliga li kago wabialu howa hari ligonime iba solowara mo mabu bupe helayadagoningi i̱ ibula hene.
PRO 8:28 Ibugua beraliba li harini ngelalu dindiha howa iba dugu dagadaga bilalu dindi biru namu lalu iba solowara tagira íbu berelayadagoni i̱ hewane dege ani bini.
PRO 8:29 Iba solowara ibu birairi helogoria tu bo mialu tu o werogo bolodaga holeni lalu lamiyangi i̱ hene. Dindi timbuni ogoni wabu wulenaga gumuni ala ibu pelayangi i̱ hene.
PRO 8:30 Anduane Homogohanda biabe uruni bigi biyangi i̱ ibu heba henego ibugua i̱ mbirale mandabi biabe de hondo haga haradagua helaya. Ibugua mbirale wabigi biyaru hondowa i̱na turu gibiore ho harugome Anduane Homogo ibu mo turu haga biru. I̱na Anduane Homogo ibu deni turu timbuniore ho haru.
PRO 8:31 Dindi ogo bibahende wabu wiyagobi wali agali dindi ogoriani wabu helayagobi hondowa i̱ turu timbuniore ho haru.
PRO 8:32 Anigo ai mini bayale gigabi ibugua bi agua latago hara. I̱naga waneiginiru-o tígua i̱naga bi larogo baya hangu hale halu i̱na biagane mana ngodagua tígua talialu bilimu. Anidagua birimiyagua tí turuho holeberami.
PRO 8:33 I̱na tí lawai haga berogoni baya hangu hale haga bilimu. Ani birimiyagua tí mini bayale gigabiwi holeberami. Mana ogonidagua bulenego hado wanahalimu.
PRO 8:34 Wali agali i̱naga bi larogo hale halu biaga karu ti turu holene nga. I̱na ti horo bibahendengi lawai holiya ibuwa i̱ ubanda tagi biaga anda harabani íbu haabo haga karu ti turu haga kagoni.
PRO 8:35 Wali agali i̱ yamu yu karu ti holeneore yu holebira. Ani bialu Anduane Homogo ibugua tihondo turuore ho holebira.
PRO 8:36 Wali agali i̱ yamia nabi karu ti tinime tini mo ko halu ka. Mbirali i̱ handabe mangaho kago ibu homolene hamelo kagoni.
PRO 9:1 Mini bayale gigabi wulene ibugua ibunaga anda mbira bu heleda. Anda ogoninaga gene karia baya hanguore bogo mbara laga buwa mo yári bia howa anda gene weda.
PRO 9:2 Ibugua nogo mbira bo dawalu waini iba wiaruni mo dendebiore howa nga. Ani buwa tomo nalu birulene dagiaru bu manda manda buwa ngeleda.
PRO 9:3 Ani bu ngelowa ibunaga biabe bia haga wandari biru wiaru uyuna tanoha dindi bare hombene wiarunaga pu howa ogodagua lalimu lalu lamiya.
PRO 9:4 Wali agali mini timbuni nawi kamirubi lulu ale bu kamirubi bibahende mini bayale gigabi wulene andaga ibidaba.
PRO 9:5 Tomo dawa ngogobi waini iba dendebi hambu ngogobi nole ibidaba.
PRO 9:6 Mini nawi howa mana ko bialu kamiruni wahalu holene bayale yu hole mo ibidaba. Mini wulene hariga ngagoria anda ibalimu, laya lene.
PRO 9:7 Wali agali minehe balagala haga kagohondo ogonidagua nabibe lalu í̠na mo tiga biriyagua ti í̠hondo bi ko lalu ladai bulebira. Wali agali ko kago mo tiga biriyagua tigua í̠ balu í̠naga tingini mo ko holebira.
PRO 9:8 Ani bulebirago mine halu balagala haga kago mo tiga nabibe. Ibugua í̠la waitigi ho haabo holebira. Anigo mbirali mini bayale gigabiwi kago mo tiga biriyagua ibugua í̠hondo turu ho holebira.
PRO 9:9 Mbirali mini bayale gigabiwi kagohondo bi lamiriyagua ibuha mini bayale gigabiwi timbuniore holebira. Ani bialu mbirali mini tigabi kagohondo bi lariyagua ibunaga manda ngagoha mo tago holebere.
PRO 9:10 Mini bayale gigabiwi holene hame lariyagua í̠ni ala Anduane Homogo andaneha holene nga. Anduane Homogo ibu bayale tigabiore kago í̠ manda bayale henene mo yu keyagua í̠ manda timbuniorewi kegoni.
PRO 9:11 Mini bayale gigabi wulene yu kegome í̠ dindini mali dewaore howa hodagua holebere.
PRO 9:12 Miniha í̠ mini bayale gigabi wulene yu hariyagua í̠ni mo bayale halu mini timbuni taraore yu holebere. Anigo í̠ manga halu hado wahene mbirago hariyagua nde mini mandala nawiore holebere.
PRO 9:13 Mini nawi howa biagane ngago wali mini nawime lulubi lagimbu bialu biagadagua biaga nga.
PRO 9:14 Wali ko uruni aleme ibunaga anda harabanibi tano hanuni bare hombene ngagoria howa dagia ngagoriabi birigi biaga.
PRO 9:15 Ani biruwa ibugua wali agali maru tinaga biabe biala heneruha pole harigani pugu biraru olowa ibidaba laga. Ani lowa ibugua tihondo lalu,
PRO 9:16 Mini timbuni nawi kamirubi lulu ale kamirubi tí i̱ andaga ibidaba, laga.
PRO 9:17 Ani lowa ibugua lalu, Iba mendealinaga hambu ngaria mo page binigo iba ogoni gagahe nolene dendebiore wulebira. Tomo mbiralinaga wialu pedago o howa mo kayu binigo ogoni dendebiore holebira, laga.
PRO 9:18 Agali maru ibunaga bi hale hole ibiyaru ti wali biagonaga anda tamuha ko ngubiore homali ale ngu bialu kago nahende haga. Wali ogoni ibu bedaria agali maru ala penedarubi áyu pialu karubi homene dininiru pu hagaha pu kago ti manda nabi howa ibu bedaria piaga.
PRO 10:1 Mana bayale gigabi bialu holenenaga Solomonohanda bi tumagi laga binigo ogodagua leda. Waneiginiru ti mini bayale gigabiwi kayagua ti ai̱ya abala turuho holebira. Anigo waneigini ti mini gigabi ndo mini nawi kayagua ko biragome ti ai̱ya abala mo tandaga holebira.
PRO 10:2 Í̠na muni page binigome homogo hariyagua muni ogonime í̠ mo bayale naholebira. Anigo í̠na mana tigabi hangu ngaru talialu biaabo hariyagua mo ko holene mbira í̠ha nawulebira.
PRO 10:3 Anduane Homogohanda wali agali tigabi karu tomo nolene mbira burupale nahelaga ka. Anigo wali agali mana ko biaga karume mbirale hamelo kago milo henge namiaga ka.
PRO 10:4 Í̠ biabe bulene mangahe hariyagua yagibano noa noalo holebere. Anigo í̠ biabe ebebebi hariyagua mbirale dewawi homogo holebere.
PRO 10:5 Agali miniwi kagome tomo nolene tu haragola bu mogobu wiaga. Anigo agali mbira ibu biabe nabi palia hangu biyagua nde horo ogoningi tomo nolene nawidagola ibu one waneigini heba ti noa noalo howa taga pani nolene wulebira.
PRO 10:6 Anduane Homogohanda wali agali mini tigabiwi karuhondo bayale dewa miaga ka. Anigo wali agali ko kago ibugua bi laragome wali agali mo hondo holenaga miniha ohe howa bi laga ka.
PRO 10:7 Wali agali mana bayale biaga karu homarangi marume ti mitangi bialu dara howa mani tigua bayale biyarunaga te laabo haga. Anigo wali agali mana ko biaga karu homaragola marume ti abale embedaho wahaga.
PRO 10:8 Wali agali mini bogabi karu tigua wali agali marume ogodagua bibe lalu bi bayale lamiragola ti bayuwa hale haga. Anigo wali agali mini nawi howa bi habane nabulene kudaga bi dege laga karu ti mo ko holebira.
PRO 10:9 Wali agali mini tigabiwi karu ti miniha maburabi holebira. Anigo wali agali mana ko biaga karu tinaga mini ko do habe nahe holebira.
PRO 10:10 Mbiralime henene lolene ngadagua la nabi hayagua ibugua genda dewa mo yalu ibaga. Mbiralime kudaga bi dewa lagimbu biaga kago ibugua mo ko holebira.
PRO 10:11 Wali agali mini tigabiwi karunaga bi larago haabo holene iba ale. Anigo wali agali mini kowi karunaga bi laragome tininaga miniha ko ngago do howa tigua wali agali maru karu mo ko hole manda bu haga ka.
PRO 10:12 Handabe manga holeneme ko mo bia haga. Anigo ko biagame ko bibahende biniru gubalini holeneme la nabi wahaga.
PRO 10:13 Mbirali ibu mini dingidangiale kagome ibunaga miniha bayale gigabiwi howa bi latagi haga. Anigo mbirali ibu mini giga napale kago ibu pani nolene wulebira.
PRO 10:14 Mbirali mini bayale gigabiwi kagome manda tara tara bulene ibunaga miniha yu haga ka. Anigo mbiralime bame kudaga bi hangu lalu kagoria ko abale anda ibilo henge miaga ka.
PRO 10:15 Tano pabe bu yanda howa tamuha wiagadagua wali agali homogo karu ti mbirale bu ngarume pabe bu mabu bidagola bayale ka. Tano pabe bu yanda nahe howa wiagadagua yagibano karu mbirale burupale kagome ti abale mo ko haga.
PRO 10:16 Bayale biragonaga yolo haabo holene nga. Anigo ko biragonaga yolo ko dewa bilo mo bia haga ka.
PRO 10:17 Wali agali maru mana birago mendealime mo tiga biragola hale haga karu ti haabo holene harigani pialu ka. Anigo wali agali maru mana mendealime mo tiga biragola i̱ ndo lalu hale nahaga karu ti mo ko holene harigani pialu ka.
PRO 10:18 Mbiralime wali agali maruhondo keba howa nahe tingi halu kago ibunaga miniha ko do haragome ibu tindule hangu laga ka. Mbiralime diburibu loyu ibaga biaga kago ibu mini nawi lulu ale ka.
PRO 10:19 Mbiralime bi dewa laga kayagua ibunaga bi laragome ko dewa bibehe holebira. Anigo mbirali ibu mini bayale gigabiwi kayagua bi dewa lagimbu nabi holene nga.
PRO 10:20 Wali agali mini bayale tigabiwi karunaga bi larago muni siliba bayaleorego ale ka. Anigo wali agali ko biaga karunaga mitangi bulenego habane nabulene hangu mitangi biaga ka.
PRO 10:21 Mbirali mini tigabiwi kagonaga bi laragome wali agali dewa biamogo bulebira. Anigo mbirali mini nawi howa biragome ibuni bo homelolebira.
PRO 10:22 Anduane Homogo ibunime ina biamogo bialu mbirale dewa ngiyagua urunime ina genda namo ngulebira.
PRO 10:23 Wali agali karume ko ngaruni bia dege dindi hole lowa turuho kayagua ti mini nawi lulu ale ka. Anigo wali agali manda bayalebi mini bayale gigabiwi karume mana bayale ngaru hangu bule lowa turuho holebira.
PRO 10:24 Mini tigabiwi karu ti tini hame lara alego mulebira. Anigo ko biaga karu tini mo gi hara alegoore mulebira.
PRO 10:25 Wali agali ko biaga karu ti kagoria ko bulene mbira ibiragola puyabu timbuni iba li heba ibuwa mbirale ngaru yalu piai hagadagua ti yalu piai holebira. Anigo wali agali mana tigabi biaga karu ti dege hongo howa bayale haabo holebira.
PRO 10:26 Wali agali mangahe karuhondo í̠naga biabe biaha nalabe. Irane marasini kome ne hambuni kau biagadaguabi ira haguame de iba dege dindi hagadagua bialu í̠na ibuhondo handabe manga holebere.
PRO 10:27 Anduane Homogohanda bi laradagua bialu hariyagua dindini lu holebere. Anigo ko biaga karu tigi mandi hangu halu tinaga horo nakaha abale homolene wulebira.
PRO 10:28 Wali agali mini tigabiwi karu ti Anduane Homogohondo mini dunubia ho howa turu halu holebira. Anigo ko biaga karu tigua bayale mbira nahende ti bameore holebira.
PRO 10:29 Mini tigabiwi karu Anduane Homogohanda ti baya hangu handayaho haga ka. Anigo mana ko biaga karu ibugua ti kagoha ko anda ibilolebira.
PRO 10:30 Wali agali mini tigabiwi karu ti dindini bayale haabo holebira. Anigo ko biaga karu ti dindini haabo naholebira.
PRO 10:31 Wali agali mini tigabiwi karume bi larago mini bayale gigabi holenenaga laga ka. Anigo wali agalinaga hégeme bi ko laga kago ogoninaga ne hambu ndibulo waholebira.
PRO 10:32 Mini tigabiwi karume bi lalu howa wali agali hale ho karu ti mo dendebia holenaga manda bialu bi bayale laga ka. Anigo wali agali mini kowi karu tigua bi laragome wali agali hale ho karu mo tandaga haga ka.
PRO 11:1 Wali agalime mendealinaga mbirale yidago mo page bulenaga genda magi handaga ngago ke̱ howa wiagadagua ndo hada dai biaga karu Anduane Homogohanda ti handabe manga haga ka. Anigo maru genda magi tigatiga ngadagua handalu yolo bulene ngadagua biaga karuhondo ibugua turu haga ka.
PRO 11:2 Wali agali tininaga mini yaraga haga karu mani taga pani nolebira. Mini bayale gigabiwi karu tigua tini mo dindiha ho haga ka.
PRO 11:3 Wali agali mini tigabiwi karume mana tigabi dege biaga ka. Anigo ke̱ haga karu ti tininaga ke̱ howa mana biaga ngagome tini mo guya haga.
PRO 11:4 Mbirale dewawi homogo ha hariyaguabi í̠ homolene horo harangi urunime í̠ mo wia nabulebira. Anigo í̠na mana tigabi ngaru talialu bialu hariyagua nde ogonime í̠ biamogo biragola í̠ abale homa nabi luore holebere.
PRO 11:5 Wali agali tigabi karume mana tigabi dege biragome tini biamogo biragola hariga tigabi ngagoria pialu holebira. Mana ko biaga karume tini mo ko haga ka.
PRO 11:6 Wali agali mana tigabi biaga karu tini mana tigabi ogonime ti bayale helonaga biamogo biaga. Anigo dimagoli halu mana koru bialu haga karu tininaga mana ko biyagome tini mo ko haga nga.
PRO 11:7 Wali agali ko biaga karume tininaga hongome mbirale bayale ngaru mo wu holeberamabe toba ho haga ka. Anigo mani tigua mbirale mbira bule lowa tinaga miniha magoyu hayago tini homaragola tini heba homamaga haga.
PRO 11:8 Wali agali mana bayale biaga karu ti kagoha genda tandagaru anda ibiyagua Anduane Homogo ibunime ti pele miaga ka. Genda tandaga urunibi wali agali maru mana ko biaga karuha mo ya holebira.
PRO 11:9 Mbirali mana ko biaga karume bi ko lalu ndelayagua tinaga bi ogonime wali agali bu karu mo ko haga. Anigo maru mini tigabi karu tigua tinaga mini bayale gigabi ngagome tini pele miragola ti bayale holebira.
PRO 11:10 Mana tigabi bialu haga karu tinaga holene bayaleore ngagola wali agali bu karume turu hai holebira. Anigo mana ko biaga karuni aria mbirago homayagua wali agalime turu timbuniore holebira.
PRO 11:11 Wali agali mini tigabi karu tigua mana bayale biragome tinaga tanoha bayale holene wulebira. Anigo wali agali mana ko biaga karu tigua bi ko tara tara laragome tinaga tanoha wali agali karu mo ko haga.
PRO 11:12 Mbiralime wali agalihondo bi ko lalu mege biyagua ogoni ibu mini nawi lulu ale ka. Wali agali mini bayale gigabiwi kagome bi ogoni ale nale ema nabi holebira.
PRO 11:13 Mbiralime bi diburibu laga kagohondo bi do henego ibu lamulene nawi. Ai mini bilinahe kagohondo lamulene karulape.
PRO 11:14 Gabumane haru haga karume wali agali hariga bayaleni pelo walia nahayagua wali agali mo ko halu dindibi mo ko holebira. Anigo gabumane biamogo bialu mitangi bayale talebu mulene dewa bu hayagua wali agali bayale holebira.
PRO 11:15 Mbiralime dano henego ibuni mibe naheyagola í̠na mia holiya leneyagua ogoninaga mani í̠ni genda timbuni wulebira. Ogoninaga í̠ bayale hole manda biriyagua í̠na mana ogonibi ngagoria wandialu habe.
PRO 11:16 Wali mana bayale biaga bedaru wali agali marume tinaga mini yaraga halu yo nahondolebira. Anigo wali mana ko biaga bedaru ti taga pani nalu birulebira. Agali mangahe karume mbirale nayi holebira. Agali biabe ebebebi hongo howa bialu haga karume mbirale dewa wua holebira.
PRO 11:17 Í̠na wali agali maruhondo dara howa biamogo biriyagua mana ogonibi beregome í̠ni biamogo beregoni. Anigo í̠na maru mo tandaga hariyagua í̠nibi mo tandaga holebere.
PRO 11:18 Wali agali ko biaga karume mbirale ngaruni tini biamogo nabibehe habane nabuleneore ngagoni. Anigo wali agali bayale tigabi biaga karume biragonaga yolo bayale mulebira.
PRO 11:19 Wali agali mana tigabi dege biaga karu ti haabo holene yulebira. Anigoyu wali agali mana ko dege bule hamelo karu ti homolene wulebira.
PRO 11:20 Anduane Homogohanda wali agali ko hangu mitangi biaabo haga karuni ti handabe manga ho kagoni. Ibugua wali agali mana tigabi biaga karuhondo gubalini ho ka.
PRO 11:21 Anduane Homogohanda wali agali ko hangu biaga karuni manani helalu ti pani nolene ngago heneneore na bulebira. Anigo wali agali mana tigabi biaga karu ti pani nane bayale helolebira.
PRO 11:22 Wali mbira dengui bayaleore biruwa ibugua mana ko hangu biaabo haga bedayagua ogoni ibu gi magi ngolome wabini nogoni yári bia howa nguira da haganego ale beda.
PRO 11:23 Wali agali mini tigabi karume ti hameledaru biragola bayale dege tagira ibulebira. Anigo ko biaga karume tini hame ledaru biyagua ko dege tagira ibiragola bibahende karume keba hai holebira.
PRO 11:24 Wali agali marume tinaga muni mbirale ngaru wali agali maru turu helo migi buwa uruni tinaga biabe biragoha muni dewaore wia tago haga. Anigo wali agali marume tinaga mbirale mbirale ngaru mendealihondo tale bialu mibehe howa namiyagua ibuni noa noalo hangu halu burupale haabo holebira.
PRO 11:25 Wali agali mbirame ibunaga mbirale ngaru wali agali maru biamogo bialu miyagua ibuni dewaore yu haabo holebira. Í̠na wali agali maru biamogo biriyagua tigua nde í̠ biamogo biadai bulebira.
PRO 11:26 Mbiralime ibunaga tomo yolo bule ibiragola yolo dibaudu howa mule layagua ogoninaga maru tigua ibu mege bulebira. Anigo wali agalime ibunaga tomo yolo bule ibidaba layagua tigua ibuhondo turu holebira.
PRO 11:27 Mbiralime mana bayale hongo howa talialu biyagua wali agali marume ibuhondo turu howa dungulo holebira. Anigo ibugua ko hangu bule manda biyagua nde ko hangu handa walia holebira.
PRO 11:28 Wali agali mbirame ibunaga mbirale ngaru mitangi bialu mo tene hayagua nde ibu dalu ibirangi ira yuni gilope hagadagua ibira holebira. Anigo mini tigabiwi karu ti ira yuni gaeangi gahenge haabo hagadagua holebira.
PRO 11:29 Agali mbirali ibugua ko biragome ibu one waneigini karuha ko yu anda ibilaragola ibunaga mbirale bibahende ngaru ereba hai halu nayi holebira. Ogonidagua dege mbirali mitangi bayale nabiaga kago ibugua mini bayale gigabi kagonaga biabe bia haga holebira.
PRO 11:30 Mini tigabi karume mana birago haabo holene lini daga ira ale ka. Agali mini bayale gigabi kago ibugua agali maru ibula mini mbiraore howa mandagi hole hame laga ka.
PRO 11:31 Wali agali mini tigabi karu ti dindi ogoria howa bayale biyagonaga yolo miaga manda bidama. Ogonigo wali agali mana ko biagaru tigua ko biyagonaga pani mia nabi yo pialu polobada manda nabimi̱ya. Anduane Homogohanda tihondo ko biyagonaga pani mulebiraore ndobe.
PRO 12:1 Wali agali mini gigabi holene hamelo karu tigua mana ko biyago mendealime mo tiga biragola ti turu haga ka. Anigo mbirali ibu ko biyago mendealime mo tiga bilo hame nale kago ibu mini nawi lulu aleore kagoni.
PRO 12:2 Anduane Homogohanda wali agali bayale biaga karuhondo turuho kagoni. Anigo wali agali ko hangu bule manda biaga karu ibugua ti pani mule mandabu ngeleda.
PRO 12:3 Mbiralime ko hangu biaabo haragome ibunaga holene bayale helo mo hongo naholebira. Anigo mbiralime mana tigabi hangu biaabo hayagua ogoni ibu ira pini dindiha anda pedagola agalime duguabe nahe hagagobi ka.
PRO 12:4 Agali one mana bayale biaga bedagome ibu agalininaga mini yaraga haga. Anigo ibu oneme mana ko hangu biaabo haga bedayagua ibu agalininaga kuniha warago ko mbira kuni bomboro bima anda piagago ale beda.
PRO 12:5 Wali agali mini tigabi karume mana tigabiru hangu bule manda bu haabo haga. Anigo wali agali mini kowi karume wali agali maru mo hondo holene tara tara mitangi biaabo haga ka.
PRO 12:6 Ko biaga karunaga bi laragome mbirali homelo bole lowa ha do howa mayu hagago ale nga. Anigo mini tigabi karunaga bi laragome wali agali genda yu karu biamogo bialu bayale helo mo paliaho helaga.
PRO 12:7 Ko biaga karu tinaga aguanene mbira yu wa nahe ereba halu homa maroore bulebira. Anigo tigabi biaga karu tinaga aguanene ereba nahe bayale ho dame bima puabo holebira.
PRO 12:8 Mini bayale gigabiwi karu wali agalime tinaga mini yaraga holebira. Anigo mini nawi kagonaga mini marume hengedape holebira.
PRO 12:9 Agali mbirame mine halu i̱ homogo kogoni lowa ibu tomo nolene burupale kayagua ogoni nakarulape. Anigo agali mini lene ndo mbirame ibunaga biabe bia haga mbiraore hangu ibu andagaha helo kayagua ogoni ibu agali mende homogo tingi haga biago bolangua ho kagoni.
PRO 12:10 Wali agali tigabi karume tinaga nogo ega hinayaru dara howa bayuwa de hondo haga. Anigo agali ko karume tinaga nogo ega hinayaru baga bialu bayuwa de hondo nahaga.
PRO 12:11 Wali agali biabe erekuibi biaga karume ti tomo nolene dewa bu wulebira. Anigo mbiralime habane nabulene tara tara ngagonaga biabe erekuibi bialu hayagua ogoni ibu bame bu waharago ibu mini nawi ka.
PRO 12:12 Ko biaga karu tigua marume ko bialu mbirale dewa mo yarago dimagoli howa hamelo wiaga. Anigo mana tigabi biaga karu ti bayale biragome tinaga holene karulapeore holebira.
PRO 12:13 Ko biaga karunaga bi ko laragome tini garabayabu wiaga. Anigo bayale biaga karu ti kagoria genda ibiyagua ti yo pialu polene hariga wulebira.
PRO 12:14 Í̠na bi laregobi mana beregobi bayaleyagua ogonime í̠ bayale habelo biamogo bulebira. Anigo í̠ni beregonaga yolo mulebere.
PRO 12:15 Wali agali mini nawi karume, Ina tigatiga manda bidamago, lo mitangi biaga. Anigo wali agali mini bayale gigabiwi karu tigua marume mitangi bayale talebu miragola turu halu hale haga.
PRO 12:16 Mbirali mini nawi kagome ibuhondo ko mbira biragola keba abaleore haga. Anigo mbirali mini bayalewi kagohondo marume bi ko layagua ibugua donge halu bi ladai nabi mini burugulo naholebira.
PRO 12:17 Godi laragola agua biya lalu de hendene kago ibu agali henene lagame kayagua ibugua henene hangu lolebira. Anigo ibu agali ke̱ haga kayagua ogoni ibugua godini tindule nabinigobi lolebira.
PRO 12:18 Mbiralime mitangi bayuwa nabi howa bi layagua nabime nogoba hagadagua ibunaga bi laragome mendealinaga bu habane nogoba holebira. Anigo mbirali mini bayale gigabiwi kago ibugua bi laragome marasini bayaleme mo dabi hagadagua mo bayale holebira.
PRO 12:19 Ke̱ holene tigi mbira hangu howa ereba haga. Anigo henene lolene wiaabo holebira.
PRO 12:20 Wali agali ko hangu bule mitangi biaabo haga karu tinime tini mo hondo hara. Anigo wali agali bayale helonaga biamogo bulene mitangi biaga kago ibuni turuho holebira.
PRO 12:21 Wali agali mini tigabiwi karu ti kagoria genda mbira handa walia naholebira. Anigo wali agali ko biaga ti kagoria ko dewa wiaabo holebira.
PRO 12:22 Anduane Homogo ibu agali ke̱ haga bibahende karuhondo turu nahe howa waitigi ale haga ka. Anigo ibu henene hangu laga karuhondo turu haga ka.
PRO 12:23 Wali agalime mbirale bayale bulene mandabidaru abale latagi nahaga. Anigo wali agali mini nawi karume bi anda dewa howa laragola wali agalime ibunaga bi hale howa ibu agali mini nawi lulu ale ka manda biaga.
PRO 12:24 Biabe erekuibi hongo howa biaga kagome handayaho haga holebira. Anigo biabe mangahe karu garabaya biabe ale biahaga holebira.
PRO 12:25 Mbirali mini burugulo haabo haga kago ibuha genda tagira ibalu ibunaga mini mo ko holebira. Anigo mbiralime ibunaga nenegehondo bi bayale layagua bi ogoni laragome ibu nenege kago miniha dungulo holebira.
PRO 12:26 Wali agali mini tigabi karume tinaga nenegehondo hariga tigabi walia halu de hondo haga. Anigo mana ko biaga karu ti hariga tigabi pedago yu wahalu pu luluyu haga ka.
PRO 12:27 Agali mangahe karume tia bo puwa mbira naboyiore dai bulebira. Anigo biabe pinditigi kau bogalo biaga karu ti agali mini lene holebira.
PRO 12:28 Wali agali mana tigabi bialu karu ti haabo holenenaga harigani pialu ka. Anigo ko bulenenaga hariga pu maro bialu homolene dege wulebira.
PRO 13:1 Waneigini bayale miniwi karume ti ai̱ya abalanaga bi larago hale holebira. Ai ko minehe karume mbiralime ti mo tiga bilo hame nalolebira.
PRO 13:2 Wali agalihondo bi bayale tigabigo hangu laga kago karia mbirale bayale bayaleru anda ibugu bulebira. Ai wali agali ke̱ hagaru mbirale mbira bule lo winigo puguaga karu ti wali agali maru karu bo wahole bulenego hangu manda bialu haga ka.
PRO 13:3 Mbirali ibunaga ne harigaha howa bi laga birago bayuwa minila haru howa laga biyagua ibu genda nahende bayale holebira. Ai mbirali mini haru nahe howa bi bame nagalone lagimbu biaga kago ibu ibuni bime genda tara tara ibuni kagoria mo yu anda ibulebira.
PRO 13:4 Mbirali mangahe kagome mbirale ngaru hameore timbuni layaguabi nayulebira. Ai wali agali erekui biabe biaga karume ti erekui biabe bialu mbirale ti hame lara ale mo wiai holebira.
PRO 13:5 Wali agali baya mini tigabiwi karume ke̱ tara tara holenego ti handabe manga timbuni haga. Ai wali agali mini kowi karu ti mana ko tagabi ngaru taga nahe bialu haga ka.
PRO 13:6 Wali agali mana tigabi biaga kago tinaga pabe tigila tini mana tigabi biragome hapai haragola ti tamuha bayale holebira. Ai wali agali ko biaga karu ti tinime mana ko bigi biragome mendeali ndo tiniore mo ko haga bulebira.
PRO 13:7 Wali agali marume mbirale mbira nawiore howa yagibanome homogo tingi haga biaga. Ai wali agali maru homogoore mbirale dewa bu hombedo wu howa mbirale nawi yagibanoore tingi haga kagoni.
PRO 13:8 Wali agali homogo karu pagealime bo wahole biyagua ti gi tagotago muni bu yidago ba ede halu tini yo pialu pole ka. Ai wali agali yagibano karu ti pagealime tinaga mbira agi yidago muluba ndoda handala ti gi nahe hada holobu haga ka.
PRO 13:9 Wali agali mini tigabiwi howa mana tigabi biaga karu ti lamu hale wá bayaore hamehe ngaligobi ka. Ai wali agali mini kowi howa mana ko biaga karu ti lamu hale hundiama dalidali biaganego ale ka.
PRO 13:10 Mine holeneme keba holenebi gungu bulenebi yu anda ibagane. Ai marume lamirago hale halu laradagua biyagua wali agali ogoni mini bayale gigabiwi holebira.
PRO 13:11 Muni awadaga mbira íbu ngaria mo yu hariyagua muni ogoni abaleore ereba hai holebira. Ai erekui biabeore bialu emeneore mbira ilu wigi binigo anda halu timbu holebira.
PRO 13:12 Mbirale mbirani mini pagaho karia mbirale odagoni habo layagua miniha dugupe ho haga. Ai miniha mbirale mbira bia nabira mandabu henego henene halu biyagua turu holene tagira ibalu miniha ho dungulo daibu hagane.
PRO 13:13 Mbirali ibu mendealime bi bayale ibu biamogo bialu lamirago mo wahalu piyagua ogoni ibu gendabi hangu handalu kane ibuni mo ko holebira. Ai mendeali bi ogonidagua lamiragola ibunaga koyane layada lalu lamirago hale halu biyagua ogoni ibu bayale turubi hama polebira.
PRO 13:14 Wali agali mini bayale gigabiwi karume mana lawai halu karuni holene miaga iba duguaradagua bialu ka. Bi mana tigabi lawai hayarume ti homolene ngagoria kaware kagola nahome yo pialu ibida pelo hariga walia holebira.
PRO 13:15 Wali agali mbirale bayuwa mandabi kago mo yo nahandaramali. Ai wali agali ke̱ hagaru mbira buliya lowa lahondo haga karu ti hama pialu tini mo ko holeneni tagira pole pora.
PRO 13:16 Wali agali miniwi karume miniha bayuwa mitangi ala buwa mani mbirale biatagi haga bulebira. Ai wali agali mini nawi karume tini mini nawi lulu ale ogobi kama lalu tinaga mana bibahende handai helo walia hai holebira.
PRO 13:17 Wali agali bi yu puibu biaga kagome bi lamibe lenegobi ndo ke̱ howa mo mendedagua howa lamiyagua genda tara tara tagira ibaga. Ai bi henene lamibe lenedaguaore lamiyagua o wali agali bayuwa helonaga mo palia holebira.
PRO 13:18 Wali agali marume ti mana lalu mo tiga biragola ti hame nale howa dogaho haabo hayagua ogoni ibu yagibanoore halu tagahe haabo holebira. Ai marume ti mana lalu mo tiga biragola tigua laradagua hale halu biyagua o bi hale haga ogoni wali agalime mo yo nahondolebira.
PRO 13:19 Mbiraleore mbira mule hame timbuni lo hadege buwa o biagoniore miriyagua nde miniha dungu lalu turuore gibi hagane. Anigo wali agali mini nawi howa tigua mana ko bialu karuni erembira mialu waholenego hame naleore kagoni.
PRO 13:20 Wali agali mini bayale gigabiwi karu heba mandagi ibagabu hariyagua í̠bi nde mini bayale gigabiwi dege holebere. Ai wali agali mini nawi howa ko biaga karu heba ibagabu hariyagua í̠ mo ko holebira.
PRO 13:21 Genda buleneme wali agali ko biagaru poradagua haruru ibagabu haabo holebira. Ai wali agali mini tigabiwi karu ti tini hangayagonaga lini mbirale bayale bayale dewa do nolebira.
PRO 13:22 Wali agali mini tigabiwigo ti homalu howa tinaga dabudabu ngaru ti waneigini aguanenaga ngelalu homaga. Ai wali agali mini kowi karunaga dabudabu ngelalu homaragola wali agali mini tigabiwi karu ti karulaga.
PRO 13:23 Wali agali yagibano karunaga mabuni tomo mbirale dewa anda howa bu wiaga. Ai wali agali ko biaga karume uruni hengedope howa ti bu naga.
PRO 13:24 Waneiginime mana ko biragola ai̱ya abalame mo tiga bialu mana nalayagua libu waneigini ogoni gubalini nahe ka. Ai̱ya abalame libu waneigini gubalini ho kayagua libu waneigini mana lolebira.
PRO 13:25 Wali agali mini tigabiwi karu tinaga tomo nolene bu payabu ngagola ti no dege paluebira. Ai wali agali mini kowi mana ko biaga karu ti tombeha garibi lo dege haabo holebira.
PRO 14:1 Wali mini gigabi bedagome ibuni andagani biruwa biabe bayale bulene ngaru biragome ibu damene bibahende mo bayale halu hongo haihe helaga. Ai wali mini nawi bedagome ibuni andagahabi ibu damenerubi bibahende mo ko hai haga.
PRO 14:2 Mana tigabi ngaru talialu bialu haga kagome ibuni Anduane Homogohondo gi ho halu ibu andaneha haabo haga ka. Anigo mana talialu biaga tingi howa ke̱ haga karu tigua Anduane Homogo mo yo handaga ka.
PRO 14:3 Mbirali mini nawi kagonaga bi laragome wali agali bu karu mo walia halu ibuninaga mini hangu mo yaraga halu haga ka. Mbirali mini gigabiwi kagonaga bi laragome ibuni mo bayale haga ka.
PRO 14:4 Dindi tombolene nogo bulumaga mbira naheyagua tomo bu wiaga anda tabuanda haga ka. Anigo nogo bulumaga hongohe kagome dindi tombaga kayagua mabuha tomo dewaore anda haga nga.
PRO 14:5 Mbirale biyago de hendene kagome bi heneneore lalu biyane handayago latagi haga heagua ibugua biyane de handayago bi tigatiga latagi haga ka. Anigo mbirali ke̱ hagame layagua ibunaga bi larago tindule dege lolebira.
PRO 14:6 Mbirali mine haga kagome manda bulene bayale damene ngaru mo yule manda bu karia mo ya nabulebira. Anigo mbirali ibunaga mini gigabi heagua ibugua manda bulene bayale ngaru hi nahe mo yulebira.
PRO 14:7 Mbirali mini nawi kago baba mandagi nahe habagiho holene nga. Ogoni ibugua mini bayale talebu ngia nabulebira.
PRO 14:8 Mbirali mini gigabiwi kago ibugua ibunime biraru bayuwa mitangi buwa biaga ka. Anigo mbirali mini nawi kago ibugua i̱ mini gigabiwi kogo mitangi biragome ibuni mo hondo haga ka.
PRO 14:9 Wali agali mini nawi karume tinaga mini mana ko bulene ngagoha hangu mo tene haabo haga ka. Anigo mana tigabi biaabo halu haga karume wali agali maru baba mini mo mbiraore ho haga ka.
PRO 14:10 Mbirali ibunaga miniha genda holenebi turu holenebi ibuni hangume manda biaga ka. Ani manda biagadagua mendeali kagome manda nabibehe ka.
PRO 14:11 Mbirali ko biaga kagome ibunibi ibunaga damenerubi mo ko hai holebira. Anigo mbirali bayale biaga kagobi ibunaga damenerubi ko nahe bayale haabo holebira.
PRO 14:12 Mbiralime hariga ogoni pialu kogo bayale porogo ibuni hangu mitangi bu kagome hariga ogoriani homolene harigadago manda nabi pupe haga.
PRO 14:13 Iname oba haramagome bu miniha genda ngago mo ereba naholebira. Turu hagabu holene ngago ereba harangi miniha genda wiaabo holebira.
PRO 14:14 Wali agali ko biaga karu tinime mana ko biragonaga pani nolebira. Anigo mana bayale biaga karu ti nde bayale bialu kagonaga lini nolebira.
PRO 14:15 Mbirali manda emene hangubi kago ibugua marume bi larago bibahende mo henene hai haga ka. Mbirali mini gigabi kago ibugua mana ibunime biraru mamage howa bialu haga ka.
PRO 14:16 Mbirali mini gigabi kago ibugua mamage ho howa genda tara tara ibuha anda ibiragola ibu habagi haga ka. Anigo mbirali mini nawi kago ibugua mbirale bibahende biraru bayuwa mini haru nahe howa ko bule abale pudu laga ka.
PRO 14:17 Mbirali keba abale tungulope haga kago ibugua mana ko luluyu howa biagadagua bialu haga ka. Wali agali maru karume mbirali ibuni hangu mitangi biaga ohe kago ogoni ale biagohondo handabe manga haga ka.
PRO 14:18 Wali agali maru manda emene hangubi karu tinaga mana mini nawi lulume biagadagua bialu haga ka. Anigo mini gigabiwi karume mana bialu karu tinaga mana bayale mandani yári biraligobi biaga ka.
PRO 14:19 Ko biaga karu tigua mana tigabi bialu haga karu andaneha bulu palu howa, Ina dara halu biamogo bidaba, lolene wulebira.
PRO 14:20 Mbirali ibu yagibano heagua ibu dameneore karu tigua agali ogonibi kago handabe manga haga ka. Anigo mbirali ibu homogo heagua ibunaga nenege dewaore holebira.
PRO 14:21 Wali agali mende kago mo ko haga karu ti mana koorene ko ngaru bialu ka. Anigo mbirali yagibano mbirale nawi kago dara halu biamogo biaga karu ti turubiore ka.
PRO 14:22 Mana ko anda helonaga biabe bialu harimiyagua tíni mini nawi koorene ko holeberemi. Biabe bayuwa biaabo harimiyagua wali agali marume tíhondo mini mbiraore wialu tí mini leneore kami lolebira.
PRO 14:23 Biabe bulene ngago bialu kago ibu mbirale yu haga ka. Anigo bame te hadalu biraga kago ibu yagibano holebira.
PRO 14:24 Mini gigabi karu ti mbirale bayale ngaru mo wu howa mini lene haga. Anigo mini nawi lulu ale karu ti tinime mana biragome panigi walia hatagi holebira.
PRO 14:25 Godi larangi mbirali de hendene kago ibugua bi tigatiga binigobi laragome mbirali biago golope holebira. Anigo ai mbirali birago de hendene kago ibugua ke̱ halu bi layagua ogoni ibu wali agali ndelaga holebira.
PRO 14:26 Mbirali ibu Anduane Homogo andaneha haga heagua ibuha gi holene mbira nawi howa ibu hongohe haabo halu ibu waneiginirubi bayale dege hai holebira.
PRO 14:27 Anduane Homogohondo giho halu ibu andaneha haragome iba gagahe bayale nolene ibiraligobi holene bayaleore wulebira. Anidagua biragome mbirali ibuha homolene kaware anda ibiragola mo habo lai holebira.
PRO 14:28 Kini ibugua wali agali dewaore haru heagua ibu mini lene timbuniore ka. Anigo ibugua wali agali emene hangu haru heagua ogoni ibu bame agali damene maru karu ale dege holebira.
PRO 14:29 Mbirali keba abale nahaga kago ibu mini gigabiwi ka. Anigo mbirali keba abale haga kago ibu mini nawi lulu ale ko lalu walia haga ka.
PRO 14:30 Miniha mo palia holene ngelo kago ibunaga tinginibi bayale dege holebira. Anigo miniha dimagoli holeneru henge loleneru wu heagua mana uruni warago koore mbira alegome ibuninaga kunini dere biradagua bulebira.
PRO 14:31 Mbiralime wali agali yagibano karu mo ko halu hengedape hayagua nde ibugua yagibano uruni wabini Ngode Datagaliwabe kagobi mo yo handaragoni. Anigo yagibano karuhondo bayale biaga karu tigua Ngode Datagaliwabenaga mini mo yaraga haga ka.
PRO 14:32 Ko biaga karu tigua mana biragome tini mo ko holene yu anda ibaga. Anigo mana bayale biaga karume ti mbirale mbira hondowa gi nahaga. Tigua homolene kaware wiaguabi tinaga holene yu tiga hongohe haabo haga ka.
PRO 14:33 Mini nawi karu tigua mini giga bulene hai bialu mulene nga manda nabiaga. Anigo wali agali mandabi karu tiha mini giga bulene wiaabo haga ndobe.
PRO 14:34 Wali agali bibahendeme mana tigabi ngaru taluwa bialu hayagua tinaga dindibi nde bayale mini lene dege wulebira. Anigo tigua mana ko ngaru bialu hayagua nde mani tini taga holene wulebira.
PRO 14:35 Kini ibunaga biabe bia haga agali karume biabe bayale bialu heagua nde kini ibuni turu ho haga. Anigo ibunaga biabe bia haga karume biabe bia ko kagola kini ibuni taga howa o biaruhondo handabe manga howa keba timbuni haga.
PRO 15:1 Mbiralime í̠hondo keba gibiore hayagua í̠na ibuhondo bi hendore tabilego ladai beregola ibunaga keba hayago hadolebira. Ai í̠naga bi larego kahe tandagabi lariyagua ibu mo keba holebere.
PRO 15:2 Wali agali mini bayale gigabiwi kagome bi laragola maru karume hale howa bi ogonime manda tigabi bulene mo hamela haga. Ai wali agali mini nawi karume bi latagi haganego galone napale lulu bi ale lalu haga.
PRO 15:3 Anduane Homogohanda dindi bibahendeni biragoni damenego ibunaga deme handaiore ho ka. Ibugua iname beremaruni ko birimayaguabi bayale birimayaguabi bibahende ibu de handayaho ka.
PRO 15:4 Bi mbira turubi laga biragola hale haragome miniha turu holenebi dungu lolenebi anda ibiragola hongo hodaibu hagane. Ai bi ko tandagabigo hale howa bu miniha timu ale ho yu ibagabu haga.
PRO 15:5 Í̠ ai̱ya abalame bi langigi biyago hale halu bia nabi mo wahariyagua í̠ mini nawi kegoni. Ai mo tiga bialu mana laragola hale hariyagua í̠ miniwi kegoni.
PRO 15:6 Wali agali mini tigabiwi karu ti andagani mbirale dewa bu payabu wulebira. Ai wali agali mini kowi karu tinaga mbirale ngarume tini genda dege mo migi bulebira.
PRO 15:7 Wali agali mini bayale gigabiwi karume wali agali maru karubi mini bayale gigabi degewi helo bi lamiaga ka. Ai wali agali mini bayale gigabi nawi karume ogonidagua nabulebira.
PRO 15:8 Wali agali mini tigabiwi karume Anduane Homogo ibuhondo bi larago hale howa ibugua turu timbuniore ho haga ka. Ai wali agali mana ko biaga karume ibuhondo mbirale loma bialu mule yalu ibiragoni ibu hame nalagaore kagoni.
PRO 15:9 Anduane Homogo ibu wali agali mana tigabi hangu biaga karu gubalini ho haga ka. Ai wali agali mana ko biaga karu tinaga mana birago hondowa ibu hame nalagaore kagoni.
PRO 15:10 Hariga bayale pedagoria yu wahalu piaga kago ibu yolo koore mulebira. Wali agali karu ti marume mo tiga bilo hame nalaga kayagua ti homolebira.
PRO 15:11 Anduane Homogohanda wali agali homeneru haga dindi ngago de handai ho kagoni. Ogonigo ibugua ina wali agali dindini kamarunaga miniha mitangi bidamarubi hame ngamarubi manda biaiore ho kago ndobe.
PRO 15:12 Mine haga karu ti mendealime ti mo tiga bilo hame nalaga ka. Tigua mbirali mini bayale gigabiwi kagome mitangi bayale tihondo talebu ngilobi hale halu ngi nalaga ka.
PRO 15:13 Mbiralime ibunaga miniha turuho kayagua ibunaga wanakuini bayale wále holebira. Anigo ibunaga miniha genda ngagola wanakui hila dalihe holebira.
PRO 15:14 Wali agali mini dingidangiale karume manda tara tara bua halu hai biaabo holebira. Wali agali mini boga nabi karume bi bame nagalone dege laabo holebira.
PRO 15:15 Wali agali yagibano karu ti mbirale burupale ko howa genda timbuni wiaabo haga ka. Anigo wali agali turu halu miniha dungulo haga karu ti horo bibahendengi tomo timbuni dawa wuwa nalu hagagobi holebira.
PRO 15:16 Í̠na mbirale emeneru wu howa Anduane Homogo andaneha hariyagua nde í̠naga holeneme homogo muni dewawi karunaga holene bolangua ho ke.
PRO 15:17 Wali agali í̠ gubalini haga karu heba howa tígua nema hangu nalu kamigome wali agali maru í̠ handabe manga haga karu heba howa nogo mbirini nalu hagago bolangua ka.
PRO 15:18 Kera poboyogobi haga kago ibugua maru mo kera haga. Anigo ema nabi hibu lalu hondo kagome mo palia holene yu anda ibaga.
PRO 15:19 Í̠ mangahe keyagua gendabi mangabibi bibahende handa walia holebere. Anigo í̠ henene mini bilinahe keyagua í̠ kegoria genda nawulebira.
PRO 15:20 Waneigini mini bayale gigabiwi karume ti ai̱ya abala mo turu haga. Waneigini mini nawiore karume ti ai̱ya abala yo handaga ka.
PRO 15:21 Mbirali mini nawi lulu ale kagome mana nagalone bialu ibuni turuho haga. Mbirali mini bayale gigabiwi kagome mana tigabi hangu biaga ka.
PRO 15:22 Í̠na biabe maru bule mitangibu keyagua mbirali mandabi kagohondo manda bayale talebu ngilo hale holene nga. Ani biriyagua í̠naga biabe berego bayale holebira. Ani nabiriyagua nde í̠na biabe berego bame erekuibi bu waholebere.
PRO 15:23 Wali agalime bi lalu kagola henge wilo hondo howa í̠na tihondo bi bayale tigabi mbira ogoningi lariyagua ogoninaga í̠ turu holebere.
PRO 15:24 Wali agali mini bayale gigabiwi karume homolene hariga ubadali kadagua ndo haabo holene hariga ubadaga kadagua pialu haga ka.
PRO 15:25 Anduane Homogohanda agali tini mini mo yaraga haga karunaga anda mo ko holebira. Anigo ibugua wali dalo agalini homene bedaru biamogo bialu wali ogoninaga dindi ngaru mendealime nakarulelo handaya ho holebira.
PRO 15:26 Mitangi ko tara tara biaganeru uruni Anduane Homogonaga deni mbirale homene ngubi wiagagobi nga. Anigo bi bayale ina laramaru Anduane Homogo deni bayalego ibu turu holebira.
PRO 15:27 Mbiralime muni dimagoli howa ko tara tara bialu miyagua ani biragome ibu one waneiginiruha genda tara tara yu anda ibulebira. Mbirali ibugua mana ko mbira bilo mendealime muni ohowa mirago wahayagua ogoni ibu bayale haabo holebira.
PRO 15:28 Wali agali mini bayalewi karume mitangi ala buwa mani maruhondo bi ladai biaga. Ko biaga karume bi ladai bialu bayuwa mitangi nabi ala laga biragome ko yu anda ibaga.
PRO 15:29 Wali agali ko biaga karu ti kagoria Anduane Homogo ibu kaware nahaga ka. Anigo wali agali mini tigabi karume Anduane Homogohondo bi laragola ibugua hale ho haga ka.
PRO 15:30 Í̠na mbirali ibunaga wanakui wále howa turuho kane handariyagua í̠bi dungulo holebere. Í̠na te bibi bayale mbira hale hariyagua ogonime í̠ mo turu howa í̠naga tingini mo hongo holebira.
PRO 15:31 Marume í̠ mo tiga bialu bi laragola hale howa miniha mo peho hariyagua í̠ mini bayale gigabiwi kegoni.
PRO 15:32 Í̠na mbira birigonaga marume mo tiga biragola hale nahariyagua í̠nime í̠ni mo ko haregoni. Marume í̠ mo tiga biragola bi hale hariyagua í̠ mini bayale gigabiwi holebere.
PRO 15:33 Anduane Homogo andaneha holene ogoni mini bayale gigabiwi holenenagabi manda bulenenagabi hariga ogoni. Í̠nime ala í̠ni mo dindiha hariyagua mani í̠ mini yaraga hene holebere.
PRO 16:1 Iname mbirale maru bule lo mandabu weremaligoyu Anduane Homogo ibugua mbirale ogoni inahondo bibe nabibe lalu ibunime mandabu bolangua ho ka.
PRO 16:2 Iname mana beremaligo bayale tigabi beramalo mitangi buwa beremali. Anigo Anduane Homogohanda iname mana beremaligonaga irane manda bialu inanaga miniha mitangi bidamagobi dabo handai haga ka.
PRO 16:3 Í̠na mbirale bule manda bidego bibahende Anduane Homogonaga gini wia hai habe. Ani beregola uruni bibahende bayale hai holebira.
PRO 16:4 Anduane Homogo ibugua mbirale bibahende wabiai heneru tigua biabe tara tara bilo mandabu nga. Ogonidagua dege Anduane Homogohanda mana ko biaga karunaga hamaro bulene horo harangi godi lalu wayali nahelonaga dabo ngeleda.
PRO 16:5 Anduane Homogohanda wali agali mine halu tini mini mo yaraga haga karuhondo turu nahagaore ka. Ibugua ti bame pelo wa nahe ibunaga hongo holene walia halu pani mulebiraore. Ogonidagua bulebirago iname manda bulene nga.
PRO 16:6 Mbiralime Anduane Homogo gubalini howa ibuha hogimbu bu kayagua ibunaga ko biyago bibahende Anduane Homogohanda domo waholebira. Mbiralime Anduane Homogo andaneha kayagua ibu ko bulene ngagoria howa wandialu bayale holebira.
PRO 16:7 Í̠na Anduane Homogohanda hameledadagua bialu ibu mo turu halu hariyagua í̠naga waitigi karu mo nenege bu hinu holebere.
PRO 16:8 Í̠na mana tigabi bialu howa mbirale emene wu hariyagua ogonidagua bidegome mbirali ibugua ko bialu howa munibi mbirale dewabi wu kago bolanguahe holebere.
PRO 16:9 Í̠na ogoale mbira bule lalu lo manda beregola Anduane Homogo ibugua í̠na berego bibelo mo tiga bialu haru holebira.
PRO 16:10 Kini karume wali agalihondo bi lamirago Anduane Homogo ibunime laminigo laga ka. Godi lolene horo harangi ibugua wali agalime bi larago dabalu tigatiga hangu laga ka.
PRO 16:11 Anduane Homogohanda lalu, Magi manda beregobi genda magi handaregobi tigatiga howa hangu handalu yolo mule wulene nga. Wali agali mo hondo holene nawi, lene.
PRO 16:12 Kini karu tigua wali agalime ko birago hondowa hame nalagaore ka. Irane mana tigabi hangu biragome gabumane karu mo hongo holebira.
PRO 16:13 Kini karu tigua wali agalime bi henene larago hale howa ogonibi laga karuhondo turu haga ka.
PRO 16:14 Kini ibugua mbiralihondo keba hayagua ogoni ibu bo wahole manda bulebira. Anigo wali agali mini bayale gigabiwi karume kini mo turu haabo hole manda bulebira.
PRO 16:15 Kini ibu mbiralihondo turu ho kayagua ibugua o biagohondo bayale dege biragola ibu bayale holebira. Kininaga mana ogoni tomo anda helo ginume dalu hambu yuwa ibilaradagua biaga ka.
PRO 16:16 Í̠ mini bayale gigabiwi howa manda bayalebi keyagua ogonibi kegome muni ngolo silibala bolanguaheore yu ke.
PRO 16:17 Wali agali mana tigabi biaga karu ti ko bulene hariga ngagoria wandialu bayaleni piaga ka. Anigo mbiralime ibuni birago de hondo halu mamage hayagua holene bayale yu haabo holebira.
PRO 16:18 Mine holeneme mo ko holene waranda halu balagala holeneme í̠ mo pila holene hinu holebere.
PRO 16:19 Marume mine howa mbirale dewa page bialu mo wini tale bialu haga. Anigo mbirali ibuni mini mo dindiha halu yagibano karu heba hayagua mana ogonibi biragome mine haga uruni bolanguaheore ka.
PRO 16:20 Mbiralime mana bayale lawai henego yu tiga bialu hayagua ogoni ibunaga holene bayale wulebira. Anduane Homogohondo mini mbiraore hongo howa wu hariyagua miniha dungulo holebere.
PRO 16:21 Mini bayale gigabiwi karu hondowa bibahendeme ti manda bayalebi bogabi ka lai haga ka. Tigua bi bayale lagayagua wali agali marume tinaga bi larago hale hole hame lolebira.
PRO 16:22 Mini nawi lulu ale karu tigua mana nagalone dege manda biragome tini mo ko haga. Anigo mini bayale gigabi wulene ogoni yu karuhondo holene bayale to̱latagi howa miagago ale nga.
PRO 16:23 Mini bayale gigabiwi karume mitangi ala buwa mani bi bayale laga. Ani laragola wali agali marume hale hoa haabo holebira.
PRO 16:24 Bi bayale laragoni mone ibane ale dendebi ogonime wali agali hale hararu tinaga miniha mo didi bia howa tinginibi mo hongo haga.
PRO 16:25 Wali agali marume ti hariga tigabini pialu kamabe toba howa piaga. Ani mitangi bialu piagago pu maro biragola homolene dege handa walia haga ka.
PRO 16:26 Biabe biaga karume mitangi bialu ti biabe nabiyagua nde tomo nolene nawulebirago lowa ogoni mitangi biragome ti biabe erekuibi biaabo helo mo hongo haga.
PRO 16:27 Wali agali mini koorewi karume wali agali maruhondo ko bule lowa hariga tara tarani taya biaga. Tinaga bi laragoni ira hungu timbuni ale daradagua bialu wali agali mo ko haga.
PRO 16:28 Ko biaga karume wali agali maru karu tini dege dege lai lelo mo la haga ka. Bi diburibu laga karume kirali nenege turu haga bu kagolabo mo keba haga bialu mo dala hangu hangu haga ka.
PRO 16:29 Mbirali kebahe kagome mendeali bo wahaga biaga kago ibunaga nenege la debodebo bialu hariga koni haru halu piaga kagoni.
PRO 16:30 Wali agali í̠hondo bi nale ne hambu ndibu lowa debia haga kagoria nahe ti de hondo mamage habe. Wali agali urunibi biaga karu ti ko mbira bule lo mandabu haga ka.
PRO 16:31 Wali agalime maru daguahe karu hondowa manda bialu wali agali wahe uruni ti mana tigabi bialu dindini lu heneda manda biaga ka. Ani manda buwa tinaga mini yaraga haga.
PRO 16:32 Mbirali keba abale nahaga kago ibu mana bayale bira. Ogonidagua biragome ami agali wayali hagane kago bolanguahe haga ka. Mbiralime ibuninaga mini bayuwa haru haga kago ibu agalime wai bialu wayali howa tano mbira karulo hagagobi ndo ibu daliga bolanguahe ka.
PRO 16:33 Wali agali marume mbira agi bibahedabe hondole tadu biaga. Anigo Anduane Homogo ibugua wali agalime ogo ale bilo lalu ibunime mandabu ngeleda.
PRO 17:1 Mbirali ibu one waneigini heba mini mo mbiraore howa hina hangu nalu kagome wali agali dewa heba keba halu lai gungu bialu howa tomo timbuni dawa nalu kago bolanguahe kagoni.
PRO 17:2 Agali garabaya biabe ale bia haga mbira ibu manda bayalebi howa ibunaga biabe bayuwa biyagua ogoni ibugua ibunaga anduane biagonaga igini habane nabulene kago haru haga holebira. Ani haru karia ibu anduane biago homaragola mbirale paluni winiru tale bialu ibu igini mialu ibubi mulebira.
PRO 17:3 Ngolo silibabi irani delowa ko bayalela dabo handagadagua Anduane Homogohanda ina wali agali bu miniha dabo hondolebira.
PRO 17:4 Wali agali ko biaga karume ko binigonaga te larago hale hoa haga. Ke̱ haga karumebi ke̱ henegonaga te larago hale hole hame laga ka.
PRO 17:5 Í̠na yagibano karu hondo oba hariyagua Ngode Datagaliwabe í̠ wabinigobi mege dege beregoni. Í̠na wali agali maru genda yu kago hondowa mine halu mege biriyagua í̠ni pani nolene wulebira.
PRO 17:6 Wali agali wahe karume ti aguane hondowa turu timbuni haga ka. Ani turu hagadagua waneiginirumebi ti ai̱ya abalahondo turu haga ka.
PRO 17:7 Bi bayale lolenego ogoni mini nawi karunaga bi ndo nga. Ogonidagua dege ke̱ holenegobi wali agali mini lene karunaga ndo nga.
PRO 17:8 Mbiralime wali agali maru muni hana haga buwa ibuni manda bialu muni ogonime ibu hameme tara tara bule manda biaga.
PRO 17:9 Í̠na wali agalime í̠hondo gubalini helo hame lariyagua tigua í̠hondo ko birago la nabi wahabe. Ko biyago embeda nahe mitangi bu wiaabo hariyagua ogonime í̠naga nenegeali mo dala hangu haga biaga.
PRO 17:10 Í̠na mbirali mini bayale gigabiwi kagome mbira biragola mo tiga biriyagua halu mbira hangu lamideore ibugua abale manda bialu mo yulebira. Anigo í̠na mbirali mini nawi kago mo tiga bialu gewame pira pira bariyaguabi ibu manda nabi dege haabo holebira.
PRO 17:11 Wali agali ko bialu haabo haga kagoria ti mo tandaga holenaga mbira ibilaradagua homolene íbu wulebira.
PRO 17:12 Í̠na biango ale mini bea iginiru minu page binigonaga angibuni ogoni harigani lola hariyagua í̠ bo nolebira manda buwa gi holene karulape nga. Anigo í̠na agali mini nawi kagome mana ko ngago bule mitangi bu kago lola hariyagua nde koorene ko timbuniore holene tagira ibulebirago manda bibe.
PRO 17:13 Marume tíhondo bayale biragola tígua tihondo ko biadai birimiyagua horo bibahendengi tí andagaha genda ko tara wiaabo holebira.
PRO 17:14 Agali mbirame keba emene hayagua ogoni iba payadagoha diri emene bo wia haradagua biaga. Ani biragola iba piai holilono abale diri bo wiragoria payagadagua keba timbuni anda ibuligo abale paya pai holene nga.
PRO 17:15 Mbiralime mana koore biragola mo tiga nabi bame yupe holenebi mendealime ko nabini kago bame pani mulenebi mana kira ogonilabo Anduane Homogo ibu hame naleore ka.
PRO 17:16 Wali agali mbirali mitangi bayale nabiaga kagome ibu mini gigabi wulene hame naleyagua irane aginaga ibu sigulu muni wule yalu ibinidabe.
PRO 17:17 Nenege bayale karume ta nabi horo bibahendengi gubalini haabo haga. Anigo ina genda yu kamangi ina hamenerume yamogo bule ibaga ka.
PRO 17:18 Agali mbiralime dano mbirame hene ngago ibugua mibe nahe howa i̱na muliya layagua ibu mini nawi ka.
PRO 17:19 Ko bulene hamelo kago ibugua wai bilo mo bia haga. Mine haabo haga karume mo ko holene hai biaga.
PRO 17:20 Mbiralime ko hangu mitangi bialu bi ko hangu laabo haga kago ibu bayale mbira handa walia nahe ko dege hondolebira.
PRO 17:21 Waneiginime ti mini nawi howa ko biaabo haga kayagua ti ai̱ya abalame miniha genda howa dara ho haabo holebira.
PRO 17:22 Miniha turu holene ogoni marasini wali agali mo bayale haga ale nga. Anigo wali agalinaga mitangi bulene dindiha haabo haga kayagua ogoni warago ko mbiralinaga kuniha mo ko hama anda piagago ale nga.
PRO 17:23 Wali agali karu tinaga godi la helo lowa tigua godi dabaga tiga nabi kagohondo muni ohowa miragola godi dabaga biago ibu muni mo yu howa godi tigatiga lolene ngadagua ndo lolebira.
PRO 17:24 Wali agali mandabi mini dingidangiale kagome mana birago tigabi hangu bule manda bulebira. Anigo mini nawi kagome mbirale ngaruni bia dege dindi halu hariga ngaruha pu dege dindi holebira.
PRO 17:25 Waneiginime mini nawi howa mana nakarulape bialu haabo hayagua tigua ti ai̱ya abala tandaga gendabi holene mo yu anda ibaga.
PRO 17:26 Godime lalu howa agali ko nabi kago yolo bia layagua ogoni nakarulape. Agali mini lene karume mana tigabi biyagonaga gewame bolene ogoni nakarulapeore ngagoni.
PRO 17:27 Mbirali mini bayale gigabiwi kagome bi nahabane nalolebira. Mitangi bayalebi kagome keba abale naholebira.
PRO 17:28 Anigo mbirali mini bayale nawi kagome ibu bame bi nale ne hambu ndibulo hayagua marume mitangi bialu ogoni ibu mandabi mbira kagoni lolebira.
PRO 18:1 Mbirali ibu wali agali maru heba nahaga kayagua ogoni ibu ibuni hangu mitangi haga ka. Ibugua wali agali marume mitangi bayale biragonaga hame nale howa lai lolebira.
PRO 18:2 Mbirali mini nawi kagome mitangi bayale bulenebi manda bayale bulenebi tanabi hame nalaga ka. Ibugua biagago damene mine halu ibu manda biaihe tingi howa biaga ka.
PRO 18:3 Ko biaga karume maru karu ti habane nabulene kagoni laga. Ani lowa tigua maru mo taga halu tinaga mini mo ko haga.
PRO 18:4 Mini bayale gigabiwi kagome bi larago galone dewa pale. Iba biru to̱lalu pugulo tagitagi bialu piagadagua mini giga bulene ogonime to̱lotagihe howa laga ka.
PRO 18:5 Mbiralime ko bidagola godini howa biamogo bialu laholene nawi. Mbirali ko nabini biago ibu godini howa yo pialu polene winigoyu í̠na hariga hangai haregome mana ogonibi bulene nakarulape nga.
PRO 18:6 Mini nawi kagome wali agali maru baba bi lai hangu lalu kayagua tigua ibunaga bi ogoni hale howa ibuni belonaga dano biaga.
PRO 18:7 Mbiralime mitangi bayale nabi howa bi layagua ibuninaga bi laragome ibuni mo ko halu gono ngagoha wiradagua biaga.
PRO 18:8 Wali agalime diburibu laragola iname turu halu hale hoa haramali. Bi ogoni tomo dendebi naramaligo bidagola hale hole dendeho haramali.
PRO 18:9 Biabe bulene mangahe kago ibu mbirale mo ko haga kagobi ka.
PRO 18:10 Anduane Homogo ibu anda mbira hongohe hagagobi kagoni. Anduane Homogo ogonibi kagola wali agali mini tigabiwi karu ti gerai puwa ibuha bayale ha do holebira.
PRO 18:11 Wali agali homogo karume tanonaga pabe hongoheme payanda hagadagua tinaga muni ngarume tini pabe bia anda kagola bayale kamalo manda bialu haga.
PRO 18:12 Mbiralime mine halu ibuninaga mini yaraga hayagua ogoni ibu mani mo ko holebira. Í̠ni ala mo dindiha nahariyagua í̠ mini lene ndo holebere.
PRO 18:13 Bi larago baya hangu hale hai howa mani í̠na ladai bulene nga. Ogonidagua nabiriyagua í̠na lulubi lagadagua lowa mani í̠ni taga holene wulebira.
PRO 18:14 Mbiralime warago bo wuwa ibunaga minime holene hame layagua ogonidagua manda biragome ibu mo dabi holebira. Anigo ibunaga minime holene ogoni galone ndo manda biyagua nde anidagua manda biragome ibunaga holene ogoni abale yupe haga.
PRO 18:15 Wali agali manda timbunibi karume manda bulene maru mendealime lawai harago hame lowa abale mo yai hole hale ho holebira.
PRO 18:16 Í̠na agali haguane mbirala bi lole manda buwa ibu mo turu halu mule mbirale mbira yalu piriyagua ibugua í̠ henge ngialu íbu lolebira.
PRO 18:17 Mbiralime godi deni howa bi pigane larago bayale tigatiga hangu lene mbau lolebira. Agali marume hale halu bi ogoni mo wála ha laragola agali ago ibu wayali holebirabe manda bibe nahe.
PRO 18:18 Agali manda timbunibi kirame godi laragola mo tiga nabibeheyagua godi hale hagame tadu ale to̱le̱ emene baraga halu agali ai ibu wayali hayadabe hondolebira.
PRO 18:19 Í̠na í̠ hamene miniha keba ho helariyagua wali agali maru anda naibilo tanonaga pabe payatagi hagadagua ibunaga mitangi bulene paya anda haregola í̠ hame nale howa bi nalolebira. Anigo agali kirali lai lo howa mo tiga bialu libu gi tigani nabiyagua ogonime hariga hangai kagola libu mini mo mbiraore habe nahe panga hongoheme payatagi kagola anda pobe nahe hagadagua holebira.
PRO 18:20 Bi laregonaga lini í̠niore nalu holebere.
PRO 18:21 Í̠na bi laregome wali agali karu bayale helo biamogo bialubi mo ko halubi larili. Ogoni manda buwa í̠na bi bayaleru hangu lole manda biriyagua bayale holebira.
PRO 18:22 Í̠na wandari mbira dabu biriyagua ogoni bayaleore. Ani biriyagua Anduane Homogo ibugua í̠hondo turuho ka lalu walia ho kegoni.
PRO 18:23 Yagibano kagome homogo kagohondo ibu biamogo bia lalu bi hendore laga ka. Anigo homogo kagome yagibano ladai bialu bi bayale ndo hongo howa ladai biaga.
PRO 18:24 Wali agali dewa nenege hinariru í̠ yu wahalu piai holebiragoyu maru mbira mbira hangume í̠ hamene mbalinila haradagua ndo í̠ha haparaore holebira.
PRO 19:1 Mbirali ibu yagibano howa mini tigabi kayagua ibugua mbirali mini nawi howa ke̱ haga kago bolanguahe ka.
PRO 19:2 Wali agali mbiralime mbirale mbira bialu howa ogo ale berolo manda nabi howa bialu hayagua ogoni nakarulape bira. Mbiralime biabe mbira ala bigi bule manda biyagua biabe ogoni biako holebira.
PRO 19:3 Wali agali marume mini nawi howa biyagome tini mo ko howa mani Anduane Homogohanda ko ogoni ibilayada laga ka.
PRO 19:4 Homogo kago ibu nenege dewa haga ka. Anigo yagibano kago ibunaga nenege kagome ibu yu wahalu poragola nenege mbira naheore holebira.
PRO 19:5 Í̠na godi lalu howa ke̱ halu lariyagua í̠ yo pialu polene nawi pani nolene wulebira.
PRO 19:6 Wali agali dewalime mini lene karu ti mo dunini halu hamelo haga ka. Mbiralime mbirale mbira miaga kayagua wali agali dewalime ibu nenege hole hame lolebira.
PRO 19:7 Agali mbira yagibano kayagua ibu hamenerume ibula holene hame nalaga ka. Ibugua ti kagoria ladebodebo bima haparapara bima piyaguabi ibunaga bime mbira yamia nabulebira.
PRO 19:8 Mbirali ibugua ibuni biamogo bule manda biyagua ibu mini bayale gigabi holebi manda bayalebi holebi hoa howa hai bulebira. Ani buwa ibugua manda bulene bayale ogoni ibunaga emboneha mo yu hayagua ibuni holene mani bayale dege holebira.
PRO 19:9 Mbirali ibu godi lalu howa ke̱ haga kago pani nolene ngagoria howa yo pialu napolebira. Ke̱ haga ogonibigo tigua bo homelolebira.
PRO 19:10 Mini bayale nawi kagome munibi mbirale marubi dewawi hayagua ogoni nakarulape. Garabaya biabe ale bia hagarume wali agali mini lene karu haru hayagua ogonibi nde nakarulape dege.
PRO 19:11 Í̠ mini bayalewi keyagua í̠ keba abale holigo í̠naga mini haru holene nga. Mbiralime í̠hondo ko biragola í̠na mitangi bu wiaabo nahe hariyagua bayaleore beregoni.
PRO 19:12 Kinime keba hagago budi gabua ale laionome ngororo hongo howa lalu keba hagagobi haga. Anigo ibu miniha dungulo howa wali agali biamogo biragola dalu ibiragome datani bayale mo anda hagagobi haga ka.
PRO 19:13 Waneigini mini nawi karume ti ai̱ya abala mo genda timbuni holebira. Agali mbira one ibu wali keba abale hagabi lai laabo hagabi bedago ogoni ibu anda dangiha diri ngagola iba emene bondo laabo haradagua biaga beda.
PRO 19:14 Aba ai̱yame munibi andabi iname hondo holoma̱ya ngibehe kagoni. Anigoyu Anduane Homogo ibugua hangu ina agali kamaruhondo wandari mini bayalewi ina one berelo ngibehe kagoni.
PRO 19:15 Wali agali mangahe karume u hangu paliaabo haga ka. Wali agali bame gi pauloyu bira hangu biaga karu ti tomo nolene nawidagola garibilo haabo holebira.
PRO 19:16 Ngode Datagaliwabenaga bi mana lo ngaru talialu biaga kago ibu bayale haabo holebira. Ngode Datagaliwabe mana lo ngaru talia bia nabi erembira miaga kago ibu homolene wulebira.
PRO 19:17 Í̠na yagibano karu dara howa mbirale miriyagua í̠ Anduane Homogola dano haradagua bidego mani ibugua í̠hondo yadai bulebira.
PRO 19:18 Tínaga waneigini emeneni howa mini bayale wilo mo tiga bilimu. Ani nabi helarimiyagua mani tini hama pialu ha ko holebira.
PRO 19:19 Mbirali keba abale haga kayagua ibuni ko biyagonaga genda yu helo wahabe. Í̠na ibu genda yu kago biamogo biriyagua nde manibi í̠na ibu lone biamogo dege biaabo holebere.
PRO 19:20 Mbiralime í̠ lawai haragola í̠na bayuwa hale howa mitangi bayale bulene talebu ngirago mo yu hariyagua mani í̠ mini bayale gigabi wulenebi manda bayalebibi holebere.
PRO 19:21 Wali agalime mbirale tara tararu bule lowa mandabu wiaga. Ani manda bu wiagago Anduane Homogo ibugua bule manda manda bu wini ngago dege tigua bulebira.
PRO 19:22 Mbiralime buleore lalu bi hongo howa lo wiyago biaga kago wali agalime ibu hameore laga. Yagibano holene nakarulape howa yagibano karu tigua ke̱ haga kago bolangua howa bayale kagoni.
PRO 19:23 Í̠na Anduane Homogonaga andaneha hariyagua ibugua holene gahenge ngiaga ka. Ani ngiragola yu howa í̠ bayale haabo halu mo ko holene mbira í̠ kegoria nawulebira.
PRO 19:24 Wali agali maru mangahe kagome tomo ngago gime mialu ne harigaha nolenebi manga dege haga kagoni.
PRO 19:25 Mine haga kago mana lalu minu bariyagua mini nawi kagome barego de hondowa ibu manda bialu mini bayale wulebira. Í̠na mbirali mini bayalewi kago mo tiga biriyagua ogoni ibu manda bayale bialu mini bayale gigabiwi holebira.
PRO 19:26 Waneiginime ti ai̱ya bo batagi halu ti abahondobi ko dege bialu hayagua ogonime ti damene mo tagaore haragoni.
PRO 19:27 I̱ waneigini-o tí mini bayale gigabiwi holenaga mana bayale lo manda bulene manga harimiyagua mana áyu yu kamigo wahalu tí mini nawi holeberemi.
PRO 19:28 Ko biaga kagome godi deni wiyanaya hayagua ibugua mo hondo haragome godi tigabi nadabolebira. Ko biaga kago ibu mana ko ogonibi hamelalu dende haga.
PRO 19:29 Bi ko laga karubi mendeali lahiraga karubi ti minu bolene wulebira. Mini nawi howa ko biaga karu tibi nde ani dege bulene wulebira.
PRO 20:1 Agalime iba mbia dewaore nayagua bi ko taratara dewa lalu gungu bia dege dindi holebira. Mbirali iba mbiame ibu haru helo hayagua ibu mitangi tigatiga nabiaga lulu ale ka.
PRO 20:2 Hari kulu timbuni laga biragola wali agali bibahendeme mogo lalu gi hai hagadagua kini kago keba harago hondowa wali agali gi hai haga. Kini kago keba helo lowa mo keba hariyagua í̠ni homole andanda bialu kego homolebere.
PRO 20:3 Lai lalu gungu bulene kaware nga handala wahalu erembira mialu piriyagua í̠ mini lene holebere. Ai wali agali mini bayale nawi kagome lai lalu gungu abale porabu paraho holebira.
PRO 20:4 Agali mangahegome ibu mabuni tomo hongole dindi aluene ngangi alia nabi mangani wahayagua ibu ani biragome mabu ogoriani tomo wini mbira buyu pialu nanolebira.
PRO 20:5 Wali agalinaga mitangi bulenego iba uliha goriane biraradagua bidago mbirali dehe bogabi kago ibugua ibunaga bime miniha paliaruagoni haealo hondolebira.
PRO 20:6 Dewalime ne harigaha howa ibu nenege bamba henegola haho wiaabo haruli lolebirago ogoni bame bime lara. Anigo mini bilinahe howa henene aniore biaganego mbirani mbira mbira kabe hondole hai bibe.
PRO 20:7 Waneigini aba ibu agali mini tigabiwi howa mana bayale hangu biaga kayagua ibu waneigini karu ti turu habehe ka.
PRO 20:8 Kini ibugua godi dabaki bule biragane dagiani biruwa godi hale hole ibiraru de hondowa ibugua ko bini bayuwa dabalu handa walia haga.
PRO 20:9 Mbiralime, I̱ha ko mbira nawi bayale tigatiga hene kogo áyubi ko mbira nabiore kogoni, lalu aiwa labehe kabe.
PRO 20:10 Wali agalime mbiralinaga mbirale yolo mule yalu ibiragola genda magi handalu howa ke̱ halu dibaudu haga karu tihondo Anduane Homogo ibugua turu nahaga ka.
PRO 20:11 Iname mbirali ibunaga mana birago hondowa ibu ogobi ko lalu walia haragola handabehe kama. Ogonidagua dege waneiginiru tigua biragome ogobi kama lalu walia haga kagoni.
PRO 20:12 Anduane Homogohanda ina de hondoloma̱ya inahondo de ngialu hale holoma̱ya halebi ngiaga ka.
PRO 20:13 Í̠ palia hangu biaga keyagua mbirale nayi yagibano holebere. Anigo í̠na biabe biaabo hariliyagua tomo nolene dewa bu payabu wuwa karulapeore nalu holebere.
PRO 20:14 Mbiralime mbirale mbira yolo mule howa ogoninaga yolo daligaoreda lowa bi dewa laabo haga. Ani lowa ibugua mbirale wiago yolo buwa ibunaga nenegeruhondo balagala halu lalu, Ogoni yolo dindiha winiyago miru, laga.
PRO 20:15 Í̠na manda timbunibi howa wali agali mo wála halu bi laregome ngolo silibabi to̱le̱ marubi muni timbunime miaganerubi ndo uruni í̠na bolanguahe holebere.
PRO 20:16 Mbirali ibu dano henego ibunime mibe nahedagola mendealime i̱na mia holiya lo kayagua ogoni ibu mini nawi ka. Anigo mbiralime í̠hondo dano hole ibiragola ibunaga mbirale mbira í̠ mo yu hole manda bibe. Mani í̠naga dano hayago ngiragola ibuni yadai bule.
PRO 20:17 Í̠na ke̱ halu mbirale mirigoni tomo dendebi ale manda bialu yu ke. Anigo mani howa í̠naga ne harigaha iba mu to̱lo tagiho hayu hene mbau lolebira.
PRO 20:18 Í̠na biabe mbira bule mitangi bialu howa bayale bulenaga mini giga bulene ala hai bibe. Í̠na waitigi baba wai bule manda biriyagua wai agua buledabe lo manda bibe.
PRO 20:19 Wali agali bi diburibu laga karu tihondo bi hagarere lalu lamirigo tigua bi ogoni maruhondo abale lamigi bima polebira. Ani bulebirago diburibu dewa laga kago baba nenege holene nawi.
PRO 20:20 Í̠na í̠naga ai̱ya abalahondo bi ko lalu ha hariyagua hale lamu hundiragola arumaha hagadagua í̠naga holene abale ereba holebira.
PRO 20:21 Mbirali ibu ai̱ya abala homa nabi kaore paluni ala karulole manda biyagua mbirale uruni bayale wu ha nabulebira.
PRO 20:22 Mbiralime í̠hondo ko biyagua í̠na ko biadai bule manda nabibe. Anduane Homogohanda í̠naga genda ogoni mo tiga bilo lowa ibunaga giha ngelowa ibuhondo mini mbiraore wu habe.
PRO 20:23 Wali agalime mbirale yolo bule biragola agali mbirame genda magi handalu howa ke̱ hayagua Anduane Homogo ibugua o biagohondo turu nahagaore ka.
PRO 20:24 Ina dindini kamangi hariga pialu holoma̱yanaga Anduane Homogohanda manda mandabu ngela haga ka. Anigo mbiralime ibu polene hariga ogoriani pialu holebero lalu ibuni hangume manda bibe nahe.
PRO 20:25 Í̠na Anduane Homogohondo mbirale mbira mule howa mitangi ala bayuwa buwa nguliya lalu tigatiga lo wibe. Abale hibilaba lo howa nguliya lariyagua mani mini dege dindi holene wulebira.
PRO 20:26 Kini mini bayale gigabiwi kagome godini dabaki halu howa mbiralime ko biyago handa walia halu dara nahe pani mulebira.
PRO 20:27 Inanaga dinini Anduane Homogohanda wá hagane hale lamu ale nginigo iname bibahende mitangi beremarubi mana beremarubi bayuwa dabalu hondoloma̱yanaga ngini.
PRO 20:28 Kini kagome ibunaga wali agaliruhondo tigabi dege bialu ti dara howa biamogo biyagua ibu bayale haru halu lu haabo holebira.
PRO 20:29 Iname igiri hongohe daliahe kago hondowa turu haramali. Wali agali wahe daguaheru kago hondowa iname ti bayuwa mitangi bialu tinaga mini yaraga holeberema.
PRO 20:30 Mbiralime ko biragola í̠na tibume bariyagua mani ogonime ko biyago erembira mialu ibu bayale miniwi holebira.
PRO 21:1 Anduane Homogohanda iba ganaha pelagadagua ibugua kininaga mini mandaru ibu hame ledadagua bilo mo tiga bialu haru haga ka.
PRO 21:2 Í̠nime manda bialu keria mbirale í̠na bialu keruni bayale dege bialu ko manda birili. Anigo Anduane Homogohanda í̠ miniha mitangi bu keruni manda biai howa irane ogonaga ani berego lalu manda biai ho ka.
PRO 21:3 Iname mana tigabi ngaru bialu holene bayaleore nga. Anduane Homogohondo lomabu meremago nira lowa mana bayale tigabi uruni bialu holenego ibunaga deni duniniore nga.
PRO 21:4 Mana ko biaga karu tigua mine haragomebi balagala haragomebi ti haru haragola mana ko dewa tiha to̱lo tagihe holebira.
PRO 21:5 Biabe biaga kago ibu minime manda ala buwa ogo aleore bulebero lalu biyagua ibugua mbirale bayale dewa yu haga. Anigo mbirale miniha mitangi ala nabi howa abale bupebe biyagua biabe ibugua birago bayale ndo halu ibu mbirale tubagiho haabo haga.
PRO 21:6 Mbiralime mana ke̱ halu mandabi tingi howa mbiralinaga mbirale mbirale ngaru homogo holenaga dewa mo yaga heagua ogoni ibu homolenaga harigani pu ka. Ani wu kagola ibunaga muni dabudabu wiyaruni ereba hai hole emene tigi mbira hanguni harini ginu wiagagobi nga.
PRO 21:7 Mana ko biaga karume mana bayale bule hame nalaga howa tigua maru karu bo wahagahaga biragome podene maru tiniha dai bialu tini mo ko hai holebira.
PRO 21:8 Mbirali mana ko biaga heagua ibugua mana ko bima puabo holebira. Ai mbirali mana ko nabiaga bayale heagua ibugua mana tigabi ngaru bima puabo holebira.
PRO 21:9 Agali mbirali ibu oneme lai laabo hayagua anda mbiraoreha paluene emene bayale lowa agali ibu tagira pu holenego bayaleore nga.
PRO 21:10 Mana ko biaga karume mana ko damene ngaru bulene garibilo haabo haga. Ani bialu tigua maru karu dara nahaga ka.
PRO 21:11 Mbirali mine halu balagala haga kago pani mirago hondowa maru mini nawi karu ti deme handalu minime manda bialu irane handa walia haga ka. Anigo mbiralime mana lawai haragola mini gigabi kagome ibunaga manda bulene wia tago holebira.
PRO 21:12 Anduane Homogo ibu mana tigabi hangu biaga kago ibugua mana ko biaga karume tini andaga tamuha biruwa bia do halu karubi heba dehandai haga ka. Ani hondowa Anduane Homogo ibugua mana ko uruni ale biaga karu mo ko hai holebira.
PRO 21:13 Yagibano karume ti biamogo bia lalu í̠ olaragola í̠na hale nahe tingi halu piriyagua mani marume í̠ni nde biamogo bia lalu olariyagua tigua hale nahe tingi halu í̠ biamogo nabi wahalu polebira.
PRO 21:14 Mbiralime í̠hondo keba hayagua wali agali marume nahende kaha libuni hangu howa ibu mo turu halu mbirale mbira bame ibu mibe. Ani meregola ibunaga keba ho hayago ereba holebira.
PRO 21:15 Wali agalime mana bayale bilonaga lo tiga biragola wali agali mini tigabiwi karume de hondowa ti turu haga. Anigo maru mana ko biaga karume de hondowa tinaga bu miniha genda timbuni ho haga.
PRO 21:16 Mbirali ibu mini gigabi wulene hariga ngago yu wahalu piyagua ogoni ibu homalu homene dininiru baba humbirini andaha hama polebira.
PRO 21:17 Mbirali ibu tomo bayale noleneru waini iba nagimbu buleneru mo tene halu turu howa awadaga holene hamelo heagua nde ibunaga muni biba halu mbirale bibahende tubagi hai holebira.
PRO 21:18 Mini kowi karume mbirali bayale tigabi kagoha genda mo mule manda bialu karia genda biago lone mini kowi biaru tini karia íbu dai biaga.
PRO 21:19 Agali mbirali ibu oneme lai lalu go̱mo̱go̱mo̱ laabo hayagua anda mbiraoreha paluene emene bayale lowa agali ibu tagira pialu dindi ko wali agali nahaga ngagoha holene ogoni bayaleore nga.
PRO 21:20 Mbirali mini gigabiwi kago ibu andagaha mbirale bayale ngaru dewaore mo wiaga. Anigo mbirali mini nawi kago ibugua ibunaga mbirale anda ibiraru abale mo hole biai haga.
PRO 21:21 Mbirali ibugua mana bayale ngaru talialu bialu wali agali maru karu gubalini halu hayagua ibu holene bayale yu holebira. Ani biragola marume nde ibuhondo mana tigabigo hangu bialu tigua ibu mini lene ka lolebira.
PRO 21:22 Mbirali mini gigabiwi kago ibugua ami agalime wai bialu tano mbira karulelo wai hono miaga ka. Tano ogoniha haga karume manda bialu wai pabe hongohe kagodago waitigi karume wai anda ibalu bo poda nabulebira lo manda bu haga. Ani manda bu karia waitigirume wai pabe podama anda pialu tano karulaga.
PRO 21:23 Wali agalime tininaga ne hambu haru howa bi laga heagua uruni tiha genda naanda ibaga.
PRO 21:24 Mine haga karume balagala howa maru karuhondo mege bialu haga. Ani bialu howa horo bibahendengi ibuninaga mini hangu mo yaraga halu haabo haga ka.
PRO 21:25 Biabe bibe manga haga kago ibugua biabe nabi howa mbirale bame awadaga mo yu holene hamelo karia nayiore halu hame loleneme ibuni balu homelolebira.
PRO 21:26 Mangahe o biagome mbirale dewaore bame yulene hangu mitangi bialu haga. Anigoyu mbirali tigabi biaga kago ibugua maru karuhondo mbirale turu halu bame tale bialu miaga ka.
PRO 21:27 Anduane Homogo ibugua ko biaga karu tinaga lomabu mirago hondowa ibu turu nahaga ka. Mbiralime mo hondo howa mana lehe biagarume lomabu miyagua Anduane Homogo ibugua mana ogoni ko ngubioreda manda biaga ka.
PRO 21:28 Mbiralime ko birago mendealime i̱na handaru lowa ibu ke̱ haga kayagua ogoni ibu homolene wulebira. Anigo mbirali ibu bi baya hangu hale hagame bi layagua maru bu karume ibunaga bi larago baya hangu hale haga.
PRO 21:29 Mbirali mana ko biaga kago ibu ke̱ halu ohowa ibu agali tigabi hetingi haga. Anigo mbirali tigabi bayale biaga kago ibugua mana birago bibahende bayale helonaga mamage howa biaga.
PRO 21:30 Í̠ Anduane Homogola waitigi hariyagua í̠ha mini gigabiwi kegobi manda bayale bu kegobi maru ale ngaru biaga mugube yu kegobi uruni bibahende nagalone hai holebira.
PRO 21:31 Ami agali karume wai bu polenaga nogo hosiru mo manda manda biaga. Ani biagago Anduane Homogo ibuni degeme tigua wai bialu mo wayali helaga ka.
PRO 22:1 Mbirale dindi dabudabu bu payabu wuwa homogo holenego nagalone lowa wali agalime abogo mini tigabi mana baya gibi biaga ka lene holenego bayaore gibi duniniorego ogoni dabolene nga.
PRO 22:2 Wali agali homogo karubi yagibano karubi bibahende Anduane Homogohanda wabini dege bu ka.
PRO 22:3 Wali agali miniwi dehe karume handalu karia genda bulene ti kagoria anda ibaruane handalu ti ala igilo mialu haga ka. Ai mini nawi karume genda bulene ti kagoria anda ibule ibiraria handa hondowa dege o ibiragoniha porabu ya howa mani tini genda yu haga ka.
PRO 22:4 Í̠nime í̠ni mo dindiha halu Anduane Homogohanda laradagua bialu ibu andaneha hariyagua homogo holenebi mini mo yaraga holenebi bayale holenebi uruni yu holebere.
PRO 22:5 Í̠ holene bayale hame lariyagua wali agali mini kowi mana ko biaga karu minigi biaga gono harigani waga bidago uruniha ti do wiagadagua í̠ gono uruniha do wuleni hariga balalu pugu bibe.
PRO 22:6 Waneigini emene bidaore mana bayale bulene abale biawai habe. Ani biriyagua awe wahe haragolabi mana bayale bulene ogoni yu wanaholebira.
PRO 22:7 Wali agali yagibano karume ti homogo karunaga garabaya biabe ale biahaga ka. Wali agali muni danoho karu ti muni anduane kagonaga garabaya biabe ale biahaga ka.
PRO 22:8 Mbiralime mana tigabi ndo bialu hayagua ibu kagoria genda dewa anda ibulebira. Ani ibiragola ibugua wali agali maruhondo ko bibe nahe holebira.
PRO 22:9 Mbiralime mbirale ngaru yagibano karuhondo turu halu miyagua Anduane Homogohanda o biagohondo turu howa bayaleore biaga kagoni.
PRO 22:10 Wali agali mine haga karuni bo batagi hariyagua lai lolenebi bi ko lolenebi mege bulenebi ereba holebira.
PRO 22:11 Mbiralime horo bibahendengi Anduane Homogonaga deni howa ko mbira nawi tigabi hangu hole hame lagabi ibunaga bi bayale lagabi kayagua kini kagome ibu nenege bu hinulebira.
PRO 22:12 Anduane Homogohanda mbirali manda bayale bidaru baya hangu mamage haga ka. Ibugua mbirali ke̱ haga kagome bi lararu mo nahabane haga ka.
PRO 22:13 Wali agali mangahe karume andaga hangu biraabo haga ka. Tigua ogodagua mitangi biaga. I̱ tagira pialu koria laiono gabua mbira harigani kagome i̱ bo nolebira, lo mitangi biaga ka.
PRO 22:14 Wali ko biaga bedagome de duguyu agali hangu tai bima ibaga bialu howa ibunaga bi larago gundu uli mbira unuraore handape habe nahe ngagobi laga. Anduane Homogohanda agali mbiralihondo keba howa pani mule kago ogoni ibu uli ogoniha pilope helolebira.
PRO 22:15 Waneiginirume bayuwa mitangi nabi howa mana ko bialu haga bulebira. Anigo í̠na ti mini wilo tibume bariyagua tigua mana ko ogoni nabi waholebira.
PRO 22:16 Mbiralime yagibano karunaga mbirale ngaru ibu mo yayaguabi homogo karuhondo turu halu mbirale miyaguabi ani biragome ibuni yagibano holebira.
PRO 22:17 I̱na áyu agali mini bayale gigabiwi karubi mandabi karubi tigua bi lenego lawai hole hameledo. I̱na bi ogoni langerogo baya hangu hale howa mitangi bibe.
PRO 22:18 Bi ogoni í̠naga miniha mo yu hariyagua í̠na maruhondo lamialu howa í̠ miniha dungulo holebere.
PRO 22:19 I̱na í̠ Anduane Homogohondo mini mbiraore wibelonaga hamelowa áyu ogoni bi mbira hale habelo larogoni.
PRO 22:20 Í̠ mini bayale gigabiwi halu manda bayalebi habelonaga i̱na bi bayale pira tebira (30) uru í̠ lawai hole gilibu wero.
PRO 22:21 Bi ogoni hale howa í̠ henene lolenenaga irane manda bulebere. Agali marume bi henene agodabe dabole pu larangi í̠na handa walia howa bi tigabigo tihondo ladai bibehe holebere.
PRO 22:22 Í̠na manda bialu yagibano karu ti habane nabulene ka lowa tinaga emene ngaru namo yabe. Ti godi lo piyagua godime ti hengedape helo manda buleni.
PRO 22:23 Ogoninaga irane Anduane Homogohanda yagibano ti dara howa biamogo bulebira. Mbiralime yagibano karuhondo ko biyagua Anduane Homogohanda o biagohondo pani miadai bulebira.
PRO 22:24 Í̠na wali agali keba abale haga karu heba nenege nahabe.
PRO 22:25 Ti heba nenege haabo hariyagua mana ko tigua biaga ngarume í̠bi dariba halu mani í̠ mo ko holebira.
PRO 22:26 Wali agali mbirame dano henego ibuni namibehedagola í̠na mia holiya lowa habo nalolene bi nalowibe.
PRO 22:27 Í̠na dano biago yadai nabibehe kegola tigua í̠naga mbirale bibahende ngeru mo yai halu paliaga dagia heba ungu yuligo dege manda bibe.
PRO 22:28 Í̠naga mamalirume dindi tu bamba winigo í̠na mo ya a̱i̱ na̱i̱ nabibe.
PRO 22:29 Agali mbira biabe bayale monehe biaga kago ogoni ibugua kininaga biabe bia holene karulapeore holebira. Agali ogonibigome agali mini nalene karunaga biabe biahabe nahe holebira.
PRO 23:1 Í̠ agali homogo kago baba tomo nalu biruwa í̠ miniha mitangi ala bayuwa bu biruwa nabe.
PRO 23:2 Í̠ tomo timbuni naga keyagua í̠naga noa holene haru howa haru narugo mangaba labe.
PRO 23:3 Tomo timbuni nabelo ngiragome bu mini bamialu ibugua í̠ mo hondo holigo de hondo habe.
PRO 23:4 Homogo hole lowa erekui biabe bereria í̠ni abale wahe halu mo ko holigo de hondo habe.
PRO 23:5 Muni dewa bu hombedo yu ha hariyaguabi abaleore ereba hai holebira. Babaganehe ega bodo hariawe yagalo yalu hariha iraga haradagua muni yidegoni babaganehego de handaya haregola abaleore yagalalu polebira.
PRO 23:6 Agali tomo ibuni hangu nole habua biaga karu heba mandagi tomo nalu nahabe. Ibunaga tomo bayale dendebiore ngago hondowa dimagoli nahabe.
PRO 23:7 Í̠na ibu heba tomo nalu birariyagua ibugua í̠hondo ogodagua lolebira. Ae tomo bayale dewa ngaruni í̠ni hameme noa biradagua narene, lalu bame lope howa ibugua í̠ henemane mitangi bialu mo turu halu ndo lara. Ibuni miniha mitangi ko bidagobi lolebira.
PRO 23:8 Í̠na agali ogoninaga mana hondo manda berengi abale o narigo magu tagu tagi hoa holebere. Ani buwa í̠na ibuhondo bi la debodebo bialu larigobi bame galone ndo laruda manda bulebere.
PRO 23:9 Wali agali mini nawi karuhondo bi bayale nalabe. Í̠na bi bayale manda bulene lamiriyagua ibugua mo himu bagabu waholebira.
PRO 23:10 Dindi tu bamba wini ngago dugu a̱i̱ na̱i̱ nabibe. Waneigini hono wahene aba ai̱ya nahe karunaga dindi ngarubi page karu nalabe.
PRO 23:11 Irane Anduane Homogo ibu hongo gibihe kagome dindi ogoninaga lalu bi laramingi waneigini hono wahene uruninaga bi Anduane Homogo ibunime la holebirago haya nahabe.
PRO 23:12 Marume mana bayale í̠ lawai haragola o lawai haragoni í̠na bayuwa hangu hale mia howa manda bialu mo yai habe.
PRO 23:13 Wandari igiribi kagua biragola tígua boliya hondo ha dege nalalimu. Abale mini wilo babe.
PRO 23:14 Mini wilo bolene ogonime ibu homolenehayagi napelo holenehayagi helonaga biamogo buleberami.
PRO 23:15 I̱ igini-o í̠ mini bayale gigabiwi hariyagua i̱ turuore holebero.
PRO 23:16 Í̠na mini bayale gigabiwi howa bi larego hale halu i̱na i̱naga miniha turu taraore ho holebero
PRO 23:17 Agali ko biagarume mana biagago í̠ hame nalabe. Í̠ Anduane Homogonaga andaneha hole hongo haabo habe.
PRO 23:18 Í̠na ogonidagua biriyagua mani bayale halu í̠ abale homa nabi mini dunubiahe holebere.
PRO 23:19 I̱ igini-o i̱na bi larogo hale halu mini bayale gigabiwi habe. Í̠ ibagabu kego baya hanguore minila haru ibagabu habe.
PRO 23:20 Agali waini iba timbuni nagimbu biaga bababi tombegene yabagi howa tomo timbuni nagimbu biaga bababi mandagi ibagabu holeni.
PRO 23:21 Lulu iba nowa lulu yaga karubi tomo timbuni nagimbu biaga karubi áyu dege yagibanoore holebira. Tomo timbuni nolenegobi iba mbia naabo holenegobi nowa bame u hangu palima ibaga biriyagua aga ko budu pugubigo bu holebere.
PRO 23:22 Í̠ aba nahenedale í̠ áyu kegoni nakelego í̠ abahanda laradaguaore bayuwa hale halu bibe. Í̠ ai̱ya wahe bedangi í̠ áyu kego habelo hondo heneyagonaga turu halu biamogo bigi bibe.
PRO 23:23 Henene loleneru mini bayale gigabi wuleneru mbirale bibahende manda taratara buleneru miniwi holeneru mana uruni alego yu hole hongo habe. Mana uruni ale yu howa bulenerunaga yolo agi ale mibehebe.
PRO 23:24 Waneigini ti mini bayale gigabiwi howa mana bayale hangu biaga kayagua ti ai̱ya abala libu miniha turu timbuniore holene irane nga.
PRO 23:25 Í̠ aba ai̱yalame í̠ hondowa miniha turuho helo mana baya o langiruruni bialu habe. Í̠ ai̱yahanda í̠ taba henegonaga embeda holeni ibu turu ho berelabe.
PRO 23:26 I̱ igini-o i̱na bi laga berogo baya hanguore hale halu mana i̱na bigi berogo handalu í̠na i̱hondo turu halu i̱ berodagua bigi bibe.
PRO 23:27 Bayanda walibi wali maru agali page biagabi bedaruni hinawai uli ale ngagoha igiri agali ogoniha pilope haga biraru wialu tongolo migi bulebira.
PRO 23:28 Pagealime mbirale page bule haradagua wali ogoni aleme agali au bolangua harabe hondole lowa deyu haga biaga beda. Wali ogoni aleme agali dewa mo gabua henego ti one waneigini wahowa wali ogoni ale bedagoha taya bima ibaga bialu kagoni.
PRO 23:29 Agali maru genda timbuniore yu howa agi bule birudabe lowa tini dara halu hearuni agali aruyabe. Bi timbuni lagimbu bialu hearuni agali aruyabe. Dongone motudu wuwa dege haabo hearuni agali aruyabe. Agali de daramabi hearuni agali aruyabe.
PRO 23:30 Uruni bibahende ti agali iba mbiabi waini ibabi lulu iba taratara ngaru naga hearuni agali uruni ndoyabe.
PRO 23:31 Waini ibame í̠ mo pila holani de hondo habe. Deme handaregola baya de hondoabi wialu naregola bame kembobeha heyolope holene awadaga wulebira.
PRO 23:32 Ani anigoyu mani howa handalu keria puya tomia palegome í̠ hayalu piyabe toba holebere.
PRO 23:33 Í̠naga mitangi bulenego mo ko henedago mbirale taratara í̠naga denguini bilingi bolangua biraria hondolebere. Ani bialu ne harigaha howa bi taratara ngagoni la dege dindi halu lulu bi dewa iba duguaradagua bulebere.
PRO 23:34 U palialu keria í̠ni tamuni ndo garo mo liahaga bima pialu kagoria erembirani palirube toba holebere.
PRO 23:35 Ani bialu í̠na bi agua lolebere. Agalime i̱ balu piyago nahende paliruda, lolebere. I̱ padogo heyabe nahedagoni irane aginagadabe. Ai i̱ heyalu iba mbia mbira lone nolebero, lolebere.
PRO 24:1 Wali agali ko biaga karu hondowa í̠na ti ale hoabagolo manda nabibe. Ti heba ibagabu hole nenege nahabe.
PRO 24:2 Tigua ko buleneru hangu mitangi biaabo halu tinaga ne harigaha howa bi laragome mendeali mo ko holenaga hangu laga ka.
PRO 24:3 Agali mini bayale gigabiwi mbirale bayuwa mandabi kago ibunaga anda bayale holebira. Ibu one waneiginibi bayale hongohe dege holebira.
PRO 24:4 Agali ogonibi kagome mbirale taratara muni daligame miaga ngaruni muwa ibu andagani mo hombedo tagiho ngelaga ka.
PRO 24:5 Agali hongohe holenego emene karulape lowa agali mini bayale giga biaga holenego bayaore gibi nga.
PRO 24:6 Kini mbira ibu hameigini mende kagola wai bule manda biyagua ala agali miniwi mandabi wai hanaga karume wai agua bimi̱ya lalu bi lamirago hale holene nga. Agali mandawi dewa bu karume lamirago hale hai halu laradagua biyagua wai buwa wayali holebira.
PRO 24:7 Mini bayale gigabiwi howa bi lolene ogoni daligaore taibi ngago mini nawi karume manda bibe nahe ka. Marume bi dunini laragoria mini nawi karume galone mbira labe nahe holebira.
PRO 24:8 Í̠na ko bulene hangu manda biaabo hariyagua wali agali karume í̠ ko biaga lene holebere.
PRO 24:9 Mbirali mini nawi kagome mana tiga nabi ngaru hangu bule manda biaabo hagago ogoni bibahende mana ko dege nga. Wali agalime handalu karia ogoni ibu maruhondo mine howa mege dege biaga kagonaga handabe manga haga ka.
PRO 24:10 Í̠ kegoria genda ibirangi í̠ hongo ibira hayagua í̠ gedaore dege haga kegoni.
PRO 24:11 Mbiralime ko nabi howa godime lo mbira halu o biago homelo bole lo wirangi í̠na puwa agali ogoni ba nabilonaga haru dai bibe.
PRO 24:12 Í̠na ogonidagua bulene i̱naga biabe ndo lolene nawi. Anigo Ngode Datagaliwabe ibugua í̠na mitangi bia do keru handalu í̠na bi larerunagabi irane bibahende manda biaihe kagoni. Ani manda buwa ibugua wali agali hangu hangume biabe biradagua yolo mulebira.
PRO 24:13 I̱ igini-o í̠na mone ibane naregola í̠naga ne hambuni dendebiore hagadagua
PRO 24:14 í̠na manda bayale bulenebi mini bayale gigabiwi holenebi ogoni bayale dendebiore nga. Mini bayale gigabiwi hariyagua mani í̠ni hama poregoha bayaleore mini dunubiahe holebere.
PRO 24:15 Mbirali ibu ko page bibi howa ibugua wali agali mini tigabiwi kagonaga anda bangulalu tinaga mbirale ngaru mo page bule lowa wahondo bira do hagadagua nahabe.
PRO 24:16 Wali agali mini tigabi karu dewa halu pilo ibira hayaguabi ibu lone heyu holebira. Anigo ko biaga karume ko bialu kagoria ibira haragola ti ko haiore ho waholebira.
PRO 24:17 Í̠naga waitigi karu genda yu kago hondowa í̠ turu halu gi habe nababe. Ti harigani pialu karia mbirale ngarume ge bobidi lenego tandaga howa kagola í̠ hondo oba nahabe.
PRO 24:18 Anduane Homogo ibugua í̠naga waitigi biaru pani mulene winigo í̠ turu halu oba harigo hondowa ti pani namuligo í̠ anidagua nabibe.
PRO 24:19 Wali agali mini kowi karume mana bigi birago hondowa í̠ genda howa mini hululabu nahabe. Í̠naga mitangi bulenego í̠ni mo ko holigo ani nabibe. Ani bialu ko biaga uruni tigua bigi birago hondowa tigua biradagua bua howa hame nalabe.
PRO 24:20 Irane ti turu howa kagoni tigimandi áyu kanginaga kago mani anidagua naholebirago í̠ ti biradagua bua nahabe. Wali agali mini kowi karuni lamu hale hundiradagua bibahende hundu tegelope haiore holebira.
PRO 24:21 I̱ igini-o í̠na Anduane Homogo mo dunini howa ibunaga andaneha halu kini kagobi mitangi bialu ibunaga mini mo yaraga habe. Wali agali karume Anduane Homogo minibi kininaga minibi mo yo handalu mine haga kagoria nahe í̠ habagiho habe.
PRO 24:22 Wali agali urunibi kagoria mo ko holene abaleore íbu wulebira. Anduane Homogohandabi kini ibuguabi urunibi karuhondo genda abi aleore mo wia holobadabe manda bibe nahe kamagoni.
PRO 24:23 Agali mini bayale gigabiwi hearume bi maru uru la dege bini. Agali godi dabaga kago ibugua wali agali ti godi lole ibirangi maru biamogo bia halu maru mo wahayagua ogoni tigabi ndo bira.
PRO 24:24 Godi dabaga kago ibugua mbirali ko biyago manani helenego bame golope hayagua wali agali dindi bibahendeni karume dabaga ogoni hame nale howa tigua ibu ha halu mege bulebira.
PRO 24:25 Anigo dabaga kagome tigatiga dabalu agali ko biyagohondo pani karulape miyagua dabaga ogoni ibu bayale howa mini lene holebira.
PRO 24:26 Mbiralime í̠hondo bi tigatiga ladai biyagua ogoni ibu í̠naga nenege heneneore kagoni.
PRO 24:27 Í̠na anda mbira bule manda biriyagua ala dindi mbira mo tiga bialu tomo ogoriani hangabe. Ani buwa mani anda bibe.
PRO 24:28 Í̠ mendealinaga godi wiyanaya pu hariyagua ibu ko nabi kagola í̠na ke̱ howa hengedape halu manani nahelabe.
PRO 24:29 Í̠na bi ogodagua lolene nawi. Ibugua i̱hondo ko biyagobiore i̱na biadai bulebero, nalabe.
PRO 24:30 I̱na ibaga bialu howa agali mbiranaga mabu de handaru. Agali ogoni ibu mini nawi mangaheyane handaru.
PRO 24:31 Ibunaga mabu ogoriani datani aniherubi tani korubi andaho hearia handaru. To̱le̱me pabe bu yaanda hene biagobi podope ho wia.
PRO 24:32 I̱na mabu ogoni de hondowa mitangitangi bialu manda maru bayale birugo ogo.
PRO 24:33 Agali mangahe karume agua laga. Biabe nabi emene paluwa erehi dogolalu heyuliya, laga.
PRO 24:34 Ti ogonidagua bialu palia hondo karia pagealirume mbirale abale mo yalu piai hagadagua tinaga mbirale ngaru ereba hai haragola ti yagibanoore holebira.
PRO 25:1 Solomonohanda bi maru leneru Yudanaga Kini Hesegaia heangi ibunaga beba gili bia hagarume gilibu wini.
PRO 25:2 Anduane Homogo ibugua mbirale dewaore mandabu do heneru ibuni hangume manda bidago ogoninaga iname ibunaga mini yaraga haramali. Anigo kini kagome mbirale dewa ina kamagoha wia do ho ngago ina manda buluma̱ya langiragola iname ibunaga mini yaraga haramali ndobe.
PRO 25:3 Iba andaneha ngarubi hari daligaha karubi iname manda biai habe nahe kamadagua kini ibunaga miniha manda bidagobi iname manda nabibehe kama.
PRO 25:4 Siliba mbira irani delowa dodo aealuru do ereba haragola siliba ogoni bayaleore howa ogonime mbirale bayale wabibehe wiaga.
PRO 25:5 Ogonidagua dege ko biaga karu kini baba mandagi nahelo bo pelayagua kini ibu mana bayaleore biragola dindi ibugua hondo kagobi mo hongo halu bayale tigabi holebira.
PRO 25:6 Í̠ kini kagoria íbu keyagua i̱ timbuni mbira kogoni lo mitangi bialu í̠ni mini yaraga nahabe.
PRO 25:7 Í̠na mbirali timbuni mbiragonaga henge í̠ mia aribia ho bederia tigua í̠hondo dalia layagua ogoni bayale ndo. Í̠ wali agali mini lene ndo karu baba keria tigua í̠ agali mini lene karu baba hole pu layagua bayale ogoni.
PRO 25:8 Mbiralime mbira bialu karia í̠na deme hondowa ibu ko biya lalu godini abale puwa latagi nahabe. Mendeali manda bayuwa biaihe kagome mani í̠naga bi larigo bope hai haragola í̠na agi buleberebe.
PRO 25:9 Í̠ nenegehondo mbirale mbiranaga bi mbira lole manda yu keyagua í̠na nenegeali ogoni ibuni karia puwa lo tiga bilibu. Anigo í̠na bi mbira ogoninaga hale harigo mendealihondo lamia nabibe.
PRO 25:10 Marume bi ogoni hale howa í̠ diburibu laga ke lalu í̠ mo taga halu í̠hondo ko mitangi bu wiaabo holebira.
PRO 25:11 Mbiralime bi galone mbira lalu ibugua bi laragonaga galone baya hanguore mo wála hayagua bi ogoni moneheore manda hareni gaigulu daradagua bulebira.
PRO 25:12 Mbirali ala henego ibugua mbirale bigi biyago handaga binime mendeali áyure hene kago mana lalu lamigi biragola mendeali biagome bi ogoni henene galoneoreda manda bialu yamiyagua ogoni ibu nde ibunaga manda teneni ega ubiya iri biradagua bulebira.
PRO 25:13 Mbirali bi yalu pu lenegome bi lamibe lenedaguaore tigatiga lamiyagua ogoni gaeangi biabe bialu howa hége lebolaho keria iba libule naragola tingini dungu lagadagua bi tigatigaore lamiyiyagua miniha dungulo holebira.
PRO 25:14 Wali agalime mbirale mbira nguliya lowa nami wahalu piyagua ogoni dalu ibule tingi howa hari kulu timbuni lowa dalu naibi ngaligobi holebira.
PRO 25:15 Í̠na keba abale nahe bi hendeore laga bialu hariyagua agali í̠naga bi hale hoa nahagaru mini mo beregedabehe holebere. Agali haguane karunaga minibi mo beregedabehe holebere.
PRO 25:16 Mone irani dedaria de handariyagua í̠ tombe karulape do nabe. Í̠na dewa do nagimbu biriyagua magu tagu tagi holigo.
PRO 25:17 Í̠ mendeali andaga hangu nenege puabo holene nawi. Ibugua í̠ handabe manga halu hame nalolebirago.
PRO 25:18 Mbiralime ibu nenege kago mo hondo halu ndelayagua ogoni timu yandare kangorume baragola tandaga biagadagua bulebira.
PRO 25:19 Í̠ kegoria ko mbira íbu ngangi í̠na manda bialu mbirali ke̱ haga kago ibugua i̱ biamogo bulubadalo manda biriyagua ogoni ne koheme tomo nagadaguabi ge koheme hariga piagadaguabi beregoni.
PRO 25:20 Mbirali miniha genda ho kane hondowa í̠na puwa turu helonaga iba gana lariyagua ogonime ibu biamogo ndo bere. Ogoni mbiralime puyabu dagarebi ibirangi ibunaga aga golo wahagago alebi dere bidagoria ibi odope hagadaguabi beregoni.
PRO 25:21 Í̠naga waitigi kago tomo noaho kayagua tomo nelo mibe. Ibu iba noaho kayagua iba nelo hambu mibe.
PRO 25:22 Í̠na mana bayale ogonidagua berego hondowa ibuni mana ko bigi biyago mitangi halu ibuni taga pani nolebira. Ani bialu í̠na mana bayale beregonaga Anduane Homogo ibugua í̠hondo turu halu yolo bayale ngulebira.
PRO 25:23 Puyabu ibiragome dalu yalu ibagadagua diburibu laragome keba holene mo yu anda ibaga nga.
PRO 25:24 Agali mbirali ibu oneme lai laabo hayagua anda mbiraoreha paluene emene bayale lowa agali ibu tagira pu holenego bayaleore nga.
PRO 25:25 Mbirali ibu iba noa howa hége lebola haragola iba libule turu howa nagadagua dindi kaundia mbirahayagi howa bi bayale maru yalu ibiragola hale hayagua ogoni turu taraore holene nga.
PRO 25:26 Agali tigabi mbira kago ibu ko biaga kagome ko mo bia helo ibuni henge miyagua ogoni ibu iba uli bayale nagane winigo mo ganguluma bia haradagua bira.
PRO 25:27 Mone ibane dewa naabo holene bayale ndo nga. Ogonidagua wali agali marume mbirali ibunaga mini yaraga helo lowa mbira bialu kagoni ogoni bayale ndo dege ngagoni.
PRO 25:28 Mbiralime ibunaga mini haru nahe howa keba abale haga kayagua marume ibu hengedape holebira. Ogonibigo ibu tano mbiraha pabe nahe ngagola waitigi anda ibuwa mbirale mo ko haganego ale ka.
PRO 26:1 Wali agalime mbirali mini nawi kagonaga mini yaraga hayagua ogoni gaea birangi dalu dindi guni ibaganego alebi tomo ibiredagola bu wulene horongi iba dalu ibaganego alebi biragoni.
PRO 26:2 Agali mbirali ibu mana liahe mbira nabi kagola marume ibuhondo bi ko lalu ha hayagua bi ogonime ibu mo ko naholebira. Tinaga bi laragoni egarume yagalo yu ibaga biaabo halu mbirani biru dambo nalagagobi holebira.
PRO 26:3 Nogo hosiru gerai pelo tibu tandaga biagame balu nogo dongiru bayuwa tiga tiga haru polenaga ibu ne harigaha aeane mbira bangabia ho helaga. Ani bialu mbirali mini nawi kago mini wilo gewame minu bolene nga.
PRO 26:4 Mbirali mini nawi kagome í̠hondo bi nagalone mbira hale haragola í̠na ladai biriyagua í̠bi nde mini nawi ibu ale dege kegoni.
PRO 26:5 Wali agali mini nawi kagome bi nagalone mbira í̠hondo hale hayagua í̠nabi nde ibuhondo nagalone dege ladai bibe. Irane ibugua ibu manda timbunibi kogoni manda buligo anidagua ladai bibe.
PRO 26:6 Í̠na mbirali mini nawi kagohondo bi mbira yalu pu lalu lawia hariyagua ogoni í̠na í̠ninaga ge gandulo waharadagua beregoni.
PRO 26:7 Agali ge kohe kago ibaga nabibehe hagadagua mbirali mini nawi kagome bi bayale gigabi mbira lole manda bialu karia labe nahe kagoni.
PRO 26:8 Mini nawi karu mini yaraga halu karuni laba dandaha to̱le̱ berelowa bole hongo howa ndibulo yani hagago ale bialu kagoni.
PRO 26:9 Agalime lulu iba nowa lulu yu howa ibunaga gini ani kenda kago dugule manda biagadagua mbirali mini nawi kago ibugua bi bayale mbira lole manda bialu karia nalabehe kagoni.
PRO 26:10 Biabe hondo haga kagome mini nawi karubi maru tanabi karuhondobi biabe bilo miyagua ogoni agalime danda bu yuwa timume agali boga dege dindi hagago ale bira.
PRO 26:11 Biangome magu tagu wuwa lone ibuni no dai biagadagua mbirali mini nawi kagome mana ko ala ibuni binigo lone budai dai bialu haga ka.
PRO 26:12 Mbirali mini nawi kago ibu manda bayale bilo biamogo bulene karulape. Anigo mbiralime mbirale bibahende ibuni manda biaihe tingi ho kayagua ogonibigo ibu biamogo bulene erekuibiore holebira.
PRO 26:13 Wali agali mangaheme andaga hangu bame biraabo howa ibugua ogodagua lalu, Laiono timbuni mbira harigani ibaga bu kago i̱ tagira napolebero, laga ka.
PRO 26:14 Anda panga hiniyime panga yani ho wiagadagua mbirali mangahegome ibuninaga dagiani palu beregedaga dege bialu wulebira.
PRO 26:15 Wali agali marume mangaheore howa tinaga ne harigaha tomo mo yanda halu nolenegobi bibe manga dege holebira.
PRO 26:16 Mbirali mangahe kago ibugua agua manda biaga. I̱na manda bidogome agali karia mini gigabi mbirale bayuwa latagi hai haga karuni bolangua ho kogoni, lo mitangi biaga ka.
PRO 26:17 Kirali lai lalu kagoha puwa í̠ ogoniha bangabia ho pu hariyagua ogoni biango mbira harigani pialu karia hondowa haleni minu gili laradagua beregoni.
PRO 26:18 Mbiralime ibunaga nenege mbira mo hondo howa mani ibugua lalu, Tabirini habiya biru, layagua ogoni ibu agali lulu mbirame timume boga dege dindi halu ira dedaore dugu giligalalo waharadagua biragoni.
PRO 26:20 Ira bo dela nabiyagua ira nade hundulebira. Wali agalime bi diburibu nale hayagua gimigomo lalu keba holene nawulebira.
PRO 26:21 Ira gabunime ira dene bayuwa hungu bialu dagadagua agali lai hangu laga kagome wai bilo mo bia haga kagoni.
PRO 26:22 Mbiralime diburibu lalu mendeali lo gurarago ina hale hole hame laramali. Bi ogonibi laragoni tomo dendebi aledagola iname abale naramali.
PRO 26:23 Mbiralime bi hongo halu mana bayale bulenenaga letingi howa mana ko bulenaga layagua bi ogoni todobene be dindi dongoma degeme wabinigo silibame hira dambi kagola bayale wini mbau lagagobi nga.
PRO 26:24 Wali agali tombene hondo kihe karume bi bayale turubi hangu lararume handabe manga holene tinaga miniha wu kago nawi tingi haga.
PRO 26:25 Bi urunibi laragoni í̠naga haleme hale hoabi lolebiragoyu í̠na tigua bi laragoni henene lara manda nabibe. Tinaga miniha ko tara tara to̱lo tagiho kagoni.
PRO 26:26 Tinaga mini ko ogoni wia do ho kagoyu wali agali marume o tinaga mana ko birago bayuwa handai holebira.
PRO 26:27 Wali agali mbirame ko mbira bule lo mitangi bu hayagua ogonime ibuni mo ko holebira. Mbirali uli pelo wa karia o biagoniha ibuni uli pu wulebira. Ibugua to̱le̱ hari hombeneni dugu yalu iragaho ngeledaria mani to̱le̱ biago pendegelope howa ibuni dambulebira.
PRO 26:28 Í̠na wali agali maruhondo ke̱ howa mo hondo hariyagua í̠na ti handabe manga ho kegobi walia hare. Anigo í̠naga miniha mende manda bu howa bime mende ale lariyagua mo ko holene hangu yu anda ibaga.
PRO 27:1 Í̠ miniha balagala howa yawi mbirale ogo ale mbira buliya lalu lo wia nabibe. Irane áyu yawila dombene nigoniha bulubadago í̠ manda nabi kegoni ndodabe.
PRO 27:2 Wali agali í̠la haga karumebi tara karumebi í̠naga mini mo yaraga hayagua karulapego ai tigua ani yaraga helo. Í̠nime dege í̠ninaga mini mo yaraga holeni.
PRO 27:3 Wali agali marume mini haru nahe howa lulume biradagua mana koore bigi biragome ina genda iba mumebi ege to̱le̱mebi ogoninaga genda ale ndo genda timbuniore mo ngigi biaga nga.
PRO 27:4 Wali agali keba gibi haga karu tigua binigome wali agali maru karu bame irane nawini mo tandaga halu mo ko haga. Ai keba holenego emene haru lowa wali agali dimagoli holenegobi i̱ nayido agini henge lolenegobi koorene ko ngubiore ngagoni.
PRO 27:5 Mbiralime mana liahe mbira biyagua tigatiga ibunihondo la ede halu mo tiga bialu lamulenego mana tigabi ogoni. Ani lamia nabiriyagua í̠na ibu dara nahe howa ainaga koyane lo heneda manda bulebira.
PRO 27:6 Í̠ nenegeali libu gubalini hagabu haga kabigo ibugua mbira biragome í̠ tandaga mo ngiyaguabi ogoni í̠ biamogo bialu dege biraria biarua manda bibe. Ai í̠naga waitigi kagome í̠hondo keba nahe miniha hade tingi howa mana maru bigi bulebirago ogoni hondole í̠bi nde dehe dege habe.
PRO 27:7 Mbirali tomo karulapeore no to̱lotagiho bedago ibu tomo bibahende magu hai holebira. Tomo dendebiore mone ibane dawa ngo lariyaguabi ibu mangaore holebira. Ai tomo noa howa tongolabehe kangi tomo bibahende tanabi bayale hangu ngabe toba holebira. Tomo ko kaubiyaguabi ogoni mo dendebia dege howa nolebira.
PRO 27:8 Agali ibuninaga dindi anda ngelo wahalu ibaga ibagabu kagoni ega mbaria ibunaga anda helo wahalu yagalo yu ibagabu kaligobi ka.
PRO 27:9 Weli ngabi taratara ngarume ina mo turu hagadagua inanaga nenege karume ina genda yu kamangi biamogo bigi biragome ina miniha turu biagane.
PRO 27:10 Í̠ nenege í̠nila bamba hama ibinidago embeda halu yu waholeni nahabe. Bamba í̠ abala mandagi haga henedagobi yu waholeni ogoni í̠la ho aribia habe. Í̠ genda yu hariyagua í̠ni hamenegoore karia pole manda buwa dindi kaundiagoha tongone pole manda nabibe. Mbirali kaware í̠nila handa a̱i̱ na̱i̱ padabigo ibugua bayuwa biamogo bulebirago bilo ibuhondo hale habe.
PRO 27:11 I̱ igini-o i̱ turu holiya mini bayale gigabi wulene dabalu hongo howa yu habe. Í̠ ani yu howa wali agali marume i̱ gurayagua tihondo i̱na ladai bulene karulape wulebira.
PRO 27:12 Wali agali miniwi dehe karume handalu karia genda bulene ti kagoria anda ibaruane handalu ti ala igilo mialu haga ka. Ai mini nawi karume genda bulene ibu kagoria anda ibule ibiraria handa hondowa dege o ibiragoniha porabu ya howa mani ibu genda yu haga ka.
PRO 27:13 Mbirali ibu dano henego ibunime mibe nahedagola mendealime i̱na mia holiya lo kayagua ogoni ibu mini nawi ka. Anigo mbiralime í̠hondo dano hole ibiragola ibunaga mbirale mbira í̠ mo yu hole manda bibe. Mani í̠naga dano hayago ngiragola ibuni yadai bule.
PRO 27:14 Egerebagiore haragola í̠naga nenege barila halu ibuhondo bi dalimu lariyagua ogoni í̠na ibuhondo bi ko lalu ha haradagua dege beregoni.
PRO 27:15 Agali mbira one ibu wali keba halu lai dege lalu bi laabo haga bedayagua ogoni ibu anda danginiha diri ngagola iba emene bondo laabo hagadagua biaga beda.
PRO 27:16 Wali ogoni ibu mana ogonibi nabilo ibu agalinime mbira bibe naheore. Ogoni ibu iname puyabu gime minu yule lowa bialu haganego alebi weli gini odo yu haganego alebi beda.
PRO 27:17 Tigua aeane naga wule lowa mbirale maru aeaneme dege aeane naga wiaga. Ogonidagua dege wali agali mbirame mendealinaga mini mo tiga biragola bayale haga.
PRO 27:18 Í̠naga poge hengedegome lini delo de hondo hariyagua lini bayale dedagola do nolebere. Biabe bia haga kagome ibunaga haru haga kago bayuwa de hondo hayagua haru haga biagome ibuhondo turu halu ibunaga mini yaraga holebira.
PRO 27:19 Í̠na iba bedagoha de handape hariyagua í̠ninaga denguiore hondolebere. Anidagua dege mbiralime mana biragobi mitangi biragobi bibahende bayuwa manda biai hayagua ibugua i̱ ogobi kogoni lalu ibuni manda bulebira.
PRO 27:20 Wali agali dewaore homayaguabi tigua humbirini anda to̱lotagi naholebira. Ogonidagua dege mbiralime ibuninaga hame ngago wu karula napolebira.
PRO 27:21 Ngolo silibala irani delowa dabo handaga. Ogonidagua dege wali agali kodabe bayaledabe hondole tininaga mana biragoria handalu maru karume ti dabaki biaga.
PRO 27:22 Í̠na mbirali mini nawi lulu ale kago hongo howa homabeheore bope hariyaguabi ibunaga mana biagane biago yu wa nahe wiaabo holebira.
PRO 27:23 Í̠nime í̠naga nogo meme sibiru bayuwa de hondo habe.
PRO 27:24 Irane í̠na muni mbirale yu kerubi wiaabo naholebiraore. Kininaga hameiginirubi haabo naholebira.
PRO 27:25 Í̠naga daluni tani luni andaho karia handariyagua í̠na tani ogoni gandu lowa mo mogo bialu í̠ninaga nogoru ti nelo mibe. Ani beregola tani bayale gahenge andaho aribia holebira.
PRO 27:26 Mani í̠naga nogo memerume yolo muwa dindi yolo bulene wulebira. Ani buwa nogo sibinaga irini podowa í̠ninaga aga ogonime wabulene wulebira.
PRO 27:27 Í̠na í̠naga nogo memerunaga andu hambuwa í̠nibi í̠ one waneiginirubi tínaga biabe biahaga wali bedarubi karulape nalu holeberemi.
PRO 28:1 Wali agali ko biaga karume ti mbiralime bole talima ibiragola piagadagua bame gi howa ibida piaga kagoni. Anigo wali agali tigabi karu ti budi gabua laiono ale elahe haabo haga ka.
PRO 28:2 Wali agali dindi timbuni mbiraoreha haga karume ko hangu biaabo hayagua dindi ogoninaga haru haga tara tara hela aribia haabo holebira. Anigo dindi mbiraha haru haga bayalebi mini gigabiwibi kayagua o biagome wali agali bayuwa haru halu dindi bayale hongohe wiaabo holebira.
PRO 28:3 Agali mbirali ibu haru haga howa wali agali yagibano karu hengedape haga kayagua ogoni ibu iba li timbuni poragome mabuha tomo hengedaru mo ko haradagua bialu kagoni.
PRO 28:4 Wali agali mana lo ngaru erembira miaga karume wali agali ko biaga karunaga mini yaraga haga ka. Anigo mana lo ngaru biaga karume ko biaga karu heba mini mbiraore nahaga ka.
PRO 28:5 Wali agali ko biaga karu ti mana tigabi agobi ngabe manda nabi kagoni. Anigo Anduane Homogo talima piaga karu ti mana tigabi ogoni manda buwaore ka.
PRO 28:6 Mbirali yagibano howa mana tigabi biaga kagome mendeali homogo howa mana tigabi nabiaga kago bolanguahe kagoni.
PRO 28:7 Wandari igiribi daliahe mana lo ngadagua bialu haga karu ti mini gigabiwi kagoni. Urunime ti wali agali ko mangahe habane nabulene karu baba nenege ho hayagua nde ti ai̱ya abala mo taga haragoni.
PRO 28:8 Agali mbirame ibunaga muni wali agali maru ti dano hadaba lowa dano biago yadai biragola muni miyagobi ndo dewa ngidaba lowa ibu homogo hayagua ibu muni ogoni nayi holebira. Muni ogoni mbirali yagibanoru dara howa biamogo biaga kagonaga giha mo mulebira.
PRO 28:9 Í̠na mana lo ngago hale halu nabiriyagua Ngode Datagaliwabehanda ibuhondo bi lariligo hale hoa nabi ko ngubidane hondolebira.
PRO 28:10 Í̠na agali tigabi kago ko bilo mo hondo hariyagua í̠na gono wirigoha í̠ni do wulebere. Wali agali ko mbira nabiaga bayale karu ti Ngode Datagaliwabehanda yolo karulapeore mulebira.
PRO 28:11 Homogo karume ti mini gigabiwi kama manda biaabo haga. Anigo yagibano kagome wali agali maru karunaga mini ngago bayuwa tale biaga kayagua ibu mini gigabiwi heneneore ka.
PRO 28:12 Haru haga agali tigabi mbira tagira íbu harangi wali agali bibahendeme turu howa ibu mini yaraga haga. Anigo agali mini kowi kagome haru hole tagira íbu harangi wali agalime ibu hondowa ti ha do haga.
PRO 28:13 Wali agali mbirame ko biyago do ho hayagua ibugua mbirale bigi birago bayale naholebiraore. Anigo mbiralime ko bibahende biyago lapani halu kohondo erembira miyagua Ngode Datagaliwabehanda ibu dara howa biamogo bulebira.
PRO 28:14 Anduane Homogohanda laradagua biaabo hariyagua í̠ turu ho haabo holebere. Anigo Anduane Homogonaga bi hale habe manga howa doga ho hariyagua í̠ ko ngagoria polebere.
PRO 28:15 Agali ko biaga mbirame haru haga howa wali agali hongo nahe karu hengedape haga. Agali ogoni ibu budi gabua timbuni laiono hongo howa ngororo lagadaguabi biango dudu ale timbuni mini bea mbirame tomo taya bima ibaga biagadaguabi bialu ibu hiriribi haga.
PRO 28:16 Haru haga kago mini giga napale hayagua wali agali mo ko halu haru ha ko holebira. Anigo haru haga mbirame wali agalinaga ngaru guru nolenebi mo hondo holenebi hame nale kago ibugua luore haru haabo holebira.
PRO 28:17 Mbiralime mendeali homelo bo wahaga kago ibu tandaga nalu haabo holebira. Ibu bayale holene mbira handa walia nahe ibagabu kaore homalu waholebira. Ogonibi kago mbiralime ibu biamogo bulene nawi.
PRO 28:18 Í̠na mana tigabi bialu hariyagua í̠ bayale holebere. Í̠na ko bialu hariyagua í̠ abale pilope holebere.
PRO 28:19 Wali agali mbirame biabe erekuibi bialu mabu hangayagua ibu tomo nolene dewa wu holebira. Anigo wali agali horo mo hole bialu biabe nabiaga karu ti yagibano haabo holebira.
PRO 28:20 Wali agali mini tigabi karu ti turu holeneme to̱lotagiho holebira. Anigo mbirali ibu abale hibilaba lowa homogo hole manda biyagua pani nane napolebira.
PRO 28:21 Agali mbirame godi hale halu howa irane baya hangu dabo handa nabi mendegonaga abale la halu mendego hengedape hayagua nakarulape bira. Anigo godi dabaga marume muni emeneorebi mbira ngilo lowa ke̱ halu godi la holebira.
PRO 28:22 Wali agali habuabi karume ti homogo holenaga abale hibilaba lalu kagoyu ti yagibano holene kaware ibirago manda nabi ka.
PRO 28:23 Mbirali mo kula haragola turu haraligo dindiha lowa í̠na mbirali mana lalu mo tiga biriyagua o biagome mani í̠hondo turu timbuni holebira.
PRO 28:24 Mbiralime ibu aba ai̱yalanaga mbirale ngaru page ndoda lo manda buwa page biyagua ogoni ibubi pagebibi maru kagobi dege kagoni.
PRO 28:25 Mbirali habua biaga kagome wali agali maru mo keba haga. Ai mbirali Anduane Homogohondo mini mbiraore hongo ho wu kago ibu bayale hangu hama puabo holebira.
PRO 28:26 Mbiralime ibuninaga manda hangume mbirale bibahende karulape biai habehe kogoni mitangi bu hayagua ogoni ibu mini nawi ale kagoni. Anigo mbirali mini gigabiwi kagome lawai haradagua bialu hayagua ogoni ibu bayale holebira.
PRO 28:27 Yagibano karuhondo mbirale miriliyagua í̠ mbira buru palia nabi holebere. Yagibano karu nahende tingi howa mbirale nami hariyagua wali agali dewaoreme í̠ ha hene holebere.
PRO 28:28 Mini kowi karume haru harangi wali agali ti ha do holebira. Anigo haru haga ko uruni ibira haragola mini tigabi karume lone haru ho aribia holebira.
PRO 29:1 Agali mbira dewa halu mo tiga birago bilowa ibu mine haabo hayagua abaleore ibu mo ko haragola marume ibu biamogo bulene hariga nawulebira.
PRO 29:2 Agali mini tigabiwime wali agali haru kagola wali agali bibahende ti turu hai haga. Anigo mana ko biaga karume haru haragola wali agali bibahendeme miniha genda howa mini dege dindiho haga.
PRO 29:3 Í̠ mini bayale gigabiwi hole hame lariyagua í̠ ai̱ya abala libu turuore holebira. Agali bayanda waliru heba ibaga bu haga kago ibu ibunaga muni mbiralebi bibahende ogoniha wahai haga ka.
PRO 29:4 Kini kagome wali agali mana tigabini haru hayagua wali agali bayale halu dindibi bayale dege wulebira. Anigo kini ibu wali agalihondo muni hangu ngi laabo hagagome dindi ibugua hondo kago ibira halu mo ko holebira.
PRO 29:5 Agali mbirame ke̱ halu ibu nenege ladebodebo biyagua ogoni ibugua ibunaga nenege gonoha delonaga gono wia haradagua biragoni.
PRO 29:6 Mbiralime mana ko mbira biyayagua ko ogoni biyagome ibuni do wulene gono wia kagoni. Anigo wali agali mana tigabi biaga karu ti turu ho haga ka.
PRO 29:7 Wali agali mini tigabiwi karume yagibano karunaga genda ngago mitangi buwa mo tiga bialu ti biamogo biaga. Anigo wali agali mana ko hangu biaga karume mana ogoninaga irane manda nabiaga ka.
PRO 29:8 Mine halu mege biaga karume wali agali tanoha bu karu tini dege dege handabe manga helo mo keba helaga. Anigo mini bayale gigabiwi karume keba ho hayaruni mo hada halu agali biarunaga mini lone mo paliaho helaga.
PRO 29:9 Mbirali miniwi kagome mini nawi mbira kago manani helayagua mini nawi biagome abale keba howa lahiralu ibu ne hambu ndibulo nahaga kagoni.
PRO 29:10 Mbirali agali darama hangu noa haga kagome wali agali mana tigabi biaga karu handabe manga haga ka. Anigo mbirali mini tigabiwi kagome maru mana tigabi biaga karu bayuwa handaya ho haga ka.
PRO 29:11 Wali agali mini nawi karume tinaga bi laragome keba holene abale walia haga ka. Anigo wali agali mini bayalewi karu tigua abale keba nahe donge ho haga ka.
PRO 29:12 Agali haguane kago ibugua agali ke̱ haga kagome bi larago hale hayagua ibunaga andaneha haga karubi ke̱ haga dege bu holebira.
PRO 29:13 Wali agali yagibano karubi yagibano uruni hengedape haga karubi tigua mbiraore ogobi degedege yu kago ogo. Anduane Homogohanda wali agali ta nabihondo de hendelo de ogobi degedege mini.
PRO 29:14 Kini kagome yagibano karunaga godi tigatiga mo dabaki biyagua ibunaga hameigini dameneruha kini howa haru haabo holebira.
PRO 29:15 Í̠na waneigini mini wilo mana lalu mo tiga biriyagua ti mini gigabiwi halu manda bayalebi holebira. Anigo waneigini tinime hame laradagua bilo helariyagua urunime ti ai̱ya abala mo taga holebira.
PRO 29:16 Agali ko biaga karume haru haga harangi ko anda hama piaho wiaabo holebira. Anigo agali uruni ti lu haabo nahe ibira haragola mini tigabiwi karume hondolebira.
PRO 29:17 Tínaga waneigini mo tiga birimiyagua mani tígua waneigini uruni hondowa turu holeberemi. Taga holene irane tiha nawulebira.
PRO 29:18 Anduane Homogohanda wali agalihondo mana ogodagua bulene nga lalu bi lamia nabidayagua tigua mana ko tara tara bialu holebira. Wali agali karume Ngode Datagaliwabenaga bi mana lo ngadagua bialu hayagua ti turuho holene nga.
PRO 29:19 Í̠naga biabe bia haga karuhondo ogo ale bia lowa bime hangu lariyagua í̠na tinaga mana birago mo tiga bibe nahe holebere. Í̠na bi o lameregoni hale howa manda bulebiragoyu tigua bia nabulebiraore.
PRO 29:20 Mbirali mini bayale nawi heagua ibu mini wilo iname ibu biamogo bibehe kamagoni. Anigo mbirali miniwi kagome bi ala bayuwa mitangi nabi howa abale lagane kago iname ibu biamogo bulene taibi holebira.
PRO 29:21 Í̠na í̠naga biabe bia haga mbira kago ibu emene kaore ibuhondo mbiraleru hame ledadagua mialu haabo hariyagua mani ibu mini ko wialu í̠ mo tandaga holebira.
PRO 29:22 Wali agali gongoma keba abale haga kagome wali agali maru mo keba halu ko dewa mo yu anda ibaga ka.
PRO 29:23 Mbiralime mine halu ibuninaga mini yaraga haragome ibuni mo dindiha holebira. Anigo mbirali ibuni mini mo dindi haga kago marume ibu mini mo yaraga holene wulebira.
PRO 29:24 Mbiralime pagebibi kago heba hagayagua ibunime ibunila mo waitigi ho ka. Ibugua page biamogo bialu hayago latagi hayagua godime ibu manani helolebira. Anigo ibugua biyago la nabi donge ho hayagua Ngode Datagaliwabehanda ibu pani mulebira.
PRO 29:25 Í̠na mbirali hondowa gi hariyagua gono ngagoha do wiagadagua gi haregome í̠ni do wulebere. Anigo í̠na Anduane Homogohondo mini mbiraore hongo howa wu keyagua í̠ gi nahe bayale holebere.
PRO 29:26 Wali agali dewame haru haga karu ti hame lelonaga tihondo bi ladebodebo biaga ka. Anigo Anduane Homogo ibugua hangu inanaga bi hale howa tigatiga dabalu ina biamogo biaga.
PRO 29:27 Wali agali mini tigabiwi karume ko biaga karu handabe manga haga ka. Ko biaga karume nde wali agali mini tigabi karu handabe manga haga dege kagoni.
PRO 30:1 Bi ogo Yage igini Agu ibugua Idiele Ugalalahondo lene.
PRO 30:2 Agu ibugua lalu, I̱ agali heneneore hagadagua ndo ko. I̱na agali marume mitangi biagadagua nabiruli. I̱ mini nawi dege ko.
PRO 30:3 I̱na mini gigabi wulenebi manda bayalebi nawi dege ko. Ngode Datagaliwabe ibu bayale tigabiore kago helowa i̱na ibu baya hangu manda nabi kogoni.
PRO 30:4 Mbirali dahuliya andagaha iraga halu pialu dai bini ai kabe. Mbirali ibunaga gime puyabu pu larago mini yania hene ai kabe. Agalime mbirale agame kabu buwa yu hagadagua iba hari beralibaha minu yu kago aiwabe. Dindi bibahende ngaru aiwa mo hongo kagola ngabe. Ogoni biyagoni ibu minibi ibu waneigini minibi ai kabe. Í̠na manda bu keyagua ogo ka lalu langibe.
PRO 30:5 Ngode Datagaliwabe ibugua bulebero ledaru bibahende biaiore haga ka. Ibugua bi heneneore hangu laga ka. Ami agalirume wai bialu howa humbime tini mo ge hagadagua wali agali Ngode Datagaliwabe ibu karia poraru bibahende ho ge haga ka.
PRO 30:6 Í̠ninaga bi latagi halu howa bi ogoni Ngode Datagaliwabenaga bi laro lalu nalabe. Anduane Homogohanda í̠ talialu mani wali agalime í̠naga bi lariru hale heneru í̠ tindule laridane walia holebira.
PRO 30:7 Ngode Datagaliwabe-o i̱na í̠hondo ngibe lalu bi kiraore hale harogo ogoni labo ngibelo hame lo ko. Ngode Datagaliwabe-o i̱ dindini kongi howa
PRO 30:8 ke̱ hagane mana ngaru erembira mialu holiya i̱ biamogo bibe. Ani bialu i̱ yagibano homogobi mendego nahelabe. Horo bibahendengi tomo karulape nalu holiya ngibe.
PRO 30:9 I̱na mbirale dewa wu howa Ngode Datagaliwabe í̠ erembira ngialu i̱ni karulape ko manda buligo karulape dege ngibe. Ai yagibano howa nde i̱na mbirale ngaru page bima ibaga bialu koria Anduane Homogo í̠naga mini mo dindiha holigo o larogonidagua bibe.
PRO 30:10 Í̠na agali haguane bedaria puwa ibunaga biabe bia haga kago mege bialu lo gura nabibe. Biabe biahaga biago ibugua Ngode Datagaliwabe mini lalu í̠ mo ko habe lalu bi lamiragola í̠ mo ko holigo lo gura nabibe.
PRO 30:11 Wali agali marume tinaga aba mo ko helonaga Ngode Datagaliwabe mini lalu lamiagaya. Marumebi ibuhondo, I̱ ai̱ya dara howa biamogo bia, nalagaya.
PRO 30:12 Wali agali marume tiha ko mbira nawi kama mitangi biagaya. Anigo uruni biaga karu tinaga ko wiaabo kagola ti Ngode Datagaliwabenaga deni ko dodoheore ka.
PRO 30:13 Wali agali marume mine howa tini bayaleore kama mitangi bialu maru ko nagalone karuni lo manda biaga ka.
PRO 30:14 Wali agali marume yagibano karu hengedape hagaya. Tinaga ne harigaha wai biaga ayu tibu nene gadele alebi nabi emene nene gadele alebi howa wali agali ko yagibano karunaga dindi dabudabu emene wiago karulai hole biagaya.
PRO 30:15 Gindi darama naga mbira ibu wane kira bereneya. Libu harunaga mini mbiraore laga bereneya. Libunaga mini I̱ Ngi laga bereneya. Mbirale maria urume haru naru nalaga ngago uru
PRO 30:16 Mbira: Homenerunaga dindi Humbirini anda Mende: Wali waneigini nahaga bedago Tebone: Dindi yobime iba hame laabo haganego Mane: Irame mbirale dewaore daragoyu uruni mo emene dege halu ibuha dolene wia dege biaga.
PRO 30:17 Wali agali tinaga aba ai̱yalanaga bi mo wahalu mege biadai biaga heagua ogoni ega nene bedarume tinaga de halu nalu tini homarangi ega bodo hariawe bedarume tinaga tingini budalu nolene wulebira.
PRO 30:18 Mbirale mariaore bigi biagayago ogoninaga tenego agime bira loabe tobahe gimbuni handabe nahe ogoniha wia.
PRO 30:19 Mbira: Ega bodo hariaweme li hariha yagalo yu ibagabu heago Mende: Nogombime ege to̱le̱ timbuni ngarunaga pu a̱i̱ halu pialu ngaligo Tebone: Iba sibi iba solowarani paga howa polene hariga manda bialu pialu kaligo Mane: Wali agali kiralime libuni gubalini haga haga bialu kaligo uruni bigi bialu hearuni agime bira loabe tobaheya.
PRO 30:20 Wali mbira ibu agalini ma hondowa ibu agali kayu biaga bedagome agua biaga. Ibugua agali kayu yuwa tomoru hibilabalo dawa nowa ibunaga ne wayawaya biagadagua bialu birulebira. Ani bu biruwa ibugua lalu, I̱ kagua mbira nabiore bedogo agiyabe, lolebira.
PRO 30:21 Mana maria dindini tagira ibagaru ogoni ko gibioredagola dindi ibunime ogoni turu nahe howa mogo lowa duru lalu wiaga.
PRO 30:22 Mana uruni ogodagua Mbira: Mbirali ibu garabaya biabe ale bialu henego mani ibu kini ha aribia harago Mende: Mbirali mini nawi kago ibugua tomo dewa no kangi biagago
PRO 30:23 Tebone: Wali mbira ala agalime hondo wahene lu berenego mani ibu agalinimebi ibu hame nalaragola bame biraabo hagago Mane: Wandari mbira biabe bia haga berenego ibu mani wali anduane biago birayagoria bira aribia harago uruni bibahende dindini biaganego nakarulapeore.
PRO 30:24 Dindi ogoria ema bialu piaga maria bedago ti emene koore biruwa mini gigabiore beda.
PRO 30:25 Mbira: Uburuli ti emene koore bedagoyu tigua tomo nawi harangi nolenaga tomo andaha mo yu pu wiaga beda.
PRO 30:26 Mende: Tia pagana ale ege bare ngagoha anda buwa biraga bedaru ti emene ko hangu hongo nahe bedane hendede tiraga ege to̱le̱ ngaruha ti anda pu paliaga.
PRO 30:27 Tebone: Pagaya ale bedaru tinaga haru haga nahe bedane hendede tiraga tigua baya hangu biru dugu bialu porane hondolebere.
PRO 30:28 Mane: Gau emene ko bedaru gime bame minu yaramaligoyu ti kini andaga timbuni karuha pu bedane hondolebere.
PRO 30:29 Mbirale mariame ge porago de hondoabi piaga uru
PRO 30:30 Mbira: Laiono karu ti hongo gibiore howa maru karu bolanguahe ka. Ti ibaga bialu howa ti mbirale mbira kagohondo gi nahe howa puabo haga ka.
PRO 30:31 Mende: Ega gogologo budubai bedaru ti tigatiga howa de handade̱le̱ bigi bialu haga ka. Tebone: Nogo meme wangabe karu Mane: Kini agaliru ti ami hongohe heba kangi mendeme ti bope naholobada manda bu haga.
PRO 30:32 Í̠na mana ko lulu ale mine howa í̠ninaga mini yaraga halu hariyaguabi í̠na mana ko mbira bule lowa manda manda bu hariyaguabi uruninaga í̠naga ne hariga hangai halu uruni abale wahai habe.
PRO 30:33 Nogo bulumaga andu iba hambuwa mo beregeda beregeda biaabo halu hariyagua ogoni ibu mo mbada holebira. Agali mbiralinaga nguini bariyagua darama ibulebira. Manane urunidagua dege mbirali baba keba hariyagua baga baga bulene wulebira.
PRO 31:1 Bi uru Kini Lemuele ai̱yahanda ibu igini mini bayale wilonaga mana lalu lamini.
PRO 31:2 I̱naga iginiore i̱na taba henenego í̠ore kegoni. I̱na Ngode Datagaliwabehondo bi lalu igiriore ngi larugola nginigo í̠ kegoni. I̱na í̠hondo bi agi lalu loabe.
PRO 31:3 Í̠ wali hangu yama ibaga bialu keria í̠naga hongo bibahende ogoniha ereba hai holani de hondo habe. Í̠naga muni yidegobi wali uruni ti mo nai holani de hondo habe. Mana ogoni aleme kini agaliru mo koore haga ngagoni.
PRO 31:4 Lemuele-o bi larogo hale habe. Kini agalirume waini ibabi lulu iba tara tara ngarubi noa haabo holene nawi.
PRO 31:5 Kini agali biaru ti lulu iba no karia mana lo wini ngaru bibahendeore embeda hai halu wali agali buru pale karu biamogo bulene winigobi embeda hai hagadagua holani.
PRO 31:6 Iba mbia tara tara ngaruni wali agali áyu ogoni homole andanda bialu karu tinaga ngagoni. Ani bialu wali agali genda timbuniore yuwa mini burugulo karubi tinaga nga.
PRO 31:7 Tigua lulu iba naragome tini mini hulula bu karu embeda helobi genda timbuni tara tara yu karu embeda helobi narama manda buwa naga kagoni.
PRO 31:8 Wali agali genda tara tara yuwa tinime latagi au hoabe tobaho karunaga bi í̠na lahole mandabu habe. Godi larangibi uruni ko bi nayida manda buwa godi hale hagame mendealigonaga la hayagua í̠na bi hongo howa ladaga halu tigatigaore dabadaba labe.
PRO 31:9 Ani bialu í̠nime godi larago hale halu dabaga dagiani birarengibi godi larago hale halu tigatigaore dababe. Wali agali yagibano buru paleore darabi karunaga bi la halu dege labe.
PRO 31:10 Igirime wandari dabu bule lowa wandari mana bayaore biaganego hame lowa hai bulene taibiore. Wandari ogonibigonaga yolo bulene nogo muniru ngolo silibarubi tahe ndo dindiha lowa ibunaga mana bayale biagago daligaore bedagoni.
PRO 31:11 Wali ogonibigo agalinime ibu one mana bayaore tigabi hangu biaga beda lowa ibu oneni mini paga howa ibu miniha turu ho holebira. Ani bialu horo bibahendengi libu haru miniha dungulo howa mbirale burupale naholebira.
PRO 31:12 Wali ogoni ibugua ibu agalini mo ko hole mbira nabi ibuhondo mana bayale dege biaabo haga bedagoni.
PRO 31:13 Ibugua nu puru aga lebiaga puru taya buwa nu bia agaru lebia bigi bialu ibu gi ema hanguni biraga bedagoni.
PRO 31:14 Iba sibime dindi kaundiaha howa mbirale mbirale tara tara hombedo yalu ibaganedagua wali ogonibigo ibugua tomoru dindi kaundiaha howa bu hombedo hanalu ibalu holebira.
PRO 31:15 Wali baya ogonibime ibu ala mbiraga gao naledaha heyuwa ibu agalini waneiginirunaga tomo dawalebira. Ani bialu wandari emene ibu andagani ibu baba biraga biru ngaru ti biabe bilonaga ibugua mo ta holebira.
PRO 31:16 Wali ebebebi ogonibigo ibugua dindi mbira tu wule hayagua ibu deme bayuwa ala handama ibaga buwa mani tu wialu yolo miaga. Ani buwa ibugua biyinaya bialu muni ilu winidagome pu mbira lini daga mini gerebi egene yolo muwa dindi odagoriani hangaga.
PRO 31:17 Wali ogoni ibu ebebebi biabe dege bialu gi pururumabi payalu kunihe hongohe beda.
PRO 31:18 Ibugua ibunaga biyinaya birago bayale haruane handayagua ibugua mbiraga lamu hale dela howa birago ale biaho wiaabo holebira.
PRO 31:19 Wali ogonibigome aga lebiyagua dewalime yani haga buwa lebibehe ngaruni ibuni hangume gi tale bialu biaga beda.
PRO 31:20 Ibugua wali agali yagibano burupale karu hondowa dara halu ibunaga mbirale ngaru talebu migi biaga beda.
PRO 31:21 Ibugua horombe biruwa dagare birangi bulenenaga aga wabuwa ibu agalini waneiginirubi wabu ta henegome gaea timbuniore bialu kewara pibira ibira hayaguabi ibu miniha mogo nale biraga.
PRO 31:22 Ibu andagani wali agali paligi bilonaga balangiya ibunime wabu ngelaga biaga. Ani bialu ibugua labolabo tohe bayaore ngarubi tagalitayabi bayaore ngarubi muwa ibuninaga aga urunime wabuwa bu haga.
PRO 31:23 Wali ogoninaga agalini wali agali bu karumebi agali haguane karumebi ibu mini lene ka laga. Wali ogoni agalini ibu dindi ogoninaga agali haguane dege mbirago haga.
PRO 31:24 Wali ogoni ibugua aga tara tara ngago lebialu nogo dongonebi dewa wabu paya biragola agali biyinaya biaga karume yolo yalu mo ibugu biaga.
PRO 31:25 Maru karume wali ogoni ibu wali mini lene beda laga. Wali ogoni ibu miniha hongo ho biruwa ibu wali hongoheore biraga. Mbirale mani bulubadarunaga ibu miniha gi mbira naheore biraga.
PRO 31:26 Ibugua wali agali lawai hayagua baya hanguore manda bilo mini bayale gigabi wu biruwa lawai haga.
PRO 31:27 Ibu andagani mbirale ngarubi waneigini karubi hondo holenego ibu manga nahe bayuwa mabura bu hondo halu erekui biabe biaga beda.
PRO 31:28 Ibunaga waneigini bu karume ti ai̱yaore baya gibi lalu ibunaga mini mo yaraga halu ka̱i̱ lo ariari biaga. Ibu agalinime ibu onenaga mini mo yaraga halu ka̱i̱ lalu bi ogodagua laga.
PRO 31:29 Ibugua lalu, Dindi ngagoria wali mana baya gibiore bigi biaga dewaore biru wima pedagoyu í̠na wali uruni bibahende bolangua hai howa í̠ daligaore bedegoni, laga.
PRO 31:30 Wali mbirame inahondo bi bayale hale hoabiore lolebiragoyu ibunaga mana birago mende ale holebira. Wali mbira ibunaga dengui tingini bayaore de hondoabi bira birulebiragoyu nde ibu dengui baya ogonibi biraabo naholebira. Ani manda buwa iname wali Anduane Homogo andaneha biruwa ibugua laradagua bialu bedagonaga hangu mini mo yaraga habehe kama.
PRO 31:31 Iname wali ebebebi manabi baya gibiore biaga ibunaga biabebi baya maburabiore biaga ogonibi bedagonaga mini yaraga holeneore nga. Wali agali bibahendeme ibugua biradaru loyogo lalu ibunaga mini mo yaraga hai holene nga, lalu Kini Lemuelenaga ai̱yahanda bi lai hene.
ECC 1:1 Agali manda timbuniorebi mbirame bi ogoni latagi hene. Agali ogoni ibu Debidi igini howa bamba ibu Yarusalemeni kini hene.
ECC 1:2 Agali manda timbunibi ogoni ibugua lalu, Mbirale bibahende bu ngaruni mbira galone nawioreni howa bibahende nagalone hangu wiai ka.
ECC 1:3 Iname mali bibahendengi biabe ndelahe bialu haabo haramali. Anidagua bialu ha haramaligo ai biabe ndelahe ogoninaga lini bayale mbira agile mo yaramalibe.
ECC 1:4 Wali agali ala heneru homaragola mani maru ha aribia haga. Anigo dindi dege mendeme ibu winigoria wia aribia naholebira. Dindi ibu winigoore wiaabo haga.
ECC 1:5 Horo bibahendengi ni ibu tagira ibalu horo bibahendengi ni ibu palialu horo mendengi tagira ibulenaga lone dai buwa manda mandabu wiaga. Horo bibahendengi ni ibu anidagua dege bialu howa ibu ha̱ timbuni laga.
ECC 1:6 Puyabu ibu nde uyurahayagi howa puloyu unurahayagi piaga. Ani bialu nde lone beregedalu uyurahayagi puloyu dai biaga. Ai puyabu ibu anidagua bialu ibaga dege bialu haabo haga.
ECC 1:7 Ai iba poraru bibahende solowaraha pialu pu mogo biai haragome solowara ibu biralu biru to̱ nale wiaabo kagoni. Iba uruni ti lone iba maneha dai buwa mani solowaraha lone pupe halu piaga.
ECC 1:8 Iname mbirale dindini ngaru bibahende manda bu handalu kamaria uruni manga hai haramali. Inanaga manga holene ogoni ogoale lalu latagi habe naheore kamagoni. Dindini ngaru bibahende deme handalu bi damenebi hale hai haramaligoyu ai urunime ina karulapu nabi dege kamagoni.
ECC 1:9 Mbirale tara tara abale deme hendenedaru ale dege mani hondoleberema. Mbirale mbira agalime bialu heneru manibi uruni ale dege bialu holebira. Anigo dindi bibahendeha gahenge mbira nawiore.
ECC 1:10 Marungi agalime lalu, Mbirale ogo gahengeda, lagago ogoni henene ndo. Ogoni ibu ina dindi ogoria nahemangi ala winigo dege nga.
ECC 1:11 Mbirale bamba inanaga mamaliru heangi bialu hene ngaru mbiralime manda biai naholebira. Manibi mbirale dewa tagira polebirago ogoni inanaga aguanene mani holobadaru tiguabi manda biai naholebira.
ECC 1:12 I̱ agali manda timbunibi mbira kogoni. I̱ Isaraele wali agalinaga kini howa Yarusalemeni harugoni.
ECC 1:13 Ani howa i̱na dindini ngaruni damene bibahende mandabu handaiore hole manda biru. Ani manda bialu uruninaga tene baya hangu tayabu handaru. Anigo Ngode Datagaliwabehanda iname biabe bialu holoma̱ya ngiyadaruni genda timbuniore mo ngiyadane hendedo.
ECC 1:14 I̱na dindi ogoria mbirale tara tara tagira ibaga ngaruni irane dabo handai harugo ai heneneore mbirale bibahendenaga galone mbira nawi degeya. Mbiralime gerai pialu puyabu minu yania hole poradagua biya.
ECC 1:15 Mbirale mbira yole ngago mbiralime mo tiga bibe nahe. Mbirale mbira nawigo iname daga labe nahe.
ECC 1:16 I̱nime manda bialu hewaria i̱ manda timbunibi howa i̱na kini abale Yarusalemeni henedaru bolangua hene kogonida lo manda bu haru. I̱na manda tara tara biaihe howa mini gigabi wu kogoni.
ECC 1:17 Ani wu howa i̱na mini giga bulenenaga tenego handa walia hole hongo howa taya bialu mini nawi lulu ale hope hagagonaga tenebi taya bialu biru. Ani taya bialu harudagoni i̱ lulu yu howa gerai lalu puyabu minu yania hole poradagua biruya.
ECC 1:18 Heneneore mbira ngago larogo mbirali ibu manda timbuniore bu heagua ogoni ibuha genda timbuniore tagira ibaga. Ibunaga manda bia timbu hama irigi hayagua ibuha genda bu ngarubi anda hama irigi dege halu mo timbu haga nga.
ECC 2:1 I̱na hamelewago bulenagabi mo turu holenaga bulene wiarubi galone agidabe hondole hai biru. Ani hai birugola urunihabi galone mbira nawi degeyane handaru.
ECC 2:2 I̱na hai bialu hewaria oba holenego galone mbira nawiore bame lulu biabe aleyane handaru. Mo turu holene ngagomebi ina biamogo bulene emene mbira nawioreyane handaru.
ECC 2:3 I̱na mini gigabi wulenenaga hariga taya dege biruria waini ibabi nalu mo turu holenenaga mana tara tara wiarubi bialu hole manda biru. I̱na wali agalime dindi ogoria emene tigi mbira hangu howa talialu bialu helonaga bayale mbira agilego winidabe hondole lowa taya bule manda biru.
ECC 2:4 I̱na biabe bulene timbuni bu wiarubi bia dege biru. I̱ninaga anda timbunirubi bialu gerebi mabubi hanga dege bialu haru.
ECC 2:5 Ani buwa i̱na mabuha tomo tara tarabi hangalu ira lini daga ale tara tara hearubi hangaru.
ECC 2:6 I̱naga mabuni ira lini daga ale hangarudaruni iba mulenaga iba goreyane berelo uli dewa dege tombo wiru.
ECC 2:7 Wali agali dewaore i̱naga garabaya biabe ale bia haga helonaga yolo bu helaru. Wali agali uruni tinaga waneigini hayarubi i̱naga garabaya biabe ale bia haga dege haya. I̱na nogo bulumaga sibirubi dewa hinarugo Yarusaleme tanoha agali maru ala henedarume nogo dewaore i̱na hinu harudadagua mbira hinu ha nabini.
ECC 2:8 Dindi i̱na handame ho harudagoria ngolo silibaru dewaore mo yu anda ibalu dindi taraha howa kini bu hearumebi ngigi biyagola dewaore mo wiatago ho haru. Wali agali marume i̱ mo turu halu iba gana laga bilonagabi dabo helaga biru. Ani bialu i̱ninaga bu miniha turuho holenaga wali dewa berearubi mo ngoai howa haru biraru.
ECC 2:9 Aniore birugome mbirale uruni bibahende i̱na mo wiai howa i̱ homogo timbuniore haru. Agali homogo maru ala Yarusaleme tanoha henedaru aria mbira homogo mbirale dewawi i̱ ale mbira nahene. Ai áyu ogoni i̱ agali manda timbuni bogabi haabo harugoni.
ECC 2:10 I̱na mbirale mule hame laruru mialu mbira bulene hamelarurubi biru. I̱na minime mbirale mbira mo turu holenaga hame larugo yamagaho ha nabi muabirago ale damene mia dege biruli. Biabe i̱ni bini ngorubi hondowa bayaleore biru lowa turu hagabu harugoni. Ainde biabe uruninaga yolo turu harudagoni.
ECC 2:11 Anigo mani i̱nime biabe ndelaheore bu ngelaruda lo mitangi bialu ai ogodagua manda biru. Uruni bibahendeme i̱ biamogo bulene mbira nawiore howa bibahende nagalone hangu mo wiai haruda lo mitangi bu haru. Uruni nagalone bameore mbiralime puyabu minu yania hole talima poradagua binidalo manda biru.
ECC 2:12 Anigo mbirale uruni bibahende i̱na biai kogodago kini mani ho aribia harago ibugua tara mbira agialego bulubadabe. Ibugua bulene nawiore. Anidagola i̱na mini gigabi wulenela mini nawi lulu ale holenelanaga tenego goaria hondole taya bialu haru.
ECC 2:13 Ani taya bialu hewaria i̱naga miniha howa manda bialu handa walia harugo ogo. Mini gigabi wulenego ibu lulu mini wiaga ngaru bibahende bolangua halu ibu duniniore howa wá holeneme aruma holene bolangua hagadagua bolanguahe wiane handaru.
ECC 2:14 Mini gigabiwi karu ti ogoale berolo miniha manda bialu biaga. Ai mini nawi karu ti galone nawini aruma ale ngaruha pupebe bialu haga ka. Bi ogoni henenego i̱na mendebi manda bidogo ogo. Dindi ogoria howa mini gigabiwi karubi mini giga nabi lulu karubi ereba holene ogobi dege dege ngane hendedo.
ECC 2:15 Ani handalu i̱na mbirale agali mini giga nabi lulu karuha tagira polobada alego i̱bi ani dege bulubadane hendedo. Anigo nde i̱naga manda bulene mini giga bulenebi áyu timbuni wu kogonime i̱ni biamogo agua bulubadabe. Mende manda berogomebi manda timbuni bidogoni galone nahedane hendedo.
ECC 2:16 Mani haragola wali agalime agali mini gigabiwi karubi lulu ale karubi bibahende embeda hai dege holebira. Mini gigabiwi karubi mini giga nabi karubi homolenenaga ogobi dege dege nga.
ECC 2:17 Anidagola i̱ manga timbuniore harugoni. Irane dindini ngaru bibahendeme i̱ genda mo ngulene dege ngagonaga manga ho haru. Mbirale uruni bibahende irane nawi i̱na puyabu poragoha gerai lalu haruru puwa minu yania haradagua bialu harugoni.
ECC 2:18 I̱na erekuibi mbira bialu harugo mani kini mendeali i̱ henegoria ha aribia harago ibugua karulo holobada manda biru. Aniore bulubadagonaga i̱ mangaore ho harugoni.
ECC 2:19 Mani agali kini i̱ henegoria ha aribia holobadago ibu agali manda timbunibime ha aribia holobabe be manda nabi lulu ale kagome ha aribia holobabe tobara. Anigo agali ogoni ibugua mbirale i̱naga manda timbuni biwagome biabe erekuibi bialu hene bu helaruruni ibugua handayaho holobada. Mbirale urunidagua bulubadagobi nde galone nawi dege.
ECC 2:20 Anidagua bulubadagonaga i̱na biabe erekuibi bialu harugo mitangi berodagua i̱naga bu miniha kebaore ho kogoni.
ECC 2:21 Mbirali ibu nde ibuninaga biabe bulenenaga bayuwa lo manda bialu mini gigabiwi howa biabe erekuibi bialu mbirale tara tara dewa mo ngelo haga. Ani mo ngelo howa mani agali ogoni ibuni homaragola ibunaga mbirale wiyaru agali bame karu ti mo haga. Mana ogonidagua bulenego irane nawi koore nga.
ECC 2:22 Ina dindini kamangi biabe erekuibi bialu haabo howa mini burugulo haramaligo ainde biabe erekuibi bialu harimarume ina mbirale bayale agi ngiadai biaga ngabe.
ECC 2:23 Ina dindini kamangi mbirale dindini wini bu ngarunime ina mo mini burugula halu genda dege mo ngiaga nga. Ani biragola mbiraga miniha uruni dege mitangi biaabo halu u baya hangu napale yange yange bu wiaabo haramali. Mana urunidagua bulenegobi nde galone nawiore.
ECC 2:24 Iname tomo ibabi nalu howa biabe birimagonaga turu holene nga. Anidagua beremago uruni tene ina ndo Ngode Datagaliwabe ibuni nde uruninaga teneore kagoni.
ECC 2:25 Iname ogonidagua buluma̱ya Ngode Datagaliwabehanda ina turu holoma̱ya yupe nakale iname tomo ibabi nalu howa turu agua habehe kamalebe.
ECC 2:26 Ngode Datagaliwabe ibugua wali agali ibu gubaliniore ho karu tihondo manda timbunibi mini gigabi wulenebi mo mialu uruni mo turuho helaga ka. Ani biagagoyu wali agali maru mana ko biaga karu Ngode Datagaliwabehanda tihondo turu nahe tigua biabe ndelahe biragome tinaga mbirale ngaru mo mogo bialu howa wali agali Ngode Datagaliwabehanda turuho hayaru tihondo mo migi biaga. Mana urunidagua bialu holenegobi nde irane nawi dege. Mbirali puyabu minu yania hole talima poradagua bialu haga.
ECC 3:1 Dindini ngaruni damene bibahendeore bulenebi lolenebi nolenebi wulenebi Ngode Datagaliwabe ibugua uruninaga horo pongobo winingi biaga.
ECC 3:2 Ibunime ina dindini holene horo mo wialu ina homolene horobi mo ngelaga ka. Tomo hongolene horobi tomo bialu nolene horobi mo ngeleda.
ECC 3:3 Agali bo home lolene horobi warago ngaru mo dabi holene horobi ibugua dege mo ngeleda. Mbirale ngaru mo waholene horobi bayale helo wabulene horobi ibugua pongobo ngelalu bida.
ECC 3:4 Dugu bialu holene horobi oba halu holene horobi ibugua dabo ngeleda. Dara holene horobi iba gana lalu mali lulene horobi ibugua dabo ngelenego nga.
ECC 3:5 Agalime ibu one baba turu hagabu holenebi waho holene horobi ibugua dege pongobo winigo nga. One agalinila mini mbira ho holene horobi naholene horobi ibugua dege dabo wini nga.
ECC 3:6 Mbirale mbira wahenego handa walia holene horobi mbirale yu waholene horobi ibugua dabo ngeleda. Mbirale ngelo mo wulenebi yu wahalu ba ai̱ nai̱ bulene horobi ibugua dabo ngeleda.
ECC 3:7 Ibugua degeme aga budulene horobi lone lebia dai bulene horobi dabo ngeleda. Bi nale holene horobi bi lalu holene horobi pongobo wini nga.
ECC 3:8 Ibugua dege mendeali gubalini ho holene horobi handabe manga ho holene horobi dabo ngeleda. Wai bulene horobi wai nabi holene horobi ibugua dege pongobo ngeleda.
ECC 3:9 Biabe biaga karume tinaga biabe biragonaga lini bayale agi yu hagabe.
ECC 3:10 Ngode Datagaliwabehanda genda mo ngiraru dege yu haga kamagoni ndobe.
ECC 3:11 Ibugua mbirale bibahende ibunime ibiloa birangi ibilaga biaga ka. Ani bialu howa ibugua inahondo mini bayale mo wia haragola iname mbirale alaore bini ngarubi mani bulubadarubi bibahendeore manda bua howa haga kamagoni. Ani kamagoyu Ngode Datagaliwabehanda mbirale ala binirubi maniore bulubadarubi bibahende ina mo walia naholebira.
ECC 3:12 I̱na uruni bibahende manda bu handalu hewaria dunini mbiraore hangu wiaria handarugo ogo. Ina dindini kamangi howa mana bayale hangu bialu turu hagabu dege holene wiaria handaru.
ECC 3:13 Iname tomobi ibabi nalu dungulo howa mbirale bialu karu turubi hangu bialu holene ngalo manda bido. Mbirale uruni bibahende Ngode Datagaliwabehanda inahondo bame nginida manda buwa ani bulene nga.
ECC 3:14 Ngode Datagaliwabehanda ibunaga mana mo iriari mbira nabiaga ngago i̱ manda buore harugoni. Ibugua biniru wiaho wiaaboboore bu wulebira. Mbiralime Ngode Datagaliwabenaga mana ngagoha mo tago habe naheore wialu ibunaga mana uruni aria mbirago mo wahabe naheore nga. Ngode Datagaliwabehanda ogonidagua ngelenedagoni irane ina wali agali bibahende kamarume ibugua biniru handawa buwa ibuni andaneha hai holoma̱ya ani ngelene.
ECC 3:15 Mbirale áyu birarunibi awe bulebirarubi uruni bibahende abale biaga winigo dege tagira pora. Ngode Datagaliwabehanda abale binidaru bu wa nahaga. Áyubi nde lone abale binidaru biadai bigi biaga ka.
ECC 3:16 I̱na manda bialu hewaria mana lehe marubi dindi ogoria wia dege biane handaru. Wali agalime mana tigabi bayale ngaru nabi howa tigua mana ko nabulene wiaru dege mo tene howa bialu ka.
ECC 3:17 Ani bialu kago manda buwa i̱nime lo mitangi bialu bibahende ngaru bulene horo pongobo ngangi bulebirago Ngode Datagaliwabe ibugua wali agali bayale biagarubi ko biagarubi ti dabaki bulene horo mbira manda mandabu ngago horo ogoningi bibahende dabaki bulebira lo mitangi biru.
ECC 3:18 Ani bialu Ngode Datagaliwabehanda ina wali agali nogo biango ale dege ka lo mitangi bialu ina ba handalu ka lo manda bido.
ECC 3:19 Anidagua larogoni irane nogo biangoru homalu ereba hagadagua ina wali agalibi nde homalu ereba haga kama. Nogo biangoru ti homagadagua ina wali agalibi nde homaga dege kamagoni. Nogo biangoru ti bu he̱ laga kadagua ina wali agalibi nde bu he̱ laga dege kamagome ina bibahende holene ogobi dege dege kama. Ani kamagome ina wali agalinaga holeneme nogo biangonaga holene bolanguahe ndo kama. Ani ndo kirabalinaga holene nagalone labolabo nga.
ECC 3:20 Ngode Datagaliwabehanda dindime kirabali wabinigo ai ina bibahende homaramangi ina haru mandagi lone dindi holeberema.
ECC 3:21 Marume wali agalinaga dinini irigi halu nogo biangorunaga dinini dindiha dalipe haga lo manda biaga. Ani lagago uruni ogodaguaore biaga lalu manda biai habehe ai kabe.
ECC 3:22 I̱na uruni mitangi biai howa manda bu handalu koria iname bulene mbiraore hangu ngane hendedo. Iname bulene ogo. Inanaga hariga mende nawiorego iname bulene ngaru bibahende turu howa bialu holene nga. Mani ina homaramangi ogoale bulebira lalu mo walia halu langulene mbira ai kabe.
ECC 4:1 I̱na lone handalu hewaria dindi ogoriani wali agali bu hearume mana tigabi ndo bialu hearu handai harugoni. Agali ko hearume wali agali dewaore hengedape hayagola dugu bialu heagoni. Anigo ti biamogo bulene mbirali naheoreya. Gabumane karu tinibi ko howa mana ko biaga karubi dege biamogo biaga ka.
ECC 4:2 I̱na manda bialu hewaria wali agali homayaru ti hangu yo piya manda bidogo irane ina dindini kamarume genda handalu kamadagua ti nahondolebira.
ECC 4:3 Wali agali dindi ogoriani karu ti ai̱yahanda nahono winidale ti yo peneore kale. Dindi ogoriani wali agali bu karume mana ko biraru ti nahendedale.
ECC 4:4 I̱na handalu hewaria mana tara mendebi handa dege biru. Wali agali karu tigua ti nenege karume mbirale dewa buwi kago hondowa henge lowa tibi ogonidagua dege bu wulenaga erekui biabe biaabo haga ka. Ogonidagua biaga karu mini nawi lulu ale howa agali mbirame gerai lalu puwa puyabu minu yani haradagua bialu ka.
ECC 4:5 Tigua lalu, Biabe nabiaga bame bira hangu biaga kago ogoni ibu lulu ale mini nawi kagoni. Ani biyagua ibunaga hongo ereba halu homolebira, laga.
ECC 4:6 Anigo i̱na manda bialu koria iname emene yidamaruni yu howa miniha dungulo holenego karulapeoredane hendedo. Iname horo bibahendengi gi kirabalime erekui biabe biaabo halu ha̱lo bira nabi harimayagua ina puyabu minu yani hole lowa gerai talima poradagua berema.
ECC 4:7 I̱na handalu hewaria mana nagalone mende bialu hearia handaru.
ECC 4:8 Agali mbira ibu iginibi hamenebi naheore ibuni hangu howa erekui biabe bialu mbirale ilu tete bu wiaga ka. Ibu dewaore bu wu howa karulape ngo lo manda nabi dewa wua dege haga. Ibugua lo mitangi bialu, I̱na erekui biabe biaabo halu turu nahe kogoni agidabe. Ibunaga mbirale uruni karula aribia holene mbirali naheoredalo mitangi nabiaga. Agali ogonime ogonidagua biragoni turubi ndo nagalone dege bialu habane nabulene holebira.
ECC 4:9 Mbirali ibuni hangu hayagua bayale ndo. Kirali howa biabe mandagi bialu hayagua ogoni bayaleore holebira.
ECC 4:10 Mendealigo pilope hayagua mendegome gi mibehe holebira. Anigo ibuni hangu howa pilo ibira haragola biamogo bulene mendeali naheyagua ibu darabiore holebira.
ECC 4:11 Dagare biragola libu mandagi paliyagua dagare naholebira. Anigo ibuni hangu hayagua ibunaga tingini agua mo poboyogo bia habehebe.
ECC 4:12 Waitigime mbiraoreali baba hangu wai biyagua waitigi ibu wayali habehe holebira. Ai waitigime kirali karia bayagua wayali nahabehe holebira. Pu tebira yuwa payinigo abale tongo nalaga.
ECC 4:13 Mbirali yagibano henemebi garabaya henemebi irigi howa ibu dindini kini habehe kagoni. Ani hayagua ibu kini howa wahe harangi ibugua agali marume manda bayaleru talebu milo henge namiyagua ibu mini nawi ale habane nabulene mbira holebira. Ibu ogonibi kangi igiri daliahe mbira yagibano mbiraleru burupale howa mini giga bulenebi manda bayalebi kayagua ibugua kini biago bolanguahe holebira.
ECC 4:15 I̱na wali agali bibahendeore dindi ogoria palu ngaru mitangi bu handarugola ti kagoniha dege howa igiri bayale daliahe mbira heago ibu kini ho aribia habehe kago handaru.
ECC 4:16 Kini mbirame wali agali dewaore daga labe nahe handayaho howa ibu homaragola wali agali hameigini mani ho aribia hararume kini ibugua biabe timbuni biyaru tigua mitangi bu dai nabulebira. Anigo ibugua biyagoni galone ndo halu agali mbirame gerai puwa puyabu minu yani hole piagagobi dege holebira.
ECC 5:1 Anduane Homogonaga andaha anda pialu howa minila haru polene nga. Í̠na mana mbira hale halu manda bulenaga piriyagua bayaleda. Anigo wali agali mini nawi karume lomaru bo delole piagadagua í̠ bame pupe holenego nakarulape. Wali agali urunibime Ngode Datagaliwabe deni ko bayalela dababe nahe kagoni.
ECC 5:2 Ngode Datagaliwabehondo ogo ale bule lowa bi bame lowia nabi mitangi ala buwa bi labe. Ibu dahuliya andagani kago í̠ nde dindi ogoriani wali agali dege kegoni manda buwa í̠na bi dewa lolene nawi galone ngadagua lalu habe.
ECC 5:3 Í̠na mbirale ngarunaga mini tumutumu bu hariyagua emaga ko hondolebere. Bi lo payapaya dewa biriyagua í̠na lulu bi dewa lolene wulebira.
ECC 5:4 Í̠na Ngode Datagaliwabehondo mbirale mbira bule lalu lo wuwa awe bule lalu lu hondo haabo nahabe. Mini nawi ale kagohondo Ngode Datagaliwabehanda turu nahaga. Í̠na bule lo wirigo abale bibe.
ECC 5:5 Í̠na Ngode Datagaliwabehondo mbirale mbira bule lalu lo wuwa nabiriyagua mana ogoni bayale ndo bere. Bule lalu lo wiridagua nabibehe keyagua nde í̠na mbirale mbira bule lalu bi lo wia nabibe.
ECC 5:6 Í̠na bi laregome í̠ni ko mo bia holigo de hondo habe. Í̠na loma binigo mo miaga agali karuhondo lalu, I̱ mini nawi howa bame laruya, lolene nakarulape. Anidago í̠na Ngode Datagaliwabe aginaga mo keba holebe. Í̠na ibu mo keba haregola mbirale erekui biabe bialu ilu wiriru mo ko holigo.
ECC 5:7 Í̠na biabe bu waholeru dewa biaga keyaguabi emagaru dewa handa gimbu biaga keyaguabi bi lagimbu biaga keyaguabi uruni ale nagalone degedago í̠na Ngode Datagaliwabe ibu gibiore ka manda bialu ibu andaneha holene nga.
ECC 5:8 Gabumane agali karume wali agali yagibano karunaga mo genda hayaguabi tinaga godi larago baya hangu mo tiga nabiyaguabi tihondo bulene tigabi ngadagua nabiyaguabi uruni hondowa í̠na mogo nalabe. Haru haga karume mana urunibi birago irane tinaga haguane karume tini genda mo wia haga. Anigo haguane o haruaruni tinaga haru haga daliga karumebi mana uruni ale dege bialu hagaya.
ECC 5:9 Agali haguane urunime ogonidagua bialu wali agali ti dindini tomo hengenerunaga muni miagane winiru ti mo page biaga. Haru haga urunime muni uruni mo page buwa tini hangu tale bu ta haga. Kini ibubi nde ogonidagua dege wali agalihondo dagisi muni ngi lalu hagaya.
ECC 5:10 Í̠na muni gubalini hariyagua karulape wu ha nabulebere. Í̠na homogo hoa hariyagua mbirale hamelederu bibahende wu hai naholebere. Uruni bibahende galone nabulene holebira.
ECC 5:11 Í̠ homogo howa mbirale dewa wu kegobi dege í̠ andagani tomo nolene ne harigawibi dewa dege holebira. Í̠na bialu kegoni maru karume í̠ homogo ka lowa manda bilonaga hangu bialu kegoni.
ECC 5:12 Biabe biaga karume tomo nolene dewa bu wiyaguabi nawiyaguabi ti mbiraga u baya hangu paliaga ka. Anigo agali homogo karu ti u palia hondo nahe tinaga mbirale wiyaruni mitangi tangi bialu yange yange bu wiaga.
ECC 5:13 Dindi ogoria nabuabi ale mbira bialu hearia ina handarugo ogo. Wali agalime muni tini buru palirangi mule lowa do haga.
ECC 5:14 Ani buwa muni urunime biyinaya mbira bialu bia ko howa muni do hayaru biba haragola mani ti waneiginiruhondo mulene nawiaga.
ECC 5:15 Ina ai̱yahanda ina taba hanayangi mbirale mbira nayi ibirimadagua dege ina homarangibi mbirale mbira nayiore poleberema. Iname dindi ogoria howa erekui biabe bialu mbirale mo mogobu ngamarubi mbira nayiore poleberema.
ECC 5:16 Mbira nayiore ina ai̱yahanda taba hanayagobi dege poleberama. Iname erekui biabe bialu puyabu minu yania haradagua bialu kamagoni aginagabe. Mbirale mbira agi yu holeberemabe.
ECC 5:17 Dindi ogoriani howa ina bayale ndo halu inaha genda tandagala anda ibalu horo bibahendengi mini burugulo halu kebabi halu waragobi balu haga beremali.
ECC 5:18 Iname bayaleore mbira bulene wiaria i̱na handa walia harugo ogo. Ngode Datagaliwabehanda holene horo henge emene tubagi ngidagoria iname turu howa biabe bialu ibabi hinabi nalu holene ogoni hangu wiaria handaru.
ECC 5:19 Ngode Datagaliwabehanda agali mbirahondo munibi mbirale dewa gime biabe biyagonaga miyagua agali ogoni ibu turuho holene nga. Irane Ngode Datagaliwabehanda mbirale uruni agali o biagohondo bame turu halu minigonaga ibu turu holene nga.
ECC 5:20 Agali ogonibime Ngode Datagaliwabehanda ibu tigimandi turuho helonaga henge miyago ibu dindi ogoria agua holedabe lowa mini dege dindi nahe holebira.
ECC 6:1 Ina dindi áyu kamagoriani wali agali bu karu mo genda haga mana ko mbira wiaria handarugo ogobi wia.
ECC 6:2 Ngode Datagaliwabehanda agali mbiragohondo muni dewabi mini timbunibi mbirale mbira ibu hame ledaru alego mbira buru palia nabi helo miai haga ka. Ani muwa Ngode Datagaliwabe ibugua agali ogonime mbirale uruninaga turu hama pelo yupe naholebira. Anigo mani hameigini tara ibirarume agali biagonaga mbirale ngaru mialu turu hama polebira. Mana ogonibigo turu nabiya.
ECC 6:3 Iname waneigini handari mbira (100) hono bila howa mali dewaore harimayaguabi mbirale bayale bu ngamarunaga lini nane kamaore dege homaramagola marume ina bayuwa hora nahayagua ogoni nakarulapeoreda manda bido. Ina ogonibi harimayagua nde gali mbira ai̱ya tombeha howa homayago ibu bolangua holebira.
ECC 6:4 Gali ogonibi taba honolenego bayale ndo. Ibu mini lene ndodagola tigua hora howabi ibu mitangibu wiaabo nahaga.
ECC 6:5 Waneigini ogoni ibu nime wá haragobi nahendene howa mbirale mbirabi manda nabi paluene dege manda biaga. Ai waneigini o biagobi ibunaga holene ogonime
ECC 6:6 agali mbirale dewa buwi biagonaga holene bolangua haga. Agali ogonibigo ibu mali daosini mbira (1,000) daosini kira (2,000) heneyaguabi ibugua dungulo bayale holenego manda nabi turu nahe dege haga. Ina bibahende kamarubi homalu gali biagobi agali biagobi libu piyadagua dege pu holeberema ndobe.
ECC 6:7 Iname biabe beremaligo bibahende tomo nolenenaga hangu beremali. Anigo iname tomo nolene karulape wu to̱lo haabo naharamali.
ECC 6:8 Agali mini gigabiwi karume mini nawi karu agua bolangua hagabe. Agali yagibano mbirame wali agali bu karu deni mana bayale mbira biyagua ogonime ibuni agua biamogo bibehebe.
ECC 6:9 Mana ogonibigo galone ndo mbiralime gerai lalu puwa puyabu minu yani haradagua bira. Ina mbirale dewa tara tara wu hole mitangi bu wiaabo nahe emene ngamaru karulapedalo manda buwa miniha turuho holene nga.
ECC 6:10 Mbirale bibahende tagira ibagago uruni bambaore Ngode Datagaliwabehanda tagira ibilonaga manda manda bu wini. Ani binigo ina wali agalime mana beremarubi Ngode Datagaliwabe ibu manda biai kago manda buwa iname ibula lai labe nahe kamagoni. Ogoni irane ibunaga hongo kagome inanaga hongo kamago bolangua haihe ka.
ECC 6:11 Iname lai laabo harimayaguabi ina wayali habe nahe holeberema. Iname bi bame lo waharamagome inane emenebi mbira biamogo nabulebira.
ECC 6:12 Ginu ngarume ni ge haragola munini abaleore ereba hagadagua ina dindini emene tigi mbira hangu halu ereba holeberema. Anigo inanaga holene ogoni galone nawidago iname mana bayalego talima poloma̱ya agua manda bibehebe. Ina homedemaha dindi ogoria bulebirago ogo ale bulebira lalu agua manda bibehebe.
ECC 7:1 Nga biagane mini sanda yolo timbuniore miaganego nira lowa wali agalime í̠ bayaleore kegoni lolenegome bolangua ka. Ai í̠ taba henene horo ogoni dindiha lowa í̠ homarego horo bayale nga.
ECC 7:2 Iname mbirali homenegonaga dugu bialu karia duguanda pirimayagua ogoni bayaleore. Tomo timbuni dawa nalu karia polenego dunini ndo nga. Ogoni irane ina dindini kamaru bibahende homaga dege kamagoni mitangi bialu holene nga.
ECC 7:3 Ina miniha genda ho holenego bayale lowa oba dege ho holenego bayale ndo nga. Ogoni heneneorego irane genda haramagome inanaga wanakui mo aruma howa ina dindi ogoria mana bibahende ngago bayuwa manda buluma̱ya biamogo biaga nga.
ECC 7:4 Mbirali turu ho holene hangu mitangi biaga kago ibu mini nawi ka. Ai mini gigabiwi kago ibu homolenenaga mitangi bialu holebira.
ECC 7:5 Wali agali mini nawi karume í̠ mini yaraga harago galone ndo lowa mbirali mini gigabiwi kagome í̠ talialu mo tiga biyagua ogoni bayaleoreda manda bibe.
ECC 7:6 Wali agali mini nawi karume oba hararuni galone nawini oba haga. Ogoni mamunali anihe irani delaragola dide hangu lalu todobene be do pobo nahagagobi tinaga oba ogoni galone ndo holebira.
ECC 7:7 Agali mbira ibu mini gigabiwi howa wali agali marunaga muni mbiraleru mo hondo howa miyagua ibu agali mini nawi kagobi dege kagoni. Agali mbirame ohowa muni mirago nayagua mana ogonibi biragome ibuni mini bayale ala wiyago mo ko haragoni.
ECC 7:8 Agali mbirame biabe mbira tehinalu bialu bu maro biyagua ibu bayale biaga ka. Mine holene nira lowa ema nabi hibu loleneme bolangua holebira.
ECC 7:9 Iname wali agali maru karuhondo keba abale nahe mini haru holene nga. Keba haho wiaabo holenego wali agali mini nawi karunaga mana nga.
ECC 7:10 Ala bayale haramaligo áyu ko kamagoni irane aginagadabe lolene nawi. Bi ogonibi larimayagua ina mini giga bulene nawi howa laramali.
ECC 7:11 Wali agali bibahende dindi ogoria kamaru ina mini gigabiwi holene nga. Holene ogoni bayaleorego ina aba homole howa mbirale bayaleru paluni ngiagago ale ngagoni.
ECC 7:12 Mini gigabi wulene ogonime horo kongi munime ina biamogo biagadagua biamogo biaga. Anigo mini gigabi wulenemebi manda bayale bulenemebi muni ngaru bolangua howa ina biamogo biaabo haga nga.
ECC 7:13 Ngode Datagaliwabehanda mbirale bibahende biyaru bayuwa manda bulene nga. Ibugua mbirale mbira wabu ko hayiyagua aiwa mo tiga bu helabehebe.
ECC 7:14 Mbirale bibahende bayale dege ngangi í̠naga miniha dungulo howa turu habe. Ko holene mbira í̠ kegoria ibirangi Ngode Datagaliwabehanda ina kamagoria kobi bayalebi ibilagada manda bibe. Ogonigo mani agi bulebirabe ina manda nabi kamagoni ndobe.
ECC 7:15 I̱na dindini howa mbirale bibahende handalu hewaria i̱naga holene ogoni galone ndoyane handarugoni. Ani handalu hewaria agali mana tigabi wiadagua bialu hearu homaya. Agali maru mana ko wiaru bialu heagoyu ti dindini lu haabo hea.
ECC 7:16 Anigo iname mana tigabi bulenebi mini bayale gigabiwi holenebi mitangi beremagome inane mo ko holigo hongo nahami̱ya.
ECC 7:17 Iname mana ko tara tara ngaru bulebi mini nawi howa bulenebi hongo howa nabimi̱ya. Ina homolene nangangi inane abale mo homa holigo nabimi̱ya.
ECC 7:18 Mana ogoni labo bulene ngagoria nabi wandialu hami̱ya. Mbiralime ibuni mo dindiha halu Ngode Datagaliwabe ibu gibiore ka manda bialu hayagua ibugua mbirale birago damene bibahende bayale hai holebira.
ECC 7:19 Tano mbirani agali haguane pira hayagua tigua tano bayale wilo mo hongo harago emene nira ale lowa mini gigabi wuleneme agali mo hongoore haragome bolanguahe ngagoni.
ECC 7:20 Mbirali dindi ogoriani howa mbirale mbira bia ko nahaga tigabi hangu biaabo haga mbira naheore. Horo marungi ibubi ko bigi biaga dege kagoni.
ECC 7:21 Wali agalime bi larago bibahende hale hai nahabe. Hale hariyagua nde í̠naga biabe biahaga kagome í̠ mini lalu bi ko lararia hale holebere.
ECC 7:22 Hale howa í̠na manda bialu keria horo marungi marunaga mini lalu bi ko dege lariligo mitangi bigi bulebere.
ECC 7:23 I̱na i̱naga mini bayale gigabi wuleneme mbirale uruni bibahendenaga tene manda biai holebero mitangi birugoni. Anigo i̱ agali mini gigabiwiore hole tai dege bialu harugoyu i̱naga manda bulenego emene halu uruni bibahende manda biai habe naheya.
ECC 7:24 Holene áyu kamagonaga galone ogobi nga lalu aiwa manda biai habehebe. Iname holene ogoninaga galone taibidago manda bibe nahe kama. Anidago bibahendenaga tene aiwa handa walia habehebe.
ECC 7:25 Anigo i̱na mini bayale gigabi wulenebi manda bulene tarabi yu tiga bule hibu laabo halu mbira manda nabi harugonaga manda bulebi hongo howaore hai bialu harugoni. Mini nawi howa mana ko ngago biaganego irane manda bulenaga i̱na hongo howa hai bialu harugoni.
ECC 7:26 I̱na handalu hewaria homoleneme genda ngiagago emene bagi hene lowa wali ko biaga bedarume genda ngiagago timbuniore ngiagayane handa walia harugoni. Mbirale do wilo gono wia hagadagua i̱na agali kamaru do wuluma̱ya gono walime wida. Tinaga gi karuni i̱na dariba haga pu seni ale ho bedagoni. Agali Ngode Datagaliwabenaga andaneha haga kago ibu gono tara uruni aleha howa yo pialu ibida pobehe holebira. Ai agali ko biaga karu ti gono ogoni aleme minu yani kagola yo pialu pobe naheore holebira.
ECC 7:27 Agali mandabi ibugua lalu, Heneneore i̱na manda nabi henego emeneore manda bigi bialu ai walinaga mana biagago handa walia ho kogoni.
ECC 7:28 I̱na mbirale marunaga irane manda nabi dege howa tai biaabo harugola handa walia naheore. Wali agali daosini dewaore bu hearu dombeneha handalu hewaria i̱na agali bayale mini tigabi mbira mbira ha dege bia. Anigo wali bayale mini tigabi lenego mbira nabereoreyane handaru.
ECC 7:29 Uruni bibahende manda bulenaga hai bialu hewaria i̱na mbira handa walia harugo ogo. Ngode Datagaliwabehanda wali agali wabiyangi mini tigabiwi holoma̱ya wabinigoyu inaneme mini tara tara wialu áyu nakarulapeore kamagoni handa walia kogoni, laya.
ECC 8:1 Wali agali mini bayale gigabiwi karu ti degeme mbirale bibahende ngarunaga irane ogobiore nga manda biai ho kagoni. Anigo wali agali mini gigabiwi uruni hengedape habehe ai kabe. Mbirali ibunaga wanakui arumahe hayagua ogoni mini bayale gigabi wulenemebi manda bayale bulenemebi ibunaga wanakui mo wála holebira.
ECC 8:2 Ngode Datagaliwabehondo bi hongo howa lo wirigo manda bialu kininaga bi larago hale howa mo wanahabe.
ECC 8:3 Í̠na kinila bi iriari biyagua bi hongo howa nalabe. Kini kagome ibuni hame ledadagua bibehe kago manda bialu í̠na ibu kagoha hariyagua ibu helalu abale wahalu pobe.
ECC 8:4 Kini ibugua bi larago hale halu wali agali bibahendeme buleneore nga. Agali mbirame kinihondo hale halu í̠na ogo aginaga biribe lolene henge nawiorego manda bibe.
ECC 8:5 Wali agali kininaga bi larago bibahende hale halu biraru ti bayale holebira. Agali mini gigabiwi kago ibugua mbirale mani bulebadago ogoangi bulubadalo manda biai ho ka.
ECC 8:6 Ina wali agali kamarume inane nakarulape kamagonaga genda yu howa bibahende bulene ngagonaga horobi hariga bayalebi ngagonigoyu ina manda emene hangu bidama.
ECC 8:7 Mani agi bulebirabe ina manda nabi kamago ai uruni ogo ale bulebira lalu ina langulene mbirali nahe.
ECC 8:8 Homolene wirangi inanaga dinini ibu tingini yu wahalu poragola mbiralime hapai habe nahe holebira. Ani bialu iname homolenenaga horobi mo aribia habe nahe kama. Wai birangi ami haguanerume ami agali wai wahalu tini dindi dai bilo yupe nahaga. Ogonidagua dege mana ko bialu harimagome ina yo pialu pobe nahe ko ogonime inani paraho wiaabo holebira.
ECC 8:9 Wali agalime dindi ogoria howa bibahende bialu haganeru handalu i̱na manda biai harugoni. Ani handalu hewaria agali haguane bu hearume wali agali maru hengedape halu tihondo ko dewa biyaria handaru.
ECC 8:10 Horo marungi ina handalu hewaria agali ko biaga mbira homayagola wali agalime hora halu hearia handaru. Wali agali biarume ti homali yu wahalu dai bialu howa tano agali homayagome mana ko bialu hayagoha tigua agali o biagonaga mini yaraga hama piya. Mana urunibi galone nawi dege biyagoni.
ECC 8:11 Wali agalime ko biyagonaga pani abale mia dai nabiragome ti ko bia toa helonaga mini mo heya haga.
ECC 8:12 Wali agali ko biaga karu ti ko dewa biaabo halu howa abale homa nabi dindini lu haabo haga. Anigo bi mbira laganego, Wali agali Ngode Datagaliwabe gibiore ka manda bialu ibu andaneha haga karu ti bayale haabo holebira.
ECC 8:13 Mana ko biaga kago ibu Ngode Datagaliwabenaga bi mana lo ngago bia nabiyagua ibu bayale habe nahe howa emene tigi mandi hangu dindini holebira, lagane ogoni nga.
ECC 8:14 Tigua ani laganegoyu i̱na handalu hewaria mana ogonidagua tagira naibagago ogoni habane nabuleneda. Marungi wali agali mini tigabiwi karume yolo mulene winigo nami ko biaga kagonaga pani no aribia haga ka. Wali agali ko biaga karume pani nolene winigo nane mini tigabiwi karunaga yolo mu aribia hagayago ogoni galone ndoya.
ECC 8:15 Anidago i̱na manda berogola ina turu hagabu holenego hangu bialu harimayagua bayaleda. Ina hariga polene bayale mende nawi. Ani manda buwa iname iba hinabi nalu turu hagabu holene nga. Iname biabe bulene ngago bialu helo Ngode Datagaliwabehanda ina dindi ogoria heledago horo bibahendengi ina turu hagabu hangu hami̱ya.
ECC 8:16 I̱ mini bayale gigabiwi hole wali agalime mana tara tara horombe mbiragabi bialu hagaru irane hai bule biabe hongo howa birugoni.
ECC 8:17 Ani hai bialu hewaria i̱na Ngode Datagaliwabehanda mbirale bibahende wabinigo dindi ogoria agua tagira ibinida lalu iname tene manda biai habe naheya manda biru. Iname erekui biabe bialu handa walia hole lowa tai biaabo harimayaguabi handa walia naholeberema. Agali mini gigabiwi karume bibahende manda biai kama layaguabi henene ndo laragoni. Tiguabi mbirale uruni bibahende manda biai habe nahe ka.
ECC 9:1 I̱na mbirale uruni bayuwa mitangi bu wiaabo howa agua manda biru. Wali agali mini gigabiwi karubi mini tigabiwi karubi tanabi tigua biagaru Ngode Datagaliwabe ibugua mandabu winidagua hangu biaga. Ibugua tinaga gubalini holenebi handabe manga holenebi haru haga ka. Ina wali agali kamarume mani agi bulebirabe manda nabi kamagoni.
ECC 9:2 Ina mini tigabiwi kamayaguabi mini ko wiyaguabi mana bayale biagabi ko biagabi mbirali Ngode Datagaliwabe deni dodohebi dodo nahebi mbirale ibuhondo bo lomabu miagabi namiagabi ina bibahende kamagoria mbirale ogobi dege ibaga. Ngode Datagaliwabehondo ogo ale bule lalu bi lowini kagohondobi nalowi kagohondobi wali agali bayale biagabi ko biagabi mana mbiraore ogobi dege dege bulebira.
ECC 9:3 Wali agali dindi bibahendeni kamaru inahondo mana mbiraore ogobi dege dege biagago ogoni tiga nabioreda. Wali agali ti dindini kangi ko bulenebi mini nawi howa bulenebi tinaga miniha to̱lo tagihe kagoni. Ogonibi kaore ti abale homaga.
ECC 9:4 Wali agali dindini kangi tigua mini dunubia holene henge nga. Biango dére kagome laiono homene ngago bolanguahe kagoni. Ogonidagua dege wali agali karume homayaru bolanguahe ka.
ECC 9:5 Wali agali karume manda bialu karia ti homole kama manda bidagoni. Anigo wali agali homayaru ti mbirale mbira manda nabibehe nga. Ti mbirale mbira bayale mulene henge nawulebira. Wali agali karume homayaru mitangi bu wiaabo nahe embeda holebira.
ECC 9:6 Wali agali homarangi hame lagagobi dimagoli hagagobi keba haganebi uruni bibahende ereba hai halu dindi ogoria mbirale mbira bu dai bulene henge nawulebiraore.
ECC 9:7 Í̠ni tomo wiridaru nalu turu ho habe. Waini iba hambu wiridarubi nalu bu miniha dungulo habe. Ngode Datagaliwabe ibugua anidagua berego karulape lo manda bida.
ECC 9:8 Horo bibahendengi í̠ yári bayaleru bu haabo howa turu ho habe.
ECC 9:9 Inanaga holene galone nawiore kamago ai wali mbira í̠ni gubalini hene bereagua Ngode Datagaliwabehanda í̠ dindi ogoriani habelo henge ngiradagua horo bibahendengi wali ogonila turu hagabu haabo habe. Í̠ dindi ogoriani howa í̠na biabe bialu harigonaga yolo ogoni ngidago ani bialu habe.
ECC 9:10 Biabe mbira bialu kego nde hongo howa bialu habe. Mani í̠ homene dininiru ti daluha pu howa í̠na biabe bulenebi manda bulenebi mini gigabi wulenebi mbira nawulebirago áyu kengi ani bibe.
ECC 9:11 Dindi ogoria mendebi nde wiane i̱na handa dege birugo ogo. Marume hongoore howa gerai laragolabi ogoni ibu pole biyagoria bolangua habe nahe haga. Ami agali hongohe karume tigua wai bialu wayali haabo nahaga. Mbirali mini gigabiwi karu manda timbunibi karubi tigua muni mbiraleru dewa nawiore hagaya. Marume biabe tara taranaga haru haga mugube timbuniyi karu ti manga nahe hibu lalu howa biabe timbuni biaabo haragome tigua biabe haru haga timbuni ho aribia nahagaya. Ndelahe gendabi ngaru ina bibahendeha ibai hagaya.
ECC 9:12 Genda timbuni mbira inaha agilego ibulubadabe bibahendeme manda nabi kamagoni ndobe. Wena pialu karia nu ngaha hana ho wiagadaguabi nogo egaru gonoha do wiagadaguabi mo ko holeneme ina manda nabi kamaria abaleore gono ngagoha do wiaga manda bidamagoni.
ECC 9:13 I̱na mbirale mbira tagira ibiyago mitangi bialu wali agali mini gigabiwi karume dindini howa mana biaganego manane bayale mbira i̱na handarugo ogo.
ECC 9:14 Tano emene mbira wiagoha wali agali dewa nahe wia. Ani wiagola kini hongohe mbirame ibunaga amiru heba ibalu wai bialu tano ogoni karulole ibiya. Ami biarume tano ogoni ho mabu bupe howa tano pabe bo podole manda manda biya.
ECC 9:15 Ani biyangi agali mbira yagibano tano ogoniha henego ogoni ibu mini gigabiwi manda bayalebi hene. Ibunaga mini gigabi wulene biagome tano ogoni waitigirunaga giha hearia ibugua mo yu dai bulene hariga manda bu hene. Ibu ogonibi henego agali bu hearume yagibano biago mitangi nabi hene.
ECC 9:16 Anigo i̱na lalu, Mini gigabi wuleneme hongo holene timbu ngago bolangua kagoni, lalu haruli. Wali agalime mbirali yagibano kago hondowa ibu mini gigabiwi kagoni mitangi nabi howa ibugua bi laragola hale nahaga ka.
ECC 9:17 Iname agali mini gigabiwi kagome bi hendore laragola hale harimayagua ogoni bayale. Agali ogonibi kago ibugua bi laragome agali maru bi habane nabulene laga karunaga haru haga agalime bi dalimuore lagago bolanguahe kagoni.
ECC 9:18 Mini gigabi wuleneme wai biagane ale bibahende ngaru bolanguahe ngagoni. Anigo wali agali ko biaga mbira kago ibugua mana tiga nabi biragome mana bayale bibahende ngago mo ko hai haga ka.
ECC 10:1 Tawalinarume nga biagane mini sandanaga beha anda pialu homa anda hayagua sanda nga biaga biago ngu bulebira. Ogonidagua dege mbiralime mini nawi howa biragome agalinaga mini gigabi wulene timbuni daliga ngago bo pelalu hengedape holebira.
ECC 10:2 Wali agali mini gigabiwi kagome mana bayale biaga ka. Ogonidagua wali agali mini nawi kagome mana tigabi ngaru nabiaga ka.
ECC 10:3 Wali agali mini nawi ogonibime harigani pialu howa mbirale mbira biragome wali agali maru karuhondo ibu mini nawiore ka walia haga.
ECC 10:4 Í̠naga haru hagame í̠hondo keba hayagua í̠na biabe bialu kego wahalu pu nabibe. Í̠na timbuni bia ko hariyagua ema nabi bi nale kegola ibugua í̠na ko birigo la nabi waholebira.
ECC 10:5 I̱na dindi bibahendeni handalu hewaria agali haru haga haguane marume mana ko mbira bigi biyaria handarugo ogo.
ECC 10:6 Haru haga haguane karume wali agali mini nawi karuhondo haru haganaga biabe timbuni ngaru bilo mo mialu homogo karuhondo biabe dindiha bayale ndo ngaru bilo mo miaga.
ECC 10:7 I̱na handa dege bialu hewaria garabaya biabe ale bia haga hearume ti nogo hosini biralu pialu hea. Anigo haru haga timbuni hearume ti garabaya biabe ale bia hagame geni dindi dindi piagadagua pialu heagoni.
ECC 10:8 Í̠na gundu uli timbuni mbira tombo wiriyagua í̠ni uli ogoniha pilabehe holebere. Í̠na ege to̱le̱ pabe minu gialariyagua nogombime í̠ hayabehe holebira.
ECC 10:9 Í̠na dindi hari ngagoha to̱le̱ timbuni ngaru polalu hariyagua to̱le̱ urunime í̠ babehe holebira. Í̠na ira balu hariyagua nde ira ogonime í̠ni dibu bai habehe holebira.
ECC 10:10 Ayu ne nahego yu howa nage nawiriyagua erekui biabeore bialu ira dibulebere. Mbirali mini gigabiwi kago ibugua biabe bulenaga ala manda manda bialu haga ka.
ECC 10:11 Mbiralime nogombi mo dambola holene mana manda bu karia ibugua nogombi ogonime ibu ala hayilo henge miyagua mo dambola holene mana biago manda bialu hayago nagalone holebira.
ECC 10:12 Mbirali mini gigabiwi kago ibugua bi larago hale howa maru karume ibunaga mini mo yaraga holebira. Anigo mini nawi kago ibugua bi laragome ibuni mo habane nabulene holebira.
ECC 10:13 Agali ogoni ibugua bi tehinalu larangi bi la ko howa mani ibu bi lamaro bulebiraha bi larago agali lulume laradagua bulebira.
ECC 10:14 Wali agali mini nawi karume bi laho dege ngane laho wiaabo holebira. Mani agi bulebirabe ina manda nabi kama. Ai ina halu homedemahabi dindi ogoria agi bulebirabe mbiralime ina langibehe ai kabe.
ECC 10:15 Mbirali mini nawiore kagome erekui biabe bialu ibunaga hongo bame biba ho wahowa ibu andaga polene hariga pedagoria nape pu tara howa ibuni andaga handa walia habe nahe holebira.
ECC 10:16 Dindi mbiranaga kini igiri emene mini boga nabime haru haga kayaguabi agali haguane maru karume egerebagi heyalu tomo ibabi timbuni dawa gimbu bu naabo halu kane mbiraga hayaguabi dindi ogoriani genda timbuniore tagira ibulebira.
ECC 10:17 Dindi mendenaga kini kago ibu mini bogabiore howa bulene ngago bayuwa manda bialu ibunime bi lalu haru haga ogoriani karume hina ibabi narago ti lulu yilo lowa nagimbu bialu ndo tingini hongo helo lowa nolene ngadagua nayagua dindi ogoni bayaleore wulebira.
ECC 10:18 Agali mbirame ibunaga anda arema bulene manga howa dangi nalayagua iba bondo lalu anda ogoni podo ibira holebira.
ECC 10:19 Tomo timbuni dawa payabu naragome wali agali mo turu halu waini iba naragome agali mini mo dungula hagane nga. Anigo muni nayi howa ogoni kirabali nabe nahe holebere.
ECC 10:20 Í̠ í̠ninaga paliagane tamuha howa í̠na homogo karu nahendedaha mege bialu kini kagobi hagarere bi lowa la hira nabibe. Í̠na larigoni ega mbirame lo yalu puwa tini lamule poligo manda bibe.
ECC 11:1 Í̠naga muni wiridaruni muni biabe timbuni tara tara bialu karuha wia holene nga. Ani beregola í̠naga muni urunime igini dewa ngagola wirigo bolangua howa dewa yu holene wulebira.
ECC 11:2 Í̠naga galone ale ngeru kahalu hali halu agima tale bialu mani dewa tago haragola mo yu dai bule wia haga bulene nga. Mani dindi ogoria mo ko holene agi ale ibulebirabe í̠ manda nabi kego ani bulene nga.
ECC 11:3 Beralibaha iba biru to̱laragola dindini iba dalu ibaga. Ira mbira uyurahayagi podo ibira heneyaguabi unurahayagi podo ibira heneyaguabi podo ibira henedagoria wiaho wiaabo holebira.
ECC 11:4 Horo bayale iba dalu puyaburu ibilonaga horo maliaho howa mbirale mbira í̠na nahenge harigo ai nolene bogabi dedariabi nadonolebere.
ECC 11:5 Ngode Datagaliwabehanda mbirale bibahende wabinigo. Ai waneigini ai̱ya tombeha aguaore bialu anda harabe ina manda nabibehe kamagonidagua dege ibugua wabini ngaru damene bibahende manda biai habe nahe kama.
ECC 11:6 Í̠na tomo egene maru egerebagi hangalu maru alendo hangabe. Mende egerebagi hangarigo bayale anda holebirabe be alendo hangarigo bayale anda holebirabe ina manda nabiore kama. Tomo egene uruni andaho kagola egerebagi hengene alendo hengene lalu dabaki habe nahe ogobi labolabo andaho holebira.
ECC 11:7 Wá holene ngago ibu baya taraore mbira ngagola nime wá harago hondowa iname turu haramali.
ECC 11:8 Mali bibahendengi ina dindi ogoria hama ibinigo kama manda buwa turu ho haabo holene nga. Mali dewaore dindi ogoria harimayaguabi iname mbirale uruni embeda nahami̱ya. Ina homalu puwa mali dewaore homene dininirunaga dindi humbirini andagaha puwa haabobo holeberamago áyu howa turu ho holene nga. Mbirale bibahende mani ibulubadaru nagalone dege holebira.
ECC 11:9 Wandari igiri daliahe kamiru tí áyu wandari igiri kamingi turu ho halimu. Tínime bialu holene bayale tigabi ngaru hangu bialu halimu. Ani bialu howa tínaga bu miniha bayale bulene hame ngamidagua talima pialu halimu. Ani bialu ha kamigo mani Ngode Datagaliwabehanda tígua beramigonaga manani dabolene wulebirago mitangi bialu tígua beramiru bibahende mamage howa bilimu.
ECC 11:10 Tí wandari igiri daliahe kamirubi dege holenenaga horo emene tubagi hangu ngago ai uruninaga galone mbira nawiore. Ani ngago mitangi bialu mbirale tara tara ngarume tíha genda tagira ibulebirarunaga mini burugu nale halimu. Ani bialu howa tínaga tinginiha tandaga mo ngiaga ngarunaga mo tene nahalimu.
ECC 12:1 Anduane Homogohanda ina bibahende wabinigo ai tí wandari igiri daliahe kamingi howa ibuniore mitangi bialu halimu. Tígua ibu embedaho howa mani tí wahe kamingi mo genda holene mbira tíha anda ibiragola tígua lalu, I̱ dindini holeneore turu nahe ko, lalu holigo ibuniore mitangi bialu halimu.
ECC 12:2 Horo ogoningi tínaga de auhe biruwa nibi egebi yakundibi bibahende nade ginu haguame wá holene bu dambi hai hayada loleberami.
ECC 12:3 Ani bedamingi tínaga gi hongo nahe howa duru lalu holebira. Ai tínaga gebi hongo nahe halu paulobagabi holeberemi. Tínaga ne kamiru pialu mbira mbira hangu kagola tomo bayale hongohe ngago baya hangu hayalu nabe nahe holeberemi. Tínaga de au haragola mbirale ngaru bayuwa nahondoleberemi.
ECC 12:4 Ani bedamingi dege tínaga hale tulu kagola tígua mbirale hale habe nahe howa anda manda tagirahayagi ege to̱le̱me kilingele lalu widi dambiaganegobi ngida piliperu bayale mbira tagirayagi laruagobi baya hangu hale nahe holeberami. Ai tí mbiraga u padamigola ega bilaragome dege tí mo barila holebira.
ECC 12:5 Ani kamingi tí hari bare ngaruha holene gi halu geme ibaga bialu polenego mogo lalu gi holeberemi. Tínaga mandari kamigoni dagua halu pele hangu hai holebira. Anidagua birangi harigani tini pobe nahedagola poa halu gililo yu ibaga bu holeberemi. Mbirale bulene ngaru bule tínaga bu miniha heyalu kiau nalolebira. Ani biralu homoleberemi. Homalu tínaga haabobo bu holene wiyagoria hole poleberemi. Ani poramigola wali agali tínaga tanoha karu ti íbu ngoai howa dugu bialu holebira.
ECC 12:6 Tí homa nabi kamingi howa Anduane Homogo ibuni ala mitangi bialu halimu. Ai tí homaramingi hale hedo wiaganaga pu seni silibame wabini ngago tongolope halu lamu hale ibuni wiaga ngolome wabini ndisibe ngago pambu lalu hale hundiagadagua hundulebira. Iba hambiaga iba be pume hende howa iba uliha bape halu iba hambialu karia be hende haga pu ogoni ibuni tongolope haragola iba be ibira halu pambu lagadagua bialu
ECC 12:7 inanaga tingini ibu lone dindi halu inanaga dinini Ngode Datagaliwabehanda inaha helayago ibu ibuni karia dai bulebira.
ECC 12:8 Agali manda timbunibi biago ibugua lalu, Uruni bibahendenaga galone nawiorene nawiya.
ECC 12:9 Agali manda timbunibi ogoni ibugua ibunaga mini gigabi wiagome wali agali lawai hene. Ibugua bi lolenebi bi yobage lalu lolenebi baya hangu minime tale bini. Tale bialu bi ogoni bayaleda lo manda biyago mbugani gilibu wini.
ECC 12:10 Ibugua bi marume hale halu dende helonaga lolenego erekuibi tayabu wahalu ai ibugua bi heneneore wiago gilibu wini.
ECC 12:11 Anigo agali manda timbunibi karunaga bi larago nogo sibi haru hagame sibi mo tiga biaga kango nguni dehe yagagobi laga ka. Ani bialu agali manda timbunibi kago ibunaga bi mo mogo bialu mbugani gili biyagua ogoni ira nili bene hagadagua holebira. Ai ina bibahende haru haga nogo sibi anduane Ngode Datagaliwabe ibunime bi uruni inahondo langiya.
ECC 12:12 I̱ igini-o mbira hangu langero. Agalime mbuga dewaore gili biagago gili biari naholebira. Ani biragola mbuga uruniha ngaru manda biai holenaga hondo manda bialu keria í̠ mo manga timbuni holebirago manda bialu habe.
ECC 12:13 Ainde bi lamaro bulenenaga bi ogodagua laro. Iname bialu haabo holene duniniore mbira ngago ogo. Ngode Datagaliwabe ibu gibiore kago manda buwa iname ibunaga mana lo wini ngago talialu bialu howa ibu andaneha haabo holene nga. Iname ani bialu holoma̱yanaga ibugua ina wabini.
ECC 12:14 Ngode Datagaliwabehanda mana bayalebi kobi bia do howabi inaneme bialu harimagoria howa bibahende ibu dabaki bulebira, lalu lamaro bini.
SOL 1:1 Iba gana ogoni bayaleore Solomono ibunime lenego gilibu winigo nga.
SOL 1:2 Í̠na i̱ nu̱nu̱ laabo harilidagua laabo habelo hameledo. Waini iba bayalegome dende biaganego goyane lowa í̠naga gubalini holenego taraoreda.
SOL 1:3 Í̠naga tinginini nga biagane iba mini sanda ha̱i̱ harigo ngabioreda. Í̠naga mini hale howa i̱ turu halu nga biagane ogonibi mitangi biruli. Wandari bedarume í̠ gubaliniore haga bedagoni.
SOL 1:4 Í̠na i̱ haru halu iya ibida mba. Í̠ i̱naga kini ale halu í̠naga tamuha i̱ haru halu pu. Agalime waini iba hame lowa gubalini hagadagua ndo iyane mandagi gubalini halu turu hagabu holeberaba. Wali marume í̠ gubalini timbuniore hagago irane hendedo.
SOL 1:5 Yarusaleme waliru-o hale hadaba. I̱ tingini mindibi bira bedogonigo i̱ hulu wandari bayawana Keda dindi yobi ngagoha balai anda mindibi kagobi bedo. Kini Solomono anda háini yári labolabo baya burugule gerelaho ngagobi bedogoni.
SOL 1:6 I̱naga tingini tara mende aledagola mo yo nahandalimu. Nime i̱ do mindibia henego. I̱ mbalinirume i̱ handabe manga howa i̱na gerebi mabuha biabe bialu holiya helaya. Biabe ogoni bialu howa i̱na i̱naga tingini baya hangu handayaho holene henge nawini.
SOL 1:7 I̱naga yamali-o í̠na nogo memeru tani bayale nelo ogoha haru pu helolebero lalu i̱ langi. Ni tandagabi daragola ti gumba agoha holebirabe. Agali maru nogo meme haru haga kagoria i̱na í̠ taya bialu holiyadago agibe.
SOL 1:8 I̱ lawini-o í̠ wandari bayaore bedegoni. Í̠na i̱ de hondoleyagua nogo meme sibiru ge piyadadagua talima ibabe. Talima ibalu í̠naga nogo memeru tani bayale nelo nogo sibi haru haga agali marunaga balai anda bu kagoria kawareni tani bayale nolene karia handa walia holebere.
SOL 1:9 I̱naga yamali debene bedego í̠naga yári bidegoni bayaleore Iyibi kininaga karisi gili lole nogo hosinaga yári biaganego aleda.
SOL 1:10 Í̠naga mandarini yári pingipongo biderumebi hale ira dederumebi í̠naga pe mo bayaleore halu gurubu gele ngegome í̠naga mani ngiringara leda.
SOL 1:11 Anigo iname yári maru ngolo silibamebi í̠naga wabuwa nguleberema.
SOL 1:12 I̱naga kini ibu paliaganeni palearia i̱na sanda bayaleore ha̱i̱ hewagome nga taraore biame haya.
SOL 1:13 I̱naga yamali ibu sanda nga taraorebigo i̱naga galu hombeni palu paga ho wiarua.
SOL 1:14 I̱naga yamali ibu palawaya minana anda halu Engedi dindinaga gerebi maburuha dedagobi kagoni.
SOL 1:15 I̱naga yamali-o í̠ore nde wali baya buruguleoreda. Í̠na i̱ gubalini kego walia halu í̠naga de gilibida.
SOL 1:16 I̱naga yamali í̠ huliya igiri bayaore kegonigo i̱na í̠ hondowa turu timbuni ho kogoni. Datani bayale ogoni iyanaga dagiani tamunguru ale holebira.
SOL 1:17 Ira tamia karunaga maganerume iyanaga anda dabira helalu ira guraya aleme anda ogoninaga dangi haradagua bulebira.
SOL 2:1 I̱ Sarono dindi ira teha palawaya minana anda haragobi bedo. I̱ hari bu karuha dindi ulini ngaruha palawaya dedagobi bedogoni.
SOL 2:2 Datani anihe bu karu dombeneha palawaya hagadagua i̱ lawini biago ibu wali dege dombeneha bayale birarua.
SOL 2:3 Ira dege dombeneha ira lini bayale daga mbira hagadagua i̱naga yamali biago ibu agali dege dombeneha biatago nahe kagoni. Ni tandagabi darangi i̱ ira ogoni teneha gumba birulene hameore ledo. Ira ogoninaga lini bayale dedago do narogola i̱naga ne harigaha dendeore biagane.
SOL 2:4 Ibunaga anda heagoha tomo timbuni dawa wiagoria ibugua i̱ haru piya. Tomo nagane anda biagoha labolabo bayaleorerume yári bidagonaga turu haradagua ibugua i̱ gubaliniore hayagonaga turuho kogoni.
SOL 2:5 I̱ lawini i̱na ibu gubaliniore kogola i̱naga kuni gedaore halu hongo naharuago aiore ira linirubi gerebi lini do gembe binirubi i̱ hongo helonaga nabehe bedo.
SOL 2:6 I̱ lawini biagome ibunaga gi lehagome i̱naga mahayagi yani halu ibunaga gi tigagome i̱naga tinginini yani haya.
SOL 2:7 Yarusaleme waliru-o tígua nogo gabua mini dia karu mitangi bialu mbira nabuleore lalu i̱hondo bi lo widaba. Mbirale ogoni iyanagago tígua iya mo mogola howa gubalini holene mo dala hangu hangu nahalimu.
SOL 2:8 I̱ lawini i̱ bedoria ibaruane hale ko. Ibu amura hari bare wiagohayagi howa pogola edene bima gerai lalu ibaruane hale ko.
SOL 2:9 Ibu gerai lalu biango dudu aleme dai lagadagua lalu nogo bulumaga wangabe daliaheme dai lagadagua lalubi ibarua. Abale ibalu anda mandaha íbu kago hendedo. Íbu howa ibu windoha handa anda haragoni.
SOL 2:10 Handa anda howa ibugua i̱hondo bi langiragoni. I̱naga lawini gubalini-o tagira íbu. Yamali-o iya haru áyu mbaliya tagira íbu.
SOL 2:11 Iba dalu to hayago dalunaga gi nahabe.
SOL 2:12 Áyu ogoni dindi bibahendeha palawaya dame kago ai iba gana lolenengida. Ega bedarume turu halu bi taratara lagalaga biarua.
SOL 2:13 Ira poge ale karume lini dalu ibirarua. Pu kuabu tara tara irabuha karume lini dagadaga biaruago ai palawaya uruninaga nga baya taraoreda. I̱naga lawini gubalini-o tagira íbu. Baya-o iya mbaliya tagira mbaibu.
SOL 2:14 Í̠ andaga tamuha ega emenerume ibuni andaga ege kaba ngagoha bira do hagadagua bira do haridago. Ainde í̠naga dengui baya hondoabago hondoliya tagira ibalu í̠naga bi baya tara laruegobi hale holiya tagira íbu.
SOL 2:15 Biango dudu emene bu karuni minu yani hadaba. Iyanaga gerebi mabu gamaha anda ibuwa palawaya bayale dedaru mo ko holigo abale minadaba.
SOL 2:16 I̱naga yamali ogoni ibu i̱ agalini kagola i̱ nde ibu one bedogoni. Ibugua ibunaga nogo memeru palawaya bayale bu karu dombeneha tani nelo haru pu haga.
SOL 2:17 Ibugua nogo meme biaru handayaho kane dege ni anda pialu dagare bulebira. Hari bare hombene bu ngaruha nogo gabua mini diame gerai lalu ibagadagua i̱ lawini-o í̠ abaleore ibabelo hameledo.
SOL 3:1 I̱na mbi bibahendengi i̱ninaga dagiani paluwa paliahondo nahe yange yange bu wuwa i̱naga gubalini biago hangu emaga handaabo haruli. I̱na emagaha ibu hangu taya biaabo howa handa walia naheore haru.
SOL 3:2 Ai emagaha dege i̱ heyalu puwa tano wiagoha ibagabume halu ibu taya bialu haruya. I̱na i̱naga yamali taya bialu tano biagoniha hariga peago bibahendeha taya bume harugoyu i̱na ibu mbiraha lola halu handa walia naheore harugoni.
SOL 3:3 Tanoha mamage haga agali hearume i̱ de handaya. I̱na tihondo hale halu lalu, I̱naga yamali de handarimibe, laru.
SOL 3:4 I̱na ti yu wahalu pialu hewaria nde aube tobane buwa i̱ lawini biago pialu hearia handa walia haru. Ibugua i̱ yu wahalu polilono i̱na ibu minu yani haabo howa i̱ ai̱ya andaga tamu i̱ni taba henenegoha haru piru.
SOL 3:5 Yarusaleme waliru-o tígua nogo gabua mini dia karu mitangi bialu mbira nabuleore lalu i̱hondo bi lo widaba. Mbirale ogoni iyanagago tígua iya mo mogola howa gubalini holene mo dala hangu hangu nahalimu.
SOL 3:6 Dindi ko iba dalu naibaga ngagoha howa ibiragoni agiledabe. Mbirale ira hagua ngabilo delagane mini inisenesibi muwebi delaragola ira hagua biale hara. Mbirale ogoni hagua biragonaga nga baya taraore agali biyinaya biagarume muni taguiaga ngaligobioredane hendedo.
SOL 3:7 Dagia bayalego agalime áyu dege mo yalu ibirago de handa. Solomono ibu dagia ogoriani biralu ibiragoni. Ani ibalu ami agali hongohe karu pira waragariame (60) haru ibiragoni. Isaraele ami agali uruni ti hongoheoreda.
SOL 3:8 Ami agali uruni ti abale howa wai biagane mugubeore ka. Tigua ayu tibu nene gadeleme wai biaganebi ka. Tinaga ayu tibu ta howa yagayaga bialu waitigime ibuligonaga tinime mbiraga mamage haabo haga ka.
SOL 3:9 Solomono ibu kininaga biragane dagiani berelalu yalu ibira. Kininaga dagia ogoni ira baya tara tararu Lebanono dindiha taweme dibu yu ibuwa wabu wia.
SOL 3:10 Dagia ogoninaga gene silibame wabu heleya. Labolabo aga pu ngolo aleme lebialu dungua ho heleya. Dagiani biragane gedaore labolabo tagalitaya aleme wia dambi hea. Yarusaleme wali berearume labolabo ogoni baya hanguore lebialu mo yári bia ho ngeleya. Tigua kininaga biabe ogoni bulene turuore howa biagaya.
SOL 3:11 Yarusaleme wali bedemiru-o tí Kini Solomono de hondole ibidaba. Ibugua kininaga manda mo karulo beda. Kini Solomono ibuni wali dabu biyangi ibu ai̱yahanda manda ogoni ibunaga haguaneni mo karula hayagoni. Horo ogoningi ibu turu timbuniore ho haya.
SOL 4:1 I̱naga yamali-o í̠ hulu wandari bayaore bedegoni. Í̠naga dengui labolabome buyi howa bo bidegonigoyu í̠naga de gili bidagome í̠na i̱ gubalini kego walia hara. Í̠naga mandari libilabu lama nogo memeru tidi yalu turu howa mali lima Gileada hari bare emene ngarunaga daliradagua biarua.
SOL 4:2 Í̠naga neru nogo sibi karunaga irini áyu dege podowa wayawaya bini peleore hagadagua í̠naga ne peweleda. Í̠naga ne mbira honda nabi bibahende bayaleore tigabi dege hai harua.
SOL 4:3 Í̠naga ne hambu daramabiore aga daramabi ngaligobida. Í̠na bi laregola ne hambu moheoreda. Labolabome í̠naga dengui buyi kegoyu i̱na í̠naga wanakui honani ale hendedo.
SOL 4:4 Wai pabeni Debidinaga mamage haga anda lu kagobi í̠naga ma lu bayaleoreda. Í̠naga mani gurubu gele bayaore ngeru ami agalinaga humbi dewaore anda lu biago háini girigerelo wiradagua biarua.
SOL 4:5 Í̠naga andu kira keru nogo dia wangabe labo laboli hono winigo baya taraore palawaya karu dombeneha tani nalu haradagua biarua.
SOL 4:6 I̱na hari hombeneni mbirale inisenesi ngabi maru buwi ngagoria pu holebero. I̱na hari hombene ogoriani pu koore dege ni anda pialu dagare bilo holebero.
SOL 4:7 I̱naga yamali-o í̠ baya taraoreda. Í̠naga tinginini motudu mbira nawi baya taraore bedegoni.
SOL 4:8 I̱ one-o iyame Lebanono hari ngaruni yu wahalu mbaliyago iya haru mbaibu. I̱na Hari Amanabi Seniribi Hemonobi uruninaga nenegoria howa daliape habe. Hari uruniha budi gabua timbuni mini laionorubi lebadirubi haga ka.
SOL 4:9 I̱ one i̱naga yamaliore bedegoni. Í̠na i̱ emene hangu handaya harigome i̱naga yamali mo ko harua. I̱na í̠naga mani gurubu gele ngeru de hondowa i̱ homalu dai bidogoni.
SOL 4:10 I̱naga yamali i̱ one-o í̠na i̱ gubalini hariligonaga i̱ turuore ho kogoni. Waini iba dende biaganego bagi hene lowa í̠naga gubalini holene ogoni baya taraoreya. Pauda nga biagane tara tara ngaru bagi hene lowa í̠naga tinginini sanda ha̱i̱ harigoni nga taraore bida.
SOL 4:11 I̱ one bayale-o í̠na bi laregoni mone ibane dende biagadagua i̱na hale harogola dendebioreda. Í̠na bi laregonibi dendebi nogo memenaga andu iba aleda. Í̠naga aga bideru baya ngabi Lebanononaga iraru ngabi ale bida.
SOL 4:12 I̱ yamali-o í̠ mabu gama mbira wia do henego ale bedego agali mbirame ge haanda habe nahe pabe bu yaanda hene wiaganegobi bede. Mabuha iba duguaragola mbirali ibu hangu iba hambiaganego ale í̠ bede.
SOL 4:13 Mabu ogoniha ira bayale bayaleru andaho haganegobi í̠ bedegoni. Ira marume lini baya dendebi noleneru daga. Marume sanda bayale wabulene dalu marume tomo mo dendebia holenebi daga. Ira marume yári tara tarabi dalu marume hagua ngabilo delolenebi daga.
SOL 4:15 Iba duguaraga halu poragome mabu mo bayale hagagobi í̠ bede. Iba emeneru Lebanono hari ngagoha howa mabu ogoniha dugu dalidali biagagobi bede.
SOL 4:16 Puyabu uyu ibirago leneha howa eberego í̠ heyabe. Puyabu unu leneha howa eberego í̠na i̱naga mabuha pulo yalu ibuwa nga biaganeme to̱lotagi hela. I̱naga yamali ibu ibuninaga mabuha ibalu ira lini bayale dedaru do nela.
SOL 5:1 I̱ one i̱naga yamali-o i̱ni mabuha íbu kogoni. I̱na mbirale bayale ngabiru mo mogo bu ngelowa mone ibane bayale dendebigobi nalu bedo. I̱na nogo memenaga andu ibabi waini ibabi na dege bialu bedogoni. Libu yamali bayalego labo-o libugua ibabi hinabi nalu no karula poragola haru lole nalibu.
SOL 5:2 Mbiraga i̱ paluwa miniha paliahondo nahe yange yange bu wiru. I̱ yange yange bu wuwa dege emene paluwa emaga handalu hewaria i̱ lawini biagome anda i̱ palewago haneni panga dugua lalu hearia handaru. I̱ lawini i̱naga yamali-o i̱ anda ibuliya panga duguabe. Mbiraga pibiya ibiyagome i̱naga dengui damialu mandani dimba beda, laya.
SOL 5:3 I̱na i̱ninaga aga golo waharugodago lone aginaga buliyabe. I̱naga ge wayawaya bu waharugodago lone aginaga mo dodo heloliyabe.
SOL 5:4 I̱ lawini biagome anda pangani gime yani hayuago hale howa i̱naga miniha dungu lalu turuore biya.
SOL 5:5 I̱na heyuwa panga dugua hole manda biru. I̱naga gime anda panga duguagane heagoria yani harugola sanda i̱naga gini heago para haya.
SOL 5:6 I̱na i̱ lawini anda ibilo panga duguarugoyu ibu abale piyiyagola i̱na de handa nabi haru. I̱na ibunaga bi hale hoa howa i̱naga miniha genda biya. I̱na ibu hai biaabo howa handa walia nahe dege haru. I̱na ibu olarugoyu ibugua ladai binigo i̱ hale nahe dege haru.
SOL 5:7 Tano pabe mamage haga agalirume i̱ handa walia howa tigua i̱ bo mberaho wahalu i̱ dagarenaga biagane aga biwago ti golo yalu piya.
SOL 5:8 Yarusaleme waliru-o tígua i̱ yamali handa walia harimiyagua i̱ hame lowa gubalini dugupe ho kogo lamilimu. Tígua bi ogoni lamuleberema lalu i̱hondo bi lo widaba. Bi uruni emaga andaha howa ani lalu haruya.
SOL 5:9 Í̠ wandari maru bedaru bolangua howa í̠ hulu wandari bayaore bedegoni. Í̠ yamali ogoni ibu agali abibe. Ibu ina wali maru bedemaru agalini karu bolanguahe kagola iname bi lo wuluma̱yabe.
SOL 5:10 I̱naga yamali ibu tingini hongoheore baya dombarale ka. Agali daosini pira (10,000) dewaore bu karunaga dengui baba bitago naheore kagoni.
SOL 5:11 Ibunaga dengui ngolo ale ngiringarale. Ibunaga mandari mindibi bayaleore ega mindi mbiranaga iri mbauleya.
SOL 5:12 Ibunaga de baya pewele ega gabiago iba angeni wayawaya bini bedaligobiya.
SOL 5:13 Mabuha mbirale bayale ngabiru bu hagadagua ibunaga peiri heago bayaleoreya. Ibunaga ne hamburu palawaya bayaleore dedagobi howa bi larago bayale ngabi sanda ale laga.
SOL 5:14 Ibunaga giru bayaleore hongohe howa ibunaga gi hondoneru mo yári bia halu gi magi muni timbunime miagaru ibu gini nga. Ibunaga tingini wála honeore howa ngiringara lalu heore. Nogo dongone ege to̱le̱ mindibi muni timbunirume miagago aleme yáribi hea.
SOL 5:15 Ibunaga ge biagolabo to̱le̱ pele bayale kirame gene wawa helene mbaulebi ngolome wabu helene peleorego aleda. Ibu timbuniore Lebanono hariha ira tamia bayaleore lu timbuni hearubi kagoni.
SOL 5:16 Ibugua i̱ nu̱nu̱ laragola i̱naga bu bamialu turu bialu dungu laga. Ibunaga tingini bibahendego baya gibiore ka. Yarusaleme waliru-o i̱naga yamali larugoni ibu ogonibiore ka.
SOL 6:1 Í̠ wandari maru bedaru bolangua howa í̠ hulu wandari bayaore bedegoni. Í̠naga yamali ibu ani piyabe. Iname í̠ biamogo bialu tayabia holoma̱ya ibu hariga ogoha piya lalu langibe.
SOL 6:2 I̱naga yamali ibuni mabuni ira nga biaga ale bu kagoha pu ka. Ibu mabuha ibunaga nogo memeru tani nelo halu palawaya bayale dedaru do mogo bialu ka.
SOL 6:3 I̱naga yamali ibu i̱naga halu i̱bi nde ibunagaore bedogoni. Palawaya kago dombeneha howa ibugua ibunaga nogo meme tani nelo haru kagoni.
SOL 6:4 I̱naga yamali í̠ baya burugule Yarusaleme tano alebi Tisa tano hameleore ngago alebi kegoni. Í̠ baya buruguleore ami agaliru wai bule lowa pelagi yalu tidiyu ibirago hondowa mitangi bu wiagadagua ngogoni.
SOL 6:5 Í̠na i̱ de handaya haabo kegome i̱ minu yani haradagua bidego í̠ handa taraha. Í̠naga mandari kerume nogo meme wabuni tidu yalu Gileada hari bareni mali lima daliape hene mbauleda.
SOL 6:6 Í̠naga neru nogo sibi karunaga irini áyu dege wayawaya bini peleore hagadagua í̠naga ne peweleda. Í̠naga ne mbira honda nabi bibahende bayaleore tigabi dege hai harua.
SOL 6:7 Labolabome í̠naga dengui buyi kegoyu i̱na í̠naga wanakui honani ale hendedo.
SOL 6:8 Kini ibu wali dewa dabu bila. Pira waragaria (60) dabu berolono bini biralu pira halira (80) one wabuni mende biralu wandari maru mini nalenebi bira dege biniru ani bila.
SOL 6:9 I̱ nde one mbiraore hangu gubalini howa berelalu ibu i̱naga yamaliore ega malibu ale bayaleore bedagoni. Ibu ai̱yahanda ibu wane mbiraore ogoni dege gubalini haga berenego i̱na ibuhondo turuho ko. Wali bibahende biru ngarumebi ibu de hondowa ibunaga mini mo yaraga haga. Kini one biru ngarumebi ibu one wabuni mende bedarumebi tigua iba gana lalu ibu mini yaraga haga.
SOL 6:10 Egerebagi ni tagira ibiraligobi dumbiyalu wálo yalu ibiragoni aibe. Ibunaga wanakui do mbarale ni tagira ibule howa dorone tagira ibagagobi ibalu ege do mbarale daganegobi halu bida. Ami agalirume wai bule lowa humbi demborerebi yalu tidiyu ibirago de hondowa mitangi bu wiagadagua i̱na ibu de hondowa mitangi biaho ngogoni.
SOL 6:11 I̱ mabuha dalipe howa ira lini bayale dagane bu karu dombeneha íbu ko. Dindi uliniha ira bayale do ngoria bialu anda harago hondole íbu ko. Gerebi yuni gahenge mabirago handalu ira marume palawaya tara tara nga biagane ale do ngarubi hondole íbu halu bido.
SOL 6:12 I̱naga yamali-o í̠na i̱naga bu mo durula harigoni. I̱na manda bialu hewaria agali mbirame karisini howa nogo hosime gililo yalu pelo poa hagadagua kogoni.
SOL 6:13 Sulama wandari-o mali lia mali lia ina de hondoloma̱ya í̠na mali lia. Irane aginaga wali agali bu karunaga deni i̱na mali luliya tí hondoa kamibe.
SOL 7:1 I̱naga yamali í̠ wandari baya buruguleoreda. Í̠naga geni gesu bidegola paliaore biarua. Í̠naga ge bagu bayaleore agali bigiya wabiagame to̱le̱ podalu wabiade hene mbauleoreda.
SOL 7:2 Iba be mbira amu ngago waini iba dendebi biraho wiagane ale nga. Palawaya bayale ngabiru do mabu bidagoria widi mberene amu do huba bu nga.
SOL 7:3 Í̠naga andu kira keru labo nogo dia igini labo laboli hono wini ogobi labolabo daburabuho kagobida.
SOL 7:4 Í̠naga ma kego anda lu mbira pele bima iraga kagobida. Í̠naga de Hesebono tano ogoninaga to̱le̱ panga haraba kawareni uliha iba bedagobida. Í̠naga ngui bayaore Lebanono agali mamage hagarunaga anda lu bima irigi hene Damasagasa tanohayagi heagonibida.
SOL 7:5 Í̠naga haguane Hari Kamele kagobida. Í̠naga mandari baya taraore pingi pongo bideru didoleda. Mandari gogorali elepebe bidago hondowa kini kagome hame lowa odope habeheda.
SOL 7:6 Hulu wandari baya taraore í̠ bedegoni. Í̠na i̱ mo turuore harigola i̱na í̠ gubaliniore ho haruli.
SOL 7:7 Í̠ore hulu wandari ndo gurulu gibi bibi ayage aleda. Í̠naga andu kego labo geromi lini aleda.
SOL 7:8 I̱na iraga howa geromi lini dedago dolebero. I̱na handalu hewaria í̠naga andu kego labo pu mbira miini gerebi lini dewa dowi kagobiya. Í̠na buhe̱ larigo ngabi dendebi ira lini mini abelo aleya.
SOL 7:9 Í̠naga ne hambu ngabiore waini iba aleda. Í̠na i̱ nu̱nu̱ laregola waini iba dende biagadaguaore biarua. I̱naga yamali-o i̱na í̠hondo waini iba ngulebero. Waini iba ogoni alego nolene bayale holebira.
SOL 7:10 I̱ ibunaga lawini bedogo ibugua i̱ gubalini haabo haga kagoni.
SOL 7:11 I̱naga yamali bubi-o iya dindi emene mbira anda bu karuha palu hama mbaliya i̱ porodagua mba íbu.
SOL 7:12 Egerebagiore iya heyalu puwa gerebi ira bu karu de hondo mbaliya. Gerebi ira uruni mabialu pabua balu yigiyaga ledabe handabiya. Ira lini mini pomegaranade bayale daga bu karume lini dole pabua bayadabe hondo mbaliya. Iya mabu ogoniha pu howa i̱na í̠ gubaliniore kodagua walia holiya.
SOL 7:13 I̱ lawini-o i̱na ira lini bayale bayaleru do yalu ibuwa í̠ nabelo panga haraba kawareni ngeledo. Maru ala do yinigo ngelalu maru áyu dege do yinigo ngelalu bido. Iyame pu kuabu ale iyanaga bu mo heya hagane karubi ngabia handaba.
SOL 8:1 I̱ ai̱yahanda í̠ i̱ mbalini taba honowa andu nabelo nginidale i̱na ogoni bayaleda lalu kole. Ogonigo i̱na í̠ harigani lola haruyagua í̠ nu̱nu̱ larogola wali agali karume hondowa í̠ ko bere lolene nawulebira.
SOL 8:2 Í̠na i̱ gubalini holenenaga mana lawai habelo i̱ ai̱ya andaga í̠ haru polebero. I̱na í̠ waini iba bayalego mbirale mo dende bia hagane ale heba bimaga maga binigo í̠ nabelo mo yalu ibuwa ngulebero.
SOL 8:3 I̱ lawini ibunaga gi lehagome i̱naga mahayagi yani halu ibunaga gi tigagome i̱naga tinginini yani haya.
SOL 8:4 Yarusaleme waliru-o tígua mbira nabuleore lalu i̱hondo bi lo widaba. Mbirale ogoni iyanagago tígua iya mo mogola howa gubalini holene mo dala hangu hangu nahalimu.
SOL 8:5 Dindi ko dalu naibaga ngagoha howa ibunaga yamalila gi pingipongo bialu ibiragoni wali aibe. Í̠ ai̱yahanda ira mini abelo teha í̠ taba heneneyago i̱na í̠ ogoniha paleria mo barila harugoni.
SOL 8:6 Í̠na wali mende gubalini nahe i̱ hangu gubalini haabo habe. Wali mende í̠naga gime yani nahe i̱ hangu yani habe. Homame hongo howa agali bope hagadagua i̱na í̠ gubalini holene hongohe ngo. I̱na í̠ hame lolenego ira hungu bialu daradagua bida.
SOL 8:7 Ira ogonibi dedago iba odo hundia hole biyaguabi iba li ibalu hundia hayaguabi nahundulebiraore. Agali mbira ibugua walime ibu gubalini halu hame lelo lowa ibunaga muni bibahende wali biago miai hayaguabi ibu bo yagibano halu wali biagome ibu mege bu dai bulebira.
SOL 8:8 Inanaga mbalini ibu wandari emene ogoni ibu andu naibi beda. Ibu wandari mabuage bedaria igiri mbirame ibu dabu bule ibiragola iname wandari biagohondo agi bia holeberemabe.
SOL 8:9 Ibu tanonaga ege pabe bedayagua ogoriani iname silibame anda luni wa hondo biragane ale mbira ibunaga bia holeberema. Ibu tano to̱le̱ pabe panga hayagua iname ibu pele mialu ira tamia hongoheme panga hongohe wabu heloleberema.
SOL 8:10 I̱ tanonaga to̱le̱ pabe halu i̱naga andu tano pabe ogoninaga anda lu wa hondo birule kira bu helene haradagua bida. I̱ yamalila iya haru mandagi haribayagua i̱ mini dungulo haruligo ibu bayuwa manda bu kagoni.
SOL 8:11 Kini Solomono ibunaga gerebi mabu mbira dindi Bala Hamono lagagoha winigo nga. Agali maru ti mabu ogoniha gerebi lini dole hame layagua ibu muni siliba daosini (1,000) mbira mbira migi biaga.
SOL 8:12 Solomono ibu muni siliba daosini mbira (1,000) ogoni mo yilo. Agali maru mabu ogoni yolo mule hongo hayaru ti tininaga muni siliba handari kira (200) ogoni mo yilo. I̱ aginaga mogo lolebe. I̱ i̱ninaga gerebi mabu mbira bayale ngogodago.
SOL 8:13 I̱naga gubalini-o í̠na mabuha howa bi labelo hame ledo. Í̠na bi labelo i̱naga nenegeru ti hale hole hondo kagoni.
SOL 8:14 I̱naga gubaliniore-o í̠na nogo mini dia aleme dai lagadagua lalu nogo dia wangabe hongoheme dai lagadaguabi lalu hari bare hombene mbirale ngabi buwi ngaruniha howa pogolama ibagadagua abale dai bibelo hame ledo.
ISA 1:1 Mbuga ogoha Emoso igini Aisaia ibugua bi gilibu winigo nga. Anduane Homogohanda Yuda wali agali Yarusalemeha hearu Aisaia ibugua lamilonaga de gandeba hondowa laminigo. Ogoningi Usiabi Yodamabi Ahasabi Hesegaiabi ti Yuda dindiha kini hemingi Aisaiahanda bi ogoni lalu latagi hene.
ISA 1:2 Anduane Homogohanda ogodagua laya. Hari daliga-o dindi-o libu hale gogabu hale halu i̱naga bi larogo nde baya hangu hale harabine. I̱naga waneigini i̱nime handayaho harurunime ti anda halu puwa áyu i̱naga bi mo wahalu kagoni.
ISA 1:3 Nogo bulumaga karume nde ti abaore ogo kalo manda bialu nogo dongi karumebi nde ti abahanda tomo ogoriaore ngiaga lo manda bidagoni. Anigo i̱naga Isaraele wali agali ti mini nawiore kagoni. Tigua manda bulenedagua nogo bulumaga dongirume manda bu bolangua kagoni, lalu lene.
ISA 1:4 Wali agaliru-o tígua mana ko ngubiore beremigome tíni koorene ko kamigoni. Bibahendengi tígua ko hangu biaabo halu kamigo ai tí ko hai holeberemi. Tíni mana ko beremigome tíni gililope halu kamigoni. Isaraele wali agali tígua Anduane Homogo tínaga Ngode Datagaliwabe tigabiore biaga kago yu wahowa erembira mialu kamigoni ndobe.
ISA 1:5 Ai irane aginaga tígua Ngode Datagaliwabenaga bi mo wahalu kamibe. Tí tandaga naabo halu holenego manga nahe kamibe. Isaraele-o tí agali marume bo mbelelo wahene tínaga tinginiru mo ko halu hongo naheore haradagua bialu haguaneni dererume pi̱po̱le haradagua bialubi tí bu miniha ko dege mitangi bu kamigoni ndobe.
ISA 1:6 Henge emene mbira wule ndo dere haguaneha howa bima pialu tingini bibahendeha dere biamehe kagoni. Dere biame halu tingini mbira henge nawiore pimbipambu lalu toha tagitagi bidagoni. Tígua dere uruni nde baya hangu domowa kabu bu dambi nahayada. Marasinirubi mbira nde ha̱i̱ha nabinidagoni.
ISA 1:7 Tínaga waitigirume dindi tano wimiruni bo labu halu gialo delai hayagoni. Tíni handayaho hemiore dege dindi tarali urunime tínaga dindiha mbirale wimiruni mo ko hai halu tínaga mabuha tomo hengemirubi tigua bialu nai hayagola ai dindi hangu ibira kagoni ndobe.
ISA 1:8 Yarusaleme tano dege darabi yu wa kagoni. Dindi ogoninaga hongo holene nawi yu waheneore ngagoni. Ibu mabu gibuniha agalime bame andira nemanda biraligobi ale ngagoni. Tano mbira waitigime ho yu mabu bupe howa bameore ngelenego ngagoni ndobe.
ISA 1:9 Anduane Homogo Hongo Haiheore ibugua wali agali maru karu yu wa nahedale Yarusaleme bo tangubagabu wahene ngale. Anigo nde heneneore ina mo koore henego bamba Sodomo Gomora tanola bo mundulo wahenegodagua bidaleda.
ISA 1:10 Yarusaleme wali agaliru agali haguane kamirubi tí bibahende ko biaga Sodomo Gomorala wali agali henerubi dege kamigoni. Ani kamigo howa áyu Anduane Homogohanda bi larago hale hadaba. Inanaga Ngode Datagaliwabe ibugua tíhondo bi larago baya hanguore hale hadaba.
ISA 1:11 Anduane Homogohanda ogodagua lara. Tígua manda bialu kamiria i̱na tínaga mbirale mbira bo lomabu ngialu kamiruni turuho kobe toba kamibe. Ani ndoyago. Tígua nogo sibi bo loma bialu irani delai hole yalu ibirimirunibi nogo maru habahe bo lomabu yalu ibigi birimiruni bibahende hondowa i̱ turu nahe kogoni. Nogo bulumaga wangabenaga daramabi sibi memebi igini hungubaluanaga daramabi urunime lomabu ngulene hame naleore kogoni.
ISA 1:12 Tí bo lomabu ngule uruni i̱ mitangi bialu lotu lole ibalu howa yalu ibalimu layadaru aiwabe. Tí i̱ andagaha ibalu howa i̱naga wanakuini li̱le̱ lalu giligele dewa lagayago ani bulene ngago aiwa layabe.
ISA 1:13 Ai tínaga bo lomabu ngulene urunibi bame mohole bu nayalu ibalimu. Tínaga bo lomabu ngulene uruni hondowa turu naheore kogo. Hagua ngabilo delaga mini inisenesi i̱na nga holiya delalu kamiruni nga nabi bame dege delalu kamigoni. Urunibi i̱naga nguime nga halu hame naleore kogoni. Tígua Ege Pigane Ngabulo kagola lotu lagarubi Sabada horo bibahendengi lotu lagarubi horo timbuni marungi lotu tara tara laga ngamirunibi bibahende hame naleore kogoni. Irane tínime mana ko nabulene ngaru hangu bialu kamigome tínaga lotu laga uruni mo mebia hai haya.
ISA 1:14 Ege Pigane Ngabulo kagolabi lotu maru lole mo ngoai howa laga wirimirubi bibahende i̱ turu naheore handabe manga ho kogoni. Tígua mana urunidagua bialu kamirunime i̱ genda mo ngiragola i̱na mo yabe nahe kogoni.
ISA 1:15 Tígua mbirungi tínaga gi yaraga howa i̱hondo bi laramigola i̱na tí de nahondolebero. Irane agi tínaga gime agali bo wahaga birimirunaga daramarume damu gobahe kami. Tígua gi yaraga howabi bi dewaore lalu harimiyaguabi i̱na hale naholebero laro.
ISA 1:16 I̱na tí dodohe kamine hendedogo. Ai pialu mana ko dodohe tíha para hayadagoni domo wahole pudaba. Ani domo wahaiho howa mana ko ngaru lone budai nabi wahai halimu.
ISA 1:17 Mana bayale tigabi bulene ngaru hongo howa manda bialu mana bayale uruni dege talialu bialu hole manda bilimu. Agali maru mendeali mo hondo haga karu mo hondo nahelo mini bayale talebu milimu. Wali agali maru genda yu karu biamogo bibe. Waneigini hono wahene karu handayaho halu wali dalo bedarubi baya hangu biamogo bigi bialu halimu. Wali agali burupale uruni marume mo ko hayagua tígua biamogo bialu halimu, lalu Anduane Homogohanda lene.
ISA 1:18 Anduane Homogo ibugua bi ogodagua larago, Ai mo le hayadaruni lotiga bimi̱ya. Áyu tí ko birimigome mo dodo hayagola aga pele bayaleoreni darama para haragola mo ko hene wiagadagua bidamiruni i̱na ko domo wahai halu lone pele bayaleore hari beraliba peleore ale halu nogo sibi irini pele tara ngaligobi holeberemi.
ISA 1:19 Tígua i̱naga bi larogo hale halu birimiyagua nde tínaga maburuha tomoru bayale anda haragola bialu noleberemi.
ISA 1:20 Anigo i̱na bi ledogo mo wahalu manga harimiyagua nde tínaga waitigi bu karume ibalu tí bo wahai holebira. I̱ Anduane Homogo i̱na bi o ledogoniore, laya, lalu Aisaiahanda lene.
ISA 1:21 Yarusaleme tano nde abale i̱naga bi hale haga winigo ai áyu wali ko biagame agali kayu bima ibaga bialu biraradagua bedagoni. Abale howa Yarusalemeha wali agali bayale hangume ho to̱latagi hagago áyu nde wali agalirume mana ko bialu mendeali homelo bo wahagahaga biagarume to̱latagihe ngagonida.
ISA 1:22 Yarusaleme-o abale í̠ baya ngiringarale ege to̱le̱ siliba ale wirigo ai áyu nde koore gaba yuni bamba tawe hagua tabule ale ngegonida laro. Abale nde í̠ waini iba dendebi ale harigo áyu nde í̠ bame dendene nahe iba damene dege ngegonida.
ISA 1:23 Í̠naga agali haguane karuni ti agali page biaga ko bu karu baba nenege howa i̱naga bi mo wahaga ka. Bibahendengi biamogo biahabe lalu ohowa muni dewa hana haga birarunaga dege bi laholene hame laga ka. Tigua godi hale halu biruwa waneigini hono wahene ibiraru biamogo nabiagabi wali dalo agalini homene bedarunaga genda ngaru baya hangu hale halu mo tiga nabiaga dege bu karuni.
ISA 1:24 Ani bidago ai Yarusaleme-o bi ogo Anduane Homogo Hongo Haiheore kago ibugua larago hale habe. Anduane Homogo ibu Isaraelenaga Ngode Datagaliwabe hongo gibihe ogoniore kagome bi ogodagua lara. I̱naga waitigi bu kamiruni i̱nime tí pani nalimulo ngulebero. Ani bidogola tígua i̱hondo lone mine naholeberemi.
ISA 1:25 Yarusaleme-o i̱na biabe hongoheore buwa lehe bialu keruni bibahende lone mo tiga biai holebero. Ege to̱le̱ silibani dodo para hayadago do taulo wahelo irani delagadagua i̱na í̠ ira hongohe dedagoria dodo do taulo wahelo delolebero.
ISA 1:26 Ani buwa agali haguane bayale ala hagarubi hela aribia harogola tigua godi tigatiga hale haga bulebira. Ani bialu kagola wali agalirume Yarusaleme dindi mini lene timbuni mbira ngago lalu ogoniha mana bayale tigabiru hangu bialu Anduane Homogo ibuninaga bi hale howa talialu biai haga ngagoni lolebira, lene.
ISA 1:27 Anduane Homogo ibu tigabiore kago ibugua mana bayaleore ngadagua Yarusalemenaga wali agalirume biyarunaga tigatiga tale bialu ti mo yu dai bulebira. Ani buwa ibunaga mana tigabi biaga ogonime dege Yarusaleme wali agali mini beregedowa tininaga ko biyaru dara halu nabule lalu karu bibahende pele mialu haru dai bulebira.
ISA 1:28 Anigo wali agali Anduane Homogonaga bi mo wahowa mine halu ko ngaru dege biaabo haga karu ibugua ti pani nelo mialu bo wahai holebira.
ISA 1:29 Tígua ira timbuni hearuhondo bi pupu wialu dama mitangi bialu mabu gamaru hangalu harimiruni manda bialu ina nakarulape birima lalu taga timbuniore holeberemi.
ISA 1:30 Tíore ira timbuni karu gabu halu podagadagua mabu mbira dindi ibane nabereni mbirale hengedemiru gauladaga halu ira gabu hai hagadagua tí homai holeberemi.
ISA 1:31 Datani gaule ngagoria ira hungume abaleore kulu lalu daralidagua wali agali hongohe mine haga kamiru tíninaga mana ko birimirume tíni mo ko holebira. Ani birangi tí biamogo biaga agali mbira naholebira, lene.
ISA 2:1 Anduane Homogohanda de gandeba mbira Emoso igini Aisaia ibugua Yuda wali agali Yarusaleme tanoha hearuhondo lamilo mo walia hene. Bi laminidagoni ogodagua lamini.
ISA 2:2 Horo mbirungi haragola Anduane Homogonaga harini ibunaga anda hene biago bibahendenaga daliga ibu bolanguahe hari bare ngaru waradai buwa ibu lina daligaore holebira. Dindi bibahendeni hameigini tara tara dewa palima pedaru ibalu ogoniha iba yo̱laradagua bialu yo̱lalu anda ibalu
ISA 2:3 wali agali uruniha howa ibirarume lalu, Anduane Homogonaga Hari Saiono iraga hama maibidaba. Isaraele wali agalinaga Ngode Datagaliwabe kago ibunaga anda kagoria ubanda hama. Ibugua hame ledaru ale iname buluma̱ya lawai halu ina pialu holene hariga ibugua ba kagoria pialu holeberema. Irane Anduane Homogonaga lawai holene mana ngaru Yarusalemeni howa ibalu Saiononaga hari neneni howa ibugua wali agalihondo bi lamiaga, lalu ka.
ISA 2:4 Hameigini tara tara tini dege dege wai bulene te lalu bi anda halu hongo ha a̱i̱ na̱i̱ bialu karu Anduane Homogo ibugua bi uruni dabalu mo palia holebira. Tinaga wai biagane ayu tibu yidaruni tomo hongole dindi godagane wabulebira. Aeane yandare widi lini dedagola gandu lolene ale helo nguni mo garayabia helolebira. Hameigini tara tara uruni lone wai bule tidu yu haga haga buwa manda manda nabuleorebira.
ISA 2:5 Ai Yagabanaga aguanealiru-o Anduane Homogohanda wá holene hariga ina ngiyagoria pialu hami̱ya ibidaba, lalu Aisaiahanda lene.
ISA 2:6 Anduane Homogo-o í̠naga wali agali Yagaba aguane o bu karu erembira miridagoni. Ani mirigo irane ti tomia tara tara bulene manabi gamugamu tara tarabi Pilidia dindiha wiagobi tinaga dindini dege wiai kagonaga ani birida. Tinime ni tagira ibiragohayagi howabi mana ko uruni mo yu anda ibinigo nga. Ani bialu áyu í̠naga wali agali uruni ti dindi mana tara wiaru bialu ka.
ISA 2:7 Muni siliba ngolobi nogo hosibi hosime gili laga garo ale karisibi dewaore daga labe nahe Isaraele dindiha to̱leda.
ISA 2:8 Ani bialu mbirale dama mitangi bialu gime wabini dewaore ti daluha wu to̱lo tagi ho ngelowa mbirale tininaga gime wabini urunihondo bi pupu wialu ka.
ISA 2:9 Anduane Homogo-o í̠na wali agali ti bibahende mo dindiha haregola ti taga timbuni ho holebira. Ai Anduane Homogo-o í̠na tigua ko biyaru domo wanahabe.
ISA 2:10 Wali agali bu kamiruni tí ibida pialu egeanda karuha bira do hadaba. Dindi uli guabuwa gonene tombolo ngelo do howa uruniha bira do hadaba. Anduane Homogo ibuni wá tara holenehebi hongo timbuni holenebi heba ibirago hondowa tí mogo lalu mo ko holigo bira do hadaba.
ISA 2:11 Anduane Homogo ibuni ibirangi mana ko mine howa bialu tininaga mini hangu mo yaraga haga karu bope haragola ti taga timbuni ho holebira. Ani helowa horo ogoningi Anduane Homogo ibuni hangu mini lene timbuni holebira.
ISA 2:12 Anduane Homogo Hongo Haiheore kago ibugua wali agali tininaga mini yaraga haga karuni horo ogongiore bope hole lowa horo pongo bo winigo ngelo ka. Ani bialu wali agali tinaga mbirale tini turu holenaga mo wigi bini ngarubi horo ogoningi dege mo ko halu bo haealabagabu wahai holebira.
ISA 2:13 Ibugua ira tamia baya bebenabi luni Lebanono dindi howa anda hene karubi dindi hobane mbira Basana ngagoha howa ira mbira bai ale mini oga hongohe giambe anda hene karubi bibahende dugu wahai holebira.
ISA 2:14 Ibugua hari nene daligaore wedaru bo haealabaga biai halu
ISA 2:15 anda lu bu gimbu bu migi bima irigi hene karu bo haealabaga bialu tano ngarunaga ege pabe hongohe bu heledaru bo gialobaga biai holebira.
ISA 2:16 Iba sibi baya timbuni ngarubi bibahende bo gialobaga biai holebira.
ISA 2:17 Anduane Homogo ibuni ibirangi wali agali mana ko bialu mine hagabi tininaga mini mo yaraga halu haga karu bibahende mo ko halu bo haealabaga biai haragola uruni biagaru tini taga timbuni ho holebira. Ani bialu mbirale dama mitangi bialu gime wabini ngaru mo ereba hai haragola Anduane Homogo ibuni hangunaga mini mo yaraga halu mini lene timbuni holebira.
ISA 2:19 Horo ogoningi Anduane Homogo ibugua mbirale bibahende dindini karubi ngarubi mo gi hai helolebira. Ibugua dindi bibahende mo emabia hole ibirangi wali agali tigua Anduane Homogo ibuni wá holene timbuni hebabi hongo tara ho yalubi ibirago handalu ti ibida piai holebira. Ani puwa egeanda karuhabi dindi guabu wini ngaruhabi bira do hole ibida piai holebira.
ISA 2:20 Horo ogoningi wali agali tigua dama mitangi bialu bi pupu wule gime ngolo silibarume wabu wini biaruni bibahende uli ngaruhabi egeanda dalagamia paliaga karuhabi ba a̱i̱ na̱i̱ bialu tini ibida piai holebira.
ISA 2:21 Horo ogoningi Anduane Homogo ibugua mbirale dindini ngaru mo ema biai hole ibiragola wali agali ti gi timbuni holebira. Ani biragola Anduane Homogo ibuni wá tara holene heba hongo timbunihe ibirago de handalu ibida pole hari tene ngaruha pialu egeanda karuha bira do holebira.
ISA 2:22 Ainde wali agali mbiralime ibalu ti biamogo bulubada lo manda nabilimu. Ani bulene nawi larogo irane ina wali agali bu kamaruniha galone mbira naheore dindini tigimandi hangu halu homoleberema.
ISA 3:1 Hale hadaba. Anduane Homogo Hongo Haiheore kago ibugua Yarusalemeha howabi Yuda dindiha howabi wali agali karu ti hana ho hagaru wali agali karubi mbirale tara tara ngaru damenebi bibahende mo wahai holebira. Ibugua tinaga iba tomobi mo wahai holebira.
ISA 3:2 Tinaga agali wai biaga hongohe karubi ami agali maru karubi godi hale haga karubi bi mana tara tara latagi haga karubi halaga biaga karubi tanoha agali haguane maru karubi bibahendeore ibugua bo batagi hai holebira.
ISA 3:3 Ani buwa ami agali haru haga karubi gabumanenaga agali haguane karubi mini manda bayaleru kinihondo talebu miaga bu karubi bibahende bo taliatagi hai holebira. Ibugua agali biabe tara tara biaga mugubeyi bu karubi agali tomia hubibiru biaga karubi bibahende bo hilo batagi hai holebira.
ISA 3:4 Anduane Homogo ibugua dege wali agali Yuda dindihabi Yarusalemehabi bibahende bu karu igiri mini boga nabi karume haru helo yupe holebira. Ani yupe haragola tigua tininaga hameledadagua dindi handayaho halu mana tara ngaru bialu holebira.
ISA 3:5 Agali bibahendeme mendeali kago hengedape holenaga biabe hongo hagahaga buwa bialu holebira. Wandari igiri daliahe bu karume wali agali wahe biru ngaru yohandalu tihondo bi tandagabiru ladai bialu holebira. Wali agali habane nabulene karume wali agali mini lene karunaga bi mo wahalu holebira.
ISA 3:6 Ogonidagua bialu kangi agali maru ti hameigini mbirago karia puwa lalu, Í̠ dege aga karulo haridago ainde inanaga haru haga haguane í̠ habe. Ani hariyagua horo ko tagira ibirangi í̠na ina biamogo bibe, lolebira.
ISA 3:7 Ani laragola agali biagome ladai bialu lalu, I̱ ndo. I̱na tí biamogo bulene hariga nawida. I̱nibi nde tomo agarubi nawi dege kogonida. Tínaga haguane holiya dabo helolene nawigo nahelalimu, lolebira.
ISA 3:8 Anioredago Yarusaleme Yudala mo ko holene horo mbira lola halu mo ko haragoni. Anidagua biragoni irane tinime bi laragomebi biabe biragomebi Anduane Homogonaga deni howa ibunaga mini timbuni lene kago mo nagalone halu mo yo handaragome bira. Tigua mana ko uruni ibuninaga wanakuihayagi howa bialu hagaya.
ISA 3:9 Tigua kiralinaga godi hale halu howa agali ti hamelo kago bime biamogo bialu mendego bope ho helaga ka. Tinime mana ogonibi bialu kagome tini godini íbu helolebira. Tigua wali agali bu karunaga deni howa mana ko bamba Sodomo wali agalime bialu henedagua taga nahe bialu haga ka. Tini bia ko hene ngagome tiha ko holene ogoni wulebira.
ISA 3:10 Wali agali mana tigabi bialu haga karu ti turu holebira. Tigua biabe bayale bialu hayagonaga lini bayale nalu holebira.
ISA 3:11 Anigo wali agali ko biaga karu tigua mana ko bialu hayagonaga pani nalu maruhondo biyadagua tinihondo biadai bulebira.
ISA 3:12 I̱naga wali agaliru-o tíore daraho kogoni. Igiri daliahe karumebi wali bedarumebi tí handayaho haru howa hengedape halu kagoni ndobe. Haru haga uruni tigua tí mo hondo halu kagola tígua nde uruni talima hariga ko ngagoha pialu kamigonida.
ISA 3:13 Anduane Homogohanda wali agali bibahendenaga godi hale haiore hole kagoni.
ISA 3:14 Ibugua ibunaga wali agali haru hagabi haguane bu karubi tigua ko biyarunaga tihondo lamialu lalu, I̱naga wali agali uruni ti i̱ninaga pu mbira lini daga mini gerebi mabu helewagola tígua i̱naga mabu ogoni mo ko harimigoni. Wali agali mbirale nawi burupale karunaga emene hangu yu karu tígua gingila mialu tínaga andagaha mo wiaga kamigoni.
ISA 3:15 Tígua i̱naga wali agali bu karu mo ko halu wali agali yagibano bu karu hengedape halu kamigo aiwa bilimu layagola bialu kamibe. Anduane Homogo Hongo Haiheore howa Bibahende Haru Haame Ho Haga i̱ kogo i̱na bi o ledogoniore, lene.
ISA 3:16 Anduane Homogohanda lalu, Yarusaleme wali biru ngaru de handadaba. Tigua mitangi bialu tini bayaleore bedemabe toba haga bedagoni. Tigua harigani ibaga bialu howa tinaga geni ngi̱li̱nge̱lo̱ laga aleru pongobia howa ngi̱li̱nge̱lo̱ laga bima piaga kagoni. Tigua ma yu̱la̱daga howa deme agali bu kagoha de handa amu nana bima ibaga biaga bedagoni.
ISA 3:17 Anigo Anduane Homogo i̱na ti pani nelo mulebero. Tinaga emboneha dere bilarogola tinaga mandari kago dugu haeala piai helowa ti embonepe helolebero, lene.
ISA 3:18 Horo ogoningi Anduane Homogohanda Yarusaleme wali bedarunaga yári baya bu bedaruni golo waholebira. Tinaga geni yári bidarubi ma gagua ngarubi hale ira dedarubi mandari mo yáribia karubi labolabo dengui yi haga bidarubi bibahende golo wahai holebira.
ISA 3:20 Ibugua tinaga gi pagida ngaru golo wahai halu labolabo mandari huba bidarubi labolabo tinaga tinginini bo bidarubi pausi emene nogo dongoneme wabiniha pauda nga biaga mini sanda berelo yidarubi no̱le̱ emene mani pongobiaho bedarubi mo wahai holebira.
ISA 3:21 Gi magi gi hondoneni karuledarubi ngui ira dedarubi bibahende golo waholebira.
ISA 3:22 Ibugua tinaga aga bayale karuledarubi labolabo tara tarame aga tara tara biagimbu biaga wabini ngarubi nogo dongoneme pausi wabini ngarubi aga emene hangisibi ngarubi uruni ale yári biyaru bibahendeore mo wahai holebira.
ISA 3:24 Horo ogoningi Yarusalemeha wali bedarume mo ngabia haga paudabi sandarubi nawi biruwa tinaga tingini ngu tara bialuhe birulebira. Ti aga bayale mandibu ale mo yári biahalu karulaganego nawi howa pu payini ko nogo hende ale karula aribia ho birulebira. Ani biruwa tinaga mandari ala mo yári biahalu baya hangu pingipongo biagadagua bibe nahe mandari waitigime podo mbololo wa kagola embone podo mbololo wahene birulebira. Ani bedagola tinaga aga bayaleore karulagadagua nakarule labolabo ko budini dege karula aribia holebira. Tinaga dengui baya biagoria waitigi bu karume garabaya biabe ale biahaganaga bage tinginini podaragola tagaho birulebira.
ISA 3:25 Yarusaleme-o waitigime í̠naga ami agali hongohe bu karubi í̠naga agali maru bu karubi bo wahai holebira.
ISA 3:26 Í̠naga dabudabubi maru ale ngerubi mo yu piai holebira. Ani biragola í̠ wali mbira aga bidaru minu golo wahai henego tibabe dindini birape kaligobi birulebere. Anidagua bidegola wai pabenaga panga timbuni kagome í̠ha urunidagua bidago de hondowa dara halu dugu dalimu bialu holebira.
ISA 4:1 Anidagua bidagola horo uruningi wali kariame agali mbiraoreli hangu harigani pialu karia minu yania howa agali ogonihondo lalu, Inanaga tomo noleneru aga buleneru inane taya bialu handayaho holeberemago. Ai ina agalini nahe birabe tagabago ina agalini í̠ kegoni loloma̱ya e̱ la, lolebira.
ISA 4:2 Horo mbira mani tagira ibulebirago ogoningi Anduane Homogohanda ira karunaga gene mbira gahenge wayatagi halu anda helolebira. Ani bialu ibugua dindini tomo bayale tara tara ngaru mo anda hai helolebira. Ani biragola Isaraele wali agali bo hilo wahai hayangi nahome yu wahene mbira mbira hangu karu tigua bayale urunidagua birago hondowa ti turu taraore holebira.
ISA 4:3 Wali agali yu wahene Yarusalemeni karu ti bayale helonaga Anduane Homogohanda dabeneru tinaga mini bibahende ibuninaga mbugaha gilibu wiai ka. Ani binigo ai áyu uruni ti ibunaga wali agali mini tigabi kami lolebira.
ISA 4:4 Anduane Homogo ibugua Yarusaleme mo ko haiore howa mani tano ogoni lone mo bayale taraore ngelole manda bu ka. Ibuninaga hongo holene timbuni kagome Yarusaleme wayawaya bo wahalu dodo emene mbira para nahe baya gibiore ngelolebira. Wali bedarume mana ko bialu birayarubi agalime ko bialu maru bo wahenegonaga darama ngarubi mana ko damene bibahende Yarusaleme tanoha ngaru domo wahai holebira. Ani bialu Yarusaleme tanonaga ko domo wahai hene bayale wiai holebira.
ISA 4:5 Ani buwa Hari Saiononi wali agali íbu ngoai ho howa lotu lalu kagoria Anduane Homogohanda horongi hari beraliba mbirame bu dambi hai helolebira. Ani helalu mbiragangi ira hagua hungu heba mandagi helolebira. Anduane Homogonaga yári wá taraore holenego hari beraliba biagobi ira hagua hungu biagobi ale howa ogonime Yarusaleme tano bibahende wia dambi hai howa handayaho helolebira.
ISA 4:6 Anduane Homogonaga wá taraore holene yári ogonime ni hongohe darangibi dalu timbuni ibirangibi Yarusaleme mo ko holilono bu dambi howa haru helo ani helolebira.
ISA 5:1 I̱na iba gana mbira i̱naga nenegenaga laharogo hale hadaba. Iba gana ogoni ibuninagabi ibunaga pu mbira lini daga mini gerebi mabu ngagonagabi garea lalu lolebero. Hari bare wiagoria dindi bayale benebere winiyagoria i̱naga nenege ibugua gerebi iraneru ogoriani hangayada.
ISA 5:2 Ibugua ege to̱le̱ wiaru ungu wahowa dindiru baya hangu aluwa pu mbira lini daga mini gerebi irane bayaleoreru hangayada. Mabu dombeneha ibuni gerebi uruni mamage holenaga andira emene mbira daligani bu helayada. Hari bare ogoniha dege gerebi lini dowa geme hengedowa pingidalu waini iba wabulenaga ege to̱le̱ mbirani uli guabupe ho wiyada. Biabe uruni biai howa ibugua gerebi lini uruni bayale taraore dendebi delo mitangi buwa de hondo hene. Ani mitangi bu hearia gerebi lini daga biagome lini bayale nade howa dalu nalu hearia ne harigaha kaubi dege deneya.
ISA 5:3 Ani biyagola i̱naga nenege ibugua lalu, Wali agali Yarusaleme tanoha kamirubi Yuda dindiha kamirubi tígua la handadaba. O bidaruni nde i̱nime binigo bidabe be i̱naga mabu ibuha howa binime bidabe.
ISA 5:4 I̱na biabe bialu hangarugo pu urunime gerebi lini bayaleore delo lowa birugo irane aginaga lini dowa kaubi dayadabe. Mbirale mbira bulene winigo i̱na nabirudabe be agua biyadabe.
ISA 5:5 Aiore i̱naga gerebi mabu ogoniha mbira bule manda bidogo tíhondo langero. I̱na mabu ogoniha nogo gabua karume anda puwa pu gerebi lini daganeru nodugu payabu wahelonaga pabe gialope holebero.
ISA 5:6 I̱na dindi ogoniore mo labu harogola mabu ogoni embera ibalu datani anihe ko karu andaho helolebero. Ani bidagola i̱naga pu gerebi lini daga uruni bayale helo lowa lone biabe nabulebero. I̱na beralibaruhondo lalu, Iba dalu dindi ogoni gomba helonaga naibilalimu, lolebero, laya.
ISA 5:7 Isaraele wali agalibi Yuda wali agalirubi ti bibahende Anduane Homogo Hongo Haiheore kagonaga pu mbira lini daga mini gerebi mabu ale kagoni. Yuda wali agalirubi ti ibunaga pu gerebi lini dagane hangayaru ale kagoni. Ibugua wali agalime mana bayale ngaru hangu bialu helo hamelo hearia tinime mana ko wiaru bialu wali agali homelo bo wahaga biaabo halu hene. Wali agali maru karume mana bayale tigabi ngadagua bilo hamelo hearia tinime wali agali maru hearu hengedope haga bialu waitigi haga bialu hene.
ISA 5:8 Mo ko holeneore tíha wulebira. Agali anda dewa yolobu helalu dindi dewa yolobu wialu buwa dewa degeme tíninaga mo tago halu kamiruni. Emene hangu howa dindibi mbirale ngarubi tí dege karulai haramigola maru karu ti mbirale nawi howa tini birulenebi heba henge nawiore kagola dindi ogoriani tí hangu holeberemida.
ISA 5:9 I̱na hale halu hewaria Anduane Homogo Hongo Haiheore kagome ogodagua layua, Heneneore larogo. Anda timbuni baya tara o hama pedaruniha mbirali palia nabi tabuanda bu karia gialo wahai holebira.
ISA 5:10 Pu mbira lini daga mini gerebi mabu timbuniore hangayagua lini emene hangu daragola waini iba emene dege wabuwa hambu wulebira. Tigua balawa wabiaga widi egene mbege nu pirani honowa hangayaguabi lini dedaha mbege nu mbiraore hangu do hanabehe dolebirago, layua.
ISA 5:11 Tíha mo ko holene timbuniore wulebira. Egerebagi heyuwa tígua waini ibabi lulu iba hongohe marubi naho wiaga kamiru. Tígua naho wia dege bialu mbi hanuni bolangua halu lulu yu haga kami.
ISA 5:12 Tígua dawe tara halu howa waini iba dewa nolenebi ngida ale bolenebi irabitele kilinge̱le̱ lalu pilipe lalubi tabage balu hiliyula lalu bulenerunaga tíha manda bogala timbuni wua kamigoni. Ainde mbirale Anduane Homogo ibugua bialu kago manda nabiore kamigoni ndobe.
ISA 5:13 Anidagua bialu kamigonaga Anduane Homogohanda ogodagua leda. Heneneore i̱naga wali agali kamirume i̱ni manda bua nahe kamigoni. Ani bialu kamigonaga dindi tarali tínaga waitigi karume ibuwa tí bo garabayabu yalu polebira. Agali haguane kamiru tomo noa halu homoleberemi. Wali agali bibahendebi tí iba nolene nawidagola hége lebola halu iba noa halu tongololebira.
ISA 5:14 Áyu tígua turu ndoore howa tomo dawa payabu nalu howa dawe tara halu kamigo. Ai heneneore Yarusalemeni agali haguane kamirubi wali agali bibahende kamirubi homenerunaga humbirini andagaha tínaga homali tí bo gamu holenaga ne hariga timbuni ha̱la howa manda mandabu ngagoni, laya.
ISA 5:15 Wali agali bibahendeoreme taga hai holebira. Wali agali tininaga mini yaraga haga biaruni tí mo dindiha helalu mini lene ndo holebira.
ISA 5:16 Anduane Homogo Hongo Haiheore kago ibugua mana tigabi biragome wali agali urunibi karuhondo ibuni mini leneore ko lalu walia holebira. Ani bialu ibuni bayaleore howa mana ibugua biagaru tigabini bayale ngaru hangu biragome wali agali tigatiga dabaki holebira.
ISA 5:17 Tano ngaruni mo ko hai halu datani anda ho dambiho waholebira. Datani timbuni kagoha nogo sibi iginiru meme iginiru ti anda ibuwa tani uruni nalu holebira.
ISA 5:18 Tíha mo ko holene timbuniore wulebira. Wali agali mendeali karu mo hondo halu ko biaga kamiruni tígua ko uruni birimiru domo wahabe nahe tíniha paraho wiaabo kagoni.
ISA 5:19 Tígua lalu, Anduane Homogo ibugua bayale howa mana tigabi ngaru dege biraru ina de hondoloma̱ya abale bilo. Isaraele wali agalinaga Ngode Datagaliwabe ibugua inahondo mbirale mbira bule mandabu heagua nde ina hondoloma̱ya abale bulene nga. Ani biragola ibunaga mini tigabiwi howa ibugua mana bayale ogoni áyu biatagi haragoria handalu manda buluma̱ya, larimigoni.
ISA 5:20 Tíha mo ko holene timbuniore wulebira. Tígua mana ko ngaruni bayale lalu bayale ngaru ko laga kami. Wá holene ngago aruma ka lalu aruma holene ngago wá hara lalu kami. Mbirale kaubi ngaru dendebi lalu dendebi ngaru kaubi nga lalu ani biaga kamiruni.
ISA 5:21 Tíha mo ko holene timbuniore wulebira. Tígua agali marunaga manda timbuni bidaru dindiha lowa tí mini gigabiwi howa manda timbunibi kamago laga kamiruni.
ISA 5:22 Tíha mo ko holene timbuniore wulebira. Agali lulu iba naga mini lene kamiruni. Tínaga mini manda bogaru lulu iba odo iriari bulenenaga dege timbuniwi kamigoni.
ISA 5:23 Godi hale haga kamiru tígua mbiralime ke̱ howa i̱naga godi lahabe lalu ohowa tíhondo muni hana haragola ogoni ibunaga lahalu pu laramili. Ai henene godi lole ibirago tígua ibunaga bi baya hangu hale halu manani ngadagua daba nabiaga kamigoni ndobe.
ISA 5:24 Anidagua bialu kamigome ira karunaga piniha togo bu wahene howa yuniru gaulalu gilopebe biralidagua bialu mo ko holene ogoni abaleore irame dangi yobi ngagoria kulu lalu dagadagua tíha tínaga pini togo bialu lini dogolope halu puyabume abalu pulo yalu piagadagua pu ereba holebira. Irane tígua Anduane Homogo Hongo Haiheore kagonaga bi mo waharimigonaga ani bulebira laro. Tígua Isaraele wali agalinaga Mbirali Tigabiore Kago erembira mialu pirimigonaga ani bulebira.
ISA 5:25 Anduane Homogohanda ibunaga wali agaliru hondowa kebaho ka. Ibugua ti mana lalu pani mule ibunaga gi mbira yaraga holebira. Ani buwa gi yupe haragola hari timbuni karuni ema biai halu wali agali bu karuni dewaore homai holebira. Ani homai haragola uruninaga tinginiru hora nahe tanonaga hariga ngarunaga wima polebira. Ani bira tiraga Anduane Homogohanda ibunaga keba holenego hada nabi wiaabo holebira. Wiaabo kagola ibunaga gi yaraga hayago yupe nahe pani miaabo holenaga yaraga ho wiaabo holebira.
ISA 5:26 Anduane Homogohanda ibunaga wali agaliru belonaga ami agali kaundiaha karuhondo manane mo walia holebira. Ani walia haragola ami urunime abale gerai lalu ibulebira.
ISA 5:27 Ami agali uruni bibahende hongo tarahe degeru ibulebira. Ti mbirali gehi howa pilagabi mbirago ibu u paliagabi ndo ibulebira. Ti hongoheore howa tinaga mandibu baya hangu ndibulo wialu ge andane hongohe budubaga bibe naheore karule ibulebira.
ISA 5:28 Tinaga timuru de biao̱le yuwa wai bule ede yalu tungu lolebira. Tinaga wai biaga nogo hosiru hongo tarahe howa uruninaga ge gibaru hongoheni giambe ege to̱le̱ alehe ibulebira. Tinaga wai biaga garo ale mini karisi nogo hosime gili laga gerai ledaria aube tobane humbirini wai biradagua bulebira.
ISA 5:29 Ami agalirume wai huaro ledaria gabua timbuni laionome nogoru nole bo yuwa ohalu yalu pole dua timbuni lagadagua lolebira. Wai tigiali urunime agali minuwa garabayabu yalu laionome ibunaga tomo bo yalu abale piagadagua polebira. Ogoniore biragola mbiralime ti gingila mibe naheore wulebira.
ISA 5:30 Horo ogoningi ami agali tara urunime hongo howa huaro lalu Yuda dindi bibahende bo gialobaga bulebira. Ani bialu howa tigua hongo tara howa huaro laragome iba solowarame yaribu timbuni bialu howa u tugu lalu kilikulu timbuni lagadagua lolebira. Anidagua bidagola agali marume dindi ogoniha handa amu halu karia dindi ogoni mo ko ho waheneore wialu ni nade ginu hagua timbunime ge hai kagola arumahe wulebira, lalu Aisaiahanda Anduane Homogonaga bi latagi halu ani lene.
ISA 6:1 Mali mbiraore Kini Usia homayangi dege handalu hewaria Anduane Homogo ibuninaga kini biragane dagia wiagoria bereane handaru. Kininaga biragane ogoni daligaore wia. Kininaga aga biago timbuniore ibunaga anda ogoniha bibahende wua namu lai hea.
ISA 6:2 Ani bereagoria dahuliyali dewaoreme ho mabubupe hea. Dahuliyali uruni tinaga babagane waragaria dege dege haihe heane handaru. Ti bibahendeorenaga babagane kira dege degeme tininaga dengui dambi hai howa kira mende dege degeme tininaga tingini dambi halu kira teboneme yaga lalu pialu hea. Dahuliyali uruni ti ira hungu ale daradagua dalu bu hearia handaru.
ISA 6:3 Tigua tini dege dege bi lade̱ne̱ bialu lalu, Anduane Homogo ibu baya burugule ibu baya burugule ibu baya burugule ka. Anduane Homogo Hongo Haiheore kago ibu agiore loabe tobahe ibu baya buruguleore kagoni. Ibunaga wá holene hongo holenebi dindi bibahendeha wiame kagoni, lalu hea.
ISA 6:4 I̱ Anduane Homogonaga anda haneni hewaria dege dahuliyali biaru mbira mbirame bi laga biyagome ege to̱le̱ anda gene wayini dunini heago mo pirila gimbu biya. Ani bialu anda biagoha ira hagua timbuni do yulo paya biyane handaru.
ISA 6:5 Ani biyago hondowa mogo lalu gi timbuni howa ogodagua laru. Aiore i̱na horo bibahendengi i̱naga ne harigaha howa bi ko ngubi hangu lalu haruli. Ani bialu i̱na wali agali bi ko hangu laga karu baba mandagi harugome aiore i̱ yo pialu polene henge nawida laru. I̱ koore biaga kogonigoyu i̱na Kini timbuni Anduane Homogo Hongo Haiheore kago i̱ni deme handarugoni. Ani handarudago ai i̱ homoleda laru.
ISA 6:6 Ani lo hewaria dahuliyali biaru aria mbirame ira hungu dalu heaore pero mbirame ira punguane mbira tabo yalu i̱ hewagohayagi ibiya. Ira punguane ogoni bo lomabu miaga dabu wiagoha howa hedo yiniya.
ISA 6:7 Ibugua ira punguane ogonime i̱naga ne hambuni ela halu howa i̱nihondo langialu lalu, Áyu i̱na ira ogome í̠naga ne hambuni ela harogome í̠na ko biridaruni domo wahai harago ai í̠ha ko mbira nawi domo wahene bayale kegoni, laya.
ISA 6:8 Ani biyagola Anduane Homogohanda dahuliyali biaruhondo hale halu lalu, Bi aiwa lama pu lamabe. I̱naga bi ogoni aiwa loyalu polobadabe, layuane hale haru. Ani layuagola i̱na lalu, I̱na lama poliya pu la, laru.
ISA 6:9 Ani larugola Anduane Homogohanda ibunaga bi ogo wali agalihondo lamule pu lowa lalu, Tígua bi halu dewa hale haabo harimiyaguabi bi ogoninaga irane manda nabi haabo holeberemi. Tígua de handaya ho haabo harimiyaguabi mbirale biragonaga irane handa walia naholeberemiore labe, laya.
ISA 6:10 Ani lowa ibugua i̱hondo lalu, Wali agali uruninaga minime irane manda nabilo mini mo ndibula halu haleme hale nahelo hale mo tulu helalu deme de nahendelo de mo ndibulalu bi labe. Tigua uruni bayale haihe howa irane manda bialubi hale halubi de handalubi i̱ni koria dai biragola i̱na ti mo dabi holene wuligonaga ani bibe laro, laya.
ISA 6:11 Ani layagola i̱na ibuhondo ogodagua hale haru, Anduane Homogo-o i̱na biabe ogoni angi biamaro buliyabe, laru. Ani larugola ibugua ladai bialu lalu, Mana lalu kene dege tano ngaru bo gialo wahai halu dindiru mo ko hai halu anda bu karuha mbirali napaleore tabuanda hai helo.
ISA 6:12 Anduane Homogo i̱nime wali agali bibahendeore tini dindi yu wahalu dindi tara kaundiaoreha pelo waratagi halu tini dindiha mbiraoreali hangubi yu wahene mbira naholebiraore.
ISA 6:13 Wali agali dindi ogoria mbira mbira yu wahene heaguabi urunibi bibahendeore biba hai helolebero. Anigo wali agali dindi ogoria naheore wiyaguabi mani ira dibininaga tiliniha lone dongoria bialu anda hagadagua i̱ninaga wali agali mani ho aribia helolebero laya, lalu Aisaiahanda lene.
ISA 7:1 Kini Ahasa ibu Yodama igini howa Usia aguane henego ibu Yudanaga kini heangi wai bialu hene. Siria dindinaga Kini Lesinibi Isaraelenaga kini Lemalia igini Pegabi libugua Yarusaleme bo podolenaga wai bialu hene. Wai bialu hebiria libugua Yarusaleme tano karulole bo poda anda habe nahe hene.
ISA 7:2 Yudanaga Kini Ahasa ibu hale halu hearia Siriali ami ibuwa Isaraele dindiha anda íbu ka layago hale howa kini ibunibi wali agali bibahendebi gi timbuniore howa puyabu pularagola ira yuniru ema biagadagua bialu ti bibahende duru timbuni lalu hene.
ISA 7:3 Ani gi ho hearia Anduane Homogohanda Aisaiahondo lalu, Í̠ igini Seayasubu haru halu Kini Ahasa lola hole pilibu. Libu harigani pialu howa iba dadabu yalu anda ibini ngagoria tagira pialu kabiria Kini Ahasa ibu labolabo wabiaga ngagoha pole pialu karia ogoriani lola holeberebi.
ISA 7:4 Lola howa Kinihondo ogodagua lalibu, Bi dewa lama ibaga bialu karuni hale howa mogo lalu gi nahe hongo howa habe. Kini Lesinihondobi ibunaga wali agali karuhondobi Isaraelenaga kini kagohondobi gi nahe embedaho habe, lalu lamilibu. Kini ogonilabonaga keba holene gibi ndogo ira hungu nabule hagua dege timbuni pau̱ lalu wiralidagua bialu kagoni.
ISA 7:5 Henene dege Sirianaga kini kago ibugua Isaraelenaga kini heba bi lo mbira ho wialu lalu,
ISA 7:6 Iyame Yudanaga Kini Ahasaore bope habiya, lalu ka. Libugua lalu, Yuda dindiha wai bu ibalu wali agali karu iya baba mandagi hamaga holenaga ti mo gihalu dindi iyame karulabiya. Ani karulowa Tabele igini kini helo dabo helabiya, laragoni.
ISA 7:7 Anigo Anduane Homogo i̱na larogo. O layadagonidagua nabulebira.
ISA 7:8 Ani nabulebirago irane Siria dindi ngagonaga hongo tininaga tano haguane Damasaga tano hongo ngagobi ndo nga. Ani bialu Damasaga tanonaga hongome Kini Lesininaga hongo kago bolangua habe nahe nga. Ani bialu Isaraele dindinaga hongome tininaga Samaria tanonaga hongo bolangua habe nahe halu Samaria tanonaga hongome tinaga Kini Pega kagonaga hongo bolangua habe nahe dege ngagoni. Anigo mali pira waragariani duria (65) uruniha howa Isaraele dindi ogoni mo ko halu wali agali uruniha karuni bo giligala lenego purugo lalu abogo ogoria hene lalubi mini mbira nawulebira. Ai Yuda wali agali tíguabi nde i̱hondo mini mbiraore nawirimiyagua mani tíbi nde ogonidagua dege pu ereba hai holeberemi, lalu Anduane Homogo ibugua laya, lalu Aisaiahanda lene.
ISA 7:10 Anduane Homogohanda Kini Ahasahondo bi mende lawia hene. Ibugua Aisaiaha howa ogodagua lamini.
ISA 7:11 Anduane Homogo í̠naga Ngode Datagaliwabehondo manane mbira waliaha lalu í̠nime hale habe lalu lamibe. Manane ogoni homenerunaga humbirini andagaha howa walia helo hame leayaguabi hari daligaha howa walia helo hame leayaguabi mbiragoha manane walia helo hame lededagua ibugua walia helonaga hale habe, lalu lamini.
ISA 7:12 Ani lamiyagola Ahasahanda lalu, Ani ndo manane mbira mo waliaha lalu hale naholebero. Anduane Homogonaga hongo i̱na ba hondolene hame nale ko, lene.
ISA 7:13 Ani layagola Aisaiahanda ladai bialu lalu, Kini Debidinaga aguanene kamiruni tí bi ogo baya hangu hale hadaba. Tígua mana bialu kamigome wali agali maru karu tigua tí handabe manga helo dege beremiligoni. Ai áyubi nde tígua inanaga Ngode Datagaliwabe ibuguabi tí handabe manga helo hame lowa beremibe.
ISA 7:14 Aniyagua Anduane Homogo ibunime manane mbira tíhondo walia holebira. Manane ogoni agua bulebira. Wandari mabuage mbirame igiri mbira taba hanaragola igiri gali ogoninaga mini Emanuele wulebira.
ISA 7:15 Ai igiri ogoni ibu anda howa boga bialu mana ko bayalela tale bibehe harangi ibugua mone taranaga ibanebi nogo bulumaga sibirunaga andu ibane mo giambe howa tomo wabini mini sisibi nalu holebira.
ISA 7:16 Ahasa-o áyu í̠na kini agali kirali ogonilabo hondowa gi timbuni halu kegoni. Mani ogonidagua bulebira larogo nabi kangi kini ogonilabo libunaga tano ngarubi dindi anda ngarubi ala bo gialobaga biragola dindi hangu ibira hai holebira.
ISA 7:17 Anduane Homogohanda mo ko holene gendabi timbuniore í̠nihabi í̠naga dameneore karuhabi í̠naga wali agali bibahende karuhabi ibilolebira. Mo ko holene horo ogoni tagira ibule biaruagoni bamba Yuda Isaraelela hameigini paligi paligi biangi howa genda wima ibini áyu ngaruni emene dege lowa mo ko holene ogoni timbuni gendabiore tagira ibulebira. Genda ibulebiragoni ogo. Anduane Homogohanda Asirianaga kini Yuda dindiha haru anda íbu helolebira.
ISA 7:18 Horo ogoningi Anduane Homogohanda do laragola Iyibi dindiha howa ami agali dewaore karume hale halu abaleore bunguna dewa ibiradagua ibulebira. Ai ibugua Asirialiru dome dege olaragola abaleore mone mbulo yalu ibiradagua ibulebira.
ISA 7:19 Ibalu Yuda dindini ho paya paya bulebira. Tigua dindi ko wali agali nahaga ngaruhabi dindi ko egeanda ngaruhabi dindi dataniruhe bayale ngaruhabi dindi ko agubandu de̱le̱de̱le̱ru buhe ngaruhabi ti hangume ho karulo piai holebira.
ISA 7:20 Horo ogoni ibirangi Anduane Homogohanda agali mandari podaga mbira iba Yuberedisi ange ederayagi kago haru ibulebira. Haru ibiragola ogoni ibugua tínaga mandaribi tínaga angaribi tínaga tinginini iri karubi bibahende podo mbololo wahai holebira. Mandari podaga ogoni ibu Asirianaga kini lalu ibulebira.
ISA 7:21 Horo ogoningi tigua ani ibalu tínaga nogo sibiru bulumagarubi bo hilo wahai holebira. Ani bidagola agali mbirago ibunaga nogo bulumaga mbirabi nogo meme kirabi hangu helo wahayagua nde
ISA 7:22 tigua nogo andu ibane dewa hambu paya bulebira. Ani hambu payabu ngelowa nolene karulapeore wulebira. Wali agali yu wahene emene hadai biraru tigua tomo nogo andume wabini mini sisibi mone taranaga ibanebi karulapeore nalu holebira.
ISA 7:23 Áyu tínaga gerebi mabu uruniha gerebi irane daosini mbira (1,000) hongo howa gerebi irane mbira mbiranaga yolo muni daosini kina ale (1,000) mbira mbira taguabehe hongo kamigoni. Anigo mani horo larogoni ibirangi howa mabu bayale uruni ira tara tara anihe karume andaho aribia haragola embera tiagi timbuniore wialu agali ogoniha anda pobe naheore wulebira. Agalime danda timuru yalu ogoniha gabua taya polebira.
ISA 7:25 Agali marume hari bare ngaruha e hangaga wiyaruni bibahende embera ibalu agubandu de̱le̱de̱le̱ purume ibalu ha aribia holebira. Ani bidagola dindi ogoniha ani kenda karu hondowa agalime e ogoniha lone hanga nabulebira. Tigua nogo bulumaga sibiru hangu uruniha datani no pelo yupe holebira laya, lalu Aisaiahanda Kini Ahasa lamini.
ISA 8:1 Anduane Homogohanda i̱ langialu lalu, Mbirale beba gili bibehe mbira taya buwa nguni daligani bi haguane ogodagua gilibu wibe. Abale mo pagebu yalu gerai pu, gili bibe. Wali agalirume bayuwa dagalelo wáleore gili bibe.
ISA 8:2 Í̠na bi gilibu ngegoni mo henene helonaga agali bayale kirali damu pialu mbirago ibu loma binigo mo miaga mini Uria mendego ibu Yaberegaia igini Segaraiala ogonilabo damu pobe, lalu langiya.
ISA 8:3 Mani i̱ one ibu yamu ko biraya. Ani biruwa igiri mbira taba hono bereagola Anduane Homogohanda i̱hondo langialu lalu, Igiri ogoni ibu mini Abale Mo Pagebu Yalu Gerai Pu wibe.
ISA 8:4 Ai igiri ogoni ibugua bi lalu aba ai̱ya̱ olabe nahe wene gali dege bedangi Asirialime abale ibalu mbirale bibahende Damasaga tanoha ngarubi Samaria tanoha ngarubi bibahende mo yalu puwa tinaga kini mo mulebira, laya.
ISA 8:5 Anduane Homogohanda i̱hondo lone ogodagua laya.
ISA 8:6 Yarusalemeni Iba Siloa hendore ema nabi yo̱ lalu piagagobi Anduane Homogo i̱ni kogoni. Ani bidogola Yuda wali agali o karume i̱ hongo nahe kagoni lowa erembira ngialu tigua Kini Lesinila Isaraele wali agalinaga Kini Pegala libu hangu mitangi bialu libunaga hongo timbuniorehe kabe tobaho kagoni.
ISA 8:7 Anigo Anduane Homogo i̱na heneneore larogo. Iba Yuberedisi pedagoni iba li timbuni ibilalu dindi bibahende ngaruni ibame birame helolebero. Iba li ani ibilalu birame helarogome Yuberedisi angeni howa dindi anda maburu namulai haga bima ibaho wialu Yuda dindini anda ibulebira. Ani ibiragola iba uyuna daligaore agali ma pahabehe ibulebira. Ai iba Yuberedisi li ogoni Asiria dindiha kini kagome ibunaga ami karu haru halu ibuwa wai bulebiragonaga yobage lalu iba li ale ibulebira, lalu Anduane Homogo ibugua lene. Agali urunime ibalu Emanuele í̠naga dindi wiagoha ti karulai holebira.
ISA 8:9 Ani bulebirago wali agali dindi kaundia kawarebi bibahendeha hameigini hama pedamiruni tígua bi ogo baya hangu hale hadaba. Tínaga hongo ho kamiruni bibahende mo ngoai howa wai bule harimadalo manda bialu gi ho halimu. Anigo wai berolo manda buwa bialu kamiria tínaga hongo podaragola tí mogo timbuni lowa luluyu ibagabu holeberemi.
ISA 8:10 Tígua bule paraho ngamigo ogodagua bimi̱ya lalu bi lo mbira ho halimu. Ogonidagua bia buleberemigoyu henene halu biatagi naholeberemi. Ngode Datagaliwabe ibuni ina heba kagome tígua mbirale bule magoyu kamiruni lini nadolebira, laya lalu Aisaiahanda lene.
ISA 8:11 Aisaiahanda lalu, Anduane Homogonaga hongo i̱ha karula hayagola hewaria ibugua i̱hondo ogodagua laya. Wali agali karuni heba mini mo mbiraore nahabe. Mana tigua bialu kadaguabi nabibe.
ISA 8:12 Wali agalirume lalu Yuda dindi mo ko hai hole laya lalu bame bi layalaya mbira lalu heagua í̠naga damenerubi í̠nibi tí bibahendeme bi ogoni henene larabe toba nahalimu. Wali agali marume mogo lowa gi ho kadagua tíbi gi hamaga nahalimu.
ISA 8:13 I̱ Anduane Homogo Hongo Haiheore howa baya buruguleore kogonigo manda bilimu. Anigo tígua i̱nihondo dege gi halu holene ngagoni.
ISA 8:14 Ai wali agali bira do holenenaga anda i̱ni kogoni. Ani howa dege i̱ Yuda Isaraelela wali agalirunaga hariga piaga ngagoria ge giba bo bidi laga biaga ege to̱le̱ wiradagua bidogoni. Ani bidogoria maru ibalu karia ge giba mo ko howaore bo bidi laga biragola odo pilope haga bulebira. Ai Yarusaleme wali agaliru i̱ni gono ale howa abale minu yaga bulebero. Ani berogola dewaliore gono ogoniha do wulebira, laya, lalu Anduane Homogohanda langiya.
ISA 8:16 Anduane Homogohanda bi i̱ langiyadaruni ereba nahe wiaabo helobi i̱naga talima ibagarume bayuwa mamage helobi gilibiru. Ani buwa i̱nimeore gili bini lalu i̱ninaga gi magibi beba ogoriani gilibu wiru.
ISA 8:17 Anduane Homogo ibugua Isaraele wali agaliru erembira mialu ti handa dai bule ndo yu waore hayagonigoyu i̱na ibuhondo mini dunubia ho howa ibugua mbira bule layaru bilo malia ho kogoni.
ISA 8:18 Anduane Homogo Hongo Haiheore kago ibunaga haru hole biragane dagia Hari Saiononi ka. Ibugua waneigini uru i̱hondo ngiyaru ti baba kogoni. Ani bialu ibugua Isaraele wali agali mo ko hole ngagonaga manane inani walia ka.
ISA 8:19 Wali agali marume tíhondo, Homene dininiru mo bila haga biarumebi halaga biaga biarumebi tíhondo bi langulebirago hale hadaba, lolebira. Wali agali uruni ti lulume laradagua bialu bi tara tara tinaga ne harigaha howa latagi haga ka. Tigua lalu, Wali agalirume wali agali homa nabi karunaga lahalu homene dininihondo hale holene nga, lolebira. Tígua ani nabi tíninaga Ngode Datagaliwabe kagohondo hangu hale holene ngagoni.
ISA 8:20 Wali agali urunime ani layagua tígua agua ladai bilimu. Anduane Homogo ibuninaga bi mana bayale lowini ngaru hale halimu. Tí halaga biaga karume agi larabe hale holene nawi. Tigua bi laragome tí biamogo nabulebira, lalu ladai bilimu.
ISA 8:21 Anidagua biragome wali agaliru ti kagoria mo ko holene anda ibulebira. Tigua hina gari timbuni ho halu gendabi timbuni yu howa dindi bibahendeha ibaga bialu haabo holebira. Hina garime ti mo luluya haragola tigua tinaga kinihondobi Ngode Datagaliwabe ibuhondobi keba halu bi ko lalu holebira. Ani lalu howa hari daligaha handa daga halu kariabi
ISA 8:22 dindiha handa dindi halu kariabi mbirale bayale taya biyago ale mbira handa walia naholeorebira. Aruma holene timbuni ngagome budambi haradagua bialu genda yu holene ko ngaru dege dindini ngaria handa walia haabo holebira.
ISA 9:1 Ogonidagua bidago yu wahalu tigua bolangua halu putara holene henge mbira ngane handa walia naholebira, lene. Abale Anduane Homogohanda Nabadali hameiginibi Sebulunu hameiginibi bo gialobaga bu wahai halu mo ko hayagola wali agali bibahendeore taga timbuni hai ho hene. Ani binigo mani howa iba solowara timbuni Medidereniana bedagoha polene hariga timbuni pedagoria dindi ngarunagabi Iba Yodana doma edeyagi ngarunagabi Galili dindi bibahendeha wali agali tara tara bu karunihabi dindi uruniha bibahendeni genda yu hayaru wahai halu mini lene mbira wulebira.
ISA 9:2 Abale wali agali uruni ti arumaoreha henego ai áyu tigua wá holene timbuniore handa walia haya. Abale ti aruma dindiha haabo henego ai áyu ti miniha wá holene anda ibiya.
ISA 9:3 Anduane Homogo-o í̠naga wali agaliru ho dame bilarigola ti turu timbuniore ho ka. Wali agalime tinaga mabuha tomo hengeneru nole bialu howa turu hagadagua ami agalirume wai buwa wai labuha mbirale bayale ngaru mo yalu dai buwa tale bialu howa turu timbuni hagadaguabi í̠na bayaleore biamogo birigo hondowa ti turu timbuniore ho kagoni.
ISA 9:4 Bambaore í̠na Midianalirunaga hongo bo podalu í̠ni wayali haridagua áyubi tinaga waitigi ti mo genda ho hearunaga hongo bo podaridagonaga tigua turu timbuni ho kagoni. Í̠naga wali agalirume genda timbuniore yu kago agalime nogo bulumaganaga erembirani ira gombedene timbuni ngago mo wia howa genda ogoni yu howa biabe bilonaga tibume erekuniha howa bo daila halu hagadagua waitigi agalirume í̠naga wali agaliruhondo ani bialu heneyagoni. Anigo í̠nime waitigi urunaga tibubi ira gombedene gendabi ogoni mo libulobagabu waharigola tinaga waitigi urunime í̠naga wali agali ti kagoha lone ibalu mo ko naholebira. Waitigi ami agaliru tinaga wai biaga gesu karulo karubi wai biaga aga agali darama heaore bidaru heba bibahendeore irame daiore holebira. Genda wiyaruni ereba hai halu horo bayale holene wia aribia holebira.
ISA 9:6 Ani bulebirago irane inanaga igiri mbira ngule wiyago taba hono ngiya. Inanaga igini ogoni inahondo ngiya. Ibu haru haga howa inanaga handame haga holebira. Ibunaga mini lolebirago uru Mini Gigabiwibi Tigatiga Talebu Ngiagabi Ngode Datagaliwabe Hongo Timbunihebi Haabobo Holenenaga Ababi Mo Palia Holenenaga Haru Hagabi ka lolebira.
ISA 9:7 Haru Haga ogoni ibunaga hongo kago yu tago howa holebira. Ibugua wali agaliru haru haga buwa kagola wai bulene henge nawi embeda ho haabo holebira. Haru Haga ogoni ibugua Kini Debidi henegoria ho aribia halu Debidinaga biragane dagia ngagoriani bira aribia holebira. Ibugua mana bayale tigabi dege biaga kagonime ibu hongo timbuniheore holebira. Ibugua mana ogonibi biragome ibuni kini hongoheore áyubi awebi ibira nahe haho wiaaboboore bu holebira, lalu Anduane Homogo Hongo Haiheore kagome urunidagua biaiore holebira, lalu Aisaiahanda lene.
ISA 9:8 Yagaba aguanene Isaraele wali agali karuni mana ko biragonaga pani mulene nga, lalu Anduane Homogohanda laya.
ISA 9:9 Horo ko ogo tagira ibirangi Isaraele wali agali kamirubi Samaria tano timbuni ngagoha bu karubi ti bibahendeme ogoniore Anduane Homogohanda inahondo henemane biyadalo manda biai holeberemi. Áyu ogoni ti dege mine howa balagala halu tininaga mini yaraga halu kagoni.
ISA 9:10 Tigua lalu, Inanaga waitigirume ege timenime anda bini hongohe hearu bo gialo delai hayagoyu iname ege to̱le̱ timbuni ngaru minu podalu anda hongohe lone buleberema. Inanaga poge ira hengemaruni dibai hayagoyu iname uruni biyagonaga mogo nale kamagoni. Ogoni bame degeyago. Iname poge ira hene dibayagoria ira tamia bayale hanga aribia holeberema laragoni, lene.
ISA 9:11 Ani layagola Anduane Homogohanda keba timbuniore howa tinaga waitigi hearume wai bu ibilonaga bu mini mo heya haya.
ISA 9:12 Ani bialu ni tagira ibiragohayagi Siriali hearunaga minibi Pilidiali ni paliragohayagi hearunaga minibi mo heya dege haya. Ani biyagola nde tigua Isaraele wali agali baba wai bialu howa tinaga ne ha̱lalu bo ereba hai holenaga wai hongo howa bialu hene. Ti ani biya tiraga Anduane Homogo ibunaga miniha keba ho hayago ereba nahe ti mana bialu kago bolenaga ibugua gi dogola amu ho haabo kagoni.
ISA 9:13 Anduane Homogo Hongo Haiheore kago ibugua Isaraele wali agali ti mana ko bialu hayagonaga pani nelo miyagoni milowa tigua mini beregeda nabi haabo halu ibuni karia dai nabi kagoni.
ISA 9:14 Ani biyagonaga Anduane Homogohanda Isaraele dindi mo ko halu horo mbira hanguni ibugua Isaraele wali agalirubi tinaga agali haguanerubi pani nelo mulebira. Ibugua Isaraelenaga erene haguanela pugu waholebira.
ISA 9:15 Agali wahe mini lene karu ti haguane lalu mbiwia halu mana latagi haga agali hearume ke̱ howa layaru ti erene lalu lene.
ISA 9:16 Agali haguane hearume wali agali bu hearuhondo mana bayalebi hariga tigabi wiadagua ndo lawai hayagola ti mini pu tara halu mo luluya hene.
ISA 9:17 Anigo wali agali dewaoreme Anduane Homogo yu wahalu puwa mana ko wiaru bialu howa tigua mana biyarubi bi layarubi bibahende ko hangu hai hene. Ani biyagonaga Anduane Homogohanda igiri daliahe karu aria mbirago yu wanahe bibahendeore pani miai holebira. Ani bialu wali dalo bedarubi waneigini aba ai̱yalame hono wahalu homene karubi ibugua bibahendeore koorene ko uruni dara nahe pani miai hole ibunaga gi dogola amu ho haabo holebira.
ISA 9:18 Ira dene emene ko mbirame dama pialu irabu timbuni ngaru do yulalu bo timbuni dagimbu bialu howa hagua timbuni pau̱ lagadagua wali agali urunime koorene ko biyaru bibahende da ho wiaabo halu ka.
ISA 9:19 Anduane Homogo Hongo Haiheore kago ibunaga keba holene biba nahe wiaabo kagome wali agali dindi bibahendeni karu pani nelo miai holebira. Irame bo timbuni dalu mbirale mbira yu wanahe dai hagadagua pani miaiore holebira. Ani bulebirago wali agali uruni tini hangu hangu mitangi bulene nga.
ISA 9:20 Dindi ogoriani wali agali karume tinaga mbirale yu karu gingilo miaga kagoni. Ani biragola wali agalime tomo nolene hai bialu howa ngadagua nalu karia tombe nahe dege hagagobi mbirale gingilomu yayarume tinaga hame wiaru no karulapobe nahedagola haga biaga. Tigua tininaga waneigini karubi bo nalu haga biaga ka.
ISA 9:21 Manase hameigini karu tigua Eberaimi hameigini karu bope haragola Eberaimi hameigini karu tiguabi nde Manase hameigini karu bope haga kagoni. Ani bialu howa hameigini kira ogonilabo libu harume Yuda hameigini karu hengedope halu bo ma laga kagoni. Anduane Homogohanda libuni anidagua birago hondowa ibunaga keba holene biba nahe dege wiaabo kagola pani mule dege ibunaga gi dogola amu ho wiaabo ka.
ISA 10:1 Tíha mo ko holene timbuniore wulebira. Mana tara tara gahenge ngaru mbira dege dege tigabi ndo tíni biamogo bilonaga wabu wirimi. Uruni lo ngarume i̱naga wali agali bope haga nga.
ISA 10:2 Tígua mana urunime yagibano karu bope howa tinaga mbirale ngaru tí mo yaga kamiruni. Wali agali yagibano urunibiru ti godi lole ibiragola tínaga mana uruni lo ngarume ti biamogo nabi howa mo hengedape haragola pugu biaga. Tigua mana tiga nabi ogonibi bialu howa Anduane Homogonaga wali agali darabi bu karu warape halu wali dalo bedarunaga mbirale ngaru mo page bialu waneigini aba ai̱yalame hono wahalu homene karunaga mbirale ngarubi mo page dege biaga kamigoni.
ISA 10:3 Ngode Datagaliwabe ibugua horo mbira tígua mana ko uruni bialu kamigonaga pani ngialu mana bule winigo horo ogoni tagira ibirangi tí agua buleberemibe. Agali tínaga waitigi hongohe dindi taraha karu haru anda ibuwa ti puyabu hongoheme ibalu pu laradagua bialu bo hilo wahayagua tí agua bule kamibe. Tí biamogo bialu gi milo ai karia poleberemibe. Ai tí mbirale mo bila ho ngamiruni agoha mo do holeberemibe.
ISA 10:4 Tí waitigirume bo hilo wahayaguabi ti dindi mbiraha minu garabaya bu yalu piyaguabi tígua mbira beregedalu bibe naheore kamigoni ndobe. Anduane Homogohanda tíhondo uruni biai holebiragoyu ibunaga keba holene ngago ereba naholebira. Ani biragola tí pani dege mule ibunaga gi dogola amu ho wiaabo holebira, lalu Aisaiahanda lene.
ISA 10:5 I̱ Anduane Homogo kogoni i̱na bi mbira laro. Asiria dindi bibahende mo ko holene ibulebira laro. Áyu i̱na Asiria i̱ninaga kango ale i̱ni giha yuwa kogome wali agali i̱ mo tandaga haga karuni i̱na keba howa pani nai helo minu bai holebero.
ISA 10:6 Wali agali uruni tigua i̱ helo wahalu puwa gamugamu tara ngaru bialu karume i̱ mo keba halu kagonaga i̱na Asiriali ami urunime ti baba wai bu pelo pelaru. Tinaga mbirale wu karuni page bialu mo yai halu ti hongo nahe bameore harigani waru hengedaradagua bilo i̱na Asiriali ami biaru pelarugoni.
ISA 10:7 Anigo Asirianaga kini kago ibunaga mini i̱naga mini ngogobi ndo wu ka. Ibunaga minime dindi maru tara tara ngaruha pialu bibahende bo podai halu ibugua bo biba hai hole hamelo ka.
ISA 10:8 Ibugua mine howa bi lalu, Ai dindi dewaore i̱na bo podai howa tinaga tano timbuni wiaruni karulo kogoni. Dindi Kagemisibi Kalanobi Abadabi Hamadabi Damasagabi Samariabi tano uruni bibahende i̱na bope hai howa dindi uruninaga kini hearu balu áyu i̱naga ami karunaga haguane tini kini helaga bidogoni.
ISA 10:10 Dindi dewa uruniha mbirale bi pupu wulenaga gime wabini bu wiarunibi bibahende bo hilo wahai harugoni. Aniore biwagola tinaga mbirale gime wabini urunime tini biamogo mbira nabiya. Tinaga uruni ngarume mbirale gime wabini uru ale dewaore Yarusaleme Samarialani ngaru bolangua howa ngagoni.
ISA 10:11 Ai i̱na Samaria dindi ogoniha mbirale bi pupu wulenaga gime wabini wiyadaru bibahendeore bo haealabagabu waharugoni. Ani bialu Yarusaleme tanobi bi pupu wulenenaga gime wabini ngarubi i̱na ogonidagua bialu bo waholebero, lalu Asirianaga kini ibugua lene.
ISA 10:12 Kini ogoni ibugua bi ogonidagua layagola Anduane Homogohanda bi ogodagua ladai bialu lalu, Ai i̱na Hari Saiono nenenibi Yarusaleme tanohabi ogodagua bibe lalu yupe harugoha biai howa i̱na kini o biago ibuni mo ko howa balu pani mulebero. Ibuni hangu mitangi bialu ibu mini lene daligaore kogoni lowa mine halu ibuninaga mini yaraga halu kagonaga aniore bulebero.
ISA 10:13 Ibugua mine howa dege lalu i̱ninaga hongo mandamebi urunidagua bulenenaga boga i̱ha ngogome uruni biruruni. Ani bialu dindi tara tara wigi wigi biaga wiarunibi i̱na mo mbiraore halu i̱ni andaneha hangu wiai heledogoni. Ogonidagua bialu tinaga mbirale bayale wiaruni bibahendeore i̱ mo yai harugoni. I̱ agali hongoheore bulumaga hongo timbunihe kadagua i̱ hongoheore hewagome wali agali dindi uruniha hearuni bibahende bope halu hengedope hai harugoni.
ISA 10:14 Dindi bibahende wiaruni ega andaha ega haba miradagua i̱na tinaga mbirale bibahendeore bameore mo yu harugoni. Ai ega angibuni mbira ga̱ lolebi i̱na ogonidagua bialu harugola ibunaga habane namibe lolebi lalu bo pelolebi mbira naheoreya, lene.
ISA 10:15 Bi ogonidagua Asirianaga kini ibugua layagola Anduane Homogohanda ogodagua ladai bialu lalu, Ayu peleba mbira ibunime lalu i̱niore hongo timbunihe agali ayudago yuwa ira dibayagonaga hongo kagobi ndo bolangua kogoni, labehebe. Ira podagane so ibunime lalu, I̱niore hongo daliga agali ibu gime yu howa ira podayagonaga hongo kagobi ndo bolangua kogoni, lolebirabe. Wai bu pole howa kango ngarume agali yalu pu nabiaga. Agalime dege kango uruni gime yalu wai bule piaga ndoyabe, lalu Anduane Homogohanda laragoni.
ISA 10:16 Anduane Homogo Hongo Haiheore kago ibugua Asiriali hongohe bu heagola warago tara timbuni ti dindiha ibilowa pani mialu hongo timbuni hayadagoni bo ereba helolebira. Ani bialu tinaga mbirale bayale ngaruha ira hedope haragola irame dai hagadagua tiha warago ira ale da ho wiaabo helolebira.
ISA 10:17 Anduane Homogohanda ibu mbirale bayale hangu biagabi mana tigabi ngaru hangu biaabo haganebi ibu Isaraele wali agalirunaga wá hagane halebi kagoni. Ibu ani kago howa Asiria wali agaliruha ira hungu poboyogobi dagagobi dalu tinaga dindi anda ngaru dai helolebira. Horo mbira hanguni ibugua datani ko karubi mbuambua anda ho karubi delai holebira.
ISA 10:18 Ani do yulalu irabu timbuni ngarubi dai halu dindi benebere bayale e hanga ngarunibi bibahende do tauladaga helolebira. Agali mbira warago hongoheme heyabe nahe bopeore halu bo tongolo milagadagua Anduane Homogohanda Asiria wali agalinaga hongo bope halu bo ereba haiore helolebira.
ISA 10:19 Asiria dindiha winiru bibahende ereba hai howa ira mbira mbira hangu bame waneigini emene karume daga lolene karulape hangu yu wahene holebira, lene.
ISA 10:20 Anduane Homogoha Yagabanaga aguanene Isaraele wali agali emene manda mandabi hangume ibuni mitangi buwa olalu helonaga horo mbira pongobu winigo nga. Isaraele wali agali tigua tinaga waitigi hearu gi howa dindi tarali hearuhondo ti biamogo bule íbu lalu hale haga biyago ai biamogo bilo hale hayadarume beregedowa Isaraele tini mo ko howa bolebira. Ani birangi tigua Anduane Homogo ibugua mana tigabi bayale hangu biaabo haga Isaraele wali agalinaga Ngode Datagaliwabe kagohondo ti biamogo bia helo lowa maliaho dege holebira.
ISA 10:21 Isaraele wali agali yu wahene emene hangu uruni ti Ngode Datagaliwabe hongo timbuniore ho kago ibuni karia dai buleberemi.
ISA 10:22 Áyu Isaraele wali agali dewaore daga labe nahe ibaha ibamu wiarubi kagonigo mani howa emene hangu daga lene mbira dai bulebira. Tigua ko biyarunaga pani karulape nelo mo ko holene timbuniore tiha wulebira.
ISA 10:23 Anduane Homogo Hongo Haiheore howa Bibahende Haru Haame Ho Haga kago ibugua dindi bibahende ngaruni mo ko halu bo gialo wahai holebira layadagua aniore mo ko hai holebira. Aniore biragola tigua de handai holebira.
ISA 10:24 Anduane Homogo Hongo Haiheore howa Bibahende Haru Haame Ho Haga kago ibugua lalu, I̱naga wali agali Saiononi kamiru-o tígua Asirialiruhondo gi nahe halimu. Bamba Iyibialirume tíhondo ko binidagua Asirialirume tí mo ko halu bayaguabi gi nahe halimu.
ISA 10:25 Áyu i̱naga keba holene tí baba haabo ho kogonaga Asirialirume tí belo waharogoni. Emeneore howa tí baba keba ho kogo wahalu beregedowa Asiriali mana ko bialu mo koore howa dambulebero.
ISA 10:26 I̱ Anduane Homogo Hongo Haiheore kogome bamba Midiana wali agali ege to̱le̱ mini Orebe bereagoria tibume tongolo baga bialu bai henegodagua ai i̱na Asiria wali agali karu tibume bai holebero. Bamba i̱na Iyibialiru ibame nai helo helarudagua i̱naga gi dogola amu halu Asiria wali agali baiore holebero.
ISA 10:27 Asiriali tigua tí ira tigini mbira nogo bulumaganaga erekunini mo paga howa biabe bilonaga bo daila hagadagua tí bo hengedape howa mo ko halu handape ho kogoni. Ai o tigua mana ogonibi bialu kagome i̱ mo tandaga halu kagoni. Anigo horo mbira tagira ibulene dabo ngelarugoni tagira ibirangi i̱na tinaga hongo bo podarogola tíha lone genda mo ngibe nahe holebira, laya, lalu Aisaiahanda lene.
ISA 10:28 Waitigi abale anda ibalu Ai tanoha wai bialu karulo haya. Tigua Migirono tano wiadagua anda ibiya. Ani bialu tinaga tomo dabudabubi yiaru Migimasa tanoha ngelaya.
ISA 10:29 Ngelalu dalipe howa iba gana wiago pogalaede halu Geba tanoni pialu paliya. Ani biyago hondowa wali agali Lama tanoha palearume mogo lowa gi tara ho ka. Ani bialu Kini Solonaga tano Gibea wiagoria wali agali bu hearume gi howa tano yu wahalu togolo yalu piai haya.
ISA 10:30 Galimi tano wali agaliru-o ga̱ hongo howa ladaba. Laisa tanoha kamiru-o ga̱ larago baya hangu hale hadaba. Anadodo wali agali tínagaore dara timbuni ho kogoni.
ISA 10:31 Ai wali agali Madamena howabi Gebimi tano howabi ti bibahende ha do holene hai bialu ibida purogo laragoni.
ISA 10:32 Áyu ogoni waitigi biaru kaware Nobo tano naina anda ibiragoni. Ani anda ibalu howa tigua Saiono nene handa amu howa ibuore boloma̱yago lowa tinaga gi hongo hongo bingibongo lagalaga bialu Yarusaleme bo podole manda manda bialu ka.
ISA 10:33 Anduane Homogo Hongo Haiheore kago ibunaga hongo timbuni kagome agali hongohe mini lene timbuni kagonaga hongo bope holebira. Áyu ti ira magane dandole lowa wabia hene ale kago ibugua ti dandaragola abale podolebira.
ISA 10:34 Ti ira Lebanono dindiha ira hongohe hene ale hayaguabi irabu awaneha hene luni hongoheore haradagua biyaguabi Anduane Homogo ibugua ti bibahende dibalu podai helolebira, Aisaiahanda lene.
ISA 11:1 Yasi hameigini ogoni ira dibini tilini ale kagoni. Anigoyu ira tiliniha lone dongoria bialu anda hagadagua Yasinaga hameiginiha howa kini gahenge mbira tagira íbu holebira.
ISA 11:2 Anduane Homogonaga Dinini ibugua ogoni ibuha íbu howa mini gigabi wialu ibu kini hongoheore howa ibunaga wali agaliru haru holene mini mandabi hongoheore wu holebira. Ibugua Anduane Homogonaga hame ledago mandabi howa ibu Anduane Homogo andaneha haabo holebira.
ISA 11:3 Ani biragome ibu turu taraore ho holebira. Ibugua wali agali manani dabalu howa dongone tagirahayagi hondowabi marume agua biya larago hale howabi ndo dabolebira.
ISA 11:4 Ibugua ibuninaga mana tigabi biaga ngagoria howa godini tale bialu burupale yagibano karunagabi marume hengedope haragola dindiha haga karunagabi bi tigabi ngadagua lalu ti biamogo biaga holebira. Ibugua bi laragola wali agali ko biaga karu ti pani tandagala nalu holebira. Wali agali mine howa ko biaga karu homai holebira.
ISA 11:5 Kini ogonime mana bayale tigabi ngagome ibunaga wali agali haru holebira. Ibu mini bilinaheni tigabi hongohe haabo howa ibunaga wali agali bayuwa haru haabo holebira.
ISA 11:6 Biango dudu gabuame nogo sibi iginibi haya nabi bayale mandagi ho halu budi gabua ale timbuni mbira mini lebadibi meme iginibi mandagi paluebira. Laiono gabua iginiru bulumaga iginirubi tomo mandagi nalu wandari igiri emene karume ti haru holebira.
ISA 11:7 Biango dudu ale timbuni mini beabi bulumagabi tomo mandagi nalu tinaga iginiru mandagi paluebira. Laiono gabua karume tinaga tomo bulumagarume nagadagua datani dege nolebira.
ISA 11:8 Waneigini galirume wali agali tomia biaga puya ngagoria gini bialu kagola haya nabi wulebira.
ISA 11:9 Hari Saiono Anduane Homogonaga hari loma bia hene heagoria ko mbira nawi mbiralime mendeali mo ko holenebi mbira nawiore bayale dege dege wulebira. Iba solowara to̱lo tagi howa birame kadagua wali agali dindi bibahendeni karume Anduane Homogonaga mini daliga taraore ngagobi ibu hongo gibiorehe kagobi manda biame holebira.
ISA 11:10 Horo mbira ibulebirago ogoningi Anduane Homogohanda Yasi aguane mbira kini helolebirago ogoni ibu wali agali bibahende mo mogo bulenenaga manane holebira. Tigua ibunaga tano ngagoria íbu ngoai howa ibu mini lene timbuni ka lalu ibu mini yaraga holebira.
ISA 11:11 Horo ogoni ibirangi Anduane Homogohanda ibunaga hongo halu mende walia halu ibunaga wali agali bibahende tininaga dindi henene wiyagoria haru dai bulebira. Wali agali emene maru yu wahene Asiriahabi Iyibihabi Sudanahabi Elamahabi Babilonohabi Hamadahabi iba timbuni Medidereniana bedago angehabi dombenehabi dindi uruniha yu wahene karu bibahende haru dai biai holebira.
ISA 11:12 Wali agali dindi bibahendeha garabaya bu yalu purogo lene hayaru bibahende Anduane Homogohanda tini dindiha haru dai bero lalu manane mbira walia halu wali agalime hendelo helolebira. Wali agali uruni Yuda wali agalibi Isaraele wali agalibi bibahende tinaga waitigime garabaya bu yalu pene biaruni dai bulebira. Áyu dindi bibahendeha hai kago mani Anduane Homogohanda haru dai bulebira.
ISA 11:13 Ani bu howa Isaraele hameigini tigua Yuda hameiginihondo miniha henge nale holebira. Yuda tiguabi Isaraele wali agali baba waitigi naholebira.
ISA 11:14 Isaraele Yudala libuni mandagi mo mbiraore howa ni paliragohayagi Pilidia hameigini padaru baba wai bia amu halu ni tagira ibiragohayagi padaru bababi wai biadai bialu wali agali uruniha karunaga dabudabu ngaru mo yu piai holebira. Libugua Idomo agali baba wai bialu Moaba bababi Amono bababi wai bia dege buwa libugua bo poda hana hai howa dindi uruni bibahende libugua handayaho hai holebira.
ISA 11:15 Anduane Homogohanda iba solowara timbuni mini Iba Daramabi bedago hundu tegelape helolebira. Ani bialu puyabu poboyogobi hongohe mbira ibilowa ogonime iba Yuberedisi pedago mo hundia halu mo emene koore holebira. Ani biragola iba gene karia emene ko dege dege bame ganaruaha pialu kagola wali agalime doma ede habehe holebira.
ISA 11:16 Ani biragola hariga timbuni mbira Asiria howa pu íbu bulene bope holebira. Hariga ogoni bamba Isaraele wali agalirunaga mamalime Iyibi dindi wahalu tagira ibilonaga hariga ba henedagua ai Isaraele wali agali Asiria dindi yu wahene karu tagira ibilonaga hariga ogoni ba holebira, lalu Aisaiahanda lene.
ISA 12:1 Horo mbira ibulebirago ogoningi Isaraele wali agali tígua iba gana ogodagua loleberemi. Anduane Homogo-o i̱na í̠naga mini yaraga haro. Í̠na i̱hondo keba ho harigoyu ai í̠naga keba ogoni ereba hayagola i̱hondo mana bayale bialu kegome i̱naga miniha dungulo kogoni.
ISA 12:2 Ngode Datagaliwabe ibu i̱ gi mialu i̱naga pele ngiaga kagoni. I̱na ibuhondo mini mbiraore hongohe wu halu gi nahe holebero. Anduane Homogo ibuniore kagome i̱ hongoheore heledagonagabi iba ganaru lalu kogonagabi ibu ka. Ibugua i̱ gi mialu i̱naga pele ngiaga kagoni lalu iba gana lolebero.
ISA 12:3 Iba uli wa wini ngagoha howa iba gagahe noa kagome naragola bayale hagadagua Anduane Homogo ibugua ibunaga wali agali biamogo bialu pele ngiragola ibuni karia pole turuore halu poleberemi.
ISA 12:4 Ani pialu howa tígua iba gana ogodagua loleberemi. Anduane Homogohondo ka̱i̱ lalu biamogo bilonaga mini olalimu. Ibugua biabe timbuni biyarunaga te wali agali bibahendeore hale helo latagi halimu. Ibu mini leneore ka, lalu lamilimu.
ISA 12:5 Anduane Homogohondo iba ganaru lalu, Ibugua biabe bayaleore bigi biyarunaga ibu mini leneore ka, lalimu. Hameigini tara tara dindi bibahendeha bu karume hale hai helo bi bayale ogoni lamiai halimu.
ISA 12:6 Isaraele wali agalinaga Ngode Datagaliwabe ibu mini bayale tigabiwi ka. Ibu ibunaga wali agali ina heba haabo kagoni. Anigo Hari Saiono wali agaliru-o iba gana bi ladaga halu Ngode Datagaliwabe mini leneore kago lalu ibunaga mini yaraga hai halimu.
ISA 13:1 Ngode Datagaliwabehanda Babilono dindi bibahendeore bo gialobaga biai holenaga ibugua bi ogo Emoso igini Aisaiahondo de gandebaha howa lamini.
ISA 13:2 Anduane Homogohanda lalu, Ami agali bu karume de handalu íbu ngoai helonaga hari nene ira mbira nahe ngagoria wai biagane pelagi helole ira homane mbira dibu hangabe. Ami agali karu olowa Babilono tanonaga wai pabe panga timbuni bu karu gi dolade howa walia halu tigua wai bule pelo pelabe.
ISA 13:3 I̱na Babilono baba miniha tandaga timbuni ho howa i̱nime i̱naga ami agali bayale hongohe bu hearu dabalu Babilono mo ko halu minu bole ibidaba laru. Ami agali uruni tigua Babilono baba wai bule turu timbuniore ho kagoni, laya.
ISA 13:4 Hari nene ngaruha howa bi timbuni ladagadaga biaruago hale hadaba. Bi ladagadaga biaruago ami agali dewaore dindi tara taraha howa íbu mogo biaruagoni. Anduane Homogo Hongo Haiheore kagome wai bule ibunaga ami agali mo mogo biragoni ndobe.
ISA 13:5 Ti dindi kaundia tara tara wiaruha howa Anduane Homogo ibunaga danda timu yandare wai biagane aleru yalu ibaruagoni. Anduane Homogohanda miniha keba timbuniore ho howa dindi tara tarani howa hameigini tara tara karu bibahende bo haealabagabu wahai holenaga ami agali o mo mogo biaruagoni.
ISA 13:6 Anduane Homogohanda wali agali bibahende godini helowa dabaki bulene horo biago ibulene kaware hayadago tígua dugu dalimuore bidaba. Horo ogoningi Anduane Homogo Hongo Haiheore kagome mo ko holene timbuniore ibilolebira.
ISA 13:7 Anidagua biragola wali agali bibahende durulowa gedaore halu hongo nahe tingini pirilape hai holebira.
ISA 13:8 Bibahendeoreme gi timbuniore halu walime gali taba honolene tu haragola tandaga timbuni hagagobi halu holebira. Ani biragola wali agali ti gi timbuni howa tini degedege de handaya haga bialu bibahende gi hai holebira.
ISA 13:9 Horo ko tara ogoni abaleore ibulebirago ogoningi Anduane Homogohanda ibunaga keba holeneme dindini mbirale nawilobi wali agali ko biaga bu karu nahelobi bo wahai holebira.
ISA 13:10 Horo ogoningi yakundi bibahende hundiai holebira. Ni tagira ibiragola wá nahe aruma halu egebi nadolebira.
ISA 13:11 Anduane Homogohanda lalu, Wali agalime mana ko biragome dindi ogoria wua to̱ledago mana ko ogoninaga i̱na dindi bibahendeni mo ko holene ibilolebero. Wali agali tininaga mini mo yaraga haga bu karu i̱na ti bope holebero. Marume tini mitangi bialu i̱ duniniore ko lo mitangibu haga karubi maru mo ko halu haga karubi pani nelo mialu bo wahai holebero.
ISA 13:12 Wali agali dewaore homai halu mbira mbira hangu helo yu waharogola ti abogoda lalu handabe nahe holebira. Ngolo bayale agoha ngabe hondole taya biagadagua agali taya bulebira.
ISA 13:13 Horo ogoningi Anduane Homogo Hongo Haiheore kogome i̱naga keba holene timbuniore heba ibulebero. Ani ibuwa i̱na hari daliga mo ema biai halu dindi dumbirumbi biagadagua bialu dindibi wulene henge nawidagola ema bialu pialu holebira.
ISA 13:14 Ogonidagua birangi wali agali dindi tara taraha howa Babilono íbu heneru ti bibahende gi timbuni halu nogo gabua tara tara agalime bole biragola ibida piagadagua pialu nogo sibime ti haru haga mbira nahedagola luluyu ibagabu hagagobi holebira. Ani bialu tini dindi tene wiyadagoha ibida dai biai holebira.
ISA 13:15 Anigo waitigirume agali maru minu yania hararu ti ayu tibu ne gadele ngarume nogoba halu homelo bo wahai holebira.
ISA 13:16 Ani birangi waneigini ai̱ya abala de handayaho kaore dege waitigi ibiyarume waneigini gali ai̱yahanda gime taba yu karu gingila mialu dindini mo para haragola homolebira. Ani bialu waitigi urunime tinaga anda bu karu bo gialo wahai halu tinaga dabudabu bu ngaru mo page biai halu wali bedarubi kayu yai holebira.
ISA 13:17 Anduane Homogohanda laabo halu lalu, Midiali karume Babilono bu karu baba wai bule pelonaga i̱na tinaga mini mo heya haru. Tigua Babilono wali agalinaga muni ngolo silibabi bu ngaru mitangi howa uruni mulenaga ndo wai bulebira.
ISA 13:18 Tigua Babilono dindiore bo haealabaga bialu mo ko holenaga wai bialu igiri daliahe karu timu yandarerume bolebira. Tigua waneigini wahebi emene galibi bibahendeore hondowa dara nahe bo wahai holebira.
ISA 13:19 Babilononaga tano timbuni ngago baya tara moneheore tano maru ngarubi ndo nga. Babilono wali agali tinime tinaga tano ogoni mini lene taraore mbira nga lowa turuho haga kagoni. Ani turuho kagoyu Anduane Homogo i̱na tano ogoni bamba Sodomo Gomorala mo ko halu bo heda harudagua bo heda hai holebero.
ISA 13:20 Ani berogola wali agali lenego mbira dindi ogoriani lone naholebira. Ani nahedagola Arebiali bu karume dindi ogoriani tinaga balai andaru nabu holebira. Nogo sibi haru haga karumebi ti dindi ogoniha tinaga sibi datani nelo haru halu naibulebira.
ISA 13:21 Dindi ogoni bame labu hangu wiai kagola ema bialu piaga gabua biru karu ti dege bu holebira. Ega mbiraga biragane umi halangau bedaru ti anda bu karuha biraga bulebira. Ega yári ale bedarubi nogo meme gabua karubi ti tano wini hama ngagoria pigipogolo yu pu íbu bialu holebira.
ISA 13:22 Ani bialu kagola kini anda hene biagohabi agali haguane anda bu hene biaruhabi biango dudu bu karume giga̱u̱ lagalaga bialu holebira. Babilono tano bo haeala togo lalu mo ko holene tu kaware hayada. Heneneore ibu holene hamaro biragoni, lalu Anduane Homogohanda laya lene.
ISA 14:1 Anduane Homogohanda Isaraele wali agali lone dara howa ti ibunaga wali agaliore ho dai bilolebira. Ani bialu tininaga dindi henene wiyagoria haru daibu helolebira. Ani kagola wali agali dindi taraha howa ti baba mandagi íbu howa tibi nde Isaraele wali agali heba ho gimbu bu holebira.
ISA 14:2 Anduane Homogohanda wali agali dindi tarani bu karume Isaraele wali agali biamogo bialu yupe halu tini daluha hama dai bilelonaga ibugua ti mo manda bia holebira. Anidagua biragola Isaraele wali agali tinaga dindi Anduane Homogo ibunime tu wa mini biagoria hole daibu kagola wali agali tara urunime ti Isaraele wali agalinaga garabaya biabe ale biahaga holebira. Bamba wali agali uruni tigua Isaraele wali agalime tinaga garabaya biabe ale bilo helaga biaru ai tinime Isaraele wali agalirunaga garabaya biabe ale bialu ha aribia holebira. Bamba tigua Isaraele wali agaliru hengedape howa mo ko halu haga hayago mani Isaraele wali agalirume wali agali uruni haru howa handayaho holebira.
ISA 14:3 Anduane Homogohanda Isaraele wali agali bu kamiru tínaga tandaga timbuni ngelo kamirubi ko damene bu ngarubi bibahende mo wahai haragola tí bayale holeberemi. Wali agali tara bu hearume tí mo ko hayagola tígua tinaga biabe biahalu howa erekuibiore bialu harimigoni. Anigo tínaga genda uruni ereba haiore holebira.
ISA 14:4 Anidagua biragola tígua Babilono wali agali bu karunaga kini kago mege bialu iba gana ogodagua loleberemi. Kini hongohe heago pilo ibira hayago de handadaba. Wali agali hengedape haga biagonaga hongo hamaro biyada.
ISA 14:5 Wali agaliru mo gi halu mo ko haga kagonaga hongo Anduane Homogohanda mo ereba hai helaya.
ISA 14:6 Kini ogoni ibugua bameore keba howa wali agaliru bope haabo haya. Wali agali dindi tara tarani palima pearu hengedape halu mana ko dewa bialu uruni bibahende mo ko haga bialu haya.
ISA 14:7 Áyu dindi bibahendeha wali agali bu karu tinaga bu miniha dungulo howa ti bibahendeme turu howa iba gana ladagadaga bialu haga ka.
ISA 14:8 Lebanono hari ngaruha ira guraya tamiaru bu karumebi nde kini í̠ homarida lalu turu timbuni halu ka. Ira tigua lalu, Ina kamaru lone dibulene agali mbira nahedago tira, lalu ka.
ISA 14:9 Humbirini andaga dinini bu karume í̠ ibirida lolenaga ti manda manda bialu ka. Tigua lalu, Agali haguaneru-o tí heyadaba. Wali agali dindi tara tara hearunaga kini ala heneru-o tínaga biragane dagia ngelo wahalu heyadaba. Tí bibahende heyalu kini agali o ibirago lola hole ibidaba.
ISA 14:10 Uruni ti bibahendeme í̠hondo bi ogodagua lolebira. Í̠naga hongo timbuniore ina bibahendenaga hongo bolangua hai hene kebe tobaho harimada. Áyu í̠naga hongo ereba hai hene ina kamarubi dege kegonida, lolebira.
ISA 14:11 Abale í̠ dindini haringi í̠naga yári bayale tara tara karulo heru hondowa wali agali bu hearume ga̱wa̱ ale lalu í̠naga mini yaraga halu lalu hayago ai ereba haya. Áyu í̠ homene dinini karuha howa ngoe bombo biru ngaru í̠naga tamunguru howa dindiha paluebereda. Ani bialu ngoe emene biru ngarume í̠ balangiya dambi haradagua bulubada.
ISA 14:12 Babilononaga kini-o Í̠ dahuliya andaga howa yakundi dindini hondo ibira henego ngegoni. Abale í̠ yakundi egabi naledaha huririle harini tagira ibagadagua howa í̠na dindi bibahendeha wai bima ibaga bialu wayali haga harigo ai í̠ mo dindiha henego ngegoni.
ISA 14:13 Í̠na mitangi bialu, I̱ dahuliya andaga pu holebero. I̱na kininaga biragane dagia Ngode Datagaliwabenaga yakundi bu kagoria mo ngelowa daligani biruliya. Dindi abene uyurahayagi hari nene mbira dama mitangi bialu mbirale gime wabini ngaru ti ngoai haga ngagohabi biruliya dege.
ISA 14:14 I̱na hari beraliba ngaru bolangua halu puwa Daligaorene Daliga kagobi dege holebero, lo manda bu harigoni.
ISA 14:15 I̱na ani lo manda birigoyu daraba í̠ pilope howa ibira harigoni. Í̠ homene dininiru haga humbirini andaga ngagoha pialu dindi andanehaore pu holebere.
ISA 14:16 Dindi ogoniha pu kegola homene dinini maru bu karume í̠ deme hongo howa handaya halu í̠hondo hale halu lalu, Dindi bibahende mo durula hai halu dindi timbuni maruha karu mo gi hai haga biagoni agali ogoni mbauleda.
ISA 14:17 Agali mbira tano wiaru bibahende bo gialabagabu wahai halu dindi hangu ngelalu piaga biagoni agali ogoni bada. Agali ogonime wali agali garabaya bu helayaru dara halu tini daluha hole dai bidaba nalaga biagoda, lolebira.
ISA 14:18 Kini maru karu homaragola tinaga tingini homali bayale wabinigoha hangu hangu yu hora haga biagaya.
ISA 14:19 Áyu í̠ ani ndo biyada. Tigua í̠naga tingini agalime ira magane dandalu dindini togo bilo bape haralidagua bape hayada. Í̠naga tingini agali waime benego tingini ngarume wia dambi howa hariga teneni ngagoni. Tinaga dinini dindi andaneha humbirini andaga ka. Agali harigani bolangua haga bialu gerai porarume í̠ angua haga bialu puíbu bialu kagoni ndobe.
ISA 14:20 Í̠naga tingini agali kini maru henerunaga tingini baya hangu hora hayadagua hora naholebira. Anidagua bulubadago irane í̠na í̠naga dindi wigo mo ko hai halu í̠naga wali agalirubi bo wahai harigonaga ani bulebira. Kini ko ogoni ibu waneigini bu karubi dindi ogoria nahe ereba hai holebira.
ISA 14:21 Anidagua bilonaga kini ibuguabi ibu mamalirumebi mana ko bialu henegonaga pani mialu ibu igini uruni bo wahai hole manda manda bu holene nga. Ibu igini biarume kini ha aribia nahelo. Tigua dindi bibahendeni tinaga tanoru lone bu aribia nahelobi ani bulene nga, lalu iba gana ogoni loleberemi, lene.
ISA 14:22 Anduane Homogo Hongo Haiheore kago ibugua lalu, I̱na Babilonoali bu karu baba wai bialu ti mo ko howa bo biba halu ereba hai helolebero. Mbiraoreli hangubi mbira helo yu wa naholebero. Wali agali waneiginirubi mbira yu wa naholebero. I̱ Anduane Homogo i̱na bi o ledogoniore.
ISA 14:23 I̱na Babilono wali agali bibahende bo wahai howa mburuma bialu hilu wahai holebero. Ani bialu Babilono mo iba pugua aribia ho ngeledogola ega iba puguaha biraga bedaru ale dege biru wulebira. I̱ Anduane Homogo Hongo Haiheore kogome i̱na bi o ledogoniore.
ISA 14:24 Anduane Homogo Hongo Haiheore kagome bi hongohe mbira lo wialu lalu, Heneneore larogo i̱na mbira bule mandabu henego biaore bulebero.
ISA 14:25 Asiriali bu hearu tigua Isaraeleali dindi wiwagoha ibalu i̱naga wali agali dindi ogoniha hearu genda timbuni mo miya. Nogo bulumagame agalinaga biabe biahelo ira mbalapeme mani dariba hamagamaga bini hagadagua Asiriali tigua Isaraele wali agali ani bu helaga kagoni. Anigo Asiriali uruni ti Isaraele dindi hari ngaruha kaore dege i̱na ti geme hengedalu tagadabagabu waholebero. Ani berogola Isaraele tiha genda timbuni winigo ereba hai holebira.
ISA 14:26 Anduane Homogo i̱na dindi mbira mbirani hameigini hongohe palima pedaruhondo urunidagua biai holebero. Anidagua bule lowa i̱naga gi megela ho manda manda bu kogoni, lene.
ISA 14:27 Anduane Homogo Hongo Haiheore kago ibugua urunidagua bule kago aiwa mo wahabehebe. Ibugua pani mule gi megela ho kago mbiralime ibunaga gi bope halu waha labe nahe kagoni.
ISA 14:28 Kini Ahasa homayagola mali ogoningi Anduane Homogohanda bi mbira ogodagua lalu lamini.
ISA 14:29 Pilidia wali agaliru-o bi ogo baya hangu hale halimu. Gewa mbira tí minu baga biago tagalaki hayagonaga tí bayale holeberemada lo mitangi bialu turu holomini nahalimu. Puya ko mbira winigo homaragola puya mende koore ngagome wini biagoria wia aribia holebira. Anigo puya koore biago koorene ko helo helaga bedago ibuni babaganehe howa yagalo yu ibaga biaga wulebira.
ISA 14:30 Anduane Homogo ibugua yagibano mbirale nawi bu karu ti mo bayale haragola tinaga bu miniha mo palia holene karulo holebira. Anigo Pilidia wali agali tíha Anduane Homogo ibunime hina gari timbuni ibilaragola hina gari ogonime tí mo homa halu bo biba helolebira.
ISA 14:31 Pilidia dindiha tano timbuni dunini wima pedemirubi wali agali tano uruniha haga bu kamirubi tí bibahendeme gi timbuni howa duguore hongo howa biadagadaga bidaba. Ani larogoni irane dindi abene uyurahayagi howa ami agali dewaore ibirago tinaga erembiraha ira hagua dagadaga bima ibiragonaga laro. Ami agali uruni ti agali dari mbira naibi wayali ogobi dege dege ibiragoni.
ISA 14:32 Pilidialime tí biamogo bule ibidaba lama inahondo hale ho ibiyagua nde iname agua ladai bimi̱yadabe. Ogodagua ladai bimi̱ya. Anduane Homogohanda Isaraele wali agalinaga ha do anda Saiono tano dabo ngeleda. Ibunaga wali agaliruha genda mbira tagira ibirangi ti tano ogoniha pialu ha do howa bayale holebira, lami̱ya.
ISA 15:1 Anduane Homogohanda Moaba dindi bo haealo wahai holenaga Aisaiahondo bi ogo de gandebaha howa lamini. Waitigirume mbiraga ibalu Moaba dindiha Ara tanobi Kiri tanobi bo haealabagabu waharagola Moaba mo ko holebira.
ISA 15:2 Anidagua biragola wali agali Dibono tanoha bu karume tinaga dama mitangi bialu gime wabini hari neneha ngaruhondo bi pupu wule puwa dugu bu mialu holebira. Moaba wali agali uruni tinaga Nebo tanobi Medeba tanobi bo gialobaga biai halu mo labu halu kagola tigua ogoninaga dara halu mitangi timbuni howa dugu bialu holebira. Tigua dara timbuni ho howa tinaga mandari angariru dogai holebira.
ISA 15:3 Wali agali tigua daraho howa aga karulagane ngaru mo karulalu tanonaga hariga pedadagua pugu bialu holebira. Tininaga anda dangini iragaho howabi wali agali ngoai ho haga hama ngagoria howabi tigua dugu hongo howaore bialu tinaga de iba timbuni iba pugu laradagua bialu holebira.
ISA 15:4 Ani bialu kagola wali agali Hesebono Elealela tanoha bu karu tiguabi yiya lalu dugu timbuni biaruagola Yahasa tano kaundiaha bu karume hale hai holebira. Ami agali hongohe bu karumebi dugu bialu howa Moabanaga hongo ereba hai hayada lolebira.
ISA 15:5 I̱na Moaba wali agalinaga dugu biahalu kogoni irane tigua tini dalu yu wahalu Soara tanohabi Egelada Selisia tano ngagohabi hole ibida piai hayadagonaga dugu bia haro. Tigua dugu bima Luhidi tanoha polene hariga iraga halu pedadagua polebira. Ani bialu maru karu tigua dugu timbuni bima pialu Haronaimi tano ngagoha polene hariga pedadagua ibida pialu holebira.
ISA 15:6 Iba Nimirimi hundialu datani iba angeni henedarubi gaulai holebira. Dindi ogoriani ira dataniru mbira anda nahe wulebira.
ISA 15:7 Moaba wali agali tinaga dabudabu bayale mo mogobu wu henedaru bibahende mo yai halu tinaga tano yu wahalu polebira. Tigua hariga dindi ulini mini Ira Te laga hariga wiyadagua pialu dindi yu wahalu polebira.
ISA 15:8 Wali agali Egelaimi tanohabi Berelimi tanohabi Moaba dindiha tano emene timbunibi ngaru bibahendeha haga biaru Moaba yu wahalu pialu howa dugu bima polebira. Ani bialu tigua dugu timbuni biame holebira.
ISA 15:9 Moaba wali agalinaga daramame Dibono tanoni iba porago mo darama bia holebira. Anigo Anduane Homogo ibugua Moaba wali agaliru pani mialu bo wahaiore holebira. Ani biragola Anduane Homogohanda pudi gabua timbuni laiono bedaru ibilaragola wali agali ibida pialu karuni balu nai helalu wali agali maru yu wahene Moaba dindini karubi balu nai helolebira, lalu langiya.
ISA 16:1 Ina Moaba wali agali maru ibida ibini Idomo dindinaga tano dunini mbira Sela ngagoria kamarume nogo sibi iginiru Yudanaga kini Yarusalemeni kagohondo mimi̱ya. Sibi igini muleberemago ogoni iname kini biagohondo dagisi lone nguleberema lalu walia holebira. Agali sibi igini uruni haru poraru tigua hariga dindi ko iba dalu naibaga ngadagua pialu Hari Saiono kagoria tagira pole polebira.
ISA 16:2 Ani puwa tigua kinihondo lamialu lalu, Kini-o waitigirume tanoha howabi inane daluha howabi bama ibalu bo taliatogo layagola ibida ibuwa Anono iba ange wiagoria kaware íbu howa ha ko kama. Ega igini gali ibu andaha howa dindini ibira henego agoha polebe toba howa irabuha odahe bameore biragagobi kama, lalu ka.
ISA 16:3 Ani lowa Yudali tígua inanaga bi laramago baya hangu mo tale bialu ina biamogo bilimulo hamelo kamagoni. Tí inanaga ha do hagane anda ale kamigola ina tínaga dindiha ibalu ni hongohe daragola wali agalime ira gumba kagoha bira do hagadagua mo ko holene inaha ibiragola ina tí daluha ibalu ha do holoma̱ya hamelo kama. Waitigirume ina bama talima ibaga bialu kagola ina ibida pialu kamaria tigua lone ina mo ko holigo tígua ina yu wa nahalimu.
ISA 16:4 Tí dalu ngemiruha ina íbu hole hamelo kamagoni. Waitigi bu karume ina mo ko nahelo tígua ina haru howa handayaho halimulo, lalu lamini. Hengedape holenebi genda damenebi ereba hai holebira. Waitigi bu karume tini dindi dai biragola mo ko holene mbira dindi ogoriani nawulebira.
ISA 16:5 Anidagua birangi Debidinaga aguanene mbira ibu kini holebira. Ani howa kini ogoni ibugua ibunaga wali agaliru gubalini ho haabo howa mana bayale tigabi ngagoria baya hangu haru holebira. Ibugua wali agalirunaga genda abaleore mo tiga bigi buwa mana bayale bulenego hangu mo hongo haabo halu holebira.
ISA 16:6 Moaba wali agalirume bi layiyago hale howa Yuda wali agali tigua tini degedege la la bialu lalu, Moaba wali agalinaga mine haga mana wiago layadane ina hale harimagoni. Tininaga mini yaraga halu tini duniniore maru karu bolanguahe kamabe toba ho haga ka. Ani howa tigua wali agali maru karu mege bialu kago bi uruni nagalone layidalo manda bidamagoni, lene.
ISA 16:7 Moaba wali agali tigua genda tandagaru yu howa dugu bialu ka. Bamba tigua Kiriherese tano wiagoria howa pu mbira mini gerebi lini do gembe biniru nalu hagago mitangi bialu tiniore dara timbuni halu mbirale uruni mo ko hai hayagonaga dugu bialu ka.
ISA 16:8 Tigua gerebi mabu baya taraore Hesebono Sibimala tanoha winigobi mitangi bialu dara timbuni ho ka. Bamba dindi tara tara wiarunaga haru haga bu hearume waini iba gerebi mabu uruniha taweme wabini wiaru turu howa nalu no lulu yaga hene. Anigo gerebi mabu uruni dugua halu mo labu hai haya. Tinaga gerebi mabu dewaore uruni Hesebono tano howa wima pialu Sibima tanohabi wima pialu amura Yasere tano uyurahayagi winigoria howa wima puabo halu dindi abene ni tagira ibiragohayagi dindi ko iba dalu naibaga wiagoria wima tagira pene. Ogoniha howa pialu ni paliragohayagi iba kuyama mini Homene Iba laga bereagoria tagira pene.
ISA 16:9 I̱na Yasere tanonagabi Sibima dindinaga gerebi mabu ngagonagabi dugu bia harogoni. Ani bialu i̱naga de iba Hesebono tanola Eleale tanolani ibira haragoni. Irane ti bibahende mo ko hai hene ngagome tinaga wali agali bu karu tigua gerebi mabuha puwa gerebi lini bogabi dedaru dalu mabuha howa ga̱ la amunana nabulubadago ogonaga dugu bero.
ISA 16:10 Mabu uruniha howa wali agali tigua pu mbira mini gerebi lini daga dewaore do wigi bialu howa ti turu timbuni halu daga hene. Ani bialu hagago ainde áyu tigua turu howa gerebi lini dalu howa ga̱ ladagadaga bialu haga hayadaruni ereba haya. Wali agalime turu ho howa iba gana lalu hagadarubi ereba haya. Gerebi lini uruni dowa waini iba wabule geme hengedaga uli timbuni ege to̱le̱ha howa gua bini wiaruha waini iba wabiaga wiarubi nawabi bame ngagoni ndobe. Tinaga ne hariga Anduane Homogohanda ndibulo wa helayagola tigua turu howa bi lalu ga̱ ladagadaga bialu haga biaruni ereba hai helaya.
ISA 16:11 Ani biyago mitangi bialu i̱naga bu miniha Moaba wali agalibi Kiriherese tano wali agalirubi dara timbuni ho kogoni. Mbiralime wali agali mbirago homedagola dara howa ngida balu iba ganaru lalu kaligobi i̱ kogoni.
ISA 16:12 Moaba wali agaliru tigua dama mitangi bialu gime wabini wiaruhondo bi pupu wule hari nene ngaruha pugu biaga ka. Ani bialu tinaga dama uruninaga anda karuha pialu bi pupu wiaga ka. Mbirale urunime bilo ti mo hongo halu biamogo nabiaga wini.
ISA 16:13 Moaba wali agalirunaga bi mo ko hai hayadagoni Anduane Homogo ibunime bule lo winidagua bini.
ISA 16:14 Ani bialu áyu Anduane Homogohanda laabo halu lalu, Horo mbira mbirani tigua bialu hayagonaga Moaba wali agalibi tinaga mbirale ngarubi bibahendeore mo ko hai holene mali tebira nga. Mali tebonegonaga horo mo ko holene i̱nime mandabu henego tagira ibirangi mbirale tihondo bule mitangibu henego bulebero. Áyu Moaba dindiha wali agali dewaliore bu kagonigo mani dindi ogoni mo ko harongi wali agali emene hangu howa ti hongo naheore holebira, lalu lene.
ISA 17:1 Damasagasa tanonaga mbiwia halu Anduane Homogohanda bi ogo Aisaia lamini. Damasagasa tano mo ko holebira.
ISA 17:2 Waitigime Siria wali agalirunaga tano dunini timbuni áyu ngago bo haealabaga biragola bame be abalu dege ibira holebira. Aroe tanoru ngagoria nde wali agali lenego mbiraoreli hangubi mbira naholebira. Anidagua biragola dindi ogoni nogo bulumagaru sibiru hangu haga wulebira. Ani ngagola ti mo gi holene agali mbira nahedagola ti hada payabu holebira.
ISA 17:3 Waitigirume ibalu Isaraele wali agalinaga tano hongohe bu karu bo haealabaga bialu mo ko hai howa wali agali Damasagasa tanoha bu karu haru holebira. Áyu hameigini kira Siria Isaraelela mini lene wali agali dewaore padagonigo mani howa tinaga dindi mo ko harangi ti emene mbira dege paluebira. I̱ Anduane Homogo Hongo Haiheore kogo i̱na bi o ledogoniore, lene.
ISA 17:4 Anduane Homogo ibugua laabo halu lalu, Horo ogoningi Isaraele hameiginiore mini lene kagoni biba hai holebira. Wali agali dewaorebi tinaga dabudabubi bibahende mo ereba hai helarogola tinaga dindiha mbirale mbira nawi dindi labuore wulebira. Manane agali hado timbuni mbira kago warago baragola tingini obi halu emene ho dai biagagobi wulebira.
ISA 17:5 Áyu nde Isaraele wali agali dewaore Lebaimi dindi ulini yu dindi bayaleore ngagoha widi bayale anda howa lini dewaore dagagobi kagoni. Anigo mani waitigi ibalu bo wahai harangi ti emene daga lene hangu agali widi gandulalu pene ngagoha iraneni mbira mbira yu wahaga bini kagome mbiraore daga biagagobi holebira.
ISA 17:6 Ani bialu ira olibe lini dewa dedago agalime kango yuwa lini dogolope helo baragola lini dogolope hai howa mbira mbira hangu magane puniruha do wahaga biraligobi Isaraele wali agali holebira. Anduane Homogo i̱ Isaraele wali agalinaga Ngode Datagaliwabe i̱na bi o ledogoniore, lene.
ISA 17:7 Horo ogoni ibirangi Isaraele wali agali ti mini beregedalu ti wabini Ngode Datagaliwabe mini tigabi kago mitangi bialu ibugua ti biamogo bilo hondo holebira.
ISA 17:8 Ani bialu howa tigua lomabu delaga dabu tinime bu helene ngagoriabi mbirale dama wali beda mitangi bialu gime ira dibu bage bigi buwa bigiya wabu heledaruhondobi bi pupu wialu naholebira. Ogoninaga lomabu delaga dabu ngagoria ira hagua ngabilo inisenesirubi nadelolebira. Tininaga gime wabini ngaruhondo bi pupu wiaga winiru bibahende wahaiore holebira.
ISA 17:9 Horo ogoningi tano hongohe winiru bo gialopaya biragola bame dindi ko mbirali nahe wulebira. Ala Hibiali Amoroaliru dindi ogoniha pigane henedaru tigua Isaraeleali anda ibuwa bo taliatogo laya handala pugu pugu biyagola wali agali mbira nahe hari wiaruha tano dege anda tabuandaru buhe wiagadagua wulebira.
ISA 17:10 Isaraele wali agaliru-o tígua Ngode Datagaliwabe tínaga Pele Ngiaga ibugua tí haru dai bini kago embedaho wahene kamigonida. Ibu ege to̱le̱ timbuni mbira haradagua kago tí mo ko holene anda ibirangi ibuha pu ha do haga kamigoni ndobe. Anigo heneneore tígua ibu embedaore harimi. Ani embeda howa tígua dama mitangi bialu mbirale bi pupu wulenaga gime wabini ngarume tí biamogo biragola bayale holeberemabe toba howa mbirale urunihondo bi pupu wialu harimi. Anigo mbirale urunime tí biamogo bibe naheore ngagola tí mo ko heneore mbirago howa mo bayale holene mbira nawiore holeberemi. Agalime gerebi mabuha gerebi hanga ho howa anda halu gini gene halu lini dewa delo maliaho kagola gerebi bayale hangayago anda nahe irane gabu hai haragola dindi hangu ona wiagagobi holeberemigo manda bilimu.
ISA 17:12 Dindi kulu timbuni laruago hale hadaba. Dindi tara tara ngaruha ami agali íbu mogo biragola dindi kulu laruagoni. Ti ibiragola dindi kulu mbari laruago iba solowara yaribu bialu tanguia amu nana biragola iba angeni hari kagoria baragola kulu nduga lagagobi laruagoni.
ISA 17:13 Waitigi agali timbuniore iba solowara tanguyu ibiraligobi ibiragoyu Ngode Datagaliwabehanda tihondo keba halu taliragola tini dalu ngagoha ibida dai bialu pugu pugu biaga. Puyabu ibalu ira yuni karu gilo yu purogo lagadaguabi puyabume humbirini wai bialu be abalu ira yuni dataniru dindini ngago puloyu piai hagadagua Ngode Datagaliwabehanda waitigi balu purogo lelolebira.
ISA 17:14 Alendo haragola waitigirume tano ngago ho hagira biragola wali agalime gi timbuni ho haga. Anigo horo mendengi gao laragola waitigi biaru nahedane hondolebira. Ogonidagua waitigi bu karume wali agali tinaga dindibi mbirale ngarubi mo ko hole ibiragola Ngode Datagaliwabehanda tinaga hariga damenego hapai haga ka.
ISA 18:1 Wali agali Sudana dindinaga iba angeha palima pedaru darabioreda. Mbirale babaganehe dewaore dindi ogoniha yagalo yu puíbu biaruane hale habehe.
ISA 18:2 Tigua marunaga bi lo yalu bi lahaga hearu iba Naili pedagoria talu dambe aleme wabinigoria yalu daliape holebira. Sudanalirunaga bi lahaga bu kamiruni tí nde bi lowia harago lo yalu gerai laga bu kamiruni tígua bi mbira tíni dalu yalu dai bidaba. Dindi ogoni hongohe iba dewape wali agali ti guruluni howa tinaga tingini peyobi bayaoreru bu kagoni. Hameigini dindi ogoniha padaru ti wai biagane hongohe kago hale howa wali agali maru dindi tara tarani padarume ti hondowa gi hai haga ka.
ISA 18:3 Wali agali dindi bibahendeha palima pedemiru tígua bi ogo hale hadaba. Manane mbira hari neneni helolebirago hondole baya hanguore handaya ho halimu. Ani bialu mbiralime mbelo biguli pu laruagolabi bayuwa hale halimu.
ISA 18:4 Irane Anduane Homogohanda i̱hondo langialu lalu, I̱ni Anduane Homogo kogome i̱na dahuliya andaga howa de handa dali halu ema nabi bi nale hendore hondo holebero. Iba angeni ni tandagabi iba muni daba kagome poboyogo hendore bima irigi hagadagua mabuha iba dimba ibira halu tomo mo anda hole hendore ibira hagagobi bi nale hendore hondo holebero, lene.
ISA 18:5 Anigo wali agali dindi ogoniha karu ti hongo gibiorehe ka. Pu mbira lini daga mini gerebi bayale anda howa lini dolenaga pabua balu lini bayale dalu boga nabidaore agali kebaheme gerebi irane ogoni abale gandulo wahai hagadagua Anduane Homogohanda dindi ogoni mo ko halu haealabaga bu wahai holebira.
ISA 18:6 Anduane Homogohanda dindi ogonila wai bilonaga waitigi bu karu ibilaga biragola waitigime ibalu ami agali bu karuni bo wahai haragola bo paya binigo tingini dindini wima polebira. Ani wima pedagola agali tingini uruni ega bedarumebi nogo gabua tara tara bu karumebi ibalu no waholebira. Ni dalu gaea birangi ega bedarume nolebira. Dagare birangi nogo gabua karume nalu holebira.
ISA 18:7 Anidagua birangi Anduane Homogo Hongo Haiheore kago ibugua mbirale mbirale mule yu ibiraru mo yaga bulebira. Mbirale uruni wali agali hongohe dindi iba dewape ngagoria karu tigua yalu ibulebira. Wali agali uruni ti guruluni tinaga tingini peyobi bayaoreru bu karume ibuhondo ani mule yalu ibulebira. Hameigini dindi ogoniha padaru ti wai biagane hongohe kago hale howa wali agali maru dindi tara tarani padarume tihondo gi hai haga ka. Anigo wali agali dindi uruniha bu karume Hari Saiono Anduane Homogo Hongo Haiheore kago ibu mitangi bialu ibu mini yaraga howa lotu lole íbu ngoai holene ngagoria ibuwa tigua ibuhondo mbirale yalu ibiyaru mulebira.
ISA 19:1 Iyibi dindinaga lalu mbiwia henego bi ogo. Anduane Homogo ibuni hari beralibani biralu gerai lalu Iyibi dindini ibulebira. Ani ibiragola Iyibi dindiha mbirale dama mitangi bialu bi pupu wule gime wabini ngarume ibu hondowa duru timbuni lalu Iyibi wali agali karumebi gi howa tinaga hongo pirilape halu ereba hai holebira.
ISA 19:2 Anduane Homogohanda lalu, I̱na Iyibiali tini dege dege wai bilo tinaga bu miniha mo bua helalu wai bilo mo bia holebero. Tini hamene bababi tinaga nenege bababi bagabaga bialu holebira. Wali agali tano mbirani karume tano mendeni karu baba wai bialu agali haguane mbira kagome haguane mendela haru holenaga hongo yu holene wai bialu holebira.
ISA 19:3 I̱na Iyibialirunaga mini mo luluya helalu tinaga hongo holene mo ereba harogola tigua mbirale mbira buleore lalu mitangi bu hayaru nabulebira. Ani berogola tigua dama mitangi bialu bi pupu wule gime wabini ngaruhondo biamogo bia lalu holebira. Ani bialu tigua wali agali homene dinini baba bi laga karu karia puwa tihondo mani agi bulubadabe lama mo bila hole polebira.
ISA 19:4 Ani bialu kagola i̱na Iyibi wali agali ti kini ko mbira holebirago ogoni andaneha helo helolebero. Ani helarogola kini ogoni ibu hongohe tandagabiore howa wali agali haru holebira. I̱ Anduane Homogo Hongo Haiheore kogome i̱na bi o ledogoniore, lalu lene.
ISA 19:5 Iba Naili porago hundiai haragola dindi pani halu yo bialu lebola hai holebira.
ISA 19:6 Iba emene hundigi biragola ngu timbuni bulebira. Ngu anidagua biragome iba angeni dambe hawalia bu karuni bibahende gaulai holebira.
ISA 19:7 Ani bialu iba angeni mabu ngaruha tomo hengedaru gaulalu gabu hai haragola puyabume tomo lini dedaru pulo yu piai holebira.
ISA 19:8 Agali maru tinaga yolo mulenaga biabe iba Naili ogoniha wena balu numebi minaga karume ti wena minulene naberedagola tinaga bu miniha genda timbuni yu howa dugu bialu holebira.
ISA 19:9 Wali agali ti mabuha pu hongohe mbira mini palagasi ogonime aga labolabo bayale wabulenaga hangayaru lone anda naholobadagola tinaga bu miniha genda timbuni ho holebira.
ISA 19:10 Iyibi dindiha aga lebiaga bu karubi biabe biahaga wali agali karu tibi nde tinaga miniha genda timbuni dege ho holebira.
ISA 19:11 Soana tanoha agali haguane bu karuni ti luluore bu ka. Agali mini bogaru talebu miaga karu tigua Iyibinaga kinihondo mini bogabi howa ndo bi ko liahe ngago lamulebira. Iyibi wali agalirunaga kini-o agali manda timbunibi uruni tigua í̠hondo langialu lalu, Ina agali mini bogabi timbuni agali ala halu homenerunaga aguanene kamagoni, lolebira. Maru ti nde lalu, Ina agali kini manda timbunibi halu homenego aria kama, laga biaga ka.
ISA 19:12 Anigo agali mini gigabiwi kini mini talebu miaga biaru ti agoha kabe. Tigua tinaga mini bayale wiyaruni agiha mo do hayagola Anduane Homogo Hongo Haiheore kago ibugua Iyibi wali agalihondo bule ngago nalangiyadabe.
ISA 19:13 Soana Membisila tanoha agali haguane karu ti bibahende luluore hai ka. Agali haguane uruni tigua Iyibi dindini wali agali karu bayuwa haru holene winigoyu ani haru nahe hariga koha haru piaga ka.
ISA 19:14 Anduane Homogohanda Iyibiali agali haguane karunaga mini mo burugula henego bu ka. Anidagua bini ngagome Iyibi wali agali tigua bialu karu damenego bibahende bia ko hai halu agalime lulu iba nowa luluyu ibagabu howa ibuninaga magu tagu wiyagoria pilo wiagagobi ka.
ISA 19:15 Agali homogobi yagibanobi mini lene timbunimebi mini nalene bu karumebi Iyibi dindi bayale ngelonaga ti mbiralime biamogo nabibeheore ka.
ISA 19:16 Horo uruningi Iyibi dindiha genda tara tara tagira ibiragola Anduane Homogo Hongo Haiheore kago ibugua ibunaga gi megela howa ti minu bole mandabu kago hondowa tigua mogo timbuni lalu walime gi howa duru lalu biragagobi birulebira.
ISA 19:17 Ani biragola marume Yuda dindi mini lalu laragola Iyibi wali agali tigua hale howa Anduane Homogo Hongo Haiheore kagome tihondo bule ngago mitangi buwa ti gi timbuniore ho holebira.
ISA 19:18 Ani birangi Iyibi dindiha tano duria ngaruni aria bu karume Hiburu bi hangu lalu holebira. Ani lalu howa wali agali urunime Anduane Homogo Hongo Haiheore kagonaga andaneha holeberema lalu bi hongo howa lo wialu holebira. Tigua tano uruni aria mbirago mini Honaninaga Tano lalu mini wulebira.
ISA 19:19 Horo uruningi Iyibi dindiha Anduane Homogonaga lomabu delaga dabu mbira bu helolebira. Ani bialu Iyibi dindi tubarini ege to̱le̱ mbira Anduane Homogo mitangi bialu loma biaho helolebira.
ISA 19:20 Anduane Homogonaga lomabu delaga dabubi ege to̱le̱ ogonibi kirabali Iyibi dindini kago hondowa wali agalime Anduane Homogo Hongo Haiheore kago ibu ti heba Iyibi dindiha kalo mitangi bu helonaga ani helolebira. Ani helo kagola waitigime ti balu hengedape hole ibiragola tigua Anduane Homogohondo biamogo bia lalu bi laragola ibugua hale howa agali mbira ti biamogo bialu haru dai bilonaga ibilolebira.
ISA 19:21 Ani biragola Iyibi wali agali tigua Anduane Homogo ibuore henego kalo manda biaiho helo tihondo ibuni mo walia holebira. Anidagua birangi Iyibi wali agali tigua Anduane Homogo ibuniore kalo manda biai howa ibu mitangi bialu lotu lalu ibuhondo mbiraleru lomabu mulebira. Ani buwa tigua mbira ogo buleore lowa bi hongoheore lo wialu bule lo wiradagua bulebira.
ISA 19:22 Anduane Homogohanda Iyibi wali agali pani mulebero lenego mulebira. Ani biragola tigua mini beregedalu ibu karia dai buwa ko biniru ibuhondo lapani haragola ibugua tinaga bi hale howa ti bayale helo biamogo bialu holebira.
ISA 19:23 Horo uruningi hariga timbuni mbira Iyibi dindi Asiria dindila tubariha puíbu bulene wulebira. Ani ngagoria Asiria wali agaliru Iyibi dindi pialu Iyibi wali agaliru Asiria dindiha polebira. Ani bialu howa wali agali dindi kira ogoniha karume Anduane Homogo ibuni hangu mitangi bialu lotu mandagi lalu holebira.
ISA 19:24 Ani birangi Isaraele ti Asiria Iyibila wali agaliru baba ti tebira uruni ti ho mbiraore ho holebira. Ani howa tigua Anduane Homogohanda tini biamogo bialu mo bayale hayadagua tigua wali agali dindi tara tarani bu karu bayale helo biamogo bialu mo bayale holene ti holebira.
ISA 19:25 Anigo Anduane Homogo Hongo Haiheore kago ibugua ti mo bayale halu howa lalu, I̱na Iyibi wali agali tí i̱ninaga wali agali kamiru i̱na tí biamogo bulebero. Asiria wali agali bu kamiru tíbi i̱nime wabini kamiru i̱na tí biamogo bulebero. Isaraele wali agali tí nde i̱ninagaore halimulo dabo helarugo tíbi biamogo bialu holebero, lalu Anduane Homogohanda laya, lalu Aisaiahanda lene.
ISA 20:1 Asirianaga Kini Sagonohanda bia layadagua ibunaga ami haru haga agali haguane heagome Asiria ami hearu haru halu Pilidia dindiha Asadodo tano wiagoria wai bule pene.
ISA 20:2 Ala Asirialime wai ogoni bule ibulebira lalu manane Emoso igini Aisaiahondo mo walia henego mali tebira peagola ogoningi lola hene. Aisaia ibugua aga mbege nu ale daligani karulo heago golo wahalu ibunaga ge subi golo wahalu mbira nakarule ibagabu hene. Aisaia ibugua Anduane Homogohanda ibuhondo bi layago hale howa bibe lalu lamiyadagua ani bialu hene.
ISA 20:3 Asiriali tigua Asadodo tano karulo heagola Anduane Homogohanda lalu, Mali tebirani i̱naga biabe biahaga agali Aisaia ibu agabi ge subi mbira karu nale bame ibagabu hayagoni. Ani biyadagoni Iyibi wali agali bu karu tiha tagira ibulebirago mananebi Sudana dindiha bu karu tiha tagira ibulebirago mananebi walia hayagoni.
ISA 20:4 Asirianaga kini kagome pialu Iyibi Sudanala baba wai buwa wandari igiri daliahe bu karubi wali agali wahe bu karubi bibahende garabaya bu yalu dindi tara tara ngaruha haru piai holebira. Wali agali uruni ti garabaya haru pialu howa ge subi agabi mbira karu naleore polebira. Ti tibabeore howa poragome Iyibi dindini taga timbuni holene mo yu anda ibulebira.
ISA 20:5 Wali agali maru Sudanalime ti biamogo bilo lowa hana ho hagarubi Iyibi dindi mini lene timbuniore mbira ngagoni lo mandabu hagarubi tigua dindi timbuni ogonilabo mo ko harago de hondowa mogo timbuni lalu miniha genda holebira.
ISA 20:6 Horo ogoningi wali agali Pilidia dindiha iba solowara ange ange paluyu pedaru tigua tini laedene bialu lalu, Ayali-o Asirialime ina baba wai bule ibirangi agali hongohe dindi kira ogoniha karume ina pele ngule ibidaba lole mandabu harimago. Ai de handa mbirali ina biamogo bulene mbira naheda. Dindi hongohe kira biagolabo bo podo wahayadagoni ndobe. Anigo ina Asirialirunaga ayu tibu ne gadele ngagoria howa yo pialu polene nakarulape kamagoni ndobe, lolebira laya, lalu Aisaiahanda lene.
ISA 21:1 Anduane Homogohanda Babilono tano mo ko holebira lalu Aisaiahondo de gandebaha howa mo walia hene. Dindi ko yobi wali agali bibahende bu karu ti polene gi hai haga ngagoria howa genda holenebi mo ko holene timbunibi tagira ibulebira. Tagira ibalu dindi ko ogoni howa puyabu humbirini wai hongohe ibagagobi abaleore ibulebira.
ISA 21:2 Mbirale ko tara uruni Anduane Homogohanda i̱hondo de gandebaha mo walia haya. I̱ hale ho hewaria Anduane Homogohanda lalu, Babilonoali karunime mendeali kagohondo ke̱ halu mo hondo howa mo ko haga ka. Tigua mana ogonibi biagago bia timbuore halu ka. Anidagua bialu kago ai Elamali ami karu aibe. Tígua Babilono karu baba wai bule ibidaba. Midiali ami karu aibe. Babilono tano ho hagira bialu bole ibidaba. Babilono tigua wali agali dindi tara tarani paluyu pearuhondo genda mo miyaruni bibahende mo wahai holebero, laya.
ISA 21:3 De gandeba ogonime i̱ mo gi bia hayagola i̱ mogo lowa duru lalu tandaga timbuniore walime gali taba hanarangi tandaga hagagobi ho haru. De gandebaha howa bi layago i̱na hale harugome i̱naga bu miniha mo ko halu deme handarugomebi i̱ mini mo burugula hayagola gi timbuniore haru.
ISA 21:4 I̱naga embone mo wangarere bialu gi timbuni harugome i̱naga tingini mo durula haya. Ani biyagola abale alendo halu aruma helo hame laru. Ani hamelarugoyu de gandeba ogonime mbiraga ogoningi i̱ mo gi timbuniore henego ko.
ISA 21:5 De gandeba dege handalu hewaria agalime tomo nalu biraga dagia wiagoria labolabo dungua howa tomo dawa manda manda biyago handaru. Ani bialu ti biruwa tomobi ibabi nalu bereagola abaleore bi mbira dalimuore layuago hale halu hewaria ogodagua laya. Agali haguaneru-o waitigi anda ibiyadago wai humbi wirimigo abale mo manda manda bidaba, laya.
ISA 21:6 Ani layagola Anduane Homogohanda i̱hondo langialu lalu, Agali mbirame mamage helo í̠na agali mbira dabo helabe. Ibugua mamage howa mbirale birago damene handarago í̠hondo langule dai bilo.
ISA 21:7 Ibugua agali nogo hosini biralu duguni kira kira ibugu bialu ibirago hondowabi nogo dongini biralu ibirago hondowabi nogo kameleni biralu ibirago hondowabi tigua birago bibahende ibugua bayuwa deme hondolene nga, lalu langiya.
ISA 21:8 Ani howa agali mamage haga ogoni ibugua ga̱ hongo howa lalu laiono gabuame bi timbuni lagadagua lowa lalu, Anduane Homogo-o i̱na mbiraga horombebi mamage holene wiagoria howa mamage haabo haru, laya.
ISA 21:9 Ani lalu heaore agali nogo hosini biralu duguni kira kira abaleore ibiyago de handaru. Agali mamage haga biagome lalu, Babilono bo gialobaga bialu ibiraho wahaya. Dindi timbuni ogoni mo ko heneore ngagoni ndobe. Tinaga dama mitangi bialu mbirale gime wabini bi pupu wiaga biaru dindini ibira halu gingirulopaya bini nga, laya.
ISA 21:10 I̱naga Isaraele wali agaliru-o waitigime tí mo ko howaore agalime widi iraneru lini hondo ibira ibira bilo bo taulagadagua ina bayadago ai Anduane Homogo Hongo Haiheore ina Isaraele wali agali bu kamagonaga Ngode Datagaliwabe kago ibugua bi bayale layadago i̱na tíhondo langerogoni.
ISA 21:11 Anduane Homogohanda Idomo dindiha bulebiragonaga bi latagi henego ogo. Wali agali Idomo dindiha karume mamage haga kagohondo hale halu lalu, Mamageali-o aruma ho wiaabo kagoni agongi ereba holebirabe. Angiore ereba holebirabe, laragoni.
ISA 21:12 Ani larago hale howa i̱na ladai bialu lalu, Wá ha holebiragoyu aruma ha dege bulebira. Tígua lone hale holene hame ledemiyagua nde lone haleho dai bilimu, lalu laru.
ISA 21:13 Anduane Homogohanda Arebia dindiha ko holene ngagonaga bi de gandebaha howa Aisaiahondo laminigo ogo. Dedana wali agaliru-o tígua mbirale yolo bialu muni mima ibaga biaga kamiru tí ibida puwa Arebia dindiha dindi ko wali agali nahaga ngagoha ha do holeberemi.
ISA 21:14 Tí ani ha do kamiria iba noa timbuni bulebira. Ani biragola Tema wali agali kamiru tígua iba hinabi nelo hanalu puwa muleberemi.
ISA 21:15 Wali agali uruni ti ibida poragoni irane waitigime danda timu ayu tiburu yuwa ti baba wai hongo howa bule kagonaga ibida poragoni.
ISA 21:16 Ani biyagola Anduane Homogohanda i̱hondo langialu lalu, Keda tanoha wali agali hameigini padarunaga hongobi tinaga mbirale ngarubi mo ko halu bo haealo wahai holenaga mali mbira hangu nga. I̱na mali ogoninaga horo mbira mbira baya hangu dagalalu ko. Horo ogoni manda bu winigo tagira ibirangi i̱na tihondo bule manda bu kogoni bulebero.
ISA 21:17 Kedali bu karu ti ami agali hongoheore howa tigua danda timume wai hongohe biaga ka. Anigo ti bo wahai haragola ami agali hongohe biaru ti emene mbira hangu holebira. I̱ Anduane Homogo Isaraele wali agalirunaga Ngode Datagaliwabe kogome bi o ledogoniore, laya lene.
ISA 22:1 Anduane Homogohanda dindi ulini yu dindi mini De Gandeba Dindi laga winigoria Aisaiaha howa bi lenego ogo. Yarusaleme wali agali bu kamiru tígua irane aginaga turuho howa bi dewa ladagadaga bialu kamibe. Tígua anda dangini irigi ho howa hoaro laramigo tano bibahendeha hale haame harago agibe. Tínaga ami agali homayaruni ami agalime hongo howa wai bialu kaore homagadagua ndo homaya.
ISA 22:3 Ani biyagola tínaga ami agali haguane bu hearu kaundiaha ibida piai hene. Agali haguane ibida piyadaruni ti danda timu mbira nayi pialu hearia waitigi bu hearume talima pialu minu yania hai hene.
ISA 22:4 Anidagua binigonaga i̱ dara ho kogo hondowa tígua i̱naga miniha mo palia hole manda bu nahalimu. I̱ni hanguore holiya helalimu. Irane i̱naga miniha genda yu howa dugu bialu kogoni ndobe. I̱naga wali agali burupale darabi bu karubi homolobadane dara howa dugu bialu kogoni.
ISA 22:5 Anduane Homogo Hongo Haiheore Howa Bibahende Haru Haame Ho Haga kago ibugua dindi ulini yu dindi mini De Gandeba Dindi laga ngagoria horo mbiru manda bu winigo tagira ibirangi genda yu holeberemi. Tínaga waitigi dewaore ibalu tigua hongo howa ga̱ ladagadaga bialu gerailo yu puíbu bialu kagola tígua mogo lalu gi timbuni halu durulowa luluyu ibagabu holeberemi. Waitigi uruni tigua wai pabe bidaru bo gialopaya biragola tígua gi timbuni halu ga̱ laramigola dindi kaundia hari nene ngaruha karume hale habehe loleberemi.
ISA 22:6 Ami agali Elama dindiha bu karume danda timuru yalu nogo hosini biralu wai biaga garo ale karisiru heba ibiragoni. Ani bialu Kiri tanoha howa ami agali bu karu tigua wai humbi yalu ibiragoni.
ISA 22:7 Tínaga dindi ulini bayaleore ngamigoha wai biaga karisi hongohe dewa wu to̱lowa ami agali maru nogo hosini biralu tanonaga pabe haraba ngagoria manda manda buwa wai bule íbu kagoni.
ISA 22:8 Anduane Homogo ibugua Yuda dindinaga de handayaho naheore ngagome waitigi tigua anidagua biragoni. Tínaga waitigime wai anda ibiyangi tígua lo manda bialu wai biagane ale dewaru tínaga anda mini Lebanono Irabunaga Anda laga hemigoha wirimigome tini mo wialu bayale holeberemabe tobaho harimigoni.
ISA 22:9 Ani howa Yarusaleme tanoha wai pabe heago maruha gialo payabu wiago de hondowa dege ho harimigoni. Ani bu wiagola tígua Yarusaleme Debidinaga tanoha anda heago damene bibahende daga lai harimi. Ani daga lowa tígua anda maru hearu gialai howa tanonaga pabe uruni biatiga birimi. Ani bialu iba tagiraha bereago tanoha dadabu yu anda ibirimigoni.
ISA 22:11 Ani buwa iba hariga timbuni mbira tanonaga pabelabo gimbuni heagoha bo wialu iba biraga uli ala wini wiagoha howa iba tamuha berelonaga dadabu yu anda ibirimigoni. Tígua urunidagua birimigoyu Ngode Datagaliwabe kago ibuni mitangi nabiore harimigoni ndobe. Ibuguaore mbirale tíha ani bilo lalu bamba howa manda manda bu winigo ai uruni tíha tagira ibiyagoni ndobe.
ISA 22:12 Horo ogoni tagira ibiyangi Anduane Homogo Hongo Haiheore howa Bibahende Haru Haame Ho Haga kago ibugua tíni dara haga bu dugu timbuni bialu tínaga mandari dogo wahai halu daraho howa karulaga aga wiago mo karulo halimulo hamelo hayagoni.
ISA 22:13 Ani hayagoyu tígua ani nabi waho howa mbirale uruni biyangi turu howa oba halu harimi. Tígua nogo bulumaga sibiru bo dawalu dawe timbuni halu waini ibaru nalu harimi. Anidagua bialu howa lalu, Ainde yawi homami̱yadago áyu tomo ibaru nalu turu hami̱ya ibidaba, larimi.
ISA 22:14 Anduane Homogo Hongo Haiheore howa Bibahende Haru Haame Ho Haga kago ibunimeore i̱hondo ogodagua layuane hale haru. Ibugua lalu, Tínaga ko urunidagua birimigo i̱na embeda nahe mandabu haabo halu tíni homarami. I̱ Anduane Homogo Hongo Haiheore howa Bibahende Haru Haame Ho Haga kogome bi o ledogoniore, lalu langiya.
ISA 22:15 Anduane Homogo Hongo Haiheore howa Bibahende Haru Haame Ho Haga kago ibugua i̱hondo lalu, Í̠na kini andagaha bibahende ngaru handayaho hai haga kago agali mbira mini Sebena kago hondo puwa ibuhondo bi ogodagua labe, lene.
ISA 22:16 Í̠ dindi ogoriani agi bialu kebe. Í̠naga dindi mbira nawi í̠ nabaile kegoni. Í̠ ariago mbira nahedago í̠ aigo damene howa í̠na agali maruhondo ege to̱le̱ hari bo tombe ladaba lowa í̠ninaga homali bayale bu manda manda bialu kebe.
ISA 22:17 Í̠na mandabu handalu keria í̠ agali hongohe kobe tobaho kebe. Ani ndoyago. Anduane Homogohanda í̠ mo emeneore halu minu mbera buwa mbalo ale helowa dindi kaundiaore mbira ngagoha bape holebira. Ani biragola í̠naga karisi bayale í̠ni gubalini hariliruni wahalu dindi kaundiaha pu homolebere. Í̠ kininaga biabe biahaga ho kegoni howa í̠na kini damene bu karuha taga holene mo yu anda ibaga kegoni ndobe.
ISA 22:19 Anduane Homogohanda í̠naga biabe bialu kegoni dugu waharagola í̠ ko yagibano howa mini lene dege mbirago kegoni lone naholebere, labe laya.
ISA 22:20 Sebena-o Anduane Homogohanda í̠hondo ogodagua laya. I̱na mbirale uruni berongi i̱naga biabe biahaga agali Hiligaia igini Eliagimi olalu íbu lolebero.
ISA 22:21 Ibiragola aga lunibi mandibubi agali haguaneme karulagane ale í̠ karulo haga biago ibu mo karula holebero. Ani bialu í̠na biabe bialu kegoni ibugua bia aribia helolebero. Ani helarogola ibugua Yarusaleme wali agalibi Yuda dindi bibahendeha haru halu baya hangu handayaho howa ibuni ti aba haradagua holebira.
ISA 22:22 Ani bialu Kini Debidi aguanene holebirarunaga panga gi i̱na ibunaga giha mo ya holebero. Ani berogola ibugua panga dugua harago mendealime payabe nahe halu panga payarago mendealimebi duguabe nahe wulebira.
ISA 22:23 Pu nguni hongo howa dariba hene ngaligobi i̱na agali ogoni ibunaga biabe buleneore ngago bialu helo mo hongo howa helolebero. Ibugua biabe ogoni bialu holebiragome ibu damene bibahende mini lene dege hai holebira.
ISA 22:24 Ani kagola ibu damene maru karu ti ibuni hana ho hene howa ibugua ti biamogo bia helonaga ibuhondo hale halu holebira. Nu todobene beru mbira ira gemboge hongoheni gerela hagadagua ti ibuni hana ho hene mbira holebira.
ISA 22:25 I̱ Anduane Homogo Hongo Haiheore kogome bi ogodagua larogoni. Mbirale uruni birangi gerela hagane gemboge ale hongohe hayago genda halu podo ibira holebira. Ibira haragola wali agali ogoriani hanaho howa genda mo mialu haga hayaruni bibahende ibira hai halu mo ko holebira. I̱ Anduane Homogo i̱na bi o ledogoniore, laya lalu Aisaiahanda lene.
ISA 23:1 Anduane Homogohanda Taia tanoha mani bulebirarunaga bi ogo lamini. Iba sibi timbuni iba solowaraha ibaga biaga agali kamiru-o Taia dindi tí dalu wirimigonaga andarubi iba sibi anda íbu wiaga iba bereagobi mo ko hayago ai dara halu dugu bidaba. Tígua iba solowara dege dombeneha dindi mini Saibarasa ngago wahalu dai beremingi ogoni biyadane handalu manda buleberemi.
ISA 23:2 Wali agali iba solowara bedago angeange paluyu pedemirubi Saidono tanoali biyinaya biabe biaga bu kamirubi tí hendore holene nga. Iba sibime Saidono tano tínaga dabudabu dewaore mo yalu ibugu biyagoni.
ISA 23:3 Ani biyagola tí mbirale ngaru yolo bia muni tagua biaga dindi mini lene mbira wirimigoni. Iba sibiru iba Naili pedadagua pialu Iyibi dindiha howa widi dewaru mo yalu ibugu biyagola tígua uruni muni tagu wigi bialu tí homogoore harimigoni.
ISA 23:4 Saidono tano-o í̠ tagaho holene nga. Tano hongoheore iba solowara angeni mbira wirigo bo haealabaga biyago í̠ore taga habe. Iba solowara bedarume bi ogo í̠hondo lalu bedagoni. I̱ daraore kogoni. I̱ waneigini nahe bedo. Ainde i̱ wali waneigini mbira taba hanalu howa tandaga nahene ale biralu waneigini bayaleru mbira taba hana nabini biragadagua bedogonida, laragoni.
ISA 23:5 Mbirale uruni Taia tanoha biya larago hale howa Iyibi dindini karume ti gi timbuni halu tinaga hongo pirilape halu ereba hai hene holebira.
ISA 23:6 Wali agali solowara angeange paluyu pedemiru tígua dara timbuni howa dugu bima ibida togolo yalu Tasisi dindi ngagohayagi piai hadaba.
ISA 23:7 Taia tano bambaore hongohe winigo wali agali bibahendeme turu haga biagoha biyadago agi biyabe. Bamba tano ogoniha howa wali agali maru dindi tara taraha puwa tano gahenge maru lone mo wule biabe bima pelo purogo lelene. Anigo irane agome tano hongohe ogoni bo gialabagabu wahene ngabe.
ISA 23:8 Taia tano timbuniore ogoni tano maru ngarunaga kini wuwa ibugua maru ngaru handayaho haga wini. Ani wuwa agali biyinaya biaga hearu timbuniore heago hondowa wali agali dindi tara tarani bu karume tinaga mini yaraga halu haga biago mo ko hene ngago aiwa bi layagola mo ko henego ngabe.
ISA 23:9 Anduane Homogo Hongo Haiheore kago ibugua uruni mo ko hai hole ala howa manda mandabu wini ndobe. Anduane Homogohanda anidagua biyadagoni irane wali agalime tini hongohe kama lowa mine halu hearia tinaga hongo bope halu tinaga agali mini lene hearubi mo dindiha holenaga ani bini.
ISA 23:10 Wali agali Tasisi tano pu kamiru tí iba Naili timbuni poragome ibuni poa biragoha pupe hagadagua tígua dindi ngagoni alialu tomo hangalimu. Tínaga hame ledemigo hapai haga Taia tanoha haga biaruni nahego ani bilimu laro.
ISA 23:11 Iba solowara timbuni bedago angeni wali agali dindi wia para para bu palima pedaruni bo wahai holenaga Anduane Homogo ibunaga gi dogolalu megelaho ka. Ani kagola wali agali dindi uruniha bu karume gi timbuni howa duru lalu ka. Wali agali iba solowara bedago angeange tano wima pedaruha palima pedaru ti biyinaya biabe bialu karia mo ko holebero lalu bi lowini.
ISA 23:12 Ibugua lalu, Tano bayale Saidono-o i̱na í̠ mo ko harogola ala í̠ turuho harigoni ereba halu í̠naga wali agali karu hengedape ho wulebere. Anigo Saidono wali agali togolalu Saibarasa dindi iba dege dombene ngagoha ibida pu harimiyagua nde dindi ogoniha bayale naholeberemi dege, laya lene.
ISA 23:13 Kaladea wali agalinaga dindi ngaru de handadaba. Asirialime ibalu tinaga dindi mo ko halu bo gialabagabu wahenego áyu wali agali mbira nahe embera nogo ega gabuaru ti hangu haga ngagoni ndobe. Asirialime ibuwa wai pabe heagoria anda daliga bima iraga halu ogoriani howa wai bini. Wai bialu Taia dindinaga wai pabe hongohe heago bo gialabaga bialu mo ko hai hene.
ISA 23:14 Tí agali iba sibi yalu solowara timbuni bedagoha ibaga bialu piaga kamiru tínaga tano hongohe biago bo gialabaga bialu mo ko hai hene ngagonaga dara halu dugu bia hadaba.
ISA 23:15 Mbirale uruni tagira ibiragola mali pira kariani (70) wali agalime Taia tano embedaho holebira. Kini mbiraoreme mali pira karia (70) urunidagua hondo haga hene. Mali pira karia uruni piai haragola agalime bayanda walinaga iba gana laga winigodagua Taia tanonaga lolebira. Iba gana agua laga wini,
ISA 23:16 Bayanda wali-o í̠ embedaho wahayagoni ndobe. Ga̱wa̱ ale wiridago mo yalu tano ngaruha ibaga bialu polene nga. Agali bu karume í̠ lone mitangibu dai bilo ga̱wa̱ ale lalu iba gana lama polene nga.
ISA 23:17 Mali pira karia (70) ogoni piai kagola Anduane Homogohanda Taia tano lone mo bayale halu wali agalime mbirale yolo bia muni tagua biaga wulebira. Bayanda walime agali ibu bedaria ibilonaga ndole bialu biragadagua Taia tanome wali agali dindi bibahendeha howa ibuha ibalu mbirale yolo bia muni tagua bule ibilo ndole bialu holebira.
ISA 23:18 Anigo muni Taia wali agali tigua muni ilu wirago dewa wua to̱ nalolebira. Mbirale uruni bibahende Anduane Homogo ibuninaga lomabu wiai holebira. Anduane Homogonaga wali agali bu karu tigua mbirale Taia wali agalime wini uruni mo yu howa ti dabudabubi tomo nolenebi aga karulolenebi burupale ngadagua karulapeore mo wigi bialu holebira.
ISA 24:1 Anduane Homogohanda dindi bibahende ngaru mo ko hai haragola dindini mbirale mbira nawi dindi hangu bame wulebira. Ibugua dindi uruni hengedo tagadabagabu waharagola mbirale winirubi mo ereba halu wali agali henerubi bo purogola halu mbirale mbira nahe dindi koore wulebira.
ISA 24:2 Anidagua biragola wali agali bibahendeore yo pialu polene mbira nahe genda ogonime lola hai holene wulebira. Loma binigo mo miaga bu karubi wali agali damene bu karubi wali agali garabaya biabe ale biahaga karubi tinaga agali haguane karubi biyinaya biaga karubi wali agali tinaga mbirale ngaru yolo biaga karubi maru tinaga mbirale ngaru marume dano helo miagaru karubi dano haga karubi homogo karubi yagibano karubi heba bibahendeore genda ogoni lola hai holebira.
ISA 24:3 Dindi bibahendeore mo ko hai haragola bameore wiai holebira. Anduane Homogo ibugua aniore bule lalu lowinigo bulebiraore.
ISA 24:4 Dindi yo bialu ibane piai halu hari daligabi ko haragola ogoninaga dara howa dugu bialu wulebira. Ani biragola wali agali mini lene bu karu tinaga hongo ereba hai holebira.
ISA 24:5 Wali agali ti ko tara tara biragome dindi mo ko haragoni. Tigua Ngode Datagaliwabenaga bi mana lowini ngago pugualu ibunaga bi mo wahalu habo nalolene bi wiaabobo bu wilo lowinigo mo habo lai haragoni.
ISA 24:6 Anidagua biragome Ngode Datagaliwabehanda bi laragola mo ko holene dindini tagira ibalu wali agali dewaore bo wahai halu emene dagalene dege holebira. Wali agali tinime mana ko bialu kagonaga pani nalu genda ogoni yu helonaga ani ibilolebira.
ISA 24:7 Pu mbira lini daga mini gerebi gabu haragola gerebi lini wene boga nabi dedaru gau lolebira. Ani birangi waini iba naberedagola wali agali waini iba nole turuho hagaru ti turu nahe miniha genda yu hai holebira.
ISA 24:8 Tigua turuho howa bi ladagadaga bialu howa iba ganaru lalu mo ngi̱li̱nge̱le̱ lahagaru mo wahai holebira. Ga̱wa̱ ale bi tara tararu lelo mo bila hagaru wahai holebira.
ISA 24:9 Tigua waini iba nalu biruwa turu halu iba gana laga winiru wahai holebira. Genda uruni ibiragola lulu iba hongohe ngaru dende biaga wiyago ndo dende nabi kau biragome ti noa nabulebira.
ISA 24:10 Mbirale bibahende tano timbuniha ngaru mo ko hai holebira. Wali agali karume gi timbuni howa tini andagaha anda pu biruwa panga payatagi halu tamuha birulebira.
ISA 24:11 Wali agalime waini iba nolene mbira nawioredagola howa tanoha hariga pugu bidagoria pialu howa waini iba mbira ngi lama polebira. Ti turu howa hadapayabu holene henge winigo ereba halu genda yu howa daraho holene dindi bibahendeni tagira ibiragola lola hai holebira.
ISA 24:12 Tano timbuni ngaru bo gialabaga biai halu wai pabenaga panga timbuni karu gialabaga bialu gingirulopaya bini hangu wulebira.
ISA 24:13 Mo ko holene horo ogoni wali agali dindi bibahendeni bu karuha tagira ibai haragola wali agali dewaore bo wahai halu emene dagalene hangu ira olibe lini dogolope halu gerebi linibi dai hene kagola mbira mbira hangu yu wahene dedaligobi wali agali ani holebira.
ISA 24:14 Ani birangi wali agali emene dagalene holebiraru tigua turu howa iba gana lalu holebira. Wali agali dindi ni paliragohayagi karume Anduane Homogo mini timbuni lene kagonaga mini yaraga halu turu timbuni ho holebira.
ISA 24:15 Wali agali dindi ni tagira ibiragohayagi karu tiguabi iba solowara bedago ange angeha paluyu pedaru tiguabi Anduane Homogo Isaraele wali agalinaga Ngode Datagaliwabenaga mini yaraga halu ibu mini leneore ka lai holebira.
ISA 24:16 Wali agali dindi leneha palima pedarume turuho howa iba gana laga ngaru lalu holebirago hale holeberemi. Tigua iba gana lalu howa, Anduane Homogo mini bayale tigabi kagonaga mini yaraga holene nga, laga bialu holebira. Ai darabago i̱na ogodagua laro. I̱naga miniha genda timbuniore yu howa turu nahe i̱ni homo ereba habehe ko. Irane wali agali maru karu mo ko holenebi ke̱ holenebi ho to̱ledagome mendeali kago mo ko howa ke̱ ho mialu karunaga i̱ turu naheore kogoni.
ISA 24:17 Dindini wali agali bu kamiru tí dege darabida. Mo ko holenebi tí gonoha dolenebi uliha gundu polenebi wiai kagoria lola holeore kamigonida.
ISA 24:18 Maru ti mo ko holene tagira ibira handala ibida pialu karia gundu uli wini ngagoha uli polebira. Ani biragola gundu uliha howa heyalu lone ibida pole pialu karia gono ngagoha do wulebira. Hari daligaha howa iba ibilo panga duguape haragola iba timbuni ibulebira. Ani biragola dindinaga gene kago pini heba mo ema bulebira.
ISA 24:19 Dindi dumbirumbi bialu mo emabia haragola dindi gaibubaga bu wima polebira.
ISA 24:20 Agalime lulu iba no howa elola ai̱nai̱ biagadagua bialu puyabu hongohe ibiragola anda emene kagobi elola amunana biagadagua bialu dindi ogo elola amunana bialu wulebira. Wali agalime bia ko hene ngagonaga genda dindi ogonime yabe nahe gendabi wulebira. Ani yu habe nahedagola dindi ibu hongo nahe ibira halu lone heyabe naholebira, laya lene.
ISA 24:21 Horo mbira pongo bo winigo tagira ibirangi Anduane Homogohanda hari daligaha hongo haga bu karuhondobi dindini kini bu karuhondobi pani mulebira.
ISA 24:22 Anduane Homogo ibugua kini uruni bibahende mo mogo buwa agali minu garabaya bialu gundu uliha helagadagua minu garabaya bu helolebira. Ibugua ti garabaya luore helowa mani ibuni hame ledagoale pani tihondo mulebira.
ISA 24:23 Ani biragola howa harini ege aruma halu ni nade wá holenebi ereba holebira. Ani bulebirago irane Anduane Homogo Hongo Haiheore kago ibugua bibahendeorenaga handame haga howa ibunaga wá holene hongo holenebi timbuni gibi heba ibalu Yarusaleme tano Hari Saiono hombeneni howa wá hadali halu ibunaga wali agali haru holebira. Ani kagola wali agali karunaga haru haga bu karume ibuninaga wá holene de hondolebira.
ISA 25:1 Anduane Homogo-o í̠ i̱naga Ngode Datagaliwabeore ke. Í̠ mini yaraga holene hamelo kogoni. Í̠na biamogo bulenaga biabe nahendene ale birigoni. Í̠na mbirale buleore lalu bamba lo wiriruni biaiore harigoni.
ISA 25:2 Í̠na tano timbuni wiaru bo gialapaya biri. Tano maru wai pabe hongohe bu mabubi hearu bo gialo wahai hari. Waitiginaga tano timbuni hongohe wiaru bo haealabaga biai harigo tigua tano uruni lone biadai nabulebira.
ISA 25:3 Wali agali tano hongohe timbuni ngaruha haga karume í̠naga mini yaraga holebira. Dindi marunaga tano mo ko haga bu ngaruha wali agali bu karume í̠hondo giho holebira.
ISA 25:4 Wali agali yagibano mbirale nawi karubi genda yu howa mini dege dindi ho karubi tinaga ha do holene í̠ hegola ti embeda howa bayale haga hene. Iba dalu puyaburu ibirangi ti bayale helonaga bira do holene anda í̠ni hariligoni. Ti ni poboyogo nahelonaga í̠ni ho ge haga kegoni. Agali ko biaga karunaga miniha tandaga holene timbuni hongoheore ngagome puyabu hongoheme wai pabe podope nahagagobi halu dindi ko gaea hangu biaho wiaga ngagoha ni hongohe dedaligobi dalu bida. Anduane Homogo í̠na agali waitigi bu karunaga ne hariga hangai harigoni. Tigua ga̱ lalu bi ko lalu kago wahalu bi nale haga. Ni hongohe dedago beralibame ge haragola gumba hagagobi í̠ kegoni.
ISA 25:6 Anduane Homogo Hongo Haiheore kagome Hari Saiono ogoriani tomo timbuniore dawa wulebira. Ibugua nogo sibi bulumaga egarubi bayaleore tara tara dawa wialu waini iba bayaleru hambu wulebira. Ani bidagola wali agali dewaore dindi tara tara ngaruha howa tomo uruni nole íbu ngoai holebira.
ISA 25:7 Ogoriani wali agali dewaore dindi tara tarani ti ala bu miniha genda timbuniore yu hagahaga bu henedaru tinaga genda uruni bibahende ogoningi Anduane Homogohanda ti dara howa mo ereba hai helolebira.
ISA 25:8 Anduane Homogo Bibahende Haru Haame Ho Haga kago ibugua homolenebi mo ereba hai haragola lone homolene nawulebira. Ibugua wali agali bibahendenaga dugu bulene ngago mo ereba hai halu tinaga de iba domo wahai holebira. Ani bialu ibunaga wali agali dindi bibahendeni bu karu tinaga taga holenebi tandaga nolenebi ngaru mo wahai holebira. Anduane Homogo ibunioreme ani bulebero laya.
ISA 25:9 Mbirale uruni tagira ibirangi wali agali bibahende karu tigua ogodagua lolebira, Anduane Homogo ibu inanaga Ngode Datagaliwabeore kagoni. Iname ibuhondo mini mbiraore wuwa ibuha hana ho hemagola ibunime ina mo wialu haru dai bini. Ibuni hangu Anduane Homogoore kagoni. Ai iname ibuhondo mini mbiraore wirimagola ibugua ina pele ngialu haru dai biyagonaga turu timbuniore ho kamagoni, lalu holebira, lene.
ISA 25:10 Anduane Homogohanda Hari Saiono de hondo mamage halu ai Moaba wali agaliru tinaga waitigime belo ibu handaya ho holebira. Nogo bulumagame tininaga ti to wini ngagoha datani hengedape hagadagua Moaba wali agali tinaga waitigirume ibalu bo hengedope hai holebira.
ISA 25:11 Ani biragola Moaba wali agaliru ti iba hanuni yu wahenego angeha do̱lo dai bule hongo howa do̱larilidagua bialu holebira. Ani bialu karia Anduane Homogohanda ti ala mine hayagonaga pani mialu ti mo taga halu dindiha ibira holebira.
ISA 25:12 Ibugua tinaga ege pabe daligaore hongohe bu heledaru bo gialo wahai halu podo bagabu ibira hai helolebira, lene.
ISA 26:1 Horo mbira tagira ibulebirago ogoningi wali agali Yuda dindiha holebirarume iba gana ogo lolebira. Inanaga tano hongoheore ngama. Ngode Datagaliwabe ibunime tano ogoninaga wai pabe mo hongo haga kagoni.
ISA 26:2 Wali agali mana bayale tigabi biaga karu anda ibilo tanonaga pabe panga timbuni payatagi hene karu dugua hadaba. Wali agali uruni ti mini bilinahe howa Anduane Homogo andaneha haabo hayaru anda ibilo.
ISA 26:3 Anduane Homogo-o í̠ andaneha haabo haga karu tinaga mini í̠ha hongohe pagaho haga ka. Ani kagola í̠na tinaga miniha mo palia holene miaga ke.
ISA 26:4 Anduane Homogo ibu inanaga ha do hagane anda kagoni. Ibu ani haabobo holebira. Ani kagonaga iname ibuhondo mini mbiraore wu haabo holene nga.
ISA 26:5 Anduane Homogohanda wali agali mine haga heneru ti mo dindiho heledagoni. Tinaga tano hongohe ngago ibugua gialo hole bialu dindini haealabaga bu ngelai haga ka.
ISA 26:6 Wali agali maru bu hearume yagibano hearu mo ko hayagola darabi uruni ti mbirale mbira nawiore hene. Yagibano uruni tigua tano bo gialapaya bini bu wiaru áyu hengedalu pialu ka.
ISA 26:7 Wali agali bayale karume hariga pialu helo Anduane Homogo-o í̠nioreme hariga ogoni mo tigabu wiaga ke.
ISA 26:8 Anduane Homogo-o ina bibahende í̠naga mana lo ngedagua talialu ibule eberemagoni. Iname í̠ handaya howa dunubia ho kamagoni. Í̠ni mini lene timbuniore kego hame lalu kama.
ISA 26:9 Mbiragabi i̱naga gubalinioreme í̠ hangu mitangi biaabo haruli. Í̠na wali agali dindini karu ti godini dabaki beregola tigua í̠naga mana tigabi ngegome dabaganego ogo aleda lalu manda bulebira.
ISA 26:10 Í̠na wali agali ko biaga karu ti dara hariligoyu tigua í̠naga mana tigabi bulene ngaru moya nabi holebira. Ti wali agali tigabiwi karu baba mandagi howa dege tigua mana ko ngaru bialu haabo haga ka. Tigua í̠naga mana bayale tigabi ngegobi hongo timbunihe kegobi mitangi nabi howa í̠ni andaneha holenegobi mangaore haga ka.
ISA 26:11 Anduane Homogo í̠na wali agali ko bu karu pani mule í̠naga gi dogola amu ho kegoni. Í̠ ani bu kegoni tigua de handa nabi ka. Anduane Homogo-o í̠naga wali agali bu karuni í̠nime biamogo biaga kegoni ti hendelo mo walia habe. Anidagua beregola mana ko biaga karu ti taga timbuni holebira. Í̠naga waitigiru bo delole ira timbuni dela manda manda bu wirigome í̠na wali agali ko biaga uruni dai helo.
ISA 26:12 Anduane Homogo-o í̠naga wali agali bayale hangu holoma̱ya bayale holene í̠na ibilaga kegoni. Iname mbirale bibahende bayale bigi birimaru í̠na biamogo birigola birimagoni.
ISA 26:13 Anduane Homogo inanaga Ngode Datagaliwabe-o agali haguane tara henerume ina handaya ho henegoyu í̠ni hangu inanaga Anduane Homogo timbuniore kegoni.
ISA 26:14 Áyu agali haguane uruni tini mbira ha nabi homai hayagoni manibi ti lone heya nabulebira. Í̠na tinaga hongo heago bope halu ti mo ko howa bo ereba hai helarigoni. Wali agalime abogo hene lalu mani tinaga mini manda nabulebira.
ISA 26:15 Anduane Homogo-o í̠nime inanaga dindi tubari mo yanga lalu mo timbu harigoni. Anidagua birigome í̠ninaga mini timbuni mini leneore helarigoni.
ISA 26:16 Anduane Homogo-o í̠naga wali agali bu hearu pani mialu barigola tigua í̠ni heria dara holene heba ibalu í̠nihondo bi layagoni.
ISA 26:17 Walime gali taba honole tandaga nalu pedere biagadagua iname genda tandagala timbuniore nalu howa pedere bialu harimagoni.
ISA 26:18 Tandaga ogoni narimagoyu iname mbirale bayale mbira tagira naibiya. Waitigi hearu tinaga hongome ina bope hayago inanaga dindi ogo iname mo bayale habe nahe harima.
ISA 26:19 Inanaga damene homayaru ti mani lone heyu holebira. Tinaga tingini heba heyu holebira. Áyu homaliha padaruni tigua dengalalu heyuwa mani turu halu kulo holenenaga iba gana lalu holebira. Dindi ko yobi ngagoni mbiraga dadimba ibiragome datani mo gomba haragola anda hagadagua Anduane Homogohanda homene uruni tinaga holene lone miadai bialu mo heya hai holebira, lalu iba gana ogoni lolebira, lene.
ISA 26:20 I̱naga wali agali bu kamiru tí tíni andaga anda puwa panga payatagi ho biralimu. Anduane Homogonaga lembo holene ngago ereba helotagi tí ani bira do halimu.
ISA 26:21 Anduane Homogohanda wali agalime ko biyarunaga pani mule ibuni dalu dahuliya andaga wahalu dindini dalialu ibiragoni. Ani ibiragola wali agali bo wahenerunaga darama dindime mo do habe naheore wulebira. Wali agali ohowa homelo bo wahaga biyaru mo pana hai holebira.
ISA 27:1 Horo ogoningi Anduane Homogohanda ibunaga hongo timbuni walia halu puya timbuni mini Lebiadana solowaraha wiaga ngago mo ko howa minu bolebira. Puya timbuni ogoni baragola biru beregeda beregeda bialu ibida piagago Anduane Homogonaga ayu tibu ne gadele ngagome dibalu dibu budubaga bulebira.
ISA 27:2 Horo ogoningi iba gana ogodagua lolebira, Gerebi mabu bayale ngagonaga iba gana lolene nga. I̱ Anduane Homogo kogo i̱nime mabu bayale ogoni handayaho haruli. Mabu ogoni i̱nime iba mialu haabo haruli. Mbirali ko biaga kagome ibalu mabu ogoni mo ko holilono mbiraga horombebi i̱nime mamage haabo haruli.
ISA 27:4 Áyu i̱na gerebi mabu ogonihondo keba nahe ko. Mabu ogoniha bolage mamunali aniheru anda kale i̱na uruni minu dugu wahalu datani ko uruni dai helo bibahende irane delole kole.
ISA 27:5 I̱naga wali agali waitigi uruni tigua i̱na ti handayaho holiya hame layagua ti i̱ni koria ibalu i̱ heba bayuwaore hole lalu bi lowilo, Heneneore i̱ni heba bayuwaore hole, lalu bi lo wilo hameledo, lalu Anduane Homogohanda lene.
ISA 27:6 Horo maru mani ibulebirago ibirangi Yagabanaga aguanene Isaraele wali agali karu ti gerebi pini hongohe puwa irane anda halu lini dole pabua balu lini dewa dagagobi holebira. Tinaga ginigene kagome wali agali dindi bibahendeha bu karu mo bayale hai holebira.
ISA 27:7 Anduane Homogohanda waitigi bu hearu mo ko halu bo wahaiore hayadagua Isaraele wali agali bo wahai nahene. Ani bialu waitigi biaru dewaore homayadagua Isaraele wali agali uruni nahome emene maru dege homene.
ISA 27:8 Anduane Homogohanda ibunaga wali agali garabaya piyagoha pani timbuni nalu helo mo mini. Ibugua ti baba keba timbuni halu ni tagira ibiragoha howa puyabu timbuni hongoheore ibalu datani mbirale ngaru hilo yalu piai hagadagua ibunaga puyabu hongohe ibilalu ti hilo yu piai helene.
ISA 27:9 Anigo Isaraele wali agali tigua bia ko hene ngago damene mo tiga bule hamelo heagua nde tinaga dama mitangi bialu gime wabini ngarunaga lomabu delaga dabu bu ngeledago bibahende bo gialalu dambu gingirulo wahalu be abalu helolene nga. Ani bialu wali dama beda mitangi bialu gime wabini mini Asera laga irani bage buwa bigiya wabu heledarubi dibu gabu dangiala bagabu wahai halu ibunaga lomabu delaga dabu ngagobi ira hagua ngabilo inisenesi lomabu delaga dabu bu ngeledagobi bibahende bo gialabagabu wahai holene nga.
ISA 27:10 Tanonaga wai pabe hongohe bu mabubi abale wini biago áyu bo gialahole bu wahenego dindi hangu nga. Ani bialu bameore wali agali mbira nahe dangi hangu wiagimbu bidagoni. Ani ngagoria nogo bulumagaru ibalu datanibi ira emene karunaga yunirubi naga bialu ti nabe manga bira handala u̱ palu ngoai haga ngagoni.
ISA 27:11 Ani bialu ira uruninaga magane karu gabu halu podo ibira haragola walirume ti ira delole ilu yu pugu biaga. Tano ogoniha wali agali hagaru ti manda bulene manga howa mine halu hearia Ngode Datagaliwabe ibu ti wabiaga ibugua ti dara nahe howa biamogo nabulebira.
ISA 27:12 Horo ogoningi Anduane Homogohanda o biyadagoni bialu ibunaga wali agali dindi tara tara ngaruha karu bibahendeore uyurahayagi iba Yuberedisi poragoria howa pialu unurahayagi Iyibi dindila tubari ngagoria pupe halu bibahende haru dai biai holebira. Agalime widi lini dowa aeane wahai halu lini bayale nolenego ibuni do wiagadagua wali agali bayale kago dabalu mbira mbira haru dai bigi bulebira.
ISA 27:13 Horo ogoni ibirangi Isaraele wali agali darabi bu hearu bamba waitigime Asiria dindihabi Iyibi dindihabi garabaya bu yalu pu hene karu ibilo mbelo biguli hongo howa pu lalu ololebira. Ani olaragola ti lone Yarusaleme dai bialu Anduane Homogo ibuninaga hari loma bia hene kagoria íbu howa ibu mitangi bialu lotu lalu holebira.
ISA 28:1 Isaraele wali agaliru Samaria tano baya gibi ngagoni Anduane Homogohanda mo ko holebiragodago daraba. Dindi ogonaga agali haguane karume waini iba dewa nayagome luluyu howa tininaga mini yaraga halu lalu, Samaria inanaga tano ogoni hongohe ngagoni, laga. Dindi bayale mabu dege dombeneha wialu palawaya tara tara bayaleore dedago dalu agali haguanerunaga mandani yári bu howa lu nahe abale yogo bialu gau lagadagua tano ogoni mo ko hai holebira.
ISA 28:2 Anduane Homogohanda waitigi hongohe mbira tano ogoni bope helonaga manda mandabu heleda. Waitigi uruni ibirangi puyabu hongohe iba dalubi dalu dindi gunibi taraore ibiradagua bialu ibuwa dindini bo gingirulo baga bialu ibira ibira bilolebira.
ISA 28:3 Tigua ani bialu agali haguaneru lulu iba nalu howa tininaga mini yaraga haga karuni tinaga tano heba waitigi urunaga geme hengedalu pu íbu bulebira.
ISA 28:4 Agali haguane biaru ti mine hayagonaga palawaya ale bayale dedaligobi yogo bialu ko haralidagua mo ko helo ngagoni. Poge lini ala pigane denego ibirayadagola agalime do nagadagua ti abale mo ko halu bo gialobagabu waholebira.
ISA 28:5 Horo ogoningi wali agali emene yu waheneru Anduane Homogo Hongo Haiheore kago ibugua tihondo turu halu holebira. Anduane Homogo ibuni kininaga tangi ale karulalu palawaya bayale tara ale tininaga emboneni dugu bu mabu buwa yári bu holebira.
ISA 28:6 Anduane Homogohanda agali godi hale haga karuhondo mini bayale dege talebu miragola tigua godi lole ibiraru bibahende mana tigabi ngagoria howa tale bigi bulebira. Waitigi karume tanoha wai bima anda ibulene henge nawilo ibunaga ami karu gi nahelo tihondo hongo timbuni mulebira.
ISA 28:7 Loma binigo mo miaga karubi mana latagi haga karubi tigua waini ibabi mbiabi dewa nalu howa lulu timbuni yu halu tigabi ndo ibagabu haga ka. Tinaga miniha mo luluya kagola tigua biabe tigabi bulene ngaru nabiaga ka. Mana latagi haga karume Ngode Datagaliwabehanda mbirale mbira mo walia harago baya hangu nahandaga ka. Loma binigo mo miaga karume luluyu howa wali agalinaga genda lamule yalu ibiraruni ogo aleda lowa manda nabi haga ka.
ISA 28:8 Tini bereagoria tebolo dagia ngaruni mbiraha bayale nawi magu tagu payapaya bidagome goba hai kagola ngu engengebiore ngelaga ka.
ISA 28:9 Tigua i̱naga bi hale howa bi ogodagua laga ka. Agali ogoni ibu ai lawai hagago kabe. Ibunaga bi uruni aiwa hale helo lawai harabe. Ina waneigini áyu dege ai̱ya andu wahene ale ndo kamagoni.
ISA 28:10 Ai bibahendengi ibugua inahondo ogodaguaore bidaba lowa mini nawi waneigini biawai hagadagua halu bi mbira mbira ogoore labe duguni mbira mbira ogoore labe galone ogonagaore labe lalu haabo kagoni, laga kagoni, lene.
ISA 28:11 Tigua i̱naga bi larogo hale naharamigodago Ngode Datagaliwabe ibugua wali agali dindi taranaga bi hale nahene karu mana lalu lawai holebira.
ISA 28:12 Anduane Homogo ibunime ibunaga wali agaliru miniha hada paya buwa gi nahe turu haga bu dindi ogoniha helayagoni. Maru manga halu erekui biraru erekui dogo lalu dindi ogoniha halimu laya. Ani layagola tígua bi ogoni hale hoa nahe harimigoni.
ISA 28:13 Ogonidagua biyagonaga Anduane Homogo ibunime baya hanguore ngadagua waneigini lawai haradagua bialu daga mbira mbira lalu bi mbira mbira ngadagua baya hangu labe lalu agalime waneigini lawai hagadagua lawai holebira. Ani bialu howa koore handa walia holeberemi. Tínaga waitigi karume ibalu dindi mendeha garabayabu yalu polebira, lene.
ISA 28:14 Agali haguane wali agali Yarusaleme ogoriani haru haga kamiru-o Anduane Homogonaga bi ogo hale hadaba. Tígua manda bialu kamiria Anduane Homogonaga bi ogoni bame galone nawida lowa
ISA 28:15 ogodagua lagaya. Ina Homa baba habo nalolene bi pongobo wialu Humbirini andagani bi lo ngamagome inaha mo ko holene nawulebira. Inaha mo ko holene tara tara anda ibiyaguabi inaha ke̱ halu mo hondo holenebi yu kamagome inane pele ngiragola yo pialu puwa bayaleore holeberema lo manda buwa mini mbiraore wu kama lalu haga kami.
ISA 28:16 Anigo Anduane Homogo Bibahende Haru Haame Ho Haga kagome ogodagua leda. Hale haramine. I̱na Saiononi ege to̱le̱ dunini mbira anda gene helo heledogo. Ege to̱le̱ ogonime ibu bayaleni hongoheore howa anda hongohe helo mo hongo holebira. Wali agali ibuhondo mini mbiraore wu karu ti mogo lalu gi naholebira.
ISA 28:17 I̱na mana tigabi buleberogome tígua mana bayale bulene ngagonaga ogobi labolabo helonaga bialu henene lolene ngagome tínaga henene lolenela ogobi labolabo helonaga ngo. Tígua manda bialu kamiria tínime ke̱ halu biaga mana ngamigome tíni yo pialu bayale holeberemabe tobaho kamigo. Ai i̱na tíha mo ko holene ibiloleberogo ogoni iba li ibiradagua bialu tí hilo yalu piai holene ibiragola tíni bira do holenebi ha do holenebi mbira nawulebiraore.
ISA 28:18 Ani buwa tínaga habo nalolene bi bamba Homa baba pongobo wirimigo i̱na mo habo lalu Humbirini andagani bi lo wirimigobi mo wahai halu ereba helolebero. Aniore bialu mo ko holene dewaore tíha ibilarogola ko mangabi ndelehe handalu holeberemi.
ISA 28:19 Mo ko holene urunime tí yupe nahe yani haho wiaabo holebira. Mo ko holene genda uruni horombe mbiragabi mbira ibugu bialu tí kamigoha ibaho wiaabo holebira, laya. Ani layago ai tígua Anduane Homogonaga bi ogoni hale howa irane handa walia harimiyagua nde tíni mogo lowa duru lalu habehe kamigoni.
ISA 28:20 Mbiralime mbiraga u palue bialu karia dagia emene tubagini paluwa ge bolangua halu balangiya dambi hagane emene ko hangu yu paluwa tingini dambi hai nahabehedagola u napale yangeyangebu hagadagua tí holeberemi.
ISA 28:21 Anduane Homogo ibunaga hongo timbuni heba ibalu abale Hari Perasimihabi Gibeono dindi uliuli wiagohabi ibinidagua ibulebira. Ibalu ibunaga biabe bule winigo biragola tígua handalu kamiria ibunaga biabe ogoni taraoredane hondoleberemi.
ISA 28:22 Aniore bule ngago ai tígua Anduane Homogonaga bi nahabane bu hinalu kamigoni wahalimu. Wa naharimiyagua tíha mo ko holene gendabiore wulebira. Anduane Homogo Hongo Haiheore kagome bi hongo howa lalu dindi ogo bibahende mo ko halu bo hilo waholebero layuane hale howa langero, lene.
ISA 28:23 Tígua hale mia howa i̱na bi galone langerogo bayu hangu hale halimu.
ISA 28:24 Agali mbirame tomo hongole lowa dindi alu wiyagua dindi hangu ona alu wuwa tomo hanga nabi wahagabe. Anidagua nabiaga ndobe.
ISA 28:25 Agalime dindi baya hangu alu wuwa nde tomo mo dende bia hagane tara tararu anda helo hangagago ndobe. Ibugua widi duguni tigabu hangalu balibi nde ibuni hongolene ngagoria hangagane. Ani bialu mabu leneleneha widi ale maru ngaru hangai haga.
ISA 28:26 Agalime tomo hongolene manabi tomo bulene manabi bilo Ngode Datagaliwabe ibugua biawai hene.
ISA 28:27 Tomo mo dende bia hagane tara tararu hangayarunaga lini boga biai halu do nolene tu haragola agalime ira pelene mbalape ngagome lini bogabi dedago dambu wahaga ndo. Tomo mo dende bia haganenaga lini dambilo nogo bulumagame ira pelene mbalape ngago gililo yu ibaga biagadagua bilo helaga ndo dege. Agalime kango emene mbira yuwa ogonime ira lini emene dedaru do ibira helonaga linini pogolobaga biragola do ibira haga.
ISA 28:28 Widi linime balawa wabule lowa baya hangu dambu tagadabaga biaganego mana manda bu ka. Nogo bulumagame ira pelene mbalape ngago gililo yu ibaga bialu widi dambialu kangi widi hengedo tagadabaga buwa mo ko holilono agalime baya hangu handayaho haga ka.
ISA 28:29 Manda bayale uruni bibahende Anduane Homogo Hongo Haiheore kago ibuniha howa hangu ibinigo nga. Anduane Homogo ibu mini gigabiwi howa ibugua manda manda bu wini uruni bayaleore wiaabo holebira.
ISA 29:1 Anduane Homogohanda lalu, Yarusaleme í̠ore i̱naga lomabu delaga dabu ale wirigoni ai í̠ha mo ko holene wulebira. Debidi ibu kini heangi Yarusaleme tano í̠ha howa hayagonigo ai áyu í̠ mo ko holebira. Anidagua bulego mali mbira kira agima ala pelo. Ani bialu horo dunini maru lotu laga wiyaru pu bolangua haga bilo.
ISA 29:2 Ani piai kagola Anduane Homogo i̱nime í̠ha genda mo yu anda ibulebero. Í̠ i̱naga loma biniru bo delaga dabu ale wia ngegonigo ai mani ga̱ lalu dugu bulebere. Lomabu delaga dabuni darama to̱lo wiagadagua í̠ daramame dohe wulebere.
ISA 29:3 I̱na í̠naga waitigiru haru eberogola tigua í̠ ho mabu bupe holebira. Tigua tanonaga pabe tagirahayagi heyu howa wai bulenaga dindi dugu yu wima irigi holebira.
ISA 29:4 Ani biragola Yarusaleme í̠ dindini podo ibiraho ngegola dindime í̠ bu dambi hai holebira. Ani wuwa í̠ damame hu̱ laradagua hu̱ lama dalidali bialu wulebere.
ISA 29:5 Agali í̠naga waitigi í̠ baba wai bule ibulebiraru ti dewaore daga labe nahe be abalu alebi agalime widi gandulo ngelowa bo tau laragola widi aeane puyabume harini yu yigiyaga lo hagadagua holebira, lene.
ISA 29:6 Anigo abaleore Anduane Homogo Hongo Haiheore kago ibu puyabu hongohe hebabi dindi dumbirumbi hebabi hari kilikulu timbuni lalu ibulebira. Ibalu ibugua mbirale ngaru bibahende dai holene ira hongohe ko mbira hedo yalu ibulebira.
ISA 29:7 Ani biragola ami agali dindi tara tarani howa Ngode Datagaliwabenaga lomabu delaga dabu biago baba wai bule Yarusalemeni íbu hayaruni mbiraorebi naholebira. Tigua mbirale tano karulolenaga bialu hayaruni bibahende ereba hai holebira. Uruni bibahende Yarusaleme ibunime emaga ko mbiraga hendenegobi tagira polebira.
ISA 29:8 Ani bialu ami agali dindi tara tara wiaruha howa Hari Saiononi wai bule ibiyaruni tigua mbirale mbira namo yulebiraore. Mbirali tomo garibi lo padaria emaga andaha tomo dewa nalu henego heyuwa handalu karia garibi laho wiagadagua bulebira. Mbirali iba noaho padaria emaga andaha iba dewa nalu henego heyalu karia iba noa halu kembobe lebolaho wiagagobi holebira.
ISA 29:9 Yuda Yarusaleme wali agaliru-o tí áyu lulu yu haabo halu de kohe dege ani hadaba. Mbiralime waini ibaru mbiaru nowa lulu yu howa ge pu ko halu ilielo lalu hagadagua tí nane howa ani hadaba.
ISA 29:10 Anduane Homogo ibunime tí de mo imula hayagola tí paliahondo hene ale kami. Anduane Homogonaga bi mana latagi halu mbiwia haga maru hearunaga de mo ndibulo waheledagola tigua mbirale bulebirarunaga de gandeba hondolene ngaru nahondolebira.
ISA 29:11 Ani bidagola Yarusaleme í̠na mbirale Anduane Homogohanda mo walia holebiraru de nahondolebere. Manane mbiralime mbuga mbira andane hadambihe ngialu í̠na dagala lolebira. Ani biragola mbirali beba dagalaga kagohondo dagala lalu ibuhondo mo mialu keria ibugua lalu, Mbuga andane hadambi hayadagome i̱na dagalabe naheda, lolebira.
ISA 29:12 Ani laragola í̠na agali mende beba daga nalaga kagohondo dagala lowa mo mialu keria ibu, I̱ daga nalaruli, lolebira, lene.
ISA 29:13 Anduane Homogohanda lalu, Wali agali tinaga ne hambu hangume i̱naga mini yaraga haga karuni tinaga bu mini i̱ni kogoha ndo kaundia ka. Tigua i̱ mitangi bialu lotu henene nalagaore ka. Agalime mana lowini gilibu wiaru hangu wali agali lawai halu haga ka.
ISA 29:14 Ani bialu karunaga i̱na tihondo mana nahendene tara mbira ngago mo walia harogola tigua mogo timbuni lolebira. Agali mini manda bayaleru talebu miaga karunaga manda bayale ngago mo waholebero. Ani bialu agali manda timbuniwi karu ti mini nawi lulu ale helolebero, lene.
ISA 29:15 Wali agalime tinaga mana ko ngaru Anduane Homogonaga deni mo do howa bialu karu tiha pani nolene timbuniore wulebira. Tigua mana ko uruni ohowa bia do halu howa tinime mitangi bialu, I̱na bialu koruni mbiralime handa nabi howa manda nabi ka, lo manda bida.
ISA 29:16 Tigua mo hondo halu mbirale ngaru mo beregedai haga ka. Agali todobene be dindime wabiaga kago ibuni duninibe be todobene be wabini ngago duninibe. Mbirale mbira agali gime wabini ngago ogonime agali wabiaga biagohondo lalu, Í̠na i̱ wabini ndoyago, layagua bi ogoni henenedabe. Agali mbirame dindi duguwa todobene be wabialu heagola todobene be ogonime lalu, Í̠na mbirale mbira berego ogo ale bero manda nabiore beregoni, layagua bi ogonidagua larago wáledabe.
ISA 29:17 Ainde emeneore howa mbirale bibahendeore mo iriari biai holebira. Lebanonoha irabu timbuni ngaruni mani mabu hongolene dindi bayale wia aribia halu mabu hangaga dindi bayale ngaruni bibahende mani irabu timbuni wia aribia holebira.
ISA 29:18 Horo ogoningi hale tuluhe karu tigua mbiralime mbugaha bi gilibu winigo daga laragola hale halu de kohe áyu arumaha ibagabu karu tiguabi de hondolebira.
ISA 29:19 Wali agali yagibano karubi maru tini mo dindiha haga karubi tigua Anduane Homogo Isaraelenaga Ngode Datagaliwabe baya burugule kago ibugua turu holene miragola yu holebira.
ISA 29:20 Anigo agali haguane ko bu karubi Ngode Datagaliwabenaga bi lo ngago nagalonedalo mitangi biaga karubi mana ko ngaru hangu bialu hole turu haga karubi ti bibahende mo ko halu bo ereba hai holebira.
ISA 29:21 Ani bialu agali maru godi hale howa dabaki biaga karu mbirali tigabi bialu haga karunaga bi henene larago mo wahalu ke̱ haga karunaga bi mo wia halu lahaga bu karu tibi nde pani ogonibi dege nolene wulebira.
ISA 29:22 Anigo áyu Anduane Homogo Isaraelenaga Ngode Datagaliwabehanda bamba horo ko wiangi Abarahama mo wialu haru dai biyago ibugua Isaraele wali agaliruhondo lalu, Ainde Yagaba aguaneneru-o tí taga halu tínaga denguiru aruma nahe holeberemi.
ISA 29:23 Ani bialu i̱na waneiginiru Isaraele wali agali tíhondo ngerogola hondowa tígua i̱ heneneore Isaraele wali agalirunaga Ngode Datagaliwabeore kogome mana tigabi bulene ngaru hangu biaabo haga henedane handa walia holeberemi. Ani handalu manda buwa tígua i̱naga mini yaraga halu i̱ninaga andaneha holeberemi.
ISA 29:24 Wali agali maru áyu mini nawi howa luluyu ibaga bialu haga karuni mani ti mini tigabiwi holebira. Maru bi dewa lagalaga bialu i̱naga bi mo wahaga karuni mani i̱naga bi baya hangu hale halu birulebira, lalu Anduane Homogohanda laya, lalu Aisaiahanda lene.
ISA 30:1 Anduane Homogohanda lalu, I̱naga waneigini Yuda wali agali ti mine haga karuni tinaga pani nolene timbuniore wulebira. Tigua i̱naga mini talia nabi tinime hameledaru ale bialu dindi tara puwa mendeali karu baba nenege halu karume ani bulebira. Anidagua bialu karume tinaga ko dewaore mo wiatago halu haabo kogoni.
ISA 30:2 Tigua i̱naga mini ala handa nabi puwa tiha mo ko holene anda ibirangi biamogo bilo Iyibi wali agalinaga kini kagohondo biamogo bule ibabe lama piya.
ISA 30:3 Anigo tigua ogonidagua biyagome mo ko holene anda ibiragola Iyibinaga kini kagome Yuda wali agaliru biamogo nabulebira. Ogonidagua biragola tini taga emene ndo timbuniore ho holebira.
ISA 30:4 Iyibi dindini kini kagome ibunaga bi lahaga hearubi ami agali haguane hearubi tigua Yudaliru lola hole Soana tanonibi Hanese tanonibi pudaba layagola ibini.
ISA 30:5 Ibuwa Yuda wali agali biamogo nabiragola dara timbuni holebira. Iyibi tigua biamogo nabiragome Yuda wali agali tiha taga holene timbuniore mo yu anda wulebira, laya.
ISA 30:6 Anduane Homogohanda gabua tara tara ema bialu piaga hearu dindi hobane unurahayagi wali agali nahaga wiagoha howa bulebiragonaga bi latagi halu lalu, Yuda wali agalinaga agali haguane hearuni hariga ogoniha ibaga. Dindi ogoniha koore genda tara tara ngaru lola hagaore nga. Dindi ogoniha laionobi nogombi agali hayagabi abagua ale babaganehe yagalalu piagabi ema bialu piaga ko marubi dindi ogoniha wia dege bida. Ani bidaru gi nahe Yuda agali haguane uruni tigua tinaga dabudabu baya tara tara ngaru nogo dongi nogo kamelerunaga erekunini mo paga howa ti biamogo bulene nawi ngagoha Iyibi dindiha kini kago mo turu halu bameore mule yalu piaga.
ISA 30:7 Iyibiali tigua dindi mendealiru ani biamogo buliya lowa henene halu biamogo nabi lahondo haga ka. Ani biaga kagonaga i̱na Iyibiali ke̱ haga uruni tinaga kai mini Abagua Ale Timbuni Bame Haga lo wiru, lalu Aisaiaha howa latagi halu lene.
ISA 30:8 Anduane Homogohanda i̱hondo ibunaga bi ogoni wali agali koorene ko ogodagua bialu kami lalu bebani gilibu wialu ege to̱le̱nibi podowa gilibu wibe lalu langiya. Anidagua berogome bi ogoni ereba nahe wiaabo howa wali agalime ko ogobi bialu ka lalu walia helo.
ISA 30:9 Wali agali ti mine halu tinaga abaore Anduane Homogo kago manda nabiaga howa mine haga ka. Tigua ke̱ howa ohalu bi mana bayale lawai harago hale habe manga haga ka.
ISA 30:10 Ani howa tigua Anduane Homogonaga mana latagi haga agali karume bi latagi halu kagola bi nale wahadaba laga. Iname ogo ale bidaba lowa mana lalu kamigoni langulene nawigo wahadaba laga. Ani lowa bi maru mani mbirale bayale holenenaga ndo inane hale hole hamelo kamaru ale dege langialu holene nga laga.
ISA 30:11 Ina bialu holene ngagoha ti hapai nahe kaundiaha holene nga. Iname Isaraele wali agalinaga Ngode Datagaliwabe baya burugule kagonaga mana ina hale haabo habe manga ho kamagoni laga ka.
ISA 30:12 Ti ani laga kagoyu Isaraele wali agalinaga Ngode Datagaliwabe baya burugule kago ibugua ogodagua leda. Tígua i̱naga bi mana bayale langirugo mo wahowa erembira mialu tí tíninaga mana mendeali mo hondo holenebi bo waholenebi ngago hangu mo tene howa ina bayale karulape holeberema laramili.
ISA 30:13 Ani larimigome tíha mo ko holene timbuni ngagome mani tíni mo ko holene timbuniore wulebira. Ogoni manane gana neneni dindi emene mbira ala ibira ibira bialu emene timbu haga bialu maniore haragola gana podope hai haga nga.
ISA 30:14 Heneneore todobene be dindime wabini gingirulobaga bialu emene ko hangu ira dene hedo yabe nahebi iba emene hangu iba hambiaga uliha bape halu hambibe nahebi wiagadagua tí bibahende gingirulobaga bialu bo haealabagabu waholebira, laya.
ISA 30:15 Anduane Homogo Bibahende Haru Haame Ho Haga howa ibu Isaraele wali agalinaga Ngode Datagaliwabe baya burugule kago ibugua wali agaliruhondo ogodagua laya. Tí bayale holenenaga hariga ogobi nga. Tíni i̱ kogoha dai bialu hendore hole ibidaba. I̱ni hangume tí baba ha paraho howa biamogo bibehe kogo. I̱nihondo yutiga bule ibidaba. Ani birimiyagua i̱na tí biamogo berogola tí hongohe holeberemi, lene. Ani layagoyu tínime ibunaga bi hale nahe mo wahowa
ISA 30:16 lalu, Waha inanaga nogo hosi gerai taraore yiru hinidamago. Nogo uruninaga erekunini biralu gerai lalu ibida poleberema, laga kamigoni. Tínaga hosini biralu ibida poleberema larimigoni henene degegoyu tínaga waitigi karunaga hosi karume gerai taraore laga kago urunime tí tali minulebira.
ISA 30:17 Tínaga ami agali daosini mbira (1,000) kagola ai tínaga waitigi agali mbiraoreli hangume wai hoaro lalu ibirago hongowa tínaga ami agalirume tano yu wahalu ibida piai holebira. Waitigi agali durialime wai hoaro lalu ibiyagua wali agali bibahendeore tano yu wahalu mbiraoreli yu wanahe piaiore holeberemi. Ani beremigola tanoha mbirali naheore bame hari neneni ira tili haradagua bulebira.
ISA 30:18 Anigo Anduane Homogo mana bayale tigabi dege biaga kagome ibunaga dara halu biamogo bulene timbuni ngago tíhondo walia hole hondo kagoni. Wali agali ibunihondo mini mbiraore wuwa biamogo bilo lowa karume turu holene handa walia holebira, lalu Aisaiahanda lene.
ISA 30:19 Wali agali Yarusalemeha kamiru-o tíha dara halu dugu bulene nawulebira. Áyu Anduane Homogohanda tí dara halu mo bayale holebira. Tígua ibu olalu ina biamogo bia laramingi ibugua tínaga bi hale halu abaleore biamogo bulebira.
ISA 30:20 Áyunaga tí genda yu halimulo Anduane Homogo ibugua mo ngirago genda yalu iba hinaru garibi timbuni lo hagadagua holeberemi. Anigo tí genda yu kamingi tígua ibu tai bulene nawi ibuni tí heba mandagi howa tí biawai haga bialu holebira. Anidagua bialu kagola tígua ibu kaorego manda buleberemi.
ISA 30:21 Tí harigani pole pialu kamiria tí hariga ala handa nabini howa gi lehayagi ngago poabe be gi tigahayagi ngago poabe tobaho kamiria ibuni tínaga erembirahayagi ibalu howa lalu, Hariga ogodagua pu lalu, langulebira.
ISA 30:22 Ani biragola tínaga bi pupu wiaga dama mitangi bialu gime wabuwa ngolo silibarume para hadambi hene ko ngubi nagalone wu kamiruni yu wahalu howa lalu, Mbirale uruni i̱na lone de nahondolego i̱ kogoria nawi pudaba, loleberemi.
ISA 30:23 Tígua tínaga mabuha tomo hangalu kamigola Anduane Homogohanda iba daluru ibilaragola tomo dewa bayale anda holebira. Ani biragola tínaga tomo dewa bu payabu wulebira. Tínaga nogo bulumagarunaga tomo nolene tani dewa anda holebira.
ISA 30:24 Tínaga mabuha tani bayaleru dewa andaho kagola tígua bu manda mandabu ngelowa tínaga nogo bulumaga dongiru mabu dindi aliaga karume nalu helo karulape migi bialu holeberemi.
ISA 30:25 Anduane Homogohanda horo mbira mo ko holene ibulebira lowinigo ogoni tagira ibirangi tínaga waitigi bu karunaga ege pabe hongohe bu heledaru bibahende poda paya biai howa waitigi hearu homai holebira. Ani biragola tí kamigohayagi iba bayaleru hari nene ngagoha howa dugualu dalipe haragola tí iba nalu holene tai nabi bayale nalu holeberemi.
ISA 30:26 Horo ogoningi ege kagome ni daradagua bialu ni ibu hongoheore ibuni dalu haga ngadagua ndoore dolebira. Ninaga hongogo timbuniore horo karianaga dolene horo mbira ogoningi damaga helolebira. Anduane Homogo ibugua ibunaga wali agalirunaga genda tandaga bu ngaru mo wahai halu ti mo bayale heledangi horo ogoni tagira ibulebira.
ISA 30:27 Anduane Homogo ibuni kaundiaha howa heyalu hongo timbuni heba ibirago de handadaba. Ibu keba timbuni howa ibunaga bu miniha tandaga timbuni ho kago walia halu hagua hungula timbuni bialu kagoni. Ibunaga bi laragoha mbirale bibahende dai holene ira dene ale tagira ibaga.
ISA 30:28 Puyabu bamba helaragome mbirale ngaru bibahende iba li hongohe ibalu hilo yu piai haradagua biaga. Dindi bibahendeha hameigini tara tara bu karu Anduane Homogo ibunaga gime yu howa bibahende tandala hole bialu mo haealabaga biaga. Ani bialu wali agalinaga mini mo luluya halu agalime nogo hosinaga ne harigaha aeane mo bangabia halu tini pole manda bidagoha ndo agalime hendeho yalu piagadagua wali agali Anduane Homogohanda haru pubagi haga ka.
ISA 30:29 Ogoningi ai Ngode Datagaliwabenaga wali agali bu kamiru tígua ibunime mbirale uruni birago de hondowa horo timbuni mbira tagira ibiragola turu howa ibu mitangi bialu lotu lalu iba gana laramilidagua lalu holeberemi. Tígua turu timbuniore howa Anduane Homogonaga hari kagoria marume iba gana lolenaga ngidaru mo yalu pialu howa hagagobi holeberemi. Anduane Homogo ibuni hongohe ege to̱le̱ ale howa ibuni Isaraele wali agalirunaga ha do hagane anda ka.
ISA 30:30 Anduane Homogohanda ibunaga bi hongo howa ladaga haragola wali agalime hale howa ibunaga keba holene ogobiore winida lalu manda biai holebira. Ibugua mbirale dai helolene ira dene hebabi puyabu timbuni hebabi iba dalu dindiguni hebabi ibulebira. Ani bialu hari kilukulu timbuni laragola wali agalime Anduane Homogonaga keba holene hondolebira.
ISA 30:31 Anduane Homogohanda bi hongo howa ladaga haragola Asiria wali agalirume mogo lalu gi timbuni ho holebira. Ibugua gewa ale mbira yu howa Asiria wali agaliru mo ko howaore minu balu holebira.
ISA 30:32 Ai Anduane Homogohanda Asiria wali agali minu baragola ibunaga wali agali bu karu ti bibahendeme turu timbuni halu tabagebi ngidabi balu ngilingele lolene ale tara tara balu biragola urunime Anduane Homogo ibugua gewa aleme teliala pugu bialu barago lo biamaga helaga bulebira.
ISA 30:33 Asirianaga kini kago balu uliha bape halu iraha delole uli bambaore manda mandabu winigo nga. Uli ogoni unuraorebi arane yangaleorebi wa ngelowa ogoniha ira gabu manda mandabu ngeleda. Anduane Homogo ibunaga buhe̱ lolene hongoheore ira hungu ale tagira ibaga ngago ogoni pu latagi haragola ogonime ira manda mandabu ngelayago kulu lalu dolebira.
ISA 31:1 Iyibi dindiha biamogo bia lama piaga kamiruni tíha mo ko holene wulebira. Tígua handalu kamiria Iyibi ti nogo hosi dewa hinalu garo ale mini karisi hosime gili laga dewa wialu ami agaliru ogoriani heyu howa wai biaga dewa ngarume tí biamogo bulubadalo manda bu kami. Anigo Anduane Homogo Isaraele wali agalinaga Ngode Datagaliwabe baya burugule kago tígua ibuha mini dunubia nahe ibuhondo tí biamogo biabi nalaga dege kamigoni.
ISA 31:2 Ibuni mini gigabiwi kagome ibugua wali agali ko biaga karuhondo mo ko holene ngaru anda ibilolebira. Anduane Homogohanda horo bibahendengi bule lowiniru biaore biaga kagome agali ko biaga karubi uruni heba mandagi ibagabu haga karubi bibahende baba wai bulebira.
ISA 31:3 Iyibi wali agali ti Ngode Datagaliwabe ale ndo wali agali bu karubi dege ka. Tinaga nogo hosi wai biaga karu ti nde mende hongo tarahe ale ndo hosi maru karubi dege kagoni. Ai horo mbiru Anduane Homogohanda ibunaga hongo timbuni walia halu gi dogolo amu harangi hameigini hongohe maru biamogo biaga karubi hameigini maru hongo nahe biamogo bini karubi bibahende tanabi mo ko halu bo ibira hai holebira.
ISA 31:4 Anduane Homogohanda i̱hondo ogodagua langiya. Laiono gabuame nogo sibi mbira bo yu puwa nalu karia sibi haru haga dewalime puwa laiono bo talu pelalu nogo sibi gingila mule lowa pa lalu haga. Ani bialu karia laiono biagome agali dewaliore ibinidagola ibu gi halu nogo sibi yu wahalu napiaga. Ogonidagua dege Anduane Homogo i̱ni Hongo Haiheore kogome Yarusaleme tano Hari Saiono kagoha wai bule íbu kogola mbiralime i̱hondo nabibe lowa hapai naholebira.
ISA 31:5 Egarume tinaga igini habane ngaru daliga yagalo yu ibaga bialu howa mamage hagadagua agalime i̱naga Yarusaleme tano mo ko halu bo gialo hole nabilo Anduane Homogo Hongo Haiheore i̱nime mamage baya hanguore holebero. I̱nime ibu handayaho haabo holebero, laya lene.
ISA 31:6 Aisaia ibugua lalu, Isaraele wali agali tíore Anduane Homogonaga bi mo wahalu mine hagaore kamiru mini beregedalu ibuni kagoha dai bilimu.
ISA 31:7 Anduane Homogo ibulene horo kaware ngago ogoningi mbirale ngolo silibarume wabuwa dama laga wu kamiruni yu wahai halu dai buleberemi. Mbirale uruni tíninaga gime wabu wirimigome ko timbuore bialu harimigoni ndobe.
ISA 31:8 Anduane Homogohanda bi ogodagua lara. Wai biagane ayu tibu nene gadeleore mbirame Asiriali baba wai bialu Asiria wali agali bo waharagola ti ibida polebira. Ayu tibu wai biaga ogoni agalinaga ndo. Anduane Homogo i̱nime wali agali dindi ogoniha pelolebero. Ayu tibu ogoni handalu Asiria wali agaliru tinaga dindi wahalu dindi mendeha ibida pugu bialu karia tinaga igiri daliaheru dindi mende uruniha garabaya biabe ale bialu helolebira.
ISA 31:9 Ani biragola tiha gi holene timbuniore ngagola tinaga tano hongohe ngaru gialohole bulebira. I̱na wai bulenenaga manane walia halu pelagi helarogola hondowa Asiriali ami haru haga karume hondowa mogo lalu ibida piai holebira, lalu Anduane Homogohanda bi ogodagua laya. Anduane Homogo ogoni mitangi bialu wali agalime Yarusalemeha Hari Saiononi howa lotu laga. Ogoriani ibunaga mbirale loma biniru bo delolene ira hongoheore daho wiaabo ka, lalu Aisaiahanda lene.
ISA 32:1 Hale halu manda bidaba. Horo mbiru kini mbira ibulebirago ibugua henene hangu lalu tigatiga dege bialu haru holebira. Ibunaga agali haguaneru tibi mana bayale tigabi ngadagua bialu wali agali haru holebira.
ISA 32:2 Ani bialu agali haguane mbira mbirame wali agali ti biamogo bilo hangu hangu ibugu biragola tigua baya hanguore biamogo bigi bulebira. Agali haguane uruni ti iba dalu puyabu hongoheru ibiragola bira do hagane bododalu haradagua bulebira. Dindi ko ni daho wiaabo haga dindi yobi titaule ngagoha agali haguane uruni ti iba gagahe poradagua bialu holebira. Tigua dindi ogoni aleha howa agalime ege to̱le̱ timbuni kagoha gumba handa walia howa ni poboyogobi dedaruni nade mbaule embedaho hagadaguabi holebira.
ISA 32:3 Ani howa wali agalinaga de ko nahe howa deme baya hangu handalu hale tulu nahe howa haleme bi baya hangu hale holebira.
ISA 32:4 Agalime mini nawi howa mana ta nabi bupebe biaga heneru ai ti baya hangu minime bayale kola tale bialu holebira. Agali maru bi libilaba lowa la ko haga henerume baya hanguore lalu holebira.
ISA 32:5 Ani bialu howa agali ko karunaga mini yaraga halu mana ko lulu ale howa bialu haga karubi mini lene lalu kamiruni bibahende ereba hai holebira.
ISA 32:6 Agali mini nawi lulu aleme mana ta nabi bialu haga urunime bi ko hangu lalu mana ko ngaru dege manda bialu haga ka. Tigua bi ko laragomebi mana ko biragomebi Anduane Homogo yo handalu wali agali tomo garibilo karubi iba noaho karubi mbirago nelo natalebu miaga koore ka.
ISA 32:7 Agali ko uruni tinaga mini ko howa emboneha wu to̱le ka. Anigo tigua minime yagibano karu mo hondo howa tinaga dabudabu ngaru ti mo yulebi agali koale karu bime bope holenebi uruni ale bulenenaga dege wai hanalu haga ka.
ISA 32:8 Anigoyu wali agali bayale mini lene karume mana bayale dege bialu howa tigabi holene ngarunaga mo hongo haga ka.
ISA 32:9 Yarusaleme waliru-o tígua manda bialu kamiria ti bayale awadaga birulumabe tobaho bedamibe. Ani ndoyago baya hangu hale kulu mia howa i̱naga bi o larogo hale hadaba.
ISA 32:10 Áyu karulapego ani turuho hadaba. Mani howa ege halene (13) dene (14) agima poragola nde tínaga pu mbira mini gerebi ira olibebi ogonime lini da nabiragola mogo lalu gi howa duru lalu holeberemi.
ISA 32:11 Áyu ti bayale howa mini dindiha nape awadaga ogonibi dege holomabe tobaho kamigo ai duru lalu gi ho halimu. Tígua aga bayale bu kamiru golo wahowa dara ho ko lalu walia holenenaga aga ngaru bia aribia hadaba.
ISA 32:12 Ai tínaga mabu e bayale wimiru uruniha gerebi irane bayale hengemirubi bibahende dugua hai hayagonaga dara howa gime galu kunini balu gi haguaneni yuwa dugu bidaba.
ISA 32:13 I̱naga wali agalirunaga dindi bayale biago mo ko halu labu hai heagola datani koru mamunali aniheru ibalu ho aribia hayadagonaga dara howa dugu bia hadaba. Heneneore anda bayaleruha paliaga harimiru mitangi halu hama tano bayaleni tí turuho haramiligo mitangi bialu dara howabi dugu bidaba.
ISA 32:14 Irane tano ogoniha wali agali dewaore tinaga biabe bule pu íbu daibu bialu haramilidagua naholeberemi. Bi laranebi mbira hale naholeberemi. Ba dindiore wulebira. Kini andagabi ami agali karunaga wai pabeanda hongohe karubi amime mamage haga anda timbuni karuhabi uruniha mbira yu wanahe mo ko howa bo gialobaga biragola dindi hangu ibira holebira. Ani ngagola nogo dongi gabua karu dindi ogoniha palu ngoaiho halu nogo sibirume datani dindi ogoniha nole íbu ngoai holebira, lalu Aisaiahanda mbiwia hene.
ISA 32:15 Anduane Homogohanda ibunaga Dinini inaha lone ibilolebira. Ani birangi dindi yobi ko mbirale anda nahabehe ngaruni mo ibane berela haragola tomo tara tara ngaru anda hai holebira. Mabu hangaga ngaruha tomo mbirale bibahende anda hagahaga bialu taraore wulebira.
ISA 32:16 Mana bayale tigabi bulene hangu dindi bibahendeha wiai holebira.
ISA 32:17 Mana tigabi hangu biragome gi nahe hada payabu holene yu anda ibiragola wali agali ti elahe howa hongoho haabo holebira.
ISA 32:18 Anduane Homogonaga wali agaliru ti tininaga dindiha turu hagabu kagola tiha mo gi holene mbira nawi bayale holebira.
ISA 32:19 Ai ti ani kagoyu irabuha iba dalu puyabula hongohe ibalu dindiguni timbuni ibira halubi ira timbuni bu karuni podopaya bulebira. Tanoha anda timbuni bu karubi podope howa dindini langulobagabu wulebira.
ISA 32:20 Anduane Homogonaga wali agali tí tíni dindi mabu bayale ngaruha tomo hangarimigo bayale anda helo iba karulape biruwa tínaga nogo bulumaga dongiru tínaga dindi bibahendeha tani bayale andaho karu minana nama ibagabu holebira, lalu Anduane Homogohanda laya lene.
ISA 33:1 Dindi mende baba wai bialu mo ko haga kamiru tíha mo ko holene wulebira. Áyu tí mo ko nahe ha kamigonigo ai tígua hongoho howa dindi mendeha karu balu bo giala holebu wahaga hongo wirimiruni ibira halu biba hayagoni ndobe. Ai tíniha mo ko holene nga. Tígua henene letingi howa habo nalolene bi lo wirimiru pugualu wali agali uruni waitigi karunaga giha mo yahaga kami. Heneneore marume ti mo hondo nahagago tígua maru karu mo hondo haga beramiligo áyu maro bulebira. Ani biradagola tínaga waitigirume dehe howa tí mo hondo halu minu mulebira.
ISA 33:2 Anduane Homogo-o í̠na ina mitangi bialu dara habe. Inanaga mini í̠ha paga howa dunubia ho kamagoni. Genda inaha anda ibuligo í̠na horo bibahendengi baya hangu handayaho haabo habe.
ISA 33:3 Í̠na ti baba wai bule manda berego hale halu agali dindi tara taraha wai biaga hongohe bu karume ibida bilibulu lalu pugupugu biaga ka.
ISA 33:4 Ani pialu tinaga dabudabu yu wahalu poraru agali marume abale ibalu pagaya ale wabuni ibuwa mabuha tomo hengedago aube tobane abale nai hagadagua mo yalu piai holebira.
ISA 33:5 Anduane Homogo ibu mini lene gibi daligaore kago ai ibugua bibahende ngarubi karubi handaya ho kagoni. Ibunaga dalu Yarusalemeha howa mana tigabi bayale hangu bialu holeneme to̱lai helolebira.
ISA 33:6 Ani buwa ibugua ibunaga wali agali kamiru hongohe halimulo mo hongo halu holebira. Tí bolangua halu mini leneore halimulonaga ibugua mbirale bayale ngaru damene bibahende tí ngialu mini mandala bayale tí ngialu bulebira. Anduane Homogo ibunihondo gi howa ibu andaneha karuhondo mini tigabi bayaleore ogoni turu halu ngidagoni.
ISA 33:7 Ai Yarusalemeali hongohe timbuni hearume hariga tene wiarunaga hagahaga buwa dugu bialu karuni handadaba. Agali maru mo palia holene ibu daluha haru anda ibule manda bu hearume dugu hongo howaore bialu ka.
ISA 33:8 Hariga dunini timbuni wiarunaga wali agali gi howa mbira pu íbu bulene hariga napiaga bame gumba ho nga. Waitigi hearume ogo ale bibiya lalu dindi mende baba bi hongohe lo wiribigo wahalu mendealinaga tano wiaru mo ko howa mege bigibigi bialu ka. Tini degedege mini hana nahe mendealigo bame nagalone nai kagonida lowa yo handaga handaga bialu ka.
ISA 33:9 Ainde dindi ibu dugu bialu heane ibunaga hongo biba hayada. Irabu timbuni Lebanono dindiha wiago ibuha ira timbuni hearu homalu gabu hai hayada ibuni taga ho kagoni. Sarono dindi ulini panda panda bayale wiago yo bialu leboladaga howa mbirale mbira anda habe nahe hayada. Basana dindihabi Hari Kamelo tenehabi ira yuni hearuni gaulalu gilopebe biai hayada, lalu Aisaiahanda mbiwia hene.
ISA 33:10 Anduane Homogohanda hameigini tara tarahondo lalu, Áyu i̱na heyalu biabe berogola wali agalirume i̱ timbuniore mini lene kagoni lalu i̱naga mini yaraga holebira.
ISA 33:11 I̱naga waitigi kamiru tígua mbirale galone nahe lini nadolene ngarunaga dege wai hanalu hagaya. Manane agali mbirame ibuni mabuha howa widi gabuni mbira gandulo yalu porobe toba karia datani hangu gandulo yinidane handagadagua bialu kamigoni. Tí biabe erekuibi bialu kamiruni bibahende ira dene delalu kamigo mani tíni urunime dolebira.
ISA 33:12 Da dege bialu ira anihe ko karubi datani ko bu karu mbirani mo yu mogo buwa delaragola bibahende dalu be abalu hagadagua tí aniore bulebira.
ISA 33:13 Aniore bulebirago ai wali agali kaware oali hene kamirubi dindi kaundiani kamirubi bibahendeme i̱na biabe hongohe bialu kogo hale halimu. Hale howa tígua Anduane Homogo hongo taraorehe mini lene daligaore kagoni laga bialu holeberemi.
ISA 33:14 Hari Saiononi wali agali mana ko bialu karume mogo lowa duru lalu howa lalu, Anduane Homogonaga lembo holene ira dene hongohe hundia nabiaga daho wiaga ngaligobi wuwa mbirale ngaru bibahende dai hagadagua biagayago. Ai ogoni ibu kagoha ina kamaru aria mbirali aiwa haparaho holeberemabe, laya.
ISA 33:15 Agali mana bayale tigabi ngadagua bialu bi henene dege laga halu mendeali karu ke̱ howa mo hondo nahaga karu ti dege yu wahene holebira. Agali mendeali kagohondo i̱na í̠naga ke̱ howa bi la holiya muni ngi nalagabi mana ko ngubi ngaru biaha lowa muni ngilo henge namiagabi mana ko biaga karubi agali homelo bo wahaga karu baba mandagi nahagabi howa
ISA 33:16 uruni bibahende hogorale biaga karu ti bayaleore holebira. Agali ogonidagua biaga karu ti hari nene bare ngaruha agali napiaga peago teneha ha do haradagua bulebira. Ti bope halu hengedape holene mbira naheha howa tomo ibabi karulapeore nalu holene ngelowa holebira.
ISA 33:17 Kini mbira ibugua aga bayale ngaru karulowa tínaga dindi timbuni yangale ngane lone handayaho holebirago tígua de hondoleberemi.
ISA 33:18 Ani bialu horo tí mo ko holene genda tandagala abale tíha anda ibiyaru mitangi budai buwa lalu, Waitiginaga ami haru hagane agali haguane abale ogoria ibuwa inanaga muni wimaru mo daga lowa tale biaga hearuni agoha kadabe. Ami haru hagane haguane maru abale ogoria ibuwa inanaga amiru tinaga mamage haga anda luni biaru bibahende dagala a̱i̱ haga biaru nde agoha kadabe loleberemi.
ISA 33:19 Tígua agali dindi tara tara howa ibiniru ti minehe tininaga mini yaraga haga o biaruninaga dengui lone nahondoleberemi. Tinaga bi tara tí hale nahene ladagadaga bialu haga biaru lone hale naholeberemi.
ISA 33:20 Hari Saiononi inanaga horo timbuni ibirangi turu halu lotu lole mo ngoai haga wirimago handadaba. Yarusaleme ogoni inanaga dindi bayale gi nahe hada payabu birulene o ngagoni handa naberemi. Agalime balai anda gialo yalu pole lowa gialalu karia ira dindiha wayago hongohe halu pu daba heneru hongohe agalime hadabe nahe wiraligobi ngagola Yarusalemeore agalime bo gialabe nahe hongoheore haho wiaabo holebira.
ISA 33:21 Anduane Homogo ibuni wá taraore holenebi hongohe mini lene kagobi inahondo walia holebira. Yarusaleme ibu dindi baya taraore ngagoria iba emene timbuniru ibuha howa dugualu purogolarago angeha holeberema. Iba uruni poragoha wai biaga iba sibiru anda naibabehe holebira.
ISA 33:22 Anduane Homogo ibuni inanaga haru haganebi mana bulene ngaru langiagabi inanaga kini howa ibunime ina baya hangu handayaho holebira. Ani biragola inaha genda tandagaru mbira anda naibulebira.
ISA 33:23 Waitigirume Yarusaleme tano karulole biyaguabi tigua karulabe nahe wulebira. Iba sibi yaga karume sibi yalu pole lowa puyabume pulo yalu pelo lowa aga yangale timbuni mbira iba sibini dariba haga biaru hadape halu karia pu aga uruni dariba henedaru hadapaya bidagola puyabume pulo yalu pobe nahe hilope hagadagua holebira. Ogonidagua biragola waitigirume tinaga dabudabu wiyadaru yu wahai halu ibida piai holebira. Piaiore haragola wali agali Yarusalemeha karume gerai lalu puwa mbirale yu wahalu piyadaruni ti mo yulebira. Agali ge kohe maru karu tibi nde ibalu kamiria wali agali ti mo yalu pialu howa mbirale ibira heneru ti karulapeore mo yagayaga bulebira.
ISA 33:24 Horo ogoningi Yarusalemeha karu aria mbiralime lalu, I̱ hagua warago beda, lalu nalolebira. Ani helowa inanaga Anduane Homogohanda ibunaga Yarusaleme wali agalirunaga ko bu hayadaru domo wahai holebira, lalu Aisaiahanda mbiwia hene.
ISA 34:1 Wali agali hameigini tara tara kamiru bi ogo hale hole íbu ngoai hadaba. Dindi bibahendeni kamiru tí bibahendeme bi ogo baya hangu hale mia howa hale hadaba.
ISA 34:2 Anduane Homogohanda dindi bibahendehabi dindi uruninaga ami karu bibahendebi ibunaga keba holene timbuniore tíha wiaho kago. Ai tíore bibahende homai helolebero laya.
ISA 34:3 Homenerunaga tingini mbiralime mo hora nahe ona homo payapaya bima pedagola wialu dindini ngu timbuni bulebira. Tinaga darama hari ngarunaga ta̱la̱payabu wulebira.
ISA 34:4 Nibi egebi yakundi bu karubi dugupebe bialu ereba hai holebira. Hari li ngago ibu beba bobu mabu biradagua bialu pu ereba holebira. Yakundi harini haga karuni bibahendeore gerebi yuniru poge yuniru gau lalu dogolope haralidagua dindini gilope holebira.
ISA 34:5 Anduane Homogohanda lalu, I̱ninaga keba holene wai biagane ayu tibu ne gadele mbira hari daligaha manda mandabu wirugo ai i̱nime abale Idomo wali agali biaru baba wai bu pole kogoni. Ani bidogo áyu agali uruni bole pelo yupe harogoni, laya.
ISA 34:6 Ani biragola nogo sibi memerunaga darama habanerume loma bo delole bowa podalu hene agali karunaga gini budahaga biagadagua Idomo wali agali uruninaga darama habaneru Anduane Homogonaga ayu tibu ogoriani budahaga bulebira. Anduane Homogohanda Idomo dindini Bosara tano ngagoha wali agali dewaore balu ibuninaga loma timbuniore bo delagadagua delolebira.
ISA 34:7 Ani bialu Anduane Homogohanda uruni biragola nogo bulumaga wangaberu bo podo paya biralidagua wali agalinaga darama habanerume Idomo dindi goba halu holebira.
ISA 34:8 Ani birangi Anduane Homogohanda ibunaga tano Yarusaleme pele mulebira. Ani bialu wai tigirume Yarusaleme bo gialo wahalu mo ko hole manda biyagonaga horo ogoningi Anduane Homogo ibugua pani badai bulebira.
ISA 34:9 Anduane Homogohanda Idomo dindiha iba pedaru mo wagaya ale halu dindini be abalu ngaru mo ege to̱le̱ ale ambuabi mini soloba helalu dindi ngaruni irame wagaya ale daradagua bialu dolebira.
ISA 34:10 Ira ogoni hundia nabuleore mbiraga horombebi hagua pau̱ lalu hongo howa daho wiaabo holebira. Ani bidagola Idomo dindiha wali agaliru mbira napiaga dindi koorene ko mbira wiaabo holebira.
ISA 34:11 Dindi ogoniha ega neneru ega umi ale tara tararu hangu birulebira. Dindi ogoni Anduane Homogohanda mo koore halu mbirale mbira naheore pigane ibuni dindi ogo nawabiangi winigobiore ngelolebira.
ISA 34:12 Idomo dindi handayaho holene agali haguanebi mbirali naholebira. Ani bidagola tinaga dindi ogoni handayaho hagane kinibi nahe wialu bidagola dindi dabulu naina wulebira.
ISA 34:13 Ani bidagola dindi ogoniha agubandu mamuni aniherumebi datani bolage timbunirubi anda howa timbu halu kini andagaru namulai halu anda maru bu karubi namulai dege holebira. Urunibi ngagola anda uruniha ega umi bedaru palu iriari bialu biango dudu ale bu karume titua lo holebira.
ISA 34:14 Ema bialu dindini piagaru wali agali nahaga ngaruha biraga bedaru dindi ogoniha íbu biralu dama wali bolomehe bedaru ti mbiraga ibagabu howa anda uruniha palialu pugu bulebira.
ISA 34:15 Ega umi mbiraga biraga bedaru tinaga igini habane anda tabuanda uruniha ngelowa mamage tininaga babaganerume yabula dambi howa paligi bulebira. Ani bidagola boda hariawe wangabe angibunibi anda uruniha ibalu bira dege dege bulebira.
ISA 34:16 Anduane Homogonaga mbuga ngagoha daga lowa handalu keria bi ogodagua gilibu winigo nga. Ega bedarubi dindini ema bialu piaga bedarubi angibunibi wangabebi mbuga ogome layaru Idomo dindiha bibahendeore íbu birai holebira. Uruni aria mbirago naibu nabulebira. Anduane Homogohanda ibilole ledaru bibahendeore ibai holebira. Anduane Homogo ibuninaga Dininime uruni bibahende mo mogo bialu haru ibaiore holebira.
ISA 34:17 Dindini ema bialu piagarubi ega bedarubi ti dindi ogoni helonaga Anduane Homogohanda Idomo dindi bibahende ogobi degedege tale bialu mbira mbirahondo tahai holebira. Ani biragola dindi ogoni uruni tinaga wiaabo holebira. Bi ogoni ani gilibu winigo nga, lalu Aisaiahanda mbiwia halu lene.
ISA 35:1 Dindi ko wali agali nahagaha mbirale anda habe nahe ngarume turu holebira. Palawaya tara tara dindi uruniha anda halu bayale dolebira.
ISA 35:2 Dindi yobi koore ogonime turu howa ga̱ lalu iba gana lolebira. Dindi ogoria Lebanono hariha irabu timbuni bayale ngagobi baya taraore wulebira. Sarono dindibi Kamelo dindibi benebere bayale ngagobi wulebira. Ani bidagola wali agali bibahendeme Anduane Homogonaga wá holene de hondolebira. Ibunaga mini timbunibi hongo holenebi ogoningi handai holebira.
ISA 35:3 Ani bulebirago áyu tígua wali agali hongo nahe karu mo hongo halu wali agali bu miniha gi howa duru lalu karubi mo hongo halu halimu.
ISA 35:4 Wali agali mini dege dindi howa burugulo karu lamialu, Tí gi nahe hongoho hadaba, lalimu. Ngode Datagaliwabe ibugua tí pele ngialu haru dai bule ibira. Tínaga waitigi karu bo hilo wahai hole ibiragoni, lalu lamilimu.
ISA 35:5 De kohe karu ti de bayale hondolebira. Hale tuluhe karu ti hale bayale holebira.
ISA 35:6 Ge kohe karu ge bayale howa pogolo daga halu mali liama ibaga bulebira. Bi nalaga karume bi bayale lalu turu halu bi ladagadaga bialu holebira. Dindi ko yobi ngaruha iba dugualu polebira. Dindi ko wali agali nahaga ngagoha iba bayaleore duguaga duguaga bulebira.
ISA 35:7 Ala dindi yobi koore iba mu poboheore wini wiagoria iba kuyama timbuniore íbu birulebira. Dindi ko dalu naibaga ngaruha iba bayaleore duguaga duguaga bulebira. Biango duduru hangu haga wiagoria mani dindi bayale ibane bere halu datani gamberu andaho holebira.
ISA 35:8 Dindi ogoniha hariga timbuni mbira polebirago ogoni mini Anduane Homogonaga Hariga Baya Buruguleore lalu wulebira. Wali agali mini kowi karu hariga ogoriani napolebira. Anduane Homogonaga mana tigabi bialu haga karu ti dege polebira. Wali agali mini nawi lulu ale karume wali agali maru hariga ogoriani pialu karu mo hondo naholebira.
ISA 35:9 Budi gabua ale timbuni mini laiono karubi napolebira. Nogo gabua tara tara maru karubi hariga ogoriani mbira napolebira. Wali agali Anduane Homogohanda pele mialu haru dai biniru ti dege hariga ogoriani pialu anda polebira.
ISA 35:10 Wali agali urunime ti turu timbuni howa iba gana dalimu ladagadaga bima hariga ogoriani pialu Yarusaleme anda polebira. Anda ibiraru tiha tandaga holenebi genda yu holenebi mbira nawiore howa ti bayale hangu howa turu hagabu haaboboore holebira, lalu Aisaiahanda mbiwia hene.
ISA 36:1 Hesegaia ibu Yudanaga kini howa mali deria (14) heagola Asirianaga Kini Senageribi ibugua ibunaga ami agali hearu haru ibalu Yuda dindiha tano wai pabe hongohe bu mabu bini wiaru karulai hene. Anigo Yarusaleme dege nakarule wini.
ISA 36:2 Ani buwa Kini Senageribi ibugua Lagisi tanoni howa ibunaga ami agali haru haga haguane heago ami agali dewa hearu heba Yarusaleme pudaba lene. Ani pudaba laya handala puwa tigua Yarusaleme tanonaga pabe tagirahayagi iba dadabu yu anda ibini wiagoria pu hene. Iba dadabu anda hene ogoni abene aga wabiaga wiagoha pole hariga pu íbu biaga peagohayagi wini.
ISA 36:3 Ani íbu heagola Isaraelenaga agali haguane tebiralirume Asiriali hondole tagira pene. Hondo penedaru tinaga mini uru. Kini andaga mamage haga Hiligaia igini Eliagimi henegobi kininaga bi gili bia dagala biaga Sebenabi kini ibugua birago damene bibahende bebani gilibu wiai haga Asaba igini Yoa henegobi uruni tigua hondo pene.
ISA 36:4 Agali tebirali uruni ti Asiriali íbu hene biaru hearia piyagola Asiriali ami haru haga haguane mbira heneyagome bi hongo howa tihondo lalu, Asirianaga kini hongohe biagonaga bi ogo Hesegaia lamule pudaba layago. Ibugua ogodagua laya, Hesegaia í̠naga hongo abialeore howa andaneha holene hame nale kebe.
ISA 36:5 Bi bame lo payapaya beregome wai bialu wayali hagabe. Í̠na i̱hondo mine harigo. Í̠ biamogo bulene mbira ai ibulubadalo manda buwa i̱hondo mine halu kebe.
ISA 36:6 Iyibiali karume ibalu í̠ biamogo bialu wai bia hole ibilo malia howa handayaho kegoni i̱ manda bido. Anigo i̱na í̠hondo langerogo Iyibiali uruni bame gambe hale podalahe ngaligobi ka. Gambe hale ogonibigome halimbu yulene karulapebe toba howa mo yu kegola gambe hale ogoni tagala puwa í̠ninaga gi kenda piagadagua Iyibinaga kini kago ibugua mana biagago manane gambe hale ogonibi ka. Ani biaga kagome ibugua í̠ pele ngialu wai bia hole naibulebira, lalu lamibe laya.
ISA 36:7 Asiriali haru haga haguane biagome laabo halu lalu, Anigo Hesegaia í̠na ina langialu, Iname Anduane Homogo inanaga Ngode Datagaliwabe kago yu tiga bu kamago ibugua ina biamogo bulebira, lalu languleberebe. Hesegaia í̠nime Anduane Homogonaga lotu lolene anda hearu bo gialalu lomabu delaga dabu wiarubi gialo wahai harigoni. Ani bialu í̠na Yuda wali agali bu hearu bibahende Yarusaleme hangu ibai halu lomabu delaga dabu mbiraore ogoni hanguni lotu lole ibai hadaba, larigoni.
ISA 36:8 I̱naga kini ibugua bi marubi la dege bialu lalu, Kini Hesegaia í̠na agali nogo hosini biruwa wai bulene ami agali daosini kira (2,000) karulape taya bibeheyagua nde hosi daosini kira (2,000) bame ngulebira laya. Anigo i̱na manda bialu koria í̠na agali urunidagua naheore kegoni.
ISA 36:9 Ani howa í̠na mandabu handalu keria Iyibime nogo hosirubi wai biagane karisirubi heba ibuwa í̠ biamogo bialu wai bulebirabe tobaho kegoni. Anigo ti naibulebira ndobe. Ani bulebirago ai í̠ni hangu kegoni howa ina ami emene hangu hemayaguabi í̠na ina bope habe naheore kamagoni ndobe.
ISA 36:10 I̱ íbu kogoni i̱ninaga minime í̠ baba wai bialu í̠naga dindi ngego bo labu hole íbu kabe toba ho kebe. Ani ndoyago. Anduane Homogo ibunime i̱ langialu í̠ baba wai bialu dindi anda o ngaruni bo gialabaga bialu mo labu habe lalu i̱ langiya, lalu ami agali haru haga haguane biagome lene.
ISA 36:11 Bi ogoni layagola Eliagimibi Sebenabi Yoabi tigua hale howa Asiriali ami haguane biagohondo lalu, Ina Siria bi hale haga kamago í̠na bi ogoni larego Siria bi lalu langibe. Í̠na Hiburu bi laregola wali agali maru uyu ege pabe daligani bu karu tigua hale holigo nalabe, lene.
ISA 36:12 Ani layagola ami agali haguane biagome ladai bialu lalu, Bi o larogoni i̱naga kini kagome tíhondobi tínaga kinihondo hangubi lamule pu lene ndo laru. Maru uyu ege pabe daligani bu karuni tibi bibahende bi ogoni hale helo laro. Ani larogoni irane iname ibalu Yarusaleme wai bule ho hagirabu anda haramangi genda timbuni tí bibahendeha ibulubadane laro. Anigo maru uyu ege pabeni handape ho karuni ti tomo nolene nawidagola tininaga ti to wuwa nalu iba noa biragola pu to nolebira. Tí kamirunibi anidagua dege buleberemi, lene.
ISA 36:13 Ani lowa Asiriali ami haguane biago ibugua agali maru ege pabe daligani handa daliho hearume hale helo Hiburu bi hongo howa ladaga howa lalu, Agali kini hongohe Asirianaga kini biago ibugua bi layago languliya baya hangu hale mia howa hale hadaba.
ISA 36:14 Hesegaia ibugua tíhondo ke̱ halu mo hondo helo nahalimu. Tí bayale halimulo mo wialu Hesegaia ibugua i̱ bope habe nahe ka.
ISA 36:15 Ibugua lalu, Anduane Homogohanda tí biamogo biragola Asirialime tí mo ko halu tínaga tano Yarusaleme nakarulolebira, layagua bi ogoni henene ndo larago mo henene nahalimu.
ISA 36:16 Tígua Hesegaianaga bi larago hale nahalimu. Tígua i̱la wai bulene manda nabilimu. Asirianaga kini ibugua bi layago ogo, Tí bayale howa tíninaga iba hambiaga iba uli ngamiruha howa hambu nalu tínaga mabuha pu mbira lini daga mini gerebi lini dedarubi poge lini dedarubi do nalu bayale holene manda bu kamiyagua nde tínaga tano i̱ karuloliya wahalimu, laya.
ISA 36:17 Ani kamiria i̱na ibalu tínaga tano karulalu tínibi dindi mende baya gibiore tínaga dindi o kamigobi dege ngagoha haru pu heloliya, laya. Dindi mende bayaleore ogoniha waini iba wabule pu mbira mini gerebi lini daga mabu dewa wialu mberedi wabulenenaga nde widi maburu dewa dege nga, laya.
ISA 36:18 Hesegaia ibugua tíhondo lalu, Anduane Homogohanda tí biamogo biragola tígua ina bope holeberema, layagua ibunaga bi ogoni mo henene nahalimu. Tígua manda bialu kamiria dindi maru wiarume ina Asiriali baba wai biyagola tinaga dama tara maru hearume ti biamogo biyane handarimibe. Nabiore ndobe.
ISA 36:19 Iname pialu Hamada tanohabi Abada tanohabi Sebabaimi tanohabi uruni baba wai birimangi tinaga dama henedaru agohayagi pu howa wali agali biamogo bialu hearia handarimibe. Ani bialu iname Samaria anda puwa wai birimangi tinaga dama henedarume ti mo wialu ina bope hayane handarimibe. Nabiore ndobe.
ISA 36:20 Iname dindi dewani tinaga dama henedaruni helowa ti baba wai birimagoni. Ani birimangi tinaga dindi bayale ngelo dama urunime ti biamogo bialu ina bope naheyago. Ai Yarusaleme wali agali tígua tínaga Anduane Homogohanda biamogo biragola ina bope holeberema lalu agua manda buwa larimibe, lene.
ISA 36:21 Asirianaga ami agali haguane biago ibugua bi lai heagola agali ege pabe daligani handape ho hayaru tigua bi mbira ladai nabi handayaho haabo hene. Ani handayaho hayadagoni irane Kini Hesegaia ibugua tihondo bi mbira Asiriali urunihondo nalalimu lenego manda buwa ti bi nale hene.
ISA 36:22 Ani biyagola Asiriali biago ibugua bi layagome Eliagimi Sebena Yoa imarume bu miniha genda timbuni ho hene. Ani howa tininaga aga minu budalu Kini Hesegaia bereria puwa Asiriali biagome bi layaruni bibahende ibuhondo lamiai hene.
ISA 37:1 Hesegaia ibugua Asirialime bi uruni layago hale howa ibu genda timbuni halu ibunaga aga minu lere lene. Ani bialu ibugua dara howa walia halu aga biaga wiago mo karulalu Anduane Homogonaga andaha anda pene.
ISA 37:2 Ani puwa Hesegaia ibugua kini andaga mamage haga Eliagimibi kininaga beba gili biahaga Sebenabi loma binigo mo miaga ala hene maru hearubi olalu ibidaba lene. Ibiyagola Anduane Homogonaga bi mana latagi haga agali Emoso igini Aisaia hondole pudaba lene. Agali uruni tibi nde dara howa walia halu aga biaga wiaru mo karulo hene.
ISA 37:3 Ani bialu Hesegaiahanda tihondo bi ogo Aisaiahondo lamilo lawia halu lalu, Horo áyu bu miniha genda yu holene wiyada. Asirialime ina mege timbuni biyagola taga timbuniore ho kamagoni. Ina walime gali taba honolene tu biruwa ibu hongo nakarulape howa taba hanabe nahedagola genda timbuni ho biragagobi ina bedamagoni.
ISA 37:4 Asirianaga kini kago ibugua ibunaga ami haru haga agali haguane heagome Anduane Homogo inanaga Ngode Datagaliwabe haluheore kagohondo mege bialu bi ko lole pu layada. Bi ko uruni hale howa Anduane Homogo ibunime agali bi ko lagadaru mana bilo hameledo. Ani hameledogo ina wali agali emene dagalene hangu kamaru biamogo bilonaga í̠na Anduane Homogohondo bi lahabe, lalu Kini Hesegaiahanda lawia hene.
ISA 37:5 Aisaia ibu Hesegaianaga bi layadago hale howa
ISA 37:6 ibugua agali bi yalu ibiyadaruhondo lamialu lalu, Tígua Kini Hesegaia bedaria dai buwa Anduane Homogonaga bi ogo ibuhondo lamilimu. Anduane Homogohanda lalu, Í̠na bi o layadaruni miniha mo pehalu gi halu genda holeni. Í̠hondo bi ko layadaru Asiria kini kagonaga biabe biahaga agali nahabane damene bu hearume bi nagalone ogoni layadago wahabe.
ISA 37:7 Ani larogoni irane Anduane Homogo i̱nime Asiria kini kago mo luluya helolebero. Ani berogola ibugua bi mbira hale halu ibuni dalu dai bulebira. Asiria dindini daibu kagola i̱na agali marume ibu homelo bo wahelolebero, laya lalu Aisaiahanda lene.
ISA 37:8 Asiria ami haru haga agali haguane biago ibugua Kini Senageribi ibu Lagisi tano yu wahalu piya layane hale hene. Ani layane hale halu ami haru haga agali haguane ogoni ibu Yarusaleme yu wahalu dai buwa hale halu hearia kini ibu Libina dindiha wai bialu ka layago hale halu ibu hondole pene.
ISA 37:9 Asirialiru ti wai bialu hearia agali maru ibuwa Kini Senageribihondo lamialu lalu, Idiobia dindinaga Kini Tihagahanda ibunaga amiru haru halu í̠la wai bule ibira, lene. Ani layago hale howa Senageribi ibugua Yarusaleme karulole mandabu heaorego beba mbira abale gili bialu Hesegaia hearia pelene.
ISA 37:10 Beba o gilibu wia henedagoniha bi ogodagua lalu gili bini. Tínaga mbirale hanaho kamigoni ibugua lalu, I̱na tí bope halu Yarusaleme karuloliya yupe naholebero, layago bi ogoni henene ndo ke̱ haya. Ibunaga bi ogoni mo dunubia nahabe.
ISA 37:11 Ina Asirialinaga kini bu kamarume biaga mana í̠ni manda biai ho kegoni. Iname dindi mbiraha wai bu puwa uruniha ngaru bibahendeore bo haealabagabu waharamaligo í̠ manda bide. Í̠na mitangibu handalu keria í̠ daluha ogonidagua nabulubada lo manda bidebe.
ISA 37:12 Bamba i̱naga mamaliru tigua wai bialu Gosana tanobi Harana tanobi Lesebe tanobi bibahende bo haealabaga bialu Bededene hameigini Telasa tanoha palearubi bo wahai hene. Ani biyagola tinaga dama bu hearume ti bayale helonaga biamogo mbira nabiore.
ISA 37:13 Hamada tanonaga kini henerubi Abada tanonaga kinirubi Sebabaimi tanonaga kinirubi Hena tanonaga kinirubi Iba tanonaga kinirubi mbira áyu heabe. Mbira naheore ndoyabe. Iname uruni bo wahai harimagoni, lalu gilibu wia hene.
ISA 37:14 Kini Senageribi ibugua beba gilibu wia halu yalu pu lenedarume yu ibiyagola Kini Hesegaia ibugua yamini. Yamialu bi bebani gilibu wiyadaruni dagalai howa ibugua beba ogoni Anduane Homogonaga andaha mo yu anda pene. Yu anda puwa ibugua beba ogoni Anduane Homogo ibuni hagani mo tiga buwa angalaho ngelene.
ISA 37:15 Ani ngelowa Hesegaia ibugua Anduane Homogohondo bi lalu,
ISA 37:16 Anduane Homogo Hongo Haiheore-o í̠ Isaraele wali agali inanaga Ngode Datagaliwabeore kegoni howa dahuliyali bu karu bolangua halu í̠ninaga biragane ngegoria bedegoni. Í̠ hangu Ngode Datagaliwabeore henene howa í̠na dindi bibahende ngaruniha handameho haga kegoni. Dindibi hari daligabi í̠nime wabiai hene kegoni.
ISA 37:17 Anduane Homogo-o i̱naga bi larogo baya hangu hale halu inaha mo ko holene o tagira ibiragoni í̠nime de handabe. Senageribi ibugua bi ko Ngode Datagaliwabe haluhe í̠ kegohondo layadarunibi hale habe.
ISA 37:18 Anduane Homogo-o Asirianaga kini hearume dindi maru wiaruha anda puwa wai bialu wali agali dewaore bo wahai halu mo ko hai hayaruni manda bu kama.
ISA 37:19 Ani bialu tigua wali agali tinaga dama mitangi bialu gime wabini wiaru iraha delai haya. Dama mitangi bialu gime wabini uruni ti Ngode Datagaliwabe heneneore kegobi ndogome tini mo ko hai haya. Mbirale uruni agalime ira dibalu pelowabi ege to̱le̱ poda tiga buwabi wabini wini.
ISA 37:20 Anduane Homogo inanaga Ngode Datagaliwabe-o í̠na ina áyu biamogo bialu Kini Senageribinaga giha howa yamibelo hame ledo. Wali agali dindi bibahendeni bu karume Anduane Homogo í̠ni hanguore Ngode Datagaliwabe heneneore henedane manda bilo aniore bibelo hamelo kogoni, lalu Kini Hesegaiahanda lene.
ISA 37:21 Anduane Homogonaga bi mana latagi haga Aisaia ibugua Hesegaiahondo bi lawia halu lalu, Anduane Homogo Isaraele wali agalinaga Ngode Datagaliwabehanda í̠naga bi larigoni hale howa ibugua lalu, Í̠na tí biamogo bialu Asirialinaga kini kagome mo ko holigo biamogo bia, larigoni.
ISA 37:22 Anidagua larigo Anduane Homogohanda Asirianaga Kini Senageribihondo bi ogodagua laya, Senageribi-o Yarusalemeha karume í̠ore mege bialu hondo oba haragoni.
ISA 37:23 Í̠na í̠ninaga mini yaraga halu mege bialu bi ko lalu harigoni aihondo bero lalu biribe. Í̠na urunidagua bialu harigoni i̱ Isaraele wali agalinaga Ngode Datagaliwabe baya burugule kogohondo yo handarigoni.
ISA 37:24 Í̠na ami haru haga agali haguane hearuhondo bi ogoni lole pu larigola tigua í̠naga mini yaraga halu i̱hondo mege taraore biya. Tigua i̱hondo mine halu lalu, I̱na i̱ninaga karisi wirugoriani howa Lebanono dindini hari nene daligaore ngaru áyu dege iraga halu pirugoni, lari. Ani larigola tigua mine dege halu bi marubi í̠ni ogodagua larigo lalu, I̱na Lebanono irabu timbuni ngago dombeneha anda pu howa ira mini lene bayale luniore tamia hearubi guriya ale mini saiberesi hearubi i̱ni dibai harugoni ndobe larigoni, laya.
ISA 37:25 Í̠na ogodagua larigo, I̱na dindi maru taraha pirungi i̱ iba noa nahe haru, lari. Dindi ko yobi iba nabere wiagoha i̱na iba uli tombo wiwagoha iba birayagola i̱naga dameneru ti karulape naiore haya, lari. Ani lalu í̠ Iyibi dindiha iba Naili timbuni pedago í̠naga ami agali biarume domalu piyagola tinaga geme iba mo hundia haya larigoni, lalu Anduane Homogo ibugua bi ogoni Aisaiaha howa lene.
ISA 37:26 Ibugua laabo halu lalu, Senageribi-o bambaore howa i̱nime manda bialu í̠na urunidagua bialu kego bibelo i̱na í̠ dabenego í̠ manda nabi kegoni. Tano wai pabe hongohe bu mabubi hearuni bo gialabaga bibelo i̱na hongo ngirugoni. Ani ngirugome í̠na i̱naga mini wiwago hangu talialu tano biaruni bo gialabagabu wahai harigola áyu ege to̱le̱ wiaruni gindulo payabu wialu nagalone bu hinu ngagoni.
ISA 37:27 Wali agali tano uruniha haga hearu ti gi timbuni hayagome tinaga mini ndibu lalu hongobi ereba haya. Ti hongo nahe ni tagira ibiragohayagi howa puyabu poboyogobi ibiragome datani dindini andaho karubi anda dangini andaho karubi hongo nahe gaulai hagadagua ogonibi wali agali uruni ti hene.
ISA 37:28 Anigo i̱na í̠naga mini ngeru manda biai ho kogoni. Í̠na mbirale bialu kegonibi ibaga bialu keriabi bibahende i̱ handaiore ho kogoni. Í̠naga miniha i̱hondo keba timbuni ho kegonibi i̱ manda bu ko.
ISA 37:29 Í̠na miniha keba ho howa bi larigobi mine bi lalu í̠ninaga mini yaraga hole bima ibaga bialu kegonibi i̱ manda biaiho kogoni. Anigo áyu í̠hondo bi hongohe mbira laro. I̱na aeane mbira wangobi ngagome í̠naga nguiha wango bialu nogo hosinaga ne harigaha banga bia helaga ngagome í̠naga ne harigaha bangabia helolebero. Anidagua buwa mani í̠ni ibirigoha dai bibelo gililo yalu haru dai bulebero laya, lalu Aisaiahanda lene.
ISA 37:30 Ani lowa Aisaiahanda bi mbira Kini Hesegaiahondo lalu, Anduane Homogohanda Senageribihondo bulebero layago heneneore layada manda bibelonaga manane mbira walia holeberogo ogo. Tígua mali áyu kamagonagabi mali edegonagabi tínaga mabuha tomo mbira hangabe nahe holeberemi. Widiru mabuha minana andaho kagola do nalu holeberemi. Anigo mali ederagonaga tínaga mabuha widi tínime hongowa bu noleberemi. Ani bialu pu mbira lini daga mini gerebi hongowa lini do nalu holeberemi.
ISA 37:31 Ani biragola Yuda wali agali maru waitigime bo wahai nahe yu wahene biaru ti bayale howa ira pini dindihaore anda puwa lini bayale dewaore daga labe nahe dedaligobi ti dewaore ho damebu holebira.
ISA 37:32 Yarusalemehabi Hari Saionohabi waitigirume wali agali nabe yu wahene maru holebira. Ti ani helo Anduane Homogo Hongo Haiheore kago ibugua uruni biai hole mandabu henego ka, lalu lamini.
ISA 37:33 Anduane Homogohanda Asirianaga kini kagome bulebira lalu lenego ogo. Ibugua ibunaga ami bu karu haru halu Yarusalemeha lone anda naibulebira. Tinaga timu mbira hangubi tano ogoha baanda naholebira. Ami agalirume wai humbi yalu tano ogoria kaware naibulebira. Tanonaga wai pabe kagoria ami uruni tigua wai bule lowa dindi dugu wima irigi habe nahe holebira.
ISA 37:34 Asirianaga kini ogoni ibu tano ogoniha anda ibalu karia naanda ibabehe lalu ibuni ibiyadagoha beregedalu dai bilolebero. I̱ Anduane Homogo i̱na bi o ledogoniore.
ISA 37:35 I̱na ogonidagua buleberogo irane i̱ninaga mini timbuni leneore kogoni mitangi bialubi agali i̱naga biabe biahaga Debidila habo nalolene bi lo wirugo mitangi bialubi anidagua bulebero, laya lalu Aisaiahanda lene.
ISA 37:36 Horo ogoningi mbiraga Anduane Homogonaga dahuliyali mbira Asiriali ami hearunaga balai anda bu hearuha puwa ami agali daosini dege handari mbirani pira halirani duria (185,000) bibahende bo wahai hayagola homai hene. Horo mendengi gao layagola Senageribi ibu heyuwa handalu hearia homayaruninaga tingini ona wima pearia hendene.
ISA 37:37 Ani biya handala Senageribi ibugua ibunaga ami agali maru yu wahene hearu heba heyalu hariga ibiyadagua dai bialu Niniba tanoha pu hene.
ISA 37:38 Ani pu howa ibugua horo mbirungi ibunaga dama mitangi bialu gime wabini mini Nisirogo laga wiagonaga bi pupu wiaga anda heagoha anda puwa o biagohondo bi pupu wialu berene. Ani berearia ibuni igini kira mini Adaramelege Sareselame ayu tibu wai biaga wiagome libu aba Senageribi dibayagola homene. Ani bialu libuni ibida pialu Ararada dindiha ha do hole pene. Ani biyagola mani Senageribi igini tebone mini Esahadono henegome ibu abanaga henge mialu ibuni Asirianaga kini ha aribia hene.
ISA 38:1 Asirialirume Yudali baba wai bialu mo ko halu heangi Kini Hesegaia ibu warago timbuniore bowa homabeheore wini. Ani homabehe wiaria Emoso igini Aisaia ibu Anduane Homogonaga bi mana latagi haga heagome Kini Hesegaia warago bo wiago hondo puwa lalu, Í̠naga warago ogoni dabi nahe ani bo wiaho wialu homolebere. Ani homoleberego manda buwa ai wali agali í̠ andagaha haga karuni lamialu, Tínaga biabe biaga wiyadagoni mo tiga biai hadaba, lalu lamibe, Aisaiahanda lamini.
ISA 38:2 Bi ogoni layago hale howa Kini Hesegaia ibu beregedalu dengui anda hai heagoha handa ede ho wuwa ibugua Anduane Homogohondo bi lamialu lalu,
ISA 38:3 Anduane Homogo-o i̱na í̠ni hanguore talima ibalu í̠naga biabe hangu biahalu harugoni. Í̠naga hame wiru bibahende i̱na talialu biai harugoni manda bibe, lene. Ani lai howa ibugua dugu timbuni hongo howa bialu berene.
ISA 38:4 Ani bialu bereagola Anduane Homogohanda Aisaiahondo lone lamialu lalu,
ISA 38:5 Hesegaiahondo bi ogodagua labe. I̱ Anduane Homogo í̠ mamali Debidinaga Ngode Datagaliwabe kogome í̠na bi larigo hale halu dugu bialu beregobi handaru. Ani birugo ainde í̠ mali nguiria (15) lone halu homabelo helolebero.
ISA 38:6 Ani bialu i̱na Asirianaga kini kagome ibalu wai buwa Yarusaleme karulelo yupe naholebero, laya lalu Aisaiahanda lene.
ISA 38:7 Aisaiahanda ladai bialu lalu, Anduane Homogo ibugua í̠hondo mbirale bulebero laragoni heneneoredalo manda bibelonaga manane mbira mo walia holebira.
ISA 38:8 Manane ogobi. Bamba Kini Ahasa ibugua egageria mbira wabu wini biago í̠ manda bidegoni. Egageria biagoria ni munini manane handaga biagoria kagola Anduane Homogohanda abaleore ni manane hobane pira dai bilolebira, laya. Ani layadagua ni manane hobane pirani dai biyaria hendene.
ISA 38:9 Hesegaia ibu warago bo wiyago dabiho howa ibugua Anduane Homogonaga mini yaraga halu iba gana ogo gilibu wini.
ISA 38:10 I̱ni mitangi bialu aiore nde i̱ wene daliahe koore dege homalu nde homenerunaga dindi ngagoha pu holoboda. I̱ dindini holenenaga lu naholoboda mitangi biru.
ISA 38:11 Wali agali dindini nahome karu baba howa i̱na Anduane Homogo de nahende holoboda. Wali agali maru homa nabi karubi mbira nahondoleorebero mitangi bu haru.
ISA 38:12 I̱ homo tongolo mini ale kogoni. Agalime balai anda gialo paulo ngagobi labolabo wabialu henego podope hagadaguabi binigo kogoni. Ngode Datagaliwabehanda i̱naga dindi ogoriani holene biba helolebiya mitangi bu harugoni.
ISA 38:13 Laionome mbirale baragonaga kuniru gingiru lalu biralu gao lagadagua i̱na horombe mbiragabi i̱ tandaga nalu homoliya abale bo waharegonidalo mitangi biru.
ISA 38:14 I̱ha tandaga timbuniore biyagola i̱ ga̱ lalu berewagola i̱naga bi emeneore hagarerebi lalu tagira ibiya. Ega umime u̱ lalu wiagadagua dege lalu wiru. Dahuliya andagaha howa i̱ biamogo bulene mbira ibirabe hondole handadagaho bira dege biwagola i̱naga deha de mborere bialu de iba ibiya. Anduane Homogo-o genda o bu ngagoria howa i̱ biamogo bialu haru pubagi ha laro.
ISA 38:15 Ai i̱na agi loabe. Anduane Homogohanda i̱ biamogo buleore layagoni o biragonidabe be agi loabe. I̱na genda timbuni yu harugo mitangi bigi bialu áyu i̱ dindini kongi i̱ninaga mini mo dindiha halu holebero.
ISA 38:16 Anduane Homogo-o genda urunime wali agalinaga mini mo beregedalu bayale tigabi helonaga biamogo biaga winida manda bido. Mbirale genda tandagabi i̱ha ibiyagome holene gahenge ngiya. I̱naga warago bo wiwago í̠na mo wahalu i̱ mo dabi harigoni.
ISA 38:17 Mbirale genda i̱ha ibiyaruni bibahende i̱ biamogo bule ibinidane hendedo. Í̠na i̱ gubalini timbuni howa i̱ wali agali homenerunaga dindiha polilono yu wanahe biamogo birida. Ani bialu i̱na ko bibahende bialu harugo í̠na domo wahai harigoni.
ISA 38:18 Wali agali homene dindiha karume í̠naga mini yaraga nahabehe. Homene dindiha karume í̠na wali agali bayale helonaga biamogo biaga kego mo dunubia nahabehe ka.
ISA 38:19 Áyu i̱na bi lalu í̠naga mini mo yaraga halu kodagua wali agali homa nabi dindini bu karume anidagua bibehe ka. Waneigini aba karume tinaga waneigini ogodagua lamialu í̠na mbirale bayale bialu mini bilinahe kego lalu lamiaga ka.
ISA 38:20 Anduane Homogohanda i̱ mo dabi hayagoni. Ai horo bibahendengi ibu andaga pialu iname ibunaga mini yaraga halu ngida balu iba gana lalubi ibunaga mini mo yaraga hami̱ya. Ina dindini nahome kamangi howa anidagua bialu haabo holeberama, lalu Kini Hesegaiahanda iba gana ogoni lene.
ISA 38:21 Ani lai hayagola Aisaiahanda kinihondo bi lamibe layadagua lamiai howa ibugua kininaga biabe biahaga agali hearuhondo lamialu lalu, Tígua poge lini maru do yalu ibule pudaba, lene. Tigua do yu dai biyagola ibugua tihondo lalu, Hesegaianaga moge hongohe bidagoriani poge lini dambuwa ibane biagome wai haramigola moge biago abale dabi holebira, lene.
ISA 38:22 Ani layagola Hesegaia ibugua Aisaiahondo hale halu lalu, Ai i̱ dabi halu horo tebira howa Anduane Homogonaga anda poleberodagoni henene lalu manane mbira áyunaga i̱hondo agi ale walia holebiradabe, lene.
ISA 39:1 Baladana igini Merodaga ibu Babilononaga kini hene. Ibugua hale halu hearia Kini Hesegaia warago timbuni bo nga layane hale hene. Ani hale howa ibugua beba mbira gili buwa mbirale bayale mbira heba Hesegaia mo turu halu mule manda bialu ogoni yalu piaga agali maru hearuhondo mialu lalu, Tígua Kini Hesegaia karia yalu pudaba, lene.
ISA 39:2 Yalu piyagola Hesegaia ibugua ibiyadarunaga bi hale howa agali uruni haru pialu ibunaga anda timbuni heagoha mbirale tara ale bibahende mo wiaga wiagoha walia hole haru pene. Haru puwa ibugua ibunaga muni siliba ngoloru dewaore wiarubi padua ale mini sanda tingini ha̱i̱ haga weli ngabiaga wiarubi wai biagane ale dewa wiarubi walia hai hene. Hesegaia ibugua mbirale mbira wiago mo do nahe bibahende kini andagaha wiaruni walia haiore hene.
ISA 39:3 Babilono agali biaru ti dai biaha Anduane Homogonaga mana latagi haga Aisaia ibu Kini Hesegaia hearia ibuwa ibugua hale halu lalu, Agali o ibiyadaruni ti aniali ibiyabe. Tigua bi agi dege layabe, lalu hale hene. Ani hale hayagola Hesegaia ibugua ladai bialu lalu, Agali uruni tini dindi kaundiaore uyura Babilono wiagoha howa ibiyagoni, lene.
ISA 39:4 Ani layagola Aisaiahanda hale halu lalu, Tigua í̠ andagaha agile dege de handayabe, lene. Ani layagola Hesegaia ibugua ladai bialu lalu, I̱na mbirale mbira mo do nahe i̱naga mbirale wiwaru ale bibahende tihondo mo walia hai haru, lene.
ISA 39:5 Ani layagola Aisaiahanda Hesegaiahondo lamialu lalu, Anduane Homogo Hongo Haiheore kagome bi layago langero.
ISA 39:6 Anduane Homogo ibugua ogodagua lalu, Horo mbira tagira ibulebirago ogoningi agalime mbirale bibahende kini andagaha wini ngarubi bamba í̠naga mamalirume mo wigi bini dabudabu ngarubi mo yai halu Babilono dindiha yalu polebira. Tigua emeneore mbira yu wanahe bibahendeore Babilono mo yalu piai holebira.
ISA 39:7 Ani bialu igiri daliahe maru í̠ni damene karunibi garabayabu yalu pu dege bulebira. Igiri uruni haru puwa tinaga pindu nogonaga miradagua bialu Babilono dindinaga kini andagaha biabe biahaga helo helolebira laya, lalu Aisaiahanda lene.
ISA 39:8 Hesegaia ibugua bi uruni hale howa Aisaiahondo lalu, Anduane Homogonaga bi áyu i̱hondo langiriruni bayaleore langiri, lene. Ani lenedagoni irane genda uruni ibu kagola ndo mani ibulubayane manda buwa lene. Ibugua lo manda bialu, Áyu i̱ kongi mbirale mo ko holene uruni naibulebirago ina wairu nabi bayaleore holeberema, lo manda bini.
ISA 40:1 Inanaga Ngode Datagaliwabehanda lalu, I̱naga wali agalirunaga bu miniha mo hongo habe. Ti gi holene mo embeda howa elahe helo helabe, laya.
ISA 40:2 Yarusaleme wali agaliruhondo bi ogodagua lamilimu, Anduane Homogohanda lalu, Tígua ko bialu harimigonaga tandaga karulapeore nalu harimigoni. Tígua mana ko wiaru bialu harimigonaga mana lalu ai áyu ko birimiruni domo wahai hene kamigoni, laya.
ISA 40:3 Mbiralime ga̱lalu, Dindi ko wali agali nahaga ngagoria Anduane Homogo ibilo hariga ba hole manda bialu halimu. Inanaga Ngode Datagaliwabe kago ibilo hariga tigabiore ba halimu.
ISA 40:4 Dindi ulini hombene ngaru mo dondelai halu dindi hari emene timbunibi bibahende godogege biai halimu. Hariga pidipodabi ngago tigatiga wilo bo tiga bialu hariga ko ngago bayuwa mbaralalu mo tiga bilimu.
ISA 40:5 Ani biragola ogoningi Anduane Homogonaga wá taraore holene hapani holebira. Wali agali dindi bibahendeha karume wá taraore holene ogoni de handai holebira. Bi ogoni Anduane Homogo ibunime aniore bulebero lalu lowini.
ISA 40:6 Mbiralime ga̱lalu, Bi latagi ha, laya. I̱na ladai bialu lalu, I̱na bi ago latagi hoabe, laru. Bi biagome lalu, Bi ogodagua latagi habe, Wali agali bibahende karu datani minana anda hagadagua anda haga ka. Tinaga yári bulene ngaru palawaya lini ale nga.
ISA 40:7 Anduane Homogohanda puyabu poboyogobi ibilarangi datani gaulalu palawayaru abaleore dogolopebe biaga ka. Ogonidagua dege wali agalibi heneneore tigi mbira hangu howa abaleore ereba haga.
ISA 40:8 Datani gaulalu palawayaru abaleore dogolopebe biaga. Anigoyu inanaga Ngode Datagaliwabe ibunaga bi mana ngago dege wiaabo haga winigo nga, lalu latagi habe, lene.
ISA 40:9 Yarusaleme-o í̠na hari nene ngarunaga irigi howa bi mana debene latagi habe. Saiono-o í̠na bi mana debene ogoni bi hongo howa ga̱ lalu latagi habe. Gi nahe howa latagi habe. Yuda dindiha tinaga tano maru ngaruhondo lamialu, Tínaga Ngode Datagaliwabe o ibiragonigo de handadaba labe.
ISA 40:10 Anduane Homogo Bibahende Haru Haame Ho Haga kago ibugua ibuninaga hongo timbuni heba o ibiragonigo de handadaba. Agalime wai bialu ibunaga waitigiru bo podalu uruninaga dabudabu bayale ngaru mo yalu dai biagadagua ibugua ibunaga wali agaliru ibuni pele mialu haru dai biyaru heba ibiragoni.
ISA 40:11 Nogo sibi haru hagarume tinaga sibiru haru hagadagua ibuninaga wali agaliru baya hanguore haru holebira. Ibugua nogo sibi iginiru mo mogo buwa ibuninaga gime igini emene biaru minu yalu bialu angibuniru mandagi pelo baya hangu haru halu polebira.
ISA 40:12 Agali mbiralime iba solowara bedago gi habeni hambu yai habehebe. Hari li ngago luni tubagila ogobiore nga lalu manda bibehebe. Mbiralime dindi bibahendenaga dindi abalu mo mogo bialu gabo beha mo gambirai habehebe. Mbiralime dindi haribi dindi hari hombene bare ngarubi uruninaga genda magi ogobi lalu manda bibehebe.
ISA 40:13 Wali agali mbiralime Anduane Homogohondo ogo ale mbira bia lalu lamulene karulape kabe. Mbiralime ibuhondo ogodagua bibe lowa mbirale ibu biawai halubi bibehe ai kabe.
ISA 40:14 Ibugua mana tigabi bayale ngaru bialu haabo helonaga pigane aiwa biawai henedabe. Ibunaga mini mandabi baya burugule ngaruni agohayagi howa minidabe. Uruni mbiralime biawai halu lawai henebi ndo ka.
ISA 40:15 Anduane Homogo ibugua dindi tara tarani hameigini kamaruni hondowa ina emene koore kamane hendeda. Ina datani karunaga dadimba bedaru alebi kamane hendeda. Solowara hanuni dindi podene mbira wuape karunaga genda magi bame yabiabi be abalu ale dege mandabu ka.
ISA 40:16 Lebanono dindi irabu timbuni ngagoha ema bialu piaga karu bibahendeore bai howa i̱nanaga Ngode Datagaliwabe ibuhondo lomabu delolene nakarulape ka. Irabu ogoni ira dewaore karubi bibahende dibai howa loma binirunaga dabuni delolene emene halu ndia holebira. Uruni bame nahabane dege ngagoni.
ISA 40:17 Dindi bibahendeha hameigini tara tara bu karuni bibahendeore Anduane Homogo ibugua handalu karia uruni emeneore nahabane bu kane hendeda.
ISA 40:18 Ngode Datagaliwabe ibuore ai ale manda bibehebe. Mbirale mbira ibu aleore agi ngabe.
ISA 40:19 Ibu agali gime mbirale bi pupu wulenaga wabinigo ale ndo ka. Mbirale urunibi wabuwa bayale helo ngolo silibarume hira dambi henego ngago ogoni ale ndo ka.
ISA 40:20 Uruni bi pupu wulenaga wabule howa agali yagibano karume ngolo silibaru mibe nahe haga ka. Anigo ibugua ira hongohe giambe togo nabiaga kago dabalu dibaga. Ibugua dibalu bi pupu wulenaga ogoni ale wabiaga mandabi kago hai biaga. Uruni ale wabiaga kagome mbirale ibira howa gingirulobaga nabilonaga ibugua wabiaga kagohondo wabia ha laga ka.
ISA 40:21 Ai tí manda nabiore kamibe. Mbiralime ti langiabi nabi halebi nahe dege kamibe. Piganengiore mbirale bibahende karubi ngarubi dindi ogo ogodagua bialu winida lowa bi te layanebi mbira hale naheore henedabe.
ISA 40:22 Uruni bibahende Anduane Homogo Kininaga biragane dagia hari daliga ngagoria biruwa ibunime uruni wabiai hene o bu ngaruni ndobe. Ibugua hari li kagoni mo yanga lowa ibunaga balai anda ale helaga ka. Ani biaga kagome ai wali agali dindini kamaru handa dali halu ina bame uburuli emene ale kamaria hendeda ndobe.
ISA 40:23 Anduane Homogo ibugua agali haguane karubi kini karubi bibahende hengedape howa ti mini lene ndo nagaloneore helaga ka.
ISA 40:24 Uruni ti tomo egene ale howa agalime áyu dege egene hengedagola dindiha pini nape wene ngaore dege Anduane Homogohanda puyabu poboyogobi ibilaragola egene abale gaulalu bame galone nabulene ngaligobi kagoni.
ISA 40:25 Anduane Homogohanda lalu, I̱ mini tigabiwi baya buruguleore kogonibi mendeali ai kabe. I̱ aleore mbira ai kabe, laragoni.
ISA 40:26 Tígua hariha handa daga halimu. Yakundi bu kane hendedamiruni aiwaore wabu helenedabe. Uruni Anduane Homogo ibunime wabini ndobe. Ti bibahendeore ibunaga wai biaga ami ale howa haru halu ibunime ti ogodagua ka lowa dagalai halu tinaga mini wiai halu manda biai ho kagoni. Ibunaga hongo timbuniore kagome ti mbirago mini nawi daga nalene yu wa naheore hai kagoni.
ISA 40:27 Yagaba waneigini Isaraele wali agaliru-o tí go̱mo̱go̱mo̱ lo kamigo agibe. Tígua lalu, Anduane Homogohanda inanaga genda yu kamaru nahendebi marume inahondo ko biragola ibugua ina biamogo nabi kagoni, lalu kami.
ISA 40:28 Ainde tí manda nabi kamibe. Halebi nahe dege kamibe. Anduane Homogo ibu tínaga Ngode Datagaliwabe haluhe kagoni. ibugua mbirale dindini ngarubi harini bu karubi bibahende wabiai henego ibuni hangu ka. Ibunaga hongo holene emene mbira ibira nahagaore ka. Mbiralime ibunaga mini ngaru handai habe naheore ka.
ISA 40:29 Anduane Homogohanda mbirali erekui halu hongo nahe ngo̱e̱le karu mo hongo howa helaga ka.
ISA 40:30 Igiri daliahe karuni tinaga tingini gedaore haga ka. Igiri hongohe karuninaga hongo biba halu ibira haga kagoni.
ISA 40:31 Ai wali agali maru Anduane Homogohanda ti biamogo bilonaga mini mbiraore wuwa karu ti ibira nahe hongo haho wiaabo holebira. Ti ega hariawe ale babagane hongohe howa hari daligaore yagalagagobi ka. Tigua gerai layaguabi ha̱ nalolebira. Hariga luore piyaguabi pobe manga naholebira, lalu Aisaiahanda lene.
ISA 41:1 Ngode Datagaliwabehanda lalu, Dindi kaundiaha wali agali hameigini tara tara kamiru ti bibahendeme bi nale howa i̱na bi larogo hale hadaba. Tígua mana tínime bialu harimirunaga kodi deni howa bi latagi haga bule manda manda bialu hadaba. Bi ai ibunaga larago henenedabe handami̱ya ina haru mandagi íbu ngoai ho hami̱ya.
ISA 41:2 Mbirali dindi bibahende ibu poragoha wai bialu wayali helonaga agali ni tagira ibiragohayagi howa dabalu kini heleneyago aiwabe. Dindi tara tara wiaru ibunaga giha mo ya halu dindi odaruninaga kini hearubi bope helonaga hongo miniyago aiwabe. Ibunaga wai biagane ayu tibu ne gadele yiagome durumbu dibaradagua dibu budabaga biniru be abalu ale mo wiaruni. Puyabume widi aeane hilo yalu purogo lagadagua ibunaga danda timurume ti bo purogo lo helene.
ISA 41:3 Ibu ibalu howa geme dindi ela nahe bame puyabu poradagua gerai pialu abaleore ibuwa bo hilo waharagola tigua mbirale mbira biadai bibe nahe holebira.
ISA 41:4 Mbirale uruni bilonaga mo bia henego ai kabe. Bambaore howa mbirale odaruni bima ibinigonaga miniha magoyu henego aibe. I̱ Anduane Homogo i̱nime dindi ogo pigane wabirungi henego ko. Mani hamaro birangibi nde i̱ Anduane Homogo i̱niore dege haho wiaabo holebero, laya.
ISA 41:5 Wali agali dindi kaundiaha karume mbirale i̱na biniru de hendene ka. De hondowa uruni ti gi timbuni halu duru lalu ka. Anigo ti mandagi hole íbu ngoai haragoni.
ISA 41:6 Tigua biamogo bigi bigi bialu tininaga bu mini elahe holenaga mo hongo haga haga bima ibalu kagoni.
ISA 41:7 Irame mbirale wabiaga agali heagome mbirale ngolome wabiaga heagohondo lalu, Í̠na biabe bayale birida, lalu ka. Bi pupu wulenaga mbirale ngolome wabiaga heagome aeaneru hiru gimbu biaga heagohondo lalu, Í̠na hiru gimbu bigi biridago bayaleoreda, laga. Ani wabiai howa gime wabini ogoni dindini ibira howa dodo gingirulo hole bulilono agali mili baga biagohondobi, Bayale birida, lalu tini hangu hangu mo hongo haga biaga.
ISA 41:8 Anigo Isaraeleali i̱naga biabe biahagaore kamiru tí Yagabanaga hameigini howa i̱nime dabarugoni. I̱naga nenegeali Abarahama ibunaga aguanaliore tí kamigoni.
ISA 41:9 I̱na tíore dindi kaundiaore howa haru ibirugoni. Tí dindi gibuni gibuni leneha howa haru halu ibirugoni. Tí i̱naga biabe biahagaore kami lalu langiru. I̱nime tíhondo manga howa erembira ngialu ndo tí i̱naga halimulo dabo helarugoni.
ISA 41:10 I̱ tí heba kogonigo tí gi nahe halimu. Tínaga Ngode Datagaliwabe i̱ore kogonigo mbirale ngaru hondowa gi holene nawi. I̱nime tí biamogo bialu mo hongo halu holebero. I̱na ti baya hangu mamage halu i̱ninaga hongo timbuni kogome tínaga waitigi karu bope haga bialu tí pele ngulebero.
ISA 41:11 Marume tíhondo keba halu ti manani haru ibuwa helayagua tinaga bime tí bope habe nahedane hondowa tini taga timbuni holebira. Tinaga bi lararuni bame nagalone halu tini mo ko halu homolebira.
ISA 41:12 Marume ti baba wai bialu bo hengeda hole manda bialu karia uruni bame dege halu mo ereba hai holebira.
ISA 41:13 I̱ Anduane Homogo tínaga Ngode Datagaliwabe kogoni. I̱ni tí heba kogonigo tí mo hongo halu bi ogodagua laro, I̱na tí biamogo buleberogo gi nahe halimu, laya lene.
ISA 41:14 Anduane Homogo ibugua bi ogodagua laragoni. Isaraele wali agaliru tí dewa ndo howa hongo nahe kamigo i̱nime tí haru dai biaga kogome tí biamogo buleberogo gi nahalimu. I̱ Isaraele wali agalirunaga Ngode Datagaliwabe mini tigabi baya buruguleore howa i̱nime tí mo wialu pele ngiaga kogoni.
ISA 41:15 Tí polene hariga hapai kago hengedope halu pilimulonaga i̱na tí mo hongo halu widi lini hondo ibira ibira bilo bo taulaga nama mbalape gahenge wiagagobi helolebero. I̱na ani berogome tínaga hongo daligaorehe howa tígua hari timbuni wedaru bo haealabaga bialu hari bare ngaru be abalu ale helabehe holeberemi.
ISA 41:16 Tíha genda bu ngaru dabiabi bame be abalu taulo wahagadagua puyabume yalu pu waholebira. Tígua tínaga Anduane Homogo i̱ kogonigo i̱nihondo turu taraore holeberemi. I̱ Isaraele wali agalirunaga Anduane Homogo mini tigabi baya burugule kogonigo tígua i̱naga mini yaraga halu holeberemi, laya.
ISA 41:17 Ibugua lalu, I̱naga wali agali burupale howa iba nolene hai bialu tí kembobe lebolaho howa i̱ olaramigola Anduane Homogo i̱nime tínaga bi laramigo hale holebero. I̱ Isaraele wali agalirunaga Ngode Datagaliwabe i̱ni kogome ti embeda halu yu wanaholebero.
ISA 41:18 Hari bare dindi ko yobi iba nabiraga ngaruha i̱na iba dugualu dindi ulini ngaruha iba bayale gagaheru uliha dugualu pelolebero. Dindi ko yobi wali agali nahagaha iba kuyama timbuni ibalu berelolebero. Dindi iba nabere winiruha iba bayaleru dewa dugualu pelolebero.
ISA 41:19 Dindi ko yobi ogoni wiyagoria ira tamiaru bayale mo anda halu ira hongohe timbuni tara tara maru mini agasiaru oliberu uruni mo andaho helolebero. Dindi ko ngaruha ira ira mini yunibabi saibarasabi ira tara tara maru dewabi anda ho helaga bulebero.
ISA 41:20 Ani bidogo hondowa wali agali tigua manda bialu Anduane Homogo i̱na ani biyada manda bulebira. I̱ Isaraele wali agalinaga Ngode Datagaliwabe mini tigabi baya buruguleore kogome uruni binidane hondolebira, Anduane Homogohanda laya, lalu Aisaiahanda lene.
ISA 41:21 Anduane Homogo Isaraele wali agalirunaga kini ibugua ogodagua laya, Dindi maru ngarunaga mbirale bi pupu wulenaga gime wabiniru-o tí bibahende godi deni howa tínaga bi hale halu dabelo íbu holene nga. Bi loleberemiru baya hanguore lo manda mandabu yalu godini howa latagi hole ibalimu.
ISA 41:22 Tígua kodi deni howa bamba biniru ogodagua bini lalu iname hale halu irane manda buluma̱ya latagi halimu. Ani bialu mani bulebiragonagabi ogodagua bulebira lalu laramigo lola harangi ina manda bialu heneneda manda buluma̱ya lalimu.
ISA 41:23 Ani bulebira laramigo henene tagira ibiyagua nde gime wabini biaru heneneore henedalo hondoleberema. Mbirale gibi mbira birimiyaguabi turubini mbira birimiyaguabi tí heneneore heneda ina manda buluma̱yanaga mbirale mbira bilimu. Ina gi howa handawa buluma̱yabi tínaga hongo walia halimu.
ISA 41:24 Anigo henene halu tígua uruni ale mbira bibe naheore kamigoni. Tínibi tígua beramilirubi irane nagalone bame dege ndodabe. Wali agali urunihondo bi pupu wiaga karubi ti nde nagalone ko ngubi uruni ale dege ka.
ISA 41:25 Agali mbira ni tagira ibiragohayagi howa dabo heledogo. Agali ogoni ibugua i̱naga mini yaraga haga heago i̱na ibu uyurahayagi howa haru ibulebero. Agalime todobene be wabule howa dindi waru duguwa geme hengedo tagada baga biagadagua ogoni ibugua kini bu karu bibahende bo hengedai hole ibiragoni.
ISA 41:26 Ai mbirale bi pupu wulenaga gime wabiniru-o uru ale tagira ibulebira lalu tí mbirali kamiru ariame latagi harimibe. Tí kamiru aria mbirame bi uruni ale latagi halu mbiwia harimiyagua nde iname ibugua bi heneneore laga ka loleberema. Anigo tí kamiru aria mbiralime bi uruni lalu mbiwia nahe kamigoni. Tígua bi uruni latagi henego mbiralime hale nahe dege kagoni.
ISA 41:27 Anduane Homogo i̱na ala Saiono tanoni hearuhondo ogo ale bulebira lalu latagi harugoni. I̱na agali mbirame bi mana debene Yarusaleme yalu pelo pelarugoni. I̱na ogodagua labe lalu, Tínaga wali agaliru andaga ibalu kagoni, labe lamirugoni.
ISA 41:28 Mbirale gime wabini wiaruni i̱na handalu koria ti bi mbira layane nahende dege ko. I̱na tihondo ladai bilonaga bi hale harugolabi mbira ladai nabi dege wia.
ISA 41:29 Mbirale gime wabini uruni tini nagaloneore wuwa mbirale mbira ema bialu nabulene ale ngaruni de handa nabere. Ke̱ howa uruni bame agali gime wabini degeme mbirale mbira bibe naheore nga, lalu Anduane Homogohanda Aisaiaha howa latagi hene.
ISA 42:1 Anduane Homogohanda lalu, Agali ogo i̱naga biabe biahaga mbira o kagoni. Horo bibahendengi i̱na ibu mo hongo haabo haruli. I̱na ibu dabo helenego bibahendengi ibuhondo turu haabo haruli. Ibuha i̱naga Dinini hela kogome ibugua dindi tara tarani hameigini bibahende karuha mana tigabi ngaru hangu mo yalu anda ibulebira.
ISA 42:2 Ibugua bi dalimu lalu hongo howa nalolebira. Hariga teneni howa wali agalirume hendelonaga bi lalu naholebira.
ISA 42:3 Gambe mbira podabehe ema bialu duru lalu kago podope naholebira. Ira hale mbira hundibehe auhe dalu kago bahundiaore naholebira. Ibugua mana tigabi bulene ngaru wiaabo helo mo hongo holebira.
ISA 42:4 Ibugua genda yulene elahe kagola gendarume ibu bope naholebira. Ibugua dindi bibahendeha mana tigabi bayale hangu bulene hongoheoreme bolangua hai helonaga mo bia holebira. Wali agali bibahende dindi kaundiaha karume ibugua bi mana bayale ogoni lawai helonaga malia howa hondo ka, lene.
ISA 42:5 Anduane Homogo Ngode Datagaliwabehanda hari daliga wabuwa yangalalu heleda. Ani helowa ibugua dindi wabialu dindini datani irabi bibahende andahai ho helo helene. Ibugua dindini wali agalirubi ema bialu pelonaga holene gahenge buhe̱ lolene pula anda hene. Anduane Homogo Ngode Datagaliwabe ibugua ibunaga biabe biahaga agali biagohondo lalu,
ISA 42:6 Anduane Homogo i̱nime i̱naga mana tigabi ngaru mo walia habelonaga í̠ olalu hongo karulape ngirugoni. Ai i̱na í̠ baya hangu kaware handayaho howa mamage holebero. Wali agali dindi bibahendeni karu baba habo nalolene bi í̠ togoni howa lo wulebero. I̱na wali agali bibahendenaga wá hagane haleore í̠ helolebero.
ISA 42:7 Agali de kohe karu lone de hendelo mo dengala holebere. Agali garabaya anda arumaha karu golope halu tagira pudaba lolebere.
ISA 42:8 I̱ hangu Anduane Homogo tínaga Ngode Datagaliwabe kogoni. Tígua i̱naga mini hangu yaraga halu holene nga. Agalime mbirale tini gime wabini ngarunaga mini yaraga holene nawi larogo irane i̱naga wá holene mini yaraga holenebi mendeali heba tale nabulebero.
ISA 42:9 I̱na abale mbira ibulebira lalu mbiwia harugoni áyu tagira ibiragonigo de handadaba. Áyu i̱na bi maru gahenge mani ibulebirago naibi ngatagi mbiwia halu lo ngelaro, Anduane Homogohanda laya, lalu Aisaiahanda lene.
ISA 42:10 Anduane Homogohondo iba gana gahenge lalimu. Wali agali dindi bibahendeha kamiru-o tígua ibunaga mini yaraga halu iba gana lalimu. Wali agali iba solowarani pialu hagarubi ema bialu piaga ale ibaha biraga bedamirubi dindi tara kaundiaha kamirubi tí bibahendeme Anduane Homogonaga mini yaraga halu iba gana lalimu.
ISA 42:11 Wali agali dindi ko lebolahe ngagoha karubi dindi ogoninaga tano ngaruha karubi Ngode Datagaliwabenaga mini yaraga helo. Keda dindi hameigini karume ibunaga mini yaraga hai helo. Sela tanoni wali agali karu tigua hari nene ngarunaga irigiho howa turu halu ga̱ lalu helo hame ledo.
ISA 42:12 Wali agali dindi kaundiaha karubi ti bibahendeme Anduane Homogo ibu mini lene kagonaga mini yaraga halu helo.
ISA 42:13 Anduane Homogo ibu wai biaga ami agali kago ale howa áyu ibu wai bule tagira poragoni. Ibu amirume wai bule manda manda bialu howa biagadagua bialu wai hoaro lalu hongo howa ladagadaga bialu ka. Ibugua waitigi biaru baba wai birangi ibunaga hongo walia howa ti bope halu ibuni wayali haga.
ISA 42:14 Anduane Homogohanda lalu, Luore i̱na bi mbira nale hendore haabo ho harugoni. I̱naga miniha tandaga ibiyago mo pehaga bialu mbirale mbira biatagi nahe haru. Ani birugoyu ai walime gali taba hanalu howa ya yi lalu ga̱ lalu hagadagua bialu kogoni. Ai ha̱ledagola buhe̱ hongo howa ala laga bialu kogoni.
ISA 42:15 I̱na hari timbunibi emene barebarebi karuni bo podope hai halu datanibi irabu karubi gabu hai helolebero. Iba timbuni porarubi mo hundia hai halu dindi ko wali agali nahaga helolebero. Iba kuyama timbuni bedarubi bibahende hundu tegelowa helolebero.
ISA 42:16 Wali agali de kohe karu i̱na haru halu hariga ala ti napene ngagoria haru polebero. I̱na ti hariga manda nabinini haru holebero. Ti de kohe howa arumaha haradagua bidago i̱na aruma holene ogoni mo wá holene helolebero. Dindi ko ngaru i̱naga wali agaliru ogoriani pelo i̱na bamba halu mo tiga bulebero. Ogodagua bule laroruni bibahende biaiore holebero. Uruni mbirago embeda halu yu wa naholeberoore.
ISA 42:17 Wali agali maru gime wabini ngaruhondo inanaga anduane uruni ka lalu bi pupu wiaga karu ti bibahende i̱na bo batagi hai harogola ti taga timbuniore holebira, lalu Anduane Homogo ibugua lene.
ISA 42:18 Anduane Homogohanda lalu, Isaraele wali agali hale tuluhe kamiru bi hale hadaba. De kohe kamiru de ngala halu bayuwa de handadaba.
ISA 42:19 I̱naga biabe biahaga harimigo tí de kohe maru karubi ndo tí de nahandabeheore kami. I̱na tí i̱naga bi yalu pilimulo dabo helarugo ai tíore wali agali hale tuluhe maru karubi ndo tí hale paiore kamigo hendedogo.
ISA 42:20 Tígua tara tara dewaore de handaramiligo hondowa ema nabi donge harimigoni. Bi dewaore hale haramiligo howa tígua mbira bayuwa hale ha nabi kamigoni, lalu laya.
ISA 42:21 Anduane Homogohanda tíhondo mbirale bayale tigabi ngaru dege bialu hayago howa ibunaga bi mana lo wiaru tíhondo ngiya. Irane wali agali maru karume mana ogoni hondowa bayale tigabioreda lelonaga ngiyagoni.
ISA 42:22 Ai áyu Isaraele tí koore kami. Tínaga waitigirume ibuwa tí bo wahalu tínaga dabudabu wimiru kayu bu yalu piai haya. Tínibi minu yalu puwa garabaya andaha dindi gundu uli tombo wiaruhabi minu bape howa panga payaanda haya. Mbiralime ti biamogo bialu wai buwa ti gingilo mialu haru dai bulene mbira naheya.
ISA 42:23 Anigo tí kamiru aria i̱na bi larogo hale habehe mbirali ai kamibe. Áyu ogoni howa tígua i̱naga bi ogo baya hangu hale holeberemibe.
ISA 42:24 Waitigirume Isaraele wali agali tí mo ko ho balu dabudabu wimiru mo yalu pelo aiwa bia layagola biyabe. O biyaruni Anduane Homogohanda mo bia hene ndoyabe. Ani biyagoni irane iname ibu erembira mialu mana ko wiaru bialu harimagonaga biya. Iname ibunaga mana wiaru mo wahalu ibugua mana tigabi bialu holoma̱ya hameleadagua ndo mana ko wiaru hangu bialu harimagoni.
ISA 42:25 Anidagua birimagonaga ibunaga miniha keba halu tandaga ho kago ina manda buluma̱yanaga ibugua inanaga waitigi urunime ina bo wahole ibilayagoni. Ibunaga keba holene ira hungu ale deagome ina Isaraele wali agali dai helaya. Anidagua biyago bilowa iname irane ogo ale biyadalo manda bialu mini beregeda nabi dege kamagonida, lalu Aisaiahanda lene.
ISA 43:1 Isaraeleali Yagaba aguanene kamiru-o Anduane Homogohanda tí wabu helowa ibugua tíhondo bi ogodagua laragoni. I̱na tí pele ngialu haru dai bini kamigo gi nahalimu. Tí i̱nagaore dabo helowa i̱na tíninaga mini lalu olarugoni.
ISA 43:2 Iba timbuni poragoria domalu pole domarimiyaguabi i̱ni tí heba holebero. Pialu kamiria ibame tí namu lai naholebira. Ira hongohe timbuniore dedagoha anda pirimiyagua nde iramebi tí nadolebira. Ira hungu biragome tí ela naholebira.
ISA 43:3 Irane i̱ Anduane Homogo tínaga Ngode Datagaliwabe kogonigo Isaraele wali agalirunaga Ngode Datagaliwabe mini tigabiore kogome tínaga pele ngiaga kogoni. Ai tínaga waitigi karunaga giha kamingi Iyibiru Sudanaru Sebarubi urunime tí golope helo i̱na yolo bia dai bialu yupe harogoni.
ISA 43:4 I̱na wali agali hameigini tara tara dindi bibahendeha karuni tí haru dai bulenaga yolo ale yupe harogoni. Urunidagua buleberogo irane tí i̱naga gubaliniore kamigonaga tí hameore lowa i̱na tínaga mini mo yaraga halu ani bulebero.
ISA 43:5 I̱ tí heba haabo kogonigo gi nahe halimu. Tí damene bibahende maru ni tagira ibiragohayagi halu maru ni paliragohayagi pu giligalalo haruaruni i̱na ti haru dai biai holeberogo tígua gi nahalimu.
ISA 43:6 Wali agali uyurahayagi karuhondo, I̱naga wali agali yupe halimu, lalu lamulebero. Unurahayagi karuhondobi, Tinaga dindi dai bilo yupe hadaba, lolebero. I̱naga wali agali maru kaundiaore amura dindi gimbuni ngaruha pu heaguabi uruni bibahendeore haru dai biai helo hame ledo.
ISA 43:7 I̱naga wali agaliore bu kamiruni tí i̱na wabirugoni. Tígua i̱ninaga wali agali heneneore hapani kamigola wali agali maru karume tí de hondowa i̱naga mini yaraga helonaga ani biru, lalu Anduane Homogohanda lene.
ISA 43:8 Anduane Homogohanda lalu, I̱naga wali agaliru olowa íbu ngoai hadaba. Tínaga de kagome de nahandaga ka. Tínaga hale kagome hale nahaga ka.
ISA 43:9 Wali agali hameigini tara tara dindi bibahendeha karu godi deni íbu ngoai helo oladaba. Tinaga mbirale gime wabini ngarume bi henene mani bulebirarunaga ogodagua bulebira lalu mbiwia habehe ka aibe. Áyu bialu kagonaga ogodagua bulebira lalu mbirale gime wabini ngaru agome mbiwia hayabe. Ainde gime wabiniru mbirame abale ibuwa bi ogodagua layago henene tagira piya lalu wali agali ai í̠na loleberebe.
ISA 43:10 Anigo Isaraele wali agaliru tí i̱na berogobi larogobi mo henene halu tigatiga lara lagane tí kami. I̱naga biabe biahaga halimulonaga tí dabarugoni. Ani birugo irane tígua i̱hondo mini mbiraore wialu tínaga Ngode Datagaliwabe i̱ hangu kogoni manda bilimulo ani dabaru. I̱ kogoria mani ho aribia holene mendeali naholebira. Ala henebi mani holenebi mbira naheore.
ISA 43:11 Anduane Homogo i̱ hanguore kogoni. Tínaga pele ngiaga i̱ore kogoni.
ISA 43:12 I̱na abale tí biamogo bialu haru dai bulebero larudagua tí haru dai birugoni. I̱na ogoni birugonidagua mbirale gime wabiniru ngagome ani nabi i̱ni hanguoreme birugoni. Ani birugonaga Anduane Homogohanda ogodagua biya lalu i̱na biruruni latagi haga tí kamigoni.
ISA 43:13 Áyubi horo bibahendengibi i̱ Ngode Datagaliwabeore haabo henego kogoni manibi nde haho wiaabo holebero. I̱na wali agali hameigini mbirago i̱naga gime yidogo mbiralime i̱naga hongo bope halu gingilo mia nabibehe ka. I̱na mbirale bialu kogobi mendealime ogo bibeheda lowa mo aribia naholebira, lalu Anduane Homogohanda lene.
ISA 43:14 Isaraele wali agaliru tínaga Ngode Datagaliwabe ibu Anduane Homogoore howa tí pele ngiaga kagome ogodagua lalu, I̱naga wali agaliru tí pele ngulenaga ami agali tara hongohe karu Babilonoaliru baba wai bule pudaba lolebero. Wai biragola Babilono wali agali uruni ti tinaga iba sibini turu halu biraga biagoriani gi howa biralu tinaga dindi andaru yu wahalu ibida polebira.
ISA 43:15 I̱niore Anduane Homogo kogoni. I̱ tínaga Ngode Datagaliwabe howa mana bayale tigabi ngaru biaga kogoni. I̱na Isaraele wali agaliru tí wabu helowa i̱ni tínaga Kini kogoni.
ISA 43:16 Bambaore Anduane Homogo i̱ni kogome iba solowara timbuni bereago dombeneha hariga bope harugoni. Iba yaribu timbuni bialu bereagoha hariga ba harugoni.
ISA 43:17 I̱na i̱naga waitigi hearunaga ami haru pialu nogo hosiru gili laga garo ale mini karisi wiaru yalu pialu hariga ogonidagua dege haruru talima ibalu hemiria kuni mibe nahe ibame naiore helarugoni. Agalime arumaha ira hungu pula hundia haragola abale tegelo mina hagadagua abaleore homai haya.
ISA 43:18 Anigo áyu i̱na abale bima ibiruruni mitangi nabi embeda halimu. I̱na bamba bialu harugoni mitangi budai nabilimu.
ISA 43:19 Mani i̱na gahenge mbira buleberogo tagira ibulebirago handalimu laro. Mbirale uruni áyu dege bia pani harago helowa tígua de handa nabiore kamigonibe. Dindi ko yobi mbirale anda nahaga ngaruha i̱na hariga ba halu iba dadabu anda halu pelolebero.
ISA 43:20 Ani berogola nogo gabua tara tara karume i̱ni mini lene ka lolebira. Biango dudu ale karubi ega yari ale karubi tigua i̱naga mini yaraga halu holebira. Ani bulebirago irane wali agali i̱ninaga dabo helene karume iba ogoni hambu nalu helonaga dindi ko iba naibaga ngagoha iba pelarogola anidagua bulebira.
ISA 43:21 I̱naga wali agali helo lowa i̱nime dabarurume tigua turu timbuniore howa i̱ni mini leneore kagoni lalu ladagadaga bialu holebira, laya, lalu Aisaiahanda lene.
ISA 43:22 Anduane Homogohanda bi ogodagua laya. Yagabanaga aguanaliru-o tígua i̱ mitangi bialu lotu naleore harimigoni. Isaraele wali agaliru-o tígua i̱ handabe manga howa yu waore ho kamigo agileme mo bia hayabe.
ISA 43:23 Tígua mbirale lomabu delalu howa tínaga bu minime i̱naga mini yaraga nahe bameore bupebe bialu harimi. Tígua nogo sibiru i̱hondo bo loma bialu irani dai helonaga delalu howabi mbirale ira hagua ngabilo delaga mini inisenesi yolo buwa lomabu delalu howabi nogo barimirunaga habane abene dewaore i̱naga loma delalu howabi i̱ hewago manda buwa ogo ale bero lalu ndo bame bupebe bialu harimi. Irane i̱ tí mo erekui bia howa i̱naga widi liniru ira hagua ngabilo delaga aleru yalu loma bule ibalimu larugo ogonime tí mo manga haruyabe. Ani ndoyago. Tígua mana ko dewa bialu i̱hondo erembira ngeramigonaga i̱na genda yu howa manga timbuniore halu kogoni ndobe.
ISA 43:25 Ani birimi tiraga i̱ Anduane Homogo mini leneore tínaga Ngode Datagaliwabe kogo manda buwa tígua ko birimiru bibahende domo wahai harugo ai lone mitangi budai nabulebero.
ISA 43:26 Anigo tígua ko mbira nabi kamalo manda birimiyagua nde tígua i̱naga mini mo tiga bilimulo bi lami̱ya.
ISA 43:27 Tínaga mamali ala pigane henego ibugua ko binigo áyubi tínaga agali haguane karu tiguabi i̱naga bi mo wahalu kagoni.
ISA 43:28 Ani biyago i̱naga deni loma binigo mo miaga agali hearuni ti bibahende mo dodohe helaru. Yagaba aguanali Isaraele wali agali kamiruni bibahende i̱na tíha mo ko holene ngeledo. I̱na wali agali tara karume i̱naga wali agaliruhondo mege bialu oba helo heledo, laya, lalu Aisaiahanda lene.
ISA 44:1 Anduane Homogohanda lalu, Yagabanaga aguanali Isaraele wali agaliru-o áyu hale hadaba. Tí i̱naga biabe biahaga halimulo i̱nime tí dabo helenego kami.
ISA 44:2 Tí pigane wabinigo Anduane Homogo i̱niore kogoni. Tí dindi ogoria tí ai̱yahanda taba hana nabiha howa i̱nime tí i̱naga wali agali daba bagi heneore halimulo lowa dabaru. Ani dabalu i̱nime tí baya hangu halimulo handayaho hama ibinigo áyu kogoni. I̱naga biabe biahaga tigabiore halimulo i̱na gubalini holeneme tí dabenego kami. Ani binigo tí gi nahe halimu, lalu Anduane Homogohanda lene.
ISA 44:3 I̱nime dindi lebolahe ngaruha iba odope halu dindi yobi ngaru uruniha i̱na iba pialu helolebero. Ani bialu i̱na tínaga waneiginiruha i̱naga Dinini hela hai halu tínaga aguanenerubi mo bayale haga bulebero.
ISA 44:4 Ani berogola tínaga waneigini aguaneru ti dindi bayale datani mindibi anda haraligobi halu ira bayale iba angeni gumbile anda hagagobi holebira.
ISA 44:5 Ani heledogola wali agali tara bu karume i̱hondo mini mbiraore wialu yutiga bulebira. Marume lalu, I̱ Anduane Homogonaga kogoni, laga bialu holebira. Marumebi, I̱ Yagabanaga aguanaliore kogoni, lolebira. Marume i̱naga mini tinaga gi habeni gili bialu I̱ Anduane Homogonaga Isaraeleali kogoni, lolebira.
ISA 44:6 Anduane Homogo Hongo Haiheore kago ibu Isaraeleali heba mandagi haabo howa ti biamogo bialu haga kagome bi ogodagua laya, I̱ Anduane Homogoore bambaore hene kogo manibi haabobo holebero. I̱ni hangu Ngode Datagaliwabe kogoni mende naheore.
ISA 44:7 Ainde i̱ ale mende heagua nde ibuni ina kamagoria hapani howa ogobiore kogoni lalu walia holene ngabe. Ani buwa i̱na mbirale bibahende ala bambaore wabirugo ibugua ogodagua birugo lalu latagi holene nga. Ani lowa nde mani bulebiragonaga ogodagua bulebira lalu latagi holene nga. Henene o layagoniore biragonida loloma̱ya latagi holene nga.
ISA 44:8 I̱naga wali agaliru-o tí mogo lowa duru nale halimu. Bambaore howa ogoale bulebira lalu i̱na tí langirugo ai áyu tí i̱na bulebira lalu laga birago henene lara lalu latagi haga tí kamigo. Ai i̱ni ale mende ai kabe. I̱nime mende kadago manda nabi ko. I̱ni hangu tí ibalu bira do haga piagone ale kogoni.
ISA 44:9 Mbirale gime wabiaga agali karu tiniore habane nabulene ka. Tinime tinaga gime wabini uruni hondowa turu timbuni hagago bame nagalone dege bialu ka. Wali agali tigua gime wabiniruhondo bi pupu wiaga karu tini uruni mo galone haga ka. Anigo gime wabini inanaga biamogo biaga laga urunime mbirale galone mbira nabiragola wali agali biaru tini taga timbuni holebira.
ISA 44:10 Wali agali tigua nde mini agua wuwa mbirale uruni wabiagadabe. Gime wabini inanaga biamogo biaga laga urunime ti biamogo nabulebiraore.
ISA 44:11 Ai nde mbirale agali gime wabini urunihondo bi pupu wiaga karu tini taga pani nalu holebira. Irane mbirale uruni bame nagalone agali gime dege wabini ngago. Gime wabini inanaga biamogo biaga laga uruni tini bibahende ibai howa urunime galone ogo ale dege biaga lole ibulene nga. Heneneore larogo i̱na ti mo gi harogola tini taga emene ndo holebira.
ISA 44:12 Agali mbirale uruni wabiaga mandabi karume ege to̱le̱ aeane irani delowa tinaga biamogo biaga laga uruni ale wabiaga. Tigua uruni ale wabialu howa aeane odaruni baya hangu tininaga hongome dambu tiga bigi buwa wabiaga ka. Tigua mbirale uruni wabialu tomo ibaru nane howa biabe ogoni bialu hayagua nde tinaga hongo ibira haga ka.
ISA 44:13 Agalime irame mbirale wabiaga karu tigua ira giambe hongohe kago dibalu baya hangu pelowa luni tubagi lowa mandaru baya hangu bialu haga. Ani buwa tigabi bayaleore ngagola tigua mbirale gime wabini ogoni ale wabulenegobiore penisolorume magi ala bo manda biaga. Ani buwa tigabi ngagola mbirale nabi ale ne gadele ngagome ira ogoni magi helayadagua podama piaga. Ani podalu wabu ngeledagola wabini biago huliya igiri baya mangabiore maru kaligobi naina wabu ngelaga. Ani wabiai howa o biagoni mo yalu puwa tininaga bi pupu wiaga andaha huliya igiri bayale ale biago ogoniha mo helaga.
ISA 44:14 Biabe ogoni bule howa ira hongohe giambe mbira kago dibalu wabiaga. Tigua irabu ngaruha puwa ira mbira kago mani timbu kagola dibule lowa hada biaho helaga biaga. Mbirale uruni wabulenaga ira mbira mbira dugu hangaho howa dalu ibalu ira ogoni mo anda helonaga maliaho haga.
ISA 44:15 Ira uruni dibalu howa maru tini dagare dogo bule delalu maru nde tinaga tomo dawale gabialu delaga ka. Ira mbiraore ogoninaga tigilene maru bayale tigabi haragome mbirale agali mbaule gime wabuwa inanaga biamogo biaga laga ogonihondo bi pupu wialu haga ka.
ISA 44:16 Ira urunime biabe biagane mana ogobi nga. Tigua ira uruni dibalu gabini maru deledagome tomo nogoru hira dawa bialu nowa tombe ho haga ka. Ani bialu ira ogoni degeme tinaga tingini mo poboyogo bia haragola tigua lalu i̱naga tinginiha karulapeore poboyogo biaruago ira ogoni bayaleoreda laga ka.
ISA 44:17 Ani bialu howa dege ira uruni arianaga tigilene mbiragome tinaga biamogo biaga laga uruni ale gime wabuwa ogoni duniniore lagaya. Tigua mbirale uruninaga mini yaraga halu ge duli hanga howa bulu paligi bialu bi pupu wiaga biagaya. Tigua gime wabini urunihondo bi pupu wialu howa ogodagua lalu, Inanaga biamogo biaga í̠ kegonigo ina biamogo bibe, lagaya.
ISA 44:18 Ai heneneore wali agali mana urunibi biaga karu ti mini nawi luluore kagoni. Tinaga deni mbiraleme wiapai kagola tigua baya hangu handabe naheore ka. Tinaga minibi mbirale mbirame mo luluya heagola mana lehe uruni bialu haga ka.
ISA 44:19 Agali miniwi kagome nde mana urunibi bialu kago hondowa lalu, I̱na ira mbiraore ogoni hangunaga gabini mbiragome i̱ninaga tomo nogoru dawalu dagare dogo bule delalu birugo. Ainde ira ogoninaga gabini mendegome agali handalehe koorene ko mbira biamogo biaga laga gime wabuwa ogonihondo bi pupu wialu kamaru nde aguadabe, labehego. Ai wali agali lulu uruni biaga karu tini mini nawiore howa bi ogonidagua nalaga ka.
ISA 44:20 Tinaga mini mo koore hai hene howa mana tigua bialu kago lulume ira punga beru dugualu naradagua bialu ka. Wali agali urunime lalu, Mbirale gime wabini i̱naga gime yu kogoni i̱ biamogo bilo ndo yu harudago bame ira tigini mbira wiago dege yu harudagoni, lalu lolene hariga nawiore ka, Anduane Homogohanda laya, lalu Aisaiahanda lene.
ISA 44:21 Anduane Homogohanda lalu, Yagabanaga aguanali Isaraele wali agali kamiru-o i̱naga biabe biahaga kamiruni tígua ani mitangi biaabo halimu. I̱naga biabe biahaga wali agaliore tí halimulo i̱na ala wabu helarugoni. Tí bibahende kamiruni i̱na embedaore naholebero.
ISA 44:22 Puyabume ginu hagua ngaru pulo wahagadagua tígua ko bialu harimiruni i̱na domo wahai haru. Egerebagi dadimba ngaru ni hongohe daragola mo ereba hagadagua mana ko birimiruni i̱na domo wahaiore harugoni. I̱na tí haru dai bialu pele ngirugoni manda bialu tígua i̱ koria dai bilimu.
ISA 44:23 Hari li kamiruni tígua turu howa iba gana ladaba. Dindi andaneha ngamiru tíguabi turu howa ga̱ lalu hadaba. Mbirale bibahende dindini hari kamiru tíguabi irabuha ira bu kamiru tíguabi tí bibahendeme nde turu howa iba gana lai halimu. Anduane Homogohanda ibunaga hongobi ibuni mini lene timbuniore kagobi bibahende walia halu ibugua Isaraele wali agali haru dai biyagonaga aniore bulene nga.
ISA 44:24 I̱ Anduane Homogoore howa i̱na tí pele ngiaga kogoni. I̱na tí ai̱ya tombeha howa wabu helarugoni. Anduane Homogo i̱ore kogome bi ogodagua langero. I̱na bibahendeore karubi ngarubi wabiai harugoni. Hari li kagoni i̱ni hangume wabu helarugoni. Dindi o ngagobi ti halimulonaga wabirugo mbiralime i̱ biamogo nabi i̱nioreme wabiai harugoni.
ISA 44:25 Agali marume mani bulebiragonaga mbiwia haga karu i̱na ti mo luluya harogola tigua ogoale mbira bulebira larago lola nahaga. Maru de gandeba handaga karubi mo luluya ha dege biruli. Agali mandabi karume bi larago i̱na mo lulubi ale dege lelaruli. Mini gigabiwi kama laga karu ti mini nawi ale helaruli.
ISA 44:26 Anigoyu i̱ninaga biabe biahaga agali karume mani bulebiragonaga mbiwia halu latagi haragolabi i̱naga bi yalu piaga karuha howa i̱na mbirale mbira mani buleberogo lalu latagi haragolabi tigua bi bibahende latagi hayadagua mo lola hai haruli. I̱na Yarusaleme tanoha wali agali lone helolebero laro. Yuda dindinaga tanoru lone wilo biadai bilolebero. Tano bo gialo wahene ngaruni lone mo heya ho helolebero.
ISA 44:27 I̱na iba solowara timbuni bedagohondo lalu, Hundia, laruyagua i̱naga bi hale halu hundulebira.
ISA 44:28 I̱na agali mbira mini Sairusi kagohondo, Í̠na i̱naga haru holene kini habe, lowa biabe i̱na hame ledodagua bilo helolebero. Ibugua Yarusaleme lone biadai bidaba lolebira. Ani lowa ibugua i̱naga anda biagobi lone biadai bidaba lolebira, Anduane Homogohanda laya, lalu Aisaiahanda lene.
ISA 45:1 Anduane Homogohanda bi ogodagua lalu, I̱na Sairusi ibu kini helo dabo helarugoni. Ibugua dindi tara tara baba wai bialu bibahende bo wahaiore holebira. Kini maru karubi ibugua tinaga hongo bo hengedope hai helonaga i̱na ibu hongo timbuni miru. Kini Sairusi ibugua tano mbiraha wai bialu bo poda anda hole karia i̱nime ibu anda pelonaga tano ogoninaga panga dugua holebero, laya. Anduane Homogohanda Sairusihondo ogodagua laragoni.
ISA 45:2 Í̠ mani ibabelo i̱ni ala bamba halu puwa hari emene timbunibi ngaru bope halu dindi ulini ngarubi mo dondole dege ngelolebero. Tanonaga panga hongohe ege to̱le̱ boronisime wabu helowa aeane timbunirume hongo howa gedene hatagi karuni i̱na bo gialo wahowa panga dugua haga bulebero.
ISA 45:3 Dindi uruniha agalime muniru dabudabu bayaleru handabe nahe mo doho ngaru i̱na í̠ mo ngerogola i̱ Anduane Homogoore henedane í̠ni manda bulebere. Isaraele wali agalirunaga Ngode Datagaliwabehanda í̠ mini lalu olayadane henene hondolebere.
ISA 45:4 I̱na í̠ olalu i̱ninaga biabe biahaga Isaraele wali agali karu biamogo bibelonaga í̠ dabo helaru. Wali agali uruni i̱naga helo i̱na ti dabo helene ka. Heneneore í̠na i̱ manda nabiha kegonigo nde i̱na í̠ni miniore olalu í̠ agali mini lene timbuni heledo, laya.
ISA 45:5 Ani lowa lalu, Anduane Homogo i̱ hangu kogoni mende mbira i̱ ale naheore. Í̠na i̱ manda nabi kegoyu i̱na í̠hondo hongo karulape nguleberogoni.
ISA 45:6 Anidagua bialu kogoni irane wali agali dindi bibahendeoreha karume i̱ ale mende nahe i̱ hangu Anduane Homogoore henedane manda bilonaga anidagua bialu ko.
ISA 45:7 I̱nime bi larugola aruma holene wá holenela íbu hene. Wali agali ti bayale holenenagabi genda yu holenenagabi i̱ni degeme yu anda ibaga kogoni. Anduane Homogo i̱ni kogome ogonidagua bigi biruli.
ISA 45:8 Hari daliga li kamiru-o tígua mana tigabi bayale bulene beralibaha howa iba dalu ibira hagadagua mo ibira hadaba. Dindini wali agali bu karuni mo turu holenaga iba dalu ale odope hadaba. Dindini iba dalu ibiragola dindi ogo mo gomba halu tomo mbirale bayale anda hagadagua wali agali ti pele mialu mana tigabi ngaru dege bialu helo hame lowa i̱ Anduane Homogoore i̱na ani buleberogoni, laya.
ISA 45:9 Agali mbirame ibuni Wabiaga Anduane Homogo kagohondo keba hayagua agali ogoni ibu mini nawiore ka. Ina wali agali nahabaneore kamagoni ndobe. Wali agali kamaruni todobene be dindime wabinigo dodobaga bini wiraligo ale kamagoni ndobe. Anigo dindime todobene be wabule agalime dugu wini ogonime todobene be wabiaga kagohondo lalu, Í̠na agile wabuleberebe. Í̠na mbirale waberegoni mugube nayi, lalu lagabe.
ISA 45:10 Ina dindini kamaru mbiralime ina aba ai̱yalahondo hale halu lalu, I̱ ogonibi kogonigo libugua agibulenaga hono wiribibe, laga kamabe.
ISA 45:11 Anduane Homogo Isaraele wali agalirunaga Ngode Datagaliwabe mini tigabi baya burugule kagome bamba Isaraele wali agaliru ibunaga helo dabo helenego ibugua lalu, Mani bulebiragonaga tígua i̱nihondo hale holene nakarulape. Tígua i̱naga waneiginiru ogodagua handayaho holene nga lolenebi biabe ogobi bulene nga lolenebi i̱ mo tiga bibe nahe kami.
ISA 45:12 I̱nioreme dindi bibahende wabiai howa wali agali dindi ogoriani helobi bibahende wabirugoni. I̱ninaga hongome hari li kago yangalalu ibuni holene henge ngagoria heledo. Ani helowa ni egebi yakundi bu karubi ti bibahende i̱na wabuwa tini holeneni helo haru haabo kogoni.
ISA 45:13 Anidagua biaga kogome Kini Sairusi ibugua galoneore mbira bilo i̱na mo bia holebero. Ibugua biabe tigabi bayale i̱ni hame ledodagua bilo i̱nime ibu dabo heledogoni. Ibu hariga polebiragoha i̱nime bamba halu mo tiga biai holebero. I̱naga tano Yarusaleme ibugua biadai buwa i̱naga wali agali garabayabu heledarubi golope hai holebira. Mbiralime ibuhondo ogonidagua bia lalu yolo biragola ndo ibunime manda bialu ani bulebira. I̱ Anduane Homogo Hongo Haiheore i̱ni kogome bi o ledogoniore, laya.
ISA 45:14 Anduane Homogohanda Isaraelehondo bi ogodagua laya. Iyibi dindihabi Sudana dindihabi muni dabudabu bibahende ngaruni tínaga wulebira. Waitigi karume Seba dindiha howa agali luni karu garabayabu yalu ibuwa tihondo ngiragola uruni tigua tínaga garabaya biabe ale biahaga holebira. Tigua tí kamiria ibalu ge duli hanga howa bulu paligi bialu howa latagi halu lalu, Heneneore Ngode Datagaliwabe ibu tí heba mandagi haabo kagoni. Mendeali ibu kagobi naheore ibu hangu kagoni.
ISA 45:15 Isaraele wali agalirunaga Ngode Datagaliwabe ibugua ibunaga wali agaliru haru dai bule pele miaga howa ibuni ha do haga kagoni.
ISA 45:16 Agali maru mbirale bi pupu wulenaga gime wabiaga karu tini taga timbuni holebira. Heneneore ti bibahendeme taga hai holebira.
ISA 45:17 Anigoyu Anduane Homogohanda Isaraele wali agali ti pele miai kagola ti horo bibahendengi wayali haabo holebira. Ani biragola tigua wali agali maru karunaga wanakuini howa taga holene mbira nawi ti bayaleore haabo holebira, lolebira laya.
ISA 45:18 Anduane Homogo ibugua hari daliga ngaru wabinigo ibuni hangu Ngode Datagaliwabe ka. Ibugua dindi ngarubi wabialu hongohe wiaabo helo wabini. Dindi ogo bame tayanda ale ngelo ndo mbirale bibahende dindini ngarubi karubi ogoriani hai helo wabini. Ogoni biyagome ibugua lalu, Anduane Homogo i̱ni hangu kogoni. Mendeali i̱ ale naheore.
ISA 45:19 I̱na kaundia aruma de handabe nahe ngaruha howa bi latagi hene ndo. I̱na mbira bulenaga manda bu harugobi mo do nahe kogoni. I̱naga Isaraele wali agalirume i̱ni dindi ko tayanda ale ngagoha i̱ hai bialu erekuibi taya bima ibulene nga lene ndo kogoni. Ani nabi howa i̱ Anduane Homogoore kogome bi bibahende larogo henene tigabi ngaru dege latagi haabo haruli, lalu Anduane Homogohanda Aisaiaha howa latagi hene.
ISA 45:20 Anduane Homogohanda bi ogodagua laragoni. Dindi tara taraha wali agali bu kamiru-o tí bibahende íbu ngoai hadaba. Wai biaga kamiru-o tí wai birimigome ba nabi yu wahene kamiru tíbi godi deni íbu holene nga. Wali agali marume mbirale gime wabini ngaru bi pupu wule yu ibaga biaga karubi ira dibu pelowa mbirale wabinihondo bi pupu wialu ina biamogo bibe lalu karubi ti mini nawi howa ogoni birago nagaloneyago mbirale wabini ogonime ti biamogo nabibehe ngagoni ndobe.
ISA 45:21 Wali agali kamiru tí tínime bialu henedaru godi deni latagi hole ibidaba. Ani bialu tíni dege dege lala bialu áyu tagira ibiraruni bamba bi lo ngelenego mbirale gime wabini ago ibuguadabe handalimu. Anduane Homogo i̱nioreme uruni tagira ibulebira lalu bamba latagi haru. I̱ni hangu Ngode Datagaliwabe kogoni howa i̱na i̱naga wali agaliru pele miaga kogoni. I̱ ale mende naheore i̱ni hanguore kogoni ndodabe.
ISA 45:22 Wali agali dindi bibahendeha kamiru-o i̱na tí pele nguliya i̱ kogoha ibai hadaba. Ngode Datagaliwabe mende nahe i̱ hanguore kogoni.
ISA 45:23 I̱ Anduane Homogo i̱ninaga minini howa bi lo wirugo heneneore lalu lo wirugoni. I̱nime bi mbira lo wirugo ogoni lone lo mende naholeore lalu i̱ heneneore laro. Bi ogodagua larugoni dindi bibahendeha wali agali bu karume ibalu i̱ni kogoha bulu paluwa ge duli hanga halu i̱naga andaneha ti bibahende hai hole lalu bi hongohe lo wigi bulebira.
ISA 45:24 Tigua lalu, Anduane Homogo ibu degeha howa mana tigabi bulenebi hongo holenebi walia hatagi haga ka, lolebira. Wali agali maru i̱ handabe manga haga karume i̱ kogoha ibuwa tini taga pani timbuniore nalu holebira.
ISA 45:25 Anigo Anduane Homogo i̱ kogonime Yagabanaga aguanali karu pele mialu haru dai berogola tigua mini tigabiwi howa i̱hondo turu halu i̱naga mini yaraga halu holebira, lalu Anduane Homogohanda Aisaiaha howa latagi hene.
ISA 46:1 Anduane Homogohanda lalu, Babilono wali agali kamiru tígua dama mitangi bialu mbirale gime wabini mini Bele Nebola biagolabo bi pupu wiaga horo timbuni ibirangi tígua mbirale o biagolabo tíninaga payani yu ibaga bigi beremili. Áyu tígua mbirale gime wabini ogonilabo nogo dongi erembirani pongo bialu dongi ogonime genda erekuibi manga howa darabiore yalu piaga.
ISA 46:2 Mani handalu kamiria gime wabini ogonilabonaga hongo nawi howa libugua tí biamogo bibe naheoredane hondoleberemi. Waitigi karume anda ibalu Babilono bo gialo waharangi tigua mbirale gime wabini biagolabo yalu polebira. Ani bialu Babilono wali agalirume bi pupu wulenaga ogonilabo ereba hai holebira.
ISA 46:3 I̱naga Isaraele wali agali Yagabanaga aguanaliru-o tí emene yu wahene kamiru i̱na bi larogo hale halimu. Tí ai̱yahanda taba hanayangi howa i̱na tí taba yalu baya hangu handayaho haabo ho harugoni.
ISA 46:4 Tínaga Ngode Datagaliwabe i̱ hangu kogome i̱na tí handayaho haabo holebero. Ani handaya hama pialu kone dege tí dagua halu waheore haramigola i̱na handayaho haabo holebero. I̱na tí wabirugoni ndobe. Anigo i̱na tí biamogo bialu i̱ kogoha haabo halimulo haru dai bialu handayaho haabo holebero, laya.
ISA 46:5 Anduane Homogohanda lalu, Tígua manda bialu kamiria i̱ kogobi mende ai kabe. I̱na birulidagua biai haga mendeali ai kabe.
ISA 46:6 Agali marume muni ngolo silibarubi dewaore mo ilowa tínaga mbirale bi pupu wulenaga wabiaga karume wabia helo muni tale bialu tihondo karulape miaga. Mbirale ogoni ale wabiaga mandabi karume wabiai kagola tigua o wabiyagonihondo bulu paluwa ge duli hanga halu bi pupu wiaga ka.
ISA 46:7 Tigua gime wabini biago tininaga payani mo yalu ogoni ibu ngelole mandabu wiyagoria yalu puwa ngelaga. Ani ngelowa mbirale gime wabini ogoni ema bibe nahe wiyagorianiore wiaabo haga. Ani ngeledagoria mbiralime puwa ibuhondo bi pupu wiragola hale nahaga wia. Wali agali tiha genda íbu ngagola o biagohondo biamogo bia laragolabi ibugua biamogo nabibehe wia.
ISA 46:8 Wali agali i̱naga bi mo wahalu ko biaga kamiruni tígua bi o larogo hale howa i̱na ala biruruni manda bilimu.
ISA 46:9 Tígua i̱na ala bialu haruruni mitangi budai bilimu. Ngode Datagaliwabeore i̱ hangu kagonida lalu latagi halimu. I̱ kogobi mende naheore i̱ni hanguore kogoni.
ISA 46:10 Ala bamba mbirale mbira ogoale bulebira lalu naibi wiaore latagi harugo mani henene larudagua tagira ibini. Mbirale mbira i̱na bule manda manda bu harugo habo nale mbiralime hapaibi nahe i̱na biaiore holebero larugoni.
ISA 46:11 I̱na bule hamelo kogo bilonaga agali mbira ni tagira ibiragohayagi dabo heledogo olalu íbu larogoni. Ogoni ibugua ega nene abaleore yagalo yalu ibagadagua ibulebira. Ibuwa i̱na mbirale bule manda manda bu wirugobi biaiore holebira. I̱nime bule larugonibi nde biaiore holebero.
ISA 46:12 Wali agali mini giambehe kamiru-o i̱na bi larogo hale hadaba. Tígua manda bialu kamiria i̱na tí haru dai bulenenaga horo pongobo wirugoni wene dege ngabe tobaho kamibe.
ISA 46:13 I̱na horo ogoni kaware haru eberogoni. Abaleore íbu hapara kagoni ndobe. I̱naga mana tigabi wayali holene ibilo emene hondoha nabi ibiragoni. Yarusaleme tano mo bayale halu wali agali karu pele mulebero. Isaraele wali agali tiha i̱ninaga hongo holenebi mini lene kogobi ogoriani mo panaho ngelolebero, lalu Anduane Homogohanda laya, lalu Aisaiahanda lene.
ISA 47:1 Anduane Homogohanda bi ogodagua lalu, Babilono-o áyu í̠ kininaga biragane dagiani bedego wahalu dindi abalu ngagoriani birape habe. Ala í̠ore mini lene timbuniore biruwa í̠ wandari mabuage agali nape biragagobi birarigoni. Anigo abale í̠na tingini baya taraore howa birarigobi ndo birulebere. Agali bu karume í̠ yári bayaleru karulo yu ibaga bu bederia nahondolebira.
ISA 47:2 Í̠naga haguani tangi hanaga ngago golo ngelalu í̠naga aga bayale karulederu golo wialu í̠ wali garabaya biabe biahaga bedarume bialu biragadagua bialu birulebere. Widime balawa helo dambiagane ege to̱le̱ beregedaga timbuni ngago mo beregedaga bialu holebere. Iba poraru domalu pole howa í̠naga agaru yaraga howa domalu polebere.
ISA 47:3 Wali agalime í̠ handalu karia í̠naga agaru golo wahene tibabe í̠ taga howa handa dindiho bereria hondolebira. I̱na í̠ore mana lalu barogola nabe waha lalu hapai holene agali mbira naholebiraore, lene.
ISA 47:4 Isaraele wali agalinaga Ngode Datagaliwabe ibu mini tigabiwi baya burugule ka. Ibugua ina biamogo bialu golope henego kama. Ibunaga mini Anduane Homogo Hongo Haiheore lene ka.
ISA 47:5 Anduane Homogohanda Babilonohondo bi ogodagua lalu, Babilono-o í̠ore bi nale aruma ngagoha birule pobe. Wali agali bu karume í̠ore lalu í̠ dindi bibahendenaga kuini wali beda nalolebira.
ISA 47:6 I̱na i̱naga wali agali bu hearuhondo keba timbuni halu ti i̱naga wali agali hayadalo manda nabiore harugoni. Ani hewagola i̱na ti í̠naga andaneha helalu í̠na ibalu i̱naga wali agali urunihondo dara emeneorebi mbira naheore howa wali agali wahe bu hearubi genda timbuni mo ya haga bialu harigoni.
ISA 47:7 Í̠nime mitangi bialu howa i̱ kuini wali biraabo holeberobe toba howa mani í̠niha tagira ibulubadagoha mitangi nabi hilahole bialu waharigoni.
ISA 47:8 Í̠ wali mbira í̠ni awadaga holenego hangu taya bialu biraabo haga mbira bedegoni i̱na bi o larogo hale ha. Í̠na mitangi bialu howa i̱ha ko mbira anda naibulebirago i̱ bayale dege biraabo holebero lowa í̠na lalu, Mbiraore i̱ hangu i̱ ale mende nahe bibahendenaga hongo bolanguahe bedo. Wali mbira agalini homene dalo mbira bereagobi i̱ nabirulebero. I̱ waneigini bibahende homai haga binigobi naholebero, lo mitangibu hari.
ISA 47:9 Anigo í̠ha mbirale ogonilabo abaleore anda ibulebiragonaga dara haro. Í̠ha mo ko holene koorene ko ibirangi í̠ agalinibi í̠ waneigini bu karubi bibahende horo mbiraorengi dege homai holebira. Í̠na í̠ni bayale haabo holenaga palene wai hongohe tara tara dewa ngogo mandabu harigome biamogo nabulebira.
ISA 47:10 Í̠nime mitangi bialu mana ko bialu kogome bayale holoboda lo mandabu hari. Ani bialu í̠na uruni bialu harigo marume í̠ nahende kabe toba hari. Í̠naga mini ko bulenenaga gigabiwi kegome í̠naga mini mo luluya hayagola í̠nime lo manda bialu, I̱ ale mende naheore bibahendenaga hongo bolanguahe bedo, larili.
ISA 47:11 Anigo mo ko holene timbuniore í̠ha anda ibirangi í̠ni yo pialu polenenaga hongo naheore holebere. Mo ko holene ogoni í̠ha abaleore anda íbu ngagola í̠na ogoni anda naibilonaga gamu bulene mbira nawulebira. Ko mbirale mbira ala nahendene ale í̠ha naibulebira lo mandabu harigo í̠ kegoria abale anda ibalu í̠ni mo ko holebira.
ISA 47:12 Í̠ wandari mabuage biraringi howa palene wai nole tara tara bu manda bialu haga wirigo bia dege bialu birabe. Ani beregome í̠ biamogo bulubada. Urunime í̠naga waitigi ibiraru ti gi halu ibida polebira bada.
ISA 47:13 Agali manda timbunibi bu hearume í̠ mini bayale talebu ngiyagola í̠naga mini ndibulo wahene kegoni. Agali yakundi handaga manayi bu karu tigua í̠ha ogoale bulebira lalu langilonaga í̠na ti ege mbira mbirani ibidaba lalu ti olaga birili. Anigo áyu í̠ha ko anda ibiragola uruni tigua í̠ mo wialu biamogo bule ibilo.
ISA 47:14 Ani biamogo nabibahe holebira ndobe. Agali uruni tibi nde datani gabuni yobi ngaligobi dege kago irame ti do waholebira. Ira timbuni hungu bialu dedagome ti nadelonaga tinime biamogo bibe nahe holebira. Heneneore larogo í̠ ira ogoni dedagoria puwa dagare dogo bialu biruleberobe toba holeni. Ani ndo ira ogonime í̠ dalu do amo lolebira.
ISA 47:15 Heneneore bulebirago laro. Í̠ wandari mabuage biraringi howa agali yakundi handaga manayi í̠ha ibulebirago langilo hale hariliru tigua í̠ biamogo nabulebira manda bibe. Tini nde kagua bialu luluyu ibaga bialu í̠ yu wahalu poragola mbirali í̠ biamogo bulene mbira naholebira, laya, lalu Aisaiahanda lene.
ISA 48:1 Yagabanaga aguanealiru-o i̱na bi ogo larogo hale hadaba. Wali agaliru tí mini Isaraele howa tí Yuda aguane kamiru-o tíhondo bi ogo larogo hale hadaba. Tígua Anduane Homogonaga minini howa habo nalolene bi hongo howa lo weramili. Tígua lalu, Iname Isaraele wali agalirunaga Ngode Datagaliwabe mitangi bialu lotu lalu kama, laramiligo ne harigaha howa bi hangu lalu mana bayale bulene ngaru nabi ibu andanehabi nahaga kami.
ISA 48:2 Ani berami tiraga tígua tíninaga mini mo yaraga halu ina tano dunini loma biaho ngelene biagonaga wali agali kama laga kami. Ani bialu howa tígua Isaraele wali agalirunaga Ngode Datagaliwabe ibu mini Anduane Homogo Hongo Haiheore kago ibugua ina biamogo bilonaga hanaho haga kama laramili.
ISA 48:3 Anduane Homogohanda Isaraele tihondo bi ogodagua laragoni. Bambaore i̱na tíhondo mbirale mbira ogodagua bulebira lalu latagi harugo ai abaleore i̱na larugodagua tagira ibilarugola de handaramili.
ISA 48:4 Mbira i̱na manda birugo tínaga mini giambe hongoheore aeanerubi ege to̱le̱ boronosi alebi howa i̱na bi larogo hale halu talialu bia nabiaga kami manda bidogoni.
ISA 48:5 Anigo i̱na ala howa tí kamigoria mbira ogoni bulebira larugo nabi howa latagi harugoni. I̱na ani larugo irane tígua tínaga mbirale dama mitangi bialu bi pupu wulenaga aeaneru irarume wabini ngarume ani biya lolemini.
ISA 48:6 I̱na mbirale bulebira lalu tí ala langirugoni biai hayane de handarimigoni. Ani hondowa áyu tígua lalu, Anduane Homogohanda heneneore layada, lolene nga. Ai áyu i̱na tíhondo ogoale ibulebira lalu ala langia nabi harugo tí handa nabini wia do henego gahenge ibulebiragonaga langero.
ISA 48:7 Áyu ogoni i̱na bi latagi harugo lola haragoni uruni ale bamba nabiniore. Abale binidale tígua de hondowa manda biai kama lalu kamile.
ISA 48:8 I̱nime tí i̱naga wali agaliore halimulo daba bagiho helarungi howa hama ibinigo tí mini bilinahe ndo áyubi tí mine halu bi mo wahaga dege kami manda biai kogoni. Anigo i̱na tíhondo mbirale uruninaga bi langia nabigo tígua bi ogoni ala nahaleheore harimigoni.
ISA 48:9 Wali agali karume i̱ mitangi bialu i̱naga mini yaraga helonaga i̱na tíhondo keba hatagi nahe kogoni. I̱na tíhondo keba timbuni howa tí bo wahai holene winigo keba ho donge ho kogoni.
ISA 48:10 I̱na tíni ko para kago domalu mo bayale holene manda birugo agalime silibani dodo para kago do lagalo wahelo irani delagadagua i̱na tí tandaga ngeledogo ko wahalimulonaga ngeledogoni.
ISA 48:11 I̱ni mini lene timbuniore kogo mitangi bialu anidagua birugoni. Wali agali bu karume i̱naga mini mo dindiha halu yo nahendelo i̱naga mini hangu yaraga helonaga anidagua birugoni, lalu Anduane Homogohanda Aisaiaha howa latagi hene.
ISA 48:12 Anduane Homogohanda lalu, Isaraele wali agali Yagaba aguanali i̱nime olo helene kamiru-o tígua i̱na bi larogo baya hangu hale holene nga. I̱ni Ngode Datagaliwabe kogoni. I̱ piganeore henego mani hamarongibi i̱ni dege haho wiaabo holebero. Mende i̱ ale nahe i̱ni hanguore kogoni.
ISA 48:13 I̱ninaga gimeore dindinaga gene dunini wabu helalu hari daligabi yangalo helarugoni. Dindi harila i̱nime olalu ibidaba larogola libugua abaleore ibalu i̱ninaga wanakuini íbu holebira.
ISA 48:14 Tí bibahendeoreme i̱ninaga bi hale hole íbu ngoai hadaba. Agali mbira i̱na dabo helenegome i̱na bia larodagua bialu ibugua Babilonoaliru baba wai bialu bope holebiragonaga gime wabini mbirale wiaru ariame ani bulebira lalu latagi naheore.
ISA 48:15 Anigo agali ogoni ibulebira lalu i̱nioreme latagi harugoni. I̱na agali ogoni íbu lalu i̱nime olowa haru ibalu ibu wayali helarugoni.
ISA 48:16 Ainde tí i̱ni kogoria kaware ibalu i̱naga bi larogo bayuwa hale hadaba. Bamba hama ibirugoningi howa i̱na ha do howa bi mbira nalaruli. Mbirale uruni bambaore wia nabiangi i̱na ogodagua bulebira larugo bilo mo bia howa birangi i̱ holebero, lalu Anduane Homogohanda lene. Anduane Homogo Bibahende Haru Haame Ho Haga kagome ibunaga Dinini i̱hondo ngialu i̱ mo hongo halu i̱ pu laya handala ibinigo kogoni, lalu Aisaiahanda lene.
ISA 48:17 Anduane Homogo Isaraele wali agalinaga Ngode Datagaliwabe mini tigabi baya burugule tí pele ngiaga kago ibugua bi ogodagua laya. I̱ Anduane Homogo tínaga Ngode Datagaliwabe kogoni. I̱na tí bayale halimulonaga mana bayale ngaru taluwa bialu halimulo lawai haga kogoni. Tígua hariga tigatiga pilimulo haru piaga i̱ kogoni.
ISA 48:18 Tígua i̱naga bi mana hale halu bidamile nde tí bayale halu iba piaga harigaha iba hundia nabi pialu haabo hagadagua tí turu holeneha dege haabo kamile. Ani bidamile iba solowarame iba angeni hongo howa ta̱la amu nana bima ibagagobi tínaga mana beremigo tigabi hongoheore bialu kamile.
ISA 48:19 Ani bu kamile nde tí waneigini dewaore iba mu daga labe nahe ngaligobi kale. Ani kale nde i̱na tinaga mini dindi ogoria ereba nahelo i̱na baya hangu handayaho kole, lalu Anduane Homogohanda laya.
ISA 48:20 Tígua Babilono dindiha wali agali karu helalu dindi ogoni yu wahalu ibida piai hadaba. Puwa tígua turu timbuniore hama kiaulo yalu dindi bibahendeha bi loyogo lowa lalu, Anduane Homogohanda ibunaga biabe biahaga Isaraele mo wialu pele mialu haru dai biya, lalu latagi hama pilimu.
ISA 48:21 Bamba Anduane Homogohanda ibunaga wali agali dindi ko iba dalu naibaga wiagoha haru piyangi uruni ti mbira iba noa halu homa nabi hene. Anduane Homogo ibunime ege to̱le̱ timbuni heagoha howa iba ibilene. Ibugua ege to̱le̱ha howa iba duguatagi hayagola ti iba gagahe bayale karulape nalu hene.
ISA 48:22 Anduane Homogohanda lalu, Wali agali mana ko biaga karu ti bayale howa mo palia holene handa walia naholebira, lalu Anduane Homogohanda laya, lalu Aisaiahanda lene.
ISA 49:1 Dindi tara taraha hameigini kamirubi dindi kaundiha kamirubi tí bibahendeme i̱na bi o larogo hale hadaba. Bamba i̱ ai̱yahanda taba hana nabi ibu tombeha berewangi Anduane Homogohanda i̱ ala mini lalu dabene. Ibunaga biabe biahaga holiya ibugua i̱ dabo helene.
ISA 49:2 Ibugua i̱ ibunaga bi lahaga howa i̱na bi larogome mbira wai biagane ayu tibu nene gadeleme podagadagua wali agalinaga bu miniha nogoba helo i̱ mo la hene. Ibuninaga giha i̱ ya do howa timu yandareru baya hangu deho manda manda biagadagua i̱na biabe bayuwa buliyanaga i̱ mo tiga bialu helene.
ISA 49:3 Ani buwa ibugua i̱hondo ogodagua laya. Isaraele-o í̠ore i̱naga biabe biahaga kegoni. Í̠ha howa wali agali bibahende bu karunaga deni i̱naga hongobi i̱ni mini lene kogobi ti walia holebero, laya.
ISA 49:4 Ani layagola ai i̱nime dege bi ogodagua ladai biru. I̱na biabe bialu harugo nagalone ale birudagoni. I̱na hongo howaore biabe birugo ai i̱naga hongo biba halu birugonaga lini mbira nadole biabe bame bu waharuda larugoni. Anigo Anduane Homogo ibunime biabe ndelahe i̱na bialu harugo manda bida. Ogoni birugonaga yolo ibunime karulape ngulebira.
ISA 49:5 Anduane Homogo ibugua i̱ ai̱yanaga tombeha berewangi biabe ogoni buliyanaga i̱ dabeneya. Anduane Homogonaga wali agali i̱na haru dai buliyanaga ibugua ibunaga biabe biahaga holiya i̱ dabo helaya. Isaraele wali agaliru dindi tara taraha purogolo karu i̱na haru dai buliyanaga i̱ dabo helaya. Anduane Homogo ibugua i̱ mini lene laga kagonigo i̱naga hongo holene tene ibuha kagoni.
ISA 49:6 Anduane Homogohanda i̱hondo langialu lalu, I̱naga biabe biahaga-o abale í̠na Isaraele wali agali yu wahene hearu i̱ni kogoha ti hongohe helo haru daibule biabe bialu habe laru. Ai i̱na biabe tara hongoheore wiago í̠hondo bia laro. Í̠na wá holene hale ale howa dindi tara taraha hameigini tara bibahende karu i̱ni kogoha haru dai biai habelo heledo. Ani beregome ti bibahende pele miai holebero, laya.
ISA 49:7 Isaraele wali agalinaga Anduane Homogo ibu mini tigabi baya burugulebi inanaga pele ngiagabi kago ibugua ibunaga biabe biahaga biago mitangi bialu ogodagua laya. Wali agali dindi tara tarani karume ibu handabe manga hagabi ibu agali ko ngubiore mbira o kagoni lagabi ka. Agali ogonime ibu agali haguane karunaga biabe biahagabi kagoni. Anduane Homogohanda ibunaga biabe biahaga o biagohondo lalu, Kini karume í̠ hondowa ti heyu holebira. Kini igini haguane karume ge duli hanga halu bulu paluwa í̠naga mini yaraga haabo holebira. Tigua í̠naga mini yaraga holebiragonaga irane i̱ Isaraele wali agalinaga Anduane Homogo mini tigabi baya burugulebi kogome i̱na bulebero laruru mbira pugua nabi biaiore haruligobi i̱naga biabe í̠na bibelo dabenego i̱ kogoni, lalu Anduane Homogohanda lene.
ISA 49:8 Anduane Homogohanda ibunaga biabe biahaga biagohondo bi ogodagua laya, I̱na í̠ haru dai bialu pele ngulene horo mbira pongobo winigo ibiragola horo ogoningiore í̠na dugu berego hale howa dara halu biamogo bulebero. I̱na í̠ mamage howa baya hanguore handayaho halu í̠ togoni howa wali agali dindi bibahendeha karu baba habo nalolene bi hongohe lo wulebero. Isaraele dindi mo ko hene ngagoni lone mo bayale howa i̱naga wali agali tini dindi ogoniha hadai bialu bayale holebira.
ISA 49:9 Wali agali garabaya andaha karu i̱na golope halu pudaba lalu maru aruma dindiha karuhondobi wá kagoria tagira ibidaba lolebero. Ani larogola tagira ibalu ti nogo sibi datani nolene dewaore hariganibi hari ngaruha bu paya bidaria nama piagadagua tigua tomo karulapeore nalu holebira.
ISA 49:10 Ani ibalu kagola ti tomo ibabi karulape nalu garibi nalolebira. Poboyogo birangi nime tinaga tingini daba naholebira. Mbiralime ti gubalini howa bayuwa haru halu iba gagahe pedagoha nogo sibi haru piagadagua ti iba bayale nalu helo haru holebira.
ISA 49:11 Dindi hari karu i̱nime wabirugo i̱na bo haeala baga bialu mo tiga bulebero. I̱naga wali agaliru pelonaga i̱na hariga bayale timbuni bope halu wulebero.
ISA 49:12 Ani bidogola i̱naga wali agaliru dindi kaundiaha howa ibalu dindi uyurahayagibi ni paliragohayagibi uruniha howa ibulebira. Maru nde Asawana tanoha karu tibi nde ibulebira, laya lalu Aisaiahanda lene.
ISA 49:13 Hari daliga li kamiruni tígua turu halu iba gana ladaba. Dindi-o í̠nabi nde turu halu mambolo balu habe. Hari wedamiru tíguabi nde turu halu iba gana lagimbu bidaba. Anduane Homogohanda ibunaga wali agali biaru dara howa ti genda tandagaru yu heneru mo bayale halu tinaga bu miniha hadapayabu holebiragonaga turu halu ani bidaba.
ISA 49:14 Wali agali Yarusaleme tanoha hearume ogodagua laya. Anduane Homogohanda ina erembira ngiya. Ibugua ina embeda halu yu wahayada, laya.
ISA 49:15 Ani layagola Anduane Homogo ibugua tihondo ladai bialu lalu, Wali mbirame waneigini gali ibuni taba henenego embedaho wahalu ibunimeore andu minigo gubalini nahagabe. Wali ai̱yame ibunaga waneiginihondo ogonidagua biaga wiaguabi i̱na i̱naga waneigini embeda halu yu wanaholeberoore ndobe.
ISA 49:16 Yarusaleme-o i̱na í̠ore embeda naholebero. I̱na í̠ mini i̱naga gi habe kirobalini gilibu yu kogoni ndobe. Ogoni handalu i̱na í̠niore mitangi biaabo haruli.
ISA 49:17 Í̠naga waneigini biarume í̠ mo bayale hole o dai biragoni. Maru abale í̠ mo ko haga biaruni tini dai nabule puabo haragoni.
ISA 49:18 Í̠na handadaga howa handa amu nana bia nabere. Í̠naga waneigini biaruni mo ngoai halu í̠ni keria dai birago de handa. I̱ Anduane Homogo Haluhe kodagua heneneore laro. Wandari bedarume agali pole yári bialu howa turu taraore hagadagua í̠na í̠naga waneigini uruni ibirago hondowa turu taraore holebere.
ISA 49:19 Heneneore í̠naga dindi mo ko hene bameore winigo ai áyu í̠naga waneigini dewaore urunime dindi ogoniha hole dai bialu ho to̱latagi haragola dindi í̠nime henge nawiore holobada. Wali agali maru í̠ mo ko halu piaga biarume tí heba lone mandagi nahe nde dindi kaundiaha pu holebira.
ISA 49:20 Í̠ waneigini uruni ti í̠naga wali agali biaru ti dindi kaundiaha garabaya bu heangi anda henego tigua awe í̠hondo lalu, Dindi ogo emene hangudago i̱na holene dindi timbuni hameledema, lolebira.
ISA 49:21 Ani laragola í̠nime lalu, Waneigini dewa uruni aiwa nginidabe. I̱naga waneigini biaru pu ereba hayagola i̱ni waneigini maru hono wibe nahe birarugoni. Waitigi bu hearume i̱ garabayabu yalu pu wahayagodago waneigini uruni anda helo handaya howa mondo bialu henedago aiwadabe. I̱ni hanguore biru wirugo ai waneigini uruni ti agoha howa ibinidabe, lolebere.
ISA 49:22 Anduane Homogo Bibahende Haru Haame Ho Haga kago ibugua bi ogodagua ibunaga wali agalihondo laragoni. Dindi tara taraha hameigini karuhondo i̱na gibu mialu manane mbira walia holeberogo hondowa tigua í̠naga waneigini uruni haru halu dai bulebira. Tigua waneigini uruni maru payani berelalu maru gini babiho yalu ibulebira.
ISA 49:23 Kini karu ti í̠ aba haradagua bialu kuini wali bedaru tibi nde í̠ ai̱ya biragadagua birulebira. Tigua í̠ keria ibalu bulu paluwa í̠naga mini yaraga holebira. Í̠ kegoria ibalu tigua tini mo dindiha halu ge duli hanga haga bulebira. Ani birago hondowa i̱ore Anduane Homogo henedane hondolebere. Wali agali i̱na ti biamogo buliya mini dunubia ho karume ti bame ndo dunubia holebira, laya.
ISA 49:24 Waitigi hongohe karume tínaga mbirale bu ngaru mo yalu piyagua nde mbiralime dabudabu uruni lone gingila mu yalu dai bibehe kabe. Waitigi uruni degeme tínaga damene mbira minu yalu piyagua nde tígua agali ogoni haru dai bibehe kamibe.
ISA 49:25 Anigoyu Anduane Homogohanda Yarusalemehondo lalu, Heneneore i̱na í̠naga waneigini garabayabu yalu piyarubi dabudabu mo yalu piyarubi bibahendeore waitigi kini hongoheore karunaga giha yu karuni mo yalu dai bulebero. Tigua í̠ baba wai biyagua nde i̱na ti baba wai biadai bialu í̠naga waneigini uruni bibahende pele mialu haru dai bulebero.
ISA 49:26 Ani buwa í̠naga waitigi bu karu tini degedege wai bilo mo bia holebero. Tini degedege wai buwa mo ko halu waini iba hongohe nowa luluyu halu biagadagua bialu tini bo galipayabu wahaga haga bulebira. Ani birago hondowa wali agali dindi tara tarani bibahende karume i̱ni hangu henene Anduane Homogoore henedane manda bulebira. Mbiralime í̠ pele ngialu golope henego i̱ore kogoni manda bulebira. I̱ Isaraele wali agalirunaga Ngode Datagaliwabe hongohe taraore kogoni manda biai holebira, lalu Anduane Homogohanda laya, lalu Aisaiahanda lene.
ISA 50:1 Anduane Homogohanda bi ogodagua laragoni. Tígua manda bialu kamiria agalime ibu one nogo dugu ngi lalu pu lagadagua i̱na i̱naga wali agaliruhondo pudaba layabe toba kamibe. Ani manda bu kamiyagua nde wali onene waharo lalu bi bebani gilibu winidago a yu kamigo. I̱ baba agali mbiralila danobi nahe dege kogo. Irane agonaga i̱na ti muni dano henego hondolenaga minalu muni taguialu dindi taraha garabaya biabe ale bialu helo pelayadalo manda bidamibe. Anidagua nabiorego. Tígua mana ko dewa birimigome i̱ mo tandaga hayagonaga i̱na Yarusaleme erembira mialu waitigi hearunaga giha mo ya harugoni ndobe.
ISA 50:2 I̱na tí taya bima ibalu hewaria agali mbiraoreli mbira naheyago agua biyabe. I̱na tí olalu hewariabi mbiralime ya nalarimigo agua biyabe. Tígua manda bu handalu hemiria i̱na tí pele ngulene hongo nahe kabe toba harimibe. I̱na bi hangu larogome iba solowara timbuni bedaruni hundu tege lolebira. I̱na bi dege larogome iba timbuni pedaruni hundialu iba piagarunaga be abalu titaulo wulebira. Ani biragola iba uruniha wena bedaru homai howa ngu bulebira.
ISA 50:3 Hari daliga li kagoni i̱na mo aruma halu wali agalime ti damene mbirago homaragola dara howa aga mindibi karulo kaligobi helabehe kogoni, laya lene.
ISA 50:4 Anduane Homogo Bibahende Haru Haame Ho Haga kago ibugua i̱na bi bayaleore loliyanaga lawai hayagome i̱na wali agali maru hongo nahe karu mo hongo halu bi bayale tigabi ngadagua laga buliyanaga lawai haya. Egerebagi bibahendengi ibugua bi gahenge i̱ lawai hararu hale holiya mo hale hoa haga ka.
ISA 50:5 Anduane Homogohanda ibunaga bi bayuwa hale holiya i̱naga hale mo dugua haga biaga. Ani bigi biragola i̱na nde biabe ogoni bibe manga howa ibu erembira mialu pu nabi bialu harugoni.
ISA 50:6 Ogoni bialu hewaria agali bu hearume i̱ gewa tibume erembirani belo helalu agali urunime i̱hondo mege bialu i̱ yo handalu i̱naga angari hewaru minu dugualu hearia ani bilo i̱na bi nale waharu. Tigua i̱naga denguiha hamiaga toloba haga biyagola wanakui handa tara nahe ani bilo waharugoni.
ISA 50:7 Anduane Homogo Bibahende Haru Haame Ho Haga kago ibugua i̱ biamogo bialu kagome agali ko urunime mana ko i̱hondo biragome i̱ mo tandaga nahaga. Anigo i̱nime hongo howa hibu lalu i̱naga biabe biaga wiyago bialu haruli. I̱na biabe ogoni bialu kogome i̱ni taga holene mbira nawulubada lo manda buwa biruli.
ISA 50:8 Ngode Datagaliwabe ibuni i̱ha kaware haparaho kagome i̱ha ko mbira nawida lolebira. I̱la godi laba lole agali mbira kabe. Anigo mbirali heagua nde i̱ manani haru pu helowa ibunaga bi yinidago latagi holene nga.
ISA 50:9 Anduane Homogo Bibahende Haru Haame Ho Haga kago ibugua i̱ pele ngiagaore kagonidago agali i̱na ko mbira biri labehe mende ai kabe. Agali i̱na ko mbira birigo godi lama laga karuni ti agaru ngaria bombome no tidabagabu wiraligobi tiniha mo ko holene lola holebira.
ISA 50:10 Wali agali Anduane Homogonaga andaneha howa ibunaga biabe biahaga kagome bi larago hale halu bialu kamiru tí gi naheore holene nga. Tí hariga poramigoni aruma ndibuleoreha pirimiyaguabi Anduane Homogo ibunime tí handayaho kago manda buwa ibunihondo mini mbiraore hongohe wuwa polene nga.
ISA 50:11 Anigo wali agali maru Anduane Homogohondo mini mbiraore nawi kamirume arumaha pole howa tíninaga hale hedo yidamigome tíni hariga walia helo lowa hale yalu pilimu. Anduane Homogo ibugua tínaga dindi tu wia kago. Dindi ogoniha tandaga nalu haabo holene nga, lalu Aisaiahanda lene.
ISA 51:1 Anduane Homogohanda bi ogodagua lalu, Wali agali maru tígua i̱naga mana tigabi talialu howa i̱na biamogo buliya hame lowa i̱ koria ibaga kamiru tí i̱na bi larogo hale halimu. Ani hale halu tínaga mamali aba ai̱ya Abarahama Sarala mandabu dai bilimu. Libu ege to̱le̱ ale hebigoha bo tombe laradagua bialu i̱na tí yaminigo. I̱na Abarahama olenedangi libu waneigini mbira nahe hearia olene. I̱na libu mo bayale halu libuhondo waneigini mirugoni. Libunaga waneigini aguaneneru dewaore halu ho dame bia hene.
ISA 51:3 I̱ Anduane Homogo i̱na Yarusaleme tanoha ko hene ngaruni hondowa i̱na dara timbuniore howa biamogo bulebero. Áyu ibu dindi ko dalu naibaga yobi ngaligobi ngago mani i̱na ibu lone mo bayale halu dindi bayale benebere mo ngelalu mbirale bayaleru anda hai helolebero. I̱na Idene mabu bayale hangarugobi ngelolebero. Ani ngeledogola dindi ogoniha turuho holene wialu wali agali karume i̱ mini yaraga halu i̱nihondo ka̱i̱ lolene iba gana lalu holebira.
ISA 51:4 I̱naga wali agali kamiru tí i̱na bi larogo hale halimu. I̱na hameigini tara tara dindi bibahendeni karu tini bayale helonaga bi mana lawai haruli. I̱naga bi mana bayale ngogome dindi uruni bibahendeha wá holene hale ale wá holebira.
ISA 51:5 I̱naga pele ngulene abale hapara haragoni ndobe. I̱naga mana tigabi bulene kaware ibiragoni. Dindi tara tara ngaruha hameigini bibahende i̱ninaga hongome haru hai holebero. Wali agali dindi kaundiaha palima pedarume i̱na ti biamogo bule ibuliya tigua i̱hondo mini dunubiaho holebira.
ISA 51:6 Tígua hari daligaha de handadaga halu dindihabi handape hadaba. Hari li ngagoni ginu hagua poradagua piai halu dindi ogo aga labolabo budabaga biradagua budabaga biai holebira. Ani biragola wali agali bame bunguna homaradagua homa paya bulebira. Ani bulebiragoyu i̱na pele ngulene i̱naga gini yalu eberogo ereba naholebira. I̱naga mana tigabi bulenego mo ko nahe bayale wiaaboore holebira.
ISA 51:7 Wali agali mana tigabi ngago manda biaihe howa i̱naga bi mana lowini ngago hongo howa yu kamiru tígua i̱na bi larogo hale halimu. Wali agali maru karume tíhondo bi ko laragolabi mege biragolabi tí gi nahalimu.
ISA 51:8 Uruni ti bomborume labolabo no budabaga bialu wahagadagua ereba holebira. Ani bulebiragoyu i̱na pele ngulene i̱naga gini yalu eberogo ereba naholebira. I̱naga mana tigabi bulenego mo ko nahe bayale wiaaboore holebira, lalu Anduane Homogohanda lene.
ISA 51:9 Anduane Homogo-o í̠ heyalu ina biamogo bibe. Í̠na bamba í̠naga hongome mbirale gibi biridagua hongo ogoni degeme ina pele ngibe. Í̠nime dama puya timbuni iba solowaraha biraga mini Lahaba biago balu bo galibaga biri.
ISA 51:10 Ani bialu wali agali í̠nime mo wialu biamogo biriru haru polenaga iba solowara timbuni bereago mo hundia halu dindi yobini pialu helo hariga pana helari.
ISA 51:11 Wali agali í̠nime gini mialu haru dai bini biaruni tini dalu Yarusaleme turu howa dai bulebiraore manda bido. Tigua dai bialu howa iba ganaru lalu bi hongo howa ladagadaga bialu dai bulebira. Dai buwa tinaga bu miniha genda tandagabi ereba hai halu tinaga turu holene wirago ereba nahe turuho haabo holebira.
ISA 51:12 Anduane Homogohanda ogodagua lalu, I̱na tínaga bu miniha mo hongo halu genda yu kamiru mo waholene i̱niore kogonigo irane aginaga tígua agali maru bu karuhondo gi haramilibe. Uruni ti hongo naheore kagoni. Wali agali bibahende dataniru gaulalu abale ereba hai hagadagua ereba hai holebira ndobe.
ISA 51:13 Anigo tínaga Anduane Homogo i̱niore tí wabini kogonigo tígua embeda ho kamibe. I̱nime hari daliga wabuwa yangalo helalu dindi ogonaga gene dindiha kagobi mo hongo howa heledogoni ndobe. I̱ ani kogodago irane aginaga tígua agali ko biaga karume tí mo ko halu bope holobada lowa gi ho kamibe. Agali urunime tíhondo mbirale mbira nabibehe kagoni. Ti keba bameore ho waharagoni.
ISA 51:14 Wali agali garabaya pu karu ti abaleore golope holebira. Ti garabaya pu kagola homa nabulebira. Ti golope haragola tomo karulapeore nalu bayale holebira.
ISA 51:15 I̱ Anduane Homogo tínaga Ngode Datagaliwabeore kogoni. I̱na iba solowara mo heya halu iba yaribu timbuni mo bia halu kulundugu timbuniore lelaga biaga kogoni. I̱naga mini Anduane Homogo Hongo Haiheore kogoni.
ISA 51:16 I̱na tínaga ne harigaha howa i̱naga bi uruni latagi halu halimulo tíhondo langirugoni. Ani bialu i̱na tí i̱naga gihaore minu yado harugoni. I̱nime hari daliga wabuwa yangalo helalu dindi ogonaga gene dindiha kagobi mo hongo howa heledogoni. I̱na Yarusaleme wali agali bu karuhondo bi ogodagua laro. Tíore i̱ninaga wali agali kamigoni laro, lalu Anduane Homogohanda lene.
ISA 51:17 Yarusaleme-o í̠ heya. Í̠ lone heyalu hongo hodai bia. Anduane Homogohanda ibunaga lembo holene waini iba gabo be mbira alego í̠ nabelo ngiyago no biba harigoni ndobe. Ani nowa í̠ luluyu ibagabu harigoni.
ISA 51:18 Ani hegola í̠ gini yalu hariga tigabini haru ibagabu holenaga í̠ igini mbira naheya.
ISA 51:19 Genda timbuniore í̠ heria ibira hayago í̠ dara howa bu miniha mo palia halu biamogo bulene mbira ai kabe. Waitigirume ibalu í̠naga dindi bo gialahole bialu haealabaga biyagoni. Wai biaga ayu tibume í̠naga wali agali bo wahaya. Ani bialu í̠naga wali agali bu hearu tiha hina gari timbuni tagira piya. Í̠ha genda ogoni wiyago mo wahalu biamogo bulene ai kabe.
ISA 51:20 Í̠naga wali agali ti bibahende hongo nahe howa ti de mborere biyagola ti dindini odo ibira halu hariga gibuni ngaruha palu wima peda. Ti nogo gabua gonoha daradagua bidagoni ndobe. Tigua mbirale mbira bibe nahe. Anduane Homogonaga lembo timbuni holenebi tínaga Ngode Datagaliwabenaga bi hongohe lolenebi gabo be wiagoha howa nelo hambu miyago tiha to̱lo ngagoni.
ISA 51:21 Yarusaleme-o í̠ore genda dewaore yu howa walime lulu iba dewa nowa luluyu wiagagobiore ngegoni. Anigo í̠ waini iba nowa ndo luluyu nge. Anduane Homogonaga keba holeneme í̠ mo luluya henego ngegoni.
ISA 51:22 Anduane Homogo Bibahende Haru Haame Ho Haga kago í̠naga Ngode Datagaliwabe ibugua waitigiru baba wai bialu wayali habelo biamogo biaga kagoni. Ibunime í̠hondo bi ogodagua lara. Í̠ de handa. I̱naga keba holene gabo be í̠ giha yu howa nalu no luluyu harigo ogoni i̱nime yamirugoni. Maniorebi í̠na gabo be ogoniha howa nabelo lone nangulebero.
ISA 51:23 I̱na gabo be ogoni agali maru í̠ mo ko hole bialu karunaga giha mo ya holebero. Agali uruni tigua í̠ dindini mo pale lowa í̠ bo hengedalu tigua dindini ge halu poradagua bialu í̠naga erekunini ge halu ibaga bu hayaru tihondo mo ya helolebero, lalu Anduane Homogohanda lene.
ISA 52:1 Yarusaleme-o hongo timbuni howa heya nabere. Í̠ mini lene timbuni mbira kegoni. Ngode Datagaliwabenaga tano lomabia hene kego í̠ yári bayale tara tara ngaru karulowa habe. Wali agali í̠ manda nabi ko biaga karume ti bibahende Yarusaleme í̠ha lone anda naibulebira.
ISA 52:2 Yarusaleme í̠ore áyu darabiore garabaya bu harigoni. Mani nde heyalu be abalu í̠ tinginini para karuni taulo wahalu í̠ni kininaga dagia biraganeni birabe. Wali agali Saiononi garabaya bu kamiru-o pu senime tínaga mani hende karuni hado wahalimu, laya.
ISA 52:3 Anduane Homogo Bibahende Haru Haame Ho Haga Kago ibugua lalu, Agali mbirame i̱hondo yolo ngialu i̱naga waneigini uruni ibunaga garabaya biabe ale bialu helo haru pene ndoyago. Ani biyagome i̱na ti haru dai bule howabi nde mbirali yolo nabi bameore haru dai bulebero.
ISA 52:4 I̱ni nde Anduane Homogoore kogome bi ogodagua laro. Bambaore i̱naga wali agaliru tininaga hameme Iyibi dindiha pu hene. Áyuore nde Asirianaga kini kagome wali agaliru minu yalu ibunaga garabaya biabe ale bia helonaga piyangi i̱hondo yolo nabi bameore minu yalu piya.
ISA 52:5 Babilonoali hearu tiguabi nde anidagua dege bialu i̱naga wali agali hearu bame garabaya biabe ale bia helo minu yalu piyagome i̱naga agali haguane hearuni bameore dugu bialu bere laya. Anidagua biyagonaga i̱ni yolo mbira mo ya nabi haru. Bibahendengi agali ti haru hagarume mine halu i̱ mege hangu bialu i̱naga mini mo yo handalu haabo haga.
ISA 52:6 Anigo awe nde horo mbira i̱na mandabu wirugo ibirangi nde i̱naga wali agali uruni tigua i̱naga mini manda biai holebira. Ani manda bialu Anduane Homogo i̱ni hangume mbirale uruale bulebira lalu langirugo i̱ kogoni ti manda bulebira. Ai i̱niore kogonigo manda bilimu.
ISA 52:7 Wali agalirume bi mana bayaleore yalu hari karuha howa ibiragoni hondowa turu timbuniore holene nga. Urunime ibalu lalu, Saiono-o mo palia holene tagira ibira, lalu tí pele ngulene horo ibiragoni. Tínaga Ngode Datagaliwabe ibu bolangua heneore handayaho haga kini kagoni, lolebira.
ISA 52:8 Tanonaga pabe daligani mamage handa amu nana bu haga agali karu tigua turu timbuniore howa bi dalimu ladagadaga bialu kagoni hale hadaba. Anduane Homogo Saiono tanoha dai birane tininaga deme de handaragoni.
ISA 52:9 Yarusalemeha kamiru-o turu timbuniore howa iba gana ladaga hadaba. Anduane Homogohanda ibunaga wali agaliru Yarusaleme haru dai bialu tinaga genda timbuni yu hearuni mo wahaiore holebira.
ISA 52:10 Anduane Homogohanda ibunaga hongo taraore kago walia haragola wali agali dindi tara taraha karume de hondolebira. Ibunaga wali agali pele miragola dindi bibahendeha bu karume de handaiore holebira.
ISA 52:11 Tí bibahende Babilono yu wahai halu ibai holene nga. Ani ibule howa Anduane Homogonaga deni bayale ndo ngaruha tínaga bu mini dindini wini nagalone ngaruha bu mini pagaho yalu naibalimu. Ibalu howa tí marume ndisi belediru Anduane Homogonaga andaha wiagaru yalu ibalu kamiru ko mbira tíha para nahe holenaga mana biaga wiyaruni biai halu ibalimu.
ISA 52:12 Tí ibule howa bamba Iyibi dindi wahalu ibule abaleore tobane tungulo mialu ibirimigodagua Babilonobi yu wahalu ibida poradagua bialu ndo hendore ibuleberemi. Anduane Homogo ibunime ti haru bamba halu ibulebira. Isaraele wali agali tínaga Ngode Datagaliwabe ibunime tí maha ibalu baya hanguore mamage hama ibuni heba ibalu haru anda ibulebira, lalu Aisaiahanda lene.
ISA 52:13 Anduane Homogohanda ogodagua laya. I̱naga biabe biahaga agali kago ibugua biraru bibahendeore bia debe hai holebira. Ani birago hondowa wali agali bibahendeme ibunaga mini daligaore yaraga holebira.
ISA 52:14 Bamba agali maru hearume ibunaga dengui mo ko halu agali maru hearubi ndo ko taraore heagola wali agalime ibu de hondowa mogo lowa gi haya.
ISA 52:15 Áyu nde ani ndogo. Dindi tara tara bibahendeha hameigini hearume ibu handawa bialu kini bu karumebi ibu de hondowa mogo lalu bi mbira labe nahedane handayaho holebira. Anidagua bulebirago irane abale mbira ogonidagua bini layane hale nahenego hale holebira. Ala tigua ogo aledalo manda nabinigo manda bialu wálowa manda bulebira, lalu Anduane Homogohanda laya.
ISA 53:1 Ani layagola wali agalime lalu, Bi galone agibe tobahe o laragoni yutiga bibe nahedago aiwa yutiga bialu mini mbiraore wuleberemibe. Anduane Homogo ibugua biabe hongohe áyu bialu kagonidagua mbira abale biyane ai í̠na handaribe.
ISA 53:2 Anduane Homogohanda ibunaga hameme ibunaga biabe biahaga agali biago dindi ko yobi mbirale anda nahaga be titaule ngagoria ira mbiraore hangu andaho hagagobi helene. Agali ogoni ibu tingini bayale ndo heago hondowa wali agali bu hearume ibu de hondoa nabi hene. Wali agalime agali ogoni hondowa turu howa hame lelonaga mbira nawini tigua ibu hame naleore hene.
ISA 53:3 Wali agalirume ibu erembira mialu mege bigi bialu howa tigua ibu handabe manga hene. Ibuha dara holenebi genda yu holenebi tandaga ho holenebi to̱laihe heneya. Ani heagola agali maru hearume ibu de hondolilono ti dengui handa tara haga buwa ibu bame nahabane ka mitangi bialu erembira mialu hene.
ISA 53:4 Ibu ani henegoyu iname tandaga nolene winigo ibugua na heneya. Inanaga genda holenebi dara holenebi agali ogonime ya halu heneyane handarima. Ibugua tandaga nalu henegonaga iname manda bialu Ngode Datagaliwabe ibugua pani nelo ko uruni ibuha wia hayada lalu manda birima.
ISA 53:5 Iname ko bialu harimagonaga pani ibugua na heneya. Iname mana koorene ko birimarunaga ibu beneya. Ibugua pani tandagaru na hayagome ina mo bayale holene winiya. Tigua ibu minu bayagome ina bayale holoma̱ya mo bayale heleneya.
ISA 53:6 Nogo sibirume tini poa kagoha pialu pu ereba hagagobi ale kama. Iname inane hame ledamagoha pugupugu bialu kama. Ani birimagome Anduane Homogohanda ina pani timbuniore ngulene winigo ina ngia nabi wahalu pani timbuni uruni ibugua ibunaga biabe biahaga biagome na helo mini.
ISA 53:7 Agali bu hearume Anduane Homogonaga biabe biahaga agali biagohondo kagua biyagola ibugua ibuni mo dindiha halu harugo lowa hibu lene. Tigua ani bialu hearia ibugua bi mbira nale hene. Agalime nogo sibi igini bole haru poragolabi sibinaga irini podole kagolabi ti ema nabi hagadagua ibugua ne halalu bi mbira nale hene.
ISA 53:8 Tigua ibu bameore minu garabayabu yalu godi lole piyagola maname ibu homelo bolene nga layagola homelo haru pene. Ani biyagola hondowa wali agali bu hearume ibu dara howa mitangi nabi hene. Ina dindi wali agalirume ko birimarunaga homolene winigo agali ogoni ibugua homo aribia hene.
ISA 53:9 Homayagola ibunaga tingini agali mana ko tara tara biaga heagonaga homaliha hora holene winigo ai ani ndo agali muni dabudaburu dewawi hearunaga homaliha hora hene. Ani wini tiraga ibugua ko mbira nabiore howa bi tindule ke̱ halubi nalagaore howa ibu ani hora hole winiya, lalu wali agalirume ani lene.
ISA 53:10 Anduane Homogohanda bi ogodagua lalu, I̱ni hameme i̱naga biabe biahaga agali ogoni mo dindiha halu tandaga ogoni henemane mo yila hene. Ani binidagoni irane agali ogoni ibugua wali agalirume ko biyarunaga domo wahagane helo loma binigome ibunaga holene pela hene. Anigo ibu haho ngane dege ibunaga aguaneneru hondolebira. Biabe biahaga agali o biagome Anduane Homogo i̱ni bule hame ledodagua bialu howa bayaleore biai haga bulebira.
ISA 53:11 Ibugua ibuninaga miniha tandaga uruni naho wiaabo howa mani mbirale bayale dewa tagira ibiraru hondowa ibuha turu holene timbuniore to̱lo holebira. I̱naga biabe biahaga agali tigabi ogoni hondowa i̱ turu ho kogoni. Ibugua wali agali bibahendeme ko biyarunaga pani na hayagome tigua ko biyaru i̱na domo wahalu mo tiga bu howa ti bayale helolebero.
ISA 53:12 I̱naga biabe biahaga ogonime ibunaga holene pela howa wali agali ko biaga karu homolene winigo ibuni homene. Wali agali bu hearume ko biyagonaga pani nolene winigo ibugua no aribia hene. Ani homole howa ibugua wali agali mana ko biaga hearunaga bi lahalu tigua ko biyago domo waha laya. Ani biyagonaga i̱na agali haguane bu karunaga wanakuini howa ibunaga mini yaraga ho helolebero. Ani heledogola ami agali hongohe karume wai bialu mbirale wai labuha howa mo yalu ibagadagua i̱naga biabe biahaga biago ibugua wayali howa wali agali dewa haru dai bulebira, lalu Anduane Homogohanda lene.
ISA 54:1 Anduane Homogohanda lalu, Yarusaleme-o í̠ waneigini nahaga dalo wali ale birarigoni. Ai áyu one agalinila kirabali haabo howa waneigini hagadagua ndo í̠naga waneigini dewaore holebiragonaga í̠ turu howa ga̱ lalu iba gana ladaga halu holene nga.
ISA 54:2 Í̠na dindi timbuni mbira tu wiape howa í̠naga balai anda ogoriani heledego mo yangalo helabe. Anda danginaga dariba haga pu nguni dariba haga bulene ibira helowa dindini pu nguni dariba haga bulene ira hongo howa wawa pu nguni biago hongo howaore dariba haga bulene nga.
ISA 54:3 Ani buwa í̠naga dindi timbuni wu yangalalu ha amu nana bulene nga. Ani bulene irane í̠naga waneigini tigua dindi maru ngaru bibahendeha wali agali karu bope hai howa karulolebira. Ani bialu tigua tano áyu wali agali nahe o ngagoriani ti haame halu ho to̱lai holebira, laya.
ISA 54:4 Yarusaleme-o í̠ha taga holene mbira nawulebirago gi nahabe. Agali bu karume í̠ lone mege nabulebira. Abale wandari hibaria biraringi taga harigo embeda halu agalini homene dalo wali biraradagua birarigobi embeda dege holebere.
ISA 54:5 Í̠ Wabini i̱ kogome í̠ agalini haradagua holebero. I̱naga mini Anduane Homogo Hongo Haiheore kogoni. I̱ Isaraele wali agalirunaga Ngode Datagaliwabe mini tigabi baya burugule howa i̱na dindi bibahende ngaruni handayaho howa haru haame haga kogoni. I̱nioreme í̠ pele ngulebero.
ISA 54:6 Isaraeleru-o í̠ wandari mabuage ayure dege agali penego agalinime yu wahalu piyagola mini burugulo biragadagua bedego. Ani bedegoyu Anduane Homogo i̱na ó̱lalu ogodagua laro.
ISA 54:7 I̱na tigimandi hangu í̠ yu waharugoni howa áyu i̱ dara howa gubalini timbuniore kogome í̠ haru dai bulebero.
ISA 54:8 Abale i̱na í̠hondo keba howa de handa tara ho haru. Anigoyu mani i̱na í̠ dara timbuni halu gubalini howa í̠hondo bayale dege biaabo holebero. Anduane Homogo í̠ pele ngiaga i̱niore kogome bi ogoni larogoni.
ISA 54:9 Bamba Noa heangi i̱na habo nalolene bi mbira lo wialu lalu, I̱na dindi ogo ibame lone nanelolebero, larugo. Áyu nde í̠hondo lone keba naholebero lalu habo nalole lalu lo wero. I̱na í̠ mana lalu panibi lone nangulebero laro.
ISA 54:10 Hari wedaru podo ibira hayaguabi hari barebare ngaru ereba hayaguabi i̱naga gubalini holene timbuni í̠ha ngogo embeda nahe wiaabo holebero. I̱na habo nalolene bi lalu í̠ha bayale hadapayabu habelonaga bi lo wirugoni habo nale wiaabo holebira. Anduane Homogo í̠ dara howa gubalini timbuniore haga i̱niore kogome bi ogoni larogoni.
ISA 54:11 Anduane Homogohanda bi ogodagua lalu, Yarusaleme-o í̠ darabiore halu tandagabi nalu burupale hengi wali agalime í̠ kegoria hapara howa biamogo bulene mbirali naheya. Aniyago ai i̱na ege to̱le̱ muni dewaoreme yolo biaga bayaleore ngarume í̠ lone biadai bulebero.
ISA 54:12 Ege to̱le̱ bayale tara ngarume dindini howa bima iraga halu mamage haga anda daligaha bayale taraore bialu helolebero. I̱na ege to̱le̱ bayale ngiringarale ngaru muwa í̠naga tano pabe panga hongo timbuniorehe helalu pabebi ege to̱le̱ baya gibi tara tara ngarume bia holebero.
ISA 54:13 Anduane Homogo i̱nioreme í̠naga waneiginiru lawai halu ti kagoha bayale holenebi mo palia holenebi wiaabo holebira.
ISA 54:14 I̱naga mana bayale tigabiore ngagome í̠ mo hongo haabo holebero. Ani berogola mbiralime í̠ handape halu mo dindiha nahe howa í̠ha giho holene mbira nawulebira. Í̠ha gi holene ala winiru ereba hai holebira.
ISA 54:15 Maru karume í̠ baba wai bule ibiyagua i̱na pu larugola ndo tini hameme ibini. Í̠ baba wai birarume ti bo ibira halu i̱na í̠naga giha mo ya holebero.
ISA 54:16 I̱na agali maru ege to̱le̱ aeane ngarume mbirale tara tara ngaru wabilonaga wabu heledo. Tigua mbirale tara tara uruni wabialu howa ira hongohe poboyogobi dedagoha delowa do gedaore kagola duguwa dambu tiga bigi bialu wai biaga ayu tibu timu yandareru wabigi biaga ka. Ami agali wai biaga karu tibi i̱na dege wabini ka. Urunime tinaga waitigi bu karu baba wai bule howa mbirale wai biaga wabu wiyaruni mo yalu piaga ka.
ISA 54:17 Anigo timu yandare uruni aria mbiraoremebi í̠ bila halu ba nabulebira. Í̠na heyalu hongo ho howa tigua í̠hondo, Í̠na ko ogoni biridago, lalu karuni ladai bigi bialu í̠naga bime ti mo dindiha helolebere. Mbirale urunidagua bigi biragola i̱naga biabe biahaga karu mo hongo howa i̱na ti mo wayaliore helaga bulebero, lalu Anduane Homogohanda bi ogoni laya, lalu Aisaiahanda lene.
ISA 55:1 Anduane Homogohanda lalu, Wali agali iba noa howa tongo lalu kamiru-o tí i̱ni kogoriani iba o bedago nole ibidaba. Wali agali muni nayi kamiru i̱ koria ibalu tomobi nole ibidaba. Waini ibabi nogo andu ibanebi ngago yolo nabi bame mialu nole ibidaba.
ISA 55:2 Mbirale tíni pele ngia nabiaga bu ngaruha muni bameore mohole bialu tombe nahagaore kamigoni aginagabe. Biabe birimigonaga yolo ngiyagome biba halu howa tomo garibi dege lo kamigoni aginagabe. Ani kamiruni bi o larogoni baya hangu hale mia howa i̱na larogodagua bialu halimu. Ani bialu harimiyagua tomo bayale dendebi tara tara ngaru karulape nalu tombe howa turu ho holeberemi.
ISA 55:3 I̱naga wali agali kamiru-o i̱na bi larogo hale hadaba. Tí i̱ni kogoha ibidaba. Holene bayale i̱na nguliya mo ibidaba. I̱na ti baba habo nalolene bi mbira lo werogo wiaabo holebira. Abale i̱na Kini Debidihondo aniore bule lalu lo winidagua bialu i̱na tí gubaliniore howa tíhondo bayale dege biaabo holebero.
ISA 55:4 I̱na Debidi mini mo yaraga howa mini lene agali timbuniore helewagola ibugua wali agali dindi tara tarani hearu heba handa gimbu bu hene. Ani helowa ibu togoni howa i̱naga hongo timbuni wiwago wali agali tihondo mo walia haru.
ISA 55:5 Áyu tígua dindi tara tarani hameigini bu karu ala manda nabi harimiru ololeberemi. Ani olaramigola nde hameigini tara tara uruni tí ala manda nabini karumebi hale halu abaleore gerai lalu tí kamiria ibulebira. Anidagua bulebirago irane i̱ Anduane Homogo Isaraele wali agalirunaga Ngode Datagaliwabe mini tigabi baya burugule kogome ogoni mo bia howa tí mini mo yaraga halu mini lene timbuniore helolebero.
ISA 55:6 Ai áyu Anduane Homogo ibuni tí kamigoha kagonigo tígua ibuni kagoha pialu holene henge áyu ngagoni. Ibugua tí kamigoha kawareore kago ibuhondo bi lalu halimu.
ISA 55:7 Wali agali mana ko biaga kamirume mana ko uruni wahalu miniha ko mitangi biaga kamirubi lone mitangi bayale bialu helo. Tígua mini beregedalu Anduane Homogo inanaga Ngode Datagaliwabe karia dai bilimu. Ibugua wali agali ibuni kagoha mini beregedalu dai biraru dara halu tinaga ko biyadaruni domo wahai haga ka.
ISA 55:8 Anduane Homogohanda lalu, I̱naga miniha mitangi birulidagua wali agali tínaga ngamirubi ndo ngo. I̱naga mana birulidagua tígua biaga kamigobi ndo dege taraore ngo.
ISA 55:9 Hari mindini li karu dindi ogo yu wahalu daligaore ngagonibi mbirale i̱na biaga ngogobi i̱naga miniha mitangi biaga ngogobi tínaga ngamigobi ndo i̱na bibahende bolangua haiho ngogoni.
ISA 55:10 Iba dalu hariha howa ibiyago hari ligoniha bame dai nabiaga ndobe. Ala iba dalu ibiragome dindiha anda pialu dindi mo gomba haragola tomo egene mbirale bayale mo anda helaga. Ani buwa tomo bayale anda kagola wali agalime tomo uruni bialu naga. I̱naga bi laruligo ogonibi nga.
ISA 55:11 Ogonidagua dege i̱na bi o larogoni ibu i̱ni koria bame nadai bulebira. I̱na bi larogonime mbirale i̱na bilo lalu laruruni bialu holebira. Ani bialu ogoale mbira bule lowa hamelo kogo i̱naga bigome bulebira.
ISA 55:12 Tígua gi nahe howa Babilono yu wahalu turu hama tagira ibuleberemi. Tano ogoniha howa i̱na tí haru ibalu mo palia holene heba haru tagira ibulebero. Tí tagira ibalu kamiria hari wedarubi hari barebare ngarubi urunime turu howa iba gana lolebira. Irabuha ira bu karumebi turu tara howa gi habe balu holebira.
ISA 55:13 Áyu pu kuabu ale anihe damene bu karuniha mani ira bayale guraya aleru andaho aribia holebira. Áyu anipu agubandu anihe tara tara andaho kago mani ira hongone anda haga bulebira. Ira bayale uruni ale anda ho haabo kagola hondowa ogoni manane mbira wulebira. Anduane Homogo i̱nime biabe hongohe bialu harugonaga wali agalirume handalu mitangi bilonaga manane ogoni wiaabo holebira, lalu Anduane Homogohanda Aisaiaha howa lene.
ISA 56:1 Anduane Homogohanda ibunaga wali agaliruhondo lalu, I̱na tí pele ngialu haru dai bulene horo hapara haragonigo tígua mana bayale tigabi ngaru hangu bialu halimu.
ISA 56:2 Wali agalime mana ko mbira nabi bayale hangu talialu bialu karubi Sabada horonaga mana ngadagua bialu karubi i̱na ti mo turu halu biamogo bulebero, lene.
ISA 56:3 Dindi tarani wali agaliru ti Anduane Homogonaga wali agaliru baba íbu hene karu tigua tini degedege bi lalu, Anduane Homogohanda ina ibunaga wali agaliru baba mandagi howa lotu lolene nawi lolebira, lalu ani lolene nawi. Agali mbirali ibu pindu mo wahene howa ibugua mitangi bialu, I̱naga waneigini mbira nahe ira gabu hene kaligobi howa homarogola mani i̱naga mini nawiore halu ereba holobada, lolene nawiore.
ISA 56:4 Anduane Homogohanda agali ogonibihondo lalu, Í̠na Sabada horonaga mana lo ngadagua bialu hariyagua mana i̱nime hame ledogobi bialu hariyaguabi i̱naga wali agaliru baba habo nalolene bi lo wirugo talialu bialu hariyaguabi
ISA 56:5 nde i̱ninaga anda kagoha í̠naga mini lene mo wulebero. Horo bibahendengi wali agalirume í̠naga mini ngago de handaga bialu ti mitangi bigi bilonaga ani bulebero. Ani berogola í̠naga mini agali maru waneigini honowi karunaga mini ngarubi ndo ti miniore bolanguahe wialu mo embedaho wahene naholebere, laga ka.
ISA 56:6 Anduane Homogo ibugua lalu, Wali agali dindi tara tara howa ibini i̱naga wali agali baba bu karuni tigua i̱ andaneha howa i̱ni gubaliniho halu i̱na bia larudagua bialu Sabada horonaga mana ngadagua bialu i̱na habo nalolene bi lowirugo talialu bialu hayagua nde
ISA 56:7 ti turu holebira. I̱na i̱naga hari Saiono loma bia hene ngagoria haru porogola ti turu hagabu i̱ andagani holebira. Ani howa tigua loma biniru i̱naga bo delaga dabu kagoria mbirale tara tara irani dai helo bo delaragola i̱na turu howa mulebero. Anigo i̱naga anda kago wali agali dindi tara tarani bu karume i̱hondo bi lagane anda kagoni lolebira, laya.
ISA 56:8 Anduane Homogo Bibahende Haru Haame Ho Haga kagome lalu, I̱na i̱naga Isaraele wali agali dindi tara tara ngaruha waitigime ibalu garabayabu yalu pene karu lone haru dai bialu kogome bi ogodagua laro. I̱na wali agali dindi tara tara ngaruha karu aria tibi haru ibalu i̱naga wali agali uruni heba mandagi helolebero, lene.
ISA 56:9 Anduane Homogohanda dindi tara taraha wali agali bu hearuhondo lalu, Waitigiru-o ai ibidaba. Nogo gabua biango duduru irabu hari ngaruha howa ibagadagua ibalu tígua Isaraeleali agali haguane bu karu bo wahai hole ibidaba.
ISA 56:10 Isaraele agali haguane uruni tigua tinaga dindi ogo aleme mo ko holebira lalu i̱naga wali agalihondo mbirale uruninaga bi mana lamialu holene winigoyu ti anidagua nabi bame bu kagoni. Ani howa ti bameore waitigi mamage haga wai pabe nene ngagoria de kohe ale hagadagua bu hama peda. Ani bialu ti biango pageali ibirago hondowa dua nalaga kembobe ko hene mbira haraligobi kagoni. Tinaga emboneha manda emeneorebi mbira nawiore bu ka. Ti bame emaga tara tara ngaru hondolenaga u̱ hangu paliaga bu ka.
ISA 56:11 Tigua biangome tomo dewaore nalu karia tombe nahe howa naabo haga kagobi ale ka. Anigo tigua nogo sibi haru haga howa haru holene tigabi bayuwa manda nabiore ka. Ti hangu hangume tini dege mitangi bialu hame ledadagua bialu tini mini mo yaraga holenaga biabe bigibigi biaga ka.
ISA 56:12 Ti mo ngoaiho kangi tigua ogodagua laga, Ina waini iba nendabu inane hame ledamagobi nole mimi̱ya. Yawibi nde lone íbu ngoai howa dewa nendabuore nami̱ya, laga ka, lene.
ISA 57:1 Wali agali mana tigabi biaga karu homarangi wali agali marume uruni ti mitangi nahaga ka. Wali agali mana bayale biaga uruni tiha mo ko holene mbira anda ibulino Anduane Homogo ibugua ti henemane homelaga ka.
ISA 57:2 Wali agali mana bayale ngago talialu biaga karu homaragola ti ha̱lo holene handa walia howa homaliha bayaleore palu wiaga.
ISA 57:3 Anduane Homogohanda Aisaiaha howa lalu, Wali agali kayu yama ibaga biaganaga waneigini kamirubi bayanda wali bedamirubi tomia biaga kamirubi tí mana ogonibi biaga kamiru ogoria ibidaba.
ISA 57:4 Wali agali mine haga aria kamiru tígua ke̱ halubi mege bialubi bi laramigo aihondo laramibe. Tígua mo guya howa yo handalu hambu gembo lalu hége domia bialu haramigo aihondo birimibe.
ISA 57:5 Tíninaga hame kome tí mo yayala haragola tíni ira timbuni bu karu andaneha bi pupu wiaga ngagoha pialubi wali agali kayu yalubi haga kami. Ani bialu howa tíni waneiginiru dindi ulini egelabo hengebane ngaruha loma bialu bo delaga beremili.
ISA 57:6 Ani bialu ege to̱le̱ dindi ogoniha ngago dugu yu puwa tínaga bi pupu wiaga ngelo mo yu pu weremili. Tínaga bi pupu wiaga ege to̱le̱ uruni mo yu pu ngelowa tígua waini iba loma bialu odo delolenebi widi lomabi nde bu delalu haga kamigoni. Tígua mana ogoniale bialu kamigo helowa i̱na mini beregedalu tíhondo dara holobadabe toba ho kamibe.
ISA 57:7 Tígua bi pupu wiaga uyura hari nene ngaruha puwa lomaru bu delalu wali agali kayuru yu haga kami.
ISA 57:8 Tíni andaga panga haraba erembirahayagi dama mitangi bialu koorene ko mbirale gime wabiniru bi pupu wulenaga mo ngelo haga kamigoni ndobe. Tígua i̱ erembira ngialu waore harimi. Ani bialu howa wali tínaga lawini bedaru tíni kayu bule lowa muni mialu haru halu puwa dagia timbuni wabu ngelarimigoriani kayu bialu haga kamigoni.
ISA 57:9 Tígua weli baya ngabi mini sanda ngarume tínaga tinginini ha̱i̱ halubi tíni mo yári bialubi dama mitangi bialu gime wabini mini Molege ngagohondo bi pupu wule piaga kami. Ani bialu tínaga bi pupu wiagane maru mo wulenaga tígua agali maru ti dindi kaundiaha dama mitangi bialu bi pupu wule gime wabiniru taya bima pudaba laga kami. Ani bialubi wali agali homayarunaga homali ngagoha mbirale dama mitangi bialu bi pupu wiaga uruniale mbira ngabe hondole taya beremili.
ISA 57:10 Tígua erekuibi bialu bi pupu wulene taya timbuniore bialu harimigome tínaga hongo ereba haya. Anigo tínaga hongo uruni ani ereba helo waha lowa tininaga hame dimagoliru timbuniore ngelo kamigome dege mo buahe haragola hibuore lalu kami.
ISA 57:11 Anduane Homogo ibugua lalu, Tígua i̱hondo ke̱ halu i̱ erembira ngialu mo embeda halu pirimigo ai hondowa gi halu pirimibe. Luore howa i̱na tíhondo keba nahe bi nale haabo harugome tígua i̱ mo dunini halu mitangi nabi harimidago.
ISA 57:12 Anigo tígua mana ko bialu kamiruni panaga ngelo mo panaho ngelai harogola tígua mana bayale tigabi beremabe toba howa bialu kamirunime tíni biamogo nabulebira.
ISA 57:13 Tíha mo ko holene mbira anda ibirangi dama mitangi bialu mbirale bi pupu wulenaga gime wabini yu ngoaiho ngamirunihondo tígua bi pupu wialu ina biamogo bia laramigola o biarume tí hale halu biamogo bulebirabe. Ani nabulebira ndobe. Tiha hongo holene mbira nawioredagola puyabu emene hangu puloyu ibirarume uruni pulo yalu polebira. Anigo wali agali i̱ni andaneha hole ibiraru ti i̱na biamogo bialu handayaho harogola tigua dindi i̱naga wali agalinaga mo wia hene ngogoria ti karulo halu Hari i̱ninagaore lomabu ngelo mo wirugoriani ti holebira, lalu Anduane Homogohanda lene.
ISA 57:14 Anduane Homogohanda lalu, I̱naga wali agali karu ti i̱ni koria dai bulene nga. Ani dai bulenenaga harigani ege to̱le̱ ira ngarume tinaga ge giba bobidi lalu ti piloligo baya hangu ilu wahai halu hariga mo tiga bulene nga.
ISA 57:15 I̱ Ngode Datagaliwabe daligaorene daliga haluhe haabo henego ko. I̱naga mini baya buruguleore howa i̱na mana bayale tigabi ngaru biaabo hagaore kogoni. Ani howa i̱ni dalu bayale daligaore ngogoha ko. Anigo dindihabi wali agali bu karume tini mo dindiha howa tininaga ko wiyadarunaga dara howa mini beregedene karu bababi nde ha dege biruli. Ani haruligo irane i̱na tinaga miniha mo hongo holebi mini dunubia holene tiha helolebi haruli.
ISA 57:16 I̱na i̱naga wali agaliruhondo tí koore biaga kamigoni nale ti baba keba ho haabo naholebero. I̱na ti baba keba ho haruyagua nde tiha holene bayale i̱nime hela harugo mo ko holobadago keba naholebero.
ISA 57:17 I̱na tihondo keba harugo irane tigua mbirale ngaru dimagoli howa mana ko marubi hamelalu bialu hearia keba haru. Anidagua bialu hearia i̱na ti pani nelo mialu i̱naga wanakui tinaga deni handa tara ho haru. Anigo tigua mine haabo halu tininaga hameledago ale dege bialu haabo hayagoni.
ISA 57:18 Tigua mana ko bialu hayaru i̱na de handai haru. Anigo i̱na ti biamogo bialu tinaga ko wiyadaru domo wahalu ti bayale helolebero. Ani helowa i̱na ti haru halu mo tiga bialu tinaga bu miniha mo hongo howa wali agali dara howa dugu bialu karu tibi mo dungulo helolebero.
ISA 57:19 Tinaga dara holene wiyadaru mo wahai harogola tigua i̱hondo turu halu ka̱i̱ lolene dege mitangi bu holebira. I̱ Anduane Homogo i̱na larogo i̱naga mo palia holene wali agali i̱ni kawareni karuha helalu wali agali kaundiaha bu karuhabi wia dege holebero. I̱na wali agali uruni mo bayale howa tiha bayale holene mo wia holebero.
ISA 57:20 Anigo wali agali maru mana ko biaga bu karu tigua iba solowara yaribu bialu haabo howa iba haingodabi iba ambi waru heba ngaru yu pialu iba angeni yu wahaga biragola iba ange bayale winigo mo ngubiaho wiagagobi ka.
ISA 57:21 Wali agali mana ko hangu bule mo tene halu haabo haga bu karu tiha mo palia holene mbira handa walia naholebira, lalu Anduane Homogo ibugua bi ogoni laya, lalu Aisaiahanda lene.
ISA 58:1 Anduane Homogohanda lalu, Hongo howa ga̱ lalu olabe. I̱naga Isaraele wali agaliru tigua mana ko bialu kago nabilimu lalu hongo howa ga̱ lalu lamibe.
ISA 58:2 Tigua horo bibahendengi henene dege i̱ mitangi bialu lotu lalu howa mana biaga wiago talialu i̱na agi hame lenedabe handalu taliaga. Ani bialu howa tigua i̱hondo hale halu lalu, Í̠ heba mandagi turu haga bu holoma̱ya í̠na bayale dege bialu biamogo bigi bialu habe, laga bu ka. Anigo urunime ti henene ndo laga howa ke̱ haga ka. Tigua i̱naga mana wiaruni mo wahai howa tininaga mana ko ngaru dege mo tene howa bialu haga ka, laga.
ISA 58:3 Ani bialu howa wali agali uruni tigua hale halu lalu, Iname tomo nane wahalu inane mo dindiha ho kamagonigo ai irane agonaga Anduane Homogo ibugua ina biamogo bialu mbirale bayale mbira nabi kabe, laga ka. Ani laragola Anduane Homogohanda bi ogodagua ladai bialu lalu, Ai tígua tomo nane kamingi tínaga biabe biahaga agali karu mo ko haga bialu tíni hangu mo dunubiaho haga kami.
ISA 58:4 Tígua lalu i̱ mitangi bialu lotu lalu tomo nane hami̱ya laramiligo lalu howa mana tígua bu walia halu kamiruni tara bialu kami. Tígua keba halu gungu bialu howa agali mende kagonaga dengui bo tugudalu gi bo tagalalu haga kami. Tígua mana ko urunibi bialu howa tomo nane kamigola i̱na tínaga bi laramiruni hale holeberobe tobaho kamibe.
ISA 58:5 Tígua manda bialu kamiria tomo waho haga horo ogoni kamigome tígua mana bialu kamiruni i̱na hondowa turuho kobe toba kamibe. Tígua daraho kama lalu walia haga aga bu kamirumebi ma podalu dindini emboneme ela helaga bialu gambe lini peroli puyabume pu laragola yu puíbu bigi bialu kaligobi bialu kami. Ani bialu tígua be abalu tamuha dugupe howa beni padamirumebi mana maru tíni mo dindiha halu bialu kamirumebi uruni bibahende i̱na de hondowa turu holeberobe toba ho kamibe. Ai ani ndoyago.
ISA 58:6 Tígua mana urunidagua bialu kamiruni i̱na hame nale kogoni. Tígua mana bilimulo hameledogoni uru. Tígua ko tara tara bialu kamiruni yu wahai halu wali agali maru karu bo hengedalu ti mo ko halu kamiruni nabi wahai halimulo hamelo ko. Wali agali burupale darabi uruni mitangi nahe tígua pu senime ti daribaho ngelaradagua beremirubi nogo bulumagarume agalinaga mabuha biabe bilo ira tigini ngagome mani daba homaga howa biabe bialu helo handayaho hagadagua bialubi kamigo. Ai urunidagua nabi wali agali burupale darabi uruni ti golope hene helo yupe holene nga.
ISA 58:7 Tígua mana bialu halimulo hame ledogo ogodagua. Wali agali tomo garibilo karu tomo nelo milimu. Wali agali yagibano tinaga anda nahe howa burupale karu tí andagaha palelo panga dugualimu. Mbirali aga bulene mbira nawiore howa dagareme duru lalu karu tígua aga ngamiru maru milimulo hameledo. Ani bialu howa ai tínaga dameneore darama mbiraore kamiru aria mbiraligo genda yu heane handarimiyagua nde de nahende tingi halu pu nabi baya hangu biamogo bialu halimu.
ISA 58:8 Tígua i̱na o bilimu lalu langeroruni baya hangu bialu harimiyagua nde egerebagi ni tagira ibalu wá timbuni haragome aruma ala ho wiyago mo ereba halu poraligodagua tíni genda yu kamiruni bibahende mo wahaiore halu i̱na tí mo bayale holebero. Anduane Homogo i̱ni mini tigabi dege kogome i̱na bambaho haabo halu mahabi i̱ni dege howa tí poramigoha pele ngialu wá haga bima pialu handayaho haabo holebero.
ISA 58:9 Tígua i̱hondo bi lalu olaramiyagua Anduane Homogo i̱na haleore holebero. Ani berogola i̱na tí heba mandagi henedane manda buleberemi. Ainde tígua wali agali mende karu mo ko howa bo hengedalu kamiru wahalu mendealihondo gi dola haga bialu howa bi ko lalu kamirubi wahalu
ISA 58:10 wali agali maru tomo garibilo kane hendedemigo nelo mialu maru ti mbirale burupale karubi mialu harimiyagua nde egerebagi ni tagira ibalu wá haragome aruma ngagoha mo ereba haraligodagua tíha aruma ho winigo horombe ale ho aribia holebira.
ISA 58:11 Ani biragola i̱na tí handayaho howa tínaga tingini warago nabe mo hongo halu tíha mbirale tubagi halu burupale hararubi tí karulape yu halimulo i̱nime ngialu haabo holebero. Ani heledogola tí dindi bayale mbirale bibahende anda hai holene dindi ibane bere wiagagobi halu iba hambiaga uliha iba gagahe hundia nabiaga iba biraho wiaga ngaligobi holeberemi.
ISA 58:12 Ani heledogola tano bo gialo wahayaruni tígua lone bia aribia howa anda abale hene gialo wahene gumuni ngarunaga lone bia aribia haga buleberemi. Ani bialu kamigola wali agali tara karume tí hondowa tigua lalu, E̱ e̱ wali agali hongohe howa tanonaga pabe gialabaga biniru bu tiga biagabi anda gialo waheneru biadai biagabi hariga baya hangu bo tiga biagabi o karuni handadaba laga bulebira, Anduane Homogohanda laya, lalu Aisaiahanda lene.
ISA 58:13 Anduane Homogohanda lalu, I̱naga horo timbuni wiabagi hene Sabada horo ogonaga mana ngago napugualimu. Horo ogoningi tíninaga biabe bulene wiaguabi nabuleore laro. Tígua i̱ni gubalini timbuni howa horo ogoniore ina bayale holoma̱ya Anduane Homogo i̱na wiabagi hene tara mbira ngagoni manda bialu holene nga. Horo ogoningi bame ibagabu holenebi biabe tara tara bulenebi bi tara tara habane nabulene lolenebi nawiore.
ISA 58:14 Tígua Sabada horonaga mana uruni baya hangu talialu i̱ mitangi bialu beremiyagua turu holene bayaleore Anduane Homogo i̱niha ngogoni handa walia holeberemi. I̱na bamba dindi tínaga mamali Yagabahondo ngulebero lene biagoria ibalu turu haga bu holeberemi. Dindi ogoriani tígua tomo nalu holene dewa bu payabu ngagola turu timbuni howa tomo uruni nalu dungulo holeberemi. Ani ho kamiria dindi tara taraha wali agali bu karume tí mini lene lai holebira. I̱ Anduane Homogo i̱na bi o ledogoniore, laya, lalu Aisaiahanda latagi halu hene.
ISA 59:1 Tígua mitangi bialu Anduane Homogo ibu tí haru dai bulene hongo nahe kabe toba nahalimu. Ibuhondo bi lamialu kamiru hale nahaga hale tulu kabe toba nahalimu. Ibu ogonibi ndo ka.
ISA 59:2 Tígua ko birimigome ibugua tínaga bi laramigo hale naholenaga ibunaga wanakui handa tara ho kagoni ndobe. Tínaga ko ngamirume Ngode Datagaliwabela mo hangu hangu haga bida.
ISA 59:3 Tígua ke̱ holene bi taratara lalu keba howa wali agali maru baba bagabaga bialu haga kami. Ani biaga kamigo tígua wali agali homelo bo wahaga bialu harimirunaga darama tínaga giha para haabo kagoni ndobe.
ISA 59:4 Tígua godi hale halu howa bi tigabi lolene ngadagua nale howa mbirali godi lole ibirago godini abale haru pu helaramili. Ani haru pu helowa tígua ke̱ howa bi galone ndo ngago dewa lo paya bialu mendego mo talola halu mo guya haga kami. Tínaga bu miniha mana ko bulene hangu timbuni wua to̱ledemigome tígua mana liahe dewaore bialu kami.
ISA 59:5 Tínaga mini ko ngamigo tomia biaga nogombi taranaga habane ale nga. Mbiralime nogombinaga habane ogoni nayagua nde ibu homolebira. Anidagua dege tínaga mini ko ngamigome mo ko holene taratara mo yu anda ibalu mendealinaga holene mo ko haramili. Gamuni anda biaga bedaru tigua tinaga anda bia kagoria ema bialu piaga bedaru gunguni ogoriani do ngaria ibuni hadalu naga beda. Wali agalime gamuni anda bidago muwa ogonime labolabo wabialu mo karulo hagabe. Manane ogonidagua dege biabe tígua bialu kamigome mendeali kago biamogo bule ndo beremi. Tígua bialu kamigome mendeali kago minu yania howa ti bope halu mo ko holenaga bialu kami.
ISA 59:7 Anigo tígua bibahendengi mana ko ngaru dege bulene manda bialu abaleore bule hamelo haga kami. Ani bialu tígua mbirali mana ko mbira nabi kago bameore homelo bo wahole hame timbuni lo haabo haga kami. Ani bialu tígua wali agali maru bayale kago mo ko hole dege bima ibaga bialu haga kami.
ISA 59:8 Tí wali agali maru baba mandagi hendeore holene manda nabi howa tígua mana tigabi bulene ngadagua nabiaga kami. Mana tígua beremiliru bibahende tiga nabiore ngago marume mana uruni talialu hayagua nde tiha bayale holene ngaria handa walia naholebira.
ISA 59:9 Wali agalime lalu, Anduane Homogohanda ibu mini tigabi howa waitigime ina hengedape hayagola ibugua ina biamogo nabiyago irane ai manda bidama. Ina wá holene hai bialu kamaria wali agali arumaha gi wagalo hagagobi kama. Ina kamagoha ni poboyogobiore datagi helo hamelo kamaria genda tara tara inaha lola haragome ina arumaha haabo kama.
ISA 59:10 Genda urunime ina de koheme ibagabu haradagua heledagola iname polene hariga taya bialu haabo kama. Horombe ni dedagoria howa ina arumaha ibaga bialu haradagua bidamaria ege to̱le̱ bu ngarume inanaga ge bidi laabo haragola kamagoni. Inaneme mitangi bialu ina bayaleore holomabe tobaho hemaria ani ndo ina homene ale harimada.
ISA 59:11 Ina mini dege dindiho howa iname biango dudu ale timbuni mini beame gururu laradagua bialu ega puyu bedarume howe dodowe laradagua bialu kamagoni ndobe. Ani kamago nde iname Anduane Homogonaga mana tigabi bayale ngago hai bialu howa handa walia habe nahe. Ibugua ina pele ngialu haru dai bilo hondo harimago ai ogoni kaundiaore nga.
ISA 59:12 Anduane Homogo-o iname ko dewaore í̠naga deni birimarume inane yania hai henego kama. Anigo inaneme mana ko bibahende birimaru manda biaiho kamagoni.
ISA 59:13 Iname mana ko uruni Anduane Homogo í̠hondo birimagoni. Inanaga Ngode Datagaliwabe iname í̠ni erembira ngialu í̠naga bi mo waharima. Iname maru bu hearu hengedape howa mine halu mana ko tara tara wiaru bialu harima. Iname mendeali kago mo hondo halu ke̱ holene hariga tara tara mitangibu harima.
ISA 59:14 Mana ko inane bialu harimarume í̠naga mana bayale tigabi ngego amura hobamu helayagola í̠na ina biamogo bialu haru dai nabi harigoni. Ani bialu iname mana tigabi bulenebi bi henene lolenebi ina hemagoria kaware ndo kaundia ngelo harima. Iname mo ngoaiho harimangi mana irane kira ogonilabo nawi dege harima.
ISA 59:15 Heneneore lolene mbira inaha nawiore kama. Ani kamago howa mbiralime mana ko bulene ngago yu wahayagua agali maru karume agali ogoni lone mo ko holene henge taya bialu haga, lalu wali agalime laya, lene. Anduane Homogohanda ko uruni bialu hearu handalu hearia mana tigabi bulene mbira nawi heago hondowa ibunaga miniha turu naheore hene.
ISA 59:16 Ani bialu mbiralime mendeali heago mo ko halu heagola mbiralime ogonidagua nabiaga lalu mo ko hene biago biamogo bialu mo wulene mbira naheyane hondowa Anduane Homogo ibu mogo timbuni lo hene. Ani howa Anduane Homogohanda ibuninaga hongomebi mana tigabi bulene ngagomebi ti mo wialu bayale helolebero manda bini.
ISA 59:17 Ani manda buwa ibugua wai biagane aga ale ibunaga mini tigabi wulene galukunini mo karulalu ibunaga pele mulene manda ale karulolebira. Ibugua ko biagaru ba dai bulenego ibunaga aga ale karulalu ibu miniha lembo holene ogoni dagarenaga aga ale daligani karulolebira.
ISA 59:18 Ani bialu ibunaga lembo holene ngagome ibunaga waitigi bu karu pani nelo ko tinime bialu hayadagobi karulape biadai bigi bulebira. Ani bialu wali agali maru dindi tara kaundiaha karubi ti bibahende pani nelo mo miai holebira.
ISA 59:19 Anduane Homogo ibugua hongo timbuniore heba ibunaga puyabu hongoheme iba pulalu mo yaribu bia haragola hongo timbuni halu poraligobi ibulebira. Anidagua birago hondowa wali agali dindi ni paliragohayagi karume Anduane Homogonaga mini hale howa mogolo holebira. Ni ibiragohayagi karume Anduane Homogonaga hongobi wá holene tarabi hondolebira. Ani hondowa tigua handawa bialu gi howa ibu andaneha hai holebira.
ISA 59:20 Anduane Homogohanda ibunaga wali agalihondo lalu, I̱na tí heba mandagi haabo hole Yarusaleme ibalu Yagaba aguaneneru mana ko birimiru lapani halu mini beregedene karu ti pele ngialu haru dai bule ibulebero.
ISA 59:21 Ani ibalu i̱na tí heba habo nalolene bi mbira ogodagua lo wialu, I̱naga Dinini ibu tíha helowa tínaga ne harigaha howa i̱naga bi mana latagi halu holeberemi. Tígua anidagua bialu haabo kamigola tínaga waneigini karumebi tínaga aguanene mani hama polobadarumebi i̱na bilimu larudagua bialu haabo holebira, lalu Anduane Homogohanda Aisaiaha howa bi ogoni lene.
ISA 60:1 Anduane Homogohanda lalu, Yarusaleme-o í̠ heyalu ni daradagua bialu wá hagimbu bia naberego. Áyu i̱ninaga hongo holenebi wá taraore holenebi í̠ha wá timbuni hadali haragoni.
ISA 60:2 Dindi tara tara wiaruha ginu hagua mindibi wiarumebi aruma hagabu mindibi wiarumebi wali agali bu dambi haiho ngagoni ndobe. Anigoyu Anduane Homogo i̱ninaga wá taraore holeneme í̠ha hadali holebero. I̱na í̠ha haabo kogome i̱ninaga wá taraore holene ogoni wiaabo helo heledogoni.
ISA 60:3 Í̠ha wá timbuni holene ogonime wá harago handalu dindi bibahendeha howa hameigini tara tara í̠ keria ibai holebira. Kini bu karu tiguabi í̠ha wá holene hongohe ogonime wá hadali haragoni handalu tibi nde í̠ keria íbu dege bulebira.
ISA 60:4 Í̠na handa amu nana bialu o biragoni de handabe. Í̠naga wali agali biaru mo mogo bialu amu ibiraruni handa. Í̠ iginiru ti dindi kaundiaha howa ibalu í̠ waneru walime dindi taraha howa gime taba yalu í̠ni keria ibiragoni.
ISA 60:5 Ani ibirago hondowa í̠ha bu mini yangalo turu holene to̱lai holebere. Í̠ kulalu turu taraore holebere. Iba sibi timbuni ibirarume dabudabu bayale dewaore mo yalu ibulebira. Dindi tara tara bibahendeha howa dabudabu baya gibiore ngaru í̠ mo turu holenaga mo yalu íbugu bialu ngigi bulebira.
ISA 60:6 Nogo kamele dewaore daga aulolebe tobahe uruni ti Midiana dindibi Eba dindibi howa ibulebira. Urunime tinaga erekunini dabudabu bayaleore wiaru mo paga howa yalu ibulebira. Ti Seba dindi ala pialu ogoniha howa ngolobi ira hagua ngabilo delaga mini inisenesirubi mo yu ibulebira. Ani ibirago hondowa wali agali bu karume Anduane Homogo i̱na birugonaga lamialu i̱naga mini yaraga halu holebira.
ISA 60:7 Nogo sibi dewaore Keda dindi howabi Nebaiodo dindi howabi haru halu ibulebira. Nogo sibi uruni i̱naga loma biniru bo delaga dabu ngagoria bo delaragola Anduane Homogo i̱ni turu timbuni holebero. Turu howa i̱naga anda biago mo yáribia halu mini lene bayale taraore ngelolebero.
ISA 60:8 Iba sibi ibiraru hari beraliba puyabume pulo yalu ibagadagua ibiraruni agiledabe. Egarume alendo haragola andaga bululo yalu dai biagadaguabi ibiraruni agiledabe.
ISA 60:9 Iba sibi dindi tara kaundiaha howa ibiraruni urunime i̱ hondo yalu ibalu i̱naga wali agaliru Yarusaleme í̠ni keria haru dai biragoni. Tigua ngolo silibaru dewaore iba sibi uruniha yalu ibiragoni. Ogonidagua yalu ibirago irane i̱na í̠ mo bayale halu mini leneore helewago hondowa tigua Anduane Homogo Isaraele wali agalinaga Ngode Datagaliwabe i̱ mini tigabi kogonigo i̱naga mini mo yaraga holenaga ani ibiragoni. I̱na dindi tara tarani hameigini bibahendeoreme i̱naga wali agali karu mini lene kagonida lelo mo la harugoni, laya.
ISA 60:10 Anduane Homogohanda lalu, Yarusaleme-o dindi tara tarani agali karume í̠naga pabe lone biadai bule ibulebira. Tinaga kini bu karumebi nde í̠naga biabe bia holebira. Bamba i̱na í̠hondo keba howa mana lalu pani nabelo ngirugo. Ai áyu nde i̱na í̠ dara halu gubalini howa biamogo bule kogoni.
ISA 60:11 Dindi tara tarani hameiginirume tínaga muni dabudabu bayale ngaru í̠ mo turu halu bame ngule yalu ibilo horombe mbiragabi í̠naga tano pangaru dugua ho wiaabo holebira. Tinaga kini karubi í̠naga garabaya biabe ale biahaga helonaga haru halu íbu dege bulebira.
ISA 60:12 Ani bulebiragoyu dindi tara maruha hameigini í̠ andaneha nahe í̠naga biabe biahaga ndo karu ti bibahendeha ko timbuniore ibalu mo ko haragola ti ereba hai holebira.
ISA 60:13 Agalirume Yarusaleme í̠naga tanoha anda dewa lone biadai bulebulenaga uyu Lebanono irabu timbuni ngagoha puwa ira guraya alerubi ira mende mini saibarasarubi ira bayale luni kilikulu lo karunibi í̠naga dibu yalu ibulebira. I̱naga anda mo duniniore ho helarogo baya gibiore howa mini lene timbuni wulebira. I̱ninaga biragane dagia ngagoriani bedoria wali agalirume i̱naga mini yaraga hole ibulebira.
ISA 60:14 Agali maru abale í̠ mo ko haga henerume í̠ keria ibalu bulu paluwa í̠ mini lene timbuniore lolebira. Ala agali í̠ mo yo hendene henerumebi í̠ keria dai buwa tinaga ge duli hanga ho biruwa í̠naga mini yaraga halu holebira. Tigua í̠ hondowa lalu, Tano ogoni Anduane Homogonaga ngagoni. Isaraele wali agalirunaga Ngode Datagaliwabe mini tigabi baya burugule kago ibunaga tano Saiono o ngagoni, lolebira.
ISA 60:15 Yarusaleme í̠ore ala bame wialu yu wahene wirigo wali agali ogoriani pu íbubi nabiaga wahene wini. Ai áyu i̱na í̠ mo bayaleore howa mo yári bia halu ḏ́uniniho ngeledogoni. Wali agali dindi tara tarani áyu karumebi mani holebirarumebi ti bibahendeme í̠ hondowa turu timbuni hai holebira. Í̠ni ani haho wiaabobo holebere.
ISA 60:16 Dindi tara tarani hameigini karumebi kini karumebi waneigini ai̱yahanda ibunaga waneigini andu mialu handayaho hagadagua tigua í̠ burupale mbira nawilo handayaho haabo holebira. Anigo í̠na Anduane Homogo i̱ore kogome í̠naga pele ngiaga kogoni manda bulebere. Isaraele wali agali Yagabanaga aguanalirunaga Ngode Datagaliwabe hongo timbunihe kogome í̠ golope halu haru dai binigo kogoni manda bulebere.
ISA 60:17 I̱na í̠naga ege to̱le̱ mini boronosi yu keruni ngolo aribia halu aeane yu keruni siliba aribia halu ngulebero. Í̠naga ira tome podene yu keruni i̱na ege to̱le̱ mini boronosi aribia halu ege to̱le̱ henene yu keruni aeane aribia helaga bulebero. Mo palia holene mo yu anda ibalu ogonime í̠ haru helowa mana bayale tigabi hangu bialu holeneme í̠naga hariga ibaga bialu poleneruha haru holebira. Agalime ala haru haga howa í̠ mo ko hayaru mani naholebira.
ISA 60:18 Dindi bibahende í̠na haru kegoha agalime ga̱ lalu bo wahagahaga bialu bi laganego mani hale naholebere. Wai buwa mbirale ngaru bo gialahole bialu kariabi nahondolebere. Í̠naga wai pabe timbuni kagonaga mini Anduane Homogohanda Pele Ngiagane lolebere. Wai pabenaga panga timbuni kagonaga mini Anduane Homogonaga Mini Yaraga Hagane lolebere.
ISA 60:19 Í̠ kegoha horombe nime wá holene henge nawulebira. Mbiragabi egeme wá holene henge nawulebira. Anduane Homogo i̱nime í̠naga wá haabo holene haluhe kogonigo i̱naga wá timbuni holene í̠ha wá haabobo holebero.
ISA 60:20 Ni lone napale egemebi dama dalidali biagadagua nabi Anduane Homogo i̱nime í̠naga wá haabo holene haluhe kogonigo nde ani haabo holebero. Í̠naga genda ngelo keruni bibahende ereba hai holebira.
ISA 60:21 Í̠naga wali agali bu karume mana tigabi ngaru hangu biaabo halu tinaga dindi i̱na tu wa wia harugo karulowa ti ogoriani haabo holebira. I̱ninaga gioreme wali agali uruni mbiraore wabirugo ti ira mbiraore hangarugonaga gene magane dewaore haradagua ka. Ani helarudagoni irane wali agali tara tara karume ti hondowa i̱ninaga mini yaraga helo ani wabu helarugoni.
ISA 60:22 Yarusaleme-o í̠ha wali agali emene hangu heagua mani ti wali agali mini leneore holebira. Hameigini maru hongo nahe mini dindiha heaguabi mani ti waneigini aguaneru dewalinaga aba holebira. I̱na bi o larogoni abaleore horo i̱nime pongobo wirugo tagira ibirangi lola holebira. Anduane Homogo i̱niore kogonigo ani bulebira larogoni, Anduane Homogohanda laya, lalu Aisaiahanda lene.
ISA 61:1 Anduane Homogo Bibahende Haru Haame Ho Haga kagome i̱ha ibunaga Dinini ho to̱latagi heleda. Ibugua i̱ dabalu wali agali yagibano burupale bu karuha ibunaga bi mana debene lamima pu laya. I̱na wali agali genda yu howa mini burugulo karu mo waholiyabi maru garabaya andaha karu golope halu pudaba loliyabi ibugua, Í̠ pu, laya.
ISA 61:2 Anduane Homogohanda ibunaga wali agali karu pele mialu haru dai bulene horo tagira ibiragoni lalu i̱na lamule pu laya. Tinaga waitigi karu pani nelo mulenebi horo ogoni tagira ibiragoni lalu i̱na lamima pu laya. Wali agali dugu bialu de iba heba beda u i̱na ti biamogo buliya pu laya.
ISA 61:3 Saiononi tí dugu biaabo halu tínaga hongo bibaho kamiru tíha dara ho holene ngago turu holene wia aribia holebira. Tínaga emboneni dara hayagonaga be abalu dugu wiyadaruni taulo wahowa yári bayale taraore mo karulolebira. Tígua dugu bialu hayaru embeda halu weli bayale ngabiore ngarume mo ha̱i̱ howa turu holene wulebira. Tígua dara halu mini burugulowa iba gana lagaru la nabi wahowa Anduane Homogonaga mini yaraga halu turu howa iba gana tara ngaru ladaga halu lolebira. Bibahendeore karume mana bayale tigabi hangu bialu holebira. Ani biragola wali agali marume handalu karia ti ira hongohe ale kagoni lalu Anduane Homogo ibunime ira bayale hengene anda ho haradagua hongoheore kago hondolebira. Ani handalu karia urunime Anduane Homogohanda biyaruninaga ibu mini yaraga halu holebira.
ISA 61:4 Anduane Homogonaga wali agali kamiru tígua anda gialobagabu wiane mali dewaore penego wiaho wini ngaruni lone bia aribia haga bialu holeberemi.
ISA 61:5 I̱naga wali agaliru-o dindi tara taraha wali agali bu karume ibuwa tínaga biabe biahaga holebira. Tínaga nogo sibiru hina halu tí mabu ngamiruha dindi tomba halu tomoru hanga ha tínaga pu mbira lini daga mini gerebi mabu ngamirubi handayaha mamage ha ani bigi bialu holebira.
ISA 61:6 Marume, Tí Anduane Homogonaga loma binigo mo miaga kami, lolebira. Inanaga Ngode Datagaliwabe kagonaga biabe biahagaore tí kamigoni, lalu manda bulebira. Dindi tara tara ngaruha hameigini tara karume tinaga dabudabu tara tara ngaru mo yalu ibalu tí talebu ngiragola tí turu taraore halu holeberemi.
ISA 61:7 Tí ala taga taraore howa tínaga dengui bu yi howa harimigoni ereba halu tíninaga dindini daibu howa mbirale dabudaburu abale yu harimigo bolangua howa dewaore yu halu turu taraore ho holeberemi. Anigo tínaga turu holene ogoni ereba nahe wiaabo holebira.
ISA 61:8 Anduane Homogo ibugua lalu, I̱na mana bayale tigabi ngaru dege hondowa turu haruli. Mana ko wali agali mende kago mo dindi halu holeneru page buleneru handabe manga ho kogoni. I̱naga wali agalirume genda dewaore ala yu howa ndelahe wiaru handalu hayago ai i̱ mini bilinahe kogome tihondo mbirale bayale ngaru yu helo mulebero. Habo nalolene bi hongohe wiaabo helonaga ti baba bi lowialu bulebero.
ISA 61:9 I̱naga wali agalirunaga waneigini aguane holebiraru hondowa dindi tara tarani hameigini karume tiore mini lene timbuniore ka lelo helolebero. Ani heledogola wali agali tara karu uruni ti i̱naga wali agali handalu i̱nime ti mo bayale halu helene kagonida manda biai holebira, laya.
ISA 61:10 Yarusaleme i̱nime Anduane Homogohanda biyaruninaga turu timbuni halu kogoni. I̱ miniha i̱naga Ngode Datagaliwabehondo turu taraore ho kogoni. Wali agali mani dabu bule lowa aga bayaleore luni ngaru biagimbu bialu yáribi bayale buwa turu ho hagadagua Anduane Homogohanda i̱ni pele mulenebi mana tigabi wiagomebi i̱ bu dambi heledagonaga turu taraore ho kogoni.
ISA 61:11 Dindime tomo egene tara tara hengeneru mo anda halu mabuha egene polenerubi mo anda hagadagua Anduane Homogo Bibahende Haru Haame Ho Haga kagome ibunaga wali agali karuha mana tigabi bulenebi ibunaga mini yaraga holenebi mo anda haga biragola hondowa dindi tara tarani hameigini tara karu tiguabi ibunaga mini yaraga holebira laya, lalu Aisaiahanda lene.
ISA 62:1 Saiono-o i̱na Anduane Homogohanda í̠ pele ngilonaga bi hongo howa laabo holebero. I̱na Yarusaleme mitangi bialu bi nale ndo ibunaga bi la haabo halu holebero. Ani laho kone dege egerebagi ni datagi haradagua Anduane Homogohanda Yarusalemeha mana bayale tigabi ngaru biatagi helo. Mbiraga hale hedo yaradagua ibugua pele mulene walia helo i̱na bi la haabo halu holebero.
ISA 62:2 Yarusaleme-o dindi tara tarani hameigini bu karume í̠naga mini tigabi bolangua ho ngago hondolebira. Tinaga kini bu karu tiguabi í̠naga hongo holenebi wá tara holenebi ngego hondolebira. Í̠naga mini gahenge tara Anduane Homogo ibunime ngulebirago tigua mini ogoni lalu lolebira.
ISA 62:3 Anduane Homogo ibuninaga manda yári baya gibiore ngolome wabini ale í̠ holebere.
ISA 62:4 Ani kegola maru karume ala Anduane Homogohanda í̠ yu wahene ka lenego mani nalolebira. Tigua lalu, Í̠naga dindi Anduane Homogohanda yu wahene darabiore ngagoni, lalu nalolebira. Tigua í̠naga mini gahenge ogodagua lalu, Anduane Homogohanda í̠hondo turu timbuni ho kagoni, lalu lolebira. Í̠naga dindihondo lalu, Wandari agali pene turuho bedagobi ngagoni, lalu lolebira. Anidagua lolobadagoni irane Anduane Homogohanda í̠hondo gubalini timbuni ho kagonaga ani lolebira. Agalime ibu one haru dai biagadagua Anduane Homogo ibugua í̠naga dindi ogonidagua haru dai bulebira.
ISA 62:5 Igiri daliaheme wandari berenego dabu biagadagua í̠ wabini biago kagome í̠la mbiraore haga holebira. Ani bialu agalime wandari bayale dabu buwa ibu onela turu hagabu hagadagua Anduane Homogohanda í̠hondo baya hanguore turu howa handayaho holebira.
ISA 62:6 Yarusaleme-o í̠naga pabeni i̱naga agalirume mamage helo dabo helarugo tigua horombe mbiragabi bibahendengi bi nale naholebira. I̱na uruni tihondo lalu, Anduane Homogo olalu haga kamiru-o tí ha̱lo nahalimu.
ISA 62:7 Tígua hongo howa ibu olaabo halu kamine dege ibugua Yarusaleme lone mo hongo hadai bilo dindi tara tarani wali agali bibahendeore karume de hondowa tano ogoni duniniore kago lalu ibu mini yaraga helo Anduane Homogohondo bi la haabo halimu laro.
ISA 62:8 Anduane Homogohanda buleore lalu bi hongohe mbira lowinigo ibunaga hongo timbuni ngagome bi lo wiyadagoni heneneore bulebira. Ibugua bi lo winidagoni ogodagua. I̱ Anduane Homogo kogoni i̱na tínaga mabuha widi hengene ngamiru waitigi bu karume nole mo yalu pelo henge namulebero. Waini iba tígua biabe erekuibi bialu wabu wini ngamiru wali agali tara ibiragome naneore holebira.
ISA 62:9 I̱naga wali agali tínime widi hongowa boga biraru gandulo wirimiru tígua mberediru wabu nalu Anduane Homogonaga mini yaraga halu holeberemi. Pu mbira lini daga mini gerebi hongowa bogabi dedaru dowa waini iba wabu berelarimiru tígua i̱naga anda kagoria hama ngagoriani howa i̱nihondo turu haga bialu noleberemi, lalu Anduane Homogohanda bi ogoni lowini.
ISA 62:10 Wali agali Yarusaleme tanoha kamiru tí tano ogoni wahalu tagira pialu pilimu. Tagira puwa tínaga wali agali tagira hene biaru lone daibirago ibilo tinaga hariga mo tiga bilimu. Hariga baya hangu mo tiga bialu ege to̱le̱ harigani ngaru mo wahalu bilimu. Dindi tara tarani hameigini bibahende karume de hendelo manane mbira harigani helalimu.
ISA 62:11 Wali agali dindi tara tarani bu karume Yarusaleme í̠hondo lelo Anduane Homogohanda bi mbira lamiyago manda bibe. Tigua ogodagua lalu, Saiono-o de handa. Anduane Homogohanda í̠ pele ngule ibiragoni. Ibugua ibalu wali agali waitiginaga giha hearia haru dai bini biaru tibi haru halu o ibiragonigo de handa, lolebira.
ISA 62:12 Tigua lalu, Tí Anduane Homogonaga wali agali mini tigabiore ka, lolebira. Anduane Homogohanda wali agali pele mialu haru dai biniru ka, lolebira. Yarusaleme í̠ hondowa lalu, Anduane Homogohanda tano ogoni ibu gubalini ho haga nga, lalu lolebira. Tano ogoni Anduane Homogohanda yu wahene ndo nga, lalu Anduane Homogo ibugua lamiyago, lalu Aisaiahanda lene.
ISA 63:1 Agali mbira yári kinirume biagadagua bialu Idomo dindinaga dindi emene Bosara ngagoha howa ibiragoni aidabe. Mbirali aga daramabiore karule hongo timbuni walia halu amu ibiragoni aidabe. Ogoni ibu Anduane Homogo ibiragoni ndodabe. Ibugua wali agali karu pele mialu haru dai bulene hongo karulape yu howa ibiragoni.
ISA 63:2 Ibunaga aga daramabihe waini iba wabiaga be timbuni ngagoha anda pu howa waini iba wabulenaga pu mbira mini gerebi lini geme hengedaga bialu hene mbauleda, laya.
ISA 63:3 Ani layagola Anduane Homogohanda ladai bialu lalu, Dindi tara tara bibahende wiaruni i̱na geme bame gerebi lini hengedo tagadabaga biagadagua birugola marume i̱ biamogo bule mbira naibiya. I̱na keba timbuniore ho howa dindi uruniha hameigini hearuni geme hengedo tagadabagabu waharugola uruninaga darama i̱naga agani wai haya, laya.
ISA 63:4 Ibugua lalu, I̱naga wali agaliru pele mialu haru dai bulene horo biago abale hapara hayadagonaga áyu ogoni howa tinaga waitigi bu karuni pani nelo mialu baru.
ISA 63:5 Ani balu hewagola agali mbirame i̱ biamogo bialu wai biba lama mbirali íbu nabiyagola mogolo handaru. Ani howa i̱ninaga keba timbuni harugome i̱ mo hongo hayagola i̱nime waitigi uruni bo wahai halu i̱naga wali agaliru haru dai biai haru.
ISA 63:6 I̱na keba ho hewagobiore dindi tara tarani hameigini bu hearu bibahendeore bo hengedo tagadabagabu wahai harugoni. I̱naga keba holene gabo be yu hewagoha howa nelo mirugo nowa ti luluyu heagola i̱na tinaga holene daramaru dindini odo payabu ngeledo, laya.
ISA 63:7 Anduane Homogohanda ibunaga dara holene timbuni wu howa mana bayale hangu biaga kago i̱na latagi holebero. Ibugua ina pele ngialu bayale dewaore biyagonaga i̱na ibunaga mini yaraga halu holebero. Ibunaga gubalini timbuniore holenemebi dara holenemebi ibugua Isaraele wali agaliruha paga ho howa mana bayaleore biyagoni.
ISA 63:8 Anduane Homogo ibugua lalu, Wali agali uruni ti i̱naga wali agaliore kago tigua mine halu i̱hondo bi lalu ke̱ naholebira, laya. Ani lowa ibugua ti pele mialu haru dai biya.
ISA 63:9 Wali agali ti genda tandagaru yu heangi Anduane Homogo ibunibi nde ti heba howa genda tandagaru yamaga ho haya. Anduane Homogo ibugua ibunaga wali agaliru dara howa bu miniha genda timbuniore howa ibunaga gubalini holeneme ti dara halu haru dai bini. Anduane Homogonaga dahuliyalime ndo ibunime ti hearia ibuwa pele mini. Bambaore howa ibunime ti taba yalu baya hangu handayaho hama ibini.
ISA 63:10 Ibugua ani bialu heago helowa wali agali tigua ibu erembira miyagome ibunaga Dinini mo tandaga halu hene. Ani biyagola ibugua ti baba mo waitigi ho hene.
ISA 63:11 Ani biyagola nde tigua bamba bialu heneru mitangi bu dai bini. Ala bamba Anduane Homogonaga biabe biahaga Mosese henengi howa bialu heneyaru mitangi bu dai buwa tigua hale halu lalu, Anduane Homogo ibu áyu agoha haruabe. Bamba nde ibugua ibunaga wali agalirunaga agali haguane haru halu iba solowara mini Daramabi bereagoha domalu bayuwa haru pialu heneyago nde áyu ogoni ibu agoha kadabe. Ala nde Anduane Homogo ibugua ibunaga Dinini ti baba mandagi helo helenego agoha haruabe.
ISA 63:12 Ibugua hongo timbuniore Mosesehondo mialu ibu bamba howa iba solowara timbuni bereago haluki bira li ni bilowa ibunaga wali agali iba ange mendehayagi ubaede halu piai helene. Ani binigome ibunaga mini yaraga halu ibu mini lene wiaabo hene.
ISA 63:13 Iba ala berene hariga wiagoriani ibuni ala bamba halu pialu wali agali ti mama penego ibuni agoha kabe. Wali agalirume hongo howa nogo hosi gabuame gerai pururu lalu piagadagua ti abale pialu pi mbira nale bayale pene.
ISA 63:14 Mbiralime nogo bulumagaru datani bayale dewa bu kagoha haru piagadagua Anduane Homogonaga Dinini ibugua wali agali uruni ti gi nahe bayale palelo mo wialu helene. Anduane Homogo-o í̠na biabe hongohe tara ogonidagua birigomebi í̠naga wali agali baya hangu haru halu pirigomebi wali agali maru karume í̠naga hongo holene ngegobi mini leneore kegobi manda biaiore holebira.
ISA 63:15 Anduane Homogo-o í̠ í̠ninaga wá taraore holenebi hongo holenebi to̱laihe dahuliya andagani wu kegonigo í̠na ina kamaru de handa dali ho habe. Í̠na irane aginaga ina mitangi nabi í̠naga hongo holene timbuni wirigo mo heya halu ina nahende kebe. Í̠naga dara halu biamogo bulene wirigo inahondo mo walia nahe ina waore harigonida. Í̠na ina handa tara howa gubalini naheore kegonibe.
ISA 63:16 Inanaga aba í̠ kegoni ndobe. Ina mamali Abarahama Yagaba imarume ina ai ima kamabe manda nabi henego ai í̠ ina abaore howa inanaga Anduane Homogoore í̠ kegoni. Bambaore howa ina heba haabo howa pele ngialu haru dai biagaore í̠ kegoni.
ISA 63:17 Anduane Homogo-o irane aginaga ina lulu yu ibagabu holoma̱ya yu waho kebe. Iname í̠ erembira ngialu í̠naga andaneha haabo nahe holoma̱ya irane aginaga i̱nanaga bu miniha mo giambe ho ngeledebe. Ai í̠naga biabe biahaga kamaru mitangi halu ina í̠ninaga wali agaliore holoma̱ya dabariruni mitangi bialu ina kamagoha lone hole dai bibe.
ISA 63:18 Emene tigimandi hanguni í̠naga wali agali kamarume anda í̠ninagaore lalu dabene biagoni inanaga giha yu harimagoni. Ai mani howa inanaga waitigi bu hearume ibalu í̠naga anda ogoni bo gialobaga bialu hengedo mbaraho wahayagoni.
ISA 63:19 Bambaore howa ina í̠ninaga wali agaliore henego kamagoyu ai áyu í̠na handayaho nahe ina wali agali tara mbaule kamagoni mitangi bu kebe. Wali agali tara karu ti í̠naga mini lalu hene ndo kagoni.
ISA 64:1 Anduane Homogo-o í̠na hari li kagoni budalu dalibelo hame ledama. Ani dalidele hari wama pedaruni í̠naga deni gi howa duru lalu ema biai ho ngale.
ISA 64:2 Hari urunime pogolodagaha dali bialu iba todobeneha hambu deledagola pobo howa kidikodo lalu haralidagua bulebira. Anduane Homogo-o í̠na í̠naga hongo timbuniore ngego heba ibalu waitigi karume í̠ mini manda biai helobi dindi tara tarani hameigini bu karu bibahendeme ti kagoria í̠ dalerego hondowa ti mogo lalu duru lai helobi abale ibulene nga.
ISA 64:3 Bambaore nde í̠ni ibalu howa nahendene ale tara tara bigi birigola iname mogolo handaga birimagoni. Í̠ni dalirigola hari wiarume gi timbuni howa duru lalu hayago.
ISA 64:4 Bambaore howa mendealime ibunaga wali agali ibuhondo mini dunubia ho karu ti biamogo bialu nahendene ale tara í̠na birigodagua biyane mbira handa nabi haleme hale nahebi naheneore nde áyubi nahe dege. Anduane Homogo-o anidagua biagane í̠ hanguore kegoni ndobe.
ISA 64:5 Wali agali mana tigabi bayale hangu bule turu halu biagabi í̠ni hame ledegobi talialu bialu haga karubi tihondo í̠na gubalini haga kegoni. Ai iname ko bulene ngaruha hongo howa haabo harimagonaga í̠na inahondo keba harigoni. Ani keba haabo harigoyu iname mana ko ala beremalidagua dege bialu mini beregeda nabiore kamagoni. Anigo iname haabo holene agua yu holeberemabe.
ISA 64:6 Ina bibahende ko birimagome í̠naga deni ko dodohe ngubiore kamagoni. Iname mbirale bayale beremabe toba howa bialu kamaria í̠naga deni ina aga ko dodohe ngubi ngaligobi kamagoni. Iname mana ko nabulene wiaru bialu haabo harimagome ina dangi yuni gaule ngaru puyabume pulo yalu poralidagua yalu pu wahabehe kamagoni.
ISA 64:7 Mbiralime nde í̠hondo bi lole í̠ keria naibaga. Í̠naga mini olalu biamogo bia lolebi naibagaore kamagoni. Í̠na ina handa tara halu pu waore hene kamagoni. Iname nde ko dege biaabo harimagome ina mo ko hai howa tandaga pani nalu kamagoni.
ISA 64:8 Anigoyu Anduane Homogo-o ina aba í̠ore kegoni. Agalime dindi duguwa mbirale todobene be ale wabiaga hagadagua í̠ni kego ina nde todobene be ale wabini kamagoni. Inanaga tingini bibahendeore í̠ninaga gioreme wabirigoni.
ISA 64:9 Anigo Anduane Homogo-o í̠na iname ko bialu harimadarunaga keba haabo nahabe. Ina í̠naga wali agali kamaru mitangi bialu dara habe.
ISA 64:10 Í̠naga tano loma bini biaruni bame dindi ko wali agali nahaga ale nga. Yarusalemebi bo gialabaga bu wahene wali agali nahaga dege ngagoni ndobe.
ISA 64:11 Í̠naga anda inanaga mamali henerume í̠ mitangi bialu lotu lole ogoniha puwa í̠nihondo turu howa í̠ mini yaraga haga anda o biagoni irame dalu bo gialabaga bialu mo ko hene ndobe. Dindi ogoriani bayale maru iname turuho haga winirubi bibahende gialabaga biai halu mo ko hai hene ngagoni.
ISA 64:12 Anduane Homogo-o í̠na o bidaruni handalu keria í̠naga bu miniha mogo lalu mbirale mbira bua nabiaruane kebe. Iname manda bu handalu kamaria mana ko dewa birimagonaga genda timbuni uruni yu haabo holoma̱ya bi henemane í̠hondo laramaru hale nahe kegonibe, lene.
ISA 65:1 Anduane Homogohanda lalu, I̱na wali agali ti biamogo bia lowa i̱hondo hale helo hondo harugoni. Anigoyu tigua i̱hondo bi mbira nale halehabi nabi i̱na ti biamogo bule manda manda bu harugo mitangi nabi hene. I̱na i̱ ogoria kogoni tí biamogo bulebero lo hewaria wali agali hameiginiru ti i̱ni koria ibilonaga hondo ho haru. Hondo hewagola ai mbiralime i̱ taya bima ibulene hame nale dege hayagoni.
ISA 65:2 Horo bibahendengi wali agali mana ko bialu tini hame ledagoha pu pebe bialu karuni haru dai bule lowa i̱na i̱ninaga gi habe angala howa manda manda bu haabo haga ko.
ISA 65:3 Ani kogo helowa tigua i̱naga wanakuini howa mana ko tara tara ngaruni biaabo haga kagome tigua i̱ mo keba haga bialu kagoni. Tigua wali agali Anduane Homogo kago manda nabi karume biagadagua mbirale gime wabiniruhondo bi pupu wiaga mabu winiruha puwa bi pupu wialu mbirale loma biniru bo delaga dabuni bo mialu ira hagua ngabilo delaga inisenesiru delalu kagoni.
ISA 65:4 Anidagua bialu howa dege mbiraga tigua agali homenenaga homali karuha halaga bule homene dininihondo mani bulene bi wia do heneru langi lole piaga ka. Anidagua bialubi tigua nogo mbiriniru nalu ema bialu piaga maru i̱naga deni bayale ndo dodohe karu mbirale gime wabiniruhondo bo muwa uruni dawenerunaga iba bedarubi naga kagoni.
ISA 65:5 Urunidagua bialu howa tigua maru karuhondo lalu, Ina bayale taraore ilili biaga kamagoha hapara nahe ina ela holigo tí amura kaundiani halimu, laga ka. Anigo i̱na wali agali mana urunidagua biaga karuhondo turu naheore kogoni. Ina tihondo keba timbuni ho kogome ira hagua ale i̱naga ngui harigaha howa datagi halu kagoni. I̱naga keba holene ogoni hundia nabi ira hungu ale daho wiagadagua wiaho wiaga, laya.
ISA 65:6 Anduane Homogohanda lalu, I̱nime wali agali mana ko ngaru hangu mo tene howa bialu haga kamiru tínaga mana ko birimiruni bibahende i̱naga mbugani gilibu wiai kogo tí mbiraligo yo pialu napoleberemi. I̱na tí bibahende ko tínime birimigonaga mana lalu pani ngiai holebero.
ISA 65:7 Tígua ko bialu kamirunagabi tínaga mamalirume biyarunagabi bibahende pani tígua nai halimulo ngulebero. Bamba tínaga mamalirume bi pupu wiaga uyu hari wiaruha puwa ira hagua ngabilo delaga mini inisenesiru delalu i̱naga deni howa mana ko tara tara wiarubi bia dege biya. Ani biyagonaga i̱na ti bibahendeore pani nai helo mule kogoni, laya.
ISA 65:8 Anduane Homogohanda lalu, Agali mbirame pu mbira mini gerebi lini dewa dedaore do wahayagua nde agali mendealime lalu, Lini bayale maru dedaore do waholigo i̱na baya hangu handa hondoliya. Bayale maru deagua nde do pingidowa waini iba bayale wabuwa nabehe holebirago, laga. Anidagua dege i̱na Isaraele wali agali bibahende bo hilo wahai nahe wali agali maru i̱naga biabe biahaga karu ti dege helolebero.
ISA 65:9 Isaraele hameiginirubi Yuda hameiginirubi tinaga aguanenerubi biamogo bialu tihondo bayale dege bulebero. I̱na ti wali agali dewaore palu yanga lelarogola tigua i̱naga hari wigi bidagoria karulowa tinaga wulebira. Wali agali uruni i̱nime ti i̱naga biabe biahaga helo dabarugo ai dindi ogoriani ibalu holebira.
ISA 65:10 Sarono dindi ni paliragohayagi tigua nogo sibi dewaore hinu hama pialu dindi mende ni tagira ibiragohayagi mini Genda Biaga Guane ulini ogoniha nogo bulumagaru hinu holebira. Wali agali i̱niore mitangi bialu i̱naga mini yaraga haga karume ti dindi uruniha tani bayale dewa bu karuha howa ti ema nabi palu wigi bulebira.
ISA 65:11 Anigoyu tí wali agali maru i̱nihondo erembira ngialu i̱ninaga hari Saiono tano wiyagoriani i̱ mitangi bialu lotu lalu i̱ninaga mini yaraga hole naibi haga kamiru tíha mo ko holene wulebira. Wali agali tígua mbirale gime wabini mbira mini Gada mende mini Meni libuhondo bi pupu wialu ogolabome tíha mbira bayale dege ibilaabo haragola inaore hongo bolanguahe kamabe toba howa kamigoni.
ISA 65:12 Ai i̱na horo tara mbira tíha ibilolene podo wia henego ngo. Horo ogoningi tínaga waitigirume ibalu tí baba wai bialu tinaga ayu tibu ne gadele ngarume tí bo wahai holebira. Waitigi urunime tí kamigoha ibiragola tígua tínaga ge duli hanga howa bulu paluwa haguaneme dindi ela ho bedamiore waitigirume tíni ma pugualu baga bulebira. I̱na tí olalu hewagola tígua i̱naga bi hale habe manga halu tíhondo bi larugolabi bia nabi harimigonaga mbirale o langeroruni heneneore tíha anda ibulebira. Ani bulebirago irane tígua i̱na mana lowirugo mo wahalu mana ko i̱ mo turu nahaga ngaru bulene dabalu i̱naga deni howa mana ko wiaru hangu bialu haabo harimigoni.
ISA 65:13 Anidago Anduane Homogo Bibahende Haru Haame Ho Haga i̱ni kogome bi ogodagua laro. Wali agali i̱naga biabe biahaga karume ti tomo bayale nalu holebiragoyu tí ko biaga kamirume tomo nane garibilo holeberemi. I̱naga biabe biahaga maru karume ibabi dewaore nalu holebiragoyu wali agali i̱ erembira ngiaga kamiru tí ibabi nolene nawi howa iba noa timbuni halu holeberemi. I̱naga biabe biahaga wali agali uruni ti turu hagabu holebiragoyu tí kamiru dege taga pani naabo halu holeberemi.
ISA 65:14 I̱naga wali agali urunime tinaga bu miniha turu holene to̱laihe howa ka̱i̱ lalu iba gana ladaga halu kagola tí nde bu miniha dara holene wu to̱lowa tínaga mini pai halu bidagola dugu hongoheore bialu holeberemi.
ISA 65:15 I̱naga wali agali i̱na dabo helene karume tí kamirunaga mini lalu ha halu bi lolebira. Anduane Homogo Bibahende Haru Haame Ho Haga kogome tí ko birimigonaga pani ngialu tí homelelolebero. Ani buleberogoyu wali agali maru i̱ninaga biabe biahaga howa i̱na bi laruruni talialu biai haga bu karume tihondo i̱na tinaga mini gahenge bayale mbira mulebero.
ISA 65:16 Wali agali dindi bibahendeha karume bi heneneore laga Ngode Datagaliwabe i̱ni kogohondo bi lalu ina biamogo bialu mo bayale habe laga bulebira. Wali agali marume tinaga bi larago heneneore laro lalu i̱naga mini lalu heneneore laro laga bulebira. Ani howa tiha genda tandagaru ala wiyaruni Anduane Homogo i̱nime mo embeda hai holebero, Anduane Homogohanda laya, lalu Aisaiahanda lene.
ISA 65:17 Anduane Homogohanda lalu, I̱na hari daligabi dindibi gahenge waberogo de handalimu. Wali agalirume ala bialu heneru mitangibu dai nabulebira.
ISA 65:18 Tígua i̱na áyu mbirale bibahende gahenge waberogonaga turu haabo halu holene nga. Yarusaleme gahenge wabuleberogoha wali agalirume gubalini haga haga buwa turu dege ho halu tinaga bu miniha mo palia holene wu to̱lai holebira.
ISA 65:19 I̱nime dindi gahenge Yarusaleme ogoni handalu i̱naga wali agaliru turu ho kago hondowa i̱ miniha turu holene to̱lai ho holebero. Yarusaleme gahenge ogoniha howa mbiralime dugu biaruanebi mbiralime tandaga timbuniore howa ga̱ laruanebi hale naholebira.
ISA 65:20 Dindi ogoniha waneiginiru ti emene galini homolene nawulebira. Wali agaliru ti dindini holene mali dewaore haho wulebira. Ti marume mali pira pira mbira (100) heneyagua ti wandari igiri daliahe ale dege kagoni manda bulebira. Ti maru mali pira pira mbira nahe howa abale homayagua maru karume Anduane Homogo i̱nime ti ko biyagonaga pani mialu abale bo homelayada manda bulebira.
ISA 65:21 I̱naga wali agaliru ti dindi ogoniha andaru bu halu gerebi maburu timbuni hongowa lini dowa waini ibaru wabuwa karulape hambu nalu holebira.
ISA 65:22 Mani tinaga waitigirume i̱naga wali agalirunaga anda biniruha karulalu palia nabulebira. Tigua mabu ngarubi karulowa ira liniru dowa waini iba wabuwa hambu nalu naholebira. Ira hongoheru mbira luore haho wiagadagua i̱naga wali agaliru ti lu haabo holebira. Ani howa tinime biabe erekuibi bialu hayaru bayaledane hondowa uruninaga turu timbuni haga bialu holebira.
ISA 65:23 Biabe tigua biraruni aria bia ko hene mbira nawulebira. I̱na tinaga waneiginiru biamogo bulebero lalu lowirugo uruni mbirago mo ko naholebiraore. I̱na tinibi tinaga waneiginirubi tinaga aguanene mani holebirarubi mo bayale howa helolebero.
ISA 65:24 Tigua i̱hondo mbirale mbira ngi lalubi biamogo bia lalubi ani lalu kaore i̱nime abale tinaga ngi larago mialu biamogo bia laragobi hale halu biamogo bulebero.
ISA 65:25 Ani bialu biango duduru nogo sibi iginiru tomo mandagi nalu holebira. Nogo bulumagarume datani karuni nagadagua budi gabua timbuni mini laiono karume datani dege nalu holebira. Puya ngarume ti dindi himu ngaru dege nalu wiaabo holebira. I̱naga hari Saiono loma bini wiagoha mbirale tara tara bibahende bayale dege howa ko mbirame maru mo ko naholebira, lalu Anduane Homogohanda laya, lalu Aisaiahanda lene.
ISA 66:1 Anduane Homogohanda bi ogodagua laragoni, Dahuliya andaga i̱naga haru holenenaga biragane dagia wialu dindi bibahende ngaru i̱naga ge dogolope ho wiagane ngago ai tígua i̱ni holiyanaga anda agi ale buleberemibe. I̱ ha̱lo biruliya henge agoha ngelaho kamibe.
ISA 66:2 I̱nime hari li kagobi dindi ogobi bibahendeore wabiai howa ani helo helarugoni ndobe. Anigo i̱na wali agali maru mini dindiha howa i̱nihondo gi halu mana ko biyaru wahowa mini beregedalu i̱ninaga andaneha haabo ho karu tihondo turu haruli.
ISA 66:3 Anigo wali agalirume tininaga bu miniha mana ko ngaru hame lalu dimagoli holene tagira ibiragobi mana ko ngubi ngaru hangu bialu holenebi hame lalu ka. Ani bialu howa tinime manda bialu karia i̱hondo lotu tigatiga lalu kamabe tobaho ka. Anigo tigua i̱hondo loma bo ngialu karuni i̱ turu nahe kogoni. Tigua nogo bulumagaru bowa i̱hondo lomabu ngiragola i̱na handalu koria agali bo lomabu ngiradagua birane handaruli. Tigua nogo sibi iginiru bo lomabu ngirangi i̱na handalu koria biango bo lomabu ngiradagua birane handaruli. Ai widiru lomabu ngiragola nogonaga darama hambu lomabu ngiradagua birane handaruli. Tigua ira hagua ngabilo inisenesi lomabu delaragolabi mbirale gime wabini ngaruhondo bi pupu wiragolabi ta nabi i̱naga deni ko dodohe ngubi dege biaga kagola hondowa i̱ turu nahe kogoni.
ISA 66:4 Ani bialu kagonaga i̱na tiha genda ogobiore ibuli lowa giho hagagobiore tigua yu helo mulebero. I̱na ti olalu hewagola tigua ya nalayagonagabi i̱naga bi tihondo lamialu hewaria hale nahayagonagabi genda yu helo mulebero. Tigua i̱na bi larugo mo wahowa i̱naga deni mana ko wiaru dege bule dabayagonaga i̱na tihondo gibi ogoni bulebero, laya.
ISA 66:5 Wali agali Anduane Homogohondo gi halu mana ngaru talialu bialu haga kamiru tí ibugua bi o larago hale hadaba. Ibugua lalu, Tígua hongo howaore i̱ni talima ibalu kamigo hondowa tí damenerume tíhondo handabe manga howa erembira ngiaga kagoni. Wali agali urunime tí mege bialu lalu, Anduane Homogohanda ibuninaga hongo holenebi wá tara holenebi walia helo. Ani biragola hondowa tí turu haramigo ina hondoloma̱ya, laga kago. Ai nde i̱na tihondo heneneore larogoni. Mani bi ogoni laragome tini taga timbuni holebira.
ISA 66:6 Bi timbuni ede tanoha laruagobi i̱naga andaha timbuni ua lo haruagobi hale hadaba. Bi ogoni laruago Anduane Homogo i̱ninaga bi degedago hale kamigoni. I̱na i̱naga waitigi bu hearume mana ko bialu hayagonaga pani nelo mulene winidagua mialu kogoni.
ISA 66:7 Anduane Homogo i̱naga Yarusaleme tano ibu walime waneigini taba honolene tandaga nahe abale taba hanagagobi nga.
ISA 66:8 Tígua abale ogonidagua bini lenebi mbira hale kamibe. Dindi hameigini mbira holene horo áyu degeni abale mo wini mbira ngabe. Horo áyu degeni wali agali dewaore íbu daga ho hagabe. Anigo Saiono ibu gahenge taba honole lo bedangi dege ibunaga waneigini abale aube tobane taba honolebira.
ISA 66:9 Anduane Homogo i̱ni kogome wali ibu gali taba honole biruwa tandaga hendelo ngelarugodago ai waneigini nataba henelo tombeha berelowa agua holeda, lalu Anduane Homogohanda bi ogoni laya.
ISA 66:10 Wali agali Yarusaleme gubalini ho haga kamiru-o tí Yarusaleme bayale kagonaga turu hamaga hadaba. Abale ibu dara howa ibuni heba mandagi dugu bialu harimiru áyu ibu heba mandagi turu hadaba.
ISA 66:11 Ibu bayale kagola tígua mbirale bayale damene ibuha howa ibiraru mo yu holeberemigo. Waneigini gali ibu ai̱yanaga andu no karulo puwa tombe halu turu hagadagua tígua Yarusalemenaga bayale wiaru no karulo puwa nolene embedaho holeberemi, laya.
ISA 66:12 Anduane Homogohanda ogodagua lara, Yarusaleme mo bayale ho ngelarogola ibugua dindi tara tarani hameigini bu karunaga dabudabu bayale bu ngaru mo yu holebira. Iba porago hundia nabiaga duguaho wiraligodagua ibuha mbirale ndia nahe wiaho wulebira. Ani biragola tígua mbirale bayale uruni mo yu howaore waneiginirume ti ai̱ya andu no karulape howa ti ai̱yahanda taba yalu pu íbu bialu ai̱yame bani berelowa mo ginibia halu bedagola turu hagadagua tí turu timbuni ho holeberemi.
ISA 66:13 Waneigini ai̱yarume tinaga waneiginiru mo turu haga buwa bi bayaleru lamigi bialu baya hangu haru hagadagua i̱na tí baya hanguore haru holebero. Ani bialu kogola tí Yarusalemeni bayale awadagaore holeberemi.
ISA 66:14 Tíhondo mbirale urunidagua birago hondowa tí turu taraore howa tíni wali agali hameigini hongoheore mbira holeberemi. Ani howa tígua manda bialu Anduane Homogo i̱niore kogome i̱naga biabe biahaga kamiru i̱naga hongo holeneme tí biamogo biaga kogoni. Anigoyu i̱naga waitigi karu tiha i̱naga keba holene walia haga kogonigo manda buleberemi, laya.
ISA 66:15 Tígua Anduane Homogo ibuni wai biaga garo mini karisi mbirani ira hungu heba gerai lalu puyabu ibiradagua ibiragola hondoleberemi. Ibunaga keba holene ira hungu ale bialu kagome ibunaga waitigi bu karu bo heda hai harane hondoleberemi.
ISA 66:16 Ani ibuwa ibugua mana ko bini lene karu pani mialu ibunaga keba holene ira hungu ale bialu kagome ti bo heda hai halu ibunaga wai biagane ayu tibu ne gadele yidagome uruni bo hilo wahai harane hondoleberemi.
ISA 66:17 Anduane Homogohanda lalu, Wali agali maru mbirale gime wabini ngaruhondo bi pupu wiagabi tini ilili biaga mana bialu mabu ngaruha bi pupu wule piagabi tinaga gamugamu biaga karunaga mana lo ngaru talialu biagabi nogoru tia hururu uruninaga mbirini i̱naga deni dodohe ngaru nalu hagabi ko uruni bibahende biaga karu ti bibahendenaga homa maro bulene horo kaware ibiragoni.
ISA 66:18 Anduane Homogohanda lalu, I̱na wali agalinaga minibi mbirale tigua bialu kagoria handalu koria i̱na dindi tara tarani hameigini bibahende karu mo mogo bulenengidane handalu mo mogo bule eberogoni. Tigua mandagi íbu ngoai ho karia i̱ninaga wá taraore holenebi hongo timbuni holenebi ngogo hondolebira.
ISA 66:19 Ani íbu kagola i̱na manane mbira ti hendelo walia holebero. Ani buwa wali agali maru nahome karu tigua dindi tara tarani hameigini i̱ninaga wá taraore holenebi hongo timbuni holenebi nahende karuha i̱ni mini timbuniore lene ka laga bima pudaba lolebero. Ti Sebena hameigini karuhabi Libia hameigini karuhabi Lidia hameigini agali uruni tiore danda timu yaga mugube ka ti karuhabi pudaba lolebero. Ani bialu hameigini maru Tubala dindiha karubi Girigi dindiha karubi dindi maru kaundia wiaruha karubi karia purogo ladaba lolebero.
ISA 66:20 Ani larogola tigua pialu wali agali dindi uruniha tí kamirunaga hameiginiore ala haru pene karu i̱naga helo i̱nihondo mo turu halu bame haru dai bulebira. Tigua wali agali uruni maru nogo hosibi dongibi kamelebi uruninaga erekunini berelalu maru garo ale mini karisi ngaruni berelalubi ti bibahende i̱naga hari Yarusalemeni i̱ kogoria haru halu anda ibulebira. Isaraele wali agali tigua widi lini haealowa ndisi be bayale i̱ninaga deni dodo nahe ngagoni ngelowa i̱nihondo lomabu ngule i̱ andaha yalu eberemilidagua wali agali tara uruni tigua tínaga dameneru i̱ni koria haru ibulebira.
ISA 66:21 Ani haru ibiragola i̱na agali uruni maru loma binigo mo miaga helobi maru Libai aria helobi dabo helolebero, lalu Anduane Homogohanda laya.
ISA 66:22 Ani lowa Anduane Homogo ibugua bi ogodagua laya. I̱na dindi gahengebi hari daliga gahengebi wabuleberogo i̱ninaga deni hongoheore wiaho wiaabo holebira. Anidagua dege tínaga waneigini aguaneru ereba nahe hongohe haho wialu tínaga minibi ereba nahe wiaabo holebira.
ISA 66:23 Ani howa ege pigane ngabulo kagonaga horo timbuni tagira ibirangibi Sabada horo bibahendengibi dindi tara tarani hameigini bibahende karume Yarusaleme ogoriani ibuwa i̱ninaga deni ge duli hanga howa bulu palialu Anduane Homogo i̱ mitangi bialu i̱naga mini yaraga halu lotu lole íbu ngoai holebira.
ISA 66:24 Ani buwa lotu ogoni lai halu i̱ andaha howa tagira pialu karia wali agali ala i̱hondo mine howa erembira ngialu i̱naga bi larugo mo wahalu yo handaga biaruni homenego tinaga tingini li tagirani wima pedane hondolebira. Himirume homene tingini uruni nalu haabo howa himiru homa nabulebira. Iramebi tingini uruni dalu kago dai nahe daho wiaabo holebira. Wali agali pialu karume homenenaga tingini uruni ngubi taraore ngane engengebi hondowa mogo lalu magu tagu wibehe holebira, lalu Anduane Homogohanda laya, lalu Aisaiahanda lene.
JER 1:1 Mbuga ogoha Hiligaia igini Yaremaianaga bi lenego nga. Hiligaia ibu hameigini loma binigo mo miaga hearu aria howa Beniyamini hameiginirunaga dindi mbira Anadodo winigoha haga hene.
JER 1:2 Kini Yosaia ibu Amono igini howa Yudanaga kini mali haleria (13) heagola horo ogoningi Anduane Homogohanda ibunaga bi mana Yaremaiahondo lamini.
JER 1:3 Mani Yosaia igini Yahoiagimi ibu kini heangi Anduane Homogo ibugua bi maru Yaremaia lamia dege bini. Horo ogoningi howa Anduane Homogohanda ibunaga bi Yaremaiahondo lamiaabo halu heane dege Yosaia igini Sedegaia ibu kini heane mali bearia (11) pene. Mali beanegonaga ege dauni hayagola waitigime Yuda wali agaliru dindi taraha tinaga garabaya biabe ale bialu helo minu garabayabu yalu pene.
JER 1:4 Anduane Homogohanda Yaremaia i̱hondo bi ogodagua langiya.
JER 1:5 Í̠ ai̱ya tombeha í̠ nabereha i̱na í̠ ala bamba dabenego kegoni. Mani í̠ ai̱yahanda í̠ taba nahe ibu tombeha berengi i̱na í̠ dindi bibahendeni i̱naga bi mana latagi haga habelo dabaru.
JER 1:6 Anduane Homogohanda bi ogoni layago hale howa i̱na ladai bialu lalu, Anduane Homogo Bibahende Haru Haame Ho Haga-o i̱na bi mana ogoni latagi holene manda nawi igiri emene dege kogonidago agua loliyadabe, laru.
JER 1:7 Ani larugola Anduane Homogohanda ladai bialu lalu, I̱ igiri emene kogoni, nalabe. I̱nime wali agali maru karuhondo i̱na bi lamule pu larugoha polene nga. Ani bialu bi lamibe larogo lamiaiore holene nga.
JER 1:8 Í̠na ti hondowa gi holene nawi. I̱na í̠ biamogo bulebero. I̱ Anduane Homogo i̱na bi o ledogoniore, laya.
JER 1:9 Ani lai howa ibunaga gi i̱ha dogola ede halu i̱naga ne hambuni ela howa ogodagua laya. Hale ha. Áyu i̱naga bi í̠naga ne hambuni wia harogo ogoni latagi habe.
JER 1:10 Áyu howa í̠na wali agali hameigini dindi tara tarani bu karuni haru habelonaga i̱na hongo ngerogoni. Í̠na mbirale ngaru handayaho habelonaga hongobi bo gialo bagabu wahabelonaga hongobi bope halu mo ko habelonaga hongobi bulene ngaru bialu habelonaga hongobi hongolene ngaru hangabelonaga hongobi bibahende karulapeore ngerogoni, lalu Anduane Homogohanda laya, lene.
JER 1:11 Anduane Homogohanda i̱hondo hale halu lalu, Yaremaia-o ogoni agile hendedebe, laya. Ani layagola i̱na ladai bialu lalu, Ira mini amononaga magane hendedogoni, laru.
JER 1:12 Ani larugola ibugua ladai bialu lalu, Tigatiga larigoni. I̱naga bi lo wirugo bibahende tagira piai helo de hondo holebero, laya.
JER 1:13 Ani lowa ibugua lone i̱hondo hale halu lalu, Ai lone mbira agi dege hendedebe, layagola i̱na ladai bialu lalu, Todobene be mbira uyugohayagi iba mbolia balu kane hendedogo ai orayagi odo dai bibehedane hendedo, laru.
JER 1:14 Ani larugola Anduane Homogo ibugua i̱hondo lalu, Mo ko holene timbuniore mbira uyugoniha howa ibalu wali agali dindi ogoha karu bibahende mo ko hai holebira.
JER 1:15 Anduane Homogo i̱nime kini uyuruniha bu karu ibilarogo tigua tinaga ami agali dewaore haru ibulebira. Ibuwa kini uruni tinaga biragane dagiaru Yarusaleme tanonaga panga harabani wia paraho ngelo bedagola wali agali tagira pobe naheore wara andaho birulebira. Wara anda howa ho mabubupe halu Yuda dindiha tano ngaru bibahendebi ani dege biai holebira.
JER 1:16 Irane i̱naga wali agaliru tigua i̱naga bi mo wahowa mana ko ngaru hangu bialu i̱ni erembira ngialu tigua dama karuhondo bi pupu wialu uruninaga mini yaraga halu lomaru miaga kamigonaga ani ibilolebero.
JER 1:17 Anigo ai heyalu í̠na wali agaliru bi ogoni lamule pu nabere. Abale puwa gi nahe bi langiruruni bibahende lamiai habe. Í̠ áyu ogoni gi hariyagua uruninaga deni howa í̠ mogo lalu gi timbuniore habelo i̱na í̠ mo gi bia holebero.
JER 1:18 Yaremaia-o hale ha. I̱na í̠ mo hongo halu tano mbira pabe hongoheore bu mabubi ngaligobi howa aeaneme anda gene hene howa to̱le̱ boronosime pabe bini hongoheore kaligobi í̠ heledo. Ani bidogome Yudanaga kini karumebi agali haguane karumebi loma binigo mo miaga karumebi wali agali bibahende karumebi í̠ bope naholebira.
JER 1:19 Agali uruni tigua í̠ baba waitigi bu hinu haho holebirago í̠ bope habe nahe holebira. I̱nime baya hangu handayaho í̠la mandagi howa biamogo bialu holebero. I̱ Anduane Homogo i̱na bi o ledogoniore, laya.
JER 2:1 Anduane Homogohanda i̱hondo lalu,
JER 2:2 Í̠na i̱naga bi ogoni Yarusalemeha karuhondo latagi halu lamibe. Bambaore tí waneigini ale harimingi tígua i̱nihondo mini mbiraore wuwa hongo howa yu tiga bialubi tínaga bu mini i̱ha pagaho harimigobi i̱na mitangi bido. Ani bialu wali agali pigane dabubu howa gubalini hagabu hagadagua harima. Ani bu howa dindi ko mbirale anda nahaga wali agalime mabu nahangaga wiagoria tígua i̱ni hangu talima ibagabu harimigoni.
JER 2:3 Isaraele-o horo ogoningi tí i̱ninaga wali agaliore howa i̱naga mabuha tomo ala pigane hengeneru lomabu migi biraligobi harimi. Mbiralime tí mo ko haga biyagola i̱ni ala pu bamba howa tigua ko biyagonaga pani migi bialu baga birugoni. I̱ Anduane Homogo i̱na bi o ledogoniore, laya.
JER 2:4 Isaraele wali agali Yagabanaga aguanali kamiru aibe. Anduane Homogohanda bi ogo lowia hayago tí hale hadaba.
JER 2:5 Anduane Homogo ibugua lalu, I̱na agi birugonaga tínaga mamalirume i̱ helo wahalu ti kaundiaha pu waore hayabe. Tigua galone ndo wiaruhondo bi pupu wialu howa tinibi habane nabulene dege hene ndobe.
JER 2:6 I̱na ti pele mialu dewaore birugo mo embeda haya. I̱nibi embeda dege haya. Iyibi dindi howa haru tagira ibalu dindi ko wali agali nahaga wiagoria haru ibirugoni. Dindi ogoniha mbirale anda nahaga ege to̱le̱ hangu pale dalubi naibaga wiagoria wali agali pu luluya haga dindi koore wiadagua haru halu ibirugobi uruni embeda hai haya.
JER 2:7 Tínaga mamali uruni dindi ko ogoni wahalu dindi homogo mbirale bibahende anda hai holene o ngagoria haru ibirugoni. Áyu Isaraele wali agali tí dindi bayale ogoria howa tomo bayalebi mbirale bibahende bayale wiarubi karulapeore wuwa kamigoni. Anigo tígua dindi bayale ngirugoria howa mana ko ngubi nagalone wiaru biaabo halu dindi bayale i̱nime tí ngirugobi i̱ninaga deni mo nagalone bu hinalu mo ngubia harimi.
JER 2:8 Loma binigo mo miaga hearume i̱ embedaho wahalu mana mandabi hearu tiguabi i̱ manda nabi dege haya. Dindi ogonaga agali haguane hearu tiguabi i̱hondo mine haya. Anduane Homogonaga mana latagi haga hearumebi dama Bala hearunaga minini howa mbiwia haga biya. Mbirale mbira ti biamogo bibe nahe wiagohondo bi pupu wiaga hene, lalu Anduane Homogohanda laya, lene.
JER 2:9 Anduane Homogo i̱na larogo, Tígua mana urunidagua birimigonaga i̱na tí ko biaga kami lalu manani dabalu pani ngulebero. Tínibi tínaga waneigini aguane mani holebirarubi bibahendeore ko biaga kami lalu pani miaabo holebero.
JER 2:10 Ai ni paliragoha dindi mini Saibarasa iba dege dombene ngagoha pialu dindi ogoniha mana biaga ngago handalimu. Ani bialu ni tagira ibiragoha pialu Arebia dindi ogoniha bialu kagobi handalimu. Mana ko ngubi tígua bialu kamirunidagua mbira dindi uruniha bialu hearia handarimibe.
JER 2:11 Tigua mbirale henene ndo karu yu tiga buwa bi pupu wialu ogoni yu wahalu pu nabi hongo howa haabo haga ka. Anigo Ngode Datagaliwabe timbuni hongohe mini lene i̱ kogo helo wahalu i̱naga wali agali kamirume dama ko habane nabulene tíni biamogo bibe nahe karuhondo bi pupu wialu kami.
JER 2:12 Anigo Anduane Homogo i̱nime laro. Hari daligani bu kamiru aibe. Isaraele wali agali o karume mana ko bialu karuni hondowa mogo lalu duru nalarami. Tigua mana ko uruni biragonaga manga halu taga ho holene nga.
JER 2:13 Ogoni irane i̱naga wali agali uruni tigua mana ko kira biyago. I̱ haabo holene iba duguaho wiagagobi howa i̱na tí holene miaga kogo helo wahalu i̱ni erembira ngialu piaga kami. Ani puwa iba hambulenaga to̱le̱ha iba berelo tínime guabu ngelo harimi. Ani guabu ngelo karia iba biraga to̱le̱ uruni poda baga biragola iba nabirulebira, laya, lene.
JER 2:14 Anduane Homogohanda lalu, Isaraele hameigini ti marume hondo haga hene ndo ka. Ti mendealinaga garabaya biabe ale bialu haga ndo howa ti aba ai̱yarubi garabaya biabe bialu hagane howa hono winibi ndo dege kagoni. Anidago irane aginaga waitigirume ibalu ti mo ko howa bo hengedalu kabe.
JER 2:15 Waitigi agali urunime gabua budi ale timbuni laionome ngororo laradagua bialu ti abale ibuwa tanoni anda hearunibi gialo wahai hayagola dindi ogoniha agali naheore nga. Dindi ogoni mo labu halu mbirale anda habe nahe ngelalu tano bayale winiru bo gialo wahai haya.
JER 2:16 Isaraeleru tíore wali mbira Iyibi dindiha Membisi tano Tabanese tanolaha agali hearume mandari podo wahenegobi kamigoni.
JER 2:17 Genda uruni tínime bia ko harimigome ibira. I̱ Anduane Homogo tínaga Ngode Datagaliwabe howa i̱na tí baya hangu hariga walia hama haru ibirugola tínime i̱ manga halu erembira ngirimi.
JER 2:18 Áyu Iyibi dindiha dai buwa iba Naili hambu nole kamigobi Asiria dindiha pialu iba Yuberedisi hambu nole kamiru aginagabe. Anidagua beramigome tí biamogo bulene mbira nawiore ndobe.
JER 2:19 Tíninaga mana ko bialu kamigome tíni hayu dai bulebira. I̱hondo erembira ngialu pirimigome tíninaga ko ogonime tínihondo handabe manga haragoni. Anduane Homogo i̱ tínaga Ngode Datagaliwabe hewago yu wahalu i̱naga andaneha nahe puabo harimigoni. Ai mana ogonidagua birimigome tíni mo tandaga halu koore kaubi ngago minime baya hangu manda bulene nga. Anduane Homogo Bibahende Haru Haame Ho Haga howa Hongo Haiheore kogome bi o ledogoniore, laya lalu Yaremaiahanda lene.
JER 2:20 Anduane Homogo Bibahende Haru Haame Ho Haga kagome laabo halu lalu, Isaraele wali agaliru-o hale hadaba. Bambaore howa tí i̱naga biabe bialu halimulo helarugo yu wahowa lalu, Í̠naga biabe ogoni iname nabuleberema, larimi. Ani lalu walime agali kayu yama ibaga biagadagua puwa tígua hari nene wiaruha iraga halu puwabi ira timbuni hearu tenehabi dama hearunaga mini yaraga howa bi pupu wialu harimi.
JER 2:21 I̱na tí pigane i̱naga pu mbira mini gerebi egene bayaleore dabalu hangarugo ai áyu abiale harimidabe tíni handadaba. Áyu tí gerebi irane ko emberaha ho wahene kuabuore kamigoni agua biyabe.
JER 2:22 Ani howa tínaga ko para karu sobo hongoheme wayawaya bo waharimiyaguabi doma nabulebira. I̱na tínaga ko birimidaruni doma nabi wiaabo kane hendedo.
JER 2:23 Tígua i̱hondo, Ina mana ko uruni nabi gime wabini mini Balahondo bi pupu nawi harima, lalu labe nahe kami. Isaraelealiru-o mana ko unu dindi ulini biagoha howa bialu harimigo manda bilimu. Nogo kamele angibunime egene bu howa wangabe taya bima dindi ngaru bibahendeha piai hagadagua bialu harimi.
JER 2:24 Nogo dongi gabua angibunime dindi ko wali agali nahaga ngagoha ibaga bialu nogo dongi gabua wangabe agoha haruabe hondole ngayaga bima piaga. Nogo urunime egene bu howa wangabe taya bima pole biragola mo dariba halu tinaga hame ngago mo batara habehebi mbira ai kabe. Ani pialu karia nogo uruni ale wangabe karume ti taya bulene erekui nabi abale lola halu handaga.
JER 2:25 Anigo Isaraelealiru tí dama tara tara karu talima polene nawi. Uruni bialu kamiria tínaga ge tandaga bialu iba noa howa kembobe lebola holani handalimu. Ani anigo tígua lalu, Bi uruni hale nahole ina dama uruniore hamelo kamago ti yu wanaholeberema laga kami, lalu Anduane Homogohanda laya lalu Yaremaiahanda lene.
JER 2:26 Anduane Homogohanda laabo halu lalu, Agali page biaga kago handa walia halu minu yania hayagua agali ogoni ibu taga timbuni hagadagua dege Isaraele tí taga timbuniore holeberemi. Tínaga kini karubi agali haguane karubi loma binigo mo miaga karubi Ngode Datagaliwabenaga bi mana latagi haga karubi tí bibahende wali agali heba taga timbuni holeberemi.
JER 2:27 Tí taga ogoni holeberemigo irane tígua ogodagua lalu, Ira bu karuni ina aba ka, lalu, Ege to̱le̱ ngarume ina hono wiaga, laramili. Tígua ani bialu howa i̱ni kogoha dai nabi i̱ erembira ngialu pu wahaga kami. Ani howa dege genda mbira tíha tagira ibirangi tígua, Anduane-o ina biamogo bule íbu, lalu haga kami.
JER 2:28 Anigo ai Yuda tínime dama mitangi bialu gime wabinirume tí biamogo bilonaga tano bibahendeha wu karulape wirimiruni agoha kabe. Mbirale uruni ti karulape heagua nde wali agali tíha genda anda ibirangi tigua tí biamogo bulebira ndobe, laya.
JER 2:29 Ani lowa lalu, Tí bibahendeoreme i̱hondo mine harimigo howa dege lone aginaga i̱na tí yu wahaya laramibe.
JER 2:30 Tí mo tiga bulenaga i̱na tínaga waneiginiru mana lalu minu barugo o barudaruni lini nade bame bu wahole birudane hendedo. Uruni bialu kogo holiya tígua i̱naga bi mana latagi haga agali hearu budi gabua ale timbuni mini laionome nogo karu bo nagadagua agali uruni homelo bo wahaga kami.
JER 2:31 Isaraeleali áyu kamirume tí hale mia howa Anduane Homogo i̱ninaga bi larogo hale hadaba. Tígua mandabu handalu kamiria i̱ daga nalene dindi ko lebolahe mbirale anda nahaga wiraligo ale kabe toba kamibe be dindi ko aruma ale kabe toba kamibe. Ani ndoyagua irane aginaga i̱naga wali agali bu kamiru tígua lalu, Inane hameledemaruha pugupugu buleberema. Í̠ni kegoha dai nabuleberema, laga kamibe.
JER 2:32 Ai tígua manda bialu kamiria wandari bedarume agali pole howa yári tara bialu piyago embeda holebirabe. Ani nabulebira ndobe. Anigo i̱naga wali agali kamiru horo dewa daga labenahe tígua i̱ embeda ho waharimigoni ndobe.
JER 2:33 Isaraelealiru tíore wali agali kayu yulenehayagi manda timbuni bolanguahe kamigoni. Ani kamigo howa tínaga mini bogaru agali kayu yama ibaga biaga wali bedarunaga manda bogala bidago bolanguahe kamigoni. Ani howa tígua maru karubi mana ko ogoni biawai holeberemida.
JER 2:34 Agali yagibano hearume tínaga andagaha howa tomo dabudabubi mbira kayu nabiore bame agibelo hearu homelo bo waharimigoni. Uruninaga darama tínaga agani wai kagoni ndobe. Ai tígua mana ko urunidagua bialu kamigo
JER 2:35 howa dege lalu, Ina ko nabi kamago Anduane Homogo-o inahondo keba holene irane nawi, laga kamigoni. Ani lalu kamigo ai hale hadaba. Bi ogonidagua laramigo henene ndo lalu kami. Ani lalu kamigonaga i̱na tí manani helowa dabolebero.
JER 2:36 Hameigini tara marume mana birago talima pialu howa dege abaleore beregedalu mana mendego bia aribia haga kamigoni. Asirialirume tí biamogo nabiyagola taga harimigodagua ai Iyibialirume tí biamogo bule naibiragola taga timbuni holeberemi.
JER 2:37 Tígua Iyibialiruhondo genda timbuni howa taga timbuni holeberemi. Tígua, Agali urunime ina biamogo bulebiraore, lalu mini dunubiaho harimiru Anduane Homogo i̱nime ti erembira midogonigo ai tigua tí biamogo nabuleorebira, laya lene.
JER 3:1 Anduane Homogohanda lalu, Agali mbirame ibu one waharagola wali biago ibugua agalini wahalu puwa ibu agali mendela piyagua agali pigane dabu bini biago ibugua ibu one wahayago lone haru dai bulene nawi. Ibugua wali ogoni ale haru dai biyagua i̱naga deni ibunaga dindi mo dodohe ngelalu mo ngubia holebira. Isaraelealiru-o tígua agali tara dewali baba kayu yu palima ibaga bialu harimigo ai i̱ni koria dai beremibe.
JER 3:2 Hari nene amu ngaruha handa amu nana bidaba. Hari nene uruni aria mbiragoria tí puwa kayu nabini mbira ngabe. Arebialirume dindi ko wali agali nahaga ngagoria bira do howa wali agalinaga mbirale yalu poraru mo page bule yu biragadagua tígua hariga teneni tínaga nenegeru ibilo hondo biraga kamigoni. Tígua mana ko bialu harimigomebi kayu yalu harimigomebi i̱naga deni tínaga dindi mo ko halu mebia harimigoni ndobe.
JER 3:3 Tígua mana ogonibi bialu kamigonaga dindi ogoria iba dalu naibilonaga i̱na yaniaho kogoni ndobe. Anigo tígua taga emeneorebi mbira nahe howa bayanda walime mine halu agali kayu yama ibaga biagadagua bialu kamigoni.
JER 3:4 Ani kamigo howa ai áyu tígua i̱hondo agua larami, Anduane Homogo í̠ inanaga aba howa ina waneigini emene hemangi ina gubalini ho haabo harigo áyu kegoni, lalu kami.
JER 3:5 Ani lalu, Í̠na inahondo keba ho haabo holeberebe. Í̠naga lembo holene ereba nahe wiaabo holebirabe, laga bialu kamigoni. Ani anigo Isaraelealiru-o tínaga bu miniha hamelo henego damene bibahende mana ko bialu harimigoha biba harimigoni ndobe, lene.
JER 3:6 Yaremaia ibugua lalu, Ai Yosaia ibu kini heangi Anduane Homogohanda i̱hondo langialu lalu, Isaraele wali agali minehe o karunime mana ko bialu hearuni de handaribe be nahende dege kebe. Tigua i̱ yu wahalu puwa hari nene ngaru bibahendehabi ira timbuni yuni gumbile hearu andanehabi pialu agali kayu yalu haya.
JER 3:7 Ainde Isaraele ibu mine halu mana ko uruni biai halu mani i̱ni koria dai bulubada lo manda bu haru. Ani manda bu hewariabi dai nabiya. Ani biyagola ibu hagibuni minehe Yuda ibuguabi Isaraelehanda biyago ale dege biya.
JER 3:8 Ai Isaraele ibugua i̱ni yu wahalu puwa agali mendela kayu yama ibaga bialu hearia i̱na wali waholene beba mbira gili buwa ibu mialu ibu pelo yupe halu pu laru. Ainde ibu hagibuni Yuda ibu mbirale o birudagoni de handayagoyu ibu gi habehego nahe dege ka. Ai áyu Yuda ibu nde ibaga bialu agali kayu yalu bedane hondo ko.
JER 3:9 Wali agali kayu yulene ogoni taga nabi bameda lowa ibugua ira ege to̱le̱ruhondo bi pupu wialu ka. Mana ogoni bialu kagoni ibugua agali kayu yagadagua yaragoni ndobe. Ani biragome i̱naga deni ibugua dindi ogo mebia haragoni.
JER 3:10 Yuda i̱ni yu wahalu puwa ibugua mana ko uruni bialu henego ai mini beregeda nabi ka. I̱ Anduane Homogo i̱na bi o ledogoniore, lalu langiya.
JER 3:11 Anduane Homogohanda i̱hondo laabo halu lalu, Isaraele Yudala libu agalini wahalu pene bayanda wali beda. Anigo Isaraele ibugua ko bini ngaru nira dege lowa Yuda ibugua bia ko hene ngago timbuniore nga.
JER 3:12 Anidagua bini ngago ai Yaremaia í̠na ga̱ lalu uyurayagi ola uyu habe. Ani olowa Anduane Homogo i̱ninaga bi ogodagua labe. Isaraelealiru-o tígua i̱ yu wahalu pirimigo ai i̱ni koria daibulene nga. I̱ Anduane Homogo i̱nimeore larogo i̱na tíhondo keba naholego i̱ni koria dai bidaba. Ani larogoni irane i̱ wali agali dara holene irane nawini dara haabo haga kogo howa i̱naga keba holene wiaabo naholebira.
JER 3:13 Isaraelealiru tígua i̱hondo tigatiga langialu ogodagua lalimu. Iname kagua dewaore birima. Anduane Homogo inanaga Ngode Datagaliwabe í̠hondo doga halu puwa ira timbuni hearu bibahende teneha pialu mbirale dama mitangi bialu bi pupu wule gime wabini wiaruha puwa mana ko biaga wiaru bialu howa í̠naga bi mo waharima, lapani halu tigatiga lolene nga. I̱ Anduane Homogo i̱na bi o ledogoniore, lene.
JER 3:14 I̱ Anduane Homogo i̱nime larogo wali agali i̱ yu wahalu pirimiruni tí i̱naga wali agaliore hene kamigo mitangi bialu i̱ni koria dai bilimu. I̱na tano mbiragoha howa wali agali mbira mbira haru halu hameigini mbiragoha howa wali agali kira kira haru ha bialu i̱ninaga Hari Saiono kagoria haru daibu helolebero.
JER 3:15 Ani helowa agali bayale i̱ninaga bi mana lo ngogo talialu biaga karu tigua haru haga helo dabo helaga bulebero. Uruni tigua manda bayale buwabi mini gigabiwi howabi tí baya hangu haru holebira.
JER 3:16 Ani bulebirago ai Anduane Homogo i̱na larogo mani tíninaga dindini howa wali agali dewaore palia dame buleberemi. Ani bu howa tígua Anduane Homogo i̱naga Habo Nalolene Bi lo winigonaga Mbogoyi biago lalu bi mbira naloleberemi. Tígua Mbogoyi ogoni mbira mitangi bule ndo wahalu ogoni agua biyadabe lalubi bi naloleberemi. Tígua gahenge wabu aribiabi naholeberemi dege.
JER 3:17 Horo ogoningi wali agalime Yarusaleme mini, Anduane Homogo ibunaga biraga dagia nga, lolebira. Ani laragola wali agali hameigini dindi tara tarani karume Yarusalemeni ngoai halu i̱ mitangi bialu lotu lolebira. Ani bialu howa tigua mini giambe hayago wahai halu tininaga miniha mana ko bulene ngelo henerubi wahai holebira.
JER 3:18 Horo ogoningi Yudalirubi Isaraelealirubi mandagi biamaga halu dindi uyurayagi áyu tini kagoria howa daibulebira. Dai bialu tinaga dindi bamba i̱na tinaga mamaliruhondo tininaga dindiore ogoni wiaabo helo mirugoria daibu holebira lalu Anduane Homogohanda laya, lene.
JER 3:19 Anduane Homogohanda laabo halu lalu, Isaraeleru-o i̱na tí i̱naga waneiginiore halimulo hame lowa dindi bayaleore mbira dindi tara ngarubi ndo ngirugoni. Ani birugonaga tígua i̱ yu wahalu pu nabi i̱ aba-o laga bima i̱ni talima ibalu haabo halimulo hamelo haru.
JER 3:20 Ainde ogonidagua nabi howa wali dabu binime ibu agalini helo wahalu piagadagua tígua i̱ wahalu pirimigonaga laro. I̱ Anduane Homogo i̱na bi o ledogoniore, lene.
JER 3:21 Dugu timbuni mbira hari nene uyu ngaruha howa biarua. Isaraele wali agalirume Anduane Homogohondo ti biamogo bia lalu dugu hongo howa bialu harua. Tigua Anduane Homogo tinaga Ngode Datagaliwabe mo embeda howa yu wahalu puwa mana koru hangu bialu henego ai ti dara halu biamogo bia lowa dugu biarua.
JER 3:22 Anduane Homogo ibugua lalu, I̱ waneigini mine hagaru-o ina baya hangu hami̱ya tínaga mana ko liahe ngelo harimidaruni mo tiga buliya i̱ni koria dai bidaba laya, lalu Yaremaiahanda lene. Ani lowa lalu, Anduane Homogo ibugua ani layagola wali agali tigua ladai bialu lalu, Anduane Homogo-o í̠ inanaga Ngode Datagaliwabeore kegodago áyu ina í̠ni keria dai beramagoni.
JER 3:23 Iname hari nene wiaruha puwa damahondo bi pupu wialu wali agali kayu yu palima ibaga bialu harimarunime inane biamogo nabini. Anduane Homogo inanaga Ngode Datagaliwabe í̠na hangu ina biamogo bialu haru dai beregoni.
JER 3:24 Anigo iname dama mitangi bialu gime wabini mbirale tagabi mini Bala wiagohondo bi pupu wialu harima. Ani bialu harimadagoha howa inanaga nogo bulumaga sibirubi inanaga waneiginirubi inanaga mbirale bayale damene ina mamalime biabe ndelahe bialu ilu wigi bini ngelo henerubi Balahondo lomabu mialu biba haiore harima. Ina wandari igiri daliahe hemangi howa bialu henego áyu bialu haabo kamagoni.
JER 3:25 Anduane Homogo inanaga Ngode Datagaliwabe-o inamebi inanaga mamalimebi bambaore wandari igiri daliaheni howa í̠hondo mana ko dege bialu haabo henego kamagoni. Iname í̠naga bi mo wahalu harimagonaga taga timbuniore halu wanakui dindiha handa daliho habeheore kama, lalu Isaraele wali agalirume bi ogoni lene.
JER 4:1 Anduane Homogohanda lalu, Isaraele wali agaliru tí dai bulene nga manda birimiyagua nde i̱ninaga andaneha hole dai bilimu. Mbirale dama mitangi bialu bi pupu wiaga ko ngubi i̱naga deni ngelo kamigoni mo wahalu i̱ni talima ibalu haabo halimu.
JER 4:2 Ani buwa tígua i̱ Anduane Homogo haluhe kogonaga minini howa bi mbira heneneore larama lowa lo wirimiyagua nde ogoni mana henenebi bayalebi tigabibi ngadagua talialu bule lalu lalimu. Tígua anidagua birimiyagua hameigini dindi tara tarani bu karume i̱hondo lalu, Ina mo bayale halu biamogo bia, lowa i̱naga mini yaraga holebira, lene.
JER 4:3 Anduane Homogohanda wali agali Yuda dindiha hearubi Yarusalemeha hearubi lamialu lalu, Tí i̱ni koria dai bialu agalime dindi alialu mabu gahengeha tomo bayaleru hangagadagua tígua mana ko bialu haga ngamigo wahalu mini tigabi bayale wia aribia halu bialu halimu. Tomo bayale ogoni mbirale anihe bu karu heba hangamaga holamini nahalimu. Yuda wali agalibi Yarusaleme wali agalibi tígua mini ko ala tawe ngemiru wahai halu i̱ninaga wali agali heneneore hole tíni lomabu halimu. Tí anidagua nabi harimiyagua i̱na tígua mana ko bialu kamigonaga keba timbuni howa tíha pani nolene timbuni ibilolebero. I̱naga miniha keba holene ira hungu ale biragola mbiralime mo hundia habe nahe wulebira, laya lene.
JER 4:5 I̱na Yuda dindihabi Yarusaleme tanohabi bi latagi holiya Anduane Homogohanda i̱hondo bi langiya. Ibugua lalu, Tí dindi bibahendeha mbelo biguliru pu laga laga bima pilimu. Bi dalimuore ladaga halu lalu, Tí bibahendeore íbu ngoai halu tano wai pabe hongohe ngaruha ha do hai hole pudaba, labe.
JER 4:6 Wali agali bibahendeore Saiono piai helonaga mo walia halu pelagi yaraga ho hadaba. Tí bame handayaho holene nawiorego bibahende abale ibida pialu ha do hole pudaba. I̱na waitigi dindi abene uyurahayagi karu ti dindi wahalu tí baba wai bilimulo ibilarogoni. Tigua ibalu tí mo ko howa bo hilo wahai helo ibilarogonigo tí ha do hai halimu.
JER 4:7 Laiono gabua ha do haga ngagoha howa tagira ibiralidagua tínaga waitigi tini dalu wahalu ibilarogoni. Tigua hameigini dindi tara tara wali agalibi dindi wiarubi mo ko hai halu bo haealabagabu wahai haga kago tí baba nde ani dege bule ibiragoni. Tigua ibalu tínaga tano ngaruni bo gialabagabu wahai haragola wali agali lenego mbira naholebira. I̱ Anduane Homogo i̱na bi o ledogoniore, laya lene.
JER 4:8 Anidagua bulebiragonaga tígua dara ho howa walia halu aga karulaga ngago mo karulo howa dara halu dugu bialu halimu. Anduane Homogohanda ina baba miniha keba timbuniore ho kago wa naholebirago ani bilimu labe, laya.
JER 4:9 Anduane Homogohanda lalu, Mbirale ogoni birangi kini karu heba agali haguane karubi gi hai halu loma binigo mo miaga karubi bi mana latagi haga agali karubi ti bibahendeore mogolo hai holebira, laya.
JER 4:10 Ani layagola i̱na lalu, Anduane Homogo Bibahende Haru Haame Ho Haga-o í̠nime ina Yarusaleme wali agali kamaru bayale holeberemi lalu larigo ina mo hondo harida. Áyu waitigime ibalu ina bibahende bo wahai holobada, lalu laru.
JER 4:11 Waitigiru ibulebiragonaga Anduane Homogohanda Yuda wali agalirubi Yarusaleme wali agalirubi tihondo bi ogodagua lene. Puyabu poboyogobiore dindi ko dalu naibaga wali agalibi nahaga ngagoha howa ibalu i̱naga wali agali bu karuha anda ibulebira. Anigo puyabu ogonime widi lini ngelalu yuni aeaneru hangu puloyu piagadagua ko ngago hangu pulo wahole ndo ibulebira.
JER 4:12 Puyabu ogoni hongoheore ibalu bibahende mo ko haiore hole ibulebira. I̱na puyabu ogoni ibiloleberogo irane i̱nime wali agali uruni manani howa mo talebuki bialu ti pani nelo mulenaga ani ibilolebero, lalu laya.
JER 4:13 Anigo i̱ Yaremaia i̱na wali agali bu hearuhondo lamialu lalu, De handadaba. Waitigiru arumahe ginu hagua mindibi mberane ale ibiragoni. Ami agalirunaga karisi puyabu hongohe humbirini wai ale ibalu ami agalinaga nogo hosiru gerai gibi ega bodo hariawe yagaloyu ibagadagua ndo gibiore ibiragoni. Ani birago mo ko holene anda ibiragonaga i̱ daraore ho kogoni.
JER 4:14 Yarusaleme wali agaliru-o tínaga miniha ko bulene dege mitangibu kamiruni angi waholeberemibe. Anduane Homogohanda tí pele ngialu haru dai bilo tígua mana ko bialu harimigo wahai halu ibunaga deni tíha ko mbira para nahe bayale halimu.
JER 4:15 Dana hameigininaga tano wiagoha howabi Eberaimi hameigininaga dindi barebare wiaruha howabi agali marume mo ko holene horo tagira ibirago lalu bi yalu ibiragoni.
JER 4:16 Anduane Homogohanda agali urunihondo lamialu lalu, Tígua wali agali dindi tara taraha bu karubi Yarusalemeha karubi lamialu, Tínaga waitigime tí baba wai bule abale anda ibiragoni lalu lamilimu, lene. Tigua anda ibuwa Yuda dindiha tano wima pedagoria ibalu wai huaro lalu wali agali bu karuhondo bi hongo howa lalu holebira.
JER 4:17 Anidagua bulebirago irane Yarusaleme wali agali tígua i̱ Anduane Homogo kogohondo erembira ngialu harimigonaga waitigi uruni tigua mabu anduaneme pabe bu yaanda hagadagua Yarusaleme ho hagira bulebira. I̱ Anduane Homogo i̱na bi o ledogoniore.
JER 4:18 Tígua mana ko hangu biaabo halu hariga ko wiagoria pialu haabo harimigome tíniha genda timbuni ogoni anda ibulebira. Tínime ko timbuni bu kamigome tínaga gubalini nogoba henego genda yu howa tandaga timbuni nalu holeberemi, lene.
JER 4:19 I̱naga bu miniha mo koore ka. Tandaga timbuni ogoni i̱na yabe naheoreda. Ogonime i̱ bopeore halu i̱naga miniha mo ko timbuni ka. Ami agalirume mbelo biguli pulalu wai huaro laga laga biaruane hale kogodago i̱na bi nale ne hariga ndibulo naholebero.
JER 4:20 Tigua wali agalibi dindibi bibahende mo ko hai halu bo haealabaga biai hayagola mo ko hai henego nga. Abale ibalu tigua inanaga balai anda bu kamaruni bo gialo wahai haragoni ndobe.
JER 4:21 Waitigi bu karuni wai wahalu tini dalu angiore dai bulubadabe. Biguli pulalu wainaga pelagi yaragaho yalu pialu angiore waholobadabe.
JER 4:22 Anduane Homogohanda lalu, I̱naga wali agaliru ti boga nabi mini bayale mbira nawiore kagoni ndobe. Tigua i̱ manda nabiore kagoni. Ti mini nawi waneigini ale lulu anda ibagabu hagagobi ka. Tigua mana ko bulenenaga hangu manda bolanguahe wu howa mana bayale bulenego manda nabi ka, lalu Anduane Homogohanda laya, lene.
JER 4:23 I̱ Yaremaia i̱na handalu hewaria dindi ogo mo ko hene tara mbira wiaria de handaru. Hari daligaha handa daga halu hewaria wá mbira naheore wiaria handaru.
JER 4:24 Dindi hari timbuni wiaru de handalu hewaria uruni ema bigibigi bialu bare emene emene wiarubi ula amunana bialu hearia de handaru.
JER 4:25 I̱na de handa amu nana bialu hewaria wali agali mbira ona hearia nahende. Egarubi yagalalu piai hayiya.
JER 4:26 Ala dindi bene bere bayale winiyaru ai dindi ko be abalu tauladagahe wiaria handaru. Dindi ogoninaga tano wiarubi bo gialabaga biai ho winiya. Anduane Homogo ibugua keba timbuni ho hayagome mbirale uruni tagira ibilayiya.
JER 4:27 Anduane Homogohanda lalu, Dindi ogo bibahendeore mo ko hene mbirale nahe bameore wulebiragoyu i̱na mo ko haiore nde naholebero, lene.
JER 4:28 Irane ogoninaga dindime dara howa kiabu dugu bialu hari ibu nde mindibi arumahe wulebira. Anduane Homogo ibugua ibunaga miniha mbirale uruni buleore lo mitangibu henego bulebiraore. Lo beregedalu wanahe biaore bulebira.
JER 4:29 I̱ Yaremaia i̱na de gandeba handa dege bialu hewaria ami agali dewaore nogo hosirunaga biralubi maru danda timuru yalubi ibaruagoni hale howa wali agali bibahendeoreme tinaga tanoru yu wahalu ibida piai haragoni. Maru ti irabuha ha do hole pialu maru ti hari bare wiaruha ha do hole poragoni. Tano bibahendeha wali agali lenego mbira nahe dindi hangu wiaria handaru.
JER 4:30 Yarusaleme-o í̠ mo ko heneore wuwa agua buleberebe. Í̠ni aga daramabi bayaleru mo karulo kego aginagabe. Gurubu gele ale ngolome wabini bayale tara ngarume í̠ni mo yáribia howa í̠naga deni hare ambuaru birigo agi bulebe. Yári urunialeme í̠ mo wia nabulebira. Í̠naga lawini í̠ kayu yaga biarume í̠ handabe manga howa í̠ bo wahole kagodago í̠ yári damene nabibe laro.
JER 4:31 Walime waneigini gali taba honole howa dugu bialu yi laruane hale ko. Waneigini gali pigane taba hanalu howa tandaga timbuni handalu biraruabe tobaneda. Dugu o biaruago Saiono tanome bialu harua. Ibugua gi dogolo howa ga̱ timbuni lalu, I̱ha mo ko holene íbu ngagonaga dara timbuni ho kogoni. Waitigi bu karume i̱ bo wahole ibirago ainde homole kogonida, layuane hale haru, lene.
JER 5:1 Anduane Homogohanda lalu, Yarusaleme wali agaliru-o tanoha hariga pedadaguabi wali agali ngoaiho haga hama ngaruhabi baya hanguore taya bima pugu pugu bidaba. Tígua wali agali mbiraoreli ibu mana bayale tigabi ngadagua biagabi mana henene ngago hongo howa biagabi mbira kane handa walia harimiyagua nde i̱ Anduane Homogo i̱na Yarusaleme wali agali tígua mana ko bialu harimiruni domo wahai holebero.
JER 5:2 Tígua bi mbira heneneore bule lalu, Anduane Homogo haluhe kagonaga minini howa iname heneneore buleberema, lalu lo wirimigo bi hangu lalu wahalu piaga kami, laya.
JER 5:3 Anduane Homogo-o í̠na wali agali bibahendeme mana bayale heneneore ngaru taluwa bialu helo hamelo ke. Wali agali uruni í̠na minu ba barigoyu tigua tandaga howa nahe tingi halu ka. Í̠nime ti bope harigoyu tigua tinaga mana mo tiga bulene hame nale dege ka. Tinaga embone giambe ege to̱le̱ ale halu tigua mini beregedolene hame naleore kagoni.
JER 5:4 Ani bialu kago ainde i̱ni mandabu handalu koria, Ti habane nabulene manda bayalebi mbira nabi dege ko bame kagonida Anduane Homogonaga mana bayale manda nabi howa Ngode Datagaliwabehanda tigua talialu bialu helo hamelo kago damene bibahende tini manda nabi dege ka, lo mitangi biru.
JER 5:5 Ani mitangi buwa, I̱na agali haguane karu hondo pialu ti baba bi lolebero. Tigua Anduane Homogonaga bi mana bayale bialu holenebi Ngode Datagaliwabehanda tigua talialu bialu helo hame ledagobi tiore manda biai haga ka, lo mitangi birugoni. Anigo i̱na ti hearia pu howa agali haguane uruni tihondo hale harugola tiguabi Anduane Homogonaga bi mo wahalu ibunaga hame leago talialu bia nabi mo waharaya.
JER 5:6 Anidagua biyagonaga gabua timbuni budi ale mini laiono bu karume irabu timbuni ngagoha howa tagira ibalu agali uruni bai holebira. Biango dudu karume dindi ko yobi ngagoha howa ibalu ti bo wahai holebira. Ani bialu wali agali uruni mbirago Yuda tanoha howa tagira pialu karia gabua timbuni budi ale mini lebadi karume ibalu bo lerelo yu ibagabu ngelolebira. Urunidagua bulebirago irane tigua ko dewaore bialu Anduane Homogo erembira mialu haabo hayagonaga genda uruni ibulebira.
JER 5:7 Anduane Homogohanda Yarusalemehondo ogodagua leda, I̱naga wali agali bu karume i̱nihondo erembira ngialu puwa mbirale dama mitangi bialu gime wabini wiaruhondo bi pupu wima piyagonaga ko ogoni i̱na nadomolebero. Tigua bi mbira lalu howa gime wabini bi pupu wiaga uruninaga minini howa henene laro laga biya. I̱na wali agali urunihondo tomo nalu helo dewaore mialu harugo helalu agalime ti one bedago berelalu bayanda wali taya bima poradagua bialu haya.
JER 5:8 Agali uruninaga mini agali mendeali one bedagoha pialu nogo hosi wangabeme hosi angibuni kago taya biagadagua bialu haga ka.
JER 5:9 Anduane Homogo i̱ kogo i̱na tigatigaore larogo wali agali urunime mana ko bialu kagonaga pani nelo i̱na muleore ngo ndobe. Yuda hameigini uruni tigua ko biyarunaga i̱na tihondo biadaiore bule ngo.
JER 5:10 Isaraele wali agalirunaga waitigi kamiru-o tígua Isaraele wali agalinaga gerebi mabu mo ko hole ibidaba. Ibalu dugu wahai hole ndo. Gerebi ginigeneru i̱naga ndogo uruni hangu dando wahalimu.
JER 5:11 Isaraele wali agalibi Yuda wali agalibi tigua i̱ni erembira ngialu piya. I̱ Anduane Homogo i̱na bi o ledogoniore, laya lene.
JER 5:12 Isaraele wali agalime ke̱ howa Anduane Homogo talima pole tingi howa lalu, Anduane Homogohanda mbirale mbira nabulebira. Ibugua mo ko holeneru ina kamagoria naibilolebira. Waitigirume ibalu ina mo ko naholebira. Ani bialu i̱na daluha hina garibi naibilolebira, lalu ka.
JER 5:13 Anduane Homogonaga bi latagi haga agali bu karume ogoale bulebira lalu latagi hararu puyabu ale pularadagua bi bame dege lalu ka. Bi uruni Anduane Homogohanda labe lene ndo bame lalu ka. Anidagua laragome mo ko holene tiniha wulebira, lalu tigua ani laga ka.
JER 5:14 Tígua bi urunidagua laga kamigo ai Anduane Homogo Hongo Haiheore kagonaga bi ogo hale hadaba. Ibugua i̱hondo langialu lalu, Yaremaia-o wali agali urunime bi ogoni layago hale howa í̠na bi mbira latagi habelo áyu langerogoni ira hungu ale holebira. Ani bialu wali agali uruni ti ira gabuni ale ngagola ira hungu ogonime do waholebira, lalu langiya.
JER 5:15 Anduane Homogohanda lalu, Isaraele wali agaliru-o i̱na tíhondo bi ogodagua laro. I̱na agali hameigini tara mbira dindi kaundiaha howa tí baba wai bilimulo ibilolebero. Hameigini uruni ti hongoheore mbira howa tini dindini haabo hene ka. Tígua hameigini tara uruninaga bi lagago manda nabi kamigome hale naholeberemi.
JER 5:16 Hameigini ogoninaga ami agali bu karu ti wai biaga hongohe howa tigua danda timume wai bialu agali homelo ba debe haga ka.
JER 5:17 Tigua ibalu tínaga mabuha tomo hengedemirubi anda tamuha bu wini ngamirubi nai holebira. Ani bialu tínaga waneiginibi bo hilo wahai halu tínaga nogo bulumaga sibi bu karubi bibahende bo wahaiore holebira. Ani bialu tí mabuha gerebi irane bu karubi poge irane bu karubi bibahendeore dibu wahai holebira. Tínime mitangi bialu wai pabe hongohe tínaga tano buyu mabubi ngamigoha howa tí bayale holeberemabe tobaho harimigoyu waitigi agali urunime ibalu wai buwa tano uruni bo gialo wahai holebiraore, lalu laya.
JER 5:18 Anigo Anduane Homogohanda i̱hondo bi lone lalu, Waitigi uruni ibirangi Isaraele wali agali tí bo biba nahelolebero.
JER 5:19 Mani i̱naga wali agali holebiraru tigua í̠hondo hale halu lalu, Yaremaia-o inanaga Anduane Homogo kagome inahondo mana ogonidagua biyago irane aginaga biyabe, lolebira. Ani laragola í̠na i̱naga bi ogo tihondo lamibe. Tígua i̱ni hewago erembira ngialu puwa tíni daluni howa wali agali hameigini tara bu hearunaga dama mitangi bialu mbirale gime wabini wiaruhondo bi pupu wialu harimi. Anidagua birimigonaga ai tí dindi taraha pu howa wali agali hameigini tara bu karu ti andaneha hama poleberemi, laya lalu Yaremaiahanda lene.
JER 5:20 Anduane Homogohanda lalu, Bi ogo Yagabanaga aguaneneru Yuda dindiha bu karuhondo lamibe.
JER 5:21 Wali agali tíore mini mandabi bayale nawiore kami. Tí dehe kamigo howa mbirale ngaru bayuwa handa nabiaga kami. Tí halehe kamigo howa bi bayuwa hale nahaga kami. Ani kamigo i̱na bi larogo bayuwa hale halimu.
JER 5:22 I̱ Anduane Homogoore kogonigo tígua i̱hondo gi howa mogo lalu i̱ andaneha nahe kamigo agibe. I̱na iba solowaranaga pabe dindi iba angeni ngarume bidogola biraabo haga nga. Iba solowara yaribu timbuniore bialu kulu nduga laga biyaguabi iba bedago birairi haga ngagoria bolangua naholebira.
JER 5:23 Anigo tí wali agali tarale mbira kamiria hendedogoni. Tígua tínaga mini ndibulo wahene kamigome i̱hondo doga tara halu kami. Ani buwa tígua i̱hondo erembira ngialu piai harimigoni ndobe.
JER 5:24 Tínaga mabuha tomo hangalu kamigo anda helo i̱na iba dalu ibilarugobi nalimulo mo boga bia harugobi manda nabi dege harimida. I̱na mali bibahendengi ani biaabo haruligonaga tígua nde Anduane Homogo tínaga Ngode Datagaliwabe kogo gi howa i̱ andaneha hami̱ya nalarimida.
JER 5:25 Anigo tígua mana ko tara tara bialu harimigome i̱na mbirale bayale tínaga bia haga wirugo hangai hene ndobe.
JER 5:26 I̱naga wali agali karu aria maru ti mana ko biaga ka. Agalime ega gono wia howa delo handayaho hagadagua ko biaga urunime wali agali bu karu mo ko holenaga deme mamage ho haga ka.
JER 5:27 Ko biaga uruni tigua mana ko bule ohowa mo hondo halu agalime ega dewa gonoha do ngagola hadowa nuha hono to̱lagadagua mbirale dewa ngaru tini andagaha wu to̱lo haga. Tigua mana ko ogonidagua biragome tinaga muni mbiraleru dewawi homogo timbuni haga.
JER 5:28 Tigua ani bialu howa tomo dewa naabo haragome tombegene timbunihe ka. Mana ko bulene ngago gi nahe howa bia dege biaga ka. Agali uruni ale kagome waneigini ai̱ya abala homene hono wahene bu karu biamogo bulene ngadagua nabiaga ka. Ani bialu yagibano bu karubi genda yu kagola tigua biamogo nabiaga ka.
JER 5:29 I̱ Anduane Homogo kogome heneneore larogo mana ko uruni bialu karunaga pani nelo muleore berogoni. Wali agali urunime ko biyarunaga i̱na pani biadai bulebero ndobe.
JER 5:30 Ko mbira ale hiriribi mogole mbira dindi ogoria tagira ibiyada.
JER 5:31 Bi mana latagi haga karume bi latagi halu howa mbiwia harago Anduane Homogonaga bi ndo ke̱ halu tininaga bi dege laga ka. Loma binigo mo miaga karume wali agali haru kangi nde tiguabi bi mana latagi haga agali uruninaga bi larago dege talialu haga ka. Anidagua bialu kagola i̱naga wali agalirumebi nde mana ko ogoniore bayale lalu turu haga ka. Anigo i̱na tí pani emene ndo nalimulo mo ngerogola mana ko uruni ereba haiore holebira. Ani nalimulo ngerongi tígua agi buleberemibe, laya lene.
JER 6:1 Beniyamini hameigini bu kamiru tí homoligo Yarusaleme tano yu wahalu ibida piai halimu. Tí puwa Tegoa tano howa mbelo biguli pulalu dindi mende Bede Hagereme ngagoria howa wali agali bu karu ti ira hagua de handalu ibida pelonaga hagua delalimu. Anidagua bulene ngago irane mo ko holene gibiore dindi abene uyurahayagi howa ibulebirago tí bibahende ibida piai holenaga ani bilimu.
JER 6:2 Saiono tanoore wandari mabuage ale biruwa ibuni hameledagoha pupe halu haabo haga ngagoni. Anigo Anduane Homogohanda tano ogoni mo ko halu bo haealabaga bu wahai holebira.
JER 6:3 Waitiginaga kini karume ami agaliru heba wai bule Yarusaleme ibulebira. Tigua ibalu tano tagirahayagi balai anda bu palu howa tano ho hagirabu yaanda ho holebira. Ami agali uruni nogo sibi dewaore hagagobi íbu holebira.
JER 6:4 Ami agali haru hagane karume bi ogodagua lolebira, Ai wai mali̱ya manda manda bialu wai dagia bama. Horombe hanuniore Yarusaleme bo anda mali̱ya, lolebira. Ani lowa dege mani nde tigua lalu, Ainde manda manda nabi hemaore dege abale alendo halu ni paliragonida.
JER 6:5 Ai wahalu wai mbiraga anda puwa tinaga tano wai pabe hongohe bu heledaruni bo gialabagabu wahai hami̱ya, lolebira.
JER 6:6 Anduane Homogo Hongo Haiheore kago ibugua lalu, Ami agali kamiru tígua Yarusaleme kawareni irabu karuni dibu wi dindi dugu wima irigiha bialu wai pabe daligaore kago togo wialu ogoriani howa wai bilimu. Wali agali tano ogoniha bu karume tinaga damene bu hearu hengedape haga hene kago i̱na tano ogoniore bo haealabaga bialu mo ko hai holebero.
JER 6:7 Dindiha iba dugualu haabo hagadagua tano ogoniha mana ko biaabo haga ka. Wali agali bu karu tigua tanoha ngaru mo ko halubi wali agali karu bameore minu baragola ti darabiore dere bu ha warago bo wigi bidagoni.
JER 6:8 Yarusaleme í̠na bi hale holene nga. Bi hale nahariyagua nde i̱na í̠ heba mandagi nahe yu wahalu polebero. Ani bialu i̱na í̠ mo ko halu iba dalu naibile í̠ abalu tauladaga ho wiagagobi ngelodogola wali agali mbira í̠ni naholebira, lalu Anduane Homogohanda laya lene.
JER 6:9 Anduane Homogo Hongo Haiheore kago ibugua i̱hondo langialu lalu, Agalime pu mbira lini daga mini gerebi mabuha puwa gerebi lini dedago bibahende dai hagadagua Isaraele wali agali yu wahene kago lone bo hilo wahai holebira. Anidagua bulebirago í̠na ti kagoha Yarusaleme pialu agalime gerebi lini dalu maru yu wahene dedago ilama piagadagua wali agali maru yu wahene karuhondo bi ogo lone lamule pobe, laya.
JER 6:10 Ani layagola i̱na ibuhondo ladai bialu lalu, Anduane Homogo-o i̱na bi aihondo lamuliyadabe. I̱na bi larogo aiwa hale holobadabe. Ti wali agali Anduane Homogo manda nabi bu karubi dege howa í̠naga bi hale nahaga hale tuluho wahene ka. Í̠naga bi ogoni nagaloneda lo manda bialu tigua i̱ hondo oba haga ka.
JER 6:11 Anigo Anduane Homogo-o í̠naga miniha keba timbuni ira hungu biagadagua biragola kegoni. I̱habi nde anidagua dege biragola i̱naga miniha keba holene ogoni mo hundia habe naheore kogoni, laru. Ani larugola Anduane Homogohanda i̱hondo langialu lalu, I̱naga keba holene ogoni waneigini hariga teneni bu karuhondo walia halu wandari igiri daliahe bu karuhondobi walia haga bibe. Ani bialu agali karubi ti one bedarubi wali agali wahe karu yu wahole ndo ti bibahendeme i̱naga keba holene ogoni handa walia holebira.
JER 6:12 I̱na dindi ogoni mo ko hai helalu tinaga anda bu heledarubi ti one bedarubi dindi ngarubi bibahende agali dindi tara howa ibiraru ti karulo helolebero.
JER 6:13 Wali agali bibahendeme muni mbiraleru mo wulenaga mo hondo halu mana ko tara tara dewaore biaga ka. Agali damene karumebi agali haguane mini lene karumebi bibahendeme mana ogonidagua biai haga ka. Loma binigo mo miaga karubi Anduane Homogonaga bi mana latagi haga karubi tigua nde wali agalihondo ke̱ halu mo hondo haga ka.
JER 6:14 I̱na handalu hewaria i̱naga wali agali dere timbuniore ti̱wa ale bu kago hondowa loma binigo mo miaga karubi i̱naga bi mana latagi haga karubi tigua dere uruni huba bia nahe bameda lalu waho haga ka. Tigua wali agalihondo lamialu lalu, Ina bayale karulape kamago tígua miniha genda nahe halimu, laga. Anigo tigua bi ogoni henene ndo laga ka.
JER 6:15 Isaraele wali agali tigua mana ko ngubiore uruni bialu hayarunaga tagaho kabe. Ndo ti taga naheore ka. Tigua mana ko uruni biyarunaga taga holene manda nabiore ka. Anidagua bialu kagonaga i̱na ti pani nelo merogola wali agali dindi tarani bu hearu pani mirugola ko hai hayadagua dege tibi ko hai holebira. I̱ Anduane Homogo i̱na bi o ledogoniore, laya lalu Yaremaiahanda lene.
JER 6:16 Anduane Homogohanda ibunaga wali agaliruhondo lamialu lalu, Hariga hagebage ngagoria howa hariga tigabi tí polene agodabe handadaba. Ani hondowa hariga bayale abale tínaga mamalirume pialu hene ngagoria pilimu. Ogoriani pirimiyagua tíha genda tandagaru anda ibulene henge nawi howa tínaga miniha dungulo holeberemi, laya. Ani layagola Isaraeleali tigua ladai bialu lalu, Iname hariga ogoriani napoleberema, laya.
JER 6:17 Anduane Homogohanda lalu, Tí biamogo bialu haru bamba helonaga agali maru dabo heledogo ai waitigi mbira ibiyagua tigua mbelo biguli pu laruagola hale halimu, laya. Ani layagola tigua ladai bialu lalu, Iname agali haguane uruninaga bi hale naholeberema, laya.
JER 6:18 Ani layagola Anduane Homogo ibugua lalu, Wali agali dindi tara taraha kamiru i̱naga Isaraele wali agaliruhondo mana lalu minu bole ngogo tíhondo languliya hale hole íbu ngoai hadaba.
JER 6:19 Dindi o ngego í̠bi nde hale habe. I̱naga wali agali uruni tigua mana ko biyagonaga i̱na ti pani nelo muleberogo irane tigua i̱naga bi mo wahalu mana lo wiwago talialu bia nabiyagonaga ani bulebero.
JER 6:20 Tigua Seba dindiha puwa ira hagua ngabilo delaga mini inisenesiru yolo bialubi gambe ale tara mbira ira hagua ngabilo delaga dindi tara kaundia wiaruha howa yolobu puwabi uruni bibahende i̱naga deni howa lotu lalu i̱hondo ngiagago i̱na turu harulibe. Uruni nakarulape bame biaga. Tigua mbirale i̱naga loma buwa irani bo delai hayaguabi maru tara ale lomabu ngiyaguabi urunidagua biraru bibahende bame dege bulebira.
JER 6:21 Anduane Homogo i̱nimeore larogo mana urunibi biaga karu ti bibahende mo ko henego pilai holebira. Aba karu ti igini heba homai halu wali agali karu tinaga nenege karu heba homamaga holebira, laya, lalu Yaremaiahanda lene.
JER 6:22 Anduane Homogohanda lalu, Ami agali uyugohayagi howa ibule ka. Ti agali hongoheoreyago dindi kaundiahaore karu tigua áyu wai bule danda timu yandareru manda manda bialu ka.
JER 6:23 Tigua wali agali bibahende karu dara nahaga koore howa bibahende homelo bo hilo wahai hole turu haga ka. Tigua danda timuru yalu nogo hosini biralu gerai lalu ibiragola dindi kulu mbari lama ibiragoni. Tidu yalu wabuni ibuwa Yarusaleme í̠la wai bule íbu kagoni, laya.
JER 6:24 Ani layagola Yarusaleme wali agali tigua ladai bialu lalu, Uruni bulebiragonaga bi abale hale ho bolangua harimago ina gi timbuni howa duru lalu hongo nahe kamagoni. Ai mana ko iname bialu harimagonaga dara halu mini burugu lalu walime gali taba honolene tu haragola mini burugulo biragagobi kama.
JER 6:25 Inanaga waitigiru dindi gibuni gibuni ngaru bibahendeha ho mabubupe howa ina baba hangu wai biai hole lowa mo giha hole hayada. Ani biyadago ai mabuhabi hariga harigabi ina ibagabu habe nahe kama, lene.
JER 6:26 Ani layagola Anduane Homogohanda lalu, I̱naga wali agaliru-o tínime daraho kamigo walia halu aga biagane ngaru ale buwa be abalu ngagoria palu pendege lalimu. Ko birimirunaga dara howa kiabu dugu taraore waneigini mbiraore hangu henego homaragola aba ai̱yarume dugu biagadagua bialu halimu. Irane tínaga waitigi urunime abale ibuwa tí mo ko halu bo hilo waholebiragonaga ani bilimu, laya, lene.
JER 6:27 Anduane Homogohanda i̱hondo ogodagua laya. Yaremaia-o í̠ tano pabe hongohe ngaligobi kego. Ai í̠na i̱naga wali agali uruni agalime siliba henenedabe be tara aledabe hondole irani delagadagua ti í̠na ba handabelo helaro, laya.
JER 6:28 Ti wali agali mine halu doga haga howa bi hale nahaga ka. Ani howa wali agali tinaga nenege karubi mege bialu diburibu bi laga ka. Ti agali mbirale wabiaga karume ege to̱le̱ siliba irani delaragola aeane dudu ibira ibira biagagobi ka.
JER 6:29 Mbirale ira timbuni dedago pulaga ale ngagome pularagola ira hongoheore siliba delo deledagola dalu silibaha aeane emene para haga bidaru do taulope helonaga bialu karia anidagua dalu do taulope naharagola agali biabe biaga biago ibu biabe ndelahe ogoni bame bu wahaga ndobe. Manane ogonidagua dege i̱naga wali agaliru bayale helo mo tiga bialu wali agali ko biaga karu tale bialu bo batagi holene hariga nawidago.
JER 6:30 Anduane Homogo i̱nime ti erembira mirugola ti bibahende siliba ko hene ngaligobi dege hayada, laya, lalu Yaremaiahanda lene.
JER 7:1 Anduane Homogohanda Yaremaiahondo lalu,
JER 7:2 Í̠na i̱naga anda haraba ngogoria pu howa Yuda wali agali karuhondo ogodagua labe. Anduane Homogo mitangi bialu lotu lalimu laya, lole pu. Anduane Homogo i̱ninaga bi o lawia harogoni baya hangu hale kulu mia howa hale halimu, laya lalu lamibe. I̱naga bi ogodagua laro.
JER 7:3 I̱ Anduane Homogo Hongo Haiheore Isaraele wali agali tínaga Ngode Datagaliwabe í̠nime larogo. Tínaga dindi biagoria bayale halimulo heloliyago ai mana ko wiaru bialu kamiruni yu wahai halimu.
JER 7:4 Horo bibahendengi agali marume tíhondo langialu lalu, Anda ogo Anduane Homogonaga ka, laga biagago. Ai anda ogonime tí mo bayale holebira lo manda nabilimu. Tínime tíni dege dege mo hondo haga haga biaganego de hondo halimu.
JER 7:5 Tí mana ko bialu kamiruni wahalu tínaga damene karu baba baya hangu tigabi bulene ngadagua bialu halimu.
JER 7:6 Wali agali dindi tara taraha howa tí baba íbu hene karubi waneigini aba ai̱ya nahe hono wahene karubi wali dalo agalini homene bedarubi uruni warape nahe baya hangu hondo halimu. Tíninaga nenege tíni aria karume ko mbira nabi howa bame homelo bo wanahalimu. Dama manda bialu gime wabini ngaruhondo bi pupu nawilimu. Ani birimiyagua ko ogonime tí mo ko holebira.
JER 7:7 Tígua i̱naga bi laroruni baya hangu hale halu biai harimiyagua nde i̱na bamba tínaga mamaliruhondo tinaga dindi henene ogoniore wiaabobo bu wiaho ngelo mirugoria tí holeberemi.
JER 7:8 Ai hale hadaba. Tígua bi henene ndo ngaru mo dunubiaho haga kamigo bi urunime tí pele ngia nabulebira.
JER 7:9 Tígua page bialu wali agali homelo bo wahalu mendeali one baba kayu yalu wali ibubi nde agali mende baba kayu yalu biaga kamigoni. Ani buwa tígua habo nalolene bi lo wialu howabi ke̱ haga dege kami. Tígua dama mitangi bialu gime wabini Balahondo ira hagua ngabilo delaga mini inisenesiru lomabu delalu dama maru abale urunihondo bi pupu nawiaga harimiruni áyu urunihondo bi pupu wialu kamigoni.
JER 7:10 Mana urunidagua bialu howa tí i̱ mitangi bialu i̱nihondo lotu lalu halimulonaga anda helarugohabi nde anda íbu dege beramili. I̱ni kogoria kaware íbu howa tígua lalu, Ina bayale kama, lowa mani i̱naga anda yu wahalu puwa mana koorene ko ngubi ngaru bia timbu haga kamigo. Ai tígua mana ogonidagua bialu kamigoni bayaledabe.
JER 7:11 I̱naga anda ogoniha tígua i̱nihondo lotu lalimulo helarugo ai tígua manda bialu kamiria pageali ha do holene anda piagone bayale ogoniha harabe. Anduane Homogo i̱nime tigatigaore larogo tígua bialu kamiruni bibahendeore handalu handai ko, laya.
JER 7:12 Anduane Homogohanda laabo halu lalu, Ai Silo tano ogoniha puwa mbirale mbira birugo hondo pudaba. Bamba Silo ogoniha tígua i̱ mitangi bialu lotu lalu helo ngelarugo mani Isaraele wali agali tinaga mana ko bialu hemigo hondowa i̱na tano ogoni mo ko harugoni.
JER 7:13 Ani birugo bilowa áyubi tígua mana ko tara tara ngaru dege bialu kami. Mana ko uruni wahadaba lowa langialu haabo harugobi hale howa nahale hetingi ho kamigoni. I̱na tí olarugola tígua ladai nabi dege kamigoni.
JER 7:14 Heneneore mo ngoai howa i̱nihondo lotu lalu halimulonaga anda ogoni helarugo ai ogoni kagodago tí i̱na biamogo bulubabe toba harimida. Ani ndoyago Anduane Homogo i̱nime larogo i̱na Silo tano bamba bo gialo waharudagua anda ogoni bo gialo waholebero. Ani buwa tínaga dindi i̱na bamba tí mamaliruhondo mirugo lone mo ko holebero.
JER 7:15 Anidagua buwa tí damene Isaraele wali agaliru bo talia tagi harudagua tíbi nde anidagua bo talia tagi holebero. Ani bero handala tígua i̱ yu wahalu poramigola i̱na tinaga dengui lone nahondolebero. I̱ Anduane Homogo i̱na bi o ledogoniore, laya lene.
JER 7:16 Anduane Homogohanda lalu, Yaremaia-o i̱na í̠naga bi laregoni hale naholebero. Anigo i̱hondo tinaga bi lahalu biamogo bia lalu hongo howa lalu kegoni nalabe. I̱hondo bi hongo howa lalu dugu bialu lolenebi nawigo wahabe.
JER 7:17 Tigua Yuda dindini tano ngaruhabi Yarusalemeha hariga timbuni pedaruhabi bialu karuni í̠ de nahende dege kebe.
JER 7:18 Tigua biagago ogo. Waneiginirume ira bo yu ngoai haragola abaru tigua ira mo delaga. Ani deledagoria ai̱yaru tigua dama wali beda manda bialu gime wabini mbira mini Dahuliya Andanaga Kuini Wali laga ngagonaga mbisigediru hiru yalu puwa lomabu miaga kagoni ndobe. Tigua waini ibabi mbirale tara wabu heledagohondo loma bialu odo miaga ka. Tigua mana ogonidagua bialu kagome i̱hondo koore bialu i̱ mo tandaga halu ka.
JER 7:19 Anigo Anduane Homogo i̱nime bi ogodagua laro. Tigua mana urunidagua bialu karume i̱ore mo ko halu kabe. Ani ndo. Tigua mana ko uruni bialu kagome podene tiniha dai biragola taga timbuniore ho holebira.
JER 7:20 Anduane Homogo Bibahende Haru Haame Ho Haga kogo i̱nime bi ogodagua laro. I̱naga tandaga holene ira hungu ale dedagola kogo agali mbirame ba hundia habe nahe kogoni. Ai tandaga timbuniore ho kogome dindi bibahendebi wali agali bibahendebi nogo tara tara hinidamirubi ira tara tara hengedamirubi tomo tara tara hengedamirubi bibahendeore bo hilo wahai holebero.
JER 7:21 Anduane Homogo Hongo Haiheore Isaraele wali agalinaga Ngode Datagaliwabe i̱ni kogome bi ogodagua laro. Tígua mbirale i̱hondo lomabu ngialu irame dai helaga wirimigo wahalu loma maru delalu howa maru tíni nagane wiyadagua dege urunibi nde tíni nai holene nga.
JER 7:22 Bamba i̱na tínaga mamaliru Iyibi dindiha howa haru tagira ibirungi tigua i̱hondo nogo irame dai helo lomabu delolenebi maru ogodaguaore bo delolenebi lalu langia nabi harugoni ndobe.
JER 7:23 I̱na tihondo lamialu lalu, Tí i̱naga wali agaliore howa i̱naga bi manaore bayuwa talialu bialu halimu. Anidagua birimiyagua nde i̱ tínaga Ngode Datagaliwabe holebero. I̱na bilimu larogo talialu biaiore harimiyagua nde ti bayale holeberemi lalu lamiru.
JER 7:24 Ani lamirugolabi tigua hale ha howa bia nabi mo wahaya. Mo wahowa tinime mine halu mana ko wiaru hangu mo tene howa biaabo halu haya. Ani biyagome ti bayale biaabo nahe tini mo pila haabo haya.
JER 7:25 Bamba tínaga mamali Iyibi dindi yu wahalu haru tagira ibirugongi howa agali maru i̱ninaga bi mana latagi halu helo ibilaga bialu haabo harugo kogoni. Ani birugola agali uruni tigua ibigi bialu i̱naga mana latagi halu haga biya.
JER 7:26 Ani lalu heagola tínaga mamalirume i̱naga bi latagi hayadaruni hale nahe mo wahaya. Ani mo wahalu howa tigua mine dewa halu mana ko wiaru biaabo haya. Mana ko biyadaruni abale henerume binirudagua ndo timbuniore bu bolangua haya.
JER 7:27 Yaremaia-o í̠na Isaraeleali bu karuhondo bi ogo latagi haregola tigua hale naholebira. Í̠na ga̱ lalu olariyaguabi tigua hale howa, O ko, lalu ya nalolebira.
JER 7:28 Ani biragola í̠na tihondo bi ogodagua lamibe. Tínaga mamalirume Anduane Homogo tínaga Ngode Datagaliwabe kagonaga bi layago hale halu talia nabi howa ibunime ti mo tiga bilo maliaho habi nabiaga dege hene. Ai tigua bi henene lolene yu wahai howa tíha henene lolene mbira nawiore kami, lalu lamibe, lalu Anduane Homogohanda laya, lene.
JER 7:29 Yarusaleme-o í̠naga mandari podo mbololo wahowa dara holene walia halu holene nga. I̱naga wali agalirume Anduane Homogo mo tandaga hayagonaga í̠nime hari bare ngaruha iraga ho dugu bialu holene nga. Irane Anduane Homogohanda ibunaga wali agali uruni handabe manga halu erembira mini kagonaga ani bulene nga.
JER 7:30 Anduane Homogohanda lalu, Yuda wali agali hearume ko dewaore i̱naga deni howa biya. Tigua i̱ninaga anda loma biaho helene biagoha dama mitangi bialu gime wabini ko ngubi galone nahe wiaru mo yalu íbu ngelowa urunihondo bi pupu wialu kagoni. Tigua mana ogonidagua bialu kagome i̱ninaga deni i̱naga anda ogoni mebia halu mo ngubia hayada.
JER 7:31 Anidagua bialu tigua damanaga anda mini Tobede ogoriani howa bi pupu wialu tinaga waneiginiru loma bialu irani bo delolenaga anda mbira Hinomo dindi ulini mbira wiagoha bu helayada. Ani buwa tinaga waneiginiru loma bia howa bo delalu ka. Anigo i̱na tihondo ogonidagua bulene mbira ngago bilimu nale. Tigua mana ogoni bulene nga lalu mo mini wiabi nahe dege haru.
JER 7:32 Anigoyu Anduane Homogo i̱naore laro. Mani tigua dindi ulini Tobedebi Hinomobi mini lone nalalu holebira. Dindi ogoniha wali agali dewaore homelo bo wahayago mitangi bialu dindi ogoni mini Homelo Bo Wahaga lalu lolebirago irane waitigirume ibalu Yuda wali agali dewaore bo wahai holebira. Ani biragola Tobede dindi ogoni Yuda wali agalirunaga homali dindi lene wulebira. Bo paya binirunaga tingini dewaore au loabe tobahe wulebira.
JER 7:33 Homene tingini dewa bu paya bu ngagola ega bodo hariawerumebi nogo biango gabua karumebi ibuwa nalu holebira. Nogo ega biangorume homene tingini uruni nalu kagola talu pelolene mbirali naholebira.
JER 7:34 Yuda dindiha tano bu ngaruhabi hariga dunini timbuni Yarusalemeha ngarunagabi mini wali agali lenego mbira munini bialu porane nahondolebere. I̱nime urunidagua berogola wali agali miniha dungulo ibagabu hagarubi wandari igiri pigane dabu bialu howa tomo timbuniru dawalu turu hagabu hagarubi bibahende mo wahai harogola ereba hai holebira. Ani bialu Isaraele dindi bibahende mo ko hai hene wulebira, lalu Anduane Homogohanda laya, lalu Yaremaiahanda lene.
JER 8:1 Anduane Homogo i̱na bi maru ladege bero. Horo ogoningi waitigi bu karume ibalu homali ngaruha puwa kini homayarunagabi Yudanaga agali haguane homayarunagabi loma binigo mo miaga homayarunagabi i̱naga bi mana latagi haga homayarunagabi Yarusalemeni wali agali maru hene homayarunagabi bibahendeorenaga kuni minu duguai holebira.
JER 8:2 Yuda wali agalirume ni ege yakundiru gubalini timbuni halu urunihondo bulu paligi bialu ge duli hanga haga bialu tini biamogo bilonaga bi pupu wialu haga hene. Ani biaga henego waitigirume uruninaga kuni duguayaru nagalone biango ti mo wahagadagua wahene ngaria ni ege yakundirume homa kui uruni hondolebira. Ani biragola kuni uruni lone mo hora holene agali mbira naholebira.
JER 8:3 Ani bialu Yuda wali agali emene hangu yu wahene holebirago uruni i̱na dindi tara tara ngaruha minalu garabaya piai helolebero. Ani bialu Yuda wali agali uruni tigua tini holenego nagaloneoredane hondowa tini homarimayagua karulapeda lo mandabu holebira. I̱ Anduane Homogo Hongo Haiheore kogo i̱na bi o ledogoniore, laya lene.
JER 8:4 Anduane Homogohanda bi ogo i̱na wali agali lamuliya i̱hondo langialu lalu, I̱ Anduane Homogo kogo i̱na bi ogodagua laro. Wali agali mbira pilaragola ibu lone heya nabiagabe. Mbirali ibu hariga pole piyagoha ndo mendeha pubagi hayagua lone beregedalu dai buwa polebiyagoha napiagabe. Nabiaga ndo aniore biaga ndobe.
JER 8:5 Anigo Yarusaleme wali agaliru tigua i̱ yu wahalu piyago puwa beregedalu lone dai nabi i̱ erembira ngialu haabo haga ka. Tigua ke̱ holene mana ngago hongo howa bialu haabo halu i̱ni kogohayagi dai bulenego hame naleore ka.
JER 8:6 Tigua bi laga biyago i̱na bayuwa hale haga birugoyu tigua bi henene mbira nale dege ka. Mbiralime mini beregedo ko lalu, I̱na mana ko timbuniore bialu haru, lalu lapani nahe dege ka. Ami agalime nogo hosini biruwa wai bule hongo timbuni halu piagagobi ti bibahendeme mana ko bule hongo hai haga ka.
JER 8:7 Ega tara tara bedarume nde ha̱lo birulenengi tini biragane wiyagoria daibu biralu polene tu haragola yagalalu piaga. Anigo i̱naga wali agali bu karume nde Anduane Homogo i̱ninaga bi mana lo ngogo bulene manda nabiore kagoni ndobe.
JER 8:8 Yuda wali agali tigua lalu, Inaha mini giga bulenebi manda timbunibi wiaihe kamagonigo Anduane Homogohanda ibunaga bi mana inahondo langinigo yu kama, lagago ti agua labehebe. Mana lawai haga bu hearu tigua bi mana henene lowini ngadagua langia nabi. Tigua ke̱ howa tinime gilibu aribiaho winiru lawai haga hene.
JER 8:9 Agali manda timbuniwi karu tigua i̱ Anduane Homogo kogohondo erembira ngialu pene kago ti manda timbunibi haruago agua binidabe. Agali uruni tini taga timbuniore howa nogo gabua uliha niao̱ wedagoha pialu dagadagua ti ko ngagoha pialu dolebira. Ani biragola tinaga manda timbuniwi kama laganegome tini biamogo bulebirabe.
JER 8:10 Ti ani binigo i̱na tinaga dindibi onebi agali tara ibilarugohondo milolebero. Wali agali bibahendeme muni mbiraleru mo wulenaga mo hondo halu mana ko tara tara dewaore biaga ka. Agali damene karumebi agali haguane mini lene karumebi bibahendeme mana ogonidagua biai haga ka. Loma binigo mo miaga karubi Anduane Homogonaga bi mana latagi haga karubi tigua nde wali agalihondo ke̱ halu mo hondo haga ka.
JER 8:11 I̱na handalu hewaria i̱naga wali agali dere timbuniore ti̱wa ale bu kago hondowa loma binigo mo miaga karubi i̱naga bi mana latagi haga karubi tigua dere uruni huba bia nahe bameda lalu waho haga ka. Tigua wali agalihondo lamialu lalu, Ina bayale karulape kamago tígua miniha genda nahe halimu, laga. Anigo tigua bi ogoni henene ndo laga ka.
JER 8:12 Isaraele wali agali tigua mana ko ngubiore uruni bialu hayarunaga tagaho kabe. Ndo ti taga naheore ka. Tigua mana ko uruni biyarunaga taga holene manda nabiore ka. Anidagua bialu kagonaga i̱na ti pani nelo merogola wali agali dindi tarani bu hearu pani mirugola ko hai hayadagua dege tibi ko hai holebira. I̱ Anduane Homogo i̱na bi o ledogoniore, laya lalu Yaremaiahanda lene.
JER 8:13 Anduane Homogo i̱naore larogo, Wali agali uruni ti pu mbira lini daga mini gerebibi pogebi lini nade yuni gilagilabi ko lini lone dabe nahe hagagobi ka. I̱na tihondo mbirale bibahende mirugo tinaga waitigi karu haru ibalu ti bope hai helolebero.
JER 8:14 Ani berogola Yuda wali agali tigua ogodagua lolebira, Irane aginaga ina bame biru ngamabe. Ina bibahende mo mogo bialu tano wai pabe hongohe mbira kagoha pu kamaria ina bayagua nde tano ogoniha homami̱ya ai ma. Iname Anduane Homogo inanaga Ngode Datagaliwabe kagohondo mana ko bialu harimagonaga ibugua ina homaiore helole manda bu ka. Ibugua ina wali agali homolenenaga tomia ko mbira mo ngiyagola ogoni naradagua binigo kamagoni.
JER 8:15 Ina bayale holeberemabe toba harimago ai bayale ndo harimada. Ina bayale holene mbira mani tagira ibulubada lo mandabu hemaria ai waitigirume mo gi holene yu anda ibiyada.
JER 8:16 Dindi abene uyurayagi Dana hameigini dalu ngagoria waitiginaga nogo hosime kurunu lalu buhe̱ timbuniore laruago ti abale anda ibaruagoni. Nogo hosi urunime hongo howa koarana laruagola inanaga dindi bibahende birilalu ema biai haruagoni. Waitigime Yarusaleme tano bo gialabaga bulebi wali agali tanoha karu bibahende bo wahai holebi ina daluha mbirale ngaru damene bibahende bo haealahole bialu mo ko hai hole ibiragoni, lolebira.
JER 8:17 Anduane Homogohanda lalu, De hondo halimu. I̱na nogombi ko mbira wali agali hayaga ngaru tí kamigoha ibilarogola tí hayulebira. Ani ibiragola tígua nogombi urunime tí nahayilonaga mo dambola howa berelolene hariga mbira nawulebiraore, laya lene.
JER 8:18 I̱na dara timbuniore howa i̱naga miniha genda timbuni yu kogoni.
JER 8:19 I̱naga wali agali darabiore dindi tara tara ngaruha pu karume dugu timbuni biaruago hale ho ko. Tigua lalu, Anduane Homogo ibuni Saiono tanoha nahedabe. Saiono tanonaga kini nahedabe, lalu ka. Anduane Homogo tinaga kini ibugua ladai bialu lalu, I̱naga wali agali bu karume dama mitangi bialu mbirale gime wabu heledaruhondo bi pupu wialu kago aginagadabe. Wali agali tara bu hearunaga mbirale ko habane nabulene wabu wiaruhondo tigua ge duli hangaho biruwa bi pupu wialu hayagome i̱ mo genda harimigoni ndobe, laya.
JER 8:20 Wali agali tigua lalu, Horo debenengi piai halu tomo bogabiru biai hayada. Anigo Anduane Homogohanda ina pele ngia nabi dege ka, laragoni.
JER 8:21 I̱ Yaremaia i̱na handalu hewaria i̱naga wali agali mo ko timbuniore hayadane hendedogoni. I̱naga bu miniha daraore harogoni. Genda timbuni yu kogome i̱ mini dege dindi ho kogoni.
JER 8:22 Gileada dindiha marasini bayale wiagayago áyu nawidabe. Anogoda biabe biaga mbira nahe dege wiaruabe. I̱naga wali agali tandaga hararu mo bayale holene nawidago aguaore buledabe.
JER 9:1 Waitigime i̱naga wali agali bibahende bo wahai hayagonaga i̱na mbiraga horombebi biruwa dugu bialu biraabo holiya i̱naga embone iba ale halu de kogo iba duguadaga hagadagua bilo hameledo.
JER 9:2 I̱naga wali agali uruni ti helo wahalu i̱ dindi kaundia mbiraha pu hole andira nemanda mbira dindi ko yobi ngagoha bu helaruyagua nde bayaleda. Ani pole hameledogoni irane ti bibahendeme biyago agalime ibu one henene bedago wahalu puwa bayanda wali bedaru talima ibaga biagadagua tigua Anduane Homogo wahalu pu ka. Ani puwa ti agali pagebibi dewaore bu kaligobi ka.
JER 9:3 Anduane Homogohanda lalu, I̱naga wali agali bu karume ke̱ halu bi lolenego agalime timu tegelalu bole edaho manda mandabu hagadagua kagoni. Ti dindiha bi henene lolenego emene lowa ke̱ holenego timbuniore nga. Tigua mana ko tara tara dewa ngaru bima ibagabu haabo howa i̱niore tinaga Ngode Datagaliwabe kagonidalo mitangi nabi haga ka, laya.
JER 9:4 Wali agali bu kamiru tínaga damene karunime tí mege buligo de hondo halimu. Tíni hamene mbaliniore bu karu ti ohe howa mo hondo hagane Yagaba ale bu ka. Tínaga nenege karume ndelalu bi lararu de hondo halimu.
JER 9:5 Agali bi henene laga mbira nahe bibahendeoreme tini damene bu karu mo hondo halu ke̱ hangu haga ka. Tiha ke̱ halu mo hondo holene mugube ka. Mana ko erekuibi ngago dege bua halu biaabo haga kagoni.
JER 9:6 Tigua agali mende kago bame bo hengedape hole hongo halu ke̱ hagane mana ngago bialu haga ka. I̱ore tinaga Anduane Homogo kogo mitangi nabi erembira ngialu haga ka, lalu Anduane Homogohanda lene.
JER 9:7 Anigo Anduane Homogo Hongo Haiheore kagome lalu, I̱nimeore bule larogo ainde agalime ngolo silibaru bayale helo irame dodo para karu do taulope helo delagadagua i̱naga wali agali uruni bibahende ba hondolebero. Tigua mana ko biaabo hayagonaga i̱na tiha bulene mende agi ngabe.
JER 9:8 Danda timume mendeali kago homelo bogo wahagadagua tinaga bi laragome tinaga damene bu karu mo ko hai haga ka. Tinaga ne harigaha howa ti dameneruhondo biamogo bulene bi lagagoyu tinaga bu miniha ti damene bu karu mo ko helolene hangu mitangi bialu haga ka.
JER 9:9 Anduane Homogo i̱ kogo i̱na tigatigaore larogo wali agali urunime mana ko bialu kagonaga pani nelo i̱na muleore ngo ndobe. Hameigini uruni tigua ko biyarunaga i̱na tihondo biadaiore bule ngo. I̱ Anduane Homogo i̱na bi o ledogoniore, laya lene.
JER 9:10 Yaremaia i̱na lalu, Hari nene wiarubi dindi datani bayale buhe wiarubi bibahende mo ngubia hai halu koore wiago handalu i̱na dara howa kiabu dugu biru. Wali agali ibagabu haga wiarunaga mbirali naheore wialu nogo bulumagarume datani nalu haga wiaruha mbira munini buwa tani nalu naheore wiago handaru. Nogo ega tara tararubi dindi ogoniha biru haga winiru mbira naheore dindi ogoni yu wahalu piai hene embera wiago handaru.
JER 9:11 Anduane Homogohanda lalu, I̱na Yarusaleme bo gialo waharogola ege to̱le̱ hangu hilomogo bu wulebira. I̱na mo koore harogola dindi ogoniha biango duduru ti hangu dalu wulebira. Yuda dindiha tano damene bibahendeore mo ko halu bo gialabaga bu waharogola ogoniha agali nahe embera labu dindi wulebira, laya, lene.
JER 9:12 Anigo ai Yaremaia i̱na bi ogodagua hale halu lalu, Irane aginaga dindi ogo mo ko halu wali agali mbiraorebi mbira yu wanahe dindi ogo mo labu halu embera ngelenedabe. Agali mini bogabi manda dingi dangiale mbirale uruni irane ogo alenaga biya lalu latagi holene mbirali ai kabe. Anduane Homogohanda mbirali mbirale uruninaga irane aihondo lamiragola wali agalihondo latagi holobadabe.
JER 9:13 Ani lalu hewaria Anduane Homogohanda i̱hondo ladai bialu lalu, Mbirale uruninaga irane wali agali uruni tigua i̱naga bi mana lamirugo talialu bia nabi howa mo wahalu hariga ogoha pilimu lalu mo walia harugobi nape mo wa dege haya.
JER 9:14 Tigua mine taraore halu tinime poa biyagoha pu pebe bialu haya. Ani buwa bamba tinaga mamalirume biawai hayadagua dege dama mitangi bialu gime wabini mini Balanaga bi pupu wialu haya.
JER 9:15 Tigua ogonidagua biyagonaga Anduane Homogo Hongo Haiheore i̱ Isaraele wali agalinaga Ngode Datagaliwabe kogome tigatigaore laro. Wali agali ko uruni biaga karu tandaga timbuniore nalu helo mo mulebero. Mbirale kaubi mundu ale nelo mialu iba kaubi tara tarabi nelo miradagua bulebero.
JER 9:16 Ani nalu kagola dindi tara bamba tinimebi tinaga mamalirumebi de nahendene ngaruha hama purogo lelo wara tagi holebero. Ani pu kagola tinaga waitigi bu karume mbiraore hangu hangu bo wahaga bialu homa amo lelolebero, laya lene.
JER 9:17 Anduane Homogo Hongo Haiheore kagome bi ogodagua laya, Mbirale o biraruninaga irane baya hangu manda bilimu. Kiabu dugu baya hangu biaga wali bedaru olo ngoai halimu, laya.
JER 9:18 Wali agalime lalu, Heneneore kiabu dugu birago hondowa inanaga de iba abale giligala lalu de tohe biruluma̱ya abale ibalu tigua dugu bilo oladaba, larimi.
JER 9:19 Tigua laabo halu lalu, Saionoha howa dugu biaruago hale hadaba. Tigua kiabu dugu bialu lalu, Ai ina mo ko haragoninaga taga timbuni ho kamagonida. Inanaga waitigi bu karume ibalu inanaga dindi andaru bo delaragonida. Ani biragome ina taga timbuniore ho kamagoni ndobe. Ainde ina dindi mendeha togolo yalu poleberemada, laya.
JER 9:20 Yaremaia i̱nime lalu, Ai Yarusaleme waliru-o Anduane Homogohanda tíhondo bi mbira i̱na tí lamibe layago langerogo baya hangu hale halimu. Tí wane wandari emene bedaru kiabu dugu bilo baya hangu biawai halimu. Wali hangu hangume kiabu dugu manda nabi maru bedaru baya hangu biawai halu biralimu.
JER 9:21 Ogoninaga irane langerogo ogo, Homa ina kamagoria kaware íbu hapara kagodago ani bilimu. Agali haguane karunaga andagaha harimayaguabi yagibano karunaga andagaha harimayaguabi ta nabi homa anda íbu dege biya. Waneigini harigani gini bialu karunaga homa ibalu lola haya. Hamaga mo ngoaiho haga ngarunaga igiri daliaheru ngoaiho hearia homa ibu ibalu lola haya.
JER 9:22 Homenerunaga tingini dindini ngubi biango ti mbaule ngu tarabi agalime widi gandulo hili mogobu wima poradagua bialu dindini wima pene. Homenerunaga tingini mo mogo bulene mbirali nahedagola bame wiagadagua wima polebira, labe lalu bi ogoni í̠na latagi habe lalu Anduane Homogohanda i̱ langiya.
JER 9:23 Anduane Homogohanda lalu, Agali manda timbuniwi kamirume i̱ manda timbuniwi haruda lowa tíni mini yaraga holene nawi. Agali hongohe kamirume i̱ hongohe kogoda lowa tíni mini yaraga holene nawi. Muni dewawi kamirume muni dewa ngogonida lowa tíni mini yaraga holene nawi.
JER 9:24 Mbiralime mbiralinaga mini mo yaraga hoa biyagua nde ibugua Anduane Homogo i̱ni kogo ala manda buwa i̱ninaga mini dege mo yaraga holene nga. Ogoni irane horo bibahendengi i̱na wali agali dindi bibahendeni bu karuni dara halu biamogo bialu ti bibahendehondo mana bayale tigabi dege biai haruli. Anduane Homogo i̱nime mana urunibi hangu bulene turu haruli. I̱ Anduane Homogo i̱na bi o ledogoniore, lalu langiya, Yaremaiahanda lene.
JER 9:25 I̱ Anduane Homogo kogome i̱na bi ogodagua laro. Agali marume mana bulene nga layago talialu tinaga dongone podo mabu biagane mana binigoyu i̱ninaga bi larogo hale halu bia nabiagaore ka.
JER 9:26 Agali uruni Iyibialirubi Yudalirubi Idomoalirubi Amonoalirubi Moabalirubi agali dindi ko dalu naibaga wiagoha howa tinaga mandari podo tumagi haga karubi ti bibahende i̱naga bi larogo hale halu mbira nabiaga kagoni. Agali uruni tinaga miniha Ngode Datagaliwabe mitangi nabiaga headagua dege Isaraeleali karumebi mana ogonidagua dege talialu biaga ka. Urunidagua bialu kagodago Isaraele agali karuni tinaga dongone dege podo mabu buwa miniha galone manda nabi hene ka, lalu Anduane Homogohanda laya, lalu Yaremaiahanda lene.
JER 10:1 Isaraele wali agaliru-o Anduane Homogohanda tíhondo bi larago hale hadaba.
JER 10:2 Ibugua lalu, Tígua wali agali tara tara bu karunaga mana ko ngago talialu nabilimu. Mbirale nahendene ale hari daligani birago hondowa wali agali marume gi haga ka. Tígua mbirale uruni birago hondowa gi nahalimu.
JER 10:3 Wali agali uruni tigua mana birago habane nabulene ngaru biaga ka. Tigua ayu mo yalu irabuha puwa ira mbira kago dibaga. Dibalu yu daibu ngagola mbirale irame wabiaga mandabi kagome ira ogonime agali ale wabu ngelaga ka.
JER 10:4 Ani wabu ngagola agali mandabime ngolo silibaru mo yalu ibuwa ogonime mbirale biago paraho dambi halu yári biaho ngelaga. Yári bia hai halu mbirale ogoni ibira holilono baya hangu dagia mbirani nilime bapara howa ngelaga.
JER 10:5 Dama mitangi bialu bi pupu wulenaga gime wabini ogonibi ngago nagalone bameore nga. Agalime tinaga mabuha egame tomo nolilono mbirali kabe toba halu ega ibida pelonaga agali ale mbira wabu helagagobi dege nga. Mbirale gime wabini urunime bi nalagabi tinime ge halu napiagabi ngagola agalime mo yalu piaga ndobe. Anigo dama mitangi bialu gime wabini ogoni alerume ko bayalebi mbira nabibehe dege nga. Ani ngago manda bialu tígua urunihondo gi holene nawi, lalu laya, lene.
JER 10:6 Anduane Homogo-o í̠ ale mende naheore. Í̠ni hangu hongo gibi daligaore ke. Í̠ mini timbuni lenebi hongohebi kegoni.
JER 10:7 Í̠ wali agali bibahende bu karunaga kini kego manda bialu wali agali bibahendeme í̠hondo gi hai halu í̠ andaneha hai holene nga. Dindi bibahendeha agali manda timbunibi mini gigabiwi karubi kini bu karubi ti bolangua hai howa í̠ daligaore ke. Mendeali í̠ kegobi nahe í̠niore kegoni.
JER 10:8 Agali uruni mini nawi ale lulu howa mana ko nagalone hangu bialu ka. Uruni tigua mbirale irame wabini ngagoha puwa agi manda bule piagayabe.
JER 10:9 Agalime Sebena dindiha howa siliba mo yu ibalu Ubasa dindiha howa ngolo mo yu ibalu ngolo siliba uruni mbirale wabiaga mandabi karuhondo mo miaga. Mo miragola tigua dama mitangi bialu bi pupu wulenaga mbirale irame wabuwa o biago ngolo siliba urunime daligani paraho dambi halu yári biaho ngelaga. Aga labolabo wabiaga kago tigua nde aga bayaleore daramabi tagalitaya alerume bu gombedagabi wabuwa mbirale wabu wini ngago mo karula haga biaga ka.
JER 10:10 Anigo Anduane Homogo í̠ Ngode Datagaliwabe heneneore kegoni. Í̠ Ngode Datagaliwabeore haluhe howa kini haabobo hole kegoni. Í̠na keba harengi dindi ngaru dumbirumbi bialu ema biaga nga. Í̠naga keba holene ogonime wali agali dindi tara tarani karunaga hongo mo pirilape haga ke.
JER 10:11 Isaraeleali tígua wali agali Anduane Homogo manda nabi karu ogodagua lamilimu. Tínaga dama mitangi bialu mbirale bi pupu wulenaga gime wabini urunime dindibi haribi wabini ndoyago. Mbirale gime wabini dindini ngarubi hari li kago andaneha karubi uruni bibahende haealabagabu wahai howa mbira nawulebiraore lalu lamilimu, lene.
JER 10:12 Anduane Homogohanda ibunaga hongome dindi wabini. Ibunaga mini bayale gigabiwigome dindi bibahende wabialu hari daliga mo yangala halu daligaha karu bibahendebi wabini.
JER 10:13 Ibunime bi laragola hari kulukulu hongoheore lalu iba hariha bedagome u̱ timbuni laga. Dindi bibahendeha howa beraliba pobo tara tara iraga howa mo mogo bilaga. Ibugua iba dalu dindini ibilalu hari daba bilaga. Puyabu tara tara ibu andaha wia do ho winiru mo heya halu pulame helo pelaga.
JER 10:14 Ibugua ani birago hondowa wali agali karu ti lulu ale halu mini nawiore ho haga. Dama mitangi bialu mbirale ngolome wabiaga agali bu karu tibi nde mbirale tinime bialu kagonaga taga pani nolebira. Mbirale bi pupu wulenaga gime wabini uruniha galone mbira naheore. Uruniha buhe̱ lolenebi nawiore.
JER 10:15 Ti nagaloneore ngago hondowa wali agalime uruni mebia holene karulape nga. Anduane Homogo ibugua horo mbirungi ko bayalebi dabaki bule ibiragola dama mitangi bialu mbirale gime wabini uruni ti ko halu ereba hai holebira.
JER 10:16 Yagabanaga Ngode Datagaliwabe kago ibu urunibi ndo tara mende ale mbira kagoni. Mbirale ngaru karubi bibahende ibugua wabiai hene ka. Ibugua Isaraele wali agaliore ibunaga helo lowa daba bagiho helene ka. Ibunaga mini Anduane Homogo Hongo Haiheore kagoni.
JER 10:17 Yuda wali agaliru-o tínaga waitigirume Yarusaleme ho hagira bu yaanda hai hayada. Ani biyadago tígua tínaga dabudabu wirimidaru kabu biai halu yalu ibida pudaba.
JER 10:18 Anduane Homogohanda lalu, Horo ogoningi i̱na wali agali Yuda dindiha bu kamiru bibahende bo taliatagi hai holebero. I̱na tíha genda timbuniore anda ibilarogola tí mbirali yu wa nahe bibahende tandaga nai holeberemi. I̱ Anduane Homogo i̱na bi o ledogoniore, laragoni.
JER 10:19 Ani laragola Yuda tígua ogodagua loleberemi. Ainde ina darabi mo ko haragonida. Inanaga genda timbuniore dere ale bidago dabi habe nahe bidaligobi wu kamagonida. Genda uruni inahaore ibini ngago nde iname harugo lowa yu habehe kamagoni, loleberami.
JER 10:20 Yarusalemeore bo gialahole bialu balai anda ko budubaga bini ngaligobiore ngagoni. Balai anda ogoni mo heya halu bulene mbirali naheore. Inanaga waneiginirume ina helalu piaiore halu erebaho wahene. Wali agali bibahende Yarusaleme wahalu piai haya, lalu loleberemi.
JER 10:21 I̱na ladai ogodagua. Agali haguane wali agali haru haga dindi ogoniha hagaru ti mini nawi ka. Tigua Anduane Homogohondo tinaga mini haru habe lalu bi nalamiaga ka. Ani bialu tigua biabe bayale mbira nabi hearia waitigirume wali agali dindi tara taraha bo purogo lai heleneya. Nogo sibi haru hagame baya hangu haru nahe karia biango dudume ibalu bo taliatogo laradagua biniya.
JER 10:22 Hale hadaba. Agali mbirame bi abale yalu ibiya. Dindi abene uyurahayagi howa kilikulu timbuni laruagoni. Waitigiru tini dindi wahalu Yuda dindi tano bu ngaruniha wai bule ibarua. Tano uruni bo gialobaga biai haragola biango dudu bu karu ti dege haga wulebira.
JER 10:23 Anduane Homogo-o ina wali agali bu kamarume inanenaga holene bayuwa haru habe naheore kama. Ina hariga polene ngagoria inaneme haru pobe nahe kamago manda bido.
JER 10:24 Anduane Homogo-o í̠naga wali agali kamaru í̠nime mo tiga bibe. Í̠na keba howa mo tiga buleni nabibe. Keba howa ani biriyagua nde ina habe nahe holeberema.
JER 10:25 Dindi tara taraha wali agali maru í̠ mitangi nabiaga karubi í̠ mini olalu í̠hondo bi nalaga karubi urunihondo í̠naga keba walia halu í̠na ti bo wahai holene karulape. Waitigi uruni tigua í̠naga wali agali Yagaba aguanene biaru bo wahai hayagoni ndobe. Tigua ina bo biba hai halu inanaga dindi andarubi mo ko halu bo labu hai haya.
JER 11:1 Anduane Homogohanda Yaremaia i̱hondo ogodagua laya.
JER 11:2 I̱naga habo nalolene bi lowinigo baya hangu hale mia howa hale habe. Ani hale howa í̠na Yuda wali agali Yarusaleme wali agalibi ogodagua lamibe.
JER 11:3 I̱ Anduane Homogo Isaraele wali agalinaga Ngode Datagaliwabe kogo i̱na bi ogo laro. Mbirali ibu i̱naga habo nalolene bi lowirugo mo habo laragome ibuha mo ko holene wulebira.
JER 11:4 I̱na habo nalolene bi ogoni tínaga mamaliru baba bamba ti Iyibi dindiha howa haru tagira ibirungi lowinigo nga. Ti Iyibi dindini heangi ira dene ale wiagola poboyogobiore wiagoria hemiria haru tagira ibirugoni. Ti ani hearia i̱na tihondo lalu, Tígua i̱naga bi larogo hale howa bilimu larudagua birimiyagua tí i̱naga wali agaliore holeberemi. Ani kamigola i̱ nde tínaga Ngode Datagaliwabeore holebero, lalu lamiru.
JER 11:5 I̱na tihondo lalu, Ani birimiyagua i̱na tínaga mamaliruhondo dindi bayale tomo mbirale anda hai holene mbira ngulebero lalu lowirugo nguleberoore, lalu lamirugoni. Anigo ai dindi ogoni tínaga mamaliruhondo ngulebero lo wirugoria tí áyu ogoniha kamigoni, laya. Anduane Homogohanda bi ogoni layagola i̱na ladai bialu lalu, Anduane Homogo-o heneneore í̠nime larigonidagua bibe, laru.
JER 11:6 Ani larugola Anduane Homogo ibugua i̱hondo langialu lalu, Áyu ogoni í̠na Yuda dindiha tano bu ngaruhabi Yarusaleme tanoha hariga pedadagua puwabi i̱naga bi ogodagua lamibe. Wali agaliru-o i̱naga habo nalolene bi lowini ngago bayuwa hale howa talialu bilimu.
JER 11:7 I̱na tínaga mamali Iyibi dindiha howa gi mialu haru tagira ibirungi i̱na tihondo bi hongohe mbira lamialu lalu, I̱naga bi mana baya hanguore hale howa talialu halimu, lalu lamiru. Ani lamialu i̱na bi ogoni dege laabo halu harugo áyu tí kamiruhondobi lalu haabo ko.
JER 11:8 Anigo tínaga mamalirume bi uruni hale habe manga howa talialu nabi haya. Tigua mana ko bulene ngago mitangi bialu mine halu tininaga hame leago hangu bialu haabo haya. I̱na tihondo habo nalolene bi lowini ngogo ogoni taluwa bialu hadaba lalu lamirugoyu tigua ogoni bibe manga hai haya. Ani biyagola wahalu ai habo nalolene bi lowini wiagoha pani mulene nga lo wiadagua i̱na ti pani nelo migi biru, lamibe laya, lene.
JER 11:9 Anduane Homogohanda i̱hondo laabo halu lalu, Yuda wali agalirubi Yarusaleme wali agalirubi tigua i̱naga bi lowirugo nabimi̱ya lalu ka.
JER 11:10 Tigua i̱ erembira ngialu tininaga mamalirume mana ko biaga wiaru lone talima pialu haabo haya. Ani bialu tigua dama mitangi bialu mbirale gime wabini wiaruhondo bi pupu wima piaga ka. Isaraele hameiginibi Yuda hameiginibi ti bibahendeme i̱naga habo nalolene bi tinaga mamaliru baba lowirugo puguai haya.
JER 11:11 Ani biyagonaga i̱ Anduane Homogo i̱na tiga tigaore larogo ti yo pialu polene nawiha wara hana howa minu baore bulebero. Anidagua berogola tigua i̱ olalu, Ina biamogo bia, lalu ha haragola i̱na ti biamogo nabi waholebero.
JER 11:12 I̱na ti biamogo naberogola Yarusaleme wali agalibi Yuda wali agalibi tinime mbirale dama mitangi bialu gime wabini ngaruha pialu ira hagua nga bilo mini inisenesiru lomabu delaga wiyadagua pugupugu bulebira. Ani bialu mbirale gime wabini urunihondo bi pupu wialu, Ina biamogo bia, lalu holebira. Ani lalu holebiragoyu tiha mo ko holene íbu ngangi mbirale gime wabini urunime biamogo nabulebira.
JER 11:13 Yuda wali agaliru tinaga dama mitangi bialu mbirale gime wabini ngaru tininaga tano dewa ngadagua gime wabiniru dewaore bu wigi biyada. Ani bialu tigua dama mitangi bialu mbirale bi pupu wulenaga gime wabini mini Balahondo ira hagua ngabilo inisenesi lomabu delolenaga dabu dewa bu ngelayada. Lomabu delaga dabu dewaore Yarusaleme tanoha hariga pedaru bibahendeore dagalai howa wu karula piai heledagonida.
JER 11:14 Yaremaia-o wali agali uruni tiha genda timbuni íbu ngangi tigua i̱ olalu biamogo bia laragola i̱na tinaga bi ogoni hale naholebero. Anigo í̠na tinaga bi lahalu i̱hondo biamogo bia ha nalabe. Í̠na tinaga genda timbuni ngago mo waha lalu i̱hondo dugu bia halu bi hongo howa olaabo nahe wahabe laro laya, lene.
JER 11:15 Anduane Homogo ibugua bi laabo halu lalu, I̱naga wali agaliru-o i̱na tí gubalini timbuore ho kogoni. Anigo tígua mana ko tara tara dewaore bialu kami. Ani bialu howa i̱naga anda kagoha tí agi bulenaga poramilibe. Tígua nogo i̱naga bo lomabu delole yalu eberemigome genda tara tara i̱na mo waharogola tí yo pialu poleberemabe tobaho kamibe. Ani ndoyago. Genda tandaga ko uruni tíha ibilolebero larugo naibiyagua tí turu holeberemibe.
JER 11:16 Bamba i̱na Isaraele tí ira olibe lini bayale dagane kaligobi ka laruli. Ani laruligo ai áyu i̱na hari daba timbuni bilarogola Isaraele wali agali ira olibe ale kamigo bo haealabaga bialu barogola ira yuni maganeru bu̱lo togo lagadagua tí bilibulu purogo loleberemi.
JER 11:17 I̱ Anduane Homogo Hongo Haiheore i̱na Isaraele Yudala ira ale hangarugo ai áyu i̱nime dege ira ogonilabo gabu helolebero. Ani buleberogo irane Isaraele wali agali Yuda wali agalirubi tígua dama mitangi bialu mbirale gime wabini Bala wiagohondo bi pupu wialu ira hagua ngabilo delaga inisenesirubi lomabu delalu harimigonaga ko holene ogoni ibilolebero. Tígua mana ogonibi bialu harimigome i̱ mo kebaore harimigoni ndobe, laya lene.
JER 11:18 Yaremaia i̱na Anduane Homogohondo bi ogodagua laru, Anduane Homogo-o agali maru hearume i̱ mo ko hole bialu hearia í̠na i̱hondo ogoale bira lalu langirigoni.
JER 11:19 Pigane biaore uruni ale bulubada manda nabi howa agalime nogo sibi igini bole haru halu poragola piagadagua pialu haruya. Agali uruni tigua ndinde lowa lalu, Ira mbira bayale howa liniru wene dalu kaore dege dibu wahagadagua wali agali mani holobadarume abogo hene lalu ibunaga mini manda nabilo agali ogoniore bo wahami̱ya, lalu heneya. Tigua anidagua lalu heago helowa dege i̱na lalu,
JER 11:20 Anduane Homogo Hongo Haiheore kego í̠ wali agali bibahendenaga bu miniha ngago damene handaore biaga howa í̠na manani lo tiga buwa mo tale biahaga kegoni. Ai i̱naga genda ogoni Anduane Homogo í̠naga giha mo ya harogoni. Anduane Homogo í̠na mana liahe biaga uruni mo ko howaore baregola hondole hameledo, laru.
JER 11:21 Agali Anadodoali bu hearume i̱ bo wahole hame lowa tigua i̱hondo ogodagua laya. Anduane Homogonaga mana í̠na latagi nahabe. Lalu keria ina handarimayagua í̠ homabelo bo waholeberema, laya. Ani layagola Anduane Homogohanda i̱naga bi larugo hale howa ibugua lalu,
JER 11:22 I̱ Anduane Homogo Hongo Haiheore kogome i̱na buleorego laro. I̱na Anadodo wali agaliru bo wahai holebero. Tinaga waitigirume igiri daliahe bu karu bo wahai holebira. Ogoningi Anadodo wali agali ti tomo nolene biba hai halu nawi kagola tinaga waneigini homai holebira.
JER 11:23 I̱na Anadodo wali agaliru bo wahai holene horo mbira pongo bo winigo ngo. Horo ogoni tagira ibirangi ti mbiraore hangubi yu wahene mbira nahelole bibahende bo wahaiore holebero, lalu Anduane Homogohanda laya, lalu Yaremaiahanda lene.
JER 12:1 Anduane Homogo-o í̠na mana tigabiore bialu haabo haga kego i̱na í̠la lai nalabehe. Anigo i̱na mana maru i̱ wá nale kogo í̠nihondo hale haro. Wali agali mana ko biaga karu ti bayale dege haabo kago irane agibe. Maru ke̱ halu mo hondo hagane mana bialu karu tibi nde bayale dege kago agidabe.
JER 12:2 Í̠na ti ira ale dindini hengedegola pini bayale dindiha piaga. Ti bayale andaho howa lini dewa dagagobi kagoni. Tigua í̠ni mini lene kego lalu kago howa í̠ mitangi nabi tinaga mini kaundiaha helowa ani laga ka.
JER 12:3 Anigo Anduane Homogo í̠na i̱ore mandabi ke. I̱na mana bibahende berogobi í̠ manda biaiho kegoni. Í̠na i̱naga mini ngogo handai howa í̠ha bu mini pagaho koria hendedegoni. Anigo agalime nogo sibi boleneru tale bialu haru pubagi hagadagua i̱naga waitigi bu karu taliabagi habelo hamelo ko. Ani bulene horo í̠nime manda bu winigo tagira ibirangi uruni homelo bo wahai habelo hameledo.
JER 12:4 Anduane Homogo-o í̠na inanaga dindiha genda ibilarigome dindi yobialu datani mbirale bibahende wiarubi gaulai haya. Mbirale uruni ereba hai harago dindi lone bayale angi holebirabe. Wali agali dindi ogoha karu tigua mana ko biaabo haragome nogo ega bu karuni homai haragoni ndobe. Ani bialu howa wali agali uruni tigua lalu, Mbirale inaha ibulebira lenego Yaremaia ibu de nahondolebira, laga ka, lalu Yaremaiahanda lene.
JER 12:5 Anduane Homogohanda i̱hondo ladai bialu lalu, Yaremaia-o í̠na genda áyu handalu kegoni mani timbuniore ibulebiragobi ndo handaregoni. Í̠ agali baba gerai lalu keria ha̱ lariyagua nde nogo hosi baba gerai agua loleberebe. Í̠ni daluha bayale ngangi mini tumutumu wu hariyagua nde iba Yodanahayagi irabu timbuni ngagoha howa agua holeberebe.
JER 12:6 Í̠ni dameneore bu karume í̠ bo wahole ndelayagoni. Tigua í̠ talima ibalu minule ibiyagoni. Í̠ damene urunime bi bayaleore layagua ti henene lara lowa í̠na mo henene nahabe, lalu Anduane Homogohanda langiya lene.
JER 12:7 I̱ Anduane Homogo i̱na bi ogodagua laro. I̱na Isaraele wali agali wahalu piru. I̱na ti i̱ninaga wali agaliore helo dabo helarugo ai erembira mialu waharu. I̱na wali agali uruni gubalini ho henego tinaga waitigirume ti bope helo yupe harugoni.
JER 12:8 I̱naga wali agali uruni tigua i̱nihondo waitigi ho kagoni. Laiono gabua irabuha haga karume hongo howa ngororo lagadagua wali agali urunime i̱hondo ani lalu ka. Anidagua bialu kagonaga i̱na ti handabe manga ho kogoni.
JER 12:9 I̱naga wali agali ti ega igini ale beda. Ani bedagola ega bodo hariawe bedarume íbu mabu bialu bo nolebira. Nogo biango gabua maru bu karume olo mogo bialu tiguabi ega emene ogoni bo nole ibidaba lolene nga.
JER 12:10 Waitigi bu hearunaga agali haguane dewaore ibalu i̱ mabuha gerebi irane bu hearu mo ko hai haya. I̱naga mabu bayale wiwago geme hengedo wahayagola dindi mo ko halu ege kelekele tagira piya.
JER 12:11 Dindi ogoni ko mbirale anda nahaga wialu wali agali mbira naheore dindi dabulu wulebira. Ani wiragola mbiralime dindi ogoninaga genda ngago mitangi nabi kagola dindi ogoria ko dalu naibaga yobi wulebira.
JER 12:12 Waitigi dewaore dindi ko dalu naibagahayagi howa ibalu mbirale ngaru mo ko hai holebira. I̱na dindi ogonibi wali agali bibahende karubi mo ko hai holenaga waitigi ani ibilolebero. Ibiragola wali agali lenego mbiraoreli hangubi mbira bayale naholebira.
JER 12:13 I̱naga Isaraele wali agali tigua mabuha widi hengedaru lini nade datani anihe tara andaho aribia helolebero. Tigua biabe erekuibi bu wiyago lini mbira do na nabi biabe bame bu waholebira. I̱ Anduane Homogo kogonaga keba timbuni kogonime tinaga widi lini nadedagonaga taga timbuni ho holebira, lene.
JER 12:14 Anduane Homogohanda lalu, I̱na wali agali maru Isaraeleali baba kaware haparaho karunaga lalu bi mbira yidogo lolebero. Ti agali koore howa dindi i̱na i̱ninaga wali agalihondo mirugo tigua mo ko haya. Ani biyagonaga i̱na waitigi odaruni tini dindi ngagoria nahelo tani dugu wahagadagua ti dugu batagi holebero. Yuda wali agali tibi waitigi dombeneha karuni i̱na ti dugualu taliatagi holebero.
JER 12:15 I̱na tihondo ani buwa mani nde ti lone dara halu tininaga dindi tara taraha helo haru dai bigi bulebero.
JER 12:16 Ani berogola wali agali tara bu karume i̱naga wali agali hearuhondo dama mitangi bialu gime wabini Balanaga mini lalu ibuhondo bi pupu wiawai henego wahalu i̱naga mana ngago lo manda biai holene nga. Ani manda bialu heneneore howa tigua Anduane Homogo i̱ haluhe kogo lalu i̱naga minini howa lo wialu bi layagua nde tibi i̱naga wali agaliore holebira.
JER 12:17 Anigo hameigini maru padaru ti i̱naga bi hale holene hame nale hayagua i̱na ti dindi ogoniha nahelo bo dugualu taliatagiore holebero. I̱ Anduane Homogo i̱na bi o ledogoniore, laya lene.
JER 13:1 Anduane Homogohanda i̱ Yaremaiahondo langialu lalu, Í̠na áyu ogoni puwa labolabo bayale mbira yolo bialu muwa karulo hole pu. Í̠ labolabo ogoni ibaha nangelabe, laya.
JER 13:2 Ani laya handala i̱na puwa Anduane Homogo ibugua bibe lalu langiyadagua bialu labolabo biago mialu karularu.
JER 13:3 Ani karulo hewagola Anduane Homogohanda lone langialu lalu,
JER 13:4 Labolabo karulo harigoni yalu Iba Yuberedisi puwa egeanda mbira kagoha mo do habe, laya.
JER 13:5 Ani laya handala Anduane Homogo ibunaga bi layago hale halu i̱na labolabo biago mo yalu puwa egeandaha mo do haru.
JER 13:6 Horo dewa peagola Anduane Homogohanda i̱hondo lone lalu, Áyu ogoni heyalu Iba Yuberedisi puwa labolabo i̱na mo doha larugola mo do harigoni mo pu, laya.
JER 13:7 Ani laya handala puwa labolabo egeandaha mo do harugoria piru. Puwa labolabo biago handalu hewaria goba halu ogonime galone mbira bibe nahe wiaria handaru.
JER 13:8 Ai Anduane Homogohanda i̱hondo lone lalu,
JER 13:9 I̱ Anduane Homogo kogo i̱na bi ogodagua laro. I̱ Yuda wali agalime mine hayagonagabi Yarusalemebi bope harogola libunaga mini timbuni mini lene wu hayagoni ereba halu labolabo ogoni mo ko hayadadagua ko holebira.
JER 13:10 Wali agali mana ko ngago hangu mo tene howa bialu haga uruni ti i̱naga bi mana ngago hale holilono tinaga hale mo ndibulo wahene ka. Ti mine halu tininaga miniha buabirago ale bialu haga ka. Tigua dama mitangi bialu gime wabini ngaruhondo bi pupu wule piaga kago. Ani buwa wali agali uruni ti labolabo biago mbirale mbira bibe nahe ko halu budabaga biyadagua tibi ko hai holebira.
JER 13:11 Bamba i̱na Isaraelealirubi Yudalirubi agalime labolabo baya hangu bo bu hagadagua ti Anduane Homogo i̱niha hapara howa helo helaru. Ti i̱naga wali agaliore ka lene helobi tigua i̱ninaga mini yaraga halu i̱nihondo turu haga bu howa i̱ni mini timbuniwiore ka lalu helobi dabo helarugoyu tigua i̱naga bi ogoni hale nahagaore kagoni, laya.
JER 13:12 Anduane Homogohanda laabo halu lalu, Yaremaia-o i̱ninaga bi ogo Yarusalemeni latagi habe. I̱ Anduane Homogo Isaraele tinaga Ngode Datagaliwabehanda bi ogodagua laro. Agalirume waini iba be dindime wabini ngagoha hambu yaga, labe. Ai Yarusaleme wali agali tigua bi ogo hale howa í̠hondo lalu, Í̠na manda bu handalu keria ina bi ogoni manda nabi kabe toba kebe, lolebira.
JER 13:13 Ani laragola í̠na tihondo ogodagua lamibe. I̱ Anduane Homogo i̱na ogodagua laro. Dindi ogoniha wali agali bibahende bu kamiruni tíha i̱na waini iba dewa hambu berela harogola tígua lulu timbuni yu ibagabu holeberami. Debidinaga aguanene kini hene karubi loma binigo mo miaga karubi Anduane Homogonaga bi mana latagi haga karubi wali agali bibahende Yarusalemeha kamirubi tí bibahendeha waini iba be dindime wabini ngagoha biru to̱lagadagua i̱na tí bibahendeha waini iba biru to̱lai helolebero.
JER 13:14 Ani buwa agalime iba be dindime wabini ngaru tini mo tilitola lalu bo pambulobaga biagadagua i̱na ti bibahende mo ko hai helolebero. Wali agali lenegobi wandari igiri daliahebi waneigini galibi ti bibahendeore mo ko hai holebero. I̱na ti dara howa mbiraore hangubi mbira yu wa nahelole bibahendeore bo hilo wahai holebero. I̱ Anduane Homogo i̱na laro, lene.
JER 13:15 Yuda wali agali tíhondo Anduane Homogohanda bi layago tígua mine nahe baya hanguore hale hadaba.
JER 13:16 Anduane Homogo tínaga Ngode Datagaliwabe ibugua tí hari nene ngaruha mana ko ngaru bule pialu kamiria tínaga dindi ogoria mo aruma helaragola tí piloligo tígua ibu mini lene timbuniore helalimu. Tínaga dindi ogoria wá kagola ibagabu hole lo manda bu kamiria Anduane Homogohanda wá holene ngago mo aruma holigo de hondo halimu.
JER 13:17 Anigo tígua i̱naga bi hale nahe mine halu haabo harimiyagua tínaga waitigirume ibalu Anduane Homogonaga wali agali kamiruni dindi tara ngaruha bo garabaya bu yalu poligo de hondo halimu. Anidagua biragola Yaremaia i̱ni hangu ogoria yu wahene howa dugu bialu kogola de iba i̱naga deha howa giligala lalu denguiha pugulope halu holoboda lo mitangi bu haru.
JER 13:18 Ani mitangi bu hewagola Anduane Homogo ibugua i̱hondo langialu lalu, Kinibi ibu ai̱yabi libu haru bedaria puwa bi ogodagua lamibe. Libunaga manda karulaga biago nagalone halu ko hayago libugua dindi ogo handayaho habe nahedago wahalu pilibu.
JER 13:19 Yudanaga dindi emene mbira abene unurahayagi tano mini Negebe ngagonaga pabe panga payayagola ai pabe panga dugulene mbirali naheoreda. Mbirali nahedagoni irane Yuda wali agali bibahende tinaga waitigime ibalu dindi taraha garabaya bu yalu piai hayagome nahedagoni.
JER 13:20 Yarusaleme-o í̠naga de kegonime dindi gibuni uyurayagi howa agali tidini í̠ keria ibaruago agi biaruabe handarene. Ai wali agali í̠na turu howa handaya ho hariliru áyu agohayagi kabe.
JER 13:21 Wali agali maru í̠na nenege hinu harigonime mani beregedalu í̠ni bope halu handayaho haragola í̠na bi agi loleberebe. I̱na manda bu handalu koria walime gali taba honole howa tandaga timbuni nagadagua í̠ tandaga timbuni nolebereda.
JER 13:22 Tandaga uruni irane agime biaruadabe lo mitangi biriyagua ogoni í̠nime mana ko wiaru bialu harigonaga pani naruda lo mitangi bibe. Í̠nimeore bia ko halu hene ngegome í̠naga aga minu golalu í̠ni mo ko haragonida lo manda bibe.
JER 13:23 Mbirali ibunaga tingini mindibi heneyagua ibugua mo beregedalu honabi holebirabe be budi ale gabua mbira mini lebadi kago ibunaga tingini gilimugalimubi bedago mo tara ho aribia holebirabe. Anidagua bibe naheore nga. Anidagua dege í̠na mana ko biaga ngeru yu wahalu mana bayale bia aribia habe naheore wulebira.
JER 13:24 Yarusaleme-o dindi ko wali agali nahaga ngagoha howa puyabu ibalu widi aeane puloyu piagadagua í̠naga wali agali bu karuni i̱na balu purogo lelolebero.
JER 13:25 Í̠na i̱ embeda halu puwa mbirale dama mitangi bialu gime wabini wiaruhondo bi pupu wima pirigonaga anidagua bulebero.
JER 13:26 I̱na í̠ taga timbuni habelonaga agali bu karume í̠naga pindu hendelo aga bu kegoni mo yaraga halu í̠ninaga dengui bu dambi helolebero.
JER 13:27 Í̠na mana ko ngubiore bialu heruni i̱na handalu manda bu ko. Í̠na hongo howa mbirale dama mitangi bialu gime wabini wiaruhondo bi pupu wule hari neneruhabi dangite wiaruhabi ibagabu harigoni. Í̠na walime ibu agalini wahalu puwa agali mende karu baba kayu yu palima ibaga biagadagua bialu kegoni. Í̠ nogo angibunime wangabe taya bialu go̱e̱ lama ibaga biagadagua bialu kegoni ndobe. Yarusaleme í̠ daraore ho kogoni. Í̠ ko kegoni howa í̠ bayale dodo nahe domo waheneore hoa nahe kegonida. Í̠ ogonibi dege kene mali agira biruleberebe, lalu Anduane Homogohanda lene.
JER 14:1 Yuda dindiha dalu naibi wiangi Anduane Homogohanda Yaremaia i̱hondo bi ogo langini.
JER 14:2 Yuda dindini wali agali karu áyu genda timbuni yu howa dugu bialu ka. Tinaga tano wiaruni mo ko hai haragoni. Ani birago dindi ogoriani wali agaliru bame henge wiagoria palu paya paya bima puwa dugu hongo howa bialu ka. Yarusalemeni karume dugu hongo howaore bialu ka.
JER 14:3 Agali haguane karume tinaga biabe biagahondo iba biraga uli tombo wini ngaruha iba hambu pudaba learia iba nabere wiaria handalu iba be bame yalu dai biragoni. Wali agalime miniha genda timbuni howa taga halu tinaga wanakui handa dindi haragoni.
JER 14:4 Yuda dindini dalu naibi dege wiane dindi yo bialu leboladaga haya. Ani biyagola wali agali maru tomo tini mabuha bialu naga hearu tibi nde genda timbuni yu howa wanakui handa tara haragoni.
JER 14:5 Nogo gabua mini dia karume igini hono wiragolabi ti datani nolene nahe. Ani biragola tinaga igini hono wahalu poragoni.
JER 14:6 Nogo dongi gabua karumebi hari nene ngarunaga howa biangome biagadagua buhe̱ ala laga bialu ha̱lo tongo lara. Ti datani nolene nahedagola de ále lalu homabehe ka.
JER 14:7 Wali agalime i̱hondo bi ogodagua lalu ka, Anduane Homogo-o iname í̠ erembira ngialu í̠naga deni mana ko dewaore bialu harimagome ai inane pani nolene ibiragonida. Anduane Homogo-o í̠ mini lene timbuniore kegoni mitangi buwa ina dara halu biamogo bia.
JER 14:8 Ina Isaraele wali agali kamarume í̠hondo mini mbiraore wialu í̠na biamogo bibelo hame lowa mini dunubia ho kama. Ani kamagola genda timbuni mbira anda ibirangi í̠nime ina abaleore biamogo biaga kegoni. Anigo áyu urunidagua biaga ndo haradagua bidego aginagabe. Mbi mbiru hangu bame nenege íbu palialu poradagua berego aginagabe.
JER 14:9 Agali nahende karia mo mogola hagadaguabi ami agalime ibuni hongo nahe howa mendeali biamogo bialu wai bibe nahe hagadaguabi kego agibe. Anigo Anduane Homogo í̠ni ina heba mandagi haabo haga kegoni ndobe. Í̠nime ina í̠ninaga wali agaliore holoma̱ya dabarigoni. Ani birigo manda bialu ina yu wanahabe, lalu ka.
JER 14:10 Isaraele tigua anidagua layagola Anduane Homogohanda ladai bialu lalu, Wali agali uruni ti mbirani hangu ho dambolo nahaga howa ibaga ibaga hangu bialu hole hamelaga ka. Ani ibaga bialu howa tinime birago mamage nahaga kagonaga i̱na tihondo turu nahe ko. Tigua mana ko biyago mitangi bialu i̱na pani mulebero, laya.
JER 14:11 Anduane Homogohanda i̱hondo langialu lalu, Yaremaia-o wali agali uruni ti bayale helo biamogo bia lalubi i̱hondo hale nahabe.
JER 14:12 Tigua tomo nane haga howa i̱hondo bi lalu, Biamogo bia, layaguabi i̱na tinaga bi hale naholebero. Tigua loma mbirale i̱hondo irani bo delai hayaguabi widiru lomabu ngiyaguabi i̱na wali agali urunihondo turu naholeorebero. Tinaga waitigime ibalu ti bo wahai helolebero. Hina garibi timbuni ibilalu ti homai helolebero. Warago timbuni ibilarogola ti bo homelai helolebero, laya.
JER 14:13 Ani layagola i̱na ladai bialu lalu, Anduane Homogo-o í̠na bi lariruni henene dege lari. Anigo Anduane Homogo Bibahende Haru Haame Ho Haga-o í̠naga bi mana latagi haga agali karume bi mende ale ogodagua mbiwia halu wali agalihondo lalu, Tínaga waitigirume tí bo wa naholebira. Hina garibi napolebira. Anduane Homogo í̠nime tí dindi ogoria bayale halimulo handayaho haabo holebero larigo dege latagi halu ka, lalu lamiru.
JER 14:14 Ani lamirugola Anduane Homogohanda ladai bialu lalu, Agali uruni tigua i̱naga minini howa lene ale tingi howa ke̱ halu ka. I̱na tihondo bi ogodagua lalimu lalu bi mbiraore hangubi nalamiore haru. Agali mbiwia haga uruni tigua tihondo bi lalu karuni ke̱ howa tininaga miniha howa tagira ibiraru ale dege latagi haragoni. Tigua de gandeba handarima laga birarubi bibahende ke̱ dege hara. Tigua mani ogoale mbira bulebira lalu mbiwia hararubi ke̱ howa bame bi dege lalu kagoni.
JER 14:15 Anigo Anduane Homogo i̱na heneneore larogo. Agali uruni tigua i̱naga minini howa bi ogoni lole i̱na dabalu pudaba lene ndome lara. Tigua lalu, Dindi ogoria wai nabulebira. Hina garibi napolebira, laga karu tini waitigirume ibalu bai holebira. Hina garimebi tini ala homai holebira.
JER 14:16 Wali agali maru agali uruninaga bi larago hale haga karubi ti bibahende waimebi hina garimebi homaiore holebira. Waitigi ibirarume wali agali waneigini homenerunaga tingini mo yu ibuwa Yarusaleme tanoha hariga ngagoria mo ngelama polebira. Homene uruninaga tingini mo hora holene mbirali naholebira. Yarusaleme wali agalime mana ko ngubi wiaru hangu bialu hayarunaga i̱na ti bo wahai holebero, laya.
JER 14:17 Anigo Anduane Homogohanda i̱hondo lalu, Yaremaia-o í̠ninaga bi hangu lamibelo hamelo ko. Ogodagua lamulene nga. I̱ Yaremaia kogo i̱naga wali agaliru darabiore waitigirume bai hayadagonaga horombe mbiragabi dugu bialu de iba ibalu pugulopebe bialu haabo hole hamelo ko.
JER 14:18 I̱na tano tagirahayagi puwa handalu koria waime agali bo waheneru wiaria de hendedo. Tanoha ibaga bu howa handalu koria wali agali hina garime tingini mo kohe homole wima pearia hendedo. Loma binigo mo miaga hearubi Anduane Homogonaga bi mana latagi haga hearubi ti ogoale beramada manda nabi bame ibagabu karia hendedo labe, lalu Anduane Homogohanda i̱ Yaremaiahondo ani lene.
JER 14:19 Anduane Homogo-o Yuda wali agalinaga dindi ogo yu wahai haribe. Saiono tanobi manga halu yu waore harigonibe. Ina mani lone bayale agua holebe tobahe mo ko howa ina balu kegoni agibe. Ina bayale holeberemabe tobaho harimago ai bayale ndo kama. Ina mani bayale karulape holene henge wulebirabe tobaho harimago ai ani ndo inanaga waitigirume ibuwa ina mo ko howa balu mo gi haga bialu haabo kagoni ndobe.
JER 14:20 Anduane Homogo-o heneneore inanaga mamalirumebi ina áyu kamarumebi í̠naga deni mana ko biaabo halu harimagoni lapani harama.
JER 14:21 Anigo í̠ni mini leneore kego manda bialu ina erembira nangibe. Í̠naga tano í̠ninaga haru howa biragane dagia í̠ni andaga biagobi waitigi karume mege bialu mo ko halu kagoni mitangi bialu ogonidagua bialu nahelabe. Ina baba habo nalolene bi lo wirigobi mitangi bialu mo habo nalabe.
JER 14:22 Dama mitangi bialu gime wabini ko ngubi urunime iba dalu ibilagabe. Be hari ibuni hangume iba dalu ibilolebirabe. Ani nabibeheore ndobe. Anduane Homogo-o í̠ hangu inanaga Ngode Datagaliwabe kegome mbirale uruni biai habehe kegoni. Í̠ hangu mbirale uruni biai haga kegome ai ina biamogo bibelo hondo kamagoni laro, lalu Yaremaiahanda lene.
JER 15:1 Ai Anduane Homogo ibugua i̱hondo lalu, Yaremaia-o hale habe. Mosese Samuelelame i̱ni koria kaware ibuwa wali agali uru biamogo bia ledale i̱na dara halu biamogo nabi dege kole. Wali agali uruni tinaga dengui i̱ lone nahondolego ogoria nahelo talu peladaba.
JER 15:2 Ani laregola tigua í̠hondo hale howa lalu, Ina agoha poloma̱yabe, layagua nde ogodagua labe. Anduane Homogo i̱nime laro. Wali agali maru warago ko tara tara ngarume balu homelo dabo heledogo ti warago baragola homolebira. Maru waiha homelo dabo heledogo ti wai bu pialu karia wai tigime baragola homolebira. Maru ti hina garime homelo heledogo hina gari tagira ibirangi tibi nde homolebira. Maru garabaya andaha homelo heledogo ti wai bialu garabaya minu yalu polebira.
JER 15:3 Anduane Homogo i̱nime homolene ale mbirale maria urunime ti balu bo biba hole dabo ngeledo. Tínaga wai tigime bo paya bidagola biango dudu karume tinaga tingini ngaru gililo yu ibagabu helo. Ega tara tara bedarubi biango nogo gabua bu karumebi uruninaga tingini nalu no amo laragola mbirali yu wanaholebira.
JER 15:4 Wali agali dindi tara tarani bu karume Anduane Homogo i̱nime Yuda wali agalihondo mana ogonibi biya lalu bi larago hale howa tigua gi timbuni halu mogolo holebira. Hesegaia igini Manase ibu Yuda wali agalirunaga kini heangi mana ko timbuni Yarusalemeni bialu hayagonaga pani mialu ti ani bo wahai holebero, lalu Anduane Homogohanda laya.
JER 15:5 Anduane Homogohanda lalu, Yarusaleme wali agaliru-o tí dara holobadagobi tíhondo dugu bu ngulubadagobi tí bayale henedabe be hako henedabe handama ibulubadagobi mbirali ai kabe.
JER 15:6 Anduane Homogo i̱na henene tigatigaore langerogo tígua i̱ erembira ngialu kaundiaha pu waharimigoni ndobe. Ani birimigonaga i̱ninaga gioreme tí balu mo ko harogoni ndobe. Tíhondo dara haabo halu haruligonigo ai áyu tí baba manga timbuni ho kogoni.
JER 15:7 Puyabume widi aeane pulo wahagadagua bialu i̱na wali agali Yuda dindini tano wiaruha hearu bibahende bo taliatagi hai harugoni. Tigua mana ko biyaru wanahe biaabo halu hemiria wali agali bibahendebi tinaga waneiginirubi bo wahaiore harugoni.
JER 15:8 Ami hearubi bo wahai harugola ti oneru áyu dalo birama peda. Wali dalo dagalabe naheore iba angeni iba mu ngaligobi beda. Horombe ami agali uruni ai̱ya berearu bo wahai helo lowa tinaga waitigi hearu ibilaru. Tiha tandaga timbuni abaleore ibilalu mo gi timbuni helaru.
JER 15:9 Wali mbira waneigini karia ai̱ya bedayaguabi uruni bibahende homai helarogola waneigini ai̱ya dara tene handalu gi ge hongo nahe birulebira. Turu howa dungulo birulene winigo gendaho birulene íbu aribia haragola taga tene handa walia holebira. Manane alendo halu ni abale anda piagadagua Yuda maru yu wahene heagua abale bo hilo wahai helo tínaga waitigiru ibilolebero. I̱ Anduane Homogo i̱na bi o ledogoniore, lene.
JER 15:10 Yaremaia ibugua lalu, Aiore mini burugu ledogo i̱ ai̱yahanda dindi ogoria holiya abule taba henenedabe. Dindi bibahendeha agali bu karu baba keba ha lai la bialu kogo aginagadabe. Tigua i̱ ngulenebi i̱na ti mulenebi dano mbira nahe kogodago bibahendeme Anduane Homogohanda i̱ mo ko helo laga bialu kagoni, laro.
JER 15:11 Anigo Anduane Homogo ibugua i̱hondo lalu, Í̠ miniha genda nayu habe. I̱na í̠ biamogo berogola í̠ bayale holebere. Ani kegola í̠naga waitigi karume tiha genda anda ibirangi í̠na ti biamogo bia lama í̠ keria ibilo i̱na mo manda bia holebero.
JER 15:12 Anduane Homogohanda wali agalihondo lamialu lalu, Aeanebi boronosibi biamaga howa wabini hongohe ngaru agali aiwa minu gai bulebirabe. Waitigi uyurayagi howa ibulebirarunaga hongo taraore aeane alehe ibulebira, laya.
JER 15:13 Ani ibiragola tínaga munirubi dabudabu maru ngamirubi bibahende bame mo mulebero. Irane tínaga dindi bibahendeni mana ko wiaru bialu haabo harimigonaga ani bulebero.
JER 15:14 I̱naga miniha tandaga holene ira hungu ale dalu haabo kagome tí bibahende dai holebira. I̱na Isaraele wali agali tí minalu agali mendenaga garabaya biabe bialu halimulo minu merogola tigua dindi ala tí handa nabini ngagoha garabaya haru puwa helolebira, lalu Anduane Homogohanda laya.
JER 15:15 I̱ Yaremaia kogo i̱na ogodagua laru, Anduane Homogo-o i̱naga genda bu ngaruni hendedego ai í̠na i̱ mitangi bialu pele ngibe. Agali maru i̱ mo ko halu karuni í̠nime ti pani mibe. Ti ba puda hariyagua tigua dai bialu i̱ bo homeore lolebira. Í̠naga biabe bulene wiago bialu hewaria tigua i̱hondo bi ko lalu kagonigo manda bibe.
JER 15:16 Tomo nolene mendealime ngiragola abale yamiagadagua í̠na bi i̱hondo langiriruni bibahende hale hai harugo. Í̠ Anduane Homogo Ngode Datagaliwabe Hongo Haiheore kegome i̱naga bu miniha turu howa dungulo holene to̱laiho kogoni.
JER 15:17 Agali maru bame turu halu oba haga karu baba i̱ hole turu nahe i̱ni hanguore harugoni. Irane í̠naga hongo i̱ha karula halu í̠naga keba holenebi i̱ha karula dege kegoni manda buwa ani harugoni.
JER 15:18 Anigo ai i̱naga miniha tandaga ngago ereba nahe wiaabo ho ngagoni irane aginagadabe. I̱naga dere bidago dabi nahe timbu hayadago aginagada. Heneneore í̠na i̱ biamogo nabidane hendedo. Agalime iba bedabe toba howa iba biraga uliha iba hambu pialu karia iba nabere hundiyada handala iba nane wahalu piagagobi i̱ haruda, laru.
JER 15:19 Ani larugola Anduane Homogo ibugua i̱hondo ladai bialu lalu, Í̠na mini beregedalu i̱ni kogoha lone hole dai biriyagua nde i̱na í̠ lone haru dai bialu i̱ninaga biabe biaga wirigoha bialu helolebero. Í̠naga ne harigaha bi habane nabulene lalu kego wahalu bi bayale hangu latagi halu hariyagua nde i̱naga bi mana latagi haga howa bi lagane ne hambu í̠ holebere. Ani howa wali agali tigua í̠ talima ibilo í̠na ti talima napobe.
JER 15:20 Wali agali uruninaga deni í̠ ege to̱le̱ mini boronosime pabe bini hongoheore kaligobi helolebero. Ani kegola tigua í̠ baba waitigi ha holebirago ai i̱ni í̠ heba mandagi kogola í̠ bope naholebira. I̱nime í̠ biamogo bialu í̠la mandagi haabo holebero. Bi ogoni Anduane Homogo i̱nime larogoni.
JER 15:21 Wali agali mana ko biagabi mendeali dara halu mitangi nahaga karunaga giha keriabi i̱na í̠ biamogo bialu haru dai berogola tigua í̠ mo ko naholebira, lalu Anduane Homogohanda Yaremaiahondo lamini.
JER 16:1 Anduane Homogohanda Yaremaia i̱hondo langialu lalu,
JER 16:2 Í̠na dindini kengi wali dabu nabi waneigini nahonowi habe.
JER 16:3 I̱ Anduane Homogo i̱na dindi ogoriani aba ai̱yahabi waneigini bu karuhabi mbirale tagira ibulebirago langero.
JER 16:4 Ti bibahendeore homai holebira. Maru warago ko tara tarame homalu maru waitigime bo homelalu maru tomo nolene nawiore howa hina gari halu homolebira. Ani homai haragola ti dara halu dugu bulenebi mo hora holenebi mbira naholebira. Homene tingini uruni dindini ti wiradagua wima pedaria ega bodo hariawe bedarumebi nogo biango gabua karumebi ibalu no waholebira.
JER 16:5 I̱ Anduane Homogo kogo i̱na lone ogodagua laro. Wali agali dugu bialu karia í̠ duguanda napobe. Mbirali homaragola dara howa dugu nabibe. Wali agali uruni hondowa i̱na ti gubalini nahe holebero. I̱na ti dara howa bayale helo biamogo nabulego í̠na dara halu dugu nabibe, lalu Anduane Homogo ibugua lene.
JER 16:6 Agali homogo bu karubi yagibano bu karubi dindi ogoria henego ta nabi bibahendeore homai holebira. Ani homaragola uruni dara howa mo hora holene mbirali mbira naholebira. Mbirali homaragola dara howa gi dambia hale poda mandari angariru mia biagadagua bulene mbira naholebira.
JER 16:7 Anigo marume mbiralinaga damene mbira homayago dara howa dugu bialu duguanda bedagola nde ibunaga iba tomoru ibu miniha mo paliaho biruwa nalu berelo yalu naibulebira. Mbirali ibu aba ai̱yaore homayagonaga daraho bedaria mbiralime ibu dara howa biamogo bule naibulebiraore.
JER 16:8 Agali marume tini andagaha tomo timbuni dawa nalu ibabi nalu kagoha í̠ ti heba mandagi nalu birule napobe.
JER 16:9 I̱ Anduane Homogo Hongo Haiheore howa Isaraele wali agalinaga Ngode Datagaliwabeore kogo i̱na heneneore larogo hale habe. I̱na wali agalinaga miniha dungulo holenebi turu howa bi lolenebi wali agali dabu bulenenaga turu holenebi urunialego bibahende mo ereba haiore holebero. Wali agali áyu kamiru tí kamiore dege mbirale uruni birane de hondoleberemi.
JER 16:10 Yaremaia í̠na bi ogoni wali agalihondo lamialu keria tigua agua ladai bulebira. Anduane Homogo ibugua inaha mbirale mo ko holene uruni damene ibilole biaruago irane agibe. Iname mana tiga nabi mbira ago birimagodabe. Anduane Homogo inanaga Ngode Datagaliwabe kagohondo mana ko mbira agi birimabe, lalu hale holebira.
JER 16:11 Wali agali tigua bi anidagua laragola í̠na tihondo ogodagua ladai bibe. I̱ Anduane Homogo i̱na tíhondo bi ogo laro. Mbirale uruni buleberogo irane tínaga mamalirume i̱ erembira ngialu puwa dama mitangi bialu mbirale gime wabini wiaruhondo bi pupu wima piyagonaga ani bulebero. Tigua i̱naga mana hale habe manga halu i̱bi wahalu piya.
JER 16:12 Mana ko abale tínaga mamali henerume bialu henedagua ndo tígua ko timbuniore bialu kamigoni. Tí bibahendeoreme mine gibi halu tíninaga mini kome hame ledagoha piai halu kami. Ani bialu howa tígua i̱naga bi mana hale habe mangaho kamigoni.
JER 16:13 Anidagua bialu kamigonaga i̱na tí dindi ogoniha howa bo ba tagi halu dindi tara mbira bamba tíguabi tínaga mamalirumebi manda nabini ngagoha piai helolebero. Tí ani pu howa mbiraga horombebi dama mitangi bialu gime wabini ngaruhondo bi pupu wialu haabo holeberemi. Ani bialu kamigola i̱na tí dara halu biamogobi nabulebero, laya lene.
JER 16:14 I̱ Anduane Homogo i̱na bi ogodagua laro. I̱na wali agali uruni bo taliatagi ha holeberogo mani i̱na dindi tinaga mamaliru helo mini ngogoria lone haru dai bulebero. Wali agali uruni tigua henene larama lalu bi mo hongo howa Anduane Homogo haluhe haabo kagonaga minini howa i̱na Iyibi dindiha howa haru tagira ibiyagonaga henene larama lalu kagoni. Mani tigua Anduane Homogo haluhe haabo haga kagonaga minini howa henene larama lalu, Ibugua ina dindi tara dindi abene uyurahayagibi dindi tara wiaruhabi bo pelai henego ai lone inanaga dindi henene ngagoria holoma̱ya haru daibu heledagoni, lolebira lene.
JER 16:16 Anduane Homogohanda lalu, Agalime wena nu bu yalu puwa ibaha bape halu wena dewaore minagadagua waitigirume ibalu Yuda wali agaliru minu yalu piai helolebero. Ani buwa mani agalime nogo gabua tiaru irabuha taya biagadagua bialu wali agali taya bilo waitigi maru i̱na lone ibilolebero. Ani ibilarogola tigua wali agali maru ibida puwa hari bare ngaruhabi egeanda karuhabi bira do haga bidaru baya hangu ilalu minu yu piai holebira.
JER 16:17 Irane Yuda wali agali tigua mana biaga damene ngago bibahende i̱na manda biai kogoni ndobe. Tigua ko bialu hene ngaruni i̱naga deni mo do habe nahe nga.
JER 16:18 Tigua mana ko dama mitangi bialu mbirale bi pupu wulenaga gime wabini ko ngubiore dewa wiaru dindi i̱nime ti helo mirugoha wu to̱lelowa tiha ko dewa ngelo ka. Anidagua bidagonaga i̱na ti pani dewaore nelo mulebero. Mbirale bi pupu wule gime wabini urunialego holenehebi buhe̱ lagabi ndo bame ema nabiaga homenenaga tingini bame ngaligobi dege nga. Dama mitangi bialu bi pupu wulenaga gime wabini urunime dindi ogoni i̱naga deni mo dodo hai hene nga, laya lene.
JER 16:19 Yaremaiahanda lalu, Anduane Homogo í̠nime genda i̱ha ibiragola i̱ biamogo bialu ho hagirabu yaanda howa mo hongoho helaga ke. Ani kego ai wali agali dindi tara tara ngaruha howa í̠ keria ibirarume ogodagua lolebira. Ina mamalirunaga bi pupu wiaga gime wabini ngarume ina biamogo bulene ale ndo bame nagalone winiya.
JER 16:20 Agalime ibuni biamogo bilonaga mbirale gime wabibehebe. Wabibe naheore. Agalime mbirale ibuni biamogo bilonaga gime wabiyagua nde wabini ogoni ibu henene ndo biamogo nabibehe nga, lolebira, lene.
JER 16:21 Anduane Homogohanda ladai bialu lalu, Ti ani lolebirago manda bialu bi ogoni larogo hale hadaba. I̱na wali agali bu karuni bibahende halu mbira hangu lawai harogola tigua i̱naga hongo holene timbuni ngogo baya hangu manda biai holebira. Ani bialu i̱naga mini Anduane Homogo henego kadalo manda bu holebira, lalu Anduane Homogohanda laya lene.
JER 17:1 Anduane Homogohanda lalu, Yuda wali agaliru-o tínaga ko ngaruni domo wahabe naheore kamigoni. Tínaga bu habaneha ege to̱le̱ ale kami. Ani kamigola tínaga mini ege to̱le̱ ale ogoriani mbirale mbira ayu tibu aleme tínaga ko birimigoni gilibu nga. Ani bialu tínaga ko uruni tíninaga lomabu delolene dabu biarunaga nguni mariani nogo bulumaga ne gayane ale kagoria gilibu nga.
JER 17:2 Horo bibahendengi tínaga wali agali bu karunime mbirale dama mitangi bialu bi pupu wiaga wiarubi dama wali beda mitangi bialu gime wabini mini Aserabi ogoni labonaga lomabu delolene dabu hari nene ngaruhabi ira timbuni bu karu tenehabi bu helaga birimigo mitangi biaabo haga kamigoni.
JER 17:3 Tígua dindi uruniha pialu mbirale urunihondo i̱na tínaga muni ngamirubi mbirale bayale tara tara ngamirubi bibahendeore tínaga waitigiruhondo mo miaiore holebero. Tígua dindi ogo bibahendeha mana ko bialu mo bia hai harimidago. Ainde tínaga waitigirume anda ibalu dindi tínaga bi pupu wiaga wirimidaruni bibahende karulai helolebero.
JER 17:4 Tínime mo ko harimidagome tí dindi bayale i̱na ngirugo yu wahalu poleberemi. I̱na tínaga waitigi bu karunaga garabaya biabe ale bialu halimulo helolebero. Tí dindi manda nabini tara mbiraha pu holeberemi. I̱naga keba holene ira dene ale wu hewaria tígua pulo hungu bia harimigola ai hungu bialu daho wulebira.
JER 17:5 Anduane Homogo ibugua lalu, Mbiralime i̱ni erembira ngialu agalinaga hongome ibu bayale holenaga biamogo biaga lo mitangi biyagua anidagua mitangi biaga kago ibuha mo ko holene wulebira.
JER 17:6 Ogoni ibu dindi ko iba dalu naibaga ege kelekele dindi ngagoha ira emene tilatila kaligo ale ka. Urunibi karu tiha bayale holene handa walia naholebira.
JER 17:7 Anigo mbirali ibu Anduane Homogo i̱hondo mini mbiraore wialu yu tiga bu howa i̱na hangu ibu biamogo bulubadalo manda bu karu i̱na ti biamogo bulebero.
JER 17:8 Ogoni ibu ira iba angeni hengene bayale anda hagagobi holebira. Ibunaga pini ibaha dalipe kagome gaea timbuni birangi ira ogoni ibu gabu holigonaga gi nahaga. Ibunaga yuniru bayale gahenge haabo halu dalu naibirangi ibu gau holobada lowa gi nahaga ka. Horo bibahendengi ibunaga lini dolene tu haragola ibu lini bayale daabo haga ka, lalu Anduane Homogohanda lene.
JER 17:9 Anduane Homogohanda ogodagua laya. Wali agali bibahendenaga bu miniha ke̱ howa mana ko bulene dege mitangi biaabo haga ka. Wali agali tinaga mini koore kago ai tigua birago heneneda aiwa lolebirabe.
JER 17:10 Ai Anduane Homogo i̱ni kogome wali agali bibahendenaga mini wu karu bibahende manda biai ho kogoni. Ani manda bu howa i̱na tinime bialu henedarunaga pani karulape miadai biruli.
JER 17:11 Agali mbirame ohowa muni dibadaga howa mo wini ngaru ti ega mbirame habane wialu pedagola ega mendeme aribia howa kayu bialu ibunaga wini tingi howa palia aribia haganegobi ka. Muni ke̱ howa mini uruni alego agali ogoni ibuni wahe nahe wene igiri daliahe kaore dege abale biba halu ereba hai haga. Ani bidagola mani agali maru bu karume ibu mini nawi luluore henedane handa walia haga.
JER 17:12 Inanaga Anduane Homogonaga anda loma bia hene biago kininaga biragane dagia ale yári taraore biahe baya taraore mbira nga. Bambaore hari nene mini lene ogonibi dege winigo wiaabo ka.
JER 17:13 Anduane Homogo-o í̠na ina Isaraele wali agali biamogo bibelo í̠hondo mini dunubia ho howa í̠na bibelo maliaho kamagoni. Mbirali í̠hondo erembira ngialu piyaru ti taga timbuniore holebira. Mbiralime agali mbiranaga mini dindini gilibu ngago hondowa mani mini ogoni doma hole bidagola hondo embeda haramalidagua maru í̠nihondo erembira ngiaga uruni ti embedaho waholebira. Ti ani holebirago irane Anduane Homogo-o í̠ iba gagahe duguagagobi howa ina wali agalinaga holene gahenge ngiaga kegonigo tigua í̠ yu wahalu piai hayadagome ani bulebira.
JER 17:14 Anduane Homogo-o i̱ dabi holiya i̱naga warago ngogo mo wahabe. I̱ bayale holiyanaga í̠na i̱ haru dai bibe. I̱ í̠naga mini hangu yaraga halu haga kogoni.
JER 17:15 Isaraelealiru tigua i̱hondo mege bialu ogodagua lalu, Anduane Homogohanda mbirale ko uruni bulebero layago aginaga layadabe. Ibugua mbirale uruni heneneore bule mitangibu heagua nde abale áyu ogoni bilo, laga ka.
JER 17:16 Anduane Homogo-o í̠naga wali agaliru i̱na haru holiya dabo helarigonigo i̱naga biabe ogoni wanahe bialu kogoni. Wali agali uruni kagoha mo ko holene mbira ibilabe lalubi i̱na í̠hondo hale naheore kogo í̠ni manda bide. I̱na bi lalu harugo damenebi í̠na baya hanguore manda biai kegoni.
JER 17:17 Mbirale gi holene ko mbira anda ibirangi urunime i̱ mo gi nahe howa i̱naga ha do holene í̠niore kegoni manda bido.
JER 17:18 Ani bialu áyu agali maru i̱ mo ko hole bialu karuni tininaga mini mo batara halu mo taga habe. I̱ni dege mo taga nahabe. Ti gi timbuni helo hiriribi mbira tihondo bibe. I̱ dege mo gi nahabe. Ti kagoha mo ko holene ibilalu tini bo wahaiore habelo hamelo kogoni.
JER 17:19 Anduane Homogohanda i̱hondo langialu lalu, Yaremaia-o í̠na tanonaga pabe panga haraba mini Wali Agalinaga Panga laga biagoria pu habe. Yudanaga kiniru ti tano pabe bu ya anda henehayagi howa tagira polenebi anda ibulenebi hariga ogoninaga dege piagago ogoriani pu habe. Ani bialu Yarusaleme tanonaga panga haraba timbuni dunini maru ngaruhabi pu ha dege bibe.
JER 17:20 Ani pu howa bi ogodagua labe. Yudanaga kini kamirubi Yuda wali agalibi Yarusaleme wali agalibi tí bibahende hariga pabe panga ogoha uba andatagi biaga kamiru tígua tínaga hale mia howa Anduane Homogo i̱ninaga bi larogo baya hangu hale hadaba.
JER 17:21 Anduane Homogo i̱na ogodagua laro. Tíni bayaleore holene hamelo kamiyagua Sabada horongi dabudabu damene bibahende Yarusaleme tano pabe ogoha yalu anda naibalimu.
JER 17:22 Ani bialu tíni andagaha howabi mbirale mbira yalu tagira napilimu. Sabada horo ogoningi biabebi heba nabuleore laro. Bi ogoni mitangi bialu halimu lalu bamba i̱na tínaga mamaliruhondo lamiwadadagua bialu Sabada horo bayale helo i̱ninagaore loma biaho ngeledogo mitangi bialu halimu.
JER 17:23 Anigo tínaga mamalirume mana ogoni mo wahalu tigua nabiore hene. I̱na ti mana bayale ngaru lawai holilono mine halu hale habe manga haga hene.
JER 17:24 Tigua ani bialu henego ai áyu tígua Anduane Homogo i̱ninaga bi larogo hale halu Sabada horongi dabudabu damene Yarusaleme tanoha yu anda naibalimu. Sabada horo i̱ninaga wu bagi heneore mbira ngago ai horo ogoningi tígua biabe bulene damenego bibahende nabi halimu. Tígua i̱naga bi larogo talialu birimiyagua
JER 17:25 nde Debidi aguaneru hangume kini ha aribia haga bialu Yarusalemeni kini holebira. Ani howa kini halu ibunaga agali haguane dabo helaga bini bu karubi tigua hosini biralubi karisini heyu halubi Yarusalemeha pu íbu bialu uba andatagi bialu holebira. Yarusaleme tanohabi Yuda dindihabi wali agali bu holebira. Ani kagome wali agali dewaliore tanoha pabe panga haraba ngagoria uba andatagi bialu holebira.
JER 17:26 Ani biragola wali agalirume dindi tara tara ngaruha howa loma biniru yalu Anduane Homogo i̱ninaga anda ibugu bulebira. Wali agali Yuda dindiha tano wima pedaruha bu karumebi Yarusaleme tano kawareha bu karumebi Beniyamini hameiginiru daluha howabi hari barebareha dindi wima pedaruha howabi ni paliragohayagi hari barebare emene wima pedaruha howabi wali agali maru Yuda dindinaga abene unurayagi padarumebi uruni bibahendeore i̱ni koria ibai holebira. Ibalu tigua loma irani dai helolenebi nogo bo lomabu delolene marubi widi lomabu delolenebi ira hagua ngabiaga mini inisenesi lomabu delolenebi Anduane Homogo i̱nihondo ka̱i̱ lalu lomabu ngulene marubi yalu ibugu ibugu bulebira.
JER 17:27 Anigo tigua i̱naga bi larogo mo wahalu i̱naga Sabada horo ngago i̱ninagaore wu bagi hene ngela nabi howa dabudabu ngaru Yarusaleme tanonaga pabe haraba ngagoria Sabada horongi yu uba anda halu birimiyagua nde i̱na tanonaga pabe panga ogoriani ira hedape harogola pabe uruni dai halu kininaga anda timbuni Yarusaleme tanoha bu karubi bibahendeore dai helo ira da timbu helolebero. Ani dalu kane dege ira ogoni dalu hundia nabulebira, lalu Anduane Homogohanda lene.
JER 18:1 Anduane Homogohanda i̱hondo lalu,
JER 18:2 I̱naga bi mbira í̠hondo langero. Í̠na todobene be dindime wabiaga agali mbira kago ibu andaga pobe, laya.
JER 18:3 Ani layago hale halu i̱na agali todobene be wabiaga biago andagaha pialu agali ogoni ibugua todobene be dindime wabialu hearia handaru.
JER 18:4 Anigo todobene o wabialu hayadagoni wabia ko haya. Agali ogoni ibugua todobene be wabia ko hene biago budabaga buwa dindi mbiraore ogoni degeme lone mo gedaore howa mende ibuniore hameleagobi mbira wabiya.
JER 18:5 Ani biyagola Anduane Homogohanda i̱hondo lalu,
JER 18:6 Isaraele wali agaliru tíhondo bi mbira larogo. Agali todobene be wabiaga o kagome ibuni wabuabirago ale wabialu kadagua i̱na Isaraele wali agali tí i̱nime buabirago ale bulene nakarulapedabe. Dindi todobene wabiaga agali biago ibunaga giha yu kadagua Isaraele tí i̱naga giha yidogoni ndobe.
JER 18:7 Mbirungi nde wali agali maruhondobi hameigini dindi tara tarani bu karuhondobi lamialu i̱na tí mo ko halu bo hilo wahai holebero laruli.
JER 18:8 Anidagua larogola wali agali uruni tigua mana ko bialu hayago wahalu mini beregedalu mana bayale biadai biyagua nde ti mo ko hole larugo waharuli.
JER 18:9 Marungi nde wali agali marubi hameigini maruhondobi i̱na tí mo bayale halu mo hongo holebero lalu lamiruli.
JER 18:10 Ani ledogola uruni tigua mana bayale tigabi bulene ngago wahowa i̱naga deni ko ngaru hangu bialu hayagua ti biamogo bulebero lalu lamirugoni wahalu biamogo nabiruli.
JER 18:11 Anigo Yaremaia-o í̠na Yarusalemeha karubi Yuda wali agali bibahendehondobi bi ogodagua lamibe. Anduane Homogo i̱na bi larogo hale hadaba. Ai i̱na tí pani ngialu mbirale tí bolene ko tara mbira manda mandabu ngelo kogoni. Ani bidogo tí bibahendeme mana ko bialu kamiruni wahai halu mana bayale ngaruni talialu bidaba laya lalu lamibe.
JER 18:12 Anigo Yaremaia-o wali agali tigua bi ladai bialu lalu, Iname ogonidagua bibe manga kamago wahalu waha. Ina inaneme buabirago ale buleberema. Ina bibahendeoreme mine hai halu inaneme mana ko ngaru bule dimagoli ho kamagoni ndobe, lolebira, lalu Anduane Homogohanda lene.
JER 18:13 Anduane Homogohanda laabo halu lalu, Wali agali dindi tara tarani bu karuhondo mana koore Isaraele wali agalirume bialu kagonidagua dindi mendeni mbira biya lene hale harimibe lalu tígua hale halimu.
JER 18:14 Horo mbiru hangubi Lebanono hari nene ngagoha dalu dindiguni nawi lene mbira hale halu dindi ogoniha howa iba baya libule ibagaru horo mbiru hundiai haya lene mbira hale harimibe.
JER 18:15 Urunidagua nabiaga ngagoni. Ai i̱naga wali agalirume i̱ni kogo mo embeda halu puwa damarunaga dabuni ira hagua nga bilo delaga inisenesiru lomabu delaga ka. Anidagua bialu kagome mana tigabi bayale ala bialu haga winiru embeda halu yu wahai haga. Áyu koore ngagoha pupe halu ka.
JER 18:16 Ani bialu kagome tinaga dindi mo ko halu mbirale anda nahaga wulebira. Wali agali dindi kaundiaha howa ibirarume dindi ko ogonibi ngago hondowa mogolalu gi timbuni ho holebira.
JER 18:17 Waitigime i̱naga wali agaliru baba wai bule ibiragola i̱na ti mo gi halu puyabu unugohayagi howa hongohe ibalu widinaga aeaneru pulo yalu piagadagua ibida piai helolebero. Tiha mo ko holene ogoni ibirangi i̱na ti biamogo nabi erembira mialu waholebero, lalu Anduane Homogohanda laya lalu Yaremaiahanda lene.
JER 18:18 Wali agali tigua lalu, Iname Yaremaia ibuhondo mbirale bulene mbira ngago abale bima. Ibugua bi lalu karuni henene ndo lalu ka. Loma binigo mo miaga karu tigua mana ina lawai haga wiyago yu wanahe lawai halu holebira. Agali mini timbuni gigabiwi bogabi karu tiguabi nde bi bayale ina langiaga wiyago biabe ogoni bialu langialu holebira. Ngode Datagaliwabenaga bi mana latagi haga karu tibi nde biabe ogoni bialu holebira. Anidagua bilo áyu iname agali Yaremaia biagonaga bi nahalehe wahalu ibu godi deni pu helami̱ya, laya.
JER 18:19 Ani layagola Yaremaia i̱na Anduane Homogohondo lalu, Anduane Homogo-o i̱na bi larogobi waitigi bu karunime i̱ mini lalu bi laragonibi hale howa manda bibe.
JER 18:20 Agali mbirame mendealihondo bayale biragola ko biadai biagabe. Agali uruni tigua i̱ gundu pilelonaga uli tombaho kago ai mana ala i̱na biruligo manda bibe. Abale í̠ni keria kaware ibuwa keba ho kegoni wahalu wali agali uruni biamogo bibe laruligonigo
JER 18:21 ai wahalu wali agali uruni tinaga waneiginiru hina garime homai helabelo hameledo. Wali agali uruni tinaga waitigi karume ibalu maru bo hilo wahelo hameledo. Agali karu warago hongohe tara tara ngarume bo homelelo hameledo. Igiri daliahe karubi wai hamaha homelo. Wali bedaru ti waneiginibi nahe biralu ti agalinibi mbira nahe dalo wali berelo hameledo.
JER 18:22 Waitigi karu ti ibalu uruni baba wai biragola mogo lowa gi timbuni halu dugu taraore bilo waitigi abale ibilabe. I̱naga waitigi karume i̱ minalu bole gono wiahama peda.
JER 18:23 Anduane Homogo-o tigua i̱ bole ndelalu kagoni í̠ manda bide. Anidagua bialu kago ai í̠na ti dara halu ko biyago domo wa nahabe. Tihondo keba howa tinaga waitigi karume bo biba helo helabe, lalu Yaremaiahanda lene.
JER 19:1 Anduane Homogohanda i̱hondo lalu, Yaremaia-o todobene be dindime wabini mbira í̠na yolobu yalu puwa agali ala hene miniwi maru karubi loma binigo mo miaga maru karubi ti í̠ baba mandagi ma lalu
JER 19:2 Hinomo dindi biagoha pole hariga Yarusaleme tanoha howa tagira piaga pabe kawareni panga mini Todobene Be Dindime Wabini Pambu Lene laga ngago tagira pilimu. Ani puwa í̠na bi ogodagua lalu lamibe.
JER 19:3 Yuda wali agalirunaga kini kamirubi Yarusaleme wali agali kamirubi tí bibahendeme bi o larogo hale hadaba. I̱ Anduane Homogo Hongo Haiheore Isaraele wali agali tínaga Ngode Datagaliwabe i̱ni kogome bi henene larogo. Mani tí dalu ogoria mo ko holene timbuni mbira ibilolebero. Ani ibiledogola wali agali mbirale ogoni ani ibilaya larane hale hararume mogo taraore lolebira.
JER 19:4 Wali agali tigua i̱hondo erembira ngialu puwa dama karunaga dabuni ira hagua ngabiaga inisenesiru lomabu delalu kagonaga anidagua bulebero. Wali agali tinibi Yudanaga kiniru tibi tinaga mamali henerubi bibahendeoreme bamba dama uruni manda nabiore hene. Anigo áyu dege howa tigua dama tara tararuhondo bi pupu wialu kagome dindi ogo i̱naga deni mo ko halu dodohe ngelayada. Irane nawini ngagoria tigua agali mende homelo bameore bo wahalu kagonaga darama dindi ogoria odo paya bidagoni.
JER 19:5 Dama mitangi bialu gime wabini mini Balahondo bi pupu wulenaga anda bia howa anda uruniha howa ti waneiginiru Bala odagonihondo loma bialu irani bo delaga ka. Anigo i̱naga mana ogoni ndo i̱na tihondo ogonidagua bilimu nale. Ti mana ogonidagua bulene nga lalubi mbira i̱naga mini ti natalebumi.
JER 19:6 Anigo ai Anduane Homogo i̱nimeore larogo maniore dindi ogoni mini Tobede lalubi dindi ulini Hinomo lalubi mbiralime nalalu holebira. Dindi ogoni mini Wali Agali Dewaore Bo Wahene lalu lolebira.
JER 19:7 Dindi ogoniha Yuda wali agalirubi Yarusaleme wali agalirubi tigua mbirale tara tara bulene para ho ngago i̱na hapai halu mo waharogola tigua mbira bibe nahe holebira. Waitigi agali karu ibalu tini abale bo hilo wahai helolebero. Ani berogola tinaga tingini homa payabu ngaru nogo gabuarumebi ega bedarumebi ti tomo halu nai helo mulebero.
JER 19:8 Yarusaleme mo ko heneore wulebira. Ani ngagola wali agali dindi taraha howa ibirarume ko hiriribi uruniore Yarusalemeni tagira ibinidago hondowa hiriri halu gi taraore holebira.
JER 19:9 Waitigirume Yarusaleme wali agaliru baba wai bule howa pigane Yarusaleme tano ala ho hagira bulebira. Ani biragome Yarusaleme wali agali tininaga tomo winiru no biba howa genda timbuni yu holebira. Ani howa nolene nawidagola tininaga waneiginiru balu nolebira. Nolene nawi degedagola tini balu naga naga bulebira, laya lamibe, Anduane Homogohanda lene.
JER 19:10 Anduane Homogohanda laabo halu lalu, Yaremaia-o í̠na bi ogoni lai howa todobene be dindime wabini yidegoni agali í̠ heba ibiyaru ti handayaho kaore pambu labe.
JER 19:11 Ani pambu lowa i̱naga bi ogodagua lamibe. Anduane Homogo Hongo Haiheore kogome Yuda wali agali mo ko hai halu Yarusaleme tano todobene be pambulo waharagola lone wabibe nahe wiagadagua ngelo i̱na Yarusaleme bo gialo wahai holebero. Ani bo gialo waharogola agalime lone biadai bibe nahe wulebira. Yuda wali agali homararunaga homali Tobede dindini ngagola homenerunaga tingini au lolebe tobahe wulebira.
JER 19:12 Anduane Homogo i̱na tiga tigaore larogo dindi ogobi wali agali ogoria karuhondobi pani mialu bai holebero. Ani berogola i̱naga deni Yarusaleme dodohe ngubi Tobede dindi ale dege wulebira. Kini andagabi wali agali maru karu andagabi Yarusaleme tanoha anda bibahende karuni i̱naga deni dodohe ko hai hene dege holebira. Irane Yarusaleme wali agalirume tinaga anda dangini daligaha iraga howa yakundiruhondo mbirale lomabu mialu ira hagua ngabilonaga delaga mini inisenesiru delalu dama tara tara hearuhondo waini ibaru loma bialu odo wigi biyagonaga i̱na mo ko halu bo gialo wahai holebero, lalu Anduane Homogohanda lene.
JER 19:14 Ani langiya handala i̱na bi lamibe layadagua lamule Tobede dindi wahalu Yarusaleme dai buwa Anduane Homogonaga anda Yarusalemeha anda polene pabe panga haraba wiagoha anda puwa tamuha wali agali ngoaiho haga wiagoria pu haru. Ani pu howa wali agali bu hearuhondo bi ogodagua lamiru.
JER 19:15 Anduane Homogo Hongo Haiheore Isaraele wali agalinaga Ngode Datagaliwabehanda bi lenego languliya baya hangu hale hadaba. Ibugua lalu, Wali agali bibahende Yarusaleme tanoha kamirubi maru Yarusaleme tano kawareni ha para parabu haga kamirubi tí bibahendeme mine halu i̱naga bi mana hale nahaga kamigoni. Ani bialu kamigonaga i̱nime tí pani ngialu bo wahai holene ko hiriribi mbira yu ibule lalu lo wirugoni mo yu anda ibulebero, laya lalu Yaremaiahanda lene.
JER 20:1 Yaremaiahanda bi ogonidagua lalu heagola loma binigo mo miaga mbira ibu hale ho hene. Agali ogoni ibu Ime igini mini Pasua howa ibu Anduane Homogonaga anda handayaho haga agali haguane mbira hene.
JER 20:2 Ibugua Yaremaianaga bi hale howa agali maru bu hearuhondo lalu, Yaremaia tibume minu balu Anduane Homogonaga anda panga mbira mini Beniyamininaga Panga Daliga laga wiagoria pu senime dariba hadaba, layagola dariba hene.
JER 20:3 Ani buwa horo mendeni Pasua ibugua Yaremaia golope hayagola Yaremaiahanda ibuhondo lamialu lalu, Anduane Homogohanda í̠naga mini Pasua ndo í̠naga mini Wali Agali Bibahende Mo Gi Hai Haga wero, leda.
JER 20:4 Anduane Homogo ibunime lalu, I̱na ogodagua bulebero, leda. I̱na í̠ha ko mbira anda ibilo henge merogola anda ibirago hondowa í̠nibi í̠naga nenegeali bu karubi bibahendeme mogo lalu gi hai holeberemi. Í̠ni handayaho keore dege í̠naga nenegeali karuni waitigime ibalu tí bo wahai holebira. I̱na Yuda wali agali bibahendeore Babilono dindiha kini kagonaga giha minu ya hai holebero. Anidagua berogola ibugua maru homelo bo wahai halu maru Babilono dindiha garabayabu yalu dai bulebira.
JER 20:5 Ani bialu tinaga waitigirume tano ogoha muni ngamiruni bibahende mo yai helalu yári bayale ngamiru bibahende mo yai helalu Yuda kininaga muni yárirubi bibahende mo yai dege helolebero. Waitigi agali urunime hongo howa wai buwa ti wayali halu mbirale uruni aria mbira ibira naheore Babilono dindiha mo yalu piai holebira.
JER 20:6 Pasua-o hale harene. Í̠nibi í̠naga damene í̠ andagaha mandagi haga kamirubi tí bibahende Babilono dindiha garabayabu yalu piai holebira. Í̠na ke̱ howa bi dewa í̠naga nenegeru lamirigo ai í̠naga nenege urunibi í̠nibi tí bibahende Babilono dindiha howa homai haramigola tínaga tingini Babilono dindiha hora holebira, lalu Yaremaiahanda lene.
JER 20:7 Anduane Homogo-o i̱ í̠naga biabe biahalu ha lowa mo hondo hariya. Ani birigola i̱na nde í̠naga bi ogoni hale halu biruya. Í̠na i̱hondo hongoore harigola i̱na í̠naga bi larigo mo wahabe nahe harugoni. Anidagua birugo ai áyu wali agali bu karu bibahendeme i̱ mege bialu oba halu haabo ka.
JER 20:8 Bibahendengi í̠naga bi latagi halu koria i̱na bi hongo howa loliya ogodagua la lalu mo la hariligoni. Wai ibulebira tíha mo ko holene ibulebira loliya mo la haga í̠ kegoni. Anduane Homogo-o í̠naga bi lamerogola wali agali hale hararume i̱hondo bi koru lalu mo taga haabo haragoni.
JER 20:9 I̱na lalu, Anduane Homogo í̠ mitangi nabi waharo, lalu í̠naga minini howa i̱na bi latagi nahe yu waharogoni, laruyaguabi í̠naga bime i̱naga kabaneha ira hungu ale kikiaulo dalu haabo ka. I̱na latagi nahole lowa yu donge hole bialu koria anidagua bibe nahe i̱naga kuniha howaore hongohe datagi haragome bi nale donge habe nahe kogoni.
JER 20:10 I̱na hale haga bialu hewaria agali hearume tini dege lagalaga bialu lalu, Yaremaia ibu agali bi laga howa ibugua bi laragome wali agali bibahende o karu mo gi hai halu kago agali ogoni godi deni íbu helami̱ya abaleore ibilo, laga biya. Agali i̱naga nenege bu henerumebi mo ko holene mbira i̱ha ibalu i̱ bope halu hengedo wahelo hamelowa handaya ho ka. Tigua lalu, Iname Yaremaia mo hondo howa ibugua mana liahe biyagonaga pai pai biadai bimabe, lalu kagoni.
JER 20:11 Anduane Homogo-o ainde í̠ ami agali hongohe mbira haradagua buwa í̠na i̱ mo wiaga kegoni. Anidagua kegola mbirale ko uruni tiniha dai biragola tigua i̱ mo ko habe nahe holebira. Anidagua birago hondowa tini taga timbuniore holebira. Taga holene ogoni ereba nahe tiha wiaabo holebira.
JER 20:12 Anduane Homogo Hongo Haiheore kego í̠na wali agali bibahendenaga miniha wu karuni ogoale nga lo manda biai howa godini íbu karu ti tigabi dabolene ngadaguaore dabaga kegoni. Ani kegonigo áyu i̱na i̱naga genda ogo í̠naga giha ya harogoni. Wali agali o karume mine halu ko biyagonaga pani í̠na merego hondole hameledo.
JER 20:13 Anduane Homogohanda wali agali ko biaga karume burupale yagibano karu bo waholilono ibunime biamogo bialu haga kagonaga ina turu howa ibunaga mini yaraga halu iba gana lama.
JER 20:14 I̱ ai̱yahanda horo i̱ taba henenedangi Anduane Homogohanda i̱ mo ko henedale nde karulapedale. Ibugua horo ogoningi mbirale tara bayale mbira binidale nde ogoni bayaleore kaleda.
JER 20:15 Horo ogoningi agali mbirame i̱ taba hanaya lama i̱ aba turu helo lamule puwa lalu, Í̠ oneme igiri taba hanayago ai í̠ igini mbira ka, lalu lamiyagome agali ogoniore i̱ aba mo turu hole napelo Anduane Homogohanda bo wahenedale nde karulapedale.
JER 20:16 Anduane Homogohanda tano timbuni wiaru bo gialo wahayadagua agali ogoni mo ko halu bo wahelo hameledo. Anduane Homogohanda tano uruni dara emeneorebi naheore hene. Egabiore laragola wali agali tano uruniha karume waitigirume abale ibalu ho paya biraria handalu mogo lowa gi halu dugu timbuni bialu yiyi laragola agali ogonime hale helo hameledo. Horombe ni hanuni haragola waitigi biarume tanoha wai bule anda ibalu howa wai huaro lalu kagola ibu hale helo hameledogoni.
JER 20:17 Ainde agali ogoni ibugua i̱ ai̱ya tombeha berewaore dege ba nabinida. Ani binidale nde i̱ ai̱yanaga tombe i̱naga homali bu hinalu ai̱ya tombehe biraabo kagola i̱ ai̱ya ibu gali bere dege biraabo kaleda.
JER 20:18 I̱ ai̱ya tombeha biraabo hoa nale tagira ibirugome genda tara tara wiaru yu howa horo bibahendengi taga pani naabo halu homolobodago aginagadabe, lalu Yaremaiahanda lene.
JER 21:1 Kini Sedegaiahanda agali kirali Yaremaia i̱ hewaria pudaba leneyago labo ibiyagola ogoningi Anduane Homogohanda i̱hondo bi langiya. Agali kirali ogonilabo Malagia igini Pasuru Masea igini loma binigo mo miaga Sebanaiala libugua ibuwa i̱hondo langialu lalu,
JER 21:2 Babilononaga Kini Nebugadenesahanda ina baba wai bialu kago ai Anduane Homogohanda ina biamogo bilo í̠na inanaga bi ibuhondo lahabe. Nebugadenesahanda ina baba wai nabi wahalu pelonaga Anduane Homogohanda bamba ina mamaliru biamogo bialu agalime nabiaga ale mbira biniyadagua buluba badago ani bilo í̠na Anduane Homogohondo bi lamibe, laya lene.
JER 21:3 Ani layagola i̱na agali kirali biago labohondo lamialu lalu, Libugua Kini Sedegaiahondo bi ogodagua lalibu.
JER 21:4 Anduane Homogo Isaraele wali agalinaga Ngode Datagaliwabe kago ibugua bi ogodagua laya, Áyu Babilono kini kagome ibunaga ami agali haru halu ibuwa Yarusaleme tano ho hagira bidagoni. Ani biragola tí Isaraele wali agalinaga ami agalime wai bule tanoha howa tagira pialu karia i̱na Babilonoha howa Kaledeali bu karume tí Isaraeleru baba wai bialu tí bope helo i̱na uruni biamogo bulebero. Ani berogola tínaga ami agali karume wai biaga danda timu yu karu yalu dai bidaba laragola tano tamuha yalu dai bulebira.
JER 21:5 I̱nime tíhondo bu miniha keba timbuniore howa tandaga ho kogo tí baba hongo howaore wai bialu pani ngialu bolebero.
JER 21:6 Wali agalibi nogo tara tara bu karubi bibahende bo wahaiore holebero. Tí kamigoha warago ko tara mbira ibilarogola ogonime tí homoleberemi.
JER 21:7 Anduane Homogo i̱na lone ladege berogo. Wali agali dewaore warago ko ogonimebi waimebi hina gari ibiragomebi tí homoleberemi. Ani bidagola mani wali agali nahome yu wahene bu karu Kini Nebugadenesa halu ibunaga ami agali bu karume ibalu Kini Sedegaia í̠bi í̠naga agali haguane bu karubi heba minu yu piai helolebero. Waitigi hiriribi urunime Isaraele wali agali bo wahai hole lo mandabu ka. Nebugadenesa ibugua bidaba lalu bi laragola ibunaga ami agali karume ayu tibu wai biagane nene gadele ngagome tí dibai holebira. Ibugua tí dara halu yupe naholebira. Tí kamiruni aria mbiraligo helo wa naholebira. I̱ Anduane Homogo i̱na bi lo ledogoniore, laya lene.
JER 21:8 Anduane Homogohanda laabo halu lalu, Yaremaia í̠na i̱naga bi ogo wali agali lamibe. Anduane Homogo i̱na bi ogodagua laro. Áyu tíhondo hariga kira tí dabolenaga mo walia haro. Hariga mbirago tí homa nabi bayale holene nga. Mendegoha tí homolene nga.
JER 21:9 Wali agali tano ogoniha haga karu bibahende homai holebira. Maru waitigime bo wahalu maru hina garime homalu maru warago ko mbira ibiragome homalu urunidagua bialu homai holebira. Anigo ti homa nabi holene hamelo heagua nde Babilononaga ami agali tano ho hagirabu kagoha hole tano wahalu tagira polene nga. Tagira poragola Babilono ami agali bu karume minu yania haragola ti homa nabi holebira.
JER 21:10 I̱na Yarusaleme mo ko helo yu wahalu tano ogoniore mo ko halu bo gialahole biai helo mandabu henego ko. Babilononaga kini kagome tano ogoni karulowa ibunaga ami agali karuhondo lamialu, Tano bibahende bo heda hadaba, lelo i̱na yupe holebero. I̱ Anduane Homogo i̱na bi o ledogoniore, laya.
JER 21:11 Anduane Homogohanda laabo halu lalu, Yaremaia-o í̠na Yudanaga kini kagobi ibu damene darama mbiraore bu karuhondobi ogodagua lamibe. Debidi aguanene bu kamiru tígua Anduane Homogo i̱nime bi larogo hale hadaba. Horo bibahendengi tígua godi hale halu howa bi tigatiga lolene ngadaguaore lalimu. Agali mbirame mendealinaga mbirale ngago mo page biniyagua nde anduane kago ibuni ya dai bia lalu ibu gendaho kago mo palia halimu. Anidagua nabirimiyagua nde i̱na tígua mana ko bialu kamigonaga keba timbuni halu tí pani ngialu mo ko holebero. I̱naga bu miniha keba holene ira hungu ale bialu kago mbiralime bahundia habe nahe holebira.
JER 21:13 Yarusaleme-o í̠na daligani howa handape halu dindi ulini panda panda ngaruha handa amu nana bialu í̠ ege to̱le̱ mbira daligaore wini wiradagua bide. Ani buwa Yarusaleme wali agali tígua bi ogodagua laga kami. Ina baba wai bibehe mbira ai kabe. Inanaga tano ogoha anda ibabehe mbirali ai kabe, lalu haga kami. Ani lalu kamigo Anduane Homogo i̱nimeore tíhondo henene larogo i̱na áyu í̠la waitigi harogoni.
JER 21:14 Anduane Homogo i̱na tiga tigaore larogo tígua mana ko bialu harimigonaga pani ngialu tí minu bolebero. I̱na Yarusalemeha ira hedope harogola dangiha bo dalu ira hungu timbuni kilikulu laradagua bialu Yarusalemeni kini anda kagobi anda damene bu karu bibahendebi daiore helolebero, lalu Anduane Homogohanda laya lene.
JER 22:1 Anduane Homogohanda lalu, Yaremaia í̠na Yudanaga kini kago andaga puwa
JER 22:2 ibuhondo bi agua labe, Í̠ Debidinaga aguanene howa kininaga dagiani biruwa í̠na Anduane Homogonaga bi o larogo hale habe. Kini í̠nibi í̠naga agali haguane karumebi í̠naga wali agali karumebi tí bibahendeme bi ogo hale holene nga.
JER 22:3 Anduane Homogohanda lalu, Tígua mana bayale tigabiore ngaru talialu bilimu. Agali mbirame mendealinaga mbirale ngago mo page biniyagua nde anduane kago ibunaga mbirale page binidaru yadai bialu ibu gendaho kago mo palia halimu. Waneigini ti aba homene karuhondo mana ko nabi wali dalo ti agalini homene bedaruhondobi wali agali dindi taraha howa tí baba mandagi íbu hene karuhondobi uruni mo ko nahe bayuwa helo halimu. Dindi ogoria howa tígua wali agali ko nabi karu bame homelo bo wa nahalimu.
JER 22:4 Tígua i̱naga bi larogo hale howa talialu bialu haabo harimiyagua nde mani tínaga Kini Debidi aguanene ti dege ha aribia haga bulene wulebira. Ani howa kini tini nogo hosime gililo yalu piaga mini karisini biralu nogo hosinibi biralu tano ogoninaga pabe haraba ngagoria puibu bigi bialu holebira. Ani bialu tinaga agali haguanerubi wali agali bu karubi ti kini heba puibu bigi bialu holebira.
JER 22:5 Anigo tígua i̱naga bi larogo talialu nabirimiyagua nde i̱ninaga minini howa larogo i̱na kini andaga ogoni mo ko halu bo gialabaga bulebero. I̱ Anduane Homogo i̱na bi o ledogoniore, laya lene.
JER 22:6 I̱ Anduane Homogo i̱na Yuda kini kago hameigini holebiragonaga lalu bi ogodagua laro. Kininaga hameigini í̠ bayaleore mbira ale kegoni. Í̠ baya dege lalu Gileada dindi alebi Lebanono hari alebi mbira kegoni. Anigo i̱na í̠ mo ko harogola í̠ ko ngubiore dindi ko yobi be abalu taule ngaligobi wialu wali agali lenego mbira naholebira.
JER 22:7 I̱na í̠ mo ko helo agali maru ibilolebero. Tigua ayuru yalu ibuwa í̠naga anda ira tamia kambulo mbaraleme bideru bo gialobaga bialu gabuwa irani dai helolebira.
JER 22:8 Ani bidagola mani wali agali dindi tara tara bu ngaruha howa dindi ogoriani ibalu bolangua haga bulebira. Ani ibalu tigua Yarusaleme mo ko hene ngago de hondowa tini lagalaga bialu lalu, Anduane Homogohanda tano timbuni ogoni mo ko henedago irane aginagadabe, lolebira.
JER 22:9 Ani lowa tini degedege laedene bialu lalu, Mbirale o biyadagoni irane wali agali uruni tigua habo nalolene bi tinaga Ngode Datagaliwabela lowinigo wahalu puwa dama mitangi bialu mbirale gime wabini wiaruhondo bi pupu wima piyagonaga mo ko henego nga lolebira, laya lene.
JER 22:10 Yuda wali agaliru-o Kini Yosaia homayago tígua ibu dara howa dugu nabilimu. Tígua ibu igini Kini Yoahasanaga dara howa dugu timbuni bulene nga. Yoahasa ibu ina kamagoria howa tigua haru piyago ibu lone dai nabulebira. Ibugua ibuninaga dindi lone nahondolebiraore.
JER 22:11 Yoahasa ibu mini mende Sulumu henegome ibu aba Yosaia henegoria ibu kini ha aribia hene. Anduane Homogohanda Yoahasa mitangi bialu bi mbira ogodagua lene. Yoahasa ibu Yarusaleme yu wahalu puwa lone dai nabulebira.
JER 22:12 Waitigi bu hearume dindi taraha minu garabayabu yalu piyagoha halu homolebira. Ibuni dindi ogoria lone nahondolebiraore, laya lene.
JER 22:13 Anduane Homogohanda laabo halu lalu, Agali mbiragome ibuni hangu mitangi bialu maru mo hondo howa mana tigabi ndo bialu anda timbuniore hobane dewa daligahayagi haga hagabi bu helayago ibuniha genda timbuniore wulebira. Ibunaga damene bu hearume anda ogoni bia hadaba lowa ibugua tihondo yolobi mbira namiya. Agali urunime biabe bameore bu wahalu piya.
JER 22:14 Ibugua bi ogodagua laga biya. Ai i̱ninaga anda timbuniore bu helolebero. Anda ogoni daligaha hobane dewa helolebero, laya. Ibugua wá anda ibilonaga diri tombelo wigi bialu anda hái ira tamia bayaleore wiaru bogo mbaralaga buwa hai para haya. Anda biago mo yári bia halu peni daramabime hiraya. Ani biyagonaga ibuha genda timbuniore wulebira.
JER 22:15 Kini-o í̠naga ira tamia bogo mbaralaga biniru dewaore mo ngelowa kegome í̠ mo kini bayale helenego kobe toba ho kebe. Í̠ aba ibu iba hinaru karulape nalu turu ho haga hene ndobe. Ibugua wali agalihondo mana bayale tigabi dege bialu hayagome ibuni holene bayale wini.
JER 22:16 Ibugua wali agali yagibano hearunaga godi hale halu manani tigabi dabolene wiagoria howa mo tale biaga henegome wali agali bayaleore hai hene. Anduane Homogo i̱naore tigatiga larogo mbirali i̱ni kogo baya hangu mandabi kagome biagane mana ngago ogoniore.
JER 22:17 Anigo í̠na í̠ni hangu mitangi halu mbirale ngaru dimagoli halubi mbirale uruni mulenaga ke̱ halu ohowa biagabi ke. Mbirali ko mbira nabi bame kago í̠na homelo bo wahaga kegoni. Wali agali bu karu bope halu mo ko haabo haga mbira í̠ kegoni ndobe. I̱ Anduane Homogo i̱na bi o ledogoniore.
JER 22:18 Irane anidagua bialu kegome Anduane Homogohanda Yosaia igini Yuda wali agalinaga Kini Yahoiagimi mitangi bialu lalu, Yudanaga Kini Yahoiagimi homarangi wali agali mbirame dara howa lalu, Ai i̱ hameneore-o i̱ mbaliniore-o, lalu mbirame dugu bialu naholebira. Mbiralime, I̱naga agali haguane-o i̱naga kini-o, lalubi dugu nabulebiraore.
JER 22:19 Agalime nogo dongi homaragola mo wahagadagua ibu homaragola ibunaga tingini bameore mo waholebira. Tigua Yarusaleme tanonaga pabe tagirahayagi ibunaga tingini gililo yalu tagira puwa mo waholebira, laya, lene.
JER 22:20 Anduane Homogohanda lalu, Yarusaleme í̠na Lebanononaga hari ngaruha irigi howa bi dalimuore labe. Basana dindinaga hari ngagoria í̠naga bi hale helobi Abariminaga hari bu ngagoria howabi í̠na dara halu kiabu dugu hongo howa bialu habe. Agali í̠naga nenege bu hayaruni homai hayagonaga ani bibe.
JER 22:21 Abale í̠ bayale howa mbirale dewa wu hengi i̱na í̠hondo bi langirugoni. I̱naga bi laruruni í̠na hale habe manga hari. Bamba í̠ igiri daliahe hengi howa i̱naga bi larogo mo wahaabo haga harigo áyubi í̠na anidagua biaabo haga kegonida.
JER 22:22 Waitigi agaliru puyabu ale ibalu í̠naga agali haguane karu puloyu piai holebira. Waitigi agalirume í̠naga nenege bu karu dindi kaundiaha garabayabu yalu piai holebira. Í̠nime mana ko biaga wirigo mitangi budai bialu tagaho holebere.
JER 22:23 Tigua Lebanononi ira tamia bayale bu hearu aria dibu pelowa anda bia hayagola í̠ bayaleore ko manda bu kebe. Tandaga hondolene timbuniore walime gali taba hanalu biruwa tandaga handalu biragagobi í̠na ga̱ lalu dugu bialu holebere, laya lene.
JER 22:24 I̱ Anduane Homogo haluhe haabo haga kogome Yudanaga Kini Yahoiagimi igini Yahoiagini í̠hondo bi tigatiga mbira langero. Í̠ baya taraore howa i̱naga gi tigayaginaga hondone magi i̱ gubalini haga ale keyaguabi i̱na nde í̠ yu wahole kogoni.
JER 22:25 Waitigi agalirume í̠ mo ko hole manda biragola ti hondowa gi hariliruhondo i̱na í̠ ti giha minu ya holebero. Agali uruni Babilononaga Kini Nebugadenesa halu ibunaga ami agali biaru tigua í̠ bo wahole karu tihondo i̱na í̠ minu mulebero.
JER 22:26 Í̠bi í̠ ai̱yabi libu haru dindi tara ngagoha minu yu pu waholebero. Dindi ogoni libu dalu ndogo libu dindi ogoniha halu homoleberebi.
JER 22:27 Libugua libuni dindi ogoria lone hondole dai bulene hame timbuni lo ha holeberebigo nde dai bibe naheore wulebira, lene.
JER 22:28 Yaremaiahanda lalu, Kini Yahoiagini ogoni ibu iba be dindime wabinigo pambu lene wali agalime hame nale ngaligobi hayadabe. Anduane Homogo ibugua Yahoiagini halu ibu one waneiginiru dindi tara ti manda nabini ngagoha pelolebero layadago irane agibe.
JER 22:29 Isaraelenaga dindi-o Isaraelenaga dindi-o í̠na Anduane Homogonaga bi larago bayuwaore hale harene.
JER 22:30 Anduane Homogohanda ogodagua lara. Agali ogoni ibu waneigini mbira hono wia nabi daloali ale ka lalu gilibu wibe. Ibugua birago damene bibahende bayale mbira naholebira. Ibu igini bu karu aria mbirame ibunaga henge mialu kini ha aribia halu Kini Debidinaga biragane dagia ngagoria bira aribia howa Isaraele dindi handayaho howa ha aribia haru naholebira. I̱ Anduane Homogo i̱na bi o ledogoniore, laya lalu, Yaremaiahanda lene.
JER 23:1 Anduane Homogohanda bi ogodagua laya, Agali haguane bu kamiruni tígua i̱naga wali agali karu mo ko halu kamigonaga tíha genda timbuniore ibulebira. Tí nogo sibi baya hangu hinu haga agali bayale ndo howa bo talia togo laga kamigoni.
JER 23:2 Anduane Homogo Isaraele wali agalirunaga Ngode Datagaliwabe i̱nime i̱naga wali agaliru haru haga agali haguane kamiru tíhondo bi ogo larogo. Tígua i̱naga nogo sibi bu hearu talia togo lalu baya hangu handayaho naharimi. Ani birimigonaga Anduane Homogo i̱nime heneneore bulego larogo. Tígua mana liahe birimigonaga i̱na mana lalu pani nalimulo handayaho holebero.
JER 23:3 Ani bialu i̱naga nogo sibiru i̱nime dindi tara taraha talia togo laruruni bibahende lone mo mogo bialu haru dai biai howa tini haga pabeha helolebero. Heledogola tigua waneiginiru dewaore hono wialu ho dame bulebira.
JER 23:4 Ani kagola Anduane Homogo i̱nime ti haru helo agali haguane dabo helaga berogola tigua haru holebira. Ani kagola nogo sibiru ti gi holene mbira nawi howa hada payabu holebira. Ti aria mbira pu ereba naholebira. I̱ Anduane Homogo i̱na bi o ledogoniore, lene.
JER 23:5 Anduane Homogo i̱nime larogo. Ira dibini tene kagoria dongoria bialu anda hagadagua mani i̱na agali bayaleore mbira Kini Debidinaga aguaneneme hondo helole horo pongo bo winigo ngelo ko. Agali ogoni ibu mini tigabi mana bayale bulene ngagonaga haru haga kini holebira. Ani howa ibugua wali agali dindi bibahendeha karuhondo mana bayale dege bialu haabo holebira.
JER 23:6 Agali ogoni ibalu ibu kini kangi Yuda Isaraelebi bibahende genda mbira nawi bayale dege holebira. Tigua lalu, Kini ogoni ibunaga mini ogo Anduane Homogo Ibu Inanaga Mini Tigabi Wulene Teneore Ka, lolebira.
JER 23:7 Anduane Homogo i̱nime larogo, I̱na wali agali dindi ogoha heneru bo batagi haruruni lone haru dai bulenaga horo mbira pongo bo winigo ngeledo. Horo ogoningi i̱na ti lone haru dai bialu tininaga dindi ogoria helarogola bayuwa turu hagabu holebira. Tigua tinaga bi larago heneneore lowa mo hongo halu ogodagua laga, Heneneore Anduane Homogo haluhe kago i̱na Iyibi dindiha howa haru tagira ibiyagonaga minini howa larogoni, laga heneya. Ai ti haru halu dai berogola tigua bi lo aribia halu lalu, Heneneore Anduane Homogo haluhe kago ibunaga minini heneneore larogo. Ibugua ina Isaraele wali agali uyurayagi howabi dindi tara taraha howa abale bo talia togo layaru lone inane dindiore wirimagoria haru dai biragonida lolebira, lalu Anduane Homogohanda lene.
JER 23:9 Yaremaia i̱na lalu, Agali bi mana henene ngadagua ndo latagi haga karuni mitangi bialu i̱naga miniha gi timbuni howa duru lalu kogoni. I̱na Anduane Homogo ibunaga bi mana tigabi bayaleore ngago baya hangu manda biai howa kogome i̱ agali lulu iba dewa nowa luluyu ibagabu hagadagua kogoni.
JER 23:10 Yuda wali agali dindi ogoriani karu tigua Anduane Homogo yu wahalu onene agalini karume tinaga one agaliniru yu wahowa tini bame kayu yama ibaga biagadagua bialu ka. Ani bialu kagome Anduane Homogohanda bi layago mitangi bialu koria dindi ogo mo ko haragoni. Dangi dataniru bibahende bu karuni gau lai halu dindi ogo hangume kiabu dugu bialu kagoni. Wali agali bu karume hariga tiga nabi ngagoha pupebe bialu howa mana ko ngubi ngaru hangu mo tene howa biaabo halu kagoni, laru.
JER 23:11 Ani larugola Anduane Homogohanda lalu, Loma biniru mo miaga karubi i̱naga bi mana latagi haga karubi ti bibahendeme i̱ manda nabi karume biagadagua dege bialu kagoni. Ti i̱naga andaha biabe bialu ha howa dege mana ko ngaruni bule gi nahe elahe howa bialu kagoni.
JER 23:12 Ani bialu kagonigo ai ti hariga pialu karuni i̱na mo gondola holebero. Ani buwa i̱na ti arumaha pelo he̱lape harogola ti pilolebira. I̱nime ti mo ko holene horo pongo bo winigo ngeledogo horo ogoni tagira ibiragola i̱na ti mo ko howaore bole ngo. I̱ Anduane Homogo i̱na bi o ledogoniore, lene.
JER 23:13 Ibugua laabo halu lalu, Samariaha bi mana latagi haga agali hearume bamba mana ko ogodagua bialu hearia handaru. Tigua dama hearu mitangi bialu bi pupu wule gime wabini Balanaga minini mbiwia halu howa i̱naga Isaraele wali agali heneru hariga ko ogoniha haru piai haya.
JER 23:14 Anigo i̱na Yarusalemeha bi mana latagi haga karume mana koore ngubi nabibehe ngaru bialu heane handaru. Tigua wali agali dabu binigonaga mana pugualu ke̱ dewa halu ka. Maru karume mana ko ngaru bilonaga tigua mo hongo haga ka. Mbiraorelimebi mana ko uruni erembira mialu pubagi nahe bibahendeme biai haga ka. Yarusaleme wali agali koore Sodomo Gomorala wali agali henegobi kane hondo ko.
JER 23:15 Anigo Anduane Homogo Hongo Haiheore kogo i̱na bi mana latagi haga Yarusalemeni karu uruni mitangi bialu bi ogodagua laro. I̱na tiha tandaga nolene timbuniore ibilolebero. Tandaga ogoni tomo mbirale nabe nahe kaubi alebi iba ko tomia binigobi nelo mo nela holebero. Ani buleberogo irane bi latagi haga urunime ti Anduane Homogo manda nabi howa bialu hagadagua bialu wali agali dewaore ti talima pelo biawai hayagola mana ko ogoni dindi bibahendeha biame hayagonaga i̱na ani bulebero, lalu Anduane Homogohanda laya, lalu Yaremaia ibugua lene.
JER 23:16 Anduane Homogo Hongo Haiheore kago ibugua Yarusaleme wali agaliruhondo lamialu lalu, Bi mana latagi haga karume mbiwia halu bi larago hale nahalimu. Urunime tí mo hondo howa ke̱ halu tí bayale holeberemi lolebira. Tigua de gandeba hendene tingi howa tininaga miniha winiru dege latagi haga ka. Tigua bi uruni latagi helo i̱na nalami ko.
JER 23:17 Agali urunime ti mine howa wali agali i̱naga bi mo wahalu karuhondo ke̱ howa lalu, Anduane Homogo ibugua tí bayale haabo holeberemi, laya lalu laga bialu ka. Wali agalirume mine howa tinime hameleda ale bialu haga karu tihondo bi mana latagi haga biaru tigua mbiwia halu lalu, Mo ko holene mbira tíha nawulebira, lalu haga ka laya, lene.
JER 23:18 Ani layagola Yaremaia i̱na lalu, Bi mana latagi halu mbiwia haga agali biaruni aria mbiralime Anduane Homogo ibugua ogo ale bule lomanda bu kago ti namandabi ka. Ti mbiraoreli hangumebi Anduane Homogonaga bi larago hale hene nahe.
JER 23:19 Ai hale hadaba laro. Anduane Homogonaga lembo holene ngagome puyabu iba dalu heba ibagadagua daliga howa dalialu puyabu timbuniore humbirini wai ibiradagua bialu agali ko biaga uruninaga embone dambigi bulebira.
JER 23:20 Anduane Homogohanda keba haho ngane mbirale bule mitangi biyaruni biaiore halu waholebira. Maha wali agali tigua mbirale uruni áyu langerogo wále howa manda biai holebira laro, lalu Yaremaiahanda lene.
JER 23:21 Anduane Homogohanda lone lalu, I̱na bi mana latagi haga agali uruni pudaba nalewaore tinime abale porabupe halu bi latagi hole piya. I̱na tihondo bi ogo lalimu lalu lamia nabiwaore tinime i̱naga minini howa mbiwia halu mani bulebiragonaga bi latagi haya.
JER 23:22 Ti ibuwa i̱naga miniha mitangi bidodagua manda buwa lamidale nde tigua i̱naga wali agali íbu ngoai halu i̱naga bi mana heneneore ngago tihondo lamule pedale. Ani lamidale wali agali uruni tigua nde hariga ko ngagoha pupebe bialu karuni wahalu beregedalu mana ko ngaru bialu karunibi wahai kale.
JER 23:23 Anduane Homogo i̱na tíhondo hale harogo. Tígua manda bialu kamiria i̱ dindi mbiraore hangunaga Ngode Datagaliwabe kabe tobaho kamibe. Ani ndoyago i̱ dindi bibahendeha haame howa Ngode Datagaliwabe kogoni. I̱ degeme kawarebi kaundiahabi haga ko.
JER 23:24 Agali mbira handabe nahe ha do heagua Anduane Homogo i̱na handabe nahe kobe. I̱ Anduane Homogoore howa dindiha harihabi haame kogome ha do karuni handa walia hai holebero.
JER 23:25 Agali ke̱ howa mbiwia haga karuni tigua ke̱ howa i̱naga minini howa latagi halu hayaruni hale harugo ai tigua lalu, Emaga mbira handarugo Anduane Homogohanda hondo ngiya, laga biaga ka.
JER 23:26 Ainde agali uruni tigua wali agalihondo bi henene ngadagua ndo lamiaga kago horo agongi mini beregedalu waholobadabe.
JER 23:27 Tini lomanda bialu iname emaga uruni wali agalihondo lamirimayagua nde bamba tinaga mamalirume i̱ yu wahalu dama mitangi bialu gime wabini Balahondo bi pupu wialu henedagua dege áyubi nde i̱naga wali agalirume i̱ embeda halu pelo tigua ani bialu kagoni.
JER 23:28 Anduane Homogo i̱na heneneore larogo. Mbiwia haga karume emaga mbira handayagua nde bame emaga handayago latagi holene nga. Ai i̱na agali mbiraligohondo i̱naga bi mana latagi helonaga lamiruyagua nde ibugua i̱naga bi ogoni tigatiga latagi holene nga. I̱naga bi ogoni tomo nolene widi lini bayaleore ngaligobi nga. Agali mbiwia haga uruninaga bi bame widi puni ale nga.
JER 23:29 Anduane Homogo i̱nime bi heneneore larogo. I̱naga bi ogoni hongoheore ira hungu alebi ege to̱le̱ timbuni hari neneha ngaruni bo podobaga biaga hama timbuni wiagagobi nga.
JER 23:30 Anigo hale hadaba. Anduane Homogo i̱nime tigatigaore larogo. Mbiwia halu i̱naga bi mana latagi haga ko lalu karuni tigua i̱naga bi henene ndo lalu ka. Agali karunaga bi mo pagebu yu howa lalu ka.
JER 23:31 Heneneore larogo agali mana urunidagua biaga karuni tigua lalu bi ogoni Anduane Homogonaga larama lowa ke̱ haga karuni baba i̱ni waitigi ho kogoni ndobe.
JER 23:32 Agali uruni tigua emaga nagaloneru Anduane Homogonaga bi ogoni lalu ke̱ howa i̱naga wali agali karuhondo latagi haga bu karuni Anduane Homogo i̱ ti baba waitigi ho kogoni. Tigua ke̱ howa bi tara tara dewaore lalu kagome i̱naga wali agali heneru kaundiaha haru pu tara haya. I̱na tihondo bi ogoni latagi hole pudaba nale. Anigome tigua wali agali uruni biamogo nabiaga ka. I̱ Anduane Homogo i̱na bi o ledogoniore, laya lene.
JER 23:33 Anduane Homogohanda Yaremaia i̱hondo lalu, Wali agali mbiramebi i̱naga bi mana latagi haga mbiramebi loma binigo mo miaga mbiramebi í̠hondo hale halu lalu, Anduane Homogohanda bi gendabi mbira í̠hondo layabe be nalebe, laragola í̠na tihondo bi ogodagua lamibe. Tígua Anduane Homogo i̱hondo genda mo ngialu kamigoni. Ani bialu kamigonaga i̱na tí bo batagi holebero, lalu lamibe.
JER 23:34 I̱naga bi mana latagi haga mbirameyaguabi loma binigo mo miaga mbirameyaguabi agali damene karu aria mbirameyaguabi bi mbira lalu, Anduane Homogonaga bi ogoni gendabioreda layagua agali ogoni ibunibi ibu damene bibahende karubi mana lalu bo waholebero.
JER 23:35 Tígua tínaga nenegebi tí hamene karu bababi bi lalu howa Anduane Homogohanda bi agua ladai biyabe lalu hale haga bilimu.
JER 23:36 Anigo tígua Anduane Homogonaga bi ogoni gendabida lalubi mbira nalalimu. Tínaga bime dege tíni mo genda haga kami. Anduane Homogo Hongo Haiheore i̱ Ngode Datagaliwabe haluhe kogome bi larogo tínime mo libilaba laga kami.
JER 23:37 Agali mbirame bi mana latagi haga karuhondo bi mbira hale hoa biyagua nde ogodagua lolene nga. Anduane Homogohanda ladai agua biyabe lariyaguabi ndo Anduane Homogohanda bi agua layabe lolenebi nga.
JER 23:38 Anigo tígua lalu, Anduane Homogonaga bi gendabioreya, larimiyagua i̱nime tíhondo heneneore larogo. Tígua bi ogonidagua lalu langirugo hale nahe tingi howa lone Anduane Homogonaga bi gendabioreya larimidago mine harimida.
JER 23:39 Ai tigatigaore larogo bi anidagua laga karuni heneneore i̱ni kogoria nahelo dindi kaundiaha bo pelolebero. I̱na tínaga mamaliruhondobi tínihondobi dindi bamba ngini biago heba mo waholebero.
JER 23:40 Ani berogome i̱na tí mo taga harogola tíha taga holene wiaabo kagola tígua embeda naholeberemi, lalu Anduane Homogohanda lene.
JER 24:1 Kini Nebugadenesahanda Yarusaleme bo haealabaga biai halu Yuda wali agali bu hearu Babilonoha garabaya haru piai hene. Ibugua Kini Yahoiagimi igini Kini Yahoiagini ibu mini mende Konia henegobi Yuda dindiha agali haguane hearubi agali mbirale tara tara wabiaga mandabi hearubi haru pene. Ani biyagola mani howa Anduane Homogohanda de gandeba mbira i̱ Yaremaiahondo walia haya. Ani walia hayagola i̱na handalu hewaria mbasigedi nu kiraha poge lini dewaore do henearia handaru. Mbasigedi nu kira ogonilabo Anduane Homogonaga anda panga haraba wiagoria winiya.
JER 24:2 Mbasigedi nu mbiragoha poge lini bayaleore pigane denego boga biragola do wiagagobi henearia handaru. Nu mende wiagoha poge lini ko tagaraga mbiralime nabe nahe hono wiaria handaru.
JER 24:3 Ani hondo hewagola Anduane Homogo ibugua i̱hondo langialu lalu, Yaremaia-o í̠na mbira agi hendedebe, laya. Ani layagola i̱na ibuhondo ladai bialu lalu, Nuha poge lini do hono ngaria hendedo. Poge lini maru baya taraore do wialu maru tagaraga ko ngubi mbiralime nabe naheore do ngane hendedo, laru.
JER 24:4 Ani larugola Anduane Homogo ibugua i̱hondo bi mende lalu,
JER 24:5 I̱ Anduane Homogo Isaraele wali agalirunaga Ngode Datagaliwabe kogome i̱na Yuda wali agali maru bo taliatagi halu dindi tara Babilono dindiha garabayabu yalu pu helenego i̱ni mitangi bialu koria wali agali uruni ti poge lini bayale do wiyagobi ka.
JER 24:6 Ani kagola i̱na ti baya hanguore handayaho howa ti biamogo bialu tihondo bayale dege bialu haabo holebero. Ani bialu ti dindi ogoriani helo lone haru dai bulebero. Haru dai buwa i̱na ti hengedape nahe baya hangu mo hongo halu holebero. I̱na ti bayale anda helo hangaradagua bialu lone dugu wa naholebero.
JER 24:7 Ani helowa i̱na tinaga bu miniha mini gahenge mo wia harogola tigua i̱niore Anduane Homogo henedalo manda bulebira. Ani manda buwa tigua i̱niha mini hanaho howa i̱ koria dai bialu ti i̱naga wali agaliore howa i̱ nde tinaga Ngode Datagaliwabe holebero.
JER 24:8 Ani buwa Anduane Homogo i̱na Yudanaga Kini Sedegaia halu ibu damene karubi ibunaga agali haguane bu karubi Yarusaleme wali agali tini dalu ogoniha karubi maru Iyibi dindiha pu karubi ti poge lini tagaraga ko ngaru agalime nabe nahedagola mo wahagadagua i̱na ti bibahende wahai holebero.
JER 24:9 Wali agali dindi tara tarani padarume Yuda wali agaliruhondo i̱na mbirale uruni biya larane hale howa ti mogo timbuni lo holebira. Wali agali uruni maru waitigime bo wahalu maru hina garime homalu maru warago ko tara tara ngarume balu homelolebira. Ani biragola i̱na ti minalu dindi tara tara ngaruha purogo lelolebero. Anidagua bialu i̱na ti dindi tinaga mamalirubi tinibi helo mirugoria nahelo bo talia togolai holebero. Wali agali dindi tara tara Yuda wali agali pu helaga berogoha hene dindi aba bu karume Yuda wali agali mege tara bialu bi koru lalu ti hondo oba halu holebira. Wali agali tara uruni tigua mendeali kagohondo ha halu howa lalu, Yuda wali agali mo ko hayadagua í̠ ko habe, laga bulebira, lalu Anduane Homogohanda laya lene.
JER 25:1 Yosaia igini Yahoiagimi ibu Yudanaga kini mali tebira henego mali mane hayagola Anduane Homogohanda bi mbira Yuda wali agalihondo lole manda buwa bi ogoni i̱ Yaremaiahondo langini. Mali ogoningi Babilonoha Nebugadenesa ibu kini pigane hene.
JER 25:2 Anduane Homogonaga bi mana latagi haga Yaremaia i̱hondo bi ogo langiyago i̱na Yuda wali agalibi Yarusaleme wali agalibi ti bibahende hale hai helo tihondo latagi halu haru. I̱na tihondo lamialu lalu,
JER 25:3 Amono igini Yosaia ibu Yudanaga kini mali haleria (13) hene lowa hama ibalu mali áyu kamago pira kirani tebira (23) kama. Mali pira kirani tebira (23) uruniha howa Anduane Homogohanda bi mana langiyago i̱na tí hale halimulo latagi halu haabo harugo nde tígua hale habe mangaho harimigoni ndobe.
JER 25:4 Anduane Homogohanda ibunaga bi mana latagi haga agali dewaore ibilaga biyarume bi latagi hayagola tígua mine halu bi hale nahe haabo harimi.
JER 25:5 Anduane Homogonaga bi mana latagi haga agali uruni tigua lalu, Wali agali tí hangu hangume bu mini beregedalu hariga koha pialu kamigo wahalu mana ko bialu kamirubi wahai halimu. Tígua mana ko uruni wahai harimiyagua nde dindi ogoni Isaraele wali agali tínagaore wiaabo helo bamba Anduane Homogohanda tí mamaliruhondo mini ngagoria bayale haabo halimulo helolebira.
JER 25:6 Tígua dama mitangi bialu mbirale gime wabini ngaru talima pialu urunialehondo bi pupu wialu uruninaga biabe biahalu holene nawiore. Tígua tíninaga gime mbirale mbira wabirimigome Anduane Homogo mo keba nahalimu. Tígua Anduane Homogonaga bi layago talialu bialu kamidale nde ibugua tíha ko holene naibile kale, lene.
JER 25:7 Anduane Homogo ibugua tíhondo ogodagua lara. Tígua i̱naga bi hale nahe howa dama mitangi bialu bi pupu wulenaga mbirale tínaga gime wabirimirume i̱ mo keba harimi. Mana ogonidagua bialu harimigome tíha ko holene ogoni tínime mo wirimigoni, lara laya.
JER 25:8 Anidagua birimigome Anduane Homogo Hongo Haiheore kago ibugua tíhondo lalu, Tígua i̱naga bi mana talialu nabi harimigonaga
JER 25:9 i̱na agali dindi abene uyurahayagi padaru bibahende olai halu i̱naga biabe biahaga agali Babilononaga Kini Nebugadenesa kago ibubi ola dege bulebero. Ani olarogola agali uruni tigua dindi ogonibi wali agali padarubi dindi maru kaware palia paraho padarubi bibahendeore mo ko hai helo ibilolebero. Dindi ogoni mo ko haiore halu labuore ngelonaga bibahendeore bo gialo wahai hole agali dindi abene uyurahayagi karu ibilolebero. Anidagua dindi labu ho ngaria hondowa wali agali tara bu karume ti mogo timbuniore lo holebira. I̱ Anduane Homogo i̱na bi o ledogoniore, lene.
JER 25:10 I̱na anidagua bialu bu miniha dungulo holenebi turuho holenebi agali karume wali dabu bulene manabi bibahende biba hai helolebero. Agali marume widi dambialu ege to̱le̱ mo beregedaga ngago mo beregedaga bialu widi lini tilitola lalu dambiaga agali mbira nahedagola biabe ogoni biaga wiyago nabi bame wulebira. Ani bialu dindi uruniha weli nawiyagola tinaga wá holene halebi mbira nadolebira.
JER 25:11 Dindi ogoni bibahende bo labu halu mo ko hai hene bameore wulebira. Ani bialu wali agali karu tigua Babilono kini kagonaga garabaya biabe ale biahalu mali pira karia (70) haabo holebira.
JER 25:12 Mali pira karia uruni piai kagola Anduane Homogo i̱na Babilono dindinaga kini kagobi ibunaga wali agali bu karubi bibahende tigua mana ko biyagonaga pani nelo mulebero. Anidagua bialu Babilono dindi timbuni Kaladia dindiha ngago mo ko howa bo labu harogola dindi bameore wiaabo hene wulebira.
JER 25:13 I̱na Babilono dindibi kinibi pani nelo dindi bibahendeha mo ko holene ibilolebero lalu Yaremaia lamirugo ibugua latagi hai hayaruni bibahende mbuga ogoha nga.
JER 25:14 I̱na Babilono dindiha bu karume ko bialu hayarunaga yolo pani nelo mulebero. Kini hongohe dindi tara taraha bu karume ibalu Babilono bo haealabaga bialu wali agali garabaya biabe ale biahalu helolebira, laya.
JER 25:15 Anduane Homogo Isaraelenaga Ngode Datagaliwabe ibugua i̱hondo lalu, Yaremaia-o i̱na gabo beha waini iba berelo yu kogoni i̱naga keba holene ngagonaga manane yu ko. Waini iba gabo be ogoniha bedaore wali agali dewaore bu kagoha yalu pobelo ngulebero. Ani ngerogola tigua waini iba gabo be ogoniha howa nelo í̠na mo na habe.
JER 25:16 Tigua waini iba ogoni nalu luluyu holebirago irane aginagabe. I̱na tinaga waitigi ti mo ko halu bai helo ibilarogome ani bulebira.
JER 25:17 Ani laya handala i̱na gabo be waini iba bere biago Anduane Homogonaga giha howa yamialu wali agali dindi tara taraha hearia puwa ti nelo mirugoni.
JER 25:18 I̱na Yarusaleme ala pialu Yuda dindiha tano maru wiaruhabi pialu kini heagobi agali haguane bu hearubi hearia puwa Yuda dindiore mo koore hene wilonaga i̱na ti waini iba ogoni nelo miru. Wali agali tara tara bu karume uruni bidago de hondowa ti mogo lalu gi timbuni holebira. Ani hondowa wali agali uruni tigua wali agali mende kagohondo ha halu howa tigua lalu, Yuda wali agali mo ko hayadagua í̠ ko habe, laga bulebira. Mbirale uruni áyubi ani dege bialu ka.
JER 25:19 Ani bialu i̱na gabo beha waini iba bedago Iyibi kini karubi tinaga agali haguane karubi wali agali bibahende bu karumebi ti nai helo yu pu mulebero.
JER 25:20 Iyibi wali agalibi dindi tara tara wali agali Iyibi dindiha íbu karu tibi nelo mulebero. Ani bialu Usu dindiha kini bu karubi Pilidia dindiha kini bu karu tihondobi nelo mulebero. Pilidianaga tano Asegelonobi Gasabi Egeronobi Asadodonaga mendehayagi karubi tigua waini iba ogoni nelo mulebero.
JER 25:21 Ani bialu Idomo dindiha karubi Moaba dindiha karubi Amono wali agalirubi
JER 25:22 Taia dindiha kini karubi Saidono dindiha kini karu bibahendebi dindi maru solowara bedago ange mendeha dindi dewa wuyu pedarubi bibahende nelo miai holebero.
JER 25:23 Ani bialu Dedana dindiha karubi Tema dindiha karubi Busu hameigini padarubi hameigini mbira tinaga mandari podo tubagi haga bu karu tibi nelo mia dege bulebero.
JER 25:24 Ani bialu Arebia wali agali tinaga kini bu karubi wali agali tara tara dindi ko iba dalu naibaga ngaruha bu karunaga kini karubi
JER 25:25 Simiri wali agalirunaga kini bu karubi Elama kini karubi Media kini karubi
JER 25:26 dindi abene uyurahayaginaga kini bu karu bibahende ti kawareni heaguabi kaundiaha kayaguabi bibahendeoreme nelo mulebero. Wali agali bibahendenaga kini dindi bibahendeni karu tigua gabo be ogoniha howa waini iba bedago nai helo mulebero. Ani nai kagola Babilononaga kini kago ibunibi na maro bulebira.
JER 25:27 Anduane Homogohanda i̱hondo langialu lalu, Yaremaia í̠na bi ogo wali agali bibahendeme hale helo latagi halu lamibe. I̱ Anduane Homogo Hongo Haiheore Isaraele wali agalinaga Ngode Datagaliwabe kogo i̱na tíhondo, Waini iba ogoni nadaba, laya labe. Waini iba timbuniore nowa luluyu halu magu taguialu dindini pilope halu lone hongo halu heyabe nahe helo nalimu, labe. Ani larogoni irane i̱na waitigi bu karu tí baba wai bule ibiloleberogo ani bilimu.
JER 25:28 Yaremaia í̠naga giha gabo be yu kego tigua yamia nabiyagua tihondo bi ogodagua lamibe. I̱ Anduane Homogo Hongo Haiheore kogome larogo tígua waini iba ogoni yamialu nadaba larogonigo noleneore nga, lalu lamibe.
JER 25:29 I̱na wali agali dindini bu karu bibahende mo ko hai holebero. Ani buleberogo i̱ninaga tano lomabia hene Yarusaleme o ngagoria ala mo ko holebero. Tígua mitangibu handalu kamiria tí mo ko naholobada lo mandabu kamibe. Ani ndoyago. I̱na hameigini tara tara bu karu dindi bibahendeha wai bule ibilolebero. I̱ Anduane Homogo Hongo Haiheore kogo i̱na bi o ledogoniore, laya labe.
JER 25:30 Yaremaia í̠na bi i̱na langerogoni bibahende wali agali uruni hale helo latagi hai habe. Anduane Homogo ibuni dahuliya andaga dahabaneha howa hari kulu laradagua ibugua ibunaga wali agaliruhondo bi hongo howa ladali holebira. Agalime gerebi lini dowa geme hengedalu howa bi hongo howaore lagadagua Anduane Homogo ibugua wali agali dindi bibahendeni bu karuhondo bi hongo howa laragola ti bibahendeore hale hai holebira.
JER 25:31 Ibugua bi hongo howa laragome dindi bibahendeha karume hale hai hene lolebira. Ibugua bi hongo howa ladaga holobadagoni irane Anduane Homogo ibugua wali agali dindi bibahendeni bu karu bibahende manani godi lole íbu hai helolenaga lolebira. Ibugua wali agali mana ko biaga karu bibahende bo wahai helo tinaga waitigi ibilolebira. I̱ Anduane Homogo i̱na bi o ledogoniore, laya lene.
JER 25:32 Anduane Homogo Hongo Haiheore kago ibugua laabo halu lalu, Dindi bibahendeore bo haealabaga bialu mo ko hai holenaga dindi mbirani howa ala bama puabo halu dindi bibahendeha bo maro bulebira. Mo ko holene timbuni ogoni iba dalu puyaburu dindi lene mbiragoha howa ibalu dindi bibahendeha pupe haralidaguaore ibulebira, laya.
JER 25:33 Horo ogoni tagira ibirangi Anduane Homogohanda wali agali dewaore bo hilo wahai haragola homai holebira. Homararunaga tingini dindi bibahendeha wiame holebira. Ani ngagola dara howa dugu bialu holenebi mo hora holenebi mbira naholebira. Homene tingini uruni bame dindini biango ti wiradagua wima polebira.
JER 25:34 Agali haguane kamiru tíni dara howa kiabu dugu bilimu. Wali agali haru haga agali bu kamirubi tí dara timbuni howa dindini abalu ngarunaga palu pendege loyu ibaga bilimu. Áyu tí waitigirume ibalu nogo sibi wangabe bo podagadagua tínaga wali agali bu karu bo wahai hole ibiragonaga tígua dugu hongo howa bialu halimu. Todobene be dindime wabini bayale ngaru pambu lagadagua tí bope halu bo purogo lelolebira.
JER 25:35 Mo ko holene ogoni ibirangi agali haguane kamiru tí ibida polene nawulebira. Wali agali haru haga kamirubi tínaga ha do holene mbira nawulebiraore.
JER 25:36 Anduane Homogohanda nogo sibi datani nalu haga dindi bayale ngaru heba mo ko hai holebiragonaga nogo sibi hinaga karume dugu biaruago hale hadaba. Haru haga karubi tinaga sibi datani nalu helolene mbira nahedagola mini burugulalu kiabu dugu biaruago hale hadaba.
JER 25:37 Anduane Homogohanda miniha keba timbuniore ho howa dindi bayale nogo sibiru ti paliaga dangite timbuni wiago heba mo ko hai hene.
JER 25:38 Anduane Homogo ibuni ibiraha laiono gabuame ibuni haga ngagoha howa tagira ibagadagua ibulebira. Anduane Homogohanda keba timbuniore howa Yuda dindi mo ko halu bo haealabagabu wahelonaga waitigiru abale ibilolebira. Ani ibiragola dindi mo labu ho wahene mbirale mbira nawi bame dindi hangu ibira holebira, lalu Yaremaiahanda latagi hene.
JER 26:1 Yosaia igini Yahoiagimi ibu Yuda wali agalinaga kini heangi Anduane Homogohanda Yaremaiahondo bi lamialu lalu,
JER 26:2 Anduane Homogo i̱nime langerogo Yarusaleme tanoha wali agali íbu ngoai haga hama ngagoria pu habe. Pu howa wali agali Yuda dindi bibahendeha howa i̱ mitangi bialu lotu lole i̱naga andaha anda ibiraruhondo i̱naga bi mana latagi habe. I̱na bi langiruruni mbira yu wanahe bibahende lamiaiore habe.
JER 26:3 Wali agalime i̱naga bi uruni lameregola hale halu tigua mana ko bialu hayaru wahai halu bu mini beregedalu holebira badago nde ani lamibe. Tigua bi uruni hale halu mini beregedayagua nde ti mo ko halu pani mule laruruni wahalu mini wiadai bialu biamogo bulebero, laya.
JER 26:4 Anduane Homogohanda i̱na tíhondo bi ogodagua labe laya. Tígua i̱naga bi mana langirugo hale halu baya hangu talialu bialu halimu laya lalu lamibe.
JER 26:5 Agali maru i̱ninaga bi mana latagi halu mbiwia haga biarume bi langiyarubi baya hangu hale halimu labe. Bibahendengi agali maru i̱naga bi mana latagi hole pudaba laga birugolabi tígua uruni hale nahagaore kamigoni.
JER 26:6 Tígua i̱naga bi mo wa haabo harimiyagua bamba i̱naga anda Silo tano bo gialo waharudagua i̱naga anda ogobi bo gialo waholebero. Ani berogola wali agali mani holebirarume tíni ha halu howa lalu Anduane Homogohanda Yarusaleme tano bo gialo wahayadagua í̠ mo ko hene koore ngubi holebere laga bulebira, labe laya.
JER 26:7 Ani laya handala Yaremaia ibu heyalu puwa Anduane Homogohanda bi lamibe layaruni wali agalihondo lamule pene. Ani puwa lamiyagola loma binigo mo miaga hearubi mana latagi halu mbiwia haga hearubi wali agali bibahende bu hearu tibi bibahendeme bi ogoni hale dege hene. Tigua Yaremaiahanda bi layago hale hai howa Yaremaia minu yania howa lalu, Áyu í̠ homolene nga, lene.
JER 26:9 Tigua lalu, Bi ko áyu Anduane Homogonaga minini howa laro lowa bamba Silo tano mo ko hayadagua Anduane Homogonaga anda ogo mo ko holebira larigo agibe. Í̠na bi ko ogonidagua lolene nawi. Dindi ogo mo ko haragola dindi ogoriani wali agali lenego mbira munini bu naholebira laridagua lolene nawi, lene. Tigua ani lai howa wali agali bibahende Anduane Homogonaga andaha biru hayarubi abale tagira ibai howa Yaremaia heagoria ho mabu bini.
JER 26:10 Ogoningi Yuda wali agalinaga agali haguane maru kini andagaha berearume bi ogoni layago hale halu abale puwa Anduane Homogonaga anda daligaha tini biragane mbira panga haraba mini Panga Gahenge laga winigoria pialu berene.
JER 26:11 Ani biruwa loma binigo mo miaga hearubi mana latagi halu mbiwia haga hearubi ti bibahendeme wali agali bu hearubi agali haguane hearubi tihondo lalu, Agali ogo ibugua tano ogo mo ko holebira lalu mbiwia halu layago tí bibahendeme hale hai harimigo ai ibuni homelo bolene nga, lene.
JER 26:12 Ani layagola Yaremaia i̱na ladai bialu lalu, Anduane Homogo ibunime tano ogobi ibunaga anda ogobi kirabali mo ko holebira lalu i̱na latagi hole pu layaru bibahende latagi hai harugoni.
JER 26:13 Ai mana ko áyu bialu kamiruni wahai halu tí áyu kamiruni lone ho beregedai halu dai buwa Anduane Homogo inanaga Ngode Datagaliwabe mini yaraga halu holene nga. Tínaga bu mini beregedalu dai buwa ibugua ledago talialu bialu harimiyagua nde ibugua tí bai halu mo ko holene yu anda ibule layagoni naibulebira.
JER 26:14 Anigo áyu i̱ tínaga gini kogonigo tínime i̱ha bulene tigabi ngago mitangi bidamidagua bia dege bidaba.
JER 26:15 Anigo tígua i̱ barimiyaguabi nde i̱ Anduane Homogohanda ogodagua bulebero lalu ibunaga bi uruni yalu pu layagola ibirugo ai irane ogoninaga agali mbira ko nabi kago homelo barimiyagua nde tíni pani nolene wulebira. Pani nolene ogoni tano ogobi wali agali tano ogoha haga karu bibahendemebi nai holeneore wulebira, lalu Yaremaiahanda lene.
JER 26:16 Yaremaiahanda bi ogoni lai hayagola agali haguane hearumebi wali agali bibahende hearumebi tigua loma binigo mo miaga hearubi bi mana latagi halu mbiwia haga hearubi tihondo lamialu lalu, Agali ogo ibugua bi Anduane Homogo inanaga Ngode Datagaliwabenaga minini howa latagi halu kagoni. Ani biragome iname ibu bo waholene irane mbira nawidago ibu ba nabimi̱ya, lene.
JER 26:17 Ai Yuda wali agalinaga agali ala hene miniwi maru hearume heyuwa wali agali ngoaiho hearuhondo lalu,
JER 26:18 Bamba agali Hesegaia ibu Yuda dindini kini heangi bi mana latagi halu mbiwia haga Moresede tanoha agali mbira mini Maiga henego ibugua mbiwia halu Yuda wali agali hearuhondo lalu, Anduane Homogo Hongo Haiheore kago ibugua Yarusalemeore balu bo gialohole bialu Saionoore bame godo mende mende buwa kagola e hangabehe wulebira. Anduane Homogonaga anda kagoria irabu tegi aribia holebira, lalu latagi heneyago.
JER 26:19 Ai Maigahanda bi ani layago hale howa Kini Hesegaiahandabi Yuda wali agali hearumebi ibu homelo bo wahenebe. Bo wanaheyago. Kini Hesegaia ibugua ani nabi howa Anduane Homogo ibunaga andaneha íbu dai buwa Anduane Homogohanda ibu dara habe lalu hene. Ani layagola Anduane Homogohanda wali agali uruni mo ko halu bole hayago nabe wahene. Anigo áyu iname Yaremaia bo wahole bialu kamagonime inaneha genda timbuniore mo yu anda ibuleberema, lalu hene.
JER 26:20 Mani howa agali mbira mini Uria ibu Semaia igini howa tano mini Kiriada Yarimi howa íbu henegome lalu, Heneneore Yuda dindibi Yarusaleme tanobi Yaremaiahanda layadaguaore mo ko holebira, lene.
JER 26:21 Kini Yahoiagimibi agali haguane bu hearubi ami agali bu hearubi tigua Uriahanda bi ogonidagua layago hale howa ibu homelo bo waholene hariga mbira taya bialu hene. Tigua bi ogonidagua lowa kinihanda Uria ibu homelo bo wahole taya bialu ka layago hale halu ibu gi howa Iyibi dindiha ibida pene.
JER 26:22 Ani ibida pu hearia Kini Yahoiagimihanda Agabo igini Elenadanabi agali marubi heba Iyibi dindi Uria damu pudaba lene.
JER 26:23 Ani laya handala tigua puwa Uria Kini Yahoiagimi berearia minu yalu dai bini. Minu yalu dai biyagola kinihanda ibu homelo ayu tibume ma pugulene nga layagola tigua balu homelayagola ibunaga tingini wali agali daga nawini ko karu homaragola hora haga wiagoha bape halu hora hene.
JER 26:24 Anigo wali agali tigua Yaremaia homelo bo wahole bialu hemiria agali mbira Sabana igini mini Ahigama henegome Yaremaia mo wiyagola tigua Yaremaia mo ko nahe helo wahene.
JER 27:1 Yosaia igini Sedegaia ibu Yudanaga kini heangi Anduane Homogohanda Yaremaia i̱hondo langialu lalu,
JER 27:2 Ira mbalape mbira mo ya nogo dongoneru mo ya bigi bialu puwa nogo bulumagame biabe bilonaga mani dariba hamagamaga bu haga ngaligobi mbira wabuwa í̠ninaga mani mo paga howa yu habe.
JER 27:3 Ani buwa í̠na i̱naga bi mbira languleberogo kini uruhondo pelabe. Idomo kini kagobi Moaba kini kagobi Amono kini kagobi Taia kini kagobi Saidono kini kagobi ti bibahendehondo i̱naga bi lamibe. Kini uruni tinaga agali dabo helene haguane maru Yarusalemeha Kini Sedegaia baba bi lole íbu karu tigua tinaga kini urunihondo lamule pelo lamibe.
JER 27:4 Agali urunihondo bi ogodagua labe. I̱ Anduane Homogo Hongo Haiheore Isaraele wali agalinaga Ngode Datagaliwabe kogome tínaga kini karuhondo bi ogodagua laro.
JER 27:5 I̱ni hongo timbuniheore kogome dindi wabialu wali agalibi mbirale dindini ngarubi karubi ema bialu piaga bedarubi wabiai hene i̱ kogoni. I̱ni hameme wali agali dindi tu wa muabirago miruli.
JER 27:6 Áyu dindi uruni bibahende i̱naga biabe biahaga Babilononaga Kini Nebugadenesahondo mo miai haru. Ani bialu nogo gabua bu karubi ibugua handaya howa haru hai holebira.
JER 27:7 Áyu hameigini dindi tara tarani karu bibahende ibu andaneha halu mani ibu igini aguanene holebirarunaga andanehabi ha dege bulebira. Tí Babilononaga andaneha haho ngamine dege Babilono mo ko halu bo haealatogo lolene horo i̱na mbira wubagiho ngogo ogoni tagira ibulebira. Horo ogoni tagira ibirangi kini hongoheore karume ibalu Babilono bope halu tinaga garabaya biabe ale biahalu holebira.
JER 27:8 Anigo wali agali dindi mbirahayagi padarume Babilono kini kagonaga biabe biaha ira mbalapeme nogo bulumaganaga mani daribaho helagadagua nahelayagua nde i̱na wali agali dindi ogoniha padaru bo haealabaga bu wahai holebero. Anduane Homogo i̱nime tinaga waitigi bu karu ti baba wai bilo ibilarogola ti tomo nolene tubagi hai halu warago ko tara ngaru anda ibulebira. Anidagua bialu i̱na Kini Nebugadenesahanda wali agali dindi ogoniha padaru bibahendeore bo wahai helo helolebero.
JER 27:9 Aniore bule ngogo tígua bi latagi halu mbiwia haga karumebi de gandeba handaga karumebi emaga hendenegonaga galone dabaga karumebi damahe karumebi hubibi biaga bu karumebi tigua bi larago hale nahalimu. Agali uruni ale biaga karume bi ogodagua lolebira, Tí Babilono kini kago andaneha naholeberemi, lalu kago
JER 27:10 henene ndo ke̱ halu tí mo hondo hara. Ani bialu karu tígua agali uruninaga bi larago mo henene harimiyagua i̱na tí dindi tara ngagoha bo talupe lolebero. Ani berogola tí mo ko heneore holeberemi.
JER 27:11 Ani anigo agali hameigini dindi mbirani padaru tigua Babilononaga kini kagome ti handayaho helo yupe ho kagola Babilononaga kini kago ibugua agali uruni haru holebira. Ani haru howa nogo bulumagame biabe bilonaga ira mbalapeme mani dariba hamagamaga biagadagua tigua biabe bialu hole ani bilo wahayagua nde i̱na wali agali dindi ogoniha karu ti helo wahalu tininaga mabu ngaruha tomo hangalu helo waholebero. I̱ Anduane Homogo i̱na bi o ledogoniore, laya.
JER 27:12 I̱ Yaremaiahanda bi ogonidagua dege Yudanaga Kini Sedegaiahondo lamialu ogodagua laru. Yuda wali agali tíore tínaga ma Nebugadenesa andaneha podape halu Nebugadenesa halu ibunaga wali agalirubi tigua tí handaya ho helo halimu. Tígua ani haru helo harimiyagua nde bayale holeberemi.
JER 27:13 Anduane Homogo ibugua lalu, Hameigini mbiragome Babilono kini kago andaneha habe manga hayagua nde uruni ti waitigime bo wahai halu hina garime homalu warago ko tara ngarumebi balu homelolebira. Í̠nibi í̠naga wali agali bu karumebi mine halu ogonidagua bialu kamiria tíha mo ko holene ogoni anda ibuligo de hondo halimu, laya.
JER 27:14 Anidagua bulene ngago manda bialu mbiwia haga agali karume, Tí Babilono andaneha nahalimu, laragola bi ogoni hale halu mo henene nahe halimu. Bi uruni ke̱ hangu howa lalu holebira.
JER 27:15 Anduane Homogo ibugua tigatigaore lalu, Agali uruni tigua bi ogoni lole pudaba larugola ibini ndo tini miniha howa loabirago ale hangu lalu ka ndobe. Tígua agali ke̱ haga uruninaga bi hale halu mo henene harimiyagua nde Anduane Homogo i̱na tínaga dindiore ngamigoria howa tí bo batagi harogola homoleberemi. Ani bialu ke̱ howa mbiwia haga karuni tibi homolebira, laya laru.
JER 27:16 I̱ Yaremaiahanda Anduane Homogonaga bi ogoni loma binigo mo miaga hearuhondobi wali agali bu hearuhondobi lamialu, Anduane Homogo i̱na tigatigaore larogo agali mbiwia haga karume lalu, Anduane Homogonaga andaha wiaga mbirale wiaru mo yalu puwa Babilonoha ngaru uruni Yarusalemeni ngelo lone mo yu dai bulene kaware dege ngagoni, laragola tigua tíhondo ke̱ howa larago mo henene nahalimu.
JER 27:17 Tano ogo mo ko halu bo gialabagabu wahaiore holigo agali urunime bi larago hale nahalimu. Tí bayale holenaga Babilono kini kago andaneha holene nga.
JER 27:18 Agali uruni ti bi mana latagi halu mbiwia haga henene heneyagua Anduane Homogohanda ibunaga bi tihondo laminiyaguabi nde mbirale maru Anduane Homogonaga andaha wiaga wiarubi kini andagaha wiaga wiarubi Yarusaleme bibahendeha wiaga wiarubi waitigirume abale mo yalu Babilono pu nabi ngelayago mo yalu napelonaga tigua Anduane Homogo Hongo Haiheore kago ibunihondo bi lamulebirabe.
JER 27:19 Kini Nebugadenesahanda Yarusaleme ibalu ibugua Yuda wali agalinaga Kini Yahoiagimi igini Kini Yahoiagini minu yalu agali haguane Yarusalemenagabi Yudanagabi bu hearu bibahendeore Babilono dindiha garabaya bu yu piai hene. Ani buwa ibugua mbirale bayale maru Yarusalemeha ngelo wahene. Ibugua ege to̱le̱ boronosime anda gene wabu helearubi iba biraga dange be timbuni boronosime wabu wini wiagobi iba dange be mo paga howa berelaga gene boronosime wabu heleagobi mo ya nabi ngelo wahalu pene. Ani bialu i̱naga andaha mbirale bayale damene wiarubi kininaga andaha wiarubi Yarusaleme bibahendeha wiarubi mo yai nahe dege. Ani binigonaga i̱ Anduane Homogo Hongo Haiheore Isaraele wali agalinaga Ngode Datagaliwabe kogo i̱na tíhondo bi ogodagua laro.
JER 27:22 Waitigi ibulebirarume mbirale uruni Babilono mo yu piai holebira. Mbirale uruni Babilonoha ngane dege horo mbira i̱nime wiabagiho ngeledogo tagira ibirangi i̱naga mbirale uruni lone mitangi bulebero. Horo ogoningi mbirale uruni lone mo yu dai bialu Yarusalemeha ngelolebero. I̱ Anduane Homogo i̱na bi o ledogoniore, laya lalu Yaremaiahanda lene.
JER 28:1 Sedegaia ibu Yuda dindiha kini heane dege mali maria hene. Mali ogoninaga ege dauni hayagola Anduane Homogonaga bi mana latagi haga agali mbira mini Hananaia Gibeono tanoali Asura igini henego ogoni ibu Anduane Homogonaga andaha ibini. Ibuwa loma minigo mo miaga hearunaga deni howabi wali agali maru bu hearunaga deni howabi ibugua ke̱ halu bi latagi howa mbiwia halu hene.
JER 28:2 Ibugua lalu, Anduane Homogo Hongo Haiheore ina Isaraele wali agalinaga Ngode Datagaliwabe kago ibugua bi ogodagua laya, Babilononaga kini kagome tí agalime nogo bulumaga kira tinaga biabe bilo ira mbalapeme nogo kiranaga mani dariba hamagamaga biagadagua buwa tí handayaho howa haru ka. Ani heagola i̱na hende ogoni minu tungulo hole birugo ai ibugua tí naharu holebira.
JER 28:3 Mali kira ngago andaneha howa dege i̱ninaga andaha wiaga damene Kini Nebugadanesahanda Babilono mo yu pene biaruni bibahende Yarusaleme mo yu dai biai holebero.
JER 28:4 Ani bialu Yahoiagimi igini Kini Yahoiagini Babilono garabaya bu yalu piyagobi Yuda wali agali piyarubi bibahende haru dai bulebero. Anidagua larogoni irane Anduane Homogo i̱nime ira mbalapayabi bulumaganaga mani hende hamagamaga biaga ngagome ti hende hamagamaga buwa haru kago golope holebero lalu laro. Ai Anduane Homogo i̱naga bi lai harugoni, lene.
JER 28:5 Ani layagola Anduane Homogonaga bi mana latagi haga Yaramaia ibugua loma binigo mo miagarubi wali agalirubi bibahende Anduane Homogonaga andaha bu hearunaga deni howa bi ladai bini.
JER 28:6 Yaremaia ibugua lalu, Heneneore Anduane Homogo ibugua Hananaia í̠nime áyu laridagua bilo hameledo. Áyu í̠na mbiwia harigoni henene ani biai helo hameledo. Ibugua mbirale ibuninaga andaha wini biaru mo yu dai biai halu wali agali Babilonoha bu karubi bibahende Yarusalemeha haru dai biai helo.
JER 28:7 Anigo áyu í̠nibi wali agali hale ho kamirubi tígua bi mende larogo hale hadaba.
JER 28:8 Abaleore howa hama ibinigo áyu kamagoniha howa Anduane Homogonaga bi mana latagi haga agali ala hama ibinirume lalu wai bulenebi mo ko holenebi warago ko tara tara bolenebi wali agali dewaore bu karuha ibalu dindi timbu wima pedaruhabi tagira ibulebira lalu lo wigi bini.
JER 28:9 Anidagua lenego ai agali mbirame mbiwia halu Anduane Homogonaga bi mana latagi haga áyu karume latagi halu wali agali bayale holene ibulebira lalu mbiwia hayagua iname bi ogoni henene larabe be ke̱ harabe tobaho holeberema. Anigo mani howa tinaga bi larago henene hayagua nde heneneore agali ogoni ibu Anduane Homogohanda bi ogoni latagi hole pu layagola ibinidalo manda buleberema, laru.
JER 28:10 Yaremaiahanda bi ogoni lai hayagola Hananaiahanda ira mbalape Yaremaianaga mani mo paga howa yayago yamini. Yamuwa Hananaiahanda ira mbalapayabi biago bo kambulobaga bini.
JER 28:11 Ani buwa ibugua wali agali bu hearunaga deni howa lalu, Anduane Homogohanda bi ogodagua laya. O berogonidagua dege i̱na Nebugadenesahanda wali agali dindi bibahendeha hearunaga mani ira mbalapayabi mo paga halu mo ya kago i̱na ani bo kambulo wahai holebero, laya. Mali kira napedaha dege howa ani bulebero laya, lene. Bi uruni layago hale halu Yaremaia ibu pene.
JER 28:12 Hananaiahanda ira mbalape nogo bulumaga biabe bilonaga hende hamagamaga biaga Yaremaianaga mani mo paga howa yu hene biago bo kambulobaga bu wahalu puwa horo dewa dege hemigola Anduane Homogohanda Yaremaiahondo ogodagua lamini.
JER 28:13 Ibugua lalu, Í̠na áyu ogoni Hananaia karia puwa bi ogo lamibe. Anduane Homogohanda lalu mbirale irame bulumaganaga mani dariba hamagamaga biaga biago bo kambulo waharigonigo ai mani í̠na aeaneme wabu aribia holebere.
JER 28:14 I̱ Anduane Homogo Hongo Haiheore Isaraele wali agalinaga Ngode Datagaliwabe kogome bi larogo. I̱nimeore wali agali bibahende dindi bibahendeha bu karu tigua tinaga mani dariba hamagamaga buwa yu helonaga aeaneme wabinigo mo merogola ai tigua Babilononaga Kini Nebugadenesa ibugua garabaya biabe ale bialu helonaga heledo. Nogo biango gabua bu karubi ibugua dege handayaho helo heledo, lene.
JER 28:15 Yaremaia ibugua bi urunidagua lai howa Hananaiahondo laabo halu lalu, Hananaia-o bi ogo hale habe. Í̠ Anduane Homogohanda pu laya handala ndo ibiriya. Í̠nime wali agali ke̱ howa la hondo harigola tigua í̠naga bi larigo mo henene hai haya.
JER 28:16 Anidagua biyago Anduane Homogo ibugua ogodagua laya. Heneneore i̱na í̠ dindi ogoria nahabelo í̠ biba helolebero. Í̠naga bi larigome wali agali dewaore i̱naga bi larogo hale nahelo lowa haru pubagi harigonaga mali mbira ogo piai nakaore dege í̠ abale homolebere, laya lalu lamiru.
JER 28:17 Ani leaha mali ogoninaga dege ege kane hayagola Hananaia ibu homene.
JER 29:1 Yaremaia ibugua Yarusalemeni howa beba mbira agali haguanebi loma binigo mo miaga hearubi bi mana latagi haga hearubi Yuda wali agali hearubi uruni ti ala Nebugadenesahanda Babilono dindiha garabayabu yalu pu helene biaru hearia beba gilibu pelene.
JER 29:2 Yaremaiahanda beba gilibu pelenedagoni Babilono amirume Yarusalemeni ibalu Kini Yahoiaginibi ibu ai̱yabi ibu anda handayaho haga agali hearubi agali haguane hearubi Yuda dindiha Yarusalemeha hearubi mbirale bayale tara tararu wabiaga mandabi hearubi bibahende garabaya minu yalu peha beba ogoni gilibu pelene.
JER 29:3 Horo ogoningi Yudanaga Kini Sedegaiahanda agali kirali Sabana igini Elasa Hiligaia igini Gemariala Kini Nebugadenesa Babilono hearia pole piyaria Yaremaiahanda beba gili biyago Yuda wali agali Babilono dindiha hearu mule libugua yu pudaba lalu mini. Beba ogoniha bi gilibu winidago ogodagua.
JER 29:4 Anduane Homogo Hongo Haiheore Isaraele wali agalinaga Ngode Datagaliwabe kago ibugua bi ogodagua lara. Yuda wali agali Yarusalemeha hemiria i̱na tí bo batagi halu Babilono pelene kamiru tíhondo bi laro.
JER 29:5 Babilono ogoniha howa tígua anda bialu e hangalu tomoru bialu nalu halimu.
JER 29:6 Agali tígua waliru dabu bialu waneigini hono wialu halimu. Ani bialu mani tínaga waneiginirume dabu bigi bialu waneigini hono wia aribia helo ani bilimu. Tí hameigini palia timbuore halu wali agali emene hangu hole lowa mo emene nahalimu.
JER 29:7 I̱nime tí dindi ogoniha henemane haru pu heledogo ai tígua dindi ogoni bayale ngelonaga biamogo buwa biabe bialu mo bayale halu halimu. Ani bialu i̱na dindi ogoni mo bayale holiyanaga i̱hondo bi lalu halimu. Ani larogo irane dindi ogoni bayale wiayagua tíbi nde bayale dege holeberemigonaga larogoni.
JER 29:8 I̱ Anduane Homogo Hongo Haiheore Isaraele wali agali tínaga Ngode Datagaliwabe kogome tigatigaore larogo. Agali ke̱ howa mbiwia halu bi mana latagi haga karumebi de gandeba handaga karumebi tíhondo ke̱ halu mo hondo holigo de hondo halimu. Agali maru emaga handaga karume emaga handaragola emaga galone dabaga karume galone latagi haro laragola mo henene nahalimu.
JER 29:9 Tigua i̱naga minini howa mani bulenenaga henene larama lalu ti ke̱ halu mbiwia haga ka. I̱nime tigatiga larogo tigua anidagua lole pudaba lalu i̱na lamini ndoore lalu ka. I̱ Anduane Homogo i̱na bi o ledogoniore, laya.
JER 29:10 Anduane Homogohanda bi ogodagua laya. I̱na Babilonome mali pira kariani (70) mo ko mbira nahe bayale helo heledo. Mali ogonidagua hai kagola Babilono mo ko holebira. Mo ko harangi i̱na buleore lalu bi lo wirugo lola helo tí mitangi bialu Yarusaleme haru dai bulebero.
JER 29:11 Tíore biamogo bulenego Anduane Homogo i̱nime ogoale buleda lalu manda bu ko. Tíore mo ko holene hame nale howa mo bayale holene manda bu kogoni. I̱na tí mo bayale hole larogoni mitangi bialu horo ogoni tagira ibilo malia ho halimu.
JER 29:12 Horo ogoningi tígua i̱ni koria kaware ibalu i̱ni olalu halimu. Ani lalu kamigola i̱na tínaga bi laramigo hale holebero.
JER 29:13 Horo ogoningi tígua tínaga minimebi gubalinimebi hongo howa i̱ taya birimiyagua i̱ handa walia holeberemi.
JER 29:14 I̱ni Anduane Homogo i̱na heneneore larogo tígua i̱ni koria ibuleberemi. Anidagua bialu i̱ni koria dai beremigola i̱na tí mo bayale holebero. I̱na tí dindi bibahendeha garabayabu yalu pelaruruniha kamiria howa haru dai biai holebero. Haru dai bialu abale dindi tíni haga wirimigoha helai holebero. I̱ Anduane Homogo i̱na bi o ledgoniore, lene.
JER 29:15 Tígua lalu, Anduane Homogohanda i̱na Babilono dindini hemagola ibunaga bi mana latagi haga inahondo ngiya, laga kami.
JER 29:16 Anigo Anduane Homogohanda agali mbira Yuda dindini áyu ibu kini howa Debidinaga biragane dagia wiagoria bedagonagabi tí damene maru garabaya nape yu wahene karunagabi ibugua bi larago hale halimu.
JER 29:17 I̱ Anduane Homogo Hongo Haiheore kogome i̱na ogodagua laro. Yuda dindiha wali agali maru yu wahene bu karu baba wai bilo waitigi ibilolebero. Ani bialu i̱na ti tomo nolenego biba helalu warago ko tara tara ngaru ibilaga bulebero. Ani berogola ti poge lini tagaraga ngago wali agalime nabe nahe ngaligobi wulebira.
JER 29:18 Anidagua bini ngago wali agali dindi tara tarani bu karume i̱na o birudagoni hale howa tigua mogo lalu gi timbuni ho holebira. Ani bialu i̱na Yuda wali agali uruni dindi tara tara ngaruha piai helolebero. Ani peledogoha wali agali dindi anduane karume Yuda wali agali uruni mege bialu bi koru laede halu hondo oba haga bulebira. Ani lalu howa tigua dege wali agali maru karuhondo ha halu howa tigua lalu, Yuda wali agali mo ko hayadagua í̠ore mo ko helo, laga bulebira.
JER 29:19 Tigua i̱naga bi mo wahayagonaga Anduane Homogo i̱nime mo ko holene tara tara uruni tagira ibilolebero. I̱na i̱naga biabe biahalu bi mana latagi haga maru ibilaga birugome bi layagola tigua hale habe manga haya. Tí Babilono dindiha garabaya bu kamiru tíbi agali uruninaga bi hale naharimi.
JER 29:20 Anigo i̱na wali agali Yarusalemeha howa bo batagi halu Babilonoha pelene kamiru tígua Anduane Homogo i̱na bi áyu larogo bayuwa hale halimu.
JER 29:21 I̱ Anduane Homogo Hongo Haiheore Isaraele wali agalinaga Ngode Datagaliwabe kogome i̱na agali kira bi latagi halu mbiwia haga henene ndo laga kago Kolaia igini Ahaba Masea igini Sedegaiala mitangi bialu bi ogodagua laro. Libugua i̱naga minini howa laraba lowa ke̱ haga ka. Libugua anidagua biyagonaga i̱na libu Babilononaga Kini Nebugadenesa giha minu ya holebero. Ani minu ya kogola ibugua agali bu karume tíninaga deni howa homelo badaba laragola libu homelo bo waholebira.
JER 29:22 Anidagua biragola Yuda wali agali Babilonoha kamiru tígua mendeali kago ha halu lalu Anduane Homogohanda í̠ore Sedegaia Ahabala mo ko howaore Babilononaga kini heagome irani bo delayadagua delelo loleberemi.
JER 29:23 I̱na agali kirali ogonilabo mo ko holeberogo irane libugua Isaraele wali agali tíniha mana ko dewa bialu hayagonaga ani bulebero. Libugua wali agali libu damene hearu one kayu bialu i̱naga minini howa bi henene laro lowa ke̱ halu bi laga biya. Libugua bi uruni latagi halibu lalu i̱na mbira nalamiore ko. Anduane Homogo i̱nime mana libugua biaga ngago manda biai howa laro. I̱ Anduane Homogo i̱na bi o ledogoniore, lalu lene.
JER 29:24 Anduane Homogohanda lalu, Yaremaia í̠na bi ogo Nehelama dindi ngagoria agali mini Semaia kagohondo lamibe.
JER 29:25 I̱ Anduane Homogo Hongo Haiheore Isaraele wali agalinaga Ngode Datagaliwabe kogome bi ogodagua laro. Semaia í̠na beba mbira gili bialu Yarusalemeha hearuhondobi loma binigo mo miaga Masea igini Sebanaiahondobi loma binigo mo miaga maru hearuhondobi pelalu howa bi ogodagua lariya.
JER 29:26 Anduane Homogo ibugua Sebanaia í̠ ibunaga loma binigo mo miaga Yahoiada henegoria ha aribia howa Anduane Homogonaga anda handayaho habelonaga ibunime í̠ dabo helaya. Anigo í̠na agali lulu mbira ona howa bi mana latagi haga tingiho heagua nde ibunaga gi geru minu kabu bigi buwa dariba holene nga. Ani bialu ibunaga mani aeane mbira dariba ho helolene nga.
JER 29:27 Ani bulene wiaruago í̠na Anadodoali Yaremaiala bi lo tiga nabiriyago irane aginagabe. Agali ogoni ibugua bi mana latagi halu tí kamigoha laabo haga ndo kabe.
JER 29:28 Ibugua beba mbira gili buwa ina Babilono dindiha hemaruhondo ibilowa lalu, Tí garabaya luore haabo holeberemigo tígua anda bialu e hongowa mabuha tomo bialu nalu halimu, lalu bi lowia hayiyago ndobe, lene.
JER 29:29 Loma binigo mo miaga Sebanaia ibugua Semaiahanda beba gilibu wia hayadagoni mo yalu Yaremaia hearia puwa dagalene.
JER 29:30 Ibugua bebani bi gilibu wiyadago dagalai hayagola Anduane Homogohanda Yaremaiahondo lamialu lalu,
JER 29:31 Yaremaia í̠na Yuda wali agali Babilono dindini garabaya pu karuhondo bi ogo lo pelolene nga. Anduane Homogohanda Nehelamali Semaia kagonaga lalu, Semaia ibugua i̱naga bi mana latagi helo dabalu tí hemigoha i̱na pu nalene kogoni. Ibunime mitangi bialu bi mana latagi haga tingiho howa tíhondo ke̱ halu tígua ibunaga bi larago mo henene halimulo lalu haga kagoni ndobe.
JER 29:32 Anduane Homogo i̱na tigatigaore larogo Nehelamali Semaiahanda wali agali bu hearume i̱naga bi mana hale nahe wahalu pelonaga haru pubagi haya. Anidagua biyagonaga i̱na ibubi ibu aguanene mani holebirarubi tihondo pani mulebero. Ani bialu mani i̱naga wali agaliru lone bayale helarongi ibu aria lenego mbira howa mbirale uruni handa nabulebira. I̱ Anduane Homogo i̱na bi o ledogoniore, lalu Anduane Homogohanda laya, lene.
JER 30:1 Anduane Homogohanda Yaremaiahondo lamialu lalu,
JER 30:2 Anduane Homogo i̱ Isaraele wali agalinaga Ngode Datagaliwabe kogome i̱naga bi langirugo bibahende beba mbirani gilibu wibe.
JER 30:3 Anduane Homogo i̱naga Isaraele wali agalibi Yuda wali agalibi bibahende horo mbira pongo bo winigo tagira ibirangi tí lone mo bayale helolebero. I̱na dindi tínaga mamaliruhondo bamba minigoria haru dai bialu tínaga dindi ogoniore ngelo lone mo ngulebero. I̱ Anduane Homogo i̱na bi o ledogoniore, lalu lamini.
JER 30:4 Anduane Homogohanda Yuda wali agali Isaraele wali agalila mitangi bialu lalu,
JER 30:5 Anduane Homogo i̱naore larogo. Wali agali tiha mo palia holene karulo howa hendore holene henge nawiore howa tigua gi timbuniore halu dugu bigibigi bialu kago hale harua.
JER 30:6 Agua biyabe agalime waneigini gali taba hanagabe. Tinaga tinini gime minu yaniaho hama pedago irane agidabe. Tigua walime waneigini gali taba honolene tu kaware biruwa tandaga timbuni handalu biragadagua bedaria hendedo. Tinaga dengui mo tara halu gi haiho kago irane agidabe.
JER 30:7 Mo ko holene timbuniore tagira ibulebiragonaga dara timbuniore ho kogoni. Áyu mo ko holene ogoni ale ibiraligobi ndo mo ko holene timbuni gibi mbira tagira ibulebira. I̱naga Isaraele wali agali bu kamiru horo ogoningi tíha genda timbuniore tagira ibulebira. Ani ibiragola i̱nime ti mo wialu haru dai bulebero.
JER 30:8 I̱ Anduane Homogo Hongo Haiheore kogo i̱na bi ogodagua laro. Horo ogoni tagira ibirangi i̱na Isaraele wali agali tinaga waitigirume ira mbalapeme tinaga mani dariba hamagamagabu howa garabaya heledagoni bo tongola hole bialu ti golope holebero. Ani bialu tinaga waitigi bu karunaga garabaya biabe ale lone bialu holene henge nawulebiraore.
JER 30:9 Tigua Anduane Homogo tinaga Ngode Datagaliwabe i̱ni kogo andaneha haho wiaabo kane dege haabo halu tinaga kini mbira Debidi aguanene ti handayaho helo i̱na dabo heledogo ogoni ibu andaneha hai holebira, lene.
JER 30:10 Anduane Homogohanda lalu, Yagabanaga aguanene i̱naga biabe biahaga Isaraele wali agaliru-o tíore gi halu duru nale halimu. I̱na heneneore larogo tí dindi taraha garabaya helene kamigoria howa i̱na tí golope halu haru dai bulebero. Tíninaga dindi wirimigoria howa lone haru dai berogola bayaleore holeberemi. Ani daibu kamigola ti mo gibia holene mbirali naholebira.
JER 30:11 Anduane Homogo i̱ni tí heba howa tí biamogo bialu haabo holebero. Wali agali tí garabaya biabe ale bialu harimigoha haga biaruni bibahende bo wahai holebero. Anigo tí dege bo wa naholebero. I̱na tí birimigonaga mana lalu i̱na mana tigabi bialu tí bo wahai naholebero. I̱ Anduane Homogo i̱na bi o ledogoniore, laya lene.
JER 30:12 Anduane Homogohanda lalu, Isaraelealiru-o tí minu bayagoni dere dabi habe naheore timbuni bu kamigoni.
JER 30:13 Ina biamogo bia, lalu i̱hondo bi langulene mbirali naheore. Tínaga dere bidaru lone dabi helonaga ha̱i̱ holene marasinibi nawi dege.
JER 30:14 Tínaga nenege agali maru abale hayaruni tigua tí mitangi nahe mo embeda hai haya. Tí mana ko dewaore bialu harimigome tíha bia ko hene tiga nabi dewaore ngelo kamigoni. Ani ngelo kamigola i̱na tíhondo mana urunibi birugoni ndobe.
JER 30:15 Ai tínaga dere ogoni dabi naholebirago dugu dewa biaabo nahe wahadaba. Tígua mana ko dewa bialu harimigome tíniha mo ko hene kamigoni. Anidagua birimigonaga i̱na tíha dere ogoni ibilaru.
JER 30:16 Ani ibilarugoyu maru tí mo ko haga uruni tiniha mo ko holene wulebira. Uruni tibi nde dindi yu wahalu dindi mendeha garabaya bu yalu polebira. Maru tí mo ko halu tínaga tomo hengedamiru mbirale ngamirubi mo page biaga biarubi nde tini mo ko halu tinaga mabuha tomo hengedaru bu kayu bialu mbirale ngamiru mo kayu biaga biaru tinihabi nde anidagua dege bulebira.
JER 30:17 Tínaga waitigi uruni tigua lalu, Saionoha galone mbira naheore bame ko ngubi o ngagoni ndobe. Tano mo ko holilono mbiralime mitangi nahaga ngagoni lolebira. Anigo Anduane Homogo i̱na bi ogodagua laro. Tínaga dere bu kamigoni mo dabi halu tínaga tinginibi mo dabi dege holebero. I̱ Anduane Homogo i̱na bi o ledogoniore, laya lene.
JER 30:18 Anduane Homogohanda lalu, I̱na Yagaba aguaneneru dara holene irane nawi ngagoria howa dara halu biamogo bulebero. Ani berogola tini dindi ngagoria lone daibu howa tininaga andaru bu holebira. Ani bialu Yarusaleme ala wini biagoria wiadai bulebira. Kininaga anda ala hene gumuni wiagoria lone biadai bulebira.
JER 30:19 Ani buwa Isaraele wali agali tigua i̱hondo turu howa ka̱i̱ lalu holebira. Ainde turu howa iba gana dalimu laragaraga bialu holebira. Ani bialu kagola ti emene hangu karuni mo dewa helarogola ti dewaore halu palia timbu holebira. Ani palia timbu kagola i̱na wali agali tara tara bu karume ti mo ko halu haga karu mo wahalu uruni tigua Isaraele wali agalirunaga mini mo yaraga halu helolebero.
JER 30:20 Ani heledogola Isaraele ti hongohe abale hagagobi helolebero. Ani bialu tininaga dindi wini biagoriani bayale karulape helo helolebero. Ani heledoria wali agali tara tara bu karume ti mo ko hole bialu karu i̱na tibi nde mo ko holebero.
JER 30:21 Isaraele wali agali karu aria agali mbiragome tinaga haru haga agali haguane howa ibugua ti haru holebira. I̱ Anduane Homogo kogome i̱na bulegobiore larogo. Agali haguane ogoni i̱ni kogoha kaware haru daibu helolebero. I̱na ani bulebero larogoni irane agalinaga hame hangume i̱ni kogoha kaware ibabe nahe kago manda bialu ani bulebero.
JER 30:22 Ani berogola Isaraele ti i̱naga wali agaliore halu i̱ni tinaga Ngode Datagaliwabeore holebero. I̱ Anduane Homogo i̱na bi o ledogoniore, lalu lene.
JER 30:23 Wali agali mana ko ngubi ngaru hangu mo tene haga bu karu bibahendeha Anduane Homogonaga keba holene timbuniore iba dalu puyabu heba ibagagobi ibalu puyabume ti bo elo lope hai hagadagua bialu holebira.
JER 30:24 Ibugua tandaga haho ngane dege bule lo mitangi bu wiyaru biai halu waholebira. Horo hamaro bulene tagira ibirangi uruni bibahende manda biai holeberemi, lalu Yaremaiahanda lene.
JER 31:1 Anduane Homogohanda lalu, I̱naga horo mbira dabo wiabagiho wini ngago tagira ibirangi Isaraele hameigini bibahende ti i̱naga wali agaliore kagola i̱ni tinaga Ngode Datagaliwabeore holebero.
JER 31:2 Anduane Homogo i̱nimeore henene larogo i̱naga Isaraele wali agaliru tinaga waitigiru ibiya handala dindi ko wali agali nahaga dindi lebolahe ni hangu daho wiaga wiaruha ibida pu henego ka. Ai i̱na ti gubalini howa dara timbuni halu ti hada payabu ha̱lo birulene ngagoria birule pelolebero, laya lene.
JER 31:3 Anduane Homogo ibu i̱ Yaremaia hewaria dindi kaundiaha howa ibuwa lalu, Isaraeleru-o tí i̱ni kogoria daiore bilimulonaga i̱na tí gubalini halu mana bayale tigabi ngaru bialu kogoni.
JER 31:4 Isaraele wali agaliru tí hongohe halimulo i̱na mo hongo holebero. Ani berogola tígua wandari mabuagerume wali agali hondo bedaru mo turu holenaga irabitele ke̱le̱nge̱le̱ lalu iba gana lalu mali liagadagua tínaga bu miniha ogonibi holeberemi.
JER 31:5 Ani howa tígua Samaria dindiha hari barebare ngaruha gerebi iraneru hangalu lini daragola do naga bialu tíni lone turu ho holeberemi.
JER 31:6 Horo uruningi Eberaimi dindi barebareha agali haguane karume hongo howa olalu, Ai Anduane Homogo inanaga Ngode Datagaliwabe karia Saiono nene dai bima, lalu holebira, lene.
JER 31:7 Anduane Homogohanda laabo halu lalu, Yagabanaga aguanene karunaga turu howa tinaga mini yaraga halu iba gana la hadaba. Uruni ti wali agali maru karu bagihene lowa ti duniniore ka. I̱nihondobi turu halu iba gana ogodagua ladaba. Anduane Homogohanda ibunaga Isaraele wali agali heneru haru dai biya lalu turu howa iba gana ladaba.
JER 31:8 Anduane Homogo i̱nime heneneore larogo. I̱naga Isaraele wali agali uyurahayagi karubi dindi bibahendeha ho giligala lo karubi bibahende haru dai biai holebero. De kohe karubi ge kohe karubi wali tombeha gali bere bedarubi wali gali áyu dege taba hanabehe bedarubi tanabi bibahendeore ti haru ibaiore holebira. Isaraele ti ho timbu halu ho damebi howa tininaga dindi henene wiyagoriani hole dai biai holebira.
JER 31:9 I̱naga wali agaliru ti i̱nime haru dai berogola horo ogoningi tigua dugu bimabi i̱hondo bi lamabi dai bulebira. I̱na ti iba nolene bayale gagahe bedagoria haru ibulebero. Hariga tigabinibi haru eberogola ti pilolene henge mbira nawulebira. Anidagua bule larogoni irane i̱ni tinaga aba howa Eberaimi ibu i̱ igini waheneore kagonaga ani bulebero, lalu Anduane Homogohanda lene.
JER 31:10 Hameigini dindi tara tarani kamiru-o Anduane Homogo i̱na bi larogo hale mia howa baya hangu hale hadaba. Hale howa wali agali dindi tara tara kaundiaha iba solowara timbuni bedago ange mendehayagi karuhondo lamima puwa ogodagua lamilimu. Anduane Homogo i̱na i̱naga Isaraele wali agali ala bo talia tagi haruru ai áyu lone haru dai bulebero. Nogo sibi hinaga karume tinaga nogo sibiru baya hangu haru hagadagua i̱nime i̱naga wali agali baya hanguore haru howa handayaho holebero.
JER 31:11 Anduane Homogo i̱ni Yagabanaga aguanali áyu tinaga waitiginaga giha karu bibahende gi mialu haru dai bulebero.
JER 31:12 Ani haru dai berogola ti ibalu Hari Saiono neneni howa turu halu ga̱ laragaraga bialu holebira. Anduane Homogo i̱nime tihondo mbirale bayale ogobi dege dege meroru yu howa ti turu timbuni ho holebira. I̱na widiru gerebi lini ibaneru olibe lininaga welirubi dewaore tihondo mialu nogo sibiru bulumagarubi dewaore tihondo merogola tigua turu timbuni ho holebira. Ti bayale dege lalu manane mbira dindi ibane bereha mabu gumbile ngaligobi holebira. Tiha mo tandaga holene mbira nawiore holebira.
JER 31:13 Horo uruningi wandari mabuage bedarume turu ho howa mali lialu holebira. Igiri daliahebi agali wahebi bu karume turu timbuni ho holebira. Tigua ala tandaga howa kiabu dugu bialu hayaruni i̱na turu holene mo aribia holebero. Tinaga bu miniha dara holene wiarubi mo wahai howa mo palia holenebi mo wia halu turu halu dungulo holenebi mo aribia holebero. Ani berogola ti turu taraore howa hadapayabu holebira.
JER 31:14 Wali agalirume i̱naga loma dewaore yalu ibiragola loma binigo mo miaga karume tomo dewa bu payabu ngelo howa tomo garibi nale holebira. I̱naga wali agali uruni ti tomo dewaore mialu kogola ti karulape nalu tombe howa holebira. I̱ Anduane Homogo i̱na bi o ledogoniore, lene.
JER 31:15 Anduane Homogohanda bi ogodagua lalu, Lama tanoha bi mbira laruago bi ogoni gibi yiyi lalu dugu biaruago hale ho ko. Lama tanoha kiabu dugu timbuni biaruagoni irane Leselohanda ibu waneigini biaru bibahendeore mbira nahe homai hayadagonaga bialu ka. Ibu waneiginiru bibahende homai hayagola wali agalime ibunaga bu miniru mo palia holenaga bi la debodebo bilobi hame naleore beda, lalu gilibu nga.
JER 31:16 Anigo Anduane Homogo i̱nime larogo, Leselo-o í̠na dugu beregoni wahalu í̠naga de iba domo wahabe. Í̠na í̠ waneigininaga bayale biaharigo embeda nahe í̠hondo bayale biadai bulebira. Í̠naga waneigini biaruni tinaga waitigirunaga dindi yu wahalu í̠ni bederia dai bulebirago ai lone dugu nabi wahabe.
JER 31:17 Í̠naga waneiginiru ti ogonidagua bialu tininaga dindiore wiyagoria birule dai bulebirago. Mbirale uruni heneneore tagira poragola hondole mini dunubiaho birabe. I̱ Anduane Homogo i̱na bi o ledogoniore, lene.
JER 31:18 Isaraele hameigini hearume kiabu dugu biayuarubi nde hale haru. Tigua kiabu dugu bialu howa lalu, Anduane Homogo-o agalime tinaga nogo bulumaga daluaru gabua haragola tibume waralu mo tiga bialu hagadagua í̠name bia laredagua buluma̱ya mo tiga bialu harigoni. Ai Anduane Homogo-o í̠ni hangu inanaga Ngode Datagaliwabe kego ina í̠ni keria dai biai holoma̱ya í̠na ina haru dai bibe.
JER 31:19 Abale iname í̠ yu wahalu pirimago ai áyu ina bu mini beregedo kama. Iname ko birimaru mitangibu dai buwa áyu taga timbuni howa ma podalu de handa dindiho kama. Ina wandari igiri daliahe hemangi howa mana ko wiaru bialu harimago ai áyu uruni birimagonaga taga timbuniore kamagoni layua.
JER 31:20 Anduane Homogo i̱na larogo I̱ igini Isaraeleore kago ndobe. I̱nime ibu gubalini timbuni ho kogoni laro. Bibahendengi ibunaga mini lalu ibuniore mitangi haabo haruli. I̱naga bu miniore ibuha ngelo haruli. Ani biruligo ai áyu i̱na ibuore dara halu biamogo bulebero, laya lene.
JER 31:21 Isaraele wali agaliru-o tínaga dindi wahalu ibirimigoni hariga ogoha howa ibirimada manda bialu ai ogoha dai buleda lalu mo walia hagane manane mbira heladaba. Ani bialu tíninaga tano biagoriani hole dai bidaba.
JER 31:22 Tí i̱ wane mabuage ale birarimigo biruwa i̱ni erembira ngirimigoni. Ani lenedangi howa mini burugu lalu tombene hondoki ho kamiruni wahalu i̱ni koria agoangi dai buleberemibe. Anduane Homogo i̱nime dindi ogoria mana gahenge talialu bulene mbira ogobi mo wero. Walime agali minu yania howa agali-o i̱ore gubalini ha lolene wulebira, lalu Anduane Homogohanda laya, lalu Yaremaiahanda lene.
JER 31:23 Anduane Homogo Hongo Haiheore Isaraele wali agalirunaga Ngode Datagaliwabehanda lalu, I̱na Yuda dindi lone mo bayale howa Yuda wali agaliru ti tinaga dindini tano ngaruha bayale helo helai holebero. Ani helarogola tigua ogodagua lolebira, Anduane Homogo ibunioreme ibunaga hari nene loma bia hene ngago mo bayale helo. Ibu hari ogoniha howa ibugua wali agalime mana bayale tigabi hangu biaabo helo, lalu lolebira.
JER 31:24 Nogo sibi hinaga karubi mabu e hangaga karubi ti bibahende ta nabi Yuda dindini tano bu ngaruha hai holebira.
JER 31:25 Mbiralinaga tingini hongo nahe ibira hayagua i̱nime ibu lone mo hongo holebero. Ani bialu mbirali ibu miniha genda yu heagua i̱na ibunaga bu miniha mo palia halu karulape helolebero, lalu Anduane Homogohanda lene.
JER 31:26 Ani layago hale howa i̱ Yaremaia i̱na heyuwa handa amu nana bialu howa i̱ u bayaleore paliruda lo mitangi biru.
JER 31:27 Anduane Homogo i̱nime ogodagua laro, Agali tomo hangaga karume ti mabuha tomo dewa hengedaru bayale anda hai hagadagua i̱na horo mbira pongo bo winigo tagira ibirangi Yuda hameiginibi Isaraele hameiginibi nogo tara tarabi dewaore helo mo dewa holebero.
JER 31:28 Bamba i̱na ti bo dugu wahelobi bo gialabaga bilobi mo ko helobi tiha ko anda ibilobi handayaho haruli. Ani handayaho harudagua áyu ti lone bayale helonaga biabe biadai bilobi tomo hangadai bilobi i̱nimeore handayaho holebero.
JER 31:29 Horo uruningi wali agalirume bi yobage lalu, Aba ai̱yarume gerebi lini boga nabi dedaru do naragola waneiginirunaga ne gi lolebira, laga winigo mani nalolebira.
JER 31:30 Bi yobage ogoni nale mendego lolebirago ogo, Agali mbira ibugua gerebi lini boga nabi dedago do nayagua ibuninaga ne gi lolebira. Horo ogoningi agali mbirame mana ko biyagua ogoninaga ibuni homolebira, lene.
JER 31:31 Anduane Homogohanda laabo halu lalu, Hale hadaba. Horo mbira pongo bo winigo ogoni tagira ibirangi i̱na Yuda wali agaliru bababi Isaraele wali agaliru bababi habo nalolene bi gahenge lo wulebero.
JER 31:32 Habo nalolene bi mbira bamba ti Iyibi dindiha howa tinaga mamaliru gini yalu i̱na haru tagira ibirungi howa lo wirugoni ale ndo taraore lo wulebero. Ala i̱ni ti agalini ale harugoyu ai tigua ko bialu habo nalolene bi ogoni lowinigo mo habo laya.
JER 31:33 Áyu i̱na Isaraele wali agali ti baba habo nalolene bi gahenge lo wuleberogo ogo. Tinaga bu miniha i̱naga mana hela halu i̱naga bi tinaga bu habaneha gilibu wia holebero. Ani buwa i̱ tinaga Ngode Datagaliwabe holebero. Ti nde i̱naga wali agaliore holebira.
JER 31:34 Horo ogoningi agali mbirame ibu damene mende kagobi ibuni hameneorehondobi lamialu lalu, Anduane Homogo kago manda bulene nga, lalu lamulene nawulebira. Irane agali haguane karubi agali damene bu karubi ti bibahendeoreme i̱ manda biai hene holebero. I̱na tinaga ko binidaru bibahende domo wahai howa lone mitangibu dai nabuleorebero. I̱ Anduane Homogo i̱na bi o ledogoniore, lene.
JER 31:35 Anduane Homogohanda horombe wá helonaga ni helalu mbiraga wá helonaga ege yakundiru heleda. Ibugua iba solowara timbuni bedaru mo emabia haragola ue timbuni lalu mo kulu ndugu laga bilo mo la haga ka. Ibunaga mini Anduane Homogo Hongo Haiheore lenego kagoni.
JER 31:36 Isaraele wali agaliru tiore ni ege yakundiru kadagua haabo holebira. Anigo ni ege yakundiruni biabe i̱na tigua bilo mo mirugo nabiyagua nde horo ogoningiore Isaraele wali agali bo amolo wahai holebero, lalu ibugua bi ogoni lowini.
JER 31:37 Agalime hari li kago luni tubagiru arane yangalenaga abidabe hondole manda nabibehe ngadaguabi dindi unura kabaneha anda puwa uruniha ngaru bibahendeha handai nahabehe ngadaguabi Anduane Homogo ibugua Isaraele wali agaliru tinaga ko biyagonaga erembira mialu Isaraele bibahende pani nelo miai nahabeheore kagoni. Anduane Homogo ibugua bi o layagoniore, lalu Yaremaiahanda lene.
JER 31:38 Anduane Homogohanda laabo halu lalu, Horo mbira tagira ibulebirago ogoningi Yarusaleme i̱naga tano wilo lone biadai bulebira. Yarusalemenaga pabe uyugohayagi timbuniore bima pialu agali mamage handa amu nana bu haga mini Hananele Anda Daliga laga kago ogoniha howa amu pialu pabe pauledagoria panga haraba mini Pau laga kagoria biatagi holebira.
JER 31:39 Bima pialu tubaria amuraore ni paliragohayagi hari nene mini Garebe kagoria howa pu paulalu dindi emene mini Goa ngagoria tagira polebira.
JER 31:40 Ai uyurahayagi dindi ulini homa hora haga homalibi ira punga yu wahagabi ngago ibu tano pabe bu yanda hene tamuha wulebira. Amu ni tagira ibiragohayagi pialu amuraore Kidirono dindi uli uli ngaruni bibahende pabe bu ya anda hene tamuha wiai holebira. Timbuniore pialu uyurayagi mini Nogo Hosi Panga Haraba laga ngagoria tagira polebira. Ani bidagola tano pabe bu yanda hene ogoniha bibahende loma biahalu Anduane Homogo i̱ninaga hangu wulebira. Ani ngagola waitigirume lone ibalu tanobi tanoha mbirale ngarubi bibahende abale bo gialobagabu wahayadagua lone nabulebira. Tano ogoni ibu hongoheore wiaho wiaabo holebira, lalu Anduane Homogohanda laya Yaremaiahanda lene.
JER 32:1 Sedegaia ibu Yuda dindiha kini heane mali pini hayagola Anduane Homogohanda Yaremaiahondo bi ogo lamini. Babilononaga Kini Nebugadenesa ibubi nde kini heane dege mali pira mbirani halini hayagola (18) Anduane Homogohanda bi ogo Yaremaia lamini.
JER 32:2 Ogoningi Babilono ami agali hearume Yarusaleme tano ho hagirabu heagola bi mana latagi haga agali Yaremaia ibu kininaga anda tagirahayagi Yarusaleme ami agaliru ti haga wiagoria ibu garabaya hene.
JER 32:3 Yaremaiahanda mbiwia halu Anduane Homogonaga bi mana latagi halu lalu, Anduane Homogohanda agua laya. Heneneore larogo i̱na Babilono kini kagome tano ogo karulelo yupe holebero. Ani berogola Babilono ami ibiragola Sedegaia ibu yo pialu napolebira. Anduane Homogo i̱na Kini Sedegaiaore Babilono kini kagome minilo yupe harogola Sedegaia ibugua Kini Nebugadenesa wanakuihayagi heyu howa ibuhondo bi hale haga birago ladai bialu holebira. Ani bialu Nebugadenesahanda Sedegaia Babilono dindiha garabayabu yalu polebira. Ani pu kane dege i̱na ti lone mitangi bulene horo manda bu harudago tagira ibilo holebero. Ani berogola tigua Babilono baba wai biyagua ti wayali naholebira. I̱ Anduane Homogo i̱na bi o ledogoniore, laya, lene. Sedegaia ibu bi ogoni hale howa ibugua Yaremaiahondo keba halu lalu, Í̠na bi ogoni aiwa langiyagola mbiwia howa latagi halu kebe, lowa Kini Sedegaiahanda Yaremaia garabayabu haabo helene.
JER 32:6 Yaremaia ibugua lalu, I̱ garabaya andaha hewangi Anduane Homogohanda i̱hondo bi ogodagua laya.
JER 32:7 Hale kebe. Í̠ aba hamene heyogone Salumu igini Hanamele ibu í̠ keria ibulebira. Ani ibuwa ibugua í̠hondo dindi mbira Anadodo tano ngagoria ibunaga ngago ogoni í̠na yolo bia lolebira. Í̠ ibu aba hamene howa dindi ogoni í̠na yolo bulene karulape kego manda bialu ani lolebira.
JER 32:8 Ani lole ibulebira lalu Anduane Homogohanda langiyadagua Hanamele ibu ami agali ti hagahayagi i̱ garabaya hewaria hondo ibalu Hanamele ibugua i̱hondo lalu, Í̠ i̱ hameneore howa í̠naore bibehe kego manda bialu i̱naga dindi mbira Beniyamini hameigini daluha Anadodo tano kawareni wiwago yolo bibelo hameledo. Dindi ogoni í̠ninagaore ngelo yolo bia, lene. Hanamele ibugua bi o layadagoni hale howa Anduane Homogohanda i̱na ani buliya hamelayada lo manda biru.
JER 32:9 Ani manda buwa agali maru bu hearu hendeaore i̱na dindi ogoni henene yolo bule lalu habo nalolene bi gilibu wialu i̱ninaga gi magi wiru. Ani buwa i̱na muni siliba genda magi handari kira (200) handalu dindi ogoninaga yolo Hanamele miru.
JER 32:11 I̱na beba kirani dindi ogoninaga habo nalolene bi gili binigo bi uruni mbira mo habo nalole lalu lo mbira haribadago gilibu wiru. Beba ogoni paulo ndibu lalu mendego bame ngelaru.
JER 32:12 Ani bialu beba kira ogoni i̱na agali mbira Mahasea aguane Neria igini Baruguhondo miru. I̱na dindi ogoni yolo bule bialu hewago agali maru bu hearume de handaya. I̱ hamene Hanamelebi agali maru beba tinaga mini gilibu wiyarubi Yudali dindi ogoniha hearubi ti bibahendeme dindi ogoni yolo bule bialu hewago de handai haya.
JER 32:13 Agali uruni tigua handayaho heaore dege i̱na Baruguhondo lamialu lalu,
JER 32:14 Anduane Homogo Hongo Haiheore Isaraele wali agalinaga Ngode Datagaliwabe kago ibugua ogodagua lalu, Barugu í̠na beba kira dindi yolo bini lalu bi lo winidagoni mende ndibuleda mende ndibu naleda ogonilabo í̠na yamialu be dindime wabini ngagoha ko nahe bayale lu wiaabo helonaga mo do habe.
JER 32:15 Ani larogo irane Anduane Homogo Hongo Haiheore Isaraele wali agalinaga Ngode Datagaliwabe kago ibugua lalu, Mani howa dindi andabi gerebi maburubi bibahende dindi ogoriani ngago lone yolo bulene wulebira, layagonaga i̱na ani gilibu wiru.
JER 32:16 I̱ Yaremaia i̱na Neria igini Baruguhondo beba habo nalolene bi gilibu wini biago mo muwa i̱na Anduane Homogohondo bi ogodagua laru,
JER 32:17 Anduane Homogo Bibahende Haru Haame Ho Haga-o í̠ninaga hongo timbuniore ho kegome dindi harila wabiniyago í̠na bibe nahe mbira nawiore.
JER 32:18 Wali agali bibahende dara hai haga howa í̠na mbiralime ko biragonaga dege tinibi tinaga waneigini aguane karubi bibahende pani nelo miaga kegoni. Ngode Datagaliwabe í̠ hangu dunini bolanguahebi hongoheorebi í̠naga mini Anduane Homogo Hongo Haiheore kegoni.
JER 32:19 Í̠na bayale bulenego dege manda bialu haga ke. Í̠ hongo gibihe howa mbirale timbuni gibiore ngaru í̠na biai haga ke. Wali agali bibahendeme bialu karuni handai ho haga kegoni. Í̠na mana tinime bialu karu hondowa tini biyadagua pani karulape nelo talebu ta haga ke.
JER 32:20 Bamba í̠na Iyibi dindini nahendene ale dewa birigoni. Áyubi nde í̠na Isaraele wali agali bu kamagohabi wali agali dindi tara tarani bu karuhabi nahendene ale bialu haabo haga kegoni. Ani bialu kegonaga wali agali bu karu bibahendeme í̠ mini leneore kegoni lai haga ka.
JER 32:21 Í̠ninaga hongo timbuniore hegome í̠na agalime nabiagane ale hongohe tara tara mogole hiriribi wiaru bialu Iyibi wali agaliru mo gi bia hari. Anidagua birigome í̠na Isaraele hameigini í̠naga wali agali haru tagira pialu ogoria holomaya haru ibiri.
JER 32:22 Ani haru ibuwa í̠nime bamba inanaga mamaliruhondo dindi ogo inahondo ngulebero lalu bi lo wiridagua ina mo ngiri. Dindi ogo bene bere mbirale bayale anda hai holene wiago ina ngiri.
JER 32:23 Ina dindi ogoriani karulole íbu howa iname í̠naga bi larigo hale nahe howa mana inahondo langirigobi nabi mo wahalu pugualu harimagoni. Iname anidagua birimagola í̠na inaha mo ko holene uruni ibilaga biriyagoni.
JER 32:24 Áyu nde Babilono amime Yarusaleme ho hagira bu yaanda howa ina baba wai bialu kagoni. Tigua tano karulolenaga tini heyu howa wai bule lowa tanonaga pabe tagirahayagi dindi dugu hono wima irigi halu kagoni. Waitigi urunime ina ho hagira bu yaanda howa ina baba wai bialu kagola ina hina gari timbuni bialu warago ko timbuni balu haabo kama. Anidagua bidagome Babilonoali tigua Yarusaleme karularagoni. Mbirale tagira ibulebira lalu bi lo wirigoni áyu tagira ibirago í̠ de hendedegoni ndobe.
JER 32:25 Heneneore Babilonome tano ogo karularagoni. Anigo Anduane Homogo Bibahende Haru Haame Ho Haga-o í̠nime i̱hondo langialu i̱na dindi ogo yolo bialu agalime habo nalolene bi lo wirugoria gi magi wia larigo ndobe, lalu Yaremaiahanda Anduane Homogohondo bi ogoni lene.
JER 32:26 Ani layagola Anduane Homogohanda Yaremaia lamialu lalu,
JER 32:27 I̱ni Anduane Homogo wali agali bibahendenaga Ngode Datagaliwabeore kogoni. Mbirale mbira i̱na nabibehego nawiore.
JER 32:28 Anigo Anduane Homogo i̱na dindi ogo Kini Nebugadenesabi Babilononaga ami agali Kaladia hameigini urunibi ti mo merogoni ndobe. Tigua tano ogoni karulalu
JER 32:29 irame bo heda holebira. Yuda wali agali tigua anda daliga danginihayagi iraga howa dama mitangi bialu mbirale gime wabini mini Bala wiagonaga mini yaraga halu ibuhondo ira hagua ngabi mini inisenesiru lomabu delalu waini ibabi odo loma birimigobi bo heda hai holebira. Tigua urunibi bialu hayagome i̱ mo keba timbuni hayagoni.
JER 32:30 Yuda wali agalibi Isaraele wali agalibi ti piganeore hemingi howa tigua mana ko dege bima ibalu haabo henego kagoni ndobe. I̱ Anduane Homogo kogome i̱na tigatigaore larogo horo bibahendengi tinaga mana ko ogonime i̱ mo keba halu haabo ka.
JER 32:31 Yarusaleme tano ogoni pigane biyangi howa Yarusaleme wali agalime i̱ mo keba hama ibalu haabo henego ka. Ani biyagonaga tano ogoni i̱ lone de nahondoleorego i̱na bo gialabaga biai holebero.
JER 32:32 Yuda wali agalibi Isaraele wali agalibi tigua i̱ mo keba holenaga mana ko tara tara wiaru bialu haabo harimi. Wali agali bu hearubi kini bu hearubi agali haguane bu hearubi loma binigo mo miaga hearubi mbiwia halu bi mana latagi haga hearubi ti bibahendeoreme mana ko dege bialu haya.
JER 32:33 Tigua i̱hondo erembira ngialu i̱ koriabi naibagaore hene. I̱na tihondo lawai haabo harugola tigua i̱naga bi hale habe manga howa i̱na ti mo tiga buliya naibagaore.
JER 32:34 Ani howa Isaraele wali agali tigua i̱ mitangi bialu lotu lalu helonaga anda helarugoha tigua dama mitangi bialu mbirale gime wabini ko ngubiore wiaru mo wu haya. Tigua ogonidagua biyagome i̱naga anda ogoni mebia haya.
JER 32:35 Ani bialu dindi ulini Hinomo wiagoha dama mitangi bialu bi pupu wiaga mini Balanaga dindi mo ngelaya. Ani mo ngelowa dama mini Molegehondo tini waneigini bo lomabu migi bialu haya. Anigo i̱na tihondo ogoniale bilimu lalu mbira nale haru. Tigua mana ko ngubi uruniale bialu Yuda wali agalimebi ko bilo mo bia holobada lo manda nabiore henego ko, laya lene.
JER 32:36 Anduane Homogo Isaraele wali agalinaga Ngode Datagaliwabe kagome i̱hondo au laya. Yaremaia-o wali agalime ogodagua lalu ka. Waitigime ina baba wai bule ibirago ai hina gari timbunibi tagira ibalu warago ko tara ngagomebi ina minaragoni. Anidagua bialu helowa Anduane Homogohanda tano ogoni Babilono kini kagome ibalu karulelo waholebira, lalu kagoni. Anigo i̱na tano ogoni mitangi halu bi mende larogo hale habe.
JER 32:37 I̱na heneneore buleberogo ogo. I̱naga bu miniha keba ho hewangi i̱na wali agali bibahende bo talia togo larugola ti dindi tara tara wiaruha pugu pugu binigo ai lone haru dai biai holebero. Ani haru dai bialu ti bayaleore helo dindi ogoria helolebero.
JER 32:38 Ani daibu helowa i̱ tinaga Ngode Datagaliwabe kogola ti nde i̱naga wali agaliore holebira.
JER 32:39 Tigua mini dewa nawilo i̱na tinaga mini mo mbiraore harogola ti hariga mbiraore degeni pialu holebira. Tigua i̱ni andaneha haabo haragola i̱na tibi tinaga waneigini aguanene mani holebirarubi uruni bibahende mo bayale hai ho helolebero.
JER 32:40 Ani bialu i̱na ti baba habo nalolene bi gahenge lo wulebero. Ani berogola habo nalolene bi gahenge ogoni ereba nahe wiaabo holebira. Tihondo mana bayale bialu i̱na ti mo bayale ho helaga mana wirugoni wa nahole lalu habo nalolene bi ogoni lo wulebero. Tigua i̱ helo wahalu lone napelobi i̱ni andaneha haabo helobi i̱na mini bayale tihondo talebu mulebero.
JER 32:41 Ani bialu i̱na tihondo bayale dege biaabo holebero. I̱naga minimebi gubalinimebi tihondo turu timbuni halu ti dindi ogoriani bayale haabo helo mo bayale ho helolebero.
JER 32:42 Anduane Homogo i̱na bi laabo halu ogodagua laro. Pigane i̱na tiha genda tandaga tara tara wiaru ibilarugoni. Anigo áyu i̱na tihondo bulebero lalu lo wirudagua ti bayale helo mbirale bayale holene hangu mo wia holebero.
JER 32:43 Wali agali karu tigua bi ogodagua larago, Anduane Homogo ibugua dindi ogo Babilono mo miyagome dindi bibahendeore mo ko hai halu wali agalibi nogo biangobi mbira muninibu naheore ngagoni ndobe, laga ka. Anigo Anduane Homogo i̱na ogodagua laro. Mani Yuda wali agali ti tini dalu ogoniha lone daibu howa tinaga dindi ngaru maru muni mia marume munime dindi yolo bia bialu holebira.
JER 32:44 Dindi ogoni heneneore yolo bini lalu habo nalolene bi lo wiragoria gi magihe wulebira. Ani bialu wali agali dewalinaga deni howa muni aba dindi abalame henene dobo berabagoni lalu bi gilibu wulebira. Tigua Beniyamini hameigini dindi ngagoria dindi yolo bialu Yarusaleme kawareni anda emene emene bu karuhabi yolo bialu Yuda dindiha tano maru ngaruhabi dindi hari bare bare wuyu pedaruhabi Yuda dindinaga abene unurayagibi ni paliragohayagi dindi hombene baragahe wima pedaruhabi dindi uruni bibahendeha muni mia munime dindi yolo bia bulebira. I̱na ti dindi ogoriani haru dai buwa mo bayale harogome ti turu halu ani bulebira. I̱ Anduane Homogo i̱na bi o ledogoniore, laya lalu Yaremaiahanda lene.
JER 33:1 Yaremaia ibu kini andaga ami agali ti hangu haga wiagohayagi garabaya dege haabo heagola Anduane Homogohanda ibuhondo bi mbira lone lole ibini.
JER 33:2 Anduane Homogo ibugua dindi bibahende wilonaga wabiaga bayale kago ibunaga mini Anduane Homogoore howa bi ogodagua i̱ Yaremaiahondo leda.
JER 33:3 Í̠na i̱ olariyagua bi larego damene i̱na hale halu biai holeberogo i̱hondo bi la dege bibe. Mbirale baya gibi í̠ nahendene wia do hene ngarubi i̱na í̠ mo walia haga bulebero.
JER 33:4 I̱ Anduane Homogo Isaraele wali agali tínaga Ngode Datagaliwabe kogo i̱na bi au laro. Yarusalemeni anda bu karubi Yuda kininaga anda karubi bibahende waitigime ibalu wai pabe tagiraha ho hagira buwa dindi dugu wima iraga halu ogoriani howa wai bulebira. Ani biragola Yarusaleme wali agali tigua tininaga anda gialalu ira ege to̱le̱ ngaru yalu puwa tanonaga wai pabe mo hongo hole gialo yalu polebira.
JER 33:5 Ani bialu tigua Babilonoaliru baba wai bule polebira. Yarusaleme wali agalirume mana ko dege bialu kagonaga keba ho kogo howa i̱na ti biamogo bulene hame naleore kogoni. Ani kogola tano ogoniha tinaga waitigirume ibalu bo wahaga birarunaga tingini tini andaga karuha homene bu payabu wulebira.
JER 33:6 Ani bidagola mani i̱na tano ogoni biamogo berogola wali agali ogoniha holebiraru lone bayale halu tano ogonibi lone bayale dege wulebira. I̱na tinaga holene bayale mo wia harogola tinaga waitigirume ti baba wai bulene henge nawi howa tini bayale holebira.
JER 33:7 Horo ogoningi Isaraele hameiginirubi Yuda hameiginirubi bibahende bayale hai helolebero. Ani buwa ti hongohe ala hayagobi dege heladai bulebero.
JER 33:8 Tigua mine halu i̱hondo mana ko timbuni bialu hayadaruni i̱na domo wahai halu i̱ninaga deni tiha ko mbira nawi bayale dege hai helolebero.
JER 33:9 Ani helarogola hameigini dindi tara taraha bu karume Yarusaleme wali agaliru i̱na mo bayale halu mana baya hangu biaabo harogo hondowa tigua i̱ baba dungulo howa i̱naga mini yaraga halu i̱ mini leneore ka lolebira. Wali agali tara uruni tigua Yarusaleme wali agali bayale kago hondowabi i̱na ti mbirale bayale tara tara ngaru mo miruligo hondowabi mogo lalu de handawabu wulebira, lene.
JER 33:10 Anduane Homogohanda lalu, Wali agalime áyu ogodagua lalu ka. Tano ogoni ko hai haragoni. Ogoniha wali agalibi nogo biango tara tarabi mbira naheore ngagoni. Yuda dindinaga tano ngaruhabi Yarusalemeha hariga pedaruhabi mbirali naheore ngagoni, lalu kago henene laragoni. Ani laragoyu mani ogorianiore wali agali dindi uruniha íbu hai holebira.
JER 33:11 Ani howa tigua turu taraore ho howa wali agali dabu birarunaga tomoru dawa nalu holebira. Ani bialu howa tigua i̱hondo ka̱i̱ lalu loma biniru mo yalu Anduane Homogo i̱ninaga andaha iba gana lama ibulebira. Tigua ibalu howa iba gana ogodagua lolebira, Iname Anduane Homogo Hongo Haiheore kagohondo ka̱i̱ lami̱ya. Ibu bayaleore howa inahondo mana bayale hangu biaabo halu haga ka. Ibugua ina gubalini ho haabo haga kagonaga ka̱i̱ lami̱ya, lolebira. Horo ogoningi Anduane Homogo i̱na dindi ogo ala bayale wiyagobi lone wiadai bilolebero. I̱ Anduane Homogo i̱na bi o ledogoniore, lene.
JER 33:12 Anduane Homogo Hongo Haiheore kago ibugua lalu, Dindi ogoninaga tano ngaru bibahende mo ko hai henego wali agali nogo biangobi mbira naheore ngagonigoyu mani tano uruniha wali agali dewa bu holebira. Dindi ogoniha datani bayaleru andaho kagola nogo sibi haru haga karume dindi bibahendeha tinaga nogo sibiru datani nelo haru haame holebira. Anidagua biragola nogo sibiru datani bayale bu karu naga bialu palu wima polebira.
JER 33:13 Ani padagola sibi anduane tinime nogo sibiru bayuwa dagalaga bialu holebira. Tigua biabe uruni hari emene bare bareni tano ngaruhabi hari uruni tene teneha tano ngaruhabi dindi emene mbira Yuda dindinaga abene unurayagi dindi emene mbira mini Negebe ngagoha howabi Beniyamini hameigini dindihabi Yarusaleme tano kaware ngaruhabi Yuda dindi tano bu ngaru bibahendehabi nogo sibiru hinalu haga haga bulebira. I̱ Anduane Homogo i̱na bi o ledogoniore, lene.
JER 33:14 Anduane Homogohanda lalu, I̱na bi lo wialu Yudali Isaraelealibi tihondo mbira bulebero lalu lo wirugo bulene horo biagoni tagira ibiragoni.
JER 33:15 Horo ogoningi ira dibini teneha hongone de lalu andaho aribia hagadagua Debidi aguanene mbirame kini ho aribia holebira. Agali ogoni ibugua dindi bibahendeha wali agali bu karu bibahendehondo mana bayale tigabi ngaru hangu bialu holebira.
JER 33:16 Ani bialu kangi Yuda wali agalibi Yarusaleme wali agalibi tiha genda mbira nawi bayale hangu holebira. Ani howa tinime Yarusaleme mini lalu, Anduane Homogo Ibu Inanaga Mini Tigabi Wulene Tene Ka, lolebira.
JER 33:17 Anduane Homogo i̱na ogodagua lo wero. Debidi aguaneneru hangume Isaraele wali agalinaga kini ho aribia haga bulebira laro.
JER 33:18 Ani bialu mendebi nde loma tara tara i̱nihondo bu ngialu irani dai helolenebi widi lomabu delolenebi nogo tara tara bo lomabu ngulenebi uruni bibahende Libai hameigini ariame hangu mo miaga haga bulebira, lalu lene.
JER 33:19 Ani lowa Anduane Homogohanda Yaremaiahondo lamialu lalu,
JER 33:20 I̱ Anduane Homogo i̱na heneneore larogo mbiraga horombebi libunaga holene henge mo ngelarudangiore libu heba habo nalolene bi lo wirudagoni mbiralime mo iriari nabibeheore.
JER 33:21 Anidagua dege i̱na i̱naga biabe biahaga Debidi ibu aguanenerume hangu kini ho aribia haga biaabo holebira lalu habo nalolene bi lo wirudago mbiralime mo habo labe naheore. Ani bialu agali maru i̱naga biabe biaga Libai hameigini aria loma binigo mo miaga karu baba habo nalolene bi lo wirugobi mbiralime mo habo nalabeheore.
JER 33:22 Mbiralime harini yakundi karubi iba angeni iba mu bu ngarubi dagalabe naheore. Ogonidagua i̱naga biabe biahaga Debidi ibu aguanenerubi Libai hameigini loma binigo mo miaga bu karu ti ariarubi i̱na mo dewaore helarogola mbiralime dagalabe naheore holebira, lene.
JER 33:23 Anduane Homogohanda i̱ Yaremaiahondo au laya,
JER 33:24 Wali agalime bi ogodagua lalu kago hale haribe. Bamba Anduane Homogohanda Yuda Isaraelela ibuninaga wali agaliore helo dabo helene. Ani helenego ai áyu ibugua ti erembira mialu handa tara hayada, lalu ka. Wali agalime bi ogonidagua lalu i̱naga wali agaliru mo ko halu mege bialu, Ti biamogo bulene mbira nahe ti burupale kagoni ndobe, laga ka.
JER 33:25 Ani lagago i̱ Anduane Homogo i̱naore tigatiga larogo mbiraga horombelahondo habo nalolene bi lowialu dindi harila libuhondobi mana mialu binigo bialu kagoni.
JER 33:26 I̱na heneneore larogo Yagaba hameigini bu karubi i̱naga biabe biahaga Debidibi ti erembira mialu handa tara nahe ti baba habo nalolene bi lo wirugo wiaabo holebira. Abarahama aguanenerubi Aisaga aguanenerubi Yagaba aguanenerubi bibahende handame ho helonaga Debidi aguaneneme kini helolebero. I̱na ti dara holene irane nawini howa i̱naga wali agali karu dara halu ti lone bayale helonaga biamogo biaabo holebero, lalu Anduane Homogohanda laya, lalu Yaremaiahanda lene.
JER 34:1 Babilononaga Kini Nebugadenesa ibugua ibunaga ami agalirubi dindi maru ibugua handayaho haga wiarunaga ami agalirubi haru ibuwa Yarusalemenibi Yuda dindiha tano maru wiagoriabi wai bialu heangi Anduane Homogohanda Yaremaiahondo bi ogo lamini.
JER 34:2 Anduane Homogo Isaraele wali agalinaga Ngode Datagaliwabe kago ibugua Yaremaiahondo lalu, Í̠na Kini Sedegaia karia puwa bi ogodagua lamibe. I̱ Anduane Homogo kogome i̱na tano ogoni Babilononaga kini kagohondo merogola ibugua tano ogoni bo heda holebira.
JER 34:3 Ani biragola Sedegaia í̠ yo pialu ibida napolebere. Tigua í̠ Nebugadenesa karia minu yalu pu heledagola libu bi loleberebi. Ani bialu tigua í̠ Babilono minu yalu polebira.
JER 34:4 Anigo ai Yudanaga Kini Sedegaia-o Anduane Homogo i̱na í̠hondo bi mende larogo hale habe. Waitigirume í̠ bo wa naholebira.
JER 34:5 Í̠ hodagua halu homolebere. Í̠ homaregola bamba í̠ mamalime Yudanaga kini homeneru hora halu howa ira hagua nga bilo inisenesiru delagadagua tigua í̠naga tingini hora halu howa í̠ mini yaraga halu inisenesi delolebira. Tigua dara timbuni howa kiabu dugu bialu lalu, Inanaga agali haguane homayada, laga bialu holebira. I̱ Anduane Homogo i̱na bi o ledogoniore, lalu Anduane Homogohanda Yaremaiahondo lene.
JER 34:6 Ani layagola Yaremaia ibugua Kini Sedegaia ibu Yarusalemeni hearia puwa bi ogoni lamini.
JER 34:7 Ogoningi Babilononaga kini heago ibunaga ami agalirume Yarusaleme tanohabi Lagisi tanohabi Asega tanohabi wai bialu hengi bi ogoni lamini. Waitigime Yuda dindi bibahendeni tano hongohe wai pabe timbuni bu mabubi hearu bo podohana haga bialu ti karulai halu tano tebira Yarusaleme tano Lagisi tano Asega tano uruni dege karulole wai bialu hene.
JER 34:8 Kini Sedegaiabi Yarusaleme wali agalirubi tigua tinaga garabaya biabe ale biahaga wali agali hearu golope hami̱ya lalu bi lowini.
JER 34:9 Tigua ogodagua bimi̱ya lowa lalu, Isaraele wali agali mbira tinaga damene dege bu karunaga garabaya biabe ale biahaga heagua nde ogoni ibu golope halu pu lami̱ya. Yuda wali agali dege kago garabaya biabe ale bialu helolene nawi, lalu lowini.
JER 34:10 Agali haguane dewali bu hearumebi bi ogoni karulapeda lowa e̱ lai hene. Tigua bi lo wialu wali agali garabaya biabe ale biahaga hearu golope halu pudaba lene.
JER 34:11 Ani lowa dege mani howa ti mini mende wialu wali agali golope hene biaruni lone haru dai bialu tinaga garabaya biabe ale bia helo helene.
JER 34:12 Anidagua biyagola Anduane Homogohanda Yaremaiahondo bi ogodagua lamini.
JER 34:13 I̱ Anduane Homogo Isaraele wali agalinaga Ngode Datagaliwabe i̱na tínaga mamaliru Iyibi dindiha garabaya biabe ale biahalu hearia golope halu haru tagira ibuwa mani ti baba habo nalolene bi mbira lo wirugoni au laru.
JER 34:14 Tígua tínaga damene degeme garabaya biabe ale biahaga heledemiru ti mali waragaria biabe bialu hayagua nde mali kane tagira ibugu biragola golope halu pudaba lalimu lalu langirugoni. Ani larugola tínaga mamali bu heneru tigua i̱na bi o larudagoni hale howa talialu bia dege nabiaga hene.
JER 34:15 Tígua áyu dege mini beregedo howa i̱naga deni mana bayale tigabi wiaru bialu harimi. Ani bialu tí hangu hangume tínaga wali agali garabaya biabe ale biahaga hayaruhondo lamialu, Tí garabaya biabe ale biahaga ndo golope hene hole pudaba, larimigoni. Tígua i̱naga anda loma biahene heagoha i̱naga wanakuini heyu howa, Wali agali garabaya biabe ale biahaga bu karu golope halu pudaba lami̱ya, lalu habo nalolene bi lo wirimi.
JER 34:16 Anidagua larimigo lowa dege wali agali golope halu pudaba larimiru lone minuyu dai bialu tínaga garabaya biabe ale biahaga helo heladai bidami. Tígua mana ogonibi bialu kamigome i̱naga mini timbuni leneore kogo mo dindiha halu kamigonida.
JER 34:17 Ani birimigonaga i̱ Anduane Homogo i̱na tíhondo bi ogodagua larogo hale hadaba. Tígua i̱naga bi mo wahalu tíni damene biaru pelo golope naharimigo i̱na tí golalu yupe harogoni. I̱na tí yupe harogola tíni pialu homai holeberemi. Maru waitigirume bo waharagola homalu maru warago ko ngagome baragola homalu maru hina garime homalu buleberemi. Anidagua bialu kamigola wali agali dindi tara tara ngaruha padarume tíha birago hale howa ti gi timbuni halu mogolai holebira.
JER 34:18 Tígua i̱naga deni heyu howa habo nalolene bi mbira lowialu buleore larimigo mo habo larimigonaga i̱na tíhondo mana mbira buleberogo ogo. Mana ogoni nogo bulumaga mbira bowa bo daga birimi. Ani buwa dagane lene labo labo ngelowa tíni hanuni pu íbu birimigoni ndobe. Ani bu howa mani tínaga wali agali bu hearu dewaoreme habo nalolene bi lo wiyago mo habo lai harimi. Anidagua bialu kamigonaga i̱na tíni nogo bulumaga bo daga birimidagua bulebero.
JER 34:19 Áyu i̱na wali agali nogo bulumaga dagane lene labo labo ngelowa dombeni bolangua halu pu íbu biyaruni Yudanaga agali haguane karubi Yarusalemenaga agali haguane karubi kini andagaha haga agali haguane karubi loma binigo mo ngiaga bu karubi wali agali maru bu karubi tigua bulumaga biago biyadagua i̱na tihondo bulebero.
JER 34:20 Wali agali uruni i̱na waitigi karunaga giha minu ya harogola tigua bo wahai holebira. Anidagua biragola tinaga tingini egaru nogo biango gabua biru karume ibalu nai holebira.
JER 34:21 Ani bialu i̱na Kini Sedegaiabi ibunaga agali haguane maru bu karubi bibahende ti waitigiali Babilononaga kini kago ibunaga ami agali bu karu giha minu ya holebero. Ani berogola Babilononaga ami agali uruni tigua tí yupe halu pudaba lolebiragoyu
JER 34:22 ai i̱ Anduane Homogo kogome agua bulene nga lalu tihondo lamerogola tigua lone Yarusaleme dai buwa wai bo anda pialu tano bibahende irame bo heda hai holebira. Ani bialu i̱na Yuda dindiha tano ngaru bo gialabaga bu wahai harogola tano bameore wialu wali agali lenego mbira naholebiraore. I̱ Anduane Homogo i̱na bi o ledogoniore, lalu lene.
JER 35:1 Yosaia igini Yahoiagimi ibu Yuda dindiha kini heangi Anduane Homogohanda i̱ Yaremaiahondo bi langialu lalu,
JER 35:2 Í̠na Legaba hameigini bu karu hondo puwa ti baba bi lalu Anduane Homogo i̱naga anda hobane mbira kagoha ti haru anda ibabe. Ani ibuwa í̠na ti waini iba nelo hambu mibe, laya.
JER 35:3 Ani laya handala i̱na agali mbira Legaba hameigini aria Yaremaia mendenaga igini Yasanaia heago ibu Habasinia aguane mbira henego hondo piru. Hondo puwa ibu hamene bu hearubi ibu igini hearubi ibu aria maru hearubi haru ibai haru.
JER 35:4 Ani ibalu Anduane Homogonaga anda heagoha bi mana latagi haga Hanana talima piaga aria Igidalianaga anda hobane heagoha haru anda ibirima. Hanana ogoni ibu Ngode Datagaliwabenaga bi mana bayuwa hale halu biaga mbira hene. Anduane Homogonaga agali haguane hearunaga anda hobane heago kaware dege daligaha Salumu igini Masea ibunaga anda hobane henegoha anda ibirima.
JER 35:5 Ani buwa i̱na waini iba beha berelowa agali Legaba hameigini uruni ti nelo mialu howa lalu, Waini iba o bedago nadaba, laru.
JER 35:6 Ani larugola tigua lalu, Iname waini iba ogoni nanoleberema. Ina mamali Legaba igini Yonadabahanda mana mbira wabu wialu ina hameigini kamarubi ina igini aguanene mani holebirarubi bibahendeme waini iba nanalimu lene.
JER 35:7 Ani lowa ibugua inahondo bi marubi langialu, Tígua e andabi nabi gerebi mabubi nahangalimu, lalu mana lene. Ina horo bibahendengi balai andaha dege haabo holene nga lene. Iname mana ogoni talialu harimayagua nde ina dindi ogoni nabaile howa ogoriani lu haabo holeberema lene.
JER 35:8 Ina mamali Yonadabahanda bi mana o lenedagoni iname talialu bialu haabo haga kama. Inanebi ina one waneiginirubi bibahende waini iba nanaga kama.
JER 35:9 Iname andabi nabiaga gerebi mabubi nahangaga mabu marubi nahangaramali.
JER 35:10 Ani nabi ina balai anda hangu bu haabo haramaligome Yonadabahanda mana langinidagoni taluwa biaiore halu haabo haramali.
JER 35:11 Ani hemaria Nebugadenesa Babilononaga kini kagome ina baba wai bule Kaladia ami Siria amibi ibiyangi urunime ina bo waholilono gi halu ina bi lo mbira howa Yarusaleme tanoha hami̱ya ma lenego íbu kama. Ani buwa áyu Yarusaleme haabo kamagoni, lalu ladai biya, lene.
JER 35:12 Tigua bi ogoni lai hayagola Anduane Homogohanda Yaremaiahondo lamialu lalu,
JER 35:13 I̱ Anduane Homogo Hongo Haiheore Isaraele wali agalinaga Ngode Datagaliwabe kogo i̱na bi o larogo. Í̠na Yuda wali agalibi Yarusaleme wali agalibi tihondo ogodagua lamibe. I̱ Anduane Homogo i̱naga mana lo ngogo wali agali tigua talialu bialu helo mana lawai holenego hamelo ko.
JER 35:14 Bamba Legaba igini Yonadabahanda ibunaga waneiginirubi hameigini mani holobadarubi tí waini iba nane halimu lene. Anidagua lenedangi tinaga mamalinaga bi hale howa nane dege hama ibinigo áyubi ogoni dege haabo ka. Anigo i̱na tíhondo bi mana langiaabo ha harugoyu tígua hale nahe harimigobi dege haabo kami.
JER 35:15 I̱naga mana latagi haga agaliru pu larugo ibugu biya. Tigua ibuwa ogodagua laya, Tí bibahendeme bu mini beregedowa mana ko wahai halu mana tigabi bialu halimu. Ani bialu tígua dama mitangi bialu mbirale gime wabu ngaruhondo bi pupu nawilimu. Tígua i̱naga mana taluwa bialu harimiyagua nde tí halimulo dindi bayale tínaga mamaliruhondobi tínihondobi ngirugoria holeberemi, lalu langini. Agali bi mana latagi hagane ibiyarume bi uruni lalu hayagoyu tígua i̱naga bi mana uruni hale naharimi.
JER 35:16 Legaba igini Yonadaba ibunaga waneigini aguanene hama ibinidaru tigua nde ti mamalinaga bi mana yu howa baya hangu taluwa bialu haga. Anigo wali agali áyu kamiru tígua i̱naga bi hale nahagaore haabo kamigoni.
JER 35:17 Anigo ai i̱ Anduane Homogo Hongo Haiheore Isaraele wali agalinaga Ngode Datagaliwabe kogo i̱na Yuda wali agalibi Yarusaleme wali agalirubi tígua hale halimulo bi ogo laro. Bamba tíhondo i̱na bi mana langirugo tí hale naharimigonagabi i̱na tí nde olalu harugoyu tí ya nale harimigonagabi i̱na tíha mo ko holene ibilole lalu lo wirugo ibilarogoni, laya lalu Yaremaiahanda lene.
JER 35:18 Mani Yaremaia ibugua Legaba hameigini biaru lamialu lalu, Anduane Homogo Hongo Haiheore Isaraele wali agalinaga Ngode Datagaliwabe kago ibugua layago langero lowa lalu, Tígua tínaga mamali Yonadabanaga bi hale halu ibugua bilimu layadagua bialu haga kami.
JER 35:19 Anigo i̱ Anduane Homogo Hongo Haiheore Isaraele wali agalinaga Ngode Datagaliwabe kogo i̱na bi larogo Legaba igini Yonadaba ibu igini aguaneneru aria mbirame i̱naga anda kogoha biabe bu aribia haga bialu haabo holebira, laya lalu Yaremaiahanda lene.
JER 36:1 Yosaia igini Yahoiagimi ibu Yuda dindinaga kini heane mali maria peagola Anduane Homogohanda Yaremaiahondo bi ogodagua lamini.
JER 36:2 Ibugua lalu, Anduane Homogo i̱na Yuda dindihabi Isaraele dindihabi hameigini dindi tara tara ngaruhabi ogodagua bulebira lalu langiruruni bibahende mbuga mbirani gilibu wiai habe. I̱naga bi bambaore Kini Yosaia heangi langirugoria howa ala gili bialu áyu ogoria langerogobi gili bibe.
JER 36:3 Yuda wali agali bu karuha tandaga bulene tara tara dewa i̱na mo yu anda ibiloleberogo lalu langerogoni hale howa tigua mana ko bialu karuni wahai halu bu mini beregedelo. Ani biyagua nde i̱na tinaga ko wiyaru domo wahai holebero laya, lene.
JER 36:4 Ani layagola Yaremaiahanda Neria igini Barugu olalu íbu lowa Anduane Homogohanda bi lene biaru bibahende layadagua latagi hai hayagola Baruguhanda mbuga mbirani gilibu wiai hene.
JER 36:5 Mani Yaremaia ibugua Baruguhondo lalu, I̱nime Anduane Homogonaga andaha pobe nahe kogonigo
JER 36:6 Barugu í̠na Anduane Homogonaga bi áyu mbugani gili birigoni Anduane Homogonaga andaha yalu puwa bi uruni wali agali bu karu hale helo dagalo mibe. Horo mbira wali agali ti tomo nane haga heangi Anduane Homogonaga andaha íbu ngoai haragola ogoningi í̠na mbuga ogoni mo yalu puwa wali agali Yuda tano bibahendeha howa íbu karume hale helo daga latagi habe.
JER 36:7 Anduane Homogohanda wali agali urunihondo keba timbuniore ho kago howa ibugua wali agali uruniore mo tandaga holene gibiore ibilolebero laya. Anigo tigua mana ko bialu hayaru wahalu mini beregedalu Anduane Homogohondo biamogo bibe lalu bi layagua nde ti bayale holebira, laya.
JER 36:8 Yahoiagimi ibu Yuda dindinaga kini heane mali daunigonaga ege dini hayagola Yuda wali agalirume tomo nane wahowa Anduane Homogo mitangi bialu lotu lolene horo mo wini. Ani buwa wali agali Yarusaleme tano howabi Yuda dindi bibahendeha howabi Anduane Homogonaga andaha íbu ngoai hene. Ani ngoai ho heagola horo ogoningi Barugu ibugua Yaremaiahanda bibe lalu lamiyadagua bialu mbuga mbirani bi gilibu wiyago Anduane Homogonaga andaha yalu pene.
JER 36:10 Yalu pialu anda tamuha pu howa ibugua Anduane Homogonaga bi mbuga mbirani gilibu wiyago daga layagola wali agali bibahende hearume hale hai hene. Barugu ibu mbuga ogoni dagalalu howa anda tamu hobane heagoha ubanda tagi biaga panga haraba wiagoria howa dagalalu hene. Tamu hobane ogoni Sabana igini Gemaraia mbira henego ibu tamu wini. Sabana ogoni ibu bamba kininaga bi larago beba gili biaga hene. Anda tamu hobane ogoni daliga wali agali íbu ngoaiho haga wiagoria Anduane Homogonaga anda haraba panga mini Panga Gahenge laga wiagoria hene.
JER 36:11 Sabana aguane Gemaraia igini Migaia ibu Anduane Homogonaga andaha howa Baruguhanda Anduane Homogonaga bi mbuga biagoria gilibu wini dagalayago haleho hene.
JER 36:12 Ani hale halu ibu kini andaga pole dalipe halu pene. Puwa anda hobane mbira kininaga beba gili biaga biragane wiagoha pialu kininaga haru haga hearu ngoai ho berearia anda pene. Haru haga agali berearu ti kininaga beba gili biaga Elisamabi Semaia igini Delaiabi Agabo igini Elenadanabi Sabana igini Gemaraiabi Hananaia igini Sedegaiabi agali marubi mandagi ngoai ho berene.
JER 36:13 Ti berearia Migaia ibuwa ibugua Anduane Homogonaga bi mbugani gilibu winiru wali agali bu hearume hale hai helo Baruguhanda dagalayaruni bibahende garea lomiai hene.
JER 36:14 Agali haru haga biarume Migaiahanda bi layago hale howa agali mbirame Barugu ibilo haru ibule pu lene. Agali Barugu damu piyadagoni Selemaia aguane mini Yahudi ibu Nedania igini hene. Selemaia ibu Kusi igini hene. Yahudi ibugua Barugu hearia puwa lalu, Mbuga í̠na wali agali hale helo daga latagi harigoni mo yalu íbu, lene. Ani layagola Barugu ibugua mbuga biagoni agali haru haga biaru ngoaiho berearia mo yalu ibini.
JER 36:15 Mo yalu ibiyagola agali haru haga biarume lalu, Mbuga ogoriani bi gilibu ngaruni ina hale holoma̱ya dagalole birabe, lene. Ani layagola Baruguhanda ti hale helo mbuga biago dagalalu berene.
JER 36:16 Tigua bi mbugani gilibu wiaru dagalayago hale howa ti mogo timbuni lalu gi howa tini handaya haga haga bini. Ani buwa tigua Baruguhondo lamialu lalu, Heneneore kini ibu bi ogoni hale helo lamule porama, lene.
JER 36:17 Ani lowa tigua hale halu lalu, Í̠na bi uruni agua bialu mbuga ogoriani gili binibe. Yaremaia ibugua bi uruni gili bia lalu langigi biyagola í̠na gili bigi biribe ina hale holoma̱ya langi, lene.
JER 36:18 Ani hale hayagola Baruguhanda ladai bialu lalu, Ogoni henene. Yaremaia ibugua langiyagola i̱na gili biaga wiagome mbuga ogoria bi layago gilibu wirudagoni, lene.
JER 36:19 Ani layagola haru haga biarume lalu, Áyu ogoniore Yaremaia karia abale dai bialu libu haru ibida pialu mbiraha ha do hole pudaba. Agali haguane karume bi ogoni hale hayagua libu bo waholebirago dindi piagone mbira libu ha do kabigo agali marume hondolani hondowa halibu, lene.
JER 36:20 Agali haru haga biarume mbuga biago muwa kininaga beba gili biaga Elisamanaga tamu wiagoha mo ngelene. Ani mo ngelowa kini biago wali agali ngoai haga wiagoha berearia pialu tigua mbirale o biyaruni lamiai hene.
JER 36:21 Lamiai hayagola kini ibugua bi uruni hale howa Yahudihondo mbuga ogoni mo pu lene. Yahudi ibugua mbuga ogoni Elisama tamuha wini biago mo yalu kini berearia ibini. Mo yalu ibuwa ibugua kinibi ibunaga agali haguane hearubi ti hale helo dagalo mini.
JER 36:22 O binidagoni ege dini hayagola dagare bulene horo tagira ibiyangi kini ibu ibuni andaga hobane mbira biragane wiagoha ira deagoria dagare dogo bialu berearia mbuga biago mo yalu ibini.
JER 36:23 Yalu ibuwa Yahudi ibugua mbuga biago dagalalu hene. Wene obeneni dagalalu heaore dege kini biagome ayu tibu emene mbirame mbuga Yahudihanda dagalayagoyagi poda muwa iraha delene. Dagalaga biyagola emene podo delaga bialu kini ibugua mbuga biago budalu bibahende irani delai hene.
JER 36:24 Ani delai howa kinibi ibunaga agali haguane biarubi ti bibahendeme bi mbuga biagoria wini dagalayago hale hai howa tigua ko biyarunaga taga halu daraho kama lalu walia halu tinaga aga buda nabi halu gi naheore hene.
JER 36:25 Agali maru Elenadanabi Delaiabi Gemaraiabi tigua kinihondo mbuga ogoni nadelole lowa hongo howa lamiyagolabi kini ibugua tinaga bi uruni hale nahe howa budu delaiore hene.
JER 36:26 Ani bialu kini ibugua ibu igini Yaramelebi Asariele igini Seraiabi Abadele igini Selemaiabi tigua agali kirali bi mana latagi haga Yaremaiabi beba gili biaga Barugubi minu yalu ibule pudaba lene. Ani layagola agali uruni tigua ogonilabo minule taya bima pialu hearia Anduane Homogohanda agali ogonilabo mo do heagola tigua nahende tayabu wahene.
JER 36:27 Kini Yahoiagimi ibugua Anduane Homogonaga bi Yaremaiahanda Barugu lamiyagola ibugua gilibu wigi bini biago budu delayagola mani Anduane Homogohanda Yaremaiahondo lalu,
JER 36:28 Mbuga mende muwa Yudanaga Kini Yahoiagimihanda budu delayagoni bi o biaruni dege lone gili bibe.
JER 36:29 Ani bialu Kini Yahoiagimihondo bi mbira ogodagua gilibu pelabe. I̱ Anduane Homogo i̱nioreme larogo. Kini Yahoiagimi í̠na mbuga biago irani delalu Yaremaiahondo bi ogodagua lari. Babilononaga kini ibuwa inanaga dindi ogo bo gialobaga bialu mo labu halu wali agali bibahendebi nogo tara tara karu bibahendebi bo hilo wahai holebira, lalu gilibu winiyago í̠hondo ani bulebira lalu aiwa langiyabe, lalu hale harigoni.
JER 36:30 Ai áyu Anduane Homogo i̱naore Kini Yahoiagimi í̠hondo larogo, Í̠naga waneigini aguaneneoremebi Kini Debidinaga biragane dagia ngagoria biruwa haru ho haga kini mbira naholebira. Kini Yahoiagimi í̠ homarengibi nde í̠naga tingini mbiralime mo yu hora nahe dindini ngelowa kagola nime do yogo bialu mbiraga dagare bialu pibira ibira haragomebi libulo waho wulebira.
JER 36:31 Í̠nabi í̠naga waneigini aguanenerumebi í̠naga agali haguane karumebi tí bibahendeoreme ko birimigonaga i̱na bo hilo wahaiore holebero. I̱na abale tíhondo bi langirugoni tí hale nahe harimigo ai ani bulebero larudagua genda timbuniore Yarusaleme tanohabi Yuda dindi bibahendehabi ibai helolebero, lalu Anduane Homogo ibugua lene.
JER 36:32 Anduane Homogohanda bi ani layagola Yaremaia ibugua mbuga gahenge mbira gili biaga agali Baruguhondo lone gili bilo mo mini. Ani muwa Yaremaiahanda bi abale kini ibugua delayagobi lone ladai bini. Ani bialu bi marubi ogonibi dege latago halu Baruguhanda gili bilo lamini. Ani lamiyagola Barugu ibugua bi uruni bibahende mbuga gahenge ogoriani gilibu wiai hene.
JER 37:1 Babilono dindinaga Kini Nebugadenesahanda Yahoiagimi igini Yahoiagini ibu Yuda dindinaga kini henego mo aribia halu Yosaia igini Sedegaia ibu Yuda dindiha kini helo dabo helene.
JER 37:2 Sedegaia ogoni ibuguabi ibunaga agali haguane hearumebi ibunaga wali agali bibahende hearumebi Anduane Homogonaga bi Yaremaiaha howa latagi haga biyago hale nahagaore hene.
JER 37:3 Horo mbirungi Kini Sedegaiahanda agali kirali Selemaia igini Yahugalabi Masea igini loma binigo mo miaga Sebanaiabi libuhondo lalu, Libugua Yaremaia karia puwa au lalibu. Kini ibugua lalu ina bayale holoma̱ya biamogo bia lalu Anduane Homogo inanaga Ngode Datagaliwabehondo bi lahabe laya, lole pudaba, lene.
JER 37:4 Ogoningi tigua Yaremaia garabaya nabi heangi howa ibunime ta nabi poa biyagoha puibu bialu ibaga biai haga hene.
JER 37:5 Horo ogoningi Babilononaga ami henerume Yarusaleme ho hagira bu hearia tigua Iyibi dindinaga ami dewaore Iyibi dindiha howa Yarusaleme ibule harigani ibira layago hale howa Babilono ami biaru ti wahalu dai bini.
JER 37:6 Ti ani bialu heangi Anduane Homogohanda bi mana latagi haga Yaremaiahondo bi maru laminigo ogo.
JER 37:7 I̱ Anduane Homogo Isaraele wali agalirunaga Ngode Datagaliwabe i̱na larogo. Yuda wali agalirunaga Kini Sedegaia ibugua i̱na ti biamogo buledabe nabuledabe hondole hale ho pudaba layadago. Ani biyadago ai dai buwa kinihondo ogodagua lamibe. Iyibi dindiha kini kagonaga ami tí biamogo bule tagira ibalu hariga obeneni howa ti beregedalu tininaga dindi dai bialu tí kamiria anda naibulebira.
JER 37:8 Ani biragola Babilononaga ami biaru lone dai buwa tí baba Yarusalemeni wai bialu tano ogoni ti karulowa irame bo heda hai holebira.
JER 37:9 Anduane Homogo i̱naore larogo. Tígua lo mitangi bialu, Babilono ami biaruni Yarusaleme lone nadai bulebira, lolamini. Ani larimiyagua tíni mo hondo haramigoni. Babilono ami ti ibulebira larogo heneneore ibulebira.
JER 37:10 Tígua Babilono amiru baba wai bialu uruni bibahende bo podahana harimiyaguabi tinaga ami agaliru dewaore bo homelai harimiyaguabi maru timu heba homabehe yalu dai buwa wai hamani anda karuha wiyaguabi tigua hibu lalu ibuwa Yarusaleme tano bo heda halu delolebiraore laro, laya lene.
JER 37:11 Babilono ami biarume Iyibi kininaga ami harigani ibira layago hale howa ti Yarusaleme wahalu pialu tini dalu dai bini.
JER 37:12 Horo ogoningi Yaremaia ibu Yarusaleme wahalu Beniyamini hameigini dalu wiagoha dindi mbira ibu damenerunaga wiago ibuni mo wule pene.
JER 37:13 Ani pole lowa Yarusaleme tano wahalu tano pabe panga mbira mini Beniyamininaga Panga laga winigoria tagira pole pene. Ani tagira pialu hearia Yaremaia ibugua ami haru haga haguane mbira Hananaia aguane ibu Selemaia igini mini Iriya henego ibu wali agali panga haraba ogoniha ubandatagi ai birabe hondole lowa mamage ho hearia ibini. Ibiyaria Iriya ibugua Yaremaia abale minu yania howa lalu, Í̠ Babilono wali agaliru baba Babilono dindiha hama polenaga ohalu pialu heria handa walia kogoni, lene.
JER 37:14 Ani layagola Yaremaiahanda ladai bialu lalu, Í̠ ke̱ haregoni. I̱ Babilonoaliru karia pole ndo poro, lene. Ani layagola Iriyahanda Yaremaianaga bi layagoni mo henene nahe howa ibugua Yaremaia agali haguaneru berearia minu yalu pene.
JER 37:15 Agali haguane biarume Iriyahanda bi layago mo henene howa tigua Yaremaiahondo keba timbuniore hene. Keba howa tigua Yaremaia tibume minu balu beba gili biaga agali mbira Yonadana henego ogoni andaga mo garabaya anda buhinu winigo ogoniha Yaremaia garabaya helo helene.
JER 37:16 Garabaya anda ogoni hobane dindiha henego ai Yaremaia ibu garabaya anda ogoniha luore hene.
JER 37:17 Mani howa Kini Sedegaiahanda, Yaremaia i̱ koria ibilo agali maru nahendelo ohalu damu pudaba, lene. Ani layagola tigua Yaremaia damu puwa haru dai biyagola kini libuni hanguore biruwa kini biagome Yaremaiahondo hale halu lalu, Anduane Homogohanda í̠hondo bi mbira langiyabe nalangibe, lene. Ani layagola Yaremaia ibugua kinihondo ladai bialu lalu, E̱ Anduane Homogo ibugua bi mbira ogodagua langiya. Mbiralime í̠ minalu Babilononaga kini bedago ibunaga giha minu ya holebira laya, lene.
JER 37:18 Ani lowa Yaremaiahanda kinihondo hale halu lalu, I̱na í̠hondobi í̠naga agali haguane karuhondobi wali agali maru karuhondobi ko mbira agi birugonaga i̱ garabaya heledamibe.
JER 37:19 Í̠naga bi mana latagi haga agali biarume mbiwia halu lalu, Babilonoalime í̠ baba wai nabulebira, laga bialu hayaru uruni tini áyu agoha kabe.
JER 37:20 Aiore agali haguane-o i̱na í̠hondo bi mbira hale hole hameledogo. Í̠na i̱ dara halu beba gili biaga agali Yonadana ibunaga garabaya anda biagoha hole daibia nalabe. I̱ garabaya anda ogoniha pu koria homoligo, laro lene.
JER 37:21 Ani layagola Kini Sedegaiahanda biabe biaga hearu lamiyagola tigua Yaremaia ibu kininaga anda pabe tamuhayagi helo ami agaliru heba helene. Ani helowa kini ibugua ibunaga mberedi hiraga andaha howa horo bibahendengi mberedi mbira Yaremaia mo migi bilimu lene. Ani miaabo halu howa tano ogoniha mberedi biba hayagola tigua mbira mulene nawiyagola howa Yaremaia ibu ami agali biaru heba garabaya hayagoha haabo hene.
JER 38:1 Yaremaiahanda wali agali bu hearuhondo bi ogodagua lalu hene. Anduane Homogohanda lalu, Wali agali tano ogoha kamiru bibahende homai holeberemi, laya. Tínaga waitigirume balu home layaguabi hina garime homarimiyaguabi warago ko tara tara ngarume homarimiyaguabi uruni mbira mbiragome homolene wulebirago ai tí bayale nahome hole hame larimiyagua nde Babilonoali amiru karia tagira pialu polene nga. Tagira pialu poramigola Babilono amirume tí abale minalu ba nabulebira. Anduane Homogohanda lalu, Tano ogo Babilono kini kagonaga amirume karulelo yupe holebero laya, lene. Ani layagola hale hene agali haguane uru. Madana igini Sebadaia Pasua igini Gedalaia Selemaia igini Yahugala Malagaia igini Pasua imaru agali mariali uruni ti hale hene.
JER 38:4 Agali haguane uruni tigua hale halu puwa kinihondo lalu, Yaremaia ibugua bi laragome ami agali tano mamage haga karunaga hongo bo podalu wali agali bibahende karunaga hongobi bo poda dege birago ibuni homolene nga. Agali ogoni ibugua wali agali bayale helo biamogo bulene hame nale howa bibahende homai helo hamelo kagoni, lalu kini lamini.
JER 38:5 Tigua anidagua layagola Kini Sedegaia ibugua ladai bialu lalu, Ogoni tíni hame ledamidagua bilimu. I̱na nabidababe lalu hapai naholebero, lene.
JER 38:6 Ani laya handala agali haguane biaru tigua Yaremaia iba biraga uli mbira wiagoha haru puwa pu luni mbirame Yaremaia minu hende howa iba uli biagoha yupe hene. Uli ogoniha iba nabere dindi waru dege wini. Yaremaia ibu iba biraga gundu uli ogoniha hearia ibunaga ge waru timbuni wiagoha namu lai hene. Uli ogoni kini igini Malagaia mbira henego ibunaga winigo ai ogoni kini ibunaga anda pabe tamuhayagi ami haguaneru haga wiagoha wini.
JER 38:7 Agali mbira Sudanali kininaga agali haguane dege mini Ebedemelege henego ibu hale halu hearia tigua Yaremaia iba uli ogoniha minupe ka layago hale hene. Horo ogoningi kini ibuni tanonaga pabe panga mini Beniyamininaga Panga laga winigoria wali agalinaga godi hale halu berene.
JER 38:8 Ani bereagola Ebedemelege ibugua kini andagaha howa tagira pialu kini berearia puwa lalu,
JER 38:9 Agali timbuni-o agali urunime Yaremaiahondo mana ko liaheore bialu iba uli ko wiagoha minupe harimiya. Ai ibu ogoniha ngelo waharimayagua ibu tomo naneore wialu homolobada. Ai tano ogoha tomo nawi biba hayadago í̠ manda bidegoni, lene.
JER 38:10 Kini ibugua bi ani layago hale howa Ebedemelegehondo lalu, Ai Yaremaia homoligo í̠na agali i̱ heba kamaruni aria pira tebira (30) haru halu puwa Yaremaia iba uli ogoniha howa dugu yamule pudaba, lene.
JER 38:11 Ani laya handala Ebedemelege ibugua agali uruni haru halu kini andagaha hobane mbira dindiha henego ogoniha anda puwa labolabo haragaya wiaru mo yalu iba uli wiagoha Yaremaia berearia yalu pene. Mo yalu puwa pu mbirani dariba howa Yaremaia bereagoha bape hene.
JER 38:12 Bape halu howa Yaremaiahondo lamialu lalu, Labolabo uruni í̠naga adogeha ala mo yuwa pu luni bape harogo í̠naga gi adogeha magui habe. Iname í̠ pume hendeho yameramagola pume í̠ noligonaga ani bia, lene. Ani layagola Yaremaia ibugua Ebedemelegehanda bia layadagua biai hene.
JER 38:13 Ani biai heagola tigua Yaremaia iba uli wiagoha howa dugu yamialu kininaga anda pabe tamuhayagi ami agaliru ti haga wiagoha garabaya helo helaabo hene.
JER 38:14 Mani howa Sedegaiahanda, Yaremaia i̱ koria ibilo damu pudaba, lene. Damu puwa haru dai biyagola Anduane Homogonaga anda panga haraba tebone wiagoria Yaremaia ibu kini lola hene. Libuni hanguore biruwa kini ibugua Yaremaiahondo lalu, I̱na í̠hondo bi mbira hale hoa kogo í̠nabi nde yu donge nahe tigatigaore latagi habelo hameledo, lene.
JER 38:15 Ani layagola Yaremaiahanda ladai bialu lalu, Ai i̱na í̠hondo bi heneneorego langiruyagua í̠na i̱ homoliya bo waholebere. Ai í̠hondo mini maru bayale talebu ngialu bi langiruyagua nde i̱naga bi ogoni í̠na hale naholebere, lene.
JER 38:16 Ani layagola Kini Sedegaiahanda Yaremaiahondo lalu, Heneneore larogo Anduane Homogo haluhe kago ibuni wali agali bibahende bu kamarunaga holene tene howa ibuni daligaore kagonaga minini howa heneneore larogoni. I̱na í̠ bo wanaholebero. Agali ko í̠ mo ko holene karunaga gihabi mo ya nahole larogoni, lene.
JER 38:17 Ani layagola Yaremaiahanda Sedegaia lamialu lalu, Anduane Homogo Hongo Haiheore howa ina Isaraele wali agalinaga Ngode Datagaliwabe kago ibugua ogodagua laya. Í̠na wai biadai nabi wahalu í̠ni Babilononaga ami ibirarunaga giha ya hariyagua nde tigua í̠ ba nabi wahalu tanobi bo heda naholebira laya. Ani biragola í̠nibi í̠ one waneigini damenerubi bibahende homa nabi bayale holeberemi.
JER 38:18 Ai í̠ni Babilono amirume minilo wa nahariyagua i̱na tano ogo ti milo wahalu bo heda helo yupe holebero. Í̠nibi nde ti helalu yopialu napolebereore lalu, Anduane Homogohanda ani laya, lalu lamini.
JER 38:19 Ani layagola Sedegaiahanda Yaremaiahondo lalu, Ainde Babilono amirume Yudali maru ti bamba ibida puwa Babilonoha hene karunaga giha minu ya hayagua tigua i̱ mo ko holigonaga giho kogoni, lene.
JER 38:20 Ani layagola Yaremaiahanda ladai bialu lalu, Babilono amiru tigua í̠ Yudaliruhondo minu mia nabulebira. Anduane Homogohanda i̱ha howa bi í̠hondo langirago bibahende í̠na hale halu buleneore nga. Ani biriyagua tigua í̠ homabelo bo wanahe bayale helolebira.
JER 38:21 Í̠ni Babilono amirume minilo wa nahariyagua ko uruni í̠ha ibulebiragonaga Anduane Homogohanda i̱hondo de gandebaha mo walia haya.
JER 38:22 I̱na de gandeba ogoniha handalu hewaria wali kini andaga berene biaru bibahende Babilono dindiha haru puwa tigua ami haru haga agali haguane hearu migi biya. I̱na hale halu hewaria wali biarume agua layua, Kini Sedegaia-o í̠naga nenege biarume í̠ mo guya halu mo hondo hayago nahende tigua í̠hondo henene larabe toba harigoni. Áyu mo ko holeneme í̠la lola kagola í̠naga ge waru tabuha anda pialu namu lai hene ale kegoni. Ani hegola í̠naga nenege biarume í̠ yu wahalu ibida piai haya, layuago hale haru.
JER 38:23 De gandeba handarudagoni hondowa manda bialu hewaria heneneore Babilono amirume ibalu í̠naga one waneigini bibahende ogonidagua bialu minu yalu piai holebira. Í̠ni yo pialu ibida polene henge nawulebira. Babilononaga kini kagome í̠ minu yania holebira. Anduane Homogonaga bi larago mo wahariyagua Babilono amirume tano ogo bo heda halu delolebiraore laro, lene.
JER 38:24 Ani layagola Sedegaiahanda Yaremaiahondo ladai bialu lalu, Iya bi laribagoni mendeali nalamibe. Mbirali hale helo lamiriyagua í̠ni homolene wulebira.
JER 38:25 Agali haguane bu karume iya bi lalu biraribago hondowa libu agi dege laribibe lalu í̠hondo hale halu lalu, Í̠na kinihondo agi laribe. Ina hale holoma̱ya bi ogoni yu donge nahe langi. Bi bibahende langiai hariyagua nde iname í̠ homabelo bo wa naholeberema, lalu lolebira. Tigua anidagua layagua nde
JER 38:26 í̠na tihondo lamialu lalu, Mbira nalego bi mbira hangu kinihondo i̱ Yonadana andaga biagoha garabaya lone nahole lalu hale haru. Ogoniha lone garabaya dai bu haruyagua nde i̱ homoloboda lalu kini lamiru, labe lalu kini biagome Yaremaiahondo lamini.
JER 38:27 Mani howa agali haguane biarume Yaremaia berearia ibuwa agi laribe lalu hale hene. Ani hale hayagola ibugua kinihanda labe layadagua ladai bini. Agali mbirame kini ibu Yaremaiala bi laribigo hale naheore. Ani biyagola agali haguane biarume Yaremaia homelo bolene hariga mbira nawiyagola tigua Yaremaia helo wahalu pene.
JER 38:28 Ani biyagola Yaremaia ibu kini anda pabe tamuhayagi amiru haga wiagoha garabaya haabo heane dege tinaga waitigirume ibalu Yarusaleme karulene.
JER 39:1 Sedegaia ibu Yuda dindini kini henego mali dini hayagola ogoninaga ege pini layagola Babilono Kini Nebugadenesahanda ibunaga ami agali haru halu Yarusaleme ibuwa tigua tano ho hagira bialu wai bialu hene.
JER 39:2 Tigua wai dege bialu howa Sedegaia ibu kini henego mali beane (11) hayagola mali ogoninaga ege mane horo diningi Babilono ami uruni tigua tanonaga gibuni mbirahayagi wai pabe bo podabaga bialu Yarusaleme tanoha anda pene.
JER 39:3 Ani buwa Babilononaga kini heagonaga agali haguane bu hearu tigua tanoha anda puwa wai pabe panga mbira mini Panga Dombeni laga wiagoria puwa ina tano ogoni handaya ho haru kamagoni lowa pu berene. Agali haguane uruni tinaga mini Negala Sarese imaru Samaga Nebo imaru Sasegimi imarubi Negala Sarese mendebi uruni berene.
JER 39:4 Kini Sedegaia halu ibunaga ami agaliru tigua handalu hearia Babilono ami anda ibiya handala ti ibida pole manda bini. Mbiragaore ti heyalu puwa kini mabu wiagoria pabe bu gimbu bini heagoria hariga wia do henego ogoniha pora bialu tagira pole pene. Ani pialu Iba Yodana peagoha pole hariga peadagua pene.
JER 39:5 Ani pole pialu hearia Babilono ami agali biarume talima pugu pugu bialu dindi tigabi panda panda Yarigo tano kaware wiagoria Kini Sedegaia minu yania hene. Minu yania halu tigua ibu Kini Nebugadenesa hearia haru dai bini. Horo ogoningi Kini Nebugadenesa ibu Hamada dindiha Libila tano wiagoria hene. Ani hearia tigua Sedegaia haru ibiyagola de hondowa Nebugadenesa ibugua ibu mana ko biyagonaga pani nolene nga lene.
JER 39:6 Babilonoali biarume Sedegaia igini hearubi Yuda wali agalinaga agali haguane hearubi bibahende Libila tanoni minu yalu pu heagola Kini Nebugadenesa ibugua bidaba layadagua tigua Sedegaia ibu deni handaya helowa ibu igini biaru homelo bo wahai hene. Ani bialu Yuda wali agalinaga agali haguane biaru tibi homelo bo wahai hene.
JER 39:7 Ani bialu kinime bidaba layadagua tigua Sedegaianaga de kirabali halu wahalu gi geru seni pume minu daba howa Babilono haru pene.
JER 39:8 Ani bialu heatambu Yarusaleme tanoha Babilono ami agali biarume kini anda heagobi wali agali marunaga anda bu hearubi bibahende bo heda hai hene. Ani bialu Yarusaleme tanonaga wai pabe hongohe bu hearuni bibahende bo gialopaya biai hene.
JER 39:9 Babilononaga ami agali haru haga haguane mini Nebusaradana ibugua ami agali haru halu Yarusaleme dai buwa wali agali maru yu wahene hearu minu garabayabu yalu Babilono piai hene. Ani bialu Yuda wali agali maru ibida pialu ti heagoha pu hene hearubi heba minu garabayabu yalu Babilono dege piai hene.
JER 39:10 Ani bialu wali agali maru mbirale nawi yagibano hearu dege Yuda dindiha helo yupe ho helene. Wali agali helo yupe hayadaruni ti tininaga dindi mbira nawi heneyagola ibugua gerebi mabu wiarubi mabu tara wiarubi wali agali uruni ti karulo helo mo mini.
JER 39:11 Kini Nebugadenesa ibugua Yaremaia mitangi bialu ibunaga ami agali haru haga haguane Nebusaradana Yarusaleme hearia bi lo pelalu lalu,
JER 39:12 Í̠na Yaremaia damu puwa bayuwa haru habe. Ibuha mo ko hole mbira buleni nabibe. Ibugua ibunaga hame ngago talialu bia lalu í̠hondo hale harago í̠na bibe, lalu bi lawia hene.
JER 39:13 Ani layagola haru haga agali haguane Nebusaradanabi agali haguane kirali ibu andaneha haga Nebusabanabi Negala Saresebi Babilonoali agali haguane maru bu hearubi
JER 39:14 tigua agali maru Yarusalemeha ami agali haguane haga wiagoha Yaremaia garabaya hearia damu pudaba lene. Damu pialu haru dai buwa tigua agali mbira Sabana aguane ibu Ahigama igini Gedalaia heagome Yaremaia handayaho helo ibu andaga haru pu lene. Anidagua biyagola Yaremaia ibu Yuda wali agaliru heba Yuda dindiha hene.
JER 39:15 Ala Yaremaia ibu ami agali haga wiagoha garabaya heangi Anduane Homogohanda bi ogodagua lamini.
JER 39:16 Í̠na Sudanali mbira mini Ebedemelege kagohondo bi ogodagua labe. Anduane Homogo Hongo Haiheore Isaraele wali agalinaga Ngode Datagaliwabe kago ibugua í̠hondo ogodagua laya. Bamba i̱na dindi ogo mo ko holene ibilolebero lalu lowirugo áyu tagira ibilarogoni. I̱na tano ogoni bayale ngela nabi mbira bule lowirugo berogola í̠na de hondolebere.
JER 39:17 Anigo Anduane Homogo i̱na uruni berongi í̠ biamogo bulebero. I̱na agali maru ti hondowa í̠ giho haga harigonaga giha í̠ minu ya naholebero.
JER 39:18 I̱nime í̠ baya hangu mamage howa haru kogola tigua í̠ bo wa naholebira. Í̠na i̱hondo mini mbiraore wu haga kegome í̠ nahomolebere. I̱ Anduane Homogo i̱na bi o ledogoniore, laya, lene.
JER 40:1 Nebusaradana ibugua Yaremaia garabaya heago golope hayagola Anduane Homogohanda Yaremaiahondo bi lamini. Yaremaiabi Yuda wali agali Yarusaleme wali agalirubi ala seni pume hende hamagamaga bialu Babilono garabaya bu yalu pene. Ani yalu harigani pialu hearia Lama tano wiagoria ami haru haga agali haguane Nebusaradana ibugua Yaremaia heba garabaya haru heneyane de hendene.
JER 40:2 Horo ogoningi ani hondowa Nebusaradana ibugua Yaremaia emene habagi howa lamialu lalu, Anduane Homogo í̠naga Ngode Datagaliwabe ibugua dindi ogoriani ko holene ibulebira lalu layadagua ibiyadagoni.
JER 40:3 Ko holene uruni áyu o birane í̠ni de hendedegoni. Isaraele wali agalime mana ko wiaru bialu haabo howa Anduane Homogonaga bi mo waharimi. Irane ogonimeore ko holene ogoni tíha ibiragoni ndobe.
JER 40:4 Anigo bi o larogo hale halu áyu i̱na seni pume í̠naga gini dariba hayadago golope harogo í̠ golope hene habe. Ani berogola í̠na i̱ porodagua Babilono ibua biyagua nde i̱na í̠ baya hangu handayaho holeberogo ai ma. Manga biyagua nde wahalu hondo habe. Ani bialu dindi tara tara ngaruha í̠nime poa biragoha ta nabi pobelo golope hene kegoni, lene.
JER 40:5 Yaremaia ibu Nebusaradanahanda bi layaruni hale howa pu nabi hondo hene. Ani heagola Nebusaradana ibugua lone lalu, Ani poa nabiyagua nde Sabana aguane Ahigama igini Gedalia karia dai bibe. Babilononaga Kini Nebugadenesahanda agali ogoni ibugua Yuda dindiha tano ngaru handayaho helo heleda. Ibu wali agali maru karu baba holebirago í̠bi nde ibula mandagi habe. Ani hoa nabiyagua nde dindi maru ngaruha í̠nime hoa biragoha hole pobe, lene. Ani lalu nde Nebusaradana ibugua mbirale mbira Yaremaia mo turu halu mialu tomo marubi talebu mialu Yaremaia ibu pelo yupe hene.
JER 40:6 Ani biya handala Yaremaia ibu Gedalia hearia Misiba tano pole pene. Puwa Yaremaia ibu wali agali yu wahene Yuda dindiha hearu baba mandagi hene.
JER 40:7 Yudanaga ami agali marubi agali haguane marubi Yuda dindi gibuni wiaruha haga haga bu hene. Tigua hale halu hearia Babilono kini kagome Gedalia ibu gabumane haguane Yuda dindiha howa wali agali yagibano Babilono dindiha garabaya nape yu wahene hearu handayaho helo dabo heleda layago ti hale hene.
JER 40:8 Ani hale howa agali haguane uruni tigua tinaga ami agaliru haru halu Misiba tanoha Gedalia hearia pene. Agali haguane penedaruni Nedania igini Isimalebi Karea igini kirali Yohanana Yonadanalabi Tanahumede igini Seraiabi dindi Nedobali mbira mini Ebai igini bu hearubi Maga dindi wiagoali Yasaniabi uruni ti pugu bini.
JER 40:9 Gedaliahanda agali uruni ibiyago hondowa tihondo lalu, I̱na tíhondo heneneore larogo tígua Babilonoali karu andaneha hole gi nahe halimu. Tígua dindi ogoria kamingi Babilono kini kago andaneha howa tí bayale holeberemi.
JER 40:10 I̱ni Misiba dindi ogoria kogola Babilonoali tigua oali hondo ibirangi i̱na Yuda wali agali tínaga bi lahaga holebero. Tígua tano tíni halu ibirimidaruha hama dai bialu ira liniru do wialu gerebi liniru dowa waini iba wabialu olibe lini weliru maninaga hambu wigi bule dai bidaba, lene.
JER 40:11 Horo ogoningi Yuda wali agali maru Moaba dindihabi Amono dindihabi Idomo dindihabi dindi tara tara wiaruha hearumebi hale halu hearia Babilono kini heagome wali agali maru Yuda dindiha helo wahalu ibugua Gedaliahanda wali agali uruni haru helo dabo heleda layago hale hene.
JER 40:12 Ani layago hale howa Yuda wali agali waime ba togolaya handala dindi maruha ibida pu haga biniru ti Yuda dindiha dai bigi bini. Dai bialu tigua Gedalia ibu Misiba tanoni hearia hondo pugu bini. Ani bialu mani mabu wiaruha tomo bayale tara tara wiarubi gerebi lini dearubi bu wialu tomo dewaore bu payabu wini.
JER 40:13 Horo mbirungi Karea igini Yohananabi Yudanaga ami agali haru haga marubi ti Gedalia hearia Misiba dindi ibini.
JER 40:14 Tigua ibuwa Gedaliahondo lalu, Amononaga Kini Balisi kagome agali mbira Nedania igini Isimale ibugua í̠ bo wahole pu lene ibirago í̠ manda nabi kebe, lalu lamini. Ani layagola hale howa Gedalia ibugua bi ogoni mo henene nahe wahene.
JER 40:15 Ani biyagola Yohanana ibu Gedalia emene haru pu bagi howa ibugua lalu, I̱na Isimale bo wahole poliya í̠na i̱ pu lolene karulapedabe be waha larebe. Ani bo waharuyagua mbiralime de nahende howa aiwa bo wahayabe toba holebira. Agali ogonime í̠ belo wahariyagua Yuda wali agali í̠ andaneha bu karuni purogo laragola inanaga wali agali emene bu karuni mo ko holene wulubadago, lene.
JER 40:16 Ani layagola Gedaliahanda Yohananahondo ladai bialu lalu, Í̠na mana ogonidagua bulene nawi. Isimalehanda i̱ bo wahole ka laregoni henene ndo lare, lene.
JER 41:1 Isimale ibu Elisama aguane Nedania igini howa ibu Yudanaga kini heneru aria mbira hene. Ani howa ibu kini aria agali haguane mbira howa ibugua mali ogoningi dege ege kane layagola agali pirali haru halu Babilononaga gabumane agali haguane Gedalaia hearia Misiba tano ibini. Ibu Gedalaia heba mandagi tomo nalu birama lo biruwa Isimale halu agali pirali biarume tinaga ayu tibume Gedalaia homelo bo wahene.
JER 41:3 Ani bialu Isimalehanda Yuda wali agali maru Misiba dindiha Gedalia heba haga bu hearubi homelo bo wahalu Babilono ami agali maru horo ogoningi Misibani bu hearubi homelo bo wahalu bini.
JER 41:4 Horo mendengi wali agali bu hearume Gedalia homaya manda nabi heaore
JER 41:5 agali pira halira (80) Segeme tanoalibi Silo tanoalibi Samaria tanoalibi Misiba tano kawareni hariga wiadagua ibini. Tigua lomabu mulenaga widirubi ira hagua ngabilo lomabu delaga inisenesi wiarubi Anduane Homogohondo lomabu mule Yarusaleme yalu pole pialu hene. Agali uruni tigua daraho kama lowa mo walia halu tinaga aga budabaga bini karuleru tinaga angari minu dogaiheru tininaga tingini darama ibilo minu podagabiru ibini.
JER 41:6 Isimale ibugua agali uruni ibira layago hale howa Misiba yu wahalu ti harigani lola hole pene. Agali urunime ibubi nde ti baba daraho kabe toba helonaga dugu bima harigani lola hole pene. Ibugua puwa tihondo lalu, Tígua Gedalia hondo ibidaba, lene.
JER 41:7 Ani laya handala ti tanoha anda pialu hearia Isimale halu ibunaga agali biarume agali ibiyaru maru homelo bo waha tinaga tingini tanoha iba berelo uli tombo wini wiagoha bape haga bini.
JER 41:8 Ani biyagola agali o bayadaru aria pirali hangu yu waheneyago tigua Isimalehondo lalu, Iname tomo dewaore widirubi balirubi olibe lini welibi mone ibanebi dangi teha do kamago í̠ mo nguluma̱ya ina ba nabi wahabe, lene. Ani layago hale howa Isimale ibugua agali pirali uruni nabe wahene.
JER 41:9 Iba uli ogoni bamba Misiba tanoha Isaraeleali Kini Basanaga ami agalime wai ibalu ho hagirabu yaanda hayagola wali agali tano ogoniha hearu ti iba biraabo helonaga Yudali Kini Asahanda tombo wini. Isimalebi ibunaga agali biarumebi Gedalia halu wali agali bo paya biyaru bibahendenaga tingini mo yu puwa iba biraga uli ogoniha wu to̱lelene.
JER 41:10 Ani biai halu mani Isimalehanda Yudanaga kini biago wane berearubi wali agali maru Misibaha bu hearubi minu yalu pene. Wali agali uruni Babilononaga ami haru haga agali haguane Nebusaradanahanda ti garabaya helo yalu nape yu wahalu Gedaliahanda Misibani handayaho helo helene. Isimalebi ibunaga agali biarubi ti Misiba yu wahalu hariga Amono dindihayagi peadagua pole pialu hene.
JER 41:11 Ani pialu peagola Karea igini Yohananabi Yuda ami haru haga agali haguane marubi Isimalehanda mana ko ogoni biya layago hale hai hene.
JER 41:12 Tigua hale howa tinaga ami agali bu hearu haru halu Isimale baba wai bule haruru talima pene. Talima pugu pugu bialu Gibeono tanoha iba kuyama timbuni bereagoria pialu hearia tali minini.
JER 41:13 Ani tali minayagola wali agali Isimalehanda Misiba howa minu yalu ibiyarume Yohanana halu agali haguane maru biaru ibiyago de hondowa turu timbuni hene.
JER 41:14 Tigua ani hondowa Isimale yu wahalu Yohanana hearia gerai lalu ibida dai biai hene.
JER 41:15 Ani biyagola Yohanana halu ibunaga agali biarume Isimale minule bialu hearia Isimale ibu ibunaga agali halirali hangu haru halu ibida pialu Amono dindiha pene.
JER 41:16 Ani biya handala Yohananabi ami agali haru haga biarubi tigua Misiba wali agali Isimale giha hearia minu yu dai biyaru haru halu Gibeono tano wahalu pene. Ami agali marubi agali marubi wali waneiginirubi kini aria bu hearunaga biabe biahagarubi uruni ti haru pene.
JER 41:17 Wali agali waneigini piyaru tigua manda bialu hearia Babilono kini heagome keba howa ina bo waholilono ti gi howa Iyibi dindiha hama polenaga harigani pialu hene. Ani penedagoni irane Isimalehanda agali mbira Gedalia dabalu Yuda dindi handayaho helo helayago bo wahayagonaga tigua kinihondo gi howa ani pialu hene. Ani puwa tigua Bedeleheme tano kawareni Gerudu Kimihama dindi wiagoria anda puwa ogoriani emene hene.
JER 42:1 Ani howa mani Karea igini Yohanana halu Hosaia igini Yasaniabi ami agali haguane hearubi wali agali mini lene nalene hearubi bibahendeoreme
JER 42:2 Anduane Homogonaga bi mana latagi haga Yaremaia hearia pene. Puwa tigua ibuhondo lamialu lalu, Ina wali agali emene yu wahene bu kamaru biamogo bilonaga í̠na Anduane Homogo inanaga Ngode Datagaliwabe kagohondo bi lahabe. Abale ina dewaore harimago áyu nde ina emeneore o kamagonidago de hendedegoni.
JER 42:3 Áyu Anduane Homogo inanaga Ngode Datagaliwabehanda inahondo ogoale bia ogoha pu lalu bi langilo hamelo kama, lene.
JER 42:4 Anidagua layagola Yaremaia ibugua tihondo ladai bialu lalu, Tígua bi laramigoni e̱ laro. I̱na Anduane Homogo inanaga Ngode Datagaliwabehondo tígua bi larimidagua hale haro. Ani hale harogola Anduane Homogo ibugua ladai birago mbira yu donge nahe bibahende tíhondo langiai holebero, lene.
JER 42:5 Ani layagola wali agali biarume Yaremaiahondo lamialu lalu, Heneneore laramago Anduane Homogo inanaga Ngode Datagaliwabehanda bia laradagua iname biaiore holeberema. Anduane Homogo ibu mana heneneore tigabi bulene ngadaguaore biaga kagome mbirale mbira bilimu lenego iname nabirimayagua nde ibugua ina baba godi lalu ko birimi lelo.
JER 42:6 Anduane Homogohanda inahondo turu holene bi ladai biyaguabi ina hale hoa nabigo ladai biyaguabi í̠hondo langiradagua iname talialu biai holeberema. Iname Anduane Homogo inanaga Ngode Datagaliwabenaga bi hale halu birimayagua nde ina bayale holeberema, lene.
JER 42:7 Yaremaiahanda bi lo heane dege horo pira peagola Anduane Homogohanda Yaremaiahondo ladai bialu lamini.
JER 42:8 Ani lamiyagola Yaremaiahanda Yohananabi ami haru haga agali haguane hearubi wali agali mini lene nalene hearubi bibahendeore olalu, Ibai hadaba, lene.
JER 42:9 Ibiyagola ibugua tihondo lamialu lalu, Tígua Anduane Homogo inanaga Ngode Datagaliwabehondo hale habe lalu i̱hondo langirimigoni Anduane Homogohanda ogodagua laya.
JER 42:10 Tí oali Yuda dindini harimiyagua nde i̱na tí bope nahe mo hongo halu holebero. I̱na tíhondo genda tandagabi ngirugoni mitangi bialu i̱naga miniha gendaho kogoni. Anigo i̱na tí ira hangagadagua hongoleberogo mani dugu wa naholebero.
JER 42:11 Tígua Babilononaga kini kagohondo gi timbuni ho harimigo ai gi nahe halimu. I̱ Anduane Homogo kogo i̱na tigatiga larogo i̱ni tí baba mandagi haabo kogonigo tí gi holene nawi. Tí ibunaga giha yu karia i̱na biamogo bialu haru dai bulebero.
JER 42:12 I̱na tíhondo dara holene nawini dara ho kogodagua kini ibuguabi tí hondowa dara helo ibuha dara holene mo wia holebero. Ani berogola ibugua tí tíninaga dindi dai bilolebira. I̱ Anduane Homogo i̱na bi o ledogoniore, lene.
JER 42:13 Anigo tígua Anduane Homogo tínaga Ngode Datagaliwabe kagonaga bi mo wahalu lalu, Ina Yuda dindiha habe manga kamagoni. Ina Iyibi dindiha hole pu kamagola waitigime ina baba wai nabulebira. Ani bialu iname wai bu polenaga mbelo biguli hale nahe tomo nolenebi tubagi nahe bayale holeberema, lalu larimiyagua nde Anduane Homogo Hongo Haiheore Isaraele wali agalinaga Ngode Datagaliwabe kagome tíhondo ogodagua lara. I̱na tí Yuda wali agali emene kamiruhondo bi larogo hale hadaba. Tígua harugo lalu Iyibi dindiha hole pirimiyagua nde tígua áyu gi ho kamiruni Iyibi dindiha pu kamiria henene talima ibulebira. Tí waitigime bo homelalu hina garimebi homelolebira.
JER 42:17 Wali agali Iyibi dindi pole hongo howa lalu karu bibahende homai holebira. Maru waitigime bo wahai halu maru hina garime homalu maru warago ko tara ngagome bo homelolebira. I̱na mbirale ko uruni tíha mo ibilaga berogola tí damene lenego mbira yu wahenebi ibida pu henebi mbira naholebira. Tí bibahende ereba haiore holeberemi.
JER 42:18 I̱ Anduane Homogo Hongo Haiheore Isaraele wali agalinaga Ngode Datagaliwabe kogo i̱na tigatigaore larogoni. Abale i̱na Yarusaleme wali agalihondo keba ho howa ti bo hilo wahaiore harugoni. Ani birudagua tíguabi nde mine halu Iyibi dindiha pirimiyagua i̱na tí bibahende bo hilo wahai holebero. Ani berogola wali agali dindi tara taraha karume i̱na tíhondo anidagua biya larago hale howa ti mogolalu gi holebira. Tí hiriribi kamigo de hondowa tigua tí mege bialu mo ngubia halu tinaga waitigi bu karuhondo ha halu howa, Yuda wali agali mo ko hayadagua tí mo ko helo, laga bulebira. Ani bialu tínaga dindi o ngago mani lone de nahondoleberemiore, laya lene.
JER 42:19 Yaremaiahanda Anduane Homogonaga bi ogoni lai howa ibugua tihondo lalu, Yuda wali agali emene hangu kamiru tígua bi ogo hale hadaba. Anduane Homogohanda tí Iyibi dindi napilimu laya. Anidagua layago mitangi bialu áyu i̱na tíhondo bi hongo howa langerogo hale halimu.
JER 42:20 Tígua i̱hondo Anduane Homogo inanaga Ngode Datagaliwabehondo inanaga bi lahabe larimigonaga laro. Tígua i̱hondo ogodagua larimi. Anduane Homogo inanaga Ngode Datagaliwabehanda inahondo bi langiraru í̠na langiai habe. Ibugua ogo ale bia ogoha pu lalu ladai birago iname talialu buleberema, larimi. Ani larimigo lowa áyu tígua mana ko tara mbira beremigo langero.
JER 42:21 Anduane Homogo inanaga Ngode Datagaliwabehanda bi tíhondo lamibe layago damene i̱na áyu o langirugoyu tígua bi ogoni hale halu bia nabi kami.
JER 42:22 Anigo tígua mbira manda bilimulo langero. Dindi tí pole hamelo kamigoha pu kamiria tí maru waitigime baragola homalu maru hina garime homalu maru warago ko tara tara baragome homalu homai holeberemigo manda bilimu laro, lalu lene.
JER 43:1 Anduane Homogohanda Yaremaiahondo bi wali agali lamibe layaru bibahende latagi hene. Ibugua bi lai heagola
JER 43:2 Hosaia igini Asariabi Karea igini Yohananabi mine haga agali maru hearubi tigua Yaremaiahondo lalu, Í̠na bi ogoni ke̱ howa lare. Ina Iyibi napobe lalu Anduane Homogo inanaga Ngode Datagaliwabehanda lama pobe lalu í̠hondo langiyago ndo langiri, lene.
JER 43:3 Bi ogoni Neria igini Baruguhanda ina hengedape holenaga í̠ mo mini wia hayagola lama ibirida. Babilono amime ibalu ina bo waha Babilono garabaya bu yalu pu bigi bilonaga í̠na madane birida, lene.
JER 43:4 Tigua bi ogonidagua layagola Yohananabi agali haguane maru hearubi Yuda wali agali bu hearubi tigua Anduane Homogohanda bi layago wahalu ti Yuda dindini ha nabini.
JER 43:5 Yohananabi agali haguane biarubi tigua Yuda wali agali bu hearu haru halu pole pene. Ibu Yuda wali agali waneiginirubi bamba waitigime bo garabayabu yalu dindi tara taraha pu howa lone Yuda dindini daibu hene hearu bibahende haru halu pole pene. Ani bialu wali agali marubi Yudanaga kini wane berearubi Babilono ami haru haga haguane Nebusaradana ibugua Gedaliahanda handayaho habe lalu piyarubi heba Yuda wali agali bibahendebi Yaremaiabi Neria igini Barugubi
JER 43:7 ti bibahendeore Yohananahanda Anduane Homogonaga bi layago wahalu Iyibi dindiha haru pene. Ani pialu tigua Iyibi dindiha Tabanese tano wiagoria anda pene.
JER 43:8 Ti Tabanese tanoni pu hemigola Anduane Homogohanda Yaremaiahondo lalu,
JER 43:9 Iyibi kini kagonaga anda mbira tano ogoniha kago Yuda wali agali marume de hendedaore í̠na ege to̱le̱ maru dugu yuwa kini anda haneni timeni ngagoriani hangama pobe.
JER 43:10 Ani bialu howa Yuda wali agali karuhondo ogodagua labe. Anduane Homogo Hongo Haiheore Isaraele wali agalinaga Ngode Datagaliwabe kago ibugua lalu, I̱ Anduane Homogo i̱na agali i̱naga biabe biahaga Babilononaga Kini Nebugadenesa dindi ogoha ibilolebero. Ani ibilalu ege to̱le̱ o hangayagoria i̱na kininaga dagia mo ngelalu ibunaga balai anda biragome dindi ege to̱le̱ uruni dangila dambi holebira.
JER 43:11 Ibugua Iyibi dindi bo haealabagabu wahole ibirangi i̱na wali agali maru tinde warago ko tara ngarume ti balu homelole dabo helenego waragome homolebira. Maru ti dindi mendeha garabaya pelo dabo helenego waitigime ti garabayabu yalu polebira. Maru ti waiha bo wahelo dabo helenego waime ti bo waholebira.
JER 43:12 Ani bialu i̱na Iyibi wali agalinaga dama anda bu karu bo heda holebero. Anda uruniha dama mitangi bialu bi pupu wulenaga gime wabini ogoniha ngaru Kini Nebugadenesahanda maru ibu daluha mo yu pialu maru iraha do taulo pelolebira. Ani bialu nogo sibi haru haga agalime nogo e ibunaga agani irigi harago minu bo wahai hagadagua ibugua Iyibi dindiha ngaru bibahende bo hilo wahaiore holebira. Anidagua bialu ibugua Iyibi bope halu wayali howa Iyibi dindi wahalu polebira.
JER 43:13 Nebugadenesa ibu Iyibi dindiha harangi howa ibugua Iyibi wali agalinaga nihondo bi pupu wulenaga ege to̱le̱ timbuni luni hengedago bo gingirulobagabu wahai halu Iyibi wali agalinaga bi pupu wule gime wabini ngarunaga anda bu karubi bo heda hai holebira, lalu Anduane Homogohanda laya lalu Yaremaiahanda lene.
JER 44:1 Anduane Homogohanda ibunaga bi Yaremaia ibugua Yuda wali agali Iyibi dindiha hearuhondo latagi helonaga lamini. Wali agali uruni ti Iyibi dindini Migidolo tano wiagohabi Tabanese tano wiagohabi Membisi tanohabi Iyibi dindi abene unurayagi wiaruhabi hene.
JER 44:2 Anduane Homogo Hongo Haiheore Isaraele wali agalinaga Ngode Datagaliwabe kago ibugua ogodagua laya. Ala Yarusaleme tanohabi Yuda dindiha tano wiaru bibahendenibi i̱na mbirale bigi biruru tí de handai harimigoni. Áyu tano uruniha mbirali naheore mo ko hai hene ngagoni.
JER 44:3 Yuda wali agali tigua mana ko dewa biaabo hayagome i̱ mo keba hayagola i̱na ti mo ko halu bo hilo wahai haru. Tigua dama mitangi bialu mbirale gime wabini wiaruhondo bi pupu wialu uruninaga dabuni ira hagua ngabilo inisenesiru lomabu dela bigi biya. Bamba ti mbirale gime wabini urunihondo bi pupu wulene manda nabiore hene. Yuda wali agali áyu kamirumebi tínaga mamali ala henerumebi dama mitangi bialu mbirale bi pupu wulenaga gime wabini ogoni manda nabi dege hene.
JER 44:4 Yuda wali agali tí hemigoha i̱naga biabe biahalu bi mana latagi haga agali dewa ibilalu haabo haru. Ani ibilarugola tigua i̱naga bi mana latagi halu lalu, Tígua mana ko ngubi i̱na turu naharuligo ale bialu kamigo wahai hadaba, laabo haya.
JER 44:5 Ani lalu heago helowa Yuda wali agali bu hearume hale habe manga haya. Tigua mana ko bialu hemigo wa nahe howa dama mitangi bialu mbirale gime wabini wiaruhondo bi pupu wialu lomarubi mialu haabo haya.
JER 44:6 Tigua anidagua bialu hayagonaga i̱na ti baba keba timbuniore howa ti pani nelo mialu Yuda dindiha tano wiarubi Yarusalemeni hariga wiarubi bibahende bo haealabaga bialu mo ko hai harugo ngagoni.
JER 44:7 Anigo i̱ Anduane Homogo Hongo Haiheore Isaraele wali agalinaga Ngode Datagaliwabe kogome i̱na tíhondo hale haro. Tígua tíni mo ko halu kamigo aginagabe. Tígua anidagua bialu kamigome Yuda wali agali bibahendebi tínaga waneiginirubi bibahende bo hilo wahai halu tí aria lenego mbira nahelo hamelo kamibe.
JER 44:8 Áyu nde tígua Iyibi dindini íbu howa dama mitangi bialu mbirale gime wabu wialu urunihondo bi pupu wialu ira hagua ngabilo delaga inisenesiru lomabu delalu kamigoni agibe. Tígua mana ogonidagua bialu kamigome i̱ mo kebaore harimigo tíha mo ko holene wulebira. Anidagua biragola hameigini dindi tara tarani bu karume tí mege bialu wali agali mendego ha halu howa tihondo lalu, Yuda wali agali mo ko hayadagua í̠bi mo ko helo, laga bialu holebira.
JER 44:9 Tínaga mamali ala henerumebi Yudanaga kini henerumebi tinaga one berenerumebi mana ko dewa bialu henego tí embeda kamibe. Anidagua dege tíguabi tí one bedarumebi mana ko dege bialu kami. Tígua mana ko uruni Yuda dindi bibahendehabi Yarusaleme tanoha hariga pedaru bibahendenibi bialu harimigo embeda ho waharimibe.
JER 44:10 Tígua mana ko bialu harimigonaga taga nahe tíni mo dindiha howa i̱ andaneha naharimigoni. I̱na bi larugobi hale habe manga halu i̱naga mana tíhondobi tínaga mamaliruhondobi laabo halu harugo hale nahagaore kamigoni ndobe.
JER 44:11 Anidagua bialu harimigonaga i̱ Anduane Homogo Hongo Haiheore Isaraele wali agalinaga Ngode Datagaliwabe kogome tí baba waitigi halu Yuda wali agali tí bibahendeha mo ko holene ibilole mitangi bu kogoni. Tí aria lenego mbiraore hangubi mbira yu wa naholeberoore.
JER 44:12 Yuda wali agali emene hangu dagalene ti Iyibi dindiha pole hongo halu karu ti bibahendeore biba helo bo hilo wahai helolebero. Ti Iyibi dindini howa maru waitigime bo wahai halu maru hina garime homaga bulebira. Agali haguane bu karubi agali damene bu karubi bibahende ta nabi homaiore holebira. Hameigini dindi tara taraha bu karume ti hondowa mogo lalu mege bialu hondo oba halu holebira. Ani lalu howa tigua tinaga waitigiru ha halu lalu, Yuda wali agali mo ko hayadagua tíbi mo ko helo, laga bialu holebira.
JER 44:13 I̱na Yarusaleme wali agali pani nelo mialu bo wahai harudagua Iyibi dindini pu karu tiore bo hilo waholebero. Ti maru waitigime bo waharagola homalu maru hina garime homalu maru warago tara tara ngagome balu homaga bulebira.
JER 44:14 Yuda wali agali emene hangu yu wahene Iyibi dindiha hole ibini kamiru tí bibahendeme Yuda dindiha hama dai bulene hamelo kamigoyu tí dai nabuleberemi. Tí pani nalu mo ko holene ngagoria pu tara halu tíni daluha ibida dai bulene mbira nawulebiraore. Tí bibahende homai harami handala mbira mbira hangu dai buleberemi, lalu lene.
JER 44:15 Wali agali dewaore íbu ngoaiho heagola Yaremaiahanda bi ogoni latagi halu hene. Yuda wali agali maru Iyibi dindi abene unurahayagi haga hearu tibi nde íbu ha dege bini. Agali ogoriani íbu henedaru ti onerume dama mitangi bialu mbirale gime wabini ngaruhondo ira hagua ngabilo inisenesiru lomabu delaga beda manda bu henerubi ti onerubi wali marubi bibahendeme Yaremaiahondo ladai bialu lalu,
JER 44:16 Í̠na Anduane Homogonaga minini howa bi inahondo langialu ha kegonigo iname bi ogoni hale naholeberemaore.
JER 44:17 Mbirale inane hameme buleore lalu bi lo wirimadaru buleberema. Iname ira hagua ngabilo delaga inisenesiru dama wali beda mitangi bialu bi pupu wiaga mini Dahuliya Andaganaga Kuini Wali laga bedagonaga dabuni lomabu delalu waini ibabi odo lomabu muleberema. Bamba inanaga mamalirumebi inamebi agali haguane henerumebi kinirumebi dama wali beda mitangi bialu mini Dahuliya Andaganaga Kuini Wali laga ogonihondo lomaru mialu haga kama ndobe. Iname Yuda dindiha tano wiaruhabi Yarusaleme tanoha hariga timbuni pedaruniha howabi loma uruni ale bu mialu haabo haramali. Iname mana ogonidagua bialu hemagola inane bayale halu inanaga tomo dewaore wialu inaha mo ko holene mbira anda naibi bayale harimagoni.
JER 44:18 Anigo iname Dahuliya Andaganaga Kuini Walihondo lomabu mialu haganego wa harimangi howa hama ibinigo áyu o kamangi ina mbirale tubagi hai halu maru waitigime bo wahai halu maru hina garime homaga biya, lene.
JER 44:19 Ani lowa wali berearume bi lagimbu bialu lalu, Iname Dahuliya Andaganaga Kuini Wali ogonihondo lomaru mialu biruwa ina balawame mbisigedi wabialu howa wali ogoninaga bigiya wabu hiruwa iname waini iba loma bialu odoba harimago ina agalini bu karume bayaleda lowa turu naholobadabe, lene.
JER 44:20 Tigua bi layaru Yaremaia ibugua hale hai howa wali agali bibahende bu hearuhondo ladai bialu lalu,
JER 44:21 Tíguabi tínaga mamalirumebi agali haguanerumebi kinirumebi tí bibahendeme Yuda dindiha tano wiarunaga howabi Yarusalemeha hariga timbuni pugu biaruha howabi tígua ira hagua ngabiaga inisenesiru lomabu delalu hemigola Anduane Homogohanda mana ogonibi birimigonaga miniha genda nahe ibu manda nabi kabe toba ho kamibe. Ani ndoyago ibugua bu miniha mo pehowa mitangi bu henego ka.
JER 44:22 Tígua mana ko ngubi uruni bialu haabo hemigola Anduane Homogohanda tínaga mana ko uruni manga timbuni haya. Ani manga ho howa ibugua tínaga dindi bo labu halu mo ko hene wiaabo helalu wali agali mbira munini bu nahe áyu wiaabo kagoni ndobe. Ani bini ngago mitangi bialu wali agali tara karume tinaga waitigiru ha halu lalu, Í̠ore Yuda dindi mo ko hene ngagobiore habe, laga bialu kagoni.
JER 44:23 Tígua dama mitangi bialu mbirale tarahondo ira hagua ngabiaga inisenesiru lomabu delaga birimigo Anduane Homogonaga deni mana ko ngubiore birimi. Ani bialu tígua ibunaga bi mo wahalu puwa ibunaga bi mana lo wiarubi talialu nabi dege harimi. Anidagua bialu harimigome mo ko holene tíha wiyago wiaabo kagoni ndobe, lene.
JER 44:24 Ani lowa Yaremaiahanda Yuda wali agalihondo bi maru lalu walime biyagonagabi ladege bialu lalu, Yuda wali agali oali Iyibi dindiha íbu kamiru tígua Anduane Homogohanda bi larago bayuwa hale hadaba.
JER 44:25 Anduane Homogo Hongo Haiheore Isaraele wali agalinaga Ngode Datagaliwabe kago ibugua lalu, Tíguabi tí one bedarumebi mbirale mbira bule lalu bi lo wirimigo henene tagira pelonaga bialu harimi. Tígua buleore lowa bi lo wialu lalu, Iname Dahuliya Andaganaga Kuini wali bedagohondo ira hagua ngabilo inisenesiru lomabu delolebi waini iba odo lomabu mulebi lalu lo wirimago ogoni heneneore tagira pelo buleberema, larimi. Ai tígua bule lalu lo wirimigo tagira pelo nde biaore bilimu laro.
JER 44:26 Anigo Isaraele wali agali oali Iyibi dindini kamiruni tígua i̱ Anduane Homogo i̱nime bi larogo hale hadaba. I̱ninaga mini timbuni mini leneore kogoni howa heneneore laro. Yuda wali agali Iyibi dindiha bu kamiru tígua mbirale mbira buleore lalu i̱naga minini howa lone naloleberemi. Tígua Anduane Homogo Bibahende Haru Haame Ho Haga kagonaga minini howa heneneore bulego larogoni lalu mbira naloleberemi.
JER 44:27 I̱ Anduane Homogo i̱na tigatigaore larogo tíhondo bayale mbira i̱na nabuleore laro. I̱na tí mo ko hai holenaga handayaho kogoni ndobe. Yuda wali agali Iyibi dindiha bu kamiruni bo wahai helonaga tínaga waitigi bu karu ibilarogola tí maru bo wahalu maru hina garime homalu tí aria lenego bibahendeore homaiore holeberemi.
JER 44:28 Tí kamiru aria mbira mbira hangu Iyibi dindi yu wahalu Yuda dindiha dai buleberemi. Anidagua birangi Yuda wali agali emene hangu Iyibi dindiha íbu harimiru tígua bi larimigo henenedabe be i̱na bi larugo henenedabe tígua hondoleberemi.
JER 44:29 I̱ Anduane Homogo i̱na tigatigaore larogo tíhondo manane mbira walia holebero. Tí Iyibi dindini kamiore dege mo ko halu bo hilo wahai holebero. Tígua mbirale uruni tagira ibirangi i̱naga bi ledogo habo nalagada lo manda bilimu. I̱na tíhondo bule lalu bi lo wirugo biaiore holebero.
JER 44:30 Anduane Homogo i̱na mbirale buleberodaruni ogodagua bulebero. I̱na Yudanaga Kini Sedegaia Babilononaga Kini Nebugadenesanaga giha minu yaharudagua Iyibinaga Kini Hobora kago ibu bo waholene waitigi kagonaga giha minuya holebero, lalu Anduane Homogohanda Yaremaiaha howa latagi hene.
JER 45:1 Yosaia igini Yahoiagimi ibu Yuda dindiha mali tebira kini howa mali mane heagola Yaremaiahanda Neria igini Baruguhondo bi lamini. Yaremaiahanda Anduane Homogonaga bi ibuhondo lamiyago damene Barugu lamiyagola Barugu ibugua mbuga mbirani gilibu wiai hene. Libugua biabe ogoni bialu biruwa Yaremaia ibugua Baruguhondo lamialu lalu,
JER 45:2 Anduane Homogo Isaraele wali agalinaga Ngode Datagaliwabe ibugua í̠hondo bi ogodagua lara, Barugu-o í̠na bi agua lari, I̱ genda tandagabi timbuniore handalu kogoha Anduane Homogohanda genda dewaore lone mo tago halu ka. I̱na dugu dege bialu haabo halu ainde manga ko. I̱ha genda damene ngago ereba nahe wiaabo ka, larigoni. Ani larigo ai Barugu-o Anduane Homogo i̱na í̠hondo bi ogo ladai berogo hale habe. I̱ Anduane Homogo i̱na mbirale bini ngoru bibahende bo gialahole bero. Ani bialu i̱na hangarugo damene bibahende dugu wahai haro. Mbirale bo gialo wahai halu dugu wahai holeberodaruni dindi bibahendeha ani biaiore holebero.
JER 45:5 Ani buleberogo ai í̠ha bayale dege ngelo hamelo kego agibe. Í̠na mini ogonidagua wu kegoni wahabe. I̱na dindi bibahende mo ko hai harogola dindi í̠ poleberegoha tigua í̠ bo wa nahelo i̱na biamogo bialu í̠ homa nabi ibida pobelonaga hariga walia holebero. I̱ Anduane Homogo i̱na bi o ledogoniore, laya lalu Yaremaiahanda lene.
JER 46:1 Anduane Homogohanda dindi tara tara ngarunaga lalu bi mana latagi haga Yaremaia ibuhondo lamini.
JER 46:2 Yosaia igini Yahoiagimi ibu Yuda dindiha mali tebira kini howa mali mane heagola Babilono Kini Nebugadenesahanda ibunaga ami agali haru ibuwa Iyibi baba wai bini. Iyibinaga Kini Nego heagonaga ami agali bu hearu ti Kagemisi tano Iba Yuberedisi pedago kawareni hearia Babilono amime Iyibi ami bope hene. Anduane Homogohanda bi mbira Yaremaiahondo lamiyadaruni Iyibi dindinaga lalu lenego ogo.
JER 46:3 Iyibinaga ami agali haguaneme bi dalimu lalu, Iyibi ami agali kamiru tígua tínaga wai humbi wirimiru mo manda manda bialu wai pole hadaba.
JER 46:4 Nogo hosi harimiru haru íbu manda manda buwa hosini irigi howa biradaba. Ege manda wirimigo mo karulalu wai bule tidiyu hadaba. Tínaga yandareru de hadaba. Wai biagane aga gabame wabini ngamiru mo karuladaba, laya.
JER 46:5 Anduane Homogohanda lalu, I̱ agi hendedobe. Iyibiali urunime gi halu ibida dai birane hendedogo agua biyabe. Ami agali hongohe karuha mbirale mo gi holene ale wiai howa tigua de handadai nabi gerai lalu ibida dai biragoni hendedo.
JER 46:6 Agali gerai gibi laga karu ibida pobe nahe. Wai biaga pari wayali karu yo pialu polene nawi. Dindi abene uyurahayaginaga Iba Yuberedisi porago angeni ti odopebe bu ngagoni.
JER 46:7 Hameigini timbuni iba Naili poragobi halu hongo timbuni iba Naili li ngaligobi irigiho kago aibe.
JER 46:8 Ogoni Iyibiali ndobe. Iyibiali ti timbuniore iba Naili ale howa tinaga hongo timbuni iba li wiagagobi ka. Iyibi ibugua lalu, I̱na hameigini palia timbu halu dindi bibahendeha ho dame biai holebero. Dindi bibahendenaga tano ngaru bo gialo wahai halu wali agali tano uruniha bu karubi bo hilo wahai holebero.
JER 46:9 I̱naga nogo hosini bedemiru gerai lalu pudaba. I̱naga wai biaga karisini kamiru tí gerai hongo howa ladaba. I̱naga ami agali hongohe bu kamiru tíbi Sudana dindi Libia dindilanaga ami agali wai humbi yaga kamirubi Lidia dindinaga ami agali danda timume wai biaga kamirubi tí bibahendemeore wai bule piai halu pudaba, laya lene.
JER 46:10 Wai timbuni ogoni Anduane Homogo Hongo Haiheore kago ibugua bulebira. Badai bulene horo ogoni ibunaga nga. Ibugua waitigi karu pani nelo mulene horo ogoningi tagira ibulebira. Ibunaga ayu tibu nene gadele yidagome agali dewaore bo homai helolebira. Ayu tibu ogonime agali tingini nalu darama heba na dege bialu tombehe wulebira. Horo ogoningi Anduane Homogo Hongo Haiheore kagome agali uruni bo wahai halu dindi abene uyurahayagi Iba Yuberedisi poragoria loma ogoni bu mulebira.
JER 46:11 Iyibi dindi í̠ore wandari mabuageni ko dere dururume no homahe ko bedaligobi ngegoni. Í̠ dabi helo Gileada dindiha pialu marasini mbira taya bu pobe. Erekui bini marasini uruni taya bialu holeni. Marasini mbira í̠ dabi holenenaga nawulebirago habane nabulene dege nga.
JER 46:12 Í̠naga ami agali biarume ibida pialu karia tini dege dege pilo bahaga binigo dindini wiai ka. Í̠ wai wayali nahe ibira harigome í̠ni taga timbuni ho kegoni. Í̠ tagaho kego dindi tara tara ngaruha karume te hale holebira. Dindi bibahendeha karume í̠naga dugu berego hale hai holebira, lalu Anduane Homogohanda laya lalu Yaremaiahanda lene.
JER 46:13 Babilono Kini Nebugadenesa ibugua Iyibi baba wai bule ibiyangi Anduane Homogohanda Yaremaiahondo bi laminigo ogo,
JER 46:14 Migidolo tanohabi Membisi tanohabi Tabanese tanohabi Iyibi dindiha tano maru ngaruhabi bi ogo lamiai habe. Waitigi bu karume tí bo hilo wahaiore holebirago Iyibiali kamiru hongo halu heyu howa wai bule manda manda bu halimu.
JER 46:15 Tínaga bi pupu wiaga gime wabini Abisi biago ibu hongo howa heyu ha nabi ibira helolebirago aginagabe. Irane Anduane Homogohanda mbirale gime wabini ogoni mo podobagabu ibira helelolebira.
JER 46:16 Iyibiali dewaore tini pilo yahaga bilelolebira. Tini degedege laedene bialu lalu, Ai ina hameigini karia dai bialu inane dindi pugupugu bialu ma nalarami. Waitigime dindi ogo bo haealabaga bialu mo labu haragonidago inane daluha dai bima, lolebira.
JER 46:17 Iyibinaga kini kago ibunaga mini ogo wilimu. Mine Howa Bi Dege Kulukala lalu Bulene Wirangi Nabi Wahaga wilimu.
JER 46:18 Anduane Homogo Hongo Haiheore i̱ni Kini heneneore kogoni. Anduane Homogo haluhe haabo haga i̱ kogome i̱na tigatigaore laro. Hari maru bibahende Hari Tabo ibuni bolanguahe kagobi iba solowara bedago angeni Hari Kamele daligaore kagobi agali mbira tí baba wai bule ibulebiragonaga hongo gibiore ogonibihe ibulebira.
JER 46:19 Iyibi wali agali tí dindi taraha garabaya poleberemigo tínaga dabudabu wirimidaru hubua bu manda manda bidaba. Membisi tano ngago waitigime bo haealabagabu wahai holebira. Tano ogoniha mbirale mbira nawi wali agalibi mbira nahe dindi hangu ona wulebira, lene.
JER 46:20 Iyibi ibuore nogo bulumaga angibuni dalua ale kagobi ngagoyu bunguna ko mini badaru mbirame dindi abene uyurahayagi howa ibalu hayulebira.
JER 46:21 Iyibiali tigua agali dindi tara tara hearu ami agali helonaga yolo biniru ti nogo bulumaga habatigi ale ka. Tigua hongo howa wai bialu haabo naholebira. Wai ibirangi agali uruni ti wai nabi Iyibi ami agalime ibida piai hagadagua tibi pora bialu ibida piai holebira. Tiha mo ko holene timbuni anda ibirane handalu ibida piai holebira. Mana ko tinime bialu hayagonaga pani nolene horo ogoningi wulebira.
JER 46:22 Waitigi timbuniore kaware ibalu kagola Iyibiali karume gi timbuni howa ti giligele nale hendore nogombime heyolalu piagadagua polebira. Agalime ayu payani yalu ira kago dibule ibagadagua waitigi ibulebira.
JER 46:23 Iyibiali ti nde dewaore irabuha ira dewa bu hagagobi kagoyu waitigime ti bibahende bo wahai holebira. Anigo waitigi ti pagaya dewa biragagobi ndo ti dewaore halu Iyibiali bolangua howa ibulebira. Tinaga ami agali dewaore daga labe nahe ka.
JER 46:24 I̱na dindi abene uyurahayagi howa agali ibilarogo ti giha minu ya hai harogola Iyibi wali agali bibahende taga timbuni hai holebira. I̱ Anduane Homogo i̱na bi o ledogoniore, laya, lene.
JER 46:25 Anduane Homogo Hongo Haiheore Isaraele wali agalinaga Ngode Datagaliwabe kago ibugua lalu, I̱na Tebese tanonaga dama mitangi bialu bi pupu wulenaga gime wabini mini Amono ngago bo gingirulobaga bulebero. Ani bialu Iyibi dindibi Iyibi wali agali karubi tinaga kini karubi tinaga dama mitangi bialu gime wabini ngarubi mo ko helo helolebero.
JER 46:26 I̱na Iyibinaga kini kagobi wali agali maru karu tigua kini biagome ti biamogo bulebira mitangi bialu hana ho haga karubi ti bibahendeore homelo bole hamelo karunaga giha minu ya holebero. Kini Nebugadenesa halu ibunaga ami agali bu karume Iyibi bo haealabaga bialu Iyibialibi homai helo hamelo kagoni. Ani kago nde i̱na Babilonoali uruninaga giha Iyibi mo ya holebero. Ani buleberogoyu mani Iyibi dindini wali agali dewaore ala hagagobi lone holebira. I̱ Anduane Homogo i̱na bi o ledogoniore, laya lalu Yaremaiahanda lene.
JER 46:27 Anduane Homogohanda lalu, Yagaba hameigini i̱naga biabe biahaga kamiru-o tí mogo nalalimu. Isaraele wali agaliru-o gi nahe halimu. Heneneore larogo i̱na tí dindi kaundiaha pu kamiria haru dai bulebero. I̱na tí aguaneneru garabayabu yalu pene karia golalu ti pele mialu haru dai bulebero. Tíni dindini daibu howa bayale holeberemi. Tí mo gi holene mbira naholebirago tí dungulo holeberemi.
JER 46:28 Isaraele wali agali i̱naga biabe biahaga kamiru tí gi nahe halimu. Anduane Homogo i̱ni tí heba mandagi haabo kogoni. Dindi tara tara tí bo purogolo helarugoha wali agali karu bibahende bo biba halu ereba hai helolebero. Anigo tí kamiru dege i̱na bo biba naholebero. I̱na tí minu ba nde boleberogo ogoni tí mana lalu bolene ngadagua bolebero. Tí nabeore yo pialu pe nalolebero. I̱ Anduane Homogo i̱na bi o ledogoniore, laya lalu Yaremaiahanda lene.
JER 47:1 Pilidia dindiha Gasa tano wiagoria Iyibinaga kini heagome anda pialu wai nabi wiangi dege Anduane Homogohanda Pilidia dindiha bulebiragonaga bi ogo Yaremaiahondo ala lamini.
JER 47:2 Anduane Homogo ibugua lalu, Dindi abene uyurahayagi howa iba ibirago de handadaba. Iba ogoni ibalu li timbuni hongoheore wulebira. Iba li timbuni ogonime dindi andabi mbirale ngaru karubi bibahende namulai holebira. Tano ngarubi wali agali karubi bibahende namulai holebira. Wali agali tano uruniha haga bu karume ga̱ timbuni lalu holebira. Ti gi timbuni howa dugu bialu holebira.
JER 47:3 Nogo hosiru gerai lalu tinaga ge ngilinguli laruagola waitiginaga garo ale mini karisi ibirarume dindi kilikulu laruagolabi geme ki̱li̱nge̱le̱ laruagolabi hale howa gi timbuni holebira. Waneigini ai̱ya abala bu karume ti waneigini biamogo bule handa daibu ha nabulebira. Tinaga gi hongo nahe pirilape holebira.
JER 47:4 Pilidia wali agali bo wahai holene hapara haragoni. Wali agali yu wahene karume Saidono wali agalibi Taia wali agalibi biamogo nabilo harigani hapai haragoni. Pilidia wali agali tinaga dindi mini Kiridi iba dege dombeneha ngago yu wahene karu Anduane Homogo i̱na Pilidia wali agali uruni bo wahole kogoni.
JER 47:5 Gasa wali agali bu hearume miniha genda yu howa tinaga mandari dogo wahai holebira. Asagelono tanoha karunaga dara howa bi lolene nawulebira. Pilidia wali agali yu dindi ngagoha haga bu kamiru tígua dara ho howa tínaga tingini podaga bialu kamiruni angi waholeberemibe.
JER 47:6 Tígua ga̱lalu, Anduane Homogo í̠naga ayu tibu nene gadele ngegome ina dibalu kegoni angi waholeberebe. Ayu tibu nene gadele-o yaga nu biagoha yadai bialu biabe ogoni berego nabi waholene nga, lalu kami.
JER 47:7 Anduane Homogo i̱nime biabe ogoni i̱naga wai biaga ayu tibu nene gadeleme bibe lenego wahabe nahe nga. I̱naga ayu tibu wai biaga ogonime Asagelono tanohabi dindi iba solowara bedago angeha wali agali bu karuhabi bo wahelo heledogoni, lalu Anduane Homogohanda lene.
JER 48:1 Anduane Homogo Hongo Haiheore kago ibunime Moaba dindinaga bi ledago ogo. Waitigi bu karume ibalu Nebo tanoore mo ko halu bo gialo wahai holebiragonaga dara bira. Kiriadaimi tano ngagobi karulalu tanonaga wai pabe hongohe bu mabubi ngago bo gialo wahai holebira. Wali agali tano ogoniha haga bu karume taga howa mini dege dindi ho holebira.
JER 48:2 Moaba dindi mini lene wiyago ibira holebira. Waitigime Hesebono tano anda pialu Moaba dindi mo ko holenaga bi lalu wai hanalu ka. Tigua lalu, Moaba dindi nga lene wiyago mani lone nawilo wali agali dindi ogoniha bu karu bo wahai hami̱ya ma, laragoni. Madamene tano wali agali bu kamiru-o waitigi agali ibirarume tí bo wahai haragola tí bibahende homaliha piai holeberemi.
JER 48:3 Horonaimi tanoha karume dugu timbuni biaruago hale hadaba. Mbirale bibahende mo ko hai haragonaga ga̱ lalu dugu bialu haruagoni.
JER 48:4 Moaba dindi mo ko haragola tinaga waneiginirume dugu hongo howa bulebira.
JER 48:5 Moaba wali agali tigua Luhidi tano polene hariga pedadagua dugu bima pialu Horonaimi tano polene hariga pedagoha daliape halu howa kiabu dugu biaruago hale hadaba.
JER 48:6 Tigua lalu, Tí homoligo abale ibida pudaba. Tí dindi ko iba dalu naibaga ngagoha pialu ha do hole gerai lalu ibida pudaba, lolebira.
JER 48:7 Moaba wali agali tígua tíninaga hongobi muni ngamirubi mo tene ho howa urunime tíni bayale holomabe tobaho harimigoni. Waitigi bu karume wai bialu tíbi bope holebira. Bope halu tígua damahondo bi pupu wulenaga mbirale gime wabini mini Kemoso ngemigo ibunaga loma binigo mo miaga bu karubi agali haguane bu karubi heba garabaya bu yalu dindi tara ngagoha polebira.
JER 48:8 Waitigi bu karume ibalu tano ngaruni bo gialo wahai holebira. Tano mbiraore hangubi mbira yu wa nahe bibahende mo ko hai holebira. Anduane Homogo i̱na larudagua dindi ulini yu dindi ngarubi dindi bare hombene ngarubi bibahende bo labu hai holebira.
JER 48:9 Moaba wali agali bu karuha genda timbuni mo ko holene ogoni tagira ibiragoni. Ti ega ale babagane halu yagalalu ibida pole tinaga babagane helalimu. Moabanaga tano ngaru bo gialabaga bialu bo labu hene wulebira. Tano winigoria wali agali lenego mbira munini bu naholebira, laya lene.
JER 48:10 Anduane Homogonaga biabe biahaga kagome biabe nabi bame hayagua ibuha mo ko holene íbu wilo. Mbirali ibugua ayu tibu yidagome mendeali homelo dibabe lenego nadibayagua o biago ibuha mo ko holene íbu wilo.
JER 48:11 Anduane Homogohanda lalu, Moaba dindi ogoni pigane winidangi howa wima ibalu áyubi ibula dindi mende baba wai bialu ibunaga wali agali dindi mendeha garabayabu yalu pene mbira nawiore. Moaba ibu baya taraore agalime gerebi lini pingidowa waini iba be mendeha yoromabu berelaga nabini ngaligobi nga. Ani ngagola ibunaga dende ngabi ereba nahe bayaleore wiaabo ka.
JER 48:12 Anigo Anduane Homogo i̱na tigatigaore laro. I̱na horo mbira pongo bo wirugo tagira ibirangi agali marume Moaba dindini anda ibalu waini iba bayale birayago odo wahalu be hangu pambulo waharadagua bialu Moaba dindi bo haealabaga bialu mo labu helo ibilolebero.
JER 48:13 Horo ogoni tagira ibirangi Isaraele wali agali tigua dama mitangi bialu mbirale gime wabini mini Bedele wiagohondo bi pupu wialu biamogo bulubabe toba howa hana ho heagola biamogo nabiyadagua áyu Moaba wali agali tibi nde mbirale bi pupu wulenaga gime wabini mini Kemoso ibugua ti biamogo nabiragola taga holebira.
JER 48:14 Moabali tígua balagala howa bi ogodagua lalu, Ina ami agali hongoheore howa wai biagane manda timbuni inaha nga, laramiligo irane aginagabe.
JER 48:15 Waitigirume Moaba bo haealabaga biai halu ibunaga tano ngaru karulai holebira. Moaba dindini igiri bayale daliahe karu bibahende bo wahai holebira. I̱ kiniore kogoni. I̱ mini Anduane Homogo Hongo Haiheore i̱na bi o ledogoniore.
JER 48:16 Moaba dindi bo haealabaga bulene horo kaware nga. Ibuha ko holene horo abaleore tagira ibiragoni.
JER 48:17 Wali agali Moaba dindi kawareni ha parapara bu kamirubi Moaba mini leneore nga lo mandabi kamirubi tígua dara halu ogodagua lalimu, Ainde Moaba mini lene hongohebi wiyago ereba halu Moaba bo haealabaga biyadago daraba, lalimu.
JER 48:18 Dibono tanoha wali agali bu kamiru tígua tí mini lene harimigo yu wahalu wali agali maru mini nalene karu dindi abaluni biragadagua tíbi birape holene nga. Moaba bo haealabaga bialu mo ko hole kagome tínaga tano wai pabe hongohe bu mabubi ngamigoni bo gialabaga bule ibulebira.
JER 48:19 Aroe tano wali agali bu kamiru-o tígua hariga gibuni ngaruha howa de hondo halimu. Wali agali ibida togolalu ibiraruhondo hale halu lalu, Tí aginaga ibida togolalu poramibe, lalimu.
JER 48:20 Tigua ogodagua ladai bulebira, Moaba dindi bibahendeore bo haealabaga bialu mo ko hayagonaga ibu áyu taga timbuni ho kagoni, lolebira. Anigo tígua ibu dara halu dugu hongo howaore biadaga hadaba. Tígua Iba Anono porago kawareni pialu wali agali ogoniha bu karuhondo, Moaba dindi mo ko halu bo haealabaga bialu mo labu hayada, lalu lama pilimu.
JER 48:21 Dindi bayale ngagoha tano wiarunaga ko pani nolene winigo miragoni. Tano uruni Holonobi Yasabi Mebadabi Dibonobi Nebobi Bede Dibiladaimibi Kiriadaimibi Bedegamulubi Bedemeonobi Keriodobi Bosorabi tano uruni bibahendeore bo gialapaya bialu bo labu hai holebira. Ani bialu Moabanaga tano lenego bibahendeore kaundiaha wiaguabi kawareni wiaguabi bibahende bo gialo wahaiore holebira.
JER 48:25 Waitigirume Moaba dindi bo poda hana halu ibunaga hongo bope halu ibugua mbirale mbira bibe naheore ngagoni. I̱ Anduane Homogo i̱na bi o ledogoniore, laya lalu Yaremaiahanda lene.
JER 48:26 Anduane Homogohanda lalu, Moaba ibugua i̱hondo doga hayagonaga lulu iba nowa luluyu haradagua mo luluya helo hameledo. Ibuninaga magu tagu ngagoria palu pendege lalu ngagola wali agali bu karume hondo oba helo hamelo ko.
JER 48:27 Bamba Moaba í̠na Isaraele wali agali hondo mege bialu oba hariligo mitangi bibe. Isaraele ti pagebibi baba mandagi heane hondowa í̠na mege bialu oba halu mo nagalone howa hengedope harigoni.
JER 48:28 Moaba wali agali kamiru tí egeanda ngaruha bira do hole pudaba. Ega bedarume tinaga anda dindi ko wali agali pobe nahe ngagoha anda bia do hagadagua tígua anda bule pudaba.
JER 48:29 Moaba wali agalime mine halu balagala bi lalu hayago ina bibahendeme hale ho ko. Tigua tininaga mini mo yaraga halu mine hama ibaga biaga ka. Moaba ibuni mo duniniore helowa ngagoni.
JER 48:30 Anigo Anduane Homogo i̱na Moabanaga mine halu mana biaganego manda biai ho ko. Moaba dindi ogoniha karume bi bame dege lopayapaya biragola mbirale biraru damene nahabane bu hinalu bame haga.
JER 48:31 Ani kago manda bialu i̱na Moaba dara halu dugu bia haro. I̱na Kiriherese tanoni wali agali bu karubi dara ho kogoni.
JER 48:32 Yase tano bo gialahole biragoni handalu i̱na dugu bialu Sibima tanoha ko ngarunagabi i̱na dugu hongo howa bulebero. Sibima tano í̠naga pu mbira lini daga mini gerebi mabu timbuni dewaore wua yu pialu iba kuyama timbuni mini Homene Iba bedagoria pialu Yase ngagoria wia dege bima tagira peda. Anigo waitigirume í̠naga gerebi lini dewa ngerubi ira lini dagane ale tara tara hengederubi bibahende dugu wahai hole ibulebira.
JER 48:33 Moaba dindiha dindi bayale benebere wiagoria wali agalime tomo damene hongowa anda haiore haragola bu nalu howa turu ho haramiligoni ereba hai holebira. Tígua waini iba wabule gerebi ibane berelo geme hengedalu howa lini iba be timbuni ngagoha berelaga beramiligo lone nabulebira. I̱na ogoni waharugome tígua gerebi lini ibane berelo geme hengedalu howa turu halu bi ladagadaga biagadagua mani nabulebira. Tígua bi ladagadaga bialu ha haramiligo turu howa ndo dara howanaga bi ladagadaga bialu holeberemi.
JER 48:34 Moaba wali agalime Hesebono tano ngagoria howa dugu bialu Eleale tanohabi Yahasa tano dindi abene uyurahayagi ngagoriabi dugu biagimbu birago hale hai holebira. Ani bialu dindi abene unurahayagi pudai bialu Soa tano ngagoha howa bima pialu Horonaimi tano ngagoria tagira pialu Egelada Selisiya tanoha pu bolangua halu dugu biagimbu birago hale hai holebira. Ani birangi dindi bibahende mo ko halu Nimirimiha iba bedarubi hundiai holebira.
JER 48:35 Moaba wali agali hari nene ngaruha pialu dama mitangi bialu mbirale gime wabini bi pupu wiaga ngaruhondo ira hagua ngabilo delaga inisenesiru lomabu dela loma maru dela nabilo i̱na gialo waholebero. I̱ Anduane Homogo i̱na bi o ledogoniore, laya lene.
JER 48:36 Ani bialu kagonaga i̱na Moaba wali agali Kiriherese tanoha hagabu karu mitangi bialu bu miniha dara ho kogoni. Mbiralime ibunaga dabudabu bayale mo wigi biyaruni ereba hai haragola dara timbuniore ho howa pilipe lama ibagabu hagagobi ko.
JER 48:37 Moaba wali agali tigua dara timbuni ho howa tinaga mandari angariru minu dogalu holebira. Tinaga gi pugualu dara ho howa aga karulaga ngaru karulo holebira.
JER 48:38 Agalime todobene be dindime wabini galone bibe nahedagola pambulo wahagadagua Anduane Homogo i̱na Moabaore bo haealabaga bulebero. Anidagua berogola Moaba dindi bibahendeha dugu timbuni bialu holebira. Tinaga anda dangini heaguabi wali agali ngoai haga hamani heaguabi dugu timbuniore biame halu holebira.
JER 48:39 Heneneore Moaba bo haealabaga biragola wali agalime taga ho howa wanakui mo hiladali halu kiabu dugu gibi bulebira. Wali agali Moaba dindi kawareni handa ai̱nai̱ padarume mbirale uruni birago de hondowa ti gi timbuni halu Moaba mege bulebira. I̱ Anduane Homogo i̱na bi o ledogoniore, lene.
JER 48:40 Anduane Homogohanda bi ogodagua lara. Ega bodo hariaweme yagaloyu irigi halu puwa ema bialu poraru minulenaga babagane abale yulupe hagadagua waitigime Moaba bole gerai hongo howa lalu ibulebira.
JER 48:41 Waitigime tano ngaru karulalu wai pabe hongohe karubi karulai holebira. Ani karulai haragola Moaba ami agali bu karu tigua gi timbuni halu walime gali taba honolene tu kaware ibiragola mogolalu gi timbuni ho biragagobi holebira.
JER 48:42 Moaba dindiha karume Anduane Homogo i̱hondo doga henegonaga ai Moaba dindiha wali agali mini lenego mbira nahe ereba haiore holebira.
JER 48:43 Moaba wali agaliru-o tí gi timbuni taraore halimulonaga gundu uli timbunibi gono tara tarabi tí delonaga wiai ho ngagoni. Anduane Homogo i̱na bi ogoni laru.
JER 48:44 Agali mbirame gibi mbira ngago handalu ibida pialu karia gundu uli ngagoha pilolebira. Pilaragola heyalu pialu karia nde gono ngagoha do wulebira. Anduane Homogo i̱na Moaba wali agali bo wahai holene horo manda bu winigo tagira ibiragoni.
JER 48:45 Moaba wali agali ibida pialu Hesebono tanoha bira do holene manda biyagobi ani bibe naheore holebira. Tigua bamba Kini Sihono heangi Hesebono tano dayaria de hendenegobi áyu darane hondowa tano ogoniha napolebira. Ani biragola ira ogonime Moaba dindi bibahendeore lenehabi hari bareha ngarubi bibahende daiore haragola ti ibida polene henge mbira nawulebira.
JER 48:46 Moaba wali agali kamiru tí darabiore mbira kamigoni. Tí dama mitangi bialu bi pupu wiaga mbirale gime wabini mini Kemosonaga wali agali bu kamiruni tí mo ko halu waitigirume ibalu tínaga waneiginiru dindi taraha minu garabaya bu yalu polebira.
JER 48:47 Anigo mani horo pongo bo wirugo tagira ibirangi i̱na Moaba wali agali ti lone mo bayale helolebero. I̱ Anduane Homogo i̱na bi o ledogoniore, laya lene. Anduane Homogohanda Moaba wali agalime ko birimi lalu tiha ko holene tagira ibulebiraru damene uruni lalu lai hene.
JER 49:1 Anduane Homogo ibugua Amono wali agalihondo bulebiragonaga bi Yaremaia laminigo ogo. Isaraele wali agali tinaga iginiru agoha kabe. Dindi ti aba henedagoria ho aribia holene waneigini nahedabe. Tinaga waneigini heagua nde Amono wali agali dama mitangi bialu mbirale gime wabini mini Molege ngagohondo bi pupu wiaga karume Isaraele hameigini Gadanaga dindi ngago ti karulayadago irane aginagabe. Ani bialu Amono wali agali uruni tigua Gada hameigininaga tano ngaruha pu kago agibe.
JER 49:2 I̱ Anduane Homogo i̱naore laro. Horo mbira i̱na pongo bo winigo tagira ibirangi tínaga waitigiru ibilarogola tigua tano timbuni mini Laba ngagoria anda ibalu wai bulebira. Laba tano ogoni Amono dindinaga tano dunini mbira ngago ogoriani wai bialu holebira. Wai bialu waitigime tano ogoni bo gialo wahai haragola gialo paya bini dege wulebira. Ani bialu waitigime tano ogoni anda dewa kaware hapara para bidaru bibahende bo heda hai holebira. Ani biragola mani howa Amono tigua dindi karulo henedagoni Isaraele wali agali tini lone karulo dai bulebira. I̱ Anduane Homogo i̱na bi o ledogoniore.
JER 49:3 Hesebono wali agali kamiru-o Ai tano bo gialo wahai hayagonaga tígua dugu dalimu bidaba. Wali agali Laba tanoha haga kamiru tíbi nde dara howa walia halu aga karulagane ngago mo karulo howa kiabu dugu bialu hadaba. Waitigirume tínaga dama mitangi bialu mbirale gime wabini mini Molege ngamigo mo yalu Molegenaga loma binigo mo miaga agali bu karubi agali haguane bu karubi bibahende dindi taraha garabaya bu yalu polebira. Ani bulebirago tígua mini burugu lowa ibida pole gerai lalu wai pabe tamuhayagi pu íbu bialu holeberemi.
JER 49:4 Amono wali agali tíguaore tínaga dindi ulini bayale ngamigoria mabuni tomo hengedemirume lini baya gibi dewaore daga kagonaga mine howa bi lalu kamigo irane aginagabe. Tígua munibi mbirale dabudabu ngamirubi hana howa lalu, Mbirali ina baba wai bima labehe mbira ai kabe, laramiligo agibe.
JER 49:5 I̱na heneneore laro. I̱nime waitigi kaware hama pedaru ibilarogola tí kamigoha mo gi hole ibulebira. Ani ibalu tigua tí waratagi haragola tí dindi tara tara ngaruha ibida piai holeberemi. Anidagua beremigola tí lone mo mogo bialu haru dai bulene mbirali naholebiraore.
JER 49:6 Ani biragola mani i̱na Amono tínaga holene lone mo bayale helolebero. I̱ Anduane Homogo i̱na bi o ledogoniore, laya lalu Yaremaiahanda lene.
JER 49:7 Anduane Homogo Hongo Haiheore kago ibugua Idomoalihondo mani bulebiragonaga bi Yaremaia laminigo ogo. Agua biyabe. Temana dindihayagi wali agali bu ka aibe. Tínaga mini bayale gigabi ala winigo ereba hayadabe. Agali manda bayale dewawi karume bi lamiaga wiyago nalami wahayadabe. Tinaga mini bayale gigabi tiha wiyago ereba hayadabe.
JER 49:8 Dedana tanoha wali agali bu kamiru tíbi tínaga tano yu wahalu ibida pialu ege andaha bira do halimu. Iso aguanene kamirume mana ko birimigonaga pani nalimulo ngulene horo tagira ibirangi i̱na tíha mo ko holene anda ibilolebero.
JER 49:9 Agalirume gerebi lini bogabi dedaru dalu howa tigua lini bibahende do yai nahe maru delo wahaga. Ogonidagua dege pagealime mbiraga ibuwa tini mo yule hameleda alego dege mo yalu piaga.
JER 49:10 Ani biagadagua ndo i̱na Idomo wali agali Iso hameigini bu kamiru tí pani nalimulo ngerongi i̱na tínaga mbirale ngamiru bibahende bo haealo wahaiore holebero. Tínaga ha do haga ngemiru bibahende bo haealo wahai harogola tínaga ha do holene dindi mbira bayale nawulebira. Idomo wali agali tínibi wali agali maru tí heba haga kamirubi hameigini tí baba kaware haga kamirubi tí bibahendeha mo ko holene anda ibulebira. Ani ibiragola Idomo wali agali lenego biba halu ereba haiore holebira.
JER 49:11 Anigo Idomo wali agali tínaga waneigini mitangi holomini nahalimu. Waneigini abaru tí waneiginiru helalu homarimiyagua waneigini uruni i̱nime handayaho holebero. Ani bialu tí one bedarubi dalo biruwa ti i̱ha hana ho birulebira, laya lene.
JER 49:12 Anduane Homogohanda lalu, Wali agali lene karu bibahende mo ko hai holebira. Maru ko nabi heaguabi ti pani na dege bulebirago manda bialu Idomo wali agali tígua mitangi bialu kamiria i̱na tí helo wahalu bolangua holobabe toba kamibe. Ani ndoyago. I̱na tí mbira yu wa nahe tí bibahende pani nai holene wulebiraore laro.
JER 49:13 I̱na Bosora tano ngago bo haealabaga bialu mo ko haiore hole lo ngogo tagira ibiragola dindi hangu bame ona wulebira. Anidagua berogola dindi tara tara ngaruha wali agali bu karume i̱na Bosora wali agali tihondo bi ogonidagua biya larago hale howa tigua mogolalu Bosora wali agali mege bialu hondo oba holebira. Ani bialu howa tigua wali agali tara karuhondo ha halu lalu, Tíore Bosora wali agali mo ko hayadagua mo ko helo, lalu holebira. I̱na Idomo dindiha tano ngaru bibahende mo ko halu bo haealabagabu wahai harogola tano uruni mo ko hene wiaabo holebira. I̱ Anduane Homogo i̱na bi o ledogoniore, laya lene.
JER 49:14 Anduane Homogohanda Yaremaia i̱hondo au laya. I̱na agali mbira bi yalu hameigini tara tara karu lamule pu ledo, laya. Agalidagoni ibugua hameigini tara tara karu bibahende mo mogo buwa Idomo hameigini karu baba wai bule abale heyalu manda manda bu hadaba labe ledo, laya.
JER 49:15 Anduane Homogohanda Idomoalihondo lalu, Hale hadaba. I̱na tíore hameigini tara tara bu karunaga deni mo nagalone halu mo ngubia hene mbira helolebero.
JER 49:16 Hameigini tara tara bu karume tíhondo gi helo mo gi halu tíni hangu mitangi bialu ina timbuni duniniore mbira kamabe toba haga kamigoni. Urunidagua bialu kamigome tíni mo hondo halu kamigoni ndobe. Tínaga tano timbuni mini lene dunini ngago hari bare daligani nga. Ani ngago uyuraore irigi halu hari nene daligaoreni ega bodo hariaweme igini wu palue anda biagadagua birimiyaguabi i̱na ogoni bo haealabaga bialu bope holebero. I̱ Anduane Homogo i̱na bi o ledogoniore, laya lene.
JER 49:17 Anduane Homogohanda lalu, Idomo dindiha mo ko holene gibi hiriribi ibulebira. Wali agali maru Idomo dindiha bolangua halu porarume Idomo dindi koorene ko hene ngago de hondowa ti mogo timbuni lalu mege bialu hondo oba holebira.
JER 49:18 Bamba i̱na tano kira Sodomo Gomorala heba tano marubi bo haealabagabu wahewagola ai dindi uruni ibira hene mbirale mbira nawi bame ngagoni. Anidagua dege i̱na Idomo dindibi mo ko harogola wali agali mbira dindi ogoriani nahe dindi hangu wulebira. I̱ Anduane Homogo i̱na bi o ledogoniore.
JER 49:19 Laiono gabuame Iba Yodana angeha irabu timbuni ngagoha howa tagira pialu nogo sibi datani bayale karu nalu karia talia togo lagadagua Anduane Homogo i̱na Idomo wali agali karia abaleore ibalu tinaga dindi ngagoria howa bo batagi holebero. I̱na agali mbira dindi ogoniha karu haru helo dabo helolebero. I̱na ani berogola mbirali i̱la lai lolene ai holebirabe. Mbirali hongohe i̱ kogobi ai kabe. Agali haguane i̱la wai bibehe ai kabe.
JER 49:20 I̱na Idomoalihondobi Temana tanoni wali agali bu karuhondobi bule mandabu kogo langerogo hale habe. Laionome nogo sibi balu bo gililo yu ibagabu ngelagadagua i̱na Idomo wali agali waneiginirubi bibahende bo payapayabu ngelolebero. Mbirale uruni bule ngogonaga Idomoaliru tini mogo lalu karuni ndobe.
JER 49:21 Idomo dindi mo ko halu kulu timbuni lalu ibira holebira. Ani biragola Idomo wali agalime dugu dalimu bima pialu haruago unuraore Iba Daramabi bedagoria wali agali bu karume hale holebira.
JER 49:22 Ega bodo hariaweme yagaloyu irigi halu puwa ema bialu poraru minulenaga babagane abale yulupe hagadagua waitigime Bosora tano bo gialabaga bialu mo ko holenaga gerai lalu ibulebira. Horo ogoningi Idomonaga ami agali bu karume gi timbuni halu walime gali taba honolene tu kaware ibiragola mogolalu gi timbuni ho biragagobi holebira, lene.
JER 49:23 Anduane Homogohanda Damasagasa dindiha bulebiragonaga Yaremaiahondo bi laminigo ogo. Ibugua lalu, Wali agali Hamada tanoha karubi Abada tanoha bu karubi bibahendeme mo ko holeneore tiha anda ibira laragola hale howa ti mogo timbuni lo holebira. Iba solowara ema bialu yaribu bigi biragagobi ti mini dege dindi howa ha̱lo birulene nawulebira.
JER 49:24 Wali agali Damasagasa tanoha bu karu bibahende hongo naheore howa gi halu ti gerai lalu ibida poragoni. Tiha genda tandagala timbuniore wialu walime gali taba hanalu biruwa tandaga handalu biragagobi ka.
JER 49:25 Tano ogoni ibu mini lene timbuniore mbira winigo hondowa i̱ turu ho haruli. Anigo tano ogoniha waitigi anda ibiyagola wali agali mbira nahe ibida piai hayadago.
JER 49:26 Horo ogoningi igiri daliahe Damasagasa tanoha bu karu ti harigani pialu karia waitigime bo waharagola uruninaga tingini ibira hayagoria wima polebira. Damasagasanaga ami agali bu karubi waitigirume ti bo wahai holebira.
JER 49:27 Damasagasa tanonaga wai pabe hongohe karu ira hedape harogola irame wai pabe dai halu Kini Benehadadanaga anda timbuni hongohe kagobi dai dege holebira. I̱ Anduane Homogo Hongo Haiheore kogo i̱na bi o ledogoniore, laya lene.
JER 49:28 Keda hameiginibi Haso dindiha hameigini bu karubi Babilononaga Kini Nebugadenesa ibugua ibalu wali agali uruni baba wai bialu bope hene. Anduane Homogohanda ani binigonaga Yaremaiahondo bi laminigo ogo. Ibugua hameigini uruninaga waitigihondo lalu, Tí heyalu Keda hameigini baba wai bule pudaba. Wali agali ni tagira ibiragohayagi karu baba wai bialu bibahendeore bo wahai halimu.
JER 49:29 Tinaga balai anda bidago bo gialalu balai andaha labolabo ngarubi tinaga dabudabu maru ngarubi bibahendeore mo yai halimu. Ani bialu tinaga nogo sibi hinidarubi tinaga nogo kamele karubi haru pilimu. Ani buwa tihondo ogodagua lalimu. Mbirale tí mo gi holene damene tí kamigoha wiame ka, lalimu, lene.
JER 49:30 Anduane Homogo i̱na Haso tanoha wali agali bu kamiru tíhondo larogo. Babilononaga Kini Nebugadenesahanda ibalu tíhondo ko bulene manda mandabu kago tí ibida piai halu ha do halimu laro, lene.
JER 49:31 Anduane Homogo ibugua Babilonoali hearuhondo lalu, Tígua abale heyalu wali agali mbiralihondo gi nahe hadapayabu karu baba wai bule pudaba. Tinaga tanoha wai pabe nahe nga. Ani bialu hameigini mende ti heba paliapara nahe dege nga.
JER 49:32 Tinaga nogo kamele bulumaga sibirubi hinu kago uruni bibahende tí haru piai halimu. I̱na agali tinaga mandari poda tubagi haga uruni bibahende bo talia togolai holebero. I̱na ti waitigi bibahendeme Haso hameigini ho hagira bialu bo haealabaga biai helolebero.
JER 49:33 Anidagua berogola Haso dindi labu halu ko biango dudu bu karu ti dalu wialu mo ko hene wiaabobo bu wulebira. Ani bialu tano ogoniha wali agali mbira napale wiaabo holebira. I̱ Anduane Homogo i̱na bi o ledogoniore, laya, lene.
JER 49:34 Sedegaia ibu Yuda dindinaga kini heangi Anduane Homogo Hongo Haiheore kago ibugua Elama dindiha ko holene ibulebiragonaga lalu bi mana latagi haga Yaremaiahondo lamini.
JER 49:35 Anduane Homogo Hongo Haiheore kago ibugua lalu, Elamali bu karu tinaga galone danda timuore yaga howa tigua tinaga waitigi bope halu ti wayali holeberema lo manda bu haga ka. Ani bu kagoyu i̱na tinaga danda timu bo podai holebero.
JER 49:36 I̱na Elamalinaga waitigi bu karu bibahende mo heya hai helarogola tigua puyabu hongohe ibagadagua gibuni mariaha howa ibilarogola Elamali baba wai bule anda ibulebira. Anidagua ibiragola i̱na Elamali dindi tara tara ngaruha minalu purogo lelarogola dindi mbira mbirani Elama wali agali lenego mbira ha dege bulebira.
JER 49:37 Waitigime ibalu Elama wali agali ayu tibume dibule kago hondowa ti gi helonaga i̱na ti mo gi timbuni holebero. I̱naga bu miniha keba timbuni ho kogome i̱na tiha ko taraore ibilolebero. I̱na tinaga waitigi bu karu ibilalu ti balu kane dege mbiraore yu wa nahe bo wahai helolebero.
JER 49:38 I̱na Elamalinaga kini kagobi tinaga agali haguane karubi bo wahai holebero. Ani buwa i̱na kininaga biragane dagia Elama dindini mo ngelowa i̱nime haru holebero.
JER 49:39 Ani buleberogo biaiore howa mani i̱na Elama wali agali tinaga holene bayale lone helolebero. I̱ Anduane Homogo i̱na bi o ledogoniore, laya lalu Yaremaiahanda lene.
JER 50:1 Anduane Homogohanda Babilono tanobi wali agali bu hearubi uruniha bulebirago ibunaga bi mana latagi haga Yaremaiaha howa latagi hene. Ibugua bi ogodagua lalu,
JER 50:2 Wali agali hameigini dindi tara tara bibahende bu karuha pialu bi ogo latagi hole pu. Wali agalime de handalu bi ogoni hale hole ibilonaga pelagi yaraga habe. Ibiragola bi ya do nahe bibahende lamiai habe. Waitigirume Babilono dindi karulayagoni. Babilononaga mbirale bi pupu wulenaga gime wabini mini Bele biago taga timbuni ho nga. Bi pupu wiaga mende mini Madugu winigo mo dindiho nga. Babilono wali agalinaga dama mitangi bialu gime wabini tara tara ko ngubi wiaru tibi nde mogo lalu taga timbuni ho nga, lene.
JER 50:3 Hameigini mbirame dindi abene uyurahayagi howa wai anda ibalu Babilono baba wai bialu bo haealabaga bulebira. Ani biragola Babilono dindi bibahendeha mbirale mbira munini bu naheore dindi hangu ibira halu wali agali mbira naheore ona wulebira. Wali agali lenego bibahendebi nogo tara tara bibahendebi Babilono wahalu ibida piai holebira.
JER 50:4 Anduane Homogohanda lalu, Mbirale uruni ibirangi Yuda wali agali Isaraele wali agalibi bibahendeme Anduane Homogo tinaga Ngode Datagaliwabe i̱ni koria dai bule dugu bima ibulebira.
JER 50:5 Tigua Hari Saiono kagoria polenaga wali agali maru karuhondo hariga agohabe lalu walia hadaba laga bima pialu holebira. Ani bialu tigua Anduane Homogo i̱ baba habo nalolene bi mbira lo wulebira. Habo nalolene bi ogoni lo wuwa tigua mbira embeda halu mo habo naloleore wiaho wiaabo holebira.
JER 50:6 I̱naga wali agaliru ti nogo sibi pu ereba hagadagua haya. Haru haga hearume ti hariga tigatiga ibagabu holenego mo batara hayagola hari wiaruha luluyu haga haga bida. Ti hari bare wiaruha pialu pu luluya halu tini hagane henene biago embeda hai haya.
JER 50:7 Agali bu hearume ti de handaga bialu minu baga biya. Waitigi uruni tigua lalu, Iname wali agali uruni bo wahaga birimago mana ko ndo bidama. Tinime Anduane Homogohondo mana ko biyagonaga pani nolene winigo naragoni. Tinaga mamali ala henerume Anduane Homogohondo mini mbiraore hongohe wu howa ti biamogo bilo mini dunu bia haga hene. Ani binidagua tíbi ani bulene winigo nabirimidagoni, lolebira, laya.
JER 50:8 Anduane Homogohanda laabo halu lalu, Isaraele wali agalibi Yuda wali agali kamirubi tí bibahende Babilono abale wahalu ibida piai hadaba. Nogo meme wangabeme meme maru mani ibilo ti bamba halu piagadagua garabaya wali agali maru bu karuni mani ibilo tí ala bamba halu pialu halimu.
JER 50:9 I̱na agali hongohe maru dindi abene uyurahayagi howa haru halu Babilono baba wai bilo haru ibuleberogo tí abale ibida pilimu. Ani haru eberogola tigua tidiyu howa wai bialu Babilono bope halu ti wayali holebira. Waitigi uruni ti wai biaga mandabi howa tigua timu barago bako nahaga kagoni.
JER 50:10 Ani bialu Babilono dindiha mbirale bayale damene ngaru mo yai holebira. Agali mbira mbirame dabudabu ngaruni tini hameledago ale karulape mo yaga bulebira. I̱ Anduane Homogo i̱na bi o ledogoniore, laya, lene.
JER 50:11 Anduane Homogohanda lalu, Babilono wali agaliru-o tígua i̱naga dindi wiwago bo haealabagabu wahai halu i̱naga wali agali hearunaga mbirale wiaru bibahende mo yai harimi. Anidagua buwa tínaga turu holene timbuniore nogo bulumagame widi iraneru lini hondo ibira ibira bilo geme hengedalu howa maru nalu turu hagagobi halu nogo hosi wangabeme bi hongo howa lalu hagadagua harimi.
JER 50:12 Ani kamigoyu nde Babilono mini lene ngago bibahende bo haealabaga biragola tíni taga ho holeberemi. Anidagua biragola dindi ko mbirale mbira nawibehe wali agali hameigini tara tara padarunaga deni Babilono mini nalene mbira wulebira. Ani bialu dindi ko yobi mbirale mbira anda habe nahe dindi hangu ona wulebira.
JER 50:13 Anduane Homogo i̱na tí baba keba timbuni howa i̱na mo ko helarogola tínaga dindi mo labu halu wali agali lenego mbira dindi ogoniha munini bu naholebira. Ani bini ngagola wali agali tara tara dindi ogoriani bolangua halu porarume mbirale o biyadaruni de hondowa mogo timbuni lalu mege bialu hondo oba holebira, lene.
JER 50:14 Anduane Homogohanda Babilonoalinaga waitigi hearuhondo lalu, Agalime danda yuwa wai bayuwa biaga mandabi kamiru tígua Babilono tano ngago ho hagira buwa tidiyu howa wai bilimu. Tígua danda edalu timu dewa baanda halu balimu. Babilonoalime Anduane Homogo i̱nihondo mana ko dewaore biyagonaga tígua tano ogoni emeneorebi nawilo bo haealabaga bilimu.
JER 50:15 Ani bialu tígua tano ogoninaga ege pabe hongohe kago bo gialahole beremigola tigua tí badai bulene hongo nahe holebira. Tano ogoni tí karulole ibalimulo yupe harongi tígua hoaro hongo howa ladagadaga bialu dindi bibahendeha ga̱ laame halimu. Babilonoalime dindi maruha pialu bo haealabaga biai hayadagua tinaga dindi ngago nde ani dege bilimu. Anduane Homogo i̱nime mbirale uruni berogola tígua pialu dindi bibahende mo labu haiore halimu.
JER 50:16 Agali mbira hangu tomo hongolenebi tomo boga birago bu mogobu ngelolenebi mbira Babilonoha naheloore bibahende bo hilo wahai halimu. Ani beremigola wali agali dindi taraha howa Babilonoha íbu hene karu tigua dindi andabi bo haealabaga bialu mo labu harimigo de hondowa ti gi timbuni holebira. Gi howa tini dalu ibida piai halu tininaga wali agali hayadaru baba holebira, lene.
JER 50:17 Anduane Homogohanda lalu, Isaraeleali nogo sibi ale kagola wali agali dindi tara taraha padarume laiono gabua ale howa tigua Isaraeleali balu mo ko hole talima ibaga bialu ka. Pigane Asirianaga kini heagome bo naya. Neaha mani Babilononaga Kini Nebugadenesahanda kuni wiago dudu naya.
JER 50:18 Anidagua biyagonaga i̱ Anduane Homogo Hongo Haiheore Isaraelenaga Ngode Datagaliwabe kogome i̱na Babilononaga kini kagobi ibunaga dindi ngagobi bibahende Asirianaga kini biago minu balu ibunaga dindi bo tangu waharudagua bulebero.
JER 50:19 Ani bialu i̱na nogo sibi haru hagadagua Isaraeleali ti tini daluha haru dai bulebero. Ani berogola tini dalu Hari Kamele kago andanehabi Basana dindihabi Eberaimi hameigini dalu hari barebarehabi Gileada dindi ngagohabi datani bayale karu nalu helo haru dai bu helolebero. Dindi uruniha howa tomo dewa karulape nalu bayale holebira.
JER 50:20 Horo ogoningi Isaraele wali agali Yuda wali agalibi i̱nime helo yu wahene emene karu uruni tiha ko wiyadaru domo wahalu ti bayale helo helolebero. Anidagua berogola tiha ko mbira para nahe holebira. Marume tihondo ko mbira birimi lalu bi hangume laede habe naheore holebira. I̱ Anduane Homogo i̱na bi o ledogoniore, laya, lene.
JER 50:21 Anduane Homogohanda Babilonoalinaga waitigi hearuhondo lamialu lalu, Tígua Babilonoali karu baba wai bule pudaba. Meradaimi dindiha wali agali karu bababi Pegodo dindiha wali agali bu karu bababi wai biai halimu. I̱na bilimu larogo mo wa nahe ti mo ko halu homelo bai halimu. I̱ Anduane Homogo i̱na bi o ledogoniore.
JER 50:22 Wai bialu hoaro laragolabi dindi bo haealabaga biragonaga kulu laragolabi dindi bibahendeha hale hai holebira.
JER 50:23 Ala Babilonoalime dindi bibahende bo haealabaga biaga hama ale wiyagoni. Ani binigo áyu ibunaga waitigi kamirume ibuni bo haealabagabu wahalimu. Anidagua beremigola wali agali tara bu karume Babilonoha ko ogoni anda ibiyago de hondowa ti mogo timbuni lolebira, lene.
JER 50:24 Anduane Homogohanda lalu, Babilono-o í̠na i̱la waitigi harigonaga í̠ gonoha delo gono wiwagoha í̠ de handa nabi howa do ngegoni, lene.
JER 50:25 Anduane Homogohanda Babilono baba keba timbuni ho howa ibunaga wai biagane anda timbuni heago panga dugua halu wai biagane ale wiaru bibahende mo batagi biai haya. Anduane Homogo Hongo Haiheore howa Bibahende Haru Haame Ho Haga kago ibugua biabe timbu gibi mbira Babilono dindi bibahendeha bulebira.
JER 50:26 Ibugua lalu, Dindi bibahendeha waitigi bu kamiru tí bibahendeme Babilono dindiha wali agali bu karu baba wai bule ibidaba. Tinaga tomo wiagane anda timbuni bu karu bo gialo wahai halimu. Agalime widi lini do mogo bu wiagadagua dabudabu Babilono dindiha ngaru mo mogobu wiai halimu. Ani buwa mbirale uruni bo haealabagabu wahai halimu. Uruni aria mbira hangubi yu wa nahalimu.
JER 50:27 Agalime nogo bulumaga homelo abale bagadagua Babilononaga ami agali bu karu ala homelo bo wahai halimu. Anduane Homogo i̱na ti pani nelo mialu bo wahai holene horo winigo áyu o íbu ngagonigo bibahende mo ko halu bo wahai halimu, laya, lene.
JER 50:28 Isaraele wali agali Yuda wali agalibi maru Babilono wahalu ibida pialu Saiono dindi daibiyaru tigua lalu, Anduane Homogo inanaga Ngode Datagaliwabehanda agali ibunaga anda bo gialo wahai hayaruhondo pani nelo miya, laya lene.
JER 50:29 Anduane Homogohanda Babilonoalinaga waitigi bu hearuhondo lamialu lalu, Agali danda yuwa wai biaga mandabi kamiru tígua Babilono baba wai bule ibidaba. Tígua ibalu Babilono tano ho mabu bupe howa hagirabu yaanda halimu. Ani buwa Babilonoali mbira pora bialu ibida napelo de hondo halimu. Babilono tinime wali agali tara palearu mo ko howaore bo wahai hayadagua tígua tini mo ko howa bo wahai halimu. I̱na ani larogoni irane Babilonoali uruni tigua Anduane Homogo Isaraele wali agalinaga Ngode Datagaliwabe baya buruguleore i̱ni mana bayale tigabi hangu biaabo haga kogohondo mine halu ko dewa biyagonaga ani bilimu.
JER 50:30 Horo ogoningi tígua Babilono dindini igiri daliahe bu karu bo wahai haramigola uruninaga tingini wali agali ngoai ho haga hama ngagoria wima polebira. Ani bialu Babilononaga ami agali bu karubi bibahende bo wahai holeberemi. I̱ Anduane Homogo i̱na bi o ledogoniore, laya, lene.
JER 50:31 Anduane Homogo Hongo Haiheore howa Bibahende Haru Haame Ho Haga kago ibugua lalu, Mine hagane Babilonoaliru-o i̱na tíhondo heneneore larogo i̱ tínaga waitigiore kogoni. I̱na tí pani nalimulonaga minu bolene horo biago kaware hapara hayada.
JER 50:32 Mine haga wali agaliru o kamigo i̱na tí mo ko harogola tí pilalu ibira holeberemi. Ani ibiraho ngemigola tí biamogo bialu lone mo heya holene mbirali naholebira. I̱na ira dene tínaga tano bu ngamiru bibahendeha hedope hai harogola ira ogonime tínaga mbirale ngemiru bibahende daiore helolebero, lene.
JER 50:33 Anduane Homogo Hongo Haiheore kago ibugua lalu, Waitigime Isaraele wali agali Yuda wali agalibi bope hai haya. Waitigime ti garabaya bu yalu piai howa uruni ti golope halu pudaba lolene manda nabiore howa bayuwa mamage ho ka.
JER 50:34 Anigo wali agali mo wialu haru dai biagane hongo gibihe mbirali kago ibu mini Anduane Homogo Hongo Haiheore ka. Ibunime ibunaga wali agali biamogo bialu tinaga waitigi bu karu bope holebira. Ani bialu ibugua wali agali dindi bibahendeha bu karu ti bayale helo biamogo bialu Babilonoha ko holene dege yu anda ibilolebira.
JER 50:35 Anduane Homogohanda lalu, Babilono dindi mo ko helo hameledo. Babilonoha wali agali bibahende karubi tinaga agali haguane karubi tinaga agali mini gigabiwi karubi homaiore helo hameledo.
JER 50:36 Agali ke̱ howa bi mana latagi halu mbiwia haga karu tibi homelo hameledo. Agali uruni ti mini nawi lulu ale kagoni. Babilononaga ami agali bu karu ti gi timbuni hai kagonigo tibi homai helo hameledo.
JER 50:37 Babilononaga wai biagane garo ale mini karisi ngarubi nogo hosi karisi gili laga karubi bibahende mo ko hai helo hameledo. Ami agali maru dindi taraha howa íbu karu ti Babilono biamogo bilo yolo bini karu ti hongo nahe kagonigo homelo bo waholene hameledo. Babilono wali agalinaga dabudabu ngaru bibahende mo ko hai holene nga. Waitigirume ibalu dabudabu bayale ngaru mo yu piai holene nga.
JER 50:38 Babilono dindiha iba dalu naibi wiaho ngane dege iba emene bedaru hundiai helolene karulape nga. Dindi ogoniha dama mitangi bialu mbirale gime wabini dewaore ngagoni. Mbirale uruni ngarume wali agali karu tini mo lulu ya hayagonaga mo ko holene nga.
JER 50:39 Ani biragola Babilono dindiha wali agali mbira naheore wialu wiaabo holebira. Ani bidagola budi gabua tara tararubi biango dudurubi ega umirubi uruni ale dege birulebira.
JER 50:40 Bamba i̱na Sodomo Gomora tanobi tano maru wiapara para biarubi bibahende bo haealabaga bialu mo ko hai henego áyubi wali agali mbira nahe bame dindi dege nga. Anidagua bini dege wialu Babilono dindibi nde wali agali mbira naheore dindi hangu wulebira. I̱ Anduane Homogo i̱na bi o ledogoniore, laya lene.
JER 50:41 Ami agali dindi abene uyurahayagi howa ibira. Ti hongo gibihe howa tinaga kini dewaore heba dindi kaundiani howa ibiragoni. Tigua wai biagane aleru mo manda manda bialu ka.
JER 50:42 Agali uruni tigua dara haga ndo ibulebira. Tigua danda timu yandareru yu karume agali maru mo ko halu bo waholene dege hamelo haga ka. Tigua nogo hosini biralu ibalu howa tidiyu ibiraha dindi kulu laruago iba solowarame tangua amunana bialu kulu nduga lalu ibagagobi ibaruagoni. Tigua tidiyu ho dugubu howa Babilono baba wai bule ibiragoni.
JER 50:43 Babilono kini kagome waitigi uruni ibaruago hale howa gi halu ibunaga hongo bibahende pirilape halu hongo nahe birulebira. Ibu gi howa mogo timbuni lalu walime gali taba honole biruwa giho biragagobi birulebira.
JER 50:44 Laiono gabuame Iba Yodana ange irabu timbuni ngagoha howa tagira ibalu nogo sibi datani bayale karu nalu karia talia togo lagadagua Anduane Homogo i̱na Babilono wali agali karia abaleore ibalu tininaga dindi ngagoria howa bo batagi holebero. I̱na agali haguane mbira dindi ogoriani haru helo dabo helolebero. I̱na ani berogola mbiralime i̱la lai lolene ai holebirabe. Hongohe mbirali i̱ ale ai kabe. Agali haguane i̱la wai bibehe ai kabe.
JER 50:45 I̱na Babilono dindibi wali agali dindi ogoniha bu karubi tihondo bule mandabu kogo langerogo hale habe. Laionome nogo sibi balu bo gililo yu ibagabu ngelagadagua i̱na Babilono wali agali waneiginirubi bibahende bo payapayabu ngelolebero. Mbirale uruni bule ngogonaga Babilono dindi ibuni mogolalu ngagoni ndobe.
JER 50:46 Babilono dindi mo ko halu ibira helarogola dindi kulu timbuni lalu pirilagimbu bulebira. Ani biragola Babilono wali agalime dugu dalimu biaruagola unuraore dindi tara tara kaundiaha karume hale hai holebira, laya lene.
JER 51:1 Anduane Homogohanda lalu, I̱na agali tara maru wali agali mo ko haga bu karunaga mini mo heya harogola tigua abale gerai lalu puyabu ibiradagua ibalu Babilono wali agali baba wai bule ibulebira.
JER 51:2 I̱na agali tara bu karu Babilono baba wai bule ibilarogola tigua ibalu wali agalime widi lini aeane taulo wahagadagua Babilononaga dabudabu ngaru bibahende mo wahai holebira. Horo ogoni harangi waitigi dindi bibahendeha howa ibalu Babilono baba wai bialu dindi mo ko halu bo labu ho wulebira.
JER 51:3 Babilononaga waitigi bu kamiru-o tígua Babilononaga amime wai biagane yári karulelobi tinaga danda timu tegelape helobi henge nami abaleore Babilono ami karu bogalimu. Mbira hangubi pora bialu napelo bibahende bo wahaiore halimu.
JER 51:4 Tínaga timume Babilono ami bu karu bila hai halu homararunaga tingini Babilono dindiha harigani wima polebira.
JER 51:5 Isaraele wali agali Yuda wali agalibi tini daluni heangi tigua Isaraelealinaga Ngode Datagaliwabe baya buruguleore howa mana bayale tigabi hangu biaabo haga kagonaga deni howa mana ko dewaore biya. Ani biyago bilowa Anduane Homogo Hongo Haiheore Ngode Datagaliwabe i̱na Isaraele wali agali Yuda wali agalibi erembira mialu yu wa nahe harugoni.
JER 51:6 Isaraele wali agali Yuda wali agaliru tí Babilono abale yu wahalu ibida piai halimu. Tí hangu hangu nahome hole manda bialu ibida pugu pugu bilimu. Babilono wali agalime mana ko bialu hayagonaga pani nelo mulene áyu ogoni. Ti pani naragola tí heba namaga holigo pilimu.
JER 51:7 Abale howa Anduane Homogohanda wali agali dindi bibahendeha hearu pani nelo mialu ibugua Babilonoha howa pani miai hayagola Babilono ibugua biabe ogoni biya. Babilono ibu Anduane Homogonaga giha gabo be ngolome wabini ale mo yu hayagola Anduane Homogohanda wali agali dindi bibahendeha bu hearu gabo be ogoniha howa waini iba nelo miradagua biya. Ani biyagola ti lulu iba nowa luluyu howa ibagabu kagoni.
JER 51:8 Anigo áyu Babilono ibuni abale mo ko halu ibira holebira. Anidagua bulebiragonaga dara halu dugu bia hadaba. Ibunaga dere bidaruni dabi holobabadago marasini mbira abale mia hadaba.
JER 51:9 Yuda wali agali Isaraele wali agalibi tigua ogodagua lolebira. Ina wali agali garabaya hene kamarume Babilono mo bayale helo biamogo bia harimago nakarulape haragonida. Anigo ina Babilono wahalu inane dalu wirimagoha hama dai bima. Anduane Homogohanda Babilono koore biyagonaga pani emene ndo timbuniore wima irigi halu hari mindini ela habehe winigo miai haya, lolebira, lene.
JER 51:10 Anduane Homogohanda lalu, I̱naga wali agali karume ogodagua lolebira. Anduane Homogo ibugua Babilono mo ko hayagome ibunaga wali agali ina kamagonaga mana bayale ngago mo panaho ngeleda. Anidagua bidago ai iname Saiono tanoha dai bialu inanaga Anduane Homogohanda inahondo biyago damene latagi hami̱ya abale ma, lolebira, laya.
JER 51:11 Babilononaga waitigi bu kamiru tínaga yandare baya hangu de halu wai humbi mo manda manda bidaba. Anduane Homogohanda Babilonoalime bo gialahole bu wahene ngago mitangi bialu ibugua Babilono pani tandaga nelo mo mulene hamelo ka. Ibugua Babilono mo ko halu bo haealabaga biai holenaga Media dindiha kini karunaga mini Babilono baba wai bilo mo heya halu wai bule ibilolebira.
JER 51:12 Waitigi bu kamiru-o ami agali bu karume wai hongo howa bialu Babilono tanonaga wai pabe hongohe kago bo gialapaya bilonaga ga̱lalu pelagi yaraga hadaba. Ami agali marume tano mamage helo dabo helalimu. Ani heledemigola tigua tinaga biabe bialu helo. Ami agali marume ohowa lamima pialu tígua Babilono baba wai bule manda manda bu halimu lalu lamilimu. Anduane Homogohanda, Babilono wali agali mo ko howa bolebero, lenego áyu bolebira.
JER 51:13 Babilono í̠ daluha iba dewa pialu mbirale bayale tara tara dewa ngegoni. Anigo í̠ha mo ko holene kaware íbu ngagoni ndobe. Í̠naga holene pudini alego ai áyu tungulaki holebira.
JER 51:14 Anduane Homogo Hongo Haiheore kago ibugua ibuninaga minini howa bi heneneore ogodagua laya. Babilono í̠ baba wai bilo agali dewaore ibilolebero. Ani ibilarogola í̠ balu tigua í̠ daluha mone dewaore biru to̱laradagua bulebira. Ani bialu tigua í̠ bope howa wayali halu mambolo balu holebira, lene.
JER 51:15 Anduane Homogohanda ibunaga hongome dindi wabini. Ibunaga mini bayale gigabiwigome dindi bibahende wabialu hari daliga mo yangala halu daligaha karu bibahendebi wabini.
JER 51:16 Ibunime bi laragola hari kilikulu hongoheore lalu iba hariha bedagome u̱ timbuni laga. Dindi bibahendeha howa beralibaha pobo tara tara iraga howa mo mogo bilaga. Ibugua iba dalu dindini ibilalu hari daba bilaga. Puyabu tara tara ibu andaha wia do ho winiru mo heya halu pulame helo pelaga.
JER 51:17 Ibugua ani birago hondowa wali agali karu ti lulu ale halu mini nawiore haga. Dama mitangi bialu mbirale ngolome wabiaga agali bu karu tibi nde mbirale tinime bialu kagonaga taga pani nolebira. Mbirale bi pupu wulenaga gime wabini uruniha galone mbira naheore. Uruniha buhe̱ lolenebi nawiore.
JER 51:18 Ti nagaloneore ngago hondowa wali agalime uruni mebia holene karulape nga. Anduane Homogo ibugua horo mbirungi ko bayalebi dabaki bule ibiragola dama mitangi bialu mbirale gime wabini uruni ti ko halu ereba hai holebira.
JER 51:19 Yagabanaga Ngode Datagaliwabe kago ibu urunibi ndo tara mende ale mbira kagoni. Mbirale ngaru karubi bibahende ibugua wabiai hene ka. Ibugua Isaraele wali agaliore ibunaga helo lowa daba bagiho helene ka. Ibunaga mini Anduane Homogo Hongo Haiheore kagoni.
JER 51:20 Anduane Homogohanda lalu, Babilono í̠ i̱naga to̱le̱ baga hama ale halu mbirale wai bule howa gi pehalu yamulene ale kegoni. I̱na í̠ yamialu wali agali dewaore bo dambu wahai halu dindi timbuni hongohe wiaru bo gindirulo wahai harugoni.
JER 51:21 I̱na í̠ heba howa wai biagane hosi hearubi ami agali hosini biraga hearubi bo wahai halu birugoni ndobe. I̱na í̠ yu howa garo ale wai biaga karisi wiaru bo pambulo wahai halu ami agali karisini heyu howa wai biaga hearubi bo wahai halu birugoni ndobe.
JER 51:22 I̱na í̠ heba howa wali agali dewaore bo wahai halu wali agali wahebi waneiginibi wandari igiri daliahebi bibahende bo wahai harugoni.
JER 51:23 I̱na í̠ yu howa nogo sibi hearubi nogo sibi haru haga agali bu hearubi bo wahai haru. I̱na mabu biabe biaga bulumaga hearubi bulumaga biabe bilo haru haga agali hearubi bo wahai halu biru. I̱na gabumane agali hearubi agali haguane hearubi bo wahai halu birugoni ndobe, lene.
JER 51:24 Anigo Anduane Homogo i̱na larogo, I̱na Babilono pani nelo muleberogo irane Babilonoha mana ko dewa bialu Saiono tano mo ko howa bo gialabaga bialu mo labu hayagonaga bolebero. Babilono pani nelo mialu minu barogola Isaraele wali agali Yuda wali agalibi tígua de hondoleberemi.
JER 51:25 Babilono-o í̠naga hongo timbuniorehe hari nene timbuni kagobi howa dindi bibahende bo haealabagabu wahai halu biri. Anigo heneneore i̱ Anduane Homogo i̱na í̠la waitigi halu gi hongo howa dogolalu í̠ minu yuwa dindini bape harogola irame í̠ dalu do amo lolebira.
JER 51:26 Í̠ daluha ege to̱le̱ bayale agalime hamelowa anda bibehe mbira ibira naholebira. Í̠ mo ko halu bo haealabaga biaiore henego ani wiaabo holebira. I̱ Anduane Homogo i̱na bi o ledogoniore, lene.
JER 51:27 Babilonoali baba wai bule ibilonaga dindi tara tara bu ngaruha wali agali bu karu dombeneha howa ga̱lalu pelagi yaraga halu mbelo biguli pu lalimu. Agali Ararada dindiha bu karubi Mininaga hameiginibi Asagenasa hameiginibi uruni bibahende ibai helo olalimu. Ani ibai halu tigua agali wai haru halu bamba holene agali haguane mbira dabo helalimu. Ani bialu ami agali wai bulenaga nogo hosini biralu mone tidiyu ibiradagua ibilo.
JER 51:28 Ani bialu Midia dindiha kini bu karu olalu gabumane agali karubi tinaga agali haguane karubi heba tigua Midia dindini wali agali hendedaru ibai halimu lalu olalimu. Wali agali dindi ngaruha bu karu bibahende Babilono baba wai bule ibai halimu ololene nga.
JER 51:29 Anduane Homogohanda Babilono mo ko hai halu dindi hangu wialu wali agali mbira nahe bameore wulebira, lalu Anduane Homogohanda bi abale lo winigo nga. Anduane Homogohanda mbirale uruni birangi dindi dumbirumbi bialu birilagimbu bulebira.
JER 51:30 Babilono ami bu karume wai nabi ibida pialu tini andaga bira do hai holebira. Ani bialu hongo naheore wali ale birulebira. Waitigi bu karume ibalu Babilononaga anda hongohe bu karu bo heda halu wai pabenaga panga hongohe karu gialapaya biai holebira.
JER 51:31 Agali bi yalu piagarume Babilononaga kini karia waitigime Babilono tano bibahende karulai haya lalu lamule pugupugu bulebira.
JER 51:32 Waitigime iba doma edene biaga ngago karulalu iba pugua ngagoha tola bu karu bo heda hai holebira. Anidagua biragola Babilono ami agali bu karu bibahende gi howa luluyu hai holebira.
JER 51:33 Waitigi bu karume ibalu Babilono dindi agalime widi iraneru lini hondo ibira ibira bilo geme hengedagadagua hengedalu bo haealabaga biai holebira. Biabe ogoni bulene horo kaware íbu ngagoni ndobe, lalu I̱ Anduane Homogo Hongo Haiheore Isaraele wali agalinaga Ngode Datagaliwabe kago i̱na bi o ledogoniore lene.
JER 51:34 Yarusaleme tanoha hearume lalu, Babilononaga Kini Nebugadenesahanda ina bo nalu naiore haya. Ibu dama tara mbira ale howa ina balu mbedogo biya. Inanaga dabudabu wimarume ibu tombe ho kagoni. Ibugua naiore hayagola inaha mbirale mbira nawi ndisi be bame ngaligobi ngama ndobe. Ani bialu mani inaha mbirale mbira para nahelo baya hangu domo wahai haya. Babilono tigua inanaga tingini bo budabaga biyagola inanaga darama bame odopaya bidagoni. Anidagua biyagome tiha ko ngago Anduane Homogohanda tigua mana ko biyagonaga paniore milo, laragoni, lene.
JER 51:36 Anduane Homogohanda lalu, Yarusaleme wali agaliru-o hale haramine. Heneneore bule larogo Babilono ibugua tíhondo mana ko biyagonaga i̱na tí biamogo bialu pani nelo mulebero. Babilono dindiha iba pedaru damene bibahende mo hundia hai holebero.
JER 51:37 I̱na Babilono bo labu harogola dindi hangu ibira halu ege to̱le̱ dudu paya bini ale ona alugumu wulebira. Ani ngagola dindi ogoniha wali agali mbira nahe nogo gabua tara tara ti hangu dalu wulebira. Wali agali dindi taraha howa bolangua haga bialu porarume de hondowa mogo timbuni lalu gi hai holebira.
JER 51:38 Ani biragola Babilonoalirume ti laiono gabuame ngororo laradagua lolebira.
JER 51:39 Anigo Anduane Homogo i̱na tigatigaore larogo tinaga minime ko bulene bolangua ho kangi i̱na tinaga tomo timbuni dawa halu badi bia harogola tigua lulu iba dewaore nalu luluyu howa turu timbuniho holebira. Ani bialu howa mani ti paluwa lone heyabe nahe paliahondo haabo holebira.
JER 51:40 Agalime nogo sibi memeru bolene ngagoria bole haru halu piagadagua ti balu homelolene ngagoha haru polebero. I̱ Anduane Homogo i̱na bi o ledogoniore, lene.
JER 51:41 Anduane Homogohanda lalu, Wali agali dindi bibahendeha bu karume Babilono dindi mini mo yaraga haga ngago ai waitigime ibalu wai buwa ti karulolebira. Anidagua birago hondowa hameigini tara tara karume mogo lai holebira.
JER 51:42 Iba solowarame yaribu timbuni bu yu ibalu iba angeni dindi ngago bo dambi hai hagadagua waitigi ibalu Babilono dindi bo dambi hai holebira.
JER 51:43 Babilonoha tano ngaru bibahende bo gialo wahai haragola dindi dege wialu wali agalibi mbira nahe wulebira. Wali agali mbira dindi ogoniha bolangua halubi napolebira.
JER 51:44 I̱na Babilono wali agalinaga dama mitangi bialu bi pupu wiaga gime wabini mini Bele ngago bo pambulo haealabaga bu waharogola ibugua mbirale mbedogo bu birayadaru magu tagudai bilolebira. Ani biragola wali agali dindi tara tara ngaruha howa Babilono naibulebira. Babilononaga wai pabe timbuni bu mabu bidago bo gialapaya biai holebira.
JER 51:45 I̱naga wali agali bu kamiru tí Babilono dindi wahalu ibida piai halimu. Tí homa nabi hole hangu hangu ibida pugu pugu bilimu. Anduane Homogo i̱na Babilono wali agali baba keba timbuniore ho kogo ti baroha tí heba bamaga holigo gerai lalu pilimu.
JER 51:46 Tígua bi diburibu laya laya maru ogoale bira lalu laga birane hale harimiyagua nde tí gi halu miniha mogo nale halimu. Mali áyu kamagoria bi diburibu mbirago tagira ibalu mali mendegoria bi diburibu mendeale tagira ibalu dindi mbira mbiraha wai bialu baga baga biarua lalu kini mbiralime kini mendela waitigi haruago lalu laga laga bialu holebira.
JER 51:47 I̱na horo mbira wiabagiho ngeledogo tagira ibirangi Babilono dindiha dama mitangi bialu bi pupu wule gime wabini bu ngaruni bibahende gingirulo wahai holebero. Ani berogola Babilono wali agali bibahendeme taga hai holebira. Ani bialu waitigime Babilono wali agali bibahende bo wahai hararunaga tingini Babilono dindi bibahendeni bu payabu wima polebira.
JER 51:48 Babilono tano bo haealabaga bini dindi hangu ibiraho ngangi hariha karumebi dindini karu ngarumebi turu timbuni hai holebira. Mbirale bu ngaru mo ko hai hole dindi abene uyurahayagi howa agali ibirarume ani bulebira.
JER 51:49 Ani bulubadagoni Babilono ibunime Isaraele wali agali tíhondo biyadaguabi wali agali tara tara bu karubi dindi wiarubi mo ko hai hayadagua ibunibi nde mo ko holebira. I̱ Anduane Homogo i̱na bi o ledogoniore.
JER 51:50 Anduane Homogohanda lalu, Isaraele wali agali tí homa nabi yu wahene pu kamiru áyu ogoni Babilono yu wahalu ibida piai halimu. Tí dindi kaundiaha pu kamigonigo tígua Anduane Homogo i̱ mitangi biaabo halu Yarusaleme embeda nahalimu.
JER 51:51 Áyu tígua bi ogodagua laga kami. Ina taga timbuni ho kama. Agali dindi tarali bu hearume Anduane Homogonaga anda tamuha tamu hobane Loma Biaheneore heagoha anda puwa yo handayagonaga ina taga timbuniore ho kama, lalu kamigoni.
JER 51:52 Anigo Anduane Homogohanda lalu, Horo mbira i̱na manda manda bu wini ngogo ogoni tagira ibirangi Babilono dindiha mbirale dama mitangi bialu bi pupu wulenaga gime wabini bu ngamiru bibahende bo gingirulo wahai holebero. Ani bialu Babilono dindi bibahendeha agali wai pialu karia bene timuhe bu howa dugu bigibigi bialu holebira.
JER 51:53 Ainde Babilono ibu hari mindiniha iraga howa wai pabe hongoheore bu habeheyaguabi harugo lowa i̱na mbirale mo ko haga bu heledaru pelarogola tigua tano hongohe ogoni bo gialabaga bialu dindini bope holebira. I̱ Anduane Homogo i̱na bi o ledogoniore, lene.
JER 51:54 Anduane Homogohanda lalu, Babilono dindiha dugu timbuniore biarua. Waitigi bu karume ibalu Babilono bo gialo wahai hayagonaga bi pudagadaga bialu ngilingolo timbuni laruagoni.
JER 51:55 Anduane Homogo i̱na Babilono bo gialabaga bialu ibunaga ne hariga timbuni ngago bo hangai holebero. Iba solowarame yaribu bialu ege to̱le̱ni baragola kulunduga laga biagadagua waitigime Babilono tanoha ibalu wai bialu kangi kilikulu timbuni lolebira.
JER 51:56 Mbirale agali mo ko haga bu karume Babilonoha ibalu Babilonoali bope halu ti wayali holebira. Tigua Babilononaga ami agali bu karu minu garabaya bialu tinaga danda timu yidaru bo podo baga biai holebira. Anduane Homogo i̱nime emena tigabi mulene ngadagua miaga Ngode Datagaliwabeore kogoni. I̱ ogonibiore kogome Babilonome ko biyagonaga paniore mulene ngadagua miadai bulebero.
JER 51:57 I̱na Babilono agali haguane bu karu bibahende lulu iba mo na howa luluyu helolebero. Ami agali bu karubi tinaga haru haga bu karubi agali manda timbunibi karubi gabumane agali bu karubi ti bibahende mo luluyu helai holebero. Uruni ti mbirali lone heya nabi dindini palia ho wiaabo holebira. I̱ Kiniore howa i̱ mini Anduane Homogo Hongo Haiheore kogo i̱na bi o ledogoniore.
JER 51:58 Babilono tanonaga wai pabe hongohe homabu bidago waitigime bo gialapaya bialu emene yu wahene mbira naholebira. Tano ogoninaga wai pabe hongohe kagonaga panga irani gialo delolebira. Wali agali bibahendeme biabe ogoni erekuibini bame bu wahaya. Tigua binigo damene bibahende irani dai holebira. I̱ Anduane Homogo Hongo Haiheore kogo i̱na bi o ledogoniore, lene.
JER 51:59 Sedegaia ibu Yuda dindini kini heane mali mane hayagola Yaremaia ibugua Babilono dindiha bi mbira lo pelene. Horo ogoningi Kini Sedegaia ibu Babilono pole manda biyagola agali haguane mini Seraia libu haru polene manda bini. Seraia ibu Neria igini Masea aguane hene. Ani heagola Yaremaia ibugua Seraiahondo bi lowia hene.
JER 51:60 Yaremaiahanda Babilono mo ko holebira lalu Anduane Homogohanda bi lamiyago bibahende gilibu wia hene.
JER 51:61 Ani bialu Yaremaiahanda Seraia lamialu lalu, Í̠ Babilononi anda puwa wali agali karume mbuga ogoni bi gilibu ngaru hale hai helo bibahende dagalai habe.
JER 51:62 Ani bialu í̠na Anduane Homogohondo bi ogodagua labe. Anduane Homogo-o í̠na dindi ogo bibahende mo ko hai halu wali agali nogo biangobi mbira naheloleore lalu dindi hangu ibira helo larigoni, lalu labe.
JER 51:63 Seraia-o í̠na mbuga ogo dagalalu Anduane Homogohondo bi ogonidagua lai howa mbuga ogoria ege to̱le̱ mbira pongobia howa Iba Yuberedisi pedagoha bape habe.
JER 51:64 Ani bialu Anduane Homogonaga bi ogodagua labe. Anduane Homogo i̱na Babilono mo ko hole ngogo mbuga ogo ibaha pu ereba halu lone dai nabulebiradagua Babilono lone iraga naholebira, lalu laya labe. Yaremaia ibugua bi ogoni lairi hene.
JER 52:1 Sedegaia ibu mali pira kirani mbira (21) hayagola ibu kini pigane henego ai kini heane dege mali bearia (11) pene. Ibu ai̱ya mini Hamudala ibu Libina tanoha agali mbira mini Yaremaia dege mende henego wane berene.
JER 52:2 Kini Sedegaia ibugua Kini Yahoiagimihanda mana ko wiaru Anduane Homogonaga deni biyadagua dege bialu haga hene.
JER 52:3 Anduane Homogohanda Yuda wali agalirumebi Yarusaleme tanoni wali agali hearumebi mana ko wiaru dege mo tene howa biaabo hayago hondowa ibugua handabe manga timbuniore howa keba halu ti bibahende tinaga dindi ngelo wahalu dindi mendeha hama pelo wara tagi hene. Kini Sedegaia ibugua Babilono dindiha Kini Nebugadenesa heagome ibu handayaho helowa holenego manga halu hame nale ha tara hene.
JER 52:4 Ani heagola Sedegaia ibu kini heane mali dininaga ege pinini horobi pini dege hayagola Babilono dindinaga Kini Nebugadenesahanda ibunaga ami bibahende haru ibuwa Yarusaleme tano karulole lowa ho hagira buwa wai bialu hene. Tigua dindi dugu yu tone buwa tini howa wai bule ge holenenaga pabe hai heagonaga tagiraha wima wima iraga halu hene.
JER 52:5 Tigua ani buwa Yarusaleme tano ho hagirabu heane dege mali mbirani ege waragaria pene. Sedegaia ibu kini heane mali bearia (11) peagola
JER 52:6 mali ogoninaga ege mane hayagola horo dinini Yarusaleme wali agali bibahende tomo nolene nawi ndia hayagola hina garime mo ko hene.
JER 52:7 Ani heagola Babilonoali ami biarume pabe mbirahayagi gialo wialu Yarusaleme tanoha anda ibini. Anda ibiyagola Kini Sedegaiabi ibunaga ami bu hearubi ti bibahende ibida piai hene. Ti kini mabu mbira wiagodagua pialu pabe bu paulene gimbuni wiagoha panga mbira winigoha tagira pole mbiraga ohalu pene. Babilono ami dewaore Yarusaleme tanonaga pabe tagirahayagi ho mabubupe howa mamage hai heago helalu Yudanaga ami biaru ti ohalu hendore tagira pialu unu Iba Yodana angehayagi dindi ulini mbira wiagoha pole pene.
JER 52:8 Ani pole pialu hearia Babilonoali ami biarume Kini Sedegaia talima pugupugu bialu harigani Yarigo tano kaware degeni abale minu yania hene. Ani biya handala Sedegaianaga ami agali biarume kini biago minilo yu wahalu ti ibida pugupugu bialu piai hene.
JER 52:9 Ani biyagola Babilonoali ami biarume Kini Sedegaia minuwa Babilononaga kini hearia yalu pene. Odagoningi Babilononaga kini ibu Hamada tanonaga dege tano emene mbira Libila winigoria hearia tigua Yudanaga Kini Sedegaia minu yalu pene. Babilononaga Kini Nebugadenesahanda Kini Sedegaia minu yalu ibiyago hondowa ibugua lalu, Kini Sedegaia ibunime ko biyagonaga paniore nolene nga, lene.
JER 52:10 Babilonoali ami biarume Kini Sedegaia iginirubi Yudali agali haguane hearubi bibahende Libila tanoni minu yalu ibini. Horo ogoningi dege Kini Nebugadenesahanda bidaba layadagua bialu ami agali hearume Yudanaga Kini Sedegaia ibuninaga deni ibu igini biaru bibahende homelo bo wahai halu Yudali agali haguane biarubi bibahende homelo ma pugu wahai dege hene.
JER 52:11 Ani buwa Kini Nebugadenesa ibugua bidaba layagola Kini Sedegaianaga de kirabali bo halu wahalu ibuni gi geru pu senime hende howa Babilono dindiha haru pene. Ani haru puwa Babilono dindiha garabaya helayagola ogoniha ha dege bialu garabaya andaha halu homene.
JER 52:12 Kini Nebugadenesa ibu kini heane dege mali pira mbirani dira (19) henego mali ogoninaga ege dauni hayagola horo piningi kininaga ami haru howa Babilononaga kini mamage haga agali haguane mbira mini Nebusaradana henego ibu Yarusaleme puwa Babilononaga kini heagonaga biabe bulene wiaru handayaho haga hene.
JER 52:13 Ani pu howa ibugua Anduane Homogonaga andabi Yuda wali agalinaga kini biago andagabi Yuda wali agalinaga agali haguane biaru andagabi bibahende mbiraorebi mbira yu wa nahe bibahendeore bo heda hai hene.
JER 52:14 Ami agali haguane Nebusaradana heba ibini biarume Yarusaleme tanoha ege pabe bu mabu bini hearu bibahende gialope hai hene.
JER 52:15 Ani bialu ami haru haga Nebusaradana ibugua Yuda wali agali maru yu wahene hearu bibahende minu garabayabu yalu Babilono dindiha piai hene. Yuda wali agali maru wai biyangi ibida pialu Babilononaga ami hearuha ho bitago ho hene hearubi bibahende garabayabu yalu pu dege bini. Agali maru mbirale tara tara ngaru wabiaga mandabi Yarusalemeha hearubi minu yalu pu dege bini.
JER 52:16 Anigo Yuda wali agali maru yagibanore howa mbirale yalu polene nawi hearu ami haru haga haguane Nebusaradana ibugua uruni ti gerebi maburu mabu tara tara wiarunibi handayaho helo lowa helo wahalu pene.
JER 52:17 Babilonoali biarume Yarusalemeha Anduane Homogonaga anda biagoha anda puwa ege to̱le̱ boronosime anda gene helo helene heago bo gialo yalu iba hambu yu pu íbu biaga wilibaro ale wiagobi mo yu pialu bini. Iba dange timbuni ege to̱le̱ boronosime wabu wini wiagobi bo pambulo baga buwa mo yalu pu dege bini. Uruni damene ege to̱le̱ boronosime wabiniru bibahende Babilono dindiha mo yalu piai hene.
JER 52:18 Ogoningi dege Anduane Homogonaga andaha biabe biaga todobene bebi mbirale hilaga nama tabulibi lamu hale hundia haga alebi nogo darama lomabu mule hambu yaga ndisi bebi ira hagua ngabilo mini inisenesi delo delaga be wiagobi mbirale tara tara ege to̱le̱ boronisime wabini Yuda dindini wini wiaruni bibahendeore Babilonoha mo hilo yalu piai hene.
JER 52:19 Ani bialu ami agali haguane Nebusaradana biagome dege mbirale ngolo silibarume wabini pelediru ndisi berubi loma delolene ira hedo yagabi ndisi be nogo darama hambu yaga wiarubi todobene be wiarubi mbirale lamu hale delaga wiarubi ira hagua ngabilo inisenesi delaga be wiarubi waini iba hambuwa loma wiaga ndisibe wiarubi bibahendeore mo yalu piai hene.
JER 52:20 Bambaore Kini Solomononaga biabe biaga agali henerume anda pigane bialu howa ege to̱le̱ boronosime anda gene kira wabu helene heagobi iba dange timbuni mbira winigobi mbirale nogo bulumaga ale homberia (12) wabuwa iba dange timbuni biago wiagonaga dabu biago andane dindiha winigobi iba dange emene emeneru hambuwa wilibaro ale ogoriani hambu yalu pu íbu biaga wiarubi bibahende Kini Solomonohanda Anduane Homogonaga andaha ngelo agalime ani wabu ngeladaba lenego. Uruni bibahende ege to̱le̱ boronosi paleago mule lowa bo dudubaga biai hene. Ege to̱le̱ boronosi uruninaga genda agalime magi handabe nahe dewaore mini.
JER 52:21 Anda gene kira boronosime wabu helenedagoni luore ogobi labolabo hene. Libu kirabali luninaga magi manda mida halira. Ogoni timbuni mabubinaga arane mida duriani howa emene bolanguahe sendimida pira tebira (30) wini. Tigua wabinidangi boronosime baibo timbuni wabu henego ogoni ibuha boronosi dewaoreme wabini. Boronosi palia gengeda tagi henego magi manda sendimida karia howa bolangua hene. Nguni daligahayagi boronosi padago magi manda mida kirani sendimida pira kira (20) wini. Tigua boronosi degeme mbirale yári wena nu alebi ira mbira mini pomegaranadenaga lini alebi wabuwa anda gene boronosime wabini biagonaga nguni daligahayagi yári bia ho helene.
JER 52:23 Anda gene mbira mbiranaga mbirale ira pomegaranade lini ale pira dege pira (100) wabuwa anda gene biago labonaga nguni daligahayagi yári bia haga bu helene. Uruninaga pira dirani waragaria (96) anda gene ogoninaga ira gubane maria biarunihayagi helai hene.
JER 52:24 Babilononaga ami haru haga agali haguane Nebusaradanahanda loma binigo mo miaga haguane Seraiabi biabe ogoni ale dege biaga agali mende Sebanaiabi agali tebirali Anduane Homogonaga anda biagonaga panga haraba wiago mamage haga hearubi bibahende minini.
JER 52:25 Ani bialu Nebusaradanahanda Yudanaga ami haguane agalibi kininaga bi lamogo biaga agali kariali hearubi ami agali haguane mende ibu ami agali mo mogo buwa tinaga mini bebani gili biaga ibubi agali haguane pira waragaria (60) hearu tibi agali uruni bibahende minu garabayabu yalu pene.
JER 52:26 Nebusaradana ibugua uruni ti Babilononaga kini biago Hamada dindiha Libila tano wiagoria ibu hearia minu yalu pene. Tano ogoriani kini ibugua agali uruni bo wahadaba layagola bibahende bo wahai hene. Ani bo wahai halu Yuda wali agali maru tininaga dindi yu wahalu Babilono dindiha garabayabu yalu piai hene.
JER 52:28 Nebugadenesahanda garabayabu yalu penedaruni daga ogodagua. Nebugadenesa ibuni kini heane mali karia hayagola Yuda wali agali daosini tebira pira kirani tebira (3,023) garabayabu yalu pene.
JER 52:29 Ai Nebugadenesa ibu kini heane mali pira mbirani halira (18) hayagola Yarusaleme wali agali handari halira pira tebirani kira (832) garabayabu yalu pene.
JER 52:30 Nebugadenesa ibu kini heane mali pira kirani tebira (23) peagola ibunaga ami haru haga haguane Nebusaradana ibugua Yuda wali agali handari karia pira mariani duria (745) garabayabu yalu pene. Ani garabayabu yalu penedaruni daga lamaga halu daosini mariani handari waragaria (4,600) bibahende pene.
JER 52:31 Yuda wali agalinaga Kini Yahoiagini Babilono dindiha garabaya dege heane mali pira tebirani karia (37) penego ai mali ogoningi agali mbira ibu mini Ebili Merodaga ibu Babilononaga kini gahenge ha aribia ho hene. Mali ogoninaga ege hombeanenaga (12) horo pira kirani duria (25) hayagola Kini Ebili Merodagahanda Yudanaga Kini Yahoiagini dara howa garabaya hayago golope hene.
JER 52:32 Kini Ebili Merodagahanda mana bayaleore walia halu kini maru Babilono dindiha garabaya hene hearunaga deni Yudanaga Kini Yahoiagini ibu mini lene lowa mo daliga helene.
JER 52:33 Ani helayagola Yahoiagini ibu garabayanaga aga nabi aga tara bu howa ibu kini andagaha tomo nalu haga haabo halu nde ibuni homene.
JER 52:34 Kini Ebili Merodagahanda Yahoiagini ibu bayale karulape helonaga wali agalihondo tomo mbiraleru munirubi tale bialu Yahoiagini miaabo halimu laga hene. Wali agali tigua ani talebu migi bialu haabo hearia dege Yahoiagini ibuni homene.
LAM 1:1 Yarusalemeni wali agali dewaore ala bu henego ai áyu naheore ngago darabioreda. Ala nde wali agali dindi tara tarani palu ngarume Yarusalemenaga mini yaraga haganego áyu nde ibu wali mbira agalini homene dalo biraradagua bida. Ala nde ibu kuini wali biragadagua biruwa dindi dewa handa gimbu bu biragago áyu nde ibu waitigirume bope hayagola habane nabulene garabaya biabe biahaga ale ho bedagoni.
LAM 1:2 Ala dindi bibahendeme ibula nenege henego ai áyu dindi mbiragome ibula dara hamogo bia ho nabereore. Ibunaga nenege biaru ti ibu mo hondo halu ibunaga waitigi bu hinaya. Ani biyagola mbiraga bibahendengi Yarusaleme ibu dugu biaabo haragola de iba giligala laabo haragoni.
LAM 1:3 Yuda wali agaliru waitigime mo ko howaore ti dindi mendeha garabaya helo minu yalu pene. Ti dindi taraha hameigini tara tara hearu dombeneha pu howa bayale ndo hene. Ani bu howa ti ibida pobe naheyagola waitigirume ho mabu bupe howa minu yalu pene.
LAM 1:4 Saiono tanoha hariga pedagoria wali agali mbira Anduane Homogonaga horo timbuni pongo bo winiangi napiaga. Ani bialu tano pangaru bame duguaho wialu loma binigo mo miaga biarume genda howa gomogomo lalu dugu darabi bialu hea. Saionoha wandari biru wiarume genda timbuniore howa Saiono tanoha hearu bibahendeme tandaga timbuni halu dugu bialu hea.
LAM 1:5 Waitigirume Yarusaleme hondo howa tigua Yarusaleme ibugua ti bope naholebira manda buwa ti mogo nale hene. Yarusaleme ibu ko dewa biaabo hayagonaga Anduane Homogohanda genda tandagabi timbuni nelo miniya. Waitigi biarume Yarusaleme waneiginiru dindi kaundiaha minu yalu puwa garabaya bu helene.
LAM 1:6 Saiono tano mini lene hayago ereba hai haya. Ibunaga agali haguane hearu ti nogo gabua mini diame tani nolene nawidagola garibi lowa hongo ibiraho hagadagua tinaga hongo ibira halu ibida pobe nahe ka.
LAM 1:7 Yarusaleme bo gialabagabu wiagola ibunaga wali agaliru dindi bibahendeha hama purogolo heangi ibu mbirale bayale bayale ala wiyaru mitangibu dai biragoni. Waitigiru ibuwa Yarusaleme wali agaliru minu yalu piyangi hameigini marume ibu biamogo nabiore. Waitigi biarume Yarusaleme bo gialabagabu waheagola ti hondo oba haya.
LAM 1:8 Yarusaleme ibu ko dewa biaabo hayagome mbirale ko ngubiore wiaganegobi wini. Bamba hameigini marume ibunaga mini yaraga haganego áyu ibu ti babe ale heago hondowa mege biyagoni. Anigo Yarusaleme ibu wali mbirame tandaga timbuni nalu biruwa dengui buyi howa dugu bialu biragadagua beda.
LAM 1:9 Ala ibugua ko biyaru mo paniho wiagola mani marume ibu bo gialabagabu waholobada manda nabi hene. Ani bu hearia ibu bo gialobagabu waore hayagola wali agali mbiramebi ibu dara naheore hene. Ani biyagola ibugua lalu, Anduane Homogo-o i̱naga genda ogoni handa. Waitigirume i̱ hengedape halu bo gialobagabu waore hayago de handabe, lalu hea.
LAM 1:10 Waitigirume Yarusalemenaga mbirale bayale bibahende wiaru mo page biai haya. Wali agali tara Anduane Homogo mitangi nabiaga hearume ibunaga andaha anda polene nawi lo winigoha anda puwa ko ogoni biyagola Yarusaleme ibu de hendene.
LAM 1:11 Yarusaleme wali agaliru tomo nolene nawiyagola garibi gibiore lowa ti tomo taya bialu howa dugu taraore bialu hea. Ti homa nabi holenaga tomo yolo bialu nole lowa tinaga mbirale bayale wiaru baba iriari bialu haga. Yarusaleme ibugua lalu, Anduane Homogo-o tigua i̱ mo ko hene bedogo de handa, laragoni.
LAM 1:12 Yarusaleme ibugua hariga kaware wigi biagoriani wali agali pugu biyaruhondo olaga bigi bialu, I̱na genda timbuni yu bedogo handadaba. Anduane Homogo ibu i̱la keba taraore howa i̱hondo tandaga timbuniore noliya ngiya. I̱na manda berogola genda ogonibi mbira agali ala henerume nane. Anidago tígua manda beremigola ogoni bame mbira biyadabe toba kamibe.
LAM 1:13 Anduane Homogohanda daligaha howa ira hedope hayagome i̱naga hongo bope halu kuniru do gedaore helo ibilaya. Ibugua gono mbira winiyagoha i̱ dalu erembirahayagi mo paraho ibira helaya. I̱ yu waore hayagola i̱ homaore birugoni.
LAM 1:14 Anduane Homogohanda i̱na ko biruru bibahende mo yu ngoai howa pongo buwa i̱ninaga mani wia haya. Ko biruruni genda gibiore yabe naheyago i̱naga hongo biba haya. Anduane Homogohanda i̱ waitigirunaga giha minu ya hayagola i̱na ti baba wai bibe nahe harugoni.
LAM 1:15 Anduane Homogohanda i̱naga ami hongohe hearuni hondo oba halu erembira miya. I̱naga igiri daliahe hearu bo hilo wahole waitiginaga ami ibilaya. Pu mbira mini gerebi lini pingidalu hengedagadagua i̱naga Yuda wali agaliru hengedo mbaralo wahaya.
LAM 1:16 Ani biyagome i̱na dugu darabiore bialu i̱naga deha de iba giligala lalu ibaabo haragoni. I̱ pele ngialu mini mo hongo holenebi mbirali naheoreda. Waitigi hearume i̱ bo gialobagabu wahalu i̱naga wali agalirunaga mbirale mbira yu wa naheore, lalu Yarusaleme ibugua lene.
LAM 1:17 Saiono ibu mbiralime biamogo bilo ibunaga gi dogolo amu heagola biamogo bulene mbira naheoreya. Anduane Homogohanda hameigini maru dindi tara kawareha hearu Yagaba hameigini baba waitigi helo ibilaya. Ani ibilayagola waitigi biarume Yarusaleme hondowa mbirale ngubi mbira handaradagua biyagoni.
LAM 1:18 Yarusaleme ibugua lalu, Anduane Homogo ibu mini tigabi howa i̱hondo biyagoni irane i̱na ibunaga bi mo waharugonagada. Wali agali dindi bibahendeni kamiru tígua i̱na bi larogobi hale halu tandaga narogobi de handadaba. I̱naga wandari igiri daliahe hearu waitigime dindi kaundiaha garabayabu helole minu yalu piyagoni.
LAM 1:19 I̱naga nenegerume i̱ biamogo bilo olarugola ti i̱ waitigi bu hinaya. Loma binigo mo miagabi agali ala hene miniwi hearubi ti homa nabi holenaga erekui biabe bialu tomo nolene taya bialu hearia hariga wiarunaga homo payapaya biya.
LAM 1:20 Anduane Homogo-o i̱ genda timbuniore yu bedogo de handabe. I̱na í̠naga bi lo wirigo bibahende mo wahalu doga harugome i̱naga miniha mitangi bulene bibahende mo talola hai kagola bedogoni. Tagirahayagi waitigirume i̱naga wali agaliru harigani bo paya bialu ai andagaha biru wiarubi homaiore haragonida.
LAM 1:21 I̱ tandaga nalu dugu bialu wirugoni hameigini maru hearu ti hale howa i̱ dara hamogo bulene mbirali naheya. Í̠na genda timbuni i̱hondo ngiriruni i̱ waitigi biaru ti hale howa turuho kagoni. Ala í̠na mana bule lo wirigo lola helo hameledo. Ani lola harangi i̱ waitigi biaru i̱ bedogobi helo tihondo mana mbiraore ogonibi dege mibelo hameledo.
LAM 1:22 I̱na ko biruru í̠na mitangi bu howa pani ngirigoni. I̱ waitigi biarume ko bibahende biyaru mitangi bialu pani i̱ ngirigobi dege mibelo hameledo. I̱ miniha genda halu hongo nahe biruwa dugu timbuni bialu bedogoni, lalu Yarusalemenaga dugu darabiore binigo uruni Yaremaiahanda lene.
LAM 2:1 Anduane Homogohanda ibunaga keba holeneme Saiono tano ginu haguame bu dambi haradagua biyagola mo aruma hai helayago daraba. Bamba Yarusaleme tano Isaraele dindiha bayaleore mbira winigo áyu Anduane Homogohanda bope hayagola ai ko ngubiore ngagoni. Anduane Homogohanda ibunaga keba holene walia hayangi ibunaga andabi Yarusaleme tanoha heago mitangi nahe tano heba bo haealabaga bini.
LAM 2:2 Anduane Homogohanda Isaraele dara nahe howa tinaga anda bu hearu bibahende bo gialo wahai helene. Ibugua Yuda tanoha wai pabe hongohe hearu bo gialabagabu wahene. Tanobi agali haguane ogoniha hearubi bibahende bope hai howa ibugua ti mo taga timbuni hene.
LAM 2:3 Anduane Homogohanda lembo timbuniore howa Isaraelenaga hongo bo pirilapeore helene. Ti waitigi bu hearume wai bule ibiyagola ibugua ti biamogo nabi wahalu irame bo daradagua bilalu Isaraele wali agali bo wahaiore hene.
LAM 2:4 Ibugua waitigime biradagua Yarusaleme bole timu edaho hene. Ibunaga hongome Yarusaleme wali agali turu haga hearu bo wahai hene. Ibunaga keba holene ira hungu ale bialu heagome Yarusaleme tano daiore helaya.
LAM 2:5 Anduane Homogohanda ibu waitigi ale howa Isaraele wali agali bibahende bo homelai hene. Ibugua tinaga wai pabe bo haealabaga bialu anda hongohe bu helearubi bo gialabaga biya. Wali agali Yuda dindi bibahendeha bu hearu ibugua ti genda timbuni mo miyagola ti dugu timbuniore bialu hene.
LAM 2:6 Agalime anda andira mbira bu helenego gialo wahagadagua Anduane Homogohanda ibunaga anda heago gialabagabu wahaya. Isaraele wali agalime ibu mitangi bialu lotu lole íbu ngoai haga anda heago gialo wahaya. Anidagua bialu Anduane Homogohanda horo timbuni tinaga mo ngoai haga wiarubi Sabada horongi bialu haga winigobi bibahende mo wahai howa ibunaga wali agali hearunaga horo timbuni uruni mo embeda hene. Anduane Homogohanda ibunaga keba holene ogonime kini hearubi loma binigo mo miaga bu hearubi tinaga biabe biaga wiarubi mo wahalu bo duguai hene.
LAM 2:7 Anduane Homogohanda ibunaga lomabu delaga dabu biagobi ibunaga anda loma bia hene heagobi erembira mialu wahaya. Waitigime Yarusaleme tanonaga anda pabe hongohe wiarubi bo gialo wahelo ibilene. Ibilayagola Anduane Homogonaga anda biagoha anda puwa ala horo timbuningi wali agali íbu ngoai howa turu howa iba gana lagalaga bialu haga biagoha waitigime wayali howa bi hongo howa la dagaraga mambolo bagadagua balu hayua.
LAM 2:8 Anduane Homogo ibugua Saiono tano bayale ngagonaga wai pabe bo gialo wahole manda bu hene. Ibugua wai pabe ogoni ogodagua bialuore gialo waholebero lo manda bu howa pabe gialo waholenego mogo nale howa gialo wahene. Ibugua mamage hagane anda lu bu heagobi tanonaga pabe bibahendeorebi mandagi bo gialo wahai heagola mo ko hene ngagoni.
LAM 2:9 Tanoha wai pabenaga panga timbuni hearu bo gialapaya bialu panga bengena haga aeane timbuni helearuni gialo wahai haya. Uruni dindini gialapayabu wiagola ege to̱le̱ gingirulopaya bini wiarume wiadambi hayiya. Agali haguane bu hearubi kini ibunibi dindi tara wiagoha minu garabaya bu yalu piyiya. Anidagua biyagola loma binigo mo miaga hearu tigua Anduane Homogonaga bi mana lowini ngago lawai nahe wahalu Anduane Homogonaga bi mana latagi haga hearumebi de gandeba nahende heagola mbiwia halu latagi nahe hayiya.
LAM 2:10 Saiononaga agali ala hene miniwi heneru tigua bi mbira nale bame dindini biru wima pedagoni. Tinaga haguaneni be abalu dugu wialu dara howa walia halu aga karulo bedagoni. Wandari Yarusaleme tanoha biraga berearume genda timbuni howa de handa dindi halu ma podope ho bedagoni.
LAM 2:11 Yarusaleme tanoha mbirale ko uruni biyago mitangi bialu i̱naga bu miniha genda howa dugu bia dege bialu hewaria de tandagame tongo ledogoni. I̱naga wali agali bu hearu darabi mo ko hai hene heago hondowa i̱naga bu miniha genda ho kogoni. Wandari igiribi waneigini galibi bu hearume tanonaga hariga teneni homo paya payabu wima peago hondowa i̱ mini burugu lo kogoni.
LAM 2:12 Wandari igiri urunime hina garibilo howa ibabi noa halu ti ai̱ya olalu dugu dege bialu hearia handaru. Wai hamani wai bialu howa bo waharagola abale homabehe harigani wima piagadagua pialu waneigini biaru ti ai̱yahanda taba yamiyagola hendore ti ai̱ya giha homo ya haga biya.
LAM 2:13 Yarusaleme-o i̱ dara timbuniore ho kogoni. Tano mendeha í̠na genda áyu yu kegonidagua mbira yu hearia handa nabi kogoni. Ainde í̠naga bu miniha dungulo habelonaga i̱na bi mbira ago loabe. Í̠na tandaga harego timbuniore iba solowara bira amu nana bidagobi ngagoni. Anigo nde mani í̠ aiwa mo bayale holobadabe.
LAM 2:14 Í̠naga bi mana latagi haga agali hearume de gandeba handarima layago tigua ke̱ howa í̠ mo hondo hayada. Í̠ bayale habelonaga tigua í̠naga ko ngelo kego yu wahabelonaga mo walia nahayada. Ani nabi howa tigua Anduane Homogonaga bi larama lowa tininaga bi hangu layagome í̠ mo hondo hayagoni.
LAM 2:15 Yarusaleme-o wali agali hariga ogoriani bolangua halu pugu birarume í̠ de handaragoni. Tigua í̠hondo ke̱ halu mogole tingi howa í̠ mege bialu lalu, Wali agalime tano dunini bayaleore mbira nga layago ogonidabe. Wali agali dindi bibahendeha bu karume tano ogo dege hamelai hagadabe, laga bialu kagoni ndobe.
LAM 2:16 Í̠ waitigi bu karume í̠ hondo oba halu mege bialu howa lalu, Agaliore ina kamagoniyago ai iname Yarusalemeore bope harimagoni ndobe. Abale iname horo ogoni tagira ibilo maliaho harimago ai horo ogoni tagira ibiyadagoni de hendedama, laga kagoni.
LAM 2:17 Anduane Homogohanda buleore lo mitangi bu henego áyu tagira ibiyagoni. Bamba Anduane Homogohanda lo wialu lalu, Isaraele wali agalirume i̱naga bi mo wahayagua i̱na ti dara nahe bo wahai holebero, lalu lowini. Anidagua lowinigo mitangi bialu áyu Anduane Homogohanda Yarusaleme í̠hondo ani biyadagoni. Ibugua í̠ waitigirume í̠ baba wai bule ibilo mo hongo halu ibilaya. Ibilayagola tigua wai bialu wayaliore howa í̠ hondo oba halu ti turu ho haya.
LAM 2:18 Í̠naga wali agali bu karume ti biamogo bia lowa Anduane Homogo olalu ka. Yarusaleme-o mbiraga horombebi í̠na dugu hongo howa bialu í̠naga deha howa de iba pigipugu lalu iba hongohe poradagua pialu helo ha̱lo ha nabi dugu bialu haabo holene nga.
LAM 2:19 Mbiraga í̠ paliahondo nahe howa heyigi bialu Anduane Homogo olalu ibuhondo bi laabo haga bibe. Bi lalu í̠naga genda ngelo keruni ibuhondo lamiai holene nga. Bi loleberedagoni irane í̠ waneiginiru hina garime hariga teneni homa a̱i̱na̱i̱ bidagonaga í̠naga gi yaraga halu dara howa biamogoore bia lalu bi lolene nga.
LAM 2:20 Yarusaleme tanome lalu, Anduane Homogo-o mbirale í̠ninaga waneiginiruhondo biridaruni áyu í̠ni handa. Waneigini ai̱yarume ti waneigini gubalini hagaore wiyaru ai tinaga tingini tini nalu kagoni de handa. Waitigi bu karume í̠naga andaha anda pialu í̠naga loma binigo mo miaga karubi bi mana latagi haga karubi bibahendeore bo wahai haragoni.
LAM 2:21 I̱naga waneigini bu hearubi wali agali wahe bu hearubi uruninaga tingini i̱ninaga hariga teneni homo payapayabu wima pedagoni ndobe. Waitigime wandari igiri daliahe uruni bibahende bo wahai hayagola ani wima pedagoni. Anduane Homogo-o í̠na i̱naga wali agali uruni dara holene irane nawigo nde harugo lalu dara nahe howa í̠naga keba timbuni holene tagira ibiyangi ti bo wahai harigoni.
LAM 2:22 Í̠na keba timbuniore ho howa i̱ waitigi dindi bibahendeha bu hearu olomogo bialu i̱ bo gialabaga bialu mo labu helo ibilarigoni. Galoneore bulene horo timbuni tagira ibiragola wali agali dewaore íbu ngoai hagadagua í̠na waitigi dewaore íbu ngoai helarigoni. Í̠naga keba holene timbuni ogoni tagira ibiyangi waitigi ibiyarume wali agali bu hearu aria mbiraore hangubi mbira yu wanahe bibahendeore bo wahai hayagoni ndobe. I̱naga waneiginiru i̱nime ti gubalini timbuniore ho howa haru haruligo ainde waitigime ibalu bo wahai haya, lene.
LAM 3:1 Anduane Homogohanda i̱hondo keba timbuni howa i̱ minu bayagola i̱na tandaga timbuniore nalu haru.
LAM 3:2 Ibugua i̱ warape halu wá kagoha polilono ko arumaha puabo holiyanaga warape haya.
LAM 3:3 Ibugua i̱ hanguore minu balu haabo kagoni. Horo bibahendengi anidagua biaabo halu kagoni.
LAM 3:4 Ibugua i̱ baabo hayagome i̱naga kuni bibahende podabaga biai halu i̱naga tingini bibahende gedaore hai halu pirilabaga biai ka.
LAM 3:5 Ibugua genda tandagabi tara tara mo ngidagome i̱ mo dariba henego kogoni.
LAM 3:6 Ibugua i̱ abale halu homayarunibi dege bu hinu helalu arumaha i̱ ibagabu holiya heledagoni ndobe.
LAM 3:7 Ibugua i̱ dariba ho heledagola golalu ibida pora bialu pobe naheore kogo. Ibugua i̱naga gi geru pu senime minu daribaho ngeledagola heyalu ibagabu holenebi nakarulapeore kogoni.
LAM 3:8 I̱na Anduane Homogohondo i̱ biamogo bia lalu kogola ibugua i̱naga bi larogo hale nahaga kagoni ndobe.
LAM 3:9 I̱ ibaga bialu porogohabi ibu hapai halu ibuni hai ka. Ibugua i̱ hariga poleberogoha ege to̱le̱ wia pai haradagua biragoni.
LAM 3:10 Anduane Homogohanda biango handalehe timbuni mini beame nogo tara karu ibiragola bo nole ohowa harigani yu biragadagua budi gabua timbuni laionome mbirale bo nole nendebu hagadaguabi
LAM 3:11 i̱ harigani pialu hewaria ibugua i̱ minu balu hariga gibuniha gililo yalu pubagi howa i̱naga tingini budubaga buwa i̱ biamogo bulene mbira naheha ngelalu piya.
LAM 3:12 Anduane Homogohanda i̱ timume bogole edaho haya.
LAM 3:13 Ani edaho howa ibugua tegelape halu i̱naga gubalinini baya.
LAM 3:14 Anidagua biyago hondowa i̱naga wali agali bu karume i̱ hondo oba halu mege bi lalu iba gana lalu ka.
LAM 3:15 Ibugua i̱ genda dewaore mo ngidagome i̱ha wu to̱leda. I̱naga tomo nolenebi iba nolenebi kaubi ale dege ngiaga kagoni.
LAM 3:16 Ibugua i̱naga dengui dindiha mo guya howa ma mo nigi biragola ege to̱le̱me i̱naga ne hondo biba haradagua bidagoni. Ani bidagome i̱ mo ko henego kogoni.
LAM 3:17 Ainde i̱naga bu miniha mo palia howa turu ho holenego henge nawiore kogoni. Bayale holenenaga mana damene bibahende embeda hai harugoni.
LAM 3:18 Anidagua bidogome manda bu handalu koria Anduane Homogohanda i̱hondo mbirale bayale ngulebiragonaga mini dunubia ho harugo ai mbira nangulebirada. Ani bialu i̱ dindi ogoria ho lu nabi abale homolobodane hendedo.
LAM 3:19 Agalime dindi andabi ibuninagaore lenego mbira nahe bame hopebe dege biaga mbira kaligo ale i̱ harudane hendedo. I̱ha tandaga uruni damene mo ngirago nalu koria mbirale kaubi ngaligobi neha nalu kogoni ndobe.
LAM 3:20 Horo bibahendengi i̱na genda uruni mitangibu haabo kogome i̱naga bu miniha genda timbuniore ho kogoni.
LAM 3:21 Anigo ai mende nde mitangi bu kogome mini dunu bia ho kogoni.
LAM 3:22 I̱na mende mitangi bidogo ogo. Anduane Homogohanda ina gubalini ho haabo haga kagoni. Ibugua ina dara howa biamogo biaabo holebira. Ibunaga mana ogoni ereba nahe wiaabo holebira.
LAM 3:23 Ibugua ina dara holene irane nawinigoyu ibunaga dara holene horo bibahendengi gahenge ibaho wiaabo haga kagoni. Anduane Homogo-o egerebagi bibahendengi ni tagira ibaabo hagadagua í̠naga dara holene inahondo walia haabo haga í̠ mini bilinahe kegoni.
LAM 3:24 I̱na mbirale ngarunaga mini dege dindiho nahe Anduane Homogo ibu hangu karulape kagoni lo mitangi bialu holenego bayaledane hendedo. Ani mitangi bidogo ai ibugua i̱ biamogo bilonaga i̱na mini dunu bia ho kogoni.
LAM 3:25 Wali agali tinime Anduane Homogo taya bialu ibunihondo mini dunu bia ho haga karu tihondo ibugua bayale biaga kagoni.
LAM 3:26 Anigo Anduane Homogohanda wali agali ti mo wialu pele milonaga tigua ema nabi hondo holene nga.
LAM 3:27 Ti wandari igiri daliahe wene kangi howa genda tandaga uruni yu hayagua nde karulapeore holebira.
LAM 3:28 Anduane Homogohanda mbiralihondo genda mo miyagua nde bi nale wahalu ibu pubagi howa ema nabi ibuni hangu holene nga.
LAM 3:29 Ani biragola Anduane Homogo ibugua ibu biamogo bulebira badago lowa ibuni mo dindiha howa ema nabi hondo holene nga.
LAM 3:30 Maru karume ibuhondo bi ko lalu minu bayaguabi nde harugo ani bilo ibu ema nabi holene nga.
LAM 3:31 Anduane Homogohanda wali agali dara howa biamogo biaga kago ibugua ti erembira mu haabo naholebira.
LAM 3:32 Anigo Anduane Homogohanda wali agalihondo genda yilo mo muwa dege mani ibugua ti dara ho dai biaga. Ibugua wali agali gubalini timbuniore haabo haga kagome ani biaga ka.
LAM 3:33 Ibugua wali agali mbirago bame genda yuwa tandaga nalu helo mo ya holenego ibu hame nalaga ka.
LAM 3:34 Maru karume garabaya biabe biahaga bu karu bo hengedayaguabi Anduane Homogo ibu manda bu ka.
LAM 3:35 Mbiralime Anduane Homogo Daligaorene Daliga kagonaga deni bulene ngago mbira bialu karia ogoni nabilonaga mendealime hongo howa bope hayaguabi ibuni manda bu kagoni.
LAM 3:36 Mbiralime ibunaga nenege kagohondo ke̱ howa bameoreni godi laba layaguabi mbirale mana uruniale damenego hondowa Anduane Homogo ibu manda biai howa turu nahaga ka.
LAM 3:37 Mbirale bibahende ngaru íbu ha lalu ái ibugua bi laragola hale halu íbu hai habehebe. Anduane Homogo ibugua hangu ogoni lolene karulapeore kagoni.
LAM 3:38 Anduane Homogo Daligaorene Daliga kago ibugua bi laragola mbirale ko holene bayale holenebi bibahende tagira ibaga.
LAM 3:39 Wali agalime ko biyagonaga pani nayagua nde bi gomogomo lolene henge nawigo aginaga lolebe.
LAM 3:40 Iname mana bialu harimaru manda bialu dabolene nga. Dabalu mana ko bialu harimaru yu wahalu Anduane Homogo ibuni karia dai bulene nga.
LAM 3:41 Iname gi dogola daga halu bu miniha mbira do nahe howa Ngode Datagaliwabe dahuliya andaga kagohondo bi lalu,
LAM 3:42 Anduane Homogo-o iname í̠hondo mine halu mana ko dewa bialu harimago í̠na ko ogoni domo wa nahe kegoni.
LAM 3:43 Í̠na inaore talima ibaga bialu bo homa hai harigoni. Í̠na inahondo keba timbuniore harigome í̠naga dara holene mo yi harigoni.
LAM 3:44 Í̠na inahondo lembo timbuni ho howa inanaga bi hale naholenaga hale hangaiho kegoni. Í̠ hari beralibame kabu bupe haradagua bu kegola inanaga bi laramago í̠ keria anda naibagabe tobaheda.
LAM 3:45 Í̠na ina bopeore ho heledegome wali agali dindi tara tarani bu karume handalu karia ina wali agali ko habane nabulene dodohe kamaria hondo kagoni ndobe.
LAM 3:46 Ina waitigi bu karuni bibahendeme ina yo handalu mo nagaloneore halu ka.
LAM 3:47 Mbirale tara tara tagira ibirarume ina mo gi timbuni halu ina mo pila haga bialu kagome mo ko heneore kamagoni.
LAM 3:48 I̱naga wali agali burupale darabi bu karuni hondowa ina dugu bialu i̱naga de iba pugu lalu iba pora biradagua pigipugu lalu kogoni.
LAM 3:49 I̱na dugu berogoni haru biru lalu wa naholebero. I̱naga de iba pugu lalu pialu haabo holebira.
LAM 3:50 Anduane Homogo ibunime dahuliya andagaha howa handa dali halu i̱ dugu bialu haabo koria dege de handaragola dugu nabi waholebero.
LAM 3:51 I̱naga tanoha wali bedaru tiha mo ko holene bu ngaru dege ngola halu biraabo kagonaga de hondowa i̱naga bu miniha tandaga timbuniore nalu kogoni.
LAM 3:52 Agali maru karume i̱la mo waitigi halu i̱ bameore bo wahole hene. Agalime ega bole taliagadagua i̱ bo wahole talima ibaga bini.
LAM 3:53 Tigua i̱ gundu uliha minu bape howa i̱ homelo bole lowa ege to̱le̱ dugualu uli biagoha ba pebe biya.
LAM 3:54 Ibame i̱ namu lai hole biyagola ai i̱ homalu ereba harogonida mitangi biru.
LAM 3:55 Ani biyagola i̱na gundu uliha howa Anduane Homogo í̠ olarugoni. I̱na humbirini andagaha haradagua buwa í̠naga mini lalu i̱ gini mialu biamogo bia laru.
LAM 3:56 I̱na í̠hondo ogodagua bia lalu olarugola Anduane Homogo-o í̠naore nde hale hariya.
LAM 3:57 Hale howa í̠na i̱ hewaria kaware ibuwa i̱hondo lalu, Gi nahe habe, lalu langirigoni.
LAM 3:58 Anduane Homogo-o í̠na i̱ pele ngialu i̱ waitigi bu hearume i̱ nabelo hapai harigoni. Í̠na i̱ pele ngirigola áyu i̱ bayale kogoni.
LAM 3:59 Anduane Homogo-o agali i̱ mo ko hole bialu hayaruni í̠ manda bidegoni. Anigo i̱ waitigi uruni bope halu i̱ wayali holiya biamogo bibe.
LAM 3:60 I̱ baba waitigiore ho karunime i̱hondo keba haga kago í̠ manda bu kegoni. Tigua i̱hondo mana ko ngaru bule manda manda bialu kagoni ndobe.
LAM 3:61 Urunime i̱ hondo oba halu mege biyago í̠ hale harigoni. Anduane Homogo-o tigua i̱hondo bule manda birago í̠ manda biai ho kegoni.
LAM 3:62 Horo bibahendengi tigua i̱ mini lalu bo waholenaga bi lala bialu hariga taya bialu kagoni.
LAM 3:63 Tigua heyu howabi ha̱lo biruwabi iba gana i̱ bo waholenenaga mege bi hangu lalu laabo halu ka.
LAM 3:64 Anduane Homogo-o tigua mana ko o biyaruni handalu í̠na ti pani nelo mibe.
LAM 3:65 Tinaga mini mo luluya halu ti koorene ko helo ha habe.
LAM 3:66 Ti mbiraoreli hangubi mbira dindini yu wa nahelo í̠na keba timbuniore howa talima ibaga bialu bo wahai habe, laro.
LAM 4:1 Ngolo bayale ngiringarale ala winigo áyu wá ereba halu mo ko hayada. Ogonidagua Saiononaga wali agali ti to̱le̱ tara tara Anduane Homogonaga anda bulenaga loma bia heneru bayale wiaganegobi henego ai ti tanonaga harigani to̱le̱ gialobagabu ngadagua ti bo haealobagabu wahayadago daraba.
LAM 4:2 Ala Saiono wandari igiri daliaheru ngolo bayaleore muni timbunime yolo miaganegobi henego ai uruni ti áyu mini lene ndo howa agalime todobene be koru dindime wabu bila haganegobi kagoni.
LAM 4:3 Biango dudu angibuni karume tinaga igini wiaru mitangi buwa andu miaga ka. Anigoyu i̱naga wali agali karume mana bayale biango dudu biarume biagadagua nabiaga. Tigua tinaga waneiginiru dara nahe ega yarime ti iginiru wahalu piagadagua piaga ka.
LAM 4:4 Saiononaga wali agalime tinaga waneigini emene uruni andu noa halu kembobe lebole howa tomo noa halu homelo wahaga. Waneigini urunime wali agali hearuha tomo ngidaba lalu hale hama ibaga biragolabi ti tomo mulene mbira nahaga.
LAM 4:5 Ala ti tomo nolene bayaleru bu payabu wiagago ai áyu homogo hearubi tomo nolene nawi burupaleore ka. Ti tomo garibilo howa tanonaga hariga bu wiarunaga homo paya paya bigi bida. Ala ti mbirale dewa buwi howa yári bayaleru bu henego ai ti yagibano howa mburuma uli wiaruha tomo budini ibira kabe hondole taya bialu haga.
LAM 4:6 Sodomo wali agalime ko biyagonaga pani mialu Ngode Datagaliwabehanda tinaga tano bayale winigo abaleore bo heda hene. Tinaga pani ogoni bagi hene lowa i̱naga wali agalime ko biyagonaga pani timbuni taraore nalu hea.
LAM 4:7 Yarusalemeni agali haguane maru ala heneru tinaga tinginini ko mbira para nahe bayaleore hene. Ti agali hongohe do mbarale halu to̱le̱ bayale mbira ngarale muni timbunime miaganegobi bu hene.
LAM 4:8 Ti harigani homo payabu wima peagola tinaga dengui mindi to̱ai leagola mbiralime abogoda lowa handabe nahe wini. Tinaga tingini obialu kuni hangu wini.
LAM 4:9 Agali maru waime bayagola homayaru ti yo piyagonigo karulapeda. Wali agali marume ti tomo nolene nawidagola garibi lalu lu howa homarago nakarulape. Wali agali uruni ti tomo garibi lowa luore haabo halu tingini kunila para halu homai haga biaga.
LAM 4:10 Walirume tinaga waneigini daraore henegoyu homayagola tinaga tingini mo yalu puwa tini dawa nene. Ogoni binidagoni waitigi hearume i̱naga wali agali baba wai bule ibiyangi ani bini.
LAM 4:11 Anduane Homogo ibugua Saionohondo keba taraore howa bo gialobagabu wahaya. Ibugua Saiononi ira timbuni hedo dela haradagua buwa tano bibahende dai helaya.
LAM 4:12 Kini hearumebi wali agali tara tara dindi bibahendeha bu hearumebi waitigirume Yarusaleme pabe panga harabani anda puwa bope halu tano karulolobadalo manda nabi haya.
LAM 4:13 Tigua ani nabibehe manda bu henego ogodagua biniya. Yarusalemeni loma binigo mo miaga hearumebi bi mana latagi haga hearumebi mana ko bialu tigua Yarusalemeni wali agali mini tigabi hearu bo wahai haya. Ani biyagola Anduane Homogo ibugua waitigi hearume Yarusaleme bo gialobaga bu wahelo ibilene.
LAM 4:14 Loma binigo mo miaga biarubi bi mana latagi haga biarubi tinaga agani wali agali homelo bo wahayarunaga darama para hayagome ti Anduane Homogo deni dodohe howa nakarulape hene. Haru haga urunime ti harigani pialu de kohe hagadagua luluyu ibagabu heagola wali agalime ti heagoria kaware hapara habe nahe haga biniya.
LAM 4:15 Wali agalime tihondo bi dalimu lalu, Tí dodohedago ina kamagoria kaware naibi habagi hadaba, lalu hayiya. Haru haga biarume ti dindi tara taraha pugu pugu biya. Dindi uruniha piyagola wali agali hearume ti íbu helo hame nalaya.
LAM 4:16 Anduane Homogo ibunime ti bo purogo lelalu ti mitangi nabi wahene. Loma binigo mo miaga hearubi agali ala hene miniwi hearubi ti wali agali bu hearu deni mini lene ndo hene.
LAM 4:17 Ina agali hameigini mbirame ibalu pele ngialu haru dai bilo lowa hariga wiaruha de handalu bu wimaria inanaga de tandaga biya. Mbiralime ina biamogo bule naibiyagola ina bame harima.
LAM 4:18 Waitigirume ina bo wahole lowa harigani yu biraabo hayagola ina hariga ibaga nabibehe harimagoni. Inanaga hamaro bulene horo kaware hayada manda bialu ina bo waholene winiya.
LAM 4:19 Ina ibida pirimagola waitigime ina talima íbuore biyagoni. Tigua geraiore lalu ega bodo hariaweme ega minule lowa ge dogolape ho yalu ibagadagua daiore ibiyagoni. Tigua ina hari wiaruha talima dalialu dindi ko dalu naibaga wiagoha pu hemariabi ina tagira ibilo lowa ti bira do howa minu yani hayagoni.
LAM 4:20 Tigua inanaga kini Anduane Homogohanda ina de hondo helo dabo helene biago minalu biya. Iname mitangi bialu hemaria ina kini ogoni andaneha dindi maru ti bayale headagua dege holeberemada lo manda bu hemaore tigua ibu minaya.
LAM 4:21 Idomoaliru-o tí Usu dindini kamigoni howa Saiono bo gialobaga biyagonaga turu howa oba halu a̱e̱a̱ ka̱e̱a̱ bialu hadaba. Anduane Homogohanda ibunaga keba holene waini iba ale gabo beha hambu wiradagua binigo Saiono nelo mo na haya. Ani biyadagua ibugua tíbi nalimulo ngiragola no luluyuore howa tínaga tinginini aga bidemiru golo wahalu ti babe howa taga taraore ho holeberemi.
LAM 4:22 Saiono-o í̠na ko birigonaga Anduane Homogohanda í̠hondo pani ngiadai biyaruni ngia maro bialu ibugua í̠naga wali agali garabayabu wiyaru golope helolebira. Idomo-o Anduane Homogohanda ani bulebiragoyu ibugua í̠na ko birigo mo pani halu í̠hondobi ibunaga hongo holene walia holebira.
LAM 5:1 Anduane Homogo-o genda tara ina kamaria tagira ibiyago mitangi bialu í̠na dara habe. Wali agali hameigini tara karunaga deni ina ko nakarulape habane nabulene kamagonigo de handa.
LAM 5:2 Inanaga dindi andarubi agali tara karu tigua karulo aribia ho kagoni.
LAM 5:3 Ina aba waitigirume bo wahai hayagola ina waneigini hono wahene ale halu ina ai̱yaru wali dalo bedagoni.
LAM 5:4 Ala ira gabunibi iba nolenebi minana miagane winigo áyu iname ira bolenebi iba hambulebi yolo bulene hangu ngagonida.
LAM 5:5 Waitigirume ina nogo dongi kamelerunaga biruyu ibaga biagadagua biyagola ina erekui taraore handalu kamagoni. Tigua ina ha̱lo biruluma̱yabi henge nangiagaore.
LAM 5:6 Ina tomo nolene nawi buru paleoreyagola nahome holoma̱ya ina Iyibiali Asirialirumebi biamogo bilo lowa hale harima.
LAM 5:7 Inanaga mamalirume ko bialu tini homeagola ai iname tigua ko biyagonaga genda yu kamagoni.
LAM 5:8 Babilononaga garabaya biabe ale biahagane bu karume ina handayaho halu tinaga giha howa ina pele ngialu haru dai bulene agali mbira naheda.
LAM 5:9 Agali homelo bo wahaga biaruni inanaga dindiha wai taya ibagabu haame howa ina tomo taya bu poramagola bo wahole yu biraga.
LAM 5:10 Ina hina garibi timbuniore lalu tingini ngo̱e lowa warago baradagua biaga. Garibi dege lalu inanaga tingini poboyogo bu yolo mialu ege to̱le̱ kundibi ale haga.
LAM 5:11 Hari Saiono weagoria waitigime ina one berearuni ti kayu yai halu Yuda tanoruha ina wane biru wiarubi kayu ya dege biya.
LAM 5:12 Tigua ko taraore bialu inanaga agali haguane hearuni bame gini minu daba howa gerelaho ngelaya. Inanaga agali wahe miniwi hearubi yo handalu mo taga haga biya.
LAM 5:13 Inanaga igiri daliahe hearu garabaya biabe ale bialu widi lini dambiaga helalu igiri emene hearuni ira gendabiore timbuni wiaru mo ya haga bialu helaya.
LAM 5:14 Agali haguaneru tanonaga pabe haraba ngagoriani nabiraga. Wandari igiri daliahe karumebi ngida balu iba gana lalu nahaga.
LAM 5:15 Inanaga turu holene winigo ereba hai hayagola iname iba gana lalu mali leremaliru dara holene íbu aribia hayada.
LAM 5:16 Mbirale ina mo turu haga winigo damene ereba hai hayada. Inane ko birimagome ina darabiore kamagoni.
LAM 5:17 Hari Saiono bo gialabaga biyagola biango duduru hangu hagane bu hinayada. Ogonidagua bidago hondowa ina dugu biaabo haramagome inanaga gubalini mo ko halu de tandaga biarua.
LAM 5:19 Anigoyu Anduane Homogo í̠ kini haabobo halu handame ho haabo holebere.
LAM 5:20 Ina aginaga erembira ngialu yu wahowa haabo kebe. Ina lone angi mitangi buleberebe.
LAM 5:21 Anduane Homogo-o ina haru dai bia. Ina haru dai bialu mini yaraga holene ala wiagane biagobi wia dai bila.
LAM 5:22 Be ina yu wahalu handabe manga halu erembira ngiaabo holeberebe. Í̠naga keba holenego maro bulene nawialu nawioredabe.
EZE 1:1 Esegielehanda lalu, Babilono agalirume ina bo garabaya buwa Iba Keba peagoha mali pira tebirani (30) ege mane hayagola horo dauningi i̱na de gandeba handalu hewaria hari daligaha panga dugua hayagola Ngode Datagaliwabe hearia handaru.
EZE 1:2 Horo ogoningi Babilonoalirume Yarusaleme lone puwa wai bialu tigua Yudanaga Kini Yahoiagini minu yalu ibinigo mali duria nigonihayagi howa de gandeba ogoni handaru.
EZE 1:3 I̱ Busi igini Esegiele loma binigo mo miaga howa Iba Keba peago angeni hewaria Anduane Homogohanda i̱ olayuago hale halu ibunaga hongo holene i̱ha karula hayuane handaru.
EZE 1:4 I̱na handa daga ho hewaria dalu puyabu beraliba heba timbuniore uyurahayagi howa ibiyago handaru. Hari beraliba ogoni hongo taraore howa hari daba bialu ira hungu ale deaore dege ibuwa kilikulu lalu purogo laya. Ogoni dombeneha mbirale ege to̱le̱ mini boronosi ngiringarale ale mbira hoaile wiaria handaru.
EZE 1:5 Ira hungu ale deagoha i̱na agali handalehe maria hearia handaru. Tinaga tingini agali handalehe dege howa
EZE 1:6 tinaga dengui maria degedege howa tinaga babaganebi maria degedege hearia handaru.
EZE 1:7 Tinaga ge tigabi degedege howa ge giba nogo bulumaganaga ale hearia handaru. Ai tinaga ge giba uruni ngaraleore ege to̱le̱ mini boronosi baya hangu domowa mbirale ha̱i̱ howa ngelene mbauleyane handaru.
EZE 1:8 Tinaga babagane hearu andaneha gi agalinaga ale hearia handaru.
EZE 1:9 Uruni ti bibahendeme tinaga babagane yanga lowa tini handa edene buwa babagane mendehayagi mo gimbu buwa nguni mo maria howa ti pole howa ho beregeda nabi ani kaore dege ibaga bialu tigatiga piagaya.
EZE 1:10 Ti bibahendenaga haguane mbiraoreni dengui maria degedege howa uruni ti mbira taratara dege hea. Mbirago agali handaleheya. Dengui gi tigahayagi heago ibu budi gabua timbuni laiono handaleheya. Tebone gi lehayagi heago ibu nogo bulumaga dengui handalehe halu ere mbirahayagi heago ibu ega bodo hariawe timbuninaga dengui handalehe hearia handaru.
EZE 1:11 Tinaga dengui ogonibi haga winiyago ai tinaga babagane kiragome yanga lalu nguni mo gimbu gimbu buwa babagane kira mende degedegeme tininaga tingini dambi hagaya.
EZE 1:12 Tinaga de maria degedege hayarume de kagohayagi handai hagaya. Ani howa ti mbirahayagi pole manda biyagua ti beregedolene henge nawi howa ta nabi pupe hagaya. Uruni tigua ogonidagua biagaya.
EZE 1:13 Agali handalehe uruni ti heago dombeneni ira hungu ale mbira pu íbu bialu hari daba ale biyaria handaru.
EZE 1:14 Ani handaga bialu hewaria agali handalehe uruni ti gerai lalu pu íbu biragola abaleore handabe nahe hari daba mege lalu poralidagua piagaya.
EZE 1:15 I̱na handalu hewaria uruni ti heagoria dindini tinaga ge haga wiagoria garo ge ale mbira mbira wiaria handaru.
EZE 1:16 Tinaga garo ge ale maria uruni bibahende ogobi degedege wuwa ege to̱le̱ uruni ambuabi ale ti bayaleore ngiringarale dedaibi muni dewame miaga wia. Garo ge ale maria uruni wiago andaneha nde garo ge ale maria mende wiago uruni handa amu nana bu polenedagua wia.
EZE 1:17 Ani biyadagome garo ge ale uruni tigua gibuni maria wiago bibahendeha pu íbu biai helonaga ani wia.
EZE 1:18 Ainde garo ge ale uruni timbuni gibiore wiagola hondowa i̱ gi timbuniore haru. Ani handalu hewaria garo ge ale uruninaga aeane heago bibahendeha handai holene de emene emene dewaore hearia handaru.
EZE 1:19 Agali handalehe uruni ti pu íbu biragola garo ge ale uruni tibi heba pu íbu biagaya. Agali handalehe uruni ti yagalo yalu piyagua garo ge ale uruni tibi nde yagalo yalu uruni poradagua piagaya.
EZE 1:20 Uruni ti poabirago bibahendeha piai hagaya. Ti piyadagua garo ge ale biaru tibi nde ani piyago irane agali handalehe mariali biaru tigua handaya howa haru hagaya.
EZE 1:21 Ainde ti poragoha ti haru mandagi ibaga biai halu ti mbirani hondo haragoria ti haru mandagi hondo haga. Ai uruni ti yagalalu daliga iraga hayagua nde garo ge ale uruni tibi yagalalu ti haru piaga. Irane agali handalehe mariali urunime ti haru kagome ani biaga.
EZE 1:22 Ani hondowa dege handalu hewaria ndisibe ale timbuni mbira mo beregedowa tibinihayagi yaraga hayaria handaru. Ai ndisibe ale ogoni ngarale iba wa̱yu aleyagola hondowa gi timbuniore haru. Iba wa̱yu ale ngarale ogonime agali handalehe mariali biaru daliagani heago handaru.
EZE 1:23 Agali handalehe mariali biaru ti ndisibe handalehe wagororo timbuni biagonaga andaneha howa tinaga babagane yanga lowa hea. Ani howa tinaga babagane nguni bibahende mo gimbu bu helowa ela hagahaga biagola handaru. Ani howa babagane kira mende hayadagome tininaga tingini dambi hea.
EZE 1:24 Ai tigua yaga layagola hale halu hewaria tinaga babagane pilipala layagome iba solowara yaribu biyagola u timbuni kulunduga laga biyabe toba howa wai biaga ami agali dewaore wai bule manda manda buwa tidiyu hene mbaulaya. Ani bialu tigua babagane yibiyabu lalu piyagola hale halu hewaria Anduane Homogo Hongo Haiheore kagonaga bi layuabe toba haru. Ti mbirani pu nabi howa tinaga babagane paulo haya.
EZE 1:25 Ani heagola agali handalehe mariali biaru togoni ndisibe ale timbuni wiyagoha howa bi lalu hayuago hale haru.
EZE 1:26 Ndisibe ale biagoria daligaha kininaga biragane dagia ale mbira wia. Dagia ogoni baya dege lalu mindibinaga hari mindini ale ege to̱le̱me wabiniya. Kininaga dagia ogoriani mbirale mbira agali handalehe berea.
EZE 1:27 Ogoni ibunaga tingini daligaha ege to̱le̱ boronosi iraha deledagola ngarale wiraligobi hea. Dindihayagi wá hagane hale ale howa wá hangume mabu bupe hea.
EZE 1:28 Wá ogoni ibunaga yári tara tara ni domo harini ngaligobi hea. Wá holene timbuni o handarudagoni Anduane Homogo ibuni hea manda biru.
EZE 2:1 I̱na uruni hondowa i̱ ge duli hanga howa ma podalu dindini bulu paliru. Ani wiwaria mbiralinaga bime i̱ olowa lalu, Dindiali-o í̠la bi lole kogo heya, layuago hale haru.
EZE 2:2 Ai bi layuagome leaore dege Ngode Datagaliwabenaga Dinini ibugua i̱ha karula howa i̱ abale mo heya haya. Ani heyu howa ibugua bi lone layuago hale halu hewaria ogodagua layua.
EZE 2:3 Dindiali-o í̠na áyu i̱naga Isaraele wali agali karia pobelo i̱na dabo helaro. Tigua i̱nihondo manga howa mine halu erembira ngialu tinaga mamalirume binidagua dege bialu kagoni.
EZE 2:4 Tinaga embone giambe mini ndibulo wahene howa tigua i̱ mo yo handalu heagome i̱na bi larugo nahale hayago ai í̠na ti karia i̱naga bi yalu pobelo hameledo. Í̠na tihondo i̱ Anduane Homogo Bibahende Haru Haame Ho Haga kogome bi larogoni, labe.
EZE 2:5 Anigo i̱naga bi ogo hale hayaguabi nahale hayaguabi wali agali uruni tigua i̱naga bi latagi haga agali mbira ibilayago ti heba íbu henego manda bulebira, lene.
EZE 2:6 Anigo dindiali-o tigua í̠hondo bi laragolabi gi nahabe. Tigua í̠naga bi larego mo hengedalu í̠ni tinaga bime mo ko holebira. Ani biragola í̠ ti dombeneha howa tinaga bime í̠ mo tandaga holene alipiago dibidabulo ngagoha yupeho haradagua bulebere. Ani howa ti de hondowabi tinaga bi lararu hale howabi gi nahe habe.
EZE 2:7 Tigua i̱naga bi hale habe manga halu i̱ erembira ngiaga kago í̠ manda bibe. Í̠na i̱naga bi larego tigua hale hayaguabi nahale hayaguabi harugo lowa i̱na bi ogo la larudagua bibahende lamiai habe.
EZE 2:8 Dindiali-o i̱na bi larogo baya hangu hale ha. Í̠na Isaraele wali agali karume i̱ erembira ngialu hagadagua nahabe. Ai í̠na ne ha̱lalu mbirale o ngerogo na, lalu bi lai hene.
EZE 2:9 Bi ogoni lai heagola handalu hewaria gi mbirame beba ale mbira i̱ hewagoha kaware yaede hayago handaru.
EZE 2:10 Beba ale ogoni handalu hewaria lunioreyago tigua mo bo bigi buwa kabu biniya. Ai gi biagome beba ale biago anga layagola handalu hewaria bi halu kirani gilibu wiaria handaru. Bi gilibu wiyadagoni handalu hewaria agalime bu miniha genda yu howa dugu taraore biniru dara howa iba gana dara holenenaga laga biniru gilibu wia. Beba ale biagoni bi hangume to̱latagi hearia handaru.
EZE 3:1 Ani handalu hewaria Ngode Datagaliwabehanda i̱hondo lalu, Dindiali-o í̠na beba ale ogoni nabe. Nowa mani Isaraele wali agali karuhondo beba ale ogoniha bi gilibu ngaru lamule pobe, laya.
EZE 3:2 Ani layagola i̱naga ne ha̱larugola ibugua beba ale biago noliya ngiya.
EZE 3:3 Ani ngialu howa lalu, Dindiali-o beba ale o ngerogoni tombeore helo nendabu nabe, laya. Ani layagola beba ale biago i̱na nalu hewaria dendebiore mone ibane aleya.
EZE 3:4 No hewagola Ngode Datagaliwabehanda i̱hondo ogodagua layago, Ai dindiali-o Isaraele wali agaliru karia puwa í̠hondo i̱na bi langiruruni bibahende lamiai hole pobe.
EZE 3:5 Pialu wali agali bi tara laga karuha ndo Isaraele wali agaliru hanguhondo lamule pobe larogoni.
EZE 3:6 Ai dindi timbuni ngagoha wali agalirume bi tara í̠ ala hale nahene ale laga laga biaga bu karuha pobe ledole nde wali agali dindi odaruniha karume í̠naga bi bibahende hale hai kale.
EZE 3:7 Anigo Isaraele wali agali ti mbiraorealime í̠na bi larego hale naholeorebira. Tigua i̱ninaga bibi hale nahagadago í̠naga bi agua hale helodabe. Irane tinaga mini giambe ho kagome i̱naga bi hale habe manga howa ti bibahendeme bi mo wahaga dege bu karuni.
EZE 3:8 Ani anigo áyu i̱na í̠naga embonebi tinaga mini giambe ogonibi dege helarugola í̠na i̱naga bi mana hongo howa gi nahe elahe howa lamialu holebere.
EZE 3:9 I̱na í̠ ege to̱le̱ baya tara mbira muni dewaoreme miaga mini daimono giambe hongo tarahe ngagobi helarogola í̠naga hongome tinaga hongo emene yu kago bope holebere. Aniore buleberogo tigua i̱naga bi mana mo wahaga kago manda bialu í̠na tihondo gi nahabe, lalu lene.
EZE 3:10 Ani lowa Ngode Datagaliwabehanda laabo halu lalu, Dindiali-o i̱na bi larogo baya hanguore hale howa mbira embeda halu yu wanahabe.
EZE 3:11 Ai í̠naga damene Isaraele wali agali Babilono dindini tinaga waitigirume bo garabayabu yalu ibini biaru karia puwa Anduane Homogo Bibahende Haru Haame Ho Haga i̱ kogome i̱naga bi langerogoni tihondo lamibe. Bi ogoni tigua hale hayaguabi nahale hayaguabi harugo i̱naga bi ogoni tihondo latagi halu lamibe, lene.
EZE 3:12 Mani howa Ngode Datagaliwabenaga Dinini ibugua i̱ mo yaragaore haya. Ani biyagola i̱ erembiraha bi mbira hongo howa layuago hale halu hewaria bi ogonime lalu, Anduane Homogo dahuliya andaga kago ibunaga hongo timbuni holenebi wá timbuniore holenebi ngagonaga ibu mini yaraga hadaba, layuago hale haru.
EZE 3:13 Ani hale halu hewaria agali handalehe mariali biaru yagalo yalu piyagola tinaga babagane biarume pilipala lama pialu tininaga babagane ngunime ela hagahaga biaore piayuago hale haru. Garo ge ale timbuni biarubi piayuane hale haru. Ai uruni ti pialu howa kulu timbuni lalu dindi dumbirumbi ale biayua.
EZE 3:14 Ani biyagola Anduane Homogonaga hongo holene i̱ha karula howa ibunaga Dinini ibugua i̱ mo yaraga halu yalu piyagola i̱ genda howa keba haru.
EZE 3:15 Ai Anduane Homogonaga Dinini ibugua i̱ haru halu Telabibi taono Iba Keba angeni Isaraele wali agaliru garabaya biabe ale bialu bu heagoria haru ibiya. I̱na mbirale tara tara o handarudarunime i̱naga bu mini mo tara howa genda bialu miniha biabe bulene hongo nahayagola ema nabi horo karu dindi ogoniha biraru, lalu Esegielehanda lene.
EZE 3:16 Horo karu ogoni piai heagola Anduane Homogohanda i̱hondo bi lone ogodagua laya.
EZE 3:17 Dindiali-o i̱na í̠ Isaraele wali agali mamage habelo dabo helarogoni. I̱naga bi hongoheore tihondo lamibelo i̱na í̠hondo langigi bulebero.
EZE 3:18 Agali mbirame mana ko ngaru biragonaga ibu homolebira laruyagua bi ogoni í̠na agali ogonihondo ogodagua laya lalu lamialu, Ai í̠ nahome holeyagua mana ko bialu haridagoni wahalu mini beregedabe, lalu lamibe. Ani nalamiriyagua nde tinaga ko biyadagoni ngaore homolebira. Anigo ibu homayagonaga irane i̱ninaga deni í̠na nalamirigome hale nahe homayagoni manda bulebero.
EZE 3:19 Ai í̠na agali ko biaga kago lamidegola ibugua ko biyago wa nahayagua nde ibuni mo ko howa homolebira. Anidagua biyagua ogoni í̠ha bi nawi pani í̠ nahomolebere.
EZE 3:20 Agali mbira mini tigabiwi kagome mana ko lone bia dai bialu kagoha i̱na ibu agi birabe hondole ba hondolene mbira ibilo warogola agali ogoni ibugua mana ko biyagua í̠na ibuhondo mana ko birago wahalu mini beregedabe lalu nalamiriyagua ibu ho ko halu homolebira. Homaragola i̱na mana bayale ibugua abale bialu hayago manda nabulebero. Ibugua mana ko áyu birago hondowa ibuni mo ko howa pani mialu home lelolebero. Anigo ibu homayagonaga irane í̠ni i̱naga deni agali ogoni lamia nabirigome homaya manda bulebero.
EZE 3:21 Ai í̠na agali tigabi mbira kagohondo mana ko nabi habe laregola ibugua nabi howa tigabi dege bialu haabo hayagua ogoni ibu nahomolebira. Ani biragola í̠bi ibuhondo bi lamirigome nde nahome bayale dege holebere, lene.
EZE 3:22 I̱ dindi ogoniha hewaria Anduane Homogonaga hongo i̱ha ibayuane handaru. Ani ibuwa ibugua i̱hondo lalu, Ai heyalu dindi ulini unu ngagoha pobe. Dindi ogoniha pu kegola i̱na í̠hondo bi languliya, laya.
EZE 3:23 Ani laya handala i̱na dindi uliuli wiagoha pu howa handalu hewaria Anduane Homogonaga wá holene timbuni Iba Keba peagoha angeni ala hendenegobi dege handaru. Ani hondowa ai i̱ ge duli hanga howa ma podalu bulu paliru.
EZE 3:24 Ani bialu hewaria Ngode Datagaliwabenaga Dinini ibugua ibuwa i̱ hongo ngialu mo heya haya. Ani heyu hewagola Anduane Homogohanda lalu, Dindiali-o í̠ni dindi pialu andaga tamuha puwa panga payatagi howa birabe.
EZE 3:25 Ani bederia mani agali marume pu yalu ibuwa í̠ minu daba holebira. Ani biragola í̠na andaga yu wahalu tagira pialu wali agali hondo pobe nahe holebere.
EZE 3:26 Ani bedegola wali agali i̱naga bi mana mo wahaga karuhondo bi mana nalamibelonaga i̱na í̠naga hége ema nabibehelo helolebero.
EZE 3:27 Anigo ai horo marungi wali agaliruhondo i̱naga bi mana lamibelo hamelo kongi bi baya hangu lamibelonaga i̱na í̠naga hége mo bayale halu bi lelolebero. Bi lalu howa bi ogoni Anduane Homogo Bibahende Haru Haame Ho Haga i̱ kogome laro lolebere. Í̠na ani laregola marume hale holebira. Marume í̠na bi larego hale howa donge halu erembira ngialu polebira. Ani bulebirago irane ti wali agali bi galone mo wahaga kagome ani bulebira, lalu lene.
EZE 4:1 Ngode Datagaliwabehanda lalu, Dindiali-o í̠na ege to̱le̱ ale dindime wabini podene mbira mo ngelowa ogoriani Yarusaleme tano ngago handalehe bigiya podalu gili bibe.
EZE 4:2 Ani buwa gili birigoria kawareni mbirale ami agalime wai bialu tano ho mabu bule biagadagua bibahende wabiai habe. Gana mbira tano ogoni wa mabu bialu pabe kagoria ami agali heyu howa wai bule dindi hono wima irigi hagadagua helalu bibe. Ami agalinaga balai anda tano ogoni kaware bu helalu mbirale hongohe guruyagu̱ bule lowa pu pongo biagadagua buwa ege to̱le̱ timbuni pu nguinini pongobia howa wai pabe bo gialaga ngagonaga bigiya wabu ngelalu bibe.
EZE 4:3 Ani bialu parabane mbira muwa í̠nila tanonaga bigiya wabu wirigola hengene ngagoria ngelabe. Ani bialu í̠ni tanoha handade howa wai bule nendebu haradagua bu habe. Wali agali bu karume í̠na berego de hondowa mani ami agali ibalu tinaga tano ngago karulolobada manda bilo manane ani bibe.
EZE 4:4 Ani bialu mani í̠naga gi lehayagi paluwa wali agali Isaraele dindiha bu karume ko bibahende biyarunaga genda yu palibe. Ani paliaho ngene dege horo handari tebirani pira dira (390) bibahende palibe. Horo handari tebirani pira dira (390) uruni mali handari tebirani pira dira (390) Isaraele wali agali bibahende ko tinime biyagonaga genda yu holebiragonaga walia halu ani bibe.
EZE 4:6 Horo ogonidagua í̠na gi leha palialu horo ogoni piai haragola beregedalu gi tigahayagi palibe. Ani paluwa Yuda wali agalime ko biyagonaga horo pira mariani (40) genda yu palibe. Horo pira maria (40) ogoni mali pira mariani (40) Yuda wali agali tigua mana ko bialu hayagonaga pani genda yu holebiragonaga walia halu ani bibe.
EZE 4:7 Í̠ ani paluwa mbirale bigiya ami agalime wai bialu Yarusaleme karulole bialu helarigo handaya habe. Ani bialu í̠ni wai bule nende biaho haradagua bu howa lalu, Tano ogo bo haealabaga bialu mo ko harogoni, laga bialu habe.
EZE 4:8 I̱na í̠ pume minu daba harogola í̠ hongo halu tingini beregedabe nahe holebere. Anidagua bialu kene dege í̠naga horo langirugo piai helabe.
EZE 4:9 Ani bialu í̠na widi marubi bali marubi paboro tara tara kirabi tomo tara tara kira dege widi alebi uruni bibahende biamaga howa mo beregeda beregeda bialu mberedi wabuwa ogoni dege horo handari tebirani pira dira (390) nalu gi lehayagi palirigoria paliaho wiaabo habe.
EZE 4:10 Í̠na mberedi uruni genda magi emene dege gi mbira hangu (garama 230) horo bibahendengi nalu bolangua howa nanabe.
EZE 4:11 Iba naregobi nde manda buwa horo mbiru gabo be kira dege naga bibe. No bolangua nahabe.
EZE 4:12 Ani bialu wali agali ti to wahene lebolehe ngago mo wibe. Ti ogoni ira delowa mberedi ogoriani hirabe. Mberedi uruni hirarego wali agali bu karume de hendelo nalu habe, lalu lene.
EZE 4:13 Anduane Homogohanda lalu, Í̠na mbirale uruni bu walia holeberego mani Isaraele wali agali tigua bialu holebira. Mani waitigime Isaraele dindi wai bialu karulai helo i̱na yupe harogola tigua ibalu dindi bo podai halu Isaraele wali agali dindi tara tara ngaruha garabaya bu yalu polebira. Tigua dindi tara uruniha pu howa tomo ko tara tara i̱naga deni dodohe nanolene ngago lo wirugoni nalu holebira, lalu lene.
EZE 4:14 Bi uruni layagola hale howa i̱na ladai bialu lalu, Anduane Homogo Bibahende Haru Haame Ho Haga-o i̱na mana urunidagua nabulebero. Ani nabuleore. Í̠naga deni i̱ni mo dodohe nahagaore ndobe. Bamba i̱ igiri emeneni howa hama ibinigo áyu kogonibi i̱na nogo minana homenebi gabua marume bo wahene ngarubi mbira nanagaore kogoni. Mbirale nanolene lo winiru í̠naga deni dodohe lene ngago nanaruli, laru.
EZE 4:15 Ngode Datagaliwabehanda lalu, Aniyagua nde mberedi hirarego wali agali time nahiri wahalu nogo bulumaga time hirabe, laya.
EZE 4:16 Ibugua lalu, Dindiali-o i̱na Yarusaleme wali agali hina garime mo ko hai helolebero. Ani berogola wali agali bibahendeme mogo lai halu miniha genda yu hai holebira. Ani biragola wali agali tigua hina ibabi horo mbira mbirani nolene bayuwa mo tawe howa nalu holebira.
EZE 4:17 Tinaga hina ibabi mo ndia harogola tinaga bu miniha genda timbuni ho howa mana ko biyarunaga ti tingini obiore holebira, laya.
EZE 5:1 Anduane Homogohanda laabo halu lalu, Dindiali-o í̠na ayu tibu ne gadeleore ngago mo yuwa í̠naga mandari angaribi podai habe. Ani bialu mandari angari uruni genda magi handagane ngagoria magi handalu halu tebo mo tale bibe.
EZE 5:2 Ala i̱na horo ogodagua palibe lalu langirugo bolangua halu piai hayagua heyabe. Manane ogoni Isaraele wali agali bu karuhondo waitigime Yarusaleme ibalu karulaya lalu mo walia holebere. Palialu heyuwa í̠naga mandari halu tebo talebu wirigo halu mbirago Yarusaleme mitangi bialu bigiya ege to̱le̱ ale dindime wabu wirigoriani delabe. Halu mende podo wirigo ege to̱le̱ ale mbalape wirigoha pu mabu bialu mendehayagi puwa í̠naga ayu tibu ne gadele biagome podopaya bibe. Halu tebonego puyabume pulo yalu pelo daliga baraga habe. Ani beregola i̱na i̱naga ayu tibu ne gadele ngago mo yalu mandari puyabume yalu porago talima poliya.
EZE 5:3 Anigo mandari emene mbira ngelo howa í̠ninaga aga ngunime paulo dambi habe.
EZE 5:4 Ani bialu mandari mbira mbira í̠naga agaha paulo dambi harigo yamigi bialu irani delaga bibe. Ani buleberegoni Isaraele wali agali dai holebiragonaga manane walia holebere, laya, lene.
EZE 5:5 Ani lowa Anduane Homogo Bibahende Haru Haame Ho Haga kago ibugua i̱hondo langialu lalu, Í̠ Yarusaleme tano ngago de handa. Dindi bibahende wuyu mabu bidarunaga hanuniore Yarusaleme ngeledogoni.
EZE 5:6 Ani ngeledogoyu Yarusaleme wali agali tigua doga halu i̱naga bi mo wahalu ti koorene ko haya. Wali agali dindi tara taraha bu hearunaga mana ko wiago emene nira lowa Yarusaleme wali agalime ko timbuniore bialu ka. Yarusaleme wali agalime i̱naga bi larogo hale habe manga howa mana bulene nga lo wirugo pugualu haabo kagoni.
EZE 5:7 Ani bialu kago manda bialu i̱na tíhondo bi ogodagua laro, Yarusaleme wali agali tígua bi o larogo hale halimu. I̱ Anduane Homogo Bibahende Haru Haame Ho haga kogo i̱na tíhondo laro. Tígua i̱naga bi hale habe manga howa i̱naga bi mana lo ngogobi mo wahalu puwa hameigini tara tara dindi tí baba wiapara para bima pedarunaga mana ko ngago taluwa bialu kamigoni. Ani bialu tígua mine halu mana ko bialu kamigoni koorene ko wali agali dindi uruniha karume mana ko bialu karu bolangua howa bialu kami.
EZE 5:8 Anidagua bialu kamigo mitangi bialu Anduane Homogo Bibahende Haru Haame Ho Haga kogo i̱na tíhondo bi laro. I̱na tíhondo turu naheore howa tí baba waitigi ho kogoni. Anigo i̱na wali agali tara tara bibahende bu karunaga deni howa tí manani helolebero.
EZE 5:9 Tígua mana ko dewaore i̱na hame nalewago birimigonaga pani ala nginidaguabi ndo mani nguleberodaguabi ndo áyu ogoria timbuniore timbu nalimulo ngulebero.
EZE 5:10 I̱na tí pani nalimulo mo ngerongi aba ai̱yalame tinaga waneigini bo nalu waneiginime ti aba ai̱yalabi bo nalu holebira. I̱na tí pani nalimulo ngule ngogo ngerongi wali agali dewaore homai holebira. Ani bialu maru homa nabi yu wahene karu ti minalu dindi tara tara ngaruha purogo lelolebero.
EZE 5:11 I̱ Anduane Homogo Bibahende Haru Haame Ho Haga Ngode Datagaliwabe haluhe kogome tíhondo heneneore bulego larogo i̱na tí pani nalimulo ngialu mo koore holebero. Anidagua buleberogo irane tígua mana ko ngubiore wiaru biaabo halu i̱ninaga deni i̱naga anda hewago mo mebia helarimigonaga pani ngulebero. Ani birimigonaga i̱na tíhondo dara nahe howa agalime tani pudu wahagadagua tí pani nalimulo ngialu pudu waholebero.
EZE 5:12 I̱na tí pani nolene ogoni halu tebo mo talebia holebero. Wabuni halu mbirago ti hina gari howa warago timbuniore balu tanoha homo wulebira. Wabuni halu mendego ti waitigi ibalu wai biagane ayu tibume tano pabe tagirahayagi dibu wulebira. Wabuni halu tebonego ti tíninaga dindi wahalu dindi tara tara ngaruha hama pugupugu bilo taliatogo lelarogola waitigi bu karume talima pugupugu bialu bai helolebero.
EZE 5:13 Ani biragola i̱naga miniha keba tandagala nalu kogo ereba helonaga tíha biba helolebero. Mbirale o bulebira laroruni tagira ibirangi tígua i̱na bi áyu larogoni mitangi bialu i̱ Anduane Homogo mbirale bi pupu wulenaga gime wabini ngaru aria mbirame i̱naga henge aribia helo yupe nahaga henedane hondoleberemi.
EZE 5:14 Ainde tí mo ko hai hene ngamigola hameigini tara tara tí baba mandagi handa a̱i̱na̱i̱ padarume tí de hondowa lalu, Bo haealabaga bini o ngago de handa nabere. Anduane Homogohanda tinaga mana ko bialu heago hondowa ti pani nelo minida, lalu handa tara haga bulebira.
EZE 5:15 I̱na tí baba tandaga timbuni ho kogo tí pani nalimulo mo ngiaore bulebero. Anidagua berogola hameigini tara tara bu karume tí pani naramigo hondowa ti gi timbuni holebira. Tigua tí ko ngubida lalu hondo oba halu mege bulebira.
EZE 5:16 I̱na hina gari tíha anda ibilarogola tomo mbira nolene nawi dege wiaabo holebira. Wali agali bu kamiru tí homai halimulonaga hina gari ogoni ibilarogola timume bogaragola tandaga biagadagua tí hina garime tandaga naabo halu homoleberemi.
EZE 5:17 I̱na hina gari ibilalu nogo biango gabua bu karubi ibilarogome tínaga waneigini bu karu bo gililoyu ibagabu ngelolebira. Ani bialu i̱na tíha warago timbunibi waitigi bu karume tí baba wai bialu bo wahai helobi ibilolebero. I̱ Anduane Homogo i̱na bi o ledogoniore, laya.
EZE 6:1 Anduane Homogohanda i̱hondo lalu,
EZE 6:2 Dindiali-o í̠na Isaraele dindinaga hari wedaruha handa amu nana bialu i̱naga bi ogo tihondo lamibe.
EZE 6:3 Hari wedarubi dindi ulini panda panda ngarubi tihondo lamialu lalu, Anduane Homogo Bibahende Haru Haame Ho Haga kogo i̱na waitigi ibilarogola tigua dama mitangi bialu mbirale gime wabini bu ngaruhondo wali agalime bi pupu wule piaga ngaru bo gialabaga bilolebero.
EZE 6:4 Waitigi urunime ibalu nogo tara tara bo lomabu delaga dabu bu heledaru bo gialo wahai halu ira hagua ngabilo inisenesi lomabu delaga dabu bu heledarubi bo gialo wahai holebira. Ani bialu tigua Isaraele wali agali bu karu tinaga mbirale dama mitangi bialu gime wabu ngaruhondo bi pupu wialu karia ti bo waholebira.
EZE 6:5 Ani bo wahowa tinaga tingini mbirale gime wabu ngagoria ngelowa Isaraele wali agali uruninaga kunibi tinaga lomabu delaga dabu kagoha wuyu mabu bu wima polebira.
EZE 6:6 Waitigime ibalu Isaraele dindinaga tanoru bo haealabaga biai halu wali agalime bi pupu wiaga anda bu heledarubi mo ko halu bo gialo wahai holebira. Tigua lomabu delaga dabu bu heledarubi mbirale dama mitangi bialu gime wabu ngarubi bo gingirulo wahai halu ira hagua ngabiaga inisenesi lomabu delaga dabu heledarubi bo gialo wahaiore holebira. Anidagua bilarogola Isaraele wali agali tigua mana ko bialu gime wabigi biyaru bibahende ereba hai holebira.
EZE 6:7 Waitigime Isaraele dindi bibahendeha piai halu Isaraele wali agali bu karu dewaore homelo bo wahaga bulebira. Anidagua biragola Isaraele wali agali maru homa nabi yu wahene bu karu tigua i̱ni Anduane Homogoore henedane manda bulebira.
EZE 6:8 Ani bialu waitigime wali agali maru ba nabi helene karu i̱na ti hameigini tara tara dindi ngaruha purogo lelolebero.
EZE 6:9 Ani purogo lelarogola ti dindi kaundia uruniha garabaya pu howa tigua i̱ mitangi bu dai bialu tinime kagua bialu harimagome i̱ mo genda harimada lo manda bulebira. Tigua i̱ erembira ngialu mbirale gime wabini wiaru hamelo aribia howa o biaruhondo bi pupu wialu harimagobi iname mana ko ngubiore bialu harimadalo manda bialu taga timbuniore holebira.
EZE 6:10 Ani taga howa i̱ Anduane Homogo i̱na bi hongohe áyu larogoni bame ti mo gi halu ndo lenedane hondolebira, lalu Anduane Homogohanda lene.
EZE 6:11 Anduane Homogo Bibahende Haru Haame Ho Haga kagome i̱hondo laabo halu lalu, Bu miniha genda halu geme dindi hongo howa hengedabe. Isaraele wali agalime mana ko ngubi dewaore biyarunaga dara howa dugu bibe. Heneneore tigua mana urunidagua bialu hayarume maru waitigime bo wahai halu maru hina garime homalu ti marubi warago tara baragome homai holebira.
EZE 6:12 Bibahendeore homai holene wulebira. Anigo maru dindi kaundiaha karu ti nde warago balu home lelolebero. Kawareni karu waitigi ibiragome bo wahalu yu wahene maru karu ti hina garime home lelolebero. I̱na urunidagua bialu i̱naga keba ho kogo tiha biba helolebero.
EZE 6:13 Waitigi tigua Isaraele wali agali homararunaga tingini maru mbirale gime wabu ngaruha waho ngelalu maru lomabu delaga dabu bu heledagoria wu mabu bu wialu maru hari nene ti bi pupu wiaga ngaruhabi dindi bare barenibi ira timbuni bu karu tenehabi ira maru yuni dewahe kagohabi tinaga tingini wahaga bulebira. Isaraele wali agalime gime wabini ngaruhondo bi pupu wialu mbirale bo lomabu delaga kago bibahendeha tinaga tingini uruni kaware wigi bulebira. Horo ogoningi Isaraele wali agali bibahende karume i̱ni Anduane Homogo henedalo manda biai holebira.
EZE 6:14 Aniore bulebira. I̱na tinaga dindi mo ko halu labu hai helolebero. Tinaga dindi lenego bibahendeore unurahayagi dindi ko wali agali nahaga ngagoria howa ibalu uyurahayagi Libila tano ngagoria mo ko hairi helalu labu hai helolebero. Dindi Isaraele wali agali haganego gibunihabi mbira yu wa nahelolebero. Anidagua berogola wali agali karu bibahendeme i̱ni Anduane Homogo heneneore henedalo manda biai holebira, lalu Anduane Homogohanda i̱hondo laya, lene.
EZE 7:1 Anduane Homogohanda i̱hondo langialu lalu,
EZE 7:2 Dindiali-o i̱ Anduane Homogo Bibahende Haru Haame Ho Haga kogo i̱na Isaraele wali agalihondo bi ogodagua laro. Áyu ogoni Isaraele wali agali dindi bibahendeha karu tinaga horo hamaro ogonida.
EZE 7:3 Isaraele wali agaliru-o tí bi ogo hale halimu. Hamaro bulene horo tagira ibiragoni. Tígua mana ko birimirunaga pani nguleberogo ngerogola i̱naga bu miniha keba timbuniore ho hene kogo tí hondoleberemi. Tígua mana ko uruni bialu harimigonaga i̱na tí manani howa birimidaguaore mo tale bulebero. Ani bialu tígua mana ko ngubi bialu harimigonaga pani ngulebero.
EZE 7:4 I̱na tí mbirali yu wa nahe dara howa biamogo nabulebero. I̱ Anduane Homogoore henedane kogo handalimulo tígua mana ko urunidagua bialu harimigonaga i̱na pani ngulebero, laya lene.
EZE 7:5 Anduane Homogo Bibahende Haru Haame Ho Haga kago ibugua lalu, Tíha mo ko holene nahendene ale taraore tí bo waholenaga ibugu ibugu bulebira.
EZE 7:6 Áyu tínaga horo hamaro bulene kawareore tagira ibiragoni. Áyu ogoniore tagira íbu ngagoni ndobe. Ai tínaga holene áyu ereba haragoni.
EZE 7:7 Wali agali Isaraele dindiha bu kamiru tí bi ogo hale haramine. Horo biago tagira ibiragonigo ai tí mo ko holobada. Ainde tígua turu hagabu howa hari nene bu ngaruha pialu bi pupu wigi beremili biaru nawuleberemida. Áyu tíni dege mo ngoaiho howa gi halu luluyu ibagabu holeberemida.
EZE 7:8 I̱na tíhondo keba timbuniore halu tandaga harudago hadelo tí minu baore bolebero. Tígua mana ko uruni bialu harimigonaga ina tí manani helolebero. Ani helalu tígua mana ko ngubiore wiaru bialu harimigonaga pani karulapeore nalimulo ngulebero.
EZE 7:9 I̱na tíhondo dara howa biamogo nabi tí bayale halimulo helo wanaholebero. Tígua mana ko uruni bialu harimigonagaore i̱na pani ngulebero. Anidagua berogola tígua i̱ Anduane Homogo kogonigo mo ko holene uruni i̱nimeore ibilenedane hondoleberemi, laya lene.
EZE 7:10 Ani lowa Anduane Homogohanda i̱hondo laabo halu lalu, Mo ko holene horo timbuni biago kaware áyu o ibiragoni ndobe. Isaraele wali agali bu karume ti damene bu karu mo ko halu haga ka. Ani bialu mine hagane mana ngago hangu bule hongo haabo haga ka.
EZE 7:11 Tigua mendeali bo waholene mana birarume mana ko dewaore mo yu anda ibaga nga. Anidagua bini ngagonaga i̱na tinaga mbirale bayale damene ngaru bibahende bo haealo wahai holebero. Tinaga munibi mbirale bayale damene ngarubi ti mini lene karubi i̱na tinaga mini mo dindiha halu hengedape harogola tinaga bayale winiru ereba hai halu mbira nawulebira.
EZE 7:12 Mo ko holene horo ko biago kaware o ibiragoni ndobe. Horo ogoningi mbiralime mbirale yolo bialu karu ti turu holene nawi. Mbirale muni mialu karu tinaga bu miniha genda holene nawi. Irane tigua biraru habane nabulene wulebirago i̱na ti bibahende pani mialu minu baiore holebero.
EZE 7:13 Agali mbirame ibunaga mbirale yu kago mendealihondo dano helo lowa miyadagua dano hanga dai nabi dano ogoni ho kaore dege ibu homolebira. Ani bulubadagoni irane i̱naga keba holeneme ti bibahendeni ibira holebira. I̱na ti homelo bo wahai holebero lalu bi lo wirugo lone mo iriari nabulebero. Wali agali bibahendeme mana ko biyarunaga homai holebira.
EZE 7:14 Tigua wai bulenaga mbelo biguli pu laragola ami agali bibahende wai bule mo manda manda bu holebirago ai mbiralime abale pora bu ade halu wai bule napolebira. Ani bulebirago irane i̱naga keba holeneme agali uruni mo gi hai haragola ti wai napolebira, laya lene.
EZE 7:15 Anduane Homogohanda laabo halu lalu, Waitigime ibalu Yarusaleme ho mabu bupe hayada. Tanonaga pabe tagirahayagi wai birarume bo homelalu maru tanonaga pabe tamuhayagi karu ti hina garimebi warago tara tara baragomebi homai holebira.
EZE 7:16 Maru ti ibida polene henge handa walia hayagua nde ibida gerai lalu puwa hari tene ngaruha ha do holebira. Wali agali uruni tigua tinime ko bialu hayaru mitangi halu ega puyume bi laradagua ti dugu bialu howe dodowe laga bialu holebira.
EZE 7:17 Ani bialu howa tinaga gi geru hongo pirilape halu diriduru lalu holebira.
EZE 7:18 Tigua dara ho howa walia halu karulagane aga ngago mo karulo howa duru timbuni lalu holebira. Ani bialu tinaga mandari podo mbololo wahai haragola ti bibahendeme taga timbuni holebira.
EZE 7:19 Anduane Homogohanda tihondo ibunaga keba holene walia haragola tigua tinaga ngolo siliba urume tini mo wialu biamogo nabulubadane hondowa muni uruni ti nole ndodago lowa tigua hariga teneni ba a̱i̱na̱i̱ bialu yu wahai holebira. Tigua ngolo silibaru dimagoli timbuni ho heagola ogonidagua biyagome ti ko bilo mo bia henego mitangi bulebira.
EZE 7:20 Bamba tinaga yári ngolo silibarume wabu winigo karulo howa ti turuho haga hene. Ani bu howa tigua ngolo siliba urunime mbirale bi pupu wulenaga gime wabu wiaga hene. Tigua mana ogonidagua biyagola i̱na hame naleore howa tinaga ngolo siliba uruni tininaga deni mo nagaloneore hai helolebero, laya lene.
EZE 7:21 Anduane Homogohanda laabo halu lalu, I̱na dindi tara agali koorene ko bu karu tí kamigoria íbu helarogola tigua Isaraele wali agalinaga dabudabu ngaru mo page biai holebira. Mo page bu yalu puwa mbirale ko tinime hameledaru ale bialu holebira.
EZE 7:22 Ani bialu agali uruni i̱naga anda bayale biagoha anda pialu tinime hameledago ale bialu i̱naga deni anda ogoni mebia halu mo ko holebira. I̱na tigua uruni nabilo hapai nahe helolebero.
EZE 7:23 Isaraele wali agali tigua mbirale bibahende libilaba lalu mo ko hama ibaga bialu kagoni ndobe. Isaraele dindi bibahendeha tigua wali agali dewaore homelo balu tanoha mendeali kago bameore bo wahaga bialu ka. Anidagua bialu kagonaga horo áyu ti minu dariba holenaga pu seni wabulene karulape.
EZE 7:24 Anidagua bialu kagonaga i̱na agali i̱ mitangi nabiaga koorene ko karu tí kamigoha haru ibuleberogo tigua Isaraele dindiha ibalu wali agali tíni andagaha howa bo taliatagi halu anda uruni ti karulolebira. Ani bialu tigua Isaraele wali agalime Anduane Homogo mitangi bialu lotu laga anda karu bo gialo wahai helarogola Isaraele agali hongohe bu karu tigua gi timbuni halu tinaga mine holene ereba holebira.
EZE 7:25 Mo ko holene ko taraore mbira áyu Isaraele dindiha anda ibiragoni ndobe. Tigua mo palia holene hamelo karia handa walia naholebiraore.
EZE 7:26 Tiha mo ko holene dewaore tagira ibugu ibugu bialu bi diburibu ko tara tara laragobi hale holebira. Ani birago hondowa tigua gi timbuni howa Anduane Homogonaga bi mana latagi haga agali kago hondo pialu i̱naga hame agua winidabe hondole hale haragola i̱na tinaga bi uruni hale howa ladai nabulebero. Ani bialu loma binigo mo miaga bu karume ti lawai holene bi mbira nawulebira. Ani bialu agali ala hene miniwi bu karume wali agali mini gigabi wulenebi bogabi holenebi talebu mulene mbira nawulebira.
EZE 7:27 Anidagua biragola tinaga kini kago ibugua dara timbuniore halu kini igini kagome mini burugu lalu bu miniha mo ko hene holebira. Wali agali bu karume gi timbuni halu durulalu holebira. Tigua mana ko bialu hayaru bibahende mitangi bialu i̱na ti pani nelo miaiore holebero. Tigua wali agali maru karu manani íbu helowa mo dabaki birimidagua dege i̱na tínibi dabaki bulebero. Anidagua berogola tígua i̱ni Anduane Homogoore henedalo bayuwa manda buleberemi, laya lene.
EZE 8:1 Ina Babilono dindiha garabaya hemane mali waraganegonaga ege waraganeni horo dauni hayagola i̱ nde i̱ni andagaha berewaria Yuda agali haguane maru ibiniyagola i̱ baba mandagi birarima. Ani beremaria Anduane Homogo Bibahende Haru Haame Ho Haga kagonaga hongo i̱ha karula haya.
EZE 8:2 Ani karula hayagola i̱ handadaga halu de gandeba handalu hewaria agali handalehe mbira ira hungu bialuhe hearia de handaru. Ibunaga tingini mandibu nirayagi ira hungu ale bialu heagola ibunaga tingini lirayagi ege to̱le̱ boronosi bayale ngiringara lelo mbirale ha̱i̱ hene handalehe hearia de handaru.
EZE 8:3 Mbirale mbira ogonime ibunaga gi handalehe mbira dogola amu halu i̱naga mandarini yania hayane handaru. De gandeba dege handalu hewaria Ngode Datagaliwabenaga Dinini ibugua i̱ minu yalu hariha yagalalu Yarusaleme haru piya. Haru puwa Yarusaleme tanoni Ngode Datagaliwabenaga anda pabe buyu mabu bini hayagonaga panga haraba anda abene uyurahayagi heagoria helaya. Panga haraba ogoriani tamu hobane ogonihayagi Isaraele wali agalime mbirale dama mitangi bialu bi pupu wulenaga gime wabini mbira mo wiago Ngode Datagaliwabe ibugua ogoni hondowa ibu keba halu miniha tandaga timbuni haga.
EZE 8:4 Ani pu howa i̱na Isaraele wali agalinaga Ngode Datagaliwabe ibu kago walia holenaga wá holene taraore hearia handaru. Wá tara ogoni abale mbira Iba Keba poragoria hewaria hendenegobi dege handaru.
EZE 8:5 Ani handalu hewaria Ngode Datagaliwabe ibugua i̱hondo bi lalu, Dindi agali-o dindi abene uyurahayagi de handa uyu habe, laya. Ani layagola i̱ de handa uyu halu hewaria lomabu delaga dabu panga haraba kawareni heleagoha mbirale dama mitangi bialu bi pupu wulenaga gime wabu wiaria handaru. Ngode Datagaliwabehanda mbirale ogoni hondowa keba halu tandaga timbuni hagago handaru.
EZE 8:6 Ngode Datagaliwabehanda i̱hondo lalu, Dindiali-o Isaraele wali agali bu karume mana ko bialu karuni de hendedebe. Tigua mana ko o bialu kagonime i̱naga andaha nahe wahalu puwa kaundiaha habagiho heledagoni ndobe. Ani bialu mani tigua mana ko áyu bialu kadagua ndo ko timbuniore birane hondolebere, laya.
EZE 8:7 Ngode Datagaliwabehanda bi ogoni lai halu ibugua ibunaga anda ege pabe bu mabu biago wahalu tagira pialu pabe timbuni heagonaga panga haraba heagoria i̱ haru piya. Haru puwa ibugua pabe ogoniha diri mbira wiago walia haya.
EZE 8:8 Ani mo walia howa ibugua i̱hondo lalu, Dindiali-o í̠na pabe ogoni bo gialole diri ogoni ala ba timbu ha, laya. Ani layagola i̱na diri biago ba timbu halu hewaria o biagoha panga mbira wiaria handaru.
EZE 8:9 Ibugua i̱hondo lone lalu, Ai ogoniha anda puwa mana ko ngubiore bialu kagoni handabe, laya.
EZE 8:10 Ani layagola i̱na anda ogoniha anda puwa handaru. Handalu hewaria nogombinaga bigiyaru ema bialu piaga tara tara Ngode Datagaliwabenaga deni dodoheru bibahendenaga bigiya damene anda tamu hobane ogoninaga hái heago bibahendeni gilibu wiame hearia handaru. Ani handalu Isaraele wali agalinaga dama mitangi bialu gime wabinigonaga bigiyabi wiaria handaru.
EZE 8:11 Ani handalu hewaria Isaraele wali agalinaga agali haguaneru pira karia (70) bereagoha Sabana igini Yasanaia ibu halu berearia handaru. Ti bibahendeoreme ira hagua ngabilo inisenesiru delaga mbira mbira yu heago lomabu delayagola ira hagua irigi hayane handaru.
EZE 8:12 Ani biyagola Ngode Datagaliwabehanda i̱hondo lalu, Ainde Isaraele wali agalinaga agali haguane biaru tigua ohowa mana ko o bialu kagoni de hendedebe. Ti bibahende tamu hobane ogoniha anda pialu anda háini bigiya ko o ngarunihondo bi pupu wialu ka. Tigua lalu, Ogoni beremago irane Anduane Homogohanda mbirale iname bialu kamago nahandagaya. Ibu ina dindi yu wahalu piyagoni ndobe, laga ka. Tigua bi ogonidagua lalu mana ko uruni bialu haga ka, laya.
EZE 8:13 Anduane Homogohanda i̱hondo laabo halu lalu, Ai tigua mana ko áyu bialu karuni bolangua halu ko timbunioreru bialu holebirago hondolebere, laya.
EZE 8:14 Ani lowa ibugua Anduane Homogonaga anda pabe bu mabu biago panga haraba uyurahayagi heagoria i̱ haru piya. Ani haru puwa ogoniha wali maru tigua dama mitangi bialu mbirale bi pupu wulenaga gime wabini mbira mini Tabusu wiago homaya lo mitangi buwa kiabu dugu bialu berearia handaru.
EZE 8:15 Ani hondo hewagola Anduane Homogohanda i̱hondo lalu, Dindiali-o mbirale o biragoni hendedebe. Ogoni handa hendedegonigo áyu mana o bialu kagoni bolangua hene koorene ko bialu kanebi hondolebere, laya.
EZE 8:16 Ani lalu ibugua anda heagonaga panga haraba heago kawareni haru piya. Anda haraba ogoriani pangala lomabu delaga dabu heagola hengene wiagoria agali pira kirani duria (25) agima bereane de handaru. Tigua anda heagoha erembira muwa ni tagira ibiragohayagi de handa amuho biruwa ti ge duli hanga howa nihondo ma podalu bi pupu wialu berea.
EZE 8:17 Ani biyagola Anduane Homogo ibugua i̱hondo lalu, Dindiali-o í̠na mbirale o bialu karuni de hendedebe. Yuda wali agali uruni ti mana ko ngubi uruni ale dege ndo bialu kagoni. Tigua Isaraele dindi bibahendeha wali agali bu karu mana ko tara tara mo bia haga bialu ko dewa biame halu kagoni. Tigua anidagua buwa i̱ mo keba halu mana ko uruni bame dege beremabe toba howa i̱naga andaha ibuwa áyu o bialu karuni biaabo haga ka. Tigua i̱naga anda ogoniha ko urunibi bialu kagome i̱ yo handalu mo tandaga timbuni haga kagoni.
EZE 8:18 Ani bialu kago i̱na keba timbuni ho kogoni tiha biba helolebero. I̱na ti dara howa biamogo nabulebero. Tigua i̱ hongo howa olalu i̱hondo bi lolebiragoyu i̱na tinaga bi larago hale naholebero, lalu langiya.
EZE 9:1 Ngode Datagaliwabehanda bi hongo howa huaro lalu, Wali agali tano bu ngaruha homelo bo wahaga kamiru tí bibahende wai biaga ayu tiburu mo yalu ibai hadaba, layuago i̱na hale haru.
EZE 9:2 Ani layuagola agali waragariali Anduane Homogonaga anda panga haraba uyurayagi wiagoha howa abale ibini. Ti bibahendeme wai biagane ayu tibu ne gadele wali agali bo wahaga ale marubi yalu anda ibiya. Ani anda ibiyagola agali mbira nde ti haru mandagi anda ibiyago ibu aga bayale tara mbira mo karule howa pausi nu emene mbira ibunaga mandibuha yu hea. Beba gili biaga aleru nu ogoniha henearia handaru. Agali uruni bibahende ibalu bo lomabu delaga dabu boronosime wabu wini wiagoria kaware ha para ho hearia handaru.
EZE 9:3 Ani heagola Isaraelealinaga Ngode Datagaliwabe ibu wá hongohe taraore howa agali handalehe maria biaruha howa tagira ibalu Anduane Homogonaga anda haneni wá hatagi haya. Ai Anduane Homogo ibugua agali aga bayale karule heago olowa
EZE 9:4 ibuhondo lamialu lalu, Í̠na Yarusaleme tanoha ibaga biai halu wali agali maru ti damenerume mana ko biragola handabe manga halu genda yu haga karunaga wanakuini magi mbira helaga bibe, laya.
EZE 9:5 Ani layuago hale ho hewagola Ngode Datagaliwabehanda agali waragariali biaruhondo lamialu lalu, Tígua agali o poragonidagua pialu wali agali bibahende bo wahole pudaba. Tígua wali agali dara nahe howa mbiraoreli hangubi helo yupe nahalimu.
EZE 9:6 Wali agali wahe karubi wandari igiri daliahe karubi waneigini gali biru ngarubi waneigini ai̱ya bedaru bibahende bo wahai halimu. Agali haguane i̱naga andaha haga karu ala bo wahalu bama pialu marubi bo wahai halimu. Anigo wali agali tinaga wanakuini i̱naga magi mbira wiagua uruni dege nabe helalimu, lalu lamini. Ani laya handala tigua pialu agali haguane maru Anduane Homogonaga anda heagoha kaware haparaho haga hearu ala bo wahai hene.
EZE 9:7 Ngode Datagaliwabe ibugua agali waragariali biaruhondo lamialu lalu, Wali agali i̱naga anda pabe bu yaanda henegohayagi haga karu bo wahai halimu. I̱ni deni i̱naga anda ko dodohe helonaga anidagua bilimu. Biabe ogoni biai halu tígua tanoha ibaga biai halu wali agali bibahendeore homelo bo wahaiore halimu. Ai biabe ogoni bule abale pudaba, lene. Ani laya handala ti abale pene.
EZE 9:8 Puwa tigua wali agali bo wahole piyaru balu heagola i̱ hangu Anduane Homogonaga anda kaware heagoriani haru. Ani howa i̱ ge duli hanga halu dindini bulupalu wuwa i̱na bi dalimu lalu, Anduane Homogo Bibahende Haru Haame Ho Haga kego-o ainde í̠na Yarusaleme wali agali bu karunihondo keba timbuniore harida. Anidagua bialu í̠na Isaraele wali agali yu wahene maru Isaraele dindiha karu bibahende bo wahai holeberebe, laru.
EZE 9:9 Ani hale harugola Ngode Datagaliwabe ibugua ladai bialu lalu, Yuda wali agali Isaraele wali agalibi tigua mana ko dewaore bialu hayagome tiha mo ko hene dewaore ngelo kagoni ndobe. Tigua manda bu handalu hearia Anduane Homogo i̱ ti dindi ngago wahalu piyada lo manda bialubi i̱na ti mitangi nabi embedaho wahayada lo manda bialubi i̱na ti handa nabi ka bada manda bialu hayiya. Ani manda bu howa tigua mana ko dewaore bialubi wali agali Yarusalemeha bu hearu bame bo wahalubi Yuda dindi bibahendeha hearu bo wahai haya.
EZE 9:10 Anidagua bialu hayagonaga i̱na ti dara halu mbiraoreli hangubi mbira helo yupe naholebero. Tigua wali agali maru heneruhondo mana biyadagua nde i̱na tihondobi biadai bulebero, lene.
EZE 9:11 Ibugua bi lai hayagola agali aga bayale karule biago Anduane Homogo hearia íbu dai biyaria handaru. Dai buwa ibugua Anduane Homogohondo ibugua lalu, Í̠na biabe bia laridagua biaiore haru, layago hale haru.
EZE 10:1 I̱na mbirale ndisibe ale timbuni agali handalehe maria biagoria daliga mo pagaho wiago handa amu haru. Handa amu halu hewaria mbirale ndisibe ale timbuni biagoria daligaha kininaga biragane dagia handalehe mbira ege to̱le̱ mindibi muni timbunioreme miaga ale mbirame wabini wiaria handaru.
EZE 10:2 Ani handalu hewaria Ngode Datagaliwabehanda agali aga bayale karule biagohondo lalu, Agali handalehe mariali biaru andanehayagi garo ge ale maria ngago dombeneha pialu í̠naga gi kirabalime ira hedo yule pobe. Hedo yuwa tano ngagoha ira dene ba a̱i̱na̱i̱ bima pobe, lalu lamiya. Ani lamiyagola agali aga bayale karule biagome ani bule piyago handaru.
EZE 10:3 Agali o biago anda pu hearia agali handalehe maria biaru ti Anduane Homogonaga anda heagonaga abene unurayagi hearia de handaru. Ani heagola ginu hagua timbuni mbirame Anduane Homogonaga anda pabe bu yaanda hene wiago bibahende dambi hai haya.
EZE 10:4 Ani biyagola agali handalehe mariali biaruha howa wá taraore holene hongo tagira pialu Anduane Homogonaga anda haneni wá hadali hayagola ginu haguame anda biagoha to̱latagi hai haya. Ani biyagola wá timbuni holene biagome anda pabe bu yaanda hene wiagohayagibi wá timbuni hongoheore haame ho heago handaru.
EZE 10:5 Ani heagola agali handalehe mariali biarunaga babaganeme pilipala layuago wali agali tanoha hearume hale hai habehe dege layua. Agali handalehe biarume pilipala layadagoni Anduane Homogo Hongo Haiheore kagonaga bi ale o layadagoniya.
EZE 10:6 Anduane Homogohanda agali aga bayale karule biagohondo ira hedo yule pu layagola agali ogoni ibu puwa garo ge ale biarunaga mbirago heagoria pu haya.
EZE 10:7 Ani pu hearia agali handalehe biaru aria mbirago ibugua ira tini heago dombeneha deago ibunaga gime ira hedo yalu agali biagonaga gi kirabaliha hedo ya haya. Ani biya handala agali biago ibu ira hedo yalu piya.
EZE 10:8 Ani piyagola handalu hewaria agali handalehe maria biarunaga babagane hearu andaneha agalinaga gi mbira mbira pani hearia handaru.
EZE 10:9 Ai mbirale garo ge ale biaru ti bibahende ogonibi dege dege howa garo ge ale uruni hoaile de daibi ege to̱le̱ ambuabi yolo dewaoreme miaga ngaligobi wiaria handaru.
EZE 10:10 Garo ge ale maria uruni wiago andaneha garo ge ale maria mende wiago uruni polenedagua handa amu nana bu wia.
EZE 10:11 Ani howa mbirale uruni ti mbira poa biragohayagi pole howa beregeda nabi kagoria howa pupe hagaya. Ani bialu agali handalehe maria uruni mbirahayagi pole howabi ti wanakui ho beregeda nabi kagoria howa pupe hagaya.
EZE 10:12 Ani bialu agali handalehe uruni tinaga tingini bibahende erembirahabi gihabi babaganehabi tinaga garo ge ale mbira mbira biarunaga bibahendeni de hondolene dewa hai hearia handaru.
EZE 10:13 Ani hondo hewagola bi mbirame, Garo ge ale uruni ibaga bialu howa mabu mabu bialu haga, layuane hale haru.
EZE 10:14 Agali handalehe maria uruni ti hangu hangunaga dengui maria howa tara tara dege hea. Dengui mbirago nogo bulumaga handalehe howa mendego agali handalehe tebonego budi gabua timbuni laiono handalehe manego ega bodo hariawe handalehe dege dege hearia handaru.
EZE 10:15 Mbirale maria uruni de gandeba hondowa handarudagoni ala Iba Keba peago angeni howa hendenego dege lone handaru. Tigua heyalu harini dai dolope halu pialu howa
EZE 10:16 garo ge ale biarubi nde ti haru mandagi piagaya. Tigua babaganeme yagalalu poragola garo ge ale biarubi ti haru yagalalu mandagi dege piagaya.
EZE 10:17 Agali handalehe maria uruni ti ema nabi hondo heagola garo ge ale tibi ema nabi wiagaya. Ani biagadagoni irane agali handalehe maria biaru tigua garo ge ale urunime bulenego mo bia howa haru haga kagome ani biagaya.
EZE 10:18 Uruni de hondo hewagola Anduane Homogonaga wá holene hongohe ibuninaga anda haneni hadali hayago dai bialu agali handalehe maria biaruni heagoria daligani pu haya.
EZE 10:19 Ani biyago handayaho hewagola agali handalehe biarume tinaga babagane yanga lowa yagalalu hariha iraga halu pialu hearia garo ge ale maria biaru tibi nde o piyagoha mandagi pumaga halu piya. Puwa Anduane Homogonaga andaha pabe bu yaanda hene pabe mende heagonaga panga haraba amu ni tagira ibiragohayagi wiagoria kaware pu haya. Ani pu heagola Anduane Homogonaga wá holene hongohe taraore ti heagoria daligaha hearia handaru.
EZE 10:20 Ani handalu hewaria agali handalehe maria uruni i̱na ala Iba Keba angeni Isaraele wali agalinaga Ngode Datagaliwabe kago andaneha hearia handarugo degeyane mandabu dege haru.
EZE 10:21 Agali handalehe maria biaru mbira mbirago ibunaga dengui maria dege degehe halu tinaga babagane maria dege degehe hearia handaru. Ani bialu tinaga babagane maria hayadaru andaneha agalinaga gi handalehe maria dege dege haihe hea.
EZE 10:22 Abale i̱na Iba Keba peagoha hewaria mbirale maria handarudaruni tinaga dengui o uruni dege lone íbu hearia handaru. Mbirale uruni ti mbira poa biragoha pole howa tinaga tingini ho beregeda nabi kagoria howa tigatiga pupe halu piagaya, lalu Esegielehanda lene.
EZE 11:1 Ani bialu heago handalu hewaria Ngode Datagaliwabenaga Dinini ibugua i̱ minu yaraga halu Anduane Homogonaga anda pabe bu mabu bini heagonaga panga haraba ni tagira ibiragohayagi heagoria yalu pu helaya. Ani biyagola agali pira kirani duria (25) panga haraba heagoria kawareni berearia de handaru. Ani hondowa uruni aria agali kira Isaraele wali agalinaga haguane henego ti heba berearia handaru. Agali kirali ogonilabo Asu igini Yasanaiabi Benaia igini Peladaiabi berearia handaru.
EZE 11:2 Ani hondo hewagola Ngode Datagaliwabehanda i̱hondo lalu, Dindiali-o agali o bedaruni tigua mana ko dege bulenaga hariga taya bialu haabo haga ka. Ani bialu howa tigua wali agali bu karuhondo bulene ngagonaga bi ko hangu lamialu haga ka.
EZE 11:3 Tigua lalu, Inaore wali agali bayaleore kamagonigo inanaga andaru abale biadai bulene nga ndobe. Tano ogoni todobene be tomo dawaga ale nga. Ina wali agali nogo mbirini ale howa todobene beha wiagadagua ina tano ogoha bayale kamagoni, laga ka.
EZE 11:4 Anigo dindiali-o í̠na tihondo bi ogodagua lolene nga. Tí wali agali bayale ndo kamigome tíniha mo ko holene anda ibulebira, labe laya.
EZE 11:5 Anduane Homogonaga Dinini ibugua i̱ha karula howa Anduane Homogohanda i̱hondo lalu, Isaraele wali agalihondo bi ogodagua lamibe, laya. Isaraele wali agali tígua bi laramirubi tínaga miniha midagi bu kamirubi bibahende i̱na manda biaiho kogoni ndobe.
EZE 11:6 Tígua wali agali dewaore tano ogoha bo wahai harimirunaga tingini tanonaga hariga pedaruha wu to̱ledagoni hendedo.
EZE 11:7 Anigo i̱ Anduane Homogo Bibahende Haru Haame Ho Haga kogome ogodagua laro. Heneneore tano ogo ibu todobene be aleore ngagola nogo mbirini baya ngabioreru todobene beha dawa ngago agibe. Nogo mbirini baya ngabi ale ogoni wali agali tígua bo wahai harimirunaga tingini ndobe. Ani birimigo tínibi nde i̱na tano ogoniha howa bo taliatagi holebero.
EZE 11:8 Tí waitigi bu karunaga wai biagane ayu tibu ngago hondowa tígua gi timbuni ho kamibe. Anigo waitigi bu karume tí bo wahole wai biagane ayu tibu mo yalu i̱na ibilolebero.
EZE 11:9 I̱na tí tano ogoniha howa haru tagira pialu agali dindi taraha howa ibirarunaga giha minu ya holebero. I̱na ogonidagua berogome tí pani nalimulo ngialu bo wahai helolebero.
EZE 11:10 Tigua ibalu tíni dindi tubaria ngamigoria howa bo waholebira. Anidagua biragola tí bibahendeme i̱ Anduane Homogo heneneore henedane manda buleberemi.
EZE 11:11 Todobene beni nogo mbirini dawedagola irame dapu nabi bayale wiagadagua tano ogonime tí bayale halimulo biamogo nabulebira. Isaraele dindi bibahende tínaga tubaria wirimidagoha kamiria i̱na ko birimirunaga pani ngulebero.
EZE 11:12 I̱na ani berogola tígua i̱ni Anduane Homogoore henedalo manda biai holeberemi. Tígua i̱naga mana wiago damene bia nabi i̱na bulene nga lo wirugobi talialu nabi puguaiore harimi. Ani birimigo tígua wali agali tara tí baba handa a̱i̱ na̱i̱ padarunaga mana ngago andaneha harimi, laya lene.
EZE 11:13 Anduane Homogonaga bi ogoni mbiwia halu latagi halu hewagola agali haguane Peladaia heago homo ibira haya. Ani homayagola i̱na ge duli hanga ho biruwa ma podalu bi dalimu lalu ogodagua laru. Anduane Homogo Bibahende Haru Haame Ho Haga-o wali agali Isaraele dindiha yu wahene karu bo wahai hole hamelo kebe, laru.
EZE 11:14 Anduane Homogohanda i̱hondo lalu,
EZE 11:15 Dindiali-o Isaraele wali agali Yarusaleme tanoha bu karume í̠ lalubi Isaraele wali agali maru garabaya bu yalu dindi taraha pene karu lalubi tigua bi ogodagua laga ka. Wali agali garabaya minu yalu dindi taraha pu karume ti kaundiaore howa Anduane Homogo mitangi bialu lotu nalabehe kagoni. Anduane Homogo ibuni ti baba naheore. Ibugua dindi ogoni ina kamarume karuloloma̱ya ngiyagoni, lalu ka, laya.
EZE 11:16 Anigo í̠na wali agali garabaya yalu pene í̠ heba kamiruhondo i̱na bi o larogo lamulene nga. Anduane Homogo i̱nime ti dindi tara tara wiaruha hama purogo lelaru. Heneneore ti dindi taraha tigimandi hangu garabaya kago howa i̱hondo bi lolene anda mbira nahe harimigola i̱ni ti heba haabo haga kogome tigua i̱ mitangi bialu lotu lalu helarugoni, laya lamibe.
EZE 11:17 Anigo i̱naga wali agali í̠ heba garabaya kamiru ti hale helo i̱na bi o larogo latagi habe. Anduane Homogo Bibahende Haru Haame Ho Haga kogo i̱na Isaraele wali agali dindi tara tara wiaruha purogo lelarugo haru dai bialu dindi ala tíni harimigoria lone helolebero. Isaraele dindi ogoni tíninagaore wilimulo ngulebero.
EZE 11:18 Lone dai beremingi tígua mbirale dama mitangi bialu bi pupu wulenaga gime wabini ngarubi mana ko ngubi tara tara bialu harimigobi bibahende dindi ogoniha ngaru mo wahai holeberemi.
EZE 11:19 Ani beremigola i̱na mini gahengebi manda bulene gahengebi ngulebero. Abale tínaga mini giambe ege to̱le̱ ale harimigoni ndobe. Anigo áyu i̱na tínaga mini ko ngamiru mo wahai halu i̱na bi larodagua bilimulonaga mini bayale gahenge ngulebero.
EZE 11:20 Ani berogola tígua i̱naga bi mana lowini ngogobi i̱na bulene nga lowirugobi hale halu taluwa bialu holeberemi. Ani bialu howa tí i̱naga wali agaliore holeberemi. I̱ nde tínaga Ngode Datagaliwabeore holebero.
EZE 11:21 Ani buleberogoyu wali agali maru dama mitangi bialu mbirale gime wabini ngaruhondo bi pupu wialu mana ko ngubi ngaru bialu haga karu dege pani mialu bo wahai holebero, lalu lamibe. I̱ Anduane Homogo Bibahende Haru Haame Ho Haga kogo i̱na bi o ledogoniore, laya lene.
EZE 11:22 Ani biyagola emene howa mbirale agali handalehe mariali yagalo yu piyagola garo ge aleru ti heba mandagi piya. Ani piyagola Isaraele wali agalinaga Ngode Datagaliwabe kagonaga wá holene hongohe biagome ti daligani wá hadali haya.
EZE 11:23 Anidagua bialu wá holene timbuni ogonime Yarusaleme tano wahalu puwa ni tagira ibiragohayagi hari mbira wiagoria pu haya.
EZE 11:24 Ani bialu i̱ de gandeba dege handalu hewaria Ngode Datagaliwabenaga Dinini ibugua i̱ Isaraele wali agali Babilono dindi garabaya harimagoha lone haru dai biya. Ani biyagola de gandeba biago ereba haya.
EZE 11:25 Ani bialu mbirale bibahende Anduane Homogohanda i̱hondo mo walia hayaru i̱na Isaraele wali agali garabaya bu hearuhondo lamiai haru, lalu Esegielehanda lene.
EZE 12:1 Anduane Homogohanda i̱hondo ogodagua laya.
EZE 12:2 Dindiali-o áyu wali agali í̠ baba mandagi bu kamiruni ti i̱naga bi mo wahalu erembira ngiaga bu ka. Tinaga de kagoyu tinaga deme baya hangu handa nabiaga ka. Tinaga hale kagoyu i̱naga bi hale habe manga howa mo wahalu i̱ erembira ngiaga kagoni.
EZE 12:3 Anidagua biaga bu karunigo ai dindiali-o áyu í̠na mbiralime ibunaga dindi yu wahalu dindi taraha garabaya biabe ale bu pole lowa manda manda bu hagadagua mbiraga nakaore tininaga deni ani bule pu. Í̠na ani berego wali agali karume de handalu irane ogo ale bira lo manda bilonaga mbira naledaore dege abale ti bu kagoria bolangua haga bialu ibaga bialu hole pu. Ani bialu porego hondowa ti mine haga bu karume í̠na mo walia halu berego tinaga minime manda nabulebira bada.
EZE 12:4 Horombe ni kaore í̠naga dabudabu mbirale uruni wali agali ti de hendelo kabubu manda manda bibe. Ani bialu alendo haragola ti handayaho kaore dege í̠naga dabudabu mo yalu dindi taraha garabaya biabe ale bu piagadagua pobe.
EZE 12:5 Wali agali bu karunaga deni í̠ninaga anda hái bo tidalu mbirale wiriru diri ogoniha howa mo yu tagira pobe.
EZE 12:6 Ani bialu ne̱ laragola ti de hondo kaore í̠naga mbirale kabubu wiriruni payani mo yalu dindi kaundiaha garabaya pole piagadagua í̠ni andaga yu wahalu harigani pialu habe. Harigani porego pialu howa wali agalime hendelo í̠naga dengui kabu biai howa hariga nahende arumaha piagadagua pobe. Í̠na anidagua beregome wali agalinaga miniha mo heya halu manane mbira mo walia holeberego anidagua bibe, laya.
EZE 12:7 Anduane Homogohanda bi ogoni langiya handala puwa i̱na ibugua bibe layadagua biai haru. Horombe dabudabu wirudaru mo kabubu wialu howa alendo hayagola i̱ni andaga biagonaga háiha diri mbira tombelo wiru. Anda hái ayu namarume ndo gi hangume gialaru. Ani bialu diri emene ogoniha howa tagira piru. Alendo ne̱ lolene tiga biyagola i̱naga dabudabu kabubu wirugo payani mo yalu piru. Ani bialu pirugola wali agali bu hearume ti de handai haya.
EZE 12:8 Horo mendengi egerebagi hayagola Anduane Homogo ibugua i̱hondo bi langialu lalu,
EZE 12:9 Dindiali-o Isaraele wali agali i̱naga bi mo wahaga bu hearunime í̠na birigoni agile biribe lalu í̠hondo hale haragola
EZE 12:10 i̱na Anduane Homogo Bibahende Haru Haame Ho Haga kogome i̱naga bi ogo í̠hondo langerogo lamibe. Bi o larogo kini igini kagobi wali agali Yarusalemeha haga bu kamirubi tí bibahende hale helo mbira mani bulebiragonaga bi ogo yido labe.
EZE 12:11 Í̠na wali agali í̠ baba kamirunihondo ogodagua lamibe. Mbirale í̠nime ti hendelo mo walia harigoni irane Yarusaleme wali agali bu kamiruha ogonibi ibulebiragonaga manane mo walia haru. Ai tínaga waitigirume ibalu wai buwa tí dindi tara ngagoha garabaya haru pole ibulebira.
EZE 12:12 Ani ibiragola tínaga kini kago iginime ibunaga dabudabu kabu bu ngaru mo yalu mbira ibida polebira. Agali marume tanonaga pabe kago bo tombelo wiragola kini igini ibu tanoha howa hariga ogoniha tagira pialu polebira. Pialu ibunaga dengui buyi howa pupe haragola ibugua hariga ogoha poroda lo manda nabi polebira.
EZE 12:13 Ani pialu karia i̱na gono baya hangu mo manda manda bu ngeledogoria pialu dolebira. Do ngagola hada yalu Babilono dindiha haru polebero. Haru pu heledogola ibugua dindi ogoni ogobiha pu haruda lalu manda nabiore bame hope holebira. Ani bialu ibu Babilono dindini halu homolebira.
EZE 12:14 Wali agali ibu heba mandagi haga bu karu ti i̱na giligala lalu purogo lelolebero. Uruni ti ibunaga agali haguane dabo helene bu karubi ami agali ibuni mamage haga bu karubi ani bulebero. Ani bialu tinaga waitigime ibalu bo wahai helonaga i̱na ti poragoha talima pelolebero.
EZE 12:15 Anigo i̱na ti hameigini tara tara karuhabi dindi kaundiahabi garabaya bu yalu purogo lelarogola tigua i̱ Anduane Homogoore kogoni manda bulebira.
EZE 12:16 Anigo waimebi hina garimebi waragorumebi Yuda wali agali bibahende bo wahai naholebero. Ti mbira mbira hangu nahomelo yu waholebero. Anidagua berogome mani Yuda wali agali tigua dindi taraha pu howa inaneme mana ko bialu harimadago lalu holebira. Te uruni larago hale howa wali agali tara karume Anduane Homogo heneneore i̱ni henedalo manda bilonaga ani bulebero, Anduane Homogohanda lalu Esegiele lamini.
EZE 12:17 Mani howa Anduane Homogo ibugua i̱hondo langialu lalu,
EZE 12:18 Dindiali-o í̠na tomo nalu howa duru lalu nabe. Iba nalu howabi gi howa mogolalu nabe.
EZE 12:19 Anidagua bialu howa í̠na wali agali dindi taraha bu karu lamialu i̱ Anduane Homogo Bibahende Haru Haame Ho Haga kogome Isaraele wali agali Yarusalemeni bu karu tiha mani bulebiragonaga ogodagua bulebira lalu bi larogo lamibe. Wali agali uruni tigua ti damene karu mo ko halu haabo hagayago ai tini tomo nalu howa duru lalu nolebira. Ibabi nalu bedaria tinaga waitigime ibalu tinaga mbirale bibahendeore dindi andabi bo labu haiore haragola tini gi howa mogolalu birulebira.
EZE 12:20 Tinaga tano áyu wali agali dewa bu kagoha bo gialo wahai haragola dindi bibahende mo ko hai hene embera ibalu wai labu dindi ona wulebira. Anidagua birangi Isaraele wali agali tigua i̱ni Anduane Homogoore henedalo manda bulebira, lamibe, lalu Anduane Homogohanda Esegielehondo lene.
EZE 12:21 Anduane Homogohanda i̱hondo bi langialu lalu,
EZE 12:22 Dindiali-o Isaraele wali agalime bi lalu haabo haga mbira ngago ogo, Agalime mbiwia halu mbirale mbira bulebira larago lola harabe hondole dege kamaria lola nahe mali dewaore hondo haabo kamagoni, lalu haga.
EZE 12:23 Áyu Anduane Homogo Bibahende Haru Haame Ho Haga kogome bi laro. I̱na tinaga bi henene ndo laga uruni lone nalelo mo ereba hai helolebero. Bi uruni lalu hagadagua bi mende gahenge mbira la aribia halu helo ti lamibe. Bi gahenge ogo. Anduane Homogonaga bi mana latagi haga agali kago ibugua ogoale mbira bulebira lalu mbiwia hararu áyu ogoni dege tagira ibulene nga.
EZE 12:24 Anidagua biagago ai agali maru Isaraele dindiha ti Anduane Homogonaga bi mana latagi halu mbiwia haga kama lalu tigua de gandeba mbira handaru lowa wali agali ke̱ howa latagi haga mbirali naholebira. I̱na bi urunialego mo ereba hai helolebero.
EZE 12:25 Ani bialu Anduane Homogo i̱nime Isaraele wali agaliruhondo bi lamulebero. Ani lamialu mbirale ibulebira lalu lo werogo abaleore tagira ibulebira. I̱naga bi mo wahalu i̱ erembira ngiaga kamiru-o bi o larogo hale hadaba. Tí áyu kamiruni hondo kamiore dege i̱na bulebero larugo bibahende tagira ibilolebero. I̱ Anduane Homogo Bibahende Haru Haame Ho Haga kogo i̱naga bi o lai harugoni, lalu Esegiele lamini.
EZE 12:26 Anduane Homogohanda i̱hondo laabo halu lalu,
EZE 12:27 Dindiali-o Isaraele wali agali bu karu tigua lalu, Esegielehanda de gandeba handalu howa ogoale bulebira lalu mbiwia halu mani aweore bulebiragonaga laga ka, lalu karuni.
EZE 12:28 Anigo Anduane Homogo Bibahende Haru Haame Ho Haga kogo i̱na Isaraele wali agali tinaga bi uruni ogodagua ladai bero. I̱na emene mbira hondo ha nabi mbirale bulebira lalu langirugo bi larudagua áyu ogoni abale tagira ibilolebero. I̱ Anduane Homogo Bibahende Haru Haame Ho Haga kogo i̱na bi larugoni agua laya lalu lamibe, Anduane Homogohanda i̱hondo ani lene.
EZE 13:1 Anduane Homogohanda i̱hondo lone lalu,
EZE 13:2 Dindiali-o í̠na Isaraelenaga agali bi mana latagi haga bu karuhondo lai labe. Agali uruni tigua mani bulebiragonaga mbiwia ho wia hagago ogoni henene ndo tini hangu mitangi bialu laga ka. Tigua bi uruni tininaga miniha tagira ibirago bame dege lo paya biaga ka. Tigua Anduane Homogo i̱na bi larogo baya hangu hale helo lamibe.
EZE 13:3 I̱ Anduane Homogo Bibahende Haru Haame Ho Haga kogo i̱na bi ogodagua laro. Agali mini nawi howa tini hangume bi mana latagi haga o bu karuni tiha mo ko holene íbu wulebira. Ti de gandeba henene nahandaga howa bi tininaga miniha tagira ibirago hangu latagi haga ka.
EZE 13:4 Isaraele wali agali kamiru tígua bi ogo hale hadaba. Anduane Homogonaga bi mana latagi haga kama lowa bi henene ngadagua ndo lalu karuni ti tano bo labu hene ngagoha biango dudu ibagabu hagagobi ka.
EZE 13:5 Tigua tanonaga wai pabe kago emene gialaho wigi bidagoha mamage nahaga. Tigua wai pabe lone bia aribia nahe dege ka. Ani bidago ai Anduane Homogo i̱na Isaraeleali pani mialu waitigi ti baba wai bule ibilarogola ti hongo halu heyu howa wai bibe nahe holeberemi.
EZE 13:6 Ani bialu agali uruni tigua de gandeba handarima layago henene ndo ti ke̱ howa mbiwia hayagobi henene tagira naibulebira. Tigua lalu, Iname Anduane Homogonaga bi mana latagi harama, laga kagoyu i̱na tigua bi ogo lalimu lalu mbira naleore. Anigo ai tininaga bi larago henene tagira polobabe tobaho howa latagi agua holedabe.
EZE 13:7 I̱na bi mana ke̱ howa latagi haga agali uruni tíhondo bi ogodagua laro. Tígua de gandeba handarimigo ai mbirale mbira tagira ibulebira laramiligo tínaga bi ogoni henene ndo ke̱ howa laga kami. Tígua wali agali bu karuhondo lamialu lalu, Bi ogo Anduane Homogonaga bi larama lalu latagi haramiligo i̱na bi uruni tígua latagi halimu lalu nalangi ndobe.
EZE 13:8 Anigo i̱ Anduane Homogo Bibahende Haru Haame Ho Haga kogo i̱na tíhondo bi larogo hale hadaba. Tígua bi mana latagi halu wali agalihondo lamialu de gandeba handarima lalu kamiru henene ndo lalu kamigoni. Tígua wali agalihondo ke̱ harimigonaga i̱na tí baba keba timbuniore ho kogoni.
EZE 13:9 Bi mana latagi haga kama lowa ke̱ halu laramiligo de gandeba handarima lalu henene ndo laramiligobi i̱na tí pani nai halimulo ngule kogoni. I̱naga wali agali mo ngoaiho kangi ti heba mandagi naholeberemi. Ani bialu Isaraele wali agali bibahendenaga mini mbugaha gilibu ngagoria tínaga minibi nawulebiraore. Tí bo taliatagi harogola Isaraele dindiha lone dai nabuleberemi. Ani beremingi tígua i̱ Anduane Homogo Bibahende Haru Haame Ho Haga kogo henedane manda buleberemi, laya lene.
EZE 13:10 Agali ke̱ howa bi mana latagi haga karume i̱naga wali agali bu karu mo hondo haga ka. Tigua wali agalihondo lamialu lalu, Mbirale bibahende bayale dege wiai kagoni, laga ka. Anigo mbirale bayale nawiore ndobe. I̱naga wali agalime pabe biyago nde hongo nahe haradagua bida. Anidagua bidagoria agali ke̱ howa bi mana latagi haga karu tigua wai pabe ogoni beni pele hiradambi halu howa lalu, Pabe hongoheoreda, laga ka.
EZE 13:11 Ani laga kago ai agali ke̱ howa bi mana latagi haga uruni tihondo ogodagua labe. Wai pabe o kagoni gialapaya bulebira. I̱na iba dalu timbuni ibilalu dalu dindi kuni timbuni pabe ogoriani ibira halu puyabu hongoheme pabe bo gialope helolebero.
EZE 13:12 Ani biragola wai pabe kago podope haragola wali agali bibahendeme tíhondo lalu, Tígua wai pabe ogoni hongoheda larimigo hongo naheda. Tínaga beni pele hirarimigome ina wali agali mo hondo heneda, lolebira laya lene.
EZE 13:13 Anduane Homogo Bibahende Haru Haame Ho Haga kagome bi ogodagua laragoni. I̱na keba timbuniore ho kogome i̱na iba dalu timbunibi dindi kuni puyabu hongohebi ibalu wai pabe ogoni bo gialabaga biai helonaga anidagua ibilolebero.
EZE 13:14 Ani bialu i̱na agali ke̱ howa bi mana latagi haga biarume wai pabe beni pele hirini kago bo gialo wahai harogola wai pabe gialabaga bu wulebira. Ani bidogola pabe henegoria dindi dege wulebira. Pabe podope harangi tí bibahende podo bai holebira. Anidagua birago hondowa tígua Anduane Homogo i̱niore henedane hondoleberemi larogoni, laya lene.
EZE 13:15 Isaraele wali agaliru-o i̱ keba timbuniore kogo ainde i̱na wai pabe ogoni bo gialo wahai halu bi mana ke̱ howa latagi haga agali hearume pabe beni peleme hiradambi haga karu tinibi pani nelo mialu bo wahai holebero. Ani buwa i̱na tíhondo langero. Ai pabe biago bo gialapaya biai halu pabe ogoni beni hiraga biarubi homai haya lalu langulebero.
EZE 13:16 Ke̱ howa bi mana latagi haga agali uruni tigua Yarusaleme wali agali hearuhondo lamialu lalu, Mbirale bibahendeore bayale wiai ka, layago bibahende bayale ndo wiagola howa leneya. Ani wiagola i̱na mo ko hai harugoni. I̱ Anduane Homogo Bibahende Haru Haame Ho Haga kogo i̱na bi o ledogoniore, laya lene.
EZE 13:17 Anduane Homogohanda lalu, Dindiali-o Isaraele wali maru bedarume tini hangume manda bialu mbirale ogoale bulebira laga bedaruni talibe. Tigua bi laradaruni tininaga miniha howa tagira ibirago dege latagi haga bedagoni.
EZE 13:18 I̱ Anduane Homogo Bibahende Haru Haame Ho Haga kogome bi ogo í̠na wali urunihondo lamibe. Wali uruni tí ko biagaore bedamigo tíha mo ko holene íbu wulebira. Tígua hubibi nu emene mbira aga pume buwa wali agalinaga gi pagida ngagoha ya do helaga beremili. Ani bialu agame nu tangi buwa hubibi ogoniha wia haga beremili. Tígua hubibi o beremidagoni irane tí hongohe halu mendealigo bope howa tí andaneha bedagola tígua handayaho holenaga hubibi ani biaga bedami. Wali bedemiruni tígua tíni dege mitangi bialu i̱naga wali agali maru mo ko halu maru mo bayale halu bulene hamelo bedemigoni ndobe. Tínime mandabu handalu kamiria mana ogonibi bialu bedemigo bayaledabe.
EZE 13:19 Tígua wali agali bu karuhondo ke̱ howa ti mo hondo halu, Iname Ngode Datagaliwabenaga bi mana latagi halu kama, laramili. Anigo bi ogoni henene ndoyago. Tígua i̱ yo handalu i̱naga mini mo dindiha holenaga laramili. Tígua hubibi bialu wali agali maru homolene nawini homelo bo wahalu maru bayale ndo ko biaga karu nahome bayale helo biamogo beremili. Anidagua beremigola wali agalime tínaga mana ogoni hondowa ti turu howa tíhondo mberedi emene gaibini mbira balawa balime wabini mende lowa ogoni labome ti yolo biragola tígua nde mana ko uruni biaabo haga bedami.
EZE 13:20 Anidagua biaga kamigo ai i̱ Anduane Homogo Bibahende Haru Haame Ho Haga kogo i̱na bi ogo laro. Tígua wali agali mende kago bope halu handaya ho holenaga hubibi gi pagidaha yaramiligo hondowa i̱ turu nahe ko. Wali agalime ega gono wiagadagua tígua wali agali mendeali kago hubibime bope ho helowa handayaho haga kamigonaga i̱ manga ho kogoni. Wali agali tígua handayaho kamiruni tí andaneha haabo nahelonaga i̱na tínaga gi pagida budu waholebero ndobe.
EZE 13:21 Ani bialu hubibi biaga nu tangi haguani dambi haga biago bibahende mo wahai holebero. Ani berogola i̱naga wali agali tí andaneha hayaruni ibida pelonaga i̱na tínaga hongo bope ho helolebero. Anidagua berogola tígua i̱ Anduane Homogo heneneore henedane manda buleberemi.
EZE 13:22 Tígua ke̱ howa bi dewa lalu haramigome wali agali bayale bu hearunaga mini mo luluya harimi. Ani birimigo wali agali uruni mo ko helo hame naledogo tígua mo ko harimi. Ani bialu tígua wali agali ko biaga bu karu bayale helo biamogo nabirimigo tinaga mana ko biaga wiaru yu wanahe biaabo halu kagoni ndobe. Tigua mana ko bialu hagaru yu wahenedale nde tini bayale kale.
EZE 13:23 Anigo tígua wali agali karuhondo ke̱ howa mani bulebiragonaga mbiwia haramilirubi de gandeba handarima lalu henene ndo laramilirubi uruni mani nabilimulo áyu biba helarogoni. I̱naga wali agali i̱nime haru dai berogola tí andaneha naholebira. Ani berogola i̱ni Anduane Homogoore henedane manda biai holeberemi, laya lene.
EZE 14:1 Isaraeleali agali haguane maru hearu tiha genda mbira wu howa tigua i̱ha birapara howa lalu, Anduane Homogonaga hame ngago hale ha, laya.
EZE 14:2 Ani layagola Anduane Homogohanda i̱hondo langialu lalu,
EZE 14:3 Dindiali-o agali uruni tigua dama mitangi bialu mbirale gime wabini ngaruhondo bi pupu wiaabo haga kagome tiha ko timbuni wu ka. Anigo tigua mbirale gime wabini uruni gubalini timbuni ho howa yu waholene hame nale ti bame dege íbu bedago tigua i̱hondo bi hale harago i̱na ladai bulebero mitangi bu bedabe.
EZE 14:4 Anigo áyu agali haguane uruni tihondo Anduane Homogo Bibahende Haru Haame Ho Haga kogo i̱na bi o larogo tihondo lamibe. Isaraeleali mbirame dama mitangi bialu mbirale gime wabini ngagohondo bi pupu wulene mo tene howa ibuha ko ngago yu wahoa nahe Anduane Homogonaga bi mana latagi haga kagohondo i̱naga hame ngogo hale ha lama ibiyagua nde i̱na ibuhondo bi mbira lamulebero. Ibugua dama mitangi bialu gime wabini dewa ngaruhondo bi pupu wulene mo tene hayagonaga i̱na hongo howa ladai bulebero.
EZE 14:5 Isaraele wali agali bu karu tigua dama mitangi bialu mbirale bi pupu wule gime wabini ngarume ti mo koore hayagola i̱ erembira ngialu piai hene. Ti ani biyagoyu i̱na i̱naga hame ngodagua ladai berogola tigua manda biyagua nde gime wabini ngaru wahalu puwa i̱ni hangu mitangi bialu holoba bada.
EZE 14:6 Anidagua bulebirago áyu nde i̱na Isaraele wali agalihondo bi ogodagua lolene hameledo. I̱ Anduane Homogo Bibahende Haru Haame Ho Haga kogo i̱na tígua dama mitangi bialu mbirale gime wabini ko ngubi ngarunihondo bi pupu wirimigo wahalu i̱ni koria dai bilimu laro.
EZE 14:7 Agali mbira ibu Isaraeleali heaguabi dindi tarali tí heba íbu hene heaguabi mbiragome i̱ erembira ngialu mbirale gime wabini wiaruhondo bi pupu wialu ibu mana konaga tene ngago yu waholene hame nale howa i̱naga bi mana latagi haga kagohondo i̱naga hame ngogo hale hole ibiyagua nde i̱ Anduane Homogo i̱ni hameore ngogo ibuhondo walia holebero.
EZE 14:8 I̱na nde ibula waitigi halu Isaraele wali agali tí heba nahelo bo taliatagi helolebero. I̱na o biagohondo ani berogola tí bibahende kamirume i̱ni Anduane Homogo henene henedane hondoleberemi.
EZE 14:9 Anigo agali i̱naga bi mana latagi haga kagome i̱naga hame ogobi nga lalu ke̱ halu latagi helo mbiralime ibuhondo bime ladebodebo biyagua ogoninaga irane i̱nime ibunaga mini mo libilabalo heledogola ibugua bi ogoni latagi holebira. Ani latagi haragola i̱naga wali agali bu karu heba mandagi nahelo i̱na ibu bo taliatagi halu mo ko holebero.
EZE 14:10 I̱na agali bi mana latagi haga biagobi agali mende bi hale hole ibaga biagobi libu haru pani ogobi labolabo nelo mulebero.
EZE 14:11 I̱na ogonidagua bialu Isaraele wali agali tígua i̱hondo erembira nangilimulobi mana ko nabilimulobi i̱naga deni tí dodo nahe halimulonagabi hariga hangai halu anidagua bulebero. Anidagua berogola tí i̱naga wali agaliore holeberemi. I̱ nde tínaga Ngode Datagaliwabeore holebero. I̱ Anduane Homogo Bibahende Haru Haame Ho Haga kogo i̱na bi o ledogoniore, laya lene.
EZE 14:12 Anduane Homogohanda i̱hondo langialu lalu,
EZE 14:13 Dindiali-o wali agali dindi mbira mbiraha haga karume mana ko bialu i̱hondo erembira ngialu mbirale tara mitangi bialu mo dununi hayagua nde i̱na dindi uruniha bu karu tinaga tomo nolene bereba halu hina gari pelolebero. I̱na wali agalibi tinaga nogo tara tara bu karubi bibahende tomo nolene bereba halu homai helolebero.
EZE 14:14 Noa Daniele Yobo imaru agali tigabi uruni dindi ogoriani kale tigua mana bayale biyagome tini hangu nahome kale. Anduane Homogo Bibahende Haru Haame Ho Haga kogo i̱na bi o ledogoniore, laya lene.
EZE 14:15 Anigo i̱na wali agalinaga tomo nolene bereba holene ndo waharuyagua nde nogo gabuame wali agali dindi ogoniha karu bo wahai helo ibilolene manda bulebero. Anidagua berogola wali agali mbira dindi ogoniha polene gi howa napolebira.
EZE 14:16 Noabi Danielebi Yobobi dindi ogoniha henedale ti ani helowa tigua tinaga waneigini bu karubi mo wia nabi homai dege kale. Tebirali uruni tini hangu pele midale. Anidagua biragola dindi hangu ibira halu embera timbuni ngale. I̱ Anduane Homogo Bibahende Haru Haame Ho Haga howa Ngode Datagaliwabe haluhe heneneore kogobi i̱na bi ogoni heneneore ledogoni.
EZE 14:17 Ani ndoyagua nde i̱na waitigi bu karu ibilalu waitigime wali agalibi nogo tara tara bu karubi bibahende bo wahai helo ibilolene manda bulebero.
EZE 14:18 Ani berongi Noa Daniele Yobo imaru ti dindi ogoriani henedalebi tinaga waneigini mo wialu biamogo bibe nahe dege kale. Agali tebira urunime tini hangu bayuwa helalu wali agali bibahende homai holene ngale. I̱ Anduane Homogo Bibahende Haru Haame Ho Haga howa Ngode Datagaliwabe haluhe heneneore kogobi i̱na bi heneneorego o ledogoni.
EZE 14:19 Ani ndoyagua nde i̱naga miniha tandaga timbuniore ho kogo ereba helonaga warago ko taraore dindi ogoniha ibilalu wali agalibi nogo tara tarabi bibahende bo wahai holene manda bulebero.
EZE 14:20 Agali tigabi Noa Daniele Yobo imaru ti dindi ogoniha henedalebi nde tinaga waneigini mo wialu biamogo bibe nahe dege kale. Agali tebirali uruni ti mana bayale biyagome tini hangu nahome kale. I̱ Anduane Homogo Bibahende Haru Haame Ho Haga howa Ngode Datagaliwabe haluhe heneneore kogobi i̱na bi heneneorego o ledogoni.
EZE 14:21 Anduane Homogo Bibahende Haru Haame Ho Haga kogome i̱na bi ogodagua laro. I̱na mbirale mo ko holene koorene ko tara tara maria uruni Yarusalemeha ibilalu wali agali bu karu pani mialu bo wahai helo ibilaga bulebero. I̱na waitigi ibilalubi hina gari ibilalubi gabua tara tara bu karume bo nelo ibilalubi warago ko ngaru ibilalubi urunime wali agali bo wahai helo ibilaga bulebero. I̱na uruni ale ibilarogome wali agalibi nogo hinini tara tarabi bibahende bo wahai holebero.
EZE 14:22 Anigo ai horo ogoningi Yarusaleme wali agali maru homa nabi heagua nde ti í̠ kegoria ibiyagua tigua mana ko bialu haga ngago í̠nime panigi hondolebere. Ani hondowa í̠na ti dara nahabe. Yarusalemeni wali agali tigua mana ko taraore bialu haga wiago hondowa i̱na ti pani mialu mo ko holene ibilarugo ogoni tigatigaore binida lo manda bulebere.
EZE 14:23 Ani bialu i̱na ti mo ko howaore pani nelo muleberogo bame ndo irane wiagola pani nelo minida lo manda bulebere. I̱ Anduane Homogo Bibahende Haru Haame Ho Haga kogo i̱na bi o ledogoniore, lalu Anduane Homogohanda Esegiele i̱hondo laya, lene.
EZE 15:1 Anduane Homogo ibugua i̱hondo bi lalu,
EZE 15:2 Dindiali-o pu mbira lini daga mini gerebi kagoni ira mbira ogobi kabe. Gerebi pu ogoni ira maru irabuha bayale karubi kabe.
EZE 15:3 Gerebi irane ogonime mbirale galone mbira bibehebe. Gerebi gene mbirago dibalu todobene be delolenaga gemboge hangubi wabibe naheore.
EZE 15:4 Pu gerebi lini daga ogoni dibalu ira delo irani delolene hangu karulape nga. Ani bialu irani deledagola nguini labolabo dowa dombeni tigini nade wiagua nde ogonime yamialu galone mbira bibehebe.
EZE 15:5 Pu ogoni irame da nabi wiagolabi galone nabulene dege wini. Anigo irame dayagola ai mo koore hene galone mbira bibe naheore wiaga ndobe.
EZE 15:6 Anduane Homogo Bibahende Haru Haame Ho Haga kogo i̱na bi ogodagua laro. I̱na ira maru irabuha karu helowa gerebi irane hangu ira delolene manda birudagua i̱na Yarusaleme tanoha wali agali bu karuhondo pani mulebero.
EZE 15:7 I̱na ti baba waitigi halu ti minu bai holebero. Ira pigane dayagome ti da nabigo ainde ira halu mende daragome ti daiore holebira. I̱na ti pani nelo miai harogola í̠bi Isaraele wali agali maru karu tiguabi i̱ni Anduane Homogo heneneore heneda lo manda buleberemi.
EZE 15:8 Yarusaleme wali agali tigua i̱ erembira ngialu i̱hondo mini bilina naheore hayagonaga i̱na tinaga dindi ngago mo ko halu dindi yamo embera hangu ngelolebero. I̱ Anduane Homogo Bibahende Haru Haame Ho Haga kogo i̱na bi o ledogoniore, laya lene.
EZE 16:1 Anduane Homogohanda i̱hondo laabo halu lalu,
EZE 16:2 Dindiali-o í̠na puwa Yarusaleme ibu mana ko ngaru bialu hayarunaga lamialu bi hongo howa lamibe.
EZE 16:3 Anduane Homogo Bibahende Haru Haame Ho Haga kogo i̱na Yarusalemehondo bi larogo ogodagua lamibe. Yarusaleme í̠ore wali ko aba ai̱yala mana ko biaga wane biragagobi í̠ ngegoni. Í̠ aba ibu Amoroali halu í̠ ai̱ya ibu Hidi wali berene. Í̠ni Kenana dindi howa taba henenego ngegoni.
EZE 16:4 Í̠ ai̱yahanda taba hanayangi í̠naga lumbipu napode helene. Í̠ ibame wayawaya balu doma nabi wahalu tinginini marasiniru ibimebi ha̱i̱ nahe wahalu agame mo kabu nabi ngelo wahalu biniya.
EZE 16:5 Mbiralime í̠ dara halu o larogoni damenego mbira nabiore winiya. Í̠ taba hanayangi howa tigua í̠ gubalini naheore howa bameore taniha hono wahalu piyaya.
EZE 16:6 I̱ hariga ibalu handalu hewaria í̠ ona wiaria handa walia haru. Í̠ áyu dege ai̱yahanda hono wahalu pene darama bagabi ema bialu wiria handaru. I̱na í̠ homabelo hame nale howa i̱na lalu,
EZE 16:7 Í̠ore homa nabi bayale anda halu mbirale eganeru bayale taraore anda hagadagua í̠ anda halu timbu luni halu wandari bayaore birabelo handayaho howa biamogo biru. Ani biwagola wandari mabuage halu andu ibalu mandari bayale anda ho birari. Ani bira biruwa dege aga mbira nabi í̠ ti babe biraabo harigoni.
EZE 16:8 Ai i̱ dai buwa handalu hewaria í̠ agali pobehe berego handaru. Ani berego hondowa i̱naga aga tohe dagarenaga biaga mbirame í̠ ti babe berego bia dambi helaru. Ani buwa i̱na í̠la habo nalolene bi mbira lo wialu í̠ i̱ one birabelo dabu buliya lalu lo wiru, lalu Anduane Homogo Bibahende Haru Haame Ho Haga kago ibugua bi ogoni lene.
EZE 16:9 Ibugua lalu, I̱na í̠ha darama heago ibame waya waya bo wahalu ira olibe lini ibane baya wiago yuwa í̠naga tingini ha̱i̱ haru.
EZE 16:10 Ani buwa aga bayale tara gime yári bialu wabu wiagobi í̠naga ge su nogo dongone bayaleme wabini wiagobi mo karula haru. I̱na í̠ mo yári bia halu aga bayaleme í̠naga emboneni heda ale wialu í̠naga aga luni bayaleore wiwago mo ngialu biru.
EZE 16:11 Ani bialu yári bulene tara tara wiaru mo ngiaiore haru. Gi pagida gurubu geleme bene mo ngialu ma gagua wiarubi mo ngiru.
EZE 16:12 Ani bialu nguira dolenebi hale ira dolenebi mo ngiai halu biru. Ani buwa kuini walinaga manda baya tara wiagobi í̠naga haguaneni mo karula halu biru.
EZE 16:13 Ani birugola í̠ni yári bulene ngolobi silibabi dewaore wuwa í̠naga aga baya taraore pu bayale mbirame wabinigoria yári tara tararuhe wirigobi i̱na dege mo ngiru. Ani bialu tomo nabelo mberedi balawa bayalerume wabini wiarubi mone taranaga ibane dendebiorebi ira olibe lini ibanebi í̠ tomo uruni nalu birabelo ngiai harugome í̠ wandari baya taraore mbira biruwa kuini wali birarigoni.
EZE 16:14 Ani bereria wali agali dindi bibahendeha hearume hale halu hearia í̠ wandari baya taraore mbira beda lene birari. I̱nime í̠ mo yári bia harugome ani birarigoni lalu Anduane Homogo Bibahende Haru Haame Ho Haga kago ibugua bi ogoni lene.
EZE 16:15 Ani birugola í̠na mitangi bialu heria i̱ bayaleore ani berene bedolo mitangi bu bedegoni. Ani mitangi bu bedegola agali bu karume í̠ore hame laiho kagoni. Ani kagola í̠ nde baya tingi howa mine halu agali í̠ bederia ibiraru baba tanabi kayu yu paliai hariya.
EZE 16:16 Ani bialu howa í̠naga aga bayale wiriruni mo yalu puwa mbirale dama mitangi bialu bi pupu wiaga gime wabini ngaru mo yári bia hari. Anidagua birigome agali maru ta nabi hearu ti í̠ni baba kayu yu palue dindi ogoniha ibilonaga ndole bialu harigo mana ogoni ko ngubiore bialu bayanda wali harigoni.
EZE 16:17 Ani bialu muni ngolo silibaru í̠ni yári bibelo ngirugo mo yalu puwa ogonime mbirale dama agali ka mitangi bialu wabu helowa ogonila mana ko wiaru bialu birari.
EZE 16:18 Ani buwa i̱na í̠ aga yári tarahe mo karula harugo mo yalu puwa mbirale dama agali ka mitangi bialu bi pupu wule wabu helene biago aga uruni mo karula hari. Ira olibe lini ibanebi ira hagua nga bilo delaga inisenesiru i̱na ngirugobi mo yalu puwa mbirale gime wabini urunihondo bi pupu wialu lomabu delole piri.
EZE 16:19 I̱na í̠ tomo bayaleru nalu birabelonaga balawa bayalerubi olibe lini ibanerubi mone taranaga ibanebi ngirugoni. Ai tomo uruni mo yalu puwa í̠ni mo turu helonaga mbirale dama mitangi bialu gime wabini wiarunaga lomabu mule mo yalu piriya, lalu Anduane Homogo Bibahende Haru Haame Ho Haga kagome bi ogoni lene.
EZE 16:20 Anidagua bialu iyanaga waneigini hono wiribaru haru halu puwa mbirale dama mitangi bialu gime wabini wiaruhondo bi pupu wialu bo lomabu mule pugu birigoni. Wali agali kayu yulenego mana ko ngubiore ngago í̠ni manda birigo buwa í̠naga bu miniha ogonime nakarulape degedagola í̠ni mo ko timbuniore holenego garibilo bedegoni.
EZE 16:21 Ai mana ko ngubiore ogoni bialu birulene hamelo biruwa i̱naga waneiginiru bu hearubi mbirale dama mitangi bialu gime wabini wiaruhondo bi pupu wialu bo lomabu delai harigoni.
EZE 16:22 Í̠ galiore hono wahene burupaleore ona wiria i̱na ogodagua mo mondo bialu hene lalu í̠ni langirugo hale howa nahalehe tingi halu puwa agali kayu yama ibaga bialu mana ko ngubiore ngarubi bialu biraabo haga bedegoni. Horo i̱na í̠ handa walia harudangi í̠ daramame dohego ona ema bialu wiria handa walia haru lalu langirugo mitangi nabi dege bedebe, lene.
EZE 16:23 Anduane Homogo Bibahende Haru Haame Ho Haga kagome laabo halu lalu, Í̠ keria mo ko holene ibulebira laro. Í̠na mana koorene ko uruni biai halu
EZE 16:24 hariga tene wiaruha pialu mbirale dama mitangi bialu gime wabiniruhondo bi pupu wulenaga anda bu helowa anda uruniha wali agali kayu yu paliaga bule bu helarigoni.
EZE 16:25 Í̠nime i̱ wali bayaore bedogonida lowa í̠na agali í̠ bedegoria pu bolangua hole poraru olalu íbu laga bialu í̠nila kayu yu paliaga biruwa í̠ha mana ko ogoni bulene bolanguaheore bedegoni.
EZE 16:26 Iyibiali tiha mana ko bulene miniha didi halu bolanguahe kaware hearu tigua ibalu í̠nila kayu yu palelo hadape ho bedegoni ndobe. Í̠na i̱ mo keba holenaga agali kayu yama ibaga bialu biraabo kegoni.
EZE 16:27 Abale í̠na ani dege bialu berenego ai i̱na í̠naga mbirale bayale damene i̱nime ngini yu bereru bibahendeore mo wahai haru. Ani bialu Pilidialirume í̠ hame nale halu í̠naga mana ko bialu biraga wirunibi handabe manga timbuni haga karu tigua í̠ mo ko helo i̱na ti ibilarugoni.
EZE 16:28 Agali í̠ baba kayu yu paliaga biaruni bibahendeme í̠naga hame wigo nakarulape degeyagola ainde Asiriali hearu baba kayu biri. Ani bialu bereria Asirialiru tiguabi í̠naga hame biba nahe dege.
EZE 16:29 Ani dege wigola ai Babilonoali agali biyinaya biaga hearu baba kayu biaga wali í̠ore birarigoni. Ani bialu heriabi í̠naga hame wigo biba nahe dege wiaabo ho nga.
EZE 16:30 Anigo Anduane Homogo Bibahende Haru Haame Ho Haga kogo i̱na í̠hondo bi mbira langero. Í̠na mana ko uruni dege bialu biraabo kegome ai mana ko ogoni bulenego í̠ bayanda wali taga nahaga elaheore bedegoni.
EZE 16:31 Hariga tene wiaru bibahendeha mbirale dama mitangi bialu bi pupu wiaga wiaruhondo bi pupu wulebi wali agali kayu yu paluenebi anda dewaore bu helama pede. Ani bialu í̠ bayanda wali maru bedarubi ndo bede. Marume agali kayu biragome muni mbiraleru migi birago mo yagago í̠na ogonidagua agali kayu yalu howa tihondo muni mbiraleru ngi lalu mo yulene hame nale bede.
EZE 16:32 Í̠ walime ibu agalini gubalini nahe yu wahalu puwa agali tara bu karu baba kayu yama ibaga bialu biragagobiore bede.
EZE 16:33 Bayanda wali bibahende bedarume tinaga yolo mirago mo yaga beda. Anigo í̠ ogonidagua nabiaga biruwa agali dindi bibahendeha bu karume í̠ baba kayu yu palue ibilonaga í̠na ti mo turu halu mbirale bayaleru bame mo miriliya.
EZE 16:34 Í̠ agali mbirame mo bayanda wali berelayagola berene ndo í̠ taraore bede. I̱nimeore biraro lalu mbira ani bedane nahendene ale tara mbira í̠ biruwa agali kayu yaregonaga yolo mo ya nabiaga biruwabi agalime í̠ kayu bilonaga í̠nime agali yolo biaga bedegoni. Heneneore bayanda wali nahendene ale taraore mbira í̠ bedegoni, lalu Anduane Homogohanda lene.
EZE 16:35 Anduane Homogohanda laabo halu lalu, Bayanda wali Yarusaleme-o i̱na bi larogo baya hangu hale habe.
EZE 16:36 Anduane Homogo Bibahende Haru Haame Ho Haga kogo i̱na bi ogodagua laro. Í̠ninaga aga golo wahalu í̠ni tingini agali í̠ dimagoli haga bu hearuha ya edede bima ibaga bialu birariya. Í̠na mana ko ngubi uruni bialu biruwa mbirale dama mitangi bialu gime wabini wiaruhondo bi pupu wialu í̠ni ti mirigoni. Ani buwa í̠naga waneiginirubi balu dama mitangi bialu gime wabini urunihondo bo lomabu mirigoni.
EZE 16:37 Ai í̠naga agali nenege uruni bibahende í̠na gubalini ho henebi maru hame nale hearubi bibahende mo mogo bialu í̠ni bedegoria ho mabu bule ibilolebero. Ani ibilalu ti í̠ bederia ho mabu bu helalu tinaga deni howa í̠naga aga bibahende golo wahai harogola aga nabiore bame ti babe holebere.
EZE 16:38 Í̠na dabu binigo mana pugualubi wali agali dewaliore homelo bo wahai harigonibi uruni bialu harigonaga i̱na í̠hondo keba timbuniore halu í̠ manani íbu helowa dabaki halu ko bialu haridagonaga í̠ homabelo bo waholebero.
EZE 16:39 Í̠naga agali nenege uruni tigua í̠ mo ko holebira. Tigua í̠na dama mitangi bialu mbirale gime wabiniruhondo bi pupu wulenaga anda í̠ agali kayu yu paliaga bu helariruni bibahendeoreme bo gialo wahai holebira. Ani bialu tigua í̠naga aga bayale bu bederubi ma gagua wu bederubi gi pagidarubi í̠na yári bu bederuni bibahende minu golo wahaiore haragola í̠na lone mo karulolene mbira nawi ti babe ona birulebere.
EZE 16:40 Í̠naga agali nenege uruni tigua wali agali bu karuhondo ndelo miragola tigua í̠ ege to̱le̱me balu wai biaga ayu tibume dibalu í̠naga tingini poda bagabu waholebira.
EZE 16:41 Ani buwa tigua í̠naga anda bu helederu bibahende bo heda hai haragola wali dewaore biru ngarume í̠ha mbirale o bulubadaruni hondolebira. Í̠na mana urunidagua bialu agali bu karu í̠ andagaha í̠la yu paliaga bilo ndole bialu mbirale mbirale tihondo mialu ala birilidagua lone nabibelo i̱na yupe naholebero.
EZE 16:42 Anidagua berogome i̱na keba ala harugo mo ereba halu i̱naga bu miniha mo palia halu i̱naga keba holenebi henge lolenebi lone nawulebira.
EZE 16:43 I̱na í̠ wandari mabuage berengi howa biamogo bialu handayaho hama ibirugo í̠na uruni birugo mo embeda halu mana ko dewaore bialu biraabo harigoni. Anidagua birigome í̠na i̱ mo keba hari. Anigo í̠na mana ko timbuniore bialu harirunaga pani nabelo ngirugoni. Í̠na mana ko dewaore uruni dege ndo í̠na agali bu hearu baba kayu yu palima ibaga bialu harigome biatago harigo aginaga biribe, lalu Anduane Homogo Bibahende Haru Haame Ho Haga kagome lene.
EZE 16:44 Anduane Homogohanda laabo halu lalu, Yarusaleme-o wali agali mani holebiraru tigua í̠ mo ko hene ngago de hondowa, Wandari ibu ai̱yanaga mana hangu talialu biraga o bedagoni, lolebira.
EZE 16:45 Heneneore í̠naga mana berego handalu karia í̠ ai̱ya hagirume bialu biraga ngagobi dege bialu bederia hendedogoni. Í̠ ai̱ya ibu agalini waneiginirubi hame nalaga berene. Í̠ hagibunirume ti agalini waneiginirubi handabe manga ho biragadagua í̠ bedegoni. Í̠ ai̱ya ibu Hidi wali biralu í̠ aba ibu Amoroali halu binigo libu wane í̠ bedegoni.
EZE 16:46 Dindi abene uyurayagi Samaria tano ngagoni ibu í̠ hagibuni wahene nga. Tano emene maru wu mabu bidaru ti ibu waneru ale nga. Ani bialu dindi abene unurayagi Sodomo tano ibu í̠ hagibuni heyogone ale wialu tano emeneru ti ibu waneru ale nga.
EZE 16:47 Abale í̠ hagibuni kira ogonilabo libugua mana ko ngaru hangu bialu biraabo hagadagua í̠nabi nde ogoni talialu birida. Anigo ai í̠naga mana ko biaga ngegome í̠naga hame wigo biba nahayagola í̠na mana ko timbuniore ngaru abaleore lone biatago halu í̠ hagibuni ogoni labome bialu berene ngarubi nira dege lowa bu bolangua harida.
EZE 16:48 I̱ Anduane Homogo Bibahende Haru Haame Ho Haga kogo i̱na Ngode Datagaliwabe haluhe heneneore kogobi í̠hondo bi heneneore ogodagua laro. Í̠ hagibuni Sodomo halu ibu waneiginirume mana ko áyu í̠ni heba í̠ waneiginirume bialu bedamigonidagua ndo bialu berene.
EZE 16:49 Ibunibi ibu waneiginirubi ti tomo dewa karulape nalu howabi ti wai nabi bayale biragabi henegoyu tigua mine halu maru hearu mbirale nawi tubagiho hearia handayaho nahagabi mbirale mia nabiagabi hene.
EZE 16:50 Tinaga miniha giambe howa mine tara haga hene. Tigua mbirale i̱na hame nalaga wiaru bialu haga hene. Tigua mana ko uruni bialu heago hondowa i̱na ti bo wahai harugo í̠ manda bu ke.
EZE 16:51 Samaria ibuguabi nde mana ko dewaore áyu í̠na bialu bedarunidagua nabiaga hene. Ai mana ko í̠na bialu bederuni ko ngubiore í̠ hagibuniru tigua bialu hayago bolangua howa bialu bedegoni ndobe. Mana ko í̠na bini í̠ hagibuniru tigua binirubi mo mandabu handalu keria í̠na binigo ko timbuni ngubiore bialu tigua biniru bame degedane hondolebere.
EZE 16:52 Ai í̠na mana ko damene bini ngeru baba í̠ hagibuniru tigua bini ngaru baba mo manda bu handalu koria í̠ha ko timbuniore í̠ hagibuniru tiha ko mbira nawi beda labehedane hendedogoni. Anigo í̠na birirunaga taga timbuniho birulene nga. Í̠nime mana ko tagabi wiaru bialu birarirunaga pani áyu noleberego í̠ni miniha genda yuwa tagaho birabe, lene.
EZE 16:53 Anduane Homogohanda laabo halu lalu, Yarusaleme-o áyu í̠ hagibuni kirali Sodomo Samariala libu waneiginiru heba bibahende mo ko hai hene ngagoni. Anigo mani i̱na libu lone mo bayale holebero. I̱na í̠bi mo bayale dege helarogola tí haru mandagi bayale holeberemi.
EZE 16:54 Ani howa í̠nime mana ko bialu birarirunaga taga halu birulebere. Ani bedego hondowa í̠ hagibuni kirali biagolabo libunaga ko genda wiyaru bame degedane hondolebira.
EZE 16:55 I̱na libubi libunaga waneiginirubi biamogo berogola ti bayale abale haraligobi lone hadai bulebira. Í̠nibi í̠ waneiginirubi tínde abale bayale haramiligobi dege lone hadai buleberemi.
EZE 16:56 Abale í̠ wali bayale bedobe toba howa mine ho biralu í̠na Sodomo ibu wali ko bedago mitangi bialu oba ho birarigoni.
EZE 16:57 Í̠ ani mine ho berengi mana ko í̠na bialu wiriru mo pani nahe birari. Ai mana ko bialu birarigo uruni pani ho ngagola í̠na Sodomohondo oba haridagua wali agali maru bu karume í̠ de hondowa oba halu ka. Idomo wali bedarubi Pilidia wali bedarubi wali maru kaware bedarubi tigua í̠ wali ko ngubi mbira o bedagoni lowa hondo mege bialu beda.
EZE 16:58 Ani biragola í̠na mana ko bialu agali kayu yama ibaga bialu birarigonagabi mana ko maru bialu birarigonagabi taga pani nalu genda yu birabelo mo ngulebero, lalu Anduane Homogohanda bi ogoni lene.
EZE 16:59 Anduane Homogo Bibahende Haru Haame Ho Haga kagome laabo halu lalu, Yarusaleme-o i̱na í̠hondo bi mende langule yidogo. Abale í̠ wandari mabuage berengi i̱naga habo nalolene bi mbira í̠la lo wirugoni. Anigo bi ogoni lo wirugo í̠na mo nagalone halu puguarigoni. Anidagua birigonaga i̱na í̠hondo mana ko í̠ni birigonaga pani nabelo karulapeore ngulebero.
EZE 16:60 Ani bialu ala í̠ boga nabi wandari hibaria berengi i̱na í̠la habo nalolene bi lo wirugoni embeda nahe bulebero larudagua biaiore holebero. I̱na habo nalolene bi gahenge í̠la lo werogola bi ogoni wiaaboboore wulebira.
EZE 16:61 Ani bialu í̠ hagibuni wahene heyogonebi kirabali ogoni labo í̠ni bedegoha haru daibu berelarogola í̠ni wane aleore bu hinu birulebere. Bi áyu larogoni habo nalolene bi lo wirugoha nale winigo ai i̱ninaga hameme ani bulebero. I̱na ani berongi í̠na mana ko bialu birariruni mitangi bu dai buwa í̠ni taga timbuni halu birulebere.
EZE 16:62 I̱na habo nalolenenaga bi gahenge lo wia aribia harogola í̠na i̱ Anduane Homogoore henedane hondolebere.
EZE 16:63 Ani hondo bedegola i̱na í̠naga mana ko bialu birariruni bibahende mo embeda halu wahai holebero. Ani berongi í̠na í̠nime mana ko biaga wirigo mitangi bu dai bialu taga timbuni howa bi lolene mbira labe nahe bi biba hene birulebere. Anduane Homogo Bibahende Haru Haame Ho Haga kogo i̱na bi ogoni larugoni, lene.
EZE 17:1 Anduane Homogohanda i̱hondo lalu,
EZE 17:2 Dindiali-o í̠na Isaraele wali agali bu karuhondo bi yobage mbira lamibelo hameledo.
EZE 17:3 Bi ogo Anduane Homogo Bibahende Haru Haame Ho Haga kogome tihondo larogo manda bilo lamibe. Ega bodo hariawe timbuniore mbira bereago ogoni ibunaga babagane timbuni yula amunana bialu iriniru yári baya taraorebi berea. Ega odagonime Lebanononaga hari wiaruha yagalo yu pialu ira tamia mbira heagonaga mane puguaya.
EZE 17:4 Pugu yalu agali biyinaya biaga hearu daluha puwa tano mbira wiagoria ngelaya.
EZE 17:5 Ani ngelalu ega biagome lone yagalalu Isaraele dindiha puwa pu mbira lini daga mini gerebi egene emene anda halu heago dugu yaya. Dugu yalu puwa dindi bayale ira anda holene iba dewa bere wiagoha hangaya.
EZE 17:6 Ani hengeagola pu mbira lini daga mini gerebi biagoni anda halu ginigene yuloyu pugu pugu biya. Ginigene uruninaga maneme ega bodo hariawe biago bereagoha anda hadaga haya. Ani bialu ibunaga pini dindiha hongohe anda piai hayagola gerebi irane ogoninaga ginigene yunibi dewaore haya.
EZE 17:7 Ai ega bodo hariawe timbuni mende berene. Ogoni ibunaga babagane lu timbuni irini dewahe berea. Ani bereagoria pu gerebi biago dindi ibu hayago turu nahe howa ibunaga pinibi gene maganebi ega bodo hariawe mende ogoni bereagohayagi handa dai biai helaya. Gerebi o biagome manda bialu hearia ega mende ogoni ibugua iba dewaore ngulubabe toba haya.
EZE 17:8 Anigo pu ogoni ibuni henedagoha dindi bayaleore wini. Dindi ogoniha iba dewa biralu dindi ibane bere bayaleore wiagoria ibu bayale anda halu gene magane dewaore halu gerebi linibi dewa dalu ibu duniniore mbira habehe wini.
EZE 17:9 Ani winigo ai Anduane Homogo Bibahende Haru Haame Ho Haga kogo i̱na mbira ogodagua hale haro. Pu lini daga mini gerebi irane ogoni ibu anda halu bayale holebirabe. Naholebira ndobe. Ega bodo hariawe pigane berene biagome keba timbuni halu pu ogoni irane heba dugualu gerebi lini dedaru do hilu wahai halu mane anda hama polene kago ni dedagoria mo yogobia holebira. Agali hongo nahemebi hameigini emene karumebi gerebi irane ogoni duguabehe bame holebira.
EZE 17:10 Pu ogoni ibu dindi bayaleoreni hangayagoyu ainde ibu bayale anda halu timbuni hoa nahaya. Ani biyago puyabu poboyogobiore hongohe ni tagira ibiragohayagi howa ibiragome pu gerebi lini daga biago irane ogoni puloba haragola ibuni ngagoria dege wialu gabu holebira, laya lene.
EZE 17:11 Anduane Homogohanda i̱hondo laabo halu lalu,
EZE 17:12 Wali agali doga halu bi hale nahaga bu karunihondo gerebi ira ogoninaga bi yobage irane manda bidamibe lalu hale habe. Bi yobage o larugonaga irane ogo. Babilonoalinaga kini heagome Yarusalemeni ibalu Yuda kini heagobi ibunaga ami agali haguane bu hearubi bibahende garabaya bu yalu Babilono piai haya.
EZE 17:13 Ibu Yuda dindiha heangi Babilono kini heago ibugua Yuda kini aria mbira heagola habo nalolene bi mbira lowini. Ibugua lalu, Agali ogo ibu Yuda dindiha kini gahenge helo, laya. Ani lowa ibugua kini gahenge ogonihondo ibu Babilono kini kago andaneha haabo hole lalu bi hongohe mbira lowia halu mo lahaya. Ani bialu Babilono kini biago ibuni dalu Babilono dai bialu howa ibugua Yudanaga agali haguane maru hearu garabaya bu yalu haru piai hene.
EZE 17:14 Ibugua ani binigo irane Yuda dindi hongo halu lone irigi nahelobi Yuda kini biagola habo nalolene bi lo wiyago habo nale wiaabo helonagabi ani bini.
EZE 17:15 Ani binigoyu Yuda kini biago ibugua bule lalu bi lo wiyago nabi habo lene. Ibugua Iyibi kini heagohondo bi lo pelalu nogo hosiru haru halu ami agali dewaorebi haru halu i̱ biamogo bule ibalimu, lene. Ani layagome kini ogoni ibu hongo holebirabe. Ibugua Babilono kininaga bi mo wahayagonaga Babilono kini kagome ibalu ibuni pani nelo mialu bolebira.
EZE 17:16 I̱ Anduane Homogo Bibahende Haru Haame Ho Haga kogo i̱ Ngode Datagaliwabe haluhe heneneore kogobi bi tigatiga larogo. Yuda kini ogoni ibu Babilono garabaya pialu ogoniha homolebira. Ani bulebiragonaga irane ogodagua. Babilono kini kagome ibu kini helo dabo helayagoyu ibugua habo nalolene bi lo wiyago habo lalu Babilono kini kagohondo ogoaleore bule lalu bi hongohe lo wiyagobi habo lalu biya.
EZE 17:17 Ani biyagonaga Babilono ami agali bu karume ibalu Yarusaleme wai pabe kawareni heyu howa wai bulenaga dindi dugu wima irigi halu Yarusaleme ho hagira bulebira. Ani buwa tigua Yarusaleme baba wai bialu wali agali dewaore bo wahai holebira. Ani birangi Iyibi kininaga ami agali hongo gibiorehe bu karume ibalu Yuda biamogo nabibehe holebira.
EZE 17:18 Yuda kini kago ibunime habo nalolene bi lo wiyagobi ogoale buleore lalu bi lo wiyagobi pugualu mo habo layagonaga ibuni pani noleneore wulebira. Pani ogoni nanolenaga ibu ibida polene henge nawulebira.
EZE 17:19 I̱ Anduane Homogo Bibahende Haru Haame Ho Haga kogo i̱ Ngode Datagaliwabe haluhe heneneore kogobi bi tigatigaore larogo. I̱na kini ogonihondo pani mulebero laro. Ibugua habo nalolene bi hongohe lo wialu howa lalu heneneore laro lalu i̱naga minini howa lo wiyago lo wuwa talialu bulene wiago nabiya.
EZE 17:20 Anidagua biyagonaga i̱na ibu gono hongohe mbira ngogoha do ngaria hadoleberogo ani hela. I̱na ibu Babilono haru puwa pani nelo muleberogo irane ibugua buleore lalu habo nalolene bi i̱naga minini howa bi lo wiyago wuwa i̱hondo mini bilina naheore haya.
EZE 17:21 Ani bialu waitigi ibirarume ibunaga ami agali wai mana mandabiore karu ti bo wahai holebira. Ani biragola ami agali maru homa nabi yu wahene hayadaru ti ibida pugupugu bialu piai holebira. Anidagua biragola Isaraele wali agali tígua bi ogo Anduane Homogo i̱nimeore lenedane manda buleberemi, laya lene.
EZE 17:22 Anduane Homogo Bibahende Haru Haame Ho Haga kagome lalu, I̱na ira tamia luniore mbira kagonaga mane podowa Isaraele dindiha hari nene daligaore maru karu bolangua haihe kagoria hongolebero. Ani hangarogola ira ogoni ibu anda halu timbuni holebira. Gene magane luni purogole howa liniru dewa dolebira. Ani biragola ibu ira tamia duniniore mbira holebira. Ega tara tara bedarume ira ogoniha ni gumba birule íbu ngoai holebira. Ani íbu ngoaiho biruwa tinaga andaru ira ogoni maganeni bulebira.
EZE 17:24 Anidagua birago hondowa ira dindi bibahendeni karume i̱ Anduane Homogo i̱naore ira luore karu tubagi helo mane gaibu wahalu tubagi bu karu mo lu helaga henedalo hendelo anidagua bulebero. Ani bialu ira yunihe karu mo gabu halu ira gabuni karu mo gahenge haga kagonidalo manda bulebira. I̱ Anduane Homogo i̱na bi o ledogoni buleore lalu larugo biai holebero, lalu Anduane Homogohanda laya lene.
EZE 18:1 Anduane Homogohanda i̱hondo lalu, Isaraele wali agalihondo bi ogodagua latagi habe laya.
EZE 18:2 Isaraele wali agaliru tígua bi yobage mbira ogodagua laramili. Aba ai̱yarume pu mbira mini gerebi lini emene gani dedaru do nagagoyu ai waneigini tigua wene gani uruninaga lini nolene kau haga, lalu laramiligo irane aginaga laramilibe.
EZE 18:3 Anduane Homogo Bibahende Haru Haame Ho Haga koho i̱ Ngode Datagaliwabe haluhe heneneore kogobi howa tíhondo heneneore laro. Tígua bi ogoni laramiligo lone nale wahaiore holeberemi.
EZE 18:4 Wali agali bibahendenaga holene i̱nime yu kogoni. Aba ai̱yalabi waneiginirubi bibahendeorenaga holene i̱nimeore yu kogoni. Ani bidogo mbiralime ko ngago biyagua biagago ibuniore homolebira.
EZE 18:5 Agali mbira ibu tigabiore howa ibunaga manabi tigabi dege biaga heagua ogoni ibu bayaleore ka laramali.
EZE 18:6 Agali ogonibi kago ibugua Isaraele wali agalinaga mbirale gime wabiniruhondo bi pupu nawiagabi urunihondo mbirale bo lomabu miyago nanagabi ka. Agali tigabi ogonibime hogorale buwa agali mendeali one kayu nayagabi wali egengi biruwa ililibu bedangibi mandagi nahaga ka.
EZE 18:7 Ibugua agali mende mo hondo nahe ibunaga mbirale ngarubi mo page nabiaga ka. Agali mbirala dano heneyagua o biago ibuniore yamialu maru tagoha nalaga ka. Ani bialu howa maru tomo nawi karu tomo nelo mialu aga nabi karu aga bilo talebu miaga.
EZE 18:8 Ibunaga nenegerume ibunila dano mbira ho heneyagua emene tago halu ngi nale miyagobiore mo yalu dai biaga ka. Wali agali maname dabaki helo ibiraru bibahende tigabi ngadaguaore tiga biaga ka.
EZE 18:9 Agali ogonibi ka ibugua i̱naga bi mana ngogoore talialu baya hanguore biaga ka. Agali mana urunibi biaga kago ibu mini tigabiore howa bayale haabo holebira, lalu Anduane Homogo Bibahende Haru Haame Ho Haga kagome laya, lalu Esegielehanda lene.
EZE 18:10 Ai agali tigabi ogonibi kago ibu igini mbira hayagua ogoni ibugua anda howa agali mendealinaga mbirale ngaru mo page bialu agali homelo balu mana ko ngaru
EZE 18:11 ibu abahanda nabiagadagua biyagua nde ibuni homolene wulebira. Agali igini ogoni ibugua mbirale gime wabiniruhondo bo lomabu miniru naga howa agali mendeali one bedaru kayu yagabi howa
EZE 18:12 yagibano karu mo hondo hagabi agali mendealime ibuhondo dano hole miraru maru mo do hagabi mbirale gime wabiniruhondo bi pupu wiagabi uruninaga andaha puwa mana ko ngubi ngaru biagabi
EZE 18:13 ibunaga dano henerume miadai biragola bolangua howa ngi lagabi kayagua ibu bayale holebirabe. Ani ndoyago ibunime mana i̱na hame naledogo bialu kagome ibuni homolene wulebira laro.
EZE 18:14 Anigo ai agali mende ko biaga kago ibu igini heagua ogonime anda halu wahe howa ibu abahanda mana ko ngaru biagadagua nabiyagua ogoni ibu bayale holebira.
EZE 18:15 Agali ogonibi kagome Isaraele wali agalinaga mbirale gime wabiniruhondo bi pupu nawiaga howa urunihondo mbirale bo lomabu mini ngaru nanagabi agali mende one kayu nayagabi ka.
EZE 18:16 Ibugua agali mendeali mo ko nahagabi tinaga mbirale ngaru mo page nabiagabi mbiralime mbirale dano hene tingi howa ohalu mbira namo yagabi ka. Ibugua mendeali tomo garibilo karu talebu mialu aga nawi karu talebu mialu biagabi ka.
EZE 18:17 Ibugua mana ko ngaru mbira nabiagabi muni dano heneru bolangua howa ngi nalagabi ibugua i̱ninaga bi mana ngoru talialu biaiore haga kayagua ibu bayaleore holebira. Heneneore ibu abahanda mana ko ngaru dewa biai hayagonaga ibu igini homolene nawulebira.
EZE 18:18 Ibu abahanda wali agali dewa mo ko howa tinaga mbirale wiaru mo kayu bialu mana ko dewa biaga henego ai ibuni urunidagua biyagome ibu homolene karulape wini.
EZE 18:19 Anigo tí Isaraele wali agalime i̱hondo bi ogodagua hale halu ai abame ko biyagonaga pani iginime no aribia naharagoni agidabe laramili. Ai i̱na tihondo ogodagua ladai bero. Igini ibugua mana tigabi ngago bialu howa i̱naga mana ngoru talialu biyagua ibu bayale holebira.
EZE 18:20 Agali ko biaga karu dege homolene wulebira. Aba ibugua kagua biragonaga iginime pani na aribia holene nawi. Igini ibugua kagua biragome ibu abahanda pani na aribia holenebi nawi dege. Agali mana tigabi biaga karu ti nde tinaga mana tigabi biyarunaga yolo bayale ngaru mo yu holebira. Mana ko ngaru biaga karu ti nde tini mana ko biyarunaga yolo pani nolene ngaru nalu genda yu holebira.
EZE 18:21 Anigo agali mbirame mana ko ngaru yu wahalu mini beregedalu dai buwa i̱naga mana tigabi ngaru talialu biadai biyagua nde agali ogonidagua birago ibu nahome bayaleore holebira.
EZE 18:22 Ibugua ko bibahende biyaru Anduane Homogohanda domo waharagola mana tigabi biaabo hayagonaga ibu holene gahenge yu holebira.
EZE 18:23 I̱ Anduane Homogo Bibahende Haru Haame Ho Haga kogome tíhondo hale harogo. Tígua manda beramigola agali ko biaga karu mbira homayagua i̱na turu haga kobe toba kamibe. Ani ndoyago agali ko biaga mbira kago mini beregedowa ko biaga biago wahayagua i̱na ogoni hondowa turu haruli.
EZE 18:24 Anigo agali bayale biaga mbirame mana bayale bialu hayago wahalu mana ko i̱na hame naledogo biyagua agali ogoni ibu bayale holebirabe. Ani ndoyago i̱na ibu mana bayale abale bialu hayago mitangi nabulebero. Ibugua i̱ erembira ngialu mana ko biragonaga ibuni homolebira.
EZE 18:25 Anigo tígua ogodagua laramili. Anduane Homogo ibugua o biragonidaguago lehe bira laramiligoni. Anigo Isaraele wali agaliru-o i̱na bi larogo baya hangu hale hadaba. Tígua manda beramigola i̱na berogo lehedabe. Ani ndoyago tíni mana beramigo lehe bialu kami.
EZE 18:26 Ai agali mbira mana bayale bialu hagame lone mana ko ngaru biadai biyagua nde agali ogoni ibugua mana ko uruni biyagonaga ibu homolene wulebira.
EZE 18:27 Ani bialu agali ko biagame mini beregedalu mana bayale biadai biyagua ogoni ibu mani bayale biyagome nahomolebira.
EZE 18:28 Irane ibunime handalu hearia mana ko bialu hayaru leheyane handalu mana ko uruni wahalu tigabi ngaru bialu hayagonaga ogoni ibu homa nabi bayale holebira.
EZE 18:29 I̱na nde mana ogonidagua berogola Isaraele wali agali tígua lalu, Mana ogonidagua birago tigabi ndo bira laramiligo. Ai tígua manda bialu kamiria i̱naga mana ogoni tiga nabidabe. Ndoyago tíninaga mana tiga nabi kooreyago.
EZE 18:30 I̱ Anduane Homogo Bibahende Haru Haame Ho Haga kogo i̱na Isaraele wali agali tíhondo bi ogo langero. I̱na tínaga mana hangu hangu birimigodaguaore dabaki bulebero. Aniore bule ngogo ai tígua mana ko bialu kamiru wahai halu mini beregedolene nga. Tígua mana ko birimiru wahalu mini beregedarimiyagua nde ko birimigome tí mo ko naholebira.
EZE 18:31 Isaraele wali agali tí aginaga homole hamelo kamibe. Tígua mana ko bialu kamiru wahalu mini ala tawe ngamirubi wahalu mini gahengebi gubalini holene gahengebi karulo holene ngagoni.
EZE 18:32 I̱ Anduane Homogo Bibahende Haru Haame Ho Haga kogoni howa i̱na wali agalibi waneiginibi mbirali homelo hame nale kogoni. Anigo nde tíni mana ko bialu kamiru wahalu mini beregedowa mana bayale ngaru bialu halimu, lalu Anduane Homogohanda laya lalu Esegielehanda lene.
EZE 19:1 Anduane Homogo ibugua i̱hondo lalu, Isaraele kinibi Yuda kinibi libunaga dugu daraore bia halu iba gana ogobi labe, laya.
EZE 19:2 Í̠ ai̱ya ibu gabua laiono timbuniore hene. Ibugua laiono wangabe dewa bu hearu ti dege dombeneha howa ibu iginiru bayuwa handayaho hayagola ti bayale anda hai haya.
EZE 19:3 Ibu igini mbiraore wangabe timbuni anda hayagola ibugua igini ogoni nogo tara tara gabua taya helo biawai haya. Ibu laiono hongoheore howa agalibi bo nagane helo biawai haya.
EZE 19:4 Hameigini tara tara dindi tarani bu hearume laiono ogonime mana biaga ngago hale hai haya. Tigua ibalu laiononaga gundu uli tombo wiyagola laiono uli ogoniha pilaya. Tigua ibu ne harigaha wena langame helowa Iyibi dindiha gililo yalu piya.
EZE 19:5 Ai̱yahanda ibu igini dai bilo maliaho biraabo heagola igini biago dai nabiya. Dai nabiya handala ibu igini dege mende heago ibu laiono dalua bayale dege helo dabo helene.
EZE 19:6 Laiono igini ogoni andaho heagola ibu laiono maru hearu baba mandagi ibaga bu haya. Ibugua nogo tara tararu bolene mana bu manda bialu howa nogo gabua tara tara taya bialu agalibi bo nagane dege hene.
EZE 19:7 Ibugua tinaga wai pabe anda hongohe hearubi tano wiarubi bo gialo wahai haga bialu hene. Ibugua bi hongo howa layagola wali agali bibahende hearume gi hai haga hene.
EZE 19:8 Hameigini tara tara dindi tara wiaruha howa laiono ogoni baba wai bule íbu ngoai hene. Tigua gono wiago mo tigabu ngelo howa gonoha dayagola hadene.
EZE 19:9 Tigua ibu wena langame hende howa mbogoyi mbiraha minu berelowa Babilono kini hearia yalu pene. Ibu pora bialu tagira napelo ibu garabaya anda hongohe wiagoha helo helene. Wali agali Isaraele dindi hari ngaruha hearume ibunaga bi hongo howa laruane lone hale nahelo ani bini.
EZE 19:10 Kini ogonilabo libu ai̱ya ibu pu mbira lini daga mini gerebi iba angeni hengene mbira haraligobi bereneya. Pu gerebi ogoni iba bayale bereagoria hengenego timbuni anda howa gene maganeni yuni dewahe gerebi linibi dewaore deneya.
EZE 19:11 Pu gerebi ogoninaga gene magane hongoheore halu kininaga halimbu hongohe ngaligobi haya. Irane ogoni luniore halu hari beraliba ela habehe haya. Ibu luniore halu magane yunibi timbuni dewaorebi heago bibahende hearume de handai hene.
EZE 19:12 Pu gerebi ogonibi heagola agali bu hearume keba howa irane ogoni minu dugualu dindini bape haya. Tigua ani biyagola ni tagira ibiragohayagi howa puyabu poboyogobi ibiyagome gerebi lini deago bibahende yogo bialu gaulai haya. Agali urunime ira magane hearu dandape hai halu magane bibahende irani delai haya.
EZE 19:13 Mani tigua pu gerebi ogoni dugu yalu puwa dindi ko yobini iba nabiraga wiagoha hangaya.
EZE 19:14 Ogoninaga teneha howa ira datagi halu gene magane yuni linibi irame dai haya. Ibunaga magane bayale mbira hongohe ndo howa kininaga halimbu wabibehe mbira naheneya. Bi ogoni dugu daraore binigo tigua iba gana lalu haabo haga winigo nga.
EZE 20:1 Ina Babilono pu hemagola mali kanegonaga ege daunini horo pini hayagola Isaraelealinaga agali haguane bu hearu i̱ berewaria kaware íbu biraya. Tiha genda mbira wiagola Anduane Homogonaga hame hale hole i̱hondo haleha laya.
EZE 20:2 Ani layagola Anduane Homogohanda i̱hondo langialu lalu,
EZE 20:3 Dindiali-o i̱ Anduane Homogo Bibahende Haru Haame Ho Haga kogo i̱na agali haguane urunihondo bi o larogo tihondo lamibe laro. Tígua i̱naga hame ngogo hale holenaga ibirimibe. I̱ Ngode Datagaliwabe haluhe heneneore kogobi i̱na tíhondo tigatigaore larogo bameore ibirimida laro. Tígua bi hale haramiru aria mbiraore hangubi mbira ladai nabulebero. I̱ Anduane Homogo Bibahende Haru Haame Ho Haga kogo i̱na bi o ledogoniore, laya.
EZE 20:4 Dindiali-o agali o bedaruni manani helai habelo hameledo. Agali uruni ti mamalinaga mana ko ngubi bialu haga wiyaru mo mitangi bia habe.
EZE 20:5 Tihondo bi o larogo lamibe. I̱na bamba tínaga mamali Isaraele hearu ti i̱ninaga wali agaliore helo dabarungi i̱na mbirale mbira tihondo buleore lalu bi hongoheore lo wirugoni. Ti Iyibi dindini heangi i̱ni ogobi ko lowa mo walia halu Anduane Homogo tínaga Ngode Datagaliwabe kogoni lalu lamiru.
EZE 20:6 Ogoningi howa i̱na ti Iyibi dindi yu wahalu dindi mbira ti mule lalu bi hongohe lo wirugoria haru halu ibule laru. Dindi ogoni ibane bere baya tomo mbirale ngaru anda hai holene nga laru. Dindi tara tara bu ngaruha dindi ogonibi mbira nawi baya gibiore mbira nga laru.
EZE 20:7 Ani bialu i̱na tihondo ogodagua lamiru. Tíni hangu hangu kamigoha howa Iyibi wali agalinaga dama mitangi bialu mbirale gime wabinigohondo bi pupu wulenaga hame lalu ngelo kamiruni wahai halimu. Tígua mbirale ko urunihondo bi pupu nawilimu. Anidagua bialu kamigome Anduane Homogo tíninaga Ngode Datagaliwabe i̱naga deni mo dodo nahalimu, laru.
EZE 20:8 I̱na tihondo ogonidagua lamirugoyu tigua doga halu bi ogoni hale nahaya. Ti bibahendeme i̱na bi larugo mo wahalu Iyibi wali agalinaga dama mitangi bialu gime wabini wiaru wahoa nahaya. Anidagua bialu hayagonaga ti Iyibi dindiha heangi i̱na i̱ miniha keba timbuni halu tandaga harudago tiha biba helole manda birugoni.
EZE 20:9 Ainde ani nabi waharudago irane i̱na ala Isaraele wali agali lamialu, I̱na tí Iyibi dindi yu wahalu dindi ogoha haru ibulebero, lalu lo wirugola wali agali Isaraeleali baba mandagi haga hearunaga deni howa larugoyane bulebirugo nabi waharu. I̱na buleore lalu bi lo wirugo mo habo laruyagua nde i̱nime tinaga deni i̱naga mini mo dindiha holilono waharu.
EZE 20:10 Ani larugoyane i̱na Isaraele wali agali Iyibi dindi wahalu haru tagira pialu dindi ko iba dalu naibaga wiagoha haru ibiru.
EZE 20:11 Ani haru íbu helowa i̱na mana buleneru lamialu i̱naga bi mana lowini ngorubi lawai halu biru. Wali agali bu karume bi mana ogoni hale halu taluwa bialu hayagua tiha bayale holene wulebira.
EZE 20:12 Ani bialu i̱na ti baba habo nalolene bi lo wirudagonaga manane mbira walia halu Sabada horo mo ngelaru. I̱ Anduane Homogo i̱nime ti mo dabobagi howa i̱naga wali agaliore helayadalo manda bilonaga horo ogoningi ti biabe tara tara nabi ha̱lo halu i̱ mitangi bialu holene wini.
EZE 20:13 Anigo ai dindi ko iba dalu naibaga wiagoha howabi nde tigua doga halu i̱naga bi hale nahaya. Dindi ko wali agali nahaga wiagoha howa tigua i̱naga bi hale habe manga halu tini bayale holenaga mana ngago taluwa bialu holene biago pugualu Sabada horonaga manabi puguaya. Anidagua biyagola i̱naga bu miniha keba timbuni halu tandaga harugo tiha biba hole manda biru.
EZE 20:14 Ainde ogonidagua nabirudago irane wali agali bu karunaga deni i̱naga mini mo dindiha holobada manda bialu ti bo wa nahe waharu. Wali agali tara tara uruni ti handayaho heaore i̱na Isaraele wali agali Iyibi howa haru tagira ibirugo mitangi bialu ti pani mialu bo wahai nahe waharu.
EZE 20:15 Anigo Isaraele wali agali dindi ko iba dalu naibaga wiagoha íbu heangi i̱na tihondo bi hongo howa lamialu, I̱na tí dindi ibane bere bayale dindi maru ngaru ogonibi mbira nawiore larugo dindi ogoniha halimulo haru pole larugoha ai haru napolebero, laru.
EZE 20:16 I̱na bi ogoni larugo irane tigua i̱na mana bulene nga laruru talialu bia nabi hayagonagabi i̱naga bi lo winigo ngoru puguayagonagabi laru. Tigua dama mitangi bialu mbirale gime wabini wiaruhondo bi pupu wulene dege hamelo howa i̱naga bi mana pugualu Sabada horonaga manabi pugua dege bialu hene.
EZE 20:17 I̱na ani larugoyu ti dindi ko iba dalu naibaga wiagoria howa homai helo bo wahai holene winigo ai i̱na ti dara hodai bialu bo wanahe waharu.
EZE 20:18 Ani nabi howa i̱na tinaga waneigini daliahe hearuhondo lamialu lalu, Tínaga mamalirume mana bialu haga wiyaru nayalimu. Ani bialu wali agali tara bu karunaga dama mitangi bialu mbirale gime wabini ngaruhondo bi pupu wialu i̱naga deni tíni dodohe nahalimu.
EZE 20:19 I̱ Anduane Homogo tínaga Ngode Datagaliwabe kogo tígua i̱naga bi lowini ngoru hale halu mana bulene ngorubi baya hangu taluwa bialu halimu.
EZE 20:20 I̱na Sabada horo ogoni i̱naga wiabagi ho wirugo mitangi bialu tígua horo ogoniore i̱naga nga manda bialu halimu. Horo ogoni i̱na habo nalolene bi lo wirugonaga manane ngelalu tígua horo ogoningi biabe nabi ha̱lo howa i̱ni Anduane Homogo tínaga Ngode Datagaliwabeore henedane manda bilimulo wirugoni, laya lene.
EZE 20:21 I̱na wali agali urunihondo anidagua larugoyu tinimebi i̱hondo doga haabo halu hene. Tigua i̱naga bi lowinigo wahalu tini bayale holenenaga i̱naga mana bulene ngaru taluwa bialu nahe pugualu haabo hene. Ani bialu tigua Sabada horonaga mana lo wirugo puguaore bialu heagola i̱naga bu miniha keba timbuni howa tandaga harugo tiha biba halu dindi ko wali agali nahaga wiagoria howa bo wahai holene winigo waharu.
EZE 20:22 Ogonidagua manda bialu waharudagoni irane wali agali tara tara bu hearunaga deni i̱naga mini mo dindiha holobayane mitangi bialu bia nabi waharu. Wali agali tara uruni ti handayaho heaore i̱na Isaraele wali agali Iyibi dindini howa haru tagira ibirugoni mitangi bialu ti bo wa nahe waharugoni.
EZE 20:23 Anigo i̱na bi mende hongohe lo wiru. I̱na ti bo talia togolalu dindi tara tara wiaruha hama purogo lelolebero manda biru.
EZE 20:24 I̱na bi ogoni larugo irane tigua i̱naga mana bulene ngoru mo wahayagobi i̱naga bi lowiniru puguayagobi Sabada horonaga mana lowinigo puguayagobi tinaga mamalinaga dama mitangi bialu gime wabini wiaruhondo bi pupu wialu hayagobi tigua ko uruni biyarunaga i̱na bi ogonidagua lo wirugoni.
EZE 20:25 Ani buwa i̱na bi mana tarabi lo wialu mana bulene tara alebi lamirugo urunime ti bayale helonaga ndo lo wirugoni.
EZE 20:26 Tigua dama mitangi bialu mbirale gime wabini wiaruhondo bi pupu wialu mbirale lomabu mule hame ledadagua bilaru. Ani bialu tinaga igiri wahene hayago dama mitangi bialu gime wabini urunihondo bo lomabu migi bilo helaru. Tigua mana uruni bialu helo waharudagoni irane ti mogolo handalu tinime mana ko bialu hayarunaga pani nalu helobi i̱ni Anduane Homogo heneneore henedane hendelobi ani biru, laya lene.
EZE 20:27 Anduane Homogohanda i̱hondo laabo halu lalu, Dindiali-o i̱ Anduane Homogo Bibahende Haru Haame Ho Haga kogo i̱na Isaraeleali karuhondo bi larogo lamibe. Tinaga mamali biarume mana ko tara mende ale bialu tigua i̱naga bi larugo mo wahalu i̱naga minibi mo yo handalu biya.
EZE 20:28 I̱na dindi tihondo ngulebero lalu lo wirugoria haru íbu helewagola tigua ira timbuni hearubi hari timbuni wearubi de hondowa dindi ogoniha dama mitangi bialu mbirale gime wabini wiaruhondo bi pupu wialu lomaru bu mialu holene bayale mbira winidalo manda biya. Ani manda bialu tigua nogo dewabi waini iba dewabi yalu ibuwa tigua lomabu miyagome i̱ mo keba timbuniore haya.
EZE 20:29 Anidagua bialu heagola i̱na tihondo ogodagua hale haru. Tígua irane aginaga hari nene daligaore ngagoha puwa dama mitangi bialu mbirale gime wabini ngaruhondo bi pupu wule aginaga pialu kamibe, laru. Ani larugoni irane Isaraele wali agali tigua hari neneha bi pupu wule piaga uruni mini Hari Neneha laga wini.
EZE 20:30 Ogoni manda bialu ai Isaraele wali agali tihondo bi la larogo lamibe. Tínaga mamalirunaga dama mitangi bialu mbirale gime wabini ngaru hangu bi pupu wule tíguabi talima pialu kamigonida. Tígua mana ko uruni talialu bialu haabo kamigo irane agibe.
EZE 20:31 Áyubi tígua dama mitangi bialu mbirale gime wabini urunihondo lomaru bu mialu haabo kami. Ani bialu tínaga waneiginirubi mbirale gime wabini urunihondo bo lomabu mialu irani delaga kamigoni. Tígua mana ogonibi bialu kamigome tínibi nde i̱naga deni dodohe dege kami. Anidagua bialu howa Isaraele wali agaliru tí i̱ koria i̱naga hame ngogo hale ho ibulene nawi howa tí bame dege eberemili. I̱ Anduane Homogo Bibahende Haru Haame Ho Haga kogo i̱ Ngode Datagaliwabe haluhe heneneore kogobi i̱na áyu tíhondo tigatigaore laro. I̱na tígua hale haramigo ale mbira ladai nabulebero.
EZE 20:32 Tíore hameigini tara dindi tara taraha bu karu ale dege hoa howa ira karuhondo bi pupu wia ege to̱le̱ ngaruhondo bi pupu wia bigi bialu holene hamelo kamigoni. Anigo i̱na tí urunidagua kamigo bialu halimulo yupe naholebero.
EZE 20:33 I̱ Anduane Homogo Bibahende Haru Haame Ho Haga kogo i̱ Ngode Datagaliwabe haluhe heneneore kogobi i̱na tíhondo bi heneneore hongohe mbira ogodagua laro. I̱na tíhondo keba howa i̱naga hongo timbuni kogome tí minu balu tandaga mo ngulebero.
EZE 20:34 Áyu tí dindi tara tara bu ngaruha garabaya pu haga haga bu kamigo i̱na haru dai bialu dindi mbiraoreni mo mogobu helolebero. Ani heledogola tígua i̱naga hongobi bu miniha keba howa tandaga holenebi panigi handa walia holeberemi.
EZE 20:35 I̱na dindi mo mogobu heloleberodago ko yobi iba dalu naibaga ngago ogoni mini Hameigini Tara Taranaga Dindi Yobi laga nga. Dindi ogoriani kamiria i̱na tí dengui handade halu tígua mana ko bialu harimigonaga manani helalu pani ngulebero.
EZE 20:36 Bamba tínaga mamaliru Sainai dindi ko iba dalu naibaga wiagoria howa i̱na ti manani helowa pani mirudagua ngulebero. I̱ Anduane Homogo Bibahende Haru Haame Ho Haga kogome i̱na bi ani laro.
EZE 20:37 Dindi ogoniha íbu kamigola i̱na tí haru howa habo nalolene bi lo wirugo tígua talialu bialu halimulo mo bia holebero. Ani bialu mana tí hangu hangume bialu harimidadagua mo dabaki bulebero.
EZE 20:38 I̱na maru mana ko biaga karubi doga haga karubi bibahende tí kamiru baba mandagi nahelo ti dindi áyu kagoria i̱na bo taliatagi hai holebero. Doga halu mana ko biaga bu karu ti Isaraele wali agalinaga dindi dai naibilolebero. I̱na anidagua berogo hondowa tígua i̱ Anduane Homogoore henedane hondoleberemi.
EZE 20:39 Anduane Homogo Bibahende Haru Haame Ho Haga kogome Isaraele wali agali tíhondo i̱na bi ogoni laro. Tíni hame ledamidagua bidaba. Tígua dama mitangi bialu mbirale gime wabini ngaruhondo bi pupu wule talima polene mitangi bu kamiyagua nde ogoni talima pilimu. Anigo tígua ogoni talima pirimiyagua nde i̱naga wali agali bu karu baba mandagi naholeberemi. Tínaga dama mitangi bialu mbirale gime wabini ngaruhondo bi pupu wialu mbira lomabu mialu hemiyagua nde mana ogoni beremigome i̱naga mini tigabi ngogo yo handaganego ani bulene nawiore.
EZE 20:40 I̱naga wali agali tí bibahende tíninaga dindi ngagoria dai biai howa tígua i̱naga hari timbuni loma biahene Isaraele dindini wedagoria pialu i̱ mitangi bialu lotu lalu holeberemi. Ani kamigola i̱na tíhondo turu timbuni holebero. Ani howa tígua i̱nihondo tínaga loma bayaleru bu yu ibalu i̱hondo mbirale bayaleru i̱ mo turu halu yu ibugu buleberemi.
EZE 20:41 Ainde tí dindi tara tarani purogolo kamiria howa bibahende i̱na mo mogo bialu i̱ninaga hari kagoria haru dai buwa i̱hondo loma bayale ngabiore bu yu ibuwa delaramigola turu harulidagua tíhondo turu howa i̱naga bu miniha dungulo holebero. Anidagua berogola hameigini tara dindi tara taraha bu karume ti de hondowa i̱ mini baya burugule tigabioredalo manda biai holebira.
EZE 20:42 I̱na tí bamba tínaga mamaliruhondo dindi ngulebero lalu bi lo wirugoria daibu kamingi tígua i̱ Anduane Homogo henene henedane hondoleberemi.
EZE 20:43 Ani hondowa tígua mana ko ngubiore wiaru bialu harimigome tíni mo ko henedane mitangi bu dai buleberemi. Ani buwa mana koorene ko uruni bialu harimigonaga taga timbuni ho holeberemi.
EZE 20:44 I̱ninaga mini bayale mini leneore kogo mitangi bialu tí mana koorene ko bialu harimigonaga i̱na pani ngulene winidagua nangi tí dara howa waharudane hondoleberemi. Ani hondowa tígua i̱ni Anduane Homogo heneneore henedane hondoleberemi. I̱ Anduane Homogo Bibahende Haru Haame Ho haga kogo i̱na bi o ledogoniore, laya lene.
EZE 20:45 Anduane Homogohanda i̱hondo langialu lalu,
EZE 20:46 Dindiali-o í̠na dindi abene unurahayagi handa daliho howa ibuhondobi ibunaga irabu karuhondobi lai lalu habe.
EZE 20:47 Irabu ngaruhondo lalu, Anduane Homogo Bibahende Haru Haame Ho Haga kago ibugua bi o larago hale ha, labe. I̱na ira mbira delarogome í̠naga irabu ngeruha ira gahengeyaguabi gabuniyaguabi bibahende dai holebira. Ani dalu kagola mbirame ba hundia habe nahe holebira. Ira ogoni dama pialu dindi abene uyurahayagibi dama polebira. Ani daragome wali agali bibahendenaga tingini poboyogo holebira.
EZE 20:48 Ani darago hondowa wali agali mbirame iba odo hundia habe nahedagola tigua ira ogoni Anduane Homogo ibunime hedope heneda lowa wali agali bibahendeme manda biai holebira, laya lene.
EZE 20:49 Anduane Homogohanda bi ogoni lai hayagola i̱na ibuhondo ladai bialu lalu, Anduane Homogo Bibahende Haru Haame Ho Haga-o ainde i̱na bi ogoni latagi ha nalabe. Wali agali bu karume i̱ mini lalu i̱na bi yobage ogoni ale dege laabo haruligonaga ti hale habe manga haga ka, lalu ladai biru.
EZE 21:1 Anduane Homogohanda i̱hondo langialu lalu, Dindiali-o í̠na Yarusalemeha de handa dai bu howa tigua ko biyagonaga godini dabaki halu tihondo, Tí mana ko biagaore kami, lalu lamibe. Tigua dama mitangi bialu mbirale gime wabini ngaruhondo bi pupu wule íbu ngoai haga dindi ngaru hondowa i̱na turu naharuligo í̠na tihondo, Mana koorene ko ogoni, lalu lamibe.
EZE 21:3 Í̠na Isaraelealihondo bi hongo howa lalu Anduane Homogo i̱na bi o larogo lamibe. I̱ Isaraele wali agali tí baba waitigi howa tí wali agali bayale biaga hemiyaguabi ko biaga hemiyaguabi tanabi i̱na i̱naga wai biaga ayu tibu ngagome tí bo wahai holebero.
EZE 21:4 I̱na ayu tibume tí dindi abene unurahayagi howa bo wahama pialu uyurahayagi tagira polebero.
EZE 21:5 Anidagua berogola wali agali bibahendeme i̱ Anduane Homogo i̱naga wai biaga ayu tibu yupe nahe yaragaho haabo koria hondolebira. I̱na tí pani ngialu bo wahai holebero, laya.
EZE 21:6 Ani lowa Anduane Homogo ibugua laabo halu lalu, Dindiali-o wali agali bibahendenaga deni howa í̠naga gubalinini tandaga timbuni howa dugu biradagua bibe.
EZE 21:7 Wali agali tigua í̠hondo irane aginaga dugu bialu kebe layagua nde í̠na tihondo ogodagua lamibe. Genda timbuniore ibulubadagonaga dugu bialu ko. Genda ogoni tagira ibirangi tínaga bu miniha gi timbuni halu tínaga gi hongo nahe halu tí mini burugu lalu gebi duru lalu holeberemi. Ogonidagua bulene horodagoni abale tagira ibiragoni ndobe. Bi ogoni Anduane Homogo Bibahende Haru Haame Ho Haga kago ibugua bi o ledagoni laro, lene.
EZE 21:8 Ani lowa Anduane Homogohanda i̱hondo laabo halu lalu,
EZE 21:9 Dindiali-o bi manane mbira áyu langerogo ti hale helo latagi habe. I̱ Anduane Homogo i̱na bi larogo tihondo lamibe. Ayu tibu mbira wiago ne gadelelo tigua nage wuwa mbiraleme baya hangu ha̱i̱ heneya.
EZE 21:10 Ayu tibu ogonime bo wahelonaga baya hangu nage wiagola ne gadeleore wialu ngiringarale hari daba ale helo tigua ha̱i̱ heneya. I̱naga wali agali ti turu haga bialu bayale holeberemabe toba ho kabe. Ani ndoyago. I̱na tihondo bi hongohe lamialu gewa tibume barugoyu tigua doga halu haabo kagoni.
EZE 21:11 Wai biagane ayu tibu ne gadele ogoni mbiraleme ha̱i̱ howa agali dibule manda manda bu nga. Tigua ayu tibu nage wialu ha̱i̱ ho ngelowa bo wahaga kagonaga giha mo ya holebira.
EZE 21:12 Dindiali-o ayu tibu ne gadele ogonime Isaraeleali haguane bu karubi i̱naga wali agali bu karu bibahendebi bo wahai holebirago í̠na dara halu dugu daraore bibe. Wali agalime dara ho hagadagua howa dugu bialu habe.
EZE 21:13 I̱na i̱naga wali agaliru ba handalu kogola ai tigua mana ko bialu kago wahalu mini beregeda nabiyagua nde mbirale o larogoni bibahende tiha tagira ibulebira, laya lene.
EZE 21:14 Dindiali-o i̱naga bi ogo tihondo latagi halu í̠na gi habe babe. Ani baregola ayu tibu ogonime wali agali mo gi halu tini bagabaga bialu dewaore bo wahai holebira.
EZE 21:15 Ayu tibu ogonime wali agali mo gi hagabi dewa bo wahagabi nga. Anigo i̱na tanonaga pabe panga haraba ngaru bibahende ngagoria ayu tibu ogoni hari daba ale ngiringaralegome wali agali bo wahai hole manda manda bu ngo.
EZE 21:16 Ayu tibu ne gadele ngego í̠na dindi bibahendeha pialu gi tigahayagibi gi lehayagibi bama pialu wali agali bo wahai habe.
EZE 21:17 Anidagua beregola i̱na gi habe balu i̱naga miniha keba harugo biba holebero. I̱ Anduane Homogo i̱na bi o ledogoniore, laya lene.
EZE 21:18 Anduane Homogohanda i̱hondo laabo halu lalu,
EZE 21:19 Dindiali-o í̠ hariga dindi mbirahayagi howa ibalu hariga pu gebage bidago manda bibe. Hariga gebagane mbirago ibu Amono dindiha tano timbuni Laba ngagoha polene nga. Hariga mendego Yuda dindiha tano timbuni wai pabe hongohe bu mabubi tano hongohe biagoha polene nga. Ani purogo lolene ha gebage ngagoria mo walia hagane manane kira helabe. Mo walia hagane manane mbirago Laba polene hariga pedagohayagi mo walia howa helalu mende Yarusaleme polene hariga pedagohayagi mo walia ho helabe. Ai Babilono kini kago ibugua ibunaga ami agaliru heba ayu tiburu yalu hariga ibidadagua ibalu ha gebage ngagoria tagira ibulebira.
EZE 21:21 Ani ibalu ogoriani howa kini ibu hariga agoha poledabe manda nabi howa halaga bulebira. Pigane ibunaga timu yidaru mo gigia lolebira. Ibugua halaga uruni bialu howa ibunaga dama mitangi bialu mbirale gime wabini ngaru bi pupu wialu hale halubi nogo lomabu mule bo ngagonaga buni ngago begelo hondolebira.
EZE 21:22 Ani bialu howa timu gi tigame yamiyagome Yarusalemehayagi polene walia holebira. Ani manda bialu tigua Yarusaleme puwa wai pabe panga kago bo gialalu tanoha anda puwa wali agali tanoha karu bo wahai holenaga mbirale mbira guruyagu̱ ale wabulebira. Wabiai howa ami agali bu karume hongo howaore hoaro lalu mbirale mbira guruyagu̱ ale biagome wai pabenaga panga kago bo gialole hongo howa yupe haragola panga biago bo haealabaga bulebira. Ani bialu tigua Yarusaleme tano bo gialopaya bule gana walu tini heyu howa wai bulenaga dindi dugu wima irigi holebira.
EZE 21:23 Í̠na Isaraele wali agaliruhondo bi ogoni latagi haregola tigua bi ogoni hale nahe bame degeda lo manda bialu, Babilono kini kago andaneha hole lalu habo nalolene bi lo wirimago ai ibugua ina baba wai nabulubadalo, manda bulebira. Anigo tigua mana ko dewaore bialu hayagonaga Babilono kini kagome ti garabaya bilo ibilolebero. Ani ibirago de hondowa tigua mitangi bu handalu karia tinime mana ko bialu harimagonaga mbirale uruni anda ibiyadalo manda bulebira.
EZE 21:24 Ai Isaraele wali agaliru-o Anduane Homogo Bibahende Haru Haame Ho Haga kogo i̱na tíhondo bi mbira ogodagua laro. Tígua mana ko dewa biaabo halu kamigo i̱na embeda naholebero. Tígua mana ko panigi bibahende handai hene bialu kamigome tíha ko ngelo kamigo wali agali bibahendeme manda biaiho ka. Tígua ko birimirunaga pani nolene ngelo kamigo i̱na tí waitigi bu karunaga giha ya holebero.
EZE 21:25 Isaraelealinaga kini kego í̠na i̱naga mana pugualu mana ko ngaru bialu haga kegoni. Í̠ mana ko bialu harigonaga pani nabelo ngulene horo biago kaware íbu ngagoni ndobe.
EZE 21:26 I̱ Anduane Homogo Bibahende Haru Haame Ho Haga kogo i̱na bi o ledogoniore. Ai í̠na kininaga manda karulo kegoni golo wahalu labolabo í̠naga emboneni bo bidegonibi golo ngelalu bibe. Ala wiyadagua mani nawulebira. Áyu ina bibahende mo iriari bialu agali haguane bu karu mo dindiha halu agali mini nalene bu karume agali haguane ha aribia halu mo yaraga helolebira.
EZE 21:27 Mbirale tara bamba nahendeneru ale bialu i̱na Yarusaleme bo gialo wahai halu mo ko hole manda bu ko. Ani bialu dindi mo ko hene wiaabo kane dege agali mbira ibilolebero. I̱na agali ogoni dabenego ibugua Yarusaleme tano handayaho howa haru helo ibuhondo mulebero, laya lene.
EZE 21:28 Anduane Homogohanda i̱hondo laabo halu lalu, Dindiali-o Amono wali agali karume Isaraele wali agalihondo bi ko laragonaga í̠na mbiwia halu tihondo bi ogo latagi habe. I̱ Anduane Homogo Bibahende Haru Haame Ho Haga kogome tihondo bi ogodagua laro. Wai biagane ayu tibu ne gadele ngagome mbirali bo waholenaga nga. Ayu tibu ogoni baya hangu nage wialu mbiraleme ha̱i̱ hayago ngiringaralalu hari daba ale migimege laradaguabi ngagome agali dibule manda manda bu nga.
EZE 21:29 Amonoali tígua mbirale de gandebaha hondo bolangua howa lalu, Ayu tibu ogoni iname yuwa wali agali i̱naga bi mo wahalu mana ko biaga karu homelo bo wahai holeberema, lalu kami. Anigo tígua de gandeba handarimigobi mbiwia halu kamigobi bibahende ke̱ dege halu kami. Heneneore wali agali uruni pani nelo mulene kaware íbu ngagonigoyu pani nelo bo waholenedagoni tígua naboleberemi.
EZE 21:30 Ayu tibu ibuni andaneha yadai bidaba. Tíni dindiniore kamigola i̱na tígua bialu harimidadagua tí manani helolebero.
EZE 21:31 Irame dangi bo daralidagua i̱na tí baba keba halu miniha tandaga ho kogome tí dolebira. Agali ko mendeali kago mo ko dege haga karume tí mo ko helo ibilolebero.
EZE 21:32 Ira dedagoria ira gabuni karu balu delaragola irame dalu do mundu lagadagua bialu tí bo wahai helolebero. Tínaga darama tíni dalu ngamigoria polebira. Ani homaramigola wali agali mani holobadarume tínaga mini abogo dindi ogoria hene lalu mbira nalolebira. I̱ Anduane Homogo i̱na bi o ledogoniore, laya lene.
EZE 22:1 Anduane Homogohanda i̱hondo langialu lalu,
EZE 22:2 Dindiali-o í̠na Yarusaleme wali agali bu karume wali agali dewaore bo wahai hayarunaga manani dabaki habe. Tigua mana ko ngubiore biaabo hayarunaga manani helalu bi hongo howa lamibe.
EZE 22:3 I̱ Anduane Homogo Bibahende Haru Haame Ho Haga kogo i̱na bi o larogo lamibe. Yarusaleme wali agali tígua wali agali tíni aria bu hearu dewaore homelo bo wahai harimigobi dama mitangi bialu mbirale gime wabini wiaruhondo bi pupu wialu harimigobi i̱naga deni tí dodoheore kamigoni. Ani bialu harimigonaga pani ngialu tíni mo ko holene horo biago kaware hapara haragoni ndobe.
EZE 22:4 Tígua mana ko uruni bialu harimigonaga tíni pani nolene nga. Tígua dama mitangi bialu mbirale gime wabu wirimigome tíni mo ko halu i̱naga deni dodohe kamigoni. Anigo ai tigimandi dege howa tíha mo ko holene ibulebirago nde kaware ibiragoni ndobe. Irane ogoninaga i̱na hameigini tara tara dindi taraha bu karume tíore hondo oba halu mege bialu helo heledo.
EZE 22:5 Wali agali kaundiaha karumebi kawareni bu karumebi tigua tí hondowa manda bialu tíore wali agali mana ko tara tara ngaru bialu haga kamigo lalu mege gibi bulebira.
EZE 22:6 Isaraele wali agali tínaga agali haguane bu karu tigua mitangi bialu mbirale tinime hameledago ale damene bibahende biai habehe kama lo manda biaga ka. Ani manda buwa tigua wali agali homelo bame bo wahaga bialu kagoni ndobe.
EZE 22:7 Wali agali Yarusalemeha bu kamiru aria mbiraoreli hangumebi aba ai̱yalanaga bi hale haga naheore. Tígua wali agali dindi taraha howa tí baba íbu hene karu mo hondo haga kami. Tígua wali agalini homene dalo bedarubi waneigini aba ai̱yala homene karubi mo ko halu biaga kami.
EZE 22:8 Tígua i̱ mitangi bialu lotu lole loma bini ngagoha bame nagalone lalu mo yo handaga kami. Ani bialu tígua Sabada horonaga mana ngago puguaiore harimi.
EZE 22:9 Agali tí kamiru aria marume wali agali bame karu godime ibu homelo bo waholene nga lelo ke̱ halu ibugua mana ko biya laga kami. Ani bialu ti marume dama mitangi bialu mbirale gime wabini wiaruhondo bi pupu wialu nogo loma bialu bo mini ngarunaga mbiriniru nagane kami. Maru tí wali agali kayu yama ibaga biaga kami.
EZE 22:10 Maru tígua tí aba one kayu yaga kami. Maru tígua wali egengi bedago haru palue hongo timbuni haga kami.
EZE 22:11 Marume agali mende one baba ko biaga ka. Marume tí igini one bedaru bababi tí aba one mende wane bedarubi haru paliaga kami.
EZE 22:12 Marume tí damene bu karu bo wahelonaga ndelalu muni mo yaga kami. Marume dano ho henego dano hangalu maru bolangua howa ngi lalu mo yaga kami. Ani bialu marume tí damene karu mo gi howa muni gingila miaga ka. Ani bialu harimigome tígua i̱ embedaho waharimi, lalu Anduane Homogo Bibahende Haru Haame Ho Haga kagome bi ogoni layagoni.
EZE 22:13 Ibugua laabo halu lalu, Agali mbirale page biaga kamirubi wali agali bame homelo bo wahaga bu kamirubi tí baba i̱na keba timbuni ho kogoni. Ani howa i̱na gi habeme hongo howa tola balu tí pani ngulebero.
EZE 22:14 Anidagua berongi tígua gi timbuniore halu hongo ereba haragola heyabe nahe holeberemi. I̱ Anduane Homogo kogo i̱na bi o ledogonidagua buleore bero.
EZE 22:15 I̱na tí dindi tara tara ngaruha pilimulo taliatogo lolebero. Ani bialu tínaga mana ko biaga ngamiru bibahende mo wahai helolebero.
EZE 22:16 Hameigini tara tara dindi taraha karunaga deni tí koorene ko howa tíninaga mini mo dindiha haragola tígua i̱ni Anduane Homogo henedaneore manda biai holeberemi, laya lene.
EZE 22:17 Anduane Homogohanda i̱hondo laabo halu lalu,
EZE 22:18 Dindiali-o Isaraele wali agalime mana ko bialu kago i̱ manga ho kogoni. Tiore agalime ira timbuniore bo delowa ege to̱le̱ irani delalu do gede halu iba harago siliba yamialu ko ale ngaru wahaga ngaligobi ka.
EZE 22:19 Ainde i̱ Anduane Homogo Bibahende Haru Haame Ho Haga kogo i̱na Isaraele wali agalihondo bi o larogo hale hadaba. Wali agali bu kamiruni tí siliba bayale yamulenaga irani delowa maru ko ale ngaru habane nabulenego wahagagobi tí kami. Ani kamigonaga i̱na tí bibahende Yarusaleme haru piai halu mo mogo bu helolebero.
EZE 22:20 I̱naga bu miniha lembo timbuni ira hungu ale bialu kagoni ndobe. Ani buwa i̱na tí irani agali ege to̱le̱ siliba yamulenaga ege to̱le̱ tara tara maru irame do taulope helo ira timbuniore dedagoha delagadagua delolebero. Agalime ira dene dedagome ege to̱le̱ elaragola ira hungu hongohe daragome siliba ibu do iba halu piagadagua i̱naga lembo holene ogonime tí dolebira.
EZE 22:21 Anigo i̱na tí Yarusalemeni mo ngoai ho helowa irani delolebero. I̱naga bu miniha keba holene ira hungu ale bialu kagome tí bibahende daiore holebira.
EZE 22:22 Tí Yarusalemeni howa siliba irani delaragola elagadagua tíbi i̱naga keba holeneme elaragola tígua Anduane Homogo kagonaga keba holene ogobiore winidalo manda biai holeberemi, laya lene.
EZE 22:23 Anduane Homogohanda laabo halu lalu,
EZE 22:24 Dindiali-o Isaraele wali agali tigua mana ko hangu bialu haabo kagome tinaga dindi i̱naga deni ko dodohe ngagonigo lamibe. Ani bialu kagonaga i̱na keba timbuniore howa ti pani nelo mialu ti dindiha iba dalu naibaga dindi ko wilolebero.
EZE 22:25 Laionome nogo gabua mbira bowa minu budu migimigi bialu bi hongo howa ngororo lalu hagadagua tinaga agali haguane karume ani bialu ka. Agali uruni tigua tinaga damene bu karu bo wahowa dindi anda ngaru ti ho aribia halu muni ngarubi ti aribia haga ka. Anidagua biragola agali dewa bo wahayarunaga one dalo bedaru mbiralime handayaho holene nahe tini hangu birulebira.
EZE 22:26 Loma binigo mo miaga karume mana tigabi bulene ngago pugualu i̱ mitangi bialu lotu lalu howa biagane ngago bame nagalone degeda lo manda bialu yo handaga ka. Mbirale i̱ninaga wubagi helene ngarubi bame wini ngarubi ta nabi nagalone degeda lo manda biaga ka. Ani bialu howa tigua wali agalihondo i̱naga deni mbirale ogo dodohe ogo dodo nahe nga lalu lawai nahaga ka. Ani bialu tigua Sabada horo mana ngago nagalonedago lalu yo handaga ka. Tigua mana urunidagua bialu haga kagome Isaraele wali agali bibahendeme i̱naga mini mo dindiha helaga ka.
EZE 22:27 Gabumane agali haguane bu karuni ti biango dudume nogo balu budu migimigi bialu nalu hagagobi ka. Agali haguane urunime muni dabudaburu dewaore wulene hamelo howa ti damene bu karu bame homelo bo wahalu uruninaga dabudabu wiaru ti aribia halu karulo haga ka.
EZE 22:28 Ani bialu kagola bi mana latagi haga agali bu karu tigua wali agalime mana ko bialu karu hondowa donge halu dago nabiaga ka. Pabe hongo nahe gedaore kago wali agalime pabe bayale hongohe kabe toba helo beni peleme hiragadagua tigua wali agalime ko biraru mo yihaga ka. Tigua ke̱ howa de gandeba handarima laragobi ke̱ howa mbiwia halu mbirale bulebira laragobi tagira naibaga. Agali uruni tigua bi lalu, Anduane Homogo Bibahende Haru Haame Ho Haga kagonaga bi latagi harama, lagago ai i̱ Anduane Homogo kogo i̱na tihondo bi ogo latagi halimu lalu mbira nalami ko.
EZE 22:29 Agali mbirale dewawi karume tini damene bu karu mo hondo howa muni mbirale emene yu karuni mo page biaga ka. Ani bialu howa tigua yagibano karubi wali agali dindi taraha howa Isaraele dindiha íbu hene karubi tihondo ko biaga ka.
EZE 22:30 Wai pabe bo gialo wahenego lone hongohe biadai bilo i̱na agali mbira taya bialu haru. Agali ogonime ibu waitigi anda ibulilono wai pabe gialo ngagoria howa wai hongo howa bialu helo taya biruria mbira naheya. I̱nioreme Isaraele wali agali ti baba waitigi halu i̱na tinaga Isaraele dindi bibahende bo haealabaga bule ngogo ai agali ogonibi mbira heagua nde anidagua nabulebero. Anigo agali ogonibi bulene mbira naheya.
EZE 22:31 Anidagua biyagonaga i̱na ti baba keba timbuni ho kogo howa ti pani nelo mialu irame dangi bo daraligobi delo pani mulebero. Mana ko tinime biyagonaga pani nelo mulebero. I̱ Anduane Homogo Bibahende Haru Haame Ho Haga kogo i̱na bi o ledogoniore, lalu Anduane Homogohanda laya lene.
EZE 23:1 Anduane Homogohanda i̱hondo lalu,
EZE 23:2 Dindiali-o bamba wali kira berenego libu hagibunila bereneya.
EZE 23:3 Libu wandari mabuage bereangi Iyibi dindiha bereneya. Ani biruwa igiri agali bu hearu baba mandagi ibagabu biruwa libu agali kayu biaga bayanda wali bereneya.
EZE 23:4 Wandari wahenedago ibu mini Ohola bereneyago ogoni ibu Isaraele dindiha tano timbuni Samaria ngago manda bialu leda. Ibu hagibunigo mini Oholiba berenego ogoni ibu Yuda dindiha tano dunini Yarusaleme ngago manda bialu leda. Ani bereagola kirabali i̱na dabu binigo ai libugua i̱naga waneigini hono wiya.
EZE 23:5 Ohola ibu i̱ one biruwa ibugua agali kayu yama ibaga bialu ibu lawini Asiriala dimagoli hama ibaga bu biragaya.
EZE 23:6 Ibu lawini uruni ti agali haguanebi ami agali haru haga haguanebi howa tigua aga tagalitayabi handalehe bayale wiaru karulo haga hene. Ami agali uruni tigua nogo hosini biruwa wai biagaya. Ohola ibugua ti igiri daliahe bayale biaru de hondowa ibunaga miniha dimagoli timbuni ho bereneya.
EZE 23:7 Ani biruwa ibu Asiria ami agali uruninaga bayanda wali biruwa ibugua Asirianaga dama mitangi bialu mbirale gime wabini wiaruhondo bi pupu wialu berearia ibuni i̱naga deni dodoheore bereneya.
EZE 23:8 Ibugua bayanda wali Iyibi dindini wandari mabuage bereangi agali yama ibaga biaga winidagua bialu biraabo heneya. Ogoningi agali bu hearu ti hameleadagua bima haru ibagabu haga heneya.
EZE 23:9 Ani biaabo halu berearia i̱na nde Asirialiru ibuni dimagoli ho berene biaru tigua ibu mo ko helonaga tiha ibilarugoni.
EZE 23:10 Ani ibilarugola tigua ibalu ibunaga labolabo minu golo wahai howa tibabe bereleneya. Ani bereagola tigua ibunaga waneigini bu hearu haru piai halu Ohola ibuni ayu tibu ne gadele wiagome homelo dibu waheneya. Ani biyagola wali maru biru wiarume Oholanaga te hale howa lalu, Ibunime mana ko biyagonaga pani nedagoni ndobe, laga biya.
EZE 23:11 Ainde ibu hagibuni Oholiba ibugua Oholaha genda tagira piyaru de hondowa ibu mogo nale bereneya. Ibugua agali baba kayu gibi yama ibaga bialu ibu hagibuni Oholahanda biyagobi ndo bu bolangua haga bereneya.
EZE 23:12 Oholiba ibuguabi nde agali haguanebi ami haru haga agali haguane bu hearubi bibahende hondo dimagoli timbuni haya. Agali uruni ti bibahende igiri daliahe dege howa aga baya ogobi dege dege karulowa tigua nogo hosini biruwa wai biagaya. Ainde Oholiba ibunaga bu miniha birabe nahayagola abale heyalu puwa igiri biaru baba mandagi paliyiya.
EZE 23:13 Ai i̱na deme hondo hewagola ibu hagibunime ko biyago ale dege bialu berearia handaru. Mana libugua bialu biraga wiago ko dodoheore biaga winiya.
EZE 23:14 Anigo Oholiba ibugua mana ko timbuniore bu bolangua ho berene. Ibugua Babilonoali agali haguane timbuni bu hearunaga bigiya gilibu wiago hendeneya. Agalime tanonaga ege to̱le̱ pabe heagoria bage tara tara podalu bigiya wabu helowa beni daramabime hiriniya.
EZE 23:15 Agali haguane uruni tigua mandibu wialu aga bayale mo yári biahene mbirame tinaga emboneni bo biniya.
EZE 23:16 Ainde Oholiba ibugua Babilono agali haguane de hondowa agali bayaleoreyagola ibu dimagoli timbuni ho berene. Ani biruwa ibugua agali hearia Babilono bi lo pelalu ibu baba palimi̱ya ibalimu lalu lowia hene.
EZE 23:17 Ani layiya handala agali biaru tigua ibu bereria ibuwa tinaga hame wiago Oholibaha biba howa Oholiba mo koore hayagola ibuni i̱naga deni ko dodoheore berene. Tigua ibu yagayaga bialu heagola mani nde Oholiba ibugua ti handabe manga hene.
EZE 23:18 Oholiba ibu wali koorene ko berene. Ibugua mana ko biyago ha do howa ndo tanabi bialu wali agali bibahendenaga deni ko biyago hondowa tigua ibu bayanda walida lo manda biai hene. Ani biya handala i̱na ibu hagibuni biago handabe manga harudagua ibuhondobi handabe manga timbuni harugoni.
EZE 23:19 Ani mangaho hewago helowa ibugua agali kayu yaabo haga berene. Bamba ibu Iyibi dindiha bereangi bayanda wali biruwa agali kayu yama ibaga bialu biraga wiyago manda bu bereneya.
EZE 23:20 Ani biruwa ibu miniha ibunaga agali Iyibi dindini hayaru mitangi bu biraabo heneya. Agali uruni ti dimagoli gibi howa tinaga tingini nogo donginaga ale halu ibane timbuni nogo hosinaga ale ibagaya.
EZE 23:21 Oholiba í̠ wandari mabuage bereangi Iyibi dindini biruwa bialu biraga wirigo dege biaabo holene hame lo bedegonida. Ani beregola agalime í̠ mo gini bia haga haga bialu mandagi haru palirigoni, laya lene.
EZE 23:22 Anduane Homogohanda laabo halu lalu, I̱ Anduane Homogo Bibahende Haru Haame Ho Haga kogo i̱na Oholiba í̠hondo bi ogo laro. Í̠ nenege agali uruni manga ho bedegoni i̱ manda bidogo ainde harugo i̱na ti í̠ baba mo keba halu í̠hondo koore bilo ibilolebero.
EZE 23:23 I̱na agali haguanebi ami agali haru haga timbunirubi igiri daliaherubi minalu ibiloleberogo Babilono howabi Kaladia howabi Pegodo hameigini karubi Soa howabi Koa howabi Asiria howabi dindi uruni bibahendeha howa tinaga nogo hosini biralu i̱na ti haru halu ibulebero. Bamba í̠na agali uruni baya taraore heago de hondowa dimagoli ho biraga birarigoni.
EZE 23:24 Ainde áyu tigua dindi abene uyurayagi yu wahalu í̠ni baba wai bilo ibilolebero. Tigua ami agali heba ibalu wai biagane garo ale nogo hosime gili laga mini karisibi tinaga tomobi wai biagane ale yaga garo ale karisi heba dewaore ibulebira. Tigua wai biagane dabudabu marubi yalu wai pole mo karulagane gaba manda karulalu wai humbibi mo yalu ibuwa tigua í̠ ho hagira bu holebira. Ani bidagola i̱na tinaga giha minu ya harogola tigua í̠ bope halu tinaga mana ngagoria howa í̠ godini dabalu minu bolebira.
EZE 23:25 Í̠ i̱ erembira ngirigonaga i̱na í̠hondo keba timbuni ho kogoni. Ani birigonaga i̱na agali ibilaroru tigua í̠ minu belolebero. Tigua í̠naga nguibi halebi minu podalu í̠ waneiginiru minu yu piai holebira. Wali agali maru í̠naga dindiha yu wahene karu nde agali urunime ayu tibu ne gadele yidagome dibalu maru irani bo delolebira.
EZE 23:26 Ani buwa í̠naga aga karulo keru golo wahai halu ma gagua alemebi í̠naga gi pagidabi bibahende golo yai holebira.
EZE 23:27 I̱na mbirale urunidagua berogola í̠na bamba Iyibi dindiha biruwa koorene ko bialu agali kayu bima ibaga bialu biraga wirigo áyu bialu biraabo kego nabibelonaga i̱na mbirale uruni biaiore holebero. Ani berogola í̠na dama mitangi bialu mbirale gime wabini ngaruhondo bi pupu wulenaga hame nale Iyibi dindibi lone mitangi nabi holebere.
EZE 23:28 I̱ Anduane Homogo Bibahende Haru Haame Ho Haga kogome bi ogodagua laro. Agali í̠na handabe manga harirubi hame nale erembira mirirubi i̱na tinaga giha í̠ minu ya holebero.
EZE 23:29 Agali urunime í̠ hame nale handabe manga howa tigua í̠na biabe bialu mbirale mo wini ngeru page bu yalu polebira. Ani biragola í̠ mbirale mbira nayiore bame bayanda wali aga nabi tibabe bedaria biragagobi birulebere. Í̠na mana ko dewaore bialu biraabo harigo
EZE 23:30 ainde í̠ha genda urunibi ibirane hondolebere. Í̠na hameigini tara tara dindi taraha karu dimagoli howa tinaga dama mitangi bialu mbirale gime wabini wiaruhondo bi pupu wialu harigome i̱naga deni í̠ni mo dodohe bayanda wali bedarume tini mo dodohe biragagobi bede.
EZE 23:31 Í̠ hagibuninaga mana ko bini wiago taluwa bialu birarigodago i̱na í̠ hagibuni pani nelo mirudagua í̠ nabelo ngulebero.
EZE 23:32 I̱ Anduane Homogo Bibahende Haru Haame Ho Haga kogo i̱na bi ogodagua laro. Í̠na í̠ hagibuninaga gabo beha nenegobi nalu holebere. Gabo be ogoni uli timbuniwi ngagoni. I̱na gabo be ogoniha waini iba hambu to̱lo ngerogola nowa í̠ luluyu ibagabu kego hondowa wali agali tara tara bu karume í̠ mege bialu hondo oba holebira.
EZE 23:33 Waini iba ogoni í̠ hagibuni Samaria ibu nalu no luluyu hayagobi dege nabelo ngulebero. Gabo be ogoniha bedago naregome í̠naga bu miniha genda yu howa luluyu ibagabu holebere. Gabo be ogoniha gi timbuniore holenebi mo ko holenebi nga.
EZE 23:34 Í̠na be ogoniha bedago no biba holebere. Nai howa í̠na gabo be bo pambu lowa gingirulo paya bini dodene ngago mo yuwa ogonime dege í̠ninaga andu podalu birulebere. I̱ Anduane Homogo Bibahende Haru Haame Ho Haga kogome bi o ledogoniore, laya lene.
EZE 23:35 I̱ Anduane Homogo Bibahende Haru Haame Ho Haga kogome í̠hondo bi ogodagua laro. Í̠na i̱ embeda halu erembira ngialu puwa dimagoli halu bayanda walinaga biabe bialu harigonaga pani nalu genda ya tandaga na bialu birulebere, laya lene.
EZE 23:36 Anduane Homogohanda i̱hondo langialu lalu, Dindiali-o í̠na wali kira mana ko ngubiore ngaru biaga Oholabi Oholibabi manani howa libuhondo ko biribi labe.
EZE 23:37 Libu wali ko bayanda wali biruwa agali kayu bu ibaga biaga wali agali homelo bame bo wahagabi beda. Libugua dama mitangi bialu mbirale gime wabini ngaru baba kayu biaga beda. Libugua i̱naga waneigini taba honowa mbirale gime wabini ngaruhondo ti bo lomabu migi biribi.
EZE 23:38 Libugua ogoni hangu ndo mana ko marubi bia dege biya. Libugua i̱naga anda hewagobi mo mebia haya. Ani bialu i̱ninaga Sabada horo wiabagi henegonaga mana wiwagobi puguaya.
EZE 23:39 Libunaga waneiginiru dama mitangi bialu mbirale gime wabini wiaruhondo libugua bo lomabu mialu dai buwa i̱naga anda hewagoha anda ibini. Ani biyagome i̱naga anda mo dodo halu mebia ho helaya.
EZE 23:40 Ani bialu libugua mana ko ngubi marubi bini wia dege bida. Libugua agali dindi tara kaundiaha hearuhondo bi lo pelalu ibalimu layagola hale halu agali biaru ibigi ibiniya. Wali biago labome wayawaya balu libunaga deni ambua hare bialu mani magaguaru wialu gi pagidaru wialu bini.
EZE 23:41 Ani bialu libugua dagia mbira mo yári biaho ngelowa libuni berene. Ani buwa libugua tomo baya dendebi maru tebolo mbira libuni dagia birayago kawareni mo wiapara ho ngelowa ogoriani tomo uruni mo wini. Libugua ira hagua ngabilo delaga inisenesirubi olibe lini ibaneru i̱na libu mirurubi tebolo ogoriani mo ngelaribi.
EZE 23:42 Ani biyagola agali lulu iba naga dindi ko iba dalu naibaga wiagoha howa haru ibiniru badi balu tomoru nalu biruwa tigua turu halu bi ladadaga birimi. Agali uruni tigua wali biago labonaga gini gi pagida wia halu kuini walinaga manda muwa libunaga haguani mo karula haya.
EZE 23:43 I̱na deme hondowa mitangibu handalu hewaria bambaore howa wali kira ogoni labome dabu binigo pugualu puwa áyu bayanda wali berearia agali uruni ti libu andaga peneya.
EZE 23:44 Agali uruni tigua bayanda wali kira Ohola Oholibala baba mandagi palue puabo haga heneya.
EZE 23:45 Libugua dabu bini mana pugualu wali agali bame homelo bo wahalu biaga bedago ainde agali mini tigabi karu tigua libu ko bialu birayagonaga manani helowa libuni homolene karulape lolebira.
EZE 23:46 I̱ Anduane Homogo Bibahende Haru Haame Ho Haga kogo i̱na bi ogodagua laro. Libu pani mialu minu bole agali dewaore haru ibidaba. Tigua ibuwa wali kira ogonilabo mo gi halu libunaga mbirale ngaru gingila miai helo.
EZE 23:47 Ani bialu agali ibirarume libu ege to̱le̱me balu wai biagane ayu tibu ne gadele ngagome dibalu homeleladaba. Tigua libu waneiginiru bo wahai halu libunaga anda bu karu bo heda hai heladaba.
EZE 23:48 I̱na anidagua berogola wali maru bedarume de hondowa tigua mitangi bialu wali kira ogoni labome agali kayu bialu birayadagua nabule lelo hameledo. Ani bialu dindi ogoha wali agali kayu yaga mana ngago mo wahai holebero.
EZE 23:49 Ogolabo hagibunila-o libugua agali kayu dewaore bialubi dama mitangi bialu mbirale gime wabini wiaruhondo bi pupu wialubi biraribigonaga pani nalibulo ngulebero. Anidagua berogola libugua i̱ni Anduane Homogo Bibahende Haru Haame Ho Haga henedalo hondoleberebi, lalu Anduane Homogohanda laya lalu Esegielehanda lene.
EZE 24:1 Ina garabaya hemaria dege mali dininaga ege pini hayagola ege ogoninaga horo pini dege ogoningi Anduane Homogohanda i̱hondo langialu lalu,
EZE 24:2 Dindiali-o horo áyu ogoni howa Babilononaga kini kagome Yarusaleme tano ho hagira bialu ka. Ani bialu ka larogoni Isaraele wali agali bu karume í̠naga bi larego henenedalo manda bilonaga horo egebi ogongiore lalu bebani gilibu wibe.
EZE 24:3 Isaraeleali mine haga bu karunihondo bi yobage ogo Anduane Homogo Bibahendenaga Haru Haame Haga kogo i̱nime bi o larogoni lamibe. Todobene beha iba berelalu irani delabe.
EZE 24:4 Nogo sibi bayale mbira bowa payane mbirini modawane ge kuni mbirinirubi be ogoniha bayuwa dawabe. Kuni mbirinibi dende biaga alego todobene ogoniha dawa to̱lalimu. Kuniru baya hangu do golelo be tibiniha dawalu iba pobo halu kidikodo laga bilo ira timbuni delaga bibe.
EZE 24:6 Anduane Homogo Bibahendenaga Haru Haame Haga kogome i̱na bi ogodagua larogoni. Yarusaleme wali agalime wali agali bameore homelo bo wahaga kamigonaga tíha mo ko holene timbuniore wulebira. Yarusalemeore todobene be boronosime wabini ale wuwa tibiniha ko dodohe mbiralime wayawaya bialu domabe naheore ngaligobi ngegoni. Nogo mbirini kuniru bayale damene beha dawayago mbira mbira dugu yamigi bialu mbiraore hangubi berelo wa nahabe.
EZE 24:7 Tígua mana ko birimada lalu gi nahe howa hariga teneni ta nabi howa bialu haga ka. Agali bo wahene ngagonaga darama dindi dugu dambi nahe bame ege to̱le̱ ngagoria odo payabu ngelo wahagadagua mana ko ta nabi bialu haga ka.
EZE 24:8 Anigo darama i̱na henemane ani ege to̱le̱ni odo payabu ngelo waharuli. Darama ogoni hondowa i̱na tígua mana ko birimida lowa keba halu tí mo ko holenaga ani biruli, laya.
EZE 24:9 Anduane Homogo Bibahende Haru Haame Ho Haga kogome ogodagua laro. Yarusaleme wali agalime wali agali bameore homelo bo wahaga kamigonaga tíha mo ko holene timbuniore wulebira. Tano ogoni i̱na bo heda hole ira dewa bo alugumu bu wima irigi holebero.
EZE 24:10 Ira bo alugumu bu wirugo ira hedope howa todobene be daligani delolebero. Todobene ogoniha iba bedago dalu kidikodo laho ngane dege beha iba bedago do hundialu nogo mbirini kunibi beha dawedago da dege bialu do dapialu mbirale todobeneha bedaru do ereba hai helolebero.
EZE 24:11 Ani bialu todobene be ogoni ibuni hangu irani daho ngane dege do kundi bialu daramabiore wulebira. Ani ngagola todobene ibu ko dodohe ala wiyago ai irame dodo uruni dapialu daiore howa todobene be ogoni dodo mbira para nahe wilonaga delo hameledo.
EZE 24:12 Anigo irame beha dodo karu dai naholobadago i̱na biabe ogoni erekuibini bameore bialu haruda.
EZE 24:13 Yarusaleme wali agaliru-o be hagua binidagoni manane tínaga mana ko damene dodohe ngelo kamigoni. I̱na tínaga ko uruni domo wahole bialu hewaria tínime domo waholene manga harimi. Anigo i̱naga keba holene timbuniore ngogome tíha mo tandagaore haragola ti lone ko dodo nahe holeberami. Ani birangi i̱naga keba holene ogoni ereba holebira.
EZE 24:14 Anduane Homogo i̱nimeore bi ogoni larugoni. I̱na tíhondo bulene ngogo áyu berogoni. Tígua mana ko dodohe birimigoni i̱na mo embeda naholebero. Tí darabi naholebero dege. I̱na tí manani howa dabaki halu ko tínime bialu harimidagonaga pani karulape nalimulo ngulebero. I̱ Anduane Homogo Bibahende Haru Haame Ho Haga kogo i̱na bi ogoni larogoni, laya lalu Esegielehanda lene.
EZE 24:15 Anduane Homogohanda i̱hondo lalu,
EZE 24:16 Dindiali-o í̠na í̠ one dara halu mitangiho kegoni i̱ manda bia bidogoni. Anigo ai harugo lowa í̠ni hanguore helalu i̱na í̠ one mo ereba helolebero. Ani berogola í̠na bi nale í̠ one dara howa dugu nabibe.
EZE 24:17 Wali agali maru bu karume í̠na dugu berego hale nahelo. Mbirali homaragola walia hole biaga mana damene wiyaruni bibahende nabi wahabe. Ani bialu í̠naga aga haguaneni karulaga wirigo wa nahe ge subi karulalu bibahende mo karulagadagua karulo habe. Denguibi bu yi nahabe. Duguanda howa tomo naga mana ngadagua nane wahabe. Mana wiyadagua í̠naga damenerume tomo yalu ibiyagua nayalu ibalimu labe, lene.
EZE 24:18 Ani layagola howa egerebagi wali agaliru baba bi lamiai ho hewane dege horo ogoni alendo hayagola i̱ one ibu homaya. Homayagola horo mendengi ogodagua bibe lalu Anduane Homogohanda langiyadagua biru.
EZE 24:19 I̱na urunidagua bialu hewaria wali agali bu hearu tigua i̱hondo hale halu lalu, Í̠na dara halu duguanda howa biaga mana wiyago nabi kegoni irane agibe. Í̠na inahondo mbirale mbira mo walia holenaga bialu kebe, laya lene.
EZE 24:20 Ani hale hayagola i̱na tihondo ladai bialu lalu, Anduane Homogo ibugua i̱hondo lalu,
EZE 24:21 Bi ogo Isaraele wali agali tihondo Anduane Homogo ibugua ogodagua laya labe. Tígua i̱ninaga anda kago handaya howa turu halu anda ogoni hongoheore ka laramili. Anigo i̱na anda ogoni bo gialo waholebero. Ani bialu tínaga waneigini Yarusalemeha yu wahene karu waiha bo waholebira.
EZE 24:22 Ani biragola manane Esegiele ibugua biyadagua buleberami. Tígua tínaga dengui bu yi nahe wahalubi duguandaha daraho biruwa tí damenerume tomo nagadaguabi nanoleberami.
EZE 24:23 Agame haguaneni karulalu ge subi bialu ibaga bialu poleberami. Wali agali homaragola uruninaga dara halu dugu biagadaguabi nabuleberami. Irane tínaga mana ko bialu hene ngamiru hangu mitangitangi bialu haabo howa tínaga miniha genda yu kamigome tínaga tingini biako halu obiore holeberami. Ani howa tíninagabi nde dugu bigibigi bialu holeberemi.
EZE 24:24 Ani beramigola Esegiele ibugua manane walia halu biyadagua tígua bialu holeberemi. Tíha mbirale uruni tagira ibirangi i̱ni Anduane Homogoore henedane hondoleberemi laya, lalu Esegielehanda lene.
EZE 24:25 Anduane Homogohanda i̱hondo laabo halu lalu, Dindiali-o i̱naga anda ti dege dombeneha kagome tí bayale hongohe kamabe toba haga kami. Tígua anda ogoni gubalini timbuni howa turu halu ogoni hangu mitangi biaabo haga kamigoni. Anigo i̱naga anda ogoni gialo wahai halu ti waneiginirubi bo wahai holebero.
EZE 24:26 Ani berogola horo ogoningi agali mbira homa nabi yu wahene kagome abale gerai lalu í̠ keria mbirale uruni biyagonaga te langule ibulebira.
EZE 24:27 Ai horo ogoningi dege í̠naga ne hariga ndibulo haabo harigo i̱na mo karulape helarogola bi lone lolebere. Ani berogola í̠na agali bi yalu ibiragohondo bi latagi halu lamulebere. Í̠na bi lalu kego hondowa Isaraele wali agali tigua i̱ni Anduane Homogoore henemane henedane hondolebira, laya lalu i̱hondo lene.
EZE 25:1 Anduane Homogohanda i̱hondo lalu,
EZE 25:2 Dindiali-o í̠na Amono dindiha handa amu howa mbiwia halu, Tí mo ko holebira, labe.
EZE 25:3 Amono wali agali tihondo í̠na bi ogodagua lamibe. Anduane Homogo Bibahende Haru Haame Ho Haga kago ibugua bi larago hale halimu, labe. I̱naga anda hewago mebia hayagobi Isaraele dindi bo haealabaga biyagobi Yuda wali agali bu hearu dindi kaundiaha garabaya bu yalu piai hayagobi hondowa tígua turu timbuni ho harimi.
EZE 25:4 Ani bialu harimigonaga i̱na agali maru ni tagira ibiragohayagi howa ibilalu tí baba wai bialu tínaga dindi ngamigo karulo helolebero. Tínaga mabuha tomo hengedemiru ti aribia howa bu nalu holebira. Ani bialu nogo bulumaga angibuni karunaga andu ibane tínaga winigo tigua hambu naga bulebira.
EZE 25:5 I̱na Laba tano timbuni ngago mo labu halu datani timbuni andaho ngeledogola dindi ogoni nogo kamele bu karume datani nalu holene wulebira. Ani bialu Amono dindi bibahende nogo sibi hangu hinalu holene wulebira. Ani ngelarogola tígua i̱ni Anduane Homogoore henedane hondoleberemi.
EZE 25:6 I̱ Anduane Homogo Bibahende Haru Haame Ho Haga kogo i̱na bi ogodagua laro. Tígua Isaraele wali agali handabe manga timbuni ho howa Isaraele dindi bo haealabaga bialu bo labu hayangi tígua turu timbuni howa gi habe balu mali ligiligi bialu harimi.
EZE 25:7 Anidagua bialu harimigonaga i̱na hameigini tara tara dindi taraha karu tí daluha ibilarogola tigua tínaga mbirale ngamiru page bialu tí minu bai holebira. I̱na tíha mo ko holene ibilarogola tínaga dindiha hameigini abogo padagoni lene napalueberemi. Ani berogo hondowa tígua i̱ Anduane Homogo heneneore henedane hondoleberemi, laya lene.
EZE 25:8 I̱ Anduane Homogo Bibahende Haru Haame Ho Haga kogo i̱na bi ogodagua laro. Moaba wali agali bu karubi Sia wali agali bu karubi tigua mitangi bialu Yuda wali agali bu karu ti hameigini maru kagobi dege ka lene.
EZE 25:9 Ani lenego i̱na tinaga waitigi bu karu ibilalu tigua Moaba dindiha dindi tubarini tano timbini dunini ngamigoria wai bilo ibilolebero. Ani ibilarogola tigua tano hongohe uru Bede Yasimodobi Balameonobi Kiriadaimibi tano bayale uruni bibahende bo hilo wahai halu bo labu holebira.
EZE 25:10 Agali waitigi uruni ni tagira ibiragohayagi howa ibalu Moaba dindiha karubi Amono dindiha bu karubi uruni baba wai bialu ti bope halu tinaga dindi ngago karulo holebira. Anidagua biragola Moaba dindiha Amono dindihabi hameigini abogo padagoni lene napaluebira.
EZE 25:11 Anidagua bialu i̱na Moabali bo haealabagabu wahai kogola tigua i̱ni Anduane Homogo henene henedane hondolebira, laya lene.
EZE 25:12 I̱ Anduane Homogo Bibahende Haru Haame Ho Haga kogo i̱na bi ogodagua laro. Idomo wali agali tigua Yuda wali agalihondo mana ko wiaru biadai biyagonaga pani nolene nga.
EZE 25:13 Ani nolene ngagonaga i̱na laro. I̱na Idomo dindi bo haeala hole bialu wali agali bibahendebi tinaga nogo tara tara bu karubi bibahendeore bo wahai holebero. Temana tano ngagoria howa bama pialu uyura Dedana tano ngagoria bama tagira pialu wali agali bibahende waitigime bo wahai halu dindi labu wulebira.
EZE 25:14 I̱na Idomo tinaga mana ko biyagonaga pani nelo mialu i̱naga Isaraele wali agali bu karume ti baba wai bule pudaba lolebero. Anidagua berogola Idomo wali agali tigua i̱naga keba holene timbuni tiha ibira manda bulebira. Anidagua bialu Idomo wali agali tigua ko biyagonaga pani nelo i̱nime minidalo manda bulebira. I̱ Anduane Homogo Bibahende Haru Haame Ho Haga kogo i̱na bi o ledogoniore, lene.
EZE 25:15 I̱ Anduane Homogo Bibahende Haru Haame Ho Haga kogo i̱na bi ogodagua laro. Bambaore howa Pilidiali tigua Isaraeleali handabe manga halu waitigi haabo haga ka. Tigua Isaraelealime ko biyagonaga paipai bialu mo ko haga bialu haabo ka.
EZE 25:16 Anidagua bialu kagonaga i̱na ogodagua laro. I̱na Pilidia wali agali pani nelo mialu iba solowara ange ange paluyu pedarubi bo hilo wahai holebero.
EZE 25:17 Tigua mana ko bialu hayaru bibahendenaga paipai biadai bialu pani timbuniore nelo merogola i̱na ti baba keba timbuni ho harugo ti miniha manda bulebira. Anidagua berogola tigua i̱ Anduane Homogo henene henedalo manda bulebira, laya lene.
EZE 26:1 Ina garabaya pu hemane mali beanenaga horo mbira layagola Anduane Homogohanda i̱hondo ogodagua laya.
EZE 26:2 Dindiali-o Taia wali agali bu karume turu howa bi ladaga halu lalu, Yarusaleme tanoore bo haealabaga bialu bo labu helayago ainde wali agali dindi tara tara ngaruha howa ti baba biyinaya bule mbirali naibulubada. Ogoniha piagaru ai ina kamaria hangu ibiragola muni dabudabubi dewa wu holeberema ndobe, lalu ka.
EZE 26:3 Ani lalu kago ai i̱ni Anduane Homogo Bibahende Haru Haame Ho Haga kogo i̱na bi ogo laro. Taia wali agaliru tí baba waitigi i̱ haro. Ani howa i̱na hameigini tara tara dindi taraha howa waitigi dewaore iba solowara bedago angeni iba yaribu timbuniore bu yalu ibuwa dambi hagadagua bialu tí baba wai bule ibilolebero.
EZE 26:4 Ani ibilarogola tigua ibalu tínaga tano wai pabe hongohe ege pabe bu mabubupe kamiru bo gialopaya bialu wai pabe daligani mamage haga anda bu heledemiru bo gialo wahai halu bulebira. Ani biragola i̱na tínaga tanoha dindi ngago dugu wahai harogola ege to̱le̱ kelekele hangu tagira íbu wulebira.
EZE 26:5 Ani ngagola agali wena baga bu karume tinaga wena nu yobilonaga dindi ege to̱le̱ kelekele ogoriani yalu ibuwa yobia haga bulebira. I̱ Anduane Homogo Bibahende Haru Haame Ho Haga kogo i̱na bi o ledogoniore. Hameigini tara tara dindi taraha bu karume ibalu tí minalu mo ko howa bai holebira.
EZE 26:6 Ani buwa tigua Taia tano iba dege dombeneha ngago kawareni dindi timbuni iba angeni wuyu pedagoha tano dewa bu ngaruha wali agali bu karu bibahendeore bo hilo wahai holebira. Anidagua biragola hondowa Taia wali agali tígua i̱ Anduane Homogo henene henedane hondoleberemi.
EZE 26:7 I̱ Anduane Homogo Bibahende Haru Haame Ho Haga kogo i̱na ogodagua laro. I̱na kini mbira hongohe daligaore kago haru ibulebero. Kini ogoni ibu Babilononaga kini Nebugadenesa kago i̱na haru eberogola ibugua Taia wali agali tí baba wai bulebira. Ibugua agali dewaorebi nogo hosi dewaorebi wai biagane garo nogo hosime gili laga mini karisi dewaorebi ami agali nogo hosini biruwa wai biagane dewabi dindi abene uyurahayagi howa haru ibulebira.
EZE 26:8 Ani ibalu tigua Taia dindi timbuninaga tano kaware iba ange bu ngaruha wali agali kamiru bo wahai holebira. Ani buwa tigua gana walu tano pabe kagoha heyu howa wai bulenaga dindi dugu wima irigi holebira. Ani bialu howa tinaga wai humbiha tini hage howa wai bulenaga wai pabe haradagua bilowa ogoniha wai bulebira.
EZE 26:9 Ani bialu howa tigua wai pabe bo gialolenaga mbirale mbira hongohe guruyagu̱ ale mo yu íbu pongo bia howa yupe haragola tanonaga wai pabe kago bo gialolebira. Ani bialu kuluba hongohe ngagome wai pabe daligani mamage haga anda bu heledemirubi gialolebira.
EZE 26:10 Ani bialu tinaga nogo hosi urunime tanoha hariga ngadagua gerai lalu pugupugu biragola tanoha be abalu timbuni taularagome anda bu karu dambi hai holebira. Ami agalime nogo hosini biralubi hosime gililaga garo ale karisini heyu halubi tanoha abale anda piai holebira. Wai pabenaga panga kagoria anda pialu howa dindi kulu lalu hongo howa bi ua laga biragola wai pabe ema bialu holebira.
EZE 26:11 Ami agali nogo hosini biralu pialu howa tigua wai biagane ayu tibu ne gadele yiagome wali agali tanoha bu karu diba amu nana bima polebira. Anda gene hongohe tanoha bu karu dindini dugu ibira hai holebira.
EZE 26:12 Waitigi urunime tínaga muni mbirale ngamirubi biyinaya bulenaga dabudabu ngamirubi bibahende mo yai holebira. Ani bialu tínaga wai pabe hongohe karu bo gialapaya biai halu tínaga anda hongohe karubi bo gialo wahai holebira. Ege to̱le̱bi ira bayale podene ngarubi dindi ngarubi bibahende iba solowara bedagoha bape hai holebira.
EZE 26:13 Anidagua biragola tígua ngida ale baga kamiru nabe iba gana laga kamirubi nale dege holeberemi.
EZE 26:14 Tínaga dindini ege to̱le̱ dege ibira halu dindi mbira nawulebira. Ege to̱le̱ ogoni ngagoria agali wena baga karume tinaga wena nu yobia haga wulebira. Ani biaga ngagola mani tano ogoriani lone biadai bibe nahe wulebira. I̱ Anduane Homogo Bibahende Haru Haame Ho Haga kogo i̱na bi o ledogoniore, laya, lene.
EZE 26:15 I̱ Anduane Homogo Bibahende Haru Haame Ho Haga kogo i̱na Taia wali agali bu karuhondo bi ogodagua laro. Waitigi urunime tínaga tano ngago bo gialabaga bialu howa hoaro laragobi kilingulu laragobi bibahende wali agali iba angeni paluyu pedarume hale holebira. Ani bialu waitigime tí minu baragola yiya lalu dugu bigibigi beremigobi tigua hale howa mogo timbuniore lowa duru lagalaga bialu holebira.
EZE 26:16 Tíha mo ko holene ogoni anda ibirago hale howa hameigini tara tara dindi tara iba solowara bedago ange ange ngagoria paluyu pedarume mogo timbuni lalu tinaga kini karume biragane dagia ngago ngelalu daluwa kininaga aga bayale karulo bedaru golo wahai halu dindini biruwa duru lalu birulebira.
EZE 26:17 Ani biruwa tínaga tano bo gialo waharagonaga dara howa duguore bialu iba gana ogodagua lolebira. Tano mini lene timbuni winigo ai bo gialo wahai hayada. Ibunaga iba sibi timbuni biaru ibani puíbu biyaru tinaga biyinaya biabe nabi ngagoni. Wali agali tano ogoniha hearu ti bamba iba solowara bedagoria ibuwa iba sibi dewa wialu ti iba solowara biabe bulene mugube tara tara yu howa ti duniniore haya. Wali agali tara tara iba solowara angeha palima pedarume í̠naga wali agali mo gi timbuni haya.
EZE 26:18 Tano bo gialabaga biai hayagola horo ogoningi wali agali iba dombeneha paliaga bu hearu tigua gi timbuni howa tini duru lagalaga bialu holebira, lalu wali agalime dara howa dugu bigi bialu iba gana ogonibi lolebira, lene.
EZE 26:19 I̱ Anduane Homogo Bibahende Haru Haame Ho Haga kogo i̱na bi ogodagua laro. Taia í̠ore tano wali agali mbira nahe ngaligobi ngelolebero. Ani bialu iba solowara timbuni bedagome bira dambi helarogola í̠ iba andane dindihaore wulebere.
EZE 26:20 Ani bialu i̱na í̠ dindihaore homayarunaga andagaha bape harogola í̠ wali agali ala homaga biyaru heba mandagi holebere. I̱na í̠ tano maru bo gialo wahai hayaru heba dindi andaneha wuwa homayaru heba wiaabo holebere. Ani biragola wali agali mbira í̠ha lone nahe í̠bi nde dindi ogoria lone nawulebere.
EZE 26:21 I̱na í̠ore bo haealabaga bu waharogola wali agali tara bu karume i̱na í̠hondo birugoni de hondowa gi timbuni holebira. I̱na í̠ bo gialabagabu wahai harogola wali agalime í̠ de hondole taya bialu karia de nahondolebira. I̱ Anduane Homogo Bibahende Haru Haame Ho Haga kogo i̱na bi o ledogoniore, laya, lene.
EZE 27:1 Anduane Homogohanda i̱hondo lalu,
EZE 27:2 Dindiali-o Taia tano ngago bo gialopaya biai holebiragonaga í̠na dugu daraore bialu iba gana lolene nga.
EZE 27:3 Tano ogoni iba solowara bedago kawareni ngagome dindi tara tarani hameigini tara tara padaru baba biyinaya bialu haga nga. I̱ Anduane Homogo Bibahende Haru Haame Ho Haga kogo i̱na bi o larogo latagi halu iba gana labe. Taia í̠na lalu, I̱ duniniorebi tano bayaleorebi mbira ngo, laga ngegoni.
EZE 27:4 Í̠naga dalu iba solowara ngegoni. Agali tano í̠ wabiagarume í̠ baya taraore iba sibi ale wabu wini.
EZE 27:5 Tigua ira bayale guraya aleru Hari Hemono weagoha howa dibalu kambu laga buwa iba sibi ale ogoni wabiya. Ira tamia Lebanono dindiha howa dibu yalu ibuwa iba sibi he̱lo yalu pelonaga labolabo pongobia hole helaga biya.
EZE 27:6 Basana dindiha howa ira bai ale hearu dibu pelowa iba talu tanguiaga ira mbalape wabu wiya. Ira bayale tara mbira dindi Saibarasa ngagoha howa dibu yu ibalu ogonime iba sibinaga dagia dindiha pelowa dunguaya. Nogo elebana kagonaga ne gayane mo wuwa ogonime iba sibinaga tamuha mo yáribia haya.
EZE 27:7 Labolabo baya taraoreru Iyibi dindiha howa mo yu ibuwa ogonime iba sibi he̱lelonaga labolabo helaya. Labolabo uruni bayale helo mo yáribia halu aga tara tara lebu para hagabi wiaru mo yu ibugu biya. Labolabo ogoni pongobia heago kaundiaha howa handaga wini. Aga bayale mindibi tagalitayabi dindi Saibarasa iba dombeneha ngagoria howa mo yu ibuwa iba sibiha agali biabe biagaru holene wiagohayagi dariba haga biya.
EZE 27:8 Agali iba sibi ogoni yu ibaga biagaru ti Saidono tanoalibi Abada tanoalibi hene. Taia í̠naga agali manda timbuniwi karu ti iba sibiha biabe biaga helene.
EZE 27:9 Agali maru iba sibi ogoninaga tamuha ira maru goba halu diri wigi birago wagaya haga ti Bibiloso tanoali mandabi hene. Iba sibi ogoni manane Taia tano í̠ manda bialu nga. Iba sibi dindi tara tara ngaruha howa í̠ daluha ibalu tinaga biabe biaga agaliru í̠naga tanoha biyinaya anda heagoha anda pialu mbirale tara tara ngaru yolo migi biaga hene.
EZE 27:10 Agali maru Pesia dindi howabi Lidia dindi howabi Libia dindi howabi ti í̠naga ami agali hayagoni. Ani howa tinaga wai biaga humbiru ami agalinaga gaba mandaru ami agali hagaha golo derela ho haga bu haya. Agali uruni tigua wai bialu í̠ mini lene habelo mo hela haya.
EZE 27:11 Abadali ami bu hearu tigua í̠naga wai pabe bu mabu bini kagoria mamage halu ami agali maru Gamadali hearu tigua wai pabe daligani mamage haga anda bima iraga hene heagoria howa waitigi ibulilono mamage haga hene. Ani howa tinaga wai humbi biaru ami agali hagaha golo derela ho haga bu haya. Agali uruni tigua í̠ mo bayale heagola í̠ tano baya taraore mbirago wirigoni ndobe.
EZE 27:12 Í̠na Sebena wali agali baba biyinaya bialu harigoni. Ani bialu howa tigua silibarubi aeanerubi gabarubi sodarubi dewaore í̠naga mbirale dewa ngeruni yolo bialu ngigi biya.
EZE 27:13 Wali agali Girigi dindiha howabi Tubala dindiha howabi Mesege dindiha howabi ibugu biyaru í̠ baba biyinayaru bialu í̠naga mbirale wua heru tihondo mialu tigua wali agali garabaya biabe ale bia hagaru helalu mbirale tara tara boronosime wabini wiaru ngigi biya.
EZE 27:14 Í̠na Togama tano wali agali bababi nde biyinaya bialu í̠naga mbirale wiru ibu mialu nogo hosi biabe biaganebi agali biralu wai bu piaganebi nogo dongibi yolo bigi birigoni.
EZE 27:15 Dedana wali agali bu hearu bababi nde biyinaya bialu harigoni. Wali agali hameigini tara tara iba solowara bedago ange ange palima pedarubi biyinaya bialu tigua nogo elebananaga ne gayanebi ira mindibi mini ebonibi bibahende í̠na ngeru ti hameledago ale yolo bialu ngigi biya.
EZE 27:16 Siria wali agali bu hearume nde labolabo mindibi tagalitaya ale marubi labolabo mbiragoria aga yári tara tara bayaru lebu para howa mo yáribia haga binirubi aga pele bayaleorebi ege to̱le̱ tara tara emeralabi koralabi lubibi muni dewame miaga wiarubi í̠naga mbirale tara tara bayale wiaru yolo bialu í̠hondo ngigi biya.
EZE 27:17 Yuda wali agali Isaraele wali agalirubi tigua nde widi dewabi mone taranaga ibanebi olibe lini welibi tomo mo dendebia haga tara tara wiarubi yalu í̠naga ngeru tini hameleda ale yolo bule ibugu biya.
EZE 27:18 Damasagasa tanoha wali agali bu hearume í̠ baba biyinaya bialu tigua waini iba Helebono tanoha howa wabinigobi nogo sibinaga irini Sahara dindi wiagoha hearumebi yalu ibalu í̠hondo ngigi biya.
EZE 27:19 Wali agali Dana hameigini bu hearumebi Girigi wali agali Usala dindiha bu hearumebi í̠ baba biyinaya bialu tigua aeanerubi tomo mo dende biahaga tara tararubi pauda mbira mini sanda wiarubi ira mini kasianaga ibanebi yunibi linibi tara tara wabini wiarubi gambe tara mbira ngabi baya tara mbirabi tigua yalu ibalu í̠na ti hameledago ale mo mibelo ibugu biaga hene.
EZE 27:20 Ani bialu Dedana wali agali bu hearume balangiya tara nogo hosinaga erekunini biralu howa mo wiagaru yalu ibalu tini hameledago ale í̠na ngeru yolo bule yalu ibugu biaga hene.
EZE 27:21 Arebia agali bu hearumebi Keda dindiha howa agali haguane bu hearumebi nogo sibi iginibi sibi wangaberubi nogo memerubi haru ibalu tinaga hameledaru í̠na ti mibelo yolobu ibugu biaga hene.
EZE 27:22 Agali biyinaya biaga Seba dindiha howabi Lama tanoha howabi tigua ngolobi pauda tara tara nga bayale biaga tara tara wiarubi ege to̱le̱ tara tara muni dewame miaga wiarubi yalu ibalu tini hameleago í̠na wu heru mibelo yolo bule yalu ibugu biaga.
EZE 27:23 Agali Harana tanoha howabi Kane tanoha howabi Idene tanoha howabi biyinaya biabe biaga agali Seba dindiha howabi Asuru tanoha howabi Kilimada tanoha howabi tigua í̠ baba biyinaya biabe biaga hene.
EZE 27:24 Tigua aga baya taraorebi labolabo tagalitaya alebi labolabo maru yári tara tara lebu para henebi pu payini timbuni tarabi balangiya anda tamuha biraganeni dungua hagane alebi yalu ibugu biya. Balangiya uruni taraore mo yaribia haga bini wiarubi yalu ibalu í̠na ti hameledaru ale ngago yolo bule mo yalu ibugu biya.
EZE 27:25 Ani bialu iba sibi timbuni wiarume í̠naga dabudabu tara tara wiaru mo yalu dindi tara tara wiaruha pugu biya. Í̠ni nde iba sibi timbuni ale ibani wuwa dabudabu tara tara dewaore wu to̱ledagoni.
EZE 27:26 Agali iba talu yaga hearume í̠ hongo howa yalu iba solowara bereago hanuni pu wigola puyabu hongohe ni ibiragohayagi howa ibalu í̠ bo haealabagi halu mo ko hai haya.
EZE 27:27 Í̠ mo ko hayangi í̠naga munibi dabudabubi yári tara tarabi í̠naga iba sibiha biabe biaga agalibi iba sibiha gabenda biabe biaga agalirubi biyinaya biabe biagarubi í̠naga ami agalirubi agali maru í̠ni heba haga heneru bibahende ibaha homai harimida.
EZE 27:28 Agali iba sibiha biabe biaga bibahende bu hearume ga̱ hongo howa layuagome iba angeni dindi wiaru birilagimbu biya.
EZE 27:29 Agali iba sibiha biabe biaga hearu tigua iba sibi ibani ngelalu tagira piai halu iba angeni pu haya.
EZE 27:30 Ti bibahendeme í̠naga daraore halu dugu timbuni bialu haya. Tigua dara ho kama walia halu biagane mana ngadagua dindi abalu tinaga haguani dugu hiralu be abalu wiagoria palu beregedaga bialu haya.
EZE 27:31 Tigua í̠naga dara howa tinaga mandari podo mbololo wahai haya. Tinaga bu miniha tandaga timbuni howa dugu tara bialu daraho howa karulagane agaru karulo haya.
EZE 27:32 Tigua agali homenenaga dara howa dugu biaga wiadagua dugu bialu ogodagua iba gana lene. Taia-o tano mbira í̠ mo ko haradagua mende agoha mo ko hene ngabe. Í̠ iba solowara bedago dombeneha wialu bi nale ngegoni.
EZE 27:33 Í̠naga dabudabu wiruni iba sibime yalu dindi tara tara ngaruha piai helarigola hameigini tara tara ala burupale hearume mbirale uruni mialu mo yu howa turu haya. Kini karume mbirale í̠naga wirume biyinaya biabe bialu ti mo homogoore haya.
EZE 27:34 Ai áyu í̠ni iba solowaraha mo ko ho wialu ibaha namu lai haya. Agali í̠ha biabe biaga hearu bibahendebi í̠naga dabudabu wiaru bibahendebi í̠ni heba iba solowaraha ereba hai harimi.
EZE 27:35 Wali agali iba solowara ange ange paluyu pearume í̠ mo ko haya layago hale howa ti mogo timbuniore laya. Tinaga kini hearubi mogolo howa gi timbuni ho hayago tinaga denguini mo walia haya.
EZE 27:36 Í̠ dindini nahe bo haealabaga bialu pu erebaore hai helaya. Anidagua bialu agali biyinaya biabe biaga dindi bibahendeha bu hearume í̠ mo ko hene wiago de hondowa ti gi timbuni howa lo mitangi bialu, Inabi nde ogonidagua buligo giba, lalu ka, laya lene.
EZE 28:1 Anduane Homogohanda i̱hondo bi lalu,
EZE 28:2 Dindiali-o Anduane Homogo Bibahende Haru Haame Ho Haga kogome i̱na bi o langerogo Taianaga kini kagohondo í̠na lamibelo hameledo. I̱naga bi ogodagua laro. Taianaga kini-o í̠na í̠ninaga mini mo yaraga halu lalu, I̱ni daliga timbuniore wali agalime i̱ mitangi bialu bi pupu wiaga mbira kogoni, laga ke. Í̠naga dindibi nde mbirale mitangi bialu bi pupu wiagaru dindi mbaule iba solowara dege dombeneha wu kegoni. Í̠na bi henene anidagua la larigonigo henene í̠ mbirale bi pupu wiaga uruni ale ndo í̠ bame agali dege kegoni.
EZE 28:3 Í̠nime manda bu handalu keria í̠naga mini gigabi ngego Danielenaga wu henego bolangua halu timbuniore wu howa mbirale wia do hene ngaru manda biaihe kobe tobaho kegoni.
EZE 28:4 Í̠naga mini gigabi ngegome muni ngolo silibaru hangu dewa mo wu howa ai homogo kegoni.
EZE 28:5 Ani mo ngelo howa muni urunime biyinaya bialu muni igini wiyagola dewaore wu kegoni. Ani howa í̠naga muni dewa wu kegonaga balagala howa mine timbuniore halu kegoni.
EZE 28:6 Anigo i̱ Anduane Homogo Bibahende Haru Haame Ho Haga kogome í̠hondo bi langerogo. Í̠na mine howa mitangibu handalu keria í̠naga mini gigabiwi mbirale gime wabini mitangi bialu bi pupu wiaga karu aria mbira i̱ kobe toba ho kegoni.
EZE 28:7 Ani mitangi bialu kegonaga i̱na í̠naga waitigi koore bu karume í̠ni baba wai bilo ibilolebero. Ani ibilarogola tigua í̠naga manda timbuni ngegome mo wini ngeruni bibahende bo gialabaga bialu mo yu piai holebira.
EZE 28:8 Ani bialu í̠ni mo ko howa í̠ninaga dindi iba solowara dege dombeneha ngegoria homolebere. Ani homalu í̠ni homenerunaga dindi humbirini andaha pu holebere.
EZE 28:9 Anigo tigua í̠ bole ibirangi í̠na tihondo lamialu, Wali agalime i̱hondo bi pupu wiaga mbirale mbira i̱ kogoni, loleberebe. Anigo ogonidagua nalolebere. Í̠na í̠ bo wahaga biaru de handade halu í̠ bame agali damene bu karuni ale dege harudane hondolebere.
EZE 28:10 Í̠naga waitigirume ibalu í̠ bo waharagola í̠ agali uruninaga giha howa biango homaradagua bulebere. Anduane Homogo Bibahende Haru Ho Haame Haga kogome i̱na tí ani bidaba lalu lamirugoni laro, laya lalu Esegielehanda lene.
EZE 28:11 Anduane Homogo ibugua i̱hondo laabo halu lalu,
EZE 28:12 Dindiali-o í̠na Taianaga kini kagonaga dugu bialu ibuhondo bi ogodagua lamibe. Taianaga kini-o Anduane Homogo Bibahende Haru Haame Ho Haga kagome bi ogo í̠hondo larago hale habe. Ala í̠ agali tigabi bayaleore wali agali maru bolangua hene mbira harigoni. Í̠naga mandabi timbuniore bu howa í̠ agali bayaleore mbira harigoni.
EZE 28:13 Í̠ Ngode Datagaliwabenaga Idene mabu ale bayale biagoha harigoni. Ani bialu í̠naga yári bayale ege to̱le̱ tara yolo timbunime miaga mini ngoloru ngibingabu lo helaga bini wiaru mo karulo hari. Ege to̱le̱ uruni mini lubiru tobasaru daimonoru beriliru kanelianaru yasabaru sabaearu emeralaru ganederu ege to̱le̱ uruni bibahende í̠ dindini nahengi i̱na í̠naga mo manda manda bu wiru.
EZE 28:14 Kini-o i̱na í̠ dahuliyali mamage haga haradagua helowa í̠na i̱naga hari loma bia hene wiagoria pu howa ege to̱le̱ ngiringarale tara tara wiagoria ibagabu harigoni.
EZE 28:15 I̱na í̠ dindi ogoria pigane helarungi í̠ bayale ko mbira í̠ha nawiore helaru. Ani helewagola mani i̱naga deni howa mana ko dewaore bialu hari.
EZE 28:16 Í̠na dindi dewaoreha biyinaya biame halu howa wali agali bu hearu baba biyinaya uruni timbuni helonaga bia hami̱ya ibidaba lowa mana ko bialu wali agali bo wahaga kegoni. Í̠ dahuliyali mamage haga ale harigoni hegola i̱naga deni í̠ ko dodoheore hayagola i̱na i̱naga hari loma bia hene biagoria howa í̠ bo taliatagi harugola í̠ taga halu pirigoni. Ani birugola í̠ ege to̱le̱ baya ngiringarale biaru ngagoria lone naholebere.
EZE 28:17 Í̠ni manda bu handalu heria í̠naga dengui bayaleyagola í̠nime balagala halu í̠ni mini mo yaraga halu harigoni. Ani bialu í̠naga manda timbuni wu howa ainde manda timbuni ogonime í̠ninaga mini mo yaraga holene ngabe tobaho harida. Irane ogoninagaore i̱na í̠ bope harugola dindini wiria kini maru karume í̠ hondo oba halu helonaga biru.
EZE 28:18 Taianaga kini-o í̠na biyinaya biabe bialu howa mana ko dewa bialu harigome lotu anda bu hearu i̱naga deni mo dodoheore helari. Ani birigola i̱na tano uruniha ira hedope halu bo heda hewagola tano uruni dai halu be abalu hangu ibira hene ngaria wali agalime hendedagoni.
EZE 28:19 Í̠ mo ko hai hene kegonigo ai dindini naholebereore. Dindi tara taraha wali agali í̠ mandabi bu karume í̠ha ogonidagua biya larago hale howa tihabi buligo lowa ti mogo timbuniore lo kagoni, Anduane Homogohanda laya, lalu Esegielehanda lene.
EZE 28:20 Anduane Homogohanda i̱hondo lone lalu,
EZE 28:21 Dindiali-o í̠na handa amu ho howa Saidono tanohondo í̠ha mo ko holene wulebira lalu lamibe.
EZE 28:22 Anduane Homogo Bibahende Haru Haame Ho Haga kogome i̱na Saidono wali agali bu karuhondo mbirale buleberorunaga bi lamibe. Saidono-o i̱nime tí baba waitigi halu mo ko hai halu tíha i̱naga mana tigabi bayale biaga ngoru mo walia halu berogola tígua i̱naga mini yaraga halu holeberami. Wali agali tara tara bu karume i̱na Saidono wali agalihondo ogonidagua berogo hondowa tigua i̱ni Anduane Homogoore henedalo manda biai holebira.
EZE 28:23 I̱nime warago ko timbuniore tara tararu tí kamiruha ibilolebero. Ani bialu tínaga waitigi bibahende ibai helarogo tigua Saidono baba wai bialu wali agali dewaore bo wahai holebira. Ani biragola bo wahenerunaga darama tanoha harigani iba poradagua pialu holebira. Ani berogo hondowa Saidono wali agali tígua i̱niore Anduane Homogoore henedane hondoleberemi, laya lalu lamibe, lene.
EZE 28:24 Anduane Homogo i̱na bi laabo halu ogodagua laro. Isaraele wali agalinaga waitigi bu karuni ti igibu ani ale howa wali agali kenda poradagua biaga bu ka. Anigo mani lone ani nabulebira. Horo ogoningi Isaraele wali agalibi waitigi bu karubi ti bibahendeme i̱ Anduane Homogo Bibahende Haru Haame Ho Haga kogo i̱niore henene henedane hondolebira, lene.
EZE 28:25 Anduane Homogo Bibahende Haru Haame Ho Haga kogo i̱naore larogo, I̱na Isaraele wali agali dindi tara tara ngaruha garabaya pu helaruruni bibahende haru dai bialu tininaga dindi tene wiyagoria helolebero. Ani berogo hondowa hameigini tara tara bu karume i̱ taraore howa mana bayale tigabi biaga kogoni manda bulebira. Isaraele wali agali tininaga dindi henene ngelo lowa i̱na i̱naga biabe biahaga Yagabahondo mirugoria ibalu haabobo bu holebira.
EZE 28:26 Ani howa tinaga anda bialu tinaga gerebi maburu hangalu ti bayaleore helo helolebero. Ani kagola tinaga waitigi abale Isaraele wali agali ti mo ko halu haga bu hayaruni pani mialu ti minu bolebero. Anidagua berogola Isaraele wali agali tigua i̱ni Anduane Homogoore tinaga Ngode Datagaliwabe henedalo manda bu holebira, lalu Anduane Homogohanda lene.
EZE 29:1 Ina garabaya hemane mali pininaga ege nde pini dege layagola ege ogoninaga horo hombene (12) hayagola Anduane Homogohanda i̱hondo bi ogodagua laya.
EZE 29:2 Dindiali-o í̠na Iyibinaga kini kagoha handa amu howa ibuhondo i̱naga bi hongo howaore la halu, I̱na í̠bi í̠naga wali agalibi Iyibi dindini hai kamiru tí bibahendeha mo ko holene ibilolebero.
EZE 29:3 Í̠na i̱ Anduane Homogo Bibahende Haru Haame Ho Haga kogo i̱na bi o larogo ibuhondo lamibe. Iyibinaga kini-o í̠ waitigi i̱ kogoni. Í̠ore Iyibini iba pugua ngagoha guru abagua timbuni mbira palu wiradagua bide. Í̠na iba Naili timbuni porago í̠nime wabirigo í̠ninagaore pora laga ke.
EZE 29:4 Ani bidego ai i̱na í̠naga neha wena hugume hende howa wena bedaru í̠naga dongone o ligilaga ledagoha hanaho ngeloliya hondo habe. Ani buwa i̱na í̠ gilila mialu í̠ni heba wena í̠ha para haga bidaru heba ibaha howa gilila mulebero.
EZE 29:5 Ani bialu i̱na í̠ni heba wena urunibi dindi ko iba dalu naibaga ngagoha bape holebero. Ani berogola í̠naga tingini dindini bame ibiraho ngagola mbiralime mo hora nahe wiaabo holebira. Ani ngagoria nogo gabua bu karumebi ega bedarumebi ibuwa í̠naga tingini nalu birulebira.
EZE 29:6 Ani birago hondowa Iyibi wali agali bibahendeme i̱niore Anduane Homogo henene henedane hondoleberemi. Anduane Homogo ibugua lalu, Isaraele wali agali karume mitangi bialu Iyibiali tígua ibalu wai biamogo bialu mo wulebirabe tobaho hemiria ai wai biamogo bule naibirimi. Kini-o í̠ halimbu hongohe ale ndo kegoni.
EZE 29:7 Isaraele agalirume í̠ halimbu yalu ibaga bule handalu hearia í̠ gambe hale gabuni ale heneyago ai tigua halimbu yamialu poramalo manda bialu hearia poda pialu tininaga adogeha nogoba haya. Tigua í̠ hongo howa yu ha hearia ai habola pialu pilowa tininaga erene podaya.
EZE 29:8 Ani biyagonaga i̱ Anduane Homogo Bibahende Haru Haame Ho Haga kogo i̱na laro. I̱na waitigiru ibilalu tigua Iyibi tí baba wai bule ibuwa wali agali bu karubi nogo tara tara bu karubi bibahende bo wahai holebira.
EZE 29:9 Ani biragola Iyibi dindi mo ko howa bo labu hai harago de hondowa tígua i̱ni Anduane Homogo heneneore henedane hondoleberemi. Kini í̠na lalu iba Naili porago í̠nime wabialu pelene pora larigo iba ogoni í̠ninagaore lalu kegoni.
EZE 29:10 Bi ogoni ko mbira larigo ai i̱na í̠la waitigi halu iba Naili poragobi waitigi dege haro. Ani howa i̱na Iyibi dindi bibahende mo ko howa bo labu hai halu Migidolo tano uyurahayagi ngagoria howa pialu unurahayagi Asawana tano ngago Sudana dindila tubari ngagoria tagira pelolebero.
EZE 29:11 Anidagua berogola mali pira mariani (40) Iyibi dindiha wali agali lenego mbira naholebirago nogo tara tarabi pialu karia nahondolebere.
EZE 29:12 I̱na Iyibi dindi balu bo haealabaga biai halu Iyibi dindini tano wima pedarubi bo haealabaga biai halu berogola dindi hangu wiaho ngane dege mali pira maria (40) polebira. Ani bialu i̱na Iyibi wali agali balu bo taliatogo larogola ti wali agali tara tara bu karu dombeneha purogo lalu piai holebira, laya.
EZE 29:13 I̱ Anduane Homogo Bibahende Haru Haame Ho Haga kogo i̱na bi ogodagua laro. Mali pira maria (40) piai haragola i̱na Iyibi wali agali dindi tara tara wiaruha minalu purogo lelarugoria howa lone tini dindiha helo haru dai biai holebero.
EZE 29:14 Ti lone daibu howa Iyibi dindinaga abene unurahayagi dege helolebero. Ani bialu Iyibi dindi abale hongohe wiagagobi ndo wulebira.
EZE 29:15 Ti i̱na mo nagalone ho helarogola tigua hongohe howa dindi mende ngaru ala handayaho howa haru hagane wiyadagua nahe ti hongo nahe holebira.
EZE 29:16 Anigo Isaraele wali agalime Iyibiali o biraruni hondowa tigua mitangi bialu Iyibime ti biamogo bule ibabe larimagonaga mana ko birimada lo manda bialu Isaraele tigua ogonidagua lone nabulebira. Ani bialu Isaraele tigua i̱ni Anduane Homogo Bibahende Haru Haame Ho Haga henedane hondolebira, laya lene.
EZE 29:17 Ina garabaya dege hemane mali pira kirani karia (27) hayagola mali ogoninaga ege mbiranaga horo mbira layagola Anduane Homogo ibugua i̱hondo langialu lalu,
EZE 29:18 Dindiali-o Babilononaga Kini Nebugadenesahanda ibunaga ami agaliru haru ibalu Taia tanoha wai bialu haya. Kini ibugua ibunaga ami agali bu hearu mbirale wai biagane aleru gendabi wiaru ya hadaba layagola tigua yu hearia tinaga haguani mandari piai halu paya gondolalu darama ibiya. Anigo kinibi ibunaga ami agali biarubi tigua biabe erekuibi ogoni biyagoyu ti mbirale bayale mbira mo ya nabi biabe bame dege bu wahole bialu hayiya.
EZE 29:19 Anidagua biyago ainde Anduane Homogo Bibahende Haru Haame Ho Haga kogo i̱na bi ogo laro. I̱na Iyibi dindi ngago Nebugadenesahondo mo mulebero. Ani berogola ibugua Iyibi dindi bo haealabaga bu wahalu Iyibi dindiha mbirale bayale ngaru ibubi ibunaga ami agali biarubi tigua biabe erekuibi bialu hayagonaga yolo ale mo yalu polebira.
EZE 29:20 Kini Nebugadenesabi ibunaga ami agali bu karubi tigua wai bialu hayago i̱naga biabe bia hayagonaga yolo biadai bialu i̱na tihondo Iyibi dindi mo mulebero. I̱ Anduane Homogo Bibahende Haru Haame Ho Haga kogo i̱na bi o ledogoniore.
EZE 29:21 Mbirale uruni birangi i̱na Isaraeleali ti lone hongo helo mo hongo holebero. Ani bialu Esegiele í̠na Isaraele wali agali bu karuhondo bi latagi habelo helarogola tigua i̱ni Anduane Homogo henene henedane hondolebira, lalu Anduane Homogohanda laya lene.
EZE 30:1 Anduane Homogo ibugua i̱hondo lalu,
EZE 30:2 Dindiali-o i̱ Anduane Homogo Bibahende Haru Haame Ho Haga kogo i̱na bi ogo larogo í̠na mbiwia halu bi dalimu latagi habelo hameledo. Mo ko holene timbuni gibi ibulebirago daraba.
EZE 30:3 Horo ogoni kaware ibiragoni. Anduane Homogo ibugua wali agali bibahendeme ko biyarunaga pani nelo miai holenaga abale tagira ibiragoni ndobe. Harini aruma holenebi wali agali mo ko holenebi horo ogoni tagira ibiragonida.
EZE 30:4 Horo ogoningi waitigime Iyibi dindiha ibalu wai bulebira. Sudana dindini wali agali karuha genda timbuniore tagira ibulebira. Iyibi dindiha waitigime wali agali dewaore bo wahai halu tinaga mbirale dabudabu ngaru bibahende mo yalu pialu dindi ogoni bibahende bo haealabaga biai holebira.
EZE 30:5 Wai ogoni birangi ami agali dewaore Sudana dindiha howabi Libiaha howabi Lidiaha howabi Arebiaha howabi Kubuha howabi homalu i̱ninaga wali agali karu aria Isaraelealibi wai ogoniha homolebira.
EZE 30:6 I̱ Anduane Homogo i̱na ogodagua laro. Iyibi agali mo wialu wai bialu karia waitigime uruni tini abene uyurahayagi Migidolo tano ngagoria howa bama pialu unurahayagi Asawana tano ngagoria bairi holebira. Iyibialiru tigua hongo howa mine halu parali ho haga winigo ai tinaga hongo ogoni biba halu ereba holebira. I̱ Anduane Homogo Bibahende Haru Haame Ho Haga kogo i̱na bi o ledogoniore.
EZE 30:7 I̱na Iyibi dindi bo haealabaga biai halu tano ngarubi bo gialahole bialu bo labu helolebero.
EZE 30:8 I̱na Iyibi dindiha ngago damene bo heda hai halu hameigini tara tara Iyibi biamogo bialu karubi bo wahai halu berogola Iyibi wali agali tigua i̱ni Anduane Homogo heneneore henedalo hondolebira.
EZE 30:9 Horo ogoningi i̱na Iyibi balu howa Sudana wali agali tigua tiha mo ko holene mbira ibuluba ndoda lowa hope karia agali maru bi lo yalu iba sibi poragoria pelolebero. Ani pelarogola tigua bi te Iyibi dindiha bialu ka lalu larago hale howa Sudana wali agali bu karu ti gi halu mogo lowa duru lalu holebira. Emene tigi mbira hangu howa i̱na urunidagua bulebero.
EZE 30:10 I̱ Anduane Homogo Bibahende Haru Haame Ho Haga kogome ogodagua laro. Babilonoalinaga Kini Nebugadenesa kago ibugua Iyibi dindiha munibi mbirale ngarubi bibahende mo yu piai helo i̱na ibuninaga ami agaliru haru halu ibilolebero.
EZE 30:11 Babilonoali kini biagobi ibunaga ami agali koore urunibi tigua ibalu Iyibi dindi mo ko halu bo haealabaga bu wahai helolebero. Tigua Iyibi wali agali ayu tibume dibu gaibu paya bidagola homene tingini dewaore Iyibi dindini bu wulebira.
EZE 30:12 Ani bialu i̱na iba Naili porago mo hundia hai howa agali mini koore karume Iyibi dindi karulelo tinaga giha ya holebero. Agali uruni ti dindi taraha howa ibalu Iyibi bo haealo wahai holebira. I̱ Anduane Homogo i̱na bi o ledogoniore.
EZE 30:13 I̱ Anduane Homogo Bibahende Haru Haame Ho Haga kogo i̱na bi ogo laro. Iyibi dindini Membisi tano ngagoha dama mitangi bialu mbirale bi pupu wulenaga gime wabu ngaru bibahende i̱na bo haealo wahai holebero. Ani bialu Iyibinaga kini kago bo taliatagi harogola Iyibi wali agali haru holene mbirali nahedagola ti gi timbuni ho helolebero.
EZE 30:14 I̱na Iyibi dindi abene unurahayagi wai labu dindi ngelolebero. Ani bialu dindi abene uyurahayagi Soana tano ngagobi bo heda hai holebero. Tebese tano timbuni ngago ko biyarunaga pani mulebero.
EZE 30:15 I̱na Pelusiumu tano Iyibi dindinaga wai pabe hongohe bu mabu bidagoha wali agali karu i̱naga keba timbuni holene ti manda bilolebero. Tebese tanoha munibi mbirale tara tara ngarubi bibahende mo wahai holebero.
EZE 30:16 I̱na Iyibi dindi bo heda hai howa Pelusiumu tanobi genda tandagala timbuni yu holebira. Tebese tanonaga wai pabe bidago bo gialo wahai howa tano ogoniha iba li timbuni ibulebira. Membisi tano ngagohabi genda tandagala yu haabo holebira.
EZE 30:17 Ani bialu Heliobolisi tanohabi Bubasidisi tanohabi igiri daliahe bu karu bibahende waitigirume bo wahai holebira. Wali agali maru tano kira ogonilaboha haga karu ti dindi taraha garabaya bu yalu piai holebira.
EZE 30:18 Iyibiali tigua hongo howa mine halu parali ho haga winigo ai tinaga hongo ogoni mo wahai harongi Tabanese tanoha aruma hai holebira. Ani bialu beraliba mindibi timbunime Iyibi dindi dambi hai holebira. Anidagua biragola waitigiru ibalu wali agali Iyibi dindiha karu minu garabaya bu yalu dindi tara tara ngaruha purogo lolebira.
EZE 30:19 I̱na Iyibi wali agali pani nelo ogonidagua merogola tigua i̱niore Anduane Homogo heneneore henedalo manda bulebira, laya lene.
EZE 30:20 Ina Babilono dindiha garabaya hemane dege mali beane (11) hayagola ege mbiragonaga horo kane layagola Anduane Homogohanda i̱hondo bi ogodagua laya.
EZE 30:21 Dindiali-o i̱na Iyibinaga kini biagonaga gi bo polaru. Ani birugola ibugua hongo howa wai biagane ayu tibu ngago yu howa wai lone bilo ibunaga gi dabi helonaga kabu bulene mbira naheore.
EZE 30:22 Ani kago i̱ Anduane Homogo Bibahende Haru Haame Ho Haga kogo i̱na bi ogo larogo, I̱ Iyibi kini kagola waitigi kogoni. I̱na ibunaga gi bo tagalene kago heba gi mende bayale kagobi kirabali bo tagalolebero. Ani berogola wai biagane ayu tibu ibu gini yidago ibira holebira.
EZE 30:23 Anidagua bialu Iyibi wali agali balu dindi tara tara ngaruha purogo lelolebero.
EZE 30:24 Ani bialu i̱na Babilono kini kagonaga gi kirabali lone mo hongo howa i̱naga wai biagane ayu tibu ibunaga giha mo ya holebero. Ani buleberogoyu Iyibi kini kagonaga gi kirabali bo tagalarogola tandaga timbuni nalu holebira. Ani nalu howa ibuni Babilono kini kagonaga wanakuihayagi howa dugu timbuniore bialu homolebira.
EZE 30:25 I̱na heneneore larogo Iyibiali kini kagonaga hongo mo wahai halu Babilonoali kini kago mo hongo holebero. I̱naga wai biagane ayu tibu ngogo Babilono kini kagohondo mo merogola ibugua Iyibihayagi ya amu haragola nde Iyibi wali agali karu tigua i̱ni heneneore Anduane Homogo henedane hondolebira.
EZE 30:26 I̱na Iyibi wali agali bibahende bo taliatogo larogola ti dindi tara tara bu ngaruha purogo lai holebira. Anidagua berongi tigua i̱ni Anduane Homogoore henedalo manda biai holebira, laya lene.
EZE 31:1 Ina garabaya hemaria mali beane (11) hayagola ege tebonegonaga horo mbira layagola Anduane Homogo ibugua i̱hondo lalu,
EZE 31:2 Dindiali-o í̠na Iyibi kini kagobi ibunaga wali agali bu karubi tihondo bi ogodagua lamibe. Iyibialiru tíore hongo gibihe kamigoni. Hongohe tí kamigobi mende ai kabe.
EZE 31:3 Iyibi hongo timbunihe howa ira tamia Lebanono irabuha kaligobi hene. Ira ogoni ibunaga gene magane timbuniruhe ibu andaneha bayale gumbahe wini. Ira ogoni ibu luore li beraliba daligaore ela howa ira tara tara karu bolanguahe hene.
EZE 31:4 Iba bayale bereagome ira ogoni mo anda halu dindi andaneha howa iba duguadaga halu puwa ira timbuniore anda hene. Iba urunime ira maru hearu mo anda haga biaga berene.
EZE 31:5 Iba dewa bereagome ira ogoni mo anda hayagola ibu andaho timbuore halu ira maru hearubi ndo lu timbuniore hene. Ibunaga gene magane timbuni luni yunibi dewahe hene.
EZE 31:6 Ira ogoninaga maganeha ega tara tara berearume tinaga anda bigibigi biagaya. Nogo gabua bu hearubi ema bialu piaga tara tara berearubi ira ogoninaga gumba bayale wiagoha ti igini wu ngoai hagaya. Hameigini tara tara dindi tara ngaruha hearume ira timbuni ogoninaga andaneha biru ngoai hagaya.
EZE 31:7 Ainde ira ogoni duniniore mbira heneya. Ira ogoni timbuniore howa ibunaga gene maganeru lu andaho hene. Ibunaga piniru dindiha unuraore pialu dindi iba dewa bereagoria piyagola lu timbuni amura pugupugubi haya.
EZE 31:8 Ira tamia bayale timbuni ogonibi mbira Ngode Datagaliwabenaga mabu Idene dindi biagoha naheore. Ira tamia ogoninaga gene maganeru ira maru mabuha hearunaga gene maganeru hearubi ndo ibu timbuni luore heneya. Mabu ogoniha ira bayale maru hearu nira dege lowa ira tamia mbiraore ogoni ibu timbuniore hene.
EZE 31:9 I̱nime ira ogoninaga gene magane mo dewaore harugola ira baya burugule mbira hene. Ngode Datagaliwabenaga mabu Idene dindiha ira maru bu hearume ira mbiraore ogoni de hondowa ti hengelo hene.
EZE 31:10 Ira maru bu hearu nira lowa ira tamia ogoni ibu luniore halu li beraliba ela howa mine haga hene. Ani henego i̱ Anduane Homogo Bibahende Haru Haame Ho Haga kogo i̱na ira ogoni timbu bayaleore henego ibuha mani tagira ibulebiragonaga laro.
EZE 31:11 Ira o biago ibu mine hayagola i̱na ibu erembira mialu kini hongohe mbiranaga giha mo ya haru. Ani birugola ainde kini o biago ibugua ira ogoni ibunime ko bialu hene wiagonaga pani nelo mulebira.
EZE 31:12 Dindi tara agali ko bu karume ibalu ira tamia timbuni ogoni dibu ibira haragola dindini wiaabo holebira. Ira ogoni podarangi gene magane timbuni biaru hari bibahende ngaruhabi dindi ulini ngaruhabi podo ibira haga bialu gingirulobaga biai holebira. Ani bidagola hameigini tara tara dindi taraha howa íbu heneru ti ira ogoninaga andane gumba heagoha biraga biaru ti ibida pugupugu bulebira.
EZE 31:13 Ira tamia ogoni dindini dibupe hene ngagoria egaru ibalu birulebira. Nogo gabua karubi ema bialu piaga maru bedarubi ibalu ira ogoni ngagoria obenenibi gene magane ngarunagabi birama ibulebira.
EZE 31:14 Mani ira lu timbuni ogonibi mende naholebira. Ira maru holobadaru teneha mo anda holene iba bayale bereaguabi luore ogonibi anda halu li beraliba daligahaore elahe mbira naholebira. Ira bibahende ti abale agali homagadagua pola hole bialu homene dinini andaga peneru heba piai holebira.
EZE 31:15 I̱ Anduane Homogo Bibahende Haru Haame Ho Haga kogo i̱na bi ogo laro. Ira timbuni ogoni ibu homalu homene dininiru hagaha porangi iba dindi andaneha bedarume ira homayagonaga dara howa bira dambi ho helolebero. Ani bialu iba poraru tagira napelo hariga hangai holebero. Anidagua bidogola iba dindini biraga bedaru hundiai holebira. Ira ogoni homayagonaga Lebanono dindiha hari wedarume daraho kago mo walia halu aruma hai helolebero. Ira maru bu karubi nde ira mbiraore ogoninaga dara ho halu tinibi gabu hai holebira.
EZE 31:16 I̱na ira timbuni ogoni homene dininiru hagaha bape harogola dindi bibahendeha ema bialu dumbirumbi biame holebira. Ani berogola ira bayale maru Idene mabuha hene biarubi ira bayale maru Lebanono dindiha hene biarubi ti homene dininiru hagaha pu karume ira luni ogoni bape harogo de hondowa tinaga bu miniha dungulo holebira.
EZE 31:17 Agali ira timbuni ogoninaga andane gumba heagoha biraga howa agali ira ogoni biamogo bigi biaga heneru tibi nde ira ogoni ibuni heba homene dininiru hagaha hole piai holebira. Ti puwa agali maru ayu tibume dibayagola homaga bini biaru heba mandagi pu holebira.
EZE 31:18 Iyibi dindinaga kini kagobi ibunaga wali agali bu karubi ti ira tamia lu timbuni ogonibi ka. Idene mabuha ira bayale luni henerubi ibu ale mbira naheore. Anigo ira timbuni ogoni ibu ira maru Idene mabuha heneru ale dege halu ibu homene dininiru hagaha hole polebira. Ibu puwa agali mini kowi hene homenerubi agali waiha hearia bene homenerubi ti heba mandagi hole polebira. I̱ Anduane Homogo Bibahende Haru Haame Ho Haga kogo i̱na bi o ledogoniore, lene.
EZE 32:1 Ina garabaya hemaria mali hombene (12) hayagola mali ogoninaga ege hombeneni (12) horo mbira layagola Anduane Homogo ibugua i̱hondo lalu,
EZE 32:2 Dindiali-o í̠na Iyibi kini kagonaga dara howa ibuhondo bi darabi ogodagua labe. Kini-o í̠na mitangi bialu hameigini tara tara bu karu bibahende dombeneha howa í̠ laiono gabua ale hetingi hariligoni. Anigo í̠ laiono ale ndogo í̠ abagua ale timbuni mbira ibaha biruwa ibaga bialu ge dege dindi halu bedaria iba bayale bedago mo ganguluma bia hagagobi kegoni ndobe.
EZE 32:3 Anigo ai Anduane Homogo Bibahende Haru Haame Ho Haga kogo i̱na í̠hondo bule ngogo ogo. Hameigini tara tara dewaore dindi taraha howa íbu ngoai haragola i̱na haru ibalu i̱naga wena nu ngogo bape harogola wena nu ogoniha í̠ do ngeria wali agali urunime nu heba ibaha howa dindini gililo mu ngelolebira.
EZE 32:4 Ani ngeledagoria i̱na í̠ nuha howa dindini tagupe ho ngelaragola ega bedarumebi nogo gabua bu karumebi ema bialu piaga tara tara biru ngarumebi dindi bibahendeha howa í̠ nai helonaga olo ngoai holebero. Anidagua berogola tigua í̠ nalu no karulape howa bibahende tombe hai holebira.
EZE 32:5 Ani bialu í̠naga tingini togo bidago podowa maru hari ngaruha bape halu maru dindi ulini ngaruhabi mo bape harogola wu to̱ladaga holebira.
EZE 32:6 Ani bialu i̱na í̠naga darama dindi uli uli ngaruhabi hari bare bare ngaruhabi odo paya biai helolebero.
EZE 32:7 I̱na í̠ bo homa howa hari daligaha buyi hai howa yakundinaga wá holenebi mo hundiai holebero. Ni nadelo hari beralibame ni mo gehai harogola egebi nadolebira.
EZE 32:8 Anidagua bialu i̱na wá holene hariha haga bu karu bibahende mo hundiai helarogola í̠naga dindi ngego bibahendeha aruma hai holebira. I̱ Anduane Homogo Bibahende Haru Haame Ho Haga kogo i̱na bi o ledogoniore.
EZE 32:9 I̱na í̠ mo ko haiore haya lalu te ogoni dindi bibahende í̠ni manda nabini ngaruha lo yogo larogola hale hararume gi howa mogo timbuni lalu holebira.
EZE 32:10 I̱na í̠hondo buleberogo hondowa hameigini tara tara dindi taraha karu dewaoreme mogolai holebira. I̱ninaga wai biagane ayu tibu yidogome í̠ mo ko howa dibidogola kini karume gi timbuniore howa mogo lolebira. Í̠ ko howa dindini ibira harengi kini karu tigua lo mitangi bialu inahondobi nde o biyadadagua buligo lalu gi holebira.
EZE 32:11 Iyibi kini-o i̱ Anduane Homogo Bibahende Haru Haame Ho Haga kogo i̱na í̠hondo bi ogodagua laro. Babilono kini kagome í̠ baba wai bule ibulebira.
EZE 32:12 Ami agali kooreru dindi odagoniha howa ibalu í̠naga wali agali bibahende bo hilo wahai helolebero. Iyibi wali agaliru tínaga turu haga ngamiru bibahende mo ko hai helolebero.
EZE 32:13 Tínaga nogo bulumaga bu karu bibahende tini iba naga bedaruha nalu karia bo hilo wahai helolebero. Anidagua bidogola agalibi nogo bulumagabi ibaha pialu karia iba bedaru geme mo ganguluma bulene mbira naholebira.
EZE 32:14 Ani bidogola iba bibahende gagahe bayaleore lone berelo mo ema bia nahe berelolebero. Iba porarubi yaribu nabi hendore pialu pelo pelolebero. I̱ Anduane Homogo Bibahende Haru Haame Ho Haga kogo i̱na bi o ledogoniore.
EZE 32:15 I̱na í̠naga wali agali bibahende bo wahai halu í̠naga dindi ngaru bibahende mo ko hai helarogola ogoniha mbirale nawi wai labu dindi ngago de hondowa Iyibi wali agali tigua i̱ni Anduane Homogoore henedalo manda biai holeberemi.
EZE 32:16 I̱na bi ogoni laroru dindi tara tara ngaruha wali bedarume hale halu í̠ dara howa í̠naga dugu ogonidagua bia holebira. I̱ Anduane Homogo Bibahende Haru Haame Ho Haga kogo i̱na bi o ledogoniore, laya lene.
EZE 32:17 Ina garabaya hemaria mali hombene (12) ogoninaga ege hombene (12) dege horo nguini (15) hayagola Anduane Homogohanda i̱hondo lalu,
EZE 32:18 Dindiali-o Iyibi wali agali dewaore daga labe nahe o bu karuninaga dugu bia habe. Ani bialu wali agali dindi tara tara hongohe ngaruha howa homayaru baba homene dininiru hagagoha ti mandagi hole pelo warape habe.
EZE 32:19 Iyibialiruhondo bi ogodagua labe. Tígua manda bu handalu kamiria tíni wali agali bu karu bolangua howa tí bayale duniniore kamabe tobaho kamibe. Wali agali mana ko bialu howa homayaru heba mandagi hole tí homene dininiru pu hagagoha abale daliape halu pudaba, labe.
EZE 32:20 Dindiali-o ai Iyibi ami agali bu karu bo wahai holenaga wai biagane ayu tibu manda manda bu wia. Ti baragola agali maru waime bene homayaru baba mandagi hole pelo waha.
EZE 32:21 Ani pu kagola agali wai biagane haguane homene dininiru pu hagagoha abale pu hene biarume Iyibi wali agaliru ti biamogo biaga biaru ibirago de hondowa turu holebira. Tigua turu howa Iyibi agaliruhondo bi dalimu lalu, Agali mini kowi heneru tinaga waitigime bayagola homene dininiru hagagoha o íbu kagoni ndobe, lolebira.
EZE 32:22 Asiria dindinaga ami agaliru bibahende waime benerunaga dinini ti homene dinini pu hagagoha pu hea.
EZE 32:23 Asiriali nahome howa wali agali tara tara bu hearu bibahende mo gi hai haga heneya. Ani heneyago ai ami agali uruni ti waime beneru tinaga dinini unuraoreha pu hea.
EZE 32:24 Elama dindinaga ami agali waime benerunaga dinini ti dindi ogoniha dege pu hea. Ami agali uruni ti waitigi agalime bo waheneru tini homa nabi heangi tigua wali agali dewa mo gi haga heneya. Ani heneyago ai ti homalu agali dongone podo mabu biagane mana wiago nabiaga heneru heba homene dininiru pu hagagoha pu hea.
EZE 32:26 Mesege dindinaga ami agaliru Tubala dindinaga ami agalirubi ti waime benerunaga dinini pu hagagoha dege pu hea. Ami agali uruni ti nahome heangi tigua wali agali bu hearu mo gi haga heneya. Ti ani bialu henego ai ti dongone podo mabu biagane mana winigo nabiaga heneru heba homene dininiru pu hagagoha pu hea.
EZE 32:27 Agali maru ami agali uruni hora haga hayadaruni tigua ami agali uruni baya hangu hora ha nabi agali yagibano bu karu hora hagadagua yu hora haya. Tigua bamba agali tara henerume tinaga ami agali hora hagadagua naheneya. Bamba agali henerume tinaga agali haguaneru homaragola tinaga wai biagane ayu tibu ngago ibuni homaliha mo haguanda ho ngelalu humbibi tinaga tinginini dambi howa horo haga wini. Mesege hameigini Tubala hameiginila homa nabi heangi wali agali dewaore mo gi timbuni haga henegome libuha pani nolene wiaabo holebira.
EZE 32:28 Iyibiali ti nde mo ko halu bo haealabaga birangi ami agali ti waime benerunaga dinini pu hagagoha dege pu holebira. Agali uruni ti dongone podo mabu biagane mana nabiaga heneru aria tibi nde waime bene.
EZE 32:29 Idomo hameigininaga agali haguanerubi kinirubi bibahende homene dininiru pu hagagoha pu ha dege bia. Bamba Idomo hameiginiru ti wai biaga ami agali hongoheore henego ainde ti homalu ami agali dongone podo mabu biagane mana winigo nabiaga heneru heba homene dininiru pu hagagoha pu hea.
EZE 32:30 Dindi abene uyurahayagi kini agali haga henerubi Saidono hameiginirubi ti dindi ogoniha dege pu hea. Bamba ti hongoheore heangi tigua wali agali tara tara bu hearu mo gi hai haga hene. Ani bialu haga henego áyu ti homalu ami agali maru waime bene biaru baba mandagi pu howa tini taga pani timbuni nalu hea. Agali homene uruni ti dongone podo mabu biagane mana winigo nabiaga dege hene. Uruni tibi wali agali maru homene dininiru pu hagagoha pu hene karu heba howa taga pani nalu hea.
EZE 32:31 Iyibialinaga kini biago ibugua ibunaga ami agali waime bo wahenego hangu ndo ami agali maru waime beneru tibi homene dininiru pu hagagoha pu kago hondowa ibunaga bu miniha emene dungulo holebira. I̱ Anduane Homogo Bibahende Haru Haame Ho Haga kogo i̱na bi o ledogoniore.
EZE 32:32 I̱nime mo heya hewagola Iyibi kini kagome wali agali hameigini tara tara padaru dewaore mo gi ho helaru. Anigo ai kinibi ibunaga ami agalirubi waitigime bo wahai haragola ti homalu homene dininiru pu hagagoha pu howa agali maru waime beneru heba mandagi holebira. Agali uruni bibahende ti dongone podo mabu biagane mana winigo nabiaga dege heneru aria pu hea. I̱ Anduane Homogo Bibahende Haru Haame Ho Haga kogo i̱na bi o ledogoniore, laya lalu Esegielehanda lene.
EZE 33:1 Anduane Homogohanda i̱hondo bi ogodagua langiya.
EZE 33:2 Dindiali-o í̠na wali agalihondo mamage holenenaga mana ogobi nga lalu lamibe. I̱na dindi mbiraha howa waitigi baba wai bule ibilarogola hale howa tigua agali mamage helonaga dabo helaga.
EZE 33:3 Ai waitigi ibiragola agali mamage haga urunime mbelo biguli mbira wai ibira lalu pu lolebira.
EZE 33:4 Mbiralime mbelo biguli ogoni pularago hale halu ha do hole ibida pu nabi karia waitigime ibu bo wahayagua nde ibuninaga koyane.
EZE 33:5 Ibu ibida nape donge ho hayagome homaya. Agali ogonime donge nahe biguli pulayago hale halu ibida pedale nde ibu nahomedale.
EZE 33:6 Anigo mamage ho haga kagome waitigi ibirago hondowa biguli pu nalayagua nde wali agali bibahende bo wahai holebira. Anidagua biyagua nde tini kagua biyagonaga pani homolene winigo homolebira. Ani bialu i̱naga deni howa agali mamage haga biago ibugua bia ko hayagome ibubi pani nolene wulebira.
EZE 33:7 Anigo ai dindiali-o i̱na í̠ Isaraele wali agalirunaga mamage habelo dabo helarogoni. I̱na wali agalihondo bi hongohe mbira í̠hondo ala langerogo í̠na ti hale helo latagi habe.
EZE 33:8 I̱na handalu koria agali mbirame ko mbira biyagonaga ibu homolebira laruyagua o biagohondo í̠na lalu, Bayale holene yu habelo mana ko bialu kegoni wahalu mini beregedabe, lalu ibu nalamiriyagua nde ibunaga ko ngago wiaabo kaore homolebira. Ani ngaore homayagua nde bia ko hagabi madane biagabi tene í̠ holebere laro.
EZE 33:9 Anigo agali ogoni í̠na lameregola ibu mini beregeda nabi howa homayagua nde ibuninaga koyane. Ibuni mana ko biyagome homolebira. Anidagua biyagua í̠ha bi dai bulene henge nawi howa í̠ homolene nawulebira, lalu lene.
EZE 33:10 Anduane Homogohanda i̱hondo lone lalu, Dindiali-o i̱naga bi ogo Isaraele wali agali karuhondo tígua bi ogodagua laramili lalu lamibe. Tígua lalu, Iname ko birimagome bu miniha genda timbuni ho halu inanaga tingini obiore kamagoni. Ai ina agua bialu bayale holeberemadabe, lalu laramiligoni labe.
EZE 33:11 Isaraele wali agaliruhondo bi ogodagua lamibe. I̱ Anduane Homogo Bibahende Haru Haame Ho Haga Ngode Datagaliwabe haluhe heneneore kogobi agali mana ko biaga karuni aria mbira homayagua i̱ turu naharuli. Agali ogoni ibu mana ko ngaruha handa tara ho howa homa nabi bayale helogo turu haruli. Ai Isaraelealiru-o hale hadaba. Tígua ko beremiligo wahalu i̱ni koria dai bidaba. Tí aginaga tíni homolene hariga tai bialu kamibe.
EZE 33:12 Dindiali-o ai Isaraele wali agaliru bi ogo lamibe. Agali mbira ibu abale bayale henego mani ko biadai biyagua i̱na ibunaga mana bayale abale bialu hayago mitangi nabulebero. Ibu biamogo bulene mbira nawulebira. Ai agali mende ibu abale ko bialu henego mani ko biyaruni erembira mialu mana bayale biyagua ogoni ibu pani nelo namulebero. Anigo agali mbira bayale henego lone mana ko biyagua i̱na abale bayale biyaruni mitangibu dai bialu ibu bayale helo wa naholebero.
EZE 33:13 I̱na agali tigabi kagohondo í̠ bayale holebere laruyagua agali tigabi ogoni ibuni lo manda bialu i̱na mana tigabi birurunime i̱ni yopialu poleberogodago lowa mani mana ko ngaru lone biyagua nde ibugua mana bayale abale biyaru i̱ manda nabuleberoore. Ibugua mani mana ko bu aribia hayagua ibuni homolene wulebira.
EZE 33:14 Ai i̱na agali ko biaga kagohondo í̠ homolebere laruyagua agali o biagome mana ko bialu henego wahalu mini beregedalu bayale biadai biyagua nde
EZE 33:15 ibu nahomolebira. Ibugua mbirale mbira dano hole lowa mendealinaga mo yinibi mbirale mo page binirubi lone yadai bialu i̱naga mana ngago baya hangu talialu biyaguabi mana ko ngaru wahayaguabi ogoni ibu nahomolebira.
EZE 33:16 Ibugua kagua bialu hayaruni i̱na domo waholebero. Ani bidogola mani ibunime mana tigabi biyagome yopialu nahome bayale holebira.
EZE 33:17 Anigo ai dindiali-o í̠ damene bu karunime lalu, Anduane Homogo ibugua mana lehe ko biaga ka lagago ai ani ndoyago. Isaraele wali agali tínime bia ko haga kami.
EZE 33:18 Agali mbirame ala mana tigabi buwa mani mana ko bialu hayagua nde ibuni homolene wulebira.
EZE 33:19 Ani buwa agali mana ko biaga mbirame mini beregedalu mana tigabi bayale ngaru bialu hayagua ibu bayale holebira.
EZE 33:20 Anigo tí Isaraele wali agalirume lalu, Anduane Homogohanda mana birago lehe bira laramiligo ai hale haramine. Mani tínime mana bialu harimirunaga manda buwa i̱na tí dabaki buleorebero, lalu Anduane Homogohanda lene.
EZE 33:21 Mali homberiani (12) ina garabaya biabe bialu henego ai mali hombeanegonaga ege pini hayagola ege ogoninaga horo dauningi agali mbira i̱ hewaria ibuwa lalu, Yarusalemeore bo gialabagabu wahaya, lalu langiya. Waitigirume ibuwa Yarusaleme bo gialo wahalu hea handala agali ogoni ibu i̱ langule pora bialu ibida ibiniya.
EZE 33:22 Ege pinigonaga horo mane layagola alendo Anduane Homogonaga hongo holene i̱ha karula hayuane handaru. Ani hondo hewaria horo mendengi egerebagiore agali ogoni i̱ hewaria anda ibiyagola Anduane Homogohanda i̱naga hége mo tiga biyagola bi bayale labehe haru.
EZE 33:23 Anduane Homogohanda i̱hondo ogodagua laya.
EZE 33:24 Dindiali-o Isaraele wali agalirunaga tano wiaru bibahendeore bo gialabaga biaiore hayago ai wali agali uruniha bu karume bi ogodagua lagaya. Abarahama ibu agali mbiraoreli howa dindi timbuni ogoni ibu karulai hene. Ai áyu ogoni ina wali agali dewaore bu kamago nde heneneore dindi ogoni bibahende inanaga wilo nginioreda, laga ka.
EZE 33:25 Ti ani lalu kago í̠na tihondo bi ogo lamibelo hameledo. Anduane Homogo Bibahende Haru Haame Ho Haga kogome bi ogodagua laro. Tígua mana ko wiaru dewaore bialu nogo egaru nole bo dawalu howa darama pelo wa naharamili. Ani bialu mbirale gime wabiniruhondo bi pupu wialubi agali homelo bo wahalubi haramili. Anigo tígua agua bialu dindi ogo tí karulolene mitangi bu kamibe.
EZE 33:26 Tí wai hangu bialubi mana ko ngubi ngaru dege bialubi haga kamigoni. Tí damene one bedarubi kayu yalu beremiligo ai agua bialu tígua dindi ogoni karulo holeberemibe. Tígua nakarulo holeberemiore ndobe, laya.
EZE 33:27 Ani lowa lalu, I̱ Anduane Homogo Bibahende Haru Haame Ho Haga Ngode Datagaliwabe haluhe heneneore kogobi tínaga waitigi agalirume tano bo gialobagabu wahene biaruha wali agali bu karu bo hilo wahai hole ibulebira. Wali agali maru yu wahene tanoha ndo tagiraha karu ema bialu piaga gabua karume bo nai halu maru ibida puwa egeanda ngaruha ha do haga bidaria warago koore ngarume balu homelai holebira.
EZE 33:28 Aniore bidagola dindi uruniha mbirali mbira naheore ngelalu dindi ogoni mo koore holebero. Isaraele wali agali tí hongoheore howa mine hagago ai tínaga hongo ogoni maro bilolebero. Aniore bidogola Isaraele dindini hari nene ngaruha irabu teha polene gi timbuni tagira ibilarogola wali agalime uruniha lone ibaga bibe nahe holebira.
EZE 33:29 Tigua mana ko ngubi wiaru hangu bialu hayagonaga i̱na pani mialu tinaga dindi ogoni mbirali nahe labu dindiore ngelarogola ogoningi tigua i̱ Anduane Homogoore henedane manda biaiore holebira, laya lalu Esegielehanda lene.
EZE 33:30 Anduane Homogo ibugua i̱hondo lalu, Dindiali-o í̠ damenerume tano biagonaga paberuhabi tini andaga haraba ngaruhabi lola howa tini degedege lagalaga bialu í̠ mitangi bialu lalu, Iname bi mana latagi haga agali biago karia puwa Anduane Homogohanda áyu bi agi layadabe hale hole ma, laga ka.
EZE 33:31 Ani lowa wali agali uruni tigua í̠naga bi hale hole íbu ngoai haga bialu howa galone manda bule ndo bame haleme hale hangu holebira. Tigua í̠ bi mana larego talialu nabiaga. Tinaga ne hambume mo turu holene bi lalu tinaga bu miniha muni dewa yu holeneru dege manda biaga.
EZE 33:32 Í̠na bi larego dege agalime ga̱wa̱ hiliyularu laragola baya hangu ema nabi biruwa haleho wiagadaguabi agalime wandari lawule iba gana bayale laragola hale hagadaguabi hale haga. Hale howa tigua bi ogoni emeneorebi talialu bia nabiagaore ka.
EZE 33:33 Anigo mani bi larego heneneore tagira piai harago hondowa bi o larigoni mana heneneore i̱ninaga bi wiago lenedane hondolebira, lalu Anduane Homogohanda laya lene.
EZE 34:1 Anduane Homogo ibugua i̱hondo ogodagua laya.
EZE 34:2 Dindiali-o í̠na Isaraele wali agali haru haga karu manani haru pu helowa mbiwia halu ogodagua labe. Isaraele wali agali haru hagaru-o i̱ Anduane Homogo Bibahende Haru Haame Ho Haga kogome tíhondo bi larogo hale hadaba. Tíha mo ko holene timbuniore wulebira. Tí nogo sibi haru haga ale howa Isaraele wali agali ti sibi ale karu tígua baya hangu tiga handalu biamogo nabi howa tíni hangu mitangi bialu harimigoni.
EZE 34:3 Tígua sibi andu iba nalu sibi irinime aga wabini ngarubi bialu sibi bayale habatigi karu balu naga kami. Ani bialu howa tígua sibi uruni baya hangu handayaho ha nabiaga kamigoni.
EZE 34:4 Tígua sibi hongo nahe karu biamogo nabiagaore kamigoni. Tígua sibi warago bo ngaru biamogo bialu dere bu karu marasini ha̱i̱ nahaga howabi mbira pu ereba hayago taya bima ibaga bialu haru dai nabiaga tí kamigoni ndobe. Tígua tínaga hongome sibi tandaga nelo balu holene dege manda biagaya.
EZE 34:5 Sibi uruni tinaga haru haga nahedagola ti giligala lalu pugupugu bidaria mbirale ema bialu piaga gabua karume balu nai haga.
EZE 34:6 Anigo i̱naga sibiru ti pialu hari wiaruha pu wandialu dindi bibahende wiaruha purogo layagola agalime sibi dara halu hai bulenebi handa walia halu haru dai bulenebi mbirali naheya.
EZE 34:7 Haru haga agali kamiru-o i̱na tíhondo bi o langerogo hale hadaba.
EZE 34:8 Anduane Homogo i̱ Ngode Datagaliwabe haluhe heneneore kogonibi bi larogo hale haramine. Heneneore i̱naga sibi bu karuni tinaga haru haga mbira naheore howa mbirale ema bialu piaga gabua karume balu nai hayagoni. Ai agali maru i̱naga sibiru haru helo dabo helarurunime sibi maru pu gabua hayaru handa walia nahaya. Irane tini hangu mitangi bialu sibiru haru nahe wahayagome.
EZE 34:9 Anidagua birimidago ai haru haga kamiru-o i̱na bi larogo haleore hadaba.
EZE 34:10 Hale naharimiyagua Anduane Homogo Bibahende Haru Haame Ho Haga i̱ni kogome larogo ti baba áyu waitigi ho kogoni. Ani howa i̱naga sibiru i̱ni kogoha haru dai bulebero. Ani buwa i̱na tíhondo i̱naga sibi haru hagane harimigo nahe wahalu pudaba lolebero. Ani larogola tígua i̱naga sibiru bo nolene mbira naholebira, lalu Anduane Homogohanda lene.
EZE 34:11 Ani lowa lalu, Anduane Homogo Bibahende Haru Haame Ho Haga kogo i̱na ogodagua laro. I̱nime nogo sibi pu ereba hayadaru taya bialu handa walia howa lone haru dai buwa baya hangu handayaho holebero.
EZE 34:12 Sibi haru haga agalime ginu hagua timbuni wialu aruma harangibi sibi pu ereba hayadaru taya dege bialu haru dai biagadagua i̱na i̱naga sibi dewa pialu ho giligalalo hagahaga bidaru haru dai bulebero.
EZE 34:13 Ti puwa dindi tara ngaruha hagahaga bidago i̱nime damu pialu tini dalu Isaraele dindiha haru dai bulebero. Ani berogola tini daluni howa dindi bayale iba angeange ngaruhabi hari barebare ngaruhabi turu hagabu haabo holebira.
EZE 34:14 Ani howa Isaraele dindiha hari barebarebi dindi ulinibi tani bayale andaho karu nalu holebira.
EZE 34:15 Ani helowa i̱naga sibi haru haga i̱niore holebero. Ti ha̱lo berelonaga henge bayale ngaruha haru polebero. I̱ Anduane Homogo Bibahende Haru Haame Ho Haga kogo i̱nime bi o ledogoniore.
EZE 34:16 Nogo sibi maru pu ereba hayago i̱nime taya bima pialu handa walia howa haru dai bulebero. Maru tinaga tinginini dereme bogo pailo waheneyaguabi uruni i̱nime marasini ha̱i̱ halu hubua bulebero. Maru warago bo wiaguabi nde i̱nime mo dabi holebero. Anigo ai sibi timbuni maru hongoheni habahe karu i̱na bolebero. Irane i̱ sibi haru haga tigabi howa mana biaga ngadagua ani bulebero.
EZE 34:17 Ai i̱naga sibiru-o i̱ Anduane Homogo Bibahende Haru Haame Ho Haga kogome tíhondo bi ogodagua laro. Tígua mana beremigo ko bayalebi i̱na hangu hangu dabolebero. Dabalu talebuki buwa nogo meme tí mendehayagi helalu nogo sibi tí mendehayagi helolebero.
EZE 34:18 Tí marume tani bayale karu tíni nalu tombe ho howa maru karu nanelonaga hengedo hole beremiligo irane aginagabe. Tígua iba bayale gagahe bedaru tíni nalu mani ibaha dalipe howa iba bayale gagahe bedago mo ganguluma bia haga beramiligo aginagabe.
EZE 34:19 Ai i̱naga sibi maru karume tígua tani nalu hengedo waharimigo nalu iba tí nowa mo ganguluma bia haramigobi naga ka. Tígua mana urunidagua bialu kamiruni liahe beramigoni.
EZE 34:20 Ani bialu kamigodago ai Anduane Homogo Bibahende Haru Haame Ho Haga kogo i̱na sibi hongohe timbuni habahe kamirubi sibi hongo nahe kamirubi heba talebuki buwa mana tínime beremigoria howa dabaki holebero.
EZE 34:21 Ai sibi hongohe kamiru tígua sibi hongo nahe karu amu dindi gibuniha hengeda amu ho helowa sibi maru karu heba mandagi henego nahelonaga waratagi haga kami.
EZE 34:22 Ani birimigoyu i̱na sibi uruni i̱ni kogoha haru dai bulebero. Ani berogola mbiralime ti lone mo ko naholebiraore. I̱na i̱naga sibi memeru ani helowa mana tinime bialu kagoria ko bayalebi talebuki holebero. Tale bialu bayale karu ti mendehayagi helalu ko karu ti mendehayagi helolebero.
EZE 34:23 Ani helowa i̱naga biabe bia haga agali Debidi aguanene mbira dabowa i̱naga sibi uruni baya hangu handayaho helo dabo helolebero.
EZE 34:24 Ani helowa Anduane Homogo i̱ni tinaga Ngode Datagaliwabe holebero. Ani kogola Debidi aguanene ogoni ibu tinaga handame howa haru haga kini holebira. Anduane Homogo i̱nime bi ogoni lo werogoni.
EZE 34:25 Ani bialu ti bayale helonaga habo nalolene bi hongohe ti baba lo ngelolebero. Ani buwa i̱na ema bialu piaga gabua i̱naga sibi bo naga karu ti dindi ogoniha nahelo bo taliatagi hai holebero. Ani berogola dindi koore wali agali habe nahe irabu tiagi ko wiyaruni i̱naga sibi uruni ti dindi ogoni bu hinu bayaleore howa irabu urunihabi bu holebira.
EZE 34:26 Ani buwa i̱na ti mo bayale hole i̱naga hari loma bia hene biagonaga ni uliuli wia banga bidarubi bibahende ti mo bayale hai helolebero. Iba dalu ibirangi dindi uruniha iba dalu dewa ibilalu dindi bayale helo mo gomba holebero.
EZE 34:27 Ira lini daga karume dewaore dolebira. Tinaga mabuha tomo dewaore anda holebira. I̱naga wali agaliru garabaya biabe ale dindi taraha bialu hayaru i̱nime golalu haru dai biai harogola tininaga dindi henene wiyagoha dai buwa turu timbuni ho holebira. Ani daibu hai kagola tigua i̱ni Anduane Homogoore henedane manda biai holebira.
EZE 34:28 Ani kagola dindi tarali i̱ mitangi nabiaga karume ti lone mo ko halu ba nabulebira. Mbirale ema bialu piaga gabua karu tibi lone naibulebira. Tinaga waitigi karume ti mo gi nahe bayaleore holebira.
EZE 34:29 I̱na tinaga dindi ngaru mo gumbila harogola dindi bene bere bayale howa tomo bayale dewa anda haga bulebira. Tinaga dindini hina gari lone napolebira. Wali agali dindi taraha karume tomo dewa bu payabu ngago hondowa lone mege nabulebira.
EZE 34:30 Ani berogola Isaraele wali agali karume Anduane Homogo i̱ni heneneore ti baba howa biamogo bialu henedane handalu ti i̱naga wali agaliore kago manda biai holebira. Anduane Homogo Bibahende Haru Haame Ho Haga kogo i̱na bi ogoni larogoni.
EZE 34:31 I̱naga wali agaliru-o tí sibi ale howa tí tomo nalu halimulo karulape ngiaabo haruli. Tí i̱naga wali agaliore kamigoni. I̱ nde tínaga Ngode Datagaliwabe kogoni, lalu Anduane Homogo Bibahende Haru Haame Ho Haga kagome bi ogoni lene.
EZE 35:1 Anduane Homogohanda i̱hondo lalu,
EZE 35:2 Dindiali-o í̠na Idomo dindiha handa amu howa, Í̠ha mo ko holene wulebira, lalu lamibe.
EZE 35:3 I̱ Anduane Homogo Bibahende Haru Haame Ho Haga kogo i̱na bi ogo Idomohondo laro. Idomo dindiha hari wedemiru tí waitigi i̱ kogoni. I̱na tí pani ngialu dindi labu hangu ngelolebero.
EZE 35:4 Tínaga tano ngamirubi bo haealabaga bialu tínaga dindibi labu hangu ibira holebira. Ogonibi ngagola tígua i̱ni Anduane Homogoore henedalo manda biai holeberemi.
EZE 35:5 Bamba howa Idomo wali agali tígua Isaraele wali agali baba waitigi ho harimi. Ani hemigola Isaraelealime ko biyarunaga pani nolene winingi tígua Isaraele waitigiru biamogo bialu Isaraeleali baba wai bialu harimigoni.
EZE 35:6 Anidagua bialu harimigonaga i̱ Anduane Homogo Bibahende Haru Haame Ho Haga howa Ngode Datagaliwabe haluhe henemane kogobi i̱na bi ogodagua laro. I̱na tí waitigime bo wahai helo ibilarogola tí mbirago yo pialu napoleberemiore. Tígua waitigiru homelo bo wahole gi nahe bo wahaga bialu haga harimigo ainde waitigime tíni homalimulo bo wahole gi nahe howa bo waholebira.
EZE 35:7 I̱na Idomo dindi bo haealabaga bialu labu hangu ngelalu wali agali Idomoha puíbu biraru bibahendebi bo wahaiore holebero.
EZE 35:8 I̱na Idomo wali agali waime bo wahenerunaga tingini bu ngarume hari karu dambi hai halu dindi ulini ngaruhabi homene tingini wu to̱lai helolebero.
EZE 35:9 I̱na tínaga dindi ngagoria mbirale mbira nahelo bo labu hai harogola dindi ogoniha wali agali mbira lone naholebiraore. Anidagua berogola tígua i̱ni Anduane Homogo henene henedalo manda biai holeberemi.
EZE 35:10 I̱ Anduane Homogo kogo i̱na Isaraele wali agaliru Yuda wali agalirubi tinaga Ngode Datagaliwabe howa ti heba haabo haga kogoni. Ani kogola tígua hameigini kira urunibi tinaga dindibi karulami̱ya larimi.
EZE 35:11 Anidagua larimigo ainde i̱ Anduane Homogo Bibahende Haru Haame Ho Haga howa Ngode Datagaliwabe haluhe henemane kogobi i̱na laro. Tígua i̱naga Isaraele wali agali karuhondo keba howa henge lalu harimigobi handabe manga timbuniho harimigobi ogoni birimigonaga pani nalimulo ngulebero. I̱na tíhondo pani ogoni mo ngerogo de hondowa Isaraele wali agalime tinihondo ko birimirunaga pani ngerogo manda biai holebira.
EZE 35:12 Anidagua berogola Idomo wali agali tígua Isaraele dindi ngagonaga bi ko lalu, Isaraele dindiha hari wedaru mo ko hai hayago ai iname dindi ogoni karulo hami̱ya, larimigo Anduane Homogo i̱nime hale haru.
EZE 35:13 Idomo tígua mine howa i̱hondo mege bialu bi ko lalu harimigo i̱ manda bu kogoni.
EZE 35:14 I̱ Anduane Homogo Bibahende Haru Haame Ho Haga kogo i̱naore bi ogo laro, Wali agali dindi bibahende bu karume í̠ hondowa turu helonaga i̱na í̠ mo ko hai holebero.
EZE 35:15 Tígua Isaraele wali agali ti i̱ninaga wali agaliore heago waitigime mo ko halu bo haealabaga biyagola de hondowa turu timbuni harimi. Anidagua birimigonaga i̱nabi nde Idomo wali agali tíniha mo ko holene ogonibi dege anda ibilolebero. Tínaga Hari Sia kagobi dindi bibahende ngamigobi mo ko halu labu wiai holebira. Anidagua birago de hondowa Isaraele wali agali tigua i̱ni Anduane Homogo henene henedalo manda bulebira, lalu Anduane Homogohanda laya lene.
EZE 36:1 Anduane Homogohanda i̱hondo lalu, Dindiali-o í̠na Isaraele dindiha hari wedaruhondo i̱na bi o larogo hale helo lamibe.
EZE 36:2 I̱ Anduane Homogo Bibahende Haru Haame Ho Haga kogo i̱na bi ogodagua laro. Isaraele wali agali tí waitigi bu karume tí mege bialu lalu, Bayaleoredago ai hari Isaraele dindiha karuni inanaga kagoni ndobe, laga bialu kagoni.
EZE 36:3 Anidagua lalu karume i̱niore Anduane Homogo Bibahende Haru Haame Ho Haga kogo i̱na bi o larogo í̠na mbiwia halu latagi habe. Agali waitigi dindi tara tara wiaruha howa ibalu tigua Isaraele baba wai bialu dindi bibahende mo ko halu bo labu halu dindi karulai howa ti mege bialu bi ko lalu haya.
EZE 36:4 Anidagua lalu hayago ainde Isaraele dindiha hari wedemirubi dindi ulini bugubugu ngamirubi iba emene emene pugupugu bialu poramirubi tígua i̱ Anduane Homogo Bibahende Haru Haame Ho Haga kogo i̱na bi o larogo hale halimu. Isaraele dindiha tano ngamirubi dindi maru wima pedemirubi waitigime balu mo labu hai hene ngamiru tíguabi i̱na bi o larogo hale halimu. Hameigini dindi kawareni palia para para biarume tí mo ko halu bo labu ho ngelowa mege bialu haya.
EZE 36:5 Ani lalu hayagonaga i̱ Anduane Homogo Bibahende Haru Haame Ho Haga kogo i̱na Idomo hameigini karu bababi hameigini dindi maruha karu bababi keba timbuni ho ko. Tigua i̱ mo nagalone halu i̱naga dindi wiwagoha mo ngubia halu i̱naga dindi ngogoha nogo bulumaga sibiru hinalu holene dataniru bayale andaho kago hondowa karulai haya.
EZE 36:6 Anidagua biyago ai dindiali-o í̠na mbiwia halu i̱naga bi ogodagua latagi habe. Isaraele dindiha hari wedemirubi dindi ulini bugubugu ngamirubi iba emene emene pugupugu bialu pedemirubi tígua i̱naga bi ogo hale halimu. Wali agali tara uruni tigua i̱naga dindi ngogo mebia howa i̱naga wali agali hondo oba halu mege biyagonaga i̱ Anduane Homogo Bibahende Haru Haame Ho Haga kogo i̱na tihondo keba timbuni ho kogoni.
EZE 36:7 Ani biyagonaga i̱ Anduane Homogo Bibahende Haru Haame Ho Haga kogo i̱na heneneore larogo hameigini uruni hengedape halu mo taga holebero.
EZE 36:8 Anigo ai Isaraele dindiha hari wedemiru tíha ira dewa andaho howa yuni mabialu lini dewaore dalu holeberemi. Emeneore howa i̱naga Isaraele wali agali ti tini dindiha hole lone dai bu harangi ira ogoninaga lini bayale dedaru do naga bialu holebira.
EZE 36:9 Hari wedemiru tíhayagi i̱ kogo i̱na tínaga dindi lone alialu eru hangalu helo handaya holebero.
EZE 36:10 I̱na Isaraele wali agali hameigini bibahende mo dewa howa Isaraele dindi í̠ha helai helolebero. Ani howa tigua í̠ha tano bo gialapaya bini ngaruni lone bia dai buwa karulai holebira.
EZE 36:11 Ani bialu Isaraele dindi í̠ha wali agalibi nogo tara tarabi mo dewa holebero. Ani berogola Isaraele dindinaga tano bibahendeni wali agali abale hagadagua ndo dewaore howa waneiginibi dewa holebira. Ani kamigola i̱na wali agali dindi ogoriani abale henedarume mana bayale bialu hayaru bolangua howa tí bayaleore bialu helolebero. Anidagua berogola tígua i̱ni Anduane Homogo henene henedalo manda biai holeberemi.
EZE 36:12 Ani bialu i̱naga Isaraele wali agali bu karu i̱naga dindi ngoruha helo ti haru daibulebero. Ani haru daibialu dindi ogoni bibahende Isaraele wali agali tinaga dindi wialu waneigini bu karu ti lone tomo garibi nale bayale helolebira.
EZE 36:13 I̱ Anduane Homogo Bibahende Haru Haame Ho Haga kogo i̱na bi ogodagua laro, Wali agali bu karume lalu, Ina daluha dindi ngagome inanaga agali haguane karu bo ereba hai halu inanaga waneigini bu karubi bo wahai hagaya, laga ka.
EZE 36:14 Tigua ogonidagua lagagoyu ainde i̱na lalu áyu ogoni howa Isaraele dindi ngagome agali haguane karubi tinaga waneigini bu karubi mo ko naholebiraore. I̱ Anduane Homogo Bibahende Haru Haame Ho Haga kogo i̱na bi o ledogoniore.
EZE 36:15 Ai wali agali tara tara bu karume Isaraele dindi ngamiru hondowa oba halu mege bialu mo taga holene mbira nawulebira. Dindi o ngamiru tígua i̱naga wali agaliru lone mo ko halu mana ko ngagoha mo pila mbira holene nawulebira. I̱ Anduane Homogo Bibahende Haru Haame Ho Haga kogo i̱na bi o ledogoniore, laya lalu Esegielehanda lene.
EZE 36:16 Anduane Homogohanda i̱hondo ogodagua langialu lalu,
EZE 36:17 Dindiali-o Isaraele wali agali tini dindi ogoria heangi tigua mana ko ngubiore dodohe nabulene wiaru hangu biaabo halu hayagome dindi ogo mo ko hayagoni. I̱ninaga deni walime egengi ilili bu biruwa taga ho biragagobi ti hayagoni.
EZE 36:18 Tigua agali dewa homelo bo wahalubi mbirale gime wabini wiaruhondo bi pupu wialubi howa Isaraele dindi i̱naga deni mo dodo halu mo ko hayagoni. Ani biyagonaga i̱na tihondo keba timbuni howa pani miadai bialu minu barugoni.
EZE 36:19 Ani buwa tigua mana ko bialu hayagonaga i̱na tinaga dindi yu wahalu dindi taratara wiaruha purogo lelarugoni.
EZE 36:20 Isaraele wali agali ti dindi taratarani pugupugu biyagoha tigua mana ko bialu hayago hondowa wali agali taratara hearume i̱naga mini bayale tigabi mo dindiha halu hene. Tigua i̱ habane nabulene nagaloneore kagonilo manda buwa mo yo handalu lalu, Isaraele wali agali ti Anduane Homogonagaore karuni howa irane aginaga tinaga dindi andaru wahayadabe. Tinaga Anduane Homogo ibugua ti biamogo nabiyadabe, laga bialu hene.
EZE 36:21 I̱na hale halu hewaria dindi bibahende Isaraele wali agaliru pu heagoha wali agali hearume bi urunidagua lalu heago ai bi layaruni aleme i̱naga mini bayale tigabiorego tigua mo dindiha halu helaga binigo mitangi bialu i̱ genda yu harugoni.
EZE 36:22 Anigo í̠na Isaraele wali agali bu karuhondo bi ogodagua lamibe. Anduane Homogo Bibahende Haru Haame Ho Haga kogo i̱nime bi ogodagua larogo bayuwa hale halimu. Isaraele wali agali tigua mana ko bialu kamigo hondowa wali agali taratara hearume i̱naga mini bayale tigabi mo nagalone halu kagoni. Ani bialu kago i̱na mbira bule ngogo Isaraele wali agali tí mitangi bialu ndo i̱naga mini bayale tigabi tígua mo dindiha harimigo i̱ni miniore ogoni mitangi bialu mo yaraga helonaga bulebero.
EZE 36:23 Ani berogome wali agali taratara uruni tihondo i̱naga mini bayale tigabiore kogo manda bilo walia holebero. Ani walia harogola tigua i̱naga mini ogoniore yaraga holebira. Isaraele wali agali tígua mana ko bialu i̱ mini mo dindiha halu mo nagalone harimigo mani i̱na mini bayale tigabibi biabe hongoheru berogobi hondowa wali agali taratara karume i̱ Anduane Homogoore henedalo manda bulebira. Ai bi ogoni Anduane Homogo Bibahende Haru Haame Ho Haga kogome larogoni.
EZE 36:24 I̱na tíhondo urudagua bulego tí dindi tarataraha ho giligalalo kamiruni tíninaga dindini halimulo haru dai biai holebero.
EZE 36:25 Haru dai bu helowa i̱na iba gagaheoreme tí dodo mbira para nahe halimulo dodo doma holebero. Tígua mana ko ngubi ngaru bialu harimirubi mbirale gime wabiniruhondo bi pupu wialu harimirubi wahai howa i̱naga deni tí dodo mbira para nahe domeneore halimulo ani bu helolebero.
EZE 36:26 Ani buwa mini ala tawe mo wahai halu mini gahenge wia aribia howa helolebero. I̱na tínaga mini ege to̱le̱ giambehe ale ala winigo mo wahalu mini gahenge i̱na bia larodagua bilimulonaga wia aribia helolebero.
EZE 36:27 Ani buwa i̱naga Dinini tínaga bu miniha haabo helo helolebero. Ani helowa tígua i̱naga bi mana ngaru talialu bialu halimulo i̱na tínaga bu mini mo heya holebero.
EZE 36:28 Ani berogola dindi i̱na bamba tínaga mamaliruhondo mirugoria daibu holeberemi. Ani daibu kamigola i̱ tínaga Ngode Datagaliwabeore holebero. Tí nde i̱naga wali agaliore holeberemi.
EZE 36:29 Ani kamigola i̱na tí biamogo bialu kogola tígua mana ko dodohe ngaru lone nabuleberemi. Ani beremigola tínaga mabu ngamiruha tomo bayaleru anda hai helolebero. Ira lini daga ale karume dewaore dolebira. Ani dedagola tígua tomo nolene mbira tumagi nahe kamigo hondowa wali agali tara tara karume tí mege nabulebira.
EZE 36:31 Ani howa tígua abale mana ko ngubi bialu harimiru mitangibu dai buwa, Iname koorene ko bialu harimadago, lalu tíni taga timbuniore halu holeberemi.
EZE 36:32 Ai Isaraele wali agaliru-o Anduane Homogo Bibahende Haru Haame Ho Haga kogome i̱na bi ogo larogo baya hangu hale hadaba. I̱na mbirale bigi bule ngogo tí biamogo bialu bayale halimulonaga ndo bulebero. Tínime ko bialu harimiru bibahende mitangi bialu taga timbuni halimulonaga bulebero, lalu lene.
EZE 36:33 Anduane Homogo Bibahende Haru Haame Ho Haga kogo i̱nime bi ogodagua laro. I̱na tínaga ko birimigo domo waharogola tí bayale dodo nahe howa nde tínaga waitigirume abale tínaga mabu anda paberu bo gialo wahalu labu hayaru daibu howa lone biadai bilimulo helolebero.
EZE 36:34 Agali tara marume ibaga bialu howa handalu heria tínaga dindi embera ibai heneyane handayagoni. Anigo ai i̱na tínaga maburu lone hangadaba lolebero.
EZE 36:35 Ani berogola dindi tarali karume ogodagua lolebira. Abale dindi ogo ko embera labu hene wiyago ai nde áyu bayaleore Idene mabu ale hayada, lolebira. Abale tano uruni gialo bagabu wahene wiyago ai áyu Isaraele wali agali tinaga tano biaruni pabe hongoheore lone bu yu mabu biyada. Isaraele wali agali ti tano uruniha lone daibu hayada, lolebira.
EZE 36:36 Ai Isaraele wali agali tí tíninaga dindini daibu kamigo hondowa wali agali maru tí kamigoha mandagi hapara ho karume manda bialu Anduane Homogo i̱nime tano uruni bo gialo wahayago lone biadai bialu mabu embera labuore wiyaru lone hangadai biyada, lolebira. Anduane Homogo i̱nime aniore bule lo wirugo buleorebero, lene.
EZE 36:37 Anduane Homogo Bibahende Haru Haame Ho Haga kogo i̱nime bi ogodagua laro. Ainde i̱naga Isaraele wali agalirume i̱hondo ina biamogo bia larimiyagua i̱na tínaga bi laramigo hale howa tínaga waneiginiru nogo sibi haradagua mo dewa ho helolebero.
EZE 36:38 Ani berogola nogo sibi ale dewaore halu horo i̱nime wiabagi helenengi Yarusalemeni i̱nihondo bo lomabu delole haru ibiraligobi tí holeberemi. Ani howa tínaga tano lone biadai bini biaruha wali agali dewaore palu to̱lolebira. Ai urunidagua heneneore tagira ibai haragola tígua Anduane Homogo i̱niore henedalo manda buleberemi, laya lalu Esegielehanda lene.
EZE 37:1 Anduane Homogo ibunaga hongo i̱ha karula howa ibu Dinini ibugua i̱ dindi ulini mbiraha homa kuni dewa bu wiaruha haru puwa helaya.
EZE 37:2 Ibugua i̱ dindi ulini ogoniha haru ibaga biyagola handalu hewaria homa kuni dewaore bu wiaria handaru. Agali kuni wiyadaruni bamba tawe gigialeoreyane de handarugoni.
EZE 37:3 Ani handalu hewagola Anduane Homogohanda i̱hondo bi ogodagua laya. Dindiali-o í̠na manda bialu keria agali kuni nai ngaruni lone agali hodai bibehebe be nabibehebe, lalu hale haya. Ani layagola nde i̱na ibuhondo ladai bialu lalu, Anduane Homogo Bibahende Haru Ho Haame Haga kego-o bi uruni larigo i̱ manda nabidogo í̠nime hangu mandabu kegoni ndobe, laru.
EZE 37:4 Ani larugola Anduane Homogo ibugua i̱hondo ogodagua langiya. Ainde í̠na homa kuni o bu ngarunihondo mbiwia halu bi ogodagua lamia. Tihondo lalu, Anduane Homogonaga bi ogo hale hadaba.
EZE 37:5 Anduane Homogo Bibahende Haru Haame Ho Haga kogo i̱na bi ogo larogoni. I̱nime tíha buhe̱ pulaanda harogola tí lone wali agali déreore holeberemi.
EZE 37:6 Heneneore i̱na tínaga gungubunirubi tingininaga mbirinirubi helai howa dongoneme hadambi helolebero. Ani buwa tíha buhe̱ pulaanda halu tí dére ibagabu hai helolebero. Ani bidogola nde tígua i̱ Anduane Homogoore henedane manda buleberemi, lalu ani labe laya.
EZE 37:7 Anduane Homogo ibugua labe layadagua laru. Ani lalu hewaore dege mbira ngilingele layuane hale haru. O layadagoni homa kuni bu wiyadarunime leneya. Ani hale howa handalu hewaria homa kuni bu wiyadaruni tini henedadagua hadai bigibigi bialu kirikaru lowa naina agali tingini howa wima pearia handaru.
EZE 37:8 Ani handalu dege hewaria kuni biarunaga gungubunirubi mbirinirubi hai howa dongoneme hadambi heleagola agaliore wima peagoyu ai buhe̱ dege nale wima pearia handaru.
EZE 37:9 Ani handalu hewaria Anduane Homogohanda i̱hondo ogodagua laya. Dindiali-o í̠na i̱ninaga bi ogo puyabuhondo ogodagua lamia. I̱ Anduane Homogo Bibahendenaga Haru Haame Haga kogo i̱nime lalu, Puyabu í̠na bibahendeha howa pulame halu ibuwa agali bo wahene o ngaru lone heyu helonaga buhe̱ pulaanda ha, labe. Ani biragola ti lone dére halu ibagabu helo, laya.
EZE 37:10 Ani layagola i̱na Anduane Homogohanda bi labe layago latagi harugola puyabu bibahendeha howa agali biaruha buhe̱ pulaanda hayagome agali biaru mo dére halu heyuwa naina heyu hama piya. Ai uruni ti dewali mandagi howa wai biaga ami agali haradagua biane handarugoni.
EZE 37:11 Ani heagola Anduane Homogo ibugua i̱hondo ogodagua langiya. Ai dindiali-o Isaraele wali agali tí homa kuni gigiale urunibi howa tígua lalu, Inanaga kuni gabuho wahene kamagonidago ina lone bayale holene henge nawi kamago ainde pu ereba hene ina harimadagoni, lowa tínaga bi ogonibi lalu kamigoni.
EZE 37:12 Anigo Anduane Homogo Bibahende Haru Haame Ho Haga kogo i̱naga bi ogo Isaraele wali agaliruhondo mbiwia halu bi ogodagua latagi labe. Anduane Homogo i̱nime tí homaliha ngamiria dugu yalu tíninaga dindi tene biagoha haru dai bulebero.
EZE 37:13 Ai i̱nime tí homaliha ngamiria duguarogola i̱naga wali agali tígua Anduane Homogo i̱nioreda lowa manda buleberemi.
EZE 37:14 Ani bialu i̱naga Dinini tíha helarogola tínaga holene hadai bialu dére holeberemi. Ani kamigola i̱na tíninaga dindiha haru dai berogola bayaleore holeberemi. I̱na tí ani haru dai bu helarogola tígua i̱nime bulebero lalu lo wirugo heneneore biyada lalu manda buleberemi. I̱ Anduane Homogohanda bi ogonidagua larogoni, lene.
EZE 37:15 Anduane Homogo ibugua i̱hondo lalu,
EZE 37:16 Dindiali-o í̠na kanogo mbira mo yalu ibuwa ogoriani bi ogo gili bibe. Yuda hameiginibi Isaraele hameigini maru Yuda dindini mandagi karubi, ogoni gili bibe. Ani bialu kanogo mende yalu ibuwa ogorianibi gii bialu, Yosebe igini Eberaimi hameiginibi Isaraele hameigini maru ti heba mandagi karubi, ogoni gili bibe, lalu laya.
EZE 37:17 Ai bi ogoni gili biai howa kanogo ngunigo laboni kanogo mbiraore ale helo mo gimbu bu yu habe.
EZE 37:18 Ani yu kegola í̠naga dameneru tigua hale halu, Manane ogoni aginaga yu kebe, layagua í̠na tihondo ogodagua lamibe.
EZE 37:19 Anduane Homogo Bibahende Haru Haame Ho Haga kogome i̱na Yosebenaga kanogobi Yudanaga kanogo ogola mo mbiraore hole yu holebero. Ani buwa i̱ninaga gime kanogo mo mbiraore howa yagadagua kirabali ogoni i̱naga giha yu holebero, ani laya labe.
EZE 37:20 Dindiali-o í̠na kanogo ogonilabo kirabali wali agalime hendelo gime yu ibagabu habe.
EZE 37:21 Ani yu howa bi ogodagua lamibe. I̱ Anduane Homogo Bibahende Haru Haame Ho Haga kogome Isaraele wali agali dindi tara tara bibahende ngaruha pu giligalalo karuni mo mogo bialu tini dindini helo haru dai biai holebero, laya labe.
EZE 37:22 Ani haru dai berogola ti mo mbiraore halu damenebi mbiraore hangu howa ti Isaraele dindi hari ngaruha mandagi helo helolebero. Ani helalu tinaga haru haga kini mbiraore dege helo helolebero. Ani howa ti dindi kirani haru haga kini kira ala hayadagua naholebira.
EZE 37:23 Tigua mbirale gime wabini ngaruhondo bi pupu lone nawi wahalu mana ko ngubi bialu haga wiyarunibi wahai holebira. Anidagua biragome ti i̱naga deni dodo mbira lone para nahe bayale holebira. Tigua mana ko wiaru ala bialu hayaruni i̱na domo wahai halu mo bayale hai holebero. Ani berogola ti i̱naga wali agali halu i̱ni nde tinaga Ngode Datagaliwabe holebero.
EZE 37:24 Ani howa i̱naga biabe bia haga Debidinaga aguanene mbirame tinaga handame haga kini holebira. Ti mo mbiraore ho kagola agali mbiraore ogoni ibugua hangu ti haru holebira. Ani bialu ti mini bilinahe howa tigua i̱naga bi mana baya hangu talialu bialu holebira.
EZE 37:25 Ani bialu howa i̱na dindi bamba tinaga mamali ala henego i̱naga biabe bia haga Yagabahondo mirugoria dai buwa tibi tinaga waneigini aguanenerubi ogoniha haabo holebira. Ani kagola Debidinaga aguanene mbirame tinaga handame haga kini haaboore holebira.
EZE 37:26 Ani howa i̱na ti bayaleore haabo helonaga habo nalolene bi hongoheore mbira ti baba lo wulebero. I̱na tininaga dindini haru daibu helarogola ti palia timbu halu dewaore holebira. Ani kagola i̱naga anda ti karia dombeneha haaboore holebira.
EZE 37:27 I̱nibi ti haru mandagi howa ti i̱naga wali agali halu i̱ nde tinaga Ngode Datagaliwabe holebero.
EZE 37:28 I̱na i̱naga anda Isaraele wali agaliru dombeneha kago hondowa wali agali dindi tarataraha karume Isaraele wali agali karu ti i̱ninagaore helayadalo manda bulebira, lalu Anduane Homogohanda laya lene.
EZE 38:1 Anduane Homogohanda i̱hondo lalu,
EZE 38:2 Dindiali-o í̠na Magogo dindiha Gogo karia de handa amu habelo hameledo. Gogo ibu Mesege dindi Tubala dindilanaga kini timbuni ka. Í̠na Gogo ibu mo ko holene nga lalu bi latagi habe.
EZE 38:3 Ibuhondo bi ogodagua labe. Mesege hameigini Tubala hameigini kago labonaga kini timbuni dunini kego í̠na bi ogo hale habe. I̱ Anduane Homogo Bibahende Haru Haame Ho Haga kogo i̱na í̠la waitigi ho kogoni.
EZE 38:4 I̱na í̠ mo beregedalu í̠naga ne hanganeha wena hugume hende howa í̠naga ami agali heba gililo yu dai bulebero. Í̠naga ami agaliru dewaore karubi nogo hosirubi ami agali maru nogo hosini biralu piagaru ti aminaga agaru mo karulalu wai humbi yalu wai biagane ayu tiburu yu karubi tí bibahende gililo yu dai bulebero.
EZE 38:5 Pesiali amirubi Sudanali amirubi Libiali amirubi bibahende tigua ege manda karulalu humbiru yu howa í̠ heba mandagi holebira.
EZE 38:6 Ani bialu Gome dindinaga ami agali wai hongo howa biaga karubi Bede Togama dindi abene uyurahayagi tanonaga ami agali bu karubi í̠ heba dege holebira. Dindi tara taranaga ami agalirubi í̠ heba holebira.
EZE 38:7 Kini Gogo í̠ wai bule manda manda bu habe. Í̠naga ami agali í̠na haru haga bu karu tibi nde wai bule manda manda bu helo í̠na ti bayuwa handayaho habe.
EZE 38:8 Mali dewaore howa wai bu pole mo mogo bule manda manda bu habe. Mali dewaore pedagola dindi mbira bamba mo ko ho winigo ai áyu tinaga tano lone mo tiga bialu biadai buwa waitigiru gi holene ereba halu dungulo kago ti baba wai bu pobelo pu lolebero. Wali agali uruni ti dindi taraha garabaya pu henego áyu i̱na ti lone haru dai binigo ai Isaraele dindi hari bare bare ngaruha daibu heledogoni.
EZE 38:9 Kini Gogo í̠nibi í̠naga ami agali bu karubi ami agali maru dindi taraha howa haru íbu hene karubi tígua wali agali tinaga dindi dai bu karu baba wai bule poleberemi. Ani poramingi tí dewaore howa iba dalu timbuni puyabu heba ibagadagua ibalu dindi bibahende karulai halu ginu hagua aleme tinaga dindi ngago bibahende bu dambi hai holeberemi.
EZE 38:10 I̱ Anduane Homogo Bibahende Haru Haame Ho Haga kogo i̱na Gogo í̠hondo bi ogo laro. Í̠na ti baba wai bule porengi í̠naga bu mini abaleore heyalu ohalu bulene mbira manda manda bulebere.
EZE 38:11 Wali agali uruni ti baba wai bulene mbira nahebe toba howa tiha mo ko holene mbira naanda ibulebirabe tobaho karia í̠na wai bule anda polebero, lo mitangi bulebere. Tinaga tano ngagoha mbirali ibuligonaga wai pabe bu mabu nabi kagoni manda bulebere.
EZE 38:12 Ani manda bialu í̠na wai bule anda puwa tinaga dabudabu bayale tara tara ngaru í̠ karulole manda bulebere. Wali agali uruni ti dindi taraha pu henego ai lone dai buwa tinaga tano lone biadai biai halu tinaga nogo sibi bulumagarubi mbirale bibahende bayale dameneru wua ka. Ani bialu tinaga dindi maru ngaru ti dege dombeneha nga.
EZE 38:13 Tígua dindi ogoni bole eberemingi hameigini maru Seba dindiha padarubi Dedana hameigini padarubi Sebena dindiha biyinaya biabe biaga bu karumebi tí eberemigo de hondowa tíhondo hale halu lalu, Í̠naga ami agali bu karu mo mogo bialu wai bule ibuwa tinaga mbirale ngaru karulai holeberemibe. Ngolo dewa ngarubi siliba ngarubi nogo bulumaga bu karubi mbirale maru tara tara ngarubi tígua mo yai holeberemibe. Anidagua bulenego bayaleoreda, lolebira.
EZE 38:14 Ai dindiali-o í̠na Kini Gogohondo i̱naga bi ogodagua lamibelo hameledo. Kini Gogo í̠na bi ogo hale ha. Anduane Homogo Bibahende Haru Haame Ho Haga kogo i̱naga Isaraele wali agali ti tininaga dindiore ngagoria bayale kangi í̠na ogodaua manda bulebere.
EZE 38:15 Í̠na ami agali dewaore haru halu í̠naga dindi uyurahayagi wahalu tígua wai bule ibuleberemi. Ami agali uruni ti dindi tara tara ngaruha howa íbu hene karu bibahende nogo hosini biralu í̠ni heba mandagi ibuleberemi.
EZE 38:16 Tígua i̱naga Isaraele wali agali baba wai bule ibuleberemi. Eberemingi tí dewaore hari beraliba aleme dindi bibahendeha ho namulai kamiria ti hondolebira. Kini Gogo-o í̠na ani bibelo mo bia holeberogo irane hameigini tara tara dindi taraha padarume i̱naga mini tigabi mana bayaleoredane hondowa i̱ kogoniore manda bilo ani bulebero. Hamaro bulene horo kaware ngelowa mbirale uruni tagira ibulebira.
EZE 38:17 Bamba i̱naga biabe biahalu bi mana latagi haga Isaraeleali bu hearume mani buleberogonaga mbiwia helo i̱na lamigi bialu lalu, Mani howa i̱na tínaga waitigi mbira haru halu ibulebero, laga bialu harugo waitigi ogoni Kini Gogo í̠ kegoni manda bialu larugoni. Ani birugola tigua mali dewaoreni biabe ogoni bialu howa bi latagi halu hene. Anduane Homogo Bibahende Haru Haame Ho Haga kogo i̱na bi o ledogoniore, laya lene.
EZE 38:18 I̱ Anduane Homogo Bibahende Haru Haame Ho Haga kogo i̱naore laro. Kini Gogo ibugua Isaraele baba wai bule ibirangi i̱na ibula keba timbuniore holebero.
EZE 38:19 I̱naga miniha keba timbuniore howa i̱na bi ogo laro. Horo ogoningi Isaraele dindi bibahendeni dumbirumbi bialu dindi ema biai holebira.
EZE 38:20 Anidagua biragola ibaha wena bedarubi ega bedarubi nogo tara tara emene timbuni bu karubi wali agali dindi bibahendeni karubi i̱ ogonibi kogonaga mogolalu durulo haiore holebira. Hari wedaru podai halu dindi ngaruni gaibu baga bialu mo ko haiore holebira. Tanonaga wai pabe egeme bu mabu bini hongohe karu podai halu dindini haealapaya biai holebira.
EZE 38:21 I̱na Kini Gogo mo gi halu ko holene dewa ibuha ibilolebero. I̱ Anduane Homogo Bibahende Haru Haame ho haga kogo i̱na bi ogodagua laro. I̱na Isaraele dindini hari bare bare ngaruha wai timbuni mo bia halu ibunaga ami agalirume tinaga ayu tibume tini degedege bagabaga bialu homelaga bulebira.
EZE 38:22 I̱na Gogo ibuha warago tara tara ibilalu waibi nde ibila dege bialu ibu pani nelo mulenaga ani bulebero. I̱na iba dalu dindiguni heba timbuniore ibilalu ege to̱le̱ do kundibiore hariha howa ibira helalu urunime ibubi ibunaga ami agali karubi agali dindi taraha howa ibu biamogo bule íbu karubi ti bibahende bo wahai holebero.
EZE 38:23 I̱na ogonidagua berogome hameigini tara tara dindi taraha karu bibahende i̱ni tinaga hongo haihe howa mini tigabi mana bayaleore biaga kogo mo walia holebero. Ani berogola tigua i̱ni Anduane Homogo henene ogobiore henedalo manda bulebira, lene.
EZE 39:1 Anduane Homogo i̱na Bibahende Haru Haame Ho Haga kogo laro, Dindiali-o í̠na Mesege dindibi Tubala dindibi ogonilabonaga Kini Gogo timbuni kago ibu mo ko holene nga hongo howa lalu ogodagua latagi habe. Kini Gogo-o i̱na í̠la waitigi ho kogoni.
EZE 39:2 I̱na í̠ mo beregedalu dindi abene unurahayagi handadai bilolebero. Ani bialu í̠ni dindi abene uyurahayagi ngago wahalu i̱na haru ibalu Isaraele dindiha hari bare bare ngaruha haru eberogola í̠na Isaraele baba wai bulebere.
EZE 39:3 Ani buwa i̱na í̠naga danda timu gi leha yu kegoni bo haealabaga bialu í̠naga yandare gi tigaha yu kegonibi bo haealabaga berogola dindini ibira hai holebira.
EZE 39:4 Í̠nibi í̠naga ami agali bu karubi ami agali maru í̠ biamogo biaga haru ebererubi tí bibahende Isaraele dindiha hari bare bare ngagoha homai holeberemi.
EZE 39:5 Homai haramigola tínaga tingini dindini bame wima pedaria ega bodo hariawe bedarumebi nogo gabua tara tara bu karumebi ibalu nai holebira. I̱ Anduane Homogo Bibahende Haru Haame Ho Haga kogo i̱na bi o ledogoniore.
EZE 39:6 Ani bialu i̱na Magogo dindi ngagohabi wali agali iba solowara bedago ange ange wai nabi palima pedagohabi ira hedope holebero. Anidagua berogola wali agali urunime i̱ni Anduane Homogo heneneore henedalo manda bulebira.
EZE 39:7 I̱naga Isaraele wali agali karume i̱naga mini baya buruguleorewi kogo manda biai helo i̱na mo walia holebero. Ani walia harogola tigua i̱naga mini ogoniore lone bope halu mo dindiha habe nahe holebira. Ani biragola hameigini tara tara dindi taraha karu tigua i̱ Anduane Homogo kogo i̱ore Isaraele wali agalinaga Ngode Datagaliwabe mini tigabi baya buruguleore kalo manda biai holebira.
EZE 39:8 I̱ Anduane Homogo Bibahende Haru Haame Ho Haga kogome ogodagua laro. Mbirale mbira bulebira larugoni bibahende horo mbiru tagira ibai holebira.
EZE 39:9 Anidagua biragola wali agali Isaraele dindi tanoha haga karume tagira pialu waitigime wai biagane ale yu wahene dindini ngaru ira delolenaga mo ilu wima polebira. Tigua wai humbibi danda timurubi yandarerubi wai biaga kangorubi uruni bibahende ira delole mo wulebira. Tigua uruni delalu kane dege mali karia polebira.
EZE 39:10 Wali agali ti mali karia uruniha irabuhabi dangite ngaruhabi ira taya nabi howa ti ira karulape mbirale wai hamani mini biaruni delalu holebira. Ogonidagua bialu Isaraele wali agalinaga waitigi bu karume ala tininaga mbirale bayale wiaru mo pagebu yu piai henedagua ai Isaraele wali agali tigua nde waitiginaga mbirale wiaru mo page bialu ogoningi pani miadai bulebira. I̱ Anduane Homogo Bibahende Haru Haame Ho Haga kogo i̱na bi o ledogoniore.
EZE 39:11 Anduane Homogo ibugua bi ogodagua lalu, Mbirale uruni tagira ibirangi i̱na Isaraele dindiha dindi hobane mbira Kini Gogo halu ibunaga ami agaliru hora hole tu wiabagi howa ngelolebero. Dindi podene ogoni mini Ibaga Biagarunaga Dindi Ulini laga winigo ogoni Homene Iba bereago ni ibiragohayagi dindi winigo ti ogoriani hora holebira. Hora howa mani dindi ogoninaga mini tara wialu Gogo Ami Agalirunaga Dindi Ulini laga wulebira.
EZE 39:12 Isaraeleali tigua ami agali uruni mo hora halu kane dege ege karia polebira. Tigua agali homene tingini uruni mo hora hai kagola dindi ogoni i̱naga deni dodo nahe bayale wulebira.
EZE 39:13 Isaraeleali bibahendeme biabe ogoni biamogomogo bulebira. I̱ wai wayali harugonaga wali agalime i̱naga mini yaraga harangi agali biabe ogoni bini karunaga minibi yaraga holebira. I̱ Anduane Homogo Bibahende Haru Haame Ho Haga kogo i̱na bi o ledogoniore.
EZE 39:14 Ege karia uruni piai kagola Isaraeleali tigua agali maru Isaraele dindi bibahendeha ibaga biai halu agali bo wahenedaru arianaga kuni maru ngabe hondole taya bima pelo dabo helolebira. Handa walia hayagua dindi ogoni i̱naga deni dodo nahe ngelonaga mo hora holebira.
EZE 39:15 Agali uruni tigua taya bima pialu karia homa kuni maru handa walia hayagua tigua nga lalu mo walia halu hada bu wima polebira. Agali marume maha ibalu kuni uruni mo yalu dai bialu dindi mini Gogo Ami Agalirunaga Dindi Ulini laga wiyagoha hora holebira.
EZE 39:16 Tigua agali waime bene uruninaga kuni wu gialo ngaru mo hora hai haragola Isaraele dindi i̱naga deni lone dodo nahe bayale wulebira. Mani tano timbuni mbira wulebirago ogoni mini Ami Agali Tidini Dewa laga wulebira.
EZE 39:17 Anduane Homogo Bibahende Haru Haame Ho Haga kagome i̱hondo ogodagua laya. Dindiali-o í̠na ega biru ngarubi nogo gabua tara tara karubi urunime i̱na loma mbira bo ngerogo nelo ti bibahende olo mogo bibe. Loma ogoni timbuniore Isaraele dindiha hari nene bu ngaruha ega nogorume mbirinibi daramabi dewaore wulebirago nelo olo mogo bibe.
EZE 39:18 Ami agali dewaorenaga mbirinibi dindi bibahendenaga kini henerunaga daramabi dewaore nolebira. Ami agali urunibi kinirubi ti nogo sibi meme bulumaga habaheru bagadagua bo waholebira.
EZE 39:19 Ami agalirubi kinirubi uruni i̱na ti loma ale bo ngerogola nogo ega biru karume habane ngaru nalu no karula pialu nabe manga holebira. Uruninaga darama na dege bialu lulu iba naradagua bialu no luluyu haradagua bulebira.
EZE 39:20 I̱naga tomo nagane dagiani biruwa tigua nogo hosirunaga mbirini dewaore nalu agali nogo hosini biralu penerunaga mbirinibi nalu ami agali wai biaga hongo gibihe bu henerunaga mbirinibi nalu tiore tombeho holebira. I̱ Anduane Homogo Bibahende Haru Haame Ho Haga kogo i̱na bi o ledogoniore, laya lene.
EZE 39:21 Anduane Homogohanda laabo halu lalu, I̱na mana tigabini howa i̱naga hongo kogome wali agali bibahendeoreme mana ko biyarunaga pani nelo mulebero. Ogonidagua berogo hondowa hameigini tara tara dindi taraha karume i̱ninaga mini yaraga holebira.
EZE 39:22 Ani berogola horo ogoningi howa Isaraele wali agali tigua i̱ni Anduane Homogo tinaga Ngode Datagaliwabeore henedalo manda bulebira.
EZE 39:23 Hameigini tara tara dindi taraha bu karu tigua Isaraele wali agalirume i̱naga bi mo wahalu mana ko dewaore biyarunaga i̱na ti dindi taraha garabaya pelarugo manda biai holebira. Ani buwa i̱na Isaraele wali agali erembira miwagola waitigi bu hearume ti baba wai bialu bope howa homelo bo wahai helo ibilarugoni.
EZE 39:24 Tigua mana ko dewa tara taraore bialu mana maru i̱naga deni dodohe wiaru bialu hayagobi pani nelo mialu ti erembira mirugoni.
EZE 39:25 I̱ Anduane Homogo Bibahende Haru Haame Ho Haga kogo i̱na bi ogodagua laro. I̱na Yagabanaga aguanene Isaraele wali agali bu hearu pani nelo mialu harugo ai dara howa ti bayale helo biamogo bulebero. Anidagua berogola mbiralime i̱ mini lene kogo bope halu mo dindiha naholebira.
EZE 39:26 Isaraele wali agali ti tininaga dindi ngagoria dai buwa mini dungulo kangi ti kagoha mbiralime mo gi naholebira. Anidagua biragola tigua mana ko tinime ala bialu hayarunaga taga timbuni ho henego embeda holebira.
EZE 39:27 Hameigini tara tara dindi taraha karume i̱ mini tigabi baya burugule kogo hendelo i̱na i̱naga wali agali ti waitiginaga dindi tara ngagoha garabaya pu karia lone haru dai bialu tini dindioreni helolebero.
EZE 39:28 Ani berogola i̱naga wali agali Isaraele tigua i̱ni Anduane Homogo tínaga Ngode Datagaliwabeore henedalo manda bulebira. Tigua ani manda bulebirago irane i̱na ti dindi taraha garabaya bu yalu pelarugo mitangi bu dai bialu tini dindi winigoria helo lone haru daibu helarogonaga manda bulebira. Ti mbirali embedaho wahalu haru dai nabi ndo bibahendeore haru dai biai holebero.
EZE 39:29 Ani bialu i̱na Isaraele wali agalihondo i̱naga Dinini mialu lone ti erembira namulebero. I̱ Anduane Homogo Bibahende Haru Haame Ho Haga kogo i̱na bi o ledogoniore, laya lalu Esegielehanda lene.
EZE 40:1 I̱na garabaya hemane dege mali pira kirani duria (25) hayagola mali ogoningi ege mbira ogonaga horo pini layagola Anduane Homogonaga hongo i̱ha karulayuane handaru. Waitigime Yarusaleme tano karulenedangi howa mali pira mbirani maria (14) pene. Horo ogoningiore Anduane Homogohanda i̱ haru halu piya.
EZE 40:2 De gandebaha Anduane Homogohanda i̱ Isaraele dindiha hari nene daligaore mbira wiagoria haru pu helaya. Hari nene ogoriani howa dindi abene unurahayagi de handa dai bialu hewaria anda dewa buhe tano ale mbira wiaria handaru.
EZE 40:3 Anduane Homogo ibugua anda buhe ogoniha i̱ kaware haru piyagola handalu hewaria agali mbira ege to̱le̱ boronosi handalehe ngiringarale hearia handaru. Agali ogoni ibu tanonaga ege to̱le̱ pabe heago panga harabani howa ibugua pu mbira mida magi manda biagane labolabome wabinibi mende mida magi manda biagane dege irame wabinibi ogonilabo yu hearia handaru.
EZE 40:4 Ani handalu hewaria agali ogoni ibugua i̱hondo langialu lalu, Dindiali-o i̱na í̠hondo mbirale mo walia haga bulenaga í̠ ogoria haru ibiru. Anigo áyu i̱na mbirale mo walia harogo bayuwa de hondowa bi larogobi hale howa mani í̠na Isaraele wali agali karume hale helo lamiai habe.
EZE 40:5 I̱na Anduane Homogonaga anda heago de handalu hewaria anda ogoni ege pabe bu mabu bupe hearia de handaru. Ani hondo hewagola agali biago ibugua mbirale mida magi manda biagane irame wabini biago yamiya. Mida magi manda biagane ogoni lunaga magi mida tebirahe winiyago mo yalu agali biago ibugua ogonime Anduane Homogonaga anda ege pabe heagonaga mida magi manda biya. Ani manda buwa handalu hearia daliganaga mida magi tebira halu aranenaga mida magi tebira dege hayane handaru.
EZE 40:6 Ege pabe ogoninaga haraba tebira dege wia. Ani bialu haraba mbira mbira wiadagua hobane mbira mbira tamuha howa haraba wiagoha bu gimbu bigi biaria handaru. Mbirali ibu Anduane Homogonaga anda kagoha anda pole pialu hobane odaruni bolangua halu puwa nde Anduane Homogonaga andaha anda polebira. Agali biago ibu ege pabe heago ni tagira ibiragohayagi pialu haraba mbiragonaga egageria wiagoria irigi halu piya. Ani puwa ibugua haraba o wiagonaga arane yangale mida magi manda biaga yu hayagome manda bu handalu hearia mida magi tebira wia.
EZE 40:7 Haraba ogoriani anda pialu howa mendehayagi hobane tebira mendehabi hobane tebira dege agali mamage haga biarunaga heneyago handa edene bima peagola hanuni bugu hama bame wali agali puíbu bulene henge wia. Ani wiagola agali magi manda biaga biagome tamu hobane uruni mida magi handalu hearia bibahende mida tebira dege dege haya. Ani bialu anda tamu hobane mbira mbiranaga anda hái heago mida manda bialu hearia mida kirani tebone habehe dege wia. Hanuni bugu hama wali agali ti puíbu biaga wiadagoni wuyu pialu tamu hobane timbuni mbira wiagoha tagira pea. Ani wiagoria agali mbirale mida manda bu handaga biagome anda tamu hobane timbuni biagonaga haraba heagoria hái heago mida manda bu handalu hearia mida magi tebira dege wiane handaya.
EZE 40:8 Ani handalu anda tamuha hobane timbuni ogoniha anda puwa hobane ogoni mida manda bu handalu hearia arane timbuninaga magi mida maria wia. Hobane ogoninaga abene mbiraha haraba mbira wiago ogoni Anduane Homogonaga anda tamuhayagi anda polene haraba wia. Ani wiagola agali biagome puwa haraba wiaria ege pabe ogoni mida manda bu handalu hearia mida magi mbira hangu haya.
EZE 40:10 Tamu hobane harabani hayaru uruni agali mamage haga biarunaga hayaruni hobane waragaria howa tamuha mbiraore ogobi dege dege hea. Hanuni bugu hama wali agali puíbu biaga biago tubari wuwa mendehayagi hobane tebira mendehabi tebira dege hea. Ani bialu anda hobane hearu magi mbiraore ogobi dege dege hea.
EZE 40:11 Ani biai halu agali biago ibugua ege pabe timbuni heagonaga haraba wiagoria puwa haraba mida magi manda biya. Haraba yangalenaga mida magi waragariani bolanguahe haya. Anigo ege pabe panga dugua amu nana biyagola emene hodai bialu mida magi duria hangu haya.
EZE 40:12 Ani bialu tamu hobane agali mamage haga biarunaga heagoha haneni ege pabe emene tubagi maru bu helea. Ani heagola agali biagome ogoninaga magi manda bialu hearia luninaga magi emene tubagi dege sendimida pira duria (50) halu aranebi nde sendimida pira duria (50) dege haya. Tamu hobanehabi nde lunagabi arane yangalenagabi mida magi tebira dege dege hea.
EZE 40:13 Ani bialu agali biagome mamage haga hearunaga tamu hobane heagonaga tibiha windo heagoria howa handama pialu tamu hobane mendehayagi windo heagoria puwa lunaga mida magi manda bu handaya. Ani handalu hearia anda ogoninaga mida magi homberiani (12) maru bolanguahe haya.
EZE 40:14 Ani bialu mani ibugua tamu hobane timbuni heago mida magi manda bule piya. Manda bialu hearia lunaga magi mida pira hea. Haraba erembirahayagi wiago wali agali mo ngoaiho haga Anduane Homogonaga anda heago tagirani wu mabu biago pole tagira piaga wia.
EZE 40:15 Anduane Homogonaga anda ege pabe heago bugu hama hayagonaga luni magi mida pira kirani duria (25) bibahende hea.
EZE 40:16 Ege pabe ogoninaga anda hobane bibahende heagoha windo mbira mbira wiai hea. Ani bialu hobane hoba amunana bini heagohabi windo wia dege bia. Ani bialu ayage ale yunihe kagonaga bigiya windo kawareni wabu wigi bia.
EZE 40:17 Agali biago ibugua i̱ haru halu ege pabe timbuni Anduane Homogonaga anda ege pabe bu yaanda hene wiagoha wali agali ngoaiho haga wiagoria haru piya. Ani piyagola handalu hewaria anda hobane pira tebira (30) bibahende wali agali ngoaiho haga wiagoria ege pabe timbuni heagoha bu gimbu bini hearia handaru. Ege pabe andane ogoniha wali agali ibaga bu holene wiagoria ege to̱le̱ dugu wima pea. Hariga poleneni ege to̱le̱ dugu wiyadagoni anda hobane emene biarunaga hanehayagi wia.
EZE 40:18 Ege pabeha bu gimbu bini biaru heagoria ani wima puabo hea. Hariga ibaga bu holene ege to̱le̱ dugu wima piyadagoni lunaga mida magi hobane tebira biaru tamuha bugu hama dombeni wiagobi dege wia. Wali agali mo ngoai ho holene hama timbuni ogoni dindiha ngelowa Anduane Homogonaga anda daligani hea.
EZE 40:19 Wali agali ngoai hagane hama timbuni ogoni ege pabe mende Anduane Homogonaga anda bu mabu biago tagirahayagi wia. Ege pabe mende ogoni andaneha ngoai hagane hama mendebi wiago ogoni ibu emene daligani wia. Ege pabe mende ogoninaga abene ni tagira ibiragohayagi ege pabe biagonaga haraba mbira wia. Haraba wiago labo dombeneha hama wiago agali biagome mida magi manda biya. Ibugua ege pabe timbuni dunini heagonaga haraba wiagoria howa manda bialu mendehayagi haraba ege pabe emene tamuha heagonaga haraba wiagoria tagira pialu handalu hearia hama biago mida magi pira duria (50) wiaria handaya.
EZE 40:20 Ani bialu agali biago ibu abene uyurahayagi puwa ege pabe timbuninaga haraba wiago mida magi manda biya.
EZE 40:21 Ani manda bu handalu hearia ogonibi mida magi tamuha tagirahabi bugu hama wali agali puíbu biaga biago agali mamage haga biarunaga tamu hobane mende mendehabi tebira dege dege hea. Uruni magi mbiraore abale ni tagira ibiragohayagi ege pabe dunini heagonaga ege pabe panga heagobi tamu hobane hearubi mida magi ogobi dege dege hearia hendene. Uruninaga magi lunaga mida pira kirani duria (25) hea arane yangalenaga magi mida homberiani (12) emene bolanguahe handaya. Anda polenenaga haraba egageria ge halu iradali bulene karia wia.
EZE 40:23 Abene ogoniha dege Anduane Homogonaga anda heagoria ege pabe panga mende dugu wiyagobi dege wiaria handaru. Panga ogonibi mende ni tagira ibiragohayagi wiagobi dege wiaria handaru. Ani wiago hondowa agali biago ibugua ege pabe ogonilabo hengeneha wiago mida magi handaya. Abale mende ni tagira ibiragohayagi wiago manda biyadagua dege manda bialu hearia ogonihabi mida magi mbiraore dege pira duria (50) wiaria handaya.
EZE 40:24 Ani bialu agali ogonime lone haru halu ege pabe haraba wiago abene unurahayagi heagoha haru piya. Haraba ogoninaga hobane timbuni heagoha pole ge halu anda polene egageria karia wiaria handaru. Ani buwa ibugua haraba biagoha anda pialu anda hobanebi bugu hamabi bibahendenaga magi handalu hearia magi mbiraore abale handayagobi dege wiaria handaya. Lunaga magi mida pira kirani duria (25) halu arane yangalenaga magi mida pira mbirani kira (12) wiaria handaya.
EZE 40:27 Abene unurahayagi pabe haraba mende wiaria handaru. Ani handalu hewaria agali biago ibugua haraba ogonilabo hengeneha bugu hama wiago abale ni tagira ibiragohayagi mida magi manda biyadagua dege manda biya. Ani manda bu handalu hearia hama ogoni mida magi mende abale handayagobi dege mida pira duria (50) wiaria handaya.
EZE 40:28 Ani bialu agali biago ibugua i̱ haru halu ege pabe mendenaga haraba tamuhayagi bu mabu bini wiagoha anda pialu hama timbuni mende wali agali Anduane Homogonaga anda heago hanehayagi ngoaiho haga wiagoria piriba. Ege pabe mende ogoninaga haraba ubanda tagi biaga wiagoriabi anda bini degeya. Ani heagoria ai agali biago ibugua ege pabe haraba abene unurahayagi wiago mida magi mandabu handalu hearia ogoniha magi bibahendeore abale tagirahayagi handayarubi dege hearia handaya.
EZE 40:29 Mamage haga agalinaga tamu hobane hama pearubi hobane hanuni wiagobi tamu hobaga bini biarubi bibahende hobane halu mende pigane tagirahayagi hayagobi dege hai hearia handaru. Tamu ogoniha windo marubi dugu wigi bia. Ogoninaga mida magi luni pira kirani duria (25) wialu arane yangalenaga mida magi pira mbirani (12) emene bolanguahe wia.
EZE 40:31 Anda ogoninaga hobane timbuni heago wali agali ngoai haga hama wiago tagirahayagi ngelowa agali mamage haga biarunaga hobane hearu ti Anduane Homogonaga anda heago hapara howa hea. Ani bialu mamage haga agali uruninaga tamu hobane uruniha anda hobaki haga bini headagua anda gene ale mbira wabu helaga bia. Ani bialu anda hái heagoria gene ale wabu helaga biyadagoria ayage ale yuniruhe bigiya wabu helaga bia. Ani bialu anda ogoniha howa ge halu wali agali ngoai haga hama timbuni wiagoha iradali bigi bialu polene egageria halira wabu wigi bia.
EZE 40:32 Ani bialu agali biago ibugua i̱ haru halu ni tagira ibiragohayagi Anduane Homogonaga anda heago kawareni wali agali ngoaiho haga hama timbuni wiagoria piya. Ani buwa ege pabe halu mende tamuha heago haraba wiagonaga mida magi manda biya. Anda ogonibi hobane bu hearubi bibahendenaga mida magi maru biarunaga heagobi dege hea. Anda ogoninaga bugu hama wali agali ngoaiho haga timbuni wiago kawareni wialu mamageali bu hearunaga tamu hobane wiaru Anduane Homogonaga anda heago kawareni hapara ho hea. Ani heagoria hobane hobaki henenaga anda gene aleru wabu helaga bia. Ani bialu anda hái heagoria gene ale wabu helaga biyadagoria ayage ale yuniruhe bigiya wabu helaga bia. Anda ogoniha howa ge halu wali agali ngoai haga bugu hama wiagoria iradali bigi bialu polene egageria halira wabu wigi bia.
EZE 40:35 Ani bialu agali biago ibugua i̱ haru halu ege pabe mende tamuha heagonaga harabani anda abene uyurahayagi heagoha haru piya. Ani puwa ibugua anda ogoni mida magi handalu hearia anda tamuhabi tagirahabi abale manda biyagobi dege hearia handaya. Anda ogoninaga bugu hama wali agali ngoaiho haga wiagohayagi mbirale anda gene aleru wabu helaga bia. Ani bialu anda hái heagoria gene ale wabu helaga biyadagoria ayage ale yuniruhe bigiya wabu helaga bia. Ani bialu mamageali bu hearunaga hobane Anduane Homogonaga anda heago kawareni hapara howa hea. Anda ogoniha howa ge halu wali agali ngoai haga bugu hama wiagoria iradali bigi bialu polene egageria halira wabu wigi bia.
EZE 40:38 Pabe mendegonaga uyurahayagi haraba wiagoria anda mbira damini bu hea. Ani bialu anda damini ogoninaga panga haraba hobane timbuni heagoria duguatagi hea. Anda damini ogoniha mbirale loma irani delole howa wayawaya bu manda manda biaga hea.
EZE 40:39 Ani bialu anda damini ogoniha dabu maria heago kira abene mendehayagi halu kira abene mendehayagi halu bia. Ani bialu lomabu delaga dabu ogoriani loma irani dai helo delolenebi ko biniru domo wahelonaga lomabi mana ko bero mitangi nabi howa binigonaga mo tiga bialu lomabu delolenebi bibahende ogoriani balu manda manda bu wiaga dabu hea.
EZE 40:40 Anda damini ogoni tagirahayagi hayadagoria lomabu delaga dabu maria mende anda polene egageria wiagoria kawareni dabu kira egageria mendehayagi kira mendehayagi lowa bu helea.
EZE 40:41 Lomabu delole bo manda manda bulene dabu halira bu helea. Dabu maria anda damini tamu heagoha halu maria mende tagirahayagi halu bia.
EZE 40:42 Ani bialu lomabu delaga dabu maria lone ha dege biago ogoni ege to̱le̱me wabiniya. Dabu ogoni daliganaga sendimida magi pira duria (50) halu lunagabi aranenagabi sendimida magi pira kariani duria (75) halu bia. Dabu ogoriani nogo egaru lomabu delolenaga bo podole howa daba nabiru manda manda bu wiagaya.
EZE 40:43 Anda damini ogoniha mbirale garayabi anda hái heagoria helama pea. Mbirale garayabi ogoni luninaga sendimida magi karia howa emene bolanguahe helea. Ani bialu nogo bo loma binirunaga mbiriniru dabuni podo wiagaya.
EZE 40:44 Ani handalu hewaria agali biago ibugua i̱ haru halu Anduane Homogonaga anda haneni wali agali ngoai haga hama wiagoria haru piya. Ogoniha agali iba gana laga hearunaga anda hobane kira hearia handaru. Hobane mende ege pabe haraba anda polenenaga abene uyurahayagi heagonaga dege hane unurahayagi handa daibu hea. Ani bialu hobane dege mbira ege pabe haraba ni tagira ibiragohayagi howa anda ibaga wiagonaga anda heago hane dindi abene uyurahayagi handa daibu hea.
EZE 40:45 Ani hondo hewagola agali biago ibugua i̱hondo langialu lalu, Anda hobane abene uyurahayagi kago loma binigo mo miaga agali Anduane Homogonaga andaha biabe biaga karu tinaga ka.
EZE 40:46 Ani bialu anda hobane mbira abene unurahayagi kago loma binigo mo miaga agalime lomabu delaga dabu kagoria biabe biaga karu tinaga hea. Loma binigo mo miaga agali uruni ti bibahende Libai hameigini Sadogo aria dege hagaya. Loma binigo mo miaga agali Sadogo hameigini hangume Anduane Homogonaga andaha kaware puwa ibunaga biabe bialu holene nga, laya lene.
EZE 40:47 Agali biago ibugua Anduane Homogonaga anda haneni wali agali ngoaiho haga wiagonaga mida magi mandabu handalu hearia lunagabi aranenagabi mida pira duria (50) dege haya. Ani bialu lomabu delaga dabu biago Anduane Homogonaga anda haneni wali agali ngoai haga hama wiagoria dombeneni hea.
EZE 40:48 Ibugua i̱ haru halu Anduane Homogonaga anda tamuha haru anda pialu tamu hobane mbira heneyagoha anda piriba. Ani puwa ibugua hobane ogoninaga haneni howa tamu ogoninaga mida magi manda biya. Ani mandabu handalu hearia mida kirani bolanguahe haya. Ani bialu harabani mida magi manda bialu hearia mida kariani emene bolanguahe haya. Ani bialu ege pabe haraba nebone tohe wiagonaga mida magi manda bu handalu hearia mida mbirani bolanguahe dege dege hea.
EZE 40:49 Ege pabe haraba wiagoria anda hobane timbuni heagonaga magi luninaga mida pira wialu arane yangalenaga mida duriani maru bolanguahe hea. Ani bialu Anduane Homogonaga anda hobane ogoniha howa egageria wali agali ngoai haga hama wiagoha daliape ho wia. Haraba ogoni wiagoria anda gene timbuni kira lene labolaboha hea.
EZE 41:1 Anda hobane ogoninaga erembirahayagi Hobane Loma Bia Hene hea. Ani bialu ibugua bugu hama wiagonaga arane manda bialu hearia mida tebira halu
EZE 41:2 luninaga magi mida duria hea. Ani bialu ege pabe emene mbira haraba wiagoria howa bima pialu anda hobanenaga gimbuni pauleagoria howa magi mida kirani bolangua hene hea. Ege pabe mende haraba mendehayagi wiagobi nde magi mida mbiraore ogonibi dege hea. Ani hondowa tamu hobane Loma Bia Hene biago magi mandabu handalu hearia luninaga mida pira kira (20) halu arane yangalenaga magi mida pira hea.
EZE 41:3 Ani handalu puwa Hobane Loma Bia Heneore anda tibihaore heagoha anda puwa haraba magi mandabu handaya. Haraba biagonaga magi manda bialu hearia magi mida tebira hea. Ani bialu Loma Bia Heneore hobane ogoniha anda polenaga mida mbira hangu hea. Ani bialu ege pabe wiagoria howa pialu anda hobane hairi heagonaga magi mida tebirani bolanguahe hea. Ani bialu ege pabe mende panga mendehayagibi nde magi mida mbiraore ogonibi dege hea.
EZE 41:4 Ibugua anda hobane uruni mida magi ogoni mandabu handalu hearia bibahendeha mida pira dege dege wia. Ani manda buwa ibugua i̱hondo lalu, Tamu hobane ogoni Hobane Loma Bia Heneore, laya lene.
EZE 41:5 Anduane Homogonaga anda heagoha anda hobane emene dewa Hobane Loma Bia Hene heagobi Hobane Loma Bia Heneore heagobi kirabaliha ho mabubupe hea. Agali biago ibugua anda hobane emene urunibi Hobane Loma Bia Hene Loma Bia Heneorela tubariha anda hobane heago mida magi manda bu handaga bini. Ani manda bialu hearia anda manda dindihayagi magi mida tebira haya. Anigo manda dombeni daligahayagila anda bu gimbu gimbu biradagua buwa bu yulatagi henegome libu ogobi labolabo ndo hea. Anda hobane emene uruni ti anda bu gimbu bima irigi henegonaga dabu tebone wiagoria hangu hene. Anda hobane dindihayagi hayadarunaga dabu dindini dege heneya. Ani bialu anda daliga bia dambi henedagonaga gene anda hobane dindiha hayago ibunaga tamu dindini hope hene hea. Ani bialu hobane dombeni hayadago ibunaga dabu tamu hobane hayadagonaga gene dindiha heagonaga anda gene heagoria bu paga hea. Gene uruni anda dindiha pigane heago dangini hengene hea. Ani bialu anda tebone daligaore bia dambi hene heago ibu gene mende dombeni heago dangini hongowa anda bu gimbu bima irigi heneya. Tigua Anduane Homogonaga anda heago mandaha hariga tombelo wuwa dabira baedene buwa bu gimbu bigi nabulenaga ogonidagua biniya. Anda pigane dindihaore heagobi dombeni heagobi daligaore bia dambi heagobi bibahendenaga hobane pira tebira (30) dege dege hea.
EZE 41:7 Anda hobane dindiha heagonaga tamuha dabu biago tohenaga magi mida kira hea. Ani bialu daliga anda mende tebonela bia dambi hene heagonaga ge haga hama wiago timbuni toheore wialu anda daligadagoha irigi halu polenebi nde dabu egageria bima irigi hene hea.
EZE 41:8 Ani bialu Anduane Homogonaga anda ogoniha hobane maru heagohayagi hobane timbuniore heagoha wali agali ogonihayagi puíbu bilonaga panga kira dugua ho wia. Anda manda ogoni ibu tohenaga magi mida kirani bolanguahe hea. Panga haraba ogoni mendego anda abene uyurahayagi dugua uyu halu mendego abene unurahayagi dugua unu hea. Ani bialu wali agali ibagabu holene Anduane Homogo anda heagonaga manda manda hama wu mabu bia. Hama ogoni arane yangalenaga magi mida kirani bolanguahe wialu ogoni daligani Anduane Homogo anda heago wali agali ibagabu haga wiagoria handa li ni wia. Ani bialu ogoninaga magi mida tebira hea. Ani heagola Anduane Homogonaga anda ogoni dindihayagi manda manda hama bayale wu mabu bupe ho wia. Hama arane yangale timbuninaga magi mida pira halu anda marubi gibugibu hama pea.
EZE 41:12 Anda timbuni mbira ni paliragohayagi heago hane orayagi Anduane Homogonaga anda hane hama wu mabu biagoha handa daibu hea. Anda ogoni luninaga magi mida pira mariani duria (45) halu arane magi mida pira tebirani duria (35) hea. Anda hái timbuni tohe heagonaga mida kirani bolanguahe hea.
EZE 41:13 Agali ogoni ibugua Anduane Homogo anda heagonaga luni magi manda bialu hearia mida pira duria (50) hea. Ani bialu dindi hama biagobi anda ni paliragohayagi heagobi magi manda biya. Ibugua Anduane Homogonaga anda mandahayagi howa magi manda bialu anda mende biago mandahayagi magi manda biya. Ani manda bu handalu hearia hama ogoninaga magi mida pira duria (50) dege haya.
EZE 41:14 Ani bialu Anduane Homogonaga anda haneni dindi henge wiago magi mida pira duria (50) dege wia.
EZE 41:15 Ani buwa anda timbuni abene ni paliragohayagi heago lunaga mida magi manda bialu anda tamu hobane luni kira heagobi mida magi manda bialu hearia bibahende mbiraore ogobi dege dege pira duria (50) hea. Anduane Homogonaga anda heagonaga panga harabanibi Hobane Loma Bia Hene heagonaga panga harabanibi Hobane Loma Bia Heneore heagonaga panga harabanibi uruninaga anda hái ira pelo mbaraleme para halu windo emene emene bu heagoha hái para halu bibahendeni irame para hai hea. Ira degeme anda hái para hama irigi halu windo heagoria paraho iri hea. Ani bialu windo bu hearu para hodambi holenebi ira maru wia dege bia.
EZE 41:17 Hobane Loma Bia Hene heagonaga anda háinibi Hobane Loma Bia Heneore heagonaga hái heagoriabi bigiya tara tara wabu helea. Ani bialu anda tamu hobane kira ogoni labonaga panga daligahabi bigiya tara tara wabu hela dege bia.
EZE 41:18 Bigiya uruni ayage ale yunihe mbira mbira heago dombeneha dahuliyali babaganeheru wabu helaga bia. Dahuliyali mbira mbiranaga dengui kira dege degehe hea.
EZE 41:19 Dahuliyalirunaga dengui mbirago agalinaga dengui handalehe ayage ale wabu heleagoha gi lehayagi handa edeho helea. Mendego laiononaga dengui handalehe ayage ale mende wabu heleagoha gi tigahayagi handa ede ho helea. Bigiya ogoni ale anda hái bibahendeha
EZE 41:20 dindi wali agali haga wiagoria howa wabu helaga bima irigi halu panga hairi heagoria wiari hea.
EZE 41:21 Panganaga anda gene timbuni heago abene bibahendeha ogobi dege dege hea. Hobane Loma Bia Heneore heagonaga haraba kawareni mbirale mbira
EZE 41:22 lomabu delaga dabu irame wabini handalehe wia. Dabu ogoni daliganaga magi mida mbirani bolanguahe howa arane timbuninaga magi mida mbirani emene bolanguahe wia. Dabu ogoninaga dindihayagibi lene lenebi bibahende ira peleneme dege wabiniya. Ani handalu hewaria agali biagome i̱hondo langialu lalu, Dabu irame wabini ogoni Anduane Homogonaga deni wiaga ngagoni, laya lene.
EZE 41:23 Anduane Homogonaga andaha Hobane Loma Bia Hene heagoha anda polene panga kira dugua ainai biaga wia. Ani bialu Hobane Loma Bia Heneore heagonaga panga harababi nde ogonibi dege wia.
EZE 41:25 Hobane Loma Bia Hene ogoninaga pangani ayage alenaga bigiyabi dahuliyalinaga bigiyabi anda háini wabu helayagobi dege wabu helaga biaria handaru. Ani bialu Anduane Homogonaga anda tamuha anda polene haraba wiagoria anda emene mbira ira peleneme dangilene hea.
EZE 41:26 Ani bialu anda ogoninaga manda mende mendehabi windo dugu wiago kaware anda háini ayage alenaga bigiyabi wabu helaga biaria handaru.
EZE 42:1 Uruni handalu agali biagome i̱ haru halu Anduane Homogonaga anda heago abene uyurahayagi wali agali ngoai haga hama timbuni mbira wiagoria puwa handalu hewaria anda mbira ogonihayagi hea. Anda odagoni Anduane Homogo anda biagonaga erembirahayagi anda mende ni paliragohayagi hayago kaware dege hea.
EZE 42:2 Anda ogoninaga panga dindi abene uyurahayagi dugu uyu heagonaga luni magi mida pira duria (50) wialu yangalenaga magi mida pira kirani duria (25) hea.
EZE 42:3 Anda ogoninaga tibi Anduane Homogonaga anda heago leneha hage helowa hanehayagi wali agali ngoaiho hagane hama timbuni wiagoria hapanaho howa hariga puíbu biaga wiagoria handa tagi hea. Anda ogoni halu tebo daliga bu gimbu bima irigi heneya. Tigua anda ogoninaga daligahayagi bu gimbu bini mende heago mo emene howa bini halu tebone daligaore bu gimbu bini heago mo emeneore howa biniya. Anidagua bini heago anda ogoni ge halu irigi hagane egageria handaleheya.
EZE 42:4 Anda ogoninaga be tebone dindiha pigane hayadagonaga erembirahayagi dindi hanguni wali agali puíbu bulene hama luniore wia. Hama ogoni wali agali puíbu bulene arane yangalenaga magi mida duria wia. Hama ogoninaga luni magi mida pira duria (50) wia. Ani bialu hama ogonibi dege abene uyurahayagi panga dugua uyu heagoria tagira pea.
EZE 42:5 Anda be tebone daligaore bu gimbu bini biagonaga tamu hobane anda beki biagolabonaga timbuni heagobi ndo emene doroge hea.
EZE 42:6 Anda be tebo bima irigi hene biaru anda maru wali agali ngoai haga hama wiagoria bu hearu gene daligani dagia buwa bini headagua ndo hobane uruni binidago dindi hombene daligani buwa bame dindini bupe heneya. Anidagua binigome anda bu gimbubu migi bima irigi hene kiragolabo mo emene howa biniya.
EZE 42:7 Anda pigane be mbira kagonaga tamu hobaneha luninaga magi mida pira kirani duria (25) hea. Anigo anda marunaga tamuha luninaga magi mida pira duria (50) hea. Anda hobane mbiragonaga haneni ege pabe mbira bia. Pabe ogoni luni magi anda ogoni ale dege mida pira kirani duria (25) hea.
EZE 42:9 Ege pabe ogonila anda hayadagola hengeneha wali agali puíbu bulene hama wia. Mbirali ibu anda ogoniha anda polenaga hariga ni tagira ibiragohayagi howa anda mandaha hariga ngadagua ibalu anda ogoniha anda piagaya. Ani bialu Anduane Homogonaga anda heago abene ni tagira ibiragohayagi anda mbira ogonibi dege hea. Ani bialu anda ogoni Anduane Homogonaga anda heago erembirahayagi anda timbuni heagobi dege hearia handaru.
EZE 42:11 Anda abene unurahayaginaga haneni wali agali puíbu bulene hama wiago anda timbuni uyurahayagi heago haneni wiagobi dege wia. Anda ogoni kirabali ogobi labolabo howa yáribi mbirale maru marubi ogobi labolabo hea. Panga haraba wiarubi mbiraore ogobi dege dege hea.
EZE 42:12 Mbirali ibu anda unurahayagi hayadagoha anda pole hariga ni tagira ibiragohayagi howa anda puwa manda manda ibalu anda piaga wia. Anda mende uyurahayagi heagoha anda pole pialu howa piagadagua piagaya.
EZE 42:13 Agali biago ibugua i̱hondo langialu, Anda kira ogonilabo Anduane Homogo ibuninagaore loma biahene ka. Loma binigo mo miaga karu ti anda kira ogoniha anda puwa Anduane Homogo kagoha kaware piagaru tigua nogo egaru wali agalime Anduane Homogonaga loma biniru yalu ibiragoni ti nagaya. Anda ogoni labonaga tamu hobaneru Anduane Homogo ibuninagaore kago loma binigo mo miaga karume loma bayale duniniore yalu ibugu biraru hobane uruniha mo wigi biagaya. Loma uruni widi lomabu delaga lomabi wali agalime ko biyaru domo wahelonaga lomabi mana ko bero mitangi nabi howa biyarunaga mo tiga bulenaga lomabi uruni anda ogoniha yu piaga wia.
EZE 42:14 Loma binigo mo miaga Anduane Homogonaga andaha biabe bialu heneru ti tagira polenaga tigua biabe bialu howa aga karulagane anda ogoninaga tamu hobaneha golo iriari biaga. Loma binigo mo miaga hearunaga aga urunibi nde Anduane Homogonaga biabe bulenaga wiabagi hene dege wini. Ani bialu tigua aga golo iriari bialu aga tara ngaru mo karulalu wali agali ngoaiho haga hama timbuni ngagoria tagira piaga, laya, lene.
EZE 42:15 Agali biago ibugua Anduane Homogonaga anda heago tamuha wiaru bibahende mida magi mandabu handai haya. Mandabu handai halu ibugua i̱ haru halu ni tagira ibiragohayaginaga ege pabe haraba heagoria tagira piriba. Puwa ibugua ege pabe tagirahayagi ogoriani hayadagonaga mida magi manda bialu handaya.
EZE 42:16 Ibugua magi manda bu handagane yiniyagome ege pabe ni tagira ibiragohayagi heagonaga mida magi manda bu handaya. Ani manda bu handalu hearia mida handari kirani pira duria (250) yiaria handaya.
EZE 42:17 Ani bialu ibugua ege pabe abene uyurahayagi heagobi unurahayagi heagobi ni paliragohayagi heagobi bibahende magi mandabu handai hayagola mida magi mbiraore ogobi dege dege mida handari kirani pira duria (250) haya.
EZE 42:20 Ege pabe timbuni Anduane Homogonaga anda bu mabu binidagoni bu mabu bini ndo tiga tiga tungulo pugu bialu uyurahayagi bu banga bialu unurahayagi daliape halu amurayagi pu amu halu unurayagi pu uyu halu tigatiga tungu laga bini maria hea. Ani heagonaga magi mbiraore ogobi dege howa bibahendenaga mida handari kirani pira duria (250) dege dege hea. Ege pabe timbuni ogonime mbirale Anduane Homogonaga loma biahene ngarula wali agali tagirahayagi tanabi bu karunaga ngarula tubari hea.
EZE 43:1 I̱na de gandeba handalu hewaria agali handalehe ogoni ibugua wai pabe timbuni heagonaga panga ni tagira ibiragohayagi dugua amu heagohayagi i̱ haru puwa helaya.
EZE 43:2 Ani howa handalu hewaria Isaraele wali agalinaga Ngode Datagaliwabe kagonaga wá taraore hongoheore ni tagira ibiragohayagi howa wá hadali hayane handaru. Ani hondo hewagola wá taraore ogoni wá heaore dege Ngode Datagaliwabenaga bi timbuni kilikulu lalu iba solowara tanguia amu nana biradagua bialu layuane hale haru. Ani layuagola wá taraore biagome dindi bibahendeha wá hongoheore haame hayane handaru.
EZE 43:3 I̱na de gandeba o handarudagoni ala Yarusaleme mo ko halu bo gialobagabu wahole ibiyaria hendenegobi dege handalu iba Keba peagoria hewaria hendenegobi dege lone handalu biru. Wá taraore ogoni ibiyago hondowa i̱na ma podalu dindiha dengui ela helo ge duli hanga howa bulu paliru.
EZE 43:4 Ani biwagola Anduane Homogonaga wá hongohe taraore ogoni ibalu tanonaga pabe panga haraba amu ni tagira ibiragohayagi howa tanoha anda pialu Anduane Homogonaga anda biagoha wá haanda hayane handaru.
EZE 43:5 Ani hondo hewagola Anduane Homogonaga Dinini ibugua i̱ haru pialu Anduane Homogo anda haneni wali agali ngoaiho haga wiagoria helaya. Ani helayagola Anduane Homogo anda biagoha handa anda halu hewaria wá taraoreme anda tamu biagoha wá ho to̱latagi hearia handaru.
EZE 43:6 Agali handalehe biago ibu i̱ hewagoria kaware helowa Anduane Homogo ibugua anda tamu biagoha howa bi mbira layuane hale haru.
EZE 43:7 Bi ogoni Anduane Homogonaga bi leneyago ibugua i̱hondo langialu lalu, Dindiali-o i̱naga dagia kini biragane anda ogoha ngago ai wali agalime anda ogoha ibalu i̱nihondo mitangi bialu lotu lole ibulebira. I̱ni Isaraele wali agali baba anda ogoha ibalu mandagi haabo kogola mani Isaraele wali agalibi tinaga kinirubi tigua i̱naga mini timbuni mini lene kogo mo dindiha naholebiraore. Tigua mbirale dama mitangi bialu gime wabiniruhondo lone bi pupu wialubi naholebira. Kini ti andabi i̱ anda kogoria bia para naholebira. Ala kini ti anda i̱ andala kawareore pabe mbira hangume ho tu wuwa hayagoni. Ani heagola tigua kini maru homayarunaga tinginiru tini anda ogoniha hora haga biyagome i̱ anda i̱ninaga deni mo ko halu mo dodo helaga biya. Ani bialu tigua anda ogoniha howa mana ko ngu pi̱a̱o̱le wiaru bialu heagola ogonime i̱naga mini timbuni mini lene hewago mo dindiha helaga biya. Anidagua biyagonaga i̱na tihondo tandaga timbuni halu ti bo wahai harugoni.
EZE 43:9 Ani birugo Isaraele wali agali tigua mbirale dama mitangi bialu gime wabini ngaruhondo bi pupu nawi wahalu tinaga kini homenerunaga tingini kaware hora haga biagago waholene nga. Tigua i̱na bi larogo hale howa talialu biyagua nde i̱ ti baba mandagi haabo holebero, laya, lene.
EZE 43:10 Anduane Homogohanda i̱hondo laabo halu lalu, Dindiali-o Isaraele wali agaliruhondo i̱ andaga biago ogobiore hea lalu lamibe. Ani lameregola tigua uruni manda bialu tinime mana ko bialu hayaru mitangi bu dai bialu taga helo ani lamibe.
EZE 43:11 Tigua taga ho kagola i̱ andagaha bibahendeore ogobi nga lalu ti hale helo lamiai habe. Ani bialu anda ogoninaga magi tara tara ogobiore ngelo lalu lamibe. Anda panga helolenebi anda ogobiore helo lalu bulenegobi lamiai habe. Anda ogoni ibu bialu howa manani talialu bulenego manabi bebani gilibu mibe. Ani bidegola tigua mana ogoni bibahende bebani gilibu ngago hondowa talialu i̱naga anda ogoni bayuwa bialu anda ogoninaga mana ngagobi bibahende taluwa bialu helo ani bibe.
EZE 43:12 I̱naga anda ogoninaga mana ogodagua. Anda ogoni ibu abale ibuni haga hari nene biagoriaore bialu anda kagoria dindi kaware ngaru i̱ninagaore ngelo loma biaho ngelalu bilimu. Ai i̱ andanaga mana uruni, lalu Anduane Homogohanda laya, lene.
EZE 43:13 Anduane Homogonaga anda mida magi manda biyadagua lomabu delaga dabu heago ogonibi magi manda biya. Lomabu delaga dabu heago gene dindiha ganarua bu mabu bia. Ganarua ogoni dindiha wape heagonaga magi sendimida pira duria (50) wialu arane sendimida pira duria (50) dege wiagoni. Ganarua biago neneni hagira ale emene bu mabu biago ogoninaga daliga magi sendimida pira kirani duriaya (25).
EZE 43:14 Dabu ogoni halu tebo heago hobane mbiragonaga magi mida mbira hangu hea. Ani bialu mende dombeni heagonaga magi mida kira halu tebone daligani heago lomabu delaga howa ogoninaga magi mida kira dege heagoni. Dabu dindiha heagonaga nguni tagirapu heago arane magi sendimida pira duriaya. (50) Ani bialu hobane dombeni ogoni nguni tagirapu heagonaga arane magibi hobane tebone daliga heagonagabi magi sendimida pira duria (50) dege degeya. Ani heago lomabu delaga dabu ogoninaga daligani gimbuni mariani nogo bulumaga ne gayane ale maria hea.
EZE 43:16 Dabu ogoni daligani luninaga magibi arane yangalelanaga magibi mbiraore ogobi dege mida waragaria hea.
EZE 43:17 Dabu nira obeneni heagonaga lu magi arane yangalela mbiraore ogobi dege mida karia hea. Dabu neneni hagira emene bu mabu bupehe heagoni. Hagira emene neneni bu mabu binidago daliganaga magi sendimida pira kirani duriaya (25). Hagira emene biadaga henedagoni lomabu delaga daligadagonaga ganarua biradagua bia. Lomabu delaga dabu daligani ganarua ale wiago arane magi sendimida pira duriaya (50). Lomabu delaga dabu ogoriani irigi holenenaga egageria mbira dabu ogoni abene ni tagira ibiragohayagi howa wiadaga heagoni.
EZE 43:18 Anduane Homogo Bibahende Haru Haame Ho Haga kagome i̱hondo langialu lalu, Dindiali-o i̱naga bi larogo baya hangu hale ha. Tígua lomabu delaga dabu ogonibi bu helowa dabu ogoriani mbirale bo lomabu delowa nogo baragonaga darama dabuni odo tandala paya bialu howa mana ogore bilimu.
EZE 43:19 Nogo bulumaga wangabe mbira haru puwa loma binigo mo ngiaga agali Sadogo aria karuhondo meregola tigua ko biyago i̱na domo waholiyanaga nogo ogoni loma bialu i̱hondo bo ngilo mibe. I̱ Anduane Homogo Bibahende Haru Haame Ho haga kogo i̱na ogo bibe larogoni. Libai hameigini Sadogonaga aguanene ti hangume loma binigo mo ngiaga howa i̱ni kogoha kaware ibalu i̱naga biabe biahaga habehe kagoni.
EZE 43:20 Ani bialu howa nogo ogoninaga darama ngago hambu yuwa dabu kagonaga gimbuni mariani bulumaga ne gayane ale kago darama ha̱i̱ halu dabu obeneni kagonaga gimbuni maria ngagoha odo ha̱i̱ halu dabu dombeni ogoni neneni hagira emene bidagobi ha̱i̱ halimu. Tígua ogonidagua beremigola dabu ogoriani dodo para kago domo wahalu i̱naga deni dabu ogoni i̱naga loma biahene bayale wulebira.
EZE 43:21 Ani bialu ko biyago i̱na domo waholiyanaga nogo bulumaga ogoni yalu puwa nogo bo delaga dindi henge mbira i̱ anda kago tagirayagi ngagoria delalimu.
EZE 43:22 Ani bialu horo mendengi nogo meme dere durubi mbira nabiore wangabe kago haru ibuwa ko biyago domo waholenenaga loma bialu bo ngilimu. Ani bialu meme ogoninaga daramame lomabu delaga dabu kago dodo nahe helonaga abale bulumaga daramame birimidagua dege bilimu.
EZE 43:23 Ogonidagua biai halu nogo sibi wangabebi bulumaga wangabebi dere durubi mbira nabi habetigiore kago i̱ni koria haru ibalimu.
EZE 43:24 Ani haru eberemigola loma binigo mo ngiaga agali karu tigua nogo ogonilabo balu ibi howa irani dai helo i̱naga loma ogoni delolene nga.
EZE 43:25 Anidagua biai howa horo karu nogo memebi bulumagabi sibibi wangabe mbira dege dege ko biyago domo waholenenaga loma bialu bo delole haru ibalu irani dai helo delalimu. Nogo uruni lomabu yalu eberemigo dere durubi mbira nabiore bayale kago hondowa haru ibalimu.
EZE 43:26 Horo karu loma binigo mo ngiaga agali karu tigua lomabu delaga dabu kago dodo nahe i̱nagaore bayale helonaga loma uruni bo delolene nga. Tigua ogonidagua biragome lomabu delaga dabu i̱ninaga loma bia heneore holebira.
EZE 43:27 Sarere mbira ogoni piai halu horo halini laragola loma binigo mo ngiaga agali karu tigua Isaraele wali agalinaga loma yu poramigo mo loma bia halu holene horo wulebira. Irani dai helonaga lomabu delolenebi Anduane Homogoi̱nila ho gimbu bulenaga lomabi delaga bialu holebira. Tigua ogonidagua bialu kangi tí baba i̱naga miniha dungulo holebero. I̱ Anduane Homogo Bibahende Haru Haame Ho Haga kogo i̱na bi o ledogoniore, laya lalu Esegielehanda lene.
EZE 44:1 Agali biago ibugua i̱ haru halu panga timbuni ni tagira ibiragohayagi wiagoria piyagola handalu hewaria panga timbuni wiago paya ho wia.
EZE 44:2 Ani paya ho wiagola Anduane Homogohanda i̱hondo langialu, Panga ogo ibu payaho wiaabo hene ngagola mbiralime dugua nabulebira. Irane i̱ Anduane Homogo tí Isaraele wali agalinaga Ngode Datagaliwabe kogo hariga ogoniha anda ibinigome panga ogoni ibu payaho wiaabobo bu wulebira.
EZE 44:3 Kini ibugua hangu panga haraba ogoniha anda ibalu i̱naga wanakuini tomo nalu birulebira. Ani biruwa anda hobane timbuni kagoha ibu panga haraba maru ngaruha ubaanda tagi bulene karulape, laya, lene.
EZE 44:4 Ani bialu agali biago ibugua tanoha anda polene panga haraba abene uyurahayagi wiagoha i̱ haru anda puwa ibu Anduane Homogonaga wanakuihayagi pu haya. Ani pu heagola Anduane Homogonaga wá taraore holeneme anda biagoha wá hagimbu biya. Anidagua biyagola i̱ ge duli hangaho biruwa ma podalu dengui dindini elaho biraru.
EZE 44:5 Ani berewagola Anduane Homogohanda i̱hondo langialu lalu, Dindiali-o i̱na í̠hondo mbirale mbira mo walia harogo damene handai halu bi languleberogo bayuwa hale hai habe. I̱naga anda o kagonaga mana ngagobi mbirale bulene ngagobi bibahendeore langiai holebero. I̱ anda ogoniha ogo ibu anda polene karulape ogo ibu anda polene nakarulape lalu langulebero. Ani loleberogo bi ogo bayuwa hale habe.
EZE 44:6 Isaraele wali agalime i̱naga bi wahalu doga ho karunihondo ogodagua lamibe. I̱ Anduane Homogo Bibahende Haru Haame Ho Haga kogo i̱na tíhondo bi ogodagua laro. Tíore mana ko ngubi ngaruore bialu haga ngamigo wahai halimu.
EZE 44:7 Tígua nogo habane daramaru i̱naga lomabu delalu howa agali dindi tarali hearu i̱naga andaha anda íbu helarimi. Agali i̱ manda nabiaga uruni tinaga dongone podo mabu biagane mana nabi howa tigua i̱hondo mini mbiraore nawi haya. Tigua i̱naga anda hewagoha anda ibiyagome i̱naga deni i̱ anda mo mebia haya. Tígua mana ko ngubi urunibi bialu kamigome i̱naga habo nalolene bi lo wirugo mo habo lalu kami.
EZE 44:8 Tínime i̱naga anda ogoniha biabe bulene ngago bialu haga ndo kami. Tígua agali i̱hondo mini mbiraore nawi bu karume tínaga biabe ogoni bia aribia helo mo biahaga kamigoni ndobe.
EZE 44:9 I̱ Anduane Homogo Bibahende Haru Haame Ho Haga kogo i̱na ogodagua laro. Agali dindi tarali tinaga dongone podo mabu biagane mana nabi howabi i̱nihondo mini mbiraore nawiagabi bu karu tigua i̱naga anda kagoha anda polene nawi. Ti Isaraele wali agali baba mandagi ibagabu ha hagayaguabi i̱naga andaha anda polene nawiore, laya lene.
EZE 44:10 Anduane Homogohanda i̱hondo langialu lalu, Isaraele wali agalime i̱ erembira ngialu piyangi Libai hameigini hearu tiguabi nde i̱hondo erembira ngialu puwa dama mitangi bialu mbirale gime wabini wiaruhondo bi pupu wialu haya.
EZE 44:11 Libai hameigini tigua wali agali bu hearume mbirale gime wabini wiaruhondo bi pupu wialu helo biawai hene. Ani biyagome wali agali tigua mana ko bilonaga tinaga bu mini mo heya hayagola tigua ko biya. Anidagua biyagonaga i̱ Anduane Homogo Bibahende Haru Haame Ho Haga kogo i̱na heneneore laro. I̱na Libai hameigini uruni pani nelo miaore bulebero. I̱na Libai hameigini karu tigua loma binigo mo ngiaga agali howa biabe nabilolebero. Tigua i̱naga Hobane Loma Bia Heneore kaware ibulene nawi. Ani bialu mbirale i̱naga wiabagi hene ngagoriabi ti kaware ibulene nawi. Tigua mana ko ngubiore wiaru bialu hayagonaga taga timbuni ho holebira. Anigo i̱naga ege pabe kagoha mamage howa handayaho helobi biabe maru ege pabe andaneha bulene ngaru tigua bialu helobi helolebero. Tigua nogo bo loma bialu irani dai helolenaga loma ngaru mo manda manda bulene handayaho halu wali agalime loma maru yu ibiraru yamigi bulebira. Ani bialu i̱ mitangi bialu lotu lolene horongi tigua wali agali lotu lelo biamogo bulebira.
EZE 44:15 I̱ Anduane Homogo Bibahende Haru Haame Ho Haga kogo i̱na ogodagua laro. Libai hameigini Sadogo aria karu ti dege loma binigo mo ngiaga agali howa biabe bialu holebira. Isaraele wali agali tigua i̱ erembira ngialu piyangi hameigini mbiraore Sadogo aria hangume i̱naga biabe bialu i̱ andaga haabo hene. Anidagua binigo ai hameigini Sadogo aria ti hangu i̱ kogoria kaware ibalu i̱naga biabe bialu howa nogo habane daramaru yalu ibalu i̱nihondo lomabu ngulebira.
EZE 44:16 Sadogo hameigini karume i̱naga andaha anda pialu i̱naga dabu kagoria kaware puwa biabe bialu mbirale ngaru handayaho holebira.
EZE 44:17 Loma binigo mo ngiaga agali karu tigua i̱naga andaha anda polene ege pabe mendehayagi anda pole howa tinaga aga karulaganego pu bayaleme wabini wiaru mo karulolebira. Ani puwa tamuha howa ti aga nogo sibi irinime wabini ngago karulo holene nawiore.
EZE 44:18 Tigua aga darasiru karulalu agame embone dambi holene labolabo bayaleme wabini ngagome dambiho holene nga. Anigo tinaga tingini poboyogo bulebiragonaga mandibu wulene nakarulape.
EZE 44:19 Ani bialu ti wali agali ngoaiho haga hama ngagoria tagira pole howa i̱naga biabe bulenaga karulagane aga biago golowa anda damini hobane kira kagoha ngelolene nga. Aga ogoni i̱ninaga wiabagi henego wali agali bu karume ela hayagua nde tibi i̱ninagaore habagi holebira. Ani buwa aga mende bame tanabi karulagane ngago karulo aribia halu tagira polene nga.
EZE 44:20 Loma binigo mo ngiaga agali uruni tinaga mandari bibahendeore podo mbololo waholene nawi. Tinaga mandari luni helo waholenebi nakarulape dege. Tigua mandari podo emene tubagi holene nga.
EZE 44:21 Loma binigo mo ngiaga agali karume i̱ andaha anda polene ege pabe mende kagoha anda pole howa waini iba nolene nawiore.
EZE 44:22 Tigua wali mbira ibu agalinime wahene bedago dabu bulene nawi. Loma binigo mo ngiaga agali karu ti Isaraele wandari agalila mandagi palia nabini bedagobi loma binigo mo ngiaga mbira homenegonaga one dalo bereaguabi nde ogoni dabu bulene karulape.
EZE 44:23 Loma binigo mo ngiaga agali karu tigua i̱naga wali agalihondo mbirale ogo i̱ninaga wiabagi hene nga mbirale ogo i̱ninaga wiabagi hene ndo nga lalu lawai holene nga. Ani lawai halu mbirale i̱naga deni dodo nahe ogo nga dodohe ogo nga lalu lawai holene nga.
EZE 44:24 Wali agalime keba howa lai lalu heagua nde loma binigo mo ngiaga agali bu karu tigua manani howa wali agali biaru i̱naga bi mana lo ngadagua tigabi dabaki bulene nga. Loma binigo mo ngiaga karu tigua i̱naga horo timbuni i̱ mitangi bialu lotu lalu halimulo dabo wirugo tagira ibirangi bulene lo ngadagua bialu holene nga. Sabada horo ibirangibi horo ogoni i̱ninagaore wiabagi hene nga lowa i̱ mitangi bialu holene nga.
EZE 44:25 Loma binigo mo ngiaga agali karume mbirali homene tingini ngago ela holene nawiore. Tigua homene tingini ngago ela hayagua tini i̱naga deni dodohe holebira. Anigo ti dameneore aba ai̱yayaguabi tini waneiginiyaguabi hameneyaguabi mbalini dabu nabi bereneyaguabi nde tinaga homene tingini ngago ela holene karulape nga. Ani biragome tini i̱naga deni dodo nahe holebira.
EZE 44:26 Loma binigo mo ngiaga mbirame ibu i̱naga deni dodohe kayagua lone dodo nahelonaga mana ngadagua bulene nga. Ani bialu o biagome ibuha dodo nahe howa horo karia bame tagira hondo holene nga.
EZE 44:27 Ani bialu mani ibugua i̱naga andaha anda polene ege pabe mende hayagoha anda puwa ibunaga ko ngago domo wahelonaga loma ala bo delalu mani i̱naga biabe bulene ngago bule anda pobehe holebira. I̱ Anduane Homogo Bibahende Haru Haame Ho Haga kogo i̱na bi o ledogoniore.
EZE 44:28 Isaraele wali agali hameigini maru karu ti Isaraele dindi podo ta haga biyagua loma binigo mo ngiaga karu ti dindi lenego mbira nawulebira. Tininaga mbirale bayale yu haabo holene i̱ni kogoni.
EZE 44:29 Loma binigo mo ngiaga karu tigua widi loma delolenebi ko biniru domo wahelonaga lomabu delolenebi mana ko bero mitangi nabi howa binirunaga lomabu delolenebi uruni wali agalime yalu ibiragola loma binigo mo ngiaga ti hangume nalu holebira. Isaraele wali agalime mbirale i̱nagaore lalu wiabagi ho ngarubi loma binigo mo ngiaga ti hangume mo yulebira.
EZE 44:30 Wali agalime mabuha tomo hengeneru pigane boga birago loma binigo mo ngiaga agali karu tinaga bu yalu ibulebira. Ani bialu wali agali karume loma tara tara i̱naga yalu ibirarubi loma binigo mo ngiaga agali ti mo yaga bulene karulape. Ani bialu wali agalime mberedi pigane hirinigo i̱nihondo loma bialu loma binigo mo ngiaga karu ti nelo mulene nga. Wali agalime mana ogonibi biyagua i̱na wali agalibi waneiginirubi bibahende mo bayale hai holebero.
EZE 44:31 Nogo egabi minana homene mbira wiaguabi nogo gabuarume bo wahene wiaguabi urunidagua homene ngaru loma binigo mo ngiaga karume nolene nawiore laya, lalu Esegielehanda lene.
EZE 45:1 Anduane Homogohanda i̱hondo laabo halu lalu, Tígua Isaraele dindiha daibu howa dindi hameigini kamidagua tuwu ta haramingi dindi timbuni mbira i̱ni Anduane Homogo kogonaga tu wiabagiho ngelalimu. Dindi ogoni luninaga magi kilomida homberia (12) bolanguahe howa arane yangalenaga magi kilomida pira ngelalimu. Dindi ogoni bibahende i̱ninagaore wiabagi hene ngelo ngelalimu.
EZE 45:2 Anidagua buwa dindi ogoni hanuniore i̱ninaga anda bule tuwu ngelalimu. Dindi ogoninaga gibuni maria ngagoha ogobi dege dege magi manda bialu mida handari kirani pira duria (250) ngelo ngelalimu. Ani bialu dindi hobane ogoni waraanda ho mabu bialu ogoninaga magi manda bialu mida pira kirani duria (25) ngelo tu wiabagiho ngelalimu. Dindi hobane mende ogoni bame ngelalimu.
EZE 45:3 Ani bialu dindi i̱ninaga tu wiabagi howa ngelarimigo ogobi labolabo ngelo haluki tu wiabagi ho ngelalimu. Ani ngelowa tu hanuni podoki halu kirabalinaga magi manda bialu luninaga kilomida homberia (12) emene bolanguahe wialu arane yangalenaga magi kilomida duria hangu ngelalimu. Dindi podene mendego loma binigo mo ngiaga agali i̱naga biabe bialu haga karu tinaga ngelo. Ani bialu dindi hobane mendego i̱naga anda bu holebira. Agali maru loma binigo mo ngiaga howa i̱naga wanakuini kaware ibuwa i̱naga anda kagoha biabe bialu haga karu tinaga anda dindi i̱na tu wu merogoha bu holebira. Dindi hobane i̱naga anda kagoha i̱ninaga wiabagi heneore wulebira. I̱naga dindi ogoniha halu mende tu wiabagi harogo Libai hameigini bu karu tinaga ngelolebero. Libai hameigini uruni ti maru i̱naga andaha biabe bialu haga bu karu tigua tinaga tano dindi hobane ogoniha bu holebira.
EZE 45:6 Ani bialu dindi tu tebone timbuni dege luninaga magi kilomida homberia (12) bolanguahe wialu arane yangalenaga magi kilomida kirani bolanguahe tu wiabagiho ngelolene nga. Ani ngeledemigoria Isaraele wali agali tinaga tano timbuni dunini ogoni ngelo ngelalimu, lene.
EZE 45:7 Anduane Homogohanda i̱hondo laabo halu lalu, Tígua kininaga dindi podene kira ngelalimu. Dindi mbirago i̱naga anda kagobi tínaga tano dunini ngamigo tagiraha ni tagira ibiragohayagi milimu. Ibunaga dindi wuyu pialu hameigini tara padago baba tubari ngagoria tagira pelo tu wu milimu. Ani bialu kininaga dindi mendego abene ni paliragohayagi ngelo tu wu milimu. Ibunaga dindi wima pialu ni paliragohayagi dindi mende hameigini tara padaru baba tubari ngagoria tagira pelo milimu. Anidagua beremigola i̱naga dindi ngogomebi tínaga tano dunini ngamigomebi kininaga dindi ogoni bibahende dindi dombeni ngago ni tagira ibiragohayagi howa pialu ni paliragohayagi tagira poragola dindi ogoni tí hai holene wulebira. Ani beremigola dindi ogoni timbuni mbira Isaraele hameigini marunaga ngagobi dege wulebira.
EZE 45:8 Ani bidagola Isaraelealinaga kini ibugua ibuninaga dindiore wu howa kini ala i̱na tíhondo dabo ngirurume wali agali hengedape halu henedagua holene manda nabulebira. Ani bialu kini ibugua Isaraele wali agalinaga dindi ngaru karulolene manda nabiore holebira.
EZE 45:9 I̱ Anduane Homogo Bibahende Haru Haame Ho Haga kogo i̱na ogodagua laro. Isaraeleali haru haga bu kamiru tígua mana ko bialu haabo harimigo ai wahai halimu. Tígua wali agali bu hearuhondo mana ko bialu ti bope halu harimigoni. Ai áyu tígua mana ko uruni alego wahai halu mana bayale tigabi ngago taluwa bialu halimu. Ani bialu i̱naga wali agali tininaga dindi ngagoria karu bo taliatagi ala haramilidagua nahalimu. I̱ Anduane Homogo Bibahende Haru Haame Ho Haga kogo i̱na bi o ledogoniore, laya, lene.
EZE 45:10 Anduane Homogohanda laabo halu lalu, Isaraele wali agali tígua tínaga mbirale yolo mulenenaga genda handagane ngamiru lu magi handagane ngamirubi tigabi dege handalu manda bilimu.
EZE 45:11 Mbirale yobi ngaru genda magi handagane mini eba nga. Mbirale iba ale ngaru magi handagane mini bada nga. Ai ebala badala ogobi labolabo wulene karulape. Anidagua bulene ngago eba pirame home mbira wialu bada pirame home mbirayaguabi koro mbirayaguabi mbira dege dege wulene nga.
EZE 45:12 Mbirale genda magi handaga ogobi nga. Genda magi mini gera ngago pira kirame (20) manda bialu genda magi mende mini segelenaga mbira hangu manda biaga nga. Genda magi segele ngago pira waragaria (60) manda bialu genda magi mini mina ngago mbira hangu manda biaga nga.
EZE 45:13 Tígua i̱naga loma tomo mbiraleru yalu ibalu howa mbirale uruninaga genda magini howa ogodagua mo tale bulene nga. Widibi balibi genda magi handalu pira waragaria (60) ngayagua nde ogoninaga homane mbira i̱hondo ngulene nga.
EZE 45:14 Tínaga ira olibe hengedemiru lini ibane handari mbiranaga (100) mbiraore hangu i̱ ngulene nga.
EZE 45:15 Ani bialu nogo sibi tí daluha datani nalu helo handari kira (200) hinu kamigo aria mbiraore hangu i̱hondo lomabu ngulene nga. Tígua mbirale uruni widi lomabu delolebi irani dai helo bo delolebi Anduane Homogo i̱nila ho gimbu bulenenaga loma bo delolebi yalu ibalimu. I̱na tínaga ko bu kamiru domo wahai holiya urunidagua bilimu. I̱ Anduane Homogo Bibahende Haru Haame Ho Haga kogo i̱na bi o ledogoniore laya, lene.
EZE 45:16 Wali agali bibahendeme loma uruni Isaraele wali agalinaga kini karia yalu ibulene nga.
EZE 45:17 Nogo sibi irani dai helonaga lomabi widi lomabu delolenebi waini iba odo lomabu delolenebi uruni bibahende ege pigane ngabulo kagola horo timbuni tagira ibirangibi Sabada horo mbira mbirangibi horo timbuni tí Isaraele wali agalinaga wiabagiho ngelaga birugo tagira ibirangibi lomabu mulene uruni milimulo kini ibugua tí mo ngulene nga. Ani bialu Isaraele wali agalime ko biniru domo waholenaga lomarubi delolene nga. Loma uruni ko domo waholenaga lomabi widi lomabu delolenebi irani dai helo lomarubi Anduane Homogola ho gimbu bulenaga lomarubi kini ibugua tí mo ngigi bulebira.
EZE 45:18 Anduane Homogo Bibahende Haru Haame Ho Haga kagome bi ogodagua lalu, Ege piganenaga horo mbira laragola nogo bulumaga wangabe mbira dere durubi nabi kago hondowa loma bialu bo ngilimu. I̱naga anda kago dodo nahelonaga loma ogoni bo ngilimu.
EZE 45:19 Loma binigo mo ngiaga kago ibugua ko biniru domo waholenaga loma nogo bulumaga ogoninaga darama hambu yuwa i̱naga anda kago panga harabani gene karu odo ha̱i̱ halu lomabu delaga dabu kagonaga nguni maria ngagoriabi i̱naga anda haneni wali agali ngoai haga ngagonaga ege pabe harabani gene kagobi bibahende darama ogonime odo ha̱i̱ halimu.
EZE 45:20 Ani buwa ege ogoninaga horo kane laragolabi ani dege bilimu. Mbiralime ibu ko berogo mitangi nabi howa ko biyaguabi mana ko ngago manda nabi howa bu heaguabi ko ogoni biyagonaga loma binigo mo ngiaga kagome bulumaga ogoni loma biahalu bo ngiragome i̱naga anda kago dodo nahe bayale helolebira.
EZE 45:21 Ege mbira ogoninaga dege horo dene (14) laragola tígua horo timbuni mbira mini Bolangua Halu Penegonaga Horo ogoni mitangi bialu holene nga. Ani bialu ogoningi horo karu bibahendengi tí kamirume mberedi yidi nahe hirinigo nolene nga.
EZE 45:22 Horo timbuni ogoninaga tí pigane íbu ngoai haramingi kini kagome nogo bulumaga bayale mbira haru ibuwa ibuni ko binirubi ibunaga wali agalime ko biyarubi domo waholenaga bulumaga ogoni loma bialu loma binigo mo ngiaga kagome bo delelo mulene nga.
EZE 45:23 Mberedi yidi nahe hirinigo nolene horo tagira ibiragola horo karu bibahendeni kini ibugua nogo sibi wangabe kariabi nogo bulumaga wangabe kariabi Anduane Homogo i̱nihondo loma bialu irani dai helo bo delolene nga. Kini ibugua nogo meme mbira mbira horo karia bibahendengi wali agalirume ko biniru domo waholenaga loma bialu bo delolene nga. Ibugua nogo uruni dere durubi nabi bayaleore kago hondowa bolene nga.
EZE 45:24 Kini ibugua nogo sibi bulumagaru mbira mbira uruni heba balawa bayale genda magi manda nu kira ale kilogarama deria (14) lomabu mialu olibe lini ibanebi be timbuninaga magi lida tebira ale lomabu mulene nga. Ani miragola loma binigo mo ngiaga bu karu tigua nogo bulumaga sibi uruni loma bialu bo delalu howa balawa urunibi olibe ibane urunibi heba lomabu delolene nga.
EZE 45:25 Horo timbuni dege mbira Anda Nemandaha Palu Holene Horo tagira ibirangi ege kanegonaga horo nguini (15) laragola horo ogoningi kini ibugua ala horo karu nogo bulumagarubi sibirubi haru ibalu ko biniru domo waholenaga lomabi irani dai helonaga lomabi balawabi olibe lini ibanebi mo yalu ibuwa loma uruni ala miyagobi dege lomabu ngialu holene nga, lalu Anduane Homogohanda laya, lene.
EZE 46:1 Anduane Homogo i̱na Bibahende Haru Haame Ho Haga kogo ogodagua laro. I̱naga anda haneni wali agali ngoai haga ngagoha polenaga panga haraba ni tagira ibiragohayagi kago horo waragaru biabe bialu hagane horongi panga ogoni payaho wiaabo holene nga. Anigo Sabada horo harangibi Ege Mbira Ngabulo kagonaga horo pigane tagira ibirangibi panga ogoni duguaho ngelolene nga.
EZE 46:2 Horo uruni tagira ibirangi kini kago ibugua i̱naga andaha anda ibulenaga panga haraba ogoniha anda ibulene nga. Ani bialu kini ibu wali agali ngoaiho haga hama timbuni ngagoha ege pabe mende kagonaga haraba ni tagira ibiragohayagi howa anda polene wulebira. Anda puwa tamuha harabani howa lomabu delaga dabu ngagoha handa amu ho holene nga. Ani ngagola loma binigo mo ngiaga karume mbirale kini ibugua lomabu yalu ibiyaru mo mulebira. Loma uruni irani dai helolene lomabi Anduane Homogo i̱nila ho gimbu bulene lomabi bu delolebira. Ani bialu kini ibuni ge duli hangaho biruwa ma podalu i̱ mitangi bialu lotu lolebira. Ani bialu mani wali agali ngoaiho haga hama timbuni wiyagoha tagira polebira. Anigo loma binigo mo ngiaga karu tigua panga ogoni paya nabi alendo halu ne̱ lelo panga duguaho ngelolebira.
EZE 46:3 Sabada horongibi Ege Mbira Ngabulo kagonaga horo ibirangibi ege pabe mende kagonaga panga ni tagira ibiragohayagi dugua dai bidagonaga haneni wali agali bibahendeme ngoaiho haga hama timbuni ngagoriani ge duli hangaho biruwa i̱ mitangi bialu lotu ogonibi lalu holebira.
EZE 46:4 Sabada horo harangi kini ibugua nogo sibi igini hongolo waragaria sibi wangabe mbira lowa irani dai helonaga loma bo delole haru ibulene nga. Nogo sibi uruni dere durubi nabi bayaleore kago hondowa haru ibulebira.
EZE 46:5 Nogo sibi wangabe bayale ogoni haru halu balawa widime wabini genda magi manda nu kira ale kilogarama deria (14) lowa yalu ibulene nga. Ani bialu nogo sibi igini waragaria biaru heba balawa ibunime hame ledadagua yalu ibulene nga. Ani bialu olibe lini ibane balawa yidagobi dege yulene nga. Ibugua yulubadagoni balawa genda magi manda nu kira ale kilogarama deria (14) hanalu ibiyagua nde olibe lini ibane be timbuninaga magi manda lida tebira ale heba hambu yalu ibulebira.
EZE 46:6 Ege Mbira Ngabulo kagonaga horo harangi kini ibugua nogo bulumaga wangabe mbirabi sibi igini hongolo waragaria hebabi sibi wangabe timbuni mbira laga buwa lomabu yalu ibulene nga. Nogo uruni dere durubi nabi bayale kago hondowa haru ibulene nga.
EZE 46:7 Ani bialu ibugua nogo bulumaga wangabe biago heba balawa widime wabini ngago aria genda magi manda nu kira ale kilogarama deria (14) heba yu ibalu nogo sibi wangabe biago heba balawa ogonibi dege lomabu yalu ibulene nga. Ani bialu nogo sibi igini hongolo biaru heba balawa kini ibuni hame ledadagua yu ibulene nga. Ibugua balawa kilogarama deria (14) ale hanalu ibiyagua nde olibe lini ibane karulape timbuninaga magi manda lida tebira ale hambu yalu ibulene nga.
EZE 46:8 Ani bialu kini ibugua i̱ mitangi bialu lotu lole ibalu panga haraba ni tagira ibiragohayagi wali agali ngoai haga hama ngagoria howa haraba kagoha anda ibiyadagua ibu lotu lai halu hariga ogoniha dege dai bialu tagira polene nga.
EZE 46:9 Wali agali karumebi nde horo timbuni uruningi Anduane Homogo i̱ mitangi bialu lotu lole ibuwa tigua ege pabe haraba abene uyurahayagi ngagonaga anda ibirarume ti lotu lai halu panga haraba abene unurahayagi ngagoha tagira polene nga. Ti marume i̱ mitangi bialu lotu lole panga haraba abene unurahayagi anda ibirarume nde ti lotu lai howa panga haraba abene uyurahayagi ngagoha tagira polene nga. Ti anda ibiragoha lone dai nabi ege pabe haraba mende ngagonaga harabaha dai bialu tagira polene nga.
EZE 46:10 Kini ibu wali agaliru ege pabe harabani anda ibirangi ibu ti heba anda ibulene nga. Ani bialu wali agali tagira porangi nde ibu ti heba dege tagira polene nga.
EZE 46:11 Horo timbuni uruni harangi wali agali tigua lomabu ngule nogo bulumaga wangabe mbira mbira haru ibalu balawa widime wabini genda magi manda nu kira ale kilogarama deria (14) hanalu ibuwa nogo sibi wangabe mbira mbira haru halu balawa genda magi kilogarama deria (14) ogonibi dege hanalu ibulene nga. Ani bialu sibi igini hongoloru haru halu balawa hanalu ibiragome genda magi tini hame ledadagua hanalu ibulene nga. Tigua balawa kilogarama deria (14) ale hanalu ibiyagua nde olibe lini ibane karulape timbuninaga magi manda lida tebira ale hambu yalu ibulene nga.
EZE 46:12 Kinidagome Anduane Homogo i̱naga loma ibunime hame ledadagua irani dai helonaga lomabi i̱nila ho gimbu bulene lomabi haru halu ibiyagua nde loma binigo mo ngiaga bu karu tigua ege pabe mende kagonaga panga ni tagira ibiragohayagi ngagoha anda ibilo dugupe holene nga. Ani dugua haragola kini ibu anda ibalu loma haru ibiyago loma binigo mo ngiaga karume lomabu ngialu kagola kini ibuni Sabada horongi biagadagua bialu tamuha panga haraba kawareni hondo holebira. Ibugua i̱ mitangi bialu lotu lai halu tagira poragola loma binigo mo ngiaga bu karume panga lone payatagi holene nga, lalu Anduane Homogohanda laya, lene.
EZE 46:13 Anduane Homogohanda laabo halu lalu, Horo bibahendengi egerebagi nogo sibi igini hungubalua mali mbira hangu pene dere durubi nabi bayaleore kago hondowa haru ibalu Anduane Homogo i̱nihondo loma irani dai helonaga bo delole haru ibalimu. Loma ogoni horo bibahendengi ogonidagua biaabo halimu.
EZE 46:14 Horo bibahendengi loma ogoni delolene heba balawa widime wabini ngaru lomabu dela dege bilimu. Balawa ogoni lomabu delole howa genda magi manda kilogarama kirabi olibe lini ibane lida mbira heba odo biamaga howa lomabu delalimu. Egerebagi loma delolene mana ogoni horo bibahendengi wiaabo helo ani bilimu.
EZE 46:15 Egerebagi bibahendengi irani dai helonaga lomabu delole nogo sibi igini haru ibalu balawabi olibe lini ibanebi yalu ibugu biaabo holene nga.
EZE 46:16 I̱ Anduane Homogo Bibahende Haru Haame Ho Haga kogo i̱na bi ogo laro. Kini ibugua ibunaga dindi mbirahayagi ngago ibu igini kago tu wu miyagua nde dindi ogoni ibu igini biagonaga wiaabo halu ibu waneigini aguanene mani holobadarunagabi wia a̱i̱ hene wulebira.
EZE 46:17 Anigo kini ibugua dindi mbira agali ibunaga biabe biahaga karu mbirago tu wu miyagua nde mani mali pira duria (50) howa dano henego Yadai Bulene Mali ogoningi dindi ogoni kini ibuni mo yu dai bulebira. Ani bialu dindi ogoni kini ibu halu ibu waneigini mani holobadarunaga wiaabo hene wulebira. Dindi ogoni kini ibu igini aguanerunaga dege wiaabo holebira.
EZE 46:18 Ani bialu kini ibugua wali agali maru karunaga dindi page karulolene nawi. Ibu igini karu dindi tu wu mulene manda biyagua nde ibuninaga dindi winigo dege tu wu mulene nga. I̱naga wali agali bu karu ti dindi karulape tininaga dindiore wiaabo helonaga anidagua bulene nga, lalu Anduane Homogohanda laya, lene.
EZE 46:19 Agali biagome i̱ haru halu puwa loma binigo mo miaga hearunaga anda habagi hene heago haneni hariga piagane Anduane Homogonaga anda heago abene uyurahayagi wiagoria haru pu helaya. Ani helayagola i̱ ogoriani howa handalu hewaria hariga wali agali ibagabu haga hama ogoni pialu ni paliragohayagi pupe hea.
EZE 46:20 Agali ogoni ibugua i̱hondo langialu lalu, Dindi ogoria loma binigo mo miaga karu ti ibalu ko biniru domo wahelonaga lomarubi mana ko bero mitangi nabi howa bialu hayarunaga lomabi aria podo wini maru loma binigo mo miaga ti nole dawagane henge ngagoni. Ani bialu balawa lomabu mini biaru aria podo wini maru ti nole hirulebira. Loma binigo mo miaga karu tigua wali agali bu haga hama ngagoria mo yalu tagira polene nawi. Tigua yu tagira piyagua nde wali agali bu karubi i̱ninaga habagi hene karu ale dege holebira.
EZE 46:21 Ani lowa agali ogoni ibugua i̱ haru halu hama timbuni wali agali ngoai ho haga wiagoria tagira puwa hama ogoninaga gibuni maria wiagoha haru piyagola dindi hobane mbira mbira wiaru handai haru.
EZE 46:22 Hama timbuni ogoninaga gibuni maria hama emene maria ogobi dege dege wia. Hama emene uruni luninaga mida pira kira (20) wialu yangalenaga mida nguira (15) wia.
EZE 46:23 Ani bialu hobane maria ogoniha ege pabe bu mabu bini wia. Ege pabe ogoni gibuniha ira delaga henge mbira wia.
EZE 46:24 Ani wiago agali biago ibugua i̱hondo langialu lalu, Anduane Homogonaga andaha biabe bialu haga agali karume wali agalime nogo loma bule haru ibiniru barago aria podo wini maru ngaru mo yalu puwa ti nole dindi hobane ogoriani dawaga bulebira, laya, lene.
EZE 47:1 I̱na de gandeba handalu hewaria agali handalehe biagome i̱ lone Anduane Homogo anda haraba biagoria haru dai biya. Ani haru dai biyagola handalu hewaria iba mbira anda biago harabaha howa dugualu ni tagira ibiragohayagi pupe halu pea. Iba o piyadagoni panga abene unurayaginaga loma biniru delaga dabu heagonaga andane dindiha ibalu piya.
EZE 47:2 Ani handalu hewaria dege agali handalehe biago ibugua i̱ haru halu Anduane Homogonaga anda pabe bu mabu bini heagonaga panga abene uyurayagi dugu wiagoha tagira pialu pabe headagua piriba. Puwa pabe headagua tagirahayagi pu mabu bialu panga haraba mende ni tagira ibiragohayagi puabo hariba. Ani pialu howa handalu hewaria iba peago abene unurayagi ege pabe heagonaga andane dindiha howa tagira pialu hearia handaru.
EZE 47:3 Ani peagola agali handalehe biagome mbirale mita magi manda biagane mbira yu howa iba peago lunaga mita magi handari duriani (500) manda biya. Manda buwa ibugua i̱hondo, Í̠ iba ogoni domaedeha, laya. Ani layagola domaede halu hewaria ibame i̱naga ge ayuende hangu namulaya.
EZE 47:4 Ani bialu emene iba tigida ubadaga halu lunaga mita magi handari duria (500) ale mende puwa ibugua i̱hondo iba lone domaedeha laya. Ani layagola domaede halu hewaria iba biagome i̱naga ge dulini namulaya. Ani biya handala lone unura mita magi handari duria (500) tebone lone puwa iba domaedeha layagola i̱ lone dege domaede halu hewaria i̱naga tombeni namu laya.
EZE 47:5 Ani bialu lone dege mita magi handari duria (500) ale puwa iba uli wiagoria i̱na domabe nahe iba do̱ lolene ale karulapeya.
EZE 47:6 Ani wiagola agali handalehe biago ibugua i̱hondo langialu lalu, Dindiali-o mbirale uruni bayuwaore de handai haribe, laya. Ani lalu iya haru iba angeha lone dai biriba.
EZE 47:7 Ani dai buwa iba ange mende mendehabi i̱na ira dewa andaho hearia handaru.
EZE 47:8 Handalu hewaria agali handalehe biagome i̱hondo langialu lalu, Iba ogoni ni tagira ibiragohayagi howa pialu iba Yodana poragoha pupe halu iba kuyama mini Homene Iba bedagoha pupe haga. Iba kuyama Homene Iba ogoni ibu ibi dewawi berenego ai iba ogonime ibalu biramogo biragome iba bayale gagahe bira aribia haga.
EZE 47:9 Iba ogoni poragoha ema bialu piaga dewa karubi íbu ngoai halu wenabi iba ogoniha dewaore birulebira. Iba ogonime iba kuyama mini Homene Iba bedagoha puwa mo gagahe bayale berelolebira. Ani bialu dindi bibahende iba ogoni poragoha mbirale bibahendeore bayale holene yu hai holebira.
EZE 47:10 Iba ogoni poragoha ange angeha agalime wena minule wena nu yuwa Engedi dindi howa hama hama pialu Enegelaimi dindi ngagoria hairi holebira. Ani bialu howa tinaga wena nuru iba angeni nime yobilonaga mo yobia haga bulebira. Iba ogoniha wena bayale tara tara dewaore solowara timbuni Mediderenianaha bedarubi dege birulebira.
EZE 47:11 Anigo iba kaware maru puguaha berene bedaru bayale naholebira. Waru pugua uruniha iba berene bedaru ibi iba dege biraabo holebira.
EZE 47:12 Anduane Homogonaga andaha howa iba tagira piyagonaga ange mende mendehabi ira lini daga tara tararu anda haga bulebira. Ira uruni karunaga yuniru gau nale liniru ege bibahendengi daabo holebira. Wali agalime ira uruninaga liniru do nalu yunirume wali agaliha warago tara tara ngaru mo dabi haga bulebira laya, lalu agali handalehe biagome i̱ de gandeba handalu hewagoha i̱hondo lene.
EZE 47:13 Anduane Homogo Bibahende Haru Haame Ho Haga kago ibugua lalu, I̱na tínaga mamali Isaraelela bi hongohe mbira lo wialu Isaraele dindi ngagoni tínaga dindi ogoniore wiaabo helo ngulebero lo wirugoni. Ai dindi ogoni Isaraele wali agali hameigini homberia (12) kamidagua tu wu tahalimu. Tínaga hameigini kamidagua dindi hobane mbira mbira dege dege tahaga bilimu. Anigo Yosebe aguaneru ti dege dindi kira tu wu milimu. Dindi tubari ogodagua wulebira.
EZE 47:15 Dindi tubari uyurayaginaga iba solowara timbuni Medidereniana bedagoria howa pu banga bialu ni tagira ibiragohayagi pupe halu Hedelono tano tagira peda. Ogoriani howa pialu Hamada tano polene hariga ngagoria tagira pialu Sedada tano pialu Beroda tano puabo howa Sibiraimi tano anda peda. Sibiraimi tano ogoni ibu Damasagasa tanola Hamada tanola hengeneha nga. Ai tínaga dindi tubari Tigoni tano ngagoria pu bolangua ka. Tano ogoni ibu dindi hobane mbira mini Haurana ngagonaga tubari ngagoria peda.
EZE 47:17 Anidagua dege Isaraelenaga dindi tubari uyurayaginaga iba solowara timbuni mini Medidereniana bedagoria howa ni tagira ibiragohayagi pialu Enono tano ngagoria peda. Dindi abene unurayaginaga tubari ogoni ibu Damasagasa dindibi Hamada dindibi dombeneha bolangua halu peda.
EZE 47:18 Ani bialu dindi tubari ni tagira ibiragohayaginaga Damasagasa Haurana dindila dombene ngagoria howa wu yu pialu Yodana iba tigida puabo halu unurayaginaga Isaraele baba Gileada dindinaga abene mbirahayagi tagira peda. Abene unurayaginaga tubari iba kuyama mini Homene Iba bedagoria tagira peda.
EZE 47:19 Tubari unurayaginaga Tama tano ngagoria howa pialu ni paliragohayagi dindi mini Kadese Meriba wiagoria tagira peda. Ani bialu Iyibila tubariyagibi iba emene mbira pedago tigida iraga halu iba solowara Medidereniana bedagoria tagira peda.
EZE 47:20 Ani bialu ni paliragohayaginaga tubari iba solowara Medidereniana bedagoria uyurayagi pu banga bialu amura Hamada tanoha tubari piyagoria gimbu bida.
EZE 47:21 Ani ngago dindi ogoni tíni hameigini harimidagua baya hangu tu wu tahaga bilimu.
EZE 47:22 Hameigini mbira ibu dindi tu wu harago ibu aguanene holebiraru tigua ogoriani ha a̱i̱ holebira. Ani bialu dindi tu wu tahalu howa agali maru dindi tara howa ibuwa ti baba mandagi hene karu dindi tu mialu ti onerume tínaga dindi ogoriani howa waneigini taba hanarago helonagabi dindi tu wu mialu bilimu. Agali uruni tibi nde Isaraeleali dege ka lo manda bialu dindi tu wu tahalu howa tigatiga bilimu.
EZE 47:23 Isaraele hameigini mbira mbira tí kamidagua dindi tarali haru kamiru dindi tínime tu wu migi migi bilimu. Anduane Homogo Bibahende Haru Haame Ho Haga kogo i̱na bi lai harugoni laya, lene.
EZE 48:1 Anduane Homogohanda laabo halu lalu, Isaraelealinaga dindi tubari abene uyurahayaginaga amura iba solowara timbuni mini Medidereniana bedagoria howa pu banga bialu ni tagira ibiragohayagi polenaga tubari Hedelono tano ngagoria bolangua halu pialu Hamada tano polene hariga tagira piaga ngagoria bolangua halu pialu amura Enono tano timbuni ngagoria puabo halu pialu Damasagasala Hamadala hengene ngagoha bolangua halu pupe haga bida. Dana hameigini ti dindi ogonihayagi mulebira. Tinaga dindi gibuni ni tagira ibiragohayagi howa wima pialu ni paliragohayagi iba solowara timbuni Medidereniana bedagoria tagira polebira.
EZE 48:2 Ase hameigini ti Dana hameigininaga dindi ngagonaga abene unurahayagi podo wulebira. Nabadali hameigini tinaga dindi Ase hameigini dindi ngagonaga abene nirayagi podo wulebira. Ani bialu daliape howa nira Manase hameigini ti podo wulebira. Ani bialu nira dege Manase hameigini erembirahayagi Eberaimi hameigini ti podo wulebira. Ani bialu nira dege Eberaimi hameigininaga erembirahayagi Lubene hameigini ti podo wulebira. Ani bialu Lubene hameigini dindi ngago abene nirayagi Yuda hameigini ti podo wulebira. Tinaga dindi tubari ni tagira ibiragohayagi howa pialu ni paliragohayagi iba solowara timbuni mini Medidereniana bedagoria pupe haga bida, lene.
EZE 48:8 Anduane Homogohanda laabo halu lalu, Yuda hameigini dindiha abene unurahayagi ngago galone bulenaga wiabagi ho ngelolene nga. Dindi ogoni yangalenaga magi kilomida homberiani (12) bolanguahe nga. Dindi ogoninaga tubari ni tagira ibiragohayagi ngagoria howa pialu mendehayagi amu iba solowara Medidereniana bedagoria tagira peda. Dindi ogoni hameigini maru tinaga dindi lunaga magi ngagobi dege ngago Anduane Homogo i̱naga anda dindi ogoniha dombeniore bu holebira.
EZE 48:9 Dindi ogoni dombeneha i̱ninaga dindiore ngelo tu wiabagiho ngelalimu. Dindi ogoninaga haguane uyurahayagi pu paga halu herene unurahayagi pupe haga bida. Ani bialu lunaga magi kilomida homberiani (12) emene bolangua hene labolabo ngelo tu wilimu. Ani bialu arane ogobi labolabo kilomida duria helo tu wilimu. Dindi ogoni loma binigo mo ngiaga karu tinaga wulebira. Anduane Homogo i̱naga anda dindi ogoniha hanuniore bu holebira.
EZE 48:11 Dindi ogoni i̱naga wiabagi heneore wulebirago Sadogo hameigini bu karu tinagaore wulebira. Bamba Isaraele wali agali maru tigua i̱hondo erembira ngialu piyangi Libai hameigini tiguabi i̱ erembira ngialu piai hayago pelowa Sadogo hameigini ti dege i̱ wahalu nape haabo haya. Loma binigo mo ngiaga uruni tigua i̱naga biabe biahalu mini bilinahe howa i̱ talima ibalu baya hangu bialu haya.
EZE 48:12 Ani bialu hayagonaga i̱na dindi bayaleore ogoni ti mo turu halu tihondo mulebero. Ani merogola dindi ogoni wiabagi heneore mbira wulebira.
EZE 48:13 Libai hameigini karu ti dindi loma binigo mo ngiaga biarunaga dindi ngagoria dege gibuniha wulebira. Tinaga dindi ogoni luninaga magi kilomida homberiani (12) bolanguahe wialu aranenaga magi kilomida duria wialu bida.
EZE 48:14 Tigua dindi Anduane Homogo i̱ninaga tu wiabagiho ngelaramigo dindi maru ngagobi ndo bayaleore wiabagi heneore wulebira. Anidagua wulebirago manda bialu Libai hameigini bu karu tiguabi loma binigo mo ngiaga karu tiguabi dindi i̱ninaga ogoni agali mendeali helo mulenebi yolo bulenebi nawiore laro, lene.
EZE 48:15 Ani bialu loma binigo mo ngiaga karunaga dindi ngago mendehayagi henge ngago luninaga magi kilomida homberiani (12) bolanguahe wialu arane yangalenaga magi kilomida kirani bolanguahe ngelo tu wilimu. Dindi ogoni i̱ninaga wiabagi helo ndo wali agali tinaga wuwa dindi dombeni tano ogoriani wulene nga. Dindi ogoriani tinaga anda bialu dindi henge maru wulebira.
EZE 48:16 Tano ogoninaga lene lene maria ngagoha ege pabe bu mabu bidagola ege pabe ogoni bibahendeha luninaga mida magi daosini kira handari kirani pira duria (2,250) holebira.
EZE 48:17 Tano ogoni tagirani dindi henge bame wia mabu bidagoria hama ogoni aranenaga mida magi handari mbirani pira kirani duria (125) wulebira.
EZE 48:18 Ani bidagoria wali agali tinaga tano dombeni wiragola hama ogoni podaki halu hama timbuni mende ni tagira ibiragohayagi wialu mende ni paliragohayagi wulebira. Dindi bame ngagoriani wali agali tanoha bu karu ti eru hongolene wulebira. Dindi ogonilabo luninaga magi mbiraore ogobi labolabo kilomida duria wulebira. Isaraele hameigini dindi bibahendeha howa ibalu tano ogoniha biabe bialu e hongolene wulebira.
EZE 48:20 Wali agalinaga dindibi i̱ninaga dindibi emene mbira yami yami buwa Libai hameigini ti haragobi dindi timbuni dege mbira wulebira. Dindi ogoni timbuni magi gibuni maria ngagoria howa manda bialu kilomida homberiani (12) bolanguahe dege dege wulebira, laya.
EZE 48:21 Dindi ogoni ni tagira ibiragohayagibi ni paliragohayagibi ngagolabo kininaga wulebira. Kininaga dindi ogoni i̱naga dindi ngogoria kawareni howa wuyu pialu ni tagira ibiragohayagi hameigini tara baba tubari ngagoria tagira polebira. Kininaga dindi mende ni paliragohayagi ngago ogoni i̱naga dindi ngogoria kawareni howa wuyu pialu iba solowara timbuni mini Medidereniana bedagoria tagira polebira. Ani bidagola kininaga dindi lene labolabo ngelowa Isaraele wali agali tinaga dindi nirayagi Libai hameigini loma binigo mo ngiaga agaliru tinaga dindi lirayagi ngelowa i̱naga dindi dombeneha wulebira. Ani bialu wali agali tinaga dindiha nirayagi tano timbuni wulebira. Yuda hameigininaga dindi abene uyurahayagi ngagola Beniyamini hameigini tinaga dindi abene unurahayagi wulebira, Anduane Homogohanda laya, lene.
EZE 48:23 Anduane Homogohanda i̱hondo laabo halu lalu, Isaraele hameigini maru bu karu tinaga dindi Beniyamini hameigini tinaga dindi biabe tara bulene o ngagonaga kaware dege dindi unurahayagi mulebira. Ani miragola unurayagi Simiono hameigini ti holebira. Ani halu Isaga hameigini ti Simiono hameigininaga dindi ngago abene unurahayagi dege mulebira. Ani bialu Sebulunu hameigini ti Isaga hameigini dindi ngago unurahayagi ngago mulebira. Gada hameigini ti dindi Sebulunu hameigini dindi ngago abene unurahayagi mulebira. Anidagua bialu tinaga dindi tubari ni tagira ibiragohayagi dindi tara baba tubari ngagoria howa wuyu pialu ni paliragohayagi iba solowara timbuni Medidereniana bedagoria tagira pugu bulebira.
EZE 48:28 Dindi abene unurahayagi howa hameigini tara baba tubaribi Gada hameigini baba tubaribi Tama tano ngagoria howa ni paliragohayagi pu dai bialu iba Kadese Meriba laga bedagoria tagira polebira. Ani bialu emene ubadaga howa iba biruyu pedadagua Iyibiali baba tubari piaho wialu iba solowara timbuni mini Medidereniana bedagoria tagira polebira.
EZE 48:29 Anduane Homogo Bibahende Haru Haame Ho Haga kogome bi ogo larogoni. Isaraele hameigini tíni dege dege dindi ogoni tíninaga wilo anidagua tu wu ta halimu, lalu Anduane Homogohanda laya lene.
EZE 48:30 Anduane Homogohanda laabo halu lalu, Tano anda polenaga ege pabe bu mabu bidagonaga haraba homberia (12) wulebira. Ege pabe ogoninaga lene uyuyagibi unuyagibi ni ibiragohayagibi ni paliragohayagibi haraba tebira dege dege wigi bulebira. Ege pabe ogoninaga haraba mbira mbirani Isaraele hameigini homberia (12) biarunaga mini mbira mbira gilibu wigi bulebira. Ege pabe abene uyurahayagi haraba tebira ngagoria hameigini Lubenebi Yudabi Libaibi tebirali uruni tinaga mini wulebira. Ani bialu Yosebebi Beniyaminibi Danabi tinaga mini haraba abene ni tagira ibiragohayagi gilibu wigi bulebira. Ani bialu Simionobi Isagabi Sebulunubi tinaga mini haraba abene unurahayagi gilibu wigi bulebira. Ani bialu Gadabi Aserabi Nabadalibi tinaga mini haraba ni paliragohayagi gilibu wigi bulebira. Ege pabe ogoni luninaga magi lene bibahendeha mbiraore ogobi dege dege mida magi daosini kira handari kirani pira duria bolanguahe (2,250) holebira.
EZE 48:35 Ege pabe tano bu yaanda kagonaga mida magi daosini dira (9,000) bibahende holebira. Mani howabi laabo halu tano ogoniha mini Anduane Homogo Ogoniha Ka lolebira, lalu Anduane Homogohanda ogodagua bigi bulebira lalu Esegielehondo de gandebaha howa uruni bibahende walia hai hene.
DAN 1:1 Yahoiagimi ibu Yuda wali agalinaga kini mali tebira heagola Babilono dindinaga Kini Nebugadenesa ibugua Yarusaleme tano wiagoria ibunaga ami agalirume waranda howa wai bule ho mabu bupe hene.
DAN 1:2 Anduane Homogohanda Kini Nebugadenesa ibugua Yudanaga Kini Yahoiagimibi Yuda wali agali dewalibi minalu gabo beru beledirubi Anduane Homogonaga andaha winiyaru bibahende mo yai helene. Ani biyagola Kini Nebugadenesa ibugua wali agali minayaru haru pialu mbirale mo yayaru bibahende ibunaga damaru andaha wule mo yalu Babilono dindi pene.
DAN 1:3 Ani bialu howa Kini Nebugadenesa ibugua ami agali haguane Asabenasa ibuhondo lalu, Yuda igiri karuni aria maru Kini Yahoiagimi andaga henebi agali haguaneru andagaha henebi uruni aria maru dabalu haru ibabe, lene.
DAN 1:4 Ibugua lalu, Huliya igiri tingini denguiru mo ko nahe bayale do mbaraleni howa sigulu bene manda maru abale mibehego handalu dababe, lalu lamini. Igiri uruni kini andagaha biabe bialu helolenaga ani dabene. Dabo helowa Asabenasa ibugua igiri uruni Babilono bi lalu bebaru daga lelobi gili bilobi lawai hole dabene.
DAN 1:5 Ani heagola kini ibugua lalu, Igiri uruni ti agali ibunaga biabe bialu ibu andagaha hagane hearu heba ti iba tomobi mandagi nagadagua nalu helo. Igiri uruni ti mali tebira sigulu bialu howa biai haragola kini ibu andagaha ibunaga biabe bia halu helo, lene.
DAN 1:6 Asabenasa ibugua igiri dabayaru aria Yuda igiri mariali dabo helene. Tinaga mini Daniele mbira Hananaia mende Misaele tebone Asaraia mane uruni dabo helene.
DAN 1:7 Ani heagola Asabenasa ibugua tinaga mini gahenge wia aribia haga bialu uru wigi bini. Daniele ibu mini Beledesasa wini. Hananaia ibu mini Sadaraga wialu Misaele ibu mini Misaga wialu Asaraia ibu mini Abedenego wigi bini.
DAN 1:8 Kini andaga howa tomo ibabi migi biyagola Daniele ibu nanaga hene. Ibugua mitangi bialu tomo waini ibaru nayagua ogonime Ngode Datagaliwabenaga deni ibu dodohe holigonaga ibu ilili bialu nanole manda bini. Daniele ibugua tomo waini ibaru nanaga henedago irane agali kini ogoni dindiha dama hearunaga loma binibi mende nde ibugua tomo uruni nayagua ibugua kininaga bi larago bibahende hale hai hole lalu walia holeyane nane wahene bada. Ani howa ibugua agali haguane Asabenasahondo ibu tomo tara maru ngaru noliya ngibehebe lalu hale hene.
DAN 1:9 Ani hale hayagola Ngode Datagaliwabehanda Asabenasa ibugua Daniele dara helo biamogo bini.
DAN 1:10 Ani biyagola ibugua gi howa Danielehondo lalu, Kini ibunime tomo uruniore nalimu lalu dabo ngiyago i̱ giho kogoni. Irane kini ibugua handalu karia igiri maru tí haru mandagi ibini biaru tinaga tingini bayale halu hondowa tínaga ko hayagua nde i̱ homoliya bo waholobadago, lene.
DAN 1:11 Ani lowa Asabenasahanda Daniele Hananaia Misaele Asaraia imaru handaya ho helonaga agali mbira dabo helene. Ai Daniele ibugua agali ogoni hearia puwa lalu,
DAN 1:12 Í̠na inahondo ogodagua bia handabelo hame ledo. Ina tomo tara nemaru iba ibuniru hangu nalu holoma̱ya horo pira hangu henge ngi.
DAN 1:13 Ani kamagola inanaga tinginibi igiri tomo kini andagaha nagane karubi inanaga tingini handa handa beregola inabi nde ti ale degedabe be inanaga tingini obiyadabe handabelo. Ani hondowa mani í̠na inahondo bule winidago biai habelo, lene.
DAN 1:14 Kininaga haru haga agali biagome Danielehanda bi ogoni layagoni karulapeda lowa anidagua bini.
DAN 1:15 Anidagua buwa ai horo pira biago howa agali haru haga biagome igiri mariali biarunaga tingini bayaleore hongohe igiri maru kinihanda tomo nalimu lene nalu hagarubi ndo bolangua ho hearia hendene.
DAN 1:16 Ani hondowa agali haru haga biagome tomo bayale tarabi waini ibabi kinihanda mibe lene biaru nami wahalu Danielebi ibunaga nenege tebirali biarubi ti tomo nelo nema wiarubi iba henene wiarubi mialu hene.
DAN 1:17 Ai Danielebi ibunaga nenege tebirali biarubi ti Ngode Datagaliwabehanda biamogo bialu mini manda bayale talebu miyagola tinaga sigulu biyago bayale hangu bialu tinaga manda timbuniwi hene. Tinaga manda tara tara lawai hayaru bibahende manda biai hene. Anibi heagola Ngode Datagaliwabehanda emaga hendeneru baya hangu tale bilo manda bogaru mugube Danielehondo mini.
DAN 1:18 Ai igiri bibahende biaru kinihanda mali tebira sigulu balu halimu layaru bai hayagola Asabenasa ibugua kini ibuni hearia haru piau hene.
DAN 1:19 Ani piyagola kini biagome handalu hearia Daniele Hananaia Misaele Asaraia imarunaga manda timbuni igiri maru biarunaga manda bolanguahe heago hendene. Ani hondowa kini ibugua igiri uruni ibunaga biabe bialu helo dabo helene.
DAN 1:20 Ani buwa ibugua igiri biaruhondo bi maru hale haga buwa ba handalu hearia igiri mariali biarunaga manda timbuniore howa ibunaga Babilono dindiha agali manda timbunibi hearunaga manda biaru bibahende bolangua hai hearia hendene. Igiri uruninaga manda ti baba nakarulapeore hearia hendene.
DAN 1:21 Daniele ibugua kininaga biabe bialu luore ho wahene. Ani bialu heane dege Babilononaga kini gahenge mbira mini Sairusi ibu kini ho aribia hene.
DAN 2:1 Nebugadenesa ibu kini howa mali mendengi emaga mbira hendene. Emaga ogonime ibuni mo mini burugula hayagola ibu u baya hangu palibe nahe hene.
DAN 2:2 Ani biyagola ibugua agali maru de gandeba hendenegonaga irane mandabi hearubi gamugamu biaga hearubi mbirale mani bulebiragonaga ala hondo bamba haga hearubi bibahende olo ngoai hene. Ani mo ngoai howa ibugua tihondo lalu, Tígua i̱naga emaga handarugo irane langule ibidaba, lene. Uruni ti ibuwa kininaga wanakuini hemigola
DAN 2:3 ibugua tihondo ogodagua lene. Ai i̱na emaga mbira handaragome i̱ mo mini burugula kagoni. Ani bidagola emaga ogoninaga iraneore manda bua kogoni, lene.
DAN 2:4 Ani layagola tigua kinihondo Arama bi lowa ogodagua ladai bini. Kini-o í̠ luore haabo habelo. Ai í̠na emaga handaridagoni iname irane ogo aleda lalu daboloma̱ya inahondo latagiha, lene.
DAN 2:5 Ani layagola kini ibugua tihondo ladai bialu lalu, Heneneore larogo i̱na emaga handarudagoni tígua ogo aleda lalubi ogo ale bulebira lalu iranebi latagi hadaba. Latagi naharimiyagua nde i̱naga ami agali karuhondo tínaga gi geru minu dogo wahadaba larogola tí homai holeberami. Ani bialu tínaga andarubi bo gialo bagabu wahadaba lolebero.
DAN 2:6 Anigo tígua i̱na emaga handarudagoni latagi halu ogoninaga irane langirimiyagua nde i̱na mbirale dewaore ngialu tí agali mini lene timbuni helolebero. Ai áyu tígua i̱na emaga handarudagobi ogoninaga iranebi langidaba, lene.
DAN 2:7 Ani layagola tigua kinihondo lone hale halu lalu, Iname emaga ogoni irane ogo aleda loloma̱ya í̠na emaga hendenedago inahondo langi, lene.
DAN 2:8 Ani layagola kini biagome ladai bialu lalu, Tígua ohalu kamigo i̱ manda bidogoni. I̱na bi lone lo beregedoliyanaga emene lu hondo hole laramigo anidagua nabulebero.
DAN 2:9 Tígua i̱na emaga handarudago latagi halu irane langidaba larogo nalangirimiyagua nde pani uruni ti bibahende ogo dege dege noleberami. Irane tígua bi lo mbira howa i̱naga mini beregedoliya ohowa horo lu bolangua helonaga lalu harimidago. Ai tígua i̱naga emaga ogoni latagi habehe kamiyagua nde tí emaganaga iranebi langibehe kami i̱na manda bulebero, lene.
DAN 2:10 Ani layagola agali biaru tigua kininaga bi layago hale howa ladai bialu lalu, Kini-o í̠na áyu inahondo langidaba laregoni dindini hene agali bibahendeoreme nalabehe taibi taraore wiago langidaba laregoni. Kini-o dindini hene kini hongohe bogabioremebi ibunaga agali manda timbuniwi karuhondobi ibunaga de gandeba hendenegonaga irane mandabi karuhondobi ogonidagua langidaba lalu mbira hale hene nawi.
DAN 2:11 Ai kini-o bi áyu inahondo langidaba lalu laregoni gendabiore agali mbirame galone langibe nahedago dama bu karume dege karulapego. Anigo ai dama uruni ti agali baba mandagi nahaga ka.
DAN 2:12 Tigua bi uruni layago hale howa kini ibu keba timbuniore howa ibunaga ami agali Babilono dindi bibahendeha purogo lowa agali manda timbuniwi hearu bo wahai halimu lene.
DAN 2:13 Ani layagola tigua Danielebi ibunaga nenege igiri tebirali biarubi heba mandagi bo wahole hondo pene.
DAN 2:14 Ami haru haga haguane henego Ariogo ibugua agali Babilono dindinaga manda timbuniwi hearu bo wahole pene. Ai Daniele ibu Ariogola bi bayale lolene mbira taya bialu hene.
DAN 2:15 Ani buwa Daniele ibugua Ariogohondo lalu, Kini ibugua irane aginaga agali manda timbuniwiru bo wahole bialu kabe, lalu hale hene. Ani hale hayagola Ariogo ibugua mbirale biyaruni bibahende Danielehondo lamiai hene.
DAN 2:16 Layago hale halu Daniele ibugua kini berearia gerai lalu puwa ibuhondo lalu, Í̠naga agali manda timbuniwi bogabi uruni abale bo wanahe emaga ogoninaga irane i̱na latagi holeberogo hondo habe, lene.
DAN 2:17 Ani layagola kinihanda ogoni karulapego ani bia laya handala Daniele ibu abale andaga dai buwa ibunaga nenege tebirali Hananaia Misaele Asaraia imaruhondo o layadaruni lamiai hene.
DAN 2:18 Ibugua lalu, Ngode Datagaliwabe dahuliya andaga kago ibuhondo mbirale wia do hene uruninaga irane ina dara halu langilonaga ibunihondo bi lami̱ya. Ani biragola ina Babilononaga agali manda timbuniwi bogabi uruni heba mandagi nahomami̱ya, lene.
DAN 2:19 Ai horo ogoningi dege mbiraga hayagola Ngode Datagaliwabehanda emaga ogo ale lalubi irane ogo ale lalubi Danielehondo de gandebaha walia hene. Ani walia hayagola Daniele ibugua Ngode Datagaliwabenaga mini yaraga halu ogodagua lene.
DAN 2:20 Ngode Datagaliwabe-o manda bulenebi hongo holenebi í̠ha hangu ngegonaga i̱na í̠naga mini yaraga haabo hole.
DAN 2:21 Iba dalu ibilolenenaga hongobi gaea bilolenenaga hongobi í̠na yu halu agali mbirago ibu kini helo dabolenebi ibu bo dugu waholenenaga hongobi í̠na dege yu kegoni. Ani buwa í̠na dege agali maruhondo mini gigabibi manda boga timbunibi miaga kegoni.
DAN 2:22 Wia do hene dewaore agalime handa mandabi biai habe nahe nga. Anigo Ngode Datagaliwabe í̠nime mbirale wia do hene uruni agalihondo walia haga biriligoni. Í̠ha wá holene haihe kegome mbirale arumaha wia do karu handa walia haga kegoni.
DAN 2:23 I̱naga mamalirunaga Ngode Datagaliwabe-o í̠na mini gigabibi hongo holenebi i̱hondo ngialu iname bi lalu emaga biago waliaha larimagola í̠na hale halu kinihanda emaga hendene biagobi galonebi ogo ale lalu walia harigonaga i̱na í̠naga mini yaraga halu ka̱i̱ laro, lalu Danielehanda lene.
DAN 2:24 Kinihanda agali manda timbuniwiru Babilono dindiha hearu bibahende bo wahelo dabo helene ami agali haguane Ariogo hearia Daniele ibugua puwa lalu, Agali manda timbuniwi karu bo wanahabe. I̱na kininaga emaga biagobi ogo aleda lalu iranebi lamuliya i̱ kini bedaria haru mba, lene.
DAN 2:25 Ani layagola Ariogo ibugua Daniele abaleore kini berearia haru puwa kinihondo lalu, I̱na Yuda igiri o haru eberogo ibugua í̠na emaga handaridagoni latagi holebira, lene.
DAN 2:26 Ani layagola kini ibugua Daniele mini mende lalu, Beledesasa-o i̱na emaga handarudagobi ogoninaga irane ogo lalubi í̠na karulapeore languleberebe, hale halu lene.
DAN 2:27 Ani layagola Daniele ibugua kinihondo lalu, Kini-o agali mini gigabiwibi manda dingi dangialebi bogabiorebi uruni aleme mbirale mbira wia do hene ogoni alego manda bibehe mbirali nahe.
DAN 2:28 Anigo Ngode Datagaliwabe dahuliya andaga kago ibugua dege mbirale wia do ho ngarunaga irane ogo ale lalu mo walia haga ka. Ai Kini-o Ngode Datagaliwabehanda mani urudagua bulebira lalu í̠hondo ala walia ho ngeleda. Í̠na áyu mbiraga paleria emaga handaridago i̱na languliya.
DAN 2:29 Kini-o í̠ palia hondo heria Ngode Datagaliwabe ibugua mbirale bibahende wia do karu handalu manda biaihe kagome mani bulebirago í̠hondo walia hayada.
DAN 2:30 Ai Ngode Datagaliwabe ogoni ibu degeme i̱hondobi mbirale wia do hene ogoni ogo ale lalu walia hayago. Ainde i̱na agali manda timbuniwi bu karuni bibahende bolangua howa i̱na manda timbuniore bidogonaga walia halu ndo. Ngode Datagaliwabehanda í̠na emaga handaridago ogoninaga irane ogo ale lalu i̱hondo mo walia hayago languliya.
DAN 2:31 Kini-o agali ale mbirale timbuni mbira gime wabini heane handaridagoni. Ai ogoni ibuni ngiringarale de daibiore heane hondowa gi timbuniore harigoni.
DAN 2:32 Ogoni ibunaga haguane ngolome wabini ngaraleore halu gi payanego labobi galu hombehayagibi ege to̱le̱ silibame wabiniyane handaridagoni. Ai dombeni ege to̱le̱ boronosime wabialu binigo handaridagoni.
DAN 2:33 Ai ge kirabali aeaneme wabini howa niraore dindi dongoma aeanelame biamaga howa wabini hearia handarida.
DAN 2:34 Ai ani handaho heria dege hari bare mbiraha howa ege to̱le̱ timbuni mbira minana ibuni podalu íbu daluwa agali ale gime wabini biagonaga ge kirabali dindi dongoma aeanelame wabumaga hene biagoria gingirulo baga bialu bo tagadabaga biyagola haeala togolayane handarigoni.
DAN 2:35 Ani hondo heria aeanebi dindibi boronosibi silibabi ngolobi bibahendeore gingirulo hole bialu abalu ale hayane hondo heria emene hingiluni mbira ibira nahe puyabume pulu wahai hayagoni. Ani biyago hondo heria ege to̱le̱ mbira ibalu gime wabini biagonaga ge heagoria ibira hayago biagome timbu halu yanga lowa ona hari timbuni íbu howa anda halu dindi bibahende karulai hayada.
DAN 2:36 Kini-o í̠na emaga handarigoni o langirugoni. Ai ogoninaga irane ogo ale lalu langero.
DAN 2:37 Kini-o í̠ agali kini timbuniore howa kini maru karu bolangua hai howa í̠ daligaore kegoni. Ngode Datagaliwabe dahuliya andagaha kago ibugua í̠ dabalu kini hongohe timbuniore daliga mini lene heledagoni.
DAN 2:38 Ibugua í̠hondo ibunaga wali agalibi dindini ema bialu piaga bedarubi bibahende handayaho hai habelo dabo heleda. Ai gime wabini agali ale biagonaga haguane ngolome wabini handaridagoni áyu í̠ni kegoni.
DAN 2:39 Ai kini mende mani ha aribia holebirago ibu timbuni í̠ kegobi ndo ibu emene ale howa nira holebira. Ai nira ege to̱le̱ boronosime wabini handaridagoni irane agali kini tebone mani holebira. Ogoni ibugua dindi bibahende handa gimbu bu howa haru holebira.
DAN 2:40 Maniore howa kini mane holebirago ogoni ibunaga manane gehayagi aeaneme wabini handaridagoni. Aeaneme mbirale bayagua bibahende dudubagabu waharaligoni. Anidagua dege dindi maru ala winirunaga kini karu bibahende bo haeala bagabu waholebira.
DAN 2:41 Ai geha nira ge hondonehayagi dindi dongoma aeanelame wabini handaridagoni irane ogo. Ai agali kini ogoni ibugua handayaho karu buda hole bialu haga haga bulebira. Anigo ti emene hongohe dege holebira. Aeane ge kirabaliha heane handaridagoni irane ogo. Kini uruni tinaga hongo abale biba halu ibira naholebira.
DAN 2:42 Ai ge hondoneha dindi dongoma aeanelame wabini handaridagonaga irane ogo. Dindi ogoninaga mendehayagi aeane ale hongohe kagola mendehayagi hongo nahe gede dindi dongoma ale holebira.
DAN 2:43 Gime wabini agali ale ogoninaga ge dindi dongoma aeanelame biamaga howa wabini handaridagoni irane ogo. Agali kini urunime kini maru ho giligalalo karu mo mogo bialu lone ho mbiraore hole lowa kini mbira mbirago wane bedaru dabu bule damu pialu holebira. Anigo manane dindi dongoma aeanela bayuwa paraho ndibu nalagadagua uruni tibi baya hangu mo mogo bialu mandagi habe nahe holebira.
DAN 2:44 Ai kini uruni ti kaore dege Ngode Datagaliwabe kago ibugua bibahendeha ibunime handayaho howa haru hai holene tu haragola ibulebira. Horo ogoni íbu wirangi ibugua handame howa haru haho wiaabo holene wulebira. Ani kagola kini maru karume ibugua handayaho kago bo podabe nahe holebira. Ngode Datagaliwabe ibugua dege tigua haru karu bo gialohole bialu ibugua haru halu handame ho holene wiaaboboore wulebira.
DAN 2:45 Ai agali ale aeanemebi boronosimebi dindi dongomamebi silibamebi ngolomebi wabini biago ege to̱le̱ mbirame podalu ibuwa bo dudubaga biyane handaridagoni irane ogo. Ege to̱le̱ ogoni ibu manane Ngode Datagaliwabenaga howa handagimbu bu holenenaga manane handarida. Ai Ngode Datagaliwabe mini lene kago ibugua í̠hondo mbirale mani bulebiragonaga walia hayadagoni. Ai í̠na emagaha handariyagoni ogo lalubi bulebiragonaga mo walia halubi langiai harugoni, lalu Danielehanda Kini Nebugadenesahondo lamini.
DAN 2:46 Kini Nebugadenesa ibugua Danielehanda bi layago hale hai howa ibu Danielenaga buha ge duli hanga halu bulu paluwa lalu, Ai tínaga dama karuhondo mbirale bo lomabu miagadagua Danielehondo bo mulene nga, lene.
DAN 2:47 Ani lowa kini ibugua Danielehondo lalu, Í̠naga Ngode Datagaliwabe ibugua dama karu nagalone lowa bolanguahe daligaore heneda. Ibu kini bibahende karunaga haru haga haguane howa ibugua mbirale wia do hene ngarunaga irane ogo ale lalu latagi haga kagoni. Áyu í̠na mbirale wia do hene biagonaga galone ogobi bulebira lalu tigatigaore langirigome ibuore baya hangu kago manda bidogoni, lalu kini ibugua lene.
DAN 2:48 Ani lowa kini ibugua Daniele ibu Babilono dindinaga haguane howa kini ibu mini mandaru mo boga bia haga agali hearu bibahende handayaho helo helene. Ani heagola kini ibugua mbirale dewaore Danielehondo miyagola Danieleore agali homogo mini lene mbira hene.
DAN 2:49 Ani howa Daniele ibugua ibunaga nenege tebirali Sadaraga Misaga Abedenego imaru Babilono dindiha biabe wiaru handayaho helo kini hale hayagola kini ibugua ti dabowa helene. Ani bialu Daniele ibuni kini andagaha haga hene.
DAN 3:1 Nebugadenesa ibugua bidaba layagola tigua ngolome agali ale mbira wabu heleneya. Agali ale ogoni ibu lunaga mida magi pira kirani karia (27) wialu timbuninaga mida magi tebira wabu helene. Ogoni Babilono dindi gunguni tigabi mbira mini Dura wiagoria wabu helene.
DAN 3:2 Ani wabu helowa kini ibugua lali, I̱naga agali haguane bibahende dindi ogoriani íbu ngoai halimu lamule bi yalu purogo ladaba, lene. Ani layagola agali haguane hearubi gabumane biabe biaga agali hearubi tinaga biamogo biaga hearubi muni handayaho haga hearubi godi dabaga hearubi bibahendeore íbu ngoai hene. Uruni ti bibahendeore Kini Nebugadenesahanda mbirale ngolome wabini loma bia ho helole íbu ngoai hene.
DAN 3:3 Ti íbu ngoai halu tigua mbirale ngolome wabini biagonaga buhayagi hondoho hene.
DAN 3:4 Ani hondo ho heagola gabumanenaga bi laga mbirame hongo howa bi laraga halu lalu, Ai wali agali bi tara tara lagaru dindi tara tarani howa hameigini mbira mbira bibahende íbu ngoai ho kamiru-o
DAN 3:5 tígua pilipe ale bigulibi ngida tara tara alerubi bibahende mo bila haruagola tí bibahendeoreme bulu paliai halu ge duli hanga hai halu Kini Nebugadenesahanda agali ale ngolome wabu heledagohondo bi pupu wilimu.
DAN 3:6 Ai mbiralime ge duli hanga halu ngolome wabini ogonihondo bi pupu nawiyagua ogoni ibu ira timbuni poboyogobiore daabo kagoha delo minu bape holeberema, lene.
DAN 3:7 Ani layagola pilipe alebi bigulibi ngida tara tara alebi mo bila hayuago hale howa wali agali dindi bibahende bi tara tara laga hameigini tara tara íbu hearume bulu palialu Kini Nebugadenesa ibugua mbirale ngolome wabini biagohondo bi pupu wiai hene.
DAN 3:8 Babilonoali marume kinihanda, Tí bibahendeore ngolome wabini biagohondo bulu palialu bi pupu wiai halimu, layago hale howa tigua Yuda igiri tebira biaru kini berearia manani helole puwa ogodagua lene.
DAN 3:9 Agali timbuni-o í̠ luore haabo habelo.
DAN 3:10 Kini-o í̠na bi mbira ogodagua lo wirigoni. Ai pilipe aleru bigulibi ngida tara tara alerumebi bi laragola wali agali bibahendeme bulu palialu ge duli hanga howa kinihanda agali ale ngolome wabu helene biagonaga mini yaraga halu bi pupu wilimu.
DAN 3:11 Ai wali agali mbirame ogonidagua nabiyagua ira timbuni dedagoha minu bape halu bo delole larigoni.
DAN 3:12 Anigo Yudali tebira í̠na Babilono dindi handayaho helo helarigo Sadaraga Misaga Abedenego imarume í̠naga bi larigoni mo wahaya. Uruni tigua í̠naga damahondo bi pupu nawiaga hene. Áyubi í̠na agali ale ngolome wabu helarigonaga bulu palialu bi pupubi nawi haya, lene.
DAN 3:13 Ani layagola kini ibugua keba timbuniore howa, Agali tebirali uruni ti i̱ bedoria haru ibule pudaba, lene.
DAN 3:14 Agali tebirali biaru ibiyagola kini ibugua tihondo ogodagua hale hene. Sadaraga Misaga Abedenego imaru-o tígua i̱naga dama kagohondo bi pupu nawiaga kami layane hale haru. Ai áyubi mbirale agali ale ngolome wabu helewagohondo bulu palialu bi pupu nawi kami layago henenebe.
DAN 3:15 Tígua pilipe ale biguli aleru ngida tara tara alerumebi bi layuago hale halu bulu paluwa ngolome wabini ogonihondo bi pupu wilimu larugoni. Anidagua nabirimiyagua nde ira timbuni dedagoha delo minu bape hadaba lolebero. Ani berogola tí pele ngulene mbirali mbira kabe, lene.
DAN 3:16 Ani layagola Sadaraga Misaga Abedenego imarume ladai bialu, Kini-o inahondo bule mandabu wiridagoni bulenego inanaga bi nawi.
DAN 3:17 Iname Ngode Datagaliwabe heneneore kagonaga mini yaraga halu ibu hangu mitangi bialu lotu laga kamagoni. Ai í̠ inahondo bule mandabu ngo laridagua biriyagua nde inanaga Ngode Datagaliwabe ibugua í̠naga hongome ina ira hongohe deledegoha howa yo pialu poloma̱ya biamogo bulebira.
DAN 3:18 Ibugua ina biamogo nabiyagua nde karulape degego iname í̠naga dama kagohondo bi pupu nawuleberama. Ngolome wabini agali ale biagonaga bulu paliabi nabuleberama, lene.
DAN 3:19 Nebugadenesa ibu Sadaraga Misaga Abedenego imarume bi ogonidagua layago hale howa keba timbuniore halu ibunaga dengui daramabu hene. Ani bu howa agali ibunaga biabe bia haga hearuhondo lalu, Ira hongo howa dewaore delalimu, lene. Abale tigua ira nendebu hongo howa ogonidaguaore nadelaga winigo ogoningi dege delene.
DAN 3:20 Ani dalu heagola kini ibunaga ami agali hongohe hearuhondo, Sadaraga Misaga Abedenego imaru pu hongohe wiarume gi geru minu kabu buwa ira timbuni dalu kagoha delo bape halimu, lene.
DAN 3:21 Ani layagola igiri uruni tinaga agaru biaore gi geru minu kabu buwa ira timbuni dalu heagoha bape hene.
DAN 3:22 Kini ibugua ira hongo howaore dewa deladaba layadagua delenego. Ai ami agali biarume Yuda igiri tebirali biaru iraha delo baede hole yalu pialu hemiria ira hungu hegene timbuni do kiaulatagi hayagome dayagola ti homene.
DAN 3:23 Sadaraga Misaga Abedenego imaru ede ira timbuni kilikulu lalu heago dombeniore tinaga gi ge kabu biyaore minu bape hene.
DAN 3:24 Ai Nebugadenesa ibugua hondowa mogo timbuni lalu naina heyu hene. Ani howa agali maru ibu mini bayale talebu mialu mo bogabia haga hearuhondo lalu, Iname agali gi geru minu kabu buwa tebirali ndo bape harimagoda, lene. Ani layagola tigua ibuhondo lalu, Agali timbuni-o ani birimagoni, lene.
DAN 3:25 Ani layagola ibugua lalu, Aniyagua agali mariali ira deago dombeneha ibaga bialu karia hendedogo agua. Pume tinaga gi geru minu kabu birimaruni naheda. Irame ti da nabi kagoni. Agali manego dahuliyali mbira handalehedago, lene.
DAN 3:26 Ira deleagoria Nebugadenesa ibugua haneni pu howa Sadaraga Misaga Abedenego imaru olowa lalu, Tí Ngode Datagaliwabe Daligaore kagonaga biabe bia hagaore henedago tí tagira ibidaba, lene. Ani layagola uru ti ira timbuni deagoha howa tagira ibini.
DAN 3:27 Tagira íbu heagola kininaga biabe bia haga agali timbuni bibahende íbu hearu tigua Yudali tebira biaru irame da nabi hearia hondole kaware ibini. Tigua handalu hemiria tebirali biarunaga mandari agarubi emeneore da nabi howa ira hagua ngubi mbira tiha para naheore hearia hendene.
DAN 3:28 Ani hondowa kini ibugua hongo howa lalu, Áyu iname Sadaraga Misaga Abedenego imarunaga Ngode Datagaliwabe kagonaga mini yaraga hama. Ibugua ibunihondo mitangi bialu mini mbiraore hongohe wialu lotu laga agali tebirali uru biamogo bilonaga dahuliyali mbira ibilayadago. Uruni tigua homolene gi nahe howa i̱naga mana lo wirugo mo wahaya. Tigua dama maru bu karuhondo bi pupu nawiaga howa tininaga Ngode Datagaliwabe kago mitangi bialu mo dunini howa lotu laga kagoni.
DAN 3:29 Áyu Sadaraga Misaga Abedenego imarunaga Ngode Datagaliwabe ibunaga wali agali biamogo biaga kagobi maru tinaga wali agali biamogo biaga naheore. Ai i̱na bi ogodagua lo wero. Wali agalime Ngode Datagaliwabe ogoni mege nabuleore laro. Dindi mbiraha howabi bi tara laga karumebi hameigini tara tara kamiru ariamebi Ngode Datagaliwabe ogonihondo mege birimiyagua ogoni ibu homelo bo budabagabu waholebero. Tinaga dindi andaru heba bo gialobagabu wahalu labu helolebero.
DAN 3:30 Kini ibugua bi lai howa Sadaraga Misaga Abedenego imaruhondo Babilono dindiha biabe ala bialu hayaru nira lowa ai biabe timbuni bilo mo mini.
DAN 4:1 Kini Nebugadenesahanda wali agali dindi bibahendeha hearubi bi tara tara laga hearubi hameigini dindi mbira mbiraha hearubi ti bibahendehondo bi lawia haga bialu lalu, Tí bibahende bayuwaore halimu.
DAN 4:2 Ai áyu Ngode Datagaliwabe Daligaore kagome i̱hondo taraore walia hayago langerogo.
DAN 4:3 Ngode Datagaliwabehanda nahendene alebi agalime nabibehe ngaru tara dewaore walia hayago ibuni hongohe taraore kagoni. Ibuni hangume handame howa kini haaboboore holebira.
DAN 4:4 Ai i̱ Nebugadenesa i̱na andagani hendore bayale biruwa i̱ninaga dabudabu wiruru handalu uruni bayale degeyane hondowa turuho haru.
DAN 4:5 Anigo horo mbiru i̱nime emaga gibi hondowa mogo timbuni laru.
DAN 4:6 Ani hondowa Babilono dindini agali manda timbuniwi hearuhondo emaga ogoninaga irane langidaba laru.
DAN 4:7 Ani larugola agali manda tara tarawi hearu íbu ngoai haya. Ti ibiyagola i̱na emaga handarudagoni irane langidaba lalu hewaria tigua ogoni langibe naheore laya.
DAN 4:8 Ani lo hearia mani Daniele anda ibiya. Daniele mini mende Beledesasa i̱naga dama mbiranaga mini wini. Ai dinini hongohe taraore mbira ibuha hearia hondowa i̱naga emaga hendenedagoni latagiha lowa ogodagua laru.
DAN 4:9 Agali manda timbuniwi bu karunaga haguane Beledesasa-o. Ai dinini hongohe taraore kagome í̠hondo manda bayale ngiyagola mbirale mbira do nahe í̠ manda biai kegoni. Ai i̱na emaga handarudago larogo ogoninaga irane langule hale habe laru.
DAN 4:10 Ai i̱na palia hondo hewaria emaga mbira ogodagua handaru. Dindi bibahende dombeni ira timbuni mbira hearia handaru.
DAN 4:11 Ira ogoni ibu anda howa timbu halu guru luore uyuna hari damindini ela heagola wali agali dindi bibahendeha hearume ira ogoni handai habehe hearia handaru.
DAN 4:12 Ira ogoni ibunaga yuniru bayale mbiri mbarale howa ibunaga liniru dindi bibahendeha ema bialu piagarumebi wali agali bibahendemebi nalu no karulapobehe deane handaru. Nogo gabua tara tara karume ira ogoni teneha ni gumba palu ngoai halu ega bedaru tibi nde ira geha anda bu ngoai haga bialu ema bialu piaga tara tara bedaru tibi bibahendeme tomo ira ogoninaga lini dege nagaya.
DAN 4:13 Ani hondowa dege emaga ogoninaga mitangi bialu hewaria dahuliyali handayaho haga heneyaru aria mbiragome dalipe halu dindiha daliya.
DAN 4:14 Daluwa ibugua bi hongo howa ladaga halu lalu, Ira ogoni podelo dibuwa ginigene bibahende dando wahai halu yuni bibahende gilo wahai habe. Lini dedaruni bibahende do giligololo wahai habe. Nogo tara tara ira ogoni tene gumba kagoha palu ngoai karuni bo talia togolalu ega ira ogoni maganeha bedaruni bo talia togolabe.
DAN 4:15 Ani bialu ira tenedago datani bu kagoria pu seni ege to̱le̱ aeane boronosirume wabini ngagome dariba holene nga. Nogorume datani nagadagua tani karu nelo helowa mbiraga dalu pibiya ibira hararume damilo ani helolene nga.
DAN 4:16 Ibu agali mini nawi howa nogorume dataniru nalu hagadagua tani nalu mali kariaore holebira.
DAN 4:17 Dahuliyali mbirale bibahende ngaru handayaho haga hearume lalu mbirale uruni bibahende anidagua biai helo. Anidagua biragola wali agali karu bibahendeoreme Ngode Datagaliwabe Daligaore henedane hondolebira. Ibugua agali mini lene karubi yagibano karubi ta nabi ibunime kini heloa biraruhondo kini helaga ka, lene.
DAN 4:18 Ani lowa i̱na Danielehondo ogodagua laru. I̱na emaga hendenego langirugonigo ai Beledesasa-o áyu í̠na emaga ogoni irane ogo ale lalu langibelo bedogoni. I̱naga agali manda timbuniwi bogabi karu tigua irane langibe nahe dege bu karudane í̠ langerogoni. Langerogo irane dinini hongohe taraore kagome í̠ha mini giga bulene dewa ngidane hondo kogoni, lalu lamini.
DAN 4:19 Ani layagola Daniele ibugua kinihanda emaga hendenedagoni irane manda biai howa ibugua kinihondo lamule turu nahe hene. Ai kini ibugua lalu, Beledesasa-o emaga ogonime í̠ha genda ngulene nawigo í̠na bu miniha genda nahabe. Agali mendeme i̱naga emaga langulene nahego, layagola Daniel ibugua ladai bialu lalu, Kini-o genda timbuni uruni í̠ha ibilo turu nahe kogoni. Í̠naga waitigi agali karuhaore genda uruni anda pelo hame ledogoni.
DAN 4:20 Ira timbuni mbira mane luniore hari damindini elahe hearia dindi ngaru bibahendeni howa handai haga heane handaridagoni.
DAN 4:21 Ani hearia yuniru bayale howa wali agali dindi bibahende ngaruha howa ira ogoninaga liniru do nole íbu ngoai haga. Ani bialu nogo gabua tara tara karume ira ogoni andane gumba kagoha palu ngoai halu egarume anda bu ngoai hagada.
DAN 4:22 Kini-o ira ogoni í̠ni kegonaga manane ale hayada. Wali agali dindi bibahende karunaga deni í̠ agali mini lene timbuniore howa í̠na dindi bibahendeha haru kegoni.
DAN 4:23 Dahuliyali mbirale handayaho haga heneru aria mbira dahuliya andagaha howa dalialu ibuwa lalu, Ira ogoni diba. Dibuwa ira tene dege datani bu karuni heba helo helabe. Ani helowa aeane boronosirume wabini pu seni timbuni mbirame dariba habe. Ani helowa mbiraga dalu pibiya ibirarume damilo nogoru kadagua mali karia tagira helabe layadagoni.
DAN 4:24 Ai kini-o emaga ogoni irane ogodagua Ngode Datagaliwabe Daligaore kagome mbirale í̠niha mani bule ngagonaga walia haya.
DAN 4:25 Ai í̠ wali agali kagoria howa wara tagi haragola nogo gabua tara tararu heba holebere. Mali kariani nogo bulumaga tigua datani naga ale nalu howa tagira palu kegola dalu pibiyame í̠ damulebira. Ani buwa í̠na Ngode Datagaliwabe Daligaore dindi bibahende ngaru hondo hai kago ibunime kini helonaga hameledago dabo helaga ka manda bulebere.
DAN 4:26 Í̠na hale halu heria dahuliyalime ira tene dindini helo wahabe layadagoni irane ogo. Mani handalu keria í̠na Ngode Datagaliwabe ibu bibahendenaga handame haga kiniore kagoni manda bialu latagi harengi í̠ni lone kini holebere.
DAN 4:27 Ai í̠na lone kini howa bi áyu languleberogo biaore bibe. Í̠ mana ko ngaru nabi wahai howa mini beregedalu mana bayale ngaru bialu howa wali agali karu dara howa ti tumagiho karu biamogo bulene nga. Í̠na ogonidagua bialu hariyagua nde í̠ni bayaleore howa mana í̠na bereruni bayale hai holebira, lalu lamini.
DAN 4:28 Mani Kini Nebugadenesaha Danielehanda ogodagua bulebira layaruni bibahende tagira piai hene.
DAN 4:29 Ai ege homberia (12) hai howa horo mbirangi Nebugadenesa ibu Babilono dindiha ibuni andaga haneni dagia wiagoria ibaga bialu hene.
DAN 4:30 Ani howa ibugua ibuninaga mini yaraga halu lalu, Babilono biagoni tano timbuniore halu mini leneore hayada. Tano ogoni i̱ninaga mini timbuni ngogobi hongo timbuni kogobi wali agali bibahende karuhondo walia hole i̱na wabido, lene.
DAN 4:31 Bi lalu heaore dege dahuliya andaga howa bi mbira layuane hale hene. Bi layuagome lalu, Kini Nebugadenesa-o i̱na bi larogo hale ha. Ai dindi í̠na handaya howa haru kegoni áyu i̱na mo waharogoni.
DAN 4:32 Ani berogola tigua í̠ tinaga kini nahabelo wara tagi haragola í̠ nogo gabua tara tara karu heba hole polebere. Ani howa mali kariani nogo bulumaga karume datani nalu kadagua í̠bi datani nalu holebere. Ani dege howa í̠na Ngode Datagaliwabe Daligaore kago ibugua wali agali bibahende haru hai hagaore henedane hondolebere. Ibuninaga hameme agali mbira kini heloa birago helaga kagoni manda bulebere, layuane hale hene.
DAN 4:33 Ani leagola bi layuagome, Kini Nebugadenesa í̠ ogodagua bulebira, layadagua biai hene. Wali agali bu hearume ti heagoha kini nahelo bo batagi haya handala puwa nogo bulumagarume datani nalu hagadagua datani nalu hene. Ani nalu heagola mbiraga iba dalu pibiya ibiyarume kini biago damigi biyagola mandari ibalu ega boda hariawe bedarunaga irini haradagua bini. Ani bialu gi gibaru íbu dege bialu luni ega ge giba ale ibini.
DAN 4:34 Nebugadenesa ibugua lalu, Ani hewane mali karia piai hayagola i̱nime hari daligaha handa daga halu hewaria i̱naga mini lone bayale tigabi ibiya. Ani biyagola i̱na turu timbuniore halu Ngode Datagaliwabe Daligaore kagoni manda buwa ibunaga mini yaraga halu kogoni. Ngode Datagaliwabe ibu kiniore haluhe haaboboore haga kagoni laro.
DAN 4:35 Ibugua dindini wali agali karunime mbirale mbira bibe nahedane hendeda. Dahuliya andagaha dahuliyali karubi wali agali dindini karubi bibahende ibugua handayaho haga howa mbirale bule ngago mbiralime hapai halu nabibe labe nahe ka. Agali mbirame í̠na agile bule kebe lalubi mbira hale habe nahe dege kagoni, lene.
DAN 4:36 Ani lowa lalu, Ai bi ogoni lai hewagola i̱naga mini bayale lone wia dai biyagola i̱ni hongo halu dindi abale i̱ni handayaho haga biaru lone handayaho haru. I̱na agali haguane helo dabo helene biarubi i̱naga agali mini bogabi biarubi ti lone i̱ni heba mandagi hole dai biya. Ani biyagola i̱ kini timbuniore mini lene abale harugobi ndo áyu bolangua howa daligaore haru.
DAN 4:37 Áyu Nebugadenesa i̱na turu timbuni howa Dahuliya andagaha Kini kago ibuninaga mini yaraga halu ibu timbuni mini leneore ka laro. Ibugua biagaru bibahende bayale tigabi dege biaga howa agali marume tininaga mini yaraga halu karu ibugua ti bope haga ka, lalu Nebugadenesahanda lene.
DAN 5:1 Babilono dindini agali mbira mini Belesasa ibu kini howa ibugua tomo timbuniore dawawa ibunaga agali haguaneru dewaore daosini mbira (1,000) bibahende íbu ngoai howa tomo waini ibarubi nalu berene.
DAN 5:2 Ani nalu biruwa Kini Belesasahanda ibunaga biabe bia haga agali hearuhondo lalu, Gabo be ngolo silibarume wabini wiaru mo yalu ibidaba, lene. Gabo be uruni Yarusalemeni Ngode Datagaliwabenaga andaha wiagani wini. Ibu aba Nebugadenesahanda Babilono dindiha mo yalu íbu winigo odaruni, Mo yalu ibidaba, lene. Kinihanda ibunaga agali haguane biarubi ibu one henene berenerubi ibu one dege halu mende berenerubi ti bibahende gabo be uruniha waini iba hambialu nole lowa, Mo yalu ibidaba, lene.
DAN 5:3 Ani layagola agali biabe bia haga biarume gabo be ngolome wabiniru mo yalu ibiyagola wali agali uruni tigua gabo be uruniha waini iba hambuwa nalu berene.
DAN 5:4 Ti waini iba nalu biruwa tinaga dama laga ngolomebi silibamebi aeanemebi iramebi wabigi bini wiarunaga mini yaraga halu berene.
DAN 5:5 Ani bialu beremiria tamu hobane ti bereagoha lamu haleme wá hongoheore deagoria gi mbira aube tobane pana howa anda háini bi mbira ona gili biyaria hendene.
DAN 5:6 Kini ibugua ani hondowa ibuni mogo lowa ibunaga dengui mo tara halu hongo holene biba howa ibunaga kuni bibahende durula gimbu bini.
DAN 5:7 Ani biyago hondowa kini ibugua agali manda timbunibi hearubi agali de gandeba handaga hearubi bibahende olowa, Íbu ngoai hadaba, lene. Ai ti íbu ngoai heagola kini ibugua tihondo lalu, Agali mbirame bi amu gilibu ngagoni irane ogo aleda lalu latagi hayagua nde i̱na agali ogoni ibu aga tagalitayabi bayale kini ibuni biaga ngago mo karula holebero. Ani buwa ibunaga mani magagua pu seni bayale ngolome wabini kininaga ngagobi mo karula holebero. Ani bialu wali agali maru karunaga deni agali ogoni ibu mini lene timbuniore halu ibu i̱naga gabumane haru haga haguane tebone helolebero, lene.
DAN 5:8 Kini ibugua ani layagola agali timbuni biarume bi gilibu wiago mbira dagalabe nahe howa kini biagohondo galone latagi habe nahe hene.
DAN 5:9 Ani biyago hondowa Kini Belesasa ibu genda timbuniore howa ibunaga dengui mo tara hayagola agali haguane biaru tigua mbirale mbira bibe naheoreyagola tibi genda timbuni ho hene.
DAN 5:10 Ai kini ai̱ya ibu hale halu hearia kinibi ibunaga agali haguane biarubi tigua bi timbuni pu dagadaga biayuago hale howa abaleore anda hobane kini heba tomo nalu bereagoha anda pene. Anda puwa lalu, Kini-o í̠ luore haabo habelo. Áyu nagalone emene bame o biyadagonime í̠naga bu miniha genda nahabe.
DAN 5:11 I̱na bi larogo hale ha. Agali mbira dinini tara hongohe heagome mini wulene dewa talebu miyagola miniru gigabiorewi í̠naga dindiha kagoni. Abale í̠ aba ibu kini heangi agali manda timbuni bialu mini gigabiwi ogoni dinini bu kago bidane hondowa ibu hondo pugu biaga henego kagoni. Ani heago hondowa í̠ aba Kini Nebugadenesa ibugua agali ogoni ibu agali manda timbunibi hearubi de gandeba handaga bu hearubi bibahende hearunaga haguane ibu helo dabo helenego ka. Í̠ aba ibugua ogonidagua binidagoni.
DAN 5:12 Irane agali ogoni ibunaga manda timbuni taraore howa emaga hendenerunaga iranebi bi manane lagarunagabi mbirale wia do hene ngarubi bibahende ogo aleore lalu lai hagago ka. Ai Kini Nebugadenesa ibugua agali Daniele ogoni ibu mini Beledesasa wialu dabo helenego kagohondo bi lawia halu ibabe labe. Ibalu ibugua anda háini bi gilibu wiyadaruni ogo ale lalu langulebirago langilo íbu labe, lene.
DAN 5:13 Ai tigua Daniele haru ibuwa kininaga wanakuini íbu helene. Ani íbu heagola kinihanda lalu, Yuda agali Daniele ka layago í̠be. I̱ aba Kini Nebugadenesa ibugua Yuda agali haru ibiniyaru aria mbira í̠ kegonida.
DAN 5:14 I̱na hale halu hewaria dinini tara bu kagome mini dingi dangia lolene í̠ha wia heagola í̠naga mandaore daliga nge layane hale haru.
DAN 5:15 Ai i̱naga agali manda timbuniwi hearu bibahende ibai hadaba lowa bi amu anda háini gilibu ngagoni daga ladaba lalu hewaria tigua daga labe nahe haya.
DAN 5:16 Agali marume i̱hondo lalu, Í̠na bi tara tara ngarunaga irane latagi halu mbirale wia do karu handa walia hagaore ke layane hale haru. Ainde í̠na bi amu gilibu ngagoni latagi hariyagua nde i̱na aga tagalitayabi kininaga ngago í̠ mo karula halu magagua pu seni ngolome wabini ngago í̠naga mani wia halu bulebero. Ani berogola wali agali bibahendenaga deni í̠ agali mini lene timbuniore i̱naga gabumane haru haga haguane tebone í̠ helolebero, lene.
DAN 5:17 Ani layagola Danielehanda ladai bialu lalu, Í̠naga yári dabudabu bayale uruni agali maru karu í̠na mua biyagua nde mibelo. I̱na yári dabudabu bayale uruni mo ya nabulebero. Anigo kini-o bi gilibu wiyadago dagalalu ogoninaga irane dege languliya.
DAN 5:18 Ai hale ha. Í̠ aba Nebugadenesa ibu Ngode Datagaliwabe Daligaore kagome kini timbuni hongoheore helene. Ani helayagola ibu agali timbuni bibahende hearu dindiha lowa ibu daligaore bolangua hai hene mbira helene.
DAN 5:19 Ibu hongoheore heagola wali agali dindi bibahendeha hearubi hameigini bi tara tara lagalaga hearubi tigua ibu hondowa mogo timbuni lowa duru lagalaga bialu hene. Ani howa ibugua agali mbirago bo wahoa biyagua ogoni homelo bo wahaga hene. Agali mbirago bo wanahe helo wahoa biyagua nde helo wahaga hene. Ibugua dege agali mbiralinaga mini mo yaraga hoa biyagua nde agali ogoninaga mini yaraga haga. Agali mbirago warape halu mo ko hoa biyagua nde ani biaga hene.
DAN 5:20 Ani biaga henego ibunime manda bialu ibu gibiore kobe toba howa mana ko wiaru bialu mine halu hearia Ngode Datagaliwabehanda ibu bope halu kini hayagoni bo duguini.
DAN 5:21 Ngode Datagaliwabehanda ibunaga mini mo nogo ale helayagola wali agalime ibu wara tagi hene. Ani biyagola ibuni nogo dongi gabuaru baba dataniru naga bialu nogo bulumaga haradagua bini. Mbiraga dalu pibiya ibiyarume ibu damigi bini. Mani howa ibugua Ngode Datagaliwabe Daligaore kagome wali agali bibahende handaya ho haga heneda lalu handa walia halu ibunime agali mbiraligo kini heloa biyagua kini helaga heneyane handa walia hene.
DAN 5:22 Ai í̠bi nde Nebugadenesa igini kego í̠na uru bibahende manda biai ho kegoni. Ani manda buwa í̠ni mo dindiha nahole haabo kegonida.
DAN 5:23 Ani bialu howa dege í̠na Anduane Homogo dahuliya andaga kago mo dindiha halu í̠ni hangunaga mini yaraga halu kegoni. Agali í̠naga biabe biaga hearuhondo Ngode Datagaliwabenaga anda wini í̠ aba ibugua mo yalu ibini wiyaru yalu ibidaba lowa í̠naga agali haguane hearubi í̠ one henene berenerubi í̠ one dege halu mende berenerubi uruni baba waini iba gabo uruniha howa nalu kami. Anidagua nalu howa tígua dama mitangi bialu mbirale agali gime ngoloru silibaru boronosiru aeaneru iraru ege to̱le̱rume wabini wiarunaga mini yaraga halu kamigoni. Ainde dama mitangi bialu gime wabini urunime de nahandaga bi hale nahaga minibi heba nawialu nawiore ngagoni. Ngode Datagaliwabe ibuni hangume í̠ bayale habelo handayaho howa í̠na bialu keruni bibahendeore ibunime handayaho hai ka. Ani helowa í̠na ibunaga mini yaraga nahaga kegoni.
DAN 5:24 Ani bialu kegonaga Ngode Datagaliwabe ibugua gi ogoni ibilowa bi ogoni gili biyada.
DAN 5:25 Bi ogoni ogobi gilibu wiya. Mene Mene inanaga bi lalu Dagala Dagala. Tegele inanaga bi lalu Genda Magi Manda. Ubasini inanaga bi lalu Tu Waki.
DAN 5:26 Dagalamaro layadagoni irane ogodagua. Ai Ngode Datagaliwabe ibunime í̠ dindi ogoria í̠na kini howa horo ogodagua holebere lalu dagalo winigo maro bira.
DAN 5:27 Genda magi manda layadago irane ogo. Ngode Datagaliwabe ibugua mana í̠na bini wiru genda magi handalu hearia í̠na mana bayale mbira nabiagaore hearia handaya.
DAN 5:28 Tu waki gilibu wiyadagoninaga irane ogodagua. Dindi í̠naga ngegoni Ngode Datagaliwabehanda tu waki howa hobane mbiraha Midialiru ti tu wa mialu hobane mendeha Pesialiru tu wa mulebira, lalu Danielehanda lamini.
DAN 5:29 Kini Belesasa ibugua bi ogonidagua layago hale howa agali bu hearuhondo kininaga aga tagalitayabi bayale wiagobi magagua ngolome wabini wiagobi Daniele mo karula hadaba lowa kini ibugua ibunaga gabumane haru haga haguane tebone Daniele ibu helo dabo helene.
DAN 5:30 Ani bialu hearia dege ogoningi mbiraga Midiali hearume wai anda ibalu Babilono dindi haru haga Kini Belesasa bo homelene.
DAN 5:31 Ani buwa Midia dindinaga Kini Dariusi ibuni ibalu Babilono dindi haru howa kini hene. Dariusi ibu ai̱yahanda taba henenegoria howa mali henego lamaga howa mali pira waragariani kira (62) hayagola ibugua Babilono dindi pigane karulowa haru haga kini hene.
DAN 6:1 Dariusi ibu kini howa agali handari mbirani pira kira (120) ibunaga dindi hobane mbira mbira wiaru haru helonaga dabo helene.
DAN 6:2 Ani helowa Daniele halu agali kiralibi tigua agali haguane biaru haru halu kininaga biabe bulene wiaru bibahende handayaho hai helo dabo helene.
DAN 6:3 Ani dabo helenego kini ibugua handalu hearia Danielehanda biabe biyaru bibahende bayaleore halu agali dabene bibahende biarubi haguane kirali ibula biabe mandagi biaga biago labobi bolangua howa biyago hendene. Ani heago hondowa kini ibugua dindi bibahende handayaho haga agali haguane Daniele ibu helo dabo helole manda bini.
DAN 6:4 Ani manda bialu hearia agali haguane biarubi agali Danielela biabe mandagi biaga kirali biago labomebi tigua ogonidagua bilo hame nale hene. Ani howa tigua Daniele ibu ko mbira biya lowa manani ibu helonaga hariga taya bialu hene. Ani bialu hemiria Daniele ibu agali tigabiore howa ibugua biabe tigabi hangu bialu heagola tigua ibu ko mbira biya labe nahe hene. Ibu ke̱ nahaga howa mana tigabi ngaru hangu biaga hene.
DAN 6:5 Ani heagola tini hangu lo manda bialu lalu, Ibugua ko mbira handa nabi kamagonidago. Ainde ibunaga Ngode Datagaliwabe kagonaga mana biaga ngagohayagi dege iname hariga taya buwa ibu manani íbu helami̱ya, lene.
DAN 6:6 Bi ogonidagua lo ngelalu tigua kini berearia puwa ogodagua lene. Kini Dariusi-o í̠ luore haabo habelo.
DAN 6:7 Ai í̠naga biabe biaga agali haguanerubi agali haguane dindi hobane mbira mbira ngaru haru haga bibahende kamarubi ina bibahendeme lo mbiraore halu í̠na mana hongoheore mbira wabibelo hamelo kamagoni. Mana ogoni ogodagua lolene nga. Wali agali bibahendeoreme horo pira tebirani (30) dama mbirahondobi agali mbirahondobi ibunaga mini yaraga halu bi pupu wulene nawi. Kini í̠ninaga mini hangu yaraga halu bi pupu wulene nga labe. Ani ledegola wali agali mbirame bi ogoni mo wahayagua ogoni ibu budi ale gabua laiono timbuni kagoha minu bape hami̱ya, lene.
DAN 6:8 Ani lowa lalu, Kini-o ai bi ogoni mana wilo bebani gilibu wuwa manaore wialu mo hongo helonaga í̠ninaga mini beba ogoriani gili bibe. Ani bidegola wali agali bibahendeme mana ogoni talialu bulebirago bilo. Mana ogoni dindi timbini Midia bibahendehabi Pesia bibahendeha karumebi talialu biai holene nga. Mendeali mbira mana ogoni mo iri ari bulene naheore, lene.
DAN 6:9 Ani larimigola Kini Dariusihanda mana ogonidagua bebani gili bidaba lowa gilibu wiagola bi ogoni karulape lalu beba ogoriani ibuninaga mini gili bini.
DAN 6:10 Daniele ibugua bi ogoni hale halu ibuni andaga pene. Puwa andaga ogoniha hobane mbira daliga henegoha puwa windo Yarusaleme handa amu howa heagoria duli hanga ho biruwa Ngode Datagaliwabehondo horo bibahendengi bi laga winidagua lalu berene. Ibugua horo mbirani Ngode Datagaliwabehondo bi halu tebira laga wini.
DAN 6:11 Ai emene howa agali haguane biarume Daniele andaga pialu hemiria Daniele ibu ibunaga Ngode Datagaliwabehondo bi lalu berearia handa walia hene.
DAN 6:12 Ani hondowa tigua kini berearia puwa lalu, Kini-o í̠na horo pira tebirani (30) wali agali bibahendeoreme í̠ni hangu mitangi bialu hale holene nga. Wali agali mbirame ogonidagua nabi howa dama mbirahondobi agali mbirahondobi bi lalu heagua ogoni ibu gundu uli budi ale gabua laiono timbuni kagoha minu bape hole larigoni, lene. Ani layagola kinihanda lalu, Bi ogoni henene. Mana hongoheore ogoni ina Pesia wali agalibi Midia wali agali bibahendenaga ngago mbiralime mo iri ari bulene nawiore, lene.
DAN 6:13 Ani layagola tigua kinihondo lalu, Yudali Daniele biagome í̠na bi larigo mo wahowa mana biago talialu nabi hea. Ibunaga Ngode Datagaliwabehondo horo mbirani halu tebira bi laga biagaya, lene.
DAN 6:14 Ani layago hale halu kini ibu miniha genda timbuni howa Danieleore biamogo bule lowa hariga tai bini. Mitangi dege bialu bereane alendo hayagola ibugua hariga bayale mbira handa walia nahe dege hene.
DAN 6:15 Alendo hayagola agali haguane biarume kini berearia lone dai buwa lalu, Kini-o ina Midiali Pesialirumebi biagane mana wirimagoni í̠ manda bide. Kini ibugua mana mbira wabu wiyagua mana ogoni mo aribia nahaga wiyagoni ndobe, lene.
DAN 6:16 Ani layagola kinihanda lalu, Daniele laiono haga gundu uli ngagoha minu bape hole pudaba, lene. Ani lowa kini ibugua Danielehondo lalu, Ngode Datagaliwabe í̠nime horo bibahendengi ibuhondo bi laabo halu mini mbiraore wiriligoni ibunime í̠ biamogo bilo, lene.
DAN 6:17 Tigua Daniele gundu uli biagoha minu bape howa to̱le̱ timbuni mbira uli biagoha panga paya anda hene. Paya anda howa wali agalime Daniele biamogo bulilono kinibi ibunaga agali haguane hearubi tigua hada bu ngelene.
DAN 6:18 Ani bu ngelalu kini ibu andaga pene. Horo ogoningi mbiraga kini ibu tomo nolenebi u paluenebi wahai howa napale hene. Wali agali maru ibu mo turu hagabu birule ibidaba laga winiru ibilo onale wahalu ibu mbiraha nape yange yangebu wiaho wini.
DAN 6:19 Egabi layagola egerebagiore panga dugu wahalu abaleore unu gundu uli biago wiagoria pole pene.
DAN 6:20 Pu howa ibugua bi hongo howa olowa lalu, Ngode Datagaliwabe haluhe kagonaga biabe biahaga Daniele-o Ngode Datagaliwabe í̠na horo bibahendengi ibuhondo bi laabo halu mini mbiraore hongo howa wialu hariligoni ibugua laiono biarume í̠ bo nane wahelo biamogo biyabe, lene.
DAN 6:21 Ani layagola Danielehanda uliha biruwa bi ladaga halu lalu, Kini-o í̠ luore haabo habelo, lene.
DAN 6:22 Ani lowa lalu, Ngode Datagaliwabe ibunime ibunaga dahuliyali mbira ibugua laionome i̱ bo nanelo tinaga ne hariga mo hangai helo ibilayagola tigua i̱ balu nane o kogoni. I̱na í̠hondo ko mbira nabi halu ko bulene mana mbira para nahe hewago hondowa ibugua i̱ baya hanguore handayaho haya, lene.
DAN 6:23 Ani layagola kinihanda turu timbuniore howa agali bu hearuhondo, Daniele iraga helo yamidaba, lene. Tagira ibiyagola tigua handalu hearia Daniele ibu Ngode Datagaliwabe yu tiga bialu mini mbiraore hongohe wu heagome laiono biarume ibu bo nane wahalu ibunaga tingini motudu emeneorebi mbira nawiore heago hendene.
DAN 6:24 Ani hondowa kinihanda lalu, Agali Daniele homelo ndelaga biarubi uruni tinaga one waneigini bibahendebi haru ibuwa laiono gabua haga biagoha minu bape hai hadaba, lene. Ani minu bape hayagola laiono biarume wali agali uruni ibira nahe wene ibalu heaore dege porabu daga howa abale minu lerela migimigi bialu no garere bu wahene.
DAN 6:25 Ani buwa Kini Dariusi ibugua beba gili bialu dindi tara tara wiaru bibahendeha wali agali hearubi tara tara laga biaga hearubi hameigini mbira mbira hearu bibahendeha bi ogodagua gilibu pelene. Ai tíore bayuwa halimu.
DAN 6:26 Wali agali i̱na handayaho kogoha kamiru tígua bi ogo hale hadaba. Tí bibahendeoreme Danielenaga Ngode Datagaliwabe haluhe haabo haga kagonaga mini yaraga halu ibunaga andaneha haabo halimu. Ngode Datagaliwabe ogoni ibu haabo haga howa haru haga kini hongo haihe haaboboore holebira. Ibunaga hongo ibira nahe haho wiaga kagoni.
DAN 6:27 Ani howa ibunaga wali agali heneruha mo ko holene mbira anda ibiragola ibunime abale mo wahaga ka. Ibugua dahuliya andagahabi dindihabi biabe hongohe nahendene ale ngaru biai haga ka. Ai Ngode Datagaliwabe ogoni ibugua laionome Daniele balu nolilono baya hangu handayaho hayadagoni, lalu gilibu wini.
DAN 6:28 Dariusi ibugua kini heangibi Pesiali Sairusi ibu kini heangibi Daniele ibu bayaleore howa agali timbuni mini lene haabo hene.
DAN 7:1 Belesasa ibu Babilononaga kini howa mali mbira piyagola Daniele i̱na mbiraga mbirungi mbirale emaga mbira handaru. Ani hondowa i̱na emaga ogoninaga te mbuga mbirani ogodagua gilibu wiru.
DAN 7:2 Mbirungi puyabu bibahendeha howa pulame hayagola iba solowara bereago puyabume pulo tangubaga biyane handaru.
DAN 7:3 Ani hondo hewaria nogo tara tara ale maria iba biagoha howa irigi halu tagira ibiyane handaru.
DAN 7:4 Mbirago ibu budi ale timbuni gabua laiono aleni howa ibunaga babagane ega bodo hariawe alenaga hearia handaru. Ani handaya howa dege hewaria mbiralime ibunaga babagane heago podo wahayagola ai agali hagadagua dindini geme heyu haya. Ani heagola ibu agalinaga mini wiaga ale wilo miya.
DAN 7:5 Ani hondowa dege nogo ale mende handalu hewaria ibu biango dudu ale timbuni mbira mini bea laga bedago ogoni agali haradagua naina geme heyu heane handaru. Biango ale bea ogoni ibugua nogonaga kuabene kuni be tebira ibunaga ne harigaha hayaho heane handaru. Ani yu heagola bi mbirame lalu, Ai mbirini nendebu nabe, layuane hale haru.
DAN 7:6 Ogoni hale howa hayahe hewaria nogo tara ale tebone budi ale dege gabua timbuni mbira mini lebadi kago ogoni ale mbira naina íbu heane handaru. Ogoni ibunaga erembirani babagane mariaheyago lina egame yagalalu pialu haradaguabi howa ibunaga haguanebi maria dege heane handaru. Odagoni ibugua mbirale wiaru bibahendeore haru helonaga hongo yu heane handaru.
DAN 7:7 Ani handaho wiwane dege ai nogo tara ale mane ha pani haya. Ogoni ibu gibi hiriribioreni denguiru handabe nahe hongo taraheni ibunaga neru aeane nehe hiriribi heagome mbirale wiaruni bibahende no dangialo ba a̱i̱ hayane handaru. Nai howa hingiluni ibira hayago geme hengedo wahaya. Nogo tara ale ogoni ibu maru biaru ale ndo ibunaga embone haguaneni ne gayane pira hearia handaru.
DAN 7:8 Ai nogo tara ale ogoni ibunaga haguaneni ne gayane pira hayadagoni handayaho hewaria dege ne gayane emene ko mbira odaruni hengeneha tagira ibiya. Emene ogoni ibugua abale pira hayago aria tebira dugu wahaya. Ai emene biago ibuni agalinaga dengui heane handaru. Ani howa ai ibu mine halu ibuninaga mini yaraga halu haya.
DAN 7:9 Ai emaga dege handalu hewaria kininaga biragane dagiaru mo yalu ibuwa naina ngelaya. Ani wiagoria mbirali haluhe haabo hene kago ibalu dagia mbira wiagoriani biraya. Agali odagoni ibunaga aga biago pele dege lalu hari beraliba ale howa ibunaga mandaribi nde peleore lalu nogo sibinaga irini aleyago naina íbu biraya. Kininaga biragane dagia ogoni garo ge aleheyago ai dagia ogoni ira hungu degeme mabu bupehe howa
DAN 7:10 ira hungu hegeneme uyuna kikiaula tagi tagi biya. Ani biyagola wali agali daosini dewaore agali ogoninaga biabe bia halu heagola wali agali daga labe nahe milini dewaore haparaparabu heago handaru. Ani howa marume godi lolenaga beba mbuga yiniyaru angalalu hearia handaru.
DAN 7:11 Ani handalu hewaria ne gayane emene ko nogo tara ale mane biagonaga haguaneni hayagome mine dege haabo halu ibuninaga mini yaraga halu balagala hayuane hale haru. Ani bialu heaore nogo tara ale mane biago balu iraha delaya. Ibunaga ne gayane biaru heba iraha bape hayagola do gindulo wahaya.
DAN 7:12 Ani buwa nogo tara ale maru tebira biarunaga hongo holene mo wahayagola tigua handayaho howa haru haga biaru yu wahaya. Ani buwa uruni ti abale homelo bo wa nahe emene tigi mbira hangu helowa haya.
DAN 7:13 Emaga handarudangi dege handalu hewaria agali mbira ina agali henene dindini kamaruni ale dege heane handaru. Agali ogoni ibu hari beralibaha howa i̱ hewagoria ibule ibiya. Ani ibiyagola tigua mbirali haluhe haabo hene biago berearia ibu haru halu piya.
DAN 7:14 Ani biyagola mbirali haluhe haabo hene biago ibugua agali ogoni ibu agali mini lene handame haga kini helo dabo helaya. Agali ogoni ibu kini haho wiaabo kagola mani agali mendeme ibu henegoria ho aribia naholebira. Ani kagola wali agali dindi bibahendeha howabi bi tara tara laga karubi hameigini tara tara bu karunibi bibahende agali kini mbiraore ogoni ibunaga andaneha íbu hai holebiragonaga emaga ogoni handaru, lene.
DAN 7:15 Ai i̱na emaga ogoni hondowa mogo timbuni lalu mini dege dindiho haru.
DAN 7:16 Ani howa i̱na kini biraga dagia wiagoria agali bu hearu aria mbira heagohondo, Emaga ogoninaga irane langi laru. Ani larugola ibugua lalu,
DAN 7:17 Ai nogo tara tara ale hongo holenehe maria uruni dindi hongohe maria wulebirago handarigoni.
DAN 7:18 Anigo mani Ngode Datagaliwabe Daligaore kago ibuninaga wali agalirume handame haga kininaga hongo holene yu howa ani haabobo holebira, lalu langiya.
DAN 7:19 Ani layago hale howa dege i̱na nogo tara ale mane hiriribi gi te̱le̱ aube tobahe biagonaga irane baya hangu manda bule hamelaru. Ogoni ibunaga ne aeane howa ibunaga ge gibaru ege to̱le̱ boronosime wabini hearia handaru. Ogoni ibugua mbirale bibahende wiaru no gindulo wahalu hingiluni ibira hayaru geme hengedo wahalu himu helaya.
DAN 7:20 Ani bialu ibunaga haguaneni ne gayane pira hayarubi ne emene mbira mani anda howa ne tebira ala hene biaru dugu wahalu ibu agalinaga dengui howa mine halu ibuninaga mini yaraga halu hayago o biagobi handarugonaga irane manda bua haru. Ne maru hayarunaga ina gi emene harugo ai nigoni ibu hondowa gi timbuniore haru.
DAN 7:21 I̱na handalu hewaria ne gayane emene ko ogoni ibugua mine howa Ngode Datagaliwabenaga wali agali hearu baba wai bialu ibu wayali haya.
DAN 7:22 Ani bialu hearia mbirali haluhe haabo hene biagome ibalu ne gayane emene denguihe ogoni manani godi lole íbu helowa ibugua ne ogonihondo lalu, Ngode Datagaliwabe Daligaore kagonaga wali agali karu mo ko halu mana yoleore bialu harigoni, laya. Ai Ngode Datagaliwabenaga wali agali uruni tigua handame haga kininaga hongo holene yu holenengi kaware íbu ngagoni, laya.
DAN 7:23 Ai agali i̱na hale harugo ibugua ladai bialu ogodagua laya. Emaga ogoninaga irane ogo. Nogo tara ale mane hongo holenewi handaridagoni ibu dindi kini timbuni mbiraha wulebirago. Dindi ogoni ibu maru ngarubi ndo wali agali ogoniha karu koore holebira. Ani howa tigua wali agali dindi bibahendeni karu baba wai timbu bialu dindi wayali howa bo podalu hongoheore holebira.
DAN 7:24 Ne pira hayadaruni agali kini pira dindi ogoria holebiraru handarida. Mani kini mbira holebirago ibu kini maru bu karunibi ndo ibu taraore howa kini tebira bope holebira.
DAN 7:25 Kini ogoni ibugua Ngode Datagaliwabe Daligaore kagohondo bi ko lalu ibunaga wali agali karu mo ko halu holebira. Kini ogoni ibugua lotunaga lolene ngarubi horo timbuningi lotunaga mana bibahende bulene ngarubi mo iri ari bua howa ibugua Ngode Datagaliwabenaga wali agali karu mali tebirani ege waragaria agima haru holebira.
DAN 7:26 Horo uruni piai kagola Ngode Datagaliwabehanda godi lalu agali ogoni ibunaga hongo bope howa mo koore halu bo gialobaga bulebira.
DAN 7:27 Ani buwa Ngode Datagaliwabe Daligaore kagome kini bibahendenaga hongo timbuni yu hayaruni ibunaga wali agali karuhondo miragola ti yu holebira. Ani biragola tigua haru haga kini haabobo kagola wali agali dindi bibahendeha karume Ngode Datagaliwabenaga wali agali karu tinaga bi hale halu ti andaneha hai holebira, lalu langiya.
DAN 7:28 Ai Daniele i̱na emaga mbira gibiore ogoni hondowa mogo lalu gi timbuni howa uruni bibahende miniha yu haru, lalu Danielehanda lene.
DAN 8:1 Mali tebira Belesasa ibu kini heagola i̱na emaga mende handarugo ogobi.
DAN 8:2 I̱ abale puwa Elama dindiha tano Susa wiagonaga pabe tamuha anda puwa Ulai iba pedago angeni pu haruyane handaru.
DAN 8:3 Ogoriani pu howa handalu hewaria nogo sibi wangabe mbira iba angeni hearia handaru. Nogo sibi ogoni ibunaga haguaneni ne gayane luni kira howa mendego ibu emene mani heneyago ogoni ibu luniore heane handaru.
DAN 8:4 Ani handayaho hewaria nogo sibi ogoni ibugua ma buli halu gerai puwa mbirale wiaruni bibahende bai hayane handaru. Nogo ogoni ibu gerai lalu amu ni paliragohayagibi unurayagi uyurayagibi ibugua gerai lalu piai haya. Nogo tara tara karu bibahendeoreme ibu napelo hapai habe naheore howa marumebi nde ibu handalu ibida pobe nahe haya. Ani bialu ibu hongo taraore howa ibunime hame leadagua bialu hea.
DAN 8:5 Ani hondowa i̱na ogoni irane agiledabe manda bialu hewaore dege nogo meme wangabe mbira amu ni paliragoha howa gerai lalu ibiya. Gerai gibi lalu ibiyagoni dindini ge nahe aube tobane ibiya. Nogo ogoni ibunaga haguaneni ne gayane timbuni mbiraore hangu de kiranaga hengene wiagoria anda hatagi heneya.
DAN 8:6 Ai meme ogonime nogo sibi wangabe mbira iba ange biagoria heago hondowa ogoni hondo yalu abale gerai tungu laya.
DAN 8:7 Ani puwa ibugua hongo taraore howa nogo sibi biagonaga ne kira biago bo gaibu wahayagola nogo sibi biago ibugua gungu bia dai bibe nahe haya. Ani beagola meme biagome hongo taraore howa nogo sibi biago dindini bo hengedape howa lerelo yu ibagabu wahaya. Ani bialu heagola nogo sibi ogoni biamogo bulene mbirali naheya.
DAN 8:8 Ai nogo meme biago ibu hongohe howa mine taraore haya. Ani bialu howa hongo timbuniore halu hearia ibunaga ne gayane biago gaibu wahaya. Ani biyagola ne mbiraore ala hene biagoria ne maria anda ho aribia haya. Ne mani ha aribia hayadaruni ti ala hayagobi ndo timbuniore haya. Ti ani howa mbirago ibugua uyurahayagi handa uyu howa heagola mendego ibugua unurahayagi handa unu howa hea. Tebonego ibugua amu ni ibiragoha handa amu howa halu manego ibugua ni paliragoha handa dai buwa heane handaru.
DAN 8:9 Ne maria hayadaruni mbiranaga parane mbira anda howa ibugua hongo taraore halu wali agali unugohayagi hearubi amu ni tagira ibiragohayagi hearubi bibahende bope hai halu dindi Ngode Datagaliwabehanda ibunaga wali agaliru minigo biagobi bope haya.
DAN 8:10 Ani bialu ne biagome hongo timbuniore howa dahuliya andagaha ami dewa yakundi tini heneyago uruni ti baba wai bibehe hayagola wai bialu hemiria ne biago ibugua yakundi biaru maru dindini bope howa hengedo mbaralo wahaya.
DAN 8:11 Ani buwa dahuliya andaganaga ami hearunaga kini heagobi bope hole wai bialu haya. Ani bialu howa kini ogoni ibuhondo horo bibahendeni mbirale mbira bo lomabu delagane wiago ne biagome mo wahaya. Ani buwa ibugua wali agalirume Ngode Datagaliwabe mitangi bialu lotu lole mo ngoai haga anda heagobi mo mebia haya.
DAN 8:12 Wali agalime mana ko wiaru biyagome ne biago ibu hongo hayagola dahuliya andaganaga ami hearu bope halu horo bibahendengi mbirale bo lomabu delaga mana henene wiaru mo mebia hai haya. Ngode Datagaliwabenaga bi bibahende heneneore lowini ngaru wali agalime talialu nabilo lowa ne ogoni ibugua bi ogoni mo nagalone halu wali agalime hale howa talialu bulilono mo wahaya. Ani bialu howa ibunime buabiya alego bibahende biai halu haya.
DAN 8:13 Anigo i̱na dahuliyali mbirame bi lalu heagola mendeali heagome hale halu ogodagua layuane hale haru. Áyu mbirale koorene kome mo mebia ho ngaruni angi howa ereba holobadabe. Agongi howa wali agalime Ngode Datagaliwabehondo bo lomabu mulene dai bulubadabe. Mana ko mbirale bibahende mo mebia haga ngarubi biba halu ne ogoni ibugua ibunaga anda mo mebia haga bialu nabilobi dahuliya andaga ami karu dindini bope halu geme hengedowa nahelobi ibunaga hongo angi ibira holobadabe, layuane hale haru.
DAN 8:14 Ani hale hayagola dahuliyali bi lalu hayadago ibugua i̱hondo lalu, Ogonidagua ngane dege horo daosini kirani handari tebira (2,300) polebira, laya. Horo uruniha howa abale biagadagua tigua egereba alendobi bo lomabu mialu haga winidagua nabulebira. Horo uruni piai kagola nde tigua Ngode Datagaliwabenaga anda mo tiga bialu mbirale bo lomabu muleneru lone mialu holebira, laya.
DAN 8:15 Daniele i̱na emaga handarugo ogonaga irane dege agiledabe lowa mitangitangi bialu hewaria dege abaleore mbirali agali handalehe ona i̱ hewagoria kaware íbu heane handaru.
DAN 8:16 Handalu hewaria i̱na Iba Ulai pedagoria howa bi mbirame ola ede halu lalu, Dahuliyali Gaberelo-o í̠na Daniele ibugua emaga handayagonaga irane ogo ale lalu lamia, laya.
DAN 8:17 Ani layagola Gaberelo ibu ibalu i̱ hewagoria kaware íbu hayagola i̱na gi timbuni howa dindini pilo ibira haru. Ani birugola Gaberelo ibugua i̱hondo lalu, Í̠ dindiali dege kegonigo mbirale emaga handarigoninaga irane manda bulene ngalo manda bido. Ogoni mani horo hamarohayagi bulebirarunaga manane handarigoni, laya.
DAN 8:18 Ibugua bi lalu heaore dege i̱ de mborere bialu dindini pilope ho wiaabo haruya. Ani pilo wiwaria ibugua i̱ lone mo heya hayagola heyu haru.
DAN 8:19 Ani heyu hewagola ibugua lalu, I̱na Ngode Datagaliwabe ibunaga keba tandagala holene ngago biba holene horo tagira ibiragola bulebirago í̠ walia haro.
DAN 8:20 Nogo sibi haguaneni ne kirahe handaridagoni Midia dindi Pesia dindila handari.
DAN 8:21 Ai nogo meme handarigoni Girigi dindi ogoni howa ne mbiraore de labo hengeneha hanunini heane handaridagoni Girigi wali agali tinaga kini mbira holebirago manane handari.
DAN 8:22 Í̠na mani ne timbuni mbiraore biago gaibu wahalu maria andaho aribia hayane handaridagonaga irane Girigi dindi mahalu tu wigi bialu dindi hobane maria wulebirago handarida. Anigo dindi maria uruni abale dindi mbiraore hangu howa hongo ho hayagobi ndo holebira, laya.
DAN 8:23 Dindi uruni mo ko howa hamaro bulene kaware ngagolabi wali agalirume ko ngaru hangu mo tene halu kagolabi agali kuyama ko mbira kini holebira. Ibu koore howa mine halu wali agali bo wahagabi mo hondo hagabi holebira.
DAN 8:24 Ibu hongoore timbunihe howa ibugua mbirale ngaru mo ko halu holebirago uruni ibuninaga hongome ndo bialu holebira. Ibugua mbirale bule hame ledago biaiore habehe howa agali hongohe karubi Ngode Datagaliwabenaga wali agali karubi mo koore hai holebira.
DAN 8:25 Ibu wali agalihondo ke̱ haga howa mo hondo hagane mana timbuni ibuha ngagome ibuni timbuni bolanguahe holebira. Ibuninaga minime ibu timbuniore kogonida mandabu holebira. Ani howa wali agali ti bayale kamalo mandabu karia ibugua ti dewaore bo haealo wahai holebira. Ani howa ibugua mine halu kini karu bibahendenaga kini timbuni bolangua hene mbira kagola wai bule bialu karia ibuni agalinaga hongome ndo bo waholebira.
DAN 8:26 Ai bo lomabu mulene egereba alendola handarigonaga irane langirugoni. Mbirale handaridaruni bibahende tagira piai holebira. Anigo uruni abale áyu ogoni tagira íbu nabulebirago wali agali maru karu nalami í̠ni miniha yu habe, lalu langiya.
DAN 8:27 Bi ogoni hale howa i̱na bu miniha gendaho howa horo marungi warago bo wiru. Warago dabi haya handala Kini Belesasa ibugua biabe mo ngiyago bule dai biru. Ani howa emaga handarugonaga irane handa walia nahabehe howa mini burugulo haru.
DAN 9:1 Dariusi Segesisi igini Midia dindiali henego ibu Babilono dindiha kini hene.
DAN 9:2 Ai Dariusi ibu mali mbira kini hene lowa Daniele i̱na Ngode Datagaliwabenaga mbuga wiago dagalaru. Ani daga lalu hewaria mali pira kariani (70) Yarusaleme bo gialobaga bu wulebira lalu Ngode Datagaliwabehanda ibunaga bi mana latagi haga agali Yaremaiaha howa mbiwia hene wiago dagalowa mitangi bialu haru.
DAN 9:3 Ani dagalowa i̱na miniha dara timbuniore howa tomo nane wahalu aga daraho howa biaga ale bialu be dugu hiru biruwa Anduane Homogo Ngode Datagaliwabehondo bi lalu haru.
DAN 9:4 Anidagua bu biruwa Anduane Homogo i̱naga Ngode Datagaliwabehondo bi hongo howa lalu Isaraele wali agalirume mana ko biniru lapani haru. I̱na bi uruni ogodagua lalu, Anduane Homogo Ngode Datagaliwabe í̠ daligaore kegonaga mini yaraga haramagoni. Bibahendengi í̠naga habo nalolene bi ina baba lo wirigoria í̠na talialu haabo howa wali agali í̠ni gubalini howa í̠naga bi hale halu karuhondo gubalini haga kegoni.
DAN 9:5 Ainde ina wali agali koore kamagoni. Iname mana ko bialu liahe dewa birimagoni. Iname í̠na mana bayale tigabi bilimu lalu langiriruni mo wahowa nabi harimada.
DAN 9:6 Agali í̠naga biabe bia halu bi mana latagi haga hearunaga bi iname mo wahalu harimagoni. Tigua kini hearubi agali haguane hearubi inanaga mamali hearubi inanaga wali agali bibahende hearubi uruni bibahendehondo bi í̠na langiriruni hale howa bia nabi mo waharimagoni.
DAN 9:7 Anduane Homogo í̠ mana tigabi ngaru hangu biaga í̠niore kegola inane Isaraele wali agalime mana ko ngaru birimagome inaneha taga holene mo yu anda ibirimagoni. Ina Yudiaha harimayaguabi Yarusalemeni heneyaguabi iname ko bialu hemaria dindi tara maruha hole pelarigoha howabi iname í̠naga bi mo habo lalu harimagonaga taga holene timbuniore inaha wiaabo kagoni.
DAN 9:8 Anduane Homogo inanaga kinirumebi agali haguane hearumebi ina mamali henerumebi bibahendeore mana ko wiaru bialu í̠hondo kagua dewa bini.
DAN 9:9 Iname í̠naga bi mo wahalu mana ko biagada lowa ina yu wanahe bibahende í̠na dara hai haga kegoni.
DAN 9:10 Anduane Homogo inanaga Ngode Datagaliwabe-o í̠na agali í̠naga biabe bia halu mana lowinigo latagi hearuha howa onahondo bi langiriruni iname hale nahe mo waharimagoni.
DAN 9:11 Ina Isaraele wali agali bibahende kamarume í̠naga bi lariruni pugualu mo wahai harimagoni. Anigo í̠naga biabe bia haga Mosesehondo bi mana lamiriruni inahondo langinigo bi urunime lalu, Í̠naga mana lowini ngego iname talialu nabirimiyagua ina mo ko halu bolebero lariyagoni. Ai iname í̠hondo ko birimagonaga ina pani ngule laridagua ngiridagoni.
DAN 9:12 Ai í̠na inahondobi inanaga agali haguaneruhondobi bule lariyadagua birida. Yarusalemebi nde mo ko halu bo gialobaga biriyagoni. Í̠na Yarusaleme mo ko halu bo gialobaga biridagua dindi mende mbira ani bini nawi.
DAN 9:13 Mosese heneyangi bi mana lo wiyagoha howa genda bibahende ibulebira lariruni inaha ibai haya. Áyubi nde iname mana ko uruni wa nahe bialu haabo howa í̠naga mana henene ngaru baya hangu talialu bia nabi kamagoni.
DAN 9:14 Anduane Homogo inanaga Ngode Datagaliwabe-o iname mana ko birimagonaga pani ngule harigoni. Í̠ mana tigabi dege biaga kegome áyubi nde ina pani ngialu kegoni. Ani bialu kegola iname í̠naga bi mana hale naholeore harimagoni ndobe.
DAN 9:15 Anduane Homogo inanaga Ngode Datagaliwabe-o í̠ninaga hongo walia halu abale inanaga mamaliru Iyibi dindiha garabaya biabe bialu hearia golope halu haru tagira ibiriyago. Áyubi nde í̠ ogonidagua biaga ke lowa wali agali dindi maruha karume í̠na biabe hongohe biriruni manda biaiho howa í̠naga mini yaraga halu kagoni. Ai heneneore iname mana ko tiga nabi wiaru dewa bialu harima.
DAN 9:16 Inamebi inanaga mamalirumebi mana ko wiaru bialu heago hondowa í̠na pani inane mo ko halu inanaga tano Yarusalemebi bo gialahole birigoni. Ani birigo wali agali dindi maruha karumebi wali agali tano ogoniha kaware karumebi Yarusalemebi í̠ninaga wali agali kamarubi mege taraore bialu kagoni. Anigo áyu í̠naga tano Yarusaleme ogoni í̠naga hari loma bia hene o biagoria ngago hondowa keba haabo nahabe. Bamba ina biamogo bule howa biabe dewaore biriyago áyubi nde anidagua dege lone bibelo hame ledama.
DAN 9:17 Ngode Datagaliwabe-o i̱na bia lalu hale halu kogo biaore bibe. Wali agali dindi bibahendeha karume í̠ni mini lene harigo mandabu dai bilo í̠naga anda loma bini tigua ala bo gialo wahayago lone biadaiore bibelo hameledo.
DAN 9:18 Ngode Datagaliwabe-o iname dugu bialu kamaru handalu bi lalu kamaru hale ha. Genda timbuniore inahabi í̠naga tano biagohabi ngaruni handabe. Ina wali agali tigabi bayale howa ndo í̠ Ngode Datagaliwabe dara howa biamogo biagaore kegodane bia lalu hale haramagoni.
DAN 9:19 Anduane Homogo-o inanaga bi laramago hale halu ina biamogo bia. Anduane Homogo-o ko bibahende birimagoni domo wahai habe. Yarusaleme tano biagobi wali agali ogoniha karubi í̠nagaore kagoni. Anigo hondo ha nabi í̠ninaga mini timbuni yaraga hene kego manda bialu abaleore biamogo bibe, lalu Danielehanda Ngode Datagaliwabehondo bi ogoni lene.
DAN 9:20 Daniele i̱na Ngode Datagaliwabehondo bi lalu howa i̱nime ko birurubi i̱ninaga Isaraele wali agalirume ko biyarunagabi lahalu biru. Ani bialu Anduane Homogo i̱naga Ngode Datagaliwabehondo ibunaga anda hari ibunaga loma bia hene biagoria haga biago lone biadai bibe laru.
DAN 9:21 Ai Ngode Datagaliwabehondo bi lalu berewaria dahuliyali Gaberelo emaga ala pigane handarugo lone i̱ hewagoria daliape haya. Horo ogoni alendonaga lomabu mulenengi wini.
DAN 9:22 Ibugua i̱naga mini mo wála holenaga bi ogodagua laya. Daniele-o í̠ agali mini gigabiwiore habelonaga í̠naga mini mo wála hole íbu kogoni.
DAN 9:23 Daniele-o Ngode Datagaliwabehanda í̠ gubaliniore ho howa í̠naga bi lariruni hale halu ibugua bi mbira layago í̠hondo langule ibirugoni. Ai í̠na emaga handariruninaga irane languliya baya hangu hale habe.
DAN 9:24 Gaberelohanda lalu, Ngode Datagaliwabehanda mali pira karia dege kahalu (490) pedagola í̠naga wali agalibi ibunaga Yarusaleme tanobi biamogo bialu mo heya holebero, laya. Ibugua wali agalirume ko biyaru domo wahai halu embeda haragola wali agali mana tigabi bayale ngaru hangu bialu holebira. Ani bialu kagola ibunaga anda loma bia hene lone helolebira. Emaga handayagobi agali Ngode Datagaliwabenaga bi mana latagi haga biagoha howa mbiwia ho winigo latagi hayagobi henene lola helonaga ani bulebira.
DAN 9:25 Ai í̠na hale halu manda bulene ngago Yarusaleme tano lone bule lowa mali karia dege kahalu (49) ala bolangua pedagola agali timbuni haru haga haguane helo dabo helene Ngode Datagaliwabehanda ibilole lene biago ibulebira. Ani bidagola tigua Yarusaleme tanoha hariga bayaleru mo pehalu ege pabe timbunirume bu mabu bupe holebira. Anigo Yarusaleme tano mali pira waragariani kira dege kahalu (434) holebirago ai mali uruniha genda tandagala hangu handaho wiaabo holebira.
DAN 9:26 Mali pira waragariani kira dege kahaludago (434) piai kagola Ngode Datagaliwabehanda agali dabalu ibilene ogoni agali maru karume irane nawini howa ibu bo waharagola ibunaga lenego mbirale mbira nawulebira. Agali kini hongohe mbiranaga ami agalirume ibuwa Yarusalemebi Ngode Datagaliwabenaga andabi bibahende bo gialo wahai holebira. Wai timbuni ogoni bialu mbirale uruniha ngaruni iba lime mbirale ngaru hilo yalu poralidagua bialu polebira. Wai timbuni ogoni bialu kane dege Ngode Datagaliwabehanda aniore bulebira lalu bi layadaguaore henene ngola halu horo hamaro bulene tagira ibulebira.
DAN 9:27 Ai kini ogoni ibugua wali agali karume ibunaga bi lo ngaru talilonaga habo nalolene bi pongo bu wialu hongohe lo wigi bulebira. Ibugua habo nalolene bi hongohe ogoni lo ngelowa kane dege mali karia dege polebira. Mali tebirani ege waragaria pedagola wali agalirume tinaga loma tara tara Ngode Datagaliwabehondo miaga winiru namilo kini biagome mo waholebira. Ani buwa ibugua Ngode Datagaliwabenaga anda daliga lumbuniore ngagoria mbirale koore Hiriribi Hondolene Gibiore mbira mo ngelolebira. Ani ngelowa agali ko mbirale mo ko haga biago ogoniha bedane dege Ngode Datagaliwabehanda ibu mo ko holene horo pongobu wiyago tagira ibalu ibunibi mo ko holebira, lalu dahuliyali Gaberelohanda Danielehondo lamini.
DAN 10:1 Sairusi ibu Pesia dindiha kini heane mali tebone hayagola Ngode Datagaliwabehanda Danielehondo bi mbira lamini. Daniele ibu mini mende Beledesasa wini. Bi lamiyagoni heneneore lamialu bi taibioreyagola Daniele ibu bayuwa manda bilo ibugua irane de gandebaha howa mo walia hene. Mo walia hayadagoni mo ko holene timbuni gibiore mani ibulebiragonaga mo walia hene.
DAN 10:2 Mali ogoningi dege i̱ Daniele i̱naga bu miniha genda timbuniore ho howa sarere tebirani dugu dege bialu haabo haru.
DAN 10:3 Sarere tebira o genda yu harudagoniha i̱ tomo bayalebi nogo egarubi waini ibabi mbira nane dege howa i̱naga mandabi gumu nabi haru.
DAN 10:4 Ani howa i̱na mali ogoningi ege mbiranaga horo pira kirani maria (24) hayangi iba timbuni Taigirisi mbira peagoria angeni pu haru.
DAN 10:5 Ani pu howa handadaga halu handalu hewaria agali mbira aga labolabo pele baya mbira karuleni nogo dongone mandibu ngolo baya tara mbirame wabini mo karulowa heago handaru.
DAN 10:6 Agali ogoni ibunaga tingini ege to̱le̱ baya wá tara holenehe wiagagobi hearia handaru. Ibunaga wanakui wá taraore hari daba waga laralidagua waga laga biya. Ibunaga de ira hungu ale hearia handaru. Ibunaga gi geru ngiringarale ege to̱le̱ boronosime wabinini mbiraleme ha̱i̱ hene ngaligobi hearia handaru. Ani howa ibunaga bigo timbuniore wali agali dewalime laradagua biayuane hale haru.
DAN 10:7 Mbirale de gandeba ogoni i̱ni hanguore howa handaru. Agali i̱ heba mandagi harimadaru ti mbirale ogoni de handa nabi howa dege ti gi halu ibida pialu ha do hai haya.
DAN 10:8 Ani piai heagola i̱ni hangu howa mbirale taraore mbira ogoni de gandebaha handaru. O handarudagoni hondowa i̱naga hongo holene pirilape halu i̱naga dengui mo tara haya. Mo taraore ho hewaria mendealime i̱ de hondowa i̱oreda manda bibe nahe haru.
DAN 10:9 Ani howa i̱na agali biagonaga bi hale halu hewaria i̱ aube tobane buwa dindini pilape howa dengui bulu paluwa agali homo tongolo mini wiradagua biru.
DAN 10:10 Ani wiwaria mbiralinaga gime i̱ mo heya hayuane handaru. Ani mo heya hayagola i̱naga gi ge lagolirume heyu biraru. Ani bira biruwa gi haabo howa i̱naga tingini duru lalu haabo haruya.
DAN 10:11 Ani biyagola dahuliyali mini Gaberelo ibugua i̱hondo langialu lalu, Daniele-o Ngode Datagaliwabehanda í̠ore gubalini timbuni ho ka. Ani kago ai abale heyalu i̱na bi languleberogo bayuwa hale habe. Ngode Datagaliwabe ibunime i̱ í̠ heria pu laya handala ibiru, laya. Ibugua bi ogoni layagola i̱na heyu hewaore i̱naga tingini duru dege laabo haruya.
DAN 10:12 Ani duru lalu hewagola ibugua laabo halu lalu, Daniele-o í̠ gi nahabe. Í̠na mbirale Ngode Datagaliwabehanda biagaru hondo manda buleore lowa í̠ni mo dindiha ho haringi Ngode Datagaliwabe ibugua í̠naga bi hale hayago o larigonaga i̱ í̠ keria íbu kogoni.
DAN 10:13 I̱na abale ibulene winigo ai Pesia dindinaga dama hondo haga heagome i̱ ibulilono horo pira kirani mbira (21) hapai howa haabo hayagola i̱ naibabehe haru. Pesianaga dama haguane biago baba i̱ hangu hewagola i̱ biamogo bulene mendeali naheyane hondowa dahuliyalinaga haguane mbira mini Maigelo ibugua i̱ hewaria ibalu biamogo biyagola ibiru.
DAN 10:14 Horo hamaro bulene kaware haragola í̠naga wali agaliruhondo ogoale bulebira lalu i̱na langule ibiru. Mbirale mani bulebirarunaga ogoale bulubada lalu handa hondowa manda bu harigonigo ai marubi mo walia ha dege buliya, laya.
DAN 10:15 Ibugua anidagua layagola i̱na handa dindi halu i̱naga bi lolene ereba haya.
DAN 10:16 Ani biyagola ai dahuliyali agali handalehe biagome ibunaga gime i̱naga ne hambuni ela hayagola i̱ lone bi labehe haru. Anidagua biyagola i̱na ibuhondo lalu, Agali haguane-o i̱na mbirale de gandebaha mo walia hayago handarugome i̱ gi timbuni howa mogo larogome i̱naga hongo pirilape halu duru lalu kogoni.
DAN 10:17 Ani biyagome i̱naga hongo ereba hai halu biabe bia haga agalime ibunaga agali haguane kagonaga deni heyu howa bi labe nahe giho hagagobi kogoni. Anigo i̱na í̠hondo bi agua loabe. I̱naga buhe̱ lolenebi taiore bira, lalu lamiru.
DAN 10:18 Ani lewaore agali handalehe biago ibunaga gime i̱ yania hayagola i̱naga hongo lone hadai biya.
DAN 10:19 Ani biyagola ibugua i̱hondo langialu lalu, Ngode Datagaliwabehanda í̠ gubaliniore ho kago í̠na mbirale uruni hondowa gi nahe hongo ho holene nga, laya. Ibugua ani layagola i̱ lone hongo timbuniho howa i̱na ibuhondo lalu, Agali haguane-o í̠na i̱ mo hongo harigonigo ai i̱hondo bi langule wiridaru langi, laru.
DAN 10:20 Anidagua larugola ibugua lalu, I̱ áyu í̠ keria ibirudagoni irane manda bidebe nabi. I̱na ibirudagoni Henene Lolene Mbuga ngagoha bi gilibu ngarunaga ogoale lalu lo wála holenaga ibiru. Anidagua binigo ai i̱ dindi ogoria lu habe nahe kogoni. I̱ abale dai bialu dama haguane Pesia dindiha handayaho haga kago baba wai bule dai bulebero. Wai ogoni biai kabagola Girigi dindinaga dama haguane kagobi ibulebira. Ibiragola i̱ biamogo bulene mbirali nahe tí Isaraele wali agalinaga mamage haga dahuliyali mini Maigelo kago ibugua dege i̱ biamogo biaga ka.
DAN 11:1 Anidagua biyadagonigo Midia dindinaga Kini Dariusi ibu Babilononaga kini heangi i̱na nde dahuliyali Maigelo biago biamogo bialu mo hongo harugoni, lalu dahuliyali Gaberelo ibugua laya.
DAN 11:2 Ani lowa dahuliyali Gaberelo biagome laabo halu lalu, Daniele-o mbirale ogoale bulebira lalu langerogoni damene heneneore tagira ibai holebira. Mani Pesia dindini kini tebirame ha aribia haga bialu haru haga bulebira. Ani bialu maniore kini mane ha aribia howa haru holebirago ibugua kini ala henerume muni dabudaburu dewawi henedagua ndo ibu ti bolangua howa homogo timbuniore holebira. Ani ho kagola ibunaga muni dabudabu ngaru dewa haragome ibu mo hongoheore haragola Girigiali bibahendeme ibu handabe manga holebira. Ani biragola ibugua ti baba wai mo bua helolebira.
DAN 11:3 Mani kini hongohe mbira ha aribia harago ibugua dindi timbuni ngaru handayaho halu wali agali dewaore haru holebira. Ani haru howa ibunime bua birago ale bialu haabo holebira.
DAN 11:4 Ani howa ibunaga hongo timbuniore kagola dindi ibugua handayaho hayaruni ma halu tu wigi bialu ibu iginirume ndo agali marume handayaho aribia holebira. Ani kagola agali kini tara uruninaga hongo ibuninaga hongo hayagobi ndome haru holebira.
DAN 11:5 Ogonidagua birangi dindi abene unurahayagi Iyibinaga kini kago ibu hongoheore holebira. Anigo kini ogoninaga ami haru haga agali haguane mbira Iyibini haga kagome kini biagonaga hongo bolanguaore howa ibuninaga dindi timbuniore haru haga holebira.
DAN 11:6 Mali maru howa Iyibinaga kini kago wane dindi uyurayagi mini Sirianaga kini kagome dabu bulebira. Libugua dindi kirabali mo mbiraore holenaga ani bulebira. Anidagua biragola wali ogoni ibunaga hongo lu haho wiaabo naholebira. Mani howa ibu agalininaga hongobi ibira dege holebira. Tigua wali ogonibi wali agali biabe biahaga maru ibu heba penedarubi ibu ababi agalinibi iginibi bibahende homelo bo wahai holebira.
DAN 11:7 Emene howa wali ogoninaga damene dege mbirame kini ha aribia howa Iyibi dindi haru holebira. Ani ho aribia howa agali kini ogoni ibugua Siria dindiha pialu tanonaga wai pabe hongohe karu bo podaga bima anda pialu wai bialu bo poda hana holebira.
DAN 11:8 Ani buwa ibugua mbirale dama mitangi bialu gime wabini ngarubi dama uruninaga dabudabu bayale tara tara ngolo silibarume wabini lomabu ngarubi bibahende Iyibi dindiha mo yu dai bulebira. Anidagua bidagola mali maruni wai nabi howa
DAN 11:9 mani Sirianaga kini kagome Iyibi dindi wai bule ibulebira. Wai bialu wayali habe naheyane ibuni dalu dai bulebira.
DAN 11:10 Sirianaga kini igini bu karume ami agali dewaore wai bu polenaga mo manda mandabu holebira. Ani howa kini igini mbirago ibugua ami agaliru haru halu wai bule abaleore tagira polebira. Ani bialu dindi dewani pialu wai buwa bo poda hana haga bima iba li timbuni piagadagua polebira. Ani pialu tigua Iyibinaga kinime handayaho haga tanonaga ege pabe hongohe bu mabu bini karu bo podama polebira.
DAN 11:11 Ani biragola Iyibinaga kini ibugua nde keba timbuniore howa Siria dindinaga kini kago baba wai bulebira. Wai bialu tigua bo poda hana howa Siria ami agali dewaore biaru minalu garabaya hai helolebira.
DAN 11:12 Ani buwa ibugua ogoni biyadagonaga turu timbuni howa ami agali daosini dewaore bo wahai hayagoyu mani ibuni hongo nahe howa wayali haabo naholebira.
DAN 11:13 Ani biragola Sirianaga kini ibugua ami agali abale wai bule haru halu piyaru bolangua howa mani agali dewaore mo mogo bu holebira. Mani wai lone bu polene wirangi ibugua ibunaga ami agali hongohe uruni haru halu Iyibinaga kini kago baba wai bule polebira. Tigua ani pialu wai biagane danda timu yandareru yalu tomo nolene dewaore bu hanalu polebira.
DAN 11:14 Ani birangi agali tara tara bu karume Iyibinaga kini kago baba waitigi hai holebira. Ani biragola ai Daniele-o í̠ damene maru ami agali bu karu tigua de gandeba ale handayagonaga lola helo ti wai bule pialu karia Iyibinaga kini kagome ti bo podara handala dai bulebira.
DAN 11:15 Ani biragola Sirianaga kini kagome ibunaga ami agaliru haru halu Iyibi dindi tanonaga ege pabe hongohe bu mabubi kagoha hagira bialu wai buwa pabe bo podalu tano anda pialu karulo holebira. Ani biragola Iyibi ami agali hongohe pari wayaliore bu karume wai bule bialu karia bibe nahe halu tinaga hongo ibira holebira.
DAN 11:16 Ani buwa Sirianaga kini ibugua Iyibi dindini howa ibunime bua biradagua biai halu kagola agali mbirame agi berebe lolene mbira naholebira. Ibugua Ngode Datagaliwabehanda dindi Isaraele wali agaliruhondo mini ngagoriani howa dindi ogoni bibahende bo haealabaga bulenenaga hongo ibuni yu hai holebira.
DAN 11:17 Mani howa Sirianaga kini ibugua ibunaga ami agaliru bibahende haru halu Iyibi dindiha wai bu pole manda manda bu holebira. Ani manda bialu ibugua dindi Iyibi kinime haru ho kagoria bope halu karulolenaga ibu wane Iyibinaga kinime dabu bilo mulebira. Ani bialu kariabi ibugua manda bu hayago kobaragola ibuni mbirale mbira nayiore polebira.
DAN 11:18 Anidagua bialu ibugua dindi dewani hameigini tara tara iba solowara timbuni bedago angeangeha palima pedaru baba wai buwa ibu wayali holebira. Anidagua bialu ha holebirago mani howa dindi taranaga agali haguane mbirame Sirianaga kini biagola wai bialu Sirianaga mine holene ereba holebira. Ani biragola Sirianaga kinime ala mine howa biyagonaga ibuni tandaga nelo badai bulebira.
DAN 11:19 Ani bira handala Sirianaga kini ibuni daluha wai pabe hongohe kagoha dai buwa ha holebira. Mani howa kini ogoni ibira halu wali agalime ibu lone nahondolebira.
DAN 11:20 Mani Sirianaga kini mbira ha aribia haragome agali haguane mbira dabalu dindi bibahende ibunime hondo haga ngaruha wali agali hearu mo genda halu dagisi muni mima ibaga bia lalu lamulebira. Ani bulebirago irane ibuninaga mbirale mbirale ngaru mo timbuni helo dagisi muni mulene nga lolebira. Ani bialu kini ogoni ibuni lu nahe abale homolebira. Ibu wai bialu karia waime bene ndo homolebira. Anidagua dege mbiralime ibuhondo keba howa bene ndo homolebira, lalu bi ogoni dahuliyali biagome mbiwia halu Daniele lamini.
DAN 11:21 Dahuliyali agali handalehe biagome i̱ Danielehondo bi laabo halu lalu, Mani Siria dindiha kini mbira ha aribia holebirago ogoni ibu agali koorene ko holebira. Agali ogoni ibu kini holene wini ndogo ibugua ke̱ howa bi ladeborebo bialubi wali agali mo guya howa bime dege lalubi ibuni pu daga halu Siria dindinaga kini holebira.
DAN 11:22 Ani howa dindi mendenaga ami agalirume ibu baba wai bule ibiyaguabi Ngode Datagaliwabenaga Loma Binigo Mo Miaga Haguane Timbuni kagome kini biago ibuni hameledadagua nabilo hapai hayaguabi tanabi ibugua ti bope hai holebira.
DAN 11:23 Ibugua dindi emene koore haru haragoyu ibu dindi mendenaga kini karu baba habo nalolene bi lo wialu, Iya wai nabi mandagi habiya, lalu ke̱ howa mo hondo haga bulebira. Ani buwa ibu kini hongo timbuniheore holebira.
DAN 11:24 Ibugua dindi maru ti muni dabudaburubi dewawi homogo karu manda bialu ohalu ti baba wai bule polebira. Ani bialu ibunaga mamali henedaru tigua ala ogonidagua nabiaga henego ibugua bulebira. Ani buwa wai bialu wayali howa ibugua dabudabu ngaru mo yu dai bialu ibu talima piaga karuhondo talebu ta haga bulebira. Ani bialu ibugua tano mbira mbiranaga ege pabe hongohe bu mabubi karu bo podama pialu maru karulowa marubi karulole manda manda bialu kaore karulolene henge nawulebira.
DAN 11:25 Kini ogoni ibugua Iyibinaga kini kagohondo gi naholebira. Gi nahe howa ibugua Iyibi baba wai bule ami agali dewaore mo mogo bu holebira. Ani biragola Iyibinaga kini kago ibuguabi nde Sirianaga kini baba wai bule ibunaga ami agali dewa hongoheore haru howa wai bule manda mandabu holebira. Anigo agali marume Iyibinaga kini kagohondo ke̱ halu mo hondo hami̱ya lalu bi lo mbira howa kagola Iyibinaga kini ibugua Siriali baba wai birangi Sirialime ibu bope holebira.
DAN 11:26 Ibunaga ami agali haguane bu karume ibuni mo ko haragola Sirianaga kini kagomebi Iyibinaga ami bu karu dewaore bo wahai holebira.
DAN 11:27 Ani buwa mani kini ogonilabome tomo mandagi nalu birulebira. Ani bira birulebiragoyu libunaga bu miniha ko mitangi bu biruwa bi damene ngago ke̱ howa lo payapaya bialu libuni mo hondo haga haga bialu birulebira. Libugua ogoale bibiya lalu lo werabigo bame la hole bialu galone nabulene wulebira. Ani bulebirago irane Ngode Datagaliwabehanda mbirale bulene lo winigonaga horo ngago wene dege tagira naibidangi lo wulebira.
DAN 11:28 Ani bialu Sirianaga kini ibugua wai bialu dabudabu mo wiyaruni ibuni dalu mo yalu dai bulebira. Ani dai bialu ibugua Ngode Datagaliwabenaga wali agalime Ngode Datagaliwabe mana lowinigo ngaru mo ko halu bo gialabaga bu wahai holeore lo manda bialu hongo tara ho holebira. Ani manda buwa ibugua mbirale ibunime bulene hamelo kago damene bibahendeore biai halu ibuni dalu dai bulebira.
DAN 11:29 Ngode Datagaliwabehanda horo mbira pongo bo winigo tagira ibirangi Sirianaga kini ibugua Iyibi dindiha dai bialu Iyibialiru baba wai buwa abale wayali hayadagua lone wayali naholebira.
DAN 11:30 Ani biragola dindi amu ni paliragohayagi howa Lomoalirume iba sibini ibalu Iyibialiru baba wai bialu kagola Sirianaga kini biago gi timbuni holebira. Gi bira handala wahalu dai bialu howa keba timbuniore hama dai bulebira. Ani dai bialu howa ibugua Ngode Datagaliwabenaga wali agali bu karume Ngode Datagaliwabe mana lowinigo ngaru mo ko haga bulebira. Ibugua wali agali maru Ngode Datagaliwabe mana erembira mialu tagira pene karume bi lararu hale halu anidagua bulebira.
DAN 11:31 Ibunaga ami agali marume Ngode Datagaliwabenaga anda kago mebia halu ibuninaga deni mo ko holebira. Ani buwa tigua Isaraele wali agalirume Ngode Datagaliwabehondo mbirale lomabu namilo hangai howa Hiriribi Gibiore Hondolene ngago Ngode Datagaliwabenaga andaha mo yu íbu ngelolebira.
DAN 11:32 Ani ngelowa kini ibugua wali agali Ngode Datagaliwabe erembira mialu pubagi hene karu ibu talima ibilonaga lahondo howa la deborebo bialu holebira. Anigo wali agali maru Ngode Datagaliwabenaga bi hale howa ibu andaneha haabo haga karu tigua ema nabi hibu lalu hongo ho howa kini ogoninaga bi mo wahaga bulebira.
DAN 11:33 Ani bialu kagola Isaraele agali haguane mini gigabiwi karume wali agali maru mo mini wia halu biamogo bialu holebira. Anigo agali haguane uruni aria maru ayu tibume dibalu maru irani bo delaga biragola homaga bulebira. Agali haguane uruni aria maru karunaga andagaha mbirale ngaru mo page bialu garabaya helaga bulebira. Anigo tigua ogonidagua bialu lu haabo naholebira.
DAN 11:34 Waitigime agali haguane uruni bo wahaga bialu kaore dege agali marume agali haguane uruni biamogo bialu holebira. Anigo agali biamogo birarume mo hondo howa tini hangu mitangi bialu tininaga mini yaraga helonaga hame lowa bulebira.
DAN 11:35 Ani biragola waitigirume agali haguane maru bo wahaga biragome maru karu tibi nde Ngode Datagaliwabenaga deni ko mbira para nahe bayaleore bialu helonaga mo hongo holebira. Mana ogonidagua biaabo halu kagola Ngode Datagaliwabehanda horo mbira pongo bo wini ngago tagira ibiragola biamaro bulene wulebira.
DAN 11:36 Sirianaga kini ogoni ibugua mbirale bibahende ibunime hame ledadagua dege bialu haabo holebira. Ani bialu mine howa ibuninaga mini yaraga halu lalu, I̱ mbirale damaru mitangi bialu bi pupu wule gime wabini ngaru bibahende bolangua howa i̱ni daligaore kogoni, lolebira. Ani lowa ibugua bi tara tara lalu Ngode Datagaliwabe Daligaorene Daliga kagonaga mini mo ko halu mo nagaloneore helalu holebira. Anidagua bialu kane dege Ngode Datagaliwabehanda ibu pani mulene horo winigo tagira ibiragola pani karulape mulebira. Ngode Datagaliwabehanda buleore lalu lowinigo horo ogoningi biaiore holebira.
DAN 11:37 Kini ogoni ibugua ibu mamalirunaga dama mitangi bialu bi pupu wulenaga gime wabini ngago handabe manga hai halu dama mende walime gubalini haga ngagobi wahai holebira. Ibuni hangu daligaore dama karu bolangua hai howa duniniore kogoni lo mitangi bialu holebira.
DAN 11:38 Ani bialu howa mbirale dama lalu gime wabini mbiraore ngago ogonime tano ege pabe hongohe bu mabubi kago handayaho haga nga laganego ogonihondo dege ibugua bi pupu wialu holebira. Ani bialu howa ibugua muni ngolo silibaru dewaore dama ogonihondo lomabu mialu ege to̱le̱ tara tarabi dabudabu tara tara ngarubi lomabu migi bulebira. Ibu mamali bamba henerume dama ogonihondo bi pupu nawiaga hene.
DAN 11:39 Ibugua wai puwa tanorunaga ege pabe hongohe bu mabubi kago handayaho helo dindi tara bu karunaga damahondo bi pupu wialu biamogo bia lalu holebira. Ani bialu ibugua agali maru ibuni kini helo hamelo karunaga mini yaraga halu holebira. Ani buwa ibugua agali uruni ti agali haguaneru helo dabo helaga bialu ibunaga dindi maru ngaru ti tu wa migi bulebira.
DAN 11:40 Sirianaga kini ogoni hamaro bulene horo hapara haragola Iyibinaga kini kagome ibu baba wai bule ibulebira. Ani ibiragola Sirianaga kini biagome nde wai polenaga garo ale karisirubi nogo hosirubi iba sibi wai bu piaga ngarubi bibahende mo manda manda bialu wai hongo howa biadai bule abale polebira. Ibugua wai hongo howa bu pialu iba li timbuni pialu mbirale ngaru hilo yai halu piagadagua dindi dewaoreha hameigini tara tara karu bibahende bo hilo wahai holebira.
DAN 11:41 Ani bialu ibugua Ngode Datagaliwabehanda ibunaga Isaraele wali agaliruhondo dindi bayale mini biagoha anda ibalu wali agali dewaore daga labe nahe bo wahai holebira. Anigo ami uruni tigua Idomo dindibi Moaba dindibi wahalu Amonoali yu wahene karu tibi yo pialu polebira.
DAN 11:42 Kini ogoni ibugua dindi dewaoreha hameigini tara tara padaru baba wai bialu bo poda hana hai halu Iyibi dindiore bayale ngelo yu wa naholebira.
DAN 11:43 Ibugua Iyibi dindiha muni ngolo silibarubi dabudabu tara tara muni dewame mibehe ngarubi mo yalu piai holebira. Ibugua Libia dindi Sudana dindibi ti bope hai halu karulolebira.
DAN 11:44 Ani bialu karia bi te maru mani ni tagira ibiragohayagi bialu karubi dindi abene uyurayagi bialu karubi uruni bibahende ogoale bialu ka lalu te lama ibirago hale halu ibu gi timbuniore ho holebira. Ani gi howa ibugua ibunaga bu miniha lembo timbuni halu wai hongoore howa bialu wali agali dewaore bo hilo wahai haga bialu holebira.
DAN 11:45 Ani bialu ibugua iba solowara Medidereniana bedagoha hari loma bia hene Ngode Datagaliwabenaga anda bu kagola hengene ngagoria kininaga balai anda timbuniru bu helaga bulebira. Ani bialu kagola ibu biamogo bia halu mo wulene mbira nahe howa homolebira, lalu dahuliyali agali handalehe biagome bi ogoni Danielehondo lamini.
DAN 12:1 Dahuliyali agali handalehe biago ibugua Daniele i̱hondo langialu lalu, Horo ogoningi dahuliyalirunaga haguane mini Maigelo tí Isaraele wali agaliru mamage haga biago ibulebira. Ani ibiragola genda timbuniore dewa tagira ibulebira. Genda o ibulubadaruni abale dindi bibahende ngaru wabiningi howa tagira naibini aleore ibulebira. Genda uruni tagira ibirangi wali agali í̠ aria bu karu tinaga mini Ngode Datagaliwabenaga mbugaha gilibu ngaru ti haru dai bulebira.
DAN 12:2 Ani bialu Ngode Datagaliwabe ibugua wali agali ala homayaru mo heya hai holebira. Ani birangi maru ti haabobo holene yu holebira. Maru ti nayi howa taga pani nalu haabo holebira.
DAN 12:3 Horo ogoningi wali agali maru mini gigabiwi howa manda bayalebi karu tiha harini wá timbuni haraligobi ho holebira. Ani kagola marume wali agali mana tigabi ngaru bialu helo biawai haga karu tiha wá yakundinaga kagobi ho haabo holebira, lalu lene.
DAN 12:4 Ani lalu ibugua i̱hondo lone lalu, Daniele-o marume mbuga ogoniha bi gilibu wini ngaru daga nalelo mbuga ogoni paulowa wagaya aleme mo ndibu lowa ngelabe. Mbuga ogoni ibu horo hamaro bulene ibilo ngelo waho holene nga. Horo ogoni naibi howa wali agali dewalioreme bi ogoninaga irane manda bulenaga tai dege biaabo holebira, laya.
DAN 12:5 Ani layagola i̱na de handalu hewaria agali kirali iba peagoria angeni íbu hearia handaru. Mendego ibu iba ange i̱ hewagohayagi hea mendego ibu iba ange ederahayagi hea.
DAN 12:6 Mendego ibugua agali handalehe aga bayale karule iba manehayagi heagohondo hale halu lalu, Mbirale nahendene ale uruni bulebiraru angiore biai halu ereba holebirabe, laya.
DAN 12:7 Ani hale hayagola agali handalehe aga bayale karule biago ibunaga gi kirabali hariha dogoladaga howa bi lalu, Ngode Datagaliwabe Haluhe kagonaga minini howa heneneore laro. Mbirale uruni biaho ngane dege mali tebirani ege waragaria polebira. Ani biragola Ngode Datagaliwabenaga wali agali loma bia henerunaga hongo ereba hai ho kagola mbirale uruni biaiore holebira, lene.
DAN 12:8 Ibugua bi uruni layagola i̱na hale harugoyu ai bi irane ago layabe tene manda nabi haru. Anigo i̱na ibuhondo lone hale halu lalu, Agali haguane-o mbirale uruni agua bialu ereba holebirabe, laru.
DAN 12:9 Ani larugola ibugua ladai bialu lalu, Daniele-o áyu í̠ pamia. Mbuga ogoniha bi gilibu ngaruni horo hamaro bulene horo ibirangi angalalu daga lolene wulebira. Áyu mbuga ogoni ibu payu ngelo waholene nga.
DAN 12:10 Genda áyu tagira ibiraruni mani wali agali dewa tigua mana bayale tigabi ngaru hangu bialu howa Ngode Datagaliwabenaga deni tiha ko mbira para nahe helonaga ibira. Wali agali manda bayalebi mini gigabiwi karu ti hangume mbirale uruninaga irane manda bu holebira. Anigo wali agali mine howa mana ko biaga karu tigua mbirale uruninaga irane manda nabi howa tigua mana ko dege bialu haabo holebira.
DAN 12:11 Horo bibahendengi Ngode Datagaliwabehondo lomabu mulene wiyarunaga mana waharangi Hiriribi Hondolene Gibiore mbira Ngode Datagaliwabenaga andaha íbu ngagola horo daosini mbirani handari kirani pira dira (1,290) ala pu bolangua holebira.
DAN 12:12 Ai wali agali maru mini bilinahe halu hongo ho haabo howa horo daosini mbira handari tebirani pira tebirani duria (1,335) bolangua halu pelo handayaho karu ti turuore ho holebira.
DAN 12:13 Ani bulebirago ai Daniele-o í̠ horo hamaro bulene biago ibilonaga mini bilinahe halu hongo ho haabo habe. Í̠ homa homoleberego mani horo hamaro bulene ogoni wirangi í̠ homaliha howa heyulebere. Heyalu Ngode Datagaliwabe ibugua mbirale damene í̠ ngule layaru ngiragola yu holebere, lalu agali handalehe biagome i̱ Danielehondo langiya, lene.
HOS 1:1 Usia Yodama Ahasa Hesegaia imaru ti Yuda dindiha kini haga binidangi Yahoasa igini Yaroboama ibu Isaraele dindiha kini hene. Ogoningi Anduane Homogohanda Beri igini Hoseahondo bi ogo lamini.
HOS 1:2 Piganeore Anduane Homogohanda Isaraele wali agali bi lamilonaga Hoseahondo ogodagua lene. I̱naga wali agalirume i̱nihondo bi lalu ha nabi tigua gime wabini ngaruhondo bi pupu wialu uruninaga mini yaraga halu karuni agali onerume ti agalini helalu agali mendela kayu yama poralidagua bialu kagoni. Ogodagua bulebira lalu walia holenaga ai í̠na wali mbira dabu bule pu. Mani í̠ one ogoni agali mendela kayu yama polebira. Ani biragola ibunaga waneiginirume nde ogonidagua dege bialu wali agali kayu yaga holebira, lalu lene.
HOS 1:3 Ani laya handala Hosea ibugua Dibilaimi wane Gome dabu buwa mani Gome ibugua igiri mbira taba henene.
HOS 1:4 Ani biyagola Anduane Homogohanda Hoseahondo lalu, Í̠na igiri ogoni ibu mini Yaserili wibe. Irane Yihu ibugua Isaraelenaga mamali kini kira bamba dindi ogoniha bo wahenego manda bialu dindi mini ogoni wibe. Ai i̱na áyu Yihunaga aguanene Isaraelenaga kini karunihondo mana lalu pani mule ngo. Ani berogola maniorebi Yihunaga aguanene uruni aria mbira Isaraele wali agalinaga kini lone naholebiraore.
HOS 1:5 Wai birangi i̱na Isaraele ami agali wai bule dindi Yaserili ogoriani tidiyu pialu karia i̱na tinaga hongo bo podai holebero, lalu Anduane Homogohanda ani lene.
HOS 1:6 Emene howa nde Gomehanda wandari mbira taba henene. Ani taba hono berearia Anduane Homogo ibugua Hoseahondo lalu, Wandari ogoni mini I̱na Gubalini Nahe wibe. Ani larogoni irane i̱na Isaraele wali agaliru gubalini nahe howa tinaga ko biyaruni lone nadomoleore lalu laro.
HOS 1:7 Anigo i̱na Yuda wali agaliru dege gubalini ho kogoni. I̱ni Anduane Homogo tinaga Ngode Datagaliwabe kogo i̱nime ti biamogo bulebero. I̱na ti wai bialu danda timu ayu tiburumebi nogo hosini ami agali wai biagarumebi ndo. I̱na ti biamogo bulene hariga tara mende ngelowa kogoni, lene.
HOS 1:8 Emene howa wandari I̱na Gubalini Nahe biago ibu emene anda halu andu wahayagola Gome ibugua igiri mende taba henene.
HOS 1:9 Ani taba hono bereagola Anduane Homogohanda Hoseahondo lalu, Í̠na igiri gali ogoni ibu mini I̱naga Ndo wibe. Irane Isaraele wali agali ti i̱naga ndo kagoni. I̱bi tinaga Ngode Datagaliwabe ndoore kogoni, lalu lamini.
HOS 1:10 Mani howa nde Isaraele wali agali dewaore daga labe nahe ibamu ngaligobi holebira. Áyu Ngode Datagaliwabehanda tihondo lalu, Tí i̱naga wali agali ndo kamigoni, leda. Anigo horo mbira tagira ibirangi ibugua tihondo lalu, Tí Ngode Datagaliwabe haluheore kagonaga waneigini kami, lolebira.
HOS 1:11 Ani bialu Isaraele hameigini Yuda hameiginila mani mo mbiraore halu hameigini mbiraore holebira. Mo mbiraore halu tinaga haru haga agali mbiraore hangu dabo helalu manabi biabebi tigua bulebiraru bibahende bayale hai holebira. Ti bayaleore Ngode Datagaliwabe ibunime mabu hengene ale holebira. Heneneore Anduane Homogohanda biabe ogoni birangi Yaserili ibunaga horo ogoni timbuni gibiore holebira.
HOS 2:1 Ani howa Isaraele wali agali ti aria karuhondo bi ogodagua lalimu. Tí Ngode Datagaliwabenaga wali agali kami. Tí Anduane Homogohanda Gubaliniore Henego kami, lalimu.
HOS 2:2 I̱naga waneiginiru-o. Tí ai̱ya ibu i̱ one ndo beda. I̱bi nde ibu agalini ndo kogoni. Anigo ai ibugua agali kayu yama ibaga bialu bedagonaga wahabe lalu hongo howa lamilimu.
HOS 2:3 Ibugua mana ogonibi bialu bedago wa nahayagua nde i̱na ibunaga aga bidaru tongolo wahai howa ibu ai̱yahanda taba hanayangi aga nabi taba hanayadagua i̱na ibu tibabe ibagabu berelarogola taga timbuniore halu birulebira. Ani buwa ibu mo ko halu dindi koore mbirale mbira anda habe nahe wiraligobi wialu dindi ko yobi iba nolenebi nawiha berelolebero.
HOS 2:4 Ibunaga waneigini bedaru ti agali kayu yule taga nahaga wali ogoninaga waneiginidagola i̱na ti dara howa biamogo nabulebero. Wali biagoni ibugua lenego ogo, I̱ agali maru i̱ni hameledoru talima polebero. Agali uruni tigua i̱ tomo ibabi aga bulenebi ngialu ira olibe lini ibanebi waini ibabi hambu ngiaga, lene.
HOS 2:6 Ani biragola i̱na wali ogoni ibu ira anihe karu dibuwa urunime pabe bu yandaho berelolebero. Ibu hariga polobadagoha pabe bu pai harogola ibugua agali uruni karia pole tagira pobe nahe holebira.
HOS 2:7 Ibugua gerai lalu agali uruni karia pole puwa ti kagoria napolebira. Wali ogoni ibugua ti taya bima pu polebirago handa walia naholebira. Ani buwa ibugua lalu, Abale i̱ bayaleore berenego. Ai áyu bira ko kogonidago i̱ agalini pigane pirugo ibuni karia dai buliya, lalu lolebira, lene.
HOS 2:8 Ai i̱nime ibu tomo nolenebi waini ibabi olibe lini ibanebi muni ngolo silibabi dewaore miai harugo ibugua yu howa i̱ mitangi nabi ibu mbirale uruni bibahende gime wabini mini Balahondo bi pupu wima poragoni.
HOS 2:9 Ai nde mabuha tomo nolene tu haragola tomobi waini ibabi bibahende i̱na mirugo mo yu dai bialu ibu aga bilo mirurubi bibahende mo yu dai biai holebero.
HOS 2:10 I̱na ibunaga aga bu henedaruni agali ibuni dimagoli haralirunaga deni howa golo wahai howa aga nabi tibabe pelolebero. Ani berogola agali mbirame ibu mo wialu biamogo nabibehe holebira.
HOS 2:11 I̱na ibunaga horo tara ibuni turu howa tomo nalu biragadaru bibahende mo wahai holebero. Horo timbuni ibu turu ho hagadaruni lotu lagane horo timbuni mali mbira mbirangi hagarubi ege mbira mbirangi hagarubi Sabada mbira mbirangi hagarubi ibunaga lotu laga horo bibahendeore mo wahai holebero.
HOS 2:12 Pu mbira lini daga mini gerebi karubi poge karubi uruni bibahende agali ibugua dimagoli howa kayu yaga biarume i̱ni tihondo mirugonaga yolo ngini lene karu mo ko holebero. Ibunaga mabuha pu ogoni gerebi lini daganebi lini dagane ira tara tara karubi bibahende nogo gabua karume dugua hai halu embera ibilolebero.
HOS 2:13 Ibugua i̱ embeda halu bi pupu wule gime wabini mini Bala anda heagoha puwa ira hagua ngabilo mini inisenesi delayagonagabi aga karulalu yári tara tara bialu agali ibuni dimagoli hagaru heagoha piyagonagabi i̱na ibu mana lalu genda timbuniore ngago yu helo mulebero, lalu Anduane Homogo i̱na bi o ledogoniore, lene.
HOS 2:14 Anduane Homogo ibugua bi yobage laabo halu lalu, Ai i̱na wali ogonihondo bi bayale lamialu dindi ko wali agali nahaga ngagoha lone haru dai bulebero. Ani buwa ibu mo gede howa bi lalu i̱na í̠ore gubalini ho kogoni lolebero.
HOS 2:15 Ibunaga mabuni gerebi lini dagane ala heneru lone ibuni helo mia dai bulebero. Ani bialu dindi mini Ulini Genda Tagira Ibaga biagoria ai mbirale bayale dindi ogoniha howa tagira ibule biarua lowa mini dunubia howa hondo holene wulebira. Dindi ogoniha howa ibugua i̱naga bi abale ibu wandari emeneni Iyibi dindi howa haru tagira ibirugola hale halu berenedagua lone hale howa talialu holebira.
HOS 2:16 Ani howa i̱hondo lalu, I̱ agaliniore í̠ kegoni, lolebira. Ibugua i̱ dama mini Bala ale degedalo manda buwa lalu, Bala í̠ timbuni i̱naga anduaneore kegoni, nalolebira. Ibugua embeda halu wahai holebira.
HOS 2:17 Ibu Balanaga mini lone lelo i̱na ibu yupe naholeberoore.
HOS 2:18 Ani bialu ogoningi dege i̱na ema bialu piaga bedaru bibahendebi ega bedarubi urunime i̱naga wali agali bu karu mo ko nahelo i̱nime ti heba habo nalolene bi mbira wiaabo helo lo wulebero. I̱naga wali agaliru tinaga wai biaga ayu tibu ne gadelebi timu yandarebi bibahende mo wahai halu ti gi nahe embeda howa bu miniha dungulo holebira.
HOS 2:19 Isaraele-o í̠ore i̱ one henene biraabo habelo berelolebero. I̱na í̠ gubalini halu í̠hondo mana bayale tigabi ngaru dege bialu haabo kogola í̠ i̱ninaga biraabo holebere.
HOS 2:20 I̱na habo nalolene bi hongohe wiaabo helonaga lo wirugo manda bialu í̠ i̱ninagaore biraabo habelo berelolebero. Í̠na Anduane Homogo i̱ hangu henedane hondolebere.
HOS 2:21 Ogoningi i̱na i̱naga Isaraele wali agalirume i̱hondo bi larago hale holebero. I̱na tinaga dindiha iba dalu ibilarogola tomo bayale anda haga bialu ladi ale mini widibi gerebi linibi olibe linibi lini do naga uruni dewaore dolebira.
HOS 2:23 I̱na i̱naga wali agali dindi ogoniha helarogola ti mabu bayale i̱nime hengene ale holebira. Ala bamba tí Gubalini Nahe kogoni laruligo ai mani howa i̱na ti gubaliniore holebero. Bamba i̱na tí I̱naga Ndo kamigoni laruligo. Mani tí i̱naga wali agaliore kamigoni, lolebero. Tigua nde, Inanaga Ngode Datagaliwabe í̠ore kegoni, lolebira, lalu Anduane Homogohanda lene.
HOS 3:1 Anduane Homogohanda i̱hondo lone ogodagua langiya. Ai í̠ one agali mendela kayu bima ibaga bialu bedagoni ibuhondo lone gubalini hole pobe. I̱naga Isaraele wali agali tigua i̱ yu wahalu gime wabiniruhondo gerebi lini do gembe biniru loma mule yalu piagaru ti i̱na gubalini haho wiaabo kogonidagua í̠ oneore gubalini habe, lene.
HOS 3:2 Ani layagola i̱na muni kina ale handari mbirani pira duriabi (K150) ladi ale mini bali mbege nu waragariamebi wali ogoni lone yolo biru.
HOS 3:3 Ani buwa wali ogonihondo ogodagua laru. Ai i̱ oneore bedegonigo iya haru mandagi napalibiya. Í̠ agali taya bima nape yamo luore birabe. I̱na nde í̠ ago berebe hondole mamage holebero, lalu wali i̱ one biago lamiru.
HOS 3:4 Ai ogonidagua dege Isaraele wali agali tinaga kinirubi haru hagarubi mbira nahe howa ti luore maliaho holebira. Tigua bi pupu wule lowa ira mbira hanga ho helowabi ege to̱le̱ mbira hanga ho helowabi urunihondo bi pupu nawulebira. Tigua gime wabini urunihondo mani bulebiraru hondole halaga biaga winirubi áyu nabulebira.
HOS 3:5 Isaraele wali agali tigua urunidagua bialu howa Anduane Homogo tinaga Ngode Datagaliwabe kahayagi dai buwa ibu mitangi bialu lotu lolebira. Tigua Kini Debidinaga aguanene mbira holebirago ibu kagohabi dai bulebira. Ani bialu howa tigua Anduane Homogonaga andaneha howa ibunaga bi hale halu kagola ibugua nde ti bayale helonaga mbirale tara tararu migi bulebira.
HOS 4:1 Isaraelealiru-o Anduane Homogohanda wali agali dindi ogoniha karuhondo bi hongohe laede hole kago ibugua bi larago baya hangu hale hadaba. Bi ogodagua lara. Wali agali dindi ogoniha karume bi henene lolenego tiha manda nabi howa ke̱ timbuni halu tinaga damene karuhondobi gubalini nahaga kagoni. Tinaga Anduane Homogo i̱ hangu kogoni manda buwa la nabiaga ka.
HOS 4:2 Tigua buleore lalu hongo howa lo winiru talialu bia nabiaga kagoni. Tigua ke̱ halu puwa agali homelo ba mendealinaga mbirale ngaru mo page bia wali agali kayu bigi bialubi wali agali maru karu homelo bame bo wahaga bialu kagoni. Mana ogoni bia timbu haragonime
HOS 4:3 dindi ogo lebola halu ko holebira. Ani ko haragola dindini ema bialu piaga bedarubi ega bedarubi iba wena bedarubi bibahende homaiore holebira, laragoni, lalu Hoseahanda lene.
HOS 4:4 Anduane Homogohanda laabo halu lalu, Agali mbirame wali agali manani helolene irane nawini howa áyu ti godini kagoni tene loma binigo mo miaga kamiruni tíha nga.
HOS 4:5 Horo bibahendengi tígua biabe bialu howa bayuwa nabi bia ko haabo harimi. Ngode Datagaliwabenaga bi mana latagi haga karume tibi nde ani dege biaga. Ani birimigome Isaraele wali agali bibahende tínaga ai̱ya biraradagua bedamigo i̱na mo ko holebero.
HOS 4:6 I̱naga wali agali tigua i̱ manda nabi kagome tiha mo ko holene wulebira. Loma binigo mo miaga kamiruni tíguabi nde i̱naga bi mana hale nahe mo waharimigoni. Anidagua birimigonaga i̱na tí talia tagi halu tínaga iginiru i̱naga biabe bia halu loma binigo mo miaga naholebira.
HOS 4:7 Loma binigo mo miaga kamirume mana ko ngaru dewaore bialu kamigoni. Áyu tí mini lene kamigonigo mani i̱na tí bope harogola tígua taga timbuniore halu holeberami.
HOS 4:8 I̱naga wali agalirume ko biyaruni tínaga tomoya. Aniyagola tígua wali agalime mana ko dewa bilo hame laga kami.
HOS 4:9 Ai wali agali ti genda timbuni yu halu loma binigo mo miaga kamiru tíbi nde wali agali heba pani namaga holeberamiore. Mana ko nabulene wiago tígua birimidagonaga i̱na pani tíhondo ngule kogoni.
HOS 4:10 Ngode Datagaliwabehondo tomo bayale minigo tíni nolene ngaru nalu kamiria tombe naholebira. Ani bialu howa tígua gime wabiniruhondo bi pupu wialu waneigini dewa helonaga werama lalu howa wirimiyagua tinaga waneigini naholebira. Irane tígua i̱ helo wahalu puwa gime wabiniru talima pirimigonaga anidagua bulebira, lalu Anduane Homogohanda lene.
HOS 4:11 Anduane Homogohanda lalu, Lulu iba hongohe tara tara bu ngarume i̱naga wali agalinaga mini mo ba tara halu mo luluya kagoni.
HOS 4:12 Anidagua bialu howa tigua ira tilini karuhondo bi wia do hene mbira langi lowa hale haga ka. Ayaliore-o tigua manda bialu karia ira gaibu wahene uruni aleme heneneore bi do hene mbira ti hale hoa kago langulubadalo manda biaga ka. Tigua i̱ yu wahalu puwa walime agali kayu bima ibaga biagadagua ti mbirale tara tarahondo bi pupu wima pene.
HOS 4:13 Tigua hari nene wali agali ta nabi napiaga ngaruha puwa ira timbuni karunaga teneha gumba bayale kagoria turu howa tigua lomarubi ira hagua ngabilo mini inisenesirubi ogoriani delaga bialu ka. Anidagua bialu kamirume tí wane bedaru habane nabulene hariga wali biralu tí aruni bedaruni agali kayu biaga wali birulebira.
HOS 4:14 Anigo tigua urunidagua biragonaga i̱na ti pani namulebero. Irane tínibi nde agali kayu biaga wali bedaru baba mandagi agali gime wabinirunaga anda kagoha puwa lomaru mialu hemigoni ndobe. Ai bi tigabi mbira ogodagua gilibu ngago. Wali agali mini nawiore kamiru tíha mo ko holene timbuniore wulebira, lalu gilibu nga.
HOS 4:15 Isaraele wali agali tíore walime agali kayu bima ibaga biaga ale halu i̱ yu waharimigoni. Anigo ai Yuda wali agali kamiru tíbi nde pani noligo mana ogonidagua nabilimu. Tígua Giligala dindinibi Bedabene dindinibi lotu ke̱ howa lole napilimu. Dindi kira ogoniha howa Anduane Homogo haluhe i̱ninaga minini mbirale mbira bule lalu bi nalo wilimu.
HOS 4:16 Isaraele wali agali tinaga embone giambe hayago áyu ti nogo dongime mine halu gabua hagagobi kagoni. Ai i̱na ti agalime nogo sibi igini tani bayale nelo bayuwa haru hagadagua agua haru holiyadabe.
HOS 4:17 Isaraele wali agalirume ti mbirale tara gime wabini uruni talima piaga kago wahalu ani helo waha.
HOS 4:18 Wali agali marume tigua birago handayadalo manda nabiaga ka. Ti mini lene hearume abale mana ko ngubi tagabi ngaru hangu bule hame lalu pora biaga. Ogonidagua bule howa lulu iba dewa nalu lulu yalu puwa wali kayu bima ibaga biaga.
HOS 4:19 Anigo hale hadaba. Uruni bialu karia puwa puyabu hongohe ibalu durumbu ngaru hilo wahagadagua i̱na ti balu purogo lelarogola mo ko henego purogo lolebira. Ani biragola tigua gime wabini biaruhondo loma mialu hayaru mitangibu dai bialu tini taga emene ndo halu holebira, lalu Anduane Homogohanda lene.
HOS 5:1 Loma binigo mo miaga kamiru-o bi o larogo hale hadaba. Isaraele wali agaliru-o tíbi bayuwa hale hadaba. Kini aria kamiru tíbi hale hadaba. Tígua wali agali manani tigabi dabolene wiadagua ndo dabalu kamigo. Ani birimigome tíni manani holene nga. Loma binigo mo miaga kamiru tígua Misiba tanonibi Hari Tabo nenenibi Sidimi tanonibi lotu henene letingi howa wali agali mo guya harimigoni. Tíore mini ohe bogabi howa wali agali minule gono alebi wena nu alebi kamigoni. Ogonidagua bialu kamigonaga i̱na tí bibahendeore pani ngiai hole ngogoni.
HOS 5:3 Isaraele wali agaliru tígua beremiligo i̱na manda biai kogo. Ai i̱na de nahondoliyanaga tíore bira do holene mbira nawiore kamigoni. Tí walime agali kayu bima ibaga biaga bedaligobi howa i̱naga deni tí dodohe koore kamigoni, lalu Anduane Homogohanda lene.
HOS 5:4 Isaraele wali agali tigua mbirale gime wabiniruhondo bi pupu wialu howa Anduane Homogo yu wahenego ka. Mana ogonidagua bialu piyagome tininaga Ngode Datagaliwabe ibuni karia lone dai bibe nahe kagoni.
HOS 5:5 Isaraele wali agali tini mine haragome tini pani nolene nga. Mana ko tigua birarume tini mo pila halu Yuda wali agalibi ti heba pilamaga halu ka.
HOS 5:6 Tigua nogo sibi bulumagaru Anduane Homogohondo bo lomabu delagago urunibi bame dege mialu ka. Irane Anduane Homogohanda ti yu wahenego ibu heba mandagi habe nahe ka.
HOS 5:7 Walime ibu agalini wahalu agali kayu bima ibaga biagadagua Isaraele wali agali tigua Anduane Homogo yu wahenego ka. Anidagua biragome tinaga waneiginiru tibi tinaga aba Ngode Datagaliwabe kago manda nabiaga ka. Anigo ai emene howa ege pigane ngabu laragola tinaga waitigirume ibuwa wai bialu ti mo ko halu tinaga dindi anda bo gialo bagabu wahalu mo labu holebira, Hoseahanda lene.
HOS 5:8 Beniyaminialiru-o tí hameigini Gibea dindibi Lama dindibi Bedabene dindibi uruniha karu heba tí bibahendeme mbelo biguli pu lalu hongo howa wai huaro ladaga halu wai bule gerai lalu pudaba.
HOS 5:9 Ani beramigola horo ogoningi dege Isaraele wali agali tí mo ko howa balu bo poda hana holebira. Ani bulebira lalu i̱na tíhondo heneneore langerogoni, lalu Hoseahanda lene.
HOS 5:10 Anduane Homogohanda lalu, Hale hadaba. Yuda wali agali haru haga karume Isaraele dindiha anda ibuwa dindi maru ti page bialu karulo kagonaga i̱na keba ho kogoni. Tigua anidagua biyagonaga i̱na iba li timbuni ibalu mbirale bibahende ngaru hilo yalu piagadagua ti mo ko halu bo hilo waore holebero.
HOS 5:11 Isaraelealiru ti mini dege dindiho kagoni irane Yudalime Isaraele bo hilo wahayagola tigua kini tara maru hearume ti biamogo birabe toba howa pialu hearia kini uruni ti hongo naheyagola biamogo bibe nahe hene.
HOS 5:12 Timamume mbirale nagadagua i̱na Isaraelealibi Yudalibi bibahende mo ko holene ibilolebero, lalu Anduane Homogohanda lene.
HOS 5:13 Anduane Homogohanda lalu, Isaraelealiru tiha warago timbuni tagira ibiyangibi Yuda tiha dere tara tagira ibiyangibi Isaraelealirume Asiria dindiha puwa kini timbuni heagohondo ti biamogo bia lole pene. Ani pialu hearia Asiria dindinaga kini timbuni ogoni ibugua tinaga warago bayarubi dere biarubi mo dabi habe nahe hene.
HOS 5:14 Ai áyu hongohe mbira budi gabua timbuni laiono ale howa i̱na Isaraele Yudala baba wai bialu ti bo gialo bagabu wahai holebero. Ani bialu i̱na ti bo gililo yalu pu waharogola mbiralime ti biamogo bulene naholebira.
HOS 5:15 I̱naga wali agali uruni tigua ko biyarunaga pani tandagabi nalu ka handala ti wahalu i̱ni dalu dai bulebero. Tigua i̱ hai bialu talima ibilo ani bulebero. Ani biragola ti tandaga ndelaheore nalu howa i̱ni kogoria dai bulebira, Anduane Homogohanda lene.
HOS 6:1 Isaraele wali agali tigua lalu, Abaleore Anduane Homogo karia lone dai bima nalarami. Ibugua ina mo ko hayagoni howa dege ai ina lone biamogo bulebira. Ibugua ina ba nde bayagonigo ai lone inanaga dere bidaru kabu bia holebira ndobe.
HOS 6:2 Horo kiru tebiru agima pedagola nde ibugua ina lone mo heya haragola howa ibunaga wanakuini mandagi bayale holeberama.
HOS 6:3 Anduane Homogo ibuniore ka manda bule iname hongo hami̱ya. Egerebagi ni tagira ibiraligo manda bialu iba dalungi dalu dindini ibira haraligo manda bidamagoni. Ai manane ogonidagua dege Anduane Homogohanda ina biamogo bule ibulebiraorelo manda bidamagoni, lene.
HOS 6:4 Anduane Homogohanda bi ogodagua ladai bini. Ai Isaraele wali agalibi Yuda wali agalibi i̱na tíhondo agi buliya hamelo kamibe. Tígua i̱ gubalini howa dege gubalini haho wiaabo nahe ginu hagua egerebagi wialu emene howa pu ereba haralidagua bialubi datani karunaga egerebagi dadimba bedaru ni daragola yo biralidagua bialubi tígua abale i̱ yu waharamiligoni.
HOS 6:5 Tígua ani birimigola i̱na i̱naga bi mana latagi haga maru dabalu tígua ko birimirunaga tigua maname dabowa pani tíniha genda tagira ibalu mo ko holebira lole pudaba laga biruligoni. Ai i̱na bi laruruni bibahende hale hai howa tígua ogoale buluma̱ya i̱na hamelo heneda lalu tínime manda biai kamigoni. Uruni wáleore langiru. Galone uruni ogodagua bulene nga laro.
HOS 6:6 Tígua mbirale loma buwa bo delaramiligo i̱na turu nahe kogoni. Anigo tígua i̱niore hondowa manda bialu gubalini haabo halimulo dege hamelo kogoni, lene.
HOS 6:7 Anduane Homogohanda Hoseaha howa latagi halu lalu, Wali agali uruni tigua iba Yodana Adama tano wiagoria howa domalu orayagi dindi i̱na mirugoha ibini. Ani íbu howa i̱la habo nalolene bi pongo bo wiribago habo laya.
HOS 6:8 Gileada tanoha agali ko biagabi mendeali homelo bo wahagabi bibahende tano ogoniha ho to̱leda.
HOS 6:9 Loma binigo mo miaga karu ti mo mogo buwa pagealime biagadagua bialu hariga obeneni bira do howa mbirali harigani bolangua halu poraru minu balu mbirale yalu poraru mo page biaga ka. Ani bialu tigua wali agali Segeme tanoha Anduane Homogo mitangi bialu lotu laga ngaruha pole poraru harigani yu biruwa homelo bo wahaga biaga ka. Anidagua biagago ti agali koore ka.
HOS 6:10 Mana ko engengebiore mbira Isaraele dindiha tagira porane i̱na hendedogo ogo. I̱naga wali agali bu karume mbirale dama mitangi bialu gime wabini ngaruhondo bi pupu wialu kagome i̱ninaga deni ko ogoni biragome tini mebia halu kagoni.
HOS 6:11 Yuda wali agali tíbi nde mana ko ogonibi dege bialu kamigonaga pani nalimulo ngule lowa horo manda manda bu wirugo tagira ibilo kogoni.
HOS 7:1 I̱na Isaraele wali agaliru lone biamogo buleberogolabi ti mo bayale holeberogolabi tigua mana ko hangu bialu karia handalu haabo kogoni. Tigua tininaga damene karu mo hondo haga bialu tinaga anda bangulalu anda puwa dabudabu ngaru mo page biaga ka. Ani bialu tigua wali agali tinaga dabudaburu yalu tanoha hariga pedadagua pialu karia uruni minu balu mo page biaga ka.
HOS 7:2 I̱na tigua mana ko bialu hayadaruni embeda naholebero. Anigo i̱na ogoni bulobodago ti manda nabiaga ka. Mana kome tini bu dambiho ngagola tinaga ko ngagoni hondo dege ko, lalu Anduane Homogohanda lene.
HOS 7:3 Anduane Homogohanda lalu, Wali agali marume mana ko tara tara ngaru bulenaga bi lo mbira halu tinaga kinibi tinaga agali haguane bu karubi bibahende mo hondo halu ke̱ haga ka.
HOS 7:4 Ti ke̱ hagane agali howa tigua kini baba mini mbiraore ho hetingi haga ka. Ira dene emene mbira hungu bialu hagagobi tinaga miniha keba holene wia do howa tingini daligaha bayale hetingi haga ka. Mberedi hiraga agalime mberedi iraga halu timbu helo wabu ngelowa ira dene delo manda manda biaga. Mberedi ibu timbu halu iraga haragola ira dene delo manda manda biyago pulope haragola ira da timbu haga. Tinaga keba holene manane ogonibiore nga.
HOS 7:5 Kini ibugua tomo timbuni dawarangi agali uruni tigua kinibi ibunaga agali haguane bu karubi waini iba dewa nelo hambu miaga ka. Ani miragola kinibi ibunaga agali haguane biarubi waini iba dewa nowa luluyu biraga.
HOS 7:6 Agali uruni tinaga miniha mana ko bulene ege to̱le̱ kundibi ale do ho biraga. Mbiraga u padaha agalime mberedi hiraganeha ira delayago emene dege dowa hagua bu wiagadagua tinaga mini ogonibi wiaga. Ani wuwa egerebalene egabi laragola tinaga mini lone hungu bialu da timbu hagagobi wiaga.
HOS 7:7 Agali ko biaga urunime kini mbira mbira karubi tinaga agali haguane karubi bibahende bo wahaga biaga. Mana ko ogoni ti daluha ngelo howa mbiraore hangumebi i̱hondo bi lalu biamogo bia naleore haabo harimi, lalu Anduane Homogohanda lene.
HOS 7:8 Anduane Homogohanda ogodagua laya. Isaraele wali agali ti wali agali dindi tara taraha karu baba hamagamaga bu howa tinaga mana tara uruni biaga wiago dege biaga ka. Ani bialu kagome tinaga mana ko mberedi dindiha dapene daligahayagi nade gahenge ngaligobi biaga ka.
HOS 7:9 Mana ko urunime Isaraele wali agali tininaga hongo bope hene kago manda nabi bayale dege kamabe tobaho haga ka. Ti wali agali abale wahe halu hongo nahe bu karubi dege howa manda nabi dege kagoni.
HOS 7:10 Isaraele wali agali tinaga mine holene ngagome tini godini helaga ngagoyu tini bu mini beregedalu Anduane Homogo tinaga Ngode Datagaliwabe i̱ni kogoha dai nabi haabo ka.
HOS 7:11 Isaraele wali agali ti ega odahe pogola a̱i̱ na̱i̱ bima piagagobi ka. Pigane Iyibialirume ti biamogo bilo hale hole pirimigo pialu mani Asirialirume ti biamogo bilo íbu lole pirimiya.
HOS 7:12 Ani bialu ti ega ale howa yagalalu porangi i̱na ti gono bape halu minu yania holebero. Ani birangi tigua mana ko ala binirubi áyu bialu karubi ogoninaga i̱na mana lalu abale bolebero.
HOS 7:13 Hale haramine. Tíha mo ko holeneore wulebira. Tígua i̱ erembira ngialu yu wahalu pu kamigo tí homalimulo boleneore wulebira. Pigane i̱na tí biamogo bulene manda bu hewaria tígua i̱hondo ke̱ dege halu pirimi.
HOS 7:14 Tígua i̱hondo bi ke̱ howa lalu kami. Ani buwa tígua i̱ ka manda nabiaga karume lagadagua dindini bulu paluwa dugu bialu bi laraga halu biaga kami. Tígua i̱hondo tomo waini ibaru ngi lalu bi lole howa Anduane Homogo manda nabiaga karume biagadagua tínaga tingini darama ibilo podaga kami. Ani bialu i̱ erembira ngialu piaga kami.
HOS 7:15 Heneneore i̱nime tí mo bayale halu hongohe helewagola tígua i̱hondo mana ko dege bule manda bu haga harimi.
HOS 7:16 Tíha mo ko holene anda ibirangi tígua i̱hondo biamogo bia lole naibaga kami. Tígua mbirale damanaga hongo nahe biamogo nabibehe ngagoha dege piaga kami. Danda kome timu bako haga ngaligobi kami. Tínaga agali haguane karume mine howa bi lalu, Iname inane biamogo bialu inanaga waitigiru bope holene hongohe karulape kama, laga ka. Anigo ti waiha homai haragola Iyibiali karume ti hondo oba holebira, lalu Anduane Homogohanda Hoseaha howa ani lene.
HOS 8:1 Anduane Homogohanda lalu, Wai bu polenaga mbelo biguli puladaba. Ega bodo hariawe bedarume ibu naga ale bedagola minule abale yulope hagadagua ti waitigiru abale ibalu i̱naga andaha wai bule ibiragoni. I̱naga wali agali tígua i̱na habo nalolene bi tí baba lo wirugo mo habo lalu i̱naga mana lo ngogobi mo wahai harimi.
HOS 8:2 Isaraele wali agali tígua i̱hondo lalu, Í̠ inanaga Ngode Datagaliwabeore kegoni howa ina nde í̠naga wali agali howa í̠ manda bu kamagoni, laga kami.
HOS 8:3 Anigo tígua nde mana bayale tigabi ngaru yu wahai halu pirimigonaga waitigirume nde tí bo taluebira.
HOS 8:4 I̱naga wali agali tigua i̱hondo hale nahe howa tini hangume agali kini helo dabo helaga biya. Tigua tinaga agali haguanebi dabalu i̱na karulape nakarulape loliya i̱hondo hale nahe howa dabo helaya. Tigua ngolo siliba wiarume dama mitangi bialu mbirale gime wabu ngelo ka. Anidagua biyagome tini bo waholene mo yuanda ibiya.
HOS 8:5 Samaria wali agali tigua dama mitangi bialu bi pupu wulenaga nogo bulumaga wangabe ale ngolome wabu heledago i̱ turu nahe howa tihondo keba timbuniore ho ko. Tinaga mana ko uruni abale yu wahelo hameledogo ai tigua angi waholobadabe.
HOS 8:6 Isaraele agali mbira biabe ogoni biaga mugubeyi heagome mbirale dama mitangi bialu bi pupu wiaga ogoni wabu helaya. Ani biyago ai mbirale gime wabini ogoni ibu Ngode Datagaliwabe ndo bame bigiya ale hangu nga. Samarianaga dama ogoni nogo ale ngolome wabu ngago i̱na bo gingirulobaga berogola be abalu dege wulebira.
HOS 8:7 Tinaga mana ko ngago emeneore puyabu pu laraligobi ngagoyu mana ogoniha howa tagira ibirago puyabu timbuniore humbirini wai ale hongohe ibalu wali agali bo paya biagagobi holebira. Ti mabuha widi egene hengedago lini bayale nade kuabu haragola mberedi wabulene balawa nawi ngaligobi holebira. Anigo widi ko urunime lini ko maru daga biyagua nde agali dindi taraha howa ibirarume do nelo waha.
HOS 8:8 Isaraele wali agali ti lone bayale holene nawiore. Ti hameigini maru dindi tara tarani bu karubi dege haya. Ti iba be pambulo wahene mbirale mbira bibe nahe ngaligobi hayagoni.
HOS 8:9 Nogo dongime gabua halu pupe haralidagua bialu tinime hameledadagua bima pupe haya. Ani buwa ti biamogo bule ibidaba lalu Asirialiruhondo hale hole pialu dindi tara tara wiagoha kini bu hearuhondobi ti biamogo bule ibilonaga muniru migi biya.
HOS 8:10 Anigo i̱na áyu ti haru mandagi mo mogo buwa minu baiore holebero. Emeneore howa Asirianaga kini kagome ti genda timbuni mo ya halu bope haragola Isaraeleali ti emene mbira hangu holebira.
HOS 8:11 Isaraeleali tigua ko domo waholenenaga lomabu delaga dabu dewaore bu helolebirago nde tinaga lomabu delolobadaruni tiga nabiore wulebira. Ani wiragome tigua ko dewaore mo bia halu holebira.
HOS 8:12 I̱na tihondo mana dewaore gilibu mirugoni. Anigo tigua i̱na mana gilibu mirudaruni de hondowa mana ogoni tara ale mbira wali agali tara karunaga winida lo manda bialu tigua talialu bia nabiya.
HOS 8:13 Tigua loma dewa i̱hondo bo lomabu delowa loma bo delayadarunaga mbirini tini naga biya. Anigo Anduane Homogo i̱na tinaga loma uruni hondowa turu nahe haru. Ani henego tigua ko bialu hayadaruni mitangi bialu i̱na pani mialu tiha mo ko holene ibilolebero. Ti Iyibi dindiha garabaya lone helo minu pelolebero.
HOS 8:14 Isaraeleali tigua tinaga kini bu karume ti biamogo bialu pele mulene hongo karulape yu kabe toba howa kininaga anda timbuniru bialu kagoni. Ani buwa tigua mbira dege i̱ Anduane Homogo wali agaliru wabiaga kogo embeda ho wahaya. Yuda wali agali tiguabi wai pabe hongohe beremagome ti karulape holeberemabe toba howa tinaga tanoru wai pabe bu mabu biya. Ani biyagoyu i̱na tinaga tano ogoniha ira dene hedope halu tanobi kininaga anda bu heledarubi bo heda hai holebero, lalu Anduane Homogohanda laya lalu Hoseahanda lene.
HOS 9:1 Hoseahanda bi ogodagua laya. Isaraele wali agaliru-o Anduane Homogo manda nabi karume biagadagua tígua ngoai holene horo wiabagi henego tagira ibirangi tí tomo dawa nalu lotu ke̱ howa lalu turu haga beremiliru wahai halimu. Tígua Anduane Homogo tínaga Ngode Datagaliwabe kagohondo erembira mialu ibu talima nape waharimigoni. Ani buwa bayanda wali harigani bedarume agali kayu yama ibaga biagadagua tígua Ngode Datagaliwabe wahalu puwa dama mitangi bialu mbirale gime wabini mini Bala ngagohondo bi pupu wialu kamigoni. Ani beremigome wali kayu yayagonaga yolo mo yagadagua Bala ibugua tínaga maburuha tomo bayale mo anda holobabe toba haga kami.
HOS 9:2 Anigo tigimandi hangu howa tínaga tomobi olibe lininaga ibanebi biba halu waini ibabi ereba holebira.
HOS 9:3 Ani bialu Isaraele wali agali tí Anduane Homogonaga dindi ngiyagoria lu haabo naholeberemi. Tí Iyibi dindihabi Asiria dindihabi lone garabaya hole poleberemi. Dindi uruniha pu howa tígua tomo mbirale Ngode Datagaliwabehanda nanabe lene ngaru tanabi nalu holeberemi.
HOS 9:4 Tígua dindi taraha pu kamingi waini ibabi nogo ega taratarabi Anduane Homogohondo lomabu namuleberemi. Tínime dindi ogoniha howa tomo nanolene lo winigo naramigome mbirali homaragola dugu bialu howa tomo tanabi nanolene ngarubi na dege bialu Anduane Homogonaga deni ko ogoni bialu holeberemi. Tomo uruni tínaga tombe karulape helonaga dege nalu holeberemi. Tigua tomo uruni aria mbira Anduane Homogonaga andaha lomabu yalu napoleberemi.
HOS 9:5 Ani buwa Anduane Homogo mitangi bialu ngoai holene horo wiabagi henego tagira ibirangi tígua bulene mbira nawulebirago tí agi buleberemibe tobara.
HOS 9:6 Mani mo ko holene timbuni tagira ibirangi tí ibida piai halu purogo loleberemi. Ani beremigola Iyibiali bu karume ibalu tí Iyibi dindiha garabaya bu yalu piai holebira. Ani biragola tí Iyibiha haabo halu homaramigola tinaga tingini Iyibi dindiha tano timbuni mini Memebisi ngagoria hora haga bulebira. Ani biragola tí lone dai bulene henge nawi. Tínaga andabi muni silibabi dabudabu tara tara bayale ngamirubi bibahende mbiralime karulolene henge nawi uruni ngagoria ani tara tara timbunirume andaho dambi holebira.
HOS 9:7 Anigo Anduane Homogohanda tígua ko birimigonaga pani ngulenengi hapara harago ai tígua ko bialu harimigonaga pani nolene wulebira. Mbirale uruni tagira ibirangi Isaraele wali agali tígua mitangi bialu tínaga yolo ko biago ibiyadalo manda buleberemi. Tígua i̱hondo langialu lalu, Anduane Homogonaga bi mana latagi haga ogoni ibu mini nawi ka loleberemi. Agali Ngode Datagaliwabenaga Dinini karule ogoni ibu luluda loleberemi. Wali agali tínaga ko timbuniore dewa bialu kamigome i̱hondo handabe mangaho kamigoni.
HOS 9:8 Ngode Datagaliwabe ibunime ibunaga wali agali tí kamirunihondo bi mana latagi hole i̱ dabalu pu laya. Ani pu laya handala ibirugoyu i̱ dindi bibahendeha ibaga berogola ega gonoha ge dagadagua i̱ hapai haabo halu kami. Ngode Datagaliwabenaga andaha pu kogola tí i̱hondo waitigi halu kamigoni.
HOS 9:9 Bamba tínaga mamalirume Gibea tanoha howa mana ko bialu henedagua tíguabi mana ko dewaore bialu kamigoni. Ani bialu kamigoni Ngode Datagaliwabe ibugua tínaga ko birimigo mandabu haabo howa pani ngulebira, lalu Hoseahanda lene.
HOS 9:10 Anduane Homogohanda ogodagua laya. Bamba i̱na Isaraele wali agali tí handa walia harungi dindi ko iba dalu naibaga ngagoha pu mbira lini daga mini gerebi bayale andaho howa lini dedaligobi hemiria handaru. Tínaga mamali ala henedaru de hondowa i̱na ti poge lini dolene tu haragola lini pigane denego ale hearia handaru. Anigo mani Hari mini Peo heagoria pu howa tigua dama mitangi bialu bi pupu wiaga Balahondo turu halu bi pupu pigane wialu heagola tinibi nde ko Bala ogonibi dege haya.
HOS 9:11 Egaru yagalo yu piagadagua Isaraele wali agali tinaga hongo ereba hai holebira. Tinaga wali bedarume waneigini gali taba nahonolebira. Wali gali bere nabirulebira. Waneiginibi nahono wulebira.
HOS 9:12 Anigo mbirali ibu waneigini mbira haga biyagua uruni homelo i̱nime bo wahaga bialu mbira hangubi yu wa naholebero. I̱na wali agali uruni yu waharongi ko tara tara nahendene ale ti kagoha ibulebira, lalu Anduane Homogohanda laya.
HOS 9:13 Hoseahanda Anduane Homogohondo lalu, Anduane Homogo-o bamba Taia tano baya tara mbira winigo ainde áyu waitigirume ibalu mo ko hayiya. Isaraele dindihabi nde anidagua dege bulubada. Waitigi bu karume ibalu waneigini bu karu bo wahai holobada.
HOS 9:14 Ani bulubadago ainde í̠na Isaraele wali agali o biaruhondo agi buleberebe lalu hale haro. Ai wali bedarume waneigini taba honolilono mo wahalu maru waneigini andu mialu bedarunaga andu ibane mo ereba helabe laruyaguabi bayaledabe, laya.
HOS 9:15 Anduane Homogohanda lalu, Bamba ti Giligala dindiha heangi howa tigua mana ko uruni tehinalu bialu haya. I̱na ti handabe manga pigane ogoningi haru. Wali agali tigua mana ko dewaore bialu hayagonaga i̱na ti i̱naga dindi ogoria howa bo batagi holebero. I̱na tihondo gubalini naholebero. Tinaga agali haguane bu karumebi i̱naga bi mana mo wahaga bialu ka.
HOS 9:16 Isaraele wali agali karu ti ira mbira pini gabu hai hene lini dabe nahe kaligobi tinaga waneigini nataba honolebira. Anigo mbirali ibu waneigini mbira taba hanayagua nde i̱na tinaga waneigini gubaliniore howa taba hono bedaru bo wahai holebero, laya lene.
HOS 9:17 Hoseahanda lalu, I̱ Ngode Datagaliwabenaga biabe biahaga howa ibunaga wali agali ibu talia nabi karu ibugua ti erembira mialu waharagola ti dindi tara taraha purogo lalu bame ibagabu holebira.
HOS 10:1 Ala Isaraele wali agali ti pu mbira lini daga mini gerebi bayale liniru dewa daga kaligobi howa mbirale dewa wu hene. Tinaga dabudabu bayale uruni dewaore wia tago haabo halu gerebi lini bayaleru dewa dedaligobi hene. Ani howa tigua mine halu lomabu delaga daburu mbirale dama mitangi bialu gime wabinirunaga gene dewaore to̱le̱me wabu helalu gene uruni yári taraore bia howa helaga bini.
HOS 10:2 Ti ke̱ hangu haga howa tinime ko bialu hayagonaga pani nolebira. Ngode Datagaliwabe ibugua tinaga lomabu delaga dabu bu heledarubi tinaga bi pupu wiaga gene wabu heledarubi bo gialo wahai halu mo koore holebira.
HOS 10:3 Emeneore howa Isaraele wali agali tigua agua lolebira. Inaneme Anduane Homogonaga bi hale naharimagome ai ibugua inanaga kini dugu wahayada. Ani biyadago inanaga kini henene kalebi nde ibugua ina biamogo agua bidaledabe. Biamogo bibe naheore ndodabe.
HOS 10:4 Kinirume ina biamogo bule ale tingi howa bi hangu bame lo payapaya biaga ka. Tigua mbirale bule ale howa bi bame lo paya bialu dindi mendenaga kini bu karu baba bi pongo bame bo wiaga, lene. Isaraele wali agalirume mana tigabi bialu holene wiaru yu wahai halu tigua mana ko wia aribia ho ngaru dege mo tene howa bialu ka. Tinaga mana ko uruni dindi bayale alu ngagoria tani ko tomia pale andaho haradagua bida.
HOS 10:5 Wali agali Samaria tanoha bu karume gi howa nogo bulumaga wangabe ale ngolome wabini Bedele dindini wiyagonaga dara timbuniore ho holebira. Asirialirume ibalu bulumaga ale ogoninaga yári ngolome bia hearu gialo wahai haragola Isaraele wali agalibi tinaga loma binigo mo miaga bulumaga ale ogoninaga biabe bialu haga bu karubi tigua dara timbuni howa dugu bialu holebira.
HOS 10:6 Asirialiru tigua mbirale ogoni Asiria dindiha mo yalu puwa tinaga kini kagohondo dagisi ale mo mulebira. Ani biragola Isaraele wali agali tigua mbirale bi pupu wule gime wabini ngarunagabi agali manda timbunibi hearume bi lenedaruni hale howa biyagonagabi tini taga timbuniore ho holebira.
HOS 10:7 Samarialirubi tinaga kini kagobi ira ongoba dabiabi ibame yalu piagadagua tini pu ereba helolebira.
HOS 10:8 Isaraele wali agali ti dama mitangi bialu gime wabini ngaruhondo bi pupu wule hari nene karuha piagago uruni mo ko hai holebira. Ani mo ko hai kagola datani ko aniherume lomabu delaga dabu bu heledaru andaho dambi holebira. Ani kagola wali agali tigua gi timbuni howa hari wedaruhondo bi laraga halu olalu, Ina hage hadaba, lalu hari barebare ngaruhondobi lalu, Ina poda dambi hadaba, lalu holebira, lene.
HOS 10:9 Anduane Homogohanda lalu, Isaraele wali agalime Gibea tano wiagoria howa i̱hondo ko bialu henego áyubi nde wa nahe ko dege bialu haabo kamigoni. Ani bialu kamigonaga Gibea tano wiagoriani waitigime ibalu agali ko uruni baba wai bialu bope hayadagua dege bima puabo holeberami.
HOS 10:10 Anigo i̱na wali agali ko biaabo haragonaga pani mulene pongo bo wirugo tagira ibiragola pani mulebero. Tigua mana ko dewaore bialu hayagonaga i̱na waitigi dindi tara tarani bu karu mo mogo bialu ti baba wai bilimulo ibilolebero.
HOS 10:11 Abale nde Isaraele ibu nogo bulumaga angibuni baya hangu biawai hene howa widi iraneru lini hondo ibira ibira bilo geme hengeda helo helagagobi howa ibu biabe bulene turu howa hangu biaga hene. Abale piganengi ibu biabe gendabi bilo mo mia nabi henego ai áyu ibunaga biabe ndelaheore bialu helo mo mido. Áyu Yuda Isaraelela libu haru nogo bulumaga mabuha dindi aliaga ngago libunaga mani dariba hamagamaga buwa gililo yu ibagabu hagadagua bialu heledo. Libugua hongo howa dindi aliaga biago gililo yalu pu nabi heagola ira mani hende hamagamaga biaga heagome libuninaga mani bungu lalu ma hibunaya.
HOS 10:12 I̱na ala Yuda wali agalirubi Isaraele wali agalirubi tihondo lamialu lalu, Agalime e ima hengedagola tomo damenego bibahende bayale dege anda hai hagadagua tígua mana ko bialu kamiruni dugu wahai halu mana bayale tigabigo hangalimu. Ani birimiyagua nde lini bayale dewa do noleberami. Tígua i̱ mitangi bialu lotu heneneore lole tínaga Anduane Homogo i̱ni koria dai bulene horo áyu ngagoniore. Tígua i̱ni koria dai birimiyagua nde i̱na tí biamogo bialu mo bayaleore holebero, larugoni.
HOS 10:13 Anigo tígua anidagua bulene mitangi nabiore harimi. Tí agali e ima henge dege harimigoni. Anigo tí mabuha mana ko bulenebi mine halu ke̱ holenebi hongo harimi. Ani hongowa ko uruninaga lini tíni dege do nalu harimigoni. Ainde tígua manda bu handalu hemiria tínaga hongo karulapeda manda bialu ami agali dewa bu karume tí biamogo bialu mo wulebirabe toba harimigoni.
HOS 10:14 Ani bu kamigome tínaga waitigirume tí baba wai bule anda ibalu tínaga tano ege pabe hongohe bu mabu bini ngaruni bo gialabaga bialu mo ko hai holebira. Wai bialu mbirale mo ko hai holene ogoni bamba Kini Salamana ibugua Bedabele tanoha hearu baba wai buwa tano mo ko hai halu bo gialabagabu wahenedagua waholebira. Ibunaga ami agali bu hearume tanoha wali waneiginiru lola hayago bame mo para halu ba ai̱ nai̱ binidagua bulebira.
HOS 10:15 Bedele wali agaliru-o tígua mana ko dewaore bialu harimigonaga genda o tagira penedagonibi tíhabi nde ani tagira ibulebira. Egerebagi ni tagira ibule manda biragola Isaraelenaga kini kago ala bo waholebira, lene.
HOS 11:1 Anduane Homogohanda laabo halu lalu, Isaraele ibu ala bamba waneigini gali ale heangi i̱na ibu gubalini halu i̱ni iginiore lowa turu halu Iyibi dindi howa haru tagira íbu helarugoni.
HOS 11:2 I̱na ibu i̱ni koria dai bilonaga olalu hewaria ibu hale nahe tingi howa erembira ngialu piya. I̱naga wali agaliru tigua mbirale gime wabini mini Balahondo bi pupu wialu mbirale loma buwa bo delalu maru wiaruhondobi uruninaga lomabu delaga dabuni ira hagua ngabilo mini inisenesi wiaru delalu biya.
HOS 11:3 Isaraele ibu hariga tigabi ngagoria pialu helonaga biawai haga i̱niore kogoni. I̱na i̱naga wali agali i̱ni gime taba yalu baya hanguore handayaho harugo helowa tigua ani biyadalo manda buwa dege la nabi hayagoni.
HOS 11:4 I̱nime ti gubalini howa turu halu i̱naga gubaliniha minu yamuwa ti mo turu howa tomobi baya hangu nelo mialu harugoni.
HOS 11:5 Tigua i̱ni kogoha daibua nahe kagodago nde ti Iyibi dindi daibuwa Asirianaga haru hagame ti handayaho helo polene nga.
HOS 11:6 Ani bilonaga wai timbuniore bialu tinaga tano timbu ngaruninaga pabe panga hongohe karuni bo gialo wahai halu tinibi bo biba hai holebira. Irane i̱naga wali agali uruni tigua i̱ni yu wahalu puwa tini hame leago bima piyagome urunidagua bulebira.
HOS 11:7 I̱ni helo wahalu piyagonaga i̱na pani timbuni merogola ti yo pialu mbira napolebiraore. Tiha genda timbuniore tagira ibiragola tigua dugu timbuniore bulebira. Dugu bialu kagola agali mbirame ladebodebo bialu mo wahabe tobahe wulebira.
HOS 11:8 Isaraelealiru-o i̱na tí yu wanaholebero. I̱na tí helalubi napolebero. I̱na Adama dindibi Seboimi dindibi mo ko halu bo gialo waharudaguabi nabule dege. I̱na tí gubalini timbuniore ho kogome tí mo ko nahole.
HOS 11:9 I̱na tíhondo keba howa pani nangulebero. I̱na tí lone mo koore naholebero. I̱ni Ngode Datagaliwabe kogome i̱naga mana agalinaga ngaru ale ndo i̱naga mana taraore ngogoni. I̱ Mbirali Loma Bia Hene kogo tí yu wanahe tí baba holebero. I̱ tí kamiria keba howa ndo ibulebero, lalu Ngode Datagaliwabehanda lene.
HOS 11:10 Anduane Homogohanda laabo halu lalu, I̱na budi gabua ale laionome bi hongo howa ngororo laradagua bialu ti waitigi bu karu olarogola i̱naga wali agali ti gi howa dindi ni paliragohayagi ngaru yu wahalu abale i̱ni talima ibulebira.
HOS 11:11 Tigua Iyibi dindi howa abale egame yagalo yalu ibiradagua bialu Asiria dindi howa ega malibu ale ibiradagua bulebira. Ani biragola tininaga dindi wiyagoriaore helo haru dai bulebero. I̱ Anduane Homogo i̱na bi o ledogoniore, lene.
HOS 11:12 Anduane Homogohanda laabo halu ogodagua laya. Isaraele wali agali tigua i̱hondo ko dewa bialu ke̱ tara halu haabo ka. Anigo Yuda wali agali tibi i̱ erembira ngialu tinaga Ngode Datagaliwabe mana tigabi bayale hangu biaabo haga kogo i̱ni andaneha íbu nabi ti mana ko dege biaabo halu kagoni.
HOS 12:1 Isaraele wali agali tigua mbiraga horombebi bialu karuni koore habane nabulene tini mo ko holenego dege bialu haabo ka. Ke̱ holene manabi bo waholenebi ti kagoha pigane emene dege ibugu bialu mani howa bia timbu haga biaga nga. Tigua Asiriali baba biabe mandagi bulenaga bi lo wirimi. Ani bialu tinaga olibe lininaga ibaneru Iyibi baba biyinaya bialu hambu pelaragola Iyibi tigua yolo miaga ka.
HOS 12:2 Anduane Homogohanda Yuda baba bi lole yu ka. Ani bialu mana ko Isaraele wali agalirume biyagonagabi pani nelo mulebira.
HOS 12:3 Tinaga mamali Yagabahanda ibu ai̱ya tombeha biruwa ibu hamene Isola gungu bialu berene. Mani ibugua agali howa Ngode Datagaliwabela gungu bini.
HOS 12:4 Ogoni biyadangi ibugua Anduane Homogonaga dahuliyalilabi gungu buwa ibugua dahuliyali biago bope hene. Ani bialu Yagaba ibuni dara halu Ngode Datagaliwabehondo biamogo bia lowa dugu bialu hene. Mbirungi nde Ngode Datagaliwabe ibuni Yagaba hearia Bedele dindini hapani howa ibuhondo bi lene.
HOS 12:5 Ngode Datagaliwabe Yagabala bi lalu henedagoni ibu Anduane Homogo Hongo Haiheore ka. Iname ibunaga mini Anduane Homogo lolene nga.
HOS 12:6 Ani kago manda bialu Yagabanaga aguanene kamiru tínaga Ngode Datagaliwabe ogonihondo mini mbiraore wialu ibuni karia dai bulene nga. Ani bialu tígua heneneore ibu talima pialu mini bilinahe howa mana tigabi ngaru hangu bialu ibugua tí haru dai bilonaga mini dunubiaho holene nga, lene.
HOS 12:7 Anduane Homogohanda lalu, Isaraeleali tigua tinaga biyinaya biabe bialu howa baya hangu bulene tigabi ngadagua nabiaga ka. Ti Kenanali biyinaya biabe biaga bu karume biagadagua tigua ke̱ halu agali mende kagome mbirale ngaru munime milo hangu hamelaga ka. Ani bialu howa tigua tinaga mbirale uruni genda magi tigatiga tale bulene ngadagua ndo biaga ka.
HOS 12:8 Mana ogonidagua buwa tinime lalu, Ina mbirale dewa wuwa abale homogo kamagoni. Mbiralime inahondo ke̱ howa muni page binime homogo kagoni labe nahe holebira. Iname mana ko ndo birima, laga ka.
HOS 12:9 Anigo Anduane Homogo tínaga Ngode Datagaliwabe i̱ kogo i̱na tí Iyibi dindiha howa haru tagira pialu haru ibirugoni. Ani birugo ainde tínaga anda bayale bu kamiru wahalu dindi ko wali agali nahaga wiagoha howa balai andaha palirimidagua lone palueberemi.
HOS 12:10 I̱naga bi mana latagi haga hearuhondo bi lalu de gandebaha howa mbirale tara tara dewaore walia halu lamiai haga biru. I̱naga bi mana latagi haga uruniha howabi i̱na tínaga mana ko bialu harimigo erembira mialu wahai halimu lalu lamiai haru.
HOS 12:11 Anigo tigua bi ogoni hale nahaya. Gileada tanoha howa tigua dama mitangi bialu mbirale gime wabini wiaruhondo bi pupu wialu mana ko dewaore bialu harago ti homai holebira. Giligala tanoha karume nogo bulumagaru lomabu delaga dabu ngagoria bo lomabu delalu haga ka. Ani bialu kago dabu uruni gialabaga bialu ege to̱le̱ dabu binidaru dindini hama ngagoria bu wulebira, lalu Anduane Homogohanda lene.
HOS 12:12 Bamba inanaga mamali Yagaba ibu Mesobodemia dindiha ibida pole pene. Puwa ibugua wali mbira dabu bule lowa wandari abanaga nogo sibi hina halu biabe bia halu hene.
HOS 12:13 Isaraele wali agali Iyibi dindiha garabaya biabe ale bialu heangi Anduane Homogohanda ibunaga bi mana latagi haga mbira ti hearia pelalu ti Iyibi dindi wahalu haru tagira pole pu lene. Ani pu layagola ibunaga bi mana latagi haga agali ogoniha howa ibugua ti baya hangu handayaho hene.
HOS 12:14 Ani heagola Isaraele wali agali tigua mana ko dewa biyagome Anduane Homogo mo keba timbuni halu hene. Anidagua biyagonaga pani tini homolene wini. Tigua Anduane Homogo mo yo handayagonaga ibugua tini pani nelo mulebira, lalu Hoseahanda latagi hene.
HOS 13:1 Bamba Eberaimi hameigini bu hearu tigua bi layagola Isaraele hameigini maru hearuhondo gi halu bi ogoni hale haga hene. Anigo Eberaimi hameigini uruni tigua mbirale dama mitangi bialu bi pupu wule gime wabini mini Balahondo bi pupu wialu heagome tigua mana koore biyagoni. Ani biyagome tini homoleneore nga.
HOS 13:2 Áyubi nde tigua mana ko dewa dege bialu ka. Tigua bi pupu wulenaga mbirale silibame wabu ngelowa ogonihondo bi pupu wialu ka. Agali tinime manda bialu ogobiore helo wabero lalu wabu ngelowa agali mende kagome gime wabini ogonihondo loma biniru mo mialu helo dabo helaga. Tigua mbirale nogo bulumaga ale gime wabini ogoni nu̱nu̱ lalu hagayago gibiore biraya. Uruni ti agile wali agalida.
HOS 13:3 Anidagua biagayagome wali agali uruni ti egerebagi ni tagira ibiragola ginu ngago ereba halu piai hagadagua ti ereba hai holebira. Ti egerebagi dadimba tanini ngaligobi howa ni daragola yo bialu abale ereba haralidagua ereba holebira. Ti widinaga aeane puyabume yu pu wahagagobi holebira. Ani bialu ira deledagola hagua hariha iraga halu pu ereba hagagobi holebira, lalu Hoseahanda lene.
HOS 13:4 Anduane Homogohanda lalu, I̱ Anduane Homogo tínaga Ngode Datagaliwabe tí Iyibi dindiha howa haru tagira ibaga harugo kogoni. Tínaga Ngode Datagaliwabe i̱ni hanguore kogo tara mende naheore. Tínaga pele ngiaga i̱ni hanguore kogoni.
HOS 13:5 Tí dindi ko dalu naibaga wiagoria pu hemigola i̱nime tí baya hanguore handayaho harugoni.
HOS 13:6 Ani bialu mani dindi bayale wiagoria anda pialu nde tomo nolene dewaore bu payabu wialu maru alebi karulape yu harimigoni. Tígua mbirale dewa uruni yu howa nde tíninaga hongome minibe toba harimigo. Anidagua birimigome i̱ mo embeda harimigoni.
HOS 13:7 Ani birimigonaga budi gabua ale timbuni laionome mbirale porabu para howa bo nagadagua i̱na tí bolebero. Tínaga hariga piaga ngagoria budi gabua ale timbuni tara mini lebadime mbirale ema bialu poraru bole nende buwa biragadagua i̱na ti bole yu birulebero.
HOS 13:8 Biango ale timbuni mbira mini bea bedagome ibunaga igini pu ereba hayadagola keba howa mbirali abale porabu ede halu gi gibame galu kuni abale minu lere lagadagua i̱na tíbi ani dege bulebero. Ani buwa laionome mbira minuwa abale nai hagadagua i̱na tí ani bulebero. Gabua tara tara timbuni irabuha hagane kagome mbirale bo lerela baga bialu nagadagua i̱na tí ani bulebero.
HOS 13:9 Isaraelealiru-o i̱na tí biamogo bibehe kogoni helowa tínime manga halu kamigome genda tandagala tínime mo yu anda eberamigoni. Irane ani beramigome tíni mo ko holene timbuniore wulebira.
HOS 13:10 Ai tígua i̱hondo tínaga kinirubi agali haguanerubi tí haru helonaga ngi larimigola nde ngirugoni. Anigo áyu urunime agua bialu tí biamogo bulebirabe. Heneneore tigua tí biamogo bibe nahe ndodabe.
HOS 13:11 Tígua ngi larimigola nde i̱na hale howa keba halu dege ngirugo ai áyu i̱na urunihondo keba timbuniore halu bo batagi kogoni, lalu Anduane Homogohanda ani lene.
HOS 13:12 Anduane Homogohanda laabo halu lalu, I̱na Isaraele wali agalinaga ko ngago bibahende i̱naga mbugani gilibu wiai howa ngeledo.
HOS 13:13 Isaraele wali agali ti bayaleore holene winigo tini lulu ale hayagome bayale holene manga haya. Ani biyadagoninaga manane waneigini ai̱ya tombeha berenego ibu ai̱yahanda taba honolebiragola waneiginime abale tagira naibagago ale ti ani bini.
HOS 13:14 Anigo i̱na ti homenerunaga dindiha pu kamiriabi homaganenaga hongome yu kariabi i̱na ti lone gi mia nabulebero. Homa-o i̱na í̠ mo ngubiore halu bo ereba holebero. Homenerunaga dindi-o í̠ni warago timbuniore bu hinuwa ti bo biba holebero. I̱na Isaraele wali agali uruni lone dara howa biamogo nabulebero.
HOS 13:15 Eberaimi hameigini ti ho damebi dewaore Isaraele hameigini maru padarubi ndo padagoni. Ai i̱na puyabu poboyogobi ni tagira ibiragohayagi howa pulo ibilarogola tinaga iba nagane duguararu bedarubi hundia hai helolebero. Ani bialu tinaga mbirale bayale damene wu karuni puyabu hongohe ogonime pulo yalu piai helolebero.
HOS 13:16 Samaria wali agalirume i̱hondo keba halu doga hayagonaga ti pani timbuniore nolebira. Waitigirume ibuwa tini balu tinaga waneigini galiru dindini mo para ho waharagola homai holebira. Wali ko gali bere bedaru tini balu waneigini tombeha bedaru bo haeala bagabu waholebira, lalu Anduane Homogo ibugua ani lene.
HOS 14:1 Isaraele wali agaliru-o tígua ko birimirume tíni mo pila hayago ai Anduane Homogo tínaga Ngode Datagaliwabe karia dai bulene nga.
HOS 14:2 Tígua Anduane Homogo ibuni karia dai buwa ibunihondo bi ogo loma ale lomialu lolene nga. Tígua ibuhondo bi ogodagua lalimu. Anduane Homogo-o iname mana ko birimaru bibahende domo wahai halu inanaga bi laramaru loma ale lo ngeramago í̠na áyu hale habe. Ai iname abale í̠hondo mana bayaleore bule lalu bi pongobo wirimaru bi ogoni larimadagua bialu í̠naga mini yaraga holeberama.
HOS 14:3 Asiriali karume ina gi mialu pele nangibehe ka. Nogo hosini biruwa wai bu piaga karume ina mo wiabi nabibehe dege ka. Iname mbirale gime wabiniruhondo inanaga Ngode Datagaliwabe kamigoni lalu bi pupu nawuleberama. Anduane Homogo-o ina biamogo bulene mbira naheore waneigini aba ai̱yala nahe hono wahene ale kamago í̠na dara howa biamogo birilidagua bibe lalimu, lalu Hoseahanda lene.
HOS 14:4 Anduane Homogohanda lalu, I̱naga wali agali i̱ yu wahalu pene uruni lone haru dai bulebero. I̱ninaga bu minime ti gubaliniore howa tihondo keba lone naholebero.
HOS 14:5 Dindi ko yobi iba dalu naibaga ngagoria dalu ibilalu dindi mo gomba hagadagua bialu i̱na Isaraele wali agali mo bayale holebero. Ti ira lini baya tara daraligobi halu Lebanono dindiha ira timbuni karu tinaga pini dindiha anda pialu unuraore pu wahagagobi ti holebira.
HOS 14:6 Ti ira yuniru bayale mbirimbarale howa ira olibe bayale kaligobiore holebira. Ira tamia Lebanono dindi taweme bayale nga biraligobi bialu wali agalime ti turu taraore holebira.
HOS 14:7 Ti ibalu i̱ni baba kagola i̱na ti handayaho holebero. Tinaga mabuha tomorubi gerebi lini daganebi bayale anda haradagua bialu nolene liniru dewa dedaligobi dege holebira. Waini iba Lebanonoha howa dendebiore berelowa mini lene wiraligobi tiore holebira.
HOS 14:8 Isaraele wali agaliru-o tígua mbirale gime wabiniruhondo lone bi pupu nawuleberami. I̱nime tínaga bi laramigo hale howa bayuwa handayaho holebero. Ira timbuni yuni dewahe kago andaneha ni gumba biragadagua i̱ni kogoha ibai holeberami. Tígua bayale bibahende yu kamigonaga tene i̱niore kogoni ndobe, lalu Anduane Homogohanda Hoseaha howa bi ogoni lai hene.
HOS 14:9 Wali agali mini gigabiwi karume mbuga ogoha bi lo wini gilibu ngaru daga lalu manda buwa bu miniha yu tiga bialu talima polene nga. Anduane Homogonaga mana bibahende tigabi dege ngago wali agali mini tigabi karume manda bialu biaga ka. Anigo wali agali mana ko biaga karume bi uruni hale halu donge howa nabiagagome tini pilaga ka.
JOE 1:1 Anduane Homogohanda Peduele igini Yoelehondo bi ogodagua lamini.
JOE 1:2 Wali agali wahe kamiru-o tí hale hadaba. Yuda wali agali kamiru-o tíguabi hale hadaba. Áyu ogoni dege mbirale bulebirarunaga tíhondo hale harogoni. Mbirale uruni ale mbira áyu tí kamingibi abale tínaga mamali heneyangibi tagira ibinibe be naibibe. I̱na manda bialu koria naibiniore lo manda bido.
JOE 1:3 O biraruninaga tígua tínaga waneiginiru lamilimu. Tigua nde mani tinaga aguanene hama polebiraruhondo bi te ogoni la a̱i̱ a̱i̱ bialu helo lamilimu.
JOE 1:4 Pagaya ale dewaoreme tidi yalu ibalu mbirale yuni damenego bibahende naiore hene. Pagaya ale pigane ibiyarume nai nahe yu wahayaru wabuni halu mende ibiyarume nene. Halu tebone mane halubi tidi yalu ibugu biyarume lone naga bialu mbira yu wanahe naiore hene.
JOE 1:5 Agali lulu iba nowa lulu yu haga kamiru-o ai heyu howa dugu bidaba. Waini iba hambu nowa lulu yaga kamiru-o tínaga waini iba hambia aribia holene pu mbira mini gerebi lini do aribia hayago pagaya aleme nai hayagonaga tí dugu bidaba.
JOE 1:6 Pagaya ale tidini dewaore ami agali ibiradagua ibalu inanaga dindi nahandabeheore dambi ho wa kagoni. Ti dewa hongoheoreni ami agalime daga labe nahe. Tinaga neru gadeleore budi gabua laiononaga ne alehe kagoni.
JOE 1:7 Tigua inanaga pu mbira lini daga mini gerebi irane mo ko halu pogebi bibahende naiore hayagoni. Ira uruninaga nagane hearu nai halu dongonebi heba bu nai hayagola irane pele hangu pana halu gabu hai hayagoni.
JOE 1:8 Wandarime igiri ibu poleore lalu lawinigo homaragola dara timbuniore halu dugu biagadaguaore dugu biai hadaba.
JOE 1:9 Lomabu mulene tomobi waini ibabi nawida. Loma binigo mo miaga karume Anduane Homogonaga andaha puwa ibunihondo lomabu mulene nawidagola dugu biragoni.
JOE 1:10 Mabuha mbirale mbira nahe bameore dindi hangu ngagoni. Ani bidagonaga dindi ibubi nde dugu bialu ka. Dugu biragonaga irane mabuha tomo anda hagane damenego gerebi lini gau lalu olibe irabi bibahende gau lai hayagonaga dugu biragoni.
JOE 1:11 Agali mabuha biabe bialu e hangaga kamiru-o dara holene nga. Gerebi lini daga pu ale hondo hagaru-o tí dugu bidaba. Tínaga mabuha balowa wabiaga widi balirubi tomo damene bibahende ereba hai hayadago ai dugu daraore bidaba.
JOE 1:12 Pu mbira lini daga mini gerebibi pogebi bibahende gau lai hayada. Ira lini naga ale daga hearunibi bibahende gau lai hayadagoni. Ani biyadagome wali agalinaga turu holene ereba hayada.
JOE 1:13 Loma binigo mo miagaru-o tí lomabu mulene dabu biabe biaga kamiru-o tígua yayawi dindi dugu hiruwa dara halu dugu bidaba. Tígua daraho kamigo walia halu yayawi dindi dugu hiralu Anduane Homogo andaha puwa dugu dege bialu egabi lelolene nga. Waini ibabi tomobi tínaga Ngode Datagaliwabehondo lomabu mulene mbira nawidagonaga ani bulene nga.
JOE 1:14 Tígua wali agali lamialu agali haguane karubi Yuda wali agali karubi bibahendeme tomo nane wahalu tí bibahende Anduane Homogo tínaga Ngode Datagaliwabenaga andaha mo ngoai howa ibuhondo bi lalu dugu bialu holene nga.
JOE 1:15 Anduane Homogo ibugua Horo ibunaga pongobo winigo áyu kaware ibiragonaga aniore bulene nga. Horo ogoningi Anduane Homogo Hongo Haiheore kagome mo ko holene timbuniore ibilolebira. Horo ogoningi inaha genda holene koore yu anda ibulebiragonaga i̱ dara ho kogoni.
JOE 1:16 Tomo mbirale ngaru mo koore harago hondowa iname mbirale mbira bibe nahe kamagoni. Anduane Homogo inanaga Ngode Datagaliwabe andaga pu poleberamago ogonihabi turu holene mbira nawi dege.
JOE 1:17 Dindiha yobi iba nabere ngagome tomo egeneru hengederia anda naholebira. Anigo tomobi mani nolenenaga do holene nawi. Ani biragome tomo bu yu mogobu ngelaga anda karubi tabuanda hai holebira.
JOE 1:18 Nogo bulumaga karu tibi nde datani nolene nahedagola ha̱a̱ lama lulu yalu ibaga bialu ka. Nogo sibi karubi nde tomo garibi lowa obi ona bu hama pedagoni.
JOE 1:19 Anduane Homogo-o ira datani karubi bibahende irame bo daradagua bialu gau lai hayadagonaga i̱na í̠ olarogo.
JOE 1:20 Ainde datani karubi gau lai halu iba bedarubi hundiai hayagola ema bialu piaga karume í̠hondo dugu bu ngialu kagoni.
JOE 2:1 Anduane Homogohanda Horo pongo bo winigo abaleore ibiragoni. Ani bidago tígua Hari Saiono biagoriani puwa mbelo mini biguli pu ladaba. Ngode Datagaliwabenaga hari loma bia hene ngagoria mbelo bolene nga. Horo ogoningi Yuda wali agali ti bibahendeore gi howa duru laga bialu holene nga.
JOE 2:2 Anduane Homogonaga Horo ogoni tagira ibirangiore ko arumahe mbira ngagola dara holene wulebira. Horo ogoningi ginu hagua mindibime bu dambi holebira. Ani biragola pagaya ale biarunime hari nene ngarunaga abale tidu yalu egerebagi ni tagira ibiralidagua bialu ami agali ibiradagua bialubi tagira ibulebira. Áyu biragoni ale nabinigo manibi nde nabulebira.
JOE 2:3 Ani ibuwa dangiha bo daralidagua tomobi datani karubi abaleore nai haragoni. Ti ge napeni ngaruha Idene mabu ale baya taraore ngagoni. Ti anda pialu nai hene ngaruha mbirale bibahendenaga yuni damene nai kagola dindi yobi hangu ona taulodaga ho ngagoni. Pagaya ale urunime mbirale yuni lenego mbira yu wanahe naiore holebira.
JOE 2:4 Pagaya ale ibiraruni nogo hosi handalehe ibiragoni. Ti wai biaga ami agalinaga hosi ibiradagua ibiragoni.
JOE 2:5 Ti hari bare ege to̱le̱ ngarunaga poragola wai biagane garo ale nogo hosime gililaga mini karisi pora biagadagua bialu dangi gabuni yobu wahe ngaruha bo daragola tilitola lalu lirilere laralidagua laragoni. Ti naina tidu yalu ibiraha ami agali wai bule ibiralidagua ibiragoni.
JOE 2:6 Ani bialu kaware hapara halu ibirago hondowa wali agalime gi taraore halu amburiho howa hiririho wima peda.
JOE 2:7 Pagaya ale biaruni abale ibalu ami agalime biagadagua tanonaga pabe karunaga iraga iraga bialu ka. Iralu mendehayagi dalialu puwa ami agalime tidu yalu piagadagua tidu yalu mandagi duguni pialu howa maru putara halu nape mandagi duguniore pialu ka.
JOE 2:8 Maru ti polene ngagoha pu pugua nabiaga. Pabe karu gialalu anda poragola mbiralime harigani hapai habe nahe.
JOE 2:9 Tigua tano ngarunaga gerai anda puwa pabe karu pora bialu anda pialu tano tamuha anda piaga. Ani anda puwa wali agali andaga karunaga windoha pagealime anda poralidagua bialu tamuha anda pugu bira.
JOE 2:10 Ti pialu kagola dindi harila ema biaga. Ni egela aruma halu yakundibi wá nahaga.
JOE 2:11 Anduane Homogohanda ibunaga ami olaragola tinaga bi hari kulu laradagua laga. Ani laragola ami agali hongohe dewaoreme ibunaga bi larago hale halu ibugua bia laradagua biaga. Ayaliore-o Anduane Homogonaga Horo ogoningi mo ko holene timbu gibiore tagira ibulebirago mbirali ogoni lola nahe yopialu ai ibu polobadabe.
JOE 2:12 Anduane Homogohanda lalu, Aniore biai holebirago ai tígua heneneore mini beregedalu i̱ni kogoha dai biai hadaba. Tígua tomo nane wahalu ko birimigonaga dara howa dugu bima i̱ni koria dai bidaba.
JOE 2:13 Ko birimigonaga darahe tingi howa ke̱ halu aga bidamiru bame budulene nakarulape. Ani ndo tínaga bu miniha howa ko birimigonaga dara heneneore halimu, lene. Anduane Homogo tínaga Ngode Datagaliwabe karia dai bulene nga. Ibuha dara holene to̱laihe howa tíhondo mana bayale ngadagua dege biaga kagoni. Ibugua inaore gubalini ho howa bibahendengi inahondo mana tigabi bulene ngaru dege biaabo halu haga kagoni. Bibahendengi ibugua ina mana lalu pani ngulene hame lowa ha ndo ibugua iname ko birimaru domo waholene hamelo ka.
JOE 2:14 Anigo tígua Anduane Homogo tínaga Ngode Datagaliwabe karia dai birimiyagua nde ibugua halu mende mitangi bialu tíhondo bayale bialu tomo dewa lone mo anda holebira. Ani biragola nde iname tomoru waini ibarubi ibuhondo lomabu mulene karulapeore yu holeberama.
JOE 2:15 Hari Saiono neneni howa mbelo biguli pu lolene nga. Tí bibahende tomo nane tí íbu ngoai holene nga, lalu wali agali lamilimu.
JOE 2:16 Wali agali dewaliore olalu mo ngoai howa Anduane Homogohondo mitangi bialu ibuhondo lotu lolenaga manda manda bilimu, lalu lamilimu. Wali agali wahebi wandari igiribi waneigini gali wene andu nalu bedarubi bibahendeore íbu ngoai hadaba, lalimu. Wandari igiri wene dabu bu hene heaguabi uruni bibahende tini andaga yu wahalu ibaiore holene nga, lalimu.
JOE 2:17 Loma binigo mo miaga karu tibi nde Anduane Homogonaga anda tamuha biabe biahagaru tigua anda harabani lomabu delaga dabu ngago hengeneni howa dugu bialu bi ogodagua lolene nga. Anduane Homogo-o í̠naga wali agali kamaru dara habe. Wali agali hameigini dindi tara tara howa íbu karu tigua ina erembira ngialu mege bialu lalu, Tínaga Ngode Datagaliwabe agoha kabe, loligo ina biamogo bia lolene nga, lalu Yoelehanda lene.
JOE 2:18 Anduane Homogohanda wali agalime mini beregedayago hondowa ibunaga dindi mitangi halu ibunaga wali agali dara howa biamogo bini.
JOE 2:19 Ibugua tihondo lalu, Áyu ina tomo dewabi waini iba dewabi olibe lini ibane dewabi tíhondo ngerogola tomo nolene dewaore nalu holeberami. Ani berogola wali agali hameigini dindi tara taraha bu karume tí erembira nangulebira.
JOE 2:20 Pagaya ale unurayagi howa ibini bedaruni bibahende ti i̱na wara pelalu maru dindi ko dalu naibaga ngagoha wara pelolebero. Wabuni mbira ala íbu berene bedaru ti iba solowara mini Homene Iba bedagoha warape halu maru mani íbu bedaru ti iba solowara mini Medidereniana bedagoha warape holebero. Maru biru wahene bedaru homaragola ngu taraore bulebira. Pagaya ale biarume tíhondo ko biyagonaga i̱na ti pani mulebero.
JOE 2:21 Dindi-o í̠ gi nahabe. Áyu í̠ miniha hadape howa turu howa dungulo holene nga. Irane Anduane Homogo i̱ni kogome biamogo birudagonaga ani bulene nga.
JOE 2:22 Ema bialu piaga biru kamiru-o Datani dewaore lone anda haragoni ti gi nahalimu. Ira lini daga karume lini dewa dalu pogerubi pu mbira mini gerebirubi lini dewaore deda.
JOE 2:23 Wali agali Saiononi kamiru-o Anduane Homogo tínaga Ngode Datagaliwabe i̱na tí biamogo timbuniore bialu harugonaga turu halu dungulo hadaba. Tígua tomo hongolene tu hayangibi ege pigane hayangibi tomo anda helonaga iba dalu karulapeore ibilarugoni.
JOE 2:24 Widi gandulo yu mogo buwa iraneru yuniru bu wahaga ngagoria widi lini dewa ibira heneru bu paya paya bu wulebira. Ani bialu gerebi lini pingidagane uli wene ngaruha hengedalu pingidaragola ibane dewaore biru to̱lowa pugula tagi tagi bialu holebira. Oilbe linibi dambiragola ibane dewaore biru to̱lowa pugula tagi tagi bialu holebira.
JOE 2:25 I̱nime pagaya ale uruni ti ami agali ibiradagua ibilarurume tínaga tomo hengemiruni bibahende nai helarugo ai mali dewa niruniha howa nalu hayarunaga áyu ngia dai biai holebero.
JOE 2:26 Tomo nolene dewaore wu kamigola to̱latagiore holebira. Ani howa tíhondo bayale bialu harugonaga i̱hondo turu halu Anduane Homogo tínaga Ngode Datagaliwabe i̱ kogo i̱naga mini yaraga halu holeberami. Ani bialu kamigola wali agali dindi tara taraha haga karume Yuda tí handape naholebira. Ani biragola i̱naga wali agali kamiruni tí lone taga naholeberami.
JOE 2:27 Ani biragola Isaraele wali agaliru-o tígua i̱ni tí kamigoha mandagi ho kogoni manda bialu i̱ Anduane Homogo tínaga Ngode Datagaliwabeore kogo i̱ ale mendeali nahedane manda biai holeberami. Ani bialu kamigola wali agali dindi tara taraha haga karume tí handape nahe i̱naga wali agali kamiruni tí lone taga naholeberami, lalu Anduane Homogohanda lene.
JOE 2:28 Anduane Homogohanda laabo halu lalu, Mani i̱ninaga Dinini wali agali bibahendeha odope hai holebero. Ani berogola tínaga waneigini karume i̱naga bi mana latagi halu holebira. Tínaga agali wahe karume emaga handalubi tínaga igiri daliahe karume de gandeba handalubi holebira.
JOE 2:29 Horo uruningi i̱naga biabe biahaga wali bedaruhabi agali bu karuhabi ti bibahendeha i̱ninaga Dinini odope hai holebero.
JOE 2:30 Anduane Homogo ibugua laabo halu lalu, Dindinibi hari daliganibi Horo ogoni ibulebiragonaga manane tara tara i̱na mo walia holebero. Bo wahenerunaga darama timbuni dindini bu payabu wialu ira hungu haguala emene ndo bulebira.
JOE 2:31 Anduane Homogonaga Horo mani ibule ngelowa ni ala hundu ereba halu ege daramabi darama ale dolebira. Uruni biai kagola nde Anduane Homogonaga Horo tagira ibulebira. Horo ogoningi wali agali dindini karume gi taraore halu holebira.
JOE 2:32 Anigo maru karume Anduane Homogo i̱ mini lalu i̱hondo, Ina biamogo bialu gi mia, lalu olalu karu i̱na ti biamogo bulebero. Anduane Homogo i̱nime larudagua wali agali Yarusalemeni karu aria mbirago yu wa naholebero. Wali agali i̱nime dabo heleneru ti bayaleore holebira, lalu Anduane Homogohanda lene.
JOE 3:1 Anduane Homogohanda lalu, Horo ogoningi wali agali Yarusalemeha karubi Yuda dindiha karubi ti bibahendeore i̱na mo bayale hai helolebero.
JOE 3:2 Ani helowa dindi ulini mbira mini Mana Ko Birago Dabaki Biaga laga ngagoria wali agali hameigini bibahende dindi tara tarani bu karu i̱na haru ibai howa mo mogo bu helolebero. Ani íbu kagola tigua i̱naga wali agali hearuhondo mana ko biyagonaga i̱na ti dabalu pani mulebero. Agali uruni tigua i̱naga Isaraele wali agali hearu dindi tara tara kaundia wiaruha waratagi halu purogo lelowa i̱naga dindi wirurubi ti dege karulai hayagonaga ani bulebero.
JOE 3:3 Agali uruni bibahendeme Isaraele wali agaliru ai ibu mirabe hondole tigua tadu bialu tadume mbira mbira migi migi biya. Tigua Isaraele wali agalirunaga waneigini bu hearu garabaya biabe ale biahaga helo muni muwa muni urunime wali kayu yaga berearu kayu yule yolo bialu waini ibaru yolo bigi bini.
JOE 3:4 Taia tano wali agali kamirubi Saidono tano wali agali kamirubi wali agali Pilidia dindi bibahendeha kamirubi tígua i̱hondo mbira agi bule beremibe. I̱na birugo ko ale biruyane tígua i̱hondo pani ngule mandabu kamibe. Ani mandabu kamiyagua nde tígua birimigonaga i̱na tíhondo pani ala biadai bulebero.
JOE 3:5 Tígua i̱naga mbirale bayale muni ngolo silibarubi wiwaru bibahende mo yalu puwa tínaga gime wabini biarunaga andaha yalu puwa mo wiai kamigoni.
JOE 3:6 Tígua Yarusalemeha howabi Yuda dindiha howabi wali agali bibahende dindi tara kaundiaha haru puwa Girigiali hearume yolo ngilo muni taguialu uruninaga garabaya biabe ale biahaga helo pelarimigoni.
JOE 3:7 Ani birimiruni ti dindi uruni wahalu dai bilo i̱nime haru dai biai holebero. Tígua urunihondo birimidadagua i̱na tíniha bia dai bulebero.
JOE 3:8 Ai tígua birimigodagua Yuda wali agali tigua nde tíninaga waneigini karu minalu kaundiaore Sabea dindiha howa ibirarume muni ngiragola tinaga garabaya biabe ale biahaga helo dindi kaundia uruniha pelai holebira. I̱ Anduane Homogo i̱na bi o ledogoniore, lene.
JOE 3:9 Yoelehanda Anduane Homogonaga bi ogodagua lamialu, Bi ogo wali agali dindi tara tara bibahendeni karu lamialu Wai bule manda manda bu halimu. Ami agaliru wai bu pole olo mogo buwa manda manda bu hadaba lalimu.
JOE 3:10 Dindi aliaga aeane ngamiru hiruwa bo tiga bialu wai biagane ayu tibu wabilimu. Tomo gandu laga ayu tibu yu kamiru hiruwa bo tiga bialu yandare wabilimu. Agali hongo nahe mbira kayagua ogoni ibunde wai bule hongo howa holene nga.
JOE 3:11 Wali agali dindi tara tarani kamiruni bibahende abaleore ibalu dindi ulini unu ngagoria mo mogo bu hadaba laya, lalu Yoelehanda lene. Ai Anduane Homogo-o í̠naga wai biaga ami agali biaru abale agali uruni baba wai bilo ibilabe, laro.
JOE 3:12 Anduane Homogohanda lalu, Wali agali hameigini dindi tara tara bibahendeha bu karu abale ibalu dindi ulini mbira mini Mana Ko Birago Dabaki Biaga laga unu biagoria mo mogo bu hadaba. Ani íbu kamigola tígua mana birimigonaga Anduane Homogo i̱nime dabaki buliya.
JOE 3:13 Wali agali o karuni ti ko ngubiore kagoni. Ti ani kago manda buwa wali agalime tomo widi boga bialu gandu lagadagua bialu agalime pu mbira mini gerebi lini waini iba wabiaga ege to̱le̱ uli timbuni ngagoha ngelowa pingidole geme hengeda hagadagua halimu. Waini iba biru to̱latagi halu piagadagua uruni tiha mana ko to̱lai howa koorene ko henego kagoni, lene.
JOE 3:14 Wali agali daosini dewa dagalabe naheore dindi ulini mbira mini Mana Ko Birago Dabaki Biaga laga ogoria godi lolenaga íbu ngoai ho ka. Dindi ogoriani Anduane Homogonaga Horo haragola ibunime dabaki bulene kaware ngagoni.
JOE 3:15 Ani ibiragola ege nibi hundiai halu yakundibi lone nadolebira.
JOE 3:16 Anduane Homogo ibugua Hari Saiono biagoria howa bi timbuni lowa Yarusaleme howa ibunaga bi laragome hari kilikulu laradagua bialu bi laruagome dindi haribi ema bialu birila gimbu biai holebira. Ani biragola Anduane Homogohanda ibunaga wali agali karu ibunime handayaho kagola ti mo ko nahe bayale holebira.
JOE 3:17 Ibugua lalu, Isaraelealiru-o i̱na ani berogola tígua i̱ni Anduane Homogo tínaga Ngode Datagaliwabeore henedane hondowa manda biai holeberami. Hari Saiono i̱ninaga loma bini ngagoriani kogoni. Yarusaleme i̱ninaga tano loma biniore ngelolebero. Ani ngeledogoria waitigirume Yarusaleme ogoni lone ibalu karu nalolebira.
JOE 3:18 Ani berongi hari bibahendeni gerebi lini daganenaga irane karume anda haame holebira. Hari bare bare ngaruha nogo bulumagarume dewaore haame holebira. Yuda dindiha dalu karulape ibalu iba bayaleore piaho wiaabo holebira. Ogoningi iba mbira Anduane Homogo andaga biagoha howa dugua tagi halu unurayagi dindi ulini mini Ira Agasia Buguni laga bu ngagoha pupe halu dindi ogoni mo gomba halu polebira.
JOE 3:19 Iyibi dindi ko howa gaea timbuni bialu Idomo dindibi wali agali mbira nahe dindi dabulu wulebira. Dindi kira ogonialime Yuda wali agali ko mbira tiha nawi hearu baba wai buwa bameore bo wahai hayagonaga ani bulebira.
JOE 3:20 Anduane Homogo i̱na agali uruni tigua irane nawini wali agali bameore bo wahayagonaga i̱na tihondo pani mialu paipai biadai bulebero. Agali mana yole biaga uruni aria mbirago yopialu napelolebero. Anigo Yarusalemenibi Yuda dindiruhabi wali agali haabo holebira. Ani bidagola Anduane Homogo i̱ni Hari Saiononi haabo holebero, lalu Anduane Homogohanda ibunaga mana latagi haga Yoeleha howa bi ogoni latagi hene.
AMO 1:1 I̱ Tegoa tanoali nogo sibiru hinalu haga Amoso kogoni. Ani hewagola Anduane Homogohanda de gandeba mbira i̱hondo mo walia haya. Odagoningi Usia ibu Yuda dindiha kini heagola Yoasa igini Yaroboama ibu nde Isaraele wali agalinaga kini heangi bi ogo langiya. De gandeba ogoni hondowa mali kira hewagola dindi dumbirumbi timbuni biya.
AMO 1:2 Amosohanda ogodagua lene. Anduane Homogo ibuni Hari Saionoha howabi Yarusaleme tano wiagoria howabi bi hongoheore hari kilikulu laradagua biayua. Ani biyagome datani Hari Kameloha hearu bibahende gau lai halu kabu gimbu biya.
AMO 1:3 Anduane Homogohanda lalu, Damasagasa wali agali tigua mana koore dewa biaabo harimi laya. Ani biaabo halu howa Gileada wali agali hearu mo ko halu harimigonaga henemaneore i̱na ti pani ngulebero.
AMO 1:4 Kini Hasaelenaga anda kagoria ira hedo bape harogola Kini Benehadadanaga andarubi dalu wai pabe hongohe bidarubi bibahende dai helolebero.
AMO 1:5 Damasagasa tano timbuni ngagonaga wai pabe panga hongohe bidaru bo gialo wahai holebero. Ani buwa Abene dindi ulini ngagoha wali agali karu bo purogo lalu Bededene dindinaga kini bedagobi bo batagi holebero. Ani bialu Siria wali agaliru Kie dindi ni tagira ibiragohayagi garabayabu yalu pelolebero, lene.
AMO 1:6 Anduane Homogohanda lalu, Wali agali Gasa tanoha kamirume mana ko dewaore bialu harimigoni. Emene ha̱lo hole ndo bibahendengi Gasa wali agali tígua wali agali maru Idomo dindiha garabaya biabe ale bialu helo minu yalu pirimigoni.
AMO 1:7 Tígua ani bialu harimigonaga heneneore i̱na Gasa wali agali pani mulebero. Tínaga tano ngagoha ira hedo bape harogola irame tano ogoniha anda hongohe karuni do baeala hole bilolebero.
AMO 1:8 Ani buwa wali agali Asadodo tanoha karu bo batagi halu Asagelono dindiha kini kagobi bo batagi holebero. Ogonidagua bialu ai Egerono tano ngago bo gialo wahalu Pilidia wali agali yu wahene maru hayadaru bo wahai holebero, lene.
AMO 1:9 Anduane Homogohanda lalu, Taia wali agali tigua horo bibahendengi ko nabi nahe biaabo halu hayagonaga wali agali maru Idomo dindiha garabayabu yalu pelayagoni. Bambaore howa ti ko mbira nabi baya hanguore hami̱ya lalu bi hongo howa lo winigo ogoni habo lalu biyagonaga i̱na Taia wali agaliruore pani emene ndo mulebero.
AMO 1:10 Taia tano ngagoria ira hedo ibira helarogola tanonaga anda hongohe karuni do gindulo ba a̱i̱ holebira, lene.
AMO 1:11 Anduane Homogohanda lalu, Idomo wali agalime horo bibahendengi ko wiaru biaabo halu howa tinaga damene Isaraele wali agali hearu dara naheore howa ayu tibume dibalu homelaga bialu harimigoni. Tigua hendore ndo keba timbuniore howa ani bialu harimigoni. Tinaga keba ogoni ereba nahe wiaabo kagonaga Idomo wali agali uruni tibi pani emene ndo mulebero.
AMO 1:12 I̱na tinaga tano Temanabi Bosara tano ngagobi kirabaliha ira hedo bape harogola tano ogoni laboha anda hongohe karu dai holebira, lene.
AMO 1:13 Anduane Homogohanda lalu, Amono wali agalime mana ko biaabo hayagonaga i̱na ti mana lalu genda mo mulebero. Tigua ani bialu howa dindi dewa mule hame lalu Gileada dindiha wali gali tombeha bere berearu bibahende bo togodo bagabu wahaya. Ani biyagonaga i̱na Amono wali agali karu pani emene ndoore mule ngogoni.
AMO 1:14 Tinaga Laba tano ngagoria pabe hongohe bu kagoria ira hedo bape harogola tinaga anda hongohe bu karuni dai helolebero. Ami agali bu karume wai bule howa wai-o hongo howa lalu wai biagadagua bialu horo kongi puyabu hongoheore ibiradagua bulebira.
AMO 1:15 Ani biragola Amono dindinaga kinibi agali haguane karubi bibahende dindi mendeha garabayabu yalu polebira, lene.
AMO 2:1 Anduane Homogohanda lalu, Moaba wali agalime mana ko hangu biaabo halu kagonaga i̱na ti pani timbuniore mulebero. Tigua Idomo wali agalinaga kini bo wahalu ibunaga kunibi irani do abalu helayagonaga i̱na Moaba wali agaliruore pani timbuni mulebero.
AMO 2:2 Moaba wali agalirunaga tano timbuni Keriodo ngagoria ira hedo bape howa tano ogoniha anda hongohe bu karuni bibahende dai helolebero. Ami agalirume wai bialu howa mbelo biguli hongo howa pu lalu wai huaro hongo howa lalu holebira. Horo ogoningi Moaba wali agali homai holebira.
AMO 2:3 I̱na Moaba wali agalinaga kini kagobi agali haguane bu karubi bibahende bo wahai holebero, lalu Anduane Homogohanda lene.
AMO 2:4 Anduane Homogohanda lalu, Yuda wali agali tigua mana ko hangu biaabo halu kagonaga i̱na ti pani timbuniore mulebero. Tigua i̱naga bi mo wahalu mana ngago talialu bia nabi kagoni. Tini mo koore halu i̱naga mana mo wahai haya. Tinaga mamalirume binidagua dege gime wabini wiaru hangu talima piya. Ani biyagonaga i̱na heneneore Yuda wali agali ti pani emene ndoore mulebero.
AMO 2:5 I̱na tinaga tano Yarusaleme ngagoria ira hedo bape harogola tano ogoniha anda hongohe bu karuni dai holebira, lalu Anduane Homogohanda ogonidagua lene.
AMO 2:6 Anduane Homogohanda lalu, Isaraele wali agali tigua mana ko hangu biaabo halu kagonaga i̱na ti pani timbuni mulebero. Irane Isaraele wali agali tini damene karu baba dano howa yadai nabiragola uruni ti minalu agali mendenaga garabaya biabe ale bia haga helo muni ngi laga ka. Muni miragome tinaga dano hayago mo aribia haga ka. Wali agali darabi uruni tigua nde muni dano timbuni ndo emene ko ge su hangu yolo mulene karulapego nde muni anduanerume tinaga damene uruni dara nahaga ka.
AMO 2:7 Tigua wali agali yagibano burupale uruni dara nahe howa hengedape halu waratagi haga ka. Agali ko uruni tinibi tinaga iginirubi bibahendeme garabaya biabe ale bia haga wandari mbiraore bedago dege kayu yu iri ari biaga kagome i̱ni mini lene kogo mo yo handaga ka.
AMO 2:8 Wali agali yagibano burupale dano hene biarunaga aga ti mo yalu puwa lotu anda karuha ti aga ogoni yu paliaga ka. Tigua ti damene urunime tinaga dano hayadago yadai bulenaga ani biagago nde yagibano urunime dano biago yadai bibe naheore kagola nde tinaga labolabo yadai bulene ngago yadai nabiaga. Ani bialu godi yolo bibe nahe kagola yagibano uruninaga waini iba hambu ngaru godi yolo ale lowa ti Ngode Datagaliwabenaga anda kagoha mo yalu puwa nalu haga biaga kagoni.
AMO 2:9 Ai i̱naga wali agaliru-o i̱na tí mitangi buwa biamogo bialu i̱na Amoroali ti luore ira tamia ale howa hongoheore ira bai ale hearuni handape howa bo hilo wahai harugoni.
AMO 2:10 I̱na tí Iyibi dindiha howa haru tagira ibirungi dindi ko wali agali nahaga wiagoha i̱nime haru bamba halu mali pira mariani (40) haru howa Amoro hameigini palearunaga dindi tí karu lalimulo mo ngirugoni.
AMO 2:11 Tí igini hearume i̱ninaga bi mana latagi haga helo dabalu helarugola tígua nahole lalu larimigoni. Igiri daliahe maru Nasa aria helo dabo helaruru hongo howa waini iba nelo mo nahalu birimigoni. I̱na manda bialu koria bi ogoni heneneore. I̱ Anduane Homogo i̱na bi o ledogoniore, lene.
AMO 2:13 Anigo i̱na tí dindiha hengedopeore holebero. Ani berogola agalime mbirale gendabi mbira yaraga halu karia darama tungulowa e̱ lalu homaraligobi hondoleberemi.
AMO 2:14 Agali gerai hongo howa laga karu ti yo pobe nahe holebira. Agali hongo tarahe karu hongo habe nahe holebira. Ami agali karume tini pele mibe nahe holebira.
AMO 2:15 Agali wai biaga karume hongo howa wai bibe nahe halu agali gerai hongo howa laga karu ti gerai lalu yo pobe nahe halu agali nogo hosini biruwa wai biaga karu ibida pobe nahe holebira. Ti bibahende yo pialu napolebiraore. Ti waitigime bo hilo wahaiore holebira.
AMO 2:16 Horo ogoningi ami agali gi nahaga pari wayali heneru bibahende danda timu wahalu ibida piai holebira, lalu Anduane Homogo i̱nime aniore ledogoni, lene.
AMO 3:1 Isaraele wali agaliru-o tí Anduane Homogohanda Iyibi dindi howa haru tagira ibalu ogoha ibini kamigo ai ibugua tíhondo bi olarago hale hadaba.
AMO 3:2 Ibugua lalu, Wali agali dewaore dindi bibahende ngaruha bu hearu helowa ai tí hangu i̱naga wali agaliore halimulonaga i̱na tí dabo helarugoni. Ani birugo ai tígua mana ko dewa i̱ hondo hewagola birimigome ko dewaore tíha to̱ layadagonaga i̱na tí mana lalu pani timbuni ngulebero, lene.
AMO 3:3 Agali kiralime ogoha mbaliya ala nalowi howa hariga mandagi piagabe.
AMO 3:4 Budi gabua ale laionome tomo naga ale irabuha taya pialu bo ya nabi biruwa ngororo lagabe. Laiono iginime ibuni paliaga ege kabaha paluwa tomo nolene mina nabi howa ngororo lagabe.
AMO 3:5 Ega gonoha delo ndole bialu ibilonaga ibunaga tomo nagane ale mbira nawiyagua agua bialu gonoha dolobadabe. Ega timbuni ge gono wialu pedaria ega nade howa bame pini hangume do wiagabe.
AMO 3:6 Mbiralime wai ibira lalu tanoha howa mbelo biguli hongo howa pu layagua nde wali agali tanoha karume gi nahe holebirabe. Anidagua dege tano mbirago mo ko hayagua genda ogoni Anduane Homogohanda ibileneda naloleberemibe.
AMO 3:7 Anduane Homogo Bibahende Haru Haame Ho Haga kagome mbirale bule mandabu ngaru ibunaga bi latagi haga agali karuha howa ala latagi howa mani ibugua bule lalu lo wiyago heneneore biaga ka.
AMO 3:8 Agalime budi gabua ale timbuni laionome ngororo laruago hale howa ti gi nahagabe. Ai Anduane Homogo Bibahende Haru Haame Ho Haga kagome agali mbiragohondo bi layagua nde agali ogoni ibugua bi layago latagi habe nahe kabe be ibugua latagi holebirabe.
AMO 3:9 Amosohanda lalu, Tígua wali agali Asadodo tanoha karu olalu Iyibi dindiha karubi olowa ogodagua lalimu. Samaria dindi hari hombeneni mo ngoai howa wali agali bibahende tano ogoniha karu luluyu howa mana ko ngaru bialu kago handadaba, lalimu.
AMO 3:10 Anduane Homogohanda ogodagua leda, Samaria wali agali urunime mendeali mo hondo howa gungu bialu mini ngaru mo yuwabi mendealinaga mbirale ngaru mo page bini ngarume ti andagaha wu to̱lo tagi kago handadaba. Tigua mana tigabi bulene ngaru manda nabiagaore ka.
AMO 3:11 Ani bialu kagonaga waitigime tano ogoniha anda ibuwa anda timbuni hongohe karu bo gialo wahalu mbirale bayale anda tamuha ngaruni mo yu piai holebira, lene.
AMO 3:12 Anduane Homogohanda laabo halu ogodagua leda. Budi gabua ale laionome nogo sibi mbira bo yalu puwa nalu heagua nogo sibi anduaneme gingila mule haruru pialu karia ge kuni kira hangu ibira halu hale yuni mbirago dege ibira karia handaga. Manane ogonidagua dege Ngode Datagaliwabehanda Isaraele wali agalinaga dindiha tano timbuni Samaria wiyagoni ogonidagua bulebira. Wali agali tano ogoniha turuho haga biaru mo ko halu homolebira. Wali agali emene yu wahene dege bayale holebira. Manane anda bibahende gialo yu piai henenaga dagia gene dege ibira haradagua bulebira, lene.
AMO 3:13 Anduane Homogo Hongo Haiheore howa Bibahende Haru Haame Ho Haga kago ibugua lalu, Tígua bi larago baya hangu hale halu bi ogoni Yagabanaga aguanene bu karuhondo lamilimu.
AMO 3:14 Isaraele wali agalirume mana ko bialu hayagonaga pani merongi howa tinaga tano Bedeleha bo lomabu miaga dabu bu heledaru bo gialo wahai helolebero. Ani bialu dabu ogoninaga gibuni mariani nogo bulumaga ne gayane kaligobi wabu heledaru bibahende bo gingirulo paya bialu dindini ibira hai helolebero.
AMO 3:15 Tinaga anda bayale dagare birangi paliaga poboyogobi bu heledarubi poboyogo birangi birulene nemanda bu heledarubi bibahende bo gialo wahai holebero. Anda bayaleore tara nogo elebananaga ne gayanerume yári bia howa bu heledarubi bibahende bo gialabagabu wahalu anda timbuni bu karu bibahende bo gialobaga biai holebero, lalu Anduane Homogohanda lene.
AMO 4:1 Samaria wali bedemiru-o bi ogo hale hadaba. Tí nogo bulumagarume tani dewa nowa habatigihe hagagobi tí bame biruwa tígua wali agali yagibano karubi burupale karubi dara halu biamogo nabi howa ti genda yu helonaga mo ya haga bedemigoni. Tígua tí agalinihondo lulu iba dewa noliya ngi lalu haya haabo hagaore bedemigoni.
AMO 4:2 Anduane Homogo Bibahende Haru Haame Ho Haga kago ibugua mana tigabiore biagago bi hongo howaore lo wialu lalu, Heneneore horo mbira tagira ibulebira. Horo ogoni ibirangi tí wena hugume bibahende bolo magamaga buwa pume hende howa gililo yalu polebira. Wena hugume bo ledagola agalime gililo yamiagadagua tí gililo yalu polebira.
AMO 4:3 Pabe gialo wini wiagoria minu yalu puwa Hamono dindihayagi batagi holebira.
AMO 4:4 Anduane Homogo Bibahende Haru Haame Ho Haga kago ibugua ogodagua leda, Ai Isaraele wali agaliru-o tí áyu ogoni pudaba. Amu Bedele dindiha i̱ mitangi bialu lotu laga biagoha mana koru bima pudaba. Giligala tanohabi lotu laga biagoria mana ko ngaru biato hama pudaba. Egerebagi bibahendengi nogoru i̱nihondo lomabu ngule yalu ibalimu. Ani bialu horo tebone bibahendengi mbirale ngamiru pi halu tale bialu pinigo i̱nihondo loma ngule yalu ibalimu.
AMO 4:5 Ani bialu mberedi loma buwa i̱hondo ka̱i̱ lalu ngia naberemi. Tígua mbirale pi halu tale buwa pinigo i̱hondo ngia naberemi. Ani buwa tíninaga mini yaraga halimu. Mana ogonidagua bule tí hamelo hagayagonaga laro, lene.
AMO 4:6 Anduane Homogohanda ogodagua lara, I̱nime tínaga tano bibahendeha hina gari timbuniore ibilarugola tomo naneore harimigoni. I̱nime binidalo manda bialu mini beregeda nabiore kamigoni.
AMO 4:7 Ai tomo anda helonaga dalu ibaga wiyagoni naibilo payarugoni. Tano maruha dalu ibilalu maruha naibile waharu. Mabu maruha gomba helonaga iba dalu ibilarugo maruha naibilarugola dindi lebola daga hayagoni.
AMO 4:8 Wali agali tano mbirahayagi hagaru ti tano mendeha iba taya bima piyago nabereyane handarimigoni. I̱na urunidagua birugola tígua i̱ni kogoha mini beregedalu dai nabi kamigoni, lene.
AMO 4:9 Anduane Homogohanda ogodagua lara, I̱na puyabu poboyogobiore ibilarugola tínaga mabuha tomo hengemiruha mo ko holene tagira ibiyagoni. Pagaya aleme tínaga mabuha tomo hengemirubi gerebi lini dagane mabu hengemirubi tínaga poge irane hearubi olibe irane hearubi bibahende naiore hayagoni. Ani biyago hondowa tíni mini beregedabehego naberegedeore kamigoni, lene.
AMO 4:10 Anduane Homogohanda laabo halu lalu, Warago koorene ko mbirame abale Iyibi wali agali bo waharudagua tíbi ani bulebero. Ani bialu wai birimingi howa waitigi agalime tínaga igiri daliahe hearu bo wahai halu tínaga nogo hosi hemiruni waitigi agali hearume haru halu piai helarugoni. Ani buwa wai bialu agali bo payapaya bini tí hemigoria wiarume ngu timbuni bialu wiyaru manda bibehego tí namandabi dege howa mini beregeda nabiore kamigoni, lene.
AMO 4:11 Ani lowa Anduane Homogohanda lalu, Abale Sodomo Gomorala mo ko howa bo waharudagua tí maru mo ko halu bo waharugoni. Ani birugo ai wali agali maru áyu kamiruni tí ira timbuni dene daba tebo dugu wini ngaligobi kamigoni. Tí anidagua bini harimadalo manda bibehe kamigo howa mini beregeda nabiore kamigonida. Ani bidamigonidago nde i̱na Isaraele wali agali tí mo ko howa boliyago ani bialu hadaba. Ai bi ogoni Anduane Homogo i̱nime heneneore tagira pelogoria lo werogo tí bibahende manani howa tale buliya íbu hai hole kamigoni, lene.
AMO 4:13 Hari timbuni karu wabialu puyabu poraru pelaga Ngode Datagaliwabe ibuore kagoni. Ibugua ibuninaga bu miniha mitangi bu karu wali agalihondo lapani haga ka. Horombenaga wá holene ngago mo arumaho helaga kagoni. Ibu dindi hari ngaruha ibagabu haga kagoni. Ibunaga mini ogo, Anduane Homogo Ngode Datagaliwabe Hongo Haiheore kagoni, lalu lolene nga.
AMO 5:1 Isaraele wali agaliru-o mbirali homaragola dara howa dugu biagadagua tínagaore dugu bia harogo hale hadaba.
AMO 5:2 Wandari mabuage ale Isaraele pilayago ai nde ibu lone heyabe naheore. Ibu dindini pilo ibiraho nga. Mbiralime lone mo heya habe nahe ngagoni, lalu larogoni.
AMO 5:3 Anigo Anduane Homogo Bibahende Haru Haame Ho Haga kago ibugua lalu, Isaraele dindi tano mbiraha howa ami agali daosini mbira (1,000) wai bule tagira piyaru ai handari mbira (100) hangu dai biya. Tano mendeha howa agali handari mbira (100) wai bule tagira piyaru ai pirali hangu dai biya, lene.
AMO 5:4 Anduane Homogohanda Isaraele wali agaliruhondo lalu, I̱ni kogoha holene bayale mule dai bidaba.
AMO 5:5 Tí Beaseba tanoha lotu lole napilimu. Tígua i̱ Bedele tanoha kabe toba howa tai nabilimu. Tano ogoni mo ko halu bo gialo hole bu waholebira. Giligala dindihabi lotu lole napilimu. Dindi ogoniha wali agali karu dindi mendeha garabayabu yalu polebirago tí Giligala dindi napilimu, lene.
AMO 5:6 Tí Anduane Homogo ibuni karia dai bialu holene bayale ibuha howa mo yule dai bidaba. Ai tígua ibu karia dai nabirimiyagua ibunime hariha howa ira hedo ibira haradagua bialu tí Isaraele aria karuni dai holebirago. Ira ogonime Bedele dindibi da dege bulebira. Ani dalu kagola agali mbirame ira ogoni ba hundia habe nahe holebira.
AMO 5:7 Agali manani howa tigabi dabolene ngadagua ndo ke̱ howa mo hondo haga kamiru tíha pani nolene emene ndoore timbuni wulebira.
AMO 5:8 Anduane Homogohanda yakundirubi wá haga ale marubi harini wabu heleda. Ibugua wá kagoha mo aruma halu aruma haga ngago mo wá haga ka. Ibugua iba solowara timbuni bedaru íbu lalu dindini haealame ha layagua ani biaga ka. Ibugua agali hongo gibihe karu mo ko howa pani mialu tinaga anda hongohe bu heledaru bo gialo wahalu biaga kagoni. Nahendene ale tara uruni biaga kago ibuninaga mini Anduane Homogoore kagoni, lalu iba gana lene.
AMO 5:10 Agali tigabi mbirame manani dabalu howa tigabi ngadagua dabalu ko biaga kago taliragola tígua agali ogonibiru handabe manga haga kamigoni.
AMO 5:11 Tígua agali yagibano karunaga dabudabu emene yu karu gingila mialu tomo mbirale ngaru mo page biaga kamigoni. Ani buwa ai tí anda hongohe ege to̱le̱ anda buwa kamigonigo tíni anda ogoniha napalueberemi. Tínaga mabu ngamiruha gerebi lini hengedamirunaga ibaneme waini iba hambialu nanoleberemi.
AMO 5:12 Tígua bia ko hene dewaore ngamigome tíha ko bini dewaore ngagoni manda bido. Tígua agali mana tigabi ngaru biaga karu mo ko haramili. Agali ko biaga karume tinaga bi lahabe lalu muni ngirago mo yuwa yagibano karunaga bi henene larago yula dambi halu muni ngiyagonaga ke̱ howa lahaga kamigoni.
AMO 5:13 Wali agalime mana tiga nabi ogonidagua mbira biyagua agali mana mandabi kamiru tígua bi mbira nale ne hambu ndibu lowa ema nabi holene karulape nga.
AMO 5:14 Tígua mana ko ngaru wahai howa mana bayale ngaru hangu bialu halimu. Ani beramigola tíni bayale holeberami. Tígua Anduane Homogo Ngode Datagaliwabe Hongo Haiheore kago ibuni tí heba haga ka laramiligo ai tígua mana bayale ngaru bialu harimiyagua nde heneneore ibuni tí heba mandagi haabo holebira.
AMO 5:15 Mana ko ngaru yu wahalu mana tigabi ngaru hangu bialu howa godi laramiru lalu manani tigabi dabolene ngadagua dabalu halimu. Tígua anidagua bialu harimiyagua Anduane Homogo ibugua wali agali emene yu wahene kamiruni baya hangu handayaho holebira.
AMO 5:16 Anigo tígua mana ko urunibi beremiligonaga Anduane Homogo Hongo Haiheore howa Bibahende Haru Haame Ho Haga kago ibugua lalu, I̱na tí pani nguleore ngogoni. Ani berogola tígua tanonaga hariga pugupugu bidarunaga yilalu dugu bigibigi bialu holeberemi. Ogonidagua bialu howa mbirali homaragola yilalu dugu biaga karubi agali nogo sibi haru haga tano tagirahayagi karubi olowa yilalu dugu biamogo bule ibidaba lalu ololeberemi. Ani berogola agali maru waini iba wabiaga gerebi mabuha karume yilalu dugu tara bima bima ibalu holebira, lene. Anduane Homogohanda i̱na bi o ledogoniore.
AMO 5:18 Tí bibahendeme Anduane Homogonaga Horo abale ibilo hamelo kamigoni. Anigo tí darabioreda. Horo ogoni tagira ibiragola tígua mbirale mbira bayale agile mo yu holeberemibe. Horo ogoningi wá holene nawi tíha aruma holene wulebira.
AMO 5:19 Horo ogoningi ogodagua bulebira. Agali mbira ibu laionome bo nolebiragola ibida pialu karia habolo puwa ibu balu nolene dege mende biango ale gabua timbuni bea ngola holebira. Agali mbira ibu tagira howa andaga dai bialu anda pole pialu karia puya anda haiha wuwa hayaradagua bulebira.
AMO 5:20 Anigo Anduane Homogonaga Horo ogoningi aruma hai howa wá holene emeneorebi nawulebira. Turu holene mbira nawi mo ko holene dege wulebira.
AMO 5:21 Anduane Homogohanda lalu, Tínaga horo timbuni mo ngoai howa lotu laga ngamiruni i̱ turu nahe howa hame naleore kogoni.
AMO 5:22 Tígua mbirale bo lomabu delarimiyaguabi balawa wabiaga widi lini lomabu ngirimiyaguabi i̱na yamia nabulebero. Nogo bulumaga hinidemiru tomo baya hangu nelo muwa habatigiore kagola i̱hondo ka̱i̱ lalu lomabu ngule haru ibirimiyaguabi i̱na nayamulebero.
AMO 5:23 Tígua ngida ale balu iba gana laramiligo i̱ore hale naholego nalalimu.
AMO 5:24 Anigo tígua bilimulo hame ledogo mbira ogo. Tígua mana bayalebi tigabi bulene ngarubi bialu halimu. Tígua ogonidagua bialu kamigome iba timbuni hundia nabiaga poraligobi wulebira.
AMO 5:25 Ai Isaraele wali agaliru-o. Mali pira mariani (40) i̱ni tí heba mandagi wali agali napale dindi ko wiagoha ibagabu harimago howa i̱na tíhondo loma mbira bo ngidaba nale haruligoni.
AMO 5:26 Anigo ai áyu howa tígua i̱ yu wahalu puwa mbirale ko tínaga kini lalu gime wabinigo mini Sagudu wirimigobi mende yakundinaga lalu mini Kaiwana wabu wirimigobi ogoni labohondo bi pupu wialu kamigoni. Ani birimigome i̱na dindi mbira Damasagasa tano ngagohayagi garabayabu yalu pelarogola pialu howa tínaga gime wabini ogonilabo mo yalu poleberemi, lalu Anduane Homogo ibu mini Ngode Datagaliwabe Hongo Haiheore kago ibugua bi ogoni lene.
AMO 6:1 Wali agali Yarusaleme tanoha kamirubi Samaria tanoha kamirubi tí bibahende awadaga bayale kamagodago lowa tíha mbira agi bulubadabe lowa hadapeho kamiruni dara ho kogoni. Isaraele dindinaga agali haguane tí kamiria wali agali tígua ti biamogo bilimulo ibaga wiyago ai dara ho kogoni. Tí bibahende mo ko holene wulebiragonaga dara ho kogoni.
AMO 6:2 Tígua Kalene tano ngago hondo pudaba. Ani bialu tano timbuni Hamadabi hondo pialu Pilidia dindiha tano Gede ngagobi hondo puabo halimu. Isaraele dindi Yuda dindila bayale ndo lowa dindi hondo pirimiruni bayaleyabe. Ani bialu dindi uruni timbuni tínaga dindi timbuni ngamigobi dege wiabe.
AMO 6:3 Tígua manda bialu kamiria tíha mo ko holene mbira naibulubadabe. Ai tíni ko ngaru bialu kamigome mo ko holene yu anda eberemigonaga dara ho kogoni.
AMO 6:4 Wali agali homogo kamiru tí nogo bulumaga sibirunaga mbirini bayale ngaru nowa dagia bayale ngarunaga paliaga kamiru tíha mo ko holeneme ngola holigo de hondo holene nga.
AMO 6:5 Kini Debidihanda iba gana lo winidagua tígua iba gana gahenge dewa lo wule manda buwa ngida ale tara tara balu iba gana laga kamiruni.
AMO 6:6 Tígua emene ha̱lo ha nabi howa gabo beha waini iba dewaore hambialu naho wiaga kamigoni. Tínaga tinginini welibi nga biaga tara mini sandabi ha̱i̱ haga kamigoni. Anigo Isaraele dindini mo ko holene tagira ibiragola tígua dara nahagane kamigoni.
AMO 6:7 Ani bialu kamigome dindi mendeha garabaya bamba holene tíore holeberemi. Ani beremigola tomo dewa dawa nagimbu bialu tínaga turu ho holene henge nawiore holebira.
AMO 6:8 Anduane Homogo Hongo Haiheore howa Bibahende Haru Haame Ho Haga kagome buleore lalu bi hongohe mbira ogodagua lo ngeleda. Isaraele wali agalirume mine halu kago i̱na turu naheore kogoni. Tínaga anda timbuni karuha yári bayale ngamirubi hame naleore kogoni. Ani bidogo ai uruni bibahendeore tí waitigi dindi taraha karu giha mo ya holebero, lene.
AMO 6:9 Ani lowa lalu, Ai agali pirali hangu anda be mbiraha yu wahene heagua uruni bibahende homai holebira.
AMO 6:10 Mbiraligo homedagola ibuni damene mbirame ibunaga tingini mo ibulebira. Ani buwa ibugua anda ogoniha mbira yu wahene bira do kagohondo lalu, Mendeali bedabe naberebe, lolebira. Ani laragola agali bira do hene biago ibugua ladai bialu lalu, Nabereore, lolebira. Ani laragola agali homenenaga tingini mo ibini biagome lalu, Bi nalabe. Anduane Homogonaga mini nalami̱ya, lolebira, lene.
AMO 6:11 Amoso ibugua lalu, Anduane Homogohanda ogodagua lara, Anda bu karuni emene timbunibi bibahende bo gialabaga bialu gingirulo payabu wahadaba, laragola gingirulo bagabu waholebira.
AMO 6:12 Tígua manda beremigola nogo hosime ege to̱le̱ timbuni ngaruni gerai polebirabe be agalime e hongole lowa ege to̱le̱ ngagoria nogo bulumagame dindi tombelo haru gililama polebirabe. Ani nabiagago manda buwa tígua mana ogonibi bialu kamigoni. Tígua mana tigabi ngago agali homelo tomia bialu mana bayale ngago tígua degeme mo beregedalu mo ko haga kamigoni.
AMO 6:13 Tígua wai bialu Lodeba tano bo poda hana halu tíni karularima lowa mine halu kamigoni. Ani bialu howa lalu, Inane hongome Karinaimi dindibi bo poda hana halu karularima, lalu kami.
AMO 6:14 Anigo Anduane Homogo Ngode Datagaliwabe Hongo Haiheore kago ibugua ogodagua lara, I̱na agali dindi tara howa tí baba wai bilimulo ibilolebero. Uruni tigua tí mo ko howa bo podama pialu uyurahayagi Hamada tanoha bama puabo halu unurahayagi dindi ulini Araba ngagoria bo poda hana holebira, lene.
AMO 7:1 Anduane Homogo Bibahende Haru Haame Ho Haga kagome i̱hondo de gandeba mbira mo walia haya. I̱na handalu hewaria pagaya ale wabuni timbuni mbira ibilaya. Agali biabe biahaga hearume datani hearu gandulo yu pialu kininaga nogo bulumaga hearu nelo minigo ai mani teneha howa pudu lalu andaho aribia halu heaore dege pagaya ale uruni tibi nde tagira ibiya.
AMO 7:2 Ani handalu hewaria pagaya ale uruni tigua datani dindi bibahendeha hearu nai hayane handaru. Ani biyago hondowa i̱na lalu, Anduane Homogo Bibahende Haru Haame Ho Haga-o í̠naga Isaraele wali agali karuninaga ko ngaru domo wahai ha. Ti dewali ndo emene ko hangu howa hongo naheore karunidago í̠na ti mana lalu pani miriyagua nde ti mani agua bialu bayale holobadabe, laru.
AMO 7:3 Ani larugola Anduane Homogo ibugua mini wiadai bialu lalu, Ai áyu de handariruni tagira naibulebira laya, lene.
AMO 7:4 Anduane Homogo Bibahende Haru Haame Ho Haga kagome de gandeba mende ogobi walia haya. Anduane Homogohanda ibunaga wali agali pani mule lowa ira timbuni delo manda manda biago handaru. Ira ogonime iba kuyuma timbuniore dindiha bereago dalu do hundi lowa ai dindini dama irigi hayane handaru.
AMO 7:5 Ani biyago hondowa i̱na lalu, Aiore Anduane Homogo Bibahende Haru Haame Ho Haga-o anidagua nabuleore. Í̠naga wali agali ti dewa ndo emene ko hongo nahe karunidago í̠na ti mana lalu pani miriyagua nde mani ti agua bialu bayale holobadabe, laru.
AMO 7:6 Ani larugola nde Anduane Homogo ibugua mini wiadai bialu lalu, Áyu handarigoni tagira naibulebira laya, lene.
AMO 7:7 Anduane Homogohanda de gandeba tebone walia hayagola handalu hewaria Anduane Homogo ibuni anda hái mbirani hapara ho hearia handaru. Agalime anda bialu howa pu tiga handaga emene mbiraha aeane emene dege mbira pu ngunini pongo biaho helowa anda háidago tigabi kabe hako hayadabe hondole tiga handaga pu heleneyago Anduane Homogohanda yaniaho hearia handaru.
AMO 7:8 Ani yaniaho howa ibugua i̱hondo lalu, Amoso-o o hendedegoni agiledabe, laya. Ani layagola i̱na ibuhondo ladai bialu lalu, Pu mbira ngunini aeane pongo biahedago hendedo, laru. Ani larugola ibugua i̱hondo ogodagua laya. Pu ogonime i̱naga wali agaliru ti tigabi henedabe be yole henedabe hondolenaga yarugo. Ai anda hái hako hene ula amuhe kaligobi henedane hendedogoni. I̱na mini wiadai bialu dara nahe howa ti pani nelo mulebero.
AMO 7:9 Isaraele wali agali Aisaganaga aguanene karu tinaga lotu lo ngoai haga dindi wiyadaruni bibahendeore bo gialobagabu wahai holebero. Kini Yaroboamanaga damene karu mbiraore hangubi yu wanahe bo wahaiore holebero laya, lene.
AMO 7:10 Bedele tanoha agali mbira mini Amasaia henego ibu loma binigo mo miaga howa ibugua Isaraele wali agalinaga Kini Yaroboamahondo bi ogodagua lo pelene. Ibugua lalu, Kini-o Amosohanda í̠naga bi hale nahe wahalu í̠la waitigi helo lowa Isaraele wali agaliha ndelope hama ibaga bialu ka. Í̠na ibu ani lalu helo wahariyagua nde ibunaga bi ogonime inanaga dindi ogo mo ko timbuniore holebira.
AMO 7:11 Amoso ibugua bi ogodagua laga bialu ka. Kini Yaroboama wai bialu karia agali waime bo wahalu Isaraele wali agali bibahende dindi mendeha garabayabu yalu polebira, lalu kagoni, lene.
AMO 7:12 Ani lowa Amasaiahanda Amoso hearia puwa ibuhondo lalu, Ngode Datagaliwabenaga bi latagi haga-o í̠ Bedele dindi ogoria nahe áyu ogoniore pialu Yuda dindiha hama dai bibe. Ngode Datagaliwabenaga bi Yuda dindiha howa latagi hama poregola Yuda wali agalime í̠ yolo bilo ani bule pu.
AMO 7:13 Bedele dindi ogoria howa í̠na bi labelo ina turu nahe kamagoni. Irane dindi ogohayagi kini ibuni lotu haru haga kagoni. Ani bialu Ngode Datagaliwabenaga anda kago Isaraele wali agali bibahendenaga kagoni, lene.
AMO 7:14 Ani layagola Amosohanda ladai bialu lalu, I̱ Ngode Datagaliwabenaga bi mana latagi haga howa maru yolo mialu karuni ale ndo kogoni. I̱ nogo sibi haru hagabi poge irane karu handayaho hagabi kogoni.
AMO 7:15 Ai i̱ninaga biabe uruni bialu hewaria Anduane Homogohanda i̱ dabo helalu bi ogodagua langiya. Í̠ pialu i̱naga Isaraele wali agali karuhondo bi ogodagua lamule pu laya handala ibinigo kogoni.
AMO 7:16 Ani birugo ai i̱na Anduane Homogohanda bi langiyago larogo hale habe. Ibunaga bi Isaraele wali agaliru lamulene yidogo lamuliya nale wahalu pu larigoni.
AMO 7:17 Amasaia-o í̠na ani larigonaga Anduane Homogohanda ibunaga bi podene í̠ha ngeleda. Ani bidagome í̠ one ibu tano ogoha agali page yama ibaga biaga birulebira. Ani bialu bedagola waitigirume ibalu í̠ waneigini bu karuni bibahende bo wahai holebira. Waitigime í̠naga dindi ngeruni karulai howa ti tuwa ta holebira. Tigua í̠ dindi tara Ngode Datagaliwabe manda nabiaga karunaga dindiha garabayabu yalu poragola dindi ogoniha í̠ homolebere. Waitigi uruni tigua Isaraele wali agalirubi dindi taraha garabayabu yalu polebira laya, lalu Amosohanda lene.
AMO 8:1 Anduane Homogo Bibahende Haru Haame Ho Haga kago ibugua de gandeba walia hayago handalu hewaria tomo bayale tara tara dewa mbasigedi nuha hono to̱lo wiaria handaru.
AMO 8:2 Ani hondo hewagola Anduane Homogohanda i̱hondo lalu, Amoso-o agi dege hendedebe, laya. I̱na lalu, Mbasigedi nuha tomo bayale tara tara hono to̱lo ngago hendedogoni, laru. Anduane Homogo ibugua lone lalu, Ai agalime tomo bogabi bayaleru buyu ngoai howa nagadagua i̱ninaga Isaraele wali agaliru pani mialu bo waholene kaware ibiyada. Áyu i̱na mini wiadai nabi ti pani timbuniore mule ngo.
AMO 8:3 Ani berogola horo ogoningi wali agali kini andagaha iba gana lalu hagarume lone nale tigua dugu daraore bia aribia holebira. Wali agali homenerunaga tingini wu paya paya bu wima polebira. Ani bidagola tigua dugu dege bialu holebira. Homenerunaga tinginiru mo batagi haga biragola wali agali bi mbira naleore ona hama polebira, lene.
AMO 8:4 Isaraeleali tígua wali agali mbirale nawi yagibano karu handape howa tí mo ko hole hame laga kamiruni tíore hale hadaba.
AMO 8:5 Tígua tíni dege dege laedene bigi bialu lalu, Lotu laga horo uruni abale piai helo. Ani biragola inanaga tomoru wali agalime yolo bilo magedi hamaha abale yalu poloma̱ya. Ai inanaga tomo magedi yalu poloma̱ya Sabada horo piai hayabe be wene dege ngabe. Inanaga tomo ngamaru ke̱ howa yolo diba daga halu genda magi handagane ngaru ke̱ howa mo hondo holoma̱ya.
AMO 8:6 Balawa wabiaga widi lini ko hene ngamaru muni daliga muluma̱ya. Ani bialu agali yagibano muni nawi mbira kagohondo dano harimago ti muni emeneorebi ge su hangu mulenebi nawiore dano harimago yadai bibe nahe karu minalu agali mendenaga garabaya biabe ale biahaga hole pelo muni mimi̱ya. Agali ogoni ibugua muni yolo ngiragome inanaga dano harimagonaga pani ngilo ani bimi̱ya, lalu kamigoni.
AMO 8:7 Anduane Homogo Isaraele wali agalinaga Ngode Datagaliwabehanda bi hongohe mbira lo wialu lalu, Isaraele wali agali tínaga mana ko bialu kamigoniore i̱na embeda naholeore bero.
AMO 8:8 I̱na dindi ogo mo ema bia halu dumbirumbi bilarogola wali agalime gi taraore howa dugu bialu holeberemi. Isaraele dindi ogo bibahendeha dumbirumbi timbuniore bulebira. Dindi ogo irigi halu ibira howa pandu laragola iba Naili tulala daga howa ibira haradagua bulebira.
AMO 8:9 Horo ogoningi dege horombe hanuni ni anda pelarogola abale mbi lolebira. Anduane Homogo Bibahende Haru Haame Ho Haga kogo i̱nime bi o ledogoniore.
AMO 8:10 Horo timbuni uruni tagira ibirangi lotu lalu kamiria turu howa iba gana laga ngamiru mo beregedalu genda yu howa homa duguanda haradagua dugu bialu holeberemi. Tígua bu miniha gendaore howa aba ai̱yame libunaga igini mbiraore hangu henego homaragola dugu biagadagua bialu holeberemi. Aiore daraho bedago walia halu aga mbege nu ale biaga ngago bu howa mandari podo mbolo lowa halu bulebira. Tígua ogonidagua biai halimulo mo bia holebero. Horo ko ogoningi genda tandagabi luore wiaabo helolebero, lene.
AMO 8:11 Anduane Homogo Bibahende Haru Haabo Ho Haga kagome laabo halu lalu, Mani howa tí dalu ogoha hina gari timbuni pelolebero. Tígua gari timbuni lalu holebirago hinanaga ndo hége lebolaho holebirago iba noa howa ndobi bulebira. Gari timbuni ogoni iba hina henene ndo i̱naga bi manaore hale hoa howa garibi timbuni lo holebira. I̱ Anduane Homogo Bibahende Haru Haame Ho Haga kogo i̱nime bi o ledogoniore.
AMO 8:12 Wali agali tigua i̱naga bi mana hale hole lowa Homene Iba bedagoha howa Medidereniana iba bedagoria dindi bibahende dombeni ngaruha taya bialu ha holebirago howa ti hale naholebira.
AMO 8:13 Horo ogoningi wandari igiri baya hongohe daliahe karu iba noa howa de mborere bialu dindini odo paya paya bulebira.
AMO 8:14 Wali agalirume heneneore bi hongohe mbira lo wialu Samaria wali agalirume dama mitangi bialu mbirale bi pupu wulenaga gime wabini ngaru mini lalu ogodagua laga ka. Heneneore Dana tanonaga dama mbiranaga minini howabi Beaseba tanonaga dama mendenaga minini howabi henene laro laga kami. Anidagua lagaru bibahendeore homai halu lone heya nabulebiraore, lene.
AMO 9:1 Anduane Homogo ibu lomabu delaga dabu ibuni andagaha wiagoria hapara howa hearia i̱na handaru. Ibugua bi ogodagua laya. I̱ andagaha wali agali haga dagia ngaruni ema bialu birila gimbu bilo anda gene daliga bolangua kagoria nduli badali ha. Anda gene hongohe karuni bo podo paya bialu wali agali karuni bibahendenaga emboneni poda dambi halu bo homelai hela. Uruniha bo dambi nahe hayadaru waitigime ibalu wai buwa bai helolebero. Ani berogola mbiraore hangubi ibida pialu ha do naholebira.
AMO 9:2 Mbiralime i̱ni heneda handala dindiha gua bima pialu humbirini andaha tagira puwa ha do heaguabi ogoni ibu i̱nime haruru puwa handa walia halu minulebero. Mbirali ibu pialu dahuliya andagaha iragaho heaguabi ogoni ibu dindi ogoria minu gililope holebero.
AMO 9:3 Maru amu Hari Kamelo kagoha puwa ha do heaguabi i̱na handa walia halu minaore bulebero. Maru ti ibida puwa iba solowara timbuni bedagoha anda pialu unuraore bira do hayaguabi nde ibaha abagua timbuni bedagohondo, Haya, lolebero.
AMO 9:4 Waitigirume ibuwa garabayabu yalu piyaguabi nde tihondo homelo bo wahalimu lalu lamulebero. I̱na ti biamogo nabi homelo bo wahai holebero, lalu Anduane Homogohanda lene.
AMO 9:5 Anduane Homogo Bibahende Haru Haame Ho Haga howa Hongo Haiheore kago ibugua dindi ogo ela haragola dindi bibahende ema biai halu wali agali dindini karume mogo lowa dugu biaga ka. Iba Naili poragome tulala ladaga howa ibira hagadagua dindi bibahende ngaru porabu daga halu ibira haga nga.
AMO 9:6 Anduane Homogohanda dahuliya andagaha howa ibunaga anda bu helalu hari mindini karume dindi ogo dangila dambi halu anda mbira bia haradagua bida. Ibugua iba solowara bedaru ibidaba lowa dindi bibahendeni odo paya bia laragola ani biaga. Ogoni biaga kago ibuninaga mini Anduane Homogoore laga kagoni.
AMO 9:7 Anduane Homogohanda lalu, Isaraele wali agaliru-o i̱na tí handaya ho haruligodagua dege Idiobia wali agalirubi nde ani dege handayaho haruli. I̱na Pilidia wali agali karubi nde Kiridi dindiha howa haru íbu helalu Siria wali agali bu karunibi Kia dindi howa haru ibirugoni. Abale Isaraeleali tí Iyibi dindiha howa haru tagira ibirudagua dege tibi haru ibinigo ka.
AMO 9:8 Anduane Homogo Bibahende Haru Haame Ho Haga kogo i̱na Isaraele wali agali tígua mana bialu kamiruni handalu koria mana ko dewaore tíha to̱ledane hendedo. Anidagua bidamigodago ai i̱na Isaraele wali agali tí bo hilo wahai helolebero. I̱na bo wahaiore nahe howa Yagabanaga aguaneneru maru nde yu waho helolebero.
AMO 9:9 I̱na bi larogome ladi ale mini widi lini aeanela tale biagadagua Isaraele wali agali i̱nime dabaki holebero. Isaraele wali agali ko biaga karuni dindi mendeha widi aeaneru yalu pu wahagadagua bialu dindi tara ngaruha ho bilibolo lelolebero.
AMO 9:10 Marume lalu, Ngode Datagaliwabehanda inaha mo ko holene mbira naibilolebira, lalu haga karu bibahende waitigirume ti bo wahai helolebero, lalu Anduane Homogohanda lene.
AMO 9:11 Anduane Homogohanda lalu, Horo mbira tagira ibulene ngago ogoni ibirangi i̱na Isaraele wali agalinaga kini mbira tínaga mamali Debidi henegobi helalu anda mbira podo ibira ho wiradagua bidaruni lone mo heyaho helolebero. Anda ibu abale bayale hongohe hayagobi helo hadai bilolebero.
AMO 9:12 Ani bidogola Isaraeleali ti hongohe howa Idomo agali karu baba wai bialu howa bo podalu dindi ti karulolebira. Dindi marubi i̱ninaga ala wini ngaru bibahende tigua karulai holebira, lene. Bi ogoni Anduane Homogo ibunime bule layago biaiore holebira.
AMO 9:13 Anduane Homogohanda lalu, Horo mbira ibulebirago ogoningi tomo bayale abale anda howa lini dewaore wali agali abale nai habe nahe dolebira. Pu mbira lini daga mini gerebi karume lini dewaore abale daragola waini iba wabiaga karume lini pingidalu waini iba wa biai habe nahe dolebira. Waini iba bayaleru dindi hari ngaruha howabi hari bare emene ngaruha howabi dugua tagi hene ale hambu paya biradagua bulebira.
AMO 9:14 I̱ninaga wali agaliru tini dindi wiyagoha haru dai bulebero. Tinaga anda paberu gialobaga bini wiyaru lone bu aribia halu hayagobi dege helolebira. Tinaga mabu hangaga wiyagoha gerebi irane hongowa gerebi lini dedagola dagadagua waini iba wabialu hambu nalu tomo marubi hangalu dewa nalu holebira.
AMO 9:15 I̱naga wali agali uruni ti tinaga dindi i̱nime mirugoha bayale kagola mbiralime ti lone bo batagi habe nahe holebira. Anduane Homogo tínaga Ngode Datagaliwabehanda bi ogonidagua laya, lalu Amosohanda lai hene.
OBA 1:1 Anduane Homogo Bibahende Haru Haame kago ibugua Idomo wali agalinaga dindihaore ogodagua bule ngeledo lalu Obadaia ibugua latagi helo lamini. Anduane Homogohanda ibunaga bi lamiaga agali mbira dindi bibahendeha piai hole pu layagola bi latagi hama penego ogoni ibugua bi layago ina hale harima. Ibugua lalu, Idomo baba wai bu mali̱ya manda manda bu halimu, laya.
OBA 1:2 Anduane Homogohanda Idomoali hearuhondo lalu, I̱na tínaga hongo bo podalu bope holebero. Anidagua berogola wali agali hameigini tara tara palu karume tí erembira ngialu yo hondolebira.
OBA 1:3 Tínaga balagala haga mana ngamigome tíni mo hondo henego kamigoni. Tínaga tano wai pabe ege to̱le̱me bu yu mabu bini kagoni. Tí hari neneha haga kami. Ani howa tíni laga bialu lalu, Ina bope habehe ai haruadabe mbirali naheore ndobe, laga kamigoni.
OBA 1:4 Anigo i̱na tíhondo langerogo ega bodo hariaweme hari nene daligaoreha pialu hari bareore ngagoria anda bu paliagadagua tígua daligaore yakundi bu karuha anda bu ha kamiyaguabi nde horo mbiru i̱na tí dindini bo haealape holebero.
OBA 1:5 Pagealime mbiraga ibalu mbirale ti hameleda alego mo yu pialu maru ngelo wahaga ndobe. Ani bialu wali agalime pu mbira mini gerebi lini do wialu howa maru delo wahaga. Anigoyu tí waitigi bu karume ibiragola tí balu bo bibaore hai holebira.
OBA 1:6 Iso hameigini kamiru tínaga munirubi dabudabu tara tara ngamirubi bibahende mo yu piai holebira.
OBA 1:7 Hameigini maru tí haru mandagi haga biarume tíhondo ke̱ halu mo hondo holebira. Urunime tí bo batagi haragola tínaga dindi yu wahalu tagira piai holeberami. Hameigini maru tí haru mandagiore haga biarume tíni baba wai bialu tí bope holebira. Tínaga nenegeore tí baba mandagi biruwa tomo naga hayarume tí gonoha dalimulo gono wu holebira. Anidagua gono wedagoha tí do ngamigola uruni tigua lalu, Idomoalirunaga mini giga bulene biago ai agoha ngabe, lolebira,
OBA 1:8 I̱na Idomo wali agali pani merongi tinaga agali manda timbunibi karuni bibahende bo wahai halu tinaga mini gigabi ngaruni mo ereba hai holebero.
OBA 1:9 Ani berogola nde Temana tanoali wai bulenenaga manda timbunibi howa bogabiore karuni bibahende gi hai holebira. Ani bialu Iso hameigininaga dindini ami agali hongohe bu karuni ti bibahendebi bo wahai holebero, lalu Anduane Homogohanda laya, lene.
OBA 1:10 Anduane Homogohanda laabo halu lalu, Idomoali tígua tí hamene Yagaba hameigini bu karunaga mbirale wiaru mo pagebu yu piai halu tini homelo bo wahai harimigoni. Ani birimigonaga i̱na tí mo taga timbuniore halu tínaga mini mo ko hai holebero.
OBA 1:11 Yudanaga waitigi bu hearume ibalu Yarusaleme tanonaga wai pabe heago bo gialalu anda puwa tanoha munibi dabudabu wiarubi mo yai howa talebu ta haga bialu hearia tígua nde mbirale uruni aria mbira mo ya nabi bame howa Yudabi biamogo bialu mo wia nabi dege harimigoni. Ani birimigome tíbi nde pageali o hayadarubi dege harimigoni ndobe.
OBA 1:12 Tí hamene Yudahondo mana ko liahe dewaore bialu harimi. Yuda mo ko hayagola tínaga bu miniha turu halu dungulo harimigoni. Ti mo ko hene heagola tígua mine halu handape ho harimi.
OBA 1:13 I̱naga wali agaliru genda yu heagola tigua tanoha anda puwa tandaga nalu wiagola tí turu haga birimi. Ani bialu tinaga dabudabu bayale wiaru mo yarimi.
OBA 1:14 Tígua hariga gebaga wigi biagoria handayaho howa Yuda wali agali ibida pole pugu biyaria tígua minu yania haga buwa tinaga waitigi hearuhondo minu migi birimigoni. Tígua mana urunidagua bialu harimigo mana koorene ko birimigoni, lene.
OBA 1:15 Anduane Homogohanda laabo halu lalu, Horo mbira i̱na wali agali bibahende dabaki bulene winigo ai ibulene kaware haragoni. Idomo wali agaliru-o tígua maruhondo birimidagua tínihondo nde anidagua dege bulebira. Tígua mana ko birimigonaga pani tínihondo biadai bulebira.
OBA 1:16 Ainde i̱naga wali agali bibahende i̱ninaga Hari Saiono loma bia hene biagoria bu haga hearuhondo pani iba kaubi ale nelo mirugoni ndobe. Ani birudagua wali agali hameigini dindi tara tarani bu karuni tibi nde pani nelo iba kau timbunibi ale hambu mulebero. Ani merogola ti iba ogoni nai halu bibahende biba haiore helolebero, lene.
OBA 1:17 Anduane Homogohanda laabo halu lalu, Wali agali maru Hari Saiononi yu wahene karu ti mo ko nahe bayale halu i̱ninaga Hari Saionobi loma bia hene bayale haabo holebira. Yagaba aguanene bu karu tinaga dindi i̱na mirugobi tinime mo yu dai bialu karulo holebira.
OBA 1:18 Ani howa wali agali Yagaba aguanene bu karubi ibu igini Yosebe aguanene bu karubi ti gibiore ira hungu bialuhe ale howa irame dangi gabuni yobi ngagoha ira hedope haragola hungu kiau lalu emene hangubi mbira ibira nahe do mundulo ai̱ hagadagua bialu tigua Iso hameigini mbiraore hangubi mbira yu wanahe bo hilo wahai holebira. I̱ Anduane Homogo i̱na bi o ledogoniore.
OBA 1:19 Isaraele wali agali Yuda dindinaga abene unurahayagi dindi hobane mini Negebe ngagoria karu tigua Idomo dindiha Isonaga hari ngaru karulo holebira. Ani bialu Yuda wali agali ni paliragohayagi hari bare bare ngaruha haga bidaru tigua Pilidia wali agalinaga dindi ngago karulo holebira. Ani bialu Isaraele wali agali marume Eberaimi hameiginirunaga dindi ngago karulalu Samaria dindibi karulolebira. Beniyamini hameiginirume dindi iba Yodana doma edeyagi ni tagira ibiragohayagi Gileada dindi hobane ngagobi karulai holebira.
OBA 1:20 Isaraele wali agali dindi abene uyurahayagi haga karu ti nde dindi taraha garabaya pu hayago golaragola tini dalu dai bulebira. Dai buwa tigua Ponisia hameiginirunaga dindi ngago karulaga bima pialu uyuraore Sarebada tano ngagoria puabo holebira. Yarusaleme wali agali Sadisi tanoni garabaya pu hayaru ti garabaya golalu dai bialu Negebe dindiha tano bu ngaru karulai holebira.
OBA 1:21 Yarusaleme agali wai bialu wayali hayarume Idomo dindiha pialu wai buwa Idomo wali agalirunaga dindi hari ngaru ti karulo howa tigua handayaho holebira. Ani kagola i̱ Anduane Homogo i̱ni tinaga kini holebero, lalu Anduane Homogohanda Obadaiaha howa latagi hene.
JON 1:1 Horo mbirungi Anduane Homogohanda Amidai igini Yonahondo bi mbira lamini.
JON 1:2 Ibugua lalu, Niniba dindi timbuni amugoria wali agali ogoriani karume mana ko ngubiore bialu kago i̱ manda bu ko, laya lalu ga̱ lalu lamule pobe, lene.
JON 1:3 Ani layago hale howa dege Yona ibu Anduane Homogonaga bi mo wahalu ibida polenaga hariga tara mendeha pudai bini. Ibu Yoba dindi dalipe halu hearia iba sibi mbira Sebena dindi pole lowa piyaria handa walia hene. Hondowa muni mialu maru berearu heba birule iba sibi biagoha ubanda hene. Ogoni Anduane Homogo yu wahalu pole manda buwa ani bini.
JON 1:4 Ani bialu hearia Anduane Homogohanda puyabu hongoheore iba solowarani ibilene. Ani biyagola dalubi puyabubi iba yaribubi hongohe gibiore biyagome iba sibi biago podobaga bibahe wini.
JON 1:5 Ani biyago hondowa iba sibi biagoria berearume gi timbuniore howa tini hangu hangunaga damame ti biamogo bilo lowa olagalaga bini. Ani bialu howa iba sibi biago yabia bilonaga mbirale maru ibaha mo ba pebe bini. Maru ti ani bialu heaha Yona ibu iba sibi tamu habaneha dalipe howa u palia hondo hene.
JON 1:6 Ani biaria iba sibi hondo haga biagome puwa lalu, O biragoni nde ogo ale bira lole ndo ka̱lo padebe. Ai heyalu í̠naga dama olole pu. Ibugua ina dara halu nahomoloma̱ya biamogo bulebira badago, lene.
JON 1:7 Iba sibini biabe biaga biaru tini lamigimigi bialu lalu, Ai ina mogo lene gibi o biragoni nde ai hondowa binidabe handami̱ya tiari yama, lowa yarimiya. Yalu hemiria tiari Yona ibuha yagi pene.
JON 1:8 Ani piyago hondowa tigua Yonahondo lalu, Ai o biragoni langi naberego. O biragoni tene aiwa binigomedabe. Í̠ biabe agi biaga kebe. Í̠ dindi ani aligo kebe. Í̠ hameigini ago ariabe, lalu hale hene.
JON 1:9 Ani layagola Yonahanda ladai bialu lalu, I̱ Hiburu tene ko, lene. Anduane Homogo hari daligabi dindibi iba solowarabi wabini dahuliya andaga kago mitangi bialu ibu mini yaraga haruli, lene.
JON 1:10 Ani lowa Yona ibugua, I̱ Anduane Homogo wahalu pole pialu hewariago o biragoni i̱ hondowa bira, lalu lamini. Ani layagola hale howa iba sibi biagoria berearume gi timbuniore howa Yonahondo lalu, Ogoni hiriribiore bialu harida, lene.
JON 1:11 Ani lalu heagola dalu puyabubi iba yaribubi biyagoni bia timbuore hayagola tigua Yonahondo lalu, Gibiore o biragoni nabilo iname í̠hondo agi bulene ngabe, lene.
JON 1:12 Ani layagola Yonahanda ladai bialu lalu, Ai uru-o dalu puyabubi iba yaribubi gibi o biraruni tene i̱ hondowa bialu ngago uruni nabilo tí bayale pole i̱ iba solowara nigoniha minu bape hadaba, lene.
JON 1:13 Ani layagoni hale howa dege agali biarume nde iba sibi biagoni hongo howaore tanguima pialu iba angeni ubade hole manda bini. Ani bule lowa biyariabi nabibeheore halu dalu puyabubi iba yaribu biyagobi gibiore halu iba angeni ubade habe naheore bini.
JON 1:14 Ani dege bialu ai hongo piai hayagola ai wahalu Anduane Homogohondo bi lalu au lene. Anduane Homogo-o iname agali ogo homelo ibaha minu bape haramagonaga í̠na ina nde homoloma̱ya pani ngia dai buleni. O beremagoni bibahende tene í̠na howa beregoni iname ndo berama, lamini.
JON 1:15 Ani lowa tigua Yona minu muwa iba solowaraha bape hene. Aniore biagola dalu puyabubi iba yaribubi timbu gibi o bialu wiyagoniore nabi nimulope hene.
JON 1:16 Ani biyago hondowa agali biarume Anduane Homogo hondowa gi timbuniore howa ibuhondo mbirale bo lomabia howa delalu tigua Anduane Homogo ibunaga biabeore bialu hole lalu bi lo wini.
JON 1:17 Anduane Homogohanda wena timbuniore mbira dabowa ogonime Yona mo mbedogo bilene. Ani biyagola Yona ibu horo tebiru mbi tebiru lowa wena tombeha wiai hene.
JON 2:1 Unuraore wena tombeneni wuwa Yonahanda Anduane Homogo ibunaga Ngode Datagaliwabehondo bi lamini.
JON 2:2 Anduane Homogo-o ai mini burugulo wuwa i̱na í̠ olarugo hale halu ladai biri. Unuraore homa dindiha hewaria í̠na i̱ biamogo bia lalu yi lalu kogoni í̠ hale ho kegoni.
JON 2:3 Í̠na i̱ iba solowara uli gibiore unuraha nalene hiriribi wiagoria minu bape harigoni. Ogoriani iba gibi berearume i̱ biruyu mabu bialu iba yaribu timbuni hongohe ibilarirume i̱ yu mabu bu hinaga bialu hayagoni.
JON 2:4 I̱na manda bialu hewaria ainde í̠naga wanakui nahondoleneniore minu wahalu í̠naga anda baya burugule biagobi hondo dai nabuliyanagaore birida, lene.
JON 2:5 Ai iba berearume i̱ berewagoria ibalu namu lalu solowara berearume i̱ bira dambiore ho wahayagoni. Iba gagua wiarumebi ibalu i̱naga haguane hubabu mabu biyagoni.
JON 2:6 I̱ dindi nalene hari pini panga paya tagiho wiaho wiaabo haga mbiraha pupe ho harugoni. Ani bu hewago hondowa Anduane Homogo i̱naga Ngode Datagaliwabe-o í̠na i̱ unura homoleneha hewaria haru dai bu helarigoni.
JON 2:7 I̱ homolene anda ibayuago hondowa ai Anduane Homogo í̠hondo bi langirugoni. Ani birugola í̠na í̠naga anda baya burugule biagoria howa hale harigoni.
JON 2:8 Maru ti mbirale nahabane bi pupu wule gime wabinigohondo bi pupu wiaga karume tinaga galone mbira bia holiya larego bia naholebira manda buwa í̠naga bi mo wahaga.
JON 2:9 Anigo i̱na í̠naga mini yaraga halu iba gana lalu mbirale mbira í̠hondo bo lomabia ho ngulebero. Ani bialu i̱na mbirale bule laruru biaore bulebero. Gini miaganebi biamogo biaganebi haru halu tagira ibaganebi pele miaganebi Anduane Homogo ibuha nga, lalu lene.
JON 2:10 Ani layagola Anduane Homogohanda wena timbuni biagohondo, Yona ede iba angeni puwa magu tagu batagiha, lene. Ani laya handala wena biagome puwa Yona iba angeni magu tagu batagihe lene.
JON 3:1 Anduane Homogohanda Yonahondo bi ala layadagua dege lone lamini.
JON 3:2 Ibugua lalu, Áyu Niniba dindi timbuni nai ngagoria puwa í̠na bi abale lo yalu pobelo langirugoni áyu wali agali ogoriani karuhondo lamule pu, lene.
JON 3:3 Ani laya handala Yona ibu Anduane Homogohanda bi layago hale halu Niniba dindi pene. Dindi ogoni timbuni gibiore ogoriani pu banga bialu pialu heane horo tebiru pene.
JON 3:4 Yona ibu dindi timbuni ogoriani pu banga bialu pialu heane horo mbira piai haga bini. Pialu howa ibugua, Niniba dindi horo pira maria (40) piai haragola bo heda hai holebira laya, lalu lamini.
JON 3:5 Ani lamiyagola Niniba wali agali hearume Ngode Datagaliwabenaga bi mana lamiyago henene layadalo manda bini. Ani manda buwa tigua tini hangu hangu hina tomo nane wali agali emenebi timbunibi ta nabi bibahendeore tigua ko ngubi ogobi bialu harima lalu walia hole danga dugu hiruwa birama polene nga, lo manda bini.
JON 3:6 Niniba wali agali kini heago ibu hale halu hearia Niniba wali agali bibahende emenebi timbunibi hearu danga dugu hiralu tomo nane birai ka layago hale howa ibubi ibunaga haru hagane dagia ngelalu ibunaga aga biaganebi golo wahowa danga dugu hiralu beha berene.
JON 3:7 Ani bialu ibugua Niniba wali agali bibahendehondo lo yogo lene. Bi ogo kinibi ibunaga biabe biaga karubi tigua lo wia harago, Mbiralime mbirale mbira nanoleore bira, lalu, wali agali bibahendemebi nogo bulumagamebi nogo sibimebi mbiraligome mbira hina ibabi nanoleore bira, lene.
JON 3:8 Wali agali bibahendebi nogo damene bibahendebi danga dugu hirai holene nga, lalu lamini. Bibahendeoreme tini hangu hangume mana ko bu walia halu hayarubi bi ko ngubi ogobiore kama lalu bu walia haga hayarubi uruni wahai harama lalu Ngode Datagaliwabehondo bi laho wulene nga, lene.
JON 3:9 Aguani beramigola Ngode Datagaliwabehanda mini wiadai bialu tihondo kebaho wiyago hadadai bialu ti nahome helolebira badago, lalu lamini.
JON 3:10 Ngode Datagaliwabehanda handalu hearia wali agali tigua tininaga mana ko ngubi bu walia haga biaruni yu wahai halu mini beregedai hayago hondowa ibugua ti bo heda hai holebero lalu lo wiyagoni mini wiadai bialu wahene.
JON 4:1 Ani biyago hondowa Yonahanda bu miniha genda timbuni howa keba holene tagira ibini.
JON 4:2 Ani biyagola ibugua Anduane Homogohondo bi agua lamini. Anduane Homogo-o i̱na abale pigane andaga yu wahalu nape howa í̠na ogonidaguaore bulebere ndo laruyabe, lene. Ogonidaguaore bulebere manda buwa i̱na Sebena dindi ibida pora bialu pole lowa pialu haruyagoni. I̱na manda bialu hewaria í̠ Ngode Datagaliwabe gubalini holenebi dara howa biamogo bulenebi to̱lo tagihe harigo manda biru. Ani bialu horo bibahendengi keba abale nahe howa bayale dege bialu horo bibahendengi mini wiadai bialu pani namule birili.
JON 4:3 Áyu Anduane Homogo-o i̱ homoliya waharene. I̱ ha ndo homaruyagua nde haru, lene.
JON 4:4 Anduane Homogohanda ibuhondo ladai bialu lalu, Í̠na keba haregoni í̠ ai howa keba harebe, lene.
JON 4:5 Ani laya handala Yona ibu uyu ni tagira ibiyagohayagi dindi timbuni biago yu wahalu pu tagi howa bira do hene. Ibu Niniba dindini agi birabe hondo birule lowa ibugua andira ale emene mbira abale buwa berene.
JON 4:6 Ani buwa berearia Anduane Homogohanda ma tumbu ale mbira Yona ibu andane gumbaha turu howa berelo lowa andaho daga helene. Yonahanda aguani biyago hondowa turu howa ka̱i̱ timbuni lo wini.
JON 4:7 Ani biaria horo mendengi egerabagiore egabi lole muna biyagola Ngode Datagaliwabehanda tonge mbirahondo, Ma tumbu ale o kagoni no podo peha, layagola no podope halu gaulene.
JON 4:8 Ai ni tagira ibalu dayagola Ngode Datagaliwabehanda puyabu poboyogobiore mbira uyu ni tagira ibiyagoha howa ibilene. Ani biyagola ogonime Yonanaga haguaneni tandagabigome daba hayagola Yona odo ibira hole bini. Ani biyagola ibugua lalu, Homolene karulape. I̱ ha ndo homaore biruyagua karulapeda, lene.
JON 4:9 Anigo Ngode Datagaliwabehanda ibuhondo lalu, Ma tumbu ale ogoninaga í̠na keba holene nawigoria keba harebe, lene. Yonahanda ladai bialu lalu, I̱na keba holene irane dewa ngane hondowa keba harogo keba halu homolene haru, lene.
JON 4:10 Anduane Homogohanda Yonahondo lalu, Ma tumbu ale anda hayago mbi mbirani hangu anda halu mbi mendeni ereba hayago í̠na ogoninaga mbirale mbira nabigo, lene. Ani bialu í̠na mo anda henebi ndo biagoria í̠ dara bame aginaga harebe, lene.
JON 4:11 Dara ogoni emene lowa dara timbuniore i̱na Niniba wali agali dindi timbuni karunaga agua holobodabe, lene. Maniore handalu hewaria dindi ogoriani wali agali daosini dege handari mbirani mendegonaga pira kira (120,000) agima nira lowa bolangua howaore waneiginiru tinaga gi tiga ogo gi le ogo lowa bayuwa manda nabi lowa tibi nogo damenerubi dindi ogoriani kagoni, lene.
MIC 1:1 Anduane Homogonaga bi ogoni Moresia dindi tano wiagoali Maiga hearia ibilene. Horo uruningi Yudanaga kini maru henego ti mini Yodama Ahasa Hesegaia imaru haga biniya. Anduane Homogo ibugua Maigaha howa latagi halu Samaria Yarusalemelani bibahende bulebiraru mbiwia hene.
MIC 1:2 Wali agali dindi bibahendeni kamiru ogo hale hadaba. Dindi ogoria ho kamiru ogo hale ho biradaba. Anduane Homogo Bibahende Haru Haame Ho kagome kago ibugua tígua ko birimiru agua birimi lalu latagi halu pani ngulebira. Anduane Homogo ibugua dahuliya andaga ibunaga andani howa bi larago hale ho hadaba.
MIC 1:3 Anduane Homogo ibuninaga dindi baya buruguleni howa ibiragoni. Ibuni íbu dalialu li hari nenerunaga ibaga bu holebira.
MIC 1:4 Ani biragola hari karuni ibunaga andaneha irani wagaya do elo pebe biradagua bialu dindi guane ngarunaga pu heyolope halu hari bareni iba pora biradagua bulebira.
MIC 1:5 Urunidagua bulebirago irane Isaraele wali agalirume Ngode Datagaliwabehanda hame leadagua nabi howa mana ko hame naleadagua biyagome ani bulebira. Isaraele wali agalime mana naleadagua uruni bilo mo bia hayadagoni tene ai lolebadabe. Uruni Samaria dindi haguane í̠ mo bia harigoni lolebira. Yuda wali agalime gime wabini wiaruhondo bi pupu wialu hadaba lene ai lolebadabe. Ogoni Yarusaleme í̠ mo bia harigoni lolebira.
MIC 1:6 Anigo Anduane Homogohanda lalu, Samaria dindi timbuni ogoni bo gialo holo bialu do hama ngagola ogoriani pu mbira mini gerebi lini doleneru taniru hongo aribia holene wulebira. Ani bialu ege to̱le̱ do gingirulo baga bini ngaruni i̱na ni hari guane ngaruha mo haealo bape halu dindi timbuni wiyaruni bame dindi hangu ibira helolebero.
MIC 1:7 Dindi ogoriani bi pupu wule gime wabini damene wiyaruni mo gingirulo baga bialu mbirale gime wabinirunaga andaha wali agali yaga bedamiru tíhondo mbirale mini ngarubi irame do haealope holebira. Ani bialu mbirale bibahendeore gime wabini biaruni do haealodaga ho wulebira. Samarialiru ti Anduane Homogo erembira mialu bayanda walinaga yolo mbiraleru bibahende mo mogo bialu hayago áyu waitigi karu ti tininaga bi pupu wiaga anda ngaruha wule mo yalu piai holebira, lene.
MIC 1:8 Ogoninaga Maigahanda lalu, I̱na dugu bialu dara ho holebero. I̱na dara ogobiore ho ko lalu ge gamu agabi nabi bame ibaga bu haradagua bu holebero. Ani bialu i̱na biango gau̱ lo haradagua bialubi ega yarime hoelo haradagua bialubi holebero.
MIC 1:9 Samaria dindini biyaruni mbira lone bayale ho dai nabulebira. Ani bialu Yudani karubi Samariani biyadagua dege hiriribi biago bule ai Yarusalemeni panga payuwa i̱naga wali agali bu kagoria íbu hapara kagoni, lene.
MIC 1:10 Inanaga waitigiru Gada dindini karume hiriribi inani biraru ogodagua biya lalu nalalimu ti de hendelo yiya lalu dugubi heba nabilimu. Wali agaliru Beda Leabada tanoni kamiru tíni hiriribi ogobiore bira lalu dindi himu ngagoriani palu pendegelo yu ibaga bulene nga.
MIC 1:11 Tí wali agali Sabia tanoni kamiru ti babe howa taga hama dindi mendeha garabaya hagadagua hole pudaba. Sanana dindini karu ti tinaga dindi timbuni yu wahalu porabu tagi halu ibida polene hame nale kago. Wali agali Bedeselo dindi ogoriani pu kamiria waitigime gialo baragola tígua yiya lalu dugu beramigola ogoriani tí ha do holene mbira nawulebira.
MIC 1:12 Irane Anduane Homogohanda mo ko holene Yarusalemeni kaware íbu hapara ho ngeleago hondowa Maroda wali agali tiore aiwa pele mulebadabe lowa giore halu hene.
MIC 1:13 Wali agali nai Lagisi tanoni kamiru ai tínaga biralu piagane garo ale biaru nogo hosime gililelo pongobia ha naberami. Tígua mana ko ngubiore Isaraele wali agalime biyaru hondo wia dege buwa bialu hemigo Yarusaleme wali agali karume handalu mana ko ngubi uruni bilo mo bia hagane tí harimida.
MIC 1:14 Ani binidago áyu Yuda wali agali kamiru tígua wali agali Moresia Gada tanoni karuni áyu waitiginaga giha andapu paliai haragonigo ai nde aniore bilimu ladaba. Isaraelealinaga kini kamiru tí Agasibi tanoni karume mbira ibalu pele mulebadabe toba holemini namuleorebirago.
MIC 1:15 Wali agali Maresa tanoni kamiru tí Anduane Homogohanda minuwa waitigi mbira tínaga dindi karulole ibiragonaga giha minu ya holebira. Isaraele wali agali haru haga baya hayadaruni Adulama ege andaha puwa ha do holebira.
MIC 1:16 Yuda wali agaliru tínaga waneigini gubaliniore ho kamiru manda bialu daraore howa dugu biahalu tíninaga mandariore nahe birule podo mbolo lo waore ho halimu. Podo hegabu waore halu mbaube aleore helalimu. Ogoni irane tinaga waneigini uruni dara howa ai̱ya yilo ngamiore minalu dindi taraha pelolebiragonaga ani bilimu.
MIC 2:1 Marume ko bule lowa tene aguaore bialu buadabe lalu palia nabi mini tumutumu bu wialu egabi ledaru nde gibioredago de handabe. Abale egerabagi egabi laragola heyalu ko bule mitangi tangi bu wiyagoni bulene henge ngane handalu puwa tigua o biagoni biaga.
MIC 2:2 Tigua mabu dindi hame lowa dindi ogoriani pialu yani haga. Tigua anda hame lowa andani yani haga. Agali mbira ibunaga one waneigini dameneyaguabi mbirale maru ibunaga ngaruyaguabi uruni mbira de nahendene wia do hene nawi.
MIC 2:3 Ogonidago Anduane Homogohanda lalu, I̱na tí kamigoria mo ko holene timbuni yu anda ibilole manda bialu kogo tí yo pialu napoleberamigo hondoha. Mo ko holene timbuni uruni tí kamigoria ibinidane tíni handa walia halu ai mani tígua mine ho yu ibaga bialu haramilidagua naholeoreberami.
MIC 2:4 Horo ogoni tagira ibirangi wali agali karume mo ko holene timbuni tíhondo ngiraruni tigua bi puromo lelo manane biyagoni holebira. Ani bialu tigua tíhondo mo ko holene timbuni tara bima piyarunaga dede bi lalu iba gana ogo lolebira, Ina mo koore henego kamagoni. Anduane Homogohanda inanaga dindi yamialu ina garabaya holoma̱ya minu yalu piyaru tihondo mo miya, lalu Anduane Homogohanda, lene.
MIC 2:5 Ani biyago horo mbirungi dindi ogoni Anduane Homogo ibunaga wali agali tinihondo yadai birangi homogo bi laga uruni tí mbira dindi page karulo hayagoria helo henge namuleorebira.
MIC 2:6 Wali agalime i̱hondo mege bialu lalu, Bi ogoni galone napaledago hale naholego inahondo langiaabo nahabe, laga. Í̠na uruale bulebira lalu langia ho wiaabo nahabe. Ngode Datagaliwabehanda ina mo dindiha halu ina mo taga holobadalo manda nabidama, laga.
MIC 2:7 Í̠na manda beregola Isaraele wali agali ha henego kabe. Anduane Homogo ibu keba abale hayadabe. Ibugua urunidagua biai haga kabe. Ibugua wali agali maru bayale tigabi biaga karuhondo bi bayale turubi laga ndobe, laga.
MIC 2:8 Tigua ani layagola Anduane Homogohanda agali homogo biaruhondo ladai bialu lalu, Tígua i̱naga wali agaliru waitigi baradagua bialu bai harimigoni. Agali wai bialu heneru gi nahe karulupe andaga dai beramalo manda bigi bima dai bialu karia tígua harigani yu biruwa mo mogola haga bialu tinaga aga erembirani biaru golo page yamigi bule kamigoni.
MIC 2:9 Tígua i̱naga wali agali hewarunaga wali dalo ale biru wiaru tinaga andaga hamelo wiaore haru gililo yalu tagira pirimi. Ani bialu tinaga waneigini tihondo turu halu i̱na miwaru tí minu page bu yalu pirimi.
MIC 2:10 Ogoria bira do holene mbira nawigo. Tígua mana ko ngubiore birimigome dindi o kamigoni mo ko holene timbuni wiyadago ai heyalu pu naberami, lene.
MIC 2:11 Ani lowa lalu, Wali agali ke̱ halu mo guya hole waini iba hongohebi iba mbiabi dewaore tinaga bu paya bulebira lalu mbiwia haro lalu kago wali agalime mana latagi haga ogonibi hame laga ka, lene.
MIC 2:12 Ani lalu howa Anduane Homogohanda lalu, I̱na tí bibahende Isaraele wali agali yu wahene karu heba mo mogo bu helolebero. I̱na tí bibahendeore nogo sibi mo mogo biradagua bialu pabe tamuha waranda holebero. Ani bidogola tí tani gahengeni nogo sibi bu haradagua bialu tínaga dindi ogoriani lone wali agali aulolebe tobaheme ho to̱lo tagi holebira, lene.
MIC 2:13 Ani layagola Maigahanda lalu, Ngode Datagaliwabehanda tinaga hariga ba halu ti dindi tara minu pelayagoha howa ibunime haru halu dai bulebira. Tigua dindi timbuni ogoriani pabe payaru bu̱lalu yola halu daibulebira. Tinaga handame haga kini Anduane Homogo ibuni halu ibugua ti haru halu daibulebira, lene.
MIC 3:1 Maigahanda lalu, Isaraele wali agali haru haga kamiru tí hale hadaba. Tígua mana tigabi ngago gubalini howa bulene wiago wahowa mana ko nabulene wiago gubalini howa bialu harimida. Tígua i̱naga wali agali dére helowa tingini minu laga lo miradagua bialu mbirini tinaga kunini hearu minu didu miradagua mirimida.
MIC 3:3 Tígua i̱naga wali agali balu nowaore haradagua birimida. Tígua i̱naga wali agalinaga tingini minu laga lalu tinaga kuni minu podalu ani bialu todobeneha dawale nogo bo podo baga biradagua birimida.
MIC 3:4 Ogoni birimigonaga horo mbira ibirago ogoningi Anduane Homogohondo dugu bu mialu kamiria ibugua hale halu ladai nabulene wulebira. Tígua ibuhondo bi laramigobi hale naholebira. Tígua mana ko gibi wiaru bialu harimigonaga ani bulebira.
MIC 3:5 Ke̱ howa mana latagi haga karume i̱naga wali agaliru mo hondo halu mo guya howa muni ngirimiyagua mo palia holene nguleberama lalu nangirimiyagua mo ko holene yu anda ibuleberama, laga ka. Ke̱ howa mana latagi haga uruni tihondo Anduane Homogohanda lalu,
MIC 3:6 Ke̱ howa mana latagi hagaru-o, tínaga horo piai halu ni paule daliyaha harimida. Irane tígua i̱naga wali agaliru mo guya halu hariga koha pelo haru pialu harimigonaga áyu tígua mani bulebiraru de gandeba mbira nahondoleberami. Ani bialu tígua mbirale mbira mani agua bulebira lalu lo wulene mbira naloleberami, lalu lene.
MIC 3:7 Marume mbirale mbira mani agua bulebira lalu lo wiyaru mbira nabiragola tini taga howa mini dege dindiho holebira. Ngode Datagaliwabehanda tigua bi layaru mbira ladai nabinigoria tinaga ne hambuni genda bialu taga biragola ne hariga ndibulo hama polebira.
MIC 3:8 Anigo i̱hondo Anduane Homogohanda ibunaga Dininibi hongobi i̱ha to̱lo tagihe ledagome mana tigabi bulenenaga mini dingidangiale ngidagoni. Ani bidagome i̱na Isaraele wali agali tinaga mana ko uru ale lalu tinihondo gi nahe howa lamulene karulape ko.
MIC 3:9 Isaraele wali agali haru haga kamiru-o i̱na larogo hale hadaba. Tígua mana tigabi bulene ngaru bilo haru nahe manga halu bayale bulene ngaru wahalu ko bu aribia haga kami.
MIC 3:10 Tígua Ngode Datagaliwabenaga dindi timbuni Yarusaleme wabule lowa gene agali balu daramala mana ko bulenelame warimida.
MIC 3:11 Dindi timbuni ngago haru hagaru tigua mbirale mbira lahole lowa yolo ngi lalu lahaga. Loma binigo mo miaga karu tibi Mana lowini ngago ogodagua lalu lamiragola dimagoli howa yolo mo yaga. Ngode Datagaliwabe mana latagi haga karu tibi mani ogo ale bulebira lalu lamiragola dimagoli howa muni mo yaga. Ani bialu howa dege ti, Anduane Homogonaga andaneha berama, laga. Tigua lalu, Anduane Homogo ina heba kago tandaga bulene mbira ina kamagoria naibulebira, laga.
MIC 3:12 Irane tigua ani laga bigi birimigome Yarusaleme mini mende Saiono godo ibira halu dindi godo wiradaguabi lalu Yarusaleme ibuni gialo baga bialu naina ungu baga bu wima polebira. Ani bialu hari bareni Anduane Homogo anda bini biarunaga yagua dagiru tagira ibilolebira.
MIC 4:1 Horo mbirungi haragola Anduane Homogonaga harini ibunaga anda hene biago bibahendenaga daliga ibu bolanguahe hari bare ngaru waradai buwa ibu lina daligaore holebira. Dindi bibahendeni hameigini tara tara dewa palima pedaru ibalu ogoniha iba yo̱ laradagua bialu yo̱ lalu anda ibalu
MIC 4:2 wali agali uruniha howa ibirarume lalu, Anduane Homogonaga hari Siaono iraga hama maibidaba. Isaraele wali agalinaga Ngode Datagaliwabe kago ibunaga anda kagoria ubanda hama. Ibugua hame ledaru ale iname buluma̱ya lawai halu ina pialu holene hariga ibugua ba kagoria pialu holeberama. Irane Anduane Homogonaga lawai holene mana ngaru Yarusalemeni howa ibalu Saiononaga hari bareni howa ibugua ibunaga wali agalihondo bi lamiaga, lalu ka.
MIC 4:3 Hameigini tara tara tini dege dege wai bulene te lalu bi anda halu hongo ha a̱i̱ na̱i̱ bialu karu Anduane Homogo ibugua bi uruni dabalu mo palia holebira. Tinaga wai biagane ayu tibu yidaruni tomo hongole dindi godagane wabialu aeane yandare yidaruni widi lini dedagola gandu lolene ale helo nguni mo garayabia helolebira. Hameigini tara tara uruni lone wai bule tidu yu haga haga buwa manda manda nabuleorebira.
MIC 4:4 Bibahendeore tíninaga gerebi mabu bu hengedemigohabi tininaga poge hengedemigonaga gumbahabi bira palia bu holeberami. Uruninaga ho hama pedaria mbiralime ti mo gi holene nawialu tínaga bu miniha mo palia holene karulowa turu haga buwa dungulo holeberami lalu Anduane Homogo Hongo Haiheore kagome ani buleore, lalu lo wini.
MIC 4:5 Hameigini tara tara tini hangu hangunaga damahondo bi pupu wialu tigua lo ngadagua bigibigi biaga ka. Anigo ina nde Anduane Homogo inanaga Ngode Datagaliwabenaga minini howa lotu lalu ibugua lo ngadaguaore biaho wiaabobo bialu holeberama.
MIC 4:6 Anduane Homogohanda lalu, I̱naga wali agali dindi kaundia tarani tandaga nalu helo helaruru ai mo mogo bialu haru íbudai biai holene horo biagoni ibiyada.
MIC 4:7 Uruni tinaga dindi andaru yu wahalu kaundiaoreni pu henego dai bulenego ge paule ka. Ani bidago wali agali yu wahene uruni heba i̱na tinaga holene gahenge mbira i̱na wabialu ti hameigini hongohe mbira helolebero. Ani bialu ti Saiono hari bareni ogoningi howa i̱nime haru haho wiaaboboore bialu holebero, lene.
MIC 4:8 Ai tí Yarusalemeni kamiru-o Ngode Datagaliwabe kago ibu nogo sibi haru hagadagua howa ibunaga wali agaliru de handame ho kagoni. Ani bialu Yarusaleme dindi lone dindi timbuni mini lene ala tininaga wiyagobi wia aribia helolebira.
MIC 4:9 Ani bulebirago tígua dugu hongo howaore bialu kamiru irane aginagabe. Tígua walime waneigini taba hanalu tandaga nalu biragadagua bedamigoni irane agibe. Ogonidagua bidamigoni irane tínaga kini nahe tíni hangu kama lowabi tínaga ganisolorubi homai hayago lowabi bidamibe.
MIC 4:10 Yarusaleme wali agali kamiru-o tí áyu dindi timbuni ogoriani nahe yu wahalu tagira puwa bame dindi degeni yu dindi mbira nga li aleni pu holeberami. Ogoninaga wali waneigini hono wule lowa tandaga nalu elo pedere bu yu ibaga biagadagua bialu hadaba. Ani bialu tí Babilono dindi polene nga. Ani beramigola ogoriani Anduane Homogohanda tínaga waitigi karume nabelo pele mulebira.
MIC 4:11 Hameigini tara tara dewa karume tini mo mogo bialu tí minalu bole biragoni. Tigua lalu, Yarusaleme bo gialo paya bulene nga. Dindi timbuni biagoni bo gialo paya bu ngagola ina de hondoleberama, lalu ka.
MIC 4:12 Ani ledagoni hameigini tara tara uruni ti Anduane Homogonaga miniha mandabu wiago tigua namandabi ka. Uruni ti widi gandulo yu mogo buwa lini hondo ibira ibira bilo dambiagadagua tandaga nelo dambule mo mogobu heledago tini namandabiore ka.
MIC 4:13 Anduane Homogohanda lalu, Yarusaleme wali agali kamiru-o tígua puwa tínaga waitigi karu tandaga nelo bo dambule pudaba, lara. I̱na tí mo hongo halu nogo bulumaga aeane ne haguanenihe alebi ge habeni boronosi alebi helolebero. Ani bidogola tígua puwa hameigini tara tara bu karu bo dambialu tinaga mbirale dabudabu wai bialu mo ngelo karu mo yalu ibuwa dindi bibahendenaga Anduane Homogo i̱ni kogohondo loma bu nguleberami, lene.
MIC 5:1 Yarusalemealiru-o tínaga wai biaga ami agaliru mo mogo bidaba. Ai ina ho mabu bialu minayaha harimadago. Isaraelenaga haru haga heago abale tigua minalu kangome ibunaga yangane dambira.
MIC 5:2 Anduane Homogohanda Bedelehemeni dindi hobane mbira Ebarada ngagoria hearuhondo lalu, Tínaga tano emene ngaru aria mbirago Yuda dindini wia para kago ogoni tíha howa Isaraele wali agalinaga haru haga mbira haru tagira ibulebero. Ogoni ibunaga mamali hameigini amuraore íbudai buwa ala pigane tehininigoria howa ibulebira, lalu ka.
MIC 5:3 Ani bulebirago emene tigi mbira hangunaga wali mbirame igiri mbira taba honolebirago henelotambu howa ibunaga wali agali uruni tinaga waitigi karume haru helo yupe howa helolebira. Ani bu kagola tinaga aria damene maru dindi tarani tagira pu hayaru lone wali agali tini aria damene hayaru heba ho gimbubu hole dai bulebira.
MIC 5:4 Ani bu kagola ibu ibirangi ibunaga wali agali uruni haru holene hongo Anduane Homogoha howa ibalu Anduane Homogo ibunaga Ngode Datagaliwabenaga mini lene holene daliga ibuniore howa ibunaga wali agali haru holebira. Ani bidagola ibunaga wali agali uruni ti gi nahe bayaleni helo ibugua mo palia holene yu íbu kagola wali agali dindi bibahendeni karume ibu daligaore kagoni lolebira. Asirialirume inanaga wai biaga ami agaliru bo podama ina dindini anda ibirangi inanaga haru haga hongoheoreru ti baba wai bilo ibiloleberama.
MIC 5:6 Tigua wai bialu Asiria dindi mini mende Nimirodi wiago helalu bo podo pelowa tigua karulolebira. Ani bialu Asirialiru ina kamagoria anda ibalu karia mbirali haru haga biago ibugua ina pele ngialu hapai holebira.
MIC 5:7 Isaraele wali agali maru ti dindi tara tarani pu howa nahome haho wiaru tanini iba dadimba gahenge Anduane Homogohanda hameigini tara tara dewaore bu hearuhondo ibu berelagadagua biralu irani dadimba biragadagua beda. Tigua agalini ndo Ngode Datagaliwabeni hanaho holebira.
MIC 5:8 Hameigini maru tara tara karu hengeneha yu wahene karu ti laiono pudi timbuni ale ira taniru teha tomo taya bialu biragadagua taya bialu ka. Ibu nogo sibi karu hengeneha íbu iragaho howa abale nogo sibi deni karu porabudaga halu bo didubaga biaga. Ani biragola nogo sibi uruni yu wahalu ibida pelo pele mulene mbira naholebira.
MIC 5:9 Isaraelealirume tinaga waitigi hayaru bope halu ti wayali howa bo gialo payabu waore holebira.
MIC 5:10 Anduane Homogohanda lalu, Horo ogoningi i̱na tínaga nogo hosi karu haru tagira pialu wai biaga garo ale mini karisi nogo hosime gililaga ngamiru mo gialo bagabu waore holebero.
MIC 5:11 I̱na tínaga tano dewa bu haame karuni bo gialo baga bu wahalu tinaga wai pabe payidamiruni gialo baga bu waore hai helobero.
MIC 5:12 Ani bialu tígua tomia hamburume bagane wirimigoni áyu i̱na mo ko holebero. Ani bialu mani bulebiragonaga mbiwia hadebe hagane wirimiru áyu mbira nahelolebero.
MIC 5:13 I̱na tínaga bi pupu wule gime wabini ngamirubi gebeanda to̱le̱ gebe minaga karubi mo ko halu gialo baga bulebero. Ani berogola tígua tíni gime wabini urunihondo bi pupu wialu holene mbira nawilo.
MIC 5:14 Tínaga minime manda bialu irame wabini dama wali beda mini Asera wali biraradagua berelo dindini wawa heledamiruni i̱na gialope halu tínaga anda dewa bu hama pedaruni gialo baga bu waore holebero.
MIC 5:15 Ani bialu i̱na keba gibiore kogobi hameigini tara tara karu bibahendeme i̱na larudagua ndo mo wahowa bialu karu tihondo tandaga nelo mulebero, lalu Anduane Homogohanda ani lalu ka.
MIC 6:1 Isaraele wali agali kamiru Anduane Homogohanda bi mbira tí baba dabole larago hale hadaba. Anduane Homogo-o heyalu dabo hondolene wiridago dabo handabe. Ani beregola hari li karumebi hari bare wima pedarumebi í̠na bi larego hale helo.
MIC 6:2 Hari li wedamiru tí dindi ngarunaga pini bamba haho wini kamiru Anduane Homogohanda dabo hondolene bi larago hale hadaba. Anduane Homogohanda dabo hondolene ogoni ibunaga wali agali tiha nga. Ibugua Isaraele wali agali tígua kagua birimida lalu dabo hondolene mbira yalu ibulebira.
MIC 6:3 Anduane Homogohanda lalu, I̱naga wali agaliru-o i̱na tíhondo agi bialu haruyabe. I̱na tíhondo agua bialu mo genda haruyabe i̱hondo ladai bidaba.
MIC 6:4 I̱na tí Iyibi dindi garabaya biabe bialu hemiria gini mialu haru tagira pirugoni. Ani bialu tí haru halu pelo Mosese Erono Miriama imaru ibilarugoni.
MIC 6:5 I̱naga wali agaliru-o Kini Bailaga Moabaali heagome tíhondo mbira bule manda bialu hearia Beo igini Bailamahanda ibuhondo agua ladai biya lo manda bidamibe. Ani bialu Giligolo dindi pole Agasia hariga obeneni mbira biyaru manda bidaba. Uruni bibahende bima piyaru manda bima poramigola i̱na tí pele mule agua bialu harudabe manda bu handadaba, lalu ka.
MIC 6:6 Anduane Homogo Ngode Datagaliwabe dahuliya andaga kago ibu mitangi bialu lotu lole ibu karia ibalu howa i̱na agi yalu ibuledabe. I̱na nogo bulumaga igini daula mali mbira pene bayaleoreru hondowa yalu ibuwa bo lomabia howa delolenego karulapedabe.
MIC 6:7 I̱na nogo sibi dewa daosini aulolebe tobahe bo yalu olibe lini ibane weli iba ale duguaho wulene hambu yalu Anduane Homogo ibu karia piruyagua ibugua ogoninaga turu holobadabe. I̱na mana ko birurunaga emena i̱naga waneigini wahene mbirago bo lomabu ibuhondo mulene harudabe.
MIC 6:8 Ani ndoyago Anduane Homogohanda lalu bayale bulenego hangu bilimu langiya. Ibugua iname bilimu ledago ogo. Bulene tigabi ngadagua bialu howabi gubalini haho wulene walia halu howabi inane mo dindiha howa Ngode Datagaliwabela ho gimbu bu howabi holene nga.
MIC 6:9 Mini gigabiwi howa Anduane Homogohanda hondo kaore lo manda buwa gi ho holene nga. Ibugua Yarusalemeni wali agali bu karu olalu, Wali agali hameigini tara tarani howa Yarusalemeni mo ngoai ho kamiru hale hadaba.
MIC 6:10 Mana ko ngubi ngaru biaga karu anda tamuha mbirale dabudabu ngaru wali agali mo hondo howa hangu mo winime anda to̱leda. Tigua mbirale yolo mirago magi tiga tiga handalu mulene ngagodagua ndo mo hondo howa mialu kago ale i̱ handabe mangaore haruli.
MIC 6:11 Agali genda magi tiga tiga handalu ndo mo hondo howa mulene ngadagua ndo mo dindiha howa mialu karu tinaga mana ko ogoni i̱na agua doma habehedabe.
MIC 6:12 Tí homogo kamiru wali agali yagibano karunaga ti dege mo to̱lole henge tai bialu kami. Ani bialu tí bibahendeore ke̱ timbuni haga kami.
MIC 6:13 Irane tígua mana ko ngubiore bialu kamirunaga i̱na mo ko holene ngaru tí kamirunaga anda ibilalu tí mo koorene ko halu turu nahe halimulo i̱na manda manda bido.
MIC 6:14 Tígua tomo emene hangu ngago noleberamigo tombe naholebira. Tínaga tombeha garibi laho wiaabo holebira. Tínaga mbirale dabudabu ngamiru do hole mo yu ibaga bialu kamiria mo do holene bayale mbira ngaria handa walia naholeberami. Tígua mbirale bibahende mo do haramiruni i̱na waime mo ko helolebero.
MIC 6:15 Tígua ladi ale mini widi egene mabuni hanga hongoleberamigo boga bidagola gandulo howa na nabuleberami. Tígua ira olibe lininaga ibane tagira ibilo lini dambuleberamigo ogonime mbira galone nabuleberami. Tígua waini iba wabuleberamigo na nabuleberami.
MIC 6:16 Urunidagua bigi bulebirago irane tígua Kini Omerila ibu igini Kini Aihabalame mana ko ngubi biyadagua bialu harimigome ogonidagua bulebira. Tígua uruni ti mana lo wiago talialu biaho wiaabo halu harimigonaga i̱na tí mo koore helarogola wali agali hameigini tara tara karume tí handabe manga henego holeberami. Wali agali bu haame karume tí mo dindiha halu holebira, lalu Anduane Homogohanda ani leda.
MIC 7:1 Ai koore hayadago i̱ agali tomo garibi lowa pogeni pogeli dedabe hondole handalu karia nade dai hayadane handagadagua pu mbira mini gerebi lini dedabe handalu karia nade dai hayadane handaganego ale ko. Gerebi lini bibahendebi pogeli ibiri dendebi bibahendebi nade do hondo waore hayada.
MIC 7:2 Dindi ogoriani wali agali henene tigabi bulene mbira yuwa naheda. Ngode Datagaliwabehondo henene mini bilinahe mbiraorebi naheda. Karu ti bibahendeme mbirali darama ibini balu homelole lowa henge wilo hondo ho hama peda. Bibahendeme tini dindi mandagiali karu aria mbira au homelabehedabe hondole lowa taya bialu ka.
MIC 7:3 Ti bibahendeoreme ko ngubi ngaru bulenenaga tigua bu debeore haga ka. Haru haga karubi dabaganeali karubi tigua mbirale mbira la hole lowa muni ngi lolene nga lalu ka. Agali hongohe dunini kagome mbirale ibu hame leda ale tigua bilo ibugua ogo ale hame ledo laragola tigua bule mo manda manda biaga.
MIC 7:4 Hongebi ale lalu agali maru bayale tigabiore karubi heba habane nabulene emberaha mamunali ho wahene anihe kaligo ale ka. Horo mbirungi wali agali uruni tandaga nelo Ngode Datagaliwabehanda mulebero lalu ibunaga mana latagi haga hearuha howa mbiwia halu laminigo horo ogoni áyu tagira ibiyada. Ai wali agali uruni ti áyu agua bimabe toba howa mini dege dindi ho ka.
MIC 7:5 I̱naga haparali karu mbiragohondoyaguabi nenegeali turubi karu mbiragohondoyaguabi ogonime larago henene lara lowa yutiga bialu mini pagaho nahabe. Mbirale mbira larego í̠ni onehondo lariyaguabi de hondowa bayuwa mitangi buwa labe.
MIC 7:6 Horo uruningi igininirume abaru mo guya howa mini nawi alehondo biradagua biaga. Wanenerume ti ai̱yarunaga bi larago hale halu bia nabi howa bi haya dai biaga. Wali daliahe bedarume ti agalini ai̱yaru baba gungu lai biaga beda. Agalinaga waitigi hiriribiore ibuninaga onene waneiginibi ti holebira.
MIC 7:7 Anigo i̱na Anduane Homogo ibugua bilo handayaho holebero. Ngode Datagaliwabe ibugua i̱ holiya biamogo bulebiragonaga i̱naga miniha dungulo holebero. I̱naga Ngode Datagaliwabe ibugua i̱na larogo hale holebira, Maigahanda ani leda.
MIC 7:8 Inanaga waitigi karu ti mini ko wu howa mine holenego irane nawi. Ina pilo wia ngamagoyu lone wialu heyuleberama. Áyu ina arumaha kamagola Anduane Homogo ibuni inanaga wá holene holebira.
MIC 7:9 Iname Anduane Homogohondo mana koore birimago ogoninaga ibugua inahondo keba habehedagua ka. Ani bidago ibugua inahondo tandaga tigi mbira hangu noloma̱ya ngidagoni karulape. Ani bidago inanaga waitigi hearume inahondo mana ko bima piyaru maniore ibugua mo bayale halu lone ko ngaru buligonaga ibugua ho hangai holebira. Ibugua ina wá kagoria haru halu tagira polebira. Ani bu howa ibugua ina pele ngirago de hondole holeberama.
MIC 7:10 Ani birago hondowa inanaga waitigi urunime taga ndo taraore holebira. Waitigi urunime dege ala ina mege bialu agua lalu, Anduane Homogo tínaga Ngode Datagaliwabe ibu agoha kabe, lalu hale hene. Urunidagua lalu karuni tinaga waitigime ibalu bo podaragola tigua heyalu mbira bibe nahe harigani waru wima poradagua bulebira.
MIC 7:11 Wali agali Yarusalemeni kamiru-o dindi timbuni ngarunaga pabe bu aribia holene horo áyu ibiragonida. Horo ogoningi dindi áyu kamiru emene dorogonedago lone mo yanga lolebira.
MIC 7:12 Wali agali tí aria tagirani ibida pu hama piyaruni tini hama piyaruha howa ibugu ibugu bialu tíni kamiria dai biai holebira. Asiria ni tagira ibiragoha howabi Iyibi dindi leneha howabi Yubaraidisi iba poragohayagi howabi amuraore iba solowara bedaruha howabi hari kaundiani wedaruha howabi íbu dai biai holebira.
MIC 7:13 Ani bilowa dege dindi ogoni mo beregedalu tomo tani iraru mbira anda naholene bu hinulebira. Ogoni irane wali agali ogoriani karu tigua mana tigabi ngaru nabiyagonaga ani bulebira.
MIC 7:14 Anduane Homogo-o í̠naga wali agali í̠ni dabarirunaga nogo sibi haru hagadagua í̠ni haru habe. Wali agali uruni ti dindi bayale tomo anda holene wia mabu bidaruni bilowa dege irabu tayanda wali agali nahe dindi ko wiagoha pubagi howa ka. Tigua mabu bayale ala bambaore nalu harimidagua áyu Basanila Giliadalani mabu gahenge bayaore karu nalu hela.
MIC 7:15 Anduane Homogo í̠na nahendene ale ina Iyibi dindi howa haru tagira ibalu howa bima ibirilidagua maru áyu inanaga bia habe.
MIC 7:16 Hameigini tara tara karume ogoni handalu karia ti hongo gibiorehe harimigo ndo tinaga hongo nawidane hondowa tini taga holebira. Tigua giho howa tininaga ne harigabi hale harigabi gi habeme panga payu pai helolebira.
MIC 7:17 Ani bialu tini dindini yu lama nogombime poradagua bialu tininaga ha do haga wai pabe anda biagoha howa gi howa duru lama ibulebira. Ani bialu tigua mini beregedalu Anduane Homogo inanaga Ngode Datagaliwabe kagoria gi howa porabu anda holebira.
MIC 7:18 Anduane Homogo-o maru í̠ ale mbira nahego í̠na hangu í̠naga wali agali nahome haho wiaabo karunaga mana ko biraru doma hariligoni. Í̠na keba haho wiaabo nahariligo ogoni irane í̠naga gubalini holene ogobiore wu haho ngo lalu inahondo walia harili.
MIC 7:19 Áyu nde lone í̠na dara hodai bulebere. Iname mana ko ngubiore birimaru í̠na geme hengedo dambi halu kaundiaore unura iba solowara uliha mo yalu puwa bape holebere.
MIC 7:20 Ani buwa í̠naga mini dunubiaho holenebi gubalini haho wulenebi í̠naga wali agali Abarahamanagabi Yagabanagabi aguanene karuhondo walia holebero lalu ala inanaga mamali heneyaruhondo lo wiridagua walia holebere, lalu Maigahanda gili bu winigo nga.
NAH 1:1 Anduane Homogonaga bi mana haga agali Nahumu ibugua de gandeba handalu hearia Anduane Homogohanda bi lamini. Nahumu ibu Elegosoali henego howa tano dunini timbuni Niniba wiagonaga de gandeba hendene.
NAH 1:2 Anduane Homogo ibuni Ngode Datagaliwabeore howa wali agalime mbirale dama mitangi bialu gime wabini bu ngaruhondo bi pupu wialu helo ibugua henge namiaga ka. Ibugua wali agali ibuhondo mine haga karu pani mialu minu bagaore ka. Ibugua uruni biaga karuhondo keba howa tini ko biyagonaga yolo miaga ka.
NAH 1:3 Anduane Homogo ibu keba abale tongolope nahaga ka. Anigo ibu hongoheore howa ibugua wali agali mana ko biaga karu pani nelo miagaore ka. Anduane Homogo ibu poragoha iba dalubi puyabu dalu dindigunibi ti haru piaga. Beraliba ibunaga geha be abalu tau laradagua biaga.
NAH 1:4 Ibugua iba solowara bedagohondo hundia laragola bibahende hundu tegelaga. Iba timbuni pedarubi hundiai helaga ka. Mabu bayale Basana dindini ngarubi Hari Kameloha ira bayale karubi palawaya bayaleru Lebanono dindini anda ho karubi uruni bibahende Anduane Homogohanda mo gaula hai helaga.
NAH 1:5 Anduane Homogonaga deni howa hari timbuni wedarume ema biai halu hari emene ngaru do elai halu iba poradagua biaga. Anduane Homogo ha pani haga birangi dindi bibahende ema biagimbu bialu wali agali bibahendeore mogo lalu duru lai haga.
NAH 1:6 Anduane Homogohanda keba ho kangi mbirali ai ibu bayale habehebe. Ibugua mo ko holene ibilarangi mbirali ai ibu yo pobehebe. Ibugua keba howa ibunaga de daramabi ira hungu ale kagola ege to̱le̱ ngaru dodahole bialu be abalu haga.
NAH 1:7 Anduane Homogohanda inahondo bayaleore biaga ka. Genda tagira ibirangi ibunaga wali agali bu karunaga ha do anda ibuni kagoni. Wali agali ibuni karia poraru ibugua ti biamogo biaga ka.
NAH 1:8 Ibu iba li hongohe poraligobi howa ibugua Niniba tano bo gialahole bialu mo ko hai holebira. Mbirali ibunaga bi mo wahaga karu homelo bo wahai haga ka.
NAH 1:9 Waitigi kamiru tígua Anduane Homogohondo agile bulene paraho bi lalu kamibe. Tí bibahende bo wahai holenego dege manda bu halimu. Mbiralime ibuhondo ko haluki bulene nawiore.
NAH 1:10 Tí lulu iba nowa luluyu haradagua kamiria ibugua tí bibahende mbirale anihe kenda polene ale ngaru irani delagadagua delalu dangi yobi ngaru delaradagua bialu tí bo delai holebira.
NAH 1:11 Ninibali kamiru aria mbirame mini ko wu howa ibugua Anduane Homogo mo ko hole lowa bi lalu hea.
NAH 1:12 Ani layagoyu Anduane Homogohanda ibunaga Isaraele wali agaliruhondo lalu, Asiria wali agali áyu hongohe dewaore ha kagonigo mani i̱na ti bo biba halu erebahai helolebero. I̱naga wali agaliru tíha genda timbuni i̱nime mo wia harugo ai uruni bibahende mani lone nawulebira.
NAH 1:13 Asirialime tí handayaho ha hayagonigo ainde áyu i̱na tinaga hongo bope harogola tigua tí lone garabaya nabulebira, laya.
NAH 1:14 Anduane Homogohanda Asirialiruhondo bi hongohe mbira lo wialu lalu, Tínaga aguaneneru yu wahene mbiraore hangubi mani naholebiraore. Tínaga bi pupu wiaga anda bu karuha mbirale dama mitangi bialu bi pupu wule gime wabu ngamiruni bibahende bo gingirulo bagabu wahaiore holebero. Tí koorene ko dindini habe nahedago tínaga homali ina manda manda bu wia kogoni.
NAH 1:15 De handadaba. Agali mbira bi bayale galoneore mbira yalu amu hari nene ngagoria howa dalipe halu ibiragoni. Ibugua lalu, Iname wai biai halu wayali harimagoni, lalu lama ibiragoni. Anigo Yuda wali agali tígua horo dunini mbira íbu ngoai haga wirangi ngoai halu Ngode Datagaliwabe ibunihondo mitangi bialu lotu lalu halimu. Ani bialu mbirale maru ibuhondo mule lalu lo wirimiruni ibuhondo milimu. Ani beramigola agali ko biaga karume tínaga dindi lone karulole naibulebira. Ngode Datagaliwabehanda ti bo wahaiore haya.
NAH 2:1 Waitigirume ibalu tí mo ko hai halu tínaga mbirale wimiru mo yu piai hayagoyu ai Anduane Homogohanda Isaraele lone mini lene ala haraligobi heladai bilolebira. Ninibaliru-o tínaga waitigime tí baba wai bule ibiragoni. Tí mo ko halu bo wahai haga biaru kaware ibiragoni. Tanoha ami agali mamage haga karume tanonaga wai pabe andani mamage helo heladaba. Hariga tene ngaruha mamage haga haga bidaba. Ani bialu wai bule hongo howa manda manda bu hadaba.
NAH 2:3 Waitigirume wai humbi daramabi yalu tinaga wai yáribi daramabi dege mo karulai halu tí baba wai bule ibiragoni. Tínaga waitigi biaru gerai lalu ibiragola tinaga wai biaga garo ale karisiru ngiringara lalu ira hungu ale bialu tinaga yandareru ira guraya aleme wabini luni yidarume kilinge̱le̱ lalu wai huaro laruagoni.
NAH 2:4 Tinaga wai biaga garo ale hosime gililaga karisi biarume hariga wiadagua gerai lalu wali agali ngoai haga hama wiagoria gerai galuyu puíbu bialu ka. Tini ira hungu ale howa gerai lalu hari daba ale biradagua biya.
NAH 2:5 Ami haru haga haguane hearume ami agali bu hearuhondo pudaba layagola ami agali o biaru abale pialu hearia ege to̱le̱me tinaga ge bobidi laya. Tigua tanonaga wai pabe heagoria abale anda pialu tanonaga wai pabe heago bo gialolenaga mbirale mbira guruyagu̱ ale wabuwa pabe heagoria wiapara haya.
NAH 2:6 Guruyagu̱ ale biagome tanonaga wai pabe panga abene iba poragohayagi kaware heago bo gialo wahayagola panga dugua haya. Anidagua biyagola wali agali kini andagaha biru wiaru bibahende gi halu mogolai ho haya.
NAH 2:7 Waitigime Asirianaga kini heago minuwa heyu helaya. Ani bialu kuini wali bereagonaga aga baya karulo bereago golo wahai halu ibuni garabayabu yalu piya. Ani biyagola ibunaga biabe biaga wali berearume tinaga bu miniha gengedai howa mini burugu lowa dugu biai haya. Tigua dara timbuni halu tininaga gi homame galu kunini balu haya.
NAH 2:8 Niniba tano bambaore howa iba kuyama hundia nabi biraho wiaga ngaligobi wini. Ani biaga winigo ai iba pelo gana bia haragola iba pora bialu poralidagua wali agali pora bialu tanoha howa purogo laya. Wali agali marume hongo howa ga̱ ladaga halu lalu, Ibida pu nabi hondo hadaba. Hondo hadaba, lalu haya. Ani lalu heagola mbiraoreli hangumebi mbira dai nabi bibahende ibida piai haya.
NAH 2:9 Ani piai hayagola tinaga waitigi ibiyarume tini aria ibiyaruhondo lalu, Muni siliba ngolobi bibahende mo yai hama. Tinaga tanoha mbirale bayale dewaore winidago mo yai hama, laya.
NAH 2:10 Niniba mo ko howa bo gialabaga biyagola tanoha anda pabe bu hearu bo gialabaga bini wiaru ona alugumu wima pea. Wali agali bu hearume tano yu wahalu ibida piai haya. Tigua gi timbuni halu tinaga gi geru diri duru lalu haya. Anidagua biyagome tinaga hongo pirilape hai hayagola tinaga dengui gade bugimbu biai haya.
NAH 2:11 Ala tano ogoni budi ale gabua timbuni laiononaga anda ale hongoheore winigo ai áyu mo ko henego ngagoni. Ala Niniba tano hongoheore laiono dalua ale wialu laiono wangabebi angibunibi iginibi bibahende mo mogobu haga wiagola waitigime anda pobe nahe ngaligobi wiaga wini. Laiono wangabe kagome nogoru bo yalu ibirago igini angibuni karu bibahende nai helo budu ta haga biaga. Ani bialu nogo tara tararu bo yalu ibalu anda to̱laga. Urunidagua biaga anda biago agoha kabe. Bo gialo wahayadago.
NAH 2:13 Anduane Homogo Hongo Haiheore kago ibugua Niniba wali agalihondo lalu, Tínaga waitigi i̱ore kogoni. I̱na tínaga wai biaga karisi ngamiruni irani mo delai holebero. Tínaga ami agali bu karubi bibahende waime bo wahai haragola homolebira. Tigua dindi tara tara ngaruha howa mbirale tara tara mo yu íbu wirimiru bibahende i̱na mo yu dai biai holebero. Wali agali dindi tara taraha bu hearuhondo tínaga bi lo yalu pudaba larimirunime bi larago tigua hale naholebira laya, lene.
NAH 3:1 Niniba wali agalime ke̱ taraore halu wali agali homelo bo wahaga ka. Wali agalinaga dabudabu bayale tara tara wiaru mo yalu ibuwa tinaga tanoha wu to̱ ka. Anidagua bu kagonaga Anduane Homogohanda wali agali uruni bo wahaiore holebira.
NAH 3:2 Nogo hosi bo daila haragola tibu tolia lalu nogo hosi gerai laragola ge ngilinguli lalubi wai biaga karisinaga ge harigani kilinge̱le̱ lama ibaruagobi hale hadaba.
NAH 3:3 Wai biaga ami agaliru nogo hosini biralu gerai ibiragola tinaga wai biaga ayu tibu yandareru iba wa̱i̱ ale ngiringaraleda. Ani bialu tigua wali agali dagalabe nahe dewaore bo wahai hayagola homenerunaga tingini mo mogo buwa alugumu wiyagola dagalabe naheore wiya. Agali tigua pialu howa homene tingini wiaru hengedalu pugu biya.
NAH 3:4 Niniba tano ogoni ibu bayanda wali ale winigo ibugua mana ko biyagonaga pani mo ko holene timbuniore mo yu anda ibiya. Ibunaga dengui baya taraore biruwa ibugua agali tara tara bu karunaga bu mini ibuha ibilo ba mulenaga ndole tara tara bialu biragaya. Ibugua mana urunibi bialu wali agali dewaore ibu daluha haru íbu to̱lai howa wali agali kayu yalu ibunaga garabaya biabe ale bialu helaga ka.
NAH 3:5 Anduane Homogo Hongo Haiheore kago ibugua lalu, Niniba-o i̱na í̠ mo ko halu minu bolebero. Bayanda wali-o í̠naga aga bideruni bibahende minu golo wahai harogola í̠ tibabe birulebere. Hameigini dindi tara taraha bu karume í̠ aga nabi tibabe bederia handaya haragola taga timbuniore ho birulebere.
NAH 3:6 I̱na í̠ handabe manga howa mbirale ko ngubi ngarume í̠ bu dambi ho ngelolebero. Ani berogola wali agali dindi tara tarani bu karume í̠ de hondowa ti mogo lalu gi timbuni holebira.
NAH 3:7 Maru í̠ de handararume ti mogo lalu tiga bebege dai bulebira. Ani dai buwa tigua lalu, De handadaba. Niniba biago mo ko hai hayada. Mbiralime ibu dara nahayada. Mbiralime ibunaga bu mini mo palia halu bi lolenebi naheda, lolebira.
NAH 3:8 Niniba-o í̠na manda bu handalu keria í̠ mini lene timbuniore Iyibi dindiha tano timbuni mini lene Tebese wiyago bolangua hene ngobe toba kebe. Tano ogoni ibubi nde ibunaga tigi pabe iba timbuni Naili peda.
NAH 3:9 Tebese tano ogonime Iyibi dindi bibahende handameho howa Sudana dindibi ibugua dege handameho henego. Ani heagola dindi mendeha ibunaga waitigi hearume ibunaga hongo bope habe naheore wini. Ani wiagola dindi mende Libia paleagola libu mo mbiraore halu wai tagira piaga hene.
NAH 3:10 Ani henego horo mbirungi ibunaga waitigime ibuwa Tebese tanoha wali agali hearu bope howa tinaga garabaya biabe bialu helo haru halu piai hene. Tinaga waneigini bu hearu hariga gebage wiaru bibahendeni bo payapaya bini wiaria hendene. Ani bialu tinaga waitigime Tebesenaga agali haguane hearu pu senime minu hende howa waitigi tini talebu tahalu tinaga garabaya biabe bialu helo haru halu piai hene.
NAH 3:11 Niniba-o tíbi nde lulu iba nowa luluyu haradagua bialu Iyibi wali agali biyadagua biai holebira. Tinaga mini mo lingilungu bia haragola tíni dindini odopebe biai holeberami. Ani bialu tí waitigiru helalu ibida pole manda buleberemi.
NAH 3:12 Ani poramigola ti waitigi ibiragome tano ngamigo hinahe abale karulolebira. Tínaga tano ngamiruni ira lini ibire daradagua bidago. Ai tí waitigime ira iraneni howa yu ema biragola ira lini ibirego damene dogolope haradagua biragola ira teneha ne ha̱la ho ngagoha dogolope haradagua bialu tigua tano ogoni karulai holebira.
NAH 3:13 Tínaga ami agali bu karu ti bame wali ale dege kagome hongo halu wai biadai nabulebira. Tinaga wai pabenaga panga irame bengena baga hongohe kago do taga laragola tanonaga panga dugua holebira.
NAH 3:14 Niniba wali agaliru-o tí waitigime tano ho hagira bule ibulebiragonaga manda manda bialu iba nalu hole tanoha iba dadabu yalu anda ibilelalimu. Gade dindi dugu puwa ege timeni wabulenaga geme hengedo waru howa timeni wabiaga mbogoyi ngagoha ngelalimu. Ani bialu ege timeni ogonime tanonaga ege pabe kago arema bilimu.
NAH 3:15 Anigo tigua uruni beremigolabi mbirale urunime tí biamogo bialu mo wia nabulebira. Waitigime ibalu tínaga tanobi tíni heba irame bo heda haragola homai holeberami. Bamba tí dewaore pagaya ale tidiyu biragadagua tidiyu harimigoni. Ani birimigo ai pagaya aleme datani karu nai hagadagua waitigirume tí bo wahai holebira.
NAH 3:16 Ani howa tínaga biyinaya dewaore dagalabe nahe harini yakundi bu kagobi wirimi. Anigo áyu tínaga biyinaya uruni pagaya harane howa yagalalu purogo laralidagua pu ereba hai haya.
NAH 3:17 Tínaga agali haguane hayaru ti dagare biaga horo tagira ibirangi wai pabe andaneha pagaya bira do hagadagua bira do ka. Ani binigo ai ni daragola pagaya uruni ti yagalalu agoha piyabe tobahe pugupugu bialu pu ereba hai hagadagua piya.
NAH 3:18 Asirianaga kini kego í̠na bi ogo hale habe. Í̠naga agali haguane biarubi agali timbuni hayarubi bibahende homai henego tinaga tingini bu payapaya bidagoni. Í̠ waitigi biarume í̠naga wali agali biaru bibahende hari wiaruha bo purogo lai helayago ai uruni lone mo mogo bialu haru dai bulene mbirali naheoreda.
NAH 3:19 Í̠naga dere bu keruni dabi helo ha̱i̱ holene marasinibi mbira nawioreda. Abale í̠na agali maruhondo mana ko bialu harigola ti ibida pobe nahe hayago. Ai áyu í̠ mo ko hene ke laga biyaru hale howa ti turu halu gi habe balu holebira, Anduane Homogohanda laya lalu Nahumuhanda lene.
HAB 1:1 Anduane Homogohanda ibunaga bi mana latagi haga Habaguguhondo mana walia halu bi laminigo ogo.
HAB 1:2 Habaguguhanda lalu, Anduane Homogo-o í̠ biamogo bibelonaga olaabo harugo i̱na agira halu lone ololiyadabe. Ko biaga karume ina bo waholilono í̠hondo biamogo bia lalu dugu bialu agira halu ololiyadabe.
HAB 1:3 Mana tigatiga ndo o biragoni agi bulenaga i̱ deni mo ngeledebe. Mana tigatiga ndo urunibi biragola í̠na handayaho kegoni mbira bia nabi aginaga handayaho kebe. I̱ kogoria howa handalu koria wali agali mo ko holenebi tinaga mbirale ngago mo ko holenebi lai lalu bagabaga bulenebi wiame kane hendedo.
HAB 1:4 Mana lo wini ngago hongo nahe gedaore halu mana tigabi bulene wiagoria bia nabi wahaga biya. Wali agali ko biagame mana lo winigo dabaga hearu mo yo handalu wali agali bayale biaga karu hengedope halu mana biagoni tini hame ledago hangu bule mo beregedo nga, lalu lamini.
HAB 1:5 Bi ogoni hale howa Anduane Homogohanda ibunaga wali agaliruhondo lalu, Wali agali dindi maru tí kamiruha palia mabu bidaru bayuwa de handaya halimu. Handayaho kamiria i̱na tihondo mbirale mbira berogola tígua ogoni hale halu mogo timbuni loleberami.
HAB 1:6 I̱na Babilono wali agali hongo gibihe karuhondo hongo mia tago holebero. Dindi tara tara karulole tigua wai hanalu tagira pora.
HAB 1:7 Wali agali dindi tara tarani karume ti de hondowa gi timbuniore haga. Ani biradagome mana lo ngago mitangi nabi mine tara halu tininaga hame ledago biaga ka, lalu lene.
HAB 1:8 Ibugua laabo halu lalu, Tinaga wai biagane hosime gerai budi gabua ale timbuni mini lebadime lagadagua ndo bolangua hai howa gerai gibiore laga ka. Biango tara dudu aleme garibi lo howa biaganego emene lowa tinaga wai biagane hosime wai tandagabiore biaga ka. Agali hosini biralu ibiradaruni dindi ona kawareni howa ndo ibaga. Hosi urunime poa halu tinaga gi gindibame dindi godalu haga. Tinaga hosi ega bodo hariaweme mbirale balu nole ibira hagadagua ti abaleore bo ibaga.
HAB 1:9 Babilononaga ami agali ti mini mende nawi dindi ti karulalu wali agalibi minu ibiragola wali agalirume gi timbuniore ho haga. Tigua wali agali abale balu minu garabaya binidaruni dagalabe nahe ibani iba mu wiraligobi ka.
HAB 1:10 Tigua dindi uruninaga kiniru hondo yo handalu kininaga agali haguane karubi hondo oba haga kagoni. Ege to̱le̱ wai pabe wedaruni dindi alu yu tono buwa togo wialu bagane agali ibaga.
HAB 1:11 Agali ko uruni tinaga hongo timbuni kama lalu hongo ogoni mo dunini howa balagala hagaruni tigua wai biraha gialope halu puyabu poradagua puabo holebira, lalu lene.
HAB 1:12 Habaguguhanda lalu, Anduane Homogo-o í̠ Ngode Datagaliwabe haabo henego kegoni. Í̠ i̱naga Ngode Datagaliwabe baya burugule haluhe haabobo henego kegoni. Anduane Homogo i̱naga bi Ngode Datagaliwabebi i̱naga humbibi kego howa í̠na Babilonoali hearu dabowa iname ko birimagonaga tigua ina belo hongo mialu dabariya.
HAB 1:13 Anigo Babilonoali uruni agali ko ke̱ hagabi mana ko timbuni biagabi biaru ti í̠naga biabe ogoni bilo dabaribe. Í̠naga deme ko ngago nahandaga howa wali agalime ko biraruhondo handa tara haga harigo howa dege wali agali ko timbuni biaga karume mana bayale biaga karu bo wahelo henge muwa í̠ handa tara ho kego aginaga kebe.
HAB 1:14 Wena ibaha puíbu biaga bedaru alebi honabi mone dewaore wabuni piaga bedaru alebi hondo haga nahe hagadagua wali agali ogonibi ka mitangi bu kego aginagabe.
HAB 1:15 Babilonoalirume wali agali wena pume baradagua bialu nume daba howa minagadagua minalu buwa turu timbuni halu mambolo bama ibaga.
HAB 1:16 Tigua wena nume wena dewa minu ya heneyago lalubi nu o biarunime ti mo homogo ho haga lalubi ka. Ani laga karume wena nu mo dunini halu urunihondo bi pupu wiaga ka.
HAB 1:17 Tigua tinaga wai biagane ayu tibu ne gadelehe ngago yuwa wali agali tara tara paluyu pedaru dara nahe howa bame bo paya bialu haabo helo heloleberebe, lalu Habaguguhanda Anduane Homogohondo ani lene.
HAB 2:1 Anduane Homogohondo i̱na genda ho howa bi lamirugoni ibugua agi ladai birabe hondolebi mani bi agi loliyanaga langirabe hondolebi i̱na i̱naga mamage holenaga anda mbira luni daliga bu kagoria iraga howa hondo harogoni.
HAB 2:2 Anduane Homogo ibugua ladai bialu lalu, Manane í̠hondo walia hole kogo í̠na dindi dongoma mbaraleni bayuwaore gilibu ngelabe. Dagalaragome hai nabi abale dagalelo wále tigatiga gilibu ngelabe.
HAB 2:3 Áyu ogoni ndo awe lola holebiragonaga manda buwa gilibu ngelabe. Anigoyu horo langeroru bulubadagoni abale ibalu walia harogo damene bibahende larodagua lola hai holebira. Hendore bigi bini mbau lolebiragoyu mbira pugu wanahe biaiore holebira.
HAB 2:4 Bi o larogo gilibu wia. Ko biaga karu yo pialu napolebira. Anigo wali agali mini tigabiwi Anduane Homogohondo mini mbiraore wu karu ti haabo holebira, lalu, Bi kira ogoni gilibu wia, lene.
HAB 2:5 Homogorume dewaore wulenaga ke̱ halu miaga ka. Agali urunime dimagoli halu mine howa tini hangu mitangi bialu homogo hole hai hangu bialu kane homa ibugua harula nalagadagua tigua homogo timbuniore hole hame dege laga ka. Babilonoali uruni ti ogonidagua biaga karume wali agali tara tara paluyu pedarunaga dindi ngaru karulama puabo haga ka.
HAB 2:6 Dindi karulenegonaga wali agali karume ti handaya ho haga karuhondo mo yo hondowa mege bialu bi ogobi lolebira. Tigua agali ko biagaruhondo lalu, Tíninaga wini ndo mendealinaga winiru page biaga kamiru ko timbuni tí kamigoria tagira ibulebira. Tí dano ho hene karuhondo hongo howa ngiadai bialu ngia tago halu ngidaba laabo halu tíni ke̱ howa mali agira halu mo homogo ho holeberamibe, lolebira.
HAB 2:7 Tí ala dano ho harimirume ti abaleore wayali ha aribia holebira. Ani wayali howa dano aribia halu danoali biaru tigua tíhondo abaleore yadai bialu ngia tago hadaba, lolebira. Tínaga waitigiru abaleore ibuwa ti mo mogola howa tínaga mbirale wirimiru heba mo yalu piai holebira.
HAB 2:8 Wali agali dindi tara tarani paluyu pedaru tinaga mbirale wiaru tí karulai halu wali agali ogoriani hearubi bo wahai halu tano wiarubi bo haealo bagabu wahai harimi. Ani birimigoyu wali agali ogoningi yu wahene biarume tíbi balu mbirale wirimidaruni ti karulalu mo yalu piai holebira.
HAB 2:9 Ko timbuni tí kamigoria tagira ibulebira. Agali maru homelo bo wahalu mbirale dewaore page bialu mini wirimirume tínaga dameneru mo homogo ho heledami. Ani bu heledamigo tí kamigoria ko mbira anda ibulani hondowa tí bayaore awadaga holenaga andarubi hagirarubi hongoheore bu heledamigoni.
HAB 2:10 Anigo tígua koorene ko urunibi birimigome taga gibi holene tínaga dameneru heagoha yu anda ibirimi. Wali agali dindi tara tarani paluyu pearu bo mburi lalu birimigome tínibi nde bo mburi lolebira.
HAB 2:11 Anda hongo timbuniore helo anda hai pabe ege to̱le̱me bima irigi harimi. Ege to̱le̱ pabe birimirume, Tí koore bialu harimi, lalu anda dabira karumebi ani dege lambare bulebira.
HAB 2:12 Ko timbuni tí kamigoria tagira ibulebira. Tagira ibulubadago irane tígua tano timbuni bulenaga wali agali garabaya biabe ale bilalu dewa homayagonaga daramani bialu harimi. Tínaga tano hongohe helo mana ko timbuni birimigome tano ogoni bu helarimi.
HAB 2:13 Dindi tara tara karularimigo wali agali hearume tínaga garabaya biabe ale bia hayago biabe ogoni nagalone holebira. Tígua bibahende biyaruni hagua hungula bialu do mundu lai holebira. Anduane Homogo Hongo Haiheore kagome ani bulebira.
HAB 2:14 Iba solowara to̱lo tagi howa birame kadagua wali agali dindi bibahendeni karume Anduane Homogonaga mini daliga taraore ngagobi ibu hongo gibiorehe kagobi wali agali bibahendeme manda biai holebira.
HAB 2:15 Ko timbuniore tí kamigoria tagira ibulebira. Hameigini tara tara kaware bu hearu tihondo lembo timbuni howa mo ko halu ogodagua birimi. Tígua wali agalime waini iba mo na howa lulu yu halu agaru golo wahowa taga nahe hagadagua tínibi ogonibi dege howa handaya ho harimi.
HAB 2:16 Ogonidagua dege Anduane Homogohanda tíbi taga halimulo mini lene timbuni kamiruni bame halu mo dindiha haragola tínibi pani nalu taga ho holeberami. Taga holene ogonime tí ala mini lene harimigo mo wahalu tí mo dindiha helolebira.
HAB 2:17 Tígua Lebanono dindini irabu timbuni wiaru dibu ibira harimidagua Anduane Homogo ibugua tíbi nde dibu ibira helolebira. Nogo gabua tara tara irabu ogoniha ibaga bialu piaga biaru barimi. Ani barimigo nogo uruni ariame tí halu mbira mo gi̱la halu bolebira. Uruni bulubadaruni irane tígua wali agali dewaore dindi bibahendeni hearubi bo wahaga bialu tanobi mo ko harimigome ko ogonibi tí kamigoria tagira ibulebira.
HAB 2:18 Tígua tínaga dama lowa gime wabinigome mbirale mbira agi biagabe. Bame agali gime wabini ogonime mbirale mbira nabiaga. Mbirale gime wabini bi nalaga ogonibime wabiagane kego í̠ biamogo agua bulebirabe.
HAB 2:19 Ko timbuni tí kamigoria tagira ibulebira. Ira gombedo minibi to̱le̱ gaibu mini ngaruhondobi hale holebada lowa bi hongo howa lalu, Heya, laga kami. Mbirale irame wabini ngarume, Galone ngaruni ogo ale nga, lalu tí walia hagabe. Ngolomebi silibamebi yári biaho berelagago ogoniha holenenaga buhe nawiaga ndobe.
HAB 2:20 Anigo Anduane Homogo ibu ogonibi ndo ka. Ibu ibuninaga anda loma bia henegoha kago wali agali dindi bibahendeni kamirume ibu kagoria howa ema nabi bi nale halimu, lalu Anduane Homogohanda Habaguguhondo lamini.
HAB 3:1 Bi mana latagi haga Habaguguhanda Anduane Homogohondo bi lalu iba gana lole howa ngida ale balu lenego ogo.
HAB 3:2 Anduane Homogo-o í̠na bini layaru hale howa í̠ timbuni gibi taraore ke manda buwa i̱na bi agi ale loabe toba ho ko. Bamba í̠na biabe hongohe tara tara bialu hariru áyu ina kamangi biabe urunibi lone bibe. Inahondo keba holene irane ngagoyu ai í̠na dara halu biamogo bibe.
HAB 3:3 Ngode Datagaliwabe ibu Idomo dindihayagi howa lone ibira. Ibu baya buruguleore howa Parananaga dindi hombene hombene ngaruha howa ibira. Ibunaga wá holene timbuniore hari daligaha dungame halu ibunaga mana baya buruguleore buleneme dindini mbirale bibahende ngarumebi karumebi ibunaga mini yaraga haralo handabeheore nga.
HAB 3:4 Ibunaga wá holene egerebagi ni tagira ibiraligobi howa ngiringarame ibunaga gi hongo ya do kagoha howa tagira ibaga.
HAB 3:5 Ibugua warago tara tararu ala bambaha lalu homa í̠na maha talima ibabe laga.
HAB 3:6 Ibu hondo kagola dindi dumbirumbi bialu ibugua emene de leneme hangu handaragola wali agali dindini karu bibahende duru lai haga. Hari haabo hole mbaule wedaruni podobaga bialu dindi hombene bambaore wini o ngaruni ibuni ibalu penego áyu ogoni dindiha anda pu bereba helolebira.
HAB 3:7 Kusana dindini wali agali hearuni giho hearia handaru. Midiana dindini wali agalibi gi howa durulo heane handaru.
HAB 3:8 Anduane Homogo-o í̠na puyabu ibilalu puyabume iba porarubi iba solowarabi hongo howa mo yaribu bia helarigoni. Ani birigoni iba urunihondo keba howa biribe. Beraliba porarunaga biru yalu piaga harigo kegoni. Í̠naga wali agali karunaga wai bia hole howa iba dalu timbuni ibule beraliba mindibi ngarunaga mo garo ale mini karisi bu hinalu ibuwa í̠naga wali agali mo wayali helariligoni.
HAB 3:9 Í̠na danda yamuwa timurume bogole manda manda buwa harigoni. Í̠naga timu hari dabaha howa ibiyagola dindi gaibu baga buwa iba timbuniru uruniha pelo mo ibira harigoni.
HAB 3:10 Hari timbuni wedarume í̠ hondowa duru lalu mogo timbuni lowa iba timbuni hariha howa dalidali biyagoni. Iba dindiha berearumebi tula lalu hegene damindini bo laya.
HAB 3:11 Í̠naga timuru ala pugupugu buwa hari daba ale piyaru handalubi í̠naga yandare didone piyago handalubi ni egela libu ema nabi hondo hene.
HAB 3:12 Í̠na dindi bibahendeni hearu baba lembo timbuni howa ami wai bule poradagua pialu wali agali í̠na dindi tara tarani hearu hengedo paya bu hari.
HAB 3:13 Anidagua birigome í̠ninaga wali agalibi kini í̠na dabenegobi heba pele mialu biamogo biri. Mini kowi hearunaga haru haga koore timbuni biaga heagobi ibunaga talima piaga hearubi bo hilo bagabu wahari.
HAB 3:14 Puyabu hongo howa ibagadagua ami agali haguaneme ibuninaga ami haru halu ibuwa ina balu purogo lelole ibalu hearia í̠na ibuninaga yandare yiniyago yamuwa emboneni yandare harigoni. Tigua mine halu ina mo ko howa balu bo purogo lelole hearia í̠na ani biri.
HAB 3:15 Í̠na iba solowarani nogo hosirunaga biru yalu pirigola iba mbolia baragaraga biya.
HAB 3:16 I̱na bi uruni hale howa mogo timbuni lo ko. Ani buwa bi hai bialu ne hambu duru lalu i̱naga dongone gimbu binihayagi homowa amburi biyagola ge ibubi nira duru lalu ka. Ngode Datagaliwabe ibunaga horo harangi inahondo ko biraru ibugua ti pani mialu belo i̱ ema nabi hendore hondo holebero.
HAB 3:17 Pogeru lini da nabiyaguabi Pu mbira mini gerebi lini nade hayaguabi Ira mini olibe lini ko hai hayaguabi Mabuni tomo bibahende gau lai hayaguabi Nogo sibiru homai hayaguabi Nogo bulumagaru nahe tinaga anda bame tabuanda hayaguabi
HAB 3:18 Uruni bibahende ani biyaguabi waha i̱ turu halu holebero. Irane i̱naga Anduane Homogo Ngode Datagaliwabe ibugua i̱ pele ngiaga ka manda buwa turu halu holebero.
HAB 3:19 Anduane Homogo Bibahende Haru Ho Haame Haga kago ibugua i̱ hongo ngiaga. Ibugua nogo tara mini dia ge hongoheme hagadagua i̱ mo heleda. Ani bialu dindi hari daliga neneni pialu koria ibugua i̱ pi naloliya haru haga ka, lalu Habuguguhanda bi ogoni Anduane Homogohondo lai hene.
ZEP 1:1 Amono igini Yosaia ibu Yuda wali agalinaga kini heangi Anduane Homogohanda Sebanaiahondo bi mbira ogo lamini. Sebanaia ibu Kini Hesegaianaga damene ti darama mandagi hene. Sebanaia aba Kusi howa Kusi aba Gedalaia halu Gedalaia aba Amaria hene. Amaria ibu aba Hesegaia hene.
ZEP 1:2 Anduane Homogo ibugua Sebanaiahondo lamialu lalu, I̱na dindi bibahendeha mbirale ngaru bibahendeore mo ko hai holebero.
ZEP 1:3 Ani bialu wali agalibi nogo biango tara tara bu karubi ega bedarubi ibaha wena bedarubi bibahende wali agalinaga mana ko bilo haru pubagi haga ngago damene mbira yu wahene nangelo bibahendeore mo wahaiore holebero. I̱ Anduane Homogo i̱na bi o ledogoniore.
ZEP 1:4 Wali agali Yuda dindihabi Yarusalemehabi karu bibahende homelo bo wahai holebero. Ani bialu mbirale dama mitangi bialu bi pupu wulenaga gime wabini mini Bala ngaru bibahendebi mbirale uruninaga loma binigo mo miaga agali bu karubi bibahendeore bo wahai holebero. Wali agali mani holobadarume agali abogo mbira ogoria hene lalu manda nabilo balu bo mundulo wahaiore holebero.
ZEP 1:5 Ani bialu wali agali tini anda dangini irigi howa ni ege yakundirunaga mini yaraga halu ge duli hanga howa bi pupu wiaga karubi bibahende bo wahai holebero. Ani berogola wali agali marume i̱hondo bi lalu howa heneneore iname Anduane Homogo talima pialu kamagoni lolebira. Ani lalu ha howa mani ti beregedalu puwa mbirale dama mitangi bialu gime wabini bi pupu wiaga mini Molege laga ngagoha puwa lalu, Iname heneneore laramago iname Molegeore talima poleberema laga ka. Ani laga karu bibahende bo wahai holebero.
ZEP 1:6 Wali agalime i̱ erembira ngialu i̱ni talima íbu nabi wahalu puabo howa tigua i̱hondo langialu, Ina haru bamba habe, lalu halebi naheore puabo haya. I̱na wali agali uruni tibi mo ko hai holebero laya, lene.
ZEP 1:7 Ainde Anduane Homogonaga Horo kaware hapara hayada. Ani manda buwa tígua ibu karia ibuwa mogo lalu bi nale halimu. Anduane Homogohanda wali agali nogo sibiru bo lomabu delagadagua ibunaga wali agaliru bo wahai hole manda manda bu kagoni ndobe. Ibugua anidagua bule kago wali agali maru de hondo ibilonaga ibugua ti lamialu lalu, Tí Anduane Homogo ibuninaga deni howa maname tíha ko mbira para nahe holenenaga biaga wiago ala bialu ibalimu, lene.
ZEP 1:8 Anduane Homogohanda lalu, I̱naga wali agali bo wahai holene horo ogoni tagira ibirangi kininaga agali dunini karubi kini ibuni igini bu karubi wali agali Anduane Homogo ibuni kago manda nabi karume biaga mana ngaru bialu haga karubi ti bibahendeore pani nelo miai holebero.
ZEP 1:9 Wali agali maru i̱ manda nabi bu karume lotu lagadagua lalu howa mbirale page bigi bialu wali agali homelo bo wahalu mbirale dama mitangi bialu bi pupu wule gime wabiniru andaha mo wiaga karubi ti bibahende pani nelo mialu minu bai holebero laya, lene.
ZEP 1:10 Anduane Homogohanda laabo halu lalu, Horo ogoni tagira ibirangi wali agali bibahende Yarusaleme tanonaga panga haraba mini Wena Panga laga kagoria íbu ngoai howa dugu bialu bu karia hale holeberemi. Yarusalemenaga tano gahenge ngagohayagibi dugu bialu karia dege hale holeberemi. Hari nene ngaruha howa tula hongohe lagalaga biaruanebi hale ha dege buleberemi.
ZEP 1:11 Ani hale howa wali agali Yarusaleme tanonaga nira uliulihayagi kamiru tínaga agali haguane biyinaya biabe bialu haga biaruni homai hayadane hondoleberemigo mitangi bialu uruni tinaga dugu bu wia halimu.
ZEP 1:12 Ogoningi ina hale hedo yalu Yarusaleme tanoha ibaga bialu wali agali i̱naga mana ngogo hame nalaga howa hope haga karu ti taya bulebero. Tigua manda bu handalu karia mbirale bibahende tinime biai habehe kamabe tobaho karunigo anidagua nabibeheore ka. Tigua lalu, Anduane Homogohanda wali agali bayale karu biamogo bulene ngago nabiagaya. Wali agali ko biaga karu pani nelo mialu mo ko nahagaya. Anidagua bulene ngago nabi ibu bameore hagaya, ani laga beremiligo ai wali agali uruni i̱na bo wahai holebero.
ZEP 1:13 Agali tara tara bu karume ibalu agali bi uruni laga karunaga mbirale ngaru mo yu piai halu tinaga anda bu karuni bo gialo wahai holebira. Tinaga anda gahenge bu helaga bidaruha tini napaluebira. Tinaga gerebi mabuha gerebi hanga hengedago ai lini dalu pingidowa waini iba hambialu na nabulebira, lalu Anduane Homogohanda lene.
ZEP 1:14 Anduane Homogohanda wali agali bibahende mo dabaki bulene Horo biago tagira ibulene kaware hapara haragoni. Horo ogoningi ami agali hongoheore ha heaguabi bibahendeore gi howa duru lalu dugu biai holebira.
ZEP 1:15 Horo ogoni tagira ibirangi Anduane Homogonaga keba gibi holene wiapani haragola wali agali bibahendeoreme genda yu hai holebira. Ani bialu tinaga bu miniha mo ko hai kagola mbirale ngarubi mo ko hai holebira. Beralibame ni ge haragola dindiha aruma timbuni holebira.
ZEP 1:16 Horo ogoningi pilipe biguliru pi̱pe̱ lalu ami agalime wai bule wai huaro laga laga bima tanoha anda ibalu wai bigi bigi bulebira. Tigua tanonaga ege pabe hongohe bu mabu bini karuha anda puwabi ami agali handa amu nana bu mamage haga anda pabe neneni bu heledaruha anda pu howabi wai hongo howa bulebira.
ZEP 1:17 Anduane Homogo ibugua ogodagua laya, Wali agali bibahendeme i̱hondo mana ko biyagonaga i̱na ti mo ko holenaga ko tara tara ti kagoria íbu ngelolebero. Ani berogola tinaga de kohe ale howa arumaha hariga taya bialu hagagobi holebira. Ani bialu kagola tinaga darama iba pora biradagua bialu homaga bulebira. Ani homaga birarunaga tinginirubi dindini wu togo bialu biango ti to wahene ngaru ngu biradagua ngu bialu wulebira, laya lene.
ZEP 1:18 Horo ogoni tagira ibirangi Anduane Homogonaga keba holene timbuni winigo tagira ibiragola muni ngolo silibarume biamogo bialu tini mbira mo wibe naheore wulebira. Ibunaga keba holene ira hungu ale bialu dindi anda bibahendehaore dai helolebira. Ani bialu wali agali dindini bu karubi bibahende bo wahaiore holebira, lene.
ZEP 2:1 Wali agali dindi ogoria bu hene kamiruni tínime mana tara tara bialu kamirunaga taga nahagaoreya. Tíni nde manda bialu ko birimirunaga taga ho holene nga.
ZEP 2:2 Taga nahe kamiria Anduane Homogohanda ibunaga tandaga holene mo heya haragola tí balawaya bayale dedago lu daho wiaabo nahe abale do taulope hagadagua tí mo ko halu ibunaga tandaga holene ngagome tí irame bo heda haradagua buligo de hondo holene nga.
ZEP 2:3 Wali agali mine nahe tini mini mo dindiha howa Anduane Homogonaga bi mana hale howa mo wa nahaga kamiru tí ibuni karia ibulene nga. Tíni mo dindiha howa mana tigabi ngaru hangu bialu holene nga. Ani bialu harimiyagua nde Anduane Homogohanda wali agali keba halu ti pani nelo mirangi tí heba mandagi namaga naholeberemi.
ZEP 2:4 Anduane Homogohanda Pilidia dindi mo ko harangi Gasa tanoha wali agali mini lenego mbiraore hangubi mbira naholebiraore. Asagelono tanohabi naholebiraore. Wali agali Asadodo tanoha karu tinaga waitigime horo mbiru hanguni balu bo togolalu Egerono tanoha karubi bo taliatagi hai halu bulebira.
ZEP 2:5 Pilidia wali agali maru iba solowara bedago angeangeha paluyu pedamiru Anduane Homogohanda tí mana ko biagaore ka lene kamigo ai ibugua tí mbiraoreali hangubi mbira yu wanahe bo wahaiore holebira.
ZEP 2:6 Tínaga dindi bayale iba angeange wima pedamiruni mani dangi anda holebira. Anda ani ho ngagola agali nogo sibi hinalu haga karume tinaga andira emeneru dindi ogoriani bu howa tinaga nogo sibiru hinalu holebira.
ZEP 2:7 Ani bialu ai Yuda hameigini emene yu wahene karume tínaga dindi ngamiruni maruhayagi ti karulo holebira. Ani karulo howa Yudalirunaga nogo sibiru dindi uruniha hinalu tini Asagelono tanoha palu holebira. Ani bialu Anduane Homogo Yuda wali agalirunaga Ngode Datagaliwabehanda tini mo bayale halu ibuni ti heba mandagi howa ti tininaga dindi ngagoria helo lone mo bayale ho helolebira.
ZEP 2:8 Anduane Homogo Hongo Haiheore kago ibugua lalu, I̱na hale ho hewaria wali agali Moaba dindiha padarumebi Amono dindiha padarumebi tigua i̱naga wali agaliru mege bialu hege lalubi hemiru hale haru. Ani lalu howa bi hongo howa lalu, Tínaga dindi ngamigo karuloleberema, laya.
ZEP 2:9 Ani layago ai Anduane Homogo haluhe i̱ Isaraele wali agalirunaga Ngode Datagaliwabe kogo i̱nimeore larogo, Moaba wali agalirubi Amono wali agalirubi bibahendeore Sodomo wali agali Gomora wali agalirubi homayadagua homai holebira. Ani homai haragola dindi uruniha nigi hangu andaho holebira. Ani bialu dindiha ibi duguagane uli hangu wialu dindi ogoni mo koore henego ogonibi dege wiaabo holebira. Ai i̱naga wali agali yu wahene emene dagalene hangu karume ti baba wai buwa tinaga mbirale yu karu balu gingila mialu tinaga dindi ngarubi karulai holebira, laya lene.
ZEP 2:10 Moaba wali agali Amono wali agalirubi tigua mine halu ti hangu hongo hetingi hayagonagabi tigua Anduane Homogo Hongo Haiheore kagohondo bi ko layagonagabi ibugua tini pani nelo mialu bulebira.
ZEP 2:11 Anduane Homogohanda ti mo gi taraore holebira. Ibugua dindi bibahendenaga dama mitangi bialu bi pupu wiaga ngaru bibahendeore mo nagalone hai helolebira. Ani biragola wali agali dindi bibahendeha bu karume tininaga dindi hangu hangu ngaruha haga haga buwa Anduane Homogo hangu mitangi bialu ibuhondo lotu lalu holebira.
ZEP 2:12 Wali agali bibahende Sudana dindiha kamiru tí bibahendeore Anduane Homogohanda bo wahai holebira.
ZEP 2:13 Ani bialu Anduane Homogo ibuninaga hongo timbuniore kagome wali agali dindi abene uyurayagi Asiria ngagoha padarubi mo ko hai holebira. Ani bialu tinaga tano dunini timbuni Niniba ngagobi mo ko halu bo gialabaga biragola mo ko hene dindi ko ege kelekele mbirale mbira anda naholene wialu wali agali mbira nahe wulebira.
ZEP 2:14 Ani ngagola nogo sibi bulumaga memerubi hangu halu ema bialu piaga tara tara maru bu karubi ti palu ngoai haga wulebira. Waitigime ira tamia dibu pelo mbara lowa anda bini ngaru bibahende bo gialabagabu wahai haragola dindini podope hene wiagoriani ega maru bi lalu birulebira. Anidagua bini ngagoria ega umi tara tara mbiraga biraga bedarume anda gialo wahene kagoria íbu biralu windo haga ngagoria biruwa bi lagalaga bialu birulebira.
ZEP 2:15 Ninibali tigua mitangi bialu ina mo ko holene nawi hongohe wayali kamagonida manda bialu turuho haga ka. Ani bialu dindi maruha tano ngaru bame dege lowa tinaga tano ogoni timbuni duniniore ngabe toba haga ka. Ani manda bu ha kagonigo ai mo ko holene tara tara Ninibaha anda ibulebira. Ani bialu dindi mo ko halu mo labu hene mbira ngagola mbirale ema bialu piaga damene dére biru karu ti hangu dindi dege ho wulebira. Ani ngagola dindi ogoniha bolangua halu pole maru porarume dindi ogoni hondowa tini mogo lalu duru timbuniore lolebira.
ZEP 3:1 Yarusaleme-o í̠ mo ko hene mbira o ngegoni. Í̠naga wali agali bu karunaga mana koore Anduane Homogonaga deni ko ngubiore bialu ka. Tigua ibunaga bi mo wahalu tininaga damene bu karu mo ko halu ka.
ZEP 3:2 Tigua Anduane Homogonaga bi hale holene mangaho howa ibugua ti mo tiga bilobi hame nale dege ka. Tigua Anduane Homogohondo mini mbiraore nawi howa ibuhondo ti biamogo bilonaga bi nale haga.
ZEP 3:3 Yarusalemenaga agali haguane hearu ti laiono gabuame tomo garibi lo howa bi hongo howa lalu kaligobi halu agali godi hale haga karu tibi nde biangome nogo ega kuniru nalu howa ai maru yawi nole ngela nabi noa dege howa nalu haraligobi ka.
ZEP 3:4 Mana latagi haga agali karume biabe bialu hararu henene tiga tiga bia ndo tigua maru karuhondo ke̱ howa mo ko holenaga dege bialu haya. Ani bialu kagola loma binigo mo miaga agali bu karumebi nde mbirale lomabia howa wubagi hene wiaru ilili biaga wiadagua nabi mo hilahole bialu Ngode Datagaliwabenaga bi mana ngagome tini biamogo bilonaga dege mo tiga bialu haga.
ZEP 3:5 Ani anigo Anduane Homogo ibu Yarusalemeha haabo ka. Ibugua mana bayale ngaru hangu biaabo haga ka. Mana ko ngaru ibu nabiagaore ka. Ibunaga wali agalime birago tiga tiga howaore mo tale biaga ka. Anigo wali agali ko tano ogoniha bu karume mana ko tiga nabi ngaru bialu haabo howa tini taga nahagaore bu kagoni.
ZEP 3:6 Anduane Homogohanda lalu, Hameigini dindi tara taraha hearu bo ereba hai halu i̱na tinaga tano hongohe wiarunaga wai pabe hongohe hearu bo gialo wahai haru. Tinaga ami agalirume mamage howa handa amu nana bu haga anda wai pabe neneni bu helearu bo gialo wahai harugola áyu mo ko hai hene nga. Tanoha wali agali yu wahene mbiraore hangubi nahe wialu tanoha hariga timbuni pedadagua mbirali mbira pialu kariabi nahondoleberemi.
ZEP 3:7 Ainde i̱naga wali agali bu karume i̱na mana bayale tigabi bialu kogo hondowa tigua i̱ andaneha halu i̱nime ti mo tiga buliya holebira mitangi bu haru. Tigua i̱naga bi mana lamirugo baya hangu minime manda bu kale nde i̱na ti mo ko nakole. Anigo tigua i̱naga bi mana lowini wiaruni mo wahai halu mana ko ngubi wiaru abale bialu haga wiago bolangua howa ko bia timbuore haga, lalu laya.
ZEP 3:8 Anduane Homogohanda wali agali ibunaga bi mana talialu karuhondo lalu, Tí mini dege dindiho nahalimu. I̱na wali agali dindi bibahendeha bu karu dabaki buleberogo hondole halimu. Irane i̱na wali agali dindi tara tara bibahendeha bu karuhondo keba howa mo ko hai holene manda bu henego ko. I̱na wali agali dindi tara tarani bu karu bibahende haru íbu mogo bialu ti mo ko hai helolebero. I̱naga keba holene ira hungu daradagua biragome dindi bibahende dai holebira.
ZEP 3:9 Ani bialu horo ogoningi i̱na wali agali dindi bibahendeha bu karunaga mini mo beregedai holebero. Ani berongi tinaga mini gahenge wia aribia ho howa i̱ hangu mitangi bialu i̱nihondo bi lalu holebira. Tinaga mini mo mbiraore howa i̱naga bi mana lowini ngaru talialu holebira.
ZEP 3:10 Ani bialu i̱naga wali agali i̱nime Sudana dindi ngagoha pu heledorubi dindi maruha pu heledorubi tigua i̱ninaga lomaru mo yalu ibulebira.
ZEP 3:11 Heneneore i̱naga wali agaliru tígua i̱naga bi mo wahalu ha harimigonigo ai i̱na mbirale uruni berongi tígua mana ko bialu harimigonaga taga ho holene nawulebira. I̱nime wali agali mine halu balagala haga bu karu bo pelai holebero. Anidagua berogola tigua i̱naga hari nene biagoriani Yarusaleme tano ngogoria howa i̱nihondo lone mine naholeberemi.
ZEP 3:12 I̱na wali agali maru Yarusalemeha helo waholeberoru ti mbirale dewa nawi howa tini mo dindiha ho holebira. Ani howa tigua i̱ni koria ibalu i̱na ti biamogo bia lalu hale halu holebira.
ZEP 3:13 Isaraele wali agali yu wahene emene dagalene hangu karuni tigua wali agali tara karuhondo ko mbira nabi holebira. Ani howa wali agali tini damene bu karuhondo ke̱ halu mo hondo naholebira. Ti bayale holene hanguha kagola tinaga waitigime ti mo gi holenebi mbira nawulebira, lalu Anduane Homogo ibugua laya lene.
ZEP 3:14 Isaraele wali agaliru-o tígua turu halu iba gana hongo howa ladaba. Yarusaleme wali agaliru-o tínaga bu miniha dungulo howa turu hadaba.
ZEP 3:15 Anduane Homogohanda lalu, Tí mo ko holebero, layago áyu bi ani layagoni wahalu wahayiya. Ibugua tínaga waitigi bu hearu bo taliatagi hai hayada. Anduane Homogo Isaraele wali agalinaga kiniore kago ibu tí heba mandagi haabo kagoni. Ani kago ai tígua mbirale mbirahondo gi ho holene nawiore.
ZEP 3:16 Horo mbira tagira ibulebirago ogoni ibirangi tigua Yarusalemehondo lalu, Yarusaleme wali agaliru-o tígua gi nahe halimu. Tígua bame mogo lalu gi holene nawulebiraore.
ZEP 3:17 Anduane Homogo tínaga Ngode Datagaliwabe ibuni tí heba mandagi haabo ka. Ibunaga hongo gibiore kagome tí biamogo biragola tígua wai bialu wayali holeberemi. Wali agalirume tinaga horo timbuni wigi binigo tagira ibirangi turuho howa iba gana lagadagua Anduane Homogohanda tíhondo turu howa iba gana lolebira. Ibugua tíhondo gubaliniore ho howa mo palia holene bi lolebira, laya lalu lene. Anduane Homogohanda lalu, I̱na Yarusaleme wali agali tí mana lalu minu barugola tínaga horo timbuni lotu lole mo ngoaiho haga wimiru talialu bibe nahe kamigoni. Tígua i̱nihondo lotu lone lalu habe nahe kamigome tíni mo tagaore henego kamigoni. Anigo áyu i̱na tí lone haru dai bulebero.
ZEP 3:19 Horo ogoningi tí bope haga waitigi biaruni i̱na mo ko hai holebero. Isaraele wali agali ti nogo sibi pugu pugu biagadagua pugu pugu binigo tinaga ge ko henego tini kagoha haga haga biagadagua Isaraele wali agali dindi tara tara ngaruha pu haga haga bidamigo i̱na tíninaga dindi henene ngagoria halimulo haru dai bulebero. Áyu wali agali bu karu bibahendenaga deni howa tí taga timbuni ho kamigonigo mani i̱na tínaga taga holene uruni mo wahai halu tí mini lene helolebero. Ani heledogola wali agali dindi bibahendeha karume tínaga mini mo yaraga holebira.
ZEP 3:20 Horo ogoningi tí dindi tara tara ngaruha pu haga haga bidamigoria howa i̱na tí lone gi mialu tíninaga dindini halimulo haru dai bulebero. Haru dai buwa tí mini leneore heledogola wali agali dindi bibahendeha bu karume tínaga mini mo yaraga holebira. Horo ogoningi tínaga biabe buleneru bibahende mo bayale hai helarogola tínaga holene bayaleore wulebira. I̱ Anduane Homogo i̱na bi o ledogoniore, lalu Anduane Homogohanda laya lalu Sebanaiahanda lene.
HAG 1:1 Kini Dariusi ibu Pesia dindiha kini heane mali mendegonaga ege waraganenaga horo mbira layagola Anduane Homogohanda ibunaga bi mana latagi haga agali Hagaiha howa bi ogo lamini. Ibugua bi ogoni agali Yudanaga gabumane haguane Serubabelebi agali loma binigo mo miaga haguane timbuni Yosuabi libuhondo lamini. Serubabele ibu Sealadiele igini hene. Yosua ibu Yahosadaga igini hene.
HAG 1:2 Ani heagola Anduane Homogo Hongo Haiheore kago ibugua Hagaihondo bi lamialu lalu, Wali agalime bi ogodagua laga, Anduane Homogonaga anda biago lone bulene wene dege nga, lagaya lamini.
HAG 1:3 Ani lamialu Anduane Homogo Hongo Haiheore kago ibugua wali agalihondo ibunaga bi mana latagi haga agali Hagaiha howa bi latagi hene.
HAG 1:4 Ibugua ogodagua lene. I̱naga wali agaliru-o tíni andaga bayaleruha paluwa i̱naga anda mo ko hene ngelo kamigo aginagabe.
HAG 1:5 Tíha ko tara tara tagira ibulene ngaru mitangi bialu holene nga.
HAG 1:6 Tígua tomo dewa hangarimi tiraga emene hangu anda haya. Tí tomo maru ngami tiraga tí no karulapu nabulebira. Tínaga waini ibabi nalu holene wia ngami tiraga tígua naramigola no karulapu nabuleberemi. Tínaga aga bu holene dewa wu kamigo ai dagare birangi tínaga aga urunime tí bu karulapu nabulebira. Muni biabe biaga maru karume muni dewa yu ka tiraga tinaga muni yaga paudi nu diriwiha hanaragola tagu wahai haradagua bialu abale ereba haga biaga.
HAG 1:7 Anduane Homogo i̱ Hongo Haiheore kogome tíhondo bi ogodagua laro. Mbirale wali agali tíha ibirarunaga irane agidabe manda bulene nga.
HAG 1:8 Ai bi ogo hale hadaba. Tígua hari ngaruha puwa i̱naga anda lone biadai bule irabuha ira dibu pilimu. I̱ turuho holiya i̱naga anda ogoni lone bia halimu. Ani bialu i̱naga mini yaraga hene howa mini leneore holiya tígua i̱nihondo lotu lalu holeberemi.
HAG 1:9 Tígua mabuha howa tomo dewa bu yalu íbu wulene manda bu kamiria tomo dewa nawiya. Tí tomo andaga bu yu íbu ngamiria i̱naga puyabume pulo wahai harugola tomo abale biba hayiya. Anidagua birudagoni irane tígua i̱naga anda giala holebu ngelo wahowa tigua tíninaga anda hangu hangu kamidagua bigibigi bialu kamigoni.
HAG 1:10 Irane ogonidagua beremigome iba dalu naibi gaea biaho wiaabo haya. Ani biyagome mabuha tomo dewa anda nahe ngagoni ndobe.
HAG 1:11 I̱nime iba dalu naibilonaga minu yu kogoni. Hari bare ngaruhabi widi mabu ngamiruhabi gerebi mabu ngamiruhabi ira olibe mabu ngamiruhabi iba dalu naibilonaga i̱na hapai ho ko. Dindini tomo tara tara hengedamigohabi wali agali bu kamiruhabi nogo bulumaga bu karuhabi tínaga tomo tara tara hengedamiru bibahendehabi iba dalu naibilonaga henemane i̱nime hapai ho kogoni, laya lene.
HAG 1:12 Yuda wali agali ti Serubabele Yosuala heba mandagi heagola bi ogo lamiyago ti bibahendeme hale hai hene. Ani hale howa Anduane Homogo tinaga Ngode Datagaliwabehanda bi layago hale howa gi timbuni halu ibuninaga bi mana latagi haga agali dabo helene Hagaihanda bi layago hale howa talialu bialu hene.
HAG 1:13 Ani heagola Hagai ibugua wali agali bu hearuhondo Anduane Homogonaga bi mana lamialu lalu, Anduane Homogohanda bi ogodagua leda. I̱ Anduane Homogo i̱ni tí heba mandagi haabo holebero, laya.
HAG 1:14 Ani layagola Anduane Homogohanda wali agali bibahendenaga mini mo heya hayagola tigua Anduane Homogonaga anda bialu hene. Serubabele Yosualabi wali agali libu heba mandagi bu hearu tigua Anduane Homogo Hongo Haiheore kagonaga anda ogoni bule bialu hene.
HAG 1:15 Tigua anda pigane tenialu binidagoni Dariusi ibu kini henego mali mendenaga ege waraganegonaga horo pira kirani maria (24) heagola tigua anda ogoni pigane bialu hene.
HAG 2:1 Mali ogoninaga dege ege kanenaga horo pira kirani mbira (21) hayagola Anduane Homogohanda ibunaga bi mana latagi haga Hagaiha howa lone latagi hene.
HAG 2:2 Ibugua Hagaihondo lamialu lalu, Tínaga gabumane agali haguane Serubabelehondobi loma binigo mo miaga haguane timbuni Yosuahondobi wali agaliruhondobi ogodagua lamibe.
HAG 2:3 Bamba i̱naga anda bayaleore henego tí marume mitangibu kamibe. Anigo áyu tígua handalu kamiria anda ogoni mo ko halu gialabaga bini nagaloneore ngaria hendedamibe.
HAG 2:4 Ani ngaria hondowa tínaga bu miniha genda dege dindiho holene nawi. I̱ni tí heba haabo kogonigo biabe ogoni bialu halimu.
HAG 2:5 Bamba tí Iyibi dindi yu wahalu tagira ibalu ibirimingi i̱ tí heba mandagi haabo holebero lalu lo wirugoni. Áyubi nde i̱naga Dinini ibu tí heba haabo kago tí gi nahe halimu.
HAG 2:6 Anduane Homogo Hongo Haiheore kogome lu nahe emeneore howa mbirale bibahende ngarunaga dindi haribi iba solowara timbuni bedarubi i̱na mo ema bia hai holebero.
HAG 2:7 Dindi bibahendeha gabumane haru haga agali haguane bu karubi mo durula hai holebero. Ani berogola wali agali hameigini dindi tara taraha bu karume tinaga munibi mbirale bayale tara tara ngarubi bibahende mo yalu ibalu i̱naga andaha wialu wu to̱lolebira.
HAG 2:8 Muni ngolo silibabi dindi bibahendeha bu ngarubi i̱naga dege wiai ka.
HAG 2:9 I̱naga anda gahenge ogoni ala hayagonibi ndo baya taraore mbira ona holebira. Ani kagola i̱naga wali agali dindi ogoniha karu mbirale bayale tara tara bu ngaru mo mialu tinaga bu miniha mo palia holenebi mo karula holebero. I̱ Anduane Homogo Hongo Haiheore kogonigo i̱na bi o ledogoniore, laya lamibe, lene.
HAG 2:10 Kini Dariusi ibu kini henego mali mendegonaga ege dininaga horo pira kirani maria (24) hayagola Anduane Homogo Hongo Haiheore kago ibugua ibunaga bi mana latagi haga agali Hagaihondo bi ogo lamini.
HAG 2:11 Ibugua lalu, Í̠na loma binigo mo miaga bu karuhondo tinaga bu miniha agua wu henedabe hondole tihondo bi ogo hale habelo hamelo ko.
HAG 2:12 Mbiralime nogo lomabu miniru bo delene ngagonaga mbirini mbira ibunaga agame mo kabu bu yalu piyagua aga ogonime mberedibi tomo dawa wini ngarubi waini ibabi olibe lininaga welibi tomo marubi uruni mbirago agame ela hayagua ela harago mo lomabu miniru aria dege halu i̱ninaga wiabagi heneore wulebirabe lalu hale habe, lene. Ani laya handala Hagai ibugua loma binigo mo miaga bu hearuhondo bi ogoni hale hayagola tigua ladai bialu lalu, Ndo anidagua bulene karulapeore, lene.
HAG 2:13 Ani layagola Hagaihanda tihondo bi mende hale halu lalu, Ai mbiralime homene tingini ngago ela hayagua nde wali agali ogoni ibu Anduane Homogonaga deni mebia hene dodohe kago ina manda bidamagoni. Anigo agali homa tingini ela hayagome ibugua tomo maru ngago ela hayagua tomo ogonibi nde mebia hene dodohe dege ngabe, lalu hale hene. Ani hale hayagola loma binigo mo miaga agali biaru tigua ladai bialu lalu, E̱ tomo urunibi nde dodo hene dege wulebira, lene.
HAG 2:14 Ani layagola Hagaihanda lalu, Anduane Homogohanda au laya. Yuda wali agali bibahende bu karunime mbirale bialu karuni ti ogonibi dege ka. Tininaga minibi mana tigua bialu karubi bibahende dodo hai hene dege bialu ka. Anidagua bialu kagome tigua lomabu delaga dabuni loma damene bibahende bu yalu ibiraru i̱naga deni mebia hene dodohe dege bu yalu ibaga.
HAG 2:15 Anduane Homogohanda ogodagua laya, Tígua i̱naga anda biago lone bia dai nabi hemingi biyago damene bayuwa mitangi budai ala bilimu.
HAG 2:16 Tígua tomo dewaore alugumu bu wiagoria puwa nu mariaore honoleberemada lo mitangi bu yalu pialu hemiria nu maria biago nahene nu kira hangu hanarimigoni. Tígua waini iba biraga iba be timbuni wabu peho berelaga wiagoha puwa waini be pira mbira bibahende hambiai hole lo manda bialu hemiria be pira uruni hambiai habe nahe be maria hangu hambirimi.
HAG 2:17 I̱na puyabu poboyogobi mbira ibilalu mabuha tomo mo ko holene tara tarabi ibilalu biru. Ani bialu dalu dindiguni heba ibilarugola mabuha tomo hengemigo damene bibahende mo ko hai haya. Ani birugo hondowa tígua mini beregeda nabirimigoni.
HAG 2:18 Áyu ogoni ege dininaga horo pira kirani maria (24) hayagola i̱naga anda bule dindi mo tiga bialu gene mo manda manda bu wirimigoni. Ani birimigome ai áyu ogoni howa agi birabe hondole bayuwa de hondo halimu.
HAG 2:19 Heneneore tomo wiaga anda timbuni bu heledamigoha tomo nabuwibi pu mbira lini daga mini gerebirubi ira lini maru pogerubi pomegaranederubi oliberubi bibahendeore lini nade dege hai ka. Ani bidagoyu tí biamogo bulenaga i̱na áyu howa bialu holebero, lalu Anduane Homogohanda lene.
HAG 2:20 Horo ogoningi dege Anduane Homogohanda bi halu mende Hagaihondo lamini.
HAG 2:21 Anduane Homogo ibugua lalu, Yuda wali agalinaga agali haguane Serubabelehondo lamialu, I̱na mbirale bibahende dindiha ngarubi hariha karubi bibahende mo emabia hai holebero.
HAG 2:22 I̱na kini bu karunaga hongo bope hai harogola tinaga hongo holene mbira nawulebira. Tinaga wai biaga garo ale nogo hosime gililo yalu piaga karisi ngarubi tinaga ami agali karisini heyu howa wai bu piaga karubi bibahende bo haealabaga biai holebero. Ani bialu tinaga nogo hosi karu bo wahai harogola ami agali nogo hosini biralu wai bu piaga karume tini dege dege homelo baga baga bulebira.
HAG 2:23 Anidagua birangi i̱na i̱naga biabe bia haga agali Serubabele í̠ dabalu i̱ninaga agaliore mbira í̠ howa i̱naga wali agaliru haru haga habelo dabo helolebero. I̱na í̠ hangu dabo helarogola í̠ i̱naga gi hondoneni gi magi ale holebere. I̱ Anduane Homogo Hongo Haiheore kogo i̱na bi o ledogoniore, lalu Anduane Homogohanda Hagaiha howa lene.
ZEC 1:1 Kini Dariusu ibu Pesia dindiha kini heane dege mali mbira howa mendegonaga ege halini hayagola Anduane Homogohanda ibunaga mana latagi haga Segaraiahondo bi ogo lamini. Segaraia ibu Beregaia igini howa Ido aguane hene.
ZEC 1:2 Anduane Homogo Hongo Haiheore kago ibugua Segaraiahondo lalu, Bi ogo i̱naga wali agali bu karuhondo lamibe, lalu lamini. Ibugua lalu, I̱ Anduane Homogo kogoni howa i̱na tínaga mamaliruhondo keba timbuniore ho haru.
ZEC 1:3 Anigo áyu i̱na tíhondo ogodagua laro. I̱na tí mo wialu biamogo buliyanaga ibalu tígua i̱ni kogoha dai bilimu.
ZEC 1:4 Tínaga mamalirume bialu henedagua nabilimu. I̱naga bi mana latagi haga agali hearume i̱naga bi mana lamialu, Tígua mana ko bialu kamiruni wahai halimu, lalu langiya tiraga tígua i̱naga bi mana ogoni hale naharimi.
ZEC 1:5 Ai tínaga mamali uruni tini homai halu i̱naga bi mana latagi haga agali urunibi homai dege haya.
ZEC 1:6 Anigo ogoaleore bulebirago lalu i̱naga bi mana latagi haga agali uruni tigua mbiwia hayadaruni tínaga mamali heangi tagira piyane de handai haya. Tigua i̱naga bi mana larugo hale nahayagome tiniha mo ko holene wiai haya. Ani biyagola mani lone tinaga bu mini beregedo howa lalu, Anduane Homogo Hongo Haiheore kago ibugua bule lalu lo wiyadaguaore henene mo ko halu minu bai hayagoni irane inaneme hadowa ho hemaria biya, laya lene.
ZEC 1:7 Kini Dariusu ibu kini heane mali mendegonaga ege beane (11) hayagola ogoninaga horo pira kirani maria (24) tinaga ege mini Sebada laga winigo ogoningi Anduane Homogo ibunaga bi i̱hondo langiya.
ZEC 1:8 Mbiraga de gandeba handalu hewaria Anduane Homogonaga dahuliyali mbira nogo hosi hone mbirani berearia handaru. Nogo hosi ogoni ibu dindi ulini panda panda wiagoha irabu dombeneha heagola nogo hosi maru ibunaga erembirahayagi bu hea. Hosi maru hone halu maru pagabua halu maru honeni pagabua bu ngibingabule hea. Ani bu heagoria dahuliyali maru hosi uruninaga erekunini birai hea.
ZEC 1:9 Ani bereagola i̱na dahuliyali haguane heagohondo hale halu lalu, I̱naga Anduane-o de gandeba áyu hendedogonaga hosi biaru irane agibe lalu hale haru. Ani hale harugola ibugua lalu, De gandeba ogoninaga irane langerogo ogo.
ZEC 1:10 Anduane Homogohanda uruni dindi bibahendeha de handama ibaga biai helo pelene, laya.
ZEC 1:11 Ani layagola dahuliyali biarume Anduane Homogonaga dahuliyali mbira biagohondo lamialu lalu, Iname dindi bibahendeha piai harimago ai wali agali dindi tara taraha bu hearu de handaiore howa tiha genda mbira nawi bayale dege hai hearia handarima, lalu lamiya.
ZEC 1:12 Anidagua layagola Anduane Homogonaga dahuliyali biagome lalu, Anduane Homogo Hongo Haiheore kego-o í̠na mali pira karia (70) bibahendeni wali agali Yarusalemeha karubi tano maru Yuda dindiha bu karubi ti bibahende baba keba haho wiaabo kego ainde ti lone dara howa biamogo angi buleberebe, laya.
ZEC 1:13 Ani layagola Anduane Homogohanda dahuliyali biagonaga bu miniha mo paliaho helonaga bi bayale lamiya.
ZEC 1:14 Ani lamiyagola dahuliyali biagome i̱hondo lalu, Anduane Homogo Hongo Haiheore kago ibugua bi layago í̠na latagi habe lalu langiai haya. Anduane Homogohanda lalu, I̱naga tano timbuni Yarusalemebi Hari Saionobi hondowa i̱na dara ho howa mini dege dindiho kogoni.
ZEC 1:15 Ani kogonigo ai hameigini dindi tara taraha bu karume tiha genda nawi bayale kago i̱na dege tihondo keba timbuni ho kogoni. Abale i̱naga wali agaliruhondo keba emene dege ho hewagola hameigini dindi tara taraha karu tigua i̱naga wali agali uruni mo tandaga nde emene dege holene winigoria ibalu bibahende bo hilo wahai halu mo ko timbuniore haya. Anigo i̱na tihondo keba timbuni ho kogoni.
ZEC 1:16 Anigo áyu i̱na Yarusaleme wali agali bu karu dara howa biamogo bulenaga daibu kogoni. I̱naga anda biago lone biadai bialu Yarusaleme tanobi lone mo tiga bialu arema bulebira laya, lene.
ZEC 1:17 Ani lowa dahuliyali biagome i̱hondo bi mende langialu lalu, Anduane Homogo Hongo Haiheore kago ibugua lalu ibunaga tano ngaruha mbirale bayale damene ngago hangume mo to̱lai helarogola wali agali ti bayaleore holebira. Ani bialu Yarusaleme tano lone ibunaga tanoore ngelalu Yarusaleme wali agaliru tinaga bu miniha mo palia holene karulo howa ema nabi holebira laya, lene.
ZEC 1:18 Segaraia ibugua lalu, I̱na de gandeba mende handalu hewaria nogo bulumaganaga ne gayane ale maria hearia handaru.
ZEC 1:19 Ani hondowa ai dahuliyali abale i̱la bi lalu haribago ibiyagola i̱na ibuhondo hale halu, Mbirale áyu hendedogoni irane agibe, laru. Ani hale harugola ibugua ladai bialu lalu, Nogo bulumaganaga ne gayane ale maria uruni abale Yuda dindibi Isaraele dindibi Yarusalemebi bibahende mo ko halu bo gialahole biaga hongo maria biarunaga manane heleda, lalu langiya.
ZEC 1:20 Ani layagola Anduane Homogohanda biabe biaga agali marialime hama timbuni yu hearu mo walia haya.
ZEC 1:21 Ani yu hearu hondowa i̱na ibuhondo hale halu lalu, Agali uruni tigua biabe agi bule ibirabe, lalu hale haru. Ani hale harugola ibugua ladai bialu lalu, Agali uruni tigua dindi tara taraha bu karume Yuda wali agali mo ko howa bo wahai halu maru dindi tara taraha bo giligalalo purogo lelaga biaru mo gi howa mo durula halu tinaga hongo ngaru bo ereba hai helole ka laya, lene.
ZEC 2:1 I̱na de gandeba dege handalu hewaria agali mbira magi handagane pu ona yuwa mbirale luni tubagi lalu mo manda bule yu hearia handaru.
ZEC 2:2 Ani hondowa i̱na ibuhondo hale halu lalu, Í̠ ani porebe, laru. Ani larugola ibugua ladai bialu lalu, I̱na Yarusaleme tano ngagonaga lunaga magibi aranenaga magibi ogobida lo manda bulenaga magi hondole poro, laya.
ZEC 2:3 Ani layagola handalu hewaria dahuliyali i̱la bi lalu haribago ibu emene amura pialu hearia dahuliyali mende ibu piyagoha ibalu lola haya.
ZEC 2:4 Lola hayagola dahuliyali ala ibiyago ibugua dahuliyali mende mani ibiyago lamialu lalu, Í̠na gerai lalu puwa agali mbirale magi handaga pu yu haragohondo lamialu, Yarusalemeha wali agali dewaorebi nogo bulumaga dewaorebi ho dame bu holebirago ai tano ogoni timbunioredagola tigua tanonaga pabe bibe nahe holebira.
ZEC 2:5 Ani bu holebirago ai Anduane Homogo ibuni ira hungu ale bialu Yarusaleme tanonaga wai pabe kagoha howa ibunime tano ogoni handayaho holebira. Ani howa ibuni Yarusalemeha haabo kagola ibunaga wá taraore holenebi hongo timbuni holenebi wiame hai holebira lamibe, lalu lamini.
ZEC 2:6 Anduane Homogohanda ibunaga wali agaliruhondo lalu, I̱na tí dindi tara tara wiaruha talu purogo lelarugonigo ai áyu Babilono tano ngago yu wahalu Yarusaleme dai bidaba, laya.
ZEC 2:8 Ani lowa lalu, Mbiralime tí bolene manda biyagua nde i̱ bole manda biragoni, lene. Hameigini dindi tara taraha karume Anduane Homogo ibunaga wali agali mo ko hayaru tihondo i̱na bi ogodagua lamuliya Anduane Homogo Hongo Haiheore kago ibugua i̱hondo langialu lalu,
ZEC 2:9 Tígua i̱naga wali agali bu karu mo ko halu barimiyagua i̱nime nde tí baba wai bulebero. Ani bialu wali agali ala tínaga garabaya biabe biaga biarunime tí mo ko halu bo wahai holebira laya lalu lamibe, lene. Ai mbirale uruni bulebira layagoore birangi wali agali bibahendeme Anduane Homogo Hongo Haiheore kago ibunime i̱ dabalu ibunaga bi ogoni latagi hole henemane pu lenedane hondolebira.
ZEC 2:10 Anduane Homogohanda laabo halu lalu, Yarusaleme wali agaliru-o i̱ni ibalu tí heba mandagi haabo holeberogonaga tígua turu howa iba gana lalu halimu, laya.
ZEC 2:11 Horo ogoningi wali agali dindi bibahendeha bu karu tibi nde Anduane Homogo kagoha ibalu ibunaga wali agali dege hai holebira. Ani bialu ibuni tí heba mandagi haabo kagola tígua heneneore ibunime i̱ dabalu tí kamiria ibileneoreda lo manda buleberemi.
ZEC 2:12 Ani bialu Yuda wali agali ti Anduane Homogonaga dindi wiabagi hene ngagoria howa ti ibunaga deni duniniore holebira. Ani bialu Anduane Homogo ibugua tano maru ngaru gubalini hagago emene nira lowa Yarusaleme tano gubalini timbuniore ho holebira.
ZEC 2:13 Anduane Homogo ibu ibuni haga ngagoha howa ina kamaria ibulebirago iname ibunaga deni howa bi mbira nale ema nabi dungulo hami̱ya, lalu Segaraiahanda lene.
ZEC 3:1 Anduane Homogohanda i̱hondo Loma Binigo Mo Miaga Haguane Timbuni Yosua heago de gandebaha mo walia haya. Yosua ibu Anduane Homogonaga dahuliyali mbira heago heba mandagi hebiria handaru. Ani hebiria dama Heyolabe ibubi Yosuanaga gi tigahayagi hearia howa ibugua Yosuahanda ko ogo biya lole manda bu hearia handaru.
ZEC 3:2 Ani hebigola Anduane Homogohanda dama Heyolabehondo lalu, I̱ Anduane Homogo i̱na í̠hondo bi mbira larogo. Í̠na bi mbira lole kegoniore nalabe. I̱na Yarusaleme gubalini timbuniore ho kogome í̠ langerogo í̠naga ne hariga hangai howa bi naleore habe laro. Mbiralime ira dateboni ira dalu kagola ba hundia halu duguaede hagadagua bialu agali Yosua ogoni mo wialu haru dai birugo ndobe, laya.
ZEC 3:3 Yosua ibu dahuliyali biago heagoria kaware hapara howa ibunaga aga ko dodohe bu heneyagobi bu haabo hea.
ZEC 3:4 Ai dahuliyali ogoni ibugua dahuliyali maru hearuhondo lamialu lalu, Agali ogoni aga ko karulo kago golo wahadaba, laya. Ani lowa ibugua Yosuahondo lalu, Ai bi o larogo hale habe. Í̠ha ko ngaru aga dodohe ogo heba i̱na mo wahai harogoni. Ani bialu aga gahengeru mo karula holebero, laya.
ZEC 3:5 Ani lowa ibugua dahuliyali maru biaruhondo lalu, Ainde tígua labolabo bayale mbira Yosuanaga haguaneni bo bialu manda ale mo karula halimu, laya. Anduane Homogonaga dahuliyali biago ibu kaware heagola maru tigua labolabo bayale Yosuanaga haguaneni bo bialu mo karula haya. Ani bialu ibunaga aga gahengebi mo karula haya.
ZEC 3:6 Mani howa dahuliyali biagome Yosuahondo lamialu lalu,
ZEC 3:7 Anduane Homogo Hongo Haiheore kago ibugua bi ogodagua lara. Í̠na i̱ hame ledodagua bialu i̱naga bi mana lo ngagobi baya hangu talialu howa í̠na biabe bialu habelo ngerogobi bialu hariyagua nde i̱naga andaha biabe bialu mbirale ngaru bibahende handayaho habelo helolebero. Ani helarogola dahuliyaliru tigua i̱ni kogoria kaware ibugu bialu hagadagua í̠bi nde i̱ kogoria kaware íbu holebere.
ZEC 3:8 Yosua í̠ Loma Binigo Mo Miaga Haguane Timbuni kegonigo ai i̱na bi larogo hale harene. Loma binigo mo miaga agali maru bu kamiru tíbi nde hale halimu. Mani mbirale bayale tagira ibulebiragonaga manane tí kamigoni. Ai hale hadaba. I̱naga biabe biahaga agali mbira ibiloleberogo ibunaga mini Ira Dibini Tilinini Andaho Aribia Hene lolebira.
ZEC 3:9 I̱na ege to̱le̱ mbira de kariahe Yosuanaga wanakuihayagi werogo de handadaba. I̱na bi mbira ege to̱le̱ ogoriani gilibu wulebero. Anidagua buwa i̱naga dindi ogoriani wali agali karunaga ko ngaru bibahende horo mbiru hanguni domo wahai holebero.
ZEC 3:10 Horo ogoni wubagiho ngeledogo tagira ibirangi tínaga nenege mbira mbira handa a̱i̱na̱i̱ bu padaru tíni haru mandagi hole ololeberemi. Olowa tínaga gerebi mabu bu hengedemigohabi tínaga poge hengedemigonaga gumbahabi bira palia bu holeberemi. Ani howa tínaga bu miniha mo palia holene karulowa turu haga buwa dungulo holeberemi, lalu dahuliyali biagome laya lene.
ZEC 4:1 Dahuliyali ala i̱la bi lalu haribagome i̱ hewaria ibalu i̱ paliahondo haradagua biwaria barila haya.
ZEC 4:2 Ani buwa ibugua i̱hondo hale halu lalu, Í̠na agile dege hendedebe, laya. Ani layagola i̱na ibuhondo ladai bialu lalu, I̱na lamu hale wiagane irane mbira ngolome wabini ngaria hendedo. Lamu hale wiagane ogoninaga nguni daligahayagi ndisi be weli bedaore mo paga howa ngane hendedo. Lamu hale wiagane irane mbiraore ogoriani howa lamu karia ho gebaga bigi bidago odaruni ti hale delole iba be mbiraore ogoniha howa dege purogo lagadane hendedo.
ZEC 4:3 Ai weli be wiaga biagonaga lene mende mendehabi ira olibe kira kane hendedo, lalu dahuliyali biagohondo ladai biru.
ZEC 4:4 I̱na uruni hondowa ai irane agibe lalu ibuhondo hale haru.
ZEC 4:5 Ani hale halu hewaria ibugua ladai bialu lalu, Í̠na uruni manda nabi kebe, layagola i̱na ibuhondo ladai bialu lalu, Agali haguane-o i̱ manda nabiore kogoni, laru.
ZEC 4:6 Ani larugola dahuliyali biago ibugua ladai bialu, Bi ogo agali haguane Serubabele kagohondo lamibe, laya. Bi ogoni Anduane Homogohanda lalu, Í̠na biabe berego bialu í̠naga ami agali kegonaga hongonibi í̠ninaga hongonibi ndo bialu holebere. I̱ dinininaga hongo í̠ha kagome biabe berego bayale bialu holebere.
ZEC 4:7 Í̠ poregoha mbirale taibi hari timbuni wedarubime hapai hayaguabi i̱nime mo waholebero. Ani bialu kogola í̠na i̱naga anda gialo wahene biago lone bia dai bulebere. Anda ogoni bule pigane bialu howa anda háinaga ege to̱le̱ dunini wia maro bialu kegola wali agali tigua hondowa lalu, Anda ogoni bayaleoreda, laga bialu hongo howa ga̱ ladagadaga bialu holebira, laya.
ZEC 4:8 Ai Anduane Homogohanda bi mende langiyago ogo.
ZEC 4:9 Ibugua lalu, Serubabelehanda i̱naga anda ogoni bulenaga dindi gumuni godo tiga bialu gene wedago ibunioreme biai holebira. I̱naga anda ogoni biai kagola i̱naga wali agaliru tigua i̱nime í̠ ti karia pu layada lo manda biai holebira.
ZEC 4:10 Biabe ogoni biai nahedagola i̱naga wali agalirume tinaga bu miniha genda ho holebira. Anigo Serubabele ibugua anda pigane tenialu bulenaga pu luni anda magi manda bulenaga yu howa bialu kago hondowa wali agali tigua turu timbuni ho holebira, laya lalu dahuliyali biagome lene. Dahuliyali biagome i̱hondo lalu, Lamu karia uruninaga manane Anduane Homogonaga de karia howa dindi bibahendeore ibugua handame haga ka, laya.
ZEC 4:11 Ani layagola i̱na ibuhondo hale halu lalu, Lamu hale wiagane gene mende mendehayagibi ira olibe kira kago irane agibe.
ZEC 4:12 Ira olibenaga magane kira olibe lininaga weli piagane baibo harigawi ngolome wabinigoha mandagi kago ogoninaga iranebi langibe, laru.
ZEC 4:13 Ani hale halu hewaria ibugua ladai bialu lalu, Í̠ uruni manda nabi kebe, layagola, i̱na ibuhondo ladai bialu lalu, Agali haguane-o i̱ manda nabiore kogoni, laru.
ZEC 4:14 Ani larugola ibugua lalu, Ira olibe kira ogoni libu agali kira dindi bibahendenaga Anduane Homogo kagome ibunaga biabe bilo dabalu libunaga haguaneni olibe weli odo wialu helenego ka, lalu langiya.
ZEC 5:1 I̱na lone dege handalu hewaria mbuga mbira yagalo yu piyaria de handaru.
ZEC 5:2 Ani hondo hewagola dege dahuliyali biagome i̱hondo hale halu lalu, Í̠na mbirale mbira agile ngane de hendedebe, laya. Ani layagola i̱na ladai bialu lalu, I̱na mbuga timbuni mbira yagalo yu porane hendedo. Lunaga magi mita pira yangalenaga magi mita duria aledane hendedogoni, laru.
ZEC 5:3 Ani larugola ibugua i̱hondo lalu, Mbuga ogoniha Anduane Homogohanda wali agali Yuda dindiha bu karu ko helonaga ha holene bi gilibu nga. Mbuga ogoninaga mbirahayagi gilibu ngago ogo pageali dindi ogoriani karu bibahende bo batagi hai holebero lalu gilibu nga. Mendehayagi gilibu ngago ogo wali agalime ogoale bule lalu ke̱ howa lo wiaga karu tibi bo batagi holebero lalu gilibu winigo nga.
ZEC 5:4 Anduane Homogo Hongo Haiheore kagome lalu, I̱na ha holene bi ogoni wali agali page biaga karubi i̱naga minini howa bi lo wialu ke̱ howa lo wiaga karubi uruni ti andagaha mo yaanda hai holebero. Anidagua berogola bi ogonime ti andagaha howa page biagabi ke̱ hagabi bu karu bibahende mo ko hai holebira, lalu laya.
ZEC 5:5 Dahuliyali biagome i̱ hewaria lone ibuwa lalu, Ai mende ibirago de handa, laya.
ZEC 5:6 Ani layagola i̱na ibuhondo lalu, O ibiragoni agilebe, laru. Ani larugola ibugua ladai bialu lalu, Mbasigedi nugo ogonime wali agali dindi ogoriani bu karume ko biyagonaga manda bulene manane ogoni, laya.
ZEC 5:7 Mbasigedi nu ogoninaga panga aeaneme payini wia. I̱na handayaho hewagola tigua mbasigedi nu biagonaga panga duguayagola wali mbira ogoniha berearia handaru.
ZEC 5:8 Ani handarugola dahuliyali biagome lalu, Wali o bedagoni wali agali bibahendeme mana ko bialu kamigonaga manane beda. Ani lalu wali biago mbasigedi nu biagoha lone he̱laanda halu panga payaanda haya.
ZEC 5:9 Ani biya handala i̱na handadaga halu hewaria wali kira babagane hongoheore ega bodo hariawenaga babagane alehe i̱ hewaria yagalo yu ibiya. Ibalu libugua mbasigedi nu wali bereago heba mo yalu piyago handaru.
ZEC 5:10 Ani piyago hondowa i̱na dahuliyali biagohondo hale halu, Libugua mbasigedi nu ogoni agohayagi yalu porabe, laru.
ZEC 5:11 Ani larugola dahuliyali biagome ladai bialu lalu, Libugua Babilono dindiha damanaga anda timbuni mbira bulenaga mo yalu pora. Libugua damanaga anda ogoni biai howa tigua mbasigedi nu ogoni Babilono wali agalirume tinaga bi pupu ogonihondo wialu helo mo ngelolebira, laya.
ZEC 6:1 De gandeba lone handalu hewaria wai biagane garo ale mini karisi maria ege to̱le̱ boronosi hari kira heago hengeneha ibiyane de handaru.
ZEC 6:2 Nogo hosi hone hearume karisi mbirago gililalu hosi mindi hearume karisi mendego gililalu hearia handaru.
ZEC 6:3 Ani bialu nogo hosi pagabua hearume karisi tebonego gililalu nogo hosi honeni pagabua ngibingabule hearume karisi manego gililalu hearia handaru.
ZEC 6:4 Ani biyago hondowa i̱na dahuliyali biagohondo hale halu lalu, Agali haguane-o garo ale karisi uruni irane agibe, laru.
ZEC 6:5 Ani hale harugola dahuliyali biagome ladai bialu lalu, Karisi maria uruni ti dinini mariali dahuliya andagaha hagago nde áyu ogoni dindi bibahendenaga Anduane Homogo kagoria howa ibiragoni.
ZEC 6:6 Karisi mbira nogo hosi mindirume gililo yu porago ogoni abene uyurahayagi Babilono dindi pole pora. Karisi mende nogo hosi pagabuarume gililo yalu porago ogoni dindi ni paliragohayagi pole pora. Ani pialu karisi tebone nogo hosi honeni pagabua ngibingabule karume gililo yu porago ogoni dindi abene unurahayagi pole poragoni.
ZEC 6:7 Nogo hosi hongo gibihe urunime tagira ibalu ti dindi bibahendeha ala pugu bule biyagola dahuliyali biago ibugua lalu, Ai karulape tí dindi bibahende abi ngabe hondole pudaba, laya handala hosi biaru abale piai haya.
ZEC 6:8 Ani piyagola dahuliyali biago ibugua i̱ olowa i̱hondo lalu, Nogo hosi uyurahayagi piyarume Anduane Homogohanda keba ala hayago mo palia hayagoni, laya.
ZEC 6:9 Anduane Homogohanda i̱hondo bi ogo langialu lalu,
ZEC 6:10 Í̠na agali mini Heledai Tobiya Yadaia imaru Babilono dindi wahalu Yarusaleme daibu karia í̠ pialu tigua mbirale ngolo silibaru mo turu halu bame ngule yidago mo yabe. Mo yalu Sebanaia igini Yosaia andaga abale pu, laya.
ZEC 6:11 Pialu tigua ngolo silibaru ngiragome í̠na kininaga manda mbira wabibe. Wabu yalu puwa Yahosadaga igini Loma Binigo Mo Miaga Haguane Timbuni Yosuanaga haguaneni mo karula habe.
ZEC 6:12 Ani karula halu howa ibuhondo bi au lamibe. Anduane Homogo Hongo Haiheore kagome lalu, Agali mbira mini Ira Dibini Tilinini Andaho Aribia Hene kago ibu dindi ibuni kagoha bayaleore haabo howa ibugua i̱naga anda lone biadai bulebira, lamibe.
ZEC 6:13 Ibugua i̱naga anda bialu kini mini lene howa ibunaga wali agaliru baya hangu haru howa handayaho holebira. Ani bialu ibugua loma binigo mo miaga agalibi ibu dege howa kininaga biragane dagia ngagoria biruwabi ibugua biabe kira mo mbiraore howa bayaleore bialu holebira, laya lalu lamibe, lene.
ZEC 6:14 Kininaga manda ogoni Anduane Homogonaga andaha wiaabo holebira. Ani ngago hondowa wali agali bibahende tigua Heledai Tobiya Yadaia imaru Sebanaia igini Yosaiabi mitangibu dai bialu turuore ho holebira.
ZEC 6:15 Agali dindi kaundiaha haga haga bidaru tibi nde ibalu Anduane Homogonaga anda ogoni lone biadai bule lowa bialu karu tigua biamogo bialu holebira. Anda ogoni biai harangi Anduane Homogo Hongo Haiheore kago ibunime i̱ heneneore dabalu tí kamiria pu laya handala ibinida lo manda buleberemi. Tígua Anduane Homogo tínaga Ngode Datagaliwabe kagonaga bi ledago baya hangu talialu biai harimiyagua nde mbirale uruni heneneore tagira ibai holebira, lalu Segaraia i̱na larogoni.
ZEC 7:1 Dariusu ibu kini heane mali tebira howa manegonaga ege dini mini Kisilebe lagago ogoni hayagola ege ogoninaga horo manengi Anduane Homogohanda i̱hondo bi mbira langiya.
ZEC 7:2 Bedele tano wali agali tigua agali kirali Sarese Legemelegela tinaga agali maru hearu haru halu Anduane Homogo Hongo Haiheore kagonaga anda pudaba lalu lamini. Agali biaruni tigua Anduane Homogohondo wali agali uruni biamogo bia lalu tinaga bi lahole pene.
ZEC 7:3 Tigua loma binigo mo miaga agali hearuhondobi Anduane Homogonaga bi mana latagi haga hearuhondobi bi mbira hale hole piyago ogo. Anduane Homogonaga anda mo ko ho wiane dege mali dewaore piyada. Anigo iname ogoninaga kiabu dugu bialubi ege dauni haragola tomo nane hagabi wirimagonigo ai ogonidagua bialu haabo hami̱yabe, lalu hale hole pene.
ZEC 7:4 Ani piyagola mani Anduane Homogo Hongo Haiheore kago ibugua i̱hondo lalu,
ZEC 7:5 Í̠na wali agali bibahende dindi ogoha karuhondobi loma binigo mo miaga agali bu karuhondobi bi ogodagua lamibe. Mali pira karia (70) uruni harimagoni tígua ege dauningibi ege kanengibi kiabu dugu bialu tomo naneore harimigoni. Ani bialu ha harimigonigo uruni tígua Anduane Homogo i̱naga mini yaraga howa ndo bialu harimigoni.
ZEC 7:6 Tígua tomoru nalu howabi tíninaga tombe hangu to̱lelonaga nalu haramiligoni ndobe laya, lalu lamibe, lene.
ZEC 7:7 Bamba Anduane Homogonaga bi mana latagi haga hearuha howa bi ogonidagua dege lamialu haga hene. Yarusaleme bayale wialu uruniha mbirale bibahende bayale dege wiangi howa latagi halu hene. Horo uruningi Yarusalemeni wali agali dewaore heagolabi Yarusalemeha tano emene kaware ngaruha wali agali dewaore bu heangibi tano abene unurayagi dewaore paleangibi ni paliragohayagi hari bare emene wima pedaruha wali agali dewaore palu heangibi bi ogoni dege latagi halu hene.
ZEC 7:8 Anduane Homogo ibugua Segaraiahondo bi ogodagua laya.
ZEC 7:9 Ala i̱na i̱naga wali agali bu hearuhondo bi ogo lamirugoni. Tígua mana bayale tigabi ngaru dege bialu halimu. Tínaga damene karu dara halu biamogo bialu halimu.
ZEC 7:10 Wali maru agalini homene dalo bedarubi waneigini ti ai̱ya abala homene biru karubi wali agali dindi tara howa tí baba íbu hene karubi wali agali maru mbirale tubagi howa burupale karubi bibahendehondo mo ko nahalimu larugoni. Ani bialu tíni dameneore karu mo ko nahalimu lalubi abale langiru.
ZEC 7:11 Anidagua larugo lelowa dege wali agalime i̱ erembira ngialu i̱naga bi hale nahaya. Tinaga mini ndibu lalu
ZEC 7:12 tinaga bu habaneha giambe ege to̱le̱ ale haya. Tigua Anduane Homogo Hongo Haiheore kagonaga bi hale nahaya. Ala i̱na i̱naga bi mana latagi haga agali ibilarugoni tiha howa i̱naga Dinini ibugua bi latagi hayagola wali agali tigua hale nahayagonaga i̱ keba timbuniore ho harugoni.
ZEC 7:13 Tigua i̱naga bi hale nahayagonaga i̱nabi nde tigua i̱hondo bi layago hale naharu.
ZEC 7:14 Ani biyagonaga puyabu hongohe ibalu datani mbirale ngaru puloyu piagadagua i̱na ti dindi tara taraha garabayabu yu piai helarugoni. Anidagua birugola tinaga dindi bayale wiago mo ko halu wali agali mbira ogoniha naheore ngelarugoni, laya lalu Segaraiahanda lene.
ZEC 8:1 Anduane Homogo Hongo Haiheore kago ibugua bi ogo Segaraiahondo lamini.
ZEC 8:2 Ibugua lalu, I̱na Yarusaleme wali agali gubaliniore ho kogo howa i̱na ti biamogo bua ho haabo harugoni. I̱na ti gubalini ho haore bidogome tinaga waitigi bu karuhondo keba timbuniore ho kogoni.
ZEC 8:3 I̱naga tano loma bia hene Yarusalemeni daibu holebero. Wali agali tara bu karume i̱naga wali agali Yarusaleme tanoni bu karuni de hondowa lalu, De handa naberego. Yarusaleme wali agali bu karume Anduane Homogo heneneore talima pialu kagoni ndobe, lolebira. Hari Saiono Anduane Homogo Hongo Haiheore kogonaga ngago wali agali bibahendeme hari ogoni Anduane Homogonaga lomabia heneore nga lolebira.
ZEC 8:4 Tano ogoniha wai bulenebi genda tara maru ngaru ariabi mbira naibulebiraore. Wali agali tano ogoniha haga karu ti hadege bialu hodagua halu halimburu yu howa tanoha hariga ngarunaga birulebira. Tano ogoniha ti bayale dege hai holebira.
ZEC 8:5 Waneigini dewaore andaho howa tano ogoninaga harigani gini bialu bu holebira.
ZEC 8:6 Wali agali yu wahene emene hangu bu karume i̱na ogo ale mbira bulebira larogoni nabibeheore lo manda bu holebira. Anigo i̱ Anduane Homogo Hongo Haiheore kogome mbirale mbira nabibehe nawi. I̱na mbirale bibahende biai habehe kogoni.
ZEC 8:7 Ainde waitigirume ibalu i̱naga wali agaliru minu garabaya bu yalu maru dindi ni tagira ibiragohayagi pialu maru nde ni paliragohayagi pialu biya. Ani yalu piyagoha howa i̱na i̱naga wali agali uruni lone haru dai berogola ti Yarusalemeni holebira. Ani kagola ti i̱naga wali agali helalu i̱ni tinaga Ngode Datagaliwabe howa i̱na mana tigabi ngaru hangu bialu holeneme handayaho halu haru haabo holebero.
ZEC 8:9 Tígua biabe hongo howaore bialu holene nga. I̱naga anda biago pigane bialu hemingi i̱naga bi mana latagi haga agali biarume bi latagi hayaru manda bilimu. Áyubi nde tí bi mbiraore ogoni aria dege hale haramigoni.
ZEC 8:10 Anduane Homogonaga bi mana latagi haga agali uruni tigua bi latagi nahe heangi marume wali agali garabaya biabe ale bialu helo yolo bulenebi nogo bulumagame biabe bilonaga yolo bulenebi uruni nawiyagola bame hene. Tinaga damene dege hearuni mo waitigi haga birugola tini baya hangu ha nabi gi ho harimi.
ZEC 8:11 Anigo áyu i̱na wali agali yu wahene emene bu karuni baba mana tara mende ale bialu holebero.
ZEC 8:12 Tinaga bu miniha mo palia holene karulo helo merogola tigua tini mabuha tomoru hangalu haga haga bulebira. Iba dalu ibilarogola ti mabuha pu kuabu ale mbira lini daga mini gerebiru anda halu lini bayaleru dalu tomo tara tararubi anda hai holebira. I̱naga wali agali yu wahene emene karu baba howa mbirale bayale urunidagua bialu holebero.
ZEC 8:13 Yuda wali agalirubi Isaraele wali agali bu kamirubi tígua bi larogo hale hadaba. Hameigini dindi tara taraha hearume tí mo ko hene wiago hondowa tini ha halu lalu, Tíore bayale ha ndo Yuda wali agaliru Isaraele wali agalirubi homo da hai hayadagua tíbi homo ereba halimu, lalu ha haga biya. Anigo ai i̱na Yuda wali agalibi Isaraele wali agalibi haru daibu heledoru mo bayale holebero. Ani heledogola hameigini dindi tara taraha haga o biarume tí hondowa ogodagua tini laga laga bialu lalu, Tíore Yuda wali agalibi Isaraele wali agalibi ti bayale kagobi dege bayale halimulo hameledema laga bulebira. Ani lolebirago ai tígua gi nahe howa hongo ho halimu, laya lene.
ZEC 8:14 Anduane Homogo Hongo Haiheore kago ibugua lalu, Bamba tínaga mamalirume i̱ mo keba hayagola i̱naga miniha mo iriari bulene manda nabi howa i̱na ti mo ko holene manda birudagua ti mo ko halu bo wahai haru.
ZEC 8:15 Anigo áyu Yarusalemebi Yuda bibahendebi mo bayale hai hole manda manda bu kogoni. Anidagua buleberogo ai tí gi nahe hongo ho holene nga.
ZEC 8:16 Ani howa tígua bialu holene ngago ogo, Mendeali kagohondo bi henenego hangu laabo holene nga. Godi lole bi hale halu howa tiga tiga kirabalinaga hanuni howa mbirago ibu bi manda bu yu haabo nahelo abale mo tiga bulene nga.
ZEC 8:17 Wali agali mende karu mo ko holene mitangi nabi holene nga. Tígua godi lole pu howa ke̱ howa nalalimu. Bi ke̱ howa lolenebi godi lalu howa tiga tiga ndo mendeali mo hondo howa lolenebi keba halu guraga bulenebi uruni aleru bibahende i̱na hame naleore kogoni, laya lene.
ZEC 8:18 Anduane Homogo Hongo Haiheore kago ibugua Segaraiahondo bi mende lamini.
ZEC 8:19 Ibugua lalu, Tígua ege maneru dauniru kaneru piniru tagira ibugu biragola ege uruninaga horo mbiru mbirungi tíha genda tagira ibiyago mitangi howa tí tomo nane haga wirimigo. Ai mani horo uruni Yuda wali agali tínaga horo tíni mo ngoaiho howa turu hagabu holene mbira wia aribia holebira. Ani bu holeberemigo mitangi bialu áyu howa tígua bi henene lolenegobi wali agali mende kago baba turu hagabu hangu holenegobi manda bialu gubalini ho halimu, lalu lamini.
ZEC 8:20 Anduane Homogo Hongo Haiheore kago ibugua laabo halu lalu, Mani howa wali agali tano dewaore bu ngaruha howa Yarusaleme íbu ngoai holebira.
ZEC 8:21 Wali agali tano mbiraha haga karu tigua wali agali tano mendeha haga karuhondo ogodagua lalu, Iname Anduane Homogo Hongo Haiheore kago mitangi bialu lotu lalu ibuhondo ina biamogo bia lole Yarusaleme poromago tíbi nde ina haru mandagi maibidaba, laga bulebira.
ZEC 8:22 Wali agali dewaore hongohe dindi timbuni tara tara ngaruha howa Yarusalemeha ibuwa tigua Anduane Homogo Hongo Haiheore kago mitangi bialu lotu lalu ibuhondo ina biamogo bibe lole ibugu bulebira.
ZEC 8:23 Horo ogoningi hameigini dindi tara tara ngaruha howa agali pirali ibalu tigua Yudali mbira kago minu yania howa ibuhondo lalu, Ngode Datagaliwabe ibu tí Yuda wali agali baba ka layane hale harima. Ani hale howa inabi nde tí baba ho mbiraore hoa biragonaga ibirima, lolebira lene.
ZEC 9:1 Anduane Homogo ibugua Segaraiaha howa mbiwia halu bi au laya. Anduane Homogohanda dindi mbira mini Hadaraga ngagobi Damasagasa tano ngagobi hondowa ti pani mule manda manda bu ngelowa hondo ka. Ani ngelowa Isaraele hameigini dindi tara taraha bu karubi ti Anduane Homogohanda pani agi mirabe hondole handayaho ka.
ZEC 9:2 Ani hondo howa dindi Hadaraga ogoniha dege dindi emene mbira mini Hamada ngagobi Taia tanobi Saidono tanobi wali agali dindi uruniha bu karume Anduane Homogohanda tihondo pani agi mirabe hondole handayaho holebira. Taia wali agali Saidono wali agalibi tinaga mini manda bogarubi mugube taratara ngaru ngelowa dege tibi Anduane Homogohanda handayaho holebira.
ZEC 9:3 Taia tano ogoni ege paberu bu mabubi hongohe mbira nga. Tigua ngolo silibaru dewaore dindini abalu wiame kadagua wu kagoni.
ZEC 9:4 Ani bidagoyu Anduane Homogohanda mbirale uruni bibahende mo wahai holebira. Ibugua Taia wali agalinaga mbirale ngaru bibahende iba solowara bedagoha mo bape hai halu tinaga waitigime tano ngago bo heda hai helo helolebira.
ZEC 9:5 Wali agali Asagelono tanoha bu karume mbirale uruni birago hondowa ti gi timbuniore ho holebira. Mani tinaga tanobi bo heda dege haragola tano ogoniha wali agali mbira naholebira. Gasa tanoha wali agali bu karu tiguabi nde mbirale uruni birago hondowa ti tandaga timbuniore holebira. Ani bialu tinaga kinibi nde homolebira. Egerono tano wali agali tiguabi nde mbirale uruni birago handaya ho karia mani tiniha genda uruni ale dege tagira ibulebira. Tigua mitangi bialu Taia wali agali bu karume ti biamogo bulubadago manda bialu mini dunubia ho henego ai ereba holebira.
ZEC 9:6 Wali agali dindi tara tara bu ngaruha howa ibugu bialu Asadodo tanoha dege íbu holebira. Anduane Homogohanda lalu, Pilidiali uruni mine hagaore bu kago i̱na ti mo dindiha halu bope holebero.
ZEC 9:7 Bope howa tigua Isaraele wali agalime ilili biaga mana ngago talialu nogo egaru darama bedaore nanaga howa Yuda wali agalirume tomo nolenebi nanolenebi mana biagadagua tibi nde anidagua bulebira. Ani bu howa Pilidia wali agali yu wahene emene hangu hearu ti i̱naga wali agali karuha hatago howa ti Yuda hameigini aria dege holebira. Bamba Yabusu hameiginime i̱naga waneigini baba hamaga halu ho mbiraore henedagua Egerono wali agali karu tibi i̱naga wali agali baba ho mbiraore holebira.
ZEC 9:8 I̱naga dindi i̱nime handaya ho kogola ami agali bu karume dindi ogoniha pu íbu bialu holene nawulebira. I̱naga wali agaliru ti tandaga nalu henego manda buwa marume ti lone mo ko halu bope holilono i̱nime handayaho haabo holebero, laya lene.
ZEC 9:9 Saiono tano wali agaliru-o turu hadaba. Yarusalemeni kamiru-o turu halu bi hongo howa ladaga halu hadaba. Tínaga kini tí kamiria o ibiragonigo de handadaba. Ibugua ibunaga waitigiru bope howa ibu mini lene timbuniore kagoyu ibuninaga mini mo yaraga nahaga howa ibu mini mo dindiha halu nogo dongi mbirani biralu ibiragoni. Nogo dongi hungubalua mbirani biralu ibiragoni.
ZEC 9:10 Anduane Homogohanda laabo halu bi ogodagua laya. Wai bu piaga nogo hosime gili laga karisiru i̱na mo wahai holebero. Wai biaganaga nogo hosi Yarusalemeni karubi Isaraele dindiha nahelo i̱na mo wahai holebero. Tinaga wai biagane danda yu karu bibahendeore podo wahai holebero. Tínaga kini ogoni ibugua hameigini tara tara dindi bibahendeha bu karu wai nabilo mo palia hai halu turu hagabu bayale helo helolebira. Kini ibunime dindi haru holobadagoni solowara iba ange mende mendehayagibi bibahende handame howa haru holebira. Dindi timbuniore Iba Yuberedisi poragoha pu bolangua halu amuraore dindi wiamaro bidaruha heba haru haame holebira, lene.
ZEC 9:11 Anduane Homogohanda lalu, Yuda tí baba habo nalolene bi mbira i̱na lo wirugo tínaga mamalirume bulumagaru bo loma biyarunaga darama pugulalu piyarume habo nalolene bi ogoni lowirugo mo hongo haya. Ani biyagome i̱na tí dindi mendeha tagira pialu pobe nahe garabayaore kamiria gololebero. Gundu uliha biruwa tagira pobe naheore wiagoha iba noa halu hége lebola howa tongolalu kamiria golope haga bulebero.
ZEC 9:12 I̱na ani buleberogo tí mini dunubia hodai bialu i̱ andaneha hole tíni dalu wiyadagoha daibu halimu. Tí ani birimiyagua bayale holeberemi. Tí genda timbuniore yu harimigonaga bi ogodagua laro. I̱na tínaga genda uruni mo wahai halu tí biamogo timbuniore bolangua howa bulebero.
ZEC 9:13 I̱na Girigiali karu baba wai bule Yudali karu mo danda halu Isaraeleali karu mo timu halu buwa wai bulebero. Yarusalemeali karu wai biaga mo ayu tibu ne gadeleore ngaligobi helalu urunime i̱na Girigiali karu baba wai bulebero, lalu Anduane Homogohanda lene.
ZEC 9:14 Anduane Homogohanda ibunaga wali agali karuha deme hendeneore hapani howa ibugua danda timu tegelalu waitigi kagoha bo pelalu ibunaga timuru hari daba ale bima wigiwaga lalu abale polebira. Anduane Homogo Bibahende Haru Haame Ho Haga kago ibugua mbelo mini biguli pulolebira. Unurahayagi howa puyabu hongoheru iba dalu heba ibulebira.
ZEC 9:15 Anduane Homogo Hongo Haiheore kagome ibunaga wali agali mamage howa baya hangu handayaho holebira. Handayaho halu tigua tinaga waitigi karu bibahende bo hengedai holebira. Tigua wai huaro laraha lulu iba no howa laradagua hongo howa lama pialu tinaga waitigiru bo payapaya biai holebira. Waitigirunaga darama pelolebira. Tinaga darama ogoni lomabu delaga dabuni mbirale bo mialu darama hambuwa odope hagadagua bulebira.
ZEC 9:16 Horo ogoningi nogo sibi haru hagame ibunaga sibiru nogo gabuame balu nole ibiragola pele miagadagua Anduane Homogohanda ibunaga wali agali pele mialu haru daibulebira. Kininaga mandani ege to̱le̱ ngarale tara tararume ngiringaralo wiagadagua ti Anduane Homogonaga dindini bayale holebira.
ZEC 9:17 Dindi ogoni nde baya taraore abi wulubada. Wandari igiri daliaheru nde ti dindi bayale ogoniha howa widiru waini iba bayale ngaru nalu howa bayaleore hongo howa anda haga bulebira, lalu Anduane Homogo ibugua Segaraiaha howa mbiwia halu lene.
ZEC 10:1 Tínaga mabuha tomo hengedemiru anda holene tu haragola Anduane Homogohanda iba dalu ibilelo ibuhondo ibila lalimu. Anduane Homogohanda hari beraliba ibilaragola ogoniha howa iba dalu ibira haga. Anidagua biragome tomo mbiraleru wali agali bibahendenaga anda hai haga.
ZEC 10:2 Wali agali marume mbirale dama mitangi bialu gime wabini ngaruhondobi maru halaga biaga karuhondobi mani ogoale bulebira lalu langi laga biaga. Ani bialu karia urunime ke̱ howa bi tindule dege lalu ladai biaga. Marume emaga hendenegonaga irane latagi howa bi dewa ke̱ halu laga. Ani lalu tí bayale holeberemi laragola ogoni henene ndo laragome tí genda yu haabo haga. Wali agali ani genda yu howa nogo sibi haru haga nahedagola sibiru ti pugupugu bialu hagahaga biagadagua bialu haga. Ti haru haga mbira nahedagola ti genda yu haabo haga.
ZEC 10:3 Anduane Homogohanda lalu, Dindi taralime i̱naga wali agali haru kagonaga keba timbuni ho kogo i̱na ti pani mialu bolebero. Yudali ti i̱naga wali agaliore kago i̱ Anduane Homogo Hongo Haiheore kogonigo i̱na ti baya hangu handayaho holebero. Yudali ti i̱naga wai biaga nogo hosi hongohe kaligobi holebira.
ZEC 10:4 Yuda hameigini uruniha howa kinirubi haru haga agali haguanerubi ami agali haru bamba hagarubi tagira íbu hai howa tigua i̱naga wali agali bayuwa haru holebira.
ZEC 10:5 Ani howa Yuda wali agali tigua tinaga waitigiru balu wayali holebira. Tigua ami agalirume wai bialu tinaga waitigiru tanonaga hariga piaga waru ngagoria bo hengedo wahene ngaligobi ngelolebira. Anduane Homogo ibuni ti heba howa hongo karulape miragola Yudali tigua tinaga waitigi nogo hosini biralu wai ibiraru bibahende bo hilo wahaiore haga bulebira.
ZEC 10:6 Anduane Homogohanda lalu, I̱na Yuda wali agaliru mo hongoho helalu Isaraele wali agaliru haru dai bulebero. Tiore dara timbuniho kogodago i̱na ti bibahendeore tininaga dindi wiyagoria lone helo haru dai biai holebero. I̱na ani bu heledogola ti bo batagi hene ale ndo holebira. I̱ Anduane Homogo tinaga Ngode Datagaliwabeore kogonigo i̱na tinaga bi lararu hale haga bulebero.
ZEC 10:7 Ainde Isaraelealiru ti hongohe ami agali ale howa agalime waini iba nowa turu hagagobi turu timbuni hai holebira. Tinaga aguanene mani holebirarume o binidagoni hondowa Anduane Homogohanda tinaga mamaliru biamogo timbuni ogoni biyadago mitangi bialu turu timbuniho holebira.
ZEC 10:8 I̱na i̱naga wali agaliru bibahende olalu mo mogobu helolebero. I̱na ti haru dai bialu wali agali dewaore abale hagadagua dege mo dewa ho helolebero.
ZEC 10:9 I̱na ti dindi tara tara kaundia wiaruha garabaya bu helarugoyu tigua dindi kaundia uruniha howa i̱ni kogo embeda nahe mitangi biaabo holebira. Wali agali uruni tinaga waneigini heba bayale howa ti bibahende mo mogo bialu tininaga dindi tene ngagoria dai bulebira.
ZEC 10:10 Wali agali Iyibi dindiha pu karubi Asiria dindiha pu karubi bibahende i̱na haru dai biai holebero. Haru dai buwa i̱na tininaga dindiore ngagoria helolebero. I̱na tinaga dindi mo yangalalu Gileada dindi ngagohabi Lebanono dindi ngagohabi wu dogola amu helolebero. Dindi uruniha wali agali ho to̱lowa holebira.
ZEC 10:11 Tigua mani genda yu howa iba li aleme wiapai hayagua Anduane Homogo i̱na ti biamogo bialu ibame namu nalelo bope holebero. Iba Naili porago hundiradagua bialu tinaga genda i̱na mo ereba holebero Asiriali bu karunaga mine holenego i̱na bo ibira dege holebero. Iyibiali tinaga hongo timbuni holenebi mo ereba holebero.
ZEC 10:12 I̱na i̱naga wali agaliru bayale helonaga mo hongo holebero. Tigua i̱ni andaneha haabo howa i̱naga mini yaraga halu bi mana lo ngadagua biaiore halu haabo holebira. I̱ Anduane Homogo i̱na bi o ledogoniore.
ZEC 11:1 Lebanono wali agaliru-o tínaga ira tamia bu karuni irame dai helo wahadaba.
ZEC 11:2 Ira tamia biaru podo ibira hai ho nga. Ira mini lene uruni podalu mo ko hai ho ngagoni. Ira guraya ale kamiru tígua dugu bia hadaba. Irabu wiago dibai hayadagonaga Basana dindiha ira mini oga kamiru tíguabi nde dugu bia hadaba.
ZEC 11:3 Haru haga bu karu tinaga hongo holene biba halu mini lene timbuni ala henego ereba hayago dugu hongo howa biaruago hale hadaba. Iba Yodana angeha budi ale gabua timbuni mini laiono ti irabuha ha do haga ngaru dibu wahai harago ha do holene taya bialu ngororo lama ibaruago hale hadaba.
ZEC 11:4 Anduane Homogo i̱naga Ngode Datagaliwabehanda i̱hondo ogodagua laya. Nogo sibi anduaneme sibiru bole biagadagua í̠na ani bialu habe.
ZEC 11:5 Nogo sibi anduane karume sibi baramago mana liahe ndo berema lomanda biaga. Tigua sibi bayago podalu muni muwa lalu, Ina muni dewawi kamagonigo Anduane Homogo kagonaga mini yaraga hama, laga ka. Nogo sibi uruninaga haru haga karu tiguabi nde sibiru dara nahaga ka.
ZEC 11:6 Anduane Homogohanda lalu, Wali agali dindini bu karu ti i̱na dara naholebero. I̱na ti bibahende hangu hangu tininaga kini giha minu yahaga bulebero. Ani berogola nogo sibi anduaneme sibiru bagadagua haru haga karume ti mo ko haga bialu kagola i̱na ti biamogo nabulebero, laya.
ZEC 11:7 Nogo sibi bolene bu karunaga haru haga i̱ harugoni. I̱na nogo sibi haru haganaga halimbu kira yu harugoni. Halimbu mendego mini Dara Holene Irane Nawini Dara Holene. Mendego mini Mandagi Mo Mbiraore Holene. I̱na halimbu kira ogonilabo yu howa i̱naga nogo sibiru haru harugoni.
ZEC 11:8 Haru haga agali tebirali i̱ heba biabe mandagi biaga hearume i̱ handabe manga hayagola i̱na ti ege mbirago dege andaneha howa bo duguaru.
ZEC 11:9 Ani bialu i̱na nogo sibi urunihondo lalu, I̱ tínaga haru haga naholebero. Nogo sibi homelo dabo helene karu ti homelo. Maru mo ko helonaga dabo helene karu tibi mo ko helo. Maru yu wahene karu tibi nde tini bo wahagahaga bilo, larugoni.
ZEC 11:10 Ani lowa i̱na halimbu mendego mini Dara Holene Irane Nawini Dara Holene laga biago podaki haru. Ani podowa hameigini dindi tara taraha karu baba Anduane Homogohanda habo nalolene bi lowinigo i̱na habo larugoni.
ZEC 11:11 Ani birugoningi habo nalolene bi ogoni biba hayagoni. Agali maru nogo sibi muni taguialu hinulene yolo bialu hayaru tigua i̱ hondowa mandabu handalu hearia Anduane Homogohanda mbirale i̱nime bialu harugonaga bi langiragoni lo manda biya.
ZEC 11:12 Ani buwa i̱na tihondo lamialu, Tígua i̱hondo yolo nguleyagua nde ngialu nanguleyagua nde wahalu tínime hame ledamidagua bilimu, laru. Ani larugola tigua i̱na biabe birugonaga yolo muni siliba pira tebira (30) hangu ngiya.
ZEC 11:13 Ani biyagola Anduane Homogohanda i̱hondo langialu lalu, Muni ogoni mo yalu agali dindime mbirale tara tara wabiaga kagohondo mo mibe, laya. Ani laya handala muni ogoni agali bu hearume i̱ habane nabulene kabe toba howa i̱ yolo ngiyago yalu puwa i̱na Anduane Homogonaga andaha agali mbirale wabiaga heagohondo miru.
ZEC 11:14 Ani buwa i̱na halimbu mendego mini Mandagi Mo Mbiraore Holene laga biago podaki harugola Isaraele Yudala hameigini mandagi ndo hangu hangu paligi paligi bu hene.
ZEC 11:15 Ani biwagola Anduane Homogo ibugua i̱hondo langialu lalu, Ai í̠ nogo sibi haru haga halu mende hole habe. Ani howa sibi haru haga agali bayale ndo habane nabulene ale hole habe.
ZEC 11:16 I̱na i̱naga wali agali nogo sibi ale karu haru helonaga agali mbira dabo heledogoni. Ani helarugola ibugua i̱naga wali agali uruni bayuwa haru nahaga. Ibugua sibi ti ko haragola biamogo nabiagabi nogo sibi pu ereba hararu olalu taya nabiagabi sibinaga dere bidaru dabi helo kabu nabiagabi ti bayale helonaga tomo namiagabi haga. Ani nabiaga howa ibugua sibi haba tigi karu balu mbirini damenego nai halu gi hondone ge hondonebi budalu mbirini karu bibahende nai holenaga ani biaga holebira.
ZEC 11:17 Nogo sibi haru haga agali ogoni ibugua nogo sibi haru hayaru bibahende yu wahai hayagonaga ibuni mo ko holeneore wulebira. Ibu waitigirume ibalu ibunaga hongo bope hai holebira. Anidagua biragola ibunaga gi homalu ibunaga de tiga ko halu ndibulo wahene holebira, lalu Anduane Homogohanda laya, lene.
ZEC 12:1 Anduane Homogohanda dindi haribi wabialu wali agali bibahende bu kamarunaga holene ngiaga kago ibugua Isaraele wali agali karunaga mbiwia halu bi ogodagua laya. Ibugua lalu,
ZEC 12:2 I̱na Yarusaleme waini iba gabo beha hambu berelenego ale helolebero. Ani heledogola hameigini tara tara dindi Yarusaleme kawareni bu karume ibuwa waini iba be biagoha howa naradagua biragola tini lulu iba nowa luluyu hagadagua holebira. Waitigi o ibirarume Yarusaleme ho hagira bialu Yuda dindiha tano maru ngarubi heba ho hagira biai holebira.
ZEC 12:3 Horo ogoni tagira ibirangi i̱na Yarusaleme mo yaraga habe nahe ege to̱le̱ gendabi ale ngelolebero. Dindi bibahendeha wali agali hameigini tara tara paluyu pedarume mo mogo bialu Yarusaleme baba wai bule ibalu karia agalime ege to̱le̱ gendabi yaraga habe nahe wiagadagua ngagome tini mo koore howa pugu bulebira.
ZEC 12:4 Horo ogoningi i̱na waitigirunaga nogo hosiru mo gi hai harogola agali nogo hosini bedaru lulu yalu purogo lolebira. I̱na Yuda wali agali bayuwa handayaho howa waitigirunaga nogo hosi karunaga de mo ndibulai helolebero.
ZEC 12:5 Ani berogola Yuda hameigininaga agali haguane bu karu tigua mbirale uruni birago de hondowa tini dege dege laga laga bialu lalu, Anduane Homogo Hongo Haiheore Ngode Datagaliwabe kago ibugua ibunaga wali agali Yarusalemeha bu karuhondo hongo miaga kagoni, lolebira.
ZEC 12:6 Horo uruningi i̱na Yuda dindiha agali haguane bu karu ira hungu bibehe dangi yuni gaule alebi widi bogabinaga yuni gabuni ngagoria ira hungu abale kulu lalu hundia habe nahe dai haraligobi ti holebira. Ani howa tigua hameigini tara tara tinaga waitigi dindi kawareni palia para para bidaru bibahende bo wahai holebira. Ani biragola Yarusaleme tano ibuni ngagoria bayale wiaabo holebira.
ZEC 12:7 Anduane Homogo i̱nime Yudanaga ami agali bu karu tigua wai bialu wayali howa helolebero. Ani berogome ti mini lene timbuni Debidi aguanene hama ibinirubi Yarusalemeali hama ibinirubi tigua Yuda maru uruni mini lene bolangua naholebira.
ZEC 12:8 Horo ogoningi Anduane Homogo i̱na wali agali Yarusalemeha karu i̱nime hapai halu humbi haradagua bulebira. I̱na agali maru wai bulene hongo nahe bu karu mo hongo harogola tibi nde wai biaga hongohe howa pari wayali Kini Debidi ale dege holebira. Ani kagola Debidi aguanene mani holebirarume ti nde Anduane Homogonaga dahuliyali ale howa tigua Yarusalemeni karu haru halu Ngode Datagaliwabe ibugua haru hagadagua haru holebira.
ZEC 12:9 Horo uruningi i̱na hameigini dindi tara tarani howa Yarusaleme baba wai bule ibiraru mo ko halu bo wahai holebero, laya lene.
ZEC 12:10 Anduane Homogo ibugua laabo halu lalu, I̱na Debidi aguanene bu karubi Yarusaleme wali agali bu karubi tiha dara howa biamogo bulenebi i̱nihondo bi loa holenebi to̱lai ho helolebero. Tigua agali mbira tinime bo wiyagoria ngago hondowa agali ibu igini mbiraore hangu henego homaragola dugu hongo howa bialu hagadagua tigua bialu holebira. Agalime ibu igini wahene hono winigo homaragola dugu timbuniore biagadagua tiguabi ani bulebira.
ZEC 12:11 Ani bialu horo uruningi Yarusalemeha dugu timbuniore bulebirago dama mitangi bialu bi pupu wule gime wabini mini Hadadarimononaga dugu dindi tigabi Megido ngagoriani dugu biagadagua bialu holebira.
ZEC 12:12 Wali agali bibahende tini damenema andaga hangu hangu padadagua dugu bigi bigi bialu holebira. Debidi aguanene bu karu ti onerubi Nadana aguanene bu karu ti onerubi
ZEC 12:13 Libai aria bu karu ti onerubi Simei aria bu karu ti onerubi
ZEC 12:14 maru hama ibinirunaga aguanene bu karu ti onerubi ti bibahendeme dugu bialu holebira. Anda mbira mbiraha paliaga bidadagua mo mogo buwa wali ti tini kadagua handa edene bu howa dugu bialu agali nde tini hangu anda mendeha bu howa dugu bialu holebira, lalu Anduane Homogohanda Segaraiaha howa mbiwia halu lene.
ZEC 13:1 Anduane Homogo Hongo Haiheore kagome lalu, Horo uruni tagira ibirangi iba tara mbira dugualu piagobudaga halu helolebero. Wali agali Debidi aguanene bu karubi wali agali maru Yarusalemeni haga bu karubi tigua mana ko timbuniore biyarubi dama mitangi bialu gime wabini wiaruhondo bi pupu wiyarubi iba duguaraga haragonime mana ko uruni biyago bibahende domo wahai holebira, laya lene.
ZEC 13:2 Anduane Homogohanda laabo halu lalu, Horo uruniangi mbirale dama mitangi bialu bi pupu wule gime wabini dindi bibahendeha ngaru i̱na mo wahai harogola mbiralime uruni mitangi bu haabo nahe embedaho wahaiore holebira. Ani bialu ke̱ howa mbiwia halu bi mana latagi haga bu karu bibahende biba hai helolebero. Wali agalinaga mini ko ngaru mo wahai harogola tigua dama mitangi bialu bi pupu wule gime wabini ngaruhondo bi pupu wua nahe wahai holebira.
ZEC 13:3 Ani kagola mbiralime ke̱ howa mbiwia halu bi mana latagi haabo hayagua ibu aba ai̱yalame ibuhondo lalu, Í̠na bi ogoni Anduane Homogonaga bi larogo lalu henene ndo tindule lalu í̠ninaga bi hangu laregome í̠ homolebere, lolebira. Agali o biagome ke̱ howa mbiwia halu ibuninaga bi latagi hayagua nde ibuni aba ai̱yalame ibu homelo nabime nogoba halu bo waholebira.
ZEC 13:4 Horo uruningi bi mana latagi haga agali mbiragome de gandeba handarago latagi hole taga holebira. Anduane Homogonaga bi mana latagi hagame aga karulo hagadagua ibugua wali agali mo hondo holenaga aga ogoni karu nale holebira.
ZEC 13:5 Agali ogoni ibugua lalu, I̱ Anduane Homogonaga bi mana latagi haga agali ndo i̱ mabuha biabe bialu haruli. I̱ igiri emeneni howa mabu biabe biaabo haga hene kogoni, laga bulebira.
ZEC 13:6 Ani laragola mbiralime ibuhondo hale halu lalu, Í̠naga galu kunini motudu ngagoni agua binibe, lalu hale hayagua ibugua tihondo ke̱ howa ladai bialu lalu, I̱ nenege mbira andaga pu hewaria nogoba henego motudu ogoni, lolebira, laya lene.
ZEC 13:7 Anduane Homogo Hongo Haiheore kago ibugua lalu, Wai biagane ayu tibu ne gadele-o í̠ heya. Í̠ heyalu agali i̱naga biabe bia halu haru haga kago babe. Nogo sibi bu karu ibida purogo lelo nogo sibi haru haga kago bo wahabe. I̱na i̱naga wali agaliru baba wai bulebero.
ZEC 13:8 Dindi ogoha wali agali bu karuni halu tebira mo tale buwa haluki kago bo hilo wahai halu tebonego yu waholebero.
ZEC 13:9 I̱na wali agali halu tebone talebu helarugo tiha ko mbira ngabe hondole ngolo silibaru bayale dodo mbira para nahe ngelonaga irani delaradagua bulebero. I̱na ani bu helowa tigua i̱ mini olaragola i̱na tinaga bi lararu hale holebero. Hale howa i̱na tihondo lamialu lalu, Tí i̱naga wali agaliore kamigoni, lolebero. Tigua nde, Í̠ Anduane Homogo inanaga Ngode Datagaliwabeore kegoni, lalu latagi holebira, lene.
ZEC 14:1 Anduane Homogonaga horo mbira tagira ibulebira. Horo ogoni tagira ibirangi Yarusaleme wali agali tínaga muni mbirale ngamiruni waitigime ibalu mo yulebira. Mo yuwa tíni handaya ho kamiore dege tíninaga deni howa talebu yagayaga bulebira.
ZEC 14:2 Anduane Homogohanda dindi bibahendeha howa hameigini tara tara haru ibalu ti Yarusaleme baba wai bulebira. Tigua Yarusaleme bope howa tí andagaha mbirale ngamiru bibahende mo yai halu wali bedaru minade halu kayu yaga bialu holebira. Wali agali karu bibahende halu ki mo tale buwa wabuni mbirago garabaya haru pialu wabuni mendego Yarusalemeni helo waholebira.
ZEC 14:3 Ani biragola Anduane Homogo ibugua ala wai birangi biaga wiyadagua dindi bibahendeha howa ibiyaru uruni baba wai bulebira.
ZEC 14:4 Horo uruni tagira ibirangi Anduane Homogo ibuni Yarusaleme tano kaware ni tagira ibiragohayagi Hari Olibe nene ngagoria holebira. Ani kagola Hari Olibe kago hanuni kambuluki howa amura haga haga biragola dindi ulini panda panda ona wu yu polebira. Hari hanuni kambuluki haragola mendego uyurayagi ha uyu halu mendego unurayagi ha unu holebira.
ZEC 14:5 Ani kagola dindi tigabi panda panda hanuni wupe kagoria tí ogonidagua pialu ibida yo pialu poleberemi. Bamba Yuda dindiha Kini Usia heangi dindi dumbirumbi biyagola tínaga mamaliru ibida penedagua áyu dindi ulini panda panda ogoni wu yu pialu dindi mini Asala mbira ngagoria tagira pedago tí ogonidagua puabo holeberemi. Ani poramigola horo ogoningi Anduane Homogo i̱naga Ngode Datagaliwabe kagome ibunaga dahuliyaliru haru hai halu ibulebira.
ZEC 14:6 Ani bialu horo uruni ibiragola dagare bulenebi kewaro ibira holenebi nawulebira.
ZEC 14:7 Alendohayagi aruma naholebira. Anidagua biragola horombe mbiragada lolene nawi wá haabo holebira. Mbirale uruni tagira ibulene ogoangilo Anduane Homogo ibuni hangu manda bu ka.
ZEC 14:8 Horo ogoningi iba gagahe bayaleore Yarusalemeha howa dugualu pialu holebira. Iba gene kira pu tale bialu gene mende iba kuyama mini Iba Homene bedagoha pupe halu mendego pialu solowara timbuni Medidereniana bedagoha pu mogo bulebira. Iba ogonime hundia nabi dalungibi gaea timbuni birangibi duguaho wialu pialu haabo holebira.
ZEC 14:9 Ani bialu Anduane Homogo ibugua dindi bibahendenaga handameho haga kini holebira. Wali agali bibahendeoreme ibu Anduane Homogoore ka lowa ibunaga mini mbiraore hangu lalu ibu hanguhondo mitangi bialu lotu lalu holebira.
ZEC 14:10 Yarusalemeni dindi ngago dondole tigabiore Yarusalemenaga tano abene uyurayagi Geba tano ngagoria howa wu yu pialu unurayagi Limono tano ngagoria tagira polebira. Yarusaleme tano ibu dege hari hombeneni wiaabo holebira. Yarusaleme tanonaga pabe dege ala pene wiyago wiaabo holebira. Tanonaga pabe panga mini Beniyamininaga Panga laga ngagoria howa pialu pabe panga mini Paulaga kagoria panga ala dugu wini ngagoria tagira polebira. Amuna pabe neneni mamage haga agalinaga anda daliga bini mini Hananelenaga laga kagoria howa pialu kininaga waini iba wabiaga gerebi lini pingidaga ege to̱le̱ uli ngagoria tagira polebira.
ZEC 14:11 Ani pedagola Yarusaleme wali agali tiha mo ko holene mbira nawi howa ti gi nahe bayale haabo holebira.
ZEC 14:12 Dindi bibahendeni hameigini tara tara karu Yarusaleme wali agali baba wai biaga bu karuha Anduane Homogohanda warago ko taraore ibilolebira. Warago ko ogonime ogodagua bulebira. Wali agali tini heyu kaore tinaga de hégeru tingini bibahende togo biai holebira.
ZEC 14:13 Anidagua bialu Anduane Homogohanda wali agali uruni mo luluya holebira. Ani mo luluya ho heledagola tini dege dege mandagi karu minu yania halu bo wahaga bulebira.
ZEC 14:14 Ani birangi Yudali bu karume Yarusaleme wali agali bolilono mo wialu wai bulebira. Ani bialu tigua hameigini dindi tara tara ngaruha wali agali bu karunaga muni ngolo silibabi aga bayale ngarubi mo yai holebira.
ZEC 14:15 Waitiginaga balai anda bu kagoria nogo hosiru kameleru dongiru bibahende yani timbuni biame halu homai holebira.
ZEC 14:16 Yudali tinaga waitigi bu karu bo wahai kagola mani yu wahene emene karu tigua mali bibahendeni Yarusaleme ibaabo halu holebira. Anduane Homogo Hongo Haiheore kago ibuni tinaga kini ka lowa tigua ibuhondo mitangi bialu lotu lalu holebira. Ani howa tigua Anda Nemandaha Palu Holene Horo tagira ibirangi bulene mana wini ngadagua talialu bialu holebira.
ZEC 14:17 Ani bialu hameigini tara tara marume dindi mbiraha howa Anduane Homogo Hongo Haiheore kago ibu inanaga kini kago mitangi bialu lotu lole naibaga heagua tinaga dindiha iba dalu naibulebira.
ZEC 14:18 Anigo Iyibi wali agalirume Anda Nemandaha Palu Holene Horo tagira ibirangi bulene mana wini ngadagua Anduane Homogo mitangi bialu lotu lole naibiyagua dindi maru ngaruha wali agali lotu lole naibaga bu hearuha mo ko helonaga ibugua warago ko ibilagadagua Iyibi wali agali tihabi nde ani ibilolebira.
ZEC 14:19 Tigua Anduane Homogo mitangi bialu lotu ogoni labe manga hayagua Iyibi wali agalibi hameigini tara tara dindi bibahendeha bu karubi bibahendeore pani tandaga mbiraore ogoni ale dege nai holebira.
ZEC 14:20 Ani birangi tinaga nogo hosi mani mbelo emene mbira pongobia ho ngaruni bi ogo gilibu wulebira. Ogo Anduane Homogonaga loma bia ho nga, lalu gilibu wulebira. Anduane Homogonaga andaha todobene be bu ngarubi dunini dege wialu ibuninagaore ndisi be loma bininaga nogo darama hambu wiaga timbuni lomabu delaga dabuni ngaligobi dege wulebira.
ZEC 14:21 Ani bialu Yarusalemeha Yuda dindi bibahendehabi todobene be damene ti andagaha ngaru bibahendeore Anduane Homogo Hongo Haiheore kago ibunaga lomabu wiai holebira. Mani howa wali agalime tinaga nogo sibi bulumagaru bo lomabu miragola nogo mbiriniru todobene be tininaga ndo Anduane Homogonaga loma bia hene uruniha dawalebira. Horo ogoningi howa mbiralime mbirale yolo bilo Anduane Homogonaga andaha yalu polene nawulebira, lalu Anduane Homogohanda Segaraiaha howa bi ogoni mbiwia halu latagi hene.
MAL 1:1 Anduane Homogohanda ibunaga bi ogo Isaraele wali agali lamilo Malagaihondo lamini.
MAL 1:2 Anduane Homogohanda ibunaga wali agalihondo lalu, I̱na tí gubalini haho wiaabo ho harugoni, lene. Ani layagola tigua ladai bialu lalu, Í̠na ina gubalini haridago agini walia haribe, lalu ladai bini. Ani layagola Anduane Homogohanda ladai bialu lalu, Iso Yagabala libu hamenela hayago i̱na Yagababi ibunaga aguanenebi gubalini halu,
MAL 1:3 Isobi ibunaga aguanenebi gubalini nahe harugoni. Iso ibu dalu bare ngarunaga mbirale mbira anda habe nahe ko kede pugubu ngeledogoni. Ibunaga dindiru nogo biango gabuaru ti hangu bu helo embera ibilo ngelo wa kogoni, lene.
MAL 1:4 Ani layago hondowa Iso aguanene Idomo hameigini tigua lalu, Inanaga tano dewa bu hayaru gialo bagabu wahayagodago lone daibu bimi̱ya, loleberemi. Ani lowa lone mo ngoai howa birimiyaguabi nde Anduane Homogo ibugua ladai bialu, Tígua ani bia handadaba. Bidamigola lone gialo waholiya, ladai bulebira. Ladai bialu lalu wali agali maru karume, Dindi ogoni mini dindi ko, lalu, Hameigini o padagoni Anduane Homogohanda handabe manga halu hondo wahene, lolebira, lalu Anduane Homogohanda ani ladai bulebira.
MAL 1:5 Ogonidaguaore biraria Isaraele wali agali tininaga deoreme hondolebira. Hondowa lalu, Anduane Homogo ibu Isaraele hameiginihondo hangu ndo hameigini maru dindi taraha karuhondobi hongoho dege harada, lalu lolebira.
MAL 1:6 Anduane Homogo Hongo Haiheore kagome loma binigo mo miagaruhondo lalu, Waneiginime ti aba ka manda biagadaguabi biabe bia hagarume ti anduane ka manda biagadaguabi i̱ tínaga Aba harugo tígua i̱naga mini mo yaraga naharamiligo aginagabe. I̱ tínaga Anduane harugo tígua i̱ hondowa mogo nale kamigo aginagabe. Loma binigo mo miagaru-o tíguaore i̱naga mini mo yo handalu kamigo howa, Ina í̠naga mini agua mo yo handarimayabe, lalu kamibe.
MAL 1:7 O agua birimi lalu langero.Tomo ko mebia hene wiaru í̠ ngerama lowa i̱naga lomabu miagane dagiani bu wirimigome i̱ mo yo handarimigoni. Ani larogola tígua, Iname í̠naga tomo agua mebia harimayabe, loleberemi. O abini Anduane Homogonaga lomabu miagane dagiani tomo ta nabi wulene nga manda buwa tí miniha mo yo handarimigome mebia harimi laro.
MAL 1:8 Nogo ega de koheru tingini koheru ge ibira heneru homabehe de mbomboleru yu ngoai howa i̱ ngeremigo ogoni ko ndo karulape beremalo manda bidamibe. Nogo ega i̱ o ngeremirunibi tínaga gabumane haguane kagohondo yupu milimu. Tínaga nogo ega urunibigo de hondowa ibugua tíhondo turu halu tígua mbirale mbira hale haramigola ngulebadago ngilo, lalu Anduane Homogohanda ani lene.
MAL 1:9 Ogonigo loma binigo mo miaga kamiru tígua Ngode Datagaliwabehondo bi lamialu, Inahondo turu halu bayale bibe, lalu lamilimu. Gi yobi ko ogonibi muwa ai Ngode Datagaliwabe í̠na ina biamogo bia laramigola ibugua hale halu tí biamogo bulebirabe.
MAL 1:10 Anduane Homogo Hongo Haiheore kagome lalu, I̱naga lomabu miagane dagiani ira bame dela holo bialu kamigo wahalimulo tí mbiragome i̱naga anda panga payaore nabira mandabu ko. I̱ tí baba turu nahe ko. Tígua mbirale i̱naga lalu yalu ibirimidaruni i̱ nayamulebero, lene.
MAL 1:11 Ni tagira ibiragoria karume i̱naga mini dege mo yaraga hama penego amu ni paliragoria karume mo yaraga ho maro biragoria ko. Dindi bibahendeha karume mbirale ira hagua ngabilo mini inisenesi i̱ nga holiya delalu nogo ega goaile mebia naheneru bo ngiraria ko. Hameigini o paluyu piaruaruni bibahendeme i̱naga mini daligaore lowa yaraga halu ani biaga ka, lene.
MAL 1:12 Ani biagago loma binigo mo miaga kamiru tígua i̱naga lomabu miagane dagia nagaloneda manda bialu tomoru ko tíni manga haramigo aleru i̱naga lalu lomabia haramigome tígua i̱ mo yo hondowaore kamigoni.
MAL 1:13 Anidagua larogola tígua ai ogoni erekuibidago wahabeheda lalu i̱hondo ngui yogo buleberemi. Nogo ega mbiralinaga heago tí bime hongo halu gingila mirimigo ogoni i̱ ngule lowa yalu eberemi. Marume kuduguru de mbombolo áyu dege tongolo mule ngaru i̱ ngule lowa mo yalu eberemili. Urunibi ngeremiruni hondowa i̱na tíhondo turu halu yamulebadalo manda bidamibe.
MAL 1:14 Nogo i̱naga lalu lomabiaho helene bayale biago ibu mo halu ko homo wahene biago i̱ mo aribia halu ngirago i̱naga gurunaga ogoni áyu homabe. I̱ ibu aleme mo yo handabe nahe handame haga kini gibiore dindi bibahendeni hameigini tara tara palu ngarume i̱ hondowa gi hai haga hene kogo, lalu Anduane Homogohanda ani lene.
MAL 2:1 Anduane Homogo Hongo Haiheore kagome loma binigo mo miagaruhondo lalu, Ai o larogo tígua bilimulonaga laro, lene.
MAL 2:2 Tígua beramigo i̱naga mini yaraga helo hangu bilimu. Tígua i̱na bi larogo hale halu nabirimiyagua nde i̱na tí ha holebero. Mbirale tí hanaho haga bidamigo i̱na mo ko haga bulebero. Tínaga pini i̱na minu tongo lolebero. Tínaga gelo minu habo lolebero ndo abale minu habo larugoni. Ani birugo irane tígua i̱naga bi larogo bu gubaliniha mo pe nahe mo yo hondowa bame dongone degeme hale halu kamigonaga.
MAL 2:3 Tínaga waneiginiru minu balu ti nogo kumburayubi i̱ bo ngirimirunaga ti to ngagoha tíninaga dengui ogoniha minu guyulebero. Ani bialu tínibi nogo ti to ngagoha halimulo minu helolebero.
MAL 2:4 Ani berogo hondowa i̱na tíhondo bilimu lalu laruyagua henene bulene winida manda buleberemi. I̱na loma binigo mo miaga Libai aguanene karu lamialu buleore lowa habo nalolenebi lo wirugo ereba naholebira, lalu lene.
MAL 2:5 I̱na tihondo habo nalolene bi lo wialu bulebero larugo ti dindini mbira mo ko nahe miniha dungulo holeberemi. Tigua i̱ hondowa gi helonaga i̱na tihondo bi ogobi lowiru. Horo odaruningi tigua i̱ hondowa gi halu mogo laya.
MAL 2:6 Tigua i̱ denibi ko mbira nabi i̱ baba girigura nabi bayaleore harima. Tini hangu mana bayale bia ndo maru ko bialu hearubi nabilo mana bayale buleneha haru dai biya.
MAL 2:7 Wali agalime Ngode Datagaliwabe bayuwa manda bilo lawai holenego loma binigo mo miaga tinaga biabe nga. Wali agalime i̱naga hame ledogo manda buleyagua loma binigo mo miaga ti Anduane Homogo Hongo Haiheore kagonaga bi yalu piaga kago wali agalime ibunaga ne harigaha howa latagi harago agi larabe hale holene nga, lalu lene.
MAL 2:8 Ani bulene winigo loma binigo mo miaga tí kamirume hariga tigatiga wiago ngelalu naleagoha pubagiho kami. Tígua mana lawai harimigome wali agali dewa ko bilo mo bia harimi. I̱na tíhondo habo nalolene bi lo wirugobi puguarimi.
MAL 2:9 Tígua i̱na hame ledodagua naberemili. Ani bialu tígua i̱naga wali agalihondo mana lawai halu howa maruhondo turu halu maruhondo manga haramili. Wali agali bibahendehondo ta nabi ogobi degedege naberemili. Ani beremiligonaga i̱na Isaraele wali agalime tí mo yo hendelo lalu tinaga ge waraha tí berelolebero, lalu Anduane Homogo Hongo Haiheore kagome lene.
MAL 2:10 Ina bibahende kamago Aba mbiraore hangu ndoyagoda. Ngode Datagaliwabe mbiraorehanda ina wabini ndoyagoda. Ani bini kamayagua nde habo nalolene bi inane lo wigi birimago puguaga bialu kamago aginagabe. Ani bialu Ngode Datagaliwabehanda inanaga mamali heba habo nalolene bi lowini wiago mebia halu mo yo handalu pugua dege bialu kamago aginagabe.
MAL 2:11 Yuda wali agalime Ngode Datagaliwabehondo bi lowinigo pugualu mana ko taraore Yarusalemenibi dindi bibahendenibi biame halu ka. Tigua Anduane Homogonaga anda ibu gubalini ho kago mebia haya. Yu agalimebi dindi tara wali tinaga damahondo bi pupu wiaga berearu dabu biya.
MAL 2:12 Mana ko urunibi biaga karu Anduane Homogohanda ne dugu waharadagua bilo. Ani biragola ti wali agali marume Anduane Homogo Hongo Haiheore kagonaga lomabia hene yu ngoai haradagua tigua nahelonaga ani dugu waholebiraore.
MAL 2:13 Ai tígua ko mendebi ogo beremili. Tígua mbirale lomabia hene yu ngoai haramigo Anduane Homogo ibu turu halu yamia nabiya. Nabiyagola tíni gendani deiba ibu dugu bia kiabu dugu bia bigi beremigoni. Deiba bondolopebe beremigome iba goroyane birama iraga haragome Anduane Homogonaga lomabu miagane dagia namu laragoni.
MAL 2:14 Ani nayamiragola ai aginaga nayami manga halu waharuadabe laramigoni. O waharuagoni irane tí igirini howa tí one pigane dabu birimingi tí onehondo bi lo wirimigo puguarimigonaga wahaya. Libu nde mini mbiraore halu pialu tí onehondo bi napugulene lo wirimiru puguarimi. Wali mende mitangi nahole lalu Ngode Datagaliwabe deni howa larimiru puguarimi.
MAL 2:15 Ngode Datagaliwabehanda í̠ í̠ onela libu tingini dininila mo mbiraore ndo hayagoda. Ibugua libu ogonidagua mo mbiraore hayago irane aginaga biyabe. O biyadagoni irane libu waneigini haragola ti Ngode Datagaliwabenaga waneigini henene helonaga bini. Anigo tí mbiralime ibu onehondo bi lowinigo pugulamini de hondo halimu.
MAL 2:16 Isaraele wali agalinaga Anduane Homogo Ngode Datagaliwabe kagome lalu, Onene agalinila wahalu pugupugu bulenegoore i̱ handabe mangabali, lene. Agalini mbiragome mana ko handabe mangabi ogonibi birago hondowa i̱ handabe mangabali. Wali mbiraore í̠ one ogoni hangu mitangi halu hole lalu lowirigo puguleni de hondo habe, lalu lene.
MAL 2:17 Tínaga bime Anduane Homogo mo erekui bia halu kami. Ani larogola tígua, Iname Anduane Homogo agua bialu mo erekui bia halu harimabe, loleberemi. Tígua, Anduane Homogo Hongo Haiheore kagome ko biaga kamaru bibahende bayale dege leda. Ibugua ina bibahende hamelai ka, lalu kamigome mo erekui bia halu kamigoni. Mana tigabi biaga Ngode Datagaliwabe hayuago a kagobe, lalu kamigome mo erekui bia halu kami.
MAL 3:1 Ani larimigonaga Anduane Homogo Hongo Haiheore kagome agua lara. I̱naga bi yalu piagame i̱ni maha ibuliyanaga ibugua ala manda manda bule bamba helolebero. Ani buwa tí Anduane Homogo hai bialu kamigoni ibuni abale ibunaga andaha ibulebira. Bi yalu tí de hondoaho kamigo ibu ibalu i̱na habo nalolene bi lo ngagonaga mana langulebira, lalu ka.
MAL 3:2 Ibu ibulebirago ibiragola horo ogoningi heyu haabo habehe ibu ai holebirabe. Ibu hapani haragola dére haabo habehe mbirali holebirabe. Ibiragola ibu dodo domaga sobo hongohe ale holebira. Ege to̱le̱ aeaneru hiru tiga biaga ira hongohe daganegobi holebira.
MAL 3:3 Ibu godi hale halu daboki biragola muni siliba irani delowa ko para kago dai halu bayaleorego do ibira helo delagadagua dabolebira. Ngolobi silibabi irani delowa ko para kago irame do ereba helo delagadagua Anduane Homogonaga bi yalu piagago ibugua Libai hameigini loma binigo mo miaga karu ogonidaguaore bi maname hiru tiga bulebira. Anduane Homogohondo mbirale yu ibalu mulene alego ngadagua milonaga tigua ani bulebira.
MAL 3:4 Anidagua biragola Yuda wali agalibi Yarusaleme wali agalibi tigua mbirale mbirale Anduane Homogohondo mule yalu ibiragola Anduane Homogo ibu turu halu yamulebira. Ala ani biaga wiyadagua bulebira.
MAL 3:5 Anduane Homogo Hongo Haiheore kagome lalu, I̱ tí kamigoria ibuwa tí bibahende hangu hangu baba godi lami̱ya ibulebero. Ibuwa wali agali tomia biagarubi wali agali kayu biagarubi tindule lalu ndinde lagarubi biabe bidagola yolo bulene ngadagua ndo emene badane biagarubi wali dalorubi waneigini hono wahenerubi dindi kaundialirubi urunibinaga ngaru mo hondo howa gurunaga karume tibi i̱ hondowa gi nahaga karubi bibahende i̱ baba godi lai holeberema, lene.
MAL 3:6 I̱ Anduane Homogo kogo ho mende haga nabiaga kogoni. Ani kogo Yagaba aguanene kamiru tí i̱na yu waore ndo ko.
MAL 3:7 Tí tínaga mamali tí nahemiha ala henerume i̱naga mana lo wiwago pugualu tini hame layadagua biyagobi dege tíguabi ani bialu kamigoni. Tígua i̱ kogohayagi de handa daibu halimu. I̱na nde tíha de handa daibu holiya. Anidagua larogola tígua, Iname í̠ keria dai bulenaga agi bulene ngabe, loleberemi.
MAL 3:8 O larogo hale halimu, Mbiralime Ngode Datagaliwabenaga ngago ohowa guru nolene karulapebe lowa hale haro. Ogonidagua nabibehego tígua i̱naga guru nalu kamigoni. Ani larogola tígua, Ina agua guru narimayabe, loleberemi. Mbirale pini dege dege ngulenebi lomabia ho ngulenebi ogonihayagi i̱naga tí guru nalu kamigoni.
MAL 3:9 Tí wali agali bibahendeme i̱naga guru nalu kamigo tí bibahende ha hai haro.
MAL 3:10 I̱naga andani tomo dewa bu wilo tomo pini dege dege wirimidaru bibahende mo yu ngoai howa wilimu. Tígua i̱ abidabe hondole bahanda bia handalimu. I̱na dahuliya andaganaga haraba panga windo dugupe howa mbirale tara tara bayale bayale bu ngoru tí bu payabu wu halimulo hombedape haroria hondoleberemigo ani bia handalimu, lene.
MAL 3:11 Tinaga tomo hengedemiru timamume nolani hondo holebero. Pu mbira lini daga mini gerebi hengedemirume lini do ndili ndulilo gogobelopeho wulebira.
MAL 3:12 Ani bidago hondowa hameigini tara tara dindi bibahendeha karume hondowa tíore baya turubi haramida lolebira. Tinaga dindi bayaore hoabidane hondowa ani laga bulebira, lalu lene.
MAL 3:13 Anduane Homogohanda lalu, Tígua i̱ lahiralu bi hiriribiru maru laga birimiria hale haru. Ani larogola tígua, Iname í̠ lalu mbira agi larimayabe loleberemi.
MAL 3:14 Agua larimigo. Ngode Datagaliwabenaga biabe bia holene ogoni galone nawiyago wahabeheya, lalu hemigoni. Iname ibugua bia laradagua hangu biaaboha ai Anduane Homogo Hongo Haiheore kagohondo inanaga ko birimaruni lapani halu uruni kagua birimaya lolene uruni nde galone nawiyago wande habeheya, lalu hemigoni ndobe.
MAL 3:15 Tígua lalu, Iname handaga birimagola wali agali minehe karu ti turuhe haga bia. Agali mini kowi karu tigua mbirale bigi birago bu debe haga bialu ko biraru hondowa Ngode Datagaliwabehanda ti pani mia nabiragola hayaho yu pugu bialu hea, lalu ani laga bialu hemigoni, lene.
MAL 3:16 Ani layagola wali agali Anduane Homogohondo giho haga hearu tini dege dege laede̱ne̱ bialu heago Anduane Homogo ibu haleho hene. Ibunaga deni mbuga mbira winiyago ogoriani wali agali Anduane Homogohondo giho halu ibugua laradagua biaga hearunaga mini gilibuwi winiya.
MAL 3:17 Anduane Homogo Hongo Haiheore kagome lalu, Uruni ti i̱naga wali agali holebira. Horo mbiru i̱na tagira ibuwa biabe berongi uruni ti i̱ninaga wali agaliore holebira. Abame ibu igini ibunila howa biabe bia hagago dara halu biamogo biagadagua i̱na i̱naga wali agali uruni dara howa biamogo bulebero, lene.
MAL 3:18 Ani berogola i̱naga wali agalime lone hondowa mini tigabiwi karuhondo agua biaga winida mini kowi karuhondo agua biaga winidalo hondolebira. Ani bialu i̱naga biabe bia haga karuhondo agua biaga winida i̱naga biabe bia nahaga karuhondo agua biaga winida lalu horo ogoningi handaga bulebira, lene.
MAL 4:1 Anduane Homogo Hongo Haiheore kagome lalu, Horo mbira biago tagira ibirangi wali agali mineherubi ko biagarubi bibahende irame gambe aea daradagua do mundu lolebira. Horo ogoningi ti bibahende do munduore lalu mbiraligo yu wanaholebira.
MAL 4:2 Ani bulebirago ai i̱na bi larogo hale halu biaga kamigo tí i̱naga pele mulene hongome tíni nime daba haradagua daba halu ni doroneme mo dabi holene yu anda ibulebira. Ani birago hondowa ti nogo bulumaga igini hungubalua hara pai henego panga dugupe haragola turu howa a̱e̱a̱ ka̱e̱a̱ bu hagadagua holeberemi.
MAL 4:3 Horo mbiru i̱na tagira ibuwa biabe bulubodangi tígua wali agali ko biaga karu bope halu holeberemigo uruni tínaga ge habeme abalu hengedaradagua buleberemi, lene.
MAL 4:4 I̱naga biabe bia hagane Mosesehanda mana langigi biyago manda bilimu. I̱na Hari Sainaini howa mana lowinigobi bulene nabulenebi Isaraele wali agali tígua bilimulo Mosesehondo lamirugo ibugua tí langiyago baya hangu manda bilimu, lene.
MAL 4:5 Anduane Homogonaga Horo timbuni hiriribi ogoni tagira naibidaha bi mana latagi haga Elaya tí kamiria pu lolebero.
MAL 4:6 Elaya ibugua ibuwa igini taribunilabi wane angibunilabi mandagi lone mo biamagaho helolebira. Ani mo biamaga nahe ngaore horo ogoni tagira ibiyagua tínaga dindi bibahende bo mburi lolene wuligonaga ala ani mo biamagaho helolebira, lene.
TOB 1:1 I̱ Tobidi kogo i̱na i̱ henego ogodagua bialu haruli lalu te lolebero. I̱ aba Tobiele howa Tobiele aba Ananiele howa Ananiele aba Aduele hene. Aduele aba Gabaele halu Gabaele aba Labaele howa Labaele aba Laguele hene. Laguele ibu Asiele mbira henego aria howa Asiele ibu Nabadali hameigini hearu aria mbirago hene.
TOB 1:2 Kini Salamanese ibu Asiria wali agalinaga kini heangi tigua i̱ aba dindi Tisibeni I̱ garabaya helaya. Dindi ogoni Galili dindinaga abene uyurahayagi nga. Gendese tano ngagonaga abene unurahayagi wialu dindi ogoni Nabadali hameigini dindiha wini. Ani bialu tano kira Haso Pogosala kawereni nga.
TOB 1:3 I̱ Tobidi kogo i̱na mana bayale tigabiore ngago bialu haabo holenaga bialu haga kogoni. I̱na i̱ dameneru muni mbirale burupale howa tubagi ho karuhondo tale bu miruli. Ani bialu wali agali maru i̱ni heba mandagi garabaya Asiria dindiha tano timbuni Niniba ngagoria bu karuhondobi nde talebu mia dege biruli.
TOB 1:4 Ngode Datagaliwabe ibunime Isaraele dindiha tano maru wiaru ngelowa Yarusaleme tano wali agalime ibunaga loma anda ogoriani bilonaga dabene. Loma anda ogoni Ngode Datagaliwabe ibuni andagaore haabo helonaga ani bini. Isaraele wali agali tigua anda ogoniha pialu Anduane Homogohondo lomaru bu migi bialu helonaga anda ogoni Ngode Datagaliwabe ibunioreme dabo helene. Ani buwa i̱ igiri emene hewangi i̱ mamalinaga dindini hewagola Nabadali hameigini bibahendeoreme Yarusaleme erembira mialu Debidi igini aguaneru kini hearubi erembira mialu bini.
TOB 1:5 Anidagua bialu Isaraele hameigini bibahendemebi i̱ aba ai̱ya hamene mbalini bibahendeme bi pupu wulenaga gime wabini nogo bulumaganaga bigiya mbira mini Bala laga wiago yu tiga bialu ogonihondo bi pupu wialu hene.
TOB 1:6 Mosesenaga mana lowini ngagome lalu mana ogo wiaabo helo ledagome Ngode Datagaliwabehondo bi lolene horo timbuni tagira ibirangi Isaraele wali agalime Yarusaleme dege piai holene nga lalu lo winigo nga. I̱ damene bu hearu aria mbiraore i̱ni hangume mana ogoni taluwa bialu haruli. Horo bibahendengi i̱na Yarusaleme puabo halu Ngode Datagaliwabehondo lomaru mialu haruli. I̱ mabuha tomo pigane boga biragobi maruale ngaru pihalu tale buwa pinigo Anduane Homogohondo loma bu migi biruli.
TOB 1:7 Mbirale uruni yalu Yarusaleme puwa loma uruni Arono aguane agali loma binigo mo miagaru Anduane Homogonaga lomabu delaga dabu kago kawareni karuhondo miruli. I̱na horo bibahendengi widi lini mbirale maru tale binirubi waini ibabi olibe lini ibanebi ira lini tara tarabi yalu puwa Libai hameigini Yarusalemeni howa Anduane Homogonaga biabe bialu haga bu karu migi biruli. Ani bialu mbirale uruni aria halu mbira talebu bagi henego muni muwa muni uruni yalu turu howa Yarusaleme pialu tomo nolene ngago nalu haruli.
TOB 1:8 Ani bialu halu mbira talebu bagi henego i̱ aguane Deborahanda biawai henedagua yagibano karu migi biruli.
TOB 1:9 Ani bialu i̱ anda howa wali mbira i̱ni aria dege mini Ana berenego dabu biru. Ani bialu iya igini mbira mini Tobaiasa hene.
TOB 1:10 Ani bialu henego horo mbiru hayagola i̱bi i̱ damene bu hearubi wali agali maru hearubi bibahende minu yalu Niniba piya. I̱na Niniba pu howa tomo ina Isaraele wali agalime nanagane ale wiaru Isaraele wali agalime ta nabi nai halu hene. Ani biragola i̱ dege nane haruli. Ani berodagoni irane
TOB 1:12 i̱na Ngode Datagaliwabe daligaore kago mitangi hongoheore bialu ibugua mana lowini ngago mitangi bialu nanaruli.
TOB 1:13 Ani bialu hewagola Ngode Datagaliwabehanda Kini Salamanesenaga bu mo dambola hayagola ibugua i̱ mo turu halu ibu one waneiginirunaga tomo yolo biaganeru handaya howa haru haga holiya dabo helaya.
TOB 1:14 Ani bialu i̱na Media dindiha pialu kininaga mbirale tara tara ngaru muni yalu yolo bule piruli. Horo mbiru lene Media dindiha tano timbuni Lagese wiagoria pu haru. Tano ogoriani howa muni siliba genda kilogarama handari tebira (300) nuha honowa agali mbira Gabariasa hamene mini Gabaele heago ibugua muni uruni mo wia howa handaya ho helo ibuhondo miru.
TOB 1:15 Salamanese ibu homayagola ibu igini Senageribihanda ibu abanaga henge mialu ibuni kini aribia haya. Ani biyangi agali pagebibi Media dindiha hariga wiaru bibahendeha hai heagola i̱na dindi ogoniha lone pobe nahe haru.
TOB 1:16 Ai Kini Salamanese heangi wali agali i̱ dameneruha genda wiaru i̱nime handaruli.
TOB 1:17 Ti tomo nane garibilo kagola ina ti tomo nelo miruli. Ti aga nabi kagola i̱ninaga aga ti karulelo golo miruli. I̱ hame waneigini mbirago homaragola tingini Niniba tano tagirahayagi mo batagi haragola i̱nime mo yalu puwa baya hangu hora haruli.
TOB 1:18 Senageribi ibu Yuda dindiha wai bu puwa ai ibida Media dindi dai bialu howa harigani Isaraele wali agali bu hearu bo wahai haga bima dai biyiya. Ani biyagola i̱na homene uruninaga tingini mo yalu pu do howa hora haga biru. Mani Senageribihanda homene tingini biaru ngabe hondole pialu hearia nawiyane hendene.
TOB 1:19 Mani howa Niniba agali mbirame ohowa kini lamialu i̱na agali tingini uruni mo hora haya lalu lamini. Abaleore handalu hewaria kinihanda i̱ bo wahole taya bialu hearia handa walia haru. Ani handa walia halu ai gi timbuni biyagola i̱ ibida puwa mbiraha ha do haru.
TOB 1:20 Kini ibugua i̱naga dabudabu wiwaru damene bibahende mo yai halu ibu andaga yu piyaya. I̱ one Ana i̱ igini Tobaiasala hangu bereneya.
TOB 1:21 Horo karia agima howa Kini Senageribi igini kiralime libu aba homelo bo wahaya. Ani bo wahalu libuni hari mini Ararada weagoha ibida puwa ha do hene. Ani biyagola kini igini mbira mini Esahadono ibu kini aribia hene. Ani howa ibugua igiri mbira i̱ hamene Anaele heago igini mini Ahiga ibugua kininaga gabumane biabe bulene wiarubi gabumanenaga muni wiarubi bibahende handame ho howa haru helo dabo helene.
TOB 1:22 Abale howabi nde Ahiga ibugua kininaga tomo iba wainiru bibahendebi muni dabudabu bibahendebi ibugua handaya ho haga hene. Ai áyubi nde Kini Esahadono ibugua Ahiga ibu biabe ogoni bialu helo helene. Ainde Ahiga ibu i̱ hamene igini howa ibu kini hendore lamiyagola nde kini ibugua i̱ Niniba daibu habe laya.
TOB 2:1 Ani laya handala i̱ni andaga lone dai bialu i̱ one Anabi i̱ igini Tobaiasabi heba mandagi harima. Ani daibu hewagola horo timbuni mini Pendigosi layagola tigua i̱naga tomo timbuni dawa hene.
TOB 2:2 I̱ biruwa handalu hewaria tomo tara tara dewaore wiane handaru. Ani hondowa i̱na Tobaiasahondo lamialu, Í̠na mbirali yagibanoore howa ibu ko nabiaga tigabiore mbira taya bialu haru halu ibule pu. Tomo ina haru mandagi nami̱ya haru halu dai bibe. I̱na libu ibalibulo hondo biragua.
TOB 2:3 Tobaiasa ibu pu piyago ibugua abale ga̱ lama daibialu howa lalu, Aba aba-o ina damene mbira áyu ogoniore homelo bo wahaya. Tigua agali ogoni golowa homayagola ibunaga tingini magedi hamani bai heneya, lene.
TOB 2:4 Anidagua layagola i̱ mogo timbuni lalu tomo emeneorebi mbira nane. I̱na heyalu abale puwa agali homene ogoninaga tingini anda emene mbira heagoha mo do haru.
TOB 2:5 Ani mo do halu i̱ni Ngode Datagaliwabenaga deni dodo para nahe bayale holenaga ibaha wayawaya biru. Biai halu tomo nalu berewaria i̱naga bu miniha genda timbuni biya. Ani biyagola i̱ dugu bialu biruwa agali Anduane Homogonaga bi mana latagi haga Amosohanda
TOB 2:6 wali agali Bedele tanoha hearuhondo mbiwia halu mani tagira ibulebiragonaga bi lowinigo mitangi biru. Amosohanda mbiwia halu lalu, I̱na Ngode Datagaliwabehondo bi lolene horo timbuni tagira ibirangi wali agali homenerunaga dara ho holene mo wia aribia helolebero. Tinaga turu holene horo ngemiru mo genda ho holene wia aribia helolebero lalu mbiwia ho wini.
TOB 2:7 Alendo halu ni paliyagola i̱na puwa homali bialu agali biago mo hora haru.
TOB 2:8 Anigo ainde agali i̱ andaga mandagi handa a̱i̱na̱i̱ hearume i̱ hondowa mege bialu lalu, Agali ogoni ibu mbirale ngaru lo manda nabiagabe tobaneda. Bamba ibugua agali homene tingini wiaru mo hora halu hearia tigua ibu bo wahole talima ibaga bialu hayagoni ndobe. Ai áyu ogoni dege bialu kagonida, laga bialu mege bialu hene.
TOB 2:9 Ainde i̱na agali homene mbira mo hora harugome i̱ni Ngode Datagaliwabenaga deni dodohe haru. Ani haruyagola horo ogoningi dege mbira i̱ni Ngode Datagaliwabenaga deni dodo nahe holenaga ibame wayawaya biru. Ani bialu mani tagira puwa anda hái heago kawareni mandaha paliru. Mbiraga ogoningi poboyogo timbuni biyagola i̱naga embone agame dambi nahe paliru.
TOB 2:10 Ega emene maru nde i̱ palirudagoriani anda hái daligahayagi biragayago i̱ manda nabi paliru. Ani palewaria ega biagome ti i̱naga deni tope hayagola mbirale pele mbirame i̱naga de pai haya. Ani biyagola i̱na anogoda heria biamogo bilo pialu hewaria tigua i̱naga de mo bayale nahaya. Ahiga ibugua mali kirani i̱ handaya ho henego ainde ibu dindi tara Elama dindiha hama piya.
TOB 2:11 Ahiga ibu peaha i̱ one ibugua aga wali marume muni mule wabialu bedadagua dege wabialu berene.
TOB 2:12 Ibugua aga uruni wabiai halu yalu poragola agalime muni miaga hene. Horo mbirungi ibugua aga dewaore wabialu agali yolo bule wabibe layadago hearia wabu yalu piya. Ani yalu piyagola agali biagome aga tigatiga yolo bulene winidagua yolo bialu ibugua biabe bayale biyadagonaga mo turu halu nogo meme igini hongolo mbira bame minu miniya.
TOB 2:13 Ani biya handala i̱ one ibu andaga dai biyagola nogo meme igini mbira gu̱ layuane hale haru. I̱na bi hongo howa ladaga halu Ana ibuhondo hale halu lalu, Í̠ nogo meme ogoni agoha hearia haru ibiribe. Nogo meme ogoni page haru haribe. Ai nogo ogoni anduane karia haru dai bibe. Mbirale page binigo nolene nawiore ndobe, laru.
TOB 2:14 Ani larugola Ana ibugua ladai bialu lalu, O ndo tigua i̱naga aga biago yolo muni karulape ngialu nogo ogoni i̱ mo turu halu bame minu ngiya, laya. Ani layagola i̱na Ana ibunaga bi ogoni mo henene nahe howa, Nogo ogoni yalu daiore bibe, laru. I̱na taga howa keba ha dege bialu i̱naga dengui darama biya. Ani bu hewagola Anahanda bi hongo howa i̱hondo lalu, Áyu í̠ agali ogobiore heneda lalu handarogoni. I̱na wali agali maru bu karu mitangi halu biamogo bulene manda bu hariligo ainde i̱ biamogo bulenego manda nabiore kegonida, laya.
TOB 3:1 Ani layagola i̱ miniha mogo lalu taga haru. I̱na dugu bialu howa Ngode Datagaliwabehondo bi ogodagua laru.
TOB 3:2 Anduane Homogo í̠ tigabiore kegoni. Í̠na dara holene nawi ngagoria howa dara haabo haga ke. Iname biabe bialu kemaru tiga tigaore mo tale biaga ke.
TOB 3:3 Áyu i̱na í̠hondo hale halu i̱hondo bayale bibe laro. I̱na ko bialu harugonagabi mana ko damene i̱na ko biruda lo manda nabi howa bialu harugonagabi pani nangibe laro. I̱ mamaliru tigua mana ko bamba bialu henerunaga i̱hondo pani nangibe.
TOB 3:4 Heneneore tigua í̠naga bi mo wahalu í̠naga bi mana lo ngagohondo mine halu hene. Ani bialu heagola í̠na waitigime inanaga mbirale wimaru mo kayu yalu inane garabaya mini yu pialu ina aria maru bo wahai halu biya. Í̠na ina taliatagi halu dindi tara wiaruha purogo lelalu wali agali tara bu hearu ti dege dombeneha heledegoni. Anidagua birigola ainde tigua inahondo gi do lalu mege timbuni bialu kagoni.
TOB 3:5 Halu dewaoreni í̠na i̱ mamalirume ko biyaru tale bialu ko i̱na binirubi tale bialu harigoni. Iname í̠hondo mana bayale nabi harima. Iname í̠naga bi mo waharima. Anidagua bialu harimagome í̠na mana inahondo bialu hariruni tigabi bulene wiadagua biri.
TOB 3:6 Áyu í̠na i̱hondo bulene ngago biai habe. I̱naga holene áyu ogoni biba helalu i̱naga tingini dindiha daibilabe. Heneneore i̱ homolene karulapeda. Tigua i̱hondo bameore mege bialu karunagabi genda tara tara i̱hondo mo ngialu kagonagabi i̱naga bu miniha mo ko henego ko. Anduane Homogo í̠na bi dege lalu i̱ha genda ngaruni mo wahai habe. Bayale haabobo bu holene ngagoria i̱ holiya helabe. Ainde i̱naga bi larogo hale hole í̠naga hale pai nahabe, lalu Tobidihanda Ngode Datagaliwabehondo bi lene.
TOB 3:7 Horo ogoningi Media dindiha Egebadana tano wiagoria biabe bia haga wali mbira berenegome Laguele wane Sara bereago mege bini.
TOB 3:8 Ai Sara ibu agali kahalu penego ainde agali uruni Sara heba horo mbiru hangubi mbira mandagi palia nabi heaore dege dama mbira mini Asamodeusu laga heagome agali uruni homelo mbira mbira bo wahaga bialu bo wahai hene. Anidagua bini bereagola wali biabe biaga berearume Sarahondo lalu, I̱na agali í̠ agalini biaruni bibahende homelo bo manogo bia haga biriya. Í̠ agali kariali uruni baba mandagi paliai harigo yu ainde mbirago ibugua í̠ yamu ko bere nalayiya.
TOB 3:9 Í̠na bame keba halu ina balu kego irane agibe. Í̠ agalini ti homeneyagua nde í̠nibi ti haruru talima polene nga. Iname í̠ waneigini lenego mbira dengui nahondoloma̱ya í̠ aniore bulene nga, lene.
TOB 3:10 Sara ibugua bi gendabi uruni hale howa ibunaga bu miniha genda timbuni halu ibuni pu nogo dalu homolene kaware manda bu berene. Anigo ainde ibunaga mini iriari bialu ibuni lo manda bialu lalu, I̱ aba wane nde mbiraore i̱ hangu birarugo i̱ pu nogo dalu homaruyagua nde i̱ aba agali waheore kagoha dara holene timbuniore mo anda ibilolebada. Anidagua berogola ibu abale homaliha warape holeberoda. Anidagua buledago ai wahalu i̱ni manogo bialu homa nabi waholiya, lo manda bini.
TOB 3:11 Sara ibu windo wiagoria kaware heyu howa ibugua Ngode Datagaliwabehondo bi lamialu lalu, I̱naga Anduane Homogo Ngode Datagaliwabe í̠naga mini yaraga holene hameledo. Iname horo bibahendengi í̠naga mini yaraga haabo halu holoma̱ya. Mbirale bibahende í̠na wabini ngarumebi karumebi í̠ninaga mini yaraga haabo halu holene nga.
TOB 3:12 I̱na í̠ de handaya howa í̠na i̱ biamogo bibelonaga maliaho bedogoni.
TOB 3:13 Í̠na bi hangu laregola i̱naga holene ogoni ereba holene nga. Anidagua biragola bi ko lalu karuni lone hale naholebero.
TOB 3:14 Anduane Homogo-o i̱na agali baba mana ko mbira nabiore bedogo í̠ manda bide.
TOB 3:15 Ina dindi ogoha garabaya íbu harimago howa i̱na halu mbira hangubi i̱naga mini mo nagalone halu mo ko naheorebi i̱ abanaga mini mo ko nahebi biraru. I̱ aba ibunaga paluni ngaru holene ibu waneigini mende nahebi inane dameneore mbira i̱ dabu bulenebi naheore. I̱ aba ibu wane mbiraore i̱ hanguore bedogoni. Agali i̱ agalini karia biaru homai haya. Ainde i̱bi homolene ngago agi bialu biruliyada. Anigo ainde Anduane Homogo i̱nime i̱naga holene hamarobi naloleyagua nde í̠na i̱ dara halu baya hangu handaya ho holene nga. Mege bialu bi ko lalu karuni lone hale holene hame naledo, lene.
TOB 3:16 Ai horo ogoningi Ngode Datagaliwabehanda dahuliya andaga howa Tobidi Saralanaga bi layago hale hene.
TOB 3:17 Ibugua ani layago hale howa Tobidinaga deni mbirale pele ira hagua aleme dambi heago mo wahole dahuliyali mbira mini Labaele ibilene. Ani bialu Labaele ibugua Tobidi igini Tobaiasa ibu Laguele wane Sara dabu bilonaga bi mo tiga bule ibalu bini. Tobaiasa ibu Sara damene hameigini mbiraore dege howa libu dabu bulene karulape hene. Ani hayagola nde Ngode Datagaliwabe ibugua dahuliyali Labaelehondo dama mini Asamodeusu Saraha karulo heago taliatagi helo ibilene. Ai ogoningi dege Tobidi ibu tagiraha howa andagaha ibiyagola Sara ibu nde Egebadana tanoni ibuni andaha hobane daligahayagi heagoha howa tagira ibalu hene.
TOB 4:1 Horo ogoningi dege Tobidinaga mini wálayagola ibunaga muni mbira bamba agali mbira mini Gabaele Media dindiha Lagese tano wiagoria heago minigo mitangi bini. Gabaele ibugua muni ogoni mo ngelowa handaya ho hene.
TOB 4:2 Tobidi ibugua mitangi bialu i̱na Ngode Datagaliwabehondo lamialu, I̱ homoliya yupe habe, larugoda. Ainde anidagua larugodago i̱ igini Tobaiasa olowa íbu lalu muni ogoninaga te lamuliya lo mitangi bini.
TOB 4:3 Ani mitangi buwa Tobidihanda Tobaiasa olalu íbu lowa ibuhondo lamialu lalu, I̱ igini-o i̱ homaroangi baya hangu hora holene ngadagua hora habe. I̱ ani homedoha í̠ ai̱yahondo mana bayale hangu bialu haabo habe. Í̠na ibu baya hangu handaya ho haabo halu ibu homaragola i̱naga homali kagoria kaware dege hora habe. Ibugua genda tandaga handalu biruwa í̠ taba henenegobi í̠ handaya ho berenegobi embeda nahabe. Í̠na ibunaga bu miniha turu ho biraabo helo berelalu ibu mo genda nahabe.
TOB 4:5 I̱ igini-o í̠na horo bibahendengi Anduane Homogo í̠naga Ngode Datagaliwabe kago embeda nahe habe. Ani bialu mana ko nabiore habe. Ngode Datagaliwabenaga mana ngago pugua nabi habe. Í̠na mana bayale tigabi ngaru bialu haabo howa mana ko biaga karu baba mandagi nahabe.
TOB 4:6 Mbirale í̠na bialu kego damene bibahende bayale hai helo í̠ni tigabi holene ngadagua haabo habe.
TOB 4:7 Mbirale bayale í̠na yu kego aria maru tale bialu wali agali maru Ngode Datagaliwabenaga hariga ngagoria pialu haga karu talebu migi bialu habe. Wali agali maru karuhondo mbirale talebu mialu howa hame nale mibe. Wali agali yagibano karuhondo biamogo bialu miriyagua nde Ngode Datagaliwabehanda í̠nibi biamogo bulebira.
TOB 4:8 Í̠nime mbirale agua wirudabe hondole dagalo manda ala buwa talebu mibe. Dewaore wiriyagua nde dewaore mibe. Emene wiriyagua nde harugo lowa hanuni talebu ki howa mende mibe.
TOB 4:9 Í̠na ogonidagua biriyagua nde í̠naga mbirale mo do haradagua berego mani í̠ha genda tagira ibirangi ibugua í̠ biamogo bulebirago ani bibe.
TOB 4:10 Mbiralime yagibano karu biamogo bialu kago Ngode Datagaliwabehanda dahuliya andaga kagome mana ogoniore loma baya gibiore ogonida lowa ibu turu haga ka. Í̠ homeneru haga humbirini andaga arumahe ngagoha pialu mo ko naholenaga mana urunidagua bialu habe.
TOB 4:12 I̱ igini-o í̠na wali bedaru baba mana ko nabibe. Ina Ngode Datagaliwabenaga biabe bia haga kemago ai í̠na wali inane aria bedaru aria dege dabu bibe. Wali tara bedaru aria mbira dabu bulene nawiorego nadabu bibe. I̱ igini-o Noa mitangi bialu Abarahama Aisaga Yagababi mitangi bibe. Agali uruni ti ina mamali bamba hene. Tigua wali tini damene berearu dege dabu bigi bini. Ani biyagola ti waneigini tini Isaraele dindiha helonaga Ngode Datagaliwabehanda waneigini tihondo migi bini.
TOB 4:13 I̱ igini-o í̠na í̠ damene bu karu gubalini ho habe. Í̠ mine halu daliga timbuni hene tingi howa ti wane bedaru mira dabu nabi wa nahabe. Mana ogoniale beregome genda erekuibi ngaru mo yu anda ibuleberego nabibe. Mana ogoni ogobi nga. Biabe bulene manga ho heagua nde mo ko holenebi hina garibilo holenebi mo yu anda ibagagobiore nga.
TOB 4:14 Agali biabe biaga karu tinaga yolo horo biabe birangi dege abale mibe. Yolo horo mendengi mule ngelo nahabe. Í̠naga mana bayale tigabi bialu kegoni. Ngode Datagaliwabe andaneha kegola ibugua í̠hondo yolo bayale biadai bulebira. I̱ igini-o í̠niore baya hangu haru halu í̠naga hame baya hanguore haru hai habe.
TOB 4:15 Mendealime í̠nihondo mbira bilo hame nalariligo damene í̠na mende kagohondo nabibe. Í̠ lulu yu holigo waini iba dewa nanabe. Lulu iba naabo holeni nahabe.
TOB 4:16 Wali agali tomo garibilo karu tomo nelo mialu aga nabi karu í̠ninaga aga golo mibe. Mbirale dewa wua hariyagua nde tale bialu maru yagibano karu mibe. Mbiralihondo mbirale talebu mialu howa í̠naga bu miniha hamelalu genda nahe howa mibe.
TOB 4:17 Agali tigabi kago homaragola í̠na ibu one waneigini homa duguanda bedaria tomo dawa hanalu puwa mibe. Anigo agali ko biaga kago homaragola anidagua bulene nawigo ani nabibe.
TOB 4:18 Agali manda timbuniwi kagohondo ibunaga mini ngago hale hole taga nahe howa hale habe. Ani bialu mbirali mini gigabiwi kagome í̠ biamogo bule bialu kago erembira muleni namibe.
TOB 4:19 Í̠na horo bibahendengi Anduane Homogo í̠naga Ngode Datagaliwabenaga mini yaraga halu holene nga. Mbirale í̠na buleberego damene bibahende bayale helonaga í̠ heba mandagi haabo halu í̠ biamogo bia lalu Ngode Datagaliwabehondo bi laabo habe. Hale ha. Dindi tara tara ngaruha agali bu karu tiha manda bayale tininaga wini mbira nawiore ka. Ogonidagua bidago irane Ngode Datagaliwabe ibuni manda bayalenaga tene ka. Ibunaga hameme mbirale bayaleru mo talebu tahaga biaga hene. Ani bialu maru ibugua turu nahe karu bo wahai habehe ka. Bi mana bayale i̱na í̠hondo langigi berogoni baya hangu manda biaabo habe.
TOB 4:20 Tobaiasa-o áyu bi mbira í̠hondo langerogo, Bamba i̱na muni timbuni mbira Gabariasa igini Gabaele ibuhondo minigo ibugua ngelowa dindi mini Lagese tano Media dindi ngagoria wu ka.
TOB 4:21 Ani ngogo ainde i̱ni yagibano holobada lowa miniha genda nayi habe. Í̠na Ngode Datagaliwabenaga bi ledago talialu howa ko bulene ngaruhondo wandialu hariyagua nde ibugua í̠hondo miniha turu ho kagola í̠ agali mbirale dewawi holebere, lalu Tobidihanda Tobaiasa mana lene.
TOB 5:1 Tobaiasahanda ibu abahondo bi ladai bialu lalu, Í̠na mbirale i̱hondo bibe lalu langiriruni bibahende biai holebero.
TOB 5:2 Anigo Gabaelehanda muni yu haruago agua mo poliyadabe. I̱ ibu handa nabidogo. Ibugua i̱ abogoda lo manda bialu muni i̱hondo agua ngulubadabe. Ayubi nde i̱na Media dindi polene hariga manda nabi kogoni ndobe, lene.
TOB 5:3 Tobidihanda ladai bialu lalu, I̱na beba mbira bamba Gabaele iyame iyanaga mini gili binigo ai i̱na buda ki binigo ai budini mendego Gabaele ibu yalu mendego i̱ni yu kogoni. Beba Gabaele ibunagago i̱ yu hewane mali pira kira (20) piya. Ai áyu í̠na agali bayale tigabi hongohe mbira í̠ heba hariga pialu libu haru mandagi dai bulene bayale mbira taya bialu haru dai bule pu. Libugua pialu dai berebigola ibu yolo bimi̱ya. Anigo ai í̠na muni Gabaelehanda hondo helo miwadago ala mo yalu ogoria dai bule pudaba, lene.
TOB 5:4 Ai ibugua agali mbira Media polene hariga manda bi ibula Media polenaga mbirali taya bima pene. Ibu andaga howa wene pole pialu hearia abaleore Labaele ngola hene.
TOB 5:5 Agali ogoni Ngode Datagaliwabehanda ibileneda lowa Tobaiasa ibu manda nabi hene. Ani howa Tobaiasa ibugua Labaelehondo hale halu lalu, Í̠ aniali kebe, lene. Ani layagola Labaelehanda ladai bialu lalu, I̱ Isaraeleali kogo. I̱ í̠ damene dege mbirago i̱ Niniba tanoha howa ibinigo ai biabe taya bero, lene. Ani layagola Tobaiasa ibugua hale halu lalu, Media dindiha polene hariga í̠ manda bidebe, lene.
TOB 5:6 Ani hale hayagola Labaelehanda ladai bialu lalu. I̱na pialu agali í̠ damene Gabaele kago andaga pialu paligi biruli. Ibu andaga Lagese tano mbira ngagoria ka. Egebadana tano timbuni ngagoria howa pialu Lagese tano polenaga handa halu kira paliaga. Lagese tano ogoni hari hombeneni nga, lene.
TOB 5:7 Ai Tobaiasa ibugua Labaelehondo lamialu lalu, Hambi-o í̠na i̱ aba lamule porogo í̠na ogoria hondo habe. I̱na iya haru Media dindi mbaliya hame ledogo pialu dai buwa í̠ yolo nguliya, lene.
TOB 5:8 Ani layagola Labaele ibugua lalu, Karulapego i̱na ogoria kogo í̠na pialu lu nahe abale dai bibe, lene.
TOB 5:9 Ai Tobaiasa ibugua puwa ibu abahondo lalu, Agali i̱la Media dindi polene mbira hearia handa walia haru, lene. Ani layagola Tobidihanda ladai bialu lalu, Í̠na puwa agali ogoni haru halu ibule pu. I̱na agali ogoni ibu hameigini emene ai ariadabe dabo hondoliya. Ani bialu ibu agali bayale í̠la haru hariga mandagi pobehedabe hondoliya haru halu ibule pu, lene. Ai Tobaiasa ibugua puwa Labaele olowa lalu, I̱ abahanda í̠ ibu bedaria ibabelo hamelo beda, lene. Labaele ibu andaga tamuha anda ibiyagola Tobidila ibiribe lalu mo bila hene. Ai Labaele ibugua Tobidi hale halu lalu, Í̠ bayale holedabe, lene. Ani layagola Tobidihanda ladai bialu lalu, I̱ agua bialu karulape bayale holeda. I̱naga de ndibulo wahene mbirale mbira deme handabe nahe bedogoni ndobe. I̱na wali agalime bi larago hale holeberogo ai deme nahondolebero, lene. Ani layagola Labaelehanda ladai bialu lalu, Mbirale ogoninaga mini burugu nalabe. Emene howa Ngode Datagaliwabehanda lone í̠ mo bayale holebira, lene. Ani layagola ai Tobidihanda Labaele lamialu lalu, I̱ igini Tobaiasa ibu Media dindiha polebirago í̠na ibu hariga mo walia haga bima libu haru mandagi polene karulape kebe. Pialu dai berebigola nde i̱na í̠ yolo nguliya, lene. Ani hale hayagola Labaelehanda ladai bialu lalu, Í̠na dewa haluore dindi ogoniha hariga hari bare bare wiagoha pearubi dindi ulini panda panda dangi pale wiaruhabi ibaga biai henego hariga baya hanguore handalu manda biaore kogo i̱na ibu heba mandagi polene karulape, lene.
TOB 5:10 Ai Tobidihanda hale ha dege bialu lalu, Aiore i̱ nenege-o í̠ nde hameigini timbuni ai aria howa aba igini emene ai aria kebe, lene.
TOB 5:11 Ani layagola Labaele ibugua ladai bialu lalu, Irane aginaga í̠na mbirale uruni hale howa manda buleberebe, lene. Ani layagola Tobidihanda lalu, Í̠naga minibi í̠ aba igini emene minibi tiga tiga langibelo hame ledo.
TOB 5:12 Ani layagola Labaelehanda ladai bialu lalu, I̱ Ananaiasa igini Asaria kogoni. Ananaiasa ibu í̠ damene dege mbira ka, lene.
TOB 5:13 Ani layagola Tobidihanda Labaele lamialu lalu, Í̠na i̱ andaga ibirigo bayuwa ibiridago ainde i̱ igini-o Ngode Datagaliwabehanda tawe helo. Aiore í̠nibi í̠ aba ai̱yabi baya hangu daba hondolenaga hale ha dege buleberogo í̠na i̱hondo keba nahabe. I̱na handalu koria ai í̠ni damene dege howa damene bayaleha howa ibiridane hendedo. Ananaiasa Nadanala libu Semaia igini kago i̱ manda bido. Ina Ngode Datagaliwabehondo lomabu mule Yarusaleme pole mandagi poromali. Í̠ hameigini tiore wali agali bayaleore howa í̠ damene uruni hongoheore mbira ka. Ainde libu harigani porabigoha Ngode Datagaliwabe ibunime libu baya hangu handaya ho helo laro, lene.
TOB 5:14 Tobidihanda laabo halu lalu, I̱na í̠ horo mbira mbira bibahendenaga yolo ngialu libu tomo nalibulobi muni ngia dege bulebero.
TOB 5:15 Ainde í̠ Tobaiasala baya hanguore ibaga bu hariyagua nde yolo muni maru lone tago halu ngulebero, lene.
TOB 5:16 Ani layagola Labaelehanda ladai bialu lalu, Í̠ miniha gi nahabe. Iya harigani pialu howabi dai bialu howabi waitigi mbira ngola nahe bayale dai bulebereba. Harigani áyu iya mo ko holene mbira nawi hariga bayale nga, lene. Ani layagola Tobidihanda ladai bialu lalu, Ai Ngode Datagaliwabe í̠ heba mandagi pelo laro, lene. Ani lowa ibugua Tobaiasa olowa lalu, Igini-o ai libu pilibulo. Ngode Datagaliwabe ibunaga dahuliyali bayale kagomebi libu baya hanguore haru pialu lone haru halu dai bilo laro, lene. Ai Tobaiasa ibu pole pialu howa ibu aba ai̱yala nunu lene. Ai Tobidihanda lone lalu, Mo ko holene mbira ngola nahe bayale ibagabu halu dai bilibu, lene.
TOB 5:17 Anigo ai Tobaiasa ai̱yahanda hongo howa dugu bialu howa lalu, I̱ igini ogoni aguanaga pu larebe. Iya handaya ho holene iya igini mbiraore ogoni hangu ndobe. Iyanaga tomobi maruale iya burupale ngago damene aiwa taya bulubadabe.
TOB 5:18 Ai í̠na muni biago mo yu dai bulenego hame timbuni lo kego ainde í̠ igini pu ereba hayagua hame nalolebere bada.
TOB 5:19 Ainde Ngode Datagaliwabehanda inahondo mbirale bayale dewaore ngiyaru yu howa turu hagabu holene abida, lene.
TOB 5:20 Ani layagola Tobidihanda ibu onehondo ladai bialu lalu, Í̠naga bu miniha genda nahe waha. Tobaiasa ibu bayale pialu bayale dege ibagabu halu lone dai biragola í̠naga deme lone hondoleberego nale waha.
TOB 5:21 Libunaga í̠na genda holene nawigo miniha genda nahabe. Dahuliyali bayale mbira Tobaiasa heba mandagi biaga bu holebira. Ibu ibaga bu haragoha bayale halu ibu lone dai bulebira. Ibu bayale karulape áyu kagobi dege holebira, lene. Ani layagola ibu dugu nabi berene.
TOB 6:1 Ai Tobaiasala dahuliyali biagola Media dindi pole pialu Tobaiasanaga biango heagobi ti haru mandagi pene. Libu pu dege bialu alendo ni anda pialu paliyagola libu Iba Taigirisi peago angeni haanda palene.
TOB 6:2 Tobaiasa ibu ge wayawaya bolenaga ibaha daliape hene. Ani biyagola wena timbuni mbirame ibaha howa pogoladaga halu Tobaiasanaga ge mendego nole bini. Ani biyagola Tobaiasa mogolalu ya lene.
TOB 6:3 Ani layagola dahuliyali biagome olowa lalu, Wena ogoni yupe halu peloleni hongo howa minu yania habe, lene. Ani layago hale howa Tobaiasahanda wena biago minu yania howa iba angeni gililo yu irigi hene.
TOB 6:4 Ani biyagola dahuliyali biagome Tobaiasahondo lamialu, Wena ogoninaga buni gubalini lilinibi baya hangu dugu wiai habe. Wena buni gubalini lilini uruni marasini bayaleorego iya pialu yalu dai bibiyago baya hangu mo ngelabe. Tini maru maru bu karu dugu wahai habe, lene.
TOB 6:5 Ani layagola Tobaiasahanda dahuliyali biagome bibe layadagua bini. Ani biai halu wena biago hirini. Hiruwa dagane mende libuni nalu mende harigani nole Tobaiasa ibugua nuha henene. Libu pu dege bialu Media dindi anda pene.
TOB 6:6 Tobaiasa ibugua dahuliyali biagohondo hale halu lalu, I̱ hambi Asaria-o ai wena bunibi gubalini lilinibi dugu hanaribagome warago agialego mo dabi holebirabe, lene.
TOB 6:7 Ani hale hayagola dahuliyali biagome ladai bialu lalu, Wena buni gubalini lilinibi irani delaregola dama wali agali mo ko haga karu ibida piai holebira. Wali agali mo ko halu henego yu wahalu ibida piai howa mani lone wali agaliha hole dai nabulebira.
TOB 6:8 Ai wena buni dugu yidegonime mbirali de ko halu deha hagua paleaguabi mbiraleme de andane halu nde handabe nahe heagua nde í̠na mbirali de kohe bedagonaga de wena buni ogonime domalu mbiraleme de dambi kago pulo waharegola de lone bayale halu handabehe holebira, lene.
TOB 6:9 Tobaiasa Labaelela Media dindini anda pialu ai Egebadana tano ngago kaware dege anda pole pene.
TOB 6:10 Ani puwa Labaele ibugua lalu, I̱ hamene Tobaiasa-o, lene. Ani layagola Tobaiasahanda ladai bialu lalu, Áyu mbiraga haragola iya agali í̠ damene Laguele andaga palibiya. Agali ogoni ibu wane mbira mini Sara beda.
TOB 6:11 Í̠ni ibu dameneore kegoni. Inanaga mamali mana ngagome wali ogoni dabu bulene karulape í̠ore kegoni. Ani bialu ina mamali mana mende ngagome wandari abanaga paluni ngago damene bibahende mo yai holene karulape í̠ni dege kegoni.
TOB 6:12 Wandari ogoni ibu baya taraore mbirani ibu gi nahaga mbira beda. Ibu ababi agali bayale dege mbira ka. Ani kago ainde áyu mbiraga i̱na wandari abala bi lalu í̠na ibu wane ogoni dabu bulene karulapebe lalu hale holiya. I̱na manda bu handalu koria ibugua wandari ogoni í̠ore ngiragola dabu bibelo. Ai Lagese howa dai berebangi dabu bialu tomo timbuniore dawalu tomo nami̱ya. Laguele ibugua wandari ogoni agali mendeme damu ibiragola e̱ nalolebira. Ani bialu ibugua Sara í̠ dabu bibelo ngulebira. Ibu wane ogoni agali mende dabu bilo miyagua Mosesehanda mana lowini ngagome lalu wandari aba homelo bo waholene nga leda. Í̠ hangu ibu wane ogoni dabu bulene karulape howa ibunaga paluni ngago karu lolenebi karulapeore kego manda bida. Ani bidago ai i̱na bi larogo baya hangu hale habe. Áyu mbiraga í̠na Sara dabu bibelogo Laguele iyame bi lo tiga bialu mo tiga biai holobaya. Ani bialu Lagese dai berebangi Sara haru halu dai bibiya, lene.
TOB 6:13 Ani layagola Tobaiasahanda Labaelehondo ladai bialu lalu, I̱ hamene Asaria-o Sara ogoninaga te maru agali marume layane hale haru. Tigua lalu agali karia bibahendeme wali ogoni dabu bigi binigo ainde agali uruni ti mbiraga mbira mbirani tini dabu bigi biyadangi wandari ogoni baba mandagi palia nabi howa wandari ibu tamuha wene anda pialu hearia agali uruni homaga biniya.
TOB 6:14 Te tigua layane hale harugo agua laya. Dama ko mbirame agali uruni bo wahaga biaga laya. Dama ogonime Sara bo wanahe agali ibu padagoha pole kaware porago bo wahaga, laya. Ani layago ainde i̱ aba ai̱yala waneigini mende nahe i̱ hangu kogo ainde i̱ giba. I̱ homaruyagua nde i̱ aba ai̱yalame dara timbuni howa libubi homaragola mo hora holene libu igini mende nahe, lene.
TOB 6:15 Ani layagola dahuliyali biagome lalu, Ainde í̠ abahanda bi galone lawai hayago embeda haribe. Í̠ wali mbira í̠ni dameneore bedago dabu bulene nga laya. Ai bi o larogo baya hangu hale habe. Dama ko ogoninaga í̠na gi nahabe. Í̠ Sara dabu bule pu dege bia. Áyu mbiraga Laguelehanda Sara í̠ dabu bibelo ngulebira.
TOB 6:16 Ai í̠na Sara ibunaga tamu hobane kagoha anda pialu howa wena gubalini lilinibi hanarigo yalu anda puwa irani delaregola dalu hagua biragola tumutumu biragome anda tamu hobane ogoniha dunguame holebira.
TOB 6:17 Dama ibu tumutumu birago ngu halu ibida puabo halu Sara bedaria lone dai nabulebira. Anigo ai libu mandagi palia nabi dege biruwa pigane libugua dahuliya andaganaga Anduane Homogo kagome libu dara halu baya hangu handaya ho haabo helo ibuhondo bi ala lalibu. Hale harene. Gi nahabe. Ngode Datagaliwabehanda dindi pigane wabiangi howa Sara ibu í̠ one berelo manda buwa berelene. Í̠na dama Sara ibuha kago taliatagi halu Sara í̠ dindiha haru halu polebere. Sara libunaga waneigini dewa haragola libunaga waneiginiruhondo turu howa miniha dungulo holeberebi. Mini dege dindi nahabe, lene. Ani layagola Tobaiasa ibugua Labaelehanda bi layago baya hanguore hale hai hene. Ai Tobaiasa ibu aba dameneha Sara libu hameigini mbiraore kago manda bu hene. Ani manda buwa ibunaga miniha Sara gubalini timbuniore ho howa ibugua Sara dabu bulene hamelo hene.
TOB 7:1 Ai Tobaiasa dahuliyali Labaelela Egebadana tano anda pialu howa Tobaiasahanda lalu, I̱ hamene Asaria-o í̠na i̱ abaleore Laguele andaga haru pobe, lene. Ani lalu dahuliyali biagome ibu Laguele andaga abale haru piyagola Laguele ibuni andahane tagirayagi pabe bu mabu biago tagira haneni berearia hendene. Labaele Tobaiasala libugua bi ala lalu, Í̠ bayale bedebe, lene. Ani layagola Laguelehanda ladai bialu lalu, Libu bayuwa ibiribidago ai andaga tamuha anda ibidaba. I̱ andaga ibiribidago bayuwa ibiribida, lene. Ani lalu Laguele ibugua ogolabo ibu andaga haru anda puwa ibu one Edena olene.
TOB 7:2 Ibugua Edenahondo lalu, De handa. Igiri ogo ibu dengui i̱ damene Tobidi handalehedago be ani ndodabe, lene.
TOB 7:3 Ani layagola Edenahanda libuhondo hale halu lalu, Libu ani howa ibiribibe, lene. Ani layagola Tobaiasa Labaelela libugua ladai bialu lalu, Iya Isaraeleali Nabadali hameigini aria íbu henego. Ai áyu iya Asiria dindiha tano timbuni Niniba tano ngagoria minu yu henego ogoreni howa ibiriba lene.
TOB 7:4 Ani layagola Edenahanda libuhondo hale halu lalu, Ina damene Tobidi mbira kago libu manda bidabibe, lene. Ani layagola libugua lalu, E̱ iya manda bidaba, lene. Ani layagola wali biagome hale halu lalu, Ibu bayale karulape kabe be agua kabe, lene.
TOB 7:5 Ani hale hayagola libugua ladai bialu lalu, Ibu bayale karulape ka, lene. Ani lowa Tobaiasahanda lalu, Tobidi ibu i̱ aba, lene.
TOB 7:6 Ani layago hale howa Laguele ibu mogo lalu ibunaga deha de iba abale pugulopebe bini. Ibugua turu timbuni halu Tobaiasa nu̱nu̱ lene.
TOB 7:7 Ani buwa ibugua lalu, I̱ igini-o Ngode Datagaliwabehanda í̠ mo bayale helo. Í̠ aba ibu agali tigabini bayaleore mbira ka, lene. Anigo ai Tobidi ibu de kohe beda layago hale howa ibugua hale halu lalu, Irane agime agali tigabi bayale ogonibigo ibugua wali agalihondo mana bayale tigabi hangu biaabo halu haga kagonaga denaga hongo ereba hene howa de handabe nahe haruada, lene. Ani lowa ibugua Tobaiasa yu hurubale bialu dugu bini.
TOB 7:8 Ani biyagola ibu one Edenabi ibu wane Sarabi ti haru Tobidi mitangi bialu dugu biai hene. Ani bialu Laguele ibugua nogo sibi wangabe mbira balu tomo timbuniore dawa manda manda bini. Ai Tobaiasa Labaelela libu wayawaya bai halu tomo nole manda manda bu biruwa Tobaiasa ibugua Labaelehondo lalu, I̱ hamene Asaria-o Sara i̱ dabu buliyanaga í̠na Laguele angi hale holeberebe, lene.
TOB 7:9 Bi ogoni hale howa Laguele ibugua Tobaiasahondo lamialu lalu,
TOB 7:10 Tomo nalu iba ala nabe. Ani bialu áyu alendo dege turu holebere. I̱na Sara mulene agali mende nahe Sara dabu bulene i̱ damene aba igini mbiraore í̠ore kegoni ndobe. Anigo ai i̱na í̠hondo tigatigaore laro.
TOB 7:11 Abale i̱ wane ogoni agali kariali mini. Tibi nde ina hameigini mbiraore dege. Anigo ai ti dabu bigi binidangiore mbiraga Sara tamuha pole wene anda pugu biyagola abale homaga bini. Anigo uruni wahalu Ngode Datagaliwabe ibunime libu biamogo bulebirago í̠ áyu tomo ibaru na, lene.
TOB 7:12 Anigo ai Tobaiasahanda ladai bialu lalu, I̱ tomobi ibabi ala nane bedoore í̠ Sara i̱ nguleore labe, lene. Ani layagola nde Laguele ibugua karulapedalo manda bialu lalu, Heneneore larogo i̱na ibu í̠ ngulebero. Mosesenaga maname bibe ledadagua í̠ ngulebero. Dahuliya andaganaga Ngode Datagaliwabe ibunime dabu bulene ogo manda mandabu heneda. Ai áyu Sara ibu í̠ one berelo libu mandagi halibu. Ai Sara ibu áyu howa í̠naga biraragoni manibi biraabo helo laro. Dahuliya andaganaga Anduane Homogo kago ibunime áyu mbiraga libu handaya ho holebira. Ani bialu libu dara halu biamogo bilo laro, lene.
TOB 7:13 Laguele ibugua ibu wane olene. Ibiyagola Laguelehanda ibu wane gini gi yalu Tobaiasa berearia puwa Anduane Homogohanda libu mo bayale helonaga bi la halu lalu, Wandari ogoni gini yamia. Ai Mosesenaga mana lowini ngadagua wandari ogoni ibu í̠ oneore berelo. Emene howa nde í̠ aba libu dalu haru pialu harigani baya hanguore haru pobe. Libu haru bayale howa turu hagabu haabo halibulonaga Ngode Datagaliwabehanda libu biamogo bulebira, lene.
TOB 7:14 Laguelehanda ibu onehondo lalu, Beba mbira libu one agaliniore lalu dabu bini lalu gilibu wulenaga mo yalu íbu lene. Edenahanda beba biago mo yalu ibiyagola Laguele ibugua libu dabu binigo habo nalolenenaga bi beba ogoriani gili bialu lalu, I̱na Mosesenaga mana ngagome ledadagua Sara Tobaiasala libu dabu bilo merogoni, lalu gilibu wini.
TOB 7:15 Tigua uruni biai howa tomo nalu berene.
TOB 7:16 Mani Laguelehanda ibu one olowa lalu, Tamu hobane mbira mo manda manda bu ngelowa Sara ibu tamu ogoniha haru pobe, lene.
TOB 7:17 Ani laya handala Edena ibugua tamu hobane mbira mo manda manda bu ngelowa Sara ogoniha haru puwa berelene. Ani berelowa Edenahanda ibu wane dara timbuniore howa dugu bini. Mani ibunaga deha de iba ibiyago domalu howa lalu,
TOB 7:18 Sara-o miniha genda nahabe. Áyu dahuliya andaga haga Ngode Datagaliwabehanda í̠ mo turu halu í̠ miniha daraho bere nalolebira. Ani bulebirago í̠naga mo palia holene karulo birabe, lene. Ani lalu Edena ibu tamu hobane wahalu tagira pene.
TOB 8:1 Ai tomo naiho biruwa paluengi hayagola wandari aba ai̱yalame igiri biago paluene anda hobane heagoha haru anda pene.
TOB 8:2 Ai Tobaiasa ibugua bi mbira Labaelehanda layago baya hangu manda biaabo ho howa ibugua wena bunibi lilini biagobi nuha henenego tagu yalu puwa ira delaga wiagoria delene.
TOB 8:3 Ani delayagola dama biagome wena buni lilini biago dalu hagua tumutumu biyago ngu halu ibida tagira pialu dindi abene unurahayagi Iyibi dindi wiagoha yagalalu pene. Labaelehanda haruru talima pugupugu bialu minu yania howa dama biago pu hongoheme gi geni dariba ho ngelene.
TOB 8:4 Ai anda tamu hobane biagoha mbirali nabere Sara Tobaiasala libu hangu biruwa panga paya tagi hene. Ani biruwa Tobaiasa ibugua ibu onehondo lalu, Yamali-o ai Anduane Homogo ibunime iya baya hangu biamogo bialu handaya ho helo ibuhondo bi labiya heya, lene.
TOB 8:5 Ani layagola Sara ibu heyalu libugua Ngode Datagaliwabehondo libu baya hangu handaya ho howa mamage habe lalu bi lene. Tobaiasahanda Ngode Datagaliwabehondo bi lalu, I̱na mamalirunaga Ngode Datagaliwabe-o iyame í̠naga mini yaraga holene karulape. Mbirale bibahende dindini ngarume karumebi dahuliya andagaha ngarume karumebi í̠naga mini dege yaraga holene nga.
TOB 8:6 Í̠na Adama wabu helowa ibuni hangu holene nakarulape heagola wali Iba Adama ibu one berelo Adamala mandagi ibagabu helobi ibu biamogo bilobi Iba Adamahondo miriya. Ani mirigola dindini wali agali bu karu bibahendenaga mamali libu hene. Í̠nime lalu, Agali ogo ibuni hangu helo nakarulapedago ai ibuni ale dege mbira ibula mandagi helonaga wabule manda bimi̱ya, lariya.
TOB 8:7 Anduane Homogo-o áyu Sara ibu dabu biaga mana tigatiga ngagoria howa i̱na ibu dabu berogoni. I̱na ibu de hondowa i̱naga miniha dimagoli hayagola bame haru pu ndo bero. Ani berogo ainde í̠nime iya dara halu iya dindini lu howa mandagiore birudagua hagahaga bulubaya biamogo bibe, lene.
TOB 8:8 Ani lowa libu harume lalu, Aniore bilo, lene. Ani lalu libu mandagi palialu egabi lene.
TOB 8:9 Mbiraga ogoningi dege Laguele ibugua agali biabe biaga agali palearu barila howa tihondo lalu, Agali hora holene homali uli mbira abale tombole pudaba, lene.
TOB 8:10 Ani layagola Laguele ibugua irane mitangi bialu ai Tobaiasabi homa dege biragola wali agali maru karume ibuhondo oba halu mege buligonaga ani bini.
TOB 8:11 Agali biaru tigua homali manda manda bu wiagola Laguele ibu anda tamuha dai buwa ibu onehondo lalu,
TOB 8:12 Ai Tobaiasa homayabe nahomebe tobahedago í̠na biabe biaga wali mbirame de hondo pu bi la. Tobaiasa ibu homayayagua nde wali agali tara bu karu nahendedaha abale hora hami̱ya, lene.
TOB 8:13 Ani laya handala Edenahanda wali biabe biaga mbirame lamu hale hedo yalu de hondo pu lene. Ani laya handala wali ogonime tamu hobane biagoha anda puwa handalu hearia libu palebiria hendene.
TOB 8:14 Wali biago ibugua handalu dai buwa Laguele Edenala lamialu lalu, Tobaiasa bayale pada, lene.
TOB 8:15 Ani layago hale howa Laguelehanda dahuliya andagaha haga Ngode Datagaliwabenaga mini yaraga halu lalu, Ngode Datagaliwabe-o bibahendengi iname í̠naga mini yaraga halu haabo holene karulapeore kamagoni. Í̠naga wali agalirume í̠naga mini yaraga halu haabo holoma̱ya, lene.
TOB 8:16 I̱na í̠naga mini yaraga harogo irane í̠na i̱naga bu habaneha turu holene to̱latagi heledegonaga. Í̠na ina dara timbuni harigola mbirale inaha anda ibulilo giho hemago naibiya.
TOB 8:17 Anduane Homogo-o iname í̠hondo bi turubi tigabiore langulene karulape kama. Ani larogo irane í̠nime wandari igiri ogolabo dara ho haridagonaga laro. Libu aba ai̱yala waneigini mende nahe libu mbira mbira hangu hene. Ainde libu dindi ogoria homa nabi kebiangi turu ho ibaga bu helobi miniha mo palia holene karulo helobi í̠na libu dara ho haabo habe, lene.
TOB 8:18 Gao nale dege wiangi Laguelehanda agali biabe biaga biaruhondo lalu, Homa uli biago lone abale mogo bidaba, lene.
TOB 8:19 Laguelehanda ibu onehondo lamialu, Mberedi dewaore karulapelo hirabe, lene. Ani lamialu ibuni nogo bulumaga wangabe kira sibi wangabe maria lowa ibunaga biabe biaga agali hearuhondo, Bo bodobaga bialu dabu biragonaga tomo timbuni nole dawa manda manda bilimu, lene.
TOB 8:20 Ibugua Tobaiasa olowa íbu lalu ibugua gi dolalu heneneore bulego laro lowa Tobaiasa abale pu nale Sarere kira helo helene. Ani helowa ibugua Tobaiasahondo lamialu lalu, Í̠ tomo nalu ibabi nalu i̱la habiya. I̱na Sara ibu abale agali penedaruha genda timbuniore yu berenego áyu ibu mo turu holebero.
TOB 8:21 Ani buwa mani i̱naga mbirale ngogo damene hanuni tale buki howa mende yalu í̠ aba karia dai bibelo. Ai Edena iya homedebagola i̱naga paluni maru ngago í̠ hai habelo. Iyame í̠ gubalini timbuniore ho kabago í̠ni manda bidego. Ai áyu í̠ iya iginiore Sara ibu iya waneore bedagobi dege kegoni. I̱ igini-o í̠ gi nahabe, lalu Laguelehanda lene.
TOB 9:1 Mani Tobaiasahanda Labaele olalu íbu lowa lalu,
TOB 9:2 Asaria-o í̠na agali biabe biaga maria haru ha nogo kamele kira haru ha bialu Lagese tano Gabaelenaga andaga pobe. Puwa í̠na Gabaele ibuhondo beba ogo bamba Tobidi libuni mandagi howa gilibu winiyago mo walia halu muni ogoni mo yalu dai bibe. Ani bialu Gabaele ibubi nde dabu bialu tomo timbuni nalu kamagobi nelo mba lalu haru halu ibabe.
TOB 9:3 Í̠ manda bidegoni i̱ aba Tobidi ibu i̱ ibinidago horo ogodaguaore ibagabu halu dai bulebira lo manda bialu horo daga lalu ka.
TOB 9:4 I̱na horo mbira bolangua halu dai biruyagua nde ibunaga miniha mogolo holebira. Ani bialu bi ogodagua bulene lalu bi hongohe Laguele ibugua layagobi í̠ manda bide. I̱na bi ogoni mo wahalu ibunaga miniha genda yu nahelolebero, lene.
TOB 9:5 Ani laya handala ai Labaele halu agali mariali biaru ti pialu Lagese tano anda pialu Gabaele andaga anda pu berene. Ani biruwa Labaele ibugua muninaga beba yayago Gabaele mini Tobaiasabi wali áyu dege dabu biya lalu Gabaele ibu dabu bialu tomo timbu dawalu kamago nami̱ya ibabe laya lalu lo wini. Ani laya handala Gabaele ibugua abale puwa muni wiyadagoha handalu hearia muni biago abale nuha dagalo winidagobiore wiaria mo yalu puwa nuha honowa nogo kamele ere kunini mo paga hene.
TOB 9:6 Ani bialu egerebagiore gao layagola ti abale dabu bialu tomo narago mandagi nole manda bialu abale anda pole pene. Labaele Gabaelela Laguele andaga anda pialu hebira Tobaiasa tomo nalu berearia hendene. Ai Tobaiasahanda abale heyuwa Gabaelehondo, Ibirida, lalu mo bila hene. Ani mo bila hayagola Gabaele ibugua Tobaiasahanda bi layago ladai bialu hearia Gabaele de iba abale ibiyagola ibugua Tobaiasahondo lalu, Í̠ agali bayalebi tigabiorebi howa í̠ aba ibuni aleoredago. Ainde Anduane Homogo dahuliya andagaha haga kago ibugua í̠bi í̠ onebi libu haru mo bayale helo. Ani bialu ibugua í̠ imane wandari aba ai̱ya kirabali mo bayale helo laro. Ainde Anduane Homogohanda i̱ hameigini Tobaiasa dengui hondoliyanaga i̱ abale homa nabi helayagonaga i̱na Ngode Datagaliwabenaga mini yaraga haro. Ibunaga dengui ibu abanaga denguiore handaleheda, lene.
TOB 10:1 Ai Tobaiasa dai nabiaore dege Tobidi ibugua Tobaiasa ibu Lagese pialu dai bulene horo ogodaguaore piya lowa daga lalu hene. Ani lalu howa ibunaga miniha ibu igini biago pialu dai bulene horo piai hayabe toba howa mitangi tangi bini. Ani biyagola Tobidihanda ibu onehondo lamialu lalu,
TOB 10:2 Ainde mbirale mbirame iya igini emene mo luma hayagola ibu abale dai nabiaruabe tobaneda. Ainde Gabaele ibuni homayagola agali mendeme Tobaiasahondo muni namiyagola ka bada, lene.
TOB 10:3 Ani layagola Tobidi ibu tiniha mini burugu lama irigi hene.
TOB 10:4 Ani biyagola Anahanda lalu, I̱ igini homayada. I̱ mandaore bido, lene. Ani lowa ibugua Tobaiasa dara howa kiabu dugu bialu lalu,
TOB 10:5 I̱ iginiore-o í̠ i̱naga gubalini haabo heneore ndobe. Irane aginaga í̠ yupe halu pu laruyabe, lene.
TOB 10:6 Ani layagola Tobidihanda ibuhondo lamialu lalu, Tobaiasa ibu bayale karulape holebirago dugu nabi waha, lene. Libu abale dai bulenego mbirale mbirame mo luma haragola kabada laro. Agali libu piribigo ibu ina hameigini mbiraoreni agali bayaleni hongohela piribigo í̠ manda bide. Í̠ mogolalu mini burugu nale waha. I̱na manda bialu koria Tobaiasa áyu ogoni dai bialu harigani ibira lo manda bido, lene.
TOB 10:7 Ani layagola wali biagome ladai bialu lalu, Wahalu waha. I̱ dugu bialu biruliya í̠ ani heyu harene. Í̠na i̱ mohondo nahabe. I̱ igini homaore biyada, lene. Ani bialu howa horo bibahendengi Ana ibu egerebagiore gao laga biragola puwa hariga Tobaiasa piyagoria pu haga biaga. Ani hondo haga dege bialu alendo halu ni anda pugu bini. Ibu tomo nane dege haabo heane alendo dai bigi bialu ibu igininaga dugu bima daibu palialu egerebagi gao laragola heyalu pugu bigi biaga. Ibu u emeneorebi napale haabo haga hene.
TOB 10:8 Ai Laguelehanda ibu wane Sarahondo buleore lowa gi dolalu dabu bininaga tomo timbuniore dawale lalu bi lenego tomo ogoni nalu hemine sarere kira piya. Ani piyagola ainde Tobaiasa ibugua Laguele berearia puwa ibuhondo hale halu lalu, Ainde i̱ni dalu dai buliya í̠na karulapego pu loleberebe. Ainde i̱ aba ai̱yalame mini burugu timbuniore lalu libugua i̱ dengui lone nahondoleda lowa genda timbuni yu biraruago. Ainde Laguele-o í̠ aba ai̱yala karia dai bia la. Ai i̱na ibalu abale í̠hondo ibunaga de kirabali ndibulo wahalu ibunibi nde agali waheore beda lalu í̠ langirugoni, lene. Ani layagola Laguelehanda ladai bialu lalu. Igini-o i̱na agali maru bi yalu í̠ aba karia puwa í̠ karulape ka lalu lama pudaba loliya ai í̠ i̱nila holene karulape, lene.
TOB 10:9 Ani layagola Tobaiasahanda hondo howa lalu, Ani ndo i̱ anidagua nabuleorego ainde i̱ aba karia dai bia larene, lene.
TOB 10:10 Ani layagola Laguele ibugua emene hondo ha nabi Sara Tobaiasa ibu mini. Ani bialu ibunaga mbirale bibahende hanuni talebu ki howa mendehayagi Tobaiasa mialu bini. Wali agali garabaya biabe ale biaga hearubi nogo bulumagabi sibi hearubi dongi hearubi kamele hearubi yári tara tara wiarubi muni wiarubi hanuni talebu ki howa mendeha Tobaiasa mini.
TOB 10:11 Laguelehanda Tobaiasa nu̱nu̱ lowa ibuhondo bi bayale lamialu lalu, I̱ igini-o ainde pobe. Dahuliya andaganaga Ngode Datagaliwabe ibunime Sara libu baya hangu mamage howa handaya ho holebirago libu bayale pialu anda pilibu. Ainde libunaga waneigini harago i̱ni de ngui hondolene hamelo kogoni, lene.
TOB 10:12 Ani lowa Laguele ibugua Sarahondo lamialu lalu, Áyu í̠ agalinila pamia. Puwa ibu aba ai̱ya andaga kagoha biraabo habe. Í̠ ai̱ya iya í̠ aba ai̱yala hama ibinigo áyu kabagonidagua dege igiri ibu aba ai̱yala í̠ aba ai̱yala ho birabe. Libugua í̠hondo bi bayale dege langialu lene hale halu biraabo howa homalu waholene hameledo, lalu Laguelehanda ibu wane Sarahondo lamini. Ibugua libuhondo, Pilibu, lalu bi lai howa, Ai libu pudaba, lene. Ai Edena ibugua Tobaiasahondo lalu, Tobaiasa í̠ore i̱ igini bayale. Anduane Homogohanda í̠ baya hangu í̠ni andaga haru dai bulebira. Ani bialu i̱bi nde í̠ waneigini harago de hondoliya Anduane Homogohanda baya hangu handaya ho helo laro. Ai Anduane Homogo ibugua i̱naga bi larogo hale holebira. I̱ waneore í̠ baya hangu handaya ho habelo ngero. Aiore nde halu mbira hanguorebi ibunaga miniha mo ko holene ale mbira nabibe. Áyu libu harigani bayale pilibu. Áyu Sara ibu í̠ one bedagoni. I̱ í̠ ai̱ya biraro. Ina haga haga bu kamaha bayale howa turu ho haabo hami̱ya Ngode Datagaliwabehondo bi lolebero, lene. Ani lai howa Edenahanda ogolabo nu̱nu̱ lalu, Ai pudaba, lene.
TOB 11:1 Ai Tobaiasa ibu pialu howa ibunaga bu miniha turu halu pene. Ibugua Anduane Homogo ibu dindi ngagonagabi dahuliya andaganagabi Ngode Datagaliwabeore howa bibahende karubi ngarubinaga kiniore kagonaga mini yaraga hama pene. Ibu ibaga bialu tagira pu hayagoha bibahende bayale dege hayagonaga ibugua Ngode Datagaliwabehondo ka̱i̱ lene. Ibugua Laguele ibu onelanaga mini yaraga halu haabo halu libu homara handala wahole lalu bi lo wini. Tobaiasa halu piyaru ti dindi Kaserini Niniba tano kaware dege ngelowa wiagoria anda pialu howa
TOB 11:2 Labaelehanda lalu, Tobaiasa iya tagira pialu piribangi í̠ aba ogobi berelalu piribalo í̠ni manda bide.
TOB 11:3 Ai í̠ one ibu mani ibilo iyame mo bamba halu puwa anda tamuru mo tiga bialu hole polene karulapeda.
TOB 11:4 Ani bialu wena buni dugu hanarigo yalu polene embeda holeni, lene. Ani lalu libugua mo bamba halu piribigola Tobaiasanaga biango biagobi ti haru dege pene.
TOB 11:5 Horo ogoniangi Ana ibu lone puwa de ibu igini piyago dai birabe hondole handa amuho berene.
TOB 11:6 Ani biruwa ai deme Tobaiasa ibiyago hondowa abaleore ibugua Tobidi olowa lalu, De handa. Iya igini ibalu ibu nenege libu haru piribigobi ibira, lene.
TOB 11:7 Ai libu Tobidi heagoria kaware naibi wene ibalu heaore Labaele ibugua Tobaiasa lamialu lalu, Í̠ aba ibu de lone hondolebira.
TOB 11:8 Í̠na wena buni dugu hanarigo ibunaga de kirabalini palada para haradagua bibe. Wena buni ogoninaga marasinime mbirale labolabo aleme de buyi kago lagalope haragola í̠na gime mo waholebere. Ani beregola í̠ aba ibu lone de hondolebira, lene.
TOB 11:9 Ana ibugua gerai pialu ibu igini gi kirabalime yu hubi lowa lalu, Áyu í̠ igini lone dai beregonidago ainde i̱naga miniha mo palia holene karulo biralu nde homoliya, lene. Ani lalu howa ibuha turu timbuni hayagome de iba deha howa pora bini.
TOB 11:10 Ainde Tobidi ibu heyalu hendore tagiraha pabe bu mabu biagonaga panga haraba wiagoria tagira pene.
TOB 11:11 Ani heagola ai Tobaiasahanda wena buni biago gime tagu yalu Tobidi heagoria pene. Ibugua ibu abanaga deha pulaba halu ibu aba bayuwa helo mo tigabu helene. Ani heagola ibu abahondo lalu, Aba-o í̠ gi nahabe, lene.
TOB 11:12 Ani lowa Tobaiasa ibugua marasini biago ibu aba deha ha̱i̱ howa mani mbirale pele deha para heago lagalo wahene.
TOB 11:14 Ani biyagola Tobidi ibugua Tobaiasa payani ibunaga gi kirabali paga howa turu timbuni halu dugu bini. Ibugua hongo howa lalu, I̱ igini í̠ áyu lone de hendedogonida. Í̠ i̱naga denaga wá holene hale de kegoni. Áyu iname Ngode Datagaliwabenaga mini yaraga holene nga. Iname ibunaga mini timbuni mini lene ka lami̱ya. Ibunaga dara holene timbuni ngagome inahondo baya dege biaabo holebira.
TOB 11:15 Ibunime i̱naga de mo ko holene ogoni i̱ha ibilenego ainde áyu lone i̱ igini Tobaiasa de hendedogoni, lene. Ainde Tobaiasanaga bu miniha turu holene to̱laiore hayagola ibuni andaga tamuha anda pialu howa Ngode Datagaliwabehondo iba gana hongo howa lalu ibunaga mini yaraga halu iba gana lamalama anda pene. Ani bialu ibu piyagoha mbirale bayale tagira bigi biyago bibahende ibu aba lamiai hene. Ibugua lalu, I̱na muni hangu ndo mo yido. Wali i̱ one haru halu bido. Ibu mini Sara. Ibu Laguele wane. Ibu wene harigani ibalu haruago ai emene howa ogoria anda ibulebira, lene.
TOB 11:16 Ai Tobidi ibu tanonaga pabe heago panga harabani ibu igini Tobaiasa one ngolaho pole pene. Ai ibu bu miniha kiau lalu yagalo howa ibugua Ngode Datagaliwabenaga mini yaraga hene. Ai Niniba wali agalime Tobidi hondowa ti mogo timbuni lalu ibu mbiralime hariga mo walia halu gini yalu piaga mbira napiyagola mogolene.
TOB 11:17 Anigo Ngode Datagaliwabehanda ibu dara halu ibunaga de mo bayale hayago wali agali bibahende lamialu ibugua Ngode Datagaliwabenaga mini yaraga halu hene. Ai Tobidihanda Sara ngola howa ibiridago bayaleore lowa lalu, I̱ wane-o bayaleore ibirida. Ngode Datagaliwabe ibunime í̠ ina hemagoha haru ibiyadagonaga ibunaga mini yaraga hami̱ya. Ai Ngode Datagaliwabehanda í̠ aba mo turu halu í̠nibi í̠ igini Tobaiasabi libu haru mo bayale helo. Ai í̠na anda hami̱ya andaga anda íbu, lene. Horo ogoni Yuda wali agali bibahende Niniba dindiha hearu tinaga turu holene horo tagira ibiniangi.
TOB 11:18 Agali kirali Tobidi damene Ahiga Nadabala libu ibalu Tobidi heba mandagi turu hamaga hole ibini.
TOB 12:1 Ai tigua dabu bialu tomo nalu berenego nai howa Tobidihanda Tobaiasa olalu íbu lowa ibuhondo lalu, I̱ igini-o igiri í̠la hariga mba lalu piribigo ibu yolo mulenego embeda nahabe. Ani bialu mbirale marubi ibunaga yolo meregoria paga halu mulene karulape nga, lene.
TOB 12:2 Ani layagola Tobaiasahanda hale halu lalu, Aba-o i̱na yolo ogoni agira muliya hame ledebe. Ina mbirale inane yalu ibirimaru hanuni mo talebu ki howa mendehayagi ibu yolo buliya karulapeda.
TOB 12:3 Ibugua i̱ haru hayagola i̱ bayale halu dai biru. Ibugua Gabaele andaga muni mo pialu yu daibu ngiya. Ibugua dege i̱ oneha dama heago waratagi halu í̠naga de mo bayale haya. Anidagua biyago ainde i̱na ibu yolo agira mibehebe, lene.
TOB 12:4 Tobidihanda ladai bialu lalu, Í̠na manda biridago tigabioredago. Ai mbirale ibunime mo yalu ibiyadago aria talebu ki howa halu mendego ibu mibe, lene.
TOB 12:5 Ai Tobaiasahanda Labaele olalu íbu lowa lalu, Mbirale i̱ biamogo bialu mo yalu ibiribago hanuni talebu ki howa halu mendego í̠ mo yabelo. Mbirale uruni í̠naga yolo mo yabelo. Ani bialu í̠ni andaga dai beregoha Ngode Datagaliwabehanda í̠ harigani baya hangu handaya ho helo laro, lene.
TOB 12:6 Ani layagola Labaele ibugua Tobidi Tobaiasala haru pubagi howa libuhondo lamialu lalu, Ai libugua Ngode Datagaliwabenaga mini yaraga halu ibuhondo iba ganaru lalu halibulo. Ibugua libuhondo biabe bayale biyaru wali agali hale helo latagi halu halibu, lalu lamini. Libugua anidagua berebigola wali agali bibahendeme Ngode Datagaliwabehanda biyadaru manda biai holebira. Libugua Ngode Datagaliwabenaga mini yaraga halu haabo halibu, lalu lene.
TOB 12:7 Heneneore mbira wali agalime kininaga mini wiado kago latagi habe nahe ka. Anigo dindi bibahendeha wali agali bu karume Ngode Datagaliwabehondo ka̱i̱ lalu ibunaga mini yaraga helo ibugua tihondo biabe timbuni biyaru latagi halu holene nga. Mbirale ko ngagome í̠ warape nahelo í̠na mana bayale ngago hangu bialu haabo holene nga.
TOB 12:8 Ngode Datagaliwabehondo bi bayuwa lolenebi ibunaga hame ngago taluwa bialu holenebi wali agali yagibano karu baya hangu biamogo bulenebi mana uruni ngagome agali homogo mbirale dewawi howa mana ko ngaru hangu mo tene howa bialu haga karu bolangua hene nga. Mbirali yagibano kago muni miagagome mbirali ngolo dewaore ibu andaga mo ngoai howa haga kago bolangua hene ka.
TOB 12:9 Mendeali kagohondo mbirale dewa talebu miaga kago ibuha homolene anda naibilo hagira bianda haga nga. Anidagua beregome í̠ha ko ngagobi domo wahai holebira. Wali agali bibahendeore yagibano biamogo biaga kago ibu bayale haga.
TOB 12:10 Anigo maru mana ko bialu mana bayale ndo tara tara ngaru bialu haga kagome ibuniha ko holene haru anda ibaga nga.
TOB 12:11 I̱na libuhondo bi mbira aguadagua laro. Wali agalime kininaga mini wiado kago latagi habe nahe ka. Anigo iname Ngode Datagaliwabehanda biyaru dindi bibahendeha hale hayogo lelo latagi halu holene nga laru. Ai áyu i̱na mbirale mbira yado nahe libuhondo bi heneneorego langiai holebero.
TOB 12:12 Tobidi í̠nabi Sarahandabi Ngode Datagaliwabehondo bi laribigo i̱nime mo yalu Ngode Datagaliwabenaga wanakuihayagi pu haru. Ani bialu mende homayagola í̠na hora halu hariruni mbira mbiranaga bi dibudibu ogoale bialu ka lalu abaleore mo yalu pugu biruli.
TOB 12:13 Horo ogoningi í̠na tomo nane wahalu agali homene biago hora hole pirigola Ngode Datagaliwabe ibunime i̱hondo í̠ bahondole pu layagola ibiru.
TOB 12:14 Anigo ai áyu ibugua i̱hondo í̠ lone mo bayale hole pu laya. Ani bialu dama í̠ aruni Saraha heagobi taliatagi halu bule pu laya.
TOB 12:15 Ai i̱ mini Labaele kogoni. I̱ dahuliyali karia Ngode Datagaliwabenaga wanakuiha haabo howa horo bibahendengi Ngode Datagaliwabenaga biabe bule manda manda bu haabo haga karu aria mbirago i̱ kogoni, lene.
TOB 12:16 Tobidi Tobaiasala libu bi ogoni hale howa libu mogo timbuni lalu libu dindini bulu palialu palipe hene. Libu gi timbuni howa duru lalu hene.
TOB 12:17 Anigo Labaelehanda libuhondo lalu, Libu gi nahalibu. Bayale holene ngago libu heba haabo helo. Libugua Ngode Datagaliwabenaga mini yaraga haga ngebigo wanahe haabo halibu.
TOB 12:18 Ngode Datagaliwabe ibuninaga hame leagome i̱ ti biamogo bule ibinigo kogoni. I̱ i̱ninaga hameme ibini ndo ko. Ai libu horo bibahendengi dindi ogoriani howa Ngode Datagaliwabehondo iba gana lalu ibuhondo ka̱i̱ laabo halu halibu.
TOB 12:19 Libugua handalu hebira i̱ tomo nara lo manda biribi. I̱ tomo nane bame nene tingi haru.
TOB 12:20 Horo bibahendengi libu dindini kebingi howa Ngode Datagaliwabenaga mini yaraga halu ibuhondo ka̱i̱ lalu haabo halibu. Ai áyu i̱ Ngode Datagaliwabe i̱ pu layago ibuni karia dai bero. Ai mbirale libuha biyaru bibahendenaga bi te gili bilibu, lene.
TOB 12:21 Ani lalu Labaelehanda libu helalu ibu pene. Ani piyagola Tobidi Tobaiasala libugua Labaele lone nahendene.
TOB 12:22 Ani biyagola libugua Ngode Datagaliwabehondo iba gana lalu ibunaga mini yaraga hene. Ani bialu libugua Labaele libu heba howa biabe timbuniore libuhondo bialu hayagonaga Ngode Datagaliwabehondo ka̱i̱ timbuni lene.
TOB 13:1 Ai Tobidihanda Ngode Datagaliwabehondo iba gana ogo lalu, Ngode Datagaliwabe haluhe kagonaga mini yaraga haabo holene nga. Ibugua bibahende baya hanguore handaya ho haga kagoni.
TOB 13:2 Ibugua ina minu ba nde balu mani nde ina dara haga ka. Ibugua ina homeneru dindiha pelowa. Ani bialu mani homaliha howa ina lone mo heya haya. Henene o mbirali ibunaga giha howa pora bialu napolebira.
TOB 13:3 Isaraele wali agali kemiru-o tí wali agali tara dege dombeneha kemingi howa tígua Ngode Datagaliwabehondo ka̱i̱ lalu holene nga. Ngode Datagaliwabehanda ti wali agali tara bu hearu ti dege dombeneha garabaya helayago.
TOB 13:4 Ani bialu dindi ogonihabi nde ibunaga hongo timbuni mo walia hayagoni. Iname Ngode Datagaliwabenaga mini yaraga hama. Ibu Anduane Homogoore howa inanaga abaore kagoni. Ani kago manda bialu wali agali bibahendeme ibu inanaga Ngode Datagaliwabeore karulape haabo haga kago heneneore hale halu manda bulene nga.
TOB 13:5 Heneneore ibugua tí tandaga ngiyago irane tígua ko tara tara wiaru bialu harimigonaga ngiya. Anigo genda uruni waha mani ibugua tí wali agali tara dege dombeneha hemiria ibugua tí lone taya bialu haru dai bialu tíninaga dindini helolebira.
TOB 13:6 Tígua Ngode Datagaliwabehondo bu mini mo beregedalu ibunaga bi ledago talialu kemigola ibugua tí kemigoha handa dai bialu tí biamogo bulebira. Tígua ibunaga dengui nahandalimulo ha do kagola ibunaga dengui lone nahondoleberemi. Ngode Datagaliwabehanda tíhondo mbirale biyaru bibahende mo embeda nahalimu. Tínaga bu minime Ngode Datagaliwabehondo ka̱i̱ laabo halu halimu. Ngode Datagaliwabe ibunaga mini tigabiore ngago mo yaraga halu halimu. Kini haluhe haabo haga kagonaga mini yaraga halu halimu. I̱ dindi taraha garabaya ha kogonigoyu ainde i̱na ibuhondo ka̱i̱ lalu haabo holene hameledo. Wali agali mana ko biaga karunihondo Ngode Datagaliwabenaga hongo taraore ngago lamulebero. Mana ko hangu mo tene howa bialu kemiru wahai halu Ngode Datagaliwabehanda hameledaru bialu haabo halimu. Anidagua beremigola ibugua tíhondo miniha lone gedaore halu tí dara holebira.
TOB 13:7 I̱na í̠naga Ngode Datagaliwabe kagonaga mini yaraga halu ibunaga hongo timbuni gibiore ngagonaga turu taraore ho ko. Dahuliya andaganaga kini-o í̠naga hongo holene bibahendeme í̠naga mini yaraga halu ko.
TOB 13:8 Wali agali bibahendeme ibunaga hongo timbuni gibiore kago mendeali hale helo latagi halu Yarusalemeni howa Ngode Datagaliwabenaga iba gana la holene nga.
TOB 13:9 Yarusaleme-o í̠ Ngode Datagaliwabenaga tanoore ngegoni. Wali agali í̠ha karume mana ko dewaore bialu hayagonaga Ngode Datagaliwabehanda Í̠ pani ngulebira. Anigo wali agali mana bayale biaga karu Ngode Datagaliwabehanda tí dara holebira.
TOB 13:10 Ani biaga kago manda bialu Ngode Datagaliwabehondo ka̱i̱ lalu harimiyagua ogoni bayale. Kini haluhe haabo haga kagonaga mini yaraga halu holene nga. Tigua í̠naga bi lolene anda lone bia haragola í̠naga wali agali tigua lone turu timbuniore holebira. Anduane Homogohanda í̠naga wali agali garabaya karu lone mo turu holebira. Wali agali áyu tandaga timbuni nalu karu ibugua tí luore handaya ho haabo holebira.
TOB 13:11 Yarusaleme í̠naga wá timbuniore dindi ngaru bibahendeha piai haragola wali agali dindi kaundiaha karu bibahende í̠ha ibai holebira. Wali agali hameigini tara tara padaru bibahendeme ibalu Anduane Homogo í̠naga Ngode Datagaliwabe kagonaga mini yaraga hole ibalu tigua Ngode Datagaliwabe ibu dahuliya andaga kini kagonaga lomaru yalu ibulebira. Í̠ha hariga pedaru bibahendeha wali agalime Ngode Datagaliwabehondo turu halu iba gana lagalaga bulebira. Ani bialu í̠naga mini daliga mini lene wiaabo holebirago irane Ngode Datagaliwabehanda í̠ ibuninaga tanoore ngelo dabayagome ani wulebere.
TOB 13:12 Maru í̠hondo bi ko laga karubi í̠ hengedope halu bope haga karubi í̠naga wai pabe bo gialaga karubi í̠naga anda pabe neneni mamageali mamage haga anda daliga kago bo gialope haga bu karubi í̠naga pabe andaneha anda hearu bo gialo delaga bu karubi bibahende Ngode Datagaliwabehanda tini pani mialu mo ko holebira. Anigo agali maru í̠ mo bayale haga karu tí Ngode Datagaliwabehanda mo turu halu haabo helolebira.
TOB 13:13 Yarusaleme í̠naga wali agali tigabi bu karuhondo turuore holene nga. Mani tigua garabaya wahalu dai buwa í̠naga pabe andaneha íbu ngoai howa Anduane Homogo haluhe haabo haga kagonaga mini yaraga halu holebira.
TOB 13:14 Wali agali í̠ gubalini haga karu ti tinaga bu miniha turu ho howa bayale holebirago irane í̠ bayale kego hondowa ani bulebira. Wali agali í̠ genda yu kego hondowa dara timbuni ho karu ti mani í̠ de hondowa turu holebira. Ani bialu í̠na turu holeneme bayale holene mo yu anda ibalu bayale wiaabobo bu wulebira.
TOB 13:15 I̱na Ngode Datagaliwabe ibu kini timbuniore kagonaga mini yaraga halu kogoni.
TOB 13:16 Tigua Yarusaleme lone arema biadai biragola Ngode Datagaliwabe ibu dalu wiabobo bu wulebira. Yarusaleme-o í̠naga waneiginirume í̠naga yári bayaleore bidego de hondowa dahuliya andaganaga kiniore kagonaga mini yaraga halu kangi i̱na turu timbuni holebero. Tigua ege to̱le̱ bayaleore ira yuni dongomabi hari mindini handalehebi ngarume í̠naga pangaru wabialu í̠naga wai paberu bibahende ege to̱le̱ muni timbunime miaga ngarume biai holebira. Tigua wai pabe neneni mamageali handa a̱i̱na̱i̱ bu haga anda ngolome bulebira. Tigua ngolo bayaleoreru mo yuwa í̠naga wai pabe bu mabu bulebira.
TOB 13:17 Tigua ege to̱le̱ baya daramabimebi ege to̱le̱ ngiringaralerumebi hariga wabulebira.
TOB 13:18 Í̠naga panga bibahendeni turu holenenaga iba gana laruane hale holebira. Ani bialu í̠naga anda bu karuha howa wali agalime ibagana ogodagua lolebira. Agua agua, lalu baya gibiore Isaraelenaga Ngode Datagaliwabenaga mini yaraga holene nga. Yarusaleme-o Ngode Datagaliwabehanda í̠naga wali agali mo bayale haragola tigua ibunaga mini baya buruguleore ngago yaraga halu haabobo holebira, lalu Tobidihanda iba gana ogoni lene. Bi ogoriani howa Tobidihanda iba gana lalu Ngode Datagaliwabenaga mini yaraga halu layago lamaro bini.
TOB 14:1 Ai Tobidinaga de ko halu mbirale handabi nahe hayangi ibu mali pira waragariani kira (62) hene. Mani de lone bayale hayagola ibu luore hene. Ani howa ibugua abale biaga wiyadagua yagibano hearuhondo mbirale dewaore talebu migi bialu haabo hene. Ani bialu howa ibugua Ngode Datagaliwabenaga mini yaraga halu mbirale bayale biyaru damene latagi halu hene. Ani bialu howa ibu mali handari mbirani kira (112) halu homene. Tigua ibunaga tingini Ninibani hora halu tigua Tobidi dara timbuni howa dugu bini.
TOB 14:3 Tobidi ibu mani dege homole lo biruwa ibu igini Tobaiasa olowa paluni bi lamialu lalu,
TOB 14:4 I̱ igini-o áyu ogoni í̠ waneigini bu karuni bibahende haru halu Media dindi pobe. Ani larogoni irane Ngode Datagaliwabenaga bi mana latagi haga agali Nahumuhanda pani nolene koore mbira tagira ibulebira lalu bamba mbiwia henego áyu tano ogoha tagira ibule biaruago í̠ pobe laro. Bamba Isaraele dindiha agali Ngode Datagaliwabenaga bi mana latagi haga hearume mbiwia halu mo ko holene taraore Niniba tanohabi Asiria dindihabi tagira ibulebira lenego heneneore tagira ibulebira. I̱naga miniha manda bu bedogome mbirale mbira bulebira lalu Ngode Datagaliwabehanda lenego damene bibahende tagira ibulebira lo winidangiore ibulebira lo manda bido. I̱naga miniha manda bidogome bi bibahende Ngode Datagaliwabe ibugua langiyaru damene heneneore tagira ibulebira. Ngode Datagaliwabe ibugua buleore lalu bi lo winigo wanahagaore ka. Ani biagago ainde í̠ Asiria dindibi Babilonobi yu wahalu Media dindiha hole pobelo hameledo. Waitigime ina aria Yuda wali agali Isaraele dindiha karu talima pugu pugu bialu minuwa dindi taraha garabaya minu yalu polebira. Isaraele dindi bibahende labu wiai holebira. Samariabi Yarusalemebi wali agali naheore labu dege wulebira. Ngode Datagaliwabenaga anda kago bo heda haragola do podope haragola tigi mbira hanguni bame dindi dege wulebira.
TOB 14:5 Anigo mani howa Ngode Datagaliwabehanda ibunaga wali agali lone dara ho dai bialu Isaraele dindiha lone haru dai bulebira. Ani haru dai biragola tigua Ngode Datagaliwabenaga anda ogoni biadai bulebiragoyu ainde anda baya pigane bini ala hayagobi ndo holebira. Anda ogoni emene tigi mbira hangu holenenaga bulebira. Mani Ngode Datagaliwabehanda horo mbira pongo bo ngago ogoni tagira ibirangi Isaraele wali agali bibahende garabaya golalu lone dai buwa Yarusaleme lone mo heya haragola Yarusaleme tano baya taraore ala wiagagobi wulebira. Ani bialu Isaraele agali Ngode Datagaliwabenaga bi mana latagi haga hearume mbiwia halu lo winidagua tigua Ngode Datagaliwabenaga anda lone bulebira.
TOB 14:6 Horo ogoningi dindi bibahende ngaruha wali agali bibahende bu karu Ngode Datagaliwabe karia dai bulebira. Tigua dama tara tararuhondo bi pupu karula nape wiaga ngaru wahai halu Ngode Datagaliwabe ibunihondo bi lole dai bulebira.
TOB 14:7 Wali agali dindi bibahendeha bu karume Ngode Datagaliwabe haluhe haabo haga kago ibunihondo bi lai halu mana bayale tigabi Ngode Datagaliwabe ibunime hame ledago bialu haabo holebira. Horo ogoningi Ngode Datagaliwabehanda Isaraele wali agali ibunaga mana baya hangu talialu hayaruhondo tinaga holene bayale mope holebira. Ibugua ti Yarusalemeni mo ngoai haragola ti Abarahamanaga dindi ngagoria howa ti bayale haabo holebira. Wali agali tinaga miniha Ngode Datagaliwabe gubalini ho haga karu ti turu ho holebira. Anigo wali agali mana ko biaga karubi wali agali ko karubi ibu deni nahelo kaundiaha talia pelolebira.
TOB 14:8 I̱ waneigini bu kemiru tí i̱na bi larogo baya hangu hale halimu. Tígua tínaga bu minimeore Ngode Datagaliwabehondo bi lalu howa tígua beremiru bibahende ibunime hame ledadagua dege bialu haabo halimu.
TOB 14:9 Tígua tínaga waneigini karuhondo mana tigabi bayale bulene ngago baya hangu lawai halu halimu. Ogodagua lawai halimu. Bibahendengi wali agali mbirale dewa nawi karu biamogo biaabo halu Ngode Datagaliwabenaga mini yaraga halu haabo halimu.
TOB 14:10 I̱ igini Tobaiasa í̠ore Niniba tano yu wahalu puore bibe. Í̠ore dindi ogoha nahabe laro. Ainde í̠ ai̱ya i̱naga homali kagoria dege kaware hora halu horo ogoningiore heyalu pobe larogoni. Mbi mbira hangubi tano ogoria napalibe. Ko tara tarabi mana lehe binigobi timbuniore dindi ogoha to̱leda. Wali agali dindi ogoha bu karume mana ko tinime bialu kagonaga taga nahaga ka. Mana lehe mbira Nadaba ibugua ibu aba hamene heyogone Ahigahondo biyago mitangi bibe. Ahiga ibuniore Nadaba anda halu agali helo baya hangu mondo bu wiagola mani agali howa Nadabahanda Ahiga homelo bo waholene manda biya. Ani biyagola Ahiga ibu ibida pora bialu puwa homali mbira wiagoha birado haya. Anigo ai Ngode Datagaliwabehanda Nadaba ibugua Ahigahondo bule paraho wiyagonaga pani nelo mini. Ainde Ahiga ibu wá holene wiagoha lone dai biyagola Nadaba ibu arumaha haabobo halu ho ereba hayago irane ibugua mana ko tara tara bialu hayagome biya. Nadabahanda Ahiga uli pelo uli tombo wiyagoyu ibu uli nape habo lalu pubagi hayada. Ibugua uli wandialu pubagi hayago irane ibugua yagibano karuhondo mbirale ngaru dewaore talebu migi biaga henegome bini. Anigo Nadaba ibuni ibunaga uli tombo wiyagoha pilaya.
TOB 14:11 Anigo ai áyu i̱naga waneigini kemiru tígua agali yagibano biamogo biaga bayale biago ibuha mini bayale tigabi wua howa mendeali biamogo biaga henedago handadaba. Anigo agali mende kago mo ko holene manda bu kagome ibuni hariga homagane hariga ngagoria pialu hagane ka. Ai áyu i̱naga hongo holene nawi ereba hai hayada, lene. Ani layagola tigua Tobidi dagiani hendore mo palia hayagola ibu ogoningi abale homene. Homayagola tigua dara halu dugu timbuni bini.
TOB 14:12 Emene howa nde Tobaiasa ai̱ya homayagola tigua ibu agalini homali wiagoria dege mandagi kaware hora hene. Hora halu Tobaiasabi ibu onebi heyalu Media dindiha Egebadana tano wiagoha pole pene. Puwa Tobaiasa ibu imane Laguele baba hene.
TOB 14:13 Ani howa Tobaiasahanda ibu imane Edena Laguelela baya hangu handaya ho hene. Libu waheore bereagola ibugua baya hanguore biamogo biaga hene. Ani howa libu homayagola ibugua Egebadana dindiha hora hene. Ani bialu Laguelenaga mbirale paluni wiaru bibahende abale Tobidinaga karulayadagua Tobaiasa ibuni dege karulai hene.
TOB 14:14 Ainde Tobaiasa ibu ha dege bialu wahe halu ibunaga mali handari mbirani pira mbirani karia (117) hayagola homene.
TOB 14:15 Tobaiasa ibu mali luore howa waitigime tano timbuni Niniba wiago bo gialahole bialu bo heda haya layane te hale hene. Ani bialu Medianaga Kini Siasarese heagome Niniba wali agali tini garabaya biai haya layane hale hene. Ai Ngode Datagaliwabehanda Asiria wali agali Niniba wali agalibi mo ko halu pani nelo miyagonagada Tobaiasa ibu turu halu Ngode Datagaliwabenaga mini yaraga hene. Tobaiasahanda Anduane Homogo Ngode Datagaliwabenaga mini yaraga halu haabo haga hene. Ai heneneore ogoni. Habo nalolene bi lo winigonaga mbuga wabuni halu mende.
JDT 1:1 Nebugadenesa ibu kini henego mali homberia (12) Asiria dindiha Niniba tano timbuni wiagoria heagola Kini Abagasada ibugua tano timbuni Egebadana wiagoria howa Midia dindi handaya ho hene.
JDT 1:2 Kini Abagasadahanda wai pabe timbuni Egebadana tano bu mabu bini. Tigua ege to̱le̱ podaganeme hariha ege to̱le̱ hearu podaga bini. Ege to̱le̱ podenego timbuninaga manda mida tebira wialu leneha manda mida mbirani bolanguahe podo wini. Ege pabe ogoni bima irigi halu daliganaga mida manda pira tebirani duria (35) wialu pabe tohenaga manda mida pira kirani duria (25) wini.
JDT 1:3 Pabe neneni ami agali mamage howa handa a̱i̱na̱i̱ holene emene daligabi gimbu bima irigi howa helaga bini. Anda daliga ami bu helaga biyago andane dindiha tanonaga wai pabe panga timbuni dugua haga bini. Mamagealinaga anda daliga ogoninaga manda mida pira duria (50) wialu manda arane timbuninaga manda mida pira tebira (30) wini.
JDT 1:4 Ai tanoha panga haraba daliganaga manda mida pira tebirani duria (35) wialu arane yangalenaga ami agali mandagi tidiyu tagira pelo manda buwa arane timbuni manda mida pira kira (20) wini.
JDT 1:5 Ai horo ogoningi Asirianaga Kini Nebugadenesa ibugua Abagasadala dindi tigabi Lagese tanonaga gibuni wiagoria wai bini.
JDT 1:6 Wali agali dewaore hari bare wiagoha paliaga hearuhabi iba tebira Taigirisi Yuberedisi Hidasabeseru ange ange paliaga hearubi dindi tigabi Kini Ariogo Elama dindi haru haga heago ibugua handaya ho haga hearubi tigua Kini Abagasada biamogo bialu wai bini. Ami agali dewaore Kaladea ami agali pelemule ibu ngoai hene.
JDT 1:7 Ani biyagola Nebugadenesa Asiria wali agalinaga kini ibugua Pesia dindiha hearubi wali agali amu ni paliragoha hearubi tihondo bi lo pelene. Bi ogoni dindi Silisiaha hearubi Damasagasaha hearubi Lebanono dindiha hearubi Lebanono mendehayagi hearubi iba solowara timbuni bedago ange ange paluyu pedarubi
JDT 1:8 Hari Kamelo kago andaneha paluyu pedarubi Gileada dindiha palearubi Galili Daligaha palearubi Yaserili dindi tigabi wiagoha palearubi ti bibahendehondo bi lo pelai hene.
JDT 1:9 Ani bialu Samaria dindiha hearubi wali agali maru Yodana iba doma mendehayagi hearubi unura puabo halu Yarusalemeha hearubi Bedaniha hearubi Kelesaha hearubi Kadeseha hearubi ti bibahendehondo bi mbira ogobi dege dege lo pelai hene. Ani bialu Iyibi iba pedagoria bi puiri halu unura Tabanese tano ngagoria puabo halu Lamese ngagoria bolangua halu Gesono dindi hobane ngagoria anda pene.
JDT 1:10 Ani bialu bi wai-o ogoni pu dege bialu Tanisi tano tagira pialu Membisi tano ngago bolangua halu Iyibi dindiha bibahende piai halu Idiobia dindila tubari ngagoria wai-o bolangua hene.
JDT 1:11 Anigo ai wali agali dindi uruniha palearume ti bi ogoni hale halu Kini Nebugadenesa biamogo bialu wai bu pu nabi wahai hene. Tigua mitangi bu handalu hemiria ibuni hangume wai bialu wayali naholebirago manda bialu tigua ibuhondo gi nahe howa wai nape wahai ho hene. Ani manda bu howa agali bi yalu wai-o ibiyaru mo ko howa mo ngubia halu bameore daibilaga bini.
JDT 1:12 Anidagua biyayagola Nebugadenesa ibugua wali agali dindi uruniha hearuhondo keba ho hene. Ibugua lalu, I̱ agali timbuniore kogo heneneore i̱ninaga minini howaore larogo i̱na wali agali dindi uruniha karu pani nelo mialu i̱ninaga hongome bo wahai holebero. I̱na Silisia dindi bibahendeni karu bo wahai halu Damasagasa dindiha karubi Siria dindiha karubi bo wahai halu Moaba dindihabi Amono dindiha karubi Yuda dindiha karubi Iyibi dindiha karubi bibahende bo wahai hama puabo halu iba solowara kira bedago labo angeni bama tagira polebero, lene.
JDT 1:13 Ai Nebugadenesa ibu mali pira mbirani karia (17) kini henego ai mali ogoninaga ibugua kini Abagasadala wai bini. Wai bialu ibugua kini Abagasada heba ibunaga ami agali nogo hosini biruwa wai biaga hearubi maru garo nogo hosime gililagani howa wai biaga hearubi bibahende bope halu bo wahaiore hene.
JDT 1:14 Nebugadenesahanda Kini Abagasada dindiha tano wiaru damene bibahende ibu karulaiore hene. Ani bialu tano timbuni Egebadana wiagoria anda puwa ami agali mamage haga anda daliga bima irigi hene heagoha ti anda pialu karulai hene. Ani bialu mbirale magedi hamani wiaru page mo yai halu bini. Ani bialu ibugua tano ogoni mo ko halu bo giala holebiyagola tano biago ko hai halu mo ngubia ho ngelene.
JDT 1:15 Nebugadenesahanda Kini Abagasada Lagese tano kawareni hari bare mbira wiagoha warahana howa minu yania hene. Minuyu howa ibunaga yandare luni yiagome Abagasada nogoba howa bo home lalu anidagua biyagome Abagasadanaga hongo bo ereba hai halu bini.
JDT 1:16 Ani biai halu Nebugadenesa halu ibunaga ami agali dewaore biaru heba tano timbuni Niniba dai bini. Dai bu howa tigua turu halu tomo timbuni dawa nadege bialu horo handari mbirani pira kira (120) hene.
JDT 2:1 Asiria dindiha Nebugadenesa ibu kini henego mali nguirani tebira (18) hayagola mali ogoninaga ege mbira horo pira kirani kira (22) layagola bi dibudibu mbira kini andagaha howa lo yu tagira ibiyagome lalu, Ibunaga bi mbira buleore lowa lowialu dindi maruha bi mo wahalu ibu biamogo bule naibiyaru pani mialu bo wahai holebero, lo wini.
JDT 2:2 Ani lalu kini ibugua ami agali haguane bu hearubi haru bamba haga hearubi agali haguane maru hearubi bibahende olalu, Bi lo manda bimi̱ya ibalimu, lene. Ani lowa íbu ngoai heagola ibugua dindi maruha ibunaga bi lo yalu pudaba laga biyaru mo wahayagohondo pani nelo mulenaga miniha yadoho henego latagi hene.
JDT 2:3 Tigua bi lo mbira halu lalu, Agali ibunaga bi hale nahayaru ti bibahende homelai holene nga, lalu lo mbira hene.
JDT 2:4 Bi lo mbira hai howa agali haguane mbira ami agali bibahende handaya ho howa haru haga mini Holoberenese ibuni kini biamogo biaga hapara hene heago olene. Ani lowa kini ibugua lalu,
JDT 2:5 I̱ dindi bibahendeha kini maru karu bolangua haihe kini timbuniore kogo i̱na larogo. I̱na áyu ogoni puwa agali wai bayale biaga mandabi karu hondo pu. Ami agali damene karu daosini dege handari mbirani pira kira (120,000) haru halu ami agali nogo hosini biruwa wai biagane daosini homberia (12,000) haru halu ibabe.
JDT 2:6 Ai wali agali amu ni paliragoha haga hearu tigua i̱na bi larugo mo wahayago ainde tígua dindi uruni bibahendeha piaiore halimu.
JDT 2:7 Puwa tigua i̱ni andaneha holeore lalu manane dindi ogoniha howa iba mbira hambu wia halu dindi himu mbira dugu wia hadaba labe. Ani larogoni irane i̱naga miniha ti baba tandaga timbuni ho kogo ti bo wahai hole pole berogodane laro. Ani bialu i̱naga ami agali karume tinaga dindi bibahende hengeda hai halu mbirale mbira dindi uruniha nawilo hilo wahai holeberogodane laro.
JDT 2:8 Wali agali bo waharagola tingini dindi ulini ngagoha wu to̱lalu iba emene pedarubi timbuni pedarubi bibahendeore homa tinginime payadai biaiore holebira.
JDT 2:9 Ani bialu wali agali maru bo wanahe heagua nde i̱na uruni minalu dindi kaundiaore dindi wiamaro ngagoha garabaya hole pelolebero, lene.
JDT 2:10 Holoberenese-o í̠na dindi uruni bibahende karulai hole pu. Ai tigua tini í̠naga giha ya hayagua nde i̱ni eberongi i̱na ti pani muliya helo wahabe.
JDT 2:11 Anigo tigua í̠ baba wai biyagua í̠na ti dara holene nawiore. Bo hilo wahai halu tinaga dabudabu ngaru mo yai habe.
JDT 2:12 I̱naga bi ogoni hangu. I̱ kini timbuni daligaore kogo i̱ninaga dindi timbuni ngagonaga hongome bulenego larogo. I̱na bule lalu bi lo wirugo buleorebero.
JDT 2:13 Ai Holoberenese-o í̠na bi ogo baya hangu hale habe. I̱na bi o larogo mbira wa nahabe. Bi langirugo damene talialu áyu ogoniore bule pu, lene.
JDT 2:14 Kini ibugua bi ogoni laya handala abale tagira puwa Holoberenese ibugua ami agali wai hanalu mo ta haga hearubi ami agali mini lene hearubi ami agali mini lene hearubi ami agali haru bamba haga hearubi bibahendeore Asiria ami henego. Ibai hadaba, lene.
JDT 2:15 Ibugua kinihanda bibe lalu lamiyadagua mo tale bigi bialu ami agali damene hearu daosini dege handari mbirani pira kira (120,000) dindi dindi pelo dabo helalu ami agali daosini homberia (12,000) nogo hosini biruwa danda yuwa wai biaga dabo helene.
JDT 2:16 Ibugua wai bulenedagua manda manda bu helai hene.
JDT 2:17 Ani buwa tomo noleneru dabudaburu dewaore nogo kameleru dongirunaga erekunini mo paga ho yalu nogo balu nolene sibi bulumaga memeru dewaore haru halu pene.
JDT 2:18 Ibugua ami agali ti burupale holobadago damene bibahendeore karulape mo yai halu kininaga muni wiagoha howa siliba ngolobi dewaore mo yini.
JDT 2:19 Anidagua bialu kini ibu mani ibilo Holoberenese halu ami agali biaru ti ala bamba halu pene. Garo nogo hosime gililagaru nogo hosini agali biralu ami agali geni pialu bibahendeore heyalu dindi amu ni paliragohayagi bibahendeore ti ho karula piai hole pene.
JDT 2:20 Wali agali dewaore ami agali biaru haruru talima mani pene. Ani piyagola dagalabe naheore niminamu lalu be abalu tau laradagua bini.
JDT 2:21 Ami agali uruni Niniba tano yuwahalu puwa horo tebira pialu dindi tigabi mini Begedilede dindini tagira pialu tigua balai anda Begedilede tano kawareni bini. Tano ogoni Silisia Daliga laga ngagonaga abene uyurahayagi hari bareni tano Begedilede ogoni wini.
JDT 2:22 Ani bialu Holoberenese ibugua dindi ogoni wahalu ibunaga ami agaliru haru halu hari bare bare wiagoha tagira pene.
JDT 2:23 Ani puwa tigua dindi kira mini Pudu Ludula bo gialahole bu wahai hene. Tigua ani bialu puwa wali agali Lasisi tanoha hearunaga dabudabu wiaru balu gingilo mialu Isimale wali agali hearunagabi gingilo mia dege bini. Isimale wali agali ti dindi ko iba dalu naibaga Kelusi dindi abene unurahayagi kaware haga hene.
JDT 2:24 Holoberenese halu ibunaga ami agali biaru iba Yuberedisi piyadagua pupe halu puwa dindi hobane mbira Mesobodemia tano hongohe iba Abarono ange ange wima pearu bo gialo wahai hama pialu iba solowara timbuni bereagoria tagira pene.
JDT 2:25 Tigua Silisia dindi karu lai halu agali maru Holoberenesela wai bulene manda biyaru homelo bo wahaga bini. Ani bima pialu tigua dindi abene unurahayagi Yabede Arebiala dindi tubari wiagoria tagira pene.
JDT 2:26 Tigua Midiana dindi agali nogo hinalu hearu bo talu pelalu tinaga nogo sibi ti page haru halu balai anda hearu heda haga bima pene.
JDT 2:27 Ai widi boga bini gandu lolene tu hayagola tigua Damasagasa dindiha dindi bayale tigabi wiagoha pupe halu pene. Ani puwa tigua widi mabuha bo hedope haga bialu nogo sibi meme bulumagabi bibahende bai haga bima pene. Ani bialu tigua tano bibahende bo gialo wahai halu mabu dugua hai halu igini daliahe hearu bibahende ayu tibume homelo dibu wahai halu bini.
JDT 2:28 Wali agali iba solowara bedago angeha paluyu pearu ti gi timbuniore ho howa duru laga laga bialu hene. Wali agali bibahende Taia tanoha hearubi Saidono tanoha hearubi Su tanoha hearubi Ogina tanoha hearubi Yabane tanoha hearubi Asadodo tanoha hearubi Asagelono tanoha hearubi bibahendeoreme gi ho hai hene.
JDT 3:1 Tano maru Holoberenese ibugua wai bule mandabi howa agali haguane bu hearume agali maru dabalu Holoberenesenaga bu mini mo gede halo pudaba laga bini. Tigua lalu,
JDT 3:2 Ina bibahende kini timbuni Nebugadenesanaga biabe biaga kema. Ina í̠naga geha handadagaho bedama. Í̠nime mbirale inahondo bule manda bu kego bibahende biai habe.
JDT 3:3 Ai inanaga anda karu bibahendebi dindi widi mabu ngemarubi nogo sibi karubi meme karubi bulumaga karubi nogo bibahende pabeha karubi í̠nagaore hai ka. Uruni bibahende í̠nime bua birago ale bibe.
JDT 3:4 Inanaga tano ngaru bibahendebi wali agali tano uruniha karubi bibahende í̠nagaore hai ka. Inaga uruni bibahende í̠nime mo ibabe lalu bi lo yalu pudaba, lene.
JDT 3:5 Tigua bi uruni lo yalu piyagola
JDT 3:6 Holoberenese ibugua ami agali biaru haru halu iba solowara bereago angeha daliape halu puwa ami agali maru tano page hongohe bu mabubi hearu handaya ho helo dabo helalu agali hongohe maru tano uruniha hearu ibunaga ami agali heagoha hela tagohalu wai bule pelo minu helaga bini.
JDT 3:7 Wali agali tano uruniha hearume yári karulowa ngidaru balu iba gana lalu ibu ibiyagola mo turu halu mali lima ibini.
JDT 3:8 Ani biyagola darabiore bialu hayadaruni bame bu hole bini. Holoberenesehanda tinaga damahondo bi pupu wiaga anda bu helearu bo gialo wahai halu ira mbirale nadibaga hada bini hearu bibahende dibu wahai hene. Ibugua mbirale o biyadagoni Kini Nebugadenesa ibunime bibe lalu layadagua bini. Nebugadenesa ibugua bi lalu, Dama mitangi bialu bi pupu wiaga gime wabini wali agalime bi pupu wiaga wiaru bibahende bo gialalu dambu gingirulo haealabagabu wahai habe. Ani beregola wali agali dindi tara tarani bi tara tara laga bu karu bibahendeme Nebugadenesa ibunihondo hangu bi pupu wialu helo ani bibe, lene.
JDT 3:9 Ai Holoberenese ibugua Dodana tanonaga gibuni mbiraha dindi tigabi Yaserili wiagoria anda pene. Tano ogoriani howa wá handa amu halu Yudia dindihayagi dindi bare hombene wiagoha handa amu haga wini.
JDT 3:10 Ibugua balai anda tano kira Geba Bedesanala hengene wiagoria bu hene. Ani buwa ibugua dindi ogoriani ibunaga ami agalinaga tomoru mo manda manda buwa ege mbira agima hondo hene.
JDT 4:1 Ogoningi dege Isaraele wali agali Yudia dindiha hearume Kini Nebugadenesanaga ami agali haru haga haguane Holoberenesehanda dindi maruha biya layago hale hai hene. Te layane hale henedago agali ogoni ibugua bi pupu wiaga anda hearuha mbirale wiaru mo pagebu yai howa mani bi pupu wule ngoai haga andadago bo gialahole biaga layago hale hene.
JDT 4:2 Ani hale howa tigua ibuhondo gi timbuni ho hene. Ani howa Yarusaleme tanobi Anduane Homogo Ngode Datagaliwabenaga anda kagobi agua bulubadabe lowa miniha genda yu hai hene.
JDT 4:3 Ani manda binidago irane Isaraele wali agali ti garabaya henego golalu áyu dege tini dindiha daibu henego mitangi bialu gi hene. Áyuore dege Isaraele wali agali dindi taraha garabaya henego golalu tini dindi Yudiaha dai buwa bayale hene. Ani dai buwa áyuore dege andabi lomabu delaga dabubi gabobi beledibi anda ogoniha biabe biaga wiarubi bibahendeore abale waitigime Ngode Datagaliwabenaga deni mo dodohe ngelenego ai lone mo loma bia hai halu bayale wiabagiho ngelo hemiria howa hale hene.
JDT 4:4 Ai Yudia wali agali ti Holoberenesehondo gi timbuniore ho howa tigua wali agali Samaria tanoha hearuhondobi Kona tanoha hearubi Bedehorono tanoha hearubi Belemaini tanoha hearubi Yarigo tanoha hearubi Koba tanoha hearubi Aisora tanoha hearubi Saleme dindi tigabi wiagoha haga hearubi ti bibahendehondo bi lo pelai hene.
JDT 4:5 Ani biai howa tigua hari nene wiaruha mamageali dele bu hai helowa tigua tano hari bareha wiarunaga wai pabe hongo helo lone biaru hene. Ani bialu howa tomorubi mo manda manda bini. Widi mabuha hengearu áyuore dege boga biai hayagola tigua mabuha tomo boga biyaru bu wiai hene.
JDT 4:6 Yoagimi ibu Yarusalemenaga loma binigo mo miaga agali haguane howa ibugua beba mbira gilibuwa wali agali bibahende tano kira Bedulia tano Bedomesedaimi tanola wiagoha hearuhondo wia hene. Bedomesedaimi ogoni dindi Yaserili ngagoha dindi tigabi ngagohayagi handadai biragoha Dodana tano kawareni wini.
JDT 4:7 Ibugua tihondo lalu hari bare ngaruhayagi waitigi uruni irigi halu agua ibirabe hondole hariga ibugu bidagoria mamage hai halimu. Yudia dindiha ibulene hariga ogoni degego manda bialu mamage ogoniha halimu. Hariga ogoniha hariga doroge agali kirali hangu mandagi dabudabu hoyu ibulene karulape nga. Ani ngagome waitigi anda ibulilono hapai holene karulape nga.
JDT 4:8 Isaraele wali agali tigua bi agali loma binigo mo miaga haguane Yoagimi halu agali haguanebi ganisolobi Yarusalemeni ngoai howa bi lo mbira howa ibilayago hale howa talialu bini.
JDT 4:9 Isaraele wali agali tigua Ngode Datagaliwabehondo hongo howa lalu ibunaga deni tini mo dindi ho hene.
JDT 4:10 Wali agali tinibi ti waneginirubi tinaga bulumagaru wali agali tara ti baba ibu hene hearubi agali biabe biaga hearubi garabaya biabe ale biaga hearubi bibahendeore aga dara ho howa karulo haga ale karulo hene.
JDT 4:11 Isaraele wali agali waneiginirubi bibahende Yarusalemeha hearu bibahende Ngode Datagaliwabenaga anda heago haneni kaware puwa tinaga haguaneni be abalu dugu hiralu dindini paliai hene. Dara ho howa mo karulaga aga wiaru Anduane Homogo deni mo dabadabaho ngelene.
JDT 4:12 Daraho howa karulagane aga maru lomabu delaga dabu heagoria mo pagaho ngelowa wali agali ti bibahendeoreme Isaraelenaga Ngode Datagaliwabe hongo howaore olene. Ti one waneiginiru garabaya lone napelonaga bi lalu ti mamalinaga tano ngaru bo gialo wahai nahelonaga bi lalu ibunaga anda kago mo ko haragola wali agali Ngode Datagaliwabe mitangi nabiaga karume turu howa ibu andaga kagoha mana ko nabilonagabi bi lalu hene.
JDT 4:13 Ani lalu heago de hondowa Ngode Datagaliwabehanda tinaga genda wiagonaga dara timbuni ho henego irane Anduane Homogo Hongo Haihe kago ibugua handalu hearia wali agali Yudia dindi bibahendeha howabi Yarusalemeha howabi bibahende ibunaga anda heago haneni kaware íbu ngoai ho howa tomo nane horo dewaore heago hendene.
JDT 4:14 Loma binigo mo miaga agali haguane Yoagimibi loma binigo mo miaga marubi ti bibahende Ngode Datagaliwabenaga deni heyu howa ibunihondo bi lalu haga hearume aga dara ho howa karulaga wiaru karulo hene. Ani howa tigua loma tara tara irame dai holene lomabi loma Anduane Homogo turu howa mule lalu wali agalime loma biaho winirubi loma tini hameme lomabu mule yalu ibinibi bibahende mo lomabu migi bialu hene.
JDT 4:15 Tigua be abalu tininaga emboneni labolabo huba biago daligani golo ngelowa Anduane Homogohondo Isaraele wali agali dara howa biamogo bibe lalu bi lene.
JDT 5:1 Asiria aminaga agali haguane Holoberenese ibu tigua te layago hale halu hearia Isaraeleme wai bule manda manda biai ho howa tigua hari neneha hariga wiarubi dindi tigabi wiagoha hariga wiarubi hangai hai halu biya layago hale hene.
JDT 5:2 Ani hale howa ibugua tandaga timbuni halu howa Moaba dindiha haru bamba haga agali haguane hearubi Amono dindiha agali haguane hearubi iba solowara ange ange wali agali hearunaga agali dabo helene hearubi bibahende olalu ibidaba lene. Ti íbu ngoaiho heagola ibugua tihondo lalu,
JDT 5:3 Kenanali kemiru tígua i̱ áyu ogoni langidaba. Hari neneha wali agali palima pedago ti abigo padabe. Ti tano agoria dege hagabe. Tinaga ami agali dewa kabe nde emene dege kabe. Ti hongohe kabe nahe ka. Kini aiwa ami agali uruni haru hagabe.
JDT 5:4 Irane aginaga wali agali hameigini dindi ogohayagi ni paliragoha karu aria mbira ogonime i̱hondo ti dara habe lalu i̱ hewaria íbu nabi howa mine hayago irane agibe, lene.
JDT 5:5 Ani layagola Amono wali agalinaga haguane Agiohanda ladai bialu lalu, Aiore agali haguane-o í̠naga biabe bia haga i̱na bi larogo baya hanguore hale habe. Wali agali haru nene uruniha bare bare padaruninaga te i̱na langulebero. I̱na ke naholebero.
JDT 5:6 Wali agali uruni ti Kaladea dindiha howa tagira ibinigo ka.
JDT 5:7 Ai tinaga mamali Kaladea dindiha heangi tigua bi pupu wiaga dindi ogoniha wiago wahai halu ti dahuliya andaganaga Ngode Datagaliwabehondo bi lalu hene. Ai ti damene hearume bo taliatagi haya handala puwa Mesobodemia dindiha puwa ogoniha luore hene.
JDT 5:9 Lone mani howa tinaga Ngode Datagaliwabehanda lamialu, Dindi Mesobodemia wahalu puwa Kenana dindi ogoria hole pobe, lene. Ani laya handala ti ibuwa bayaleore hene. Ani howa ti hongoheore halu tigua ngolobi silibabi dewaore wialu nogo bulumaga dewaore hinu hene.
JDT 5:10 Emene howa mani Kenana dindiha tomo gari timbuniore tagira ibiyagola ti togolo yalu Iyibi dindiha pialu tigua luore dindi ogoniha henego irane Iyibi dindiha tomo dewaore wiagola ani hene. Ani heagola ti hono dame bialu dewaore daga labe naheore hene.
JDT 5:11 Ani heagola Iyibi kini heagome ti baba waitigi howa ti bo hengeda halu ibunaga garabaya biabe bialu helowa biabe erekuibiore mbirigi wabialu helo helene.
JDT 5:12 Tigua biabe ogoni bialu howa tinaga Ngode Datagaliwabehondo dugu bialu heagola Ngode Datagaliwabe ibugua Iyibi dindi bibahendeha genda timbuni tara tara ibilene. Ani ibilayagola Iyibiali tigua, Isaraele wali agali Iyibi wahalu tagira pudaba, lene.
JDT 5:13 Tinaga Ngode Datagaliwabehanda iba solowara Iba Daramabi laga bereago hanuni hariga mo wia halu iba ange mendehayagi haru bolangua halu puwa Hari Sainai pu halu dindi mini Kadese Banea dindini pu hene. Isaraele tigua wali agali dindi ko ogoniha ala hene hearu bo taliatagi howa ti ho aribia halu
JDT 5:15 ani puwa Amoro dindi wiagoria pu berene. Tigua Hesebono tanoha hearu bibahende bo wahai halu Iba Yodana domalu ibalu dindi hari bare bare uruni ti karulai hene.
JDT 5:16 Tigua hameigini Kenanabi Peresebi Yabusubi Segemebi Gigasabi bibahende bo taliatagi hai hene. Ai tigua ogonidagua bialu bambaore íbu henego ka.
JDT 5:17 Tinaga Ngode Datagaliwabe ibugua ti mana ko birago turu nahaga howa wali agalime mana ko nabi baya tigabi kangi ti bayaleore haga ka.
JDT 5:18 Anigo ainde ogo bialu halimu lalu tinaga Ngode Datagaliwabehanda lamiyago nabi hayagua nde tinaga waitigi ibalu wai timbuni bialu wali agali uruni bo wahai halu maru dindi tara tara ngaruha garabaya bu yalu piaga hene. Waitigime Isaraele wali agali tinaga Ngode Datagaliwabenaga anda kago bo gialo wahai halu tano wiago karulo hene.
JDT 5:19 Anigo mani Isaraele tigua mini beregedalu tinaga Ngode Datagaliwabe karia dai biaga hene. Ani biragola tigua dindi kaundiaha haga haga bu henedaru wahalu dai biaga hene. Ani dai bialu ti Yarusaleme lone karulo howa tigua Ngode Datagaliwabenaga anda heagoria hene. Ani bialu hari bare bare tini hagane wiyadagoria daibu hai haga bini.
JDT 5:20 Ani binigo ainde agali haguane-o iname dabo handalu kamaria wali agali uruni tigua mana ko mbira bialu Ngode Datagaliwabenaga bi mana lo winigo mo habolo heagua nde iname puwa wai bialu ina wayali holeberemago mali̱ya.
JDT 5:21 Anigo iname handalu kamaria tigua ko bini mbira nawiyagua nde ti helo waholene karulapego irane Ngode Datagaliwabe tinaga Anduane Homogo kagome ti baya hanguore handaya ho kagola ina wali agali dindi bibahendeha bu karunaga deni taga tene handa walia holene dege wulebirago helo wahami̱ya, lene.
JDT 5:22 Agiohanda bi lai hayagola agali maru Holoberenesenaga balai anda tamuha heyu homabu bu hearume bi lagalaga bialu keba hai hene. Ani lalu howa Holoberenesenaga ami agali haru haga hearumebi agali iba solowara angeha haga hearumebi Moabali bu hearumebi bi hongo howa lalu, Agio ibu homolene karulape, lai hene.
JDT 5:23 Ani lowa lalu, Irane agome Isaraele wali agali gi haramabe. Tinaga hongo nawiore howa tigua ina baba wai nabulebira.
JDT 5:24 Agali haguane-o í̠naga ami agalime abaleore bope holebirago ai ina abaleore áyu ogoni ma, lene.
JDT 6:1 Agali ho mabu biaru tigua keba howa bi lai heagola Asirianaga ami hearunaga agali haguane Holoberenesehanda heyuwa Agiohondo keba howa agali tara hearunaga denibi Amononaga ami agali hearunaga deni howabi lai lene.
JDT 6:2 Ibugua lalu, Í̠ Agio kegonibi tí maru Isaraelenaga biabe bia haga kemirubi tígua manda bialu kemiria ti ai kemada lo manda bidemibe. Í̠na lalu, Tínaga Ngode Datagaliwabehanda tí baya hangu handaya ho holebirago iname Isaraele baba wai nabimi̱ya, laribe. Ai Ngode Datagaliwabe ogoni ibu ai kabe. Nebugadenesa ibu inanaga Ngode Datagaliwabe kagoni ndobe. Ibunaga ami agali karu ibilalu Isaraele bibahende bo wahaiore holebirago ndobe. Tínaga Ngode Datagaliwabe kagome ti biamogo nabulebira.
JDT 6:3 Ina Nebugadenesa ibunaga biabe bia haga kemarume ti bo wahai holene erekui nabi ti yamo daga nawini mbira ka. Tigua inanaga ami agali nogo hosini biruwa wai biaga hongo gibihe karunaga hongo bope habe nahe ka.
JDT 6:4 Iname balu bo hedaore holeberema. Ani beremagola tínaga daramame hari bare ngaru bu dambi hai halu homene tinginime dindi tigabi ngaru ereba hai holebira. Tí ina baba hongo karula nape ka. Tí aria lenego mbiraoreli hangubi yu wahene nahe loleberema. Bi o larogoni dindi bibahendenaga agali haguane timbuniore kago Kini Nebugadenesanaga bi laro. Ai ibunaga bi ogoni lo wa naholebiraore.
JDT 6:5 Anigo Agio í̠ Amonoali ami ko mbira kegoni. Ai i̱naga waitigi mbira henedane áyu handa walia ko. Í̠na i̱naga dengui nahende keore dege i̱na hameigini Iyibi dindiha howa ibida ibini uruni bo wahaiore holebero.
JDT 6:6 I̱na dai berongi ami agali tigua í̠ ayu tibume dibaragola í̠naga tingini agali bo wahene ngaru dege dombeneha wulebere.
JDT 6:7 Áyu í̠ i̱naga biabe biaga agali tigua haru halu hari bare ngagoha puwa tano mbira harigani kaware ngagoria helolebira.
JDT 6:8 Í̠ áyu ogo homabelo ndo mani Isaraele wali agali baba mandagi homabelo.
JDT 6:9 Í̠na manda bialu keria iname ti babe nahe ko lo manda bu heagua nde í̠naga miniha genda aginaga yu kebe. Ai ogoni hangu i̱naga bi lai haru. I̱naga bi ogoni bame lo waholene nawiore, lene.
JDT 6:10 Ai Holoberenesehanda agali ibunaga biabe biaga hearuhondo lamialu, Tígua Agio gi geru minu daba haga bialu yalu puwa Bedulia tano ngagoria Isaraele bu karu milimu, lene.
JDT 6:11 Ani layagola tigua Agio gi geru minu daba haga buwa yalu dindi tigabi wiagoha pupe halu pene. Ani pu dege bialu hari bare wiagoha puabo halu Bedulia tano wiago andaneha iba uli wiagoria anda pene.
JDT 6:12 Ani piyagola agali tano ogoniha hayadarume ami agali ibiyago tinaga danda timu yandere wiaru mo yalu haru bare wiagoha piai hene. Ani pu howa agali maru ege to̱le̱ timbuni pume hendeho yuwa baga mugube hearume waitigi ibiyaru hari bareha irigi halu naibilo hariga handai halu hene.
JDT 6:13 Ani piyagola ami agali biaru ti ege to̱le̱ timbuni heagoha birado hene. Tigua pume Agionaga gi geru minu kabu buwa hari heago teneha ngelene. Ngelalu tinaga agali haguane hearia dai bini.
JDT 6:14 Ti Isaraele tano yu wahalu ti daliape howa handalu hearia Agio ibu palearia hendene. Ani hondowa pume gi geru daba heago hadape halu Bedulia tano haru pene. Puwa tanonaga agali haguane berearu deni heyu helene.
JDT 6:15 Horo ogoningi Simeono hameigini aria Maiga igini Usiabi Odoniele igini Kabarisibi Melegiele igini Kamisibi ti agali haguane hene.
JDT 6:16 Tigua tanonaga agali hearu ibidaba layagola urunibi igiri daliahe hearubi wali berearubi mo ngoai hagane wiagoria íbu ngoai hene. Agio ibu agali biaru dombeneha heagola Usiahanda ibuhondo, Bibahende biyadarunaga te la, lene.
JDT 6:17 Ani layagola Agiohanda ladai bialu mbirale bibahende abale ti Holoberenese baba mo ngoai howa bi lene biago lamiai hene. Ani bialu bi ibunime Asiria biaruhondo layarubi lamia dege bini. Ani lalu mine halu bi mbira Holoberenese ibugua Isaraele mege bialu layagobi lamia dege bini.
JDT 6:18 Wali agalime Agiohanda bi layago hale howa tinaga dengui dindini paliape howa Ngode Datagaliwabehondo bi lalu hene.
JDT 6:19 Tigua Anduane Homogo dahuliya andaganaga Ngode Datagaliwabe olowa lalu, Waitigime inahondo tiga nabi ngago bialu kagoni de handalu ina taga timbuni ho kamarubi de hondowa biamogo bibe. Ani bialu ina í̠naga wali agali kemaruhondo bu mini gubaliniha daraho haabo habe, lene.
JDT 6:20 Ani lowa tigua Agionaga bu miniha mo hongo halu mo turu howa
JDT 6:21 bi lo mbira hai howa Usiahanda Agio haru halu ibu andaga puwa ibugua agali haguane bu hearunaga tomo timbuniore dawa manda manda bini. Ai horo ogoningi mbiraga tigua Isaraele wali agalinaga Ngode Datagaliwabehanda ti biamogo bilonaga bi lene. Tigua Ngode Datagaliwabehondo bi lalu heaore dege gao lene.
JDT 7:1 Horo mendengi Holoberenese ibugua ibunaga ami agali hearubi ami agali tara ibu biamogo bialu wai mogo ibini hayarubi bibahendehondo ogodagua bidaba lalu wai hono miai hene. Tihondo lalu, Tígua egerebagi gao laragola abale heyalu puwa Bedulia tano ho hagira bialu hariga uyura hari neneha irigi halu piaga ngago hapai howa tanoha Isaraele wali agali baba wai bilimu, lene.
JDT 7:2 Horo ogoningi dege ami agali uruni ti heyalu abale pene. Ami agali geni piaga bibahende daosini dege handari mbirani pira karia (170,000) bibahende hene. Ami agali nogo hosi erekunini biruwa wai biagaru daosini homberia (12,000) hene. Ani bialu ami agali dewaore nu dabudabu wiaru yilo helene. Uruni bibahende biamaga hayagola daga labe naheore hene.
JDT 7:3 Tigua puwa Bedulia tano wiagonaga dindi ulini iba hambiaga bereagoria balai anda bini. Tigua anda bu henedago timbuniorenaga arane mendehayagi Bedulia tano howa pialu amuraore Siamono wiagoria tagira pene. Mendehayagi nde Dodana tano ngagoria howa bima pialu Balabaimi ngagoria tagira pene. Siamono ogoni Yaserili tanohayagi handa dai biaga wini.
JDT 7:4 Isaraele tigua ami agali daga labe nahe dewaore íbu heago hondowa ti gi timbuniore ho howa tini dege dege ladene bialu lalu, Ami agali dewaore kagome tomo ngago damene bibahende nai holobada. Hari timbuni wedarubi dindi tigabi ngarubi hari emene wedarubi tinaga genda nayulubada, lene.
JDT 7:5 Ani lalu agali mbira mbira bibahendeme wai bulene ale yagayaga bialu pabe neneni mamage haga anda heagoria ira delowa mamage halu egabi lene.
JDT 7:6 Ani bialu egerebagi Holoberenesehanda ami agali nogo hosini biruwa wai biaga hearu bibahende dindi tigabi hamama bayale wiagoria haru tagira ibuwa wai dagia bayago Isaraele wali agali Bedulia tanoha hearume hari bare wiagoria howa handabe halu hendene.
JDT 7:7 Ibugua tanoha hariga irigi halu polene wiago baya hangu handalu iba hambiaga uli wiarubi baya hanguore deme handaiore hene. Iba hambiaga uli wiaru bibahendeore ibu karulai howa ibunaga ami agalirume mamage howa handaya ho helalu ibunaga balai anda hayadagoha dai bini.
JDT 7:8 Ani biyagola Idomo agali haguane hearubi Moaba agali haguane hearubi wali agali iba solowara bedago ange ange paluyu pedarunaga agali haguane hearubi bibahende Holoberenese hearia ibuwa tigua ibuhondo lamialu lalu,
JDT 7:9 Agali haguane-o í̠na mini iname ngemago taliriyagua nde í̠naga ami agali karuni bai naholebira.
JDT 7:10 Isaraele tinaga hongo holene danda timuha nawi hari bare timbuni ngagoha ngelo ka. Ani laramago irane áyu hari bare ngagoha irigi halu wali agali ti kagoha anda polene nakarulape kemagoni ndobe.
JDT 7:11 Anigo agali haguane-o í̠na wai tiga tiga nabiriyagua í̠naga ami agali maru bo biba holebira.
JDT 7:12 Wahalu í̠naga ami agaliru haru howa tinaga balai anda kagoria hondo holene nga. Anigo agali í̠naga biabe biaga karume iba hambiaga uli hari teneha ngaru dege baya hangu mamage howa handaya ho holene nga.
JDT 7:13 Ani laramago irane wali agali Bedulia tanoha karu ti iba ogoniha dege hambu ibagaya. Tigua iba noahalu homabehe ngagola tinaga tano ngago inanaga giha ya holebira. Inanaga agali karu heba iname hari nene ngago irigi howa balai anda kaware biapara howa wali agali maru ibida tagira poligonaga mamage hole poloma̱ya.
JDT 7:14 Wali agalibi waneiginibi bibahende hina garime homai holebira. Iname bo polene henge nawi. Tini minana homalu tinaga tingini hariga tene ngaruha homo wima polebira.
JDT 7:15 Tigua í̠naga bi mo wahalu tini í̠naga giha ya nahayagonaga pani ogoni, lene.
JDT 7:16 Ani layagola Holoberenese halu ibunaga ami agali haru haga bu hearu tigua hariga ogoni bayaleoreda lowa tini lo mbira halu tigua, Agali maru mamage hole pudaba, lene.
JDT 7:17 Ani laya handala Moaba ami agali hearu heba Asiria ami daosini duria heba (5,000) ti haru mandagi hole pene. Tigua puwa balai anda hari tene wiagoria bialu Isaraele wali agali iba hambu piaga hariga wiagoria hapai hene.
JDT 7:18 Ani helalu Idomo amibi Amono amibi tigua hari bare wiagoria Dodana tano handabe howa balai anda bu hene. Ani bialu maru dindi abene unurahayagi pelalu maru amu ni tagira ibiragohayagi iba Mogomu poragoha dindi mini Kusi dindi kawareni Agaraba tano ngagoha hole pelene. Asiria tini dindi tigabi bayale wiagoria balai anda bu hene. Ti dindi ogoniha wiago bibahendeni haiore hene. Tinaga balai anda heagobi tinaga dabu dabu wialubi bibahende daga labe nahe dewaore wini.
JDT 7:19 Isaraele wali agali ti waitigime ho hagira biyagola tigua ibida pora bialu polene hariga nawiore howa mogo timbuni lalu gi howa tigua Ngode Datagaliwabe tinaga Anduane Homogo olalu ti biamogo bia lowa bi lalu hene.
JDT 7:20 Asiria ami agali hearume ami agali damene hearubi ami agali nogo hosini biruwa wai biaga hearubi garo nogo hosime gililagani heyu howa wai biaga hearubi bibahendeme Isaraele wali agali ho hagira bu heane dege horo pira tebirani maria (34) hene. Ani heagola Bedulia tano wali agalinaga iba be todobene wiaruha iba nabere bameore wiai hene.
JDT 7:21 Ani bialu tanoha iba hambiaga uli wiarubi iba nabere iba biba hai habeheore wini. Ani biyagola tigua horo mbira mbiranaga iba emene ogoni tale bigi bialu wali agali bibahende nai helo manda bialu tale bigi bialu hene.
JDT 7:22 Ainde waneigini galiru mo ko halu homabehe wiai hene. Ani bialu wali berearubi igiri daliahe hearubi bibahende de mborere bialu hariga timbuni pearuhabi tanonaga wai pabe heagonaga pabe panga heago kawarenibi odopeho wima pene. Ani bialu ti hongo naheore wini.
JDT 7:23 Anidagua biyagola wali agali bibahende bu hearubi waneigini bu hearubi bibahende ibalu Usia halu agali haguane biaru bereagoria ho mabu bu howa bi hongo howa ladagadaga bialu lai lalu hene. Tigua lalu,
JDT 7:24 Ngode Datagaliwabe ibunime tinaga miniha ngemigobi inanaga miniha ngemagobi mo tale bulebira. Ai tígua Asiria ami bialu baba bi lalu mo palia holene wiago waharimigome ko timbuniore inahondo birimi.
JDT 7:25 Áyuore ina pele ngulene mbira naheore. Ngode Datagaliwabehanda ina waitiginaga giha minu ya hayagoni ndobe. Ami agalirume tanoha anda ibuwa handalu karia ina bibahende iba noa howa homai halu tingini dindini wima pedaria hondolobada.
JDT 7:26 Ainde wahalu Holoberenesenaga ami agali biaru heba ami agali marubi tanoha ibidaba lowa tano bibahende ti mialu mbirale tanoha ngarubi mo ko halu mo page yai hole ibidaba lalu oladaba.
JDT 7:27 Ina garabaya hangu biragola garabaya biabe ale bia haga howa biabe bialu holene karulape wialu ina abale homolenego nakarulapeda. Iname ogonidagua birimayagua nde ina homa nabi holeberema. Ina waneigini gali bu karu homaragola inane de hondolene nakarulapebi ani bialu walibi waneiginibi mo ko heneore bedago hondolene nakarulapeore holobada.
JDT 7:28 Iname heneneore laramago ai Ngode Datagaliwabe ibunime ti maname mo daba ki bulene karulape. Ibuni Ngode Datagaliwabe ina mamalirunaga Anduane Homogo kago ibugua mana ko iname bialu kemagonaga pani ngialu inanaga mamalirume ko biyagonaga pani ngia dege biaga kago ainde mbirale ko uruni inaha anda naibilo ibunihondo bi lama, lene.
JDT 7:29 Ani lowa wali agali bu hearu bibahendeme dugu bialu bi hongo howa ladaga halu Ngode Datagaliwabe tinaga Anduane Homogo kagohondo bi lalu hene.
JDT 7:30 Ani lalu heagola Usia ibugua tihondo lamialu lalu, Hameneru-o áyu tígua hongo ho ala holene karulape nga. Abale gede holene nawigo harugo lowa horo duriane agima hondo hami̱ya. Horo ogoningi Ngode Datagaliwabe inanaga Anduane Homogo kagome ina wahalu napolebirago harugo lowa malia howa holene nga.
JDT 7:31 Ai horo dauru ogoni piai haragola ina mo wialu biamogo bulene mbira nawiyagua nde tígua laramigonidagua bimi̱ya, lene.
JDT 7:32 Ani lalu Usiahanda wali agali uruni tini biabe bialu hagadaruha hole pudaba lene. Agali ti wai pabe neneni mamage agalirunaga anda mamage helo biama irigi hene hearuha hole pudaba lalu, Wali waneiginiru tí nde tíni andaga dai bidaba, lene. Anigo tano ogoniha wali agali bu hearunaga bu miniha genda timbuni ngelo hene.
JDT 8:1 Horo ogoningi mbirale uruni bira layagola Yudidi ibu hale hene. Yudidi ibu Merari wane berene. Merari ibu Oso igini howa Oso ibu Yosebe igini hene. Yosebe ibu Osiele igini halu Osiele ibu Elegia igini halu Elegia ibu Ananaiasa igini hene. Ananaiasa ibu Gideono igini hene. Gideono ibu Labaimi igini hene. Labaimi ibu Ahidubu igini hene. Ahidubu ibu Elaya igini hene. Elaya ibu Hiligia igini halu Hiligia ibu Eliaba igini hene. Eliaba ibu Nadaniele igini halu Nadaniel ibu Selumiele igini hene. Selumiele ibu Surisadai igini halu Surisadai ibu Yagaba igini hene.
JDT 8:2 Yudidi agalini mini Manase henego ibu nde Yudidila libu hameigini mbiraore damenela pene. Ainde agali ogoni ibu mabuha balawa wabiaga mini bali mabuha howa lini dearu gandu lowa mo mogobu wigi bialu hearia homene.
JDT 8:3 Ai agali Manase ogoni ibugua agali maru bali lini deago gandulo mogo bialu heago haru heagola nime ibunaga haguaneni hongoheore daba hayagola ibu andaga pialu Bedulia tanoha ibuni dagiani palearia homene. Ai ibunaga tingini ibu aba mamaru hora heagoria dege Dodana tano Balamono tanola hengene wiagoria hora hene.
JDT 8:4 Ani bialu Yudidi ibu dara howa duguanda mali tebirani ege maria ibuni daluha biraabo hene.
JDT 8:5 Ibu anda dangini tigabi mbarale wiagoria hobane mbira bia howa ibugua ogoriani dara howa biagane aga karulo biraga berene.
JDT 8:6 Ibu dara ho birayadagoha biruwa tomo dewa nane wahowa berene. Anigo ai Sabada horo mendengi hole lowa horo pigane harangibi horo Sabada ibuni tagira ibirangibi horo timbuni malinaga ege pigane ngabulo mbiraga piganengibi horo ogoni ibuni tagira ibirangibi horo Isaraele tinaga Ngode Datagaliwabe bi lolene tagira ibirangi tinaga horo timbuni turu ho haga winigo tagira ibirangibi horo uruni bibahende ibirangi Yudidi ibu tomo wanahe nolene ngadagua naga berene.
JDT 8:7 Ai Yudidi ibu wali baya tara mbira ibunaga dengui bayaore wali maru berearubi ndo ibu bayaore mbira berene. Ainde ibu agalini Manase homayagola muni ngolo dewaorebi wali agali biabe biaga hearubi nogo bibahendebi maburubi dindibi ibuni karulai hene. Ani karulai howa Yudidi ibuni handaya ho haga berene.
JDT 8:8 Bi wahalu wali agalibi mbiralime ibuhondo bi ko mbira lade habe naheore ibu Ngode Datagaliwabe andaneha biraabo howa bi lalu biraga berene.
JDT 8:9 Wali agali bu hearume ti iba nalu holene nawidagome tiha mo ko holene timbuniore wiyada lowa tigua keba howa Usiahondo lai lalu heago Yudidi ibu hale ho berene. Ani bialu Usiahanda bi layago leagola horo duria howa tano ogoni Asiria ami agali karuhondo mimi̱ya lalu gi dolalu lo wiyagobi Yudidi ibu hale hadege bini.
JDT 8:10 Ani hale howa Yudidihanda wali mbira ibunaga mbirale ngago damene bibahende handaya ho hai haga bereagohondo lamialu, Usiabi Kabarisibi Kamasibi tanonaga agali haguane tebirali uruni i̱ bedoria ibidaba laya lalu lamule pu, lene.
JDT 8:11 Agali tebirali uruni ibiyagola ibugua tihondo lamialu lalu, Tí Bedulia tanonaga agali haguane bedemiru tígua bi i̱na larogo hale hadaba. Tígua wali agalihondo bi áyu lamirimigo nakarulape larimi. Tígua mbirale buleore lowa Anduane Homogonaga deni howa gi dolowa lalu Anduane Homogohanda horo duria ogoniha ina biamogo nabiyagua nde tigua tano ogo waitigi giha mo ya hami̱ya larimiya.
JDT 8:12 Anigo tí ai howa tígua horo duria ko tagira ibirangi Ngode Datagaliwabe kago bahondolene manda birimibe. Tígua Ngode Datagaliwabe bolangua halu tí daliga holene manda bu kemibe.
JDT 8:13 Tígua Anduane Homogo Bibahendenaga Hongo Haihe kago bahondolene manda birimida. Tí mini nawiore harimida lo manda bido.
JDT 8:14 Tígua agalinaga bu habaneha manda bu kago ogoale bu ka lalu manda biade habe naheore kemigoni ndobe. Ani bialu agalinaga miniha yado kago handabe naheore kemigoni ndobe. Ani ngago ai tígua Ngode Datagaliwabe ibu mbirale ngago wabiai haga kagonaga miniha wu kago agua handa walia holeberemibe. Mbaliniru-o darabioredago tígua Anduane Homogo inanaga Ngode Datagaliwabe kago ibugua ina baba keba helo tígua mo keba nahalimu.
JDT 8:15 Ibugua ina horo duria uruni andaneha howa biamogo bua nahayagua nde horo tara mendengi biamogo bulene hongohe karulape ka.
JDT 8:16 Ina Anduane Homogo inanaga Ngode Datagaliwabenaga mini hamelo ngago handaya ho hagane ndo kema. Iname mo giha ladebodebo bia bulene Ngode Datagaliwabe ibu ina wali agali kamago ale ndo ka.
JDT 8:17 Ani kago manda bialu iname hondo howa ibugua ina dara halu biamogo angi birabe hondole ema nabi howa biamogo bia lowa ibunihondo olalu haabo holene nga. Inanaga dugu bialu kemago ibunaga hameme hale hoa biyagua nde hale holebira.
JDT 8:18 Bamba ina mamaliru howa hama ibinigo áyu kemagoni howa hameigini mbiralimebi dindi gibuni podenehayagi habagi ho henemebi aba igini emene mbiramebi mbirale dama mitangi bialu bi pupu wule gime wabini wiaruhondo bi pupu nawi hama ibinigo áyu kemagoni ndobe. Bambaore inanaga mamali alaore headarume nde dama mitangi bialu bi pupu wule gime wabini wiaruhondo bi pupu wialu heneya.
JDT 8:19 Anidagua bialu hemiria Ngode Datagaliwabehanda tí waitigi giha pilopaga helayagola bibahende tini homai halu mbirale wiarubi mo page biai helalu biyagola ti bibahende ko hai hene.
JDT 8:20 Ani binigo áyu iname bi pupu wule gime wabini urunialehondo pupu nawi wahai halu iname Anduane Homogo ibuni inanaga Ngode Datagaliwabe kago ibu hanguhondo bi lalu kema. Ani bialu haga kemago manda bialu ibugua ina bame handaya naholebirago iname ibuhondo mini mbiraore wu holene nga.
JDT 8:21 Hale hadaba. Waitigime anda ibalu ina balu wayali hayagua nde Yudia wali agali bibahende bo hana hai holebira. Ani bialu Ngode Datagaliwabenaga anda kago heba bo gialo wahai holebira. Ani biragola Ngode Datagaliwabehanda ibunaga anda barago pani inanaga darama poragome holebira.
JDT 8:22 Ina damene bo wahayaguabi maru garabaya yalu piyaguabi uruni iname bia ko hene mbira ngane hondowa bulebira. Ani bialu dindi inanaga mamalirunaga hiha howa bame ngini yu harimago bo gialo wahai halu bo labu hayagobi nde iname bia ko haramagome dege bulebira. Ani bialu ina garabaya biabe ale bialu kemagola tigua ina mo taga haragola waitigime ina mo taga timbuni halu kagome ina tinaga deni ko galone nabulene mbirago holeberema.
JDT 8:23 Ani birangi mbiralime dara holene nawulebira, lalu Yudidihanda lene.
JDT 8:24 Yudidi ibugua laabo halu lalu, Ani bulebirago ai mbaliniru-o ina damene bu karuhondo mana bayalego bu walia hami̱ya. Ai tinaga holene bibahende inanaga giha ngagoni ndobe. Ani bialu Ngode Datagaliwabenaga andabi ibunaga lomabu delaga dabubi inanaga giha dege nga.
JDT 8:25 Iname Anduane Homogo inanaga Ngode Datagaliwabe kagome bamba ina mamali bahandalu henedagua áyu inabi bahandaragoni.
JDT 8:26 Ibugua Abarahamahondo biyagobi Aisagahondo genda mo miyagobi Yagaba ibugua ibu hanini Labananaga nogo sibi hinalu Mesobodemia heangi biyarubi iname manda budai bulene nga.
JDT 8:27 Ngode Datagaliwabehanda agali uruni tinaga miniha agile ngabe hondolenaga ti henemane bahandaga binigo. Ai áyu inahondo ogonidagua bahanda ndo bira. Inaha genda mo ngiyaruni mana ko iname bialu harimago pani karulape ndo ngiya. Ai Ngode Datagaliwabehanda wali agali ibuni kagoria kaware hapara ho kagohondo lawai halu genda holene mo miaga ka, lene.
JDT 8:28 Ani layagola Usiahanda Yudidihondo ladai bialu lalu, Í̠na bi lariruni bibahende henene ngago lai hari. Mbiralime í̠na bi lariruni mo nagalone naholebira.
JDT 8:29 Áyu í̠naga mini manda bayale latagi haregoni áyu pigane ndo latagi hare. Bamba í̠ wandari berengi howa mini manda bayale í̠ha ngago latagi halu mana bayale ngago bu walia halu biraga bedegoni.
JDT 8:30 Anigo ainde wali agalime iba noleneore nawidagola tigua lo hongo halu iname buleore lalu habo nalolene bi ogoni lo widaba lalu ka. Ani bialu iname buleore lalu gi dolalu lo widaba lara.
JDT 8:31 Í̠ wali mini mbiraorewi bedegola í̠ore birarigonigo ainde Anduane Homogohondo inanaga bi lahabe. Bi halu mende Anduane Homogohanda iba dalu ibilalu inanaga iba hambiaga uli ngaru iba biru to̱laragola ina iba nalu hongohe holoma̱ya iba biru to̱lelo bi labe, lene.
JDT 8:32 Ani layagola Yudidihanda ladai bialu lalu, Hale harene. Ai inanaga waneigini aguane aguanalioremebi embeda naholene mbira i̱na bule manda bido.
JDT 8:33 Áyu mbiraga wali i̱naga biabe biaga bedago iya tagira polobaya tigua wai pabe panga dugupe hole manda manda bu halimu. Í̠na horo manda bialu tano ogo waitigi giha ya hole lalu bi lo wirigo tagira naibi ngaore dege Ngode Datagaliwabenaga hongoni howa i̱nime ina Isaraele wali agalinaga genda timbuni ngagoni mo wahai holebero.
JDT 8:34 Í̠na agile bulebe lalu i̱nihondo hale nahalimu. I̱na tíhondo ogoale bule lalu langia nabi howa buledago bupe harogola handalimulo, lene.
JDT 8:35 Usia halu agali haguane hearume bi ogoni hale howa tigua Yudidihondo lamialu lalu, Ngode Datagaliwabe ibunime í̠ handaya ho holebirago í̠ pu. Anduane Homogo í̠ heba kago ibunime waitigime inahondo mana ko bialu karuhondo pani mulebira, lene.
JDT 8:36 Ani lalu ti Yudidi andaga wahalu tini mamage hagane wiyagoria hole pene.
JDT 9:1 Ani lalu Yudidi ibu pialu anda tamu biragane wiagoria bulu palu wini. Ibugua aga dara howa karulolene wiago karulaabo ho biruwa be abalu ibunaga haguaneni dugu hiruwa berene. Ani biruwa ai tigua Yarusaleme ira hagua ngabi biaga lomabu delalu howa Yudidi ibugua Ngode Datagaliwabehondo bi hongo howa ladaga halu lalu,
JDT 9:2 Anduane Homogo-o í̠ i̱naga mamali Simeononaga Ngode Datagaliwabeore kego í̠na agali dindi tarali hearume mana ko í̠na nabulene nga lalu lo wirigo biyagola í̠na Simeonohondo tiga bule pu lalu ayu tibu nene kirabaliha gadele wiago ibuhondo mirigoni. Agali tara urunime Simeono halu ti mbalini wandari mabuage bereagonaga aga minu budalu mana ko bule bialu hene. Ani buwa tigua aga budu wahai howa wandari ogoni kayu minalu mo ko hene.
JDT 9:3 Ani biyagola í̠na agali uruni tinaga agali haguane hearu tini dagia wali kayu biyagoria howa dege bo wahai harigoni. Í̠na agali biabe bia haga hearu heba tinaga agali haguane hearubi bo wahai halu handaya ho haga hearu bo wahai halu tinaga garabaya biabe ale bia halu haga hearubi heba bo wahai harigoni.
JDT 9:4 Í̠nime tinaga one wane berearu garabaya piai helalu tinaga dabudabu damene wiaru bibahende í̠ waneigini bayale bu hearu mo tahaga birigoni. Waneigini uruni tigua í̠naga mana lo ngago baya hangu taluwa bulene hame lo haga hene. Tigua mana ko tagabi ti dameneha biyadagonaga tandaga timbuni ho howa í̠na ti biamogo bia lowa í̠ni olalu hayagoni. I̱naga Ngode Datagaliwabe-o i̱ agalini homene i̱ wali dalo abogo beda lalu daga nalene nagalone bedogonigo ainde harugo lowa i̱naga bi larogo í̠na hale habe.
JDT 9:5 Mbirale áyu tagira ibirarunibi abale ibinirubi mani mbira ibulubadarubi bibahende í̠nime haru howa handaya ho kegola ibaga. Áyu ngaru bibahendebi mani bulubadaru bibahendebi í̠nime manda biai ho kegoni. Heneneore í̠na ogoale ibulebira lo manda bu harigo damene bibahende ibai haya.
JDT 9:6 Mbirale mbira i̱na bule manda bidego abaleore aube tobane tagira ibaga. Í̠na bule ngeru bibahende bambaore howa manda bu halu mbirale uruni bule ngego í̠ni minime mo tale bialu manda baya hangu biaga ke.
JDT 9:7 Ngode Datagaliwabe-o Asiria ti ami agali dewaore daga labe nahe kagoni de handa. Tigua tinaga ami agali damene dewaorebi ami agali nogo hosini biruwa wai biaga dewabi kago mitangi bialu ti agali daga labe nahedagola turu halu mine haga ka. Tinaga danda timubi humbi yandarerubi pume ege to̱le̱ baga yidarubi uruni damenenaga hongo manda bialu ti mine haga ka. Anigo tigua í̠ manda nabiore ka. Í̠ni degeme wai emene timbuni birago mo palia habehe kegoni. Anduane Homogo í̠niore ke.
JDT 9:8 Í̠naga hongo gibiore ngegome tinaga hongo bo podabe. Tigua dindi í̠ninaga loma biahe wiabagi hene biago mo ko halu mo dodohe ngelole ai í̠naga tandaga holeneme uruni balu bo bibaore habe. Tigua í̠naga andabi í̠naga lomabu delaga dabu kagobi bo gialo wahai hole ibu kagoni ndobe.
JDT 9:9 Tinaga mine hagane mana ngago de handalu í̠naga tandaga holeneme ti balu bo biba habe. I̱ mini nahe bame wali dege bedogome i̱na hameledogo ale buliya í̠na i̱ hongo ngibe.
JDT 9:10 I̱naga bi dege larogome agali biabe biahaga karubi tinaga anduane karubi bole pelo í̠na biamogo bibe. Tinaga mine hagane mana ngago walinaga giha howa wiamaro bilabe.
JDT 9:11 Í̠naga hongo ami agali dewanaga hongoni howa ndo ibaga. Í̠ wali agali tini mo dindiha ho haga karunaga Ngode Datagaliwabeore howa i̱na mbirali daga nalene mini nawi karu biamogo biaga ke. Í̠na mbirali hongo nahe karu handaya ho halu darabi yagibanoore kagoha ti baba mandagi kaware haga ke. Ani bialu maru homolene kaware ngagoria karia í̠na haru dai biaga ke.
JDT 9:12 I̱ mamali Simeononaga Ngode Datagaliwabe-o i̱naga bi áyu ogoni hale ha. Isaraelenaga ngaru bibahende aba kegoni. Í̠ni dahuliya andaga dindilanaga timbuni daligaore kegoni. Í̠ iba pedaru wabiaga howa uruni abaore kegoni. Mbirale bibahende í̠nime wabirirunaga kini í̠niore kegoni. I̱na bi larogo abale hale habe.
JDT 9:13 Bi ohowa i̱na loleberogome waitigi agali karu bo wahelo mo bia helabe. Irane tigua manda bialu bi lo kago í̠naga habo nalolene bi ina baba lo wirigo mo habo lelolebi í̠naga anda kago bo gialo wahai holebi Hari Saiono nene ngago mo ko halu mo ngubia holebi í̠ waneiginirunaga dindi ngago mo ko hai holebi manda bialu ibu ka.
JDT 9:14 Ainde í̠naga wali agali bu karumebi wali agali maru bu karumebi í̠ni tinaga Ngode Datagaliwabeore heneda lo manda biai helo ani bibe. Í̠ Ngode Datagaliwabe Bibahendenaga Hongo Haiheore howa kegoni. Ani howa Isaraele wali agali handaya ho haga í̠ni hanguore kegoni, lalu Yudidi ibugua Ngode Datagaliwabehondo bi lene.
JDT 10:1 Yudidi ibugua Isaraelenaga Ngode Datagaliwabehondo bi lai howa
JDT 10:2 ibu paliyagoria howa heyalu wali ibunaga biabe bia haga bereago ibilo olene. Ani bialu anda hobane mbira horo Sabadangibi bi lagane horo timbuni tagira ibirangibi ibuni biragadagoha daliape halu anda pene.
JDT 10:3 Puwa aga dara ho howa karulagane karulo birayagobi ibu agalini homayagola dalo tangi karulo birayagobi golo wahai hene. Ibu waya balu tingini mbagua ngabi mbira mini sanda laga wiagome ha̱i̱ hene. Ani buwa ibunaga mandari gumu bialu aga bayale tara mbirame mandari hubabu dambi halu agali bayale ibu agalini Manase heangi karulagane wiago mo karulalu bini.
JDT 10:4 Ani buwa ge su mo karulalu ge hala gi pagidaru mo karulai halu haleira dalu gihondeneni gi da wialu ibunaga yári wiago damene mo karulai halu biyagola wali biago wali maru baba tabe nabi baya dege lalu agibe tobahe ona berene. Ani bereagola agali ibu de handararume dimagoli timbuni habeheore berene.
JDT 10:5 Ai waini iba be mbirabi olibe lini ibane be mbirabi ibunaga biabe bia hagane wali biagome henelo mini. Ani bialu bali lini hirini wiagobi mberedi hirini bayale wiarubi kegi maru ira lini do gembeme wabini wiarubi bibahende nuha hangu hanai hene. Baya hangu hubabu ndagi laga buwa wali biabe bia haga bereagome nuha henelo mini.
JDT 10:6 Ani biai halu libu tanonaga wai pabe panga haraba heagoria pialu hebiria Usia halu Bedulia tanonaga agali kirali Kabarisi Kamisila ti haru mandagi howa tanonaga wai pabe panga dugua hene.
JDT 10:7 Ani buwa handalu hemiria Yudidi wali baya dege lalu agi loabe tobaheni ibunaga dengui baya tara howa ibunaga agabi tara dege biaria hendene. Tigua turu halu bi ogodagua lamini.
JDT 10:8 Í̠na hame ledegobi mini ngegobi bibahende í̠naga mamalirunaga Ngode Datagaliwabehanda mo karulape helo. Ani biragola Isaraele ti lone wayali haragola Yarusaleme mini lene ngelo laro, lene.
JDT 10:9 Yudidi ibugua Ngode Datagaliwabehondo bi lai howa ibugua ladai bialu lalu, Ai i̱na mbirale bule lalu larugoni bule poliya agali biabe biaga karuhondo tano pabe panga dugua ladaba, lene. Ani layagola tigua igiri daliahe bu hearuhondo pabe panga duguadaba lene.
JDT 10:10 Panga dugua hayagola Yudidila wali ibunaga biabe bia haga bereago libu haru tanoha howa tagira pialu hari bare wiagoha daliape halu dindi tigabi wiagoha puabo halu pene.
JDT 10:11 Libu dindi tigabi wiagoha puabo halu hebiria Asiria ami agali bu hearu mamage ibagabu hearia ngola hene.
JDT 10:12 Tigua hapai howa Yudidi hale halu lalu, Libu dindi timbuni agoha howa ibalu hameigini ai aria eberebibe, lene. Ani layagola Yudidi ibugua ladai bialu lalu, I̱ Hiburu wali bedogonigo tígua wai bialu bo podanda holeberemigo manda bialu i̱ dindi yu wahalu ibida poro.
JDT 10:13 Ai i̱ ami agali tínaga agali haguane Holoberenesehondo bi bayale maru lolego ibu hondo polene hame ledo. Ibu dindi barebare ngaru bibahende bo podai holene hame leagua nde i̱na ibuhondo ogodagua bibe lalu bi lamerogo hale holene nga. Anidagua biyagua nde ibunaga ami agali bu karu bope halu ti wayali holeberemi, lene.
JDT 10:14 Ami agali biaru tigua handalu hemiria Yudidi baya taraore heagola tigua handaya hai hene. Ibugua bi layago hale hai howa tigua ladai bialu lalu,
JDT 10:15 Í̠ore wali oheme hariga baya handarida. Í̠na abale ibalu inanaga agali haguane Holoberenese hondole abale ibiridagome í̠ homolene nawi. Ai gi nahabe. Áyu ogoni ibunaga balai anda kagoha abale pu. Inanaga ami agali bu karume í̠ heba pialu haru halu inanaga agali haguane karia haru polebira, lene.
JDT 10:16 Í̠na ibu deni pu howa gi nahe howa bi bibahende áyu inahondo langirigo damene ibuhondo lamiai habe. Ani beregola ibugua í̠ baya hangu handaya ho holebira, lene.
JDT 10:17 Ani lalu tigua ami agali handari mbirame (100) Yudidila wali ibunaga biabe bia haga biagola haru halu Holoberenese ibunaga balai anda heagola berearia haru halu pene.
JDT 10:18 Ami agali balai andaha bu hearume hale halu hemiria wali baya taraorene tara mbira ibiya layago hale halu ti de hondole gerai ibugu ibugu bini. Tigua Holoberenese berearia wali mbira ibira lalu bi lo yalu piyagola Yudidi ibu balai anda haneni hondo hene. Agali ibu heagoria ho mabu bu howa
JDT 10:19 wali baya taraore heago hondowa mogo lowa tigua bi dewaore laga laga bialu hene. Tigua manda bialu Isaraele wali agali maru karu aria ndo tara mbira harua lo manda bini. Tigua lalu, Hameigini wali baya biraga uruni wali agali abime mege bibehedabe. Iname wali uruni agalini kago damene bo wahai holene karulapeda. Hameigini wali baya biraga tigua wali agali dindi bibahendeha palima pedaru mo hondo hai holigo, lene.
JDT 10:20 Ani lalu hemigola ami agali Holoberenese mamage haga hearubi agali ibunaga biabe bia haga hearubi bibahendeme tagira ibalu Yudidi minu yalu anda ibini.
JDT 10:21 Holoberenese ibu andaga tamuha palene. Ibunaga paliaga dagia ogoni aga mindibi hari mindini handalehemebi ngolo pume wabini wiagome hinabibi anda bu dambihe wini. Aga ogoni pu tara taramebi ege to̱le̱ muni timbunime miaga tara taramebi mo yári bia ho wini.
JDT 10:22 Agali biarume Yudidi ibiya lalu bi lamiyagola Holoberenese ibu balai anda haneni tagira íbu heagola agali marume lamu silibame wabini wiagome hale hedo yalu tigua bamba halu ibini.
JDT 10:23 Yudidi ibu heyu heagola Holoberenese halu agali ibunaga biabe bia haga ibiyadaru ti de hondowa Yudidi dengui baya taraoreyago hondowa ti hame timbuni lene. Wali biago ibugua Holoberenese wanakuihayagi howa ibunaga mini yaraga halu ge duli hanga howa bulu palialu hearia agali hearume mo heya howa heyu helene.
JDT 11:1 Holoberenese ibugua Yudidihondo lamialu lalu, Wali-o í̠ mini burugu lolene nawi. Í̠ gi holenebi nawi. Wali agali Kini Nebugadenesa dindi bibahendenaga kini timbuni handame ho bedago andaneha holeore lalu anda ibiyaru aria mbiraoreli hangu halu mbiraorebi i̱na uruni mo ko halu bo wa naharuli.
JDT 11:2 Ani bialu í̠ damene uyu hari bareha paluyu pedaru tigua i̱hondo erembira nangidale nde i̱na ti baba wai nabidole. Anigo ai tinime bia ko haya.
JDT 11:3 Anigo í̠na ti helalu í̠ pora bialu ibida ina hemaria ibiridago irane agibe. Í̠ ibiridago bayale biridago ani ibiridagome í̠ni bayale biruleberego í̠ gi nahabe. Áyu mbiraga ogoni howa mani birama poleberegoha í̠ mo ko naholebira.
JDT 11:4 Agali o karu bibahendeme wali agali í̠naga agali haguane Kini Nebugadenesanaga bi hale halu ibu andaneha karu baya hangu handaya ho hagadagua í̠ baya hangu handaya ho holebira, lalu Holoberenesehanda Yudidi lamini.
JDT 11:5 Ani layagola Yudidihanda ladai bialu lalu, Aiore agali haguane-o i wali í̠naga biabe bia haga bedogoni. I̱ bi maru lolene karulapebe. Ai mbiraga kamangi i̱naga agali haguane kagohondo ke halu bi nalolebero. Anidagua bulene nawiore.
JDT 11:6 I̱na bi loleberogo í̠na hale halu biriyagua nde Ngode Datagaliwabehanda í̠naga giha howa biabe timbuni tara bulebira. Mbirale í̠naga agali haguane ibugua bulene ngago mbiralime mo habo nalolebira. Ibugua birago tigabi dege piaho wulebira.
JDT 11:7 I̱na heneneore gi dolalu Nebugadenesa ibu dindi bibahendenaga kini howa agali haguanebi ibuore howa ibugua dindi bibahendeha pialu wali agali baya hangu helo tigua mo tiga bule pudaba layadago ibunaga mini lalu larogo Holoberenese í̠na biabe timbuniore birigome wali agali hangu ndo dindini ema bialu piaga bibahendebi ega bedarubi bibahendeore ibunaga hongo timbuni ngago andaneha hai ka.
JDT 11:8 Iname abale hale harimago í̠ agali manda bayaleorebibi mini bayalewibi mbira ke laya. Wali agali dindi tarani haga haga bidaru bibahendeoreme manda biai kago Asiria dindiha í̠ biabe beregome bu bolangua holenebi manda timbuni bolangua henebi wai puwa bo podahana halu wayali holenebi í̠ ale mende nahe layane hale hai harima.
JDT 11:9 Ani bialu Agio ibugua í̠hondo bi maru layayago ina hale hai harima. Beduliali hearubi tigua ibu bo wanahe heleagola ibugua bi í̠hondo langiniyaru bibahende layane hale hai harima.
JDT 11:10 Agali haguane-o ibugua bi langiyago mo wanahabe. Ibugua bi ogoni heneneore layago í̠naga miniha yu haabo habe. Inanaga wali agali bu karu tigua Ngode Datagaliwabenaga deni howa ti mana ko mbira nabi heagua nde ti ayu tibu nene gadele ngagome nadibulebira. Ani bialu tiha mo ko holenebi nawulebira.
JDT 11:11 Anigo i̱naga agali haguane-o í̠naga biabe bulene ngago bia ko halu ibira holobadalo manda nabibe. Mana kome Isaraele wali agali dariba hene kagome tiha mo ko halu homoleneore nga. Tigua mana ko ngaru damene bialu kagome Ngode Datagaliwabenaga bu miniha tandaga nolene ngago mo yu anda ibaga.
JDT 11:12 Áyu dege tinaga tomo nalu holene ndia halu ibabi nai habehe nga. Ani biyagola ai tinaga nogo bulumaga karu bo nai halu tomo maru Ngode Datagaliwabehanda nolene nawi leneru balu nai hole ka.
JDT 11:13 Ani bialu tigua tinaga mabuha widi pigane boga bini dedarubi waini ibabi olibe lini ibanebi Anduane Homogohanda ibunagaore leneru tini nole lalu bi lo mbira hai haya. Tomo uruni agali loma binigo mo miaga Yarusalemeni Anduane Homogonaga tano loma biaho helene biagoria biabe bialu karu tinaga wiaga wini. Tomo uruni agali mendeme ela nahaga loma biahowa wiabagi hene wiaga nga.
JDT 11:14 Anigo ainde tigua tomo ogoni narama lalu agali maru bi yalu ganisolo agali Yarusalemeni hearu lamule pudaba laya. Wali agali Yarusalemeni hearu tiguabi nde ogonidagua dege biya.
JDT 11:15 Ainde ganisolo agali Yarusaleme karu tigua karulapego nalimu lalu ladai biragola tigua tomo ogoni nayayagua nde horo ogoningiore Ngode Datagaliwabehanda ti í̠naga giha mo ya haragola í̠na ti bo wahaiore holebere.
JDT 11:16 Ai i̱ wali í̠naga biabe biaga i̱na bi ogoni hale halu i̱na ti yu wahai halu ibida pora bialu ibiru. Ngode Datagaliwabehanda í̠ mbirale timbuniore mbira iyane buleberebago ogoni dindi bibahendeha wali agali bu karume hale hai holebira. Ani hale howa ti mogo timbuni lolebirago ai i̱na mbirale timbuni ogoni buliya Ngode Datagaliwabehanda ibilaya.
JDT 11:17 I̱ í̠naga biabe biaga biruwa Ngode Datagaliwabe dahuliya andaga kagonaga bi hale haga bedo. Ani biruwa horo bibahendengibi mbiraga bibahendengibi ibunaga mini yaraga halu biraga bedo. Agali haguane-o horo bibahende i̱ í̠la biraabo howa mbiraga i̱ unu dindi ulini tigabi ngagoha Ngode Datagaliwabenaga mini yaraga hole pugu bulebero. Ani berogola Ngode Datagaliwabe ibugua Isaraele wali agalime ko ogongi biya lalu i̱ langulebira.
JDT 11:18 Ibu bi langirago hale howa í̠ langerogola í̠na í̠naga ami agali bu karu haru halu puwa wai beregola í̠ hapai halu í̠la wai bulene Isaraeleali mbira naholebira.
JDT 11:19 Í̠ Yarusaleme pobelonaga hariga Yudia dindiha pedadagua pialu pobelo i̱na hariga walia holebero. Ani bialu tano í̠ karulalu í̠ kini halu Yarusaleme tano dombeneha birulebere. Ani bialu í̠na wali agali uruni nogo sibi haru haga nahe yu wahalu pene haru haradagua haru kegola biango ko karume í̠hondo du̱a nalolebira. Bambaore howa mbirale uruni bulebira lalu Ngode Datagaliwabehanda i̱hondo langiyagola i̱ manda bu berene. Ai áyu Ngode Datagaliwabehanda í̠ lamule pu laya, lene.
JDT 11:20 Yudidihanda bi layagome Holoberenese mo turu halu agali bu hearu bibahende mo turu hai hayagola tigua wali ogoninaga mini baya taraore winiyago hondowa ti mogo timbuni lo hene. Tigua lalu,
JDT 11:21 Dindi amu ni tagira ibiragoha howa pialu ni paliragoha wali ogobi mbira berearia handa nabirima. Ibunaga dengui baya taraore mbirani ibunaga manda ngagobi wali maru bedarunaga manda ngago bolangua heneda, lene.
JDT 11:22 Ai Holoberenese ibugua Yudidihondo lalu, Bayaleore Ngode Datagaliwabehanda í̠naga wali agaliru helalu í̠ ala ibilayada. Áyu i̱na hongoheore howa wali agali i̱naga agali timbuni Nebugadenesa mege biaga karu tiha mo ko holene ngago ngola holebira.
JDT 11:23 Ainde í̠ wali baya taraore mbira bedegoni. Í̠naga dengui baya burugule mbirani bi í̠na larigobi dendebioreda. Mbirale í̠na bule lariruni biai hariyagua nde í̠naga Ngode Datagaliwabe kago ibu i̱naga Ngode Datagaliwabe holebira. Ani bialu í̠ni Nebugadenesa andaga pu bedegola í̠naga mini dindi bibahende ngaruha hale hayago lalu mini lene birulebere, lalu lene.
JDT 12:1 Holoberenesehanda agali biabe biaga hearuhondo lalu, Yudidi anda tamuha tomo nolene beledi silibame wabini ngagoria haru pu berelalimu, lalu lamini. Ani bialu ibugua agali biabe biaga bu hearuhondo lamialu, Tomo bayalebi waini ibabi i̱ni nagane ale maru mo milimu, lalu lamini.
JDT 12:2 Ani layagola Yudidihanda lalu, I̱na tomo uruniale nanolebero. Tomo nolene i̱ni hanalu ibinidaru karulape nolebero. Tígua ngeremigo naruyagua mana ngago puguligonaga nanolebero, lene.
JDT 12:3 Ani layagola Holoberenese ibugua Yudidihondo lamialu lalu, Tomo í̠ni hanaridago nai kegola í̠naga tomo iname agoha ngaria taya buluma̱yadabe. Yuda wali agali mbira ina baba mandagi nahedago agua taya buledabe, lene.
JDT 12:4 Ani layagola Yudidihanda bi layago ladai bialu lalu, Heneneore i̱na í̠hondo tigatiga langerogo. Anduane Homogohanda i̱ha howa biabe bule ngago bu maro biragola tomo i̱ nolene wiaabo holebira, lene.
JDT 12:5 Ani lalu agali Holoberenese ibunaga biabe biaga hearume Yudidi balai anda mbira heagoha haru piyagola ibu anda ogoniha paleaore mbi hanuni hene. Palialu egabi lolene kaware ngelowa ami agali mamage haga hearu bu heaore heyuwa Yudidihanda
JDT 12:6 Holoberenese hearia bi lama pudaba lowa lalu, I̱ tagira pialu dindi ulini tigabi ngagoha pialu Ngode Datagaliwabehondo bi lole poabe lalu í̠nihondo hale haro laya lalu lamule pudaba, lene.
JDT 12:7 Ani lama piyagola Holoberenese ibugua ami agali hearuhondo lalu, Ibu polebiragoha napobe. Hapai nahe mamage dege baya hangu halimu, lalu lamini. Ai Yudidi ibu horo tebira ami agali balai anda bu heagoha howa mbiraga bibahendengi Bedulia tanonaga dindi ulini wiagoha pialu iba bereagoha wayawaya biaga berene.
JDT 12:8 Wayawaya bai howa ibugua Anduane Homogo Isaraelenaga Ngode Datagaliwabehondo lalu, Isaraele tigua wayali halu waitigi bope helonaga hariga maru mo walia habe, lalu bi lalu berene.
JDT 12:9 Ibu Ngode Datagaliwabenaga deni dodo ko mbira para nahe holenaga biaga mana ngago biaabo halu berene. Ani biai halu ibunaga balai anda kagoha pu biraabo halu alendo tomo nolene tu haragola tagira ibaga berene.
JDT 12:10 Horo maneni hayagola Holoberenesehanda agali ibunaga biabe biagane hearunaga tomo timbuni dawa hene. Anigo agali ami agali haru halu bamba haga maru hearu ti ibalimu nalene.
JDT 12:11 Ani bialu howa Holoberenese ibugua agali mbira ibunaga mbirale wiaru bibahende handaya ho haga mini Bagoasa heagohondo lamialu lalu, Í̠na áyu ogoni puwa Hiburu wali í̠na handaya ho haga biaga tomo ibabi ina haru mandagi nalu i̱naga balai andaha birami̱ya haru halu ibabe.
JDT 12:12 Iname wali ogonibigo ibu heba te lalu mandagi bira nabi howabi ibula mandagi palia nabi howabi bameore biralu pelarimayagua nde ina mege gibiore bialu ina hondo oba holebira, lene.
JDT 12:13 Ani laya handala Bagoasa ibugua Holoberenese berelalu Yudidihondo pene. Ibugua puwa lalu, Wali baya-o í̠naga agali haguane baba bialu tomo nami̱ya ibuleberebe. Ibugua í̠ iba wainiru nalu ina baba turu hagabu birami̱ya hame layago. Ainde í̠na Asiria walirume Kini Nebugadenesa andaga biruwa biagadagua bule íbuore bibe laya, lene.
JDT 12:14 Ani layagola Yudidihanda ladai bialu lalu, I̱ aigo biruwa i̱naga agali haguane kagohondo naibule loabe. I̱na ibalu mbirale bibahende i̱naga agali haguane kago ibugua i̱na buliya hame ledago biai holebero. Ani bialu mbiraga ogoniore embeda nahe manda biaho biraabo howa homalu waholeberoda lo manda bido, lene.
JDT 12:15 Ani laya handala Yudidi ibugua puwa aga bayaleru mo karulalu yári tara tararu bialu bini. Ani bialu heagola wali ibunaga biabe bia haga biagome nogo sibi dongone wiago mo yalu puwa Holoberenese bereago kaware dindiha dunga hene. Nogo sibi dongone ogoni Yudidi ibu tomo nalu biruwa dungaho berelonaga Bagoasahanda minigo ogoni mo yu puwa ogoni ala dungua hene.
JDT 12:16 Ani buwa Yudidi ibu anda ibalu berene. Ani ibiyagola Holoberenese ibunaga bu miniha wali biago dimagoli timbuni halu mandagi paluenaga ladebodebo bialu biraabo hene. Yudidi ibu pigane ibiyangi howa Holoberenesehanda hame lowa mini burugu timbuni lalu mandagi paliba lolenaga hariga taya bialu haabo hene.
JDT 12:17 Ani bialu howa Holoberenese ibugua Yudidihondo lalu, Í̠na waini ibaru abale nalu ina baba turu ho birami̱ya, lene.
JDT 12:18 Ani layagola Yudidi ibugua ladai bialu lalu, Agali haguane-o áyu i̱na iba í̠la mandagi noleberogo irane horo áyu ogoni i̱naga horo timbuniore ngago manda bialu nolebero, lene.
JDT 12:19 Ani lalu Yudidi ibugua tomobi ibabi wali ibunaga biabe bia haga biagome manda manda biyadaru nalu berene.
JDT 12:20 Ani nalu bereagola Holoberenese ibugua Yudidi de handaya halu hearia dimagoli timbuni tagira ibiyagola ibu waini iba dewaore nagimbu bialu berene. Ibu iba abale nanagadagua dewaore áyu ogoningi nowa mo ko howa lulu yu berene.
JDT 13:1 Mbi hanuni hayagola agali Holoberenesenaga biabe bia haga biaru ti abale heyalu piai hene. Ani biyagola Bagoasahanda Holoberenesenaga balai anda heagonaga panga payanda howa agali biabe biaga maru hearu ibunaga agali haguane padagoha anda napole lalu bi lamiai hene. Tomo nalu luore biru wahayagome agali bibahende de umu lai hene.
JDT 13:2 Yudidi ibu hangu Holoberenesela balai anda biagoha biraabo hene. Ani bereagola ai Holoberenese ibu lulu timbuni yalu mo ko hayagola ibuni tamu dagia wiagoria ibira halu palene.
JDT 13:3 Yudidihanda wali ibunaga biabe bia haga biago balai anda tagirahayagi haneni abale biagadagua ibu tagira ibuliya hondo habe lene. Wali ibunaga biabe bia haga biago lamialu ibu, Anduane Homogohondo bi lone lole porogo, lene. Ani bialu Bagoasahondobi ani dege lamini.
JDT 13:4 Agali mini lene birayarubi agali bame biabe bia haga birayarubi bibahende tomo nai halu pugu pugu biai hene. Ani piai hayagola Yudidi ibu Holoberenesenaga dagia kawareni heyu howa ibugua Anduane Homogohondo ibuni bu miniha bi ogodagua lene. Ngode Datagaliwabe í̠ore Anduane Homogo Hongo Haiheore kegoni. Horo áyu ogoningiore i̱na Yarusaleme mini yaraga halu biabe buleberogo buliya i̱naga gi mo hongo habe.
JDT 13:5 Í̠naga wali agali bayale helo biamogo bulenebi ina bope halu bo hengedolenaga waitigi áyu íbu karu bo haealabaga bialu mo habo lai holenaga biabe bule manda bu birarugobi bulene horo áyu ngagoni, lene.
JDT 13:6 Ani lalu Yudidi ibugua Holoberenesenaga haguandahayagi ayu tibu ale ogoni mo pehowa
JDT 13:7 yalu dagiani kaware hapara hene. Ibugua Holoberenesenaga mandarini yania ho howa lalu, Isaraele wali agalinaga Ngode Datagaliwabe í̠ni kego i̱ áyu ogoni mo hongo habe, lene.
JDT 13:8 Ani lowa Yudidi ibunaga hongo bibahendeoreme Holoberenesenaga mani halu kira dibalu haguane pugu ba̱i̱ hene.
JDT 13:9 Ani bialu ibunaga tingini dindini pendegelope halu dagiani hina bibime hayulino dambi haga labolabo baya tara heago hadowa gini yu hene. Emene howa Holoberenesenaga haguane biago yalu tagira puwa wali ibunaga biabe bia haga biagohondo mini.
JDT 13:10 Miyagola wali biago ibugua agali haguane biago tomo hanagane nuha henene. Ai Yudidila wali ibunaga biabe biaga biagola Ngode Datagaliwabehondo bi lole piaga wiyadagua pene tingi halu puwa ai balai anda bu hearu yu wahai halu dindi tigabi wiagobi wahai halu pialu hari bare wiagoha irigi halu puwa Bedulia tanonaga wai pabe panga heagoria kaware anda pene.
JDT 13:11 Libu wene kaundiani dege wene pialu howa Yudidihanda agali maru wai pabe panga handaya ho howa mamage haga hearu olowa lalu, Panga duguadaba panga duguadaba. Inanaga Ngode Datagaliwabe ibuni inane heba mandagi haabo kago. Áyu dege inahondo ibunaga hongo ngago ina Isaraelehondo lone mo walia halu ibunaga hongome waitigi hearu bope haya, lene.
JDT 13:12 Agali tanoha hearume bi layuago Yudidihanda layuane hale halu ti abale gerai wai pabe heagoria puwa tanonaga agali haguane hearu ibilo olene.
JDT 13:13 Wali agali daliahebi wahealebi wandari igiribi bibahende Yudidi dai bulubada manda nabi howa gerai lalu wai pabe panga heagoria piai hene. Pialu tigua panga duguayagola anda pene. Anda piyagola wali agali tigua hale hedo yuwa ho mabu bini.
JDT 13:14 Ani heagola Yudidi ibugua bi hongo howa ladaga halu lalu, Ngode Datagaliwabenaga mini yaraga holene nga. Ibunaga mini daligaore kago yaraga holene nga. Ngode Datagaliwabehanda ina Isaraele wali agali dara haga kagonaga ina ibunaga mini yaraga holene nga. Áyu mbiraga dege Ngode Datagaliwabehanda inanaga waitigi i̱naga giha howa bo haeala hole biai haya, lalu latagi hene.
JDT 13:15 Ani lalu agali haguane nuha pugu hanayago ti de hendelo yaraga halu lalu, De handadaba. Agali haguane o yidogoni Holoberenese Asiria ami agali haguane biagonaga haguane o pugu yidogoni. Ani bialu aga ogo Holoberenese iba nowa luluyu wiagola ibu dambi hene. Anduane Homogohanda agali haguane ogoni wali mbiranaga giha howa bo wahaya.
JDT 13:16 I̱na heneneore gi dolalu howa larogo i̱na mbirale uruni buliya Anduane Homogo ibunime i̱ baya hangu handaya ho haya. I̱naga dengui baya tara handalu Holoberenese mo luluya henego homaya. Anigo ibugua i̱la mana ko nabi bayale halu i̱ mo ko halu mo tagabi nahe, lene.
JDT 13:17 Wali agali tigua mogo timbuni lalu tigua bulupaluwa Ngode Datagaliwabehondo bi lene. Ti bibahendeme bi lo mbira halu hongo howa ladagadaga bialu Ngode Datagaliwabenaga mini yaraga halu lalu, Iname Anduane Homogo inanaga Ngode Datagaliwabe í̠naga mini yaraga harama. Áyu í̠naga wali agali kemarunaga waitigi hearu mo taga harida, lene.
JDT 13:18 Ai Usiahanda Yudidihondo lalu, I̱ wane Yudidi-o Ngode Datagaliwabehanda dindi bibahendeha wali biru ngaru berelowa í̠naga mini timbuni mini lene berelayada. Anduane Homogo inanaga Ngode Datagaliwabe ibugua dindi harila wabini kagonaga mini yaraga hama. Ibunime í̠na bibelo mo bia hayagola í̠na inanaga waitigi hearunaga agali haguane heagonaga haguane puguarida.
JDT 13:19 Horo bibahendengi mani wali agaliru Ngode Datagaliwabenaga hongo ngago te lalu howa tigua í̠naga mini mbiraore hongohe wiridago te lalu holebira.
JDT 13:20 Í̠na mbirale uruni biridagonaga Ngode Datagaliwabehanda í̠hondo bayale biaabo helo laro. Wali agali mo ko holene kawareni hemagola í̠na ibunaga deni tigatiga ibagabu biruwa í̠ni homolene mo embeda halu birigonaga ibugua í̠hondo mbirale bayale damene ngaru ngiai helo laro, lene. Ani layagola wali agali bibahendeme bi lo mbira halu lalu, Henene heneneore, lai hene.
JDT 14:1 Ai Yudidihanda wali agalihondo lamialu lalu, Hagibuni mbaliniru-o i̱na bi larogo ala hale hadaba. Tígua agali haguane ogo mo yalu puwa wai pabe neneni mo paga hadaba.
JDT 14:2 Egabi lalu gao laragola tígua agali haguane mbira dabo helalimu. Agali hongohe kemigo damene bibahende danda timu yandareru yai halu tano wahalu tagira piai halimu. Asiriali mamage haga karu baba wai bule tagira peneale tingi halimu. Tigua henene wai bule daliape halu napilimu.
JDT 14:3 Ani beremigo hondowa Asiriali tigua wai biagane ale mo yai halu gerai lalu balai anda kagoha aminaga agali haguane barila hole polebira. Ani biragola agali haguane uruni tigua gerai lalu Holoberenese andaga balai andaha pialu karia tigua Holoberenese nahondolebira.
JDT 14:4 Ani biragola gi timbunioreme ami agali uruni bope haragola tí bibahendeme talima pugupugu bialu harigani bai halimu.
JDT 14:5 Ani bule dege tígua Amonoali Agio dege i̱ kogoria haru ibule damu pudaba. Ibugua ibalu haguane ogo Holoberenese haguanedabe taradabe hendelo damu pudaba. Agali ogonimeore Isaraele wali agali mo taga halu Agio ibubi nde ina Isaraele wali agali baba mandagi homelo ibilenego agali ogonioredabe be tara mendedabe hendelo, lene.
JDT 14:6 Tigua Yudidihanda layago hale halu Agio ibu Usia andaga berearia hondo pene. Ai Agio ibu ibuwa handalu hearia wali agali dewa ho mabu bu hearu aria agali mbirame Holoberenesenaga haguane pugu yu heago hondowa ibu mogo timbuni lalu de mborere biyagola dindini odope hene.
JDT 14:7 Tigua ibu lone mo heya haya handala puwa Yudidi geha ge duli hanga howa mo bulu paluwa lalu, Wali agali Yudia dindiha bu karume í̠naga mini yaraga hai holebira. Ani bialu wali agali dindi bibahendeha bu karume í̠naga mini hale halu ti gi timbuniore holebira.
JDT 14:8 Ainde í̠na biridaru bibahende i̱ hale holiya te langi, lene. Ani layagola Yudidi ibugua wali agali bu hearunaga deni heyu howa ibu tagira piyangi howa bialu henedago lama ibalu dai biyagoria te lamaro bini.
JDT 14:9 Yudidihanda te lai hayagola wali agali tigua hale hai halu tanoha howa turu timbuni howa bi ladaga daga bialu hene.
JDT 14:10 Ainde Agio ibugua Isaraelenaga Ngode Datagaliwabehanda bibahende biyago damene bibahende de hondowa ibugua Ngode Datagaliwabehondo mini mbiraore wialu hongo howa yutiga bu hene. Ani bialu ibu Isaraeleali dege hatago hayagola tigua ibunaga tingini dongone boda mabu bialu Isaraeleali helo helenego ai ibu waneigini tibi Isaraele wali agali dege hatago halu hama ibini áyu ogoniha haabo kagoni.
JDT 14:11 Egerebagi hayagola Isaraele tigua Holoberenesenaga haguane biago tanonaga pabe nene heagoria mo paga halu tini wai biaga danda timuru yaga bialu tanoha howa hariga pugu biadagua harigani hama pene.
JDT 14:12 Asiria ami biarume Isaraeleali biaru tagira ibiyago de hondowa tinaga agali haguaneru abale lama pene. Ani lama piyagola agali haguane biaru tigua ami agali haru bamba haga hearubi haru howa handaya ho haga hearubi lamini.
JDT 14:13 Ani lamiyagola tigua agali bibahendenaga haguane Holoberenese andaga balai anda heagoria puwa Bagoasahondo lamialu lalu, Isaraele agali ko galone nabulene hearume inanaga hongo tinaga hongola manda bulenaga tinaga tanoha howa tagira ibalu ede bareni dalidali bialu ibira. Ai iname ti abale bo biba holoma̱yanaga ibaruago ai inanaga agali haguane barila hole pu, lene.
JDT 14:14 Ani laya handala Bagoasa ibugua abale puwa Holoberenese ibu wene dege Yudidila mandagi padabe toba howa ibunaga tamu hobane panga nge̱lo nge̱lo bene.
JDT 14:15 Ani bayagola Holoberenese ibugua bi ladai nabiyagola Bagoasahanda panga dugua anda halu tamuha anda puwa handalu hearia Holoberenesenaga tingini dindini ibiraho wialu ibunaga haguane nawiyane hendene.
JDT 14:16 Ani wiago hondowa Bagoasahanda ga̱ lowa dugu bialu ibunaga aga lerelene.
JDT 14:17 Ani bialu Yudidi andaga balai anda heagoha puwa handalu hearia Yudidi nabereyane hendene. Ani bialu ibu abale gerai lalu ami agali biaru hearia tagira ibuwa lalu,
JDT 14:18 Agali hameigini ko ngubi hearume ina mohondo hayada. Hiburu wali mbirame Nebugadenesanaga dindini wali agali bu hearu bibahende mo taga timbuni hayada. Ai uru-o handadaba. Holoberenesenaga tingini dindini ngago ibunaga haguane agoha ngabe tobaheda, lene.
JDT 14:19 Asiria ami agali haru haga hearubi haguane hearubi tigua ogoni layago hale howa ti mogo timbuni lene. Tigua ani hale howa balai anda bu haga haga biadagua dugu bigibigi bialu tinaga aga budu lerelai halu bini.
JDT 15:1 Ami agali maru hearu ti tinaga balai anda heagoha biraga biraga buwa hale halu hemiria Holoberenese homayada layago hale howa tibi nde mogo timbuni lene.
JDT 15:2 Tigua gi howa duru lagalaga bialu ti hayadagua pugu pugu bialu maru dindi ko hari nene wiaruha pialu maru dindi tigabi wiagoha pugu pugu bialu piai damene hene.
JDT 15:3 Ami agali maru Bedulia tano kaware hari bareha hapare howa balai anda bu hayago tibi nde ibida piai hene. Ani biyagola ai Isaraele ami hearu abale daliape halu ti talima pugu pugu bini.
JDT 15:4 Ani biyagola Usiahanda Bedomasadaimi dindiha bi lo pelalu Bebai dindihabi Koba dindihabi Kola dindihabi Isaraele dindi bibahendeha layago lalimu lene. Ibugua mbirale o biyarunaga te lo pelalu agali ibida poraruni baba wai bialu bibahende bo wahai halimu, lene.
JDT 15:5 Isaraele tigua bi uruni hale howa tigua waitigi baba bibahendeha wai biai hene. Tigua talima pugu pugu bialu Koba dindiha talima puabo halu bibahende bo wahaiore hene. Ai agali Yarusalemeha howabi agali hari bare bareha paliaga hearubi bibahende waitiginaga balai anda bu heagoha biya layaru hale halu tibi íbu ngoai hene. Ai Isaraele agali Gileada dindiha hearumebi Galiliha hearumebi bibahendeme tinaga waitigi Asiria ami agali pora bialu ibida pole piyaru baya hangu ho hagira buwa bo wahaiore hene. Tigua talima pugu pugu bialu Damasagasa tano wiagoria tagira pialu uyuraore puabo hene.
JDT 15:6 Wali agali Bedulia tanoha hearume Asiria ami agali balai anda bu hene biagoha puwa ami agali biarume mbirale bayale ngelo wahalu pene wiaru mo yini. Tigua dabudabu dewaore mo yalu tanoha dai bini.
JDT 15:7 Isaraele agali biarume Asiria ami biaru baba wai biai halu dai buwa tibi balai anda bu hene biagoha puwa dabudabu dewaore wiaria mo hilu yini. Dabudabu baya tara tara Asiria ami agali balai anda bu hene biagoha wiagola wali agali hari bare bare paliaga hearubi dindi uliniha paliaga hearubi bibahende ibalu mo hilu ya dege bini.
JDT 15:8 Agali loma binigo mo miaga haguane Yoagimi bi Isaraele wali agalinaga agali haguane bu hearubi bibahende Yarusaleme wahalu Ngode Datagaliwabehanda mbirale bayale Isaraele wali agali biamogo bialu biya layaru hondole pene. Ani bialu tigua Yudidi mo turu hole ibalu bini.
JDT 15:9 Ani pialu agali uruni tigua Yudidi ngola howa bibahendeme ibunaga mini yaraga halu lalu, Í̠na Yarusalemenaga mini mo yaraga halu daligaho ngelarida. Í̠ Isaraele wali duniniore mbira mini lene bedegoni. Iname í̠naga mini yaraga harama.
JDT 15:10 Mbirale uruni bibahende í̠ni hangumeore bidegoni. Í̠na dege Isaraele lone mo wayali harida. Ani bialu Ngode Datagaliwabehandabi í̠na biabe ogoni biridago hondowa turu timbuni ka. Ngode Datagaliwabe Bibahendenaga Hongo Haihe kagome í̠ mo turu haabo helo larogo. Heneneore laro.
JDT 15:11 Horo pira tebirani (30) Isaraele wali agalime dabudabu Asiria ami biarume balai anda bu hayagoria yu wahalu piyago mo yu tone bialu hene. Ainde dabudabu Holoberenesenaga damenego bibahende balai andabi ndisi be belediru silibame wabini wiarubi dagia paliaga wiagobi gabo be wiagobi dagia wiagobi biragane dagia wiagobi maruale wiarubi bibahende mo yai hene. Ani bialu Yudidihanda mbirale uruni mo kabu bigi buwa ibunaga nogo dongi erekunini mo paga halu ibugua garo nogo hosime gililagane mo manda manda bu ngelowa mbirale uruni mo paga howa gililo yalu tini dalu hari nene biagoha irigi hene.
JDT 15:12 Isaraele wali bibahendeme Yudidi hondole ibai ho hene. Tigua ibu mini leneore beda lowa ibunaga mini yaraga halu marume ibu mani ibilo ti turu halu mali lima bamba hene. Yudidihanda ira yuni bu yuwa maru ibu heba pirimigo mini.
JDT 15:13 Ibunibi wali maru ibu heba piyarubi tigua ira olibe magane yuni heaore mabu buwa tinaga emboneni tangi mo karulene. Ani bialu tigua iba gana lalu mali lima piyadagoha íbu lu bamba hene. Ani biyagola Isaraele ami agali tigua danda timu yandarebi wai biaga ale yai howa ira yunirume tinaga emboneni yári biai halu turu holenenaga iba ganaru lama walini piyadagua mama pene.
JDT 16:1 Yudidi ibugua Isaraele wali agali bibahende mandagi howa turu halu ka̱i̱ lolenenaga iba gana ogo layagola wali agali tigua talialu layadagua lene.
JDT 16:2 Iname i̱naga Ngode Datagaliwabe- hondo iba gana lalu kaboga wialu tabaga balu Anduane Homogo mini yaraga hama. Iba gana gahenge lalu ibunaga mini yaraga hama. Ibunaga mini timbuniore mini lene ka lalu iname ibunaga mini olalu, Ina biamogo bibe, lalu lama.
JDT 16:3 Uruni irane Anduane Homogo ibu wai mo palia haga Ngode Datagaliwabeore kago manda buwa ibugua waitiginaga giha howa i̱ mo wialu haru dai bialu i̱ ibunaga wali agali heagohayagi haru dai bu helaya
JDT 16:4 Asirialiru uyurayagi howa daliape halu abaleore ibiya. Tinaga ami agali dewaore howa dindi tigabi wiagoha ho namulai haya. Ami agali nogo hosini biruwa wai biaga bu hearume hari nene wialu ho karulai haya.
JDT 16:5 Tigua ina mo gi holenaga bi ogodagua laya Inanaga dindi andaru bo heda holeberema, laya. Tigua, Igiri daliahe karu ayu tiburume dibai holeberema, laya. Tínaga waneigini gali bibahende dindini mo paraho waholeberema, laya. Waneigini garabaya yalu poleberema, laya. Tínanaga wandari mabuage bedaru bibahende mo ko holeberema, laya.
JDT 16:6 Anidagua bule layagola Anduane Homogo Bibahendenaga Hongo Haihe kago ibugua wali mbiranaga giha howa ti bope hayagoni ndobe.
JDT 16:7 Tinaga agali haguane ogoni igiri daliaheme ndo bayiya. Agali hongohe mbirame ndo baya. Merari wane Yudidi ibugua hangu ibunaga dengui baya heagome agali mo luluya hayaya.
JDT 16:8 Ibugua ibunaga dara howa aga karulayago golo wahalu puwa Isaraele wali agali darabi hearu bibahende mo yaraga hayiya. Ibunaga dengui mbagua sandame hai howa ibunaga mandari aga baya mbirame kabu bialu aga bayaleru karulalu agalime hondowa dimagoli helo piyiya.
JDT 16:9 Agali haguane timbuni heagome Yudidinaga ge hondowa dimagoli halu ibu wali baya taraoreyago handaya. Ani bialu hearia Yudidi ibugua wai biagane ayu tibume ibunaga ma puguayiya.
JDT 16:10 Pesia wali agali hearume wali biagonaga hongo wiago hondowa ti mogo lowa durulalu haya. Midiali hearu tigua handalu hearia wali ogoni ibu gi nahaga heago de hondowa ti mogolo hendene.
JDT 16:11 Inanaga damene ala mo ko hene hearume ti turu howa hoaro layagola waitigi hayaru mogo lai haya. Tigua hongo howa hoaro laga laga biyagola waitigi agaliru mogolalu ibida piai haya.
JDT 16:12 Ina wali galone nahe biabe biaga waneiginirume ti homelo bo wahai harima. Iname garabaya agalime ibida poragola bagadagua bialu ti homelo bo wahaiore harima. Anduane Homogonaga ami agali giha howa ti ereba hai haya.
JDT 16:13 I̱naga Ngode Datagaliwabe kagohondo i̱na iba gana gahengeru lolebero. Anduane Homogo-o í̠ gibiore kegoni. Í̠ bolangua heneore kegoni. Í̠ bibahendenaga hongo haihe howa mendealime í̠ bope halu ti wayali habe nahe ka.
JDT 16:14 I̱na wabini ngaru bibahendeme í̠ni andaneha haiore holene nga. Í̠na bi dege larigola mbirale uruni bame hai hene. Í̠naga buhe pulanda harigola abaleore aube tobane buwa mbirale uruni baya gibi haya. Mbiralime í̠naga bi mo wahabe nahe.
JDT 16:15 Hari timbuni wedarubi iba solowara bedarubi tigua durulaga ndobe. Í̠ kaware eberegola ege to̱le̱ timbuni ngarume mo iba bu hinaga. Í̠naga wali agalime í̠naga bi hale haga karuhondo dara haga kegoni.
JDT 16:16 Loma ngabi dendebiore wiaguabi ogoni bame dege holebira. Nogo bulumaga habane lomabu delaga dabuni delayagua ogoni bame dalu biba haga. Mbiralime Anduane Homogonaga bi hale hayagua ibu galoneore holebira.
JDT 16:17 Dindi mbiraha padarume wali agali i̱ damene baba wai bule ibiyagua nde ti de hondowa ibulene nga. Anduane Homogo Bibahendenaga Hongo Haihe kagome godi hale holene horo timbuni tagira ibirangi tihondo bi hale holebira. Ibugua ti kagoha ira hedape halu tinaga tingini ngoeme hai helolebira. Ani biragola tigua tandaga handaabo halu howa dugu bialu haabo holebira, lalu iba gana ogoni lai haya.
JDT 16:18 Ani bialu wali agali Yarusaleme dai buwa tigua Ngode Datagaliwabehondo bi lalu hene. Wali agali tini Ngode Datagaliwabe deni dodo nahe hole mana biaga wiago biai howa tigua loma irani dai helonaga lomabu delalu wali agali tinime Ngode Datagaliwabe loma turu halu mule lalu bi lo winirubi tini hameme hangu hangu yalu ibiyaru bibahende loma uruni bu migi bialu hene.
JDT 16:19 Mbirale Holoberenesenaga dabudabu mo yayaruni wali agali tigua Yudidi mo miai henego ainde Yudidi ibugua Ngode Datagaliwabe mo mini. Ani bialu labolabo hinabibi hagira biaga Yudidi ibuni Holoberenesenaga mo yini biagobi Anduane Homogo dege mini.
JDT 16:20 Ege tebiraru bibahende howa wali agali ti turu halu Ngode Datagaliwabenaga anda Yarusalemeni heago kawareni haabo henego ai Yudidi ibubi nde ti haru hene.
JDT 16:21 Turu ho holene horo uruni hai halu wali agali bibahende tini dalu dai biai hene. Yudidi ibu nde Bedulia tano dai buwa ibunaga dindi wiyadagoria berene. Horo ogoningi howa ibu Isaraele dindiha mini lene mbira biraabo halu homalu wahene.
JDT 16:22 Yudidi ibu agalini Manase homayagola tigua ibu mamaliru homali heagoria mandagi hora halu Yudidi dalo bereagola agali marume dabu dabulene manda bialu hemiria ibu agali nape biraabo halu homene.
JDT 16:23 Ibunaga mini loyogo lai hene. Ibu agalini andaga heagoha biraabo halu ibunaga mali handari mbirani duria (105) berene. Ani biruwa wali ibunaga garabaya biabe ale bia haga biago yupe halu pu lene. Ani bialu ibu homayagola Bedulia tanoha ibu agalini Manase hora heagoha dege hora hene.
JDT 16:24 Yudidi ibu homayagola Isaraele wali agalime dara howa horo karu dugu bialu duguanda ho hene. Ibu homa nabi dege biruwa ibunaga paluni wiaru bibahende tale buwa maru ibu agalini Manase damene hearu talebu mialu maru ibuni damene mini.
JDT 16:25 Yudidi ibuni bereangibi mani Yudidi ibu homeagolabi waitigime Isaraele wali agali mo gi holene henge mbira nawiore bayale haabo hene.
ESG 1:1 Mbirale uruni biyagola Pesia dindiha Segesisi ibu kini heangi bini. Ibu kini howa Pesia dindiha dindi timbuni Susa tanoni kini biragane dagia wiagoria handame ho howa haru hene. Ani howa ibugua dindi hobane handari mbira pira kirani karia (127) bibahende India dindiha howa wima pialu amuroaore Sudana dindiha wiairi hene.
ESG 1:3 Ibu kini henego mali tebone howa ibugua dindi bibahendenaga agali bu hearubi agali manda timbuni bi hearubi bibahendenaga tomo timbuni dawa hene. Pesia dindi howabi Midia dindiha howabi nde tomo ogoni nalu berene. Ani bialu dindi hobane emene mbira mbiranaga agali haguane bu hearubi bibahende íbu birai hene.
ESG 1:4 Ani howa ege waraganeni ibunaga muni yaribi bayale wiaru damene bibahende agali haguane bu hearu wanakuini mo walia hai hene.
ESG 1:5 Ani bialu mani howa kini ibu dalu andagaha pabe bu mabu bini wiagoha yagi tomo timbuni lone dawene. Tomo ogoni agali taraha howa íbu hene tanoha hearunaga dawa hene. Tigua tomo nalu horo karia bibahende hene.
ESG 1:6 Pabe bu mabu binidago aga peleme mo yari bia howa pu mindibi hari mindini handaleheme dariba hene. Aga ogoni nguni bibahendeha silibame wabini mabubime daba haga buwa ege pabe heagoria mo paga howa mo yaribia haga bini. Ai pabe andaneha ege to̱le̱ baya tara pelebi daramabi wiarubi mindibi hari mindini handalehe wiarubi ege to̱le̱ tara iba wa̱i̱ handalehe wiarubi urunime dindini dunga ho wini. Ani wiagoria biragane dagia ngolome wabini silibame wabiniru pabe andaneha ege to̱le̱ dunga henedagoria wiai hene. Ani bialu dagia uruni aga baya tara tara wiarume dunga halu mo dambi howa mo yari bia halu bini.
ESG 1:7 Ani bialu agali gabo be ngolome wabinirubi silibame wabini wiarume iba nalu berene. Ani biruwa gabo be mbira yolo timuni daligaore kina dege daosini pira tebirame (K30,000) miaga wiago ti mo walia hene. Ani bialu kini ibugua agali uruni waini iba dewaore nelo mini.
ESG 1:8 Waini iba ogodagua nalu karulape lo manda nabi agali bedaru ti iba tini hame ledadagua karulape nelo mia dege bilimu lalu agali waini iba odo tale biaga ibu andagaha haga hearuhondo lamini.
ESG 1:9 Horo ogoningi dege kuini wali Basidi ibugua nde kini andagaha dege walinaga tomo timbuni dawa nalu berene. Tomo ogoni walinaga hanguore wini.
ESG 1:10 Tomo ani nalu biruwa horo kane hayagola kini ibu waini iba nowa emene lulu yu berene. Ani biruwa ibu andagaha biabe biaga agali karia hearu olalu ibidaba lene. Agali uruni mini Hamana Basana Tara Borase Sadoloda Abadasa Taraba layaru henego uruni ibini.
ESG 1:11 Ani ibiyagola kinihanda lalu, Kuini wali Basidi haru ibidaba, lene. Kini ibugua Basidi haguaneni kuini walinaga tangi mo karula holenaga ani lene. Kuini wali ogoni bayaleore tara wali maru baba tabe tabe nabi berenego ai kini ibugua ibu one baya ogoni agali maru tomo nalu berearu mo walia hole manda bini.
ESG 1:12 Ani manda bialu layaria ai kuini wali ogoni ibu ibulene hame nalene. Ani biyagola kini ibu keba timbuniore hene.
ESG 1:13 Ani howa ibugua agali mana mandabi bu hearuhondo lamialu, Kuini wali Basidihanda bi mo wahayago ayu ibuhondo agi buabe, lalu hale hene.
ESG 1:14 Ani hale hayagola agali haguane timbuni tebirali kini ibuniale dege henego ibini. Agali tebirali uruni tigua kinihondo ti daluha mana wiago lawai halu, Ai mbirale kuini Basidihanda biyadagonaga ogodagua bulene nga, lalubi lamialu bini. Agali tebirali uruni ti mini Ageseusu Sasadeusu Malesea layaru hene. Agali tebirali uruni ti Pesia dindibi Midia dindibi howa íbu hene.
ESG 1:16 Ai kini ibugua ibunaga agali haguane Pesia dindialibi Midialibi hearuhondo mbirale kuini wali Basidihanda ibuhondo biyaru lamiai hene. Ani lamiyagola agali mbira mini Mugeusu heago ibugua agali haguane hearuhondo lamialu lalu, Kini-o bi ogo hale harene. Ai kuini Basidihanda ko ogoni í̠hondo hangu ndo biyada. Ibugua ina bibahendehondo biyida.
ESG 1:17 Ainde inanaga wali bedaru bibahendeme kuini wali Basidihanda ogonidagua biya larago abale hale hayago lolobada. Ani bialu wali bedaru bibahendeme kuini wali Basidihanda biyadadagua dege ti agalininaga bi mo wahalu mine holobada.
ESG 1:19 Anidagua bulubadago ai kini-o í̠na manda bialu keria bi ogoni bayaleda lo manda bideyagua nde bi ogoni wali agali bibahende kagoha piai helolene karulapeda. Í̠na bi ogoni lo pelalu howa tihondo lalu, Ai Basidi ibu i̱ bedoria ibulene nawiore lolene nga. Ani lalu bi ogoni Pesia dindi Midia dindilanaga mana mbuga ngagoha gilibu wulene nga. Ani bialu wali bayale mbira taya buwa Basidi kuini wali berenegoria bira aribia helo taya bulene nga. Ai ogoni hangu.
ESG 1:20 Ai ṉ́aga bi ogoni dindi ṉ́a hondo kego bibahendeha wali agali bu karume hale hai harangi wali lenego bibahendeore agali haguane one bereaguabi agali damene one bereaguabi bibahendeme ti agalini bi hale hai holebira, lene.
ESG 1:21 Ani layagola kinibi ibunaga agali haguane biarume bi ogoni karulapeda lowa ai kini ibugua Mugeusuhanda lamiyadagua bini.
ESG 1:22 Ibugua beba gili bialu dindi ibugua wiaru bibahendeha wali agali bi tara tara laga laga biaga wiagodagua gili bialu pelai hene. Kini ibugua beba ogoniha gilibu wialu lalu, Agali ibu hangume ibu one waneigini bibahende handaya ho hai ka, lalu gilibu pelene.
ESG 2:1 Mani howa nde kini ibu keba hayago wa hene. Anigo ainde ibugua Basdi kuini naberelo bo duguayago mitangi biaabo ho haga hene.
ESG 2:2 Ani heagola agali manda timbunibi hearume ibuhondo lamialu lalu, Ai wandari bayaore mbira taya bulene karulapeda.
ESG 2:3 Agali haguane dindi hobane mbira mbira ngaruha karu bibahendehondo wandari baya bedaru gabumanenaga tano dunini Susa tano haru ibalimu lolene karulapeda. Ani haru halu ibiragola í̠naga wali anda kagoha bere lowa í̠naga wali bedaru handaya hagane agali Hegai kago ibugua handaya ho helo. Ani handaya ho kagola wali bayale helonaga tinaga tingini yari bia weliru ha̱i̱ ha bilo.
ESG 2:4 Anidagua biragola wali mbira í̠nimeore hame ledego dabaregola ogoni ibugua Basidi berenegoria bira aribia howa kuini wali berelo, lene. Kini ibugua bi uruni karulapeda lowa bi layago talialu bini.
ESG 2:5 Ai tano timbuni Susa tano wiagoria Yudali mbira mini Modegai hene. Ai Modegai ibu Yairi igini howa Simai aguane halu Simai ibu Beniyamini hameigini aria Kisi igini heago aguane hene.
ESG 2:6 Bamba Babilono kini Nebugadenesahanda Yuda wali agali garabaya yalu piai hene. Ani piyadangi Modegai heba garabaya yalu pene.
ESG 2:7 Modegai ibu wane emene mbira mini Eseda berenego ti haru dege pene Eseda ogoni ibu Aminadaba Modegai aba hamene heyogone henego wane berene. Ainde Eseda aba ai̱yala homayagola Modegai ibu waneore biraradagua berene. Eseda wandari baya taraore mbira bereagola Modegaihanda ibuni dabu bulene manda bu hene.
ESG 2:8 Ai kini ibugua bi lo yu porogo lelayagola tigua wandari baya berearu haru halu Susa tano ibai hene. Ai Esedabi nde ti haru mandagi ibini. Haru ibuwa kini daluha yagi anda wali anda heagoha bere lene. Ani bereagola agali mbira mini Hegai henegome handaya ho hene.
ESG 2:9 Hegaihanda Eseda wali baya bereago hondowa ibu hame lo hene. Ani howa ibugua aga bayalerubi weli baya tara tara wiarubi Eseda yari bilo mo mini. Ani bialu tomo bayaleru nalu berelo mialu bini. Ani bialu howa ibugua wandari kira kininaga wali andaha berearume Eseda handaya ho berelo dabo bere lene. Ani bialu Hegaihanda wandari uruni hondo bayale dege bialu haabo hene.
ESG 2:10 Abale howa Modegaihanda Esedahondo bi ogodagua lene. Ibu Yuda wali bedo lalu nalabe, lalu lamini. Ani layagola Eseda ibugua ibu aba hamene biagome bi layago baya hangu manda bu berene.
ESG 2:11 Ainde horo bibahendengi Modegaihanda kininaga wali anda heagonaga haneni bolangua halu pugu biaga hene. Ibugua Eseda agua biraruabe hondolebi tigua Esedahondo agi bulubadabe hondolebi ani puíbu biaga hene.
ESG 2:12 Mali mbirani wandari haru ibiyaru bibahende bayale berelonaga mo yari bia ha tomo bayaleru nelo mia bialu haabo hene. Ani bialu ege waragariani tigua weli baya tara ira mue ibaneme wabini baya ngabi wiarume wandari uruni tingini bayale helo ha̱i̱ halu hene.
ESG 2:13 Ani bialu howa mani tigua wali uruni horo mbiru wali mbira haru pugu bialu kini Segesisi berearia haru pugu bini.
ESG 2:14 Wali ti kini andaga alendo ne̱ ledegola pialu egerebagi gao laragola dai bigi biaga wini. Ani dai biragola tigua wali uruni kininaga anda mende wali ibu one wabuni halu mende laga biraga anda kagoha bere lowa Hegaihanda handaya ho helo haru puwa bere laga hene. Ani bialu wali uruni lone kini andaga dai bulene nawi. Ai kini ibuni hameme wali mbirago mini olalu kini ibu andaga ibabe layiyagua nde pugu biaga wini. Tigua tini hameme kini andaga polene hariga nawi.
ESG 2:15 Eseda ibugua kinihondo polene horo tagira ibiyagola Eseda ogoni ibu Modegai aba hamene heyogone mini Aminadaba mbira henego wane berene. Ibugua Hegaihanda bi mana lalu lawai harago bibahende baya hangu hale howa talialu bereagola wali agali bibahendeme ibu gubalini timbuni halu turu hai haga berene.
ESG 2:16 Horo ogoni kini Segesisi ibu kini heane mali karia hene. Ai mali ogoninaga ege hombene (12) mini Ada layagola tigua Eseda kini berearia haru anda pene.
ESG 2:17 Ani haru anda piyagola kini ibu hondowa ibugua Eseda gubalini timbuni hene. Wali mende kininaga gubalini podene Eseda ale mende nabere ibu hangu berene. Ani biyagola ai kinihanda Eseda haguaneni kuini walinaga tangi mo karula hene.
ESG 2:18 Ani bialu horo kariani kini ibugua tomo dawa nalu biraabo hene. Ani bialu howa ibugua agali haguane hearubi agali manda timbunibi bu hearubi bibahende Eseda libu dabu bialu howa tomo dawalu turu haga bu birami̱ya ibidaba laga bini. Ai horo ogoningi ibu dindiha wali agalime dagisi muni wiaga wiadagua nami gadiape howa dagisi milimu lalu kinihanda latagi hene.
ESG 2:19 Horo ogoningi dege kinihanda Modegai kini ibu andaga handaya ho helo dabo helalu bini.
ESG 2:20 Bamba howa Modegai ibugua Esedahondo lamialu ibu Yuda wali bedo lalu mbirali nalamibe lalu lamini. Eseda ibunaga mana Modegaihanda bi larago baya hangu hale halu biai haga biruwa ibugua layago hale halu nale berene. Ibugua Ngode Datagaliwabehondo bi laabo halu biraga biruwa ibugua Ngode Datagaliwabenaga bi mana baya hangu talialu biraga berene. Ani bialu ibugua mana Yuda wali agalime biaga wiaru mbira wanahe berene.
ESG 2:21 Ai Modegai ibugua kini Segesisinaga biabe bialu heagola agali haguane kininaga biabe bialu kini hadaya ho haga heagolabome kinila keba ho howa libugua kini bo wahole bi lalu lo manda bini.
ESG 2:22 Ani lalu hebigo Modegai hale howa ibugua kuini Eseda lamini. Mani howa Eseda ibugua bi Modegaihanda hale howa lamiyaru kini hale helo lamini.
ESG 2:23 Ani lamiyagola kini ibugua dabo handalu hearia bi uruni henene leneyane handa walia hene. Ani hale howa tigua agali kira ogoni labo irani bo derela hayagola homene. Ai mani kini ibugua Modegainaga mini mo yaraga holenaga lalu, Ai wali agalime biabe baya gibiore Modegaihanda biyago embeda nahelonaga te gabumane mbuga ngagoha gilibu widaba, layagola tigua te ogoni gilibu wini.
ESG 3:14 Ai bi ogo wali agali bibahendeme hale holene nga. Ai horo ogoni tagira ibirangi tí bibahendeme wali agali uruni homelo bo wahai hole manda manda bu halimu.
ESG 3:15 Ani lalu bi ogoni tano timbuni dunini Susa wiagoria howa latagi hayagola wali agali bu hearu bibahendeore hale hai hene. Ai kini ibunibi Hamanabi libu hangu turu howa bu miniha dungulo howa waini iba dewa nalu lulu yu berene.
ESG 4:1 Ai Modegai ibu bi o layadagoni hale howa ibu gi timbuni ho hene ibunaga bu miniha genda timbuni ho howa ibunaga aga bu heago lerelo wahowa be abalu haguaneni dugu wu berene. Anidagua bialu tanoha anda pole pialu howa kiabu dugu bialu lalu, Wali agali ko mbira bini nawi karu homelo bameore bo wahole biragonida, lene.
ESG 4:2 Ani lama pialu kini andaga haneni pu hene. Mbirali kini andaga tamuha anda polenaga aga bayale karu lalu anda piagane wiagola ibu aga bayale nabi ibuwa tagirani berene.
ESG 4:3 Ai tigua kininaga bi biago dindi bibahendeha hale hai howa Yuda wali agali bibahende gi halu mogo timbuni lowa bu miniha genda timbuni yu hai halu ga̱ laga laga bialu hene. Ti tomo nane wahalu dugu bigi bigi bialu kiabu dugu bialu haga haga bini. Yuda wali agali dewaoreme aga ko budabagabi wiaru mo karu lai halu be abalu wiagoria paliai hene.
ESG 4:4 Wali Esedanaga biabe biaga berearumebi agali Esedanaga biabe biaga hearubi tigua Modegaihanda anidagua bira layago hale howa Eseda ibunaga bu miniha genda timbuni howa mini burugu lo berene. Ainde Modegaihanda aga ko biyadago golo wahalu bayale karu lelonaga aga bayale yalu pelo mbirali heagohondo mo mini. Ani yalu ibiyagola Modegai ibu manga hene.
ESG 4:5 Ani layayago hale howa Esedahanda agali mbira mini Hadaga heago olalu íbu lene. Hadaga ogoni ibu agali kininaga wali bedaru handaya ho haga howa ibu Esedanaga biabe biaga agali mbira helonaga kinihanda dabo helene. Ani henego ai Esedahanda Hadaga abale Modegai bedaria puwa í̠ agua biyabe lalu hale hole pu laya handala puwa hale hene.
ESG 4:7 Ibugua puwa hale hayagola Modegai ibugua mbirale biyarunaga te bibahende lamiai hene. Ani lalu Yuda wali agali bibahende bo wahai hayagua Hamanahanda siliba dewaore genda handari tebirani pira kariani duria (375) bibahende kininaga muni andaha ngelole laya.
ESG 4:8 Ani lalu Modegai ibugua Hamananaga beba ogoni aria mbira yu henego Eseda hendelo yalu pelo mini. Ani bialu Eseda ibunime kini bedaria puwa Yuda wali agali dara halu nabelonaga kini la debodebo bule pobe lalu bi lamini. Ani lowa Modegaihanda bi mbira Hadaga ibugua Eseda bedaria lamule pelonaga agua lamini. Eseda í̠ wandari emene berengi i̱nime baya hangu handaya ho harugo embeda nahabe. Ai ayu Hamana ibu kininaga haguane bedago biruwa ina mo ko halu bo wahai hole bi layadago. Ainde í̠na Anduane Homogohondo bi ala lalu mani kinila bi lole pobe. Í̠na ina mo wialu haru dai bulene karulape nga, lalu lawia hene.
ESG 4:9 Ani laya handala Hadaga ibugua bi uruni Eseda lamule pene.
ESG 4:10 Ani lama piyago hale halu Eseda ibugua bi mbira Modegai bedaria lama dai bilonaga Hadaga lamini.
ESG 4:11 Ibugua lalu, I̱na kini hondole polene nakarulapeda. Kinihanda mbirali ibu ibabe layagua nde hondo anda piaga. Ai mbirali ibu ibabe naledaha ibuni anda piyagua ogoni ibu homelo bo wahaga mana ngago bibahende manda biai ka. Mana ogoni ba lalu polene hariga mbiraore hangu ngago ogo. Mbirali ibu bame anda pialu karia kininaga halimbu ngolome wabini ngagome íbu lalu yaraga hayagua nde ogoni ibu nahomolebira. Ai kini ibugua i̱ ibabe nale dege heane ege mbira poragoni, lene.
ESG 4:12 Modegai ibugua Esedahanda bi layayago hale howa
ESG 4:13 ibugua ladai bialu lalu, Heneneore í̠ kini andaga bedegome í̠ni karulape biruleberobe tobaho bede. Anigo ai í̠bi nde Yuda wali agali maru kamaru homaramadagua mandagi homolene wulebira.
ESG 4:14 Ai ayu í̠na bi nale ne ndibulo birariyagua nde mendeale mbirame ibalu ina biamogo bulebira. Anigo ai í̠ni homariyagua nde í̠ni damene lonego mbira nahe ereba hai haragoni holebira. Anigo ai mo ko holene íbu ngangi ina Yuda wali agali biamogo bulenaga í̠ kuini wali biraribe tobahego handami̱ya, lene.
ESG 4:15 Ani layiyago hale howa Eseda ibugua Modegaihondo ladai bialu lalu,
ESG 4:16 Ai ayu ogoni í̠ Susa tanoha puwa Yuda wali agali bibahende lamialu tígua tomo nane howa i̱ mitangi bialu Anduane Homogohondo bi lalimu. Ani bialu howa tígua iba hinabi nane horo tebira mbi tebira lowa halimu. I̱nibi nde wali i̱naga biabe biaga bedaru baba ani dege bialu biruleberema. Ani bialu horo ogonidagua piai haragola i̱na kini bedaria polebero. Mana ngago mo wahalu harugo polebero. Anidagua berogola i̱ homaruyagua nde bi nawi karulape degego poliya, lene.
ESG 4:17 Modegai ibu Esedanaga bi layiyago hale hai halu ibu kini anda haneni birayago wahalu Esedahanda bilimu layago bule pene. Modegai ibu mbirale Anduane Homogohanda biyaru mitangi bu dai buwa ibugua Anduane Homogohondo bi lalu biruwa lalu, Anduane Homogo í̠ni mbirale bibahende dindini ngarunaga handaya ho haga kegoni. Bibahende karumebi ngarumebi í̠naga bi hale haga. Í̠na ina Isaraele wali agali kemaru biamogo beregola nabibe lowa hapai holene mbira naheore. Í̠nime dindi harila wabialu mbirale bayale uruniha karubi ngarubi wabiai haga ke. Í̠ni mbirale uruni haru hai haga kegola mbirale mbirame í̠naga bi mo wahabe nahe ka. Í̠na mbirale bibahende manda biai ho kegoni. Ai i̱na agali mine haga Hamananaga mini yaraga halu bulu palialu ge duli hanga nahe harugoni i̱ni mine howa i̱ninaga mini yaraga halu ndo biru. Anidagua birugo irane i̱na Anduane Homogonaga mini yaraga halu bulene ngago bame agali dege kagoha mini yaraga holene nawi. I̱na í̠naga mini yaraga hole hangu ma podalu bulu paliruli. Ainde i̱na handalu koria iname mana ogonidagua beremagome ina Isaraele wali agali biamogo bilonaga bulene ngale nde i̱na Hamana geha bulupalialu ibunaga ge hondene nunu ledole. Anduane Homogo í̠ Ngode Datagaliwabebi kinibi í̠ni hangu howa í̠ Abarahamanaga Ngode Datagaliwabe kego ina í̠naga wali agali kemaru baba mandagi haabo habe. Inanaga waitigi bu karume ina mo ko nahelabe. Tigua ina bo wahai holenaga bi lo mbira halu lo nga. Ai horo ina bo wahai hole pongo wiyadago tagira ibilonaga maliaho ka. Bambaore howa í̠na ina í̠ninaga wali agali holoma̱ya dababagiho helalu í̠na ina Iyibi dindi howa haru tagira pialu haru ibiri. Ayu ina yu wanahabe. Ina í̠naga wali agali hene biaruore kemagoni. Ani kemago manda bialu í̠na i̱na dara halu ina í̠hondo bi larogo hale halu biamogo bibe. Genda holene horo ogoni mo aribia halu turu holene horo mo wibe. Iname iba ganaru lalu í̠naga mini lalu bi loloma̱ya ani bibe. Ina homelo yupe nahabe. Ina í̠hondo bi lalu haabo holene hame lo kema, lene. Horo ogoningi Isaraele wali agali ti homoleore harimada lo manda bialu Ngode Datagaliwabehanda ti biamogo bia lowa bi hongo howa ladaga daga bialu hene. Ainde kuini wali Eseda ibubi bu miniha genda ho biruwa ibugua Ngode Datagaliwabehondo bi lalu berene. Ibunaga aga bayale biaru golo ngelowa aga ko dara ho biruwa karu lagane wiago mo karulo berene. Ibugua wayawaya nabi biralu ibuni tingini weli mini sanda bayale ngabi wiarubi hai nahe berene. Ibugua be abalubi nogo bulumaga tibi ibunaga haguaneni mo ngelo berene. Ibunaga yari bayale karulo biraga wiaru golo wahai howa aga ko wiaru koru lowa wali maru berearubi dege berene. Abale ibunaga mandari luni baya heago here buwa mo yaribia ho biraga berene. Anigo ayu howa mandari baya ogoni hadapaya bialu bame helo berene Ani bialu ibugua Anduane Homogo Isaraelenaga Ngode Datagaliwabehondo bi lalu berene. Ibugua lalu, Anduane Homogo í̠ni hangu Ngode Datagaliwabebi kiniorebi kegoni. Ainde ayu ogoni í̠ biamogo bia. I̱ biamogo bulene mbirali nahe í̠ni hanguore kegoni ndobe. Ai i̱ biamogo bulene í̠ni hanguore kegoni. Ainde í̠naga holene wahalu i̱ homoligo ayu ogoni abale biamogo bia. Anduane Homogo-o abale i̱ wandari emene berewangi i̱ damenerume mbirale í̠na biagago damene bibahende te lai haya. Tigua lalu, Ina Isaraele wali agali í̠naga ho bamba ho holoma̱ya í̠nime ina Isaraele dabene laya. Bambaore inanaga mamaliru dabalu ina í̠naga wali agali haabo holoma̱ya dabene laya. Ani bialu í̠na ogoale bule lalu ti baba bi lo wiriru biai hariya. Anigo ainde iname í̠hondo ko bialu harima. Iname mbirale dama mitangi bialu bi pupu wiaga gime wabini wali agali tara hearunaga wiagohondo bi pupu wialu hemaria í̠na inahondo keba halu ina waitigi bu hearu giha minu ya hari. Anidagua birigola inaha bi lolene mbira naheore kemagoni ndobe. Í̠na ina pani ngulene tigabioreni ngiri. Ai ayu waitigi tigua ina tinaga garabaya biabe ale bialu holenebi karulapeoredane hondowa inahondo manga ho ka. Ani howa tigua tinaga bi pupu wiaga gime wabini wiarunaga mini lowa henene buleore lalu bi lo wialu ina wali agali í̠hondo bi lalu haga kemaru bibahendeore bo wahaiore holeberema lalu bi hongohe lo wiya. Tigua í̠naga bi mana lo wini ngago mo wahole manda bu halu tigua dege í̠naga andabi loma bu delaga dabu kagobi bo gialohole bule manda bu ka. Tigua hame lo kago wali agali dindi bibahendeha karu bibahendeme mbirale bi pupu wule gime wabini ko ngubiore wiaruhondo bi pupu wialu tinaga kini dindini hene agali dege kagonaga mini yaraga helo hame lo ka. Anduane Homogo-o mbirale bi pupu wulenaga gime wabini bu ngaruni ko ngubi galone nabulene bameore ngago ndobe. Tigua í̠ bope helo yupe nahabe. Waitigi karume ina mo ko howaore homaramago ti de hondowa oba helo nahelabe. Tininaga mini ko ogonime beregeda dai bialu tiniha dai bialu tini mo ko helo helabe. Ani bialu agali ko ina mo ko halu bo wahole manda bu kago ibuni homelo ibuni manda manda bu ngagoha mo dela habe. Anduane Homogo-o inaore mitangi bibe. Genda timbuni ogoni inaha tagira ibirangi í̠ni ina baba mandagi haabo habe. Í̠ mbirale bi pupu wule gime wabini ngarunaga kiniore kego howa mbirale dindini ngaru bibahendenaga handaya ho haga í̠ni hanguore kegome i̱naga bu mini ayu ogoni mo hongo ha. Ai i̱na tamuha anda puwa Segesisila bi larogola i̱naga bi dendebiore i̱naga ne hambu hegeni mo wia habe. Anduane Homogo-o ina biamogo bule ibalu i̱nibi biamogo bia. I̱ biamogo bulene mbira nahe i̱ni hangu kogo biamogo bia. I̱ biamogo bulene í̠ hangu kegoni. Anduane Homogo í̠na bibahendeore manda biai ke. I̱ wali agali í̠naga mana ngago baya hangu talia nabiaga bu karume i̱hondo turu howa bi lalu i̱naga mini yaraga halubi karunihondo i̱na turu naheore birarugo í̠ni manda bide. I̱ agali tinaga dongone napoderu baba mandagi paluene manga halu agali hameigini tara baba palibe manga haruligo í̠ni manda bide. Anigo ainde uruni i̱ninaga hameme ndo bidogo í̠ni manda bide. Horo marungi nde tinaga turu holene horo tagira ibirangi nde ina kuini walinaga manda karulo bira biruleberogo ainde i̱naga miniha turu naheore bedo. I̱na kuininaga manda karulo biragago irane maname lalu mandaore karu lo birulene nga lalu mana hongoheore wini nga. I̱nime mbirale uruni mo galone naheore bedo I̱na handalu hewaria manda ogoni galone ndo bame aga labolabo budu lerelo wahene mbira wiaru ale degeyane handaru. I̱ Hamanala tomo nole palene turu nahe howa ai kinilabi nde mandagi nalu birulene turu nahe bedo. Tigua waini iba tinaga bi pupu wiaga gime wabini wiagohondo mo loma bini ngago nanaruli. I̱ oali hewangi mbiraore mbirame dege i̱ mo turu hagane. Mo turu hagane ogoni Anduane Homogo Abarahamanaga Ngode Datagaliwabe hongo haihe kego í̠naga mini yaraga halu í̠hondo bi lolenego hame lalu biraruli. Ngode Datagaliwabe í̠ hongo haiheore kegoni í̠naga wali agali bu karu tigua í̠hondo dugu bialu karuni hale harene. Agali ko bu karunaga giha kemago haru dai bialu i̱na gi naholiya i̱ biamogo bibe, lalu Esedahanda lene Kuini Eseda ibu horo tebiriani anduane Homogohondo bi lalu berene. Ani biruwa mani aga ko dara howa karu lo haga biyago golo ngelalu aga bayale kuini walinaga wiyago mo karu lai hene. Ani biai howa ibu wali baya tarore hene. Ani howa ibugua Anduane Homogo bibahende ngarubi karubi manda biaihe kagohondo bi lene. Ani lai howa baya hanguore kuini walime heyu hagadagua heyu halu mani ibunaga biabe bia haga wali kira haru halu tagira pene. Wali mendeme Eseda gi yalu piyagola mendeme Esedanaga aga luni dindini gililapehe kuini wali aga karu leago yaraga ho yalu pene. Esedanaga dengui wáleore howa bayaore hene. Ibuha genda mbira nawi bame biruwa poradagua bini. Anigo ibunaga bu miniha gi timbuni howa duru lama pene. Ibugua pialu anda hobane dewa wahalu anda pialu kini ibuni biragane anda hobane timbuni wiagoha anda pene. Ani anda puwa kininaga deni heyu hene. Kini ibu nde kininaga yari biaga ngolome wabini tara tara wiaru karu lalu ege to̱le̱ tara tara yolo muni dewaoreme miaga wiaru mo karu lowa ibuni biragane kininaga dagia wiagoria berene. Ani bedaria de handariyagua í̠ de mborere bialu ge duru lolebere. Ibunaga dengui wále hadapayabiore berene. Ai Eseda tamuha anda ibiyagola ibunaga dengui aruma hai hene. Ani bu bereagola Eseda ibu mogo timbuni lene. Ibunaga dengui hageraia biai halu ibu de mborere bini. Ani biyagola ibunaga embone wali biabe bia haga kaware heagonaga payani palu paga hene. Ani biagola Ngode Datagaliwabehanda kini biagonaga bu mini mo beregedene. Kini ibugua Eseda de hondowa ibu mogo lalu mini burugu lo berene. Ani buwa kini ibu abale heyalu puwa Eseda pilolino gini abale yania hene. Ani bialu Eseda mo hongo halu bi bayale maru lamigi bini. Ibugua lalu, Eseda-o í̠na irane aginaga gi ho kebe. I̱ í̠ agalini ndo kobe. Í̠naga miniha genda yuleni nayabe. Tamuha anda naibule lalu mana winidagoni wali agali maru bu karu bibahendenaga lo winigo nga. Í̠ homolene nawiore. I̱ni koria abale íbu, lene. Ani bialu kini ibunaga halimbu ibunaga hongo ngago manda bialu yagane wiago yaraga halu Esedanaga mani wia hene. Ani buwa ibugua Eseda nu̱nu̱ lowa ibugua lalu, Ai í̠ mbirale agile hame lalu ibiribe. Ayu ogoni abale langi, lene. Ani layagola kuini ibugua ladai bialu lalu, Kini-o i̱na handa amu halu í̠ dengui handalu hewaria í̠ Ngode Datagaliwabenaga dahuliyali mbira bedabe toba haru. Ani hondowa i̱ mogo timbuni lalu durubi lalu hewaria Í̠ tara mbira handalu í̠naga dengui wá tarahe berearia handaru, lene. Ai Eseda bi lalu heaore dege ibu de mborere bialu odope hene. Ani biyagola kini ibu mogo timbuni lalu mini burugu lene. Ani biyagola agali kini handaya ho haga hearume Eseda mo heya hene.
ESG 5:1 Kini ibugua Esedahondo lalu, Kuini Eseda-o í̠ore agile hame ledebe. I̱na í̠hondo mbirale timbuniorebi i̱naga dindi timbuni ngogo mendehayagi í̠ tuwua ngi lariyagua nde nguliya langi, lene.
ESG 5:4 Ani layagola Esedahanda ladai bialu lalu, Kini-o ayu mbiraga Hamana libu tomo timbuni nami̱ya ibulene karulapedabe. Tomo timbuni ayu noledago irane i̱naga horo timbuni mbira tagira ibiragonaga nami̱ya laro, lene.
ESG 5:5 Ani layago hale halu kini ibugua Hamana lamialu tomo nole Eseda andaga mbaliya abale ibabe lalu lamini. Ai kini Hamanala Esedahanda tomo dawa manda manda bialu bereagoha pene.
ESG 5:6 Ani puwa ti waini iba nalu biruwa kinihanda Esedahondo hale halu lalu, Eseda-o i̱hondo mbirale ngi larego ta nabi nguleberogo ai í̠naga hame ledego abale langi, lene.
ESG 5:7 Ani layagola Esedahanda kinihondo ladai bialu lalu,
ESG 5:8 Kini-o i̱na í̠hondo hale harogo bibahende e̱ lai holeyagua nde Hamana libunaga tomo halu mende manda manda bu wiaguago yawi lone ibalibu, lene.
ESG 5:9 Hamana ibu tomo nalu berenego nai halu andaga pole tagira pialu howa ibunaga bu miniha dungu lalu turu hama tagira pene. Ibu tagira puwa handalu hearia Modegai ibu nde kini anda haneni berearia hendene. Ani hondowa Hamana ibu miniha tandaga timbuni hama pene.
ESG 5:10 Ani puwa Hamana ibugua ibu damene hearu íbu ngoai hadaba lowa ibu one Seresebi ti haru mandagi birami̱ya íbu lowa ti haru berene.
ESG 5:11 Ti bibahende íbu ngoaiho bereagola tinaga deni Hamanahanda ibuninaga mini yaraga halu hene. Ibugua tihondo lamialu ibunaga muni dabudabubi dewaore ngo lene. Ani bialu kinihanda ibu agali dunini timbuni mbira helalu biabe timbuni mbira mo ngialu kininaga agali haguane bu hearu bibahende ibu andaneha helaya lalu lamini.
ESG 5:12 Ani bialu Hamana ibugua laabo halu lalu, Ai Kuini Esedahanda Kini iya hangunaga tomo timbuniore dawa haya. Ibugua agali maru hearu tomo nami̱ya ibalimu naleore. Ani bialu yawibi nde lone nami̱ya ibalibu laya.
ESG 5:13 Anigo ai Yudali Modegai heago kini anda haneni bereago handarugola i̱naga bu miniha tandaga timbuniore ira daradagua biya. Anidagua biyagome mbirale bayale ayu larogoni bame nagalone haya, lene.
ESG 5:14 Ani layagola ibu one biagomebi ibu damene berearu tiguabi lamialu lalu, Miniha genda halu mini burugu nale waha. Ai í̠na agali karuhondo ira luni manda mida pira kira (20) dibu hongowa yawi egerebagi í̠na kini hale halu Modegai abale ira ogoriani bo derela helo lamibe. Ani bialu mani í̠naga miniha dungulo howa tomo no pole ani bibe, lalu tigua lamini. Hamana ibugua bi hale howa agali bu hearuhondo lalu, Ira luni mbira Modegai pume manogo bia buwa bo derela helonaga dibu hongole pudaba, lene.
ESG 6:1 Ai horo ogoningi mbiraga kini ibu baya hangu palibe nahe hene. Ani biyagola ai mbuga mbira dindi ibugua handaya ho kagoha binigo te gilibu wiaga wiago mo yalu ibu lene. Ani biyagola agali biabe biaga hearume te gilibu wiaru daga ladaba lene.
ESG 6:2 Ani layagola tigua agali kini andaga mamage haga kirali biago labome kini bo waholebiyago te wiago daga lene. Agali kira ogoni labome kini homelo bo wahowa kalego ai nde Modegai heagome handa walia howa libu manani haru pialu ko biniyago handa walia hene.
ESG 6:3 Ani bialu kinihanda lalu, Ai iname Modegai ibu biabe bayale biyagonaga iname ibu yolo mbira agi mirimabe, lene. Ani layagola agali berearume lalu, Í̠na ibuhondo mbirale mbira nami henego ke, lene.
ESG 6:4 Kini ibugua agali biaruhondo hale halu, Ai Modegaihanda biabe bayale biyagonaga iname agi bimabe lowa wene lole lalu bereaore dege Hamana ibugua Modegai ira dibu hongowa bo manogo bia hole poro lalu kini hale hole anda ibini. Ani anda ibiyagola kini ibugua agali biaruhondo hale halu lalu, Agali ibaruago aibe, lene.
ESG 6:5 Ani layagola agali biabe bia haga hearume ladai bialu lalu, Hamana ibuwa í̠ hondole manda bu ka, lene. Ani layagola kini ibugua lalu, Tamuha haru anda ibidaba, lene.
ESG 6:6 Ai Hamana anda ibiyagola kini ibugua Hamanahondo lalu, I̱na agali mbira kagonaga mini yaraga holene hame lo ko. Anidagua bule manda bidogo ai agua buledabe i̱ miniha manda baya hangu nabi bedogo. Ai i̱na bayale buliyago mbira í̠na manda bedebe, lalu hale hene. Ani layagola Hamana ibu miniha manda bialu lalu, Ai kinihanda agali mini mo yaraga holene mbirali aida. Agali mende nahego. Ainde i̱hondo bule layago, lo mitangi bini.
ESG 6:7 Ani manda buwa ai Hamana ibugua kinihondo ladai bialu lalu, Agali biabe biaga karume aga bayale í̠ni karu lagane ngego agali ogoni mo mulene nga. Ani buwa í̠ninaga nogo hosi kago haru ibulene nga.
ESG 6:9 Ani buwa i̱naga agali haguane mbira kagome í̠naga aga biaruni agali ogoni mo karula halu agali haguane ogonime agali ogoni nogo hosini bere lowa wali agali ngoai haga tano hama ngagoria haru polene karulape. Libu ani pialu howa agali haguane timbuni ogoni ibugua lalu, Agali ogo de handadaba kinihanda ibu mini lene mbira heleda. Kinihanda ibuhondo bayale biyadagoni handadaba lalu wali agali hale helo ga̱lalu lolene nga, lene.
ESG 6:10 Hamanahanda bi ani layago hale howa kinihanda ibuhondo lamialu lalu, Mini ogoni baya gibioredago. Ai í̠na abale puwa Yudali Modegai i̱ andagaha biabe timbuni biaga agali haguane biagohondo anidagua bule pu. Ayu í̠nime laridagua biai habe, lene.
ESG 6:11 Ai Hamanahanda kininaga nogo hosibi agarubi mo yalu ibuwa aga Modegai mo karula hene. Ani mo karula halu Modegai kininaga nogo hosini bere lalu tanoha wali agali ngoaiho haga wiagoria haru halu pene. Libu pialu howa Hamanahanda bi hongo howa ladaga halu lalu, Agali ogo de handadaba. Kini ibugua agali ogonaga mini yaraga haya. Ani buwa ibugua agali ogohondo mana bayale ogoni biya, lene.
ESG 6:12 Ani bialu mani Modegai ibu kini andaga dai bini. Anigo Hamana dege taga timbuni howa miniha genda timbuni halu bini. Ani howa ibunaga dengui agame bu dambi halu ibuni andaga dai bini.
ESG 6:13 Daibuwa mbirale biyaru bibahende ibu onebi ibu damene hearubi bibahende lamiai hene. Ani layagola ibu onebi ibu damenedarubi ti manda timbunibi howa tigua ibuhondo lamialu lalu, Ayu í̠ timbuni mini lene kego mo wahalu Modegai ibu ho aribia holobada. Ibu Yudali kago ainde í̠na ibu nahelo hapai holene henge nawida. Ibu nde Ngode Datagaliwabe heba haga kagome í̠ homolene dege nga, lalu tigua Hamana lamini.
ESG 6:14 Ti wene bi lalu bereaore dege agali kininaga biabe biaga hearume Hamana kuini Esedahanda tomo timbuni dawayago nolenaga haru pole abale damu ibini.
ESG 7:1 Ai kinila Hamanala kuini wali Eseda andaga tomo
ESG 7:2 halu mende nole pene. Puwa ti waini iba nalu biruwa kinihanda Esedahondo hale halu lalu, Ai kuini Eseda í̠na agileore hame ledebe. Ngi larego i̱na í̠ nguliya latagi ha. Í̠na dindi bibahende i̱na handameho kogo tu wu ngi lariyagua nde nguleberogo langi, lene.
ESG 7:3 Ani layagola kuini Esedahanda ladai bialu lalu, Kini-o aiore nde í̠na i̱hondo bayale bule manda bideyagua nde i̱na í̠hondo hale holeberogo e̱ labelo hame ledogo. Ainde i̱naga wali agali heba i̱ni homolene ngago hame naledo.
ESG 7:4 Tigua ina wali agali mendenaga garabaya biabe ale bia haga helalu ina bibahende homelo bo wahai hole ka. Genda ogoni inanaga waneiginihondobi mia dege biya. Abale howa i̱naga genda ogoni latagi nahe harugo ai ayu inanaga waitigi ogoni ibu kini andagaha biabe timbuni biaga kagola ai i̱na ogoni tiga nabido lo manda bido, lene.
ESG 7:5 Ai kini Segesisi ibugua bi ogoni hale howa ibugua kuini wali Esedahondo hale halu lalu, Agali ogoni ai ibugua gi nahe howa mana ko uruni bialu hayadabe, lene.
ESG 7:6 Ani layagola Eseda ibugua ladai bialu lalu, Agali mana ko o bialu hayadagoni Hamana o bedagoni ibugua biyiya, lene. Ani layagola hale howa Hamana ibu mogo timbuni lowa duru lalu hene.
ESG 7:7 Ai kinihandabi nde keba halu tandaga timbuni hene. Ibu tomo nane wahalu tagira puwa ibu andaga mandamanda gama wiagoha ibaga bu hene. Ani biyagola ai Hamana kinihanda ibu bo waholebada lo manda bini. Ani manda buwa ibugua ai kinihanda ibu bo wanahelo kuini Esedahondo ibu dara ha lole andaga tamuha biraabo hene.
ESG 7:8 Ai kini ibu andaga tamuha lone anda ibuwa handalu hearia Hamana ibu tamu Eseda biruwa tomo nalu bereagoria bulupalu wiaabo hearia hendene. Ai hondowa kini ibugua lalu, E̱ agali ogonime i̱ni andagaoreha howa i̱ni oneore bedago i̱ninaga deni howa kayu bule bedabe tobaneda, lene. Hamana ibu bi ogoni layago hale howa ibunaga hongo ereba halu tingini bibahende gedeore hai hene.
ESG 7:9 Ai agali biabe biaga mbira mini Bugadana heagome lalu, Hamana ibu andaga mandaha kaware dege ira luninaga mida pira kira (20) dibu hengeda. Ibugua ira ogoriani Modegai bo derela holenaga ani heleda. Waitigime í̠ bo wanahelonaga Modegai ogoni ibugua í̠ biamogo biyagome tigua í̠ nabaya, lene. Ani layagola kinihanda lalu, Tígua Hamana ibuni haru halu puwa ibunime ira dibu hangayadagoriani homelo bo derela hole pudaba, lene.
ESG 7:10 Ani laya handala tigua Hamana haru puwa ibunime Modegai bo derela hole ira dibu hangayagoria bo derela hene. Ani biai hayagola kini ibunaga mini lone karulape bayale hene.
WIS 1:1 Dindini agali homogo kemiru tígua mana tigabi ngago gubalini ho holene nga. Tígua Ngode Datagaliwabe kago mitangi bialu ibu taya bialu kemigo howa tíninaga mini tigabiore howa taya bilimu.
WIS 1:2 Ai wali agalime Ngode Datagaliwabe kago ibu abi henedabe hondole bahandaga karu tigua Ngode Datagaliwabe karia handa walia naholebira. Anigo wali agali Ngode Datagaliwabehondo mini mbiraorewi karu ibuni tihondo mo walia holebira.
WIS 1:3 Mohondo halu ohagane mana ngagome wali agali Ngode Datagaliwabe yu wahalu kaundiaha haru halu pu wahaga. Wali agali mini bayale ndo wua howa Ngode Datagaliwabenaga hongo abidabe hondolenaga bahandalu karia Ngode Datagaliwabehanda tini mo taga haga ka.
WIS 1:4 Mini gigabi ibu wali agali mana ko bulene ngagoha haga kago baba mandagi nahaga.
WIS 1:5 Wali agali mini tigabi talialu haga kago ibugua ke̱ holene mana ngago erembira miaga ka. Ani bialu wali agalime bi tiga nabi lulu bi lalu kagoria ti nahe ibida pialu wali agali mbirame mende kagohondo mo ko hayagua ti mogo timbuni laga.
WIS 1:6 Mini gigabi ibu Ngode Datagaliwabenaga Dinini ka. Ibugua wali agali gubaliniore haga kago mbiralime Ngode Datagaliwabe mege biyagua nde ibugua ko ogoni mo wanahaga ka. Anidagua biagago irane Ngode Datagaliwabehanda wali agalinaga miniha hame ngagobi mini ngagobi manda biaiho howa tinaga bi larago bibahende hale hai haga ka.
WIS 1:7 Ai Ngode Datagaliwabenaga Dinini dindi bibahendeha ho to̱lai kago ani howa ibugua mbirale ngaru bibahendeore mo mandagi hilamaga howa yu haga ka. Ani howa wali agalinaga bi larago manda biai ho haga ka.
WIS 1:8 Ani howa wali agalime bi ko layagua ibu hale hai haga kago tigua lado habe nahe. Ani bidagome Ngode Datagaliwabehanda tini ko biya lenegonaga pani nolebira.
WIS 1:9 Ngode Datagaliwabe ibugua baya hanguore begelo handai howa wali agali ko biaga karunaga mini wu karu baya hangu mo talebu ki bulebira. Anduane Homogohanda tigua bi latagi hararu baya hanguore ogoale laragoni lalu mo tale bulebira. Ani mo tale buwa ko birida laragola tigua beregedalu dai bulene nawulebira.
WIS 1:10 Ngode Datagaliwabehanda wali agali tigua ibuni kago helalu kaundiaha pelo hame naleore howa ibugua tinaga bi larago damene bibahendeore baya hangu hale haiore haga ka. Bi hale habe nahe ohowa layaguabi ibugua hale haiore haga ka.
WIS 1:11 Ani kago ai tígua Ngode Datagaliwabehondo keba howa lai lalu bi loligo de hondo holene nga. Mana ogonibi ngagome tíni biamogo bulene mbira nawulebiraore. Ngode Datagaliwabehondo bi nagalone ngago lolene nawiorego irane bi emene ohowa lalu kego damene bibahendeme í̠niha genda mo yu anda ibulene wulebira. Tígua ke̱ halu haga hemigua nde mana ogonibi beremigome tí mo ko holene wulebira.
WIS 1:12 Tíha mo ko holene wuligo tí lulu ale howa hopebe bu nahalimu. Tínaga mana ko biaga ngemigome tíni homagane kemi.
WIS 1:13 Irane Ngode Datagaliwabehanda homolene mo yu anda naibaga ka. Ani kagome ibu mbirale homene ngaru hondowa turu nahaga ka.
WIS 1:14 Mbirale ngarubi karubi ibugua wabiai hene. Mbirale uruni bibahende bayale hai helo hame lo ka. Mbirale bibahende ibugua wabini ngaru bayale dege ngelonaga wabini. Mbirale uruniha tini mo ko halu homagane mo yu anda ibulene ale mbira nawabini. Homa ibugua dindi ogo handaya ho ha nabigo.
WIS 1:15 Irane mana tigabi bulene ibu Ngode Datagaliwabe ibunaga ngagome ibu ereba holenebi homolenebi ibuha nawi.
WIS 1:16 Anigo wali agali ko bu karu tinime bi ko lalu mana ko bialu kagome homolene mo yu anda ibaga. Tigua homa ibu bayalebe toba howa tigua homa heba mandagi hole hongo haabo haga ka. Tigua homa baba habo nalolene bi lowini ngagome tini homa heba ho mbiraore ho haga ka.
WIS 2:1 Wali agali ko bu karume lulu kariane ogodagua mitangi biagaya. Inanaga holene emene tubagi hangu ngagoria genda tara tara ngaru wua to̱leda lo mitangi biagaya. Ina bibahende homai hole kema. Homa iname habagi ha lalu ina pubagi holene henge nawiore. Wali agali mbirali ibu homeneru dalu humbirini andaga howa dai binigo nahende kema.
WIS 2:2 Ina bameore irigiho hene kemago mani homalu nde ina dindi ogoria nakemalegobi dege nga. Inanaga holene ogoni irane nawi nagaloneore. Inanaga holene ibu ira hagua darago abale ereba haraligobi emene hangu halu abale homaga kema. Inanaga mini ibubi ira dene emene dedago pulole bialu keria abale hundia tegeledaligobi ina emene hangu howa lone holenaga holene yu dai bibe nahe abale homaga kema. Inaha buhe̱ lolene nawiyagua nde ira dene emene hoai dedago hundiagadagua holene ibu ereba hayago ai ira hundini be hangu bame tambehe ngaligobi inanaga homa tingini bame amburibi wiaga.
WIS 2:4 Ina homedemagola mbirale iname bialu harimaru abaleore embeda holebira. Inanaga minibi abale embedaho waholebira. Inanaga holene egerebagi ginu pobo wiagagobi kemago ai ni tagira ibiragola mbirale uruni ereba hagadagua inanaga holene abale ereba holebira.
WIS 2:5 Dindi ogoria inanaga holene emene tigi mbira hanguore puriabu pulo yu ibalu abale bolangua hagagobi kema. Iname homolene ngago wandialu pubagi holene nakarulapeore. Ina bibahendenaga homolene horo mbira mbira wiai kago ogoningi ina homoleneore wini nga. Mbiralime ibuninaga homolene horo ngago mo yamu holene nakarulapeore ndobe.
WIS 2:6 Marume ogodagua lolebira ai holene ogonibi wiagua nde mini burugu nale waha. Ina wandari igiri daliaheme hagadagua howa bibahende ngaruha inanaga hame ledago biba hama ibaga bimi̱ya.
WIS 2:7 Iname waini iba bayaleru dewa naabo halu pauda baya ngabi mini sanda muni dewaoreme miaga ngarume tingini hai halu bimi̱ya. Yári biagane baya tara dedaru bame dalu dogolo wanahe iname dowa mandariha yari bialu hami̱ya.
WIS 2:9 Ina bibahende mo ngoai ho hai howa mali lialu tomo timbuni nalu mali ligimbu bimi̱ya. Wali agali bu karume ina turu ho kemago hendelo ina ibaga bialu dindi ngaruha piai hami̱ya. Mana ogonibi bialu holenego baya tara mbira nga.
WIS 2:10 Wali agali yagibano bu karu ko heaguabi bayale heaguabi ta nabi bo hengedo wahai hama mali̱ya. Wali ti agalini homene bedaru dara nahami̱ya. Ani bialu wali agali waheale karubi dagua peleore bu karubi daga nawinigo waha.
WIS 2:11 Ina hongohe kamagoni ndobe. Ani kamagonaga ai mana inanenaga tara wabialu inanenaga hame ngemago biba halu holene karulape kema. Wali agali hongo nahe karu ti daga nawini habane nabulene bame ka.
WIS 2:12 Wali agali mana tigabi talialu hagane bu karuni mo ko holene hariga handa walia harimagoni. Uruni tigua inanaga hariga hapai haga ka. Tigua inanaga mana bialu kemago hondowa inahondo keba howa lalu iname Mosesenaga manabi ina mamalirunaga manabi puguaga kemi laga ka.
WIS 2:13 Tigua Ngode Datagaliwabe baya hangu manda bialu ibunaga waneigini karubi manda bidema laga ka.
WIS 2:14 Mana tinaga ngago damene bibahende inanaga mana ngemago bibahende baba waitigi haga nga. Wali agali uruni ale bu karuni manga timbuni ho kemagoni ndobe.
WIS 2:15 Ti wali agali tara maru bu hama pedaru ale ndo tinaga mana tarore nga.
WIS 2:16 Tigua handalu karia mana iname bialu kemago ko dodohe beremago handalu ti kaundiaha haga ka. Tigua lalu, Wali agali mana bayale bialu haga karu ti mani turu ho holebira, laga ka. Ani lowa tigua kudaga bi lalu Ngode Datagaliwabe ti aba ka laga ka.
WIS 2:17 Anigo hondo ha hadaba mani tinaga bi ogoni henenedabe be bame lenedabe handa handami̱ya. Ainde mani tiha agile tagira ibulubadabe.
WIS 2:18 Ainde wali agali tigabi bu karu ti heneneore Ngode Datagaliwabe waneiginiore heneyagua nde tiha mo ko holene tagira ibirangi Ngode Datagaliwabe ibunime ti waitiginaga giha howa haru dai birane handami̱ya.
WIS 2:19 Ai ti agua birabe handami̱ya ai ti bahandalu tandaga mo mima nalaremi. Tigua tandaga agira nelo mulene karulapeda.Tinaga bu mini mo palia howa hendore ha holebadabe naholebada.
WIS 2:20 Ai ayu howa bimi̱yago lo wima. Wali agali maru karunaga deni ti mo taga halu bo wahami̱ya. Tinime lalu ti Ngode Datagaliwabe ibunime ti handaya ho holebira layago ai tiha gi holene nawulebira.
WIS 2:21 Ai ogoni hangu wali agali ko biaga bu karu tigua tinaga miniha ngago latagi haga ka. Anigo ti luluore ka. Tininaga mana ko ngagome tini mo hondo henego ka.
WIS 2:22 Ngode Datagaliwabehanda wali agali mana bayale ngago talialu biaga karuhondo yolo bayale miaga kago ti manda nabiore ka. Ngode Datagaliwabenaga mini timbuni ngago manda nabiore ka.
WIS 2:23 Tinaga miniha mini putara halu mo libilaba lai heneore ka. Ngode Datagaliwabenaga mini ngago ogo. Ibugua wali agali homelo hame naleore ka. Irane ibuni haluhe haabobo haga kagome wali agali ibuniale helo wabini.
WIS 2:24 Anigo ai dama heyolabeme wali agali heago dimagoli timbuni hayagome dindini homolene yu anda ibiyagoni. Ani binigome wali agali dama ibu aria bu karu bibahende homai halu pu ereba hai holebira.
WIS 3:1 Dama damene karu ti homalu pu ereba hai holebirago ainde wali agali tigabi karu ti homalu Ngode Datagaliwabenaga giha howa ti lone tandaga hondolene nawulebira.
WIS 3:2 Wali agali lulu bu karume lo manda bialu wali agali tigabi uruni ti mo ko timbuniore henego ai ti pu ereba hai halu biba hayagoni lo manda biaga ka. Ai ani ndoyago. Wali agali bayale uruni ti ayu mo palia holene karulalu bayale ka.
WIS 3:4 Ai wali agalinaga deni howa tiha yolo ko miyagoni. Ani ndo wali agali tigabi howa mini mbiraore hongohe wua haga karu ti bayale haabobo bu holebira.
WIS 3:5 Heneneore tigua tandaga nalu hayagoni. Anigo Ngode Datagaliwabehanda tihondo bayaleore helo helolebira. Tigua tandaga nalu hayangi Ngode Datagaliwabehanda tinaga ko wiago domo wahai hayagola ti lone bayaleore halu ai ti Ngode Datagaliwabe heba mandagi birulebira. Agalime ngolonaga mana ogonidagua dege biaga nga. Tigua ngolo ira timbuni hongohe dedagoha delalu ngoloni dodo para kago domo waharagola ngolo bayale ngago yamiaga. Ai Ngode Datagaliwabe ibugua wali agali tigabi bu karuhondo miniha dungulo howa wali agali uruni loma bayale irani dai hene loma yamiagagobi dege yamiaga ka.
WIS 3:7 Ai Ngode Datagaliwabe ibugua wali agali bayaleru mo tale bule ibirangi ti ira hungu timbuniore dangiha bo daraligobi holebira.
WIS 3:8 Wali agali bayaleru tigua wali agali bibahendeore bu karu handaya ho hai halu dindi tara tara ngaru bibahendebi handaya ho howa haru hai kagola Anduane Homogo ibuni tinaga kini howa haru halu haabobo bu holebira.
WIS 3:9 Wali agalime mini mbiraore hongohe wialu Ngode Datagaliwabehanda ti baya hangu handaya ho ka lo manda bu karu tigua ibunaga mini ngago bibahende manda biai holebira. Ani bialu wali agali Ngode Datagaliwabenaga mana lowini ngaru baya hangu talialu haga karu ti ibuni heba mandagi howa ibuni gubalini ho haabo holebira. Irane Ngode Datagaliwabe ibu bayale taraore howa ibugua wali agali dara holene irane nawini howa dara haga kagome wali agali ibuninaga dabo heleneore bu karu dara haga ka.
WIS 3:10 Wali agali ko bu karume mana tigabi bulene ngaru mitangi nabiaga howa tigua Anduane Homogohondo erembira miaga. Ani bialu kagome mini ko tiniha ngagonaga mini lene holebira.
WIS 3:11 Tigua manda bu handalu karia manda bayalebi lawai haragobi bibahende galone ndoda lo manda bialu kagome tininaga holene koore hagaya. Tigua mbirale bayaleru mani tagira ibilonaga maliaho hagago ogoni bameore maliaho hagaya. Tinaga biabe birago lini nadole bameore bu wahole biaga.
WIS 3:12 Ti one bedaru lulu yu halu tinaga waneigini karu pagebibi halu biragola
WIS 3:13 mani ti waneigini aguane holobadaru Ngode Datagaliwabenaga deni nahe pu ereba hai holebira. Wali agali one mbirame mana bayale ngago talialu biruwa ibugua dabubini mana ngago pugua nabiyagua nde ibu waneigini nahe birayaguabi ibu turu ho birulene nga. Ngode Datagaliwabehanda wali agalime bialu henedaru koda bayaleda lalu mo tale bule ibirangi wali ogoni ibu bibahende bolangua hene bayaleore birulebira.
WIS 3:14 Ai agali mbira kago ibunaga tingini podo wahene howa dabubini mana ngago bibenahe heaguabi ani howa ibugua Ngode Datagaliwabenaga mana ngago baya hangu talialu howa ibugua Ngode Datagaliwabela keba nahe heagua nde Ngode Datagaliwabehanda ibuhondo yolo timbuniore dunini ngago ibugua mana bayale bialu hayagonaga yolo mulebira. Ani bialu ibu dahuliya andagani Ngode Datagaliwabe andaga kagoha holene bayale ngagoria henge mbira mulebira.
WIS 3:15 Wali agali mana tigabi ngaru biaga heagua nde ti ira lini bayale dewaore de hagagobi ka. Ani bialu mini tigabi ngagome ira pini dindiha bayale pialu ira parane anda halu haabo haga kago ale ka.
WIS 3:16 Anigo ainde waneigini tinaga aba ai̱ya libu dabubini mana pugualu pugupugu bini bu karu ti bayale lu naholebira. Ti abale homolebira.
WIS 3:17 Anigo ai uruni aria maru ti mali luore ho bolangua howa ho dagua halu waheore hayagua nde ti mini lene timbuni naholebira. Ti habane nabulene bame karule dege holebira.
WIS 3:18 Ai ti wene igiri daliahe kaore dege homayagua nde Ngode Datagaliwabehanda godi larangi ti pu ereba holebira.
WIS 3:19 Heneneore wali agali mana ko biaga karu tiha mo ko holene timbuni gibiore wulebira.
WIS 4:1 Ai one agalinila libu waneigini mbira naheore heagua nde libu ogoninaga genda holene nawi. Tigua mana bayale ngago bulenaga dege mini burugu lalu holene nga. Ani larogo irane Ngode Datagaliwabehandabi wali agali bu karumebi tigua mana bayale birago dege turu howa handaragome tinaga mini ereba nahe wiaabobo bu wulebira.
WIS 4:2 Mbirali ibu mana bayale ngago talialu hayagua nde mendeali kagome mana bayale ibugua birago talialu bulebira. Anigo mbirali ogonidagua bulene naheyagua nde tigua dugu bialu howa taya bulene nga. Mana bayale bulene ngago ibu dewali gerai lagalaga buwa bolangua harago ibu yolo bayale mo ko naholene ngago mo yu hagagobi nga.
WIS 4:3 Wali agali mana ko biaga bu karume waneigini dewaore hono wu ha hayaguabi waneigini uruni habane nabulene bame yagibano bu holebira. Waneigini hono wahene hariga bame holebadaruni ti ira mbira ibunaga pini dindiha anda nape howa hongo nahe bame ula a̱i̱na̱i̱ bu hagagobi holebira.
WIS 4:4 Marungi nde ira ogoni alego yuni dewaore karia puriabu ibalu pula amu nana biragola yuni genda halu iradago podagane.
WIS 4:5 Ira ogoni wene podape haragola gene magane maru ira wene gahange ngaore lebolahole biagane nga. Lini nolene ale dedagobi boga nabi wene dedaore podaragola lini dedago bayale nabehe ndo bame gilahole bulene daga.
WIS 4:6 Ainde mana wali agalime bialu hayaru mo tale bulene harangi waneigini harigani bu holobadaruni tigua ti aba ai̱yalame mana ko ogodagua biya lalu lapani hagane holebira.
WIS 4:7 Wali agali tigabi biaga kago ibu wene wandari igiri daliahe kangi homayaguabi ti pialu Ngode Datagaliwabela mandagi ha̱lo birulebira.
WIS 4:8 Agali waheore karu ti mini lene kago irane agimedabe. Ti mali dewaore hayagome dabe. Ani ndoyago.
WIS 4:9 Wali agalibi mbirago ibuha mini manda baya wu howa mana tigabi ngago talialu hayagua nde ibubi agali wahe mali dewaore biralu homayagobi dege holebira. Wali agali ogonibi kago ibu mini lene holene karulape ka.
WIS 4:10 Bambaore agali mbira heneya. Ibugua Ngode Datagaliwabenaga bi hale howa talialu haga heagola Ngode Datagaliwabehanda ibu gubalini timbuni ho haga hene. Ani howa agali ogoni ibu wali agali ko biaga bu hearu ti dege dombeneha hearia Ngode Datagaliwabehanda ibu dahuliya andagaha helo haru pene.
WIS 4:11 Ngode Datagaliwabehanda wali agali ko biagabi ke̱ hagabi hearu baba helo hame nalene. Mana tigua biragome ibunaga mini mo luluya habeheyane hondowa ani bini.
WIS 4:12 Ainde wali agali bayale kagome tinaga mini mana ko bulene dewa bu ngaruha haru ibaga bilo hayagua nde tigua mana bayale tigabila ko bulenela mo tale bibe nahe haga. Ani howa tinaga mini libilabale hai haga.
WIS 4:13 Tigi mandi hanguni agali ogoni ibu bayale tigabiore hene. Ani howa agali waheore maru ti bayale tigabiore holenenaga li hama ibini wiaru ibugua bolangua hai hene.
WIS 4:14 Mana ibugua biaga wiaru Anduane Homogohanda hondowa karulapeoreda lo manda bu hene. Ani heago hondowa Ngode Datagaliwabehanda ibu dindi kaundia wali agali nahaga wiagoha haru puwaore hene.
WIS 4:15 Wali agali bu hearu tigua de handa hondowa dege tigua ogoale biyada lalu galone manda nabi howa tinaga gubaliniha nogoba nahe hene. Ainde Ngode Datagaliwabehanda ibunaga wali agalihondo gubalini ho howa ti dara holene irane nawini howa dara halu handaya ho haga kago ti manda nabiore hene.
WIS 4:16 Wali agali bayale homayaru tigua ko biaga dindini karu tigua ko biya lalu tigua mana ko bialu ka lalu godini lapani holebira. Wali agali ko biaga karu ti waheore haragola mana bayale tigabi wandari igiri daliahe bu karu tigua mana bayale tigabi bialu kago hondowa ti taga timbuni holebira.
WIS 4:17 Marungi nde wali agali mini gigabi wu howa tini wene daliahe dege kaore homaga. Ai wali agali ko karu tigua wali agali tigabi uruni homarago Ngode Datagaliwabehanda urunihondo ogoale bule ka lo manda nabiore ka. Anidagua birago Anduane Homogo ibunaga mana ngagome wali agali tigabi uruni ibu dalu dindi bayale genda tandagabi nawiore ngagoria haru polenaga biaga ngago ti manda nabiore ka.
WIS 4:18 Wali agali mana ko biaga bu karume wali agali tigabi karu homaragola tigua mege bialu oba halu haga ka. Anigo ai hondo harene. Mani Anduane Homogohanda wali agali ko biaga bu karu ti homaragola ibugua ti hondo oba haragola ti taga tene hondolebira.
WIS 4:19 Ngode Datagaliwabehanda ti dindiha bope haragola tinaga bi lone lolene nawulebira. Ibugua ti he̱lo waharagola ti mo ko howaore pilo gingirulobaga bu wulebira. Ani wuwa tandaga tara nalu wulebira. Ti homaragola wali agalime dara howa dugu nabulebira. Wali agali maru homayaru tiguabi nde uruni hondowa hondo oba halu haabobo bu holebira. Ti homedaha wali agali maru bu karume ti mitangi bu haabo naholebira.
WIS 4:20 Ai Ngode Datagaliwabehanda mana ko tigua bialu hayago manani howa mo tale birangi tiha ko wiyago panaga ona angalo payabu ngagola tini hondowa gi timbuni howa durulalu holebira.
WIS 5:1 Horo ogoningi wali agali mana bayale ngago talialu haga karu tigua abale wali agali ti mege bialu handape manga haga biarunaga deni heyu holene gi nahe holebira.
WIS 5:2 Wali agali ko biaga tigua agali uruni ti bayale holobada manda nabi hene. Ai ti bayale henedago hondowa mogo lowa tini duru lalu holebira.
WIS 5:3 Ani howa ko tini biyago dara howa mini burugu timbuni lalu ti dege dege laedene bialu lalu,
WIS 5:4 Wali agali iname abale mege bialu tiha galone naheda lo manda bu harimagoni. Ainde ina lulu timbuni yu harimada. Tigua mana bialu karu iname leheoreda lo manda birima. Ani bialu ti homayagola iname uruni ti dara halu dugu nabi harima.
WIS 5:5 Anigo áyu ti kago de handadaba. Ti Ngode Datagaliwabe waneiginiore howa ti wali agali Ngode Datagaliwabenaga karu heba mandagi kago handadaba.
WIS 5:6 Áyu ina manda bidamagoni. Iname bia ko howa mana tigabi wiago talialu naharima. Ina ko aruma holene wiagoha pupe halu harima. Mana tigabinaga hariga polene wá ibiyagola mo walia hayagohayagi nape harima.
WIS 5:7 Iname mana ko bulene hariga tara tara wiaruha pu pebe bialu howa mbirale wiaru dewa mo ko hai harima. Hariga piaga ndo wiagoha ina pialu harima. Anduane Homogohanda hariga ina poloma̱ya hamelo heagohayagi nape haabo harima.
WIS 5:8 Ina mbirale dewa wu howa karulape kemabe toba howa taraore kemagoni lo manda birima. Anigo ainde mbirale urunime áyu ina biamogo nabiore ngagoni ndobe.
WIS 5:9 Ai mbiralime bi laruago áyu dege hale halu embeda haramalidagua mbirale yu harimaru abale ereba hai hayagoni ndobe.
WIS 5:10 Mbirale uruni agoha piyabe tobane pu wahalu ibani iba sibi pu porane handa hendedemago pu ereba halu agoha piyabe toba hagadagua mbirale yu harimaru ereba hai hayada. Ibu piyago ge ngane nahondolebereore.
WIS 5:11 Ti ega mbira harini yagaloyu piagadagua piya. Egame pilipulu lalu yagaloyu porane handarego agohayagi piyadabe hondole ge handabe nahe haga.
WIS 5:12 Ani bialu yandare bo pelalu bole manda biyagoha bo pelagane. Bo pelalu ibu hariga agua piyabe ge handabe nahaga nga.
WIS 5:13 Inabi nde mbirale manane o larurunibi harima. Ina ai̱yahanda taba hanayangi howa hama ibininaga ina dindini tigi mbira hangu howa ho lu naberemali. Mana ko bulene inaha wua to̱ leagola iname mana bayale bulene wiago nabi harima. Ani birimagome ai wali agali tigua hendelonaga inaha manane bayale mbira nawiore kemagoni, lolebira.
WIS 5:14 Maru ko biaga karume mani mbirale bayale mbira tagira ibilonaga malia ho nahaga ka. Anigo tigua mbirale mbira tagira ibilo malia ho hayago bame malia ho wahaga ka. Tigua hamelo hagane ngago damene galone nabulene bame datani puriabume puloyu ibagabu hagagobibi iba hangodo iba solowara yaribu biragola bame ti̱ta̱lahole biagagobibi ira hagua puriabume puloyu purogo lagagobibi ka. Mbirali dindi kaundiaha howa ibu henego ibuni dalu dai biragola mbiralime manda biaho wia nabi embedaho wahagagobi ka.
WIS 5:15 Ai wali agali tigabi heneru ti haabobo bu kagola Anduane Homogohanda ti mo turu halu yolo mulebira. Ngode Datagaliwabe daligaore kago ibugua ti baya hanguore handaya ho haga ka.
WIS 5:16 Ani bialu ibu ti heba mandagi haabo howa ibunaga gi hongo gibihe kagome biamogo biaga ka. Ibugua ti dababagi ho helowa yolo baya taraore mulebira.
WIS 5:17 Anduane Homogohanda waitigi bope holenaga hongo timbuni howa bope haga ka. Ani bialu howa mbirale bibahende ibunime wabini ngaru bibahendehondo ibuni biamogo bialu wai bule ibidaba laga ka.
WIS 5:18 Mana bayale bulene ngago ibunaga aga giambe hongohe wabini ngago ale halu mana tigabi bulene ibunaga manda giambe hongohe wabini karulo haga ka.
WIS 5:19 Mana dodo nahe hogorale bulene ngago humbi ale yu haga ka.
WIS 5:20 Ibunaga bu miniha keba holene wai biagane ayu tibu nene kirabaliha gadele nga. Ani kago ai mbirale bibahendeore ibugua wabini ngaru damene ibuni baba mandagi tidiyu howa waitigi lulu mana bialu haga karu baba wai biaga ka.
WIS 5:21 Timu bolebirago baya hangu bilina howa agalime bagadagua ibunaga timu hari daba waga laradagua bialu waitigi karu bai haga ka.
WIS 5:22 Anduane Homogohanda keba timbuniore howa ibugua dalu dindiguni timbuni ege to̱le̱ ale hariha howa bape halu waitiginaga embone tuguda hole bialu baga ka. Ani bialu iba solowara timbuni bedarume yaribu timbuni hongohe bialubi iba pedaruni iba li timbuni wialubi waitigi bibahende karu bu dambi hai helaga ka.
WIS 5:23 Puriabu timbuni hongohe mbira ibalu waitigi bame datani yobi ngaru hilo yu piagadagua bilolebira. Wali agalime mine howa Ngode Datagaliwabenaga bi mana mo wahaga karu pani nelo mulenaga uruni bulebira. Tininaga mana ko biaga ngagome dindi bibahendeha mo ko holene yu anda ibiragola dindi hobane tara tara bi tara tara lagalaga biaga ngaru bibahende bo haelatogo lai holebira.
WIS 6:1 Ai áyu agali haguane dindi bibahende ngaru handaya ho haga kemiru tígua i̱naga bi larogo hale halu manda bayale bi ogoni ngago mo yadaba.
WIS 6:2 Tígua dindi dewaore handaya ho howa wali agali dewaore tí andaneha kagola tíni turu timbuni ho haga kemi. Anigo ai baya hangu hale hadaba.
WIS 6:3 Ngode Datagaliwabe daligaore kago ibugua handaya ho howa haru holene hongo ogoni tínaga giha mo ya hene. Ani bialu biabe tígua birimigo damene mo tale biai haya. Ani buwa mani bulene tígua miniha yu kemigo handa walia hai haya.
WIS 6:4 Ainde Ngode Datagaliwabe ibuni kini timbuniore kago howa ibugua biabe timbuni tíhondo mo ngiyago yu howa tígua mana tigabi ngago talialu bulene manda nabi haga kemi. Tígua Ngode Datagaliwabenaga mana ngagobi hame ledagobi talia nabi kemigoni.
WIS 6:5 Ani bialu kemigonaga Ngode Datagaliwabehanda tí bo wahai holebira. Heneneore Ngode Datagaliwabehanda wali agali hongo timbuni yu karu pani timbuniore nelo miaga ka.
WIS 6:6 Ibugua wali agali daga nawini karu dara halu tiha ko ngaru la nabi wahaga ka. Anigo agali haguane bu karu pani nelo miralo hendene timbuniore nelo mulebira.
WIS 6:7 Ngode Datagaliwabe ibu Anduane Homogoore howa ibugua bibahende karubi ngarubi handaya ho hai howa mbiralihondo gi nahagaore ka. Mbirali ibu haguane handame haga heaguabi haguane ndo heaguabi gi nahaga ka. Ngode Datagaliwabe ibunime wali agali bibahende wabiai hene. Ibugua wali agali daga nalene bu karu wabialu wali agali mini lene karubi ibugua dege wabini. Ani bialu ibugua ti ogobi dege dege handaya ho haga.
WIS 6:8 Ani howa wali agali mini lene hongohe karume bialu karu baya hanguore mo tale bulebira.
WIS 6:9 Bi o laroruni i̱na agali timbuni kini kemiru tí lawai halu bi laro. Tígua hale howa mana bayale tigabi bulene ngago yu howa mana ko bulene ngago nabi wahai halimulo laro.
WIS 6:10 Tí kemiru aria mbirame Ngode Datagaliwabenaga mana ngago mana tigabi ngagoria howa talialu hayagua nde ogoni ibuni Ngode Datagaliwabenaga wali agali kagoha hatago ho holebira. Tí kemiru aria mbirame Ngode Datagaliwabenaga mana ngago baya hangu manda bu heagua nde ibu dabolene harangi ibu hongo howa heyu kagola ko birida lolene mbira ibuha nawulebira.
WIS 6:11 Ani bulebirago manda bialu bi i̱na tíhondo lawai harogo baya hangu gubalini ho holene nga. Ani beremigola tígua manda bayale ngago mo yu holeberemi.
WIS 6:12 Mini gigabi wulene ibu wáholene hale hongohe hundia nabiaga ale nga. Wali agalime ibu mo yule howaore taya bialu kago ibugua abale mo yulene erekui nabi ngagoria mo yulebira.
WIS 6:13 Mini gigabi ibuni wali agalime ibu gubalini howa taya bialu karuhondo abale mo walia haga ka.
WIS 6:14 Wali agali egerebagiore panga dugualu mini gigabi wulene taya bima pole tagira pialu karia ibuniore abale anda haneni ngola haga.
WIS 6:15 Wali agalibi mbirago ibu mamage howa mini gigabi wulene ogoni taya biyagua nde ogoni ibuha mini bayale wialu ibunaga miniha mo palia holene karulo holebira.
WIS 6:16 Mini gigabi wulene ogoni ibugua wali agali bayale karu taya bialu mbirali handa walia hayagua ogoni ibula baya hangu mandagi haga nga. Wali agali ti kagoria ta nabi howa ngola halu tihondo bayale biaga. Ani bialu tinaga mini ngago bibahendeha ngola hai haga.
WIS 6:17 Wali agali mini gigabi wulene mo yu hole hamelo heagua nde tigua ogoni mo yulenaga lo manda bulenego hameore lo kagome mo yaga. Wali agali ogoni mo yulenaga hongo howa lo manda bialu kago ibuha mini gigabi mini bayalebi ibaga.
WIS 6:18 Wali agali ibuhondo turu ho karume mana bayalebi mana tigabibi biaga ngagobi ogoninaga mana lo ngagobi mo walia harago talialu haga. Wali agali ti ogoninaga bi ledagobi mana ngagobi talialu haga ka. Wali agali mana uruni talialu kago ibu haabobo bu holene bayale ngago mo yu holebira.
WIS 6:19 Ai wali agali tinaga holene bayale mo yu heneru ti Ngode Datagaliwabela mandagi haabobo bu ka.
WIS 6:20 Anidagua biagago ai wali agali bibahende mini bayale mule hamelo karu ti mani Ngode Datagaliwabenaga handame howa haru holene ngagoria ti haguane holebira.
WIS 6:21 Ani biagago ai kini timbuni bu kemiru-o ainde tí tíninaga hongo timbuni ngemirubi yári baya ngamarubi gubalini ho hemiyagua nde tígua mbirale uruni baya hangu yu howa agali haguane haabo holenaga tí mini bayale wulene hongo howa yu dungu lo holene nga.
WIS 6:22 Áyu i̱na tíhondo mini bayale ogoni ogoale lalubi ibu ogodagua tagira ibaga lalubi languliya. Ina bi mbira tihondo ya do naholebero. I̱na bi ogoninaga mbira tíhondo mo do naholebero. I̱na ibunaga biabe biaga ngago mo pana hai holebero. Ibunaga biabe ogoni pigane Ngode Datagaliwabe ibugua mbirale bibahende wabiniyangi howa biniya. Ai i̱na tíhondo ke̱ howa nalolebero.
WIS 6:23 I̱ wali agali mendenaga manda timbuni ngago hondowa dimagoli haga karu baba mandagi naholebero. Anidagua larogoni irane mini bayale ngago baba biamaga nahaga nga manda bialu naholebero.
WIS 6:24 Wali agali dewaoreme mini bayale mo yu heagua nde dindi ogo baya taraore mbira wulebira. Ani bialu kini ibu mini bayale wu howa wali agali handaya ho howa haru hayagua nde ibunaga wali agali bayale holebira.
WIS 6:25 Ai áyu i̱na tíhondo lawai harogo baya hangu mo yalimu. Bi i̱na tí lawai harogome tí biamogo bulebira.
WIS 7:1 I̱ nde wali agali maru bu karuni ale dege howa homole kogoni. I̱ nde dindi agali pigane heneyago Adama igini dege ko. I̱ aba ai̱yalame i̱ha holene hela heneya. Ege dirani i̱naga tingini i̱ ai̱ya tombeha anda halu bereneya.
WIS 7:3 I̱ ai̱ya ibugua i̱ taba hanayagola nde i̱ dindi ogoria waneigini maru bu hearubi dege hene. Wali agali maru bu karu ti buhe̱ laga yadagua dege laru. I̱na bi pigane waneigini gali bibahendeme biagaya ale dege dugu biru.
WIS 7:4 Ai i̱ labolabome huba buwa baya hangu handaya ho haya.
WIS 7:5 Ainde kini bu karu ti bibahende ani dege bini ka. Tinaga hariga mende nawiore ndobe.
WIS 7:6 Ai wali agali bibahendeore holene mo yulene hariga mbiraore hangu wialu homolenebi hariga mbiraore hangu nga.
WIS 7:7 I̱nime handalu hewaria i̱ bame agali bu karu ale dege haruda lo manda bialu i̱na Ngode Datagaliwabehondo bi laruli. Ani larugola ibugua mini gigabi ngiya.
WIS 7:8 Mini gigabi ogoni ibugua timbuni hongohe holenebi kininaga yári baya tara tara karu lolenebi uruni bibahende bolangua hai halu ibu dunini daligaore ka.
WIS 7:9 Yári bayale tara tara ngarumebi ngolomebi mini gigabi wulene ngago bolangua habe nahe nga. Dindini ngolo ngaruni bibahende bame nagalone iba mu bu wiaruni ale wialu siliba bame dindi waru ngaru ale dege nga.
WIS 7:10 Mini gigabi ogonime wali agali tingini hongohebi bayalebi bolangua hene ibu daliga nga. Ibu wá holene maru bolangua hene wá holene timbuni hongoheore mbira ale nga.
WIS 7:11 I̱na mini gigabi mo yu howa mbirale bayale wiaru heba mo yu haru. Ani bialu i̱ mbirale dewa wua howa homogo timbuni mbira haru.
WIS 7:12 Mini gigabi wulene biagome mbirale uruni mo ngiai heneyagola i̱na turu timbuni haru. I̱ abale henedago howa manda nabi henego ainde áyu mini gigabi wulene ibu mbirale bayale uruninaga teneore winiyane hendedo.
WIS 7:13 Mini giga buleneme i̱hondo bayale tara tara wiaru biawai haya. Ani biyago ai mbirale uruni i̱ninaga yu habura bulene nakarulape. I̱na wali agali maru karu lawai hole turu ho kogoni.
WIS 7:14 Mini gigabi wulene ibugua wali agal hondo mbirale bayale talebu miaga ngago tigua biba habe nahe dewaore miaga. Ani biragola wali agali tigua mbirale bayale tara tara mini gigabi wuleneme mo talebu mirago yu haga. Wali agali tigua mbirale bayale uruni mo yu howa uruni baba biabe bialu howa tini Ngode Datagaliwabe baba nenege haga. Ani biaga ngago irane mini gigabi ibugua wali agali biawai harago ibu turu haga howa ani nenege ho haga ka.
WIS 7:15 Ai nde Ngode Datagaliwabe ibunime i̱ lawai hayadagua i̱na ibunihondo bi i̱naga mini baya hanguore tigabi ngagoria pelo haru howa mo tiga bilonaga bi lolebero. Ani bialu bi i̱na loleberogo damene Ngode Datagaliwabe ibunaga hame ngagoria talialu loliya haru helonaga bi lolebero. Ani loleberogo irane ibunime mini gigabi ibu hariga ogoha polene nga lalu mo walia hayagonagabi wali agali galone manda bi hearu mo tiga biyagonagabi ibuhondo bi lolebero.
WIS 7:16 Inanebi inanaga bi laramago bibahendebi Ngode Datagaliwabenaga giha hangu hai ka. Ani bialu mini wulene bibahendebi Ngode Datagaliwabe ibunime haru hai karu bibahende manda bulenebi bibahende ibuni giha nga.
WIS 7:17 Bibahende ale karunaga ngarunagabi ibunime i̱hondo baya hangu lawai haya. Ibunime dindi ibu pigane agua winigo nga lalubi lawai haya. Ani bialu ibunaga manabi ira dene ibunaga manabi puriabu pulo yu ibagabu kagonaga manabi i̱hondo langiai haya.
WIS 7:18 Ibugua iba dalu ibulene horobi gaea bulene horobi dagare bulene horobi horo tara taranaga mana langialu ni tagira ibiragonaga ni paliragonaga manabi langiya. Ani bialu mali mbira mbiranaga manabi horo daganaga manabi gaeanginaga manabi iba dalungi ibiragonaga manabi langiya. Ani bialu yakundinaga manabi hariga ibuni puíbu biaga ngagonaga manabi langiya.
WIS 7:20 Ani bialu mbirale ema bialu piaga bedaru tinaga ibagabu biru haga manabi ti talialu biraga manabi langiya. Ani bialu puriabunaga hongobi agalinaga mini ngagobi ogoale lalu lawai haya. Mbirale mabuha andaho hagabi irabu tagiraha anda ho hagabi uruni bibahendenaga mana wiagobi i̱ lawai haya. Ani bialu irabuha irabu karu aria marasini wabulene bayale ogo lalu lawai haya.
WIS 7:21 Mbirale agalime hendene bu ngarubi agalime de nahendene wia do ho wiaga ngarubi i̱ lawai hai haya.
WIS 7:22 Ainde mini gigabi wulene ibu i̱ lawai haga i̱naga lawai haga kagome i̱na manda dewaore bu kogoni. Mbirale bibahende ibunime wabini ngagome uruni bibahende ibuni manda biai ka. Mini gigabi wulene ibu dinini ale dege mbira ka. Ibu minibi mandabi wáleore wiaihe nga. Ibu mana bayaleore ngago talialu biaga. Ibu ibuni hanguore haga ka. Ibu ale mende naheore. Ani howa ibugua wali agalihondo ibuni mo walia holebi ibuninaga biabe bulene ngagohabi hariga tara tara nga. Ibu dindini wali agali tinginihe kemaru ale ndo ibu dinini ka. Ani bialu ibugua bia ko hene mbira nawi. Ibu bibahendeha piai haga ka. Ibu mo ko holenego mbira nawiore. Ibunaga bi wáleoreni wali agalinaga gubaliniha nogoba haga. Ibu mbirale bayaleru dege hamelaga. Ibugua mbirale ngaru bibahende hondo bolangua hai kagola ibunaga biabe bulene ngago mbiraleme wu pai habe naheore.
WIS 7:23 Ibugua wali agali gubalini halu biamogo biaga. Ibu gi halu duru nale hongo ho haga. Ibu gi nahaga howa ibu bibahendenaga hongo haihe ka. Ibugua bibahende ale deme hendedago mamage hai halu ibugua dinini maru karu kabaneha howa biabe biaga ka. Ibu dinini mini bogabi mandabi karu bibahende bolanguahe daliga howa ibugua dinini maru miniha wále bogabi tíha ko mbira nawi tingini nahe karu ogodagua bidaba lalu haru bamba haga ka.
WIS 7:24 Mini gigabi wulene ibu maru bibahende bolangua hai howa ibu biabe abale bigi biaga. Ibugua mbirale ngaru bibahendeha abaleore anda piai haga.
WIS 7:25 Ibu Ngode Datagaliwabenaga hongome helenego howa ibu wá holene au nahe bayaleore mbira Ngode Datagaliwabenaga wá holene timbuni kagoha howa ibini ka. Ani kagome ai mbirale ko tara tara ngago aria mbira ibuha para holene nakarulapeore ka.
WIS 7:26 Ibu Ngode Datagaliwabeha howa wá hole ibaga ngagonaga manane ale howa wá holene hundia nabiaga ka. Ibu Ngode Datagaliwabenaga biabe biaga ngagobi dara holene irane nawini dara haga ngagobi mo walia haga baya tara iba wa̱i̱ ale ka.
WIS 7:27 Ibugua mbirale bibahende ibunaga hongome biai holebira. Ibugua mbirale bibahende lone gahenge wabu helai habehe ka. Anigo ibu tara ale ho iriari nabiaga. Bambaore howa hama ibaabo henego ibu wali agali tigabi bayaleru baba dege haabo haga. Ani howa ibugua ti maru Anduane Homogonaga bi mana latagi halu mbiwia hagaru mo hela maru Ngode Datagaliwabenaga nenegeru mo hela bini.
WIS 7:28 Ngode Datagaliwabehanda turu hagago wali agalime mini gigabi wulene mana ngago baya hanguore talialu kagohondo turu haga.
WIS 7:29 Mini gigabi wulene ibu bayaleoreni ibu ni yakundirubi bolanguahe ka. Ibu ninaga wáholene kago bolangua hene ka.
WIS 7:30 Ni kago ibu nde nime wá hongoheore ha kago ai alendo halu mbi laragola ni ibu ereba halu aruma holeneme bolangua hagane nga. Anigo ainde mbirale ko ngaru dameneme mini giga bulene bolangua habe naheore.
WIS 8:1 Mini gigabi wulene ibugua biabe hongo howaore bialu ibu dindi ngaru bibahendeha piai haga bialu dindi anda bu kagoria irigi haga biaga. Ani irigi halu mbirale ngaru bibahende mo tiga bigi biaga.
WIS 8:2 I̱na mini gigabi wulene hamelo haru. Abale igiri daliahe hewangi i̱ ibula haru mandagi haabo haru. Ibu i̱naga gubaliniore hene. Agalime wandari bayaore mbira bedago gubalini ho hagadagua i̱na ibu gubalini timbuni ho haru.
WIS 8:3 Ibu Ngode Datagaliwabe howa ibalu mini lene timbuni haya. Ibunaga mini daligaore ngago irane ibu Ngode Datagaliwabela mandagi haabo haga kagome.
WIS 8:4 Mbirale bibahendenaga Anduane Homogo Ngode Datagaliwabehanda ibu gubalini ho haga ka. Mini gigabi ibugua Ngode Datagaliwabenaga biabe bulene ngago bialu ibunila haru mandagi haga ka. Mini gigabi ibugua Ngode Datagaliwabenaga mini ngago damene bibahende manda biai ho kagome libu haru biabe bialu haga ka.
WIS 8:5 Wali agalime dindini wini ngaru dewaore mo mogo bu wu hayagua nde karulape dege. Anigo mini gigabi bayale wu holene ngago ibu baya taraore mbira dindini wini ngaru bolangua howa ngago irane ibunime mbirale ngaru bibahende wabiai hene kagome nga.
WIS 8:6 Wali agalime mbirale ngaru tininaga mandame wabiyagua nde karulape dege. Anigo mini gigabi wulene ngago ibugua agalinaga manda ngaru bolangua haiho ngago irane ibuni wabiai hene ka.
WIS 8:7 Wali agalime ti tigabi holene hamelo heagua nde mana bayale mini gigabi ibugua biagago mitangi bulene nga. Wali agali tigua tininaga mini hamela haru howa mini ngagobi biabe bulene ngagobi baya hangu mo tale bilonaga mini gigabi ibugua ti lawai haga ka. Ani bialu wali agali tigua mana tigabi ngago talialu howa wali agali gi nahe hongo ho hagadagua howa helonaga mini gigabi ibugua dege lawai haga nga. Mana bayale uruni bibahendeme wali agali dege biamogo biaga. Holene uruni aria mbira hangumebi mini gigabi ibugua biamogo biagadagua nabulebira.
WIS 8:8 Wali agalime biabe tara tara bulene taya biyaguabi mini tara tara wulene taya biyaguabi uruni bibahende mini gigabi wulene ibugua biamogo bulebira. Ibugua bambaore bini ngagobi mani bulubadarubi bibahende manda biai ho kagome mini gigabi ibugua ti biamogo bulebira. Ibugua wali agalinaga bi tara tara larago mo tiga buwa mo wála halu bi latagi nahe ngagonaga irane mo walia halu latagi haga ka. Ngode Datagaliwabehanda manane mbira mo walia hole ngagobi agalime nabiagane ale bule ngagobi manda biai halu mbirale bibahende maniore ibulebiragobi manda biaho ka.
WIS 8:9 Ai mini gigabi ibugua ibunaga manda wiago bibahendeme i̱ biamogo bialu i̱ha genda bulenebi mini burugu lolenerubi anda ibirangi i̱ biamogo bulubada lo manda bido. Ani bulebirago manda bialu i̱na ibu gubalini timbuni ho howa ainde ibu i̱ heba mandagi haabo helo hame timbuni lo ko.
WIS 8:10 I̱ninaga mini giga bulene wu hewagome wali agalinaga deni i̱ mini lene timbuni henego kogoni. Heneneore i̱ igiri emene ha kogonigo ainde agali haguane ala hene bu karu tigua i̱naga mini yaraga haga ka.
WIS 8:11 Ai wali agali tigua handalu karia i̱ manani tigatigaore mo tale bialu tigatiga laga henedane hondolebira. Ani hondowa agali haguane bu karu tigua i̱hondo turu timbuni holebira.
WIS 8:12 I̱na bi la nabi kogola wali agali tigua bi nale nimulo hagahaga biaga. Ai i̱na bi larogola tigua baya hangu hale hai ho haga. I̱na bi lu lalu kogola wali agali ti hale ho habe manga nahaga.
WIS 8:13 Mini gigabi wulene ibugua binime i̱naga mini yaraga henego ainde ani wiaho wiaabo holebira. Ai wali agali mani holebiraru tigua i̱naga mini embeda nahe mitangi biaho wiaabo holebira.
WIS 8:14 I̱na dindi tara tara ngaru dewaore haru howa handaya ho kogola wali agali dindi uruniha bu karu i̱naga hongo gibi kogo andaneha hai holebira.
WIS 8:15 Ani kogola wali agali tigua i̱ tinaga kini bayalebi wai biaga agali hongohebi i̱ henedalo hondolebira.
WIS 8:16 Ai i̱ni andaga dai berogola mini gigabime i̱naga bu miniha mo palia holene karula haga. Anidagua biagago irane ibu i̱naga nenegeore kagome i̱ha genda ho holene mbira anda naibaga. I̱ ibu heba mandagi howa i̱ha mo ko nahe haruli. I̱ turu ho haabo haruli.
WIS 8:17 I̱na mbirale uruni i̱naga miniha tombehabi ngelo howa ogodagua laro. Mbirale ibu mini gigabi ngago baba mini mbiraoreho hayagua nde ibuha haabobo bu holene yu holebira.
WIS 8:18 Maru tí nde agali ogoni nenege hayagua ti turubiore ka. Mbirale tinaga biabe bia haga kago ibu mbirale bayale ngaru mo yu holebira. Ani bialu mini gigabi ibuha howa mbirale bayale dewaore tagira ibulebira. Wali agali ibu heba te lalu bedago ti mini leneore holebira. Ani bulene wiago hondowa i̱na mini gigabi bayale ogoni ngola howa i̱nila mandagi holenaga hariga tara tara wiaru taya biru.
WIS 8:19 I̱ waneigini galioreni i̱naga tingini Ngode Datagaliwabehanda ngiya. Ani bialu mana bayale bulene i̱ha ngelalu biya.
WIS 8:20 Ai wahalu i̱ni bayaore ko lolene karulapeda. Ani bialu i̱nime tingini baya tara mbiraha anda piru.
WIS 8:21 Anigo ai i̱nime manda bido. Ainde i̱nime mini gigabi bayale ngago mulenego Ngode Datagaliwabehanda nangiyagua nde mo yulene nakarulapeore. Ai Ngode Datagaliwabehanda i̱hondo mbirale ogoni bameore i̱ mo turu halu ngiyago ai manda ogonime i̱ mo walia kagome i̱naga miniha wáleore kogo mo walia ka. Ani bidago manda bialu i̱naga miniha dege Anduane Homogohondo bi lalu holebero.
WIS 9:1 I̱ mamalirunaga Ngode Datagaliwabebi dara holene irane nawini dara holene Ngode Datagaliwabebi kego í̠naga bi degeme mbirale bibahende ngaru wabiai hariya.
WIS 9:2 Í̠ninaga mini gigabi ngegome mbirale ngaru bibahende handaya ho howa haru hai helonaga wali agali wabiriya.
WIS 9:3 Ani bialu tigua mini gigabi wulenebi mini bayale wulenebi wu howa mbira ngaru bibahende handaya ho howa mo tale bialu helonaga wabiriya.
WIS 9:4 Ngode Datagaliwabe-o mini gigabi wulene í̠ heba mandagi ka. Ani bialu libu haru mandagi mbirale ngaru handaya ho kebigo ainde mini gigabi ogoni i̱ ngibe. I̱ í̠naga waneigini bu karuha hatago hole anda ibulino naibule nalabe.
WIS 9:5 I̱ í̠naga garabaya biabe ale biaga kogoni ndobe. I̱ wali í̠naga biabe biaga biago igini ko. Ani howa i̱ agali hongo naheore kogo dindi ogoria tigimandi hangu holebero. I̱na tigabiore lolenaga mana tigabi ngadagua lolene manda nabiore kogoni.
WIS 9:6 Ai wali agali mbira ibu mana bayale ngago bibahende taluwa bialu howa ibuha mini bayalebi mini gigabi wulenebi í̠ha howa ibini nawi heagua nde wali agalibi ogoni ibu habane nabulene mbira holebira.
WIS 9:7 Ngode Datagaliwabe-o í̠na i í̠naga wali agalinaga kini holiya dabo helalu í̠ waneigini uruni ti mana larago hale howa mo tale biaga holiya dabo helede.
WIS 9:8 I̱naga hari nene biagoria í̠ anda buliyabi loma bu delaga dabu mbira Yarusalemeni bia holiyabi ani bibe lalu i̱hondo langiri. Yarusaleme í̠ni biragane tano timbuni ngagola anda kago ibu dahuliya andanaga manane ka. I̱nime Yarusaleme bambaore howa manda manda bu winiya.
WIS 9:9 Mini gigabi wulene ibu í̠la haabo haga. Bamba í̠na dindi harila wabiringi ibu í̠la mandagi hene. Ani howa ibugua í̠ hame ledego manda biai halu mbirale í̠naga mana lo ngago talialu bialu holene tigabi wiagobi manda biai hene.
WIS 9:10 Mini gigabi wulene í̠nila dahuliya andagaha kago ibu ibilabe. Ibugua mbirale í̠na hamelo kego damene bibahende i̱ lawai helo ibu í̠naga wá timbuni taraore holene ngego wahalu dalialu ibilabe.
WIS 9:11 Ibuha manda bayale bialu mbirale bibahendenaga mini wále bayale ngago ainde ibugua mbirale bibahende i̱na bule manda bidogo damenenaga mini baya hangu haru hai helo. Ani bialu ibunaga hongome i̱ haru helo.
WIS 9:12 Anidagua biragola i̱naga biabe berogo damene bibahende í̠naga deni bayale hai helo ani bibe. I̱na wali agali í̠naga karunaga dabolene tigabi lolene ngadagua lalu tinaga bi larago bibahende baya hangu mo tale buliya. Ani bialu i̱ni kini bayale holiyabi i̱ aba Debidinaga henge muliyabi ibugua haru helo ibi labe.
WIS 9:13 Ainde mbiralime Ngode Datagaliwabenaga mini mandala ngago baya hangu manda biai habehebe. Ndo manda biai habe naheore.
WIS 9:14 Nahabehedago irane agalinaga mini bayaleore ndo howa mbirale bulebirago damene bibahende biako hai haga.
WIS 9:15 Anidagua biagago irane wali agalinaga tingini dindi kagome abale mo ko hai hagaya. Tingini ogonime wali agalinaga holene ngagoha genda mo ngialu mini abale puguagaya.
WIS 9:16 Ai iname manda bialu mbirale dindini ngaru damene bibahendenaga manda bulenego ndelaheda lo manda beremali. Ani bialu mbirale inanaga deni kaware ngaru baya hangu handa tiga naberemali. Anidagua beremaligo ainde mbirale wiado hene dahuliya andaga ngaru baya hangu manda bibehe ai kabe.
WIS 9:17 Ngode Datagaliwabe-o í̠naga hame ngego mbiralime manda nabiore ndobe. Ainde í̠nime í̠naga mini gigabi wulene wali agalihondo mialu í̠naga dinini dindini dalilalu miriyagua nde wali agalime baya hangu manda bibehe ka.
WIS 9:18 Anidagua dege dindini wali agali bu karume talialu helonaga hariga baya hangu mo tiga biriya. Í̠na mbirale í̠ni hamelo keru wali agali lawai haregola mini gigabi wulene ibugua ti biamogo biaga, lene.
WIS 10:1 Agali pigane Ngode Datagaliwabehanda wabu helayago ibu mini gigabime ibu haru hene. Ani bialu ibugua inanaga mamali ogoni ibu nde ibuni hangu heangi mini gigabi ibu libu haru mandagi hene. Ani howa Adama ibu koha pilayangi ibugua lone mo heya hene.
WIS 10:2 Ani mo heya howa dindini ngarubi karubi bibahende Adama ibugua handaya ho howa haru hai helo ibuhondo hongo mini.
WIS 10:3 Anigo ainde agali ko mbira ona heneya. Ibu keba taraore haga mbira heneya. Ani howa ibugua mana bayalebi mini gigabi wulenebi talialu nabiaga heneya. Ibu ibunime mo ko heneya. Anidagua biaga howa ibu hamene heago homelo bo wahaya.
WIS 10:4 Ko timbuni Keni ibugua binigome iba li timbunime dindi namu lai hene. Anigo mini gigabi ibugua dindi lone mo bayale hene. Ibugua agali mbira ibunaga iba sibiha bereaore ira tigini mbira ibame yu ibagabu haradagua bialu iba sibi ogoni ibame yu ibagabu heagola mini gigabi wulene ogonime baya hangu handaya ho hene.
WIS 10:5 Ko tara tara wiagome wali agali bibahendeore mo ko hai heneore hai heagola ti lulu yu ibaga bialu heangi mini gigabi ibugua Abarahama mana tigabi wiago bialu haga heago hondowa ibu gubalini howa dabene. Abarahama ibugua ibu igini kago gubalini ho heaguabi harugo lowa ibuha ko mbira para nahe Ngode Datagaliwabenaga deni ko mbira ibuha para nahe bayale helonaga mini gigabi wulene ibugua Abarahama biamogo bini.
WIS 10:6 Lode ibu mana bayale tigabi wiago hangu biaabo haga heagola mini gigabi ibugua Lodela mandagi howa biamogo bialu henego irane Lode ibu wali agali ko biaga hearu heba mandagi nahomelo ani bini. Tano timbuni duria wiagoria ira dene hariha howa ibira hayagola Lode ibu ibida pene.
WIS 10:7 Bamba howa hama ibinigo áyu kegoniha wali agali uruninaga mana ko binidago mo walia holene tara tara wiaabo kagoni ndobe. Dindi tinaga winidago áyu wiaabo kagoria dindiha kaba ngaruha ira haguaru datagi halu haabo ka. Ira lini do naganealerume lini da nde dagagoyu baya hangu boga bialu bayale nolene nadagaya. Ani bialu ege to̱le̱ timbuni ibi kui mbira kago ogoni ibu Lode one ibugua Ngode Datagaliwabehanda bi layago mini mbiraore nawiyagonaga manane henego ka.
WIS 10:8 Wali agali tano timbuni duria uruniha haga bu henedaru tigua mini bayale gigabi wualene ogoni galone ndoda lowa mo nagalone ho hene. Ani heagome tinaga mini ndibulo wahene howa tiha mbirale bayale wiaru mbira wá naleore heneya. Ainde wali agalime mbirale tara tara irame dene ngaru de hondowa tigua wali agali urunime mana lehe bia ko halu henedaru mitangi budai bulebira. Ani bialu mana ko timbuniore wali agali tano timbuni duria uruniha hagadarume binidaruni embeda naholebira.
WIS 10:9 Mini gigabi ibugua wali agaliha ti mo ko holene mbira ibuligonaga ibugua hame ledago bialu helo biamogo biaga ka.
WIS 10:10 Yagaba ibu agali mana tigabi biaga howa ibu hameneme keba timbuniore haya handala ibu ibida pene. Mini gigabi wuleneme Yagaba mana tigabi bilo biamogo bini. Ibugua dahuliya andaga mo walia halu bini. Dahuliya andaga ogoni Ngode Datagaliwabe ibu andaga baya buruguleore ka. Mini gigabi wulene ibugua Yagabahondo mbirale Ngode Datagaliwabenaga ngago lawai haya. Ibu biabe bilo biamogo bini. Ani biamogo biyagola ibugua biabe bayale dewa bini. Ibugua biabe erekuibi bialu hayagome lini bayale maru dene.
WIS 10:11 Agali tara maru hearume Yagabanaga mbirale wiaru dimagoli ho howa mo page bule manda bialu hearia mini gigabi wulene Yagabala haru mandagi haga heagome biamogo biyagola ibu mbirale bayale dewaore wia tago haga bini.
WIS 10:12 Yagaba waitigi kagome bolino mini gigabi ibugua Yagaba handaya ho hene. Waitigirume Yagaba hariga poragoha bo waholino ibugua baya hangu mamage haga hene. Mini gigabi ibugua Yagaba biamogo biyagola Yagabahanda mbiraga mbirangi Ngode Datagaliwabenaga dahuliyali mbirala gungu timbuni bialu Yagoba ibugua dahuliyali bope hene. Mbiraga dahuliyalila gungu timbuni biyadagoniha mini gigabi wulene ibugua Yagoba lawai henedago ogo. Mbirali Ngode Datagaliwabenaga hame ledago taluwa bialu haga kago ibu hongo timbuniore agali wai biaga pari wayali kagonaga hongo kago bolanguahe ka, lalu lawai hene.
WIS 10:13 Bamba agali tigabiore mbira mini Yosebe hene. Ibu baba hamene ho hearume ibu agali tara ibiyaru minu mialu yolo taguini. Ani binigoyu mini bayale gigabi ibugua Yosebe yu wa nahene. Ibugua Yosebehanda mana ko bulino Yosebela mandagi howa biamogo bialu hene. Tigua Yosebe garabaya andaha heleagolabi mini bayale gigabi ibu libu haru haabo hene.
WIS 10:14 Ibugua Yosebe wahalu pu napeore. Nape libu haru howa ibugua Yosebe Iyibi dindiha gabumanenaga agali haguane helo mo helene. Ani bialu waitigi maru abale Yosebe bope halu hayaru Yosebehanda lone handaya ho howa haru helo hongo mini. Ibugua agali maru tigua bi ke̱ howa Yosebehanda ko biya laga hearu ke̱ henedalo panaga hendelo ibugua mo panaho ngelene. Ani bialu ibugua Yosebenaga mini timbuni mini lene wiaabo helo mo hela hene.
WIS 10:15 Ngode Datagaliwabehanda Isaraele wali agali ibuninaga wali agaliore helo dabo helene. Ani heagola ainde Iyibi wali agali tigua Isaraele bope howa mo ko halu hearia mini bayale gigabi ibugua Isaraele haru dai bialu helene.
WIS 10:16 Mini gigabi ibu agali Ngode Datagaliwabenaga biabe bia haga Mosese hearia dalialu ibini. Mini gigabi ibu agali kini ko hearunaga deni gi nahe hongo howa heyu hene. Ani hongo ho howa ibugua agalime nabiagane aleru dewa bialu hene.
WIS 10:17 Mini gigabi ibugua Ngode Datagaliwabenaga wali agali bu hearume biabe erekuibiore bialu heago hondowa yolo bayale tihondo mini. Tihondo ibugua hariga bayaleore mo walia hene. Horombe ibuni hari beraliba ale howa ti bu dambi ho haga hene. Mbiraga yakundi timbuni heagobi howa wá hadali halu ti hariga mo walia haga bialu hene.
WIS 10:18 Ani bialu ibugua tinaga hariga iba uli timbuni bereago hanuni bope hene. Ani bialu ibugua ti iba solowara mini Iba Daramabi bereago domaede halu pelo biamogo bini.
WIS 10:19 Ani bialu waitigi ibiyagola iba yaribu timbuni bialu li ibiyagome waitigi uruni bo namu lai hene. Ani biyagola waitigi agali biaru iba nalu homai helene. Ani bialu Iyibi waitigi uruninaga tingini ibame iba angeni yaragaho ngelama pene.
WIS 10:20 Wali agali bayale hearume wali agali ko biaga hearunaga mbirale dabudabu tara tara bayale wiaru ti karulai hene. Isaraele wali agali tigua Ngode Datagaliwabe í̠hondo í̠naga mini yaraga halu í̠hondo iba gana lalu haya. Ti bibahendeme í̠hondo turu howa iba gana lagimbu bialu lai haya. I̱naga hongome ti mo wialu pelarigonaga ani biya.
WIS 10:21 Ai mini gigabi bayale wulene ibugua wali agali bi nalaga bu hearunaga hége mo tiga bialu lone bi lelaya. Ani bialu waneigini galirume bi layaru mo beregedalu galone lene helaya.
WIS 11:1 Mini gigabi ibu Ngode Datagaliwabenaga bi mana latagi haga Mosese heba mandagi haabo haya. Mosesenaga giha mini gigabi ibu howa Isaraelenaga biabe biyago bayale biaabo halu hene.
WIS 11:2 Isaraele ti dindi ko yobi iba dalu nabiaga wali agali nahaga wiagoha ibaga bialu hene. Ani bialu hariga mbira nawiore wiagoha balai anda bu haga bima pene.
WIS 11:3 Tinaga waitigi baba wai bialu hongo ho hene. Ani bialu waitigi hearu baba wai bialu bo he̱la dai bigi bini.
WIS 11:4 Isaraele wali agali ti iba noa halu dendebe lebola hayagola tigua í̠hondo iba ngi lalu olayagola í̠na ti iba nelo migi biri. Iba ogoni ege to̱le̱ hongohe timbuni heagoha howa gudulatagi hayagola ti nalu hene.
WIS 11:5 Ibame tinaga waitigi bai hene. Ai horo kongi ibame dege Isaraele tini biamogo bini.
WIS 11:6 Bamba Isaraele waitigi tigua mana mbira wabialu mana ogonime, Isaraele waneigini bu karu bibahendeore homelai holene nga, lene. Ai tigua mana ko bialu karu biadai biaga Ngode Datagaliwabe í̠na iba timbuni pialu haabo haga peago mo ko harigola iba biago daramabi haya. Ani bialu ai ti dindi ko iba dalu naibaga wiagoha heangi í̠naga wali agali tinaga dendebe lebola halu iba noa howa tungulo handalu haya. Í̠nime waitigi genda mo mirigo Isaraele tiguabi nde genda ogoaleda lo manda bilonaga biriya. Anidagua helo howa ai Isaraele ti homaramagonida lo manda bu hearia nde ti iba dewaore nelo miriya.
WIS 11:9 Waneigini abame ti waneigini tigatiga mana lalu biagadagua í̠na í̠naga wali agaliru bahandariya. Ainde kinime ibu waitigi baba keba halu homelo bo wahagadagua wali agali ko hearu daba bagi hariya.
WIS 11:10 Wali agali ko karu kinime ti baba keba halu dabowa deni helagadagua í̠na nde wali agali tigua bialu heago bahandalu mo tale biriya.
WIS 11:11 Isaraele ti Iyibi wali agali baba mandagi Iyibi dindiha heangi í̠na Iyibi wali agalihondo tandaga timbuni mo miriya. Ani bialu Isaraele ti Iyibi wahalu puwa kaundiaha heangi nde Iyibi wali agalihondo genda timbuni lone mo miriya.
WIS 11:12 Genda timbunime Iyibi wali agali halu ki mo ko hayiya. Tiha mo ko holene genda timbuni halu ki anda ibiyago labo mitangi bialu howa tigua dugu timbuni biya. Agali timuheme tandaga howa dugu biagadaguaore biya.
WIS 11:13 Anidagua binigo genda timbuni Iyibi tigua yu hayadagoni irane Isaraele biamogo bulenaga ani ibilene. Iyibi tigua mbirale o biyadagoni hale howa tigua manda bialu biabe ogoni Anduane Homogohanda ibunaga biabe dege biya lolebira.
WIS 11:14 Mosese ibu bamba emene galini tigua mo bagi howa nu mbiraha ngelowa mo panaho ngelene. Ai Mosese ibu anda halu agali heagola Iyibi wali agalime mege bialu ibu erembira mialu hene. Mani howa mbirale tara tara tagira ibiyagola ibunaga biabe timbuni taraore yu heago hondowa ti mogolo hene. Ani hondowa ai Isaraele wali agalinaga Ngode Datagaliwabehanda mana kirani hagayane hendene. Ngode Datagaliwabehanda Isaraele wali agali iba dewaore mialu Iyibi wali agali namiyane hendene.
WIS 11:15 Ani biyago hondowa wali agali ko uruni tigua mini ko dewaore wialu hene. Tininaga mini ko ogonime mo luluya hayagola tigua puya mini nawi wiagohondobi ema bialu piaga maru berearuhondobi bi pupu wialu hene. Ani bialu hearia í̠na ema bialu piaga tara tara biru hearu ibilalu ti mo ko hariya.
WIS 11:16 Í̠na anidagua bialu mbirale ema bialu piaga tinime bi pupu wiaga biarume tini mo ko holene yu ibaga lalu Iyibi wali agali tini mo walia hariya.
WIS 11:17 Ngode Datagaliwabe í̠naga hongo timbuniore nge. Í̠ninaga hongome dindi ogo wabiriya. Ani bialu mbirale wia ko hearu í̠nime baya hangu mo dabadabaho ngelariya. Ani bialu biango dudu tara tarabi gabua laionobi wali agali mo ko halu bo wahai helo ibilabehe kegoni.
WIS 11:18 Í̠na ema bialu piaga gabua taraoreru wabulene hongo karulapeore ke. Ani bialu maru nde tinaga ngui harigaha ira datagi haluhebi wabibehe ke. Ani bialu ema bialu piaga maru nde bi dalimuore hongo tara howa ladaga haragola ira hagua ne harigaha timbuni datagi helalu maru nde tinaga deha howa ira hungu datagi hagaru wabibehe karulapeore ke.
WIS 11:19 Ai ema bialu piagane urunibi dindini hayagua nde urunime wali agali abale balu tongolo milolebira. Ani bialu wali agalime urunibi de handayagua ti gi timbuni howa mogo lalu abale tungulo mu wulebira.
WIS 11:20 Anidagua bulene í̠ni karulape kegonigo í̠na ema bialu piaga ko urunialego wali agali bo wahai helonaga naibilabe. Í̠naga dabolene tigabi ngegoria haru polene hamelo heagua nde í̠na bame í̠naga ne harigaha pu laregome wali agali ko bu karu bame odopebe bialu homai habehe ke. Anigo ainde í̠nime mbirale bibahende dewaore helobi daga lowaore manda buwa holene karulape ngadagua helobi wabiriya.
WIS 11:21 Ngode Datagaliwabe-o í̠naga hongo bibahendengi walia haabo habehe kegoni. Mbiralime í̠naga hongo mo bagi habe naheore.
WIS 11:22 Í̠naga deni dindini ngago ibu emeneore dabiabi iba mu alebi mbiraga pibiya ibira haragome egerebagi handalu keria dadimba dindini ngaligobibi nga.
WIS 11:23 Anigo ainde í̠nime mbirale bibahende wabiai habehe kegome wali agali bibahende dara holene irane nawi ngagoria howa dara hai haga ke. Í̠na mbirali ko biaga kago abale bo waholene ngago nabe kegoni irane ti mini beregedelo henge mialu handaya ho haga ke.
WIS 11:24 Í̠na dindini karubi ngarubi bibahende gubalini hai ho haga ke. Mbirale bibahende í̠nime wabini bu ngaru aria mbirago ko ngada lo manda nabi kegoni. Ani manda bidego irane mbirale bibahende wabialu howa í̠na ko í̠ni manga holene ale mbira nawabini.
WIS 11:25 Í̠na mbirale mbirago helo hame nalariyagua nde ogoni ibu bayale naholebira. Mbirale mbira dindini helo wa nabiriyagua ogoni ibu dindini bame anda ho habe nahe ka.
WIS 11:26 Anduane Homogo-o mbirale bibahende karubi ngarubi í̠naga dege ngaru bibahende uruni í̠nime gubalini hai howa handaya ho haga ke.
WIS 12:1 Í̠naga dinini haabobo haga kago ibu bibahendeha ho to̱lai ka.
WIS 12:2 Ani kagome í̠ mbirali ko birago hendore tiga biaga ke. Anduane Homogo-o wali agalime ko mbira biyagua tinime handalu tiga bulene ngadagua mo tiga bilo í̠na mini mo wia haga ke. Í̠na tihondo bi hongo howa lamialu ko bialu kemigo wahai halu í̠ninaga biamogo biaga ngego manda bialu yutiga bilo ani biaga ke.
WIS 12:3 Í̠na wali agali hameigini tara bamba í̠naga dindi ngegoria hearuhondo turu nahe hene. Tigua mana koore wiaru dewa biaabo halu tomia bialu dama togo wialu mbirale gime wabini wiaruhondo bi pupu wialu hene.
WIS 12:5 Tigua dara naheore howa tinaga waneigini homelo balu wali agalinaga tingini daramarubi nalu hene.
WIS 12:6 Wali agali dindi ogoniha haga hearume mana ko bulenaga bi pupu wiaga howa ai aba ai̱ya hearume tinaga waneigini galiru homelo baga hene. Ani bialu haga heago hondowa í̠nime inanaga mamaliruhondo lamialu, Wali agali dindi ogoniha hene karu homelo bo wahai halimu, lariya.
WIS 12:7 Ani bialu dindi ogoni í̠ni gubalini timbuni howa dindi maru ngaru gubalini anidagua nahe ke. Ani howa í̠naga wali agali ti dindi bayale ogoniha helo hame lede.
WIS 12:8 Anigo dindi ogobi í̠nime gubalini ho hariyago irane wali agali dindi ogoria hene hearubi nde í̠nime wabini dege heagola biriya. Ainde í̠na ema bialu piaga berearu ala bamba halu wali agali waitigi bu hearu hendore mbira balu homelaga bule pudaba lowa í̠naga mamage agali hearu mani pelariya.
WIS 12:9 Agali mana ko biaga karu bo wahai helo agali bayale biaga karu biamogo biaga í̠naga hongo gibi nge. Í̠na bi hongohe mbira laregomebi mbirale ema bialu piaga biru karu ibilalubi waitigi bu karu abaleore homai helo bo wahai holene karulape ke.
WIS 12:10 Anigo í̠na ogonidagua nabiaga. Tigua bu mini beregedelonaga hendore dege mo tandaga haga biaga ke. Heneneore ti wali agali ko biaga waneigini howa ti wene waneigini gali heangi ko biawai hene kago í̠ manda bide. Ani bialu tigua mini beregedabe nahe kagobi í̠ manda bu ke.
WIS 12:11 Ani bialu kago irane bambaore howa wali agali bibahende í̠naga deni nahe pu ereba hai hene kagome ani biaga ka. Heneneore tinime ko biyago karulape pani nelo nami hari. Í̠na ti pani nelo nami harigo irane í̠na agali mbira gi howa ndo í̠na ti dara ho howa pani nami wahariya.
WIS 12:12 Ngode Datagaliwabe-o í̠hondo o beregoni agile berebe labehe ai kabe. Ani bialu í̠naga bi mo wahabehe mbirali ai kabe. Ani bialu wali agali bibahende í̠nime wabini bu karu bibahende bo wahai hariyagua ko birida lalu í̠hondo laba lolene mbira ai kabe. Ani bialu wali agali ko biaga bu karunaga bi lamogo bia hole mbirali í̠naga deni ai ibu holebirabe.
WIS 12:13 Mbiralime urunidagua bibe nahego irane mbirale bibahende í̠nime handaya ho howa haru hai haga ke. Ani bialu ogoale biru ogoale laru lalu í̠na lamulene bi pupu wiaga wiarualebi mbira naheore.
WIS 12:14 Ani bialu ína wali agali bo wahai hariyagua agali haguane mbiramebi kini mbiramebi í̠na ko birida lalu bi ladai bulene mbira naheore.
WIS 12:15 Í̠ tigabiore howa í̠na mbirale ngaru mana tigabi handaya ho holene ngadagua handaya ho haga ke. Í̠na mbirali ko nabiaga kago bame laede halu ko birida nalaga ke.
WIS 12:16 Anidago irane mana tigabi í̠na biaga ngegome í̠naga hongo gibi ngego mo walia haga nga. Í̠ni tinaga Anduane Homogo howa wali agali bibahendehondo dara hai haga ke.
WIS 12:17 Wali agalime í̠ hongo naheda lo manda bu kangi í̠naga hongo ngego mo walia haga ke. Mbirali í̠naga hongo ngego manda bu howa mine haga karu í̠na ti pani nelo mialu minu baga kegoyu tinime mine halu í̠ erembira ngiaga ka.
WIS 12:18 Hongo damene bibahende í̠ninaga giha yu howa ina wali agali pani ngulene ngangi ngialu minu baga ke. Anigo ina baba daba ki lolene ngangi ina wali agali dara holene irane nawini dara haga kegoni. Í̠na ina wali agali mana tigabi ngagoria howa hendore haru haga ke.
WIS 12:19 Í̠na mana ogonidagua birigome mbirali tigabi kago ibugua wali agali tigabi bu karu mini turuho haga lalu biawai hari. Í̠naga waneigini tigua ko bialu hayaru erembira mialu í̠ni keria dai bilo hondo haga kegonaga tigua í̠hondo mini mbiraore hongohe wua ka.
WIS 12:20 Í̠na keba abale tungu nale howabi í̠naga wali agali waitigi karu abale nabagabi kegoni. Heneneore ko tinime biyagonaga tiniore homolene nga. Anigo ainde mana ko tinime bialu henedaru yu wahai helo henge miaga ke.
WIS 12:21 Í̠naga waneigini tinaga mamaliru baba habo nalolene bi lo winiyago ngelowabi tihondo mbirale bayaleru nguliya lalu bi lo winiyago ngelowabi uruni ani ngela lowa í̠naga waneiginirume ko biyaore lalu mo ko howaore dabariya.
WIS 12:22 Heneneore í̠nime ina pani ngiaore biri. Anigo ina baba waitigi karuhondo pani nelo dewaore daosini dege pihalu (10,000) agima mo miaga ke. Í̠na ogonidagua birigo irane ina wali agalime mo tiga bialu larago hale halu howa í̠naga mana dara holene irane nawini howa dara haga kego manda bu howa hale halu mo tale buluma̱ya biri. Ai ko iname bidemangi tigua ina mo tiga bilo anidagua pu howa nde tigua ina dara helo malia ho holeberema.
WIS 12:23 Ani bialu í̠na maru lulu yu howa mana ko wiagoha talima pialu hearu tandaga nelo migi biriya. Anidagua biriyago irane tinime mbirale ema bialu piaga ko hearuhondo bi pupu wima pialu hearia tandaga nelo mo miriya. Ainde mbirale ema bialu piaga urunime ti tandaga nelo mo miya.
WIS 12:24 Tigua bi henene lolenenaga hariga ngago wahai halu puwa mbirale ema bialu piaga ko bu hearuhondo bi pupu wima piya. Ti waneigini gali mini nawiore hagagobi howa lulu yu ibaga bu ka.
WIS 12:25 Í̠naga deni wali agali uruni mini bayale nawiore waneigini ale kagola í̠na ti baba daba ki bialu pani nelo mo meregobi nde mo ko holeneore ndo bame wali agali tara tara bu karume de hondowa oba halu mege bilo manda buwa mo miaga ke.
WIS 12:26 Pigane ti mini beregedelonaga genda emene hangu mo mirili. Anidagua beregola tigua í̠naga dara howa biamogo bulene ngago manda nabi kagome ai tiha í̠naga manani tigatigaore mo tale bulene ngadagua mo tale bulebere.
WIS 12:27 Mbirale ema bialu piaga uruniale tinaga bi pupu wiaga hearume tinihondo tandaga taraore nelo miya. Anidagua biyagome tinaga miniha mo wála hayagola abale howa Ngode Datagaliwabe tigua manda bulene manga ho heneyago hendene. Anidagua bialu tiha mo ko holene timbuniore mo yu anda ibini.
WIS 13:1 Wali agali Ngode Datagaliwabe manda nabi karu ti luluore ka. Wali agali urunibi karume mbirale bayale tini deni kaware ngaru hondolebirago ainde Ngode Datagaliwabe ibuni haore biarua lalu taya buwa handa walia naholebira. Biabe bu wini ngago baya hangu bigibege lalu handalu howa biabe ogoni biaga kago ibuni baya hangu taya bialu handa walia nahaga ka.
WIS 13:2 Tigua mitangi bialu howa ira dene dedagobi puriabu pu laragobi iba solowara timbuni bedagobi yakundi karubi iba li timbuni poragobi ni kagobi ege kagobi ti timbuni howa tigua dindi ogo handaya ho ka lo manda biaga ka.
WIS 13:3 Wali agalime mbirale urunihondo turu timbuniore howa tigua mbirale uruni bi pupu wiagane ale ka lo manda bu haga ka. Anigo Anduane Homogo mbirale uruni wabiaga kago ibuni mbirale ibunime wabinidaru bolangua hene daligaore ka. Ani bialu Anduane Homogo ibuni mbirale bayale damene ngaruni abaore ka.
WIS 13:4 Wali agalime mbirale uruninaga hongo ngago hondowa mogo timbuni lalu biabe hongohe birago de hondowa mogo timbuni laga ka. Anigo ainde mbirale uruni wabini aba ibuni kago ibu mbirale uruni bolangua hene howa ibu hongo gibiorehe ka.
WIS 13:5 Wali agalime mbirale baya taraorebi timbuniorebi mbira ti kagoria ngaria hondowa ai mbirale baya ogoni aba baya taraore halu mbirale timbuni ngaru aba timbuniore harua lo manda bulene nga.
WIS 13:6 Anigo ai tinaga miniha wá nale heagua nde tigua henemane manda buwa bero lalu bialu hene ndo dege holebira. Tigua Ngode Datagaliwabe ibuni taya bule bialu karia pu luluya howa bulebira.
WIS 13:7 Anidagua bulebirago irane Ngode Datagaliwabehanda mbirale bayale wabiyago damene bibahende tinaga deni panaga bu payabu wiai kagola tigua Ngode Datagaliwabe ibuni taya bialu hene holebira. Mbirale ibugua wabini uruni baya taraoreru bu ngagola tinaga bu mini uruniha ha holebira.
WIS 13:8 Anigo ainde ti luluyu kago daraba.
WIS 13:9 Tigua mbirale bu ngarunaga mana ogodagua biaga agua piaga agua haga lalu manda timbuni uruninaga wu ka. Anigo ainde mbirale bayale uruni aba kago ibuni abale handa walia nahaga kago irane agimeda.
WIS 13:10 Wali agali darabiru tigua manda bialu mbirale holene nayi ngarume ti biamogo bulebirabe toba howa urunialehondo mini mbiraore wu karu dege daraba. Tigua mbirale agali tininaga gime wabini ngaruhondo bi pupu wiaga ka. Agali mbira mandabi kagome ema bialu piaga biru ngarunaga ngolo silibarume wabu wini ngagohondo bi pupu wialu haga ka. Ani bialu ege to̱le̱ bamba agalime podo wini ngagohondo bi pupu wialu haga ka.
WIS 13:11 Agali anda biaga kagome biabe biagago baya hangu manda bulene nga. Ibugua ira mbira dibalu ongoba bu wiaga. Ani buwa ogonime wali agali biamogo bulene ale bayale mbira gime wabiaga.
WIS 13:12 Ani wabialu howa ira ogoninaga duni haraneru tomo hirule ira delowa ibuni turu ho biraga.
WIS 13:13 Anigo ira bogo wahene harene ngarume biabe bulene mbira nawi. Ira ogoni ibu yiyoleni howa de habane bere bada. Anidagua bini mbira wiagua nde agali biabe biaga biago ibu biruwa ira ko galone nabibehe ogoni tigi haga buwa tigini urunime wali agalinaga bigiyaru
WIS 13:14 ema bialu piagarunaga bigiyaru wabiagaya. Ani wabuwa maruhayagi bayale ndo ngaru daramabi lo budambi haga.
WIS 13:15 Ani biai howa ogoni ibu mo ngelolenaga tamu bayale mbira anda hai kagoria wiapara ho ngelowa mbirale irame wabiyago mo yalu puwa pume dariba howa mo ngelaga.
WIS 13:16 Mbirale irame wabini ogoni puriabume mo ibira haragola ibira howa gingirula hole bulino baya hanguore waya pume daba haga bu ngelaga. Baya hangu mo dariba haga biagadago irane ira dibalu bame agalime wabini wuwa ibuni pelemialu hongo naholobada manda bialu baya hangu agalime dege mo daba haga buwa helaga.
WIS 13:17 Ani helowa agali ogoni ibuni taga nahe howa mbirale ibunime wabu wiyagohondo bi pupu wialu ibu one baya hangu handaya ho habe lalu ibu waneiginibi ibunaga mbirale ngarubi baya hangu handaya ho habe lalu bi lamiaga.
WIS 13:18 Ibugua mbirale irame wabu wiyagome ibuni tingini mo hongo habe lalu bi pupu wiagagoyu mbirale irame wabini ogoni ibuninaga hongo nawi. Agali biago ibu holene ngibe lalu bi pupu wiagagoyu irame wabini ogoni ibuniha holene mbira naheore. Agali biago ibugua mbirale ogonihondo ibu biamogo bia lalu bi pupu wiaga. Anigo irame wabini ogoni ibuni biabe mbira bibe naheore ka. Agali biago ibugua irame wabini ogonihondo ibu baya hangu ibagabu holiya biamogo bibe lalu bi lagagoyu irame wabini ogoni ibaga bialu napiaga.
WIS 13:19 Agali biago ibugua irame wabu wiyagohondo bi pupu wialu lamialu ibunaga biyinaya biabe bialu kago biamogo bialubi biabe maru ibugua bialu karubi biamogo bibe lalu bi lagago ainde mbirale gime wabini ibuninaga ema bialu hongo holene mbira nawiore ndobe.
WIS 14:1 Agali mbira ibugua iba li timbuniore wiyagola iba taluha anda pole hene. Ani howa pigane ira tigini mbira wiagohondo ibu bayale holiya biamogo bia lalu bi lamini. Anigo ai ira tigini ogoni ibu hongo nahe. Ibunaga hongo iba sibi agali ogoni ibu yalu polebiragobi ndo nga.
WIS 14:2 Agali mbira ibu yolo mulenaga iba sibi wabulenenaga bebani wabu wini. Ani bu wiagola agali manda bayalewi heago ibugua iba talu wabini.
WIS 14:3 Anigo ainde Aba-o í̠na iba sibi ibu iba hanuni hariga ogodagua pelo lalu baya hanguore handaya ho haga ke.
WIS 14:4 Agali manda nabi heaguabi ibugua iba sibi baya hangu yalu polebirago irane í̠na ibu biamogo beregola yalu polebira.
WIS 14:5 Ainde mbirale bibahende í̠naga mini gigabi ibugua wabini ngago damene bibahendeme tininaga biabe bulene ngago bigi bigi bialu helo hamelo ke. Ani manda bidegome wali agali tigua gi nahe bameore ira mbalapayabi ngagoria biralu iba solowara timbuni bedagoria pialu mo ko halu iba nai nahe bayale ange mendehayagi anda piaga.
WIS 14:6 Bamba bambaore agali luoreni timbu gibiore heneya. Ti mine halu balagala halu heagome tini homai halu ereba hai henego mbiraore hangu homa nabi bayale heneya. Ibu hangu bayale howa wali agali hameigini tara tara mani henerunaga mamali ho aribia heneya. Ibu iba sibi í̠nime handaya ho heneyagoha biruyu ibagabu heneya.
WIS 14:7 Ngode Datagaliwabe-o í̠na iba sibi ogoni agalime irame wabiyago mo bayale harigola ai iba sibi ogonime biamogo biyagola mana tigabi bulene ibu bolangua heneya.
WIS 14:8 Heneneore mbiralime bi pupu wulenaga irame bigiya wabu wiyagua nde ibugua gime wabu wiyago mbiralime mo ko harangi ibuni heba mo ko holene wulebira. Ibuni heba mo ko holene wulebirago irane agali ogoni ibugua gime wabinihondo bi pupu wiaga ogoni wabu wiyagome ibu mo ko holebira. Ai mbirale abale mo ko halu goba haga ngago bi pupu wiaga bayale lalu kemigome ibubi mo ko holebira.
WIS 14:9 Ngode Datagaliwabehanda wali agali ko biaga karubi tigua biabe ko bu ngarubi hame nalagaore ka.
WIS 14:10 Ani howa ibugua wali agali uruni heba tinaga biabe ko bini ngarubi bibahende bo haealabaga bu wahai holebira.
WIS 14:11 Anidagua bialu Ngode Datagaliwabe ibuni ibalu wali agali Ngode Datagaliwabe yutiga nabiaga bu karu heba tinaga bi pupu wiaga ngaru heba bo haealabaga biai holebira. Heneneore Ngode Datagaliwabehanda mbirale bibahende ngaru wabiai henegoyu ainde wali agali tigua mbirale uruni mo ko hai halu mo nagalone halu ka. Mbirale urunime wali agalinaga mini mo luluya haga nga. Mbirale uruni wali agalime ibaha wena minule wena nu wiagadagua ngago urunime wali agali lulu karu minai holebira.
WIS 14:12 Agalime bi pupu wulenaga irame wabiyangi Ngode Datagaliwabe erembira mulene mana heyini. Wali agali tiniha mo ko holenebi ogoningi dege anda íbu wini.
WIS 14:13 Bambaore mbirale bi pupu wule gime wabini uruni ale nawini. Ani bialu manibi ani wiaabo naholebira.
WIS 14:14 Wali agali tinaga mine hagane maname mbirale bi pupu wiaga uruni dindi ogoria wabu winiya. Heneneore mbirale bi pupu wiaga gime wabini uruni abaleore ereba hai holebira.
WIS 14:15 Horo mbirungi agali mbira heneyago ibu igini abaleore homo tungulo miyiya. Ani homayagola igiri aba biagome ibu iginiore dara timbuni howa igiri ogoninaga mbirale mbira gime wabiyiya. Ani wabuwa ibu igini abe dege homayagohondo bi pupu wiyiya. Ani buwa ibu ilili bulene manabi bi pupu wulene manabi tara tara wabuwa ibu waneigini aguaneru mani holobadaru tigua taluwa bialu helo wabu wini.
WIS 14:16 Maniore howa mana ko ogoni pu hongo halu mo mana helene.
WIS 14:17 Wali agalime gime wabini uruni ale ngagohondo bi pupu wilimu lalu agali haguane bu hearume bi hongo howa laga hene. Ai tinaga agali haguane dindi kaundiaha kagola wali agali tigua dengui handalu ibunaga mini yaraga hole ibabe nahe kaundiaha haragola tigua gime wabini agali ogoni handalehe wabu wiaga. Ani wabu ngelowa tigua agali haguane ogonihondo bi laradagua ibunaga bigiya ogonihondo bi lalu mini yaraga holenaga gime wabini ogoninaga mini yaraga halu hagaya. Agali haguane tigua ogonidagua bilimu lowa hongo haabo haga winiya.
WIS 14:18 Agali gime uruni wabiaga karu tigua nde ogoni tinaga gi biyinaya winidagola tiguabi hongo howa wabu bila howa yolo migi biagaya. Ai tinaga biyinaya manda bialu wabiragola ogonime bi pupu wiagane mana ogoni pu timbu hene. Anidagua biragome wali agali maru tinaga agali haguane kago manda nabi bu karume bi pupu wiagane mana ogoni talialu haga hene.
WIS 14:19 Agali deme hondolene uruniale wabiaga kago ibugua ibunaga agali haguane kagonaga wabero lowa ibunaga agali haguane kagome hondowa turu helonaga bayaleore wabiaga.
WIS 14:20 Anigo áyu wali agali bibahende deme hondolene baya uruni turu hai ho ka. Bamba howa tigua tinaga agali haguanerunaga mini yaraga haga winigo ai áyu uruni tinaga bi pupu wulene nga.
WIS 14:21 Anidagua biragome wali agali mohondo halu genda tara tara mo miaga nga. Ani bialu agali haguane bu karunaga bi laragome wali agali mo luluya halu ege to̱le̱ ngarubi ira tigini ngarubi tinaga bi pupu wulene urunihondo lolene nga lagane ka. Tigua ogonidagua binidago bamba Ngode Datagaliwabehanda tihondo lamialu mbirale mbira bi pupu wule gime nawabibe lenego mo wahene.
WIS 14:22 Wali agalinaga miniha mo luluya hai heagola tigua Ngode Datagaliwabe ibuni ai kabe manda nabiore ka. Mani howa ti pu luluyaore halu tinaga lulu mana ogonime tininaga minibi holenebi mo libilaba lalu mo luluya dege henego ka. Tinaga embone gengedai henego howa tigua lalu, Mana ko bulene ngagome holene bayale awadaga mo yu anda ibaga, lalu ka.
WIS 14:23 Tigua bi pupu wiaga maru ngaruha tinaga waneigini homelo bagane ka. Ani bialu tigua bi pupu tara tara lalu iba gana ko tagabi tara tara ngarubi mana ko tara nahendene ale tara ngarubi bialu haga ka.
WIS 14:24 Ani bialu howa tininaga dabubini mana ngagobi holene bayale ngarubi mitangi nahaga ka. Ani howa agalime agali mende kago mohondo halu ohowa homelo bo wahaga ka. Agali ko biaga urunime agali mendeali one bedago ti kayu bialu haru paluwa wali ogoni ibu agalini kago mo taga haga ka.
WIS 14:25 Wali agali uruni ti daluha mana ko tara tara wu to̱leda. Tigua agali bameore homelo bo wahaga bialu mbirale mendealinaga ngaru mo page bialu maru karu mohondo haga bialu haga ka. Tigua mana bayale bialu holene ngago wahalu habo nalolene bi lowini ngaru pugualu piai haya. Tigua agali maru karu wai bilo mo bia halu mbirale mbira bule lalu bi lo wiyago nabi wahalu piaga ka.
WIS 14:26 Tigua agali bayale karu gililo yu pialu agali mende ibugua biabe bayale bini ngago mo embeda haga ka. Wali agali tigua mana bayale bini ngaru geme hengedo wahai haga ka. Agali dege dege mana ko tagabi ngaru bialu howa dabubini mana ngago puguaga ka. Dabubini mana pugualu puwa wali agali kayu bima ibaga dege biaga ka.
WIS 14:27 Mbirale bi pupu wule gime wabini ngagohondo bi pupu wiagane mana ngagome ko damene ngago mo yu anda ibagane hariga ogoni nga. Mana ogonialeme ko tara tara ngaru mo anda halu mana ogoni aleme wali agali ko mana ko uruni talima piaga karu biba helalu ereba helaga nga.
WIS 14:28 Wali agali mbirale bi pupu wule gime wabini urunihondo bi pupu wiaga karu ti lulu taraore yu ibaga bu haga ka. Tigua mbiwia harama lowa ke̱ dewa halu mana nabulene lehe ngaru bialu haga ka. Ani bialu howa tigua mbirale mbira buleore lalu bi lo wiyagua nde bule layago henene bule ndo nabi wahalu piaga ka.
WIS 14:29 Tigua mbirale bi pupu wule gime wabini uruniha holene nahe ema nabiaga bameore ngarume tiha genda nangulubada lo manda bialu tigua mbirale mbira buleore lalu gi dolalu lo wirago nabi wahalu piaga ka.
WIS 14:30 Anigo tigua Ngode Datagaliwabe kago manda nabi tinaga miniha mo luluya hene kago ainde horo mbirungi tiha genda anda ibulebira. Tigua mbirale gime wabini dama mitangi bialu bi pupu wiaga ngaruhondo bi pupu wialu howa mana tigabi ngago bame dege nga lo manda biaga. Ani manda buwa tigua wali agali karu mo hondo howa mbirale mbira buleore lalu gi dolalu ke̱ howa lo wulene karulape lo manda biaga.
WIS 14:31 Agali uruni tigua mbirale dama mitangi bialu bi pupu wule gime wabini uruninaga minini howa henene ore bulego laro lowa gi do lalu bi lo wiaga. Mbirale bi pupu wiaga urunime tigua mana ko biragonaga pani namiagago ainde mo ko holene ngagome tiha ngola haabo holebira. Ani bulene ngago irane wali agali mana ko biaga bu karu tiha pani nelo mulene tigabi ngadaguaore miaga ngagome ani mulebira.
WIS 15:1 Anigo í̠ inanaga Ngode Datagaliwabeore kegoni howa í̠naga miniha mo palia holene karulo halu mana tigabiore ngago talialu haga ke. Í̠naga miniha keba abale tungulope nahaga ke. Í̠na dara holeneme mbirale bibahende karubi ngarubi haru howa handaya ho hai haga ke.
WIS 15:2 Í̠naga hongo holene ina manda bidamagome ina mana ko birimayaguabi ina í̠naga wali agaliore kema. Anigo ina nde í̠ninaga dabeneore holoma̱ya daba bagiho heledego ainde iname mana ko bulene hame naledema.
WIS 15:3 Mbirali baya hangu í̠niore manda biai ho kago ibu bayale tigabiore ka. Mbirali í̠naga hongo timbuniore gibiorebi ngego hondowa manda bu kago ibuha haabobo holene yu ka.
WIS 15:4 Ainde mbirale agali tinaga manda wiadagua gime wabu wini bu ngaruni aria mbiragome ina wali agali kemaru haru pubagi naholebira Agali ira dibu bogo wahaga bialu gime wabini ngarumebi deme hondolene yári tara tara hiru wini ngarumebi uruni aria mbiragome Ngode Datagaliwabe helalu ina haru halu kaundiaha pubagi naholebiraore.
WIS 15:5 Wali agali lulu mini nawi karume mbirale irame wabinibi baya urunibi de hondowa tinaga bu miniha mo kiaula haragola tigua mbirali ema nabiaga holene nahe uruniale ngagohondo bi pupu wialu haga ka.
WIS 15:6 Wali agalime mbirale uruniale wabiyaguabi deme hondolene urunialego hame layaguabi urunihondo bi pupu wiyaguabi wali agali urunidagua biaga kago ti mana ko ngago turu haga ka. Anidagua biaga karu ti mani howa tininaga mana ko ngubi uruni yu tiga bu hayagonaga pani tandaga koore ngago nalu holebira.
WIS 15:7 Agali be dindime wabiaga kago ibugua dindi waru gedaore ngago dugu mbera bigi buwa baya hanguore mo beregeda beregeda bialu ibuninaga gime beledi tara tarabi be tara tarabi wabu wiaga. Maru biabe bayale ngago bulenaga wabu wialu maru biabe damene bulene ngaru bule wabu wiaga. Ibu be uruni wabialu howa dindi mbiraore ogoni degeme wabialu wabiagane manabi mbiraore biagadagua dege bialu wabiaga. Agali be wabiaga kago ibunime be mbirago ogoale bule lalu mo daba bagi haga biaga.
WIS 15:8 Ani bialu agali ogoni ibugua dindi mbiraore ogoni aria dege duguwa mbirale dama mitangi bialu bi pupu wiaga wabiaga. Agali ogoni ibuninaga horo bame mohole biaga. Ainde agali ogoni ibuni dindi agali howa ibuni áyu dege dindiha howa ibinigo ibunaga horo mohole biaga ka. Ani bialu dindini lu nahe abale homalu ibunaga tingini lone dindi ho dai bulebira. Ibunaga holene bame dano howa mo yu hayago lone miaga kagohondo mia dai bulebira.
WIS 15:9 Agali ogoni ibunaga dindini holene emene tigi mbira hangu halu abale homolene ngago ainde ibugua uruni mitangi nabiaga ka. Ibu agali mini lene holenaga ibugua agali maru ngolo silibarume mbirale wabiaga karu baba bolangua haga haga bulene manda biaga. Ibugua agali maru boronosime mbirale tara tara wabiaga karubi dege holene manda biaga ka. Ai mbirale ibugua wabiniru handalu keria ngolo siliba boronosirume wabini handalehe wabu ngagoyu ai henene ani wabini ndo ke̱ howa dindi hangume wabu wiaga.
WIS 15:10 Agali ogoninaga gubalini be abalu ale howa ibunaga yu tiga mini mbiraore wulene dindi himu bame ngago ale howa ibunaga holene kagonaga yolobi nagalone daga nawini halu bida. Ibu yolo bulenego dindime be wabule yolo biagagobi nakarulape dege ibu nagalone ka.
WIS 15:11 Ainde ibuni wabiaga Ngode Datagaliwabe kago emeneorebi manda mbira nabiore ka. Ani bialu ibunaga holene Ngode Datagaliwabehanda ibunaga buhe̱ pulaanda hayagola ibuha holene mo karula hayagobi Datagliwabehanda agali ema bialu piaga helo wabu helayagobi manda nabiore ka.
WIS 15:12 Tigua manda bialu karia inanaga holene yu kemago mo gini bia holene alebi mbirale mbira yolo mulene alebi mbirago kemabe tobaho ka. Tigua mitangi bialu hariga tara tara ngaru ko bayaleyaguabi tanabi taya bialu yolo mulene dege manda biaga ka.
WIS 15:13 Ani howa ibugua dindi duguwa mbirale dama mitangi bialu bi pupu wiagaru wabialu be abale pambu lagane ngaruale wabiaga ka. Agali mana uruniale biaga karu tigua mbirale uruni mana ko berema lo manda bu howa dege bialu haga.
WIS 15:14 Wali agali dewalime mana lehe luluale mana ngaru bialu hagago ainde waitigime ibalu í̠naga wali agali bu hearu bibahende bope hai hayago ti luluore haya. Ti mini nawi howa biya. Ainde waneigininaga mini ngagome tinaga mini wu bolangua howa ngabada.
WIS 15:15 Anigo irane tigua deme hondolene wabu ngaru bibahende Ngode Datagaliwabe dege ka lo manda bidagome nakarulape. Ainde gime wabini uruninaga de kagome mbirale karu ngaru handa nabiaga ka. Tinaga ngui kago ai nguiha buhe̱ namiaga ka. Tinaga hale heledago ai bi larago hale habe nahe ka. Tinaga gi hondone kagome ema bialu mbirale ela halu ogoaleda labe nahe ka. Wabini uruni tinaga ge kagome ge ogoni howa ibaga bialu pobe nahe ka.
WIS 15:16 Agali mbirale wabiaga kago ibunaga holene bame dano ho kago howa dege ibugua wali agali Ngode Datagaliwabe yutiga nabiaga karunaga bi pupu wiagane nabiagaru wabiaga ka. Anigo mbiralime bi pupu wulene mbira ibunialeore wabibe nahe ka.
WIS 15:17 Wali agali bibahendeore tinaga homolene horo mbira ngelowa dege ka. Ai mbirale mana ko bialu wabini ngaru bibahende tinaga ema bialu holene naheore nga. Agali tiniha buhe̱ lalu holenehe howa tini mbirale bi pupu wiaga ngaru bolanguahe daliga ka.
WIS 15:18 Ngode Datagaliwabe-o í̠naga wali agalinaga waitigi karume, ema bialu piaga ko tara tara bu karuhondo bi pupu wialu haga ka. Ema bialu piaga maru tiha mini mbira nawioregome ti emene bayale lowa ema bialu piaga tigua bi pupu wiaga uruni koorehondo bi pupu wiaga ka.
WIS 15:19 Ani bialu ema bialu piaga wali agalinaga bi pupu wiaga uruni wali agalime de handalu bayaledago hondowa bi pupu wibehe ndo. Ai Ngode Datagaliwabehanda mbirale ibuni wabiniruni bibahendehondo bi bayale lamialu howa ani buwa ema bialu piaga ko uruni tihondo mo turu halu bi lamia nabi berelo wahene.
WIS 16:1 Anidagua biyagome wali agali uruni tiha pani karulape mialu ema bialu piaga ko tara tara berearume pani mialu tandaga tara tara karulape mo mini.
WIS 16:2 Anigo Ngode Datagaliwabe-o í̠na wali agali í̠naga bu hearume mana ogoniale dege bialu hayaruhondo pani nelo namiriya. Ani nabi howa í̠naga bu miniha ti emene dambi ho howa ti tomo nelo ti heagoha egaru ibilariya. Tiha gari bilo kago biba helonaga tomo dendebiore miriya.
WIS 16:3 Anigo wali agali í̠ni mitangi nahaga bu hearuhondo tomo dendebiore wiaguabi tomo garibi timbuni ho howa tomo nolenego mbira hame nalego miriya. Tigua hame nalego irane ti tomo nelonaga ema bialu piaga ko berearu tihondo miriya. Anigo í̠naga wali agali ti garibilo howa tigimandi hangu helowa tomo bayaleore abale miriya.
WIS 16:4 Heneneore í̠naga waitigi hearu pani nelo mialu hina gari timbuni mo miriya. Anigo í̠ninaga wali agali tihondo waitigi bu karu mana ogodagua bialu pani nelo miaga ko lalu mo walia hariya.
WIS 16:5 Ainde í̠naga wali agali bu heagoha nogombi ko wiaru mo ibilariya. Puya uruni ko gabuaore howa pedere bialu heneya. Ani bialu howa í̠naga wali agali bu hearu hayalu homelaga biyiya. Anigo í̠naga miniha keba holene lu wiaabo naheneya.
WIS 16:6 Í̠naga wali agali tigua í̠ninaga manaore nga manda bilonaga pani emene tigimandi hanguni nelo mo miriya. Ani muwa mani ti mo karulape helo boronosime nogombi ale wabu ngelariya.
WIS 16:7 Mbirali nogombime hayaragola abale puwa nogombi ale wabu wiyago de handaya hayagua ogoni ibu homa nabi bayale haga biniya. Anigo ti biamogo binidagoni agalime nogombi wabu wiyadagome biamogo bini ndo. Í̠nime wali agali bibahende biamogo biriya.
WIS 16:8 Anidagua bialu í̠naga waitigi bu hearuhondo í̠na mbirale ko tara tara ibirago mo wahai holene karulapeore ko lalu ti mo walia hariya.
WIS 16:9 Pagayabi bunguna tawalina bedarubi ibalu waitigi wali agali biaru balu homelai helarigola ti biamogo bulene marasini mbira nawiore hene. Heneneore pagaya tawalina bedarubi ibilalu wali agali bo wahai harigo henemane tinaga ko biyagonaga pani mialu ibilariya.
WIS 16:10 Anigo nogombi biaru tigua í̠naga wali agaliru mo koore halu haya nabini. Í̠nime í̠naga wali agali dara howa biamogo bialu mo dabi haga biriya.
WIS 16:11 Í̠nime tihondo bi lamigi birigo mo mitangi bia holenaga nogombime hayilariya. Ani bialu í̠ha dara holene ngago tigua embeda nolenaga abale mo karulape helariya.
WIS 16:12 Ai ti mo bayale helayadagoni ira yuni irabuha hearu ariabi marasini ngarumebi ti mo dabi hene ndo. Anduane Homogo í̠naga bime wali agali bibahende mo dabi hene.
WIS 16:13 Wali agalinaga holenebi homolenebi í̠nime dege yu kegoni. Wali agali homeneru dalu humbirini andagaha hai hearia ti mo wialu haru dai biai hariya.
WIS 16:14 Agali ko mbira kagome mendeali kago homelo bo waholene karulape dege bolebirago ainde ibuninaga holene mo yu dai bulenego nakarulapeore. Ani bialu agali ogoninaga dinini humbirini andagaha pu kago haru dai bulene nakarulape ka.
WIS 16:15 Wali agali mbirame í̠ helalu ibida pobe naheore kago
WIS 16:16 irane wali agali ko biaga bu karu tigua í̠ baya hangu handa nabi kagome bida. Ani kago manda bialu í̠na tihondo í̠naga hongo timbuni ngego mo walia halu tihondo tandaga holene timbuni mo miaga ke. Í̠na dalu dindiguni timbunimebi puriabu heba ira dene ibilalubi ti minu baga ke. Ani bialu irame wali agali ko biaga uruni bo wahai haga ke.
WIS 16:17 Ani bialu nahendene ale tara mbira tagira ibini. Ibame ira ba hundia nahene. Ibani ira hongo howa hundiabe nahe dayago irane hongo holene dindini wiaru damene bibahendeme wali agali bayale dindini bu hearu biamogo biyagola ira ibu ibani dene.
WIS 16:18 Horo mbiru howa ira ibugua ema bialu piaga wiaru Ngode Datagaliwabehanda wali agali ko hearu bo wahai hole ibilayaru bolino ibunaga hongo emene halu hundiale hene. Ani biyagola wali agali ko biaga bu hearu tigua mbirale uruni biyago hondowa tigua mitangi bialu Ngode Datagaliwabehanda tihondo ko birida lalu ti minu baore biyada lo manda bu hene.
WIS 16:19 Ani bialu mbirungi ira biago iba biradambi heago berelowa ira hongoheore dalu hene. Ani bialu ira ogonime wali agali ko hearunaga mabu hengearu bibahende dai hene.
WIS 16:20 Wali agali ko biaga bu hearu genda emene ndo yu hayadagua í̠naga wali agali ti nayi dege hene. Ína ti tomo nelonaga dahuliyalinaga tomo wiago í̠naga wali agali ti nelo mo miriya. Í̠na dahuliya andaga tawe mberedi horo bibahendengi ibilalu haabo harigo ai mberedi dawa manda manda binigo nelo hangu mope hariliya. Mberedi ogoni dendebiroredagola wali agali tigua hame timbuniore laga hene.
WIS 16:21 Tomo ogoni í̠ waneiginiru ti nelo miriyagome í̠na ti gubalini timbuniore ho ko lalu tini mo walia hariya. Ai mberedi ogoni wali agali bibahendeore nai halu no karulapelo manda bialu mirigola tigua nalu hearia dendego taraore wali agali bibahendeoreme dende hai halu nene.
WIS 16:22 Irame tomo ogoni dabe naheore halu dindiguni kerane hongohe ngago delaregola iba halu piagagobi winiya. Anigo irame waitigi wali agali mabuha tomo hengearu bibahende dai hayaya. Anidagua biyago í̠naga wali agali ti hondowa tigua manda bialu ira ogonime tinaga tomo mo ko halu da nabulubada lo manda bini.
WIS 16:23 Í̠na wali agali tigabi hearu ti tomo nolene milo manda bialu ira abale hongohe dayagobi ndo emene do dai bilariya.
WIS 16:24 Í̠na hongo tara tara holene dindini mo hela harigola bibahendeme í̠naga hame ngego taliai hagaya. Ai í̠naga hongo dindini wiyagome wali agali mana ko biaga karu pani nelo mialu bo wahaga biagaya. Ani bialu wali agali maru í̠naga hongo ngago yutiga bu kagohondo tinaga yutiga bu kago mo hongo holenaga í̠naga hongo ibu emene ibirahalu gedaore hagaya.
WIS 16:25 Anidagua dege horo ogoningi í̠naga hongo bibahende tara tarani iriari bialu í̠naga wali agaliru í̠ni olalu karuhondo biamogo bule ogodagua biruli lalu mo walia haga biriya.
WIS 16:26 Ani bialu í̠na í̠ waneigini hearu gubalini ho howa í̠na tihondo tomo mabuha hengene kagome ti mo hongo naholebira. Í̠naga bime dege wali agali í̠naga biamogo biaga ngego yutiga bu kago mo hongo haga lalu í̠naga wali agali mo walia halu tihondo lawai halu biriya.
WIS 16:27 Ai tomo maru irame nade wiaru nime daba hayagola do gedaore halu iba hayiya.
WIS 16:28 Anidagua biyadagome wali agalihondo ogodagua lawai hariya. Ni tagira naibidaore ti abale heyalu í̠nihondo ka̱i̱ ala lolene nga. Ani bialu gao naledaore í̠nihondo bi ala lolene nga lalu tihondo lawai hariya.
WIS 16:29 Wali agalime Ngode Datagaliwabehanda ti biamogo biaga ka lowa mini mbiraore wu howa ainde tigua ibunihondo ka̱i̱ nalayagua nde tinaga yutiga emene bu kago dindi guni ni daba haragola iba halu piagadagua ereba holebira lalu mo walia haya.
WIS 17:1 Í̠naga godi laga mana ngego tigabiore ngegoyu ainde í̠naga mini ogobiore nga lalu lo wála holenego ndelaheore nga. Ani ngagome wali agali tigua í̠naga mini ngego baya hangu manda nabi howa tini pu luluya haga biya.
WIS 17:2 Wali agali ko biaga ko hearume mitangi bialu í̠naga wali agali garabaya hai heledemagoni lo manda biyagoyu ainde mbinaga aruma holene lo wiaho wiyagome tini minu yaniaho wiyagola garabaya haabo haya. Ani heagola mbirale ngaru bibahende handaya ho haabo haga Ngode Datagaliwabe ibugua wali agali uruni ti tini andaga tamuha garabaya heagola ibu mini dege dindi nahe haya.
WIS 17:3 Agali mana ko biaga karume mitangi bialu tiha ko do kago mbiralime handa nabi wia do kagoni lo manda biaga. Anidagua biagago irane marume tinaga ko ogoni embeda halu wahayago ai nahendeda lo manda biaga. Anigo ai áyu howa ti mogolalu luluyu ibaga bu haga ka. Mbirale tara tara aruma biagoha ibiyago hondowa gi timbuniore haya.
WIS 17:4 Tigua tamu piagone arumaorehe wiagohabi birado hayagoyu ai nakarulapeore haya. Ani bialu mbirale tara tara wiaruha kilikulu lagalaga biyagola gi timbuni hene. Ani heagola ai dama tara tara dengui koherume ti talima pene.
WIS 17:5 Ani biyagola wali agali urunime hale hedo yulenenaga ira hongohe mbira nadaya. Yakundi mbiraga wá timbuni haga heagome mbiraga koore ogoningi wali agali uruni wá nahami̱ya.
WIS 17:6 Ira mbiraore dege taraore dearia hendene. Ira ogoni wali agali mbirame bo delene ndoya. Ai tigua mitangi bialu mbirale ko uruni emaga hendedemabe be bame miniha dege mbirale ko tara tara uruni tagira ibaruabe lo manda bini. Ani bialu howa tininaga deme heneneore handayago ogoni gibi tara nahendene aleyagola tini mogo lowa duru lalu hene.
WIS 17:7 Agali marume mendealinaga de mo luluya howa nahendene ale tara tara biaga hearubi heba tigua mendeali mo hondo howa nabiaganeale biatingi hagadarubi mo ereba hai haya. Bambaore howa tinaga manda tara tara wiarunaga bi nagalone lagimbu bialu henego ainde tinaga manda tara tara uruni nagaloneore hayagola tini taga timbuni ho hene.
WIS 17:8 Bamba abale howa tigua gi holene ngago mo wahai halu wali agalinaga lulu mini ngaru karulapeore mo wahaiore holeberema lalu henego áyu ogoningi tini gi timbuni howa luluyu ibaga bini.
WIS 17:9 Mbirale mbira ti mo gi holene ale mbira nawigoyu tigua mbirale handayaru bibahendehondo mogo dege lalu hene. Mbirale ema bialu piaga berearu pugu biyago hondowa mogo dege lalu hene. Ai puyame bi layuago hole howa ti mogo dege lene.
WIS 17:10 Ti gioreme homalu hene. Ti mo gi holene mbirale mbira nawigoyu tinaga de muguore lalu gime homalu hene.
WIS 17:11 Wali agali tigua mana ko tinime bialu hayagonaga pani nolene wiagola ti gi timbuni ho hene. Maru tiha mo ko holene taraore ibulene wiayuagola tinaga bu miniha genda timbuniore yu hene.
WIS 17:12 Maru gi timbuniore hayaru ti mini tigabi nawi mo luluya haiore haya.
WIS 17:13 Wali agalime mini kira wu halu tini biamogo bibe nahe howa ti gi timbuniore halu holebirago irane tinime manda bialu karia ti mo gi hagane ngago irane agibe agilemeore mo gi harabe manda nabi howa tigua gi timbuniore haga.
WIS 17:14 Ani biagago ai mbiraga ko ogoningi wali agali ti aruma timbuni hayago gi hai howa u baya hangu napale hene. Anigo mbiraga ogoningi aruma henedagoni ibunaga hongome ndo mo ko hene. Aruma ogoni ibu homeneru dalu humbirini andagaha howa ibinigo ainde ibuninaga hongo nawi dege ibini.
WIS 17:15 Dama ko tara tara bu hearume ti bo taliatogo lai heneya. Anidagua biyagola ti gi timbuni halu ti u baya hangu palia ndo bame homene wiradagua bima peneya. Gi timbuniore nabiagagobi biyagome bibahende minai hayagola ani biniya.
WIS 17:16 Ani biyagola wali agali bibahende gi timbuni ogonime minai henego dindini odopepe bu wima peneya.
WIS 17:17 Wali agali uruni aria maru mabu anduane heneyaguabi nogo sibiru hinalu haga heneyaguabi mabuha biabe biaga heneyaguabi gi timbuni biagome ti mbirago wanahe bibahendeore minai henego irane arumanaga garabaya hai heleagome ani bini.
WIS 17:18 Wali agali bibahendeore gime homa handai hene. Tigua puriabume pu layuago hale howabi egame ira timbuni heago magane daligaha biruwa bi layuagolabi iba piyagome ue layuago hale howabi ege to̱le̱me ibira halu kulu nduga layuago hale howabi tigua gi timbuniore halu hene. Ani bialu ema bialu piaga maru birado howa giligele layago hale howabi nogo biango timbuni hearume bi hongo howa gi̱ga̱u̱ layagola egeandaha howa bi dodone ibayuago hale howabi gi timbuniore hene.
WIS 17:20 Dindi bibahendeha wá timbuni heagola wali agali bibahende tininaga biabe biala hene wiyadagoha bialu hai hene.
WIS 17:21 Anigo aruma timbunime wali agali ko uruni bu dambi ho wiaabo hene. Aruma ogoni homanaga aruma ti ibilo maliaho kagonaga manane wini. Aruma ogoni genda timbuni tinaga payani padago manane nga. Anigo mini burugu timbuni tininaga ko biyagonaga ngagome mbiraga aruma ogoninaga genda bolangua haya.
WIS 18:1 Anigo í̠naga wali agali ira hungume hariga mo walia hariya. Í̠naga wali agalime bi layuago tinaga waitigime hale henego ainde deme nahendene. Í̠naga wali agali ti tandaga nane heago hondowa waitigi biaru ti dimagoli ho hene.
WIS 18:2 Í̠naga wali agali tigua waitigi biarume ko bialu haga wiagonaga pani badai nabiyagonaga waitigi uruni tigua í̠naga wali agali ka̱i̱ lene. Ani bialu tigua í̠naga wali agali hale halu mana ko tigua bialu harimago mitangi nabilimu lene.
WIS 18:3 Í̠naga wali agalihondo wáholene timbuniore mbira miriya. Ani bialu wá timbuni ogonime wali agali uruni ti hariga ala napene manda nabi wiagoha ibugua hariga mo walia haga bima bamba hayiya. Wá holene ogoni ibu ira hungu hongohe timbuni mbira binigo ogonime wali agali tini tingini da nabini.
WIS 18:4 Anigo waitigi biaru ti heagoha wá nahende arumaha haabo hene. Ti arumanaga garabayaha haabo henego irane tigua í̠ waneigini abale garabaya helayagonaga helene. Ai í̠naga waneigini tigua í̠naga mana ngago wali agali bibahendehondo lamiai holebira. Mana ogoni ibu ani wiaabobo bialu wali agali tihondo wá holene hale miagane holebira.
WIS 18:5 Tinaga waneigini bu karu bo wahai hami̱ya lalu waitigi bu hearu tigua bi lo wiya. Tigua waneigini mbira homelo lowa nu mbiraha honowa ibu homelo panaga mo panaho ngeleneya. Anigo igiri gali ogoni ibu homa nabi bayale winiya. Ani binigo manda bialu pani í̠na tinaga waneigini dewaore bo wahai hariya. Iba li timbuniore ibilalu wali agali ko uruni bo wahaiore hariya.
WIS 18:6 Mbiraga ogoni horo mbiru tagira ibulebira lalu ina mamaliruhondo lamiriya. Í̠na tihondo lamialu lalu, Mbirale ogoale buleore, lalu bi lo werego bulubada lowa ti mini dunubia ho helobi ti hongo ho helobi lamiriya.
WIS 18:7 Ainde í̠naga waitigiru bo wahai halu wali agali tigabi karu biamogo buleberego í̠naga wali agali ti manda bu howa mini mbiraore wu haya.
WIS 18:8 Inanaga waitigi hearu homelo bo hilo wahai howa anidagua birigome inanaga mini mo yaraga halu ina í̠naga wali agaliore holoma̱ya dabo helariya.
WIS 18:9 Wali bayale igini tigabi hearu tigua ohalu wali agali nahaga ngagoha puwa í̠nihondo lomabu nginiya. Ai bibahendeme buleore lowa bi lo mbira halu tigua í̠naga mana lowini ngago baya hangu talialu bule lowa bi lo mbira halu í̠naga wali agali ti turu ho holene horongibi genda yu holene horongibi mo ngoai hami̱ya lalu bi lo winiya. Ani bialu tigua í̠naga mini yaraga halu inanaga mamalirume iba gana bamba lawai heneyago lalu hene.
WIS 18:10 Anigo ai tinaga waitigi biaru homo togo layago wali agali bibahende hale hai hene. Ai tinaga waneigini homayagonaga dara howa kiabu dugu timbuni bigibigi bialu hene.
WIS 18:11 Agali haguane bu hearu tibi nde genda tinaga biabe biahaga hearu yu heagobi dege mandagi yu hene. Ani bialu wali agali damene bu hearu waneigini homayadagua kini ibu igini mbiraore heagobi homa dege bini.
WIS 18:12 Anidagua bialu waneigini dewaore aba ai̱ya bibahendenaga waneigini homaiore hene. Abaleore aube tobane buwa aba ai̱ya tinaga waneigini gubaliniore haga hearu horo ogoningi dege homai heagola homa yu hora holene mbira nahene.
WIS 18:13 Bamba pigane howa wali agali uruni tigua tinaga agali maru halaga biaga gamugamu biagabi bu hearuhondo mini hana ho howa í̠naga bi mo wahaya. Ai mani ti igini wahene damene hearu homai hayagola tigua manda bialu í̠naga wali agali bu karu ti Ngode Datagaliwabe waneiginiore heneda lo handaya.
WIS 18:14 Giligele emene mbira naleore wiangi abaleore mbi timbulo mina hene.
WIS 18:15 Ani binigo í̠naga bi bibahende hongo haiheore howa í̠naga kini biragane dagia dahuliya andaga yu wahalu dalini. Dindi mbira í̠na mo ko hai hole birigoria dalini. Ibu mamage haga agali ale howa ibugua wali agali pani mule ibini.
WIS 18:16 Ibugua í̠naga hame leadagua tiga tigaore talialu í̠naga bi ayu tibu ne gadeleore ngaligobi hene. Ibu dindini heyu hene. Ibu agali luniore howa dahuliya andaga elaho hene. Ibugua mbirale bibahende wiaru bo wahai hayagola mbirale homayarunaga tinginime dindi bibahende to̱latagi haiore hene.
WIS 18:17 Anigo abaleore emaga kome wali agali mo talola halu gi timbuniore buleneme wali agali minai hene.
WIS 18:18 Bibahendeha wali agali dindini odope halu homo wiradagua bima pene. Ani bialu o biyadagoninaga tene ogoale biya lalu hene. Tigua manda bialu ti homolene nga lo manda binigo irane
WIS 18:19 tigua emaga ko hendenego ai emaga ogoniha mbirale biyarunaga galone mo manda bia hayagola ai ti homoligo irane aginaga tigua tandaga ogoni nalu harimada lo manda bini.
WIS 18:20 Wali agali bayale tigabi bu hearubi dindi ko iba dalu naibaga wiagoha hemiria homaga biyagome tihabi nde homanaga genda anda íbu dege biya. Anigo í̠naga miniha keba ho holene lu wiaabo nahene.
WIS 18:21 Agali mini tigabi mbira ibugua wali agalime olayagola biamogo bule abale heyini. Ibuni tinaga loma binigo mo miaga agali hene. Ani howa wali agalinaga minini howa ibugua tinaga í̠hondo bi tara tara layaru bibahende mo loma bialu í̠hondo ibilene. Ibugua ira hagua nga bilo í̠hondo lomabu delalu howa wali agalinaga ko ngaru domo wahabe lalu bi lene. Ibugua í̠naga miniha tandaga ho hearu gi nahe howa warago ko wiaru mo wahai halu ibuni í̠naga biabe bia haga agaliore henego mo walia haya.
WIS 18:22 Ibugua í̠naga miniha tandaga holene bolangua hayago ibuninaga hongome ndo. Ani bialu wai biagane aleme ndo bolangua haya. Ibugua í̠nihondo bi lolene hongome bolangua haya. Ibugua í̠hondo bi lalu, bamba ina mamaliruhondo bi hongo howa lo wirigobi habo nalolene bi lo wirigobi mitangi bibe, laya.
WIS 18:23 Wali agali dewaore homayarunaga tingini ona bu wiai heneya. Ani biyagola agali tigabi ogoni ibugua í̠naga wali agaliru biamogo bule ibiniya. Í̠naga miniha tandaga holene wigome wali agali homa nabi hearubi bo wahai habeheyane ibugua mo wahole ibiniya.
WIS 18:24 Ibugua aga luore mbira biagimbu bulene karulalu ibiniyago aga ogoniha mbira dahuliya andagaha ngaru manda bialubi dindi ngaru manda bialubi hai heleneyago ogoni karulalu ibiya. Ibunaga galu kunini mbira mbira ibu mamalirunaga mini lene henego manda bialu gilibu wima wabuni daligibigo ege to̱le̱ muni yolo timbunime miaga wiarume wabiniyago ogoni mo karuleneya. Ani bialu emboneni agali loma binigo mo miaga haguane kagonaga manda karu leneya. Manda ogoni í̠naga hongo timbuniore ngego manda bialu karulaga wini.
WIS 18:25 Wali agali homelo baga dahuliyali ibiyago ibugua mbirale uruni de hondowa ibu gi halu ogoriani handaya ho hene. Í̠naga wali agali ti í̠naga miniha tandaga holene ogoni emene dege handayago ogoni karulape dege.
WIS 19:1 Í̠naga miniha tandaga holene biago ereba nahe wiaho wialu wali agali ko biaga hearu tigua mani ogoale bule ka lo manda biriru bo amo lariya.
WIS 19:2 Tigua í̠naga wali agali ala pudaba lalu bo daila hayagoyu mani tinaga mini beregedalu talima mama puwa bolobada lo manda biriya.
WIS 19:3 Ainde tinaga waneigini homayarunaga homalini dugu bialu heyu howa ainde tigua lone lulu mini mbira wiyiya. Pigane howa tigua lalu, Ngode Datagaliwabenaga wali agali dindi ti henedago wahalu pudaba, lalu bi hongohe layago lowa peaha tigua talima pialu lone haru halu dai bule pene.
WIS 19:4 Tiha mo ko timbuniore hene. Anidagua biyagome mbirale tiha tagira ibiyaru mo embeda hene. Ani bialu ti tandaga tara tarabi genda tara tarabi handa nabi dege hayago ai uruni áyu ngola hayagola ti mo ko howa bai hene.
WIS 19:5 Wali agali ko uruni ti homolene hariga tara tarani ko tara tara ngagoria homai holebira. Anigo ainde í̠naga wali agali ti hariga tara mbiraha yupe halu piya.
WIS 19:6 Í̠naga waneigini bu hearu mo ko nahelonaga í̠na bi larigola dindi ogoria mo ko hagane tara tara wiarunaga hongo iriari biya.
WIS 19:7 Tigua handalu hearia tinaga balai anda bu heagoha ginu haguame ge hai heago handalu dindi abale ibame namulai ho wiaria hendenego ai dindi pana halu yobi iba nabere wiaria hendene. Ani bialu hariga tigabiore iba solowara mini Iba Daramabi laga bereago hanuni pearia hendene. Abale dindi mbira iba solowara birame hearia hendenego ai ogoriani dataniru andaho hearia hendene.
WIS 19:8 Í̠naga wali agali tigua mbirale nahendene ale tara timbuni uruni hondowa miniha mogolo hene. Í̠na ti baya hangu handaya ho heagola ti bayale pialu iba ange mendehayagi ubaede hai hene.
WIS 19:9 Tigua turu howa nogo hosime gerai ibaga biagadagua bialu nogo sibi iginime porabu dagadaga bialu te biagadagua bialu hene. Í̠na ti anidagua biamogo birigola tigua Anduane Homogo í̠naga mini yaraga halu iba gana lalu hene.
WIS 19:10 Tigua mbirale mbirale dindi tarani hemigoha bini wiaru bibahende manda biai hene. Ainde dindime bulumagabi marualebi anda ho helo mondo bialu wia nabi hinabibi hangu mondo biniya. Ibame nde wenaru mondo bialu wia nabi iba yago biru wiaru dege magu taguatagi haya.
WIS 19:11 Ainde í̠naga wali agali ti tomo bayaleru noa ho heagola nde mana gahenge tarale mbira handa walia haya.
WIS 19:12 Tinaga hina gari timbuni wiago biba helonaga ega biaru iba solowara beregoha howa tagira ibiyaria hendene.
WIS 19:13 Manane tara tara harini haya. Ngode Datagaliwabehanda wali agalime ko tara tara bialu hayagonaga pani nelo mulene tigabi ngadagua mulenaga harime kulukala lalu hari dabame mo walia haya. Ti pani nelo mulubadagoni irane tigua wali agali tara bu hearuhondo mana ko bialu hayagonaga nelo mulebira.
WIS 19:14 Wali agali tara uruni tini dalu wahalu dindi tara wiagoha ibu hearia wali agali dindi aba hearume tinaga dindini helo hame nale hene. Ani bialu wali agali tara dege halu mende dindi ogoniha íbu henego ainde dindi aba hayadaru tigua wali agali tara urunime tihondo bayale bialu hayago mitangi nabi hene. Tigua wali agali tara uruni tinaga garabaya biabe ale bialu helo helene.
WIS 19:15 Heneneore wali agali dindi anduane uruni tigua wali agali tara uruni turu nahe howa tinaga dindiha helo hame nale hene. Wali agali mana ogonidagua bialu hayaru ti yolo ko wiaru mini.
WIS 19:16 Ai wali agali halu mende ti daluha haru hene biaru baba tomo bayale timbuniore dawa nalu mali lialu iba ganaru lalu turu howa tinaga dameneore haru haradagua haru hene. Ani howa mani tigua wali agali tara turu howa haru hayaru lone garabaya hai helene.
WIS 19:17 Ngode Datagaliwabehanda tinaga de mo ndibulo heleagola ti de nahe Sodomo wali agali henegobi dege hene. Sodomo wali agalime wali agali tigabi hearunaga panga haraba wiago handabe nahe hene. Ainde wali agali ko uruni Sodomo wali agali henegobi dege hene. Ti aruma timbuniore heagoha howa bibahendeoreme tinaga anda panga taya bialu hene.
WIS 19:18 Ainde ngida tara tara ngaru tinaga pu dewa hibu howa agali ngida bagame balu howa bi tara tara mo lela halu bagane nga. Bamba manane ogonibi dindini mbirale tara tara wiaruha tagira ibini. Mana dindini bialu haga wiago bibahende iriari bialu ai mana gahenge tagira íbu nga. Iname mbirale ala wini ngaru baya hangu manda biai harimayagua nde áyu iriari dewaore bidane hondoleberema.
WIS 19:19 Ainde ema bialu piaga irabuha biragaru andaga biru aribia halu ibaha biragaru dindini bira aribia halu dindiha biragaru ibaha biru aribia haga bini.
WIS 19:20 Ira iba andaneha dalu kagoyu hundia nabiagaya. Ai iba ibu mo beregdalu ibunaga hongo ira ba hundia haga wiago wahaya.
WIS 19:21 Abale irame mbirale ibu dedagoha anda porago bibahende dai hagago ainde áyu ogoningi irame nadayagola ema bialu piaga uruni nahomaya. Ai tomo dahuliya anda howa ibiniyago dindi guni aleya. Anigo ainde iranaga hongome tomo ogoni mo iba habe naheya.
WIS 19:22 Anduane Homogo-o bibahende ngaru togoni howa í̠naga wali agali bu karunaga mini yaraga hagaya. Í̠na ti horo mbirangi yu wahene nawiore. Bibahendengi dindi bibahendeha í̠na ti biamogo bialu haabo hagaya.
SIR 1:1 Mini gigabi wulene ibu Anduane Homogo ibuha howa ibinigo ibunila haabobo bu hagane nga.
SIR 1:2 Iba angeni iba mu ngaru aiwa daga lai habehebe. Iba dalu ibiyaru daga lai habehe ai kabe. Horo piyago bibahendebi horo mani ibule ngagobi ogodaguaore lalu daga lai habehe ai kabe.
SIR 1:3 Ai hari damindiniha manda biadaga holenebi dindi ogo yangalenaga manda bulenebi iba solowara timbuni bedago andane dindiha manda biadali holenebi uruni bibahende ogodagua nga lole manda bibehe ai kabe. Ani bialu mini bayale ibu baya hangu begelo handabehe ai kabe.
SIR 1:4 Mbirale bibahende nawiha mini gigabi wulene ibu ala ibalu bambaore henego ka.
SIR 1:6 Ngode Datagaliwabehanda mini gigabi wualenaga tene aihondo mo walia hayabe. Mini bayale ibunaga biabe tara tara biaga ngaru damene ai ibugua manda bidabe.
SIR 1:8 Mbiraoreli hangu mini gigabiwi ka. Iname ibuhondo gi halu ibu andaneha haabo halu ibunaga mini timbuniore mini lene ngago yaraga halu holene nga.
SIR 1:9 Anduane Homogo ibunime mini gigabi wulene ogoni helene. Ibugua baya hangu begelo handalu ibu baya hangu talebu handalu ibugua ibunime wabini wiaru bibahendeni odope hai helene.
SIR 1:10 Anduane Homoghanda mini gigabi wulene wali agali bibahende tini hangu hanguhondo tini karulape headagua mo ta haga bialu ibuhondo gubalini ho haga hearuhondo dewaore mini.
SIR 1:11 Wali agali Anduane Homogo gi halu ibuni andaneha haga bu karu ti mini lene timbuni halu yari bayale bu holebira. Ani howa tinaga bu miniha dungulo howa turu taraore ho holebira.
SIR 1:12 Wali agali Anduane Homogo andaneha karu ti turu howa tinaga bu miniha obaho haga. Ani bialu tinaga dindini holene luore haga.
SIR 1:13 Wali agali ogoniale karu tinaga holene kaware biba hole tu ngagola ti bayaleore halu homolene horo tagira ibirangi tiha mini burugu nale biralu homolebira.
SIR 1:14 Mbiralime Anduane Homogohondo gubalini ho howangi hayagua ibuha mini gigabi wulene tagira ibulebira. Ibu mini gigabi bamba ibu ai̱ya tombeha bereangi howa mo yu hene ka.
SIR 1:15 Bambaore howa mini gigabi wulene ibu wali agali heba mandagi hama ibinigo haabo mani tinaga waneigini aguane aguanali hama polobadaru heba haabore holebira.
SIR 1:16 Mini gigabi wule bibahendeore wali agali Anduane Homogo ibuniha haga karu tiha to̱lai ho kagola mini bayale urunime lini bayale tagira ibiraru yu howa turu ho holebira.
SIR 1:17 Mini gigabi ibugua wali agali tini hame lo karu ale ti andagaha wu to̱latagi halu tinaga tomo anda ngagoha tomo tara tara ngaru dewaore wu to̱latagi hai holebira.
SIR 1:18 Anduane Homogonaga mana hale hagane mana ngagome mini gigabi wulene mo yaribia halu bayale holenebi miniha mo palia holene karulo holenebi hongo holenebi mo wia haga nga.
SIR 1:19 Mini gigabi wuleneme manda buwa mo yulenebi iba dalu ibiradagua ibilaga. Ani ibilowa ibunaga wali agali gubalini ho mini lene helo helaga.
SIR 1:20 Ani ibiragome ira pini hongohe dindiha piagadagua polebira ibuni lu dindini holene ginigene lu hagagobi holebira.
SIR 1:22 Wali agali keba timbuni haga kago ibu wali agali tigabi ndo ka. Keba abale haganeneme wali agali abale mo pila hagane nga.
SIR 1:23 Wali agali hendeore haga kago ibu deme hondo kagola mani tiha turu holene tagira ibaga.
SIR 1:24 Tigua abale latagi nahe deme hondo howa laragola mani wali agalime ibunaga manda bayale ngagonaga te lalu holebira.
SIR 1:25 Mini gigabi wulene ibu tomo wiaga anda alehowa biawai holene baya tara tara wu to̱latagi ka. Anigo ainde Anduane Homogo gi howa ibuni andaneha hagane mana ngagome wali agali mana ko biaga karu ti mana bayale nabilo manga haga ka.
SIR 1:26 Ainde mini gigabi wu holene hame lo keyagua Anduane Homogonaga bi mana lo ngago taluwa bialu kegola ibugua í̠ha mini gigabi wulene mo to̱la hai holebira.
SIR 1:27 Heneneore í̠na Anduane Homoghondo gubalini ho howa gi hariyagua nde mini gigabi wulenebi biawai holenebi mo yu holebere. Anduane Homogohanda wali agali tini mo dindiha halu ibu talima piaga karuhondo turu haga ka.
SIR 1:28 Í̠ ibu poleyagua mini kira wu yalu na polebere. Anduane Homogonaga bi ledago mo wanahe holene nga.
SIR 1:29 Í̠na wali agali mohondo howa í̠naga mini mo yaraga halu bi tara tara ke̱ howa lalu wali agalinaga bu mini tiha yamule nalalimu. Í̠naga ne harigaha bi larego mamage howa lalimu.
SIR 1:30 Mani í̠ni pilalu howa taga pani nolene wuligo í̠ninaga mini yaraga howa nalalimu. Ai Anduane Homogohanda í̠naga miniha yadoho kego wali agalinaga deni mo pana ho ngelowa í̠ guruligo í̠na í̠ninaga mini yaraga nahabe. Ani buleberego irane í̠ni Anduane Homogo karia ibalu howa í̠ni ibunaga deni mo dindiha nahe eberegome ke̱ hagane mana í̠ha emene ndo wu to̱leda.
SIR 2:1 I̱ waneigini-o Anduane Homogo talima polene manda biriyagua í̠ha ba hondolene anda ibulebirago manda manda bu habe.
SIR 2:2 Í̠ninaga mini baya hangu mo tiga buwa hongo ho habe. Ani kegola í̠ha ko mbira ibirangi í̠ abale mogo lalu duru nale holebere.
SIR 2:3 Anduane Homogoha haparaore ho howa ibu yu wanahabe. Ani beregola maniore í̠ha mbirale mbira tubagi holene nawulebira.
SIR 2:4 Mbirale í̠ha ibirago damene ibilo ha dege bibe. Mo iriari bulene tara tara ibalu Í̠ bope hayagua nde i̱ ema nabi ha dege bibe.
SIR 2:5 Irame ngolo dedagola dodo ngoloni para haga bidago do taulo waharagola ngolo ibuni dodo nahe bayale wiaga. Anidagua dege wali agalinaga mini mo dindiha holene ngagome wali agali tigabi karu ba handaga nga.
SIR 2:6 Anduane Homogohanda í̠ biamogo biragola í̠ bayale howa ibunihondo mini mbiraore wu hole ibuni kagoha hapara howa habe.
SIR 2:7 Wali agali Anduane Homogo gi howa ibuni andaneha haga kemiru ti ibunaga dara holene irane nawini dara hagane ngago malia ho halimu. Tí pi loligo ibuni wanahalimu.
SIR 2:8 Wali agali Anduane Homogonaga bi ledago talialu haga kemiru tí ibuni kagoha hapara ho halimu. Ani harimiyagua nde tí yolo bayale muleberemi.
SIR 2:9 Ainde wali agali Anduane Homogo ibuni andaneha haga kemiru tí mbirale bayale ibulebirago maliaho halimu. Mbirale bayale ogoni turu holenebi dara holene irane nawini dara ho haabo holenebi ibulebira.
SIR 2:10 Tínaga mamali ala heneru mitangi bu dai bialu minime baya hangu mo tale bilimu. Ainde mbirali Anduane Homogo heagoha kaware hapara ho kagola Anduane Homogohanda mo taga hene mbira ai henebe. Mbirali ai ibu Anduane Homogonaga bi baya hangu hale halu helowa Anduane Homogohanda yu wahene ai heneyabe. Ainde mbirali ai ibu Anduane Homogo lalu heagola Anduane Homogohanda ibu erembira minibe.
SIR 2:11 Heneneore Anduane Homogohanda dara holene nawioreni í̠na dara timbuni haga ka. Ibugua í̠naga ko wiyadago domo wahalu í̠ha mo ko holene anda ibirangi hongo ho habelo helaga ka.
SIR 2:12 Wali agali hariga mende mendebi kirabali pu handalu haga howa mogo lalu duru lole kemiru tíore daraba.
SIR 2:13 Ti wali agali gi hagabi tiha yutiga nabiagabi kemigo Anduane Homogohanda tí handaya ho naholebiragonaga dara kogoni.
SIR 2:14 Ainde daraore kogoni ndobe. Wali agali manga hene kemiru tí baba Anduane Homogohanda godi lalu ko birimi larangi agua buleberemibe.
SIR 2:15 Ai wali agali Anduane Homogo gi halu ibuni andaneha haga karu tigua ibunaga bi ledago mo wanahaga ka. Ani bialu wali agali Anduane Homogo gubalini ho haga karu tigua ibunaga hariga piagane ngagoria pialu holebira.
SIR 2:16 Wali agali Anduane Homogonaga bi ledago baya hangu hale halu biaga kagome Anduane Homogohanda ibu biamogo bilo bulene ngago hongo howa bialu haga. Wali agali Anduane Homogo gubalini ho haga karu tiha ibunaga bi mana ho to̱le ka.
SIR 2:17 Wali agali Anduane Homogo andaneha haga karu tigua ibuni talima pule manda manda bu howa Anduane Homogo deni tini ala mo dindiha haga ka.
SIR 2:18 Ani howa tigua lalu, Ina wali agalinaga giha howa pi loligo inane Anduane Homogo ibuni giha mo ya holene karulapeda. Hongo gibiorebi dara holene irane nawioreni bame dara hagabi timbuniore ngago manda buwa ani bulene nga, lene.
SIR 3:1 Waneigini bu kemirume tí aba ai̱yalanaga bi baya hangu hale halimu. Ani bialu harimiyagua tí baya karulape holeberemi.
SIR 3:2 Irane Anduane Homogohanda tínaga aba ibu waneigini bolangua howa ibu daliga heleda. Ani bialu ai̱ya ibu nde ibunaga waneiginiru handaya ho haga helo mo hongo howa bereleda.
SIR 3:3 Waneigini ti aba andaneha haga karu tinaga ko domo waholebira.
SIR 3:4 Ani bialu waneigini ti ai̱yanaga mini mo yaraga haga karu ibuha mbirale bayaleru dewaore wu to̱le kagobi ka.
SIR 3:5 Waneiginime aba andaneha baya hangu hayagua nde mani ibuni waneigini holobadarume ibu mo turu holebira. Ani bialu Anduane Homogohanda ibunaga bi laragobi hale holebira.
SIR 3:6 Waneigini ibu abanaga mini yaraga haga kago ibu dindini luore holebira.Waneigini Anduane Homogonaga bi hale haga kagome ibu ai̱ya mo turu haga ka.
SIR 3:7 Aba ai̱yala libugua libu waneigini handaya ho haga kago mana bialu waneigini tigua aba ai̱yalanaga bi larago hale holene nga.
SIR 3:8 Waneigini kemiru tí abanaga mo turu holene ngago tíha wia helo tígua bi laremigomebi biabe beremigome tí abanaga mini yaraga halu halimu.
SIR 3:9 Anidagua bulebirago irane abanaga mo turu holeneme waneigininaga anda kago mo hongo haga. Anigo ti ai̱yanaga keba holeneme anda gene bibahende dugu wahai haga.
SIR 3:10 Í̠ aba andaneha nahariyagua Í̠ aba ibu dindiha halu í̠ daliga haruda lo manda nabibe. Anidagua biriyagua í̠ aba mo taga haregome í̠ mini lene naholebere.
SIR 3:11 Heneneore waneiginime ti abanaga mini yaraga halu ti aba andaneha haga hayagua nde mani ti timbuni mini lene mbira holebira. Anigo ti ai̱yanaga mini mo dindiha hayagua tinaga mini mo ko hene holebira.
SIR 3:12 Waneigini tígua ti aba waheore bedangi baya hangu handaya ho halimu. Ibu homa nabi wene bedaore ibuha genda yulene namilimu.
SIR 3:13 Ai aba ibu lolongo yayagua tígua ibu dara holene nga. Í̠ni hongohe ha kegonigo ani howa ibuhondo mege bulene nawiore.
SIR 3:14 Anduane Homogo ibugua í̠na dara halu biamogo bulene mana í̠ abahondo biriruni embeda naholebira. Ibugua í̠naga ko domo wahelu í̠ andaga mo hongo holebira.
SIR 3:15 Í̠ha mo ko holene ibu ngangi Anduane Homogohanda í̠ mitangi holebira. Ni hongohe daragome dagare bulene ngago mo wahagadagua í̠naga ko ngago Anduane Homogohanda domo waholebira.
SIR 3:16 Waneigini ti aba mo embedaho haga heagua nde ti wali agali Anduane Homogo mege biaga holebira. Waneigini ti ai̱yahondo lai laga karu ti genda yu holebirago irane Anduane Homogohanda tihondo keba haragola genda yu holebira.
SIR 3:17 Waneigini tígua biabe tara tara bialu kemiru bialu howa tíni mo dindiha howa bialu halimu. Ani beremigola wali agali tigabi bayale karume tíhondo gubalini ho holebira.
SIR 3:18 Í̠naga mini timbuni mini lene hariyagua nde í̠ni mo dindiha holenebi anda halu timbuniore haragola í̠ mo turu holene Anduane Homogo ibu deni yu holebere.
SIR 3:20 Ngode Datagaliwabenaga hongo daligaore kagola wali agali tini mo dindiha ho haga karume ibunaga mini yaraga haga ka.
SIR 3:21 Ainde mbirale í̠naga manda ngegola karulanape wiarunaga í̠na manda buleore lowa wiaede nahabe. Ani bialu mbirale í̠na baya hangu goaru handabe nahe ngaru goaru hondolene manda nabibe.
SIR 3:22 Tigua biabe í̠na bibelo mo ngirago hangu mitangi bialu mbirale í̠naga deme handabe nahe mo do ho ngarunaga mini burugu nalabe.
SIR 3:23 Biabe í̠na bulene nakarulape ngago bule mitangi bulene nawiore. Biabe í̠ni bialu kego karulape ogonigo bialu habe.
SIR 3:24 Wali agali dewaore luluyu hagago irane tininaga mini ngago hangu talialu karia biaga. Tinaga embone mini kome wu to̱latagi hene ka.
SIR 3:26 Wali agali mine harago ibu mbirale ko ngaru mo yulebira. Ani bialu wali agali ko hame laga karu tini ogoniha homanda holebira.
SIR 3:27 Wali agali mine hagane bu karunaga genda ngago damene ereba naholebira. Anidagua dege wali agali ko mine hagane bu karunaga ko ngaru timbuni holebira.
SIR 3:28 Wali agali lai lalu bi poboyogobi laga karunaga genda mo yu anda ibirago mo ereba holene marasini mbira nawiorego irane dindiha ira pini hongohe piagadagua konaga pini tiha hongohe anda peda.
SIR 3:29 Wali agali mini bayalewi karu tigua manda bayale bulene ngago abale yamiaga ka. Ani bialu mini bayalewi karu ti lawai haga karume lawai harago turu howa hale hagane ka.
SIR 3:30 Wali agali yagibano bu karu dara ho halimu. Anidagua buleberemigo irane ibame ira dedago ba hundia hagadagua dara holeneme wali agali tiniha ko ngago domo wahaga nga.
SIR 3:31 Wali agalime mendealihondo dara holene walia haga karu ti mani tini pilarangi mendealime abale biamogo bule kago handa walia haga ka.
SIR 4:1 Waneiginiru-o tígua wali agali yagibano karu ti mbirale buru padaru ale milo hapai halimu. Tigua deme í̠ hongo howa handaya ho kagola ti bahame handaya ho helo wanahalimu.
SIR 4:2 Wali agali ti genda halu mini burugu timbuni lo holebirago í̠na ti mo garila holeni. Ani bialu maru mbirale tubagiho karuhondo keba halu lai nalabe.
SIR 4:3 Wali agali genda yuwa mini burugu lo kagoha genda dewa lone mo tago nahabe. Ani bialu wali agali yagibano bu karume í̠hondo mbirale mbira hale hayagua í̠na hapai nahabe.
SIR 4:4 Wali agali darabi bu karu tigua í̠hondo mbirale mbira hale haragola ti erembira mialu napobe. Ani bialu wali agali mbirale nawi tubagiho karuhondo erembira namibe.
SIR 4:5 Wali agali mbirale nawi karume í̠ hondo bi ko loligo í̠na ti helalu putara halu napobe.
SIR 4:6 Ani lolebirago irane tinaga bu miniha genda timbuni tagira ibiyagua tigua í̠hondo bi ko laragola mbirale bibahende wabiaga kago ibugua tinaga bi larago hale holebira.
SIR 4:7 Í̠na mana ogoriani ibagabu hariyagua nde wali agalime í̠ hame lai holebira. Agali haguanerunaga deni pialu howa ma podalu pobe.
SIR 4:8 Wali agali yagibano bu karunaga bi larago baya hangu hale hai halu marume í̠hondo mo bi la hayagua nde í̠ni ale dege dege bi bayale laga wiridagua wali agali uruni baba bi bayale dege ladai bibe.
SIR 4:9 Wali agali mana ko biaga bu karu giha howa wali agali darabi bu karu tigua mo ko halu kago haru dai bibe. Ani bialu manani godi lalu mo tale bulenaga wali agalihondo gi nahe tigatigaore mo tale bulene ngadagua mo tale bibe.
SIR 4:10 Waneigini ti aba homene bu karu baya hangu handaya ho halu wali ibu agalini homene dalo bedaru baya hangu handaya ho halimu. Anidagua bialu í̠ Anduane Homogo Daligaore kago ibu waneiginiore holebere. Heneneore waneigini ai̱ya ibugua í̠na anidagua beregonaga gubalini holebirago ainde Anduane Homogohanda í̠ gubalini timbuniore holebira.
SIR 4:11 Mini gigabi wulene ibugua ibu waneigini karuhondo ti miniwi bayaore ka lagabi wali agali ibu taya bialu karu baya hangu handaya ho hagabi ka.
SIR 4:12 Wali agali mini bayale wulene hame lalu tini bayale holenebi hame lo howa tigua aba taya biyagua tiha turu holene timbuni to̱latagi holebira.
SIR 4:13 Wali agali hongohe mini bayale wiaga karu ti mini lene halu mini bayale ibu poragoha Anduane Homogohanda mo turu holebira.
SIR 4:14 Wali agali mbirame mini gigabi wuleneme ibunaga mini yaraga hayagua tigua Ngode Datagaliwabe baya buruguleore kagonaga mini mo yaraga haga. Ani bialu wali agali mini gigabi wualene ngago gubalini haga bu karu ti Ngode Datagaliwabehanda gubalini holebira.
SIR 4:15 Wali agali ibunaga bi hale haga karu ti wali agalinaga haguane holebira. Ibugua bi larago hale haga karu ti bayale holebira.
SIR 4:16 Wali agalime mini gigabi wulene ngago mo galone halu yu tiga biyagua nde tigua mini gigabi mo yu holebira. Ani bialu tinaga waneigini mani holobadarumebi yu haabo holebira.
SIR 4:17 Pigane mini bayale wulene ibugua wali agali hariga tiga nabi yole ngagoha haru pialu mo luluya halu ti mo gi halu mo durula haga. Mini bayale wulene ibugua bi tandagabi ngarume minu heda halu wali agalinaga mana biaga ngago damene bayale tigabi hai helonaga lawai haga. Ani mo hongo kagola tigua ibunaga bi bayale manda bulene lawai harago talialu biai habehe karulape helaga.
SIR 4:18 Ani biragola mini gigabi wulene ibu wali agaliha hariga tigabi ngagoria ibalu ti mo turu halu ibunaga bi wiado hene ngaru tihondo mo walia hagane.
SIR 4:19 Anigo wali agali ti pu luluya hayagua nde mini gigabi wulene ibugua ti yuwa halu tini mo ko halu homolene ngagoha pelo yupe haga.
SIR 4:20 Horo bayalengi í̠na henge bayale ngago bame mo holebu nahabe. Anigo ko ngagome í̠ minalu mo taga holigo mamage ho habe.
SIR 4:21 Taga holeneme wali agaliha mana ko bulene mo yu ibalu taga holeneme wali agali bu karunaga deni mini lene helaga nga.
SIR 4:22 Í̠na mendeali kago helo la debodebo bialu keria í̠ni pi loligo handabe. Í̠ni pilagane tene ogoniha nga.
SIR 4:23 Í̠naga bi lolene henge ngangi í̠ ne hariga ndibulo holeni nahabe.
SIR 4:24 Ani lolene ngago irane í̠naga bi larengi mini gigabi wulene ibu pana haragola í̠naga bime í̠ha manda bayale bidego latagi holebere.
SIR 4:25 Bi ke̱ howa lama ibaga nabibe. Í̠na bi tigatiga í̠ bibahende manda biai naheme lolene ngadagua lolene karulape.
SIR 4:26 Í̠na iba porago payabe nahe kego manda bialu í̠ha ko ngago latagi hole taga nahabe.
SIR 4:27 Í̠nime í̠ wali agali lulu mini nawi karu andaneha holene nawi. Ani bialu mbirali mini lene timbuni bu karu ladebodebo bialu ti kagoha hadede nabibe.
SIR 4:28 Í̠ homoleneore wiaguabi harugo Anduane Homogohanda í̠ biamogo bule wai bulebirago í̠ hongo howa bi henene loleneme í̠ bolangua helo hongo habe.
SIR 4:29 Í̠ kudaga halu bi nagalone ngaru dewa laabo holeni nahabe. Ani bialu biabe bialu kegoha manga halu gedeore holeni nahabe.
SIR 4:30 Í̠ni andaga tamuha howa laionome ngororo laradagua nabibe. Ani bialu wali agali í̠naga biabe bia haga bu karu talialu bi hongo howa loleni nalabe.
SIR 4:31 Mbirale ngaru yamule í̠naga gi dogo nalabe. Ani bialu í̠na mbirale mbiralihondo mialu howa í̠naga gi pau nalabe.
SIR 5:1 Í̠ninaga muni mbirale ngegoha mini hana ho howa í̠na lalu, Ai i̱ karulapeore kogoni, lolene nawigo nalabe.
SIR 5:2 Í̠na hame ngego bibahende mbirale í̠ni dimagoliho kego ha biba halu howa
SIR 5:3 lalu i̱ aiwa handaya ho holabada, loleni. Irane ogoninaga Anduane Homogohanda í̠ pani ngialu minu baore bulebira.
SIR 5:4 I̱na mbirale bia ko harugo ainde mo ko holene mbira i̱ha naibiya, lolene nawigo nalabe. Anduane Homogo ibugua la nabi luore hondo haga ka.
SIR 5:5 Í̠nime lo manda bialu, Anduane Homogohanda ko biniru domo wahagayago waha, lalu mana ko ngaru bialu haabo holeni nabibe.
SIR 5:6 Anduane Homogo ibunaga dara holene irane nawini howa dara timbuni hagane kago i̱naga ko ngago bibahende domo wahaiore holebira, nalabe. Heneneore ibugua dara holebirago kebabi timbuni dege haga ka. Ani howa ibunaga keba holene timbuni wali agali mana ko biaga bu karuha ibira holebira.
SIR 5:7 Anduane Homogo kagoha abaleore dai bulene nga. Horo yawiore dai buliya lowa horo mo baedede nabibe. Anidagua biriyagua Anduane Homogonaga keba holene abaleore ibalu í̠ mini baragola í̠ homalu ereba holigo abale dai bibe.
SIR 5:8 Í̠naga biabe ko buwa muni mo wirigoria mini paga howa holene nawiore. Muni ogonime horo hamaro bulene ngangi í̠ mo wialu biamogo nabulebira.
SIR 5:9 Puyabu puloyu iriari biragola mabuha ira hedape holene nawi. Ani bialu hariga tara tara pugupugu bulene ngagoha tanabi pupe nahabe. Wali agali mini kirawi howa mana ko biaga karu tinaga mana ogonigo í̠ polene nawiore.
SIR 5:10 Í̠naga mini mo iriari bialu mo beregedaga nabibe. Í̠naga bi laregobi bayale tigabi ngaru lalu habe.
SIR 5:11 Bi larago abale hale halu ladai nabi emene hondo habe.
SIR 5:12 Bi ladai bulene í̠na manda bu hariyagua bi larago ladai bibe. Manda nabi hariyagua nde ne hariga ndibulo holene karulape.
SIR 5:13 Bi ibugua wali agalinaga mini mo ko halu mo bayalebi haga dege nga. Ani biagago irane wali agalinaga hegeme dege mo ko haga nga.
SIR 5:14 Wali agali bu karume í̠ bi dibudibu hale ho page bialu í̠naga ne hariga ngegome wali agali mende kago mo ko haga ka nalelo holene nga. Ani larogo irane page biaga karu ti taga haga wialu wali agali bi haluki laga karu tiha godi ko tara ngago handa walia holebira.
SIR 5:15 Mana ko ngago dameneore bibabahende emene timbuniyaguabi nabibe.
SIR 6:1 Ai mbiralila nenege hariyagua lone waitigi holene manda nabibe. Lone waitigi haregome í̠naga mini mo ko haragola taga timbuni holebere. Wali agali bi lo mende halu bi kira laga ko bu karunaga yolo ogoni mo yaga ka.
SIR 6:2 Miniha dimagoli ko ngegome í̠ haru helo nahabe. Miniha dimagoli holene ogonime í̠ nogo bulumagame hengedaradagua bialu í̠ balu home loligo hondo habe.
SIR 6:3 Miniha dimagoli holene ogoni ibugua í̠naga yuni linibi bibahende nai haragola Í̠ ira gabuni ale holebere.
SIR 6:4 Heneneore mbirali ibu miniha dimagoli ogoni ale ngelo kago ibu mo ko haragola waitigi bu karume ibu hondo oba holebira.
SIR 6:5 Bi dendebi laregome nenege dewaore hinalu bi hendore lalu bedegome hadapaya bu holene mo yu anda ibaga.
SIR 6:6 Wali agali dewaoreme í̠la mini hana haga bu hene heaguabi ai daosini mbira (1,000) bu karu aria mbiraoreli hangume í̠ baya hanguore mo tiga biaga holebira.
SIR 6:7 Í̠naga nenege holene mbira taya bialu hariyagua í̠na mbirali kagohondo abale mini mbiraore nawibe. Í̠na ibu abidabe hondole baya hangu begelo hondolene ngago
SIR 6:8 irane nenege mbiraore ndo nenege tara tara dewa hagane ngagonaga ani hondolene nga. Nenege mbirago ibu í̠ bayale kengi nenege howa í̠ha genda ibirangi í̠ heba mandagi naholebira.
SIR 6:9 Nenege mendego ibugua í̠naga nenege ha howa dege mani í̠la waitigi halu bi ohowa libuni hangu howa laga wiribigo bibahende hale hai helo latagi haragola í̠ taga ho holebere.
SIR 6:10 Maru í̠na tomo merengi libu nenege howa mani í̠ha genda anda ibirangi í̠ biamogo nabulebira.
SIR 6:11 Nenege uruni aleme í̠ bayale kengi nenege halu í̠la mini mbiraore ho holebira. Ani howa ibunaga mini bayaleru í̠ andaga ibuwa latagi haga bulebira.
SIR 6:12 Anigo tigua í̠naga mini mo guya harangi nenege biagome í̠ erembira ngialu ibunaga wanakui mo do holebira.
SIR 6:13 Wali agali í̠la waitigi bu karu kaware nahe kaundiaha halu í̠naga nenege karu baya hangu minime ti mo tale bialu de hondo habe.
SIR 6:14 Ainde í̠naga nenege henene kago ibu anda hongohe kaligobi ka. Wali agali mbirale yolo dewame miaga ngaligobi nenege bayale ogoni ibu holebira.
SIR 6:15 Nenege heneneore wali agalime yolo nabulebira. Nenege bayaleoredagola ibunaga yolo ogo aleria lade naholebira.
SIR 6:16 Nenege henene he kago ibuha holene bayaleore holebira. Ani bialu mbirali ibu Anduane Homogo gi howa ibuni andaneha haga kago ibu nenege uruni ale handa walia holene nga.
SIR 6:17 Heneneore Anduane Homogo andaneha kago ibu nenege bayale karia handa walia holebira. Ani bialu libunaga mini mbiaraore ogobi degedane hondolebira.
SIR 6:18 Waneigini-o í̠ wene daliahe kengi í̠na mbirale lo manda bule hongo halu Í̠ waheale biruwa mini gigabi wulene taya bule manda bibe.
SIR 6:19 Wali agalime mabuha biabe erekuibiore bialu dindi tombalu tomo hongowa mani lini bayale delonaga maliaho hagadagua tígua mini gigabi wulene taya bialu haabo halimu. Heneneore í̠na mabuha biabe bulenengi emene tigi mbira degeni birigo ai mabuni tomo liniru bayale dedagola abale do nolebere.
SIR 6:20 Ainde wali agali manda nabini bu karu tihondo mini bayale wulene ibu erekuibioredagola wali agali kuni naheru baba ibu lu haabo naholebira.
SIR 6:21 Mini gigabi wulene ibu ege to̱le̱ gendabi ngaligobi ngagome wali agali gendame bope hagane. Ani bope haragola tigua mini gigabi wulene ogoni abale yu wahagaya.
SIR 6:22 Ainde wali agali dewalime mini gigabi wulene ibunaga mini lolene hame lariyagua nde mbirale tara tara bayale handa walia nahaga ngaru mini lolene karulape nga.
SIR 6:23 Waneigini-o bi hale halu í̠naga mini ngogo baya hangu taliabe. Bi i̱na langerogo mo embeda holeni.
SIR 6:24 Í̠naga ge mini gigabi wulene ege pu ngagome dabaho ngelalu í̠naga ma mini gigabi wulenenaga pume dabaholene nga.
SIR 6:25 Mini gigabi wulene ibunaga genda gibiore ngago í̠naga payani yu pialu ibunaga ege pume daba hayagobi ogoninaga mini burugu nale yu pobe.
SIR 6:26 Í̠naga bu mini bibahendeme mini gigabi wulene taya biaabo halu í̠naga hongo bibahendeme ibunaga hariga ngagoha pialu habe.
SIR 6:27 Ayu ogoni handa walia holeberego taya bima pialu handa walia halu minu yania hariyagua nde pelo yupe habe.
SIR 6:28 Ani beregola mahaore miniha mo palia holene mini gigabi ibugua ngiaga ngago handa walia halu turu holebere.
SIR 6:29 Ani beregola ege pume í̠ dariba hayago ibugua ayu í̠ handaya ho halu pu alatawe biaru ti í̠naga tolanda ge hala gi pagida aleru holebira.
SIR 6:30 Ibunaga genda mo yarigo í̠naga ngolo manda halu ege pume í̠ dariba haga biyaru baya taraore girilimame dedaru ale holebira.
SIR 6:31 Ani bialu í̠naga mini gigabi wulene aga lu bayale karula gimbu biaga ale ngago taya buwa í̠naga embone mo yari bia howa ibaga bu holebere.
SIR 6:32 Waneigini-o hame layagua nde biwai harago baya hangu manda bibe. Manda biriyagua nde í̠ nde í̠ bayaleore holebere.
SIR 6:33 Bi larago baya hangu hale hole hongo ho hariyagua nde í̠na manda bayale bulebere. Í̠naga wiaho biraga hariyagua nde wali agali mini bayalewi mbirago í̠ holebere.
SIR 6:34 Agali wahe mo ngoaiho biruwa bi lalu biraga ngagoha pobe. Ani pu biruwa wali agali mini bayalewi mbira bereagua í̠ ogonila birabe.
SIR 6:35 Ngode Datagaliwabenaga bi te larago í̠ hale nahe bederia í̠ helalu pubagi holigo baya hangu hale ho birabe.
SIR 6:36 Í̠na handalu keria wali agaliyaguabi manda bayalebi mbira bedaria handariyagua nde gao laragola egerebagi heyalu gerai lalu puwa ibu andaga haraba ge halu ubaanda hagane dagia bidagoria ge habe.
SIR 6:37 Anduane Homogonaga bi langiyago baya hangu mitangi biaabo halu ibunaga bi manabi mitangi bibe. Ibugua í̠ mo hongo halu ibugua mini bayale í̠nime yulene hame ledegobi ngulebira.
SIR 7:1 Í̠ha mo ko holene ibuligo mana ko ngaru nabibe.
SIR 7:2 Í̠na mana ko ngaru hondo wandialu habe. Anidagua biriyagua nde í̠ha pani nolene nawulebira.
SIR 7:3 Waneigini-o mana ko ibu mabuha tomo hangarimagobi nga. Í̠na mabuha hengederia dewaore anda holigo handabe.
SIR 7:4 Í̠ timbuni haguane holiya biamogo bia lalu, Anduane Homogohondo bi lolene nawigo nalabe. Ani bialu kinihondo í̠naga mini yaraga hene holiya í̠ mini lene hela lalu hale nahabe.
SIR 7:5 Í̠na Anduane Homogo bime ladebadebo bialu ibugua í̠ mana bayale bialu hagada lelo manda buwa bi nalabe. Ani bialu kini ibugua í̠ agali manda bayalewida lelonaga í̠na kini mohondo halu bi nalabe.
SIR 7:6 Godi hale halu manani ngadagua mo tale biaga karu tinaga biabe bialu kago dimagoli nahabe. Í̠na bu aribia holene manda nabi howa wali agalime mana ko bini ngago baya hangu mo tiga nabibehe holigo ani nabibe. Í̠na agali haguane mbira godi lole ibirago hondowa í̠ni mogo laregola í̠ninaga mini mo ko holene wuligo í̠na biabe ogoni bule hame loleni nalabe.
SIR 7:7 Wali agali í̠ni daluha bu karuhondo ko nabi halu wali agali deni lulu ale howa bulene ngago nabibe.
SIR 7:8 Mana ko halu mbira berego halu mende nabibe. Ko mbira mbira beregonaga yolo hangu hangu nga.
SIR 7:9 Í̠na lalu Ngode Datagaliwabe Daligaore kagome í̠naga mbirale bayale bame mulene bu ngoruni handape halu hondowa í̠na ibu mbirale loma bu merogo yamulebira nalabe.
SIR 7:10 Í̠naga mini mbiraore wulene hongohe wu kego heba howa Ngode Datagaliwabehondo bi lalu howa bibahendengi yagibano bu karu biamogo bulene ngago hondowa wahalu pu nabi.
SIR 7:11 Wali agali taga timbuniore ho kago hondowa ibuhondo oba holene nawigohondo oba nahabe. Wali agalinaga mini bope holenagabi mo yaraga holenagabi Ngode Datagaliwabe ibugua hangu biaga ka.
SIR 7:12 Í̠ hamene kago mo ko holenaga te ke̱ howa nale wahalu í̠naga damene kagohondobi anidagua dege nabibe.
SIR 7:13 Í̠na ke̱ holeni nahabe. Ke̱ holene mana ngagoha howa mbirale bayale mbira tagira naibaga.
SIR 7:14 Agali haguane ngoaiho bedagoria bi nagalone kudaga bi nalabe. Ani bialu Ngode Datagaliwabehondo bi nagalone ngago lu laabo nahabe.
SIR 7:15 Mabu biabe bulene erekuibi ngagola wahalu ibida napobe. Ai biabe ogoni Ngode Datagaliwabe Daligaore kago ibuguaore mo winigo nga.
SIR 7:16 Wali agali mana ko biaga karu baba mandagi holeni nahabe. Anduane Homogonaga miniha keba holene abale tagira ibaga ngago manda bialu habe.
SIR 7:17 Í̠ni mo dindiha howa holene nga. Ira denela ngoelame wali agali ko biaga karu nai holebirago manda bialu ani habe.
SIR 7:18 Ai muni hangu mule ínaga nenege wanahabe. Ani bialu dindini wini ngolo ngaru mulenaga í̠ni hameneore kago wanahabe.
SIR 7:19 Í̠ wali mbira manda bayalebi bedago taya bulene ngago irane wali bayaore bedago ibu dindini ngolo ngaru bibahende bolangua hene beda.
SIR 7:20 Wali agali í̠ andaga handaya ho haga bu karuhondo mo ko nahabe. Ani bialu í̠naga biabe ndelahe erekuibi ngaru bialu haga wali agali bu karuhondo mo ko nahabe.
SIR 7:21 Agali í̠naga biabe bia haga mbira biabe baya hangu biaga kago gubalini ho holene nga. Ani howa horo mbirungi ibuni andaga poa hayagua í̠na napobe lolene nawi.
SIR 7:22 Í̠ nogo bulumagaru hinu hegua nde baya hangu handaya ho holene nga. Ai nogo urunime í̠naga biyinaya berego biamogo biagayagua nde muni mia nabi helo wahabe.
SIR 7:23 Í̠ waneigini hayagua nde ti wene waneigini emene kaore biawi halu ogoningi howa dege bayale helo mo tiga bibe.
SIR 7:24 Í̠ waneru bereagua nde í̠na ti baya hangu mamage ho howa ti baame berelo wanahe hongo howa handaya ho habe.
SIR 7:25 Ai wandari mbirago agalime dabubilo miriyagua nde í̠naga biabe timbuni biaiore harigoni ndobe. Anigo í̠ wane agali manda bayalebi kago hondowa mibe.
SIR 7:26 Í̠ one gubalini ho keyagua nde wahalu pu nalabe. Anigo ibugua mini kira wu biruligo dege de hondo habe.
SIR 7:27 Í̠na hongo holene bibahendeme í̠ aba mitangi halu í̠ ai̱yahanda nde í̠ taba hanayangi tandaga gibiore nenego mitangi bibe.
SIR 7:28 Aba ai̱yalame í̠ habelo holene ngini kego baya hangu mitangi bibe. Mbirale tigua í̠ ngiyago damene miadai bibe nahe kego manda bialu holene nga.
SIR 7:29 Í̠naga bu mini bibahende Anduane Homogo andaneha haabo howa agali ibunaga biabe bialu haga agali loma binigo mo miaga bu karuhondo mana bayale bulene ngadagua bialu halimu.
SIR 7:30 Í̠naga hongo holene ngego bibahendeme Ngode Datagaliwabe kago gubalini halu wali agali haru bamba haga kago baya hangu mitangi halu halimu.
SIR 7:31 Í̠na Anduane Homogo ibunihondo gi ho howa agali ibunaga biabe bia haga agali loma binigo mo miaga bu karunaga mini yaraga halu holene nga. Bulene nga lalu maname ledadagua bialu tǵua mbiraleru agali loma binigo mo miaga agali karu mo mialu bulene nga. Mbirale mulene uruni mabuha tomo hengedego pigane boga birarubi ko domolenenaga loma ngarubi nogo ega ge loma bu mulene ngarubi loma maru loma bia hene ngarubi loma marubi bu mulene nga.
SIR 7:32 Anduane Homogohanda í̠ mo bayale helo í̠na mbirale ngeru maru yagibano bu karu talebu migi bulene nga.
SIR 7:33 Wali agali homayaru mitangi ho howa wali agali nahome karu mo turu halu mbirale bame migi bulene nga.
SIR 7:34 Wali agali dara ho bedaru baba mandagi dara ho biralu dugu bialu bedaru baba dugu bialu birulene nga.
SIR 7:35 Ainde wali agali warago bo ngaru embeda nahe hondo polene nga. Í̠na ogonidagua biaga hariyagua wali agalime í̠ gubalini ho holebira.
SIR 7:36 Í̠ni mbirale bule manda bu wiridago ngelowa homolene ngago ala mitangi bibe. Anidagua beregola í̠na mana ko mbira nabi holebere.
SIR 8:1 Wali agali mini lene karu baba hongo manda nabibe. ani bialu keria í̠ tinaga giha pilo yaholigo nabibe.
SIR 8:2 Wali agali muni mbirale dewawi bu karu baba lai loleni nalabe. Tigua agali biyinaya dewawi karu yolo bu heledago nahende lalu keria í̠ bope holene wuligo nalabe. Ani larogo irane ngolome wali agali dewaore mo ko hai halu kini karunaga minibi mo talola haga nga.
SIR 8:3 Wali agali bi nagalone laga karu baba lai nalabe. Ani lalu keria í̠ mbiralime gambe hale iraha delo bape haraligobi holigo nabibe laro.
SIR 8:4 Wali agali mini nawi lulu karu baba bi tabirene holeni nahabe. Í̠naga mamali henedaru mege buligo tabirene nabe laro.
SIR 8:5 Wali agali mana ko bulene ngago hondo wandialu heagua ogoni mege buleni nabibe. Ina bibahendeore bialu harimagonaga pani nolene ngadagua noleberemago baya hangu mitangi bu habe.
SIR 8:6 Inabi nde mani wali agali wahe ayu biru ngarubi dege holeberemago ai wahe urunihondo mege nabibe.
SIR 8:7 Ani bialu wali agali mbirago homayagua ogonihondo turu holeni nahabe. Ainde mani inabi homole dege kemago baya hangu mitangi bibe.
SIR 8:8 Agali manda timbuni bi karume te larago nagalone larabe toba holeni. Ani ndo. Tigua lawai harago baya hangu hale howa mo yai holene ngago irane tigua í̠ tigabi howa agali haguane tinaga biabe bulene ngago biamogo bia habelonaga lolebira.
SIR 8:9 Agali wahe bedaru tigua te bamba tinaga mamali bu heneruha howa lawai hene ngago lalu birulebirago ainde í̠na tinaga te lalu bedago wahalu napobe. Ainde í̠na te anidagua lalu bedago baya hangu hale hariyagua nde í̠ha genda tara tara anda ibugu biraru ogoale ibiyida la dai bulene holebere.
SIR 8:10 Wali agali mana ko biaga bu karunaga bu mini dimagoli holene ira hungu ale hedope holeni nahabe. Ani bialu keria í̠nibi dolene wuligo nabibe laro.
SIR 8:11 Wali agalime í̠ mo keba howa bi laba lowa lalu heagua nde í̠na abale lungulope halu ladai buleni nabibe. Tigua bi í̠na tigabi larego mo beregedalu í̠ mo ko halu mo yobia holebirago nalabe laro.
SIR 8:12 Wali agalime hongo halu í̠ha dano dewaore holiya ngi larago hale halu muleni namibe. Anigo ainde dano helo miriyagua í̠naga muni pu ereba haragoniore ndobe.
SIR 8:13 Í̠na muni ngego emene dege ngelowa mbiralinaga dano henego abale nguliya lalu latagi holeni nahabe. Anigo nguliya lalu abale latagi hariyagua nde dano abaleore mibe.
SIR 8:14 Agali godi hale halu mo tale biaga kago godi laba lole haru poleni napobe. Irane ibunaga hongo tara ngagome ibunaga mini haru helowa bi lolebirago.
SIR 8:15 Wali agali mine haga bu karume í̠ genda dewa mo nguligo í̠ ti heba mandagi ibagabu holeni nahabe. Tigua mana ko tinime hame ledago bialu lulu ale howa biagadaru bialu kagola í̠ heba mandagi mo ko holene wuligo ti heba mandagi nahabe.
SIR 8:16 Wali agali keba haga kago baba gungu nabibe. Ani bialu agali ogoniale baba dindi ko wali agali nahaga ngagoha mba lalu napobe. Agali ogoniale kagome holene mo galone nahaga kago ndobe. Tigua dindi ko wali agali nahaga ogoniha howa í̠ bo waholebiyagua í̠ biamogo bulene mbirali ai kabe.
SIR 8:17 Wali agali lulu karu baba mandagi biruwa bi nalabe. Irane aginaga tigua bi wali agali bu kagoria lo paya bulebirago nalabe.
SIR 8:18 Mbirale do howa lolene ngago wali agali dindi taraha howa ibini bu karu hale helo lolene nawigo nalabe. Mani agi bulebirabi í̠ manda nabi kego nalabe.
SIR 8:19 Wali agali bu karume í̠ abogo keda lo manda nabi kago í̠naga mini ngego wali agali bu kagoria lama ibaga nabibe. Anidagua biriyagua í̠naga turu holene emene ngago mo waholobere.
SIR 9:1 Í̠ one bedagohondo ko birabe toba howa mini ko nawibe. Í̠nime biawai haregola ibuguabi nde í̠hondo ko bialu kebe toba holebirago nabibe.
SIR 9:2 Wali mbira bedagome í̠naga hongo bope holigo í̠ni ibuhondo namibe.
SIR 9:3 Wali mbira í̠nenege birule hamelo bedagome í̠ gili lolebirago ibu hangu karia ngola nahabe.
SIR 9:4 Wali mali liaga iba gana lalu dawe haga bedagome í̠naga mini mo batara howa í̠ mo hondo holigo ibu heba mandagi nabirabe.
SIR 9:5 Wandari mabuage bedago í̠na yolo buligo deme hongo howa handaya nahabe.
SIR 9:6 Í̠naga muni mbiraleru bibahende wahai holeberego í̠ bayanda wali baba mandagi holeni nahabe.
SIR 9:7 Tanoha howa hariga bibahendeha de handama ibaga buleni nabibe. Ani bialu hariga wali agali nahe ngagoha hangu pupe halu poleni napobe.
SIR 9:8 Wali bayaleore mbira ibiyagua í̠na ibu deme handaya nahe de handa tara halu pobe. Agali mendeali one baya bedago deme handaya nahabe. Agali mbira ibu one bayale bedago deme hongo howa handaya nahabe. Heneneore agali maru tinaga bu miniha dimagoli holene ira hungu ale bialu kagola ti wali maru bedaru baba ibaga bu haga ka.
SIR 9:9 Wali mbira agali one bedagola mandagi birulene nawigo ibu heba mandagi tomo bayaleru dewa dawa nalu lulu ibaru dewa nalu luluyu biruleni. Ani bederia í̠naga bu mini hongohe ibuha poragola í̠ mo ko halu pi loligo nabirabe.
SIR 9:10 Nenege ala hene biago mani hene kagome bolangua hene ndo holebirago nenege ala hene kago yu wanahabe. Nenege mani hene kago ibu waini iba gahange wabini ngagobi ka. Anigo waini iba lu ngelowa mani nariyagua baya dendebiore wiaga.
SIR 9:11 Wali agali mana ko biaga kagonaga mini yaraga halu mo ko holene mbira agi ibulebirabe í̠ manda nabi kego ainde tinaga mini timbuni yaraga hene kago hondowa dimagoli holeni nahabe.
SIR 9:12 Wali agali tigua turu haga ngagohondo í̠ turu holeni nahabe. Baya hanguore manda bibe. Ti homeneru dindi humbirini andagaha pu nabi wene kaore pani nolene koore ngago abale ngola holebira.
SIR 9:13 Mbiralime í̠ bo waholobada lo manda nabi hole wali agali homelo bo wahaga bu karu baba mandagi holeni nahe putara halu kaundia habe. Anigo ti kagoha kaware piriyagua nde í̠nime poro lalu penedago í̠ni mamage ho habe.Ogo dege manda bibe. Í̠ mbirali mbira gabua uli dewaore ngagoha handa nabi howa pupe halu piagagobi howa wai bialu kagoria bamba halu timu deneni pu hagagobibi holebere.
SIR 9:14 Í̠naga nenege bu karu baya hangu minime mo tale buwa wali mini gigabi bedarunaga mini bayale ngago hale halu mo yabe.
SIR 9:15 Bibahendengi wali agali mini bayalewi bu karu baba te lalu biraga kegoni howa dewangiore te laabo halu Ngode Datagaliwabe Daligaore kagonaga bi mana ngago lolene nga.
SIR 9:16 Wali agali bayale tigabi karu ti dege í̠ andaga tomo nami̱ya ibidaba lalu í̠ni Anduane Homogo ibu andaneha haabo howa ibuni hanguhondo gi ho haabo holene nga.
SIR 9:17 Agali anda biaga kago ibu biabe bayale ibuni biragome ibunaga mini mo yaribia ho halu agali haguane bu karu ti tinaga bi bayale laragome tinaga mini timbuni mini lene ka lene haga.
SIR 9:18 Wali agali tini dindi anda wiyadagoha haga karu ti wali agali bameore bi kulukala lalu kudaga haga kago gi halu wali agali bi galone ndo ngago lalu karia ti handabe manga haga ka.
SIR 10:1 Agali haguane kago mini gigabiwi heagua nde ibunaga wali agali baya hangu haru halu wali agali manda bayalebi karume haguane howa wali agali baya hangu haru holebira.
SIR 10:2 Wali agalinaga agali haguane kago ibu bayale heagua nde wali agali tibi bayale dege holebira. Ani bialu agali haguane dindi mbira mbiraha haga bidago bayale heagua nde ibunaga wali agali bu karubi bayale karulape dege holebira.
SIR 10:3 Kini ibu mini nawi heagua nde ibunaga wali agali mo ko hai hagane nga. Anigo agali timbuni haguane hayadago ibuni manda bayale bi heagua nde ibugua ibunaga dindi bayale ngelo mo heya hagane nga.
SIR 10:4 Dindi handaya ho holene hongo Anduane Homogo ibuniha ngago ainde ibugua wali agali bayale karu mo heya holenengi mo heya haga ka.
SIR 10:5 Anduane Homogo ibunime wali agalinaga biabe bulene ngago mo bayale halu kininaga beba gilibia dagala biaga agali kagonaga mini yaraga haga ka.
SIR 10:6 Í̠naga nenege kagome ko emene mbira biragola ibuhondo keba halu hongo howa lai lolene nawigo nalabe. Wali agali mbiragome í̠la mine hayagua nde bialu helo habe. Mbirale mbira abale bulene nawiorego nabibe.
SIR 10:7 Mine hagane ngagobi wali agali mende kago mo ko holene mana ngagobi ogoni Anduane Homogonaga denibi wali agali maru karunaga denibi mana koore nga.
SIR 10:8 Gabumane agali tara tara bu karume mana ko lehe ngago taluwa bialu mine halu page dewa biaga ka. Anidagua biagane ngagome horo ayu marume gabumane haru kagola horo mendengi agali marume gabumane haru haga ka.
SIR 10:9 Wali agali dindini hene bame dege kago ai tininaga mini mo yaraga halu holene nawiore. Ti dindini kangi dege homabi ti heba nahe dege ka.
SIR 10:10 Anogodame warago lu balu wirago manda bibe nahe haga bialu kagoni.
SIR 10:11 Ayu í̠ kini kegoni yawi í̠ homale dege ke. Wali agali homene ngago ngoebi bunguna bedarubi hi̱mi̱ ngarubi tigua homa tingini ngago handaya ho haga nga.
SIR 10:12 Wali agali mine haga karume Anduane Homogo wahagaya. Tigua tinaga bu miniha Ngode Datagaliwabe mitangi emeneorebi mbira nahagaore ka.
SIR 10:13 Mana ko bulene ngago ibunime mine holene yu anda ibaga nga. Ainde wali agali kome dariba hene karu tigua mana koorene ko tara tara ngaru bialu haga ka. Ani bialu kagonaga Anduane Homogo ibugua wali agali tara tara bu karu pani mialu bo wahai halu erebaore helolebira.
SIR 10:14 Anduane Homogohanda kini hearu bope hai halu wali agali damene bu hearu minalu kininaga henge wiagoria bira karu lelaya.
SIR 10:15 Anduane Homogohanda wali agali dindi anduane hearu bo taliatagi hai howa wali agali daga nolene bu hearu minalu ti hene wiagoria ho aribia helaya.
SIR 10:16 Anduane Homogohanda tinaga dindi mo labu hai helalu ti dalu wiaru bo haealahole bilaya.
SIR 10:17 Hameigini maru bo haealahole biai helayagola wali agali uruni aria mbirali abago ogoria heneya lalubi mani te nalolebiraore.
SIR 10:18 Anduane Homogohanda wali agali ti ibaga biai halu mine halu keba howa bi hongo howa lama ibaga bu helo ndo wabini.
SIR 10:19 Mbirali ai ibuore mini lene holobadabe. Wali agali degeme mulene nga. Ai ibu mini lene holene ngabe. Wali agali Anduane Homogonaga bi hale haga karu ti dege mini lene holebira. Wali agali mini lene habe nahe ai kabe. Wali agali dege holebira. Ai ibu mini lene holebirabe. Wali agali Ngode Datagaliwabenaga bi mana lo ngago hale nahaga bu karu ti mini lene naholebira.
SIR 10:20 Wali agalime tinaga haguane kagonaga mini yaraga haga ka. Anidagua dege Anduane Homogohanda wali agali ibunaga bi hale halu haga karunaga mini yaraga haga ka.
SIR 10:22 Wali agali Anduane Homogo gi halu ibu andaneha haga karu ti homogo mbirale dewaorewi heaguabi wali agali mini lene heaguabi mini nalene heaguabi bibahende mini lene hai holebira.
SIR 10:23 Mbirali yagibano howa manda bayalewi kago bo hengedope holene nakarulape. Wali agali mana ko biaga karunaga mini yaraga holenebi koore nga.
SIR 10:24 Ainde heneneore wali agali tigua agali timbuni karubi agali haguane karubi godi hale halu manani mo tale biaga bu karubi uruninaga mini yaraga haga nga. Anigo wali agali uruni aria karu ti mbirame wali agali maru Anduane Homogonaga bi hale haga karu bolangua habe naheore ka.
SIR 10:25 Anda anduane kagome biabe bia haga mini mandaru bayalewi kago talima piagane nga. Ainde wali agalime mini bayale wu heagua nde ogoni wu kago taga holene nawi.
SIR 10:26 Ai biabe mbira bialu hariyagua kudaga bi lama ibaga nabibe. Ani bialu í̠ yagibano hariyagua nde ke̱ howa í̠ninaga mini yaraga halu holeni nahabe.
SIR 10:27 Wali agali biabe bialu howa tiha mbirale tubagi nahe karume wali agali kudaga bi dewa laabo halu tomo nolene nawi gariho karu bolangua hene ka.
SIR 10:28 Waneigini-o í̠ni mo dindiha ho hariyagua nde í̠ mini lene bayale holebere. Ani howa bi í̠na larego galone hayagua nde í̠ninaga mini yaraga holene karulape ke.
SIR 10:29 Wali agali tini handaya ho habe nahe karu aiwa biamogo bialu holobadabe. Ani bialu wali agali tini taga ho haga karu mini lene helo aiwa mo yaraga holobadabe.
SIR 10:30 Yagibano karu tinime tinaga mini bayale ngago latagi halu kagome tinaga mini mo yaraga hene mini lene haga. Anigo homogo bu karu ti tininaga mbirale dewa wu karume ti mo mini lene helaga ka.
SIR 10:31 Yagibano mbira ibu mini lene hayagua ibu muniru dewawi harangi ibunaga mini yaragaore halu ibu mini lene daligaore mbira holebira. Muni mbirale dewawi homogo karu ti mini lene ndo heagua nde mani ti yagibano harangi tinaga mini nawi erebaore holebira.
SIR 11:1 Agali yagibano ibu mini bayalewi heagua nde ibu agali haguane karu baba mandagi birulebirago ibu turu ho holene nga.
SIR 11:2 Wali agali tingini hangu bayale karunaga mini yaraga holene nawigo nahabe. Ani bialu wali agali koale karu mo guya nahabe.
SIR 11:3 Mone tara mbira bedago ibu emene dege bedagome habane ngago ibane dendebioreni ibu duniniore mbira wiaga beda.
SIR 11:4 Tigua í̠naga mini yaraga haragola í̠na mine howa aga bayale ngaru mo karulo holene nawigo ani nabibe. Ani larogoni irane mbirale Anduane Homogohanda biagago bayaleore biaga kago ainde wali agalime biabe ibugua biaga ngago damene ti manda nabi ka.
SIR 11:5 Agali haguane dewaore tinaga biabe biaga wiaru wahai howa tini dindini bedagola agali mbira daga nawini heago ibugua tinaga henge ibu miai haya.
SIR 11:6 Agali haguane dewaore bu hearunaga mini mo ngubia halu mo ko hai hayagola wali agali mini lene bu heneru ayu wali agali tara hearunaga giha henego ka.
SIR 11:7 Wali agali mbirago godini haru polene manda biriyagua nde ti wali agali ogobiore kagoda lalu baya hangu mo tale ala bibe. Tihondo keba halu lai loleyagua nde í̠ni miniha mitangi ala bibe.
SIR 11:8 Wali agali mbirame bi lalu heagua í̠na lapugua bulene nawigo lapugua nabibe. Baya hangu hale hai howa bi ladai bibe.
SIR 11:9 Wali agali tigua í̠ mitangi nabiore kago í̠na tinaga mbirale ngaru mitangi holene nawigo nahabe. Ani bialu wali agali mana ko biaga karu ti godi lalu bedagoha í̠ ti heba mandagi nabirabe.
SIR 11:10 Waneigini-o biyinaya biabe tara tara ngaru dewa nabibe. Tara tara dewaore ngaru biai holene manda biriyagua nde í̠ni mo ko holebira. Abale bu bolangua naholeberego gerai lalu ala bigi nabibe. Mbiraha ibida pu haraiyagua nde í̠naga biabe biagane uruni ereba naholebira.
SIR 11:11 Wali agalime biabe erekuibiore ngaru hibu lowa hongo howa bialu haabo haga. Anigo tiha dewaore tubagiho haabo ka.
SIR 11:12 Wali agali marume nde biabe nabiaga kagola maru karume urunibi karu biamogo biaga ka. Ti hongo nahe howa tiha mbirale dewa tubagiho haga ka. Ani kagola Anduane Homogonaga deme handape halu ti de hondowa ti biamogo bialu haga ka. Ani bialu wali agali mo ko hene uruni lone mo heya halu
SIR 11:13 tinaga emboneha yagi mo yaraga haga ka. Ani biyagola wali agali dewame hondowa ti mogo lo hendene.
SIR 11:14 Anduane Homogohanda mbirale ko bayalebi ngia dege biaga ka. Ibugua holene ngialu holene lone mo yu dai biaga ka. Ibugua wali agali mo yagibano halu lone mbirale dewa mialu mo homogo haga ka.
SIR 11:15 Anduane Homogo ibugua mini gigabi wulenebi lawai halu ibunaga bi manabi ngiaga ka. Ani bialu mendeali kago gubalini howa biamogo bulene mo wia haga ka.
SIR 11:16 Anigo ainde mana ko lehe ngago damene aruma holene mana bulenebi uruni wali agali mana ko biaga karuha howa ibaga. Ani bialu mana ko uruni wali agali mana ko turu haga bu karu baba haabo halu tini homalu wahaga.
SIR 11:17 Anduane Homogohanda wali agali tigabi karuhondo mbirale miaga ngago damene bibahende mo ko nahagaore. Biabe mbira Ngode Datagaliwabe ibu hame ledago bialu heagua nde biabe ogoni mo ko nahe bayale bialu haabo haga.
SIR 11:18 Agali muni dewaorewi karume mbirale dewaore mo ngoaiho wu hayagua nde ibu yolo agile mulubadabe.
SIR 11:19 Ibugua lalu, Ainde ema nabi ha̱lo biruwa tomo mbirale bayale ngaru nalu biruliya, lagane. Anigo ibunaga tomo bayale uruni nalu holene horo agira ngabe ibu manda nabi kago ainde ibuni homaragola wali agali tara bu karume ibunaga tomo bayale uruni no aribia holebirago ibu manda nabi ka.
SIR 11:20 Habo nalolene bi lo wirigo baya hangu yu habe. Waore nahabe. Yu haabo halu í̠ni waheore howabi yu haabo habe.
SIR 11:21 Wali agali mana ko biaga karume biabe biaga ngago í̠na dimagoli nahabe. Í̠ninaga biabe biaga wiridago yu howa Anduane Homogoha kaware haabo habe. Anduane Homogohanda yagibano bu karuhondo mbirale bayale ngaru abaleore mo miaga kago manda bialu ibuha haabo habe.
SIR 11:22 Ani bialu ibunaga mo turu holene ngago abaleore mo dewa haga ka.
SIR 11:23 Ainde í̠na lalu, I̱ha mbirale agilego tubagiho kobe. Mani bayale mbira agigo mo yuledabe lolene nawigo nalabe.
SIR 11:24 Í̠na lalu, I̱ karulapeore kogodago i̱ mo ko holene mbirale mbira agigo ibulobada, nalabe.
SIR 11:25 Wali agalime bayale kangi ko ibulebirago mo embeda ho haga. Ani bialu kongi howa bayale ala hayago mitangi bu dai nabiaga.
SIR 11:26 Heneneore Anduane Homogohanda wali agalihondo yolo mulenego erekui nabiore ndobe. Wali agali tini homaga birangi Anduane Homogohanda mana tinime bialu hayagonaga yolo mulene winigo migi bulebira.
SIR 11:27 Wali agali tiha mo ko holene íbu ngagola mbirale bayale damene ngago abaleore embeda hai hagaya. Wali agali mbirago homaragola tigua bialu hagadago panaga wiai haga.
SIR 11:28 Wali agali mbirago nahome kangi ibunaga mini yaraga holene nawigo mini yaraga nahabe. Tinaga waneigini kago baya hangu lawai halu howa aba ai̱ya tininaga mana ogobioreda lo manda biai holebere.
SIR 11:29 Wali agali tara tara bu karume tinaga ohaga boga gibi bidagome í̠ mo hondo holigo í̠ andagaha wali agali ta nabi ibai hadaba loleni nalabe.
SIR 11:30 Wali agali mine haga uruni ti wali agalime mbirale ega henene ndo ega henene bedago mo hondo holenaga berelaga ka. Tinaga miniha oholene ogonibiore ka. Tigua ohowa í̠ pilabelo hondo haga ka.
SIR 11:31 Tigua biabe bayale í̠na biniru mo beregedalu biabe bia ko haya lole ka. Mana bayale biaga ngeru tigua mo ko howa te ko ngaru lalu holebira.
SIR 11:32 Ira dene emene mbirame ira datimbu haga ndobe. Anidagua dege wali agali mana ko biaga bu kagome í̠ homolene ngagoria pialu homabelo mo hondo haga ka.
SIR 11:33 Wali agali ko biaga bu karume mbirale ngago damene mo ko hole dege manda biaga bu kago deme handalu mamage ho habe. Tigua í̠ha mo taga holene ngago mo para haragola í̠ha taga ho haabo holene mbira mo bade holigo hondowa holene nga.
SIR 11:34 Í̠na wali agali dindi taraha howa íbu hene karu í̠ andaga haru piriyagua tigua í̠ ko tara tara ngagoha haru poragola í̠ mo luluya holebira. Ani biragola í̠ni dameneru baba mandagi howa í̠ dindi tara howa íbu hene mbira haradagua bulebere.
SIR 12:1 Wali agali bu karu mo turu halu bayale bulene manda biriyagua nde wali agali í̠na ti biamogo bulene manda bu haridaruni tinaga mana agobi biagadabe hondole mo talebu handabe. Ani buwa í̠naga biabe bayale beregonaga turu halu í̠ ka̱i̱ loleberego ani bibe.
SIR 12:2 Wali agali tigabi bu karuhondo biriyagua nde tinime í̠hondo emena bolebira. Ani nabiyagua nde Anduane Homogo Daligaore kago ibugua í̠ emena ngulebira.
SIR 12:3 Wali agali mana koha haabo haga kagoha howabi wali agali burupale yagibano bu karu biamogo nabiaga karuha howabi mbirale bayalego mbira tagira naibaga ndobe.
SIR 12:4 Wali agali tigabi karu biamogo bialu mana ko biaga bu karu biamogo nabibe.
SIR 12:5 Wali agali ko mini nalene karu biamogo bialu, Wali agali ko biaga karu mbiralebi tomobi mulene nawigo namibe. Ani miriyagua í̠ mo ko holene hariga handa walia holigo nami waholeneore nga. Í̠na tihondo mana bayale bini wiaguabi uruni ani bi lowa í̠hondo ko bule manda bu holebira.
SIR 12:6 Anduane Homogo Daligaore kagome wali agali mana ko biaga uruni baba keba taraore ho howa ibugua ti pani nelo miaiore holebira ndobe.
SIR 12:7 Wali agali tigabi bu karuhondo bayale bulene ngadagua bialu wali agali mana ko biaga karu biamogo bulene nawigo nabibe.
SIR 12:8 Horo bayalengi í̠naga nenege bayale abogo ka lalu manda bibehego nabulebere. Anigo horo kongi í̠naga waitigi bu karu ti hado naholebira.
SIR 12:9 Í̠naga mbirale ngeru bayale ngangi waitigi karu tinaga bu miniha genda ho haga. Í̠naga mbirale ngeru mo ko halu ereba hai harangi í̠naga nenege bu hayarubi í̠ wahalu piai holebira.
SIR 12:10 Í̠ waitigi karuhondo mini mbiraore wulene nawigo nabibe. Ibugua í̠ mo ko halu mbirale hagua biagaleme gaba hagua biagadagua í̠ mo ko ibuni helolebira.
SIR 12:11 Nenege ko uruni aleme ke̱ howa tini mo dindiha halu í̠ha bi gedaoreme ladebodebo bialu holebirago ainde wali agali uruniale bulene kagohondo mamage howa oha habe. Mana tinaga ngago baya hangu handa walia hole hongo howa agalime ibawa̱i̱ dodohe ngago baya hangu domalu karia dodohe dege ngane de handagadagua tinaga mana ogonibidane hondolebere.
SIR 12:12 Tigua í̠ bope halu í̠naga henge ti muligo í̠ni bedegoria mandagi haru biruleni na birabe. Í̠naga biabe ti mo yu pu bagi holigo ai í̠naga gi tigaha yagi naberelabe. Ainde bi i̱na larogoni heneneore leneda lalu tagira ibirangi handa walia halu manda bulebere. Ani birangi bi i̱na larugome i̱naga gubaliniha nogoba harane hondolebere.
SIR 12:13 Wali agali mbirago ibu puya hinu karia puya ogonime ibuni hayiyagua nde ibu dara aiwa holebirabe. Mbirali ibunime nogo gabua kagoha piyagua nde ibu dara aiwa holobadabe.
SIR 12:14 Anidagua dege wali agali mbirago ibu wali agali mana ko biaga bu karu baba hayaguabi tigua biabe ko biaga ngaruha handa handayaguabi nde tigua ibu dara naholebiraore.
SIR 12:15 Í̠naga waitigi karu tigua í̠ baba tigi mbira hangu howa handalu karia í̠ hariga mendeha yagi pole keria handayagua nde tigua í̠ wahalu polebira.
SIR 12:16 Waitigi tinaga ne harigaha nde la debodebo bi baya lalu holebirago ai henene ndo tinaga miniha í̠ uliha minu bape hole howa lalu holebira. Waitigi tinaga de pora dugu bialu ha holebiragoyu tigua í̠ wene balu homelo lene hariga taya bialu holebira.
SIR 12:17 Mo ko holene genda timbuni mbira í̠ha anda ibiyagua nde waitigi abaleore kaware íbu howa í̠ biamogo bule hetingi howa hondo holebira. Anigo ibugua í̠naga ge poregoha hana howa pilolene mbira mo ngelalu í̠ mo pila holebira.
SIR 12:18 Ibu agali bu karuale ndo taraore mbira tagira íbu holebira. Ibugua ma tanda lalu wangarere bialu gi habe balu í̠ha gi dola howa mege taraore bialu holebira.
SIR 13:1 Mundu kalaro ndobabi ngago í̠ gime yidegola í̠naga giha para haga bulebira. Anidagua dege wali agali mana ko biaga bu karu baba mandagi haga hariyagua nde í̠bi wali agali ko biaga uruni ale dege holebere.
SIR 13:2 Mbirale í̠na yaraga holene gendabi ngago yaraga holene manda nabibe. Ani bialu wali agali í̠ dindiha lowa daligaore howa muni mbiraleru í̠na ngego wu bolanguahe kago baba mandagi nahabe. Todobene be dindime wabini ngago todobene be ainime wabini ngagola mandagi ngeria dindime wabini biago pambu lolebirago mandagi nawibe.
SIR 13:3 Muni mbirale dewawi homogo kagome mana lehe ngago bialu howa mana lehe biyagonaga bi nagalone mine howa bi ngago lalu holebira. Tigua wali agali yagibano karuhondo mana ko biyagua nde yagibano uruni tigua ko bini ndo ngagoyu ai tini genda yidago dambi halu tigua dege daraba lolene nga laga.
SIR 13:4 Homogo karume í̠naga mbirale ti hame layagua la nabi bame yamiaga. Ani bialu í̠ha mbirale tubagiho kegola ibugua í̠ erembira ngulebira.
SIR 13:5 Í̠ha muni mbiraleru yu hariyagua ibugua uruni mo hole bialu nai holobada manda nabi howa mo holebi nai ha bialu í̠ heba mandagi holeberebi.
SIR 13:6 Ani howa í̠hondo ibu biamogo bia layagua henene ndo ke̱ halu í̠ mo hondo howa lolebira. Ani lowa ibugua í̠hondo bi bayaleore langialu lalu, I̱na í̠ mbirale mbira biamogo bulene ngabe lalu hole holebira.
SIR 13:7 Ibugua ohowa í̠ mo taga holenaga tomo dewa nabelo ngulebira. Anigo o bulubadagoni í̠naga mbirale ngeru nai holenaga ani bulebira. Ibugua halu kiru tebirubi ani dege bialu howa mani í̠hondo oba holebira. Ani bialu í̠ lone ngola hayagua nde í̠ha tawe mbirale mbira hale halu manda bulene hame nalolebira. Ibunaga ma ema bima polebira.
SIR 13:8 Tigua í̠ mo hondo harago nahende howa í̠ lulu mini nawi howa bialu keria í̠ni mo taga holenego de hondo habe.
SIR 13:9 Agali haguane mbira kagome í̠ olalu ibu layagua ibu hongo howa ibuore lelo emene hondo habe.
SIR 13:10 Ibugua í̠ bo taliatagi holigo í̠ abale polene nawi. Ani bialu ibugua í̠ embeda holigo í̠ kanduiaha nabirabe.
SIR 13:11 Agali uruni ale kago í̠naga nenege mandagiore ibagabu holenebi libu te lo holenebi bayale kabe tobaho holeni nahabe. Ani bialu bi dewaore ibu degeme lalu holebirago henene larabe toba nahabe. Ibugua bi te dewa lalu í̠ abidabe hondole bahandalu bi lolebirago manda bu habe. Libu bi lalu oba harabigo í̠naga mana abidabe hondolenaga biagago manda bulene nga.
SIR 13:12 Mbirali ibugua te libuni hangu howa lenego wali agali hale helo lo yu ibaga bialu heagua ogoni ibu mendeali dara nahaga ka.
SIR 13:13 Ani biaga kagome í̠ mo ko halubi garabaya helolenebi ibugua gi nahe howa tanabi bulenego biai holebira.
SIR 13:15 Gabua tara tara bu karu ti dameneru baba mandagi haga kago ainde wali agali ti damene heba mandagi haga dege hene.
SIR 13:16 Mbirale ema bialu piaga bedaru tigua nde ti aria bedaru baba mandagi haga. Anidagua dege wali agali tiguabi nde tini ale dege dege mandagi haga.
SIR 13:17 Ai biango dudu irabuha hagane bu karume nde nogo sibi igini bu karu baba mandagi ibaga bu holobadabe. Anidagua dege wali agali ko biaga bu karu tibi nde wali agali ko nabiaga bayale karu heba mandagi ibaga bu naholebira.
SIR 13:18 Ai biango gabua irabuha haga kagome biango maru hinini andaga haga kago baba mandagi bayale holebirabe. Anidagua dege homogo kagome yagibano heba mini mo mbiraore howa mandagi naholebira.
SIR 13:19 Dindi ko wali agali nahaga iba dalu naibaga ngagoha dege timbuni laiono gabua kagome nogo dongi igini kago balu naga. Anidagua dege homogo bu karume yagibano bu karunaga mbirale ngaru nai haga ka.
SIR 13:20 Wali agali mine haga bu karunaga deni í̠ni mo dindiha ho holenego koorene ko nga lo manda bu hagaya. Anidagua dege homogo bu karu tigua tinaga miniha yagibano bu karu ko galone nabulene ka lo manda bu haga ka.
SIR 13:21 Homogo karu pilabehe kagola ibu aria karume mo hongo ho helaga. Anigo yagibano karu pilaragola ti damene karume pilelo wahalu ti piaga.
SIR 13:22 Homogo kago piledagola wali agali dewaoreme ibu biamogo biaga. Ibugua ti baba ogoale bimi̱ya lalu habo nalolene bi lo wiragola wali agali tigua bi ogoni karulapeda lo manda biaga. Anigo wali agali homogo ndo karu piledagola wali agalime ogonihondo keba halu lai lo miaga. Yagibano pilayagome bi bayale lamirago lelowa tiguabi ogoni hale nahaga.
SIR 13:23 Anigo ai homogome bi larangi wali agali tigua ema nabiore baya hangu hale ho howa tigua bi ogoni bayale duninida lagane ka. Anigo homogo ndo karume bi laragola ti hale nahe howa lalu, Ogoni í̠ ai kebe laga ka. Ani bialu yagibano mbirago bi layagua wali agali tigua ge perege baga ka.
SIR 13:24 Muni mbiraleru mana ko bulene ngagoha howa ndo mini wiagua ogoni ko ndo bayale nga. Anigo wali agali mana ko biaga bu karu tigua lalu, Wali agali yagibano holenego mana ko nga lagane ka.
SIR 13:25 Mini wali agaliha ngagome tini turu ho kema keba ho kema lalu tinaga wanakuime latagi haga ka.
SIR 13:26 Ai wali agali tinaga bu miniha dungulo heagua nde tinaga wanakui bode wále holebira. Anigo tigua mini bayale wu karu latagi hole howa tinaga embone tandaga haga.
SIR 14:1 Wali agalime tinaga bi ledagoha bi ko mbira nale heagua tini turubiore ka. Tinaga ko mitangi halu dara howa genda holene nawiore ka.
SIR 14:2 Heneneore wali agali uruni tigua ko bini mbira tinaga miniha wu howa ogonime tiha ko nga lalu latagi nahe heagua nde tigua bayale mbira mani ibulebirago ngola holene manga nahe maliaho holebira.
SIR 14:3 Wali agali muni habura buwa mo do ho hagayagua nde muni ogoni bayale ndo nga. Muni mo doho hayagua nde muni ogonime tini biamogo agua bulubadabe.
SIR 14:4 Wali agalime muni mo do howa tomo nolene ngaru yolo nabi heagua nde galone nabulene bameore mo doho holebira. Ani ngelo karia mani wali agali maru karu ti mo yuwa turu holebira.
SIR 14:5 Mbiralime ibu biamogo bulene mana bayale nabiaga hayagua ibugua mendeali ai kagohondo nde mana bayale agua bulubadabe. Ibuni turu holene emeneorebi mbira nayi holebira.
SIR 14:6 Wali agali tininaga tingi baya hangu handaya ho nahaga karu tiha mo ko timbuni holebira. Ai tinime mana ko biyagonaga pani nolene ogoni holebira.
SIR 14:7 Tigua wali agali mende kago biamogo biyagua nde bero lalu ndo embeda ho howa biamogo bulebira. Maniore howa mana ko tigua bialu kago panaga tagira polebira.
SIR 14:8 Wali agalime tinaga de bu yiho howa mendeali kago biamogo bialu mia nabi heagua nde mana ko leheore ogoni nga. Tigua ma ema bialu yagibano bu karu erembira mialu piyagua nde mana tiga nabi ogoni.
SIR 14:9 Wali agali uruniale bu karu tigua mbirale emene ngaru yule turu naholebira. Tiniha dimagoli holene ngagome ti mo mini burugula haga.
SIR 14:10 Wali agali urunibi biaga karume mberedi yolobu wia nabi howa ti andagaha tomo nolene nawi haga.
SIR 14:11 Waneigini-o í̠ karulape hariyagua nde í̠ni baya hanguore handaya ho habe. Ani bialu loma bayale Anduane Homogo ibu hame laga ngaru loma bu yalu pu mibe.
SIR 14:12 Homa ibu hondo holenaga henge emene mo yadai nabiaga. Ani bialu í̠ homeneru dindiha pobelo horo ogoangiore lalu tigua manda bu kago í̠ manda nabi ke.
SIR 14:13 Í̠ homa nabi kengi í̠naga nenege bu karuhondo mana bayale bialu habe. Ani bialu ti mo turu halu mbirale bame mulene karulape hariyagua nde migi bialu habe.
SIR 14:14 Mali lulene horo wiagua í̠ waho nahabe. Tomo nolene bayale wiagua waha nalabe.
SIR 14:15 Í̠ni biabe bialu harigonaga yolo mo yarigo wali agali maru karuhondo tale bialu migi bulebe. Ani meregola í̠na erekui biabe bialu yolo mo mirigo mo yuwa tigua gadi taduru bilobe.
SIR 14:16 Í̠na mbirale ngeru wali agali migi bibe. Ani bialu maru nde í̠ hondowa turu ho hole ngelabe. Irane homenerunaga dindi humbirini andaga ngagoha í̠ turu holene mbira nawulebirago ani bibe.
SIR 14:17 Aga yariru wialu ko goba hagadagua wali agalibi ha dege bialu waheale haga. Anidagua biagadagoni bambaore mana lo winidagome lalu wali agali lenego homolene nga lalu bi lo wini ngagome homaga nga.
SIR 14:18 Heneneore wali agali ogonidagua buleneore winigo nga. Abale hene karu ti homaragola mani holene ho aribia haga nga. Ira yuni ala henego dogolope haragola yuni gahange lone andaho aribia haga ndobe.
SIR 14:19 Wali agali tigua wabini ngaru ko halu ereba hai hagane. Wali agalibi tinaga mbirale uruni ereba haradagua tinibi nde tinaga biabe uruni heba homaga wini nga.
SIR 14:20 Wali agali mini bayale taya bialu haabo howa bi bayale latagi haga karu ti turubiore ka.
SIR 14:21 Heneneore wali agalime mini gigabi wulene tene ngago manda bulenaga baya hangu taya bialu hayagua nde mini gigabi wulenenaga tene ngago handa walia howa ti turu ho holebira.
SIR 14:22 Wali agalime tia gabuaru taya hagadagua mini gigabi wulene ngago talialu ibilo baya hangu hariga doroge ngagoria yu holene nga.
SIR 14:23 Ibunaga windo ngagoha de handanda halu ibunaga panga haraba ngagoha hale wia howa hale holene nga.
SIR 14:24 Ibu andaga kago kawareni ha̱lo biralu anda gene maru ibu andaga kagoha wa gimbu bialu ibu andaga hai kagoha wa gimbu buwa
SIR 14:25 balai anda bu gimbubu heledegola í̠ birulene bayale mbira handa walia holebere.
SIR 14:26 Ira timbuni gene magane timbuni pu amunanabi kago andaneha ha̱lo birulene henge mo wibe. Ani mo wu bedegola ira gene magane urunime í̠ waneiginiru yuladambi halu
SIR 14:27 ni tandagabi hongohe daragome dolino yuladambi halu gumba hai holebira. Ani beregola tí mini bayale wulenenaga hongo heba biruleberemi.
SIR 15:1 Ainde í̠na Anduane Homogo gi howa ibu andaneha hariyagua nde í̠na mana tigabi bialu holebere. Ani bialu í̠na Anduane Homogonaga bi mana ngago baya hangu talialu hariyagua nde mini bayale wulene handa walia holebere.
SIR 15:2 Wali ai̱ya bedagome ti waneigini lone ngola hagadagua bialubi wandari mabuageme igiri ibu agalini holene biago ngola hagadagua bialubi mini gigabi wulene ibugua í̠ abaleore ibu lalu haga nga.
SIR 15:3 Ani poregola mini gigabi wulene ibugua manda bayale tomo ale ngialu mini bayale iba nolene gagahe ale ngiagane nga.
SIR 15:4 Í̠ pilolino ibugua baya hangu haru haga ka. Í̠ha taga holene ngaru anda ibulino ibugua baya hangu haru holebira.
SIR 15:5 Wali agali í̠ni damene bu karu ti dege dombeneha í̠ keria mini gigabi wulene ibugua í̠ mini lene mbirago helolebira. Ani bialu wali agali íbu ngoai ho kagoria í̠na bi bayale tigabi ngago latagi habelo mini gigabi wulene ibugua í̠ lamogo bulebira.
SIR 15:6 Í̠ turu halu turu holene yu howa í̠naga mini timbuniore mini lene mbirago holebere.
SIR 15:7 Wali agali lulu bu karume mini bayale ogoni taya nabulebira. Ani bialu wali agali mana ko biaga bu karume mini gigabi wulene nahondolebira.
SIR 15:8 Mini gigabi wulene ibu wali agali mine haga karuha kaware nahaga. Wali agali ke̱ haga bu karume ibu mitangi naholebira. Mini gigabi wulenehondo wali agali mana ko biaga bu karume bi bayale lamiyagua ogoni henene ndo lehe lolebira. Tigua mini gigabi wulene mo turu holene bi lelonaga Anduane Homogohanda tinaga ne hambuni mo wia nahaga ka.
SIR 15:10 Anigo wali agali mini gigabiwi bu karuha dege bi anidagua layagua ogoni karulapego irane Anduane Homogo ibunime bi ogoni tinaga ne hambuni mo wia haragola lolebira.
SIR 15:11 Anduane Homogo Ngode Datagaliwabehanda mbirale ibu hame naledago nabiaga kago ai wali agalime lalu Anduane Homogohanda i̱ mohondo haya lolene nakarulape.
SIR 15:12 Wali agalime mana ko ngago bilo Anduane Homogohanda mo bia nahagago ai Anduane Homogohanda í̠ mo luluya haya lolene nawigo nalabe.
SIR 15:13 Anduane Homogohanda wali agali mana ko bialu kagonaga tandaga timbuni haga kagola wali agali ibuni andaneha haga bu karu tiguabi mana ko bulene hame nalolebira.
SIR 15:14 Bambaore Anduane Homogohanda wali agalila wabini. Ani wabu helowa ibugua libuhondo mbirale bibahende ko bayalela libuni miniha mo tale bilo mo tale bulene hongo libuhondo mini.
SIR 15:15 Mbirali ibu hangu hangu hameme mana bayale talialu bulene ngago ainde heneneore í̠na Anduane Homogonaga bi mana lo ngago talialu bulene karulape.
SIR 15:16 Ira dedaorebi ibabi kirabali Anduane Homogohanda í̠naga giha mo ya ho heledagoni ndobe. Ai í̠nime mo tale bialu í̠ hame ledego mo yarene.
SIR 15:17 Anidagua dege holenebi homolenebi kirabali Anduane Homogo ibuni yu kago wali agali mbirago ibu mule hame laragoale mo mulebira.
SIR 15:18 Anduane Homogonaga manda timbuni daligaorene daliga nga. Anduane Homogo ibu bolangua hene daligaore kagola ibunaga deni mbirale mbira mo do hene nawiore ndobe.
SIR 15:19 Anduane Homogo ibunaga de mbirale wali agali tigua bialu kagoha ibagabu hai ka. Tigua mbirale bialu kago damene Anduane Homogo ibuni handai ho ka.
SIR 15:20 Wali agalime mana lehe bia ko holene ngarubi mana ko nabulene ngarubi bialu halimu lalu Anduane Homogohanda ti laminigo ndo bialu ka.
SIR 16:1 Waneigini dewaore hono wiriyagua ogoninaga turu holeni nahabe. Ti mine hayagua nde tigua Anduane Homogonaga mana ngago talialu nabulebira.
SIR 16:2 Tigua Anduane Homogo kagohondo gi howa ibuni andaneha ha nabi heagua nde waneigini dewaore hono wiruda lowa ti turu nahabe.
SIR 16:3 Waneigini uruni tigua í̠na biabe erekuibi bialu ti handaya ho harigonaga mani nde tigua aribia halu í̠ handaya ho holobada lo manda nabibe. Heneneore waneigini mine haga daosini mbira (1,000) kagoha bayale mbira hangu holebira. Ainde agali mbira ibu waneigini dewaore howa bibahendeoreme Anduane Homogonaga bi mana ngago hale nahaga heagua nde agali ogoni ibu waneigini hono wianabi heangi homedale nde karulape.
SIR 16:4 Wali agaliyaguabi mini gigabi mbira heagua nde tinaga dindi ngagobi bayale dege wiaga. Anigo wali agali dewame mana ngago talia nabiyagua nde dindi mo ko haiore hagane nga.
SIR 16:5 Mbirale uruni dewaore biyane i̱ninaga deme handaga biru. Ani bialu dewaorebi ani biya laga biyane hale haru.
SIR 16:6 Wali agali Anduane Homogonaga bi mana hale nahaga bu hearuha ibuninaga tandaga holene ira hungualego tiha tagira pugu biagaya.
SIR 16:7 Bamba wali agali hongohe hearume Anduane Homogo bolangua hole manda bialu hearu ibugua nde ti dara nahene.
SIR 16:8 Anduane Homogohanda wali agali Lode daluha haga hearuhondo keba timbuniore hene.Tigua mine howa mo ko holene wiaru dewaore bialu heagola ibugua ti dara naheore hene.
SIR 16:9 Anduane Homogohanda wali agali Kenana dindiha dindi anduane bu hearu ti ko buleneme mo ko hai hene heagola ibugua ti dara nahe bo taliatagi hai hene.
SIR 16:10 Ani bialu ibugua wali agali daosini dege handari waragaria (600,000) dindi ko wali agali nahaga iba dalu naibaga wiagoha pialu hearu dara nahene. Tigua ibunaga bi mana lo wiaga mo wahayagola anidagua bini.
SIR 16:11 Ani bialu wali agaliyaguabi mine haga mbira heagua ogoni ibubi pani nalu ibuha mo ko holene ngola ha dege bulebira. Ani bulebirago irane Anduane Homogo ibu dara holene irane nawini dege dara haga kagoyu ibugua kebabi haga dege ka. Ibugua dara halu keba timbunibi ha dege biaga ka.
SIR 16:12 Ibunaga dara holene timbuni ibalu ibunaga kebabi timbuni dege haga. Ani bialu wali agali tinime bialu hayadadagua manani howa mo tale bigi bulebira.
SIR 16:13 Wali agali mana ko biaga karu ti mbirale mo page buwa yu haga bidaru tigua mbirale uruni yalu ibida yopialu polene hariga nawiore ka. Ani bialu wali agali bayale bu karu tiguabi nde tinaga yolo bayale mani mulene ngago mulenaga maliaho hole manga habe naheore.
SIR 16:14 Yolo bayaleaore dara holene irane nawini dara hagane ngagoha howa tagira ibaga nga. Wali agali tinaga yolo tinaga mini timbuni mini lene holene biabe tinime bialu henedago karulape mo yu holebira.
SIR 16:17 Í̠na ogodagua lalu, I̱ Anduane Homogonaga deni hado kogodago ainde mbirali dahuliya andagaha kagome i̱naga miniha ngogo hendedabe. Wali agali dewa dege bu karu dombeneha i̱ kogo baya hangu aiwa hendedanebe. Anduane Homogohanda mbirale timbuni wabini ngaru dege dombeneha i̱ imaru aidanebe.
SIR 16:18 Anduane Homogohanda godi lole ibirangi dindibi haribi dahuliya andagabi dindi andaneha iba timbuni pedarubi bibahende duru lalu ema biaiore holebira.
SIR 16:19 Anduane Homogo ibu ibalu dindiha de handadali haragola hari timbuni wedarubi dindinaga hongo irane ngarubi mogo lalu gi howa ema biai holebira.
SIR 16:20 Anigo wali agalibi mbirame ogoni bulebirago mitangi nabiore ka. Anduane Homogohanda biaga ngago mitangi ho haga mbirali ai kanebe.
SIR 16:21 Puyabu hongohe puloyu porago ogobida lalu wali agalime handa nabiaga ngadagua Anduane Homogonaga biabe bulenebi dewaore ogonibi handabe naheore nga.
SIR 16:22 Godi tigabiore lagane Anduane Homogonaga ngago ogodagua nga lalu mbirali aiwa latagi holebirabe. Ani bialu Anduane Homogonaga godi amura kaundiaha wiarua lalu aiwa maliaho holeberemibe, lalu bi ogonidagua lolene nawi.
SIR 16:23 Ai wali agali manda nabi mini nawi bu karume anidagua manda biaga ka. Heneneore wali agali lulu howa mbirale bia ko halu bi la ko halu haga karu tigua anidagua manda bu haga ka.
SIR 16:24 Waneigini-o hale baya hangu mia howa i̱na bi larogo hale halu manda bu yalimu.
SIR 16:25 I̱na í̠naga manda bulene bayaleore ngaru langialu tí baya hanguore lawai holebero.
SIR 16:26 Anduane Homogohanda mbirale bambaore bialu heneyaru ibuninaga minime hangu ogodagua bule wini lalu bulene wiago biai hene. Ibugua mbirale mbira wabule howa ogoni ibu ogoriaore helobi ngelobi waberogoni lo manda ala bu bambaho ngelowa wabigi bini.
SIR 16:27 Ibugua bibahendenaga tigabi bayaleorebi wiabo howa biabe bialu haabo helo mo tale bigi bialu tini holene wiagoria helaga bini. Gari lolenebi manga holenebi tiha ngola naheore howa tinaga biabe manga halu wanahagaore ka.
SIR 16:28 Bibahendeore tini daluha holene wiyadagoria haga haga bida. Ani bialu uruni ti mbirago ibugua Anduane Homogonaga bi mo wanahaga.
SIR 16:29 Ani bialu mani Anduane Homogo ibugua dindi bibahendeha handa amunana biai halu dindi bibahendeha ibunaga mbirale wiaru degeme wu to̱lai helene.
SIR 16:30 Anduane Homogo ibugua dindi bibahendeha mbirale bayaleru wu tolai helenego ainde mani mbirale uruni homalu lone dindi hai holebira.
SIR 17:1 Ngode Datagaliwabehanda wali agali dindini wabu helowa mani lone dindi helene.
SIR 17:2 Tinaga dindini holene hengebi horobi emene tigi mbira hanguni helo mo mini. Ani bialu henge emene tubagi ogoriani howa mbirale ibugua wabini dindini ngaru bibahende handaya ho howa haru helo ani helene.
SIR 17:3 Mbirale uruninaga hongo gibiore wia halu wali agali ibunaga bigiya ale helo helene.
SIR 17:4 Wali agalime ema bialu dindini biru karubi ega bedarubi haru howa handaya ho hai helo ani helene. Ani helenegome ema bialu piaga bibahendeme wali agali handalu tigua gi hai haga beda.
SIR 17:6 Wali agali tinaga de halu hale halu hege helalu mini wialu manda wialu buwa mbirale ko bayalela ngaru mo tale bilo mini.
SIR 17:7 Anidagua binigome mini mandala tara tara wali agaliha wu to̱leda. Anidagua bidagome wali agali tigua mbirale ko ogo nga bayale ogo nga lalu mo tale bulebira.
SIR 17:8 Ani bialu tigua Anduane Homogonaga biabe timbuniore bini ngago damene bibahende handa walia helo ibugua wá holene wali agaliha mo wia hene.
SIR 17:10 Ai wali agali tigua ogodagua lolebira. Anduane Homogonaga mini baya buruguleore ka, lolebira. Ani laragola wali agali maru bu karume biabe ibugua binidaru manda bilonaga ani lolebira.
SIR 17:11 Wali agali tiha holene mo yu helonaga Anduane Homogohanda tiha manda bayale bulenebi ibunaga bi manabi tihondo mini.
SIR 17:12 Anduane Homogohanda ti baba habo nalolene bi wiabo helo lo wialu ibunaga mini wiago wali agalihondo mo walia halu bini.
SIR 17:13 Tinaga deme Anduane Homogo handalu haleme ibunaga bi hongo howa layago hale hene.
SIR 17:14 Ti wali agali mana ko biaga bu karu baba mandagi nahalimu lalu Anduane Homogohanda lawai hayago hale halu wali agali tini damene bu karu biamogo bialu halimu layagobi ti hale hai hene.
SIR 17:15 Anduane Homogohanda mana iname bialu kamago manda biai kagola ibunaga deni mbirale mbira wiado naheore. Anduane Homogohanda hameigini mbira mbira kadagua tinaga agali haru bamba holene haguane dabo helaga bida. Anigo Isaraele ti ibuninaga wali agaliore ka.
SIR 17:19 Biabe iname bialu kemago dame bibahendeore hona ni ale howa wáleore beremali. Ani beremagola Anduane Homogonaga deme biabe bialu kemaru bibahendeore handai haga ka.
SIR 17:20 Mbirale iname bi ko henebi mana ko bialu kemarubi ibunaga deni do naheore.Ibu manda biai ho ka.
SIR 17:22 Wali agalime dara halu bame biamogo bulene biabe bialu heagua nde Anduane Homogohanda mana ogoni ale birago turu timbuniore yari bayaleru hondowa turu hagadagua turu haga ka. Ani bialu tinaga biabe bayale ogoni mitangi biaabo ho haga ka.
SIR 17:23 Anigo wali agali mana ko biaga bu karu Anduane Homogohanda ti pani nelo mialu mo ko hai holebira. Mana konaga yolo ko ngagome tini nogoba holebira.
SIR 17:24 Anigo wali agali tigua ko biaga ngago wahalu mini beregedayagua nde Anduane Homogohanda ibuni kagoha kaware ibulene karulape lolebira. Ani bialu ibugua wali agali hongo nahe karu gini yalu piaga ka.
SIR 17:25 Mana ko bialu kemiru wahai halu Anduane Homogo ibuni karia dai biai halimu. Ibuninaga deni howa ibuhondo bi lalu ko birimiru wahai halimu.
SIR 17:26 Mana ko ngaru erembira mialu mana lehe nakarulape ale ngaru hogorale bialu Anduane Homogo karia dai bulene nga.
SIR 17:27 Wali agali homa nabi karu tigua Anduane Homogo Daligaore kagonaga mini yaraga halu holebira. Anigo ainde homeneru dalu humbirini andaga ngagoha howa turu halu iba ganaru lalu holebadago aibe.
SIR 17:28 Wali agali homayaru lone ho dai bule ndoore homayagoni. Ani biyagome tigua lone dai bialu Anduane Homogonaga mini yaraga holene nawiore. Wali agali homa nabi dindini hongohe karu tigua dege Anduane Homogohondo ka̱i̱ lalu holebira.
SIR 17:29 Heneneore Anduane Homogohanda wali agali dara timbuniore howa wali agali mini beregedalu dai biragonaga ko biyaru domo wahai haga ka.
SIR 17:30 Anigo wali agali ti tara mbirale ka. Ti dindi ogoria haabo howa Anduane Homogonaga mini yaraga halu haabo naholebira.
SIR 17:31 Nime wá timbuniore haganegoyu arumabi haga dege nga. Anigo wali agali tigua arumanaga mana ngago dege hame lo haabo haga ka.
SIR 17:32 Anduane Homogonaga hongome mbirale hongohe hari daligaha ngarunaga hongo timbuni ngago bolangua ho ka. Ai wali agali galone nahe bame dindi himu abalu ngaruale dege bu kagoni ndobe.
SIR 18:1 Anduane Homogo ibu haluhe haabo kagome mbirale bibahende karubi ngarubi ibugua wabiai hene.
SIR 18:2 Ani bialu mana bayale tigabi ngago talialu haga ibu hanguore ka. Mbirali ibugua bolangua hole howa ibula pugupugu biaga mbira naheore.
SIR 18:4 Ibunaga biabe biaga ngago damene ogodagua lalu latagi habehe ai kabe. Ani bialu mbirale bibahende ibugua wabini ngaru bibahendenaga tene handa walia habehe ai kabe.
SIR 18:5 Anduane Homogonaga hongo gibi ngago ogobiore ka lolenaga magi manda bule mida yuwa manda bibehe mbirali ai kabe. Ani bialu ibugua dara holene henge nawini dara howa bialu haga ngago damene daga lolene karulape ai kabe.
SIR 18:6 Ainde Anduane Homogo ibugua biabe bini ngagobi mendealime bope holenebi bu bolangua holene mbirali naheore Anduane Homogo ibugua biabe bini ngago damene bibahende wali agali mbiragome baya hangu goaru handabe naheore nga.
SIR 18:7 Wali agalime mitangi bialu tigua daga lai harima layagua nde tigua daga lai nahe wene pigane daga lalu ka. Daga lamaro bule biragoha tinaga de mborere bulebirago daraba.
SIR 18:8 Wali agali bu karuru agilego kabe.Ani bialu tinaga biabe agigo biaga kabe. Wali agali mo ko holene agigo wialu biamogo bulene agile ngabe.
SIR 18:9 Wali agali dindini mali handari mbira (100) hayagua nde ogoni ibu mali luore hayabada.
SIR 18:10 Anigo tinaga mali ogoni iba solowara timbuni bedagonaga emene gibuni angeha bedagobi hangu halu tini iba angeni iba mu ngagobi dege nga. Ainde haabobo holenenaga lu mida manda beregola tinaga mali lu ndoni bame nagalone holebira.
SIR 18:11 Ani ngagola Anduane Homogohanda ibunaga dara holene dewaore odope halu ti baba hendore dege haga ka.
SIR 18:12 Ibugua ti de handalu mo ko holene timbuni mbirame tiha anda ibulubada lo manda bini. Ani biago manda bialu Anduane Homogohanda mana ko bini wiaru bu yi halu mo wahai hene.
SIR 18:13 Wali agalime tini damene bu karu dara haga. Anigo Anduane Homogohanda wali agali bibahende dara hai haga ka. Ibugua wali agalihondo lai lalu ti mo tiga bialu baya hangu lawai haga ka. Ani bialu nogo sibi haru hagame nogo sibiru haru ibagadagua ibugua wali agali haru dai biaga ka.
SIR 18:14 Tigua ibunaga mana lawai harago talialu bialu howa ibunaga bi mana baya hangu taluwa bialu holeore lowa hongo howa bialu karu dara timbuni ho haga ka.
SIR 18:15 Waneigini-o bi keba howa lolene ngarume í̠naga biabe bulene bayale ngaru mo ko holeni hondowa habe. Ani bialu wali agali mbira kagohondo biamogo bialu howa ibu mo taga halu bi mbira loleni nalabe.
SIR 18:16 Mbiragoha baya gombahe ngago ibu ni dedagome poboyogo bu ngaligo bolanguahe ngagobi dege bi bayale lolene ngagome mbirale mendeali kago biamogo bialu mulene ngago bolangua hene nga.
SIR 18:17 Heneneore bi bayale lolene ogoniale baya mbirale bame biamogo bialu mendeali mulenenego bolangua heneore nga ndobe. Anigo wali agalime dara holene mo walia halu miragome ogoni labo kirabali miagaya.
SIR 18:18 Wali agali lulu bu karume dara nahe lai lo miagaya. Wali agali mendeali kagohondo biamogo bialu mbirale bame mia nabiaga karume mendeali kago mo turu holene ti ha nawi ka.
SIR 18:19 Í̠na bi nagalone ngaru bameore ona lopaya bialu holigo mendealiha howa manda ala mo yabe. Í̠ha warago bolene ngaru anda ibuligo í̠naga tingini baya hangu handaya ho habe.
SIR 18:20 Ainde Anduane Homogohanda í̠ godi lolene ngagoria íbu helowa mana ko birida loligo mana í̠na berego damene mamage howa bayale bulene ngago bialu habe. Godi lolene ngangi ko birida nalelo mana bayale ayu ogoni howa bialu habe.
SIR 18:21 Warago bolene ngagome í̠ ela holigo í̠ni mo dindiha ho habe. Mana ko mbira biriyagua abaleore mini beregedabe.
SIR 18:22 Anduane Homogohondo ogoale mbira bule lalu bi lo wirigo tigabi bule kego mo habo lolene mbira ibu wuligo baya hangu de hondowa mamage ho habe. Ani bialu homa abale í̠ha ibalu bi lo wirigo mo habo loligo bule dege lowa lu ho wanahabe.
SIR 18:23 Miniha tale ala buwa mbirale buleore lalu bi lo wulene karulape nga. Í̠na bule lalu bi lo wirigo nabi wahalu poregola Anduane Homogonaga keba holene ngago mo timbuniore holigo manda bibe.
SIR 18:24 Baya hangu manda ala bia handa. Í̠ni homarengi Anduane Homogohanda í̠hondo keba ho helo hame lo kebe. Ibugua í̠la miniha tandaga timbuni halu í̠ erembira ngilo hame ledebe.
SIR 18:25 Tomo dewa ngelowa nalu kengi mbiru í̠ni tomo nawi harigo mitangi bibe. Muni mbiraleru dewaore wu kengi abale yagibano harigo mitangi bibe.
SIR 18:26 Í̠naga mbirale wu keruni horo mbiru hanguni mo tara halu iriari biaga nga. Anduane Homogohanda ani bilo hame layagua iriari bulene ogoni abaleore anda ibulebira.
SIR 18:27 Í̠ha mini gigabi wu keyagua nde mbirale í̠nime bialu keru mamage howa bialu habe. Wali agali marume mana ko bialu heagua nde tigua bialu kago í̠ talima poligo hondowa hongo howa de hondo habe.
SIR 18:28 Wali agali manda bayalewi karume wali agali mini gigabiwi ogo ibuore kagoda lalu abale handa walia haga. Ani bialu mo turu holene bi abale laede haga.
SIR 18:29 Ani bialu tigua bi bayale í̠ lawai harago baya hangu mo yai hariyagua í̠bi nde mini dingi dangiale dege mbira holebere. Ani howa í̠nabi wali agali maru karu lawai habehe dege holebere.
SIR 18:30 Í̠ninaga miniha hame ko ngago natalibe. Í̠nime hame uruni baya hangu haru hai habe.
SIR 18:31 Í̠naga hame ko urunime í̠ haru helo hariyagua waitigi bu karume í̠ hondowa ti oba holebira.
SIR 18:32 Í̠naga hame ngego damene mo karulape lolenaga mbirale bayale ngaru yolobu wiai nahabe. Í̠naga muni ngeru bibahende bameore biba holeberego nabibe.
SIR 18:33 Í̠ muni nawi hariyagua nde í̠ tomo timbuni mbira dawalu nolenaga agali mende kagoha muni dano holene nahabe. Í̠ mo yagibanoore holigo dano nahabe laro.
SIR 19:1 Wali agali lulu iba dewa nalu lulu yaga bu karume mbirale bayale ngaru dewa nayulebira. Ani bialu wali agali mbirale emene ngago baya hangu handaya ho nahaga karu tinaga biabe bialu karu bayale naholebira. Ani ndo bibahendeore mo ko haiore holebira.
SIR 19:2 Wali bedarumebi lulu iba hongohe ngagomebi agali manda bayalewi kago mo luluyaho helolebira. Agali mbira ibu bayanda wali bedago nenege ho hayagua nde wali ogonime mana lehe tara tara ngago ibuhondo bialu holebira.
SIR 19:3 Mana ogonibi biragome ibu mo ko holebira. Ani bialu ibu homolebira ibunaga tingini homaliha ngagola himi ngoerume handaya ho birulebira.
SIR 19:4 Wali agali mendeali kagonaga bi larago mo henene haga karu tinaga miniha tiga nabiore ka. Mana ko í̠na biriyagua nde í̠ni mo ko holebere.
SIR 19:5 Mana ko bulene ngago turu ho hariyagua nde Anduane Homogohanda í̠ godini haru pu helowa mana ko birida lolebira.
SIR 19:6 Bi larago hale ho kayu nabiaga hariyagua nde í̠ha mo ko holene timbuni nawulebira.
SIR 19:7 Bi mbira larane hale hariyagua mendeali kagohondo dibudibu nalabe. Ani beregome í̠ miniha mini dege dindi nahe holebere.
SIR 19:8 Í̠naga nenege heaguabi waitigi heaguabi dibudibu lalu lamulene nawigo nalabe. Anigo bi ogonime í̠ mana ko bulene ngagoha mo pila hayagua nde harugo latagi holene karulape nga.
SIR 19:9 Bi dibudibu hale howa mende kago lamiriyagua nde mbira kago ibu hale halu í̠na lalu kego de hondoligo ohowa labe. Handayagua nde í̠ mo ko holene henge tagira ibilo hondo holebira.
SIR 19:10 Bi dibudibu mbira larane halu hariyagua í̠ha halu bibahe helabe. Latagi bi nahabe. Bi ogoni latagi nahariyagua nde í̠ mo ko holene nawulebirago hongo ho habe.
SIR 19:11 Walime gali taba honole tu haragola tandaga nalu biraga wini nga ndobe. Agali mini nawi lehe bu karu ti nde bi dibudibu hale hayagome tinaga miniha andanda biragola habe nahelo haga kago ndobe.
SIR 19:12 Bi ogonime ibunaga miniha bilina halu agali geni timu bilina hagagobi ho hagane ka.
SIR 19:13 Wali agali mbiragome í̠naga nenege biagome ogodagua laya lalu dibudibu í̠hondo langiyagua nde í̠nime puwa ibuhondo hale holene nga. Ani beregola bi ogoni henene ndo holebira. Anigo ainde í̠naga nenege biagome bi ko leneyagua nde mani halu mende nalole lalu ibuni mini wiadai bulebira.
SIR 19:14 Bi dibudibu lalu bi laribe lalu í̠naga damene kagohondo hale habe. Ibugua leneyagua nde ai lone halu mendengi naloliya lo manda bulebira.
SIR 19:15 Bi dibudibu wali agalime í̠na ogodagua lari laya lalu í̠naga nenege biago ibunihondo hale habe Wali agalinaga bi dibudibu ogoniale henene ndo dewaore laga ngago. Ani naleyagua nde wali agalime bi dewa layago mo henene naholebere.
SIR 19:16 Wali agali dewaoreme mini nawi howa bi bame lo paya biaga ngago ndobe. Mbirali ogonidagua nabiaga ai kabe.
SIR 19:17 Í̠na í̠ damene hayadagohondo ko larida lalu keba holeyagua nde ibunila bi ala labe. Ani lalu Anduane Homogo Daligaore kago ibunaga godi tigabi ngagome tiga bilo wahabe.
SIR 19:20 Wali agali Anduane Homogonaga bi hale halu talialu karu ti dege mini gigabiwi ka.
SIR 19:22 Wali agalime mana ko tara tara ngaru bulene manda tara tara wu heagua manda urunime tini mini gigabi wilo biamogo nabulebira. Wali agali mana ko biaga karunaga mini ngago talialu holene bayale ndo.
SIR 19:23 Wali agali mini bayalewi howa ai mana ko bialu heagua nde wali agali ko orene ko ti kagoni ndobe. Ai wali agali mana lehe ngago bialu karu tiha mini tigabi nawiore ka.
SIR 19:24 Wali agali manda timbuni nawi howa ti Anduane Homogonaga bi hale halu heagua nde tigua mbirali manda timbuniwime Anduane Homogonaga bi mana pugualu karu bolangua hene ka.
SIR 19:25 Wali agali maru nde mini gigabiwi kago howa tinaga mana bialu kago ko biaga ka. Wali agali marume nde tini godi deni howa pora bialu polenaga bime baya hangu ladebodebo biaga ka.
SIR 19:26 Wali agali maru ko bu karume dara nahagaore ka. Tigua ke̱ hangu haga ka. Tigua í̠ mo hondo holene dege manda bida.
SIR 19:27 Tigua ma ema biragola í̠naga bi larigo hale nahe kabe toba holebere. Í̠ni baya hangu mamage nahe hariyagua nde tigua í̠ mo hondo timbuni halu mo luluya holebira.
SIR 19:28 Tigua mana ko ayu nabi hayagua nde yawi ko bule taya bialu holebira.
SIR 19:29 Í̠na wali agali bu karu baya hangu mo tale bu handaya haga beregola ti ogobiore heneda lo panaga handa walia haga bulebere. Ai wali agali mbirago ngola haga bialu tiha mini gigabi ngabe nawidabe hondole baya hangu daba handaga bibe.
SIR 19:30 Wali agali mbirago ibu abidabe hondolene manda biriyagua nde ibugua yari mo karu ledarubi bi oba hararubi ibuni ibagabu karubi baya hangu mo tale bialu handabe.
SIR 20:1 Ai wali agali mbira kagohondo keba halu lai lolene manda biriyagua nde ibu abiale kabe ala dabo handabe. Ani handaregola ibuhondo lai labe naheda lo manda biriyagua nde wahalu í̠ bi nale waholene nga.
SIR 20:2 Ainde í̠naga keba ogoni wia ho wiaabo holigo ayu ogoni abale la tagi holene karulape.
SIR 20:3 Í̠na bia ko hene ngago latagi hariyagua nde í̠naga mini mo ko holene nawulebira.
SIR 20:4 Í̠naga godi larego lo bolangua haga kago pani mialu bulene nawi. Í̠ agalime wali mbirago ibugua í̠ hame leaguabi nale bereaguabi harugo lowa agalime ibu dabu bule manda bu hagadagua habe.
SIR 20:5 Wali agali maru ti bi nale hondo haganego irane ti mini gigabiwime haga. Wali agali maru bi dewa lagimbu bialu hagago maru bu karume tihondo turu nahe haga ka.
SIR 20:6 Marume bi nale hagago tigua lolene mbira nawidagola haga. Marume bi nale hagago tigua henge bayale tigua bi labehe wilonaga hondo haga.
SIR 20:7 Wali agali mini gigabiwi karu tigua bi nale hondo howa tigua bi lolene henge ngagola tinaga bi latagi haga. Anigo lulu mini nawi karume kudaga bi lo paya bialu tinaga bi lolene henge nawini bame lo pebe bialu haga.
SIR 20:8 Agali bi dewa laabo halu nabulene wali agali mende kago bi lelo henge namiaga karu wali agalime handabe manga haga ka.
SIR 20:9 Horo kongi wali agalime mbirale bayale ngaru mo yu halu horo bayalengi ko ngaru mo yu haga.
SIR 20:10 Í̠na agali mbira biamogo beregola ibugua í̠ yolo nabi polebira bada. Agali mende biamogo beregola ibugua í̠ yolo halu kira bulebira bada.
SIR 20:11 Agali mini lene timbuni kago mana agali damene maru karubi dege holebira. Ani bialu agali damene bame karu horo mbiru mini lene timbuni holebira.
SIR 20:12 Í̠na muni emene mbira wahalu mbirale emene ngago bayalebe toba howa yolo bulebere. Anigo mani howa muni dewaore wahalu ogoniale dege yolo bulebere.
SIR 20:13 Wali agalime tihondo bi bayalego hangu lamilo hame laga. Anigo wali agali lehe karume bi nagalone ngaru lalu ladebodebo biaga karu ti turu nahaga ka.
SIR 20:14 Wali agali mbirame mbirale mbira í̠ mo turu halu bame ngiyagua nde ogonime í̠ biamogo nabulebira. Ibunime í̠hondo mbirale ngerobe toba howa ngiragoyu ai ogoni bayale ndo nagalone dege nga.
SIR 20:15 Emene bame galoneale ndo ngago ngulebira. Ani bialu ibugua bi ko ngago lalu wali agalime de hendelo bi hongo howa huaro lalu lama ibaga bulebira. Ayu dano helo mialu yawi lone mo yu dai bulebira. Wali agali mana urunibi biaga karu í̠ hame nale ke bada.
SIR 20:16 Ibugua lalu, I̱naga nenege mbira naheore. Wali agali bu hearume i̱na bayale birugo ngiadai nabiya.
SIR 20:17 Ti tomo nolene i̱na wiwago dege nalu howa mani tigua i̱ mege biya, lolebira. Henene larogo wali agali bibahendeme ibu hondowa oba haabo haga ka.
SIR 20:18 Í̠ harigani pilariyagua nde í̠ mo ko hene nga. Anigo í̠na ke howa mo ha halu te lariyagua í̠ mo ko timbuni holene nga. Anidagua dege wali agali ko biaga bu karu mo ko holene abaleore ibulebira.
SIR 20:19 Wali agali te laga galone nabulene karu te laragola wali agali bu karu ti hale holene manga halu pugu biagago irane te wali agali ti hale hole hame naledago laabo haragola ti manga haga ka. Anidagua dege wali agali tigua bi irane galone ogoale laro lo manda nabi howa bi lo pebe bialu karu manga holebere.
SIR 20:20 Mbirali bi la ko haga kagome bi bayale lalu heagua wali agali ti hale habe manga hai holebira. Hale habe manga hai holebirago irane ti bi ogoni hale hole manda nabi kago bame bi dege lopaya biragola tiha anda napolebira.
SIR 20:21 Wali agali maru ti yagibano kagome tigua mana ko bulene henge nawiore ka. Tiha genda halu mini burugu lolene mbira nawi howa ti u baya hangu paluebira.
SIR 20:22 Wali agali marume agali mana lehe biaga bu karu deni howa tini mo ko haga biagaya.
SIR 20:23 Wali agali marume ti aria kagohondo bi ko lolene taga howa tigua mbirale mbira buleore lalu bi lo wiagaya. Anigo daraba. Tigua buleore lalu ti damenehondo bi lo wiyago bame bi dege lenedagola tinaga nenege biarume keba timbuni howa ti baba lone mo waitigi ho hagaya.
SIR 20:24 Ke̱ hagane mana wali agali tininaga mini heba haabo hagane nga. Anigo mana lehe bialu haabo haga karu tiha mana ogoni bialu haabo haga nga.
SIR 20:25 Wali agali bu karume maru mbirale page biaga karubi ke̱ haabo haga karubi ti hame nalagaore. Mana kira ogoni biaga karu bibahende mo ko holene wulebira.
SIR 20:26 Wali agali ke̱ haga karu tinaga mini wali agalime mo ko haragola ti bibahendengi taga ho haabo holebira.
SIR 20:27 Wali agali mini gigabiwi karu tigua bi bayale dege laga kagome ti bayale holebira. Agali haguane bu karume wali agali urunibi kago turu haga ka.
SIR 20:28 Wali agali e baya hangu hengedago ibu tomo dewa nalu haga ndobe. Wali agali biabe bayale biaga kago agali haguane kagome ti turu ho haga. Haguane kagome wali agali uruni tigua ko emene bini ngago mitangi naholebira.
SIR 20:29 Wali agali mini baya wi ha heneyaguabi mendeali kagome ibu mo turu halu mo gede howa mbirale bayale tara tara ngaru bame miyagua nde mini gigabiwi hayago ndo ibu mo luluya halu de kohe ale ibagabu helaga. Anidagua bidagola ai ibugua wali agali uruninaga hame ngago talima pialu maru karume ibuha mana lehe ngago mo tiga bule manda biragola tigua mo tiga bule karuni erembira mialu piaga ka.
SIR 20:30 Mini bayale wulene wali agalime latagi nahe ngago wali agalime muni mbogoyiha ngelowa mo doho ngaligobi nga. Ani wuwa ibugua wali agali mbirago biamogo bulene henge nawiore bame wu wahene wulebira.
SIR 20:31 Ainde wali agalime tinaga lulu mini wu kago anidagua mo doho holene bayale. Tigua mini gigabi wulene ngago mo doho holene bayale ndo nga.
SIR 21:1 Waneigini-o mana ko mbira biribe. Ai ko lone bulene nawigo ko nabibe. Ani bialu ko ala birigo domo wahabe lalu Anduane Homogohondo bi labe.
SIR 21:2 Puya ngagola handalu ibida piagadagua mana ko bulene ngago handalu ibida pobe. Ko ngagoria kaware piriyagua kome í̠ hayulebira. Mana konaga ne laiononaga ne ale ka. Ani howa tigua wali agali hayu homa haga ka.
SIR 21:3 Anduane Homogonaga mana ngago puguayagua nde ibu tinginini dere ko ti̱wa ale bu kago ai dere ogoni dabi nahagane ale bu ka.
SIR 21:4 Mbiralime wali agali maru karu mo gi halu mana lehe ngago biaede hayagua nde ibugua bayale ngago bibahende mo ko hai haga ka. Ani biaga ngago manda bialu wali agalime mine holene mana ko ngago talialu heagua nde tininaga mbirale bayale ngago damene mo ko hai holebira.
SIR 21:5 Yagibano bu karume Anduane Homogohondo bi larago ibuninaga haleha abale anda piaga. Ani anda porago hale halu Anduane Homogohanda ibunaga genda wiyadago abale mo tiga biaga.
SIR 21:6 Wali agalime mbirali ibu mo tiga bule bi laragola ibugua abale keba tungu layagua nde ibu ko bulene hariga ngagoha pupe halu piaga. Ai wali agali Anduane Homogo gi ho haga karu ti mini beregedo haga ka.
SIR 21:7 Wali agali dewaore bi larago damene bibahende hale ho bira biragonego ai wali agali manda bi kago tigua dege bi larago henene laragoda ke̱ hara lalu abale mo tale biaga.
SIR 21:8 Mbirali ibugua page munime anda biyagua nde ogoni ibu iba dalu ibalu toe̱lo ngagoha e hiralu hagagobi ka.
SIR 21:9 Wali agali mana ko biaga bu karume tini mo mogo biagago bame datani gabuni ngaligobi galone napole bame ngoai haga. Ira datani gabuni ogoriani dayagua abale do gidi lalu dai haga nga.
SIR 21:10 Mana ko biaga karu ti hariga bayale gundu uli nawi ngagoha piyaguabi maniore wali agali dewa pialu homagane gundu uli ngagoria pialu homolebira.
SIR 21:11 Wali agali Anduane Homogonaga bi mana hale halu bialu haga karume tininaga hame baya hangu haru haga ka. Ani bialu tini Anduane Homogo andaneha hayagua ti manda timbunibiore holebira.
SIR 21:12 Mandabi kago ibu manda timbuni mo tago howa manda bu holebira. Anigo wali agali dewame mandabi howa mende kago keba helo mo keba halu hagane ka.
SIR 21:13 Wali agali mini gigabiwi bu karunaga manda timbuniore iba li timbuni hongohe piagagobi holebira. Tinaga bi larago bayaore iba uliha dendebi gagahe nolene dugaho wiaga ngaligobi nga.
SIR 21:14 Wali agali lulu ale mini nawi bu karunaga embone iba be pambu lene tibiniha diriwi ngaligobi ka. Emboneha manda emene hangubi mbira mo yabe naheore ka.
SIR 21:15 Wali agali mandabi karu ti bi bayale mbira hale hayagua ti turu howa bi marubi latago haga. Anigo wali agali lulu mini nawi karume bi bayale hale hayagua nde ti hale habe manga howa erembira mialu piaga.
SIR 21:16 Kudaga bi bame lo paya paya biragome genda timbuni mbira wali agalime yu haga nga ndobe. Anigo bi bayale laragome wali agali mo turu haga.
SIR 21:17 Wali agali mo ngoai ho biruwa ti mbirali mandabi kagonaga bi hale holene hame lowa hale halu bi uruni baya hangu miniha mitangi bu haga.
SIR 21:18 Wali agali lulu mini nawi bu karume lalu, Manda bulene henene ogoni anda ko kaligo ale nga, laga. Anigo wali agali bi ogoni laga kagonaga manda ngagome bi ko uruni latagi haga.
SIR 21:19 Wali agali mini nawi bu karu tinaga miniha manda bialu karia manda bulene bayale ogonime wali agali gi ge minu kabubu ngelaga nga lo manda biagaya.
SIR 21:20 Wali agali lulu mini nawi uruni ale karume oba timbuni kuakua lalu holebira. Anigo mandabi kagome oba hendore holene ngadagua haga.
SIR 21:21 Agali mandabi karu tinaga miniha bi lawai harago yari baya tara ngolome wabini ngagobi gi ndola baya tara gi tigaha wiagagobi haga.
SIR 21:22 Wali agali mini nawi lulu urunialeme mendeali andagaha bame la nabi gialaanda haga. Anigo wali agali mendeali andagaha pialu biagane mana mandabi kago ibugua anda haneni hondo haga.
SIR 21:23 Wali agali mini gigabi nawi kagome harabani howa tamuha ma yulanda haga.
SIR 21:24 Wali agali ti ohowa bi lalu bedago í̠ hado howa hale ho page bulene nawiore. Wali agali bayale kagome mana ogonibi bulene taga halu miniha genda haga.
SIR 21:25 Wali agali kudaga karume bi mbiraorego dege laragola ainde wali agali miniwi karunaga bi larago bayale dendebiore laga.
SIR 21:26 Wali agali mini nawi karume tinaga mini ngago abale latagi haga. Ai wali agali mandabi karume tinaga miniha mo tale ala buwa latagi haga.
SIR 21:27 Wali agali mana ko biaga bu karu tigua waitigihondo bi ko lagago bi ko laragome dai bialu tini nogoba haga.
SIR 21:28 Ai tigua bi dibudibu lama ibaga biyagua nde bi ogoni dai bialu tini nogoba haga. Ai tinaga damene maru bu karumebi ti hame nalaga ka.
SIR 22:1 Wali agali mangahe bu karu ti ege to̱le̱ni ti to ngagola wali agalime ngu hagagobi ka. Wali agalime handa nabi howa ege to̱le̱ ogoni ela hayagua ti keba timbuni haga.
SIR 22:3 Waneigini mbira mine halu haga heagua ogonime aba kago mo taga haga. Anigo ainde waneigini ogoni ibu wandariyagua nde aba ibu taga timbuniore haga.
SIR 22:4 Wanene bedago ibu bayale bereagua nde biralu agali polebirago ainde mine haga bereagua ibu aba kago genda mo mulebira.
SIR 22:5 Wanene bedago ibu mine haga bereagua nde ibu ababi ibu agalinibi mo taga haragola libugua wandaridago mo ko halu mo ngubia haga.
SIR 22:6 Waneigini aba ibugua waneiginime ko mbira nabi karia bame keba hayagua ogoni bayale ndo, ko bira. Anidagua birago manane homa duguanda dara ho biruwa ai daweanda iba gana turu howa laradagua bulebira. Anigo abame waneigini mana lalu tibume bayagua karulape ogoni.
SIR 22:7 Í̠na wali agali lulu mini nawi karu lawai hale manda biriyagua nde í̠ agalime todobene be pambu lenego mo gimbubu dai biradagua mendeali paliahondo kago mo barila haradaguabi bulebere.
SIR 22:8 Heneneore mbirali de umu lalu palua ho bedago lawai haradagua bulebere. Erekuibi lawai kegola mini pu tara ho biruwa í̠hondo lone hale halu, Í̠ agi larebe lolebira.
SIR 22:11 Wali agali homararu tigua ni kago lone de nahondolebirago manda bialu ti dara howa dugu bulene nga. Anidagua dege wali agali mbirale manda bibe nahe karu ti nde ogonibi dege manda bibe naheore kago dara halu dugu bulene nga. Wali agali homayaru ti ayu ha̱lo kago tinaga dara howa dugu dewa bulene nawi. Anigo wali agali mini nawi lulu bu karu tinaga holene ko darabiore kagonaga dara halu dugu bia holene nga.
SIR 22:12 Wali agali mbirago homaragola dara howa dugu bialu horo karu duguanda haramalidagua wiyago. Wali agali mini nawi lulu ale karuhondobi wali agali mine haga bu karubi dara holene nga.
SIR 22:13 Í̠na wali agali mini nawi lulu ale karu baba bi te nale wahalu wali agali mbirale manda nabi karu bedaria polene nawigo. Í̠ha mo ko holene anda ibuligo de handalu mamage ho habe. Ani hariyagua nde tigua í̠hondo bi ko larangi í̠ha mo ko holene anda naibulebira. Ti helalu í̠ pubagi halu poregola tinaga bi ko larago hale howa í̠ manga nahe halu í̠ bayale holebere.
SIR 22:14 Ege to̱le̱ mini aeane tigi hope hene ngagonaga genda agileme bolangua holebirabe. Wali agali mini nawi lulu ogoni ale ti ka.
SIR 22:15 Iba mu ngagobi ibi ngago nuha hanaga bu ngela aeanebi ngela buwa yaraga ho handalu keria ti gendabi dege dege nga. Anigo wali agali mini nawi lulu bu karume genda timbuniore mo ngiaga nga.
SIR 22:16 Ira kambu lene mbirago anda bialu anda haini bapara heagua nde dindi dumbidumbi birangi gialope naholebira. Anidagua dege wali agalime mana tigabi bialu holenenaga galone baya hangu lo manda bu heagua nde tiha ba hondolene anda ibirangi ti hongohe ogonibi holebira.
SIR 22:17 Wali agali mini gigabi wulene hongo howa yu haga karu ti agali irani bage giligili bayaru wabu helaga bini ngaligobi ka.
SIR 22:18 Hari bare ngagoha agalime ira dibuwa hagira bidago puyabu timbuni pu larangi hongo nahe hagagobi dege wali agali mini gigabi nawi lulu bu karuni ti ogonibiore ka. Mo gi holene tiha anda ibirangi ti hongo ho habe naheore ka.
SIR 22:19 Wali agalinaga de nogoba hariyagua nde deiba abale ibaga nga. Í̠na bime wali agalinaga bu miniha nogoba hene lariyagua nde miniha ngago panaga tagira ibai helaga nga.
SIR 22:20 Ega bedagoha to̱le̱ bariyagua nde egame gi halu ibida polebira. Anidagua dege í̠naga nenegehondo nabini ngago biri lalu ke̱ howa bime mo baede hariyagua nde í̠naga nenege ibugua í̠ wahalu pu waholebira.
SIR 22:21 Ainde ayu tibume í̠naga nenege biago nogoba holebiriyagua nde haru dege. Mani bime libu mo tiga bulene karulape nga.
SIR 22:22 Í̠naga nenege lai lalu bi dewa lariyaguabi nde mani bi lalu libu mo tiga bialu gi tigani bulene hariga wiadege bida. Anigo ainde í̠na ibuhondo bi ko bialu hege lalu ibu mege bialu biriyaguabi ani bialu bi libuni hangu ohowa lenego ína latagi halubi í̠na ibu mo hondo halubi uruni alego biriyagua nde í̠naga nenege ibugua í̠ wahalu pu wahelo talia pelolebere.
SIR 22:23 Í̠na í̠naga nenege kebigo ibu mbirale dewa nawi tubagiho kebingi ibu wahalu pubagi ho howa ibu mbirale dewa wu kangi ibu heba mandagi turu ho nahabe. Ibu mani bayale kangi ibunaga mbirale ngago tubagi howa maru í̠ mo yulene wulebirago ai ibu mbirale nawi ko kangi libu haru mandagi holene nga.
SIR 22:24 Ira hibunaregola ngu haguala ala bialu ira mani daga. Anidagua dege wali agalime pigane keba ala howa mani wali agali mbirago homelo bo wahaga.
SIR 22:25 I̱naga nenege mbira kago i̱na haru holene taga nahe handaya ho holebero. Ani bialu i̱ ibunaga deni hado naholebero.
SIR 22:26 Anigo ai i̱naga nenege ibugua bia ko hene ngagome i̱ha mo ko holene ngago anda ibiragola wali agali maru bu karume hale hayagua nde tigua ibuhondo gi ho hai holebira.
SIR 22:27 Ainde ayu i̱naga ne harigoha howa bi mbira la ko harogome i̱niha bi lolene ngago i̱naga hegeme i̱ni mo ko hene wuligo ai i̱naga ne harigoha bi larogo haru habe lalu i̱naga haru haga mbira kagohondo bi laro.
SIR 23:1 Anduane Homogo-o í̠niore i̱ Ababi i̱naga Haguaneore kego i̱ waholeni wanahabe. I̱ninaga bi latagi harogome i̱ni mo luluya halu mo pila holigo i̱ wanahabe.
SIR 23:2 Mbirale gewa tibu yu kagome i̱naga hame ngogo damene haru hai kagola mini gigabi wulene i̱ lawai haragome i̱ handaya ho helo i̱na bi laro. I̱na mana ko berongi libugua i̱ dara naholebira. Ani bialu i̱na ko bidogo handalu pubagi naholebira.
SIR 23:3 Anidagua biragola i̱naga ko binibi mana lehe binibi timbuni dewa nawiragola i̱ waitigi bu karunaga deni i̱ bi lolene nawulebira. I̱ mo ko haragola ti oba holigo handabe.
SIR 23:4 Anduane Homogo-o í̠ i̱ Ababi i̱naga Ngode Datagaliwabebi kegonigo i̱na mine holigo i̱ baya hangu handaya ho habe.
SIR 23:5 I̱ha hame ko dimagoli holene ngaru mo wahai habe.
SIR 23:6 I̱naga miniha tomo dewaore nalu holenebi miniha dimagoli holene ngago talialu holenebi hongo holigo hame ko i̱ha howa i̱ni bope holene tagira ibirago mo wahai habe.
SIR 23:7 I̱ waneiginiru-o gi dolalu i̱na tíhondo bi tigabi bayale ogodagua lolene nga lalu tí lawai harogo baya hangu hale halimu. Bi i̱na langirogo hale howa tí pu luluya nahalimu.
SIR 23:8 Wali agali mana ko biagane bu karu ti tininaga ne hariga ngagoha howa tini mo ko hagane ka. Ani bialu wali agalime mendeali kago mege bialu mo taga haga kago ti pi lolebira.
SIR 23:9 Í̠na mbirale mbira buleore lowa gi doladaga halu bi lo wulene nawi. Ani bialu bibahendengi Anduane Homogonaga mini bame laabo holene nawigo nalabe.
SIR 23:10 Agali í̠naga biabe bia haga kago gewa tibume balu haabo hariyagua nde ibu tingini bibahendeha dere biai holebira. Anidagua dege wali agalime mbirale mbira buleore lalu gi doladaga halu bi dewa lo wiyaguabi Anduane Homogonaga mini bame laabo halu heaguabi tinaga ko ngago ereba nahe wiaabobo bu wulebira.
SIR 23:11 Wali agalime mbirale mbira buleore lalu gi doladaga halu bi dewaore lo wuwa mana pugulu karia ti damene bibahendeore mo ko holene ngago ngola hai holebira. Tinaga bi henene ndo ke̱ howa larago mo hongo howa gi doladaga halu buleore lalu lo wiyagua nde tiha ko ngago timbuniore holebira. Tigua buleore lalu gi dolalu layago bame dege bule tingi howa leneyagua nde ti koore ka lalu mini lene mbira halu tinaga onene waneiginirubi ti bibahende genda tara tara yu holebira.
SIR 23:12 Bi marubi nde Yagaba hameiginime lolene nawiore. Wali agali mbirame bi ogoni layagua tini homolene hangu lene nga. Wali agali bayale tigabi karu ti bi ogoni ngagoria kaware nahe kaundiaha kagola mbirale bia ko henenaga ko dodohe ngagome tiha pialu bu dambi naholebira.
SIR 23:13 Bi tagabi ngago lolene mana koorego bi tagabi lolene mana ngago mo ya nabibe.
SIR 23:14 Í̠ agali haguane bedaru dombeneha biruwa í̠ aba ai̱yala ala mitangi bibe. Í̠na bi mbira tinaga deni howa la ko haregola tigua í̠ luluda loligo. Ani laragola mani í̠na taga howa lalu, I̱ aiyahanda i̱ aginagaore taba henenedabe loligo, manda bibe.
SIR 23:15 Wali agali bi ko hangu laabo halu haga bu karu ti lone beregedalu bi bayale lolene nawiore.
SIR 23:16 Dimagoli holene ibunaga hongo ira deneale nga. Ibu hundia nabi daho wialu wali agali dalu damaro biaga nga. Dimagoli holene kirame mana ko mo wia halu tebone ngagome Anduane Homogo mo keba timbuniore hagane nga. Dimagoli holene mbirago ibugua wali agali tini tinginime mana ko bulene ngago biaabo halu manga nahole dimagoli ira hungu ale dayago hundira handala wahagane nga.
SIR 23:17 Dimagoli holene mendego bayanda wali agalime kayu biagane nga. Mana ogonigo wali agali kayu biaga karu tigua dendeore howa bialu haabo halu tini homalu wahaga.
SIR 23:18 Ai dimagoli tebonego dabu bini mana puguarago. Wali agali tinaga miniha dimagoli ogoniale ngagome lalu, I̱ mbirali aiwa hendedabe. Arumame i̱ mo ge halu anda hai ho mabubupe kagome mo ge halu bidagome mbiralime i̱ de handabe nahe kagoni. I̱ agihondo gi holobada. Anduane Homogo Daligaore kago ibugua i̱naga ko ogoni mitangi nabulebira ndobe, lagaya.
SIR 23:19 Wali agali mana urunibi bialu haga karume Anduane Homogonaga deme bibahende handai holene hona ni dedago ladali hene wáleore kago helowa tigua wali agali maru kagonaga de gi halu mo ohagaya. Anduane Homogohanda bira do holene ngago baya hanguore wále panaga ngaria handai halu mana wali agalime bialu karu bibahende handai halu bida.
SIR 23:20 Biabe bulene damene ngago Anduane Homogo ibu manda biahe howa ibini ngago bibahende manda bialu bule ogo nga lalu manda biai ho ka.
SIR 23:21 Heneneore wali agali dabu bini mana pugualu piyago ibu wali agali bibahendenaga deni howa pani nolebira. Ti taya bialu handawalia naholebira lo manda bialu bira do karia puwa minu yu tagira polebira.
SIR 23:22 Wali mbira ibu agalini helalu puwa agali mende kago baba waneigini hono wialu heneyaguabi nde mana ogonibi dege bulebira.
SIR 23:23 Wali ogonime ko dene tebira biya. Mbiragome Anduane Homogo Daligaore kagonaga mana lo wini ngago puguaya. Mendegome ibu agalinihondo mana lehe biya tebonegome agali kayu yama ibaga biyagome dabu bini mana ngago pugualu agali mendela waneigini hono wialu haya.
SIR 23:24 Tigua wali agali ngoai ho kagoria ibu helowa ko birida lalu ibu wane igini bu karu pani nelo mulebira.
SIR 23:25 Ani biragola ibu waneigini uruni tinaga holene bayale nawulebira. Ira mbira pini dindiha bayale anda nape howa lini nadaga kagobi waneigini uruni ti holebira.
SIR 23:26 Wali agalime bi ko mbirago lalu howa tigua wali ogoninaga mini lalu lolebira. Ainde ibugua beregedalu ibunaga mini lone mo bayale naholebiraore.
SIR 23:27 Ainde wali agali maniore hama polobadarume Anduane Homogohondo gi holenego timbuni duniniore mbira winida lo manda biaiore holebira. Anidagua bulenego bolangua hende mende nawiore. Ani bialu mana mbira Anduane Homogonaga bi mana lo wini ngago taluwa bialu holenego baya dendebiore nga.
SIR 24:1 Mini gigabi wuleneme ibuninaga mini mo yaraga halu ibunaga wali agali bu kagoha ibu mini lene timbuni mbira holebira.
SIR 24:2 Isaraele wali agalibi dahuliyali hongo gibihe bu karubi ti bibahende Anduane Homogo Daligaore kagonaga deni mo ngoaiho kagola mini gigabi wulene ibugua ibunaga ne ha lowa ibugua turu holene bi lalu,
SIR 24:3 I̱ Anduane Homogo Daligaore kagonaga ne harigaha howa ibinigo ai i̱na dindi bibahendeore egerebagi ginu haguame dambi haradagua bido.
SIR 24:4 I̱ dindi bare ngagoha bedogo ai i̱naga kininaga biragane dagia daliga ginu hagua dege dombeneha nga.
SIR 24:5 I̱na dahuliya andaga ibaga biai halu iba solowara bedago andaneha hariga pedagoha piai hene ko.
SIR 24:6 Iba solowara bibahendebi dindi ngago bibahendebi wali agali dindi bibahendeha bu karubi dindi hobane tara tara ngaru bibahendebi i̱na handaya ho howa haru hai ko.
SIR 24:7 I̱ ha̱lo birulene mbira agoha ngabe hondolenaga i̱na uruni bibahendeha ibaga biai haruli. I̱ birulene dindi taya bialu ko.
SIR 24:8 Anduane Homogohanda mbirale bibahende wabiai hayangi ibugua i̱bi nde wabu helalu i̱ holiya ibugua i̱ dalu mbira wabu ngelene. Ani buwa ibugua i̱hondo langialu lalu, Í̠ anda Yagaba kagoha yagi bialu í̠ dindi Isaraele daluha podene hobane mbira mo wibe, laya.
SIR 24:9 Ibugua i̱ bamba bambaore wabinigo ainde i̱ lu haabobo bu haho wulebero.
SIR 24:10 I̱na ibunaga anda loma bihe kagoha biabe bialu haga howa i̱ dalu hari Saiono nene nga.
SIR 24:11 Anduane Homogohanda dindi i̱ ha̱lo biruliya tano ibuniore gubalini ho haga biago i̱ ngiyagola ai Yarusaleme tano i̱na haru howa handaya ho ka.
SIR 24:12 Ani howa ai i̱ wali agali mini lene bu hearu ti dege dombeneha bedo. Ai Anduane Homogo ibunime dindi ibuninagaore mo wiagoria ko.
SIR 24:13 Ai i̱ guru lu dege lalu Lebanono dindiha ira tamia karubi halu hari Hemono kagoha ira guraya alebi karubi kogoni.
SIR 24:14 Í̠ guru lu dege lalu Engedi dindiha pibi ayage kagobi halu baya dege lalu Yarigo dindiha dambe tara kagobi ko. Ani bialu i̱naga hongo timbuniore mabuha ira olibe bu karubi halu timbuninaga ira timbuni howa luni iba angeni hagagobi ko.
SIR 24:15 I̱naga baya taraore irabuha balawaya dedaru nga biagagobi ko. I̱ nga baya taraore bulene ira mini kasia dongoneme pauda wabini ngagobi howabi sinamonome pauda wabini nga biagagobibi pauda mini muwe nga biagagobibi nga bayaore balawaya mini galabanumume nga biagagobibi pauda mbirale tara mbirame wabini ngagobibi pauda ira mini balasama ibaneme wabini ira hagua nga bilo Ngode Datagaliwabe andagaha delaga ngagobibi ko.
SIR 24:16 Ira lini daga mini guyaboli ibu gene maganeru luore amura pu wahalu hongohe howa baya tara kagobi kogoni.
SIR 24:17 I̱ pu mbira mini gerebi irane kagonaga mane baya anda howa i̱na pabua bayale dewaore balu lini bayaleru do girigere ledagobi ko.
SIR 24:19 Wali agali i̱ hame lo kemiru i̱ni koria ibilimu. I̱ lini dedogo tí do nalu no karulapeore noleberemigo ibalimu.
SIR 24:20 I̱ mitangi bilimu. I̱ dende taraore mone taranaga ibane ngago bolangua henebi mbirale mo turu halu bame miaga ngogo baya taraore mone ibane mini hani bolangua hene ngo.
SIR 24:21 Wali agalime i̱ tomo ale nayagua dende taradane hondowa lone noa dege holebira. Ani bialu i̱ iba ale nayaguabi lone dege noa holebira.
SIR 24:22 Wali agali i̱naga bi hale halu kago ibuha taga holene nawulebira. Ani bialu wali agali i̱naga hongo heba biabe bialu haga kago ibu mana ko ngago nabulebira, laya lene.
SIR 24:23 Mbirale uruni Anduane Homogo Daligaore kagonaga habo nalolene bi gilibu wini mbuga ngagoha wiai hene nga. Bi ogoni damenego Mosesehanda ina Yagaba hameigini bu kemarume mo mana howa talialu holoma̱ya ngini.
SIR 24:25 Mabuha tomo ala hengene kago abale boga birangi iba Pisono biru to̱latagi halu pugu lalu piagadaguabi iba Taigirisi pedagoha iba hangu to̱latagi hagadaguabi mini gigabi wulene bi mana mbuga ngagoha gili bu wiai henego nga.
SIR 24:26 Iba Yuberedisiha iba to̱latagi kadaguabi widi lini gandulo yu mogobu wulene horongi iba Yodana ibame to̱latagi hagagobibi bi mana lo wini ngagome wali agaliha mini gigabi wulene bayale wu to̱latagi ka.
SIR 24:27 Bi maname wali agali baya hanguore lawai haragola, lawai harago nde baya gibi waholene hale ale lawai haga. Baya gibiore iba Gihono mabuha gerebi hengedago do wulene horongi iba biragagobi lawai haga.
SIR 24:28 Wali agali abale henedarume mini gigabi wulene bayale ngago baya hangu manda nabi henego ainde mani holobadaru tiguabi baya hangu manda nabulebira.
SIR 24:29 Mini gigabi wulene ngagonaga lawai hagane ngago timbuniore iba solowara bedaru bolangua hai halu iba kuyama unurahaore bedarubi bolangua haihe ngagome manda bibe naheore.
SIR 24:30 Agalime iba timbuni pedagoha howa iba emene mbira mabuha dadabu yu piagagobi i̱ kogoni.
SIR 24:31 Ani howa i̱na ogodagua laro. I̱na iba maru i̱ mabuha bedago aria maru hambuwa ira lini dedagoha odo ba holebere. Mabuha ibaga buwa dadabu yu anda ibinidagoni abaleore timbu halu iba solowara timbuni bedagobi holebira.
SIR 24:32 Ani bialu i̱na mbirale lawai harogome egerebagi ni dagagobi helalu i̱naga wá holene dindi bibahendeni piai helolebere.
SIR 24:33 Ani bialu i̱naga bi ogoni agali Anduane Homogonaga bi mana latagi halu mbiwia hagarume lawai hagadagua dege lai holebero. Anidagua berogola wali agali mani holobadaru tibi nde hale halu manda milo lawai holebero.
SIR 24:34 Heneneore i̱ni hangu manda bulenaga erekuibi bialu hene ndo i̱na wali agali manda bayale bule hame layaru bibahende biamogo bialu lawai holenaga bialu haru.
SIR 25:1 I̱naga bu miniha irane tebiranaga turu ho ko. Irane tebira ogoni Anduane Homogonaga denibi wali agalinaga denibi bayale dege nga. Hamene kagola mini mbiraore ho holenebi nenege kagola mandagiore holenebi onene agalinila mandagi baya hangu birulenebi nga.
SIR 25:2 I̱naga bu miniha wali agali tebira uruni haga haga bu kagonaga manga ho ko. Mana tigua bialu kagome i̱ mo taga halu ka. Uruni mbirago yagibano bu karu tigua mini lene timbuni hetingi haga ka. Ani bialu homogo kagome ke̱ timbuni hagane ka. Wali agali waheore bu karume dabubinigo mana puguaga ka.
SIR 25:3 Í̠ni daliahe keangi howa mbirale manda nabi hariyagua nde í̠ wahe howa agua manda buleberebe.
SIR 25:4 Wahe halu dagua hariyagua miniha ko bayalela baya hangu mo tale bulene karulapeore nga. Waheore bedarume mana bayale ngago lawai hayagua bayale tigabiore bira.
SIR 25:5 Waheale karume ti mini gigabi wu biralu agali haguane bu karume wali agali ti daluha haga karu lawai hayagua nde galoneore mbira ogoni nga.
SIR 25:6 Manda bayale tara tara bidaru waheale karu tinaga yari nga. Ani bialu tigua Anduane Homogo gi halu ibu andaneha haga heagua ti mini lene timbuni holebira.
SIR 25:7 I̱naga bu miniha mo turu hagane irane pira ngago ai uruni aria mbirago ibugua i̱ mo turu timbuniore hagane ngagola i̱na ogoni hongo howa latagi halu lolebero. Irane pira uruni ogo. Mbira: Wali agalime tinaga waneigini mo turu haga. Mende: Wali agalime tinaga waitigi karu mo ko halu homelo hame lagane.
SIR 25:8 Tebone: Agalime wali ti one bedago manda bayale bi berelo hame lagane. Mane: Wali agalime bi tigabi bayale ndo ngago latagi nahagane. Dauni: Wali agali ti agali ko kagonaga biabe bia haga holene hame nalaga.
SIR 25:9 Wali agali tinime mini tigabi ngago taya bialu mo yaga. Waragane: Wali agali bu karume tinaga bi lawai harago hale hoa harago baba howa bi lole turu haga.
SIR 25:10 Kane: Wali agalime mini giga bulene mo yu howa ti turu timbuni haga. Halini: Anigo wali agali Anduane Homogo kago gi halu tini ibu andaneha haga. Dini: Ani biaga kago ibugua wali agali maru karu bolangua hai hene ka.
SIR 25:11 Pini: Heneneore Anduane Homogohondo gihalu ibuni andaneha haga kago ibu bolangua hai hene ka. Ani bialu wali agali mana ogoni latagi halu kago ibu duniniore mbira ka.
SIR 25:13 I̱ha genda tara tara ibiyagua i̱ mini burugu nale dege holeberogo ai i̱naga nenege bayaore mbira kagome i̱ wahalu piyagua nde genda timbuniore yu holebero. Wali agali maru karume i̱hondo mana ko dewa biyagua i̱ genda nahe dege holeberogo ainde i̱ one bedagome i̱hondo ko biyagua nde dara timbuniore ho holebero.
SIR 25:14 Wali agali bu karume i̱ bayagua nde i̱ genda nahe dege holeberogo ainde waitigi ibalu i̱ mo ko hayagua i̱naga miniha dara timbuniore holebero. I̱na bialu harugonaga pani nolene ona ibiyagua nde i̱ genda nahe holeberogo ainde waitiginaga giha howa i̱ mo ko holene anda ibiyagua nde i̱naga miniha dara holebero.
SIR 25:15 Puyanaga tomia ko ngago bolangua hene tomia hongohe mende nawiore. Walinaga keba holeneme keba holene bibahende ngaru bope hai haga nga.
SIR 25:16 Laiono gabua karu bababi puya ga̱u̱laga timbuni ngaru bababi mandagi birulene karulape degego ai wali ko bedago baba mandagi nabiruleorebero.
SIR 25:17 Walime miniha tandaga timbuniore ho bereagua ibunaga dengui mo tara halu biango gabua ale.
SIR 25:18 Ibu agalini kagome tomo ibuni nolene ibu damene andaga taya bu nalu ibunaga miniha genda wu kago yado naholebira.
SIR 25:19 Genda damene bu ngaru bame degego ai wali tinime genda mo wia hayagua nde darabiore nga. Ani biyagua nde wali agali mana ko biaga bu karu pani nolene ngadagua nolebira.
SIR 25:20 Agali waheore karume dindi ko iba dalu naibaga dindi be tauladagahe ngaruha hari kago irigi holene nakarulape nga. Anidagua dege agali mo palia holene karulo haga kagome ibu one keba timbuni halu lai hongo howa laabo haga bedago baba mandagi birulene ndelaheore nga.
SIR 25:21 Wali dengui baya bedagome i̱ mo talola holigo de hondo holene nga. Ani bialu wali muni mbiraleru dewawi bedago hondowa ogoni dimagoli holigo hondo holene nga.
SIR 25:22 Ai biabe bulene ngago wali ibu hangu bialu bedagola ibu agalini bameore ibaga bu heagua nde walime keba halu mine haragola agalini kago taga pani nolebira.
SIR 25:23 Wali ko bedagome ibu agalini kagohondo mini tara tara mo wia halu genda mini burugu ngaru mo miaga beda. Wali ogoni ale biaga bedagome ibu agalini kago mo turu nahaga beda. Anidagua biragola ibu agalininaga hongo ereba hai halu gi himbi gedeore halu ge duli hilamagamaga bialu tingini durule hagane.
SIR 25:24 Piganeore mana ko walime mo yu anda ibiyagome ina bibahendeore homai holene winigo nga.
SIR 25:25 Í̠naga iba beha bedago bame odo payubu ngelalu pu nabiaga. Anidagua dege wali ko kudaga bedagome bi nagalone ngago lo payapaya bialu helo wanahabe.
SIR 25:26 Ibugua í̠naga bi larego hale nahayagua pelo talitagi halu pu labe.
SIR 26:1 Agalime wali bayale bedago dabu biyagua ibu bayale turu ho halu dindini luore howa ho dagua halu mali dewaore holebira.
SIR 26:2 Wali ogonibi bedagome ibu agalini kago mo turu haragola agali ibu turu dege ho howa miniha mo palia holene karu lo haabo halu homalebira.
SIR 26:3 Anduane Homogohanda agali ibu andaneha haabo haga karu mo turu halu wali bayale bedago hado miaga ka.
SIR 26:4 Agali ogoniale kago ibu turu ho haabo holebira. Ibu muni mbirale dewawi homogo heaguabi mbirale mbira nawiore howa yagibano heaguabi ta nabi howa ibu bayale turu ho haabo holebira.
SIR 26:5 I̱ore mo gi hagane irane maria ngago ai mbiragome i̱naga miniha mo duru la hagane nga. Ai homolenego ko mangabiore mbira ngagoni ina bibahende manda biai kema. Anigo tebira wiaruago koorene ko nga. Wali agali bu karunaga mege biaga mana ngagobi wali agali keba timbuni haga tinaga mo ngoai haga ngagobi godi lalu howa bi ke̱ howa laganebi nga.
SIR 26:6 Anigo irane mane ngagome mini burugu timbuni mo ngialu genda timbuniore mo wia hagane nga. Ogoni wali mbirame wali mende bedago dimagoli holeneme mo wiaga.
SIR 26:7 Nogo bulumaga biabe bilo irame mani daribaho magamaga bu heledaria irame nogonaga mani kedaragola tandaga hagagobi wali ko bedagome ibu agalini bime hayalu biraga nga. Í̠na wali ogoni ale bedago mo tiga bule bi lalu keria ibugua í̠ moneme hayaradagua bulebira.
SIR 26:8 Walime lulu iba nowa ibuni taga nahe karia wali agalime ibuhondo keba haga nga.
SIR 26:9 Bayanda wali bedagome ibuha mini dimagoli ngago miniha ogoale wu bedo lalu deme hendene panaga mo walia holebira. Í̠na ibu denguini handaede halu ibunaga hame ngago panaga handa walia holebere.
SIR 26:10 Í̠ wane bedago baya hangu handaya ho habe. Ibu mine holigo í̠na ibuhondo bialu helo wanahabe.
SIR 26:11 Ibugua de dimagoli hama ibaga bialu biruwa í̠ mo taga holigo í̠na ibu baya hangu mamage ho habe.
SIR 26:12 Wali ogoniale bedago ibu mbirali iba noa timbuniore howa iba emene ge mugu ibabi iba emene bedago ta nabi nai damene holene bidaligobi beda. Wali ogoniale bedagome agali bu kago damene hai yadege bule taya bialu biraabo haga beda.
SIR 26:13 Mana bayale agali one bedago ibugua biagagome ibu agalini mo turu halu tomo dendebi ibugua dawaragome agali mo hongo haga.
SIR 26:14 Wali agali one bedago ibu bi nale ne hariga ndibulo biragago mugube baya tara mbirago Anduane Homogohanda mini yu beda. Wali bi dewa nalagane bedago bolangua hene daliga mbirale mbira nawiore.
SIR 26:15 Wali agali one bedagome ibunaga hame ngago damene baya hangu haru hai haga bedago mana bayale duniniore biaga beda. Mana ogonibi bulenaga mbirale mbirame yolo bu yulene nawiore ndobe.
SIR 26:16 Agali tigua nde ti oneme waneigini baya hangu handaya ho bedago de hondowa ti turu haga. Agalime ibu one turu timbuniore hari nene ngagoria egerebagi ni bayale daba harago hondowa wali agalime turu hagagobi kagane ka.
SIR 26:17 Walinaga dengui baya kago Ngode Datagaliwabe andagaha hale hongohe dedagome wá timbuni hagagobi ka.
SIR 26:18 Tinaga ge bayale kago anda gene hongohe ngolome para hadambi howa silibame mbogoyi wabuwa ogoniha mo karu ledagola hongohe kagobi ka.
SIR 26:19 Waneigini-o í̠ daliahe keangi howa í̠naga tingini baya hangu handaya ho habe. Í̠na mana tara tara ngago bima ibaga bialu keria í̠naga hongo ereba holigo de hondowa habe.
SIR 26:20 Dindi ngago baya hangu deme handama ibaga ala buwa bayaleore ngago í̠ninaga dindi mo wibe. Ani bialu tomo eganeru dindi mabu ogoniha hengedegola í̠ damene lenego hongohe bayale holebira.
SIR 26:21 Ani beregola í̠ waneigini aguane mani holebiraru ti dindi holene mo ko naholebira. Ani bulebirago irane í̠ damene kago ti hongo timbunihe bayale holebira.
SIR 26:22 Bayanda wali agali kayu yama ibaga biaga bedaru ti hamiaga to̱lo wahene dindini ngaligobi beda. Ani bialu agali oneme ibu agalini kago wahalu agali mende kayu biagagome ibuninaga homolene mo yu anda ibaga.
SIR 26:23 Wali ko biaga bedaru agali mana ko biaga karu tinaga yolo beda. Wali ko nabiaga bedaru ti agali Anduane Homogo andaneha haga bu karunaga yolo bayale bame mo turu halu mini beda.
SIR 26:24 Wali taga nahaga bedaru ti tinaga mini mo ko holobadago mitangi nahaga beda. Anigo wali bayale bedagome ibu agalini andaga mandagi biruwabi taga ho biraabo hagane nga.
SIR 26:25 Wali mine haga bedaru ti biango ko kilayubi hagagobi bedago ai wali taga haga bedago ibugua Anduane Homogo gi halu ibu andaneha biraga beda.
SIR 26:26 Wali agalime bi lalu, Wali ogome ibu agalini baya hanguore handaya ho biraga ibu mini bayalewi beda laga. Anigo wali ibu agalini nahandaya ho haga bedago wali agalime lalu, Wali ogoni ko ngubiore beda laga. Agalini one bayale dabubi kago ibu turu ho howa mali dewaore holebira.
SIR 26:27 Wali mbira ibugua bame laiore laabo halu bi nagolone ngago hongo howa latagitagi bialu bedago ibu nagaloneore bame wai bialu howa agalime waitigi bu karu gi howa mogo lalu ibida piai helonaga pilipe biguli hongo howa pu lagagobi beda. Wali ogonibi agalini kago wai bialu karia abale timula ngola halu homolebira.
SIR 26:28 Irane tebiranaga i̱ genda timbuniore ho kogo ai mbiragome i̱ mo keba timbuniore haga. Ainde agali mbira ibu mbirale nawi buru pale howa ayu ibu yagibano heaguabi wali agali manda timbuniwi maru bu karume erembira miyaguabi wali agalime hariga tigabi ngago wahalu puwa mana ko ngago bialu hayaguabi uruni ko tiga nabiore nga. Wali agali ko urunibi karu ti Anduane Homogo giha homo ya holebira.
SIR 26:29 Agali biyanaya biaga karume tigabi bulene ngadagua bialu habe naheore ndobe. Wali agali tidugu anda handaya ho haga kagome mana ko bulene ngagoria hogorale bialu pobe nahe nga.
SIR 27:1 Wali agali dewaoreme muni bolangua ho mule manda biragome mana ko biaga nga. Wali agali mini dewawi homogo hayagua tinaga biabeha yagi ko biruda bayale biruda lo manda nabulebira. Ti biyanaya biabe dege bialu holebira.
SIR 27:2 Ege t-ole̱ ngagoha nduli baanda hariyagua nde lone dugu yamibe nahe hongo halu ndibulo wahaga nga. Anidagua dege mana ko ngago biyanaya biabe biaga kagoha hongohe para ho wahene nga.
SIR 27:3 Wali agalime Anduane Homogonaga bi mana lo ngago hongo howa talialu holene manda nabiyagua nde tini heba tinaga damene kago bibahende abaleore mo ko hai holebira.
SIR 27:4 Iba hambu yuwa ibaha dodo bedago mo wahole biyagua nde ibaha dodo maru berenedane handa walia hagane nga. Anidagua dege wali agali mbira kago baba lai larebingi ko ibuha padago panaga tagira ibagane nga ndobe.
SIR 27:5 Be gahange dindime wabini ngagonaga hongo ira deneme bahandagane nga. Anidagua dege agali ngoai ho biruwa tininaga mini bahandaga tandaga biaga.
SIR 27:6 Ira tara tara kagobi tinaga linibi tara tara dagane ka. Anidagua dege wali agali bu karu tinaga mini ngadagua latagi haga haga biaga ka ndobe.
SIR 27:7 Í̠na wali agali mbira kago mo turu halu bi bayale loleyagua nde tinaga mini ngago ala begelo hondolene nga. Wali agali ko bayale lalu mo tale bulene hariga urunibi nga.
SIR 27:8 Í̠na mana tigabi mo yulenaga taya bialu hariyagua nde henene larogo handa walia holebere. Ani mo yu kegola ibugua í̠ aga bayale ngagome yaribia haradagua bulebira.
SIR 27:9 Ega mbiraorego ale ti mo mogo buwa mbiraoreni biragone. Anidagua dege mana tigabi bulene ngago wali agali tigabi biaga bu karu ti baba hagane nga.
SIR 27:10 Laiono gabua bedaru tigua nogo bolenaga ohowa ibulubadagoria yu biragane nga. Anidagua dege mana ko bulene ngagome wali agali mana lehe biaga bu karu minule ohowa harigani yu biraga ngago ndobe.
SIR 27:11 Wali agali Anduane Homogonaga bi mana hale haga karume tinaga bu mini bayale ngagobiore latagi holebira. Anigo wali agali mini tiga nabi karu tigua egeme ho iriari biagadagua bulebira.
SIR 27:12 Wali agali bayale ndo mana lehe biaga bu karu baba haga hariyagua ti wahalu polene hariga taya bialu habe. Anigo wali agali mini bayale gigabiwi baba birariyagua nde karulapego birabe.
SIR 27:13 Wali agali mini tiga nabi karume bi ko nalolene ngago laabo halu tininaga mana ko biragonaga te lalu oba halu haga ka.
SIR 27:14 Wali agali ko uruni aleme bi laragola wali agalinaga tingini pandi hinalu agali ko kagome keba howa lai larangi wali agali maru bu karume bi hale holino tinaga hale paiho haga ka.
SIR 27:15 Wali agali mine haga bu karume lai laabo halu mbirago darama dalira handala wahaga. Tigua lai larago bi ko ngubiore laragola wali agali maru karu ti hale habe manga halu piaga.
SIR 27:16 Wali agali mbirame bi ohowa lene ngago bibahende hale hai helo latagi hayagua nde wali agali bu karume ibuhondo henene laga ka lo manda nabulebira. Ani bialu ibu nenege holene mbira lone mani handa wali naholebira.
SIR 27:17 Í̠naga nenege kago gubalini halu kaware haabo holene nga. Anigo í̠na bi libuni hangu ohowa lene ngago hale hai helo latagi hariyagua nde ibu kagoha lone talima napobe.
SIR 27:18 Agalime ibunaga waitigi kago homelo bo wahagadagua í̠na libu mani bayale hama polene wiago í̠na mo ko harigoni ndobe.
SIR 27:19 Wali agalime ega bedago giha pogo lalu minu yanigo poragola lone bedaria handa nabiagadagua í̠naga nenego biago lone dai bule ndo pu wahayagoni ndobe.
SIR 27:20 Ainde í̠naga nenege biago nogo gabua timu ho yalu ibida pu wahagadagua ibu ibida puabo hayago ainde í̠na ibu lone haruru talima napobe.
SIR 27:21 Dere bidago kabu bulene karulape wialu keba haribigo hadalu gi tigani bulene ngago ainde bi ohowa laribigo hale hai helo latagi hariyagua nde ogoni lone mo tiga bulene nawiore.
SIR 27:22 Wali agali mbira kagome bi nale í̠hondo debia hayagua nde ogoni galone tara ndo mbirale ko bule hangu debia holebira. Ani biaga kago mbiralime ibunaga mini ngago mo beregedabe naheore ka ndobe.
SIR 27:23 Wali agali ogoniale kagome í̠la haru mandagi te lalu í̠la bi bayaleru lalu biruwa í̠naga bi larego damene baya hangu mo yari bia howa lalu birulebirago ainde mani howa ibu te taraale lalu bi í̠na larigo mo beregedalu í̠ni mo ko holene bi ngago lo aribia holebira.
SIR 27:24 I̱na handabe manga hagane dewaore ngago ngelowa wali agali uruniore handabe manga timbuni haruli. Ani bialu Anduane Homogohandabi ti handabe manga ho ka.
SIR 27:25 Ege to̱le̱ mbira baraga hariyagua lone dai bialu í̠ninaga emboneni bedelabaga bulubira. Ani biragola dere timbuniore bu holebere.
SIR 27:26 Mbiralime dindiha gabua uli tombayagua nde tini uli ogoniha pilolebira. Mbiralime gono wiyagua nde ibuni gono wiyagoha dai bialu ibuni do wulebira.
SIR 27:27 Wali agali mbirame mendeali kago mo ko hole karia ibugua bule wiyago lone beregedalu ibuniha dai bialu mo ko haragola mo ko holene ogoni agoha howa ibiyabe toba halu handa nabulebira.
SIR 27:28 Wali agali mine haga bu karume mege dewa bialu bi ko ngaru ta nabi laabo halu haga ka. Anigo tiore laiono nenda biaho berelalu nogome pogolalu pu nabiaga ngadagua tigua yolo ko taraore mo yulene ngago ngelalu napolebira ndobe.
SIR 27:29 Wali agali maru ti wali agali bayale tigabi bu karu pi larago hondole karu tinibi nde yo pialu pu nabi tihabi mo ko holene anda ibulebira dege. Ti homa nabi kangi dege tandaga timbuniore nalu holebira.
SIR 27:30 Mana ko ngubiore kira wali agali mana ko biaga bu karu tiha nga. Ogoni keba holene bu miniha tandaga holenela kira nga.
SIR 28:1 Mbiralime wali agali bu karuhondo yolo ko miaga bu karu tini nde Anduane Homogo giha howa ko ngago mulebira. Ani bialu Anduane Homogohanda tinaga ko biyago embeda naholebira.
SIR 28:2 Wali agali maru bu karume í̠hondo ko birago mo embeda halu biadai nabi wahariyagua nde ko í̠ha ngago Anduane Homogohondo mo embeda halu domo wahai habe lalu bi larego ibugua hale halu domo waholebira.
SIR 28:3 Wali agali maru karu baba keba ho hariyagua Anduane Homogohanda í̠ biamogo bia laregola í̠ mo bayale holebirabe.
SIR 28:4 Í̠naga damene karu dara nahaga hariyagua nde Anduane Homogohanda ko í̠na bini ngago domo waholebirabe.
SIR 28:5 Í̠ bame agali dege kegoni howa í̠naga miniha tandaga timbuni ho kego hadalu wanahariyagua nde í̠naga ko ngago aiwa domo waholebirabe.
SIR 28:6 Baya hangu mitangi bia. Í̠naga dindini holene ngago biba haragola homalu mo ko holebira. Anidagua bulebirago mitangi bialu í̠ninaga miniha waitigi holene hongo kego wahai halu Anduane Homogonaga mana ngago baya hangu talialu holene nga.
SIR 28:7 Anduane Homogonaga habo nalolene bi timbuni lo wini ngago mitangi bialu ibunaga bi mana ngini ngagobi mitangi bialu holene nga. Í̠na wali agali bu karu baba keba howa lai lolene ngago wahalu tigua í̠hondo lulu mana ale bialu karunaga miniha genda nahe habe.
SIR 28:8 Mbiralime lai laragola í̠na bime lai lagalaga bialu irigi irigi beregola í̠naga ko ngago timbuniore holigo lai nalabe. Irane wali agalime keba howa lai lalu gungu biaga ka.
SIR 28:9 Wali agali mana ko biaga bu karume tinaga nenega bayale holene ngago mo ko halu wali agali bayale holene ngagoha waitigi holene mo yu anda ibalu mo ko hai haga ka.
SIR 28:10 Ira dene emene dedagoria ira dewa bo wima irigi haregola ira datimbu halu timbuniore haga nga. Anidagua dege wali agalime mine hayagua nde wai ogonime mo heya haga. Heneneore wali agali ti hongohe heagua nde tinaga keba holene pu timbu dege hagane nga. Anigo ti muni dewawi homogo heagua tinaga miniha tandaga timbuni ngago hongo howa latagi haga ka.
SIR 28:11 Wali agali keba abale tongo laga kagome mo ko halu bagabaga bulene mo wia halu biragola mbirali kago abale bope hagane nga.
SIR 28:12 Ira dene hagua bialu ngago pulope haregola ira datimbu hagane nga. Anigo ira dene emene hoailo ngago hamiaga toloba haregola ira hoailo wiyago abale hundu tegelo mina haga nga. Manane ogonibi dege kirabali í̠naga ne harigaha howa tagira ibagane nga.
SIR 28:13 Tí wali agali mege bialu hagabi ke̱ howa bi lagabi kemiru tíha pani nolene ko ngago anda ibulebira. Ani bulebirago irane tígua wali agali maru karunaga bayale holene wiago mo ko halu kemigonaga noleberemi.
SIR 28:14 Mege beregome wali agali bo taliatogo lalu dindi tara tara ngaruha purogo lelagane nga ndobe. Ani bialu tano timbuni ngago bo gialahole bialu gabumane kago biba helaga nga.
SIR 28:15 Megenaga lini agali one wali bayale bedago ibu andagaha howa bo batagi halu tinaga biabe erekuibi bialu hayagonaga yolobi nami piaga.
SIR 28:16 Wali agali mende kagome ibu mege biyadago hale howa henene ledada lo manda biyagua nde ti kagoha hendore holenebi hadapaya bu holene nawigo.
SIR 28:17 Mbirali kago gewa tibume bayagua nde tinaga tinginini to halu dere biaga nga. Anidagua dege wali agali bi ko laga bu karume wali agali maru kagonaga hongo bope hai halu mo ereba hai helaga ka.
SIR 28:18 Wai biagane ayu tibu mini bainademe wali agali dewa homelo dibaganego ainde bi kome bolangua halu dewaore home laga nga.
SIR 28:19 Wali agali bi ko larago hale nahe baya hangu hogorale bu haga karu ti turu ho holene ngago irane tigua bi larago baya hangu manda nabi kagome turu holene nga. Tiha keba halu lai lene ngagonaga genda mbira yu ha nabini ka. Ani bialu ke̱ holenenaga ege pume gono ngagoha halu mbira do wianabini ka.
SIR 28:20 Mege biragonaga miniha genda timbuniore aeane gendabi ngagobi wialu hongo timbuniore ege pu hongohe ngagobi nga.
SIR 28:21 Mege biaganeme wali agali homelo bo waore haga. Ainde mbirale uruni nahondole ina ayu dege homolene karulapeda.
SIR 28:22 Bi ko ogonialeme wali agali tigabi karu bope halu irani da nabulebira.
SIR 28:23 Anigo wali agali Anduane Homogo yu wahalu piyaru minu yania halu ira hundia nabiaga dedagoria dai helolebira. Heneneore mege biaga mana ogonime laiono gabuame wali agali talima poradagua bialu biango dudume balu naradagua biagane nga.
SIR 28:24 De handaluore holene nga. Í̠ daluha yagi baya hangu gewa agubandu anihe ngarume pabe hagira hongohe bu yaanda howa, í̠naga muni ngolo siliba ngeru baya hangu mo do ho wibe.
SIR 28:25 Bi lararu bibahende miniha baya hangu mo tale biai halu í̠naga ne harigaha bi mbira loligo panga gedeni ho ndibulo wiagadagua ndibulo habe.
SIR 28:26 Í̠na bi ko mbira laregome í̠ni waitigi giha pilo ya holigo baya hangu mamage howa de hondo holene nga.
SIR 29:1 Wali agali mende kago dara haga bu karume wali agali tini dindi mandagi haga karu biamogo bialu dano helo mialu biaga. Tigua ogoni Anduane Homogonaga mana ngago talialu anidagua biaga.
SIR 29:2 Wali agali mende kago tubagi ho kangi mbirale bame tale bu mulene nga. Ani bialu dano ho hariyagua abale miadai bulene nga.
SIR 29:3 Í̠naga nenegela ogoale bibiya lalu bi lo wirigo mo aribia nahe bule larigo abale bibe. Anidagua beregola í̠ha tubagi ho kego ibugua biamogo biaabo halu holebira.
SIR 29:4 Wali agali dewaoreme dano hole mirago bame ti mo turu halu bame mini mo yaradagua bialu tigua mbirale anduane ti biamogo biaga kago genda mo miaga ka.
SIR 29:5 Wali agali marume dano holenaga bi bayale hadalu bime mo adogoda bialu mbirale dano howa mo yu piaga. Anigo ai dano hongolenenaga abale miadai nabi howa tigua lalu, Nguliya degego emene hondo habe, laga. Ani buwa bi la tara haga bialu howa lalu, Ai horo hapara hayadago dano nahongolebero, laga.
SIR 29:6 Ainde dano anduane kagome lo hongo halu ibunaga dano ngi laragome muni emene dege mbira miragola mo yarago ibu karulape holebira. Anigo dano hayadagome dano hongolene mbirale mbira nayi hayagua nde daraba ibunaga muni dano hayago homa anda haragola hako holene ona ibira holebira. Tigua bi ko larago ladai bulene dege ndo wulebira.
SIR 29:7 Anidagua biragome wali agali bayale karume dano helo lone mulene turu nahaga ka. Ogoni irane wali agalime tihondo lone ke̱ holigonaga namiaga.
SIR 29:8 Anigo ai wali agalibi mbirago ibu mbirale nawi tubagiho kane handariyagua í̠na ibu biamogo bulene nga. Ibu í̠ malia howa bame ho waholigo abale biamogo bibe.
SIR 29:9 Anduane Homogonaga mana lo ngagome bibe ledago talialu yagibano karu biamogo bialu mbirale ibuha tubagi ho kago mibe leda. Bameore halu pe nalabe leda.
SIR 29:10 Í̠ dameneru í̠naga nenegeru biamogo bialu í̠naga muni pelolene karulape. Í̠naga muni bame wialu ege to̱le̱ andaneha wu hagua dalu ereba holigo abale galone bulene nga.
SIR 29:11 Í̠naga muni ngeru Anduane Homogohanda pelabe ledagoha pelaregola í̠naga yolo mani mo yu holeberego ngolo ngago bolangua howa mo yulebere.
SIR 29:12 Í̠na wali agali yagibano bu karu dara haabo haga hariyagua nde í̠ha mo ko hene keangi tigua í̠ heba holeberemi.
SIR 29:13 Wali agali biabe bia haga bu karu tinaga hongo gibiore yandare alebi wai humbi hongohe waingi yagane ngagobibi ka.
SIR 29:14 Wali agali bayale kagome ibu damene mbirame mbiralinaga dano howa ya dai bibe nahe kagola nde ibugua biamogo bialu dano hanga haga. Anigo wali agali ti damene karu mitangi nahaga kagome dano hayadago ibugua hanga naholebira.
SIR 29:15 Í̠naga nenege mbira kagome í̠naga dano ho henedago ibugua hanga hayagua nde í̠naga nenege bayale ogoni ibu howa ibunaga mbirale bayale winiru yuwahai halu í̠naga dano hanga hayago mitangi bialu í̠naga nenege ogoni wanahabe.
SIR 29:16 Ai wali agali mana ko biaga karume ti dameneme dano hangabe lalu muni mirago ti biamogo biyada lo manda nabi howa tigua muni uruni galone nawiha bame baainai bialu wahalu piaga. Ani biragola ibu damene biagome nde ibu helalu wahalu piaga.
SIR 29:17 Wali agali bayale bu hearu nde iba sibi solowara bedagoha pialu karia mo ko hagadagua bialu mo ko hai haya. Ani biyadagoni ti damene bu hearunaga dano hangalu hearia tini mo ko holene ngola haya.
SIR 29:18 Mana ogonialeme dege agali haguane bu hearubi mo ko dege henego tini dalu wahalu dindi taraha pu wahaga biya.
SIR 29:19 Wali agali ko biaga karume ibu damenenaga dano hongoliya lowa ti muni bolangua hene ngago hangu mule manda biyagua nde ti darabiore bialu ka. Ti godi larangi pani emene ndo nolebira.
SIR 29:20 Í̠na mo ko holene wuligo de handa ala hondowa karulape hariyagua nde í̠naga damene kago biamogo bibe.
SIR 29:21 Wali agalime dunini mariago tininaga ngelowaore holene nga. Iba mbira tomo nolene mende aga karulolene tebone tini paluene andabi helowa holene karulape.
SIR 29:22 Yagibano kago ibu anda ibuni andagaha paliaga heagua ibu turubiore ka. Ibu wali agali maru ti damene andaga puwa tomo bayale tara tara ngaru nalu u paulene anda nahe bu hearubi ndo ka.
SIR 29:23 Í̠ mbirale dewawi hariyaguabi nawi hariyaguabi í̠ ta nabi howa turu ho holene nga. Wali agali dindi mandagi haga karume í̠ha bi maru ke halu laede hayagua í̠ genda nayi habe.
SIR 29:24 Í̠ wali agali mende andaga paliaabo holeyagua í̠ turu naholebere. Ani bialu í̠naga mini ngego hale helo latagi naholebere.
SIR 29:25 Ti andagaha bame biabe bialu haga kadagua holebere. Í̠na wali agali ibiraru tomo ibabi nelo meregola tigua í̠hondo kai ladai nabulebira. Ani bialu tigua í̠ handaya ho howa í̠ ti andaneha helowa lalu,
SIR 29:26 Igiri-o tomo nalu birulene tebolo dagia ogo mo tiga bu ngelabe. Ani bialu tomo dedagola abale dugu yalu ogoria ibabe lolebira.
SIR 29:27 Ani bialu biragola tigua lalu, Í̠ tagira pialu pobe lolebira. Agali haguane mbira ibiyada. Ayu dege i̱ hamene mbira ibalu anda hobane mbira Í̠ padego mulebira.
SIR 29:28 Heneneore wali agali manda dewawi karu irane kirame ti mo ko holebira. Wali agali í̠ ti andagaha palibelo turu nahe bu karume í̠ mege biragomebi Í̠na dano haridago hanabe, lalu bi hongo howa keba ho howabi olalu kagome tinaga miniha mo ko hai hene holebira.
SIR 30:1 Abame ibu waneigini gubalini ho heagua nde waneigini bolebira. Ani biragola mani waneiginime ibu aba mo turu holebira.
SIR 30:2 Abame waneigini mani turu helonaga ayu baya hangu lawai haga ka. Ani bialu damene dewa biru ngagoria wane igininaga te dewa laga ka.
SIR 30:3 Waitigirume waneigini kago de hondowa ti dimagoli ho helo waneigini aba ibugua baya hangu mana laga ka. Ani biragome aba ibuni ibu nenege bu karunaga deni mini lene mbira holebira.
SIR 30:4 Aba ibuni nahome kangi ibu waneigini bu karu hondowa turu ho birulebira. Ani biruwa ibu homolene horo tagira ibirangi ibuni miniha genda nayi homolebira. Ibu homedeha waneiginime ibu hene ngagoria ho aribia holobada lo manda bialu genda naheore homolebira.
SIR 30:6 Heneneore ibu waneigini ha aribia haragome ti waitigi abala hayaru pani ba abala nenege howa mbirale ti aba biamogo biagaru tigua biamogo bigi bialu holebira.
SIR 30:7 Aba kagome ibu waneiginihondo hendore howa ibunaga dere emene bidaru kabu bia hayagola waneiginime dugu emene biyagua aba ibu manga haga ka.
SIR 30:8 Nogo hosi kago baya hangu biawai nahayagua nde ibu mine halu gabua holebira. Anidagua dege waneigini mana nahale hene heagua nde ibuni hame ledagoha pupebe bialu haga holebira.
SIR 30:9 Í̠naga waneiginime í̠hondo hale harago e̱ dege laga hariyagua nde horo mbirungi í̠ mo durula holebira. Libu haru gini bialu haga haribiyagua nde horo mbirungi í̠ mo genda holebira.
SIR 30:10 Í̠ igini kagola oba nahabe. Ibugua í̠ genda mo ngiragola mani í̠ni dara ho howa keba halu birulene wuligo nahabe.
SIR 30:11 Ibu igiri emene dege kangi ibuni hame ledagoha helo wanahalimu. Wene igiri emene kangi mana lalu tibume bolene nga. Mani anda halu puwa í̠naga bi larego hale nahe mine hama ibaga bulebirago ayu wene kangi bo gangu lolene nga.
SIR 30:13 Í̠ igini kago baya hangu handaya ho howa mana bayale bulene ngago lawai holene manga nahe baya hangu lawai habe. Mani ibugua í̠ mo taga holene wulebirago ayu howa mo tiga bialu holene nga.
SIR 30:14 Yagibano tinaga tingini hongohe agali homogo karunaga tingini gedeore howa warago tara tara balu haga ka.
SIR 30:15 Tingini ibu galoneale mbira muni ngolo ngaru nagalone lowa bolangua hene nga. Tingini hongohe maruale ngaru bibahende bolangua hene nga.
SIR 30:16 Heneneore tingini ibuha warago mbira nawi howa hongohe heagua ibu galone duniniore mbira kagola wali agali turu ho haga.
SIR 30:17 Ainde í̠naga tingini ibu warago tara tara balu mo ko halu haabo hagayagua nde abale homalu homaliha baya hangu ha̱lo haabobo bu holene nga.
SIR 30:18 Ai mbirali warago bo ngagonaga tomo yu pialu keria ibugua tomo ogoni nabe naheyagua nde tomo ogoni wali agali homayaru tinaga loma bu yalu homaliha pialu yu wahalu dai biradagua bulebere.
SIR 30:19 Dama wabu heledagohondo ira lini bayaleru aginaga do loma bu mialu harilibe. Ibugua mbirale mbira nabe nahebi nga yabe nahebi ngago ndobe. Wali agali warago timbuni Anduane Homogoha howa ibini mo yu karu tibi nde tomo nolenebi nga yulenebi nakarulapeore holebira.
SIR 30:20 Tomo bayale ngaru tinaga deme handa hondowa tinaga bu miniha noa halu nabe nahedagola genda timbuni holebira. Agalime wandari baya bedago de hondowa ibu daubulene hame lowa miniha dimagoli halu mini burugu lo hagagobi holebira.
SIR 30:21 Genda bu ngarume í̠ bope nahelo halu í̠ninaga hame ngegome í̠ mo ko halu bope helo nahabe.
SIR 30:22 Wali agali turu ho haga karu ti bayale halu ti mali luore dindini holebira.
SIR 30:23 Í̠ni hendore hole í̠naga miniha mo turu howa habe. Bu miniha genda halu mini burugulo holeneme wali agali dewa mo ko hai halu ti biamogo nabiagaorego manda buwa í̠naga bu miniha genda ngago mo wahalu habe.
SIR 30:24 Mana kira dimagoli holene keba holenelame wali agali abale balu home laga ndobe. Bu miniha genda yu kagome wali agali abale mo wahe haga nga.
SIR 30:25 Heneneore wali agali turu ho karu ti tomo damene bibahende hame lai haga ka.
SIR 31:1 Wali agalime tinaga muni ngago hangu mitangi bialu mini burugu lo hayagua tini u baya hangu napale halu tinaga tingini o bialu kuni hangu ona holebira.
SIR 31:2 Heneneore wali agali tinaga biyinaya hangu mitangi ho haga karu ti u baya hangu napaliagaore ka. Ogoni wali agali warago timbuni bo wuwa u napale hagadagua haga nga.
SIR 31:3 Muni dewawi homogo kagome biabe ndelaheore bialu muni mbiraleru mo ngoai ho wialu hagane. Ani bialu howa ainde horo mbiru ibu ha̱lo bedangi mbirale bayale ilo wiyagome ibunaga hame ngago biba helo biraga.
SIR 31:4 Yagibano kago ibubi nde erekui biabe bialu muni mbiraleru emene dege ilomogo bu ngelo haga. Anigo ai ibu ha̱lo bedangi ibuha dewaore tubagi ho wiai karia handaga.
SIR 31:5 Wali agali ngolo dege hame lo haga karu ti wali agali bayale tigabi ndo holebira. Ani bialu wali agali muni hangu mo wialu haabo haga kago ibu mbirungi mo luluya holebira.
SIR 31:6 Wali agali dewame muni ngoloru dewaore wule hame lalu karia tiniha genda tandagala timbuni ngago ngola howa tini mo ko haga nga.
SIR 31:7 Muni dimagoli haragome wali agali dewaore mo pila halu wali agali lulu karu mo hondo hagane nga.
SIR 31:8 Homogo muni mbirale dewawi kago ibugua muni hangu hame lowa biabe bia ndo ibugua biabe tigatiga bialu heneyagua nde ibu turu ho holene nga.
SIR 31:9 Wali agali ogonibi bialu haga heagua nde iname ogoni ale kagohondo mo turu halu bi bayale lamialu holene ngago irane ibugua mana bayaleore ibunaga wali agali karu mo walia halu kagonaga mo turu holene nga.
SIR 31:10 Munime ba handayagola bi nalene ai kebe. Ibu munime bahandayagola handalu ibu pora bialu pene heagua nde ibu turubiore kagoni ndobe. Mbirali mana ko nabiaga ai kagome munime bahandayagola pora bialu pene kabe.
SIR 31:11 Ibunaga holene bayale ngago ibu abale ereba naholebira. Ani bialu wali agali ti mo ngoai ho biruwa ibunaga mana bayale biaga ngago hangu te lalu birulebira.
SIR 31:12 Í̠ agali haguane mbirago andaga tomo nole dagia ngagoria biruwa tomo baya dagiani ngago deme hondo biruwa lalu, Ayaliore-o tomo baya taraoreda, loleni nalabe.
SIR 31:13 Baya hangu manda bibe. De ibugua dimagoli hagago ko nga. Mana ogoni bolangua hene mende nawiore. Anidagua biagagome de ibu dugu biaabo haga nga.
SIR 31:14 Dagiani ngane hendedego mo yai holeni nahabe. Tomo í̠ ala mulenaga wali agali hela amunana nabibe.
SIR 31:15 Í̠ni mitangi birilidagua wali agali bu karu ala mitangi bibe. Mbirale mbira bule manda bidego minime mo tale ala bibe.
SIR 31:16 Tomo nolene tu haragola tomo minila haru agalime tomo naga ngadagua nabe. Nogo biangome nagadagua nalu keria wali agali biru ngarume í̠hondo oba holigo manda bialu nabe.
SIR 31:17 Mana bayale mbira í̠ tomo emene nalu maru ti wene dege nole nalu bedagola í̠ abale nai hariyagua bayaleore. Tomo dewaore í̠ mo yariyagua wali agali bedaru bibahendeme í̠hondo mini ko wialu birulebira.
SIR 31:18 Wali agali dewaore bereagua nde garere bialu tomo dewa í̠ mule manda buleni nabibe.
SIR 31:19 Wali agali mana bayale bulenenaga manda mini bedarume tomo emene dege nalu biraga. Ani bialu mani ti buhe bayale karulape mialu u bayale paliaga.
SIR 31:20 Wali agali tomo dewa nane kagome u bayale paliaga. Wali agali tinaga tombeha tomo palu toleledago ibu u baya hangu napaliaga. Buni timbuni nalu magu tagua ho biraga.
SIR 31:21 Ai tomo dewaore nariyagua nde heyalu bu he bayale mialu ibagabu kegola mani karulape holebira.
SIR 31:22 Igini-o i̱na bi larogo baya hangu hale habe. Mineore holene nawigo mine nahabe. Ani larogoni mani howa i̱naga bi ogo henene galoneore lenedane hondolebere. Mbirale í̠na berego damene bibahende mendeali kago baba irigiirigi bialu bolangua haga haga bulenaga nabibe. Warago ngago í̠ha ngola holigo nabibe laro.
SIR 31:23 Wali agali bu karume mbirali kago ibugua tomo timbuni dawa ngago hondowa turu halu tigua bi dewa ogoninaga lalu hagaya. Tigua ani lolene bayale
SIR 31:24 Anigo wali agali andagaha haga karume tomo emene ko miriyagua nde tigua keba abale holebira. Ani bialu tinaga bi larago tiga tiga ngadagua lara.
SIR 31:25 Í̠ lulu iba nalu howa wali hongohe bedo agali hongohe ko lowa maru kago walia nahagago nahabe. Waini ibame wali agali dewaore mo ko hai hene ngago manda bulene nga.
SIR 31:26 Ibame aeane irame dene ngago mo hongo haga nga. Anidagua dege waini ibame wali agali mine haga bu karu ti gungu bialu kangi tinaga mini ngago mo pana hagane nga.
SIR 31:27 Waini iba ti nolene ngadagua nayagua nde wali agali mo turu holene bayale nga. Wali agali waini iba nolene nawi hayagua nde agua bulubadabe. Bambaore howa wima ibinigo ayu kemangibi waini ibame wali agali mo turu hagane winigo nga.
SIR 31:28 Wali agali ti waini iba nolene tu nalu ibunaga nolene magi ngago karulape nayagua wali agali tini turu haga.
SIR 31:29 Anigo waini iba dewaore nayagua nde tigua keba abale tungulope halu gungu bialu pilope hama ibaga biagane nga.
SIR 31:30 Wali agali mini nawi lulu bu karu iba nowa luluyu kangi tiha keba abale halu gungu bule hamelowa homa handalu biraga. Ani bialu karia tinaga hongo ereba hai haragola tinaga tinginiha dere dewaore bu hagane nga.
SIR 31:31 Dawe halu tomo nalu biruwa í̠naga damene mbira kagohondo í̠naga dano hanga lalu ibuhondo lai lolenebi ibu mege bulenebi dano hangabe lalu bi hongo howa nalabe.
SIR 32:1 Í̠na tomo nolene ogoni mo tiga bialu haru habelo dabo helayagua nde í̠na mine halu í̠ninaga mini yaraga holeni nahabe. Í̠ wali agali tomo nole ibiraru ti dombeneha ti tomo nelo baya hangu haru howa ti tomo nalu birai kagola í̠nibi nde ti haru mandagi birabe.
SIR 32:2 Í̠naga biabe bulene ngago biai howa ti heba mandagi turu ho biralimu. Anidagua beregola í̠naga biabe bayale birigonaga te dewa lalu birulebirago berelo ani bibe.
SIR 32:3 Agali wahe-o í̠na mbirale bibahende manda biai kego ainde í̠na te maru lolene bayaleda. Anigo í̠na iba gana mo ko holigo hendore mini wiadai buwa dege labe.
SIR 32:4 Wali agali tingini maru bialu kago í̠na bi hendore dege labe. Horo ogoni í̠naga mine howa manda ngego mo walia holenengi ndo.
SIR 32:5 Waini iba dendebi ngago heba ibagana lalu iba bayale heba mandagi birabe. Ogoni baya gibiore ngolome wabini ege pume mo yari bia hene ale wialu ege to̱le̱ bayale tara yolo dewaoreme miaga ngarume mo yaribia hene ngaligobi nga.
SIR 32:7 Igiri daliahe kego í̠na bi mbira lole heya layagua ogoni bayalego ainde tigua í̠hondo bi lole heya lalu halu kira olelo birabe.
SIR 32:8 Bi dewa nale howa bi kuni dunini lolene ngago dege labe. Manda timbuni bi hariyaguabi bi dewa nale ne hariga ndibulo habe.
SIR 32:9 Í̠ agali haguane bedaru baba mandagi birariyagua nde í̠bi agali haguane ti bedagobi dege kobe toba nahabe. Ani biruwa wali agali mbirago ibu bi laragola í̠ bi nale ne hariga ndibulo birabe.
SIR 32:10 Hari kulu nale wene dege lole ngelowa hari daba ala waga larane handaga. Anidagua dege wali agali mbirago ibu wali agali bu kagoria ibu ha nabi ngaore ti mini bayale mini lene ka lalu hale ho bamba haga nga.
SIR 32:11 Dawe halu tomo nalu birarimigo nai halu í̠ni andaga abale pobe. Maru ti piai kagola í̠ hangu biru waholigo abale pobe.
SIR 32:12 Í̠ni andagaha biruwa biradagua birulene karulape dege. Anigo mine howa kudaga bi dewa lalu bedegome í̠ha ko wuligo ala manda buwa bi labe.
SIR 32:13 Mbira ngago ladege bero. Anduane Homogohanda í̠ wabu helalu ibugua í̠hondo mbirale dewaore yu habelo nginigo í̠na ibuhondo ka̱i̱ lalu holene nga.
SIR 32:14 Wali agali Anduane Homogo gi halu ibu andaneha haga karu tigua ibunaga bi lawai harago hale halu talialu haga ka. Ani kagola Anduane Homogohanda wali agali ibu gubalini ho haga karu mo bayale haga ka.
SIR 32:15 Wali agali Anduane Homogonaga bi mana lo wini ngago baya hangu lo manda biaga karu tigua mana ngago manda timbuniore bulebira. Anigo wali agali ke̱ howa mana talialu haga tingi haga bu karu ti pi lalu pu ereba holebira.
SIR 32:16 Wali agali Anduane Homogo andaneha haga karu tigua mana tigabi ogoda lalu handa walia holebira. Ani bialu tigua biabe bayale biragome arumaha ngago mo wá haga.
SIR 32:17 Wali agali mana ko biaga kagome maru karume ti mo tiga bule bi lalu karia tigua uruni hale nahe bi larago mo wahaga ka. Ani bialu tigua mana mo beregedalu tinime hame ledago mo ngelaga ka.
SIR 32:18 Wali agali manda bayalebi kagome wali agalinaga mini ngaru bibahende mo tale biaga ka. Anigo wali agali mine haga bu karu tigua mbirale mbira gi nahaga ka.
SIR 32:19 Í̠na mbirale mbira bule manda bu hariyagua wali agali maru karu tinaga miniha ngago ala hale habe. Anidagua beregola biabe berego biai howa í̠ha mini burugu lolene mani nawualebira.
SIR 32:20 Í̠ pi loligo hariga ege tole̱ dewa uliwi ngagohabi napobe.
SIR 32:21 Hariga bayale wiagua nde mo ko holene nawulebirabe toba nahabe.
SIR 32:22 Anigo deme mamage baya hangu habe. Í̠ni waneigini karu tigua genda mo yu anda ibulene nga ndobe.
SIR 32:23 Í̠ni kegoha baya hangu mamage halu mbirale í̠na berego damene mamage howa bialu habe. Wali agali mana ogonidagua biaga kago ibugua Anduane Homogonaga bi mana lo wini ngago talialu hagane ka.
SIR 32:24 Wali agali Anduane Homogonaga bi mana hale halu taluwa bialu haga kago ibu baya holebira. Wali agali Anduane Homogohondo mini mbiraore wu kago ibuha mo ko holene naibulebira.
SIR 33:1 Wali agali Anduane Homogo gi halu ibunaga bi hale haga kago tiha mbirale ko ngaru naibulebira. Bahondolene ibiragome bope nahe ti bolangua halu pelo Anduane Homogohanda ti biamogo bulebira.
SIR 33:2 Wali agali mini gigabiwi kago ibu Anduane Homogonaga bi mana lo ngago angua halu pubagi nahaga ka. Anigo wali agali Anduane Homogonaga bi mana talialu haga tingi ho kago ti iba sibi solowara hanini puyabume pulo yolu pu amunana biagagobi ka.
SIR 33:3 Wali agali mini tigabiwi kagome mana lo wini ngago yutiga bu haga ka. Ani yutiga biagadago irane bi mana lo wini ngagoha helaga biagane ege tole̱ kira Anduane Homogonaga hame hale hagane ngagome bi ledago heneneore laga ngago manda bialu ti mini mbiraore wiaga nga.
SIR 33:4 Wali agalime í̠naga bi baya hangu hale helonaga í̠naga bi lolenego baya hangu manda manda bu yabe. Bi tigua í̠hondo bi hale harago tigatiga ladai bulenaga miniha baya hangu mitangi bialu manda manda bu dege holene nga.
SIR 33:5 Wali agali lulu karume mbirale lawai henego baya hangu manda nabiaga ka. Tinaga miniha bame garo ge poragola pedere biyadagua bialu helowa haga ka.
SIR 33:6 Wali agalime tinaga nenege bu karu mitangi nahaga karu ti nogo hosime tinaga erekunini biraruago abogoda lo manda nabiaga kagobi ka.
SIR 33:7 Ni ibugua wá horo bibahendengi ngiaga ka. Irane agome horo maru duniniore wiagabe.
SIR 33:8 Anduane Homogo ibuninaga hameme horo marungi ogonibi ngelaga ka. Ibugua malinaga horo pongo wialu horo timbuni marunagabi pongo wini.
SIR 33:9 Ai Ngode Datagaliwabehanda ibuninaga horo maru mo bagiho ngelalu binigome horo wiabagiho ngelene uruni horo damene maru bu ngarunibi ndo ti horo timbuni nga. Ani bialu horo maru emene dege horo damene wilo ngelene.
SIR 33:10 Ina wali agali kemago dindime wabini ogobi dege dege kema. Adama ibu dindini henegodagua ina wali agali bibahende dindini holene wini nga.
SIR 33:11 Anigo Ngode Datagaliwabe ibuninaga manda timbuni ngagome wali agali tara tara dindini wabu helai hene. Ani wabu helowa tinaga dindibi tinaga mana bi lolenebi tara tara tini heagoha ta haga biniya.
SIR 33:12 Anduane Homogohanda wali agali maruhondo bi bayale lamialu tinaga mini mo yaraga heneya. Ani bialu ibugua maru ibuninaga helo dabo bagiho helalu ibuni heagoha kaware heleneya. Anigo maru hearu Anduane Homogohanda tihondo erembira mialu ti bope halu tinaga dindi wiyadagoha hearia bo taliatogo leneya.
SIR 33:13 Wali agali tigua dindi dongoma emeneru tinaga gime dugu mberabu yuwa ogonime beru tinime hame ledagobi wabiaga nga. Anidagua dege Anduane Homogohanda wali agali wabu helowa tinaga biabe ibunime hame leadagua bialu helo mo migi bini.
SIR 33:14 Mana bayale ibu mana konaga waitigi ngagola holene ibu homolenenaga waitigi ka. Anidagua dege wali agali mana bayale biaga karu ti mana ko biaga karuale ndo ti tara mbira ka.
SIR 33:15 Baya hangu deme handabe.Anduane Homogo daligaore kago ibugua wabini bibahende kira kira dege dege wabiyagola bibahende hangu hangu helo ndo bibahende ibunialela mandagi haga bu helo wabini.
SIR 33:16 I Siraga kogo ainde agali maru haru haga bu heneru aria i hamaro bini ko. Ani bialu agali marume gerebi lini dedago do yu piai heneha mbirali mahaore ibalu dai heneha emene do wahene dedaru dalu piagagoale i̱ kogoni. Anduane Homogohanda i̱ biamogo biyagola gerebi dewa dedagola agalime do ngoai hagadagua i̱na biabe bayale bialu kogoni.
SIR 33:17 Heneneore i̱na i̱ni biamogo bulenega erekui nabi bialu haru. Wali agali manda bayale bua ho hearu baya hangu lawai halu haru.
SIR 33:18 Agali biabe bialu haga kemiru tigua i̱ bi larogo baya hanguore hale halimu. Agali haguane wali agali íbu ngoai howa bi lelo haru haga kemiru ti i̱na bi larogo baya hangu hale halimu.
SIR 33:19 Agali mende kagome í̠ ogoale bia lowa horo bibahendengi mende kagome í̠ handaya ho helo nahabe. Ani bulene nawiore. Í̠ni waneigini kagomeyaguabi í̠ onemeyaguabi í̠ni hamenebi damenebi mbira kagome í̠ handaya ho helo holene nawiore.
SIR 33:20 Ani bialu í̠naga mbirale ngago wali agali mendeali kagohondo bame muwa mani í̠na tihondo dano hanga loligo bame namibe.
SIR 33:21 Mbirali í̠naga henge milo yupe nahe ha dege bialu homalu wahabe.
SIR 33:22 Í̠ waneiginime í̠ biamogo bia lolene tiga nabi nga. Í̠ waneigini tigua í̠na ti biamogo bia lalu í̠hondo hale holene karulape nga.
SIR 33:23 Í̠naga biabe berego damene í̠nime haru hai holene nga. Anidagua beregome í̠naga mini bayale mini lene kego mo ko naholebira. Í̠ni homole kaware biruwa dege í̠naga mbirale wiridaru Í̠ damene bu karu paluni talebu tahabe.
SIR 33:24 Í̠naga dongi ibu muleberego tomo nelo mialu gewa tibu mialu pindu ngago mulebere. Anidagua dege tomobi biabe uruni bulenebi í̠naga garabaya biabe bia haga kago ibu karulape nga.
SIR 33:25 Í̠naga biabe bia haga kagohondo biabe dewaore mo miriyagua nde í̠naga miniha dungulo holebere. Anigo í̠na ibu bameore berelo wahariyagua nde ibugua í̠ wahalu polene manda bulebira.
SIR 33:26 Biabe ndelahe hongohe ngago bialu tibu tandaga nayagua nde bulumagame bi hale hagane. Anidagua dege í̠naga garabaya biabe ale biaga kagome mine hayagua tibu tandaga bulene ngagome tandaga helo minu balu garabaya helolene nga.
SIR 33:27 Ibu bame naberelo biabe dewa mo mibe. Bame biruwa wali agalime mana ko bulene ngago miniha giga bialu biragane nga.
SIR 33:28 Bi ogoni henene orego biabe mo mibe. Bi larego hale nahayagua tandaga hendelo mibe.
SIR 33:29 Anigo ibuhondo miniha tandaga nahabe. Ani bialu ibuhondo mana tiga nabi ngago nabibe.
SIR 33:30 Í̠naga garabaya biabe bia haga agali mbira heagua nde ibu erekuibi í̠naga yolo wahalu yolo bu helene kago manda bialu baya hanguore í̠ni tingini haru harilidagua haru habe.
SIR 33:31 Í̠ninaga holeneore ibu kago manda bialu í̠ hameneore haru haradagua bibe.
SIR 33:32 Í̠na ibuhondo koale bialu hariyagua nde ibugua í̠ wahalu ibida polebirago mani í̠na ibu lone handawalia agua holeberebe.
SIR 34:1 Wali agali mini nawi ibu lulu karunaga yutiga biaga kago lehe tiga nabiore biaga. Tigua emaga handaragome tini mo durula haragola tigua mbirale henene tagira naibulebirago bameore maliaho haga nga.
SIR 34:2 Wali agali emaga mo dunu bia ho haga karu ti ni dedago tininaga munini kago minu yania halu holenedaguabi puyabu pu larago haruru talima polenedagua pialubi haga ka.
SIR 34:3 Mbirale emagaha handarigo ibu mbirale iba waiha handarigo ale dege nga.
SIR 34:4 Mbirale dodohe ngagome mbirale dodo nahe ho aribia naholebira. Mbirale henene ndo ngagome mbirale henene ngago ona ibu he nalolebira.
SIR 34:5 De gandeba handaga karume de gandeba hondowa bi laragobi egame bi tara laragobi emaga tara tara handoragobi uruni bibahendeore henene ndo ke̱ hagane nga. Mana ogoni walime waneigini taba hanalu howa mini tigabi ndo lehe ngago wu biragagobi nga.
SIR 34:6 Anduane Homogo Daligaore kagome í̠hondo emaga ogoni nahondo ngiyagua í̠ mini burugu lo holene nawi.
SIR 34:7 Emagame wali agali mo luluya hagane nga. Wali agali emaga ogoniale talialu haga heneru mo ko hai hene nga.
SIR 34:8 Mbirale ke̱ holene tara tara uruni aleme maninaga wali agali baya hangu bi mana ngago talialu helo biamogo nabulebira. Ani bialubi wali agali bayale tigabi karu tigua tinaga mini bayale wua kago latagi helo biamogo bialu mo hongo haga ndo nga.
SIR 34:9 Wali agali dindi tara tara ngaru handama ibaga bu hene kago tiha manda tara tara dewaore bi ka. Ani bialu wali agali biabe tara tara bialu hene karume lawai bayale holebira.
SIR 34:10 Wali agali tiha bahondolene mbirame tiha anda naibini karu ti mbirale ngarunaga manda timbuni nawi ka. Anigo wali agali dindi tara tara ngaruha handama ibaga bini karu tiha biabe tara tara ngaru bulene hondo manda bu yai ho ka.
SIR 34:11 Heneneore i̱na dindi maruha de handama ibaga bialu howa dewaore hondo manda biru.
SIR 34:12 Anigo mbirale dewaore de handarugo uruni bibahende te lai holenego nakarulape. Ai mbirale manda birudagome i̱ni dege biamogo dewa biya.
SIR 34:13 Wali agali Anduane Homogo gi halu ibunaga bi hale halu kago ti haabo holene yu holebirago irane tigua Anduane Homogohanda hangu ti biamogo bulebira lowa mini mbiraore wu kamogo ti haabo holene yulebira.
SIR 34:14 Wali agali Anduane Homogo andaneha haga karu ti ibugua mbirale bayale ngaru mo miragola ti mogo lowa duru nale holebira.
SIR 34:15 Wali agali Anduane Homogo kago gi halu ibuni andaneha haga karu ti turu holene ngago irane Anduane Homogo ibuni ti heba mandagi holebira lo manda bidagome turu holebira.
SIR 34:16 Anduane Homogonaga deme wali agali ibu gubalini ho karu handaya ho haga ka. Ibugua ti baya hanguore handaya ho halu mo hongo halu haga ka. Puyabu timbuni ibalu ni hongohe dalu birangi ibugua ti mo do haga ka. Ti pi nale bayale ibaga bu helonaga ibugua ti baya hangu handaya ho kaga ka.
SIR 34:17 Ibugua ti mo yaraga halu tinaga de mo wá helaga ka. Anduane Homogohanda ti mo dabi halu holene tiha helo mialu buwa ibuni ti haru mandagi ore haabo haga ka.
SIR 34:18 Wali agali mbirame nogo egaru bo page buwa Anduane Homogohondo loma bo miyagua nde Anduane Homogo ibu wali agali tinaga loma ogoni alego hame nalaga ka.
SIR 34:19 Anduane Homogo Daligaore kagome wali agali ibunaga bi mo wahaga bu karunaga loma ngago ibu hame nalaga ka. Wali agali mana urunibi biaga karume loma dewa mialu hayaguabi ibugua tinaga loma ngago hondowa turu naholebira.
SIR 34:20 Wali agalime loma bo mulenaga nogo yagibano kagonaga bo kayu biyagua mana ogonibi birago koorene ko nga. Tigua ogonidagua birago manane waneigini mbira ibu aba handaya ho helowa agali mende kagome waneigini ogoni homelo bo waharadagua bira.
SIR 34:21 Wali agali yagibano bu karu tinaga holene tomo emene ngelo kagoria hangu paga ho kagoni ndobe. Ai wali agali mbirame tomo emene ogoni mo page biyagua nde yagibano mbira kago homelo bo waharagoni ndobe.
SIR 34:22 Wali agali mbira ibugua ibu damenenaga tomo mbira ngago ohowa mo yalu biabe biaga kago yolo nabi piyagua nde tibi wali agali mbira kago homelo bo wahaga karubi dege ka.
SIR 34:23 Agali mbirame anda bialu kagola mendealime gialalu heagua ogoniha galone naheore libugua biabe erekuibini bameore bialu kebi.
SIR 34:24 Agali mbirago ibugua mbirale mbira hame larago mendego ibu manga hayagua nde Anduane Homogohanda libu harunaga hame natalulebira.
SIR 34:25 Wali agalime homene tingini mbira ngago gime yania howa gi wayawaya bo howa lone ela hayagua nde gi wayawaya bayago bame dege holebira.
SIR 34:26 Anidagua dege wali agalime tinaga ko biyagonaga dara howa ti tomo dewa nane henego ainde mani howa tigua mana ko lone biyagua nde Anduane Homogohanda tinaga bi larago hale naholebira. Heneneore tinaga dara hayago bame yu wahayagoni ndobe.
SIR 35:1 Wali agali mana bayale ngago talialu haga bu karu tibi nde loma bayale tara tara karu bo delo miaga kagobi dege ka. Ani bialu wali agali Anduane Homogonaga bi mana hale haga karu ti Ngode Datagaliwabela mini mbiraore holene loma bo delaga bayale ngagobi dege ka.
SIR 35:2 Wali agali tigua mana bayale birago bia dai biaga kago ibu widi lini bayaleru loma bu miaga ngagobi nga. Ani bialu wali agali yagibano kagohondo tomo mbiraleru tale bu miaga kago ibu Ngode Datagaliwabehondo ka̱i̱ lalu loma bu miagagobi ka.
SIR 35:3 Ngode Datagaliwabe ibugua wali agali mana ko bulene ngagoha hogorale bialu haga karuhondo turu ho hagane ka. Ani bialu wali agali mana tiga nabi ngago wahalu piaga karunaga ko ngago domo wahaga ka.
SIR 35:4 Maname ogodagua leda. Í̠ Anduane Homogo andagaha ibalu loma mbira manda bu yalu ibulene nga lalu lo wini nga.
SIR 35:5 Wali agali bayale tigabi bu karume nogo bo loma bu mulenaga nogo bayale habe tigi kago bo loma bu miaga ka. Anidagua biragola loma bo deledagome tumutumu baya ngabiore biragome Anduane Homogo Daligaore kago mo turu hagane nga.
SIR 35:6 Anduane Homogo ibu wali agali bayale karume loma bu mirago turu haga howa ibugua ti embeda nahagaore ka.
SIR 35:7 Anduane Homogonaga mini yaraga hole turu ho howa í̠naga mabuha tomo hengedego piagane boga birago ibunihondo bu loma bu mulene nga.
SIR 35:8 Í̠naga lomaru bu yalu ibalu howa í̠naga denguiha keba howa aruma holene nawi.
SIR 35:9 Anduane Homogo Daligaore kago ibugua í̠hondo mbirale dewa ngiyago manda bialu í̠na nde ibuhondo miadai bulene nga. Í̠ mbirale dewawi karulape hariyagua nde ibuhondo dewa dege mulene nga.
SIR 35:10 Anidagua buleberego irane Anduane Homogohanda í̠na mbirale ibuhondo mo turu halu mialu kego damene baya hangu ngiadai biai haga ka. Heneneore dewa haluore ngiadai biai holebira.
SIR 35:11 Anduane Homogo í̠na bime ladebodebo nabibe. Ibugua mbiralime mana ogonibi birago manga haga ka. Ani bialu loma ko ngaru bu merogome í̠ni biamogo bulubabe toba nahabe.
SIR 35:12 Anduane Homogohanda wali agali lenego timbuni haguane heaguabi ko yagibano heaguabi bibahende manani howa tinime bialu hayagonaga mo tale bulene ngadagua mo tale biaga ka.
SIR 35:13 Ibugua wali agali yagibano bu karu ibu mini turu howa ibugua wali wali ko uruni wali agali maru bu karunaga giha howa tandaga nalu howa tigua ibuhondo bi lalu kago hale hagaore ka.
SIR 35:14 Waneigini aba ai̱ya nahe hono wahene bu karunaga bi larago erembira nami baya hangu hale haga ka. Ani bialu wali dalo ibu agalini homene bedarume bi larago hole haga ka.
SIR 35:15 Wali dalo bedagome dugu timbuni bialu wali agali ibuhondo mana lehe biyadago manani helaga ka.
SIR 35:16 Wali agali Anduane Homogonaga biabe baya hangu bia halu haga bu karunaga bi baya hangu hale halu ibugua tihondo turu holebira.
SIR 35:17 Wali agali manda nawi karunaga bi larago Anduane Homogo karia tigatiga puabo haga. Wali agali uruni ti turu nahe haabo halu Anduane Homogohanda tinaga bi larago hale haragola wahaga.
SIR 35:18 Wali agali mini lene timbuni bu karu ti ha̱lo hole ndo Anduane Homogohondo bi lalu haabo halu Anduane Homogo ibuni tiheba kaware kagola wahaga ka. Ani bialu wali agali bayale tigabi bu karume wali agali ko biaga karu bo wahai helo hongo mialu haga ka.
SIR 35:19 Anduane Homogo ibu hondo ha nabiaga ka. Ibu ti kagoha abaleore ibuwa
SIR 35:20 wali agali mende kago dara halu biamogo nabiaga karunaga hongo bo podalu wali agali ibuhondo mini mbiraore nawiaga bu karu pani nelo mialuore wahaga ka.
SIR 35:21 Anduane Homogohanda wali agali mine haga karu bo hilo wahai halu wali agali ko karunaga hongo timbuni ngago bo haealo wahai haga ka.
SIR 35:22 Ani bialu ibugua tininaga mini wu kagoria howa mo tale bialu biabe tinime bialu hayadagua yolo miadai bulebira.
SIR 35:23 Ani bialu wali agali ibunaga heneru godini howa biamogo bialu ibunaga dara holene irane nawini dara hagane mana ngagome ti mo turu timbuni holebira.
SIR 35:24 Heneneore wali agali tigua hondole turu holebirago ni hongohe dedagola beralibame ni dedago mo ge hagadagua horo ko mangabi tiha anda íbu ngangi Anduane Homogonaga dara holene panaga ibu ngagola hondole turu ho hagane.
SIR 36:1 Ngode Datagaliwabe-o í̠ dindinaga dahuliya andaganagabi Anduane Homogo kego ina kemaru de handalu ina dara halu wali agali hameigini tara tara paluyu pedaru bibahende í̠nihondo gi helo mo gi habe.
SIR 36:2 Wali agali í̠hondo mini mbiraore nawiaga karu ti í̠naga hongo ngego handa walia helo pani nelo mialu minu bai habe.
SIR 36:3 Bamba í̠ni ina heba mandagi howa biabe bialu hegola wali agali bu hearume í̠naga mini timbuni mini lene hego de handaya. Ai ayubi í̠na tiha biabe beregola í̠naga hongo tara ngego mo walia haregola ina hondoleneore hame ledema.
SIR 36:4 Ani beregola iname mini mbiraore wulene mbirali nahe Ngode Datagaliwabe í̠ hangu kegohondo ina mini mbiraore wu haga kagoni í̠ ale mende nahe lalu wali agali maru karume hondo manda bilo ani bibe.
SIR 36:5 Í̠naga hongo lone mo walia halu agalime nabiaganeale maru bibe. Ani bialu í̠naga hongo timbuni ngego lone mo walia halu ti hendelo mo pana ho ngelabe.
SIR 36:6 Í̠na keba holene ngego mo heya halu í̠na miniha tandaga holene ngego inanaga waitigi kagoha mo batagi habe. Bibahendeore bo wahai halu mbiraoreli hangubi mbira helo yupe nahabe.
SIR 36:7 Buleore lalu bi lo wiriru abaleore mitangi bibe. Ai wali agalime biabe timbuni í̠na birirunaga te dewaore lalu helo manda buwa bibe.
SIR 36:8 Waitigi homa nabi ngaru homelo irame bo heda halu tungulomi labe. Wali agali tara í̠naga wali agaliru mo ko haabo halu haga karu bo haealabaga bu wahaiore habe.
SIR 36:9 Waitigi agali haguane bu karunaga haguane karume haguane timbuni mende mbira nahe ti hangu kama lalu haga kago ai agali haguane uruninaga emboneore bo gingirulo wahai habe.
SIR 36:10 Yagoba hameigini bu karu ti hameigini mo mbiraore howa helo bibahende mo mogo bialu tininaga dindi í̠nime mini ngagoria helo mo mbiraore habe.
SIR 36:11 Anduane Homogo-o ina Isaraele í̠naga mini inanaga mini mo wialu ina í̠naga waneigini mo waheneho helalu birigo kemago ainde í̠na ina dara habe.
SIR 36:12 Í̠ninaga dindiore Yarusaleme ngago dara habe. Ani bialu dindi í̠niore biragane ngago mitangi bialu dara habe.
SIR 36:13 Í̠ninaga mini yaraga holene iba ganarume Saiono to̱latagi helalu í̠ni andaga kagoha í̠naga mini mo yaraga halu mo timbuni habe.
SIR 36:14 Í̠naga wali agali abale í̠nime wabu helene biaru baba mandagi kaware habe. Ani bialu agali í̠naga bi mana latagi halu mbiwia haga bu heneruha howa mbiwia halu bi laga birigo ayu mo walia haga bia.
SIR 36:15 Wali agali í̠ malia ho karuhondo yolo bayale mialu agali í̠naga bi latagi halu mbiwia haga henerume biwia ho winiru heneneore helo mo pana halu tagira pelalu haabo habe.
SIR 36:16 Í̠naga wali agali kemarunaga bi laramago hale halu agali í̠naga biabe bia haga Aronohanda ina mo bayale habelo ibugua í̠hondo bi layago mo karulape helabe.
SIR 36:17 Ani beregola wali agali dindi bibahendeha bu karume í̠ni hangu Ngode Datagaliwabe haluhe haabo haga kego manda biai helo ani bibe.
SIR 36:18 Wali agalime tomo tara tara dewa mialu naganego ainde tomo maru bayale dendebiore ngaru mialu naga.
SIR 36:19 Ne hegelame nogo egaru bayale dendebi ogoale lalu mo tale biagane nga. Manane ogonidagua dege wali agali mandabi kagome bi henene lara ogo ke̱ howa laragoni lalu abale mo talebu lai haga nga.
SIR 36:20 Wali agali manda bayale nawi karume genda dewa mo yu anda ibagane nga. Anigo wali agali manda bayalewi karu tigua bi ko larago baya hangu ladai bibehe ka.
SIR 36:21 Agali ibunime wali taya bulene nga. Anigo pigane wali ibu dabubule hame ledago ibuni abidabe hondole ala daba hondolene nga.
SIR 36:22 Walinaga dengui baya ho bedagome agali mo turu halu agali maru karunaga dimagoli holene mo heya hagane nga.
SIR 36:23 Wali bi hongo howa wali agali maru karu baba nalagane bereagua nde wali ogoni agalini kago ibu turubiore ka.
SIR 36:24 Agali wali ogoni dabubini kago ibu mbirale bayale duniniore mbirago mo wu haradagua bidago irane wali bedago ibu biamogo biagabi ibula mandagi hagabi bedagome ibu turubi ka.
SIR 36:25 Mabu mbira ngago pabe nabi hangayagua nde nogome mabu duga holebira. Anidagua dege agali mbira kago ibu wali nabere heagua ibu mabu pabe nabi ogonibi bame ibagabu haga ka.
SIR 36:26 Wali agalime agali mine haga karu tanoha ibagabu helo hame nalaga ka.
SIR 36:27 Ani bialu maru tini anda nahe bame paliaedede bima ibaga bialu haga karu hame naleda.
SIR 37:1 Wali agali dewalime í̠hondo ti í̠naga nenege kema lolebirago ai marume ke̱ howa lolebira.
SIR 37:2 Ainde í̠naga nenege bayale mbira kebigome í̠ wahalu piyagua nde í̠naga bu miniha genda timbuni yu holebere.
SIR 37:3 Aiore nde darabago irane aginaga mbirale uruniale tagira ibalu dindi mo ko harabe.
SIR 37:4 Ke̱ halu nenege tingi ho kago howa bayalengi í̠ heba mandagi haabo howa genda yu kengi í̠ erembira ngu holebira.
SIR 37:5 Ke̱ howa nenege ogoni ale kagome dawe halu tomo bayaleru dewa nalu birulene horo ngangi libu haru mandagi tomoru nalu biruleberebigo ai wai porengi libu haru mandagi nape ibu birado holebira.
SIR 37:6 Í̠ nenege heneneore mbira heagua nde ogoni mitangi ho haabo holebere. Í̠ mbirale dewa wu kengi ibu embedaho wanahabe.
SIR 37:7 Wali agali dewame í̠ biamogo bialu mini maru tale bu ngulebirago ai dewa uruni marume í̠ mitangi halu ndo bame dege lalu holebira. Ti tininaga mitangi howa lolebira.
SIR 37:8 Wali agali uruniale bu kagoha mamage ho habe. Tigua mini agua wu howa lenedabe hondole baya hangu daba handabe. Tigua í̠ biamogo bulenaga lenedabe bame lenedabe handabe. Tigua í̠ bope holenaga ohowa lalu holigo baya hangu handabe.
SIR 37:9 Wali agali urunibi kagome ke̱ howa í̠hondo lalu, Í̠naga biabe karulapeda, loligo handabe. Ani lalu í̠ha mo ko holene ngagoria ti bame de dege hondo holene wuligo manda bibe.
SIR 37:10 Wali agali í̠ heba biabe bua nahe kagohondo í̠ biamogo bia lolene nawigo nalabe. Wali agali í̠naga mbirale ngego dimagoli ho kagohondo í̠naga mini ngego hada walia nahabe.
SIR 37:11 Heneneore larogo wali mbira wali mendela hongo haga haga bialu bedagohondo wali mendedagonaga te í̠ langi nalabe. Ani bialu agali mbira wai napiaga dule kagohondo wai ogodagua biagane lalu í̠ lawai helo hale nahabe. Agali biyinaya biaga kagohondo í̠naga mbirale ngeru ibu yolo bilonaga ina lone ibuhondo agira mibehedabe lalu hale nahabe. Ani bialu agali í̠naga mbirale yolo bulebiragohondo muni agirame yolo bulebe lalu hale nahabe. Agali í̠na ibu ka̱i̱ labelonaga lawai haga kago bi nalamibe. Ani bialu wali agali dara nahaga howa dara holene mendeali mo walia nahaga kago baba bi nalabe. Agali mangahe kagohondo biabe biagane lawai ha lalu hale nahabe. Ani bialu wali agalime biabe abale biai holenaga abale biai nabi hendore bigi bialu kagohondo bi hale nahabe. Agali biabe biaga mangahe kagohondo biabe timbuni ngago mo muleni namibe.Agali uruni ale biaga kagonaga bi hale holeni nahabe.
SIR 37:12 Horo bibahendengi wali agali tigabi karu baba dege ibaga bu holene nga. Ani buleberego irane í̠ni manda bidegoni ti wali agali Anduane Homogonaga bi mana hale howa talialu hagane howabi tigua í̠ baba mini mbiraoreho howabi í̠ pi lolene kaware kegola tigua miniha í̠naga genda ha halu hagabi ka ndobe.
SIR 37:13 Ainde í̠ í̠ninaga mini gigabi ngego talialu bialu holene ngago irane í̠naga manda bayale bidego ibu í̠la mandagi haabo holene bayale mbira bu kego manda bialu anidagua bulene nga.
SIR 37:14 Mbirungi nde agali mini gigabi timbuni bi laga bu karu í̠na bolangua howa kego ani bu helowa mbirale mbira í̠ hangume mo tiga bulene wulebirago bulebere.
SIR 37:15 Anigo dunini timbuniore mbira ngago Anduane Homogo Daligaore kago ibugua í̠ hariga henene ngago mo walia ha lolene nga.
SIR 37:16 Biabe mbira bule ngego bame bupe nahabe. Baya hangu manda ala buwa bi lolene nga.
SIR 37:17 Wali agalinaga miniha howa irane maria tagira ibaga mbirago bayale bulene mendego ko bulene
SIR 37:18 tebonego homolenenaga manego holenenaga. Ai hege ibugua irane maria uruni haru hagane ka.
SIR 37:19 Wali agali maru mini bayaleru wu howa mendeali kago baya hangu lawai hagago ainde tininaga biabe bayale bibe nahe haga.
SIR 37:20 Wali agali maru bi bayaleru lalu holebirago garime tini homa handalu wiaga. Ani birago hondowa wali agalime tinaga bi larago hale holene manga haga.
SIR 37:21 Wali agali uruninaga mini ngago Anduane Homogohanda mini ndo wu howa tinaga bi laragoha lini bayale mbira tagira naibaga.
SIR 37:22 Wali agali maru mandabi kagome tini biamogo bialu howa bi bayale dege laga ka.
SIR 37:23 Wali agali maru ti mandabi howa tigua wali agali maru biamogo biaga. Wali agali ogoni ale kagonaga mana bayale ngagome lini bayale tagira piagane nga.
SIR 37:24 Wali agali maru kagome wali agali mini gigabiwi uruninaga mini yaraga hagane nga. Wali agali mandabi kagome ibu ngola halu howa tigua lalu, Í̠ bolangua heneore kegoni, laga ka.
SIR 37:25 Wali agali dindini lu haabo nahaga nga ndobe.
SIR 37:26 Anigo wali agali maru karume tinaga manda bayale biago mo galone ho kagome tinaga mini ereba nahe wiaho wiaabo haga.
SIR 37:27 Waneigini-o mana í̠na bialu kego baya hangu handaya ho holene nga. Ani bialu deme baya hangu hondolene nga. Mbirale mbira í̠ni mo ko holene ngago mo yulene nawi.
SIR 37:28 Wali agali bibahendenaga hame mbiraoregobi ndo nga. Anidagua ngagome mbirale tara tara ngago wali agali mbiraoreli ibu hangu karulape ndo nga.
SIR 37:29 Tomo dendebiore ngago miniha bolangua timbuni ho biruwa dewaore nagimbu bulene nawigo
SIR 37:30 irane tomo dewaore nariyagua í̠naga tiniha mo ko halu mini burugu lalu magu taguadai bulebere.
SIR 37:31 Wali agali dewaore homenego irane tomo dewaore nalu hearia homene. Anigo wali agali tomo nolene karulape ngadagua nalu heagua nde ti bayale howa lu dindini holebira.
SIR 38:1 Dogoda biabe biaga karunaga mini mo yaraga holene nga. Ani bulene ngago irane ibugua í̠ baya hanguore handaya ho hagabi Ngode Datagaliwabe ibunime dabo helenebi kagonaga ibu mini yaraga holene nga.
SIR 38:2 Anduane Homogo Daligaore kagome wali agali warago bo ngaru mo dabi helonaga manda dogoda tihondo talebu biyagola gabumane kagome ti yolo biragola biabe bialu haga ka.
SIR 38:3 Dogoda ibu ibunaga manda ngadagua ibunaga henge mo wu kagola agali haguane karume ibu bayale baba bialu haga ka.
SIR 38:4 Datagliwabehanda marasini tara dindini wini ngarume wabini ngagome wali agali tigua marasini mo nagalone habe naheore.
SIR 38:5 Bambaore howa ira mbirame iba ko kaubi bereago nolene bayale helene. Ani mo dende bia hayagola wali agali bu hearume ira ogoninaga hongo tara winiyane hendene.
SIR 38:6 Wali agalime Anduane Homogo ibuninaga mini mo yaraga halu mini leneore kagoni lelonaga ibugua ti manda bulene mo mini.
SIR 38:7 Ibugua wali agali warago bo ngaru mo dabi halu tinaga tinginiha tandaga ngaru mo wahai haga ka. Ainde dogoda bu karu tigua ira yuni tara tara bu karu yuwa marasini tara tara ngaru wabiaga nga.
SIR 38:8 Ani bialu kagome Ngode Datagaliwabenaga biabe bu hawia nahe bialu haabo kagoni howa wali agalinaga holene bayale ngelo mo tiga biaga nga.
SIR 38:9 Waneigini-o warago bayagua ogoni bame bira lowa mo nagalene holeni nahabe. Ani nabi howa í̠ biamogo bialu mo dabi habe lalu Anduane Homogohondo bi lolene nga.
SIR 38:10 Mana ko bulene ngaru handalu hogorale bialu puwa mana bayale ngago talialu bialu howa mana ko í̠naga miniha hengedego dugu wahai halu buwa holene nga.
SIR 38:11 Loma bu merego nde balawa bayaleni olibe lini ibaneme wabini weli bayale ngaru odoba howa loma ngabioreru bu mulene nga.
SIR 38:12 Ani biai halu mani howa dogoda Ngode Datagaliwabe ibunime dabo helene kagohondo í̠ biamogo bia lalu lamulene nga. Dogoda kago ibu í̠ biamogo bulene ngago manda bialu ibu í̠ wahalu pelo yupe nahabe.
SIR 38:13 Heneneore marungi warago timbuni ngago biamogo bulene dogodameore biamogo bialu mo dabi holebira.
SIR 38:14 Anidagua biaga ngago irane dogoda tiguabi warago bo ngagonaga tandaga nalu ngago mo wahalu warago mo dabi holene hariga maru mo walia ha lalu tigua Anduane Homogohondo bi laga ka.
SIR 38:15 Wali agalime Ngode Datagaliwabenaga deni howa mana ko biyagua nde tiha warago anda ibiragola ti dogoda hondolene nga.
SIR 38:16 Waneigini-o wali agali mbirago homaragola í̠na ibuhondo dara halu dugu bialu howa dara ho kego mo walia halu kiabu dugu bulene ngadagua bulene nga. Homa tingini ngagonaga mini mo yaraga hole baya hangu mo manda manda bu ngelowa hora holene nga handala wahalu napobe.
SIR 38:17 Mbirali homo ngagola tínaga biagane mana ngadagua bialu dara howa dugu bilimu. Hora howa nde wali agali maru bu karume í̠ mege buligo duganda hagadagua hora howa halu mani nde latara halu haga haga bulene nga.
SIR 38:18 Dara holene ngagome wali agalinaga hongo bope haga ngago dara haho wiaabo holene nawigo tigi mbira hangu dara ho holene nga.
SIR 38:19 Heneneore mbirali homarago hora halu purogo lowabi dara ho haabo hagago ainde ani dara ho haabo keria í̠naga holene ngagoha yagi mo ko holigo manda bibe.
SIR 38:20 Luore dugu bialu haabo holene nakarulape nga. Í̠naga biabe bialu haga wirigo í̠ni abale ibabelo maliaho ngago manda bibe.
SIR 38:21 Mbirali homarago lone mo heya halu haru dai bulene nawiorego baya hangu manda bibe. Í̠niha dara holene ngagome í̠ni dege mo ko holene nga ndobe.
SIR 38:22 Hale harene. Í̠nibi nde homole dege kegoni ndobe. Abe mbirago ibu homayago ayu henge í̠naga ngelo kegoni ndobe.
SIR 38:23 Mbirali homarago hora halu howa í̠naga miniha genda hui hame ngego damene bibahende hora hamaga habe. Ibunaga dinini pedaha í̠na ibuhondo lone mitangi halu holene nawigo mitangi nahabe.
SIR 38:24 Wali agalime mbirale mbira baya hangu manda bule hame lo heagua nde ti lo manda bialu birulene henge ngelolene bayale. Wali agali tinaga biyinayaha mini piai hene kagome mbirale mbira lo manda bibe nahe ka.
SIR 38:25 Agali dindi aliaga kago ibubi mbirale lo manda bibe nahe nga. Ibunaga bulumaga karume dindi tombelo bo daila halu howa ibunaga mini biabe ogoniha piai helowa ibugua bi mende tara ngagonaga bi lolene henge nawiore kagome mbirale uruniale lo manda bibe naheore ka.
SIR 38:26 Ibunaga mini mabu biabe bulene ngagoha piai helalu ibunaga nogo bulumaga hungubalua kagonaga tomo nelo mule taya bulenego dege mitangi bu haga ka.
SIR 38:27 Uruni ti agali irame wabiaga karubi bebani wabiaga karubi ogonidagua dege biaga ka. Tigua mbiraga horombebi biabe dege bialu haabo haga ka. Tigua irame wabialu howa ogoriani yari tara tara bia holenenaga aguaore berogola karulapedabe hondole ogoni hangu mitangi tangi bialu haga ka. Ani bialu biabe ogoni dege bialu haabo howa bu maro bialu wahaga ka.
SIR 38:28 Agalime aeanebi mbirale gahange ngaru wabiaga bu karu tiguabi anidagua dege biaga ka. Ira hongohe dedagome tini dalu do poboyogo bia hagane nga. Aeane hamame baragola hale poboyogo birago bilowa tinaga mini biabeha hangu piai helowa aeane hongohe ngaruni hamame bo dambigi bialu mbirale wabialu haga ka. Ani bialu ibunaga mini mbirale wabialu wabu maro buleneru hangu mitangi buwa wabiai halu wahaga.
SIR 38:29 Agali be dindime wabiaga kagomebi anidagua dege biaga ka. Ibugua biruwa ibunaga geme garo geale dindiha ngago mo beregedaga nga. Ibunaga miniha biabe baya hangu bulenego hangu mitangi bialu daga ogodagua wabibe lalu lamiyadago abale wabiai holene mitangi biagane nga.
SIR 38:30 ibugua dindi dongoma ngago dugu ngelowa geme hengedo waru wia hagane. Ani biai howa gime be wabiaga. Ani wabiai howa mo yaribia holenego mitangi bialu howa biabe bu maro bialu ibunaga biabe uruni bialu haga anda kago baya hangu mo tiga biai howa mburuma bu wahai halu u palue piagane ka.
SIR 38:31 Wali agali tinaga gime biabe bialu haga karu tinaga biabe bulene ngago baya hangu manda biaihe ka.
SIR 38:32 Agali biabe biaga uruni ale mbira naheyagua nde tano bu ngaru timbu habe naheore. Ani bialu wali agali tanoha nakale dege.
SIR 38:33 Anigo agali biabe biaga uruniale karu ti ganisolo karu aria mbirago holenebi ti gabumaninaga agali haguane holene ngarubi nahaga. Ti godi hale halu mo tale biaga karu ale holenebi
SIR 38:34 tigua mana lo wini ngago baya hangu manda nabibi ka. Tigua lawai helo napene howa tinaga manda bayale nawi ka. Ani bialu tigua bi bayale wále mbira nalolebira. Anigo agali uruniale kago ti dindi ogoninaga hongo holene pini howa tigua Anduane Homogohanda tinaga biabe bialu karu mo hongo helo bi laragola ibugua tinaga bi larago hale haga ka.
SIR 39:1 Wali agali biabe erekuibi hongo howaore bialu Anduane Homogo Daligaore kagonaga bi mana lo wini ngago baya hangu lo manda bialu kago ti wali agali maru karu ale ndo mendeale ka. Tigua manda bayale mamaliru tigua wu henedaru hondowa manda bialu mbiwia halu bi lo winidaru baya hangu ogoaleore leneda lalu handalu holebira.
SIR 39:2 Tigua agali haguaneme bi latagi hayaru manda bu halu bi yobage lalu layarunaga galone manda biai halu biaga ka.
SIR 39:3 Bi mbiwia halu layarunaga galone baya hangu taya buwa hondo manda biai halu bi yobage lalu layarunaga irane baya hangu manda biai holebira.
SIR 39:4 Tigua agali haguane karu baba biabe mandagi bialu howa ai wali agali tigua handalu karia ti kini heba mandagi bedaria hondolebira. Tigua dindi tara tara ngaruha ibaga biai halu wali agali mo ko hagane agilemedabe handalu wali agali biamogo biagane agilemedabe hondo manda bulenaga handama ibaga biai holebira.
SIR 39:5 Tigua egerebagiore abale heyalu Anduane Homogo tinaga Abaore kagohondo bi ala lolebira. Tigua Anduane Homogohondo bi lalu tinaga ko ngaru mo wahai habe lalu bi lolebira.
SIR 39:6 Ani laragola Anduane Homogohanda tinaga bi larago hale hayagua manda bayale bulenenaga dinini kago tiha ho to̱laragola wali agali uruni tigua mini gigabi wulene bayale ngaru tigua latagi halu holebira. Ani bialu tigua Anduane Homogohondo bi laragome Anduane Homogo ka̱i̱ lolebira.
SIR 39:7 Ani bialu tigua wali agali bu karu tinaga mini gigabi ngagomebi manda bayale bidagomebi ti bayale helo mo tiga buwa haru bamba halu Anduane Homogonaga bi do ho wini ngaru bigi bege lalu handa walia hagane ka.
SIR 39:8 Tigua manda bayale tíni lo manda bu yayago mo walia halubi tigua Anduane Homogonaga bi mana lo wini ngagobi habo nalolene bi lo wini ngagohondobi ti turu ho hagane ka.
SIR 39:9 Wali agali maru bu karume tinaga manda bayale ogobi wini lowa te lalu howa ti embeda nahe manda biaabo holebira. Ani bialu wali agali abogo hene lalu tinaga mini ereba nahe wiaabo holebira.
SIR 39:10 Wali agali dewaoreme tinaga manda binigonaga te dewa lolebira. Ani bialu wali agali dewa ngoaiho bedagoria ti mo turu halu bi ngaru lolebira.
SIR 39:11 Ainde wali agali uruni ale karu ti dindini lu hayagua nde tinaga mini timbuni halu tigua wali agali maru abale henedaru bolangua hene holebira. Ani howa ti homayagua nde tinaga mini timbuni mini lene howa homarago karulape dege holebira.
SIR 39:12 Mbirale bulene ngago i̱na manda biai ko. Heneneore larogo ege bayaleore do mbara laraligobi mini bayale wulene tara tara i̱ha wu to̱latagi ko.
SIR 39:13 I̱naga waneigini bayaleru-o baya hangu hale hadaba. Iba angeni yari biagane bayaleoreru dedaligobi tíore bayale andaho hai halimu.
SIR 39:14 Tíha nga baya taraore bulene gabitugu ale howa mabuha yari bulene bayale hangaradagua bilimu. Tínaga nga baya taraore buleneme dindiha piai halu to̱lai helalimu. Tínaga biabe bialu kemigo bibahende bialu howa turu holene iba ganaru lalu Anduane Homogonaga mini mo yaraga halu halimu.
SIR 39:15 Tígua ibunaga mini timbuniore mini lene helalu ibuhondo turu halu hongo howa huaro lalu halimu. Ngita tara tara ngaru bowa iba ganaru lalu ibuhondo ka̱i̱ ogodagua lalimu.
SIR 39:16 Anduane Homogohanda mbirale bibahende karubi ngarubi wabiai henego bibahende bayale nga. Ani bialu mbirale mbira ibilo ibu hame lo kago ogoangi ibilo lalu horo ibunime pongo winidangi tagira ibulebira. Ogoni agiledabe lalu wali agalime hale holene nawiore. Mani howa mbirale bibahende panaga handai hene ibu wiai holebira. Ani ibu ngagola bi hale ho wirigonaga ladai biradagua ogoni hondolebere.
SIR 39:17 Bamba Anduane Homogohanda bi layagola iba ema bialu nape wini. Ibugua bi layagola ibame gana nene haradagua mende mendehala haga haga bu hene.
SIR 39:18 Mbirale mbira Anduane Homogo ibu hame layagua ogoni íbu wia dege bulebira. Wali agali bayale helonaga mo bayale holebira. Mo waholene mbirali naheore.
SIR 39:19 Wali agali tigua biagane ngaru Anduane Homogo ibu hondowa kagola ibunaga deni wia do holene ale mbira nawiore.
SIR 39:20 Heneneore bibahendengi Anduane Homogo ibu bibahendeore manda biaihe haabo howa ibu manda nabini gahange mbira nawiore.
SIR 39:21 Wali agali tigua lalu, Mbirale ogo agiledabe nalolebirago irane Anduane Homogohanda wabu wini ngago damene bibahende tinaga biabe wiai ka.
SIR 39:22 Anduane Homogonaga mo turu halu mo gumbila holene timbuniore iba li timbuni dindi ko iba dalu naibaga ngagoha peagagobi nga ndobe.
SIR 39:23 Anigo bamba iba bayale nagane bereago mo kaubia henedagua ibunaga miniha tandaga holene timbuniore wali agali ibuni manda nabiaga bu karu ti kagoha odope holebira.
SIR 39:24 Wali agali tigabi bayale bu kagoha Anduane Homogo ibunaga hariga bayale dege wiai ho ka. Anigo wali agali mana ko biaga karu ti polene hariga ngagoha gundu uli dewaore nga.
SIR 39:25 Bibahendengi Anduane Homogohanda wali agali bayale tigabi karu tihondo mbirale bayale ngaru mialu haabo halu wali agali mana ko biaga bu karu tihondo mbirale ko ngago mo miaga ka.
SIR 39:26 Wali agali ti wu holene ngago ibabi ira delolenebi aeanebi ibibi nogo andubi mone tara mbiranaga ibane gerebi ibane waini ibabi olibe lini ibame wabini welibi tomo nolenebi aga karu lo holenebi bibahende wiai howa holene nga.
SIR 39:27 Mbirale urunime wali agali tigabi bu karu biamogo biaga nga. Anigo wali agali mana ko biaga bu karu tinaga mbirale urunialego ko galone nabiagane ale mbira buhinaga.
SIR 39:28 Anduane Homogohanda marungi puyabu hongohe ibilaga bialu ibunaga tandaga holene ngelo kago wali agalihondo mo walia halu ibilaga bini. Ainde mbirale bibahende homaiore kagola puyabume ibunaga hongo bibahende odope haragola Anduane Homogonaga miniha keba holene ngago ereba haiore holebira.
SIR 39:29 Dindi mo ko halu bo haealabagabu wahai holene maru wia dege bidago mbira ira dene mende dalu dindiguni heba ibalu tebone hina gari mane homa lagabiyaru ngagoni ndobe.
SIR 39:30 Ani bialu nogo gabua tara tara biango duduru laiono gabu karubi uruninaga ne gadele bu karubi puya ngarunaga ne kagobi tandagabi hayaga ko biru karubi wali agali mana ko biagaru dibaga ayu tibu nene gadele ngagobi
SIR 39:31 uruni ti bibahendeme Anduane Homogohanda bia lalu lamirago hale halu bule turu timbuni holebira. Ani bialu biabe bia larago bule abale manda manda bu holebira. Ai tigua biabe bialu howa Anduane Homogohanda bi larago mo wanahaga ka.
SIR 39:32 Heneneore ina mbirale uruni bibahende bamba howa i̱naga miniha mitangi dewa bu henego ai mbugani gilibu wero.
SIR 39:33 Anduane Homogonaga biabe bulene ngago bibahende bayale dege wialu mbirale ibugua ina ngiaga ngaru ibunime ngulene horo manda bu henedangiore ngiaga ka.
SIR 39:34 Í̠na mbirale bibahendeore ngaruni mbirago ko lolene nawigo ko nalabe. Horo mbira Anduane Homogohanda manda bu winigo tagira ibirangi bibahende bayale dege holebira.
SIR 39:35 Ai ayu tígua turu holenenaga iba ganaru lalu Anduane Homogonaga mini yaraga hadaba, lene.
SIR 40:1 Wali agali bibahendeme biabe ndelahe ngaru bialu kemigola Adama hamewaneigini bibahendenaga genda tini karulapeore ngago bulene nga. Genda ndelahe uruni ai̱yahanda taba hanayangi howa ngola halu winigo ainde wiaho wiaabo halu ti ai̱yaore dindi ngago ai tini homalu lone dindiha dai birangi waholebira.
SIR 40:2 Wali agalinaga miniha mo luluya kagola ti mini burugu timbuni lalu ti homolenego giho ka.
SIR 40:3 Mbirago ibu kini howa kininaga dagia ngagoria biragane heaguabi bame wali agali damene dege howa dindini biaga heaguabi
SIR 40:4 wali agali aga baya tara ngaru mo karulo howa kininaga yari ngaru mo karulo heaguabi maru labolabo ko ngaru mo bobu heaguabi bibahendeore genda yaiho haga tene keba holenebi dimagoli holenemebi mo ko holene anda biragolabi genda ibiragolabi miniha tandaga holene abale tungulope haragomebi hongo haga haga bialu irigi irigi bulene ngagomebi homolene gi haga ngagomebi bibahende urunime miniha genda holene mo anda ibi lai hagane nga.
SIR 40:5 Wali agali dagiaha padaria miniha genda uruni ale anda ibiragome tinaga mini ibu ha̱lo helowa u padago mo yangayanga bia haga nga.
SIR 40:6 Ti ha̱lo howa u emeneore palua karia ainde palibe nahaga nga. Ti u pada tiraga tinaga de ibu de ngilaho wiaga nga. Tininaga emagoha ti mo luluya harago nahende agali mende kagome ibu bo wahole dege kabe tobaho haga nga.
SIR 40:7 Anigo ti karulape harimada lo manda biragola ti u palenedago heyuwa handalu karia gi harigo bame dege gi henedalo handa walia haga ka.
SIR 40:8 Bibahendeale ema bialu piagane damenego homa dege bulene nga ndobe. Tigua ngola holebirago wai bulenebi ayu tibu nene gadele wai biaga ngagobi horo ko ngarubi hina garimebi genda timbuni ngarumebi warago ko ngarumebi ngola hai holebira. Ema bialu piaga biru ngarubi wali agali bu karubi ti bibahendeore mo ko holene uruni ngola hai holebirago ainde wali agali ko biaga karu ti dege kahalu degedege ngola haga bulebira.
SIR 40:10 Heneneore mbirale ko uruni damenego Anduane Homogo ibunime wali agali mana ko biaga bu karu tandaga nelo mialu pani nelo mule winigo nga. Mana konaga lini koore iba li timbuni mbira bamba ibini nga.
SIR 40:11 Mbirale bibahendeore dindi ogoria andaho hene karu bibahende lone dindiha dai biai holebira. Ani bialu mbirale bibahende ibaha howa ibini ngaru lone ibaha dai biai holebira.
SIR 40:12 Mbiralime wali agali muni ngilonaga bime lo adogoda biaga mana ngago bibahende ereba hai halu wali agali mende kagohondo mana tiga nabi biaga ngago ereba hai holebira. Anigo mini mbiraore wulene ngago ibu wiaabobo holebira.
SIR 40:13 Muni page mini ngaru lu yu haabo nahe abaleore aube tobane bialu gaea bialu ni hongohe darangi iba emene bedago abale hundialu ereba hagadagua bialubi iba dalu ibirangi hari daba abale bialu ereba hagadagua bialu ereba haga.
SIR 40:14 Wali agalime maru dara halu biamogo biaga karu ti turu holene timbuni handa walia holebirago ainde wali agali bi mana lo wini ngago pugualu haga karu ti dege pu ereba hai holebira.
SIR 40:15 Wali agali ko biaga waneigini bu karu tiha lini bayale galone mbira tagira napolebirago irane ira dindi ko ege kelekele ngagoha kaligobi ka.
SIR 40:16 Wali agali uruni iba angeni iba gagua ngaligobi kago iba hundiragola datani maru karu mani gaulalu homelo iba gaguame ibu abale gaulalu homaga ka.
SIR 40:17 Anigo mana bayale wali agali biamogo bulene ngago mabu bayaleha tomo tara tara anda hai holene ngaligobi howa wali agali yagibano bu karu dara halu biamogo bialu haabo holebira.
SIR 40:18 Wali agalime biabe bialu tininaga biyinaya biabe bialu haga karu ti turubi ka. Anigo mbira ibu muni ngolaru dindiha hora karia handa walia howa duguarago ibu turubiore bolangua heneore ka.
SIR 40:19 Agali mbira ibu waneigini honowi howa ibugua tano timbuni mbira mo heya hayagua nde ibu agali timbuni mini lene holebira. Anigo agali mbira ibu wali bayale mbira dabubu hayagua nde ogoni ibugua agali kira ogoni labo bolangua hene ka.
SIR 40:20 Waini ibala ngita baya baragolame agali mo turu haga nga. Anigo manda bayale bulene ngagome ogoni labo bolangua halu daligaore nga.
SIR 40:21 Be tabage baragola ngita baragolanaga bi biamaga haragola baya tara mbira laruane hale haga nga. Anigo wali agalinaga iba gana baya laragome kira ogoni bolangua hene nga.
SIR 40:22 Wali agalinaga deme mbirale bayalebi monehebi ngago hondole turu haga nga. Anigo yari biagane gahange baya dedagome kira ogonilabo bolanguahe deda.
SIR 40:23 Mende kagola nenege ho holenebi mandagi ibagabu holenebi bayale mbira nga. Anigo wali agali dabubuwa onene aglinila mandagi birulenego bayaore bolangua hene nga.
SIR 40:24 Í̠ha genda ngangi í̠ hamenebi í̠ damene kagobi í̠ni heba mandagi holene bayaleore. Anigo í̠nime wali agali maru karu dara halu biamogo biaga keyagua nde bayaleore ogoni biri.
SIR 40:25 Ngolo silibarume wali agali bayale helonaga biamogo biaga nga. Anigo mini giga bulene í̠naga nenege ibugua ngiragome kira ogoni labo kirabali bolangua hene nga.
SIR 40:26 Muni dewa ngagomebi tingini hongohe kagomebi wali agali ti bayale dunini mbira kemabe toba ho haga kago ndo.Wali agali Anduane Homogo gi halu ibunaga mini yaraga halu haga kago ibu dunini bolangua hene bayale ka. Heneneore mbirali Anduane Homogonaga bi hale halu haga kago ibu mbirale mbira burupalia nabiaga ka.
SIR 40:27 Mbirali ibunaga mana Anduane Homogo andaneha haabo haga kago ibu mabuha tomo hengedago damene bayale anda howa lini bayale dai hagagobi howa mbirali mana ogoni talialu haga kago ibu mini lene timbuni mbira holebira.
SIR 40:28 Waneigini-o wali agalime mendeali kagoha mbirale mbira ngilonaga ngi ngi lalu hagadagua lolene nawigo nalalimu. Anidagua lolene manda biriyagua nde wahalu ayu ogoni humbirini andagaha hama polene nga.
SIR 40:29 Wali agalime tomo bayaleru mendenaga dabuni ngaru dimagoli ho hagago ibu nde ibuninaga holene naheoreme biradagua biaga. Tigua tomo wali agali mende kagome mirago dege nalu haabo hayagua nde ti tagabiore ka. Anigo wali agali ti biwai baya hangu hene manda bayale bu heagua nde tigua mana ogonidagua nabulebira.
SIR 40:30 Wali agali taga nahaga bu karu tinaga ne harigoha ngi ngi lalu haga karu ngi lolene dendeore howa ngi laga ka. Anigo mana ogoni tinaga bu habeneha mo kaubia hagane nga.
SIR 41:1 Homa-o wali agalime tinaga muni mbirale ngaru mo dunubia ho kangi í̠nime ti mo gi haga ke. Ani bialu tinaga biyinayaru bayale anda hai haragola tinaga miniha genda holene mbira nawi hadapaya bu howa tinaga tomo bayale ngaru gubalini ho bedagola í̠na tinaga miniha mo luluya hagaya.
SIR 41:2 Homa-o wali agali yagibano karu ti mbirale mbira nawiore howa ti hongo naheore kangi í̠na ti mo turu hagaya. Ani bialu ti waheore biruwa ti mbirale ngaru bibahendenaga miniha genda yu kangi í̠na tinaga miniha mo palia hagaya. Tigua manga halu irane nawini bameore keba halu bedagola í̠na ti baya hangu ha̱lo holene miaga ke.
SIR 41:3 Heneneore homome horo mbiru í̠ olaruagola í̠ gi holene nawigo gi nahabe. Baya hangu mitangi bibe. Wali agali ala henedaru ti halu homenego mani holebirarubi halu homolebira.
SIR 41:4 Anduane Homogo ibunime mana ogoni wialu mbirale ema bialu piaga damenego bibahende homelo lenego í̠na Anduane Homogo Daligaore kagonaga bi ogoni mo bagi naholebere. Í̠ homa nabi mali pira mbira ha dege biriyaguabi mali handari mbira (100) homa nabi hariyaguabi mali daosini mbira (1,000) hariyaguabi urunidagua halu humbirini andagaha homeneru dalu ngagoha poregola mbiralime í̠ hale halu dabo hondolene nawi.
SIR 41:5 Wali agali mana ko biaga karu waneigini bu karume mine tara halu wali agali mana ko biaga bu kagoha pialu haabo hagane ka.
SIR 41:6 Mbirale bayale ti aba ai̱yaha howa mo yu hayago yu wahalu tinaga mini ko halu tinaga waneiginiha ha helolebira.
SIR 41:7 Ani ha henego howa ti aba ko henedago ibugua binime tinaga mini mo ko hayada lowa bi ti abahondo wiaabo helolebira.
SIR 41:8 Wali agali ko biaga kemiru tígua Anduane Homogo Daligaore kagohondo mana ko bialu ibuni erembira mirimigo manda bialu de hondo holene nga.
SIR 41:9 Tí ai̱yahanda taba hanayangi howa tínaga mini ko ko biaga lene tíha ha henego kemi. Ai tí homaramingi mini ko ogoni tíha haabo holebira.
SIR 41:10 Bibahende dindi ogoria anda ho henego bibahende dindiha lone dai biai holebira. Anidagua dege bialu wali agali tinaga mini mo ko hene karu bibahende mo ko hai hene wulebira.
SIR 41:11 Wali agali mbirago ibu hamarangi wali agali maru bu karume dara howa dugu bialu haga. Anigo mbirali homarago ibu mana ko biaga heneyagua nde wali agali karume tinaga mini abale embeda holebira.
SIR 41:12 Í̠naga mini bayale ngelo baya hangu handaya ho habe. Mani í̠ homaregola muni mbirale ngego ibu abale ereba holebirago ainde í̠naga mini ibu bayale wiaabo holebira.
SIR 41:13 Í̠ wali agali bayale heneyaguabi dindi ogoria holene biba holebirago ai í̠naga mini bayale wiaabo holebira.
SIR 41:14 Waneiginiru-o tígua mbirale i̱na lawai harogo baya hangu hale halu taluwa bialu harimiyagua nde tínaga miniha mo palia holene karulo holebira. Mini giga bulene bayale ngago wali agalime latagi nahe miniha yadoho heagua nde mbogoyi muni wiado hene wiagagobi nga. Ani ngagome wali agali biamogo bulene henge nawi bame nagalone dege nga.
SIR 41:15 Ainde wali agalime mini bayale ndo lulu mini wu karu yado ho heagua bayaleore ogoni. Anigo mana bayale bulene ngago yadoho hayagua bayale ndo bira.
SIR 41:16 Ani ngago manda bialu i̱na tí langerogo baya hangu hale halimu. Ainde marungi í̠ taga ho halu marungi í̠ taga nahe holebere. Wali agali maru karu tiha mini i̱na ngobobi nawi ka.
SIR 41:17 Tígua mana ko dodohe ngago bialu harimiyagua nde tí aba ai̱yalanaga deni taga holene nga. Ani bialu tígua bi ke̱ howa larimiyagua nde kinihondobi agali haguane kagohondobi taga ho holene nga.
SIR 41:18 Tígua mana pugualu harimiyagua nde agali godi hale haga kagohondo taga ho holene nga. Ani bialu tígua mana ko bialu harimiyaga nde wali agali ngoai ho kagoria tí taga ho holene nga.
SIR 41:19 Tínaga nenege kagohondobi tí damene karuhondobi ke̱ howa bi lariyagua nde uruninaga deni howa í̠ tagaho holene nga. Ani bialu wali agali tí baba dindi mandagi haga karunaga mbirale ngago mbira mo page biriyagua nde tinihondo taga ho holene nga.
SIR 41:20 Tígua habo nalolene bi bayale Ngode Datagaliwabenaga lo wini ngago pugulene tagaho halu tígua wali agali yagibano bu karunaga tomo mulino hapai haga hariyagua nde taga holene nga.
SIR 41:21 Tígua mbirale mbira tí mo turu halu bame ngiragola yamialu howabi tígua mendeali kago mo turu halu bame mialu howabi tínaga dengui arema holene nawi. Ani bialu wali agali mbira kagome í̠hondo mo bi la haragola í̠na ladai nabi hariyaguabi nde í̠ taga holene nga.
SIR 41:22 Wali bayanda bedago deme hongohe handaya hariyagua í̠ taga holene nga. Ani bialu í̠ dameneme í̠hondo mbirale mbira í̠hondo hale haragola í̠na bi ko ladai biriyagua nde í̠ taga holene nga.
SIR 41:23 Mbiralinaga mbirale bame mo turu halu wia harago aria mo page biriyaguabi wali agali tinaga mbirale ngago maru mo page biriyaguabi nde í̠ni taga ho holene nga. Mendeagali ibu one bedago deme hondowa dimagoli hariyagua nde í̠ taga ho holene nga.
SIR 41:24 Wali agali mende kagonaga biabe bia haga wali bedago baba mine hama ibaga bu hariyagua í̠ taga ho holene nga. Tamu hobane ti paliaga ngagoha polene nawiore.
SIR 41:25 Tínaga nenege kagohondo bi ko lariyagua nde tíni taga holene nga. Mbirali kagohondo mbirale mbira ibu turu helo bame mialu howa ibu mege biriyagua nde í̠ni taga holene nga.
SIR 41:26 Mbirale hale haregonaga bi la yogo lariyaguabi bi lado hene ngago latagi hariyaguabi nde tíni taga ho holene nga.
SIR 41:27 Heneneore tígua mbirale tagabi uruni dameneru ngago nabi haabo harimiyagua nde wali agalime tínaga mini bayale mini lene ka lolebira.
SIR 42:1 Ayu mbirale í̠ taga naholenebi wali agali mende kagome í̠naga mini ngego tigua mo tiga bialu helo yupe naholenebi ngago langiro.
SIR 42:2 Anduane Homogo Daligaore kagonaga bi mana lo wini ngagobi ibunaga habo nalolene bi lo wini ngagobi manga nahabe. Ani bialu mana í̠ damenerume bialu kago mo tale bulenebi wali agali dindi taraha howa íbu hene karume bialu kagobi baya hangu mo tale bulene ngagobi degedege mo tale bialu habe.
SIR 42:3 Í̠naga dano í̠ damene baba henego mo tiga bulene taga nahabe. Ani bialu í̠ abanaga paluni ngago í̠ damene bu karu tale bu mulene ngago taga nahe howa tale bulene nga.
SIR 42:4 Mbirale genda handagane bayale tigabi ngago yu howa genda baya hangu handalu emene timbuni yaguabi ta nabi yolo bia muni taguia bule taga nahe bibe.
SIR 42:5 Ai í̠naga biyinaya biabe bialu howa muni bolangua hene tigatiga mulene ngadagua mule gi nahabe. Ani bialu í̠ waneigini tibume minu bolenebi wali agali garabaya biabe ale bialu hagame mine haragola tibume minu bolenebi taga holene nawiore.
SIR 42:6 Í̠naga muni ngego í̠ one bedagome hondo page biagayagua nde í̠naga muni ngego mo do holene taga holene nawi. Wali agali í̠ anda kegoha uba andatagi bu hagayagua nde í̠naga mbirale ngeru baya hangu gedene howa mo do habe.
SIR 42:7 Í̠na mbirale wali agalihondo miridago agira minidabe hondole daga lo hondolenebi í̠ mo yu anda ibini ogodaguada lalu tagira penego ogodaguada lalu mbugani gili bulene ngago taga holene nawi.
SIR 42:8 Ani bialu wali agali manda dewa nawi lulu karu baya hangu lawai holenebi wali agali waheore bedaru ti mini nawi waneiginime bialu hagagobi bialu karu mo tiga bulenebi taga nahe howa biai habe. Heneneore larogo í̠na mana baya hangu talialu biriyagua nde wali agalime í̠ bayale biaga ka lolebira.
SIR 42:9 Wandari bedagome ibu aba mo genda haruda lo minime baya hangu manda nabulebira. Mbiraga ibu abahanda ibu wane bedagonaga genda ya halu ibu u baya hangu napale de ngalaho wiaabo haga kago ibu manda nabi beda. Wandari ibu emene dege bedangi ibu waneore bayale bialu agali polobadabe be agua bulubada. Ibu baya hangu biralu agali piyagua nde ibu agalinime baya hangu handaya ho holobadabe nde naholobada, lalu mitangi tangi bialu biraabo haga.
SIR 42:10 Wandari ibu agali nape wene bedangi ibu wane bedago agali maru karume mo ko holino miniha genda ho hagane ka. Ai ibu agali nape tini andagaha biruwa waneigini aba ai̱yalame miniha genda yu haga ka. Ani bialu ibu agali pu bedagola waneigini naholigo lowa aba ibu giho haga.
SIR 42:11 Í̠ wane bedagome mine hayagua nde andagaha bo payanda ngelabe. Ibugua mine hama ibaga bialu kagome í̠ waitigi bu karume í̠hondo oba halu wali agali tanoha karubi í̠ daluha haga bu karubi tigua ngoai ho biragane ngagoria biruwa tigua í̠ bime lo ginibia halu mo yobia haragola wali agali dewa bu karunaga deni taga timbuni holene wuligo ainde í̠ wane baya hangu handaya ho habe.
SIR 42:12 Ibu wandari baya ibunaga dengui bayale bedago hondowa agali bu karume dimagoli holigo ibu bame ibaga bu helo yupe nahabe. Ani bialu wali maru agali one bedaru baba bi nagalone ngaru ta nabi loligo andaga berelo baya hangu handaya ho holene nga.
SIR 42:13 Ani larogoni irane hurume aga bayale ngago no budagabu wahagadagua walime wali mende bedago mo ko haga beda.
SIR 42:14 Agalime mine haga ngago ko nga. Anigo walime de dimagoli hayagua ko timbuniore nga ndobe. Ibugua ogonidagua biragome í̠ mo taga halu í̠naga mini bayale kego mo ko hagane nga ndobe
SIR 42:15 Ayu i̱na Anduane Homogohanda bini ngaru mitangi bu dai bialu i̱na de handarugo damene latagi holebero. Anduane Homogo ibunime bi lalu mbirale ibu ha layago hai hene.
SIR 42:16 Ni ibugua wá bibahendeha hame haga ka. Anidagua bialu ai Anduane Homogohanda mbirale bibahende karuhabi ngaruhabi ibuninaga hongobi ibunaga holenebi ho to̱latagi heleda.
SIR 42:17 Anduane Homogohanda ibunaga hongo timbuni dahuliyali bu karuhondo mia mini heaguabi tigua Anduane Homogonaga biabe timbuni bini ngaru latagi hai naholebira. Ani bidago irane Anduane Homogo Daligaore kagome mbirale bibahende uruni wabia halu bibahende dindiha ngarumebi dahuliya andagaha karumebi bayaleore wuwa ibuninaga mini dege yaraga helo wabini nga.
SIR 42:18 Ibugua iba solowara timbuni bedago andaneha ngaru baya hangu manda biai halu wali agalinaga bu miniha wiado karu baya hangu manda biai ka. Ibunaga deni mini wiado hene mbira nawiore. Anduane Homogo Daligaore kago ibugua bibahendeore manda biai ho howa ibugua mbirale horo tara tara tagira ibirangi biaga ngaru manda biahe kagome bibahendeore ibu hondo manda biai ka.
SIR 42:19 Anduane Homogohanda mbirale ala bambaore bini ngaru manda biai howa latagi halu mani bule ngarubi manda biai ho howa bibahende mo do ho ngaru mo panaho ngelai holebira.
SIR 42:20 Ibugua wali agalinaga mini ngaru manda biai ho kagome bi mbira ibu deni mo do hene nawulebira.
SIR 42:21 Biabe ibugua bini ngaru bayaleore wialu urunime ibunaga manda timbuni ngago mo walia ho nga. Ibuni dege haluhe haabo haga ka. Anduane Homogo ibu bolangua hene timbuniore kagola ibugua mbirale mbira mo yulenebi yupe holenebi mbirale mbira nawiore. Mbiralime ibu mbirale mbira lawai holene nakarulapeore ka.
SIR 42:22 Anduane Homogohanda bini ngaru bibahendeore bayale taraorebi monehebi manane ira hungu ale nga.
SIR 42:23 Mbirale uruni tigua tinaga biabe ngago bialu haga haga bialu haabo howa tigua Anduane Homogonaga mini ngago talialu haga nga.
SIR 42:24 Mbirale bibahende kira kira mandagi ibaga bu helonaga wabini.
SIR 42:25 Ani binigo ainde mbirale mbira ibuni hanguore holene nawabini. Mbira mbira tiniale dege dege kago bayale helo biamogo bigibigi biaga ka. Ainde mbiralime Anduane Homogohanda biabe bayale bialu hene ngago de hondowa handabe manga holene naheda lo manda bido.
SIR 43:1 Hari daligaha wá hongohe wáleoreme bibahende wá hame kagola yari baya taraore hondoabi ngaligobi nga.
SIR 43:2 Nime egerebagi harini tagira iba lu ibugua Anduane Homogohanda biabe baya taraore binidaru ibunaga wá baya taraore kagome latagi hagane.
SIR 43:3 Ni ibu ibalu lina hanuni howa dindini ngaru baya hangu yo biai halu ibunaga hongome ira deneale ngagome wali agalinaga tingini daga ka.
SIR 43:4 Agalime ira daga ngagoha ira dedago pu lalu karia iranaga hongo poboyago biragome walia harago handaga. Anigo ni ibunaga hongo timbuniore hari ngaru dope haga ka ndobe. Ni ibunaga hongo gibiore ngago wali agali kagoha ba amunana biragome wali agalinaga de baiore helaga ka.
SIR 43:5 Heneneore Anduane Homogo ibuni ni wabiaga howa ibu timbuni daligaore ka. Ainde ni ibugua Anduane Homogonaga bi ledago talialu gerai lalu ibunaga piaga hariga ngagoria abale bolangua halu piaga ka.
SIR 43:6 Ege ibubi nde ibu tagira ibulene horo ngangi baya hangu talialu ege mbira mbira tagira ibugu bulene hengebi mali mbira mbira tagira ibilonaga henge wulenebi
SIR 43:7 Ngode Datagaliwabehondo bi lolene horo timbuni ngaru tagira ibilo henge wialubi ibunaga ani haga biaga ka. Egenaga wá hatimbu hama pialu mani lone emene hama dai biaga.
SIR 43:8 Ege li hari daligani kagome dege malinaga egebi daga lagane nga. Anigo hari daligaha howa mo emene ha mo timbuni ha bialu nahendene taraore uruni ibunime dege biagaya. Ibugua dahuliyali bu karunaga wá hadai biaga ka. Ibugua hari daligaore howa wali agali mbiraga ibagabu karuhondo wá hadali hagane ka.
SIR 43:9 Yakundinaga wá haragome hari daligaha mo yaribia halu baya taraore ngelalu Anduane Homogonaga dahuliya anda mo yaribia haga nga.
SIR 43:10 Ngode Datagaliwabe ibugua bi layadagua yakundi ti tini habe lenedagoriaore haga ka. Tigua de handaya ho holene manga nahaga ka.
SIR 43:11 Ai nidomo harini kago de handalu Anduane Homogonaga mini yaraga holene nga. Irane Anduane Homogo ibunime yari tara tarame ibu kau wabaga bialu de daibi baya tara mbira ka.
SIR 43:12 Anduane Homogohanda hari daliga mo yaribia holenaga mbirale mabubi yari baya tara mbira wabini ka.
SIR 43:13 Anduane Homogohanda bi laragola dindiguni hariha howa ibira haga ka. Ani bialu ibunaga miniha tandaga ho kago walia halu hari daba abale wigiwaga lalu ibilaga.
SIR 43:14 Ani bialu dahuliya andaga timbuni kago panga dugupe haragola hari beraliba dewaore tagira pialu ega poradagua pugu pugu bialu purogo lagane nga.
SIR 43:15 Ibuninaga hongo timbuniore ngagome hari beraliba karuni mo mogobu ngelowa mo dindiguni haga ka. Ani buwa mani minu ngirulo baga buwa dindiha ba amunana bialu ibilaga ka.
SIR 43:16 Tigua handalu karia Anduane Homogo ibiyagua hari timbuni wedago ibu mogo lowa duru lalu hagane ka. Ani bialu ibugua bia larago hale halu puyabu dindi abene unuraha yagi howa abale pu lo yalu piaga ka.
SIR 43:17 Ibunaga ne harigaha howa bi hongo howa kulu kala lalu latagi haragola dindi ngago ibu mogo lowa duru lalu ngagola dindi uyuraha yagi howa puyabu heba puyabu tara humbirini wai ale heba ibalu biaga.
SIR 43:18 Ainde ibugua ega yagaloyu ibiradagua bilalubi pagaya dindini ibira haradagua bilalubi dindini dalu dindiguni ibilaga ka. wali agalime handalu karia dindiguni ngago bayaleorebi dendebiorebi ngago hondowa ti turu ho kagola dindi guni ibu daligaha howa hendoreore ibira haga biaga nga.
SIR 43:19 Egerebagi handalu keria dindiguni ogoni ibu tara mbira ti tande ibi mbaule gewa ani alebi ngaria handaga.
SIR 43:20 Ibugua dindi abene uyuraha yagi howa puyabu dagarebi ibilalu iba bedago mo dindiguni helaga nga. Ani bidagola iba biaru dindigunime dambi hai ho ngagola handape halu keria iba ibu wai polenaga wai humbi yidabe toba holebere.
SIR 43:21 Anduane Homogonaga hongome hari dalu dindi ko iba dalu naibaga ngaru dai halu datani emene bu karu dalu do aulai helaga nga.
SIR 43:22 Ani bialu mani howa iba dalume mbirale uruni mo karulape hai halu pibiya ibira haragome datani bayale anda helagane.
SIR 43:23 Anduane Homogo ibunaga hongome iba solowara bedagonaga hongo minu podalu iba hanuni dindi emeneru wupe helo ibugua hangaga bida.
SIR 43:24 Agali iba sibi ngagoria iba solowara bedagoha pugu bini hearume iba solowaraha mbirale kooreru nga laga biyagola ina mini dege dindiho haramali.
SIR 43:25 Tigua lalu iba solowara ngagoha mbirale taraale dewaore beda laya. Iba wena timbuni tararu puya timbuni taraorerubi nga laya.
SIR 43:26 Anduane Homogo ibunime tihondo tininaga biabe bilo hongo miyagola ti karulape bayale ibagabu ka. Ibugua bi laragome bibahende tigabi hai ka.
SIR 43:27 Ainde iname te luore lalu holene ngagonigo ainde iname te ogoni lai habe naheoreda. Ai wahalu mo tubagi howa ogodagua lama. Anduane Homogo ibu bibahende karubi ngarubi uruninaga tene ibuni ka.
SIR 43:28 Ibu mbirale ibunime wabiniru bibahendeore bolangua haihe kago ainde ibunaga mini yaraga holene inanaga hongo karulape kemadalo manda bidemabe.
SIR 43:29 Anduane Homogo ibu daligaore kagola bibahendeme ibuhondo gi hai haga ka ndobe. Ibunaga hongo timbuni gibiore nga ndobe.
SIR 43:30 Tigua ibunaga mini yaraga halu howa ibu daligaore kago manda bialu ibuhondo mo turu howa bi ngago laga bilimu. Anduane Homogonaga mini yaraga holenaga tínaga hongo bibahende bibaoare halimu. Tígua ibuhondo mo turu halu bi larimigo nakarulapego ainde tígua ibunaga mini yaraga holene manga nahe yaraga haabo halu halimu.
SIR 43:31 Anduane Homogohanda biaga ngago baya hangu latagi hai hole Anduane Homogo de hendene mbirali ai kabe. Anduane Homogonaga mini yaraga holene manda ogodagua karulape lalu hondo manda bi mbirali ai kabe.
SIR 43:32 Heneneore Anduane Homogonaga biabe bini maru de handarimaga ainde maru wiado karu ina handa nabi kemagoni ndobe.
SIR 43:33 Ainde mbirale bibahende Anduane Homogo ibunime wabiai howa wali agali bayale tigabi biaga bu karuhondo manda bayaleru talebu tahalu miai haya.
SIR 44:1 Ayu iname agali haguanebi inanaga mamali heneruhondobi ka̱i̱ lo wia holene nga.
SIR 44:2 Anduane Homogohanda tinaga mini mo timbuni howa mini lene helalu bambaore howa ibunaga hongo tihondo mo walia halu heneya.
SIR 44:3 Maru ti hongohe heagome ti agali mini lene timbuniru haga bialu maru kiniru heneya. Maru ti manda bayalebi howa baya hanguore lawai haga hene. Ani bialu Anduane Homogonaga bi mana latagi halu mbiwia hagaru hene.
SIR 44:4 Maru ti nde wali agali íbu ngoai ho kago baya hangu mo tiga bialu haru howa wali agali ti hale helo bi bayaleru latagi halu haga hene. Tigua mana lo wini ngagobi tinaga mamali manabi baya hanguore manda biaihe howa ani latagi haga hene
SIR 44:5 Maru tigua iba gana gahangeru wabu wiyagola marume bi teru baya hangu gilibu wigi biniya.
SIR 44:6 Maru ti muni mbiraleru dewaorewi howa tini daluni agali haguane howa bayaleore haga biniya.
SIR 44:7 Wali agali uruni tini daluha heangi mini lene timbuni halu ti homa nabi heangi tini damene bu hearume tinaga mini yaraga haga bialu haga hene.
SIR 44:8 Maru henedarunaga mini timbuni ayu wiaho wiaabo ho ngagola wali agalime tinaga mini yaraga halu haabo ka.
SIR 44:9 Anigo maru henedarunaga mini nawi erebaore heneya. Ti homayagola nde ti mitangi holene mbirali naheneya. Ainde tinibi tinaga waneiginibi mbira naheore mbauleya.
SIR 44:10 Ai ayu iname wali agali abale mana bayale bialu haga homeneru wali agalime embeda nahe manda biaho haabo heneru mitangi budai bialu turu hama.
SIR 44:11 Mana bayale tigua bialu hene ngago heba tinaga mini heba ti waneiginime yu henego mani yu yobialu waneigini aguanerume yu hama ibinigo nga.
SIR 44:12 Waneigini tigua Anduane Homogonaga habo nalolene bi lo wini ngago hongo ho yu kagola waneigini aguane maha ho aribia hararume ti abanaga bi lo ngago talialu holebira.
SIR 44:13 Hameigini ti ariago biba nahe haabo halu tinaga mini ereba nahe wiaabo holebira.
SIR 44:14 Ti homalu tinaga ha̱lo holene baya wiago handa walia halu tinaga mini ereba nahe wiaho wiaabobo bu wulebira.
SIR 44:15 Wali agali bibahendeme mamalinaga manda bayale abale bamba wu henedaru latagi halu kagola wali agali ngoaiho bedarume ti mo turu halu bi lolebira.
SIR 44:16 Inogo ibu Anduane Homogo heba mandagi ibagabu haga henego ainde Anduane Homogohanda dahuliya andaga haru halu pene. Ibugua wali agali mani holebiraru bu mini beregedo halimu lalu mini beregedolene mana biawai hene.
SIR 44:17 Anduane Homogohanda handalu hearia Noa ibu hangu agali tigabi hearia de hendene. Ai wali agali maru hearu mo ko hai hayagola ibu hangu bayale hene. Ani bialu iba li timbuni ogoni hundiyagola wali agali emene dege maru dindini hene.
SIR 44:18 Ani heagola Anduane Homogohanda wali agali iba lime halu mendengi bo wahai nahole lalu Noala habo nalolene bi lo wini.
SIR 44:19 Abarahama ibu wali agali bibahendenaga mamali timbuni mini lene mbira henego ibu ale mende naheore.
SIR 44:20 Ibugua Anduane Homogo Daligaore kagonaga bi mana hale howa talialu heagola Anduane Homogohanda ibula habo nalolene bi lo wini. Anduane Homogonaga habo nalolene bi lo winidagoninaga Abarama ibuni tinginini mo wialu ibuha bahondolene ibu wiangi ibugua Anduane Homogonaga bi hale howa talialu haga hene.
SIR 44:21 Ani bialu heagola Anduane Homogohanda heneneore bulego Abarahamahondo lamialu ibu damene mani hama polebirarunaga minini howa wali agali bibahendeore dindi bibahendeha karu ti mo turu holene wulebira. Ani bialu ibu waneigini aguaneru dewaore iba angeni iba mu ngaligobi holebira. Ani bialu ti ibugua mo yaraga halu hari daligani yakundi kadagua helolebero. Ani bialu dindi timbuni mbira ti mulebero lalu bini. Dindi ogoni iba solowara kira bedago dombeneha ngago ai tubari uyuraha yagi iba Yuberedisi porago tubari wialu pialu dindi wimaro bidagoria tagira polebira, lalu lamini.
SIR 44:22 Anduane Homogohanda Aisaga ibu Abarahama iginiyagola habo nalolene bi ibula lo wia dege bini.
SIR 44:23 Ani bialu mani wali agali mo turu halu mo gumbila holenebi habo nalolene bi lo winigo ogoni Yagabaha lone mo ba unu hene. Anduane Homogo ibugua Yagaba mo turu holeore ngo lalu ibugua dindi tuwu merogola hameigini homberia (12) howa dindi ogoni tuwu ta holebere lalu lamini.
SIR 45:1 Anduane Homogohanda agali mbira Yagaba hameigini heago aria dabo heleagola wali agalime ibu gubalini ho hene. Ibu Ngode Datagaliwabe nenege halu wali agalibi nenege dege henego ibu mini Mosese hene. Iname turu howa ibu mitangi ho holene nga.
SIR 45:2 Anduane Homogohanda ibunaga mini timbuniore mini lene dahuliyaliru mini lene heledagobi dege helene. Ani helowa mo hongo ho heleagola waitigi bu hearume ibu hondowa gi timbuni hene.
SIR 45:3 Mosese ibugua agalime nabiagane ale dewa ibunaga neha mbuha howa bilo Anduane Homogohanda mo bia hayagola hongo timbuni ogoni kini bu hearunaga deni howa mo ya hene. Anduane Homogohanda Mosese ibu wali agali haru hagane helo dabo helalu Mosesehanda ibunaga dengui hendelo mo walia halu bini.
SIR 45:4 Mosese ibu bi hale haga howa ibuni mo dindiha ho haga howa mana tigabi ngago bialu haga heago hondowa Anduane Homogohanda ibu wali agali bu hearuha ibu agali ho bamba hene helo helene.
SIR 45:5 Anduane Homogo ibuni Mosesela bi laedene bialu hari beraliba arumahe wiagoha haru anda pene. Ani bialu Anduane Homogohanda ibuni dengui Mosese mo walia howa ibunaga bi mana Mosese giha mo ya hene. Bi mana urunime agali holene mialu mini gigabi wulene miaga mini. Anduane Homogohanda Yagaba hameigini bu hearu ibunaga habo nalolene bi ngago lawai holenaga mini. Isaraele wali agaliru ibunaga bi mana lawai holenaga mini.
SIR 45:6 Libai hameigini aria agali mbira Anduane Homogohanda Mosese hamene Arono dabo helene.
SIR 45:7 Anduane Homogohanda ibula habo nalolene bi lo wialu ibugua wali agalinaga loma bu mirago mo loma bu mule loma binigo mo miaga agali hene. Ani helowa Anduane Homogohanda labolabo bayaleore wiarume mo yari bia halu labolabo luni biagimbu biaga yolo dewaoreme mulene wiago mo karula halu bini.
SIR 45:8 Anduane Homogohanda ibu yari baya taraore wiarume mo karula halu agali loma binigo mo miaganaga aga tara tararu mo karula halu bini.Yari uruni agalinaga aga giha karulolene mbirabi mende karula gimbu bulenebi wabu mini.
SIR 45:9 Labolabo luni ogoni yari taraore ira taranaga lini baya dedaligobirume mo yari bia helowa mo karula hene. Ani bialu ngilinge̱lo̱ lolene emeneru ibu poragola ngilinge̱lo̱ lelonaga helene. Anduane Homogohanda ogoni ngilinge̱lo̱ larago hale howa ibunaga andaha wali agali bedaru mitangi bilonaga helene.
SIR 45:10 Agali aga wabiaga manda bi bu hearume aga loma binigo mo miaga tinaga karulolene ogoni ngolomebi pu daramabi mindibirume mo yaribia halu buwa wabini. Agali mandabi maru hearume ege to̱le̱ kira Anduane Homogonaga hame ngago hale hole badaga haga mini Urimu Tumimula wiago honolene nu baya mbira wabini. Tigua nu ogoni pu daramabime lebini.
SIR 45:11 Agali maru ngolome biabe biaga hearume nu biago ege to̱le̱ baya tara tara wiarume mo yaribia halu lebu para haga bini. Tigua ege to̱le̱ uruni podaga bialu ha helaga bialu Isaraele hameigini homberiali (12) hearunaga mini ege to̱le̱ ogoriani gilibu wiai hene.
SIR 45:12 Ani bialu agali mbira mbirale wabulene mandabi heagome Arononaga labolabo tangi hanaga wiago karula dambi holene mabubi mbira ngalome wabini. Ani buwa mabubi ngolome wabini ogoriani bi mbira gilibu winigo ogodagua, Anduane Homogonaga Loma Biaho Nga, lalu ogoni ibu mo yári bia hene baya taraore mbira deme hondolene baya nga.
SIR 45:13 Arono ibu naheha yári baya urunibi mbira nawini. Ani bialu yári ogoni agali maru karume bulene nawiore. Mana wiaabo halu Arono ibunibi ibu igini aguanerumebi tigua dege karulolebira.
SIR 45:14 Horo bibahendengi Arono ibunaga biabe loma irame dai helonaga loma bu delolene egerebagi alendobi delalu haabo haga hene.
SIR 45:15 Arono ibu agali loma binigo mo miaga helonaga ibunaga haguaneni weli taraore mbirame odo wini. Anduane Homogohanda ogonidagua bialu Arono halu ibu damene mani holebirarubi ti baba habo nalolene bi lo wialu habo nalolene bi ogoni ibu habo nalole dahuliya andaga ngadagua wiaabo holebira. Ainde Anduane Homogohondo bi lolebi loma binigo mo miaga agalinaga biabe bulene ngago bulebi Anduane Homogonaga minini howa wali agali mo bayale helo lalu bi lolebi bibahende Arono ibugua dege haru bamba howa bialu holene wini.
SIR 45:16 Mosesehanda agali maru bu hearu helowa Arono ibu hangume lomarubi ira hagua nga bilo loma bu delolenebi Anduane Homogonaga loma bu delole yalu pugu bilo dabene. Anidagua biragola Anduane Homogohanda ibunaga wali agalime ko bini ngaru embeda halu wahai holebira.
SIR 45:17 Ani bialu Mosese ibugua Aronohondo lamialu lalu wali agalinaga godi hale howa haru holene hongo mialu Yagaba hameigini bu karu Anduane Homogonaga bi mana lawai halu mana lo wini ngago baya hangu lawai halu mo wála halu helo mini.
SIR 45:18 Ani heagola ainde agali maru Datanabi Abiramabi ti damene bu hearubi Kora halu ibu damene bu hearubi tigua ibalu Aronohondo keba timbuni halu hene. Dindi ko iba dalu naibaga wiagoria howa tigua Arononaga biabe biyago dimagoli halu hene. Ani howa tigua bi mbiraore halu Arono bope hole manda bialu hene.
SIR 45:19 Anduane Homogohanda tigua uruni bialu heago hondowa ibu turu nahe hene. Ibugua ti baba keba timbuniore halu bibahende bo hilo wahai hene. Ibugua tara nahendeneale bialu agali uruni ira timbunime bo heda hai hene.
SIR 45:20 Ani bialu Anduane Homogohanda Arononaga mini mo yaraga howa mo timbuniore halu ibugua mana mbira ogodagua ngelene. Wali agali bibahendeme tomo hengedaru aria bayale kago Arono aria karu bu mialu bibahendengi mberedi dewaore hiru yu íbuwa Arono aria karu nelo mialu halimu lene.
SIR 45:21 Anduane Homogohanda mana ogoni Arono halu ibu igini bu hearu biamogo bialu wali agalime tinaga loma Anduane Homogonaga yalu ibirago ti nelonaga wabini.
SIR 45:22 Anigo Arono aria ti dindi hobane mbira Isaraele hameigini maru ti tuwu ta hayadagua ti nawi howa ti dindi hobane mbirago aba ndo hene. Anduane Homogo ibuni tinaga abaore howa ibuni tinaga dindiore wiradagua bialu ibugua ti handaya ho hene.
SIR 45:23 Agali mini lene timbuni tebone Eliasa igini Piniasa hene. Ibuore Anduane Homogonaga bi hale hole turuore halu ibu mana bayale ngago baya hangu taluwa bialu haabo haga hene. Wali agali tigua Anduane Homogo erembira mialu poragola Piniasa ibu hongo howa haabo haga hene. Anidagua biragome Anduane Homogohanda Isaraele wali agali lone dara ho dai biaga hene.
SIR 45:24 Anidagua bialu heagola Anduane Homogohanda ibunaga nenege agali bayale Piniasala haabo nalolene bi lo wialu ibugua mbirale loma bu mulene andaha ngaru bibahende baya hangu handaya ho halu wali agali haru bamba helo helene. Ani bialu agali loma binigo mo miaga haguane helo dabo helalu ibu igini aguaneru hangume loma binigo mo miaga haabo helo lalu lo wini.
SIR 45:25 Anduane Homogohanda Yuda hameigini hearu aria Yasi igini Debidila habo nalolene bi lo wialu Yudanaga kini Debidi halu ibu damene degeme kini haabo holebira lalu lamini. Anidagua dege agali loma binigo mo miaga Arono igini aguaneneru tigua hanguore haabo holene wini.
SIR 45:26 Tígua wali agali baya hanguore mo tiga bialu haru halimulonaga Anduane Homogohanda mini bayale tíhondo talebu ngilonaga i̱na Anduane Homogohondo bi la haro. Anidagua bialu tínaga holene bayale ngago ereba nahelobi tínaga mini bayale mini lene timbuni ngemigo ani wiaabo helobi i̱na bi laharogoni.
SIR 46:1 Ai Nana igini Yosua ibu wai biaga pari wayali hongoheore howa ibugua agali Anduane Homogonaga bi mana latagi halu mbiwia haga Mosesenaga henge mialu ibu ho aribia hene. Ibugua ibunaga mini Yosua ngagonaga galone Anduane Homogohanda biamogo biaga lalu mini wini ngago baya hanguore taluwa biaga henego irane ibugua Anduane Homogonaga wali agaliore haru kogoni lo manda buwaore haga hene. Waitigi Isaraele baba wai biyaru ibugua balu bope haga bini. Tigua wai bialu bope halu dindi Isaraele dindi ti karulo haga bini.
SIR 46:2 Ibugua ayu tibu nene kirabali gadele wai biagane ngago yalu tano mbira ngagoha anda pialu wai birangi ibunaga mini mo yaraga halu ibu mini lene timbuniore haga biaga hene.
SIR 46:3 Agali ala henedaru hongohe Yosua ale mbira nahe. Irane aginaga. Anduane Homogonaga wai bamba hagane hongohe mbira ibu hene.
SIR 46:4 Horo mbirungi Yosuahanda ni abale anda napelo, Yania ha, layagola ni abale anda pialu mbi nale horo luore horo kira ale wini.
SIR 46:5 Ai waitigime bibahendeha ibugu ibugu bialu Yosua halu ibunaga wali agaliru ho hagira biai hayagola ibugua Anduane Homogo Daligaore kago olalu ibu biamogo bialu mo hongo ha, lene. Ani layagola Anduane Homogo Daligaore kagome bi layago hale halu dalu dindi guni timbunioreru waitigi heagoha yagi bape halu waitigi bai hene.
SIR 46:6 Yosuahanda agali uruni bai halu hari bare wiagoha daliape halu puwa halu mende hearume wai bialu hearia urunibi bo hilo wahai dege hene. Anidagua bialu heagola wali agali bibahendeme manda biai halu Yosua ibu wai biaga agali hongohe pari wayaliore howa ibu Anduane Homogo Bibahende Hongo Haiheore kagonaga hame ledago talialu haga ka lo manda biai hene.
SIR 46:7 Mosese heangi Yosuala Yabune igini Kalebelame Anduane Homogonaga bi larago baya hanguore hale haga hene.Wali agalime mine halu kagola libu hongo ho halu wali agalime mana ko nabilo libugua hongo howa mana lalu tigua keba harangi bi nale wahadaba lowa wali agalinaga ne hariga ndibu lalu biaga hene.
SIR 46:8 Agali wai biaga pari wayalioreru handari waragaria Iyibi dindi wahalu tagira ibinigo aria agali kirali ogoni labo hangu nahome hene. Ani howa libugua Isaraele wali agali tinaga dindi gahange Anduane Homogohanda ngulebero lalu lo wini wiagoria haru anda ibini. Dindi ogoniha tomo bayaleore mone taranaga ibanebi nogo andu ibanebi tomo tara tara dewaorebi wiaihe wini.
SIR 46:9 Anduane Homogohanda Kalebe hongo timbuni minigo hongo ogoni ho haabo halu homene. Ibu dindi hari bare mbira wiagoha pu berenego ainde ibu waneigini aguanene hearu ti ogoriani ho aribia halu dindi ogoni aba ti hene.
SIR 46:10 Te ogonime Isaraele waneigini bu hearu tihondo Anduane Homogonaga bi hale holene bayaleore nga lalu lawai hene nga.
SIR 46:11 Agali haguane mbira mbira hama ibiniru bibahendeore tigua Anduane Homogo erembira mialu napebi tigua mbirale dama mitangi bialu bi pupu wiaga gime wabini waruhondo bi pupu nawibi bayale hene. Ainde agali haguane uruni mitangi ho haga karu ti turubiore ka.
SIR 46:12 Ainde mana agali haguane uruni tigua bialu henedaru wiaabo helonaga i̱na Anduane Homogohondo bi laro. Ani bialu tinaga waneigini aguane bu karumebi mana mbiraore ogoni taluwa bialu helonaga i̱na Anduane Homogohondo bi laharo.
SIR 46:13 Anduane Homogohanda Samuele gubalini timbuni ho hene. Samuele ibu agali Anduane Homogonaga bi mana latagi halu mbiwia hagane ibugua kini holene pigane agali haguaneru helo tinaga haguaneni mbagua odo wialu kini holene hama pelo pigane ibugua dabo helene.
SIR 46:14 Ibugua Anduane Homogonaga bi hale halu wali agali baya hangu haru heagola Anduane Homogohanda Yagaba hameiginiru baya hangu haru hene.
SIR 46:15 Samuele ibu agali Anduane Homogonaga bi mana latagi halu mbiwia hagane heneneore howa ibunaga emaga larago henene tagira piaga lalu wali agalime manda biai ho hene.
SIR 46:16 Waitigi ibalu bibahendeha ho hagira biai kagola Samuelehanda ibu biamogo bule ibu lalu Anduane Homogo Bibahende Hongo Haiheore kago abale olaga. Ani bialu nogo sibi igini hongolo mbira abale bo loma bu miaga hene.
SIR 46:17 Ani biragola Anduane Homogohanda dahuliya andagaha howa bi hongo howa ladali haragola wali agali bibahendeme bi ogoni hale hai haga.
SIR 46:18 Samuelehanda Taia agali haguane bu hearu bo hilo wahai halu Pilidia agali haguane bu hearubi bo hilo wahai halu bini.
SIR 46:19 Ai Samuele ibu homole howa ibugua heneneore Anduane Homogonaga deni howabi kininaga deni howabi gi doladaga halu lalu, I̱na mendealinaga mbirale mbira mo page nabiore haabo hene, lene. Ani layagola mbiralime í̠ ke̱ harego agibe nalene.
SIR 46:20 Ibu homeaha howa mani ibunaga dininime lamialu howa lalu mbi wia halu bi lalu haabo howa kinihondo waitigime kini ibu bo waholebira lalu lamini. Ibu homene dindi humbirini andagaha howa wali agalinaga ko wiaru domo wahalu bi mbiwia halu ogoni lene.
SIR 47:1 Samuele homeaha Debidi kini heangi Nadana ibu Anduane Homogonaga bi mana latagi halu mbiwia haga ho aribia hene.
SIR 47:2 Wali agalime nogo balu Anduane Homogohondo bo loma bu mulenaga nogo bayale habetigi kago bowa habane abene baya kago loma bu miagane nga. Anidagua dege Anduane Homogohanda agali bayale mbira mini Debidi heago ibu dabalu Isaraele waneigini bu hearunaga agali haguane helo helene.
SIR 47:3 Debidila laiono gabua bu karubi biango handalehe timbuni mini bea karubi ibu baba hongo nakarulapeore. Laiono gabua bea gabua hongohe uruni Debidihanda mo emene halu nogo sibi memeru igini taliradagua biaga hene.
SIR 47:4 Ibu wene igiri emene dege howa ibugua agali hongohe timbuni gibiore pari wayali mbira tinaga waitigi heago balu bo homa hene. Ibugua ege to̱le̱ puha yuwa bope lalu Golaidinaga embone dambiyagola Golaidi abale ibira halu ibugua bi ko lalu hagadago ogoningi biba helene.
SIR 47:5 Debidihanda ibuha hongo holene ngibe lalu Anduane Homogo Daligaore kagohondo bi lowa ibugua hongo ogoni mo yu howa agali hongohe wai biaga pari wayali heago balu ibu wayali hene. Anidagua bialu Debidihanda ibunaga wali agalinaga mini timbuni mini lene daligaore lone wiadai bilo mo yaraga hene.
SIR 47:6 Ibugua waitigi daosini dege pira (10,000) bayagola tigua ibunaga mini yaraga hene. Ani bialu Anduane Homogohanda ibuhondo bayale biyagome ibu kini hayangi wali agalime ibunaga mini yaraga hene.
SIR 47:7 Ai Debidihanda waitigi bu hearu baba wai biai howa bibahende bope hai halu ibugua Pilidianaga hongo bopeore halu biba helenego ayu ogoni wiaabo henego ngagoni ndobe.
SIR 47:8 Horo bibahendengi Debidihanda bialu henego damene bibahende Ngode Datagaliwabe baya burugulene howa daligaore kagohondo ka̱i̱ lalu ibunaga mini timbuniore mini lene helonaga bialu haabo haga hene. Ibugua Anduane Homogohondo turu timbuni ho howa turu holene iba gana lalu haga hene.
SIR 47:9 Agalime ngitaru balu Anduane Homogonaga mini yaraga halu iba gana lelo ibunaga anda tamuha loma bu miaga dagia heago kawareni agali maru dabo helaga bini.
SIR 47:10 Ibugua horo timbuni maru Ngode Datagaliwabehondo bi lolene dabo wialu horo uruni mo timbuni howa mo bagiho wigi bini. Ani wiagola wali agalime Anduane Homogonaga mini baya burugule ngago mo yaraga halu howa egerebagiore gao laragola wali agali abaleore Ngode Datagaliwabe andaha íbu ngoai howa iba ganame gialo yu helaga hene.
SIR 47:11 Anduane Homogohanda Debidinaga ko wiaru mo wahai halu ibunaga mini timbuniore mini lene wiaabo helo helene. Anduane Homogohanda habo nalolene bi Debidila lo wialu ibuni kini helalu biyagola ainde Isaraele wali agalinaga deni Debidi ibu mini lene timbuni hene.
SIR 47:12 Debidi halu homayagola ibuni igini Solomonohanda ibu abanaga henge ibuni mo aribia hene. Mini gigabi wulenebi manda bayalebi ibuha to̱le howa ibu abahanda biabe bayale bu wahene wiagoria ibu bayale hene.
SIR 47:13 Solomono ibu kini heangi ibunaga holene baya gibiore wialu Anduane Homogohanda miniha mo palia holene mo karula ho helene. Ani helayagola ibugua Anduane Homogonaga anda mbira haabobo hene howa Ngode Datagaliwabenaga andaore helo lowa ibugua bia hene.
SIR 47:14 Solomono-o í̠ wene igiri emene dege hengi í̠naga manda timbuni daligaore wia heneya. Iba timbuni poragoha iba to̱latagi hagadagua mini giga bulene manda bayalebi í̠ha to̱latagihe heneya.
SIR 47:15 Í̠na wali agali dindi bibahendeha karu bi te bayale larigomebi manane bayale mo walia harigomebi ti manda bayale wáleore wiai haya.
SIR 47:16 Í̠naga mini mo yaraga halu mini lene timbuniore ka lenego dindi bibahendeha purogo lai halu dindi kaundiaore iba dege dombeneha wiaruahabi anda piai henego hale hai haya. Hale howa í̠na mana bayale bulene ngago mo heya howa bialu ke layago hale hai howa ti turu timbuniore hai ho ka.
SIR 47:17 Ainde í̠na biagago damene iba gana lo ngagobi í̠na lawai bayale haga ngegobi bi yobage laga ngegobi wali agalime í̠hondo bi maru hale haragola í̠ ladai biriligobi Ngode Datagaliwabe ibu Isaraele wali agalinaga Anduane Homogo kagonaga minini howa í̠na ngoloru silibaru dewaore mo mogo bu wu hariya.
SIR 47:19 Anigo í̠na dimagoli holeneme í̠ haru heagola walime í̠ mo pila hayaya.
SIR 47:20 Í̠ninaga mini bayalebi í̠ waneigini aguane mani hama polobadarunaga mini bayale lolenebi í̠nime ko mo hai hariya. Lulu mana ale í̠nime bialu hariyagome í̠ igini bu hearunaga miniha mo genda harigo ainde tiha ko holene anda ibiya.
SIR 47:21 Ani bialu í̠naga dindi mbiraore wiyago lone tuwuki halu Eberaimi hameigini ti mine haga mbirago hayaya.
SIR 47:22 Anigo Anduane Homogohanda í̠ dameneruhondo dara ho haabo howa ibugua í̠hondo buleore lalu bi lo wiyago mo habo nalayaya. Anduane Homogo ibunime Debidi ibuninaga biabe bia haga helo dabo helene biago mitangi bialu ibugua ibunaga nenege Debidi aria balu biba helolene hame nale hayaya. Ani hame lowa ibugua Yagaba hameigini maru helo wahalu Debidi aria nde maru helo karulapeda lo manda biniya.
SIR 47:23 Ai Solomono ibu homalu ibu mamaliru baba ha̱lo paleagola ibu igini Lehoboama henegome henge mialu ho aribia hene. Agali ogoni ibu lulu mini nawiore hene. Ibugua gabumane biabe bia ko hayagome wali agali mo pila hai hene.
SIR 47:24 Mani howa agali mende Nebada igini Yaroboama ibu ho aribia howa ibugua Isaraele wali agali mana ko bulene hariga ngagoha haru halu pubagi halu ibugua Eberaimi wali agali hariga koha haru pupe hene. Ani binigome wali agalinaga ko timbuniore wu to̱le layagola Anduane Homogohanda tihondo handabe manga halu tinaga dindiha nahelo bo batagi hai hene.
SIR 47:25 Heneneore tigua mana ko tara tara wiaru bima pu dege bialu pani nolene ko tara ngola hene.
SIR 48:1 Horo ogoniangi agali mbira Anduane Homogonaga bi mana latagi halu mbiwia haga mini Elaya hene. Ibu agali hongoheore howa ibunaga bi ira hunguale lene.
SIR 48:2 Ibugua hina gari timbuni mo bia hayagola ibunaga biabe ogonime wali agali dewaore hina garime mo homa hai hene.
SIR 48:3 Ibugua bi hongo howa Anduane Homogohondo layagola iba dalu naibi wiaabo hene. Ani bialu ibugua ira dene halu tebira ibilo olene.
SIR 48:4 Elaya-o í̠ agali haguaneore agalime nabiaga aleru bia heneya. Agali mende í̠ bolanguahe nahe.
SIR 48:5 Í̠na Anduane Homogo Daligaore kago olalu agali mbira homo tongolomini wiago mo heya heneya.
SIR 48:6 Í̠na agali kini hearubi agali haguane bu hearubi bibahende waragome homalu hearu homelo wahaga biriya.
SIR 48:7 Hari Sainaini howa Anduane Homogohanda í̠hondo lai layago hale halu hari Horebeni howa Anduane Homogohanda waitigi karu bo wahai holebero layane hale hariya.
SIR 48:8 Kini ko hearu bo wahelonaga kini ogo í̠na bo pu lalu dabariya. Ani bialu agali mende í̠na henge mialu Anduane Homognaga bi mana latagi halu mbiwia haga helo dabo helariya.
SIR 48:9 Í̠ dahuliya andaga pole howa nogo hosime garo ale garisi gili laga wiago ira hungu heba ibiyagome í̠ mo yalu puyabu humbirini wai bialu hongohe mbirame dahuliya andaga mo yalu piya.
SIR 48:10 Ngode Datagaliwabenaga bi mbugaha ngagome lalu Anduane Homogohanda horo manda bu winigo ngago ogoni tagira ibirangi í̠ dai bulebere. Anduane Homogonaga keba holene pu timbu holigo ai í̠na ibunaga miniha mo tabila holebere. Ani bialu abahanda waneigini baba lone mini mbiraore helalu í̠na Yagoba waneigini lone haru dai bulebere.
SIR 48:11 Wali agali í̠ de handayaru ti turu ho helobi wali agali í̠na biamogo biaga karu tigua miniha mo palia holene karulo helobi inabi nde bayale holene handa walia holeberema.
SIR 48:12 Puyabu hongohe ibiyagome Elaya pulu yalu piyagola ibunaga dinini Elaisaha ho to̱latagi hene. Elisa ibu henedago howa ibugua kini mbira kagohondo gi nahaga howa agali mbirame ibuhondo ogoale bia lowa ibu handaya ho haga mbira nahene.
SIR 48:13 Ibugua biabe bulene damenego bibahendeore genda naheore bialu howa mani ibu homeaha ibunaga biabe Anduane Homogonaga bi mana latagi halu mbiwia hagadago bialu haabo hene.
SIR 48:14 Ibu nahome heangi agalime nabiaganeale dewaore biaga henego ibu homowabi mbirale tara tarabi bini.
SIR 48:15 Wali agali bu hearume mbirale tara tara uruni handa hondowa dege tigua mini beregedalu mana ko biyago wanahe haabo hene. Ani biyagola Anduane Homogohanda tinaga dindi wiago wahalu bo taliatagi howa dindi tara tara wiaruha purogo lelene.
SIR 48:16 Ani bialu hayadaru ti nde emene hangu howa tinaga agali haguane Debidi aria dege haabo hene. Agali haguane uruni marume mana bayale bialu haga halu marume nde mana ko wiaru bialu hene.
SIR 48:17 Hesegaiahanda ibunaga tano mo hongo holene hame lo hene. Ani howa ibugua iba tanoha dadabu yu anda polenaga biabe bialu gana walu hene. Ibugua ege to̱le̱ wiaru aeaneme bo dodo wahai howa iba berelonaga uli dewa tombo wigi bini.
SIR 48:18 Ogoningi kini Senageribihanda Isaraele baba wai ibalu agali mbira Labasage heago ibilene. Agali Labasage ogoni ibugua Saiono bo gialahole bule íbu howa ibugua ibuninaga hongo timbuni heago mitangi bialu wai bi lalu bi ko tara tara hongo howa lalu hene.
SIR 48:19 Ani layagola wali agalime gi timbuni howa tinaga gi duru laga laga bialu miniha tandaga timbuni walime gali taba hanalu howa tandaga hagagabi ho hai hene.
SIR 48:20 Ani howa Anduane Homogohanda ti dara helo Anduane Homogo olalu hene.Tinaga gi yaragadaga bialu Anduane Homogohondo bi lene. Anduane Homogo baya buruguleore kagome tinaga bi ogoni hale halu ti biamogo bilo Aisaia abaleore ibilene.
SIR 48:21 Ai Anduane Homogohanda Asiria wai biaga agali biaru mo ko howa minu balu ibunaga dahuliyalirume ibalu balu bo amo lai hene.
SIR 48:22 Anidagua binidago irane agali Anduane Homogonaga bi mana latagi halu mbiwia haga Aisaia ibugua de gandeba handarago bi heneneore ngago handa walia haga kago Hesegaia ibu mini mbiraore wialu bi layago talialu heagome bini. Hesegaia ibugua Anduane Homogonaga bi hale halu ibu mamali Debidihanda biaga wiago talialu bialu hene.
SIR 48:23 Ainde Aisaia ibu Anduane Homogonaga bi mana latagi halu mbiwia haga heangi ibugua ni abale anda nape hondo ha lowa bi lalu ai ibunaga bi Anduane Homogohondo layagome kini ibu mali dewaore dindini halu bini.
SIR 48:24 Ibunaga dinini hongoheore howa mbirale mani ibule wiago hondo bamba halu ibugua wali agali Saiononaga dara timbuniore howa dugu bialu hearunaga mini bayale helo motiga bini.
SIR 48:25 Ibugua mbirale bibahende mani bule ngago damene bibahendeore dindi ogo ibu biba holene tagira ibirangi waholene bi lai halu mbirale wiado hene ngarubi lai halu mbirale tagira naibi ngarubi lai haga hene.
SIR 49:1 Yosaianaga mini lolene baya dendebiore. Dendebi bayaleore lalu ira hagua nga biaga delole agalime baya hangu manda manda bu wiagagobi halu mone ibane dendebiore wali agalime nagane ngagobi halu tomo tara dawa nalu tabage balu wali agalime ngita bayaru balu iba ganaru lagagobi hene.
SIR 49:2 Wali agalime mini beregedelonaga ibugua mana bayale tigabi wiaru bialu howa ibugua mbirale dama mitangi bialu bi pupu wiaga bigiya bu wiaru bo pambulabaga bialu bo gialo wahai halu bini.
SIR 49:3 Ibugua Anduane Homogonaga biabe bulenego dege mitangi bu hene. Wali agali tigua mana ko bule hongo halu piai hayagola ibuni hanguoreme Ngode Datagaliwabenaga mana ngago talialu hole hongohe hene.
SIR 49:4 Debidibi Hesegaiabi Yosaiabi tigua Anduane Homogohondo erembira nami bayale henego ainde kini maru henedarume mana ko dewaore wiadambi dambi bima irigi helene. Ani binidago irane tigua Anduane Homogo daligaore kagonaga bi mana wahayagome ani bini. Ani binigome Yuda wali agalinaga kini naheore hene.
SIR 49:5 Hongo Yuda tinaga holenego wali agali tara tara hearuha piai halu tinaga mini daliga mini lene holenego dindi tara tarani wali agali bu hearu tiha piai hene.
SIR 49:6 Anidagua biyagome dindi taraha hameigini tara tara palearume ibalu tanobi Anduane Homogonaga anda heagobi bibahende bo gialahole biai halu wali agali lenego mbira tano ogoniha munini bialu hariga pugu biagoria nape wini. Mbirale uruni bulebira lalu Yaremaiahanda mbiwia halu bi lo winigo ngola hene.
SIR 49:7 Yaremaia ibu biabe ogoni bulene agali mbira helo lalu Anduane Homogohanda bamba ibu ai̱ya tombeha bereangi howa dabenegoyu ainde wali agalime Yaremaia mo ko halu haabo hene. Anduane Homogohanda Yaremaia ibu agali Anduane Homogonaga bi mana latagi halu mbiwia hagane helobi mbirale ko ngaru minu dugalu bo gialahole bialu mo ko hai helobi maninaga mo heya halu lone hongo aribia helobi Anduane Homogohanda ibu dabo helene.
SIR 49:8 Esegiele ibugua degandaba mbira hendene. Ibugua handalu hearia Ngode Datagaliwabe ibuni kini biragane dagiani bereagola dahuliyaliru ibuni heba mandagi hearia hendene.
SIR 49:9 Ibugua puyabu hongoheore wali agali waitigi bu hearuha piai helalu wali agali ibunaga bu heagoha yagi nabi bayale helene.
SIR 49:10 Agali mbiwia haga homberiali (12) tinaga kuni ayu homaliha ngaru mani lone heyalu holene gahange karu lelo hame lowa Anduane Homogohondo tinaga bi laharo. Ani larogo irane tigua Yagaba hameigini mo hongo halu tinaga holene henge bayale mbira mani ibilonaga malia ho helo biamogo bialu hai haga hene.
SIR 49:11 Ainde iname aguaore bialu Serubabelenaga mini yaraga holene karulapeda. Ibuore Anduane Homogonaga giha yari baya taraore bida.
SIR 49:12 Ani bialu Yosadaga igini Yosuabi nde ogonibi dege hene. Libu dindini heangi howa Anduane Homogonaga anda bayale mbira ibuninaga mini yaraga halu holenaga bia howa anda ogoniha yari baya tara tara wiaru mo wiai howa mo yaribia ho ngelene.
SIR 49:13 Wali agalime Nehemaianaga miniore embeda holene nawigo irane ibugua tano timbuni wiagonaga ege pabe gialahole bu wiaru lone arema bu dai bialu tanonaga wai pabe panga gialopaya bu wiaru lone wabu helai halu inanaga anda damene lone biai henegonaga iname ibu embeda holene nawiore.
SIR 49:14 Anigo ainde dindini hene agali bu karu mbirame Inogo bolangua habe naheore hene. Ibu dindi ogo wahalu Anduane Homogohanda dahuliya andagaha haru pene.
SIR 49:15 Ani bialu Yoseba henego ai Yoseba ale agali mbira nahe. Ibu hamene bu hearu ibunime mo tiga buwa baya hangu haru halu ibu damene hearu mo hongo halu haga hene. Anidagua bialu henego manda bialu tigua ibunaga kuniru baya hanguore handaya ho howa yu ibaga bu hene.
SIR 49:16 Wali agalime Siemela Sedelanaga mini yaraga halu haga hene. Anigo mini daliga timbuniore mini lene howa mbirale ema bialu piaga maru ti dege dombeneha agali pigane henego Adama henegonaga mini timbuni daligaore yaraga holene nga.
SIR 50:1 Oniasa igini Saimono ibu loma binigo mo miaga agali haguane timbuni heangi Anduane Homogonaga anda lone mo tiga buwa arema buwa ibugua anda ogoni lone mo bayale helene.
SIR 50:2 Ibugua Ngode Datagaliwabe anda heagonaga pabe hagira lone arema bialu ege pabe ogoninaga nenani mamagealinaga anda emeneru lone bima irigi halu bini.
SIR 50:3 Ai Saimono ibu heangi ibugua iba berelonaga uli timbuni mbira tombo winigo ogoniha iba timbuni iba kuyama biraradagua berene.
SIR 50:4 Ani bialu ibunaga wali agali bu hearu mo ko holigonaga mini burugu lo hene. Ani howa waitigime ibalu tanoha abale anda ibulino tanonaga pabe baya hangu arama bialu mo hongo howa bialu hene.
SIR 50:5 Ai Saimono ibu Anduane Homogo andaga tamu Hobane Loma Biaheneore laga heagoha howa tagira ibiyagola ibunaga dengui wáleore tagira ibiyago hondowa wali agali dewaore ibu ngola hole ibai hene.
SIR 50:6 Tigua handalu hemiria ibu yakundi egabi laragoha kaligobi ege datimbu haragola wá timbuni hagagobibi hearia hendene.
SIR 50:7 Tigua handalu hearia ibu de daibi ni hongohe dalu Anduane Homogonaga anda dangini daba hagagobi halu ni domo yari tara tara bi hari beraliba pele kagoria wu paga hagagobi hearia hendene.
SIR 50:8 Tigua Saimono de handalu hearia yari biagane baya dedaligobi halu iba angene datani baya taraore bu kaligobi hearia hendene. Ani bialu ira hongone Lebanono hari ngagoha andaho hagagobi hene.
SIR 50:9 Ibu bayaore ira denela ira hagua nga bilo loma bu delaga dabu kagoria ngaligobi halu ngolome wabini gabo be baya ege to̱le̱ yolo dewame miagane tara tara ngarume mo yaribia howa ngaligobi hene.
SIR 50:10 Ibuore ira olibe lini dewa daga kagobi halu ira mende guraya ale anda halu lu holene wiadege bialu anda howa hari mindini ela habehe piagagobi hene.
SIR 50:11 Saimono ibugua ibunaga aga bayale ngago mo karulalu yari tara tara ngaru mo karula bialu Anduane Homogonaga loma biaga dabu kagoria porangi baya taraore mbira haga hene.
SIR 50:12 Loma emene agali loma binigo mo miaga karunaga giha yidaru yamu yuwa agali ibu damene karu baba mandagi nogo egaru loma bu deloledagoria pu haga. Ibuore ira tamia baya taraore Lebanono irabuha hagagobiore hene.
SIR 50:13 Ibu dombeneni helowa loma bu minigo mo miaga Arono aguane bu hearume ibu ho mabu biyagola ibu pibi ayage ale yuniru ha amunanabi haradagua biniya. Tigua Anduane Homogonaga lomaru giha yaga yaga buwa tinaga aga bayaleru karulai damene howa Isaraele wali agali bibahende deni heyu hai haga heneya.
SIR 50:14 Ai Saimoni ibugua bo lomabu miaga dabuni Anduane Homogohondo bi howa ibugua Anduane Homogo Bibahende Hongo Haiheore kagonaga loma mo manda manda biaga.
SIR 50:15 Ibugua iba be mo yamuwa waini iba loma ngago odo loma bu ngelaga. Lomanaga nga baya taraore birago pialu Anduane Homogo Daligaore Bibahende Hongo Haiheore kagoha pelonaga ibugua waini iba loma ogoni loma bu wiagane dabu heago gene dindiha odo baede haga bini.
SIR 50:16 Ani biragola Arono aria bu hearume bi hongo howa ladaga daga bialu tinaga pilipe bigulibi pu lalu biaga hene. Ani biragola wali agalime Anduane Homogo Daligaore kago mitangi bilonaga mo mitangi bia halu bi hongo howa ladagadaga biaga hene.
SIR 50:17 Anidagua biragola wali agali bu karume abaleore dindini bulupalu ibira howa tigua iba gana larago hale hoabi darabi mbira lagane wini.
SIR 50:18 Ani biragola wabuni halu mbira henedagome tinaga ngitaru balu turu holene iba ganaru laragola tinaga iba gana larago hale howabi turubi mbira laga wini.
SIR 50:19 Ani laragola wali agalime Anduane Homogo Daligaore kagohondo olalu Ngode Datagaliwabe dara hagane kagonaga deni howa bi lalu howa lolene winidago lai halu purogo laga wini.
SIR 50:20 Ani bialu Saimono ibugua dalipe howa ibunaga gi Isaraele wali agali bu karu bibahendeha dogola angua halu ibugua Ngode Datagaliwabenaga mini loleore turu howa mini lalu Anduane Homogonaga mo turu holene tiha helo miaga hene.
SIR 50:21 Anidagua biragola wali agali ti dindini halu mende lone bulupalialu Anduane Homogonaga mo turu holene miaga wini.
SIR 50:22 Ai tígua Ngode Datagaliwabe ibu wali agali bibahende aba kagohondo turu holene bi ladaba. Ibugua mbirale timbuni ngaru biaabo haga ka. Ibugua ina ai̱yahanda ina taba hanayangi howa ina dara howa handaya ho hama ibalu henego haabo kagoni. Ani howa ina dara halu inahondo mbirale bayale ngago dege bialu haga ka.
SIR 50:23 Anduane Homogohanda ina mo turu helobi ibugua bamba biaga winidagua ayu Isaraele wali agali bayale holene ibilelobi ina ibuhondo bi laro.
SIR 50:24 Ani bialu ibugua ina dara halu mbirale ko damene inaha ngaru mo wahai helo ina bi laro.
SIR 50:25 Wali agali í̠ hame nalene halu tebira kago ainde tebonego ko ngubiore ka.
SIR 50:26 Halu mbirago ibu hari Sia kagoha ka halu mendego ibu Pilidia hameigini bu kagoha ka. Ani bialu wali agali luluorene luluru Segeme tano ngagoha bu karu ti ka.
SIR 50:27 I̱ Yasu Siraga Eleasa aguane mbira Yarusalemeali kogoni. I̱na wali agalihondo i̱naga mini gigabi manda bayalebi ngago lawai holene hame lo howa mbuga ogo gili biru.
SIR 50:28 Wali agali bi ogo baya hangu manda biyagua tigua manda bayale mo yu holebira.
SIR 50:29 Tigua bi uruni talialu hayagua tinaga biabe bulene ngago biai holenenaga hongo karulape yu holebira. Ti Anduane Homogonaga wáholene ngagoria ibaga bu howa ani holebira.
SIR 51:1 I̱naga Anduane Homogobi i̱naga kinibi í̠ kegohondo i̱ ka̱i̱ lalu Ngode Datagaliwabe howa i̱naga biamogo biaga kegonaga í̠ mo turu halu bi laro.
SIR 51:2 Í̠na i̱ baya hanguore mamage howa handaya ho halu i̱ biamogo bialu hegola i̱ mo ko nahe bayale haabo haru ai uruninaga í̠hondo ka̱i̱ lalu í̠naga mini yaraga haro. Ke̱ holenemebi bi dibudibu lalu bedago hale ho kayu bulenemebi i̱ mo pila nahe harugo ko. Wali agalime i̱ talima ibaga biyagola ina i̱ baya hanguore handaya ho halu i̱ biamogo bialu harigoni.
SIR 51:3 Í̠naga dara holene irane nawini dara halu biamogo bulenemebi í̠naga mini bayale mini lene kegomebi biamogo bialu harigoni. Wali agalime i̱ balu noleore heagola í̠na i̱ biamogo biri. Í̠nime i̱heba mandagi ibagabu hebagola wali agalime i̱ bo wanahebi bahondolene bu wiarume i̱ mo ko nahebi haru.
SIR 51:4 Wali agali tara hearume ira hagua bo delalu i̱ bo wahole bialu hearia í̠na i̱ nahomoliya hapai harigoni.
SIR 51:5 Í̠nime i̱ handaya ho heagola i̱ homeneru dindi nape kogoni. Í̠na i̱ baya hanguore mamage ho haabo hegola waliagali bi ko lalu ke̱ haga bu hearume i̱ mo ko halu kininaga deni i̱ ko biya lalu ke̱ howa godini helole haru nape wahaya.
SIR 51:6 Heneneore i̱ homeneru dalu humbirini andaga abale penego habo laya.
SIR 51:7 Wali agalime i̱ biamogo bialu mo wulene mbira nahe bibahendeme i̱ talima ibaga biai haya. Mbirali nde i̱ biamogo bilo taya bialu hewaria i̱ biamogo bulene mbira naheoreya.
SIR 51:8 Anduane Homogo-o i̱ ayu í̠naga dara holene ngegobi biabe maru ala í̠na bini ngagobi mitangi bialu ko. Wali agali í̠na ti biamogo bibelo í̠ malia ho hearu biamogo bialu waitiginaga giha hearu golope halu haru dai biriya.
SIR 51:9 I̱ abale nahomolenaga i̱na Anduane Homogo Daligaore kago olalu ibuhondo bi larogoni.
SIR 51:10 Horo ko tagira ibirangi ibugua i̱ wanahelobi i̱ wali agali ko bu karunaga hongo bolangua habe nahe kongibi biamogo bule kaware helonaga i̱na Anduane Homogo i̱ abaore kagohondo dugu bu mialu kogoni. I̱na í̠naga mini yaraga holenebi í̠hondo turu holene bi lalu ka̱i̱ lolenebi ha̱lo ha nabi lalu haabo holebero.
SIR 51:11 I̱ bi lalu mo ko holene wiangibi ko bu wiaru i̱ha anda ibulene wiangibi í̠na i̱naga bi larogo hale halu biamogo bialu haga ke.
SIR 51:12 Anduane Homogo í̠na i̱hondo uruni bialu haga kegonaga i̱na í̠naga mini yaraga halu í̠hondo ka̱i̱ lalu haabo holebero.
SIR 51:13 I̱ bamba igiri daliahe hewangi howa dindi tara tara wiaruaru de nahende howa i̱na Anduane Homogo tigatiga hale halu mini giga bulene bayale ngago ngibe lalu hale haru.
SIR 51:14 I̱ ibu andaga porogo puwa i̱ mini gigabi ngibe lalu bi laabo haruligo ai ani bialu haabo halu
SIR 51:15 i̱ni daliahe hewangi yari biagane gauni baya dedaligobi henego hama ibalu ayu agali wahe howa i̱ ira boga biai halu ibiraihe ale kogonigo mini gigabi bayale ogonime i̱naga bu miniha mo turu haabo haga nga. Í̠ igiri emene hewangi howa i̱na ibu talima pialu howa ibunaga hariga wiagoria pialu haru.
SIR 51:16 I̱na ibunaga bi emene hangu hale ho berewagola ibugua i̱ dewaore lawai haya.
SIR 51:17 Anidagua binigome i̱ mini gigabi wulene ngola halu haabo ko. Ani howa Anduane Homogohanda i̱hondo mini gigabi wulene ngiyagonaga ka̱i̱ lalu haabo ko.
SIR 51:18 I̱na ibunaga mini gigabi wulene ngago talima polenaga mini paga halu ibunaga mana bayale tigabi ngago bialu holene taga naholebero.
SIR 51:19 Heneneore larogo i̱na mini gigabi wulene ngago baya hangu yu ndibulo howa mana bayale tigabiru hangu bialu hole hame laru. I̱naga miniha mini bayale gigabi wulene ngago dara ho haabo howa i̱naga gi daligaha dogoladaga halu dugu bialu kogoni.
SIR 51:20 I̱ mini gigabi wulene yamuleore lalu hongo howa mana bayale wiago taluwa bialu howa ai i̱na ayu mo yu kogoni. Mini gigabi wule i̱ pigane ngola halu i̱na mbirale bayaleru lo manda birugome i̱ karulape holebero.
SIR 51:21 I̱na bu miniha hameore timbuni lowa mini gigabi wulene taya bialu henego ainde mini bayale ogoni mo yu ko.
SIR 51:22 Anduane Homogohanda i̱hondo mbirale bayale mbira i̱ mo turu halu bameore nginigo ogoni bi bayale latagi holene ngiya. Ani ngiyagome i̱naga turu holene ngogo bibahende latagi hai holebero.
SIR 51:23 Wali agali manda nabi bu kemiru tí iha mini bayale gigabi ngago manda bule i̱ koria kaware ibidaba.
SIR 51:24 Irane aginaga tigua mbirale uruni nayi kemibe. Ani bialu irane aginaga ibu olalu dugu bialu kemibe.
SIR 51:25 I̱na tíhondo langialu ogodagua laru. Yolo buleneha yagi wahalu mbirale ogoni bame yamidaba larugoni ndobe.
SIR 51:26 Mini gigabi wulenaga tí kaundiaha taya bima polene ndo nga. Ibunaga genda ngago yamialu tínaga payani mo yu howa manda bayale ngago mo yu halimu.
SIR 51:27 Ainde de handadaba ina bu miniha mo palia holene biabe erekuibi bialu ndo mo yini.
SIR 51:28 Ai tígua mini gigabi wulene yolo birimiyagua nde mbirale bayale tara tara ngaru mo yu dai buleberemi.
SIR 51:29 Tígua Anduane Homogonaga dara holene ngagohondo turu halu ibuhondo taga nahe howa ibunaga mini yaraga holene taga nahe halimulonaga i̱na tínaga bi la haro.
SIR 51:30 Ai biabe bulene ngida. Ngode Datagaliwabehanda horo yolo mulene pongo winigo tagira ibiragola tí yolo bayale ngaru mule ayu abale bigi bialu biabe biala harimidago bumaro bilimu, lalu Siragahanda lene.
BAR 1:1 Mbuga ogo Baruguhanda gili bini. Barugu ibu Masea aguane howa Neria igini hene. Ani bialu ibu hameigini Sedegaiabi Hasadiabi Hiligiabi uruni aria hene.
BAR 1:2 Ibugua Babilonoha howa ege mbiru horo kane layagola Babilononaga kini heagome Yarusaleme bo gialo wahai halu wali agali garabaya bu yalu Babilono pu henego mali dauni hayagola mbuga ogo gili bini.
BAR 1:3 Baruguhanda mbuga ogo Yudanaga Kini Yahoiagimi igini Yahoiagininaga deni howa daga lene. Ani bialu ibugua mbuga ogoni Babilono wali agali dewaore iba Sudu angeni bu hearu bibahende deni howa daga lene. Wali agali Baruguhanda beba daga layago hale hole ibinidaru agali mini lene timbuni bu hearubi kini damene bu heneru waneigini hearubi agali timbuni mini lene hearubi bi ogoni hale hole íbu ngoai ho hene. Wali agali dunini bu hearubi dunini ndo bame hene hearubi bibahende bi ogoni hale hole íbu ngoai hene.
BAR 1:5 Barugu ibugua mbuga ogoni gili bialu heagola wali agalime dugu timbuni bialu tomo nane waho halu tigua Anduane Homogohondo bi lalu hene.
BAR 1:6 Ani bialu howa tigua muni tinime mule karulape hame leadagua
BAR 1:7 ilomogo bialu tigua muni uruni loma binigo mo miaga agali haguane Yahoiagimi hearia Yarusaleme yalu pelene. Yahoiagimi ibu Hiligia igini howa Salumu aguane hene. Muni uruni maru agali loma binigo mo miaga maru hearu talebu mialu maru nde wali agali maru Yahoiagimi heba mandagi haga Yarusalemeni hearuhondo migi bini.
BAR 1:8 Ege mini Sibananaga horo pini (10) hayagola Baruguhanda gabo mbiraleru Ngode Datagaliwabenaga andaha Yarusalemeni wiaru abale Babilono ami agalime mo pagebu yalu pene biaru lone yu dai bialu Yuda dindiha daibilene. Gabo mbirale uruni abale Yudanaga kini Yosaia igini Sedegaiahanda wabidaba layagola tigua silibame wabu wini.
BAR 1:9 Tigua gabo uruni Babilononaga Kini Nebugadenesahanda Yudanaga Kini Yahoiagini Yarusalemeni hearia minu yalu agali haguane hearubi gabumane haru haga hearubi agali timbuni hearubi wali agali damene bu hearubi wali agali tara tara bu hearubi bibahende garabaya haru halu Babilono penego ogoni peaha mani gabo be uruni wabu wini.
BAR 1:10 Wali agali tigua beba gili buwa Yarusaleme pelalu howa lalu, Iname muni tíhondo ibilaramago tígua muni urunime lomabu delolene ale nogo irani dai helo loma bo delolenebi loma bame mo turu halu ko domolenenaga miagaru ale yolo bialu ira hagua nga bilo loma delolene widi lomabu mulenerubi yolo bigi bilimulo wia harama. Tígua uruni bibahende yolo buwa Anduane Homogo inanaga Ngode Datagaliwabe kagonaga lomabu delaga dabu kagoria wu haealadaga helalimu.
BAR 1:11 Ani bialu tígua Babilononaga Kini Nebugadenesabi ibu igini Belesasa kagobi libu luore howa mali dewaore helonaga Ngode Datagaliwabe kagohondo bi la halimu.
BAR 1:12 Anduane Homogohanda ina baya hangu mo hongo helobi haru kagola ibaga bu holoma̱yabi ibugua ina biamogo bilo tígua inanaga bi la halimu. Ainde Nebugadenesabi ibu igini Belesasabi libugua ina handaya ho howa haru kagola iname libunaga mini yaraga ho haabo halu homalu waholeberema. Ani beremagola libunaga miniha ina baba turu ho holebira.
BAR 1:13 Ainde iname mana ko birimagonaga ibugua inahondo keba ho kago wahalu ina dara helo Anduane Homogohondo inanaga bi lahalimu.
BAR 1:14 Iname bi mbugani gili bu wia haramago handalu horo timbuni Ngode Datagaliwabehondo bi loleneru tagira ibirangi inanaga ko ngaru ibunaga andaha puwa latagi hai halimu, lene.
BAR 1:15 Beba ogoniha bi maru ladege bialu ogodagua leda. Ainde tígua Anduane Homogohondo bi ogodagua lalimu. Ngode Datagaliwabe ibu inanaga Anduane Homogoore ka. Ibu tigabiore ka. Ani kagonaga deni ina taga timbuniore ho kemagoni. Ina Yudia wali agali bibahendebi Yarusaleme wali agalibi
BAR 1:16 kini kemarubi agali haguane bu kemarubi loma binigo mo miaga agali kemarubi Anduane Homogonaga bi mana latagi halu mbiwia haga kemarubi inanaga mamali henerubi bibahendeore taga hai haramagoni.
BAR 1:17 Irane iname mana ko bialu
BAR 1:18 Anduane Homogonaga bi mo waharima. Iname ibunaga bi hale nahe howa ibunaga mana lo wini wiagobi baya hangu talia nabi harima.
BAR 1:19 Bambaore hama ibinigoha howa áyu kemagoni iname Anduane Homogo kago mo erembira mialu harima. Mana ogoni Anduane Homogo inanaga Ngode Datagaliwabehanda ina Iyibi dindiha howa haru tagira ibiyangi howa bialu henego haabo kema.
BAR 1:20 Ainde Bambaore Ngode Datagaliwabehanda inanaga mamaliru Iyibi dindiha howa haru tagira ibalu dindi bayale mbira tomo baya nogo andu ibane dewawibi mone taranaga ibane dewawibi wiagoha haru íbu helene. Ani bialu ibugua bi hongohe mbira agali ibunaga biabe bia haga Mosesenaga ne harigaha howa lalu iname ibu andaneha naharimayagua ibugua ina pani ngialu mo ko holebero, lalu bi hongoheore lene. Anidagua lenego ainde áyu iname genda Anduane Homogohanda keba halu mo ngiyago yu kema.
BAR 1:21 Anduane Homogo Ngode Datagaliwabehanda agali ibunaga bi mana latagi halu mbiwia haga marume ibunaga bi ina langule yalu pu lene ibugu biyaru iname hale nahe mine halu bi mo wahalu haabo harima. Ina hangu hangu hame wimagoha pupebe bialu hariga ko wiagoha pialu harima. Ani puwa iname mbirale bi pupu wulenaga gime wabini wiaruhondo bi pupu wule pialu harimago Anduane Homogonaga deni mana ko bialu harima.
BAR 2:1 Anidagua bialu hemagola Anduane Homogohanda ko bialu harimiyagua pani nalimulo ngule lenego henene tagira pelaya. Ibugua bi ogoni Isaraele wali agalinaga agali haguane hearuhondobi kini hearuhondobi agali timbuni bu hearuhondobi Isaraele wali agali bu hearuhondobi Yuda wali agaliruhondobi bi lo wini.
BAR 2:2 Mosesenaga bi mana lowini ngagome ledadaguaore ina genda timbuniore mo ya henego kema. Ainde genda timbuni Yarusalemeha anda ibiyago timbuniore dindi maruha genda ogonibi naibini.
BAR 2:3 Ina mo ko halu inanenaga waneiginirunaga tingini inaneme narimagoni ndobe.
BAR 2:4 Anduane Homogohanda ina bo taliatagi howa wali agali hameigini tara ina baba handa a̱i̱na̱i̱ kaware howa ina mege bialu ina ko ngubiore tara handale haga bu hearunaga hongo andaneha heledagoni.
BAR 2:5 Iname inanaga Anduane Homogo kagohondo mana ko bialu ibunaga bi hale nahe harima. Anidagua birimagonaga Anduane Homogohanda ina mo heyaha ndo ina bopeore henego kema.
BAR 2:6 Anduane Homogo inanaga Ngode Datagaliwabe ibu bayale tigabiore kago helowa inabi inanaga mamali henedaru tibi bibahendeore mana ko inane bialu harimagonaga genda yu kemagoni.
BAR 2:7 Anduane Homogo ibunime bule lalu lo winidaguaore bialu ina pani nolene mo ngiya.
BAR 2:8 Anigo ainde iname mini beregedalu ibuni karia dai bialu inanaga mini ko wu harimadaru wahai halu dai buluma̱ya ina mo hongo habe lolene wiago nale harima.
BAR 2:9 Ina ibunaga bi layago hale naheore howa ina ibunaga mana lo ngagobi talia nabi harima. Anidagua dege Ngode Datagaliwabehanda lalu, Tígua mana baya bulene ngago nabi harimiyagua tíha mo ko holene ibilolebero, lalu bi lo wiyago ngola helo ibugua uruni inaha ibilaya.
BAR 2:11 Ngode Datagaliwabe í̠ore Anduane Homogo Isaraele wali agalinaga Ngode Datagaliwabeore kegoni. Í̠naga hongo timbuniore ngegomebi í̠naga biabe timbuniore bialu agalime nabiaganeale birigomebi í̠naga wali agali Iyibi dindi wahalu haru tagira pialu oali haru ibirigoni. Í̠naga hongo timbuni mo walia harigome í̠naga mini timbuniore mini lene henego áyu haabo ke.
BAR 2:12 Anduane Homogo inanaga Ngode Datagaliwabe-o iname mana ko timbuni bialu harima. Ina wali agali ko kema. Iname í̠naga mana lo wini ngaru aria mbiraore hangubi mbira talialu nabiore harima.
BAR 2:13 Ainde ina baba keba ho haabo holeni nahabe. Í̠nime ina dindi tara tara wiaruha pugu pugu buluma̱ya bo taliatogo larigola ainde ina dege dombeneha mbira mbira hangu haga haga bidemagoni ndobe.
BAR 2:14 Anduane Homogo-o í̠naga mini timbuni mini leneore kego manda bialu ina biamogo bibe. Ainde agali ina dindi ogoha garabaya bu yalu ibiyaru tibi nde áyu ina baba turu haga bu helo helabe larama.
BAR 2:15 Wali agali tara tara karume í̠ inanaga Ngode Datagaliwabeore howa ina Isaraele wali agali í̠ninaga helo í̠nime dababagiho heleneoreda lo manda biai helo ani bibe larama.
BAR 2:16 Anduane Homogo í̠ni dahuliya andagaha howa de handadali halu ina de handalu mitangi habe larama. Inanaga bi laramagoni hale habe.
BAR 2:17 Í̠naga dengala halu ina de handa. Ai wali agali homalu humbirini andagaha pu karu tigua bu he̱ lolene lone mibe nahe kago ai tigua í̠hondo bi turubi langulenebi í̠naga mana tigabi ngeru latagi holenebi nakarulapeore.
BAR 2:18 Wali agali homa nabi karume dege lolene karulape. Ti tandaga timbuni nalu howabi ti bo hengeda hene hongo naheore howabi ti hina garime tungulo mibehe de mborere bu howabi harugo lowa tigua í̠ni Anduane Homogoore kegonaga mini yaraga halu mana bayaleore í̠na biaga ngego latagi halu holebira.
BAR 2:19 Anduane Homogo inanaga Ngode Datagaliwabe-o í̠na inaore dara halu biamogo bibelonaga bi lalu kema. Ina mamalirumebi inanaga kinirumebi mana bayale bialu henego mitangi bibe lalu ndo larama.
BAR 2:20 Ainde bamba í̠naga bi mana latagi halu mbiwia haga hearuhondo bi lamirigola tigua latagi halu hene. Tigua lalu
BAR 2:21 Anduane Homogohanda lalu, Tí Babilononaga kini kago andaneha halu ibugua tí handaya ho helalimu. Ani howa dindi ina tínaga mamaliruhondo mirugoha ema nabi hendore halimu.
BAR 2:22 Anigo ainde tígua bi i̱na larogo mo wahowa Babilononaga kini kago andaneha holene manga harimiyagua
BAR 2:23 nde Yuda dindiha tano bu ngaru bibahendehabi Yarusaleme tano ngagohabi wali agali lenego mbira naholebiraore. Wali agalinaga bu miniha turu ho hagabi wali agali dabu bialu howa tomo bayaleru nalu turu haga bu hagane ngarubi bibahende mo wahai halu ereba helolebero. Ani berogola dindi ogo bibahendeha labu dindi hangu wulebira. Dindi ogoha dabulu labu wialu wali agali lenego mbira naholebira.
BAR 2:24 Agali Anduane Homogonaga bi mana latagi halu mbiwia haga bu hearume bi ogonidagua layagoyu iname í̠naga bi larigo mo wahalu Babilononaga kini kago andaneha holene hame nale harima. Anidagua birimago hondowa í̠na bi hongohe agali í̠naga biabe biaga biarunaga ne harigaha howa bule lalu latagi harigo biriya. Í̠na lalu, Waitigime ibalu homali bu karuha puwa inanaga kini homenerunaga kuni ngarubi ina mamalirunaga kuni ngarubi bibahende
BAR 2:25 dindini ba̱i̱na̱i̱ bima polebira lariya. Ai wali agali kuni áyu dindiha wiaruni nime dalu do gialalu mbiraga dindi guni ibira howa wiadambi halu biaga nga. Agali uruni tandaga timbuniore nalu howa homaga bini. Hina gari halu homenebi waitigime bayagola homenebi warago ko tararu ibalu bo homolenebi nga.
BAR 2:26 Isaraele wali agalibi Yuda wali agalibi bibahendeme ko bialu heagome í̠naga anda í̠naga wali agali ti í̠ni kegoria kaware ibilonaga bu helarigo bo gialahole bu ngelo waharigoni áyu wiaabo kagoni ndobe.
BAR 2:27 Anigo Anduane Homogo-o í̠naga dara holenewigo inahondo mo walia halu inahondo hendore dege bialu harigoni.
BAR 2:28 Abale agali í̠naga biabe bia haga Mosesehondo latagi ha lari. Bi ogoni í̠na ibuhondo Isaraele wali agalinaga deni howa í̠naga bi mana gili bibe lalu lamiringi howa latagi hene. Í̠nime latagi halu lalu,
BAR 2:29 Áyu tí wali agali dewaore padamigoni. Anigo tígua i̱naga bi larogo hale naharimiyagua nde i̱na tí bo haeala togo lalu dindi tara tara ngaruha purogo lelolebero. Ani berogola wali agali emene daga lene dege ona holeberemi.
BAR 2:30 Ai tíore wali agali mine hagaore bu kemigoni howa i̱naga bi larogo hale naholeberemida lo manda bido. Anigo tí dindi mendeyagi garabaya pu harimiyagua nde tígua mini beregedo holeberemi.
BAR 2:31 Ani pu kemigola i̱ Anduane Homogo tínaga Ngode Datagaliwabeore kogo i̱na tínaga mini dungula halu hale paiho kemigo dugua halu berogola tígua i̱naga bi baya hanguore hale holeberemi.
BAR 2:32 Tí dindi kaundia ogoniha pu howa tígua i̱ lone mitangi ho dai bialu i̱naga mini timbuni mini yaraga hene ngago yaraga halu holeberemi.
BAR 2:33 Tíha mini ko mine holene ngago wahai halu mana ko biaga ngemigo wahalu buleberemigo irane tínaga mamaliru tigua Anduane Homogonaga bi mana lo wini ngago mo wahalu pialu hemiria bini ngaru manda biadai buleberemi.
BAR 2:34 Ani manda bu kemigola i̱na tí lone haru dai bialu tíninaga dindi i̱na tí ngule lalu tínaga mamali Abarahamahondobi Aisagahondobi Yagabahondobi bi lo winigoria halimulo lone haru dai bulebero. Ani berogola dindi ogoni tínaga dindiore wialu tíni ogoniha howa wali agali emene áyu kadagua ndo palia timbu holeberemi. Ani howa mani wali agali lone palia emene naholebira.
BAR 2:35 Ani bialu i̱na tí baba habo nalolene bi gahenge mbira wiaabobo bu ngelonaga lo wulebero. Ani bialu i̱ tínaga Ngode Datagaliwabe kogola tí i̱naga wali agali holeberemi. Ani bialu Isaraele wali agali tí dindi i̱na tí ngirugoria kemiru lone bo taliatagi naholebero, lene.
BAR 3:1 Isaraele wali agalinaga Ngode Datagaliwabe-o í̠ Anduane Homogo Hongo Haiheore kegoni. Inanaga miniha genda tara tara yu howa í̠hondo olalu kema.
BAR 3:2 Anduane Homogo-o iname í̠naga deni howa mana ko dewaore bialu harimago ainde í̠na ina dara habe.
BAR 3:3 Í̠ kiniore howa haabo haga kegola ina wali agali homalu ereba hagane kemagoni ndobe.
BAR 3:4 Anduane Homogo Hongo Haiheore howa í̠ Isaraele wali agalinaga Ngode Datagaliwabe kego ina wali agali ko biaga bu heneru aguane kemarume í̠hondo bi lalu kemago hale habe. Tigua i̱naga bi mo wahalu penegome tinaga genda iname yu aribia ho kemagoni.
BAR 3:5 Ainde mana ko inanaga mamalirume bialu hene ngarunaga mo wiaho haabo nahabe. Í̠ninaga mini yaraga hene timbuni kegobi í̠naga hongo timbuniore ngegobi mitangi bibe.
BAR 3:6 Í̠ inanaga Ngode Datagaliwabebi Anduane Homogobi í̠ hanguore kego manda bialu mo yaraga halu holeberema.
BAR 3:7 Iname í̠ olalu holoma̱yanaga í̠nime inahondo mo gi halu haga ke. Ai ina mamalirunaga mana ko biniru wahai ho kemagome ainde garabaya andaha kemago howa í̠naga mini yaraga halu holeberema.
BAR 3:8 Ainde í̠na de handa dali halu wali agali darabi garabaya bu kemaru nde de handabe. Wali agali tara dindi taraha bu hearume hondo mege bialu tigua inahondo bi ko ngaru laedede bialu helonaga ina dindi taraha pelariya. Anduane Homogo inanaga Ngode Datagaliwabe-o inanaga mamali tigua í̠hondo mine howa í̠ erembira ngialu piyagome ko timbuni biya. Anidagua binigome ko uruni inaha wua dambi hai kagola ina wali agali ko biaga mini leneore kemagoni ndobe.
BAR 3:9 Isaraele wali agali bu kemiru tígua mana lo wini ngagome bi ledago baya hangu hale hadaba. Mana lo ngagoha howa bi laragome tí haabo holene hariga ngagoria haru halu polebira. Ani bulenaga tígua bi larago baya hanguore hale halu lo manda bialu halimu.
BAR 3:10 Isaraele wali agali tí dindi tara waitigi ti dalu ngagoha íbu howa hodagua hene kemigo irane agibe.
BAR 3:11 Tí Ngode Datagaliwabenaga deni wali agali ko dodohe homene ngaligobi kemigo irane agibe.
BAR 3:12 Tígua Ngode Datagaliwabe kago wahalu pirimigoni irane tíha mini gigabi wulenebi manda bayale bulenebi nawi kemigome pirimi.
BAR 3:13 Tígua ibunaga hariga ngagoria ibagabu kemile nde tínaga holene baya gibiore ngagoria kemile.
BAR 3:14 Tígua hongo holene tene ngagobi manda bayale bulene ngagobi mini bayale ngagobi mo yu holenaga hongo howa taya bilimu. Anidagua beremigola tí dindini luore holenebi hariga mo walia holene halebi ngialu kagola tinaga holene baya gibiore ngagoria holeberemi.
BAR 3:15 Tí henedagoha howa mini gigabi bayale wu holene nga ái í̠na handa walia haribe. Mini gigabi wulene anda timbunioreha ngago anda ogoniha mbirali ái anda pirimibe.
BAR 3:16 Agali hariga uruni pu manda bialu haga heneru tini áyu nahe. Agali hariga uruni pu manda bialu henedaru agali dindi mbiranaga haguane henerubi agali maru gabua tara tararubi ega irabuha minana biru ngarubi uruni baba gini bialu talima ibaga bialu haga henerubi agali maru ngolo silibaru dewaore wule hamelo howa biabe erekuibiore bialu ilu wia dege bialu haga henerubi
BAR 3:18 agali marume biabe ndelaheore bialu silibame mbirale yári bulene ale tara tara wabiaga bu henerubi ti pialu hene.
BAR 3:19 Ai agali ala hene uruni ti agoha yagi pu kabe. Ainde ti homeneru dalu humbirini andagaha piyagola maru mani ho aribia halu homayarunaga henge karulo ho aribia haya.
BAR 3:20 Uruni ti halu homeaha wali agali daliahe maru dindini ho aribia henego ainde tiguabi mini gigabi wulene hariga ngago handa walia nahe dege howa tigua hariga ogoriani kaware nape hene.
BAR 3:21 Ani bialu ti waneiginimebi pu manda bialu henego pobe nahe dege hene.
BAR 3:22 Kenanalimebi Idomoali bu heneru tiguabi mini gigabi wulene taya bialu henego ainde tiguabi nakarulape dege hene.
BAR 3:23 Agali Merane dindiha biyinaya biaga hearumebi Tema dindiha hearumebi pu manda bialu henego tiguabi mini gigabi wulene ogoni handa walia nahe hene. Ani bialu agali bi te laga bu henerumebi manda taya bialu haga bu henerumebi mbira handa walia holene nakarulape dege hene.
BAR 3:24 Isaraele wali agaliru-o baya hangu hale haremine. Ainde Ngode Datagaliwabe ibunaga dindi ngago wu maro nabiore wuyu pu dege bialu timbuniore nga ndobe.
BAR 3:25 Ibu dalu ogoni wu maro nabiagabi mbiralime dindi ogoni luninaga manda bulenebi arane yangalenagabi mbiralime ogobi nga lalu manda buwa latagi habe naheore nga.
BAR 3:26 Dindi ogoni bambaore agali wai biagane mana mandabi howa agaliha tabetabe nabi timbuniru taba heneneyago dindi ogoniha taba henene.
BAR 3:27 Anigo Ngode Datagaliwabehanda agali uruni ti ibunaga wali agali helo daba nabini. Ani bialu ibugua tihondo mini gigabi wulenenaga hariga mo walia nahe hene.
BAR 3:28 Wali agali uruni tiha mini bayale wulenebi manda bayalebi tubagi ho howa abale homai halu biba hene.
BAR 3:29 Agali mbirame mini gigabi wulene ogoni hari beraliba kagoha irigi halu puwa taya bu yalu dai bini ndo.
BAR 3:30 Agali mbirame iba solowara timbuni bedagoha iba sibini biralu ibaga biai halu mini gigabi wiaria handa walia halu ngolo baya yolo dewaoreme mulene ngagome yolo bu yalu dai bini ndo nga.
BAR 3:31 Mbirali hangume pialu mini gigabi bayale taya bima puwa ibu ngagoria ngola halubi ibu kagoha polenaga hariga handa waliabi nahe dege hene.
BAR 3:32 Mini gigabi wulene ibu nde mbiraorego Ngode Datagaliwabela haabo hagane nga. Ibugua ibuninaga manda bayale ngagoha ngaria handa walia hagane nga. Ibugua dindi ogo ani wiaabo helonaga wabialu ema bialu piaga tara tararubi dindini ibagabu helo wabia dege bini.
BAR 3:33 Ibugua wá holene bibahendeha hame helaga ka. Ani bialu wá holene ibuni karia abale dai bia laragola hale haga.
BAR 3:34 Ibugua yakundi bu karu olaragola tigua abaleore hale halu ladai biaga ka. Yakundi tigua tini haga ngagoria haabo halu tigua tini wabu helaga Ngode Datagaliwabe kagonaga mini yaraga holene turu howa wá ha amunana bialu haga ka.
BAR 3:36 Ogoni ibu inanaga Ngode Datagaliwabe kago ibu mendealila nakarulapeore ka.
BAR 3:37 Mini gigabi bayalenaga hariga ibuni hanguore taya biaga. Ani bialu ibunaga wali agali ibunaga biabe bia haga ibunime gubalini ho haga Isaraele bu karuhondo manda bayale mo mini
BAR 3:38 Horo ogoningi mini gigabi wulene ogoni ibu dindini ibalu ina heba mandagi ka.
BAR 4:1 Mini gigabi wulene mbuga Ngode Datagaliwabenaga mana lowini ngagoha ngago mana ogoni wiaho wiaabobo bu wulebira. Mbirali bi mana ogoni yu kago ibu holene yu holebira. Anigo mbirali mana lo winigo waho kago ibu homolebira.
BAR 4:2 Isaraele bu kemiru tígua mini gigabi wulene taya bialu baya hangu minu yania halimu. Tí hariga wá holene ogoniha yagi pialu halimu.
BAR 4:3 Tígua inanaga mini bayale ka lolene ogoni yu wahalu wali agali tara bu karume mo yu pelo wanahalimu.
BAR 4:4 Ainde Ngode Datagaliwabe ibu hame laganego ogoale nga lalu ina Isaraele wali agalime manda bu hai kemago ainde iname turu holene nga.
BAR 4:5 I̱naga wali agali bu kemiru tí hongo ho holene nga. Tígua mini Isaraele yu kemigo howa tí gi nahe halimu.
BAR 4:6 Tigua tí wali agali Anduane Homogo manda nabiaga hearume tí bo wa hai helonaga ndo pelaya. Tínime Ngode Datagaliwabe mo keba halu harimigonaga Anduane Homogo ibunime tínaga waitigi bu heagoha tí minu ya haya.
BAR 4:7 Ngode Datagaliwabe ibunime tí wabiniore heago helalu puwa tígua mbirale dama mitangi bialu bi pupu wiaga gime wabini wiaruhondo bi pupu wialu lomaru bu mialu Ngode Datagaliwabehondo ndo bu mialu hemigola ibugua tíhondo keba helo mo keba harimi.
BAR 4:8 Tí wene galiore hemingi baya hanguore handaya ho hene Ngode Datagaliwabe ibuni haluhe haabo haga heago embeda halu pirimi. Wali ai̱yame waneigini handaya ho howa haru biragadagua Yarusaleme ibugua tí baya hangu handaya ho birayagoyu tígua Yarusaleme mo genda harimi.
BAR 4:9 Ngode Datagaliwabehanda tí baba keba halu tí pani mo ngiyago Yarusaleme ibu de hondowa ibugua tano maru kaware wiaruhondo lamialu lalu, Tí de handadaba. Ai Ngode Datagaliwabehanda genda timbuniore i̱ha ibiledagoni ndobe.
BAR 4:10 Ngode Datagaliwabe Haluhe Haabo Haga kagome i̱ waneigini dindi taraha garabaya bu yalu piyago de handaru.
BAR 4:11 I̱naga waneiginiru handaya ho harungi howa i̱na tihondo turu timbuni ho harugo ainde tigua i̱ yu wahalu piyangi ti dara timbuni howa dugu bialu haru.
BAR 4:12 Mbiralime i̱ha genda ngago hondowa turu hayagua nde mana nakarulape bulebira. I̱ wali dalo agalini homene ibu handaya ho holene mbirali nahe hagagobi kogoni. I̱ waneiginime Anduane Homogonaga bi mana bayale lo wiago mo wahalu mana ko bima piyagola tinaga ko ogonime i̱ bameore ege to̱le̱ hangu ngaligobi kogoni.
BAR 4:13 Tigua Ngode Datagaliwabenaga bi mana lo wini wiaru mo wahai halu tigua dindini heangi howa talialu holene manga haya. Ti Ngode Datagaliwabehanda mana bayale tigabi bialu holene ngagoria haru howa mo tiga bialu helo hame nalaya.
BAR 4:14 Tano kaware ngemiru-o tí ibalu i̱ waneiginiru mitangi hami̱ya ibidaba. Ngode Datagaliwabe Haluhe kago ibugua i̱ waneigini uruni garabaya piai helaya.
BAR 4:15 Ibugua agali hameigini tara dindi taraha hearu ibilo olayiya. Agali uruni ti hameigini ko ngubi taraore howa tinaga bi tara hale nahene lagaya. Tigua wali agali waheore bedarunaga mini mo yaraga nahagabi waneigini bu karu dara nahagabi heneya.
BAR 4:16 Ainde agali tara urunime ibuwa i̱naga waneigini bu hearu haru halu piai haya. I̱ waneigini uruni hame ledago lelowa ainde i̱ni hanguore bedogoni.
BAR 4:17 I̱naga waneigini áyu garabaya kemiru i̱na tí biamogo bibe naheore kogoni.
BAR 4:18 Mbiraore hangu tí biamogo bibehe kago ibu tígua mana ko bialu hemiria tí pani ngialu ibugua tí waitigi giha minu miyago ibuni hangu karulape ka.
BAR 4:19 I̱naga waneiginiru-o i̱ nde i̱ni hanguore bedogo tí nde tíninaga biabe wiyadaru bima pudaba.
BAR 4:20 I̱na i̱naga aga baya horo debenengi karulo biraga wirugo golo wahai halu aga ko dara ho howa karulagane ko wiaru mo karulowa walime dugu bialu biragagobi bedogoni. I̱na Ngode Datagaliwabe Haluhe Haabo Haga kagohondo olalu bedogo ainde ani olalu haabo halu i̱ni homalu waholebero.
BAR 4:21 I̱naga waneiginiru-o tígua tíninaga miniha mo hongo ho howa Ngode Datagaliwabehanda tí biamogo bilonaga ibuhondo olalu halimu. Ibugua tí waitiginaga gi hongohe kagoha howa minu yu dai bulebira.
BAR 4:22 Ainde Ngode Datagaliwabe Haluhe Haabo Haga kago ibugua tí garabaya kemigo golope holebira lo manda bialu ibuhondo mini mbiraore wu bedo. Ngode Datagaliwabe baya buruguleore kago ibugua tí haru dai biaga ka. Ibugua tí lone dara harangi ogonidagua biragome i̱ lone mo turu holebira.
BAR 4:23 Tí minu garabaya bu yalu piyangi i̱na tí dara halu dugu bialu biraru. Anigo ainde Ngode Datagaliwabehanda tí lone haru halu dai bulebirago ani haru dai birangi i̱na turu haabobo bu holebero.
BAR 4:24 Ai tí garabaya bu yalu piyagola tano kaware ngaru ti de handai hayago ai anidagua dege Ngode Datagaliwabe Haluhe Haabo Haga kago ibuni wá taraore holene timbuniorebi ibunaga hongo taraore holenebi heba ibalu tí biamogo birago de hondolebira.
BAR 4:25 I̱ waneigini bu kemaru tíguaore Ngode Datagaliwabehanda genda tandaga timbuni mo ngidago hongo ho howa baya hangu yu halimu. Ani kemigola ibugua tí ala waitigi howa tí bama talima ibaga bialu haga hayaru áyu dege uruni ti mo ko hai henego bibahende ibalu tínaga giha ya harane hondoleberemi.
BAR 4:26 Tí i̱ waneigini kemiru-o i̱na tíhondo gubalini ho haabo harugoni. Anigo waitigi bu hearume tí hariga ko wiagoha pialu halimulo mo pela halu tí minu yu piai halu nogo sibi igini kago minu pagebu yu piagadagua piya.
BAR 4:27 Waneiginiru-o tígua heyu howa Ngode Datagaliwabehondo biamogo bia lalu bi hongo howa lalu halimu. Ibugua tíhondo pani ngialu minu ba bayagonigoyu ainde ibugua tí embedaore halu wanaheore ka.
BAR 4:28 Ala bamba howa tígua Ngode Datagaliwabe yu wahalu pole hongo taraore ho haga harimigo ainde áyu howa tínaga mini beregedalu hongo howa hado pongo bialu ibuni kago lone taya bialu halimu.
BAR 4:29 Agali tí genda uruni yu halimulo mo ya haga biago ibugua tí lone biamogo bialu turu ho haabobo helolebira, lene.
BAR 4:30 Yarusaleme-o Ngode Datagaliwabe ibunime í̠ mini mo yaraga hene ngelalu í̠naga miniha mo palia holene karulo habelo mo yu ibulebira.
BAR 4:31 Wali agali í̠ pilarigola turu ho howa í̠ genda mo ngiaga bu karu tini pani nalu mo ko holebira.
BAR 4:32 Dindi í̠naga waneiginiru garabaya pu hayago ibuni mo ko halu bo haealahole bini wulebira. I̱ waneiginiru genda miaga Babilono ngago ibuni gendame bope holebira.
BAR 4:33 Bamba í̠ pilalu mo ko haringi ibugua iba ganaru lalu turu ho hayago ainde áyu ibunibi í̠ mo ko hayadagua mo ko holebira.
BAR 4:34 I̱na tinaga mege bialu bi layaru mo beregedalu dara holene bi lolene ngago lo aribia helalu tinaga wali agali bu karuni bo taliatogo lai helalu mine hagane mana ngago wiamaro bilolebero.
BAR 4:35 I̱ni Ngode Datagaliwabe Haluhe Haabo Haga kogo i̱na ira dene bape halu irame dai helolebero. Anidagua berogola ira ogoni horo dewaore daho wiaabo holebira. Ibu mo ko halu bo gialo wahai halu bo labu hai hene ngagoria dama ko bu karu ti ogoniha ho gengeda tago bu holebira.
BAR 4:36 Yarusaleme-o amu ni tagira ibiragoha yagi handa dai bialu Ngode Datagaliwabehanda turu holene mo yalu ibulene wiyago yalu ibirago de handa.
BAR 4:37 Ainde í̠ waneigini dindi kaundiaha minu yu piyaru amu ibirago de handa. Ai Ngode Datagaliwabe baya burugule kagome ti olalu amu ni tagira ibiragoha wahalu dai bialu ni paliragohabi wahalu dai bialu dindi hanuni íbu ngoaiho hadaba lole olaya. Áyu tigua turu halu Ngode Datagaliwabehondo turu ho kagoni.
BAR 5:1 Yarusaleme í̠naga aga dara halu dugu bialu biruwa karulagane ko biago golo wahalu aga gahenge Ngode Datagaliwabenaga wá taraore holenebi hongo tara holenebi ngago karulabe.
BAR 5:2 Ngode Datagaliwabenaga mana tigabi ngagome í̠ni mo yári bia halu bu dambi habe. Ani bialu kininaga yári ngago í̠naga haguaneni mo karu labe. Ngode Datagaliwabe Haluhe Haabo Haga kago ibugua í̠naga mini daliga mo yaraga howa mini lene helolebira.
BAR 5:3 Ani bialu Ngode Datagaliwabehanda í̠naga yári baya karulo kego wali agali dindi bibahende ngagoha bu karu de handai helo mo walia holebira.
BAR 5:4 Ibugua í̠naga mini gahenge wialu í̠naga mini ogoniore wiaho wiaabobo bu wulebira. Í̠naga mini gahenge ogoni ogodagua, Mana bayale tigabi bulene ngagome í̠naga mini mo palia holene mo karulo haabobo bu i̱ni andaneha holene mana ngadagua holenebi ogoni labome í̠ mini lene mo helaga nga, lene.
BAR 5:5 Yarusaleme í̠ abale heya. Hari nene ngagoria abale heyu habe. Ani howa í̠ waneigini biaru de handape halu handa. Ngode Datagaliwabehanda ti dindi abene amu ni tagira ibiragoha yagi howabi ni paliragoha yagi howabi bibahende Ngode Datagaliwabe baya burugule kagome bibahende olo mogo biai halu ibu ngoai ho heledagoni ndobe. Ngode Datagaliwabehanda ti mitangi ho howa biamogo biyagonaga ti turu ho ka.
BAR 5:6 Yarusaleme í̠naga waneigini biaru tigua í̠ yu wahayagola waitigi bu hearu ibalu ti haru halu piai haya. Anidagua biyago ainde áyu Ngode Datagaliwabehanda í̠ni bedegoria haru halu dai biai ho heleda. Wali agalime kini yalu piagadagua wali agali uruni Ngode Datagaliwabehanda yu íbu heleda.
BAR 5:7 Ngode Datagaliwabehanda hari nene timbuni wedarubi hari emene wedarubi bibahende dindini podope hai halu dindi ulini ngaru mo dondolope helalu bidaba lalu mana hongohe mida. Ani bidagola dindi tigabibi dondolope ngagoria Isaraele wali agali ti Ngode Datagaliwabenaga wá taraorebi hongo timbunibi heba ibulebira.
BAR 5:8 Ngode Datagaliwabehanda bi laragola ira bayale nga bulene aleru andaho kagola Isaraele wali agali ira ogoni andane gumba kagoha birulebira.
BAR 5:9 Ngode Datagaliwabe ibuni Isaraele wali agali ibilo bamba halu poragola tigua ibunaga wá timbuni kago de hondowa turu timbuni holebira. Ani bialu Ngode Datagaliwabenaga dara holenebi mana bayale tigabi bulenebi ti heba haabo holebira, lene.
EPJ 1:1 Ai beba ogo Babilononaga kini heagome Yarusaleme wali agali garabaya bu yalu polene kaware dege ngelo howa Yaremaiahanda wali agali Yarusalemeni bu hearunaga gilibu wia hene. Ngode Datagaliwabenaga bi Yarusaleme wali agali bu hearuhondo gilibu pelelonaga Yaremaiahanda beba gilibu pelelonaga lamini.
EPJ 1:2 Tígua Ngode Datagaliwabehondo mana koru bialu harimi. Anidagua bialu harimigonaga ainde Kini Nebugadenesahanda ibalu tí garabaya haru hai halu Babilono haru polebira.
EPJ 1:3 Tí dindi kaundiaha kamine dege mali dewa pialu ka daba agima halu homoleberemi. Ani kemigola mani Ngode Datagaliwabehanda tí baba miniha lone dungulo howa tí Babilonoha howa haru tagira pialu Yarusaleme haru dai bulebira.
EPJ 1:4 Tí Babilono pu howa mbirale dama mitangi bialu bi pupu wulenaga gime wabiniru dewaore irame wabinibi silibame wabinibi ngolome wabinirubi dewaore ngane hondoleberemi. Agalime mbirale uruni payani yalu ibaga bialu kagola wali agali tigua mbirale urunihondo gi haga ka.
EPJ 1:5 Tígua wali agali tara uruninaga mana ko ogoniale ngago talialu holigo baya hangu de hondo halimu. Agali dewame mbirale gime wabini uruni payani yalu duguni ibiragola wali agalime mbirale urunihondo bi pupu wialu holebirago ani bialu kagola tígua mbirale gime wabini galone nahe uruniale ngagohondo gi nahe halimu.
EPJ 1:6 Ani howa tígua lalu, Anduane Homogo í̠ dege Ngode Datagaliwabe henene kegoni. Iname í̠ni hanguhondo bi loleberema, lalimu.
EPJ 1:7 Ngode Datagaliwabenaga dahuliyali tí heba mandagi dindi tara ogoniha howa tí mamage howa haru holebira.
EPJ 1:8 Agali anda biaga manda bayalebi hearu tigua ngolorume mbirale bi pupu wule gime wabini uruni ira baya hangu bogo mbara lowa mbirale uruninaga hége wabu helaga. Anigo mbirale uruni ti Ngode Datagaliwabe ale dege ndo wuwa tigua bi nalaga nga.
EPJ 1:9 Wali agalime manda ngolome wabuwa yári tara tara helowa wandari mabuage bedarume hame lagagobi wabuwa gime wabini bi pupu wiaga uruninaga mo karula haga biaga nga.
EPJ 1:10 Horo marungi nde agali dama mitangi bialu bi pupu wiaga uruninaga muni siliba ngoloru maru ti mo pagebu yaga ka.
EPJ 1:11 Tigua ogoniale hangu ndo mo kayu biaga hene. Tigua mbirale bi pupu wiaga uruninaga yári bu ngaru mo kayu buwa wali maru anda ogoniha biabe bialu agali yalu biraga bedaru mo miaga ka. Wali agali bu karume mbirale bi pupu wiaga iramebi silibamebi ngolomebi wabini ngago wali agali yári biagadagua agaru baya hangu mo karula ho ngelaga biaga.
EPJ 1:12 Tigua agali mindibi hari mindini handalehe kininaga yári ngaru mo karula howa ngeledagola ainde agali bayale urunibi ibunibi be abalu baga bialu dodo hayaguabi ugurulime no timbitombe layaguabi tinime mo tiga bibe nahe ka.
EPJ 1:13 Andagaha be abalu ngago tinaga denguiha para haga biyagua tinime doma nabiaga nga. Agali mbirame ibalu dege domaga nga.
EPJ 1:14 Tinaga giha godi hale haga agali haguaneme kango yu biragadagua yu bira biruwa ainde mbiralime tihondo ko biyagua nde agali ogoni ko biyagonaga pani nelo namiaga.
EPJ 1:15 Tinaga giha ayu tibu emeneru ayu gamia emeneru yu biragago agali ibalu ti bo gingirulo waholebiragolabi mo page yu polebiragolabi tinime mo wialu pani babe naheore nga.
EPJ 1:16 Tigua urunibi biagane ngagome tini Ngode Datagaliwabe ale ndo nga lalu mo walia ka. Ani ngago manda bialu tígua mbirale gime wabini uruniale ngagohondo bi pupu wulene nawiore.
EPJ 1:17 Wali agali uruni andaga tamuha mbirale dama mitangi bialu gime wabini ngaru ko ngubi nagaloneore nga. Be pambu lene ngaligobi nga. Wali agalime mbirale bi pupu wiaga uruni de hondole ibiragola tinaga geme be abalu titau laragome mbirale uruninaga de hariga beme ndibulo wahaga.
EPJ 1:18 Ai pagealime mbirale uruni mo yalu polino agali mbirale uruninaga loma binigo mo miaga bu karume anda panga hongo howa paya anda halu piagane ka. Tigua mbirale bi pupu wiaga uruni baya hanguore mbiralime kinihondo mana lehe bidagola godi lole panga baya hangu paya anda howa helagadagua baya hanguore hagira buwa mo do howa ngelaga nga.
EPJ 1:19 Agali loma binigo mo miaga bu karume hale lamu dewaore anda mbirale ogoni ngagoha ngelaga. Anigo mbirale bi pupu wule gime wabini uruni tigua deme mbirale ngaru deme nahandabehe nga.
EPJ 1:20 Ani ngagola tinaga agabi tinginibi ugurilime anda ira nalu no podelagadagua biagago yu tinime handa nabiaga.
EPJ 1:21 Andagaha ira hagua deledagome tinaga dengui dodohe mindibi ko mbira wiaga.
EPJ 1:22 Dumania emene bedarubi ega emenerubi busirubi ibalu mbirale bi pupu wiaga ogoriani biralu pugu biaga.
EPJ 1:23 Anidagua bidagome mbirale bi pupu wule gime wabini uruni ti bame nagalone ngago manda bialu tígua ibuhondo bi pupu wulene nawigo nawilimu.
EPJ 1:24 Wabiaga agali karu tigua deme hondolene uruni wabu ngelowa ngolome paraho dambi helaga. Anigo ai mbiralime ngolo ogoni baya hangu domo mbara nalayagua nde ngolo ogoni hoai lalu ngiringare nalaga. Agali mbirale uruni wabiaga karu tigua aeaneme wabialu howa irame delaga biragola tandaga nahaga nga.
EPJ 1:25 Mbirale bi pupu wulenaga gime wabini uruni muni dewaoreme yolo bu wiaguabi tiha bu he̱ nawiore.
EPJ 1:26 Tinime ge halu napolebirago de handalimu. Ani bialu tigua gi ema bialu mbirale mbira nabulebiraore.
EPJ 1:27 Ai agalime bi pupu wule gime wabini uruni yu pialu karia dindini ibira hayagua nde agali biabe biaga maru karume lone mo yaraga howa berelelodagola payani yaga biago ibuni taga timbuni haga nga. Ani bialu mbiralime bi pupu wiaga gime wabini mbira dindi mbirani ngelo heagua nde ibuni ema bialu pubagi halu napolebira. Agalime ibu baya hangu nawi wua ula howa ngagola ibunime mo tigabu ha nabulebira. Wali agali marume bi pupu wiaga urunihondo mbirale mbira ibu mo turu halu bame miyagua nde mbirali homo tungulomini ngagohondo miradagua bira.
EPJ 1:28 Mbirale bi pupu wule gime wabini uruninaga loma binigo mo miaga agali karu tigua wali agali bu karume nogo lomabu migi biraru mo yu puwa tini yule muni miaga. Ani buwa muni ogonime mbirale tini hame ledaruale yolo biaga. Agali loma binigo mo miaga uruni one bedarume nogo bo loma bini uruni abale ko halu ngu bulino baya hangu ibi ho ngelowa tini dawalu nai haga ka. Tigua nogo uruni podalu maru yagibano karubi waragobe karu mulene ngago namiaga ka.
EPJ 1:29 Ani bialu wali ege ngola ho bedarumebi waneigini gali ai̱ya bedarumebi loma uruni ilili bialu birulene ngago nabi tigua ta nabi ela haragome mebia hagaya. Mbirale urunidagua biagadaru bibahendeme gime wabini ogoni ibuha galone naheore ibu Ngode Datagaliwabe kago ale ndo bame agali gime wabiniore ngago panaga mo walia haga. Ani ngago manda bialu mbirale gime wabini urunihondo bi pupu wulene nawigo nalalimu.
EPJ 1:30 Ainde bi pupu wiaga iramebi silibamebi ngolomebi wabini ngagonaga lomaru walime bu miaga wiagua nde agalime lalu ogoni ibu tinaga bi pupu wiaga galone nga lagayago irane agome lagabe.
EPJ 1:31 Dara ho holene horongi agali mbirale bi pupu wiaga uruninaga loma binigo mo miaga karu tigua mbirale gime wabini uruninaga anda kagoha pu biruwa tinaga angaribi agaru minu budalu mandaribi dogalu bira biruwa tinaga haguane agame bu yi nahe biragaya.
EPJ 1:32 Mbirale gime wabu wini bi pupu wiaga uruninaga agali loma binigo mo miaga bu karu tigua tinaga bi pupu wiaga uruninaga deni howa bi hongo howa ladaga halu homa duguanda hai halu purogo lole howa lagadagua lalu hagaya.
EPJ 1:33 Tigua mbirale bi pupu wiaga gime wabini uruninaga aga bidago agali loma binigo mo miaga karu tigua golowa ti one wane bedaru miagaya.
EPJ 1:34 Wali agalime mbirale bi pupu wiaga urunihondo mana bayale biyaguabi ko biyaguabi bi pupu wiaga gime wabini uruni tigua mbirale mbira nawiore nga. Ani bialu ibugua agali mbira kago kini helo dabo helolenebi kini kago bo dugu waholenebi hongo nawi nagaloneore nga.
EPJ 1:35 Tigua muni dewabi yári tara tara bayale ngarubi wali agalihondo namiaga ka. Mbiralime mbirale mbira bule lowa bi lo wialu puwa layago nabi wahalu piyagua tigua ibuhondo pani nelo namiaga ka.
EPJ 1:36 Tigua wali agali mbiranaga homolino haru nahaga. Ani bialu wali agali hongo nahe bu karu agali hongohe kagonaga giha howa mo wialu haru dai nabiaga nga.
EPJ 1:37 Tigua mbirali de kohe kago biamogo bialu de mo ngala habe nahebi maru ko gendabi ngagoha pialu karu haru dai bibe nahebi nga.
EPJ 1:38 Tigua wali dalo ti agalini homene bedaru dara habe nahe nga. Ani bialu waneigini ti aba ai̱ya homene bu karu biamogo bulene nakarulapeore nga.
EPJ 1:39 Mbirale bi pupu wiaga uruni bameore irame wabini ngago siliba ngolorume para hadambi howa ngaruni bame nagalone hari ngagoha puwa ege to̱le̱ ngaru dugu ngelo haradagua bida. Ani ngagohondo bi pupu wialu haga karu tini tagabiore ka.
EPJ 1:40 Irane mbira agi ngagome mbirale uruni bi pupu wiagabi ibu bi pupu wulene alebi nga lalu wali agalime lolene karulape ngabe. Babilono wali agali tinime tinaga bi pupu wiaga gime wabini ngaru mo yobia halu mo taga haga nga.
EPJ 1:41 Tigua mbirali bi nalaga kago tinaga bi pupu wiaga Belenaga anda kagoha haru puwa Belehondo agali ogoni lone bi lelo mo karulape hela lalu bi lamiagaya. Tigua Bele ogoni bi hale haga ngabe toba hagaya.
EPJ 1:42 Ainde tinaga bi pupu wiaga urunime tinaga bi larago hale halu biamogo nabiagaore ngago manda bia buwa dege tinime harugo lowa hongo halu mbirale gime wabini urunihondo bi pupu wialu haabo hagaya.
EPJ 1:43 Tinaga mana mini nawi howa lulu mana ogoni bialu haabo haga. Wali bedaru tigua pume tini daba howa hariga tene ngagoria biru wima piaga. Ani biruwa tigua widi alenaga irane ngaru ira hagua nga bilonaga delalu biruwa tinaga tingini agali ibiragohondo miaga. Ani miragola agali ibiragome wali mbirago kayu yule haru piyagua nde wali ogoni ibu agali biagola palialu dai buwa wali mende ibula haru mandagi birayagohondo mege bialu oba halu ibuhondo lamialu lalu, Í̠ wali bayale ndoyago hondowa agalime í̠ mba nalayagoni ndobe, lagaya.
EPJ 1:44 Mbirale bi pupu wulenaga gime wabini uruninaga mana dewaore ko leheru nga. Ani ngagoyu ainde tigua ogoni bayaleore nga lo manda biagayago irane agome. Agalime bi ogonidagua lagayago aginagada.
EPJ 1:45 Agali mbirale iramebi ngolomebi mbirale wabiaga karu tigua bi pupu wiaga uruni tini hameme wabua biragobi wabiaga.
EPJ 1:46 Agali mbirale bi pupu wiaga uruni wabiaga bu karu tini dindini lu nahe abale homaga. Ainde tigua tini biamogo bulenaga hongohe kago tininaga gime agua wabuledabe.
EPJ 1:47 Agali biabe biaga uruni tini homalu ti damene karunaga mbirale bayale mbira paluni nangele homolebira. Tigua tinaga ke̱ hagane manabi taga holenebi ogonilabo hangu ngelalu homolebira.
EPJ 1:48 Ainde wai biarua handala mbirale bi pupu wiaga uruninaga loma binigo mo miaga karume mbirale uruni mo yalu abale hado holene ngagoha hado hole ibida piaga ka.
EPJ 1:49 Wai ibiyaguabi genda tara ngaru anda ibiyaguabi mbirale bi pupu wiaga agali gime wabini urunime mbirale mbira bibe naheore nga. Ani ngago manda bialu wali agali tigua gime wabini ogoni ibuha galone ndo bame nagaloneore ngago baya hangu handa nabiagayago agidabe.
EPJ 1:50 Mbirale wali agalinaga bi pupu wiaga uruni bame agali gime ira hanguni siliba ngoloru dambu para haga buwa wabini nga. Horo mbiru nde wali agali Ngode Datagaliwabe manda nabiaga bu karubi tinaga kini karubi tigua mbirale bi pupu wule gime wabini uruni bayale galone ndo bame agali gime dege wabinidalo manda biai holebira. Ani bialu mbirale uruniha hongo holene mbira tiha nawidane hondolebira.
EPJ 1:52 Ainde bi pupu wiaga uruni ti galone ndo nga lalu manda bibe nahe ai kabe.
EPJ 1:53 Mbirale urunime agali mbira kini helo dabo hela nabulebira. Ani bialu iba dalu dindini ibi nalolebira.
EPJ 1:54 Mbirale urunime tinaga biabe ngago tinime mo tiga bibe nahe nga. Mbirali kagome mendealihondo ko biyagua nde ogonime pani nelo namulebira. Tigua mbirale mbira bibe nahe ka. Ti bame ega yagombe harini yagalo yu ibagabu hagagobi dege ka.
EPJ 1:55 Ai mbirale gime wabini bi pupu wiaga uruninaga anda kago dayagua nde agali loma binigo mo miaga bu karu tini irame dolino ibida pora bialu piaga. Anigo ainde mbirale dama mitangi bialu bi pupu wiaga iramebi silibamebi ngolomebi ira biago para haga buwa agali gime wabini ngaru ira maru anda ogoninaga gene bu karu daradagua damaga haga ndobe.
EPJ 1:56 Mbirale ogoni kini bu karu bababi waitigi bu karu bababi wai bibe naheore nga. Ogonibi ngagohondo wali agalime mo galone halu ibu bi pupu wulene bayale mbira ngago agua loleda.
EPJ 1:57 Ainde pageali ibiyagaua mbirale bi pupu wiaga irame wabuwa siliba ngolome para haga bialu wabini biagome mbirale mbira bibe naheore bameore wiaga nga.
EPJ 1:58 Ani ngagola pageali tigua bi pupu wiaga gime wabini uruninaga siliba ngoloru lagalo yai halu aga mo karula ho ngagobi golo yalu piaga. Ani biragola gime wabini ogoni ibunime mbirale uruni namilonaga mbirale mbira bibe naheore wiaga.
EPJ 1:59 Mbirale bu ngaruni bibahendeme bi pupu wiaga gime wabini ngago bolangua howa nga. Agali kini gi nahaga mbira ai kabe lo manda bia handa. Ani bialu todobene be bayale mbira mitangi bia. Anda mbiranaga hobane mbirale mo do hagane ngagonaga panga haraba ngago mitangi bia. Anda timbuni kago taba yu hagane anda gene kago mitangi bia. Mbirale uruni ti galone wialu tigua bi pupu wule gime wabini nagalone ogoni bolangua halu ti dunini nga.
EPJ 1:60 Ngode Datagaliwabehanda nibi egebi yakundirubi tigua ina kemagoha wáhadali helo harini heledagola tigua ibunaga bi larago hale hai haga ka.
EPJ 1:61 Hari beraliba kagonaga wáholenebi puriabu pu lo yu poragobi ani dege biaga nga. Hari beralibanaga wáholene timbuniore howa wá kaundiaha piai halu puriabume dindi bibahendeha piai hagane nga.
EPJ 1:62 Ngode Datagaliwabehanda hari beralibahondo lamialu dindi bibahende wiadambi ha layagua nde hale halu dindi wiadambi hai haga.
EPJ 1:63 Ainde Ngode Datagaliwabehanda dahuliya andagaha howa ira dene bape halu hari wedarubi irabu timbuni ngarubi dai ha layagua nde tigua Ngode Datagaliwabenaga bi larago hale halu dai holebira. Anigo mbirale bi pupu wulenaga gime wabini ngarume mbirale urunibi nabibehe nga.
EPJ 1:64 Ainde mbirale nagalone gime wabini urunime inahondo bayale bulenebi mo ko holenebi hongo naheore ngagohondo wali agalime mo galone howa uruni bi pupu wulene galoneore lagayago aginaga biagabe.
EPJ 1:65 Mbirale uruni ti Ngode Datagaliwabe ndo ngago tí manda bidemi. Ani manda buwa tígua mbirale ko nagalone urunihondo bi pupu nawilimu.
EPJ 1:66 Mbirale bi pupu wiaga uruni tigua kini bu karu handaya ho haga ndo ka. Tigua bi ko lolenebi ti mo bayale helo bi lolenebi nawiore nga.
EPJ 1:67 Tigua wali agalime de hendelo manane mbira harini mo walia harane nahondoleberemi.Tigua ni egelame wáhagagobi mbira naholebiraore.
EPJ 1:68 Gabua tara tara irabuha karubi ema bialu biaga biru maru bibahendeme bi pupu wiaga ogoni bolangua haihe beda. Ema bialu piaga uruni ti balu nolene tara tara kago ibirane handayagua nde ti ibida piaga ndobe. Anigo bi pupu wule gime wabini uruni ti ibida polene nakarulapeore nga ndobe.
EPJ 1:69 Tiha galone naheore ngago tí manda biai kemi. Ani ngago manda buwa tígua mbirale uruni gi nahe halimu.
EPJ 1:70 Wali agali tara bu karu tinaga bi pupu wiaga uruni agali tigua irame wabuwa siliba ngoloru para haga bini ngago ogoni ko ngubiore nga. Ogoni ibu galone nahe bame agalime ega mabuha ira lini dedaru do nole ibirago gi halu naibilonaga agali handalehe wabu heledagola tigua mamage howa mbirale mbira bibe nahe bameore wirigoria wiagago ale dege nga.
EPJ 1:71 Ti ira anihe mbira mabuha hagagobi ka. Ira ogonime ega emene ibirago mo gi nahe ibunaga ginigene kagoria ibu berelo wahaga kagobi nga. Mbirale bi pupu wiaga gime wabini uruni ti homene tingini ngago arumaha bape halu yu wahagagobi nga.
EPJ 1:72 Mbirale bi pupu wiaga uruninaga aga baya hari mindini iba kuyamaru handalehe mo karula ho ngeledaru mo ko halu togo biai haga. Ani biragola mbirale uruni ugurulime nai kagola wali agali mbirali urunihondo bi pupu wiaga bu karu tini taga timbuni ho haga nga. Ani biaga nga manda bialu mbirale gime wabini urunialego bi pupu wiaga ale ndo ngago manda bulene nga.
EPJ 1:73 Mbirali tigabiore howa ibu mbirale bi pupu wiaga gime wabini uruniale ngagohondo bi pupu nawiaga kago ibu bayale bolangua heneore ka. Ibu mo taga holene ale mbira nawiore howa tigabi ka.
PRA 1:1 Ani biyagola igiri tebirali Hananiabi Misaelebi Asariabi ti haru ira gibi do wiagoha ibagabu hene. Tigua Anduane Homogo tinaga Ngode Datagaliwabe kagonaga mini yaraga halu iba ganaru lalu hene.
PRA 1:2 Ani howa Asaria ibugua ira timbuni deago dombeneha howa ibugua ne ha̱ lalu Anduane Homogohondo bi ogodagua lene.
PRA 1:3 Anduane Homogo í̠ore ina mamalirunaga Ngode Datagaliwabeore kego manda bialu iname í̠naga mini yaraga halu í̠hondo ka̱i̱ lalu kema. Í̠naga mini timbuni mini lene daliga wiabobo bu wilo larama.
PRA 1:4 Í̠nime mbirale inahondo biriruni bibahende tigabi bulene wiago biri. Ani bialu ina manani howa mo dabaki bialu inahondo ko birimi lariyagua bi ogoni tigabiore holebira.
PRA 1:5 Í̠na mana bayale tigabi bulene wiadaguaore bialu inanaga mamaliru tinaga tano loma bia hene Yarusaleme wiago bo gialo wahai halu mo labu helarigoni. Ogoni mana ko iname bialu harimagonaga pani ngialu karulapeore biriya.
PRA 1:6 Iname í̠naga bi mo wa howa í̠ni erembira ngialu pirimagola inaha mbirale bia ko hene dewa wialu mana ko inaha dewaoreme inani bu dambi hai haya.
PRA 1:7 Biabe iname bialu halimu lariruni nabiore harima. Heneneore iname í̠naga bi mana ngago taluwa bialu kemale nde ina bayale kemale.
PRA 1:8 Anigo ainde inane bia ko hene ngamagome pani nolene nginigo ayu iname genda yu kamagonida.
PRA 1:9 Í̠na ina waitigi hearunaga gihabi mana puguaga bu hearunaga gihabi kini ko hearunaga gihabi minu ya kegonida.
PRA 1:10 Áyu ina í̠hondo bi lalu haga kemaru nde taga halu kema. Ina taga timbuniore ho howa bi nale kemagoni ndobe.
PRA 1:11 Anduane Homogo-o í̠naga mini daliga mini leneore kego mitangi bialu ina baba habo nalolene bi lo wirigo mitangi bibe. Í̠na ina yu wahowa nahabe.
PRA 1:12 Í̠na dara holene irane nawini dara haga ngego mo wanahabe. Agali í̠naga nenege Abarahamahondo buleore lalu bi lo wirigobi agali í̠naga biabe bia haga Aisagahondo lo wirigobi ina í̠naga Isaraele wali agali Isaraele bu kemarunaga mamali Yagabahondo bi lo wirigobi mitangi bialu bibe.
PRA 1:13 Í̠na bi lo wialu ina wali agali dewaore palia timbu halu harini yakundi kagobi halu ibani iba mu ngagobi dewaore holeberemi lariya.
PRA 1:14 Anigo Anduane Homogo-o ayu ina damenego emene halu wali agali tara bu karu ti palia timbu ka. Ina ko biagaore lalu wali agali dindi bibahendeni bu karume ina bope halu mo nagalone halu kagoni ndobe.
PRA 1:15 Áyu inanaga kinibi agali Anduane Homogonaga bi latagi hagabi agali haguanebi mbira naheore. Ai iname loma tara tararu bu yalu ibulenebi mbirale bame mo turu halu ngulenebi ira hagua ngabilo loma bu delolenebi ainde inanaga anda biago naheore ngagoni ndobe. Ainde í̠naga dara holene ngego taya bulenenaga lomaru bu yu ngoai holene dindi henge mbira nawiore kema.
PRA 1:16 Ayu ina í̠ kegoha iberemagola inanaga bu mini ndibulo kema. Inanaga ma í̠ha podalu ina biamogo bia lalu bi larama. Ainde heneneore iname í̠ loma bu ngulenego nogo bulumaga dewabi sibi igini hongolo habetigi daosini dewabi nahiniore kemagoni ndobe.
PRA 1:17 Anigo ayu inanaga bu mini beregedo kemago loma ale í̠ keria yu eberema. Ainde iname í̠naga hame ngego damene bibahende lone talialu howa í̠ni talima ibalu holoma̱ya inanaga loma ogoni yamia. Mbirali í̠ni hondo mini mbiraore henenewi kago ibu taga naholebira.
PRA 1:18 Áyu inanaga hongo bibahendemebi inanaga hame bibahendemebi í̠ lone talima ibalu holeore larama. Iname í̠hondo bi lalu laabo holeore larama. Ainde ina baba miniha bayale howa ina dara habe. Ina wali agali bu karume lone mo taga nahelabe.
PRA 1:20 Ainde Anduane Homogo í̠naga mini lone daliga mini yaraga hene wilo agalime nabiaganeale bialu ina lone haru dai bia.
PRA 1:21 Tinaga hongo kagobi mine haga mana hongohe ngagobi bibahende mo wahai ha.
PRA 1:22 Í̠ hangu Anduane Homogobi Ngode Datagaliwabebi heneda lo hendelo ti pani nelo mialu bo wahai ha. Ani bialu í̠ninaga hongoni howaore dindi tara tara bu ngarubi bi tara tara laga laga biaga paluyu pedaru bibahende handaya ho howa haru hai haga kegoni, lene.
PRA 1:23 Agali kininaga biabe bia haga bu hearume igiri tebirali biaru ira timbuni deagoha minu ba anda howa tigua weli wiarubi golota wiarubi dangi yuni wiarubi ira bo wiarubi ira hongohe delonaga irani delai hene.
PRA 1:24 Ani delayagola ira hungu hongohe datagi halu timbuniore magi mandanaga mita pira kirani duria agima do bolangua halu Babilonoali kaware bu hearu daya.
PRA 1:26 Anigo ainde Anduane Homogonaga dahuliyali mbira abale daliape halu ibuwa ira timbuni deago dombeneha agali tebirali biaru baba mandagi howa irame ti dolino ira he̱ladai bini.
PRA 1:27 Ani biyagola agali tebirali biaru tiha puyabu gahenge dagarebi bayaleore ibayuane hendene. Ai ira ti heagoria kaware naibi. Ani bialu ti irame emeneorebi mbira nadeore hene.
PRA 1:28 Ai igiri tebirali biaru ti ira hongoheore timbuni dayagoha howa Anduane Homogonaga mini yaraga halu iba gana lalu hene. Tigua iba gana ogodagua lene.
PRA 1:29 Iname ina mamalirunaga Anduane Homogo Ngode Datagaliwabe kego í̠naga mini yaraga harama.
PRA 1:30 Í̠naga mini yaraga holene daligaore baya buruguleore haabo holene nga. Wali agali bibahendeoreme í̠naga mini daligaore ngago mo yaraga halu holene nga.
PRA 1:31 Tigua iba ganaru lalu í̠naga mini yaraga halu í̠naga mini bayaleore ngago mo turu haabo halu í̠naga anda kagoha í̠hondo ani lalu holene nga.
PRA 1:32 Í̠na kininaga biragane dagia ngagoria biruwa í̠ dahuliyali karu bolangua ho howa í̠na de handadali halu humbirini andaga hondo bolangua haga kegoni. Iname í̠ni andaneha howa í̠naga mini yaraga halu haabo holene karulape kama.
PRA 1:33 Í̠naga haru howa biragane dagia ngagoria bedegola wali agalime í̠naga mini yaraga holene nga. Horo bibahendengi tigua í̠ mo turu halu iba ganaru lalu holene nga.
PRA 1:34 Tigua í̠ dahuliya andaga kegoha í̠ mo turu holene nga. Horo bibahendengi tigua í̠ mo turu halu iba ganaru lalu holene nga.
PRA 1:35 Mbirale bibahende wabini dindini ngarumebi karumebi Ngode Datagaliwabenaga mini yaraga holene nga. Tígua turu holene iba gana lalu ibunaga mini yaraga halu haabo holene nga.
PRA 1:36 Hari daliga bibahende kamirume Ngode Datagaliwabenaga mini yaraga holene nga. Tígua turu holene iba ganaru lalu ibunaga mini yaraga haabo halu holene nga.
PRA 1:37 Anduane Homogonaga dahuliyali bu kamiru tí bibahendeme Anduane Homogonaga mini yaraga hadaba. Tígua turu holene iba ganaru lalu ibunaga mini yaraga halu haabo holene nga.
PRA 1:38 Iba hari daligaoreha bedemiru tígua Anduane Homogonaga mini yaraga hadaba. Tígua turu holene iba ganaru lalu ibunaga mini yaraga halu haabo holene nga.
PRA 1:39 Hongohe damene bibahende ngemiru tígua Anduane Homogonaga mini yaraga hadaba. Tígua turu holene iba ganaru lalu ibunaga mini yaraga haabo halu holene nga.
PRA 1:40 Ni egela libugua Anduane Homogonaga mini yaraga hadaba. Libugua turu holene iba ganaru lalu ibunaga mini yaraga haabo halu holene nga.
PRA 1:41 Yakundi harini bu kemiru tígua Anduane Homogonaga mini yaraga hadaba. Tígua turu holene iba ganaru lalu ibunaga mini yaraga haabo halu holene nga.
PRA 1:42 Iba dalubi iba dalu pibirabi tígua Anduane Homogonaga mini yaraga hadaba. Tígua turu holene iba ganaru lalu ibunaga mini yaraga halu holene nga.
PRA 1:43 Puyabu tara tara kemiru tígua Anduane Homogonaga mini yaraga hadaba. Tígua turu holene iba ganaru lalu ibunaga mini yaraga haabo halu holene nga.
PRA 1:44 Ira denebi ni hongohe dedagobi tígua Anduane Homogonaga mini yaraga hadaba. Tígua turu holene iba ganaru lalu ibunaga mini yaraga haabo halu holene nga.
PRA 1:45 Dagare timbuni biaga ngagomebi puyabu poboyogobi ngagomebi Anduane Homogonaga mini yaraga hadaba. Tígua turu holene iba ganaru lalu ibunaga mini yaraga haabo halu holene nga.
PRA 1:46 Iba dalu dadimba ngemirubi dalu dindi guni ngemirubi tígua Anduane Homogonaga mini yaraga hadaba. Tígua turu holene iba ganaru lalu ibunaga mini yaraga haabo halu holene nga.
PRA 1:47 Horo ngemirubi mbiraga ngemirubi tígua Anduane Homogonaga mini yaraga hadaba. Tígua turu holene iba ganaru lalu ibunaga mini yaraga haabo halu holene nga.
PRA 1:48 Wáholene í̠nabi aruma holene í̠nabi Anduane Homogonaga mini yaraga hadaba. Tígua turu holene iba ganaru lalu ibunaga mini yaraga haabo halu holene nga.
PRA 1:49 Dindigunimebi dagaremebi bulene ngegobi Anduane Homogonaga mini yaraga hadaba. Tígua turu holene iba ganaru lalu ibunaga mini yaraga haabo halu holene nga.
PRA 1:50 Dindiguni mo iba halu dalu ibira haremiru Anduane Homogonaga mini yaraga hadaba. Tígua turu holene iba ganaru lalu ibunaga mini yaraga haabo halu holene nga.
PRA 1:51 Hari beraliba kamirubi hari daba kulukala lararumebi tígua Anduane Homogonaga mini yaraga hadaba. Tígua turu holene iba ganaru lalu ibunaga mini yaraga haabo halu holene nga.
PRA 1:52 Dindi bibahende wiame ngamiru tígua Anduane Homogonaga mini yaraga hadaba. Tígua turu holene iba ganaru lalu ibunaga mini yaraga haabo halu holene nga.
PRA 1:53 Hari nene ngemiru emene timbunimebi tígua Anduane Homogonaga mini yaraga hadaba. Tígua turu holene iba ganaru lalu ibunaga mini yaraga haabo halu holene nga.
PRA 1:54 Dindini andaho hene bu kemiru tígua Anduane Homogonaga mini yaraga hadaba. Tígua turu holene iba ganaru lalu ibunaga mini yaraga haabo halu holene nga.
PRA 1:55 Iba solowara bedegobi iba maru bedemirubi tígua Anduane Homogonaga mini yaraga hadaba. Tígua turu holene iba ganaru lalu ibunaga mini yaraga haabo halu holene nga.
PRA 1:56 Iba dindiha howa duguadaga halu piagaru tígua Anduane Homogonaga mini yaraga hadaba. Tígua turu holene iba ganaru lalu ibunaga mini yaraga haabo halimu.
PRA 1:57 Wena timbuni bedamirumebi mbirale iba solowaraha biraga bedamirumebi tígua Anduane Homogonaga mini yaraga hadaba. Tígua turu holene iba ganaru lalu ibunaga mini yaraga haabo halu holene nga.
PRA 1:58 Ega hariha yagaloyu ibaga biaga bedemiru tígua Anduane Homogonaga mini yaraga hadaba. Tígua turu holene iba ganaru lalu ibunaga mini yaraga haabo halu holene nga.
PRA 1:59 Nogo bulumagarumebi nogo tara tara gabua bu karumebi tígua Anduane Homogonaga mini yaraga hadaba. Tígua turu holene iba ganaru lalu ibunaga mini yaraga haabo halu holene nga.
PRA 1:60 Wali agali dindi bibahendeha bu karu tígua Anduane Homogonaga mini yaraga hadaba. Tígua turu holene iba ganaru lalu ibunaga mini yaraga haabo halu holene nga.
PRA 1:61 Isaraele wali agali bibahende tígua Anduane Homogonaga mini yaraga hadaba. Tígua turu holene iba ganaru lalu ibunaga mini yaraga haabo halu holene nga.
PRA 1:62 Ngode Datagaliwabenaga agali loma binigo mo miaga kemiru tígua Anduane Homogonaga mini yaraga hadaba. Tígua turu holene iba ganaru lalu ibunaga mini yaraga haabo halu holene nga.
PRA 1:63 Agali Ngode Datagaliwabenaga biabe biaga kemiru tígua Anduane Homogonaga mini yaraga hadaba. Tígua turu holene iba ganaru lalu ibunaga mini yaraga haabo halu holene nga.
PRA 1:64 Wali agali tigabi halu homene dinini kemiru tígua Anduane Homogonaga mini yaraga hadaba. Tígua turu holene iba ganaru lalu ibunaga mini yaraga haabo halu holene nga.
PRA 1:65 Wali agali ko mbira nawiore bayale howa tíni mo dindiha ho haga kemiru tígua Anduane Homogonaga mini yaraga hadaba. Tígua turu holene iba ganaru lalu ibunaga mini yaraga haabo halu holene nga.
PRA 1:66 Honaniabi Asariabi Misaelebi tígua Anduane Homogonaga mini yaraga hadaba. Tígua turu holene iba ganaru lalu ibunaga mini yaraga haabo halu holene nga. Ibugua ina homeneru dalu humbirini andagaha howa haru dai bialu homanaga giha howa gingilo mialu haru dai biya. Ibugua ira deagoha howa haru tagira pialu ira timbuni deago dombeneha demaria duguaya.
PRA 1:67 Anduane Homogonaga dara holene wiaabobo howa ibugua bayale biaabo haga kagonaga iname ibunaga mini yaraga halu ka̱i̱ lami̱ya.
PRA 1:68 Wali agali Anduane Homogo andaneha haga kemiru tígua ibuhondo iba ganaru lalu ibunaga mini yaraga halimu. Ngode Datagaliwabe ibugua mbirale bi pupu wulenaga gime wabini ngaru bolangua hene howa ibu daligaore kagonaga tígua ibu mo turu halu iba gana lalu halimu. Anduane Homogo ibugua ina dara holene nawioreni howa dara haabo haga kagonaga iname ibuhondo ka̱i̱ lolene nga, lalu iba gana lene.
SUS 1:1 Babilono dindiha agali mbira mini Yoagimi hene.
SUS 1:2 Ibugua Hiligia wane Susana bereago dabu bini. Susana ibu baya tara mbira biruwa ibunaga mini Ngode Datagaliwabenaga mana ngagoha pagaho biraabo haga berene.
SUS 1:3 Susana ibu aba ai̱yala Yuda wali agali bayale howa Susana ibu wandari emene bereangi libugua Mosesenaga bi mana lo wiaru baya hangu talialu habe lalu libugua lawai haga berene.
SUS 1:4 Susana ibu agalini Yoagimi ibu mbirale dewawi homogo mbira howa ibunaga mabu bayaleru anda mandaha wia mabu biaihe hene. Ainde Yoagimi ibu agali bayale ka lo manda bialu Yuda wali agali tigua ibu andagaha íbu ngoai haabo haga wini.
SUS 1:5 Wali agali godi hale holenaga ti Yoagimi andaga dege íbu ngoai haga henego irane agali godi hale haga ogoni libugua anda ogoniha biruwa godi hale haga hene. Agali kirali ogoni libu Yudali henego ayu dege gahange godi hale holene biabe ogoni bule hene. Ai Ngode Datagaliwabehanda agali ogoniale kago manda bialu bi abale lo bamba halu lalu, Agali godi hale haga bu hearume wali agali baya hangu haru nahe wiagola mo ko holene taraore Babilono dindiha tagira bini nga, lalu bi lo wini, lene.
SUS 1:7 Horo bibahendengi horombe hanuni haragola wali agali ti tomo nole piai haragola Susana ibu mabuha ibaga bialu piaga hene.
SUS 1:8 Ainde agali godi hale haga kirali ogoni libu Susana hondowa dimagoli ho haga hene.
SUS 1:9 Ai libunaga miniha dimagolime habe nahayagola libu Anduane Homogohondo bi lolenebi libunaga biabe godi hale haga wiagobi embeda hai hene.
SUS 1:10 Libu kirabali Susana dimagoli haga haga bu howa libuni mendealigo lamia nabi haabo henego
SUS 1:11 irane libuni taga haga haga bu howa nale hene.
SUS 1:12 Ani howa horo bibahendengi libugua Susana hondole hariga taya bialu haabo hene.
SUS 1:13 Ainde horo mbirungi horombe tomo nolene tu hayagola libugua lalu, Ai horombe tomo nolenengidago ainde andaga tomo nole mba nalare, lene.
SUS 1:14 Ani bialu libu pugupugu bialu pene. Ani pialu libunaga miniha mende mendemebi Susana dege taya bima peneyago mbirani ngola hene. Ani ngola howa libuni bi hale haga haga bialu lalu, Í̠ lone dai binidago agibe lene. Ani lowa libuni ladai bigi bigi bialu, I̱ Susana dimagoli ho henedago latagi haga haga bini. Ani latagi halu libugua Susana ibuni hangu ngola holene horo mbira wilo hondo haba lene.
SUS 1:15 Horo mbiru hayagola Susana ibu horo bibahendengi piaga wiadagua ibunaga biabe bia hagane kira heba mabuha ibaga bu hene. Ani heagola godi hale haga agali kirali biago labo hado howa Susana hearia de hendene. Ai ni do tandaga biyagola Susana ibu wayawaya bolene hame lene. Ai Susanahanda ibunaga biabe bia haga wali kiralihondo welibi pauda mini sanda baya ngabi wiarubi andaga winigo mo pudaba lene. Ani pialu howa agali mbira ibalu ibu waya waya bialu kogo hondoligo pabe panga payadai bialu pilibu lalu lamini.
SUS 1:18 Ani lamiya handala wali kira biago labo abale puwa pabe panga payatagi halu libuni hariga emene mbiraha tagira pialu pene. Libu Susanahanda mbirale mo pudaba layaru mo yu dai bule abale pene. Anigo ai agali kirali hado ho heago libu nahende pene.
SUS 1:19 Ai wali kira biago labo piyagola agali godi hale haga biago labolabo hado hayago abale tagira pialu gedailalu Susana hearia pene. Puwa libugua Susanahondo lalu,
SUS 1:20 Pabe panga paya tagi kagola mbiralime ina handabe nahe kamagoni. Iyaore í̠ dimagoli timbuni ho kebago ainde í̠na iyahondo e̱ lalu iyame hame ngebago bibelo hame ledeba.
SUS 1:21 Í̠na e̱ nalariyagua iyame godi larabangi í̠ igiri mbirala kayu bule wali kirali í̠naga biabe bia haga biago labo andaga pudaba lari lalu godini heneneore laraba lalu gi dololebereba, lene.
SUS 1:22 Ainde i̱ pogolalu polene diri nawiore hapai hai kebigoni ndobe. Í̠na libunaga hame ngebigo e̱ laruyagua nde wali agalime i̱ homoliya bo waholebira. Ani bialu i̱na ndo laruyagua nde libugua i̱ mo ko holebere bida.
SUS 1:23 Anigo ainde libugua i̱ ko biya lalu godini latagi holene karulapeda. i̱na Ngode Datagaliwabenaga deni howa mana ko nabulebero ndobe lene.
SUS 1:24 Ani lalu Susanahanda kuaba hongo howa ladaga hayagola agali biago labomebi hongo howa ga̱ lagalaga bini.
SUS 1:25 Ani lalu agali mendego ibugua mabuha pabe panga payatagi hene heago ge dai puwa duguape hene.
SUS 1:26 Bi ladaga daga biayuago wali agali andagaha berearume hale halu gerai ibalu mabu pabe panga emene payiyago dugualu mabuha anda piai hene. Susana mbira agi biyadabe hondolenaga abale piai hene.
SUS 1:27 Ani piyagola agali godi hale haga biago labome ke̱ howa te layago wali agali tigua hale howa ti mogo timbuni lalu taga hai ho hene. Abale henedagoha howa Susana ibugua mana ko ogoniale mbira biya lene hale nahaga howa ti taga hai ho hene.
SUS 1:28 Horo mendengi wali agali Yoagimi andaga íbu ngoai hayagola agali kirali godi hale haga biago labobi ibini. Susanaore homelo lalu libu bi lo manda bialu ibini.
SUS 1:29 Ai wali agali dewaore bu hearunaga deni libugua latagi halu lalu, Hiligia wane Yoagimi one Susana haru ibidaba, lene. Tigua Susana olayagola
SUS 1:30 Susana ibu ababi ibu ai̱yabi waneigini bibahendebi ibu damenerubi ti haru mandagi ibai hene.
SUS 1:31 Íbu heagola Susana ibu wali bayaore mbira berene.
SUS 1:32 Ani íbu heagola agali godi hale haga ko biago labome lalu, Libugua wali ogoni ibu aidabe dengui hondolobaya aga ibunaga dengui bu yi kago mo wahadaba, lene.
SUS 1:33 Ai Susana damene biarubi wali agali marubi dugu bialu bai hene.
SUS 1:34 Ai agali kirali godi hale haga biago labome wali agalinaga deni heyu howa libugua godi lolenaga gi dogola amu halu Susananaga haguaneni wia hene.
SUS 1:35 Ani biyagola Susanahanda dugu bialu ibu Ngode Datagaliwabehanda biamogo bulebira lo manda buwa de hari daligaha handadaga hene.
SUS 1:36 Ani biyagola agali godi hale haga kirali biagome godi latagi halu lalu, Iya mabuha hebagola wali ogo ibu wali biabe bia haga kira heba mabuha anda ibirimigo handariba. Ani bialu mabu pabe panga payadai bialu wali kira biago labo andaga dai bidaba laya.
SUS 1:37 Wali biago labo tagira peagola igiri mbira mabuha hado heneyago abale tagira ibalu libu mandagi paliribi.
SUS 1:38 Iya mabu gibuniha yagi howa anidagua biyago handariba. Ani hondowa iya gerai lalu puwa
SUS 1:39 handalu hebaria libu mana ko bialu heneya. Agali ogoni minu yania holebialu hebaria agali ogoni hongo gibioreyayago ibu gerai pialu panga dugualu ibida piya.
SUS 1:40 Ani biyagola iyame wali ogo minu yania howa agalidago mini langi lalu hebaria ibu donge haya. Ai iyanaga te ogoni hangu, lene.
SUS 1:41 Agali ogoni labo tinaga agali haguanebi godi hale hagabi henegome wali agali bu hearume libunaga bi layago mo henene hai ho hene. Ani lowa ainde tigua bi lo mbira hai halu lalu Susana homelo laiore hene.
SUS 1:42 Ani layagola Susanahanda bi hongo howa ladaga halu lalu Ngode Datagaliwabe haluhe haabo haga-o í̠naga deni mbirale bibahendeore wiado hene mbira nawiore. Mbirale mbira tagira naibi wene ibule ngago í̠ni manda bu bolangua ho kegoni.
SUS 1:43 Agali kira o kago libugua ke̱ kagobi í̠ manda bide. Ani bialu i̱na mana ko mbira nabiore bedogobi í̠ manda biai ho kegoni. Ainde i̱ irane aginaga homoledabe, lene.
SUS 1:44 Ani layagola Ngode Datagaliwabehanda Susananaga bi layago hale hene.
SUS 1:45 Ai tigua Susana bole haru halu pialu heagola Ngode Datagaliwabe dininime igiri daliahe mbira mini Daniele heago mo mini wia hayagola Danielehanda hongo howa lalu, Wali ogoni homaragonaga genda i̱ yu holene hameore nale ko.
SUS 1:46 Tígua wali bameore bo wahole haru poremigonigo ainde ibu homaragola i̱na bia ko hene ndo wulebira, lene.
SUS 1:47 Wali agali bibahendeme de handadai biai howa tigua Daniele hale halu lalu, Bi ogoni agialego larebe, lene.
SUS 1:48 Ani hale hayagola Danielehanda wali agali tinaga deni howa lalu, Isaraele wali agali bibahende luluyu hai harimida. Tígua te emeneha yagi dege hale howa Isaraele wali mbira bereago bame homelo bo wahole bialu harimida.
SUS 1:49 Ai wahalu godi ogoni lone hale hole dai bidaba. Agali godi hale haga kirali ogoni libu ke̱ hayadago lene.
SUS 1:50 Ani laya handala wali agali ti godi laga wiagoria abale dai buwa tigua Danielehondo lalu, Ngode Datagaliwabehanda í̠naga mali dewa ndo wene igiri dege kegola í̠ manda timbuni ngiyada. Ai í̠na mini ngego baya hangu latagi hole ina haru ma. Ainde í̠ wene igiri emene dege helowa Ngode Datagaliwabehanda manda bayale mo ngiyadago, lene.
SUS 1:51 Ani layagola Danielehanda tihondo lamialu, I̱na agali godi hale hagane ogoni libunaga bi hale holiya libuni kaundiaha haga haga biladaba, lene.
SUS 1:52 Ani lowa Danielehanda agali godi hale haga mendego ala íbu lowa ibuhondo lalu, Í̠ agali waheore ko o kegoni í̠naga ko ngelo kego ayu panaga tagira ibiragoni ndobe.
SUS 1:53 Í̠ godi lako haga kegoni ndobe. Mbirali ko nabiago kago ko biya lalu tinaga mini mo ko halu mo yobia haga kegoni. Ani bialu mbirali mana ko bini kago í̠na mo dambi halu wahalu pu laga ke. Anigo Ngode Datagaliwabehanda ledagome mbirali ko nabi kago bameore homelo bo wanahabe leda.
SUS 1:54 Anigo ainde heneneore Susana ibu agali mbiralila heneyagua nde í̠ tigatiga langi. Ai libu ira agile teneha paleneyabe, lene. Ani hale hayagola agali biagome ladai bialu lalu, Ira, dugu heago andaneha heneyabe, lene.
SUS 1:55 Ani layagola Danielehanda lalu, Í̠ ke̱ haregoni ndobe. Í̠ni ke̱ haregome í̠ ayu biba hene kegoni. Ngode Datagaliwabenaga dahuliyalime ayu tibu nene gadele yu kagome í̠ dibu dagabu ki holenaga handaya ho kagoni, lene.
SUS 1:56 Ai agali godi hale haga mbira biago pu lalu godi hale haga agali mende biago íbu lene. Ibiyagola Danielehanda ibuhondo lalu, Í̠ore Kenana dindiha puya ko ngagonaga igini kegoni. Í̠ Yudali ndo kegoni. Wali baya berearume í̠naga mini mo luluya hayada. Ani bialu mini dimagoli wu heagome í̠naga embone mo ko hayada.
SUS 1:57 Isaraele bedarume í̠hondo gi haragola í̠na ti mo guya halu mo hondo haga ke. Ai Yuda wali mbira birayadagome í̠naga dimagoli ko wiridago mo hengedo waharagoni.
SUS 1:58 Ai libugua hendenedago wali agali ogoni libu ira agile teneha ko bialu heneyabe, lene. Ani hale hayagola agali godi hale haga biagome ladai bialu lalu, Ira hale timbuni heago teneha kayu bialu haribiya, lene.
SUS 1:59 Ani layagola Danielehanda lalu, Í̠ ke̱ haregoni. Í̠naga ke̱ ogonime í̠ni bo waharagoni ndobe. Ai ayu Anduane Homogonaga dahuliyali mbira í̠ dibu dagabuki holenaga ayu tibu nene gadele giha yu kagoni ndobe. Ai libu kirabali biba holeberebi, lene.
SUS 1:60 Ani layagola wali agali bibahendeme bi hongo howa ladagadaga bialu Ngode Datagaliwabehanda wali agali ibunihondo mini mbiraorewi kago biamogo biaga kagonaga mini yaraga halu hene.
SUS 1:61 Ani bialu agali godi hale haga kirali biagolabome bi henene letingi howa ke̱ halu gi do lalu laribigo ke̱ore haya lalu Danielehanda ti mo walia hayagola wali agali tigua libuhondo keba timbuni hene.
SUS 1:62 Mosesenaga mana lo ngagoha bi ogodagua leda. Mbiralime ke̱ howa godi lalu mendeali kago pani nelo mule lalu karia handa walia harimiyagua nde mende ali pani nelo mulene manda biyago ibuni nelo mulene nga, lalu gilibu nga. Anidagua bialu tigua agali kirali godi hale haga biagolabo homelo balu wali Susana ko mbira nabi biago mo wialu haru dai bini.
SUS 1:63 Ai Hiligiabi Susana ai̱yabi Susana agalini Yoagimibi Susana damene bibahende ibu hayarubi tigua Susanaha ko bini mbira nawiyago hondowa ti turu timbuni halu tigua Ngode Datagaliwabenaga mini yaraga halu hene.
SUS 1:64 Horo ogoningi howa Daniele ibu agali mini lene timbuni mbira ka lalu hatagi ho hene.
BEL 1:1 Ai Kini Asadiagese homayagola Pesia dindi howa agali mbira mini Sairusu henego ibu kini ha aribia hene.
BEL 1:2 Daniele ibu Kini Sairusunaga nenegeore howa kinihanda Daniele gubalini timbuni haga hene. Kini ibugua Daniele gubalini timbuniore ho hagagobi ibunaga nenege maru bu karu nahaga hene. Danielenaga biabe kini mini bayaleru talebu miaga hene.
BEL 1:3 Babilono wali agalinaga bi pupu wiaga gime wabini mbira mini Bele laga wini. Horo bibahendengi wali agalime balawa bayaleoreru mbasegedi nuha honowa nu homberiabi (12) nogo sibi pira mariabi (40) waini iba dewaore genda magi manda lida handari kirani pira duria (250) lowa urunidagua Belenaga loma wiaga wini.
BEL 1:4 Ainde Kini Sairusu ibugua Bele ogoni galoneorebe toba ho howa horo bibahendengi ogonihondo bi pupu wu piaga hene. Anigo ainde Daniele ibu ibunaga Ngode Datagaliwabe kagohondo bi lalu haga hene.
BEL 1:5 Ainde horo mbirungi kini ibugua Danielehondo hale halu lalu, Í̠na Belehondo bi pupu nawi kego irane agibe, lene. Ani hale hayagola Danielehanda ladai bialu lalu, I̱na mbirale bi pupu wulenaga agali gime wabini urunialehondo bi pupu nawiaga ko. I̱ Ngode Datagaliwabe ibuni holeneyi howa ibugua hari daliga dindibi wabialu wali agali bibahende handame ho howa haru haga kago andaneha haga ko, lalu ladai bini.
BEL 1:6 Ani layagola kini ibugua lone hale halu lalu, Í̠na inanaga bi pupu wiaga ngago ibuha holene nayi nga larego irane agome. Mbirale horo bibahendengi loma bu mialu kemaru naiore haga ngago nahendedebe, lene.
BEL 1:7 Ani layagola Daniele ibugua oba halu lalu, Kini-o í̠ tigua mohondo halu helo waholene nakarulape mbira kegoni. Mbirale bi pupu wiaga mini Bele ogoni dindime wabuwa daliga mboronosime para hadambi howa ngago ogonime tomobi ibabi mbira nolene nakarulapeore ndobe, lene.
BEL 1:8 Kini ibugua bi ogoni hale howa ibu tandaga emene ndo howa ibugua Belenaga loma binigo mo miaga agali bu hearu ibidaba lene. Ibiyagola ibugua tihondo hongo howa lamialu, Tígua bi pupu wiaga Bele ogonime tomo loma bu mialu kemagonaga lalu heneneore mo walia naharimiyagua nde tí homalimulo bo wahai holebero. Anigo ainde bi pupu wiaga Bele ogoni ibugua loma wialu kemaruni bibahende heneneore naiore haga ngago mo walia harimiyagua nde Danielehanda inanaga bi pupu wiaga baya ngago mege biyago ainde ibuni homelo, lene.
BEL 1:9 Ani layagola Daniele ibugua kinihanda bi layadago karulape lene. Agali Belenaga loma binigo mo miaga pira karia (70) bibahende howa ti one waneiginibi bere hene.
BEL 1:10 Ai Daniele ibu kini heba bi pupu wiaga Belenaga anda heagoha pene.
BEL 1:11 Piyagola Belenaga loma binigo mo miaga agali hearume lalu, Kini-o ina bibahende tagira piai haramagola í̠nime tomobi waini ibabi tebolo dagia ngagoria mo manda manda bu wiai habe. Ani wialu í̠ni tagira pialu panga baya hangu paya dai bialu kininaga magi pangani helabe. Ani bialu egerebahagi dai bibe. Dai buwa handalu keria Bele ibugua tomo uruni nai nahe wiagua nde í̠na ina bibahende bo wahai habelo. Anigo tomo uruni nai hayiyagua nde Daniele ibugua inahondo bi ko layagonaga ibuni homelo, lene.
BEL 1:12 Anigo ainde agali loma binigo mo miaga uruni tigua anda ogoni tamuha panga wia do hene mbira dagia wiago andaneha ngelo howa ti mogo nale hene. Ani ngelowa mbiraga bibahendengi tigua panga wia do hene ogoniha anda puwa tomo ngago nai halu piaga hene.
BEL 1:13 Ai agali loma binigo mo miaga biaru ti peagola kini ibugua tomobi waini ibabi dagiani mo manda manda bu wiai hene.
BEL 1:14 Ani wiai heagola Danielehanda agali ibunaga biabe bia haga hearuhondo lamialu, Be abalu dewaore dugu yalu ibuwa anda tamuha wali agali ge haga wiagoria dugu paya bu ngeladaba, lene. Mbirale ogoni biyago kini ibu hangu hendene. Ani biai halu ti tagira puwa panga payadai bini. Payalu kininaga magi pangani de hondo wialu ti andaga pene.
BEL 1:15 Anidagua bialu peagola mbiraga urumaha agali Belenaga loma binigo mo miaga hearubi ti one waneigini bu hearubi bibahendeore horo bibahendengi biaga winidagua panga haraba wia do hene biagoha anda puwa tomobi waini ibabi dagiani manda manda bu wiyago naiore hene.
BEL 1:16 Egerebagiore kini Danielela heyalu Bele bi pupu wiaga andaha tomo wiyago hondole pene
BEL 1:17 Puwa kini ibugua Danielehondo lalu, I̱naga gi magigo hondole pangani helarugo budayadabe nabudidabe, lene. Ani layagola Danielehanda ladai bialu lalu, Agali haguane-o nabudida, lene.
BEL 1:18 Ai kini ibugua panga dugualu anda puwa handalu hearia tomo dagiani manda manda bu wiyago nawiyagola ibugua lalu, Bele í̠ timbuniore. Í̠ ke̱ nahaga kegoni, lene.
BEL 1:19 Ani lole lalu heaore dege Danielehanda oba halu kinihondo hondo ha hondo ha lowa lalu, Ai dindi ge haga ngagoria de ala handa. Ai i̱ hale holiya ge hayadago ogonaga ge lalu langi, lene.
BEL 1:20 Ani layagola kinihanda ge biago hondowa lalu, Walibi agalibi waneiginibi hai hayadane hendedo, lene.
BEL 1:21 Ani lalu kini ibugua keba timbuni howa, Agali loma binigo mo miaga biarubi ti one waneigini heba ibaiore hadaba, lene. Ai tigua ibalu anda tamuha panga haraba wiado hene ngagoha anda ibalu tomo nai haga wiago kini hendelo mo walia hene.
BEL 1:22 Ani biyiyagola kini ibugua badaba layagola agali loma binigo mo miaga biaru homelo bo wahai hene. Ani bialu kinihanda wali agalinaga bi pupu wiaga Bele wiago Danielehanda Bele heba ibunaga anda timbuni heagobi bo gialabaga bialu mo ko hai hene.
BEL 1:23 Babilono wali agalinaga bi pupu wiaga puya timbuni mbira wini.
BEL 1:24 Ainde mbirungi kini ibugua Danielehondo lalu, Ainde í̠na bi pupu wiaga puya timbuni ngago ibuha holene nayi nalolebere. Ibu holene yiore ngago ai í̠na ibuhondo bi pupu wulene karulape, lene.
BEL 1:25 Ani layagola Danielehanda ladai bialu lalu, I̱na Anduane Homogo ibu hangu holenehe kago ibunaga mini hangu yaraga haruli.
BEL 1:26 Ai kini-o í̠na karulape lariyagua nde i̱na puya timbuni ogoni bo waholebero. I̱na ogoni bole howa i̱na ayu tibu wai biagane nene gadele ngagobi kangobi mbira nayi howa bameore homelo bolebero, lene. Ani layagola kinihanda ladai bialu, Karulapego í̠na babehedabe hondole pu, lene.
BEL 1:27 Ani laya handala Daniele ibugua puwa mundu kalaro ale mbirale mindibi ndobabi wiagobi nogo habene wiarubi wali agalinaga mandaribi mo biamaga howa todobeneha hiruwa deagola mo molo̱ molo̱ bigi buwa puya biago nelo mini. Puya biagome mbirale uruni nai hayagola ibunaga tombene timbu halu pururu lalu tulalaki hene. Ani homayagola Danielehanda tihondo lalu, Tínaga bi pupu wiaga wiyuago ogonibe, lene.
BEL 1:28 Ani biyago Babilono wali agali bibahendeme hale hai howa tigua keba timbuni howa tinaga kini bope hole manda biai hene. Tigua hongo howa lalu, Ai inanaga kini biago ibu ai Yudali hayada. Abale inanaga bi pupu wiaga Bele bo pambulabaga bu wahai halu agali Belenaga loma binigo mo miaga hearu bo wahai hayago. Ani bialu mani inanaga puya dama bi pupu wiaga wimago bo wa hayada, lene.
BEL 1:29 Tigua kini berearia puwa kinihondo lalu, Daniele ibu inanaga giha minu ya habelo hame ledema. Anidagua layagola iname í̠nibi í̠ one waneiginibi í̠ damene bibahende bo wahai holeberema, lene.
BEL 1:30 Tigua genda timbuniore kini mo ya hene. Anidagua biyagola ibugua gi timbuni howa Daniele tinaga giha minu ya hene.
BEL 1:31 Ani biyagola tigua Daniele minu yalu puwa gundu uli laiono heagoha bape hene. Ani buwa tigua horo waragaria uli laiono haga wiagoha ngelo hene.
BEL 1:32 Gundu uli laiono haga ogoniha laiono karia hene. Horo mbira mbirani laiono ti wali agali kira nalu nogo sibi kira naga hene. Anidagua biaga henego ai horo ogoningi laiono urunime Daniele balu nelonaga tigua laiono tomo nami hene.
BEL 1:33 Horo ogoningi agali Anduane Homogonaga bi mana latagi haga agali mbira mini Habagugu Yudiaha hene. Ibugua agali maru mabuha biabe bialu widi gandulo mogo bialu hearunaga tomo dawa yalu polenaga nogo mbiriniru todobeneha iba heba dawa yalu mberediru ogoniha budu ibira haga buwa yalu pole pialu hene.
BEL 1:34 Harigani pialu hearia dahuliyalime ibuhondo lamialu lalu, Í̠na tomo ogoni Daniele nelo Babilono yalu pu. Daniele ayu ogoni Babilono dindiha uliha laiono haga wiagoha minu bape henego beda, lene.
BEL 1:35 Ani layagola Habaguguhanda ladai bialu lalu, Í̠ Babilono nahendene kogoni. Ani bialu laiono uli ogoni agoha ngabe i̱ manda nabi kogoni, lene.
BEL 1:36 Ani layagola dahuliyali biagome Habagugunaga mandari heagoria yaraga howa yalu harini puyabu poradagua bialu Babilono yu pene. Yalu puwa Babilononi laiono uli wiagoria kaware yu ibira hene.
BEL 1:37 Ani biyagola Habaguguhanda lalu, Daniele Daniele-o Ngode Datagaliwabehanda í̠naga tomo maru wia hayago mo ibu, lene.
BEL 1:38 Daniele ibugua Habaguguhanda bi layago hale howa Ngode Datagaliwabehondo bi ogodagua lene. Ngode Datagaliwabe-o í̠na i̱ mitangi bu haga kegoni. Wali agali í̠ gubalini haga karubi embeda nahagaore kegoni, lene.
BEL 1:39 Daniele ibu abale heyuwa tomo nalu berea handala Ngode Datagaliwabenaga dahuliyali biagome Habagugu yalu ibuni dalu yu dai bini.
BEL 1:40 Ai horo kaneni kini ibugua Danielenaga dugu bulenaga laiono uli wiagoria pene. Puwa uli biagoha handape halu hearia Daniele laionome balu na nabi berearia hendene.
BEL 1:41 Ani hondowa kini ibugua hongo howa ladaga howa lalu, Danielenaga Ngode Datagaliwabe í̠ hangu Anduane Homogo kegoni. Í̠ hangu Ngode Datagaliwabeore kegoni, lene.
BEL 1:42 Ani lalu agali bu hearu hondo lamialu Daniele uliha bedago irigi halu ibilo yamidaba lene. Ani bialu kini ibugua Daniele bolene manda biaga hearu tini laiono uli biagoha minu bape hadaba layagola tigua minu bape hene. Ani bape hayagola kini ibuni de hondo heaore dege laiono biarume agali biaru abale balu buda migimigi bialu nai hene.
1MA 1:1 Alegesanda ibu Masedonianaga Kini Pilibi igini howa ibugua ami agaliru haru halu Masedonia dindi wahalu Pesia dindi Midia dindilanaga Kini Dariusula wai bule pene. Ani bialu Alegesanda ibugua Dariusu bope halu ibu Pesia dindinaga kini ho aribia hene. Pigane Girigi wali agali hangunaga kini hene.
1MA 1:2 Alegesanda ibugua wai dewaore bialu tano hongohe wiaru balu bo bodahana haga bini. Ibugua dindi kaundia tara tara wiaruha wai bialu kini bu hearu bo wahai halu dabudabu bayale tara tara wiaru mo page bigi bialu dindi anda bo labu haga bini.
1MA 1:3 Ani bialu ibugua dindi bibahende wiaru handame hai ho howa ainde ibu gibiore mbira kogoni lo mitangi bu hene.
1MA 1:4 Ibunaga ami agali hongoheore dabo helowa ibugua dindi tara tara bu wiarubi wali agali uruniha hearubi kini hearubi handaya ho heagola tigua ibu dagisi migi bialu hene.
1MA 1:5 Mani howa Alegesanda ibuni warago timbuni bayagola ibuni homeleda lo manda bini.
1MA 1:6 Ani manda bialu ibugua agali maru ibuni baba mandagi igiri emeneni howa hama ibalu ayu ti ami agali haru bamba haga heneru bibahendehondo dindi ibugua handaya ho heneru ti mo tahaga bini.
1MA 1:7 Alegesanda ibu mali homberia kini halu homene.
1MA 1:8 Homayagola mani agali haguane biaru ti mbira mbirame dindi tini wai bialu mo wiyaru handaya ho haga haga bialu
1MA 1:9 tini dindi uruninaga kini haga haga bini. Ani bialu mani howa ti igini aguanerume tini henegoria henge mialu ho aribia haga bialu mali dewaore hene. Ani howa tigua wali agali dindini hearu genda timbuni dewaore mo migi bialu hene.
1MA 1:10 Andiogusu Ebipanese ibu Kini Andiogusu tebone henego ogoni igini howa ibu kini agali ko henedaru aria mbira hene. Ibu tano timbuni Lomo wiagoria garabaya henego ai Giriginaga mali daga handari mbira pira tebirani karia (137) layagola ibu kini hene.
1MA 1:11 Horo odaruningi Isaraele dindiha wali agali Anduane Homogonaga bi mana mo wahaga maru howa tigua wali agali mo luluya halu lalu, Ai wali agali tara Anduane Homogo mitangi nabiaga kaware karu baba mandagi biabe biamaga halu holene nga. Inane hangu hemagola genda tara tara wiaru inaha anda ibugu biyagonaga ani bulene nga, lene.
1MA 1:12 Wali agali dewaoreme bi ogoni bayaleda lalu
1MA 1:13 marume turuore howa tigua wali agali tara Anduane Homogo mitangi nahaga tara karunaga mana ngago talialu bulenaga tigua kinihanda bule pudaba larabe hondole gerai lalu kini hale hole pene.
1MA 1:14 Ani bialu tigua gini biagane hama timbuni mbira Girigi dindiha wabu wigi biadagua Yarusalemeni wabu wini.
1MA 1:15 Ani bialu Isaraeleali tinaga tingini podene heago lone heladai bini. Tigua anidagua binigome habo nalolene bi Ngode Datagaliwabehanda ti baba lo wiyago pugini. Ani bialu ti wali agali tara tara Anduane Homogo mitangi nahaga hearubaba nenege halu howa tigua mana ko tara tara wiaru bialu hene.
1MA 1:16 Andiogusu ibunaga gabumane biabe bulene wiago buwa mo hongo hai howa ibugua Iyibi baba wai bialu Iyibinaga kinibi ibu dege howa ibugua dindi kirabali handaya ho holene hame lene.
1MA 1:17 Ani manda buwa ibunaga ami agali hongohe hearu haru halu Iyibi pene. Ibugua wai biaga garo ale nogo hosime gililaga karisi wiarubi nogo timbuni tara mini elepana hearubi haru halu nogo hosirubi haru halu sibi dewabi heba pene.
1MA 1:18 Pialu Iyibinaga Kini Tolemi heago baba wai bini. Wai bialu howa Tolemi ibu gi halu ibida dai bialu pu waore hayagola ibunaga ami agali bu hearu bibahende bo wahai hene.
1MA 1:19 Andiogusuhanda Iyibi dindiha tano hongohe wiaru bo poda anda howa ibu karu lai halu wali agali tinaga dabudabu wiaru damene bibahende mo hilo yai halu bini.
1MA 1:20 Ai mali handari mbira pira mariani tebira (143) hayagola ibu lone dai buwa ami agali dewaore haru halu Isaraele dindihabi Yarusaleme tanohabi wai bule pene.
1MA 1:21 Ibugua mineore tara howa Ngode Datagaliwabenaga anda heagoha anda puwa mbirale lotunaga wiaru damene mo yai hene. Anduane Homogonaga lomabu delaga dabu ngolome wabini heagobi lamu hale hedo wiaga gene hearu heba biabe ogoninaga biaga wiarubi
1MA 1:22 tebolo dagia mbira mberedi Anduane Homogo lomabu minigo wiaga heagobi waini iba hambu lomabu miaga gabo be wiarubi ira hagua ngabilo delaga mini inisenesi lomabu delaga ndisibe beledirubi labolabo timbuni Anduane Homogo anda tamu Hobane Loma Bia Heneore hoba amu heagoha panga paya amu haga heagobi mo yalu yári tara tara ngolome wabini wiarubi mo yai halu bini. Ani bialu anda biago haneni ngolome yári bia hearu gialo yai hene.
1MA 1:23 Ani bialu silibabi ngolobi gabo be tara tara muni dewaoreme yolo bu wini wiarubi muni bibahendeore mo do hearubi mo yai halu pene.
1MA 1:24 Mbirale uruni bibahende ibu dalu mo yu piai hene. Ibugua wali agali dewaore bo wahai halu mbirale o biyadaruninaga ibu wayaliore timbuni tingi howa ibuninaga mini yaraga halu hene.
1MA 1:25 Ani biyagola Isaraele dindi bibahendeha kiabu dugu dewa bialu hene.
1MA 1:26 Agali haguane hearumebi agali haru bamba haga hearubi tigua dugu timbuniore bini. Wandari igiri daliahe bu hearunaga hongo pirilope halu wali baya biragaru dengui mo koheru berene.
1MA 1:27 Agali maru ti wali aidege daubu hearume kiabu dugu bialu haga haga bini. Wandari maru agali andaga ayudege pene berearu dugu bialu biru wima pene.
1MA 1:28 Ainde wali agali dugu biyagome dindi dumbidumbi biyagola Isaraele hameigini bibahendeore taga hai hene.
1MA 1:29 Mali kira piyagola kini ibugua ami agali haguane mbira ami agali dewaore haru halu Yarusaleme wali agaliha dagisi muni mule pudaba lene.
1MA 1:30 Agali ami haru haga ogonime bi bayale lalu howa ke̱ halu ibunaga miniha ko mo hondo holene mana palia to̱le hene. Wali agalime ibunaga bi bayale layagoha mini pelai howa hale ho wai heagola wai abale hedope halu wali agali bu hearu bai hene. Ibugua ti bope halu Isaraele wali agali dewaore bo wahai hene.
1MA 1:31 Ibugua Yarusalemeha mbirale bayale wiaru mo yai halu tano bibahende bo heda haiore hene. Anda bu hearubi tanonaga wai pabe hongohe egeme bini heagobi bibahende irame bo heda hai hene.
1MA 1:32 Wali waneigini bu hearu garabaya helai halu nogo bulumaga bu hearu kayu haru hai halu bini.
1MA 1:33 Ani bialu mani howa tinime Yarusaleme tanonaga hobane mbira mini Debidinaga Tano laga wiagohayagi hagira bu mialu ege pabe daligaore biadaga howa pabe neneni ami agali mamage howa handapugu bu haga andaru bu helaga bini.
1MA 1:34 Ani buwa tigua agali maru mana ko ngago bialu mana puguaga hearume tinaga anda hongohe ogoniha mamage howa handaya ho helo helene.
1MA 1:35 Tini holenego mo hongo hai howa tini tomo nolenebi wai biaga alerubi mo mogo bu wiai hene. Ani bialu tigua mbirale Yarusalemeha page mo yayaruni anda ogoniha mo do howa wiai hene.
1MA 1:36 Tigua Isaraele wali agali baba waitigi timbuniore halu maru Anduane Homogonaga andaha pole piyaru mo gi haga bialu hene.
1MA 1:37 Wali agali bayaleru Anduane Homogonaga anda biagoha berearu homelo bo wahai haga bini. Mana ko tigua biyagome Anduane Homogo anda loma biahe baya heago mebia halu mo dodohe helene.
1MA 1:38 Wali agalime gi timbuni howa ti Yarusaleme wahalu ibida piai hene. Ani piai hayagola Yarusaleme wali agali tara hearu ti dege dalu wini. Wali agali tara dindi taraha howa ibini hearu tinaga tano buhinu wini. Yarusaleme wali agali tini tano ogoni wahalu piai hene.
1MA 1:39 Ngode Datagaliwabenaga anda biago wali agali naheha bameore ho wahene mbira ani hene. Horo timbuni turu ho haga winingi dara howa dugu bialu holene wini. Sabada horongi tagaho holene horo wia aribia hene. Ani wiagola wali agali tigua anda biago bayale mini lene ka lalu mini yaraga nahene. Ani nabi tigua anda ogoni mege bialu bi ko hangu lalu hene.
1MA 1:40 Bamba Yarusaleme mini lene daliga winigo ai ayu ibu tagabiore nga. Abale ibu turu ho hene. Ai ayu ibuha turu holene biago beregedalu dara holene wia aribia ka.
1MA 1:41 Ai kini ibugua mana mbira wabialu lalu, Wali agali bibahende dindi ibugua haru howa handaya ho kago bibahendeha bu kamiru tígua tíni dindinaga mana ngago wahai halu mana mbiraore hangu biame halu dindi mbira wali agali haradagua bialu halimu, lene.
1MA 1:42 Wali agali bibahende dindi bibahendeha bu hearume kininaga mana ogoni karulape lai hene.
1MA 1:43 Ainde Isaraele wali agali dewaoremebi kininaga bi layadago talialu howa mbirale bi pupu wiaga gime wabini wiaruhondo bi pupu wialu lomaru bu mialu howa Sabada mana lo ngago wahaiore hene.
1MA 1:44 Ai kini ibugua beba mbira gili buwa agali marume yalu Yarusalemehabi Yuda dindiha tano maru ngaruhabi piai helene. Ibugua beba ogoni gilibu wia howa lalu, Mana gahenge ngago talialimu, lowa pelene.
1MA 1:45 Ibugua tihondo lawia halu, Loma damene bibahende loma irame dai helolenebi widi lomabu delolenebi waini iba odo lomabu delolenebi uruni bibahende wahai halimu. Ani bialu Sabada horongi biabe bialu lotu laga horo timbuni tagira ibirangibi biabe bilimu.
1MA 1:46 Tí Anduane Homogonaga anda kagobi agali anda ogoniha biabe bialu loma binigo mo miaga karubi bibahende mo nagalone hai helalimu.
1MA 1:47 Ani bialu tigua mbirale bi pupu wule gime wabini ngagonaga andaru bia halu lomabu delaga daburu bia halu dindi wiabagi heneru mo ngelaga bilimu. Loma bo delole howa nogoru ema bialu piaga marubi tinaga maname nabiaga ngago bo lomabu delalimu.
1MA 1:48 Tí igini taba hanaragola dongone podo mabu bulene nawiore. Ani bialu tínaga maname tíni Ngode Datagaliwabenaga deni dodohe holino nabiagane ngago bialu halimu.
1MA 1:49 Tigua mana bamba Anduane Homogohanda Mosesehondo mini yu kago wahai holene nga. Ani bialu mana ogoni mo bagi halu waore holene nga, lene.
1MA 1:50 Ani lowa kini ibugua lalu, Wali agali mana ogoni talia nabi kago ibu homelo bo waholene wulebira.
1MA 1:51 Ani lalu ai kini ibugua bi ogoni dindi ibugua handaya ho howa haru hene wiago bibahendeha piai helene. Ibugua agali haguane maru wali agali haru helo dabo helaga bialu howa lalu, Yuda dindiha tano ngaru bibahendeni mbirale bi pupu wule gime wabini ngagohondo loma mialu halimu, lene.
1MA 1:52 Ainde Yuda wali agali dewaore agali haguane uruninaga bi hale howa talima pialu Anduane Homogonaga bi mana lo wini ngago erembira mialu piai hene.
1MA 1:53 Anigo mana ko ogoni bialu howa Yuda wali agali maru dindi tara tara wiaruha ibida pugu pugu binigo ai dindi tara uruniha hadoho haga haga biai ka.
1MA 1:54 Ainde ege mini Kisilebenaga horo nguini (15) mali handari mbira pira mariani duria (145) hayagola Kini Andiogusuhanda bidaba layagola mbirale ko taraore ogoni Anduane Homogonaga anda kagoha lomabu delaga dabu heagoria, Mo wilimu, lene. Ani bialu tigua Yuda dindi maru wiaruha loma bu delaga dabu bu helai hene.
1MA 1:55 Ani bialu anda harabanibi hariga pedago bibahendenibi ira hagua nga biaga inisenesiru delaga biaga wini.
1MA 1:56 Ani bialu howa tigua Mosesenaga bi mana lo wini mbuga mbira ngane handayagua tigua budabaga buwa iraha delaga hene.
1MA 1:57 Mbirali ibu habo nalolene bi lo winigonaga mbuga yu howa Ngode Datagaliwabenaga mana taluwa bialu heagua ogoni ibu homolene nga lalu kini ibugua bi hongohe ogoni lo wini.
1MA 1:58 Ege dewaoreni Isaraele wali agali tinaga tanoha hearia minu yania hene biaru mo ko timbuni halu hene.
1MA 1:59 Ai ege mini Kisilebenaga horo pira kirani duria (25) hayagola tigua mbirale bi pupu wiaga gime wabini biarunaga lomabu delaga dabu Ngode Datagaliwabe ibuni kagonaga lomabu delaga dabu heagoria wiadambi haga biagoria lomabu delene.
1MA 1:60 Tigua kininaga mana lo wiago talialu walime ibu igininaga tingini agalime podamabu bidaba lene bedaru bo wahai hene. Waneigini gali henedago ai̱ya ibuni mani pongobia howa libu haru homelo bo wahaga bialu hene.
1MA 1:61 Ani bialu tinaga damenerubi agali waneigini galinaga tingini podaga hayadagobi bibahende homelo bo wahai hai haga bini.
1MA 1:62 Ani bialu heago helowa Isaraele wali agalime kininaga bi mo wahalu Anduane Homogonaga maname tomo nanolene leago damene bibahendenaga hene.
1MA 1:63 Isaraele wali agali tigua habo nalolene bi Ngode Datagaliwabela lo winigo pugualu tomo tara tara maname nanolene lo ngaru nanole howa tini homolene karulape lalu homole manda manda bu hene. Anidagua bialu hayagome wali agali dewaore homai hene.
1MA 1:64 Ai ogoningi ti genda timbuniore yu hene.
1MA 2:1 Horo ogoningi Madadiasa ibu Yarusaleme wahalu Modeini tano pu hene. Madadiasa ibu Yone igini howa Yone ibu Simeono igini hene. Ani bialu Simeono ibu agali loma binigo mo miaga Yahoiaribi aria mbira hene.
1MA 2:2 Madadiasa ibu igini duria hene. Igiri mbirago mini Yone henego ibu mini mende Gadi laga hene.
1MA 2:3 Igiri mende Saimono henego tigua ibu mini Tasi laga halu
1MA 2:4 tebone mini Yudasa henego mini mende Magabeusu laga halu
1MA 2:5 manego mini Eleasa henego mini mende Abarana halu dauni mini Yonadana henego mini mende Abusu laga hene.
1MA 2:6 Ai Madadiasa ibugua handalu hearia wali agalime Yuda dindi bibahendenibi Yarusalemenibi tigua Ngode Datagaliwabenaga bi mana lo wini ngago bibahendeore puguai halu heago hondowa ibugua lalu,
1MA 2:7 Ainde mbirale ko ayu íbu ngaruni hondoliya i̱ ai̱yahanda i̱ aginaga taba henenedabe. Ainde Ngode Datagaliwabenaga tano loma biahe wiago bo gialahole biai hene wialu wali agali i̱ damene bu heneru bibahende homai hayago i̱ni deme hendedogoni. Ai horo tano ogoni waitigi heago mo miyangi wali agalime de hangu handaya ho bereagola agali tara tagira howa ibini biarume Ngode Datagaliwabenaga anda kago ti karulalu handaya ho kagonida.
1MA 2:8 Agali mini nawi daga nawi mbira kaligobi Anduane Homogonaga anda biago mo ko halu mo ngubia hene kagonida.
1MA 2:9 Mbirale lotunaga biabe biaga wiaru bibahende waitigime mo yu piaiore hayagonida. Waneigini bu hearu tano gibuni wiagoha bo wahai haya. Igiri daliahe hearu wai biagane ayu tibu nene gadele ngagome dabalu bo wahai haya.
1MA 2:10 Ainde ayu wali agali dindi tara tara wiaruha howa Isaraelenaga tano wiaruha íbu hai howa tinaga mbirale wiaru mo pagebu yai haragonida.
1MA 2:11 Tanonaga yári tara tara wiaru bo gialo yai haya. Ayu ibuha mbirale mbira nawi bameore garabaya biabe bia haga agali hagagobi nga. Ani bialu ibuni hameledago bilo golope hene ndo nga.
1MA 2:12 Anduane Homogonaga anda baya taraore kago de handa. Bamba ibu inanaga yári biahe taraore mbira hayago ai ayu agali tara bu hearume ibalu bo gialohole binigo ibuha mbirale bayale lenego mbira nawi bameore ngagoni ndobe.
1MA 2:13 Ainde inabi homai holene ngago nahome ibagabu kemago agua buleda, lene.
1MA 2:14 Ai Madadiasa halu ibu iginiru tinaga miniha genda timbuni yu howa tinaga aga bu hearu minu lerelai halu dara ho howa karu lagane aga ko wiaru karu lo howa dugu bialu hene.
1MA 2:15 Ainde kininaga biabe biaga agali haguane wali agalime Ngode Datagaliwabe erembira mialu helo mo bia haga bu hearume Modeini tanoha wali agali bu hearume mbirale bi pupu wiaga gime wabini wiagohondo bi pupu wilo mo bia hole ibini.
1MA 2:16 Isaraele wali agali dewaore agali haguane uruni heba mandagi heagola Madadiasa hangu ibu dameneru heba mandagi gibuniha hene.
1MA 2:17 Ani heagola agali haguane kininaga biabe biaga biarume Madadiasahondo hale halu lalu, Í̠ agali tano ogonaga haguane howa ogoha mini lene timbuni mbira í̠ kegoni. Ani kegola í̠ igini bu karubi í̠ damene bu karu tibi nde í̠ talima ibaga kagoni.
1MA 2:18 Ai í̠na kininaga bi ledago talialu ho bamba howa bialu ha nabi kego agibe. Wali agali tara tara bu karume Yuda wali agali heba maru Yarusalemeha karubi tigua taluwa bialu kago. Ainde í̠nabi ogonidagua bialu hariyagua nde í̠nibi í̠ iginibi tí mini kininaga nenege laga karu aria dege holeberemi. Ani howa ti mini lene timbuni howa muni silibabi ngolobi yári tara tarabi bame mo turu halu ngulebira, lene.
1MA 2:19 Ani layagola Madadiasa ibugua hongo howa bi ladai bialu lalu, Wali agali bibahendeore dindi bibahende kini ibugua handaya ho kagoha bu karume ti mamalinaga bi pupu wiaga mana ngaru wahai halu kininaga mana ngago talialu hai heaguabi i̱na anidagua bulene nawiore.
1MA 2:20 I̱nibi igini bu karubi i̱ damene bu karubi ina bibahendeore Ngode Datagaliwabehanda habo nalolene bi inanaga mamaliru baba lo winigo hongo howa yu haabo holeberema.
1MA 2:21 Heneneore gi dolalu larogo iname Ngode Datagaliwabenaga bi mo wahalu polenebi mana lo wini ngago pugualu polenebi nawiore.
1MA 2:22 Iname kininaga bi hale naholeberema. Ani bialu inanaga lotu laga ngago mo aribia naholeberema ndobe, lene.
1MA 2:23 Madadiasa ibugua bi ogoni lai hayagola Yuda agali mbirame wali agalinaga deni heyu howa mbirale dama mitangi bialu bi pupu wiaga gime wabini wiagonaga lomabu delaga dabu wiagoria heyu howa lomabu mule bialu hene.
1MA 2:24 Ani biyago Madadiasa ibu de hondowa ibunaga miniha tandaga timbuniore ira hunguale bialu tingini bibahende durula gimbu bini. Ani biyagola abale pogolalu pua agali lomabu delole bialu hayago ayu tibume gaibu dibuwa lomabu delaga dabu ibuni hayagoria ngelene.
1MA 2:25 Ani buwa kininaga biabe biaga agali haguane wali agalihondo loma ogoniale bu deladaba lowa bi lalu hayagobi o heagoriani heaore abale tibume burulaki ho ngelene. Ani buwa bi pupu wiaganaga lomabu delaga dabu bu heleagobi bo gialo wahai hene.
1MA 2:26 Ainde Madadiasa ibugua o biyadagoni Ngode Datagaliwabenaga bi mana lo wini ngago yu tiga ogobi bido lalu mo walia hene. Bambaore Piniasahanda Salu igini Simiri ogonidagua dege bialu bo wahene.
1MA 2:27 Ani bialu Madadiasa ibu hariga pugu biagoha pialu howa bi ladaga halu lalu, Wali agali maru Anduane Homogonaga bi mana lo ngago mitangi bu haabo howa ibunaga habo nalolene bi lo ngago talialu haga kemiru tí ayu ogoni i̱ talima ibidaba, lene.
1MA 2:28 Ani lalu Madadiasa halu ibu igini biaru tinaga mbirale wiyadaru bibahende tanoha ngelalu tini hari bare wiagoha ha do hole ibida pene.
1MA 2:29 Horo ogoni Isaraele wali agali dewaore Ngode Datagaliwabenaga mana ngago talialu hole hame lene.
1MA 2:30 Ai ti genda tandagala dewaore yu henegome ai tinaga walibi waneiginibi tinaga nogo bulumagarubi dabudabu wiarubi mo yai halu dindi ko wali agali nahaga wiagoha hole pene.
1MA 2:31 Ani peaha ami haru hagabi ami agalibi Yarusaleme Debidinaga tano wiagoha anda hongohe biagoha hayaru ti hale halu hearia wali agalime kininaga bi mo wahalu tini ha do hole ibida piya layago hale hene.
1MA 2:32 Ani hale halu ami agali dewaore wali agali uruni haruru talima pene. Pialu wai Sabada horongi bulenaga ti heago hondowa tinaga deni balai anda abale bini.
1MA 2:33 Ami agali haru haga agali haguane bu hearume Isaraele wali agali bu hearuhondo laamu halu lalu, Ayu ogoni tínaga henge emeneore ngagonigo ainde tí ha do harimidagoha howa tagira ibalu kininaga mana ngago talialu harimiyagua nde tí homolene nawulebira, lalu laamu hene.
1MA 2:34 Ani layagola wali agali biarume ladai bialu lalu, Ndo ina naibuleberema. Kininaga bi ogoni hale naholeberema. Ani bialu Sabada horo mana ngago napuguleberema, lene.
1MA 2:35 Ani laya handala ami agali biarume wai abale tungulope halu pene.
1MA 2:36 Anigo ainde Yuda wali agali tigua wai biadai nabini. Tigua ege to̱le̱ wiarume dugualu bolenebi tinaga bira do hagane wiago hagira bulenebi bibahende nabiore bame handaya ho hai hene.
1MA 2:37 Ani howa tigua lalu, Karulapego ina homoloma̱ya waha. Inaha ko bini nawi bameore hene kemago bame bo waharamigo mana ko timbuniore beremi. Ai ko birimi lalu latagi holene dindi ngagola dahuliya andagala libu ngagoni ndobe, lene.
1MA 2:38 Ainde waitigi biarume Sabada horongi wai bini. Ani buwa tigua wali agalibi waneiginibi bibahende daosini mbira (1,000) homelo bo wahai halu tinaga nogo bulumaga bu hearu heba bo wahai hene.
1MA 2:39 Ai te Madadiasa halu ibu damene biaru ti hale howa dara timbuni hene.
1MA 2:40 Ani howa ai tini dege bi la la bialu lalu, Ina damene urunime biyadadagua nabimi̱ya. Tigua waitigi baba wai bialu badai nabiyadagome tininaga holenebi mana lo wini ngagobi kirabali yu wahai hayada. Ainde inamebi ogonidagua dege birimayagua nde ina damene lenego mbira dindini nahe hameigini mbirago erebaore holobada, lene.
1MA 2:41 Ani lalu horo ogoningi dege tigua bi pongo wialu lalu, Ai waitigime ina baba wai Sabada horongi biyagua nde inamebi wai biadai bimi̱ya. Inabi nde ina damene maru tinaga ha do haga wiagoha homayadagua dege homoligo wai biadai bimi̱ya, lene.
1MA 2:42 Ai Isaraeleali agali wai biaga hongohe pari wayali Hasidi hameigini laga heneru ibalu Madadiasa heba hatago hene. Ainde Ngode Datagaliwabenaga mana lo wini ngago baba waitigi ho karu baba wai bulenaga ibini.
1MA 2:43 Ani bialu Isaraeleali abale ibida pialu ha do ho heneru ibalu Madadiasanaga ami heagoha hatago hai hene.
1MA 2:44 Agali uruni hatago hayagola ami agali hongohe mbira tagira pene. Ani howa tigua Isaraele agali mana pugualu piaga biaru baba keba ndo howa ti baba wai bini. Isaraele agali ko uruni aria maru ibida pora bialu puwa wali agali Anduane Homogo mitangi nahaga bu hearu baba pu hene.
1MA 2:45 Ai Madadiasa halu ibu nenege agali biarume dama mitangi bialu gime wabini bi pupu wiaga biarunaga lomabu delaga dabu bu helearu bibahende bo gialo wahai hene. Tigua Isaraele igiri emene ngola haga biyaru minu yania howa
1MA 2:46 tinaga dongone abale poda mabu nabi heneyagua tigua podaga bini.
1MA 2:47 Tinaga waitigi mine haga biaru bama talima pialu ai wai bayaleore bialu hene.
1MA 2:48 Tigua agali haguane bu hearumebi agali kini hearumebi Anduane Homogonaga bi mana Mosesehanda lo wini ngago tigua mo nagalone howa pugualu helo hame nale hene. Ani howa tigua agali mana ko biaga bu hearunaga hongo bope hai hene.
1MA 2:49 Ai Madadiasa ibu homole biruwa ibu iginiruhondo lamialu lalu, Mine holene mana hongoheore tagira ibalu ina bibahendeore bahandai haya. Ayu kemagoni genda timbuni bu ngangi kema.
1MA 2:50 Anigo tí i̱ igini bu kemiru tígua Anduane Homogonaga bi mana lo ngago hongo howa yu halu tigua Ngode Datagaliwabenaga habo nalolene bi ina mamaliru baba lo wini ngago hongo howa talialu kemigonaga harugo lowa homole manda manda bu haabo halimu.
1MA 2:51 Ina mamaliru ti dindi ogoria heangi howa bialu henerubi biabe tigua bialu hene ngarubi baya hangu mitangi bialu halimu. Baya hanguore talialu halimu. Ani bialu kemigola tínaga mini yaragaore hene timbuni howa mani holobadarume tínaga mini manda biaho haiore holebira.
1MA 2:52 Abarahama henego mitangi bilimu. Ibugua Ngode Datagaliwabehondo mini mbiraore hongohewi henego ai Ngode Datagaliwabehanda ibu bahandayangi ibu pi nale hene. Ani heagola Ngode Datagaliwabehanda ibu agali tigabiore ka lene.
1MA 2:53 Ani bialu Yosebe ibu nde genda ibuha anda ibiyangi ibu Ngode Datagaliwabenaga mana baya hanguore talialu heagome ibu Iyibi dindiha agali haguane hene.
1MA 2:54 Inanaga mamali Piniasa ibugua nde lotu mana baya hanguore hongo howa talialu heagola Ngode Datagaliwabehanda ibu damene hangume Anduane Homogonaga loma binigo mo miaga haabobo holebira, lalu lamini.
1MA 2:55 Yosua ibugua Mosesenaga mana wiago hongo howa yu heagome ibu Isaraele wali agalinaga agali haguane hene.
1MA 2:56 Kalebehanda dindi hondo wialu dai buwa dindi ogobi wia lalu te lama dai biyagome dindi timbuni mbira ibu yolo ale tigua ibu tu wa mini.
1MA 2:57 Debidi ibu dindi Ngode Datagaliwabenaga nenegeore heagome Ngode Datagaliwabehanda ibuhondo bi lo wialu lalu ibu damene hangume kini haabo holebira lalu bi lo wini.
1MA 2:58 Elayahanda Ngode Datagaliwabenaga bi mana lo wiago hongo howa yu haabo henegome Ngode Datagaliwabehanda ibu mo yalu dahuliya andagaha pene.
1MA 2:59 Agali tebirali Hananiabi Asariabi Misaelebi ira timbuni de agoha bo delearia Ngode Datagaliwabehanda tigua ibuhondo mini mbiraore hongohe wua heago hondowa ibugua ti dugu eda halu pelene.
1MA 2:60 Daniele ibu agali bayale tigabiore heago hondowa laiono hearume balu nelo Anduane Homogohanda ibu yupe nahene.
1MA 2:61 Tígua ina mamalirunaga mana bayale bialu hene uruni baya hangu mitangi bialu mana uruni baya hangu mo yalimu. Mbirali ibu Ngode Datagaliwabehondo mini mbiraore wua haga heagua nde ibu pi nalaga.
1MA 2:62 Agali ko karunaga bi hongohe lalu kago hondowa tí gi nahalimu. Tinibi homalu tínaga dabudabu baya tara tara mo ngoaiho kago ereba hai haga ngago manda bilimu. Ani howa mani tinaga tingini dindiha padagola ngoe bedaru tinaga tomo holebira ndobe.
1MA 2:63 Heneneore ayu ti mini lene timbuni bu karunigo ainde yawi ti dindi ogoria naholebira. Tinaga tingini dindiha poragola mbirale tigua bule manda bu hayaruni tini heba mandagi ereba hamaga holebira.
1MA 2:64 Anigo i̱ igini kemiru tí Ngode Datagaliwabenaga bi mana lo ngagome agali mini lene helaga ngago manda buwa tí Ngode Datagaliwabenaga bi mana ogoniha hongo mialu halimu.
1MA 2:65 Tí hamene Saimono kago ibu agali manda timbunibi ka. Ani kago manda bialu ibu tí aba haradagua helo tígua ibunaga bi larago hale halimu.
1MA 2:66 Yudasa Magabeusu ibu wene igiri emene heangi howa ibu agali hongohe henego ka. Ani kago manda bialu i̱na ibu tínaga agali haguane helo dabo helarogo ibugua tí haru halu wai bamba holebira.
1MA 2:67 Agali Ngode Datagaliwabenaga mana ngago baya hangu talialu haga bu karu olalu tí heba mandagi mo ngoai ho halimu.
1MA 2:68 Wali agali tara tara Anduane Homogo mitangi nahaga bu hearume inahondo mana ko biyaru mitangi bialu pani migi bilimu. Ani bialu Anduane Homogonaga bi mana lo wini ngago baya hangu talialu haabo halimu, lene.
1MA 2:69 Ai Madadiasa ibugua ibu iginiru Anduane Homogohanda mo bayale helo bi lalu ibu homene.
1MA 2:70 Mali handari mbira pira mariani waragoria (146) layagola ibu homene. Homayagola ibunaga tingini ibu mamalirunaga homali Modeini tanoha heagoha hora hene. Ainde Isaraele wali agalime dara timbuni howa dugu bialu howa hora hene.
1MA 3:1 Yudasa Magabeusuhanda ibu aba Madadiasanaga henge mialu ibu aba henedagoria ho aribia hene.
1MA 3:2 Ani heagola ibu hamene bu hearumebi wali agali ibu aba heba mandagi haga bu hearumebi bibahende mo mogo bu howa ibu biamogo bialu hene. Ani bu howa tigua Isaraelenaga wai bu winigo tigua bu gilila mialu wai bule manda bini.
1MA 3:3 Yudasa ibugua bialu heagome ibunaga wali agali bibahende mini lene hene. Ibunaga yari wai pole karulaga wiaru mo karulowa agali timbuniore haradagua hene. Ibugua danda timu yandarerume waitigi bu karu bo wahaiore haga hene. Ibugua ayu tibu wai biaga ngago giha yu howa ibu damene bu karunaga dindi anda bu kago mamage ibuni haga hene.
1MA 3:4 Ibu laiono gabua hongohe hagadagua howa nogo meme sibiru balu nole hame lalu haabo hagagobi hene.
1MA 3:5 Ibugua wali agali Ngode Datagaliwabenaga mana mo wahalu pene karu taya bima ibaga bialu haabo haga hene. Ani bialu wali agali marume ibu aria heneru balu iraha bo heda haga hearu baya hangu taya bialu haga hene.
1MA 3:6 Agali ko bu hearume ibu hondowa gi halu tini mbirani mo mogo bu biruwa duru lalu haga wini. Anigo ainde agali ko biaga uruni mbira ibida palene henge nawioreni hene. Ainde Yudasahanda wali agali golope hene bayale helonaga biabe bayale ogonidagua bialu hene.
1MA 3:7 Ibugua kini dewaorenaga miniha mo tandaga halu haga hene. Anigo ibugua Isaraele wali agali mo turu halu haga heagome Isaraele tigua ibu mo turu halu ibunaga mini yaraga halu haga hene.
1MA 3:8 Ibugua Yuda dindiha tano wiaru bibahendeha ibaga biai halu wali agali ko biaga bu hearu bo wahai hene. Isaraele dindini genda timbuni bu wiaru bibahende mo wahaiore hene.
1MA 3:9 Ibunaga mini timbuni mo yaraga hene dindi wiaru bibahendeha wali agali bu hearume hale hai hene howa ibugua wali agali pu ereba holene hearu haru dai bialu hene.
1MA 3:10 Ani bialu heagola Aboloniusuhanda ami agali dewaore Ngode Datagaliwabe mitangi nahaga bu hearubi Samaria agali bu hearubi bibahendeore haru halu Isaraele baba wai bule ibini.
1MA 3:11 Ani ibira layago Yudasa ibu hale halu ibugua Aboloniusula wai bule abale puwa ibugua ti bogo hana hai halu Aboloniusubi homelo bo wahalu bini. Waitigi agali uruni aria maru homai haya handala maru ti ibida piai hene.
1MA 3:12 Tigua wai biai halu waitigi bo wahene wiarunaga mbirale wiaru mo ngoai halu howa Aboloniusunaga ayu tibu wai biaga wiago Yudasa ibu mo yini. Ani mo yuwa ibu yu haabo halu homalu wahene.
1MA 3:13 Ai Yudasahanda ami agali dewaore haru ka layago Sirianaga ami agali haguane mbira mini Serono heago ibu hale hene. Ti Ngode Datagaliwabehondo mini mbiraore hongohewi howa ti wai baya hangu hongo howa biaga agali hongoheore ka layane hale hene.
1MA 3:14 Ani layago hale howa Serono ibugua mitangi bialu agali kininaga bi mo wahaga Yudasanaga ami uruni baba wai bialu bo wahai holiya. Ani buwa dindi bibahende kini ibugua hendene ngaruha i̱ mini yaraga hene timbuniore holiya lo mitangi bini.
1MA 3:15 Ani bialu ibugua Yudasala wai bule piyagola Yuda agali ko bu hearume ami agali Isaraele baba wai bule ibiyaru biamogo bialu wai Isaraele baba bule pene.
1MA 3:16 Ani puwa ti hariga Bedehorononaga hari bare wiago iralu daulene hari bare wiagoria ibalu heaore Yudasa halu ibunaga ami agali emene dege daga lene hearume abale Serono halu ibunaga ami agalidaruni ngola hole pene.
1MA 3:17 Ani puwa handalu hemiria ami agali dagalabe naheore ibiyago hondowa tigua Yudasahondo lalu, Ainde inanaga ami agali emene dege kemagonime ami agali dewaore ibirago bope agua holedabe. Ani bialubi ina horo ayu hina tomo nane kemagome ina hongo nahe kemagoni ndobe, lene.
1MA 3:18 Ani hale hayagola Yudasahanda tihondo ladai bialu lalu, Emene hangume ami agali dewaore kago bope holene erekuibi ndo nga. Ami agali dewaore heaguabi emene hangu heaguabi Ngode Datagaliwabenaga deni ogobi degedege holebira.
1MA 3:19 Wai beremagola ami agali dewaore kagome ndo wayali holene nga. Ani ndo ami agali Ngode Datagaliwabenaga minini hongo ho howa birago ibu wayali holene nga.
1MA 3:20 Waitigi uruni ti mine haga howa mana ko dewa bialu hagabi howa ai ina baba wai bule ibira. Tigua inanaga wali waneigini biru karu bo wahai halu inanaga dabudabu tara tara bayale ngemaru mo yu polenaga ibulebira.
1MA 3:21 Ani biragola iname nde inanaga dindi ngagonagabi inanaga yutiga bu haga mana ngagonagabi wai buleberema.
1MA 3:22 Anidagua beremagola Ngode Datagaliwabehanda inanaga waitigi bu karu bo wahaiore holebirago iname gi nahe wai hongo howa bimi̱ya.
1MA 3:23 Ai Yudasahanda bi ogoni lai halu abale pora bialu Serono halu ibunaga ami agaliru baba wai bule pene.
1MA 3:24 Ani puwa Isaraele tigua waitigi biaru Bedehorono hari bare wiagoria howa bama talima pialu dindi ulini tigabi wiagoria talima tagira pene. Anidagua bialu tigua waitigi uruni handari halira (800) bibahende bo wahai hayagola maru pora bialu Pilidia dindiha piai hene.
1MA 3:25 Anidagua biya layago hale howa Ngode Datagaliwabe manda nabiaga bu hearu bibahendeme Yudasa halu ibu hameneru gi timbuni ho hene.
1MA 3:26 Yudasahanda galone timbuni uruni bialu ka layago kinimebi hale hene. Wali agali dindi tara tara wiaruha bi tara tara laga bu hearumebi Yudasahanda waitigi karu bo podahana halu wayali haga lalu te layago lai hene.
1MA 3:27 Ai Kini Andiogusu ibugua mbirale Yudasahanda bialu ka layago te hale howa ibu tandaga timbuni hene. Ani howa dindi ibugua haru howa handaya ho hene wiaruha ami agali hearu bibahende olomogo biai howa ami agali dewa daga labe naheore hene.
1MA 3:28 Ani heagola kini ibunaga muni anda heago panga duguwa ami agali biaru bibahende mali mbiranaga karulape yolo miai hene. Ani mialu ibugua tihondo lalu, Wai bule manda manda bu haabo halimu, lalu lamini.
1MA 3:29 Anidagua buwa handalu hearia ibunaga muni bibahende biba holene tiga bialu dagisi munibi tubagi hene. Anidagua binidagoni irane ibunaga mana abale wiagadago mo iriari bialu mana wabu aribia hayagome genda timbuni ogoni dindi bibahendeni tagira ibai hene.
1MA 3:30 Anidagua biyagola abale bini ngadagua ibunaga muni biba holilo manda bini. Ani tubagi haragola ibugua mbirale gahenge munime yolo bulenebi mbirale tara tara bayale muni dewaoreme miaga ngaru wali agali mo turu halu migi biagadagua nabulubada lo manda bu hene. Ibugua wali agalinaga gubalini ba mialu ibuha hatago helo mbirale bame ta hagadagome kini maru karubi ndo ibu daliga bolangua hene mbira hene.
1MA 3:31 Ibunaga bu miniha genda wiagome mo heya hayagola mini burugu timbuni lo howa ainde ibugua agali dewa lone mo mogo bulene manda buwa ai Pesia dindiha dagisi muni mo palene manda bini.
1MA 3:32 Andiogusu ibugua agali mbira ibuni damene dege agali haguane mini Lisiasa heago dindi bibahende iba Yuberedisi poragola Iyibi dindila hengeneha wiaru handame ho howa gabumane haguane helo dabo helene.
1MA 3:33 Ai kini ibu Pesia dindiha pole howa ibugua Lisiasahanda kini igini Andiogusu bayale halu dai bilo handaya ho habe lalu dabo helene.
1MA 3:34 Ibugua Lisiasahanda ibunaga ami agali nogo elepana heba kagohayagi haru howa handaya ho helo dabo helene. Mbirale ogoale bibe lalu bi baya hanguore lamiai hene.
1MA 3:35 Ani bialu Yudia dindihabi Yarusalemebi pialu wai buwa dindi anda bo heda hai halu bo gialo wahai habe lalu Lisiasa lamini. Wali agali dindi bibahendeha bu karume Isaraele wali agali Yarusaleme wali agalibi mbira hene lo manda nabi embeda ho wahai helo bo hilo wahaiore habe lene.
1MA 3:36 Ani lowa tinaga dindi ngagoria wali agali tara tara bu karu haru puwa dindi ogoriani ho aribia helo tuwia ta hai habe lalu kini ibugua Lisiasa lamini.
1MA 3:37 Ani lalu kini ibugua ami agali halu mende hearu haru halu dindi dunini timbuni Andiogo tano wiagoria howa pene. Mali ogoni handari mbira pira mariani karia (147) layagola tagira pene. Iba Yuberedisi peago domalu Pesia dindiha pole pene.
1MA 3:38 Lisiasa ibugua agali maru ami agali haru helonaga Dorimenese igini Tolemibi Niganobi Gogiasabi tigua haru helo dabene. Agali tebirali ami agali wai biaga pari wayaliru howa ti mini Kininaga Nenege laga hene.
1MA 3:39 Ti mbira mbirame ami agali daosini dege pira maria (40,000) geni ibaga bialu wai biaga daosini karia (7,000) nogo hosi erekunini biruwa wai biagaru haru haga haga biaga hene. Ani mo taho helowa Lisiasa ibugua ami agali urunihondo lamialu Yudia dindi bibahendehabi Yarusaleme tano ngagoriabi anda pugu bialu kinihanda bilimu lalu langiyadagua bibahendeore bo hilo wahai hole pudaba lalu lamini.
1MA 3:40 Ani laya handala tigua abale pialu dindi tigabi bayale Emaiasa tano kaware dindi wiagoria balai anda bini.
1MA 3:41 Ani bialu ami agali tidi mbira Idumia howa tidi mende Pilidia howala ibalu hatago hene. Agali biyinaya biaga tano kaware haparapara hearu tigua hale halu hearia ami agali wai biaga hongo gibihe ogoni ibira layago hale howa tigua lo manda bialu ami agali hongohe urunime ibalu Isaraele bo podahana halu maru garabaya biabe ale biaga helo muni taguirangi tigua maru yolo bule manda bu hai hene. Ani howa tigua muni siliba ngolobi dewaore hanalu wali agali hendeho yalu polenenaga senipubi yalu ami agali balai anda bu heagoria íbu dege bini.
1MA 3:42 Ai Yudasa halu ibu damene bu hearu tigua handalu hemiria balai anda ti daluha biyagola ai tiha mo ko holene waitigi abale anda ibiyadalo manda biai hene. Ani bialu kinihanda lalu, Isaraele wali agali bibahendeore bo hilo wahai halimu, lalu ibunaga ami agali hearu lamiya layago ti hale ho dege hene.
1MA 3:43 Ani hale ho howa ai Isaraele wali agalinaga mini mo hongo halu tinaga dindibi Anduane Homogonaga anda kagobi wai hongo howa bimi̱ya lalu hongo ho hai hene.
1MA 3:44 Ai wali agali bibahende íbu ngoai ho howa wai bule manda manda bialu Ngode Datagaliwabehondo ti dara howa biamogo bibe lalu ibuhondo bi lalu hene.
1MA 3:45 Yarusaleme tanoha bame dindi hangu wini. Wali agali mbira hamani puíbu nabiore wini. Agali Ngode Datagaliwabe mitangi nahaga hearume anda hongohe hearu ti mo wialu tigua ta nabi Anduane Homogonaga anda hamelo howa anda mebia halu biya. Isaraele wali agalinaga lone turu ho holene nawini. Ani bialu ngidaru balu iba gana baya laga winiru ereba hene.
1MA 3:46 Ai Yudasa halu ibunaga ami agali biaru tigua Yarusaleme abene be tagiraha bamba tinaga mamali Isaraelerume lotu laga dindi mini Misiba wiagoria mo ngoai ho hene.
1MA 3:47 Tigua horo mbira tomo nane hai halu dara ho howa karulagane aga ko wiago mo karulalu be abalu tinaga emboneni dugu wialu tininaga aga bayale biaru lerelo wahai halu bini.
1MA 3:48 Ainde wali agali Anduane Homogo mitangi nahaga bu karu tigua mbirale mbira bule howa tinaga bi pupu wule gime wabini wiagohondo hale haga wini. Anigo Isaraele wali agali tigua bi mana gilibuwi mbuga ngago anga lowa Ngode Datagaliwabenaga hame ngago hale haga nga.
1MA 3:49 Tigua agali loma binigo mo miaga bu karunaga aga karulaga ngaru yalu ibalu widi lomabi yu ibalu mbirale ngarunaga pini lomabu mulenebi yalu ibugu biaga nga. Ani bialu agali maru tinaga bule lalu bi lo winigo biaiore hene mini Nasa laga kago íbu lalu biaga hene.
1MA 3:50 Ani buwa tigua Anduane Homogohondo bi lalu, Ngode Datagaliwabe-o iname Nasa o karuhondo agua beremabe. Ani bialu mbirale o ngelo kemaru agua beremabe.
1MA 3:51 Agali bu hearume í̠naga anda mo ko halu mebia hayagola ayu mebia hene ko dodohe kagoni ndobe. Ani bialu í̠naga agali loma binigo mo miaga biaru ti dara timbuni howa tinaga nawiore bame bu kagoni ndobe.
1MA 3:52 Agali tara Anduane Homogo mitangi nahaga bu hearume ina balu bo bibaore holenaga ina baba wai bule ibira. Inaha ogoale bule ibira lalu í̠ni manda bide.
1MA 3:53 Ainde í̠nime ina biamogo nabiriyagua nde inanenaga hongome heyu holene karulape kemabe, lene.
1MA 3:54 Ani lalu tigua pilipe hongo howa pulalu wai huaro hongo howa ladagadaga bini.
1MA 3:55 Ani bialu maha Yudasa ibugua ami agali biaru mo tale bigi buwa tidiyu haga haga bilene tidi yu haga haga biyadagua maru pirali (10) halu maru pira duria (50) halu maru handari mbira (100) halu maru daosini mbira (1,000) halu buwa ona tidiyu haga haga bilene. Ani buwa ti haru bamba holene agali maru tidi mbira mbira headagua mo taho helene.
1MA 3:56 Ani helowa ai mana mbuga wiagoha howa bi leadagua bialu agali anda gahenge bu dangila halu ibiyarubi wali aidege daubu berelalu ibiyarubi pu mbira lini daga mini gerebi mabu aidege hangalu ibiyarubi maru wai pole gi hayarubi bibahende dai bidaba lene.
1MA 3:57 Ani bialu ibunaga ami agali uruni Emaiasa tano wiagonaga gibuni mbira unurahayagi balai anda bialu hene.
1MA 3:58 Ani bialu Yudasa ibugua ibunaga ami agali biaruhondo lamialu lalu, Aiore tígua agali Anduane Homogo mitangi nahaga bu karu baba wai bule manda manda bu halimu. Tigua Anduane Homogonaga anda bo gialo wahai halu inanebi mbira wanahe bibahende bo wahaiore hole íbu ka.
1MA 3:59 Ina bame howa ti birago de handaga bu kemaria inanaga dindibi Anduane Homogonaga anda kagobi bo gialo haealabagabu wahai holigo wai beremagola ina waiha homolene karulape nga.
1MA 3:60 Anigo ainde Ngode Datagaliwabehanda ibunime hame ledadagua bulebira, lene.
1MA 4:1 Gogiasa ibugua ami agali daosini dege duria (5,000) geni pialu wai biaga halu daosini mbira (1,000) nogo hosini biruwa wai biaga henego ai tigua tinaga balai anda bu hayagoria howa mbira tagira pene.
1MA 4:2 Agali maru Yarusalemeni anda hongohe biagoha mamage haga hearume ti hariga walia hene. Gogiasa ibugua Yuda ami kagoria mbiraga anda puwa wai mbiraga bu manda bini.
1MA 4:3 Ani bira layago Yudasa ibu abale hale ho bolangua halu ibugua ami agali haru halu Emaiasa tano wiagoria puwa kininaga ami biaru baba wai bialu hene.
1MA 4:4 Ogoningi Gogiasa halu ibunaga ami agali biaru kaundiaha heagola bialu hene.
1MA 4:5 Ai Gogiasa halu ibunaga ami agali biaru Yuda ami anda bu henedagoria anda pialu hemiria mbirali mbira naheoreyane hendene. Ai Yudasa halu ibunaga ami agaliru ibida piyabe toba howa ai hari bare wiaruha taya bima pene.
1MA 4:6 Egerebagi gaolalu biyagola Yudasa halu ibunaga ami agali daosini tebira biaru hama tigabi wiagoria pu hene. Ani bialu ti dewali wai pialu karulagane agabi wai biagane ayu tibubi nawi hene.
1MA 4:7 Ai waitiginaga balai anda buwa ti haga wiago hongoheore mbira wiaria hendene. Agali ami nogo hosini biruwa wai biaga hearume ti daluha mamage ho hearia hendene.
1MA 4:8 Ani hondowa Yudasahanda ibunaga ami agali biaruhondo lamialu lalu, Tinaga ami agali timbuni dewaore bu karia handa hendedemigonigo ai tígua mogo nale halimu. Tigua porabupe halu wai birangi tí gi naheore elaho halimu.
1MA 4:9 Baya hangu mitangi bidaba. Bamba Iyibi kini heagome ibunaga ami agali haru halu ina mamaliru talima iba solowara mini Daramabi laga wiagoria ibiyagola Ngode Datagaliwabehanda ti mo wialu biamogo bini.
1MA 4:10 Ayu nde Ngode Datagaliwabehanda ina dara halu biamogo bilonaga ibu olama. Bamba ina mamaliru baba habo nalolene bi lo wiyago lone mitangi bu dai bialu iname wai hamani porabupe halu wai beremangi ibugua waitigi bame hengedopaya bilo iname ibuhondo bi lama.
1MA 4:11 Anidagua birago wali agali tara tara bu karu ti de hondowa Isaraele wali agalinaga Ngode Datagaliwabe mbiraore ogoni ibu hangu heneore howa ibunaga wali agaliru mo wialu baya hangu handaya ho haga ka lolebira, lene.
1MA 4:12 Waitigi agali biarume Yudasa halu ibunaga ami agali biaru ibiyago de hondowa
1MA 4:13 tiguabi nde wai bule tinaga anda bu heagoria howa tagira ibini. Ai Yudasa halu ibunaga ami agali biarume wai bulenaga pilipe ale mini biguli pu layagola tigua pora bialu wai bini. Ani biyagola waitigi biarume ti ho giligalalo howa ibida dindi tigabi bayale wiagoria piai hene.
1MA 4:15 Ani pialu heaore dege maru gerai nale ha layaru Isaraele tigua minalu bogai hene. Ani bialu Isaraele tigua bama talima piaho wialu Gese tano pialu Idumia dindihayagi dindi tigabi wiagoha piaho wialu Asadodo tanobi Yabane tanobi wahalu talima pu dege bialu waitigi bo wahai henego daosini tebira (3,000) bibahende bo wahai hene.
1MA 4:16 Ai Yudasa halu ibunaga ami agali biarume waitigi agali biaru talima pugupugu buwa talu wahalu lone dai bini.
1MA 4:17 Ani buwa Yudasahanda ibunaga ami agali biaru lamialu lalu, Iname wai bulene wia dege bidago tígua waitiginaga mbirale ngaru abale mo yule duru nale hadaba.
1MA 4:18 Gogiasa halu ibunaga ami agali weneore hari bare ngagoha kago ai tí hongo ho howa wai biai howa mbirale waitiginaga ngago tíni hame ledemigobi mo yuleberemi, lene.
1MA 4:19 Yudasahanda bi lai hayagola ami agali waitigi aria tidi mbira hari bare wiagoha howa tagira ibalu ibini.
1MA 4:20 Ibuwa handalu hemiria ira hagua timbuni dadaga hayago hondowa tinaga ami bu hearu bo wahai halu tinaga balai anda dai hayada lo manda bini.
1MA 4:21 Anidagua biniyago hondowa ti mogo lalu gi timbuni ho hene. Ani bialu Yudasanaga ami agali biarume hama bayale dindi tigabi wiagoria wai bule manda manda bu heago hondowa
1MA 4:22 ti ibida pora bialu Pilidia dindi wiagoha yagi piai hene.
1MA 4:23 Ani piya handala Yudasa ibu waitiginaga dabudabu wiaru mo pene. Ibugua muni silibabi ngolobi labolabo daramabi baya tara tarabi maru tara muni dewame yolo biaga wiarubi mo yai hene.
1MA 4:24 Yuda ami biaru tininaga balai anda heagoria dai bialu howa tigua Ngode Datagaliwabenaga mini yaraga halu iba gana lama dai bini. Anidaagua binidago irane Anduane Homogo ibu bayale howa ibunaga dara holene wiaabo haga ngagonaga iba gana lalu ibunaga mini yaraga hene.
1MA 4:25 Horo ogoningi Isaraele wali agali tigua wai bialu hongoheore halu mbiralime bope habe nahe hene.
1MA 4:26 Ami agali tara ibida piyarume Lisiasa hearia puwa mbirale biyaruni bibahende te lamiai hene.
1MA 4:27 Ai te uruni hale hai howa ai ibunaga ami agali biarume kinihanda bilimu lalu lamiyadagua Isaraele wali agali mbira hangubi wanahe bo hilo wahai halu dindi anda bo labu halimu layadagua nabiyagola Lisiasa ibu mogo lalu miniha genda timbuni hene.
1MA 4:28 Maha mali mendeni howa Lisiasa ibugua ami agali wai baya hangu bulenenaga tuguli bini bayaleore daosini dege pira waragaria (60,000) dabo helalu nogo hosini biruwa wai bulene daosini dege duria (5,000) helalu buwa ai ibugua Yuda wali agali bo hilo wahaiore holoboda lo manda bini.
1MA 4:29 Ai ami agali uruni tigua heyalu puwa dindi mbira mini Idumia wiagoha Bedesu tano wiagoria balai anda bu hene. Ani heagola Yudasahanda nde ibunaga ami agali daosini pira (10,000) haru halu wai bule ngola ho ibini.
1MA 4:30 Ani ibuwa waitigi ami hearunaga hongo gibiore heago hondowa ibugua Anduane Homogohondo bi lalu, Ngode Datagaliwabe-o iname í̠naga mini yaraga holene hame ledema. Í̠na Isaraele wali agali mo wialu haru dai biagaore ke. Í̠na agali timbuni hongohe mbira heagonaga hongo agali í̠naga biabe bia haga Debidinaga giha howa bope hariya. Í̠na Solo igini Yonadanala ibunaga agali danda timu ayagu yu ha haga heagola biamogo birigola libugua Pilidia ami hearu bai halu wayali haya.
1MA 4:31 Ayu anidagua dege í̠naga wali agalime waitigi ibirago balu wayali holoma̱ya í̠nime ina biamogo bibe. Ami agali dewabi tinaga hongo kagobi nogo hosi kagobi uruniha mini hana ho howa mine halu karuni mo taga habe.
1MA 4:32 Ti mo gi halu ibida piai helabe. Tinaga hongo mo gedaore helabe. Iname ti bai halu bo hengedo wahai helabe.
1MA 4:33 Wali agali í̠naga mini mandabi karume í̠naga mini yaraga halu iba gana lelo wali agali í̠ gubalini ho haga bu karu ti giha howa waitigi uruni bo wahaiore habe, lalu Anduane Homogohondo bi lene.
1MA 4:34 Ani lalu puwa wai bialu Lisiasanaga ami agali daosini duria (5,000) bibahende bai hene.
1MA 4:35 Ai Lisiasa ibugua handalu hearia ibunaga ami agali biaru hongo ibira hai halu Yudasa halu ibunaga ami agali biaru ti gi naheore waiha homai holeore lalu agali gibiore heago hendene. Ani hea handalu Lisiasa ibugua Andiogo dai buwa ami agali gahenge dewaore ibu biamogo bilonaga munime yolo bu helene. Ibugua ami agali dewaore haru halu Yudia dindiha wai daibule lo manda bini.
1MA 4:36 Ai Yudasa halu ibu hamene biarume lalu, Ai waitigi biaru bo talu pelai harimago ainde iname Yarusaleme dai buwa Ngode Datagaliwabenaga anda kago ibuninaga deni lone mo bayale halu ibunaga biabe bulene ngago bilo loma bu miadai bimi̱ya ma, lene.
1MA 4:37 Ani lalu wali agali íbu ngoai halu hari Saiono nene irigi hene.
1MA 4:38 Puwa handalu hemiria Anduane Homogonaga anda biago bameore hearia hendene. Lomabu delaga dabu mo ko hene ko wiaria hendene. Panga heneru dai halu datani bolaga ko hearu timbuni anda hai halu anda hai biago yuladambi hai halu tano biago embera tegi ko mbira wiaria hendene. Anda biagoha hobane loma binigo mo miaga agalinaga tamu hobane henego bo gialo wahai hene wiaria hendene.
1MA 4:39 Mbirale uruni hondowa wali agalime dara timbuni halu tinaga aga minu lerelai hene. Tigua dugu hongo howa biai halu be abalu tinaga emboneni dugu wigi bini.
1MA 4:40 Ani buwa ti dindini bulupalu wuwa pilipe biguli layuago hale howa ti bibahendeme Ngode Datagaliwabe olai halu hene.
1MA 4:41 Ai Yudasa ibugua Anduane Homogonaga anda lone mo bayale hole howa ibunaga ami agali marume Siria ami agali maru anda hongohe tini bu helayagoha hearu baba wai bule pudaba, lene.
1MA 4:42 Ani bialu agali loma binigo mo miaga maru mana ko nabiaga howa Anduane Homoganaga bi mana baya hangu talialu haga hearu dabalu
1MA 4:43 anda biago Ngode Datagaliwabenaga deni dodo nahe helo mo bayale helo dabo helene. Ani bialu lomabu delaga dabu bini ege to̱le̱ Anduane Homogo deni dodohe wiaru mo tagira puwa dindi ko Anduane Homogo deni bayale ndo wiagoha bape haga bini.
1MA 4:44 Anigo loma bu delaya dabu kago ibuni agali Anduane Homogo mitangi nabiaga bu hearume mebia halu mo ko hayadago agua bimabe lowa tini bi lala bialu hene. Ani lowa tigua bi lo mbira halu, Ani ngelo kemaria inane taga pani nolene dege ngago mo wahami̱ya lalu bi lo mbira hene. Ani lo mbira howa tigua Anduane Homogonaga lomabu delaga dabu ogoni gialalu
1MA 4:46 ege to̱le̱ dabu ogoni bini ngago mo mogobu yalu puwa hari bare Anduane Homogonaga anda ogoni kago erembira handabe nahe ngagoha mo do hami̱ya. Ege to̱le̱ uruni ogoniha ngelo haabo howa agali Anduane Homogonaga bi mana latagi haga mbira ibalu ege to̱le̱ uruni ogoale bidaba laradagua bimi̱ya ngelama, lowa ani wini.
1MA 4:47 Ani bialu tigua ege to̱le̱ gahengeru agalime biabe maru bulenaga podala nahe ngago podalu bibe lowa Mosesenaga mana lo ngagome ledadagua tigua gahenge heago podo yuwa Anduane Homogonaga lomabu delaga dabu gahenge ala hayagobi dege bu aribia ho helene.
1MA 4:48 Ani buwa tigua Anduane Homogonaga anda tagiraha tamuhabi mo tiga biai howa dindi anda biago kawareni wiago bibahende Anduane Homogonagaore ngelo mo loma bia hai hene.
1MA 4:49 Lotunaga wiagane ale bibahende gahenge wabu aribia hai hene. Lamu hale delo ngelaga dabubi ira hagua nga bilo inisenesi lomabu delaga dabubi mberedi Ngode Datagaliwabe lomabu minigo mo wiaga dabubi gahenge wabiai howa Ngode Datagaliwabenaga andaha mo yu anda ibai hene.
1MA 4:50 Ani yu anda ibu wiai howa inisenesi lomabu delaga dabu wiagoria ogoni lomabu delalu lamu hale hedo wiaga wiagoria lamu hale hedo wialu biyagola Anduane Homogonaga anda tamuha wá holene hadai bini.
1MA 4:51 Mberedi wiaga tebolo dagia wiagoria mberedi mo wialu labolabo timbuni wiaga wiagoria labolabo ogoni ale dege wia aribia hene. Tigua mbirale urunidagua bialu biabe bulene wiago biai hene.
1MA 4:52 Ai mali handari mbira pira mariani haliria (148) layagola ege dini mini Kisilebenaga horo pira kirani duria (25) layagola
1MA 4:53 tigua egerebahagiore gao layagola abale heyuwa maname ledadagua lomabu delaga dabu gahenge biagoria lomabu delene.
1MA 4:54 Horo abale waitigi Anduane Homogo mitangi nahaga hearume lomabu delaga dabu heago mo dodohe helayago horo ogoni dege tagira ibiyagola Isaraele tigua lomabu delaga dabu ogoni mo loma bia halu iba ganaru lalu ngida balu tabagaru balu iba gana lalu bini.
1MA 4:55 Ainde Anduane Homogohanda ti biamogo biyagola tigua wai buwa tigua waitigi bope halu wayali hayagonaga turu howa wali agali bibahende dindini bulupalu ibira howa Anduane Homogonaga mini yaraga halu ibuhondo lotu lene.
1MA 4:56 Horo halira bibahendeni tigua lotu lalu lomabu delaga dabu ogoni Anduane Homogonaga ngelo mo loma bia halu hene. Tigua turuore halu loma irani dai helolene lomaru yalu ibalu Ngode Datagaliwabela hogimbu bulenaga lomaru yu ibalu Ngode Datagaliwabehondo ka̱i̱ lolene lomaru yu ibalu bini.
1MA 4:57 Tigua ngolomo pu payuwa mo yaribia haga buwa wai biaga humbi wiaru mo yáribia howa Anduane Homogonaga anda haneni wini. Ani bialu tigua wai pabe panga hearu baya hangu arema bialu agali loma binigo mo miaga hearunaga anda hobane bo gialahole bini wiaru lone mo arema buwa biadai bialu pangaru baya hangu wabu helaga biai hene.
1MA 4:58 Wali agali tigua mbirale ti mo taga holenaga agali Anduane Homogo mitangi nahaga hearume mo yu íbu wini biaru mo wahai howa ti turu timbuni ho hene.
1MA 4:59 Ani howa ai Yudasa halu ibu hamene biarubi Isaraele wali agali bibahendebi tigua bi lo mbira halu mali bibahendeni horo Anduane Homogonaga lomabu delaga dabu mo loma bia haramago mitangi biaabo hamalo. Lotu lolene horo timbuni ogo ege mini Kisilebe laragola horo pira kirani duria (25) haragola ngoai howa horo halira bibahende lotu lalu hami̱ya lalu bi lo wini.
1MA 4:60 Ai tigua Saiono neneni Anduane Homogonaga anda kagoha ege pabe hongohe daligaore bu mabu buwa pabe neneni mamageali anda hongohe bu helaga bini. Waitigi agali Anduane Homogo mitangi nahaga bu hearume abale ibalu mbirale Anduane Homogonaga mo loma bia hene wiaru hengeda hai halu mebia halu penedagua bulino pabe hongohe bini.
1MA 4:61 Ani buwa Yudasa ibugua ami agali maru dabalu Anduane Homogonaga anda mamage helo helene. Ani bialu Idumia dindi ngagohayagi handa daibu holenenaga tano hongohe Isaraele wali agalinaga tano Bedesu mo hongo howa ngelene.
1MA 5:1 Wali agali dindi kawareni bu hearu ti hale halu hearia Yuda wali agalime Anduane Homogonaga anda bo gialo wahayago lone hongohe biadai bialu Anduane Homogonaga lomabu delaga dabu biago lone biadai bialu mo bayale ho nga layago hale howa ti mogolo hene.
1MA 5:2 Ani howa Isaraele wali agali maru ti baba haga ti daluha hearu bibahende bo wahai holene manda bini. Ani buwa tigua Isaraele wali agali hearu mbira bo wahaga bialu hene.
1MA 5:3 Iso hameigini Idumia dindiha bu hearume Isaraele henge nami tigua hapai hayagonaga ai Yudasahanda ti baba wai bini. Ibugua Agarabadene dindi wiagoria wai bialu ibugua ti bope halu ibu wayali howa tinaga mbirale wiaru mo yai halu pene.
1MA 5:4 Ani bialu mana ko abale Baiana hameiginirume binigo Yudasa ibu mitangi bu dai bini. Wali agali uruni tigua Isaraele wali agali mo ko halu genda tara tara deware mo mialu haga hene. Tigua harigani bira do howa wali agali harigani bolangua haga biaru minu balu mo ko haga biaga hene.
1MA 5:5 Ani heago hondowa Yudasahanda wali agali bibahende Baiana tanoha hearu mamage haga tano pabe neneni anda daliga bu heagoha agali mamage hearu heba ho hagira bu yaanda hene. Bibahendeore homelo bo wahaiore hole lalu gi dolalu bi lene. Ani lalu puwa anda mamage haga daligaore bu helene hearu heba wali agali anda tamuha bini hearu bo heda hai hene.
1MA 5:6 Ani bialu mani Yudasa halu ibunaga ami agali biarume puwa Amono wali agali baba wai bule pene. Amono tinaga ami agali hongohe dewaore howa Timodi ibugua haru howa handaya ho haga hene.
1MA 5:7 Ani agali uruni beba Yudasa ibugua wai biaabo halu howa ibugua ti bope hai hene.
1MA 5:8 Ibugua wai buwa Yase tano karu lalu dindi emene wiapara para biarubi karu lalu bini. Ani biai halu Yudia dai bini.
1MA 5:9 Ani biagola dindi hobane mbira mini Gileada agali buhearume Isaraele wali agali tinaga dindiha bu karu baba wai bialu bibahende bo wahai hene. Ani biyagola Isaraele wali agali ti Dadema dindiha ha do holene anda hongohe heagoha pu hene.
1MA 5:10 Ani pu howa tigua Yudasa halu ibu hamene biaruhondo beba gilibu pelalu howa lalu, Wali agali Anduane Homogo mitangi nahaga oali bu karu tigua Timodinaga ami agaliru baba ho biamaga haya. Ani biya handala ina ibida puwa anda hongohe ogoha ibu kema. Anigo agali ko uruni tigua anda hongohe ogonibi giala holebu wahai holebirago
1MA 5:12 ayu ogoni ina biamogo bule abale ibabe. Ina aria dewaore homai haya.
1MA 5:13 Ina damene dewaore tano mini Tobo wiagoria heneru bo wahai haya. Ani bialu wali waneiginiru garabaya helalu tinaga muni dabudabu wiaru mo page biai haya. Wali agali ogoniha henego bibahende daga daosini mbira (1,000) agima kaware dege henego homai haya, lalu bi lo wia hene.
1MA 5:14 Yudasa ibu beba ogoni wene daga lalu heagola agali mbira Galiliha howa beba mende yalu ibini. Agali mani ibiyadaruni tigua dara ho kago walia halu biagadagua tinaga agaru budabaga bu yalu ibini.
1MA 5:15 Ani ibuwa tigua lalu, Agali bibahendeore tano tebira Tolemesebi Taiabi Saidonobi heba agali bibahendeore Galilinaga abene uyurahayagi haga hearume tinaga ami agali dewaore mo tago bialu ina bibahendeore mbiraorebi mbira pora bialu napelo bo wahaiore hole ibira laya, lene.
1MA 5:16 Yudasa halu ibunaga wali agalirume bi ogoni hale howa ainde ti damene waitigi giha howa homai holobadago biamogo agua bimabe lole ti mo ngoai hene.
1MA 5:17 Ani mo ngoai howa Yudasa ibu hamene Saimonohondo lalu, Ina damene Galiliha haruago biamogo bule pelo agali maru abale dababe. Ai i̱ Yonadana iyame Gileada porabago, lene.
1MA 5:18 Ani bialu Yudasahanda ami agali maru hearu tigua Yudiaha baya hangu handaya ho halimu lene. Ani lowa ibugua agali kirali wali agali Yudiani hayadaru handaya ho helonaga Segaraia igini Asariala Yosebela dabo helene.
1MA 5:19 Ibugua libuhondo lamialu lalu, Wali agali ogoria karu libugua handaya ho halibulo helarogoni. Waitigi maru karu baba wai bulumini nabilibu. Ina dai buluma̱ya hondo halibu, lene.
1MA 5:20 Ani lalu ami agali daosini tebira (3,000) bibahende Saimono heba Galili pole pene. Ani piyagola ami agali daosini haliria (8,000) bibahende Yudasa heba Gileada dindi pole pene.
1MA 5:21 Saimono ibugua puwa Galiliha wali agali Anduane Homogo manda nabi hearu baba wai bialu bibahende bo podahana hai hene.
1MA 5:22 Ibugua bo padama pu dege bialu Tolomese tano tagira pialu daosini tebira (3,000) agima homene bo wahai hene. Ani bialu ami agali bo wahayarunaga danda timu yári tara wai pialu karulaga ale karulo haabore wiaru ti mo yai hene.
1MA 5:23 Ani bialu Yuda wali agali Galiliha bu hearubi Arabadaha hearubi bibahendeore mo mogo biai halu ti one waneiginibi tinaga dabudabu wiarubi heba yai halu Yudia dindiha dai bini. Ani biyagola wali agali uruni ti turu timbuniore hai hene.
1MA 5:24 Ogoni dege Yudasa Magabeusu halu ibu hamene Yonadana halu ami agali biaru Iba Yodana domalu horo tebira pialu dindi ko wali agali nahaga wiagoha pene.
1MA 5:25 Puwa tigua Nabadia hemeigini bu hearu ngola hayagola uruni tigua ogolabohondo turu timbuni howa mbirale bibahende Yuda wali agali Gileada dindiha hearunaga te baya hangu lamiai hene.
1MA 5:26 Tigua lalu, Yuda wali agali dindi ogoniha tano hongohe timbuni Bosora tanohabi Boso tanohabi Alema tanohabi Kasabo tanohabi Magede tanohabi Kanaimi tanohabi garabaya hai heleda.
1MA 5:27 Ani bialu Yuda maru Gileada dindiha tano emene ngaruha garabaya hai heleda, lalu lamini. Ani bialu Yuda wali agali lenego bibahende horo mbira hanguni bo wahai halu tinaga anda hongohe karu yawi dege bo gialo wahai hole tagira polebira, lalu lamini.
1MA 5:28 Ani layago hale howa Yudasa halu ibunaga ami agali biaru tigua dindi ko iba dalu naibi dindi ko wiagoha tano Bosora wiagoha pole pene. Pialu tigua tano ogoniha hearu baba wai bialu wali agali tano ogoniha haga bu hearu bo wahai howa tano bo heda halu wali agalinaga dabudabu tara tara wiaru ti mo yai halu bini.
1MA 5:29 Ani ti mbiraga hangu puabo halu tano hongohe mini Dadema wiaga kawareha Isaraele wali agali anda bu heagoria anda pene.
1MA 5:30 Egabi layagola Yudasa halu ibunaga ami agali biaru tigua handalu hemiria ami agali dewaoreme tanoha anda hongohe heago bo gialaga laga bialu hearia hendene. Tigua wai bulene masini tara tarabi wai pabe irigi holenaga egageriabi mo yalu íbu howa wai bulenaga wai pabe hongohe heago bo giala hole biyago de hendene.
1MA 5:31 Yudasa ibugua mbirale uruni biyago de hondo howa hale halu hearia tanoha wali agalime ga̱ hongo howa ladagadaga bialu pilipe layuagola ai wai biyada lo manda bini.
1MA 5:32 Ani hale howa ibunaga ami agali bu hearuhondo lamialu, Ayu ina hameneru biamogo bialu mo wulenaga wai hongo howa bimi̱ya, lene.
1MA 5:33 Ibugua ibunaga ami agali biaru halu tebira mo tale bialu waitigi erembira wiagohayagi wai bia aribia hene. Yuda tigua nai hongo howaore bialu waitigi bope howa tigua Anduane Homogohondo bi hongo howa lene.
1MA 5:34 Ai Timodinaga ami biaru tigua Yudasa Magabeusu ibiyago hondowa ti beregedalu ibida piai hene. Horo ogoningi Yudasa halu ibunaga ami agali biarume waitigi ami agali daosini dege halira (8,000) bibahende geme hengedai howa bogai hene.
1MA 5:35 Ani bialu Yudasa ibugua Alema tanoha wai bule pene. Puwa ibugua wai bialu agali tano ogoniha haga hearu bo wahai hene. Wali agalinaga dabudabu wiaru ti mo yai halu tano bo heda hene.
1MA 5:36 Ani bialu Kasabo tano bo podalu Magede tanobi Boso tanobi Gileada dindiha tano maru wiarubi bo heda hai hene.
1MA 5:37 Ani biyagola maha Timodihanda ami agali maru hearu lone mo ngoai howa Labono tanola hengene tubari iba gana emene wiago kawareni balai anda bialu hene.
1MA 5:38 Ani bialu heagola Yudasa ibunaga ami agali hearu aria marume waitiginaga balai anda bu heagoha baya hangu hondo wu pudaba lene. Ani laya handala marume hondo pialu dai buwa tigua lalu, Agali Anduane Homogo mitangi nahaga dindi ogoniha hearu bibahende tidiyu pialu Timodinaga ami agaliha hatago howa agali dewaore ka.
1MA 5:39 Timodihanda ami agali maru Arebia dindiha bu hearu ibu biamogo bule wai ibuha anda ibilo munime yolo bialu ibunaga ami agali dewaore hea. Ani howa tigua ina baba wai bule iba doma ederayagi balai anda buwa manda manda bu hea, lene. Ani laya handala Yudasa ibugua wai bule pene.
1MA 5:40 Yudasa halu ibunaga ami agali biaru iba ange wiago kaware ibiyagola Timodihanda ibunaga ami agali haru halu bamba haga bu hearuhondo lamialu lalu, Yudasahanda iba domalu ina kemagoha ibu ala ibiyagua nde iname ibu babe nahe ibugua ina bope holebira.
1MA 5:41 Anigo ibugua iba domalu naibi iba angeni hondo hayagua nde iname iba domalu puwa wai bialu ina ti bope halu wayali holeberema, lene.
1MA 5:42 Ai Yudasa halu ibunaga ami agali biaru bia ange wiagoria íbu howa ibunaga ami agali haru haga bu hearu iba angeni ibu hai helowa tihondo lamialu lalu, Ami agali tí bibahendeore wai pora biai halimu. Mbira hangubi hadai nabilimu, lalu lamini.
1MA 5:43 Ani lalu ai Yudasa ibuni wai pole bamba halu ibaha pora bialu piyagola ami agali bibahende piai hene. Ani piyagola ami agali Anduane Homogo mitangi nahaga bu hearu ibida pugupugu biai hene. Danda timu timbuni yiaru wahai halu ibida puwa Kanaimi tanoha bi pupu wiaga gime wabini wiagonaga anda timbuni heagoha ibida pialu birado hai hene.
1MA 5:44 Ani biyagola Yudasa halu ibunaga ami agali biarume haruru talima puwa anda timbuni ogoni heba wali agali anda ogoniha birado hearu bibahende bo heda hai hene. Yudasahanda Kanaimi tano bo podahana hayagola wali agali tano ogoniha hearume mo ko holene mbira Yudasahondo lone bibe nahe hene.
1MA 5:45 Ani bialu Yudasahanda Isaraele wali agali Gileada dindiha hearu bibahende mo mogo biai halu Yuda dindiha haru dai bini. Ti piyagola daga lamibe naheore dewaore tidiyu pene. Wali agali tara tarabi wali waneiginibi tinaga dabudabu wiarubi heba piai hene.
1MA 5:46 Ti pialu tano timbuni mbira mini Eberono ege pabe hongohe bu mabubi wiagoria pialu hemiria wali agali tano ogoniha hearume waipabe panga hongo howa payatagi hene. Ti hariga ogonidagua pialu tano ngago pu balalu pubagi halu polene henge nawiore hariga mbiraore hangu tano tamuha bolaangua halu polene mbiraore wini.
1MA 5:47 Anigo wali agali tano ogoniha haga bu hearume Isaraele wali agali bolangua halu pelo henge nami tigua ege to̱le̱ timbuni wiaru muwa pabe panga hongo howa payatagi hene.
1MA 5:48 Anidagua biyagola Yudasa ibugua bi bayaleore lo pelalu lalu, Ina tí daluha hariga dege bolangua halu inane dalu pole poloma̱ya henge ngidaba. Iname tíha ko mbira bulene manda nabi bame hariga dege bolangua halu poleberema, lene. Ani layago Yudasanaga bi hale nahe tigua panga payaho haabo hene.
1MA 5:49 Anidagua biyagola Yudasahanda ibunaga wali agali ogoriani hondo hadaba lowa
1MA 5:50 ami agali biaru tigua danda timurubi wai biaganeale wiaru mo manda manda biai hene. Ani bialu anda puwa wai mbira horombebi biaho wialu tigua bo podahana halu tano ti karulene.
1MA 5:51 Yudasa ibugua agali bibahende bo wahai halu tano ogoni bo gialahole biai halu tanoha wali agalinaga mbirale bayale wiaru bibahende mo hilo yai halu bini. Ani bialu Yudasa halu ibunaga ami agali biaru agali tinime bo wahene wiaru tinginini ge haga bialu pene.
1MA 5:52 Pialu iba Yodana domaede halu dindi tigabi mbira Bedesana tano wiago abene mbirayagi tagira pene.
1MA 5:53 Ani pialu howa Yudasa ibugua agali maru hariga pole manga halu maha ibiyaru bime mo hongo haga bialu bime wali agalinaga bu miniha mo hongo hama dege ibalu Yuda dindiha anda ibini.
1MA 5:54 Tigua wai biyagohabi hariganibi mo ko halubi waiha homabi nabi dege haabo halu dai biyagonaga turu timbuni hama Saiono nene irigi halu Ngode Datagaliwabehondo turu howa ka̱i̱ lama pialu loma irani dai holene lomaru bu delole pene.
1MA 5:55 Ai Yudasa Saimonola Gileada dindiha pu heagola libu hamene heagome Galili dindiha Tolemese tano wiagoria wai bialu hene.
1MA 5:56 Ani bialu heagola Yudanaga ami haru haga Yosebela Asariala libu hale halu hebiria tebirali hamenema biarume wai bialu tigua bo podahana haga bima pora layago te hale hene.
1MA 5:57 Ani hale howa libugua lalu, Iyame nde wali agali Anduane Homogo manda nabiaga wali agali kaware karu baba wai bialu wayali howa iyabi mini lene dege habiya wai bu mba, lene.
1MA 5:58 Ani lalu libugua ami agali bu hearu haru haru halu Yabane tano wiagoha wai bule pene.
1MA 5:59 Gogiasahanda tano wahalu ogolabo baba harigani ngola howa wai bule pene.
1MA 5:60 Puwa Gogiasa halu ibunaga ami agali biarume wai bialu Yosebe Asariala aria biaru bama talima pialu Yuda dindiha taliairi hene. Horo ogoningi dege Isaraele ami agali daosini kira agima (2,000) bo wahai hene.
1MA 5:61 Ami agali haru hagane haguane kirali biago labome Yudasa halu ibu hamenerunaga bi hale nahe libuninaga mini yaraga holene hame lo hebiria ani homai hene.
1MA 5:62 Ani bialu libu agali maru Ngode Datagaliwabe ibunime Isaraele wali agali mo wialu haru dai bilo dabo helene hayadaru aria ndo heagome bini.
1MA 5:63 Anigo Yudasa Magabeusu halu ibu hameneru ti dege Isaraele wali agalinaga denibi wali agali tara tara bu hearu denibi mini lene daligaore hene. Wali agali bibahendeme biabe timbuni tigua biyaru hale hai ho howa
1MA 5:64 tininaga dengui handalu tinaga mini yaraga haga bialu haga hene.
1MA 5:65 Mani howa Yudasa halu ibu hamene biaru heba dindi abene unurahayagi Iso hameigini palearu baba wai bule pene. Yudasahanda puwa Heberono tano wiagoria wai bialu tano emene emene wiaruhabi wai biai hene. Wai pabe hongohe biaru bo gialo wahai halu mamageali handa amunana bu haga anda daliga bima irigi hene bu hearu bo heda hai halu bini.
1MA 5:66 Ani bialu ibunaga wali wali agali haru halu Pilidia dindi wiadagua puabo halu Maresa tano wiago hanuni bolangua hene.
1MA 5:67 Ogoningi agali loma binigo mo miaga bu hearu tigua tinaga miniha emene mini ko wu howa tibi nde mini lene pari wayali dege holenaga wai pene. Ani pialu hearia waitigime tiha bogo hana hai hene.
1MA 5:68 Ai Yudasa halu ibu damene biaru ti beregedalu Pilidia dindiha Asadodo tano wiagohayagi puabo hene. Ani puwa dindi ogoniha dama mitangi bialu bi pupu wiaga gime wabini wiarunaga lomabu delaga dabu hearu bo gialo wahai halu uruninaga bigiya wiaru mo delaga bini. Ani ogoniha wiaru bo gialo payabu wahai halu Yuda dindi dai bini.
1MA 6:1 Kini Andiogusu mane ibu Pesia dindiha dindi timbuni Mesobodemia wiagoha howa hale halu hearia tano mbira mini Elimaisi nga layane hale hene. Tano ogoniha siliba ngoloru dewawi mini lene mbira nga layago hale halene.
1MA 6:2 Mbirale dama mitangi bialu bi pupu wiaganaga anda tano ogoniha hayadagoha mbirale bayale damene muni dewame yolo miaga dege dewaore nga layago hale hene. Wai humbi ngolome wabini wialu wai pole karulagane yari damene dewaore anda ogoniha nga layago hale hene. Mbirale uruni Masedonia Kini Alegesanda ibugua anda ogoniha mo winiya. Alegesanda ibu Pilibi igini howa Girigi dindiha kini timbuni mini lene pigane ibu henego ogonime mo wini.
1MA 6:3 Ani nga layago hale halu Kini Andiogusu ibugua Elimaisi tano puwa wai bialu mbirale uruni mo kayu bule manda bialu hearia wali agali tano ogoniha hayadarume te ala hale ho bolangua howa Kini Andiogusu ibiyagola tigua manda manda bu heneyago wai biadai bini. Ani biyago Andiogusu ibugua mbirale mo page bule piyago mibe nahe hene. Ani biya handala Andiogusu ibu beregedalu Babilono dai buwa ibunaga bu miniha genda timbuni ho hene.
1MA 6:5 Pesia dindini hearia agali mbirane ibuwa Andiogusuhondo lamialu lalu, Í̠naga ami agali Yudia dindiha helariruni bo podahana haya.
1MA 6:6 Yuda ami agalime Lisiasa halu ami agali hongohe hearu bo talia togolaya. Ani bialu ayu ti hongoheore kago irane tigua wai bialu ami agali tigua bo wahaga biyarunaga wai biaga ale wiaru ti mo wiai halu dabudabu marubi dewaore mo wua howa ti hongohe gibiore ka.
1MA 6:7 Í̠na mbirale Hiriribi Hondolene Gibiore lomabu delaga dabu Yarusalemeni wiagoria mo wirigoni Yuda tigua mo wahaya. Ani bialu pabe hongohe daligaore ala hayagobi ndo lomabu delaga dabu kago bu mabu bida. Ani bialu í̠ninaga tano Bedesu ngago tigua karulalu mo hongo howa ngeleda, lalu lamini.
1MA 6:8 Ani layago hale howa kini ibunaga miniha genda timbuni howa mini burugulo berene. Ani biyagola ibu warago bamialu dagiani paliaabo henego irane mbirale ibugua bule mende bu wiyago damene bibahende mo habo lai hayagola ibunaga miniha mo ko hai hayagola dagiaha wiaabo hene.
1MA 6:9 Horo dewaore dagiaha ani wiaabo hearia genda mini burugu dewaore lone dambi haga bialu bope haabo hene. Anidagua biyago hondowa ibu homoleore ngogonida lo manda bini.
1MA 6:10 Ani manda buwa ibugua agali maru Kininaga Nenege laga hearu mogo buwa ibugua tihondo lalu, I̱ u palibe naheore genda timbuni ngagome i̱naga bu gubalini nedagome i̱ mo ko kagoni.
1MA 6:11 Ainde i̱nihondo hale halu genda tara tara i̱ha tagira ibirago irane agidabe. Bamba nde i̱ha mo palia holene karulo kagola wali agalime i̱hondo turu hai hagago.
1MA 6:12 Anigo ayu i̱na ko bialu mbirale lotunaga biabe biaga ngolo silibarume wabini Yarusalemeha wini mo yu pirugomeda. Ani bialu Yuda wali agali bame bo waharugomeda.
1MA 6:13 Ai i̱na mbirale uruni birugome genda uruni i̱ha anda ibiyada lo manda bido. Ainde ayu i̱naga miniha ndibu lai harugo ai i̱ dindi kaundia ogoha homoleda lo manda bido, lene.
1MA 6:14 Ani lowa Andiogusuhanda agali mbira mini Pilibi ibu Kininaga Nenege laga heaga olo íbu lowa ibu dindi bibahende Andiogusuhanda hondo haga wiaru bibahende ibugua handaya ho helo dabo helene.
1MA 6:15 Ani helowa kininaga mandabi agabi gi hondene magibi Pilibihondo miai hene. Ani mialu ibu igini Andiogusu dauni kagobi nde mani kini helonaga mana baya hangu lawai helo lamini.
1MA 6:16 Ani lalu Kini Andiogusu mane ibu mali handari mbira pira mariani dira (149) layagola dindi kaundia ogoniha wialu homene.
1MA 6:17 Ani Andiogusu homaya layago Lisiasa ibu hale howa ibugua wali agali bu hearuhondo Andiogusu homayago ai ibu igini mini Andiogusu dege kagome ibu abanaga henge ibuni miya. Ani bialu ibu kini gahenge haribia halu ibu mini Yubado ka. Kini ogoni ibu wene igiri emene heangi Lisiasahanda baya hangu handaya ho haga hene.
1MA 6:18 Ai Yarusalemeha wai pabeanda hongohe heagoha waitigi bu hearume Isaraele wali agali Anduane Homogonaga anda kaware pole pialu karia napole lowa hariga hapai haga hene. Horo bibahendengi wali agali genda mo mialu haabo hene. Ani bialu maru Anduane Homogo manda nabiaga hearu biamogo bialu haga hene.
1MA 6:19 Ani bialu kagonaga Yudasahanda agali uruni bialu kago balu bo biba helolebero laya. Ani lowa mali handari mbirani pira duria (150) layagola ibugua ami agali wai biaga hearu Yarusaleme wai pabe anda hongohe heagoha haga hearu baba wai bilo dabo helalu
1MA 6:20 wai biagane masini tara tara wai biagane wiaru ogoriani kaware mo wialu bini.
1MA 6:21 Ai agali mine haga anda ogoniha haga hearu heba Isaraeleali Anduane Homogo mitangi nahaga hearubi tigua pora bialu kini hearia puwa ibuhondo lamialu lalu,
1MA 6:22 Mana ko ina waitigime inanaga wali agali baba bialu kago angi pani mule kebe.
1MA 6:23 Ina í̠ aba ibu andaneha howa ibunaga bi mana lo ngago hale halu howa talialu harima.
1MA 6:24 Ani bialu harimago ainde mana o bialu haruagome ina biamogo agua bulubada. Ayu inane dameneore bu karume ina baba waitigi ho kago. Ani bialu tigua ina aria maru bo wahai haya. Ani bialu inanaga dabudabu bayale wimaru ti mo yu piai haya.
1MA 6:25 Tigua ina hangu mo ko ha ndo hameigini tara tara ina baba kaware palia parapara padaru bababi wai bialu ha dege bida.
1MA 6:26 Ani bialu howa ai ayu tigua agali maru wai pabe anda hongohe Yarusaleme tanoha haga haru baba wai bialu anda hongohe ogoni ti karulole manda bialu ka. Tigua Yarusalemeha Anduane Homogonaga anda hayago arema buwa mo hongo halu Bedesu tano mo ho ngeleda.
1MA 6:27 Ayu ogoniore í̠na mbirale mbira nabiriyagua tigua bialu kago pu hongo halu ina bo wahai haragola mani í̠na mbirale mbira tihondo bibe naheore wulebira, lene.
1MA 6:28 Kini ibugua agali Yarusaleme howa ibiyarunaga bi layago hale howa ibu miniha tandaga timbuni ho hene. Ani howa ibugua agali haguane mini Kini Nenege laga bu hearubi ami agali haru haga haguane hearubi ami agali nogo hosini biruwa wai biaga haru handaya ho haga hearubi bibahende olo ngoai hene.
1MA 6:29 Ani bialu ami agali maru dindi tara tara wiaruha hearu yolo bu helalu maru dindi iba dege dombene wiagoha hearubi munime yolo bu helatago halu buwa ibunaga ami agali dewaore hene.
1MA 6:30 Ami agali dindini howa wai bulene daosini dege handari mbira (100,000) nogo hosini biruwa wai biaga daosini dege pira kira (20,000) nogo tara mbira mini elebana wai bilo agali baya hangu biawai heneru pira tebirani kira (32) bibahenderubi manda bu helalu bini.
1MA 6:31 Ani bialu Kini Andiogusu halu ibunaga ami agali biaru tigua Idumia dindi wiagoha pu bolangua halu puwa Bedesu tano wiagoha wai luore bialu haabo hene. Ani bialu howa tigua masini tara tara wai biaga wiaru wai pabe tagiraha wabu helaga biaria agali tano ogoniha haga hearume ibalu bo giala hole bialu bo heda hene.
1MA 6:32 Ai Yudasa ibugua nde ibunaga ami agali Yarusalemeha wai pabeanda hongohe biagoha helayaru heba haru halu puwa dindi mini Bede Segaraia laga wiagoria balai anda bu hene. Kininaga ami agali ibulubadagoria hapai halu ogoriani pu hene.
1MA 6:33 Ani heagola kini halu ibunaga ami agali biaru tigua gao layagola heyalu Bede Segaraia polene hariga peadagua pialu howa ibunaga ami agali biarume pilipe biguli pu laga laga bialu danda timu yandareru wai biaga ale manda manda bu yai hene.
1MA 6:34 Ani bialu nogo elebana biarume wai bilonaga tinaga miniha mo noa halu mo tandaga holenaga gerebi liniru ira tara mini malaberi liniru mo nga helene.
1MA 6:35 Ani bialu nogo timbuni uruni ami agali mbira mbira tidiyu headagua mo tahaga bini. Ami agali daosini mbira (1,000) hearu bibahendeore manda boronosime wabini mo karulai halu aga senipume wabiradagua bini wiaru mo karulai halu nogo elebana mbira mbira headagua tidiyu haga haga bini.
1MA 6:36 Ani bialu ami agali nogo hosini biruwa wai biagaru tibi mo tale bialu handari duria (500) dege dege nogo elebana mbira mbira headagua tidiyu haga haga bini.
1MA 6:37 Tigua dabu wabuwa nogo elebana erekunini mo paga howa mandibuale hongohe mbirame daba hene. Ani buwa ami agali tebira heba mane nogo mo tiga bialu haru haga howa nogo elebana mbira mbirani ani dege berene.
1MA 6:38 Ani bialu Lisiasa ibugua ami agali nogo hosini biruwa wai biaga hearu ibunaga ami agali geni piaga hearu gi tigaha gi lehala helene. Ani buwa ti waitiginaga miniha mo tandaga holebi tinaga ami agali bayale helo haru holebi ani helene.
1MA 6:39 Tinaga wai humbi siliba ngolorume wabini wiaru yalu hari bare wiagoria heago ni daba hayagola ngiringara lalu ira hungu timbuni daradagua bini.
1MA 6:40 Kininaga ami agali maru hari bare wiagoha heagola maru dindi ulini wiagoria tidiyu haga haga bini. Ani bialu ti hondo ha nabi abale wai pora biai hene.
1MA 6:41 Agali hearume ami agali uruninaga danda timu humbiru kilingele layago hale howabi geme dindi kulu layago hale howabi ti gi timbuni hene.
1MA 6:42 Ai Yudasa halu ibunaga ami agali biarume wai bialu kininaga ami agali handari waragaria (600) bibahende bo wahai hene.
1MA 6:43 Eleasa Abarana ibu de handalu hearia nogo elebana timbuni daligaore mbira kininaga agaru mo karulahe ibiyago hondowa kini ibuni nogo ogoriani biralu ibirabe toba hene.
1MA 6:44 Ani manda buwa Eleasahanda ibuninaga holene embeda halu ibunaga wali agali biamogo bialu homene. Ani biyagome ibunaga mini timbuni mo yaraga henego wiaabo ka.
1MA 6:45 Ibu gi nahene. Ibugua gerai lalu nogo elebana timbuni biago ami agali abene mende mendehala ibilowa dombeni ibiyago hondo yalu gerai tungulope hene. Ani buwa ami agali abene mende mendehabi heago bai hayagola maru mende mendebi ha migimigi bini.
1MA 6:46 Ani biyagola Eleasa ibugua nogo elebana biagonaga himuniha anda puwa yandareme nogo timbuni ogoni nogoba hayagola nogo ogoni ibira hayagome Eleasa bo dambi hayagola homene.
1MA 6:47 Ai Yuda ami biaru tigua handalu hearia kininaga ami biarume wai tara mbira biyago hondowa ti emene hadai bini.
1MA 6:48 Ani biyagola kininaga ami biarume Yuda ami Yarusalemeni hearu baba wai bini.
1MA 6:49 Ani bialu kini ibugua wali agali Bedesu tanoha hearu baba gi tigani bialu pene. Ani binidagoni ti wai lu bialu holenego tomo nalu holeme nawiyagola ani bini. Ani bialu mali ogoni Yuda wali agalinaga mabuha tomo hongolene nawi mali kane hayagola tomo nawini.
1MA 6:50 Ani bialu kini ibugua Bedesu tano karu lowa ami agali maru tano ogoni handaya ho helo helene.
1MA 6:51 Ani bialu kini ibugua Anduane Homogonaga anda kagoha wai bu pialu horo dewa wai dege bialu hene. Ibugua masini tara tara ira hangu dedaore babe lolenebi ege to̱le̱ bape lolenebi timu bape lolenebi wabu helowa wai bialu hene.
1MA 6:52 Ani biyagola agali Anduane Homogonaga anda heagohayagi hearu tiguabi nde wai biaga masini tara tara uruni ale wabuwa wai biadai bini. Ani bialu heagola wai luore bialu hene.
1MA 6:53 Ani bialu henego ai mali ogoni mali kane tomo nahanga biago howa Anduane Homogonaga andaha tomo nawi tubagi hene. Ani bialu Yuda wali agali wai togoloyu ibini hearume tomo emene wiago nawi heagola ti tomo nawiore hene.
1MA 6:54 Ani biyagola wali agali dewaore tini dalu dai biai hene. Ani biyagola Anduane Homogonaga andaha emene dege haabo hene.
1MA 6:55 Horo ogoni Pilibi ibu Pesia dindi Midia dindiruha howa dai andaga dai bini. Pilibi ogoni bamba kini Andiogusu mane biago ibu homalu ibu igini Andiogusu dauni kini ho aribia helo lawai halu haru habe lene biago dai bini. Ogoni ibugua Andiogusu mane biagonaga ami agali biaru heba dai buwa ibugua gabumane biabe damene bibahende handaya ho hai hole manda bini. Ai anidagua biru layago Lisiasa ibu hole howa
1MA 6:57 ibugua andaga dai bulenaga mbirale manda manda bini. Ani buwa ibugua igiri emene Kini Andiogusu daunibi ami haru haga hearubi ami agali bu hearubi lamialu lalu, Horo bibahendengi ina tomo nolene nawi howa inanaga hongo ibira haabo harago. Ai tano ina karulole manda birimagobi hongoheore nabibehe ngagoni. Ani bialu ina daluha gabumane biabe mo tiga bulene dewaore wiarua.
1MA 6:58 Ani wiaruago ai iname Yuda agali haguane karu baba gi tigani bialu bi lo tiga bulene karulapeda.
1MA 6:59 Ani bialu tinaga mana lo wini ngagobi tini bialu haga ngadaguabi bialu helo waholene karulapeda. Abale inaha genda tara tara tagira ibiyago irane iname tinaga bi mana lo wini wiago mo pugualu tinaga bialu haga wiago mo wahai harimagome ibiya, lene.
1MA 6:60 Ani layagola kini halu ami agali haru haga hearume karulape lai lene. Ani lalu tigua Yuda wali agalihondo wai wahalu gi tigani lama lalu bi lo yalu pu lene. Ani layago hale howa Yuda wali agali tigua karulape lene.
1MA 6:61 Ani layago hale howa ai kini halu ami agali haru haga biaru tigua habo nalolene bi ogoni napugule lalu gi dolalu bi lo wini. Ani layagola Yuda ti anda hongohe wai pabeanda hongohe biago wahalu tagira ibini.
1MA 6:62 Ani lalu kini ibugua Saiono nene puwa handalu hearia wai pabe hongohe heago hondowa habo nalolene bi lo wiyago pugualu ibunaga ami agali biaruhondo wai pabe hongohe ogoni bo gialo wahai hadaba lene.
1MA 6:63 Ani lalu ibuni abale dai bialu Andiogo tano pene. Andiogo dai buwa handalu hearia Pilibi tanonaga agali haguane hearia hendene. Ani hondowa kini ibugua Pilibila wai bialu Andiogo tano ibuni mo yu dai bini.
1MA 7:1 Mali handari mbira pira duriani mbira (151) layagola Selugusu igini kini Demidiriasa halu ibunaga ami agali maru haru Lomo tano wahalu tano mbira iba solowara angeni wiagoria íbu hene. Ogoriani íbu howa ibu kini ko lalu latagi hene.
1MA 7:2 Ani lalu ibu mamalirunaga kini andaga wiagoha anda íbu biruwa ibunaga ami agali hearume Kini Andiogusubi Lisiasabi mini garabaya bu yalu Kini Demidiriasa berearia pene.
1MA 7:3 Ogolabo garabaya bu yalu ibira layago Demidiriasa ibu hale howa ibu agali ogoni labo dengui nahondoleore, lene.
1MA 7:4 Ani layago hale howa ami agali bu hearume ogolabo homelo bo wahayagola Kini Demidiriasa ibu hene.
1MA 7:5 Yuda hameigini bi mana lo wini ngago hale nahaga mine haga agali maru hene. Agali uruni tinaga haguane Alagimusu henego ogoni ibu loma binigo mo miaga haguane holenaga hongo halu hene. Ani howa agali uruni aria maru Kini Demidiriasa hearia puwa tigua lalu,
1MA 7:6 Yudasa halu ibunaga ami agali hearume wali agali í̠ gubalini haga hearu bo wahai halu inabi inanaga dindiha howa bo taliatagi haya.
1MA 7:7 Ai Yudasa ibugua í̠naga dindi hobane wirigo mo ko halu inanaga mbirale wimaru mo ko hai hayadago de hendelo agali í̠naga dabene mbira kago ibugua de hondole pu labelo hamelo kema. Ani bialu Yudasa halu ibu hamenerubi wali agali ibu biamogo biaga bu karubi bibahende pani nelo mibelo hame ledema, lene.
1MA 7:8 Ani layago hale howa kini ibugua agali haguane mbira gabumane biabe iba Yuberedisi porago angeha dindi ngagoha bialu haga mini Bagidese henego ogoni dabene.
1MA 7:9 Dabalu kini ibugua Bagidese Alagimusu heba Isaraele wali agali pani nelo mule pudaba lene. Agali Alagimusu ogoni ibu Ngode Datagaliwabenaga bi mana lo wini ngago hale nahaga henegoyu kini ibugua agali ogoni Anduane Homogonaga loma binigo mo miaga agali haguane helo dabo helene.
1MA 7:10 Ai ti Andiogo wahalu ami agali dewaore pialu Yuda dindiha tagira pene. Ani pu howa Bagidese ibugua ohowa henene letingi halu ibugua Yudasa halu ibu hameneru baba gi tigani bule ko laya lalu agali marume lo yalu pelene.
1MA 7:11 Anigo ainde Yudasa halu ibu hameneru tigua handalu hearia Bagidese halu ami agali dewaore heago hondowa bi ogoni henene ndo layada lo manda bini.
1MA 7:12 Agali mana ngago manda biahe agali maru Alagimusula Bagidesela hearia ibuwa tigua ogolabohondo lamialu, Wali agali bu karuhondo mana ko nabi bayale bulene ngadagua bilibu, lalu lamini.
1MA 7:13 Agali hameigini mini Hasidi hearu tigua Yuda mani ibilo bamba halu Alagimusu Bagidesela heba gi tigani bule pene.
1MA 7:14 Ai tigua manda bu handalu hemiria Alagimusu ibu agali loma binigo mo miaga Arono aria hayago. Ibugua ko mbira nabulubada lo manda buwa pene.
1MA 7:15 Alagimusu ibugua hongo howa gi doladaga halu lalu ibugua tini tinaga damene karubi mbira mo hole ndo tigatiga gi tigani bule laro lene.
1MA 7:16 Ani layagola tigua mo henene hene. Ani mo henene ho hearia ibugua agali pira waragaria (60) minu yania howa horo ogoningi dege bo wahai hene. O biyadagoni bamba Anduane Homogonaga mbuga ngagoha howa daga lalu,
1MA 7:17 Waitigime wali agali í̠hondo mini mbiraorewi hearunaga tingini dindini bame bo ba a̱i̱na̱i̱ bialu piya. Uruninaga darama Yarusalemeni iba poradagua biya. Tingini uruni mo hora holene mbirali naheoreya, lalu gilibu wini ngago lola haya.
1MA 7:18 Ani biyagola wali agali bibahende bu hearume Alagimusu Bagideselahondo gi timbuni hai hene. Wali agali tigua lalu, Libugua bi henene lolenenaga iranebi bi tigatiga lolenenaga iranebi manda nabi libuore heneda. Libugua henene laro lalu gi dolalu bi lowa mana lo wiyago puguaya, lene.
1MA 7:19 Ani bialu Bagidese ibugua Yarusaleme wahalu puwa ibu balai anda Bedesaida wiagoria bini. Ibunaga ami agali hearu lamialu, Yuda agali bayale bu karu garabaya biai halu Yuda agali ko ibu aria heagoha hatago hole turuho hearu heba garabaya hai helalimu, lalu lamini. Ani lowa lalu, Bialu bibahende homelo bai halu tinaga tingini gundu uli ngagoha bape hai halimu, lene.
1MA 7:20 Ani bialu Bagidese ibugua Alagimusu Yuda dindi handaya ho helo dabo helalu ami agali marubi talebu mialu ibuni kini hearia Andiogo dai bini.
1MA 7:21 Ani helayagola loma binigo mo miaga agali haguane Alagimusu ibugua Yuda wali agalinaga ibu timbuni mini leneore hene.
1MA 7:22 Ani bialu heagola agali ko bu hearume ibuha halaga hene. Ani howa Yudia dindiha ti hongo gibihe tagira pialu tigua Isaraele wali agali genda dewa mo mialu hene.
1MA 7:23 Ai Alagimusu halu ibu aria bu hearume Isaraele wali agali bu hearuhondo mana ko ala ibu damene Anduane Homogo mitangi nahaga henerume bialu hagadagua dege bialu hearia Yudasa ibu hondo hene.
1MA 7:24 Ani handalu ibu Yudia dindi bibahendeha ibaga biai hene. Ani bialu Yuda wali agali maru waitigiha hatago hayaru pani migi bialu tanoha nahe tagira piai halimu lalu lamiai hene.
1MA 7:25 Ai Alagimusu ibugua handalu hearia Yudasa halu ibu aria hearu hongoheore tagira piyaria hendene. Ani hondowa ibugua Yudasa bope habe naheda lo manda bini. Ani handalu Alagimusu ibu kini hearia dai buwa ibugua kinihondo lalu, Yudasahanda mana ko dewa biya, lalu ke̱ howa bi maru lene.
1MA 7:26 Ani layago hale howa kini ibugua ami agali hongoheore howa Yuda wali agalinaga waitigi mini Nigano henegohondo lamialu, Yuda wali Yudia dindiha kago damene bibahende bo hilo wahai hole pu, lalu lamini.
1MA 7:27 Ani laya handala Nigano ibugua ami agali dewaore haru halu Yarusaleme anda ibini. Ani anda íbu howa ibugua ohowa Yudasa halu ibu hameneru baba gi tigani loleberogo ibalimu la bi lo pelene. Ibugua Yudasahondo lalu,
1MA 7:28 Ainde iya keba nahabiya. I̱na í̠ keria ibalu howa í̠ nenege karia poro lalu ibulebero, lene.
1MA 7:29 Ani lalu ibu Yudasa hearia ibuwa libu gi tigani bialu libu mini mo mbiraore howa nenegeore haradagua bini. Anigo Yudasanaga waitigi bu hearume Yudasa minu yania hole manda manda bu hene.
1MA 7:30 Ani howa Yudasa ibu mani handalu hearia Niganohanda ibu mo hondo heneyane handa walia halu ibugua Niganohondo turu nahe howa ibuhondo gi timbuni halu ibu Nigano lone ngola nale manda bu hene.
1MA 7:31 Ai Nigano ibu ohayago wali agalime manda biai hayago hondowa ibugua Yarusaleme wahalu tagira puwa Yudasala wai dindi mini Kabasalama wiagoria wai bialu hene.
1MA 7:32 Wai ogoniha Niganonaga ami agali handari duria (500) bibahende homai haya handala maru ibida pora bialu Yarusaleme Debidinaga tano wiagoha piai hene.
1MA 7:33 Wai bialu mani Nigano ibu Saiono nene wiagoha pene. Agali loma binigo mo miaga maru hearubi wali agali bu hearubi tigua, Nigano ibiridago bayuwa birida, lalu ibu ngola hole tagira ibini. Ani bialu Anduane Homogohanda kini biamogo bilonaga loma irame dai helo delole yu hearu ibuhondo walia hene.
1MA 7:34 Anigoyu ibugua tihondo mege bialu hondo oba halu ti hamiaga toloba halu loma yu heago Anduane Homogo deni mo dodohe helene. Ibugua mine howa
1MA 7:35 tihondo lai laede halu lalu, Yudasa ibu i̱naga giha ibunime ibalu mo ya holene nga. Anidagua nabiyagua nde i̱na ibu karia pialu wai buwa ibu pobe halu dai buwa Anduane Homogonaga anda o kago bo heda holebero, lene. Nigano keba timbuni howa ti ani helalu ibu pene.
1MA 7:36 Ani puwa handala agali loma binigo mo miaga biaru ti puwa lomabu delaga dabu heagobi Anduane Homogonaga anda heagobi handa amu howa hondo hene. Ani howa tigua dugu bialu Anduane Homogohondo bi hongo howa ladaga halu lalu,
1MA 7:37 Ai Anduane Homogo-o anda ogo í̠ninagaore helo loma biaho helowa wali agali í̠ni keria kaware ibalu í̠hondo lotu lalu bi lelonaga anda ogoni helarigoni ndobe.
1MA 7:38 Ai agali ko o kagohondo pani nelo mialu ibunaga ami agali karubi heba pani nelo mibe. Wai hamaha bo wahabe. Í̠hondo mege bialu bi ko layago manda bialu pani mibe, lalu bi lene.
1MA 7:39 Ai Nigano ibu Yarusaleme wahalu tagira pialu Bedehorono tano wiagoria balai anda bini. Ani bialu Siria ami agali maru ogoriani ibalu hatago hene.
1MA 7:40 Ani heagola Yudasa halu ibunaga ami agali daosini tebira haru howa tinaga balai anda nde Adasa tano wiagoria bini. Ani bialu howa Yudasahanda Anduane Homogohondo bi lalu,
1MA 7:41 Anduane Homogo-o í̠naga mbuga ngagoha howa dagalalu, Kini mbirame agali maru í̠hondo mege bule pu lene ibiyaria í̠naga dahuliyalime ibalu ami agali uruni aria daosini dege handari mbira pira halirani duria (185,000) bibahende bo wahai haya lo nga.
1MA 7:42 Anidagua dege wali agali bu karu bibahendeme í̠na Nigano ibugua í̠naga anda kago mege biyagonaga pani nelo mirida lo manda biai helo í̠nime ami agali ayu inanaga deni karuni balu bo hengeda hai habe. Ibugua mana ko timbuniore biyagonaga pani nelo mialu minu bai habe, lalu Anduane Homogohondo bi lene.
1MA 7:43 Ani lalu ege mini Adanaga horo halene (13) layagola tigua wai bini. Ani lalu wai biyagola Nigano ibuni waiha homalu ibunaga ami agali hearume wai ibira hene.
1MA 7:44 Ai ibunaga ami agali hearume Nigano homaya handa danda timu giha yu hearu wahai halu ibida piai hene.
1MA 7:45 Piyagola Yuda tigua Adasa tano howa bama talima piaho wialu Gese tano tagira pene. Harigani talima pialu howa ami agalime hongo howa wai bilonaga pilipe biguli pu lama dege pene.
1MA 7:46 Ani biyagola Yuda wali agali haga haga bu hearu tagira ibai hene. Ani ibalu tigua wai gi leha howa gi tigaha howabi tagira ibugu bialu wai biai hene. Ani biyago hondowa waitigi ami agali biarume emene hadai bialu hearia ami agali ti bama talima ibiyarume tali minalu minu bogaiore hene.
1MA 7:47 Ani bialu Yuda wali agali tigua waitiginaga mbirale wahearu mo yai hene. Ani bialu Nigano ibugua ibu timbuni daligaore Ngode Datagaliwabe daligaore bolanguahe hene tingi howa ibunaga gi hongoru walia hayagonaga tigua ibunaga gi tiga pugu yalu haguane pugu yalu bialu dai bini. Yu dai buwa wali agali Yarusalemeni bu hearu bibahende hendelo walia hai hene.
1MA 7:48 Ani bialu Yuda wali agali turu timbuni hene. Ani bialu horo ogoni tinaga lotu lolene timbuni mbira wiabagiho ngelene.
1MA 7:49 Ani mo ngelowa mali bibahendenaga ege Adanaga horo halene (13) tagira ibiragola tinaga lotu laga wini.
1MA 7:50 Ani bialu tigi mbira hanguni Yudiaha wai nabi emene bayale wini.
1MA 8:1 Yudasa ibu hale hale halu hearia Lomo agaliru hongohe mini lene mbira howa hameigini mbira baba mini mo mbiraore howa gi tigani lalu libu nenege haga layago abale hale hene. Wali agali dindi tara tara ha karu bibahende lomo baba biabe mo mbiraore howa bialu haga kago ibunaga nenegeore lo haga ka layago hale hene.
1MA 8:2 Yudasa ibu hale halu hearia Lomoali tigua wai timbuni biaga layagobi tigua Gala palearu baba wai bialu bope howa dagisi mialu ka layagobi hale hai ho hene.
1MA 8:3 Ani bialu lomo tigua Sebena dindiha biabe bayale bialu ogoniha ngolo silibaru dugualu kago baya hangu handaya ho ka layago hale ha dege bini.
1MA 8:4 Sebena dindi ogoni kaundiaha ngagoyu Lomonaga hongomebi mini gigabi wiagomebi dindi ogoni ibu karu lalu handaya ho ka layago hale hene. Dindi tara tara wiaruha howa kini dewaoreme Lomo agaliru baba wai bini. Ani biyagola Lomo amime wai hongo howa bialu kini dewa uruni bope hai halu ibugua tiha dagisi mali bibahendengi mialu haabo haga hene.
1MA 8:5 Lomo tigua Masedonia dindinaga kini kira Pilibila Peseusula bope halu hameigini dindi tara taraha palearume Lomoaliru baba wai biyarubi bibahende bope halu bini.
1MA 8:6 Sirianaga kini timbuni mini lene Andiogusu tebone henegomebi Lomo agaliru baba wai bini. Tinaga wai biagane nogo elebana handari mbira pira kira (120) halu ami agali nogo hosini biruwa wai biagabi garoale karisini heyu howa wai biagabi dewaore hene. Ani heago helowa Lomo tigua uruni mo emene howa bo haealabaga biai hene.
1MA 8:7 Ani buwa Andiogusu minalu garabaya helene. Ani buwa Andiogusu ibunihondo mali bibahendengi dagisi muni ngi lalu ibu igini aguane muni ho aribia hayarume heba dagisi mani dewaore Lomo tagu mialu haabo hene. Ani bialu tinaga agali haguane mini lene hearu minalu Lomo dindiha garabaya helaga bini.
1MA 8:8 Ani bialu Lomo agali tigua dindi baya maru Indiabi Midiabi Lidiabi ibunaga gabumane andaneha helaga bini Lomo tigua dindi uruni Kini Andiogusunaga wiago bo mialu Kini Yumenese giha ya haga bini.
1MA 8:9 Ai Lomo tigua hale ho hearia Girigime Lomo baba wai buwa bo biba holebira laya hale howa
1MA 8:10 Lomo tigua ami agali dewaore tidi yalu Girigi baba wai bule pene. Puwa wai bialu Girigi bo podahana hene. Lomo tigua Girigiali one waneigini bu hearu garabaya haru hai halu dabudabu wiaru mo pagebu yai halu dindibi ti karulalu bini. Lomo tigua Girigi dindiha wai pabeanda hongohe wiaru bo gialo wahai halu wali agali bu hearu garabaya biabe ale bia haga helalu binigo ayu ani wiaabo henego nga.
1MA 8:11 Lomo agali tigua dindi bibahendebi dindi iba dombeneha wiarubi wali agali Lomo agalihondo mine hayaru bibahende bope hai halu bini.
1MA 8:12 Ai hameigini maru Lomo agali baba nenege howa ti heba mandagi haga bu hearume ti baya hangu handaya ho habe lalu olaga bialu hene. Tigua mana ogonidagua bialu kini kaware hearubi kaundiaha hearubi bibahende bo podahana hai halu bini. Ani biyagola wali agali bi te uruni hale hayarume Lomo agalia gi howa mogo lalu hene.
1MA 8:13 Ani bialu Lomo tigua dindi mbiraha agali mbira kini heloa hayagua nde kini helaga biaga. Ani bialu mbirali kini henego dugu wahoa biyagua nde kini kago dugu wahaga ka. Ani bialu heagome Lomo agaliru ti hongoheore halu mini lene hene.
1MA 8:14 Ai lomo agaliru ti mini lene hongohe ani ha howa tigua kininaga manda karulolebi kininaga manda karulolebi kininaga aga karulalu tininaga mini yaraga holene manda nabi haga hene.
1MA 8:15 Tinaga gabumane ngoai holene anda bialu anda timbuni ogoniha memba handari tebirani pira kira (320) bibahende íbu ngoai howa wali agali bayale helonaga biabe bulenenaga bi lalu dindi mo heya holenenaga bi lalu bule horo bibahendengi mo ngoai haga hene.
1MA 8:16 Mali bibahendengi tinaga memba mbirame gabumane biabe bulenebi dindi bibahende ngarubi handaya ho helo dabo helaga biaga hene. Wali agali bibahendeme agali haguane ogoninaga bi hale hai halu mbirale mendealinaga ngago ti dimagoli nahaga hene.
1MA 8:17 Ai Yudasa ibugua agali kirali Lomo pialu Lomo gabumane kagohondo nenege haba lama bi yalu pudaba lene. Agali mbirago Agoso aguane Yone igini Yubolemusu pialu mendego Eleasa igini Yasonola pudaba lene.
1MA 8:18 Yudasa ibugua ogonidagua binidagoni irane Girigi kini kagome ibalu Isaraele wali agali bo hilo waholobada lo manda buwa Lomo gabumaneme ibu biamogo bialu ibunaga genda ngago mo wahole ibilonaga manda buwa ani lene.
1MA 8:19 Yubolemusula Yasonola hariga luore pialu Lomo anda pene. Puwa Lomo gabumane anda heagoria anda puwa libugua gabumane agali biru wiaruhondo lalu,
1MA 8:20 Yudasa Magabeusu ibu hamenerubi Yuda wali agalibi tigua Lomo tí baba nenege halu ina mini mo mbiraore ho hami̱ya habo nalolene bi lo wule pudaba laya handala ibiriba, lene.
1MA 8:21 Ani layagola Lomo tigua bi ogoni karulape lalu,
1MA 8:22 Tígua habo nalolene bi uruni bi gili biaga boronosime wabini mbalape wiagoria gilibu wialu Yarusaleme yu dai bidaba, lene. Bi gilibuwi boronosime wabini ogoni hameigini kiralime habo nalolene bi lo winigonaga manane wini.
1MA 8:23 Habo nalolene bi lo gilibu winidagoni ogo, Iname mbirale bibahende bayale bulene dege Yuda Lomolanaga dindi ngagohabi iba solowara bedagohabi wiaabo helo hame ledema. Horo mbiru libuha ke̱ nahelo. Ani bialu libu wai nabilo hame ledema.
1MA 8:24 Hameigini tara kagome Lomo baba wai biyaguabi Lomonaga nenege kago baba wai biyaguabi
1MA 8:25 nde Yuda ibugua nenegeoreme biagadagua Lomo baba mo mbiraore halu waitigi ogoni baba wai bulebira.
1MA 8:26 Ani bialu Yuda tigua Lomo baba wai biragohondo tomobi munibi wai bulenealebi iba sibibi uruni ale mbirago mulene nawiore. Iname bi ogonidagua laramago Yuda tigua talialu howa inahondo yolo ngi lolene nawi.
1MA 8:27 Anidagua dege hameigini tara kagome Yuda bayagua nde Lomo tiguabi Yudala libu hamenelaore haradagua bialu waitigi baba wai bulebira.
1MA 8:28 Ani bialu Lomo tigua Yuda waitigi kagohondo tomobi munibi wai biaga ngarualebi iba sibibi mbirago Yuda waitigi kago mulene nawi. Ina Lomome bi ogonidagua laramago ke̱ halu mana mende bu aribia naholeberema.
1MA 8:29 Bi ogonime ina Lomo kemagome Yuda wali agali baba habo nalolene bi lo werema.
1MA 8:30 Anigo mani howa libugua bi lo mbira howa habo nalolene bi maru latago holeyaguabi maru mo waholeyaguabi karulape dege. Mo iriari bulenego bayale heneneorego bulene wulebira.
1MA 8:31 Ani bialu ina Lomome beba mbira gili bialu Kini Demidiriasa hearia í̠na Yuda wali agalihondo bialu hariyago mana ko biriya lalu gilibu pelarima. Ina bi ogodagua larima. Inanaga nenegebi ina heba hagabi Yuda kahondo mana ko biriyago aginaga biribe.
1MA 8:32 Í̠na Yudahondo ko lone beregola tigua ina kemaria ibuwa í̠na biridago bi lalu ina Lomohondo langiyagua iyame wai dindinibi iba solowara bedagoriabi bibiya, lalu bi gilibu pelarima, lene.
1MA 9:1 Ai kini Demidiriasa ibu hale hayane Nigano halu ibunaga ami agalirubi homai haya layago hale howa ibugua Alagimusubi Bagidesebi Yudia pudaba lene. Libu ayu ogoni halu mende pialu ami agali marubi haru halu pene.
1MA 9:2 Tigua hariga Giligala tano wiadagua pialu wali agali Abela dindiha dindi emene Mesalodini bu hearu baba wai bule balai anda ogoriani bini. Ani buwa tigua wali agali dewaore bo wahai halu dindi ogoni karulo hene.
1MA 9:3 Mali handari mbira pira duriani kira (152) layagola mali ogoninaga ege mbira hayagola Yarusaleme baba wai bule puwa balai anda kaware bini.
1MA 9:4 Ani bialu mani ti heyalu Beria dindi wiagoria pene. Tinaga ami agali daosini dege pira kira (20,000) haru halu ami nogo hosini biruwa wai biaga daosini kira (2,000) haru halu bini.
1MA 9:5 Yudasa ibu dindi mini Elasa wiagoria hene. Ami agali ibunime dabene daosini tebira (3,000) hene.
1MA 9:6 Ani howa waitigi dewaore ibiyago hondowa ti gi timbuni hene. Ani howa dewaore balai anda bu hayago wahalu ibida piai hene. Ani piai hayagola ami agali handari halira (800) hangu hene.
1MA 9:7 Ai Yudasa ibugua handalu hearia ibunaga ami agali ibida piai halu waitigi hapara hayago hondowa ibunaga ami agali biaru lone mo ngoai holene henge nawi ibida piai hayagola ibunaga bu miniha mini naibi ndibulo wahene.
1MA 9:8 Pigane ibunaga bu miniha duru lalu gi ho henego ai mani howa ami agali maru hadai bu hearuhondo lalu, Ayu iname wai bialu wayali holeberemabe toba ho kogo ai iname wai bimi̱ya, lene.
1MA 9:9 Ani layagola agali maru hearume ibunaga mini mo beregedalu lalu, Iname wai bibe nahedago ina hameneru heba howa wai bimi̱ya emene hadai bima. Ayu ina emene dege kamagoni, lene.
1MA 9:10 Ani layagola Yudasahanda ladai bialu lalu, Ani nabuleore. Ina waitigi handalu ibida polene nawi. Inanaga homolene horo ayu ibiyagua nde iname mogo lalu gi holene nawi. Inanaga damene bu karunaga homa haramagola inanaga mini bayale mini lene wiaabo holebira, lene.
1MA 9:11 Ai Bagidese halu ibunaga ami agali biaru tinaga balai anda helalu Yuda baba wai bule manda manda bialu hene. Ani howa ami agali nogo hosini biruwa wai biaga hearu ti halu kira talebuki halu tidiyu haga haga bini. Ami agali maru ege to̱le̱ puni yuwa baga hearubi danda timu yi hearubi tigua ami agali dewaore mani ibilo ti bamba hene. Ani bialu ami agali wai baya hangu biagaru tigua wai bamba howa hene.
1MA 9:12 Bagidese ibu gi tigahayagi hene. Waitigi halu kira biago pilipe biguli pu lama wai bule tidi yalu pene. Ani piyagola Yudasanaga ami agali hearu tiguabi pilipe biguli pu lalu wai pora bini.
1MA 9:13 Ani bialu wai gime minaga minaga biribiha geme dindi kulu lalu ema bilene. Wai egerebahagi howa binigo bialu hebine alendo ni palene.
1MA 9:14 Ani bialu howa Yudasa ibugua handalu hearia Bagidese halu ibunaga ami agali haguane hearu gi tigahayagi hearia hendene.
1MA 9:15 Ani heago hondowa Yudasahanda ibunaga ami agali wai gi nahaga pari wayali hearu dabowa haru halu Bagidese halu ibunaga ami haru hagaru heagohayagi wai gialaanda howa balu bo hengedalu maru talima pugu pugu bialu Asadodo hari nene wiagoria talidaga hene.
1MA 9:16 Waitigi biarume handalu hearia ti aria gi tigahayagi hayago ibira hayago handalu tigua Yudasa halu ibunaga ami agali biaru erembiraha aribia howa wai bima talima pene.
1MA 9:17 Wai bu alendo halu ami agali mende mendehabi kirabaliha timu dewa hai halu dewa homalu bini.
1MA 9:18 Yudasa ibunibi homaya handala ibunaga ami agali hearu ibida piai hene.
1MA 9:19 Mani ibu hamene Yonadana Saimonolame libu hamene tingini mo yalu pene. Mo yalu puwa tinaga aba mamaliru homali wiagoha Modeini tanoha hora halu duguanda howa dugu bialu dara ho hene.
1MA 9:20 Isaraele wali agali Yudasa duguanda dugu bialu horo dewaore howa tigua lalu,
1MA 9:21 Darabiore ina Isaraele wali agali mo wialu haru dai biaga agali haguane biago nde aginaga hayada, lalu hene.
1MA 9:22 Tigua Yudasahanda binigo damene bibahendeore biabe timuni bini ngarubi wai bini ngarubi bibahende te gili bulene dewaoreyagola tigua gilibu wiai nahe.
1MA 9:23 Yudasa homayagola wali agali Anduane Homogonaga bi mana mo yo handaga hearu Isaraele dindiha lone tagira íbu hene. Ani bialu agali mana ko biaga hearu ti hongo lone miadai buwa hongo ho hene.
1MA 9:24 Ogoningi tomo gariangi howa tomo nalu holene nawiyagola Isaraele wali agali ti waitigi baba hama pugu pugu bini.
1MA 9:25 Ani heagola Bagidese ibugua Yuda agali Anduane Homogo gi nahaga hearu dabalu tigua Yuda dindi handaya ho howa haru helo dabo helaga bini.
1MA 9:26 Agali haguane uruni tigua Yudasa aria hearu baya hangu taya buwa minu yalu Bagidese hearia pugu biyagola Bagidese ibugua agali uruni mo taga halu mo ko haga bialu hene.
1MA 9:27 Ai Isaraele wali agali mo ibu wini. Agali maru Anduane Homogonaga bi mana latagi halu mbiwia haga henegoria howa hama ibalu ayu ogoni dombeneha Isaraele dindiha genda timbuni ogonibi mbira nawinigo pigane ayu anda ibini.
1MA 9:28 Ai Yudasa nenego hearu ti mo mogo bu biruwa tigua Yonadanahondo lalu,
1MA 9:29 Í̠ hamene Yudasa homayagola ainde ayu agali ko Bagidese halu ibu aria karu homelo bo waholene agali hongohe Yudasa ale mbira naheore harimada.
1MA 9:30 Ani manda buwa ayu iname í̠na í̠ hamene Yudasanaga henge mialu agali haguane ibu hayadagua ha aribia howa í̠na ina wai haru bamba hagane habelo hame ledema, lene.
1MA 9:31 Ani layagola horo ogoningi Yonadana ibugua ibu hamene Yudasanaga henge ibuni mialu Isaraele wali agalinaga agali haguane hene.
1MA 9:32 Ai Yonadana Isaraele wali agalinaga haguane ka layago hale howa Bagidesehanda Yonadana bo wahole hariga taya bialu hene.
1MA 9:33 Anigo ai Yonadanabi ibu hamene Saimonobi ibunaga agali bu hearubi tigua Bagidesehanda ibu bole ka layago hale halu ti ibida pialu dindi ko iba dalu naibaga Tegoa dindi wiagoha puwa iba hambiaga iba uli mini Asaba laga wiagoria anda bu hene.
1MA 9:34 Sabada horo mbirungi hayagola Bagidese ibu hale hayagola Yonadana halu ibu aria biaru ogoniha ka lene hale halu tigua abaleore iba Yodana domaede halu pene.
1MA 9:35 Ai Yonadana ibugua ibu hamene mbira mini Yone ami agalinaga biabe biaga hearunaga agali haguane henego ogonihondo lamialu, Yonadana ibu nenege maru Nabadia dindiha karu hondo pudaba. Í̠naga dabudabu ngaruni ti daluha ngeloabe, lalu hale hene.
1MA 9:36 Ani lama pialu hearia agali maru Yambiri aria Medeba tano howa ibalu tigua Yone garabaya haru halu dabudabu biaru ti mo page yalu pu wahene.
1MA 9:37 Emene howa Yonadanala ibu hamene Saimonola libu hale halu hebiria Yambiri hameigini bu hearu turu timbuni ho ka layago hale hene. Ayu dege mbirali wali dabu biyagola wali agali dewa Nadabada tano howa wali agalime dabu bilodago haru halu harigani ibira layago hale hene. Wali ogoni Kenanali agali haguane mbira heago wane berenego haru ibini.
1MA 9:38 Ani layago hale howa libu hamene Yone homayago mitangi bialu libugua abale puwa harigani hari bare wiagoha bira do howa yu berene.
1MA 9:39 Libugua bira do howa handalu hebiria agali dewaore ngoaiho hearia de hendene. Tigua bi ladagadaga bima dabudabu dewaore yalu ibiyago hendene. Igiri wali dabu bulene biago halu ibu hamenerubi ibu damenerubi ti wali damene harigani ngola hale ibini. Tigua ngida tara tara bi wai biaganealebi dewa yalu ibiyago hendene.
1MA 9:40 Ai Yonadana halu ibunaga agali biaru ti porabu tagi halu puwa Yambiriali uruni baba wai bini. Agali dewaore homai haya handala maru hari bare wiagoha ibida pora bialu piai hene. Ani biya handala Yudali biaru ti dabudabu wiaru mo yalu pene.
1MA 9:41 Anidagua biyagola wali dabu bialu turu holene winigo wiaribia halu dara halu dugu bulene wini. Ngidaru balu iba gana bayale lole wiyago mo beregedalu dara howa agali homenenaga kiabu dugu bia aribia hene.
1MA 9:42 Libugua ogonidagua bialu libu hamenenaga darame pelayago pani libugua tininaga daramama pani bu aribia helene. Ani bialu libuni Yodana ibahayagi iba pugua wiagoha pene.
1MA 9:43 Libugua ani biya layago Bagidese ibu hale howa ibugua ami agali dewaore haru halu Sabada horoni iba Yodana peago angeni pu hene.
1MA 9:44 Ani íbu heagola Yonadana ibugua ibunaga ami agali biaruhondo lamialu lalu, Ayu genda yu kemago tara yu kemago ai wai bima, lene.
1MA 9:45 Ai hale halimu. Ayu ina homarimayaguabi nahome howa iname ti bai harimayaguabi karulape. Ayu waitigi tombehayagi ina halu iba Yodana erembiraha peda. Abene mende mendeha iba pugua ngagome ina polene henge nawida.
1MA 9:46 Ani bidago manda bialu ai Ngode Datagaliwabehanda ina biamogo bilo ibuhondo bi dege lami̱ya, lene.
1MA 9:47 Ani lalu wai bialu howa Yonadanahanda Bagidese ayume taula dibaro lo manda biyaria Bagidese ibu igiladai biyagola bako hene.
1MA 9:48 Ani biya handala Yonadana halu ibunaga agali biaru iba Yodanaha pora bialu howa ange mendeha do̱la ede hai hene. Anigo waitigi biarume iba do̱malu talima nape wahene.
1MA 9:49 Anidagua bialu horo ogoningi dege Bagidesenaga ami agali daosini mbira (1,000) agima homai hene.
1MA 9:50 Ani bialu Bagidese ibu Yarusaleme dai buwa Yudia dindiha tano wiaru mo hongo haga bini. Ibugua anda íbu holene Yarigo tanohabi Emaiasa tanohabi Bedehorono tanohabi Bedele tanohabi Timinada tanohabi Piradono tanohabi Tebono tanohabi bu helaga biai hene. Ibugua wai pabe daligaore biai halu wai pabe panga hongohe wabu helowa bengena aeane hongohe wabu helai halu bini.
1MA 9:51 Ani buwa tano bibahendeni ibunaga ami agali maru Isaraele wali agali genda mo mialu helo helaga bini.
1MA 9:52 Ibugua tano kira Bedesula Gesela mo hongoho ngelalu Yarusalemeni wai pabeanda heagobi mo hongo halu buwa tano uruniha ibunaga ami agali dewa helalu tinaga dabudabu dewa tano uruniha mo wialu bini.
1MA 9:53 Ani bialu Yuda agali haguaneru igini hearu minu yalu puwa Yarusalemeha wai pabeanda hongohe biagoha garabaya helaga bini.
1MA 9:54 Ai mali handari mbira pira duriani tebira (153) layagola mali ogoninaga ege mende heagola Alagimusuhanda agali bu hearuhondo, Wai pabe hongohe halu mende Anduane Homogonaga anda bu mabu bini heago wahalu gialo wahadaba, lene. Ibugua anidagua bialu bamba agali Anduane Homogonaga bi mana latagi haga henerume biabe bini wiaru mo ko holenaga ani bini.
1MA 9:55 Anigo tigua biabe ogoni bule bialu heagola Alagimusu ibu warago timbuni bo wiagola ibunaga biabe bule bialu heago wahene. Warago wialu ibunaga ne hariga ndibulo wahai halu gi gebi homalu hongo naheore halu homai hene. Ani biyagola ibunaga ne hariga halalu bi mbira labe nahe halu ibu andagaha biabe bulene ngago gi ge ema bialu mbira bibe nahe hene.
1MA 9:56 Anidagua bialu Alagimusu tandaga timbuni nalu homene.
1MA 9:57 Ai Bagidese ibu hole halu hearia Alagimusu homaya layago hale halu ibu kini hearia dai biyagola Yuda wali agali ti mali kirani bayale hene.
1MA 9:58 Ani biyagola agali mana puguaga bu hearume ti mo mogobu howa lalu, Handadaba. Ai Yonadana halu ibunaga wali agali tiha mo ko nahe bayale kagoni ndobe. Ai wali agali uruni mbi mbira hanguni minalu garabaya biai helo Bagidese haru dai bimi̱ya, lene.
1MA 9:59 Ani lalu tigua Bagidese hondo piyagola
1MA 9:60 ibugua ami agali dewaore haru halu ibini. Ani ibu howa ibugua Yudiaha ibunaga nenege bu hearuhondo ohowa beba dindiha gilibu wia haga bialu, Tígua agali Yonadana halu ibu damene karu minalu garabaya helalimu, lalu lo pelaga bini. Ani layago Yonadana ibu hale ho bolangua ho heagola tigua minabe nahe hene.
1MA 9:61 Ani howa Yonadana halu ibu damene hearume agali haguane biabe ko uruni biaga pira duria (50) hearu minalu garabaya buwa homelo bo wahai hene.
1MA 9:62 Ani bialu Yonadanabi ibu hamene Saimonobi libu aria bu hearubi bibahende heyalu pialu dindi ko wali agali nahaga tano Bedebasi wiagoha hole pene. Tano ogoni bamba giala holebini winiyago ainde tigua puwa lone mo hongo halu arema buwa mo hongo halu hene.
1MA 9:63 Ai mbirale libugua bialu ka layago Bagidese ibu hale howa ibunaga ami agali hearu mo ngoai halu Yudia dindiha agali hearu ibidaba lalu bi lene.
1MA 9:64 Ani bialu mani ibuni dai buwa Bedebasiha wai bule balai anda bini. Ibugua wai biagane masiniru wabu ngelowa wai horo dewaore bialu hene.
1MA 9:65 Yonadanahanda ibu hamene Saimono wali agali baba tanoha helalu ibuni heba ami agali maru haru halu irabuha pene.
1MA 9:66 Puwa ibugua Odomera halu ibu damene bu hearu bo haealabaga bialu Pasirono halu ibu aria tinaga anda bu heagoria hemiria puwa bo wahai hene. Ani bialu puwa Yonadana halu ibunaga ami agali biarume Bagidese baba wai bini.
1MA 9:67 Ogoniangi Saimono halu ibu aria hayaru tigua tano howa tagira puwa wai biagane masini wabu wiaru irame heda hai hene.
1MA 9:68 Tigua Bagidese baba wai bialu Bagidesenaga ami agali hearu bope howa bo hengeda hai halu bini. Ai Bagidese ibunaga miniha wai hono wiago bibahende mo habo lai halu biabe bule biyago habo lai hayagola ibu manga timbuni ho hene.
1MA 9:69 Ibugua Yudali agali ko maru ibu ibabe lalu bi yalu ibiyaru baba tandaga timbuni hene. Ani howa Yuda agali ko uruni maru homelo bo wahai halu mani ibuni dalu dai bulene hamelo hene.
1MA 9:70 Ai Bagidese ibu ibuni dalu dai bule ka layago hale howa Yonadanahanda agali maru Bagidese karia puwa lalu, Yuda agali garabaya helariru bibahende golope halu gi tigani bialu wai palima lama pudaba, lene.
1MA 9:71 Bagidese ibugua bi ogoni hale howa ibuguabi Yonadanahanda bi layadagua dege bima lene. Ibugua bi hongohe gi dolowa lalu, I̱na Yonadana mo ko hole mbira nabi haabo halu homalu wahole, lalu bi lo wini.
1MA 9:72 Ani lalu ibugua garabaya agali Yudiaha howa haru peneru golope halu piai hadaba lene. Ani lalu ibuni dalu pu wahalu dai nabi wahene.
1MA 9:73 Anidagua binidagome wai timbuni Isaraele dindi biaga wiaru biba helene. Ai Yonadana ibu Migimasa tano wiagoria pu hene. Ani howa ibugua wali agali bibahende handame howa haru hai halu wali agali Ngode Datagaliwabenaga mana puguaga hearu bibahende bo wahai haga bini.
1MA 10:1 Mali handari mbira pira waragaria (160) layagola Kini Andiogusu igini Alegesanda Ebipanesehanda Tolemese tano ibalu tano ibu karulo hene. Wali agali ogoniha hearume ibu ibiyago mo turu hayagola ibugua tanoha gabumane biabe bulene wiago handaya ho hai hene.
1MA 10:2 Ai Kini Demidiriasa ibugua mbirale biyadagonaga te layago hale howa ibugua Alegesandala wai bule ami agali dewaore ho manda bu hene.
1MA 10:3 Ani manda bu howa Demidiriasa ibugua Yonadana mo gede holenaga bi bayaleru gilibu pelole manda bini.
1MA 10:4 Ibunaga miniha hangu mitangi bialu, Yudasa ibu Alegesandala gi tigani lalu ibula ala nenege howa libu mo gimbu bialu i̱ boligo i̱na Yudasala ala nenege halu gi tigani loliya, lo manda bini.
1MA 10:5 Ainde mana ko iname Yonadana halu ibu hamenerubi ibu dameneruhondobi birimago manda bu holebira, lo manda bini.
1MA 10:6 Ani manda buwa ainde harugo lowa Demidiriasahanda Yonadanahondo lawia halu ibugua lalu, Ami agali manda manda bu halu danda timubi wai pole yaga damene manda manda bu yu habe, lowa lalu, Yonadana iyaore mandagi haabo habiya, lalu lo pelene. Ani bialu Yuda agali maru Yarusaleme wai pabeanda hongohe biagoha garabaya hayaru golope halu Yonadana karia daibia lalimu lalu lo wia hene.
1MA 10:7 Yonadana ibugua beba ogoni yalu Yarusaleme ibuwa wali agali bu hearu denibi ami agali Yarusalemeha wai pabeanda hongohe heagoha mamage haga hearunaga denibi dagala tagi hene.
1MA 10:8 Ai kini ibugua Yonadana hongo mialu ami agali tidi mbira haru habe layayago hale howa ti mogolo hendene.
1MA 10:9 Agali wai pabeanda hongohe handaya ho haga biaru tigua bi uruni hale howa garabaya agali anda ogoniha helene biaru golope halu Yonadana hearia dai bidaba layagola ti aba ai̱ya hearia andaga piai hene.
1MA 10:10 Ani bialu Yonadana ibu Yarusalemeni howa tano mo ko ho wiaru arema bialu mo tiga bialu hene.
1MA 10:11 Ibugua agali biabe biaga hearuhondo lamialu, Ege to̱le̱ bayale tigabi ngaru mo yuwa tanonaga wai pabe baya hangu biatiga bialu Saiono nene ngago ege pabe hongohe bu mabu bulene nga, lalu lamini. Ani layagola tigua bilimu layadagua biai hene.
1MA 10:12 Ani biya handala agali maru dindi tara howa ibini Yarusalemeha wai pabeanda hongohe Bagidesehanda bu helene biagoha heneru ibida piai hene.
1MA 10:13 Ti bibahende Yarusaleme wahalu tini dalu pugu pugu bini.
1MA 10:14 Agali maru bi mana lo wini ngaru mo wahaga heneru ti Bedesu tanoha haabo hene. Tinaga hado anda tano ogoni wini.
1MA 10:15 Ai Kini Alegesanda ibu Demidiriasahanda Yonadanahondo ogoale bibiya lalu bi gili bu wia hayayago hale hene. Ani bialu Yonadana halu ibu hamenerume wai timbuni bialu henegobi biabe timbuni tigua bini wiarubi genda tara tara tigua yu henegobi bibahendenaga te ogoale bira lalu marume lo yalu ibiyago hale ho hene.
1MA 10:16 Ani hale ho howa ibuni hangu lo manda bialu lalu, Agali hongohe Yonadana ale mende nahe. Ibu inanaga nenegeore howa ina heba holene karulapeda, lene.
1MA 10:17 Ani manda buwa ibugua beba Yonadana hearia gilibu pelalu howa lalu,
1MA 10:18 Kini Alegesandahanda ibu hamene Yonadana bayale kebe lara.
1MA 10:19 Iname hale harimago í̠ agali wai biaga hongohe pari wayaliore ke layago. Ainde inanaga nenege hami̱ya hamelo kema.
1MA 10:20 Ani howa ayu í̠ í̠naga wali agalinaga Anduane Homogonaga loma binigo mo miaga agali habelo dabo helarama. Ani bialu í̠naga mini Kininaga Nenege larama. Í̠na baba mandagi haga inanaga nenegeore habe, lene. Ani lalu Kini Alegesanda ibugua kininaga aga daramabi mbira kininaga manda ngolome wabini mbirala Yonadana karulelo mo yalu poa helo mo wia hene.
1MA 10:21 Ai Horo timbuni Anda Nemandaruha Palu Holene Horo ege kaneni Yonadana ibugua Anduane Homogonaga loma binigo mo miaga agali haguanenaga aga karulagane ale mo karulene.
1MA 10:22 Ai Yonadana ibu Anduane Homogonaga loma binigo mo miaga agali haguane ka layago Kini Demidiriasa ibu hale howa ibunaga miniha tandaga timbuni howa ibugua lalu,
1MA 10:23 Alegesanda ibu ala nenege helo harimadago agidabe. Ibu ala puwa Yuda baba nenege halu mandagi hayada.
1MA 10:24 Ai inabi nde bi dendebiore lo pelalu ibula nenege halu ibuha ina biamogo bulene maru yamuliya. Ani bialu ti mo turu halu mbirale bayale duniniore ngago mo wia holiya, lene.
1MA 10:25 Ani lowa ibugua bi ogodagua gilibu wia hene. Kini Demidiriasa ibugua Yudia dindiha wali agali kemiruhondo horombe lalu bayale kemibe, lalu bi lo wia hara.
1MA 10:26 Ainde tígua ina baba bi pongo wirimago mo habo nale baya hangu yu haabo halubi ina baba nenego haabo halubi inanaga waitigi karu baba mandagi howa nenege nahebi kemigonaga ina turu ho kema.
1MA 10:27 Tígua ina baba nenege bayale haabo harimiyagua nde iname tíhondo bayale bulene ngago bialu haabo holeberema.
1MA 10:28 Iname tínaga dagisi ngiaga wirimigo mo wahalu tí mo turu halu mbirale bayale ngaru bame nguleberema.
1MA 10:29 Ayu ina Yuda tíhondo bi ogodagua laro. Ai tí dagisi maru wiaga wiyago ibi yolonaga dagisibi kininaga dagisi miaga wiyagobi mo wahai haro.
1MA 10:30 Tígua widi linibi ira lini nagane dedarubi halu tebonego ina ngiaga wirimigo ai ayu howa mani lone nangilimu. Ayu ogoni howa maniorebi ina Yudiaha howabi dindi tebira Samarianaga winibi Galilinaga winibi Yudiaha bo tago hene ngagoha howa dagisi ngi nalole ayu waharogoni.
1MA 10:31 Ina Yarusaleme ngagobi dindi emene maru kaware ngarubi bibahende loma biahe wiabagi hene nga lalu uruniha howa dagisi tara tara mulene nawiore lalu latagiho ngelaro.
1MA 10:32 Ai Yarusalemeha wai pabeanda hongohe hayago ina handaya ho haga wirugo yupe halu agali Anduane Homogonaga loma binigo mo miaga agali haguane timbuni kago ibu giha ya harogo. Ibunime ami agali maru dabalu anda ogoni mamage helo dabalu helolebira.
1MA 10:33 I̱naga dindi ngogoha Yudanaga ami agali garabaya kago bibahende ayu ogoningi dege golope halu pudaba lolebero. Tígua yolobia dai bilimulo ndo bame golope holebero. Ani bialu agali uruninaga nogo bulumaga sibi hinu kagonagabi dabudabu tara tara ngagonagabi dagisi ngi nalolebero.
1MA 10:34 Ai Sabada horobi ege gahenge ngabulo kagonaga horo timbuni lotu laga ngago tagira ibirangibi horo lotu lagane timbuni maru ngago tagira ibirangibi wali agali tara tara karume Yuda wali agalihondo dagisi ngi nalole. Ani bialu horo timbuni lotu laga uruni mani ibilo horo tebirani dagisi nabi halu hai howa horo tebira degeni dagisi mulene nawiore, laro.
1MA 10:35 Horo ogoningi mendealime í̠ kegoha ya lo hale holenebi tíha mo genda holenebi nawiore laro.
1MA 10:36 Yuda ami agali daosini pira tebira (30,000) kininaga ami agali baba hatago holene nga. Ani bialu tinaga yolo kininaga ami karu miradagua dege mulebira.
1MA 10:37 Maru ti kininaga pabe anda hongohe ngagoha halu marume gabumane biabe bulebira. Ani howa tinaga mamali mana bialu haga winidago abale kini ibuni bialu helo layadagua bialu holebira.
1MA 10:38 Dindi hobane tebira Samaria dindinaga winigo Yudia dindihayagi yamialu mo tago hayago Yudia dindiha wiaabo helo. Ani bialu bibahende gabumane mbiraore hangume handa gimbu buwa Anduane Homogonaga loma binigo mo miaga agali haguane timbuni kagonaga giha habelo.
1MA 10:39 Ani bialu muni maru Tolemese tanoha howa mo wigi bini ngogo tigua Yarusalemeni anda loma bia hene kagoha biabe bulene ngaru bilimulo ti mo turu halu bame ngulebero.
1MA 10:40 Ani bialu kininaga muni andaha muni ngago aria siliba muni daosini nguira (15,000) biabe tara bulene ngaru bilimulo ngulebero.
1MA 10:41 Mali maru piyagoha muni maru gabumaneme anda loma bia hene Yarusaleme hayaha biabe bulenego mope howa bame ngelo hayago ogonibi ayu yupe halu tini mo ngulebero. Ai ayu ogoni howa maninaga tinaga yolo tigabi mialu holeberemi.
1MA 10:42 Ani bialu lotu biabenaga dagisi siliba muni daosini duria (5,000) miruligo waharogoni. Muni ogoni ibu agali loma binigo mo miaga Anduane Homogonaga andaha biabe biaga karu yolo bilo ngelo waharogoni.
1MA 10:43 Agali mbira dindi i̱na handaya ho howa haru kogoha karu aria mbirame kinila dano ho howayagua maru baba dano ho howayaguabi ibu dano hangabe nahedagola ohalu puwa Anduane Homogonaga andaha ha do heyagua nde agali ogoni ibu garabaya napolebira. Ani bialu ibunaga mbirale ngago mo yulenebi nawi.
1MA 10:44 Ai anda biago kagonaga wai pabe biatiga bulenebi anda biatiga bulenebi uruni bulenenaga muni kini ibuniha howa ibulebira.
1MA 10:45 Ani bialu agali maru Yarusaleme wai pabe bu mabu biragonaga yolobi Yudia dindiha tano pabe biragonaga yolobi kini ibunime bulebira, lalu Kini Demidiriasahanda lene.
1MA 10:46 Ai Yonadana halu ibunaga wali agali hearume Kini Demidiriasahanda bi layago mo henene nahe hene. Irane ala Kini Demidiriasa ibugua tihondo mana ko bini dewa wialu genda timbuniore tiha mo ya hene wiagome nakarulape wini.
1MA 10:47 Ai tigua Kini Alegesandala dege habo nalolene bi lo wiyago yu howa gi tigani layago manda bu holene manda bini. Ani bialu habo nalolene bi ogoni pugua nabi haabo halu homalu wahabiya layago manda bu hene.
1MA 10:48 Ai Kini Alegesanda ibugua ami agali dewaore haru halu puwa Kini Demidiriasa deni balai anda bini.
1MA 10:49 Kini kirali biago wai bule ngola ho hebigola Demidiriasanaga ami agali hearu ibida piai hene. Ani biyagola Kini Alegesanda ibugua talima pugu pugu bialu bo wahai halu wayali hene.
1MA 10:50 Ani bialu wai hongo howa bialu bu alendo halu Kini Demidiriasabi waiha homalu bini.
1MA 10:51 Mani howa Alegesanda ibugua Iyibi Kini Tolemi hearia bi lama pudaba lowa lawia halu lalu,
1MA 10:52 Ai i̱ninaga dindini daibu howa ayu i̱ mamalirunaga kini biragane dagia ngagoria bedo. I̱naga gabumane biabe mo tiga biai howa ayu dindi bibahende handameho ko.
1MA 10:53 Ayu dege i̱na Demidiriasanaga hongo bo podalu ibunaga dindibi i̱na dege handame ho kogoni.
1MA 10:54 Ayu í̠la habo nalolene bi lo wibiya hame ledo. Í̠ wane i̱ daubuliya í̠na karulape labelo hame ledo. Ani beregola i̱na wariabu libu harume tabaga nahalibulo karulapeore bulebero, lalu lo pelene.
1MA 10:55 Kini Tolemi ibugua ladai bialu lalu, Ainde í̠ lone dai bialu í̠naga mamalirunaga dagia wiagoria í̠ni kini ti henegoria haaribia halu í̠ni birariyangi ina wali agali bibahendeme turu timbuni harima.
1MA 10:56 Í̠na bi lariyago i̱na hale howa i̱ wane bedago í̠ dau bibelo karulape laro. Anigo ainde i̱na í̠ baya hangu hondo manda bialu í̠nabi nde i̱ baya hangu hondo manda bibelo Tolemese tanoni ngola habiya, lene.
1MA 10:57 Ani lalu Kini Tolemi halu ibu wane Keleobadarabi Iyibi wahalu Tolemese tano ibini.
1MA 10:58 Ani ibiyagola Kini Alegesanda ibu ibalu ti Tolemeseni ngola howa Kini Tolemihanda ibu wane Keleobadara Alegesanda dabu bilo mini. Ani miyagola libu Tolemese tanoni yári baya tara tara kinime hamelaga wiaru karulowa ogoriani mo dabubia hene.
1MA 10:59 Alegesanda ibugua beba mbira gilibu wia halu Yonadana ibu ngola hole ibabe lalu lawia hene.
1MA 10:60 Ani layago hale halu Yonadana ibu yári bayaleru mo karulalu kini kirali biago labo Tolemese tanoni berebiria ngola hole pene. Puwa ibugua libu mo turu halu siliba ngolobi dewaore mini. Ani bialu libunaga ami agali haguane hearubi mo turu halu mbirale mia dege bini. Ani biyagola wali agali bu hearume Yonadana mo turu halu bi laga bini.
1MA 10:61 Anigo horo ogoningi dege Isaraele agali ko maru heneyago tigua Yonadana mo ko holenaga bi marubi lalu hene. Ani layago Kini Alegesanda ibu hale nahene.
1MA 10:62 Kini ibugua lalu, Kininaga aga daramabi ngago Yonadana ibu karulelo mini.
1MA 10:63 Ani bialu kini ibugua Yonadana ibunaga gi tigahayagi berelalu buwa ibunaga agali haguane bu hearuhondo lamialu lalu, Yonadana haru halu tano hanuni pupe hole pudaba. Ani bialu tígua wali agali bu karu lamialu tí Yonadanahanda ko biya lalu ke̱ howa bi mbira laremigo hale naholeore. Ani bialu mbiralime ibu mo genda naholeore, lene.
1MA 10:64 Ai agali marume ke̱ howa Yonadana ko biya lalu bi bame laede haga hearu tigua handalu hemiria kinime Yonadananaga mini mo yaraga hayayago de hondowabi kininaga aga daramabi wiago mo karula heago hondowabi ti gi halu ibida pene.
1MA 10:65 Anigo kini ibugua Yonadana mini timbuni mini lene helene. Ani bialu ibu mini Kininaga Nenege helalu ami agali haru haga agali haguane dabo helalu ibu daluha agali haguane ho bamba hene helo dabo helene.
1MA 10:66 Turu holene timbuni Yonadanaha to̱latagi halu ibu hendore mo palia holene karulo biralu nde Yarusaleme dai bini.
1MA 10:67 Mali handari mbira pira waragariani duria (165) hayagola Kini Demidiriasa mende ibu Demidiriasa mbira igini henego ibugua Kiridi dindi iba dege dombeneha wiago wahalu dai buwa ibuni dalu bamba ibu mamaliru berene wiagoria hole pene.
1MA 10:68 Ai Kini Alegesanda ibu Demidiriasa lone daibu ka layago hale howa ibunaga miniha genda timbuni halu ibu Siria dindinaga tano dunini Andiogo dai bini.
1MA 10:69 Demidiriasa ibugua Aboloniusu heago gabumane haru haga haguane Koelesiria wiagoria helo dabo helene. Ani heleagola ai Aboloniusu ibugua ami agali mo hongo ho helowa haru halu puwa Yabane tano kawareni balai anda bu hene. Ani buwa ibugua Yonadana hearia bi lowia halu lalu,
1MA 10:70 Í̠ hangume i̱la wai bialu howa wali agali bu karunaga deni í̠na i̱ lo guralu kego aginaga bialu kebe.
1MA 10:71 Ainde í̠naga ami agali kago para howa uruniha hongo hanaho howa lariyagua nde hari bareha kego wahalu dindi tigabi ngagoria howa hongo manda bialu wai bibiya daliape halu ibabe. Anigo manda ala bia handa. Tanoha ami agali hayadaru ti i̱ baba hatagoho kema ndobe.
1MA 10:72 Ai í̠na i̱ ai henedabe handalu i̱ heba ai dege henedabe hondole hondo habe. Í̠na i̱la bulene hongo nakarulapeore kegoni ndobe. Bamba í̠ aba mamaru tigua i̱la hongo manda bialu hearia nakarulapeoreya handala halu kira libu dindinaga wai hongo howa bia nabi ibida piyago í̠ manda bide.
1MA 10:73 Í̠na i̱ aguaore bope holene manda bidebe. I̱naga ami agali í̠na bamibe nahe gibiore maru nogo hosini biruwa wai bulenebi ami agali damenebi dewaore haru kogo ainde dindi tigabi ngagoria wai bibiya tagira ibalu keria í̠ erembira mulene ege to̱le̱ hibaria mbira nawulebira ndobe. Ani bialu í̠ ibida polene diri mbira nawioreni porabupe holebere, lene.
1MA 10:74 Aboloniusu ibugua bi ogoni layayago Yonadana hale howa ibu keba timbuni hene. Ani howa ibugua ami agali pari wayaliru daosini pira (10,000) haru halu Yarusaleme wahalu tagira pene. Ani biyagola ibu hamene Saimono ibuguabi ami agali haru halu íbu dege bini. Pialu agali halu kira piyago bibahende Yoba tano wiago be tagiraha balai anda bini.
1MA 10:75 Ani bialu heagola wali agali tanoha hearume tanoha pabe panga payatagi hene. Anidagua binidagoni irane Aboloniusunaga ami agali maru tanoha heagola bini.
1MA 10:76 Ani biyago bilowa Yonadana ibugua wai Yoba tanoha giala anda halu wai bini. Ani biyagola agali tanoha hearu tigua gi howa tanoha panga dugupe hayagola tano ogoni Yonadana ibu mo wini.
1MA 10:77 Aboloniusu ibu hale hayaria Yoba tano Yonadana ibu mo wiya layago hale howa ibunaga ami agali nogo hosini biruwa wai biaga daosini tebirabi (3,000) ami agali dewaorebi heba tidi yalu ohowa Asadodo ibida pole petingi halu pene. Ibunaga ami agali nogo hosini biruwa wai biaga hearume wai bilonaga dindi tigabi bayale wiagoria henge ngelonaga ibu emene dogolo mialu amura pene.
1MA 10:78 Yonadana ibugua Asadodo talima pialu ogoriani howa wai bini.
1MA 10:79 Anigo Aboloniusu ibunaga ami agali daosini mbira (1,000) nogo hosini biruwa wai biaga Yonadana erembiraha yagi wai tibini waraanda ho bereleago Yonadana nahende wai dombeni pora bini.
1MA 10:80 Mani howa Aboloniusunaga wai hanalu birayayago Yonadanahanda handa walia hene. Tigua Yonadananaga ami agali wara dombe bia howa timu tombe mbiraha doba bayago ti heagoria ibai hene. Wai egerebahagi howa binigo bialu alendo hene.
1MA 10:81 Anigo Yonadananaga ami agali biarume ibunaga bi hale halu hongo ho hai hene. Ani heagola waitiginaga nogo hosi biaru manga hai halu tinaga hongo pirilope hai hene.
1MA 10:82 Ani biyagola Saimono halu ibunaga ami agali biaru anda ibini. Ibalu wai abale pora buwa Aboloniusunaga ami biaru ba dege bialu bo hengeda hai hene. Ani biyagola waitigi biaru ibida pugu bialu piai hene.
1MA 10:83 Agali nogo hosini biruwa wai biaga biaru wai hama wiagoria pu luluya hama ibaga bialu hene. Ani bialu ti ibida pialu Asadodo tanoha mbirale dama mitangi bialu bi pupu wiaga gime wabini mini Dagononaga anda timbuni heagoha birado hai hene.
1MA 10:84 Ani biyagola Yonadanahanda Asadodo tano bibahende bo heda hai halu tano emene maru wiarubi heba bo heda hai hene. Ani bialu tano dabudabu tara tara wiaru mo yai halu bini. Ani bialu Dagononaga anda timbuni heago bo heda halu ami agali wai ibida pialu anda ogoniha birado hayago heba bo heda anda halu bini.
1MA 10:85 Waitigi waiha howa ayu tibume dibini homayagobi andaha waranda howa hedaanda hene homayagobi bibahende daosini halira (8,000) homene.
1MA 10:86 Mani Yonadana ibugua Asadodo tano wahalu puwa Asagelono tanoni balai anda bini. Agali tanoha haga hearu ibu ngola hole harigani tagira ibini. Ani ibuwa tigua ibunaga mini mo yaraga hai hene.
1MA 10:87 Ani bialu mani Yonadana halu ibunaga ami agali biaru tigua tinaga waitigi bo wahayarunaga mbirale bayale wiaru mo hilo yalu Yarusaleme dai bini.
1MA 10:88 Yonadanahanda wai hongohe biya layago Kini Alegesanda ibu hale howa ibugua Yonadananaga mini yaraga hene.
1MA 10:89 Ani bialu ibugua manda ngolome wabini mbira Yonadananaga wia hene. Yari ogoniale kini ibuni damene darama mbiraore kago miaga winigo Yonadana mini. Ani bialu Egerono tanobi dindi emene ogoniha wiarubi bibahende Yonadana ibuninaga tanoore ogoni wilo kini ibugua Yonadana mini.
1MA 11:1 Uruni bialu henedangi Iyibinaga Kini Tolemi waragane ibugua ami agali dewaore mo mogo bialu hene. Ibunaga ami agali daga labe nahe iba angeni iba mu ngadagua hene. Ani bialu ibunaga iba sibi dewabi wini. Ibugua Alegesanda mohondo howa Alegesandanaga dindi wiaru ibu bo yamialu ibunaga dindi dege wiagimbu bu ngelo ani.
1MA 11:2 Ani howa ibugua Siria dindi pialu agali ogoniha hearu baya hanguore bime ladebodebo bini. Ani biyagola wali agali tanoha hearume wai pabe panga payago dugua halu tini tagira puwa Kini Tolemi ngola hole pene. Abale howa Kini Alegesanda ibugua ibunaga wali agalihondo lamialu Kini Tolemi ogoni ibu imane kago ibiragola ibiribe lalu mo bila halimu, lalu lamini.
1MA 11:3 Anigo ainde tano mbira mbira pugu pugu bialu ibunaga ami agali maru helaga bini.
1MA 11:4 Ani bialu tigua Asadodo tano wiagoria tagira puwa tigua dama mitangi bialu bi pupu wiaga mini Dagononaga anda timbuni henego bo heda hene wiago Tolemi mo walia hene. Asadodobi tano emene emene wiarubi bo heda hai hene labu wiago de hendene. Wai bialu agali bo wahai henedaru dewaore wiago dengui hendene. Ani bialu agali maru Yonadanahanda anda heba heda anda hene biarunaga tingini Tolemi ibu polene harigani daga labe nahe wiaria hendene.
1MA 11:5 Wali agali bu hearu tigua mbirale uruni Yonadanahanda bini lalu lamini. Ani layago hale howa kini ibugua bi mbira ladai nabi dege hene.
1MA 11:6 Yonadana ibugua kini ibiyagola Yoba tano wiagoria ngola hole puwa turu halu ibiridago bayuwa birida lama pene. Libu gi tigani bialu turu haga bu howa libu haru tano ogoniha palene.
1MA 11:7 Ani bialu Kini ibu Yonadana libu haru pialu iba Eluderusu peagoria tagira pene. Ogoriani ngua halu Yonadana ibu Yarusaleme dai bini.
1MA 11:8 Anidagua bialu Kini Tolemihanda iba solowara angeange tano timbuni dunini wuyu pearu ibugua handame hai halu Selusia tano wiagoria handa tagi hene. Ibugua Alegesanda mohondo howa anidagua bini.
1MA 11:9 Ani buwa Kini Tolemi ogoni ibugua Kini Demidiriasa hearia bi lo pelalu howa lalu, Habo nalolene bi mbira lo wibiya. I̱ wane Alegesanda ibu dabu biyago wahalu haru dai berogola í̠ dabu bibelo. Ani bialu dindi í̠ abanaga winigo í̠nime handaya ho hai habelo.
1MA 11:10 Ainde Alegesanda ibugua í̠ bo wahole manda bialu hearia nde i̱ wane hono mirugo daraba.
1MA 11:11 Ibugua bi gendabi ogoni lenedago inane Alegesandanaga dindi baya wiago dimagoli ho howa anidagua lene.
1MA 11:12 Kini Tolemihanda ibu wane Alegesanda miyago lone haru dai bialu Kini Demidiriasa daubilo mini. Ibugua ogonidagua bialu habo nalolene bi lo wiribidago puguini. Ani bialu wali agali bibahende deni libu harume waitigi haga haga bini.
1MA 11:13 Mani howa Kini Tolemi ibu Andiogo tano ngagoria pialu ibu Sirianaga kini hene. Anidagua bialu ibu dindi kira Iyibi kini halu Siria kini halu bini.
1MA 11:14 Ogoningi Kini Alegesanda ibu Silisia wali agalime gabumanenaga bi mo wahayaya handala ibu ogoniha hama pene.
1MA 11:15 Ani howa Alegesanda ibugua mbirale Tolemihanda ogoni biya layago hale halu ibu Tolemila wai bule pene. Ani pialu hearia Tolemi ibu ami agali dewaore daga lamibe nahe haru halu harigani ibalu Kini Alegesanda ngola hayagola Kini Alegesanda halu ibunaga ami agali ibida piai hene.
1MA 11:16 Ani piai hayagola Kini Alegesanda ibida pialu Arebia dindi ha do heagola ayu Kini Toleminaga mini daliga mini lene timbuni hene.
1MA 11:17 Ani pu hado hearia agali mbira Arebiaali mini Sabadiele henegome Kini Alegesanda balu ibu haguane Kini Tolemi hearia pugu yalu pu lalu mini.
1MA 11:18 Anigo horo tebiru hangu howa nde Kini Tolemi ibunibi homa dege bini. Ani homayagola wali agali dindi anduane tano bibahendeha bu hearume Toleminaga ami agali wai pabeanda hongohe haru bibahende bo wahai hene.
1MA 11:19 Anidagua biyagola mani mali handari mbira pira waragariani karia (167) hayagola nde Demidiriasa mende ibu kini pigane hene.
1MA 11:20 Ogoningi Yonadanahanda Yudia dindiha agali bu hearu mo ngoai hai howa wai biaga masini hongoheru Yarusaleme tanoha wai pabe hongohe hearu bo gialanda holenaga wabialu hene.
1MA 11:21 Ani bialu heagola Yuda agali ko maru Yuda tini aria turu nahaga hearume kini hearia puwa lalu, Yonadanahanda Yarusaleme wai pabeanda hongohe biago ho hagira bida, lene.
1MA 11:22 Kini Demidiriasa ibu bi ogoni layago hale howa keba timbuni halu abale heyalu Tolemese tano pole pene. Puwa ibugua beba mbira gili buwa Yonadana hearia pelalu howa lalu, Wai bialu harugoni wahalu bi midini mbira lami̱ya abale ibabe, lalu gilibu wia hene.
1MA 11:23 Yonadana ibugua beba ogoni dagalo handa hondowa dege wai wanahe bialu haabo hene. Ani bialu howa dege ai agali haguane marubi Anduane Homogonaga loma binigo mo miaga marubi ti haru kini hondo pole dabene. Ibuha ko mbira anda ibulubadago gi naheore hene.
1MA 11:24 Ibugua ngolobi silibabi agabi dewaore bame talebu migi bulenaga yalu Tolemese tano pene. Anda piyago hondowa kini ibu turuore timbuni ho hene.
1MA 11:25 Yonadana ibuni aria hearu marume ibuhondo keba howa Yonadanahanda ko biya lowa bi laga laga bialu hemiria
1MA 11:26 kini ibugua Yonadanahondo mana bayale kini ale henerume biagadagua dege bini. Ani bialu ibuni damene bu hearu deni howa kini ibugua Yonadana mini yaraga hene.
1MA 11:27 Kini ibugua Yonadana ibu Anduane Homogonaga loma binigo mo miaga agali haguane timbuni helo mo hongo halu mini lene timbuni helo mo yaraga halu ibu mini Kininaga Nenege ho bamba hene ka, lalu bini.
1MA 11:28 Ani bialu Yonadana ibugua kinihondo hale halu, Ibugua muni siliba daosini dege genda magi kilogarama pira (10,000) nguliya í̠na dagisi muni Yudia dindihabi dindi tebira Samariaha howa bo yu anda ibini biaruhabi nami wahabelo hameledo, lalu kini hale hene.
1MA 11:29 Ai kini ibugua bi Yonadanahanda ibuhondo hale hayago e̱ lalu ibugua Yonadananaga beba gilibu wia halu ladai bini. Ibugua bi lenedago ogo,
1MA 11:30 Kini Demidiriasahanda ibu hameneore Yonadana halu Yuda wali agaliru bayale kemida lara.
1MA 11:31 Iname beba mbira gili bialu í̠naga te gili buwa ina hanini Lasenesenaga wia harima. Beba ogoniha bi ogodagua gili birima.
1MA 11:32 Kini Demidiriasahanda ibu hanini Lasenesehondo lalu, Bayale kebe.
1MA 11:33 Iname Yudia wali agalihondo mana bayale bimi̱ya lalu bi lo wirimagoni tiore inanaga nenege howa tigua ina baba habo nalolene bi pongo winigo hongo howa yu ka.
1MA 11:34 Tigua Yudiaha dindi dewa bu ngarubi dindi tebira Eberaimibi Lidabi Arimadia ngagobi tigua handaya ho helo karulape larima. Dindi uruni iname Samaria dindiha howa mo bagi halu Yudiaha wiatago helarima. Wali agali Yarusalemeha lotu lole poragobi biamogo bimi̱ya larima. Ani bialu mabuha tomo hengedagonaga dagisibi ira lini dedarunaga dagisibi kinihondo mani lone namule larima. Muni uruni wahalu tini yu howa Anduane Homogonaga anda kagoha biabe bulene ngago bule ti yu helo larima.
1MA 11:35 Ani bialu dagisi maru tigua ngiaga wini mbirale bibahendenaga pinibi ibinaga dagisibi kini ibuninaga dagisibi uruni bibahende waharima.
1MA 11:36 Bi beba uruniha gilibu ngaruni mbirago maniorebi mbiralime mo iriari nabulebiraore.
1MA 11:37 Iname ani ledemagoha bi mbiraore helo í̠nabi beba mbira tigua dagalalu hari nene loma bia hene ngagoria handalu mo ngelelo gili bialu pelabe, lalu lo pelene.
1MA 11:38 Dindi Kini Demidiriasa ibugua handaya ho howa haru hene wiago bibahendeha wali agali tini mabuha ira lini daga hearu andaneha mbirale mbira gi nahe hadapaya bu hearia hendene. Ani bialu ibula waitigi mbira naheore hene. Ani howa ibunaga ami agali bialu biabe wahalu tini andaga dai biai helene. Anigo ami agali iba dege dombeneha howa ibini hearu dege ibuni heba hole helene. Anigo ami agali maru ala ibu aba heba biabe bialu lu hene bu hearu tigua dege tinaga biabe nawiyagola tinaga miniha Kini Demidiriasa baba genda yu hai hene.
1MA 11:39 Ogonigo agali mbira mini Tiribo hene. Bamba ibu Alegesanda baba mandagi hagaore mbira henego ibu hondo hearia Demidiriasanaga ami agali bu hearume keba hai ho heago hendene. Ani handalu Tiribo ibu Arebia dindiha agali mbira mini Imalague ibu Alegesanda igini Andiogusu henego ogoni handaya ho haga henego ogoni hearia pene.
1MA 11:40 Tiribo ibugua Imalaguehondo hongo howa hale halu lalu, Andiogusu ibu haru dai buwa ibu aba Alegesandanaga henge mialu kini haaribia helo haru poliya i̱naga giha yaha, lene. Ani bialu Tiribo ibugua te maru Demidiriasanaga mana ogobi nga lalubi ibunaga ami agali hearume ibuhondo turu naheore hearubi lamiai hene.
1MA 11:41 Ai Yonadanahanda Demidiriasa hearia bi lo pelalu, Kininaga ami agali Yarusaleme wai pabeanda hongohe ngagoha karu haru tagira pialu Yudiaha wai pabeanda hongohe maru ngaru ami agali bu karu bibahende hai tagira piai habe. Agali uruni tigua Isaraele wali agali bu kagoha wai bule duru bialu haabo kago ani bibe, lalu lo pelene.
1MA 11:42 Ani layayago hale howa Kini Demidiriasa ibugua Yonadanahondo ladai bialu lalu, Mbirale í̠na hale haridaruni i̱na karulape laro. Ani bialu i̱na í̠naga mini yaraga holebi í̠naga dindininaga mini yaraga holebi harigabi taya bialu ko.
1MA 11:43 Anidagua buliya ainde i̱naga ami agali hearume i̱naga bi mo wahalu piai hayago ainde í̠naga ami agali i̱ biamogo bule ibulene karulapeda, lalu lo pelene.
1MA 11:44 Ani layayago hale halu Yonadana ibugua ami agali pari wayali wai hongohe biaga hearu daosini tebira (3,000) bibahende Andiogo tano pelene. Yudia howa ami agali biaru Andiogo tano anda piyagola Kini Andiogusu ibu turu timbuni hene.
1MA 11:45 Ayu dege wali agali dindi ogoniha howa daosini dege handari mbirani pira kira (120,000) íbu ngoai howa kini bo wahole bialu hearia ibiyagola kini ibu turu hene.
1MA 11:46 Ai kini ibu ibida ibuni andaga piyagola wali agali tano ogoni bi hearume hariga wiadagua tini gungu bima pugu pugu bini.
1MA 11:47 Ani bialu hearia Yudia ami agali biaru olayagola tigua ibalu kini biamogo bini. Ani bialu tigua tanoha hariga pearu bibahendeha piai halu wali agali bai halu horo ogoningi daosini handari mbira (100,000) bibahende bo wahai hene.
1MA 11:48 Tigua kini baya hangu handaya ho ha howa tano ba heda hai halu dindi anda bibahende bo heda hai halu mo labu hai halu dabudabu bayale wiaru ti mo yai hene.
1MA 11:49 Ai Yudia ami agali biarume tano timbuni wiago ti handaya ho heagola ti mogolo hendene. Ani hondowa tigua kinihondo wai wahalu ti daraha lalu hale hene. Tigua ibuhondo lalu,
1MA 11:50 Í̠naga miniha keba ho kegoni wahalu Yudia ami agali bu karume ina baba wai nabi mo palia halu gi tigani ladaba, labe, lene.
1MA 11:51 Ani lalu agali wai biaga tanoha hayadaru tinaga mbirale wai biaga wiyadaru wahai halu wai palene. Ani bialu kininaga denibi ibunaga wali agalinaga denibi Yudia ami agali biaru ti mini yaraga hene timbuni mbira hene. Ani bialu Yudia ami ti waiha howa dabudabu bayale tara tara mo yayaru yalu tini dalu dai bini.
1MA 11:52 Ai Kini Demidiriasa ibugua ibunaga dindi baya hangu handaya ho heagola ibunaga wali agali emene tigi mbirani hangu bayale hene.
1MA 11:53 Anigo mani howa kini ibugua habo nalolene bi lo wiyago mo habo lene. Ani bialu ibugua Yonadanala mandagi nahe wahalu Yonadanahanda ibuhondo bayale bialu hayarunaga yolo mbirale mbira nami wahalu ibugua Yonadana mo genda halu hene.
1MA 11:54 Mani mbirungi Tiribohanda igiri emene Andiogusu haru dai buwa ibugua kininaga manda mo karula hene.
1MA 11:55 Ami agali maru Demidiriasa ibugua biabe wahalu tini andaga pudaba layaru ayu ti pialu Andiogusunaga ami anda piai hene. Ani puwa tigua Demidiriasa baba wai biyagola Kini Demidiriasa ibu ibida pora bialu pene.
1MA 11:56 Ani piyagola Tiribo ibugua nogo elebana dewaore haru howa Andiogo tanoha agali haguane howa handaya ho hene.
1MA 11:57 Ai igiri emene Kini Andiogusuhanda beba mbira gili bialu Yonadana hearia pelene. Ibugua lalu, Í̠ Anduane Homogonaga loma binigo mo miaga agali haguane timbuni habelo karulape lalu i̱naga dindi hobane maria ngago í̠na handaya ho habelo yupe halu i̱na í̠ mini Kininaga Nenege lalu laro, lene.
1MA 11:58 Ani lowa ibugua beledi be ngolome wabini wiaru mo wia halu ibugua lalu, Yonadana í̠na kininaga aga daramabi ngago karulalu ngolome wabini mandibu kini ibuni aria darama mbiraoreme karulaga ngago mo karulalu bibe, lene.
1MA 11:59 Ani bialu Yonadana hamene Saimono ibu gabumane agali haguane dabo helalu ibugua tano maru iba solowara bedago angeange wuyu pedaru Ponisia howa pialu Iyibi dindila tubari ngagoria handatagi helo dabo helene.
1MA 11:60 Ai Yonadana ibu dindi maru iba Yuberedisi doma ederahayagi wiaruha pole ibunaga ami agali hearu haru halu puwa dindi uruniha tano wiaruha anda pu haga bima pene. Ani piyagola Siria ami agali hearume ibu heba mini mbiraore halu ti heba mandagi haga bini. Ani bialu ibu Asagelono tano wiagoria anda piyagola wali agali tanoha hearume ibu ibiyagola turu howa ngola hole tagira ibai hene.
1MA 11:61 Anigo ai ibu Gasa tanoha anda piyagola wali agali tanoha hearume tano pabe panga payatagi hene. Ani biyagola ibugua ti baba wai bialu bo poda hana howa bope howa dindi emene emene wiaru bo heda heda hai halu mbirale dabudabu bayale wiaru mo pagebu yaiore hene.
1MA 11:62 Ani biyagola wali agali Gasa tanoha haga hearume Yonadanahondo hale halu, Keba hadalu wahabe, lene. Ani layagola ibugua ti baba gi tigani lalu wahene. Anigo agali haguane hearu igini dege minalu Yarusaleme garabaya helo haru piaga hene. Ani bialu ibu pialu Damasagasa tano puabo hene.
1MA 11:63 Ani pu howa Yonadana ibu hale halu hearia Demidiriasanaga ami agali dewaore haru halu ami agali haguane mbira hariga Yonadana dai bulebiyago hapai hole Galiliha Kadese tano wiagoria íbu ka layago hale hene.
1MA 11:64 Ani halu howa ibu hamene Saimono Yudia dindiha helalu Yonadana ibugua ngola halu wai bule pene.
1MA 11:65 Saimono ibugua Bedesua tano kawareni wai bialu luore biaho wini.
1MA 11:66 Ani bialu howa tigua Saimonohondo wai wahalu gi tigani lama layagola Saimonohanda karulape lalu anidagua bini. Ani bialu ibugua wali agali tano ogoniha haga hearu taliatagi hai howa ami agali marume tano ogoni handaya ho helo helene.
1MA 11:67 Ai Yonadana halu ibunaga ami agaliru puwa iba kuyama Genesarete bereago angeni balai anda bialu hene. Ani bialu gao layagola heyalu dindi tigabi Haso tano wiagoria tagira pene.
1MA 11:68 Ani pialu hearia waitigi maru dindi tigabi bayale wiagoria ibu ngola hene. Anigo ti aria maru hari bare wiagoha hado heago Yonadana ibu manda nabi hene.
1MA 11:69 Ai ami agali maru hari bareha hado hayaru tagira ibalu waiha hatago hayagola
1MA 11:70 Yonadananaga ami agali hearu ibida piai hene. Ani biyagola ami agali haru haga haguane kirali hangu Abasalomo igini Madadiasala Kalabisi igini Yudasala hangu Yonadana heba ona hene.
1MA 11:71 Ani biyagola Yonadanahanda taga timbuni halu be abalu ibunaga haguaneni dugu wialu ibugua Anduane Homogohondo bi lene.
1MA 11:72 Ani lalu íbu dai buwa waitigi baba wai bialu waitigi bope hayagola ibida piai hene.
1MA 11:73 Ai Yonadananaga ami agali abale ibida piyaru tigua handalu hearia Yonadana handalu ibida piyago hondowa tibi nde lone íbu dai bialu ami agali hatago hene. Waitigi talima pialu Kadese tano tinaga balai anda bu hene biagoria tagira pialu dindi ogoni Yuda ti karulene.
1MA 11:74 Ai waitigi daosini tebira (3,000) bibahende horo ogoningi dege homai hene. Ani biai halu Yonadana ibu Yarusaleme dai bini.
1MA 12:1 Ai Yonadana ibugua handalu hearia ibunaga biabe biyago bayale hai hayago hondowa agali maru ibunaga bi yalu Lomo tano timbuni ngagoha pudaba lene. Tigua habo nalolene bi ala lo wiyago lone mo hongo holenaga bi yalu pelene.
1MA 12:2 Ani bialu bi mbiraore dege gili bialu Sabarada tanohabi tano hongohe wiaruhabi pelai hene.
1MA 12:3 Agali bi yalu pene biaru Lomo pialu gabumane anda timbuni mana lagane anda heagoria anda pene. Anda puwa tigua lalu, Inanaga agali haguane Yonadana halu Yudiaha wali agali hearume tí baba habo nalolene bi ala lo wirimago mo hongo halu lone lo wule pudaba laya handala ibirima, lalu latagi hene.
1MA 12:4 Ani layagola Lomonaga gabumane agali haguane hearume beba gili buwa agali biaru ti giha ya hene. Beba uruni ti harigani Yudia dai bialu karia agali haguane dindi tara tarani bu karume ti harigani baya hangu handaya ho helonaga gilibu mini.
1MA 12:5 Yonadanahanda Sabarada dindiha gilibu pelenedagoni ogodagua lene.
1MA 12:6 Agali Anduane Homogonaga loma binigo mo miaga agali haguane timbuni Yonadana halu gabumane agali haguane bu karubi agali loma binigo mo miaga maru karubi Yudiaha wali agali bu karubi tigua ti hamene Sabarada dindiha karuhondo bi lo wia hara.
1MA 12:7 Bamba tínaga Kini Ariusuhanda beba mbira gili buwa inanaga Anduane Homogonaga loma binigo mo miaga agali haguane timbuni Oniasa hearia ibilaya. Ibugua lalu ina bibahende hamene hamene dege lo hami̱ya lalu langiya. Ayu iname bi ibunaga ogoni heba gilibu maga halu tí kemiria ibilaramago ai Ariusunaga bi ogoni heba inanaga bi heba tí handalimulo ibilarama.
1MA 12:8 Oniasahanda agali tínaga bi yalu ibiyadago bayuwa ibirida lalu turu howa beba ogoni yamini. Beba ogoniha howa ina mandagi nenegeore ho hami̱ya lalu bi wáleore lo wia heneya.
1MA 12:9 Heneneore ina dindi mende karu baba nenege naheha howa ina hongo Anduane Homogonaga mbuga ngagoha hongo miadai beremali.
1MA 12:10 Anigo ainde iname tí baba habo nalolene bi lo wirimago lone mo hongo ina nenegeore halu mandagi hami̱ya manda bialu gilibu wia haramago irane iname tíore wanahole manda buwa larama. Anigo ai beba tigua gilibu ibilene mbira nami dege hemaria mali mbira pu bolangua hayada.
1MA 12:11 Iname lotu lagane horo timbuni tagira ibirangibi inanaga horo timbuni maru tagira ibirangibi iname Anduane Homogohondo loma mialu howabi ina ibuhondo bi lalu howabi bibahendengi tí embeda nahe mitangi bu haabo haramali. Anidagua beremadago irane ina hamene mitangi holene duniniore mbira ngago manda bialu anidagua beremali.
1MA 12:12 Ani bialu tíore mini yaraga hene timbuni kemigonaga ina turu timbuni ho kema.
1MA 12:13 Anigo ina bayale nahe wai biabe bialu genda yu haabo haga kemago irane kini bu karume inahondo genda mo ngialu haabo halu kagome ina genda yu kema.
1MA 12:14 Ina wai beremago bialu howa tíbi ina baba nenege hene maru karubi tí genda mo mulene hame nalaramali.
1MA 12:15 Ina Ngode Datagaliwabe ibunime baya hangu handaya ho haga kagome ani beremali. Anidagua biaga kemagome inanaga waitigi ibira halu ina wayali hene kema.
1MA 12:16 Ani howa iname agali kirali Andiogusu igini Numeniusu Yasono igini Andibadela Lomo dindiha bi lo yu pialu ina baba nenego halu mandagi holenaga habo nalolene bi ala lo wirimago lone mo hongo halu lo wima lama piribi.
1MA 12:17 Ani bialu libugua tí kemiria puwa tí mo biala halu beba habo nalolene bi ala lo winigo mo hongo halu gili bini ogoni milibu larima.
1MA 12:18 Ainde ayu inanaga beba gilibu wia haramago ladai bilimulo hame ledema, lalu pelene.
1MA 12:19 Ai abale Sabaradali tigua Anduane Homogonaga loma binigo mo miaga agali haguane timbuni Oniasa hearia beba gilibu ibilenego ogo
1MA 12:20 Ai nde Ariusu Sabaradali kini kagome loma binigo mo miaga agali haguane timbuni Oniasa bayale kebe, lara.
1MA 12:21 Tigua bi mbira gilibu winiyago ogodagua leneya. Ai Sabarada wali agalibi Yuda wali agalibi ti hamenelaore ka. Libunaga mamali mbiraore Abarahama hene.
1MA 12:22 Ayu iname mbirale ogoni handa walia halu ayu ai ti bayale dege kabe hako kabe manda nabi howa bame hale dege harama.
1MA 12:23 Ainde tígua inahondo beba gili bialu bi ladai birimiyagua nde iname beba gilibu dai bilalu nogo bulumagaru dindiru maru nde tí talebu nguleberema. Tígua nde anidagua bulene manda birimiyagua agali inanaga beba yalu ibirago tigua bi uruni baya hangu ogobi hea lalu lama dai bulebirago hale holeberema, lalu beba gilibu wia hene.
1MA 12:24 Yonadana ibu hale ho hearia Demidiriasanaga ami haru haga agali haguane hearume ami agali ala haru emene lowa ami agali dewaore haru halu wai bule manda buwa íbu ka layane hale hene.
1MA 12:25 Ani hale halu Yonadanahanda waitigi ibu daluha anda ibilo hame nale howa ibugua abale Yarusaleme wahalu harigani ngola hole Hamada tano wiagoria pene.
1MA 12:26 Agali o penedaru tigua hondo wule penego ai tigua handalu dai buwa lalu, Waitigime wai ayu mbiraga bule mandabu hea, lalu lamini.
1MA 12:27 Ani hale howa Yonadana ibugua ami agali biaruhondo lamialu lalu, Ami agali karu lamialu ayu mbiraga u napale halimu lalu bibahende lamiai halimu. U napale wai biaganeale gime yai howa wai bule manda manda bu halimu lalu lamilimu, lene. Ani lowa agali mbira mamage hai helo dabalu delaga bini.
1MA 12:28 Ani bialu heago waitigi ti handa walia howa waitigi agali hearu ti gi hai ho hene. Tinaga ira delearu wene dalu helalu ti ibida piai hene.
1MA 12:29 Ainde mbiraga Yonadana halu ibunaga ami agali biarume agali biaru warahanda howa handalu hearia ira hangu dalu heago dalu helalu tini piai hayayago hendene. Egabi lalu
1MA 12:30 ai gao layagola Yonadana halu ibunaga ami agali biarume waitigi talia minabe nahe iba Eluderusu domalu pu waore hayago hendene.
1MA 12:31 Ani piyaya handala Yonadanahanda uruni ti pelo wahalu puwa Sabarada tanoha Arebia hameigini hearu baba wai bialu hene. Wai bialu ibugua ti bo podahana howa tinaga mbirale wiaru ti aribia howa mo pagebu yai halu pene.
1MA 12:32 Ani bialu mani Damasagasa tano wiagoria tagira pene. Ani puwa dindi ogoniha wiaru baya hangu de handama ibaga biaiore hene.
1MA 12:33 Ogoningi dege Saimono ibubi nde Asagelono tanoha dindi emene wiaru handama ibaga biai halu bini. Ani bialu lone beregedalu Yoba tano wiagoha puwa ibugua ami agali maru tano ogoni handaya ho helo dabo hene.
1MA 12:34 Ani dabo helenedagoni irane Yoba wali agalime tinaga tano hongohe ogoni Kini Demidiriasa mule ka layago hale howa ami dabo helene.
1MA 12:35 Ai Yonadana ibugua gabumane agali haguane bu hearu olo mogo bialu tigua Yudiaha wai pabeanda hongohe maru bu helole mitangi bini.
1MA 12:36 Ani bialu tigua Yarusaleme tanoha wai pabe daligaore helo biadaga halu wai pabe hongohe timbuni mbira tanola wai pabeanda kagola hengeneha bu hobaki ho bule manda bini. Anidagua biragome tigua mbirale yolo bulenebi mbirale tagulenebi nabilo manda bialu pabe ogonime bu tu wiaki hene.
1MA 12:37 Wali agali bibahendeme tanoha biabe bulene wiago bulenaga mo hilombira howa bialu hene. Ani binidago wai pabe amu ni tagira ibiragohayagi heago ko halu gialapaya bu wiago hondowa ani bialu hene. Ani bialu mendebi mini Kabenada laga heagobi dindini podo ibira ho wiago de hondowa ogonibi bule manda bialu hene.
1MA 12:38 Ani bialu heagola Saimono ibugua nde dindi abene amu ni paliragohayagi hari bare wiagoha tano wiaru mo hongo halu wai pabe hearunaga wai pabe panga payaga aeaneme bengena hongohe helaga bini.
1MA 12:39 Ainde Tiribo ibuni Sirianaga kini holenaga ibugua Kini Andiogusu homelo bo wahale manda bu hene.
1MA 12:40 Anigo ainde Yonadanahanda ibunaga mini wu kago hame nale howa ibu baba wai bulino gi ho hene. Ani manda buwa Tiribo ibugua ibunaga ami agaliru haru halu Bedesana wiago pole pene. Ibugua Yonadana minalu homelo bo wahole manda bialu pene.
1MA 12:41 Anigo Yonadana ibuguabi nde ami agali wai baya hangu biaga pari wayaliru daosini dege pira maria (40,000) haru halu Bedesana tano pene.
1MA 12:42 Ani piyagola Tiribo ibugua Yonadananaga ami agali dewaore haru heago hondowa ibugua Yonadana hamelo bole piyago gi halu wahene.
1MA 12:43 Wahalu ibunaga agali ho bamba hene haguane bu hearunaga deni howa ibugua Yonadana ibirida lalu mo bila halu hene. Ani bialu ibugua Yonadana mo turu howa mbiraleru bame mialu howa lalu, Wali agali bibahendeme kini ibuninaga mini yaraga haremilidagua Yonadananaga mini yaraga halu halimu, lene.
1MA 12:44 Ani lowa ibugua Yonadanahondo lalu, Iyaore keba holene mbira nawiore kebagoni. Ani kebagodago irane aginaga í̠naga ami agali dewaore haru kebe.
1MA 12:45 Ti maru tini daluha hama dai bidaba la. Í̠ni heba polene maru dege haru halu Tolemese tano ma. I̱na tano ogonibi wai pabeanda hongohe maru ngarubi ami agali marubi ami agali haru haga haguane marubi tale bialu maru í̠ ngulebero. Ani ngialu maha nde beregedalu i̱ni dalu dai bulebero. Ainde i̱ mbirale uruni dege bule ibinigo kogoni, lalu lamini.
1MA 12:46 Ani laya handala Yonadana ibugua Tiribonaga bi ogoni henene laya lo manda buwa ibunaga ami agali dewaore Yudia hole dai bidaba lene.
1MA 12:47 Ami agali daosini tebira (3,000) hangu ibuni heba hene. Ani howa lone mo tale bialu ami agali daosini kira (2,000) Galili helalu daosini mbira (1,000) ibuni heba pene.
1MA 12:48 Pialu Yonadana halu ibunaga ami agali biaru Tolemese tanoha anda piyagola agali tanoha hearume wai pabe panga payatagi howa Yonadana minu garabaya bialu ibunaga ami agali biaru homelo bo wahai halu tinaga wai biaga ayu tibu yu hearu tigua gingila miai hene.
1MA 12:49 Ani bialu Tiribohanda ibunaga ami agali maru geni piaga hearubi maru nogo hosini biruwa wai biaga hearu Galili dindihabi dindi tigabi wiagohabi pialu Yonadananaga ami agali maru hearu bo wahai hole pudaba lene.
1MA 12:50 Ainde Yuda ami agali maru biaru tigua manda bu handalu hearia Yonadana halu ibunaga ami agali maru piyaru bo wahayada lo manda bu hene. Ani manda buwa ainde tini degedege mo hongo haga haga bialu wai bule tidi yalu pene.
1MA 12:51 Waitigi biaru tigua handalu hearia Yudali biarume homolene gi nahe tigua wai bule hongo ho heago handalu ti ibida dai bini.
1MA 12:52 Ani biya handala Isaraele ami agali ti bayale dai bialu Yudia dindi anda pene. Ani bialu Yuda wali agalime Yonadana halu ibunaga ami agali homayagonaga dara timbuni howa dugu bialu duguanda luore hene. Tigua gi timbuniore ho howa dugu timbuni bialu hene.
1MA 12:53 Ai dindi bibahendeha hameigini tara tara palearume Yuda wali agali lenego mbiraore hangubi nahelo bo helo wahaiore manda bini. Tigua lo manda bialu, Ayu tinaga agali haguane ti haru bamba haga mbira nahebi agali ti biamogo bulenebi mbira naheore nga. Ani ngago ai mani howa Yuda wali agali dindi hene lalu tinaga te nalelo iname ti aria lenego balu bo amo lami̱ya, lene.
1MA 13:1 Ai Saimono ibu hale halu hearia Tiribohanda ami agali dewaore haru halu Yudiaha wali agali bu karu bo hilo wahai hole ibira layane hale hene.
1MA 13:2 Ani hale ho hearia wali agali bu hearume gi howa mogolalu duru timbuni lalu heago hendene. Ani hondowa ibu Yarusaleme pialu ti haru mandagi hene.
1MA 13:3 Ani howa ibugua tinaga miniha mo hongo halu lalu, Ai i̱ hamenerubi i̱ aba ibu damene bu hearumebi Anduane Homogonaga anda bayale ngelonaga baya hangu handaya ho halu Mosesenaga bi mana lo wini ngagobi bayale ngelonaga handaya ho halu buwa timbuni bialu harimago tínime handalu manda bu kemi. Ani bialu howa iname wai timbuni bialu harimagobi genda tara tara dewaore yu harimagabi tí manda biai kemi.
1MA 13:4 I̱ hamene bibahende Isaraele wali agali biamogo bialu homai hayagoni ndobe. Ai i̱ hangu wahenego o kogonida.
1MA 13:5 Ai wai birimagoha i̱ni hangu homolino wai bialu henebe toba holemini nahalimu. Ainde i̱ hameneru ti dindiha lowa i̱ daliga ndo ko.
1MA 13:6 Ayu agali dindi tara taraha bu hearume ina bo hilo wahaiore holenaga ti mo mogo biai halu wai mo miyadagola i̱na nde inanaga dindibi Anduane Homogonaga anda kagobi tinaga wali waneigini biru karunagabi wai bulene hamelo kogoni, lene.
1MA 13:7 Wali agali tigua Saimononaga bi ogoni hale howa tinaga bu mini ha lone hongo hadai bini.
1MA 13:8 Ani howa tigua hongo howa ladai bialu lalu, Saimono í̠ inanaga agali haguane kegoni. Í̠ hamene Yudasala Yonadanala libunaga henge mialu libu henedagua í̠ni ha aribia ha.
1MA 13:9 Ani bialu inanaga wai bia ha. Ina bibahende í̠ hangu talima ibule kema, lalu bibahendeme lai hene.
1MA 13:10 Ai Saimonohanda ami agali hearu bibahende mo mogo biai howa Yarusaleme tanoha wai pabe hongo howa biai halu tano maru wiaruhabi lone mo hongo halu abale biai helo mo daila hene.
1MA 13:11 Ani bialu ibugua, Abasalomo igini Yonadana halu ami agali dewaore Yoba tano pole pudaba, lene. Ani laya handala puwa Yonadana ogoni ibugua wali agali tano ogoniha hagane hearu bo taliatagi hai halu tano ibu karulo hene.
1MA 13:12 Ai Tiribo halu ibunaga ami agali dewaore Tolemese tano wahalu Yudiahayagi anda pene. Ogoningi Saimono hamene Yonadana garabaya helowa Tiribo heba mandagi Yudiaha pole pene.
1MA 13:13 Horo ogoningi Saimono halu ibunaga ami agali biarume puwa dindi tigabi mbira wiago gibuniha Adida tano wiagoria balai anda bialu hene.
1MA 13:14 Ai Saimono ibugua ibu hamene Yonadananaga henge mialu agali haguane ha aribia howa wai bule manda manda bu ka layago Tiribo hale hene. Ani hale howa Tiribo ibugua Saimonohondo lawia halu lalu,
1MA 13:15 Í̠ hamene Yonadana ibugua Yarusalemeha agali haguane hayago howa kininaga dagisi muni namiyagonaga ibuni garabaya helowa ina haru mandagi kema.
1MA 13:16 Ainde tigua siliba muni dewaore genda magi kilogarama daosini tebira (3,000) ibilarimiyagua nde ibu garabaya kago golope halu pu loleberema. Anigo ai garabaya golalu pu laramagola mani lone mine holigo ibu igini kirali kago labo ina baba howa libu aba henegoria ha aribia helo ibilalimu, lalu bi lo pelene.
1MA 13:17 Ani lo wia hayayago hale howa Saimonohanda ami agali lo manda bialu, Yonadana igini kira ogoni labo haru ibidaba, lene. Saimono ibu Tiribohanda bi layadago henene ndo layada lo manda bu howa dege Yuda wali agali tigua ibuhondo keba howa lalu,
1MA 13:18 Saimonohanda siliba muni biarubi igiri kirali ogoni labobi napelayagome nde Yonadana homaragonida, lalu ibuha bi podene ngelolobada lo manda bini.
1MA 13:19 Ani manda buwa ibugua munibi igiri kiralibi pelene. Ani pelayagola Tiribo ibugua henene bule lalu gi dolalu bi lo wiyago mo habo lalu ibugua Yonadana garabaya golope nahene.
1MA 13:20 Ani bialu mani howa Tiribo ibugua Yudia dindiha dewaore mo ko hole emene hama anda ibugu bini. Ibugua hariga paulalu Adora tano pole piaga luore wiadagua pialu pene. Ani pialu hearia Saimono halu ibunaga ami agalirume hariga ogonidagua dege pialu Tiribo pole piyago hariga hapai hene.
1MA 13:21 Ani bialu heagola ami agali maru Yarusalemeha wai pabeanda hongohe wiagoha haga hearume Tiribo hearia bi lo pelalu, Ina tomo nawiore kemago tomo maru yalu hariga dindi ko wali agali nahaga ngagoha ibalu tomo yalu ibabe, lalu hongo howa bi lawia hene.
1MA 13:22 Anidagua layayago hale halu ibunaga ami agali nogo hosini biruwa wai biaga bu hearu tigua pole manda manda bu hadaba lalu lamini. Pole manda manda bu palearia mbiraga ogoningi dindi guni timbuni ibira howa hariga polebiyago wiapai hene. Anidagua biya handala ti emene hadai bialu Gileada polene hariga wiadagua pialu pene.
1MA 13:23 Pialu ibugua Basagama tano wiagoria tagira puwa Yonadana ogoriani howa homelo bo wahene. Ani biyagola ibunaga tingini dindi ogoniha mo hora hene.
1MA 13:24 Ani bialu Tiribo ibu ibuni dalu dai bini.
1MA 13:25 Ani biyagola Saimonohanda agali maru ibu hamene Yonadananaga tingini mo pudaba lene. Mo yu dai biyagola ibu mamalirunaga tano Modeini tano wiagoria hora hene.
1MA 13:26 Ani bialu Isaraele wali agali ti Yonadana dara howa dugu bialu duguanda luore horo dewa berene.
1MA 13:27 Ani bialu Saimonohanda ibu aba hameneru mitangi bu haabo holenaga tinaga homalini anda mbira daliga bu gimbu bima irigi howa bu helene. Anda bu gimbu bima irigi hene ogoni dindi kaundiaha howa panaga handai habehe daliga dege hene. Anda ogoni erembirahabi tombehabi ege to̱le̱ ngiringarale muni yolo dewaoreme miaga wiarume mo yaribia helene.
1MA 13:28 Ani bialu nde Saimono ibu aba ai̱yalabi ibu hamene marialirubi mitangi bialu ege to̱le̱ timbuni karia mo dabadaba howa ogoriani dege ngelene.
1MA 13:29 Ege to̱le̱ ogoni wiyadagoria ira timbuniru gombedo yu ibuwa ira ogoriani aminaga wai yari biaga wiaru gili buwa bigiya wabu ngelalu iba sibinaga bigiyabi wabu ngelalu buwa hengene. Ira timbuni dibu hangaga binidaruni agali wai pialu tigua bo poda hana haga bini mitangi bialu daga lowa helene. Saimono ibugua mitangi bialu. Wali agali dindi tara tarani bu karume ibalu de handai helo mitangi buwa ani wabu helene.
1MA 13:30 Ai mbirale uruni ayu Modeini tanoni homali kagoria haabo ka.
1MA 13:31 Ai Tiribohanda Kini Andiogusu waragane igiri emene dege hayago mohondo howa homelo bo wahene.
1MA 13:32 Ani bialu Tiribo ibuni Sirianaga kini ho aribia howa ibugua dindi ogoniha mana ko dewa bialu hene.
1MA 13:33 Saimonohanda Yudiaha tano wiaru dewaore mo arema bialu hongohe ngelaga bialu hene. Wai pabe neneni mamageali de handa pugubu hagane anda daliga bu helaga bialu wai pabe ege pabe hongoheore bu helaga bialu wai pabe panga bengena aeane hongoheme helaga bini. Ani biai howa tano wai pabeanda hongohe uruniha tomo dewaore bu ngelaga bini.
1MA 13:34 Ai Saimonohanda Kini Demidiriasahondo bi agali kiralime lo yu pudaba lowa lalu, Tiribohanda ibu daluha mo ko halu mbirale mo page bialu haabo kago ainde ibu daluha howa dagisi muni miaga wirigo emene yupe harebe, lama pene.
1MA 13:35 Ani layago hale howa Kini Demidiriasa waragane heago ibugua beba gili bialu bi ladai binigo ogo,
1MA 13:36 Kini Demidiriasahanda agali Anduane Homogonaga loma binigo mo miaga haguane timbuni Saimonobi Yudia wali agali bibahendebi tinaga agali haguanerubi turu haro laro.
1MA 13:37 Tígua manda ngolome wabinibi ayage alenaga yunibi wia harimiyago mirimago ai iname tí baba gi tigani bule manda manda bu kema. Ani bialu inanaga agali haguane bu karuhondo tíha dagisi mulene nawi lalu abale lamirima.
1MA 13:38 Habo nalolene bi ala lo wirimago iname bi ogoni karulape lalu haabo kema. Tígua wai pabeanda hongohe bu helaga bidemigo tíniha ha helo laro.
1MA 13:39 Ai mana ko tígua abale howa bialu henego ayu bialu haabo kemigoni bibahende wahai harama. Ani bialu kininaga dagisi muni yolo bulene winingi nabi ngelo kemigobi waharama. Ani bialu dagisi muni Yarusalemeha miaga winigo nami harimagobi mo waharama. Ani bialu dagisi muni maru tara tara Yarusalemeha miaga wirimagobi waharama.
1MA 13:40 Ai Yuda agali wai biaga pari wayali kemiru tí maru kininaga ami agali hatago hoa biyagua nde ani bulene karulape ka. Ina kemagoha mo ko holene nawi bayale dege hami̱ya hamelo kema, lene.
1MA 13:41 Ai mali handari mbira pira karia (170) hayangi howa Isaraele tiha wali agali Anduane Homogo mitangi nahaga hearume Isaraeleali abale haru henego ogoriani howa haru nahe wahalu pene. Isaraele wali agalirume tini hangu halu bayale hene.
1MA 13:42 Ai Saimono ibu Anduane Homogonaga loma binigo mo miaga haguane timbunibi ibu ami agalinaga agali haguanebi Yuda wali agalinaga agali haguanebi ibu pigane hayangi howa tigua habo nalolene bi lo wiaganerubi uruniale lo wiaganerubi horo ogoningi howaore tini hangu lalu gilibu wiaga hene.
1MA 13:43 Ogoningi Saimono halu ibunaga ami agali heba pialu Gese tano wiagoria pialu balai anda buwa ami agalime tano ho mabubu hene. Ani howa tigua wai biagane masini mbira wabuwa tanoha wai pabe heagoha wiapara howa ngelowa pabe neneni mamageali handa amu nana bu holene anda pabe neneni heago tigatiga masini biagome pabe bo gialayagola anda daliga wai pabe neneni heago podope hene.
1MA 13:44 Ani biyagola Saimononaga ami agali bu hearume miyagola ami agali masini biagoria hearu abale tanoha porabu anda hayagola wali agali tanoha bu hearu bibahende ibida pora bialu piai hene.
1MA 13:45 Ai wali agali tanoha bu hearume tinaga aga minu budalu tanonaga wai pabe egeme bini heago neneni irigi hai halu tigua Saimonohondo wai wahalu gi tigani lama lowa hongo howa bi ladagadaga bialu hale halu hene.
1MA 13:46 Tigua lalu, Ainde ko iname birimago damene bibahende mitangi bialu pani nangi wahalu ina dara ha, lalu hene.
1MA 13:47 Ani layagola nde Saimono ibugua wai wahalu tinaga bi layago hale hene. Anigo ibugua wali agali tanoha hearu bo taliatagi hai halu mbirale dama mitangi bialu bi pupu wiaga gime wabini wiarunaga anda hearuha mbirale ko uruniale wiaru mo wahai halu anda hearu lone mo bayale haga bialu hene. Ibu tano ogoniha anda pialu howa ibugua Ngode Datagaliwabehondo turu halu iba gana lama anda pene.
1MA 13:48 Ani bialu tano ogoniha mbirale Ngode Datagaliwabenaga deni dodohe wiaru bibahende mo wahai halu agali maru Mosesenaga bi mana hale howa talialu haga bu hearu haru halu ibuwa tano ogoniha helaga bini. Ani buwa wai pabe baya hangu mo hongo howa biatiga bialu ibunaga mbira tano ogoniha bu helalu bini.
1MA 13:49 Ogoningi Yarusaleme tanonaga wai pabe timbuni heagonaga pabe panga ndibulo waheagola agali wai pabe andaha haga bu hearu tomo taya magedi tagira pobe naheore wini. Ani wiagola ti tomo nalu holene mbira nawiore howa dewa hina garime homai hene.
1MA 13:50 Anidagua biyagola tigua Saimonohondo lalu, Waitigi wahalu gi tigani bima, lene. Ani layagola ibugua ti baba gi tigani lalu dege agali wai pabeanda hongohe ogoniha haga hearu bo talia tagi halu anda Anduane Homogonaga deni dodo nahe helo lone mo bayale hene.
1MA 13:51 Ai mali handari mbira pira kariani mbira (171) heagola mali ogoninaga ege mendenaga horo pira kirani tebira (23) hayagola Yuda tigua wai pabeanda hondole Yarusalemeni hayagoha pigane anda pene. Puwa Saimono halu ibunaga agali bu hearume Ngode Datagaliwabehondo turu timbuniore halu tigua ira maganeru podo yalu tigua ngidaru tabagerubi balu iba ganaru lama anda pene. Tinaga waitigi timbuni henego mo ko hayagola tigua Yarusaleme turu timbuni halu hene.
1MA 13:52 Ani howa Saimonohanda mana mbira ogobi wabu wini. Mali bibahendenaga horo ayu kemago dege tagira ibiragola turu ho holene horo ngelo dabaro, lene. Ani lowa ibugua Anduane Homogo andanaga wai pabe abene pabeanda hongohe heagohayagi heago baya hangu mo hongo howa hongoheore bialu agali marume obisianda dunini ogoniha bu helene.
1MA 13:53 Ani buwa ainde Saimono ibuni igini Yone anda halu agali hongohe dege heagola ibugua Yone ogoni ibu ami agali haru hagane agali haguane helo dabo helene. Ani helaya handala Yone ibu puwa Gese tanoha hene.
1MA 14:1 Mali handari mbira pira kariani kira (172) layagola Kini Demidiriasa mende ibugua ibunaga ami agaliru haru halu Midia pole pene. Midiali tigua ibu biamogo bialu Tiribola wai bima lole hondo pene.
1MA 14:2 Ani pialu hearia Midia Pesialanaga Kini Asagese ibugua ani ibira layago hale howa ibunaga ami agali haru haga agali haguane mbira heagohondo lalu, Ami agali maru haru halu abale harigani ngola halu Demidiriasa minalu garabaya bule pudaba, lene.
1MA 14:3 Ami agali haru haga agali haguane ogoni ibugua pialu wai buwa Demidiriasanaga ami agali bope halu ibuni minu garabaya bu yalu Kini Asagese hearia dai bini. Ani piyagola Asagesehanda Demidiriasa garabaya helo helene.
1MA 14:4 Saimono ibugua Yudia dindi hondo howa haru heangi mbirale bibahende bayale dege wiai hene. Mali bibahendengi ibu Yudiaha agali haguane heangi ibugua agali haguane mini lene howa wali agali biamogo buleneale wiago biai halu hene. Ani bialu heagola tigua ibuhondo turu ho haabo hene.
1MA 14:5 Ibugua iba sibi íbu wiaga iba ange Yobani wiago bo podahana halu wali agali hariga ogoniha polene hearu ta nabi puíbu bialu Girigi dindiha pelo hariga bope heagome ibunaga mini yaraga halu mini lene timbuniore hene.
1MA 14:6 Ibugua wai bigi bialu dindi maru ibunaga dindiha bo yu anda ibalu wiatago helaga biyagola ibunaga dindi dewaore waore wialu mo timbu howa dindi uruni bibahende ibuni handaya ho hene. Ani bialu waitigi dewa garabaya helaga bini.
1MA 14:7 Ibugua tano hongoheore Gese tanobi Bedesu tanobi handaya ho halu wai pabeanda hongohe Yarusalemebi handaya ho hene. Ani bialu ibugua pabeanda hongohe ogoni mo gini bialu heagola agali mbirame ibunaga bi layago mo wanahe hai hene.
1MA 14:8 Ainde Yuda wali agali ti bayale howa tinaga mabuha tomoru hangalu hene. Mabuha tomo hengearu bayale anda hai halu lini bayale dalu ira lini dagane ale hengearume ira lini bayale dai haga bini.
1MA 14:9 Agali waheore ala hene hearume magedi hamani biruwa mbirale bamba ti heangi biniru te lamigi bialu berene. Igiri daliahe hearume ami agalinaga wai pole mo karulagane yari wiaru ti mo karulalu bame horongi yari karulole turu howa bame mo karulole haga bini.
1MA 14:10 Saimonohanda tano timbuni wiaruha bayale ngelonaga tomo dewa bu mialu wai biagane alebi dewa dege tano uruniha mo wigi bini. Dindi bibahendeha ibunaga mini yaraga hene mbira hene.
1MA 14:11 Saimonohanda Yudiaha mo palia holene mo yu anda ibiyagola Isaraele wali agali turu timbuni ho hene.
1MA 14:12 Agali ti hangu hangu tini headagua mbirale mbira gi nahe tinaga ira lini daga ale gerebi andanehabi poge andanehabi ni gumba biraga bini.
1MA 14:13 Tigua kini biaru bope hai hene heagome Yuda dindiha wai anda ibulene waitigi mbira nahe wini.
1MA 14:14 Saimono ibugua yagibano karubi biamogo biaga hene. Ibugua Mosesenaga bi mana lo wini ngagome bibe lalu ledadagua wali agali mana ko biaga bu karu bo talialu purogo lelaga hene.
1MA 14:15 Ibugua Anduane Homogonaga anda baya hanguore mo yaribia halu ibugua gabo be belediru tigua lotunaga biabe bilo mo migi bialu hene.
1MA 14:16 Yonadana homayagola bi te loyogo lalu Lomo dindihabi Sabarada dindihabi piaiore halu hale hai howa tigua Yonadana dara timbuni hene.
1MA 14:17 Ani howa dege Sabaradali tigua Yonadana hamene Saimono ibu hamenenaga henge wiagoria ibuni ha aribia howa Anduane Homogonaga loma binigo mo miaga agali haguane timbunibi Yudia dindi bibahende haru howa handayaho hagabi tano ngaru bibahende handaya ho hagabi ibuni dege ha aribia ho ka layago hale howa ti turu hene.
1MA 14:18 Bamba tigua habo nalolene bi Yudasa bababi Yonadana bababi lo wini biago mbirale boronosime wabini mbalapaya mbirani lone gili bialu Yarusalemeha yalu pelene.
1MA 14:19 Ani yu piyagola tigua wali agalinaga deni howa bi ogoni daga lene.
1MA 14:20 Habo nalolene bi ogo Sabarada wali agalime gilibu wia heneya. Tigua lalu, Agali haguanerubi Sabarada wali agali bibahendebi tigua Anduane Homogonaga loma binigo mo miaga agali haguane timbuni Saimonobi agali haguane bu kemiru bibahendebi agali loma binigo mo miaga kemiru bibahendebi ina hameneore Yudiaha kemiru tíbi bibahendehondo bayale kemidago turu harama lalu lo ibi larama.
1MA 14:21 Agali maru ina hemaria bi yu pudaba larimiyaru tigua ina hemaria ibalu tínaga mini timbuni mini lene ngagobi tí dunini abogo ka lene kemigobi bibahende ina langiai haya. Ti ibiyagola iname ti hondowa turu timbuni harima.
1MA 14:22 Iname bi libugua layago damene bibahende mbuga mbiraha gilibu ngema. Bi ogodagua laya. Andiogusu igini Numeniusubi Yasono igini Andibadabi libugua ina nenege haabo holenaga bi lo winigo lone mo hongo hami̱ya bi yalu pudaba larimiyago libugua lama ibiya.
1MA 14:23 Inanaga wali agalime libu ibiyago ngola hole íbu ngoai howa ibirida lowa turu hai halu libunaga mini yaraga haya. Iname libunaga bi layago gabumane mbugaha bi pigane layagonaga beba mo wulenaga turu halu mo werema. Ani bialu Sabarada wali agali tinaga bi kira nga. Bi mendego bebani gili bialu Anduane Homogonaga loma binigo mo miaga agali haguane timbuni Saimono hearia pelarima, lene.
1MA 14:24 Mani howa Saimonohanda Lomo dindialiru baba habo nalolene bi lo winigo lone mo hongo holenaga bi yalu Numeniusu Lomo pu lene. Ani laya handala Numeniusu ibugua wai humbi mbira ngolome wabini genda magi kilogarama handari duria (500) wiago mo yalu pene.
1MA 14:25 Saimonohanda mbirale uruni bira layago Isaraele wali agali tigua hale howa turu timbuni halu tigua Saimono halu ibu iginiruhondo, Ka̱i̱ agua loabedabe, lalu hene.
1MA 14:26 Ibunibi ibu hamenerubi ibu aba hamene maru hearubi tigua hongo howa haabo haya. Tigua wai bialu waitigi bu hearu balu bo taliatogo layagome dindi ogo hibaria golope hene ngagoni ndobe, lene. Tigua bi urunidagua lalu beba timbuni gili buwa Saiono neneni ira dibu hongowa ogoni handai helo bapara ho ngelaga bini.
1MA 14:27 Tigua bi gilibu winidaruni ogodagua lo wini. Ai ege mini Elulu hayagola mali handari mbira pira kariani kira (172) layagola ege ogoninaga horo pira mbirani halira (18) hayangi Saimono ibu Anduane Homogonaga loma binigo mo miaga agali haguane timbuni pigane henego hama ibalu mali tebone hayagola
1MA 14:28 iname wali agali bu hearu bababi agali loma binigo mo miaga hearubi agali haguane bu hearubi ina bibahendeme bi mbira lo wirima.
1MA 14:29 Wai dewaore dindi ogoha beremaligo ainde agali loma binigo mo miaga Yahoiaribi aria Madadiasa igini Saimono halu ibu hamenerume tini homolenehayagi mo embeda haga hene. Ani howa tigua hongo howa dindi ngagonagabi Anduane Homogo anda kagonagabi bi mana lo wini ngagonagabi hongo howa wai bialu haga hene. Tigua ogonidagua bialu inanaga dindi ngagonaga mini mo yaraga haya.
1MA 14:30 Yonadanahanda wali agali bu hearunaga bu mini mo mbiraore ho helalu ibuni Anduane Homogonaga loma binigo mo miaga agali haguane timbuni halu buwa nde homaya.
1MA 14:31 Waitigime ibalu inanaga dindi ngagobi Anduane Homogonaga anda kagobi mo ko hai halu bo labu hole ibiyagola
1MA 14:32 Saimonoha abale heyalu wai biaga hene. Ibuninaga muni dewaore wahalu wai bulene ale danda timuru yolo bialu ami agali bu karubi yolo biaga hene.
1MA 14:33 Ani bialu ibugua Yudiaha tano timbuni wiaru mo hongo hai halu Bedesu tano Yudia dindi gibunihayagi waitiginaga wai biaganealeru mo wini tano biagobi mo hongo hai haya. Ani bialu ami agali maru tano ogoni mamage howa handaya ho helo heleda.
1MA 14:34 Ani bialu ibugua Yoba tano iba solowara bedago angeni ngago mo hongo ho ngelalu Asadodo tano ngagoria kaware Gese tano ngagobi mo hongo ho ngelalu bida. Tano uruni abale waitiginaga winigo ayu ibu mo yu daibu wini nga. Ibugua Yuda wali agali tano uruniha hai helalu tinaga biabe bulene ale ibunime mo miaga ka.
1MA 14:35 Wali agali tigua Saimono hondo hearia ibu agali hongohe mini lene timbuni hayago hondowa tigua ibu tinaga agali haguanebi tinaga Anduane Homogonaga loma binigo mo miaga agali haguane timbunibi helo dabo helaya. Ibugua biabe urunidagua bialu ibu daluha mana bayale tigabi bulenebi mini lene timbuni nga lolenebi mo yu anda ibiyagome tigua ibu mo yaraga haya. Heneneore laramago ibunaga wali agali mini mo yaragaore ho heleda.
1MA 14:36 Ibu agali haguane heangi ibugua wali agali tara hearu bo taliatagi hai haya. Ani bialu waitigi Anduane Homogonaga anda kawareni bu hearu taliatagi haya. Waitigi uruni tigua wai pabeanda hongohe anda biago kawareni bu howa bibahendengi tigua tagira ibalu anda heago Anduane Homogonaga deni mo dodo haabo haya.
1MA 14:37 Ani biyagola ayu Saimono ibugua wai pabeanda hongohe ogoniha Yudiali dabo helalu ibugua anda ogoni arema bialu mo hongo howa dindibi Anduane Homogonaga andabi bayale helonaga ani biya. Ani bialu ibugua Yarusalemenaga pabe hongohe kago lone bialu daligaore heleda.
1MA 14:38 Kini Demidiriasahanda biabe Saimono ibugua biyago de hondowa Saimono Anduane Homogonaga loma binigo mo miaga agali haguane timbuni karulape kago ibu helo lalu helaya.
1MA 14:39 Ani bialu ibunaga mini Kininaga Nenege lalu ibu mini lene timbuni helo helaya.
1MA 14:40 Kini Demidiriasa ibugua o biyadagoni irane ibugua hale ho hearia Lomoalime Yudali ti nenegebi ti baba mandagi holenebi ti hamenebi layago hale howabi agali Saimononaga bi yalu piaga biarunaga mini yaraga hara layago hale howa ibugua anidagua biya.
1MA 14:41 Anidagua biyagola nde Yuda wali agalimebi agali loma binigo mo miaga bu hearumebi bi lo mbira halu agali Anduane Homogonaga mana latagi haganeore ibilo malia ho kemangi ibugua biabe bialu helo wahama larimi.
1MA 14:42 Tigua bi lo mbira halu Saimono ibugua gabumane agali haguane halu Ngode Datagaliwabenaga anda handaya ho halu ami agalibi haru helo helama larimi. Ani bialu agali gabumane handaya ho holenebi wai biaganeale ngarubi wai pabeanda hongohe tanoha wima pedarubi Anduane Homogonaga anda kagobi ibuni handaya ho helo waha lai harimi.
1MA 14:43 Ani bialu agali bu hearume lalu wali agali bibahendeme Saimononaga bi hale hai halimu laya. Ani bialu gabumaneme habo nalolene bi lo wigi birago bibahendeni Saimono ibunaga mini gilibu wialu dege ngelo laya. Ibugua kininaga aga ngago mo karulalu ngolome wabini mandibu ngago karulo halu bilo laya.
1MA 14:44 Agali loma binigo mo miaga karu ariamebi agali marumebi Saimononaga bi ledago mo waholenebi ibunaga aga kininaga aga karu laganeale ngago mendealime aribia howa mo karulolenebi ibunaga mandibu ngolome wabini ngago mo karulolenebi nawiore laya. Ani bialu agali dewa íbu ngoai howa bi midini mbira loleyagua nde Saimononaga bi ala hale howa ibugua karulape layagua midini lolebira.
1MA 14:45 Mbiralime mana ogoni mo bagi halu piyaguabi pugualu piyaguabi nde ogoni biaga kago ibu godi deni ibu holene nga.
1MA 14:46 Wali agali bibahendeme bi lo mbira halu Saimono ibugua mana ogoni talialu bialu howa wali agali haru helo larima.
1MA 14:47 Ani larimago Saimono ibugua Anduane Homogonaga loma binigo mo miaga agali haguane holenebi ami agali haru bamba haga agali haguanebi loma binigo mo miaga agali bu karunaga agali haguane holenebi wali agalinaga agali haguane holenebi ibugua dege holene karulape laya, lene.
1MA 14:48 Ai tigua bi lo e̱ lalu bi uruni boronosime wabini mbalapaya mbirani gili buwa wali agali bibahendeme de handai helo Anduane Homogonaga anda biago tamuha anda háini gilibu derela hami̱ya.
1MA 14:49 Ani bialu bi ogoni halu mende gili buwa Saimono halu ibu iginiru tini de handaga bilonaga Anduane Homogonaga andaha muni wiaga ngagoha ngelami̱ya, lalu bi lene.
1MA 15:1 Andiogusu Kini Demidiriasa igini mbira ibu dindi mbira iba solowara dombeneha dindi mini Kiridi laga wiagoha hene. Ai agali Andiogusu ibugua beba mbira gili buwa loma binigo mo miaga agali haguane timbunibi Yuda wali agalinaga agali haguanebi wali agali ibugua handaya ho haga bu karunaga agali haguanebi Saimono heagohondo beba gilibu peleneya.
1MA 15:2 Ibugua bi ogodagua lalu gili bini. Kini Andiogusuhanda Anduane Homogonaga loma binigo mo miaga agali haguane timbuni Saimono halu Yudia wali agalibi tíhondo bayale kemibe larama.
1MA 15:3 Agali ko hearume i̱ abanaga dindi ti karulai henego ai ayu i̱nime hongo halu lone mo yu dai buwa mo hongo halu abale bayale wiagagobi ngelo biabe bialu ko. Ami agali tagira howa dewaore i̱ biamogo bialu wai bilonaga yolo bialu haru halu íbu heledo. Ani bialu iba sibi dewa timbuniru mo manda manda bu wiai ko.
1MA 15:4 Iba sibi uruni yalu dindi mendehayagi puwa waitigi dewa i̱naga tanorubi dindi andaru bo labu hai halu mo ko haga biaru baba wai bulebero.
1MA 15:5 Ayu i̱nabi nde dagisi dewa tígua ngiaga wirimigo abale i̱ aba ibugua biyadagua mo wahai halu tígua yolo maru i̱ ngulene ngemigobi bibahende mo wahai haro.
1MA 15:6 Tí daluha munime biabe bulene ngago damene tínime bialu holene karulapego muni tíni taya bialu biabe tínime bialu holene nga laro.
1MA 15:7 Yarusalemehabi Anduane Homogonaga andahabi dagisi muni miaga wirugo yupe halu ayu waharogoni. Wai biaganeale wabu wu kemiru bibahendebi tano wai pabe hongohe bu mabubi ngemirubi uruni bibahende tíninaga giha ya harogoni.
1MA 15:8 Tígua kininaga muni andaha muni dano hole mo yiniyaguabi dano mani holenenagabi bibahende maniorebi ani wiaabo helonaga ayu mo waharogoni.
1MA 15:9 Mani i̱naga dindi ngago bibahende handameho howa haru kongi i̱na í̠naga mini yaraga howa mo daligaho helalu í̠naga wali agalibi Anduane Homogonaga andabi bibahende mini mo yaraga hai holebero. Anidagua beregola wali agali dindi bibahendeha karume tínaga mini mo yaraga hene mini leneore kemigo hondolebira, lene.
1MA 15:10 Mali handari mbira pira kariani maria (174) hayagola Andiogusu ibu dindi ibu aba mamalirunaga winiore wiagoria birule dai bini. Ami agali dewaore ibalu ibuha hatago hayagola Tiribo baba emene daga lene dege mbira hene.
1MA 15:11 Andiogusuhanda Tiribo baba wai biyagola Tiribo ibu ibida pialu iba solowara timbuni bereago angeha Doro tano wiagoha hado hene.
1MA 15:12 Tiribo ibugua manda bu handalu hearia ibunaga ami agali heneru dewaore piai hayagome ibugua wai bibe nahe ibu minalu boleneore wiayuane handalu ibu pora bialu pene.
1MA 15:13 Ani piyagola Andiogusu ibunaga ami agali wai biaga mugube pari wayaliru daosini handari mbirani pira kira (120,000) ami agali geni pialu wai biagabi daosini halira (8,000) nogo hosini biruwa wai biaga hearubi haru halu puwa Doro tano wiagoria wai bini.
1MA 15:14 Ibunaga iba sibi wiarume iba solowarani wai bialu heagola anidagua biyagome Andiogusuhanda Doro tano ho hagirabu yaanda hai hene. Ani bialu ibunaga ami agali hearume dindinibi solowaranibi wai biai hene. Ani bialu howa tano ogoniha mbiraoreli hangubi uba andatagi nabuleore lalu mamage baya hangu hai hene.
1MA 15:15 Horo ogoningi dege Numeniusu halu ibu baba haga hearume beba mbira gili buwa Lomo dindi wahalu dindi maruha kini hearunagabi dindi bibahendenagabi ta halu yu pugupugu bini. Beba ogoniha bi ogodagua lene.
1MA 15:16 Lomonaga agali haguane Lusiusuhanda Kini Tolemihondo, Í̠ bayale kebe, lara.
1MA 15:17 Ani bialu Anduane Homogonaga loma binigo mo miaga agali haguane timbuni Saimono halu Yuda wali agalime habo nalolene bi ala lo wirimago lone mo hongo howa ina nenege haabo halu mandagi howa ina hamene dege lo holenaga habo nalolene bi ala lo wirimago lone mo hongo hama lalu bi yalu agali kirali ibiniya.
1MA 15:18 Libugua wai humbi mbira ngolome wabini genda magi kilogarama handari duria (500) inanaga wabu wia heneyago yalu ibiya.
1MA 15:19 Iname bi lo mbira halu Yuda dindi mo ko halu bo labu haga kinibi agali haguane bu karubi bibahendehondo beba ogo gili bialu piai helarama.
1MA 15:20 Tigua wai humbi wabu yalu ibiyagobi ina yamulene karulapego yamima larima.
1MA 15:21 Agali ko maru ibida pora bialu tí kemigoha ibiyagua nde tígua minalu Anduane Homogonaga loma binigo mo miaga agali haguane timbuni Saimono giha minu ya halimu. Ibunime howa agali ogonialego ti Yuda maname biaga winidagoale bilo minu milimu, lene.
1MA 15:22 Lusiusu ibugua bi ogoni dege gili bialu Kini Demidiriasahondobi Kini Adalusuhondobi Kini Ariadesehondobi Kini Asagesehondobi pelaga bini.
1MA 15:23 Bi ogoni dege gili bialu dindi maru Samasamesehabi Sabarada dindihabi Deloso dindihabi Mindoso dindihabi Sisiono dindihabi Karia dindihabi Samoso dindihabi Pambilia dindihabi Lisia dindihabi Haliganasusu dindihabi Lodese dindihabi Paselisi dindihabi Koso dindihabi Side dindihabi Aradusu dindihabi Godina dindihabi Nidusu dindihabi Saibarasa dindihabi Sairini dindihabi bibahendeoreha pelaiore hene.
1MA 15:24 Ani bialu beba mbira loma binigo mo miaga agali haguane timbuni Saimono hearia pelalu bini.
1MA 15:25 Kini Andiogusu ibugua Doro tanoha wai halu mende bini. Ibugua ami agali dewaore haru howa wai biagane masini dewa wabu wialu buwa tano ogoniore bo gialanda hole lowa bu hondo wahalu hene. Ibugua tano ho hagira biai ho heagola Tiribo tagira pobe naheore wini.
1MA 15:26 Ani bialu heagola Saimono ibugua Andiogusu biamogo bialu ami agali ibunagaore haga heneru daosini kira (2,000) mialu muni silibabi ngolobi dewaore talebu mialu wai biaganeale danda timu yandare ayu tibu wai humbibi dewaore tale bu mialu bini.
1MA 15:27 Ani biyagola Andiogusu ibugua mbirale uruni yamia nabi wahalu habo nalolene bi ala lo wiyago mo habo lalu bini. Ani bialu libu mo waitigi hene.
1MA 15:28 Andiogusu ibugua agali ibunaga nenege mbira mini Adenobiusu heago Saimonola bi lole pu lene. Ani laya handala ibugua puwa lalu, Ayu í̠na Yoba tanobi Gese tanobi wai pabe anda hongohe Yarusalemebi handaya ho kegoni. Ai tano uruni bibahende i̱ daluha dege wiai ka.
1MA 15:29 Í̠na dindi uruni mo ko hai harigoni. I̱naga dindiha mo ko halu genda holene dewa mo yu anda ibiri. I̱naga dindi wiaru dewa í̠ karulo ke.
1MA 15:30 Ai ayu í̠na i̱naga tano timbuni wiwaru í̠ karulariruni bibahende i̱ni ngiadai bibe laro. Ani bialu tano Yudia be tagirahayagi wini í̠ karulo kegonaga dagisi muni ngibe.
1MA 15:31 Anidagua nabuleyagua nde í̠na muni siliba genda magi kilogarama daosini nguira (15,000) tano uruni yolo ngialu muni ogonidagua dege halu mende dagisi mitangi bialubi mbirale mo ko hai haridagonagabi ngibe laro. Anidagua nabiriyagua nde wai bibiya laro, lalu bi lama pudaba lene.
1MA 15:32 Ani laya handala Adenobiusu ibu pialu Yarusaleme anda puwa ibugua Saimono yari biarubi ibunaga beledi ngolome wabinibi silibame wabinibi ibunaga tebolo dagiani wiaru handalu mana Saimonohanda biaga wiarubi handa dege bialu ibu mogo lo hendene. Ani hondowa ibugua Kini Andiogusunaga bi layago Saimono lamini.
1MA 15:33 Ani layagola Saimonohanda ladai bialu lalu, Iname dindibi mbirale tara tara ngarualebi dindi mendenaga mo page nabiore henego kemagoni ndobe. Bamba inanaga mamali giha yu haga winiru dege inane mo yu dai bigi bini wu kema. Mbirale uruni waitigime bamba mo pagebu yu pugu binigo yu dai bigi binigo ngema.
1MA 15:34 Mbirale ina mamalinaga mo page bini uruni mo yu dai bulene hariga ayu dege handarima.
1MA 15:35 Í̠na Yoba tano Gese tanola hale haribe. Tano kira ogoni laboha karume inanaga wali agali kagoha genda tara tara mo mialu inanaga dindi ngagobi mo ko haabo haga ka ndobe. Anidagua biagago ainde harugo tano kira ogonilabo yolo bialu muni siliba genda magi kilogarama daosini tebira (3,000) hangu nguliya, lene. Ani layagola Adenobiusuhanda bi mbira ladai nabini.
1MA 15:36 Ibugua miniha tandaga timbuni halu kini hearia dai bini. Dai buwa ibugua kinihondo Saimonohanda bi layago lamiai halu Saimononaga yari biaria handayagobi andagaha wiarubi lamiai hene. Kini ibugua bi ogoni hale howa ibuguabi keba timbuni hene.
1MA 15:37 Horo ogoningi dege Tiribo ibu ohalu ibida iba sibi piyagoha pora bialu Odosia tano wiagoha pale pene.
1MA 15:38 Kini ibugua agali Sendebeusu heagohondo ami agali geni pialu wai biaga dewabi maru nogo hosini biruwa wai biaga hearubi talebu mialu dindi iba solowara bedagoha ngarunaga gabumane haguane hole pu lene.
1MA 15:39 Ani lowa Sendebeusuhondo Yuda wali agali baba wai bibe lene. Ani bialu Kederono tano baya hangu arema bialu wai pabe pangaru baya hangu hongohe wabu helalu bibe lene. Wai bulenaga manda buwa ani lene. Ani lalu kini ibunime Tiribo talima pene.
1MA 15:40 Sendebeusu ibugua pialu Yabane tano wiagoria anda puwa anda bu hearu bo gialapaya bialu mbirale wiaru mo ko howa bo labu halu hene. Ani bialu Yudia dindiha anda puwa wali agali dewa minu garabaya bialu bo wahai halu hene.
1MA 15:41 Ani bialu ibugua Kederono tano mo hongo howa lone arema bialu ibugua ami agali geni piagabi nogo hosini piagabi dewa tano ogoniha howa Yudiaha hariga pedagoha mamage puíbu bialu helonaga ani helene. Ibugua kini kagome bibe lalu lamiyadagua talialu ani bialu hene.
1MA 16:1 Ai Saimono igini Yone ibu Gese tano wahalu ibugua Sendebeusuhanda bialu heagonaga ibu aba Saimono lamule pene.
1MA 16:2 Puwa te layago hale howa Saimono ibugua ibu igini kirali Yudasala Yonela olowa libuhondo lamialu lalu, I̱nibi i̱ hamenerubi i̱ aba damene bu hearubi iname Isaraele wali agali biamogo bialu wai bamba i̱na igiri emene hewangi howa bialu haabo henego ayu kemagoni. Iname wai bialu howa Isaraele wali agali waitigi giha howa mo wialu haru dai bigi beremali.
1MA 16:3 Anidagua biaga henego ai ayu ina mbirale mbira bibe naheore agali miniwiore bedogoni. Ainde i igini kirali agaliore haribidago turu howa i̱na Ngode Datagaliwabehondo ka̱i̱ timbuni laro. Libugua i̱naga henge mialu i̱ hamene homayarunaga henge mialu libu ho aribia halibu. Ainde Ngode Datagaliwabehanda libu haru holebirago ai libugua inanaga dindi ngago karulole waitigi ibirago baba wai bule pudaba, lene.
1MA 16:4 Ani laya handala Yonehanda ami agali daosini dege pira kira (20,000) geni pialu wai biaga hongohe pari wayaliru haru halu nogo hosini biruwa wai biagabi dewa dege haru hene. Tigua Sendebeusu halu ibunaga ami agaliru ngola howa uruni baba wai bule pialu harigani mbi layagola Modeini tanoha palene.
1MA 16:5 Egerebalene galaki biyagola abale heyalu wai hama dindi tigabi wiagoria pene. Ogoriani ami agali nogo hosini biruwa wai biaga dewaorebi ami agali geni pialu wai biagabi dewa ngola hene. Anigo ogoriani iba mbira peagome libu mo tu wia howa amura haga haga bilene.
1MA 16:6 Ani biyagola Yone halu ibunaga ami agali biarume puwa waitigi bu hearu handaede ho hene. Ani howa Yone ibugua handalu hearia ami agali biaru waitigi hondowa tigua iba domaede halu wai polene gi hayane hendene. Ani biyago hondowa Yone ibunime pigane pora bialu iba ala domole pene. Ani domalu piyago hondowa ami agali bibahende iba domalu ubaede hai halu pene.
1MA 16:7 Yonehanda ibunaga ami agali nogo hosini biruwa wai biaga biaru dombeneha helowa ami tidiki helowa lene labolabo helene. Anidagua binidago irane waitigi tinaga nogo hosi dewaore haru heago hondowa anidagua bini.
1MA 16:8 Tigua pialu pilipe biguli pu lalu puwa Sendebeusu halu ibunaga ami agali hearu bama talima pene. Ogoningi waitigi dewaore timu hai halu dewa wai hamani homai hene. Maru ibida pialu wai pabeanda hongohe Kederono tano wiagoha pene.
1MA 16:9 Wai ogoniha Yudasa timu hene. Ani ho wia handala ibu hamene Yonehanda waitigi bama talima pialu wai pabeanda hongohe Sendebeusu ibuni haga Kederono tano talima anda pene.
1MA 16:10 Ani bialu waitigi maru Asadodo tanoha anda bima irigi howa mamageali handa pugu bu haga heagoha puwa birado hene. Ani heago helowa Yone ibugua tano bo heda hayagola agali dege daosini kira (2,000) bibahende homai hene. Ani bialu mani Yudia dindi dai bialu ibu mo ko nahe karulape dai bini.
1MA 16:11 Abubusu igini Tolemi ibu Yarigo tano ngago kawareha dindi tigabi ngagoha gabumane haguane hene. Ibunaga muni ngolobi silibabi dewaorewi henego
1MA 16:12 irane ibu one Anduane Homogonaga loma binigo mo miaga agali haguane timbuni Saimono wane dabu henegome ani hene.
1MA 16:13 Tolemi ibugua mine timbuni halu ibugua dindi bibahende handame ho holene manda bu hene. Ibugua ibu imane Saimono mo hondo howa Saimonobi Saimono iginirubi bibahende homelo bo wahai hole manda bu hene. Ani manda bu howa mali handari mbira pira kariani karia hayagola (177) mali ogoninaga ege beaneni (11) mini Sebada heagola
1MA 16:14 Saimono ibu tano maru dindi ibugua hendedagoha wiaru halu mbira handama ibaga bule pene. Ani puwa wali agalinaga gendaru tinaga hameru agi dege wiaruabe handama pene. Ibu igini kirali Madadiasabi Yudasabi ti haru pialu Yarigo tano anda pene.
1MA 16:15 Ani pu bereagola Tolemihanda ibu imane Saimonobi ibu balibuni Madadiasa Yudasala mo hondo hene. Ibugua tihondo ibu andaga dindi emene mbira mini Dugu ibuni mo wini wiagoha nenege ibalimu lene. Ani lowa ibugua tomo timbuni dawalu badi bialu howa agali maru tamuha birado helene.
1MA 16:16 Ani bialu Saimono halu ibu igini biago labo waini iba dewa nowa luluyu wiagola Tolemi halu agali maru waraandaho birayarume danda timu yagayaga bialu tomo nalu bereagoha waraanda hene. Ani buwa Saimonobi ibu igini kirali biagolabobi agali maru biabe bia haga hearubi minalu homelo bai hene.
1MA 16:17 Tolemihanda ibu imane balibuni biaru mo hondo howa ogonidagua bini. Tigua ibuhondo mana bayale biaga wiagonaga pani ibugua tihondo mana kome emena hangalu biadai bini.
1MA 16:18 Ani bialu mani howa Tolemi ibugua o biyadaruninaga te gili bialu kini hale helo yu pelene. Ani bialu dindi ogoni ibugua haru howa handaya holiyanaga ami agali dewaore ibilabe lalu kini hole hale halu bini.
1MA 16:19 Ani bialu Tolemihanda agali marume Yone bo wahole Gese tano pudaba lalu bini. Ibugua ami agali haru haga agali haguane hearuhondo beba gilibu pelaga bialu, I̱na tí mo turu halu ngolo silibaru dewaore ngigi buliya ibalimu, laga bialu beba gilibu pelaga bini.
1MA 16:20 Ani bialu agali maru Yarusalemebi Anduane Homogonaga anda hari nene ngagobi karulole pudaba lalu bini.
1MA 16:21 Ani layago hale halu agali mbira ibu gerai lalu bamba halu Gese tano abale anda puwa Yonehondo lalu, Í̠ ababi í̠ hamene kirali biago labobi homaya. Ai Tolemihanda agali marume í̠ bo wahole pudaba lenego ibira, lalu lamini.
1MA 16:22 Ani layago Yone ibu hale howa mogolo hene. Anigo ibugua Toleminaga ohaga wiago manda bu howa agali maru Tolemihanda ibu minalu bole pudaba lene ibiyaru Yone ibugua tini minalu garabaya helaga bini. Ani helowa ibunime ti homelo bo wahaga bini.
1MA 16:23 Ai Yone ibugua Anduane Homogonaga loma binigo mo miaga agali haguane timbuni howa bialu henego te maru mbuga ogoha daga lolebere. Mbuga ogoha Yonehanda wai bini ngagobi tanonaga wai pabe baya hangu arema bialu mo hongo haga bialu henegobi ibugua biabe maru bialu henegobi te gilibu nga. Mbuga ogoniha te gilibu ngago Yone ibu aba homayagola ibuni Anduane Homogonaga loma binigo mo miaga agali haguane timbuni ha aribia henegoria howa pigane lalu te lama peda.
2MA 1:1 Yuda wali agali Yudiaha bu hearumebi Yarusalemeha hearumebi ti damene Iyibi dindiha kemiru tí bi lo wia halu bayale kemibe lara. Mo palia holenebi bayale holenebi tí heba haabo helo larama.
2MA 1:2 Ngode Datagaliwabehanda tí mo bayale ho helalu ibugua bamba inanaga mamali ibunaga biabe bia haga agali Abarahamalabi Aisagalabi Yagabalabi habo nalolene bi lo wiyago mitangi bialu helo iname tínaga bi Anduane Homogohondo la halu kema.
2MA 1:3 Tígua Ngode Datagaliwabehondo lotu lalu halimulobi tígua ibunaga hame ngago tínaga bu minihabi dininimebi baya hangu yu howa talialu halimulobi Ngode Datagaliwabe ibunime tí mo hongo haabo helo larama.
2MA 1:4 Ibugua tí ibunaga bi mana lo wini ngago baya hangu talialu bule manda manda bu halimulobi ibugua tínaga holene bayale mo wia helonagabi iname tínaga bi Anduane Homogohondo la halu kema.
2MA 1:5 Ina ibuhondo tínaga bi laremigo hale halu tígua ko bialu harimidago mo wahabe lalu bi lahalu kema. Ai tíha mo ko holene mbira anda íbu wiagua nde ibugua tí wanahelo larama.
2MA 1:6 Ina Yarusalemeha haga kemaru bibahendeme Anduane Homogohanda tí biamogo bilonaga iname ibuhondo tínaga bi la halu kema.
2MA 1:7 Ai mali handari mbira pira waragariani huniane dira (169) layagola Demidiriasa mende ibu Sirianaga kini heangi ina Yuda wali agalime beba mbira gili bialu tínaga ibilarima. Beba ogoniha genda timbuni dewa inaha anda ibugu biyaru tí hale ho halimulo lo ibilarima. Ogoningi Yasono ibugua Ngode Datagaliwabenaga wali agali bu kemarunaga dindi wiago mo ko howa bo labu halu kininaga gabumane heagobi mo ko hai haya. Ani bialu heagola ibu heba haga hearume ibu biamogo biya.
2MA 1:8 Tigua Anduane Homogonaga andaha anda polene harabani dagia heago bo heda halu wali agali mana ko nabiaga hearu homelo bameore bo wahai haya. Ani bialu heagola iname Anduane Homogohondo ina biamogo bia lalu bi larimagola ibugua hale halu ina biamogo biya. Iname balawa widime wabini wiarume lomabu mialu lamu hale wiaru hedalu birima. Ani bialu Anduane Homogo deni mberediru loma biaho ngelarima.
2MA 1:9 Ainde ayu tíbi ina heba mandagi Anda Nemandaruha Palu Holene Horo ege mini Kisilebe tagira ibiragola hami̱ya hame ledema. Iname beba ogo mali handari mbira pira halirani halira (188) hayagola gili berema, lene.
2MA 1:10 Ina Yarusaleme wali agalibi Yudiaha howabi gabumane agali bu karubi Yudasa ibubi iname Arisidobulusu í̠ agali Kini Toleminaga loma binigo mo miaga howa lawai hagabi kego í̠hondo bayale kebe larama. Yuda wali agali Iyibi dindiha kemiruhondo bayale kemibe lowa tíha mo ko holene mbira naibi bayale dege halimulo hamelo kema.
2MA 1:11 Ainde Ngode Datagaliwabehanda inaha mo ko holene mbira anda naibile howa iname kinila wai buluma̱ya biamogo biyagonaga iname Ngode Datagaliwabehondo ka̱i̱ lalu haabo kema.
2MA 1:12 Waitigi Yarusalemeha anda ibalu wai bialu hayaru ibugua bo taliatagi haya.
2MA 1:13 Ogoningi Kini Andiogusu halu ibunaga ami agali dewaore haru halu Pesia dindiha piya. Ani piyagola mbirali ibu baba wai biba lalu baede habe naheore pene. Ani pialu hearia dama wali beda lo manda bialu bi pupu wiaga mini Nanea gime wabini bigiya wiagonaga loma binigo mo miaga agali bu hearume Kini Andiogusu mo hondo howa tigua kininaga ami agali biaru heba kini ibuni bope hayaya.
2MA 1:14 Ai Andiogusu halu ibu aria hearu gime wabinigohondo bi pupu wiaga anda heagoha anda piyangi ibugua mbirale gime wabini mini Nanea ogoni dabu bule poradagua piya. Anigo ibu ke̱ howa piya. Ibugua Nanea bi pupu wiaga anda heagoha mbirale bayale wiaru ibu dabuni mo yaradagua mo yule piya.
2MA 1:15 Agali anda ogoniha biabe bialu haga hearume mbirale bayale tara tara wiaru anda tamuha baya hangu mo tiga buwa wigi bini. Ani ngelo howa kini halu ibu aria maru anda ogoniha anda ibiyagola agali biabe biaga hearume anda panga payadai bini.
2MA 1:16 Ani buwa tini anda panga emene wiado hene wiagoha tagira puwa kini halu ibu aria maru tamuha hearu ege to̱le̱me balu home leneya. Ani bialu agali Naneanaga biabe biaga uruni tigua agali bayarunaga tingini bo budabaga biai halu tinaga haguane dege agali tagiraha de handa andaho heagoria mo batagi hene.
2MA 1:17 Mbirale bibahende bayale dege biai harigonaga Ngode Datagaliwabe í̠naga mini mo yaraga heneore ngelo. Ani bialu í̠na agali ko uruni homai helarigonaga mini yaraga holene í̠ha wiaabo helo, larama.
2MA 1:18 Ainde lotu lagane horo timbuni ege mini Kisilebenaga horo pira kirani duria (25) kaware ibiragoni ndobe. Iname horo timbuni tigua mbirale bi pupu wiaga gime wabini Anduane Homogonaga andaha wiago mo wahenegonaga horo mitangiho kemago ainde tígua Anda Nemandaruha Palu Holene Horo mitangi howa turu ho halimu lalu langerema. Ani bialu tigua agali Nehemaia ibu Ngode Datagaliwabenaga anda lone biadai bialu lomabu delaga dabu lone biadai bialu haga agali biagome loma mbira bu delalu hearia ira timbuni minana kululadaga hayago mitangi bialu halimu.
2MA 1:19 Waitigime ina mamaliru garabaya bu yalu Pesia dindi piyangi agali Anduane Homogonaga loma binigo mo miaga agali bayale hearume lomabu delaga dabuni ira dene deago aria mbira hedo yalu puwa iba hambiaga uli iba nabere yobi wiagoha hedo do henego manda bilimu. Tigua baya hangu mo do howa wiagola mbiralime ira hedo do hayadago handa walia nahene.
2MA 1:20 Mali dewaore halu Ngode Datagaliwabehanda horo pongo winidago tagira ibiyagola Pesianaga kini heagome Nehemaia Yarusaleme dai bia lene. Ani layagola Nehemaia ibugua agali loma binigo mo miaga ira dene hedo do henedaru aguane mbira ai kemibe lalu hale ira dene ogoni lone mo pudaba, lene. Ani laya handala tigua taya bu pialu dai buwa lalu ti ira ogoni taya bu waharima dindi gede ndobabi dege uliha wiaria handarima. Ani layagola Nehemaiahanda lalu dindi ogoni aria maru mo yu ibule pudaba lene.
2MA 1:21 Ai mo yu ibiyagola agali loma binigo mo miaga hearume dindi waru ogoni budaga buwa maru loma bu delaga dabuni ira gabu wini ngagoria wialu maru loma delole ngagoha ha̱i̱ ho ngelaga bidaba lene. Ani layagola tigua bia layago biai hene.
2MA 1:22 Mani emene howa ni hari beralibame geho winigo ai beraliba pubagi heagola ni hongohe bayale dene. Ani biyagola aube tobane buwa lomabu delaga dabu heagoria ira hungu timbuni kilikulu lalu daga daga biyagola wali agali bu hearu mogo laiho hene.
2MA 1:23 Irame loma biago wene dalu heangi agali Anduane Homogonaga loma binigo mo miaga hearubi wali agali bu hearubi tigua Anduane Homogohondo bi lalu hene. Yonadana ibugua Anduane Homogohondo bi layagola Nehemaia halu wali agali tigua ladai bulene wiagohayagi ladai bialu hene.
2MA 1:24 Yonadanahanda Anduane Homogohondo bi ogodagua lene, Ngode Datagaliwabe-o í̠na mbirale bibahende karubi ngarubi wabiai hariya. Mbirale bibahendeme í̠hondo gi hai halu í̠ andaneha hai haga ka. Í̠ hongo haihebi í̠ tigabiorebi howa dara holene irane nawini dara haganeore Ngode Datagaliwabe ke. Í̠ni hangu kiniore howa mbirale bayaleru í̠nime ina ngiaga ke.
2MA 1:25 Wali agali mbirale tubagiho karuale í̠nime ti mo miaga ke. Í̠ni hangu haluhe haabo haga ke. Hongo bibahende í̠ni haiho kegoni. Isaraele wali agali tinaga genda ngelo karu mo wahai haga í̠ni hangu kegoni. Inanaga mamali agali haguane heneru ti í̠naga dameneore helo dabaga biniya.
2MA 1:26 Ayu í̠ninaga wali agalinaga minini howa loma ngeremago yamia. Tiore mamage baya hangu haabo halu mana bayale tigabi bulene ngaru bialu helo biamogo bibe.
2MA 1:27 Wali agali ina damene giligala lo haga haga bidaru mo mogo biai habe. Ani bialu ina damene wali agali tara Anduane Homogo mitangi nahaga bu karu ti daluha garabaya karu í̠na ti golope halu haru dai bibe. Wali agali í̠ mitangi nahaga bu karume í̠ni inanaga Ngode Datagaliwabeore heneda lo hendelo wali agali ina damene genda yu karu dara halu mo wahabe.
2MA 1:28 Waitigi ina hengedope halu ina mo ko halu karu pani nelo mialu bo wahai habe. Ti tandaga nolene timbuni mo mialu pani nelo miai habe.
2MA 1:29 Bamba bulebiraore lalu Mosesehanda bi lo wiyadagua bialu, Í̠naga wali agali dindi í̠nime tí ngulebero, lalu abale lo wiridagua bialu haru dai biai habe larama, lene.
2MA 1:30 Mani howa agali loma binigo mo miaga bu hearu tigua lotunaga iba gana maru lalu howa
2MA 1:31 loma biago irame dai hayagola Nehemaiahanda loma binigo mo miaga agali hearuhondo lamialu, Loma deledago dai kagola dindi ira minana daga biago ege to̱le̱ mbirani dugu wilimu, lene.
2MA 1:32 Ani layagola tigua dindi ogoni duguwa ege to̱le̱ biagoria wiyagola ira hungu o biagoria kilikulu lalu dene. Anigo ira lomabu delaga dabu heagoria ira hungu deago hongoheore dalu ege to̱le̱ni dayago ibu emene dege dene.
2MA 1:33 Ani biyago hondowa te dindi bibahendeha purogo lai hene. Agali Anduane Homogonaga loma binigo mo miaga garabaya helayaru tigua ira dene ogoni bamba mo doho heneya layago Pesia kini heago ibu hale hene. Ainde mani howa tigua ira dene hedo do hene uli biagoha dindi gede ibane bere wiaria hondowa tigua dindi uruni dugu yuwa loma delaga bini.
2MA 1:34 Ani bialu ka layago hale howa kini ibugua agali maru mbirale uruni bi henene layadabe ke̱ hayadabe hondole pudaba laya handala tigua de hondole ibini. Ani bialu kinihanda dindi ogoni hagira bu yaanda ho ngelalimu lene.
2MA 1:35 Ani bialu kini ibugua dindi ogoninaga dagisi muniru mialu howa muni maru ibu damene nenege bu karu talebu migi biaga hene.
2MA 1:36 Ai Nehemaia halu ibu damenerume dindi ginanebi ira daga ogoni mini Nebeda lene. Inanaga bi lalu, Domaga laga, wini. Anigo wali agali bibahende bu hearume dindi ogoni mini Nabada laga wini.
2MA 2:1 Mbuga ala tawe ngagoha howa bi ogodagua leda. Agali Anduane Homogonaga bi mana latagi haga Yaremaiahanda wali agali garabaya hearuhondo ira dene hedo do hene lalu te ayu hale harimago dege lene nga.
2MA 2:2 Ani bialu bi mana lo wini ngago embeda nahalimu lalu ibugua lawai halu hene. Ani bialu tigua mbirale bi pupu wule bigiya gime wabini yari bayaleru ngolo silibarume mo yaribia howa ngeledago deme hondowa dimagoli holene nawi. Ani bialu bigiya urunime tinaga miniha mo luluya helo holene nawi.
2MA 2:3 Ani bialu ibugua bi hongo howaore tihondo lamialu bi mana lo wini ngagoore embeda holomini nahalimu lalu lamini.
2MA 2:4 Ani bialu mbuga ogoniha te maru ledagome Yaremaia ibu mini Ngode Datagaliwabeha howa ibini mo yu howa ibugua latagi halu lalu tigua Ngode Datagaliwabenaga balai anda kago gialo yalu Habo Nalolene Bi lo winigonaga Mbogoyi ngagobi mo yalu ibu talima ibalimu leneya. Ani puwa hari nene bamba Mosese ibu irigi howa dindi Ngode Datagaliwabehanda Isaraele tí ngulebero lene biago handa amu halu hendene biagoria irigi heneya.
2MA 2:5 Ai Yaremaia ibu hari nene biagoha irigi howa handalu hearia ege gundu mbira ona wiaria hendene. Hondowa ibugua balai anda gialo yayagobi Habo Nalolene Bi lo winigonaga Mbogoyi biagobi ira hagua nga bilo inisenesi lomabu delaga dabu gialo yaygobi bibahende egeanda ogoniha mo do howa ege to̱le̱ mbirame panga payadai biniya.
2MA 2:6 Mani howa agali maru Yaremaia heba mandagi haga hearume hariga penedadagua pialu tigua mbirale uruni taya binigoyu tigua handa walia nahe dege hene.
2MA 2:7 Mani howa Yaremaia ibu hale halu hearia tigua mbirale uruni taya biyago handa walia nahe ka layago hale howa ibugua ti baba keba howa tihondo lalu, Wali agali mbirame mbirale uruni handa walia nahe dege kane Ngode Datagaliwabehanda ibunaga wali agali dara halu lone mo mogo bu heledangi handa walia holebira.
2MA 2:8 Horo ogoni birangi Ngode Datagaliwabehanda mbirale uruni panaga mo batagi ho ngelolebira. Ani bialu Ngode Datagaliwabenaga wá hongoheore tara bamba Mosese ibugua hendenegobi Kini Solomonohanda Anduane Homogonaga anda loma biahe kago ibunihondo mo loma bialu howa bi lalu hearia mo walia henegobibi mo walia harane hondolebere.
2MA 2:9 Inanaga mamalirume te maru ogodagua laya. Agali manda bayalewi Solomono heneyago ibugua Anduane Homogonaga anda gahenge panga dugualu howa horo timbuni ogoningi loma bo delalu heneya.
2MA 2:10 Ani bialu howa ibugua Anduane Homogohondo bi layagola ira dene daligaha howa ibira halu loma wiaru minana dai hene laya. O binidagoni bamba Mosesehanda Anduane Homogohondo bi layagola ira dene minana ibira halu lama wiago dene yadagua dege biniya.
2MA 2:11 Mosesehanda lalu, Loma ogoninaga budini mbira agalime nane wiagome loma ogoni irame daiore haya, leneya.
2MA 2:12 Horo ogoningi Solomono ibu turu timbuni ho howa horo halira lotu dege lalu haabo heneya.
2MA 2:13 Bi ayu iname gilibu wia haramago mbuga mbira Nehemaianaga Te laga ngagoha daga lalu hondolebere, lene. Nehemaia ibugua kini henerunaga te mo ngoai howa gilibu wiai halu bi Debidihanda lenegobi agali Anduane Homogonaga bi mana latagi haga henerume gilibu winirubi kini tigua mbirale lotunaga lalu bi laga binirubi bibahende mo ngoai ho winiya.
2MA 2:14 Ani buwa Nehemaiahanda ibu andagaha mo ngoai howa winiya. Mani howa nde Yudasahandabi anidagua dege biniyago irane wai timbuni biaru biyagome mbuga uruni mbira mbiraha wahaga biniyago ainde ibugua lone mo ilu mogobu wigi biniya. Mbuga uruni ayu iname yu kema.
2MA 2:15 Ainde tí mbuga uruni maru daga lole manda birimiyagua nde agali marume mo pu lalimu. Tigua mo yu dai bialu tini ngilo.
2MA 2:16 Ngode Datagaliwabenaga anda ibunihondo mo loma bia holene horo timbuni biago tagira ibiyadago. Ani ibiyadagola tíguabi nde horo ogoni tínaga turu ho holene horo mbira wiabagi hene wilimulonaga iname bi ogoni tí kemiria lo ibilarama.
2MA 2:17 Ngode Datagaliwabehanda ina garabaya hemaria haru halu dai biyago nai bialu ina mamalirunaga dindi wiago inanehondo ngiadai biya. Ibugua ina biamogo biyagome kini lone ho dai bialu loma binigo mo miaga agali hearume tinaga biabe bialu haga wiaru lone bialu ha biagola Anduane Homogonaga andaha lotu lolenebi lone wiadai biya.
2MA 2:18 Ainde Ngode Datagaliwabehanda wali agali abaleore dara halu wali agali dindi tara tara ngaruha haga haga bu kemaruni bibahende mo mogo bialu ibunaga dindi ibuhondo mo loma bia hene ngagoria haru dai bulebira lowa iname mini dunubia ho kema. Ibugua mbirale ko tara tara wiaruha hemaria haru dai bialu ibunaga anda kagobi lone mo bayale haya, lene.
2MA 2:19 Ayu iname te lamiyago damene mbirale Yudasa Magabeusuha biyarubi ibu hameneruha biyarubi Anduane Homogonaga anda mo gini bialu biabe bialu henerubi lomabu delaga dabu kago mo loma bia henegonaga tebi lami̱ya
2MA 2:20 Ani bialu wai timbuni Yuda tigua Andiogusu Ebipanese bababi ibu igini Yubadolabi binigonaga tebi hale hami̱ya.
2MA 2:21 Ani bialu Ngode Datagaliwabehanda Yuda wali agali tinaga mana ngago mo hongo holenaga wai bialu henerunaga tebi lami̱ya. Heneneore Yuda dewa ndo dege henego howa tigua waitigi bu hearu bope hai halu tinaga dindi bibahende bo yu dai biai halu waitigi hearu bo taliatagi hai halu bini.
2MA 2:22 Tigua Anduane Homogonaga anda dindi bibahende manda biaihe mini lene biago mo yu dai bini. Ani bialu waitigi Yarusaleme tanoha bu hearu bo hatagi halu bini. Ngode Datagaliwabehanda ibunaga dara holene timbuni inahondo mo walia hayagola birimagoni.
2MA 2:23 Bi Yasono ibugua mbuga taratara duriani gilibu wiyayaru uruni ina mbuga mbiraoreha mo biamaga ho ngelarogoni.
2MA 2:24 Ai mbuga ogoni lu hayagola ainde mali dagabi bi mana marubi mbuga ogoniha mo ngeledema. Ani bidagome bi kuniore ngago mbirale urunime wiapai haragola bi kuni dunini ngago taya bialu handawalia ala awene habe nahe kema.
2MA 2:25 Ina mbuga mbira mbirali mbuga ogoni daga larago ibu turu helobi maru mbirale tara tara ngaru lo manda bu harago ibu lo manda bialu tinaga miniha hengelobi gili bulene manda birigo ai gili bulebero. Ani bialu ayu maru bame daga laga karu biamogo bulene hamelo ko.
2MA 2:26 Bi damenego mo mogobu ngelowa lone mo tubagi holenego awedaga ndo ndelaheore mbira nga.
2MA 2:27 Marungi nde gendabiore wiagola mbiraga u napale biabe biaabo haruli. Mbiralime tomo timbuni wali agali íbu ngoai ho biruwa nole manda manda bialu biagadagua bialu biraruli. Biabe ogoni bulene awedaga ndo nga. Agali mbirago ibugua wali agali ibunaga tomo dawa ngago nalu birule ibiraru ti turu ho berelonaga baya hangu mo manda manda bu ngelaga ka. Manane ogonibi dege bialu ina wali agali mbuga ogoni dagalalu holebiraru mo turu hole manda buwa gili biru.
2MA 2:28 Agali mbuga ogoha te ngago gili binidago ibugua te luore gili lowa gilibu winiya. Anigo ina gili bialu howa mo tubagi howa gili bulene hame ledo.
2MA 2:29 I̱ agali anda biaga mbirame anda bialu howa anda bulene aguaore buleda lowa miniha genda tara tara yu howa bialu hagagobi ndo ko. I̱ agali anda bayale helo mo yári bia halu beni hiragogobi howa bero.
2MA 2:30 Mbirali ibu mamalinaga bi te baya hangu hale hole hamelo heagua nde te gilibu ngaruni baya hangu dagalalu manda bulene nga. Ibugua beba daga layago te ogoni henene binigo ngabe bame dege gilibu winidabe lalu maru karu hale holene nga.
2MA 2:31 Anigo mbirali te i̱na larogodagua lole kago ibugua genda yu holene nawi. Te lo gili nale howa bime mo tubagi howa lolene nga.
2MA 2:32 Anigo ai ogoria haru lalu i̱ninaga te gili bero. Bi damene mo walia halu ledagome te henene lo ngago bu dambi howa mo do holigo ai ogoria haru laro.
2MA 3:1 Oniasa ibu Anduane Homogonaga loma binigo mo miaga agali haguane timbuni heangi wali agali Yarusalemeha bu hearu ti bayale howa tigua bi mana lo wini wiaru baya hangu talialu hene. Oniasa ibu agali lotu lagane mbira howa mana ko bulene ngago damene ibu hame nalaga hene.
2MA 3:2 Kini agali maru dindi tara tara kaundia wiaruha howa Yarusaleme ibugu bialu tigua dabudabu muni dewaoreme yolo miaga wiaru Anduane Homogonaga anda mo yári bia helo migi bini.
2MA 3:3 Esia dindinaga kini mini Selugusu ibugua muni dewaore kini andaga muni wiaga wiagoha wiaru aria agali Anduane Homogonaga loma binigo mo miaga hearu tinaga lotu lalu lomabu delalu biabe biaga wiaruale bulene ngago yolo bigi bilo mini.
2MA 3:4 Ainde agali mbira Biliga aria mini Saimono henego ibu Anduane Homogonaga anda kagonaga gusugusu henego mbirale uruniha ngaru handaya ho haga henego ogoni ibugua loma binigo mo miaga agali haguane timbuni heago baba magedi ngago handaya ho hagane mana tiga nabi wiagola ogoninaga lai lalu hene.
2MA 3:5 Ani lalu howa Saimono ibugua loma binigo mo miaga agali haguane timbuni Oniasa kago ibugua bime bope habe naheyagola ibugua pialu Koelesiria dindinagabi Ponisia dindinagabi agali gabumane haguane Taraseusu igini mini Aboloniusu heago hondo pene.
2MA 3:6 Ani pialu Saimono ibugua Aboloniusuhondo Yarusaleme Anduane Homogonaga anda kagoha muni dewaore mo do ho ngago ogodagua nga lalu lamini. Muni anda biago ngago bibahende agalime daga labe naheore nga. Ani bialu muni uruni wali agalime tinaga loma mini ngago bolangua howa daligaore nga. Ani ngago kini ibugua muni ogoni ibu handaya ho holene erekui nabiore nga, lalu lamini.
2MA 3:7 Aboloniusu ibugua bi ogoni hale halu puwa kinihondo muni ogonidagua nga laya lalu lamiyagola kini ibugua agali mbira mini Heliodorusu ibunaga agali ho bamba hene heago lamialu muni uruni mo pu lene.
2MA 3:8 Ani laya handala Heliodorusu ibu heyalu abale pene. Ibugua ke̱ howa dindi maru Koelesiria tanobi Ponisia tanobi handama ibaga bule poro lalu puwa ibunaga bu miniha biabe henene bule heago wiado howa tara pene tingi halu pene.
2MA 3:9 Ibu puwa Yarusaleme anda piyagola loma binigo mo miaga agali haguane timbuni heagomebi Yarusalemenaga agali haguane bu hearumebi ibunaga mini yaraga hene. Ani biyagola ibugua bi mo do nahe ibu ogoale bule ibiru lalu tihondo latagi hene. Ibugua agali haguane hearuhondo bi Saimonohanda layadago henene layabe bame layabe lalu tihondo hale hene
2MA 3:10 Ani hale hayagola Oniasahanda Heliodorusuhondo lamialu lalu, Í̠na muni ayu te larego ogoni wali dalo ti agalini homene bedaru biamogo biagabi waneigini ti aba nahe karu biamogo biagabi nga.
2MA 3:11 Ani bialu muni uruni aria timbuni Tobaiasa igini Higanusu agali haguane heago ibunaga nga. Muni uruninaga genda magi manda kilogarama daosini nguira (15,000) wialu ngolo kilogarama daosini karia (7,000) nga. Ani ngago ainde agali Saimono ogoninaga bi layadagoni henene ndo layada, lene.
2MA 3:12 Ani lowa laabo halu lalu, Ainde wali agalinaga muni emene ngago ereba hayagua nde ko mbira tagira polebira. Tinaga muni Anduane Homogonaga andaha winidagoni irane anda ogoni mo loma biahene halu dindi bibahendeha mini leneore kago manda bialu winigo nga, lene.
2MA 3:13 Heliodorusu ibu bi Oniasahanda layago hale howa dege ibugua hongo halu muni uruni kininaga muni andaha anda pelo lalu kinihanda bi lo wiyagoria howa lo hongo hene.
2MA 3:14 Ani lowa ibugua horo mbirangi Anduane Homogonaga andaha anda puwa muni mbirale uruni de hondole lalu horo pongo wini. Ani layagola wali agalime mbirale ibugua biagadaru manga timbuni hene.
2MA 3:15 Agali Anduane Homogonaga loma binigo mo miaga hearu tigua tinaga biabe bialu karulaga aga wiaru mo karulowa Anduane Homogonaga lomabu delaga dabu heago kaware be abalu wiagoria palene. Ani paluwa Ngode Datagaliwabehondo wali agalinaga muni ibuhondo loma bia howa Anduane Homogonaga andaha mo wini ogoni baya hangu handaya ho habe lalu tigua bi lalu hene.
2MA 3:16 Wali agali tigua agali Anduane Homogonaga loma binigo mo miaga haguane timbuni heagonaga dengui hondowa ti gi timbuni hai hene. Ibunaga dengui heagome ibu genda yu heago mo walia hene.
2MA 3:17 Ibu gi timbu howa duru lalu heago hondowa wali agali tigua mitangi bialu, Ibu tandaga timbuni ho ka, lo manda bu hene.
2MA 3:18 Ani hondowa wali agali dewaore tini andagaha howa gerai laga laga bialu ibu hondole íbu ngoai hene. Ani buwa tiguabi nde agali ko karume tinaga Anduane Homogonaga anda kagonaga mana ngago pugualino gi timbuni ho howa tigua Anduane Homogohondo bi hongo howa lalu hene.
2MA 3:19 Walime dara ho howa karu lagane agaru karulowa tinaga andu bu yi nahe bame ibagabu hene. Wali uruni dewaore howa tanoha hariga wiaru henge nawiore ti hangu to̱lai hene. Wandari mabuage tini andagaha birado ho biraga berenerume tini andaga wahalu tagira pialu gerai tanonaga wai pabe heagohabi wai pabe panga heagohabi pugu pugu biai hene. Maru tamuha biruwa windoha handatagi hai ho birama pene.
2MA 3:20 Bibahendeme gi doladaga hai halu Anduane Homogohondo bi laiore hene.
2MA 3:21 Dara holene wali agalinaga bu miniha to̱lai hayagaola tigua dindini be abalu wiagoria paluwa Anduane Homogohondo bi hongo howa lalu hene. Anduane Homogonaga loma binigo mo miaga agali haguane timbuni heago ibu gi timbuni ho howa durulalu hene.
2MA 3:22 Anduane Homogohondo muni dabudaburu wali agalime ibunaga andaha ngaru baya hangu handaya ho habe lalu tigua bi hongo howa lalu hene.
2MA 3:23 Tigua Anduane Homogohondo bi ogoni lalu heagola Heliodorusu ibu gi nahe ibu bule manda bu heago bialu hene.
2MA 3:24 Ibuni heba ami agali ibuni mamage haga bu hearu haru halu Anduane Homogonaga andaha muni wiaga wiagoha anda pene. Ani piyagola Ngode Datagaliwabe ibu bibahendenaga hongo haihe howa dindi bibahendeha bu karu handaya ho howa haru hai haga kago ibunime dama timbuni mbira ibiradagua ibini. Ani biyagola agali haguane maru Heliodorusu heba ibiyaru tigua Ngode Datagaliwabenaga hongo gibiore handa walia halu tini luluyu ibagabu hai hene. Ti gi timbuni howa dindini pilo ibiraho wiai hene.
2MA 3:25 Ai Ngode Datagaliwabe ibuni agali hongohe mbira haradagua bialu nogo hosini yári biahe mbirani berearia hendene. Nogo hosi ogonime gerai lalu ibuwa Heliodorusu pogola ba howa geni hengeda hene. Agali nogo hosini biralu ibiyagoni ibunaga wai biagane yári ngolome wabini karu learia de hendene.
2MA 3:26 Ani bialu igiri daliahe kirali Heliodorusu hearia ibiyago hendene. Libu agali hongoheore howa libunaga yári bayaleore karuleago hendene. Agali kira ogonilabome Heliodorusu abene talebu howa mo ko howa balu hebiria hendene.
2MA 3:27 Ibunaga de mborere biyagola ibu dindini odope hene. Ani biyagola ibunaga agali haru hayarume balai anda danginime lebera buwa ogoriani mo pale lowa
2MA 3:28 mo yalu pene. Ani biyagola agali ibunaga ami agali dewaore haru halu muni andaha haru anda pole manda biyago ibuha mo ko holene abale ngola hene. Tigua agali homene tingini mo yu tagira poradagua bini. Ani biyagola Heliodorusu ibugua Ngode Datagaliwabe ibu bibahendenaga hongo haiheore ka lo manda bini.
2MA 3:29 Heneneore Ngode Datagaliwabenaga hongome agali ogoni bope halu dindini paliape helaya. Ani bialu ibu bi labe naheore wialu ibu lone karulapobe nahe wini.
2MA 3:30 Anduane Homogo ibunime agalime nabiaganeale hongohe mbira ibuni andaga biagoha howa biyagonaga Yuda wali agali tigua Ngode Datagaliwabenaga mini mo yaraga halu hene. Pigane wali agalime tinaga miniha genda timbuni ho howa gi halu Anduane Homogonaga andaha ibalu to̱lai hene. Ani binigo mani mo beregedalu gi holene wiyago turu holene timbuniore anda biagoha to̱latagi hene. Ngode Datagaliwabenaga mini yaraga halu henego irane Ngode Datagaliwabe Bibahendenaga Hongo Haiheore kagome ibunaga hongo taraore mo walia hayagonaga turu hene.
2MA 3:31 Agali maru Heliodorusu nenege hearu Oniasa hearia ibuwa Heliodorusu mo ko nahelo Ngode Datagaliwabehondo bi lahabe lama ibini. Ibu homoligo bi lahabe lalu lamini.
2MA 3:32 Ani layagola Anduane Homogonaga loma binigo mo miaga agali haguane timbuni Oniasahanda mitangi bialu Kinihanda Heliodorusu Yuda wali agalime bo wahayada lo manda buligonaga Oniasa ibugua Anduane Homogohondo Heliodorusu biamogo bibe lalu bi la hene.
2MA 3:33 Oniasahanda ko domolenenaga loma bo delalu heagola igiri daliahe kirali biagolabo lone ibini. Libu yári mbiraoregobi karulowa ala hayagobi dege ibini. Libugua ibalu Heliodorusu deni heyu howa ibuhondo lamialu lalu, Anduane Homogonaga loma binigo mo miaga agali haguane timbuni Oniasahondo ka̱i̱ lolene nga. Ibugua loma bo delayagome í̠ Ngode Datagaliwabehanda bo wanahe helo yupe hayago ndobe.
2MA 3:34 Ayu í̠na pialu wali agali bu karu bibahende hale hai helo Ngode Datagaliwabenaga hongo ogobi winiyagome i̱ pani ngialu baya lalu lamima pole pu, lene. Libugua bi ogonidagua lalu libuni pu ereba hene.
2MA 3:35 Ai Ngode Datagaliwabehanda Heliodorusu ibu homelo bo wahabehego nabayagonaga ibugua Ngode Datagaliwabehondo lomabu mini. Ani bialu ibugua Anduane Homogonaga loma binigo mo miaga agali haguane timbuni Oniasala gi tigani bialu kini hearia ibunaga ami agali biaru heba dai bini.
2MA 3:36 Dai buwa Heliodorusu ibugua te bibahende Ngode Datagaliwabe Daligaorene Daliga kagome agalime nabiagane ale ibuni deme hondo heagola biyaru bibahende wali agali hale hai helo lamiai hene.
2MA 3:37 Ai kini ibugua Heliodorusu hale halu, Ibugua agali abialeme Yarusaleme pu lolene karulapebe lalu hale hayagola Heliodorusuhanda ladai bialu lalu,
2MA 3:38 Agali í̠naga waitigi ho mbira heaguabi í̠naga gabumane mo ko hole manda bu mbira heaguabi ogoniale kago dindi ogoniha pelo pu labe. Ani pelaregola ibu pu ereba nahe bayale dai biyagua nde mbirale tibume bo baulo wahe mbira ibiradagua bialu ibulebira Ngode Datagaliwabenaga hongo tara mbirame ibunaga anda ogoni mamage haga heagome ina bame agali dege kamarume polenego nakarulapeya.
2MA 3:39 Ainde Ngode Datagaliwabe dahuliya andagaha haga kagome ibunaga anda ogoni baya hangu mamage ho haga mbira wia. Ani wiagola agali mbira ibula mini ko wuyu ibirago mo ko howa minu bagaya, lalu lamini.
2MA 3:40 Ai Ngode Datagaliwabehanda Heliodorusu mini balu ibunaga andaha muni wiago baya hangu handaya ho henegonaga te ogoni hangu.
2MA 4:1 Pigane Saimonohanda Aboloniusu hearia Anduane Homogonaga andaha muni ogodagua nga lalu bi dibudibu lo yu piyagome tiha mo ko holene dewa anda ibalu dindi bibahendeha ibai haya lalu te larugoni. Ainde Saimono ogoni ibugua dege wali agali mo hondo howa ke̱ halu lalu, Oniasahanda Heliodorusu mo ko hayagome dindi bibahendeha mo ko holene anda íbu nga, lalu lamiai halu hene.
2MA 4:2 Ibugua bi ke̱ holene urunialego Oniasahondo bameore laede holene gi naheore howa lalu hene. Ibugua lalu, Oniasahanda gabumanenaga biabe bulene ngago mo ko hai haga ka. Anigo Oniasa ogoni ibugua Yarusaleme ngago baya hangu mo bayale howa handaya ho halu ibu damene bu karu handaya ho halu buwa dindi ogoninaga mana ngago wali agalime baya hangu taluwa bialu helo mo hongo halu haga ka.
2MA 4:3 Saimononaga waitigi holene mana wiago pu timbu heagola ibu baba haga agali mbirame wali agali dewaore homelo bo wahaga bialu heagola
2MA 4:4 Oniasa ibugua manda bialu waitigi holene mana ogoni pu hongo hayada lo manda bini. Ani bialu Menesedesu igini Aboloniusu kago ibu Koelesirianaga gabumane agali haguanebi Ponisianaga gabumane agali haguanebi kago ibugua Saimonohanda mana ko ogonidagua bialu helo mo hongo hayada lo manda bu hene.
2MA 4:5 Ani bialu ibunime kini hondole pene. Ibugua wali agali ibu damenerume ko biya lole ndo ibugua ibunaga wali agalinaga mbirale wiarunaga genda yu howabi Yuda dindiha agali mbira mbira hearunaga genda yu howabi kini hondole pene.
2MA 4:6 Ibugua mitangi bialu, Ainde kini ibugua keba ogoni mo home lolenego mbira nabi heagua nde gabumane biabe bulene ngago damene bibahende mo ko hai halu Saimono ibugua lulu biabe bialu kago pu hongo holobada, lo manda bini.
2MA 4:7 Kini Selugusu homayagola Andiogusu ibu mini Ebipanese lagago ibu kini ho aribia hene. Ani howa tigua Oniasa hamene Yasono ibu Anduane Homogonaga loma binigo mo miaga agali haguane timbuni helo dabo helene. Anigo Yasono ibugua biabe ogoni bulenaga kini mo hondo howa biabe ogoni mo yini.
2MA 4:8 Ibugua muni siliba daosini dege genda magi kilogarama haleria (13,000) ala mialu lone mani daosini dege tebira (3,000) ibunaga biyinaya biragome igini wirago mule lene.
2MA 4:9 Ani bialu kini ibugua ibunaga bi larago hale halu igiri dalihe bu karu tinaga gini biaga hama mbira godo wia layagua nde siliba muni daosini duria (5,000) lone tago halu mulebero lene. Ani bialu ibugua kinihondo hale halu, Yarusaleme wali agali tano dunini timbuni Andiogo ngagonaga dindi aba ka lalu latagi ha, lalu kini hale hene.
2MA 4:10 Ani hale hayagola kini ibugua, Yasononaga bi layadago karulape, lene. Kini e̱ lalu Anduane Homogonaga loma binigo mo miaga agali haguane timbuni dabo helayagola ibu agali haguane timbuni ani howa ibugua abaleore Yuda wali agalime Giriginaga mana ngago bidaba lowa wali agali genda mo ya halu hene.
2MA 4:11 Ani bulenaga pigane tigua bi bamba Yone heangi Yuda wali agalime karulape lo winidago ala mo waholene nga. Yone ogoni bamba Lomo wali agali baba Yuda wali agali nenege hami̱ya lalu habo nalolene bi lo wiyago lolenaga bi lo yalu Yone ogoni igini Yubolemusu ibugua pene. Ai Yasono ibugua mana lowinigo mo bagi howa mana maru bi mana ala lo winidagola wai bi wiaru mo wini.
2MA 4:12 Ibugua abaleore gini bulene hama mbira Yarusalemeha wai pabeanda hongohe heago kawareni mo ngelowa igiri daliahe agali haguane hearu igini hearume gini tara tara maru biawai helo dabo helaga bini.
2MA 4:13 Ani bialu agali ko loma binigo mo miagaore ndo ke̱ howa dabo helene Yasono ogoninaga biabe ko biyago bia timbu halu Giriginaga manabi dindi tara taranaga manabi pu timbuore hene.
2MA 4:14 Ani biyagogali Anduane Homogonaga loma binigo mo miaga agali hearumebi tinaga biabe lotunaga bialu haga wiaru manga halu wahai hene. Tigua Anduane Homogonaga anda erembira mialu loma bu miaga wiago embeda halu piai hene. Ai agali loma binigo mo miaga uruni tigua lotu maname gini tara tara nabibe lene ngaru bulenaga gini uruni bule mbelo pu laruagola tigua ala gini hama ngagoria pu haga hene.
2MA 4:15 Tigua ti maru agalirunaga mbirale bayale wiaru damene yu wahai halu pene. Ani puwa tigua gini uruni bialu Girigi wali agalinaga mbirale wiaru mule hamelo haga hene.
2MA 4:16 Anidagua bialu hearia genda timbunioreme Yuda wali agali minini. Tigua hongo howa Giriginaga mana wiago bialu heago helowa ainde Girigi tigua Yuda wali agali baba waitigi ho hene.
2MA 4:17 Heneneore Ngode Datagaliwabenaga bi mana ngago mo wahalu polenego mana bayale ndo nga. Te ayu lolebiragome mo walia halu bi lolebira.
2MA 4:18 Mali duria bolangua haragola tigua gini tara tara biaga wini. Gini ogoni Taia tanoha birangi kini ibuni hondo pugu biaga hene.
2MA 4:19 Ai agali ko Yasonohanda gini ogoni bulene horo tagira ibirangi ibugua agali maru Andiogo dindi aba lalu heneru Yarusaleme minini howa maru gini ogoni bu pelo dabalu pelaga hene. Tigua mbirale dama mitangi bialu bi pupu wiaga mini Hegulusu ibunaga loma muni siliba genda magi kilogarama daosini dege pira (10,000) lomabu yu piaga wini. Anigo agali uruni tigua muni uruni loma mulene hame nale haga. Tigua muni ogonime biabe tara bulene karulapeda lo manda biaga hene.
2MA 4:20 Tigua muni ogoni mbirale bi pupu wiaga ogoninaga lomabu mule yu puwa ainde tigua wai biaga iba sibi wabini.
2MA 4:21 Pilomedo ibu nde Iyibi dindiha kini hene. Ibu pigane kini hayangi Yuda wali agali tigua agali mbira mini Aboloniusu Menesedesu igini heago tinaga minini pu lene. Ainde Kini Andiogusu ibugua hale halu hearia Kini Pilomedohanda ibunaga gabumane biabe bialu kago turu nahe ibunibi handabe manga ho ka layago hale ho hene. Ani layago hale halu Kini Andiogusu ibugua miniha genda halu mini burugu timbuni lalu howa ai ibu Yoba tano pialu mani Yarusaleme puabo hene.
2MA 4:22 Ani piyagola Yasono halu Yarusaleme wali agali bu hearume ibu ibirida lalu mo turu timbuni hene. Tigua ira hungu dalu heaoreru hedo yu howa tigua ibuhondo turu howa hoaro laga laga bialu hene. Ani pialu mani howa Andiogusu ibu andaga dai bialu howa ibunaga ami agali dewaore dindi mbira Ponisia wiagoria helene.
2MA 4:23 Mani mali tebira howa Yasono ibugua Menelausuhondo muni maru kininaga yu pialu ibugua mbirale gahenge maru bide manda buwa kini ibugua bia e̱ lelo hale hole pu lalu bini. Agali Menelausu ogoni ibu agali abale Saimono te larimago hamene hene.
2MA 4:24 Ani pu laya handala Menelausu ibugua kini berearia anda puwa ibugua kini bime baya hangu la debodebo bialu ibu agali haguane mini lene timbuni hene mbirame bi letingi howa bi lalu hene. Ani lalu howa ibugua kinihondo lalu siliba muni ala Yasonohanda kini ngule lalu bi lo wiyagodagua mialu ibugua siliba genda magi pira lone dambi howa ngulebero lalu kini lamini. Ani layagola kinihanda Menelausu ibu Anduane Homogonaga loma binigo mo miaga agali haguane timbuni helo layagola ibu ani hene.
2MA 4:25 Menelausu ibu kinihanda agali loma binigo mo miaga agali haguane timbuni holenenaga bi e̱ lalu karulape laya handala biabe ogoni bule dai bini. Anigo ibu agali biabe ogoni bulene karulape ndo hene. Ibu agali keba abale tungulope halu biangome hayule dua lalu hagagobi hene.
2MA 4:26 Ainde Menelausu ibugua biabe Anduane Homogonaga loma binigo mo miaga agali haguane timbuni ogoni ibu hamenenaga winigo Yasonohanda mo pagebu yu hayadagua ibuguabi nde Yasononaga mo page bu yini. Ani biya handala Yasono ibu ibida Amono dindiha hama pene.
2MA 4:27 Ani peagola Menelausu ibu Anduane Homogonaga loma binigo mo miaga agali haguane timbuni howa biabe bialu hene. Ani bialu ha howa dege ibugua kinihondo muni ngule lalu bi lo wiyago nami dege hene.
2MA 4:28 Kininaga ami agali haguane mbira mini Sosaradusu Yarusaleme ami agali hearu haru haga henego ibugua Menelausuhondo hale halu ibugua dagisi mima ibaga bulene wiyadago ainde kini muni mule wirigo ngi, lene. Ani hale hayagola Menelausu ibugua nami hene.
2MA 4:29 Ani heagola kini ibugua libu haru mandagi bi lo tiga bule ibidaba lalu olene. Ani laya handala Menelausu ibugua agali mbira ibu hamene mini Lisimagusu heagome ibu pedaha ibunaga biabe bulene ngago bia aribia halu habe lene. Ani bialu ami agali haru haga agali haguane Sosaradusuhanda ami agali mbira mini Karadese ibu Saibarasali henego ogonime ami agali haru ha aribia howa handaya ho helo dabo helalu pene.
2MA 4:30 Uruningi kini ibugua tano kira Tasusula Malusula ibu one yapara hene halu mende berearu aria mbira mini Andiogisi bereago mo miyagola wali agali tano kira ogoniha haga bu hearume wai ho hene.
2MA 4:31 Ani ka layago ibu hale halu ibugua agali haguane mbira mini Andoronigusu heagome gabumane biabe ngaru handaya ho habe lalu ibunime wali agali tano kira biago laboha wai hayadago mo tiga bule abale pene.
2MA 4:32 Menelausu ibugua manda bialu kini bime baya hangu la debodebo bulene henge ayu o ngagonida lo manda bu hene. Ani manda buwa ibugua gabo be ngolome wabini Anduane Homogonaga andaha wiaru mo page buwa Andoronigusu mo mini. Ani bialu ibugua gabo be maru tanoha wali agali hearubi wali agali tano kaware wiaruha bu hearubi mo migi biriya.
2MA 4:33 Menelausu ibugua biyago Oniasa ibugua goaru handalu hearia henene anidagua biniyago handa walia haya handala Oniasa ibu ibida pialu Andiogo tanoha lotu anda mbira heagoha hado ho howa ibugua mana ko Menelausuhanda biyadago tiga tiga latagi halu hene.
2MA 4:34 Ani lalu heago Menelausu ibu hale howa ibugua ohowa Andoronigusula bi lene. Bi lalu ibugua hongo howa Oniasa homelo bo waholenaga bi lalu hene. Ani lalu Andoronigusu ibugua Oniasa hearia puwa ibugua mo gede howa bi lalu hene. Ani lalu, Hambi-o bayale kebe, lowa ibugua ke̱ howa ohalu Oniasa ibuha mo ko holene mbira nawi lowa bi lene. Ani lalu heagola Oniasa ibu bi ogoni mo henene nahe howa dege Andoronigusu ibugua baya hangu la debodebo biyagola ibu lotu andaha howa tagira pene. Ani tagira ibiyagola Andoronigusu ibugua mana bayale ndo lehe ngago biruda lo manda nabi howa ibugua Oniasa homelo bo wahene.
2MA 4:35 Andoronigusu ibugua mana lehe ogoni bialu ka layago hale howa Yuda wali agalinaga miniha mogo timbuni lalu gi ho hai hene. Wali agali bi tara tara lagane dindi tara taraha bu hearubi mogo lalu gi ho hai hene.
2MA 4:36 Ani howa ai kini ibu Silisia dindiha lone dai biyagola Yuda wali agali Andiogo dindiha haga hearubi Girigi wali agali hearubi tigua mana lehe ko Andoronigusu ibugua Oniasahondo bialu ibu homelo bameore bo wayagonaga keba timbuni halu ti Oniasa dara ho kema lalu lamini.
2MA 4:37 Andiogusu ibuguabi nde Oniasa dara timbuniore halu de iba ibu deha howa pugu lalu hene. Oniasahanda ibuni nahome heangi biabe bayalebi mana bayalebi bialu haga wiaru mitangi biai hene.
2MA 4:38 Ani howa Kini Andiogusu ibunaga miniha keba timbuni halu ibuni hunguale dalu heagola ibugua Andoronigusunaga mini daliga mini lene heago bope halu dinini daliga heago mo wahai hene. Ibugua Andoronigusunaga aga karulo haga karulo heago golo wahai howa tanoha wali agali bu hearume de handai helo haru ibaga biai hene. Ani bialu tigua haru puwa Andoronigusuhanda bi henene letingi howa Oniasa mo hondo howa bayagoria ibalu tigua Andoronigusu homelo bo wahene. Anidagua bialu Ngode Datagaliwabehanda Andoronigusu mana ko biyagonaga pani nelo anidagua mo mini.
2MA 4:39 Lisimagusuhanda ibu hamene Menelausunaga bi hale halu ibugua Anduane Homogonaga andaha biabe biaga gabo be bayale ngolome wabini wiaru mo kayu yaga bini. Ainde ibugua gabo ngolome wabini uruni ani mo page yai halu ka layago hale howa wali agali tigua Lisimagusu heagoria mo mogobu howa keba halu hene.
2MA 4:40 Tigua keba timbuni howa wai bule manda bu hene. Ani bule heagola Lisimagusuhanda ibunaga ami agali daosini tebira (3,000) wali agali baba wai bule ibidaba lalu olene. Ami agali uruni haru bamba haga agali waheale mbira ibu mini Auranusu hene. Agali Auranusu ogoni ibunaga mana ko ngubiore biaga hene.
2MA 4:41 Ami agali ibiyagola Lisimagusuhanda ibidaba lene ibiyada lowa Yuda wali agali ti manda biai hene. Ani manda buwa wali agali tigua ege to̱le̱bi namabi ira punga be abalurubi dugualu Lisimagusu halu ami agali uruni heagoha bape lalu uruni mo luluya hai hene.
2MA 4:42 Anidagua biyagola ami agali biaru mo ko hai howa mo luluya hai hayagola dewa homai haya handala dewa ibida piai hene. Ani bialu Lisimagusu ibuni Anduane Homogonaga andanaga hobane muni anda heago kawareni balu bo homa hene.
2MA 4:43 Lisimagusuhanda mana ko bialu hayagonaga wali agalime Menelausu manani howa mo tale bini.
2MA 4:44 Ai kini ibu Taia tanoha ibu heagola Yarusalemenaga ganisolo hearume agali tebirali dabalu Menelausuhanda ko biya lalu kini lamule pudaba lene.
2MA 4:45 Ani layagola Menelausu ibugua godi deni mo beregedalu bulene mbira nawioreyane hendene. Ani hondowa ainde ibugua Dorimenese igini Tolemi ibugua kininaga mini mo beregedalu ibu yupe hayagua nde ibugua muni dewaore mule manda bini.
2MA 4:46 Ani manda biyagola ai Tolemihanda kini ibu tamuha godi hale halu berenego ai tagira emeneore ha̱lo hole tagira íbu lalu lamini. Ani tagira ibiyagola kini ibunaga mini beregedo ka lo manda buwa Tolemihanda kini bime baya hangu la debodebo bialu hene.
2MA 4:47 Ai agali mana ko biaga uruninaga anduane teneore Menelausunaga godi hale hai hene. Ani hale hai howa kini ibugua lalu agali tebirali Menelausu godini haru piaga biaru tini homelo bo wahadaba lene. Ani layadagoni mana ko nakarulapeore Sidia wali agali tigua binigo emene nira dege lowa ko timbuniore bini.
2MA 4:48 Tigua agali tigabi tebirali tiha ko bini mbira nawiore howa tigua bi tigabiore lalu Yarusaleme biamogo bialubi wali agali biamogo bialubi Anduane Homogo andanaga gabo be ngolome wabini biarubi uruni biamogo bialu bi layago bameore homelo bo wahai hene.
2MA 4:49 Taia wali agali tigua mbirale urunidagua biyago de hondowa ti mogolo hai hene. Ani buwa tigua agali tebirali uruninaga tingini ti daluha agali haguane heneru hora hagadagua mo hora hene.
2MA 4:50 Agali haguane bu hearu ti muni hangu garali bialu taya biaga heagome ai Menelausu ibu ibuninaga biabe bialu haga wiago bialu hene. Ani bialu heagola ibunaga mana ko wiago pu timbuore hene. Ani bialu wali agali ibuni damene bu hearunaga waitigi timbuni ho bamba hene ibuniore hene.
2MA 5:1 Ogoningi dege Andiogusu ibugua Iyibi baba wai lone bialu hene.
2MA 5:2 Yarusalemeha wali agali bu hearu tigua manane tara mbira harini hearia handa walia howa horo pira mariani (40) hondo haabo hene. Tigua hondo hearia ami agali dewaore nogo hosini biralu gerai lalu puíbu bialu hearia de hendene. Ami agali maru nde danda timu yandareru wai biagane ayu tiburubi yu hearia de hendene.
2MA 5:3 Ami agali nogo hosini biruwa wai biaga hearume wai pora bule manda manda buwa ona tidiyu haga haga bini. Ani heagola ami agali maru geni pialu wai biaga hearu tigua lene labo laboha tidiyu haga haga bini. Ani howa wai bialu hene. Wai bialu howa wai biagane ayu tibubi yandare wai humbirume kilingele tilitola lalu wai timbuni uru ba hagahaga bini. Hona ni do wiagoria ami agalinaga wai yári taraore de mborerebi hene.
2MA 5:4 Ani biyagola wali agali tanoha bu hearume Anduane Homogohondo bi lalu mbirale manane ogoni heneneore mbirale bayale mbira mani tagira ibilonaga bi lalu hene.
2MA 5:5 Bi dibudibu mbira lama ibiyagome lalu, Kini Andiogusu homaya lene hale hene. Ani biya handala Yasono ibugua ami agali daosini mbira (1,000) haru halu puwa Yarusalemeni wai bini. Wai bialu Yasono halu ibunaga ami agali biarume Yarusaleme agali maru wai pabe neneni mamage haga hearu bo taliatogo lalu tano ti karulai hene. Ani biyagola Menelausu ibu ibida pialu tanoha ami agalinaga wai pabeanda hongohe heagoha ha do hene.
2MA 5:6 Ani biyagola Yasono halu ibunaga agali biarume tano bibahendeha pugu pugu bialu tini aria bu hearu homelo bo wahai hene. Ainde Yasono ibugua wali agali ibuni dameneore bu karu homelo bo wahai haruyagua nde mani ibunaga hongo pirilape halu ibira holobada lo manda nabi ibu mini tigabi nawiore hene. Ibu dameneore bu hearu waitigi handaradagua bini.
2MA 5:7 Anigo Yasono ibugua gabumane haru holenenaga hongo nawi hene. Ani howa ibugua mana lehe ogonidagua bialu henedagome ibuniha taga mo yu anda ibiyagola ibuni hado hole Amono dindiha puwa hado hene.
2MA 5:8 Ani pu heagola mani howa Arebia dindinaga agali haguane mini Aredasahanda garabaya andaha helowa mini bayagola mo ko hene kuduguhe hene. Ani howa mani ibu ibida pialu tano wiaruha hadoho haga hene. Ani howa ibugua mana pugualu hearia wali agali tano uruniha hearume ibu baba keba howa bo talima ibaga bialu hene. Ibugua mana ko bialu wali agali ibuni dameneore hearubi ibu baba dindi mandagi haga hearubi ta nabi bo hilo wahai haga hayago manda bialu tigua ibuhondo turu nahe hene. Ani biyagola mani ibu Iyibi dindiha ibida pialu hado hene.
2MA 5:9 Ani halu mani Yasono ibu Iyibi wahalu iba sibini biralu Sabarada tano pole pene. Ibugua lo mitangi bialu Sabarada wali agali Yuda nenege kagome ibu dara halu baya hangu haru howa handaya ho holobabe toba howa pene. Anigo ibuni dindi kaundia ogoniha heaore dege homene. Agali ogoni ibugua ogonidagua bialu wali agali ibuni daluha ibu damene bu hearu bo talia hole bialu ibunibi agali mini nawi ko mbirago homaradagua bini.
2MA 5:10 Yasonohanda wali agali dewaore homelo bo wahai heneru mo hora habe naheore tingini bame dindini wialu wu togo biai helene. Ani binigonaga mani ibuni pani nolene wiago nene. Ibu homayagola dara holene mbira nahene. Ibunaga homali bulene mbira naheore wialu ibu mamalirunaga homaliha mandagi hora hole mo yu dai bulenebi mbira nahene.
2MA 5:11 Mbirale uruni biya layago te Andiogusu ibu hale ho howa ibugua lo manda bialu Yudiaha wali agali bu hearume wai bule heyu kada lo manda bini. Ani manda buwa ibunaga bu miniha tandaga timbuniore ira hungu ale bialu helo hene. Ani keba ho howa ibugua Iyibi wahalu abale puwa wai timbuniore u napalene Yarusalemeni bialu bo podahana halu tano karulene.
2MA 5:12 Ibugua ibunaga ami agaliruhondo lamialu lalu, Wali agali lenego bibahende harigani ngola haramigobi andagaha birado karia handa walia haramigobi bibahende dara nahe homelo bo wahai halimu, lalu lamini.
2MA 5:13 Ani layagola tigua puwa igini emene hearubi agali waheale biru wiarubi wali berearubi waneigini gali andu naga berearubi bibahende homelo bo wahai hene.
2MA 5:14 Horo tebira hanguni Yarusaleme wali agali daosini dege pira halira (80,000) bibahende amo lelene. Daosini dege pira maria (40,000) homelo bo wahai halu daosini pira maria (40,000) mende garabaya haru piai hene.
2MA 5:15 Anigo Andiogusunaga keba ereba nahe wiaabo dege hene. Ani keba ho haabo howa Anduane Homogohanda dindi bibahende wiaru dege dombene anda ibunagaore loma bia hene helo loma biahe heagoha anda pene. Ani piyagola Menelausu libu haru anda pene. Menelausu ogoni agali Anduane Homogo erembira mialu ibuninaga damene biaru erembira miaga biago libu haru anda pene.
2MA 5:16 Andiogusu ibu Anduane Homogo deni bayale ndo dodohe heago howa ibugua andaga tamuha gabo wiaru gime mo yalu pene. Ani bialu mbirale bayale tara tara kini maru hearume Anduane Homogonaga mini mo yaraga halu bame migi bini ela nahaga loma biahene wiarubi mo ya dege bini.
2MA 5:17 Andiogusu ibugua mine gibiore hene. Ibugua Ngode Datagaliwabehanda Yarusaleme wali agalihondo keba emene tigi mbira hangu haga kago manda nabiore hene. Wali agali tigua mana ko bialu heagonaga Anduane Homogohanda ti mo ko helo Andiogusu ibilalu Andiogusuhanda Anduane Homogonaga anda mo ko helo yupe hene.
2MA 5:18 Ainde Yarusaleme wali agali tigua mana ko nabinidale nde Anduane Homogohanda Andiogusunaga miniha mo talola halu mo luluya ho heledale. Bamba Anduane Homogo ibugua agali mbira mini Heliodorusu heago Amduane Homogonaga andaha muni agua ngabe hondo wule pu lalu Kini Selugusuhanda pelayangibi nde ani dege bini.
2MA 5:19 Ngode Datagaliwabehanda wali agali Anduane Homogonaga anda biamogo bilo dabo helene ndo ibugua wali agali biamogo bialu Anduane Homogonaga anda helene.
2MA 5:20 Ani binigome anda biago wali agali heba mo ko hamaga halu mani lone wali agali heba bayale hadai biamaga halu mini lene hamaga hene. Anduane Homogo Bibahendenaga Hongo Haiheore kago ibugua keba ho kangi ibunaga anda kago mo embeda haga ka. Mani ibunaga keba holene ereba harangi ibunaga anda kago lone mo bayale haga ka.
2MA 5:21 Andiogusuhanda muni siliba daosini pira waragaria (60,000) Anduane Homogonaga andaha wiago mo pagebu yalu abale Andiogo tano dai bini. Ibu lulu taraore mbirago howa ibugua mitangi bialu iba sibi bame iba mu ngagoria pialu ami agali iba solowarani gehalu polebira lo manda biniya.
2MA 5:22 Ibugua kiabe agali maru Yuda wali agali tandaga mo mialu helo dabo helene. Ibugua agali mbira Pirigiali mini Pilibi heago Yarusaleme kiabe helo dabo helene. Agali Pilibi ogoni ibu minehe koore howa mana ko ibugua biagago Andiogusuhanda biaga wiago bolanguahe hene.
2MA 5:23 Kini Andiogusuhanda agali mbira mini Andoronigusu heago hari bare Gerisimi heagoha kiabe helo dabo helene. Ani bialu agali mbirabi daba dege binigo mini Menelausu. Agali ogoni ibugua wali agali ibuni damene bu hearu genda timbuniore kiabe agali kira biago labome miyago emene dege lowa mo mialu haga hene. Andiogusuhanda Yuda wali agalihondo keba timbuni halu howa
2MA 5:24 ibugua agali mbira mini Aboloniusu ibu Misia dindinaga ami agali haru haga haguane heago ibunaga ami agali daosini dege pira kirani kira (22,000) hearu haru halu Yarusaleme pelene. Pelalu howa Andiogusuhanda tihondo lamialu lalu, Agali damenego bibahende bo hilo wahai halu wali waneigini minalu garabaya haru hai halimu, lene.
2MA 5:25 Ani laya handala Aboloniusu ibu pialu Yarusalemeni anda pu howa ibugua ko mbira nabi bayale hole tingi ho hene. Ani howa Sabada horongi hayagola Yuda wali agali biabe nabi bame ha̱lo bereagola ibugua ami agali hearuhondo lamialu ibu de hondoliya tano tagirahayagi ho dugubu hole pudaba lene.
2MA 5:26 Ani howa wali agali ami agali biaru ti ho dugu buwa tidi yu ibaga bialu heago hondole tagira ibiyaru homelo bo wahai hene. Ani bialu mani ami agali biarume tanoha anda puwa wali agali dewaore homelo bo wahai hene.
2MA 5:27 Anigo agali mbira hangu mini Yudasa Magabeusu henego ogoni dege agali diriali heba pora bialu ibida dindi ko wali agali nahaga wiagoha pene. Ti pialu hari bare ko wiagoha howa tomo ega tiarume nalu biraga wiaru nalu hene. Ti tomo irabuha minana ira yuni lini tara tara wiaru nalu hene. Tomo tanoha wini ngaru naramagola Yuda wali agalinaga mana lo wini ngaru mbirago pugualino ani hene.
2MA 6:1 Tigi mbira dege howa mani kini ibugua Adene tanoha agali haguane mbira heagome Yuda wali agali tinaga mamali mana ngago wahai helonaga genda lone dege mo mule pelo dabalu pelene. Kini ibunaga hameme Yuda wali agali tigua Ngode Datagaliwabenaga mana ngago talialu nahelo hame lene.
2MA 6:2 Ani lowa kini ibugua agali ogonihondo lamialu, Yarusalemeni Anduane Homogonaga anda kago mo dodohe helalu Hari Olimbusunaga dama mitangi bialu bi pupu wiaga mini Susu anda ogoniha mo aribia ho wibe, lene. Ani laya handala puwa ibugua wali agali ogoniha hearunaga mana wiaru talialu Hari Gerisimini Susuhondo bi pupu wiaga anda heago mini, Anda ogoni Susunaga. Susu ibu tarali tagiraha howa íbu hene karunaga nenege kagoni, laga hene.
2MA 6:3 Kini ibugua mana urunidagua bialu Yuda wali agali genda timbuni mo mialu hene.
2MA 6:4 Anidagua bialu howa wali agali tara tara ta nabi Anduane Homogonaga andaha anda ibai howa tigua lulu iba no howa mana ko tagabi ngaru bialu haga hene. Tigua anidagua bialu howa bayanda wali bedaru baba Anduane Homogonaga anda ibuninaga pabe bu yaanda henehayagi kayu yu paligi biaga hene.
2MA 6:5 Anidagua bialu howa dege mbirale maname Anduane Homogonaga andaha yu anda polene nawi lo wini wiaru anda biagonaga pabe tamuhayagi mo yu anda pialu tigua mbirale Anduane Homogo deni dodohe uruni lomabu delaga dabu heagoria mo lomabu ngelaga bialu haga hene.
2MA 6:6 Kini ibugua Yudanaga Sabada horongi lotu laga mana wiago mo wahalu horo timbuni tara tara lotu lolene tara tara biagaru mo wahai halu bini. Ani bialu Yuda wali agali tinibi Yuda wali agali nalalimu lalu bini.
2MA 6:7 Ani bialu Yuda wali agali tigua kini ai̱yahanda ibu taba henene horo timbuni tagira ibirangi nogo tara tara wali agali tara uruni tigua loma bo delararunaga tini garini Yuda wali agalime nolene nga lalu bini. Ani lowa waini ibanaga horo timbuni mbira tinaga dama mitangi bialu bi pupu wiaga mini Dionisusunaga horo lagago ogoni tagira ibirangi Yuda wali agali bibahende ho dugu bu mandagi howa ira yunime tinaga haguani yári bialu harigani ibagabu holene nga lene.
2MA 6:8 Ani bialu Girigi wali agali tano kaware wiaruha bu hearu tiguabi ani dege bulene nga lalu Kini Tolemi ibugua mana wabu wini. Ani bialu nogo tara tara loma bo delaga birarunaga maru Yuda wali agalime nalimu lalu mana hongohe lo wini.
2MA 6:9 Ai Yuda wali agali Giriginaga mana ogoni mo wahaga karu homelo bo wahalimu lo wini. Ai mo ko holene wia panaho ngagoni lalu panaga hendene wini.
2MA 6:10 Ai ogoninaga bi manane mbira mo walia halu laro. Tigua wali kira libu igininaga dongone poda mabu bulene mana biaria hondowa ogoni labo godini íbu helene. Tigua wali ogoni labo iginidago labo libuninaga anduni yaparaho yalu tanoha wali agali handai helo ibaga bu helene. Ani bialu mani tigua wali biago labo tanonaga wai pabe heagoria manogo bia howa mani hadope halu dindiha ibira halu homo tungulo mini.
2MA 6:11 Manane mende Sabada horongi Yuda wali agali ti Yarusaleme be tagiraha egeanda wiagoha lotu lole ngoai ho berene. Ani berearia handa walia halu tigua wali agali uruni Pilibi hearia minu yalu piyagola ibugua irani bo heda hene. Yuda wali agali uruni tigua Sabada horo ogoniore mitangi halu tigua wai biadai nabi wahene. Ani biyagome tini homene.
2MA 6:12 Wali agali mbuga ogo daga laregome mo ko holene mbirale ibilaga binidaru hondowa miniha genda holemini nahalimu. Ngode Datagaliwabehanda ina mo ko haiore halu bo amo lole binida lo manda bulumini nabilimu. Ibugua ina mo tiga bule dege manda buwa bini nga.
2MA 6:13 Ina Yuda wali agalime mana ko bialu hemago mo tiga bulenaga Ngode Datagaliwabe ibunaga dara holene irane nawini dara haga ngago mo walia holenaga mana ogonibe biaga ka. Ibugua lu hondo nahe abaleore mo tiga bule anidagua biaga.
2MA 6:14 Anigo wali agali tara tara bu karu tiha dege tinaga ko dewaore ngagola pani timbuni mialu bo waholenaga ko dewaore ngelo Ngode Datagaliwabe ibu hondo haga ka. Ai Ngode Datagaliwabe ibugua inahondo anidagua nabiaga ka.
2MA 6:15 Ibugua inanaga ko dewa nawi wene emene ngelo kemangi abale mo tiga biaga ka.
2MA 6:16 Ngode Datagaliwabehanda ina dara haabo haga ka. Heneneore genda tara tara ngarume inaha genda mo ibilalu mo genda ha hagago ainde ogonidagua bialu ina embeda nahaga kago ndobe.
2MA 6:17 Tígua ibu embeda nahalimulonaga ina tí bi mana ogo lawai harugo ai te lala harugo aria lone lo gililo merogoni.
2MA 6:18 Agali wahealeore mbira mini Eleasa henego ibu mana lo winigo lawai haga agali haguane heagola wali agali bibahendeme ibu gubalini hai haga hene. Ani henego horo mbirungi ami agali bu hearume Eleasanaga ne hariga minu to̱ala edene buwa nogo mbirini neha mo nahene.
2MA 6:19 Ani biyagola Eleasahanda nogo mbirini biago hayatagi halu ibuni hameme ami agali biarume ibu tibume badaba lene. Ibugua lo mitangi bialu bi mana lo wini ngago pugualu dindi ogoria emene tigimandi dege howa ibuha taga holigo manda buwa ibugua Ngode Datagaliwabenaga bi mana lo wini ngago baya hangu talialu holene karulapeda lo manda bini.
2MA 6:20 Ibugua mana ogonidagua biyagome wali agali bibahende waitigime bo waholene wiaguabi harugo lowa mbirale maname nolene nawi ledago nolene nawiore lalu mo walia hene.
2MA 6:21 Lomabu mini tomo ngago handaya ho haga agali bu hearu ti Eleasanaga nenege bayaleore bu hene. Tigua ohowa ibuhondo nogo mbirini ibuni nagane alego nole yalu ibuwa nabe lalu miaga hene. Ani nalu bedago kini ibu de hondowa lomabu mini biaru aria narabe toba helo anidagua bibe lalu lamini.
2MA 6:22 Tigua lalu, Anidagua biriyagua ibu homolene nawulebira, lalu lamini. Ainde agali uruni ti ibunaga nenege howa tigua ibu homelo hame nale howa ibu biamogo bialu bi ani lene.
2MA 6:23 Ani layagola Eleasa ibugua lo mitangi bialu, I̱ agali wahealeore daguahe kogoni ndobe. Ainde i̱ wali agali bu karu dombeneha agali mini lene mbira kogonidago, lo manda bini. Horo bibahendengi ibugua igiri emeneni howa bayale dege hama ibaabo halu Anduane Homogonaga bi mana baya hangu talima ibalu haabo haga hene. Ani henego manda bialu ibunaga mini hongo howa manda bialu lalu, Wahalu i̱ homeneru dalu humbirini andaha paliya pelolene karulape.
2MA 6:24 I̱ agali waheore kogonidago ayu i̱na ohowa mana tara tara urunidagua bialu haruyagua nde wandari igiri daliahe bu karume de hondowa tigua lo manda bialu, Agali Eleasa ogoni ibu agali waheore howa ibunaga mali pira dira (90) bibahende hene kago howa ainde ibugua lotu mana wali agali tara tara bu karunaga ngago talialu kagonida, lolobada.
2MA 6:25 Ainde i̱ninaga holene emene tigi mbira hangu ngagonaga hame lowa nogo mbirini ogoni nalu bere tingi howa ohowa tara nalu biraruyagua nde wandari igiri daliahe bu karu mohondo halu hariga koha pelo mo poa halu i̱ninaga mini bayale mini lene ngago mo ko halu i̱niha taga holene mo yu anda ibuleberoda.
2MA 6:26 Ai agali uruninaga bi ko ladai biraru mobagi hai holiya. Anigo i̱ haruyaguabi homaruyaguabi Anduane Homogo bibahendenaga Hongo Haiheore kagonaga bu miniha tandaga holene ngago ngelalu i̱na balalu pubagi naholeberoda.
2MA 6:27 Ainde i̱na hongo ho howa homaruyagua ogonime i̱ dindini mali dewaore harugonaga ka̱i̱ lalu homolebero.
2MA 6:28 Ani bialubi nde wandari igiri daliahe bu karunaga bu miniha mo hongo halu Ngode Datagaliwabenaga bi mana ngago baya hangu turu howa yu halu homelonaga i̱na mo walia holebero, lene. Ani laya handala ami agali biaru tigua Eleasa minu yalu puwa tibume mo ko howaore bo pailatangi bini.
2MA 6:29 Ami agali abale Eleasa biamogo biaga hayaru beregedalu lone ibu baba waitigi hene. Eleasa ibugua biyago agali mini wime ndo lulume lagadagua layagonaga tigua ibula waitigi hene.
2MA 6:30 Ani howa tigua ibu tibume lone dege balu haabo hayagola homabehe wini. Ani wuwa mani ibugua bi latagi halu lalu, Ngode Datagaliwabe bibahende manda biaihe kago ibugua tandaga timbuniore ayu narogoni ibu manda bida. Genda tandaga ayu i̱ha ibiragoni hogorale bialu polene karulape kogo ibu manda bida. Anigo i̱na ibuni kago gi halu ibu andaneha haabo haga kogome genda ogoni i̱na yule kogo ibu hondowa manda bu ka, lalu Eleasahanda lene.
2MA 6:31 Anidagua dege Eleasa ibu ani homene. Ibugua homenegome maru hearuhondo manane bayale mbira mo walia hene. Wandari igiri daliahe bu hearubi wali agali ibu daluha bu hearu bibahendebi tigua ibunaga mini bayale ogonihondo turu timbuni halu ibu mitangi ho haabo haga wini.
2MA 7:1 Horo mbirangi igiri karia hamenema heba ti ai̱ya minu garabaya helene. Kini ibugua ti nogo nolene nga lowa nogo nelonaga tibumebi gewa tibumebi mo ko howa bo dambini.
2MA 7:2 Hamene kariama uruni mbirago ibugua tinaga bi lahaga howa lalu, Kini í̠na inahondo bi hale harego damene bibahende mbiraore hangubi mbira gi nahe ladai biai holeberema. Í̠ ina bo wahai holene manda bu heaguabi iname gi nahe elaheore howa ina mamalinaga mana lo wini ngago napuguleberema ndobe, lene.
2MA 7:3 Kini ibu bi ogoni hale howa ibu keba timbuni howa ibunaga biabe biaga hearuhondo parabane timbuni wiago do kundi yakundi bilo ira timbuni delalu todobene be timbuni wiagobi dalu do kundiore bilo ira bo deladaba lalu lamini Kini ibugua bidaba layago hale halu agali biabe biaga hearume abale ira delai hene.
2MA 7:4 Tigua ira delo manda manda biai heagola kini ibugua agali biabe biaga hearuhondo lalu, Igiri kane bi laga biagonaga hége gandulalu embonenaga dongone bibahende lagalo wahai halu gi gebi minu gandulo wahai halu bidaba, lalu bini. Anidagua biyagola ibu hamene hearubi ibu ai̱yabi handaya ho hene.
2MA 7:5 Anidagua bialu ibunaga tingini podabaga biyago bilowa ibu buhe emene wiaabo hene. Ani wiagola kini ibugua agali biabe biaga hearuhondo lamialu, Igini ogoninaga tingini parabane timbuni do kundibu wiagoria mo deladaba, lene. Ani mo delayagola tingini biaga dalu do hagua bialu heagola ibu ai̱ya hamene biaru tigua tininaga miniha gi nahe elahe howa homolenaga mini mo hongo haga bialu hene.
2MA 7:6 Tigua lalu, Inanaga Anduane Homogo Ngode Datagaliwabe ibunime ina ayu ogoni de handaya ho kago. Ani howa ibugua ina dara holebira, lene. Bi ogoni bamba Mosesehanda lo wini ngago heneneore tagira pelonaga bi layago ogo, Ngode Datagaliwabehanda wali agali ibunaga biabe bialu haga karu dara holebira, lalu lo winigo ngola haya.
2MA 7:7 Hamene karia biaru hamene wahene biago homayagola ai mendegobi o biadagua dege bialu homelo bene. Tigua ibunaga haguane dongone poda lagalo wahalu nogo mbirini podo wiagoria lowa nanayagua tigua ibunaga tingini balu bo podahole buleberema lene.
2MA 7:8 Ani layagola ibugua ibuninaga bi laga wiago lowa hongo howa ladaga halu lalu, I̱ nogo mbirini ogoni nolene nawigo nanoleore laro, lene. Ani lalu ibubi nde tandaga timbuniore ibu hamene wahene biagome nayago dege nalu homene.
2MA 7:9 Ai ibu homoleore howa ibugua bi hongo howa lalu, Í̠ore dama Heyolabe igini kegome inanaga dindini emene holene ngago í̠na bameore mo tubagi haregonida. Anigo dindi ogonaga Kini Ngode Datagaliwabe ibunime inanaga haabobo holene wia kago lone mo ngulebira. Ina homaramago irane iname ibunaga bi mana lo wini ngago pugua nabulenaga homarama, lene.
2MA 7:10 Ani bialu ti hamene tebonego bene. Bole howa tigua igiri ogoni nogo mbirini wiago nelo mini. Ani miyagola ibugua nogo ogoni mo wahalu ibunaga hége dolatagi halu gi geru gandulo wahelo dogo ba amu hene. Ibugua gi nahe elahe howa ani bini.
2MA 7:11 Ani howa ibugua tihondo lalu, I̱naga tingini ogoni Ngode Datagaliwabeha howa minigo ainde ibunaga bi mana i̱naga tingini ale ndo daligaore nga. Ani bialu Ngode Datagaliwabe ibunime i̱naga tingini ogoni lone ngiadai bulebira lo manda bido, lene.
2MA 7:12 Ani layagola kini halu ibunaga agali bu hearume handalu hearia igiri daliahe biagome homolene gi naheore howa ibunaga tingini embeda ho heago hondowa ti mogolo hene.
2MA 7:13 Hamene tebone biago homayagola manego ibubi nde tandaga mbiraoregobi dege nene.
2MA 7:14 Ai ibu homole howa ibugua kini lamialu lalu, Wahalu i̱bi homoliya badaba. Anigo mani Ngode Datagaliwabehanda i̱ lone mo heya howa i̱naga holene lone ngiadai bulebira. Anigo kini í̠hondo larogo. Í̠ore lone mo heya naholebiraore ndobe, lene.
2MA 7:15 Ai tigua igiri daunigo haru ibuwa ibu mo tandaga halu hene.
2MA 7:16 Ani bialu heagola ibugua kini de handaya howa lalu, Ayu wali agalihondo mbirale í̠nime bua biragoale bialu kego mani í̠nibi homa dege bulebere ndobe. Ngode Datagaliwabehanda ibunaga wali agali ina bu kemaru yu wahayada lo manda buleni nabibe.
2MA 7:17 Ai Ngode Datagaliwabe ibunime í̠ pani nabelo mo ngialu í̠ni waneigini aguane holebirarubi pani nalu haabo holebira, lene.
2MA 7:18 Tigua igiri daunigo beagola igiri waraganego haru halu ibini. Ibuwa homole howa ibugua lalu, Í̠na minime í̠ni mo hondo helo holeni nahabe. Inanenaga ko bini ngagome ina pani nalu kemago. Iname Ngode Datagaliwabehondo mana ko birimagome mo ko halu tandaga nolene tara tara inaha anda ibira.
2MA 7:19 Anigo í̠na Ngode Datagaliwabenaga tandaga holene ngagoria howa yo pialu pubagi holobada lo manda buleni nabibe. Yo pialu napolebereore ndobe, lene.
2MA 7:20 Ainde iname wali bayale igiri uruni ai̱ya bedago embeda nahami̱yago irane ibunaga mana baya taraore ibu igini uruni bolanguahe berene. Ibu heyu howa deme hondo heaore dege ibu igini karia biaruni horo mbira ogoningi dege homai hayago hendene. Ibunaga bu miniha hongoho howa ibugua tandaga uruni yai henego irane ibugua Ngode Datagaliwabehondo mini mbiraore hongohe wu heagome hongo ho hene.
2MA 7:21 Ibuninaga bi lalu ibu igini biarunaga bu miniha mo hongo halu hene. Wali ogoni ibugua hongo agalime ho hagagobi howa ibu igini biarunaga bi lowa lalu,
2MA 7:22 I̱naga tombeha howa igiri uruni agua taba hanarube tobara. I̱na tínaga holene buhe mo wia hene ndo. Tínaga tinginibi i̱na wabinibi ndo dege.
2MA 7:23 Anduane Homogo ibunime dindi harila wabialu ibugua ina wali agalibi wabini. Dindini karubi ngarubi bibahendenaga tene ibuniore ka. Ainde ibunaga dara holene irane nawini dara haga kagome tínaga buhe lolenebi holenebi lone ngiadai bulebira laro. Ani bulebirago irane tí ayu homaramigoni irane tíni hangu bame homa ndo ibunaga bi mana ngago napugule lowa hongo ho kemigome homaramigonaga ngulebira, lene.
2MA 7:24 Ani lalu heagola Kini Andiogusu ibu mitangi bialu wali ogoni ibugua kini ibu mege bialu ibu igini heyogone kago bime la debodebo birabe toba hene. Ani manda buwa ibugua igiri heyogone biagohondo lamialu heneneore laro lowa lalu, Igiri heyogone ogoni ibugua ibunaga mamali mana lo wini ngago wahayagua nde kini ibugua igiri ogonihondo muni dewa mialu ibu mo turu holebero. Ani bialu ibu mini Kininaga Nenege lagago ogoniale helalu ibu gabumane biabe timbuni mo mulebero, lalu bini.
2MA 7:25 Ani layago hale howa igiri heyogone biago ibu mogo nale hene. Ani heago hondowa ibugua igiri ai̱ya biagohondo ibu igininaga mini mo iriari bule bi lamia, lene.
2MA 7:26 Ani lowa kini ibugua wali biagohondo bi laabo halu ibu igini mini mo beregeda layagola ainde wali biagome ibu igini mana lene.
2MA 7:27 Wali biago ibugua kini mo ohowa bi kinihanda ibu igini lamia layago letingi howa ibu igini geha duli hanga ho biruwa lalu, I̱ igini-o i̱nihondo dara habe. Í̠ore ege dira i̱naga tombeha berelo biralu mali tebirani i̱na í̠ andu ngialu toba yu biralu buwa baya hangu handaya ho birama ibinigo ayu kebagoni.
2MA 7:28 Ai mbirale deme handa edene buwa handalu keria uruniha karubi ngarubi handa. Ainde mbirale uruni Ngode Datagaliwabe ibunime wabiai howa wali agali dindi bibahendeha bu karubi ibugua wabiai hene ka.
2MA 7:29 Agali í̠ bole kagohondo gi nahabe. Í̠ hamene maru biaru tigua í̠ biawai hayago manda bialu tigua biyadagua bule kegoni. Homolenenaga gi nahabe. Mani tí bibahende dengui lone hondole manda bido. Anigo ainde í̠ ti heba mandagi keria dengui lone nahandaruyagua nde i̱ dara timbuniore howa turu ho ndo birulubada, lene.
2MA 7:30 Ai̱yahanda bi ogoni lairi heagola igiri biagome abaleore ladai bialu lalu, Ai tí agile malia ho kemibe. I̱ kininaga bi layago hale naholebero ndobe. Bamba Ngode Datagaliwabenaga bi mana Mosesenaga ne harigaha howa hayago hangu talialu holebero.
2MA 7:31 Anigo Kini Andiogusu í̠na ina Hiburu wali agalihondo mana ko dewaore bialu kegoni. Ai í̠ore Ngode Datagaliwabenaga keba holene ngagoria howa í̠ pora bialu yo pialu napolebere ndobe. Ai ogoni tagira ibilo hondo ha harene.
2MA 7:32 Heneneore iname ko bialu harimagonaga genda dewa yarimago.
2MA 7:33 Ai Ngode Datagaliwabehanda inahondo keba tigimbira hangu haragoni. Ani howa mani ina baba lone miniha dungu lo holebira.
2MA 7:34 Í̠na mitangi bialu í̠ gibiore kobe toba ho ke. Anigo agali ko timbuniorego í̠ kegoni ndobe. Ani howa í̠ninaga mine hagane mana ko ngegome í̠ni mo hondo heagola í̠na wali agali Ngode Datagaliwabenaga biabe biaga bu hearu homelo bameore bo wahalu kegoni ndobe.
2MA 7:35 Ani bialu howa nde Ngode Datagaliwabe Bibahende Hongo Haiheore howa mbirale bibahende karubi ngarubi de handai haga kago ibu kagoha hogorale bialu ibida pobe naheore í̠ kegoni.
2MA 7:36 I̱ hamene biaru tigua Ngode Datagaliwabenaga mana baya hangu taluwa bialu halu tinaga holene pelaya. Ti tandaga tigi mbira hanguni nayago ayu ti haabobo bu holene gahenge karulo ka. Ani kago ainde í̠na Ngode Datagaliwabehondo mine timbuni harigonaga ibugua í̠na mana ko biri lalu godini helolebira.
2MA 7:37 Ayu i̱bi nde Ngode Datagaliwabenaga bi mana i̱ mamaliruha howa lo wini ngago gubalini timbuniore ho hagaore kogome i̱bi hariga mbiraore i̱ hameneru ti piyagoha pole kogoni ndobe. Ainde inanaga wali agali bu karu dara habe lalu Ngode Datagaliwabehondo bi laro. Ani lalu ibugua pani nolene timbuniore í̠ mo ngirago hondowa í̠nabi nde Ngode Datagaliwabe ibu hangu Ngode Datagaliwabe heneneore ka labelo ibugua í̠ pani ngulebira.
2MA 7:38 Ayu i̱na Ngode Datagaliwabehondo bi lalu kogome i̱ hamenerubi i̱nibi homaramagome Ngode Datagaliwabenaga keba holene ngago biba habe lalu bi larogoni, lene.
2MA 7:39 Igiri heyogone ogoninaga bi layagome kini mo tandaga hayagola ibugua igiri daliahe biago mo ko timbuni hayagola ibunaga tandaga daliga timbuniore ibu hamene maru biaru ti tandaga nayarubi ndo nene.
2MA 7:40 Igiri daliahe ogoni ibu homenedagoni irane ibu nogo mbirini maname nolene nawi lo wiago nanoleore layagonaga homene. Ibugua Ngode Datagaliwabe ibuni kawareore haga kago mini mbiraore hongohe wu haga hene.
2MA 7:41 Ani bialu maniore wali biago ibu igini kariali biaru homai heagola ibuni mani homa maro bini.
2MA 7:42 Ai Yuda wali agali tigua nogo dama mitangi bialu bi pupu wiago gime wabini ngaru loma bo mini ngagonaga tini garini nanaga hearu tandaga nelo mialu bo wahai haga binigo te ogoni hangu.
2MA 8:1 Ai Yudasa Magabeusu halu ibu aria bu hearu ti pialu dindi maru wiaruha hado hai hene. Tigua tini aria agali bu hearu bibahende olo mogo biai halu Yuda wali agalinaga lotu baya hangu handaya ho haga bu hearubi baya hangu mo mogo bu hai hene. Ani mo ngoai howa daosini dege waragaria bibahende (6,000) mo ngoaiho hene.
2MA 8:2 Ainde agali tara tara hearume ibalu tinaga wali agali mo ko howa haru kagonaga Ngode Datagaliwabehondo ti dara halu biamogo bilonaga bi lalu hene. Ani bialu wali agali tara urunime Anduane Homogonaga anda heago ibunaga deni mo dodohe hayagonagabi mitangi bibe lalu bi lalu hene.
2MA 8:3 Agali ko bu hearume tano mo ko halu bo gialahole bialu heagola Yarusaleme tanoore dara habe lalu tigua Ngode Datagaliwabehondo olalu bi lalu hene. Ani bialu Ngode Datagaliwabehondo agali homayarunaga dugu biyaru hale halu tinaga darama pelayagonaga darama dege peloleneme pani miadai bibe lalu bi lalu hene.
2MA 8:4 Agali ko uruni tigua ko mbira nawi waneigini darabi bu hearu bame bo wahayarubi mitangi bibe lalu tigua bi lene. Ani bialu waitigi hearu tigua Anduane Homogonaga mini mege bialu hayagonaga pani ndo mialu wali agali mine howa mana ko bialu karuni alego pani nelo agua miaga ko lalu mo walia habe lalu tigua ibuhondo bi lalu hene.
2MA 8:5 Ai Yudasahanda ibunaga ami agali mo mogo bu heagola maru hearu baba ibula karulanape hene. Ani henedago irane Anduane Homogo ibunaga miniha tandaga timbuni ho heago karulape biba hai howa ayu ibunaga Isaraele wali agali dara ho heagome ani hene.
2MA 8:6 Yudasa ibunaga wai biagane mana ogobi hene. Ibugua tano ngaruha abale anda puwa anda bu karu abale bo heda haga hene.
2MA 8:7 Ibugua wai ogonidagua mbiraga bulene hame lo haga hene. Tano hongohe wai pabeanda bayale ngago ibu abale anda puwa karulai halu waitigi bu karu bo taliatogo laga hene.
2MA 8:8 Ai Pilibi ibugua Yudasahanda wai hongo howa bialu haabo heago hondowa ibugua beba mbira gili buwa Koelesiria dindinagabi Ponisia dindinagabi gabumane agali haguane mini Tolemi hearia yalu pu lene. Ibugua Tolemihondo ibu biamogo bialu kininaga gabumane biabe mo hongo holene nga lalu lo pelene.
2MA 8:9 Ani layago hale howa Tolemi ibugua ami agali dewaore dindi tara taraha howa íbu hene bu hearu olo ngoai howa mo mogo bialu daosini dege pira kira (20,000) bibahende haru Padorogolusu igini Nigano ibu Kininaga Nenege Dunini laga hearu aria henego ibugua haru halu pole ibabe lene. Tigua wali agali Yudiaha bu karu bibahende bo amolo wahai halimu lene. Ibugua agali mende mini Yosiasa heagobi libu haru mandagi pudaba lalu dabo pelene. Yosiasa ogoni ibu wainaga mana manda biaihe pari wayali gibi mbira henego ogoni pudaba lene.
2MA 8:10 Nigano ibu kinihanda muni siliba daosini dege pira waragariani duria (65,000) Lomo dagisi mulebere layago hole howa ibu Yuda wali agali garabaya hearu garabaya biabe ale bia halu haga helo pelalu muni ogoni ibu tubagi hayago mulene hame lene.
2MA 8:11 Ani howa ibugua tano iba solowara bereago ange ange wima peagoha wali agali bu hearuhondo beba gilibu pelaga buwa lalu, Tígua Yuda wali agali garabaya karu maru tinaga garabaya biabe ale bialu helo yolo buleyagua nde ibugua wai bialu bope holeberogo tí maru yolo bilimulo, lalu lo pelene. Ibugua tihondo lo wia halu lalu, Heneneore larogo. Tígua garabaya agali tebira siliba muni genda magi kilogarama mbiraore hangume yolo buleberemi, lene. Ibugua anidagua la layago ai Ngode Datagaliwabe Bibahende Hongo Haiheore kagome ibugua mana ko dewaore bialu hayagonaga pani nelo mule kago manda nabi howa lalu hene.
2MA 8:12 Yudasa ibugua Nigano halu ibunaga ami agaliru wai kaware anda ibira laya hale howa ibu damene bu hearuha bi abale purogo lelene.
2MA 8:13 Ani hale howa agali maru gihe hearubi maru Ngode Datagaliwabehondo mini mbiraore nawiaga hearubi bibahende ibida piai hene.
2MA 8:14 Anigo agali maru elahe hadai biyaru tigua agalime tinaga mbirale wiaru munime yolo biyaru bilo hondo hene. Ani howa tigua Anduane Homogohondo bi lalu Yuda maru bamba wai nabi howa Nigano ibugua garabaya biabe ale biago helonaga muni taguigi binigo lone haru dai bilonaga bi hongo howa lalu hene.
2MA 8:15 Tigua Anduane Homogohondo bi lalu, Ainde ibugua mana bayale tigua bialu kago mitangi nabuleyagua nde habo nalolene bi bamba tinaga mamaliru baba lo wini ngago mitangi bibe, lalu bi lalu hene. Ibunime Isaraele wali agali ibunaga wali agaliore helo dabo helenego manda bialu ani bibe lowa bi lalu hene.
2MA 8:16 Ani bialu Yudasahanda ibunaga ami agali daosini waragaria (6,000) hearu mo mogo bu helene. Ani helowa ibugua tinaga miniha mo hongo halu lalu, Agali Ngode Datagaliwabe kago manda nabiaga bu karume ti baba wai bule dewaore tidi yu ibalu bame wai dege bule ibirago de hondowa gi nahalimu, lalu lamiai hene. Wai hongo howa biadai bilimu, lalu lamini.
2MA 8:17 Agali tara Anduane Homogo mitangi nahaga urunime ibunaga anda kago mebia halu mo dodohe heledago mitangi buwa halimu. Waitigi tigua genda dewa ina mamali heneruhondo mo mialu hene ngarubi manda bilimu.
2MA 8:18 Ani lowa Yudasahanda tihondo lamialu lalu, Waitigi agali tigua wai biaga danda timu yandare humbi yidaru mo dunubia howa uruniha hana halu wai bulene mana manda bu kago mo galone haga ka ndobe. Anigo iname Ngode Datagaliwabe ibu Bibahende Hongo Haiheore kagohondo mini mbiraore wiaga kema. Ai Anduane Homogo ibugua waitigi uruni ayu ogoni ina baba wai bule wene harigani ibalu kaore bo wahai hoa biyagua nde bo wahai halu waitigi dindi bibahendeha bu karu bibahendeore bo wahai hoa biyagua nde bo wahai dege holebira, lene.
2MA 8:19 Ani bialu Anduane Homogohanda tinaga mamaliru biamogo bini wiaru te lalu hene. Ai agali mini Senageribi heangi Ngode Datagaliwabehanda waitigi daosini dege pira halirani duria (85,000) bibahende bo wahai hene.
2MA 8:20 Ai ti Babilononi heangi howa Yuda agali daosini halira (8,000) halu Masedonia agali daosini maria (4,000) hangu howa tigua Galesia bope halu dabu dabu bayale tara tara wiaru ti mo yai hene. Horo ogoningi Galesiame Masedonia baba wai bule tano wiago ho hagira bini. Ani bialu hearia Yuda ami agali daosini halira (8,000) uruni tigua ibalu wai biyagola Ngode Datagaliwabehanda ti biamogo biyagola tigua Galesia ami agali daosini dege handari mbirani pira kira (120,000) bibahende bo wahai hene.
2MA 8:21 Bi Yudasahanda layagome ami agali biarunaga miniha mo hongo hayagola tigua hongo ho howa tinaga lotu mananagabi tinaga dindinagabi wai bia halu homole manda manda bu hai hene. Ani heagola Yudasa ibugua ami agali biaru mahalu mo talebu helowa
2MA 8:22 ibu hamene Saimonohanda ami agali halu mbira heago haru halu Yosebehanda halu mende heago haru halu Saimono Yonadanahanda halu tebone heago haru halu buwa ti mbira mbirame daosini mbirani handari duria (1,500) dege dege haru haga haga bini.
2MA 8:23 Ani howa Yudasahanda Eleasahondo, Bi mbira Ngode Datagaliwabenaga mbugaha gilibu wini wiago heyu howa hongo howa ladaga halu dagala, lene. Eleasahanda mbugahabi ogoni daga lai heagola Yudasahanda lalu, Ngode Datagaliwabe í̠nime ina biamogo bibe, lene. Ani lalu wai porabupe halu wai bini. Yudasa ibunime ami agali halu mbira heago haru halu pora bialu Niganola wai bini.
2MA 8:24 Ani bialu heagola Ngode Datagaliwabehanda Yuda ti biamogo biyagola tinaga waitigi agali daosini dira (9,000) bibahende horo ogoningi bo wahai hene. Tigua Niganonaga ami agali dewa biaru balu bo haealatago lalu dibu gombedapaya bialu bama talima piaho wini.
2MA 8:25 Ani bialu agali maru muni yalu Isaraele wali agali garabaya biabe ale bia haga helo munime yolo bule muni yalu ibiyaru Yuda ami agali biaru ti mo yai hene. Ainde tigua waitigi agali biaru luore ha bama talima piaho winigo alendo hayagola
2MA 8:26 yawi Sabada horo ngago manda buwa Sabadani wai bulene nawigo manda bialu ai wahalu dai bule manda bini.
2MA 8:27 Ani buwa tigua waitigi bo wahayarunaga wai biaganeale wahene wiaru mo mogo bu wiai halu dabudabu tara tara henearu taguiai halu buwa mani Sabada horonaga lotu lene. Tigua lotu lalu howa Ngode Datagaliwabehanda ti lone dara halu baya hangu handaya ho hayagonaga tigua turu timbuniore howa Anduane Homogonaga mini yaraga halu hene.
2MA 8:28 Sabada horo piai hayagola tigua dabudabu mo yayaruni baya hangu mo tale bigi bialu maru agali tandaga timbuni nalu wiaru mialu maru wali ti agalini homene dalo berearu mialu maru waneigini aba ai̱ya homene bu hearu talebu mialu bini. Ani bialu maru ami agali tini talebu ta hene.
2MA 8:29 Ani bialu mani lone mo ngoai howa tigua Anduane Homogohondo bi lalu, Wali agali í̠naga biabe bia haga karu dara halu biamogo bibe, lene.
2MA 8:30 Yuda ami agali biarume Timodinaga ami agalibi Bagidesenaga ami agali hearubi ti baba wai bialu Yuda ami tigua waitigi daosini dege pira kira (20,000) agima bolangua howa bo wahai hene. Ani bialu tigua wai pabeanda hongohe wai pabe daligaore bu mabubi wiaru bo poda anda hai halu ti karulai hene. Ani karulowa tano uruniha dabudabu bayale wiaru mo yai howa tale bialu maru wali dalo berearu mialu maru wai timu howa tandaga nalu wiaru mialu maru wali agali waheale andaga berearu mialu bini.
2MA 8:31 Ani bialu tigua waitiginaga danda timu yandare wai humbi ayu tiburu wai hamaha mo yayaru baya hangu mo do hai hene. Ani bialu dabudabu maru ibira hene wiaru Yarusaleme yu dai bini.
2MA 8:32 Wai biyagoha Timodinaga ami agali haru haga agali haguane mbira bo wahalu bini. Agali ogoni ibu koore mbira howa ibugua Yuda wali agali genda timbuni mo mialu haga henego homene.
2MA 8:33 Ai Yuda ti Yarusaleme dai bu howa tigua waitigi bope hayagonaga turu timbuniore halu howa agali maru te Anduane Homogonaga anda panga heago irame heda haga agali hearu tini irani bo delai hene. Ani bialu agali mbira mini Kalisenese anda tamuha birado hearia handa walia howa ogonibi irani bo delalu bini. Anidagua biyagome ko ibuni bialu hayago karulape pani o nayadagoni.
2MA 8:34 Anduane Homogohanda Yuda wali agali biamogo biyagola tigua Niganola wai bialu tigua Nigano bope halu ti wayali haya. Nigano ogoni ibu agali koore howa ibugua agali biyinaya biaga daosini mbira (1,000) agima Yuda wali agali garabaya biabe ale biaga helo munime yolo bule muni hanalu ibiyaru haru ibaga henego ogoni bope hene.
2MA 8:35 Yuda agali maru Niganohanda bamba ti mo ko hayaru tigua beregedalu Nigano ibuni mo ko hene. Niganohanda ibunaga wai pole karu lagane aga karu learu golo wahalu ibuni hangu ibida pu tara halu agali mbira garabaya biabe bialu haga ibida puwa birado haradagua pialu bira do hene. Ibugua irabuha dege puabo halu Andiogo tano tagira pene. Ibunime biako hearia ibunaga ami agali biaru bibahende amo lai hene.
2MA 8:36 Ainde Niganohanda Yarusaleme wali agali minalu muni muwa muni ogoni Lomo gabumane dagisi mule manda buwa ai nde ibugua Yuda baba wai bule pene. Ani pialu hearia ibuni bope hayagome Yuda ti biamogo biaga hongo gibihe mbira ka lalu tigatiga mo walia haya. Ainde Yuda wali agali ti bi mana Ngode Datagaliwabe ibunime minigo yu haabo haga kagome waitigi tara tara padarume ibalu Yuda baba wai bialu bope habe nahe holebira.
2MA 9:1 Ogoningi dege Andiogusu ibu Pesia dindi wahalu ibunaga ami agali maru hearu haru halu ibida dai bini.
2MA 9:2 Ani dai bialu howa harigani Pesebolisi tano wiagoria anda puwa tano ibu mo wialu tinaga lotu anda heagoha muni dabudabu wiaru mo kayu bule manda bini. Ani manda buwa ibunaga ami agali biarume anda puwa wai bule pialu hearia dindi anduane tanoha hearume wai biadai bialu Andiogusunaga ami agali bo taliatagi hai hene. Ani biya handala Andiogusu taga timbuni howa dindi ogoni wahalu ibida pene.
2MA 9:3 Ani puwa Egebadana tano tagira puwa hale halu hearia Yudame Nigano bope halu Timodinaga ami agali hearubi mo ko howa bo hengeda haya layago hale hene.
2MA 9:4 Te ogoni hale hayagola ibunaga bu miniha ira hungu ale bialu hene. Ani biyagola ai Yudame ibunaga mini lone yaraga halu helo hame lene. Ai wali agali Pesebolisi tanoha hearume ibu bo taliatagi hayangi ibunaga mini mo guya hayagonaga keba howa ani bini. Ai ibunaga nogo hosime garo ale karisi yaga heagohondo lamialu nogo hosi bo daila halu geraiore la lene. Harigani ha̱lo ha nabi piaho wialu Yarusaleme anda pobe lene. Ani lowa ibu gibiore tingi howa lalu, I̱na Yarusaleme anda pialu tano ogoni Yuda wali agalinaga homali helolebero, lene. Anigo ibu pialu Ngode Datagaliwabenaga godi lolene ngagoria pu holebira manda nabi howa ani lene.
2MA 9:5 Anduane Homogo Isaraele wali agalinaga Ngode Datagaliwabe kagome warago ko tara ereba naholene mbira Andiogusuha ibilene. Ibugua mine halu bi uruni lalu heangi dege tandaga timbuni yandare aleme gubaliniha nogoba hayagola tandaga timbuni nalu hene.
2MA 9:6 Ibugua wali agali maru tandaga dewa mo mima ibaga bialu hayagonaga pani ibuniha dai bini. Anigo tandaga ogonime ibunaga miniha iriari nabini.
2MA 9:7 Ibunaga mine hagane mana ogoni wanahene. Ibugua mine timbuni hene. Yuda wali agali mo gi holenenaga bi hongoheru lalu hene. Ani lalu ibunaga nogo hosi yaga heago mo daila hene. Ani gerai lalu piyagola Andiogusu nogo hosime gili laga karisi biagoha howa pilape halu dindini gi ge kuniru podo habolo baga biai hene.
2MA 9:8 Ibuha mine holene manda wiagome ibu hongo gibihe kobe toba hene. Ibugua miniha mitangi bialu ibugua solowara bedagohondo bi lamerogo hale holobabe toba ho hene. Ani bialu hari nene wedarunaga genda magi manda ogodaguada lalu ibugua hondolobabe toba ho hene. Ani manda bu haga biago bame pilape hayagola dindini wiaria agalime lebera buwa mo yalu pene. Anidagua biyagome wali agali bibahendeoreme Ngode Datagaliwabenaga hongo panaga handa walia hai hene.
2MA 9:9 Ani wiagola himi agali ko biagonaga de harigaha tagira ibalu tinginiha pugupugu bialu hene. Ani bialu heagola tandaga timbuni nalu wini. Ibu homo tungulo mia nabi wiaore dege ibunaga tingini bibahende togo biai hene. Tingini ngu timbuni biyagome ibunaga ami agali hearu odo yu pugupugu bialu
2MA 9:10 ibu biamogo bule kaware holene mbira nahene. Ai agali ogoni de handadaba. Abale harini yakundi karu ibunaga gime mo yu holene kobe toba ho haga hayago ogoni ndobe.
2MA 9:11 Andiogusu ibu tandaga timbuni nalu wuwa ai ibunaga mine holene mana wiago wahene. Ngode Datagaliwabehanda ibu pani nelo mo miyagola tandaga timbuniore nalu wuwa ai ibunaga mini bayale tigabi wiadai bini.
2MA 9:12 Ibuni tingini ngu biyagome ibunaga ngui harigoha ngu timbuni biyagola ibugua lalu, Ina wali agali bibahende Ngode Datagaliwabe andaneha hai halu iname ibuni ale dege kobe toba holene henge nawiore ndobe, lene.
2MA 9:13 Ani layago lelowa Ngode Datagaliwabenaga dara holene ibuha nawini. Anigo agali ko ogoni ibugua Anduane Homogohondo ko nabule lalu bi hongohe lo wini.
2MA 9:14 Ibugua bi lo wialu lalu, Bamba i̱na abale pialu Yarusaleme Ngode Datagaliwabenaga tano loma bia hene wiago Yuda wali agalinaga homaliore ngelole manda birugo ainde ayu lone lo beregedalu Yarusaleme tini handaya ho howa gabumane tinime helo hongo mialu tini haru halimu, laro.
2MA 9:15 Abale Yuda wali agali homararunaga tingini ngarubi waneigini homene tingini ngarubi nogo biangorume nalu togo lelo tano pabe tagiraha batagi helo manda bu haru. Wali agali ko uruninaga tingini horo holene galone nawida lo manda bu haru. Ani manda bu harugo ai lone mini beregedalu Adene tanoha wali agali bayale kadagua dege helo hameledo.
2MA 9:16 Bamba i̱na gabo be ela nahagane loma bia hene Anduane Homogonaga andaha wiaru mo yalu dabudabu tara tara anda biagoha wiarubi mo yalu biru. Ai i̱na mbirale bayale tara tara ala wini uruni ale ndo gahengeoreru Anduane Homogonaga andaha mo wia aribia halu to̱latagi helolebero. I̱na i̱ninaga munime loma buleneru yolo biai holebero.
2MA 9:17 Ani bialu i̱ni Yudali ho halu wali agali dindi bibahendeha karume hale hai helo i̱ porogoha latagi haga bima polebero. Ani bialu Ngode Datagaliwabe ibu hongo gibiorehe ka lalu wali agali hale hai helo latagi holebero, lene.
2MA 9:18 Ngode Datagaliwabehanda Andiogusu ibuni ko biyagonaga pani ndo timbuniore nelo miyagome Andiogusu tandaga timbuni nalu hayago ereba nahe wiaabo hene. Ani wiyagola ai ibu lone dabi naholoboda lo manda bialu ibugua beba gili buwa bi ogo Yuda dindiha lo pelene.
2MA 9:19 Beba gilibu pelenedagoha bi ogodagua lene. I̱ Andiogusu i̱ kini howa ami haru haga agali haguane kogo i̱na i̱naga wali agaliore hene Yuda wali agali tíhondo bayale kemida laro. I̱na tínaga miniha mo palia holene karulo howa bayale halimulo hamelo ko.
2MA 9:20 Tínibi tínaga waneiginibi bibahende bayale howa mbirale bibahende tínaga mini ngemigoria talialu bayale dege wiagua nde i̱na Ngode Datagaliwabehondo turu halu ka̱i̱ lolebero.
2MA 9:21 Mana bayale tígua i̱hondo bialu haga wirimigo mitangi bialu turuho ko. I̱ Pesia dindi howa ibirugola warago ko tara mbirame i̱ minaya. Ani biyago manda bialu ayu i̱na tí bayale halimulo biamogo bulene manda bu ko.
2MA 9:22 Ainde i̱ lone dabi holoboda lo manda bido. Ani bialu i̱naga warago ko ngago dabi holebira lo manda bido.
2MA 9:23 Anigo ainde i̱ aba ibugua dindi maruha wai bu puwa mana bialu hayaru manda bido. Ibugua agali mbirame gabumane biabe bialu helo dabo helaga hene.
2MA 9:24 Ani binigo manda buwa mbirale mo ko holene mbira tíha anda ibiyagua wali agalime mogo lolene nawi. Agali mendeme gabumane biabe bialu kago tí manda bidemi.
2MA 9:25 Ani bialu gabumane maru i̱naga dindi ngago gibuni gibuni hama pedarume mbirale mbira agile tagira ibirabe hondole handaya ho hai ka. Ani kago manda bialu i̱ni homarogola i̱ igini Andiogusu kago ibu kini ho aribia helo dabo heledo. Horo dewaore i̱ni dindi hobane maru ngaruha de handama ibaga bule howa igiri ogoni ibugua tí haru helo helalu piruli. I̱na beba mbira ayu tínaga gilibu wia harodagua dege gilibu pelaru.
2MA 9:26 Ai mbirale bayale tí mbira mbira kemigo biamogo bialubi bibahende biamogo bialu i̱na bayale bialu haruligo mitangi bilimu. Ainde tígua i̱nihondobi i̱ igini kagohondobi miniha bayale dungulo halimulo hame ledo.
2MA 9:27 I̱ igini kini ho aribia hole kago ibuguabi nde tí baba biabe bayale bulene ngago bialu harulidagua bia aribia halu mo palia holene karulowa tí dara howa bialu harulidagua bialu holobada lo manda bido, lalu gilibu pelene.
2MA 9:28 Ainde agali koore howa wali agali dewa homelo bo wahai halu Ngode Datagaliwabe kago mege bialu haga heago nde wali agali tandaga nelo ibugua mo miaga wiadagua ibuni nalu wini. Ani nalu ibu dindi kaundia mbiraha hari bare wiagoha agali ko mini nawi daga nalene agali maru karuale mbira homaradagua homene.
2MA 9:29 Ani homayagola agali ibunaga nenege Pilibi mbira heagome ibunaga tingini ibuni dalu mo ya dai buwa hora hene. Ani hora halu mani Pilibi ibu kini igini Andiogusu gi halu ibu ibida Iyibi Kini Tolemi Pilomedo hearia pene.
2MA 10:1 Ngode Datagaliwabehanda Yudasa Magabeusu halu ibu damene hearu biamogo biyagola ibugua waitigi giha howa Anduane Homogonaga andabi Yarusaleme tanobi mo yu dai bini.
2MA 10:2 Tigua lomabu delaga dabu agali tara íbu hayarume wali agali ngoai ho haga hama wiagoria bu helayago bo gialo wahai halu mbirale dama mitangi bialu bi pupu wiaga gime wabini wiarunaga anda bu helearubi bo gialo wahai halu bini.
2MA 10:3 Tigua Anduane Homogonaga anda lone Anduane Homogo deni dodo nahe helo mo loma bia halu biagane mana wiaru bialu anda timbuni biago mo loma bia halu tigua lomabu delaga dabu mbira gahenge bu helalu bini. Tigua ege to̱le̱ kira ira delolenedagoria bo gingido helalu loma gahenge bo delene. Mali kirani tigua Anduane Homogonaga andaha loma bo delabe naheore hene. Ani bialu ira hagua nga bilo delaga mini inisenesiru lomabu delalu lamu hale wiaru hedo delalu mberedi Anduane Homogonaga deni ngelaga biaru lone mo wialu bini.
2MA 10:4 Ani biai howa mani mbirale mo ko holene ibiyaruale lone naibilelo tigua dindini paliape hai howa Ngode Datagaliwabehondo bi lene. Tigua Ngode Datagaliwabehondo lalu, Ina ko lone birimayagua nde ina minalu wali agali tara Anduane Homogo mitangi nahaga karuhondo minu mialu wali agali mege biaga karu giha minu ya habe, lene.
2MA 10:5 Tigua ege mini Kisilebenaga horo pira kirani duria (25) layagola Anduane Homogonaga anda ogoni lone mo loma bia hene. Ala egebi horobi ogoningi dege agali tara tagiraha howa ibiyarume anda ogoni Anduane Homogo deni mo dodohe helene wini.
2MA 10:6 Ai horo halirani Yuda wali agali tigua turu ho howa tomo dewaore dawa nalu Horo Timbuni Anda Nemandaruha Palu Holene Horo biagobi ogoningi dege halu bini. Ani bialu tigua horo uruni mali abale hayarunaga holene winigo mitangi bu dai bini. Mali uruninaga ti togolo yu ibida pialu dindi ko wali agali nahaga wiaruhabi egeanda hearuhabi biango gabuaru paliradagua palima ibaga bialu hene.
2MA 10:7 Ani bialu henego ayu tigua ira magane gahengeru bu yalu ayage yuniru bu yalu halimbu wiaru ira yunime mo yári bia halu bini. Ani buwa tigua Ngode Datagaliwabehanda ibunaga anda ogoni lone mo loma bia helonaga henge ogoni mo wia hayagonaga tigua ibunaga mini yaraga howa turu halu iba gana lalu hene.
2MA 10:8 Ani bialu tigua mana gahenge mbira wabinigo mana ogoni ogodagua leda, Mali bibahendengi horo ayu kemago tagira ibiragola Yuda wali agalime Anduane Homogonaga anda lone mo loma bia haramago manda biaabo holene nga, lene.
2MA 10:9 Ainde Andiogusu Epibanesenaga te abale larimago hale harimi. Ai ayu iname agali mende Andiogusu ko biago igini Andiogusu Yubadonaga te laramago hale hadaba.
2MA 10:10 Ayu iname te emene tigimandi dege lone ko tagira ibini ngarunagabi ibugua wai binirunaga tebi loleberema.
2MA 10:11 Ainde Andiogusu Yubado ibu kini ha aribia ho howa ibugua agali mbira mini Lisiasa heago ibu dindi kira Koelesiriala la Ponisialanaga gabumane agali haguane helo dabo helene.
2MA 10:12 Ani helowa ibugua agali bayale mini Tolemi Magarono ibu gabumane agali haguane howa ibugua Yuda wali agalihondo mana bayale biaabo halu ibugua gabumane mana bayale hendore bulene ngadagua bialu haga hene.
2MA 10:13 Ani biaga hearia agali Kininaga Nenege laga agali maru hearume Yubado hearia puwa Magaronohanda ko biya lalu ndelene. Ainde bamba Kini Pilomedohanda dindi mbira iba solowara dombeneha mini Saibarasa wiago ibugua handaya ho helo miyagola agali bu hearu bibahendeme agali ogoni kininaga waitigi ka laga hene. Anigo ibugua dindi ogoni wahalu puwa Andiogusu Epibanesela nenege ho haga hene. Ani bialu howa ibunaga mini abale gabumane biabe biaga bayale mbira ka lene haga wiago lone mo yu dai bibe naheyagola ai nde homagane tomia mbira ibunime nalu homene.
2MA 10:14 Ai Gogiasa ibu dindi ogoniha gabumane haguane hene. Ani howa ibugua dindi tara tara wiaruha ami agali hearu munime yolo bialu haru ibuwa Yuda baba wai biaabo halu haga hene.
2MA 10:15 Ani bialu heagola Idumea hearu tiguabi nde dindi bayaleha wai pabeanda hongohe heagoha wai bulene hamabi bayale wiagoha howa tigua Yuda baba wai bule karali bialu hene. Idumea tigua wali agali ko bialu Yarusalemeha howa ibida pene hearu mo doho howa tigua wai bulenenaga mana lehe bialu haga hene.
2MA 10:16 Ainde Yudasa Magabeusu halu ibu aria hearume Ngode Datagaliwabehondo tigua wai buluma̱ya biamogo bibe lowa bi lalu hene. Ani lalu puwa tigua Idumea dindiha tano hongohe wai pabeanda haga wiaru karulole wai bule pene.
2MA 10:17 Puwa tigua wai hongo howaore bialu wai pabeanda uruni bo poda anda halu karulai hene. Tigua agali wai pabe neneni howa wai biadali halu biyaru baba hongo howa bialu bo taliatogo lai halu tigua waitigi daosini dege pira kira (20,000) horo ogoningi bai hene.
2MA 10:18 Ai waitigi ami agali daosini dira (9,000) agima ibida pialu mamageali hagane anda hongohe bima irigi hene kira heagoha ha do hai hene. Anda mamageali hagane ogoniale kagoha wai biaganeale mbirale damene mo wiaga hene.
2MA 10:19 Ainde Magabeusu ibugua Saimonobi Yosebebi Sagiusu heba wai bialu helalu ibugua wai hongoheore gime minaminaga bialu heago biamogo bule pene.
2MA 10:20 Ani biyagola Saimononaga ami agali maru hearume ti muni hame lowa agali anda hongohe biagoha waitigi birayarume siliba muni genda magi pira waragariani maria (64) tinaga giha mo ya hene. Tigua ogonidagua bialu munime de miniru minai ho berelalu tini ibida pora bialu piai hene.
2MA 10:21 Mbirale uruni biya layago Yudasa ibu hale howa ibugua ami haru hagane agali haguane hearu ibidaba lowa godi hale hene. Hale halu howa lalu, Ami agali waitigime muni miyago mo yalu hayadaru tigua ti hamene bu karu muni taguiyada. Ai tigua waitigi ibida pelo yupe hayadagome dai bialu ina aria bu karu bo wahai holobada, lene.
2MA 10:22 Yudasa ibugua anidagua lalu ami agali muni mo yaga biaru homelo bo wahai hene. Ani bialu gerai lalu wai dai buwa pabeanda hongohe kira anda pene.
2MA 10:23 Wai Yudasa ibu heba bialu kagoha tigua waitigi bo podahana haga hene. Ani howa ai ibugua wai pabeanda anda hongohe kira ogoniha giala anda halu wai biyadagoha waitigi daosini dege pira kira (20,000) bolangua howa bai hene.
2MA 10:24 Abale nde Yuda tigua Timodi bope haya handala penego ainde Timodi ibugua puwa ami agali dewaore yolo buwaore yolo bu helowa ibugua ami agali maru Esiaha hearu baba mo mogo bialu dewaore agali Esia ami uruni nogo hosini biruwa wai biaga henego uruni heba mo mogo bini. Ani bialu puwa tigua wai hongo howa bialu Yudia karulai hole tidiyu pene.
2MA 10:25 Ani bialu ti wene harigani pialu hearia Yudasa Magabeusu halu ibunaga ami agali hearume Anduane Homogohondo bi lalu hene. Tigua bi lalu howa dara howa aga karulaya wiaru karulalu be abalu ti haguaneni dugu wua hene.
2MA 10:26 Ani bialu tigua lomabu delaga dabu heago kawareni dindi wiagoria bu palu wuwa tigua Ngode Datagaliwabehanda wai bulebirago biamogo bilonaga ibuhondo bi lalu hene. Tigua Ngode Datagaliwabehondo tinaga waitigi kagoha pialu waitigi uruni bo hilo wahai habe lalu lamini. Tigua ani lalu henedagoni bamba Anduane Homogo ibunime ibunaga bi mana lo wini ngagoha howa lo wialu ibunaga wali agali baya hangu handaya ho holebero lo winigo manda bialu lene.
2MA 10:27 Tigua Anduane Homogohondo bi lai halu tinaga wai biaganeale wiaru mo yai halu Yarusaleme howa tagira pialu kaundiaha pole pene. Puwa waitigi heagoria kaware dege handaya howa manda manda bu hene.
2MA 10:28 Ani howa ni tagira ibule manda biyangi mendeha mendaha howabi wai pora bigi bigi bini. Ani bialu howa Yuda ami ti tininaga hongo hanguni hana howa ndo wai bialu kema tigua Anduane Homogonaga hongoni howa wai bialu kemagome tigua wai bialu bo poda hana halu bope holeda lo manda buwa wai bialu hene. Waitigime tinaga keba holene hongoni howa wayali holeberema lo manda buwa wai bialu hene.
2MA 10:29 Wai hongo howaore kaware hapara howa gime minigi minigi bialu howa waitigi agali biarume de handadaga howa handalu hemiria agali bayaleore duriali nogo hosini biralu nogo mo tiga biagane pu ngolome wabiniyago ogonime nogo hosi mo tiga bima ibiyago de hendene. Agali durialu uruni tigua Yuda ami agali haru halu bamba hayaria de hendene.
2MA 10:30 Ani piyagola agali duria uruni ti Magabeusu heba mandagi howa tigua ibu ho hagira bialu tigua wai pole karulaga aga karulearume Magabeusu timu nabelonaga ge hai helearia de hendene. Ani buwa tigua danda timu tege lalu bayagome dabale harini kulukala lalu waitiginaga de minai haga bini. Anidagua biyagome waitigi mo luluya hayagola wai wahalu tini headagua ibida pugu pugu bai hene. Ani pugu pugu biyagola Yuda tigua waitigi minalu bai hene.
2MA 10:31 Yuda ami tigua waitigi ami agali geni pialu wai biagane daosini dege pira kirani handari duria (20,500) homelo bo wahai halu handari waragaria (600) nogo hosini biruwa wai biaga heneru homelo bo wahai halu bini.
2MA 10:32 Ani biya handala Timodi ibuni ibida pialu Gese tanoha wai pabeanda hongohe wiagoha Kaireasahanda ami agali hongohe haru haga wiagoha anda pialu birado hene.
2MA 10:33 Ani piyagola Magabeusu halu ibunaga ami agali biarume horo maru Gese tano wai pabeanda hongohe ogoniha wai bialu hole turuore howa bialu hene.
2MA 10:34 Ami agali wai pabe hongohe ogoniha hearume tinaga wai pabeanda hongohe ogoni bo gialalu podama anda naibulubada lo manda buwa ti ogoriani hongo hanaho howa tigua Yuda ami agali biaru hondobi Anduane Homogohondobi mege timbuni bialu bi koru latagi halu hene.
2MA 10:35 Ani lalu heagola horo dauningi egerebahagi ni tagira ibiyagola Yudali Magabeusunaga ami agali igiri daliaheru pira kira (20) hearumeore keba timbuni hene. Tigua homolene gi naheore elahe howa wai pabe hongohe ege pabe heago irigi hene. Ani pialu porabu anda howa gerai mo koheore pialu agali ti deni ngola hayago damene bibahende ayu tibume dibu gaibu paya biai hene.
2MA 10:36 Waitigime agali uruni baba hila mialu wai bialu heagola Yuda ami halu mende anda puwa wai pabe anda hongohe heago ami agali mamage haga hearu baba wai bialu hene. Ani bialu tigua agali mamage haganaga anda ege pabe neneni bima irigi hene hearu bo heda hai halu ira gialo wahayaru mo mogo buwa ira timbuni bo delowa agali waitigiali mege biaga biaru minalu ira ogoniha do taulaha helene. Ani bialu Yuda ami tidi tebone lone tanoha anda puwa maru tagira hearu anda ibilonaga wai pabe hongohe heagonaga panga hongohe payatagi hearu bibahende bo gialai halu panga dugupe hai hene. Ani bialu tano Yuda ami agali biaru ti anda pialu karulai hene.
2MA 10:37 Ainde Timodi ibuni ibida pialu iba hambiaga iba uli tombo wiagoha birado hearia tigua handa walia halu minuwa homelo bo wahene. Ani bialu tigua Timodi hamene Kaireasa heago homelo ayu tibume dibu wahalu agali mende mini Abolobanese heagobi homelo bo wahalu bini.
2MA 10:38 Wai biai howa Yuda ami agali tigua Anduane Homogonaga mini yaraga hene. Anduane Homogohanda ibunaga dara holene wiago Isaraele wali agali mo walia halu tigua waitigi bope helo hongo miyagonaga tigua turu timbuni halu ka̱i̱ lowa iba gana lalu Anduane Homogonaga mini yaraga halu hene.
2MA 11:1 Ainde mani howa Lisiasa ibu kini hanini howa gabumane agali haguane dege mende henego ibu te uruni hale howa keba timbuni hene.
2MA 11:2 Ani howa Lisiasa ibugua ami agali geni pialu wai biaga daosini dege pira halira (80,000) mo mogo bialu ami agali nogo hosini biruwa wai biaga dewaorebi mo mogo bu helalu bini. Ani bialu tigua Yuda hameigini baba wai bule tidiyu pene. Ani pialu howa Lisiasa ibunaga miniha Yarusaleme tano ngago Girigi dindi ngaru aria dege wiagimbu bu ngelo ibugua yamuleore manda bialu pene.
2MA 11:3 Ani bialu Ngode Datagaliwabenaga anda kagonaga muni dagisi dindi maru ngaruha howa dagisi biaga ngadagua dege ngi lole manda bialu pene. Anduane Homogonaga loma binigo mo miaga agali haguane mali mbira mbirani agali mbirame ibu muni mirago ibu ho aribia haga bilo hamelo hene.
2MA 11:4 Lisiasa ibugua Ngode Datagaliwabenaga hongo gibiore ngago mitangi nabiore hene. Ibugua ibunaga ami agali dewaore daga labe nahe hearubi nogo hosi hearubi nogo timbuni tara mini elebana wai biaga pira halira (80) hearubi uruninaga hongoni hana howa bialu hene.
2MA 11:5 Ani manda bialu Yudia dindiha anda ibuwa Bedesua tanoha wai bialu hene. Bedesua tano ogoni wai pabe hongoheore egeme bu mabubi emene kaundia dege Yarusaleme tanonaga abene unurayagi winigo ogoriani wai bialu hene.
2MA 11:6 Ai Lisiasahanda Yuda dindiha anda ibalu tano hongohe wiaru ho hagira bida layago hale howa Yudasa Magabeusu halu ibunaga ami agali bu hearubi Yuda wali agalibi tigua dugu timbuni bialu Anduane Homogohondo ti biamogo bule dahuliyali mbira ibila lowa bi lalu hene.
2MA 11:7 Ani lalu Magabeusu ibuni wai biagane ale wiaru mo yai halu wai bamba halu pene. Ibugua agali maru hearuhondo, Tí hamene baruago biamogo bialu wai bule maibidaba, lalu olene. Ani laya handala bibahende heyalu piai hene. Tini homolenehayagi mo embeda halu pene.
2MA 11:8 Tigua Yarusaleme tano kaware anda ibalu howa handalu hemiria agali mbira nogo hosini biralu gerai lalu bamba halu piyaria de hendene. Agali ogoni ibu aga pele karulalu wai biagane ale bibahende ngolome wabini hangu mo karulalu biaria de hendene.
2MA 11:9 Yuda ami agali bibahendeme de hondowa ti bibahendeme Ngode Datagaliwabehanda ti dara halu biamogo biyagonaga tigua ibunaga mini yaraga halu ibuhondo ka̱i̱ lene. Ani biyagola ibugua tinaga miniha mo hongo hai hene. Anidagua biyagome tinaga hongo gibiore ho howa waitigi ami agali baba wai bulene hongo karulape halu nogo tara gabua karu baba wai karulape bialu tigua tanoha wai pabe panga hongohe aeaneme bengena howa payatagi karu bo gialalu anda polene hongo karulape hene.
2MA 11:10 Ai tigua tidi yalu duguniore agali nogo hosini biralu bamba halu piyago erembiraha pene. Ngode Datagaliwabehanda ti dara halu agali ogoni ti hearia ibilenego ti haru pene.
2MA 11:11 Ani pialu tigua wai taraore budiale gabua timbuni lainonome hongo hagadagua howa agalini pogolo paga halu balu bo budabaga bialu mo ko howaore balu waitigi ami agali daosini dege pira mbirani mbira (11,000) bibahende bai halu ami agali nogo hosini biruwa wai biaga daosini mbirani handari waragaria (1,600) bibahende bo wahai halu ami agali maru bo taliatogo lai hene.
2MA 11:12 Ami agali dewaore timu hai hayagola tinaga danda timu yu wahalu ibida piai hene. Anigo Lisiasa ibuni homolenenaga gi halu ibida piyagome ibuni nahomene.
2MA 11:13 Lisiasa ibu ibida penedagoni ibu lulu howa ndo agalime ogoale bule lo manda bialu ibida pene. Ibugua wai bialu wayali habe nahe wiyago mitangi bialubi ibugua Hiburu hameigini uruni bope habe nahe kago manda bialubi ibida pene. Yuda tinaga Ngode Datagaliwabe hongohe gibiore kagome ti baya hangu handaya ho kago manda buwa ainde ibugua Yuda wali agali baba wai palima lalu bi lo mbira hole manda bini.
2MA 11:14 Ibugua Yuda wali agali baba bayale hole lowa bi bayale dewa lo wialu ibunaga kini kagomebi Yuda wali agali baba nenege holene karulape lelonaga ibugua baya hangu kini bime ladebodebo bialu haabo hene.
2MA 11:15 Magabeusu ibuguabi nde wali agali bayale helo biamogo bulene hamelo howa ibugua Lisiasahanda wai palima lalu bi layadagoni turu ho hene. Ani bialu Kini ibuguabi nde Magabeusuhanda wai palialu nenege hama lalu bi Lisiasa hearia gilibu pelenedago de hondowa karulapego ani bimi̱ya lalu tigua bi lo pelayadaru bibahende karulape lai hene.
2MA 11:16 Lisiasahanda beba gili bialu Yuda wali agalinaga bi lo pelenedagoni ogo Lisiasahanda Yuda wali agalihondo horombeore lara.
2MA 11:17 Agali kirali tínaga bi i̱ hewaria lo yalu pudaba lene Yonela Abasalomola libugua beba gilibu wia harimiyago yalu ibiya. Tígua bi bebani gilibu ibilarimigo í̠na e̱ labe lalu bi lo wia harimiya.
2MA 11:18 Ani larimiyago hondowa bi tígua hale harimiyaruni bibahende kinihondo miai haru. Ani bialu mbirale i̱hondo hale harimiyaruni i̱na karulape lai haru.
2MA 11:19 Ainde tígua gabumane kago baba mini mo mbiraore ho harimiyagua nde i̱nabi mbirale tí biamogo bulene i̱naga hongo tahe ngago bialu holebero.
2MA 11:20 I̱na agali tínaga bi lahaga karubi agali i̱naga bi lahaga bu karubi tigua bi ogoni baya hangu dabo handalu lo tiga bidaba lalu lamiai haru.
2MA 11:21 Ai hondo halimu laro. I̱na beba ogo mali handari mbira pira mariani halira (148) kagola ege mini Diosogorindiusunaga horo pira kirani maria (24) layagola gili bero, lalu lo wia hene.
2MA 11:22 Kinihanda beba bo pelalu lalu, Kini Andiogusuhanda ibu hamene Lisiasahondo, Í̠ bayale kebe, lalu mo bi la hara.
2MA 11:23 I̱ aba ibu piyago ayu ogoni mbirale bi pupu wiaga dama karu baba mandagi beda. Ainde ayu wali agali ina daluha bu karu bibahende bayale dege hai howa tini daluha biabe bulene ngaru tini handaya howa bialu haga haga bilo hame ledo.
2MA 11:24 Yuda wali agali tigua i̱ abahanda bilo hame layadagua i̱na Girigi dindinaga mana ngago taluwa bule hame nale tinaga mamali mana ngago bialu haabo holene hamelo ko. Ani howa tigua i̱hondo hale halu ti anidagua bulene hamelo kemago i̱na karulape labe laya.
2MA 11:25 Ani hale hayago ainde wali agali uruni ti gi nahe hendore dege wali agali hameigini tara tara dindi iname haru howa handayaho hene ngagoha karudagua dege helo hame ledo. Ti Anduane Homogonaga anda mo tiga bilo i̱na karulape lalu tinaga mamali mana bialu haga ngadagua bialu helobi i̱na karulape laru.
2MA 11:26 Aiore í̠na i̱naga bi ogoni tihondo lamialu ogodagua labe. Ina tí baba nenegeore hole hame ledema. Ani kemago tiha mogolalu miniha gi ho holene nawi. Tí hadapeho howa tíninaga biabe bulene ngago bialu holene nga, lalu kini ibugua bebani gilibu wia hene.
2MA 11:27 Kinihanda beba mbira gili bialu Yuda dindiha yu pelene. Bi bebani gilibu wiyadagoni ogo, Kini Andiogusuhanda gabumane Yudiaha kagobi wali agalibi bibahendehondo bayale kemida lara.
2MA 11:28 Bibahende ale tí daluha ngaru bayale dege ngelo hamelo ko. I̱nibi nde bayale dege ko.
2MA 11:29 Menelausu ibugua i̱hondo langialu ogodagua laya. Tí tíni daluha dai bialu tínaga dindi andaru mbiraleru mo tiga bima polene hamelo kemi, laya. Anidagua bulene bayale. Tíni daluha dai biai halu tínaga dindi andaru mbirale wiyadaru mo tiga bima polene nga.
2MA 11:30 Bayalego wali agali bibahende ege ayu mini Sandigusu kagonaga horo pira tebira (30) naledaore dege tini dalu dai biai holene nga. Tigua mbirale mbira gi holene nawiore.
2MA 11:31 Ani bialu tomo Yuda wali agalime nolene nawi lene ngago bibahende nane halimu. Mbirale Yuda tíni aria karu aria mbirame mana ogoni pugualu hene wiagua nde ayu howa ogoni ibu godi deni holene nawi.
2MA 11:32 Ayu i̱na Menelausu ibugua tínaga miniha mo palia holene karulo halimulonaga bi lelo ibu tí kemiria pu laro.
2MA 11:33 Hondo halimu laro. I̱na beba ogo mali handari mbirani pira mariani halira (148) ogonaga ege mini Sandigusu kagonaga horo pira mbirani duria (15) howa beba ogo gilibu wia haro, lene.
2MA 11:34 Lomoali tiguabi nde Yuda dindiha beba mbira gilibu pela dege bini. Beba ogoniha bi ogodagua lalu gilibu wini. Kuindiusu Memiusula Taidusu Maniusula libu Lomo wali agalinaga bi lagane howa libugua tíhondo bi lo wia hara.
2MA 11:35 Ai i̱namebi nde kininaga hanini Lisiasahanda bi layago karulape ledema.
2MA 11:36 Tígua bi uruni baya hangu mo tale bilimulo hame ledema. Ani bialu tígua mbirale kini ibugua hangu bulene ngago ogo lalu Lisiasahanda tíhondo layago baya hangu mo tale bilimu. Agali mbira tínaga bi la hagane ina baba bi lo tiga buluma̱ya abale ina kemaria ibilalimu. Ina Andiogo tanoha ibaga bialu polene kaware ngago abale ibilalimu.
2MA 11:37 Ainde tínaga mini ogobi wua harua lalu ina manda bu holoma̱ya nde tígua agali mbira mani ibilalimu.
2MA 11:38 Ai hondo halimu laro. Iname beba ogo mali handari mbira pira mariani halira (148) ogonaga ege mini Sandigusu kagonaga horo pira mbirani duria (15) layagola gilibu wia harama, lene.
2MA 12:1 Tigua mandagi holenenaga habo nalolene bi uruni lai halu Lisiasa ibu kini hearia dai bialu Yuda ti tininaga mabuha biabe bialu hagadaru bima dai bini.
2MA 12:2 Anigo agali haguane maru kinihanda dindi hobane mbira mbira wiaru handaya ho haga bilo dabo helene bu hearume Yuda wali agali baya hangu helo hame naleore hene. Agali uruninaga mini Timodibi Aboloniusu ibu Geneusu igini henegobi Hieronimusubi Demobonobi uruni hene. Ani howa Nigano ibu ami agali maru dindi mini Saibarasa iba solowara dege dombene wiagoha haga hearu haru haga howa ibuguabi nde Yuda wali agali bayale helo hame nale dege hene.
2MA 12:3 Ayu Yoba tanoha wali agali bu hearume mana ko mbira bialu henegonaga te laro. Tigua Yuda wali agali tinaga tanoha haga bu hearuhondo tinaga iba talu ngagoria biralu ibaha ma lene. Walibi waneigini hearubi ma dege laga bini. Tigua mini ko wua howa ma lagadagua ndo tiga tiga howa ma laradagua bini.
2MA 12:4 Ainde Yuda wali agali tigua Yoba wali agali baba nenege holene bayaleda lo manda bialu tigua ma layagola ta nabi pu dege bini. Tigua mbirale mbira bulubada lowa gi nahe dege pene. Ani puwa iba solowara haunini puwa Yoba wali agali biarume iba talu mo ande lowa Yuda wali agali handari kira (200) bibahende iba nalu homai helene.
2MA 12:5 Ai Yudasa ibu hale halu hearia Yoba wali agalime ibu damene Yuda wali agali anidagua ibaha homai helaya layane hale howa ibunaga ami agali mo mogo bini.
2MA 12:6 Ani buwa ibugua Ngode Datagaliwabe manani ngadagua tigatiga mo tale biaga kagohondo bi ala lalu mani wali agali ko ibunaga Yuda wali agali bo wahaga hayadaru bole pene. Mbiraga puwa iba angeni iba sibi bu wiaru delai halu iba togo wiarubi delalu wali agali biradoho berearu bo wahai halu bini.
2MA 12:7 Ani bialu howa Yudasa ibu handalu hearia tanoha wai pabe panga payatagi heago handalu ti dai bini. Ibugua mani halu mende dai bialu wali agali ogoniha haga bu hearu bo wahai hama dai bule manda bialu pene.
2MA 12:8 Yudasa ibu lone dege hale halu hearia Yabane tanoha wali agali bu hearu tiguabi Yuda wali agali ani dege bo wahai hole ka layane hale hene.
2MA 12:9 Ani layago hale howa horo mbirangi mbiraga heyalu wai bule pene. Puwa ibugua tinaga iba togobi iba sibi bu wiarubi bo heda hai hene. Ani bo heda hayagonaga ira hagua timbuni dayago Yuda wali agali Yarusaleme tanoha hearume handa amu halu panaga handai hene.
2MA 12:10 Ani bialu Yudasa halu ibunaga ami agali biarume Yabane tano wahalu Timodila wai bule pene. Harigani pole wene pialu hemiria hameigini tara Arebiali ami tidiyu howa wai bini. Arebia uruni ti tomo nolene taya ibaga bu hai haga hene. Agali uruni ti ami agali daosini duria (5,000) howa handari duria (500) nogo hosini biruwa wai biaga hene.
2MA 12:11 Ani heago baba Yudasa halu ibunaga ami agali biaru baba wai buwa Ngode Datagaliwabehanda ti biamogo biyagola ti wayali hene. Ani biyaola Arebia ami agali biaru Yudasahondo hale halu, Ai wai wahalu gi tigani bialu tígua nogo bulumaga sibiru talebu mialu biabe maru bulene ngarubi buleberema, lene.
2MA 12:12 Ani layagola Arebiali uruni tigua Yuda wali agali biamogo bialu tigua biabe dewaore bulebira lo manda bialu Yudasahanda karulape lene. Ani lowa tigua gi tigani biai halu Arebiali ti tininaga balai anda heagoha dai bini.
2MA 12:13 Ani bialu Yudasa ibugua tano wai pabe hongohe bu mabubi mini Kasabini wiagoha wai bule pene. Tano ogoniha wali agali dindi tara taraha howa íbu hene dewaore haga hene.
2MA 12:14 Ani howa tinaga wai pabe hongohe bu mabu bini heagonaga hongoni hana ho hene. Ani bialu ti tomo nalu holene karulape tanoha wai kema lo manda bu hene. Ani howa ai tigua Yudasanaga ami agali biarume mbira buluba ndoda lo manda buwa tigua bime mo tandaga haga bialu hene. Agali uruni tigua bi ko lalu Ngode Datagaliwabe mege bialu hene.
2MA 12:15 Ani lalu heagola Yudasa ibugua dindi bibahende haru howa handame ho haga Ngode Datagaliwabehondo bi lene. Bamba Yosua heangi Ngode Datagaliwabehanda Yarigo tanoho ege pabe hongohe bu mabu bu heago bo gialape hai hene. Yuda tigua pabe ogoni masinimebi ege to̱le̱ timbunime bo gialene ndo. Danda timumebi ndo dege. Ani binigo manda bialu Yudasa ibugua tano ogoni karulole manda buwa wai hongo howa bialu heagola
2MA 12:16 Ngode Datagaliwabehanda ibu biamogo biyagome ibugua wai ogoni bialu bo poda hana howa wayali hene. Yudasa halu ibunaga ami agali biarume wali agali dewaore bo wahai hayagola ibu kuyama mbira bereago wali agali bayaru daramame to̱lene. Iba kuyama ogoni timbuninaga magi manda mida handari maria (400) berene.
2MA 12:17 Yudasa halu ibunaga ami agali biaru ti Kasabini tano wahalu hariga luore pialu Karagasa tano anda pene. Yuda agali maru dindi mini Daliga haga hearu tano ogoniha hene.
2MA 12:18 Ai Yudasa ibu puwa handalu hearia Timodi ibu abale wai mbira binigo ogonime ibu bo poda hana haya handala ibida peaha Yudasa pu aribia hene. Anigo Timodi ibu pialu ibunaga ami agali hongoheoreru tidi mbira ogoniha helalu pene.
2MA 12:19 Ani helalu pearia Magabeusunaga ami agali haru haga kirali Dosideusula Sosibadalame Timodinaga ami agali uruni baba wai bialu bo podahana halu daosini dege pira (10,000) bolangua howa bene.
2MA 12:20 Ani bialu Yudasa ibugua ami agali dewa mo tale bigi bialu tidi yu haga haga bilowa tinaga wai haru bamba holene dabo helowa haru helaga bini. Ani bialu ibuni abaleore Timodi haruru talima pole pene. Timodi ibunaga ami agali nde daosini dege handari mbirani pira kira (120,000) haru halu ami agali nogo hosini biruwa wai biagane daosini kirani handari duria (2,500) haru hene.
2MA 12:21 Ani piyagola ibira layago Timodi ibu hale howa ibunaga wali waneigini dabudabu wiarubi Kanaimi tano yu pelene Kanaimi tano polene hariga emene dorogeore ngagola ogoniha wai anda polene nakarulape wini.
2MA 12:22 Ai Yudasanaga ami agali tidi mbirago pialu anda piyagola Timodi halu ibunaga ami agali biaru mogo lalu duru lo hai hene. Ti mogolo henedago irane Ngode Datagaliwabenaga manane mbira biyago handa walia howa mogolo hene. Ani bialu ti ibida hariga nawi de hendeagoha pugupugu bialu ibida piai hene. Pialu tini mo luluya heagola tini aria dege dege ayu tibume dibaga dibaga bini.
2MA 12:23 Ani biyagola Yudasa halu ibunaga ami agali biarume talima pugupugu bialu waitigi daosini dege pira tebira (30,000) bibahende homelo bo wahai hene.
2MA 12:24 Ai Timodi ibuni ibida pialu hearia hameigini kira Dosideusu hearumebi hameigini Sosibada hameigini hearumebi minu yania hene. Ani biyagola Yuda wali agali aba ai̱ya wahebi wandari igiri daliahebi ibunaga garabayaha helai hene. Ani kago ainde ibu andaga dai nabiruyagua nde wali agali uruni homo aribia hai holobada, lene.
2MA 12:25 Ani lalu Timodi ibu henene buleore howa lalu ibugua wali agali uruni mbirago mo bo nahe baya hangu handaya ho halu baya hangu tini karia dai bilolebero lalu latagi hene. Ani laya handala tigua Timodi pelo yupe hene.
2MA 12:26 Yudasa ibugua Kanaimi tanoha puwa dama wali beda mitangi bialu bi pupu wiaga mini Adagadisi laga waigonaga anda heagoria puwa wali agali daosini dege pira kirani duria (25,000) bibahende bo wahai hene.
2MA 12:27 Ani bo wahai halu Eberono tano hongohe wali agali dindi tara taraha howa ibini dewaorehe wiagoha pene. Ani biyagola igiri daliahe tano ogoniha haga hearume ege pabe neneni howa timu batagi halu wai hongo howa bini. Ai tano tamuha masini tara tara ege to̱le̱ batagi holenebi timu batagi holenebi dewa wabu ngelowa wai bini.
2MA 12:28 Ani bialu heago helowa Yuda tigua Anduane Homogohondo ti biamogo bialu waitiginaga hongo bo podabe lalu bi hongo howa lene. Ani lalu tanoha gialalu anda puwa waitigi daosini dege pira kirani duria (25,000) ale bo wahai hene.
2MA 12:29 Ani bialu mani Eberono wahalu pialu tano mbira mini Bedesana Yarusaleme howa horo mbirani gao laragola heyalu puwa alendo ne laragola anda polene wiagoha pole pene.
2MA 12:30 Wali agali Yuda hameigini aria tano ogoniha haga hearume Yudasahondo lamialu lalu, Wali agali dindi aba tano ogoniha haga bu karume ina Yuda wali agali baya hangu handaya ho howa mo ko holene ngangi ina biamogo bialu haga ka lalu lamini.
2MA 12:31 Ani layago hale howa Yudasahanda bime hongo howa lalu, Horo bibahendengi anidagua biaabo halimu, lalu lamini. Ani lalu Horo Timbuni Mabuha Tomo Pigane Denegonaga biago kaware ibulene wiagola Yudasa halu ibunaga ami agali biaru heba Yarusaleme dai bini.
2MA 12:32 Horo timbuni ogoni mini Girigi bi lalu Pendigosi laga. Yudasa halu ibunaga ami agali biaru tigua horo mini Pendigosi ogoni hai halu Idumea dindiha gabumane agali haguane mini Gogiasala wai bule abale heyalu pene.
2MA 12:33 Ani biyagola Gogiasa ibugua ibunaga ami agali daosini dege tebirabi (3,000) ami agali nogo hosini biruwa wai biaga handari mariabi (400) mo mogo bu hene.
2MA 12:34 Ani howa wai bialu Yuda ami maru homene.
2MA 12:35 Yuda agali ami hongoheore pari wayali mini Dosideusu ibu tano mini Daliga howa ibini henego ogoni ibugua nogo hosini biruwa wai bialu howa Gogiasa talima pugu pugu bialu aga biagoria minu yania howa gililo yalu pubagi hene. Ani buwa ibugua homelo bolene hame nale hearia dege ami agali mende nogo hosini biruwa wai biaga Terese dindiha howa ibini heagome Dosidereusunaga gi ayu tibume gandulope hayagola Gogiasa ibu pora bialu ibida Maresa dindiha puabo halu pene.
2MA 12:36 Ainde Esediriasa halu ibunaga ami agali biaru heba wai luore biai howa tinaga hongo ibira hene. Ani heago Yudasa ibu de hondowa Anduane Homogohanda ibuni ti heba ko lalu manane mbira mo walia halu ibuni Yuda ami agali heba bamba habe lalu bi lene.
2MA 12:37 Ani lalu Yudasa ibugua ibunaga ami agaliru mo hongo halu lotunaga iba gana mbira mbira tininaga bi lalu lene. Ani lalu tigua wai pora bialu Gogiasanaga ami agali biaru balu bo taliatogo lai hene.
2MA 12:38 Wai biai halu Yudasahanda ibunaga ami agali mo mogo bialu Adulama tano pole pene. Puwa Sarere ogoninaga horo kane tagira ibulene wiagola Yuda wali agalinaga maname biaga winidadagua tini Anduane Homogonaga deni dodo nahe holenenaga biaga mana wiago bialu Sabada horonaga mana bialu hene.
2MA 12:39 Horo mendeni Yudasa halu ibunaga ami agali biaru tigua tinaga ami agali waiha homayarunaga tingini tini mamaliru hora heagoha dege mandagi tininaga tanoha hora hole mo pene.
2MA 12:40 Ani mo puwa handalu hemiria homayadarunaga gi adogeha Yabane wali agalinaga bi pupu wiaga gime wabini bigiya irame wabini wiaru mo yiaria de hendene. Ngode Datagaliwabenaga mana lowini ngagoha howa mbirale bi pupu wiaga gime wabini ogoniale Yuda wali agalime yulene nawi lalu lowini. Ai agali waiha homai hayadaruni irane ogonime homayada lo panaga hondo manda biai hene.
2MA 12:41 Ani biyagonaga mini panaga handai henego tigua Anduane Homogonaga mini mo yaraga halu hene.
2MA 12:42 Ai Yuda tigua Ngode Datagaliwabehondo bi lalu tinaga ko ogonime mo wia hayadago mo wahaiore habe lalu bi lene. Yudasa ibugua ibunaga ami agali biaruhondo lamialu, Konaga pani ayu dege agali homai hayago ina de handarimagonigo ai tíha mana ko ngelo kemigo wahai halimu, lalu lamiai hene.
2MA 12:43 Ani lalu ibunaga ami agali biaruhondo muni ngidaba lowa siliba muni kuni daosini kira (2,000) mo mogo bini. Ani buwa agali loma binigo mo miaga Yarusaleme tanoha hearume tinaga mana ko ngago domolene lomabu milonaga mo pelene. Mana Yudasa ibugua binidagoni bayale tigabiore binigo irane wali agali homayaru mani lone heyulebirago manda bialu mini mbiraore hongohe wu howa ani bini.
2MA 12:44 Yudasa ibugua agali homayarunaga bi Ngode Datagaliwabehondo la henedago ibugua mini mbiraore nawi howa lenedale ogoni mana tiga nabi dege bialu kale.
2MA 12:45 Anigo ainde Yudasa ibugua agali bayale tigabi howa mana bayale bialu haga homeneru ti mani yolo bayale mulebira lo manda bu hene. Ani manda buwa Yudasa ibugua agali wai bialu homararunaga ko Ngode Datagaliwabehanda domo wahai helonaga loma wia hene.
2MA 13:1 Mali handari mbira pira mariani dira (149) layagola Yudasa halu ibunaga ami agali biaru handalu hearia Andiogusu Yubadohanda ibunaga ami agali haru halu Yuda dindiha anda ibira layago hale hene.
2MA 13:2 Agali mende mini Lisiasa ibu Andiogusu ibu aba hamene gabumane agali haguane mende henego ogoni libu haru mandagi ibini. Ani bialu Girigi ami agali bu hearubi ti haru ibini. Ami agali geni piaga dewaore daosini dege handari mbira pira mbira (110,000) ibalu ami agali daosini duriani handari tebira (5,300) nogo hosini biruwa wai biaga heba ibini. Ani bialu wai biagane nogo elebana pira kirani kira (22) haru halu wai biagane garo ale nogo hosime gili lagane wiarunaga ge bibahendeni wai biagane ayu nabi nene gadeleru wabu helaga binigo handari tebira (300) bibahende ibalu bini.
2MA 13:3 Ani pialu howa Menelausu ibu ohowa ti haru mandagi wai ma lalu ti heba petingi halu Andiogusu bime ladebodebo bima pene. Ibugua anidagua binidagoni ibunaga dindi mitangi halu ibu dindinaga oha ndo ibu agali mini lene timbuni mbira loma binigo mo miaga agali haguane timbuni kago dugu waholigonaga ibu ohowa ti heba mandagi pene.
2MA 13:4 Ani pialu heagola Kini haguaneore kago Ngode Datagaliwabe ibunime Andiogusunaga miniha mo tandaga timbuni helowa Menelausuore biba helelo mo bia hene. Ani biyagola Lisiasahanda kininaga deni howa tigatiga latagi halu lalu, Genda tara tara Kini Andiogusuha tagira ibugu biyago tene Menelausu kagome ibiya, lalu latagi hene. Anidagua layagola kini ibugua lalu, Menelausu ibu homelo Beria tanoha puwa tininaga maname homelo bagane ngadagua bole pudaba, lene.
2MA 13:5 Beria tano ogoniha dabu bima irigi hene magi manda daliganaga mida pira kirani duria (25) henego dabu ogoniha ira punga be abalu dewaore wini. Dabu bima irigi hene ogoni tamuhayagi bu yulopehe hene.
2MA 13:6 Ai wali agali tano ogoniha hagarume de hondo karia mbiralime mbirale lotunaga ngaru mo ko halu mana ko mbira birane handayagua tigua dabu daliga ogoriani haru irigi howa homelo dindiha be abalu ngagoria helope haga.
2MA 13:7 Ai agali Ngode Datagaliwabenaga mana lo wini ngago pugualu haga Menelausu ibu anidagua dege homene. Ani homayagola tigua ibunaga tingini mo hora nahene.
2MA 13:8 Ibugua mana ko biaabo halu Ngode Datagaliwabenaga dabu kagoria be abalu wiago mo ko halu haabo haga henegonaga pani ogoni karulape nene. Anidagua binigome ibuni lomabu delaga dabu kagoria be abalu wiagoria homadambi hene.
2MA 13:9 Ai Kini Andiogusu ibu ibalu heagola ibunaga bu miniha keba holene timbuni tagira ibini. Ibugua ibu aba henego bolangua howa Yuda wali agali tandaga nolene dewaore mo mule manda bini.
2MA 13:10 Ai Kini Andiogusuhanda anidagua bule manda bu ka layago Yudasa ibu hale howa ibugua Yuda wali agali lamialu, Mbiraga horombebi Anduane Homogohondo bi hongo howa laabo halimu, lalu lamini. Waitigime ibalu horo ogoningi tinaga mana lo wini ngagobi dindibi Ngode Datagaliwabenaga anda kagobi bo gialo wahai halu mo ko hai holebiragonaga bi lahalu halimu, lalu lamini. Ibugua lalu, Ngode Datagaliwabehanda ti abale biamogo biyadagua ayubi nde biamogo bulebira.
2MA 13:11 Tínaga dindi ala mo ko hene labu dindi winigo ayu emene bayale ngago mani agali ko Anduane Homogohondo mini mbiraore nawiaga karunaga hongo andaneha pilaede holigonaga bi lalimu, lalu lamini.
2MA 13:12 Ani layago lole howa wali agali bibahendeme Yudasanaga bi layago taliai halu bini. Tigua horo tebirani howa Anduane Homogo dara holene irane nawini dara timbuni haga kagohondo bi lalu haabo hene. Tigua tomo nane dindini dengui handa dindiho paluwa Anduane Homogohondo dugu bialu hene. Ani bialu heagola mani Yudasahanda ti olo mogo buwa lamialu, Wai bule manda manda bu halimu, lalu lamini.
2MA 13:13 Ai Yudasa ibugua agali haguane hearu baba mandagi ngoai ho biruwa tigua bi lo mbira halu lalu, Tigua ayu ogoniore heyalu wai poramagola Ngode Datagaliwabe ibunime ti biamogo biragola wai kini karia bu yalu polebirago ai kini ibu wai Yuda dindihabi Yarusalemebi anda naibidaore iname wai ala anda polene nga, lene.
2MA 13:14 Ani lalu Yudasahanda mbirale bibahendeore dindi harilabi uruniha karubi ngarubi wabiaga Ngode Datagaliwabe ibuninaga giha mo ya hai halu ainde ibunaga ami agali hearume wai hongo howa bilo tinaga miniha mo hongo hene. Ani biyagola tigua nde Ngode Datagaliwabenaga mana ngagonaga manda bialubi ibunaga anda kagonagabi Yarusaleme tano mitangi bialubi tinaga dindi bibahende mitangi bialu tinaga mamali mana ngago mitangi bialubi homole manda buwa hongo ho hai hene. Ani howa tigua tano Modeini wiagoria puwa balai anda bini.
2MA 13:15 Ani bialu Yudasa ibugua ibunaga ami agaliru wai bilonaga hoaro lalu howa lalu, Ngode Datagaliwabehanda wai bialu waitigi bope halu wayali holebira, lene. Ani lalu mbiraga howa igiri daliahe gi nahaga hearu haru halu Yudasahanda wai mbiraga kininaga balai anda bu paleagoha anda pene. Puwa mbiraga ogoningi kininaga ami agali daosini kira (2,000) bibahende homene bai hene. Ani bialu wai biagone nogo elebana duniniore heago heba nogo ogoriani mo tiga bialu biraga heago heba homelo balu bini.
2MA 13:16 Ani bialu tinaga waitigi bibahende mo luluya hai halu mo gi hai hene. Ani bialu ai Yuda ami tigua wai bialu wayali hayagonaga turu howa gao layagola waitigi dalu wahalu pene.
2MA 13:17 Anduane Homogo ibunime Yudasa baya hanguore handaya ho howa haru heagome mbirale tigua biyago bayale dege biai hene.
2MA 13:18 Ai kini ibugua wai Yudame biaga wiago baya hangu hondo manda biai howa ai Yuda dindiha tano wai pabe hongohe bu mabubi wiaru bo podahana halu karulole manda buwa ohowa wai henene.
2MA 13:19 Ani manda bialu puwa Yuda tinaga wai pabeanda hongohe Bedesu tano wiagoria anda pene. Ani puwa tano ogoni mulenaga wai hongo howa bialu hene. Ani bia biyagoyu Yudame ti bo heladai bini. Ani biyagola harugo lowa wai hongo howa biadaiore bialu hearia ibu lone boga hana hai hene.
2MA 13:20 Ani biyagola Yudasa ibugua tanoha wali agali wai bialu hearunaga dabudabu maru mo pelene.
2MA 13:21 Ani biyagola Yuda ami agali mbira mini Lodogusu henegome Yudasahanda ani biya lalu waitigi hearu lamini. Ani lamiyayago Yuda wali agalime handa walia howa agali Lodogusu ibuni minalu homelo bo wahene.
2MA 13:22 Ani biagola ai kini ibugua Bedesu wali agali baba baya hangu mandagi biruwa bi lalu, Ina wai nabi baya hangu hami̱ya, lalu habo nalolene bi lo wialu wali agali baba gi tigani bialu kini ibu pene. Ani bialu puwa kini ibugua Yudasala wai bialu hearia Yudasahanda kini bope halu wayali hene.
2MA 13:23 Ani bialu howa kini ibu hale halu hearia agali mbira mini Pilibi Andiogo tanoha gabumane biabe damene bibahende haru howa mamage habe leago lulu tagira piya layago hale hene. Ani hale howa ai kini ibunime ago bule harube toba halu mini naibiore ona hene. Ani howa ai ibugua Yuda wali agali baba bi lalu berene. Ani biruwa Yuda wali agalime bi ibuhondo bilonaga hale hayaru e̱ lalu ibugua, Ai Yuda wali agali tíninaga mana bialu haga winidago baya hangu talialu bialu halimu, lene. Ani lowa ti baba gi tigani bialu mbira lomabu delalu bini. Ani bialu ibugua Yarusalemeni Anduane Homogonaga anda heagobi anda ogoniha mbirale wiarubi bibahendenaga mini yaraga halu bini.
2MA 13:24 Ani bialu ibugua Yudasa Magabeusu ibu andagaha haru anda pialu libu nenegeore hene. Ani bialu agali mbira mini Hegemonidese heago dabalu ibu gabumane haru haga haguane dege mbira helowa ibugua dindi maru mini Tolemese tano howa pialu amuraore Gera tano tagira pedago haru howa handaya ho helo helene.
2MA 13:25 Ani bialu kini ibuni Tolemese tano pole pene. Wali agali dindi uruniha hearume kinihanda habo nalolene bi Yuda wali agali baba lo wiyayago manga halu mo waha lo manda bu hene.
2MA 13:26 Anigo Lisiasahanda heyu howa habo nalolene bi lo wiyago mo hongo halu bi lone la dege bini. Ibugua wali agali baba bi hendore lalu tinaga bu mini mo beregedaga bialu hene. Ani lalu wali agalime ibu baba mini mo mbiraore hai haya handala ibu Andiogo dai bini. Te ogoni kini ibugua wai bule pialu hearia ainde wai bibe naheya handala ibuni andaga dai binigonaga ogoni hangu.
2MA 14:1 Mali tebira howa Yudasa halu ibunaga agali hearu ti hale hayane Selugusu igini Demidiriasahanda ibunaga ami agali hongohe dewaore haru halu iba sibini biralu puwa Tiribolisi tano wiagoria iba sibi anda ibaga iba angeni ibu nga layago hale hene.
2MA 14:2 Ai agali Demidiriasa ogonime Kini Andiogusu homelo bo wahalu ibu aba hamene Lisiasabi bo wahalu ibunime gabumane haru halu handaya ho hene.
2MA 14:3 Horo ogoningi agali mbira mini Alagimusu hene. Ala ibu agali loma binigo mo miaga haguane timbuni henego mani howa wai biyangi howa ibunaga mamali mana wiaru wahai ho hene. Ibu mitangi bu handalu Yuda wali agalime ibu pani ngulubada lo manda bialu gi ho howabi ibu loma binigo mo miaga agali haguane timbuni howa biabe bialu haga wiagobi lone ibuni mo yu dai buwa bialu habe nahe wiago manda bu hene.
2MA 14:4 Ani manda bu howa mali handari mbira pira duriani mbira (151) layagola Alagimusuhanda Kini Demidiriasa hondo pene. Ani puwa ogoningi ibugua manda mbira ngolome wabinibi ayage yunibi ira olibe maganebi Yuda wali agali tigua Anduane Homogonaga andaha bu yalu piaga mana winidagua yalu puwa kinihondo mini. Ani puwa ibunaga mini wiago kinihondo latagi nahe dege hene.
2MA 14:5 Mani howa Kini Demidiriasahanda ibu agali ganisolo hearu baba mandagi bi midini mbira lolene wiagola ibu heba lami̱ya íbu lene. Ani íbu lowa lalu, Yuda wali agalime mbirale mbira agi bule hamelo kabe, lalu hale hene. Ani hale hayagola Alagimusuhanda ibuha lulu mini wu hene ngelo heago latagi hene. Ibugua lalu,
2MA 14:6 Yudasa Magabeusu ibugua Yuda hameigini aria maru ti mini Hasidi laga hearu haru halu ibuni mo haguane ko ka. Bibahendengi agali uruni tigua wali agalime wai bialu haabo helonaga tinaga bu miniha mo heya haabo haragome dindi mo bayale ngelonaga hondo ha nabiaga ka.
2MA 14:7 Tigua i̱naga biabe timbuni i̱ abahanda i̱ni giha mo ya halu homene yu hewago mo wahalu biya. Ayu i̱ oali ibirudagoni
2MA 14:8 irane i̱ mbirale bibahende kininaga ngago damene mitangi howa ibini. Ani bialu i̱naga wali agali bu karunaga genda yalu ibini. Agali ko o mini laruruninaga lulu mana bialu heagome i̱ dindiha genda timbuniore mo yu anda ibiya.
2MA 14:9 Kini-o í̠na dara holene irane nawini howa wali agali bibahende dara hai halu ti heba miniha dungulo haga kegoni. Í̠na mbirale bibahende baya hangu dabo handai howa nde i̱ daluha dindi ngago bayale helo biamogo bulene mitangi bialu i̱naga wali agali genda yu karu biamogo bulene mitangi bibe.
2MA 14:10 Agali Yudasa ogoni homa nabi haabo hayagua í̠naga dindiha wali agali bayale holene nawulubada, lene.
2MA 14:11 Alagimusuhanda bi lai hayagola abaleore Yudasa waitigi agali mini Kininaga Nenege laga hearume bi laga laga bialu Kini Demidiriasa mo tandagore hene.
2MA 14:12 Anidagua biyagola Kini Demidiriasa ibugua heyalu abaleore agali ami haguane mbira nogo elebana handaya ho haga heago dabalu Yuda dindiha gabumane haguane howa haru hole pu lene.
2MA 14:13 Ibugua Yudasa homelo bo waholenebi agali Yudasa baba mandagi ibaga bu haga hearu bo taliatogo lolenebi. Alagimusu Anduane Homogonaga anda kagonaga biabe bialu helo loma binigo mo miaga agali haguane timbunibi helo dabo helalimu laga bialu bi lamiai hene.
2MA 14:14 Wali agali maru Anduane Homogohondo mini mbiraore nawiaga Yudiaha haga heneru ti Yudasa gi halu ibida pugupugu biniru ogoningi Niganola ho mbiraore hene. Tigua lo manda bialu Yuda dindi mo ko holene anda ibirangi tini mo ko nahe bayale holebirama lo manda bu hene.
2MA 14:15 Yuda ti hale ho hearia Nigano heba agali Anduane Homogohondo mini mbiraore nawiaga hearu Yuda ti baba wai bule ibira layago hale hene. Hale howa Yuda tigua be abalu tinaga haguaneni dugu wini. Ani buwa tigua Anduane Homogo ibu Yuda wali agali ti ibuninagaore haabo helo dababagi ho helene howa bibahendengi biamogo hongo howa biaabo hagabi kagohondo bi lalu hene.
2MA 14:16 Ani bialu tinaga agali haguane Yudasahanda bidaba layadagua bialu abale heyalu puwa tinaga waitigi dindi emene mbira mini Adasa wiagoria ngola hole pene.
2MA 14:17 Ani bialu ai Saimono ibu Yudasa hamene howa ibugua Niganola wai bini. Ani bialu heagola waitigi biarume abale ibalu wai biyagola ti emene bope hene.
2MA 14:18 Ai Nigano ibu hale halu hearia Yudasa halu ibunaga agali bu hearu ti gi nahe elaheore howa tinaga dindinaga wai hongo howa biaga ka layago hale howa Nigano ibu wai bulene hame nale hene. Ani howa tigua wai wahalu bi lalu mo palia hole hame lene.
2MA 14:19 Ani manda bialu ibugua agali maru bi lo tiga bilo Posidoniusubi Teododusubi Madadaiasabi dabalu, Yuda wali agali baba bi lo tiga bule pudaba, lene.
2MA 14:20 Ani laya handala puwa agali haguane kirabaliha howa ibalu bi lo tiga bule luore lalu hene. Ani lalu howa mani agali haguane mbirame ibunaga ami agali hearuhondo lalu, Ayu iname bi lalu inanaga waitigi bu karu baba mandagi mini mo mbiraore ho hami̱yanaga bi lole mo ngoai ho kemagonida, lene.
2MA 14:21 Ani lalu agali haguane biaru tigua mitini lone lole horo pongo wini. Agali haguane kirabaliha howa wai biagane garo ale mini karisi nogo hosime gili laga mbira mbira lowa biragane dagia kirawi yalu ibini.
2MA 14:22 Ani bialu ha howa dege Yudasahanda ibunaga ami agali dindi bibahendeha waitigime ohowa wai biyagua biadai bule manda manda bu hai helene. Ani heagola agali haguane kirabaliha howa bi bayale dege lai hene.
2MA 14:23 Ani lalu Nigano ibu luore Yarusalemeni biruwa ibugua mbirale mbira biako nahe bayale hene. Ani bialu agali tara tara Nigano heba íbu hene bu hearu tihondo lalu, Wahalu tíni dalu pugu pugu bidaba, lene.
2MA 14:24 Ai Nigano ibu Yudasa gubalini timbuni ho howa ibu Yudasala mandagi haabo hene.
2MA 14:25 Ani howa Niganohanda Yudasahondo bi bayale lamialu, Ai Yudasa wali dau bialu waneigini hono wulene nga, lalu lamigi bini. Ani layago hale howa Yudasa ibu wali dau bialu waneiginiru hono wialu agali maru bu hearubi dege hene.
2MA 14:26 Agali loma binigo mo miaga haguane timbuni Alagimusu ibugua handalu hearia agali kirali Nigano Yudasala mo nenegeho heago hondowa ibugua libunaga habo nalolene bi lo wibigo mo yalu Demidiriasa hearia puwa ibugua kini berearia puwa lamialu lalu, Nigano ibugua gabumane mo guya hole hariga taya bialu ka. Ani bialu ibugua agali waitigi gibiore heago Kininaga Nenege dabo heleda, lalu kini lamini.
2MA 14:27 Bi ke̱ howa mege bialu layadagome kini mo tandaga timbuniore hayagola ibugua Niganonaga beba mbira gilibu wia hene. Ibugua lo wia halu lalu, Habo nalolene bi Yudasala lo wiriyago turu naheore ko. Ai agali Yudasa Magabeusu ogoni minu garabaya bu yalu Andiogo ibabe, lene.
2MA 14:28 Ai beba gilibu wia hayago Nigano hearia anda piyagola Nigano mogolo hendenego irane ibugua agali ko mbira nabi kego baba habo nalolene bi lo wiyago mo habo lolene hame nale hene.
2MA 14:29 Ani howa ainde ibugua kininaga bi ledago mo waholene nawigo manda buwa ainde Yudasa mo ohowa mini ede hole hariga taya bialu hene.
2MA 14:30 Ani bialu heago Yudasa ibu de hondowa ainde Niganohanda Yudasa ibu baba mini mbiraore nahebi ibu baba nenegeme bi lo hagadagua nahebi heago de hondo hene. Ani hondo howa ainde agali ogonime ibu mo ko hole kagonida lo manda bu hene. Anidagua bule heagola Yudasahanda ibunaga ami agali dewaore haru halu mbirahayagi hado hole pene.
2MA 14:31 Ai Nigano ibu handalu hearia Yudasahanda ibu mo hondo heneya handala ibu heyalu abale Anduane Homogo andaga agali loma binigo mo miaga hearu tigua lomabu mialu hearia anda pene. Anda puwa ibugua agali urunihondo lamialu, Yudasa abaleore ibu minu ngilimu, lalu lamini.
2MA 14:32 Ani layagola agali uruni tigua ladai bialu, Heneneore Yudasa ibu agoha ha do kabe ina manda nabidama, lene.
2MA 14:33 Ai Niganohanda Anduane Homogonaga anda heago ibunaga gi tigame gi dola amu halu ibugua mbira buleore lowa hongo howa lalu, Tígua Yudasa minu yalu ibuwa i̱naga giha ya naharimiyagua i̱na anda o kago bo gialo wahai halu ibu kagoria mbirale mbira nawi dindi hangu wulebira. Tínaga lomabu delaga dabu bu heledemigo i̱na bo gialo wahalu inanaga bi pupu wiaga bigiya tara mbira mini Dionisusu ngagonaga anda baya tara mbira bu aribia ho helolebero, lene.
2MA 14:34 Ibugua bi ogoni lai halu ibuni andaga dai bini. Anidagua lalu piyagola agali loma binigo mo miaga hearume tinaga gi dahuliya andagaha dogoladaga howa Ngode Datagaliwabe ibu tinaga dindi ngago baya hanguore haru howa handaya ho haabo haga kagohondo bi lalu hene. Tigua lalu,
2MA 14:35 Anduane Homogo í̠ha mbirale mbira tubagi nahaga ke. Anigo í̠ni ina baba mandagiore holenaga í̠naga anda mbira í̠ni dalu ngagoria bu helari.
2MA 14:36 Anduane Homogo í̠ hangu baya tigabiore ke. Ainde í̠na anda ogo ayuore dege iname í̠na deni dodo nahe helonaga mo loma bia ho helarimago baya hangu handaya ho habe, lalu Anduane Homogohondo bi lene.
2MA 14:37 Agali mbira mini Lasisi ibu ganisolo Yarusalemeha henegonaga te ogo. Tigua ibu Nigano deni íbu helowa godi hale hene. Lasisi ibu agali bayale tigabiore mbira howa ibugua mana tara tara biyagome ibunaga wali agali baya hangu biamogo bialu haga heagola tigua ibunaga mini yaraga halu ibu Yuda wali agali aba ka laga hene.
2MA 14:38 Yuda ti baba wai nabi heaore dege Lasisi homenego irane ibugua Yuda wali agalinaga lotu mana wiadagua baya hangu taluwa bialu hearia homene. Ibugua homolene gi nahe howa lotunaga mana baya hanguore talialu bule kaware haabo hene.
2MA 14:39 Nigano ibugua ibu Yuda wali agali baba waitigiore ko lalu biyagome walia haga bini. Ani bialu howa ibugua ami agali dewaoreme Lasisi minu pelo pelene. Ami agali dewaore handari duria (500) agima bolangua howa pene.
2MA 14:40 Nigano ibu lo manda bu handalu hearia ibugua, Agali hongohe Lasisi ale bu karu minu garabaya biruyagua Yuda wali agali bibahendeme gi hai holebira, lo manda buwa ani bini.
2MA 14:41 Ai ami agali biarume puwa wai pabeanda hongohe heagoha Lasisi ha do heagola tigua wai hongo howa bialu hene. Ani bialu howa tigua wai pabe hongohe heago gialolenaga ira hedo yalu ibidaba lowa hongo howa olalu hene. Ainde Lasisi ibugua handalu hearia ami agali biarume ibu talialu ho mabu biai hearia hondowa ibunaga wai biaga ayu tibu yiagome ibuni homolenaga nogoba hene.
2MA 14:42 Ibugua mitangi bialu ami agali Anduane Homogo mitangi nahaga bu karume ibu mo taga holigo ai ibunaga mini bayale mini yaraga hene ngago ngaore homarayagua karulapeda lo manda bialu anidagua bini.
2MA 14:43 Anidagua bialu hearia ibugua abale ala bigi bialu hearia ibuni dibayadagoha diba puda hearia homa nabini. Ani howa handalu hearia ami agali biaru wai pabe panga dugualu abale anda ibai hayago handalu Lasisi ibu dai lalu wai pabe nene wiagoria pole pene. Puwa unu dindiha wali agali bu heagoha porabupe hene. Ani bulene gi naheore howa pora bini.
2MA 14:44 Ani pora biyagola wali agali ti hamigi migi biyagola henge wiagoria ibira hene.
2MA 14:45 Ani biyagola ibu homa tongolo mia nabi dege buhe̱ wiaabo howa ai lone heyalu darama timbu dibini wiagoha piago pialu helowa gerai lalu wali agali bu heagoha pene.
2MA 14:46 Ani puwa ege to̱le̱ timbuni mbira wiagoria porabu paga hene. Ani biyagola nde ibunaga darama pu dege bialu pu maro bini. Ani biyagola ibuni gi kirabalime hongo howa ibuninaga tini tombene bibahende minu duguai howa wali agali heagoha ba pelene. Ani bialu ibugua Anduane Homogo buhe̱ lolenebi holenebi miaga kagohondo olowa lalu, I̱naga buhe̱ lolenebi holenebi lone ngiadai bibe, lalu bi lene. Ainde agali bayale Lasisi ibu ogodagua homene lalu te ogoni hangu.
2MA 15:1 Yudasa halu ibunaga agali biaru Samaria dindihayagi ka layago Nigano ibu hale hene. Ani hale howa ai Nigano ibugua wai hanalu Yudasa halu ibunaga agalirume Sabadani wai biadai nabulubada lo manda buwa ibugua Sabada horoni wai bu pole manda bini.
2MA 15:2 Ani pole manda bu ha hearia dege Yuda agali maru Nigano heba hearume ibuhondo lamialu lalu, Agali lu mini nawime biagadagua wali agali homelo Sabada horongi wai nabulebere. Horo Ngode Datagaliwabehanda mbirale bibahende karubi ngarubi handai haga kago ibugua mbirale ibunaga ngelo dabalu handaya ho haga kago ibunaga deni mana bayale hangu bialu holene nga.
2MA 15:3 Ani bialu agali ko dama Heyolabe igini ogoni ibugua tihondo hale halu lalu, Agali haguane mbira hari daligaha howa ogoni ibugua inahondo Sabada horo dabo ngelalimu lene ngabe, lalu tihondo hale hene.
2MA 15:4 Ani layagola tigua ladai bialu lalu, E̱ Anduane Homogo ibu holenehe yu howa mbirale bibahende karubi ngarubi haru hai haga kago ibugua inahondo langialu Sabada horo ogoni talialu halimu, lene.
2MA 15:5 Ani layagola Niganohanda lalu, I̱ hangu daliga howa dindi ogo i̱na handaya ho howa i̱na tíhondo langialu tínaga wai biaganeale ngemiru mo yai halu kininaga biabe bule pudaba laru, lene. Anigo ibugua ibuninaga hame ko wiyadago talialu habe nahe hene.
2MA 15:6 Nigano ibuninaga mine halu biaga tingi hayagome ibugua lo mitangi bialu, Í̠na Yuda baba wai buwa Yuda ami karu bope halu tinaga dabudabu ngaru bibahende ibu mo yai halu puwa ege to̱le̱ timbuni mbira ibugua wai bialu wayali henego mitangi biaabo holenaga hama dombeni hongole manda bini.
2MA 15:7 Ani bialu heago helowa Yudasa Magabeusu ibu mogo nale hene. Anduane Homogohanda ibu biamogo bulubada lo manda bu hene.
2MA 15:8 Ani howa ibugua ibunaga ami agali biarunaga bu miniha mo hongo ho howa lalu, Agali Anduane Homogo yu tiga nabiaga ina baba wai bule ibiragohondo gi nahalimu. Ngode Datagaliwabehanda ina biamogo biaabo haga kago mitangi biadai bulene nga. Ani bialu ayubi nde Ngode Datagaliwabe Bibahende Hongo Haiheore kago ibunime ina biamogo bialu kagola iname wai bialu bo podahana holeberema lo manda bialu ibuhondo mini mbiraore hongohe wu holene nga, lalu lamini.
2MA 15:9 Ani bialu Yudasa ibugua ibunaga ami agali biaru bi bayale mana mbugaha howa lo wini wiarumebi agali maru Anduane Homogonaga bi latagi halu mbiwia haga henerunaga bi lo wini wiaru tinaga buminiha hongo ho helo mo hongo halu hene. Ibugua tihondo lamialu lalu, Wai bialu tí wayali haga wirimigo baya hangu mitangi bilimu, lene. Ibugua bi ogonidagua laga biyadagome ti wai hongo howa bilonaga mo hongo halu laga bini.
2MA 15:10 Ani lai hayagola ibunaga ami agali biarume wai bule manda manda bu hene. Ibugua ti lamialu, Agali Ngode Datagaliwabe kagohondo mini mbiraore nawiaga howa bi henene lo wini ngago mo habo lalu mo hondo halu ohaga bu kago baya hangu de hondo halimu, lene.
2MA 15:11 Yudasahanda ibunaga ami agaliru mo hongo halu danda timu humbiru mo mini ndo. Ibugua tihondo mo hongo halu bi bayaleru dege lamialu mo hongo hene. Ani bialu emaga mbira Yudasa ibugua hendenego tihondo lamialu bini. Agali bibahende emaga bini te layago hale howa henene layabe toba ho hai hene.
2MA 15:12 Yudasa ibugua emaga handayadagoha agali loma binigo mo miaga haguane timbuni mini Oniasa bamba halu homenego ogoni hearia hendene. Agali Oniasa ogoni ibu bayale tigabiore howa ibuni mo dindiha ho howa hendore dege bulene ngago bialu haga hene. Ani bialu agali bi lagane gibiore mbira hene. Bamba igiri emeneni howa ibu mana bayale tigabi bulene ngaru hangu bulenenaga sigulu bialu hene. Ani bini henego ai Yudasa ibugua emagaha handalu hearia Oniasahanda ibunaga gi doladaga howa Yuda wali agali bibahendenaga bi la halu hearia hendene.
2MA 15:13 Ani hondo heagola agali mende ha pana howa Oniasahanda bi layadagua dege lalu hearia hendene. Agali ogoni ibu waheoreni daguaheyago agali mini lene howa hongo tara yi heago hendene.
2MA 15:14 Ai Oniasahanda lalu, Agali ogoni ibu Ngode Datagaliwabenagabi mana latagi halu mbiwia haga ibu mini Yaremaia ka. Ibugua ibunaga wali agali Ngode Datagaliwabe ibuninaga tano Yarusalemeha bu karu gubalini timbuni ho haga ka laya, lene.
2MA 15:15 Ani hondo hewagola Yaremaia ibunaga gi tigahayagi ayu tibu nene gadele wai biagane baya tara ngolome wabini wiago yu hearia handaru. Ayu tibu ogoni Yudasa mialu
2MA 15:16 ibugua lalu, Wai biagane ayu tibu ogo yamia. Ayu tibu ogoni baya buruguleore loma biahego Ngode Datagaliwabe ibunime í̠ bameore mo turu halu ngirago ogonime í̠naga waitigi bo wahai habelo biamogo bulebira, laya lene.
2MA 15:17 Ani layagola Yudasanaga bi bayale ogonime ami agali bu hearunaga bu miniha mo kula halu mo heya hai hene. Igiri daliahe hearu ti agali wahe hearuha howa hongo mini. Ani howa heyalu wai pora bima lalu bi lo mbira hai howa waitigi baba wai bule pene. Ami agali mbirame mo ta halu tinaga waitigi mbira mbira headagua wai biaho wialu wai bu maro bini. Tigua ogonidagua bulene wai henenedagoni irane tinaga waitigime tinaga tano bo gialahole bu wahai halu tinaga lotu manabi Anduane Homogonaga andabi bibahende bo haealabaga biai halu mo ko hole ibiragola tigua wai ogoninaga pene.
2MA 15:18 Yuda ami agali uruni tigua ti onebi waneiginibi ti damenebi bibahende mo embeda hai halu Ngode Datagaliwabenaga anda kago mitangi halu wai pene.
2MA 15:19 Wali agali Yarusaleme tanoha hondo hearu tigua dindi tigabi wiagoria wai biyagola gi timbuni howa mini burugu lalu genda yu hai hene.
2MA 15:20 Wali agali tigua ai ibugua bo podahana harabe toba howa gi halu mini burugu lo hene. Ani hondo heagola waitigi ami ti ibalu wai bule amuna tidiyu hene. Nogo hosi wai biagame lene labolaboha heagola nogo elebana wai biaga hearume dombeneha hene.
2MA 15:21 Ainde waitigi ami agali iba ale timbuni íbu hearubi wai biagane masini tara tara yiarubi nogo elebana gabua haru hearubi bibahende Yudasa ibu de hondo hene. Ani hondowa ibugua gi yaraga halu Anduane Homogo ibuni mbirale agalime nabiagane ale biai haga kagohondo bi lene. Anduane Homogonaga minini howa wai pora birago ibu pari wayali halu danda timuru hongoni howa wai birago ibu wayali nahaga ngago ti manda bini.
2MA 15:22 Ani manda buwa Yudasahanda Anduane Homogohondo bi lene. Ibugua lalu, Anduane Homogo-o ainde Hesegaia ibu Yudanaga kini heangi í̠nime dahuliyali mbira ibilarigola ibugua Kini Senageribinaga ami agali daosini dege handari mbira pira halirani duria (185,000) bibahende homelo bo wahai hene.
2MA 15:23 Ainde Anduane Homogo-o ayubi nde ina waitigi karume de handalu mogo lowa duru lalu helo í̠naga dahuliyali mbira ina haru halu bamba helo ibilabe.
2MA 15:24 Í̠ninaga hongo gibiore kegome waitigi agali í̠nihondo bi ko ngubiru lalu oali ibuwa í̠naga wali agali bu karu bo wahai hole karuni bo hilo wahaiore habe, lene. Yudasahanda Anduane Homogohondo bi lenego ogoni.
2MA 15:25 Nigano halu ibunaga ami agali biarume wai porabupe halu howa pilipe biguli pu lalu wainaga iba gana laga laga bini.
2MA 15:26 Anigo Yudasa halu ibunaga ami agali biarume wai pora bialu waitigi ngola hole pialu howa tigua Anduane Homogo olalu ibunihondo bi lama pene.
2MA 15:27 Tinaga bu miniha howa Anduane Homogohondo bi lalu tinaga gime wai bialu hene. Anidagua bialu Yuda tigua waitigi agali daosini dege pira tebirani duria (35,000) bibahende horo ogoningi homelo bo wahai hene. Anidagua buwa Ngode Datagaliwabehanda ti biamogo biyagonaga tigua turu timbuni hene.
2MA 15:28 Wai biai howa ti turu timbuni hene. Ani bialu andaga dai bialu howa handalu hemiria Nigano homo tungulo miniyago ibunaga wai pole mo karu laganealeru karulaabore wiaria handa walia hene. Ani handa walia howa
2MA 15:29 tigua huaro laga laga bialu tininaga bi lalu Anduane Homogonaga mini mo yaraga hene.
2MA 15:30 Yudasa Magabeusuhanda ibunaga wali agali biamogo bialu mo wulenaga wai bialu howa horo bibahendengi ibunaga mini dininibi tinginibi heba howa wai biaga hene. Yudasa ibu wene igiri emeneni howa hama ibinidagoha howa ibuore ibunaga dindi gubalini ho kago mo walia ho haga hene. Ai Yudasa ogoni ibugua ibunaga ami agali hearuhondo lamialu, Niganonaga gi tigabi haguanebi pugu yalu Yarusaleme pudaba, lene.
2MA 15:31 Ani lalu tigua ani pugu yalu Yarusaleme tano anda puwa ibugua wali agali bibahendeore íbu ngoai hadaba lowa agali loma binigo mo miaga hearu ti Anduane Homogonaga lomabu delaga dabu heago wanakuihayagi hadaba lene. Ani bialu ami agali wai pabeanda hongohe heagoha haga hearubi olalu íbu ngoai hadaba lene.
2MA 15:32 Ani layagola tigua íbu ngoai howa agali ko Niganonaga haguane pugu yu íbu wiago de handalu gi ko Anduane Homogo Bibahende Hongo Haiheore kagonaga anda ogo bo gialo wahai hole lo gi dola haga biago wiaria de hendene.
2MA 15:33 Ai Yudasa ibugua lalu Niganonaga hége minu duguwa ega bedarume nelo mialu gi biagola haguanela wai pabe neneni amu Anduane Homogonaga anda kagoha handa daibu wilo mo paga hadaba layagola tigua anidagua ngelene. Niganohanda mine howa mana lehe bialu hayagonaga pani nenego te ogoni hangu.
2MA 15:34 Wali agali bibahendeme hongo howa hoaro ladaga daga bialu Anduane Homogohanda ibunaga hongo timbuni wiago tihondo mo walia hayagonaga tigua ibunaga mini yaraga halu lalu, Ngode Datagaliwabehanda ibunaga dindi ibunaga loma bia hene ngago ibunime baya hangu handaya ho hayagonaga iname ibunaga mini yaraga hama. Ibunaga anda ilili biagaore wiabagi hene wiago waitigi agalirume ibalu bo gialo wahai helo yupe nahaga ka, lalu hene.
2MA 15:35 Wali agali bibahendeme Anduane Homogohanda ti biamogo biyadago de handai helonaga Yudasahanda Niganonaga haguane biago wai pabeanda kago anda háini mo derela hene.
2MA 15:36 Ai wali agalime bi lo mbira halu lalu, Mali mbira mbirani howa iname horo timbuni ogoni mitangi biaabo hami̱ya. Horo ogoni ege hombenenaga (12) horo halene (13). Tinaga bi lalu ege mini Adu laga nga. Horo ogoni horo Modegainaga horo biago mani dege ibule ngelowa ogoni ibu ala mo bamba ho ngelene.
2MA 15:37 Ai Niganonaga binigo te ogoni hangu. Ogoni howa Yuda tinime Yarusaleme handaya ho henego hama ibalu ayu kemagonigo ainde i̱na te ogoria howa haru lalu lamaro bero.
2MA 15:38 I̱na bite ogoni baya hangu gilibu ngogola te wáleni bayale dendene heyagua nde i̱ni turu ko. Ai te ogoni wá naleyagua nde te nagalone dewa wiagua i̱na ogodagua laro. Gilibu manda dege biru laro.
2MA 15:39 Ainde waini iba hangubi iba henene mendego hangu nolene bayale dendebi ndo ngago ina manda biai kema. Dende bilonaga waini iba henene mo biamaga haramagola dende biaga ndobe. Anidagua dege te tara tara ngaru heba mo biamaga howa gili beremagola daga laga kagonaga te bayaleore hale hoabi hale holebira. I̱naga bi lamaro ogoni.
MAT 1:1 Mini gilibu ngaruni Yasu Keriso mamali hama ibinirunaga nga. Debidi ibu Abarahama aguanene henego Yasu Keriso ibubi Debidi aguanene hene.
MAT 1:2 Abarahama heneyangi howa handame haga kini maha Debidi henego dombeneha mamali heneru mini bimaga howa gilibu ngaru uru. Abarahama Aisaga Yagaba Yuda ibu hamenemabi hama ibini. Ti howa Perese Serala libu ai̱ya Tama berenego Heserono Lama Aminadaba Nasono Salamono Lahaba igini Boasa Obede Yasi Kini Debidi imaru uruni ti hama ibini.
MAT 1:6 Debidi henego howa Isaraele wali agaliru Babilono dindini garabaya buwa ti uruni haru penego ogoningi mamali heneru bimaga howa mini gilibu ngaru uru. Debidi Solomono ibu ai̱ya Yuraia one ala berenego Lehoboama Abaya Asa Yihosabada Yihorama Usia Yodama Ahasa Hesegaia Manase Amono Yosaia Yahoiagini ibu hameneru uruni ti hama ibini.
MAT 1:12 Isaraele wali agaliru Babilono dindini garabaya buwa ti haru penego howa Yasu taba henenengi mamali heneru lamaga howa tinaga mini gilibu ngaru uru. Yahoiagini Seadeli Serubabele Abiudu Eliagimu Asoro Sadogo Agimu Eliudu Eleasa Madana Yagaba Yosebe ibugua Yasu ai̱ya Meri dabu binigo Yasu ibu Mbirali Dabo Helenego ibulebira lowinigonaga mini winigo uruni tibi hama ibini.
MAT 1:17 Mini uruni Abarahama henego howa Debidi henego lamaga howa de daba hene. Debidi howa Isaraele wali agaliru Babilono dindini garabaya buwa ti haru penego howa lamaga howa de daba hene. Ogoningi howa Mbirali Dabo Helenego ibulebira lowinigo ibu ibinigo howa lamaga halu de daba dege hene.
MAT 1:18 Yasu Keriso ibu taba henenengi ogodagua bini. Ibu ai̱ya Meri Yosebe lawini biruwa Yosebehanda ibu dabu nabi berearia Ngode Datagali wabe Dinini ibugua gali wia hayago handa walia ho berene.
MAT 1:19 Yosebe ibu agali tigabi howa ibugua wali agali hearume Meri mo taga nahelo ibu ohowa Meri wahole lo manda bu hene.
MAT 1:20 Ani manda bu hearia ibu emaga handalu hearia Anduane Homogonaga dahuliyali mbira ha pani howa Yosebehondo bi lalu, Debidi aguanene Yosebe-o í̠na Meri í̠ one berelo dabu bule gi nahabe. Gali ibuha bedago Ngode Datagali wabe Dinini ibugua wia haya. Ibugua igiri mbira taba honolebira.
MAT 1:21 Maha igiri ogoni ibugua wali agali bibahendeme ko biyarunaga pele mialu domo wahai holebirago taba hanarangi í̠na ibu mini Yasu wibe, lalu lamini.
MAT 1:22 Ani biyagola ala Anduane Homogohanda ibunaga bi mana latagi haga mbira heagoha howa mbiwia henego lola hai hene.
MAT 1:23 Mbiwia henego ogo, Wandari mabuage mbirame agali nape berenego gali bere biruwa igiri taba honolebira. Igiri ogoni ibu mini Emanuele wulebira, lalu gilibu nga. Emanuele inanaga bi lalu, Ngode Datagali wabe ina heba kagoni.
MAT 1:24 Anduane Homogo ibunaga dahuliyalime bi layadagua Yosebe de ngala halu puwa ibugua Meri dabu bini.
MAT 1:25 Dabu biyagola Merihanda igiri gali taba nahene howa ibu Yosebela mandagi nahe berene. Igiri taba hanayagola Yosebehanda igiri ogoni mini Yasu wini.
MAT 2:1 Herodo ibu kini heangi Yuda dindiha tano mbira mini Bedelehemeni Merihanda Yasu taba henene. Taba hanayangi howa agali maru yakundi handagane mana mandabi hearu ti dindi kaundia ni tagira ibiragohayagi howa ibalu Yarusalemeni anda ibini.
MAT 2:2 Ibuwa tigua, Yu wali agalinaga handame haga kini hole igiri gali taba hanayuago ibu agoha kabe. Ibunaga yakundime ni tagira ibiragohayagi howa darali hayagola de handarimago hondowa iname ibu mini yaraga hole ibirima, lalu lamini.
MAT 2:3 Ani lamiyago hale howa Kini Herodo ibu mini burugulo hene. Wali agali bibahende Yarusalemeni hearumebi anidagua dege bu hene.
MAT 2:4 Ani howa Herodo ibugua loma binigo mo miaga haguane hearubi Mana lowinigo lawai haga hearubi mo ngoai howa ti mo bila halu lalu, Mbirali Dabo Helenego ibulebira lowinigo ibu dindi agoha taba honolebirabe, lalu lamini.
MAT 2:5 Ani layagola tigua ladai bialu lalu, Yuda dindiha tano mbira mini Bedeleheme ogoriani íbu holebira. Ngode Datagaliwabe mana latagi haga mbira henegome mbiwia halu lalu,
MAT 2:6 Bedeleheme Yuda dindiha ngago Yudanaga tano timbuni ngaru emene nira lowa í̠ ndo. Í̠ha howa haru haga haguane mbira tagira ibulebira. Ibugua i̱naga Isaraele wali agali haru holebira, lalu gilibu winigo nga, lene.
MAT 2:7 Ani layagola Herodohanda ohalu agali tara kaundia ni tagira ibiragohayagi howa ibiyaruhondo olowa tigua yakundi biago angi handayadabe hale hole ti mo bila hene.
MAT 2:8 Tigua ibu lamiyagola ibugua tihondo lalu, Tígua igiri gali odago baya hangu tai bialu handa walia harimiyagua i̱nabi ibu mini yaraga hole poliya langule dai bilimu, lene.
MAT 2:9 Ani layago hale howa tigua igiri gali biago tai bima pialu hearia yakundi ala handayago lone de hendene. De hondowa tigua turu hene. Tinaga turu holene timbuniore íbu wini. Yakundi biagome bamba halu igiri gali biago wiagoria pialu ema nabi hondo hene.
MAT 2:11 Agali biaru ti anda mbira heagoha anda pialu hearia tigua igiri galibi igiri ai̱ya Meribi de handalu ge duli hanga ho biruwa igiri biagonaga mini yaraga halu hene. Tigua ngolobi mbirale mbira ira wagaya ngabiorebi ira mbiranaga ibane mini muwebi henenego Yasuhondo mini.
MAT 2:12 Ani tagu miai halu tigua tininaga dindi dai bule hariga mendeni pialu dai binigo irane ti emaga handalu hearia Ngode Datagaliwabehanda tihondo lalu, Herodo karia dai nabi hariga mendeha pialu tínaga dindi dai bilimu, lalu lamiyadagua dai bini.
MAT 2:13 Ti piyagola howa Yosebe ibu emaga handalu hearia Anduane Homogonaga dahuliyali mbira ha pani hene. Ha pani howa lalu, Herodohanda igiri biago bo wahole tai bulebirago í̠ heyalu igiribi ibu ai̱yabi tí yola halu Iyibi pudaba. Pu kamigola i̱na tí dindi tarani pudaba loliya hondo halimu, lene.
MAT 2:14 Ani layagola Yosebe ibu heyalu ibugua igiribi igiri ai̱yabi mbiraga howa yo pialu Iyibi haru pene.
MAT 2:15 Iyibi puwa tigua Herodo homelo lowa Iyibini haabo hene. Ani biyagola ala Anduane Homogohanda ibunaga mana latagi haga mbiragoha howa mbiwia ho winigo lola hai hene. Mbiwia henego ogo, I̱ igini Iyibi dindini howa tagira ibilo i̱na olarugo, Anduane Homogohanda lenego gilibu nga.
MAT 2:16 Herodohanda agali tara dindi kaundia ni tagira ibiragohayagi howa ibiyarume ibu mo hondo hayada manda buwa ibu keba timbuniore hene. Keba timbuni howa ibugua igiri emene mali kira henerubi mali kira bolangua nahe henerubi Bedelehemeni henerubi dindi kawareni henerubi bibahendeore homelo, Bo wahai halimu, lene. Agali tara biarume, Yakundi pigane darali haya, lalu lamiyago ibugua manda buwa ani lene.
MAT 2:17 Ani binigo Ngode Datagaliwabe mana latagi haga Yaremaiahanda ala mbiwia ho winigo lola henegonaga lo ngago ogo,
MAT 2:18 Lama dindiha bi mbira laruago bi ogoni gibi yiyi lalu dugu biaruago hale ho ka. Leselohanda ibu waneiginirunaga dugu biarua. Ti homai hayagola wali agalime ibu bu mini mo palia holenaga bi la debodebo bilo hame naleore beda, lalu gilibu nga.
MAT 2:19 Herodo homayagola howa Yosebe Iyibini howa emaga handalu hearia Anduane Homogonaga dahuliyali mbirame ha pani howa
MAT 2:20 ibuhondo lalu, Heya. Igiribi ibu ai̱yabi haru halu Isaraele dindini dai bidaba. Igiri biago bo wahole manda bialu hayago ti homayago tí dai bidaba, lene.
MAT 2:21 Ani layagola Yosebe ibu heyuwa igiribi ibu ai̱yabi haru halu Isaraele dindini dai bini.
MAT 2:22 Ti dai bialu howa Yosebehanda Agelasa ibu aba Herodonaga pani ha aribia howa Yudanaga kini ka layagola hale howa ibugua Yuda dai bulene gi hene. Gi ho hearia ibugua emaga mende handalu hearia Ngode Datagaliwabehanda ibuhondo bia layadagua bialu ibu Galilini pialu
MAT 2:23 Nasarete tanoni hole manda bialu ogoriani hondo hene. Ani binigo Ngode Datagaliwabe mana latagi haga henerume, Ibu Nasareteali ka lolebirago, lalu ala lenegonaga lola hene.
MAT 3:1 Ani binidangi baboraya biaga Yonehanda Yudiani dindi ko yobi wali agali nahaga wiagoria howa ibalu mana lamialu hene.
MAT 3:2 Ibugua lamialu lalu, Ngode Datagaliwabenaga Handame Holene kaware ngagonigo tígua ko birimigonaga mini beregedalimu.
MAT 3:3 Ngode Datagaliwabe mana latagi haga Aisaiahanda ala mbiwia halu lalu, Dindi ko yobi wali agali nahaga ngagoria howa mbiralime ga̱lalu, Anduane Homogo ibilo hariga ba hole manda bialu halimu. Hariga ogoni tigabiore ba halimu, lenego lalu bi ogoni Yone mitangi bialu lenego gilibu nga.
MAT 3:4 Yone ibu nogo kamele irinime aga wabinigo karulowa nogo dongoneme mandibu wuwa hene. Ibugua pagayabi mone taranaga ibanebi naga hene.
MAT 3:5 Wali agali Yarusaleme howabi Yudia dindi bibahende winigo uruniha howabi Iba Yodana peagoria dindi bibahende wiagoha howabi Yone hearia íbu ngoai haga bini.
MAT 3:6 Ibuwa tigua ko biyaru la pani hayagola Yonehanda Iba Yodanaha ti baboraya bini.
MAT 3:7 Perisi agalirubi Sadiusi agalirubi dewali Yonehanda ti baboraya bilo ibalu hearia de hondowa Yone ibugua tihondo lalu, Tí ko nogombi ale kamigo Ngode Datagaliwabehanda pani áyuore wia holebirago nane yo poleberami lalu tí aiwa langiyabe.
MAT 3:8 Tígua ko bialu harimigo wahalu mini beregedai kamigonaga irane walia hole lowa mana bayale bialu halimu.
MAT 3:9 Tígua, Inanaga mamali Abarahama hene, laramiligome pani nolene ngagoria nane yo pialu poleberama, lo mitangi nabilimu. I̱na bi mbira langerogo hale hadaba. Ngode Datagaliwabehanda ege to̱le̱ o ngaruni mo yuwa Abarahamanaga aguanene bu hinu helabehe kagoni laro.
MAT 3:10 Ira karu teneha dibule ayu mo yu íbu nga. Ira lini bayale nadaga karu bibahende dibai howa ira dedagoria dolebira.
MAT 3:11 Tígua ko birimigonaga mini beregedarimigo walia hole i̱na tí ibame baboraya biruli. Maha mbirali ibulebirago ibugua Ngode Datagaliwabe Dininimebi ira hungu ale biragomebi tí baboraya bia holebira. Ibu i̱ emene ko̱ kogobi ndo ibu daliga timbuniore kago i̱na ibunaga ge habe gamu mo ya holene nakarulape kogoni.
MAT 3:12 Ibugua ladi ale mini widinaga lini aeanela dambialu mo tale bilo mbirale baraga hagane nama taboli ale yu ka. Tale biai howa ibugua widi lini do hagane andaha do hole wuwa aeane biaru ira hundia nabiaga daabo kagoria delolebira, lalu Yonehanda lamini.
MAT 3:13 Horo uruningi Yasu ibu Galili howa Iba Yodana peagoha ibalu ibu Yonehanda baboraya bilo lowa Yone hearia ibini.
MAT 3:14 Ibiyagola Yonehanda Yasu mini wia dai buwa baboraya nabule lelo ibuhondo lalu, Í̠na i̱ baboraya bia holene ngago áyu ani ndo i̱na í̠ baboraya bia holiya i̱ kogoria ibirida, lene.
MAT 3:15 Ani layagola Yasuhanda ladai bialu lalu, Áyu aniore bibelo. Mana ogoni bialu howa Ngode Datagaliwabehanda ani bulene nga ledago biaiore holeberaba, lene. Ani layagola Yonehanda, Anidago baboraya bia haro, lene.
MAT 3:16 Yonehanda Yasu baboraya bia hayagola Yasu ibaha howa heyiyagola hari daliga buduwa Ngode Datagaliwabe Dinini ega malibu ale dalipe halu Yasuni íbu birayagola de hendene.
MAT 3:17 Ani biyagola dahuliya andagaha howa bi mbira ladali halu lalu, I̱ Igini i̱ gubaliniore ho kogo ogoni. Ibuhondo turu timbuni ho kogoni, lene.
MAT 4:1 Ani biyagola howa dama Heyolabeme Yasu ko mo bia habehedabe hondole Ngode Datagaliwabe Dinini ibugua Yasu dindi ko yobi wali agali nahaga wiagoria haru pu helene.
MAT 4:2 Ani haru pu helearia Yasu ibu horo pira maria (40) mbiraga horombebi heba tomo nane dege howa garibi lo hene.
MAT 4:3 Ibu ani garibi lo hearia dama Heyolabe ibuwa lalu, Í̠ Ngode Datagaliwabe Iginiore keyagua nde ege to̱le̱ o ngaru mo mberedi bu hina, lene.
MAT 4:4 Ani layagola Yasuhanda ladai bialu lalu, Anduane Homogonaga mbugani lo ngagome lalu, Wali agalime mberedi hangu nowa habe nahego Ngode Datagaliwabehanda bi bibahende ledaruoreme holene nga, lalu gilibu nga, lene.
MAT 4:5 Ani ladai biyagola dama Heyolabeme Yasu haru pialu Yarusaleme anda Ngode Datagaliwabehondo loma bia ho helenegoha puwa daligaoreni helowa
MAT 4:6 ibuhondo lalu, Í̠ Ngode Datagaliwabe Iginiore keyagua nde ogoriani howa í̠nime pora bupe harene. Ogoninaga Anduane Homogonaga mbugani bi mbira lo ngagome lalu, Ngode Datagaliwabehanda ibunaga dahuliyaliruhondo í̠ haru holenenaga ege to̱le̱me í̠naga ge nanelo tigua tinaga gini í̠ minu yaraga ho helo lamulebira, lalu gilibu nga, lene.
MAT 4:7 Ani layagola Yasuhanda ladai bialu lalu, Anduane Homogonaga mbugani bi mende lo ngagome lalu, Anduane Homogo í̠naga Ngode Datagaliwabe kago ba hondolene nawi, lalu gilibu nga, lene.
MAT 4:8 Ani ladai biyagola dama Heyolabeme hari timbuni weagoha Yasu haru iraga halu wali agali bibahende dindi tara tarani bu hearubi tinaga mbirale baya gibiore bu wiarubi walia hai hene.
MAT 4:9 Walia hai halu lalu, Í̠na i̱ buha ge duli hanga ho biruwa i̱hondo bi pupu wiriyagua nde uruni bibahende de hendederu karulai habelo í̠hondo ngiai holebero, lene.
MAT 4:10 Ani layagola Yasuhanda ladai bialu lalu, Heyolabe í̠ wahalu puabo ha. Anduane Homogonaga mbugani bi lo ngagome lalu, Anduane Homogo í̠naga Ngode Datagaliwabe kago í̠na ibuni hangunaga mini yaraga holenebi ibuni hangunaga biabe bulenebi nga, lalu gilibu nga, lene.
MAT 4:11 Ani ladai biyagola dama Heyolabeme Yasu helalu pene. Piyagola dahuliyalirume Yasu biamogo bule ibu hearia ibini.
MAT 4:12 Baboraya biaga Yone garabaya andaha ka layago hale howa Yasu ibu Galili pene.
MAT 4:13 Puwa ibugua Nasareteni hondo nahe pu wahalu Galili iba timbuniore bereagoha Kabaniama tanoni hole pene. Dindi ogoni Sebulunu Nabadalila libunaga dindini wini.
MAT 4:14 Ani biyagola Ngode Datagaliwabe bi mana latagi haga Aisaiahanda mbiwia henego lola hene.
MAT 4:15 Ibugua mbiwia henego ogo, Sebulunu dindibi Nabadali dindibi hariga iba solowara bereagoha polene Iba Yodana ange edehayagi ngago Yualinaga ndo wali agali tara taranaga dindi mini Galili nga.
MAT 4:16 Wali agali arumaha karume wá holene timbuniore de hondolebira. Homaganenaga dindi arumaha karu kagoriani wá ha dali holebira, lalu gilibu nga.
MAT 4:17 Horo uruningi Yasuhanda ibunaga bi mana tenuwa lamialu lalu, Ngode Datagaliwabenaga Handame Ho Holene kaware ngago tígua ko birimigonaga mini beregedalimu, lalu lamini.
MAT 4:18 Yasu ibu Galili iba timbuniore bereago angeni pialu howa ibugua wena minaga agali kirali Saimonobi ibunaga mini mende Pida ibu hamene Andurubi de hendene. Ogoni labome libu iba timbuni ogoniha howa wena nume wena minalu hene.
MAT 4:19 Ani hondowa Yasuhanda libuhondo lalu, Libugua agali minalibulo i̱na minawai holiya i̱ porodagua talima ibidaba, lene.
MAT 4:20 Ani layagola libugua libunaga wena nu ngelalu ibu talima pene.
MAT 4:21 Yasu ibu pialu howa ibugua agali kirali libu hamenela dege Sebedi igini Yamese Yonela libu hearia de hendene. De hondowa Yasuhanda libu olayagola
MAT 4:22 libugua libu aba hela iba talu ngela bialu Yasu talima pene.
MAT 4:23 Yasu ibu Galilini ibaga bialu pialu ngoai hagane andaruha bi mana lawai halu Ngode Datagaliwabehanda Handame Ho Kagonaga Bi Mana Debene lamialubi wali agali dewa warago tara tara bo wiaru mo dabi halubi hene.
MAT 4:24 Ani bialu heago wali agali Siriani haame hearume hale hai howa tigua wali agali warago tara tara bo wiarubi tandaga halu wiarubi dama daragahe wiarubi biango bibi biaga wiarubi kuduguhe wiarubi mo yalu ibu hearia ibiyagola ibugua ti bibahende mo dabi hai hene.
MAT 4:25 Wali agali dewaore Galilini howabi Tano Piraha howabi Yarusalemeha howabi Yudiaha howabi Iba Yodana ange abene edehayagi howabi ibai halu ibu haruru pialu hene.
MAT 5:1 Yasuhanda wali agali dewaore bu hearu de hondowa bare hari mbira weago iraga howa berene. Ani berearia ibunaga talima piaga biaru ti ibu bereagoria ibalu bira mabu bini.
MAT 5:2 Ogoriani berearia ibugua tihondo bi mana lawai halu berene.
MAT 5:3 I̱ miniha nakarulape ko lo mitangi bu karu Ngode Datagaliwabehanda Handame Ho Kagoria tinagaore ngago ti turu ho holene nga.
MAT 5:4 Dara ho karu Ngode Datagaliwabehanda ti mo turu holebiragonaga ti turu ho holene nga.
MAT 5:5 Tini mo dindiha haga bu karu Ngode Datagaliwabehanda, Ngulebero, lowinigo tigua mo yulebiragonaga ti turu ho holene nga.
MAT 5:6 Ngode Datagaliwabehanda hame ledadagua bua timbuni ho karu Ngode Datagaliwabehanda tini hame larago mo to̱lai holebiragonaga ti turu ho holene nga.
MAT 5:7 Wali agali maruhondo dara howa biamogo biaga karu Ngode Datagaliwabehanda ti dara howa biamogo bulebiragonaga ti turu ho holene nga.
MAT 5:8 Mini gahengewi ko bua nahaga karu tigua Ngode Datagaliwabe de hondolebiragonaga ti turu ho holene nga.
MAT 5:9 Mo palia holenenaga biabe bialu karu Ngode Datagaliwabehanda tihondo, I̱ waneigini, lolebiragonaga ti turu ho holene nga.
MAT 5:10 Ngode Datagaliwabehanda hame ledadagua bialu howa tandaga nalu karume Ngode Datagaliwabehanda Handame Ho Kagoria tinaga ngago ti turu ho holene nga.
MAT 5:11 Tígua i̱ porodagua talima ibalu kamigonaga wali agali marume tí mege biragolabi mo tandaga haragolabi ke̱ halu nde laragolabi mana urunibi biragola tí turu ho holene nga.
MAT 5:12 Ngode Datagaliwabe mana latagi haga bamba henerume tandaga ogonidagua dege nalu hene. Dahuliya andagani tínaga emena timbuniore wia do kago turu timbuniore ho halimu.
MAT 5:13 Wali agali tara tara bibahendenaga ibi ale tí kamigoni. Ibi ibuninaga dende ereba hayagua lone mo dende bia habe nahe nga. Ibi ko halu dindini waharagola wali agali geme hengedaga nga.
MAT 5:14 Wali agali dindi bibahendeni tara tara karunaga wá holene ale tí kamigoni. Tano timbuni dindi bare hombeneni bu karu mo ge nahabehe ka.
MAT 5:15 Mbiralime lamu delowa ndisi be timbuni ngago andaneha nawiaga. Ani biagadagua ndo anda ogoniha bedaru bibahende wá haame helo ibugua lamu dedago dagia daligani mo wiaga.
MAT 5:16 Ogonidagua tínaga wá holene wali agalime de hendelo mo wá holene nga. Tígua mana bayale beramigo de hondowa wali agalime tí Aba dahuliya andaga kagonaga mini yaraga helonaga ani mo wá halu holene nga.
MAT 5:17 Mosese heneyangi Mana lowinigobi Ngode Datagaliwabe mana latagi haga heneyarume mana lawai henegobi i̱na mo wahole ibiruda mitangi bidamibe. I̱na mo wahole ndo ibiru. Tigua bi lowinigo lola helonaga i̱ íbu kogoni.
MAT 5:18 Hari daligabi dindibi wiaabo kadagua Mosese heneyangi Mana lowinigonaga bi emeneorebi mbira ereba nahe maha bibahende hamaro birangi hangu ereba holebirago manda bilimu.
MAT 5:19 Anigo mbiralime mana uruni lowiniyaria dunini ndo emeneorerubi ngago ibuni nabi howa marumebi nabilo biawai hayagua o biago ibu Ngode Datagaliwabehanda Handame Ho Kagoria dunini maru karubi ndo ibu niraore holebira. Ani biradagua ndo mbiralime mana uruni lowiniyadagua bialu maru karumebi bilo biawai hayagua ogoni ibu Ngode Datagaliwabehanda Handame Ho Kagoria timbuni duniniore holebira.
MAT 5:20 Anidago i̱na bi mbira langero. Ngode Datagaliwabehanda mana tigabi tígua bilimulo hame ledago Mana lowinigo lawai haga karumebi Perisi agali karumebi biagadagua ndo tígua ti bolangua halu nabirimiyagua Ngode Datagaliwabehanda Handame Ho Kagoria anda napoleberami.
MAT 5:21 Bambaore wali agali hearuhondo bi laminigo ogo, Wali agali homelo nababe. Mbiralime ogonidagua biyagua godi lolene wulebira, lalu bi ogoni leneyago tí hale harimigoni.
MAT 5:22 Anigo áyu i̱na tíhondo agua laro. Mbiralime ibu hamenehondo keba hayagua ogoninaga godi lolene wulebira laro. Agali mbirame ibu hamenehondo, Í̠ habane nabulene kegoni, layagua ibubi o layagonaga ganisolo agali kagoria haru polebira. Agali mbirame ibu hamenehondo, Í̠ koore mini nawi ke, layagua o layagonaga heli dindini ira dedagoria polene henge ibunime mo wulebira.
MAT 5:23 Anigo í̠ mbirale Ngode Datagaliwabehondo mule bo lomabu miaga dagiani mule bereria í̠ hameneme í̠hondo mbirale mbiranaga keba ka lo mitangi biriyagua
MAT 5:24 nde mbirale mulene biago bo lomabu miaga dagia kawareni ngelalu í̠ hamene karia mo palia hole abale pobe. Mo palia halu dai buwa mbirale Ngode Datagaliwabehondo mule wirigo mibe.
MAT 5:25 Mbiralime í̠la godi lolenaga, I̱la godi labiya mba, layagua godi lagane andaha anda nape howa ibula abale mo tiga bulene manda bibe. Godi lole haru piyagua godi dabagane agali kagohondo í̠ minu mulebira. Minu miragola godi dabagane biagome í̠ dandayi gini ya haragola tigua í̠ garabaya andaha helolebira.
MAT 5:26 Ani biragola í̠na ko birigonaga yolo miaiore habelo garabaya andaha helaabo holebirago lalu langero.
MAT 5:27 Bambaore bi lowinigo ogo, Wali agali kayu nabibe, lalu bi ogoni leneyago tí hale harimi.
MAT 5:28 Anigo áyu i̱na tí langialu agali mbirame wali deme hondowa dimagoli hayagua ibugua miniha wali biagoni yaore biya laro.
MAT 5:29 Í̠naga de tigame í̠ ko mo bia hayagua halu wahabe. Í̠ tingininaga aria mbirago nahe howa holene bayale nga. Í̠naga tingini bibahende hai howa heli dindiha mo bape holenego nde koorego.
MAT 5:30 Í̠naga gi tigame í̠ ko mo bia hayagua gi ogoni gandulo wahabe. Í̠naga gi mende hangu howa holenego bayale nga. Í̠naga tingini bibahende hai howa heli dindiha polene nde koorego.
MAT 5:31 Bambaore bi mende lowinigo ogo, Agali mbirame ibu one wahole manda biyagua ibugua bebani gili buwa ibu onehondo mulene nga, lalu leneya.
MAT 5:32 Áyu i̱na tí langerogo agali mbirame ibu one agali mendela kayu biragola ndo bame wahayagua ibugua ibu one biagome agali kayu bilo mo bia hara. Agali mbiralime agali mende one wahenego dabu biyagua o ibugua wali biago kayu dege biragoni.
MAT 5:33 Bambaore wali agali hearuhondo bi laminiyago ogo, Bi mbira í̠na buleore lalu lo wirigo waholene nawi. Anduane Homogohondo mbirale mbira buleore bero lo wirigo bibe, lalu bi ogoni leneyagobi tí hale harimi.
MAT 5:34 Anigo i̱na áyu tí langerogo bi lo wialu howa mbirale mbiranaga mini lalu ndo wilimu. Dahuliya andaga Ngode Datagaliwabenaga handame ho biragane ngago tígua, Dahuliya andani ngadagua buleore bero, lalu nalo wilimu.
MAT 5:35 Dindini Ngode Datagaliwabehanda ibunaga ge dogolo wiaga ngago tígua, Dindi ngadagua buleore bero, lalu nalo wilimu. Yarusaleme handame haga kini timbuni kagonaga dindi ngago tígua, Yarusalemeni ngadagua buleore bero, lalu nalo wilimu.
MAT 5:36 Í̠ninaga haguani kadagua buleore bero, lalu nalo wibe. Irane ogo í̠nime mandari mbirago mo pela halubi mo mindi bia halubi nabibehe kegoni.
MAT 5:37 Tígua lalu, E̱bi ndobi dege lalu lalimu. Bi marubi larimiyagua bi o larimiruni tene dama Heyolabeha howa ibiragola larimi.
MAT 5:38 Bambaore bi lenego ogo, De mbira halu waharagonaga pani de mbira halu wahaga. Ne mbira hondo waharagonaga pani ne mbira hondo wahaga, lalu bi ogoni leneyago tí hale harimigoni.
MAT 5:39 Anigo áyu i̱na tí langerogo mbiralime tíhondo ko biyagua tígua ko bia dai nabilimu. Mbiralime í̠naga pe tigahayagi bayagua pe lehayagibi belo beregedabe.
MAT 5:40 Mbiralime í̠ godi lole haru pialu howa í̠naga aga tingiliya ngulene nga layagua í̠naga dagare tingiliyabi tago bialu mibe.
MAT 5:41 Ami agali tínaga dindini bu karu aria mbiragome, I̱naga togi nu mabu tu mbira poa nakeha hanalu pu layagua í̠na mabu tu ki hono bolangua habe.
MAT 5:42 Mbiralime, Mbirale ogoni i̱ ngi, layagua nde mibe. Mendealime, Ogoni ya dai buliya i̱ ngi, layaguabi nde ya dai bilo mibe.
MAT 5:43 Bambaore bi leneyago ogo, Í̠naga nenegeruhondo gubalini ho habe. Í̠naga waitigi karuhondo handabe manga ho habe, lalu bi ogoni leneyago tí hale harimigoni.
MAT 5:44 Ani anigo i̱na tí ogodagua langerogo tínaga waitigi ho karuhondo gubalini ho halimu. Tí mo tandaga halu karu bayale helonaga tígua Ngode Datagaliwabehondo bi la halimu.
MAT 5:45 Ani bulene ngago irane tí Aba dahuliya andaga kagonaga waneigini hole ani bilimu. Aba ibugua wali agali ko bayalebi ta nabi kagoria ibunaga ni daame helaga ka. Ibugua wali agali ko biaga karubi bayale biaga karubi ta nabi bibahendehondo ta halu miaga ka.
MAT 5:46 Tí gubalini hagaru hangu gubalini harimiyagua Ngode Datagaliwabehanda tínaga emena aginaga ngulene ngabe. Dagisi muni ngi laga karume ti nde ani dege biaga ka.
MAT 5:47 Tígua tínaga nenegeru hanguhondo bi turubi larimiyagua tí mana biagane winiyadagua ndo bayale taraore mbira birimibe. Wali agali Ngode Datagaliwabe mitangi nabiaga karume tibi ani dege biaga ka.
MAT 5:48 Tí Aba dahuliya andaga kago ibu mini baya buruguleorewi kadagua tíbi mini baya buruguleorewi holene nga.
MAT 6:1 Tígua Ngode Datagaliwabe mitangi bialu mana beramiligo wali agali karume tí de hendelonaga ndo ti kagoria howa nabilimu. Mana ogoni wali agalinaga deni howa birimiyagua tí Aba dahuliya andaga kagome tíhondo emena ngulene nawulebira.
MAT 6:2 Mbirali buru pale kagohondo mbirale mbira mirimiyagua mine halu marume de hendelo lowa namilimu. Wali agali maru tombene hondo kihe karume ngoai hagane andahabi hariganibi ani biaga ka. Tigua wali agali marume ti mini yaraga helonaga biaga ka. I̱na tíhondo henene larogo o biarume tinaga emena mulene winigo áyu dege mo yai ka laro.
MAT 6:3 Tígua mbirali buru pale kago biamogo bule lowa tínaga nenegeru tí heba mandagi hagago manda nabilo o halu bilimu.
MAT 6:4 Ani birimiyagua tíni hangu hangume manda bu holeberami. Tí Aba tíni hangu hanguore howa beramiligo ibugua de handaya ho howa tíhondo emena ngulebira.
MAT 6:5 Tí kamiru hangu hangume Ngode Datagaliwabehondo bi lalu howa wali agali maru tombene hondo kihe karume biagadagua tígua nabilimu. Wali agali maru karume ti de hendelo lowa tigua ngoai hagane andahabi hariganibi heyu howa Ngode Datagaliwabehondo bi laga ka. I̱na tíhondo henene larogo o biarume tinaga emena mani mulene winigo áyu dege mo yai ka.
MAT 6:6 Ani biagadagua ndo tí hangu hangume Ngode Datagaliwabehondo bi lole howa tíninaga anda hobane mbiraha anda puwa panga paya tagi howa tí Aba tínaga deme nahandabehe kamigo ibuhondo bi lalimu. Ani laramigola tí Aba ibugua tíni hanguore howa beramigo de hondo kagome tíhondo emena ngulebirago ani bilimu.
MAT 6:7 Tígua Ngode Datagaliwabehondo bi lalu howa wali agali maru Ngode Datagaliwabe mitangi nabiaga karume bi dewa nagaloneru lagadagua nalalimu. O biarume bi lu laabo haragome hale holebira manda biaga kago
MAT 6:8 tigua lagadagua nalalimu. Mbirale buru pale kamigonaga tígua Abahondo bi naledemiore ibugua ala manda biai ho ka.
MAT 6:9 Ngode Datagaliwabehondo bi ogodagua lalu lolene nga. Ina Aba dahuliya andaga kegoni. Í̠ mini baya gibiore ngego mo yaraga helobi
MAT 6:10 í̠naga Handame Ho Holene ibilobi hamelo ko. Í̠na hamelo kego dahuliya andagaha karume biagadagua ina dindini kamarumebi buluma̱ya biamogo bibe.
MAT 6:11 Tomo áyu nolene buru pale kamago noloma̱ya ngibe.
MAT 6:12 Marume inahondo ko birago bia dai nabi waharamalidagua í̠na iname ko birimago domo wahabe.
MAT 6:13 Ina kamagoria ba hondolene hongohe nangelabe. Dama Heyolabeme ina ko mo bia holigo í̠na haru habe.
MAT 6:14 Wali agali marume tíhondo ko biyaru bia dai nabi waharimiyagua tí Aba dahuliya andaga kagome tígua ko birimiru nde domo waholebira.
MAT 6:15 Anigo wali agali marume tíhondo ko biyaru mitangi bu wiaabo halu wa naharimiyagua nde tígua ko birimiru tí Abahanda domo wa naholebira.
MAT 6:16 Tígua Ngode Datagaliwabe mitangi bialu tomo nane howa wali agali maru tombene hondo kihe karume dengui darabini ale howa hagadagua nahalimu. Wali agali o biarume tomo nane agua biagada lelo tigua tinaga tingini wayawaya nabi haga ka. I̱na tíhondo henenore larogo tinaga emena mani mulene winigo áyu dege mo yai kagoni.
MAT 6:17 Ani bidago tígua tomo nane howa tínaga dengui wayawaya bialu mandari perebi bialu halimu.
MAT 6:18 Ani buleberamigo irane wali agali maru karume tí handalu tomo nane kamigo manda nabilonaga bilimu. Tí Aba tínaga deme nahandabehe kamigo ibu hangu manda bulebira. Ani manda bialu tí hanguore howa beramiligo ibugua de handaya ho howa tíhondo emena ngulebira.
MAT 6:19 Tígua dindini howa mbirale homogo holenenaga mo mogobu wia nabilimu. Dindi ogoriani bombome nalubi hagua bialubi pagealime ohalu anda ibuwa page bialu mo ko hagagoria do holene nawi.
MAT 6:20 Ani biagagoria ndo dahuliya andagani bombome nanaga ngagoriabi hagua nabiagagoriabi pagealime anda naibagagoriabi mbirale homogo holenenaga mo do halimu.
MAT 6:21 Mbirale homogo holenenaga mo do ho ngagoria tínaga gubalini íbu haabo holebira.
MAT 6:22 De libu tingininaga lamu hale ale ka. Tínaga de bayale kayagua tínaga tinginiha wá haame holebira.
MAT 6:23 Anigo tínaga de ko hayagua tingini arumahe holebira. Tínaga tinginiha wá holene kago hundiyagua aruma taraorehe holebira.
MAT 6:24 Mbiralime anduane kiranaga garabaya biabe ale bia haga habe nahe ka. Ibugua anduane mendego handabe manga halu mendego gubalini holebira. Ani bialu howa anduane mendegome bi larago hale halu bialu mendegome larago hale halu mo waholebira. Tígua Ngode Datagaliwabenaga biabebi muninaga biabebi kirabali gi tale bu howa bibe naheore kamigoni.
MAT 6:25 Irane ogonigo i̱na tí langerogo tígua tomo ibabi nalu holenenagabi tingini aga bu holenenagabi burupadamigo agua buledabe lowa mini dege dindi ho nahalimu. Tomo bagi hene lowa wali agali holenego duniniore ndobe. Aga bagi hene lowa tingini duniniore ndobe.
MAT 6:26 Ega yagalo yu ibaga bialu poraru de handaramine. Ega uruni ti tomo egene nahangaga widi kago gandulowa do hagane andahabi nawiaga. Ani nabi kagola tí Aba dahuliya andaga kago ibugua egaru de handaya ho kagoni. Ega uruni emene niraore lowa wali agali tí duniniore kamigoni ndobe.
MAT 6:27 Tí kamigoni mbiralime dindini holenenaga mini dege dindi ho hayagua dindini haabo habehedabe.
MAT 6:28 Aga agi bu holedabe lalu mini dege dindi ho holene aginagabe. Palawaya aleru minana anda howa lini dedago agua anda halu haradabe mitangi bidaba. Tigua tini biabe nabiagabi tininaga yári bule lowa agabi nawabiaga ka.
MAT 6:29 Anigo i̱na tí langerogo Kini Solomono ibunaga mbirale dewaorewi howa aga baya bu haga henego palawayanaga yári baya gibiore bidagobi ndo bu haga hene.
MAT 6:30 Ngode Datagaliwabehanda datani minana anda halu karuni mo yári bia haga ka. Datani uruni áyu kago yawi agalime ganda lowa irani delolebira. Ngode Datagaliwabe ibugua o biaru mo yári bia hagadagua tí kamirubi aga bilimulo ngulebira ndobe. Tígua mini mbiraore emene wu kamigo agi bulenaga wu kamibe.
MAT 6:31 Anigo tígua tomo iba nolenebi aga bulenebi agiha howa ibulubadabe lowa mini dege dindi ho nahalimu.
MAT 6:32 Mana urunibi wali agali Ngode Datagaliwabe mitangi nabiaga karume mini dege dindi ho ka. Tí Aba dahuliya andaga kago ibugua tí mbirale uru ale bibahende buru pale kamilo manda bu ka.
MAT 6:33 Ani mitangi bilimulo ndo Ngode Datagaliwabehanda Handame Ho Kagonagabi ibugua tí bilimulo hame ledagonagabi tígua duninida lowa mitangiore bialu haramigola ibugua uruni bibahende ngaru tíhondo ngiai holebira.
MAT 6:34 Anigo tígua yawinagabi áyu mini dege dindi ho nahalimu. Horo yawi haragola ibuni mini dege dindi ho holenenaga karulape wulebirago áyunaga mini dege dindi ho holene ngagoria marubi mo wia tago bia holene nawi.
MAT 7:1 Yasuhanda laabo halu lalu, Ngode Datagaliwabehanda tí beramigo daba ki nabilo tígua wali agali marume biragobi daba ki nabilimu.
MAT 7:2 Tígua wali agali marume birago hondowa daba ki beramilidagua Ngode Datagaliwabehanda tígua beramigobi hondowa daba ki bulebira. Tígua wali agali maru hondowa ti bulene nabulene bi ogo lalu lo weramilidagua Ngode Datagaliwabehanda tí hondowa ani dege lo wulebira.
MAT 7:3 Anigo tígua tí hamenenaga deni kugi emene ede ngago laramiligo tíninaga deni ira goba ale ngago mitangi nabi howa laramiligo agibe.
MAT 7:4 Tígua tíninaga deni ira goba ale wu kamigo dege howa tí hamenehondo lalu, Í̠naga deni kugi emene ede ngago mero, lalu agua labehedabe.
MAT 7:5 Tí tombene hondo kihe kamigoni. Tíninaga deni ira goba ale ngago ala mo wahowa mani tí hamenenaga deni kugi emene ngago bayuwa handalu mibehe holeberami.
MAT 7:6 Mbirale Ngode Datagaliwabehondo loma bia ho ngago tígua biangohondo namilimu. Mirimiyagua nde biango biarume beregedalu tí porabu para howa hayulebira. Tínaga gele mini pealo baya gibi ngamiru nogo ngui ngagoria ba amu nahalimu. Ba amu harimiyagua gurubu gele ale baya gibi biaru nogo geme hengedolebira.
MAT 7:7 Ngi, lalimu. Ngi, larimiyagua tígua yu holeberami. Tai bialu halimu. Tai bialu harimiyagua handa walia holeberami. Panga dugua, lalu halimu. Panga dugua, lalu kamigola tíhondo panga dugua holebira.
MAT 7:8 Ogoninaga bibahendeme, Ngi, lalu karuhondo miragola yulebira. Tai bialu karume handa walia holebira. Panga dugua, lalu karuhondo panga dugua holebira.
MAT 7:9 Waneigini aba kamiru tí iginime, Hina mbira ngi, layagua mbiralime ege to̱le̱ dugu muleberamibe.
MAT 7:10 Ai ibugua, Wena mbira ngi, layagua tí mbiralime nogombi minu muleberamibe.
MAT 7:11 Tíni ko howa tí waneiginihondo bayale dege mulene manda bu kami. Ogonidagua ndo bolangua howaore tí Aba dahuliya andaga kagohondo mbirale ngi laragola o laragohondo Ngode Datagaliwabehanda bayaleore dege dege mulebira.
MAT 7:12 Wali agali marume tíhondo bilo hame laramilidagua nde tígua maru biaruhondo ani dege bilimu. Mosese heneyangi Mana lowinigohabi Ngode Datagaliwabe mana latagi haga henerume bi lawai henegohabi bi uruniha mana ogoninaga tene bulene lo nga.
MAT 7:13 Anda polene panga haraba dorogone ngago ogoniha anda pilimu. Heli dindi anda polene panga haraba yangale nga. Panga haraba ogoni ngagoria polene hariga taibi ndo awadaga ngagoni hondowa wali agali dewaoreme hariga ogoriani pialu ka.
MAT 7:14 Holene gahengeore mule anda polene panga haraba dorogone nga. Ani ngago panga haraba ogoni ngagoria anda polene hariga taibiore ngago wali agali mbira mbira hangume hariga ogoni handa walia haga ka.
MAT 7:15 Ngode Datagaliwabe mana henene ngadagua ndo latagi haga agali karu de hondowa mamage halimu. Tigua tí kamigoria ibalu dongoneni nogo sibi dambole ale howa miniha ti biango duduore ale ka.
MAT 7:16 Tígua ti mana birago hondowa tioreda manda buleberami. Mamunali anihe ale kagome pu mbira mini gerebi lini nadaga ka. Mamunalime pogoli nadaga ka.
MAT 7:17 Ira bayale kagome lini bayale daga ka. Ogonidagua dege ira ko kagome lini ko daga ka.
MAT 7:18 Ira bayale kagome lini ko nadabehe ka. Ogonidagua dege ira ko kagome lini bayale nadabehe ka.
MAT 7:19 Ira damene lini bayale nadaga kago ani nadaragola ira uruni dibuwa ira dedagoriani delolebira.
MAT 7:20 Anigo tígua Ngode Datagaliwabe mana henene ngadagua ndo latagi haga karume mana birago hondowa tioreda manda buleberami.
MAT 7:21 Bibahendeme i̱ olowa, Anduane-o Anduane-o, lalu karu Ngode Datagaliwabehanda Handame Ho Kagoria anda piai naholebira. I̱ Aba dahuliya andaga kago hame ledadagua bialu karu ti degeme anda polebira.
MAT 7:22 Daba Ki Bulene Horo ibirangi wali agali dewalime lalu, Anduane-o Anduane-o í̠ minini howa iname Ngode Datagaliwabenaga bi mana latagi harima. Í̠ mini lalu iname dama dewa wara tagi halubi agalime nabiagane ale dewa bialubi harima, lolebira.
MAT 7:23 Ani laragola i̱na tihondo lalu, I̱na tí manda nabialu nabido. Wali agali mana ko hanguore mo tene haga kamiruni tí i̱ denguini nahe puabo hadaba, lolebero.
MAT 7:24 Anigo i̱na bi o larogoni hale halu bialu kagome ibu agali mbira mini gigabiwime ege to̱le̱ni anda biyagoni ale ka.
MAT 7:25 Anda ani biyagola dalu timbuni ibalu howa iba li piyagome dindi namu layagolabi puyabume anda biagoha hongo howa pu la anda hayagolabi anda ege to̱le̱ni ho ndibu lenegome poda nabi hene.
MAT 7:26 I̱na bi larogoni hale halu bia nabi kagome ibu agali mini nawi howa iba muni anda biyagoni ale ka.
MAT 7:27 Anda ani biyagola dalu timbuni ibalu howa iba li piyagome dindi namu layagolabi puyabume anda biagoha hongo howa pu la anda hayagolabi anda podaiore hene. Ani podo ibira halu u emene agima ndo lowa kulu ndugu lalu podope hene.
MAT 7:28 Yasuhanda bi uruni bibahende lai hayagola wali agali dewaore bu hearume ibugua taraore lawai hayago hale howa mogo lai hene.
MAT 7:29 Mana lowinigo lawai haga hearume lawai hagadagua ndo ibugua hongo taraore howa lawai halu hene.
MAT 8:1 Yasu ibu hari bare biagoriani howa daliyagola wali agali dewaoreme ibu haruru pialu hene.
MAT 8:2 Ani pialu howa agali mbira ge hamuabi heago Yasu hearia ibalu ge duli hanga ho biruwa lalu, Anduane-o í̠na i̱ mo dabi hoa biyagua nde mo dabi habehe ke, lene.
MAT 8:3 Ani layagola Yasuhanda ibunaga gi dogola amu howa agali biago ela halu ladai bialu lalu, I̱na í̠ mo dabi hoabago dabi ha, lene. Ani layagola agali biagonaga ge hamuabi abale dabi haiore hene.
MAT 8:4 Ani buwa Yasuhanda ibuhondo lalu, Ai hale ha. Maru nalami loma binigo mo miaga agali kagome í̠ de hendelo ibu kagoria abale puabo halu pole pu. Ani bialu í̠ dabi haiore haridago wali agali karume de hendelo walia hole Mosesehanda bi lowini wiyadagua mbirale mbira Ngode Datagaliwabehondo bo mibe, lene.
MAT 8:5 Yasuhanda Kabaniama anda pialu hearia Lomo ami haru haga mbirame ibu lola howa lalu,
MAT 8:6 Anduane-o i̱naga biabe bia haga ibu i̱ andagani warago bo wuwa tandaga timbuni nalu ema nabibehe nga, lalu lamini.
MAT 8:7 Ani layagola Yasuhanda ibuhondo lalu, Ibu mo dabi hole porogo, lene.
MAT 8:8 Ani layagola ami haru biagome ladai bialu lalu, Anduane-o ani ndo. Agali ko i̱ alego andaga í̠ ibulene emene nakarulapego í̠na i̱naga biabe bia haga biago dabi helo bi dege labe.
MAT 8:9 Ami handa gimbu bu haga hongohe karu tigua i̱hondo, Bia, laradagua bialu haruli. Ani buwa i̱na ani agali maru karuhondo, Bidaba, larodagua biaga ka. I̱na mbiralihondo, Pu, larogola ibu piaga. Mendealihondo, Íbu, larogola ibu ibaga. I̱na i̱naga garabaya biabe ale bia hagahondo, Ogo bia, larogola ogoni biaga, lene.
MAT 8:10 Ani layagola hale howa Yasu ibu mogo timbuni lowa wali agali ibu haruru ibalu hearuhondo lalu, I̱na tí langerogo Isaraele dindini mbiralime mini mbiraore ogonidaguaore wu hearia i̱ nahende ko.
MAT 8:11 Ogo heneneore larogo wali agali dewaore dindi ni tagira ibiragohayagi howabi ai ni paliragohayagi howabi ibuwa tigua Ngode Datagaliwabehanda Handame Ho Kagoriani ibuwa Abarahamabi Aisagabi Yagababi heba tomo timbuni dawa gimbu bu wulebirago mandagi nalu birulebira.
MAT 8:12 Wali agali maru Ngode Datagaliwabehanda Handame Ho Kagoria polene wini wahayaru ti arumahe ngagoria minu ba tagi ho helolebira. Ani minu ba tagi ho helaragola howa ti dugu yiyi lalubi ne gingirulo hayaga bialu holebira, lene.
MAT 8:13 Ani lowa Yasuhanda ami haru haga biagohondo lalu, Í̠na mini mbiraore wu kedagua bulebirago ai andaga pamia, lene. Ani layaore dege ami haru haga biagonaga biabe bia haga biago dabi hene.
MAT 8:14 Yasu ibu Pidanaga andaga puwa ibu imane poboyogo bialu warago bo wiaria de hendeme.
MAT 8:15 De hondowa ibugua wali biagonaga gi ela hayagola poboyogo ala biyago ereba halu dabi howa wali biago heyalu ibu Yasu tomo nelo mule manda manda bini.
MAT 8:16 Alendo ni gai layagola wali agali bu hearume dama daragahe hearu Yasu hearia haru ibini. Haru ibiyagola Yasuhanda bi layagome dama dewa wara tagi halu wali agali warago bo wiarubi mo dabi halu hene.
MAT 8:17 Ibugua ani binigo Ngode Datagaliwabe mana latagi haga Aisaiahanda ala mbiwia heneyago heneneore lola hene. Aisaiahanda bi leneyago ogo, Inanaga warago bayago ibuni mo yini. Warago tara tara inani bayaru ibugua mo yalu pene, lenego nga.
MAT 8:18 Yasuhanda wali agali dewarore ibu heba bu hearu de hondowa ibu talima piaga biaruhondo lalu, Iba timbuni o bedagoni ange abene edegohayagi ma, lene.
MAT 8:19 Ani layagola howa Mana lowinigo lawai haga mbira Yasu hearia ibuwa ibuhondo lalu, Lawai haga-o í̠ poregoha i̱na talima ibaga bulebero, lene.
MAT 8:20 Ani layagola Yasuhanda ibuhondo ladai bialu lalu, Biango dudu ale karu ti dindi hau̱ha paliaga ega bedaru tinaga andaha paliaga Agali Hole Ibiyago ibu ha̱lo̱ paluene henge nawi ka, lene.
MAT 8:21 Agali mende heago ibu Yasu talima piaga howa ibugua Yasuhondo lalu, Anduane-o i̱na i̱ aba ala hora hole dai berogo, lene.
MAT 8:22 Ani layagola Yasuhanda ibuhondo ladai bialu lalu, Homene karu tinaga homene tinime hora holene ngago í̠na i̱ porodagua talima mba íbu, lene.
MAT 8:23 Yasu ibu iba taluni anda pu birayagola ibunaga talima piaga biaru ibu heba pene.
MAT 8:24 Ani pialu hearia puyabu hongo howa pu layagola iba yaribu biyagome iba talu biago guaneha iba anda ibalu ibame ti nai hole bini. Ani biyagola Yasu ibu iba talu guaneha palia hondo hene.
MAT 8:25 Palia hondo hearia ibunaga talima piaga biaru tigua puwa Yasu mo barila halu lalu, Anduane-o ina homai haramago í̠na biamogo bule heya, lene.
MAT 8:26 Ani layagola Yasuhanda ladai bialu lalu, Tí aginaga gi ho kamibe. Tígua mini mbiraore emene wu kamigo agi bulenego wu kamibe, lene. Ani lowa ibugua heyuwa puyabubi iba yaribuhondobi bi layagola puyabu nale ibabi yaribu nabi nimu lowa bayaleore wini.
MAT 8:27 Ani biyagola bibahende hearume mogo lai howa lalu, Agali ogoni ibu ara alidabe. Puyabumebi ibamebi ibugua bi layago hale hagada, lalu hene.
MAT 8:28 Yasu ibu iba timbuni bereago doma ede halu puwa Gadara dindi anda pene. Anda pialu hearia homali egeanda wiaruha agali kira tagira ibalu hearia Yasu lola hene. Agali ogoni labo libuha dama daraga howa wali agali bo wahabehe heago hondowa wali agali hariga ogoriani napiaga hene.
MAT 8:29 Libugua Yasu lola howa ga̱ lowa lalu, Ngode Datagaliwabe Igini-o í̠na iyahondo agi bule ibiribe. Iya pani nolene horo naibidaore dege pani abale ngule ibiribe, lene.
MAT 8:30 Emene kaware ale nogo dewa bareni pi̱a̱ nalu bu hene.
MAT 8:31 Ani bu kago manda buwa agali biago laboha dama daraga hayagome Yasuhondo lalu, Í̠na ina wara tagi holeyagua ina nogo na̱i̱ karuha anda pu holoma̱ya hole pudaba la, lene.
MAT 8:32 Ani layagola Yasuhanda dama biaruhondo lalu, Tí tagira pialu nogoha anda pudaba, lene. Ani layagola dama biarume agali biago labo helalu nogo biaruha anda pene. Anda piyagola nogo bibahendeore hayaru bareni dalipebe bialu iba timbuni bereagoha anda piai hayagola ibame nogo biaru nai hene.
MAT 8:33 Ibame nogo ani nai hayago de hondowa nogo haru haga hearume gerai lalu tanoni wali agali dewa bu heagoria puwa bibahende biyago te lalu agali ala dama daragahe biago labonagabi te lalu lamiai hene.
MAT 8:34 Lamiai hayagola wali agali bibahende hearume tano biagoria howa tagira pialu Yasu lola hole pene. Ani pialu howa tigua Yasu de hondowa ibuhondo hongo howa lalu, Í̠ inanaga dindi ogoriani nahe wahalu pu, lene.
MAT 9:1 Yasu iba taluni biralu iba bereago doma dai bialu ibuni haga biagoha dai bu heagola
MAT 9:2 agali marume agali mbira kuduguhe henego ibu lebereni ira ho yalu ibini. Ani yalu ibiyagola tigua mini mbiraore wu howa biyago hondowa Yasuhanda agali kuduguhe biagohondo lalu, I̱ igini-o í̠naga ko birigo domai hayago gi nahe turu habe, lene.
MAT 9:3 Ani layagola Mana lo winigo lawai haga hearume tini hangu la la bialu lalu, Ngode Datagaliwabe ibuni hangume wali agali ko biyago domo wahabehe kagodago agali ogonime Ngode Datagaliwabe mege bialu kagoni ibu aidabe, lo manda bialu berene.
MAT 9:4 Ti ani lo manda bialu bereago hondowa Yasuhanda tihondo lalu, Dama biangome mini wini manda bialu bedamigoni agibe.
MAT 9:5 Í̠naga ko domai haya lolenego taibidabe be heyalu ibaga bu ha lolenego taibidabe.
MAT 9:6 Anigo Agali Hole Ibiyagome dindini howa wali agalime ko biyago domo waholene hongo yu kago tí manda bilimulo walia haro, lene. Ani lowa ibugua agali kuduguhe biagohondo lalu, Heyuwa í̠naga lebere mo yalu andaga pamia, lene.
MAT 9:7 Ani laya handala agali biago ibu heyalu andaga pene.
MAT 9:8 Ani biyagoni hondowa wali agali hearume gi hai howa agali biago Ngode Datagaliwabe ibugua hongo taraore miyiyagonaga tigua Ngode Datagaliwabenaga mini yaraga hene.
MAT 9:9 Yasu ibu ani bialu harigani pole pialu hearia agali mbira dagisi muni miaga mini Madiu ibu dagisi muni miaganenaga andaha berearia hondowa Yasuhanda ibuhondo lalu, I̱ porodagua talima íbu, lene. Ani layagola Madiu ibu abale heyalu Yasu talima pene.
MAT 9:10 Puwa Yasu ibu Madiu andaga tomo nalu berearia dagisi muni miaga hearubi mana ko biaga dewali hearubi ti Yasubi ibunaga talima piaga biarubi tomo nalu berearia ibalu biraganeni bira para ho berene.
MAT 9:11 Ani bialu bereagola Perisi agali maru hearume hondowa ibunaga talima piaga biaruhondo lalu, Tínaga lawai haga ibu mana ko biaga karu heba mandagi tomo nalu bedago irane agibe, lene.
MAT 9:12 Bi ani layago hale howa Yasuhanda lalu, Wali agali warago nabe karu anogodame ti biamogo bilo ibu karia napiagago warago bo ngaru hangu anogodame ti biamogo bilo ibu karia piaga.
MAT 9:13 Anduane Homogonaga mbugani lo ngago ogo, I̱ mbirale tara tara bo ngulene hame nale howa dara halu biamogo bulene hame ledo, lalu gilibu nga. Bi ogoni irane aginaga layadabe dabo hondole pudaba. I̱ ibirugo wali agali bayale karu olole ndo wali agali ko biaga karu olole ibirugoni, lene.
MAT 9:14 Ani biyagola baboraya biaga Yonenaga talima piaga hearume Yasu hearia ibuwa ibuhondo lalu, Inabi Perisi agali karubi ina tomo nane haga beramaligo í̠naga talima piaga karume tomo nane nahagadago irane agibe, lene.
MAT 9:15 Ani layagola Yasuhanda tihondo ladai bialu lalu, Tígua agali mbirame wali dabu biragola howa wali agali tomo nole ngoai ho hararume agali wali dabu biaga biago heba mandagi biruwa tomo nole lowa nane darabini ale ho heloleberamibe. Ani naberamili. Horo mbiru agali wali dabu biaga biago ti kagoria howa marume ibu haru poragola tigua tomo nane holebira.
MAT 9:16 Mbiralime aga gobani aga gahengeme lebu para nahaga. Ani lebu para hayagua aga gahenge biago migimugu lalu aga ala tawe biago buda timbu holebira.
MAT 9:17 Ogonidagua dege mbiralime waini iba gahenge bedago be nogo dongoneme wabini bamba taweha odo bere nalaga. Mbiralime odo bere layagua waini iba biagome be mo lere lalu tagira polebira. Ani biragola be biagobi ko dege holebira. Ani buligo waini iba gahenge bedago be nogo dongoneme wabini gahenge degeha bere laragola libu haru bayale ogobi labolabo holebira, lene.
MAT 9:18 Yasu ibu anidagua lalu hearia Yu wali agalinaga hondo hagane agali mbira ibuwa Yasu heagoria wanakuihayagi ge duli hanga ho biruwa lalu, I̱ wane áyu dege tongolo miyago ibu lone dabi helo í̠na gime ela habelo mba, lene.
MAT 9:19 Ani layagola Yasu ibu abale heyuwa ibu piyadagua piyagola ibunaga talima piaga biaru tibi ibu piyadagua pene.
MAT 9:20 Pialu hearia wali mbira mali pira mbirani kira (21) warago taraore baabo haga berenegome ibuni hangu lo manda bialu lalu, I̱na Yasunaga agani ela haruyagua bayale holebero, lowa Yasu erembirahayagi puwa aga nguinini ela hene.
MAT 9:22 Ani biyagola Yasuhanda beregedalu wali biago hondowa lalu, I̱ wane-o í̠ni Ngode Datagaliwabehondo mini mbiraore wirigome í̠ áyu mo dabi hayago turu halu hongoho habe, lene. Ani layaore dege wali biago warago dabi hai hene.
MAT 9:23 Ani bialu Yasu ibu Yu wali agalinaga hondo haga agali biago andaga anda pene. Anda pialu hearia pilipe alebi ga̱wa̱ alebi hiliyula alebi lalu dugu anda howa lalu walime kiabu dugu bialu hearia hondowa
MAT 9:24 Yasuhanda lalu, Wandari emene ogoni ibu tongolo mia nabi palia dege bidago tí bibahende tagira piai hadaba, lene. Ani layagola tigua Yasu hondo oba halu hene.
MAT 9:25 Wali agali bu hearuni tagira piai hayagola Yasu ibugua wandari biago paliaga hobane mbiraha anda puwa wandari biago gi yamiyagola ibu heyini.
MAT 9:26 Yasuhanda biyagoninaga dindi ogonihayagi hearunime hale ho yogo lai hene.
MAT 9:27 Yasu ibu dindi ogoniha howa tagira puwa ibu harigani pialu hearia agali kira de kohe henego labome Yasu olama mama ibalu howa lalu, Debidi Igini-o iya hondowa dara harene, lene.
MAT 9:28 Yasu ibu andaga anda pu heagola agali kira biago labome talima ibini. Ibiyagola Yasuhanda libuhondo lalu, Libunaga de o dabi habehe i̱ kogo mini mbiraore wu kabibe, lene. Libugua ladai bialu lalu, Anduane-o e̱ iya mini mbiraore wu kabagoni, lene.
MAT 9:29 Ani layagola Yasuhanda libunaga deni ela halu howa lalu, Líbuni mini mbiraore wu kabigobi dabi hadaba, lene.
MAT 9:30 Ani layagola libunaga de biago de ngalayagola Yasuhanda libuhondo hongo howa lalu, O birugoniore libugua mbirali nalamilibu, lene.
MAT 9:31 Ani laya handala libu pialu howa Yasuhanda o biyagoninaga dindi ogonihayagi hearunime hale hai helo lo yogo lama pene.
MAT 9:32 Agali biago labo tagira pialu piyagola wali agali marume agali mbiraha dama daraga hayagola bi nalabehe henego haru ibini.
MAT 9:33 Dama daraga ho hayago wara tagi hayagola agali biagome bi tenialu lene. Ani biyagola bibahende bu hearume mogo lo nga karu lai howa lalu, Ogonidaguaore mbira Isaraeleni biyaria nahandalu nahende hene kamagoni, lene.
MAT 9:34 Ani layagola Perisi agali hearume mo yo hondowa lalu, Ogoni dama bibahende karunaga haguane mini Heyolabe ibugua dama maru karu wara tagi holenenaga hongo miyagola wara tagi hayadagoni, lene.
MAT 9:35 Yasuhanda tano wiaruhabi mabu andaga wiaruhabi wali agali nenege piai halu hene. Ibugua ngoai hagane andaha howa Ngode Datagaliwabehanda Handame Ho Kagonaga Bi Mana Debene lamiabi lawaibi ha bigi bialu howa dongone ko haga biarubi warago tara tara bo wiarubi mo dabi ha bigi bialu hene.
MAT 9:36 Ibugua wali agali dewa bu hearu handalu hearia dara holene ibunaga gubaliniha to̱lai howa hene. Irane ti nogo sibi haru hagane nahe howa hagadagua lulu anda ho pe ho howa mini dege dindi ho heagola dara ho hene.
MAT 9:37 Ani bu heago hondowa ibugua ibunaga talima piaga biaruhondo lalu, Tomo bialu mo mogo bulenego timbu halu ai tomo ogoni mo mogo bialu biabe bia hagane agali ndiada.
MAT 9:38 Anigo mabu anduane ibunime tomo buwa mo mogo bialu biabe bia hagane maru dabalu pu lelo tígua ibuhondo bi lolene nga, lene.
MAT 10:1 Yasuhanda ibunaga talima piaga homberiali (12) biaru olalu, Ibidaba, lowa dama daragahe karu wara tagi helobi dongone ko hagabi warago tara tara bo ngarubi bibahende mo dabi helobi ibugua tihondo hongo holene mini.
MAT 10:2 Abosolo homberia (12) uruni tinaga mini uru, Saimono mini mende Pida ibubi ibu hamene Andurubi Yamese ibu hamene Yonebi libu Sebedi igini henego
MAT 10:3 Pilibibi Badolomiubi Tomasabi dagisi muni miaga Madiubi Alibiasa igini Yamesebi Tadiasabi
MAT 10:4 Saimono ibu ka̱i̱ mini mende Paidoro ibubi Yudasa Isagariodo ibu Yasu nde lenego ibubi uruni ti Yasuhanda dabene.
MAT 10:5 Yasuhanda agali homberiali (12) uruni ani dabowa ti pelonaga bi ogodagua lamini. Tí puwa Yuali ndo wali agali tara tara karuhabi Samaria tano karuhabi napilimu.
MAT 10:6 Ogoniha poradagua tígua Isaraele wali agali ti nogo sibi pu ereba ho kagobi kagoria pilimu.
MAT 10:7 Puwa, Ngode Datagaliwabenaga Handame Ho Holene horo ha para holene kaware nga, lalu bi mana lamilimu.
MAT 10:8 Ani buwa warago bo ngaru mo dabi halubi tongolo mini ngaru mo heya halubi ge hamuabi karu mo dabi halubi dama daragahe karu wara tagi halubi bialu halimu. Tígua áyu yu kamigoni yolome mini ndo yu kamigo ogoni bialu howa yolo ngi nalalimu.
MAT 10:9 Tígua pialu howa ngolobi silibabi muni emene toea ale ngarubi mbira nayi pilimu.
MAT 10:10 Ani buwa harigani pialu howa muni ngi lowa mo hanagane nubi tingiliya hunianebi ge subi halimbubi nayiore pilimu. Biabe biaga kagohondo mbirale mbira ibu buru pale kago ale mulene nga.
MAT 10:11 Tígua tano mbiranibi mabu andaga mbirahabi anda puwa mbiralime, Tí palimi̱ya ibidaba, larabe hondole pilimu. Poramigola palima larago baba paliaabo halu polene tu haragola pilimu.
MAT 10:12 Tígua anda mbiraha anda pialu howa, Mo palia holene tí heba helo, lalu anda pilimu.
MAT 10:13 Wali agali anda ogoniha padarume, Tí palimi̱ya ibidaba, layagua tígua mo palia holene tí heba helo larimigo ti yu helo milimu. Tigua tí palimi̱ya ibidaba nalayagua tígua mo palia holene helo larimigo tíni yamilimu.
MAT 10:14 Anda mbiraha karumebi tano mbirani karumebi tí palimi̱ya ibidaba nale tígua bi laramigobi hale nahayagua nde tínaga geni abalu para kago taulo wahalu pilimu.
MAT 10:15 I̱na tí langerogo Daba Ki Bulene Horo harangi Ngode Datagaliwabehanda dara howa Sodomo wali agalihondobi Gomora wali agalihondobi dabaradagua ndo wali agali tano ogoniha karu hongo howaore dabolebira, lene.
MAT 10:16 Yasuhanda lalu, Hale hadaba. Nogo sibi aleore kamigo tí biango gabua ale bu karuha i̱na pudaba larogoni. Tígua pialu howa bayuwa tendore nogombime yolo hinalu piagadagua pialu ega malibu aleme baya hangu hau howaore piagadagua pilimu.
MAT 10:17 Agali karume tí minuwa godi lole haru polebiragobi ngoai hagane andaha howa tí bolebiragobi ogoniore bayuwa mamage ho halimu.
MAT 10:18 Tí i̱naga minini kamigo hondowa kini karubi gabumane haru haga karubi ti karia godi lama lalu minu yalu poragola tígua Bi Mana Debene tihondobi Yuali ndo wali agali tara tara karuhondobi lamilimulo haru polebira.
MAT 10:19 Tigua tí godi lama lalu haru poragola agi lole harudabe lowabi aguaore lolego harube lowabi mini dege dindi ho nahalimu. Lolene tu haragola lolene wiragobi loleberami.
MAT 10:20 Ogoninaga bi loleberamigo tíninaga bi ndo loleberami. Tí Aba Ngode Datagaliwabe Dinini ibugua tínaga miniha howa la lalu langirago loleberami.
MAT 10:21 Agalime tini hameneore homelo belo minu mulebira. Waneigini aba karume ti waneiginihondo ogonidagua dege bulebira. Waneiginime ti ai̱ya aba baba hoba migimigi bialu homelo belo minu mulebira.
MAT 10:22 Ani buwa i̱naga minini kamigo hondowa bibahendeoreme tí handabe manga holebira. Anigo mbiralime hongo howa ho ununu lo haabo hayagua hamaro birangi Ngode Datagaliwabehanda ogoni ibu pele mulebira.
MAT 10:23 Tí tano mbirani kamigola mo tandaga hayagua tano mendeni hole gerai lalu pilimu. I̱na tíhondo larogo Agali Hole Ibiyago ibu naibida tagi howa tígua Isaraelenaga tano bibahendeni biabe bulene ngaru biai naholeberami.
MAT 10:24 Bu manda biaga kagome ibunaga biawai haga kago bolangua nahaga. Ani biagago garabaya biabe ale bia haga kagome ibunaga anduane kago bolangua nahaga.
MAT 10:25 Anigo bu manda biagame ibunaga biawai haga kagobi holene karulape mitangi bulene nga. Garabaya biabe ale bia haga kagomebi ibunaga anduane kagobi holene karulape mitangi bulene nga. Ani buwa tigua waneigini aba kago ibu mini Heyolabe laga kayagua ibunaga waneigini karubi ti mini koorene ko lolobada, lene.
MAT 10:26 Anigo tígua wali agali hondowa gi nahalimu. Mbirale áyu do ho ngaru mani mo pani hai halu ohowa biniru manda biaihe lalu bulebira.
MAT 10:27 I̱na arumaha howa langigi berogoni tígua horombe wá haragoria howa larodagua loyane bialu halimu. Tíni hangu howa layane hale harimigo tígua anda dangini howa awa lalu lope halimu.
MAT 10:28 Dinini heba ndo tingini hangu homelo baga karu hondowa gi nahalimu. Ai dinini tinginila kirabali heli dindiha mo bape habehe Ngode Datagaliwabe kago ibuhondo hangu gi ho halimu.
MAT 10:29 Ogoninaga tígua muni emene toea ale mbirame ega pimbi ale kira yolo bibehe kami. Anigo ega pimbi ale homane mbira tínaga Aba kagome dindiha pu ereba henalaga ka hendeni.
MAT 10:30 Ai tínaga haguaneni mandari kamigo bibahendeore daga lai howa heleda hendeni.
MAT 10:31 Anigo ega pimbi ale biru ngaru goyane lowa tí duniniore kamigo gi nahalimu, lene.
MAT 10:32 Mbiralime wali agali bu karu wanakuini howa i̱ mini lalu, I̱ Kerisonaga kogoni, lalu latagi hayagua i̱na nde i̱ Aba dahuliya andagani kagonaga wanakuini howa o biagonaga mini lalu ani dege lolebero.
MAT 10:33 Anigo mbiralime wali agali bu karunaga wanakuini howa i̱ mini nale erembira ngiyagua i̱na nde i̱ Aba dahuliya andagani kagonaga wanakuini howa o biagonaga mini nale erembira mulebero, lene.
MAT 10:34 I̱na dindi bibahendeni mo palia holene wule yalu ibiyada manda nabilimu. I̱na mo palia holene yalu ndo mo wai bia holene yalu ibiru.
MAT 10:35 I̱ ibirugo iginime ti aba baba hoba migi migi bu halu waneme ti ai̱ya baba hoba migi migi bu biralu igiri oneme igiri ai̱ya baba hoba migi migi bu biralu bilo ani mo bia hole ibiru.
MAT 10:36 Agalinaga waitigi hiriribiore ibuninaga onene waneiginibi ti holebira.
MAT 10:37 Mbiralime i̱ gubalini harago goyane lowa ibu ai̱ya abala gubalini timbuniore hayagua ibu i̱naga talima piaga habe nahe holebira. Ani buwa mbiralime i̱ gubalini harago goyane lowa ibu waneigini gubalini timbuniore hayagua ibubi nde i̱naga talima piaga habe nahe dege holebira.
MAT 10:38 Ani buwa mbiralime ibuninaga ira banga yalu i̱ porodagua talima naibiyagua i̱naga talima piaga habe nahe dege holebira.
MAT 10:39 Mbiralime ibuninaga holene ngago mo tene hayagua holene ogoni ereba holebira. Ai mbiralime i̱ mo tene howa ibuni holene hado wahayagua holene gahenge yu holebira, lene.
MAT 10:40 Mbiralime tíhondo, Ina hami̱ya ibidaba, layagua i̱bi ibula habiya i̱bu lara. Ani buwa mbiralime i̱hondo, Iya habiya íbu, layagua mbirali i̱ pu layagobi ibula habiya íbu laragoni.
MAT 10:41 Mbiralime Ngode Datagaliwabenaga bi latagi haga kago hondowa ibuhondo, Habiya íbu, layagua mani ibubi Ngode Datagaliwabenaga bi latagi haga kagobi libu harume ogoninaga emena yu holeberabi. Ani buwa mbiralime agali mini tigabiwi kago hondowa ibuhondo, Habiya íbu, layagua mani ibubi agali mini tigabiwi kagobi libu harume ogoninaga emena yu holeberabi.
MAT 10:42 Mbiralime i̱naga talima piaga mbira nira kago ibunaga talima piaga kagodago hondowa ibuhondo iba libule nelo hambu miyagua ogoni ibuhondo Ngode Datagaliwabehanda emena mulebiraore laro, lalu Yasuhanda lene.
MAT 11:1 Yasuhanda ibu talima piaga homberiali (12) biaruhondo ani bulebira lalu lamiai halu tano ogoni wahalu tano maru kaware wiaruhayagi ibaga bialu howa wali agalihondo bi mana lawai ha lamia bigi bule pene.
MAT 11:2 Yone ibu garabaya andaha hearia Kerisohanda bialu hayuago hale howa Yone ibugua ibuninaga talima piaga maruhondo, Bi agua lalu Yasu karia lamule pudaba, lene. Ani laya handala Yasu hearia puwa
MAT 11:3 ibuhondo lalu, Í̠ baboraya biaga Yonehanda, Mbirali ibulebira, layagoni í̠yagua ina langi. Be mbirali mani ibirabe hondole holomabe, lene.
MAT 11:4 Ani layagola Yasuhanda la dai bialu lalu, Yone karia dai buwa bi hale haramigobi de handaramigobi ibuhondo lamilimu. Lamialu lalu,
MAT 11:5 De kohe heneru de handalu ge kohe heneru ibaga bialu ge hamuabi heneru mo dabi halu hale tuluhe heneru hale halu homo tongolo mini wiaru mo heya ho helalu ani buwa wali agali yagibano hearuhondo Bi Mana Debene lamialu hea, lalu lamule pudaba.
MAT 11:6 I̱hondo mini kira nawi karume turu taraore ho holene nga, lene.
MAT 11:7 Yonenaga talima piaga ibiyago dai bialu heaore Yasuhanda wali agali bu hearuhondo Yone mitangi bialu lalu, Yone ibu dindi koni wali agali nahaga wiagoria ibu hangu heagoha puwa tígua minime agileore hondole manda bu yalu pirimibe. Tani puyabume elape howa hongo nahe yomagelo wiago hondole pirimibe.
MAT 11:8 Tí penedago agi hondole penebe. Agalime aga bayale hangu bu heago hondole pirimibe. Wali agali aga bayale ogonibiore bu kagome homogo anda baya gibi kagoha paliaga ka.
MAT 11:9 Tígua hondo penedago ogo ale hondole pirima lalu i̱ langidaba ndabe. Ngode Datagaliwabe mana latagi haga heago hondole pirimibe. E̱ aniore handarimi. Anigo Ngode Datagaliwabe mana latagi haga karu nira lowa ibu daligaore hearia handarimi.
MAT 11:10 Ogoninaga Yone mitangi bialu Anduane Homogonaga mbugani lowini ngago ogo, Ngode Datagaliwabehanda lalu, I̱naga bi lamule piagago ibu í̠ bamba halu í̠naga hariga ba hama pelo ibuhondo pu lolebero, laya, lalu gilibu nga.
MAT 11:11 I̱na tí langerogo agali bibahende heneru mbirali baboraya biaga Yone kagobi ndo ti nira hangu hene. Anigo Ngode Datagaliwabehanda Handame Ho Kagoria mbirali niraore kago ibu Yone bolangua howa duniniore ka.
MAT 11:12 Baboraya biaga Yonehanda mana lamialu hayangi howa lama íbu gimbu bialu áyu ogoni Ngode Datagaliwabehanda Handame Ho Kagoria mo tandaga halu agali ko karume tinaga hongome karulole manda biaga ka.
MAT 11:13 Anigo Mosese heneyangi Mana lowinigomebi Ngode Datagaliwabe mana latagi haga bibahende henerumebi lama íbu gimbu bialu Ngode Datagaliwabehanda Handame Ho Kagonaga mana laabo halu Yone hayangi lairi hene.
MAT 11:14 Ani bialu tígua tinaga bi hale howa mini mbiraore wua biyagua Elaya ibulebira lalu mbiwia halu lowinigo Yone íbu kagoni.
MAT 11:15 Ogonigo tí hale kamiyagua nde hale haramine.
MAT 11:16 Wali agali áyu karuni i̱na bi agi ale lalu mo manda bu hondoabe. Ti waneigini magadi hamani mbolatola balu biru wiagago ale ka. Maru mbolatola balu bira wiyarume maru mbolatola balu bedaruhondo ola amu halu lalu,
MAT 11:17 Iname tínaga pilipe la halu wali dabu bialu howa iba gana lagane la harimagola tígua mali nali harimi. Ani birimigola iname homenenaga kiabu dugu bia halu iba gana la harimagola tígua dugu nabi dege harimi, lalu hagago ale ti ka.
MAT 11:18 Ani buwa baboraya biaga Yone ibu íbu howa tomo nane hagane mana bialu waini ibabi nane hene. Ibu ani biyago hondowa tí bibahendeme, Ibu dama daraga ho ka, larimi.
MAT 11:19 Ani buwa Agali Hole Ibiyago íbu howa ibugua tomobi waini ibabi ta nabi nalu hene. Ani biyago hondowa tí bibahendeme lalu, Agali o kago ibu tomo na gimbu bialu waini iba naabo haga ka. Ibu dagisi muni miagabi mana ko biagabi karu baba nenege hinu mandagi kagonigo de handadaba, larimi. Anigo Ngode Datagaliwabenaga mini gigabiwi holene bia pani haragome heneneore ngago walia holebira, lene.
MAT 11:20 Yasuhanda tano maruha howa agalime nabiagane ale dewaore biyagola wali agali uruniha bu hearume mini beregeda nabi hene. Ani biyagola Yasuhanda ti talialu lalu,
MAT 11:21 Korasini wali agali kamiru tínaga mo ko holene timbu gibiore wulebirago dara ho ko. Bedesaida wali agali kamirubi tínaga mo ko holene timbu gibiore wulebirago dara ho ko. Tí hemiruha agalime nabiagane ale biyago Taia Saidonolani abale bidale nde ti ko binigo wahai harima lalu walia helo dara howa walia halu aga karulowa tinaga dongoneni be mo dugu hirame kaleda.
MAT 11:22 I̱na tí langerogo Daba Ki Bulene Horo harangi Ngode Datagaliwabehanda dara timbuni howa Taia Saidonolanaga wali agalihondo dabaradagua ndo wali agali tano uruniha kamiruhondo hongo howaore dabolebira.
MAT 11:23 Ai tí Kabaniamani kamiru dahuliya togo wialu polenaga tíninaga yaraga hoa kamibe. Tí heli dindiha minu bape ho helolebira. Tíhondo agalime nabiagane ale biyago Sodomo wali agalihondo bidale Sodomo tano ogoni áyu haabo kale.
MAT 11:24 Anigo Daba Ki Bulene Horo harangi Ngode Datagaliwabehanda dara timbuni howa Sodomo wali agali dabaradagua ndo tí kamiru hongo howaore dabolebira, lene.
MAT 11:25 Horo ogoningi Yasuhanda lalu, Aba-o hari daliganagabi dindinagabi Anduane Homogo í̠ kegoni. Dindi mana manda bu karubi mini gigabiwi karubi tihondo walia nahe harigo mini nalene wali agali ta nabi karuhondo í̠naga mana tara walia harigonaga turu halu ka̱i̱ laro.
MAT 11:26 E̱ore. I̱ Aba-o í̠ni bule hame lededagua birida.
MAT 11:27 Anigo í̠ Abahanda mbirale bibahende i̱hondo ngiai haya. Bibahendeoreme Igini ibu ogo kalo manda nabi Aba ibuni hangu manda bu ka. Ani buwa bibahendeoreme Aba ibu ogo kalo manda nabi Igini ibuni hangu manda bu ka. Igini ibugua ibu Aba walia hoa biragohondo walia haragola tigua Aba ogooreda lowa manda bu holebira.
MAT 11:28 Tí bibahendeme mbirale gendabi ngaru erekui howa yu kamiru ha̱lo̱ bereloliya i̱ kogoria ibai hadaba.
MAT 11:29 I̱ni mo dindiha haganebi hogorale bu haganebi kogonigo tígua i̱ha howa bu manda bule i̱ni dariba hamagamaga kogonaga ira nguini mende tínime yadaba. Ani mo yaramigola ha̱lo birulene handa walia holeberami.
MAT 11:30 Ani buleberamigo irane i̱na dariba hamagamaga kogonaga ira nguini mende nguleberogo awadaga ngago mbirale i̱na tíni mo yalimulo ngerogo gendabi ndo yabiabi ngero, lene.
MAT 12:1 Lu ndo emene tigi mbira dege howa Sabada horongi Yasu ladi ale mini widi teha pialu howa ibunaga talima piaga biaru garibi layagola widi biagonaga lini deago dowa nama nama pene.
MAT 12:2 Ani biyagola Perisi agali hearume Yasuhondo lalu, Inanaga Mana lowini ngago Sabada horongi nabulene wini ngago í̠naga talima piaga biarume pugualu bialu karuni handa, lene.
MAT 12:3 Ani layagola Yasuhanda tihondo ladai bialu lalu, Debidibi ibunaga agalirubi tomo nawiyagola garibi lowa Debidihanda bini gilibu ngago tí nahende kamibe.
MAT 12:4 Ibu Ngode Datagaliwabenaga andaha anda puwa mberedi Ngode Datagaliwabehondo loma bialu mini wiago muwa ibunibi ibunaga agalirubi heba nene. Ani binigo Mana lowini ngago mberedi ogoni nanolene wini nga manda buwa nene. Loma binigo mo miagane agali degeme nolene nga lowini.
MAT 12:5 Ani buwa Mosese heneyangi Mana lowini ngago de nahende dege kamibe. Bi ogodagua lalu bi lowini ngagoni. Sabada horo bibahendengi loma binigo mo miaga agali karume Ngode Datagaliwabenaga andaha howa Sabada horonaga bulene bi lo ngago pugualu haga howa, Tí ko birimida, nalagago manda nabi dege haabo kamibe.
MAT 12:6 Ngode Datagaliwabenaga anda goyane hene howa mbirale mbira áyu ogoria ngago duniniore nganenaga tí langero.
MAT 12:7 Anduane Homogonaga mbugani lo ngago ogo, I̱na mbirale loma bialu irani bo delolene hame nale biamogo bulene hame ledogo, lalu gilibu nga. Anigo bi i̱na larogo irane ogo ale laralo manda bidamile tígua wali agali ko nabi karuhondo, Tí ko birimida, nalaga kamile.
MAT 12:8 Ogoninaga Agali Hole Ibiyago ibu Sabada horonaga Anduane ka, lene.
MAT 12:9 Yasu ibu dindi ogoni wahalu puwa ngoai hagane anda mbiraha pene.
MAT 12:10 Anda ogoniha agali mbira gi mbariane kohe henego íbu hene. Agali maru hearume Yasuhondo, Í̠na koore biri, loa howa tigua ibuhondo lalu, Inanaga Mana lowini ngagome Sabada horongi mo dabi holene lalu lo ngabe be nalowibe, lene.
MAT 12:11 Ani layagola Yasuhanda ladai bialu lalu, Aniyagua tínaga nogo sibi mbira Sabada horongi uliha pilayagua agua buleberami. Nogo sibi anduaneme uliha howa Sabada horongi dugu baraga naholebirabe.
MAT 12:12 Nogo sibi emene bagi hene ale lowa agali dunini timbuniore ka hendedeni. Anigo inanaga Mana lowini ngagome Sabada horongi mbirali biamogo bulene nga laga ndobe, lene.
MAT 12:13 Ani lowa ibugua agali gi kohe biagohondo lalu, Í̠naga gi mbariane dogola, lene. Agali biago ibugua gi dogo layagola lone bayale ho dai bialu gi mendeyagi heagobi dege hene.
MAT 12:14 Ani biyagola Perisi agali biarume ibu helalu puwa, Yasu homelo agi bimabe, lalu lo manda bialu hene.
MAT 12:15 Yasuhanda ibu bole lo manda bialu heago hale howa dindi ogoniha nahe wahalu piyagola wali agali dewa bu hearubi ibu piyadagua pene. Pialu howa ibugua bibahende warago bo wigi biaru mo dabi haga bima pialu howa
MAT 12:16 tihondo, I̱na o beroruniore maru lamulemeni, laga bima pene.
MAT 12:17 Ibugua ogoni bima penedagoni Ngode Datagaliwabehanda ibunaga mana latagi haga Aisaiaha howa mbiwia henego lola hene. Bi mbiwia henego ogo,
MAT 12:18 I̱naga biabe bia haga i̱na dabarugo o kagoni. I̱na ibu gubalini howa turu ho kogoni. I̱na i̱ Dinini ibuniore hole pu larogola ibugua i̱naga daba ki bulene ogobiore nga lalu wali agali dindi tara tarani bu karuhondo lo pebe bialu holebira.
MAT 12:19 Ibugua lai lalubi ga̱ lalubi nalolebira. Harigani howa awa lalu nalolebira.
MAT 12:20 Gambe mbira podabehe ema bialu duru lalu kago podope naholebira. Ira hale mbira hundibehe auhe dalu kago ba hundiaore naholebira. Tigatiga bulene ngaru bolangua hai helo ibugua bia ho wiaabo holebira.
MAT 12:21 Wali agali dindi tara tarani karume ibu mitangi bialu mini dunu bia ho holebira, lalu gilibu nga.
MAT 12:22 Ani biyagola howa wali agali maru hearume agali mbiraha dama daraga hayagola howa debi ko halu bibi nalabehe henego Yasu hearia haru ibini. Haru ibiyagola Yasuhanda dama wara tagi hayagola agali biago debi handabehe halu bibi labehe hene.
MAT 12:23 Yasuhanda ani biyagoni hondowa wali agali dewa bu hearume miniha mogo lai howa lalu, Ibu Debidi Iginidabe, lene.
MAT 12:24 Ani layagola hale howa Perisi agali hearume lalu, Ani ago dama bibahende karunaga haguane Heyolabe kagome ani bilonaga hongo miyago yu howa biragoni, lene.
MAT 12:25 Yasuhanda tinaga miniha tongoyongo paluwa lalu hearuni manda buwa tihondo lalu, Dindi mbiraoreni howa tale bigi bigi bu howa wai bia a̱i̱ na̱i̱ biyagua lu bia ho wiaabo naholebira. Ogonidagua dege tano mbirani wali agali bu kayaguabi hameigini mbiraore bu kayaguabi tale bigi bigi bu howa wai biyagua hangu hangu haga haga bu holebira.
MAT 12:26 Anigo dama Heyolabeme haru kagoria howa marume maru baba hoba migi migi bialu wai bialu kayagua ogoni abale tale bigi bigi bu henego bia ho wiaabo habe nahe holebira.
MAT 12:27 Bi o larogoni tígua i̱hondo dama daraga karu wara tagi holene hongo dama Heyolabeme miya larimigonaga laro. Anidago tí baba haga kamirume dama daraga karu wara tagi helo hongo miyadago aiwabe. Aniyagua tínaga aria karu biabe biragome tí kagua manda birimigo walia haga ka.
MAT 12:28 Anigo ogoninaga irane i̱na dama daraga karu wara tagi holiyanaga hongo dama Heyolabeme ngiya larimigo ndo. Ngode Datagaliwabe Dinini ibugua i̱hondo hongo ngiyagoni karulo howa bero. O berogoni Ngode Datagaliwabenaga Handame Ho Holene tíni kamigoria abaleore íbu nga lalu walia haragoni.
MAT 12:29 Mbiralime agali hongohe kagonaga andaha ibunaga mbirale ngaru mo kayu bule pobe nahe holebira. Ibugua agali hongohe biago ala gi gebi minu huba bu wiyagua nde mani ibunaga andaha mbirale ngaru mo kayu bule pobehe holebira.
MAT 12:30 Mbirali i̱ aria ndo kago ibu i̱la waitigi ibuni ho ka. Ani buwa mbirali i̱la mo mogo bulene hame nale kagome waro hila halu bo purogo la haga ka.
MAT 12:31 Anigo i̱na tí langerogo wali agalime ko biyagobi mege biyagobi domo wahabehe holebira. Mbiralime Ngode Datagaliwabe Dinini mege biyagua ibunaga ko ogoni domo wa naholebira.
MAT 12:32 Mbiralime Agali Hole Ibiyago mege biyagua ko ogoni biyago Ngode Datagaliwabehanda domo wahabehe ka. Mbiralime Ngode Datagaliwabe Dinini mege biyagua ko ogoni biyago Ngode Datagaliwabehanda áyubi awebi domo wa naholebiraore.
MAT 12:33 Ira bayale kagome linibi bayale dege daga ka. Ira ko kagome linibi ko dege daga ka. Ira bibahende lini darago hondowa ira ogobiore kalo manda beramili.
MAT 12:34 Tí nogombi ale kamiru. Tígua tíni ko ngubi howa bi bayale agua loleberamibe. Bu habaneha to̱lo ngagobi ne harigaha la tagi haga.
MAT 12:35 Mbirali bayale kagome ibuninaga bu habaneha bayale ngagobi bia tagi haga ka. Mbirali ko kagome ibuninaga bu habaneha ko ngagobi bia tagi haga ka.
MAT 12:36 Bi o langerogo wali agaliru tígua nagalone larimigonaga irane Daba Ki Bulene Horo harangi hangu hangu howa ladai buleberami.
MAT 12:37 Horo ogoningi tínaga bi larimigome tí dabalu karulape harimi nakarulape harimi lalu walia holebira, lene.
MAT 12:38 Ani layagola Mana lowinigo lawai haga maru hearumebi Perisi agali maru hearumebi laraga halu lalu, Lawai haga-o agalime nabiagane ale mbira hondoa ho kamago í̠na mbira bia, lene.
MAT 12:39 Ani layagola Yasuhanda mogo lo hondowa lalu, Wali agali áyu karume ko dege bialu Ngode Datagaliwabe mo tene nahaga haabo kago agidabe. Tígua i̱hondo agalime nabiagane ale mbira bia larimibe. Agalime nabiagane ale mbira Ngode Datagaliwabe mana latagi haga Yonahondo biyago dege binigo mitangi bulene nga.
MAT 12:40 Yona ibu wena timbu mbiranaga tombeha horo tebiru mbi tebiru lowa berenedagua Agali Hole Ibiyagome nde horo tebiru mbi tebiru lowa dindiha wiai holebira.
MAT 12:41 Daba Ki Bulene Horo harangi Nineba wali agalime wali agali áyu karu baba heyuwa tihondo. Tí nakarulapeore birimi, lalu hongo howa lolebira. Irane ti Yonahanda Ngode Datagaliwabe bi mana latagi hayago hale howa mini beregedalu ko bibahende wahai hene. Anigo i̱na tíhondo heneneore larogo áyu ogoriani kago ibu Yona henegobi ndo ibu duniniore ka, lene.
MAT 12:42 Daba Ki Bulene Horo harangi Siba wali agalinaga Kuini wali ibugua wali agali áyu karu baba heyuwa tihondo, Nakarulapeore birimi, lalu hongo howa lolebira. Irane wali ogonime Solomonohanda mini gigabiwi howa bi mana wále lawai hayagola hale hole ibuni dindi kaundiaore howa ibaabo hene. Anigo i̱na tíhondo larogo áyu ogoriani kago ibu Solomono henegobi ndo ibu duniniore ka, lene.
MAT 12:43 Agali mbiraha dama daraga hayago wara tagi haya handala dama biago ibu puwa ibuni holenaga dindi tuhe mbira agiha ngabe hondole dindi bibahendeha tai bialu haga. Tai bialu howa mbira handa walia naheyagua
MAT 12:44 ibuni hangu lo manda bialu lalu, I̱ni andaga biagoriani dai bulebero, lo manda biaga. Ani lalu ibuni andaga biagoha dai buwa handalu karia mbira nahe bayale gini bu waho ngaria handa walia haga.
MAT 12:45 Hondo wialu lone tagira puwa ibuni ko kagobi ndo lowa dama karia koorene ko karu haru dai bialu anda puwa anda ogoniha haga. Ani buwa dama biarume ibuha karulai haragola agali biago abale ko hayago emene ko lowa mani ko timbuniore holebira. Wali agali ko ngubi áyu o karuha ogonidaguaore bulebira, lene.
MAT 12:46 Yasu ibu wali agali hearuhondo bi lamialu hearia ibu ai̱ya hameneru ibini. Ti tagirani howa, Ibu baba te lole kama, lene.
MAT 12:47 Ani layagola wali agali hearuni mbiragome Yasuhondo lalu, Í̠ ai̱ya hameneru í̠ baba te lama lole li tagirani ka, lene.
MAT 12:48 Ani layagola Yasuhanda ladai bialu lalu, I̱ ai̱ya ago i̱ hamenebi arube, lene.
MAT 12:49 Ani lowa ibugua ibunaga talima piaga biaruhondo gi dola amu howa lalu, I̱ ai̱ya hamenerubi o karunigo de handadaba.
MAT 12:50 Wali agalime i̱ Aba dahuliya andaga kagome hame ledadagua bialu karu i̱ hamenebi i̱ mbalinibi i̱ ai̱yabi ka, lene.
MAT 13:1 Yasu ibu horo ogoningi dege andaga howa tagira pialu iba timbuni bereago angeni puwa mana lawai hole berene.
MAT 13:2 Berearia wali agali dewaore íbu ngoai howa ibu bereagoria ho mabu bupe hayagola ti iba angeni helowa ibu iba taluni uba ede ho berene.
MAT 13:3 Ani biruwa ibugua bi yobage lowa mana dewaore lamialu lalu, Agali mbirame ladi ale mini widi egene mabuni ba a̱i̱ na̱i̱ bima pene.
MAT 13:4 Ba a̱i̱ na̱i̱ bima piyagola howa egene maru hariga teneni ibira ho wiaria egame ibuwa mo nai hene.
MAT 13:5 Egene maru ege to̱le̱ dindi emene mbaliahe wiagoriani ibira howa abale anda halu dindi emene pini unura puabo habe naheyagola yuni emene doai lalu tagira ibiyago ni daba hayagola gau lai hene.
MAT 13:7 Ani buwa egene maru ira anihe gandula anda hene wiagoria ibira howa ani heba mandagi anda hamaga howa ho gengedalu oge hayagola lini nadabehe hene.
MAT 13:8 Egene maru dindi bayale wiagoriani ibira howa anda halu irane marume pira pira (100) dene. Marume pira waragaria (60) dene. Marume pira tebira (30) dene, lene.
MAT 13:9 Ani lowa Yasuhanda lamaro bialu lalu, Hale kamiyagua nde hale haramine, lene.
MAT 13:10 Ani layagola Yasunaga talima piaga biarume Yasu hearia ibuwa lalu, Í̠na wali agalihondo bi lamialu howa bi yobage lowa hangu lamigi biriligoni aginagabe, lene.
MAT 13:11 Yasuhanda ladai bialu lalu, Ngode Datagaliwabehanda Handame Ho Kagonaga manda bulene ala pani nahe ngelenego maru karu ndo tí manda bilimulo ngiya.
MAT 13:12 Ogoninaga mbiralime mbirale mbira yu kagohondo dewa mo tago halu mulebira. Ani miragola karulape dege yu helo ndo dewaore yu helo mulebira. Anigo mbiralime mbirale mbira nayi howa emeneore yidago yamulebira.
MAT 13:13 I̱na maru karuhondo bi lamialu howa bi yobage lowa laruligoni irane tigua handaya howa de handa nabulebiragonagabi hale howa manda nabulebiragonagabi laruli.
MAT 13:14 Anigo Ngode Datagaliwabe mana latagi haga Aisaiahanda mbiwia henego tiha lola holebirago ogo, Wali agali urunime hale haabo hara tiraga minime manda nabulebira. Tigua de handaya haabo hara tiraga galone handa walia naholebira.
MAT 13:15 Irane tinaga mini ndibulo wahene ka. Tinaga haleme hale holilono hale ndibulo wahene ka. Tinaga deme hondolilono de ndibulo wahene ka. Ngode Datagaliwabehanda lalu, Tigua ani nabidale ti deme handalu haleme hale halu minime manda bialu i̱hondo mini beregedo kale. Ani bidale nde i̱na ti mo dabi kole, lenego, lalu gilibu nga.
MAT 13:16 Tí áyu turu taraore howa a̱e̱a̱ ka̱e̱a̱ bu kamigoni. Tínaga deme hendedami. Tínaga haleme hale kami.
MAT 13:17 I̱na tí langerogo Ngode Datagaliwabe mana latagi haga dewaoremebi Ngode Datagaliwabenaga wali agali dewaoremebi tígua handaramidagua hondoa timbuni howa handa nabi hene. Tígua hale haramidagua hale hoa timbuni howa hale nahe hene, lene.
MAT 13:18 Yasuhanda ani lowa lalu, Egene polene biagonaga bi yobage larugoni irane aginaga layadabe hondole hale hadaba.
MAT 13:19 Ngode Datagaliwabehanda Handame Ho Kagonaga bi mana hale howa manda nabi karu ti egene harigani ibira hayago ale ka. Ani kagola dama Heyolabeme abale ibalu tigua bi mana hale hayago mo yalu piaga.
MAT 13:20 Tomo egene ege to̱le̱ dindi mbaliaheni ibira hayago ale wali agali marume bi mana abale hale howa turu halu mo yaga.
MAT 13:21 Ani buwa tinaga bu habaneha anda puabo habe nahedagola ti ho wiaabo nahaga. Ani buwa marume tigua bi mana mo yayago hondowa ti mo tandaga haragolabi mo ko holene íbu ngagolabi ti abaleore yu wahalu piaga.
MAT 13:22 Tomo egene dindi ani gandula anda hene wiagoriani ibira hayago ale wali agali marume bi mana hale howa dindini holene mitangi bialu mini tumutumu wu holenebi dindinaga mbirale dewa ngaru minime wua hai ho holenebi urunime bi mana hale hayago ho gengedalu oge haragola lini nadaga ka.
MAT 13:23 Tomo egene dindi bayaleni ibira hayago ale wali agali maru karume bi mana baya hangu hale howa mo yai halu tiha lini dewa pira pira (100) da pira waragaria (60) da pira tebira (30) daga bigi biaga ka, lene.
MAT 13:24 Yasuhanda bi yobage dege mende lowa lalu, Ngode Datagaliwabehanda Handame Ho Kagoria ogobi nga. Agali mbirame ibuni mabuni ladi ale mini widi egene bayaleore ba a̱i̱ na̱i̱ bini.
MAT 13:25 Ani biyagola mbiraga mbirungi ti bibahende palia hondo hai heagola waitigi agali mbirame ibuwa widi egene ba a̱i̱ na̱i̱ bu wiyagoha egene ko mbira widi ale ba a̱i̱ na̱i̱ bu ngelalu ibu pu wahene.
MAT 13:26 Widi anda halu lini dolene tuore hayagola egene ko widi ale biagobi mandagi anda ho hearia hendene.
MAT 13:27 Mabu anduanenaga biabe bia haga biarume abale dai buwa mabu anduane biago lamialu lalu, Anduane-o í̠ mabuni widi egene bayale hangu ba a̱i̱ na̱i̱ biribe toba harimago. Egene ko anda ho kagoni agoha howa ibinigo anda ho kabe.
MAT 13:28 Ani layagola mabu anduane biagome ladai bialu lalu, Waitigi karume hangayada, lene. Tigua ibuhondo lalu, Iname puwa egene ko widi ale uruni dugu wahole poloma̱ya hame ledebe, lene.
MAT 13:29 Anduane biagome ladai bialu lalu, Ndo egene ko widi ale áyu dugualu kamiria widi ibuni heba dugumaga holigo helalimu.
MAT 13:30 Dolene tu wilo áyu widi alebi widi ibunibi mandagi ani anda ho helalimu. Ani helowa mani i̱naga biabe bia hagarume widi ale uruni ala dugualu kabu bigi buwa delai howa mani widi gandulalu mo mogo buwa i̱naga tomo bu wiagaha wilimu larongi wule helalimu, lene.
MAT 13:31 Yasuhanda bi yobage dege tebone lalu, Ngode Datagaliwabehanda Handame Ho Kagoria ogobi nga. Agali mbirame ira masada egene mbira mo yalu puwa ibu mabuni hengene.
MAT 13:32 Egene ogoni emeneorego anda haragola ira timbuni anda ho haga. Anda hai kagola ega bedarume ibuwa ira maganeni tinaga anda biaga, lene.
MAT 13:33 Yasuhanda bi yobage dege mane lalu, Ngode Datagaliwabehanda Handame Ho Kagoria ogobi nga. Walime balawa timbuni beha odape howa yidi ibira haragola balawa mo timbu hagago ogoni aleore nga, lene.
MAT 13:34 Yasuhanda wali agali bu hearuhondo bi lole howa bame mbira nale bi yobage lowa hangu lamigi bini.
MAT 13:35 Ibugua ani binidagoni Ngode Datagaliwabe bi mana latagi haga mbirame mbiwia halu lowinigo lola hene. Bi ala mbiwia halu lowinigo ogo, I̱na tihondo bi lalu howa yobage lalu hangu lamulebero. I̱na tihondo mbira pigane wabiyangi howa wini ngaruni manda nabininaga bi lamulebero, lenego gilibu nga.
MAT 13:36 Yasu ibu mana lalu howa andaga pu berearia ibunaga talima piaga biaru ibuwa lalu, Egene ko mbira widi alenaga mabuni ba a̱i̱ na̱i̱ bima pene lalu yobage larigoni irane langi, lene.
MAT 13:37 Ani layagola Yasuhanda lalu, Agali egene bayale ba a̱i̱ na̱i̱ biyago ibu Agali Hole Ibiyago ka.
MAT 13:38 Mabu biago dindi bibahendeore ngagoni. Egene bayalego Ngode Datagaliwabe Handame Ho Kagonaga wali agali kagoni. Egene ko mbira widi ale karu dama Heyolabenaga wali agali kagoni.
MAT 13:39 Waitigime egene ko mbira widi ale ba a̱i̱ na̱i̱ biyago ibu dama Heyolabe ka. Tomo ogoni dolene tu horo ha maro birangi holebira. Tomo do wulene biabe bia haga biaru ti dahuliyali holebira.
MAT 13:40 Widi ale duguwa kabu buwa irani delayadagua horo ha maro birangi aniore bulebira.
MAT 13:41 Ani bulebirago Agali Hole Ibiyago ibugua Handame Ho Kagoria howa wali agali ko mo bia haga karubi wali agali ko biaga bibahende karubi mandagi mo mogo bule pelo ibunaga dahuliyaliruhondo, Ani bule pudaba, lolebira.
MAT 13:42 Ani buwa dahuliyalirume wali agali o biaru ira timbuni dedagoria minu bape holebira. Ani biragola wali agali o biarume dugu bialu tininaga ne gingirulo hayaga bialu holebira.
MAT 13:43 Ani biragola Ngode Datagaliwabenaga wali agali karume ti Abahanda Handame Ho Kagoria howa ti ni wá tara hagadagua ho holebira. Hale kamiyagua nde hale haramine, lene.
MAT 13:44 Yasuhanda lalu, Ngode Datagaliwabehanda Handame Ho Kagoria ogobi nga. Agali mbirame muni dewaore mabu mbiraha do ho wiaria hendene. Hondowa ibuni karulolenaga lone yi ho dai bu ngelalu turu taraore howa mbirale ibuni yini biaru yolo migi bima pialu mani dai buwa mabu biago yolo bini.
MAT 13:45 Ngode Datagaliwabe ibugua Handame Ho Kagoria ogobi nga, lowa, Agalime hale pangeha paliagago mini pealo ogoni bayaleore agiha ngabe hondole tai bume halu haga.
MAT 13:46 Ani buwa ibugua pealo mbira ngane baya burugule handarangi ibugua mbirale ibuni yini biaru yolo migi bima pialu mani dai buwa pealo baya burugule biago yolo biaga, lene.
MAT 13:47 Yasuhanda lalu, Ngode Datagaliwabehanda Handame Ho Kagoria ogobi nga. Wena minaga agali marume wena nu iba timbuni bedagoha ibira haragola wena dewa tara tara minaga.
MAT 13:48 Wena nu biago to̱lai haragola angeni yamu ngelowa daba ki halu howa bayale galone bibehego dabo bagi howa be timbuniha ngelaga. Wena ko galone nabibehego dabo wahaga.
MAT 13:49 Horo ha maro birangi aguani dege bulebira. Dahuliyali karume wali agali kagoria puwa karuni daba ki halu howa bayale biagaru helalu ko biagaru mo mogo bulebira.
MAT 13:50 Ani buwa wali agali ko biaga biaru ira timbuni dedagoria minu bape haragola ogoniha ti dugu taraore bialu tininaga ne gingirulo hayaga bialu holebira, lene.
MAT 13:51 Yasuhanda tihondo lalu, Mbirale uruni ogo alenaga laya lalu manda bu kamibe, lene. Ani layagola tigua ladai bialu lalu, E̱ ina manda bu kamagoni, lene.
MAT 13:52 Ani layagola Yasuhanda ladai bialu lalu, Anidago Mana lowinigo lawai haga bibahende karume Ngode Datagaliwabehanda Handame Ho Kagonaga talima piaga hararu ti agali anda anduaneme ibunaga wia do hagane andaha howa mbirale gahenge aiware tawe ala tawebi haru mandagi mo yalu tagira piagago ale uru ka, lene.
MAT 13:53 Yasu ibu bi yobage uruni lai howa dindi ogoni wahalu
MAT 13:54 ibuni dalu anda pialu tano biagoria dai bini. Ani dai buwa ibugua ngoai hagane andaha mana lawai hayagola wali agali biru wiarume mogo lai ho berene. Tigua lalu, Ibu mini gigabi ngago ani howa minidabe. Agalime nabiagane ale birarubi agiha tawedabe.
MAT 13:55 Ibu anda biabe biaga biago igini ndoyagoda. Ibu ai̱ya Meri biralu ibu hamene Yamese Yosebe Saimono Yudasa imaru ndoyagoda.
MAT 13:56 Ibu mbaliniru ina heba o bedaruni ndobe. Ibu mbirale uruni wia agiha wiaria minidabe, lene.
MAT 13:57 Tigua ani lowa ibu handabe manga halu hame nale hene. Tigua ani biyago manda buwa Yasuhanda tihondo lalu, Ngode Datagaliwabe mana latagi haga dindi bibahende ngaruniha wali agali karume íbu lai haga ka. Ibuni dindi teneni karumebi ibu hameiginirumebi ti dege hame nale haga, lene.
MAT 13:58 Dindi ogoriani hearume ibuhondo mini mbiraore nawiyagola ibugua ogoniha agalime nabiagane ale dewaore nabi hene.
MAT 14:1 O bialu henedagoningi Galili wali agali handame haga Herodo ibu Yasuhanda bialu hayuagoni hale hene.
MAT 14:2 Hale howa ibugua ibunaga haru haga hearuhondo lalu, Ogoni baboraya biaga Yone ala homayago ho dai bu howa agalime nabiagane ale bulenaga hongo holene yu haruagoni ibudago, lene.
MAT 14:3 Ogoninaga ala Herodohanda Yone minuwa pu senime dariba howa garabaya andaha helene. O binidagoni irane Herodo ibugua ibu hamene Pilibi one Herodiasa ibu dabu binigome ibugua Yone garabaya andaha helene.
MAT 14:4 Ala baboraya biaga Yonehanda homa nabi howa Herodohondo lamiaabo halu lalu, Wali Herodiasa ogoniore í̠ one berelo dabu birigo nabulene biridagoni, lene.
MAT 14:5 Ani layagola howa Herodohanda Yone homelo bo wahole biyaria Yu wali agali hearu hondowa gi howa wahene. Irane Yu wali agali tigua, Yone ibu Ngode Datagaliwabe mana latagi hagaore ka, laga henegonaga wahene.
MAT 14:6 Ani buwa Herodo ibu taba henenengi hayagola tomo nalu biruwa wali Herodiasa waneme wali agali biru wiagoria howa mali lini. Mali liyago hondowa Herodohanda turu taraore howa
MAT 14:7 wandari biagohondo lalu, Í̠na ngi larego ale ta nabi nguliya, lalu lowini.
MAT 14:8 Ani layagola ibu ai̱ya Herodiasa ibugua ibu wanehondo lamialu lalu, Herodohondo au labe. Baboraya biaga Yonenaga ma puguwa haguane ndisini yuwa áyu ogoni ngi labe, lene.
MAT 14:9 Ani labe layadagua layagola Kini Herodo ibu mogo lowa wali agali biru wiaru wanakuini howa, Ngi larego ale nguliya, lalu lo wiyago manda bialu mo habo lole ndoyagola ibugua maruhondo lalu, Wandari biagome hame laradagua bule pudaba, lene.
MAT 14:10 Ani layagola nde abule ndoyagola agali marume Yone garabaya andaha heago ma puguwa
MAT 14:11 haguane ndisini pugu yalu dai buwa wandari biagohondo miyagola wandari ibugua ibu ai̱yahondo mule pene.
MAT 14:12 Ani biyagola Yonenaga talima piaga henerume ibuwa ibu dongone mo yalu pialu hora howa tigua Yasu lamule pene.
MAT 14:13 Yone bo wahaya layago hale howa dindi Yasu ibu hayagoni wahalu iba taluni biralu mbirali naheha ibuni hangu pene. Wali agali bu hearume Yasu piya layago hale howa tano uruni wahalu Yasu piyadagua talima mama dindi dindi pene.
MAT 14:14 Yasu iba taluni howa uba ede halu hearia wali agali dewaore bu hearu hondowa ibunaga gubaliniha dara holene to̱lai howa ibugua waragobe hearu mo dabi haga bini.
MAT 14:15 Horo ogoningi alendo hayagola ibunaga talima piaga biaru Yasu hearia ibuwa ibuhondo lalu, Ai alendo hayadago ina dindi ko tomo nawini kamago wali agali o karuni pugu pugu bialu tini tomo yolo mule tano emene karuha taya bima pudaba la, lene.
MAT 14:16 Ani layagola Yasuhanda tihondo ladai bialu lalu, Ti tomo nelo tínime midaba, lene.
MAT 14:17 Tigua ladai bialu lalu, Iname mberedi duria wena kira hangu lowa dege henedama, lene.
MAT 14:18 Ani layagola Yasuhanda lalu, I̱ kogoria tagu yalu ibidaba, lene.
MAT 14:19 Yalu ibiyagola ibugua wali agali hearuni, Tanini biradaba, lowa mberedi duria biarubi wena kira biago labobi mo yuwa hari daligaha handa daga halu Ngode Datagaliwabehondo ka̱i̱ lene. Ani lowa ibugua mberedi gai bu baga buwa ibunaga talima piaga biaruhondo miyagola tigua wali agali biru wiaruhondo mo mini.
MAT 14:20 Ani miyagola bibahendeoreme no karula pialu ibira hayago ibunaga talima piaga biarume nu homberia (12) hono to̱lai hene.
MAT 14:21 Nenedaruni wali waneiginiru nale agali hangu daga la a̱i̱ halu daosini duria (5,000) hene.
MAT 14:22 Ani biyagola howa Yasuhanda wali agali bu hearu andaga pugu pugu bidaba lalu ibunaga talima piaga biaruhondobi lalu, Tígua iba taluni biralu ange edeyagi pole pudaba, lene.
MAT 14:23 Ibugua wali agali biaruhondo, Pudaba, lowa hombene mbira wiagoria iraga howa Ngode Datagaliwabela bi lole pene. Aruma hayahayagi Yasu ibu ibuni hangu hene.
MAT 14:24 Ani bu hea handala iba talu biago iba hanunihayagi pialu hearia puyabu hongo howa pu ladai biyagome iba mo yaribu biyagola talu biago mo badele bini.
MAT 14:25 Egerebagi muna biyagoha Yasu ibu ibunaga talima piaga biaru bereagoria ibani ibini.
MAT 14:26 Tigua ibu ibani ibiyago hondowa mogo timbuniore lo berene. Ti mogo lo biruwa lalu, O ibiragoni homene dininida, lowa gi howa ga̱ lene.
MAT 14:27 Ani layagola Yasuhanda tihondo lalu, I̱ Yasu kogo gi nahe mini mbiraore hongo howa wu holene nga, lene.
MAT 14:28 Ani layagola Pidahanda hongo howa la daga halu lalu, Anduane Homogo-o í̠oreyagua í̠ keria ibani ibuliya íbu la, lene.
MAT 14:29 Ani layagola Yasuhanda, Pida-o íbu, lene. Íbu, layagola Pida ibu iba taluni howa tagira pialu ibani Yasu hearia pole pene.
MAT 14:30 Ani pole piyaria puyabu hongo howa pu layago hondowa mogo layagola iba nalu namu lole biyaria Pida ibunime ga̱ lowa lalu, Anduane Homogo-o i̱ gi mia, lene.
MAT 14:31 Ani layagola Yasuhanda abale gini yamuwa yani halu lalu, Mini mbiraore emene wirigo abiyanenaga mini kira wuwa kebe, lene.
MAT 14:32 Ani buwa libu haru mandagi iba taluni biraribigola puyabu pu nale nimu lene.
MAT 14:33 Ani biyago hondowa ibunaga talima piaga iba taluni birayarume Yasunaga mini yaraga halu Yasuhondo lalu, Í̠ Ngode Datagaliwabe Igini heneneore kegoni, lene.
MAT 14:34 Ani bialu ti iba timbuni bereago domade halu dindi mbira mini Genesarete wiagoria anda piyagola
MAT 14:35 wali agali hearume ibu de hondowa, Yasuore ibiragonida, lo manda bini. Ani manda buwa tigua ibu heagoha warago bo wiaruni dindi wu mabu biaruniha howa Yasu hearia haru ibai hene.
MAT 14:36 Haru ibuwa tigua ibuhondo hame lowa lalu, Warago bo ngaru ti í̠naga aga nguni hanguni ela helo, lene. Ani layagola wali agali Yasunaga agani ela haga biyaru ti dabi hai haga bini.
MAT 15:1 Ani biyagola howa Perisi agali maru hearubi Mana lo winigo lawai haga maru hearubi Yarusaleme howa Yasu hearia íbu ngoai ho howa tigua ibuhondo lalu,
MAT 15:2 Í̠naga talima piaga karume bamba inanaga mamalime ilili biagane wini ngago pugualu gi wayawaya nabi howa tomo nalu kagoni agidabe, lene.
MAT 15:3 Ani layagola Yasuhanda tihondo ladai bialu lalu, Anidago tígua nde Ngode Datagaliwabehanda bi lo ngadagua bia nabi tíninaga mana hangu yu tiga biaabo halu kamigo irane aginagabe.
MAT 15:4 Ogoninaga Ngode Datagaliwabehanda lalu, Í̠naga aba ai̱yabi mo yo handa nabi laradagua hale halu bibe, lalu, Mbiralime ibu aba ai̱yabi ha hayagua nde ibu homelo bolene nga, lene.
MAT 15:5 Anidagua ndo tígua agua lawai haramili. Mbiralime mbirale ibunaga winigome ibu aba ai̱yayaguabi biamogo bulene howa ibugua lalu, Mbirale uruni Ngode Datagaliwabehondo loma bia ho ngo, layagua
MAT 15:6 ibu aba ai̱yala biamogo bulene nawi lawai haramiligoni. Tígua mana ogoni beramigome Ngode Datagaliwabehanda mana lo winigo wahalu tíninaga mana lawai halu kami.
MAT 15:7 Tí tombene hondo kihe kamirunaga Ngode Datagaliwabe mana latagi haga Aisaiahanda mbiwia halu tí layagoore tigatigada, lene. Mbiwia hene lo ngago ogo,
MAT 15:8 Ngode Datagaliwabehanda lalu, Wali agali urunime tinaga mini do howa bime dege i̱naga mini yaraga haga ka.
MAT 15:9 Tigua Ngode Datagaliwabehanda bi lowinigo lawai harama lalu howa agalime mana lo winigo dege lawai haga ka. Anigo tigua i̱naga mini nagalone halu mo yaraga habe nahe, lenego gilibu nga, lalu Yasuhanda lamini.
MAT 15:10 Ani lowa Yasuhanda wali agali dewaore bu hearu olalu, Ibidaba, lowa tihondo lalu, I̱na bi o larogo hale halu manda bilimu.
MAT 15:11 Ne harigaha anda poragome wali agali mo ko nahaga. Bu miniha howa mitangi tagira ibiragome wali agali mo ko haga, lene.
MAT 15:12 Ani layagola ibunaga talima piaga biarume Yasu hearia ibuwa lalu, Í̠na bi o lareruninaga Perisi agali karuha anda puwa ti miniha tandaga halu kagoni manda bidebe, lene.
MAT 15:13 Ani layagola Yasuhanda ladai bialu lalu, Mbirale bibahende i̱ Aba dahuliya andaga kagome hengene ndogo minu duguai holebira.
MAT 15:14 Perisi agali biaru tí mitangi nabilimu. Tinibi de kohe howa de kohe dege maru karu haru piaga kago. De kohe mbiragome de kohe mende haru pialu kagola libu haru kirabali gana habaneha pilo pagupagu bu wulebira, lene.
MAT 15:15 Ani layagola Pidahanda la daga halu lalu, Ina manda buluma̱ya bi yobage larigoni irane langi, lene.
MAT 15:16 Ani layagola Yasuhanda ladai bialu lalu, Tí nde mini nawi maru karudagua dege kamigoni.
MAT 15:17 Tí manda nabiore kamibe. Mbirale ne harigaha anda porago pialu tombeneha puabo halu tagira piaga.
MAT 15:18 Mbirale ne harigaha howa tagira ibiragome bu miniha howa tagira ibalu urunime wali agali mo ko haga.
MAT 15:19 Irane bu miniha howa tagira ibiragome ko manda bialu homelo bolenebi wali agali kayu yaga bulenebi tingininaga ko tara bulenebi dabudabu kayu bulenebi ke̱ holenebi la hirulenebi
MAT 15:20 mbirale urunibi bulene bu miniha howa tagira ibiragome wali agali mo ko haga. Anigo tigua tí gi wayawaya biagane winidadagua bulene nga lalu laralidagua nabi howa tomo naramigome mbirali mo ko nahaga, lene.
MAT 15:21 Yasu ibu dindi ogoni wahalu dindi Taia tanohayagibi Saidono tanohayagibi pene.
MAT 15:22 Ani piyagola Kenana wali mbira dindi ogoniha berenego ibu Yasu hearia ibuwa ibuhondo lalu, Debidi Igini-o i̱ dara howa biamogo berene. I̱ waneha dama daraga howa mo ko harago, lene.
MAT 15:23 Ani layagola Yasuhanda wali biagohondo bi mbira ladai nabiore hene. Ibu ema nabi heagola ibunaga talima piaga biarume ibu hearia ibuwa Yasuhondo lalu, Wali o ibiragome ina poramadagua bi hale pobobi lama ibirago ibuhondo, Pu, la, lene.
MAT 15:24 Ani layagola Yasuhanda ladai bialu lalu, Isaraele wali agali nogo sibi pu ereba hene ale karu ti hangu karia i̱ ibilenego ko, lene.
MAT 15:25 Ani layagola wali biagome Yasu heagoria abale ibuwa ge duli hanga ho biruwa lalu, Mambo-o i̱ biamogo bia, lene.
MAT 15:26 Ani layagola Yasuhanda ladai bialu lalu, Waneigini emenenaga hina biangome nelo bape holene nawi, lene.
MAT 15:27 Ani layagola wali biagome lalu, Mambo í̠na ogoni tiga tigaore lari. Ti anduanenaga hina habane dagiani howa ibira hararu biangome mo naga ndobe, lene.
MAT 15:28 Ani layagola Yasuhanda wali biagohondo ladai bialu lalu, Í̠na mini mbiraore marume wiagadagua ndo timbuniore wu kegome hame lededagua bulebiraore, lene. Yasuhanda bi ogoni layaore dege wali biagonaga wane bayaleore hene.
MAT 15:29 Yasu ibu dindi ogoni wahalu Galili iba timbuni bereago ange ange puabo halu bare hombene mbira wiago iraga howa berene.
MAT 15:30 Berearia wali agali dewa bu hearume ge kohebi de kohebi tingini kohebi ne hambu ndibulebi warago tara tarabe maru dewabi heba Yasunaga geha mo yalu íbu ngelayagola ibugua ti mo dabi hai halu hene.
MAT 15:31 Ani biyagola wali agali bu hearume ne hambu ndibule hearu bi lalubi tingini kohe hearu bayale hai halubi ge kohe hearu ibaga bialubi de kohe hearu de handalubi ani bialu heago hondowa mogo lowa tigua Isaraele wali agalinaga Ngode Datagaliwabe kaore lowa mini yaraga halu hene.
MAT 15:32 Yasuhanda ibunaga talima piaga biaru olalu, Ibidaba, lowa lalu, Wali agali o karu i̱ heba horo tebiru haabo hayagome ai áyu tomo nolene nawidago dara ho ko. Ti andaga pole pialu karia harigani de mborere buwa odope holigo i̱na tihondo tomo nami howa, Pudaba, lolene hame naleore ko, lene.
MAT 15:33 Ani layagola talima piaga biarume ibuhondo lalu, Dindi ko wali agali bu karuni no karula pelo ina tomo agohayagi tai buleberamabe, lene.
MAT 15:34 Ti ani layagola Yasuhanda tihondo lalu, Mberedi agira henedamibe, lene. Tigua lalu, Iname mberedi karia wena nde emene maru henedama, lene.
MAT 15:35 Ani layagola Yasuhanda wali agali bu hearuni, Dindini birai hadaba, lowa
MAT 15:36 ibugua mberedi karia biarubi wena emene biarubi mo yuwa Ngode Datagaliwabehondo turu halu ka̱i̱ lowa gai bu baga buwa talima piaga biaruhondo mini. Ani miyagola tigua wali agali biru wiaruhondo ta halu mini.
MAT 15:37 Ti bibahendeme tomo miyago karulape nalu no ibira hayago mialu ibunaga talima piaga biarume nu karia hono to̱lai hene.
MAT 15:38 Nenedaruni wali waneigini nale agali hangu daga lai halu daosini maria (4,000) hene.
MAT 15:39 Ani bialu Yasuhanda wali agali hearuni, Andaga pudaba, lalu iba taluni biralu dindi mbira mini Magadana wiagoha pene.
MAT 16:1 Perisi agali maru hearubi Sadiusi agali maru hearubi Yasu hearia ibuwa tigua Yasuhanda mbira agi larabe hondole ibuhondo lalu, Ngode Datagaliwabehanda í̠ha howa heneneore birabe hondoloma̱ya í̠na agalime nabiagane ale mbira bia handa, lene.
MAT 16:2 Ani layagola Yasuhanda lalu, Ni darama bialu paliragola tígua, Aiore oali gaea bulubada, laramili.
MAT 16:3 Egerebagi haragola harini pobo darama bialu aruma haragola, Dalu ibulubada, laramili. Tígua harini hondowa ogo aleore bulubada lowa haramiligodago áyu ogoninaga birago ogo ale biarua lalu mo tale nabi kamigodago.
MAT 16:4 Wali agali áyu o karu ko dege bialu Ngode Datagaliwabe mo tene nahaga ka. Tígua, Agalime nabiagane ale mbira hondoloma̱ya bia, larimibe. Nabuleyago. Yona hendelo agalime nabiagane ale mbira binigo ogoni dege walia hene mitangi bulene nga, lene. Ani lame halu bialu ibu ti hea handala pu wahalu pene.
MAT 16:5 Ibunaga talima piaga biarume iba timbuni bereagoria ange abene edehayagi domade halu pu howa handalu hearia mberedi mbira nahene embeda halu pu hene.
MAT 16:6 Ani biyagola Yasuhanda tihondo lalu, Perisi agalinagabi Sadiusi agalinagabi yidi ngago de hondowa bayuwa mamage ho halimu, lene.
MAT 16:7 Ani layagola hale howa ibunaga talima piaga biaru tini hangume laga laga bialu lalu, Ibugua o laragoni iname mberedi mbira nahene ibirimagonaga lara, lalu hene.
MAT 16:8 Yasuhanda tini hangu howa lalu heagoni manda buwa lalu, Tígua mberedi nahene ibirimada lowa lalu kamigoni agibe. Mini mbiraore emene wu kamigonida.
MAT 16:9 Tí manda nabi dege kamibe. Mberedi homane duria agali daosini duriame (5,000) no karula pelo gai bu baga birugo mitangi nabi kamibe. Ani birugola ti nalu ibira hayagola nu agira hono to̱ larimibe.
MAT 16:10 Ani buwa mberedi homane karia hangu biaru agali daosini mariame (4,000) nelo gai bu baga birugola ti nalu ibira hayagola nu agira hono to̱ larimibe.
MAT 16:11 I̱na tíhondo mberedi lalu mbira nalarugo manda nabi kamigo agibe. I̱na tíhondo Perisi agalinagabi Sadiusi agalinagabi yidi ngago dege de hondowa bayuwa mamage ho halimu laru, lene.
MAT 16:12 Ani layagola talima piaga biarume manda bialu hearia ibugua layago tinaga mberedinaga yidi lalu ndo Perisi agalimebi Sadiusi agalimebi mana lawai hagago bayuwa de hondowa mamage ho halimu lalu layada manda bini.
MAT 16:13 Ani lalu bialu Yasu ibu dindi mbira Sisaria Pilibai tanohayagi pu howa ibugua ibunaga talima piaga biaruhondo lalu, Wali agali karume Agali Hole Ibiyago ai ka lalu kabe, lene.
MAT 16:14 Ani layagola tigua ladai bialu lalu, Marume, Baboraya biaga Yone ka, lalu marume, Elaya ka, lalu marume, Ngode Datagaliwabe mana latagi haga Yaremaiabi marubi ka, lalu laga ka, lene.
MAT 16:15 Ani ladai biyagola ibugua tihondo lalu, Tígua nde i̱ ai ka lalu kamibe, lene.
MAT 16:16 Ani layagola Saimono Pidahanda ladai bialu lalu, Mbirali Dabo Helenego ibulebira lowinigo Ngode Datagaliwabe haluhe kagonaga Igini í̠ore kegoni, lene.
MAT 16:17 Ani layagola Yasuhanda ladai bialu lalu, Yone igini Saimono í̠na bayaleore lari. Áyu henene larigoni dindi agali karume langiyagola ndo i̱ Aba dahuliya andaga kagome í̠ bayuwa mo manda bia halu, La, layagolaore larigoni, lene.
MAT 16:18 Ani lowa lalu, Anigo i̱na Pida í̠ ege to̱le̱ore kegoni laro. To̱le̱ ogoriani i̱naga wali agali Ngode Datagaliwabehanda olo holebiraru mo bimaga harogola homanaga hongome giala hole bialu karu nalolebira.
MAT 16:19 Ngode Datagaliwabehanda Handame Ho Kagonaga panga duguagane gi í̠hondo ngulebero. Í̠na dindini howa nabulene nga lo werego dahuliya andagani nde nabulene dege wulebira. Í̠na dindini howa bulene nga lo werego dahuliya andagani nde bulene dege wulebira, lene.
MAT 16:20 Ani lowa Yasuhanda ibunaga talima piaga biaruhondo lalu, Mbirali Dabo Helenego ibulebira lowinigo i̱ kogonigo mbirali nalamilimu, lene.
MAT 16:21 Horo ogoningi howa Yasuhanda ibunaga talima piaga biaruhondo tigatiga aguaore bulebero lalu, I̱ Yarusalemeni puwa agali ala hene miniwi karumebi loma binigo mo miaga haguane karumebi Mana lowinigo lawai haga karumebi i̱ mo tandaga timbuniore holebira. Ani bialu tigua i̱ homelo baragola horo kiru howa tebonengi i̱ni mo heya holebero, lene.
MAT 16:22 Ani layagola Pidahanda Yasu haru pu bagi howa talialu lalu, Anduane Homogo-o í̠na bi laregoni agi larebe. Bulebira larigo nabilo Ngode Datagaliwabehanda biamogo bulebira, lene.
MAT 16:23 Ani layagola Yasu ibu beregedowa Pidahondo lalu, Dama Heyolabe í̠ i̱ kogoria nahe pu. Bi o larigoni Ngode Datagaliwabenaga ndo agalinagadago í̠na i̱naga harigani ha pai haregoni, lene.
MAT 16:24 Ani lowa Yasu ibugua ibunaga talima piaga biaruhondo lalu, Mbiralime i̱ porodagua ibua ho kayagua ibuni hame ledago mitangi nabi ibuninaga ira banga yalu i̱ talima ibulene nga.
MAT 16:25 Ogoninaga mbiralime ibuni holene ngago mo tene hayagua holene ogoni ereba hai holebira. Mbiralime ibuninaga holene wahai halu i̱ mo tene hayagua holene gahenge ibu handa walia holebira.
MAT 16:26 Mbiralime dindi bibahendeni ngaru mo tene ho kaore ibuninaga holene maro biyagua biamogo bulebirabe. Biamogo nabulebiraore. Ibuninaga holenego lone mo yu dai bule ibugua mbira bibe naheore.
MAT 16:27 Agali Hole Ibiyago ibu Abanaga wá taraore holene karulalu dahuliyali heba áyu dege daibule kago. Dai birangi ibugua wali agali bibahendeme biyadaguaore tihondo emena mulebira.
MAT 16:28 I̱na tíhondo heneneore larogo maru áyu ogoria kamiru nahome haabo kamiore Agali Hole Ibiyago ibuni Handame Haga Kini howa ibiragola de hondoleberemi, lalu lene.
MAT 17:1 Horo waragaru howa Yasuhanda Pidabi Yamese Yone libu hamenela henego haru halu tini hangu hole hari mbira timbuni weagoria haru iraga ho hene.
MAT 17:2 Ani howa tigua handalu hearia Yasu ibuni mo tara halu ibunaga dengui biago mo tara dege howa ni hanuni howa daragola wá taraore haraligobi halu aga biago pele dege bialu taraore demborerebi hearia de hendene.
MAT 17:3 Ani de hondowa talima piaga tebira biarume handalu hearia Mosese Elayala Yasu baba te lalu hearia de hendene.
MAT 17:4 Ani lalu heagola Pidahanda Yasuhondo lalu, Anduane Homogo-o ina ogoria kamagoni bayaledago i̱na anda nemanda mbira í̠naga mende Mosesenaga tebone Elayanaga lowa tebira hame lareyagua bia holebero, lene.
MAT 17:5 Pida ibu wene bi lalu heaore beraliba pele taraore demborerebi ti heagoria tiga tiga ibuwa beraliba biagoha howa bi la dali halu lalu, I̱ Iginiore ogoni gubalini ho kogo ibugua bi larago hale halimu, lene.
MAT 17:6 Bi ani layuago hale howa Yasunaga talima piaga biarume mogo timbuniore lowa dindini bulu palu wigi wigi bini.
MAT 17:7 Ani bu wiaria Yasu ibuwa ela halu lalu, Gi nahe heyadaba, lene.
MAT 17:8 Ani layagola ti dengala howa handalu hearia mende nahe Yasu hangu hearia hendene.
MAT 17:9 Ti harini howa dalialu howa Yasuhanda tihondo hongo howa lalu, De gandeba ale áyu handarimigoni mbirali nalami Agali Hole Ibiyago tongolo muwa mo heya haragola dege lamilimu, lene.
MAT 17:10 Ani layagola ibunaga talima piaga biarume Yasuhondo lalu, Mana lo winigo lawai haga karume Elaya ibu ala ibulebira lalu kago irane agidabe, lene.
MAT 17:11 Yasuhanda ladai bialu lalu, Bibahende mo manda manda bulenaga Elaya ibu ala ibulebiraore.
MAT 17:12 Anigo i̱na tí langerogo Elaya ala ibiya. Ibiyagola wali agali hearume ibu manda nabi tinime ibuhondo bua biyadagua bialu haya. Ani bialu hayadagua dege Agali Hole Ibiyagohondo tigua nde mo tandaga dege holebira, lene.
MAT 17:13 Ani layagola talima piaga biarume tihondo bi o laragoni baboraya biaga Yonenaga laralo manda bu hene.
MAT 17:14 Ti wali agali bu heagoria dai bialu hearia agali mbirame Yasunaga wanakuihayagi ibuwa ge duli hanga ho biruwa
MAT 17:15 lalu, Anduane-o i̱ iginihondo dara howa biamogo berene. Ibu biango bibi biaabo halu dindini pilaga bialu marungi ibu ira dedagohabi ibahabi pilaga biaga.
MAT 17:16 Ani biyagola i̱na í̠naga talima piaga biaru hearia haru ibirugola tigua ibu mo bayale nahabeheya, lene.
MAT 17:17 Ani layagola Yasuhanda ladai bialu lalu, Wali agali tí mini mbiraore nawi howa mini pu tara ho haabo kamigoni. I̱na tí kamiruha horo agiru haabo holiyadabe. I̱na tí heba howa horo agiru tínaga genda yu haabo holiyadabe, lene. Ibugua ani lowa lalu, Igiri biago i̱ kogoria haru ibidaba, lene.
MAT 17:18 Haru ibiyagola Yasuhanda dama biagohondo, Tagira pu, layagola igiri biago helalu dama tagira piyagola igiri biago bayaleore hene.
MAT 17:19 Ani biyagola ibunaga talima piaga biarume ibuni hangu hearia ibuwa lalu, Iname dama wara tagi nahabehe kamago agidabe, lene.
MAT 17:20 Yasuhanda tihondo ladai bialu lalu, Tígua mini mbiraore emene wu kamigome dama wara tagi nahabehe kami. I̱na tíhondo heneneore larogo ira masada egene emeneore ngago ale mini mbiraore wu harimiyagua hari wedagohondo lalu, Ogoriani howa amugoria pu, laramigola ibu amugoha polebira. Ani buwa mbirale marubi ta nabi bibehe holeberami, lene. [
MAT 17:21 Anigo mbirale mbira beramigome ndo tomo nane howa Ngode Datagaliwabehondo bi laramigo hangume dama ogonibi wara tagi holene nga, lene.]
MAT 17:22 Talima piaga biaru Galilini mandagi íbu ngoai hayagola Yasuhanda tihondo lalu, Agali Hole Ibiyago agalihondo minu mulene tu haruagoni.
MAT 17:23 Minu mialu tigua ibu homelo baragola horo kiru howa tebonengi ibuni mo heya holebira, lene. Aniore layagola nde ibunaga talima piaga biarume daraore howa dugupeore ho hene.
MAT 17:24 Yasubi ibunaga talima piaga biarubi Kabaniama anda piyagola Ngode Datagaliwabenaga anda dagisi muni miaga hearume Pida hearia ibuwa lalu, Í̠naga lawai haga kagonime Ngode Datagaliwabenaga anda dagisi muni wiagabe, lene.
MAT 17:25 Ani layagola Pidahanda lalu, E̱ wiagaore, lene. Ani lowa Pida ibu andaga piyagola Yasuhanda ala lalu, Saimono-o í̠na agi manda bu kebe. Dindi bibahende hangu hangu ho ngarunaga kini karuhondo dagisi muni miradago aiwabe. Dindi uruninaga wali agalirumebe be dindi tara howa ibinirume miagabe, lene.
MAT 17:26 Ani layagola Pidahanda ladai bialu lalu, Dindi tara howa ibinirume miaga, lene. Yasuhanda ladai bialu lalu, Anidago dindi uruninaga wali agalirume dagisi muni mulene nawidagoni.
MAT 17:27 Anigo iname o karuni mo pila holene hame nale kamago í̠na iba timbuni bedagoha puwa wena pu iba bedagoha bape habe. Wena pinagane baregonaga ne hanganeha muni kuni mbira yulebirago ogonime Ngode Datagaliwabenaga anda dagisi muni i̱nagabi í̠nagabi wulene karula polebira. Kuni ogoni mo yalu iyanaga dagisi muni wule pobe, lene.
MAT 18:1 Horo uruningi talima piaga biarume Yasu hearia ibuwa lalu, Ngode Datagaliwabehanda Handame Ho Kagoria bolangua howa handape ho kago aibe, lene.
MAT 18:2 Ani layagola Yasuhanda igiri emene mbira olowa tinaga wanakuihayagi helowa
MAT 18:3 lalu, I̱na tíhondo heneneore larogo tígua mini mo beregedalu igiri emene ogobi naharimiyagua Ngode Datagaliwabehanda Handame Ho Kagoria anda napoleberami.
MAT 18:4 Mbirali ibuni mo dindiha halu waneigini ogobi hayagua Ngode Datagaliwabehanda Handame Ho Kagoria ibu bolangua howa duniniore ho holebira.
MAT 18:5 Ani buwa mbiralime i̱naga minini howa waneigini emene ogobigohondo, I̱la habiya íbu, layagua i̱hondobi i̱la habiya íbu lara, lene.
MAT 18:6 Mbiralime waneigini ogonibigo i̱hondo mini mbiraore wu kago hado wahelo ko mo bia hayagua ege to̱le̱ timbuni ngago pume ibunaga mani pongo bia howa iba timbuni bedagoha ibame nelo bape holene bayale nga.
MAT 18:7 Wali agalime i̱hondo mini mbiraore wu kago hada hole bialu wahelo dindi bibahendeni mbirale bu payabu ngarume ani biagagonaga dara emene ndoore ho kogoni. Mbirale uruni horo bibahendengi ani bia ho wiaabo holebirago mbiralime ti ko mo bia haragonaga pani emene ndoore nolebiragonaga dara ho kogoni.
MAT 18:8 Í̠na i̱hondo mini mbiraore wu kego hado wahabelo í̠naga gi mendegomebi ge mendegomebi ko mo bia hayagua mendego gandulo wahabe. Gi gebi kirabali howa ira dalude daabo ho ngagoria penego nde kogo gi gebi mbiraore hangu howa haabobo holene ngagoria anda polene bayale nga.
MAT 18:9 Í̠na i̱hondo mini mbiraore wu kego hado wahabelo í̠naga de mendegome ko mo bia hayagua halu wahabe. De kirabali howa heli dindi ira dalude daabo ho ngagoria penego nde kogo de mbiraore hangu howa haabobo holene ngagoria anda polene bayale nga, lene.
MAT 18:10 Tígua waneigini emene o karunibi mbirago handabe manga nahe bayuwa de hondo halimu. I̱na tí langerogo waneigini uruninaga dahuliyali karuni ti i̱ Aba dahuliya andagani kagonaga deni haabo haga ka. [
MAT 18:11 Agali Hole Ibiyagome wali agali pu ereba heneru pele mule ibini, lene.]
MAT 18:12 Ani lowa lalu, Agali mbirame nogo sibi handari mbira (100) hinu kagola mbirago pu ereba hayagua agi bulebirabe. Ibugua nogo sibi pira dirani dira (99) biaru bareni tani nelo helalu mbira pu ereba hayago tai bu polebira.
MAT 18:13 I̱na tí langerogo ibugua nogo sibi ogoni handa walia howa maru pira dirani dira (99) pu ereba nahe karunaga turu kagobi ndo o biagonaga turu timbuniore holebira.
MAT 18:14 Ogonidaguaore tí Aba dahuliya andagani kagome nde emene o karunibi mbirago pu ereba helo hame naleore ka, lene.
MAT 18:15 Í̠ hamene mbirame í̠hondo ko biyagua ibuni hangu karia puwa ko biyagonaga libuni hangu howa lo tiga bilibu. Ibugua í̠na bi larego hale hayagua í̠na ibu haru dai birigoni.
MAT 18:16 Í̠na bi laregola hale habe manga hayagua í̠ heba kirali tebirali agima puwa Anduane Homogonaga mbugani lo ngadagua, Ko ogo birigo larago kiralibi tebiralibi hendene karume aniore biya lelo, lo ngadagua haru puwa lo tiga bilimu.
MAT 18:17 Ani beramigolabi o biagome hale habe manga dege hayagua wali agali Ngode Datagaliwabehanda olo holebiraru ngoai ho biru ngagoria hale hai helo bibahende biyagoni lamiai habe. Wali agali o biarunime bi laragola hamene biagome hale habe manga dege hayagua nde ibu Ngode Datagaliwabe mitangi nabiaga karubi kago lowa dagisi muni miaga karubi kago lowa o biaruhondo birilidagua ibuhondo ani bibe, lene.
MAT 18:18 Anigo i̱na tí bibahendehondo langerogo tígua dindini howa mbira nabulene nga lalu lo weramigo dahuliya andaganibi nde nabulene dege wulebira. Tígua dindini howa mbira bulene nga lalu lo weramigo dahuliya andaganibi nde bulene dege wulebira.
MAT 18:19 Anigo i̱na tíhondo bi marubi langi dege berogo. Dindini howa kiralime bi lo mbiraore howa Ngode Datagaliwabehanda mbirale mbira ogo bilo lalu Ngode Datagaliwabehondo bi larimiyagua i̱ Aba dahuliya andagani kagome hale halu bia laramigo ale bulebira.
MAT 18:20 Ogonigo kirali tebiralime i̱ minini howa mandagi mo ngoai ho kagoha i̱ ti heba kogoni, lene.
MAT 18:21 Ani layagola howa Pida ibu Yasu hearia ibuwa lalu, Anduane Homogo-o i̱ hamene mbirame i̱hondo ko bia ho wiaabo hayagua i̱na agira halu domo waholene ngabe. Ka halu domo waholene ngabe, lene.
MAT 18:22 Ani layagola Yasuhanda ladai bialu lalu, Ka halu ndo. Domalu haabo habe.
MAT 18:23 Irane Ngode Datagaliwabehanda Handame Ho Kagoria ogobi nga. Ala kini mbirame ibunaga biabe bia haga baba dano ho henego mo tiga bule bini.
MAT 18:24 Ibugua mo tiga buleore biyaria ibunaga biabe bia haga mbirala muni au lole daga labe nahe dewaore dano ho henegome haru ibini.
MAT 18:25 Biabe bia haga ogonime kini biagonaga muni dewa dano ho hayiyago dano hangalu ya dai bibe nahe hene. Aniyagola kini biagome agali maruhondo lalu, Ibubi ibu onebi ibu waneiginibi ibunaga mbirale ngarubi muni dano hangai helo garabaya biabe ale bia haganaga yolo muni miai halimu, lene.
MAT 18:26 Ani layagola hale howa biabe bia haga biagome kini biago bereagoria ge duli hanga ho biruwa lalu, I̱na í̠naga biaruni dano hangai holiya emene hondo habe, lene.
MAT 18:27 Ani layagola nde kini biagome daraore timbuni howa dano dewa hayagoni la nabi, Wahalu pu, lene.
MAT 18:28 Ani laya handala agali biagome puwa ibula mandagi biabe bia hagame agali ogoninaga muni mbiraore dano henego hearia lola howa mani yani howa lalu, I̱naga muni dano harigoni ngi, lene.
MAT 18:29 Ani biyagola muni mbiraore dano haga biagome ibu geha bulu paluwa hame lowa lalu, I̱na ya dai biai holiya emene hondo habe, lene.
MAT 18:30 Ani layagola danoali biagome, Nabuleorego áyu dege ngi, lowa ibunaga muni dano ho hayago ya dai biragolaore golope hole lowa garabaya andaha helaabo hene.
MAT 18:31 Ani biyagola biabe bia haga maru hearume nakarulapeore biyago hondowa tinaga kini biago hearia pialu biyaruni bibahende lamiai hene.
MAT 18:32 Ani lamiyagola kini biagome biabe bia haga biago, Íbu, lowa lalu, Í̠ garabaya biabe ale bia hagane habane nabulenedago í̠na i̱naga dano ho harigo howa biamogo bialu la nabi waha larigola la nabi hila hole bialu waharugo.
MAT 18:33 Í̠na nde i̱na í̠ dara halu hila hole birudagua í̠ yangone ogoni dara halu la nabi hila hole bialu waharine, lene.
MAT 18:34 Ani lowa kini biagome keba emene ndoore howa ibunaga dano ho hayaru bibahende ya dai biai haragola golope hole lowa, Biabe bia haga biago garabaya andaha helaabo hole haru pudaba, lene.
MAT 18:35 Yasuhanda la maro bialu lalu, Tí aria marume tíhondo ko biragola hila hole bialu henemane wa naharimiyagua i̱ Aba dahuliya andagani kagome nde tí bibahendehondo ogonidaguaore bulebira, lene.
MAT 19:1 Yasu ibu bi uruni lai halu Galili wahalu dindi mende Iba Yodana piyago domade halu Yudiaha pene.
MAT 19:2 Piyagola wali agali dewaoreme ibu piyadagua haruru ibiyagola ibugua ti waragoberu mo dabi haga bini.
MAT 19:3 Ani biyagola Perisi agali maru hearume Yasu hearia ibuwa Yasu ibugua mbira agi larabe hondole tigua ibuhondo lalu, Galoneni galone ndonibi inanaga Mana lowini ngagome agali mbiralime ibu one waholene nga lalu lo ngabe nawibe, lene.
MAT 19:4 Yasuhanda ladai bialu lalu, Anduane Homogonaga mbugani bi mbira lo ngago, Piganengi Ngode Datagaliwabehanda wali agalila kirali helo wabini, gilibu ngago handa nabi dege kamibe.
MAT 19:5 Ngode Datagaliwabehanda lalu, Irane ogoninaga agali mbirame ibu aba ai̱yala helalu ibu onela mandagi howa libu mo mbiraore ho holebira, lene.
MAT 19:6 Anigo libu kira henego ai kira ndo mo mbiraore ho haga ka. Ngode Datagaliwabehanda wali agali mo mbiraore henego mbiralime mo hangu hangu ho helolene nawi, lene.
MAT 19:7 Ani layagola Perisi agali biarume ibuhondo lalu, Mosesehanda bi lo ngagome lalu, Agalinime ibu one wahole lalu bebani gili bialu ibu onehondo muwa waholene nga, lo ngago aguadabe, lene.
MAT 19:8 Ani layagola Yasuhanda ladai bialu lalu. Anigo pigane wabinidangi howa ogonidagua bulene wini ndo. Mosesehanda tí one waholene nga lo winidagoni tínaga bu mini giambe ho hemigo hondowa ani lowini.
MAT 19:9 Anigo i̱na tí langerogo ogo. Agali mbirame ibu one agali mendela kayu biragola ndo ibu one bame wahalu wali mende dabu biyagua ibugua wali mende biago kayu biragoni laro, lene.
MAT 19:10 Ani layagola ibunaga talima piaga biarume ladai bialu ibuhondo lalu, Wali agalime ogonidagua bulene wiyagua nde agalime wali dabu nabi holene karulapeda, lene.
MAT 19:11 Ani layagola Yasuhanda ladai bialu lalu, Mana ogoni áyu lawai harogo wali agali bibahendenaga lalu ndo Ngode Datagaliwabehanda wali agali maruhondo dege laminigo uruni tini hangunaga laro.
MAT 19:12 Irane tara tara ngagola agalime wali dabu nabiaga ka. Maru ti ai̱yahanda taba hanayangi wali dabu bibe nahe taba henene. Maru agali marume ti dabu nabilo ogonibi helene. Maru Ngode Datagaliwabehanda Handame Ho Kago mitangi howa wali dabu nabi haga. Ogoni lawai harogoni hale halu manda bibehe kagome nde manda bila, lene.
MAT 19:13 Wali agali maru hearume tinaga waneigini Yasu ibugua tini gi wialu Ngode Datagaliwabehondo bi la helo ibu hearia haru ibiyagola ibunaga talima piaga biarume ti talialu lalu, Haru naibidababe, lene.
MAT 19:14 Ani layagola Yasuhanda lalu, Waneigini i̱ kogoria ibilo ha pai nahadababe. Ngode Datagaliwabehanda Handame Ho Kagoria waneigini urubi karunaga nga, lene.
MAT 19:15 Ani lowa ibugua waneiginini ibunaga gi wialu bialu pene.
MAT 19:16 Horo mbirungi agali mbirame Yasu hearia ibuwa lalu, Lawai haga-o i̱na haabobo holene mo yule bayale mbira agi buabe, lene.
MAT 19:17 Ani layagola Yasuhanda lalu, Í̠ bayale bulenenaga larigoni i̱hondo larigo agi. Mbiraore ibuni hangu bayale kago. Í̠na haabobo holene ngagoria anda poa keyagua bi mana lowini ngago biai holene nga, lene.
MAT 19:18 Agali biagome lalu. Bi mana lowini ngago aginagabe, lene. Ani layagola Yasuhanda ladai bialu lalu. Wali agali homelo nababe. Wali agali kayu nayabe. Mbirale page nabibe. Ke̱ howa dibade nahabe.
MAT 19:19 Í̠ aba ai̱yala mo yo handa nabi laradagua hale halu bibe. Í̠na í̠ni gubalini ho harilidagua maru karu ta nabi gubalini ho habe, lene.
MAT 19:20 Ani layagola agali daliahe biagome ladai bialu lalu, Bi uruni bibahende lo ngago i̱na biai haruli. I̱na maru agi bulene ngabe, lene.
MAT 19:21 Yasuhanda ibuhondo lalu, Í̠ bayaleore hoa biyagua í̠naga mbirale wiruni bibahende yolo miai hole pu. Ani buwa muni ngirago yagibano karuhondo mo meregola dahuliya andagani homogo holene í̠naga wulebira. Ani buwa i̱ porodagua talima ibabe, lene.
MAT 19:22 Yasuhanda ani layagola agali daliahe biagome ibu agali homogo gibiore henego ibu genda halu pene.
MAT 19:23 Ani biyagola Yasuhanda ibunaga talima piaga biaruhondo lalu, I̱na tíhondo heneneore larogo. Homogo karume Ngode Datagaliwabehanda Handame Ho Kagoria anda polene erekuibiore wulebira.
MAT 19:24 I̱na lone larogo nogo kameleme hali diriha anda polene erekuibi emene ale lowa homogo karume Ngode Datagaliwabehanda Handame Ho Kagoria anda polene erekuibi emene ndo timbu gibiore wulebira, lene.
MAT 19:25 Ani layagola ibunaga talima piaga biarume hale howa ti abale mogo laiore howa lalu, Aiwa pele mulene yu holebirabe, lene.
MAT 19:26 Yasuhanda ti handaya ho wuwa lalu, Wali agalime bibe nahedane kago Ngode Datagaliwabehanda mbirale bibahende biai habeheore kagoni, lene.
MAT 19:27 Ani layagola Pidahanda lalu, Ai handa. Iname inanaga mbirale bibahende wahai halu í̠ talima íbu kamagoni. Ai agilego yule kamabe, lene.
MAT 19:28 Yasuhanda tihondo lalu, Heneneore larogo Holene Gahenge harangi Agali Hole Ibiyagome ibu haru holenaga biragane baya gibioreni birule ibirangi i̱naga talima piaga homberia (12) kamirume haru haganaga biragane homberiani (12) biruwa Isaraele hameigini homberiaru (12) hondo haore buleberamigoni.
MAT 19:29 Ani buwa bibahendeme ibunaga andabi hamenebi mbalinibi ababi ai̱yabi waneiginibi dindibi helai halu i̱ hangu handaya ho yalu ibaabo hayagua helalu ibiyaruni goyane lowa dewaore mo yatago halu haabobo holene ngagobi mia dege bulebira.
MAT 19:30 Áyu bamba ho karu mani ti maha holebira. Áyu maha karu mani ti mo bamba ho holebira, lene.
MAT 20:1 Yasu ibugua lalu, Ngode Datagaliwabe ibugua Handame Ho Kagoria ogobi nga. Horo mbiru egerebagiore agali mbirame ibunaga gerebi mabu agali marume biabe bilo tai bule pene.
MAT 20:2 Ani buwa agali maru handa walia howa ti baba lo mbiraore halu lalu, Horo mbiru biabe beramigonaga yolo bulene ngadagua kina mbira ale dege dege ta holiyago gerebi mabu biabe bule pudaba, lene.
MAT 20:3 Ani lowa ni do paya biyagola ibugua lone magedi hamani pialu hearia agali maru bame ho payapaya bu hearia hondowa
MAT 20:4 tihondo lalu, I̱na muni yolo karulape nguliyago tíbi i̱naga gerebi mabu biabe bule pudaba, lene.
MAT 20:5 Ani laya handala ti biabe bule pene. Ani buwa horombe hanuni hayagolabi maru heagola ani dege lalu alendo hayagolabi ogonidagua dege bini.
MAT 20:6 Ai alendoore hayahayagi lone magedi hamani pialu hearia ibugua agali maru bame ha dege biaria hendene. Hondowa ibugua tihondo lalu, Bamba horo lu biago bameore mohole bu kamigoni agibe, lene.
MAT 20:7 Ani layagola tigua ladai bialu lalu, Mbirame inahondo biabe bidaba nalayagola kama, lene. Ani ladai biyagola ibugua lalu, Tíbi i̱naga gerebi mabu biabe bule pudaba laro, lene.
MAT 20:8 Ne lalu purogo lolene tu hayagola mabu anduane biagome ibunaga biabe hondo haga heagohondo lalu, Biabe bialu hayaruni ibidaba lowa ti yolo bialu howa alendoore ibuwa biyagoni howa yolo mima pialu egerebagiore ibuwa bialu hayaruhondo mia maro bibe, lene.
MAT 20:9 Agali maru alendoore biabe bu maro bulebiyahayagi puwa biabe biyaruhondo muni kina mbira ale miyago hondowa
MAT 20:10 egerebagiore puwa bialu haabo hayarume tihondo emene bolangua howa ale ngulubada manda bu hearia kina mbira ale dege dege ta hai hene.
MAT 20:11 Egerebagiore ala puwa biabe bialu hayarume muni biago mo yalu puwa mabu anduane biagohondo go̱mo̱go̱mo̱ lalu hene.
MAT 20:12 Tigua ibuhondo lalu, Iname egerebagiore puwa ni tandaga biyaruni donge howa biabe bialu haabo harimago. Agali urume ibuwa biabe biyago hina guyini dugua nabiaore biabe bia maro birimigo tihondo inahondobi muni ogobi dege dege ta harigo agibe, lalu hene.
MAT 20:13 Ani layagola anduane biagome mbirali biagohondo lalu, Hambiya-o i̱na í̠hondo kagua ndo biru. Biabe bia nabi howa iya lo mbiraore halu horo mbirani beregonaga kina mbira ale ngibelo biabe bero larigoni ndobe.
MAT 20:14 Anigo í̠naga muni mo yalu andaga pu. Agali ogome biabe maha ayuore ibuwa biabe biyagohondo yolo ogobi labolabo í̠ ngerogobi dege mule manda bidogoni.
MAT 20:15 I̱naga munime i̱ni bule hame lewadagua ndo birudabe. Be i̱ agali mbuni nabiaga howa í̠hondo mbiraore ngirudanenaga henge larebe, laya, lene.
MAT 20:16 Yasu ibu te ogoni lowa ibugua lamaro bialu lalu, Anigo wali agali áyu maha karu mani mo bamba ho halu áyu bamba ho karu mani mo maha holebira, lene.
MAT 20:17 Yasu ibu Yarusaleme pole pialu howa ibunaga talima piaga biaru haru pu bagi halu tini hangu te lama pialu howa lalu,
MAT 20:18 Hale hadaba. Ina Yarusaleme poramagoha loma binigo mo miaga haguane karubi Mana lowinigo lawai haga karubi tihondo mbiralime Agali Hole Ibiyago minu mulebira. Minu miragola tigua ibu homelo bolene nga manda buwa
MAT 20:19 Yu agali ndo agali tara karuhondo minu miragola tigua ibu mege bialubi tibume balubi ira bangani ba para holebira. Ani biragola horo kiru howa tebonengi ibuni mo heya holebira, lene.
MAT 20:20 Wali mbira Sebedi oneme ibu igini kira haru pialu Yasu heagoria ibuwa ge duli hanga ho biruwa lalu, Mbira biamogo bibelo hame ledo, lene.
MAT 20:21 Yasuhanda ibuhondo lalu, Í̠ agile hamelo bedebe, lene. Wali biagome ladai bialu lalu, Í̠ Handame Haga Kini harengi i̱ igini kira ogolabome í̠naga gi le tigalaha berelo lalu i̱hondo langi, lene.
MAT 20:22 Ani layagola Yasuhanda igiri biago labohondo lalu, Libu larabigoni manda nabi howa lope harabi. I̱na beha howa tandagabi nole kogo libugua nabehe kabibe, lene. Ani layagola libugua ladai bialu lalu, Iya ani nabehe kabagoni, lene.
MAT 20:23 Ani layagola Yasuhanda lalu, Libugua i̱naga beha howa dege noleberabiore. Anigo libugua mendealime i̱naga gi tigaha mendealime i̱naga gi leha lowa biralibulo dabolene i̱naga ndo kogoni. I̱ Abahanda berelo manda manda bu winigo hangu birulebira, lene.
MAT 20:24 Talima piaga pirali biarume Yone ibu hamene Yameselame bi ani layago hale howa keba ho hene.
MAT 20:25 Ani biyagola Yasuhanda, Tí bibahende ibai hadaba, lowa tihondo lalu, Yu wali agali ndo tara taranaga handame haga karume wali agali hongo howa handame haga ka. Ani buwa tinaga haru haga karume wali agali dara nahe hongo hangume haru hai haga ka manda bidami.
MAT 20:26 Ani biradagonigo bilowa tí kamigome mbira ani bulene henge nawulebiraore. Tí kamigoni mbiralime timbuniore hoa biyagua maru karunaga biabe bia haga holene nga.
MAT 20:27 Ani buwa tí kamigoni mbiralime ibu duniniore hoa biyagua ibugua tínaga garabaya biabe ale bia haga holene nga.
MAT 20:28 Ogonidagua Agali Hole Ibiyago wali agalime ibunaga biabe bia halimulo ndo ibugua tinaga biabe bia halu ibunaga holene wali agali bibahendenaga pela hole ibiya, lene.
MAT 20:29 Yasubi ibunaga talima piaga biarubi Yarigo howa tagira pialu pole biyagola wali agali dewaore bu hearume ti talima pene.
MAT 20:30 Agali de kohe kira hariga gibuniha bereagoria hearume, Yasu o bolangua halu poragoni, layuagola libu hale hene. Hale howa libugua abale olowa lalu, Debidi Igini-o iyahondo dara howa biamogo bia, lene.
MAT 20:31 Libugua ani layagola wali agali bu hearume libu talialu lalu, Bi nale wahadaba, lene. Ani layagola libu donge howa dalimuore olalu, Debidi Igini-o iyahondo dara howa biamogo bia, lalu laabo hene.
MAT 20:32 Ani olayagola hale howa Yasuhanda pu nabi hondo howa libuhondo lalu, I̱na libuhondo agi buliya hamelo kabibe, lene.
MAT 20:33 Libugua ladai bialu lalu, Anduane-o í̠na iyanaga de mo ngala habelo hamelo kabagoni, lene.
MAT 20:34 Ani layagola Yasuhanda libu dara howa libunaga deni ela hene. Ela hayagola abaleore dabi halu de handabehe howa libugua Yasu piyadagua talima pene.
MAT 21:1 Yasubi ibunaga talima piaga biarubi ti Yarusaleme anda polene kaware ngelowa Hari Olibe weagoria Bedabayani anda ibini. Anda ibuwa Yasuhanda ibunaga talima piaga kiralihondo,
MAT 21:2 Ogodagua bule bamba halu pudaba, lowa lalu, Dindi amugoha anda bu kagoria anda pialu kabiria nogo dongi igini angibuni dariba howa iginila halu karia de hondoleberabigo hadalu kirabali i̱ kogoria haru ibalibu.
MAT 21:3 Hadarabigola libuhondo mbirame aginaga hadarabibe layagua agua lalibu. Anduane Homogo ibu ogonioreme mbira bulene buru padane hadaraba, lalibu. Ani larabigola ibugua, Abale haru pudaba, lolebira, lene.
MAT 21:4 Binidagoni Ngode Datagaliwabe mana latagi haga mbira henegome mbiwia halu lowinigo mo lola hene. Bi lowinigo ogo,
MAT 21:5 Saiono wali agali karuhondo lalu, Tínaga Handame Haga Kini biago tí kamigoria ibiragoni de handadaba. Ibuni mini mo dindiha halu nogo dongini biralu ibiragoni. Ibu dongi hungubalua mbirani biralu ibiragoni, lalu gilibu nga.
MAT 21:6 Ani laya handala talima piaga kira biago labome Yasuhanda, Bilibu, layadagua bule pene.
MAT 21:7 Libugua nogo dongi biago labo haru dai buwa aga nogo dongi biago labo erekunini dungua hayagola Yasu ibu nogo dongi igini biagoria iraga ho berene.
MAT 21:8 Ani bereagola wali agali dewaore bu hearu marume tinaga aga harigani dungua haga bialu marume ira magane yuni dewahe dandowa harigani tebara haga bini.
MAT 21:9 Wali agali dewa bu hearume Yasu pole piyagohayagi bamba halu piyarumebi maha ibiyarumebi awa lama pialu howa lalu, Debidi Igininaga mini yaraga hama. Anduane Homogonaga minini howa ibirago Ngode Datagaliwabehanda ibu mo turu helo larama. Ngode Datagaliwabenaga mini yaraga hama, lalu lama pene.
MAT 21:10 Yasu ibu Yarusaleme anda piyagola wali agali bu hearume mogo lo hondowa laga bialu lalu, O ibiragoni aibe, lene.
MAT 21:11 Ani layagola wali agali bu yalu ibiyarume ladai bialu lalu, Ogoni ibu Ngode Datagaliwabe mana latagi haga Nasareteali Yasu Galili howa ibiragoni, lene.
MAT 21:12 Yasu ibu Anduane Homogonaga andaha anda puwa marume tamuha howa mbirale yolo bialubi yolo mulebi hearu bo ba tagitagi bialu hene. Ibugua muni ariari biaga hearunaga dagiabi ega malibu ale yolo biaga hearunaga biragane wiarubi mo hombeda haealabagabu wahai hene.
MAT 21:13 Ani bialu howa lalu, Ngode Datagaliwabehanda ibunaga mbugani bi lo ngago ogo, I̱naga anda kago i̱hondo bi lagane anda kagoni lolebira, lalu gilibu nga. Tígua nde pagebibi karu ha do hagane anda bu hinu helarimidagoni, lene.
MAT 21:14 Ani layagola howa de kohebi gi ge kohebi Anduane Homogonaga andaha Yasu hearia ibiyagola ibugua ti mo bayale haga bini.
MAT 21:15 Ibugua agalime nabiagane ale biyago hondowa waneigini emene bu hearume Anduane Homogonaga andaha howa turu halu mambolo balu lalu, Debidi Igininaga mini yaraga hama, layagola hale howa loma binigo mo miaga haguane hearumebi Mana lowinigo lawai haga hearumebi keba hai ho hene.
MAT 21:16 Keba howa tigua Yasuhondo lalu, Tigua laragoni ogo ale laralo í̠ hale ho kebe, lene. Ani layagola Yasuhanda ladai bialu lalu, E̱ i̱ hale hoore kogoni. Anduane Homogonaga mbugani bi mbira lo ngagome, Waneiginirumebi waneigini galiorerumebi Anduane Homogonaga mini baya hanguore mo yaraga helo biawai hari, lalu gilibu ngago tí nahendeore kamigonibe, lene.
MAT 21:17 Ani lalu ti hea handala Yasu ibu Yarusaleme tagira pialu Bedani palima pene.
MAT 21:18 Horo mendengi Yarusalemeha dai bialu hearia Yasu ibu hina garibi lene.
MAT 21:19 Garibi layagola handalu hearia ibu poge mbira hariga gibuniha hearia de hondowa lini dedabe nadedabe hondo pene. Hondo piyaria lini mbira nade yuni hangu ma bu hearia hendene. Nadeyagola ibugua poge biago ha halu lalu, Í̠na mani lini mbira nadoleore bere, lene. Ani layaore poge biago abale yongo bialu gau lene.
MAT 21:20 Ani biyagola talima piaga biarume mogolo hondowa lalu, Poge biago abale yongo bialu gau layadagoni aguadabe, lene.
MAT 21:21 Ani layagola Yasuhanda tihondo ladai bialu lalu, I̱na tíhondo heneneore larogo miniha toba toba nahe mini mbiraore wu harimiyagua i̱na áyu poge ogohondo larudagua tíguabi ani labehe holeberami. Ani buwa homane ogoni hangu ndo tígua hari hombene o wedagohondo, Í̠nime dugualu puwa iba solowara bedagoria ibiraha, labehe holeberami. Ani laramigola hari biagome hale halu ani bulebira.
MAT 21:22 Tígua Ngode Datagaliwabehondo bi lalu howa mini mbiraore wuwa larimiyagua bia laramigo bulebira ngi laramigobi ngiaore bulebira, lene.
MAT 21:23 Yasu ibu Anduane Homogonaga andaha lone dai buwa ibugua mana lawai halu hearia loma binigo mo miaga haguane hearubi agali ala hene miniwi hearubi ibuwa tigua ibuhondo lalu, Í̠na mbirale uruni bialu kegoni hongo aiwa ngiyane berebe. Ani bibelonaga í̠ aiwa dabo helenego kebe, lene.
MAT 21:24 Ani layagola Yasuhanda tihondo ladai bialu lalu, I̱na bi mbira tíhondo hale harogo tígua ladai birimiyagua i̱na mbirale uruni buliya hongo ngiyadagoni ogome ngiya lalu tí langulebero.
MAT 21:25 Yonehanda baboraya biyago bulene hongo miyago Ngode Datagaliwabehanda minibe be agalime minibe, lene. Ani layagola tigua, Agi ladai bimabe, lowa tini dege dege laga laga bialu lalu, Iname Ngode Datagaliwabehanda mini larimayagua ibugua inahondo lalu, O Yonehanda mana langiyago yu tiga nabi harimidago agibe, lolebira.
MAT 21:26 Iname agalime mini larimayagua wali agali bibahende o biru ngarume Yone ibu Ngode Datagaliwabe mana latagi haga hayago lagago manda buwa tigua inahondo mbira buligonaga gi ho kamagoni, lene.
MAT 21:27 Ani lowa tigua Yasuhondo lalu, Ina manda nabiore kama, lene. Ani layagola Yasuhanda tihondo lalu, Anidago nde i̱na mbirale uruni berogo buliya hongo ngiyadago nalangulebero, lene.
MAT 21:28 Yasuhanda lalu, Tígua agi manda bu kamibe. Bamba agali mbira henego ibu igini kira hene. Agali biagome ibu igini wahene biagohondo lalu, Igini-o áyu ogoni mabuni puwa biabe bialu habe, lene.
MAT 21:29 Ani layagola igiri wahene biagome lalu, I̱ mangaba, lowa mani howa mini wia dai bialu biabe bule pene.
MAT 21:30 Ani bialu agali biagome ibu igini heyogonego hearia puwa ibuhondobi bi ala layadagua dege lene. Ani layagola igiri heyogone biagome ladai bialu lalu, E̱ aba-o bule porogo, lowa bule pu nabi wahene.
MAT 21:31 Agali biagome bilo hame layadagua ibu igini agome hale halu binibe, lene. Tigua ladai bialu lalu, Ibu igini wahenegome bini, lene. Ani ladai biyagola Yasuhanda tihondo lalu, I̱na tí langerogo dagisi muni ngi laga karubi bayanda wali kayu bule muni ngi laga bedarubi tí helalu bamba halu Ngode Datagaliwabehanda Handame Ho Kagoria anda poragoni.
MAT 21:32 Ogoninaga baboraya biaga Yone ibugua ibuwa tí hariga tiga tigaore pilimulo walia hayagola tígua yu tiga nabi harimigoni. Dagisi muni ngi laga karumebi bayanda wali kayu bule muni ngi laga bedarumebi Yonehanda mana lamiyago yu tiga biya. Urunime ani biyagola tígua hondowa mini beregedalu Yonehanda mana langiyago yu tiga nabi dege harimi, lene.
MAT 21:33 Yasuhanda lalu, Bi yobage mende ogo nde hale hadaba, lene. Ani lowa lalu, Bamba dindi anduane mbirame pu mbira gerebi lini daganego dewa hongo dugudugu buwa gerebi ibane pingidope holenaga ege to̱le̱ha uli guabuwa wini. Mabu mamage holenaga anda luni daliga bima iraga howa helene. Ani buwa ibugua agali maruhondo, Mabu biabe bia halu hondo ha halimu, lalu ibuni dindi mbiraha ibaga bialu pene.
MAT 21:34 Pu mbira lini daga mini gerebi dolene tu hayagola mabu anduane biagome ibunaga garabaya biabe ale bia haga maruhondo lalu, I̱naga gerebi mabu hondo ha haga karuhondo lini maru do ngidaba lole pudaba, lene.
MAT 21:35 Ani laya handala ti pialu hearia mabu hondo ha haga biarume garabaya biabe ale bia haga biaru mbira minu balu mende to̱le̱me balu tebone homelo balu bini.
MAT 21:36 Ani biyagola anduane biagome garabaya biabe ale bia haga abale pu layadagua ndo mani dewaore pudaba layagola pialu hearia mabu hondo ha haga biarume abale bayadagua dege bene.
MAT 21:37 Mahaore anduane biago ibuni igini mbira henego mitangi bialu lalu, I̱ igini ogoni pu larogola tigua ibu mitangi bialu ibuhondo tiga tiga bulebira manda bido, lene.
MAT 21:38 Ibu igini piyagola mabu hondo ha haga biarume hondowa tigua laga laga bialu lalu, Mabu anduane biago iginiore ogonigo ibunaga paluni ina karulami̱ya homelo bama, lowa
MAT 21:39 tigua mabu tagirahayagi minu ba tagi howa homelo bene, lene.
MAT 21:40 Ani lowa Yasuhanda tihondo lalu, Ani biyagola anduane biagome ibuwa mabu hondo ha haga biaruhondo agi bulebirabe, lene.
MAT 21:41 Tigua ladai bialu lalu, Ibugua ibuwa mabu hondo ha haga agali koore uruni homelo bo wahai howa mabu ogoni marume lini dolene tu harangi do tale bu ngulebirago tihondo, Mabu hondo ha halimu, lalu mulebira, lene.
MAT 21:42 Ani layagola Yasuhanda tihondo lalu, Anduane Homogonaga mbugani bi longago nahende hene kamigonibe. Ege to̱le̱ mbira anda biagame galone nabibehedago lowa dabo wahenego ege to̱le̱ ogoniore mo timbuni duniniore heleda. Ogoni Anduane Homogo ibunioreme mo yu dai bu helenego iname de handalu handawa bu kamagoni, lalu gilibu nga, lene.
MAT 21:43 Yasuhanda laabo dege halu lalu, Anigo i̱na tíhondo larogo Ngode Datagaliwabehanda Handame Ho Kago tí kamigoria howa mo yalu puwa wali agali marume Ngode Datagaliwabe mana tigabiore biragohondo mulebira, lene. [
MAT 21:44 Ege to̱le̱ ogoni ngagoriani wali agali pilo paga hararu to̱le̱ ogonime ti bibahendeore budu baga bu waholebira. Ani buwa ege to̱le̱ ogonime mbiralini podo dambi hayagua dambu gingirulo baga bu waholebira, lene.]
MAT 21:45 Loma binigo mo miaga haguane hearumebi Perisi agali hearumebi Yasuhanda bi yobage layago hale howa, Yobage laragoni inahondo laragoni, lowa
MAT 21:46 tigua Yasu minule manda biyaria wali agali bu hearume Yasu ibu Ngode Datagaliwabe mana latagi haga ka laga lalu hea handala gi howa wahene.
MAT 22:1 Yasuhanda wali agalihondo bi yobage lowa lamini.
MAT 22:2 Ani lowa lalu, Ngode Datagaliwabehanda Handame Ho Kagoria ogo ale nga. Kini mbirame ibu igini wali dabu biyagola tomo dawa manda manda bu wini.
MAT 22:3 Manda manda bu wiai howa ibugua ibunaga biabe bia haga hearuhondo, Wali agali ibalimu laruruhondo áyu ibilo lamule pudaba, lene. Ani lamule pialu hearia wali agali biaru ti ibulene manga hai hene.
MAT 22:4 Ani biyagola nde ibugua biabe bia haga maruhondo, Bi ogo lama pudaba, lowa lalu, Áyu tomo nole ibalimu. Nogo bulumaga timbunibi igini habanehebi podo baga buwa bibahendeore manda manda bu wiai kogo, laya lalu dabu beramagonaga tomo nami̱ya ibalimu lole pudaba, lene.
MAT 22:5 Ani layagola ti ibulene manga dege halu tininaga biabe bialu heneha biabe bima pugu pugu bini. Mbiragome ibuni mabuha biabe bima pene. Mendegome ibuni tirugu andaha biabe bima pene.
MAT 22:6 Marume biabe bia haga biaru minu balu homelo bene.
MAT 22:7 Ani biyiyagola handame haga kini biagome keba taraore howa ibunaga wai biaga agali hearuhondo, Agali uruni bibahende bo wahai halu tinaga tanobi heda hai hole pudaba, lene.
MAT 22:8 Ani biyagola ibugua ibunaga biabe bia haga biaru olowa tihondo lalu, I̱na tomo manda manda bu wiai howa wali agali ibai halimu larugo hale halu nole ibulene nakarulape hayada.
MAT 22:9 Ai hariga emene pedaruhabi timbuni pedaruhabi puwa wali agali handaramigo bibahende haru ibai hole pudaba, lene.
MAT 22:10 Ani laya handala biabe bia haga biarume hariga emene timbunibi peadagua puwa wali agali ko bayalebi ta nabi mo mogo bialu haru ibai howa tomo nole wali agalime anda biagoni to̱lai hene.
MAT 22:11 Wali agali ibai hayagola kini biagome wali agali bereago hondo pialu hearia mbirali dabu biagane aga nakarule berearia hendene.
MAT 22:12 Hondowa ibugua lalu, Hambiya-o dabu biagane aga nakarule ogoria agua anda ibiribe, lene. Kini biagome ani layagola agali biagome mbira ladai nabiore berene.
MAT 22:13 Ladai nabiyagola kini biagome ibunaga biabe bia haga biaruhondo lalu, Ibunaga gi gebi minu kabu buwa aruma kagoha ba tagi hadaba. Ogoniha howa ibugua dugu bialu ibunaga ne gingirulo hayaga bialu wulebirago wilo, lene.
MAT 22:14 Ani lene lowa Yasuhanda lamaro bialu lalu, Dewa labe nahe ibalimu lenego mbira mbira hangu dabene, lene.
MAT 22:15 Perisi agali hearume puwa, Iname Yasuhondo bi aguaore hale halu minami̱yadabe, lalu ndi lalu hene.
MAT 22:16 Ani lowa tigua tininaga talima piaga marumebi Herodonaga aria marumebi, Agua lole pudaba, lene. Tigua Yasu hearia puwa lalu, Lawai haga-o iname manda bialu hemaria í̠na mana lamiriligo tiga tigaore larili manda birima. Ani buwa í̠na agali mini timbuniwi hongohe karu hondowa gi nahe maru karumebi í̠ hondowa larago mitangi nabi howa Ngode Datagaliwabehanda hame ledagonaga mana wali agalihondo lawai hariligo tiga tigaore larili.
MAT 22:17 Ai bi mbira langibelo inanaga Mana lowini ngago manda bialu Lomonaga Kini kagohondo dagisi muni mulene ngabe be nawibe. Í̠na manda bidedagua ina langi, lene.
MAT 22:18 Ani layagola Yasuhanda tinaga miniha dama mini wialu yageyage palu howa layagoni manda buwa tihondo lalu, Tí tombene hondo kihe kamiru-o tígua i̱ aginaga minule nde larimibe.
MAT 22:19 Muni kuni dagisinaga meramiligo i̱ hondoliya walia ha, lene. Ani layagola tigua muni kuni biago mo yalu ibiyagola
MAT 22:20 ibugua tihondo lalu, Muni kuni ogoriani dengui ngagobi mini gilibu ngagobi ainagadabe, lene.
MAT 22:21 Tigua ladai bialu lalu, Lomo Kini kagonagada, lene. Ani layagola Yasuhanda tihondo lalu, Anidago mbirale Lomo Kini kagonaga ngago nde ibunihondo milimu. Mbirale Ngode Datagaliwabenaga ngago nde ibunihondo milimu, lene.
MAT 22:22 Ani layagola hale howa tigua mogo timbuniore lowa ibu helalu pene.
MAT 22:23 Horo ogoningi Sadiusi agali maru hearume Yasu hearia ibuwa wali agali homeneyaru naheyulebira lole ibini.
MAT 22:24 Tigua lalu, Lawai haga-o Mosesehanda lalu, Agali mbira waneigini nahe howa homayagua homayago hameneme wali dalo biago dabu bu aribia howa waneigini homayagonaga hono wia holene nga, lo nga.
MAT 22:25 Anigo igiri karia hamenema ogoriani henego wahenegome wali dabu bu howa waneigini nahe heaore homayagola wali dalo bereagola ibula pagu bini biagome dabu bini.
MAT 22:26 Dabu buwa nde ogonidagua dege bialu ibu hamene tebonegobi ani dege bima pialu karia hamenema biaru homo mundula piai hene.
MAT 22:27 Ani bialu mahaore wali biago homa maro bini.
MAT 22:28 Ani binigo igiri karia biaru bibahendeme wali o biago dege dabu biyago horo mbiru homeneru mo heya harangi wali biago agonaga one birulebirabe, lene.
MAT 22:29 Ani layagola Yasuhanda tihondo ladai bialu lalu, Anduane Homogonaga mbugani bi lo ngagobi Ngode Datagaliwabe hongohe kagobi manda nabi kamigo mini pu tara ho kamigoni.
MAT 22:30 Ogoninaga wali agali homeneru mo heya harangi wali agali dabu bulene nawiore ndobe. Ti dahuliyali dahuliya andaga karu ale dege holebira.
MAT 22:31 Anigo wali agali homeneru mo heya holenenaga larogo Ngode Datagaliwabehanda tíhondo ibunaga mbugani lowini ngago daga nale dege kamibe. Ibugua lalu,
MAT 22:32 I̱ Abarahama Aisaga Yagaba imarunaga Ngode Datagaliwabe kogoni, lalu lo nga. Ngode Datagaliwabe ibu wali agali holenehe kagonaga kagoni homenenaga ndo ka, lene.
MAT 22:33 Ibugua mana ani lawai hayago hale howa wali agali bu hearume mogo lai ho hene.
MAT 22:34 Yasuhanda bi layagola Sadiusi biarume bi ladai bibe nahe heago hondowa Perisi agali hearu mandagi mogo buwa
MAT 22:35 ti aria mbira ibu Mana lowinigo lawai haga heagome Yasuhanda bi nakarulape larabe hondole bi maru Yasuhondo hale hene.
MAT 22:36 Ibugua lalu, Lawai haga-o Mana lowinigo ngagoni duniniore agobe, lene.
MAT 22:37 Ani layagola Yasuhanda ibuhondo ladai bialu lalu, Í̠na Anduane Homogo í̠naga Ngode Datagaliwabe kago í̠naga gubalinimebi minimebi mandamebi gubalini ho habe.
MAT 22:38 Bi mana bibahende lowini ngago duniniore ogoni.
MAT 22:39 Bi mana duniniore mende ogonibiore lowini ngago ogo, Í̠ni gubalini harilidagua maru karu ta nabi gubalini ho habe.
MAT 22:40 Mosesehanda Mana bibahende lowinigobi Ngode Datagaliwabe mana latagi henerume lawai halu howa lenegobi bi mana kira ogoni laboni lowini ngago mo tene howa lalu habe, lene.
MAT 22:41 Perisi agali maru mandagi mogo bu hearia Yasuhanda tihondo lalu,
MAT 22:42 Tígua Mbirali Dabo Helenego ibulebira lowinigo ibu ai kalo manda bu kamibe. Ibu ainaga aguanene kabe, lene. Ani layagola tigua ladai bialu lalu, Ibu Debidi aguanene ka, lene.
MAT 22:43 Ani ladai biyagola Yasuhanda tihondo lalu, Anidago Ngode Datagaliwabe Dinini ibugua Debidiha mo bila hayagola Debidihanda ibu Anduane Homogo layago agidabe. Debidihanda lalu,
MAT 22:44 Anduane Homogohanda i̱naga Anduane Homogohondo lalu, Í̠naga waitigi karu í̠naga geme hengedai habelo i̱na mo heloliya í̠ i̱naga gi tigahayagi ogoria birabe, laya.
MAT 22:45 Ani binidago Debidihanda ibu Anduane Homogo layagonaga Mbirali Dabo Helenego ibulebira lo wia ibu Debidinaga aguanene agua habehebe, lene.
MAT 22:46 Yasuhanda ani layagola mbiralime ladai bibe naheoreyagola howa horo ogoningi howa be lirayagi tigua Yasuhondo bi mbira lone hale naheore hene.
MAT 23:1 Ani lowa Yasuhanda wali agali dewaore bu hearuhondobi ibunaga talima piaga biaruhondobi mana lamialu lalu,
MAT 23:2 Mana lowinigo lawai haga karumebi Perisi agali karumebi ti Mosese heneyangi Mana lowinigo mandabi heneru tigua bi lo ngago ogo ale lo nga lalu laga ka.
MAT 23:3 Ani biagago tigua larago hale halu bidaba laradagua buleneore nga. Anigo tigua mana langiragonaga bu manda nabiagago ti biradagua tígua bulemini.
MAT 23:4 Tigua wali agalime gendabi nayabehe ngaru yu helo mo ya ho helaga. Ani buwa tinime gi dogolowa gendabi ngaru yamogo nabiaga ka.
MAT 23:5 Ani buwa tigua bibahende biraru wali agalime ti hendelo biaga ka. Ani buwa nogo dongone aleni Anduane Homogonaga mbugani bi polene ngaru gili buwa tinaga embonenibi tinaga ginibi bo bidago handalimu. Nogo dongone uruni timbuniore bo bidago handalimu. Tigua labolabo lu karulowa mbirale bayale ale ngaru labolabo ogoriani pingi pongo buwa girigerelo heledago handalimu.
MAT 23:6 Ani buwa tigua tomo nole ngoai haragoriabi ngoai hagane andaruhabi agali haguanenaga biraganeni hangu birule gere biraga kago handalimu.
MAT 23:7 Ani buwa tigua ibaga bialu magedi hamani wali agalime ti hondowa tinaga mini yaraga helobi tihondo, Lawai haga-o, lelobi hame laga ka.
MAT 23:8 Tí kamiruhondo, Lawai haga-o, lolene nawi irane tí mbiraore hamenema kamigo tínaga Lawai haga mbiraore hangu kagoni.
MAT 23:9 Ani buwa dindi ogoriani kago mbirahondo, Aba, lolene nawiore irane Aba mbiraore hangu ibu dahuliya andaga kagoni.
MAT 23:10 Tíhondo, Haru haga-o, lolene nawiore irane tínaga haru haga Mbirali Dabo Helenego ibulebira lowinigo ibuni hangu kagoni.
MAT 23:11 Tí kamigoria mbirali timbuni bolangua howa dunini hoa kago ibu tínaga biabe bia haga holeneore nga.
MAT 23:12 Mbirali ibuni mo dunini ho kago ibu mo dindiha halu mbirali ibuni mo dindiha ho kago ibu mo dunini ho helolebira, lene.
MAT 23:13 Yasuhanda lalu, Mana lowinigo lawai hagabi Perisi agalibi tí tombene hondo kihe kamigoni. Tígua Ngode Datagaliwabehanda Handame Ho Kagoria tíni anda pu nabi howa wali agali marume anda pole biraria tinaga wanakuini howa panga paya pai haramili. Anigo tínaga mo ko holene timbu gibiore wulebirago dara holene nga. [
MAT 23:14 Ani buwa tígua wali dalo bedarunaga andaga mbirale ngaru mo page biaga howa wali agali mo hondo hole Ngode Datagaliwabehondo bime dege bi lu laho wiaabo haga kamigoni. Ani beramigonaga pani timbuniore ngia tago howa mulene nga. Anigo tínaga mo ko holene timbu gibiore wulebirago dara holene nga.]
MAT 23:15 Mana lowinigo lawai hagabi Perisi agalibi tí tombene hondo kihe kamigoni. Tígua mana beramigore mbiralime yu tiga bilonaga dindi kaundiaha dindi dindi pialu iba taluni biralu poramili. Mbirali biagome tínaga mana yu tiga bu kagola tígua ibu mo ko timbuniore hai halu tí heli dindiha polene nira lowa ibu polene liraore wulebira. Anigo tínaga mo ko holene timbu gibiore wulebirago dara holene nga.
MAT 23:16 Tí dengalibi degeme dengalibi karu hariga i̱na hendedogo mbaibu lowa gililo yalu pialu kamiru tínaga mo ko holene timbu gibiore wulebirago dara holene nga. Tígua lawai haramigo ogo. Mbiralime Anduane Homogonaga anda mini lalu gi dolayagua i̱na larogoni heneneore laro lo wuwa ibuni bi laragonime ibuni dariba naholebira. Mbiralime i̱na larogoni heneneore laro lo wuwa Anduane Homogonaga andaha ngolo ngagonaga mini lalu lo wiyagua bi ogoni lo wiyagome ibuni dariba holebira, lalu lawai haramili.
MAT 23:17 Tí dengalibi mini nawi lulu yu ibaga bu kamigoni. Duniniore ngolo wiabe be Anduane Homogonaga anda ngolo Ngode Datagaliwabehondo loma bia ho ngelaganego duniniore wiabe.
MAT 23:18 Tígua mana mende lawai haramiligo ogo. Mbiralime Ngode Datagaliwabehondo mbirale bo lomabu miaga dagia ngago mini lalu i̱na larogoni heneneore laro lo wiyagua ibuni bi ogoni lo wiyago bame nagalone lowini. Mbiralime mbirale Ngode Datagaliwabehondo bo lomabu mini dagiani ngagonaga mini lalu i̱na larogoni heneneore laro lo wiyagua ibuni bi ogoni lo wiyago habo nalolene bi lowini, lalu lawai haramili.
MAT 23:19 Tí dengalibiore kamigoni. Duniniore mbirale Ngode Datagaliwabehondo minigobe be bo lomabu miaga dagia mbirale Ngode Datagaliwabehondo minigo mo loma bia haga biago duninibe.
MAT 23:20 Anigo mbiralime bo lomabu miaga dagiago mini lalu heneneore laro lo wirangi ibugua mbirale bibahende Ngode Datagaliwabehondo bo mini lomabu miaga dagiani ngarubi heba mini lara.
MAT 23:21 Ani buwa mbiralime Anduane Homogonaga anda mini lalu heneneore laro lo wirangi ibugua Anduane Homogonaga anda ogoniha haga kagobi mini lalu lo wira.
MAT 23:22 Ani buwa mbiralime dahuliya andaga mini lalu heneneore laro lo wirangi ibugua Ngode Datagaliwabenaga haru howa biraganebi biragane ogoriani mbirali biragagobi mini lalu lo wira.
MAT 23:23 Mana lowinigo lawai hagabi Perisi agalibi tí tombene hondo kihe kamigoni. Tígua tomo mo dende bia hagane palena ale tara tara hangarimigo pini pini Ngode Datagaliwabehondo loma bia halu muwa Mana lowinigo duniniore ngagonaga mo tiga bulenebi dara howa biamogo bulenebi tigabi holenebi yu tiga nabi kami. Tígua mana uruni bialu howa maru wa nahe mandagi bimaga howa bulene nga. Anigo tínaga mo ko holene timbu gibiore wulebirago dara holene nga.
MAT 23:24 Tí dengalibi degeme dengalibi karu hariga i̱na hendedogo mbaibu lowa gililo yalu pialu kamigoni. Tígua tínaga iba beha hinabibi ale emene koore bedago na nabi mo waharamili. Ani buwa nogo kamele ale mbedogo beramili.
MAT 23:25 Mana lowinigo lawai hagabi Perisi agalibi tí tombene hondo kihe kamiru tígua bo waholenebi habua bulenebi mbirale mbirale yu kamigo tínaga iba bebi beledibi habanehayagi mo to̱lai ho ngaru dodo ho ngelowa tagirahayagi hangu wayawaya biaga kamigoni. Anigo tínaga mo ko holene timbu gibiore wulebirago dara holene nga.
MAT 23:26 Perisi agali de kohe kego í̠na iba be habaneha dodo agi kabe hondowa ala wayawaya biriyagua tagirahayagibi bayale dege holebira.
MAT 23:27 Mana lowinigo lawai hagabi Perisi agalibi tí tombene hondo kihe kamiru tí homali tagirahayagi hangu bayuwa kau wuwa tamuhayagi homa kuni togo buwa himi tabulo wiagago ale kamigonigo tínaga mo ko holene timbu gibiore wulebirago dara holene nga.
MAT 23:28 Ogonidagua dege tí dongone tagirahayagi wali agalihondo bayale hetingi howa tínaga bu habanehayagi tombene hondo kihe holenebi ko tara tarabi to̱laihe kamigoni, lene.
MAT 23:29 Mana lowinigo lawai hagabi Perisi agalibi tí tombene hondo kihe kamiru tígua Ngode Datagaliwabe mana latagi haga bamba heneru hora henegoria anda bayale bialubi agali mini bayale bamba heneru tí embeda naholenaga hora henegoria yári bayaleore bia halubi kamigonigo tínaga mo ko holene timbu gibiore wulebirago dara holene nga.
MAT 23:30 Ani buwa tígua agua lalu, Ina inanaga mamali henedangi henedale iname Ngode Datagaliwabe mana latagi heneru ti bo wahenedagua bo wa nahe kamale, laga kami.
MAT 23:31 Ani lowa tígua ina Ngode Datagaliwabe mana latagi haga heneru bo wahenerunaga aguanene kamagoni lo manda buore kamigoni.
MAT 23:32 Ani binigo áyu tígua nde tínaga mamali henerume biala ho wiyadagoria howa bu maro bidaba laro.
MAT 23:33 Tí nogombibi nogombi iginibi kamigoni. Tí heli dindiha pani nole pu laragola agua pu yola holeberamibe.
MAT 23:34 I̱na tí langerogo tí kamigoria Ngode Datagaliwabe mana latagi hagabi agali mini gigabiwibi lawai hagabi pudaba larogola tígua uruni maru homelo balu maru ira bangani ba para halu maru ngoai hagane andaha karia minu balu ti dindi dindi ibida pugu pugu biragola minule talima poleberami.
MAT 23:35 Anigo wali agali bolene irane nawi howa bame homelo bayagonagabi Abele bolene irane nawi howa homelo bayagonagabi Beregaia igini Segaraia ibu Anduane Homogonaga andala Ngode Datagaliwabehondo mbirale bo lomabu miaga dagiala dombeneha hearia tigua homelo bayagonagabi uruni biyagonaga pani wali agali áyu kamirume na holeberami.
MAT 23:36 I̱na tí heneneore langerogo uruni bima penedagoni bibahendeorenaga pani wali agali áyu karume na holebira.
MAT 23:37 Yarusalemeni waliagali kamiru-o tígua Ngode Datagaliwabe mana latagi haga heneru homelo balubi Ngode Datagaliwabenaga mana lamule ibiniru to̱le̱me homelo balubi kami. Ega gogologo angibunime ibu igini ibuni tombeha mo mogo bu ngelai howa babaganeme dungu dambi hagadagua i̱na i̱naga gime wali agali bu kamiruni tí mo mogo buwa tali wu mabu bua haabo harugola tígua, Í̠na ani bia, nale harimi.
MAT 23:38 Anigo Anduane Homogonaga anda tíninaga laramiligo tabuanda halu tamuha mbirali nahe helo wahalu polebira.
MAT 23:39 I̱na tí langerogo tu áyu howa be lirahayagiore mbira tígua i̱ nahende haabo howa, Mbirali Anduane Homogonaga minini howa ibirago Ngode Datagaliwabehanda ibu mo turu helo, laramingi i̱ lone de hondoleberami, lene.
MAT 24:1 Yasu ibu Anduane Homogonaga andaha howa tagira pialu piyagola ibunaga talima piaga biarume puwa Yasuhondo lalu, Anduane Homogonaga anda bayaleore o bidago de handa, lene.
MAT 24:2 Ani layagola Yasuhanda lalu, E̱ o bidagoni hendedamigo ogoni bulebiragonaga i̱na tí langero. Ege to̱le̱ wia gimbu gimbu bima iraga kagoni homane mbiraore winidagoria ngeladai nabi bibahendeore mo ibira ibira biai holebira, lene.
MAT 24:3 Yasu ibu Hari Olibeni berearia ibunaga talima piaga biaru tini hanguore ibuwa lalu, O larigoni ogongi bulebira lalu ina langi. Agi birane hondowa í̠ ibulenebi horo hamaro bulenebi ha para haragonida lolomabe, lene.
MAT 24:4 Ani layagola Yasuhanda ladai bialu lalu, Mbiralime tí mo hondo holigo mamage halu de hondo halimu.
MAT 24:5 Agali dewaoreme i̱ mini lowa lalu, Mbirali Dabo Helenego ibulebira lowinigo i̱ íbu kogoni, lowa wali agali dewaore mo hondo holebira.
MAT 24:6 Ani buwa dindi kawareni wai biragonaga bi laruagolabi dindi kaundiaoreni wai bira laragolabi tí hale howa gi nahalimu. Mbirale uruni ani bia bulebirago ani laragome ha maro bulene nga lalu ndo larago gi nahalimu.
MAT 24:7 Dindi mende mendela wai bia a̱i̱ na̱i̱ bialu gabumane tara tarala wai bia a̱i̱ na̱i̱ bialu holebira. Ogoningi dindi bibahendeha hina gari pume halu dindi dumbirumbi biame holebira.
MAT 24:8 Mbirale uruni bibahende biai haragola walime waneigini taba honole howa tandaga pigane nagago aleore bulebira.
MAT 24:9 Ani buwa tí minuwa mo tandaga halu balu home lolene karuha minu mulebira. Ani biragola tígua i̱naga mini yu tiga bu kamigo hondowa wali agali bibahendeore karume tí handabe manga halu handa tara hai holebira.
MAT 24:10 Horo uruningi dewaoreme Ngode Datagaliwabehondo mini mbiraore wu hayagoni wahalu tini handabe manga haga haga bialu ndelalu maruhondo minu migi bulebira.
MAT 24:11 Ani biragola Ngode Datagaliwabe mana henene ngadagua ndo latagi haga dewaoreme ha pani howa wali agali dewaore mo hondo hai holebira.
MAT 24:12 Ogoningi dege ko tara tara urunime anda haragola wali agali dewaoreme gubalini holene wu heneru ho amburi hama dai bulebira.
MAT 24:13 Ani bulebirago wali agali mbiralime wahalu pu nabi hongo howa ho ununu lo haabo hayagua hamaro birangi ogoni ibu pele mulene wulebira.
MAT 24:14 Ani buwa Ngode Datagaliwabehanda Handame Ho Kagonaga Bi Mana Debene ogoni wali agali dindi bibahendeha karu hale hai helo lamiai halu kagola horo hamaro bulene ibulebira.
MAT 24:15 Ngode Datagaliwabe mana latagi haga Danielehanda Hiriribi Hondolene Gibiore te lenego ogoni tagira ibuwa Ngode Datagaliwabehondo loma bia howa mini ngagoria ngagola tígua de hondoleberami lene. Bi ogoni daga lalu kamirume irane ogonaga layada lalu bayuwa manda bilimu.
MAT 24:16 Yasuhanda ani lowa lalu, Uruni biragola de hondowa Yudiani karume hari hombene ngaruha hondo yalu gerai polene wulebira.
MAT 24:17 Ogoningi agali mbira ibuni anda dangini bedagome dalialu tamuha ibuninaga dabudabu wiyago mo anda polene henge nawulebira.
MAT 24:18 Agali mende mabuni biabe bialu kagome ibuni andaga aga mo dai bulene henge nawulebira.
MAT 24:19 Horo uruningi wali gali bere bedarubi gali andu mialu bedarubi dara timbuniore holene wulebira.
MAT 24:20 Ira yuni gilope howa dagare biagane hororu ibirangibi Sabada Horongibi tí ibida napolenaga Ngode Datagaliwabehondo bi lalu holene wulebira.
MAT 24:21 Horo uruningi hiriribi emene ndoore bulebiradagoni ale mbira ala dindi bibahende wabiyangi howa nabinigobi bialu mani nde lone ogonidaguaore mbira nabulebiragobi bulebira.
MAT 24:22 Ani buwa ogoni birangi Ngode Datagaliwabehanda horo mo tubagi hole manda bini. Ani manda nabi kale uruni birangi wali agali bibahende holene henge na mo ngale. Ngode Datagaliwabehanda ibunaga wali agali dabeneru manda buwa horo uruni mo tubagi holebira.
MAT 24:23 Anigo mbiralime tíhondo lalu, Mbirali Dabo Helenego ibulebira lowinigo o íbu kago de handadaba, layaguabi, Amu íbu kago de handadaba, layaguabi hale nahalimu.
MAT 24:24 Agali marume ke̱ halu, Mbirali Dabo Helenego ibulebira lowinigo i̱ íbu kogoni, lole ibulebira. Marume ke̱ halu, I̱ Ngode Datagaliwabe mana latagi haga kogoni, lole ibulebira. Tigua wali agali Ngode Datagaliwabehanda dabeneru mo hondo habehedabe hondole agalime nabiagane ale timbuniorebi nahendene alebi bialu holebira.
MAT 24:25 Uruni bia nabidaore i̱na tí ala langerogoni hale halu mamage ho halimu.
MAT 24:26 Anigo wali agalime lalu, Ibu dindi ko wali agali nahaga wiagoria íbu ka, layagua hondo napilimu. O tigua lalu, Ibu ogoni ha do kago, layaguabi hale nahalimu.
MAT 24:27 Ogoninaga bialu ni tagira ibiragohayagi howa ni paliragohayagi hari daba mege lagadagua Agali Hole Ibiyago ibu ogonibiore ibulebira.
MAT 24:28 Homenenaga tingini ngagoha ega bodo hariaweme nole íbu ngoai holebira, lene.
MAT 24:29 Ani lowa Yasuhanda laabo halu lalu, Horo uruningi mo ko holene uruni ngagola abaleore ni hundialu ege nadalu yapibiya hariha howa dugu ibira ibira bialu hari daligaha hongo haga karu tarame mo ema bia holebira.
MAT 24:30 Ani biragola Agali Hole Ibiyagonaga manane tara walia halu harini ha pani holebira. Ani biragola wali agali dindi bibahendeni karume Agali Hole Ibiyago hongo timbuni holenebi wá timbuni taraore holene hebabi hari beralibani ibirago hondowa gi halu dugu taraore yi yi lalu biai holebira.
MAT 24:31 Ani biragola mbelo biguli timbuniore laragola dindi bibahendenaga gimbuni maria ngagoniha howa ibugua ibunaga dahuliyalirume wali agali Ngode Datagaliwabehanda dabeneru dindi bibahendeha karu, Mo mogo bule pudaba, lolebira.
MAT 24:32 Tí mana mbira manda bilimulo pogenaga te langero. Poge mabirago hondowa ai ni poboyogobi dolene tu kawareda manda beramili.
MAT 24:33 Ogonidagua dege mbirale uruni bibahende bigi biragola tígua handalu kamiria horo kaware ha para kagonida manda buleberami.
MAT 24:34 Ogoninaga tí manda biaabo halimulo i̱na bi heneneore laro. Wali agali áyu kamiruni nahome kamiore dege mbirale uruni bibahende bulebirago laro.
MAT 24:35 Hari daligabi dindibi ereba hai holebirago i̱naga bi dege ereba nahe wiaabo holebira, lene.
MAT 24:36 Ibugua ani lowa lalu, Uruni bibahende bulebirago horo ogo angiore bulebiralo mbiralime manda nabiore ka. Dahuliyali dahuliya andaga karumebi Igini ibuguabi manda nabi dege ka. Aba kago ibuni hangu manda bu ka.
MAT 24:37 Agali Hole Ibiyago dahuliya andaga howa daibiragola Noa hayangi biyadaguaore bulebira.
MAT 24:38 Iba li timbuni biago naibiaha Noa ibu iba talu biagoha anda piyago horo ha para naheaha wali agali bu hearume hina iba nalubi wali agali dabu bigi bialubi hene.
MAT 24:39 Wali agali bu hearume ogo ale bulubadalo manda nabiore hearia iba li timbuni ibiyagome bibahendeore ibame nai hene. Agali Hole Ibiyago lone ibirangi ogonidaguaore bulebira.
MAT 24:40 Ogoningi agali kirali mabuha biabe mandagi bialu karia mendego helalu mendego yamulebira.
MAT 24:41 Wali kirali widi dambialu mandagi bedaria mendego berelalu mendego yamulebira.
MAT 24:42 Anigo tínaga Anduane Homogo ogongiore ibulebiralo manda nabiore kamigo tí mamage bayuwa ho halimu.
MAT 24:43 Ani buwa galone mbira tí manda biaabo halimulo laro. Anda anduaneme pageali ogongiore ibulebiralo manda bidale pagealime ibu andaga duanialu anda naibilo lowa palia nabi halu gaeabu hagadagua kale.
MAT 24:44 Anigo Agali Hole Ibiyago ogongi ibulebiralo tí manda nabi kamiria íbupe holigo tíbi horo bibahendengi manda manda bu haabo holeneore nga.
MAT 24:45 Anigo biabe bia haga mini bilinahebi mini gigabiwibi haruago aibe. Ibunaga anduane biagome biabe bia haga biago ibugua biabe bia haga maru karu bayuwa hondo howa tomo tale bulene ngangi tale bilo helayago ogoni ibu haruagoni.
MAT 24:46 Anduane biago ibu andaga dai biragola ibunaga biabe bia haga biagome biabe ogonidagua bialu karia ibiyagua nde biabe bia haga biagome turu timbuniore holebira.
MAT 24:47 Aniore bulebiragonaga i̱na tí langerogoni. Anduane ogonime biabe bia haga biagohondo, I̱naga mbirale bibahende ngaru í̠na hondo habe, lolebira.
MAT 24:48 Ani laragola ibunaga biabe bia haga agali ko kayagua ibunime lo manda bialu lalu, I̱ anduane luore howa dai bulebira, manda buwa
MAT 24:49 ibu biabe bia haga maru karu baba bo wahaga haga bialubi tomo na gimbu bialubi agali lulu iba naga karu baba lulu iba na gimbu bialubi holebira.
MAT 24:50 Ani bialu howa biabe bia haga biagome ibunaga anduane ogongi ibulebiralo manda nabi karia íbupe holebira.
MAT 24:51 Ani ibuwa anduane biagome biabe bia haga biago bo ba tagi howa tombene hondo kihe karu heba mandagi helaragola ibu dugu bialu howa ne gingirulo hayaga bialu holebira, lene.
MAT 25:1 Yasuhanda ibunaga talima piaga biaruhondo bi laabo halu lalu, Horo uruni harangi Ngode Datagaliwabehanda Handame Ho Kagoria ogobi wulebira. Wandari pira berenego tigua lamu hale yalu agali wali dabu bule ibiyago lola hole pene.
MAT 25:2 Wandari duria miniwi biralu duria mende mini nawiore berene.
MAT 25:3 Wandari mini nawi biarume lamu hale yuwa delagane olibe lininaga weli huniane mbira nayiore pene.
MAT 25:4 Miniwi biaru ti hale lamu iranehabi behabi weli ogoni berelowa to̱lo yalu pene.
MAT 25:5 Pu biruwa agali wali dabu biaga biago abale naibiyagola wandari biaru ti umu layagola palia hondo hai hene.
MAT 25:6 Mbi hanuni hayagola mbiralime hongo howa ga̱ lalu, Ai agali wali dabu biaga biago ibiragonigo lola hole ibidaba, lene.
MAT 25:7 Ani layagola wandari pira palia hondo hayaru abale heyuwa tinaga lamu hale biago bayuwa hungu bilo mo tiga bini.
MAT 25:8 Ani bialu howa wandari duria mini nawi biarume duria miniwi biaruhondo lalu, Inanaga lamu hale hundirago tígua weli maru ina yobu ngidaba, lene.
MAT 25:9 Ani layagola duria miniwi biarume ladai bialu lalu, Tí ngialu inane halu bulene nakarulapedago tirugu anda puwa taya bu pudaba, lene.
MAT 25:10 Ani laya handala wandari mini nawi biarume tirugu andaha weli mo pene. Ti peaha agali wali dabu biaga biago ibini. Ibiyagola wandari duria manda manda bu birayaru ti agali biago heba tomo nole anda pialu panga paya tagi hene.
MAT 25:11 Mahaore wandari duria mende biaru ibini. Tigua ibuwa lalu, Anduane-o ina anda eberamago panga dugua, lene.
MAT 25:12 Ani layagola agali wali dabu biaga biagome ladai bialu lalu, I̱ tí manda nabidogo panga naduguleore bero, laya, lene.
MAT 25:13 Ani lowa Yasuhanda lamaro bialu, Tígua ogongiore ibulebiralo manda nabiore kamigo bayuwa mamage holene nga, lene.
MAT 25:14 Yasuhanda la dege bialu lalu, Horo uruni harangi Ngode Datagaliwabehanda Handame Ho Kagoria ogobi wulebira. Agali mbirame ibu dindi taraha ibaga bialu pole lowa ibunaga biabe bia haga biaru olalu, Ibidaba, lowa, I̱naga mbirale bibahende ngoru hondo ha halimu, lene.
MAT 25:15 Ibugua ti hangu hanguhondo biabe bulene mugube headagua mbiragohondo muni daosini duria (5,000) mialu mendegohondo muni daosini kira (2,000) mialu tebonegohondo muni daosini mbira (1,000) mialu bini. Ani bialu ibuni dindi mbiraha ibaga bialu pene.
MAT 25:16 Piyagola biabe bia haga muni daosini duria (5,000) yayagome abale mo yalu puwa muni biagome biabe bialu daosini duria (5,000) mende mo tago hene.
MAT 25:17 Ogonidagua dege biabe bia haga mende muni daosini kira (2,000) yalu piyagomebi daosini kira mende mo tago hene.
MAT 25:18 Biabe bia haga muni daosini mbira (1,000) mo yayagome ibu anduane biagonaga muni yayago mo yalu puwa dindiha uli wawa hora hene.
MAT 25:19 Ani bu hemiria maniore tinaga anduane biago dai buwa ti haru biruwa lalu, Muni tíhondo ngirugonaga lo manda bimi̱ya, lene.
MAT 25:20 Ani layagola biabe bia haga muni daosini duria (5,000) yayago ibugua muni daosini duria (5,000) mende mo yalu ibuwa mialu howa lalu, Anduane-o í̠na muni daosini duria (5,000) ngirigo i̱na daosini duria (5,000) mende mo tago ho yidogoni handa, lene.
MAT 25:21 Ani lalu miyagola ibunaga anduane biagome ladai bialu lalu, Í̠ biabe bia haga bayale mini bilinahe kegoni. Ai í̠na emene biago yuwa baya hangu bialu haridago timbunibi hondo habelo helaro. I̱naga turu holene ngagoria iya haru mandagi turu ho habiya íbu, lene.
MAT 25:22 Ani layagola biabe bia haga muni daosini kira (2,000) mo yalu piyagome ibuwa lalu, Anduane-o í̠na muni daosini kira (2,000) ngirigo i̱na daosini kira (2,000) mende mo tago ho yidogoni handa, lene.
MAT 25:23 Ani layagola anduane biagome lalu, Í̠ biabe bia haga mini bilinahe bayale kegoni. Ai í̠na emene biago yuwa baya hangu bialu haridago timbunibi hondo habelo helaro. I̱naga turu holene ngagoria iya haru mandagi turu ho habiya íbu, lene.
MAT 25:24 Ani layagola biabe bia haga muni daosini mbira (1,000) mo yalu piyagomebi ibuwa lalu, Anduane-o í̠ agali tandagabi kegoni manda bido. Tomo í̠na hengene ndogo do nariligobi tomo egene í̠na polene ndogo mo mogo biriligobi kegoni.
MAT 25:25 Í̠ ogonibi kego i̱ gi howa í̠naga muni biago mo yalu puwa uli wawa dindiha hora haru. Í̠naga muni biago o yidogo de handa, lene.
MAT 25:26 Ani layagola ibunaga anduane biagome lalu, Í̠ agali ko mangaheda. Í̠na manda birigola howa i̱na hengene ndogo do naruligobi i̱na egene polene ndogo mo mogo biruligobi henene manda biribe.
MAT 25:27 Ani manda biriyagua nde í̠na i̱naga muni biago muni wiaga mbeniha wu howa i̱ dai berogola mo tago howa ngule wirine agi biyane henebe.
MAT 25:28 Anigo muni daosini mbira (1,000) ogoni ibu yidagoni mo yu dai bialu agali muni daosini pira (10,000) yu kagohondo midaba.
MAT 25:29 Ogoninaga mbiralime mbirale mbira yu kayagua ibuhondo mia tago halu dewaore yu holebira. Mbiralime mbirale emene mbira yu howa nayi kolo kayagua emeneorebi yidago yamulebira.
MAT 25:30 Biabe bia haga ogonibigo ibu galone nabulene kago arumaha minu ba tagi halimu. Ogoniha howa ibu dugu bialu ibuni ne gingirulo hayaga bialu holebira, lalu lene.
MAT 25:31 Ani lowa Yasuhanda laabo halu lalu, Agali Hole Ibiyago ibu Handame Haga Kini howa dahuliyali bibahende karu heba mandagi ibirangi ibu handame haga biragane dagiani birulebira.
MAT 25:32 Ani bedaria wali agali dindi bibahendeoreha howa ibu wanakuihayagi mo mogo bu helolebira. Ani bu kagola nogo sibi haru haganeme nogo sibi memela daba ki hagadagua ibugua wali agali uruni mo daba ki ho helolebira.
MAT 25:33 Daba ki howa wali agali mini tigabi karu ibunaga gi tigahayagi helalu mini tigabi ndo karu ibunaga gi lehayagi helolebira.
MAT 25:34 Ani helowa Handame Haga Kini biagome wali agali ibunaga gi tigahayagi karuhondo lalu, I̱ Abahanda mo turu howa helenedago ibidaba, lolebira. Dindi bibahende wabiyangi howa Ngode Datagaliwabehanda handame ho kagoha tí halimulo mo manda manda bu wini ngagoria hole ibidaba, lolebira.
MAT 25:35 I̱ hina garibi lo hewagola tígua i̱ hina ngirimi. I̱ iba noa ho hewagola tígua i̱ iba hambu ngirimi. I̱ mbiraha howa íbu hewagola tí andaga palimi̱ya íbu larimi.
MAT 25:36 I̱ aga nabi tibabe hewagola tígua i̱ aga mo bia harimi. I̱ warago bo wiwagola tígua i̱ ira to birimi. I̱ garabaya hewagola tígua i̱ nenege ibirimi, lalu lolebira.
MAT 25:37 Ani laragola wali agali mini tigabiwi karume ogodagua ladai bulebira, Anduane Homogo-o iname í̠ hina garibi lo heria hina ngialu iba noa ho heria angi hambu ngialu birimabe.
MAT 25:38 Í̠ dindi mbiraha howa íbu heria hondowa ina andaga palimi̱ya ma lalu tibabe heria angi aga mo bia halu birimabe.
MAT 25:39 Iname í̠ warago bo wiriabi garabaya heriabi nenege angi ibirimabe, lolebira.
MAT 25:40 Ani laragola Handame Haga Kini biagome ladai bialu lalu, I̱na tíhondo heneneore larogoni. Tígua birimiangi bialu howa i̱ hamene emene ko yagibanoruhondo birimigo i̱hondo birimigoni, lolebira.
MAT 25:41 Ani lowa ibugua ibunaga gi lehayagi karuhondo lalu, I̱ kogoria nahe pudaba. Tí Ngode Datagaliwabe mo yo handaga karunaga pani nolene ngagoria harimidago ira hundia nabiaga dalude daabo ho ngagoria hole pudaba. Ogoriani dama Heyolabebi ibunaga dahuliyalirubi helo Ngode Datagaliwabehanda manda manda bu wini ngagoria hole pudaba, lolebira.
MAT 25:42 I̱ hina garibilo hewagola tígua i̱ hina nangirimi. Iba noa ho hewagola i̱ iba nahambu ngirimi.
MAT 25:43 I̱ dindi mbiraha howa íbu hewagola i̱ tí andaga palimi̱ya íbu nalarimi. I̱ tibabe hewaria tígua i̱ aga mo bia naharimi. I̱ warago bo wiwagolabi garabaya hewagolabi tígua i̱ nahondo ibirimi, lolebira.
MAT 25:44 Ani laragola tigua ladai bialu lalu, Anduane Homogo-o iname í̠ hina garibi lo heriabi iba noa ho heriabi dindi mbiraha howa íbu heriabi aga nabi tibabe heriabi warago bo wiriabi garabaya heriabi iname í̠ angi hondowa biamogo nabirimayabe, lolebira.
MAT 25:45 Ani ladai biragola Handame Haga Kini biagome ladai bialu lalu, I̱na tihondo heneneore larogoni. Tígua mbirali emene yagibanoru biamogo bulene hame naleore harimigo i̱hondo birimi, lolebira.
MAT 25:46 Anigo uruni pani naabo holene ngagoria helo pelolebira. Mini tigabiwi karu ti haabobo holene ngagoria polebira, lalu Yasuhanda hene.
MAT 26:1 Yasuhanda mana uruni lawai hai howa ibunaga talima piaga biaruhondo lalu,
MAT 26:2 Horo kiru hangu howa Bolangua Halu Penegonaga tomo nolene wulebirago manda bu kamigoni. Ogoningi Agali Hole Ibiyago ira bangani ba para helo minu mulebira, lene.
MAT 26:3 Loma binigo mo miaga haguane hearubi agali ala hene miniwi hearubi ti loma binigo mo miaga haguane timbuni mini Kaiabasa andaga mo ngoai hene.
MAT 26:4 Mo ngoai howa tigua Yasu ohowa minalu bo wahole lo manda bialu hene.
MAT 26:5 Tigua lalu, Wali agali bu karume ina baba gungu buligo tomo nolene harangi iname ibu naminami̱ya, lene.
MAT 26:6 Yasu ibu Bedani howa Saimono ge hamua mbira ala ibugua mo dabi henegonaga andaga pu berene.
MAT 26:7 Yasu ibu tomo nalu berearia wali mbirame weli ngabi baya muni dewaoreme yolo buwa beha berelo winigo mo yalu ibuwa Yasunaga haguaneni odo wia hene.
MAT 26:8 Wali biagome ani biyagola Yasunaga talima piaga biarume hondowa keba halu lalu, Bame oda hole biragoni agidabe.
MAT 26:9 Weli ngabi baya ogoni muni dewa mulene ngago midale muni mirago yagibano karuhondo talebu ta kaleda, lene.
MAT 26:10 Tigua ani layago manda buwa Yasuhanda tihondo lalu, Wali ogome birago nabi waha laramigo aginagabe. Ibugua i̱hondo o biyagoni bayaore biya.
MAT 26:11 Wali agali yagibano karu tí heba mandagi haabo kamigoni. I̱ tí heba mandagi haabo naholebero.
MAT 26:12 Wali ogome weli ngabi baya i̱naga tinginini odo wia hayagoni nde i̱ hora holebiragonaga manda bialu biyagoni.
MAT 26:13 Anigo i̱na tíhondo heneneore laro. Bi Mana Debene ogoni dindi bibahendeha lamialu howa ibugua i̱hondo biyago mitangi bu dai bialu te ogoni loyogo lolebira, lene.
MAT 26:14 Ani biyagola howa Yasunaga talima piaga homberiali (12) heneru mbirago mini Yudasa Isagariodo henegome loma binigo mo miaga haguane hearu hearia puwa
MAT 26:15 lalu, I̱na Yasu tíhondo ndelo ngiruyagua tígua i̱ agi nguleberamibe, lene. Ani layagola agali biarume muni kuni pira tebira (30) daga lowa Yudasa mini.
MAT 26:16 Ani miyagola Yudasahanda ogoningi howa Yasu minu mulene henge aguaore ngabe hondole tai bialu hene.
MAT 26:17 Mberedi Yidi Nahe Hirinigo nolene horo pigane hayangi ibunaga talima piaga biaru ibuwa Yasuhondo lalu, Bolangua Halu Penego Horonaga tomo í̠ nabelo agoha manda manda bule poloma̱ya hamelo kebe, lene.
MAT 26:18 Ani layagola Yasuhanda tihondo lalu, Yarusalemeha puwa agali mbira ogoniha holebirago ibu karia puwa ibuhondo agua lalimu. Inanaga Lawai Haga biagome lalu, I̱naga horo ha para hayadago i̱bi i̱naga talima piaga karubi ina mandagi Bolangua Halu Penego Horonaga tomo í̠ andaga noloma̱ya, laya lalimu, lene.
MAT 26:19 Ani laya handala howa ibunaga talima piaga biarume Yasuhanda layadagua bialu tigua Bolangua Halu Penego Horonaga tomo nole manda manda bu wule pene.
MAT 26:20 Alendo tomo nolene tu hayagola Yasu ibunaga talima piaga homberiali (12) biaru heba tomo nalu berene.
MAT 26:21 Tomo nalu biruwa Yasuhanda lalu, I̱na tíhondo heneneore larogo. Agalime i̱ minilo tí mbiraligome nde loleberami, lene.
MAT 26:22 Ani layagola ibunaga talima piaga biarume mogo lowa ibuhondo hangu hangume lagalaga bialu lalu, Anduane Homogo-o í̠na o larigoni i̱ ndo lari, lalu laga laga bini.
MAT 26:23 Ani lagalaga biyagola Yasuhanda ladai bialu lalu, Mbirali i̱ heba ndisiha mberedi iba howa nalu bedagome i̱ minilo nde lolebira.
MAT 26:24 Anduane Homogonaga mbugani lo ngadagua Agali Hole Ibiyago homolebira. Agalime ibu minilo ndelalu walia harago ibunaga mo ko holene timbu gibiore wulebiragonaga dara holene nga. Agali ogoni ibu ai̱yahanda taba nahenedale nde bayale kaleda, lene.
MAT 26:25 Ani layagola Yudasa ndelaga biagome lalu, Lawai haga-o í̠na o larigoni i̱ lalu larebe, lene. Ani layagola Yasuhanda ladai bialu lalu, Í̠nime o laregoni, lene.
MAT 26:26 Ti tomo nalu biruwa Yasuhanda mberedi mbira yamuwa Ngode Datagaliwabehondo turu halu ka̱i̱ lowa gai bu baga buwa ibunaga talima piaga biaruhondo mialu howa lalu, I̱naga tingini ogonigo ya mialu nadaba, lene.
MAT 26:27 Ani buwa ibugua iba be yamuwa Ngode Datagaliwabehondo turu halu ka̱i̱ lowa tihondo mialu howa lalu, Ogoni tí bibahendeme no gombedalu nadaba.
MAT 26:28 Ngode Datagaliwabehanda habo nalolene bi gahenge lowinigo tene i̱naga darama ogoniha nga. Ani bidago i̱naga darama pelarogome wali agalime ko birago domo wahelo pelaro.
MAT 26:29 I̱na tí langerogo waini iba lone nane i̱ Abahanda Handame Ho Kagoria tí heba howa waini iba gahenge nolebero, lene.
MAT 26:30 Ani lai howa tigua iba gana mbira lowa tagira pialu Hari Olibe weagoha pene.
MAT 26:31 Yasuhanda tihondo lalu, Áyu mbiraga tí bibahendeme i̱ helalu ibida piai holeberami. Ogoninaga Anduane Homogonaga mbugani lo ngago ogo, I̱na nogo sibi haru haga kago baro handala nogo sibi karu ibida purogo lai holebira, lalu gilibu nga.
MAT 26:32 Anigo Ngode Datagaliwabehanda i̱ mo heya hara handala tí maha ibalimulo i̱ ala Galili bamba halu polebero, lene.
MAT 26:33 Ani layagola Pidahanda Yasuhondo laraga howa lalu, Ti bibahendeme ani wahalu purogo layaguabi i̱na í̠ wahalu napolebero, lene.
MAT 26:34 Ani layagola Yasuhanda Pidahondo lalu, Í̠hondo heneneore larogo áyu mbiraga ega gogologome bi naledaore í̠na halu tebo, Yasu manda nabido, lalu lolebere, lene.
MAT 26:35 Ani layagola Pidahanda ladai bialu lalu, I̱ í̠la homole howayaguabi ogonidagua naloleore bero, lene. Pidahanda layadagua talima piaga bibahende biarumebi ani dege lai hene.
MAT 26:36 Yasu ibu ibunaga talima piaga biaru heba Gedemani dindi wiagoria pu howa ibugua tihondo lalu, I̱ Ngode Datagaliwabela amugoha bi lole porotagi tí ogoria hondo biralimu, lene.
MAT 26:37 Ani lowa ibugua Pidabi Sebedi igini kirabi haru halu puwa ibu dara ho howa mini burugulo hene.
MAT 26:38 Ani biyagola ibugua tihondo lalu, Genda timbuniore i̱ha anda ibiragome i̱ garali bialu budara. Ina haru mamage howa tí ogoria hondo biralimu, lene.
MAT 26:39 Ani lowa Yasu ibu emene pu amu howa dindini bulu palu wuwa Ngode Datagaliwabehondo bi lalu, I̱ Aba-o tandaga nolene ngago nanoliya mo yalu polene ngayagua mo yalu pobe. Anigo i̱ hame ledodagua ndo í̠ hame lededagua hangu bibe, lene.
MAT 26:40 Ani lalu bialu ibunaga talima piaga tebirali biaru bereagoria dai bialu hearia ti palia hondo hai hearia hondowa ibugua Pidahondo lalu, Tí tebirali kamirume i̱ heba mamage emeneorebi habe nahedagola padamibe.
MAT 26:41 Ko ngagome tí ko mo bia holigo tí bayuwa mamage howa Ngode Datagaliwabehondo bi lalu halimu. Tínaga minime Ngode Datagaliwabe hame ledamigo lowa tínaga tingini gedaore ho kamigoni, lene.
MAT 26:42 Ani lowa Yasu ibu lone puwa lalu, Aba-o tandaga nolene ngago ogoni i̱ nane howa mo yalu polene nawiyagua noleberogo í̠ni hame lededagua hangu bibe, lene.
MAT 26:43 Ani lowa Yasu ibu lone dai bialu hearia ibunaga talima piaga biaru ti dengala nahe palia hondo dege hearia hendene.
MAT 26:44 Ani palea handala ibugua puwa Ngode Datagaliwabehondo bi mbiraore layagobi dege halu tebone lene.
MAT 26:45 Ani lai howa ibunaga talima piaga biaru bereagoria dai buwa ti palearia hondowa lalu, Tí erekui dogolowa palia hondo dege kamibe. Agali Hole Ibiyago agali ko biaga karuhondo minu mulene tu kaware ha para haragonigo handadaba.
MAT 26:46 I̱ minilo ndelaga biago kaware o kago de handadaba. Ai heyalu ma, lene.
MAT 26:47 Yasuhanda bi ogoni lalu heaore ibunaga talima piaga hombeane Yudasa ibu agali dewali haru ibini. Loma binigo mo miaga haguane biarumebi agali ala hene miniwi biarumebi, Yasu minule pudaba, layagola tigua wai biagane ayu tibu kangoru yalu Yasu hearia ibini.
MAT 26:48 Yasu minilo ndelaga Yudasahanda ala agali biaruhondo lalu, Tí manda bilimulo i̱na walia halu mbiralinaga peni nu̱nu̱ larogo ibu minalimu, lene.
MAT 26:49 Ani layadagua bialu Yudasahanda Yasu heagoria hondo yalu puabo howa lalu, Lawai haga-o mo palia holene í̠ha haabo helo, lowa ibu peni nu̱nu̱ lene.
MAT 26:50 Ani biyagola Yasuhanda ibuhondo lalu, Hamene-o bule wiridago abale berene, lene. Ani layagola agali hayarume abale ibuwa Yasu minalu gime bayuwa yu ndibu lene.
MAT 26:51 Ani biyagola Yasu heba hayaru mbiragome wai biagane ayu tibu yayagome loma binigo mo miaga haguane timbuni heagonaga garabaya biabe ale bia haga heagonaga hále bagadape hene.
MAT 26:52 Ani biyagola Yasuhanda ibuhondo lalu, Wai biagane ayu tibu ogoni ibuni yaganeha ya dai bibe. Mbirali wai biagane ayu tibume bole manda biyagua ayu tibume dege ibuni nde homelo bolebira.
MAT 26:53 I̱na i̱ Abahondo biamogo bia laruyagua ibugua dahuliyali ami ale dewaore ibilabehe kagoni manda nabi kamibe.
MAT 26:54 Ani biruyagua Anduane Homogonaga mbugani ogonidagua bulebira lo ngago agua bialu lola holobadabe, lene.
MAT 26:55 Ani lowa Yasuhanda agali dewa bu hearuhondo lalu, Pageali minaramilidagua tígua wai biagane ayu tibu kangoru yalu i̱ minule ibirimibe. Horo bibahendengi i̱ Abanaga andaha mana lawai halu haabo haruligo tígua i̱ mina nabirimi.
MAT 26:56 Anigo uruni bibahende beramigo Ngode Datagaliwabe mana latagi haga henerume Anduane Homogonaga mbugani bi lo ngadagua lola hai haragoni, lene. Ani layagola ibunaga talima piaga bibahende biaruni Yasu wahalu ibida purogo lai hene.
MAT 26:57 Mana lowini lawai haga hearubi agali ala hene miniwi hearubi ti loma binigo mo miaga haguane timbuni mini Kaiabasa andagaha mo ngoai ho heagoria Yasu minu yalu pene.
MAT 26:58 Ani minu yalu piyagola Pida ibu emene kaundia howa loma binigo mo miaga haguane timbuni heago andaga pabe tagirahayagi mayu̱lo handaga bima pene. Ibu pabe tamuha anda puwa agi birabe hondole lowa maru mamage ho hearu heba mandagi berene.
MAT 26:59 Loma binigo mo miaga haguane hearubi Ganisolo agali bibahende bu hearubi tigua Yasu homelo bole ibugua bini lenebi mbira agidabe handalu hearia
MAT 26:60 mbira nahendeore hene. Wali agali marume ke̱ howa Yasuhanda agua biya lama ibiyaru hale howabi mbira handa walia naheore hene. Mahaore agali kirame heyuwa
MAT 26:61 lalu, Agali o kagome Anduane Homogonaga anda gialowa horo tebiru hanguni lone bia dai bulebero laya, lene.
MAT 26:62 Ani layagola loma binigo mo miaga haguane timbuni biagome heyuwa Yasuhondo lalu, Í̠hondo bi laragoni ladai bulene mbira nayi kebe, lene.
MAT 26:63 Ani layagola Yasu ibu bi nale hene. Ani hearia hondowa loma binigo mo miaga haguane timbuni biagome Yasuhondo lone lamialu lalu, Í̠hondo langerogo Ngode Datagaliwabe haabo kagonaga minini howa Mbirali Dabo Helenego ibulebira lowinigo Ngode Datagaliwabe Igini í̠yagua langi, lene.
MAT 26:64 Ani layagola Yasuhanda ladai bialu lalu, Í̠ ani larigoni. Anigo i̱na tí bibahendehondo laro. Áyu ogoni howa be lirahayagi Agali Hole Ibiyago ibu Hongo Haiheore Kagonaga gi tigahayagi biruwa hari beralibani biralu daliraria de hondoleberami, lene.
MAT 26:65 Ani layagola loma binigo mo miaga haguane timbuni biagome ibuninaga aga lerelowa lalu, Ibugua Ngode Datagaliwabe mege bialu layago hale harimigo ai marume ina lamogo bia holene irane nawi.
MAT 26:66 Tí agi manda bu kamibe, lene. Tigua ladai bialu lalu, Ibuni ko biyagonaga homoleneore nga, lene.
MAT 26:67 Ani lowa tigua Yasu denguini hamiaga tolo ba halu gi habeme balu howa
MAT 26:68 lalu, Mbirali Dabo Helenego ibulebira lowinigo í̠oreyagua ina kamagoni manda bu ade halu í̠ bayagoni ogome baya la, lene.
MAT 26:69 Pida ibu andaga pabe tamuhayagi berearia loma binigo mo miaga haguane timbuni biagonaga biabe bia haga wandari mbirame ibuwa lalu, Í̠bi Galiliali Yasula mandagi hariligo, lene.
MAT 26:70 Ani layagola Pidahanda o bu hearuni hale hai heaore ladai bialu lalu, Í̠na o laregoni agi larebe i̱ manda nabido, lene.
MAT 26:71 Ani lalu bialu pabe harabani puwa hearia biabe bia haga wandari mende heagome Pida hondowa agali hearuhondo lalu, Ibu Nasareteali Yasula mandagi haga, lene.
MAT 26:72 Ani layagola Pidahanda wanakui ela howa halu mende lalu, Agali ogoni i̱ manda nabido, lene.
MAT 26:73 Emeneore howa agali hayarume Pida heagoria ibuwa lalu, E̱ mbira í̠ anioreda. Í̠ni bi laregome í̠ni mo walia haragoni, lene.
MAT 26:74 Ani layagola Pidahanda wanakui ela howa lalu, Heneneore laro. I̱ ke̱ haruyagua Ngode Datagaliwabe ibugua i̱ pani ngilo, lalu, Agali odagoni i̱ manda nabido laro, lene. Bi ogoni layaore ega gogologome bi layagola
MAT 26:75 ala Yasuhanda, Ega gogologome bi naledaore halu tebo í̠na i̱ manda nabido lolebere, layago Pida ibuni mitangi bu dai bini. Ani mitangi buwa Pida ibu tagira pialu dugu emene ndoore yi lalu dugu timbuni bialu hene.
MAT 27:1 Egerebagiore hayagola loma binigo mo miaga haguane hearumebi agali ala hene miniwi hearumebi Yasu homelo bole lo manda bialu hene.
MAT 27:2 Tigua Yasu ege pume hende howa Lomonaga hondo haga Pailate hearia haru pene.
MAT 27:3 Tigua Yasu homelo bole manda bu wiyago hondowa ndelaga Yudasa biago ibu mini burugu lowa muni kuni tara pale pira tebira (30) biago loma binigo mo miaga haguane hearubibi agali ala hene miniwi hearubi hearia yalu dai bini.
MAT 27:4 Yalu dai buwa mialu howa lalu, Agali ko mbira nabiore heago bame habe manga ndelarugo ko timbuniore biru, lene. Ani lamiyagola tigua ladai bialu lalu, Í̠nime birigodago ina mitangi nabi kama. Í̠naga koyane, lene.
MAT 27:5 Ani ladai biyagola Yudasahanda muni biaruni Anduane Homogonaga andaha ba dai bialu tagira puwa ibuni eanogo dalu homene.
MAT 27:6 Ani biyagola loma binigo mo miaga haguane biarume muni biaru iluwa lalu, Muni ogoni agali darama pelalu belo mirimadago inanaga Mana lowini ngagome lalu, Anduane Homogonaga anda muni wiagaha wulene nawi, lo nga, lene.
MAT 27:7 Tigua, Aguaore bimi̱ya, lalu lo mbiraore howa agali dindime be wabiaganaga dindi yolo buwa, Dindi ogoni wali agali mbiraha howa ibini homarago hora helonaga tu wimi̱ya, lene.
MAT 27:8 Ani binigo manda buwa áyu dindi ogoni mini Darama Dindi lagane nga.
MAT 27:9 Ani biyagome Ngode Datagaliwabe mana latagi haga Yaremaiahanda lowinigo heneneore lola hene. Ibugua lowinigo ogo, Tigua muni kuni tara pale pira tebira (30) biaru Isaraele wali agalime agali ogoninaga yolo buleberama layago mo yuwa
MAT 27:10 muni ogonime agali dindime be wabiaganaga dindi yolo bini. Anduane Homogohanda i̱hondo, Bia, lo wiyadagua tigua bini, lalu gilibu nga.
MAT 27:11 Tigua Yasu haru puwa Lomonaga hondo haga heagoria bi maru hale helo haru puwa helene. Ibugua Yasuhondo lalu, Yu wali agalinaga handame haga kini í̠ kebe, lene. Ani layagola Yasuhanda ladai bialu lalu, Í̠na o laregoni, lene.
MAT 27:12 Loma binigo mo miaga haguane hearumebi agali ala hene miniwi hearumebi ibuhondo bi maru ladai bilo lamiyagola Yasu ibu ladai nabiore hene.
MAT 27:13 Ladai nabiyagola Pailatehanda ibuhondo lalu, Tigua í̠hondo bi o laragoni hale nahe kebe, lene.
MAT 27:14 Ani layagola Yasuhanda bi mbira ladai nabuleore hayagola Lomonaga hondo haga biagome mogolo hene.
MAT 27:15 Bolangua Halu Penegonaga Horo harangi wali agali bu hearume mbira garabaya henego Lomonaga hondo haga heagohondo lalu, Golope ha larama, laragola ibugua golopeore haga hene.
MAT 27:16 Ani biaga henego ogoningi agali mini lene mbira mini Barabasa garabaya hene.
MAT 27:17 Wali agali bu hearu mo mogo bu hayagola Pailatehanda tihondo lalu, Barabasa golope hoabe be Yasu Mbirali Dabo Helene ka lagago golope hoabe, lene.
MAT 27:18 Yu wali agali haru hagame henge lowa Yasu ibu hearia minu yalu ibiyagoni Pailatehanda manda buore howa ani lene.
MAT 27:19 Pailate ibu daba ki bialu biraganeni berearia ibu oneme bi lawia hayagola mbirame lama ibalu howa lalu, Abale mbiraga emaga handalu hewaria agali ko mbira nabiore ogoni mitangi bialu tandaga emene ndo narugo ibuhondo mbira bulene nawiore, laya, lene.
MAT 27:20 Loma binigo mo miaga haguane hearumebi agali ala hene miniwi hearumebi wali agali hearuhondo lalu, Pailatehondo Barabasa golope halu Yasu ira bangani ba para ha ladaba, lene.
MAT 27:21 Ani layagola Pailatehanda wali agali bu hearuhondo lalu, Agali kira kago labo ago golope hoabe, lene. Tigua ladai bialu lalu, Barabasa golope ha, lene.
MAT 27:22 Ani layagola Pailatehanda lalu, Anidago Yasu Mbirali Dabo Helene ka lagagohondo i̱na agi buabe, lene. Ti bibahendeme ladai bialu lalu, Ibu ira bangani ba para habe, lene.
MAT 27:23 Ani layagola Pailatehanda lalu, Anidago ibugua ko agi biyabe, lene. Ani layagola tigua hongo howa dalimu laga laga bialu lalu, Ina nahondoleorego ibu ira bangani ba para habe, lene.
MAT 27:24 Ani layagola Pailatehanda bulene mbira nawi ti gungu bibehe heago hondowa ibunaga bi emene hayagola wahalu wali agali bu hearuni wanakuini howa iba bereago gime ta̱la̱ muwa gi domo wahalu howa lalu, I̱na agali ogoni gi ela halu homelo ba naloleberogo. Ogoni tínime beramigoni i̱ ndo, lene.
MAT 27:25 Wali agali bu hearume ladai bialu lalu, Ibu homaragonaga pani nolene wiagua inanenibi ina waneigininibi ibira helo larama, lene.
MAT 27:26 Ani layagola Pailatehanda Barabasa golope howa ibugua ami agali hearuhondo, Yasu tibume badaba, lowa lalu, Ibu homelo ira bangani ba para hole haru pudaba, lene.
MAT 27:27 Ani biyagola Pailatenaga ami agali hearume Yasu haru halu gabumane haru haganaga andagahayagi haru piyagola ami agali bibahende bu hearuni ibu heagoria ho mabu bupe hene.
MAT 27:28 Ani buwa tigua ibunaga labolabo golo wahowa labolabo daramabi mbira mo karula hene.
MAT 27:29 Ani buwa tigua pu aniheme bo buwa Yasunaga haguaneni karula howa Yasunaga gi tigahayagi gewa mbira mo ya ho helowa tigua ibu buhayagi bulu paligi bialu howa mege bigi bini. Mege bialu lalu, Yu wali agalinaga Handame Haga Kini haabo habelo, laga bini.
MAT 27:30 Ani lowa tigua hamiaga toloba halu gewa mo ya ho helayago yamuwa haguaneni baga bini.
MAT 27:31 Tigua mege biai howa labolabo daramabi karula hayago golowa ibuninaga labolabo biago karula dai buwa ira bangani ba para hole haru tagira pene.
MAT 27:32 Ti tagira pole pialu hearia Sairiniali mbira mini Saimono ibalu hearia lola hene. Lola howa ami agali biarume ibu Yasunaga ira banga yilo ibuhondo, Ya ya, layagola yini.
MAT 27:33 Ti pialu dindi mbira mini Gologoda ogoriani anda pene. Gologoda inanaga bi lalu, Haguane Kuni.
MAT 27:34 Ogoriani howa tigua waini ibabi marasini kaubibi mandagi bimaga maga buwa Yasu nelo miyagola ibu na hondowa na nabi wahene.
MAT 27:35 Tigua Yasu ira bangani ba para howa ibunaga labolabo biago ái ibu harabe hondole tadu bialu berene.
MAT 27:36 Ani buwa tigua ibu handadaga ho berene.
MAT 27:37 Ira banga daligani bi ogo gilibu wini. Yu wali agalinaga Handame Haga Kini Yasu ogoni, lalu gilibu wini.
MAT 27:38 Ani buwa tigua agali ko biaga kirabi Yasu heba mendego gi tigahayagi mendego gi lehayagi lowa ti ira banga tebirani ba para hene.
MAT 27:39 Wali agali ti hearia bolangua haga bialu piyarume Yasuhondo ma bonge laga bialu tongoyongo bi laga bini.
MAT 27:40 Tigua lalu, Í̠na Anduane Homogonaga anda gialope howa horo tebira howa bia dai bulebero larigodago í̠ Ngode Datagaliwabe Iginiore keyagua í̠ nahomolenaga ira banga ogoriani howa í̠ni pele mialu dalerene, lene.
MAT 27:41 Ogonidagua dege loma binigo mo miaga haguane hearumebi Mana lowinigo lawai haga hearumebi agali ala hene miniwi hearumebi mege bialu lalu,
MAT 27:42 Ibugua wali agali maru nahomelonaga pele mialu kaligodago ibuni pele namibehedane wiaruabe. Ibu Isaraele wali agalinaga handame haga kini ndodabe. Áyu ogoni ibu ira bangani howa daliyagua iname ibuhondo mini mbiraore wuleberama.
MAT 27:43 Ibugua Ngode Datagaliwabehondo mini mbiraore wuwa lalu, I̱ Ngode Datagaliwabe Igini kogoni, layagodago áyu Ngode Datagaliwabehanda ibu pele mirabe handami̱ya, lene.
MAT 27:44 Agali ko biaga kirali Yasu heba ira banga mendehayagibi mendehayagibi ba para hayago labomebi ogonidagua dege mege bini.
MAT 27:45 Horombe hanuniore howa dindi ogoni bibahendeha aruma ha ho wiaabo howa
MAT 27:46 alendo ni gai layahayagi wá hodai bini. Ani biyagola Yasuhanda bi dalimu lowa lalu, Eloi Eloi lema sabagadanai. Inanaga bi lalu, I̱naga Ngode Datagaliwabe-o i̱naga Ngode Datagaliwabe-o í̠na i̱ aginaga wahalu piribe, lene.
MAT 27:47 Bi layago hale howa wali agali maru ogoniha hearume lalu, Ibu Elaya olarua, lene.
MAT 27:48 Mbiragome abale gerai puwa mbirale tara dahundu ale waini iba kaubi bereagoha ibira howa ira ngunini mo gedo lowa Yasunaga ne hambuni ngelene.
MAT 27:49 Ani biyagola marume lalu, Elaya ibu pele mule ibirabe handami̱ya emene hondo hama, lene.
MAT 27:50 Ani layagola howa Yasuhanda bi dalimu halu mende lowa buhe̱ ereba halu tongolo mini.
MAT 27:51 Tongolo miyagola Anduane Homogonaga andaha labolabo timbuni gerela ho winigo hanuni daligani howa buda ki bini. Dumbirumbi emene ndo bialu to̱le̱ timbuni kambulo baga bialu
MAT 27:52 homali wiaruni tawa bu baga biyagola wali agali dewa Ngode Datagaliwabehondo mini mbiraore wu heaore homeneru mo heya hene.
MAT 27:53 Wali agali o biarume homali helalu puwa Yasu homowa mo heya hayagola ti Tano Mbira Loma Bia Hene wiagoria anda piyaria wali agali dewaoreme ti handai hene.
MAT 27:54 Ami haru haga heagobi ibu heba ami agali hearubi Yasu handaya ho hayarume dumbirumbibi mbirale bibahende biyagoni hondowa gi halu mogo tara lowa lalu, Ibu Ngode Datagaliwabe Igini heneneoredago, lene.
MAT 27:55 Ogoniha wali dewa Galili howa Yasu biamogo bima haruru ibiyarubi uruni heba Magadala wali Meribi Meri mende Yamese Yosebela ai̱yabi Sebedi onebi ti haru amura howa handaya ho hene.
MAT 27:57 Horo ogoningi alendore hayagola Arimadia howa agali homogo mbira mini Yosebe ibu Yasu talima piaga henego dindi ogoriani anda ibini.
MAT 27:58 Ibuwa ibu Pailate hearia puwa, Yasu tingini mule poabe, lene. Ani layagola Pailatehanda maruhondo lalu, Yasunaga tingini Yosebe milalimu, lene.
MAT 27:59 Ani layagola Yosebehanda Yasunaga tingini muwa labolabo peleore gahengeme kabu bini.
MAT 27:60 Ani buwa ibugua ibuninaga egeanda áyuore dege guabu winigoha yalu puwa hora hene. Hora howa ege to̱le̱ timbuni wiago muwa panga paya anda halu pene.
MAT 27:61 Magadala wali Meribi Meri mendegobi egeanda biagoha handa amu ho berene.
MAT 27:62 Horo mende Sabadangi loma binigo mo miaga haguane hearubi Perisi hearubi mo mogo bialu Pailate hearia puwa
MAT 27:63 lalu, Haru haga-o agali ke̱ haga o biagoni homa nabi howa lalu, Horo kiru howa tebonengi i̱ni mo heya holebero, layago manda bidama.
MAT 27:64 Anigo ibunaga talima piaga karume aribia halu ibu tingini mo yalu puwa wali agali karuhondo lalu, Ibu ibuni mo heya halu piyada, loligo horo tebiru ogoni bolangua helo ibunaga egeanda mamage bayuwaore halimu labe. Tini ke̱ abale hayago emene bayale lowa mani ke̱ timbuniore holigo í̠na ani bilimu lalu lamibe, lene.
MAT 27:65 Ani layagola Pailatehanda tihondo lalu, Tígua ami mamage haga agali maru haru puwa egeanda bayuwa mamage helo manda bilimu, lene.
MAT 27:66 Ani laya handala puwa tigua ege to̱le̱ panga paya anda hayago hada buwa mamage haga biaruhondo, Mamage bayuwaore ho halimu, lalu pene.
MAT 28:1 Horo Sandengi egerebagiore muna biyagola Magadala wali Meribi Meri mendebi libu Yasu egeanda horo hayagoha hondo pene.
MAT 28:2 Hondo pialu hebira dindi dumbirumbi timbuniore bialu Anduane Homogonaga dahuliyali mbira dahuliya andaga howa dalipe halu ege to̱le̱ panga payini biago dugu a̱i̱ howa panga biagoriani berene.
MAT 28:3 Dahuliyali biagonaga dengui wá taraorehe hari daba ale ibunaga aga biago demborerebi pele taraore hene.
MAT 28:4 Ogonibi heago hondowa mamage ho hayaruni ti gi timbuni howa mogo lalu homene aleore wini.
MAT 28:5 Ani bu wiagola dahuliyali biagome wali biago labohondo lalu, Gi nahalibu. Libu Yasu ira bangani ba para hayago tai berabigoni i̱ manda bido.
MAT 28:6 Ibu oali nahe ibuni bulebero layadagua abale heyalu piya. Ibu wiyago dege de hondole ibidaba.
MAT 28:7 Libugua abale puwa ibunaga talima piaga biaruhondo au lalibu. Yasu ibuni mo heya halu áyu ogoni ibu bamba halu Galili pole piyago ogoriani tí de hondoleberami lalibu. O langerogoni embeda nahalibu, lene.
MAT 28:8 Ani lamiyagola libu gi tago tago gerai pialu howa nde turu holene to̱lai ho yalu ibunaga talima piaga biaru lamule pene.
MAT 28:9 Libu pialu hebira abaleore Yasu libu lola howa lalu, Mo palia holene libu heba haabo helo, lene. Ani layagola libugua Yasu heagoria ha para howa ibunaga geni yu huribale buwa ibu mini yaraga hene.
MAT 28:10 Ani biyagola Yasuhanda libuhondo lalu, Gi nahalibu. I̱ amu Galilini koria tigua hondolebirago libugua i̱ hamene biaru Galili pudaba lole pudaba, lene.
MAT 28:11 Wali biago labo harigani pialu hebi tagi agali egeanda mamage hayarume Yarusalemeha abale dai buwa biyago damenego bibahendeore loma binigo mo miaga haguane hearu lamiai hene.
MAT 28:12 Lamiai hayagola loma binigo mo miaga haguane biarubi agali ala hene miniwi hearubi mandagi mogo buwa bi lo mbiraore howa tigua ami agali biaruhondo muni dewa mini.
MAT 28:13 Mialu howa lalu, Tígua agua lalimu. Mbiraga ina palia hondo hemaha ibunaga talima piaga biarume ibuwa ibu tingini mo page biyiya, lalimu.
MAT 28:14 Gabumane haru haga kagome bi ogoni hale hayagua iname ibuhondo, O laragoni heneneore lara, laramagola tí agali tigabiore ka lalu ogoninaga mini dege dindi ho holene henge nawulebira, lene.
MAT 28:15 Ani layagola ami agali mamage haga biarume muni biago mo yalu puwa tigua bilimu layadagua bini. Ani binigo ndelene ogoni. Yu wali agalime loyogo lenego wali agali kamarume áyubi bi ogoni dege loyogo lalu kagoni.
MAT 28:16 Yasunaga talima piaga beriali biaru Yasuhanda pilimu layagoha Galilinaga bare hombene wiagoha iraga halu pene.
MAT 28:17 Puwa tigua Yasu hondowa ibu mini yaraga halu howa marume mini kira kira wuwa hene.
MAT 28:18 Yasuhanda ti heagoria ha para howa lalu, Ngode Datagaliwabehanda harihabi dindihabi hongo holene bibahende i̱hondo ngiai hayagoni.
MAT 28:19 Ogonigo tí dindi bibahendeha wali agali bu karuha puwa ti i̱naga talima ibaga helo helalimu. Ani buwa Aba mininibi Igini mininibi Ngode Datagaliwabe Dinini mininibi howa ti baboraya bia halimu.
MAT 28:20 Ani buwa i̱na tí langirugo manda biai helo bayuwa lawai halimu. Tígua ani bialu kamigola hamaro bulene horo helo i̱ tí heba haabo holebero, lene.
MAR 1:1 Bi ogo Ngode Datagaliwabe Igini Yasu Kerisonaga Bi Mana Debene pigane teninigo ogo.
MAR 1:2 Ngode Datagaliwabe bi mana latagi haga Aisaiahanda mbiwia halu lowinigo ibunaga mbugani gilibu nga. Ngode Datagaliwabehanda lalu, Hale hadaba. I̱naga bi lamule pu larogome í̠naga hariga ba helo ibuhondo, Bamba ha, lolebero, lene.
MAR 1:3 Dindi ko yobi wali agali nahaga wiagoria howa mbiralime olalu, Anduane Homogo ibilo hariga ba hole manda manda bialu halimu. Hariga ogoni tigabiore wilo ba halimu, lalu ka, lenego gilibu nga.
MAR 1:4 Yone ibugua ogonidagua dindi ko wali agali nahaga wiagoria ibuwa bi mana lawai halu baboraya bia hole ibini. Ibugua ibuwa lalu, Ko birimigo domo wahelo tí bu mini beregedalu baboraya bulene nga, lalu lamialu hene.
MAR 1:5 Wali agali Yudia dindi howabi Yarusaleme howabi bibahende hearu ibu hearia ibai hene. Tigua ibuwa ko biniru la pani haga biyagola Yone ibugua iba Yodanani ti baboraya biahaga bini.
MAR 1:6 Yone ibu nogo kamele irinime aga wabinigo karulowa mandibu nogo dongoneme wuwa hene. Ibu pagayabi mone taranaga ibanebi naga hene.
MAR 1:7 Ibugua mana lamialu lalu, I̱ ala íbu kogonigo maha mbirali i̱ dindiha lowa ibu daliga timbuniore kago ibulebira. I̱ bayale ndo kogome i̱na bulu paluwa ibunaga ge habe gamu pu hadolene nakarulapeore kogoni.
MAR 1:8 I̱na tí ibame baboraya bialu kogo ibugua Ngode Datagaliwabe Dininime tí baboraya bia holebira, lene.
MAR 1:9 Horo odarungi Yasu ibu Galili dindi Nasarete tano howa ibiyagola Yonehanda Yasu iba Yodanani baboraya bia hene.
MAR 1:10 Yasu ibaha howa hayayigola dahuliya andaga dugua hayago de hendene. Ani dugua hayagola Ngode Datagaliwabe Dinini ega malibu ale dalialu Yasuni birayago de hendene.
MAR 1:11 De handalu hearia dahuliya andaga howa bi ladali halu lalu, I̱ Iginiore i̱na í̠ gubalini ho howa í̠hondo turu timbuni ho kogoni, lene.
MAR 1:12 Ogoniore lai heagola Ngode Datagaliwabe Dinini ibugua Yasu dindi ko wali agali nahaga wiagoria haru pu hene.
MAR 1:13 Ani haru pu hayagoha ibu horo pira maria (40) hene. Yasu hearia dama Heyolabeme ibu ko mo bia habehedabe hondole ibini. Yasu nogo gabua tara tara bu heagoha hearia dahuliyalirume ibu biamogo bule ibini.
MAR 1:14 Yone garabaya biya handala Yasu ibu Galili puwa Ngode Datagaliwabenaga Bi Mana Debene lamialu hene.
MAR 1:15 Yasuhanda lalu, Horo tu winigo áyu ogoni lola haragoni. Ngode Datagaliwabehanda Handame Ho Holene kaware ngagoni. Tígua ko birimigonaga mini beregedalu Bi Mana Debene yu tiga bilimu, lalu lamini.
MAR 1:16 Yasu ibu Galili iba timbuniore bereago angeni pialu howa wena minaga agali kira Saimonobi ibu hamene Andurubi libugua wena nu ibaha ibira howa wena minalu hearia de hendene.
MAR 1:17 De hondowa Yasuhanda libuhondo lalu, Libugua agali minalibulo i̱na minawai holiya i̱ porodagua talima ibidaba, lene.
MAR 1:18 Ani layagola libugua libunaga wena nu abale ngelalu ibu talima pene.
MAR 1:19 Yasu emene lu pu howa ibugua Sebedi igini Yamesebi ibu hamene Yonebi libu iba taluni howa wena nu mo tiga bialu hearia de hendene.
MAR 1:20 De hondowa abale olayagola libu aba Sebedibi yolo biabe biaga hearubi ti iba taluni helalu libu Yasu talima pene.
MAR 1:21 Ti Kabaniama tano anda puwa Sabada horongi Yasu ibu ngoai hagane andaha puwa ibugua mana lawai halu hene.
MAR 1:22 Mana lowinigo lawai haga hearume lawai hagadagua ndo Yasuhanda hongo holene taraore yu howa lawai hayagola wali agali hearume hale howa ti miniha mogo lai hene.
MAR 1:23 Ani lawai halu heagola agali dama daragahe mbira ngoai hagane anda biagoha abale anda ibuwa ibugua ga̱ lowa lalu,
MAR 1:24 Nasaretaeali Yasu-o ina kamagoha í̠na agi bule ibiribe. Ina bo wahole ibiribe. I̱na í̠ manda bido í̠ agali bayale tigabi Ngode Datagaliwabe ibuni kagoria howa ibini kegoni, lene.
MAR 1:25 Ani layagola Yasuhanda dama biago talialu, Bi nale agali ogo helalu í̠ tagira pu, lene.
MAR 1:26 Ani layagola damame agali biago mo biango bibi bia halu ga̱ lo helalu tagira pene.
MAR 1:27 Ani biyagola wali agali bibahende bu hearume tini degedege lagalaga bialu lalu, O biyagoni agiyabe. Mana gahenge ogonida. Damarume ibugua bidaba laradagua bilo bidaba lolene hongo yu kagoni, lene.
MAR 1:28 Yasuhanda biyaru Galili dindi bibahendeha wali agali bu hearume hale hai hene.
MAR 1:29 Yasubi Yamese Yonebi ibunaga talima piaga maru biarubi ti ngoai hagane andaha howa pialu Saimono Andurula andaga pene.
MAR 1:30 Saimono imane warago bowa poboyogo timbuni bu winigo tigua Yasu ibiyagola abaleore lamini.
MAR 1:31 Lamiyagola Yasu ibu wali biago warago bo wiagoria puwa ibugua gini mialu mo heya hene. Ani biyagola poboyogo ala biyago ereba halu dabi howa wali ogonime ti tomo nelo mule manda manda bini.
MAR 1:32 Alendo ni gai lalu paliyagola wali agali bu hearume warago bo wiaru mo yalu dama daragahe hearubi haru ibalu Yasu hearia ngoai hene.
MAR 1:33 Wali agali bibahende dindi ogoriani hearu anda ogoninaga haneni mo ngoai hene.
MAR 1:34 Ani biyagola Yasuhanda wali agali dewa warago tara tara bene wiaru mo dabi haga bialu dama dewa daraga hearu wara tagi haga bialu hene. Ani bigi biyagola dama biarume Yasu ibu ogoore kalo manda bu henego Yasuhanda dama biaruhondo, Bi naladababe, lene.
MAR 1:35 Gao nale aruma ho wiagoha Yasu ibu heyalu tagira pialu mbirali naheore wiagoha puwa Ngode Datagaliwabela bi lalu hene.
MAR 1:36 Saimonobi ibu heba mandagi hayarubi tigua Yasu hai bima pene.
MAR 1:37 Ani buwa ibu handa walia howa tigua ibuhondo lalu, Bibahende karume í̠ hai bialu ka, lene.
MAR 1:38 Ani layagola Yasuhanda ladai bialu lalu, Dindi maru kaware ngagoria bi mana lawai holiya ma. I̱ ani bule ibirugo, lene.
MAR 1:39 Ani lowa Galili bibahendeni ibaga bialu ngoai hagane anda hearuha puwa Yasu ibugua bi mana lamialu dama daraga hearu wara tagi haga bialu hene.
MAR 1:40 Ani bialu hearia agali ge hamua mbira Yasu hearia ibuwa ge duli hanga ho biruwa lamialu lalu, Í̠na i̱ mo dabi hoa biyagua nde mo dabi habehe ke, lene.
MAR 1:41 Ani layagola Yasuhanda gubalinime dara howa gi dogola amu howa agali biago ela halu lalu, I̱na í̠ mo dabi hoabago dabi ha, lene.
MAR 1:42 Ani layagola ge hamua ereba hai halu bayale hene.
MAR 1:43 Yasuhanda agali biagohondo hongo howa lalu, Ai hale ha. Maru nalami loma binigo mo miaga agali kagome í̠ de hendelo ibu kagoria abale puabo halu pole pu. Ani bialu í̠ dabiore haridago wali agali karume de hendelo walia hole Mosesehanda bi lowini wiyadagua mbirale mbira Ngode Datagaliwabehondo bo mibe, lene.
MAR 1:45 Ani laya handala ibu hale halu agali biagome pialu howa Yasuhanda nalamibe layago donge howa ibugua biyago lamigi bima pene. Ani layagola wali agali bu hearume bi layago hale hai hayagola Yasu ibu tano wiaruha tinaga deni pobe naheyagola wali agali nahaga wiagoria ha dai bu hene. Ani pu hearia wali agali dewa dindi bibahende wiaruha howa Yasu hearia ibugu ibugu bini.
MAR 2:1 Horo maru agima howa Yasu ibu Kabaniama dai bini. Dai bu heagola wali agali hearume, Yasu andaga daibu ka, layagola bibahendeme hale hai hene.
MAR 2:2 Hale howa wali agali dewaore Yasu hearia íbu ngoai howa ti anda tamuhabi harabanibi holene henge nawi gengeda tago bu heagola Yasuhanda bi mana ti lamialu hene.
MAR 2:3 Ani lamialu hearia agali marialime agali mbira kuduguhe winigo Yasu hearia mo yalu ibini.
MAR 2:4 Wali agali dewa ho gengeda tago bu heagola tigua agali biago Yasu hearia yalu anda pobe naheyagola anda dangini yalu iraga howa dangi gialowa agali ira ho yalu ibiyago Yasu heago tigatiga yarali hene.
MAR 2:5 Tigua mini mbiraore wu howa biyago hondowa Yasuhanda agali kuduguhe biagohondo lalu, I̱ igini í̠na ko birigo domai haya, lene.
MAR 2:6 Ani layagola Mana lowinigo lawai haga maru berearume minime dege mitangi bigi bialu,
MAR 2:7 Agali ogonime bi larago agi larabe. Ibugua Ngode Datagaliwabe mege bialu kagoni. Ngode Datagaliwabe ibu hangume wali agali ko biyago domo wahabehe kago, minime lo manda bialu berene.
MAR 2:8 Ti ani mitangi bialu bereago hondowa Yasuhanda tihondo lalu, Tígua ogonidagua manda bialu bedamigoni agibe.
MAR 2:9 I̱na agali kuduguhe biagohondo, Í̠na ko birigo domai haya, lolenego taibidabe be, Heyalu í̠naga tamunguru mo yalu ibaga bu ha, lolenego taibidabe.
MAR 2:10 Anigo Agali Hole Ibiyagome dindini howa wali agalime ko biyaru domo waholene hongo yu kago tí manda bilimulo walia haro, lene. Ani lowa ibugua agali kuduguhe biagohondo lalu,
MAR 2:11 Í̠hondo larogo, Heyuwa í̠naga tamunguru mo yalu andaga pamia, lene.
MAR 2:12 Ani layagola wali agali bu hearu handai heaore ibu heyalu ibunaga tamunguru mo yalu abale tagira pene. Ani biyagola ti bibahende hearume mogo lai howa Ngode Datagaliwabe mini yaraga halu lalu, O biragoni ale ina nahendene kamagoni, lai hene.
MAR 2:13 Yasu ibu iba Galili timbuniore bereagoha lone pene. Piyagola wali agali bibahende hearume Yasu hearia íbu ngoai hayagola ibugua bi mana lawai halu hene.
MAR 2:14 Ani lawai halu pialu hearia agali mbira muni dagisi ngi laga heago Alibiasa igini Libai ibu muni dagisi miaga andaha berearia de hondowa Yasuhanda lalu, I̱ porodagua talima íbu, lene. Ani layagola Libai ibu heyalu Yasu talima pene.
MAR 2:15 Ani bialu mani Yasu ibu Libai andaga tomo nalu berene. Agali dewa muni dagisi ngi laga hearubi mana ko biaga hearubi ti Yasu piyadagua haruru puwa Yasubi ibunaga talima piaga biarubi tomo nalu berearia ibalu biraganeni biruyu pene.
MAR 2:16 Mana lowinigo lawai haga Perisi aria maru hearume Yasu ibu mana ko biaga biarubi muni dagisi ngi laga biarubi heba mandagi tomo mandagi nalu bereago hondowa tigua Yasunaga talima piaga biaruhondo lalu, Yasu ibu mana ko biaga karubi muni dagisi ngi laga karubi heba tomo mandagi nalu bedago aginagadabe, lene.
MAR 2:17 Ani layago hale howa Yasuhanda ladai bialu lalu, Wali agali warago nabe karu anogodame ti biamogo bilo ibu karia napiaga. Warago bene karu hangu anogodame ti biamogo bilo ibu karia piaga. I̱ ibirugo wali agali bayale karu olole ndo wali agali ko biaga karu olole ibirugoni, lene.
MAR 2:18 Tomo nane hagane horo hayagola baboraya biaga Yonenaga talima piaga biarubi Perisi agali hearubi ti tomo nane hene. Wali agali tigua Yasu hearia ibuwa ibuhondo lalu, Yonenaga talima piaga karubi Perisi agalinaga talima piaga biarubi tomo nane kago. Í̠naga talima piaga karume tomo nane holenengi nalu kago irane agibe, lene.
MAR 2:19 Ani layagola Yasuhanda tihondo ladai bialu lalu, Agali mbirame wali dabu biragola wali agali tomo nole ngoai hararume tomo nane holene nga loleberamibe. Ani naloleberamiore. Agali wali dabu birago ibu ti heba mandagi biruwa tomo nolene nga.
MAR 2:20 Anigo horo mbira ibulebirago ibiragola agali wali dabu biaga biago ti kagoria howa marume ibu haru poragola ti tomo nane holene wulebira, lene.
MAR 2:21 Ani lowa Yasuhanda bi mende lalu, Mbiralime aga gobani aga gahengeme lebu para nahaga. Ani biyagua aga gahengeme aga gobago budulebira. Ani buwa ala budayadagua ndo buda timbu holebira.
MAR 2:22 Ogonidagua dege mbiralime waini iba gahenge bedago waini iba hambu wiaga be meme dongoneme wabini bamba taweha odo bere nalaga. Mbiralime odo berelayagua waini ibame meme dongoneme wabini biago lere lalu waini iba piai halu biagobi ko holebira. Ani buligo waini iba gahenge bedago meme dongoneme wabini biago gahengeha odo berelolene nga, lene.
MAR 2:23 Sabada horo mbirungi Yasu ibunaga talima piaga biaru heba ladi ale mini widi teha pialu hene. Pialu howa ibunaga talima piaga biarume widi biagonaga lini deago do nama pene.
MAR 2:24 Ani bialu hearia Perisi agali hearu tigua hondowa Yasuhondo lalu, Inanaga Mana lowini ngago Sabada horongi nabulene winigo í̠naga talima piaga biarume mana puguwa bialu karuni handa, lene.
MAR 2:25 Ani layagola Yasuhanda tihondo ladai bialu lalu, Debidibi agali maru ibu heba henerubi ti tomo nolene nawiyagola garibi lowa Debidihanda bini gilibu ngago tí nahende kamibe.
MAR 2:26 Agali mini Abaiada ibu loma binigo mo miaga haguane timbuni henego heangi Debidihanda Ngode Datagaliwabenaga andaha anda puwa mberedi Ngode Datagaliwabehondo loma bialu mini wiago nole mini. Mberedi ogoni marume nolene nawi loma binigo mo miaga agali degeme naga winigo Debidi ibu mo nalu agali ibu heba hayarubi nelo mo mini, lene.
MAR 2:27 Ani lowa Yasuhanda lamaro bialu lalu, Ngode Datagaliwabehanda wali agali bayale helonaga Sabada horo wini. Sabada horo bayale wilonaga wali agali wabini ndo.
MAR 2:28 Ani binigo Agali Hole Ibiyago ibu Sabada horonaga Anduanebi ka, lalu lamini.
MAR 3:1 Yasu ibu ngoai hagane andaha halu mende anda pene. Anda ogoniha agali mbira gi mbariane kohe hene.
MAR 3:2 Wali agali maru hearume Yasuhondo, Í̠na koore biri, loa howa tigua Yasuhanda Sabada horongi agali biago mo dabi harabe hondole ti ha para howa hondo hene.
MAR 3:3 Yasuhanda agali gi kohe biagohondo lalu, Heyalu i̱ kogoria íbu, lene.
MAR 3:4 Ani lowa ibugua tihondo lalu, Sabada horongi inanaga Mana lowinigome bulene nabulenebi agi lo ngabe. Biamogo bulene lo ngabe be mo ko holene lo ngabe. Wali agali bayale helo pele mulene lo ngabe be homelo bolene lo ngabe, lene. Ani layagola tigua ladai nabi hene.
MAR 3:5 Yasu ibugua wali agali biaru handalu hearia bu mini giambe ho heago hondowa keba halu agali biagohondo lalu, Í̠naga gi mbariane dogola, lene. Ani layagola agali biagome ibunaga gi mbariane dogo layaore bayale ho dai bini.
MAR 3:6 Ani biyago hondowa Perisi agali hearume tagira pialu Herodo aria hearia puwa, Yasu homelo agi bimabe, lalu lo manda bialu hene.
MAR 3:7 Yasu ibunaga talima piaga biaru heba ti o hayagoria wahalu Galili iba timbuniore bereagoria pene. Ti piyadagua wali agali dewaore Galili howabi Yudia howabi
MAR 3:8 Yarusaleme howabi Idumia howabi iba Yodana edeyagi howabi Taia howabi Saidono howabi dindi uruniha howa wali agali au lole labe nahe Yasuhanda biyago hale howa haruru puwa ibu hearia íbu ngoai hene.
MAR 3:9 Ani ngoai hayagola ibugua wali agali dewa mo dabi hayago hondowa waragobe dewa hearume Yasu ela hole garere bima ibu hearia ibini. Ani biyagola ibiyarume ibu ho gengedoligo lowa Yasuhanda ibunaga talima piaga biaruhondo lalu, Iba talu kaware yalu íbu widaba, lene.
MAR 3:11 Ani biyagola wali agali dama daragahe hearume Yasu de hondowa ti ibu geha bulu paluwa ga̱ lalu, Í̠ Ngode Datagaliwabe Igini kegoni, lene.
MAR 3:12 Ani layagola ibugua dama biaruhondo bi hongo howa lalu, I̱ Ngode Datagaliwabe Igini kogonigo maru nalamilimu, lene.
MAR 3:13 Yasuhanda dindi hombene wiagoria iraga howa agali maru ibuni hamelearu olayagola ti ibu hearia ibini.
MAR 3:14 Ibiyagola ibugua agali homberiali (12) dabowa ogoningi tinaga mini abosolo wini. Ani buwa ibugua tihondo lalu, I̱na tí i̱ heba mandagi hami̱ya dabarugo maha i̱na tígua mana lamule pudaba lolebero.
MAR 3:15 Ani larogola tígua dama daraga karu wara tagi holenenaga hongo karulo holeberami, lene.
MAR 3:16 Yasuhanda agali homberia abosolo helo dabenedaru mini uru Saimono Yasuhanda ibu mini mende Pida winigo ibubi
MAR 3:17 Sebedi igini Yamese Yonela henego Yasuhanda libu mini mende Boaneyisi inanaga bi lalu Hari Kulu igini winigo libubi
MAR 3:18 Andurubi Pilibibi Badolomiubi Madiubi Tomasabi Alibiasa igini Yamesebi Tadiasabi Saimono ibu ka̱i̱ mini Paidoro ibubi
MAR 3:19 Yudasa Isagariodo ibu Yasu nde lenego ibubi homberiali (12) uruni Yasuhanda dabene. Ani dabai halu Yasu ibu andaga pene.
MAR 3:20 Wali agali dewaore lone ngoai hayagola Yasubi ibunaga talima piaga biarubi ti tomo nolene henge nawi hene.
MAR 3:21 Wali agali hearume, Yasu lulu kago, layagola hale howa ibu dameneme Yasu damu pene.
MAR 3:22 Yarusalemeni howa Mana lowinigo lawai haga ibiyarume lalu, Dama mini Heyolabe Yasunaga gubaliniha daraga ka, lalu, Yasu ibu dama bibahende karunaga haguane hongoni howa dama karu wara tagi haga ka, lene.
MAR 3:23 Ani layagola Yasuhanda, Ibidaba, lowa tihondo bi yobage lalu, Dama Heyolabeme ibuni agua wara tagi habehe kabe.
MAR 3:24 Dindi mbiraoreni howa tini tale bigibigi bu howa wai bia a̱i̱ na̱i̱ biyagua hangu hangu haga haga bu holebira.
MAR 3:25 Hameigini mbiraoreme tini tale bigibigi bu howa wai biyagua hangu hangu haga haga bu holebira.
MAR 3:26 Dama Heyolabeme haru kagoria tale bigibigi bu howa ti wai biyagua bia ho wiaabo habe nahe hangu hangu haga haga bu howa ereba hai holebira, lene.
MAR 3:27 Mbiralime agali hongohe kagonaga andaha ibunaga mbirale ngaru mo kayu bule pobe nahe holebira. Ibugua agali hongohe biago ala gi gebi minu huba bu wiyagua nde mani ibunaga andaha mbirale ngaru mo kayu bule pobehe holebira, lene.
MAR 3:28 Ani lowa Yasuhanda lalu, Tíhondo heneneore larogo. Wali agalime ko bibahende birarubi mege bialu bi ko tara tara lararubi domo wahabehe holebira.
MAR 3:29 Mbiralime Ngode Datagaliwabe Dinini mege biyagua domo wa nahe ibunaga ko ogoni ibuniha wiaaboboore wulebira, lene.
MAR 3:30 Tigua, Yasu gubaliniha dama daraga ka, layagola Yasuhanda bi ogoni lene.
MAR 3:31 Yasu ibu ai̱ya hamenerume tagirani íbu howa lalu, Yasu tagira ibilo lamidaba, lene.
MAR 3:32 Ani layagola wali agali Yasu heba biru mabu bu berearume Yasuhondo lalu, Í̠ ai̱ya hamene mbalinirume tagirani íbu howa í̠ olara, lalu lamini.
MAR 3:33 Ani lamiyagola ibugua ladai bialu lalu, I̱ ai̱ya hameneru ai imabe, lene.
MAR 3:34 Ani lowa ibugua wali agali biru mabu biaru handa de̱le̱ buwa lalu, De handadaba. I̱ ai̱ya hameneru o bedaruni, lene.
MAR 3:35 Ani lowa lalu, Ngode Datagaliwabehanda hame ledadagua biaga karu ti i̱ hamenebi i̱ mbalinibi i̱ ai̱yabi kagoni, lene.
MAR 4:1 Yasuhanda iba Galili bereago angeni howa bi mana lone lawai halu hene. Wali agali dewaore íbu ngoai howa ibu bereagoria ho mabu biyagola ibu iba taluni ubade ho biralu wali agali ti iba angeni hene.
MAR 4:2 Yasuhanda bi yobage lowa mana dewaore tihondo lawai halu lalu,
MAR 4:3 Hale hadaba. Agali mbirame ladi ale mini widi egene mabuni ba a̱i̱ na̱i̱ bima pene.
MAR 4:4 Ba a̱i̱ na̱i̱ bima piyagola egene maru hariga teneni ibira ho wiaria egame ibuwa mo nai hene.
MAR 4:5 Egene maru ege to̱le̱ dindi mbaliahe wiagoriani ibira hayaru abale anda halu pini dindiha puabo naheyagola yuni emene doai lalu tagira ibiyago ni daba hayagola gau lai hene.
MAR 4:7 Ani buwa egene maru dindi pu kuabu anihe pini gandula anda hene wiagoriani ibira hayaru ani heba mandagi anda hamaga ho gengedalu oge hayagola lini nade hene.
MAR 4:8 Egene maru dindi bayale wiagoria ibira hayaru anda halu lini dewa dene. Irane marume lini pira tebira (30) dene. Irane marume pira waragaria (60) dene. Irane marume pira pira (100) dene, lene.
MAR 4:9 Ani lowa Yasuhanda lamaro bialu lalu, Tí hale kamiyagua nde hale haramine, lene.
MAR 4:10 Yasuhanda bi ogoni layagola howa hale hayaru maru ibunaga talima piaga homberiali biaru heba Yasu ibu hangu hearia ibuwa tigua ibuhondo lalu, Bi yobage lalu larigo irane aginaga lalu laribe, lene.
MAR 4:11 Yasuhanda tihondo ladai bialu lalu, Ngode Datagaliwabehanda Handame Ho Kagonaga manda bulene ala pani nahe ngelenego áyu tí manda bilimulo langero. Wali agali tagira karuhondo bi yobage hangu lamialu kogo
MAR 4:12 irane ogo, Tigua deme handaya haabo hara tiraga galone handa walia naholebira. Tigua haleme hale hara tiraga minime manda nabulebira. Tigua handa walia ha minime manda bia ani bidale tinaga mini beregedo kale. Ani beregedale tigua ko biyago Ngode Datagaliwabehanda domo wa kale, lene.
MAR 4:13 Yasuhanda tihondo lalu, Bi yobage larugo galone manda nabi kamibe. Manda nabi kamiyagua nde bi yobage bibahende larogo agua manda buleberamibe.
MAR 4:14 Agali biagome tomo egene polayadagua Ngode Datagaliwabenaga bi mana polaga ka.
MAR 4:15 Wali agali maru tomo egene harigani ibira hayago ale karume bi mana hale haragola dama Heyolabeme abale ibalu bi mana bu habaneha polayago mo yalu piaga.
MAR 4:16 Ogonidagua wali agali maru tomo egene ege to̱le̱ dindi mbaliaheni ibira hayago ale karume bi mana hale howa turu halu mo yaga.
MAR 4:17 Ani buwa tinaga bu habaneha anda puabo habe nahedagola ti ha wiaabo nahaga. Ani buwa marume tigua bi mana mo yayago hondowa ti mo tandaga haragolabi mo ko holene íbu ngagolabi ti abaleore yu wahalu piaga.
MAR 4:18 Wali agali maru tomo egene dindi anihe pini gandula anda hene wiagoria ibira hayago ale karume bi mana hale howa
MAR 4:19 dindini holene mitangi bialu mini tumutumu wu holenebi dindinaga mbirale dewa ngaru minime wua hai holenebi mbirale tara tara ngago dimagoli holenebi urunime bi mana hale hayago ho gengedalu oge haragola lini nadaga ka.
MAR 4:20 Anigo wali agali maru tomo egene dindi bayaleni ibira hayago ale karume bi mana hale howa mo yai halu tiha lini pira tebira (30) da pira waragaria (60) da pira pira (100) daga bigi biaga ka, lene.
MAR 4:21 Ani lowa Yasuhanda tihondo lalu, Mbiralime lamu hale delowa ndisime dambi ho wiagabe be paliagane dagia andaneha wia do hagabe. Lamu hale delowa dagia daligani wiaga ndobe.
MAR 4:22 Mbirale wia do kago mo pani hai halu mbirale yi ho ngago mo pani ho ngelolebira.
MAR 4:23 Tí hale kamiyagua nde hale haramine, lene.
MAR 4:24 Ibugua laabo halu howa tihondo lalu, Mana hale haramigo bayuwa mitangi bilimu. Wali agali marume birago tígua hondowa dabaramilidagua Ngode Datagaliwabehanda tígua beramigobi hongo howa dabolebira.
MAR 4:25 Mbiralime mbirale mbira yu kagohondo Ngode Datagaliwabehanda dewa mo tago halu mulebira. Mendealime mbirale mbira nayi howa emeneore yidogoni karulape dege yidolo kago Ngode Datagaliwabehanda yamulebira, lene.
MAR 4:26 Yasuhanda laabo halu lalu, Ngode Datagaliwabehanda Handame Ho Kagoria ogo ale nga. Agali mbirame tomo egene mabuni polalu howa
MAR 4:27 mbiraga pali egerebagi heya bigi bialu ka tambu tomo egene polayago doai lalu anda haga. Agua bialu anda harabe ibu manda nabi haga.
MAR 4:28 Tomo egene dindiha howa anda harago yuni ala anda halu mani pabua balu lini daga.
MAR 4:29 Ani buwa maniore boga bialu ladi ale mini widi lini dolene tu haragola agalime ayu tibu wangobime gandulaga, lene.
MAR 4:30 Yasuhanda ogonidagua dege lalu, Ngode Datagaliwabehanda Handame Ho Kagoria agi ale lamabe. Bi yobage irane aginaga lalu garea lo lamabe.
MAR 4:31 Ngode Datagaliwabehanda Handame Ho Kagoria ogo ale nga. Agalime ira masada egene mbira emene koore ngago mabuni hangaragola
MAR 4:32 egene ogoni anda halu maru kagobi ndo ibu timbuniore anda ho haga. Ani anda howa magane timbuni kagola egame gumbaha tinaga anda biaga, lene.
MAR 4:33 Yasuhanda wali agali hearuhondo bi mana lamialu ti manda bua kadagua manda bilo bi yobage hangu dewa ogonidagua lalu lamialu hene.
MAR 4:34 Ibugua tihondo mana lamialu bi yobage dege lalu lawai hene. Yasubi ibunaga talima piaga biarubi tini hangu howa ibugua bi yobage layarunaga irane bibahende lamiai hene.
MAR 4:35 Horo ogoningi dege ni paliyagola Yasuhanda ibunaga talima piaga biaruhondo lalu, Iba timbuniore domalu ange edeyagi ma, lene.
MAR 4:36 Ani lowa wali agali dewa bu hearu helalu iba talu Yasu pu birayagoria ibunaga talima piaga biarubi ti haru biralu pene. Iba talu marubi ogoriani wini. Wali agali maru iba talu urunini biralu Yasu piyadagua haruru pene.
MAR 4:37 Pialu hearia puyabu timbuni hongo howa pulayagola iba yaribu buwa iba talu guaneha iba anda ibini. Iba anda ibuwa talu to̱lole bini.
MAR 4:38 Ani biyagola Yasu ibu iba talu ereneha haguanda howa palia hondo hearia tigua ibu mo barila halu lalu, Lawai haga-o heya. Ina homaramago nahende padebe, lene.
MAR 4:39 Ani layagola Yasuhanda heyuwa puyabuhondo, Pu nalabe, lalu ibahondobi, Yaribu nabibe, lene. Ani layaore puyabu pu nale ereba halu ibabi yaribu nabi nimu lowa bayaleore wini.
MAR 4:40 Ibugua tihondo lalu, Aginaga gi ho kamibe. Ngode Datagaliwabehondo mini mbiraore nawi kamibe, lene.
MAR 4:41 Ani layagola tigua gi timbuni howa tini bi lagalaga bialu lalu, Puyabubi ibabi ibugua bi layago hale hagadago agali ogoni ibu aidabe, lalu hene.
MAR 5:1 Yasubi ibunaga talima piaga biarubi ti iba Galili ange edeyagi pialu Gerasa dindi anda pene.
MAR 5:2 Yasu ibu iba talu ngelalu pialu hearia agali mbira dama daragahe egeanda homali wiaruha henego ibalu hearia lola hene.
MAR 5:3 Agali biago ibu homali hearuha haabo haga hene. Mbiralime ibunaga gi gebi seni pume minu huba bibe nahe hene.
MAR 5:4 Tigua ibu gi gebi seni pume huba bu wiaabo hayagola ibugua seni pu tongo laabo haga hene. Ani henego tigua ibu mo tabila habe naheyagola helene.
MAR 5:5 Agali ogoni ibu horombe mbiragabi homali kagoriabi dindi hombenehabi ibaga bialu ga̱ lalu areme ibunaga tingini podalu haga hene.
MAR 5:6 Ani bialu hagago Yasu kaundiani ibiyaria hondowa ibu gerai lalu Yasu hearia ibuwa ge duli hanga howa bulu palene.
MAR 5:7 Ani buwa bi dalimu ga̱ lowa lalu, Ngode Datagaliwabe Daligaorene Daliga Kagonaga Igini Yasu í̠na i̱hondo agi bule ibiribe. Ngode Datagaliwabe mitangi bialu i̱hondo pani nangibe, lene.
MAR 5:8 Bi layago irane Yasuhanda damahondo, Tagira pu, lalu heaore ani ladai bini.
MAR 5:9 Yasuhanda ibuhondo lalu, Í̠ mini aibe, lene. Ibugua ladai bialu lalu, I̱ mini Dewa ina dewali kamago, lene.
MAR 5:10 Ani lowa ibugua Yasuhondo hongo howa laabo halu lalu, Ina dindi ogo wahalu pudaba nalabe, lene.
MAR 5:11 Nogo dewaore bare kawareni pi̱a̱ nalu bu hene.
MAR 5:12 Anigo dama daraga ho hayarume Yasuhondo hongo howa lalu, Ina nogo na̱i̱ karuha anda pu holoma̱ya pudaba la, lalu lai hene.
MAR 5:13 Yasuhanda, Ani bidaba, layagola agali helalu dama biarume tagira pialu nogo dewa daosini kira agima (2,000) hayaruha anda pene. Anda piyagola nogo bibahende hayaru bareni dalipebe bialu dai lo yalu pialu iba timbuniore bereagoha anda piai hayagola ibame nogo biaru nai hene.
MAR 5:14 Ani biyagola nogo haru haga hearume gerai lalu pialu tanohabi dindi anda bu wiaruhabi lopebe bima pene. O layago hale howa wali agali bu hearume agi biyadabe hondole pene.
MAR 5:15 Ti Yasu hearia ibuwa agali ala dama dewa daragahe hayago aga karulowa ibu mini bayale wia dai bu bereago de hondowa ti bibahende gi hai hene.
MAR 5:16 Maru handayarume wali agali íbu hearu hale helo dama dewa wara tagi hayarubi nogo ibaha puwa homayarubi te lalu lamiai hene.
MAR 5:17 Ani lamiyagola tigua Yasuhondo lalu, Í̠ inanaga dindi ogoriani nahe wahalu pu, lene.
MAR 5:18 Ogonidagua laya handala Yasu ibu iba taluni birule biyaria agali ala dama dewa daragahe hayagome ibuhondo lalu, Í̠ poredagua mba, lene.
MAR 5:19 Ani layagola Yasuhanda agali biago ibuhondo lalu, I̱ heba pobe nahedago Anduane Homogohanda í̠hondo biyagobi dara hayagobi í̠ damene lamule andaga pu, lene.
MAR 5:20 Ani layagola agali biagome Tano Pira wiaruha lamima ibaga bialu Yasuhanda ibuhondo biyago wali agali hearuhondo lamiai hayagola ti minime mogo lai hene.
MAR 5:21 Yasu iba taluni biralu iba timbuniore domalu dai buwa ibu iba angeni hearia wali agali dewa íbu ngoai hene.
MAR 5:22 Ani ngoai hayagola ngoai hagane anda hondo haga mbira mini Yairasa ibuwa Yasu de handalu ibu geha bulu palialu
MAR 5:23 hongo howa ibuhondo lalu, I̱ wane emene mbira homolene kaware ngago ibu nahome dabi helo í̠naga gime ela habelo mba, lene.
MAR 5:24 Ani lowa libu haru pialu hearia wali agali dewa hearu Yasu haruru pialu gengeda tago bima pene.
MAR 5:25 Pialu hearia wali mbira mali pira mbirani kira (12) warago taraore baabo haga berene.
MAR 5:26 Ibugua anogoda agali dewaoreme handalu ibunaga muni yolo bialu biyagola miai howa dabi nahe warago íbu timbuore hene.
MAR 5:27 Ani biruwa Yasuhanda mo dabi haga ka layago hale howa ibu wali agali Yasu haruru piyaru heba pene.
MAR 5:28 Ala ibuni hangu lo manda bialu, I̱na Yasunaga agani ela haruyagua dabi holebero, manda bini.
MAR 5:29 Ibugua Yasunaga agani ela hayagola warago bayago abaleore ereba halu ibunaga tingini dabi haiore hayada manda bini.
MAR 5:30 Anidagua biyagola Yasu ibunaga mo dabi haga hongo piayuago manda buwa ibu beregedalu lalu, I̱naga agani ela haya aiwabe, lene.
MAR 5:31 Ani layagola ibunaga talima piaga biarume ibuhondo lalu, Wali agali dewali gengeda tago bu kamago de hendedego. Aiwa ela hayabe larigo aginaga laribe, lene.
MAR 5:32 Ani layagola Yasuhanda aiwa ela hayabe hondole handa de̱le̱ bini.
MAR 5:33 Wali biagome warago dabi hayago manda buwa gi howa duru lalu Yasu hearia ibini. Ibuwa ibu geha bulu paluwa bibahende ibuni biyago lamiai hene.
MAR 5:34 Ani lamiai hayagola Yasuhanda ibuhondo lalu, I̱ wane-o í̠na Ngode Datagaliwabehondo mini mbiraore wirigome í̠ mo dabi hayago ai warago lone naboleberego mo palia holene karulo yalu pu, lene.
MAR 5:35 Yasuhanda wali biagohondo bi lamialu heaore agali maru hondo haga Yairasa ibunaga andaga howa ibini. Ibuwa tigua lalu, Í̠ wane biago tongo lo miyago ai Lawai Haga kago la pugu nabibe, lene.
MAR 5:36 Tigua bi ani layagola hale howa Yasuhanda hondo haga Yairasahondo lalu, Gi nahe Ngode Datagaliwabehondo mini mbiraore wibe, lene.
MAR 5:37 Ani lowa wali agali maru hearu helalu Yasuhanda Pida Yamese ibu hamene Yonema tihondo, Ina hangu hondo maibidaba, lene.
MAR 5:38 Hondo haga agali biagonaga andaga anda pialu hearia wali agali dewa ngoai ho hearume bi lagalaga bialu dugu timbuni bialu hearia Yasu ibu handa walia hene.
MAR 5:39 Handa walia howa ibu anda tamuha puwa tihondo lalu, Tí aginaga bi laga bialu dugu timbuni bialu kamibe. Wandari emene ogoni ibu tongolo mia nabi palia dege bida, lene.
MAR 5:40 Ani layagola tigua Yasuhondo oba halu hene. Ani biyagola ibugua ti bibahende wara tagi howa wandari ai̱ya ababi agali tebira biarubi ti haru hobane mbiraha wandari moa heagoria pene.
MAR 5:41 Yasuhanda wandari biago gini yamuwa ibuhondo lalu, Talita kumi, inanaga bi lalu, Wandari emene heya laro, lene.
MAR 5:42 Ani layaore wandari biago heyalu ibaga bini. Wandari ogoni ibu mali pira mbirani kira (12) berene. Ani biyagola wali agali hearume handawa bialu mogo timbuniore lai hene.
MAR 5:43 Yasuhanda tihondo hongo howa lalu, O birudagoni wali agali mbirali nalamilimu, lowa lalu, Wandari ogoni tomo nelo midaba, lene.
MAR 6:1 Yasu dindi ogoni wahalu ibunaga talima piaga biaru heba ibunaga dindiha dai bini.
MAR 6:2 Sabada horo hayangi Yasu ngoai hagane andaha anda puwa ibugua mana lawai halu hene. Ibugua mana lawai hayago hale howa wali agali dewa hearume mini mogo lai howa lalu, Bi larago aiwa laminidabe. Ibu mini timbuni ngago aiwa mo wia henedabe. Ibugua biabe agalime nabiagane ale bialu kago agidabe.
MAR 6:3 Ibu anda biabe biaga agali Meri igini ndo kabe. Ibu Yamese Yosese Yudasa Saimonoma tinaga hamene ndo kabe. Ibunaga mbalibuniru ina heba o bedamagoni ndobe, lene. Tigua ani lowa ibu handabe manga halu hame nale hene.
MAR 6:4 Ani biyagola Yasuhanda tihondo lalu, Ngode Datagaliwabe bi mana latagi haga kagome bi laragola dindi bibahendeni wali agali karu hale haga ka. Ibuni dindini howa bi mana lamiragola ibu damenebi hameiginibi ti degeme hale nahaga ka, lene.
MAR 6:5 Ibugua biabe agalime nabiagane ale biyagonidagua dindi ogoriani nabibehe hene. Ibugua wali agali mbira mbira hangu warago bayago gime ela halu mo dabi hene.
MAR 6:6 Ani biyago hondowa ti mini mbiraore nawiyagola ibu mogo timbuni lo hene. Ani buwa ibu wali agali bu hearuha bi mana lawai hama ibaga bialu hene.
MAR 6:7 Yasuhanda ibunaga talima piaga homberiali (12) biaru olalu, Mo mogo bidaba, lowa ibiyagola tihondo lalu, Tí purogo lalu kirali kirali pugu pugu bidaba, lene. Ani lalu dama daraga karu tigua wara tagi helo ibugua tihondo hongo holene mini.
MAR 6:8 Ibugua tihondo lalu, Tí pialu howa dabudabu mberedibi muni ngi lowa mo hanagane nubi munibi mbira nahene pilimu. Halimbubi ge subi aga mbira hangubi uruni karulalu pilimu, lene.
MAR 6:10 Ibugua tihondo laabo halu, Dindi mbira anda poramigoria anda mbira paluene henge ngiragoria dege paliaabo halimu. Wahalu poramingi wahole.
MAR 6:11 Wali agali dindi mbirani karume, Naibidababe, lowa tínaga bi hale habe manga hayagua dindi ogoni wahalu pilimu. Wahalu pialu tigua biyagoni walia hole tínaga geni abalu para kago taulo wahalu pilimu, lene.
MAR 6:12 Ani laya handala agali homberiali (12) biaru ti purogo lowa wali agali hearuhondo, Tí bu mini beregedo halimu, lalu lamima pene.
MAR 6:13 Tigua ani lamima pialu howa dama dewa daraga hearu wara tagi haga bima pene. Warago bo wiarubi tigua olibe lininaga weli odo wiyagola dabi haga bini.
MAR 6:14 Wali agalime Yasu mini lo yogo lai hayago Kini Herodo hale hene. Marume lalu, Baboraya biaga Yone ala homayago lone ho dai bu howa agalime nabiagane ale bialu kagoni, lene.
MAR 6:15 Marume lalu, Ibu Elaya ka, lene. Ani layagola marume lalu, Ibu Ngode Datagaliwabe bi mana latagi hagaru aria mbira ka, lene.
MAR 6:16 Herodohanda bi ogoni hale howa lalu, Yone i̱na ayu tibume ma pugu waharugo lone dai bu haruago, lene.
MAR 6:17 Ala Herodohanda agali hearuhondo lalu, Yone minule pudaba, layagola tigua ibu minuwa garabaya andaha ege pume dariba hene. Herodohanda ibu one Herodiasa turu helo ani bini. Herodiasa ibu ala Herodo hamene Pilibi one berenego mani Herodo ibu wali ogoni dabu bini.
MAR 6:18 Ani biyagola Yonehanda Herodohondo lalu, Í̠ hamene one heba kego nabulene ngago bialu kegoni, lene.
MAR 6:19 Ani layagola Herodiasahanda Yonehondo keba halu ibu homelo boa howa agua boabe toba ho berene.
MAR 6:20 Ani bu bereagola Herodohanda Yone ibu agali bayalebi bu mini tigabibi kago manda buwa gi halu Yone nabelo mamage hene. Yonehanda bi layago Herodo hale hoa hene. Hale howa mini tumu tumu ho hene.
MAR 6:21 Horo Herodo ibu taba henenengi hayagola gabumane haru haga hearubi ami haru haga hearubi Galili agali haguane hearubi ibugua tihondo lalu, Tomo nami̱ya ngoai halimu, lene. Ani layagola howa tomo dawayangi Herodiasahanda Yone bolene henge wiaria handa walia hene.
MAR 6:22 Horo ogoningi Herodiasa wane ibuwa mali lini. Ibugua mali liyagola hondowa Herodobi agali biarubi ti turu hai hene. Turu hai hayagola Herodohanda wandari biagohondo lalu, Mali lirigonaga mbirale mbira hame larego ngi lareyagua nde nguliya, lene.
MAR 6:23 Ibugua wandari biagohondo wanakui minalu lalu, Mbirale ngi larego i̱naga dindi timbuni handame haruligo hanuni tu wa ngi lariyaguabi nguliya, lene.
MAR 6:24 Ani layagola wandari biagome hale halu tagira pialu ibu ai̱yahondo hale howa lalu, Agi ngi loabe, lene. Ani layagola ibu ai̱yahanda lalu, Baboraya biaga Yone haguane pugu ngi labe, lene.
MAR 6:25 Ani layagola wandari biagome Herodo hearia gerai lalu dai buwa ibuhondo lalu, Baboraya biaga Yonenaga haguane gamiangini pugu wuwa áyu ngibelo hame lo ko, lene.
MAR 6:26 Ani layagola hale howa Herodo ibu dara timbuni hene. Ibugua agali tomo nole ibiyaru hendeaore ala wanakui minalu bi layago mitangi buwa bi wahabe nahe manda bini.
MAR 6:27 Ani manda buwa Herodohanda mamage haga mbirahondo lalu, Yonenaga ma ayu tibume puguwa haguane yalu dai bule pu, lene.
MAR 6:28 Ani layagola ibugua garabaya andaha puwa Yonenaga ma tibume puguwa haguane gamiangini wialu yalu dai buwa wandari biagohondo mini. Miyagola wandari biagome ibu ai̱yahondo mini.
MAR 6:29 Ogonidagua biya layago hale howa Yonenaga talima piaga hearu ibunaga tingini mo puwa ege andaha hora hene.
MAR 6:30 Abosolo biaru Yasu hearia dai buwa tigua biyagobi mana lawai hayagobi bibahende lamiai hene.
MAR 6:31 Wali agali dewa Yasu hearia pu íbu biaabo hayagola ti tomo nolene henge nawiyagola Yasuhanda tihondo lalu, Wali agali naheha ina hangu ha̱lo hami̱ya ma, lene.
MAR 6:32 Ani lowa ti iba taluni biralu wali agali naheha pene.
MAR 6:33 Ti wene pialu heaore wali agali dewalime Yasu porago manda bini. Ani manda buwa ti dindi tara tara howa dindi dindi gerai lalu Yasubi ibunaga talima piaga biarubi ti polebiyaria bamba halu anda pene.
MAR 6:34 Ani biyagola iba talu angeni ibuwa Yasu ibugua iba taluni howa uba ede halu hearia wali agali dewaore uruni bu hearu de hendene. Ti nogo sibi haru hagane nahe howa hagadagua heagola handalu dara holene ibunaga gubaliniha to̱lai howa ibugua bi mana dewa ti lawai halu hene.
MAR 6:35 Horo ogoni alendo hayagola Yasunaga talima piaga biaru Yasu hearia ibuwa ibuhondo lalu, Ai alendo hayadago ina dindi koni tomo nawini kamago
MAR 6:36 wali agali o karuni pugu pugu bialu tini tomo yolo mule mabuni anda karuhabi tano emene karuhabi taya bima pudaba la, lene.
MAR 6:37 Ani layagola ibugua tihondo ladai bialu lalu, Ti tomo nelo tínime midaba, lene. Ani layagola tigua ibuhondo lalu, Muni kina handari kirame (200) mberedi ti nelo yolo bule poramabe, lene.
MAR 6:38 Ibugua tihondo lalu, Mberedi agira henedamibe handadaba, lene. Hondowa tigua ibuhondo lalu, Mberedi duriabi wena kirabi heneda, lene.
MAR 6:39 Ani layagola ibugua tihondo lalu, Wali agali karu tanini bira dugu bu biradaba ladaba, lene.
MAR 6:40 Ani layadagua layagola ti maru handari mbira (100) bira dugu bialu maru pira duria (50) bira dugu bialu birai hene.
MAR 6:41 Ani bereagola ibugua mberedi duria biarubi wena kira biago labobi gime mo yuwa hari daligaha handa daga halu Ngode Datagaliwabehondo ka̱i̱ lowa mberedi ibunaga talima piaga biarume wali agalihondo milo gai bu baga bu mini. Ani buwa ibugua wena kira biago podo baga buwa ti bibahende tale bu mini.
MAR 6:42 Wali agali bibahende bu hearume no karula pialu nene.
MAR 6:43 Ani biyagola ibunaga talima piaga biarume mberedi wenabi no ibira hayago mialu nu pira mbirani kira (12) hono to̱lai hene.
MAR 6:44 Mberedi wenabi nayaru agali hangu daga laa̱i̱ halu daosini duria (5,000) hene.
MAR 6:45 Yasuhanda ibunaga talima piaga biaruhondo lalu, Tí iba taluni biralu iba ange edeyagi Bedesaida dindi bamba halu pudaba, lene. Ani lalu wali agalihondo, Tí andaga purogo ladaba, lowa
MAR 6:46 ibu hombene mbira wiagoria Ngode Datagaliwabela bi lole pene.
MAR 6:47 Yasu ibu hangu dindi o biagoria hea handala ibunaga talima piaga biaru iba taluni biralu iba hanuni pialu hearia aruma hene.
MAR 6:48 Ani aruma hayagola puyabu hongo howa pu ladai biyagola tigua iba talu tanguiyago nakarulapeyagola Yasu ibu de hendene. Muna biyagola ibu ti bereagoria ibule ibani ibini. Ibu ti berelalu bolangua holebiyaria
MAR 6:49 tigua Yasu de hondowa homene dininibe toba howa ga̱ lene.
MAR 6:50 Ti bibahendeme handai halu gi timbuni hayago hondowa ibugua tihondo lalu, I̱ Yasu kogonigo gi nahe hongo howa halimu, lene.
MAR 6:51 Ibu ti haru iba taluha anda íbu birayagola puyabu pu nale ereba hene. Ani biyagola ti minime mogo timbuni lene.
MAR 6:52 Tinaga bu mini giambe howa Yasuhanda wali agalime nelo mberedi mo dewa hayago irane manda nabi hene.
MAR 6:53 Ani bialu ti iba timbuniore bereago doma ede halu dindi mbira mini Genesarete anda puwa iba talu pume pongo bia halu angeni ngelene.
MAR 6:54 Ani ngelalu ibalu hearia wali agali hearume ibu de hondowa, Yasuore ibiragonida, lo manda bini.
MAR 6:55 Ani manda buwa ti gerai lalu dindi wiagoha purogo lalu lamima pene. Ani lamima piyagola wali agali, Yasu ka, hale hayarume warago bo wiaru Yasu hearia ira ho yalu ibini.
MAR 6:56 Yasu ibaga bialu pialu anda mbira mbira heagoriabi anda dewa bu heagoriabi mabu wiagoriabi pialu wali agali hearume warago bo wiaru yalu ibuwa magedi hamani mo ngelene. Mo ngelayagola tigua Yasuhondo hame lowa lalu, Í̠naga aga nguni hanguni warago bo ngaru ti ela helo, lene. Ani layagola wali agali Yasunaga agani ela haga biyaru ti dabi hai haga bini.
MAR 7:1 Perisi agali hearubi Mana lowinigo lawai haga maru hearubi ti Yarusaleme howa ibalu Yasu hearia ngoai howa ho mabu bini.
MAR 7:2 Ani buwa tigua Yasunaga talima piaga maru hearume gi wayawaya biagane winidagua nabi howa tomo nalu hearia hendene.
MAR 7:3 Perisi agalibi Yu wali agali bibahendebi ti mamalime ilili biagane mana winigo mitangi bialu gi wayawaya nabi howa tomo nanaga hene.
MAR 7:4 Ti tomo magedi howa mo yalu ibuwa tini tingini wayawaya biagane winidagua nabi howa tomo nanaga hene. Iba bebi ndisibi dini be alebi paliaganebi ilili bialu wayawaya biagane winidagua ilili bialu dewa biai haga wini.
MAR 7:5 Ani biaga henego Perisi agali biarubi Mana lowinigo lawai haga biarubi tigua Yasuhondo lalu, Í̠naga talima ibaga biarume inanaga mamalime ilili biagane mana wini ngadagua ndo pugualu gi wayawaya nabi howa tomo nalu kagoni agidabe, lene.
MAR 7:6 Ani layagola Yasuhanda tihondo lalu, Tí tombene hondo kihe kamigoni. Bamba Ngode Datagaliwabe mana hale howa Aisaiahanda mbiwia henego áyu tíha howa lola haragoni, lene. Mbiwia halu lo ngago ogo. Ngode Datagaliwabehanda lalu, Wali agali urunime tinaga mini kaundiaore howa bime dege lotu laga ka.
MAR 7:7 Tigua Ngode Datagaliwabehanda bi mana lowinigo lawai harama lalu howa agalime mana lowinigo dege lawai haga ka. Anigo tigua i̱naga mini nagalone halu mo yaraga habe nahe ka, lenego gilibu nga, lalu Yasuhanda lamini.
MAR 7:8 Ibugua lalu, Tígua Ngode Datagaliwabehanda mana lowinigo wahalu agalime ilili biagane mana winigo hangu bialu kamigoni, lene.
MAR 7:9 Ani lowa Yasuhanda tihondo laabo halu lalu, Tínaga ilili biagane mana bule Ngode Datagaliwabehanda mana lowinigo waharimigo bayuwa birimadalo manda birimida.
MAR 7:10 Ogoninaga Mosesehanda lowialu lalu, Í̠naga aba ai̱yala mo yo handa nabi laradagua hale halu bibe, lalu, Mbiralime ibu aba ai̱ya ha hayagua nde homelo bolene nga, lalu lowini.
MAR 7:11 Anigo tígua agua lalu haramili. Mbiralime mbirale ibunaga winigo ibu ai̱ya abala biamogo bibehe howa ibugua lalu, Mbirale uruni Kobana, layagua o biago ibu ai̱ya abala biamogo bulene nawi laramili, lene. Kobana inanaga bi lalu, Ngode Datagaliwabehondo loma bia ho ngo.
MAR 7:13 Yasuhanda ani lowa lalu, Mamalime ilili biagane mana biawai hayadagua biawai haabo halu Ngode Datagaliwabenaga bi mo wahalu mana dewa ogonibi biaabo haramili, lene.
MAR 7:14 Ani lowa Yasuhanda wali agali bu hearu lone olalu, Ibidaba, lowa tihondo lalu, I̱na bi o larogo tí bibahende hale halu manda bilimu.
MAR 7:15 Ne harigaha anda poragome wali agali mo ko nahaga. Bu miniha howa mitangi tagira ibiragome wali agali mo ko haga. [
MAR 7:16 Tí hale kamiyagua nde hale haramine, lene.]
MAR 7:17 Ani lalu wali agali biaru helalu ibu andaga tamuha pu hearia ibunaga talima piaga biarume ibuhondo lalu, Bi yobage larigo irane agibe, lene.
MAR 7:18 Ani layagola ibugua tihondo lalu, Tíbi nde mini nawi maru karudagua dege kamigoni. Tomo bibahende tombeha puwa wali agali mo ko nahagago tí manda nabi kamibe.
MAR 7:19 Tomo bu miniha piaga ndo tombeha puwa tagira piaga, lene. Ibugua ani layagola tomo bibahende ta nabi nolene nga, lalu lene.
MAR 7:20 Ibugua lalu, Bu miniha howa mitangi tagira ibiragome wali agali mo ko haga.
MAR 7:21 Bu miniha howa kagua mitangi buleneru dabu nabi howa kayu buleneru dabudabu page buleneru wali agali homelo boleneru
MAR 7:22 wali agali kayu buleneru habua buleneru mana ko bibahende ta nabi buleneru mo hondo holeneru mana ko ngubi buleneru nayido agini henge loleneru ke̱ halu nde loleneru mine holeneru mini nawi howa buleneru
MAR 7:23 uruni ko bibahende bu miniha howa tagira ibiragome wali agali mo ko haga, lene.
MAR 7:24 Yasu ibu dindi ogoni wahalu dindi Taiahayagibi Saidonohayagibi pene. Pialu ibu anda mbira heago tamuha puwa wali agali hearume, Yasu ka, manda nabilo hame lo hene. Ibu ha do hoa howa ha do habe nahe hene.
MAR 7:25 Ani buwa wali mbirame ibunaga wane emene dama daragahe berenego marume, Yasu ka, layagola hale howa wali biago abale Yasu hearia ibuwa geha bulu palene.
MAR 7:26 Wali ogoni ibu Yu wali ndo Siria dindiha ibu dalu Penisia dindini berene. Ibugua Yasuhondo lalu, Dama i̱ waneha daraga kago pelo wara tagi habelo hamelo ko, lene.
MAR 7:27 Ani layagola ibugua wali biagohondo lalu, Ala waneiginihondo hina mulene nga. Waneigininaga hina biangome nelo bape holene nawi, lene.
MAR 7:28 Ani layagola wali biagome ibuhondo lalu, Mambo. Í̠ tiga tiga larigo. O ndo waneigini emenenaga hina habane dagiani howa ibira ho ngago biangome naga ndobe, lene.
MAR 7:29 Ani layagola Yasuhanda wali biagohondo lalu, Bi ogoni bayuwa larigo dama í̠ waneha daraga hayago piya. Ai andaga dai bia, lene.
MAR 7:30 Wali biago andaga dai bialu hearia ibu waneha dama daraga hayago tagira piyagola wandari biago bayale palearia hendene.
MAR 7:31 Yasu Taia howa dai bialu Saidononibi Tano Piranibi ibaga bialu pialu Galili iba timbuniore bereagoria tagira ibini.
MAR 7:32 Wali agali hearume agali mbira hale tuluhe bi libilabale heago Yasu hearia haru ibini. Tigua haru ibuwa Yasuhanda agali biago gime ela helo lamini.
MAR 7:33 Ani lamiyagola Yasu ibu wali agali bu hearu helalu agali biagola libu haru emene pu hangu howa ibunaga gi hondoneme agali biagonaga hale ela hene. Ani buwa ibugua hamiaga tolowa agali biagonaga hégeni ela halu
MAR 7:34 hari daligaha handa daga halu, Epata, lene. Epata inanaga bi lalu, Hale dugua ha.
MAR 7:35 Ani layagola agali biagonaga hale dugua halu ibunaga hége mo bayale hayagola bi bayale lene.
MAR 7:36 Yasuhanda wali agali hearuhondo hongo howa lalu, Áyu handarimigoni wali agalihondo nalamilimu, lene. Wali agalihondo ogonidagua nalamilimu laabo hayagola tigua kedanda howa lamiaabo hene.
MAR 7:37 Tigua mini mogo timbuniore lowa lalu, Ibugua bayuwa dege biyagoni. Hale tulu kago hale mo dugua halu bi libilabale kago bi bayale lelo mo bayale haga ka, lene.
MAR 8:1 Horo uruningi wali agali dewa lone ngoai howa ti tomo nolene nawiyagola Yasuhanda ibunaga talima piaga biaruhondo, Ibidaba, lowa tihondo lalu,
MAR 8:2 Wali agali dewa i̱ heba horo tebiru haabo harimagome áyu tomo nolene nawidago dara ho ko.
MAR 8:3 I̱na, Tí andaga pudaba, laruyagua maru dindi kaundia howa ibini karu ti garibi timbuni lowa hariga obeneni pialu karia de mborere bialu odope habehe ka, lene.
MAR 8:4 Ibunaga talima piaga biarume ibuhondo ladai bialu lalu, Ina dindi ko yobi wali agali nahaga tomo nawini kamago wali agali bu karuni tomo no karulape nelo iname tomo agiha taibu muleberamabe, lene.
MAR 8:5 Ani layagola Yasuhanda tihondo lalu, Mberedi agira henedamibe, lene. Tigua ibuhondo ladai bialu lalu, Mberedi karia henedama, lene.
MAR 8:6 Ani layagola Yasuhanda wali agali bu hearuni, Dindini birai hadaba, lowa ibugua mberedi karia biaru mo yuwa Ngode Datagaliwabehondo turu halu ka̱i̱ lowa gaibu baga buwa talima piaga biaruhondo mini. Ani miyagola tigua wali agali biru wiaruhondo ta halu mini.
MAR 8:7 Tigua wena emene mbira mbira heneneyagobi Yasuhanda ka̱i̱ lowa, Wali agali nelo midaba, lene.
MAR 8:8 Wali agali bibahendeme karulape nalu no ibira hayago mialu ibunaga talima piaga biarume nu karia hono to̱lai hene. Ogoningi wali agali tomo nalu hayadaru dewaore daosini maria (4,000) agima hene.
MAR 8:10 Yasuhanda wali agalihondo, Andaga pudaba, lowa ibu ibunaga talima piaga biaru heba iba taluni biralu Dalamanuda dindi pene.
MAR 8:11 Perisi agali maru hearu Yasu hearia ibuwa lai lalu hene. Tigua Yasuhanda mbira agi larabe hondole ibuhondo lalu, Ngode Datagaliwabehanda í̠ha howa heneneore birabe hondoloma̱ya í̠na agalime nabiagane ale mbira bia handa, lene.
MAR 8:12 Yasuhanda ibunaga bu habaneha mini burugu lowa hi̱ he̱ lowa lalu, Wali agali áyu karume agalime nabiagane ale dege hondole hai bialu kago irane aginagabe. Tíhondo henene laro wali agali áyu karume agalime nabiagane ale de hendelo walia naholebira, lene.
MAR 8:13 Ani lowa ibugua Perisi agali biaru helalu iba taluni lone biralu iba timbuniore bereago domalu dindi edeyagi pene.
MAR 8:14 Yasunaga talima piaga biarume mberedi maru embeda halu mbira hangu hanalu iba taluni pene.
MAR 8:15 Ibugua tihondo hongo howa lalu, Perisi agalinagabi Herodonagabi mo hiwa hagane mini yidi ngago de hondowa bayuwa mamage ho halimu, lene.
MAR 8:16 Ani layagola hale howa tini hangume laga laga bialu lalu, Ibugua o laragoni iname mberedi nahene ibirimago lara, lalu hene.
MAR 8:17 Tigua ani layagola manda buwa Yasuhanda tihondo lalu, Tígua mberedi nahene ibirimada lowa lalu kami agibe. Tí manda nabi haabo howa tínaga bu mini giambe hayabe.
MAR 8:18 Tínaga de bayale howa de nahende halu tínaga hale bayale howa hale nahe kamibe. Mberedi homane duria wali agali daosini duriame (5,000) no karula pelo gaibu baga birugo mitangi nabi kamibe. Ti nalu ibira hayagola mberedi no ibira hayago nu agira hono to̱lo hanarimiyabe, lene. Ani layagola tigua ibuhondo ladai bialu lalu, Nu homberia (12) hanarima, lene.
MAR 8:20 Tigua ani layagola ibugua lalu, Wali agali daosini mariame (4,000) nelo mberedi karia gaibu baga birugo no ibira hayago nu agira hono to̱lo hanarimiyabe, lene. Tigua ibuhondo ladai bialu lalu, Nu karia hanarima, lene.
MAR 8:21 Ibugua tihondo lalu, Tí manda nabi haabo kamigo agibe, lene.
MAR 8:22 Ti dindi ogoni yu wahalu Bedesaida anda pene. Anda piyagola agali marume agali mbira de kohe heago Yasu hearia haru ibuwa ibuhondo lalu, Agali ogoni í̠ gime ela habelo haru íbu kama, lene.
MAR 8:23 Ani layagola Yasuhanda agali de kohe biago gime yalu anda bu heagoria howa tagira haru pene. Ibugua agali de kohe heagonaga deni hamiaga tolo ba howa ibu gime ela halu agali biagohondo lalu, Mbirale mbira hendedebe, lene.
MAR 8:24 Ani layagola agali biagome dengalowa lalu, Agali ira ale ibaga bialu kago de hendedo, lene.
MAR 8:25 Ani layagola Yasuhanda agali biagonaga deni lone ela hayagola ibunaga de bayale halu mbirale bibahende de handai hene.
MAR 8:26 Ani biyagola Yasuhanda agali biagohondo lalu, Anda dewa bu kagoria dai nabi í̠ni andaga puabo habe, lene.
MAR 8:27 Yasu ibunaga talima piaga biaru heba dindi ti hayagoni yu wahalu Sisaria Pilibaihayagi ibaga bialu pene. Pialu howa ibugua ibunaga talima piaga biaruhondo lalu, Wali agali karume i̱ ai ka lalu kabe, lene.
MAR 8:28 Ani layagola tigua ibuhondo ladai bialu lalu, Wali agali marume, Baboraya biaga Yone ka, lalu marume, Elaya ka, lalu marume, Ngode Datagaliwabe bi mana latagi haga agali mbira ka, larago, lalu lamini.
MAR 8:29 Ani lamiyagola ibugua tihondo lalu, Tígua i̱ ai ka lalu kamibe, lene. Pidahanda ibuhondo ladai bialu lalu, Mbirali Dabo Helenego ibulebira lowinigo í̠ore kegoni, lene.
MAR 8:30 Ani layagola Yasuhanda tihondo hongo howa lalu, I̱ni kogonigo wali agali karu nalamilimu, lene.
MAR 8:31 Yasuhanda ibunaga talima piaga biaru lawai halu lalu, Agali Hole Ibiyago ibu tandaga timbuni nolebira. Agali ala hene miniwi karubi loma binigo mo miaga haguane karubi Mana lowinigo lawai haga karubi tigua ibu hame nalolebira. Tigua ibu homelo baragola homalu horo kiru howa tebonengi ibuni mo heya holebira, lene.
MAR 8:32 Ibugua bi ogoni tigatiga lamiyagola Pidahanda Yasu haru pu bagi howa talialu lalu, Ani nalabe, lene.
MAR 8:33 Ani layagola Yasu ibu beregedalu ibunaga talima piaga biaru handaya howa ibugua Pida talialu lalu, Dama Heyolabe i̱ kogoria nahe pu. Ngode Datagaliwabehanda manda bidadagua ndo agalime manda biagadagua manda bide, lene.
MAR 8:34 Ani lowa ibugua wali agali hearubi ibunaga talima piaga biarubi, Tí bibahende ibidaba, lowa tihondo lalu, Mbiralime i̱ porodagua ibua ho kayagua nde ibuni hame ledago mitangi nabi ibuninaga ira banga yalu i̱ talima ibulene nga.
MAR 8:35 Mbiralime ibuninaga holene ngago mo tene hayagua nde holene ogoni ereba hai holebira. Mbiralime i̱bi i̱naga bi mana debenebi mo tene howa ibuni holene wahayagua ogoni ibu holene bayale yu holebira.
MAR 8:36 Mbiralime dindi bibahendeni ngaru mo teneho kaore ibuninaga holene maro biyagua ibu biamogo bulebirabe. Biamogo nabulebiraore.
MAR 8:37 Ibuninaga holenego lone mo yu dai bule ibugua mbira bibe naheore.
MAR 8:38 Wali agali Ngode Datagaliwabe mana hale nahaga karubi ko biaga karubi hondowa mbiralime i̱ minibi i̱naga bi manabi lamulene taga hayagua Agali Hole Ibiyago ibu Abanaga wá holene taraorebi Ngode Datagaliwabenaga dahuliyali loma bia henerubi heba dai birangi ibugua nde o biago hondowa taga holebira, Yasuhanda lene.
MAR 9:1 Ibugua tihondo lamialu lalu, Henene larogo. Tí maru kamigo nahome kamiore Ngode Datagaliwabehanda Handame Ho Holene hongo howa tagira ibiragola de hondoleberami, lene.
MAR 9:2 Horo waragaru howa Yasuhanda Pida Yamese Yone imaru tini hangu hole hari timbuni mbira weagoria haru iraga ho hene.
MAR 9:3 Tigua handalu hearia Yasu ibuni tingini mo tara howa ibunaga aga pewele dindi bibahendeni karume aga wayawaya bo ngaligobi ndo pele de mborerebiore hene.
MAR 9:4 Ani biyagola talima piaga tebira biarume handalu hearia Elaya Mosesela Yasu heba te lalu hearia tigua de hendene.
MAR 9:5 Ani bialu heagola Pidahanda Yasuhondo lalu, Lawai haga-o ina ogoria kamagoni bayaledago ina tebirali kamagome nemanda tebira beramabe. Nemanda mbira í̠naga mende Mosesenaga tebone Elayanaga lowa bia harama, lene.
MAR 9:6 Ti tebirali biarume gi timbuni howa Pida ibugua agi loabe toba howa bi ogonidagua lene.
MAR 9:7 Ani lalu heaore beraliba mbirame ti mo ge howa bi mbira beralibaha howa ladali halu lalu, I̱ Iginiore ogoni gubalini ho kogo ibugua bi larago hangu hale halimu, lene.
MAR 9:8 Ani hale howa tigua abale de handa de̱le̱ bialu hearia agali maru nahende Yasu dege hearia hendene.
MAR 9:9 Ti harini dalialu howa Yasuhanda tihondo hongo howa lalu, Áyu handarimigo mbirali nalamilimu. Agali Hole Ibiyago tongolo muwa ibuni mo heya haragola dege lamilimu, lene.
MAR 9:10 Yasuhanda ani layagola tigua hale howa maru nalami hene. Tini hangu howa, Agali tongolo minigo agua mo heya holobadabe, lowa te lalu hene.
MAR 9:11 Tigua ibuhondo lalu, Mana lowinigo lawai haga karume Elaya ala ibulebira lalu kago irane agidabe, lene.
MAR 9:12 Ibugua tihondo lalu, Bibahende manda manda bule Elaya ibugua ala ibulebiraore. Anduane Homogonaga mbugani lo ngago ogo, Agali Hole Ibiyago ibugua tandaga timbuniore nalu maru karume ibuhondo handabe manga holebira, lalu gilibu ngago irane agibe.
MAR 9:13 Elaya ala ibiyago langero. Ibu ibiyagola Anduane Homogonaga mbugani bi gilibu winigo ngadagua maru hearume ibuhondo tini hame leadagua bigibigi bini, lene.
MAR 9:14 Yasunaga talima piaga maru biarubi wali agali dewabi ti haru ngoai ho hearia Mana lowinigo lawai haga hearume ti baba lai lalu hearia Yasu Pida Yamese Yone imaru ibalu de hendene.
MAR 9:15 Wali agali dewa biarume Yasu hondowa mogo lalu ibu hearia gerai puwa tigua ibuhondo, Ani haribe, lene.
MAR 9:16 Ani layagola ibugua tihondo lalu, Tí aginaga lai lalu kamibe, lene.
MAR 9:17 Agali mbirame ibuhondo ladai bialu lalu, Lawai haga-o i̱ iginiha dama daraga howa bi nalagago í̠ heria haru ibiru.
MAR 9:18 Dama igiri ogoniha daraga howa ibu mo pila halu ne harigaha hangiau pudu haea bialu ne gingiri gengero lalu ibunaga tingini hiribula haga. Í̠naga talima piaga biaruhondo, Dama daraga kago wara tagi hadaba larugola tigua wara tagi habe naheya, lene.
MAR 9:19 Ani layagola Yasuhanda tihondo lalu, Wali agali tí Ngode Datagaliwabehondo mini mbiraore nawi kamiruha i̱ horo agiru haabo holiyadabe. I̱na tí heba howa horo agiru tínaga genda yu haabo holiyadabe, lene. Ani lowa, Igiri biago i̱ kogoria haru ibidaba, lene.
MAR 9:20 Ani layagola tigua igiri biago ibu hearia haru ibini. Haru ibiyagola damame Yasu hondowa igiri biago mo biango bibi bia hene. Igiri biago dindini pilowa pedere pedere bialu ne harigaha howa hangiau puda tagitagi bini.
MAR 9:21 Ani biyagola Yasuhanda igiri biago abahondo lalu, O biragoni pigane angi howa binibe, lene. Ibu abahanda ladai bialu lalu, Ibu igiri emeneoreni howa bini.
MAR 9:22 Damame igiri ogoni homelo ira dedagoriabi ibahabi mo pila haabo hagago í̠na mbira bibeheyagua nde iya dara halu biamogo berene, lene.
MAR 9:23 Yasuhanda ibuhondo lalu, Mbira bibeheyagua larigo mbiralime Ngode Datagaliwabehondo mini mbiraore wu kayagua bibahende biai habehe kagoni, lene.
MAR 9:24 Ani layagola ibu abahanda lalu, Ngode Datagaliwabehondo mini mbiraore wia ngogo nakarulapedago mini mbiraore wuliya í̠na mo hongo halu biamogo biaha, lene.
MAR 9:25 Wali agali dewa gerai lalu ibalu heago hondowa Yasuhanda dama talialu lalu, Hale mo tulu hagabi bi mo libilaba laga dama í̠hondo hongo howa larogo tagira pu. Igiri ogoni ibuha lone hole dai nabibe, lene.
MAR 9:26 Ani layagola dama biagome ga̱ lalu igiri biago homene ale ho ngelalu tagira pene. Igiri biago homene ale wiago hondowa wali agali dewame, Ibu tongolo miyada, lene.
MAR 9:27 Ani layagola Yasuhanda igiri biagonaga gini yuwa mo heya hayagola heyini.
MAR 9:28 Ani bialu Yasubi ibunaga talima piaga biarubi ti andaga puwa tini hangu howa tigua ibuhondo lalu, Iname dama wara tagi habe nahe harimago irane agidabe, lene.
MAR 9:29 Ani layagola Yasuhanda ladai bialu lalu, Mbirale mbira beremigome ndo Ngode Datagaliwabehondo bi laramigome dama ogoni ale wara tagi holene nga, lene.
MAR 9:30 Yasu ibunaga talima piaga biaru heba dindi ogoni wahalu Galilini puabo halu hene. Ibugua ibunaga talima piaga biaru lawai halu heago wali agali hearume ti agoha kabe manda nabilo puabo halu hene. Ibugua tihondo lawai halu lalu, Agali Hole Ibiyago agalime minu mulebira. Minuwa tigua ibu homelo bolebira. Homelo baragola howa horo tebonengi ibuni mo heya holebira, lalu lamini.
MAR 9:32 Ibugua bi ani layago hale howa tigua manda nabi howa ibuhondo, Irane langi, lolene gi hene.
MAR 9:33 Ti Kabaniama anda bu heagoria anda pene. Yasu anda mbira heago tamuha howa ibugua tihondo lalu, Harigani ibalu howa tíni te agi dege lama ibirimibe, lene.
MAR 9:34 Ani layagola ti harigani ibalu howa, Ina kamago bolangua howa duniniore ai ibu holobadabe, lama ibirimigo tigua ibuhondo ladai nabi hene.
MAR 9:35 Ibu biruwa homberiali (12) biaruhondo, Ibidaba, lowa tihondo lalu, Mbira bolangua howa duniniore hoa biyagua nde ala ibu emene halu bibahende biamogo bulene nga, lene.
MAR 9:36 Ani lowa ibugua igiri emene gini yamialu ti hearia haru ibuwa tinaga wanakuihayagi helowa tihondo lalu,
MAR 9:37 Mbiralime i̱naga minini howa igiri emene ogoni biagobihondo, I̱la habiya íbu, layagua i̱hondobi, Habiya íbu, lara. Ani buwa mbiralime i̱hondo, I̱la habiya íbu, layagua i̱, Pu, layagohondobi, I̱la habiya íbu, lara, lene.
MAR 9:38 Yonehanda ibuhondo lalu, Lawai haga-o agali mbirame í̠naga minini howa dama daragahe hearu wara tagi halu hearia iname hondowa, Nabi waha, larima. Irane agali ogoni ibu ina aria ndoyanenaga lamirima, lene.
MAR 9:39 Ani layagola Yasuhanda tihondo ladai bialu lalu, Mbiralime ani biragola, Nabibe, nalalimu. Ibugua i̱naga minini howa agalime nabiagane alego biyagua nde mani i̱ mege bibe nahe holebira.
MAR 9:40 Mbiralime ina baba waitigi ndo kago ina aria ka.
MAR 9:41 Tíhondo henene larogo i̱naga minini kamiru hondowa mbiralime tí iba nalimulo ngiyagua ibuhondo emena mulene ngago mulebiraore, lene.
MAR 9:42 Yasuhanda lalu, Mbiralime waneigini emene ogonibi i̱hondo mini mbiraore wu kago hado wahelo ko mo bia hayagua ege to̱le̱ timbuni ngago pume ibunaga mani pongo bia howa agali ogoni to̱le̱ heba iba timbuni bedagoha bape hayagua nde karulape ogoni.
MAR 9:43 Í̠ninaga gi mendegome í̠ni mo pila hayagua gi ogoni gandulo wahabe. Gi mbiraore hangu howa haabobo holene ngagoria polene bayale nga. Gi kirabali howa heli dindi polene ogoni bayale ndo.
MAR 9:45 Í̠naga ge mendegome í̠ mo pila hayagua ge ogoni gandulo wahabe. Ge mbiraore hangu howa haabobo holene ngagoria polene bayale nga. Ge kirabali howa heli dindi polene ogoni bayale ndo.
MAR 9:47 Í̠naga de mendegome í̠ mo pila hayagua halu wahabe. De mbiraore hangu howa Ngode Datagaliwabehanda Handame Ho Kagoria polene bayale nga. De kirabali howa heli dindi polene ogoni bayale ndo.
MAR 9:48 Dindi ogoriani himi nahomagabi ira hundia nabiagabi nga.
MAR 9:49 Tomo mbira lomabu delalu howa Ngode Datagaliwabe deni bayale helo ibi tomoni ibira halu delagadagua ira dedagome wali agali bibahendeni ibira holebira.
MAR 9:50 Ibi bayale ngago ibunaga dende ereba hayagua tígua agime mo dende bia holeberamibe. Tínaga bu habaneha ibi halu wali agali heba howa mo palia holene karulo halimu, lene.
MAR 10:1 Yasuhanda bi ani lowa ibu dindi ogoni wahalu Yudia dindi anda pialu iba Yodana doma ede halu ange edeyagi pene. Piyagola wali agali dewa ibu hearia ngoai hayagola ibugua mana lawai hayadagua lone ti lawai halu hene.
MAR 10:2 Ani biyagola Perisi agali maru hearume ibu hearia ibuwa Yasu ibugua mbira agi larabe hondole tigua ibuhondo lalu, Inanaga Mana lowini ngagome agali mbiralime ibu one waholene nga lalu lo ngabe nawibe ina langi, lene.
MAR 10:3 Ani layagola ibugua tihondo ladai bialu lalu, Mosesehanda tíhondo agi bilimu lowinibe, lene.
MAR 10:4 Tigua lalu, Mosesehanda lo wialu lalu, Agalinime one wahole lalu bebani gili bialu ibu onehondo muwa waholene nga, lowini, lene.
MAR 10:5 Yasuhanda tihondo lalu, Mosesehanda tínaga bu mini giambe ho hemigo hondowa bi ogoni gilibu winida.
MAR 10:6 Ngode Datagaliwabehanda pigane wabiyangi ibunaga mbugani lo ngadagua ogo, Wali agalila kirali wabini.
MAR 10:7 Irane ogonigo agali mbirame ibu aba ai̱yala helalu ibu onela mandagi howa
MAR 10:8 libu mbiraore ho holebira, lalu gilibu nga. Anigo libu kira henego ai kira ndo mo mbiraore holebira.
MAR 10:9 Ngode Datagaliwabehanda wali agali mo mbiraore hayago mbiralime mo hangu hangu ho helolene nawi, lene.
MAR 10:10 Ti andaga daibu biruwa Yasunaga talima piaga biarume ibuhondo lalu, Te larigo irane aginaga lalu laribe, lene.
MAR 10:11 Ani layagola ibugua tihondo lalu, Agali mbirame ibu one wahalu wali mende dabu bu aribia hayagua ibugua wali mende biago kayu biragoni.
MAR 10:12 Wali mbirame ibu agalini wahalu agali mende piyagua ibugua agali kayu biragoni, lene.
MAR 10:13 Wali agali maru hearume tinaga waneigini Yasuhanda gime ela helo ibu hearia haru ibiyagola ibunaga talima piaga biarume ti talialu lalu, Haru naibidababe, lene.
MAR 10:14 Ani layago hondowa Yasuhanda tihondo keba howa lalu, Waneigini i̱ kogoria ibilo natalidababe. Ngode Datagaliwabehanda Handame Ho Kagoria waneigini urubi karunaga ka.
MAR 10:15 Tíhondo larogo manda bilimu. Waneiginime Ngode Datagaliwabehanda Handame Ho Kagoria hoa hagadagua hoa nahe karume nde anda napolebira, lene.
MAR 10:16 Ani lowa ibugua waneigini hangu hangu taba yuwa gime ela halu lalu, Ngode Datagaliwabehanda biamogo bilo laro, laga bialu hene.
MAR 10:17 Yasu ibu wene harigani pole pialu hearia agali mbirame gerai lalu ibuwa ge duli hanga ho biruwa lalu, Lawai haga bayale-o i̱ haabobo holene yule agi buabe, lene.
MAR 10:18 Ani layagola Yasuhanda ibuhondo ladai bialu lalu, Í̠na i̱ bayale larigo agibe. Mbirali bayale nahe Ngode Datagaliwabe ibuni hangu bayale ka.
MAR 10:19 Bi mana lowini ngago manda bu kegoni maru uru, Wali agali homelo nababe. Wali agali kayu nayabe. Mbirale page nabibe. Ke̱ howa diba ede nahabe. Mbirale page bule mo hondo nahabe. Aba ai̱yala mo yo handa nabi laradagua hale halu bibe, lo nga, lene.
MAR 10:20 Ani layagola ibugua Yasuhondo lalu, Lawai haga-o bi o lariruni bibahende i̱na igiri emeneoreni howa biai harugoni, lene.
MAR 10:21 Ani layagola Yasuhanda agali biago gubaliniore halu ibu handaya howa lalu, Mbiraore dege nakarulape kego í̠naga mbirale wiruni bibahende yolo miai hole pu. Ani buwa muni ngiraru yagibano karu mo meregola dahuliya andagani homogo holene í̠naga wulebira. Ani buwa i̱ porodagua talima ibabe, lene.
MAR 10:22 Agali biagome Yasuhanda bi layago hale howa ibunaga wanakui hi̱la dali hene. Irane ibu homogo gibi henegonaga genda halu pene.
MAR 10:23 Ani biyagola Yasuhanda ibunaga talima piaga biaruni de handaya howa tihondo lalu, Wali agali homogo karume Ngode Datagaliwabehanda Handame Ho Kagoria anda polene erekuibiore wulebira, lene.
MAR 10:24 Ani layagola hale howa ibunaga talima piaga biarume mogo lene. Yasuhanda tihondo halu mende lalu, I̱ iginiru-o Ngode Datagaliwabehanda Handame Ho Kagoria anda polene erekuibiore wulebira.
MAR 10:25 Nogo kameleme háli diriha anda polene erekuibi lowa homogo karume Ngode Datagaliwabehanda Handame Ho Kagoria anda polene erekuibiore wulebira, lene.
MAR 10:26 Ani layagola ibunaga talima piaga biarume mogo lai howa tini hangu hangu laga laga bialu lalu, Aiwa pele mulene yu holebirabe, lene.
MAR 10:27 Ani layagola Yasuhanda ti handaya howa lalu, Wali agalime bibe nahe ngago Ngode Datagaliwabehanda mbirale bibahende biai habeheore kagoni, lene.
MAR 10:28 Ani layagola Pidahanda lalu, Ai handa. Iname inanaga mbirale bibahende wahai halu í̠ piridagua talima ibirimagoni, lene.
MAR 10:29 Ani layagola Yasuhanda tihondo lalu, Henene larogo mbiralime i̱bi i̱naga bi mana debenebi mitangi bialu ibunaga andaru hameneru mbalibuniru ai̱yaru abaru waneiginiru dindiru yu wahalu piyagua
MAR 10:30 anda dewaru hamene dewaru mbalibuni dewaru ai̱ya dewaru waneigini dewaru dindi dewaru áyu dindini ka tambu Ngode Datagaliwabehanda ibuhondo dewaore mulebira. Ani wu kagola marume ibu mo tandaga holebira. Ani biragola nde awe ibugua haabobo holene yu holebira.
MAR 10:31 Áyu bamba ho karu mani ti maha holebira. Áyu maha karu mani ti mo bamba ho holebira, lene.
MAR 10:32 Yasubi ibunaga talima piaga biarubi ti Yarusaleme harigani pole pialu howa Yasu ibu mo bamba halu pene. Ani biyagola ibunaga talima piaga biarume mogo lowa handawa bima mama pene. Maru mahaore piyarume gi hama pene. Yasu ibunaga talima piaga homberiali (12) biaru ti hangu pu bagi howa ibugua awe agalime ibuhondo bulebiragonaga te tihondo lamini.
MAR 10:33 Ibugua tihondo, Hale hadaba, lowa, Ina Yarusaleme poramagoha loma binigo mo miaga haguane karubi Mana lowinigo lawai haga karubi tigua Agali Hole Ibiyago minilo mbiralime minu mulebira. Minu miragola tigua ibu homelo bolene nga manda buwa Yu agali ndo agali tara karuhondo minu mulebira.
MAR 10:34 Minu miragola tigua ibu mege bialubi hamiaga tolo ba halubi tibume balubi homelo bolebira. Ani biragola horo tebonengi ibuni mo heya holebira, lalu lamini.
MAR 10:35 Sebedi igini Yamese Yonela Yasu hearia ibini. Ibuwa libugua ibuhondo lalu, Lawai haga-o iyame mbira mitangi bidabagobi í̠na langibelo hamelo kabagoni, lene.
MAR 10:36 Ani layagola ibugua libuhondo ladai bialu lalu, Agi languliyanaga hamelo kabibe, lene.
MAR 10:37 Ani layagola libugua ibuhondo ladai bialu lalu, Í̠na Handame Ho Holenenaga mini daliga taraore karularengi iya mendealime í̠naga gi tigahayagi biralu mendealime í̠naga gi lehayagi birulubaya biralibu labelo hamelo kaba, lene.
MAR 10:38 Ani layagola Yasuhanda igiri biago labohondo lalu, Libugua bi laribigoni manda nabi howa lope haribi. Beha iba tandagabi bedago i̱na nole kogo libugua nabehe kabibe. I̱ baboraya bule kogo libu bibehe kabibe, lene.
MAR 10:39 Ani layagola libugua ibuhondo ladai bialu lalu, E̱ ani bibehe kabagoni, lene. Ani layagola Yasuhanda libuhondo lalu, I̱na beha howa noleberogo libuguabi noleberabiore. I̱ baboraya buleberogo libuguabi buleberabiore.
MAR 10:40 Anigo libugua mendealime i̱naga gi tigaha mendealime i̱naga gi leha lowa biralibulo dabolene i̱ ndo kogoni. Ngode Datagaliwabehanda mbirali berelonaga manda manda bu ngago ibu hangu birulebira, lene.
MAR 10:41 Talima piaga maru pirali biarume Yamese Yonelame bi ani layago hale howa keba ho hene.
MAR 10:42 Ani biyagola Yasuhanda, Tí homberiali (12) bibahende ibai hadaba, lowa lalu, Yu wali agali ndo tara taranaga handame haga karume wali agali hongo howa handame haga ka. Ani buwa tinaga haru haga karume wali agali dara nahe hongo hangume haru hai haga ka manda bidami.
MAR 10:43 Ogoni biradagonigo ani bilowa tí kamigome mbira ani bulene henge nawiore. Tí kamigoni mbiralime timbuniore hoa biyagua maru karunaga biabe bia haga holene nga.
MAR 10:44 Ani buwa mbiralime ibu mo duniniore hoa biyagua ibugua tinaga garabaya biabe ale bia haga holene nga.
MAR 10:45 Ogonidagua Agali Hole Ibiyago wali agalime ibunaga biabe bia halimulo ndo ibugua tinaga biabe bia halu ibunaga holene wali agali bibahendenaga pela hole ibiya, lene.
MAR 10:46 Ani lalu howa ti ibalu Yarigo anda pene. Anda pu howa Yasubi ibunaga talima piaga biarubi wali agali dewa hearubi ti haru Yarigo wahalu pialu hearia agali mbira Dimaisa igini Badimaisa de kohe henego ibu tomo munibi ngidaba lalu hariga leneha biraabo haga berene.
MAR 10:47 Marume, Nasareteali Yasu ibira, layuagola hale howa ibugua olowa lalu, Debidi igini Yasu-o i̱ dara howa biamogo bia, lene.
MAR 10:48 Ani layagola wali agali biarume ibu talialu lalu, Bi nale waha, lene. Tigua ani layagola ibu donge howa dalimu olalu lalu, Debidi igini-o i̱ dara howa biamogo bia, lalu laabo hene.
MAR 10:49 Ibugua ani layagola Yasuhanda ema nabi hondo howa wali agali biaruhondo lalu, Ibu i̱ kogoria ibilo oladaba, lene. Ani layagola tigua agali de kohe biago olowa ibuhondo lalu, Ibugua í̠ olalu íbu larago heya, lene.
MAR 10:50 Ibugua aga mbira yu biragago golo wahalu abale heyalu Yasu hearia ibini.
MAR 10:51 Ibiyagola Yasuhanda ibuhondo lalu, I̱na í̠hondo mbira agi buliya hamelo kebe, lene. Ani layagola agali de kohe biagome ibuhondo lalu, Lawai haga-o lone de hondoa ko, lene.
MAR 10:52 Ani layagola Yasuhanda ibuhondo lalu, Í̠ni Ngode Datagaliwabehondo mini mbiraore wirigome í̠naga de mo ngala hayago ai pamia, lene. Ani layaore agali biago ibunaga de abaleore dabi halu de handabehe howa ibu Yasu piyadagua talima pene.
MAR 11:1 Ti Yarusaleme anda polene kaware ngelowa dindi Bedabayabi Bedanibi Hari Olibe weagoria emene kaware pene. Pialu howa ibugua ibunaga talima piaga kirali bamba halu pelo libuhondo, Ogodagua pudaba, lowa lalu,
MAR 11:2 Dindi amugoniha anda bu kagoria anda pialu kabiria nogo dongi igini mbira ala mbirame naberene dariba karia de hondoleberabi. Dongi ogoni hadalu ogoria haru dai bilibu.
MAR 11:3 Mbiralime libuhondo lalu, Agi bule hadarabibe, layagua ibuhondo bi ogodagua lalibu, Anduane Homogo kagome ogoriani biralu polene ngagola hadaraba. Ibugua abale haru dai bidaba lolebira, lalibu, lene.
MAR 11:4 Ani laya handala libu pialu hearia hariga gibuniha nogo dongi igini anda haneni dariba hearia de hondowa hadene.
MAR 11:5 Hadayagola wali agali hearume libuhondo lalu, Agi bule nogo dongi igini ogoni hadarabibe, lene.
MAR 11:6 Libugua Yasuhanda lamilibu layadagua lamiyagola tigua, Haru pudaba, lene.
MAR 11:7 Libugua nogo dongi igini biago Yasu hearia haru dai biyagola ti hearume nogo dongi igini biagoni aga dunga hayagola Yasu iraga ho berene.
MAR 11:8 Ani biyagola wali agali marume tinaga aga harigani dunga haga bialu marume ira magane yuni dewahe dibuwa harigani dunga haga bini.
MAR 11:9 Wali agali dewa bu hearume Yasu piyago buhayagi bamba halu piyarumebi maha ibiyarumebi awa lama pialu howa lalu, Ngode Datagaliwabenaga mini yaraga hama. Mbirali Anduane Homogonaga minini howa ibirago Ngode Datagaliwabehanda ibu mo turu helo larama.
MAR 11:10 Ina mama Kini Debidihanda handame ho henedagua ibugua nde ani handame helo larama. Ngode Datagaliwabenaga mini yaraga hama, lalu lama pene.
MAR 11:11 Yasu ibu Yarusaleme anda puwa Anduane Homogonaga anda heagoha anda pene. Ibugua bibahende wiaru de handai howa ne laya handala tagira pialu talima piaga homberiali (12) biaru heba Bedani pene.
MAR 11:12 Horo mendengi ti Bedani howa dai bialu hearia Yasu hina garibi lene.
MAR 11:13 Garibi layagola ibu emene kaundia howa poge mbira yuni dewahe heago de hondowa lini dedabe nadedabe hondo pene. Hondo piyaria lini mbira nade yuni dege dewa hearia de hendene. De handalu hearia poge lini dolengi ndo yuni hangu ma bu hearia hendene.
MAR 11:14 Ibugua poge biago ha halu lalu, Wali agalime í̠naga liniore lone nanolebira, lene. Ani layagola ibunaga talima piaga biarume hale hai hene.
MAR 11:15 Yasubi ibunaga talima piaga biarubi ti Yarusaleme anda pene. Anda puwa Yasu ibu Anduane Homogonaga andaha anda pialu yolo mulebi yolo bialubi hearu bo ba tagitagi bialu hene. Muni ariari biaga hearunaga dagiabi ega malibu ale yolo biaga hearunaga biragane wiarubi mo indi ande lalu beregedai hene.
MAR 11:16 Ibugua wali agali hearuhondo lalu, Anduane Homogonaga anda ibule hariga ibidadagua tígua mbirale yalu naibalimu, lene.
MAR 11:17 Ani lowa ibugua tihondo mana lawai halu lalu, Anduane Homogo ibunaga mbugani bi lo ngago ogo, I̱naga anda kago wali agali dindi tara tarani bu karume Ngode Datagaliwabehondo bi lagane anda kagoni, lolebira, lalu gilibu nga. Tígua pagebibi karu ha do hagane anda bu hinu helarimidagoni, lene.
MAR 11:18 Ani bira, layagola hale howa loma binigo mo miaga haguane hearubi Mana lowinigo lawai haga hearubi tigua Yasu bo wahole henge hai bialu hene. Yasuhanda mana lawai hayago hale howa wali agali bibahende bu hearume, Gibiore larago, lowa minime mogo lai ho berene. Ani mogo layago hondowa loma binigo mo miaga haguane biarubi Mana lowinigo lawai haga biarubi tigua Yasu hondowa gi ho hene.
MAR 11:19 Ne laya handala Yasubi ibunaga talima piaga biarubi ti Yarusaleme wahalu pene.
MAR 11:20 Horo mendengi egerebagiore hayagola ti dai bialu howa poge biago yunibi pinibi gau lai hayago de hendene.
MAR 11:21 De hondowa Pidahanda mitangi bialu Yasuhondo lalu, Lawai haga-o í̠ de handa. Í̠na poge biagohondo ha halu bi larigome gau layada, lene.
MAR 11:22 Ani layagola Yasuhanda tihondo ladai bialu lalu, Ngode Datagaliwabehondo mini mbiraore wu haabo halimu.
MAR 11:23 Tíhondo henene laro. Hari hombene ogo wedagohondo, Í̠nime dugualu puwa iba solowara bedagoria ibiraha, laragome dugu ibira holebirabe dugu ibira naholebirabe mini kira wuwa ndo mini mbiraore wuwa dugu ibiraha layagua dugu ibira holebiraore.
MAR 11:24 I̱na irane ogoninaga bi langero. Tígua Ngode Datagaliwabehondo bi lamialu, Inanaga mbirale mbira bia, laramigola bulebiraore manda buwa mini mbiraore wuwa, Bia, laramiyagua bia larami ale bulebira.
MAR 11:25 Tígua Ngode Datagaliwabehondo bi lamialu howa mbiralihondo keba ho kamiyagua tínaga Aba dahuliya andaga kagome tígua ko birimigo domo wahelo ala mbiralihondo keba ho kamigo mitangi bu wiaabo holemeni wahalimu, lene. [
MAR 11:26 Tígua mbiralihondo keba ho kamigo wa nahe keba ho wiaabo kamiyagua tínaga Aba dahuliya andaga kagome tígua ko birimigo domo wa naholebira, lene.]
MAR 11:27 Ani lalu ti Yarusaleme lone dai bini. Dai bialu Yasu ibu Ngode Datagaliwabenaga andaha pialu hearia loma binigo mo miaga haguane hearubi Mana lowinigo lawai haga hearubi agali ala hene miniwi hearubi ibu hearia ibini.
MAR 11:28 Ibuwa tigua ibuhondo lalu, Mbirale uruni í̠na bialu kegoni bialu habelo hongo aiwa ngiyane berebe. Ani bibelonaga hongo ogoni aiwa ngiyabe, lene.
MAR 11:29 Ani layagola Yasuhanda tihondo ladai bialu lalu, I̱na bi mbira hangu tíhondo hale harogo tígua ladai birimiyagua i̱na mbirale uruni bialu haruruni buliya hongo ngiyadagoni ogome ngiya lalu tí langulebero.
MAR 11:30 Yonehanda baboraya biyago bulene hongo miyago Ngode Datagaliwabeha tawebe be agaliha tawebe ogoha tawe lalu langidaba, lene.
MAR 11:31 Ani layagola tini dege degeme laga laga bialu lalu, Iname Ngode Datagaliwabeha tawe larimayagua ibugua lalu, Yonehanda mana lamiyago yu tiga nabi harimidago agibe lolebira, lowa.
MAR 11:32 Agaliha tawe, lolebiyaria wali agali dewa bu hearu hondowa gi howa bi ogoni lairi howa wahene. Bibahende bu hearume, Yone ibu Ngode Datagaliwabe mana latagi haga hayago, lai haga kago manda buwa gi hene.
MAR 11:33 Gi howa tigua Yasuhondo ladai bialu lalu, Ina manda nabiore kama, lene. Ani layagola Yasuhanda tihondo lalu, Anidago nde i̱na mbirale uruni berogo buliya hongo ngiyadago ogoha tawe nalangulebero, lene.
MAR 12:1 Ani lowa Yasuhanda tihondo bi yobage lowa lamialu hene. Ibugua lalu, Agali mbirame pu mbira lini daga mini gerebi dewa hongo dugu dugu bini. Hongowa to̱le̱me pabe wa mabu biai halu gerebi lini ibane pingidope holenaga uli ege to̱le̱ha guabuwa wini. Ani buwa mabu mamage holenaga anda mbira luni daliga bima iraga howa helene. Ani buwa ibugua agali maruhondo lalu, Mabu biabe bia halu hondo ha halimu, lalu dindi mbiraha ibaga bialu pene.
MAR 12:2 Pu mbira mini gerebi lini dolene tu hayagola mabu anduane biagome ibunaga garabaya biabe ale bia haga mbiralihondo lalu, I̱naga mabu hondo ha haga karuhondo lini maru do ngidaba lole pu, lene.
MAR 12:3 Ani lole piyagola hondo ha haga biarume ibu minu balu mbira nayiore dai bilene.
MAR 12:4 Ani biyagola mabu anduane biagome lone ibunaga garabaya biabe ale bia haga mendehondo, Pu, layagola mabu hondo ha haga biarume ibu haguaneni gaeo bialu ibu handabe manga halu mege taraore bini.
MAR 12:5 Ani biyagola mabu anduane biagome ibunaga garabaya biabe ale bia haga tebonehondo, Mo pu, layagola mabu hondo ha haga biarume ibu homelo bo wahene. Ani buwa agali maru piyagola mabu hondo ha haga biarume maru bowa maru homelo bo wahene.
MAR 12:6 Ani biyagola mabu anduane biagome ibu igini mbira hangu gubalini timbuniore haga henego ogoni ibuni hangu lini mo pole hene. Maniore ibugua ibuni igini biagohondo lalu, Mabu hondo ha haga kagoria lini mo pu, lalu, Tigua ibu mitangi bialu ibuhondo tiga tiga bulebira manda bido, lene.
MAR 12:7 Mabu hondo ha haga biarume tini hangu laga laga bialu lalu, Mabu anduane biago igini ogonigo ibunaga paluni ina karulami̱ya homelo bama, lowa
MAR 12:8 tigua igiri biago minuwa homelo bowa ibu tingini mabu tagirahayagi mo ba tagi hene, lalu Yasuhanda lene.
MAR 12:9 Ani lowa Yasuhanda tihondo lalu, Ani biyago mabu anduane agi bulebirabe. Ibugua ibuwa agali mabu hondo ha haga biaru homelo bai howa mabu ogoni marume hondo ha helo mulebira.
MAR 12:10 Anduane Homogonaga mbugani bi mbira lo ngago tí nahende kamibe. Ege to̱le̱ mbira anda biagame galone nabibehedago lowa dabo wahenego ege to̱le̱ ogoniore mo timbuni duniniore ho heleda.
MAR 12:11 Ogoni Anduane Homogo ibunioreme mo yu daibu helenego iname de handalu handawa bu kamagoni, lalu gilibu nga, lene.
MAR 12:12 Yu wali agali haru haga hearume Yasuhanda bi yobage ogoni layagonaga ti mitangi bialu layago manda buwa minule bialu hearia wali agali dewa bu hea handala gi howa wahalu pene.
MAR 12:13 Perisi agali maru hearubi Herodonaga aria maru hearubi tigua tinaga aria maru hearuhondo lalu, Yasu bi lalu kago bi ko lelo mo bila hole ibu karia pudaba, lene.
MAR 12:14 Ani layagola ti Yasu hearia puwa tigua ibuhondo lalu, Lawai haga-o iname manda bialu hemaria í̠na mana lamiriligo tiga tigaore larili manda bidama. Ani buwa í̠na agali mini timbuniwi hongohe karu hondowa gi nahe maru karumebi í̠ hondowa larago mitangi nabi howa Ngode Datagaliwabehanda hame ledagonaga mana wali agalihondo lawai hariligo tiga tigaore larili. Ai bi mbira langibelo inanaga Mana lowini ngago manda bialu Lomo dindinaga handame haga Kini kagohondo dagisi muni mulene ngabe be nawibe. Iname dagisi muni ogoni mulumabe be namulumabe, lene.
MAR 12:15 Ani layagola Yasuhanda tinaga miniha yageyage palu howa layagoni manda buwa tihondo lalu, Tígua aginaga minule nde larimibe. Muni kuni mbira i̱ de hondoliya mo yalu íbu, lene.
MAR 12:16 Ani layagola tigua muni kuni mbira mo yalu ibiyagola ibugua tihondo lalu, Muni kuni ogoriani dengui muguni ngagobi mini gilibu ngagobi ainagadabe, lene. Ani layagola tigua ladai bialu lalu, Lomo handame haga Kini kagonagada, lene.
MAR 12:17 Ani layagola Yasuhanda tihondo lalu, Mbirale Lomo handame haga Kini kagonaga ngago nde ibunihondo milimu. Mbirale Ngode Datagaliwabe kagonaga ngago nde Ngode Datagaliwabe ibunihondo milimu, lene. Ani layagola tigua mogo timuniore lene.
MAR 12:18 Sadiusi agali hearume wali agali homeneru naheyulebira lagane maru henerume Yasu hearia ibuwa lalu,
MAR 12:19 Lawai haga-o Mosesehanda mana mbira ina buluma̱yanaga gilibu wini ngago ogo, Agali mbira waneigini nahe one dalo berelalu homayagua homayago hameneme wali dalo biago dabu bu aribia howa waneigini homayagonaga hono wia holene nga, lo nga.
MAR 12:20 Anigo igiri karia hamenema howa kane wahenegome wali mbira dabu bu howa waneigini nahe heaore homene.
MAR 12:21 Homayagola ibula pagu bini biagome dabu bu aribia howa waneigini nahe heaore dege homene. Ani biyagola hamene tebonegome dabu buwa ani bima pu gimbu bialu
MAR 12:22 hamene karia bibahende biarume wali o biago dege dabu buwa waneigini nahe heaore homai hene. Ani bialu maniore wali biago home maro bini.
MAR 12:23 Ani binigo igiri karia biaru bibahendeme wali o biago dege dabu biyago homeneru mo heya hagane horo harangi wali biago agonaga one birulebirabe, lene.
MAR 12:24 Ani layagola Yasuhanda tihondo lalu, Tí mini pu tara ho kamigo irane Anduane Homogonaga mbugani gilibu ngagobi Ngode Datagaliwabe hongohe kagobi tí manda nabi kamigo mini pu tara ho kamigoni.
MAR 12:25 Ogoninaga wali agali homeneru mo heya harangi wali agali dabu bulene nawiore ndobe. Ti dahuliyali dahuliya andaga karu ale dege holebira.
MAR 12:26 Anigo wali agali homeneru mo heya holenenaga larogo Mosese ibu ira mbira hungu biyagoria hearia Ngode Datagaliwabehanda Mosesehondo lalu, I̱ Abarahama Aisaga Yagaba imarunaga Ngode Datagaliwabe kogoni, lenego Mosesehanda gilibu ngago tí daga nale dege kamibe.
MAR 12:27 Ngode Datagaliwabe ibu wali agali holenehe kagonaga kagoni. Ibu homenenaga ndo kago tí kaguaore manda birimida, lene.
MAR 12:28 Mana lowinigo lawai haga mbira heago ibuwa tigua te layago hale halu Yasuhanda Sadiusi agalihondo bayuwa ladai biyago hondowa ibugua Yasuhondo lalu, Ngode Datagaliwabehanda Mana lowinigo dunini ala agoore mitangi bulene ngabe, lene.
MAR 12:29 Ani layagola Yasuhanda ladai bialu lalu, Mana lowinigo dunini ala mitangi bulene ngago laro. Isaraele wali agali tí hale halimu. Anduane Homogo ibu inanaga Ngode Datagaliwabe kago ibu hangu Anduane Homogo kagoni.
MAR 12:30 Í̠na Anduane Homogo í̠naga Ngode Datagaliwabe kago í̠naga gubalinimebi minimebi mandamebi hongomebi gubalini ho habe, lowinigo dunini ogoni ala mitangi bulene nga.
MAR 12:31 Mana duniniore mende ogonibiore lowini ngago ogo, Í̠ni gubalini harilidagua maru karu ta nabi gubalini ho habe, lowia. Mana duniniore timbuniore kira ogoni lowinigo ngagobi maru nawi, lene.
MAR 12:32 Ani layagola Mana lowinigo lawai haga biagome ibuhondo lalu, Lawai haga-o í̠ tiga tiga larigo. Ngode Datagaliwabe mbira hangu kago heneneore lari. Mende nahe ibu hangu kagoni.
MAR 12:33 Ibuhondo gubalinimebi mandamebi hongomebi hame lowa í̠ni gubalini harilidagua maru karu ta nabi ogonidagua gubalini hariyagua ogoni duniniore. Ngode Datagaliwabehondo mbirale tara tara lomabu delolenebi mbirale bo lomabu mulenebi ogonidagua bulene dunini ndo, lene.
MAR 12:34 Yasuhanda agali biagome bayuwa layago hondowa ibuhondo lalu, Ngode Datagaliwabehanda Handame Ho Kagoria í̠ kaware kegoni, lene. Ani layagola marume Yasu ibu ladai bilo ibuhondo bi nalami wahene.
MAR 12:35 Yasuhanda Anduane Homogonaga andaha howa mana lawai halu howa ibugua lalu, Mana lowinigo lawai haga karume, Mbirali Dabo Helenego ibulebira lowinigo ibu Debidinaga aguanene holebira, lagago agua hole biaruabe.
MAR 12:36 Debidihanda Ngode Datagaliwabe Dinini ibugua mo bila hayagola lalu, Anduane Homogohanda i̱naga Anduane Homogohondo lalu, Í̠naga waitigi karu í̠naga geme hengedai habelo i̱na mo heloliya í̠ i̱naga gi tigahayagi ogoria birabe, laya.
MAR 12:37 Debidi ibunime ibuhondo Anduane Homogo layagobi Mbirali Dabo Helenego ibulebira lowinigo ibu aguanene hayagobi mbiraore agua habehebe, lene. Wali agali dewaore ngoai hayarume ibugua bi mana layago turu howa hale hene.
MAR 12:38 Ibugua tihondo mana lawai halu lalu, Mana lowinigo lawai haga karu de hondo halimu. Tigua labolabo lu karulalu ibaga bialu magedi hamani puwa wali agalime ti hondowa tinaga mini yaraga helo hame laga ka.
MAR 12:39 Ani buwa tigua ngoai hagane andaruha agali haguanerunaga biraganeni hangu birulebi wali agali dewa tomo mandagi nole ngoai haragola tomo anduane heba birulebi hame laga ka.
MAR 12:40 Ani buwa tigua wali dalo bedarunaga andaga mbirale ngaru mo kayu biaga ka. Ani buwa wali agali mo hondo hole Ngode Datagaliwabehondo bime dege bi lu la ho wiaabo haga ka. Ani biragonaga ti pani timbuniore mia tago howa mulene nga, lene.
MAR 12:41 Anduane Homogonaga andaha muni wiaga wiagoria Yasu ibu kaware bira para ho bereria wali agali dewa ibiyarume muni wiagani wiyagola de hondo berene. Wali agali homogo hearume muni dewa wini.
MAR 12:42 Wali dalo mbira bereagome muni nayiore berenego ibuwa muni emeneore toea mbira ale wini.
MAR 12:43 Ani wiyagola Yasuhanda ibunaga talima piaga biaru olalu, Ibidaba, lowa, I̱na tí langerogo wali agali bibahendeme Ngode Datagaliwabenaga muni wiagani wiyaru emene wiya. Wali dalo yagibano o bedagome muni dewaore wiya.
MAR 12:44 Tigua muni dewawi howa emene wiya. Wali dalo ogome mbira nayiore biruwa ibu tomo yolo bule yinigo bibahendeore wiai haya, lene.
MAR 13:1 Yasu ibu Anduane Homogonaga andaha howa tagira piyagola ibunaga talima piaga mbira heagome ibuhondo lalu, Lawai haga-o anda tara tara baya buruguleore ege to̱le̱ timbunime bima iraga kago de handa, lene.
MAR 13:2 Ani layagola Yasuhanda ibuhondo lalu, Anda timbuniore kago de hendedebe. Ege to̱le̱ wia gimbu gimbu bima iraga kagoni homane mbiraore winidagoria ngeladai nabi bibahende gialo ibira ibira biai holebira, lene.
MAR 13:3 Emene howa Yasu ibu Hari Olibe iraga halu Anduane Homogonaga anda handa de̱le̱ heagoriani berene. Bereagoria Pida Yamese Yone Anduruma ibuwa tigua Yasuhondo lalu,
MAR 13:4 Bi larigoni angi bulebirabe. Iname ala agi birane hondowa henge karulolene horo ha para hayada lolomabe, lene.
MAR 13:5 Ani layagola Yasuhanda tihondo ladai bialu lalu, Mbiralime tí mo hondo holigo mamage halu de hondo halimu.
MAR 13:6 Agali dewaoreme i̱ mini lalu, Mbirali Dabo Helenego ibulebira lowinigo i̱ íbu kogoni, lalu ibuwa wali agali dewa mo hondo hole ibulebira.
MAR 13:7 Ani buwa dindi kawareni wai biragonaga bi laruagolabi dindi kaundiaoreni wai bira laragolabi tí hale howa gi nahalimu. Mbirale uruni ani bia bulebirago ani laragome ha maro bulene nga lalu ndo larago gi nahalimu.
MAR 13:8 Dindi mende mendela wai bia a̱i̱ na̱i̱ bialu gabumane tara tarala wai bia a̱i̱ na̱i̱ bialu holebira. Dindi bibahendeha dumbirumbi biame holebiragobi wali agali dindi tara tarani hina gari timbu holebiragobi. Ani biragola tandaga nolene ogoni walime waneigini taba honole howa tandaga pigane nagago aleore wulebira.
MAR 13:9 Ani buwa tíni mamage halu de hondo halimu. Tigua tí minu yalu godi lole haru polebira. Ngoai hagane andaha howa tí bolebira. I̱ mini yu tiga bu kamigo gabumane haru haga karubi kini karubi ti kagoria i̱naga Bi Mana Debene hale helo lamialu holeberami.
MAR 13:10 Ogoni bu maro nabidaore ala wali agali dindi tara tarani bu karu bi mana debene hale hai helo lamulene nga.
MAR 13:11 Tigua tí minuwa godi lole haru poragola miniha mbira agi loledabe ala lolenaga mini dege dindi ho nahalimu. Godi laramingi Ngode Datagaliwabehanda bi langirago lalimu. Bi laramigo tíni bi lole ndo berami. Ngode Datagaliwabe Dinini ibugua tí mo mitangi bia haragola bi loleberami.
MAR 13:12 Agali ibu hamene marume homelo belo minu mulebira. Ogonidagua dege abahandabi ibu igini minu mulebira. Waneiginimebi ti ai̱ya abalahondo hongo halu marume homelo belo minu mulebira.
MAR 13:13 I̱ mini yu tiga bu kamigo hondowa bibahende karume tíhondo handabe manga holebira. Ani biragola uruni bu maro bilo wahalu pu nabi hongo howa ho ununu lo haabo ho kagome pele mulene yu holebira, lene.
MAR 13:14 Ani lowa Yasuhanda tihondo lalu, Hiriribi Hondolene Gibiore íbu wulene nawi ngagoria ngagola tígua de hondoleberami, lene. Bi ogoni daga lalu kamiru irane ogonaga layada lalu bayuwa manda bilimu. Yasuhanda ani lowa lalu, De handaramigola Yudia wali agali karu hari hombene ngaruha hondo yalu gerai polene wulebira.
MAR 13:15 Ogoningi agali mbira ibu anda dangini bedagome dalialu tamuha ibunaga mbirale mbira mule mo anda polene henge nawulebira.
MAR 13:16 Agali mende mabu biabe bialu kagome ibuni andaga aga mo dai bulene henge nawulebira.
MAR 13:17 Horo uruningi wali gali bere bedarubi gali andu mialu bedarubi dara timbuniore holene nga.
MAR 13:18 Uruni bulebiraru ira yuni gilope howa dagare ibagane hororu birangi nabilonaga Ngode Datagaliwabehondo bi lalu halimu.
MAR 13:19 Horo uruningi mo ko holene dewaore wulebira. Ani bulene wulebirago Ngode Datagaliwabehanda bibahende wabiyangi howa nawinigo mahabi nde lone ogonidagua nawulebira.
MAR 13:20 Anigo Anduane Homogohanda horo uruni mo tubagi hole manda nabi kale awe wali agali bibahende holene henge namo ngale. Wali agali ibugua dabeneru mitangi bialu horo uruni mo tubagi hole manda bini.
MAR 13:21 Anigo mbiralime tíhondo lalu, Mbirali Dabo Helenego ibulebira lowinigo o ibu kago de handadaba, layaguabi, Ibu amu kago de handadaba, layaguabi hale nahalimu.
MAR 13:22 Agali marume ke̱ halu Mbirali Dabo Helenego ibulebira lowinigo i̱ kogoni, lole ibulebira. Marume ke̱ halu, I̱ Ngode Datagaliwabe mana latagi haga kogoni, lole ibulebira. Ibiragola tigua wali agali Ngode Datagaliwabehanda dabo heleneru mo hondo habehedabe hondole agalime nabiagane alebi nahendene alebi bialu holebira.
MAR 13:23 Uruni bia nabidaore i̱na ala tí langerogoni hale halu mamage ho halimu, lene.
MAR 13:24 Ani lowa Yasuhanda laabo halu lalu, Horo uruningi mo ko holene uruni ngagola howa ni hundialu ege nadalu
MAR 13:25 yapibiya hariha howa dugu ibira ibira bialu hari daligaha hongo haga karu mo ema bia hai holebira.
MAR 13:26 Ani biragola Agali Hole Ibiyago ibu hari beralibaha howa hongo timbuni holenebi wá timbuni taraore holenebi heba ha pani holebira.
MAR 13:27 Ha pani haragola dindi gimbuni bibahende ngagoniha howa ibugua ibunaga dahuliyalirume wali agali Ngode Datagaliwabehanda dabo heleneru dindi mbirahayagi howabi mendehayagi howabi, Mo mogo bule pudaba, lolebira, lene.
MAR 13:28 Ani lowa Yasuhanda tihondo laabo halu lalu, Tí mana mbira manda bilimulo poge biagane te langero. Poge mane mabiragola hondowa ai ni poboyogo dolene tu kawareda manda beramili.
MAR 13:29 Ogonidagua dege mbirale uruni bibahende bigi biragola tígua handalu kamiria horo kaware ha para kagonida manda buleberami.
MAR 13:30 Ogoninaga tí manda biaabo halimulo wali agali áyu kamiruni nahome ogobi dege dege kamiore mbirale uruni bibahende bulebirago laro.
MAR 13:31 Hari daligabi dindibi ereba hai holebira. I̱naga bi mana dege ereba nahe wiaabo holebira, lene.
MAR 13:32 Ibugua ani lowa lalu, Horo ogoni ogongiore bulebiralo bibahendeme manda nabiore ka. Dahuliyali dahuliya andaga karumebi Igini ibuguabi ti manda nabi dege ka. Aba kago ibuni hangu manda bu ka.
MAR 13:33 Bi larogoni ogongiore bulebiralo tí manda nabi kamigo de hondo mamage ho halimu.
MAR 13:34 Ogoni agali mbirame ibu kaundiaha poralidagua ngagoni. Ibunaga andaga wahalu ibunaga garabaya biabe ale bia hagaruhondo lalu, Biabe bia halu hondo halimu, lalu agali harabani hagahondo, Mamage habe, lalu piaga.
MAR 13:35 Anda anduane ibu ne laragola dai bulebirabe be mbi hanuni haragola dai bulebirabe be ega gogologo bi laragola dai bulebirabe be egerebagi haragola dai bulebirabe tí manda nabiore kamigo mamage bayuwa ho halimu.
MAR 13:36 Tí palia hondo kamiria abale ibuligonaga mamage ho halimu.
MAR 13:37 Tíhondo bi larogonidagua wali agali bibahendehondo, Mamage hai halimu lalu larogoni, lene.
MAR 14:1 Horo kiru howa tebonengi Bolangua Halu Penego Horonaga tomo nolene wulebira lowa Mberedi Yidi Nahe Hirinigo Horonaga nolene nga lo manda bini. Ani manda biyangi loma binigo mo miaga haguane hearubi Mana lowinigo lawai haga hearubi ohalu tigua Yasu homelo bole minulene henge tai bini.
MAR 14:2 Tigua lalu, Wali agali bu karume ina baba gungu buligo tomo nolene harangi iname ibu naminami̱ya, lene.
MAR 14:3 Yasu ibu Bedani howa Saimono ge hamua ala henego andaga tomo nalu berearia wali mbira ibuwa weli baya ngabi mini nada muni dewaoreme yolo buwa beha berelo winigo ogoni yalu ibini. Yalu ibuwa wali biagome be pambu lowa Yasunaga haguaneni weli baya ngabi biago odope hene.
MAR 14:4 Ani biyagola wali agali maru hearume keba howa tini la a̱i̱ na̱i̱ bialu lalu, Weli ngabi biago bame mohole birago agi birabe.
MAR 14:5 Weli ngabi ogoni kina handari tebira (300) ale mulene ngago midale nde yagibano karuhondo tale bu ta kale karulapedale, lowa tigua wali biago guralu talini.
MAR 14:6 Ani biyagola Yasuhanda tihondo lalu, Ibu aginaga taleremibe. Tí bi nale ibu helo wahadaba. Wali ogonime i̱hondo biyagoni baya buruguleore biya.
MAR 14:7 Wali agali yagibano karu tí heba mandagi haabo holeberemigo tihondo mbirale mbira bayale bua biragola bibehe kamigoni. I̱ tí heba mandagi haabo naholebero.
MAR 14:8 Ibugua mbira bibehe wiagoore biyagoni. I̱ nahome ko tagi i̱naga tinginini mani hora holenenaga weli baya ngabi ogoni odo wia hayagoni.
MAR 14:9 I̱na tíhondo henene larogo bi mana debene dindi bibahendeha lamialu howa ibugua i̱hondo biyago ibu mitangi bialu te loyogo lolebira, lene.
MAR 14:10 Talima piaga homberiali (12) henego hombeane Yudasa Isagariodo ibugua loma binigo mo miaga haguane hearu hearia Yasu minilo ndelowa, Walia holiya, lole pene.
MAR 14:11 Ani layagola hale howa tigua turu halu ibuhondo, Muni nguleberama, lene. Ani layagola ibugua Yasu minu mulene henge aguaore ngabe hondole tai bialu hene.
MAR 14:12 Mberedi Yidi Nahe Hirinigo Horonaga tu hayagola horo ogoningi Bolangua Halu Penego Horonaga nogo sibi igini bo mulene tu hene. Ani hayagola ibunaga talima piaga biarume ibuhondo lalu, Bolangua Halu Penego Horonaga tomo mitangi bialu í̠ tomo nabelo agoha dawa manda manda bu wuledabe, lene.
MAR 14:13 Ani layagola ibugua ibunaga talima piaga kiralihondo lalu, Yarusalemeha anda pialu kabiria agali mbira iba be yalu ibiragola lola holeberabigo agali ogoni ibu anda poradagua pilibu.
MAR 14:14 Anda puwa anda anduanehondo agua lalibu, Lawai haga kagome í̠hondo lalu, I̱naga talima piaga karubi i̱bi iname Bolangua Halu Penego Horonaga tomo noloma̱ya anda hobane mbira agoha ngabe, laya, lalibu.
MAR 14:15 Ani larabigola ibugua tamu hobane mbira daligaha ngago dagia manda bu winigo walia holebirago ogoriani tomo dawa manda manda bu wilibu, lene.
MAR 14:16 Ani laya handala ibunaga talima piaga kira biago labome pialu Yarusaleme anda pene. Anda puwa mbirale bibahendeore Yasuhanda agua bulebira layadaguaore bu wiaria hondowa libugua Bolangua Halu Penego Horonaga tomo nole dawa manda manda bu wini.
MAR 14:17 Alendo ni paliyagola Yasu ibunaga talima piaga homberiali (12) biaru heba ibini.
MAR 14:18 Ti tomo nalu biruwa Yasuhanda lalu, I̱na tíhondo henene larogo agalime i̱ minilo ina tomo nalu bedamaru mbiraligome ndelolebira, lene.
MAR 14:19 Ani layagola ibunaga talima piaga biarume ibuhondo hangu hangume ala la mani la bigi bialu lalu, Í̠na o larigoni i̱ ndo lari, lalu laga laga bini.
MAR 14:20 Ani laga laga biyagola Yasuhanda ladai bialu lalu, Tí homberiali (12) bedamigo hombeanego i̱la mandagi ndisiha mberedi ibuni gime mo nalu bedagome ani bulebira.
MAR 14:21 Anduane Homogonaga mbugani lo ngadagua Agali Hole Ibiyago homolebira. Agali Hole Ibiyago agalime ibu minilo ndelalu walia harago ibuni dara holene wulebira. Agali ogoni ibu ai̱yahanda taba nahenedale dege bayale awadaga hendedaleda, lene.
MAR 14:22 Ti tomo nalu berea tambu Yasuhanda mberedi mbira yamuwa Ngode Datagaliwabehondo turu halu ka̱i̱ lowa mberedi gaibu baga buwa ibunaga talima piaga biaruhondo mialu howa lalu, I̱naga tingini ogonigo mialu nadaba, lene.
MAR 14:23 Ani lowa ibugua iba be yamuwa Ngode Datagaliwabehondo turu halu ka̱i̱ lowa tihondo miyagola ti bibahendeme no gombedaga bialu nene.
MAR 14:24 Yasuhanda tihondo lalu, Ogo i̱naga darama. Wali agali dewa homai holilono i̱naga darama ogoni pela harogoni. Ngode Datagaliwabehanda habo nalolene bi lowinigo tene i̱naga darama ogoniha nga.
MAR 14:25 I̱na tí langerogo i̱na waini iba lone nane Ngode Datagaliwabehanda Handame Ho Kagoriani howa waini iba gahenge nolebero, lene.
MAR 14:26 Tigua Ngode Datagaliwabenaga iba gana mbira lowa Hari Olibe weagoha pene.
MAR 14:27 Yasuhanda tihondo lalu, Tí bibahendeme i̱ helalu ibida piai holeberami. Anduane Homogonaga mbugani bi lo ngago ogo, Ngode Datagaliwabehanda nogo sibi haru haga kago bara handala nogo sibi karu ibida purogo lai holebira, lalu gilibu nga.
MAR 14:28 Anigo Ngode Datagaliwabehanda i̱ mo heya hara handala tí maha ibalimulo i̱ ala Galili bamba halu polebero, lene.
MAR 14:29 Ani layagola Pidahanda ibuhondo ladai bialu lalu, Ti bibahendeme ani wahalu purogo layaguabi i̱na í̠ wahalu napolebero, lene.
MAR 14:30 Ani layagola Yasuhanda ibuhondo lalu, Í̠hondo langerogo áyu mbiraga ega gogologome bi halu ki naledaore í̠na halu teboore Yasu manda nabido lalu lolebere, lene.
MAR 14:31 Ani layagola ibugua hongo howa ladai bialu lalu, Í̠la homole howayaguabi ogonidagua naloleberoore, lene. Pidahanda layadagua dege talima piaga bibahende biarubi ani lai hene.
MAR 14:32 Yasu ibunaga talima piaga biaru heba dindi mini Gedemani wiagoria pu howa ibugua ibunaga talima piaga biaruhondo lalu, I̱ Ngode Datagaliwabela bi lole porotagi tí ogoria hondo biralimu, lene.
MAR 14:33 Ani lalu ibu Pida Yamese Yonema ti haru puwa Yasu ibu genda howa mini burugulo hene.
MAR 14:34 Ani buwa ibugua tihondo lalu, Dara bulene i̱ha timbuniore anda ibiragome i̱ garali bialu budara. Tí mamage halu ogoria hondo biralimu, lene.
MAR 14:35 Ani lowa Yasu ibu emene pu bagi howa dindini bulu palu wuwa ibu tandaga nolene winigo Ngode Datagaliwabehanda yalu polene ngayagua nde yalu pelo lowa Yasu ibugua Ngode Datagaliwabela bi lalu berene.
MAR 14:36 Ibugua lamialu, Aba i̱ Aba-o í̠na mbirale bibahende bibehe kegoni. Tandaga nolene beha bedago nanoliya mo yalu pobe. Anigo i̱ hame ledodagua ndo í̠na hame lededagua hangu bibe, lene.
MAR 14:37 Ani lowa ibunaga talima piaga tebirali biaru bereagoria dai bialu hearia ti palia hondo hai hearia hondowa ibugua Pidahondo lalu, Saimono-o í̠ padebe. Í̠na mamage emene tigi mbira habe nahedane padebe, lene.
MAR 14:38 Ani lowa ibugua tihondo lalu, Ko ngagome tí ko mo bia holigo tí mamage howa Ngode Datagaliwabehondo bi lalu halimu. Tínaga minime Ngode Datagaliwabe hame ledamigo lo howa tínaga tingini gedaore ho kamigoni, lene.
MAR 14:39 Ani lalu Yasu ibu halu mende Ngode Datagaliwabela bi ala layadagua dege lole pene.
MAR 14:40 Ani bialu ibu lone dai bialu hearia ti de muguli howa palia hondo hearia hendene. Tigua ibuhondo agi ladai bulebe toba howa manda nabi hene.
MAR 14:41 Ibu halu tebone dai buwa tihondo lalu, Tí ha̱lo palia dege bidamibe. Ogoni karulape. Agali Hole Ibiyago ko biaga karuhondo minu mulene tu hayadago handadaba.
MAR 14:42 I̱ minilo ndelaga biago kaware o íbu kago de handadaba. Ai heyalu ma, lene.
MAR 14:43 Yasuhanda bi ogoni wene lalu heaore ibunaga talima piaga agali hombeane Yudasa ibu agali dewa heba ibini. Loma binigo mo miaga haguane biarumebi Mana lowinigo lawai haga biarumebi agali ala hene miniwi biarumebi, Yasu minule pudaba, layagola tigua wai bulene ayu tibu kangoru yalu Yasu hearia ibini.
MAR 14:44 Yasu minilo ndelaga biagome agali bu hearuhondo ala lalu, Tí manda bilimulo i̱na manane walia halu mbiralinaga peni nu̱nu̱ larogo ibu minuwa bayuwa haru pilimu, lene.
MAR 14:45 Ani layadagua bialu Yudasahanda Yasu hearia pu tiga buwa, Lawai haga-o, lowa Yasu peni nu̱nu̱ lene.
MAR 14:46 Nu̱nu̱ layagola agali dewa hayarume Yasu minalu bayuwa gime yu ndibu lene.
MAR 14:47 Ani biyagola agali mbira heagome wai bulene ayu tibu yayagome loma binigo mo miaga haguane timbuni heagonaga garabaya biabe ale bia haga heagonaga hale bagadape hene.
MAR 14:48 Yasuhanda tihondo lalu, Pageali minaramilidagua tígua wai bulene ayu tibu kangoru yalu i̱ minule ibirimibe.
MAR 14:49 Horo dewa tí heba Anduane Homogonaga andaha howa mana lawai halu hewangi tígua i̱ mina nabirimi. Anigo Anduane Homogonaga mbugani bi lo ngadagua bilo, lene.
MAR 14:50 Ani layagola ibunaga talima piaga bibahende biaruni Yasu wahalu ibida purogo lai hene.
MAR 14:51 Agali mbira labolabo bobi heago Yasu haruru pialu hearia agali biarume ibu minini.
MAR 14:52 Minaya handala ibugua ibunaga labolabo bo biyago giha golo yu hea handala ti babe ibida pene.
MAR 14:53 Loma binigo mo miaga haguane biarubi agali ala hene miniwi biarubi Mana lowinigo lawai haga biarubi ti loma binigo mo miaga haguane timbuni heago andagaha mandagi ngoai ho berearia Yasu haru pene.
MAR 14:54 Pida ibu emene kaundia howa Yasu haruru pialu loma binigo mo miaga haguane timbuni biagonaga anda pabeha anda pene. Anda puwa mamage haga hearu heba ira deagoria dagare dogo bu berene.
MAR 14:55 Loma binigo mo miaga haguane biarubi Ganisolo agali bibahende biarubi tigua Yasu homelo bolenaga ibugua ko binigobi lenegobi mbira agidabe hondole daba handalu hearia mbira nahendeore.
MAR 14:56 Agali dewa hearume Yasu ndelowa bi layagoyu tinaga bi layago lo iriari bini.
MAR 14:57 Marume heyuwa ke̱ halu lalu,
MAR 14:58 Ibugua au layagola hale harima. Anduane Homogonaga anda agali gime binigo gialo wahalu horo tebira howa agali gime ndo mendeale bu aribia holebero, laya, lene.
MAR 14:59 Tigua bi ogoni lo iriari dege bini.
MAR 14:60 Ani layagola Loma Binigo Mo Miaga Haguane Timbuni biagome agali berearunaga wanakuini heyu howa ibugua Yasuhondo lalu, Í̠hondo bi laragoni ladai bulene mbira nayi kebe, lene.
MAR 14:61 Ani layagola Yasu ibu ema nabi howa bi mbira naleore hene. Nale heagola Loma Binigo Mo Miaga Haguane Timbuni biagome ibuhondo halu mende lalu, Í̠ Mbirali Dabo Helenego ibulebira lowinigo Ngode Datagaliwabe Baya Buruguleore Kagonaga Igini kegonibe, lene.
MAR 14:62 Ani layagola Yasuhanda lalu, E̱ i̱ ogoni kogoni. Agali Hole Ibiyago ibu Mbirali Hongo Haiheore Kagonaga gi tigahayagi biruwa hari beraliba heba daliraria de hondoleberami, lene.
MAR 14:63 Ani layagola Loma Binigo Mo Miaga Haguane Timbuni biagome hale howa keba halu ibuninaga labolabo lerelowa lalu, Marume lamogo bia helo hame naleore kama.
MAR 14:64 Ibugua Ngode Datagaliwabe mege biyago hale harimi. Tí agi mitangi bu kamibe, lene. Ani layagola ti bibahendeme lalu, Ibugua ko biyagonaga homelo bolene nga, lalu lai hene.
MAR 14:65 Maru hearume Yasu hamiaga tolo ba halu ibunaga dengui yi howa gime balu lalu, Í̠ bayagoni ogome baya lalu langi, lene. Agali mamage haga hearume ibu bo ariari bini.
MAR 14:66 Pida ibu anda pabe tamuhayagi berearia loma binigo mo miaga haguane timbuni biagonaga biabe bia haga wandari mbirame ibalu Pida ira deagoria dagare dogo bu berearia de hendene.
MAR 14:67 Ibugua Pida handa tiga howa lalu, Í̠bi Nasareteali Yasula mandagi hariligoni, lene.
MAR 14:68 Ani layagola ibugua lalu, I̱ ndo í̠ bi laregoni i̱ manda nabido, lene. Ani lalu ibu pabe harabani pialu hearia ega gogologome bi lene.
MAR 14:69 Wandari biagome Pida hondowa agali biaruhondo lone lalu, Agali ogoni Yasu ibula haga, lene.
MAR 14:70 Ani layagola Pida ibugua halu mende lalu, I̱ ndoyago, lene. Emeneore howa agali biarume Pidahondo lalu, Í̠ ndo larego nde í̠ Galiliali kego ibulaore hariligoni, lene.
MAR 14:71 Ani layagola Pidahanda wanakui minalu hongo howa lalu, Heneneore i̱ ke̱ haruyagua Ngode Datagaliwabe ibugua i̱ pani ngilo, lalu, Agali mini larimigo i̱ manda nabido, lene.
MAR 14:72 Bi ogoni layagola ega gogologome halu mende layago hale howa ala Yasuhanda, Ega gogologome bi halu ki nale howa halu tebo í̠na Yasu manda nabido lolebere, layago Pidahanda mitangi bini. Mitangi buwa dara halu dugu bini.
MAR 15:1 Egerebagiore hayagola loma binigo mo miaga haguane biarubi agali ala hene miniwi biarubi Mana lowinigo lawai haga biarubi Ganisolo agali bibahende biarubi urunime te lalu hene. Tigua Yasu pu senime hende howa Pailate hearia haru pene.
MAR 15:2 Haru ibiyagola Pailatehanda Yasuhondo lalu, Yu wali agalinaga handame haga kini í̠ kebe, lene. Ani layagola ibugua ladai bialu lalu, Í̠na o laregonigo, lene.
MAR 15:3 Loma binigo mo miaga haguane biarume lalu, Ibu ko dewa biya, lene.
MAR 15:4 Ani layagola Pailatehanda ibuhondo halu mende lalu, Ladai nabule dege kegonibe. Tigua í̠na ko dewa birigo layago hale haribe be nahebe, lene.
MAR 15:5 Ani layagola Yasu ibu ladai nabiyagola Pailate ibu miniha mogo lowa Yasuni handaya hene.
MAR 15:6 Bolangua Halu Penegonaga Tomo nolene horo harangi agali mbira garabaya kagola wali agalime, Gola, laragola Pailatehanda golaga hene.
MAR 15:7 Agali maru gabumane baba wai biyagola garabaya binigo mbira mini Barabasa hene. Ibugua agali homelo bayagola garabaya bini.
MAR 15:8 Horo ogoningi wali agalime Pailate hearia puwa ibuhondo lalu, Í̠na ala birilidagua áyu bibelo, lene.
MAR 15:9 Ibugua tihondo lalu, Yu wali agalinaga Handame Haga Kini kago gololiya hamelo kamibe, lene.
MAR 15:10 Loma binigo mo miaga haguane biarume henge lowa Yasu ibu hearia minu yalu ibiyagoni manda buore howa Pailatehanda ani lene.
MAR 15:11 Wali agalime, Barabasa gola, lelonaga Loma binigo mo miaga haguane biarume mo la hene.
MAR 15:12 Pailatehanda tihondo lone lalu, Yu wali agali kamirunaga Handame Haga Kini ka larimigo ibuhondo i̱na agi buabe, lene.
MAR 15:13 Ani layagola tigua lone dalimu lalu, Ibu homelo ira bangani ba para habe, lene.
MAR 15:14 Ani layagola Pailatehanda tihondo lalu, Ibugua ko mbira agi biyiyabe, lene. Ani layagola tigua hongo howa dalimu lalu, Ibu homelo ira bangani ba para habe, lene.
MAR 15:15 Ani layagola Pailatehanda wali agali biaru turu helo Barabasa golope howa ibugua ami agali hearuhondo, Yasu tibume balu ibu ira bangani homelo ba para hole haru pudaba, lene.
MAR 15:16 Ami agali biarume gabumane haru haganaga anda pabe tamuhayagi Yasu haru anda puwa ami agali bibahende hearu mo ngoai hene.
MAR 15:17 Mo ngoai howa tigua labolabo luni tagalitayabi Yasu karula howa pu aniheme bo buwa ibu haguaneni karula hene.
MAR 15:18 Tigua gi hondone do lowa lalu, Yu wali agalinaga Handame Haga Kini haabo habelo, lene.
MAR 15:19 Ani lowa tigua ibunaga haguaneni gewame balu hamiaga tolo ba howa mine halu lalu, Í̠ timbuni ke, lalu bulu paligi bini.
MAR 15:20 Ani mege bialu howa tigua labolabo tagalitayabi biago golowa ibuninaga labolabo karula hene. Ani buwa tigua ibu ira bangani ba para hole tagira haru pene.
MAR 15:21 Ti harigani pialu hearia Sairiniali mbira mini Saimono ibu Aleganda Lubasala aba biago Yarusaleme ogoniha áyu dege anda ibalu hearia lola hene. Ibu lola howa ibu Yasunaga ira banga yilo ami agali biarume ibuhondo, Ya ya, dege layagola mo ya hene.
MAR 15:22 Tigua Yasu haru pialu dindi mini Gologoda pene. Gologoda inanaga bi lalu, Haguane Kuni.
MAR 15:23 Puwa tigua waini ibabi ira mbiranaga ibane mini muwebi mandagi bimaga ho berelenego ibu nelo miyagola ibu nane wahene.
MAR 15:24 Ani buwa tigua ibu homelo ira bangani ba para hene. Ibunaga labolabo ai ibu mo harabe hondole tadu bialu berene.
MAR 15:25 Yasu homelo ira bangani ba para hayago egerebagi ni do paya biyagola ba para hene.
MAR 15:26 Tigua ibu ko biya lowa beba mbirani, Yu wali agalinaga Handame Haga Kini ogoni, gili buwa ira banga daligani ba para hene.
MAR 15:27 Ani buwa tigua agali ko biaga kirali Yasu heba mandagi mendego gi tigahayagi mendego gi lehayagi lowa ti ira banga tebirani ba para hene. [
MAR 15:28 Ani biyagome Anduane Homogonaga mbugani bi lo ngago ogo, Ibugua ko biaga heba pani nene, lalu gilibu winidagua lola hene.]
MAR 15:29 Wali agali ti bolangua haga bialu piyarume Yasuhondo ma bonge laga bialu tongoyongo bi laga bialu lalu, E̱he. Anduane Homogonaga anda gialope halu horo tebira howa bia dai bulebero, larigo í̠da.
MAR 15:30 Í̠ni nahomolenaga í̠ni pele mialu ira banga ogoriani howa dalerene, lene.
MAR 15:31 Ogonidagua dege loma binigo mo miaga haguane biarubi Mana lowinigo lawai haga biarubi tini laga laga bialu Yasu mege bialu lalu, Wali agali maru nahomelonaga pele mialu kaligodago ibuni pele namibehedane wiaruabe.
MAR 15:32 Ina de hondoloma̱yabi ibuhondo mini mbiraore wuluma̱yabi Mbirali Dabo Helenego Isaraele wali agali kamarunaga Handame Haga Kini kago ira bangani howa áyu ogoni dalilo, lene. Ani layagola agali kira Yasu heba ira bangani ba para hayago labomebi ibuhondo mege dege bini.
MAR 15:33 Horombe hanuniore howa dindi ogoriani aruma ho wiane alendo ni gai layahayagi wá ho dai bini.
MAR 15:34 Ani biyagola Yasuhanda bi hongo howa lalu, Eloi Eloi lema sabagadanai. Inanaga bi lalu, I̱naga Ngode Datagaliwabe-o i̱naga Ngode Datagaliwabe-o i̱ aginaga wahalu piribe, lene.
MAR 15:35 Bi layago hale howa wali agali maru ogoniha hearume lalu, Ibugua Elaya olaruago hale hadaba, lene.
MAR 15:36 Mbiragome gerai lalu puwa waini iba kaubi bereagoha mbirale tara dahundu ale ibira howa waini iba biru to̱leagola ira nguinini mo gedo howa Yasunaga ne hambuni ngelene. Ngelowa agali biagome lalu, Elayahanda ibu ira bangani howa golope hole ibirabe handami̱ya, lene.
MAR 15:37 Yasu ibu bi dalimu lowa buhe̱ ereba halu tongolo mini.
MAR 15:38 Tongolo miyagola Anduane Homogonaga andaha labolabo timbuni gerela ho winigo daligani howa buda ki hene.
MAR 15:39 Ami agali haru haga mbira heagome handade ho hearia Yasu tongolo miyagola hondowa lalu, Agali ogoni ibu Ngode Datagaliwabe Igini heneneoreda, lene.
MAR 15:40 Magadala wali Meribi Yamese mende Yosesela ai̱ya Meribi Salaumibi wali maru heba emene kaundia howa handa amu ho hene.
MAR 15:41 Ala Yasu Galilini hayangi wali urunime ibu poradagua puwa biamogo biaga berene. Wali maru dewa Yasu heba Yarusaleme ibiyaru tibi de hendene.
MAR 15:42 Ni palue dadai biyagola Sabada horo kaware howa tomo dawa manda manda bulene wini.
MAR 15:43 Ogoningi Arimadia Ganisolo agali Yosebe ibu mini bayalewi henego ibu Ngode Datagaliwabehanda Handame Ho Holene tu helo hondo henego ibugua gi nahe elahe howa Pailate hearia puwa lalu, Yasu tingini mule poabe, lene.
MAR 15:44 Ani layagola Pailatehanda ibuni manda bialu abale tongo layabe nalebe manda nabi hene. Manda nabi howa ami haru haga biago olowa ibuhondo lalu, Ibu abale tongolo miyabe, lene.
MAR 15:45 Ani layagola ami haru haga biagome, Abale tongolo miya, lamiyagola Pailatehanda Yosebehondo, Yasu tingini mo pu, lene.
MAR 15:46 Mo pu, layagola Yosebe ibu labolabo pele bayaleore mbira yolo buwa mo winigome Yasunaga tingini ira bangani howa mo yalu daluwa labolabome mo kabu bini. Ani buwa ege andaha ala guabu winigo ogoniha hora howa ege to̱le̱ timbunime paya anda hene.
MAR 15:47 Ani bialu hearia Magadala wali Meribi Yosese ai̱ya Meribi libu Yasu hora heagoria de hendene.
MAR 16:1 Sabada horo piai hayagola howa Magadala wali Meribi Yamese ai̱ya Meribi Salaumibi tigua Yasunaga tinginini ha̱i̱ hole weli tara ngabiore yolo bini.
MAR 16:2 Horo Sandengi egerebagiore ti ege anda biagoha pene.
MAR 16:3 Pialu howa tini lalu, Ege to̱le̱ ege anda panga payiyago aiwa dugua helodabe, lama pene. Ege to̱le̱ ogoni timbuniore winigo manda bialu ani lene. Pialu howa handa amu halu hearia ege to̱le̱ panga biago dugua ho wiaria de hendene.
MAR 16:5 De hondowa ege anda biagoha anda pialu hearia agali mbira labolabo pele karule wali biarunaga gi tigahayagi bereago de hondowa ti mogo lowa handaya hene.
MAR 16:6 Ani biyagola agali biagome tihondo lalu, Mogo naladababe. Nasareteali Yasu ira bangani ba para hayago hai bialu kamigo ibu ogoniha nawi ibuni mo heya halu piya. Ibu hora hayagoria ogoni tí de handadaba.
MAR 16:7 Pidabi Yasunaga talima piaga maru karubi ti karia pialu au lalimu. Yasu ibu bambaha halu Galili pole porago. Ibu ala langiyadagua ogoriani tí de hondoleberemigo, lamule pudaba, lene.
MAR 16:8 Ani laya handala ti mogo lowa gi timbuni halu ege anda biagoha howa abale tagira pialu gerai lalu pene. Gi timbuni halu ti maruhondo bi nale puabo hene. [
MAR 16:9 Horo Sandengi egerebagiore Yasu mo heya howa Magadala wali Meri ala de hendelo ibu bereria Yasu ha pani hene. Wali ogoni dama karia daragahe berearia Yasuhanda ala wara tagi hene.
MAR 16:10 Ha pani hayagola wali agali Yasu heba ala haga hearume dara howa dugu bialu hearia Meri ibugua lamule pene.
MAR 16:11 Puwa Merihanda lalu, Ibuni heyu heago i̱na de handaru, layagola hale howa tigua hawa larabe toba ho hene.
MAR 16:12 Ani buwa agali kira harigani pialu hearia Yasu ibu ha pani hayagola libugua ibu agali tarabe toba ho hene.
MAR 16:13 Ani biyagola libugua wali agali maru Yasu heba ala haga biaru hearia dai buwa, Yasu handariba, lalu lamiyagola ti hawa larabe toba howa mini kira wu hene.
MAR 16:14 Ani buwa maniore ibunaga talima piaga bereali (11) biaru tomo nalu bereagoria Yasu ibu ha pani hene. Ha pani hayagola ibuni mo heya hayiyagola howa wali agali de handayarume bi layago ti hale howa mini mbiraore nawiyagobi bu mini giambe ho hayiyagolabi hondowa Yasuhanda ti talini.
MAR 16:15 Ibugua tihondo lalu, Dindi bibahendeni purogo lalu wali agali bibahendehondo bi mana debene lamima pilimu.
MAR 16:16 Bi mana debene yu tiga bu karume baboraya buwa pele mulene yu holebira. Yu tiga nabi karume pani nolebira.
MAR 16:17 Mo yai ho karume manane ogonibi walia holebira. I̱naga minini howa dama daraga karu wara tagi holebiragobi wali agali taranaga bi lolebiragobi
MAR 16:18 tigua puya minayaguabi tomia iba nayaguabi nahomolebira. Tigua wali agali warago bo ngaru gime ela haragola dabi holebira, lene.
MAR 16:19 Anduane Homogo Yasuhanda tihondo bi layagola howa dahuliya andaga iraga halu Ngode Datagaliwabe gi tigahayagi pu berene.
MAR 16:20 Ani biya handala tigua purogo lalu dindi bibahendeni bi mana lamigi bima pene. Pialu howa Anduane Homogohanda ti biamogo bialu tigua bi mana lamiyago henene larago manda bilonaga manane walia hene.]
LUK 1:1 Agali homogo Tiobilasa-o mbirale tara tara dewa ina hemagoria biyagonaga te agali dewalime gilibule manda bialu hene.
LUK 1:2 O biyadagoni tigua de handayarubi bi mana lawai hayarubi piganengi tenialu inahondo langiyadagua bebani gilibu wini.
LUK 1:3 Anigo i̱na o biyadagoni pigane tenialu biyadagua bayuwa manda buwa í̠ de handalu daga labelonaga gilibu wia hole manda biru.
LUK 1:4 I̱na ogoni birudagoni ala agali maru hearume bi ogoni í̠hondo lawai hayago heneneore biyagoni í̠na bayuwa manda bibelo i̱na te ogoninaga gilibu wia haro.
LUK 1:5 Yudia dindini wali agali hearu Herodo handame haga kini heangi loma binigo mo miaga agali mbira mini Segaraia hene. Ibu Abaya loma binigo mo miaga henego aria hene. Ibu one mini Ilisabede ibu Arononaga aguanene berene.
LUK 1:6 Ani buwa libugua Ngode Datagaliwabenaga deni howa bayale dege bialu Anduane Homogonaga bi mana lo wiago bulene wiadaguaore biai halu hene.
LUK 1:7 Ilisabede ibu waneigini taba hanabe nahe wali tabua berene. Libu waneigini nahe waheore labolabo hene.
LUK 1:8 Horo mbirungi Segaraia ibu loma binigo mo miaga agali howa loma binigo mo miaga marume biabe bia aribia hagadagua buwa ibugua bulene winingi Anduane Homogonaga andaha howa biabe bialu hene.
LUK 1:9 Delolenenaga dagia wiagoriani mbirale mini inisenesi Ngode Datagaliwabehondo nga bilo delolene winigo aiwa delolebadabe hondole loma binigo mo miaga hearume dabo handalu hearia Segaraiahanda bulene wini. Ani biya handala ibu Anduane Homogonaga andaha anda pene.
LUK 1:10 Anda puwa ibugua mbirale mini inisenesi hagua ngabiore bilo lowa delalu hea tambu wali agali dewa tagirani bu hearume Ngode Datagaliwabehondo bi lalu hene.
LUK 1:11 Segaraia ibu ani bialu hearia mbirale mini inisenesi hagua ngabiore bilo delolenenaga dagia wiagoriani gi tigahayagi Anduane Homogonaga dahuliyali mbira ibalu ha pani ho hene.
LUK 1:12 Ha pani ho hearia de hondowa Segaraia ibu minime mogo lowa gi hene.
LUK 1:13 Gi hayago hondowa dahuliyali biagome ibuhondo lalu, Segaraia-o gi nahabe. Í̠na Ngode Datagaliwabehondo bi larigonaga Ngode Datagaliwabe ibu hale hayago í̠ one Ilisabede ibugua igiri mbira taba honolebira. Taba hanaragola í̠na ibu mini Yone wibe, lalu lamini.
LUK 1:14 Ani lamialu, Igiri ogoni taba hanaragola í̠bi wali agali maru dewa bu karu tibi turu hai ho holeberami.
LUK 1:15 Taba hanaragola howa ibu Anduane Homogonaga deni howa agali timbuniore holebira. Ani bu howa ibugua waini ibabi lulu yagane iba marubi nolene nawi holebira. Ibu ai̱yahanda ibu taba hanarangiore howa Ngode Datagaliwabe Dinini ibuha ho to̱laihe holebira.
LUK 1:16 Ho to̱laihe howa ibugua Isaraele wali agali dewa Anduane Homogo tinaga Ngode Datagaliwabe kagoria haru dai biai holebira.
LUK 1:17 Ngode Datagaliwabe bi mana latagi haga Elaya timbuni hongohe henedagua ibubi ogonibi dege howa Anduane Homogo maha ibilo ibu ala bamba halu pialu holebira. Bamba halu pialu howa ibugua aba ai̱yabi waneiginibi mo mbiraore halu mandagi helalu wali agali Ngode Datagaliwabe bi mana wahalu piaga karu mini mo beregedai halu mini tigabiwi karume manda biagadagua ti manda bilo ibugua mo manda bia holebira. Anduane Homogo ibilo tagi ibugua Anduane Homogonaga wali agali mo tiga bialu manda manda bu helolebira, lalu dahuliyali biagome lamini.
LUK 1:18 Ani layagola Segaraiahanda dahuliyali biagohondo ladai bialu lalu, I̱bi i̱ onebi iya wali agali tabua labolabo kabagodago í̠na bi larigoni henene lari lalu i̱na agua manda buabe, lene.
LUK 1:19 Ani layagola dahuliyali biagome ladai bialu lalu, I̱ mini Gaberelo Ngode Datagaliwabe karia haabo haruli. I̱na bi bayale áyu í̠ langirugoni langule Ngode Datagaliwabehanda, Bi ogoni lama pu, layadagoria howa íbu kogoni.
LUK 1:20 Anigo i̱na bi larogo lola holene tu haragola lola holebiraore. Í̠na bi ogoni mo henene nahe mini kira wu harigo ogoni bulebira langirugo lola holene horo helo nde í̠ bi nalabehe holebere, lalu lamini.
LUK 1:21 Segaraia ani bialu hea tambu ibu tagira ibilo wali agali tagirani hayaru ti hondo haabo hene. Segaraia ibu Anduane Homogonaga anda tamuha hondo haabo hayagola tigua ibu agi bialu haabo kabe toba howa minime tai bialu hene.
LUK 1:22 Segaraia ibu tagira ibuwa bi labe naheyagola wali agali biarume ibu tara mbira de gandeba ale Anduane Homogonaga andaha handayadago manda bini. Ibugua tihondo bi nalabehe howa bi loa hayago ibuni gime walia halu hene.
LUK 1:23 Emene halu ibunaga biabe bulene winigo biai halu Segaraia ibu andaga dai bini.
LUK 1:24 Mani howa Ilisabede ibu tombeha gali birayagola ibu ege duria andaga biraabo hene.
LUK 1:25 Biraabo howa lalu, Anduane Homogohanda i̱hondo bayale ogoni biamogo biyada. Ibugua i̱ hondowa dara hayagome ai wali agali marume i̱hondo, Wali tabua bedego, nalolebira, lene.
LUK 1:26 Ilisabede ibu tombeha gali bere berenego ege waraganengi Ngode Datagaliwabehanda dahuliyali mbira mini Gaberelohondo lalu, Í̠ Galilinaga tano mini Nasarete pobe, lene.
LUK 1:27 Wandari mbira mini Meri Yosebe ibu dabu bule lo berelenego berearia dahuliyali biagome ibuhondo bi lamule pene. Yosebe ibu Isaraele wali agalinaga Kini Debidinaga aguanene hene.
LUK 1:28 Ani bu berearia dahuliyali biagome puwa lalu, Meri-o mo palia holene í̠ha wiaabo helo laro. Anduane Homogo ibu í̠ heba mandagi howa turu timbuni habelo mo turu haya, lene.
LUK 1:29 Dahuliyalime bi layago hale howa Meri ibu bi ogoni aginaga larabe toba howa mini burugu lowa tai timbuni bialu berene.
LUK 1:30 Ani bialu berearia dahuliyali biagome ibuhondo lalu, Ngode Datagaliwabehanda í̠ mitangi bialu í̠hondo turu ho kago gi nahabe.
LUK 1:31 Í̠ tombeha gali bere birulebere. Í̠ igiri gali ogoni taba honowa ibu mini Yasu wibe, lalu lamini.
LUK 1:32 Ani lamialu lalu, Igiri ogoni ibu agali mini lene holebira. Wali agali bibahendeme lalu, Ibu Ngode Datagaliwabe Daligaorene Daliga Kagonaga Igini kagoni, lolebira. Anduane Homogo Ngode Datagaliwabehanda Yasu ibunaga mamali Debidi kini henedagua ibubi ho aribia ho helolebira.
LUK 1:33 Ibugua Yagaba aguanene karunaga kini haabobo bu holebira. Ibunaga handame ho holene wiaabobo bu wulebira, lalu lamini.
LUK 1:34 Ogonidagua lamiyagola Merihanda dahuliyali biagohondo lalu, I̱ wandari mabuage agalila nahene bedagodago bi áyu lariruni agua bialu bulubadabe, lene.
LUK 1:35 Ani layagola dahuliyali biagome ladai bialu lalu, Ngode Datagaliwabe Dinini í̠ha daluwa Ngode Datagaliwabenaga hongome í̠ karula holebira. Ani bulebirago manda buwa igiri taraore ogoni ibu Ngode Datagaliwabe Igini ka lalu lolebira, lene.
LUK 1:36 Dahuliyali biagome ani lamialu lalu, Í̠naga damene Ilisabede bedago mitangi bibe. Tigua ibu waneigini hono wibe nahe lenego áyu ibu wali waheore biruwa ibunaga tombeha gali bere beda. Gali biru bereane ege waragaria pene.
LUK 1:37 Ngode Datagaliwabehanda mbirale mbira nabibehe nawi, lalu lamini.
LUK 1:38 Ani lamiyagola Merihanda lalu, I̱ Anduane Homogonaga biabe bia hagane wandari bedogo í̠na áyu langiridagua i̱hondo biai helo, lene. Ani laya handala dahuliyali biagome Meri berea handala pene.
LUK 1:39 Dahuliyali biago ibu piya handala Meri ibu heyalu abale pialu Yudiani bare wiaru iri dali bigi bima pialu tano mbira wiagoria anda pene.
LUK 1:40 Tano ogoriani anda pialu Segaraianaga andaga Ilisabede bereria puwa Merihanda ibuhondo, Hagibuni-o í̠ bederia nenege ibirugo, lene.
LUK 1:41 Merihanda Ilisabedehondo bi layago hale howa Ilisabedenaga tombeha gali birayagome ema bini. Ani bereria Ngode Datagaliwabe Dinini Ilisabede ibuha ho to̱layagola
LUK 1:42 Ilisabedehanda bi dalimu lalu, Meri-o í̠ wali maru bedarubi ndo Ngode Datagaliwabehanda í̠ore mo turu timbuniore hayada. Í̠na gali taba honoleberego ibubi mo turu holebira, lene.
LUK 1:43 Ani lowa lalu, I̱na bayale agi birugonaga i̱naga Anduane Homogo kagonaga ai̱ya í̠ i̱ berewaria ibiribe.
LUK 1:44 Í̠na lalu, Í̠ bederia nenege ibiru, larigo hale harugola i̱naga tombeha gali bedago ibu turu howa ema biya, lene.
LUK 1:45 Ilisabedehanda ogonidagua lamialu lalu, Anduane Homogohanda, Bulebero, layadagua henemane lola holebiragoni í̠na mini mbiraore wu bedegome í̠ turu timbuni ho birulebere, lalu lamini.
LUK 1:46 Lamiyagola Merihanda lalu, I̱naga gubalinime Anduane Homogonaga mini yaraga harogoni.
LUK 1:47 Ngode Datagaliwabe ibu i̱naga Pele Ngiaga kago i̱naga miniha turu ho bedogo.
LUK 1:48 Ibunaga biabe bia haga wandari i̱ habane nabulene berewaria Ngode Datagaliwabe ibugua i̱ dara howa mitangi bini. Ngode Datagaliwabe Hongo Gibihe kago ibugua galone dunini timbuni ogoni i̱hondo biyago mitangi bialu áyu wali agali marumebi mani holebirarumebi, Meri ibu turu timbuni ho birulene nga, lolebira. Ngode Datagaliwabenaga mini bayale honani ale ka.
LUK 1:50 Wali agali dabane áyu hama pedarubi mani ho aribia holebirarubi ti bibahendeme Ngode Datagaliwabenaga mini mo yaraga halu karu Ngode Datagaliwabehanda tihondo dara howa biamogo bialu ka.
LUK 1:51 Wali agalime mine howa tini hangume bule lowa manda manda bu wu hearia ibugua ibunaga gi hongo timbunihegome dogola a̱i̱ na̱i̱ biyagola ti wahalu kilikala lalu purogo lai hene.
LUK 1:52 Kini hongohe hearu handame ho hearia ibugua ti mo dindiha helalu wali agali dindiha hearu mo yaraga ho helene.
LUK 1:53 Wali agalime tinaga miniha garibilo hearu bayale mbirale mbirale ibugua ti mo to̱la hai halu wali agali mbirale mbirale dewawi hearu ibugua tini giha mbira nayi, Pudaba, lene.
LUK 1:54 Ibugua inanaga mamalihondo, Bulebero, lowinidagua buwa ibunaga biabe bia haga Isaraele biamogo bule ibini.
LUK 1:55 Ibugua Abarahamabi Abarahamanaga aguanene ala henerubi mani holebirarubi tihondo dara howa biamogo bulene mitangi bia ho wiaabo ka, lalu Merihanda bi ogonidagua lamaro bini.
LUK 1:56 Meri ibu Ilisabedela ege tebira agima biralu nde ibuni andaga dai bini.
LUK 1:57 Ilisabedehanda gali taba honolene tu hayagola ibugua igiri gali mbira taba henene.
LUK 1:58 Taba hanayagola wali agali mandagi haga hearubi ibunaga damene hearubi ti ibu berearia ibuwa tigua Anduane Homogohanda Ilisabedehondo bayale gibiore biyagola hale howa ti ibu heba mandagi turu haga bu hene.
LUK 1:59 Horo halini bolangua hayagola tigua igiri gali biagonaga dongone podo mabu bia hole pene. Puwa tigua igiri biago aba mini Segaraia winigo igiri biagonaga minibi Segaraia dege wule biyaria
LUK 1:60 ibu ai̱yahanda lalu, Ogoni ndo ibu mini Yone wimi̱ya, lene.
LUK 1:61 Ani layagola tigua ibuhondo lalu, Í̠naga damene bibahende karu mbirali mini ogoni lalehe mbira nahe, lene.
LUK 1:62 Ani lowa tigua ibu abahondo, Í̠ igini mini ai wule hamelo kebe, lalu gime walia hene.
LUK 1:63 Ani biyagola Segaraiahanda beba gili buliya ngi la nabi gime dege walia hene. Ani walia hayagola tigua ibuhondo beba mini. Miyagola ibugua bebani gili bialu, Ibu mini Yone, gili bini. Ani gili biyago de hondowa tigua handaya hene.
LUK 1:64 Ani gili biyaore Segaraia ibu bi lone labehe hearia ibugua Ngode Datagaliwabe mini yaraga halu hene.
LUK 1:65 Ani biyagola wali agali ti ibu heba mandagi haga hearume mogo timbuni lene. Yudia dindini bare bibahende wiaruniha tara ogoni biyiyagonaga te loyogo lalu hene.
LUK 1:66 Bibahendeme te ogoni layago hale hayaru tigua mitangi bialu, Anduane Homogonaga hongo holene ibu heba haore biaruago igiri ogoni ibugua agi bulenaga holobadabe, lalu hene.
LUK 1:67 Yone aba Segaraia ibuha Ngode Datagaliwabe Dinini ho to̱laihe howa ibugua mbiwia halu bi ogodagua latagi halu lalu,
LUK 1:68 Iname Anduane Homogo Isaraele wali agalinaga Ngode Datagaliwabe kagonaga mini yaraga hama. Ibugua ibunaga wali agali biamogo bulene wiagoria ibalu ti golope hole hayada.
LUK 1:69 Ibunaga biabe bia haga Debidinaga aguanene mbirali ogoni ibu inanaga Pele Ngiaga hongohe helo ibugua dabo helayada.
LUK 1:70 Ibugua ibunaga mana latagi haga lomo bia ho heleneruha howa bambaore ani bulebero lalu lowinigo ogo.
LUK 1:71 Inanaga waitigi karume ina dariba nahelobi inahondo handabe manga ho karunaga hongo kagoha kamaria howabi ibugua, I̱na pele ngulebero, lalu lowini.
LUK 1:72 Ibugua inanaga mamalihondo dara howa, Biamogo bulebero, lalu, Habo nalolene bi baya taraore mbira ala lowinigo mitangi bulebero, lalu lowini.
LUK 1:73 Ibugua inanaga mamali Abarahamahondo bi galone duniniore lowinigo ogo, Iname gi nahe horo bibahende howa ibunaga biabe bia halu holoma̱ya inanaga waitigi karume ina dariba ho ngagoria howa ibugua ina pele ngialu haru dai bulebero, lalu lowini.
LUK 1:75 Ani lenego irane ina dindini kamagola howa ibu deni iname bayalebi tigabibi howa ibunaga biabe bialu holoma̱yanaga lowini.
LUK 1:76 I̱ igini-o tigua nde, Í̠ Ngode Datagaliwabe Daligaorene Daliga Kagonaga mana latagi haga kegoni, lolebira. Anduane Homogo ibilo í̠na bamba halu ibunaga hariga ba halu mo tiga bima polebere.
LUK 1:77 Í̠na ibunaga wali agali lamialu, Tígua ko birimigo ibugua domo wahai halu pele ngulebira, lamulebere.
LUK 1:78 Inanaga Ngode Datagaliwabe ibu hendore howa dara halu biamogo biaga ka. Ibugua ina haabo holoma̱ya pele mulene wá timbuniore holene aleme tagira ibalu
LUK 1:79 wali agali homolenenaga aruma holene ngagoria karu ibugua hari daligaha howa wá hadali helolebira. Ina mo palia holene ngagoria pole pialu holoma̱yanaga ibugua bayuwaore haru holebira, lalu bi ogoni Segaraiahanda mbiwia halu latagi hene.
LUK 1:80 Ibu igini biago mini tinginibi boga bialu hongo halu anda hene. Ani buwa ibugua Isaraele wali agali hearume ibu de hendelo hamani ha pani holene tu wilo lowa ibu dindi ko wali agali nahaga wiagoha haabo hene.
LUK 2:1 Horo uruningi Lomo agali mini Ogasadasa ibu Kini howa ibugua wali agali handame ho hearu bibahendenaga mini gili biai holene nga lowini.
LUK 2:2 Gabumane agali mini Kuiriniasa ibugua wali agali Siria dindini hearu haru hearia mini gilibu wulene pigane ogoningi wini.
LUK 2:3 Ogonidagua howa wali agali bibahende tinaga dindi tene pugu pugu bialu bebani mini gilibu wule pene.
LUK 2:4 Ani bialu Yosebe ibu Galilihayagi Nasarete tano howa Yudiahayagi Bedeleheme tano ogoniha pene. Bedeleheme ogoriani bambaore handame haga Kini Debidi ibu hene. Yosebe ogoniha penedagoni ibu Debidinaga aguanene howa pene.
LUK 2:5 Yosebe ibu one Meri ayuore dege dabu bule lo berelenego libu haru mini wule pene. Meri ibu tombeha gali bere berenego
LUK 2:6 libu Bedelehemeni hearia Meri ibu gali taba honolene tu hene.
LUK 2:7 Ani hayagola Meri ibu igiri mbira pigane taba honowa labolabome huba buwa nogo bulumaga tomo naga mbogoyi wiagoha pale lene. Mbogoyi ogoniha pale lenedagoni irane wali agali palu ngoai hagane anda heago to̱la tagi hai howa henge nawiyagola bini.
LUK 2:8 Dindi ogoninaga mbirahayagi nogo sibi haru haga maru hearume ti mbiragani tinaga nogo sibi tagirahayagi haru hene.
LUK 2:9 Ani haru hearia Anduane Homogonaga dahuliyali mbira ha pani hayagola Anduane Homogonaga wá taraore holene ti heagoria hadali hene.
LUK 2:10 Ani biyagola nogo sibi haru haga biaru ti gi howa mogo timbuniore lo hene. Ani gi ho heago hondowa dahuliyali biagome lalu, Gi nahadababe. I̱na wali agali bibahende bu karu turu hai holenenaga bi bayale langule íbu kogo.
LUK 2:11 Áyu mbiraga ogoni Debidinaga tano ngagoriani tínaga Pele Ngiaga íbu kago ibu Anduane Homogo Keriso ka.
LUK 2:12 Ogoni heneneoreda manda bilimulonaga igiri gali ogoni ibu nogo bulumaga tomo naga mbogoyi ngagoha labolabome huba buwa pale ledaria handa walia holeberami, lene.
LUK 2:13 Dahuliyali biagome bi ogonidagua lamiyagola abaleore dahuliyali dewaore dahuliyali mbira abale íbu hayago heba mandagi ha pani hene. Ha pani ho howa Ngode Datagaliwabenaga mini yaraga halu iba gana lalu,
LUK 2:14 Ngode Datagaliwabe dahuliya andaga daligaore kagonaga mini yaraga holene nga. Wali agali dindi bibahendeni Ngode Datagaliwabehanda turu ho karu tinaga gubaliniha Ngode Datagaliwabehanda mo palia ho ka, lene.
LUK 2:15 Ogonidagua lalu dahuliyali biaru ti dahuliya andaga dai bini. Dai biyagola nogo sibi haru haga biarume tini lo mitangi bialu lalu, Áyu ogoni Anduane Homogohanda galone mbira inahondo walia hayagoni handami̱ya Bedeleheme ma nalare, lene.
LUK 2:16 Ani lalu ti abaleore Bedeleheme pialu Meri Yosebela berearia handa walia howa Yasubi mbogoyi nogo bulumaga tomo naga wiagoha paleria hendene.
LUK 2:17 Tigua igiri gali biago handalu howa bi bibahende dahuliyali biagome ogoni agua bulebira layagola hale ho yayago Meri Yosebela lamiai hene.
LUK 2:18 Ogonidagua lamiai hayagola wali agali bibahende bu hearume nogo sibi haru haga biarume layago hale hai hene. Hale howa ti mini burugu lowa mogo lai ho hene.
LUK 2:19 Meri ibugua nde bi bibahende layane hale halu ibunaga miniha mo pe hai howa mitangitangi bialu berene.
LUK 2:20 Ani bialu nogo sibi haru haga biaru dahuliyali biagome aguaore bulebira lalu lamiyadaguaore biai hayagola hale hayagonagabi deme handayagonagabi ti dai bialu howa Ngode Datagaliwabenaga mini yaraga hama pene.
LUK 2:21 Ogonidagua buwa horo halini bolangua hayagola igiri gali biagonaga dongone podo mabu bia halu howa ibunaga mini Yasu wini. Yasu mini ogoni ibu ai̱ya Meri tombeha gali nabere howa dahuliyalime ala, Yasu wibe, lalu lamiyadagua wini.
LUK 2:22 Mosese heneyangi waneigini ai̱ya abalame bulene winigo Mana lowinigodagua bulene tu hayagola Yosebe Merila libugua igiri biago Anduane Homogohondo lomabu mule Yarusaleme yalu pene.
LUK 2:23 Ogoni tene agi Anduane Homogo ibunaga mana lowini ngago ogo, Igiri pigane wahene walime taba hanaragola howa igiri ogoni Anduane Homogohondo loma bia holene nga, lalu gilibu nga.
LUK 2:24 Mana mendebi lowinidagua Yosebe Merila libugua bule pene. Mana mende lowini ngago ogo, Ega malibu ale kirayaguabi ega malibu ale dege emene tara igini kirayaguabi Anduane Homogohondo bo mulene nga lowinidagua bo mule pene.
LUK 2:25 Ogoningi agali mbira mini Simiono ibu Yarusalemeni hene. Agali ogoni ibu Ngode Datagaliwabe mitangi bialu bayale biagabi Ngode Datagaliwabehanda Isaraele wali agali pele milo manda bu hagabi hene. Simiono ibu Ngode Datagaliwabe Dininihe hene.
LUK 2:26 Ngode Datagaliwabe Dinini ibugua Simionohondo ala lowa lalu, Í̠ nahome keore Anduane Homogohanda Mbirali Dabo Helenego ibulebira lowinigo íbu kagola hondolebere, lalu lamini.
LUK 2:27 Ani lamuwa Ngode Datagaliwabe Dinini ibugua Simiono Anduane Homogonaga anda heago tamuha haru anda pene. Haru anda piyagola Yasunaga aba ai̱yalame Mana lowinidagua libunaga igini Ngode Datagaliwabehondo lomabu mule taba yalu ibini.
LUK 2:28 Ani taba yalu ibiyagola Simiono ibugua Yasu gime taba yuwa Ngode Datagaliwabenaga mini yaraga halu ka̱i̱ lalu ogodagua lene.
LUK 2:29 Anduane Homogo í̠na bi bamba langirigo lola harago í̠naga biabe bia hagane o kogo i̱naga gubalini mo palia howa i̱ homolene karulape kogoni.
LUK 2:30 I̱ninaga deoreme í̠na pele mulene ngulebero larigoni hendedo.
LUK 2:31 Í̠na ogoni mo manda manda bu wirigo wali agali bibahendeme de hendelo birigoni.
LUK 2:32 Ibu wá holene howa Yu wali agali ndo tara tara karume í̠naga mana manda bilo mo walia holebi í̠naga Isaraele wali agali kamarunaga mini mo yaraga holebi kagoni, lalu Simionohanda lai hene.
LUK 2:33 Simionohanda bi ogoni Yasu mitangi bialu layagola hale howa Yasunaga aba ai̱yala libunaga minime mogo timbuni lene.
LUK 2:34 Ani biyagola Simionohanda ti mo turu halu igiri ai̱ya Merihondo bi ogodagua lamini. Ibugua lalu, Hale ha. Igiri ogoni ibugua Isaraele wali agali dewa maru mo pila helo maru mo heya helobi Ngode Datagaliwabehanda ibu dabo helene. Ibu Ngode Datagaliwabenaga manane kago hondowa wali agali dewame ibuhondo bi ko lalu handabe manga howa
LUK 2:35 tinaga miniha manda bu kagobi la pani holebira. Ani biragola dara bulene ogoni wai bulene ayu tibu nehe aleme í̠naga gubaliniha anda poragola tandaga biraligobi bulebira, lalu Merihondo lamini.
LUK 2:36 Ogoningi wali dalo mbira waheore mini Ana ibu Ngode Datagaliwabe bi mana latagi haga berene. Ibu Asa hameigini mbira mini Penuelenaga wane berene. Ala ibu agali puwa ibu agalinila bereane mali karia pene. Ani pu berearia ibu agalini homene. Ibu mali pira halirani maria (84) biraabo howa waheore berene. Ani biruwa ibu Anduane Homogonaga andaha horo mbira yu wa nahe biraabo haga berene. Ibugua Ngode Datagaliwabe mitangi bialu tomo nane howa ibuhondo bi laabo halu horombe mbiragabi ani biraga berene.
LUK 2:38 Ogonidagua biaga berenego Yosebe Merilame Anduane Homogonaga andaha Yasu taba yu hearia hondowa Ana ibu kaware ibalu ibugua Ngode Datagaliwabehondo ka̱i̱ lene. Ani lowa ibugua wali agali Ngode Datagaliwabehanda pele ngilo Yarusalemeni hondo hearu tihondo igiri ogoninaga te lamiai hene.
LUK 2:39 Yosebe Merila libugua Anduane Homogohanda bi mana lowinidagua biai halu Yasu taba yalu ti tini andaga Galiliha tano mbira winigo mini Nasarete dai bini.
LUK 2:40 Dai bu heagola Yasu ibu anda halu hongo hayagola mini boga bialu mini gigabiwi holene ibuha to̱ laihe hene. Ani bu hayagola Ngode Datagaliwabenaga turu howa biamogo bia holeneru ibuha wini.
LUK 2:41 Mali bibahendengi Bolangua Halu Penegonaga Horo haragola Yasu ai̱ya abala libu Yarusaleme piaga hene.
LUK 2:42 Yasu ibunaga mali pira mbirani kira (12) hayagola ibu ti heba pene.
LUK 2:43 Tomo nolene horo uruni piai hayagola libu andaga dai bialu hene. Yasu ibu Yarusalemeni helo wahalu manda nabi howa libu hangu dai bialu hene.
LUK 2:44 Ibu wali agali maru ibiradagua ibirabe toba howa libu horo mbiru puabo hene. Ani buwa libugua Yasu tai bialu libunaga damenerubi wali agali marubi tihondo, Yasu de handarimibe, lalu tai bialu hene.
LUK 2:45 Tai biaabo halu libugua Yasu handa walia nahe howa Yaruselemeni ibu tai bima dai bini.
LUK 2:46 Horo kiru howa tebonengi Anduane Homogonaga andaha puwa libugua Yasu Yu agali lawai hagaru heba biralu tigua bi layago hale halu biruwa bi ladai bialu berearia handa walia hene.
LUK 2:47 Yasuhanda bi layago hale ho hayarume ibu mini timbuniwi howa ladai biyago hale howa ti minime mogo lo hene.
LUK 2:48 Ibu ai̱ya abalame Yasu de hondowa miniha mogo lowa ibu ai̱yahanda ibuhondo lalu, Igini-o iyahondo ogoni birigo aginagabe. Í̠ aba iyame mini burugu lowa í̠ tai biaabo halu hariba, lene.
LUK 2:49 Ani layagola ibugua ladai bialu lalu, Libugua i̱ tai biribidago agibe. I̱ Abanaga andaha i̱ holene ngago manda nabi haribibe, lene.
LUK 2:50 Bi ani layago hale howa libu manda nabi irane aginaga larabe toba ho hene.
LUK 2:51 Ani biyagola howa Yasu ibu ai̱ya abala heba Nasarete dai buwa libugua bia layadagua ibugua biai halu hene. Urunidagua bigi biyagola ibu ai̱yahanda ibunaga miniha mitangitangi bialu biraabo hene.
LUK 2:52 Yasu ibu tingini minibi boga bialu ibu mini gigabi wialu anda hayago hondowa Ngode Datagaliwabehandabi wali agali hearumebi ibuhondo turu hai ho hene.
LUK 3:1 Agali Taiberiasa ibu dindi dewa handame haga Kini howa mali pira mbirani duria (15) ibugua handame howa heangi Pondiasa Pailate ibu Yudia gabumane haru haga heangibi Herodo ibu Galili haru haga heangibi Herodo hamene Pilibi ibu Idureabi Taragonaidisibi haru haga heangibi Lisaniasa ibu Abilene haru haga heangibi
LUK 3:2 Anasabi Kaiabasabi libu Loma Binigo Mo Miaga Haguane Timbuni heangibi ogoningiore Segaraia igini Yone ibu dindi ko wali agali nahaga wiagoria howa Ngode Datagaliwabehanda ibuhondo bi lamini.
LUK 3:3 Ngode Datagaliwabehanda ibuhondo bi lamiyagola Yonehanda dindi bibahende iba Yodana piyagohayagi ibaga bialu wali agalihondo mana lamialu lalu, Ngode Datagaliwabehanda tí ko birimigo domo wahelo bu mini beregedowa baboraya bilimu, lalu lamini.
LUK 3:4 Ngode Datagaliwabe bi mana latagi haga Aisaiahanda mbiwia halu ibunaga mbugani bi gilibu wini ngago ogo, Dindi ko wali agali nahaga wiagoria howa mbiralime olalu, Anduane Homogo ibilo hariga ba hole manda manda bialu halimu. Hariga ogoni tigabiore ba halimu.
LUK 3:5 Ulini hombene bibahende ngaru mo donde lai halu dindi hari emene timbunibi godo gege biai halimu. Hariga pidipodabi ngago tigatiga wilo bo tiga bialu hariga ko ngago bayuwa mbara lalu mo tiga bilimu.
LUK 3:6 Wali agali bibahendeme Ngode Datagaliwabenaga pele mulene handai holebira, lalu ka, lenego gilibu nga.
LUK 3:7 Wali agali dewaore Yonehanda ti baboraya bia helo ibu hearia iba ho wiaabo hene. Ani biyagola Yonehanda tihondo lalu, Tí ko nogombi ale kamigo Ngode Datagaliwabehanda pani áyuore wia holebirago nanole yo pialu polene nga lalu tí aiwa langiyabe.
LUK 3:8 Tígua ko bialu harimigo wahalu mini beregedai kamigo walia holenaga mana bayale bialu halimu. Tínime lalu, Inanaga mamali Abarahama hene, lolene nawi. I̱na tíhondo bi mbira langerogo Ngode Datagaliwabehanda ege to̱le̱ o ngaruni mo yuwa Abarahamanaga aguanene bu hinu helabehe kagoni laro.
LUK 3:9 Ira karu dibule ayu ira teneha mo yu íbu nga. Ira lini bayale nadaga karu bibahende dibai howa ira dedagoria delolebira, lene.
LUK 3:10 Ani layagola wali agali hearume Yonehondo lalu, Bi larigo iname agi bulene wiaruabe, lene.
LUK 3:11 Ani layagola ibugua ladai bialu lalu, Mbiralime aga kira wu kago mendego nawi kayagua ogoni mulene nga. Mbiralime tomo nolene wu kayagua ibugua maruhondo talebu mulene nga, lene.
LUK 3:12 Dagiyi muni mo mogo biaga maru hearu Yonehanda ti baboraya bia helo ibuwa tigua ibuhondo lalu, Lawai haga-o iname agi bulene wiaruabe, lene.
LUK 3:13 Ani layagola Yonehanda tihondo ladai bialu lalu, Dagiyi muni tigatiga hangu ngi lolene nga, lalu lamini.
LUK 3:14 Ani layagola ami agali maru hearume Yonehondo lalu, Inamebi agi bibehe kamabe, lene. Ani layagola Yonehanda tihondo ladai bialu lalu, Wali agalinaga muni page bialu gingila namilimu. Godi lalu howa ke̱ halu nde nalalimu. Amime yolo ngirago karulape ngira manda bulene nga, lene.
LUK 3:15 Wali agali hearume ti miniha turu howa Yone mitangitangi bialu Mbirali Dabo Helenego ibulebira lenego Yone ibu ka bada lo mitangi bini.
LUK 3:16 Ogonidagua mitangi biyagola Yonehanda ti bibahendehondo lalu, I̱na tí ibame baboraya bialu kogo maha mbirali i̱ emene ko̱ kogobi ndo ibu daliga timbuniore kago ibulebira. I̱ bayale ndo howa ibunaga ge habe gamu i̱na gololene nakarulapeore kogoni. Ibugua Ngode Datagaliwabe Dininimebi ira hungu biragomebi tí baboraya bia holebira.
LUK 3:17 Ladi ale mini widi ibunaga lini aeanela dambialu mo tale bilo ibugua mbirale baraga hagane nama tabuli ale yu ka. Tale biai howa ibugua widi lini do hagane andaha do hole wuwa aeane biaru ira hundia nabiaga daabo kagoria delolebira, lalu lamini.
LUK 3:18 Yonehanda wali agalihondo bi tara tara laga bialu Bi Mana Debene lamialu, Tígua bu mini beregedalimu, lalu lamialu hene.
LUK 3:19 Gabumanenaga haru haga Herodohanda ibu hamene Pilibinaga one Herodiasa dabu bialu heagolabi mana ko dewa bialu heagolabi de hondowa Yonehanda Herodo talini.
LUK 3:20 Ani taliyagola Herodohanda ko timbuni bialu Yone garabaya bini.
LUK 3:21 Yonehanda wali agali bibahende hearu baboraya bia hai howa ibu Yasu baboraya bia hene. Ani biyagola Yasu ibu Ngode Datagaliwabela bi lalu hearia hari daliga budalu
LUK 3:22 Ngode Datagaliwabe Dinini ega malibu alego Yasuni dalini. Ani biyagola dahuliya andaga howa bi ladali halu lalu, I̱ Iginore i̱na í̠ gubalini ho howa í̠hondo turu timbuni ho kogoni, lene.
LUK 3:23 Yasuhanda ibunaga biabe pigane tenialu biyangi ibunaga mali pira tebira (30) agima hene. Wali agali hearume Yasu ibu Yosebe igini ka mitangi bu hene. Yosebe ibu Hilai igini hene.
LUK 3:24 Hilai ibu Maligi igini Maligi ibu Yanai igini Yanai ibu Yosebe mende igini hene.
LUK 3:25 Yosebe ibu Madadaiasa igini Madadaiasa ibu Amoso igini Amoso ibu Nahumu igini Nahumu ibu Eseli igini Eseli ibu Nagai igini hene.
LUK 3:26 Nagai ibu Meada igini Meada ibu Madadaiasa mende igini Madadaiasa ibu Semene igini Semene ibu Yosege igini Yosege ibu Yoda igini hene.
LUK 3:27 Yoda ibu Yoanana igini Yoanana ibu Lesa igini Lesa ibu Serubabele igini Serubabele ibu Sealadiele igini Sealadiele ibu Neri igini hene.
LUK 3:28 Neri ibu Melegi igini Melegi ibu Adi igini Adi ibu Kosama igini Kosama ibu Elemadama igini Elemadama ibu Ere igini hene.
LUK 3:29 Ere ibu Yosua igini Yosua ibu Eliese igini Eliese ibu Yorimi igini Yorimi ibu Madada igini Madada ibu Libai igini hene.
LUK 3:30 Libai ibu Simiono igini Simiono ibu Yuda igini Yuda ibu Yosebe tebone igini Yosebe ibu Yonama igini Yonama ibu Eliagimu igini hene.
LUK 3:31 Eliagimu ibu Melea igini Melea ibu Mena igini Mena ibu Madada igini Madada ibu Nadana igini Nadana ibu Debidi igini hene.
LUK 3:32 Debidi ibu Yasi igini Yasi ibu Obede igini Obede ibu Boasa igini Boasa ibu Salamono igini Salamono ibu Nasono igini hene.
LUK 3:33 Nasono ibu Aminadaba igini Aminadaba ibu Adamini igini Adamini ibu Arani igini Arani ibu Heserono igini Heserono ibu Perese igini Perese ibu Yuda igini hene.
LUK 3:34 Yuda ibu Yagaba igini Yagaba ibu Aisaga igini Aisaga ibu Abarahama igini Abarahama ibu Tera igini Tera ibu Neho igini hene.
LUK 3:35 Neho ibu Serugu igini Serugu ibu Leu igini Leu ibu Pelege igini Pelege ibu Ebere igini Ebere ibu Sela igini hene.
LUK 3:36 Sela ibu Kainana igini Kainana ibu Arabagada igini Arabagada ibu Seme igini Seme ibu Noa igini Noa ibu Lamege igini hene.
LUK 3:37 Lamege ibu Medusela igini Medusela ibu Inogo igini Inogo ibu Yarede igini Yarede ibu Mahalalele igini Mahalalele ibu Kenana igini hene.
LUK 3:38 Kenana ibu Inoso igini Inoso ibu Sede igini Sede ibu Adama igini Adama ibu Ngode Datagaliwabe igini hene.
LUK 4:1 Yasu ibu iba Yodanaha howa dai biyagola Ngode Datagaliwabe Dinini Yasuha ho to̱laihe howa ibugua dindi ko wali agali nahaga wiagoria Yasu haru pu hene.
LUK 4:2 Ani haru pu hearia dama Heyolabeme horo pira mariani (40) Yasu ko mo bia habehedabe hondole ba handalu hene. Ani ba handalu hearia Yasu tomo nane hangu heane horo ogoni piai hayagola Yasu ibu garibilo hene.
LUK 4:3 Ani bu heago hondowa dama Heyolabeme Yasuhondo lalu, Í̠ Ngode Datagaliwabe Igini keyagua ege to̱le̱ ogo mo mberedi bu hina, lene.
LUK 4:4 Ani layagola Yasuhanda ladai bialu lalu, Anduane Homogonaga mbugani lo ngago ogo, Wali agalinaga holene tomo noleneme hangu miaga ndo, lalu gilibu nga, lene.
LUK 4:5 Ani layagola dama Heyolabeme Yasu haru iraga halu wali agali dindi bibahendeni karu abaleore de pandi mugu laradagua ibuhondo walia hene.
LUK 4:6 Ani walia halu lalu, Bibahende ogoni i̱hondo ngiai henego i̱na mua biragohondo mibehe ko. Í̠na bulu paluwa i̱hondo bi pupu wiriyagua bibahendeore ogoni í̠na karulowa haru hai habelobi ti bibahende karume í̠naga mini yaraga hai helobi ngiai holebero, lene.
LUK 4:8 Ani layagola Yasuhanda ladai bialu lalu, Anduane Homogonaga mbugani lo ngago ogo, Anduane Homogo tínaga Ngode Datagaliwabe ibu andaneha haabo halu ibuni hangu mitangi bialu ibunaga minini howa lotu lalu halimu, lalu gilibu nga, lene.
LUK 4:9 Ani layagola dama Heyolabeme Yasu Yarusaleme haru pialu Anduane Homogonaga anda daligaoreni helowa ibuhondo lalu, Í̠ Ngode Datagaliwabe Igini keyagua ogoriani howa í̠nime porabupe harene.
LUK 4:10 Ogoninaga Anduane Homogonaga mbugani bi mbira lo ngago ogo, Ngode Datagaliwabehanda ibunaga dahuliyaliru lamialu hondo hole pudaba lolebira, lalu
LUK 4:11 bi mendebi ogodagua dege lo nga, Ege to̱le̱ ngagome í̠naga ge nabehedagola dahuliyali uruni tinaga gime í̠ taba yaraga holebira, lalu gilibu nga, lene.
LUK 4:12 Ani layagola Yasuhanda ladai bialu lalu, Anduane Homogonaga mbugani ogodagua lo nga, Anduane Homogo tínaga Ngode Datagaliwabe ibunaga hongo abidabe hondole bahanda nabilimu, lalu gilibu nga, lene.
LUK 4:13 Dama Heyolabeme Yasu ko tara tara mo bia habehedabe ba handayagola nabialu binini awe dai bule mitangi bialu ibu Yasu helalu pene.
LUK 4:14 Ngode Datagaliwabe Dinini ibugua Yasu mo hongo hayagola ibu Galili dai bini. Yasuhanda biyagoni marume loyogo lalu howa wali agali bibahende ogoriani hearume hale hai hene.
LUK 4:15 Ani biyagola Yasuhanda ngoai hagane andaruha howa mana lawai hayagola wali agali bibahende hearume ibunaga mini yaraga halu hene.
LUK 4:16 Yasu ibu Nasareteni halu anda henegoria pu howa ibu Sabada horongi biaga winidagua bialu ngoai hagane andaha anda pene. Anda puwa ibugua Anduane Homogonaga mbugani howa bi daga lole heyalu
LUK 4:17 mbirali heagome mana latagi haga Aisaianaga mbuga ibuhondo miyagola Yasuhanda mbuga ogoni angalalu bi mbira gilibu wini wiago handa walia howa daga lalu henego ogo,
LUK 4:18 Anduane Homogonaga Dinini ibu i̱ha kagoni. Irane i̱na wali agali yagibano karuhondo bi mana debene lamuliya ibugua i̱ dabene. Wali agali dariba ho ngaruhondo golope holene nga lalu lamulenebi deme nahandabehe karu lone de hendelo mo bayale holenebi garabaya biabe ale bia haga karu golope holenebi Anduane Homogohanda ibunaga wali agalihondo pele mulene tu áyu nga lalu lamulenebi ogoni bibahende ibugua, Í̠na ani bule pu, lalu lenego gilibu nga, lene.
LUK 4:20 Ani daga lai howa Yasuhanda mbuga biago payuwa hondo haga biagohondo mialu mana lawai hole berene. Ani biyagola wali agali bibahende biru wiarume ibu handaya ho berene.
LUK 4:21 Ani bu bereagola ibugua tihondo lalu, Bi ogoni Anduane Homogonaga mbugaha howa daga larugola tígua hale ho birarimiore áyu ogoni lola haragoni, lene.
LUK 4:22 Ani layagola wali agali biru wiarume miniha mogo lowa lalu, Bi baya gibiore lagadago ibu Yosebe igini ndobe, lene.
LUK 4:23 Yasuhanda tihondo lalu, Bi mbira laramiligo tígua i̱hondo lalu, Anogoda-o í̠ni mo dabi harene, loleberami. Tígua i̱hondo bi mendebi lalu, Kabaniamani howa mana bialu harigo hale harimago oali howabi bialu harene, loleberami.
LUK 4:24 Galone mbira ogo i̱na langerogo. Ngode Datagaliwabe mana latagi hagame ibuni dindini howa bi laragola wali agali karume hale nahaga ka, lene.
LUK 4:25 Yasuhanda ani lowa lalu, Hale hadaba. Elaya ibu heneyangi Isaraele dindini howa wali dalo dewa biru winigo ogoni heneneore laro. Biru wiyangi mali tebira mane ogonaga ege waragaria dalu naibi gaea hangu bia ho wiaabo hene.
LUK 4:26 Ani biyagola Ngode Datagaliwabehanda Elayahondo, Isaraele wali agali biamogo bule pu, nale howa wali dalo mbira Saidono dindinaga tano mbira mini Sarebadani berenego, Biamogo bule pu, lene.
LUK 4:27 Ngode Datagaliwabe mana latagi haga Elaisa ibu heneyangi Isaraele dindini howa wali agali ge hamua dewa bu hene. Ani bu henego ti mbira mo dabi nahe Siria agali mbira mini Naimana ibu dege mo dabi hene, lene.
LUK 4:28 Yasuhanda ani layagola wali agali ngoai hagane andaha biru wiarume hale howa ti keba timbuni hene.
LUK 4:29 Tigua keba timbuni howa heyalu anda bu heagoriani howa Yasu minu yalu tagira pene. Tinaga tano ogoni hombeneni hene. Tigua Yasu hombeneni minu yalu puwa bare bayanoha howa bape hole manda biyaria
LUK 4:30 Yasuhanda wali agali dewa bu heagoha bolo baga bialu puabo hene.
LUK 4:31 Yasu ibu puabo halu Galilinaga tano mbira mini Kabaniama anda puwa Sabada horongi ibugua wali agali hearuhondo bi mana lawai hene.
LUK 4:32 Yasuhanda hongo holene taraore yu howa lawai hayagola wali agali bu hearume hale howa miniha mogo lai hene.
LUK 4:33 Ngoai hagane andaha agali mbira dama koore daragahe hene. Ibugua ga̱ timbuni lalu lalu,
LUK 4:34 Nasareteali Yasu-o ina kamagoha í̠na agi bule ibiribe. Ina bo wahole ibiribe. Í̠ mbira Ngode Datagaliwabenaga bi lamule piaga loma biahe biago kego mandabu kogoni, lene.
LUK 4:35 Ani layagola Yasuhanda dama biago talialu, Bi nalabe. Agali helalu í̠ tagira pu, lene. Ani layagola damame agali biago wali agali hearu wanakuini howa mo pila halu mo ko nahe howa tagira pene.
LUK 4:36 Wali agali bibahende bu hearume miniha mogo lai ho howa tini dege dege laga laga bialu lalu, Ibugua bi layagoni agi alebe. Damarume ibugua tagira pudaba laradagua pelo pudaba lolene hongo yu kagoni, lene.
LUK 4:37 Yasuhanda biyagoni wali agali dindi ogoriani hearume hale hai hene.
LUK 4:38 Ani buwa Yasuhanda ngoai hagane andaha howa pialu Saimononaga andaga pene. Saimono imane ibu poboyogo warago timbuni bo winigo tigua Yasu lamini.
LUK 4:39 Lamiyagola Yasu ibu wali warago bo wiagoria puwa, Dabi ha, layagola poboyogo ala biyago ereba halu dabi hene. Dabi howa wali ogonime heyalu ti tomo nelo mule manda manda bini.
LUK 4:40 Alendo ni paliyagola wali agalime tinaga damene warago tara tara bo wiaru Yasu hearia mo yalu ibini. Mo yalu ibiyagola Yasuhanda ti hangu hangu gime ela haga bialu ti bibahende mo dabi hai hene.
LUK 4:41 Wali agaliha howa damarubi tagira pugu bialu ga̱ lalu, Í̠ Ngode Datagaliwabe Igini kegoni, laga bini. Ani bigi biyagola dama biarume Yasu ibu Mbirali Dabo Helenego ibulebira lowinigo ibuore kalo mandabu henego Yasuhanda dama biaruhondo, Bi naladababe, lene.
LUK 4:42 Muna biyagola Yasu heyalu dindi ogoniha howa tagira pialu mbirali naheore wiagoha pene. Wali agali hearume tai bima mama pene. Tigua ibu handa walia howa ibu napelo hongo hene.
LUK 4:43 Ani biyagola Yasuhanda tihondo lalu, Ngode Datagaliwabehanda Handame Ho Holenenaga Bi Mana Debene wali agali maruhondobi lamulene ngo. Ani buliya Ngode Datagaliwabehanda i̱hondo, Pu, laya, lene.
LUK 4:44 Yasuhanda ibaga bialu ngoai hagane andaruha bi mana lamigi bima pene.
LUK 5:1 Horo mbirungi Yasu iba timbuni mini Genesarete angeni hearia wali agali dewame Ngode Datagaliwabe bi mana hale hole gengeda tago bu hene.
LUK 5:2 Ani biyagola Yasuhanda iba talu kira iba angeni yu íbu wiaria de hendene. Agali wena minagarume iba talu o biago labo ngelalu wena nu wiaru wayawaya bialu hene.
LUK 5:3 Yasu ibu iba talu mbira Saimononaga wiagoria anda puwa ibugua Saimonohondo lalu, Iba angeni howa iba talu emene he̱lo pela, lene. Saimonohanda ani biyagola Yasuhanda iba taluni biruwa wali agali dewa angeni ngoai ho hearu bi mana lawai halu hene.
LUK 5:4 Yasuhanda wali agali bi mana lawai howa ibu Saimonohondo lalu, Í̠bi agali wena minaga í̠ heba karubi tígua wena minule wena nu ibira hole iba talu emene edera pelo pelabe, lene.
LUK 5:5 Ani layagola Saimonohanda Yasuhondo lalu, Anduane-o iname mbiraga minule haabo harimago mbira naminiore kamagoni. Í̠na ani laregodago i̱na wena nu ibaha ibira haro, lene.
LUK 5:6 Ani lowa tigua wena nu ibaha ibira hayagola wena dewaore miyagola wena nu lerelabehe hene.
LUK 5:7 Ani biyagola tigua hangu yaraga nahabeheyagola maru tini aria iba talu mendeni hearume yamogo bule ibilo lowa gime gibu mini. Ani layagola tigua ibai howa iba talu kira biago laboni wena baraga ho wiyagola iba talu biago labo ibaha namu lole bini.
LUK 5:8 O biyagoni hondowa Saimono Pidahanda Yasu buhayagi ge duli hanga ho biruwa lalu, Anduane Homogo-o i̱ koorene ko kogo i̱ helalu pu, lene.
LUK 5:9 Pidabi maru ibu heba wena minalu hayarubi wena dewa minu wiyago hondowa mogo lai ho hene.
LUK 5:10 Ogonidagua dege Saimononaga aria Sebedi igini Yone Yameselabi mogolo hene. Ani biyagola Yasuhanda Saimonohondo lalu, Gi nahabe. Áyu ogoni howa í̠na agali minalu hagane holebere, lene.
LUK 5:11 Ani buwa tigua iba talu biago labo angeni yalu puwa ngelalu mbirale marubi ngelai halu Yasu piyadagua talima pene.
LUK 5:12 Horo mbiru Yasu tano mbirani hearia agali mbira ge hamuabi henego Yasu hearia ibuwa abale birape howa lalu, Anduane-o í̠na i̱ mo dabi hoa biyagua nde mo dabi habehe ke, lene.
LUK 5:13 Yasuhanda ibunaga gi dogola amu howa agali biago ela halu lalu, I̱na í̠ mo dabi hoabago dabi ha, lene. Ani layagola agali biagonaga ge hamuabi biago abaleore ereba hai hene.
LUK 5:14 Ani biyagola Yasuhanda ibuhondo hongo howa lalu, Maru nalami loma binigo mo miaga agali kagome í̠ de hendelo ibu kagoria abale puabo halu pole pu. Ani bialu í̠ dabiore haridago walia hole wali agali karume de hendelo Mosesehanda bi lowini wiyadagua mbirale mbira loma bialu Ngode Datagaliwabehondo bo mibe, lene.
LUK 5:15 Anigo Yasuhanda biyagoni maru hearume lo yanga layagola wali agali dewaoreme Yasu ibugua bi layago hale hole ibalu howa warago bo wiaru mo dabi haga bilo ibini.
LUK 5:16 Ani biyagola Yasu ibu wali agali nahaga wiagoha pu bagi howa Ngode Datagaliwabela bi lalu hene.
LUK 5:17 Horo mbiru Yasu ibugua mana lawai halu hearia Perisi agali marubi Mana lowinigo lawai haga marubi ti tano bibahende Galili howabi Yudia howabi Yarusaleme howabi íbu ngoai ho berene. Ani bialu howa Yasuhanda warago tara tara bo wiaru mo dabi helo Anduane Homogonaga hongo Yasuha hene.
LUK 5:18 Ani biyagola agali maru hearume agali mbira kuduguhe henego ibu lebereni ira ho yalu ibuwa tigua anda Yasu heagoria ngelole lowa henge tai bialu hene.
LUK 5:19 Wali agali dewa ho gengeda tago bu heagola tigua anda tamuha yalu pobe nahe hene. Ani biyagola tigua agali biago anda dangini ira ho yalu iraga howa Yasu heago tigatiga anda dangi minu tidini. Tiduwa agali ira ho yayago lebere heba Yasunaga wanakuihayagi yarali hene.
LUK 5:20 Tigua mini mbiraore wu howa biyago hondowa Yasuhanda agali biagohondo lalu, Hamene-o í̠na ko birigo domai haya, lene.
LUK 5:21 Ani layagola Mana lowinigo lawai haga biarumebi Perisi agali biarumebi tini minime manda bigi bigi bialu, Ngode Datagaliwabe ibu hangume wali agali ko biyago domo wahabehe kago. Agali Ngode Datagaliwabe mege bialu kagoni ibu aidabe, lomanda bialu berene.
LUK 5:22 Ti ani lomanda bialu bereago hondowa Yasuhanda tihondo lalu, Tígua ogonidagua manda bialu bedamigoni agibe.
LUK 5:23 Í̠na ko birigo domai haya, lolenego tai bidabe be, Heyalu ibaga bu ha, lolenego tai bidabe.
LUK 5:24 Anigo Agali Hole Ibiyagome dindini howa wali agalime ko biyago domo waholene hongo yu kago tí manda bilimulo walia haro, lene. Ani lowa Yasuhanda agali kuduguhe biagohondo lalu, Í̠hondo larogo. Heyuwa í̠naga lebere mo yalu andaga pamia, lene.
LUK 5:25 Ani layaore agali biagome tinaga wanakuini abale heyalu ibunaga lebere biago mo yalu andaga pialu howa Ngode Datagaliwabenaga mini yaraga hama pene.
LUK 5:26 Ani biyagola ti bibahende hearume miniha mogo lai halu gi howa tigua Ngode Datagaliwabenaga mini yaraga halu, Mbirale baya burugule nahende tara aleore áyu de handarimadagoni, lene.
LUK 5:27 Ogoni biai halu Yasu pole pialu hearia dagisi muni miaga agali mbira mini Libai ibu dagisi muni miaganenaga andaha berearia hondowa Yasuhanda ibuhondo lalu, I̱ porodagua talima íbu, lene.
LUK 5:28 Ani layagola Libai ibu mbirale bibahende ngelai halu abale heyalu Yasu talima pene.
LUK 5:29 Ani buwa Libaihanda Yasu mitangi buwa ibu andagani tomo timbuni dawalu agali dagisi muni miaga dewalibi agali marubi, Tomo nole ibidaba, lene.
LUK 5:30 Ani layagola howa Perisi agali marumebi Mana lowinigo lawai haga maru Perisi aria hearumebi Yasunaga talima piaga hearuhondo bi gimigomo lalu, Tí dagisi muni miaga karu bababi ko biaga karu bababi ti heba mandagi tomobi ibabi nalu bedamigo agibe, lene.
LUK 5:31 Ani layago hale howa Yasuhanda tihondo ladai bialu lalu, Wali agali warago nabe karu anogodame ti biamogo bilo ibu karia napiaga. Warago bo ngaru hangu anogodame ti biamogo bilo ibu karia piaga.
LUK 5:32 I̱ ibirugo wali agali bayale karu mini beregedelo olole ndo wali agali ko biaga karu mini beregedelo olole ibirugoni, lene.
LUK 5:33 Wali agali maru hearume Yasuhondo lalu, Yonenaga talima piaga biarumebi Perisi agalinaga talima piaga biarumebi Ngode Datagaliwabehondo bi lole tomo nane hagago í̠naga talima piaga biarume tomobi ibabi nalu hagadago agibe, lene.
LUK 5:34 Ani layagola Yasuhanda ladai bialu lalu, Tígua agali mbirame wali dabu biragola howa wali agali tomo nole ngoai hararume agali wali dabu biaga biago ti heba mandagi biruwa tomo nane holene nga loleberamibe. Ani naloleberamiore.
LUK 5:35 Anigo horo mbira ibulebirago ibiragola agali wali dabu biaga biago ti kagoria howa marume ibu haru poragola tigua tomo nane holene wulebira, lene.
LUK 5:36 Ani lowa Yasuhanda bi yobage ogo lalu, Mbiralime aga gahenge lere lowa aga mende gobani lebu para nahaga. Ibugua ani biyagua aga gahenge biago lere lalu mo ko howa aga gahengeme aga gobani lebu para haragola bia tago naholebira.
LUK 5:37 Ogonidagua dege mbiralime waini iba gahenge bedago waini iba hambu wiaga nogo dongoneme wabini bamba taweha odo bere nalaga. Ani odo bere layagua waini iba gahengeme nogo dongoneme wabini biago mo lere lalu waini iba piai holebira. Ani biragola nogo dongone biagobi ko dege holebira.
LUK 5:38 Ani buligo waini iba gahenge bedago waini iba hambu wiaga nogo dongoneme wabini gahenge degeha odo bere lolene nga.
LUK 5:39 Mende larogo mbiralime waini iba ala tawego nowa waini iba gahengego noa nahaga. Ibugua lalu, Waini iba ala tawego karulapeore, lolebira, lene.
LUK 6:1 Sabada horongi Yasu ibu ladi ale mini widi teha pialu howa ibunaga talima piaga biarume widi biagonaga lini deago dowa gime yigiyugu buwa nama nama pene.
LUK 6:2 Ani biyagola Perisi agali maru hearume tihondo lalu, Tígua inanaga Mana lowini ngago Sabada horongi nabulene wini ngago puguaramigoni agibe, lene.
LUK 6:3 Ani layagola Yasuhanda tihondo ladai bialu lalu, Debidibi agali maru ibu heba henerubi tomo nawiyagola ti garibi lowa Debidihanda bini gilibu ngago tí nahende kamibe.
LUK 6:4 Ibugua Ngode Datagaliwabenaga andaha anda puwa mberedi Ngode Datagaliwabehondo lomabu mini wiago muwa maru ibuni nalu maru agali ibu heba heneru nelo mo mini. Anigo inanaga Mana lowini ngagoria mberedi ogoni loma binigo mo miaga agali degeme nolene nga lowinigo nga, lene.
LUK 6:5 Ani lowa Yasuhanda lamaro bialu lalu, Agali Hole Ibiyago ibu Sabada horonaga Anduane ka, lene.
LUK 6:6 Sabada horo mendengi Yasu ibu ngoai hagane andaha anda pu howa ibugua mana lawai halu hene. Mana lawai halu hayagoha agali mbira gi tiganaga mbariane kohe hene.
LUK 6:7 Mana lowinigo lawai haga maru hearubi Perisi agali maru hearubi tigua Yasuhondo, Í̠na koore biri, lolene irane wilo ti ha para howa ibugua Sabada horongi mbirali mo dabi harabe hondole handaya ho hene.
LUK 6:8 Tigua ogonidagua mitangi bialu heago hondowa Yasuhanda agali gi mbariane kohe biagohondo lalu, Heyalu i̱ kogoria íbu, lene. Ani layagola agali biagome heyalu pu hene.
LUK 6:9 Ani heyu heagola Yasuhanda tihondo lalu, Sabada horongi inanaga Mana lowinigo bulene nabulenebi agi lo ngabe. Biamogo bulene ngabe be mo ko holene ngabe. Agali nahomelo pele mulene ngabe be homelo bolene ngabe, lene.
LUK 6:10 Ani lowa Yasu ibugua ti bibahendeni handa de̱le̱ buwa agali biagohondo lalu, Í̠naga gi mbariane dogola, lene. Ani layagola agali biagome gi mbariane dogolayaore bayale ho dai bini.
LUK 6:11 Ani biyagola tigua keba timbuniore howa tini hangu laga laga bialu, Yasuhondo agi bimi̱yadabe, lalu hene.
LUK 6:12 Horo ogoningi Yasu ibu hombene mbirani iraga howa mbi mbiru Ngode Datagaliwabela bi lalu haabo hene.
LUK 6:13 Gao layagola Yasuhanda ibunaga talima piaga biaru olalu, Ibidaba, lowa ibugua agali homberiali (12) dabalu tinaga mini abosolo wini.
LUK 6:14 Saimono Yasuhanda ibu ka̱i̱ mini Pida winigo ibubi ibu hamene Andurubi Yamesebi Yonebi Pilibibi Badolomiubi
LUK 6:15 Madiubi Tomasabi Alibiasa igini Yamesebi Saimono ibu ka̱i̱ mini Paidoro winigo ibubi
LUK 6:16 Yamese igini Yudasabi Yudasa Isagariodo ibu Yasu nde lenego ibubi uruni ti Yasuhanda dabene.
LUK 6:17 Yasu ibunaga abosolo agali biaru heba hombeneni henego daluwa yu dindi wiagoria ibu haruru piaga dewa ti heba bu hene. Wali agali dewaore Yudia bibahendeha howabi Yarusalemeha howabi solowara bereagoha Taia tano howabi Saidono tano howabi íbu ngoai ho hene.
LUK 6:18 Tigua Yasuhanda mana lawai hayago hale holebi warago bo wiaru mo dabi helobi ti ibini. Maru dama daragahe hearubi ibiyagola dama wara tagi halu mo dabi hene.
LUK 6:19 Yasuha howa hongo holene tagira ibiyagome ti bibahende mo dabi hai helo wali agali bibahendeme Yasu ela hoa hene.
LUK 6:20 Yasuhanda ibunaga talima piaga biaru handaya howa lalu, Tí yagibano kamiru Ngode Datagaliwabehanda Handame Ho Kagoria tínaga ngago turu ho holene nga.
LUK 6:21 Áyu garibilo kamiru mani nabe manga bulebirago turu ho holene nga. Áyu dugu bialu kamiru mani oba holene wulebirago turu ho holene nga.
LUK 6:22 Agali Hole Ibiyagonaga kamigo hondowa wali agalime tí handabe manga haragolabi bo pelaragolabi mege bialu tí ko ngubi laragolabi tí turu ho holene nga.
LUK 6:23 Ogonidagua biragola tínaga emena timbuniore dahuliya andagaha wia do kago manda buwa tígua kulo howa mali luyu ibaga bulene nga. Tinaga mamali henedarume Ngode Datagaliwabe mana latagi haga heneruhondo ogonidagua dege binigo manda buwa turu ho holene nga.
LUK 6:24 Anigo áyu homogo kamiru tí holene baya awadaga harimigo tínaga mo ko holene timbu gibiore wulebirago dara holene nga.
LUK 6:25 Áyu nabe manga ho kamiru mani garibilo howa tínaga mo ko holene timbu gibiore wulebirago dara holene nga. Anigo áyu oba howa kulo kamiru mani tí yi lalu dugu bialu holeberamigo tínaga mo ko holene timbu gibiore wulebirago dara holene nga.
LUK 6:26 Wali agali bibahendeme tí kamirunaga mini mo yaraga haragola tínaga mo ko holene timbu gibiore wulebirago dara holene nga. Bamba tinaga mamali henedarume ke̱ howa mana latagi haga heneru hondowa ogonidagua dege bialu hene.
LUK 6:27 I̱na bi larogo hale haramigohondo laro. Tínaga waitigi karuhondo gubalini ho halimu. Tíhondo handabe manga ho karuhondo tígua bayale dege bia dai bilimu.
LUK 6:28 Marume tíhondo ha halu homabe layagua tígua tihondo bayale bia dai bilimu. Tíhondo ko bialu karu bayale helonaga tígua Ngode Datagaliwabehondo tinaga bi la halimu.
LUK 6:29 Anigo mbiralime tínaga pe mendeyagi bayagua mendehayagibi belo beregedalimu. Ani buwa mbiralime tínaga dagare aga mo yalu piyagua aga mendebi tago bialu milimu.
LUK 6:30 Mbiralime tíhondo mbirale mbira moga ngidaba laragola milimu. Ani buwa mbiralime tínaga mbirale mo yalu piyagua lone yadai bia nalalimu.
LUK 6:31 Wali agali marume tíhondo bilo hame laramilidagua nde tígua maru biaruhondo ani dege bilimu.
LUK 6:32 Tí gubalini hagaru hangu gubalini harimiyagua tígua turubini ngago aginaga yuleberamibe. Ko biaga karume tihondo gubalini hagaru tibi gubalini dege haga ka.
LUK 6:33 Ani buwa marume tíhondo bayale biagaruhondo hangu tígua bayale bia dai birimiyagua tígua turubini ngago aginaga yuleberamibe. Ko biaga karumebi ogonidagua dege biaga kagoni.
LUK 6:34 Tígua mbirale mbira mialu howa mo yu dai bibehegohondo mirimiyagua tígua turubini ngago aginaga yuleberamibe. Ko biaga karume tibi lone mo yu dai bulenaga ani moga miaga kagoni.
LUK 6:35 Anigo tígua tínaga waitigi karu gubalini howa tihondo bayale dege bialu mbirale mbira moga yilo meramigo yadai bia nalalimu. Ani birimiyagua tígua emena timbuni ngago yuwa Ngode Datagaliwabe Daligaorene Daliga Kagonaga waneigini holeberami. Ogoninaga ibugua ka̱i̱ nalaga karuhondobi koore biaga karuhondobi bayale dege biaga ka.
LUK 6:36 Tínaga Abahanda tí dara halu biamogo biagadagua tígua nde maru dara halu biamogo bilimu.
LUK 6:37 Tígua wali agali maru karume biragonaga daba ki nabilimu. Daba ki nabirimiyagua Ngode Datagaliwabehanda tígua beramigobi daba ki nabulebira. Tígua maruhondo hongo howa, Pani nabe, nalalimu. Nalarimiyagua Ngode Datagaliwabehanda tíhondobi nalolebira. Marume tíhondo ko biyago biadai nabi wahalimu. Anidagua birimiyagua Ngode Datagaliwabehanda tínaga ko birimigobi domo waholebira.
LUK 6:38 Ani buwa maruhondo milimu. Ani beramigola Ngode Datagaliwabehanda tíhondo ngulebira. Ibugua ngulebirago emene ndo dewaore mo tago howa ngiragola tínaga gime yu to̱lo holeberami. Tígua maruhondo mbirale meramigo daba nabi mirimiyagua Ngode Datagaliwabehanda nde tíhondo daba nabi ngulebira, lene.
LUK 6:39 Ani lowa Yasuhanda tihondo bi yobage lowa lalu, Agali de koheme de kohe dege mendeali haru pobe nahe. Haru piyagua libu haru ganaruaha pilo pagupagu bu wulebira.
LUK 6:40 Lo manda biaga karu ti lawai haga kagobi ndo emene nira ale ka. Anigo lo manda biaga biagome lo manda biai howa ibu lawai haga kagobi dege holebira.
LUK 6:41 Tígua tí hamenenaga deni kugi emene ngago handaramiligo tíninaga deni ira goba ale ngago nahende kamigo agibe.
LUK 6:42 Tígua tíninaga deni ira goba ale wu kamigo nahandabehe howa tí hamenehondo lalu, Í̠naga deni kugi emene ngago mero, lalu agua labehedabe. Tí tombene hondo kihe kamigoni. Tíninaga deni ira goba ale wu kamigo ala mo wahowa mani tí hamenenaga deni kugi emene ngago bayuwa handalu mibehe holeberami.
LUK 6:43 Ira bayale kagome lini ko nadaga. Ogonidagua ira ko kagome lini bayale nadaga.
LUK 6:44 Ira bibahendeme lini darago hondowa ira ogobiore kalo manda beramili. Ira anihe kagome poge lini nadaga. Mamuni anihe ale kagome lini mbira mini gerebi nadaga.
LUK 6:45 Mbirali bayale kagome ibuninaga bu habaneha bayale ngagobi biatagi haga ka. Mbirali ko kagome ibuninaga bu habaneha ko ngagobi biatagi haga ka. Mbiralime ibuninaga bu miniha to̱lo ngagobi ne harigaha howa latagi haga ka.
LUK 6:46 I̱na tíhondo bidaba lalu langirugo bia nabi howa tígua i̱hondo, Anduane Homogo-o Anduane Homogo-o, laabo harimigo agibe.
LUK 6:47 Mbirali i̱ kogoria ibuwa i̱na bi larogo hale howa biyagua i̱na ibu ogobi ka lalu walia holebero.
LUK 6:48 Agali mbirame ege to̱le̱ni uli wawa anda bayuwaore bu heagola dalu ibalu iba li timbuni piyagome dindi namu layagola anda bayale binigo ema nabi hongo ho hene. Agali ogoni ibu ege to̱le̱ni anda biyago ale ka.
LUK 6:49 Anigo i̱na bi larogoni hale howa bia nabi kagome ibu agali mende anda bialu gene bayuwa nawe biyago ale ka. Ani biyagola howa dalu ibalu iba li timbuni pialu anda biago abale gialo yayagola poda ibira halu u emene agima ndo lowa kulu hangu lalu podope hene, lalu lamini.
LUK 7:1 Yasuhanda bi ogoni wali agalihondo lamiai halu ibu Kabaniama pene.
LUK 7:2 Lomo ami haru haga mbira ibunaga biabe bia haga ibu hamelo haga henego warago bowa tongolo mibeheore wini.
LUK 7:3 Ani wiagola marume Yasu ka layago hale howa ami agali biagome Yu agali ala hene miniwi hearuhondo lalu, Warago mo dabi helo Yasu i̱ koria ibilo damu pudaba, lene.
LUK 7:4 Ani layagola tigua Yasu hearia puwa lalu, Agali ogoni bayaleore ibu í̠na biamogo bulene irane timbuniore nga.
LUK 7:5 Ibugua inanaga wali agali karu gubalini halu inanaga ngoai hagane andabi ibuni hangu bia hene.
LUK 7:6 Ani laya handala Yasu ibu ti haru pene. Pialu howa ami haru haga agali biagonaga anda kaware ibalu hearia ami agali biagome ibunaga nenege maru hearuhondo bi lamialu lalu, Tígua Yasu lola hole puwa ibuhondo bi ogodagua lalimu. Anduane-o í̠ erekuibini i̱ andaga ibuleni. Agali ko i̱ alego andaga í̠ ibulene emene nakarulapego
LUK 7:7 i̱bi í̠ keria ibulenegobi emene nakarulape dege. Í̠na i̱naga biabe bia haga biago dabi helo bi dege labe.
LUK 7:8 Ami handa gimbu bu haga karunaga andaneha i̱ kogoni. I̱naga andaneha nde ami agali maru kagoni. I̱na mbiraligohondo, Pu, larogola ibu piaga. Mendalihondo, Íbu, larogola ibu ibaga. I̱na i̱naga garabaya biabe ale bia hagahondo, Ogo ale bibe, larogola ibu ogoni biaga, lalu lalimu, lene.
LUK 7:9 Ani lalimu layadagua tigua layagola hale howa Yasuhanda mogo timbuni lene. Ibugua beregedowa ibu haruru ibalu hearuhondo lalu, I̱na tí langerogo mbiralime mini mbiraore ogonidagua wu hearia i̱ nahendeore Isaraele wali agalimebi mini mbiraore ogonidaguaore nawiaga, lene.
LUK 7:10 Ani layagola bi lama piyaru ti ami haru haga biago andaga dai buwa biabe bia haga biago dabi ho hearia de hendene.
LUK 7:11 Ani biyagola howa Yasu ibunaga talima piaga biarubi wali agali dewa bu hayaru heba Naina tano pene.
LUK 7:12 Tano o biagoria anda pialu hearia wali agali dewame homene tingini homaliha hora hole yalu pialu hearia hendene. Wali dalo mbira berenego ibu igini mbiraore ogoni hanguore henego homene. Ani biyagola wali agali dindi ogoniha hearume ibu heba dugu bima pene.
LUK 7:13 Wali biagome dugu bima piyago hondowa Anduane Homogohanda ibunaga bu miniha wali biago dara timbuniore howa ibugua wali biagohondo lalu, Dugu nabibe, lene.
LUK 7:14 Ani lowa ibugua lebereni wiagoria puwa lebere biago ela hayagola agali ira ho yalu piyarume hondo hene. Ani biyagola Yasuhanda lalu, Igiri daliahe-o i̱na í̠hondo heya laro, lene.
LUK 7:15 Ani layagola igiri homene biagome heyu biruwa bi layagola Yasuhanda igiri biago ai̱yahondo lalu, Í̠ igini ogonida, lene.
LUK 7:16 Ani biyagola bibahende hayarume mogo timbuniore lowa tigua Ngode Datagaliwabenaga mini yaraga halu lalu, Ngode Datagaliwabe mana latagi haga timbuniore ina kamagoria ha pani hayada. Ngode Datagaliwabehanda ibunaga wali agali pele ngule ibiyada, lene.
LUK 7:17 Yasuhanda biyago te ogoni dindi ogoni bibahendeha wu mabu biarume hale ho yogo lene.
LUK 7:18 Yonenaga talima piaga biarume Yasuhanda o biyagoni Yone lamiyagola ibugua kirali olalu, Ibidaba, lowa,
LUK 7:19 Anduane Homogo kagoria agua lamule pudaba. Í̠ Yonehanda mbirali ibulebira layagonibe be mbirali mani ibirabe hondole holomabe, lole pudaba, lene.
LUK 7:20 Ani laya handala libugua Yasu heagoria puwa lalu, Baboraya biaga Yonehanda mbirali ibulebira layagoni í̠be be mbirali mani ibirabe hondole holomabe, lole pudaba laya handala ibiriba, lene.
LUK 7:21 Ogoningiore Yasuhanda wali agali dewa warago tara tara bo wini wiaru mo dabi haga bialu dama daragahe hearubi wara tagi halu de kohe hearubi de mo bayale halu hene.
LUK 7:22 Ani bialu hearia Yonehanda agali kira bi lamule pudaba lene ibiyago labohondo Yasuhanda lalu, Libugua Yone karia dai buwa hale haribigobi de handaribigobi ibuhondo lamilibu. Lamialu lalu, De kohe heneru de handalu ge kohe heneru ibaga bialu ge hamuabi heneru mo dabi halu hale tuluhe heneru hale halu homo tongolo mini wiaru mo heya ho helalu ani buwa yagibano hearuhondo Bi Mana Debene lamialu hea, lalu lamule pudaba.
LUK 7:23 I̱hondo mini kira nawi karume ti turu taraore ho holene nga, lene.
LUK 7:24 Agali bi lamule ibiyago labo dai biaha Yasuhanda wali agali bu hearuhondo Yone mitangi bialu lalu, Yone ibu dindi koni wali agali nahaga wiagoria ibu hangu heagoha puwa tígua minime agileore hondole manda bu yalu pirimibe. Tani puyabume elape howa hongo nahe yomagelo wiago hondole pirimibe.
LUK 7:25 Tí penedago agi hondole penebe. Agalime aga bayaleore bu heago hondole pirimibe. Wali agali aga ogonibi karulalu dongonenaga tomobi dabudabubi dewa wu karume homogo anda baya gibi kagoha paliaga ka.
LUK 7:26 Tígua hondo penedago ogo ale hondole pirima lalu i̱ langidaba ndabe. Ngode Datagaliwabe mana latagi haga heago hondole pirimibe. E̱ aniore handarimi. Anigo Ngode Datagaliwabe mana latagi haga karu nira lowa Yone ibu daligaore hearia handarimi.
LUK 7:27 Ogoninaga Yone mitangi bialu Anduane Homogonaga mbugani lowini ngago ogo, Ngode Datagaliwabehanda lalu, I̱naga bi lamule piagago ibu í̠ bamba halu í̠naga hariga ba hama pelo ibuhondo, Pu, lolebero, lalu gilibu nga, lene.
LUK 7:28 Yasuhanda lone latago halu lalu, I̱na tí langerogo agali bibahende ala heneru mbirali Yone kagobi ndo ti nira hangu hene. Anigo Ngode Datagaliwabehanda Handame Ho Kagoria niraore kago ibu Yone bolangua howa duniniore ka, lene.
LUK 7:29 Ani layagola wali agali bibahendeme hale hai hene. Tibi dagisi muni miaga hearubi tigua Ngode Datagaliwabenaga tigabi bialu holene winigo bialu howa Yonehanda ti baboraya bia heneru hene.
LUK 7:30 Perisi agali hearumebi Mana lowinigo lawai haga hearumebi Ngode Datagaliwabehanda hame leago wahowa Yonehanda ti baboraya bia helo hame nale hene.
LUK 7:31 Yasuhanda la ho wiaabo halu lalu, Wali agali áyu karuni i̱na ti agi ale ka lalu mo manda bu hondoabe.
LUK 7:32 Ti waneigini magedi hamani mbolatola balu biru wiagago ale ka. Maru mbolatola balu biru wiyarume maru mbolatola balu bedaruhondo ola amu halu lalu, Iname tínaga pilipe la halu wali dabu bialu howa iba gana lagane la harimagola tígua mali nali harimi. Ani birimigola iname tínaga kiabu dugu bialu harimagola tígua dugu nabi dege harimi, lalu hagago ale ti ka.
LUK 7:33 Ani buwa baboraya biaga Yone íbu howa tomo nane hagane mana ngadagua nane howa waini ibabi nane hene. Ibu ani biyago hondowa tígua, Ibu dama daraga ho ka, larimi.
LUK 7:34 Ani buwa Agali Hole Ibiyago íbu howa ibugua tomobi waini ibabi ta nabi nalu hene. Ani biyago hondowa tígua lalu, Agali o kago ibu tomo nagimbu bialu waini iba naabo haga ka. Ibu dagisi muni miagabi mana ko biagabi karu baba nenege hinu mandagi kagonigo de handadaba, larimi.
LUK 7:35 Anigo wali agali Ngode Datagaliwabenaga mini gigabiwi holene yutiga bu karume ogoni heneneore walia haga ka, lene.
LUK 7:36 Perisi agali mbirame Yasu ibu andaga tomo nami̱ya ibabe layagola Yasu ibu puwa tomo nalu berene.
LUK 7:37 Tano ogoniha wali mbira ko timbuniore biaabo haga berene. Ibu berearia Yasu ibu Perisi agali biago andaga tomo nalu beda layagola hale howa wali biagome weli baya taraore beha to̱lo winigo mo yalu ibuwa
LUK 7:38 Yasu erembira gehayagi íbu howa dugu bialu de ibame Yasunaga ge damilene. Ani buwa ibunaga mandarime mo yobiahalu geni nu̱nu̱ lowa weli baya taraore nga te̱le̱ yayago odo wini.
LUK 7:39 Ani biyago hondowa Perisi agali biagome ibuni miniha mitangi bialu, Agali ogoni ibu Ngode Datagaliwabe mana latagi hagaore kale wali ogoni ibu ela haragome ibu ko hangu bialu biraabo haga biago ibu manda bidaleda, manda bini.
LUK 7:40 Ani manda bu bereagola Yasuhanda ibuhondo lalu, Saimono-o i̱na í̠hondo bi mbira loa ko, lene. Ani layagola ibugua lalu, Lawai haga-o e̱ langi, lene.
LUK 7:41 Yasuhanda lalu, Agali kirali henego labome agali mbiranaga muni dano ho hene. Agali mendegome muni handari duria (500) dano halu mendegome pira duria (50) dano halu bini.
LUK 7:42 Libu kirabalime muni yadai nabibeheyagola muni dano helo miaga biagome libuhondo, Muni yadai bulene nawidago wahadaba, lene. Ani binigo agali agome dano helo miaga biagohondo turu timbuniore holebirabe, lene.
LUK 7:43 Ani layagola Saimonohanda ladai bialu lalu, Muni dewa miyagome bada, lene. Ani layagola Yasuhanda lalu, Tigatiga lari, lene.
LUK 7:44 Ani lowa ibu beregedowa wali biago de handalu Saimonohondo lalu, Wali ogo hendedebe. I̱na í̠ andaga ibirugola i̱naga ge wayawaya buliya í̠na iba nangiri. Wali ogome i̱naga ge ibunaga de ibame damilalu mandarime domayagoni.
LUK 7:45 I̱ ibirugola í̠na turu howa, Ibiribe, lalu gi tigali nabiri. Wali ogome i̱ ibirugola howa ibugua i̱naga geni nu̱nu̱ laabo halu bedagoni.
LUK 7:46 Í̠na olibe lininaga weli i̱ haguaneni odo wuliya nangiri. Wali ogome i̱naga geni weli baya taraore nga te̱le̱me odo ha̱i̱ haya.
LUK 7:47 Anigo i̱na í̠hondo larogo ibugua i̱hondo gubalini taraore howa biyagome ibunaga ko dewa bu birayago domo wahaya lalu walia haya. Anigo mbirali gubalini emene hayagome ibunaga ko emene biyago domaya lalu walia haga, lene.
LUK 7:48 Ani lowa Yasuhanda wali biagohondo lalu, Í̠na ko biriru domo wahaya, lene.
LUK 7:49 Ani layagola maru tomo nalu biru wiarume tini miniha mitangi bialu lalu, Ko domo wahaga ogoni ibu aidabe lomanda bialu berene.
LUK 7:50 Ani mandabu bereagola Yasuhanda wali biagohondo lalu, Í̠na Ngode Datagaliwabehondo mini mbiraore wu birarigome í̠ pele ngiyago mo palia holene karulo yalu pu, lene.
LUK 8:1 Emene halu Yasu ibu tano emenebi timbunibi wiaruha ibaga bialu howa Ngode Datagaliwabehanda Handame Ho Kagonaga Bi Mana Debene lamima pene. Piyagola ibunaga talima piaga homberiali (12) biaru ibu talima piyadagua
LUK 8:2 wali marubi pene. Wali biaru ti dama daragahe bereariabi warago bo wiariabi Yasuhanda mo bayale heneru ibu piyadagua pene. Magadala wali mbira mini Meri winigo abale ibu dama karia daraga hearia Yasuhanda wara tagi henego ibubi
LUK 8:3 wali mende Yoanabi ibu agalini Tusa ibugua Kini Herodonaga haru haga henego wali tebone Susanabi wali marubi Yasu piyadagua pialu howa tigua munibi tomobi wiyagome Yasubi ibunaga talima piaga biarubi biamogo bima pene.
LUK 8:4 Wali agali dewaoreme tano dewa wiagoria howa ala íbu maha íbu bigi bialu Yasu heagoria ngoai hene. Ngoai ho birai heagola Yasuhanda tihondo bi yobage lowa lamialu lalu,
LUK 8:5 Agali mbirame ladi ale mini widi egene mabuni ba a̱i̱ na̱i̱ bima pene. Ba a̱i̱ na̱i̱ bima piyagola howa egene maru hariga teneni ibira hayagola wali agalime hengedo mbalapu wiaria egame ibuwa mo nai hene.
LUK 8:6 Egene maru ege to̱le̱ dindi emene mbaliahe wiagoriani ibira halu anda howa dindiha gomba naheyagola gau lene.
LUK 8:7 Egene maru ira anihe gandula anda hene wiagoria ibira hayaru ani heba mandagi anda hamaga howa ho gengedalu oge hayagola lini nadabehe hene.
LUK 8:8 Egene maru dindi bayale wiagoriani ibira hayaru anda halu irane hangu hangume lini pira pira (100) dene, lene. Yasuhanda lamaro bialu lalu, Tí hale kamiyagua nde hale halimu, lene.
LUK 8:9 Ibunaga talima piaga biarume Yasuhondo lalu, Bi yobage larigoni irane langi, lene.
LUK 8:10 Ani layagola Yasuhanda tihondo ladai bialu lalu, Ngode Datagaliwabehanda Handame Ho Kagonaga manda bulene ala pani nahe ngelenego tíni manda bilimulonaga ngiya. Anigo maruhondo bi yobage lalu lamulebirago tigua deme handara tiraga galone handa walia naholebira. Haleme hale hara tiraga minime manda nabulebira.
LUK 8:11 Bi yobage ogoninaga galone ogo. Ngode Datagaliwabenaga bi mana tomo egene ale nga.
LUK 8:12 Wali agali bi mana hale hararu ti tomo egene harigani ibira hayago ale ka. Hale howa ti yu tiga nabilobi pele mulene nayilobi dama Heyolabeme tiha howa mo yalu piaga.
LUK 8:13 Tomo egene ege to̱le̱ dindi mbaliaheni ibira hayago ale wali agali marume bi mana abale hale howa turu halu mo yai haga. Ani buwa tinaga bu habaneha anda puabo habe nahedagola ti tigi mbira hangu yu tiga bu howa kome ba handaragola wahalu piaga.
LUK 8:14 Tomo egene dindi ani pini gandula anda hene wiagoria ibira hayago ale wali agali marume bi mana hale howa mini tumutumu wu holenebi homogo holenebi dindini howa mo turu holenebi mana urunime bi mana tiha mo yayago ho gengedalu oge haragola lini boga nabiaga.
LUK 8:15 Tomo egene dindi bayaleni ibira howa lini dewa dayago ale wali agalime bi mana hale howa mini bayale wialu tinaga bu miniha yu tiga biaabo halu yu ununu lalu howa tiha lini dewa daga ka, lene.
LUK 8:16 Ani lowa Yasuhanda lalu, Mbiralime lamu hale delowa ndisime wia dambi nahaga paliagane dagia andanehabi nawiaga. Ibugua wali agalime tamuha anda ibalu hendelo lowa dagia daligani wiaga ka.
LUK 8:17 Mbirale wia do kago mo pani halu mbirale yi ho ngago handa walia howa mo pani ho ngelolebira.
LUK 8:18 Anigo tí bayuwa hale howa hondo holene nga. Mbiralime mbirale mbira yu kagohondo Ngode Datagaliwabehanda dewa mo tago halu mulebira. Mendealime mbirale mbira nayi howa emeneore yidogoni karulape dege yidolo mitangi birago ogoni Ngode Datagaliwabehanda yamulebira, lene.
LUK 8:19 Yasuhanda bi ani lalu hearia ibu aíya hameneru ibalu hearia wali agalime ho gengeda tago buwa heagola ti ibu heagoria ha para nahabehe hene.
LUK 8:20 Ani bu hearia mbirali heagome Yasuhondo lalu. Í̠ ai̱ya hameneru o tagirani howa í̠ mo bila hole ka, lene.
LUK 8:21 Ani layagola Yasuhanda ti bibahende berearuhondo lalu, Ngode Datagaliwabenaga bi mana hale howa yu tiga bialu karu ti i̱ ai̱ya hameneru uruni, lene.
LUK 8:22 Horo mbiru Yasu ibunaga talima piaga biaru heba iba taluni anda pu biruwa ibugua tihondo lalu, Iba kuyama timbuni o bedago domalu ange edeyagi ma, layagola ti ani pialu hene.
LUK 8:23 Ti iba talu yalu pialu howa Yasu ibu talu guaneha palia hondo hene. Palia hondo hearia puyabu hongo howa pu layagola iba yaribu timbuniore bialu talu guaneha iba anda ibalu ibame nai hole bini.
LUK 8:24 Ani biyagola ibunaga talima piaga biarume Yasu palearia puwa ibu mo barila halu lalu, Anduane-o Anduane-o, ina homai haramago nahende palia hondo kebe, lene. Ani layagola Yasuhanda heyuwa puyabuhondobi iba yaribu biyagohondobi bi layagola iba yaribu nabi puyabubi pu nale nimu lowa bayaleore wini.
LUK 8:25 Ani biyagola ibunaga talima piaga biaruhondo lalu, Tínaga mini mbiraore wirimigo agoha ngabe, lene. Ani layagola howa ti mogo lowa gi howa tini minime laga laga bialu lalu, Ibugua puyabuhondobi iba yaribu biragohondobi bi laragola hale halu ema nabiagadago agali ogoni ibu aidabe, lene.
LUK 8:26 Ani bialu Yasubi ibunaga talima piaga biarubi iba talu yalu Galili iba kuyama domalu Gerasa anda pene.
LUK 8:27 Yasu ibu iba angeni ge ha ade halu hearia agali mbira dama dewa daragahe heago lola hene. Agali ogoni ala howa aga nabi pialu andaga napale homali egeanda wiaruha hangu paliaga hene.
LUK 8:28 Ibugua Yasu de hondowa ga̱ dalimu lowa Yasunaga geha birape howa hongo howa lalu, Ngode Datagaliwabe Daligaorene Daliga Kagonaga Igini Yasu-o i̱hondo agi bule ibiribe. I̱hondo pani nangibe, lene.
LUK 8:29 Ibugua bi ogoni lenedagoni Yasuhanda ibuha dama daraga hearuhondo, Pudaba, layagola lene. Ibu horo bibahendengi ibunaga gi gebi pu senime kabu bu ngagola damame ibuha karulowa pu seni tongo lalu ibu dindi ko wali agali nahaga wiagoha haru piaga hene.
LUK 8:30 Ani layagola Yasuhanda ibuhondo lalu, Í̠ mini aibe, lene. Ani layagola ibugua ladai bialu lalu, I̱ mini Dewali, lene. Ani lenego irane dama dewa ibuha daraga ho hene.
LUK 8:31 Ani layagola dama biarume Yasuhondo hongo howa lalu, Ina dindi uli koha hole pudaba nalabe, lene.
LUK 8:32 Nogo dewa bare kawareni pi̱a̱ nalu bu hene. Ani bu kago manda buwa dama daraga ho hayarume Yasuhondo hongo howa lalu, Nogo karuha anda pu holoma̱ya pudaba la, lene. Ani layagola Yasuhanda, Tí nogoha hole pudaba, lene.
LUK 8:33 Ani layagola dama biarume agali biago helalu nogo hayaruha anda pene. Anda piyagola nogo bibahende hayaru bareni dalipebe bialu dai lo yalu pialu iba timbuni bereagoha anda piai hayagola ibame nogo biaru nai hene.
LUK 8:34 Ibame nogo ani nai hayagola nogo haru haga hearume handalu gerai lalu pialu tanohabi dindi anda bu wiaruhabi lopebe bima pene.
LUK 8:35 O layago hale howa wali agali bu hearume agi biyadabe hondole pene. Ti Yasu hearia ibuwa tigua agali ala dama dewa daraga hayaru tagira piai hayagobi agali biago ibu mini bayale wia dai biyagobi aga biyagobi ibu Yasu geha berearia hondowa ti bibahendeme gi hai hene.
LUK 8:36 Maru handayarume wali agali íbu hearu hale helo, Au bialu dama wara tagi haya, lalu lamiya.
LUK 8:37 Wali agali dindi ogoniha hearu bibahendeme gi hai howa Yasuhondo lalu, Í̠ oali nahe wahalu pu, lene. Ani laya handala Yasu ibu iba taluni biralu pole biyagola
LUK 8:38 agali ala dama dewa daraga hene wara tagi hayagome Yasuhondo hongo howa lalu, Í̠ poredagua mba, lene. Ani layagola Yasuhanda ladai bialu lalu,
LUK 8:39 Í̠ andaga dai buwa Ngode Datagaliwabehanda í̠hondo biyago lamule pobe, lene. Ani layagola agali biagome tanoha pialu howa Yasuhanda ibuhondo biyago te lamima pene.
LUK 8:40 Ani buwa Yasu ibu iba ange edeyagi lone doma dai bialu heagola wali agali bibahendeme ibu ibilo hondo hearia ibiyago hondowa tigua, Yasu íbu, lai hene.
LUK 8:41 Ani bu hearia agali mbira mini Yairasa ibu ngoai hagane andaha hondo hagane henego ibini. Ibuwa ibugua Yasu heagoria birape howa lalu, I̱ wane mbiraore mali pira mbirani kira (12) hangu berenego ai homarago iya i̱ andaga porabane, lene. Yasu ibu piyadagua wali agali dewaore gengeda tago bu yalu pene.
LUK 8:43 Ti heba pialu howa wali mbira mali pira mbirani kira (12) warago baabo haga berenego ibubi ti haru pene. Ibugua wia ale bibahende anogoda agalihondo miyagola tigua ibu mo dabi habe naheyagola biraabo hene.
LUK 8:44 Ibugua wali agali gengeda tago bu heagoria Yasunaga erembirahayagi ibuwa Yasunaga aga nguinini ela hayagola warago bayago abaleore ereba hai hene.
LUK 8:45 Ani biyagola Yasuhanda lalu, I̱ ela hayago aiwabe, lene. Ani layagola wali agali bu hearume, I̱ nabi, I̱ nabi, lai hayagola Pidahanda lalu, Anduane-o í̠ wali agali dewa gengeda tago bu karuni ndobe, lene.
LUK 8:46 Ani layagola Yasuhanda lalu, Mbiralime i̱ ela hayagola i̱naga hongo tagira piayuagola handaru, lene.
LUK 8:47 Ani layagola wali biagome ibu handa walia hayada manda bialu ibunaga miniha duru lama Yasu heagoria bira para hene. Wali agali bu hearume wanakuini biruwa lalu, Ogo ale biyane í̠naga agani ela harugola i̱ha warago bo wiaabo hayago abale ereba halu dabi haya, lene.
LUK 8:48 Ani layagola Yasuhanda wali biagohondo lalu, I̱ wane-o í̠na Ngode Datagaliwabehondo mini mbiraore wirigome í̠ mo dabi hayago mo palia holene karulo yalu pu, lene.
LUK 8:49 Yasuhanda ani lalu hearia ngoai hagane andaha hondo hagane biagonaga andaga howa mbiralime bi lama ibalu howa lalu, Yairasa-o í̠ wane biago tongolo miyago ai Lawai haga kago la pugua nabibe, lene.
LUK 8:50 Ani layagola hale howa Yasuhanda Yairasahondo lalu, Gi nahe Ngode Datagaliwabehondo mini mbiraore wiriyagua ibu dabi holebira, lene.
LUK 8:51 Ani lowa Yasu ibu andaga anda pialu howa maru anda polene hame nale Pida Yone Yamese imaru wandari biago aba ai̱yama ti hangu anda pene.
LUK 8:52 Bibahende bu hearume wandari emene biagonaga yiyi lalu dugu bialu hene. Ani bialu heagola Yasuhanda tihondo lalu, Dugu nabidababe. Wandari emene ogoni ibu tongolo mia nabi palia dege bida, lene.
LUK 8:53 Ani layagola tigua Yasu hondo oba halu hene. Irane ibu tongolo minigo manda buwa hondo oba hene.
LUK 8:54 Ani biyagola Yasuhanda wandari biago gini yamuwa lalu, I̱ wane-o heya, lene.
LUK 8:55 Ani layaore wandari emene biago buhe̱ ladai bialu heyayagola Yasuhanda tihondo lalu, Ibu mbirale mbira nelo mo midaba, lene.
LUK 8:56 Ani layagola wandari emene biago aba ai̱yalame miniha mogo timbuniore lo heagola Yasuhanda libuhondo hongo howa lalu, O birudagoni wali agali mbirali nalamilibu, lene.
LUK 9:1 Yasuhanda ibunaga talima piaga homberiali (12) biaru olalu, Mo ngoai hadaba, lowa tigua dama daragahe karu wara tagi helobi warago tara tara bo ngaru mo dabi helobi ibugua tihondo hongo holene mini.
LUK 9:2 Ani buwa Yasuhanda lalu, Ngode Datagaliwabehanda Handame Ho Kagonaga bi mana lamima pialu howa warago bo ngaru mo dabi hole pilimu, lene.
LUK 9:3 Bi ogoni nale howa ala Yasuhanda tihondo lalu, Pialu howa mbirale nayi pilimu. Halimbubi muni ngi lowa hanagane nubi tomobi munibi tingiliya hunianebi nayiore pialu halimu.
LUK 9:4 Mbirame tíhondo, Palimi̱ya ibidaba, larago andaga haabo halu polene tu haragola pilimu.
LUK 9:5 Tí poramigoha mbiralime tíhondo, Palimi̱ya ibidaba, naleyagua tigua biyagoni walia hole tínaga geni abalu para kago taulo wahalu pilimu, lene.
LUK 9:6 Ani laya handala ibunaga talima piaga biarume tagira pialu Bi Mana Debene dindi bibahende wiaruha lamigi bima pialu howa warago bo wiaru mo dabi haga bima purogo lene.
LUK 9:7 Galili wali agali handame haga Herodo ibugua mbirale tara tara biayuago hale howa ibu mini burugulo hene. Irane wali agali marume lalu, Baboraya biaga Yone lone heyu daibu ka, lalu
LUK 9:8 marume Elaya ibu lone ha pani ho ka, lalu marume, Ngode Datagaliwabe mana latagi haga mbiraligo lone heyu daibu ka, lalu lagalaga biyagola Herodo ibu mini burugulo hene.
LUK 9:9 Mini burugulo howa lalu, Yonenaga ma puguadaba, larugodago áyu mbirale tara tara biaruago agali aiwa biaruabe, lowa ibugua Yasu hondole henge tai bialu hene.
LUK 9:10 Abosolo homberiali (12) biarume dai buwa tini bialu hayaru bibahende Yasuhondo lamiai hene. Ani lamiyagola Yasuhanda ti haru pialu tini hangu hole tano mbira mini Bedesaida pene.
LUK 9:11 Ti ani piyago hale howa wali agali bu hearume ti piyadagua haruru mama pene. Haruru mama ibiyagola Yasuhanda, Tí ibidaba, lowa Ngode Datagaliwabehanda Handame Ho Kagonaga mana lamialu howa warago bo wiarubi mo dabi halu hene.
LUK 9:12 Ni gai lole biyagola ibunaga talima piaga homberiali (12) biarume ibu hearia ibuwa lalu, Wali agali bu karu ogoria tomo nalu paluene henge nawidago tano emene ngaruhabi mabu anda bu karuhabi tai bima purogo lelo pudaba la, lene.
LUK 9:13 Ani layagola Yasuhanda tihondo lalu, Ti tomo nelo tínime midaba, lene. Ani layagola tigua ladai bialu lalu, Mberedi duria wena kira lowa hangu henedama. Wali agali bibahende bu karunaga tomo yolo bu poloma̱ya hameledebe, lene.
LUK 9:14 Tigua ani layago irane agali dewaore daosini duria (5,000) agima hene. Yasuhanda ibunaga talima piaga biaruhondo lalu, Wali agali bu karuni berelo pira duria (50) dege dege bira dugu bigi bilo biradaba ladaba, lene.
LUK 9:15 Ani layadagua talima piaga biarume biai hayagola
LUK 9:16 Yasuhanda mberedi duria biarubi wena kira biago labobi mo yuwa hariha handa daga halu Ngode Datagaliwabehondo turu halu ka̱i̱ lowa mberedi gaibu baga buwa ibunaga talima piaga biaruhondo mialu, Wali agali biru ngaru talebu midaba, lene.
LUK 9:17 Ani layadagua biyagola ti bibahende bu hearume no karula pialu ibira hayago ibunaga talima piaga biarume nu homberia hono to̱lai hene.
LUK 9:18 Horo mbiru Yasu ibu hangu howa Ngode Datagaliwabela bi lalu hearia ibunaga talima piaga biaru ibini. Ibiyagola ibugua tihondo lalu, Wali agali bu karume i̱ ai ka lalu kabe, lene.
LUK 9:19 Ani layagola tigua ladai bialu lalu, Marume lalu, Í̠ baboraya biaga Yone kegoni, lalu marume, Í̠ Elaya kegoni, lalu marume, Ngode Datagaliwabe mana latagi haga bambali henego lone heyu daibu kegoni, lalu ka, lene.
LUK 9:20 Ani ladai biyagola ibugua tihondo ladai bialu lalu, Tígua nde i̱ ai ka lalu kamibe, lene. Ani layagola Pidahanda ladai bialu lalu, Ngode Datagaliwabenaga Mbirali Dabo Helenego ibulebira lowinigo í̠ore íbu kegoni, lene.
LUK 9:21 Ani layagola Yasuhanda tihondo hongo howa lalu, Mbirali nalamilimu, lene.
LUK 9:22 Ani lowa ibugua tihondo lone lalu, Agali Hole Ibiyago tandaga timbuni nalu agali ala hene miniwi karubi loma binigo mo miaga haguane karubi Mana lowinigo lawai haga karubi tigua ibu hame nale howa homelo bolebira. Ani biragola howa horo kiru howa tebonengi Ngode Datagaliwabehanda ibu mo heya holebira, lene.
LUK 9:23 Ani lowa ibugua ti bibahendehondo lalu, Mbiralime i̱ porodagua ibua ho kayagua ibuni hame ledago mitangi nabi horo bibahendengi ibuninaga ira banga yalu i̱ talima ibulene nga.
LUK 9:24 Ogoninaga mbiralime ibuninaga holene mo tene hayagua nde holene ogoni ereba hai holebira. Anigo mbiralime ibuninaga holene wahai halu i̱ mo tene hayagua ogoni ibu holene gahenge yu holebira.
LUK 9:25 Mbiralime dindi bibahendeni ngaru mo tene ho kaore ibuninaga holene maro biyagua ibu biamogo bulebirabe. Biamogo nabulebiraore.
LUK 9:26 Mbiralime i̱ minibi i̱naga bi manabi lamulene taga hayagua Agali Hole Ibiyago ibunaga wá holene taraorebi ibu Abanaga wá holene taraorebi dahuliyali loma bia henerunaga wá holene taraorebi heba dai birangi ibugua nde o biago hondowa taga holebira.
LUK 9:27 I̱na tíhondo heneneore larogo maru áyu ogoria karu nahome kaore Ngode Datagaliwabehanda Handame Ho Kagoria de hondolebira, lene.
LUK 9:28 Yasuhanda bi ogoni lai ho howa horo karu agima howa Pida Yone Yamese imaru haru halu dindi hombene wiagoria iraga halu Ngode Datagaliwabela bi lole pene.
LUK 9:29 Ibugua Ngode Datagaliwabela bi lalu hearia Yasunaga dengui mo tara howa aga biagobi demborere bialu peleore hene.
LUK 9:30 Ani biyagola agali kira ibu heba te lalu hene. Agali kira hayago labo Mosese Elayalame
LUK 9:31 dahuliya andaganaga wá taraore holene karulo howa Ngode Datagaliwabenaga galone bulene bumaro bule Yarusalemeni howa Yasu ibu abale homolebiragonaga te Yasu heba lalu hene.
LUK 9:32 Pidabi agali kirali ibu heba hayago labobi palia hondo howa de ngala howa tigua Yasu ibu wá taraore holene karulo howa agali kirali ibu heba mandagi hearia de hendene.
LUK 9:33 Agali kira biago labo Yasu helalu pialu hearia Pidahanda Yasuhondo lalu, Anduane-o ina ogoria kamagoni bayaledago. Iname anda nemanda mbira í̠naga bialu mende Mosesenaga tebone Elayanaga lowa bia harama, lene. Pida ibu bi ogo ale laro nale bame lope hene.
LUK 9:34 Ibu bi lalu heaore beraliba mbira ibiyagome ti gumba hayagola talima piaga tebirali biarume gi hene.
LUK 9:35 Beralibaha howa bi lowa lalu, I̱ Igini i̱ni dabo heledogo ogoni. Ibugua bi larago hale halimu, lene.
LUK 9:36 Bi ogoni lai hayagola Yasu ibuni hangu hearia hendene. Talima piaga tebirali biarume o handayagoni horo uruningi maruhondo nalami ti bi nale hene.
LUK 9:37 Horo mendengi Yasubi ibu talima piaga tebirali hayarubi ti bareni dalialu hearia wali agali dewali bu yalu ibuwa Yasu lola hene.
LUK 9:38 Wali agali bu heagoha howa agali mbirame laraga halu lalu, Lawai haga-o i̱ igini mbiraore ogoni hangugo í̠na dara howa de handa.
LUK 9:39 Damame ga̱ lalu ibu mo para howa biango bibi bia halu ne harigaha hangiau puda haea bialu mo tandaga haabo halu abale yu pe nahaga.
LUK 9:40 Ani biaabo hayagola í̠naga talima piaga biaruhondo, Wara tagi hadaba, larugola tigua wara tagi habe nahe haya, lene.
LUK 9:41 Ani layagola Yasuhanda ladai bialu lalu, Wali agali tí Ngode Datagaliwabehondo mini mbiraore nawi howa mini pu tara ho haabo kamigoni. I̱na tí kamiruha horo agiru haabo holiyadabe. I̱na tí heba howa horo agiru tínaga genda yu haabo holiyadabe, lene. Ani lowa agali biagohondo lalu, Í̠naga igini ogoria haru íbu, lene.
LUK 9:42 Igiri biago haru ibalu hearia damame igiri biago dindini mo para howa biango bibi bia hene. Ani biyagola Yasuhanda dama biagohondo lalu, Tagira pu, layagola igiri biago bayale hayagola ibu abahondo, Í̠ igini ebere ibirago, lene.
LUK 9:43 Ani biyagola wali agali bibahende bu hearume Ngode Datagaliwabenaga hongo hondowa mogo lai ho hene. Wali agali bu hearume Yasuhanda biyagonaga mogo dege lo heagola Yasu ibugua ibunaga talima piaga biaruhondo lalu,
LUK 9:44 Bi mbira o langerogoore embeda nahalimu. Marume Agali Hole Ibiyago minuwa agali hongo yu karuhondo mulebira, lene.
LUK 9:45 Ani layagola talima piaga biarume irane ogo alenaga laralo manda nabi hene. Ti manda nabilo lamia nabi ya do ho hayagola tigua ibuhondo hale hodai bulene giho hene.
LUK 9:46 Ibunaga talima piaga biarume tini dege dege lalu, Bolangua howa duniniore ai ibu kabe, lowa lai lalu hene.
LUK 9:47 Yasuhanda tinaga miniha mitangibu heago manda buwa ibugua igiri emene mbira heago ibu adogeha helowa
LUK 9:48 tihondo lalu, Mbiralime i̱naga minini howa igiri emene ogobigohondo, I̱la habiya íbu, layagua i̱hondobi, I̱la habiya íbu, lara. Ani buwa mbiralime i̱hondo, I̱la habiya íbu, layagua i̱hondo, Pu, layagohondobi, I̱la habiya íbu, lara. Ogoninaga mbirali tí kamigoria howa mo dindi ho kago ibuore bolangua howa duniniore kagoni, lene.
LUK 9:49 Ani layagola Yonehanda lalu, Anduane-o agali mbirame í̠naga minini howa dama daraga hearu wara tagi halu hearia iname hondowa, Nabi waha, lamirima. Irane agali ogoni ibu ina aria ndoyanenaga lamirima, lene.
LUK 9:50 Ani layagola Yasuhanda Yonehondobi talima piaga maru hearuhondobi lalu, Ibugua ani biragola, Nabibe, lole manda nabilimu. Mbirali tí baba waitigi ndo kago tí aria ka, lene.
LUK 9:51 Yasu ibu dahuliya andaga iraga halu polene horo kaware ha para hayagola ibuni manda bialu Yarusaleme pole pialu hene.
LUK 9:52 Pialu howa ibugua Samaria dindini marume mbirale mbirale manda manda bialu helonaga, Lama bamba hadaba, lene.
LUK 9:53 Anigo wali agali amugoniha hearume ibu Yarusaleme puabo holeyagola ti hearia ibilo hame nale hene.
LUK 9:54 Ani biyago hondowa talima piaga biagolabo Yamese Yonelame lalu, Anduane Homogo-o wali agali uruni irame ti dai helo iyame hariha howa ira hungu ibiraha larababe, lene.
LUK 9:55 Ani layagola Yasuhanda beregedowa libu talini.
LUK 9:56 Ani lalu bialu Yasubi ibunaga talima piaga biarubi dindi mendehayagi pene.
LUK 9:57 Ti harigani pole pialu howa agali mbirame Yasuhondo lalu, Í̠ poregoha i̱na talima ibaga bulebero, lene.
LUK 9:58 Ani layagola Yasuhanda ibuhondo ladai bialu lalu, Biango dudu ale karu dindi hau̱ha paliaga ega bedaru tinaga andaha paliaga Agali Hole Ibiyago ibu ha̱lo paluene henge nawi, lene.
LUK 9:59 Ani lowa Yasuhanda agali mendehondo lalu, I̱ porodagua talima ibabe, lene. Ani layagola agali biagome lalu, Anduane-o i̱ aba ala hora hole dai berogo, lene.
LUK 9:60 Ani layagola Yasuhanda ibuhondo ladai bialu lalu, Homene karu tinaga homene tinime hora holene ngago. Í̠na Ngode Datagaliwabehanda Handame Ho Kagonaga mana lamule pu, lene.
LUK 9:61 Ani layagola agali mendeme Yasuhondo lalu, Anduane-o í̠ talima ibuliya i̱ damenehondo, Tí hondo halimu, ala lo porogo, lene.
LUK 9:62 Ani layagola Yasuhanda ibuhondo lalu, Mbirali ibugua dindi aliagame dindi alialu howa erembirahayagi handa dai biaabo hayagua ogoni ibu Ngode Datagaliwabehanda Handame Ho Kagonaga galone nabulene holebira.
LUK 10:1 Ani lowa Anduane Homogohanda agali pira kariani kira (72) dabalu ibu dindi polebiragoha, Tí bamba halu kirali kirali pugu pugu bidaba, lowa
LUK 10:2 ibugua tihondo lalu, Mabuni tomo dewaore ngago wali agalime tomo bialu mo mogo bulene ndia ka. Tomo mo mogo biagane maru ibilelo mabu anduanehondo bi lamulene nga.
LUK 10:3 I̱na tí nogo sibi igini ale kamiru biango dudu ale kagoria pudaba laro.
LUK 10:4 Pialu howa muni pauyibi muni ngi lowa hanagane nubi ge ge subi nayi pilimu. Pialu howa harigani wa̱e̱a na̱e̱a nabi bola balu pilimu.
LUK 10:5 Anda mbiraha anda poramigo pialu howa ala bi lalu, Anda ogoniha mo palia holene helo, lalimu.
LUK 10:6 Ogoriani kago mbirame mo palia holene hamelo heayagua tígua anda ogoniha mo palia holene helo larimigo ibu yu helo milimu. Ogoriani kago mbirame mo palia holene hame nale heayagua tígua mo palia holene helo larimigo tíni yadai bilimu.
LUK 10:7 Ani buwa tigua ngira ale iba nalu hina nalubi anda mbiraore paleremigoria palu haabo halimu. Biabe biagame yolo nolene ngago. Anda mendeha palia anda anda nabilimu.
LUK 10:8 Tano mbira anda poramigola maru karume, Palimi̱ya ibidaba, layagua ogoniha puwa tomo ngirago nalu palilimu.
LUK 10:9 Tano ogoniha warago bo ngaru mo dabi halu howa, Ngode Datagaliwabenaga Handame Ho Holene tí kamigoria kaware íbu nga, lalimu.
LUK 10:10 Anigo tano mbiraha anda poramigola, Palimi̱ya ibidaba, nalayagua anda haneni hariga pedadagua pu tiga bialu howa lalu,
LUK 10:11 Tano ogonaga abalume inanaga geni para hayadago tígua birimigoni walia halu taulo badai bialu porama. Ngode Datagaliwabenaga Handame Ho Holene tí kamigoria kaware íbu ngago manda bilimu, lalimu.
LUK 10:12 I̱na tíhondo heneneore larogo Daba Ki Bulene Horo harangi Ngode Datagaliwabehanda dara howa Sodomo wali agalihondo dabaradagua ndo wali agali tano ogoniha karu hongo howaore dabolebira, lene.
LUK 10:13 Yasuhanda lalu, Korasini wali agaliru tínaga mo ko holene timbu gibiore wulebirago daraho ko. Bedesaida wali agaliru tíbi tínaga mo ko holene timbu gibiore wulebirago daraho ko. Tí harimigoha agalime nabiaga ale biyadagua Taia Saidonolaha abale bidale nde ti mini beregedalu ko binigo wahai harima lalu dara howa walia helonaga aga karulo biruwa tinaga dongoneni be mo dugu hirame kaleda, lene.
LUK 10:14 Daba Ki Bulene Horo harangi Ngode Datagaliwabehanda dara timbuni howa Taia Saidonolanaga wali agalihondo dabaradagua ndo wali agali tano uruniha kamiruhondo hongo howaore dabolebira.
LUK 10:15 Tí Kabaniamani kamiru dahuliya togo wialu polenaga tíni yaraga hoa kamibe. Tí heli dindiha minu bape ho helolebira, lene.
LUK 10:16 Ani lowa Yasuhanda ibunaga talima piaga biaruhondo lalu, Mbirali tínaga bi hale haragome i̱naga bibi hale haragoni. Mbirali tíhondo handabe manga haragome i̱hondobi handabe manga haragoni. Mbirali i̱hondo handabe manga haragome i̱hondo, Pu, layagohondobi handabe manga haragoni, lene.
LUK 10:17 Agali pira kariani kira (72) piyaru dai bialu howa turu hama dai bini. Dai buwa tigua Yasuhondo lalu, Anduane Homogo-o iname í̠naga minini howa dama daraga hearu, Tagira pudaba, larimagola hale halu tagira piya, lene.
LUK 10:18 Ani layagola Yasuhanda tihondo ladai bialu lalu, I̱na handalu hewaria dama Heyolabe hari daba ale bialu hariha howa pilope hayago de handaru.
LUK 10:19 Ai hale hadaba. Tígua puyabi alipiagobi ngago hengedalu pilimulobi dama Heyolabenaga hongo bolangua halimulobi tí mo ko nahelonagabi i̱na tíhondo hongo holene yu halimulo ngirugoni.
LUK 10:20 Anigo damarume tígua bi larimigo hale haragola ku nale howa tínaga mini dahuliya andagani gilibu nga manda buwa ogoninaga kulo halimu, lene.
LUK 10:21 Horo ogoningi Ngode Datagaliwabe Dinini ibugua turu holene Yasuha to̱lai hayagola Yasuhanda turu ho howa lalu, Aba-o hari daliganagabi dindinagabi Anduane Homogo í̠ kegoni. Dindi mana manda bu karubi mini gigabiwi karubi tihondo walia nahe harigo dindi mana manda nabi karuhondo í̠naga mana tara walia harigonaga turu halu ka̱i̱ laro. Anigo i̱ Aba í̠ni bule hame lededagua birida.
LUK 10:22 Anigo i̱ Abahanda mbirale bibahende i̱hondo ngiai haya. Bibahendeoreme Igini ibu ogo kalo manda nabi Aba ibuni hangu manda bu ka. Bibahendeoreme Aba ibu ogo kalo manda nabi Igini ibuni hangu mandabu ka. Igini ibugua ibu Aba walia hoa biragohondo walia haragola tigua Aba ogooreda lowa mandabu holebira, lene.
LUK 10:23 Ani lowa Yasuhanda beregedowa talima piaga biaru ti hanguhondo lalu, Mbirale biyaru de handaramigo turu timbuniore haramine.
LUK 10:24 I̱na tí langerogo Ngode Datagaliwabe mana latagi haga dewa henerumebi kini dewa henerumebi tígua de handaramigo hondoa howa nahandabehe hene. Mana tígua hale haramigo hale hoa howa hale nahe hene, lene.
LUK 10:25 Mana lowinigo lawai haga mbirame Yasu mo hondo habehedabe hondole ibini. Ibuwa lalu, Lawai haga-o i̱na haabobo holene yule agi buabe, lene.
LUK 10:26 Ani layagola Yasuhanda ibuhondo ladai bialu lalu, Anduane Homogonaga mbugani bi agi lo wiabe. Bi lo ngadagua handalu agua manda birilibe, lene.
LUK 10:27 Ani layagola agali biagome ladai bialu lalu, Í̠na Anduane Homogo í̠naga Ngode Datagaliwabe kago í̠naga gubalinimebi minimebi hongomebi mandamebi gubalini ho habe. Ani buwa í̠ni gubalini harilidagua maru karu ta nabi gubalini ho habe lo wia, lene.
LUK 10:28 Ani ladai biyagola Yasuhanda ladai bialu lalu, Í̠na tigatiga larigo ogonidagua bialu hariyagua haabobo holene ngago yu holebere, lene.
LUK 10:29 Ani layagola Mana lowinigo lawai haga biagome i̱na birugo bayale biru lolenaga Yasuhondo lalu, Maru ta nabi i̱na nenege hinulene ti ai haruabe, lene.
LUK 10:30 Ani layagola Yasuhanda ladai bialu lalu, Horo mbiru agali mbira Yarusaleme howa Yarigo pole dalipe halu pene. Pialu hearia pageali marume ibu de handalu minuwa ibunaga dabudabu yiaru ti gingila mialu ibuni bo mbaulo wahowa tongolo mibehe heagola hariga teneni ngelalu pene.
LUK 10:31 Horo ogoningi dege loma binigo mo miaga agali mbira hariga ogonidagua dege pole pialu hearia agali homo wiago hondowa ibu hariga balalu bolangua halu pene.
LUK 10:32 Ogonidagua dege agali mende Libai aguanene henego ibubi pialu hearia agali wiagoria handa hondowa ibu hariga balalu pene.
LUK 10:33 Anigo agali tebone Samaria agali hariga ogoniha dege pialu hearia agali biago homo wiago hondowa ibunaga miniha dara timbuniore hene.
LUK 10:34 Ibugua agali biago wiagoria puwa dere biaruni welibi waini ibabi odo wia halu dere biaru huba biai halu ibuninaga nogo dongini mo yalu pialu palu ngoai hagane anda mbira heagoha ngelowa ira to bule mo yalu pene.
LUK 10:35 Ani buwa horo mendengi Samaria agali biagome kina kira ale yalu puwa palu ngoai hagane anda hondo haga heagohondo mialu howa lalu, Í̠na agali ogo bayuwa hondo habe. I̱ni dai bialu howa í̠na agali ogohondo miridadagua i̱na ani bia holiya ira to bialu habe, laya, lene.
LUK 10:36 Yasuhanda lamaro bialu lalu, Pagealime agali biago bo waho wiaria í̠ agali tebone agome biyago nenege hinayalo mandabu kebe, lene.
LUK 10:37 Ani layagola Mana lowinigo lawai haga biagome ladai bialu lalu, Agali tebone dara howa biamogo biyagome nenege hinaya, lene. Ani layagola Yasuhanda lalu, O biyadagonidagua í̠na bule pu, lene.
LUK 10:38 Yasubi ibunaga talima piaga biarubi ti harigani pole pialu howa tano emene mbira wiagoha anda puwa wali mbira mini Mada berenegome ibu andaga, Ibidaba, lene.
LUK 10:39 Ibu hagibuni mende berenego mini Meri ibu Anduane Homogonaga geha bira para howa Yasuhanda mana lawai hayago bayuwa hale ho berene.
LUK 10:40 Anigo Mada ibu tomo nolene biaru mo manda manda bialu howa miniha genda ho yalu Yasu berearia puwa lalu, Anduane Homogo-o i̱ hangu erekuibi bialu kogo Merihondo í̠ biamogo bule pu la, lene.
LUK 10:41 Ani layagola Anduane Homogohanda ladai bialu lalu, Mada-o Mada-o mbirale dewa bu ngarunaga mini burugu lowa mini dege dindi ho kego
LUK 10:42 mbiraore hangu buru pade Merihanda mbirale ogoni dabayago ibuha yidago yamulene nawi, lene.
LUK 11:1 Horo mbiru Yasu ibu dindi mbiraha Ngode Datagaliwabela bi lalu hene. Ibugua Ngode Datagaliwabela bi lamaro biyagola ibunaga talima piaga mbiragome ibuhondo lalu, Anduane Homogo-o Yonehanda ibunaga talima piaga biaru Ngode Datagaliwabehondo bi lelo lawai hayadagua iname nde ibuhondo bi loloma̱ya í̠na ina lawai ha, lene.
LUK 11:2 Ani layagola Yasuhanda tihondo lalu, Tígua Ngode Datagaliwabehondo bi lalu howa ogodagua lalimu, Ina Aba í̠ mini baya gibiore ngego mo yaraga helobi í̠naga Handame Ho Holene ibilobi hamelo ko.
LUK 11:3 Iname horo bibahendengi tomo nolene buru padamagola ngiaabo habe.
LUK 11:4 Marume inahondo ko biragola bia dai nabi waharamalidagua í̠na iname ko birimago domo wahabe. Ina kamagoria ba hondolene hongohe nangelabe, lalu lene.
LUK 11:5 Ogonidagua lalimu lowa Yasuhanda ibunaga talima piaga biaruhondo lalu, Tí kamiru mbiralime mbi hanuniore tí nenege andaga puwa ibuhondo lalu, Nenege-o i̱ nenege mbira dindi kaundia mbiraha howa i̱ andaga íbu bedago i̱ tomo nawi hewaria ibiyago mberedi homane tebira ngi, laragola
LUK 11:7 í̠ nenege tamuha paliyagome latagi halu lalu, Í̠na i̱ dalima nahabe. Panga payuwa howa i̱ waneigini heba dagiani mandagi padama. Í̠ mbirale mbira ngule heyabe nahe, layagua
LUK 11:8 agua buledabe. I̱na tíhondo larogo ogoni tí nenegeore kago manda buwa ibugua heyuwa namo ngiyagua taga nahe donge howa haya halu ngi laabo haramigola heyuwa ngi laramigo ale mo ngulebira, lene.
LUK 11:9 Ani lowa, Tíhondo laro. Ngi, lalimu. Ngi, laramiyagua tígua yu holeberami. Tai bialu halimu. Tai bialu haramiyagua handa walia holeberami. Panga dugua, lalu halimu. Panga dugua, lalu kamigola tíhondo panga dugua holebira.
LUK 11:10 Ogoninaga bibahendeme, Ngi, lalu karuhondo miragola yulebira. Tai bialu karume handa walia holebira. Panga dugua, lalu karuhondo panga dugua holebira.
LUK 11:11 Waneigini aba kamiru tí iginime, Wena ngi, layagua mbiralime nogombi muleberamibe.
LUK 11:12 Be tí iginime, Ega haba ngi, layagua alipiago muleberamibe.
LUK 11:13 Tíni ko howa tí waneiginihondo bayale dege mulene manda bu kami. Ogonidagua ndo timbuni bolangua howaore tí Aba dahuliya andaga kagome ibuhondo, Ngode Datagaliwabe Dinini ngi, lalu karuhondo mulebiraore, lene.
LUK 11:14 Agali mbiraha dama daraga ho howa bi labe nahe henego Yasuhanda dama biago wara tagi hayagola agali biagome bi lene. Ani biyagola wali agali dewa bu hearume miniha mogo lai ho hene.
LUK 11:15 Anigo wali agali maru hearume lalu, Ogoni dama bibahende karunaga haguane mini Heyolabe hongoni howa dama karu ibugua wara tagi haga ka, lene.
LUK 11:16 Ani layagola agali maru hearume Yasu mo hondo habehedabe hondolenaga tigua Yasuhondo lalu, Ngode Datagaliwabehanda í̠ hondowa turu ho ka walia hole agalime nabiagane ale mbira hondoloma̱ya bia, lene.
LUK 11:17 Ani layagola Yasuhanda tinaga miniha manda bu heagoni manda buwa tihondo lalu, Dindi mbiraoreni howa tale bigi bigi bu howa wai bia a̱i̱ na̱i̱ bigi biyagua lu bia ho wiaabo naholebira. Ogonidagua dege hameigini mbiraore tale bigi bigi bu howa hangu hangu haga haga bu holebira.
LUK 11:18 Anigo dama Heyolabeme haru kagoria howa tale bigi bigi bu howa tini wai biyagua bia ho wiaabo agua habehebe. Bi o larogoni tígua i̱hondo dama daraga karu wara tagi holene hongo dama Heyolabeme miya laramigonaga laro.
LUK 11:19 Aniyagua dama Heyolabeme i̱na dama maru karu wara tagi holiya hongo ngiyagua tínaga aria karume dama daraga karu wara tagi holene hongo miyadago aiwabe. Tíni aria urunime tí kagua manda birimigo walia haga ka.
LUK 11:20 Anigo i̱na Ngode Datagaliwabenaga hongome dama daraga ho karu wara tagi haruli. O berogome Ngode Datagaliwabenaga Handame Ho Holene tí kamigoria abaleore íbu nga lalu walia haragoni.
LUK 11:21 Agali hongoheme wai biagane ale manda manda bu yuwa ibuni andagani mamage haragola ibunaga mbirale ngaru bayale wulebira.
LUK 11:22 Anigo agali mbira hongo gibiorehe ibuwa agali biago bo mbera ho ngelalu wai biagane aleni hana ho henego gingila mo yalu puwa agali maru baba talebu ta holebira.
LUK 11:23 Mbirali i̱ aria ndo kago ibu i̱la waitigi ibuni ho ka. Ani buwa mbirali i̱la mo mogo bulene hame nale kagome waro hila halu bo purogo la haga ka.
LUK 11:24 Agali mbiraha dama daraga hayago wara tagi haya handala puwa ibu hole dindi tuhe mbira agiha ngabe hondole dindi bibahendeha tai bialu haga. Tai bialu howa mbira handa walia naheyagua ibuni hangu lo manda bialu lalu, I̱ni andaga biagoriani dai bulebero, lo manda biaga.
LUK 11:25 Ani lalu ibuni andaga biagoha dai buwa handalu karia bayale gini bu ngaria handa walia haga.
LUK 11:26 Hondo wialu lone tagira puwa ibuni emene bayale lowa dama karia koorene ko haru dai bialu anda puwa anda ogoniha haga. Ani buwa dama biarume ibuha karulai haragola agali biago abale ko hayago bayale lowa mani koorene ko holebira, lene.
LUK 11:27 Yasuhanda bi ogoni lai hayagola wali agali biru wiaru dombeneha wali mbirame laraga halu lalu, Wali í̠ taba honowa andu miyago ibu turu holene wiarua, lene.
LUK 11:28 Ani layagola Yasuhanda la dai bialu lalu, Anidago Ngode Datagaliwabe bi mana hale howa bialu karume turu gibiore holene wiaruagoni, lene.
LUK 11:29 Wali agali bu hearume Yasu ho mabu bu heagola ibugua tihondo lalu, Wali agali áyu karume ko dege bialu haabo kago agidabe. Tigua agalime nabiagane ale mbira bia lalu kago ti hendelo mbira bia nabi Yonahondo biyago dege walia henego mitangi bulene nga.
LUK 11:30 Ngode Datagaliwabe bi mana latagi haga Yona manane ibuni howa Nineba wali agali hearu hendelo walia ho henedagua Agali Hole Ibiyagome wali agali áyu karume manane hendelo ibuni walia hole íbu ka.
LUK 11:31 Daba Ki Bulene Horo harangi Siba wali agali handame haga kuini wali ibugua wali agali áyu karu baba heyuwa tihondo, Nakarulapeore birimi, lalu hongo howa lolebira. Irane wali ogonime Solomonohanda mini gigabiwi howa bi mana wále lawai hayagola hale hole ibuni dindi kaundiaore howa ibaabo hene. Anigo i̱na tíhondo larogo áyu ogoriani kago ibu Solomono henegobi ndo ibu duniniore ka.
LUK 11:32 Daba Ki Bulene Horo harangi Niniba wali agalime wali agali áyu karu baba heyuwa tihondo, Tí nakarulapeore birimi, lalu hongo howa lolebira. Irane ti Yonahanda Ngode Datagaliwabe bi mana lamiyago hale howa mini beregedalu ko bibahende wahai hene. Anigo i̱na tíhondo heneneore larogo áyu ogoriani kago ibu Yona henegobi ndo ibu duniniore ka, lene.
LUK 11:33 Mbiralime lamu hale delowa do nahaga ndisi timbuni andanehabi nawiaga. Ani nabi wali agali maru tamuha anda ibirarume wá kago de hendelo dagiani ngelaga.
LUK 11:34 Tínaga de libu tingininaga lamu ale ka. Tínaga de bayale kagola tínaga tinginiha wá haamehe holebira. Anigo tínaga de ko kagola tínaga tingini arumahe holebira.
LUK 11:35 Anigo tíha wá kago ereba halu aruma holigo handaramine.
LUK 11:36 Tínaga tinginiha wá holeneme to̱lo tagi ho kamiyagua gembone mbirahayagi aruma holene mbira nawi kamiyagua lamu wá taraore de mborerebi tíni mo wá haraligobi ho holeberami, lene.
LUK 11:37 Yasuhanda bi lai hayagola Perisi agali mbirame ibu andaga, Tomo nabiya íbu, layagola puwa tomo nalu berene.
LUK 11:38 Yasu ibu gi wayawaya biagane mana nabi howa tomo nalu bereago hondowa Perisi agali biagome mogo lo berene.
LUK 11:39 Ani manda bu bereago hondowa Yasuhanda ibuhondo lalu, Perisi agali kamiru tígua iba bebi beledibi tagirahayagi hangu wayawaya buwa tínaga bu habaneha bo wahaga haga bulenebi komebi to̱laihe kamigoni.
LUK 11:40 Tí mini nawi lulu yu ibaga bu kamigo Ngode Datagaliwabehanda dongone daliga wabiyago wabialu howa bu habanehabi wabini ndobe.
LUK 11:41 Anigo tínaga iba behabi beledinibi ngaru yagibano karuhondo milimu. Ani bu meramigola tínaga wayawaya bulene ngaru bibahende Ngode Datagaliwabenaga deni bayale wiai holebira.
LUK 11:42 Perisi agali kamiru tígua tomo mo dende bia hagane palena ale tara tara hangarimigo pini pini Ngode Datagaliwabehondo loma bia halu muwa tigatiga bulenebi Ngode Datagaliwabehondo gubalini holenebi nahe kami. Tígua mana urunibi bialu howa maru wa nahe bibahende bimaga howa bulene nga. Ani nabirimiyagua tínaga mo ko holene timbu gibiore wulebirago dara holene nga.
LUK 11:43 Perisi agali kamiru tígua ngoai hagane andaruha agali haguanerunaga biraganeni hangu birulebi magedi hamani puwa karume tínaga mini yaraga holenebi hame lo kami. Anigo tínaga mo ko holene timbu gibiore wulebirago dara ho ko.
LUK 11:44 Tí homali ngago wali agalime handa nabi howa pupe haga ngago ale kamiru tínaga mo ko holene timbu gibiore wulebirago dara holene nga, lene.
LUK 11:45 Ani layagola Mana lowinigo lawai haga mbiragome Yasuhondo lalu, Lawai haga-o í̠na bi ogoni larigome inabi mege bere, lene.
LUK 11:46 Ani layagola Yasuhanda la dai bialu lalu, Mana lowinigo lawai haga kamiru tíguabi ogonidagua dege bialu wali agali marunaga gendabi nayabehe ngaru yu helo, Mo ya, laramili. Ani buwa tínime gi dogo lowa gendabi ngaru ti yamogo naberamili. Anigo tínaga mo ko holene timbu gibiore wulebirago dara holene nga.
LUK 11:47 Tínaga mamali henerume Ngode Datagaliwabe mana latagi haga bo waheneru uruniorenaga homali tínime bia howa yari bia haramili. Anigo tínaga mo ko holene timbu gibiore wulebirago dara holene nga.
LUK 11:48 Ani buwa tínaga mamali henerume binigonaga, Karulape bini, larami. Mamali o biarume Ngode Datagaliwabe mana latagi haga heneru homelo benego hora henegoria tí kamirume tinaga homali anda baya gibi bia haramili.
LUK 11:49 Irane ogoninaga Ngode Datagaliwabehanda mini Gigabiwi howa lenego ogo, I̱na ti karuha i̱naga mana latagi hagarubi bi lamule piagarubi ibilarogola tigua maru homelo bo wahalu maru mo tandaga halu bigi bulebira, lene.
LUK 11:50 Anigo pigane wabiyangi howa Ngode Datagaliwabe mana latagi haga heneru homelo bo wahayagonaga wali agali áyu karume pani no aribia holebira.
LUK 11:51 Ogonidagua pigane Abele homelo bo wahayangi howa mani dewaore bo wahaga bialu howa Segaraia ba maro bini. Segaraia ibu Ngode Datagaliwabenaga andaha howa Anduane Homogonaga mbirale bo lomabu delaganela Loma Bia Hene Hobanela dombeneni hearia tigua Segaraia bo pe hene. Anigo tí heneneore langerogo bibahende homenerunaga pani wali agali áyu karume na holebira.
LUK 11:52 Anigo Mana lowinigo lawai haga kamiru tígua mana ogoni manda bulenaga andaha tíni anda pu nabi howa marume anda pole biragola anda napelo tígua panganaga duguagane gi mo do haramili. Anigo tínaga mo ko holene timbu gibiore wulebirago dara holene nga, lene.
LUK 11:53 Yasu ibu ani lalu pole biyagola Mana lowinigo lawai haga biarumebi Perisi agali biarumebi ibuhondo la ade halu hongo howa mege bialubi, Irane agibe, lalubi lamialu hene.
LUK 11:54 Ani buwa tigua ibu mo hondo habehedabe hondole mo bila halu bi ko mbira au larabe hondowa minule hale ho hene.
LUK 12:1 Wali agali daosini dewaore labe nahe gengeda tago buwa he̱lo ya haga bu heagola Yasuhanda ibunaga talima piaga biaruhondo ala lamialu howa lalu, Perisi agalinaga mo hiwa hagane mini yidi lowa ti tombene hondo kihe karu larogo de hondo halimu.
LUK 12:2 Mbirale bibahende yi ho winiru mo pana hai halu ohowa biniru manda biai helalu bulebira.
LUK 12:3 Anigo arumaha howa bi larimigo bibahende wá kagoria lo yu tagira ibalu anda tamuha howa ohowa hagarerebi lalu larimigo anda dangini howa awa lowa lalu holebira, lene.
LUK 12:4 I̱ nenegeru-o tíhondo langerogo tingini hangu homelo baga karu mani mo koore nahabehego manda bialu ti hondowa gi nahalimu.
LUK 12:5 I̱na tí ogohondo gi halimu larogo Ngode Datagaliwabe hongohe kagome mbirali homelo bowa mani heli dindi bo pe holebirago ibuhondo hangu gi holene nga, lene.
LUK 12:6 Ani lowa, Ega pimbi ale duria bedaru toea kirame yolo miaga ndobe. Anigo Ngode Datagaliwabehanda ega uruni ale homane mbira embeda nahaga ka hendeni.
LUK 12:7 Tínaga haguaneni mandari kamigo bibahendeore daga lai howa heleda hendeni. Anigo ega pimbi ale biru ngaru goyane lowa tí duniniore kamigo gi nahalimu.
LUK 12:8 I̱na tíhondo heneneore larogo. Mbiralime wali agali bu karunaga wanakuini howa i̱naga mini lalu, I̱ Kerisonaga kogoni, lalu la tagi hayagua Agali Hole Ibiyagome nde Ngode Datagaliwabenaga dahuliyali bu karunaga wanakuini howa o biagonaga mini lalu lolebira.
LUK 12:9 Anigo mbiralime wali agali bu karunaga wanakuini howa i̱ mini nale erembira ngiyagua Agali Hole Ibiyagome nde Ngode Datagaliwabenaga dahuliyali bu karunaga wanakuini howa o biagonaga mini nale erembira mulebira.
LUK 12:10 Anigo mbiralime Agali Hole Ibiyago mege biyagua ko ogoni biyago Ngode Datagaliwabehanda domo wahabehe ka. Mbiralime, Ngode Datagaliwabe Dinini ibugua ko biaga, lalu mege biyagua ko ogoni biyago Ngode Datagaliwabehanda domo wa naholebiraore.
LUK 12:11 Anigo tigua tí ngoai hagane andaruhabi gabumane hondo haga karuhabi haru haga maru karuhabi godi lole haru poragola gi halu toba toba howa tíni, Bi agua la dai buabe be bi agi lalu holedabe, lowa mini dege dindi ho nahalimu.
LUK 12:12 Ogoningi Ngode Datagaliwabe Dinini ibugua tínaga miniha mo manda bia holebirago ogoni lalu halimu, lene.
LUK 12:13 Agali mbira wali agali biru wiago dombeneha biruwa Yasuhondo lalu, Lawai haga-o i̱ hamene iya abahanda paluni ngiyago talebu ki holobaya i̱ hamene lamia, lene.
LUK 12:14 Ani layagola Yasuhanda ibuhondo la dai bialu lalu, I̱ nenege-o libu mo daba ki bule helolenebi libunaga mbirale uruni mo tale bia holenebi i̱ aiwa helenebe, lene.
LUK 12:15 Ani lowa ibugua bibahende bu hearuhondo bi la ho wiaabo halu lalu, Tíni de hondo howa mbirale bibahende wu kago nale timbuni dege wua howa dimagoli holigo mamage holene nga. Irane ibu homogoore gibi kayaguabi ibuninaga holene heneneore ibunaga mbirale bu ngaruha ndo nga.
LUK 12:16 Ani lowa Yasuhanda bi yobage ogo tihondo lamini. Agali homogo mbirame ibunaga mabuni tomo dewaore bayale wu hene.
LUK 12:17 Ani wu howa ibuni hangu lo manda bialu howa lalu, I̱naga tomo bu ngogoni mbiraha wulene henge nawi kogoni. Ai agigo bule harudabe, lowa,
LUK 12:18 I̱na ogodagua bulebero. I̱ninaga anda bidoru gialowa lone maru timbuniore buwa i̱naga ladi ale mini widi hengedogobi i̱naga mbirale marubi anda uruniha bu paya anda holebero, lene.
LUK 12:19 Ani bu howa ibunime lalu, Ogoni birugome ai i̱ awadaga hondo kogoni. I̱na mbirale bayale mali dewaore howa buru pale holeberago ale áyu wu hai kogoni. Ani buwa bame habane nabulene howa iba nalu tomo nalubi horo mohole bialu baya awadaga kogoni, ibuni lo manda bini.
LUK 12:20 Ibuni ani lo manda bu heagola Ngode Datagaliwabehanda ibuhondo lalu, Í̠ mini nawi lulu ale yu kegoni. Áyu mbiraga í̠naga holene ereba holebirago í̠ni hangu mitangi bialu í̠naga mbirale bibahende bu wu keruni aiwa yu holebirabe, lene.
LUK 12:21 Yasuhanda lamaro bialu lalu, Wali agali tini dindini homogo holenenaga mbirale mo mogo bu wu howa Ngode Datagaliwabe kagohayagi homogo nahe ti ogonibi kagoni, lene.
LUK 12:22 Ani lowa Yasuhanda ibunaga talima piaga biaruhondo lalu, I̱na tí langerogo tígua tomo nalu holenenagabi tí tinginini aga bu holenenagabi buru padamigo agua buledabe lowa mini dege dindi ho nahalimu.
LUK 12:23 Tomo bagi hene lowa wali agali holenego duniniore ndobe. Agabi bagi hene lowa tingini dunini wigi bidago ndobe.
LUK 12:24 Tí ega bedaru de handaramine. Ti tomo egene nahangaga ladi ale mini widi kago gandu lowa do hagane andahabi nawiagago ti nelo Ngode Datagaliwabehanda miaga ka. Ega uruni emene niraore lowa wali agali tí dunini kamigo ndobe.
LUK 12:25 Tí kamigoni mbiralime dindini holenenaga mini dege dindi ho hayagua dindini haabo habehedabe.
LUK 12:26 Tí emene ngaru hondo habe nahe kamiyagua mbirale marunaga mini dege dindi ho abule kamibe.
LUK 12:27 Balawaya minana anda howa lini dedago agua anda halu haradabe mitangi bidaba. Tigua tini biabe nabiaga tininaga yári bule lowa agabi nawabiaga ka. Anigo i̱na tí langerogo Kini Solomono ibunaga mbirale dewa wu howa henego balawayanaga yári baya gibi bidagobi ndo ibugua aga emene nira hangu bu haga hene.
LUK 12:28 Ngode Datagaliwabehanda datani minana anda halu karuni mo yári bia haga ka. Datani uruni áyu kago yawi haragola irani delolebira. Ngode Datagaliwabe ibugua o biaru mo yári bia hagadagua tí kamirubi aga bilimulo ngulebira ndobe. Tígua mini mbiraore emene wu kamigo agi bulenego wu kamibe.
LUK 12:29 Anigo tí iba hinabi agi nalu holedabe lowa mini dege dindi ho nahalimu.
LUK 12:30 Wali agali Ngode Datagaliwabe mitangi nabiaga dindi tara tarani karume dindini holene hangu mo tene halu mbirale uruninaga mini dege dindi ho haabo haga ka. Tí ogonibi holene nawi irane tí Abahanda mbirale uru ale buru pale kamilo manda bu ka.
LUK 12:31 Anigo ibugua Handame Ho Kagonaga tígua mitangi howa biabe beramigola ibugua mbirale uruni ngaru tíhondo ngiai holebira.
LUK 12:32 I̱ aria emene tí kamiru Abahanda turu howa Ngode Datagaliwabehanda Handame Ho Kagonaga tíhondo ngulebirago gi nahalimu.
LUK 12:33 Tínaga mbirale ngamiru yolo miai howa muni ngiragola wali agali yagibano karuhondo milimu. Ani buwa muni pauyi goba nahaga manda manda bialu dahuliya andagani ereba nahaga ngagoha mbirale homogo holenenaga mo do halimu. Ogoriani pagealime mo kayu bule anda pobe nahego wiaabo hagabi bombome nalu mo ko nahagabi nga.
LUK 12:34 Mbirale homogo holenenaga mo do ho ngagoria tínaga gubalini íbu haabo holebira.
LUK 12:35 Agi birabe hondole manda manda bu howa lamu hale dela ho yalu dongoneni aga karulai ho howa bulene ngago bule halimu.
LUK 12:36 Biabe bia haga agalime tinaga anduane ibu agali mbirame wali dabu biyagonaga tomo nalu howa dai birabe hondole manda manda bu hagadagua holene nga. Ti anduane o biagome ibalu, Panga duguadaba, laragola ibu anda ibilo tigua panga abale dugulebira.
LUK 12:37 Biabe bia haga biarume palia hondo nahe dengala ho howa tinaga anduane ibilo manda manda bu karia ibiragola hondowa ti turu timbuniore holebira. I̱na tí langerogo ibugua ibunaga dagare tingiliya ale golo ngelowa lalu, Tí tomo nalimulo manda manda bu nguliya biradaba, lolebira.
LUK 12:38 Ibugua mbiraga mbi hanuni ibiyaguabi o mani howa ibiyaguabi ti manda manda dege bu karia ibiyagua nde ti turu timbuniore holebira.
LUK 12:39 Ani buwa galone mbira tí manda biaabo halimulo laro. Anda anduaneme pageali ogoningiore ibulebiralo manda bidale pagealime ibu andaga duanialu anda ibilo henge namidale.
LUK 12:40 Ani buwa tíguabi Agali Hole Ibiyago ogongi ibulebiralo tí manda nabi kamiria íbu pe holigo horo bibahendengi manda manda bu haabo holeneore nga, lene.
LUK 12:41 Ani layagola Pidahanda lalu, Anduane Homogo-o yobage laregoni inahondo hangu larebe be maru bibahendehondo larebe, lene.
LUK 12:42 Ani layagola Anduane Homogohanda ladai bialu lalu, Anidago biabe bia haga mini bilinahebi mini gigabiwibi haruago aibe. Ibunaga anduane biagome biabe bia haga biago ibugua anda baya hangu hondo helobi biabe bia haga maru baba tomo tale bulene ngangi tale bilobi helayago ogoni ibu haruagoni.
LUK 12:43 Anduane biago ibu andaga dai biragola ibunaga biabe bia haga biagome biabe ogonidagua bialu karia ibiyagua nde biabe bia haga biagome turu timbuniore holebira.
LUK 12:44 Aniore bulebiragonaga i̱na tí langerogoni anduane ogonime ibunaga biabe bia haga biagohondo, I̱naga mbirale bibahende ngoru í̠na hondo habe, lolebira.
LUK 12:45 Anigo biabe bia haga biagome ibuni lo manda bialu lalu, I̱ anduane emene lu howa dai bulebirago, lowa ibu biabe bia haga wali agali maru karu baba bo wahaga haga bialu howabi tomo na gimbu bialubi lulu iba ngaru nagimbu bialu howa lulu yu hayaguabi
LUK 12:46 ibunaga anduane ibilo manda manda nabi howa ibu angi ibirabe manda nabi karia ibunaga anduane biago íbu pe holebira. Ani ibuwa anduane biagome biabe bia haga biago mo ko howa balu maru bi mo wahaga biarubi pani mbiraore dege mulebira.
LUK 12:47 Biabe bia haga mbirame ibu anduaneme, Ogo ale bibe, laya lo manda buwa bia layadagua bule manda manda nabi hayagua ibu anduaneme ibu tibume hongo timbuniore howa bo mbera ho waholebira.
LUK 12:48 Anigo biabe bia haga mbirame ibu anduaneme, Bibe, layago manda nabi howa tibume bolene irane wilonaga bialu hayagua ibu anduaneme emene hangu bolebira. Anigo marume dewa yu hayagua ya dai dewa dege bulene nga. Marume dewaore mo tago howa yu hayagua nde dewaore mo tago howa ya dai bulene nga.
LUK 12:49 I̱na dindi wiame kago heda hole ibirugo nde abaleore hungu bilo hame ledo.
LUK 12:50 I̱ homolenenaga baboraya yu holeberogo tu wilo tagi ogoninaga genda yu kogoni.
LUK 12:51 Dindi bibahendeni mo palia holene wule yalu íbu ka manda bu kamibe. I̱na mo palia holene yalu ndo mo tu wia holene yalu ibiyada manda bilimu.
LUK 12:52 Anidago áyu ogoni howa ai̱ya igini hameiginima duria howa tale bialu tebira mendeyagi kira mendeyagi lowa hoba migimigi bu haga haga buwa tebira biarume kira biago labohondo hoba migimigi bu halu kira biago labome tebira biaruhondo hoba migimigi bu haga haga bu holebira.
LUK 12:53 Ani buwa igiri abame ti igini baba hoba migimigi bialu igirime ti aba baba hoba migimigi bu holebira. Ani buwa wandari ai̱yame ti wane baba hoba migimigi bialu wandarime ti ai̱ya baba hoba migimigi bu birulebira. Ani buwa igiri ai̱yame igiri one baba hoba migimigi bialu igiri oneme igiri ai̱ya baba hoba migimigi bu birulebira, lalu Yasuhanda lene.
LUK 12:54 Ani lowa Yasuhanda wali agali bu hearuhondo lone lalu, Ni paliragohayagi howa hari beraliba ibirago hondowa daluore ibulubada áyu dege lo kamigola dalu henene ibaga.
LUK 12:55 Ani buwa ni tagira ibiragohayagi howa puyabu ibirago hondowa aiore gaea bulubadalo manda bu kamigola gaeaore biaga.
LUK 12:56 Tí tombene hondo kihe kamigoni. Tígua harinibi dindinibi dalubi nibi aguaore biralo handaramiligo hondowa áyu kamigonagaore birago irane ogo ale biralo manda nabi kamigo agibe, lene.
LUK 12:57 Tí tínime bayale tigabi ngagoore bulenaga daba nabi kamigo agibe.
LUK 12:58 Mbiralime í̠ heba godi lolenaga, Í̠la godi labiya mba, lalu haru pole biyagua í̠na harigani pialu godi lagane andaha anda nape howa ibu mo te la halu abale mo tiga bulene manda bibe. Ani nabiriyagua ibugua í̠ godi dabaga agali karia hongo howa haru poragola godi dabaga biagome í̠ dandayi agalihondo minu miragola dandayi biarume í̠ garabaya andaha helolebira.
LUK 12:59 Ani biragola í̠na ko birigonaga yolo miaiore habelo garabaya andaha helaabo holebirago i̱na langero, lene.
LUK 13:1 Horo ogoningi dege agali marume Yasuhondo Pailatehanda Galiliali maru Ngode Datagaliwabehondo mbirale bo delalu hearia homelo bayagonaga te lamini.
LUK 13:2 Lamiyagola Yasuhanda ladai bialu lalu, Galiliali biaru ogonidagua bayagoni irane Galiliali marume ko biyago goyane lowa tigua ko gibiore biyagonaga bayago manda birimibe.
LUK 13:3 Ani ndogo i̱na tí langerogo tígua ko birimigo wahalu mini beregeda nabirimiyagua ti homayadagua tí bibahendebi homai holeberami.
LUK 13:4 Wali agali pira mbirani halira (18) Sailoamani anda daligaore podope howa bayagola homai hayaru agua bulebirabe. Tigua ogoni biyadagoni Yarusalemeni heneru goyane lowa wali agali urunime koore henegonaga bayago manda birimibe.
LUK 13:5 Ani ndogo i̱na tí langerogo tígua ko birimigo wahalu mini beregeda nabirimiyagua ti homayadagua tí bibahendebi homai holeberami, lene.
LUK 13:6 Ani lowa Yasuhanda bi yobage ogo wali agali biru wiaruhondo lamialu lalu, Agali mbirame ibu mabuni poge mbira anda ho hene. Ani buwa ibugua lini dedabe hondo pialu hearia mbira nadeore hearia hendene.
LUK 13:7 Ani biyagola ibunaga mabu biabe bia hagahondo lalu, De handa. I̱na mali tebira poge ogonime lini mbira dedabe hondo ibaabo harugo mbira dearia i̱ nahendeore. Galone nabulene howa dindi bene bedago no biba harago dibu waholene nga, lene.
LUK 13:8 Ani layagola mabu biabe bia haga biagome ladai bialu lalu, Anduane-o diba nabi mali mbiraore hangu ani helabe. I̱na teneha dindi godo mabu buwa nogo bulumaga time dugu homa buliya.
LUK 13:9 Ani berogola poge ogoninaga lini darabe hondole nadagayagua dibupe habehe holebere, laya, lalu lene.
LUK 13:10 Sabada horo mbirungi Yasu ibu ngoai hagane andahabi mana lawai halu hene.
LUK 13:11 Wali mbira damame warago mo ba hayagola mali pira mbirani halira (18) ibunaga tingini tigatiga habe naheore pola ki bu yu ibaga bu berenego ibu ogoniha berene.
LUK 13:12 Yasuhanda wali biago hondowa ola amu howa lalu, Wali-o warago balu bedegoni dabi habelo, lowa
LUK 13:13 ibunaga gi wali biagonaga erekunini ela hayagola abaleore dabi howa wali biagome ibuni tigatiga ho howa Ngode Datagaliwabenaga mini mo yaraga hene.
LUK 13:14 Ani biyagola ngoai hagane anda hondo haga heagome, Yasuhanda wali biago Sabada horongi mo dabi hayago, lalu lembo howa wali agali biru wiaruhondo lalu, Horo waragaru wiyagoriani howa biabe bialu horo uruninaga howa warago bo ngaru mo dabi helo ibulene nga Sabada horongi ndo, lene.
LUK 13:15 Ani layagola Yasuhanda ibuhondo ladai bialu lalu, Anidago tí tombene hondo kihe kamiru tí mbiralime Sabada horongi nogo bulumaga andaha puwa nogo bulumagabi nogo dongibi iba nelo haru piaga ka.
LUK 13:16 Anigo Abarahamanaga aguanene wali o bedago dama Heyolabeme mali pira mbirani haliraore (18) erene mo pola ki hayagola biraabo henego i̱na Sabada horongi hadape holene ngagoni ndobe, lene.
LUK 13:17 Ani ladai biyagome ibu baba waitigi ho hayaru taga timbuni hayagola wali agali maru hearume Yasuhanda agalime nabiaga ale bibahende biyago hondowa turu timbuni ho hene.
LUK 13:18 Yasuhanda tihondo lalu, Ngode Datagaliwabehanda Handame Ho Kagoria agi ale ngabe. I̱na ogo ale lole agi ale lalu manda buabe.
LUK 13:19 Ogo ale lalu agali mbirame ira masada egene mbira mo yalu puwa ibu mabuni hengene. Ani birago egene biago doai lalu ira anda ho kagola ega bedarume ira ogoni maganeni tinaga anda biaga. Ogoni ale Ngode Datagaliwabe Handame Ho Kagoria ngagoni, lene.
LUK 13:20 Yasuhanda lone lalu, Ngode Datagaliwabehanda Handame Ho Kagoria i̱na agi ale lalu manda bu hondoabe.
LUK 13:21 Ogo ale lalu walime balawa timbuni beha odape howa mo hiwa hagane mini yidi mo bimaga haragola balawa hiwa hai hagago ogoni aleore nga, lene.
LUK 13:22 Ani lowa Yasu dindi wiaruhabi tano wiaruhabi wali agali bu hearuhondo bi mana lawai haga bima Yarusaleme pole pene.
LUK 13:23 Mbiralime Yasuhondo lalu, Anduane-o wali agali mbira mbira hangu pele mule beda agini, lene. Ani layagola Yasuhanda wali agali hearuhondo ladai bialu lalu,
LUK 13:24 Anda polene panga haraba dorogone ngago ogoniha anda pialu pole tí hongo holene nga. Irane wali agali dewaoreme anda pialu pole lowa haruru biaabo haragola anda pobe naheoredane hondolebira.
LUK 13:25 Ani biragola anda anduane biagome heyuwa panga paya pai holebira. Ani biragola tígua haneni howa pangani ngi̱la̱o̱ ngi̱la̱o̱ balu howa lalu, Anduane-o ina anda ibuluma̱ya panga dugua ha, laramigola ibugua tíhondo ladai bialu lalu, I̱na tí manda nabidogo tí ani howa ibirimibe, lolebira.
LUK 13:26 Ani laragola tígua howa lalu, Ina í̠ heba iba nalubi hina nalubi haramali. Ani buwa inanaga tanoni howa í̠na mana lawai hari, loleberami.
LUK 13:27 Ani laramigola ibugua halu mende lalu, Tí ani howa ibirimibe i̱ toba ko, lolebira. Wali agali mana ko hanguore mo tene haga kamiruni tí bibahende i̱ denguini nahe puabo hadaba, lolebira.
LUK 13:28 Ani laragola tígua tagirani howa Abarahamabi Aisagabi Yagababi Ngode Datagaliwabe mana latagi haga bibahende biarubi Ngode Datagaliwabehanda Handame Ho Kagoria kagola hondowa dugu tara bialu ne gingirulo hayaga bialu holebira.
LUK 13:29 Wali agali dewaore ni ibiragohayagi howabi ni paliragohayagi howabi uyurahayagi howabi unurahayagi howabi íbu ngoai howa Ngode Datagaliwabehanda Handame Ho Kagoria tomo nole birulebira.
LUK 13:30 Ani buwa wali agali áyu maha karu mo bamba halu áyu bamba ho karu mo maha holebira, lene.
LUK 13:31 Ani lalu heaore Perisi agali marume Yasu hearia ibuwa lalu, Herodohanda í̠ bo wahole manda bialu kago í̠ ogoria nahe mbiraha poleneore nga, lene.
LUK 13:32 Ani layagola Yasuhanda tihondo ladai bialu lalu, I̱na dama daraga karu wara tagi halubi warago bo ngaru mo dabi haga bialubi áyu yawiru bialu howa luma i̱naga biabe ogoni biai holeberogo tígua biango dudu haruagoni biago lamule pudaba.
LUK 13:33 Anigo áyu yawi lumaru i̱ harigani pialu holeberogo ogoni Ngode Datagaliwabe mana latagi haga karu mbirani howa bolene nawi Yarusalemeni dege bolene nga.
LUK 13:34 Yarusalemeni kamiru-o Yarusalemeni kamiru-o tígua Ngode Datagaliwabe mana latagi haga heneru homelo balubi Ngode Datagaliwabenaga mana lamule ibiyagola to̱le̱me homelo balubi kami. Ega gogologo angibunime ibu igini ibuni tombeha mo mogo bu ngelai howa babaganeme dungu dambi hagadagua i̱na i̱naga gime wali agali bu kamiruni tí mo mogo buwa tali wu mabu bua haabo harugola tígua, Í̠na ani bia, nale harimi.
LUK 13:35 Anigo Ngode Datagaliwabenaga anda tíninaga laramiligo tabuanda helo wahalu polebira. I̱na tíhondo henene larogo tu áyu howa be lirahayagiore mbira tígua i̱ lone nahende haabo howa, Mbirali Anduane Homogonaga minini howa ibirago Ngode Datagaliwabehanda ibu mo turu helo, laramingi i̱ de hondoleberami, lene.
LUK 14:1 Sabada horo mbirungi Yasu ibu Perisi agali mini lene mbiranaga andaga tomo nole piyagola wali agali bu hearume Yasu handaya ho hene.
LUK 14:2 Agali mbira gibi gebi tohe henego ibuwa Yasu heagoria hayagola
LUK 14:3 Yasuhanda Mana lowinigo lawai hagabi Perisi agalibi hearuhondo lalu, Inanaga Mana lowinigo ngagome Sabada horongi mo dabi holene nga lagabe be nalagabe, lene.
LUK 14:4 Ani layagola tigua bi mbira ladai nabiore hene. Ladai nabiyagola Yasuhanda agali biago yamuwa mo dabi howa, Ai í̠ andaga pamia, lene.
LUK 14:5 Ani buwa Yasuhanda tihondo lalu, Tí kamiruni mbiraligonaga iginibi nogo bulumagabi Sabada horongi iba uliha pilayagua ogoningi abale duguleberamibe be naduguleberamibe, lene.
LUK 14:6 Ani layagola tigua ladai bibe nahe hene.
LUK 14:7 Yasuhanda handalu hearia agali maru tomo nole tamuha anda ibiyarume dagia bayale wiagoria hangu birule dabayagola hondowa ibugua bi yobage ogo ti bibahendehondo lamini.
LUK 14:8 Lamialu howa lalu, Mbirame wali dabu bialu howa tomo nami̱ya ibabe laragola puwa dagia bayale ngagoria habu lowa daligani birule manda nabibe. Tomo dawa wiaga biagome í̠ dindiha lowa agali mende, Ibabe, laganego
LUK 14:9 agali ibabe laga biagome í̠ bedegoria ibuwa, Dagia ogoriani ibu berela, lolebira. Ani laragola taga emene ndoore howa dindiha birape holebere.
LUK 14:10 Ibabe, laragola puwa dindini birabe. Ani birariyagua í̠ ibabe laga biagome í̠ bederia ibuwa, I̱ hamene-o daligani iragaho bira, lolebira. Ani lalu maru íbu bedaruni heba howa bi ogoni laragome í̠ mini yaraga holebira.
LUK 14:11 Mbiralime ibuni mo yaraga hayagua ibu mo dindiha ho helolebira. Mbiralime ibuni mo dindiha hayagua ibu mo yaraga ho helolebira, lene.
LUK 14:12 Ani lowa Yasuhanda ibu tomo nami̱ya ibabe laga biagohondo lalu, Í̠na horombe alendobi tomo nole howa í̠ nenegebi hamenebi damenebi í̠la homogo handa a̱i̱ na̱i̱ padagobi urunibigo, Tomo nami̱ya ibidaba, nalabe. Tigua nde mani í̠ dano hangalu, Tomo nabiya íbu, lolebira. Ani laragome í̠na birigonaga yolo buwa haragoni.
LUK 14:13 Í̠na tomo mbira dawariyagua yagibano karubi kuduguhe karubi ge kohe karubi de kohe karubi, Nami̱ya ibidaba, labe.
LUK 14:14 Ani lariyagua urunibime dano hangabe nahego, Nami̱ya ibidaba, larigo í̠ mo turu holene yulebere. Wali agali mini tigabiwi howa homayaru heyulene horo harangi Ngode Datagaliwabehanda í̠naga yadai bulebira, lene.
LUK 14:15 Agali mbira tomo wiaga dagia wiagoria bira para heagome ogoni hale howa Yasuhondo lalu, Ngode Datagaliwabehanda Handame Ho Kagoria tomo nole birule birarume turu timbuniore holebira, lene.
LUK 14:16 Ani layagola Yasuhanda ibuhondo ladai bialu lalu, Agali mbirame tomo timbuniore dawale manda buwa ibugua wali agali dewaore, Nami̱ya ibalimu, lene.
LUK 14:17 Agali biagome tomo biagoni dawawa nolene tu hayagola ibunaga biabe bia haga heagohondo lalu, Wali agali ibalimu laruru tomo dawa ngago nole ibilo lamule pu, lene.
LUK 14:18 Ani lamiyagola tigua manila alala bialu lalu, I̱ ogodagua bulebero i̱ ogodagua bule ko, laga bini. Agali mbiragome lalu, I̱ dindi mbira yolo birugo handa kia bu porogo naibagua larogoniore hale halu manda bibe, lene.
LUK 14:19 Agali mendegome lalu, Biabe bulenaga nogo bulumaga pira (10) áyu dege yolo birugo mandabu hondole porogo naibagua o larogoniore hale halu manda bibe, lene.
LUK 14:20 Tebonegome lalu, I̱ wali áyu dege dabu birugo irane ogoninaga naibabehe ko, lene.
LUK 14:21 Ani layagola biabe bia haga biagome dai buwa o layaruni ibu anduane biago lamule pene. Ani lamiyagola tomo dawa wiaga anduane biago lembo howa ibunaga biabe bia haga biagohondo lalu, Tanoha hariga emene pedagohabi timbuni pedagohabi abale puwa yagibano karubi kuduguhe karubi de kohe karubi ge kohe karubi haru dai bule pu, lene.
LUK 14:22 Ani layagola howa biabe bia haga biagome abale pialu dai buwa lalu, Anduane-o í̠na laridagua biai harugo birulene henge wia dege bida, lene.
LUK 14:23 Ani layagola tomo anduane biagome ibunaga biabe bia haga biagohondo lalu, Tamu henge ngago to̱lai helo hameore ledogo í̠na hariga pedadagua puwa tinaga mabu andaga karuha puwa haru ibai hole pu.
LUK 14:24 I̱na tí bibahende langerogo wali agali uruni, Tomo nami̱ya ibidaba, laruru ti bibahendeme naneore holebira laro, laya, lalu Yasuhanda bi yobage ogoni lene.
LUK 14:25 Horo mbirungi wali agali dewaoreme Yasu piyadagua mama ibalu hearia ibugua beregedowa tihondo lalu,
LUK 14:26 Mbirali i̱ kogoria ibua kago i̱naga talima ibagane hole ibu abahondo gubalini howa ibu ai̱yahondobi ibu onehondobi ibu waneiginihondobi ibu hamenehondobi ibu mbalinihondobi ani bialu ibunihondobi gubalini hayago goyane lowa i̱ ala gubalini nahayagua i̱naga talima ibagane habe nahe holebira.
LUK 14:27 Ani buwa ibuninaga ira banga nayi howa i̱ porodagua ibirago ibu i̱naga talima ibagane habe nahe holebira.
LUK 14:28 Tí kamigoha mbiralime anda daligaore bima iraga hole mandabu kayagua anda daliga ogoni bumaro bulene muni karulape ngabe hondole ibugua ala biruwa muni agirame bulene karula polobadabe handalu ala manda manda biaga.
LUK 14:29 Ani nabiyagua anda gene wawa anda daliga biago biai habe nahe holebira. Ani biai nahe biala ho ngago handararume ibu hondo oba holebira.
LUK 14:30 Oba halu tigua lalu, Agali ogome anda bule biyago biai habe naheyane wahayada, lolebira.
LUK 14:31 Kini mbirame agali daosini pira (10,000) haru halu kini mendeme agali daosini pira kira (20,000) haru halu ibirago baba wai bulenaga hongo karula polobadabe nakarula polobadabe manda bulebira.
LUK 14:32 Mandabu hondowa nakarula pobehe manda biyagua wene amura ibalu kaore agali marume wai mo palia hole pelo, Bi lama pudaba, laga, lene.
LUK 14:33 Yasuhanda lamaro bialu lalu, Ogonidagua tí mbiralime i̱naga talima ibagane hole ibuninaga mbirale ngaru bibahende wahai nahayagua i̱naga talima ibagane habe nahe holebira, lene.
LUK 14:34 Ibi bayale nga. Ibi ibuninaga dende ereba hayagua lone mo dende bia habe nahe nga.
LUK 14:35 Ibi ogonibigo dindi himu ngagohabi nogo bulumaga ti hilu mogo bu ngagohabi nawiagago waholene nga. Tí hale kamiyagua nde hale halimu, lene.
LUK 15:1 Horo mbirungi dagisi muni miagarubi ko biaga marubi Yasuhanda bi layago hale hole ibiyagola
LUK 15:2 Perisi agalibi Mana lowinigo lawai hagabi hearume bi gimigomo lalu, Agali ogome mana ko ngubi biaga karuhondo, Hami̱ya, lagabi ti heba tomo nalu biragabi ka, lene.
LUK 15:3 Ani layagola Yasuhanda ti bi yobage ogo lamini.
LUK 15:4 Tí mbirame nogo sibi handari mbira (100) hinuwa mbirago pu ereba hayagua ibu agi bulebirabe. Ibugua pira dirani dira (99) tani nalu helalu pu ereba hayago tai bima ibaga bialu handa walia haga.
LUK 15:5 Handa walia howa ibu turu tara haga. Ani buwa ibuni payani yalu
LUK 15:6 andaga dai biaga. Dai buwa ibu nenegerubi ibula handa a̱i̱ na̱i̱ padarubi mandagi olo ngoai howa lalu, I̱naga nogo sibi mbira pu ereba hayago handa walia harugo ai turu taraore ho kogo ina haru turu ho hama, lolebira.
LUK 15:7 Ogonidagua dege bulebiragonaga i̱na tí langerogo wali agali pira dirani dira (99) bayale howa mini beregedolene nawi karunaga ndo mbira koore biaga henego mini beregedalu dai biyagonaga dahuliya andagani turu taraore holene wulebira, lene.
LUK 15:8 Ani lowa Yasuhanda lalu, Wali mbirame muni kuni pira winiru pinigo ereba hayagua ibugua agi bulebirabe. Ibugua lamu hale hedo yuwa tai bialu handa waliaore hole lowa durumbu hilo ba tagi howa baya hangu tai biame haga.
LUK 15:9 Ibugua handa walia howa ibu nenegerubi ibula handa a̱i̱ na̱i̱ padarubi olowa lalu, Muni kuni mbira ereba hayago handa walia harugo ai mandagi turu ho hami̱ya ibidaba, lolebira.
LUK 15:10 Ogonidagua dege i̱na tí langerogo mbira koore biaga henego mini beregedalu dai biyagua Ngode Datagaliwabenaga dahuliyalirume turu taraore holebira, lene.
LUK 15:11 Yasuhanda la ho wiaabo howa lalu, Agali mbira ibu igini kira hene.
LUK 15:12 Ani howa igiri heyogonegome ibu abahondo lalu, Aba-o munibi mbirale marubi i̱ ngule wiridago tale bialu áyu ogoni ngi, lene. Ani layagola agali biagome ibunaga mbirale wiyaruni ibu igini biago labohondo mo tale bia hene.
LUK 15:13 Ani buwa horo kiru tebiru agima howa igiri heyogone biagome ibunaga mbirale yayaruni yolo miai halu muni hangu yalu ibu andaga wahalu pene. Dindi kaundiaoreha pu howa ibuninaga mini bayuwa haru nahe howa muni yayago ko galone nabulene wiaru hanguni mohole bialu hene.
LUK 15:14 Ani buwa mbirale yayaruni bibahendeore biba hai hene. Ani bu hearia dindi ogoniha hina gari timbuniore piyagola igiri biago ibu mbirale mbira nayiore hene.
LUK 15:15 Ani biyagola agali mbira heagome ibunaga mabuha, Nogo haru hole pu, layagola nogo haru ha hole pene.
LUK 15:16 Haru hearia mbirame ibuhondo tomo emeneore namiyagola garibi timbuni lowa tomo hingilu wahayago noa timbuni ho hene.
LUK 15:17 Ani buwa mani mini wia dai bialu lalu, I̱ abanaga biabe bia haga karume tomo timbuni nalu maru nabe manga ho kago i̱ nde ogoria nane howa tongolo mibeheore kogoni.
LUK 15:18 I̱na áyu ogoni heyalu i̱ aba kagoria puwa ibuhondo lalu, Aba-o i̱na Ngode Datagaliwabehondobi í̠hondobi ko bialu hoba mu harugoni.
LUK 15:19 Ai áyu i̱na í̠ igini labe nahe kogoni. Í̠naga biabe bia haga karuhondo bialu harilidagua i̱hondobi bialu habe lolebero.
LUK 15:20 Ani mitangi bialu ibu aba hearia pole heyalu andaga dai bini. Ibu andagani anda íbu nabi wene amuraore ibalu hearia ibu abahanda hondowa ibunaga bu miniha daraore ho howa abale gerai puwa yu hurubale buwa yu nu̱nu̱ lene.
LUK 15:21 Ani biyagola ibu igini biagome lalu, Aba-o i̱na Ngode Datagaliwabehondobi í̠hondobi hoba mu howa koore birugo ndobe. Ai i̱na í̠ igini labe nahe kogoni, lene.
LUK 15:22 Ani layagola ibu abahanda ibunaga biabe bia haga biaru, Ibai hadaba, lowa, Aga bayaleore abale mo puwa gi hondoneni magibi karula halu ge su mo karula halu bidaba.
LUK 15:23 Ani bialu nogo bulumaga igini habahe mbira kago bo puwa dawadaba. Ani buwa turu halu nami̱ya.
LUK 15:24 I̱ igini ogoni homayago ai dére ho kagoni. Pu ereba hayago ai handa walia kogoni, lene. Ani layagola howa ti tomo biagoni dawalu hene.
LUK 15:25 Ani bialu hea tambu igiri wahene biago mabuha biabe bialu hene. Ibugua andaga kaware dai bialu howa hale halu hearia amu andaga biagoha mbira bi anda howa iba ganaru lalu mali lialu hayuane hale hene.
LUK 15:26 Ani biayuagola biabe bia haga mbira heago olowa hale halu lalu, O biaruagoni agi birabe, lene.
LUK 15:27 Biabe bia haga biagome ladai bialu lalu, Í̠ hamene biago andaga íbu dai biyagola í̠ abahanda ibu igini biago homo ereba nahe heneda lowa nogo bulumaga igini habahe mbira heago bo dawalu ka, lalu lamini.
LUK 15:28 Ani layagola hale howa igiri wahene biagome kera gibiore howa andaga anda pu nabi hene. Ani biyagola ibu abahanda abale tagira puwa yu hurubale buwa, Andaga mba, lene.
LUK 15:29 Ani layagola ibu abahondo lalu, I̱na mali bibahende biagoni í̠na bi larigo mbira mo wa nahe garabaya biabe ale biaabo halu harugoni. Í̠na i̱ agile ngiribe. I̱ nenege karu baba nogo memebi mbira bo dawaliya nangiriligo manda berene.
LUK 15:30 Í̠ igini ogoni í̠naga mbirale wiriru mohole bialu walime kayu bibiya ngi layagola mialu andaga íbu dai biyagola nogo bulumaga igini habahe mbira heago ba harida, lene.
LUK 15:31 Ani layagola ibu abahanda lalu, I̱ igini-o í̠ horo bibahendengi i̱la haabo howa mbirale i̱na wu hewaru í̠naga ho haribagoni.
LUK 15:32 Anigo áyu nogo balu uru halu kamago nde í̠ hamene biago homayago dére halu pu ereba hayago handa walia halu birimagonaga beramagoni, lene, lalu Yasuhanda lamini.
LUK 16:1 Yasuhanda ibunaga talima piaga biaruhondo lalu, Agali homogo mbira henegome biabe bia haga mbirahondo ibunaga mbirale wiaru hondo helo helene. Ani hondo heagola mbiralime agali homogo biago lamialu lalu, Í̠naga mbirale wiru hondo helariyagome í̠naga muni bame biba helara, lene.
LUK 16:2 Ani lamiyagola ibugua biabe bia haga biago olalu, Íbu, lowa lalu, Í̠na biri layane hale harugo agibe. I̱naga mbirale wiwaru hondo harigo baya hangu dagalo manda bialu gili biai hole pu, lene. Ani biai halu í̠ i̱naga biabe bia haga habe nahedago wahalu tagira polebere, lene.
LUK 16:3 Ani layagola biabe bia haga biagome lalu, I̱ anduaneme i̱ biabe wahalu tagira pu lolebirago ai agi buabe, lalu ibuni hangu lo manda bini. I̱ gana walenebi hongo nahego wali agalihondo muni mbiralebi ngi lolene taga ko.
LUK 16:4 Ai i̱na ogo ale bule lo manda bidogo buwa i̱ biabe nabi kogola i̱ nenege karume i̱ ti andaga, Íbu, lolebira manda bido, lene.
LUK 16:5 Ani lo manda buwa ibugua ibu anduanenaga agali dano ho hayaru olalu, Ibidaba, lowa mbiragohondo lalu, Í̠na i̱ anduanela dano agira ho kebe, lene.
LUK 16:6 Ibugua ladai bialu lalu, Olibe lininaga weli be heba handari mbira (100) dano ho ko, lene. Ani layagola biabe bia haga biagome agali biagohondo beba mialu, Í̠naga dano harigonaga ogoni. Í̠na biruwa ogoriani pira duria (50) gili bibe, lene.
LUK 16:7 Ani lowa ibugua mendehondo lalu, Í̠na i̱ anduanela dano agira ho kebe, lene. Ani layagola mendeali biagome ladai bialu lalu. Ladi ale mini widi nu heba daosini mbira (1,000) dano ho ko, layagola biabe bia haga biagome ibuhondo beba mialu lalu, Í̠naga dano harigonaga ogoni. Í̠na biruwa beba ogoriani handari halira (800) gili bibe, lene.
LUK 16:8 Ani biyagola ibu anduane biagome biabe bia haga mini tigatiga ndo ohewi biagohondo lalu, Mini ohe harigo bayale birida, lene. Wali agali dindini holene hangu mitangi bu karume tinaga biabe bialu howa wali agali wá kagoria karume biabe biagadagua ndo tigua miniha o timbuniore howa biaga ka, lalu Yasuhanda ani lene.
LUK 16:9 Ani lowa Yasuhanda la ho wiaabo halu lalu, Anigo i̱na tí langerogo dindinaga mbirale yu kamigome wali agali mo nenege hinulene nga. Ani bialu howa homaramingi Ngode Datagaliwabehanda haabobo holene ngagoria, Hole íbu, lolebira.
LUK 16:10 Mbiralime mbirale emene ngago bayuwa hondo hayagua timbuni ngarubi bayuwa hondo holebira. Mbiralime emene ngago bayuwa hondo nahayagua timbuni ngarubi bayuwa hondo naholebira.
LUK 16:11 Aniyagua í̠na mbirale dindi yu holene ngago mohole bialu hariyagua homogo holene henene ngago agua yu holeberebe.
LUK 16:12 Ani buwa í̠na mbiralinaga mbirale bayuwa hondo nahariyagua mbirale í̠ninaga yu habelo aiwa ngulebirabe.
LUK 16:13 Biabe bia haga mbiraoreme anduane kiranaga garabaya biabe ale bia haga habe nahe ka. Ibugua anduane mendego handabe manga halu mendego gubalini holebira. Ani bialu howa anduane mendegome bi larago hale halu bialu mendegome bi larago hale howa mo waholebira. Tígua Ngode Datagaliwabenaga biabebi muninaga biabebi kirabali gi tale bu howa bibe naheore kamigoni, lene.
LUK 16:14 Yasuhanda bi uruni layago hale howa Perisi agali hearume Yasu handabe manga howa talialu hene. Irane ti muniore gubalini timbuni haga hene.
LUK 16:15 Ani biyagola Yasuhanda tihondo lalu, Tígua tíni wali agali maru karunaga deni howa, Bayaleda, lelo mo ho kamigo Ngode Datagaliwabehanda tínaga bu miniha mitangi bu kamigoni manda bida. Mbirale bayale timbuni hongohe ngaruni agalime mo dunu bia ho kagoni uruni Ngode Datagaliwabenaga deni howa galone nabulene nga.
LUK 16:16 Mosese heneyangi Mana lowini ngagobi Ngode Datagaliwabe mana latagi hagarume bi gilibu wini ngagobi uruni baboraya biaga Yone hayangi winigo wima ibaabo halu Ngode Datagaliwabehanda Handame Ho Kagonaga Bi Mana Debene lamiaabo halu bibahendeoreme anda pelo hongo howa piaga ka.
LUK 16:17 Anigo ogoni hari daligabi dindibi ereba holene tai nabi awadagago Mana lowini ngagonaga bi emeneorebi ereba nahe wiaaboore ho wulebira.
LUK 16:18 Agali mbirame ibu one wahalu wali mende lone dabu bu aribia hayagua ibugua wali mende biago kayu biragoni. Ani buwa wali wahayago agali mendeme dabu biyagua ibugua wali kayu biragoni, lene.
LUK 16:19 Yasuhanda lowa, Agali homogo mbira henegome aga bayaleru muni timbunime muwa bu howa anda bayale hanguni palialu tomobi bayale hangu nalu hene.
LUK 16:20 Ani buwa agali mende mini Lasarasi ibu ko yagibanoore dereme dongoneni biamehego agali homogo biago anda haneni marume haru íbu biraabo helene.
LUK 16:21 Biraabo howa agali homogo biago ibu tomo nalu hingilu dagiani howa ibira hayago Lasarasihanda noa howa biraabo hene. Biangomebi ibu dongoneni dere bidago domo naabo halu hene.
LUK 16:22 Lasarasi yagibano biago homayagola dahuliyali hearume ibu Abarahama dahuliya andagani tomo dawa wiaru nalu bereagoria berelole yalu pene. Ani biyagola mani agali homogo biago homayagola hora hene.
LUK 16:23 Ani buwa Heli dindi tandaga timbuniore nalu howa handa daga halu hearia Abarahama uyuraore Lasarasila berearia hendene.
LUK 16:24 Ani bu bereago hondowa ola daga howa lalu, Aba Abarahama-o i̱hondo dara ha. Í̠na Lasarasi ibu gi hondoneni iba mbira wai ho yalu i̱naga hége dege mo gomba hole ibilo ibilabe. I̱ ira dedagoria howa tandaga timbuniore nalu kogoni, lene.
LUK 16:25 Ani layagola Abarahamahanda ladai bialu lalu, I̱ igini-o í̠ dindini haringi mbirale bayale hangu hanguni harigo Lasarasi ibu mbirale ko hangu hanguni hayago mitangi bibe. Í̠ tandaga nalu kegola áyu Lasarasi ibuni turu ho ka.
LUK 16:26 Ani buwa ina kamagoria tubari timbuniore ngago mbiralime ina kamagoria howa tí kamigoha bolangua halu naibilobi tí kamigoria howa ina kamagohayagi bolangua halu naibilonagabi tubari timbunioreme ngagoni, lene.
LUK 16:27 Ani layagola agali homogo biagome lalu, I̱na í̠hondo heneneore larogo aba Abarahama-o Lasarasi ibu i̱ aba andaga pialu
LUK 16:28 i̱ hamene duria kago uruni kagoria puwa tandaga nalu kogoria ti naibilo lamule pu labe, lene.
LUK 16:29 Ani layagola Abarahamahanda ladai bialu lalu, Í̠ hamene uruni ti Mosese ibugua bi gilibu wini ngagobi Ngode Datagaliwabe mana latagi haga henerume bi gilibu wini ngagobi yu kagoni. Tigua agi larabe í̠ hamene biarume hale holene ngagoni, lene.
LUK 16:30 Ani layagola agali homogo biagome lalu, Aba Abarahama-o ogonime nakarulapeda. Mbiralime tongolo minigo lone heyalu ti kagoria piyagua dege nde ti ko bialu hayagoria howa mini beregedolebira, lene.
LUK 16:31 Abarahamahanda lalu, Anigo Mosesehanda bi gilibu wini ngagobi Ngode Datagaliwabe mana latagi haga henerume bi gilibu wini ngagobi tigua hale nahayagua mbirali tongolo minigo lone heyalu piyaguabi manda nabulebiraore, lamini, lalu Yasuhanda lene.
LUK 17:1 Yasuhanda ibunaga talima piaga biaruhondo lalu, Mbirale tara tara ngarume wali agali ko mo bia haga nga. Anigo mbiralime ko mo bia hagago ibunaga mo ko holene timbu gibiore wulebirago dara holene nga.
LUK 17:2 Waneigini mini boga nabi karu ko bilo mbiralime ko mo bia hayagua ogoni ibu ege to̱le̱ timbuni ngago pume ibunaga mani pongo bia howa iba timbu bedagoha bape hayagua ogoni karulape.
LUK 17:3 Anigo tígua beramigo tiga hondowa bulene nga. Í̠ hamene mbirame ko biyagua talibe. Ani buwa ibu mini beregedalu dai biyagua ibugua ko í̠hondo biyago la nabi wahabe.
LUK 17:4 Ani buwa ibugua í̠hondo horo mbiru hanguni ka halu ko buwa kane halugo bialu í̠ keria ibuwa, Ai í̠hondo ko birugo wahalu mini beregedaru, layagua ibugua ko biyagoni la nabi wahabe.
LUK 17:5 Abosolo agali biarume Anduane Homogohondo lalu, Iname mini mbiraore wu kamago mo timbu ha, lene.
LUK 17:6 Ani layagola Anduane Homogohanda ladai bialu lalu. Tígua mini mbiraore masada egene emeneore ngago ale wu kamiyagua nde lini daga ira o kagohondo lalu, Í̠na í̠ni pini heba dugu yalu puwa iba solowara bedagoria í̠nime hangabe, laramigola hale halu bulebira, lene.
LUK 17:7 Tí kamigoni mbirame tínaga biabe bia haga mabu dindi alialu howayaguabi nogo sibi haru howayaguabi andaga dai biragola, Tomo abale nabe laramilibe.
LUK 17:8 Ani nalaramiligoyago. Tígua ibuhondo agua laramili, I̱naga tomo manda manda bu dawabe. Ani buwa aga mbira mo bo buwa tomo i̱ noliya dugu yalu ibabe. Ani buwa maniore í̠ni tomo nolebere, laramili.
LUK 17:9 Ani laramigo, Bibe, larimidagua biabe bia hagame biai haragola ibuhondo, Bayuwa birida turu halu ka̱i̱ laro, lolene irane nawi.
LUK 17:10 Tíni nde ogonibi dege kamigoni manda buwa, Bulene nga, layago biaiore howa au labe. Ina biabe bia haga howa bia layagoni dege birima lolene nga, Yasuhanda lene.
LUK 17:11 Yasu ibu Yarusaleme pole pialu howa Samaria Galilila tubari wiadagua pialu hene.
LUK 17:12 Ibu tano emene mbira wiagoha anda pialu hearia agali pira ge hamuabi lola hene. Ti amura howa
LUK 17:13 ladaga halu lalu, Yasu-o Anduane-o ina dara howa biamogo bia, lene.
LUK 17:14 Ani layagola Yasuhanda ti hondowa lalu, Loma binigo mo miaga karume tí de hendelo ti karia pudaba, lene. Ani laya handala pole harigani pialu hearia tinaga ge hamuabi biagoni ereba haiore hene.
LUK 17:15 Mbiragome ibunaga ge hamuabi biago ereba hayiyagola hondowa bi dalimu lalu Ngode Datagaliwabenaga mini yaraga halu Yasu hearia lone íbu dai bini.
LUK 17:16 Dai buwa ibugua Yasu heagoria dindini birape howa Yasuhanda ibu mo dabi hayagonaga ka̱i̱ lene. Agali ogoni ibu Samariali hene.
LUK 17:17 Ani layagola Yasuhanda lalu, Agali pira dabi hayago dira biaru agoha kabe.
LUK 17:18 Agali mbiraore dindi tarali ogome dege ibu Ngode Datagaliwabehondo ka̱i̱ lole dai biyago agibe, lene.
LUK 17:19 Ani lowa Yasuhanda ibuhondo lalu, Í̠ni Ngode Datagaliwabehondo mini mbiraore wirigome í̠ mo dabi hayago heyalu pamia, lene.
LUK 17:20 Perisi agali maru hearume Yasuhondo lalu, Ngode Datagaliwabenaga Handame Ho Holene angi ibulebirabe, lene. Ani layagola Yasuhanda ladai bialu lalu, Ngode Datagaliwabenaga Handame Ho Holene panigi hendene naibaga.
LUK 17:21 Mbiralime lalu, O kago handadaba amu kago handadaba, nalabehe. Irane Ngode Datagaliwabenaga Handame Ho Holene nde tí kamigoha íbu kagoni, lene.
LUK 17:22 Ani lowa ibugua ibunaga talima piaga biaruhondo lalu, Agali Hole Ibiyago lone ibulene hororu harangi mbira hondoa ho howa handa nabuleberami.
LUK 17:23 Marume tíhondo lalu, Amu kago handadaba, layaguabi, O kago handadaba, layaguabi o laragoni hale howa handa nabilimu.
LUK 17:24 Hari daba bialu wá ho banga bialu mendehayagi howa mendehayagi ho bolangua hagadagua Agali Hole Ibiyagonaga dumbiyalu ogoningiore hondoleberami.
LUK 17:25 Anigo ala ibu tandaga timbuni nalu wali agali áyu karume ibu handa tara halu erembira mulebira.
LUK 17:26 Agali Noa heneyangi wali agalime bialu hayadagua Agali Hole Ibiyago lone ibulene hororu harangi wali agalime bialu holebira.
LUK 17:27 Wali agali bibahende bu hearume hina nalubi iba nalubi wali agali dabu bigi bialu heaore horo ha para hayagola Noa ibu iba taluha anda piyagola ibali timbuniore ibalu bibahendeore ibame nai hene.
LUK 17:28 Ani buwa Lode heneyangi biyadagua bulebira. Wali agali bibahende bu hearume hina nalubi iba nalubi mbirale yolo bialubi mbirale yolo mule wialubi tomo hangalubi anda bialubi hene.
LUK 17:29 Ani bialu heagola horo mbirungi Lode ibu Sodomo wahalu tagira piyagola hariha howa ira hungu heba ege to̱le̱ ale ambuabi mini saloba kundibi alebi ibira howa bibahendeore do mundulo wa helene.
LUK 17:30 Agali Hole Ibiyago lone ha pani harangi ogonidaguaore bulebira.
LUK 17:31 Horo ogoningi agali anda dangini bedagome tamuha ibuninaga dabudabu mo anda pole daluene henge nawulebira. Ogonidagua dege agali mabuha mabu biabe bialu kagome ibuni andaga dai bulene henge nawulebira.
LUK 17:32 Lode one biyago mitangi bayuwaore bilimu.
LUK 17:33 Mbiralime ibuninaga holene ngago mo tene hayagua holene ogoni ereba holebira. Ai mbiralime ibuni holene hado wahayagua holene gahenge yu holebira.
LUK 17:34 I̱na tí langerogo mbiraga ogoniorengi kirali dagia mbiraoreni padaria mendego palelalu mendego yamulebira.
LUK 17:35 Wali kirame ladi ale mini widi dambialu mandagi bedaria mendego berelalu mendego yamulebira. [
LUK 17:36 Ogonidagua agali kirame mabuha biabe mandagi bialu karia mendego helalu mendego yamulebira,] lene.
LUK 17:37 Ani layagola ibunaga talima piaga biarume ibuhondo lalu, Anduane Homogo-o o lariruni agohayagi bulebirabe, lene. Yasuhanda tihondo ladai bialu lalu, Homenenaga tingini ngagoha ega bodo hariawe aleme nole íbu ngoai holebira, lene.
LUK 18:1 Ani lowa Yasuhanda ibunaga talima piaga biarume, Wahalu poro, nale Ngode Datagaliwabehondo bi laabo halu helo ti lawai halu bi yobage ogo lamini.
LUK 18:2 Ibugua lalu, Dindi mbiraha godi lagane agali mbira henego ibugua Ngode Datagaliwabehondo gi nahagabi agali hearu hondowa dara nahagabi hene.
LUK 18:3 Ani buwa dindi ogoniha dege wali dalo mbira berenegome godi lagane agali biago hearia puabo howa lalu, I̱nagaore bayuwa mo tiga bia halu i̱la hoba mu kagonaga i̱ biamogo bia habe, lalu la debodebo biaabo haga berene.
LUK 18:4 Ani laabo halu berea tambu godi lagane agali biagome hale halu mbira bia nabiagaore henego mani howa ibuni hangu lo manda bialu lalu, Ngode Datagaliwabehondo i̱ gi nahe wali agalihondobi dara nahaga kogo
LUK 18:5 wali dalo o bedagome horo bibahendengi lawanana biaabo halu i̱ mo lulu ya harago i̱na tiga handalu wali ogoninaga genda yu bedagoni mo tiga bulebero. Ani nabiruyagua wali ogonime i̱ koria iba ho wiaabo halu i̱ mo genda holebira, laya, lene.
LUK 18:6 Anduane Homogohanda laabo halu lalu, Godi lagane agali tigabi ndo ogonime biamogo bialu howa o layadagoni hale halu manda bilimu.
LUK 18:7 Anigo Ngode Datagaliwabehanda tigatiga hanuniore dabagane kagome ibunaga wali agalime horombe mbiragabi ibuhondo, Biamogo bia, laabo halu haragola biamogo nabulebirabe. Ibugua tendoreore biamogo bulebirabe.
LUK 18:8 I̱na tí langerogo ibugua hanuniore howa dabalu abaleore ti biamogo bulebira. Anigo Agali Hole Ibiyagome dindini lone ibuwa wali agali mini mbiraore wu karia handa hondolebirabe, lene.
LUK 18:9 Yasuhanda bi yobage lowa wali agali maru hearume tini bayale tigabi hangu biaga kama lalu wali agali maru karu ko biaga ka laga hearuhondo lalu,
LUK 18:10 Agali kira mendego Perisi agali mendego dagisi muni miaga agali libugua Anduane Homogonaga andaha Ngode Datagaliwabehondo bi lole pene.
LUK 18:11 Perisi agali biagome ibuni hanguore howa Ngode Datagaliwabehondo bi lalu, I̱ ko nabiaga mbirale kayubi wali kayubi nabiaga marume ko biagadagua nabiruligonaga Ngode Datagaliwabe í̠hondo turu halu ka̱i̱ laro. Dagisi muni miaga na̱i̱ kagome biagadagua i̱na nabiruligo í̠hondo ka̱i̱ laro.
LUK 18:12 I̱na Sarere mbiranaga horo kiru tomo nane haruli horo bibahendengi yolo merogo mialu pinigo í̠naga lowa wiruli, lalu Ngode Datagaliwabehondo bi lene.
LUK 18:13 Ibu ani lalu hea tambu dagisi muni miaga biagome amuraore howa Ngode Datagaliwabehondo bi lalu hearia hariha handa daga nahe ibuni galu kunini balu lalu, I̱ koorene kogo Ngode Datagaliwabe í̠na i̱hondo dara habe, laya, lene.
LUK 18:14 Yasuhanda lalu, I̱na tí langerogo libu andaga dai buwa Ngode Datagaliwabela mo mbiraore ho henego Perisi agali biago ndo dagisi muni miaga biago ibu hene. Ogoninaga mbiralime ibuni mo yaraga hayagua ibu mo dindiha helalu mbiralime ibuni mo dindiha hayagua ibu mo yaraga ho helolebira, lene.
LUK 18:15 Wali agali maru hearume Yasuhanda ti waneigini emene haguaneni gi wialu mo turu helo lowa taba yalu ibu hearia íbu ngoai hene. Ani biyagola ibunaga talima piaga biarume hondowa o biyagoni nabilo ti talini.
LUK 18:16 Ani biyago hondowa Yasuhanda, Waneigini i̱ kogoria ibidaba, lowa, Waneigini i̱ kogoria ibiragola naibilo ha pai nahalimu. Irane Ngode Datagaliwabehanda Handame Ho Kagoria waneigini urubi karunaga ka.
LUK 18:17 Tíhondo larogo manda bilimu. Waneiginime Ngode Datagaliwabehanda Handame Ho Kagoria hoa hagadagua hoa nahe karume nde anda napolebira, lene.
LUK 18:18 Yu wali agali hondo haga mbirame Yasuhondo lalu, Lawai haga bayale-o i̱na haabobo holene mo yule agi buabe, lene.
LUK 18:19 Ani layagola Yasuhanda ibuhondo ladai bialu lalu, Í̠na i̱ bayale larigo irane agibe. Mbirali bayale nahe Ngode Datagaliwabe ibuni hangu bayale ka.
LUK 18:20 Bi mana lowini ngago í̠na manda bu kegoni. Wali agali kayu nabibe. Wali agali homelo nababe. Mbirale page nabibe. Ke̱ howa dibade nahabe. Aba ai̱yala mo yo handa nabi laradagua hale halu bibe, lene.
LUK 18:21 Ani layagola agali biagome ladai bialu lalu, Bi o lariruni bibahende lo ngago i̱na igiri emeneoreni howa biai harugoni, lene.
LUK 18:22 Ani ladai biyagola hale howa Yasuhanda agali biagohondo lalu, Í̠na mbiraore hangu bibehe kego í̠naga mbirale wiruni bibahende yolo miai hole pu. Ani buwa muni ngirago yagibano karu mo meregola dahuliya andagani homogo holene í̠naga wulebira. Ani buwa i̱ porodagua talima ibabe, lene.
LUK 18:23 Bi ani layago hale howa agali biagome ibu homogo gibi henego dara halu tingini biagoni bibahende pirila paya bini.
LUK 18:24 Yasuhanda agali biago darabi howa tingini pirila paya bu heago hondowa lalu, Homogo karume Ngode Datagaliwabehanda Handame Ho Kagoria anda polene erekuibiore wulebira.
LUK 18:25 Nogo kameleme háli diriha anda polene erekuibi lowa homogo karume Ngode Datagaliwabehanda Handame Ho Kagoria anda polene erekuiore wulebira, lene.
LUK 18:26 Wali agali bu hearume Yasuhanda bi layago hale howa ibuhondo lalu, Ai imame pele mulene yu holebirabe, lene.
LUK 18:27 Ani layagola Yasuhanda ladai bialu lalu, Wali agalime bibe naheore ngago Ngode Datagaliwabehanda biai habeheore kagoni, lene.
LUK 18:28 Ani layagola Pidahanda lalu, Ai handa, Inanaga dindi andabi wahalu í̠ talima ibirimagoni, lene.
LUK 18:29 Ani layagola Yasuhanda tihondo lalu, E̱ anigo i̱na tíhondo heneneore larogo mbiralime dindi andabi onebi hamenebi aba ai̱yabi waneiginibi helai halu Ngode Datagaliwabehanda Handame Ho Kagoria hangu handaya ho yalu poragola
LUK 18:30 áyu dindini ka tambu timbuniore yu howa mani haabobo holene ngago yu holebira, lene.
LUK 18:31 Yasuhanda ibunaga talima piaga homberiali (12) biaru haru pu bagi howa tihondo lalu, Hale hadaba. Ina Yarusaleme pole poramagoni. Puwa mbirale bibahende Ngode Datagaliwabe mana latagi haga henerume Agali Hole Ibiyagonaga mbiwia halu gilibu wini ngago lola hai holebira.
LUK 18:32 Mbiralime Agali Hole Ibiyago Yu agali ndo agali tara karuhondo minu miragola tigua ibuhondo mege bialubi bi ko lalubi hamiaga tolo ba halubi bulebira.
LUK 18:33 Tigua ibu pu payini tibume balu tongolo milolebira. Ani biragola horo kiru howa tebonengi ibuni mo heya holebira, lalu lamini.
LUK 18:34 Ibunaga talima piaga biarume o layagoni irane ogo alenaga laya lalu manda nabiore hene. Ti ogoninaga bi galone manda nabilo mo do hene. Ani biyagola tigua Yasuhanda layagoni ogo ale layalo manda nabiore hene.
LUK 18:35 Yasu ibu Yarigo anda ibule biyagola agali mbira de kohego hariga leneha biruwa munibi mbiralebi, Ngidaba, laabo haga berene.
LUK 18:36 Ibugua wali agali dewa bi lama piayuago hale howa lalu, O laruago agidabe, lene.
LUK 18:37 Tigua ibu lamialu lalu, Nasareteali Yasu o bolangua halu poragoni, lene.
LUK 18:38 Ani layagola ibugua abale olowa lalu, Debidi Igini Yasu-o i̱ dara howa biamogo bia, lene.
LUK 18:39 Ani olayagola Yasu maha helalu wali agali bamba halu piyarume agali biago talialu lalu, Bi nale waha, lene. Ani layagola ibu donge howa dalimuore olalu, Debidi Igini-o i̱ dara howa biamogo bia, lalu laabo hene.
LUK 18:40 Ani olayagola hale howa Yasuhanda ema nabi hondo howa lalu, Agali de kohe amu bedago i̱ koria haru ibidaba, lene. Ani layagola tigua ibu haru halu howa de kohe biago Yasu heagoria ha para hayagola Yasuhanda lalu,
LUK 18:41 I̱na í̠hondo agi buliya hamelo kebe, lene. Ibugua ladai bialu lalu, Anduane-o i̱ lone de hondoa ko, lene.
LUK 18:42 Yasuhanda ibuhondo lalu, De handa. Í̠ni Ngode Datagaliwabehondo mini mbiraore wirigome í̠naga de mo ngala hayagoni, lene.
LUK 18:43 Ani layaore de kohe biago ibunaga de abaleore dabi halu de handabehe hayagola ibugua Ngode Datagaliwabehondo turu halu ka̱i̱ lalu Yasu piyadagua pene. Wali agali bu hearume o biyago hondowa ti bibahendeme Ngode Datagaliwabenaga mini yaraga halu hene.
LUK 19:1 Yasu ibu Yarigo anda pialu bolangua halu pole pene.
LUK 19:2 Ani biyagola ogoniha agali mbira henego mini Sagiasi ibu dagisi muni miaga karunaga haguane howa homogo gibiore hene.
LUK 19:3 Ibu Yasu ibayuago aidabe hondole biyaria ibu agali tumagiore howa wali agali dewa gengeda tago bu heagoha Yasu handabe naheore hene.
LUK 19:4 Wali agali piyagoha ibu ala mo bamba halu gerai puwa Yasu o ibiyagohayagi poragola hondole lowa ira mbira heago hondowa iraga ho berene.
LUK 19:5 Yasu ibu bereagoria íbu pialu howa Yasuhanda ira mane biagoha handa daga howa Sagiasihondo lalu, Sagiasi-o i̱ áyu í̠ andaga holeberogo abale dalialu íbu, lene.
LUK 19:6 Ani layagola Sagiasi abaleore dalipe halu turu taraore howa Yasu ibu andaga, Tomo nalu palibiya íbu, lene.
LUK 19:7 Ani layagola wali agali bu hearume bi gimigomo lalu, Agali ogoni ko ngubiore biaga biagonaga andaga nenege hole poragoni, lene.
LUK 19:8 Ibu andaga puwa Sagiasihanda heyu howa Anduane Homogohondo lalu, Anduane-o hale habe. I̱na mbirale bu ngoru hanuni talebu ki howa yagibano karu mulebero. Ani buwa mbiralinaga mulene wiadagua ndo dibaudu howa ngi larugonaga i̱na ibuhondo ma halu dewaore yadai bigi bulebero, lene.
LUK 19:9 Ani layagola Yasuhanda ibuhondo lalu, Í̠bi í̠ andagani hagarubi áyu pele mulene yu holeberami. Ogoninaga agali ogo ibu Abarahamanaga aguanene henene kagoni.
LUK 19:10 Agali Hole Ibiyagome wali agali pu ereba heneru haru dai bule tai bialu pele mule ibini, lene.
LUK 19:11 Wali agali bu hearume bi layago hale ho bereagola Yasuhanda la ho wiaabo halu bi yobage lalu hene. Ibu Yarusalemeni ha para ho heagola tigua manda bialu howa Ngode Datagaliwabenaga Handame Ho Holene ha pani holene kawareore wiyada manda bini.
LUK 19:12 Ani manda binigo Yasuhanda lalu, Agali haguane duniniore mbira henegome dindi kaundiaoreha kini mo helelo pialu ibuni andaga dai bulenenaga pongo bo wialu pene.
LUK 19:13 Ibu pu nabi howa ala ibugua ibunaga biabe bia haga pirali olowa tihondo muni kuni mbira kina pira kira (20) ale dege dege hangu hanguhondo ta halu lalu, I̱ pedoha o ngerogome biabe bialu mo tago halu halimu, lalu pene.
LUK 19:14 Ani piyagola ibunaga dindini wali agali hearume ibu handabe manga howa tigua lalu, Agali ogonime inanaga kini helo hame naledamago, lowa marume lamilo, Lamule pudaba, lene.
LUK 19:15 Ani biyagola howa agali biago kini mo helayagola dai bini. Ibu dai buwa ibunaga biabe bia haga biaruhondo muni miyagome ti biabe bialu mo tago au hayadabe hondole ibugua, I̱ kogoria ngoai hadaba, lene.
LUK 19:16 Ti ngoai howa agali mbiragome ibuwa lalu, Anduane-o í̠na muni kuni mbira ngirigome i̱na biabe bialu mo tago howa muni kuni pira o mo yidogo handa, lene.
LUK 19:17 Ani layagola ibugua ogonihondo lalu, Bayuwaore biridagoni í̠ agali biabe bia haga bayaleore ke. Í̠na emene biaru baya hangu hondo haridago i̱na í̠hondo tano timbuni pira hondo habelo nguliya, lene.
LUK 19:18 Agali mendegome ibuwa lalu, Anduane-o í̠na muni kuni mbira ngirigome i̱na biabe bialu mo tago howa muni kuni duria mo yidogo handa, lene.
LUK 19:19 Ani layagola ibugua ogonihondo lalu, I̱na tano timbuni duria ngago í̠na hondo habelo nguliya, lene.
LUK 19:20 Agali tebonegome ibuwa lalu, Anduane-o í̠naga muni kuni o yidogo agame huba bu do haru.
LUK 19:21 Irane í̠ agali kerahe harigoyane i̱ gi haru. Mbirale í̠naga ndogo í̠na mo yalu pialu tomo í̠ni hengene ndogo nariligo, lene.
LUK 19:22 Ani layagola ibugua agali biagohondo lalu, Í̠ agali ko mangahe kegoni. I̱na í̠ninaga bi laregome pani nabelo ngulebero. Í̠na manda birigola i̱ agali kerahe ka manda biridago mbirale i̱naga ndogo i̱na mo yalu pialu tomo i̱ni hengene ndogo naruligo manda birida.
LUK 19:23 Anidago i̱naga muni biago mbeniha wia nabiridago agibe. Mbeniha widele i̱ dai berogola dewa mo tago howa ngidele, lene.
LUK 19:24 Ani lowa ibugua heyu bu hearuhondo lalu, Ibugua muni kuni mbira amu yidagoni yamuwa biabe bia haga muni kuni pira yu kagohondo mo midaba, lene.
LUK 19:25 Ani layagola tigua ibuhondo lalu, Anduane-o ibugua kuni pira abale yayago yu ka, lene.
LUK 19:26 Ani layagola ibugua ladai bialu lalu, I̱na tíhondo larogo mbiralime mbirale yu kayagua yu kago nale mia tago dege holebira. Mbiralime mbirale nayi kayagua nde emeneore yidagoni yamulebira.
LUK 19:27 Anigo i̱ baba waitigi ho karu i̱ tinaga kini nahole layaru tígua i̱ kogoria haru ibuwa homelo bai halimu, laya lalu Yasuhanda lene.
LUK 19:28 Yasuhanda ani lalu bialu Yarusaleme pole ibugua ala ti mo bamba halu pene.
LUK 19:29 Ibu Bedabayabi Bedanibi kaware ibuwa Hari Olibe heagoria ha para howa ibugua ibunaga talima piaga kiralime bamba halu pelo
LUK 19:30 libuhondo, Ogodagua bule pudaba, lowa lalu, Dindi amugoniha anda bu kagoria anda pialu kabiria nogo dongi igini mbira ala mbirame naberene dariba karia de hondoleberabi. Dongi ogoni hadalu ogoria haru dai bilibu.
LUK 19:31 Mbiralime libuhondo lalu, Ogoni agi bule hadarabibe, layagua libugua ibuhondo ogodagua lalibu, Anduane Homogo kagome ogoriani biralu polene ngagola hadaraba, lalibu, lene.
LUK 19:32 Ani layagola libu hariga peadagua puabo halu hebiria Yasuhanda bulebira layadagua biai hearia hendene.
LUK 19:33 Talima piaga kira biago labome nogo dongi igini biago hadalu hebiria nogo dongi anduaneme libuhondo, Ogoni agi bulenaga hadarabibe, lene.
LUK 19:34 Libugua ladai bialu lalu, Anduane Homogo kagome biralu polene ngagola hadaraba, lene.
LUK 19:35 Ani lalu libugua nogo dongi igini hadalu haru halu Yasu hearia dai bini. Dai buwa libugua aga nogo dongi biagoni dunga halu Yasu nogo dongini iraga ho berelo biamogo bini.
LUK 19:36 Ani biyagola ibu nogo dongi biagoria biralu piyagola wali agalime tinaga aga harigani dunga haga bini.
LUK 19:37 Ti Yarusaleme anda polene kaware ngelowa Hari Olibe weagoria hariga dalipe holeneni Yasu talima piaga dewaore biaru o biyagoria howa tigua agalime nabiagane ale handayarunaga hongo howa awa lalu Ngode Datagaliwabenaga mini yaraga hama pene.
LUK 19:38 Tigua lalu, Handame Haga Kini Anduane Homogonaga minini howa ibirago Ngode Datagaliwabehanda ibu mo turu helo. Dahuliya andagani mo palia holenebi Ngode Datagaliwabenaga mini yaraga holenebi wilo larama, lama pene.
LUK 19:39 Ani layagola Perisi agali marume wali agali heagoniha howa Yasuhondo lalu, Lawai haga-o í̠naga talima piaga karuni bi naladababe la, lene.
LUK 19:40 Ani layagola Yasuhanda ladai bialu lalu, I̱na tíhondo larogo tigua bi nale hayagua ege to̱le̱ wiaru tinime bi hongo howa lolebira, lene.
LUK 19:41 Yasu ibu Yarusaleme kawareore pialu howa handaya howa dugu bialu
LUK 19:42 lalu, Mo palia holene ngogo mo yulenaga tí áyu ogonibi manda bua kamiyagua o haru. Ani nabirimigo ai manda bibe nahe kami.
LUK 19:43 Tí waitigime tí bolene horo ha para kago. Tí waitigime tí ho mabu biaiore howabi hariga hangai howabi bole holebira.
LUK 19:44 Tigua tíbi wali agali bibahende tí mandagi kamirubi bo wahai howa ege to̱le̱ pabe bu mabu bidamigobi anda bidamigobi bibahendeore gialo paya bulebira. Irane tígua Ngode Datagaliwabehanda tí pele mule ibiyangi manda nabi harimigoni, lene.
LUK 19:45 Ani lowa Yasu ibu Anduane Homogonaga andaha puwa agalime mbirale yolo bialu wu berearubi bo ba tagitagi bialu
LUK 19:46 tihondo lalu, Anduane Homogonaga mbugani Ngode Datagaliwabehanda lo ngago ogo, I̱naga anda kago Ngode Datagaliwabehondo bi lagane anda kagoni lolebira, lalu gilibu nga. Tígua nde pagebibi karu ha do hagane anda bu hinu helarimidagoni, lene.
LUK 19:47 Horo bibahendengi Yasu ibu Anduane Homogonaga andaha howa mana lawai halu haga hene. Ani lawai halu henego loma binigo mo miaga haguane hearumebi Mana lowinigo lawai haga hearumebi wali agali haru haga hearumebi Yasu homelo bole manda bialu hene.
LUK 19:48 Ani manda bu hearia wali agali bu hearume Yasuhanda mana lawai hayago bi mbira hale nahe holigo bayuwa hale ho ibaabo hayagola tigua Yasu bolene henge handa walia nahe hene.
LUK 20:1 Horo mbirungi Yasu ibu Anduane Homogonaga andaha howa wali agali berearuhondo bi mana lawai halu Bi Mana Debene lamialu howabi loma binigo mo miaga haguane hearubi Mana lowinigo lawai haga hearubi agali ala hene miniwi hearubi ti mandagi ibuwa tigua
LUK 20:2 Yasuhondo lalu, Mbirale uruni í̠na bialu kegoni bialu habelo hongo aiwa ngiyane berebe. Ogoni bibelonaga hongo ogoni aiwa ngiyabe. Ogome ngiya lalu ina hale holoma̱ya langi, lene.
LUK 20:3 Ani layagola Yasuhanda tihondo lalu, I̱na bi mbira tíhondo hale harogo
LUK 20:4 Yonehanda baboraya binigo bulene hongo miyago Ngode Datagaliwabeha tawebe be agaliha tawebe langidaba, lene.
LUK 20:5 Ani layagola agi ladai bimabe lowa tini dege dege laga laga bialu lalu, Iname Ngode Datagaliwabeha tawe larimayagua o Yonehanda mana langiyago yu tiga nabi harimidago agibe lolebira.
LUK 20:6 Iname agaliha tawe larimayagua wali agali o biru ngaru tigua Yone ibu Ngode Datagaliwabenaga mana latagi haga hayago lagago ina homelo to̱le̱me bolebira, lene.
LUK 20:7 Aniyagola tigua ladai bialu, Ina manda nabiore kama, lene.
LUK 20:8 Ani layagola Yasuhanda tihondo lalu, Anidago nde i̱na mbirale uruni berogo buliya hongo ngiyadago ogoha tawe nalangulebero, lene.
LUK 20:9 Ani lowa Yasuhanda bi yobage ogo wali agalihondo lamini. Agali mbirame pu mbira lini daga mini gerebi dewa hongo dugu dugu bini. Ani buwa ibugua agali maruhondo lalu, Mabu biabe bia halu hondo ha halimu, lalu ibuni dindi mbiraha pu wahalu pene.
LUK 20:10 Gerebi lini biago dolene tu hayagola mabu anduane biagome ibunaga garabaya biabe ale bia haga mbiralihondo, I̱naga mabu hondo ha haga karuhondo, Lini maru do ngidaba, lole pu, lene. Ani laya handala ibu lole piyagola hondo ha haga biarume garabaya biabe ale bia haga biago minu balu mbira nayiore dai bilene.
LUK 20:11 Ani biyagola mabu anduane biagome lone ibunaga garabaya biabe ale bia haga mendehondo, Pu, layagola hondo ha biarume mege taraore bialu minu balu mbira nayiore dai bilene.
LUK 20:12 Ani dege biyagola mabu anduane biagome ibunaga garabaya biabe ale bia haga tebonehondo, Pu, lene. Piyagola mabu hondo ha haga biarume ibu minu ba dege buwa tagirahayagi ba tagi hene.
LUK 20:13 Ani biyagola mabu anduane biagome, Ai nde agi buabe, lowa, i̱ni igini i̱na gubaliniore ho kogonigohondo, Pu, larogola tigua ibu mitangi bialu ibuhondo tigatiga bulebira manda bido, lene.
LUK 20:14 Ibu igini biago piyagola hondo ha haga biarume ibu hondowa tigua lagalaga bialu lalu, Mabu anduane biago iginiore ogonigo ai ibunaga paluni ina karulami̱ya homelo bama, lowa
LUK 20:15 tigua mabu tagirahayagi minu ba tagi howa homelo bene, lene. Ani lowa Yasuhanda tihondo lalu, Ani biyago mabu anduane biagome ibu mabu hondo ha haga biaruhondo agi bulebirabe.
LUK 20:16 Ibugua ibuwa hondo ha haga biaruni bibahende homelo bai howa mabu ogoni marume hondo ha helo mulebira, lene. Wali agali biru wiarume bi ogoni hale howa tigua lalu, Ani bibe naheore, lene.
LUK 20:17 Ani layagola Yasuhanda ti handaya howa lalu, Anidago Anduane Homogonaga mbugani bi ogo lo ngago irane agi lowa lo ngabe. Ege to̱le̱ mbira anda biagame galone nabibehedago lowa dabo wahenego ege to̱le̱ ogoniore mo timbuni duniniore ho heleda, lalu gilibu nga.
LUK 20:18 Ege to̱le̱ ogo ngagoriani wali agali pilo paga hararu to̱le̱ ogonime ti bibahendeore budu baga bu waholebira. Ani buwa ege to̱le̱ ogonime mbiralini podo dambi hayagua dambu mberegedo waholebira, lene.
LUK 20:19 Mana lowinigo lawai haga hearumebi loma binigo mo miaga haguane hearumebi Yasuhanda bi yobage ogoni layagonaga ti mitangi bialu layago manda buwa minule bialu hearia wali agali dewa bu hea handala gi howa wahene.
LUK 20:20 Tigua ibu minulene henge agiha ngabe hondole tai dege bialu hene. Tigua agali maru hearuhondo lalu, Muni nguluma̱ya agali tigatiga hetingi ho yalu puwa Yasuhanda mbira agiore ladai birabe hondole baya hangu hale ho howa Lomonaga haru haga hongoyi kagohondo minu mimi̱ya bi ogo ibuhondo hale hole pudaba, lene.
LUK 20:21 Ani laya handala agali ohe biarume puwa Yasuhondo lalu, Lawai haga-o iname manda bialu hemaria í̠na bi lariligobi mana lawai hariligobi tigatigaore larili. Ani buwa iname manda bialu hemaria í̠na agali mini timbuniwi hongohe karu hondowa gi nahe Ngode Datagaliwabehanda hame ledago mana wali agalihondo lawai hariligo tigatigaore larili.
LUK 20:22 Ai bi mbira langibelo inanaga Mana lowini ngago manda bialu Lomonaga Kini kagohondo iname dagisi muni mulumabe be namulumabe, lene.
LUK 20:23 Ani layagola Yasuhanda tinaga miniha yageyage palu howa layagoni manda buwa tihondo lalu,
LUK 20:24 Muni kuni mbira i̱ hondoliya walia hadaba, lene. Walia hayagola ibugua tihondo lalu, Muni kuni ogoriani dengui muguni ngagobi mini gili bu ngagobi ainagadabe, lene. Tigua ladai bialu, Lomonaga Kini kagonagada, lene.
LUK 20:25 Ani ladai biyagola Yasuhanda lalu, Anidago mbirale Lomonaga Kini kagonaga ngago nde ibunihondo milimu. Mbirale Ngode Datagaliwabe kagonaga ngago nde ibunihondo milimu, lene.
LUK 20:26 Ani layagola agali biarume bi o layagoria wali agali hearu wanakuini mo paga howa minabe naheyagola bi ladai biyago hale howa ema nabi ne ndogolo hinu hene.
LUK 20:27 Sadiusi agali hearume wali agali homeneru naheyulebira lagane maru hearume Yasu hearia ibuwa lalu,
LUK 20:28 Lawai haga-o Mosesehanda mana mbira ina buluma̱yanaga gili bu wini ngago ogo. Agali mbira waneigini nahe one dalo berelalu homayagua homayago hameneme wali dalo biago aribia howa waneigini homayagonaga hono wia holene nga, lo nga.
LUK 20:29 Anigo igiri karia hamenema howa wahenegome wali mbira dabu bu howa waneigini nahe heaore homene.
LUK 20:30 Homayagola ibula pagu bini biagome dabu bu aribia howa waneigini nahe heaore dege homene.
LUK 20:31 Ani biyagola tebonegome dabu buwa ani bima pu gimbu bialu igiri karia biarume wali o biago dege dabu buwa waneigini nahe heaore homai hene.
LUK 20:32 Ani bialu maniore wali biago homa maro bini.
LUK 20:33 Ani binigo igiri karia biaru bibahendeme wali o biago dege dabu biyago horo mbiru homeneru mo heya harangi wali biago agonaga one birulebirabe, lene.
LUK 20:34 Anidagua layagola Yasuhanda tihondo ladai bialu lalu, Wali agali áyu ka tagi dabu bialu kagonigo
LUK 20:35 wali agalibi mini tigabi howa homeneru mani holeneha hole mo heya harangi wali agali dabu bulene nawiore ndobe.
LUK 20:36 Ti dahuliyali nahomaga karu ale dege holebira. Ti homayagoria howa mo heya hayago ti Ngode Datagaliwabenaga waneigini holebira.
LUK 20:37 Ani buwa Mosesehanda baya hanguore walia howa lalu, Wali agali homeneru mo heya holene nga, lowini. Anduane Homogonaga mbugani ira mbira delo hungu biyagonaga bi te lo ngago Mosesehanda lalu, Anduane Homogo kago ibu Abarahama Aisaga Yagaba imarunaga Ngode Datagaliwabe kagoni, lenego gilibu nga.
LUK 20:38 Ani lenego ibu wali agali holenehe kagonaga Ngode Datagaliwabe kagoni homenenaga ndo kago ti bibahende homa nabi hai kagoni Ngode Datagaliwabehanda manda biaga ka, lene.
LUK 20:39 Ani ladai biyagola Mana lowinigo lawai haga maru hearume lalu, Lawai haga-o bayaleore ladai biri, lene.
LUK 20:40 Yasuhanda bi ani layago hale howa Sadiusi agali biarume bi maru hale holene gi howa la nabi wahene.
LUK 20:41 Yasuhanda tihondo lalu, Mbirali Dabo Helenego ibulebira lowinigo ibu Debidinaga aguanene holebira lagago agua hole biaruabe.
LUK 20:42 Ogoninaga nde Debidi ibunime Iba Gana mbugani lo ngago ogo, Anduane Homogohanda i̱naga Anduane Homogohondo lalu, Í̠naga waitigi karu í̠naga geni malia ho wilo i̱na mo malia heloliya í̠ i̱naga gi tigahayagi ogoria birabe, lene.
LUK 20:44 Debidihanda ibuhondo Anduane Homogo layagobi Mbirali Dabo Helenego ibulebira lowinigo ibu Debidinaga aguanene hayagobi mbiraore agua habehebe, lene.
LUK 20:45 Wali agali bu hearume ibugua bi layago hale ho heagola Yasuhanda ibunaga talima piaga biaruhondo lalu,
LUK 20:46 Mana lowinigo lawai haga karu de hondo halimu. Tigua aga lu karulalu ibaga bialu magedi hamani wali agalime ti hondowa tinaga mini yaraga helobi ngoai hagane andaruha puwa agali haguanerunaga biraganeni hangu birulebi wali agali dewa tomo mandagi nole ngoai haragola tomo anduane heba birulebi hame laga ka.
LUK 20:47 Ani buwa tigua wali dalo bedarunaga andaga mbirale ngaru mo kayu biaga howa wali agali mo hondo hole Ngode Datagaliwabehondo bime dege bi lu la ho wiaabo haga ka. Ani biragonaga pani timbuniore mia tago howa mulene nga, lalu lene.
LUK 21:1 Yasuhanda handa a̱i̱ na̱i̱ bigi bialu hearia agali homogo hearume Anduane Homogonaga andaha muni wiagani muni wialu hearia hendene.
LUK 21:2 Ani buwa wali dalo mbirame muni emeneore kuni kira toea mbira ale ibira halu hearia ibu de handa dege bini.
LUK 21:3 Ani hondowa ibugua lalu, I̱na tí langerogo marume muni wiyaru emene lowa wali dalo yagibano ogome muni dewaore wiya.
LUK 21:4 Marume homogoore howa maru tale buwa wiya. Wali dalo yagibano ogome mbira nayiore biruwa ibu tomo yolo bule yinigo bibahendeore wiai haya, lene.
LUK 21:5 Yasunaga talima piaga marume Anduane Homogonaga anda handaya howa lalu, Anda baya buruguleore ege to̱le̱ timbuni hongoheme bidagoda. Mo yári bia karubi Ngode Datagaliwabehondo turu halu bame minida, lene. Ani layagola Yasuhanda lalu,
LUK 21:6 Mbirale uru tígua hendedamigo ege to̱le̱ wia gimbu gimbu bima iraga karuni horo mbira ibulebirago ibirangi homane mbiraore winidagoria ngeladai nabi bibahendeore gialo ibira ibira biai holebira, lene.
LUK 21:7 Ibunaga talima piaga biarume lalu, Lawai haga-o ogoni angi bulebiragonaga ina langibe. Iname ala agi birane hondowa henge karulolene horo ha para hayada lolomabe, lene.
LUK 21:8 Yasuhanda ladai bialu lalu, Marume tí mo hondo holigo mamage holene nga. Agali dewaoreme i̱naga mini lalu, Mbirali Dabo Helenego ibulebira lowinigo i̱ íbu kogoni, lalubi, Horo ha para haya, lalubi ibulebira. O laragoni hale nahalimu.
LUK 21:9 Wai timbuni tara tara bira, laragolabi, Dindi mbiraoreni talebu ki buwa mo ko hara, laragolabi hale howa gi nahalimu. Mbirale uruni ala ani bia bulebirago ani laragome horo hamaro bulene kawareore nga lalu ndo larago gi nahalimu, lene.
LUK 21:10 Ibugua laabo halu lalu, Dindi mende mendela wai bia a̱i̱ na̱i̱ bialu gabumane tara tarala wai bia a̱i̱ na̱i̱ bialu holebira.
LUK 21:11 Dumbirumbi emene ndoore mo ko howa bialubi hina gari timbuniore pialubi warago timbuni ba gimbu bialubi dindi bibahendeha bulebira. Nahendene alebi mo gi timbuni holene tara tarabi hariha howa ibulebira.
LUK 21:12 Uruni nabi howa marume tí minalu mo tandaga holebira. Ani buwa godi lole ngoai hagane andaruha minu yu puwa garabaya andaha helolebira. Ani buwa i̱naga mini yu tiga bu kamigo kini karubi gabumane haru haga karubi karia tí haru pu helolebira.
LUK 21:13 Ogoningi Bi Mana Debene lamilimulonaga henge wulebira.
LUK 21:14 Minu yalu poragola miniha mbira agi ladai buledabe lolenaga ala mini dege dindi ho nahalimu.
LUK 21:15 Irane i̱na tínaga ne hambuha howa bi lolenebi miniha manda bulenebi ngerogola tí waitigi karume bi ogoni mo wahabi hale nahabi nabulebira.
LUK 21:16 Tínaga aba ai̱yalamebi hamenemebi damenemebi nenegemebi agali maruhondo tí minu mialu tí maru homelo bolebira.
LUK 21:17 Tígua i̱naga mini yu tiga bu kamigo hondowa wali agali bibahendeme tí handa tara holebira.
LUK 21:18 Anigo tínaga haguaneni mandari kamigo homane mbiraoreorebi tongolo wa naholebira.
LUK 21:19 Tí hongo howa ema nabi ho ununu lowa tíni pele mialu holeberami, lene.
LUK 21:20 Tígua handalu kamira ami agali dewaoreme Yarusaleme ho mabu bu karia hondowa mo ko holene kaware wiarua manda bilimu.
LUK 21:21 Ani buwa Yudiani karume hari hombene ngaruha hondo yalu gerai polene wulebira. Yarusaleme ogoriani padarume ibida piai holene wulebira. Ani buwa dindi udura amura ale padarume Yarusaleme ogoniha anda ibulene nawulebira.
LUK 21:22 Ogonigo horo uruni Pani Nolene Hororu wiragola Anduane Homogonaga mbugani bi lo ngadagua lola holebira.
LUK 21:23 Horo uruningi wali gali bere bedarubi gali andu mialu bedarubi dara timbuniore holene nga. Ani buwa dindi ogoria mo ko holene timbuniore ibira halu Ngode Datagaliwabehanda wali agali uruni pani nelo wia holebira.
LUK 21:24 Ani buwa wali agali maru wai bulene ayu tibume bo wahai halu wali agali maru garabaya wali agali haru poradagua bialu dindi tara tararu kaundiaoreha haru polebira. Ani buwa Ngode Datagaliwabe manda nabi hope hene karume Yarusaleme karulo halu Ngode Datagaliwabehanda horo hairi holene pongo bo winingi hairi helo helolebira, lene.
LUK 21:25 Ani lowa Yasuhanda laabo halu lalu, Ninibi egenibi yapibiyanibi manane tara nahendene ale bulebira. Ani biragola dindini howa iba solowara timbuniore bedagome ta̱la̱ amu nana bima u lama ibiragola wali agali bibahende dindi tara tarani karume mogo taraore lowa gi timbuni holebira.
LUK 21:26 Hari daligaha hongo haga karu tarame mo ema bia haragola wali agalime hondowa dindi bibahendeha agua bulubadabe lowa gi halu mogo timbuniore lowa odo pebe bulebira.
LUK 21:27 Ani biragola Agali Hole Ibiyago hongo timbuniore holenebi wá taraore holenebi heba hari beralibaha ha pani halu ibulebira.
LUK 21:28 Mbirale uruni tongo hinalu biragola tígua heyalu handa daga ho halimu. Irane tínaga pele mulene abale ha para haragoni, lene.
LUK 21:29 Ani lowa Yasuhanda bi yobage ogo tihondo lamialu lalu, Poge kagobi ira maru karubi manda bilimu.
LUK 21:30 Yuni gahenge mabirago hondowa ni poboyogobi dolene tu kawareda manda beramili.
LUK 21:31 Ogonidagua dege tígua mbirale uruni bigi biragola handalu kamiria Ngode Datagaliwabenaga Handame Ho Holene áyu dege ibulebira manda bilimu.
LUK 21:32 Ogoninaga tí manda biaabo halimulo wali agali áyu kamiru nahome ogobi dege dege kamiore mbirale uruni bibahende bulebirago laro.
LUK 21:33 Hari daligabi dindibi ereba hai holebira. I̱naga bi mana dege ereba nahe wiaabo holebira, lene.
LUK 21:34 Mamage howa de hondo holene nga. Tomo timbuni dawa naabo halubi iba na gimbu biaabo halubi dindini mbirale ngaru mo te te hangu bialubi nahalimu. Ani bialu harimiyagua Horo ogoni tagira ibirangi gono ngagoha poragola dagadagua ti abale doligo. Horo ogoni wali agali dindi bibahendeha kagoria tagira ibulebira.
LUK 21:36 Urunidagua biragola horo bibahendengi tígua bayuwa hongo ho holebi Agali Hole Ibiyago deni holebi mamage howa Ngode Datagaliwabehondo bi laabo halu holene nga, lene.
LUK 21:37 Horo uruni bibahendeni Yasu ibu Anduane Homogonaga andaha mana lawai halu biraabo howa alendo haya handala Hari Olibe weagoria puwa mbiraga ogoniha palima piaga hene.
LUK 21:38 Wali agali bibahende hearume horo bibahendengi egerebagiore Yasuhanda bi mana lawai hayago hale hole Anduane Homogonaga andaha ibaabo haga hene.
LUK 22:1 Mberedi Yidi Nahe Hirinigo Horonagabi Bolangua Halu Penegonaga Horonagabi kaware wini.
LUK 22:2 Ogoningi loma binigo mo miaga haguane hearumebi Mana lowinigo lawai haga hearumebi wali agali dewa bu heagola gi howa tigua ohowa Yasu bo donge hole henge tai bialu hene.
LUK 22:3 Ani biyagola Yasunaga talima piaga hombeanego Yudasa ibu mini mende Isagariodo laga henego ibuha dama Heyolabe anda pene.
LUK 22:4 Ani piyagola Yudasahanda loma binigo mo miaga haguane hearubi Anduane Homogonaga anda mamage hagarunaga haru haga hearubi hearia puwa ti baba bi lalu, I̱na Yasu aguaore berogola minalimu, lowa ndelalu hene.
LUK 22:5 Ani layagola agali biarume turu taraore howa tigua, Muni nguluma̱ya, layagome Yudasanaga mini bamini.
LUK 22:6 Ani buwa ndelo waho ngelalu puwa Yudasahanda wali agalime nahendedaha tihondo Yasu minu mule lowa henge aguaore ngabe hondole tai bialu hene.
LUK 22:7 Mberedi Yidi Nahe Hirinigo Horonaga uruni mbirangi Bolangua Halu Penegonaga nogo sibi iginiru bolene tu hene.
LUK 22:8 Ani hayagola Yasuhanda Pida Yonelahondo lalu, Bolangua Halu Penego Horonaga tomo ina noloma̱ya dawa manda manda bu wule pudaba, lene.
LUK 22:9 Ani layagola libugua ladai bialu lalu, Agoha dawa wule pudaba laribe, lene.
LUK 22:10 Ibugua lalu, Yarusalemeha anda pialu kabiria agali mbira iba be payani yalu pialu karia lola holeberabigo agali ogoni ibu anda poradagua anda pilibu.
LUK 22:11 Anda pu howa anda ogoni anduanehondo agua lalibu, Lawai haga kagome í̠hondo lalu, I̱naga talima piaga karubi i̱bi iname Bolangua Halu Penego Horonaga tomo noloma̱ya anda hobane mbira agoha ngabe, laya lalibu.
LUK 22:12 Ani larabigola ibugua anda hobane mbira daligaha ngago dagia manda bu winigo walia holebirago ogoriani tomo dawa manda manda bu wilibu, lene.
LUK 22:13 Ani laya handala libu pialu hebiria mbirale bibahendeore Yasuhanda agua bulebira layadaguaore bu wiai hearia hondowa libugua Bolangua Halu Penegonaga tomo nole dawa manda manda bu wini.
LUK 22:14 Tomo nolene tu hayagola Yasu ibu biragane dagiani ibunaga abosolo agali biaru heba tomo nole berene.
LUK 22:15 Ani biruwa Yasuhanda tihondo lalu, I̱ tandaga nane howa tí heba Bolangua Halu Penego Horonaga tomo ogo ala nole hame timbuni lalu haru.
LUK 22:16 Ogoninaga tí langerogo i̱na áyu narogonidagua lone nane Ngode Datagaliwabehanda Handame Ho Kagoriani howa ogoninaga galone lola harangi nolebero, lene.
LUK 22:17 Ani lowa Yasuhanda iba be yamuwa Ngode Datagaliwabehondo turu halu ka̱i̱ lowa lalu, Ogo yamuwa tínime no gombedaga bidaba.
LUK 22:18 I̱na tí langerogo waini iba áyu o narongi howa nane kone Ngode Datagaliwabehanda Handame Ho Kagola howa nolebero, lene.
LUK 22:19 Ani lowa ibugua mberedi mbira yamuwa Ngode Datagaliwabehondo turu halu ka̱i̱ lowa gaibu baga buwa tihondo mialu howa lalu, I̱naga tingini ogonigo tí pele ngialu ngerogo. Ogoni nalu howa i̱ mitangi bialu nalimu.
LUK 22:20 Mberedi ogoni nai howa ogonidagua dege ibugua iba be yamialu howa lalu, Be ogoniha bedago Ngode Datagaliwabehanda habo nalolene bi gahenge lowinigo tene i̱naga daramaha nga. I̱naga darama ogoni tínaga pela harogoni.
LUK 22:21 Anigo mbirali i̱ minilo ndelalu walia holebirago i̱ bedogoria tomo nalu bedagonigo de handadaba.
LUK 22:22 Ngode Datagaliwabehanda manda bu winidagua Agali Hole Ibiyago homolebira. Ibu minilo ndelalu walia haragome ibunaga mo ko holene timbu gibiore wulebirago dara holene nga, lene.
LUK 22:23 Ani layagola tini dege dege la a̱i̱ na̱i̱ bialu lalu, O bulebira layagoni a bedagome bulebira layabe, lalu berene.
LUK 22:24 Talima piaga biarume lai lalu howa, Ina bolangua hole haruago aibe, lalu hene.
LUK 22:25 Ani lalu heagola Yasuhanda tihondo lalu, Wali agali tara taranaga kini karume hongo yu howa handame haga ka. Ani buwa wali agali haru haga karu ti mini Wali Agalinaga Biamogo Biagaru laga ka.
LUK 22:26 Anigo tígua ogonidagua holene nawiore. Tí kamigoni mbiralime bolangua ho kagome mo heyogone ale ho holene nga. Ani buwa haru haga kagome biabe bia hagane ale ho dai bulene nga.
LUK 22:27 Timbuni kago aibe. Mbirali birape howa tomo nalu bedagodabe be ibu tomo nelo mo yu tono bialu kagodabe. Mbirali birape howa tomo nalu bedago ibuore timbuni kagoda. Anigo i̱ tí baba mandagi howa biabe bia hagame kagodagua kogoni.
LUK 22:28 I̱ tandaga nalu harungi tí i̱ heba haabo harimigoni.
LUK 22:29 I̱ Abahanda handame ho holenenaga hongo i̱hondo ngiyagobi i̱na nde tíhondo ogonidagua dege ngulebero.
LUK 22:30 Ani buwa i̱na Handame Ho Holene ngagoria howa i̱naga dagiani tígua tomo ibabi nalu biruleberami. Ani buwa tígua haru hagane biraganeni biruwa Isaraele hameigini homberiaru (12) haru holeberami, lene.
LUK 22:31 Saimono-o Saimono-o í̠na hale habe. Tomo hangaga agalime ladi ale mini widi bogabidagola lini aeanela mo talebu ki biagadagua dama Heyolabeme tí bibahende ko bayalela talebu ki helo Ngode Datagaliwabehanda ibuhondo henge mini.
LUK 22:32 Ani biragola í̠na mini mbiraore wu kego hado wa nahabelonaga i̱na Ngode Datagaliwabehondo í̠naga bi la halu ko. Ani buwa i̱ kogoria daibu howa í̠na talima piaga maru karu mo hongoore habe, lene.
LUK 22:33 Ani layagola Pidahanda ladai bialu lalu, Anduane Homogo-o í̠ garabaya andaha poredagua pialu homaredaguabi mandagi homabiyaore manda bu kogoni, lene.
LUK 22:34 Ani layagola Yasuhanda lalu, Pida-o í̠hondo langerogo áyu mbiraga ega gogologome bi naledaha halu teboore í̠na i̱ manda nabido lolebere, lene.
LUK 22:35 Ani lowa Yasuhanda ibunaga talima piaga biaruhondo lalu, I̱na tí bi mana lawai hama pilimulo tígua muni pauyibi nubi ge subi nayi pilimu larungi mbirale mbira buru palu harimibe, lene. Tigua ladai bialu, Naburu paleore harima, lene.
LUK 22:36 Yasuhanda lalu, Anidago áyu ogoni mbiralime muni pauyibi nubi yidago yalu polene nga. Ani buwa mbiralime wai bulene ayu tibu nayi kayagua ibuninaga dagare tingiliya bidagome yolo muwa mbira yolo bulene nga.
LUK 22:37 Ogoninaga i̱na tíhondo langerogo Anduane Homogonaga mbugani lo ngago ogo, Ko biagame pani nalu homagadagua ibuguabi homolebira, lalu gilibu ngadagua i̱ mitangi bialu lola holeneore nga. Irane i̱ mitangi bialu bi gilibu ngadagua áyu lola haragoni, lene.
LUK 22:38 Ani layagola ibunaga talima piaga biarume lalu, Anduane Homogo-o iname wai bulene ayu tibu kira yidamago handarene, lene. Ibugua lalu, Ogoni karulape, lene.
LUK 22:39 Yasu ibu Yarusalemeni howa abale piagadagua pialu Hari Olibe weagoha pialu howa ibunaga talima piaga biaru ibu heba pene.
LUK 22:40 Ti hari weagoria anda pu howa Yasuhanda ibunaga talima piaga biaruhondo lalu, Ko ngagome tí ko mo bia holigo Ngode Datagaliwabehondo bi lalu halimu, lene.
LUK 22:41 Ani lalu Yasu ibu ti helalu ibuni hangu amura mbiraha ege to̱le̱ agima ba amu haralidagua puwa ge duli hanga ho biruwa ibugua Ngode Datagaliwabela bi lalu,
LUK 22:42 Aba-o tandaga nolene beha ngago nanoliya mo yalu polene ngayagua mo yalu pobe. I̱ hame ledodagua ndo í̠ hame lededagua hangu bibe, lene.
LUK 22:43 Ani lalu berearia dahuliya andaga howa dahuliyali mbirame ha pani howa ibu mo hongo hene.
LUK 22:44 Ibu mini burugu lowa tibalua howa bede labeheore howa donge halu hongo howa Ngode Datagaliwabela bi layagola tingini poboyogo bialu pingitigi darama ale dindini bondolope hene.
LUK 22:45 Ibu Ngode Datagaliwabela bi lai halu talima piaga biaru birayagoria dai bialu hearia tini dara timbuniore hayagome palia hondo hearia hendene.
LUK 22:46 Hondowa ibugua tihondo lalu, Agi bialu padamibe. Ko ngagome tí ko mo bia holigo heyuwa Ngode Datagaliwabehondo bi lalu hadaba, lene.
LUK 22:47 Yasuhanda ibunaga talima piaga biaru heba bi lalu hearia ibunaga talima piaga hombeane Yudasa henegome agali dewa haru halu ibini. Yudasa ibu abale ibuwa Yasunaga peni nu̱nu̱ lole ibini.
LUK 22:48 Ani ibiyagola Yasuhanda Yudasahondo lalu, Agali Hole Ibiyago minule beramidago ani nu̱nu̱ lowa minule beramibe, lene.
LUK 22:49 Ibunaga talima piaga ibu heba hayarume ogo aleore bulubada manda buwa Yasuhondo lalu, Anduane Homogo-o ina wai bulene ayu tibu yidamagome agi bulumabe, lene.
LUK 22:50 Ani lowa ti mbiragome loma binigo mo miaga haguane timbuni heagonaga garabaya biabe ale bia haga heagonaga hale tigago bagadape hene.
LUK 22:51 Ani biyagola Yasuhanda lalu, Ogonidagua nabulene, lowa ibugua agali biagonaga hale biago ela howa lone mo heladai bini.
LUK 22:52 Ani buwa Yasuhanda loma binigo mo miaga haguanerubi Anduane Homogonaga anda mamage hagarunaga haru hagarubi agali ala hene miniwirubi ibu minule íbu hearuhondo lalu, Tígua wai bulene ayu tibu kangoru yalu ibirimidago pageali minaramilidagua minule ibirimibe.
LUK 22:53 I̱ horo bibahende tí heba Anduane Homogonaga andaha haabo harungi mina nabirimi. Anigo áyu ogoni aruma holenenaga hongome bolangua ho kagoni howa bialu harimida, lene.
LUK 22:54 Tigua Yasu loma binigo mo miaga haguane timbuninaga andaha minu yalu piyagola Pida ibu amuraore howa mayu̱lo handaga bima pene.
LUK 22:55 Ani buwa pabe payanda heago tamuha anda puwa Pida ibu ira deagoria maru bira mabu bu bereagoria mandagi berene.
LUK 22:56 Ani bereago hondowa biabe bia haga wandari mbirame Pida handa kia biaabo howa lalu, Agali o bedagobi Yasula mandagi haga, lene.
LUK 22:57 Ani layagola Pidahanda lalu, Wali i̱ ndo. I̱ mandabi heba nabido hendeni, lene.
LUK 22:58 Ani layagola emeneore howa agali mbira heagome Pida manda buwa lalu, Í̠bi ibu heba hariligoni ndobe, lene. Ani layagola Pidahanda lalu, Agali i̱ ndoya hendeni, lene.
LUK 22:59 Ani layagola emene howa agali mbira heagome hongo howa lalu, Agali ogoni Galilialioredago Yasulaore haga, lene.
LUK 22:60 Ani layagola Pidahanda lalu, Agali o laregoni agi larebe i̱ tobaho ko hendeni, lene. Ogonidagua lalu heaore ega gogologome bi lene.
LUK 22:61 Bi layagola Anduane Homogohanda Pida handa kia biyagola Pida ibugua Anduane Homogohanda, Áyu mbiraga ega gogologome bi naledaha halu teboore í̠na i̱ manda nabido lolebere, ala layago mitangi bu dai bini.
LUK 22:62 Ani mitangi buwa Pida ibu tagira pialu dugu emene ndoore yi lalu dugu bialu hene.
LUK 22:63 Agali maru Yasu mamage ho hayarume mege taraore bialu hale to̱a̱ baga bini.
LUK 22:64 Ani buwa ibunaga de agame yi howa ibuhondo lalu, Í̠na manda biade halu í̠ bayagoni ogome la, lene.
LUK 22:65 Ani lowa tigua ibuhondo bi ko dewa laga bini.
LUK 22:66 Egerebagi ni tagira ibiyagola agali ala hene miniwi hearubi loma binigo mo miaga haguane hearubi Mana lowinigo lawai haga hearubi mandagi mo mogo buwa ti Ganisolo agali heagoria godi lelo Yasu haru ibini.
LUK 22:67 Haru ibuwa tigua Yasuhondo lalu, Mbirali Dabo Helenego ibulebira lowinigo í̠ ibu keyagua í̠na langi, lene. Ibugua ladai bialu lalu, I̱na tí langiruyagua tígua i̱hondo mini mbiraore nawuleberami.
LUK 22:68 Ani lalu i̱na tíhondo bi maru hale haruyaguabi ladai nabuleberami.
LUK 22:69 Tu áyu ogoni howa be lirayagi Agali Hole Ibiyago ibu Ngode Datagaliwabe Hongo Haiheore Kagonaga gi tigahayagi birulebira, lene.
LUK 22:70 Ani layagola ti bibahendeme ibuhondo lalu, Ngode Datagaliwabe Iginiore í̠ kegonibe, lene. Yasuhanda ladai bialu tihondo lalu, Tígua ani larimigoni, lene.
LUK 22:71 Ani layagola tigua lalu, Lamogo bia holene mbira hame naleore kamagoni. Inaneme ibuni layagoni hale hai ho kama, lene.
LUK 23:1 Bibahende bu hearunime heyai howa Yasu Pailate hearia haru pene.
LUK 23:2 Tigua haru puwa lalu, Yu wali agalime nabiagane wimaru agali ogo ibugua mo bia halu hearia handa walia harima. Ani bialu ibugua lalu, Lomonaga Kinihondo muni dagisi mulene nawi, lalu, ibu Mbirali Dabo Helenego ibulebira lowinigo handame haga kini ogoni i̱ kogoni, laya, lene.
LUK 23:3 Tigua ani layagola Pailatehanda Yasuhondo lalu, Yu wali agalinaga handame haga kini í̠ kebe, lene. Ani layagola Yasuhanda ladai bialu lalu, Í̠na o laregoni, lene.
LUK 23:4 Ani layagola Pailatehanda loma binigo mo miaga haguane hearuhondobi wali agali dewa bu hearuhondobi, Agali ogome kagua biya lolene irane nawida, lene.
LUK 23:5 Ani layagola tigua hongoore howa, Agali ogonime mana lawai haragonaga Yudiani wali agali bibahende karu mo gungu ale bia haga ka. Pigane ibu Galilini bialu henego áyu ogoriani ani bule ibiragoni, lene.
LUK 23:6 Tigua bi layago hale howa Pailatehanda lalu, Agali ogoni ibu Galilialibe, lene.
LUK 23:7 Ibugua manda bu handalu hearia Yasu Herodohanda handame ho kagoha howayane Herodo áyure dege Yarusaleme íbu hayuagola, Yasu Herodo karia haru pudaba, lene.
LUK 23:8 Herodo ibu bambaore howa Yasu hondoa ho haabo henego haru ibiyago hondowa ibu turu timbuniore hene. Yasuhanda agalime nabiagane ale biragola de hondole Herodo ibu hamelo hene.
LUK 23:9 Ani buwa Herodohanda Yasuhondo bi maru hale hayagola Yasuhanda mbira ladai nabiore hene.
LUK 23:10 Loma binigo mo miaga haguane hearumebi Mana lowinigo lawai haga hearumebi íbu ha para halu hongo howa lalu, Agali ogonime ko gibiore biya, lalu hene.
LUK 23:11 Ani layagola Herodobi ibunaga wai biaga ami agali hearubi tigua Yasu mege taraore bialu handabe manga howa aga bayaleore mbira mo karula howa, Pailate karia haru dai bidaba, lene.
LUK 23:12 Pailate Herodola waitigi ho haga haga biaga henego horo ogoningiore nenege hinini.
LUK 23:13 Pailatehanda loma binigo mo miaga haguane hearubi wali agali haru haga hearubi wali agali hearubi, Mandagi ngoai hadaba, lowa
LUK 23:14 tihondo lalu, Tígua agali ogo i̱ hewaria haru ibuwa lalu, Ibugua wali agali mo hondo halu kago, larimigo i̱na tínaga wanakuini helowa ibugua kagua mbira agi biyadabe hondole ibuhondo hale halu tai biaabo haru. Ani buwa ibugua kagua ogo biya larimiru mbira handa walia nahe ko.
LUK 23:15 Herodohandabi handa walia nahe dege howa ina hemaria dai bilayagoni. Anidago agali ogome ko mbira nabidago ibu homelo nababeheda.
LUK 23:16 I̱na agali maruhondo, Ibu tibume bowa pelalimu, lolebero, lene. [
LUK 23:17 Bolangua Halu Penegonaga Horo harangi agali mbira garabaya heago wali agali hearume, Gola, laragola Pailatehanda golaga hene.]
LUK 23:18 Pailatehanda ani layagola wali agali bibahendeme hongo howa dalimu lalu, Agali ogoni homelo balu Barabasa inane kamaria golalu dai bila, lene.
LUK 23:19 Barabasahanda Yarusalemeni howa mo gungu bia hayagolabi agali mbira bo tongolo milayagolabi garabaya andaha garabaya bu helene.
LUK 23:20 Ani layagola Pailatehanda Yasu, Wahalu pu, loa howa lone wali agali bu hearuhondo bi layagola
LUK 23:21 tigua hongo howa dalimu ladai bialu lalu, Ibu ira bangani ba para ha. Ibu ira bangani ba para ha, lene.
LUK 23:22 Ani layagola Pailatehanda tihondo halu tebone lalu, Ibugua kagua agi biyabe. Ibu homelo bolenaga kagua biyago i̱ handa walia nahe ko. Ogoninaga i̱na agali maruhondo, Ibu tibume bowa pelalimu laro, lene.
LUK 23:23 Ani laya tiraga tigua, Ira bangani ba para habe, lalu bi hongo howa layagome Pailatenaga bi lo dambi hene.
LUK 23:24 Ani layagola Pailatehanda lalu, Tíni hame lowa bule harimidadagua bilimu, lene.
LUK 23:25 Ani lowa agali mbirame Lomo gabumane baba wai bialu agali mbira bo wahayagola garabaya andaha helenego agali ogoni tigua golelo hame layago Pailate ibugua golope hene. Ani buwa ibugua agali hearuhondo lalu, Tíni hame ledamidagua bilimu, lalu Yasu tihondo mini.
LUK 23:26 Ami agali hearume Yasu minu yalu pialu hearia Sairiniali mbira mini Saimono Yarusalemeha anda ibalu hearia harigani lola hene. Lola hayagola tigua ibu minuwa Yasunaga ira banga ibunaga payani mo ya hayagola ibugua yalu Yasu piyadagua mama pene.
LUK 23:27 Wali agali dewaore Yasu piyadagua pialu howa wali marume Yasunaga dugu yiyi lama ibiyagola
LUK 23:28 Yasu ibu handa dai buwa lalu, Yarusaleme waliru-o i̱naga dugu bulemini tíninagabi tí waneigininagabi dugu bilimu, lene.
LUK 23:29 Ani lowa ibugua lalu, Horo maru tagira ibirangi wali agali karume agua lolebira, Wali waneigini nahe bedarubi wali gali taba nahene bedarubi wali gali andu nami bedarubi ti turu taraore ho birulebira, lalu lolebira.
LUK 23:30 Ogoni ibirangi wali agalime gi howa hari wedaruhondo, Ina bu dambi hadaba, lalu dindi hombene ngaruhondo, Ina ge hela, lalu holebira.
LUK 23:31 Ira kago bayale mindibi gumbile kaore mbirale urunibi biyagua ira ogo gau laragola agua bulebirabe, lalu Yasuhanda lene.
LUK 23:32 Agali kira mana ko biaga henego kirabali Yasu heba mandagi homelo bole haru pene.
LUK 23:33 Ti dindi mbira mini Haguane Kuni laga winigoria anda puwa tigua Yasu ira bangani ba para howa agali ko biaga biago labo mendego gi tigahayagi mendego gi lehayagi lowa ti ira banga tebirani ba para hai hene.
LUK 23:34 Ani biyagola Yasuhanda lalu, Aba-o tigua ogo ale berama nale bupe harago tinaga ko biragoni domo wahabe, lene. Ani layagola tigua ibunaga aga ai ibu harabe hondole tadu bialu berene.
LUK 23:35 Wali agali bu hearume handaya ho hearia Yu wali agali haru haga hearume Yasu mege bialu lalu, Ibu Mbirali Dabo Helenego ibulebira lowinigo Ngode Datagaliwabehanda dabene ibu kayagua ibugua wali agali maru pele miralidagua ibuni pele mila, lene.
LUK 23:36 Ami agali biarumebi mege dege bialu ibu wiagoria ha para howa waini iba kaubi nelo yade halu
LUK 23:37 lalu, Í̠ Yu wali agalinaga handame haga kini keyagua í̠nime í̠ni pele merene, lene.
LUK 23:38 Ira banga daligani bi ogo gilibu wini. Yu wali agalinaga Handame Haga Kini ogoni ibu, gili bini.
LUK 23:39 Agali mana pugualu ko biaga ira bangani ba para hayago mendegome Yasu mege bialu lalu, Mbirali Dabo Helenego ibulebira lowinigo í̠ ndobe. Í̠ni pele mialu iyabi pele ngerene, lene.
LUK 23:40 Ani layagola mendegome o layago hale howa ibu talialu lalu, Í̠na Ngode Datagaliwabehondo mogo nale kebe. Ibu tandaga naradagua dege í̠bi naregoni.
LUK 23:41 Iyame kagua biribagonaga pani nolene winidaguaore narabago o tigabida. Agali ogome pani narago ibugua ko mbiraore nabiore howa naragoni, lene.
LUK 23:42 Ani lowa ibugua Yasuhondo lalu, Yasu-o í̠ Handame Haga Kini howa eberengi i̱ mitangi bibe, lene.
LUK 23:43 Ani layagola Yasuhanda ibuhondo lalu, I̱na buleberoore lalu langerogoni áyu dahuliya andaga iya haru pu holeberaba laro, lene.
LUK 23:44 Horombe hanuniore hayagola ni da nabi hundialu dindi ogoniha wiagoni bibahendeore aruma haho wiane alendo ni gai layagola ni dadai bini.
LUK 23:45 Ani biyagola Anduane Homogonaga andaha labolabo timbuni gerela ho winigo daliga howa buda ki bini.
LUK 23:46 Aniore biyagola Yasuhanda bi dalimuore lalu, Aba-o i̱ dinini í̠naga gini ya harogoni, lowa tongolo mini.
LUK 23:47 Ami agali haru haga heagome o biyago hondowa ibugua Ngode Datagaliwabe mini yaraga halu lalu, Ibu agali bayaleore haya, lene.
LUK 23:48 Wali agali agi birabe hondole íbu ngoai ho hearume o biyaruni hondowa dara timbuni halu tinaga galuhombeneni bama andaga dai bini.
LUK 23:49 Yasu ibu baba hagarubi wali maru Galili howa Yasu ibiyadagua haru ibiyarubi o biyaruni amuraore howa handa amu ho hene.
LUK 23:50 Agali mbira mini Yosebe ibu Yudianaga tano mbira mini Arimadia howa íbu hene. Ibu agali baya mini lene henego Ngode Datagaliwabenaga Handame Ho Holene ibilo hondo hene. Ani buwa ibu Ganisolo agali howa Ganisolo agali marume bulene manda biyadagua ibu bulene hame nale hene.
LUK 23:52 Agali ogonime Pailate hearia puwa lalu, Yasu tingini mule poaba, lene.
LUK 23:53 Ani lowa Yasu tingini ira bangani howa mo yalu daluwa labolabo peleoreme kabu buwa ege andaha ala guabu wuwa mbirali hora nahene winigoha yalu puwa hora hene.
LUK 23:54 Ogoni ani biyagola Sabada horo holene kaware wini.
LUK 23:55 Wali maru Yasu ibiyadagua Galili howa mama ibiyarume Yosebehanda Yasu tingini mo yalu piyago hondowa homali ege anda wiago hondole pene.
LUK 23:56 Handalu andaga dai buwa welibi mbirale ngabioreru mo manda manda bini. Ani buwa Sabada horongi Mana lowini ngadagua ti ha̱lo hene.
LUK 24:1 Horo Sandengi egerebagiore wali biarume mbirale ngabiru mo manda manda bu wiyago mo yalu Yasu hora hayagoha pene.
LUK 24:2 Homali egeanda wiagoria puwa handalu hearia panga biago dugua ho wiaria hendene.
LUK 24:3 Hondowa Anduane Homogo Yasu tingini ngabe hondole anda pialu hearia nawiyane hendene.
LUK 24:4 Ani biyiyagola wali biarume mini dege dindi howa o biagoria hearia agali kira aga pele de mborerebi ogobi labo labo ti heagoria abaleore ha pani hene.
LUK 24:5 Ani biyagola wali biarume gi howa dindini bulu palene. Bulu paliyagola agali biago labome wali biaruhondo lalu, Agali heyu kago tí homene wiagaha tai beramigo agibe.
LUK 24:6 Ibu ogoha nawi ibuni mo heya halu piya. Ibugua Galilini howa langiyago mitangi bu dai bilimu.
LUK 24:7 Agali Hole Ibiyago ko biaga karuhondo minu mulebira. Ani minu miragola tigua ibu ira bangani ba para haragola horo kiru howa tebonengi ibuni mo heya holebira, layagoni, lene.
LUK 24:8 Ani layago hale howa wali biarume Yasuhanda bi ogoni ala layago mitangi buwa
LUK 24:9 homali biagoria howa dai buwa mbirale handayagobi hale hayagobi ibunaga talima piaga bereali biarubi maru hearubi lamiai hene.
LUK 24:10 Wali uruni mini Magadala wali Meribi Yoanabi Yamese ai̱ya Meri imaru tibi wali maru heba piyarubi o biyaruni abosolo agali biaru lamiai hene.
LUK 24:11 Wali biarume ani layagola abosolo agali biarume wali bame mini nawi howa lara manda buwa ti mini kira kira wu hene.
LUK 24:12 Ani biyagola Pida ibu abale heyalu egeanda biagoha gerai puwa bulu paluwa handa anda halu hearia maru nahende labolabo ibu kabu bini biago dege wiaria hendene. O biyiyago hondowa ibu mini dege dindi ho yalu andaga dai bini.
LUK 24:13 Horo ogoningi Yasu haruru piaga henego agali kirali Yarusaleme howa kilomida bearia (11) agima bolangua halu dindi mbira mini Emaiasa pole pene.
LUK 24:14 Harigani pialu howa mbirale biyarunaga libuni lade̱le̱ bigi bima pialu hene.
LUK 24:15 Ani lade̱le̱ bigi bima pialu hebiria Yasu ibuni kaware ibalu libu piyadagua pene.
LUK 24:16 Ani biyagola handa handayago aguabe tobane buwa libugua ibu ogoore kagonilo manda nabi hene.
LUK 24:17 Ani buwa Yasuhanda libuhondo lalu, Harigani ibaabo halu howa agi dege lade̱le̱ bigi bima eberabibe, lene. Ani layagola libunaga dengui dara biniore howa ema nabi hondo hene.
LUK 24:18 Agali mendego mini Kiliobasa henegome ladai bialu lalu, Mbirale abe lebe dege biyago manda nabini í̠ dege mbiraha howa áyu íbu kebe, lene.
LUK 24:19 Ani layagola ibugua ladai bialu lalu, Mbirale agilebe, lene. Libugua ladai bialu lalu, Nasareteali Yasuni mbirale biyaruni. Agali ogonime Ngode Datagaliwabe mana latagi haga howa ibugua mana lawai hayagobi biabe biyagobi bibahende hongo taraore howa biyagoni lowa Ngode Datagaliwabehandabi wali agali bibahende kamarumebi ani manda bu harima.
LUK 24:20 Inanaga loma binigo mo miaga haguane hearumebi haru haga hearumebi ibu minuwa wai biaga ami agali hearuhondo minu miyagola tigua ibu homelo ira bangani ba para haya.
LUK 24:21 Ani biyagola iname ibu Isaraele wali agali pele mialu golope holebira mitangi bu harima. Anigo mbirale uruni biyago horo áyu kamagoni tebone.
LUK 24:22 Ogonigo wali marume áyu egerebagi muna biyagola egeanda biagoha hondo pialu dai buwa ina mo mogola haya.
LUK 24:23 Tigua ibu tingini handa nabi dai bialu howa lalu, Ina de gandeba ale handalu dahuliyalirume ina langialu ibu heyu ka laya, lama dai biya.
LUK 24:24 Ani langiyagola ina heba haga marume egeandaha pialu hearia wali biarume layadaguaore hondowa tigua ibu handa nabi dege, lene.
LUK 24:25 Ani layagola Yasuhanda libuhondo lalu, Libu mini nawi haabo kabigo dege agidabe. Ngode Datagaliwabe mana latagi haga henerume mana bibahende lowini ngago tendoreore manda bigi berabigo dege agidabe.
LUK 24:26 Mbirali Dabo Helenego ibulebira lowinigo ibugua mbirale uruninaga tandaga nalu howa ibuninaga mini daliga taraore karulai holene irane ndo winibe, lene.
LUK 24:27 Ani lowa Yasuhanda Anduane Homogonaga mbugani Mosesehandabi mana latagi haga henerumebi gilibu wini wiaru pigane ogoriani howa lama pialu ibuninaga bibahende lowini wiaru libuhondo garealo miai halu hene.
LUK 24:28 Libu pole biyagoria anda polene kaware howa Yasu ibu bola balu pole biyagola
LUK 24:29 libugua bime mo luma howa lalu, Alendo halu ne lolebiaruago áyu oali iya baba ho hama, lene. Ani layagola ibu libu heba andaga pu hene.
LUK 24:30 Ibu libu heba tomo nole biruwa ibugua mberedi mo yuwa Ngode Datagaliwabehondo ka̱i̱ lowa gaibu ki howa libuhondo mini.
LUK 24:31 Ani biyagola libunaga de mo ngala hayagola ibu Yasuore bedagoni lole biyagola o birayagoriani howa ereba halu libugua ibu de nahende hene.
LUK 24:32 Ani biyagola libuni lade̱le̱ bialu lalu, Harigani ibalu howa ibugua iyahondo Anduane Homogonaga mbugani bi lo wiaru bayuwa garealo ngiai hayagola iyanaga bu miniha irame daradagua biayua handarini, laga bialu berene.
LUK 24:33 Ani biya handala libugua abale heyalu Yarusaleme ibunaga talima piaga beariali (11) biarubi wali agali marubi ngoai ho hayagoria abale dai biyagola
LUK 24:34 wali agali bu hearume libuhondo lalu, Anduane Homogo ibu heneneore heyu howa Saimono hendelo ha pani haya, lene.
LUK 24:35 Ani layagola libugua harigani biyagobi ibugua mberedi yamuwa gai biyagola ibu Anduane Homogoda lowa manda biribigobi baya hangu garealo miai haribi.
LUK 24:36 Agali kira biago labome te lamialu hebiore Anduane Homogo ibuni ti heagoria abaleore ha pani howa lalu, Mo palia holene tí heba helo laro, lene.
LUK 24:37 Ha pani hayagola ti mogo taraore lowa homayago dinini daibu kabe toba ho hene.
LUK 24:38 Ani bu heago hondowa ibugua tihondo lalu, Aginaga gi ho kamibe. Tínaga miniha mini kira wulene ogoni wiyadagoni agibe.
LUK 24:39 I̱ i̱niore kogo i̱naga gi gebi bayuwa handa beramine. Homene dininime dongonebi kunibi o kogobi nahagago tí manda bule tíni gime ela haramine, lene.
LUK 24:40 Ani lowa ibugua ibunaga gi gebi tihondo walia hene.
LUK 24:41 Walia hayagola ti turu ha howa lulunda hope howa mini mbiraore wibe nahe hene. Ani bu heagola Yasuhanda tihondo lalu, Tomo mbira ngamibe, lene.
LUK 24:42 Ani layagola tigua wena hiru winigo miyagola
LUK 24:43 ibugua tinaga wanakuini howa nene.
LUK 24:44 Ani buwa ibugua tihondo lalu, Abale tí baba harimangi howa i̱na mbirale heneneore biyaruni langiai harugoni. I̱na ogonidagua bulebira lalu Mosese heneyangi Mana lowinigo gilibu ngarunibi Ngode Datagaliwabe mana latagi haga henerume gilibu ngarunibi Iba Gana mbugani gilibu ngarunibi bibahende lola hai helo lowini, lene.
LUK 24:45 Ani lowa Anduane Homogonaga mbugani bi gilibu ngagoni manda biai helo ibugua tinaga mini mo wála hene.
LUK 24:46 Ani buwa tihondo lalu, Anduane Homogonaga mbugani lo ngadagua ogo, Mbirali Dabo Helenego ibu tandaga noleneore wulebira. Tandaga nowa horo tebonengi tongolo miyagoria howa mo heya holebira.
LUK 24:47 Ani biragola ibunaga minini howa wali agalime mini beregedalu dai bilobi ko biyago domo wahelobi mana ogoni Yarusaleme ala lamima pialu mani dindi bibahendeha lamima tagira polene nga.
LUK 24:48 Mbirale uruninaga walia hagane tí kamigoni.
LUK 24:49 I̱ Abahanda ngulebero lo wiyadagua i̱nime tíni hole dalilolebero. Anigo tíni hongo holene daliga howa dalu helo Yarusaleme ogoriani hondo holene nga, lene.
LUK 24:50 Ani lowa Yasuhanda ti Yarusaleme howa haru tagira pialu amuraore Bedani puwa ibunaga gi yaraga halu Ngode Datagaliwabehanda ti biamogo bilo lalu ti mo turu hene.
LUK 24:51 Ibugua ti mo turu howa ti hea handala ibu dahuliya andaga iraga halu pene.
LUK 24:52 Ani biyagola tigua ibuhondo mitangi bialu ibunaga mini yaraga halu turu timbuniore holene tiha to̱lai ho yalu Yarusaleme dai bini.
LUK 24:53 Ani dai buwa tigua horo bibahendengi Anduane Homogonaga andaha howa Ngode Datagaliwabehondo ka̱i̱ lalu haabo hene.
JOH 1:1 Bibahendeore nawingi Bi hene. Bi ibu Ngode Datagaliwabela hene. Bi ibu Ngode Datagaliwabeore hene.
JOH 1:2 Bibahendeore nawingi Bi ibu Ngode Datagaliwabela hene.
JOH 1:3 Ngode Datagaliwabe ibugua Bila haru howa bibahendeore wabiai hene. Ngode Datagaliwabehanda Bila haru ndo ibuni hangu howa mbirale mbira wa nabi hene.
JOH 1:4 Bi ibuha holene wini. Holene ogonime wali agalinaga wá holene tene wini.
JOH 1:5 Wá holene ogonime arumaha mo wá halu kagoni. Aruma holeneme wá holene ogoni mo yi habe nahe ka.
JOH 1:6 Agali mbira Ngode Datagaliwabehanda ibilayago ibu mini Yone hene.
JOH 1:7 Wali agali bibahendeme Ngode Datagaliwabehondo mini mbiraore wilonaga Yone ibugua wá holene walia helo Ngode Datagaliwabehanda ibu ibilene.
JOH 1:8 Ibu wá holene ndo hene. Ibugua wá holene walia hole ibini.
JOH 1:9 Wá holene heneneore ogoni dindiha daluwa ibugua wali agali bibahendeni wá haame heleda.
JOH 1:10 Bi ibu wali agali heba hene. Ngode Datagaliwabehanda Bi ibula haru howa bibahende wabinigo wali agali bibahendeme ibu manda nabi hene.
JOH 1:11 Ibuni dindini ibiyagola ibunaga damene hearume ibu hame nale howa turu nahe hene.
JOH 1:12 Wali agali maru hearume ibuhondo turu halu mini mbiraore wiyagola ibugua tihondo, Ngode Datagaliwabenaga waneigini tí halimu, lene.
JOH 1:13 Ti wali agalime waneigini taba hanagadagua taba honowa Ngode Datagaliwabenaga waneigini hene ndo. Ngode Datagaliwabe ibunime ti mo ibunaga waneigini hene.
JOH 1:14 Bi ibu agali heneneore hole dalini. Agali hole daluwa ibugua ina heba hene. Ina heba hayagola howa iname ibu mini daliga wá holene taraore heneyane hondowa handawa biaabo harima. Aba Ngode Datagaliwabe Igini mbiraore ibu dege howa ibuhondo mini daliga wá holene taraore miniyago handarima. Biamogo bia holenebi henene lolenebi ibuha to̱laihe hene.
JOH 1:15 Yonehanda ibu walia halu bi dalimu lowa lamialu lalu, I̱na tí langialu howa agali mbira i̱ nahewaha henego maha ibulebirago ogoni ibu daligaore ka larugo o íbu kagoni, lene.
JOH 1:16 Ibuha bayale bulene to̱laihe howa ina bibahendehondo biamogo bia holene ngia tago halu ngiaabo halu ka.
JOH 1:17 Ngode Datagaliwabehanda ibunaga mana Mosesehondo lamiyagola Mosese ibugua inahondo Mana lo wia hene. Biamogo bia holenebi henene lolenebi Moseseha ndo Yasu Kerisoha ngago ibugua inahondo ngule dalini.
JOH 1:18 Wali agali bibahendeme Ngode Datagaliwabe de nahendene ka. Ngode Datagaliwabe Igini mbiraore ibu Ngode Datagaliwabe dege howa ibu Abala howa ibugua inahondo Ngode Datagaliwabe walia hene.
JOH 1:19 Yu agali Yarusalemeni hearume loma binigo mo miaga agalirubi Libai agalirubihondo lalu, Yone karia puwa ibuhondo í̠ ai kebe lalimu, lene. Ani layadagua tigua ibuhondo hale hayagola
JOH 1:20 Yonehanda mbira do nahe tiga tigaore latagi halu lalu, Mbirali Dabo Helenego ibulebira lowinigo i̱ ndo ko, lene.
JOH 1:21 Tigua ibuhondo lalu, Anidago í̠ aibe. Í̠ Elaya kebe, lene. Ibugua ladai bialu lalu, I̱ Elaya ndo ko, lene. Tigua lalu, Ngode Datagaliwabe Mana Latagi Haga Mbirali ibulebira lowinigo ibu í̠ kebe, lene. Ibugua ladai bialu, I̱ ogoni ndo ko, lene.
JOH 1:22 Ani layagola tigua ibuhondo lalu, Í̠ ogo ko, lalu langi. Ina dai buwa ina pudaba layaruhondo ibu agali ogo hea lalu lamuluma̱ya, lene. Í̠nime í̠ni agi lalu larilibe, lene.
JOH 1:23 Ani layagola Yonehanda Ngode Datagaliwabe mana latagi haga Aisaiahanda mbiwia ho winigo lalu, I̱ dindi ko yobi wali agali nahaga ngagoria howa mbiralime olalu kago ko. Olalu howa Anduane Homogo ibilo hariga ba halu mo tiga bilimu, laruli, lalu ogonidagua lene.
JOH 1:24 Ani layagola agali maru Perisi agalime pu laya handala ibiyaru tigua
JOH 1:25 ibuhondo lalu, Mbirali Dabo Helenego ibulebira lowini biagobi Elayabi Ngode Datagaliwabe Mana Latagi haga biagobi i̱ ndo ko larigodago í̠na baboraya biriligo irane agibe, lene.
JOH 1:26 Yonehanda ladai bialu lalu, I̱na ibame baboraya biruli. Mbirali tí manda nabi kamigo ibu tí kamigoha ka.
JOH 1:27 Ibu maha ibalu ibu ala mo bamba holebirago i̱ ko kogonigo i̱na ibunaga ge su pu hadolenebi nakarulapeore kogoni, lene.
JOH 1:28 Tigua bi ogoni Iba Yodana ange ederayagi Bedani dindini Yonehanda baboraya bia halu henegoria lalu hene.
JOH 1:29 Egerebalene Yasu ibalu hearia Yonehanda hondowa lalu, Ngode Datagaliwabenaga Nogo Sibi Igini o ibiragoni de handadaba. Ibugua wali agali bibahendeme ko biyago mo yai holebira, lene.
JOH 1:30 Agali mbira i̱ nahewaha henego ibu daligaore kago maha ibulebira larugo o ibirago, lene.
JOH 1:31 Ibu agali ai ibulebirabe i̱bi manda nabi howa dege tí Isaraele wali agalime ibu ka manda bilimulo i̱na tí ibame baboraya bule ibiru, lene.
JOH 1:32 Yonehanda ibu walia halu lalu, Ngode Datagaliwabe Dinini ega malibu alego hariha howa dalialu Yasuni birayago de handaru.
JOH 1:33 Ani birayagoni hondowabi i̱na ibu manda nabi dege hewaria Ngode Datagaliwabehanda, Í̠na ibame baboraya bule pu, layago ibugua i̱hondo lalu, I̱ Dinini daluwa agali mbiralini birarago hondolebere. Agali ogoni ibugua Dinini ogonime baboraya bia holebira, laya.
JOH 1:34 Ani bulebira layadagua heneneore biyago i̱na deme handarugo ibu Ngode Datagaliwabe Iginiore ka lalu tí langerogoni, Yonehanda lene.
JOH 1:35 Egerebalene Yonebi ibunaga talima piaga kiralibi ti hearia
JOH 1:36 Yasu piyaria Yonehanda de hendene. De hondowa lalu, Ngode Datagaliwabenaga Nogo Sibi Igini o poragoni de handadaba, lene.
JOH 1:37 Ani layago hale howa ibunaga talima piaga kira biago labome Yasu piyadagua talima pene.
JOH 1:38 Yasu ibu beregedalu de handa dai bialu hearia libu ibu talima ibiyago hondowa libuhondo lalu, Libu agi mo eberabibe, lene. Ani layagola libugua ibuhondo, Labai, í̠ ani harilibe, lene. Labai inanaga bi lalu, Lawai haga.
JOH 1:39 Ani layagola Yasuhanda lalu, De hondole maibidaba, lene. Alendoreha ani lene. Ani layagola libu Yasu heba puwa ibu harayago de handalu Yasu heba ho hai hene.
JOH 1:40 Agali kira Yonenaga bi hale halu Yasu talima piyago agali mendego mini Anduru ibu Saimono Pida hamene hene.
JOH 1:41 Anduru ibugua abaleore ibu hamene Saimono hondo pene. Puwa ibuhondo lalu, Mbirali Dabo Helenego ibulebira lowinigo biago handa walia hariba, lene. Mbirali Dabo Helenego mini mende Keriso.
JOH 1:42 Ani lowa ibu hamene Saimono Yasu hearia haru ibini. Ibiyagola Yasuhanda ibu de handalu lalu, Í̠ Yone igini Saimono kegoni. Í̠ mini Sibasa holebere, lene. Sibasa bi mende lalu Pida. Pida inanaga bi lalu, Ege To̱le̱.
JOH 1:43 Egerebalene Yasu ibu Galili dindi pole manda bini. Pilibi hearia hondowa ibuhondo lalu, I̱ talima íbu, lene.
JOH 1:44 Pilibi ibunaga dindi Bedesaida wini. Anduru Pida libubi dindi ogoniali dege hene.
JOH 1:45 Pilibi ibugua Nadanele handa walia howa ibuhondo lalu, Mosese heneyangi ibugua Mana lowinigo gilibu ngarumebi Ngode Datagaliwabe mana latagi haga bamba henerumebi mbirali ibulebira lalu mbiwia ho wini gilibu wiagoni ibu hearia iname handa walia harima. Ibu Nasareteali Yosebe igini Yasuya, lene.
JOH 1:46 Ani layagola Nadanelehanda ibuhondo lalu, Nasareteni howa mbirali bayale mbira ibabehebe, lene. Ani layagola Pilibihanda ibuhondo lalu, De hondole mbaibu, lene.
JOH 1:47 Yasuhanda Nadanele ibalu hearia de hondowa lalu, Isaraeleali tigabi ibunaga bu miniha mo hondo holene mbira nawi o ibiragoni de handadaba, lene.
JOH 1:48 Ani layagola Nadanele ibugua Yasuhondo lalu, Í̠na i̱ agua manda biribe, lene. Ani layagola Yasuhanda ibuhondo ladai bialu lalu, Pilibihanda í̠hondo bi layago naleaha í̠ poge heago teneha beregoni handaru, lene.
JOH 1:49 Ani layagola Nadanelehanda ibuhondo lalu, Lawai haga í̠ Ngode Datagaliwabe Iginiore Isaraele wali agalinaga Handame Haga Kini kegoni, lene.
JOH 1:50 Ani layagola Yasuhanda ibuhondo lalu, Í̠ poge heago teneha beregoni handaru larugo hale howa i̱hondo mini mbiraore wiribe. Hongo emene ogonigo mani hongo timbuniore de hondolebere, lene.
JOH 1:51 Ani lowa ibugua tihondo lalu, Heneneore larogo. Maha dahuliya andaga panga dugua ho ngagola Agali Hole Ibiyago kagoria Ngode Datagaliwabenaga dahuliyalirume iri dali bialu karia de hondoleberami, lene.
JOH 2:1 Horo kiru peha tebonengi Galiliha tano mbira mini Kaina ogoriani agali mbirame wali mbira dabu biyagoria Yasu ai̱ya ibu hondo pene.
JOH 2:2 Yasubi ibunaga talima piagarubi, Ibalimu, lalu lawia hayagola tibi hondo pene.
JOH 2:3 Ti íbu ngoai ho biruwa waini iba bibahende nai hene. Nai hayiyagola Yasu ai̱yahanda ibuhondo lalu, Waini iba nabereda, lene.
JOH 2:4 Ani layagola Yasuhanda ibuhondo lalu, Ai̱ya-o ogoni í̠naga biabe ndo. I̱naga biabego í̠na howa i̱hondo ogo bia lolene nawi. I̱naga biabe bulene tu nahego, lene.
JOH 2:5 Ani layagola ibu ai̱yahanda biabe biaga agali hearuhondo lalu, Yasuhanda bidaba laradagua bilimu, lene.
JOH 2:6 Iba be timbuni ege to̱le̱me wabini waragaria wini. Yu wali agalime iba be uruniha howa iba hambialu tinaga ilili biagane mana winidagua wayawaya biaga hene. Iba be uruni homane mbirago mbagaya be nguira aleme hambu to̱labehe wini.
JOH 2:7 Yasuhanda tihondo lalu, Iba be uruniha iba hambu to̱lai hadaba, lene. Ani layagola tigua iba be bibahende hambu to̱lai hene.
JOH 2:8 Ani biyagola Yasuhanda tihondo lalu, Iba uruni be emeneha odo yoroma buwa iba nelo mo tale bialu haru haga agali kagoria yalu pudaba, lene. Ani layadagua iba be emeneha odo yoroma bu berelayaru yalu pene.
JOH 2:9 Yalu puwa tomo nelo mo tale bialu haru haga agali biagohondo miyagola ibugua na handalu hearia waini ibayagola agoha tawebe toba hene. Biabe biaga agali iba odo yoroma bu yalu ibiyaru ti manda bu hene. Ani hearia ibugua agali wali dabu biaga biago olowa
JOH 2:10 ibuhondo lalu, Wali agali tomo nami̱ya ibalimu lene íbu bedarume waini iba bayalego ala nelo muwa haruore no bidagola nde waini iba ta nabi bedago nelo tale bu miraligo. Í̠na ani ndo waini iba bayalego wu doho haabo howa áyu ogoni yalu ibirida, lene.
JOH 2:11 Yasuhanda agalime nabiagane aleru dewaore binigo mbira pigane Galiliha tano mbira mini Kainani howa ogoni bini. Bialu howa ibunaga hongo taraore holene winigobi walia hene. Ani walia hayagola ibunaga talima piaga biarume ibuhondo mini mbiraore wini.
JOH 2:12 Yasuhanda anidagua bialu ibunibi ibu ai̱ya hamenerubi ibunaga talima piaga biarubi ti Kabaniama puwa horo maru dauru agima ho hene.
JOH 2:13 Yu wali agali ti Bolangua Halu Penegonaga Horo mitangi bialu tomo nolene tu kaware wiagola Yasu ibu Yarusaleme pole dindi dindi pialu anda pene.
JOH 2:14 Anda pialu hearia Anduane Homogonaga andaha nogo bulumagabi sibibi egabi agalime yolo mialu biyinaya bialu hearia handa walia hene. Muni mo ariari biagamebi bialu berearia handa walia hene.
JOH 2:15 Handa walia howa ibugua tandaga biaga tibu mbira pume wabini. Ani wabuwa agali biarubi nogo sibibi bulumagabi bibahende Anduane Homogonaga andaha howa bama pialu tagira bo ba tagi hai hene. Muni mo ariari biaga berearunaga muni be heba dagiani wiaruni mo haealo baga bu wahalu muni wiagane dagia wiaru mo beregedai hene.
JOH 2:16 Mo beregedai howa ega biyinaya biaga agali hearuhondo lalu, Uruni bibahende yalu tagira pudaba. Ogo i̱ Abanaga anda mo magedi hama helolene nawi, lene.
JOH 2:17 Ani layagola ibunaga talima piaga biarume Anduane Homogonaga mbugani lo wiago ogo, Í̠naga anda bayale haabo helo i̱na hame timbuni lalu kogome i̱naga bu habaneha ira daradagua biragola haruli, gilibu wiaria hendenego mitangi bini.
JOH 2:18 Yasuhanda ani bo ba tagi hayagola Yu wali agali haru haga hearume ibuhondo lalu, Í̠na o birigonidagua bulene hongo ngo lalu inahondo agalime nabiagane ale mbira agi walia holeberebe, lene.
JOH 2:19 Yasuhanda tihondo ladai bialu lalu, Anduane Homogonaga anda o kagoni gialo waharimiyagua i̱na horo tebiru hanguni bia dai bulebero, lene.
JOH 2:20 Ani layagola tigua lalu, I̱na horo tebiru hanguni bia dai bulebero laribe be. Iname Anduane Homogonaga anda ogoni bialu hemaria mali pira mariani waragaria (46) penego agua, lene.
JOH 2:21 Yasuhanda Anduane Homogonaga anda layago ibuninaga tingini mitangi bialu lene.
JOH 2:22 Ibu homalu heyu heangi ibunaga talima piaga biarume ibugua bi ogoni layago manda bini. Manda buwa Anduane Homogonaga mbugani bi lo ngagobi Yasuhanda bi laga biyagobi heneneore layada manda bini.
JOH 2:23 Yarusalemeni Yu wali agalime Bolangua Halu Penegonaga Horo tomo nole ngoai hayangi Yasuhanda agalime nabiagane aleru walia hayago hondowa wali agali dewame ibuhondo mini mbiraore wini.
JOH 2:24 Ani wiyagolabi Yasu ibugua ti bibahendenaga bu miniha wiago hondowa tihondo mini mbiraore nawi hene.
JOH 2:25 Yasuhanda wali agali bibahendenaga bu miniha wiago ibu manda biai ho henego mbiralime ibuhondo agali abogo ogobi ka lowa ibu lamulene irane nawini.
JOH 3:1 Perisi aria agali mbira Yu wali agali haru haga henego ibu mini Nigodimusi hene.
JOH 3:2 Ibugua mbiraga mbirungi Yasu hearia ibuwa ibuhondo lalu, Í̠ lawai hagaore Ngode Datagaliwabehanda pu lenego íbu ke lo manda bu kama. Mbiralime Ngode Datagaliwabela haru ndo ibuni hangu howa agalime nabiagane aleru í̠na walia haga biriligodagua bibe naheore ka, lene.
JOH 3:3 Ani layagola Yasuhanda ladai bialu lalu, I̱na í̠hondo heneneore laro. Mbirali ibu halu mende nataba hene kayagua ibu Ngode Datagaliwabehanda Handame Ho Kagoria nahondolebiraore, lene.
JOH 3:4 Ani layagola Nigodimusi ibugua Yasuhondo lalu, Agali wahego lone halu mende agua taba hanabehebe. Ibugua ibu ai̱ya tombeha anda puwa halu mende taba hanabehebe, lene.
JOH 3:5 Ibugua ani layagola Yasuhanda ladai bialu lalu, I̱na í̠hondo heneneore larogo mbirali ibu ibamebi Ngode Datagaliwabe Dininimebi halu mende nataba hene kayagua ogoni ibu Ngode Datagaliwabehanda Handame Ho Kagoria pobe nahe ka.
JOH 3:6 Tinginime taba hanagago tingini dege haga. Ngode Datagaliwabe Dinini ibugua taba hanagago dinini haga.
JOH 3:7 I̱na í̠ halu mende taba honolene nga larugonaga í̠ mogo nalabe.
JOH 3:8 Puyabu pu larane hale hariligo agoha howa pu lo yalu ibalu agohayagi pu lo yu porabe í̠ manda nabi ke. Ngode Datagaliwabe Dinini ibugua holene gahenge ngulene ogonibi nga, lene.
JOH 3:9 Ani layagola Nigodimusi ibugua ladai bialu lalu, Mana o larigonaga agua bialu bulebirabe, lene.
JOH 3:10 Ani layagola Yasuhanda ladai bialu, Isaraele wali agali lawai haga gibi í̠ kego howa mana ogoni manda nabi kebe.
JOH 3:11 I̱na í̠hondo heneneore laro. Iname mbirale manda biai howabi handai howabi nde maru lameramaligo áyu iname tíhondo bi mana ogoninaga langeramagola tígua yu tiga nabi haabo kami.
JOH 3:12 I̱na dindi tawe manda bidamigo langirugola yu tiga nabi kamigoria dahuliya andaga tawe langerogola agua yu tiga buleberamibe.
JOH 3:13 Mbirali dindini howa dahuliya andaga iraga halu pu nabigo Agali Hole Ibiyago ibu dege dahuliya andagaha howa daliya, lene.
JOH 3:14 Mosesehanda dindi ko wali agali nahaga wiagoriani howa puya ege to̱le̱ ale mini boronosime wabinigo irani ba para howa yaraga hayadagua Agali Hole Ibiyago ani yaraga holene wulebira.
JOH 3:15 Ibuhondo mini mbiraore wiragome haabobo holene yilo ani bulebira.
JOH 3:16 Ngode Datagaliwabehanda wali agali bibahende gubalini timbuniore howa ibu Igini mbira hangu henego ngini. Ibuhondo mini mbiraorewi karu ti dinini koha nape haabobo holene yu holebira.
JOH 3:17 Ngode Datagaliwabehanda ibu Igini wali agali dindi bibahendeni karu tinaga daba ki biaga helo ndo ibilene. Ibu wali agali bibahende pele miaga helo ibilene.
JOH 3:18 Ngode Datagaliwabehanda ibu Iginihondo mini mbiraorewi karu daba ki nabulebira. Mini mbiraore nawi karume biyagonaga daba ki bini kago irane tigua Ngode Datagaliwabe Igini mbira hangu kagonaga mini yu tiga nabiyagome ani bini.
JOH 3:19 Daba ki bulene ngago irane ogo. Wá holene ibu wali agali dindini hearia ibiyagola mana ko biaga hearume arumaha hole hame lowa wá holene hame nale hene.
JOH 3:20 Mana ko biaga karume wá holenehondo handabe manga howa wá holeneme tinaga ko biyago walia holilono wá holene kagoria naibaga.
JOH 3:21 Mana henene biaga karu tigua biagago Ngode Datagaliwabenaga hongome biaga lalu wá holeneme walia helo lowa ti wá holenehayagi íbu haga, Yasuhanda lene.
JOH 3:22 Ani lalu bialu Yasubi ibunaga talima piaga biarubi Yudia pu howa dindi ogoriani wali agali maru baboraya bini.
JOH 3:23 Yonehanda Salimi dindi kaware ngelowa Aenononi iba dewa bereagoria baboraya bialu hene. Wali agalime ibu hearia ibugu biyagola ibugua baboraya bigi bini.
JOH 3:24 Yone ibu garabaya nape heangi ani bialu hene.
JOH 3:25 Mbirungi Yonenaga talima piaga biarume Yu agali mbira heago heba wayawaya biagane mananaga te lowa lai lene.
JOH 3:26 Lai lalu bialu Yone hearia ibuwa ibuhondo lalu, Lawai haga-o agali mbira í̠ heba iba Yodana ange ederayagi hebigola iname agali eberegoni aibe larimagola í̠na ibu ogo ka lalu langirigo agali o biagonime áyu wali agali baboraya bialu ka. Ani biragola wali agali bibahendeme ibu karia hangu pialu ka, lene.
JOH 3:27 Ani layagola Yonehanda ladai bialu lalu, Ngode Datagaliwabehanda mbiralihondo mbirale mbira namiyagua nde mbirali ogoni ibu mbirale nayi holebira.
JOH 3:28 I̱na bi ala larugo tí hale harimi. Mbirali Dabo Helenego ibulebira lowinigo i̱ ndo ko. Ngode Datagaliwabehanda i̱ ala bamba halu pu lenego íbu ko larugoni.
JOH 3:29 Agali mbirame wali mbira dabu biragola nde wali ogoni ibu one biraga. Agali wali dabu biagagome bi larago hale howa ibunaga nenege igiri yango mende kagome kaware ibu heba howa turu timbuni haga. Ani biagadagua i̱naga turu holene to̱lai harago i̱ turu timbuni ho ko.
JOH 3:30 Ibu daligaore holene ngago ani hela. I̱ dindihaore nira holebero, lene.
JOH 3:31 Mbirali daliga howa ibiyago ibu maru ale ndo ibu timbuniore ka. Dindini hene kago ibu dindiali ka. Ibugua bi larago lalu dindi tawe hangu laga ka. Mbirali dahuliya andaga howa ibiyago ibu daliga gibiore ka.
JOH 3:32 Ibugua handayagobi hale hayagobi wali agalihondo lamialu kagola tigua yu tiga nabi ka.
JOH 3:33 Yu tiga bidagome Ngode Datagaliwabe henene ka lalu walia ka.
JOH 3:34 Ngode Datagaliwabehanda mbirali ibilayagohondo ibu Dinini to̱lai helo miagago o biago ibugua Ngode Datagaliwabenaga biore laga ka.
JOH 3:35 Abahanda ibu Igini gubalini timbuniore howa mbirale bibahende ibuhondo miai hene.
JOH 3:36 Igini ogonihondo mini mbiraore wu kagome haabobo holene yu ka. Igini ogonime bi larago hale nahe donge ho kagome haabobo holene nayulebiraore. Ngode Datagaliwabenaga lembo holene ibuha wiaabo holebira, lene.
JOH 4:1 Yonehanda wali agali baboraya biyaru emene lowa Yasuhanda dewaore bialu ka, lalu marume layane Perisi agalirume hale hene.
JOH 4:2 Yasu ibunime mbirali baboraya nabi ibunaga talima piagarume dege ani bini.
JOH 4:3 Ogonidagua layago hale howa Yasu ibu Yudia wahalu Galili dai bini.
JOH 4:4 Galili pole Samariani pialu polene wini.
JOH 4:5 Ani pialu Samariaha Saiga tano anda pene. Tano ogoni bamba Yagabahanda Yosebehondo dindi tu wa minigo ogoriani kaware wini.
JOH 4:6 Dindi ogoriani pialu howa horombe hanuni hayagola Yasu ibu bamba Yagabahanda iba hambiagane uli wene wiagoria pialu ibunaga ge hi howa ogoriani ha̱lo berene.
JOH 4:7 Ani berearia Samaria wali mbira iba hambule ibiyagola Yasuhanda ibuhondo lalu, Iba noliya hambu ngi, lene.
JOH 4:8 Ibunaga talima piaga biaru ti tanoha tomo mo piyagola ibu berene.
JOH 4:9 Ani layagola Samaria wali biagome ladai bialu lalu, Í̠ Yu agali ndobe. I̱ Samaria wali bedogo iba noliya hambu ngi larigo agibe, lene. Yu wali agalime Samaria wali agali heba mandagi nahaga hene.
JOH 4:10 Ani layagola Yasuhanda ibuhondo ladai bialu lalu, Ngode Datagaliwabehanda ngiagagobi agali í̠hondo iba noliya hambu ngi lalu kagonibi manda bidele nde í̠na ibuhondo iba ngi ledele. Ani ledele nde ibugua iba haabo holene ngiaganego ngidale, lene.
JOH 4:11 Ani layagola wali biagome ibuhondo lalu, Agali-o í̠ iba hambiagane be nayi kego iba ogo uli unuraha bedago haabo holene iba agoha hambuleberebe.
JOH 4:12 Iba hambiagane uli ogoni bamba ina mamali Yagabahanda ina ngini. Ibunibi ibu iginirubi ibunaga nogo sibirubi ti iba uli ogoniha bedago naga hene. Ibu agali timbuni henego í̠ ibu ale ndo agali daligaore kebe, lene.
JOH 4:13 Yasuhanda ladai bialu lalu, Wali agali iba uli ogoha bedago narago lone noa holebira.
JOH 4:14 Mbirali iba i̱na miagane yidogo narago ibu lone noa naholebira. I̱naga iba ibuha duguaho wiaabo haragola ibu iba noa nahe howa haabobo holene yulebira, lene.
JOH 4:15 Ani layagola wali biagome Yasuhondo lalu, Agali-o i̱ iba lone noa naholiyabi iba uli ogoha lone hambu dai nabuliyabi iba ogoni ngi, lene.
JOH 4:16 Yasuhanda ibuhondo lalu, Í̠ agalini damu puwa libu haru ogoria dai bilibu, lene.
JOH 4:17 Wali biagome ladai bialu, I̱ agalini nahe, lene. Yasuhanda ladai bialu lalu, I̱ agalini nahe larigo tiga tiga langiri.
JOH 4:18 Í̠ agali duria pirigo mbira áyu pu bedegonibi í̠ agaliniore ndola bedego heneneore langiri, lene.
JOH 4:19 Ani layagola wali biagome ibuhondo lalu, Agali-o í̠ Ngode Datagaliwabe mana latagi hagaoredane hendedo.
JOH 4:20 Ina mamalime hari ogoria howa Ngode Datagaliwabe mitangi bialu lotu laga henego. Áyu tí Yu wali agalime Yarusalemeni howa hangu Ngode Datagaliwabe mitangi bialu lotu lolene nga laramili, lene.
JOH 4:21 Yasuhanda ibuhondo lalu, Wali-o bi mbira larogo manda bialu yu tiga bibe. Emene howa wali agalime hari ogoriani howabi Yarusalemeni howabi Aba Ngode Datagaliwabe mitangi bialu lotu nalolebira.
JOH 4:22 Tí Samaria wali agalime mbirali ai mitangi bialu lotu laramiligo tí manda naberamili. Ina Yu wali agalime Ngode Datagaliwabe kago manda buwa ibu mitangi bialu lotu laramaligo irane pele mulene Yualiha howa ibaga.
JOH 4:23 Wali agalime Ngode Datagaliwabe Dinininaga hongome Aba henene ka lalu ibugua hame ledadagua tigua ibu mini yaraga holebira. Nde ani bulene tu áyu haragoni.
JOH 4:24 Ngode Datagaliwabe ibuni Dinini kago wali agalime Ngode Datagaliwabe mini yaraga holene nga manda biyagua nde tigua ibu Dinininaga hongome Ngode Datagaliwabe henene kagobi ibu mitangi bialu lotu lolene nga, lene.
JOH 4:25 Ani layagola wali biagome ibuhondo lalu, Mbirali Dabo Helenego ibulebira lowinigo ibiragola ibugua galone bibahende ngago langiai holebiralo manda bido, lene.
JOH 4:26 Yasuhanda ladai bialu lalu, Áyu í̠ heba te lalu kagoni i̱ ogoni kogoni, lene.
JOH 4:27 Bi ogoni lalu heaore ibunaga talima piaga biaru dai bialu hearia Yasu ibu wali heba te lalu heago hondowa ti mogo lo hendene. Mogo lowa tigua wali biagohondo, Í̠ agi mo ibiribe, lolenebi Yasuhondo, Í̠ wali heba te lalu kego agibe, lolenebi ogoni latagi nahe hene.
JOH 4:28 Wali biagome ibunaga iba be o biagoriani ngelalu tanoha dai buwa wali agali hearuhondo lalu,
JOH 4:29 Agali mbira kago ibugua i̱na biniru bibahende langiai hayago ibu Mbirali Dabo Helenego ibulebira lowinigo mbauleyago hondo ma, lene.
JOH 4:30 Ani layagola tigua tano biagoha howa Yasu hondole ibini.
JOH 4:31 Wali biago peaha talima piaga biarume Yasuhondo lalu, Lawai haga-o tomo na, lene.
JOH 4:32 Ibugua ladai bialu, I̱ tomo nolene ngogo tí manda nabi kami, lene.
JOH 4:33 Ani layagola talima piaga biarume tini degedege lagalaga bialu lalu, Ibunaga tomo mbiralime yu íbu miyadago aiwadabe, lene.
JOH 4:34 Yasu ibugua tihondo lalu, Mbirali i̱ pu layago ibugua bibe layadagua bulenebi biabe buliya ngiyago bu maro biai holenebi i̱naga tomo ogoni, lene.
JOH 4:35 Ibugua lalu, Tígua, Ege maria howa widi lini gandu lolene tu holebira, laramiligo i̱na tíhondo au laro. Áyu mabu bayuwa handawa bidaba. Widi lini bogabidago gandu lolene tu hayada, lene.
JOH 4:36 Mbirali áyu widi gandu lalu kago ibu yolo mialu haabobo holenaga gandu lalu ka. Anigo mbirali egene polalu kagobi mendeali gandu lalu kagobi libu mandagi howa turu holebira.
JOH 4:37 Bi henene mbira laganego ogo, Mbiralime egene polaga mendealime gandu laga.
JOH 4:38 Tígua egene polene ndo wiagoria i̱na tíhondo gandu lole pudaba laro. Maru ti biabe bu wiagoha tí karulo harimi, lene.
JOH 4:39 Wali biagome, I̱na bibahende biniru damene langiai haya, layago hale howa Samaria wali agali dewame Yasuhondo mini mbiraore wini.
JOH 4:40 Tigua Yasu hearia ibuwa ibuhondo lalu, Í̠ ina hebaore hami̱ya hame ledama, layagola Yasu ibu ti heba horo kiru hene.
JOH 4:41 Wali agali dewaoreme Yasuhanda bi layago hale howa ibuhondo mini mbiraore wini.
JOH 4:42 Ani wuwa tigua wali biagohondo lalu, Í̠na bi larigo dege hale howa ndo ibuninaga bi layago hale harimagome ibuhondo mini mbiraore wu kama. Ibu wali agali bibahendenaga Pele Miagaore ka mandabu kama, lene.
JOH 4:43 Yasu ibu horo kiru Samaria wali agali heba halu Galili pene.
JOH 4:44 Ala Yasuhanda lalu, Ngode Datagaliwabe mana latagi haga agaligo ibu damene ibuni daluni karume ibu mitangi nabiaga ka, lene.
JOH 4:45 Yasu ibu Galilini anda pialu hearia wali agali hearume turu howa íbu ngoai hene. Irane ala Bolangua Halu Penegonaga horo timbuni tagira ibiyangi wali agali urunime lotu lolebi tomo nolebi Yarusaleme puwa Yasuhanda biyago bibahende ti de handai henegonaga turu ho hene.
JOH 4:46 Ala Yasuhanda Galiliha tano mbira mini Kainani howa iba mo waini iba hayagoha ibu lone pene. Dindi ogoriani gabumane agali mbira heago ibu igini Kabaniama tanoni warago bo wini.
JOH 4:47 Ibugua Yasu Yudia howa Galilini íbu ka layago hale howa Yasu hearia ibini. Ibuwa ibugua Yasuhondo lalu, I̱ igini áyu ogoni tongolo mibeheore ngago ibu nahome dabi helo Kabaniama mba, lene.
JOH 4:48 Yasuhanda ibuhondo lalu, Tígua agalime nabiagane alebi nahendene alebi nahende howa i̱hondo mini mbiraore nawuleberami, lene.
JOH 4:49 Gabumane agali biagome ibuhondo lalu, Agali-o i̱ igini homoligo abale mba, lene.
JOH 4:50 Yasuhanda ibuhondo lalu, Í̠ igini dabi holebirago pamia, lene. Ani layagola hale howa agali biagome Yasuhanda bi layago yu tiga bialu pene.
JOH 4:51 Andaga dai bialu hearia ibunaga garabaya biabe ale bia haga hearume ha obeneni lola howa lalu, Í̠ igini dabi ho ka, lene.
JOH 4:52 Agali biagome lalu, Angi dabi hayabe, lene. Tigua ladai bialu, Abe ni ande layagola warago dabi haya, lene.
JOH 4:53 Igiri aba biagome mitangi bialu Yasuhanda, Í̠ igini dabi holebira, layangiore dabi hayadalo manda bini. Ani manda buwa agali biago ibunibi ibu damenebi ti bibahendeme Yasuhondo mini mbiraore wiai hene.
JOH 4:54 Yasu ibu Yudia howa Galili ibuwa ibugua agalime nabiagane ale halu mende ogoni bini.
JOH 5:1 Ani bialu howa Yasu ibu Yarusalemeni Yu wali agali ti bibahende lotu lolebi tomo nolebi ngoai hagane horongi ngoai hayagoria pene.
JOH 5:2 Yarusalemeni wai pabe haraba timbuni mbira mini Nogo Sibi Panga laga heago kawareni iba emene mbira berene. Hiburu bi lalu iba ogoni mini Bedeseda laga wini. Anda mbira haraba duria wi heagoria wali agali de koheru ge koheru kuduguheru dewaore iba ogoni angeni biru wini. [Mbiruore uliningi Anduane Homogonaga dahuliyalime daluwa iba ogoni mo lumulumu bigi bia haga berene. Lumulumu bialu kagoha ala pora birago ibu mo dabi haga wini. Ani biagago manda buwa wali agali urunime abale pora bule lowa nende bia ho biraga biaga wini.]
JOH 5:5 Agali mbira ibu warago bo wiane dege mali pira tebirani halira (38) pene wiago
JOH 5:6 Yasu ibu de handalu ibu bambaore howa warago bo wiaabo heneda manda buwa ibuhondo lalu, Í̠ dabi holene hamelo bedebe, lene.
JOH 5:7 Ani layagola ibugua ladai bialu lalu, Agali-o iba lumulumu bialu kaore i̱ mo yalu puwa ibira holene mbira nahedagola wene pialu koore dege maru ti abale pora biaga, lene.
JOH 5:8 Ani layago hale howa Yasuhanda ibuhondo lalu, Heyalu í̠naga tamunguru mo yalu pu, lene.
JOH 5:9 Ani layangiore agali warago bo wiraligo mo dabi haya handala ibunaga tamunguru mo yalu pene. Agali ogoni mo dabi hayadago Sabada horongi mo dabi hene.
JOH 5:10 Agali dabi hayagome ibunaga tamunguru mo yalu piyadago Yu wali agalinaga haguane hearume hondowa ibuhondo lalu, Áyu Sabadangidago inanaga Mana lowini ngagome mbirale mbira yalu polene nawi longago í̠naga tamunguru yalu porego agibe, lene.
JOH 5:11 Ibugua ladai bialu, I̱ mo dabi hayadago ibugua í̠naga tamunguru mo yalu pu laya handala yalu porogoni, lene.
JOH 5:12 Ani layagola tigua lalu, Í̠naga tamunguru mo yalu pu layadagoni agali aiwa layabe, lene.
JOH 5:13 Agali dabi hene biagome lalu, I̱ aiwa mo dabi hayabe manda nabido, lene. Yasuhanda agali biago mo dabi halu ibu wali agali dewa bu heagoha piyiyagola agali biagome agohayagi piyabe toba howa ani lene.
JOH 5:14 Maha Yasu ibu Anduane Homogonaga anda tamuha pialu hearia ibugua agali biago hearia de hondowa ibuhondo lalu, Áyu í̠ dabi ho kegonigo mani mo ko holene mbira í̠ha wuligo mana ko nabi bayale hangu bialu habe, lene.
JOH 5:15 Ani layago hale halu agali biagome puwa Yu agali haguane hearuhondo lalu, I̱ mo dabi haya larugo Yasuhandaya, lene.
JOH 5:16 Ani layago hale howa Yu agali biarume, Sabada horongi nabulene winigo birida, lowa Yasu mo tandaga halu hene.
JOH 5:17 Ani bialu heagola Yasuhanda ladai bialu lalu, I̱ Abahanda biabe biaabo halu kadagua i̱nabi bialu kogoni, lene.
JOH 5:18 Yasuhanda bi ani layagome Yu wali agalinaga haguane biaru ti mo kebaore hene. Keba henego Yasu ibugua Sabada horongi puguayagonaga hangu ndo. Ngode Datagaliwabe i̱ Aba layago mine halu Ngode Datagaliwabela iya ogobi labolabo kaba lalu laya manda buwa tigua ibu homelo bo wahole manda bialu hene.
JOH 5:19 Ani bu heagola Yasuhanda tihondo lalu, I̱na tíhondo heneneore langerogo. Igini ibuni hangume manda bialu mbira nabiaga. Ibu Abahanda birago hondowa ibugua biradagua hangu bulebira.
JOH 5:20 Abahanda ibu Igini gubalini timbuniore howa ibugua birago bibahende ibu Igini walia haga. Ibu Iginime biabe hongohe taraore áyu birane handarimigobi ndo timbuniorebi bilo walia holebira. Anidagua birago hondowa tí mogo loleberami.
JOH 5:21 Abahanda wali agali homenego mo heya halu holene gahenge miagadagua ibu Iginimebi ani dege bialu holene gahenge ibuni mua biragohondo mulebira.
JOH 5:22 Aba ibunime wali agalime biragonaga daba ki nabulebira. Ibu Igini hangume bibahende daba ki bilo heleda.
JOH 5:23 Ani heledago irane wali agali bibahendeme Abanaga mini mo yaraga hagadagua ibu Igininaga minibi mo yaraga helo heleda. Mbirali Igininaga mini mo yaraga nahe kagome Aba ibugua i̱ pu layagonaga minibi mo yaraga nahaga dege ka, lene.
JOH 5:24 Tíhondo heneneore laro. Wali agalime i̱naga bi larogo hale halu bialu kagobi i̱ pu layagohondo mini mbiraore wialu kagobi ogoni ibu haabobo holene yu halu ibugua biyagonaga dabolene nawulebira. Ogoni ibu ala homaganehayagi henego áyu haabobo holenehayagi porabu ede ho ka, lene.
JOH 5:25 Yasuhanda laabo halu lalu, Tíhondo heneneore laro. Horo mbira tagira ibulebira lowinigo áyu tagira ibiragonigo ibiragola homene homaliha padarume Ngode Datagaliwabe Igininaga bi hale holebira. Hale hararume heyulebira.
JOH 5:26 Aba ibuniha holene tene ngagobi Igini ibuhabi holene tene ngeleda.
JOH 5:27 Ani buwa Ngode Datagaliwabehanda wali agali biraligonaga dabolene ibu Igini ibu Agali Hole Ibiyago ka lowa ibugua ibuhondo hongo mini.
JOH 5:28 Áyu o larogo hale howa mini mogo nalalimu. Horo tara tagira ibulene kaware ngago tagira ibirangi homaliha hora heneru bibahendeme ibunaga bi hale halu
JOH 5:29 heyalu tagira ibai holebira. Bayale bialu haga heneru heyalu ti haabobo holenehayagi pu hadaba lolebira. Ko bialu haga heneru heyalu ti baba godi lowa pani nolenehayagi pu hadaba lolebira, lene.
JOH 5:30 I̱ni manda bialu agua labehedago lowa mbira nalaruli. I̱ Abahanda, Agua lolene nga, lalu langirago hale howa hangu laruli. Dabolene ngadaguaore lo tiga biruli. I̱ni hameme mbira bupe halu nabiruli. I̱ pu layagome hame ledadagua hangu biruli.
JOH 5:31 I̱na agua biruli lalubi i̱ ogobi ko lalubi koyagua nde henene ndo lare lolene nga.
JOH 5:32 Mbirale i̱na biaganego agua biaga lalu mbiralime lamialu kago henene biruligobi tiga tiga lamialu ka manda bu ko.
JOH 5:33 Tínaga bi lamule piagarume Yone hearia piyagola ibugua tihondo bi lamiyagoni henene hangu lamiya.
JOH 5:34 I̱na agalime i̱ kogobi henene ka lelo manda buwa ndo tí pele ngulenaga manda buwa laro.
JOH 5:35 Yone ibu lamu hale ale dalu howa wá timbuni hagadagua ibuni wá ho heago handarimingi turu ho harimi.
JOH 5:36 Yonehanda i̱ tíhondo emene walia haya. I̱ Aba ibunime mo hongo haragola biabe buliya ngiyago bialu kogome i̱ tíhondo timbuniore ogonime walia haragoni. Ogoni hondowa i̱ Abahanda i̱ pu layagola ibinida manda bibehe kami.
JOH 5:37 I̱ Aba i̱ pu layago ibunime bi i̱ henene kogobi lalu ka. Tígua ibunaga bi hale nahene halu ibunaga denguibi nahendene kami.
JOH 5:38 Ibugua pu layagola ibiyagohondo mini mbiraore nawi kamigome ibunaga bi mana tí bu miniha yu tiga nabi kami.
JOH 5:39 Anduane Homogonaga mbugaha haabobo holene handa walia hole manda buwa daga laabo haramiligo nde Anduane Homogonaga mbugani lo ngagome i̱ tíhondo walia haga nga.
JOH 5:40 Ani bidago áyu i̱na tíhondo holene gahenge nguliya i̱ kogoria ibulene manga halu kami.
JOH 5:41 Agalime i̱naga mini mo yaraga helo hame lowanaga ndo laro.
JOH 5:42 Anigo i̱na tínaga bu miniha kamigobi manda bidogo tígua Ngode Datagaliwabehondo gubalini holene tíha nawiore kamilo manda bido.
JOH 5:43 I̱ Abanaga minini howa íbu kogo tígua i̱hondo turu halu ina hami̱ya ibinida lowa i̱naga bi yamia nabi kami. Agali tara mbira ibuninaga minini howa ibiyagua tígua ogoni ibunaga bi larago turu halu ina hami̱ya lowa abale yamuleberami.
JOH 5:44 Ngode Datagaliwabe mbiraore hangu kago ibugua tínaga mini mo yaraga helo ha nabi howa tínime tíninaga mini mo yaraga haga haga bialu kami. Ani bialu haabo howa i̱hondo mini mbiraore agua wuleberamibe.
JOH 5:45 Tígua bialu kamigoni agua biya lalu manani dabelo i̱na i̱ Aba lamulebiralo manda nabilimu. Mosesehondo tígua mini dunubia ho harimigo ogoni ibugua tígua bialu harimidagoni agua biya lalu manani dabelo i̱ Aba lamulebira.
JOH 5:46 Iname Mosesenaga bi hale howa mini mbiraore wu kama, lalu kamigo ibuhondo mini mbiraore heneneore ngamile nde i̱naga bi hale howa i̱hondobi mini mbiraore ngamile. Ibugua i̱ lalu bi te gilibu wini ngagoni.
JOH 5:47 Ibugua i̱ lalu gilibu wini ngago hondowa mini mbiraore nawi kamigoria i̱naga bi hale halu mini mbiraore agua wuleberamibe, lene.
JOH 6:1 Ani lalu Yasu ibu iba Galili doma edeyagi pene. Iba Galili mini mende Taiberiasa.
JOH 6:2 Ibugua wali agali warago bo winiru mo dabi halu agalime nabiagane ale dewa biyago hondowa wali agali dewaoreme ibu piyagoha haruru pene.
JOH 6:3 Yasu ibunaga talima piagaru heba hari mbira heagoria iraga ho berene.
JOH 6:4 Bolangua Halu Penegonaga tomo nolene tu kaware wini.
JOH 6:5 Wali agali dewaore ibiyaru hondowa Yasuhanda Pilibihondo lalu, O ibiraruni tomo karulape nelo iname tomo agua mimi̱yadabe, lene.
JOH 6:6 Ibugua tomo agua mule manda buwa Pilibi ba hondole lene.
JOH 6:7 Pilibihanda ladai bialu lalu, Kina handari kirame (200) tomo yolo bu mirimayaguabi bibahende no karula napolebira, lene.
JOH 6:8 Yasunaga talima piaga Saimono Pida hamene Anduruhanda lalu,
JOH 6:9 Igiri mbirame ladi ale mini balime mberedi hirini duriabi wena kirabi heneago nde ina tidini gibi kamago nakarulapeda, lene.
JOH 6:10 Ani layagola Yasuhanda lalu, Wali agali bibahende birai hadaba ladaba, layagola tani bayale heagoria birai hene. Agali hangu daga lowa daosini duria (5,000) hene.
JOH 6:11 Birai heagola Yasuhanda mberedi biago yamuwa ibu Abahondo ka̱i̱ lowa wali agali birayaru milo talebu tahene. Wenabi ani dege talebu muwa no karulapeore mini.
JOH 6:12 No karula pialu ibira hayaru ibugua ibunaga talima piaga biaruhondo lalu, Mbira waholigo bibahende mo mogo bidaba, lene.
JOH 6:13 Tigua mo mogo biai howa mberedi duria biaru nalu ibira hayaru nu homberia (12) hono to̱lene.
JOH 6:14 Wali agali biarume Yasuhanda agalime nabiagane ale biyago hondowa tini laga laga bialu lalu, Ngode Datagaliwabe Mana Latagi Haga Mbirali dindini ibulebira lo harimago ibuoreda, lene.
JOH 6:15 Tigua bi degeme, Yasu í̠ handame haga kini ha, lalu ibu mo yaraga hole heago hondowa ibu hari heagoha ha do hole ibuni hangu pene.
JOH 6:16 Ne̱ lanini Yasunaga talima piaga biaru ti ibaha dalipe halu
JOH 6:17 iba taluni biralu Kabaniama pole pene. Pialu hearia Yasu naibi heaore dege aruma hene.
JOH 6:18 Aruma howa puyabu timbuni pulalu ibiyagome iba mo yaribu bini.
JOH 6:19 Ti iba talu tanguima piyadagoni lunaga magi kilomida duria waragaria agima pialu hearia Yasu ibani ibalu iba talu biago kaware ibiyaria de hendene. Hondowa ti gi timbuniore hene.
JOH 6:20 Gi hayagola ibugua tihondo lalu, I̱ kogonigo gi nahalimu, lene.
JOH 6:21 Ani layago hale howa iba taluha ibilo turu howa gi yamini. Ani biyaore ti polebiyagoria anda pene.
JOH 6:22 Egerebalene wali agali iba timbuni doma edeyagi paliyarume manda bialu hearia, Abe iba talu mbiraore hangu wiyagoria ibunaga talima piaga biaru piyadagua Yasu ibuni napiyagoda, manda bini.
JOH 6:23 Ani manda bu hearia iba talu maru Taiberiasa howa Anduane Homogohanda ka̱i̱ lowa ti tomo karulape nayagoria kaware anda ibini.
JOH 6:24 Tigua Yasubi ibunaga talima piaga biarubi nahe piai hayiyago hondowa iba talu urunini biralu Kabaniamaha Yasu hai bima pene.
JOH 6:25 Tigua Yasu iba timbuni doma orayagi hearia handa walia howa ibuhondo lalu, Lawai haga-o í̠ ogoria angi íbu haribe, lene.
JOH 6:26 Ani layagola Yasuhanda ladai bialu lalu, Tíhondo heneneore laro. I̱ hai bima ibirimigo i̱na agalime nabiagane ale birugo hondowa ndo ibirimi. Tomo mo karula pirugola haruore narimigo manda buwa ibirimi, lene.
JOH 6:27 Ani lowa lalu, Ereba hagane tomonaga biabe nabialu halimu. Haabobo holene tomo Agali Hole Ibiyagome ngulebirago tomo ogoni mule biabe bialu halimu. Aba Ngode Datagaliwabehanda ibu ani helo loma bia ho heleda, lene.
JOH 6:28 Ani layago hale howa tigua ibuhondo lalu, Iname Ngode Datagaliwabehanda hame ledadagua buluma̱ya agua bibehebe, lene.
JOH 6:29 Yasuhanda ladai bialu lalu, Ibugua pu layagola ibiyagohondo mini mbiraore wulene ogoni Ngode Datagaliwabehanda hamelo ka, lene.
JOH 6:30 Ani layagola tigua ibuhondo lalu, Í̠na agalime nabiagane ale bialu iname hondowa í̠hondo mini mbiraore wuluma̱ya agi buleberebe. Í̠na biabe agi buleberebe.
JOH 6:31 Ina mamali dindi ko wali agali nahagaha howa mena nalu hene. Ogoni binigo Anduane Homogonaga mbugani lo ngago ogo, Ibugua ti nelo mberedi dahuliya tawe mini, lalu gilibu nga, lene.
JOH 6:32 Ani layagola Yasuhanda lalu, Tíhondo heneneore laro. Mosesehanda tíhondo mberedi ngiyago dahuliya tawe ndo. I̱ Aba ibugua dege mberedi dahuliya taweore ngiaga ka.
JOH 6:33 Mberedi Ngode Datagaliwabehanda ngiaga ogoni dahuliya andaga howa dalinigo kago ibugua wali agali dindini karuhondo holene gahengeore mialu kago Ngode Datagaliwabenaga mberedi ogoniore, lene.
JOH 6:34 Tigua ibuhondo lalu, Anduane-o í̠na mberedi ogoni ina ngiaabo habe, lene.
JOH 6:35 Ani layagola Yasuhanda tihondo lalu, Holene gahengeore mberedi i̱ni kogoni. I̱ koria ibaabo halu karu garibi nale holebira. I̱hondo mini mbiraore wialu karu iba lone noa naholebira.
JOH 6:36 Anigo tígua i̱ de hondowa i̱hondo mini mbiraore nawi kami lalu langirugoni.
JOH 6:37 I̱ Abahanda i̱hondo ngiraru bibahende ibalu i̱ kogo haho tago holebira. I̱ koria ibiraru mbira i̱na wara tagi naholeberogo
JOH 6:38 irane i̱ dahuliya andaga howa ibuwa i̱ni hame ledodagua bule ndo. I̱ pu layago ibugua hame ledadagua bule ibiru.
JOH 6:39 I̱ pu layago ibugua i̱na buliya hamelo kago ogo. I̱hondo ngiraru mbira i̱na yu wa nahe hamaro bulene horo harangi bibahende mo heya hai holiya hamelo ka.
JOH 6:40 I̱ Abahanda hamelo kago ogo. Igini i̱ de hondowa i̱hondo mini mbiraore wialu karume haabobo holene mo yai helo hamelo ka. Hamaro bulene horongi haabobo holene yu karu i̱na mo heya hai holebero, lene.
JOH 6:41 Ibugua lalu, Mberedi dahuliya andaga howa dalinigo i̱ ko, layago hale howa Yu agali tini bi gimigomo lalu,
JOH 6:42 Ibu ai howa lalu kabe. Ibu Yosebe igini Yasu ndodabe. Ibu ai̱ya abala ina manda bidamagoni. Ibugua lalu, Dahuliya andaga howa dalinigo i̱ ko, lalu kago irane agibe, lowa laga laga bini.
JOH 6:43 Ani layagola Yasuhanda tihondo lalu, Tíni dege dege bi gimigomo lalu kamigo wahadaba.
JOH 6:44 I̱ Abahanda i̱ pu layago ibugua mbirali haru naibiyagua ibuni hangu howa i̱ koria naibabehe. I̱ Abahanda i̱ koria haru ibirago hamaro bulene horo harangi ibu i̱na mo heya holebero.
JOH 6:45 Ngode Datagaliwabe mana latagi haga henerume gilibu winigo ogo, Ngode Datagaliwabehanda wali agali bibahende lawai holebira, lalu gilibu wini. Abahanda ani lawai harago hale howa lomanda biraru bibahende i̱ koria ibaga.
JOH 6:46 Mbiralime Aba de hendene lalu ndo laro. Aba de hendene mbirali ibu hangu Ngode Datagaliwabe kagoria howa daliyago ibugua Aba de hendene ka.
JOH 6:47 I̱na tíhondo heneneore laro. Ngode Datagaliwabehondo mini mbiraore wu kagome haabobo holene yu ka.
JOH 6:48 Holene gahenge mberedi i̱ ko.
JOH 6:49 Tí mamalime dindi ko yobi wali agali nahaga wiagoria howa mena nalu henego ti haabo nahe homene.
JOH 6:50 Ai dahuliya andaga howa daliyago mberedi ogoni mbiralime nayagua ibu nahomolebira.
JOH 6:51 Holenenaga mberedi dahuliya andaga howa dalinigo i̱ kogoni. Mberedi ogoni mbiralime nayagua ibu haabo holebira. Mberedi i̱na nguleberogo o i̱naga tingini. Dindi bibahendeni karume holene gahenge yilo i̱na i̱naga tingini mulebero, lene.
JOH 6:52 Ani layago hale howa Yu agalime keba howa tini dege dege laga laga bialu lalu, Agali ogonime ibunaga tingini ina nalimulo ngulebero lalu kago agua bialu ngulubadabe, lene.
JOH 6:53 Ani layagola Yasuhanda lalu, I̱na tíhondo heneneore laro. Agali Hole Ibiyagonaga tinginibi daramabi nane kamiyagua tíha holene gahenge nawulebira.
JOH 6:54 I̱naga tinginibi daramabi nalu kago ibu haabobo holene yu kago ogoni ibu hamaro bulene horo harangi i̱na ibu mo heya holebero.
JOH 6:55 Tomo heneneore i̱naga tingini. Iba heneneore i̱naga darama.
JOH 6:56 I̱naga tinginibi daramabi nalu kago ibu i̱ha ka. I̱ nde ibuha ko.
JOH 6:57 Aba holenehe kago ibugua i̱ pu layagola ibirugo ibu kagome i̱bi holenehe kogoni. Ogonidagua i̱ nalu kago ibu i̱ kogome ibubi holenehe holebira.
JOH 6:58 Mberedi ogoni dahuliya andaga howa dalini. Mberedi tí mamalime nalu howa homenego ogoni ale ndo. Mberedi ogoni áyu o larogoni mbiralime nayagua ibu haabo holebira, lene.
JOH 6:59 Kabaniamani ngoai hagane andaha howa Yasuhanda mana lawai henego ogoni.
JOH 6:60 Yasuhanda ani layago hale howa wali agali ibu haruru piaga marume lalu, Bi ogoni larago haibioredago aiwa mo yulebirabe, lalu hene.
JOH 6:61 Ti bi gimigomo lalu heago Yasu ibu minime manda buwa tihondo lalu, I̱na bi o larugoni hale howa tí genda howa wahalu poa kamibe.
JOH 6:62 Agali Hole Ibiyago ala hayagoria hole iraga harago handarimiyagua agi manda buleberamibe.
JOH 6:63 Ngode Datagaliwabe Dinini ibugua holene gahenge ngiagane. Wali agalinaga hongome habane nabulene nga. I̱na tíhondo bi langirugome holene gahenge ngiagane yalu Dinini ibaga.
JOH 6:64 Anigo tí marume i̱hondo mini mbiraore nawi kami, lene. Yasu ibugua ibuhondo mini mbiraore nawulebirarubi ibu nde lolebiragobi piganengi howa manda biai ho howa bi ani lene.
JOH 6:65 Ani lowa lalu, Irane ogoni manda buwanaga i̱na tíhondo lalu i̱ Abahanda mbirali ibu i̱ koria ibilo mo mitangi bia nahayagua ibuni hangume ibabe nahe holebira lalu langiru, lene.
JOH 6:66 Yasu haruru piaga wali agali hearume bi ogoni layago hale howa dewame ibu haruru nape wahene.
JOH 6:67 Ani biyagola Yasuhanda ibunaga talima piaga homberiali (12) biaruhondo lalu, Tíbi i̱ wahalu piai holeberamibe, lene.
JOH 6:68 Ani layago hale howa Saimono Pidahanda ladai bialu lalu, Anduane Homogo-o ina ai karia poloma̱yabe. Haabobo holenenaga bi í̠na dege yu kego.
JOH 6:69 Í̠ Mbirali Baya Buruguleore henego Ngode Datagaliwabe karia howa íbu kego manda buwa iname í̠hondo mini mbiraore wu kamago, lene.
JOH 6:70 Yasuhanda tihondo ladai bialu lalu, I̱na tí homberiali dabarugo tí mbira dege dama kami, lene.
JOH 6:71 Ibunaga talima piaga hombeane Saimono Isagariodo igini Yudasa henego ibugua nde lolebira manda buwa Yasuhanda ani lene.
JOH 7:1 Ani lowa Yu wali agali haru haga hearume ibu bole ka manda buwa Yasu ibu Yudia dindiha nape Galili dindihayagi hangu ibaga bu hene.
JOH 7:2 Yu wali agalinaga Anda Nemandaha Palu Holene Horo kaware hayagola
JOH 7:3 Yasu hamenerume ibuhondo lalu, Í̠na biabe bialu kegoni í̠ haruru ibirarume de handai helo dindi ogo wahalu Yudia pobe.
JOH 7:4 Mbirali ibugua birago bibahendeme manda biai helo manda biyagua ohowa nabi panigi biaga. Í̠na biabe bialu kego dindi bibahendeni karume í̠ manda biai helo walia halu bule pu, lene.
JOH 7:5 Ibu hamenerume ibuhondo mini mbiraore nawi hene.
JOH 7:6 Ani layagola Yasuhanda tihondo lalu, I̱naga horo wene natagira ibi. Áyu tínaga horo hangu wiaabo ka.
JOH 7:7 Wali agali dindi bibahendeni karume tí handabe manga naholebira. I̱na tíhondo ko bialu kami lalu lamiaabo harogola ti bibahendeme i̱hondo handabe manga halu kagoni.
JOH 7:8 Tí ngoai hagane biagoria ngoai hole pudaba. I̱naga horo wene natagira ibigo i̱ haro, lene.
JOH 7:9 Ani lalu ibu nape Galilini hondo hene.
JOH 7:10 Yasu ibu hameneru ngoai hole piyadagua ibubi maha pene. Ibu wali agalime nahendelo ohowa pene.
JOH 7:11 Wali agali ngoai hayagoria Yu wali agali haru haga haguane hearu tigua, Yasu agoha kabe, lalu hai bialu hene.
JOH 7:12 Wali agalime hagarerebi laga laga bialu marume, Ibu agali bayale, la marume, Ndo ibugua wali agali mo guya halu ka, laga bialu hene.
JOH 7:13 Yu wali agali haru haga hearu hondowa ti bibahendeme gi howa latagi nahe hagarerebi lowa lalu hene.
JOH 7:14 Mo ngoai holene horo uruni maru peha Yasu ibu Anduane Homogonaga andaha puwa mana lawai halu hene.
JOH 7:15 Yasuhanda mana lawai halu heago hale howa Yu wali agali bibahendeme ti mogolo hondowa lalu, Agali ogoni sigulu nabi howa manda timbuni taraore bidago agua manda binidabe, lene.
JOH 7:16 Ani layagola Yasuhanda ladai bialu lalu, Mana lawai halu kogo i̱ni mitangi bialu ndo Ngode Datagaliwabe i̱ pu layagonaga minini howa lawai halu ko.
JOH 7:17 Mbirali ibu Ngode Datagaliwabehanda hame ledadagua bua kayagua ogoni ibugua i̱na lawai halu kogo i̱ni mitangini howa lawai halu kobe Ngode Datagaliwabenaga mitangini howa lawai halu kobe manda bu hondolene nga.
JOH 7:18 Mbirali ibuninaga mitangini howa lawai halu kagome ibuninaga mini mo yaraga helo lawai halu ka. Anigo ibu pu layagonaga mini mo yaraga helo hame lowa lawai halu kagome ogoni ibu tigabiore ibunaga miniha ke̱ holene mbira nawiore ka.
JOH 7:19 Mosesehanda ibu heangi Mana tígua bilimulo lowinigo tí mbiralime bia nabi puguabo halu kami. I̱ homoliya bole manda bialu kamigo irane agibe, lene.
JOH 7:20 Ani layagola tigua ladai bialu lalu, Í̠ dama daraga ho kebe. Í̠ homabelo aiwa bole kabe, lene.
JOH 7:21 Yasuhanda ladai bialu lalu, I̱na agalime nabiagane ale mbira birugo hondowa mogolo handarimi.
JOH 7:22 Dongone podo mabu biagane mana Mosesehanda bilimu lene manda buwa Sabada horongi tígua tí iginiru dongone podo mabu beramili. Dongone podo mabu biagane mana ogoni tene Mosesehanda wabu wini ndo. Pigane bamba tí mamalirume tenini.
JOH 7:23 Mosese heneyangi Mana lowinigo napugule lowa tígua Sabada horongi igiri dongone podo mabu beramilidagua i̱na agali mbiranaga tingini ko heago mo dabi haiore harugonaga i̱hondo keba halu kamigo agibe.
JOH 7:24 Tígua de degeme hondowa daba ki nabilimu. Mana henene birago hondowa daba ki bialu halimu, lene.
JOH 7:25 Ani layago hale howa Yarusaleme wali agali marume lalu, Haru haga karume mbirali homelo bole lalu kago agali ogoni ndobe.
JOH 7:26 Ibugua o nahe wali agali handai helo howa mana lalu kagoni. Tigua ibuhondo mbira nale helo wa kagoni. Ina haru haga karume ibu Mbirali Dabo Helenego ibulebira lowinigo ibu ka manda buwa wahaya bada.
JOH 7:27 O ani ago Mbirali Dabo Helenego ibiragola ibu ogoha howa ibinida manda nabi holeberamago ai agali ogoni ibu ogoha howa ibini ka manda bu kamagoni, lene.
JOH 7:28 Yasu ibugua Anduane Homogonaga andaha howa lawai halu dalimu lalu, Tígua i̱bi i̱ ogoha howa ibini kabi bayuwa manda bu kamibe. I̱ni mitangini ndo ibiru. I̱ pu layago ibu henene tene kagoni. Tígua ibu manda nabi kamigo
JOH 7:29 i̱na dege ibu manda bu ko. I̱ pu layagola ibuha howa ibiru, lene.
JOH 7:30 Ani layago hale howa tigua ibu minule binigo ibunaga horo ogoningi ndo hayagola mbiralime gi yade halu ibu mina nabi wahene.
JOH 7:31 Wali agali ngoai ho hearu dewalime lalu, Agali ogoni ibugua agalime nabiagane ale bialu kago emene lalu Mbirali Dabo Helenego ibu ibuwa ibugua dewaore bulebirabe, lowa ibuhondo mini mbiraore wini.
JOH 7:32 Yasuhanda uruni biyagonaga wali agalime hagarerebi lowa laga laga bialu heago Perisi agalime hale howa tiguabi loma binigo mo miaga haguane hearumebi Anduane Homogonaga anda mamage haga agaliruhondo, Yasu minu pudaba, layagola tigua ibu minu ibini.
JOH 7:33 Ti ani íbu heagola Yasuhanda tihondo lalu, I̱ tí heba emene tigi mbira hangu halu i̱ pu layago karia dai bulebero.
JOH 7:34 Dai berogola tígua i̱ hai buwa handa walia naholeberami. I̱ poleberogoha tí haruru naibabehe kami, lene.
JOH 7:35 Ani layago hale howa Yu wali agali haru haga haguane hearume tini dege dege la la bialu lalu, I̱ handa walia naholeberami lalu kago ibu aniha pole howa lalu kabe. Ina aria maru Girigi dindi tara taraha purogolo karu uruni karia puwa Girigi wali agalihondo mana lawai hole pole howa larabe.
JOH 7:36 Ibugua lalu, Tígua i̱ hai buwa handa walia naholeberemi, layagobi, I̱ poleberogoha tí haruru naibabehe, layagobi irane agi manda bialu layabe, lene.
JOH 7:37 Horo timbuni ngoai hayaru hamaro biyangi Yasu heyuwa tihondo dalimu lalu, Mbirali iba noa kamiyagua i̱ koria ibalimu.
JOH 7:38 Anduane Homogonaga mbugani lo ngago ogo, I̱hondo mini mbiraore wu karu tinaga gubaliniha howa haabo holene iba miagane duguabo holebira, lalu gilibu nga, lene.
JOH 7:39 Ibugua bi ogoni layago wali agali ibuhondo mini mbiraore wu hararu tihondo maha Ngode Datagaliwabe Dinini mulebira manda buwa lene. Ogoningi Ngode Datagaliwabe Dinini naibinigo irane Yasu ibu wá taraore holeneha mo yaraga nahe henegome ani lene.
JOH 7:40 Ibugua bi ogoni layago hale howa wali agali marume lalu, Ngode Datagaliwabe Mana Latagi Haga Mbirali ibulebira lo ngago agali ogoni ibuoreda, lene.
JOH 7:41 Marume lalu, Mbirali Dabo Helenego ogoni íbu kaoreda, lene. Marume lalu, Mbirali Dabo Helenego Galili dindi howa naibulebira.
JOH 7:42 Anduane Homogonaga mbugani lo ngago, Mbirali Dabo Helenego ibu handame haga kini Debidi aguanene holebira, lalu, Debidinaga dindi Bedelehemeni taba honolebira, lalu gilibu nga, lene.
JOH 7:43 Wali agali bu hearume ani laga laga bialu Yasu ai kabe manda nabi howa talebu ki bini.
JOH 7:44 Marume ibu minule manda binigo ti mbiralime gi yade halu mina nabi wahene.
JOH 7:45 Ani biyagola mamage haga agali biarume Yasu minule ibinigo mina nabi helalu Perisi agali hearubi loma binigo mo miaga haguane hearubi ti hearia dai bini. Dai biyagola tigua tihondo lalu, Agi biyagola wahalu ibu helalu ibirimibe, lene.
JOH 7:46 Ani layagola mamage haga biarume ladai bialu lalu, Agalime nalagagodagua layago hale halu ibirima, lene.
JOH 7:47 Ani layago hale howa Perisi agalime ladai bialu, Ibugua tíbi mo guya haya handala lulu yalu ibirimibe.
JOH 7:48 Ina Yu wali agali haru haga mbiramebi Perisi agali mbiramebi ibuhondo mini mbiraore wu hemaria handarimibe.
JOH 7:49 Wali agali urunime Mosese heneyangi Mana lowini ngago manda nabi kago tihondo Ngode Datagaliwabehanda, Tandaga nama pobe, lolene wulebira, lene.
JOH 7:50 Perisi agali mbira Nigodimusi Yasu hearia bamba penego ibugua ibuni aria biaruhondo lalu,
JOH 7:51 Inanaga Mana lowini ngadagua mbirali ibugua biyadago hale nahe howa pani mia nalaramali, lene.
JOH 7:52 Ani layagola tigua ibuhondo ladai bialu lalu, Í̠bi Galili howa ibini dege kebe. Anduane Homogonaga mbugani lo ngago handalu Ngode Datagaliwabe mana latagi haga mbira Galili howa ibulebira lalu gilibu ngaria handa walia naholeberego, lene. [
JOH 7:53 Ani lalu ti bibahende andaga purogo lene.
JOH 8:1 Yasu ibu Hari Olibe heagoria pene.
JOH 8:2 Egerebalene ibu Anduane Homogonaga andaha dai buwa ibu hearia wali agali dewaore íbu ngoai hayagola Yasu ibugua biruwa ti lawai halu hene.
JOH 8:3 Mana lowinigo lawai haga hearubi Perisi agali hearubi tigua wali mbira kayu bialu hearia handa walia howa Yasuhanda mana lawai halu berearia wali ogoni minu yalu ibini. Minu yalu ibuwa dombeni helowa
JOH 8:4 tigua ibuhondo lalu, Lawai haga-o wali ogoni kayu bialu hearia handa walia howa minu yalu ibirima.
JOH 8:5 Inanaga Mana lowinigo ngagome, Mosesehanda lalu, Wali ogoni ale biagago homelo ege to̱le̱me balimu, lalu gilibu ngago í̠na au loleberebe, lene.
JOH 8:6 Tigua ibu kagua laya lolenaga bi ko mbira lelo manda buwa mo la halu hene. Ti ani lalu helowa Yasu ibu ge dayama biruwa ibunaga gi hondoneme dindini gili bialu berene.
JOH 8:7 Tigua ibuhondo layadagua loyane yane bialu haabo hayagola ho tiga buwa ibu tihondo lalu, Tí agali ko mbira nabiaga bayaleore mbira kamigome wali o kagoni homelo to̱le̱ pigane í̠na babe, lene.
JOH 8:8 Ani lowa ibu lone ge dayama biruwa dindini gili bialu berene.
JOH 8:9 Bi ogoni layago hale howa ti lo hende mbira pugu bialu agali wahe hearu ala pu yola halu maha igiri hearu pu yola hai halu piai hene. Yasubi wali biagobi libu hangu hene.
JOH 8:10 Yasu ho tiga buwa ibu wali biago hangu hearia de hondowa lalu, Wali-o í̠ haru ibiyaru abiyabe. Í̠ pani ngulene mbirali nahedabe, lene.
JOH 8:11 Wali biagome lalu, Agali timbuni-o mbirali nahe, lene. Ani layagola Yasuhanda ibuhondo lalu, I̱nabi í̠ pani nanguleberogo pu. Í̠na ko lone nabibe, lene.]
JOH 8:12 Maha Yasuhanda Perisi agaliruhondo lone lalu, Dindi bibahendeni karunaga wá holene i̱ kogo. Wali agali i̱ porodagua talima ibiraru arumaha nape holene gahengenaga wá holene yu ibaga bu holebira, lene.
JOH 8:13 Ani layago hale howa Perisi agalirume ibuhondo lalu, Í̠ni birigonaga í̠nime latagi halu lama ibaga bialu kego henene larebe ina manda nabi kama, lene.
JOH 8:14 Ani layagola Yasuhanda tihondo ladai bialu lalu, I̱na birugo i̱nime latagi halu langialu kogo heneneore langialu ko laro. I̱ni hangume i̱ ogoria howa ibirugoni ai ogoha pole kogoni manda bu ko. Tígua i̱ agoha howa ibini kabe agoha pole kobe tí manda nabi kamigoni.
JOH 8:15 Tígua agalime daba ki biagadagua beramili. I̱na mbirali daba ki nabiruli.
JOH 8:16 I̱na mbirali daba ki biruyagua heneneore hondowa bulebero. Irane i̱ni hangu ndo kogoni. I̱ Abahanda i̱ pu layago iya haru kabagoni.
JOH 8:17 Tínaga Mana lowini ngagome lalu, Mbiralime layadagua dege mendealime layagua heneneore lara manda bilimu, lalu gilibu nga.
JOH 8:18 I̱ni birugo latagi hagane i̱ni kogo. Mende i̱ Aba i̱ pu layago ibugua i̱ni birugo latagi haga ka, lene.
JOH 8:19 Ani layago hale howa tigua ibuhondo lalu, Í̠ Aba agoha kabe, lene. Ani layagola Yasuhanda ladai bialu lalu, I̱bi i̱ Ababi tí manda nabi kami. I̱ ogo kalo manda bidamile i̱ Ababi manda bidamile, lene.
JOH 8:20 Yasuhanda Anduane Homogonaga anda loma muni wiaga hobane mbiraha howa bi ogoni lalu hene. Tigua ibu minule manda bu henego ibunaga horo ogoningi ndo hayagola mina nabi wahene.
JOH 8:21 Ani lowa Yasuhanda tihondo lone lalu, I̱ pole kogo porogola tígua i̱ hai buleberami. Hai bialu tínaga ko birimigo nadome wiaabo ka handala tíni homoleberami. I̱ poleberogoha tí haruru naibabehe kami, lene.
JOH 8:22 Ani layago hale howa Yu wali agali haru haga biarume lalu, Ibugua i̱ poleberogoha tí haruru naibabehe kami layago ibunime ibuni bo wahole howa lalu ka mbauleda, lene.
JOH 8:23 Yasuhanda tihondo ladai bialu lalu, Tí dindini hene kami. I̱ daliga howa ibini ko. Tí dindi ogoriani hene kamigo i̱ dindi ogoriani hene ndo ko.
JOH 8:24 Irane ogonigo i̱na tínaga ko birimigoni nadome wiaabo kaore tíni homoleberemi larugo. Tígua tíni minime I̱ I̱ni Haluhe Henego Haabo Hole Kogo tí manda nabi mini mbiraore nawi haabo harimiyagua tí ko bialu kamigoria howa homai holeberami, lene.
JOH 8:25 Ani layago hale howa tigua ibuhondo lalu, Í̠ ai howa lalu kebe, lene. Yasuhanda tihondo ladai bialu lalu, I̱ ogo ko lalu bamba piganeore howa langialu harugoni.
JOH 8:26 Tígua bialu kamigo i̱na langulenebi dabolenebi dewa mo yai ko. I̱ pu layago ibu henene kago ibugua la laradagua hangu dindi bibahendeni kamiruhondo langialu kogoni, lene.
JOH 8:27 Ani layagola tigua ibu Aba ka lalu langira manda nabi hene.
JOH 8:28 Manda nabi heagola Yasuhanda tihondo lalu, Áyu manda nabi kamigo maha Agali Hole Ibiyago tígua mo yaraga haramingi I̱ I̱ni Haluhe Henego Haabo Hole Kogo manda buleberami. I̱ni hongoni howa mbira nabiaga i̱ Abahanda labe lenedaguaore laga henedalo manda buleberami.
JOH 8:29 I̱ pu layago iya haru haabo kaba. I̱na ibugua hameledadagua hangu biaabo haruligo i̱ hangu helalu ibu napiaga ka, lene.
JOH 8:30 Ani layago hale howa wali agali dewalime ibuhondo mini mbiraore wini.
JOH 8:31 Yasuhanda ibuhondo mini mbiraore wiyaruhondo lalu, I̱na bi lalu kodagua bialu harimiyagua i̱naga talima ibagane wali agali heneneore holeberemi.
JOH 8:32 Tígua henene lolene manda biai holeberami. Ani beramigola henene loleneme tí golope hai holebira, lene.
JOH 8:33 Tigua ladai bialu lalu, Ina Abarahama aguanene hama ibinigo kama. Ina mbiralinaga garabaya biabe ale bia nahene kamago golope hai holebira larigoni agua laribe, lene.
JOH 8:34 Ani layagola Yasuhanda tihondo lalu, I̱na tíhondo heneneore larogo. Wali agali ko bialu karu ti ko bulenenaga garabaya biabe ale bia haga ka.
JOH 8:35 Garabaya biabe ale bia hagane kago ibu anduane andaga haabo nahaga. Aba igini henene kago ibu dege abala haabo haga ka.
JOH 8:36 Ngode Datagaliwabe igini ogoni ibugua tí golope hayagua tí golope heneore holeberami.
JOH 8:37 Tí Abarahama aguanene hama ibinigo kama larimigo i̱ manda bido. I̱na bi mana lawai haruligo tígua tínaga miniha nayami kamigo howa i̱ homelo bole manda bu kami.
JOH 8:38 I̱na i̱ Abahanda walia hayaru langialu kogo tígua tí abahanda bilimu layadagua bialu kami, lene.
JOH 8:39 Ani layagola tigua ladai bialu lalu, Ina aba Abarahama hene, lene. Yasuhanda tihondo lalu, Tí Abarahama waneigini heneneore kamile Abarahamahanda binidagua tígua bialu kamile.
JOH 8:40 I̱na langialu harugo Ngode Datagaliwabehanda bi henene i̱hondo langiyago tí langulenaga lalu kogola tígua i̱ homelo bole manda bialu kami. Ogonidagua Abarahamahanda nabiaga hene.
JOH 8:41 Tí abahanda biagadagua bialu kami, lene. Ani layagola tigua ibuhondo lalu, Ina Aba mbiraore Ngode Datagaliwabe ibuni dege kago ibu igini heneneore ina kamagoni, lene.
JOH 8:42 Ani layagola Yasuhanda tihondo lalu, Tí Aba heneneore Ngode Datagaliwabe ibuni kale i̱ Ngode Datagaliwabe howa íbu ka manda buwa tígua i̱hondo gubalini ho kamile. I̱ni hangu manda bialu ndo ibugua pu layagola íbu kogo.
JOH 8:43 I̱na tíhondo bi langialu kogo manda nabi kamigo irane agibe. Irane tígua i̱naga bi mana hale hoa nahe kamigome.
JOH 8:44 Tí aba dama Heyolabe waneigini kamigo ibugua bia laradagua bua howa bialu kami. Piganengiore howa ibu bo wahaga henego áyubi bo wahalu haabo kagoni. Ibuha henene lolene mbira nawi howa ibu henene lolenehayagi nahaga ka. Ibu ke̱ hagane howa ibunaga mini ogoni ka. Ke̱ hagane tene ibu howa ke̱ hagane bibahendenaga ababi ibu ka.
JOH 8:45 Anigo i̱na tíhondo henene hangu langialu kogo hale howa tígua i̱hondo mini mbiraore nawi kamigoni.
JOH 8:46 I̱na ko mbira biruria de hendene mbirali ai kamibe. Nahe ogoniyagua i̱na tíhondo heneneore langialu kogola tígua i̱hondo mini mbiraore nawi kamigo irane agibe.
JOH 8:47 Mbirali ibu Ngode Datagaliwabeha howa íbu kayagua ibugua Ngode Datagaliwabenaga bi hale hagane ka. Tígua Ngode Datagaliwabenaga bi hale nahagane kamigo tí Ngode Datagaliwabeha howa ndo kamigoni, lene.
JOH 8:48 Tigua Yasuhondo ladai bialu lalu, Iname lalu í̠ Samaria agali dama daraga ho ke laramago henene ndo laramabe, lene.
JOH 8:49 Ani layagola Yasuhanda ladai bialu lalu, I̱ dama daraga naheore ko. I̱na i̱ Aba mitangi bialu ibu mini mo yaraga halu kogola tígua i̱ mege bialu kami.
JOH 8:50 I̱na i̱ni mini mo yaraga holene manda nabi ko. Mbirali kago ibugua i̱ mini mo yaraga holene hai bialu i̱hayagi dabalu ka.
JOH 8:51 I̱na tíhondo henene larogo. I̱naga bi mana lawai haruligo hale halu bialu karu ti homolene nawulebira, lene.
JOH 8:52 Ani layago hale howa tigua ibuhondo lalu, Í̠ dama daraga ke larimago heneneore larimada. Abarahama ibu homene. Ngode Datagaliwabe mana latagi haga henerubi homene. Í̠na lalu i̱naga bi mana lawai haruligo hale halu bialu karu ti homolene nawulebira larigo.
JOH 8:53 Ina aba Abarahama homenego í̠ ibu ale ndo í̠ agali daligaore kebe. Ngode Datagaliwabe mana latagi haga henerubi homenego í̠ ai ale hole manda bu kebe.
JOH 8:54 Yasuhanda ladai bialu lalu, I̱na i̱ni mini mo yaraga halu kole habane ndo mbira o birarunida ledamile. I̱ mini mo yaraga haga i̱ Aba ibugua. I̱ Aba tígua lalu tíninaga Ngode Datagaliwabe ibu ka lalu kamigo.
JOH 8:55 Tígua ibu manda bidama lalu kamigo manda nabiore kami. I̱na dege ibu manda bu ko. I̱na ibu manda nabi ko ledole i̱bi ke̱ hagane tí ale kole. I̱na ibu manda buwa ibugua bia larago biai halu ko.
JOH 8:56 Tí aba Abarahamahanda i̱ ibulene tu de hondole lowa turu halu hondo haabo henego. Ibiyago hondowa turu hene, lene.
JOH 8:57 Ani layago hale howa tigua ibuhondo lalu, Í̠ mali pira duria (50) agimabi ndo o kegodago Abarahama hendene kebe, lene.
JOH 8:58 Ani layagola Yasuhanda ladai bialu lalu, I̱na tíhondo heneneore laro. Abarahama naheha I̱ Haluhe ko, lene.
JOH 8:59 Ani layago hale howa tigua ibu homelo bole ege to̱le̱ miya handala Yasu ibu o biagoniha howa ho bilibale bialu Anduane Homogonaga anda howa tagira pene.
JOH 9:1 Yasu pialu hearia agali mbira ibu ai̱yahanda de kohe ogonibi taba henenego de kohe haabo heago de hendene.
JOH 9:2 Ibunaga talima piaga biarume ibuhondo lalu, Lawai haga-o agali ogoni de kohe henedago ibuni ko biyagonaga pani nalu de ko henedabe be ibu aba ai̱yalame ko biyagonaga pani nalu de ko henedabe, lene.
JOH 9:3 Ani layagola Yasuhanda ladai bialu lalu, Ibuni ko biyagonagabi ibu aba ai̱yalame ko biyagonagabi pani ndo. Ngode Datagaliwabenaga hongo ibuni howa walia helonaga de ko hene.
JOH 9:4 Áyu wá kangi i̱ pu layagonaga biabe bialu hami̱ya. Aruma holene tagira ibirangi biabe bulene henge nawulebira.
JOH 9:5 I̱ dindini kongi dindi bibahendeni karunaga wá holene i̱ ko, lene.
JOH 9:6 Ani lowa Yasu ibu hamiaga dindini tolope howa dindi wiago gime mo waru howa agali de kohe biagonaga deni yiyu lalu howa ibuhondo lalu
JOH 9:7 Sailoama Iba bedagoria í̠naga de domole pu, lene. Sailoama inanaga bi lalu, Pu lene. Ibugua layadagua domo pialu dai bialu dengala ho yalu dai bini.
JOH 9:8 Dai biyagola ibula handa a̱i̱ na̱i̱ paliagarubi ibu tomo muniru ngi laabo halu berearia de hendene wali agali hearubi tigua lalu, Agali de kohe tomo muniru ngi laabo halu biraraligo agali ogoni ndoyagodabe, lene.
JOH 9:9 Marume, O biagonioreda, lene. Marume, O biagoni aleda, lene. Ani layagola agali biago ibunime lalu, I̱ agali o biagoniore kogoni, lene.
JOH 9:10 Tigua ibuhondo lalu, Í̠naga de agua buwa bayale hayabe, lene.
JOH 9:11 Ani layagola ibugua ladai bialu lalu, Agali mbira mini Yasu ibugua dindi mo waru howa i̱naga deni yiyu lowa lalu, Í̠naga de Sailoama Iba bedagoria domole pu, layagola domo pirugola dengalalu bayale haya, lene.
JOH 9:12 Tigua ibuhondo lalu, Áyu agali ogoni ibu agoha kabe, lene. Ani layagola ibugua lalu, Ibu agoha piyabe i̱ manda nabido, lene.
JOH 9:13 Wali agali biarume agali de mo baya hayago Perisi agaliru hearia haru pene.
JOH 9:14 Yasuhanda mo waru howa ibunaga de mo baya hayago Sabada horongi mo baya hene.
JOH 9:15 Perisi agali tigua ibuhondo lalu, Í̠naga de agua buwa bayale hayabe, layagola ibugua tihondo lalu, Agali mbirame i̱naga deni warume yiyu laya ogoni domarugola dengala henego bayale handalu ko, lene.
JOH 9:16 Ani layago hale howa Perisi agali marume lalu, Agali ogoni Ngode Datagaliwabe howa ibini ndoda. Sabada horo mitangi nabi howa puguayada, lene. Marume lalu, Ibu ko biaga kale ibugua agalime nabiagane ale gibi o biyadagonidagua bibehe kalebe, lene. Ani layagola ti talebu ki hene.
JOH 9:17 Ani bialu howa Perisi agalirume agali de ko hene biagohondo lone lalu, Í̠naga de mo ngala hayadago manda buwa ibu agi biaga agali ka manda bu kebe, lene. Ani layagola ibugua ladai bialu lalu, Ibu Ngode Datagaliwabe mana latagi haga ka manda bido, lene.
JOH 9:18 Ibu ai̱yahanda de kohe ogonibi taba henenego ayure mo dabi haya layago Yu wali agali haru haga biarume hale howa ke̱ harabe toba howa ibu ai̱ya abala ibilo olene.
JOH 9:19 Ibiyagola tigua libuhondo lalu, Libu igini de kohe taba henene larabiligo ogonibe. Ibuyagua de bayale howa handalu kago agua hendenebe, lene.
JOH 9:20 Ani layagola ibu ai̱ya abalame ladai bialu lalu, Iyanaga igini ogoni de koheore taba henenego manda bu kaba.
JOH 9:21 Ibu áyu de bayale howa handalu kago agua buwa bayale halu handayabe aiwa mo ngala hayabe iya manda nabi kaba. Ibu miniwi kago ibuni tí langulebirago ibunihondo hale hadaba, lene.
JOH 9:22 Ibu ai̱ya abalame Yu agali hondowa gi ho howa ani lene. Yu wali agali haru haga tigua ala lalu, Mbiralime Yasu ibu Mbirali Dabo Helenego íbu ka lalu latagi hayagua iname agali ogoni ngoai hagane andaha howa bo ba tagi halu puabo heloleberama, lene.
JOH 9:23 Ani lenego manda buwa ibu ai̱ya abalame gi howa lalu, Ibu miniwi kago ibuni langulebirago ibunihondo hale hadaba, lene.
JOH 9:24 Yu agali tigua agali de kohe hene biago halu mende olowa lalu, Í̠ Ngode Datagaliwabe deni howa bi henene lolebero labe. Ina agali ogoni ko biaga ka manda bidamago, lene.
JOH 9:25 Ibugua ladai bialu lalu, Ibu ko biaga kabe nabiaga kabe i̱ bayuwa manda nabido. I̱ mbira dege manda bidogo langero. I̱ de ko haabo henego ibugua mo dabi hayagome áyu de handalu kogoni, lene.
JOH 9:26 Tigua ibuhondo lalu, Ibugua í̠hondo agi biyabe. Í̠naga de ko henego agua mo ngala hayabe, lene.
JOH 9:27 Ibugua ladai bialu lalu, Tíhondo abale langirugo hale naharimibe. Lone gonana bialu haabo kamigo agi. Tíbi ibunaga talima piaga dege holenaga lalu kamibe, lene.
JOH 9:28 Ani layagola tigua ibu mege bialu lalu, Ibunaga talima piaga í̠ kego ina Mosesenaga talima piaga kamago.
JOH 9:29 Ngode Datagaliwabehanda Mosesehondo bi laminigo ina manda biai kamago. Agali ogoni ibu ani howa ibinibe ina manda nabi kama, lene.
JOH 9:30 Ani layagola ibugua ladai bialu lalu, Aya. Ibugua i̱naga de mo ngala haya hondowa ibu ani howa ibiyabe tí manda nabi kamigoni.
JOH 9:31 Ko biaganaga bi Ngode Datagaliwabehanda hale nahagane manda bidama. Mbiralime Ngode Datagaliwabehanda hame ledadagua bialu ibu mini yaraga hayagua ogoninaga bi ibugua hale hagane manda biai kama.
JOH 9:32 Dindi ogo pigane wabiniyangi howa mbiralime mbiralinaga de ko henego mo ngala haya lalu mbira layaria hale nahe harimago.
JOH 9:33 Agali ogoni Ngode Datagaliwabe howa ibini ndo kale ibu mbira bibe nahe kale, lene.
JOH 9:34 Ani layagola tigua ibuhondo ladai bialu lalu, Í̠ ai̱yahanda í̠ koha howa taba hanayagola koha howa anda ho daga hene kego. Í̠ aleme ina lawai hole manda berebe, lene. Ani lowa tigua ibu ngoai hagane andaha howa bo ba tagi hene.
JOH 9:35 Ani bo ba tagi haya layago hale howa Yasu ibugua agali biago hearia puwa lalu, Agali Hole Ibiyagohondo mini mbiraore wu kebe, lene.
JOH 9:36 Ibugua ladai bialu lalu, Agali timbuni-o ibu ai kabe mini mbiraore wuliya langi, lene.
JOH 9:37 Yasuhanda ibuhondo lalu, Í̠na ibu de hendedegoni. Ibugua áyu í̠la bi laragoni, lene.
JOH 9:38 Ani layagola ibugua lalu, Anduane-o i̱na í̠hondo mini mbiraore wero, lowa Yasu buhayagi ibu ge duli hanga ho berene.
JOH 9:39 Yasuhanda lalu, I̱na wali agali daba ki bule dindini íbu kogoni. De kohe karu de hendelo de handaga karu de ko helo ogoninaga íbu ko, lene.
JOH 9:40 Ani layago Perisi agali maru hale ho hearume ibuhondo lalu, Inabi de kohe dege kamane hondowa laribe, lene.
JOH 9:41 Yasuhanda tihondo lalu, Tí de kohe kamile tínaga ko nangalego tígua lalu, Ina de handaga kama, lalu kamigome tínaga ko wiaabo kagoni, lene.
JOH 10:1 Yasuhanda lalu, Tíhondo heneneore laro. Mbirali nogo sibi anda panga dugualu anda nape howa leneha iraga halu anda piagago ibu ohowa page biagane agalibi page bule bo wahagane agalibi ka.
JOH 10:2 Panga dugualu anda piagago ibu nogo sibi haru hagane agali ka.
JOH 10:3 Ibu anda ibilo panga mamage hagane agalime panga duguaga. Nogo sibi haru hagane ogonime ibuninaga nogo sibi hangu hangu mini olaragola tigua hale howa ibu poradagua haruru piaga.
JOH 10:4 Ibunaga nogo sibi haru tagira puwa ti maha ibilalu ibuni ala bamba halu piaga. Nogo sibime ibunaga bi manda buwa haruru piaga.
JOH 10:5 Agali taranaga bi hale halu haruru nape agali tarame olara manda bialu ibida piai haga.
JOH 10:6 Yasuhanda tihondo bi yobage ogonidagua lamiyagola tigua irane manda nabi hene.
JOH 10:7 Ti manda nabi heago hondowa Yasuhanda halu mende lalu, Tíhondo heneneore laro. Nogo sibinaga panga i̱ kogoni.
JOH 10:8 I̱ naibiwaha ala bamba halu ibiniru ti bibahende ohowa page biagane agalibi page bule bo wahagane agalibi ibini. Tinaga bi nogo sibime hale nahaga hene.
JOH 10:9 Panga i̱ kogoni. I̱ kogoria anda ibirago pele mulebero. Pele merogola anda íbu tagira pu bialu howa tani bayale handa walia holebira.
JOH 10:10 Pagebibime page bulebi bo waholebi mo ko holebi hangu ibaga. I̱na tíhondo holene gahenge ngule íbu kogoni. Holene gahenge tíha to̱lo tagi helo ngule íbu kogoni.
JOH 10:11 Nogo sibi haru hagane bayale i̱ kogo. Nogo sibi haru haga bayale ibugua ibunaga nogo sibi nahomelo ibuninaga holene pela holebira.
JOH 10:12 Nogo sibi anduane ndo agali yolo hangu mitangi buwa haru haga kagome biango dudume nogo sibi bo nole ibira handala hondowa ibuni ibida piaga. Ibida poragola biango dudume nogo sibi hanu tali togo laga.
JOH 10:13 Nogo sibi anduane ndo howa yolo hangu mitangi buwa haru hagame nogo sibi mitangi nabi howa ibu ibida piaga.
JOH 10:14 Nogo sibi haru hagane bayale i̱ kogo. I̱ Abahanda i̱ manda bia i̱nabi ibu manda bia bu kabadagua i̱naga nogo sibi mbira embeda nahe manda biai ho ko. Tiguabi i̱ manda biai ho ka. I̱na ti nahomelo i̱ninaga holene pela holebero.
JOH 10:16 Nogo sibi anda o kagoha karunaga hangu ndo i̱naga nogo sibi maru tagiraha tara hama pedago tibi i̱na haru ibua ho ko. Haru eberogola tiguabi i̱naga bi hale howa ti mandagi mbiraore halu ale ha nogo sibi haru hagane mbiraore holebira.
JOH 10:17 I̱na i̱naga holene pela holeberogobi pela howa lone karuloleberogobi mitangi buwa i̱ Abahanda i̱hondo gubalini timbuniore ho ka.
JOH 10:18 Mbiralime i̱naga holene nayamulebira. I̱ni peloa howa pelolebero. Pelolenebi lone karulolenenagabi hongo yu kogo. I̱ Abahanda i̱hondo bibe lenedaguaore laro, lene.
JOH 10:19 Ibugua ani layago hale howa wali agali hearu lone talebu ki buwa
JOH 10:20 ti dewalime lalu, Ibu dama daraga ho howa lulu bi lalu kagodago agi bule hale haramibe, lene.
JOH 10:21 Marume lalu, Ibugua bi lalu kago dama daragaheme lagadagua ndo lara. Damame wali agali de kohe de hendelo mo bayale hagabe, lene.
JOH 10:22 Ira yuni gilope howa dagare biagane hororu hayagola Anduane Homogonaga anda Loma Bia Henegonaga horo hayangi Yarusalemeni ngoai ho hene.
JOH 10:23 Anduane Homogonaga andaha anda polene bugu hama mbira mini Solomononaga laga wiagoriani Yasu ibu pialu hearia
JOH 10:24 Yu wali agali ti ngoai howa Yasu ho mabu buwa lalu, Í̠ni ogo ko lalu inahondo angi languleberebe. Í̠ Mbirali Dabo Helenego íbu keyagua tiga tiga latagi halu langiai ha, lene.
JOH 10:25 Ani layagola Yasuhanda tihondo ladai bialu lalu, Bamba i̱na langiai harugo tí yu tiga nabi haabo kami. I̱ Abanaga hongoni howa biabe bialu kogome i̱ tí walia haragoni.
JOH 10:26 Tígua i̱na biabe bialu kogoni de hondowa i̱hondo mini mbiraore nawi kamigo i̱naga nogo sibi ndo kami.
JOH 10:27 I̱naga nogo sibi karu i̱ni manda bido. Tigua i̱naga bi hale howa i̱ talima ibaga.
JOH 10:28 I̱na ti mitangi bialu tihondo haabobo holene miruligo ti haabo howa nahomolebira. I̱na ti i̱naga gime yani ho kogola mbiralime gingila mibe nahe holebira.
JOH 10:29 Bibahende dindini ngaru emene nira lowa i̱ Abahanda i̱hondo ngiyaru ti duniniore ka. Anigo ibunaga gime yani ho kagola mbiralime gingila mibe naheore ka.
JOH 10:30 I̱ Aba i̱bi iya mbiraore kaba, lene.
JOH 10:31 Ani layago hale howa Yu wali agali tigua ibu ege to̱le̱me bole to̱le̱ lone mini.
JOH 10:32 Ani miyagola Yasuhanda tihondo lalu, Abahanda bia layadagua bialu ti hendedamiore i̱na bayale dewa bialu harugo ago birugonaga i̱ bole kamibe, lene.
JOH 10:33 Tigua ladai bialu lalu, Í̠na bayale bigi birigonaga ndo Ngode Datagaliwabe mege birigonagabi í̠ agali howa í̠ni mo Ngode Datagaliwabe bu hinarigonagabi iname í̠ ege to̱le̱me bole kama, lene.
JOH 10:34 Yasuhanda ladai bialu lalu, Tínaga Mana lowinigo ngagome, Ngode Datagaliwabehanda tí Daligaorene Daliganaga waneigini dege kami, lalu gilibu nga ndobe.
JOH 10:35 Anduane Homogonaga mbugani lo ngago bibahende henene wiaabo holebira manda bu kama. Ngode Datagaliwabenaga bi wali agalihondo laminiru o biaruhondo, Tí Ngode Datagaliwabe waneigini kami, lene ndobe.
JOH 10:36 I̱ Abahanda mbirali ibunaga helo loma bia howa dindini ibilenego i̱ kogome, I̱ Ngode Datagaliwabe Igini ko, lalu kogola tígua í̠na Ngode Datagaliwabe mege bialu ke larimigo irane agibe.
JOH 10:37 Abahanda biabe ogoni bia laradagua i̱na nabi koria handarimiyagua i̱hondo mini mbiraore nawilimu.
JOH 10:38 I̱naga bi hale howa mini mbiraore nawirimiyagua i̱ha Aba kagobi i̱ Abaha i̱ kogobi manda bilimulonaga biabe i̱na beroru handalu tí mini mbiraore wulene nga, lene.
JOH 10:39 Ani layago hale howa tigua ibu minule biyagola ibu pu yola halu pene.
JOH 10:40 Yasu ibu Iba Yodana lone domalu ange ederayagi Yonehanda pigane baboraya bialu henegoria pu hene.
JOH 10:41 Ani pu hearia wali agali dewa íbu ngoai howa tigua lalu, Yonehanda agalime nabiagane ale mbira nabi hayago agali ogome maha ogodagua bulebira, lalu Yone ibugua layaru uruni henene lola haiore haragoni, lalu
JOH 10:42 dewalime Yasuhondo mini mbiraore wini.
JOH 11:1 Bedani tanoni Meri ibu hagibuni Madala berearia agali mbira mini Lasarasi warago bo wini.
JOH 11:2 Meri ogoni ibugua Anduane Homogonaga geni weli baya taraore ngabime odo wialu howa ibunaga mandarime domene berenego ibunaga mbalini Lasarasi warago bo wini.
JOH 11:3 Warago bo wiyagola ibu mbalini biago labome Yasu hearia bi lawia halu lalu, Anduane Homogo-o agali í̠ nenege biago warago bo nga, lalu lawia hene.
JOH 11:4 Ani layiyago hale howa Yasu ibugua lalu, Warago ogoni Lasarasi homelonaga ndo. Wali agalime Ngode Datagaliwabe mini yaraga helobi Ngode Datagaliwabe Igini mini yaraga helobi ogoninaga warago bo nga, lene.
JOH 11:5 Yasuhanda Madabi ibu hagibunibi Lasarasibi gubalini ho haga hene.
JOH 11:6 Lasarasi warago bo nga layiyago hale howa Yasu ibu heagoriani horo kira ho hondo ho hene.
JOH 11:7 Ani buwa ibugua ibunaga talima piaga biaruhondo lalu, Ina Yudia dai bima, lene.
JOH 11:8 Ibunaga talima piaga biarume ibuhondo ladai bialu lalu, Lawai haga-o ayure dege agalime í̠ ege to̱le̱me bole biyagoha í̠ lone dai bule manda buwa larebe, lene.
JOH 11:9 Ani layagola Yasuhanda ladai bialu lalu, Horo mbirunaga ni tagira ibiragola howa aruma helo wá haabo haga ndobe. Horombeni agali ibagabu hayagua ibu dindi ogonaga wá kago de hendedago pilolene nawi.
JOH 11:10 Mbiraga agali ibuniha wá holene nawi howa ibagabu hayagua pilolene nga, lene.
JOH 11:11 Yasuhanda ani lowa lalu, Ina hamene Lasarasi ibu padago i̱na pialu mo barila holebero, lene.
JOH 11:12 Ibunaga talima piaga biarume ladai bialu lalu, Anduane Homogo-o ibu padayagua dabi holebira, lene.
JOH 11:13 Yasuhanda ibu tongolo miya manda buwa lenego tigua ibu u henene pada lalu layabe toba howa ani lene.
JOH 11:14 Ani layagola Yasuhanda tihondo tiga tiga lalu, Lasarasi homo tongolo miya.
JOH 11:15 Ina dindi taraha hemaria tongolo miyago tígua i̱hondo mini mbiraore wilimulonaga manda buwa turu ko. Ai ibu hora kagoria ma, lene.
JOH 11:16 Ani layagola Tomasa ibu ka̱i̱ mini Hono Palu ibugua talima piaga maruhondo lalu, Inabi ibu heba homami̱ya ma, lene.
JOH 11:17 Yasu anda ibiyagola Lasarasi horo tebiru hora ho hene lowa horo maneni anda ibini.
JOH 11:18 Yarusaleme howa Bedani polene hariga lunaga magi kilomida tebira ale wini.
JOH 11:19 Yudia wali agali dewalime Meri Madala libu mbalini homayagonaga dugu bialu biraabo hayagola dara holene embeda helo bi lamule íbu ngoai hene.
JOH 11:20 Yasu ibira layago hale howa Meri andaga berelalu Mada ibu harigani lola hole pene.
JOH 11:21 Lola howa Madahanda Yasuhondo lalu, Anduane Homogo-o í̠ oali henedale i̱ mbalini nahomedale.
JOH 11:22 Áyubi í̠na Ngode Datagaliwabehondo mbira bia lariyagua ibugua bulebiraore manda bido, lene.
JOH 11:23 Yasuhanda ibuhondo lalu, Í̠ mbalini homayago heyulebira, lalu lamini.
JOH 11:24 Ani layagola Madahanda ibuhondo lalu, E̱ hamaro bulene horo harangi ibu mo heya holebira manda bido, lene.
JOH 11:25 Ani layagola Yasuhanda ibuhondo lalu, Mo heya holenebi holene gahengebi tene i̱ kogoni. Mbirali i̱hondo mini mbiraore wu henego homayaguabi ibu holebira.
JOH 11:26 Mbirali nahome kagome i̱hondo mini mbiraore wu kago ibu nahomolebira. Heneneore laralo manda buwa mini mbiraore ngebe, lene.
JOH 11:27 Ani layagola Madahanda ibuhondo lalu, E̱ Anduane Homogo-o í̠ Mbirali Dabo Helenego Ngode Datagaliwabe Igini dindini ibulebira lowinigoore ke manda buwa mini mbiraore wu bedo, lene.
JOH 11:28 Ani lalu Mada dai buwa ibu hagibuni Meri hendore olowa lamialu lalu, Lawai haga biago ibuwa í̠ íbu layago pu, lene.
JOH 11:29 Ani layago hale howa Meri ibu abale heyalu Yasu hearia pene.
JOH 11:30 Yasu ibu tano anda íbu nabi wene Mada lola hayagoria dege hene.
JOH 11:31 Meri dugu biaabo hayagola dara holene embeda helo bi lamule wali agali ibiyarume ibu piyago hondowa hora hayagoria howa dugu bule pora manda buwa haruru pene.
JOH 11:32 Meri Yasu heagoria puwa ibunaga geha bulu paluwa ibuhondo lalu, Anduane Homogo-o í̠ oali henedale i̱ mbalini nahomedale, lene.
JOH 11:33 Merihandabi wali agali haruru ibiyarumebi dugu biai hayago de hondowa Yasu ibu miniha dara timbuni howa bu mini gengedai hene.
JOH 11:34 Gengedai howa lalu, Tígua ibu agoria hora kamibe, lene. Tigua ladai bialu, Anduane Homogo-o hora kamago de handami̱ya ma, lene.
JOH 11:35 Hondo puwa Yasu ibubi dugu bini.
JOH 11:36 Dugu biyago hondowa wali agali biarume lalu, Lasarasi gubalini au ho heneda handa naberami, lene.
JOH 11:37 Marume lalu, Agali de kohe heagonaga de mo ngala hayadago Lasarasi homolilono ibugua mbira bibe naheyagola wahayadabe, lene.
JOH 11:38 Yasu ibu bu mini gengedai howa Lasarasi hora heagoria pene. Egeandaha hora howa ege to̱le̱ mbirame mo hangai heago de hendene.
JOH 11:39 Yasuhanda lalu, Ege to̱le̱ ogoni mo yabagi hadaba, lene. Agali homayagonaga mbalini Madahanda ibuhondo lalu, Anduane Homogo-o áyu horo manenidago ngu timbuni bulebira, lene.
JOH 11:40 Ani layagola Yasuhanda ibuhondo lalu, Mini mbiraore wuwa bereyagua Ngode Datagaliwabenaga hongo taraore holene de hondolebere laru ndobe, lene.
JOH 11:41 Tigua ege to̱le̱ biago mo yabagi hayagola Yasuhanda de handadaga howa lalu, Aba-o i̱naga bi hale ho kego ka̱i̱ laro.
JOH 11:42 Í̠na i̱naga bi hale haabo harili manda bu ko. Bi mbira larugo wali agali o karume hale helonaga laru. Ti hale howa í̠na i̱ pu leneda manda bialu i̱hondo mini mbiraore wilonaga laru, lene.
JOH 11:43 Ani lowa ibugua bi hongo howa lalu, Lasarasi tagira íbu, lene.
JOH 11:44 Ani layagola agali homene biago ibunaga gi ge denguibi dere kabu biaga aleme huba bu hora henego huba biaabo heaore tagira ibini. Ibiyagola Yasuhanda tihondo lalu, Ibu pelo hadape hadaba, lene.
JOH 11:45 Yu wali agali Meri bereria ibini biaru dewalime Yasuhanda biyago hondowa ibuhondo mini mbiraore wini.
JOH 11:46 Marume Perisi agali hearia dai buwa Yasuhanda biyago lamini.
JOH 11:47 Lamiyagola Perisi agalibi loma binigo mo miaga haguane agalibi Yu wali agalinaga Ganisolobi hearume bi lole ngoai howa lalu, Agali ogoni ibugua agalime nabiagane ale dewa bialu kago iname agi bimabe.
JOH 11:48 Ibugua ogonidagua bialu helo waharimayagua wali agali bibahendeme ibuhondo mini mbiraore wiai holebira. Ani biragola Lomo agali ti ibuwa ina wali agalibi bo wahalu inanaga anda loma bia hene kagobi bo gialo paya bulebira, lene.
JOH 11:49 Ani lowa agali mbira mini Kaiabasa ibu mali ogoninginaga loma binigo mo miaga haguane timbuni henego ibugua lalu, Tí mini nawi kamigoni.
JOH 11:50 Ogodagua bulene nga manda bimi̱ya. Ina hameigini bibahende bo wahai holigo mbiralime homa holene karulape, lene.
JOH 11:51 Bi ogoni ibuninaga bi ndo lene. Ibu mali ogoninginaga loma binigo mo miaga haguane timbuni howa ibugua Yasuhanda Yu wali agali bibahende tinaga homa aribia holebiragonaga mbiwia halu lene.
JOH 11:52 Yu hameigini hangunaga ndo Ngode Datagaliwabenaga waneigini dindi bibahendeha hama pedaru tinagabi heba homa aribia howa mo mbiraore holebiragonaga lene.
JOH 11:53 Ani lowa tigua horo ogoningi howa Yasu homelo bo waholenaga lo manda bialu hene.
JOH 11:54 Ani lalu heago hondowa Yasu ibu Yudia dindini ha pani nahe ogoriani howa pialu dindi ko wali agali nahagaha kaware ngelowa Eberaimi tanoni ibunaga talima piagaru heba pu hene.
JOH 11:55 Pu heaha Yu wali agalime Bolangua Halu Penegonaga Horo kaware hayagola dewali tini dindi howa tomo ogoni nolenaga ala ti Ngode Datagaliwabe deni howa dodo nahe hole mana bulene winigo bule lowa Yarusaleme piai hene.
JOH 11:56 Ti puwa Yasu hai bialu howa Anduane Homogonaga andaha ngoai halu tinihondo hale haga bialu, Horo ogoningi ibu ogoria ibulebadabe naibulebadabe, lo manda bialu hene.
JOH 11:57 Loma binigo mo miaga haguane hearubi Perisi agali hearubi tigua hongo howa lalu, Ibu karia mbiralime handarimiyagua iname ibu minu poloma̱ya langule ibalimu, lalu lamini.
JOH 12:1 Horo waragaria howa Bolangua Halu Penegonaga Horongi tomo nolene ngelowa áyudagua Yasu ibu Bedani pene. Lasarasi homene Yasuhanda mo heya hayago ogoni ibunaga andaga pene.
JOH 12:2 Yasu ibiyagola tigua ibu tomo nelo dawa mini. Madahanda tomo tale bialu heagola Lasarasi Yasula maru heba tomo nalu berene.
JOH 12:3 Ani berearia Meri ibu weli tara baya ngabi muni dewame yolo binigo ogoni muwa Yasunaga geni odo ha̱i̱ howa ibunaga mandarime domalu berene. Weli tara ogoni gabo be kira ale to̱labehe wini. Ani biyagola nga baya biyagome anda biagoha to̱lai hene.
JOH 12:4 Yasunaga talima piaga agali Yudasa maha Yasu ndelole henego ibugua lalu,
JOH 12:5 Weli baya ngabi ogonime yolo kina handari tebira (300) muwa wali agali yagibano karu mibehego odo waharago agibe, lene.
JOH 12:6 Ibugua wali agali yagibano karu mitangi bialu ndo lene. Muni nu ibugua hono haga howa pagebibime maru mo haga henego ibu mo hole manda buwa lene.
JOH 12:7 Ani layago Yasu hale howa ibugua lalu, Ibugua birago bilo waha. I̱ hora holene tu holebiranginaga birago.
JOH 12:8 Horo bibahendengi wali agali yagibanoru tí heba haabo holeberami. I̱ tí heba haabo naholeberama, lene.
JOH 12:9 Yasu Bedani pu ka layago Yu wali agali dewame hale howa ibu hearia pene. Lasarasi homenego Yasuhanda mo heya haya layago hale howa ogonibi heba de hondole pene.
JOH 12:10 Yu wali agali dewalime Lasarasi mo heya hayago hondowa loma binigo mo miaga haguane aria tinaga haru haga homogo henego wahalu Yasuhondo mini mbiraore wialu hene. Ani wialu henego hondowa loma binigo mo miaga haguane biarume Lasarasibi heba bo wahole lo manda manda bialu hene.
JOH 12:12 Egerebalene wali agali dewali Bolangua Halu Penegonaga Horongi ngoai hayarume Yasu Yarusaleme ibira layago hale hene.
JOH 12:13 Hale howa ti ayage yuni dibu yalu hariga obeneni lola hole pene. Lola howa tigua bi dalimu lalu, Ngode Datagaliwabe mini yaraga hama. Mbirali Anduane Homogonaga minini howa ibirago Ngode Datagaliwabehanda ibu mo turu helo larama. Ngode Datagaliwabehanda Isaraele wali agalinaga Kini mo turu helo larama, lalu hene.
JOH 12:14 Yasuhanda nogo dongi mbira handa walia howa ogoni erembirani biralu ibini. Anduane Homogonaga mbugani lo ngadagua binigo ogo,
JOH 12:15 Saiono tano kamiru tí gi nahalimu. Tínaga kini ibu dongi iginini biralu tíni kamiria ibiragoni, lalu gilibu nga.
JOH 12:16 Ani biyagola ibunaga talima piaga biaru ti irane manda nabi henego maha ibu mo yaraga halu wá taraore holeneha pu hayagola howa ani bulebira lalu Anduane Homogonaga mbugani gilibu wini ngadaguaore wali agalime ibuhondo ani biyadago ti lo manda bini.
JOH 12:17 Ala Yasuhanda Lasarasi homenego, Homali egeanda howa tagira íbu, layagola heyalu ibiyago wali agali de hendenerume lalu, Ibugua agua biya, lalu wali agali hearu lamini.
JOH 12:18 Anigo ibugua agalime nabiagane ale biya layago hale howa wali agali dewa de hondole ngoai hene.
JOH 12:19 Ani biyago de hondowa Perisi agalirume tini degedege lagalaga bialu lalu, De handadaba. Dindi bibahendeha karume ibu talima piai harago iname mbirale mbira nabibehe kamagoni, lene.
JOH 12:20 Girigi agali maru hearume tomo biago nalu Ngode Datagaliwabe mini yaraga halu lotu lole Yarusaleme ibini.
JOH 12:21 Tigua Pilibi hearia puwa lalu, Hambi-o ina Yasu de hondoa birago walia ha, lene. Pilibi ibu Galili dindi mbira mini Bedesaidali hene.
JOH 12:22 Ani layago hale howa Pilibi ibugua Anduru lamule pene. Lamialu libu haru Yasu lamule pene.
JOH 12:23 Lamiyagola Yasuhanda libuhondo ladai bialu lalu, Agali Hole Ibiyagonaga mini mo yaragaore holene tu íbu nga.
JOH 12:24 Tíhondo heneneore laro. Widi lini hondene mbira dindini ibira howa homa nabiyagua lini mbiraore hangu ngagobi wiaabo holebira. Dindini ibira howa homayagua anda howa lini dewa dolebira.
JOH 12:25 Mbiralime dindini howa ibuni holene hangu hame lalu hayagua holene ogoni yu waholebira. Mbiralime dindini howa ibuni holene hame nale hayagua ibu holene ogoni yu haabo howa haabobo holenebi yu holebira.
JOH 12:26 Mbiralime i̱naga biabe bia hoa ho kayagua i̱ kogoria ibubi hole i̱ porodagua talima ibulene nga. I̱naga biabe bia hagane karu i̱ Abahanda tinaga mini mo yaraga holebira, lene.
JOH 12:27 Yasuhanda lalu, Áyu i̱naga miniha genda bialu burugu laruago i̱na agi loabe. Aba-o i̱hondo bulene ngago nabi wahelo mo wahabe loabe. Ndo i̱ tandaga ogoni nole dindi ogoria dalirugoni.
JOH 12:28 Aba-o í̠naga mini mo yaraga helo bibe, lene. Ani layagola dahuliya andaga howa bi ladali halu lalu, I̱na mo yaraga harugo lonebi mo yaraga holebero, lene.
JOH 12:29 Ani layuago hale ho hayarume lalu, Hari kulu lagadagua larua, lene. Marume lalu, Dahuliyali mbirame ibuhondo bi lamiarua, lene.
JOH 12:30 Yasuhanda tihondo lalu, Bi o layuagoni i̱ mitangi bialunaga ndo tí mitangi bialunaga layua.
JOH 12:31 Áyu ogoni wali agali dindi bibahendeni karu daba ki bulene nga. Áyu ogoni wali agali dindi bibahendeni karunaga haguane kago bo talia tagi kaware nga.
JOH 12:32 I̱ dindini howa mo yaraga haragola wali agali bibahende i̱ni kogoria yamiai holebero, lene.
JOH 12:33 Ani layago ibu aguani homolebero lalu lene.
JOH 12:34 Wali agali biarume ibuhondo ladai bialu lalu, Inanaga Mana lowini ngagome Mbirali Dabo Helenego ibu haabo hagane lalu gilibu ngago manda bidama. Anigo í̠na lalu, Agali Hole Ibiyago mo yaraga holebira, larigo Agali Hole Ibiyago ibu aibe, lene.
JOH 12:35 Ani layagola Yasuhanda tihondo lalu, Wá holene ibu tí heba emene tigi mbira hangu holebira. Wá holene tí heba kaore ibu heba ibagabu halimu. Tí arumaha naholenaga ani halimu. Arumaha ibagabu hagarume agoha porobe manda nabi howa pupe hagane.
JOH 12:36 Tí wá holenenaga waneigini halimulo wá holene tí heba kaore wá holene ogonihondo mini mbiraore wialu halimu, lene. Yasuhanda ani lowa tigua ibu hondolilono ohowa ha do hole pene.
JOH 12:37 Tigua deme hendelo Yasuhanda agalime nabiagane ale dewa biyagola ti hondowa ibuhondo mini mbiraore nawi dege haabo hene.
JOH 12:38 Ngode Datagaliwabe mana latagi haga Aisaiahanda ani bulebira lalu mbiwia henego lola hene. Ibugua lalu, Anduane Homogo-o iname bi mana lamirimago hale howa aiwa yu tiga biyabe. Anduane Homogohanda ibunaga hongo aihondo walia hayabe, lalu gilibu nga.
JOH 12:39 Tigua Yasuhondo mini mbiraore nawi henego irane Aisaiahanda bi mende lo ngago ogo,
JOH 12:40 Tigua deme hondolilonobi minime galone manda bulilonobi i̱na ti mo dabi holiya i̱hondo mini beregedolilonobi Ngode Datagaliwabehanda tinaga de mo ko halu tinaga minibi mo ndibu leda, Ngode Datagaliwabehanda lene, lalu gilibu nga.
JOH 12:41 Aisaiahanda ani layago irane ibu Yasunaga wá holene ala de hondowa Yasunaga te lalu bi ogoni lene.
JOH 12:42 Yu agali marume mini mbiraore nawi helowa Yu wali agali haru haga dewame Yasuhondo mini mbiraore wu hene. Ti ngoai hagane andaha nahe tagira puabo halimu lo wuligo Perisi agali hondowa ti gi howa latagi nahe ohowa lalu hene.
JOH 12:43 Ani binigo irane tigua wali agalime tinaga mini mo yaraga helo hame timbuni lowa Ngode Datagaliwabehanda tinaga mini mo yaraga helo hame emene lo hene.
JOH 12:44 Yasuhanda bi dalimu lowa lalu, I̱hondo mini mbiraore wu kagome i̱ hanguhondo ndo i̱ pu layagohondobi mini mbiraore wu ka.
JOH 12:45 I̱ de hendedagome i̱ pu layagobi de hendeda.
JOH 12:46 I̱hondo mini mbiraore wu karume arumaheha haabo nahelo i̱ wá holene howa dindini daliru.
JOH 12:47 Bi i̱na langialu kogo hale halu nabiaga kago ibuni biyagonaga daba ki nabulebero. Wali agali dindi bibahendeni karu daba ki hole ndo ibiru. Ti pele ngule ibirugoni.
JOH 12:48 Mbirali i̱la habiya nale pelo wahaga kagobi i̱na bi langialu kogo yu tiga nabi kagobi ibuni biragonaga dabaga mbirali ka. Ha maro bulene horo harangi bi i̱na langirugome o biyagonaga daba ki holebira.
JOH 12:49 Ogoni heneneore laro. I̱ni hangu manda bialu ndo laruli. I̱ Aba i̱ pu layagome labe lenego hangu laruli.
JOH 12:50 Ibugua bibe lenego hale halu biagago haabobo holene yulebira manda bu ko. I̱ ani manda buwa i̱ Abahanda labe lenedagua hangu laruli, lene.
JOH 13:1 Yawi Bolangua Halu Penegonaga Horo lowa áyudagua Yasu ibu minime, Dindi ogo wahalu i̱ Aba karia polene tu haragoni, lo manda bu hene. Ibunaga wali agali dindi bibahendeni hearu ibugua gubalini haabo howa hamaro biyangibi gubalini ho haabo hene.
JOH 13:2 Yasubi ibunaga talima piagarubi ti tomo nalu berene. Dama Heyolabeme Saimono igini Yudasa Isagariodonaga miniha Yasu ndelelo mo manda bia hene.
JOH 13:3 Yasu ibu ogoningi, I̱ Abahanda i̱hondo hongo bibahende ngiai hayagobi Ngode Datagaliwabe howa ibirugo nde ibu karia lone pole kogobi, ibu ani manda bu wiaabo hene.
JOH 13:4 Ani manda buwa ibu dagiani berenego heyuwa ibugua ibunaga aga daliga biagane golo ngelowa dabero mbira muwa bo bini.
JOH 13:5 Bo buwa ibugua iba ndisini odo berelowa ibunaga talima piagarunaga ge wayawaya bia halu daberome domaga bini.
JOH 13:6 Saimono Pida berearia bima ibiyago de hondowa Saimonohanda ibuhondo lalu, Anduane Homogo-o i̱naga ge í̠na wayawaya bia holeberebe, lene.
JOH 13:7 Ani layagola Yasuhanda ladai bialu lalu, I̱na o berogoninaga irane áyu manda nabidego maha manda bulebere, lene.
JOH 13:8 Pidahanda ibuhondo lalu, I̱naga ge í̠na wayawaya bulene nawiore manda bido, lene. Ani layagola Yasuhanda ladai bialu lalu, I̱na í̠naga ge wayawaya nabiruyagua i̱naga talima piaga nahabehe holebere, lene.
JOH 13:9 Ani layagola Saimono Pidahanda ibuhondo lalu, Anduane Homogo-o aniyagua i̱naga ge hangu ndo i̱naga gibi embonebi wayawaya biai habe, lene.
JOH 13:10 Yasuhanda ibuhondo lalu, Mbirali ibu tingini bibahende wayawaya biai hene kago ibu dodo nahe kago lone buyane nabi ge dege bulene nga. Tí bibahende bayale kamigo mbiraoreli hangu bayale ndo kami, lene.
JOH 13:11 Yasu ibu agali ogome i̱ nde lolebira manda buwa, Mbiraoreli hangu bayale ndo kami, lene.
JOH 13:12 Yasuhanda tinaga ge wayawaya biai howa ibunaga aga lone karulalu dagia biagoria daibu biruwa tihondo lalu, I̱na tíhondo o birugoninaga irane manda bidamibe.
JOH 13:13 Tígua i̱hondo, Lawai Hagabi Anduane Homogobi, laramiligo tiga tiga laramili nde i̱ ogoniore kogoni.
JOH 13:14 I̱ tínaga Lawai Hagabi Anduane Homogobi howa i̱na tínaga ge wayawaya birudagua tíguabi tíninaga ge wayawaya bia haga bia haga bialu halimu.
JOH 13:15 I̱na tíhondo birudagua tígua maruhondo bilimulo biawai haru.
JOH 13:16 I̱na tíhondo heneneore laro. Garabaya biabe ale bia haga kago ibunaga anduane kagobi ndo ibu nira haga. Bi lamule piaga kago ibuhondo pu lenego kagobi ndo nira haga.
JOH 13:17 Ai galone ogoni manda bu kamigo manda bialu birimiyagua turu holene handa walia holeberami.
JOH 13:18 I̱na tí bibahendenaga lalu ndo laro. Tí agali i̱na dabene kamiru manda biai ko. Anduane Homogonaga mbugani lo ngadagua, Mbiraorelime iya haru tomo mandagi nalu biraga henego ogoni ibugua i̱ handabe manga dege halu handa tara haya, lalu gilibu ngago lola holebira.
JOH 13:19 Áyu i̱na tíhondo langerogoni nabi ngaore langero. Ani langirudagua birago handalu I̱ I̱ni Haluhe Henego Haabo Hole Kogoni manda buwa tígua i̱hondo mini mbiraore wilimulonaga laro.
JOH 13:20 I̱na tíhondo heneneore laro. Mbirali i̱na pu larogola ibirago mbirame habiya lalu yamiyagua i̱bi yamiragoni. I̱ yamiragome i̱ pu layagobi yamiragoni, lene.
JOH 13:21 Yasuhanda ani lowa ibu miniha genda timbuni howa latagi halu lalu, I̱na tíhondo heneneore laro. Tí mbiralime i̱ nde loleberami, lene.
JOH 13:22 Ani layago hale howa ibunaga talima piaga biarume aiwa ani bulebira layabe toba howa tini handaya haga haga bini.
JOH 13:23 Ibunaga talima piaga mbira Yasuhanda gubalini ho haga henego ibu Yasunaga galu hombeni palu paga heago
JOH 13:24 Saimono Pidahanda ibu de hondowa ibuhondo hendore gibu muwa lalu, Ogome buleberami lalu inahondo langi la, lene.
JOH 13:25 Ani layagola ibugua Yasu bereagoha kaware bira para howa ibuhondo lalu, Anduane Homogo-o ogome bulebira lalu langi, lene.
JOH 13:26 Yasuhanda ladai bialu lalu, Mberedi gai bini ogo nema ibaneha ibira howa muleberogo ogonime bulebira, lene. Ani lowa ibugua mberedi biago nema ibaneha ibira howa Saimono Isagariodo igini Yudasahondo mini.
JOH 13:27 Yudasa ibu mberedi biago yamiyaore ibunaga bu miniha dama Heyolabe anda pene. Yasuhanda Yudasahondo lalu, Í̠na bule kego abale bibe, lene.
JOH 13:28 Ani layago ibu heba dagiani birayarume irane manda nabi berene.
JOH 13:29 Marume Yudasa ibu muni nu hono hagane henego ibugua tomo dawa nolene kaware wiyagonaga tomo yolo bu pu lalu layabe toba hene. Marume wali agali yagibanoruhondo mbirale mbira mule pu lalu layabe toba hene.
JOH 13:30 Yudasa ibu mberedi gai bini miyago nalu abale tagira pene. Ibu arumaha tagira pene.
JOH 13:31 Yudasa tagira pialu peha Yasuhanda lalu, Agali Hole Ibiyagonaga mini mo yaraga holene tu pana haragoni. Ngode Datagaliwabe mini mo yaraga holenebi ibuha howa pani haragoni.
JOH 13:32 Ibuha howa Ngode Datagaliwabe mini mo yaraga hayagua Ngode Datagaliwabehanda ibuniha howa Agali Hole Ibiyagonaga mini mo yaraga holene áyu ogoni dege howa pani holebira.
JOH 13:33 I̱ iginiru-o i̱ tí heba emene tigi mbira hangu holebero. I̱ porogola tígua i̱ hai buleberami. I̱na Yu wali agali haru haga karuhondo lamirudagua tíhondobi langero. I̱ poleberogoha tí naibabehe kami.
JOH 13:34 I̱na bilimu lalu tíhondo bi gahenge lowerogo ogo. Tíni gubalini haga haga bialu halimu. I̱na tíhondo gubalini ho harulidagua tíni gubalini haga haga bialu halimu.
JOH 13:35 Tíni gubalini haga haga bialu harimiyagua wali agali bibahendeme tí de hondowa i̱naga talima piagada lolebira, Yasuhanda lene.
JOH 13:36 Saimono Pidahanda ibuhondo lalu, Anduane Homogo-o í̠ ani pole howa laribe, lene. Ani layagola Yasuhanda ladai bialu, I̱ poleberogoha áyu ogoni i̱ haruru naibabehe ke. Awe haruru ibulebere, lene.
JOH 13:37 Ani layagola Pidahanda ibuhondo lalu, Anduane Homogo-o aginaga i̱ haruru naibabehe kobe. Í̠ mitangi buwa i̱na í̠naga homa holenebi karulape manda bu ko, lene.
JOH 13:38 Ani layagola Yasuhanda ladai bialu lalu, I̱naga homa holebero larigo heneneore ani bule manda bu kebe. Í̠hondo heneneore laro. Ega gogologome bi naledaha Yasu manda nabido í̠na halu tebo lolebere, lene.
JOH 14:1 Yasuhanda ti lamialu lalu, Tí mini tumutumu bu dara dege dindi ho nahalimu. Ngode Datagaliwabehondo mini mbiraore wialu kamidagua i̱hondobi mini mbiraore wialu halimu.
JOH 14:2 I̱ Abanaga andagani hobane dewa ka. Hobane dewa nakale tí holene mo manda manda bule poro ala langirugo nalangidole.
JOH 14:3 Tí holene manda manda bu ngelalu i̱ kogoria ina mandagi haabo hami̱ya tí damu dai bule poro.
JOH 14:4 I̱ pole kogo hariga ogoha polebira manda biai kami, lene.
JOH 14:5 Ani layago Tomasa hale howa ibuhondo lalu, Anduane Homogo-o í̠ ani pole kebe ina manda nabi kamago í̠ hariga ogoha polebere agua manda bibehebe, lene.
JOH 14:6 Ani layagola Yasuhanda ladai bialu ibuhondo lalu, Harigabi henene lolenebi holene gahengebi i̱ ko. Mbiralime Aba karia pole i̱ koria naibiyagua pobe nahe.
JOH 14:7 Tígua i̱ manda bidamigo i̱ Ababi manda buleberami. Áyu ogoni howa ibu de handalu bayuwa manda bidami, lene.
JOH 14:8 Ani layagola Pilibihanda ibuhondo lalu, Anduane Homogo-o í̠ Aba inahondo walia ha. Walia haregola karulape manda buleberama, lene.
JOH 14:9 Yasuhanda ibuhondo ladai bialu lalu, Pilibi-o i̱ tí heba luore haabo harimago howa í̠na i̱ manda nabi dege kebe. I̱ hendedagome i̱ Ababi hendeda. Ani biagane ngago í̠na Aba inahondo walia ha larigo irane agibe.
JOH 14:10 Pilibi-o i̱ Abaha i̱ kogo i̱ha i̱ Aba kagobi manda bialu mini mbiraore nawi kebe, lalu Yasuhanda ibunaga talima piagaruhondo lalu, I̱na tíhondo bi langialu kogo i̱ninaga hongome ndo langialu ko. I̱ Aba i̱ha kago ibugua biabe bialu ka.
JOH 14:11 I̱ Abaha i̱ kogo i̱ha i̱ Aba kagobi larogo hale howa mini mbiraore wilimu. Bi hale howa mini mbiraore nawi kamiyagua i̱na biabe bigi bialu kogoni hondowa mini mbiraore wilimu.
JOH 14:12 I̱na tíhondo heneneore laro. I̱hondo mini mbiraore wialu kagome i̱na biabe bialu kodagua ibuguabi bulebira. I̱ Aba kagoria porogome ibugua biabe timbuni tarabi bulebira.
JOH 14:13 Igini i̱na berogome Abanaga mini mo yaraga helo tígua i̱naga minini howa mbirale mbira bia larimiyagua i̱na biai holebero.
JOH 14:14 Tígua i̱naga minini howa mbirale mbira bia larimiyagua i̱na biai holeberoore, lene.
JOH 14:15 Tígua i̱hondo gubalini ho kamiyagua i̱na bilimu lalu kodagua bialu holeberami.
JOH 14:16 I̱na i̱ Abahondo lamialu lalu, Biamogo Biagane ibuni tí heba haabo helo i̱ pani mia, lolebero.
JOH 14:17 Biamogo Biagane ogoni ibu Ngode Datagaliwabe kagobi heneneore lagane Dinini ka. Dinini ogoni dindi mana hangu biaga karume de nahandabehebi minime manda nabibehebi kago tigua ibu nayamibehe kagoni. Tígua dege ibu mandabu kami. Ibu tí heba haabo howa tíha holebirago mandabu kami.
JOH 14:18 Tí hono wahene ale halimulo yu wahalu napolebero. Tí kamiria i̱ dai bulebero.
JOH 14:19 Emene howa dindi mana hangu biaga karume i̱ de nahondolebira. Tígua dege i̱ de hondoleberami. I̱ kodagua tíbi holeberami.
JOH 14:20 Horo ogoningi i̱ tíha kogobi i̱ Abaha i̱ kogobi i̱ha tí kamigobi manda biai holeberami.
JOH 14:21 I̱na bilimu lalu kodagua mo yai halu bialu kagome i̱hondo gubalini ho ka. Mbirali i̱ gubalini ho kago i̱ Abahanda ibuhondobi gubalini ho holebira. I̱nabi ibuhondo gubalini howa i̱ni ibuhondo walia holebero, lene.
JOH 14:22 Ani layago hale howa Yudasa Isagariodo ndo Yudasa mendeme ibuhondo lalu, Anduane Homogo-o inahondo í̠ni mo walia halu dindi mana hangu biagaruhondo í̠ni walia naholebero larigo irane agibe, lene.
JOH 14:23 Ani layagola Yasuhanda ibuhondo ladai bialu lalu, Mbiralime i̱hondo gubalini ho kayagua i̱naga bi mana hale halu biai holebira. Ani bialu kago i̱ Abahanda ibuhondo gubalini holebira. Ani buwa ogoni ibu karia i̱bi i̱ Ababi iya ibuwa ibu heba haabo holeberaba.
JOH 14:24 I̱hondo gubalini nahe karume i̱naga bi hale halu nabulebira. Tígua bi mana hale halu kamigo i̱naga bi mana ndo i̱ Aba i̱ pu layagonaga bi mana langirugoni.
JOH 14:25 I̱ nape tí heba kogo howa bi ogoni langiru.
JOH 14:26 Maha Biamogo Biagane ibu Ngode Datagaliwabe Dinini kago i̱ Abahanda i̱ minini howa tí kamiria pu lolebirago ibugua ibuwa mbirale bibahende tíhondo lawai holebira. I̱na tíhondo langialu harugo damenego bibahende ibugua tí mo mitangi bia hai holebira.
JOH 14:27 I̱ pole howa mo palia holene tí kamigo heba ngelalu polebero. I̱ninaga mo palia holene tíhondo ngero. Dindi mana hangu biaganerume ngiagadagua ndo ngero. Tí mini tumutumu bu dara dege dindi hobi gi hobi nahalimu.
JOH 14:28 I̱na tíhondo lalu i̱ Aba karia pialu tí kamiria dai bule larugo hale harimigoni. Hale howa i̱hondo gubalini ho kamile i̱ Aba karia porogonaga turu ho kamile. Irane i̱ Aba i̱ kogobi ndo ibu timbuniore kago.
JOH 14:29 I̱na tíhondo langiai harugo ogoni nabi ngaore langiru. Ani langirudagua birago hondowa tígua i̱hondo mini mbiraore wilimulonaga langiai haru.
JOH 14:30 I̱na tí heba bi lu lalu haabo habe nahego wali agali dindi bibahendeni karunaga haguane kago ibu i̱ koria ibulene kaware nga. Ibuwa i̱ha nakarulape mbira ngaria handa walia naholebira.
JOH 14:31 Nde dindi mana hangu biagane karume i̱na i̱ Abahondo gubalini ho kogo ti manda bilonaga ibugua bibe laradagua hangu bialu ko. Ai mali̱ya heyadaba, lene.
JOH 15:1 Yasuhanda, Pu mbira lini daga mini gerebi irane henene i̱ kogoni. Mabu anduane i̱ Aba kagoni.
JOH 15:2 I̱ha magane kago aria mbira lini nadaga kago ibugua gandulo wahaga. Magane mende lini daga kagome lini dewa delo mane danda wabia haga.
JOH 15:3 I̱na tíhondo bi langirugome tí mo bayale henego kami.
JOH 15:4 I̱ha ho gimbu bu halimu. I̱bi tíha ho gimbu bu holebero. Magane mbira iraneha gimbu nabi hayagua magane hangume lini nadabehe hagadagua tíbi i̱ha ho gimbu nabi harimiyagua lini nadabehe holeberami.
JOH 15:5 Pu mbira lini daga mini gerebi irane i̱ kogoni. Magane tí kami. Tí mbirali i̱ha ho gimbu bia i̱ nde ibuha ho gimbu bia bu kabayagua ogoni ibuha lini dewa dolebira. I̱ wahowa tíni hangu howa mbirale mbira bibe nahe kami.
JOH 15:6 Magane podo wahagadagua i̱ha mbirali ho gimbu nabi hayagua ogoni podo waharagola gau lolebira. Magane podo winigo mo mogo buwa irani delagadagua delolebira.
JOH 15:7 I̱ha tí ho gimbu bia i̱naga bi manabi tíha gimbu bia bilowa i̱hondo mbirale mbira bia lalu langirimiyagua hale halu buleberoore.
JOH 15:8 Tíha lini dewa dedamigome i̱ Abanaga mini mo yaraga holebira. Ani buwa tí i̱naga talima piagaore holeberami.
JOH 15:9 I̱ Abahanda i̱hondo gubalini ho kadagua i̱nabi tíhondo gubalini ho ko. I̱na gubalini ho kogoha tí halimu.
JOH 15:10 I̱ Abahanda bibe lenedagua i̱na bialu howa ibugua gubalini ho kagoha i̱ kodagua i̱na bilimu larogo bialu harimiyagua i̱na gubalini ho kogoha tí holeberami.
JOH 15:11 Tíhondo bi langialu harugo i̱naga turu holene tíha wilobi wiragola tínaga turu holene tíniha to̱lelobi langiru.
JOH 15:12 I̱na bilimu lalu kogo ogo i̱na tí gubalini ho kodagua tíni gubalini hagahaga bu halimu.
JOH 15:13 Agali mbirame ibu nenegealiru mitangi howa ibuninaga holene pela hayagua agali ogoni ibuha gubalini holene timbuniore nga.
JOH 15:14 Anigo i̱na bilimu lalu kodagua bialu harimiyagua i̱naga nenegeali tí holeberami.
JOH 15:15 I̱na tí i̱naga biabe bia hagane kami lalu ndo ko. Biabe bia haganeme ti haru haga kago agi birabe manda nabi hagane. I̱ Abahanda bule kago bibahende tíhondo langiai harugo manda buwa tí i̱naga nenegeali kami lalu ko.
JOH 15:16 Tígua i̱ dabarimi ndo i̱na tí dabaru. Tíha lini dewa dalu halimulo dabo helaru. Tínaga lini darago daabo helo helaru. Ani bu howa tígua i̱naga minini howa i̱ Abahondo mbirale mbira bia larimiyagua ibugua biai holebira.
JOH 15:17 Ogonigo tígua bilimu lalu kogo ogo tíni gubalini ho hagahaga bialu halimu, lene.
JOH 15:18 Yasuhanda lalu, Dindi mana hangu biaga karume tí handabe manga hayagua pigane i̱ handabe manga hayadagua ina handabe manga haragonida manda bilimu.
JOH 15:19 Tíbi dindi mana hangu biaga kamile dindi mana hangu biagarume ina aria ka lowa tíhondo gubalini ho kale. I̱na tí dindiali hemiria dabarugo tí dindi mana nabiaga kamigoni. Ani kamigo dindi mana hangu biagarume tí hondowa handabe manga halu ka.
JOH 15:20 Tíhondo i̱na bi mbira langirugo mitangi bilimu. I̱na au larugo, Garabaya biabe ale bia haga kago ibu ibunaga anduane kagobi ndo ibu nira haga. Tigua i̱ mo tandaga hayadagua tíbi mo tandaga holebira. Tigua i̱na mana lawai harugo hale halu biyagua tígua mana lawai haramigobi hale halu bulebira.
JOH 15:21 Urunime tí mo tandaga holebira larugo i̱ Aba i̱ pu layago manda nabi karume tí i̱naga kamigo hondowa mo tandaga holebira laru.
JOH 15:22 I̱na tihondo bi mana lamule naibidole tigua ko bialu kama manda nabi howa bialu kale. I̱na lamirugo hale howa ko bialu kagonaga tigua ina manda nabi howa bialu harimada labe nahe holebira.
JOH 15:23 I̱ handabe manga haga karume i̱ Ababi handabe manga halu ka.
JOH 15:24 I̱na agalime nabiagane aleru bialu harugo urunime de hendelo nabidole tigua ko bialu kama manda nabi howa bialu kale. Ogonidagua birugo ti de hondowa tigua i̱bi i̱ Ababi handabe manga halu ka.
JOH 15:25 Tinaga Mana lowinigo ogo, Tigua handabe manga holene irane mbira nawini bameore i̱ handabe manga haya, lalu gilibu ngadaguaore lola haragoni.
JOH 15:26 Biamogo Biagane ibu ibulebira. Ogoni ibugua Ngode Datagaliwabe ogobi ka lalu heneneore lagane Dinini i̱ Aba kagoria howa ibulebira. I̱na ibu tí kamigoria pu loleberogo ibuwa ibugua i̱ ogobi ka lalu langulebira.
JOH 15:27 Piganeore howa tí i̱ heba haabo harimago tíguabi i̱ ogobiore ka lalu lamuleberami, lene.
JOH 16:1 I̱na bi langialu harugo tígua Ngode Datagaliwabehondo mini mbiraore wu harimigo wahalu napilimulonaga langialu harugoni.
JOH 16:2 Tigua tíhondo, Ngoai hagane andaha nahe tagira puabo halimu, lalu lolebira. Horo tara mbira tagira ibulebira. Ibiragola mbirame tí bo wahalu howa ibugua i̱ Ngode Datagaliwabenaga biabe bia harogo manda bialu tí bolebira.
JOH 16:3 Tigua i̱ Ababi i̱bi manda nabi howa ani bulebira.
JOH 16:4 Ani bulebira larogo biragola layadagua biragonida manda bilimulo langero, lene. I̱na ani bulebira lalu pigane biangi i̱ni tí heba harimagoyane nalangi haru.
JOH 16:5 Áyu ogoni i̱ pu layago karia dai buleberogo tí mbiralime i̱hondo í̠ agoha poleberebe nale kami.
JOH 16:6 Ani polebero langirugo hale howa tínaga miniha dara timbuni ho kami.
JOH 16:7 I̱na tíhondo heneneore laro. Tínaga koyaneorenaga i̱ pobeheore kogoni. Tí wahalu i̱ napiruyagua Biamogo Biagane larugo tí heba hole ibu naibulebira. I̱ piruyagua ibu tí heba hole ibilo pu lolebero.
JOH 16:8 Ibu ibirangi ibugua dindini karuhondo lalu, Tígua ko bulene ogoni lalu tigabi holene ogoni lalu Ngode Datagaliwabehanda dabaki bulene ogoni lalu laga beremiligo tí kagua manda birimi, lalu lamiai holebira.
JOH 16:9 Tigua i̱hondo mini mbiraore nawi kagome ko bulene tene ogonida ti manda nabi ka.
JOH 16:10 I̱ Aba karia porogola tígua i̱ lone de nahondoleberamigo tigua tigabi holene tene ogonida manda nabi ka.
JOH 16:11 Wali agali dindi bibahendeni karunaga haguane kago ibugua biyagonaga Ngode Datagaliwabehanda daba ki bini ka. Tigua daba ki bulene tene ogonida manda nabi ka.
JOH 16:12 I̱na tíhondo bi langulene dewa yidogo tígua áyu ogoni mo yai nahabehedago.
JOH 16:13 Ngode Datagaliwabe ogobi ka lalu heneneore lagane Dinini ibuwa ibugua tí heba howa henene lolene ogoni lalu mo walia holebira. Ibugua ibuni hangu manda bialu nalangulebira. Larane hale harago hangu langulebira. Mani bulebiragonaga agua bulebira lalu langulebira.
JOH 16:14 Ibugua i̱naga bi mo yalu ibalu tí langulebira. Ani biragome ibugua i̱naga mini mo yaraga holebira.
JOH 16:15 I̱ Abanaga bibahende ngaru i̱nagabi nga. Ani ngago manda buwa i̱na lalu i̱naga ngago Ngode Datagaliwabe Dinini ibugua mo yalu ibalu tí langiai holebira laru.
JOH 16:16 Yasuhanda lalu, Emene howa tígua i̱ nahondoleberami. Maha halu mende emene howa i̱ hondoleberami.
JOH 16:17 Ani layago hale howa ibunaga talima piaga marume tini degedegehondo hale haga bialu lalu, Ibugua emene howa tígua i̱ nahondoleberami layagobi maha halu mende emene howa i̱ hondoleberami layagobi ibu Aba karia polebero layagobi agi manda bialu layabe.
JOH 16:18 Ibugua emene howa layago agi manda buwa layabe irane ina manda nabi kama, lalu tinihondo hale haga bialu hene.
JOH 16:19 Tigua ibuhondo ladai bua ho heago manda buwa ibugua tihondo lalu, Tíni degedegehondo hale haga birimigo i̱na lalu emene howa tígua i̱ nahondoleberami larugobi maha halu mende emene howa i̱ hondoleberami larugobi ogoninaga ladai bua ho kamibe.
JOH 16:20 I̱na tíhondo heneneore laro. Ogoningi tí dugu bialu dara timbuni holeberami. Dindi mana hangu biaga karu ti turu holebira. Ndo maha tí dara ho holene embeda halu tíha turu holene wia aribia holebira.
JOH 16:21 Wali ibu gali taba honole biruwa tandaga bulene tu harago ibu mini burugu lalu biraga. Ibu gali taba honowa tandaga biyago embeda howa ibu gali taba hanaru lalu turu timbuni haga.
JOH 16:22 Tíbi ogonidagua holeberami. Áyu ogoni tí dara ho holeberami. Maha tígua i̱ lone de hondowa tínaga bu miniha turu timbuni holeberami. Turu holene ogoni mbiralime mo ereba habe nahe holebira.
JOH 16:23 Horo ogoningi howa tígua i̱hondo mbirale mbira bia naloleberami. I̱na tíhondo heneneore laro. Tígua i̱naga minini howa i̱ Abahondo mbirale mbira bia lameramidagua ibugua hale halu bulebiraore.
JOH 16:24 Abale tígua i̱ minini howa mbirale mbira bia lalu nalamiaga harimi. Turu holene tíha to̱laiore helo áyu pigane tenuwa i̱ minini howa lamilimu, lene.
JOH 16:25 I̱na tíhondo langialu harugo bi yobage lalu langialu haru. Horo mbira tagira ibulene kaware ngago horo ogoningi howa lone bi yobage lalu ndo i̱ Aba ogobiore ka lalu latagi holebero.
JOH 16:26 Horo ogoningi howa tígua i̱naga minini i̱ Abahondo lamuleberami. I̱na i̱ Abahondo tínaga la holebero ndo laro.
JOH 16:27 Ani lamuleberamigo irane i̱ Aba ibunime tí gubalini ho kagoni. Tígua i̱hondo gubalini ho kamigobi i̱ ibu kagoria henego íbu kogo manda buwa i̱hondo mini mbiraore wialu kamigobi hondowa i̱ Aba ibugua tíhondo gubalini ho ka.
JOH 16:28 I̱ Aba kagoria howa ibalu dindi ogoria ibiru. Ai dindi ogo wahalu i̱ Aba karia dai bulebero, lene.
JOH 16:29 Ani layago hale howa ibunaga talima piaga biarume ibuhondo lalu, Ae. Ai yobage lalu ndo heneneore latagi haregoni.
JOH 16:30 Í̠na bibahende manda biai kego. Mbiralime bi larigo irane agi manda bialu laribe lalu ladai bulene nawi manda bidama. Bi o biagoni hale howa í̠ Ngode Datagaliwabe kagoria howaore ibini ke manda buwa iname í̠hondo mini mbiraore wu kama, lene.
JOH 16:31 Yasuhanda tihondo ladai bialu lalu, Tí mini mbiraore wu kama larimibe.
JOH 16:32 Horo mbira tagira ibulene kaware ngago ogoningi tí bibahende tíni ala haramiligoha pugupugu bilimulo bo talia togo lolebira. Talia togo laragola i̱ hangu helo wahalu tí ibida pugupugu buleberami. Ani beremigola i̱ hangu ndo holebero. I̱ Aba iya haru holeberaba.
JOH 16:33 I̱na agua bulebira lalu langirugo i̱ha tí ho gimbu bu howa mo palia holene yu halimulonaga langiru. Dindi mana hangu biaganerume tí mo tandaga holebirago ani bilo tí elahe halimu. I̱na dindi mana bibahende bope halu i̱ wayali hene kogoni, lene.
JOH 17:1 Yasuhanda bi uruni lamiai howa ibu dahuliya andagaha handa daga howa lalu, Aba-o horo biago tagira ibiyago í̠ igini ibugua í̠hondo mini daliga taraore lolene ngilonaga í̠na í̠ iginihondo mini daliga taraore lolene ngibe.
JOH 17:2 Í̠na wali agali i̱hondo ngiriru tihondo i̱na haabobo holene muliya wali agali bibahende hondo hai holiyanaga hongo i̱hondo ngiri.
JOH 17:3 Ngode Datagaliwabe henene í̠ hangu ke manda bia Yasu Keriso i̱ í̠na pu larigola ibinida manda bia ani bialu kagome haabobo holene yu ka.
JOH 17:4 Í̠na bibe lalu langirigo biai haru. Ani bialu harugome i̱na í̠naga hongo holene taraore walia haru.
JOH 17:5 Aba-o bamba dindi wa nabingi í̠ heba howa mini daliga taraorewi harugo ogoni áyu i̱ í̠naga deni howa mini daliga taraore ogoni lone ngibe.
JOH 17:6 Dindini hene agali maru í̠na i̱hondo ngiriru urunime í̠ manda bilo walia halu haru. Ti í̠naga henego í̠na i̱hondo ngirigoni. Tigua í̠naga bi hale halu laridagua biya.
JOH 17:7 Mbirale bibahende ngirigo í̠na i̱hondo minida ti manda biai kagoni.
JOH 17:8 Í̠na i̱hondo bi mana langirigo i̱na tihondo lamiai harugola tigua hale howa yu tiga bu ka. Yu tiga buwa i̱ í̠ kegoria howa henene ibinidalo ti manda biai ho ka. Í̠na i̱ pu larigola ibini ka manda buwa yu tiga bu ka.
JOH 17:9 Ti mitangi bialu i̱na tinaga la haro. Dindi mana hangu biagaru mitangi bialu ndo í̠na i̱hondo ngiriru ti í̠naga kago mitangi bialu tinaga la haro.
JOH 17:10 I̱naga karu bibahende í̠nagabi ka. Í̠naga karu bibahende i̱nagabi ka. Tigua bialu kagome i̱naga hongo taraore holene walia haragoni.
JOH 17:11 Áyu ogoni i̱ í̠ kegoria ibule ko. I̱ dindini naholebero. Ti dege dindini holebira. Aba Baya Buruguleore-o í̠na í̠naga mini i̱hondo ngirigonaga hongome ti haru halu mamage ho habe. Iya mbiraore kabadagua tibi mbiraore helo.
JOH 17:12 I̱na dindini ti heba harungi í̠naga mini i̱hondo ngirigonaga hongome ti haru halu mamage ho haru. I̱na ti mamage howa mbirali pu ereba nahe ka. Agali mbira pu ereba hole henego ibu hangu pu ereba haya. Ani biyagome Anduane Homogonaga mbugani bi gilibu ngadagua lola haragoni.
JOH 17:13 Áyu ogoni i̱ í̠ kegoria ebero. I̱naga turu holene ti gubaliniha to̱lai helo i̱ dindi ogoria howa bi ogoni tihondo lamiru.
JOH 17:14 I̱na tihondo í̠naga bi mana lamialu haru. I̱ dindi mana hangu biaga aria ndo kodagua tibi dindi mana hangu biaga aria ndo kago hondowa dindi mana hangu biagarume tihondo handabe manga ho hene.
JOH 17:15 Dindi ogoria howa í̠na ti haru pobelonaga ndo laro. Ko Bulene Anduane ibugua ti ko mo bia holigo mamage halu haru habelonaga langero.
JOH 17:16 I̱ dindi mana biaga aria ndo kodagua tibi dindi mana biaga aria ndo ka.
JOH 17:17 Ti í̠ninaga helo henene loleneme ti loma bia ho helabe. Henene lolenego í̠naga bi nga.
JOH 17:18 Í̠na i̱ wali agali dindi bibahendeni kagoha pu laridagua i̱nabi tihondo wali agali dindi bibahendeha pugupugu bidaba laru.
JOH 17:19 I̱na ti mitangi bialu ti í̠ninagaore loma bia hene helo i̱nibi í̠ninagaore loma bia ho ko.
JOH 17:20 I̱na agali uruni tinaga hangu mitangi bialu ndo la haro. Tigua bi mana lamiragola hale howa i̱hondo mini mbiraore wu holebirarunagabi heba la haro.
JOH 17:21 Ti bibahende mbiraore helonaga i̱na la haro. Aba-o i̱ha í̠ kedaguabi í̠ha i̱ kodaguabi iyaha ti helo hameledo. Wali agali dindi bibahendeni karume í̠na i̱ pu larigola ibinida manda buwa mini mbiraore wilo í̠na ti mo mbiraore helabe.
JOH 17:22 Iya mbiraore kabadagua tibi mbiraore helonaga í̠na i̱ hongo holene taraore ngirigo i̱na tihondo miru.
JOH 17:23 I̱ tiha kogobi í̠ i̱ha kegobi ti nde mbiraore helo mo mbiraore helabe. Ti mbiraore kago hondowa wali agali dindi bibahendeni karume í̠na i̱ pu larigola ibinida manda bilo. Ani manda buwa í̠na i̱ gubalini ho kedagua tibi gubalini ho ke manda bilobi ti mo mbiraore helabe.
JOH 17:24 Aba-o dindi bibahende wa nabi howa í̠na i̱ gubalini timbuni ho harigoni. Ani howa í̠na agali i̱hondo ngirirume i̱ mini daliga taraore ngirigo hendelo i̱ kogoria tibi helo hameledo.
JOH 17:25 Tigabi Holene Aba-o dindi mana hangu biaga karume í̠ manda nabi ka. I̱na í̠ manda bu ko. Agali o karumebi í̠na i̱ pu larigola ibinida manda biai ka.
JOH 17:26 Í̠na i̱ gubalini ho kego gubalini holene ogoni tiha wilobi i̱bi tiha holiyabi tigua í̠ manda bilo i̱na tihondo walia harugo mahabi ani walia haabo holebero, Yasuhanda lene.
JOH 18:1 Yasuhanda Ngode Datagaliwabehondo bi ogoni lai howa ibunaga talima piagaru heba tagira pialu iba Kidirono doma ede halu puwa mabu mbira winigoria ubanda hene.
JOH 18:2 Mabu ogoriani Yasu ibunaga talima piagaru heba halu dewa ngoai haabo haga henego Yudasa ndelaga biago ibu manda bu hene.
JOH 18:3 Ani manda buwa Yudasa ibu Anduane Homogonaga anda mamage haga marubi Lomo ami agali marubi ti Perisi agalirubi loma binigo mo miaga haguane biarume pudaba laya handala ti haru lamu halebi agali bagane alebi yalu mabu biagoria haru pene.
JOH 18:4 Ibiyagola Yasu tigua ibuhondo bulebirago bibahende manda biai howa tihondo lalu, Tí ái hai bima eberamibe, lene.
JOH 18:5 Tigua ibuhondo ladai bialu lalu, Nasareteali Yasu hai berama, lene. Yasuhanda tihondo lalu, I̱ o kogoni, lene. Ndelagane Yudasa ibu ti mandagi hearia lamini.
JOH 18:6 Yasuhanda tihondo, I̱ o kogoni, layago hale howa ti bibahende tiga bebege dai bialu hearia dindini pindipandulo pilo ibira hai hene.
JOH 18:7 Yasuhanda tihondo halu mende lalu, Tí ái hai bima eberamibe, lene. Ani layagola tigua lalu, Nasareteali Yasu hai berama, lene.
JOH 18:8 Ani layagola Yasuhanda tihondo ladai bialu lalu, I̱ o kogoni lalu abale langirugoni. Tígua i̱ hai beramiyagua agali o karu purogo lelo pudaba ladaba, lene.
JOH 18:9 Ibugua ala, Aba-o agali í̠na i̱ ngiriru mbirali pu ereba naholebira, lalu layadagua lola helo ani lene.
JOH 18:10 Saimono Pida ibu wai biagane ayu tibu yu henego ogoni yamuwa loma binigo mo miaga haguane timbuninaga garabaya biabe ale bia haga mbira mini Malagasa heagonaga hale tiga bo bagada pe hene.
JOH 18:11 Ani biyagola Yasuhanda Pidahondo lalu, Í̠naga wai biagane ayu tibu andaneha da dai bia. I̱ Abahanda i̱hondo ibabe nginigo ogoniha tandaga nolene bedago nolebero ndobe, lene.
JOH 18:12 Ani layago hale howa Lomo ami agali biaru tinaga haru haga heba Yuali mamage haga biarubi tigua Yasu minuwa gi huba bialu
JOH 18:13 mali ogoninaga loma binigo mo miaga haguane timbuni Kaiabasa henego ibunaga imane Anasa hearia ala Yasu haru pene.
JOH 18:14 Kaiabasa ogoni ala ibugua Yu wali agalinaga haru hagahondo lalu, Wali agali bibahende homoligo mbiralime homa holene nga, lalu lene.
JOH 18:15 Tigua Yasu minu yalu piyadagua Saimono Pidabi Yasunaga talima piaga mendebi libu haru mama haruru pene. Talima piaga mende biago ibu loma binigo mo miaga haguane timbunime mandabi henego ti Yasu minu yalu piyadagua pialu ibu loma binigo mo miaga haguane timbuninaga andaga anda pene.
JOH 18:16 Pida ibu pabe tagirahayagi hene. Talima piaga mende loma binigo mo miaga haguane timbunime mandabi biago ibugua dai buwa panga mamage haga wandari heagohondo bi lamuwa Pida haru anda ibini.
JOH 18:17 Haru ibiyago hondowa panga haru hagane wandari biagome Pidahondo lalu, Agali o haru poragonaga talima piaga mbira í̠ ndobe, lene. Ani layagola Pidahanda ladai bialu lalu, I̱ ndo, lene.
JOH 18:18 Dagare biyagola biabe bia hagane agalibi mamage haga agalibi tigua ira delowa dagare dogo bialu hearia hondowa Pida ibu puwa ti heba mandagi howa dagare dogo bialu hene.
JOH 18:19 Loma binigo mo miaga haguane timbuni biagome Yasuhondo hale halu lalu, Í̠naga talima ibaga agali ai kabe. Í̠na mana agi lalu lawai harilibe, lene.
JOH 18:20 Ani layagola Yasuhanda ladai bialu lalu, Wali agali karu bibahende ti hale hai helo panigiore howa lamialu haruli. Yu wali agali ngoai hagane andaha howabi Anduane Homogonaga andaha howabi i̱na mana lawai haruli. Mbira do howa nalaruli.
JOH 18:21 I̱hondo aginaga hale harebe. I̱na mana lamirugo hale hene karu ti manda biai kago tihondo hale habe, lene.
JOH 18:22 Ani layagola mamage haga agali mbira heagome hale howa ibunaga gi habeme Yasu bowa lalu, Loma binigo mo miaga haguane timbunihondo ogonidagua ladai birilibe, lene.
JOH 18:23 Ani layagola Yasuhanda ladai bialu lalu, Kagua ago larugonaga baribe. Kagua mbira laruyagua ogo larigonaga baru lalu o karu hale helo lamia, lene.
JOH 18:24 Ani bialu Anasahanda, Loma binigo mo miaga haguane timbuni Kaiabasa karia haru pudaba, layagola Yasu gi huba biaabo heaore haru pene.
JOH 18:25 Pida ibu ira deagoria dagare dogo bu hearia tigua ibuhondo lalu, Agali o haru poragonaga talima piaga mbira í̠ kegoni ndobe, lene. Ani layagola ibugua lalu, I̱ ndo, lene.
JOH 18:26 Pidahanda agali hale bagadape hayagonaga damene mbira loma binigo mo miaga haguane timbuni biagonaga garabaya biabe ale bia haga dege heagome Pidahondo lalu, Mabuni ibu heba heria handarugo í̠ ndoyagoda, lene.
JOH 18:27 Ani layagola Pidahanda lone lalu, I̱ ndoore, lene. Ogoni lope heagolaore ega gogologome bi lene.
JOH 18:28 Ani bialu tigua Yasu Kaiabasanaga andaga howa gabumanenaga haru haga andaga haru pene. Egerebagiore haru penego Yu agali ti áyu Bolangua Halu Penegonaga Horo nga manda buwa Anduane Homogonaga deni dodo nahe helo mana pugule ndoyagola ti anda biagoha anda nape tagirani hene.
JOH 18:29 Tagirani hearia Pailate ibu tagira puwa tihondo lalu, Agali ogonime agi biyagola godi lole haru ibirimibe, lene.
JOH 18:30 Ani layagola tigua ladai bialu lalu, Ibugua ko mbira nabidale iname naharu ibidamale, lene.
JOH 18:31 Pailatehanda tihondo lalu, Tínaga mana lo ngadagua godi lole ibu haru dai bidaba, lene. Ani layagola Yu agali biarume ibuhondo lalu, Inane hangume godi lowa agali mbira bo waholene nawi lo ngago, lene.
JOH 18:32 Tigua bi ogoni bame ndo lene. Yasuhanda bi ala lalu, Ogodagua biragola homolebero, lenego henemane lola helonaga lene.
JOH 18:33 Pailate ibu gabumanenaga andaga dai buwa Yasu olowa lalu, Yu wali agalinaga Handame Haga Kini í̠ kebe, lene.
JOH 18:34 Yasuhanda ladai bialu lalu, Í̠ni manda buwa laribe be marume i̱ ogoni ka layago hale howa laribe, lene.
JOH 18:35 Pailatehanda ladai bialu lalu, I̱ Yu agali kobe. Í̠ ariarumebi í̠naga loma binigo mo miaga haguane hearumebi i̱na godi loliya í̠ haru ibiyago í̠na agi birigola haru ibiyabe, lene.
JOH 18:36 Ani layagola Yasuhanda ladai bialu lalu, I̱ handame ho kogo dindi ogoali ndome handame ho ko. Dindi ogoalime handame ho kole Yu haru haga agalime i̱ bolilono i̱naga haruru ibaganerume wai bidale. I̱ handame ho kogo dindi ogoali ndome handame ho ko, lene.
JOH 18:37 Pailatehanda ibuhondo lalu, Aniyagua í̠ handame haga kini mbira kebe, lene. Ani layagola Yasuhanda ladai bialu lalu, Í̠na handame haga kini kebe larigoniore ko. Henene lolene lamiai hole i̱ dindi ogoria dalirugola taba henenego ko. Wali agali henene lolene aria karu bibahendeme i̱naga bi hale hai haga ka, lene.
JOH 18:38 Ani layagola Pailatehanda ibuhondo lalu, Henene lolene agilebe, lene. Ani lalu Pailate ibu Yu wali agali hearia tagira puwa tihondo lalu, Ibugua ko bini mbira nawidago
JOH 18:39 tínaga manani Bolangua Halu Penegonaga Horo harangi garabaya agali mbira golope holiya langeramiligo áyu Yu wali agalinaga handame haga kini golope holiya manda bidamibe, lene.
JOH 18:40 Ani layagola tigua hongo howa ladai bialu lalu, Agali ogoni ndo. Barabasa ibu golope habe, lene. Barabasa ibu page bia agali ba biagane hene.
JOH 19:1 Ani layago hale howa Pailate ibugua lalu, Yasu haru puwa pu payini tibume badaba, lene.
JOH 19:2 Ani bialu ami agali tigua pu anihe bo buwa handame haga kininaga manda ogoni lowa ibu haguani karula hene. Karula howa labolabo luni tagalitaya ale karula hene.
JOH 19:3 Karulo hearia ti ibugu bialu lalu, Yu wali agalinaga Handame Haga Kini haabo habelo, lalu baga bialu hene.
JOH 19:4 Pailate ibu lone tagira puwa Yu wali agalihondo lalu, Agali ogonime ko bini mbira handa walia naheda manda bilimulo tí kamiria haru tagira ebero, lene.
JOH 19:5 Ani lowa Yasu pu anihe mandabi labolabo luni tagalitaya ale biagobi karulo heaore haru tagira ibuwa Pailatehanda tihondo lalu, Agali biago ogogo handadaba, lene.
JOH 19:6 Loma binigo mo miaga haguanerumebi Anduane Homogonaga anda mamage haga agalirumebi de hondowa dalimu lowa lalu, Ira bangani ba para ha. Ira bangani ba para ha, lene. Ani layagola Pailatehanda tihondo lalu, Ibugua ko bini mbira handa walia nahe kogo tíni haru puwa ira bangani ba para halimu, lene.
JOH 19:7 Ani layago hale howa Yu wali agali tigua ladai bialu lalu, Ibuni i̱ Ngode Datagaliwabe Igini ko layagome inanaga mana lo ngago puguayago ibu homolene ngaore, lene.
JOH 19:8 Bi ogoni layago hale howa Pailate ibu gi timbuniore hene.
JOH 19:9 Gi timbuniore howa gabumane andaga biagoha lone anda puwa Yasuhondo lalu, Í̠ ani howa ibini kebe, lene. Ani layagola Yasuhanda ladai nabi hene.
JOH 19:10 Ladai nabiyagola Pailatehanda ibuhondo lalu, I̱hondo mbira nalole kebe. Í̠ golo peha lolenebi í̠ ira bangani ba para hadaba lolenebi i̱ kogo manda bia, lene.
JOH 19:11 Ani layagola Yasuhanda ladai bialu lalu, Ngode Datagaliwabehanda í̠na i̱hondo bulene hongo ngidago nangidale mbira nabibehe kele. Í̠na i̱hondo ko emene ale bere. I̱ minilo nde layago ibugua ko timbuniore biya, lene.
JOH 19:12 Ani layago hale howa Pailate ibugua Yasu golope hole henge hai bini. Henge hai bialu hearia Yu wali agali tigua dalimu olalu, Agali ogoni golope hariyagua í̠ Lomonaga handame haga Kininaga damene ndo ke. Agali mbira handame haga kini hole ibuni mo yaraga hayagua ibu Lomonaga handame haga Kinila waitigi ho ka, lene.
JOH 19:13 Tigua ani layago hale howa Pailate ibugua Yasu haru tagira ibuwa hama mini Ege To̱le̱ Mbalape dewa para ho winigoria godi lalu daba ki haganaga biraganeni berene. Hama ogoni Hiburu bi lalu, Gabada, laga hene.
JOH 19:14 Bolangua Halu Penegonaga Horo yawi holebira lowa horo hanuni kaware hayagola Pailatehanda Yu wali agalihondo lalu, Tínaga handame haga kini o kagoni, lene.
JOH 19:15 Ani layagola tigua dalimu olalu, Homelo ba. Homelo ba. Ira bangani ba para ha, lene. Ani layagola Pailatehanda tihondo lalu, Tínaga handame haga kini i̱na ira bangani ba para holiya hamelo kamibe, lene. Ani layagola loma binigo mo miaga haguane biarume ladai bialu lalu, Inanaga handame haga kini mende nahe Lomonaga handame haga Kini ibuni hangu ka, lene.
JOH 19:16 Ani layagola Pailatehanda lalu, Tínime ira bangani ba para hole haru pudaba, lene. Ani layagola tigua Yasu haru pene.
JOH 19:17 Yasu ibuni ira banga yalu haru pialu dindi mini Haguane Kuni laga winigoria haru pene. Dindi ogoni Hiburu bi lalu, Gologoda, laga hene.
JOH 19:18 Ogoriani tigua ibu ira bangani ba para hene. Yasu dombeni ba para howa agali kira lene labolabo ba para hene.
JOH 19:19 Pailatehanda ira mbalapeni bi ogo, Nasareteali Yasu Yu wali agalinaga Handame Haga Kini Ogoni, lalu gili buwa Yasunaga ira bangani ba para hene.
JOH 19:20 Bi ogoni Hiburu bi lalubi Ladini bi lalubi Girigi bi lalubi gilibu wiai hene. Anigo Yasu ira bangani ba para hayagoria Yarusaleme kaware winigo Yu wali agali dewalime bi gilibu wiago hondowa daga lene.
JOH 19:21 Ani gilibu wiago hondowa loma binigo mo miaga haguane biarume Pailatehondo lalu, Yu wali agalinaga Handame Haga Kini Ogoni lalu nagilibu wibe. Ibuni degeme lalu, Yu wali agalinaga Handame Haga Kini i̱ kogoni, laya lalu gilibu wia, lene.
JOH 19:22 Ani layagola Pailatehanda ladai bialu, I̱na o gili bidogoni gilibu wiaabo helo, lene.
JOH 19:23 Ami agali tigua Yasu ira bangani ba para howa ibunaga labolabo ti marialime ta hene. Ta howa ibuninaga aga lu bia gimbu biago tigua muwa podolene henge nawi mbiraore ogonibiore wabini biniyagola
JOH 19:24 ami agali biarume lalu, Gime lere nalami̱ya. Mbirali ai ibu mirabe handami̱ya tadu bima, lene. Anduane Homogonaga mbugani lo ngago ogo. I̱naga labolabo maru tini tale bu ta howa i̱naga aga lu biagonaga tadu bini, lalu gilibu nga. Ani binigome bi ogoni lola hene.
JOH 19:25 Yasu ba para heago ira banga kaware helowa ibu ai̱yabi ibu ai̱ya hagibuni Kolobasa one Meribi Magadala wali Meribi ti hene.
JOH 19:26 Yasuhanda ibu ai̱yabi ibunaga talima piaga mbirali gubalini ho haga henegobi kaware heago de hondowa ibu ai̱yahondo lalu, Ai̱ya-o í̠ igini o kagoni, lene.
JOH 19:27 Ani lowa ibugua ibunaga talima piaga biagohondo lalu, Í̠ ai̱ya o kagoni, lene. Ani layago hale howa ibunaga talima piaga biagome wali biago ibu andaga haru pu hene.
JOH 19:28 Yasuhanda ai bumaro bialu biai harugoni manda buwa, I̱ iba noaba, lene. Anduane Homogonaga mbugani ani lolebira lalu gilibu winigo lola halu lene.
JOH 19:29 Ani layagola waini iba kaubi ndisi mbiraha to̱lo winigo tigua dahundu ale ira mbira mini hisobo magane mbira waini iba kaubi biagoha ibira howa Yasu nelo ibunaga ne hambuni mo paga hene.
JOH 19:30 Ani biyagola Yasu ibugua iba biago nai howa lalu, Ai bumaro bialu biai harugoni, lene. Ani lowa ibunaga ma podope halu tongolo mini.
JOH 19:31 Yu wali agali haru haga tigua Sabada horo timbuni taraore helo loma bini yawi holebira lowa ti tomo mo manda manda biagane horo ogoningi Pailatehondo bi lamule pene. Tigua Sabada horo ogoningi tingini ira bangani wiaabo nahelo hame lowa Pailatehondo lalu, Ti abale homelo tinaga ge kuni podowa homaragola tinaga tingini mo yalu poloma̱ya ani bidaba labelo manda bu kama, lene.
JOH 19:32 Ani layagola ami agali biarume agali pigane ba para hayagonaga ge kunibi mende maha Yasu gi lehayagi ba para hayagonaga ge kunibi podene.
JOH 19:33 Ani buwa ti Yasu wiaria ibalu hearia ibu abale homayiyago hondowa ibunaga ge kuni napode wahene.
JOH 19:34 Ami agali mbirame yandareme Yasunaga habianeni nogoba hene. Nogoba hayagola daramabi ibabi tagira ibini.
JOH 19:35 Tíguabi heneneore leada manda buwa mini mbiraore wilimulonaga ani biyago de hendene mbiralime ani biya lalu heneneore laro manda buwa lene.
JOH 19:36 Ogonidagua biyagola Anduane Homogonaga mbugani bi lo ngago ogo, Ibunaga kuni mbira napodolebiraore, lalu gilibu winigo ogoni lola hene.
JOH 19:37 Anduane Homogonaga mbugani bi mende lo ngago ogo, Tigua agali mbira nogoba hayago wali agalime handaya ho holebira, lalu gilibu winigobi lola halu bini.
JOH 19:38 Arimadiali Yosebe ibugua Yasu tongo layago hondowa Pailatehondo lalu, Yasunaga tingini i̱na mo yalu poabe, lene. Yosebe ogoni ibu Yasunaga talima piaga henego Yu wali agali haru haga hearu hondowa gi howa oho hene. Yosebehanda bi ani layagola Pailatehanda lalu, E̱ yalu pobe, lene. Ani layagola Yosebe ibugua Yasunaga tingini mo yalu pene.
JOH 19:39 Nigodimusi Yasu hearia bamba mbiraga ibinigo ibubi Yosebe heba pialu ira mbiranaga ibane mini muwebi ira mende mini alo ogoninaga ibanebi bimaga henego Yasu tinginini ha̱i̱ hole mo yalu pene. Ira ibane ogoninaga genda magi timbuniore wini.
JOH 19:40 Libugua Yasunaga tingini muwa Yu agalime hora hole biaganedagua ira ibane biago ha̱i̱ howa labolabo pele bayaleore mbirame huba bini.
JOH 19:41 Yasu ira bangani ba para hayago dindi ogoriani mabu winigo mabu ogoriani egeandaha hora holene uli ayure dege tombo goabu ede howa mbirali hora nahe gahenge wini.
JOH 19:42 Sabada horo yawi holebira manda buwa hora holene uli ogoni kaware wiago hondowa libugua Yasunaga tingini ogoniha abale hora hene.
JOH 20:1 Horo Sandengi egerebagiore muna biyagola Magadala wali Meri ibu Yasu hora hayagoria puwa ege to̱le̱me panga payinigo dugua ho wiaria de hendene.
JOH 20:2 De hondowa ibugua Saimono Pidala talima piaga mende Yasuhanda gubalini ho haga henego ibula hearia wali biagome gerai lalu puwa libuhondo lalu, Anduane Homogo hora hayagoria nawiyago ti mo yalu piyiya. Agoha yalu puwa ngabe manda nabi kama, lene.
JOH 20:3 Ani layago hale howa Pidala talima piaga mendela libu tagira puwa Yasu hora hayagoria de hondo pene.
JOH 20:4 Libu gerai lalu pialu talima piaga mende biagome Pida yu wahalu hora hayagoria ibu abale pene.
JOH 20:5 Abale puwa ngabe hondole bulu paluwa handa anda halu hearia labolabo pele bayaore biago dege wiago de hendene. Wiago hondowa anda nape tagira hearia
JOH 20:6 Saimono Pida ibu mama ibuwa egeanda biagoha anda puwa labolabo pele bayaore biagobi
JOH 20:7 mende Yasunaga embone huba binigobi mandagi nawi hangu hangu wiaria de hendene.
JOH 20:8 Talima piaga mende abale gerai lalu ala íbu hene biago ibubi hora hayago egeanda biagoha maha anda pene. Anda puwa ogoni de hondowa mini mbiraore wini.
JOH 20:9 Anduane Homogonaga mbugani lo ngago, Ibu homowa heyalu polebira, lalu gilibu wini biago irane libugua bayuwa manda nabi hene.
JOH 20:10 De handalu libu andaga dai bini.
JOH 20:11 Yasu hora hayagoria Meri ibu tagira howa dugu bialu hene. Dugu bialu howa hora hayagoria bulu paluwa handa anda halu hearia
JOH 20:12 dahuliyali kira labolabo pele karule berearia de hendene. Yasunaga tingini winigoria mende Yasunaga embone winigohayagi bira mende Yasunaga ge winigohayagi bira biago de hendene.
JOH 20:13 Libugua ibuhondo lalu, Wali-o í̠ dugu berego aginagabe, lene. Ani layagola ibugua libuhondo lalu, I̱naga Anduane Homogo tigua yalu piyadago agoha ngabe toba howa dugu bero, lene.
JOH 20:14 Ani lowa ibu beregedalu hearia Yasu heago hondowa ibu Yasuda manda nabi hene.
JOH 20:15 Yasuhanda ibuhondo lalu, Wali-o í̠ dugu berego aginagabe. Ái hai bialu kebe, lene. Ani layagola ibu mabu biabe biaga agali kabe toba howa ibuhondo lalu, Agali-o í̠na yalu piriyagua i̱ni mo poliya ogoha yalu pu ngo lalu langi, lene.
JOH 20:16 Ani layagola Yasuhanda ibuhondo lalu, Meri-o, lene. Ani layago hale howa Meri ibu beregedowa ibuhondo Hiburu bi lalu, Labonai, lene. Inanaga bi lalu, Lawai haga.
JOH 20:17 Yasuhanda ibuhondo lalu, I̱ Aba karia iraga nahe kogo i̱ ela nahabe. I̱naga hameneru kagoria puwa au labe. I̱naga Ababi tínaga Ababi i̱naga Ngode Datagaliwabebi tínaga Ngode Datagaliwabebi karia iraga hole kogo laya labe, lene.
JOH 20:18 Ani layago hale howa Magadala wali Meri ibugua talima piaga biaru hearia puwa tihondo lalu, Anduane Homogo de handaru, lalu ibuhondo layagobi lamiai hene.
JOH 20:19 Horo Sande ogoningi dege alendo ni gai layagola ibunaga talima piaga biaru Yu wali agali haru haga hearume ti hondoligo lowa gi halu panga paya tagi ho berene. Ani berearia Yasu ibuwa ti bereagoria dombeneni íbu hene. Ibugua tihondo lalu, Mo palia holene tí heba helo laro, lene.
JOH 20:20 Ani lowa ibugua ibunaga gi habebi habianebi tihondo walia hene. Tigua de hondowa, Ina Anduane Homogooreda, lowa ti turu timbuni hene.
JOH 20:21 Yasuhanda tihondo halu mende lalu, Mo palia holene tí heba helo laro. I̱ Abahanda i̱ pu layadagua i̱nabi tí pudaba laro, lene.
JOH 20:22 Ani lowa ibugua ti bibahendeha buhe̱ pu la anda halu lalu, Ngode Datagaliwabe Dinini tíha helo ngero.
JOH 20:23 Mbiralime ko binigo tígua domarimiyagua domai holebira. Mbiralime ko binigo tígua nadomarimiyagua nadome wiaabo holebira, lene.
JOH 20:24 Yasu ibiyago ogoningi ibunaga talima piaga mbira mini Tomasa kai mini Hono Palu ibu nabereha ibinigo
JOH 20:25 maha talima piaga marume ibuhondo lalu, Iname Anduane Homogo de handarima, lalu lamini. Ani layagola Tomasahanda tihondo lalu, Ibunaga gi habeni nili motudu ngago de nahende howa i̱naga gi hondoneme ela nahe howabi ibunaga habianeni i̱naga gime ela nahe howabi i̱na mini mbiraore nawulebero, lene.
JOH 20:26 Ani layago Sarere mbira peha ibunaga talima piaga biaru andagaha lone ngoai ho berenego Tomasabi ti heba berene. Panga paya tagi ho berenego ti bereagoria dombeneni Yasu íbu howa tihondo lalu, Mo palia holene tí heba helo laro, lene.
JOH 20:27 Ani lowa ibugua Tomasahondo lalu, Í̠naga gi hondoneme i̱naga gi habeni ela halu handa. Í̠naga gi dogolalu i̱naga habianenibi ela halu handa. Hondowa mini kira nawi mini mbiraore wialu habe, lene.
JOH 20:28 Ani layagola Tomasahanda ibuhondo lalu, I̱naga Anduane Homogobi i̱naga Ngode Datagaliwabebi í̠ore ke, lene.
JOH 20:29 Ani layagola Yasuhanda ibuhondo lalu, Í̠na í̠naga deme i̱ de hondowa mini mbiraore werebe. Deme i̱ nahende howa mini mbiraore wialu karu ti turu timbuniore halu ka, lene.
JOH 20:30 Yasu ibugua ibunaga talima piagaru heba howa ti deni agalime nabiagane ale dewaore binigo mbuga ogoha gili nabini.
JOH 20:31 Mbuga ogoha bi gilibu ngago tí daga lalu howa Mbirali Dabo Helenego ibulebira lowinigo ibu Ngode Datagaliwabe Igini Yasuoreda manda buwa mini mbiraore wialu halimulonaga gilibu wero. Tígua ibuhondo mini mbiraore wialu kamirume holene gahenge yu halimulobi gilibu wero.
JOH 21:1 Maha Yasunaga talima piagaru iba Taiberiasa mini mende Galili angeni hearia Yasu ibuni ha pani halu ogodagua bini.
JOH 21:2 Saimono Pidabi Tomasa kai mini Hono Palu ibubi Galiliha Kaina tanoali Nadanele henegobi Sebedi igini kiralibi Yasunaga talima piaga kira mendebi ti mandagi hene.
JOH 21:3 Ti mandagi hearia Saimono Pidahanda tihondo lalu, I̱ wena minu porogo, lene. Ani layagola tigua ibuhondo lalu, Ina haru ma, lene. Ani lowa ti iba taluni puwa mbiraga wena minalu hearia homa mbira mina nabi hene.
JOH 21:4 Egerebagiore ni dole tiga biyagola Yasu iba angeni íbu hearia ibunaga talima piaga biarume Yasu kalo manda nabi hene.
JOH 21:5 Yasuhanda tihondo lalu, Igiriru-o wena mbira minu ngamibe, lene. Ani layagola tigua ladai bialu, Wena mbira naminuwiore, lene.
JOH 21:6 Ibugua tihondo lalu, Wena nu gi tigahayagi yupe harimiyagua wena minuleberami, lene. Tigua wena nu yupe halu hearia wena dewaore anda piyagola nu yamibe nahe hene.
JOH 21:7 Ani biyago hondowa talima piaga mbira Yasuhanda gubalini ho haga henegome Pidahondo lalu, O kagoni Anduane Homogoda, lene. Anduane Homogoda layago hale howa Pida ibunaga labolabo daliga biagane ala golo ngelenego mo bo bialu ibaha pora bialu Yasu hearia uba ede hene.
JOH 21:8 Talima piaga maru ti iba taluni howa nuha wena dewa anda piyago gililo yalu angeni uba ede hene. Ti iba angeni uba ede halu polenego kaundia ndo ge lunaga magi mida handari mbira (100) ale hangu wini.
JOH 21:9 Iba angeni iraga halu hearia ira pungane hihoailo deagoria wena mberediru hiriago de hendene.
JOH 21:10 Yasuhanda tihondo lalu, Wena minarimigo maru yalu ibidaba, lene.
JOH 21:11 Ani layagola Saimono Pida ibu puwa iba taluni howa wena nu yamuwa iba angeni gililo yalu ibini. Wena minayago timbuni dewaore daga handari mbirani pira duriani tebira (153) minini. Wena dewaore minayagome nu lere nalene.
JOH 21:12 Ani biyagola Yasuhanda tihondo lalu, Tomo nami̱ya ibidaba, lene. Ani layagola ibunaga talima piagaru tigua ibu Anduane Homogoore kagoni manda biai howa ti mbirame ibuhondo lalu, Í̠ ái kebe, nalene.
JOH 21:13 Yasuhanda mberedi dugu yalu ibuwa tihondo talebu migi bini. Wenabi anidagua dege bini.
JOH 21:14 Yasu ibu homalu heyu howa ibunaga talima piaga hearu hearia ha pani henego halu tebone ogoni.
JOH 21:15 Tigua tomo nai howa Yasuhanda Saimono Pidahondo lalu, Yone igini Saimono-o í̠na o karume i̱hondo gubalini ho kagobi ndo í̠na i̱hondo gubalini timbuni ho kebe, lene. Ani layagola Pidahanda ladai bialu lalu, E̱ laro. Anduane Homogo-o i̱na í̠hondo gubalini ho kogo í̠ manda bide, lene. Ani layagola Yasuhanda ibuhondo lalu, I̱naga nogo sibi iginiruhondo tomo mialu habe, lene.
JOH 21:16 Ani lowa ibugua Pidahondo halu mende lalu, Yone igini Saimono-o í̠na i̱hondo gubalini ho kebe, lene. Ani layagola Pidahanda ibuhondo lalu, E̱ Anduane Homogo-o i̱na í̠hondo gubaliniore ho kogo í̠ manda bide, lene. Ani layagola Yasuhanda ibuhondo lalu, I̱naga nogo sibiru haru habe, lene.
JOH 21:17 Ani lowa Yasuhanda ibuhondo halu tebone lalu, Yone igini Saimono-o í̠na i̱hondo gubalini ho kebe, lene. Ibugua ibuhondo halu tebone lalu, I̱hondo gubalini ho kebe, layago hale howa Pida ibu emene genda howa lalu, Anduane Homogo-o í̠ bibahende manda biai kego i̱na í̠hondo gubaliniore ho kogo manda bidegoni, lene. Ani layagola Yasuhanda ibuhondo lalu, I̱naga nogo sibiru haru habe, lene.
JOH 21:18 Ani lowa lalu, I̱na í̠hondo heneneore laro. Í̠ igiri hongohe haringi í̠ninaga aga gambali buwa í̠ni poa biyagoha pu pebe bialu hari. Ai í̠ wahe harengi í̠naga gi dogo laregola mbiralime í̠naga gi minu huba bialu í̠ napoa kegoha haru polebira, lene.
JOH 21:19 Yasuhanda bi layadagoni Pida ibu ogonidagua bialu homalu Ngode Datagaliwabe mini mo yaraga holebira manda buwa lamini. Ani lowa Yasuhanda ibuhondo lalu, I̱ porodagua talima ibabe, lene.
JOH 21:20 Pida ibu beregedo handalu hearia Yasunaga talima piaga mbira Yasu ibu gubalini ho haga hene biago Pidanaga mbirahayagi hearia hendene. Bamba ti tomo dawa nole ngoai ho birayangi agali mbira Yasunaga galu hombeni palu paga howa ibuhondo lalu, Anduane Homogo í̠ aiwa nde lolebirabe, lenego o biago hearia hendene.
JOH 21:21 Hondowa Pidahanda Yasuhondo lalu, Anduane Homogo-o agali ogo agua bulebirabe, lene.
JOH 21:22 Ani layagola Yasuhanda ibuhondo lalu, I̱ dai beroria ibu haabo helo hamelo koyagua nde agi. Í̠naga biabe ndo. Í̠na i̱ porodagua talima ibulene ngago ibabe, lene.
JOH 21:23 Ani lenego hale howa Yasu talima pialu hearume lalu, Ibunaga talima piaga ogoni nahomolebira laya, lalu hene. Yasuhanda, Ibu nahomolebira, nale. I̱ dai beroria ibu haabo helo hamelo koyagua nde agi. Í̠naga biabe ndo, lalu ogonidagua hangu lene.
JOH 21:24 Ogodagua biya ogodagua laya lalu talima piaga ogonime bebani bi gilibu ngago iname hondowa heneneore layadalo manda bu kama.
JOH 21:25 Yasuhanda biabe tara tara dewaore binigo bibahende hangu hangu gilibu wiai kole dindi bibahendeha mbuga dewaore uruni wibe nakale manda bido.
ACT 1:1 Tiobilasa-o Yasu ibunaga biabe pigane teniyagoria howa ibu dahuliya andaga iraga holene tu helo howa ibugua biabe biyagobi bi mana lawai hayagobi bibahende i̱na i̱naga mbuga mbira ala gili birugoriani gilibu wiai harugoni. Yasu ibu iraga nahe howa ibugua Ngode Datagaliwabe Dinininaga hongome agali abosolo helo dabayaruhondo, Ogodagua bilimu ogodagua lalimu, laga bialu lalu lamiai hene.
ACT 1:3 Yasu homalu mo heya howa horo pira mariani (40) halu dewaore ibuni walia hayagola tigua Yasu de handalu ibu heba haabo hene. Ibu heba halu tigua Yasu ibuniore heyu kagoni lowa manda biaiore hene. Yasu ti heba howa ibugua Ngode Datagaliwabehanda Handame Ho Kagonaga mana lamialu hene.
ACT 1:4 Ibugua tihondo hongo howa lalu, I̱ Abahanda mbirali ngulebero lalu lo ngago ngulebira lalu abale langirudagua ogoni ngilo Yarusaleme wahalu napilimu.
ACT 1:5 Yonehanda wali agali ibame baboraya binigo horo marudaru mbira howa Ngode Datagaliwabehanda ibu Dininime tí baboraya bia holebira, lene.
ACT 1:6 Abosolo biaru Yasu heba mandagi ngoai ho biruwa tigua Yasuhondo lalu, Anduane Homogo-o Isaraele wali agali inaneme handame ho holoma̱ya í̠na handame holene inahondo ngia dai bulenengi áyu ogonibe, lene.
ACT 1:7 Ani layagola Yasuhanda tihondo lalu, Maha tara tara bulenenaga horo i̱ Aba ibuni hangume ala manda manda buwa pongo bo wini ngago tínaga biabe ndo.
ACT 1:8 Ngode Datagaliwabe Dinini ibu tí kamigoha ibiragola ibunaga hongo holene tíha to̱lai holebira. Ani biragola tí Yarusalemehabi Yudia bibahendehabi Samariahabi dindi timbuni ogo gibuni gibunihabi Yasuhanda agua laya agua biya lalu i̱ mo walia hagane tí holeberami, lene.
ACT 1:9 Yasuhanda bi ogoni lai hayagola tigua handaya ho hearia ibu dahuliya andaga yaraga hayagola beralibame ibu ge hayagome ti Yasu lone handabe nahe hene.
ACT 1:10 Ibu piyagola tigua hari daligaha handa daga ho hearia aguabe tobane buwa agali kira aga peleorebi ogobi labolabo ti heagoria abale ha pani hene.
ACT 1:11 Ani ha pani howa agali biago labome lalu, Galilialiru-o tí hari daligaha handa daga ho kamigo aginagabe. Yasu tí heba mandagi hemira howa Ngode Datagaliwabehanda ibu dahuliya andaga helo mo yaraga hayago de handarimigo Yasu o piyagonidaguaore dai bulebira, lene.
ACT 1:12 Ani laya handala abosolo biaru Hari Olibe heagoria howa Yarusaleme dai bini. Hari Olibe weagoria heagoria howa Yarusaleme polene emene kaware dege wini.
ACT 1:13 Ti Yarusaleme anda puwa tamu hobane daligani tini hagaha iraga halu anda pene. Pidabi Yonebi Yamesebi Andurubi Pilibibi Tomasabi Badolomiubi Madiubi Alibiasa igini Yamesebi Saimono ka̱i̱ mini mende Paidoro ibubi Yamese igini Yudasabi
ACT 1:14 agali urunime Ngode Datagaliwabehondo bi lole mandagi ngoai haga hene. Wali marubi Yasu ai̱ya Meribi Yasu hamenerubi abosolo biaru heba ngoai howa Ngode Datagaliwabehondo bi laga hene.
ACT 1:15 Horo maru howa Yasu mana yu tiga biaga hearu bibahende lamaga howa handari mbirani pira kira (120) agima ngoai ho heagola Pidahanda heyuwa tihondo lalu,
ACT 1:16 Hamene mbaliniru-o Ngode Datagaliwabe Dinini ibugua Debidiha howa lalu Yudasahanda bulebiragonaga mbiwia ho wini. Ani binigo agali hearume Yasu minilo Yudasahanda walia hayagola Anduane Homogonaga mbugani lo winidagua lola haya.
ACT 1:17 Ina heba biabe mandagi buluma̱ya Yasuhanda Yudasa dabayagola ibu ina aria hene, lalu Pidahanda lene.
ACT 1:18 Yudasa ibu ko biyagonaga muni yolo miyagome dindi mbira tu wini. Ani buwa dindi ogoriani ibuni homo ibira howa tombe tula lowa tini tagira ibiyagola tongo lene.
ACT 1:19 Wali agali Yarusalemeni hearu bibahendeme ogonidagua biya layago hale howa tigua tininaga bi lalu dindi ogoni mini Ageledama wini. Inanaga bi lalu Darama Dindi.
ACT 1:20 Pidahanda lalu, Iba Gana mbugani bi mbira lo ngago ogo, Ibunaga anda tabuanda helobi ibu anda ogoniha mbirali napalelobi, lalu gilibu nga. Bi mendebi lo ngago ogo, Biabe ibugua biaga wiyago mendealime bilo aribia holene nga, lalu gilibu nga, lene.
ACT 1:21 Bi ogoni gilibu ngago mitangi bialu agali mbira ogobi dabami̱ya. Ngode Datagaliwabehanda Yasu mo heya hayago de hendenego helolene nga. Agali ogoni ibu Anduane Homogo Yasu heba ibaga bialu mandagi harimangi howa henegobi Yonehanda baboraya bialu hayangi howa Yasu hari daligaha Ngode Datagaliwabehanda mo yaraga hayangi howa henegobi bibahende biyago handai henego agali ogonibi mbira ina heba helo dabami̱ya, lene.
ACT 1:23 Pidahanda ani layagola tigua agali kiranaga mini mo wini. Agali mendego mini Yosebe maru hearume ibu mini Basabasa lalu marume Yasadasa laga hene. Mendego ibu mini Madaiasa.
ACT 1:24 Ani mo wuwa ti Ngode Datagaliwabehondo bi lene. Tigua lalu, Anduane Homogo-o wali agali bibahendenaga bu habaneha í̠ handai ho kegoni. Agali ogo labo dabarimago mendealigome Yudasahanda abosolo biabe biala ho ngelayago bu yolo mialu helo í̠na mbira dabarigo ina walia habe. Yudasa ibuni pole heneyagoha pole abosolo biabe ogoni wahalu piyago, lene.
ACT 1:26 Ngode Datagaliwabehondo bi lowa tigua o biago labonaga mini gilibu gambiruwa mo ema biyagola Madaiasa mini ala tagira ibiyagola ibu helene. Ani bialu abosolo beriali (11) biaruha ibu hombeane (12) ha tago hene.
ACT 2:1 Yu wali agalinaga horo timbuni mini Pendigosi hayangi Yasu mana yu tiga biaga hearu bibahende anda mbiraha mandagi ngoai ho berene.
ACT 2:2 Ani ngoai ho berearia puyabu hongo howa u e lagadagua hari daliga howa ibayuago hale hene. U e layuagome anda ti bereagoha laanda hai hene.
ACT 2:3 Laanda hayagola mbirale ira hungu hegene ale ibuwa ti emboneni dolo ibira ibira biyago tini de hendene.
ACT 2:4 Ani biyagola Ngode Datagaliwabe Dinini ibugua tiha to̱lai hene. To̱lai howa wali agali dindi tara taranaga bi lagalaga bilo Dinini ibugua ti mo la hene.
ACT 2:5 Yu wali agali Ngode Datagaliwabe mitangi biaga hearu dindi bibahendeha howa Yarusaleme íbu ngoai ho hene.
ACT 2:6 Wali agali urunime u e layuago hale howa bibahende ngoai hene. Ngoai ho hearu hangu hangume hale halu hearia Yasu mana yu tiga biaga hearume bi taratara lagalaga biayuago hale howa ti mogolo hendene.
ACT 2:7 Tigua mogo lowa lalu, Inanaga bi lalu karu ti bibahende Galili agali hangu ndoyagoda.
ACT 2:8 Tigua ina hangu hangunaga bi lalu langirane haleho kamago agidabe.
ACT 2:9 Ina dindi tara tarali íbu kamagoni. Padia howabi Midia howabi Ilama howabi Mesobodemia howabi Yudia howabi Kabadosia howabi Pondasa howabi Esia howabi
ACT 2:10 Piriya howabi Pambilia howabi Iyibi howabi Libia dindi Sairini kaware howabi Lomo ariabi
ACT 2:11 Kiridi howabi Arebia howabi Yu wali agalibi wali agali maru ti Yu wali agali mana yu tiga biagarubi ina bibahende kamagohondo tigua inanenaga bi lalu Ngode Datagaliwabehanda biabe timbuni tara biyago langirago, lalu
ACT 2:12 ti mogo lowa lagalaga bialu lalu, Ogoni agidabe, lene.
ACT 2:13 Maru hearume mege bialu lalu, Waini iba áyu dege wabu wiago timbuni nayadago lulu yaragoni, lene.
ACT 2:14 Ani layago hale howa Pidabi abosolo maru beriali (11) biarubi ti heba howa ibugua tihondo bi hongo howa lalu, Ina Yu wali agali kamarubi Yarusalemeni kamirubi o biyagoni languliya bayuwa hale halimu.
ACT 2:15 Agali uruni lulu iba nayadago larimibe. Ani ndoyago. Horo áyu wene egerebagi dege kamago.
ACT 2:16 O biragoni bamba Ngode Datagaliwabe mana latagi haga Yoelehanda mbiwia halu lowinidagua lola haragoni. Ngode Datagaliwabehanda layadagua Yoele ibugua lowinigo ogo,
ACT 2:17 Ngode Datagaliwabehanda lalu, Ha maro bulene horo kaware haragola i̱na buleberogo ogo. I̱na i̱naga Dinini wali agali bibahendeha helolebero. Tínaga waneiginime i̱naga bi mana latagi halu holebira. Tínaga igiri daliaherume mbirale tara de gandeba hondolebira. Tínaga agali waherume emaga hondolebira.
ACT 2:18 E̱ aniore buwa horo uruningi i̱naga biabe bia haga wali agalirubi i̱na i̱naga Dinini tiha helolebero. Ani berogola tigua i̱naga bi mana latagi halu holebira.
ACT 2:19 Hari daligaha biabe tara tara nahendene ale hongohe i̱na mo bia halu dindihabi manane tara tara mo walia halu holebero. Anduane Homogonaga Horo timbuni gibi pongo bo winigo naibidaha darama ibunibi ira hungu hagua timbunibi heba hondoleberami. Ni hundialu egebi darama ale dolebirago hondoleberami.
ACT 2:21 Ani birangi Anduane Homogohondo, Pele ngi, lararume pele mulene yulebira, lalu, Ngode Datagaliwabehanda lene lalu Yoele ibugua bi ogoni lowinigo, Pidahanda lene.
ACT 2:22 Pidahanda lalu, Isaraele wali agaliru-o bi larogo hale halimu. Nasareteali Yasu ibugua agalime nabiagane alebi nahendene alebi taratara binigo Ngode Datagaliwabehanda Yasuha howa ani bini. Ani biyagome Nasareteali Yasu ibu Ngode Datagaliwabehanda loma bia hene howa biabe ogoni bule ibinigo bialu walia hene. Tí hemigoha howa biabe ogoni biyago hondowa tíni manda bidami.
ACT 2:23 Yasu tí kamiruhondo minu ngulebirago Ngode Datagaliwabehanda ala manda manda bu howa ani bilo helene. Anigo Yasu homelo agali ko biaga hearume ibu ira bangani ba para helo tígua mo bia harimi.
ACT 2:24 Yasu tongo layagola howa homanaga hongome ibu dariba nahabeheoreyagola Ngode Datagaliwabehanda ibu golope halu mo heya hene.
ACT 2:25 Debidihanda Yasu mitangi bialu lenego ogo, I̱na Anduane Homogo ibu i̱naga deni haabo heago i̱ de handaru. Kome i̱ mo ema bia holilono ibu i̱ heba haabo haga ka.
ACT 2:26 Ogoninaga i̱ gubaliniha turu holene to̱lai halu i̱na bi turubi laro. Ngode Datagaliwabe í̠na i̱ dinini humbirini andaga naheloleberego. Í̠naga biabe bia haga loma biaho helarigonaga tingini togo nabilo heloleberego. Tingini áyu kogoni howa awe bayaleore holebero lo yu tiga bidogoni.
ACT 2:28 Í̠na i̱ haabo holenenaga harigani poliya mo walia harigoni. Í̠na i̱ heba haabo kegome turu holene i̱ha to̱lai holebira, lalu Debidihanda ani laya, lene.
ACT 2:29 Pidahanda lalu, I̱ hamene mbaliniru-o inanaga mamali mini lene Kini Debidi mitangi bialu i̱na tíhondo tigatiga laro. Ibu homenegobi hora henegobi ibunaga homali áyu wiaabo kagobi manda bu kama.
ACT 2:30 Abale ibu Ngode Datagaliwabe mana latagi haga hearia Ngode Datagaliwabehanda ibuhondo bi heneneore lo wialu lalu, Mahaore í̠naga aguanene mbiralime wali agalinaga kini í̠ kedagua helolebero, lalu lowinigo Debidi ibu manda bu hene.
ACT 2:31 Ngode Datagaliwabehanda mani ogodagua bulebira mitangi buwa Debidi ibugua bi ogodagua lalu, Ngode Datagaliwabehanda ibu dinini humbirini andaga hela nabi ibu tinginibi homaliha togo nabini, lalu bamba lenego Ngode Datagaliwabehanda Mbirali Dabo Helenego homowa mo heya holebiragonaga mitangi bialu ani lene.
ACT 2:32 Yasu ogoniore Ngode Datagaliwabehanda mo heya hayagola iname handaiore harima.
ACT 2:33 Ngode Datagaliwabe ibugua Yasu mo yaraga halu ibu Abanaga gi tigahayagi berelowa ibuhondo ibunaga Dinini ngulebero lowinidagua mini. Áyu handaramigobi hale haramigobi ibugua inahondo turu halu ngirago inaha hela hayago ogoni.
ACT 2:34 Debidi ibuni dahuliya andaga iraga hene ndo ibugua lowialu lalu, Anduane Homogohanda i̱naga Anduane Homogohondo lalu, Í̠naga waitigi karu í̠naga geni malia ho wilo mo malia heloliya í̠ i̱naga gi tigahayagi ogoria birabe, lalu laya, Pidahanda lene.
ACT 2:36 Pida ibugua ani lowa lalu, Isaraele wali agali tí bibahende kamiru manda bilimu. Yasu ogoniore tígua ira bangani ba para harimigo Ngode Datagaliwabehanda ibu Anduane Homogo helobi Mbirali Dabo Helenego helobi helayagoni bayuwa manda bilimu, lene.
ACT 2:37 Bi ogoni layago hale howa wali agali hearume tinaga gubaliniha nogobaore hayagola dara hene. Dara howa tigua Pidabi abosolo maru biarubi tihondo lalu, Hameneru-o ina agi bulene ngabe, lene.
ACT 2:38 Ani layagola Pidahanda ladai bialu lalu, Tí bibahende ko birimigonaga mini beregedalu Yasu Kerisonaga minini howa hangu hangu baboraya bilimu. Ani beramigola Ngode Datagaliwabehanda tígua ko birimigo domo wahalu tíhondo ibu Dinini ngulebira.
ACT 2:39 Ngode Datagaliwabehanda, Nguleberoore, lalu bi lowinidagua tíhondobi tí waneiginihondobi wali agali kaundia karuhondobi ti Anduane Homogo inanaga Ngode Datagaliwabe ibugua ibu karia ibilo ololebiraru uruni ti bibahendehondo ngulebiraore, Pidahanda lene.
ACT 2:40 Pidahanda bi galone dewa hongo howa lalu bi marubi lalu, Tí ko biaga karu heba mandagi pani nolene ngagoria holemini, lene.
ACT 2:41 Ibugua mana lamiyago hale howa wali agali dewalime yu tiga bialu baboraya bini. Horo ogoningi dege wali agali daosini tebira (3,000) Yasu aria hearuha ho gimbu bini.
ACT 2:42 Tigua abosolo biarume mana lawai hayago hale halu Yasu aria hearu heba mandagi mini mbiraore howa biamogo bigibigi bialu tomo mandagi nalu Ngode Datagaliwabehondo bi laabo halu mandagi ngoai haga hene.
ACT 2:43 Ngode Datagaliwabehanda abosolo biaruha howa agalime nabiagane alebi nahendene alebi biyagola wali agali bibahendeme handawa buwa mogolo hene.
ACT 2:44 Yasu mana yu tiga bu hearu bibahendeme mandagi mini mbiraore howa turu halu tinaga mbirale wiaru talebu migimigi bini.
ACT 2:45 Dindibi mbirale taratara wiarubi tigua yolo mialu muni miyaru tinaga aria biamogo bulene wiadagua biamogo bigi bini.
ACT 2:46 Horo bibahende ti Anduane Homogonaga andaha ngoai halu tinaga andaru pugupugu bialu bu mini hada howa turu halu tomo mandagi naga hene.
ACT 2:47 Tigua Ngode Datagaliwabe mini yaraga halu heago hondowa wali agali bibahende hearume ti mana tigabiore bialu kagoni laga hene. Horo bibahende wali agali maru mini mbiraore wigi biyaru Anduane Homogohanda ti Yasu aria hearuha ho gimbu bigi bilene.
ACT 3:1 Horo mbirungi alendo ni gai layagola Pida Yonela Anduane Homogonaga andaha pene. Alendo ogonidagua haragola ti Ngode Datagaliwabehondo bi lagane wini.
ACT 3:2 Agali mbira ibu ai̱yahanda taba hanayangiore howa kuduguhe wiaabo henego ibu Anduane Homogonaga anda haraba mbira mini Debene ogoriani berene. Horo bibahendeni ibu dameneme ibu mo yalu ibalu ogoriani berelaga hene. Ibugua Anduane Homogonaga andaha anda poraruhondo, Muni ngi, lelo ani berelaga hene.
ACT 3:3 Pida Yonela Anduane Homogonaga andaha anda pialu hearia de hondowa agali kuduguhe biagome libuhondo, Mbirale mbira ngidaba, lene.
ACT 3:4 Ani layagola Pida Yonela libugua ibu handaya halu lalu, Iya handaya ha, lene.
ACT 3:5 Ani layagola mbirale mbira ngulebiralo mitangi bialu ibugua libu handaya ho berene.
ACT 3:6 Ani handaya ho bereria Pidahanda ibuhondo lalu, I̱ muni nayiorego mbira dege yu kogo ngero. Nasareteali Yasu Kerisonaga minini howa larogo í̠ heyalu ibagabu ha, lene.
ACT 3:7 Ani lowa Pidahanda agali kudugu biagonaga gi tigani yuwa mo heya hayagola abaleore ibunaga ge hongo howa
ACT 3:8 porabu dagadaga bialu ibu ibagabu hene. Libu heba Anduane Homogonaga andaha pialu ibugua ibaga bialu porabu dagadaga bialu howa Ngode Datagaliwabe mini yaraga halu hene.
ACT 3:9 Ibu ani ibaga bialu Ngode Datagaliwabe mini yaraga halu hearia hondowa wali agali hearume lalu,
ACT 3:10 Anduane Homogonaga anda haraba mini Debene ngagoha muni ngi lalu biraabo haraligo ibu ndoyabe, lene. Ani lowa bibahendeme mogo lowa handawa bini.
ACT 3:11 Agali biago ibu Pida Yonela yaniho hearia hondowa wali agali hearume mogo lalu Anduane Homogonaga anda hane mbira mini Solomononaga Hane wiagoria ti hearia gerai lalu pene.
ACT 3:12 Wali agali ibiyago hondowa Pidahanda tihondo lalu, Isaraelealiru-o ogoni biyago hondowa tí mini mogo lowa iya handawa bu kamigo agibe. Iyanaga hongome Ngode Datagaliwabe mana bayale yu kabagomebi agali ogo mo dabi hayadalo manda bidamibe.
ACT 3:13 Abarahamabi Aisagabi Yagababi inanaga mamalirubi tinaga Ngode Datagaliwabe ibugua ibunaga biabe biahaga Yasu mini daliga helo mo yaraga hene. Tígua tínaga haru haga hearia Yasu ogoni minu yalu pirimi. Tígua Pailate hearia ibu haru pialu Pailatehanda ibu golole manda biyaria tígua nagololeore lai harimi.
ACT 3:14 Ibu agali Ngode Datagaliwabehondo loma bia henebi tigabibi heago tígua, Ibu hame naledama, lalu Pailatehondo, Ina hame ledamadagua bialu í̠na homelo baga agali mbira golope habe, larimi.
ACT 3:15 Ani larimigome wali agali holene gahenge yilo miaga tene biago homelo belo tígua mo ba harimi. Homayagola Ngode Datagaliwabehanda ibu mo heya ho heleago iyameore de handaribago.
ACT 3:16 Yasu ogoni mininaga hongome agali ala kudugu ho wini ogohondo hongo mini. Áyu tí de hendedamigobi manda bidamigobi irane iyame Yasuhondo mini mbiraore wiribagome. Ibunibi Yasuhondo mini mbiraore wiyagome ibu áyu bayale kagoni tí de handai kamigoni.
ACT 3:17 I̱ hameneru-o tíguabi tí haru haga karumebi Yasuhondo birimigo bayuwa manda nabi howa birimiya manda bido.
ACT 3:18 Bambaore Ngode Datagaliwabehanda ibu mana latagi haga bibahende hearuha howa lalu, Mbirali Dabo Helenego ibulebira lowinigo ibu tandaga nolebira, lalu mbiwia halu lowini. Bi ani layadagua henene lola hene.
ACT 3:19 Anigo Ngode Datagaliwabehanda ko birimigo domo wahelo mini beregedalu ibuhayagi hole ibidaba. Ani birimiyagua
ACT 3:20 Anduane Homogo ibuha howa ibugua tí dinininaga hongo holene ngulebira. Ani buwa Mbirali Dabo Helenego tínaga helo bamba loma bia ho helenego Yasu o biagoniorego tí kamiria ibilolebira.
ACT 3:21 Bambaore Ngode Datagaliwabehanda ibunaga mana latagi haga loma bia heneru tiha howa mbiwia halu layadagua Ngode Datagaliwabehanda bibahende mo gahenge hole horo pongo bo wiyago lola helo Yasu ogoni ibu dahuliya andagani hondo ka.
ACT 3:22 Mosesehanda bamba ani layadagua lalu, Anduane Homogo tínaga Ngode Datagaliwabehanda i̱ helayadagua tí ariaha howa mbirali Ngode Datagaliwabe mana latagi haga helo helolebira. Helaragola ibugua bi mana langirago damene bibahende tígua hale halu bulene nga.
ACT 3:23 Hale howa nabiaga karu ti Ngode Datagaliwabenaga wali agali heba nahelo bo waholebira, Mosesehanda lene.
ACT 3:24 Mosesehanda ani laya, lalu Pidahanda lalu, Ngode Datagaliwabe mana latagi haga henerubi Samuelebi maha hayarubi ti bibahendeha howa Ngode Datagaliwabehanda horo áyu kamagoria birarunaga mbiwia hene.
ACT 3:25 Ngode Datagaliwabehanda ibunaga mana latagi haga heneruha howa bi lowinigobi tínaga mamalihondo habo nalolene bi lowinigobi áyu tí kamirume mo yalimulonaga nga. Ngode Datagaliwabehanda bamba Abarahamahondo lalu, Í̠naga aguaneneha howa i̱na wali agali dindini karu bibahende mo turu hai holebero, layadagua ani bini.
ACT 3:26 Anigo Ngode Datagaliwabehanda Yasu mo ibunaga Biabe Bia Haga helowa tí hemiria ala ibilene. Ani binigo irane ogo. Ibugua tí ko bialu kamigoria howa haru dai bialu mo turu holenaga ibilene, lalu Pidahanda lene.
ACT 4:1 Pida Yonelame wali agalihondo mana lamialu hearia loma binigo mo miaga agali hearubi Anduane Homogonaga anda mamage hagarunaga haguane heagobi Sadiusi agali hearubi ibini.
ACT 4:2 Abosolo agali biago labome wali agalihondo lawai halu lalu, Yasu homalu mo heya hayagome wali agali homeneru bibahende mo heyu holebira, lene. Ani lawai hayago hale howa agali ibiyarume keba howa
ACT 4:3 tigua Pida Yonela minu yalu puwa horo ogoningi alendoyagola yawi godi lole lowa garabaya andaha palelene.
ACT 4:4 Pida Yonela libugua bi mana lamiyago wali agali dewalime hale howa yu tiga bini. Ala yu tiga biyarubi mani yu tiga biyarubi lamaga halu daosini duria (5,000) agima hene.
ACT 4:5 Horo mende hayagola Yu wali agalinaga haru haga hearubi agali ala hene miniwi hearubi Mana lowinigo lawai haga hearubi ti Yarusalemeni ngoai hene.
ACT 4:6 Loma binigo mo miaga haguane timbuni Anasa heagobi ibu damene Kaiabasabi Yonebi Alegandabi maru ibu baile hearubi ngoai ho berene.
ACT 4:7 Ti bereagoria Pida Yonela handade ho helowa tigua libuhondo lalu, Ogoni biribidagoni agua bialu biribibe. Ainaga mininibi hongonibi ogoni biribibe, lene.
ACT 4:8 Ani layagola Pidahanda ibuha Ngode Datagaliwabe Dinini to̱lai howa tihondo lalu, Wali agali haru haga kamirubi agali ala hene miniwi kamirubi
ACT 4:9 te áyu laramigo agali ala kuduguhe biago mo dabi hayagonaga laramiyagua
ACT 4:10 nde tí bibahendebi Isaraele wali agali bibahendebi irane manda bulene nga. Nasareteali Yasu Kerisonaga mini hongome agali ogoni mo dabi hayago ibu áyu tí heba bayale o kagoni de hendedamigoni. Tígua Yasu Keriso ogoni ira bangani ba para harimigo ibu homayagola Ngode Datagaliwabehanda mo heya hene.
ACT 4:11 Anduane Homogonaga mbugani bi lo ngago ogo, Tí anda biaga kamirume ege to̱le̱ mbira handabe manga ho harimigo ege to̱le̱ ogoni timbuni duniniore ho heleda, lalu gilibu ngago ogoni ibu Yasu ka.
ACT 4:12 Ibuni degeme pele ngibehe ka. Dindi bibahendeni ina pele ngulene mende nahe Yasu ibu dege Ngode Datagaliwabehanda nginigo, lalu Pidahanda lene.
ACT 4:13 Ganisolo agali biarume Pida Yonelame gi nahe hongo howa bi lalu heago libu agali damene dege sigulu nabini howa bi tara layago hondowa mogolo hendene. Ani hondowa tigua libu Yasu heba haabo haraligo manda bini.
ACT 4:14 Tigua agali ala kudugu ho wini biago Pida Yonela heba bayale heago hondowa bi ladai bibe nahe hene.
ACT 4:15 Anigo tigua Pida Yonelahondo, Tagira pudaba, lowa tini hangu lo manda bialu lalu,
ACT 4:16 Agali o biago labohondo agi bimi̱yabe. Libugua agalime nabiagane ale tara timbuni biyagonaga te Yarusalemeni wali agali karu bibahendeme hale hai kago. Iname galone ndo bameyago nalabehe kama.
ACT 4:17 Mana ogoni anda haame holigo iname libuhondo, Yasu mini lalu wali agali lone nalamilibu, lalu hongo howa lamimi̱ya, lene.
ACT 4:18 Ani lowa tigua libu olowa ibiyagola libuhondo hongo howa lalu, Libugua Yasu mini lalu lone wali agali lawai holene nawiore, lalu lamini.
ACT 4:19 Ani layagola Pida Yonelame ladai bialu lalu, Iyame tígua laramidagua bulene ngabe be Ngode Datagaliwabehanda laradagua bulene ngabe. Ngode Datagaliwabehanda ogoni tigatiga lolebirago agobe tínime dabadaba.
ACT 4:20 Iyame de handaribagobi hale haribagobi lo wahabe nahe lamiaabo holeberaba, lene.
ACT 4:21 Ani layagola Ganisolo agali biarume Pida Yonelahondo hongo howa lalu, Lamiaabo haribiyagua iname libu pani nalibulo boleberamaore, lene. Libugua biyago hondowa wali agali bibahende hearume Ngode Datagaliwabe mini yaraga halu heago hondowabi tigua bolene irane handa walia nahe howa wahalu golope hene.
ACT 4:22 Agalime nabiagane ale bialu agali kudugu ho wini mo dabi hayago biago ibunaga mali pira maria (40) agima hene.
ACT 4:23 Golope haya handala Pida Yonela libu aria hearia dai buwa loma binigo mo miaga haguane biarumebi agali ala hene miniwi biarumebi libuhondo bi layago libugua ti lamiai hene.
ACT 4:24 Lamiai hayagola ti bibahendeme hale howa Ngode Datagaliwabehondo bi lalu, Anduane Homogo í̠na hari daligabi dindibi ibabi bibahende ogoniha ngarubi Wabiaga kegoni.
ACT 4:25 Bamba inanaga mamali Debidi í̠naga biabe bia haga biago ibuha howa í̠ Dininime bi lariyago ogo, Yu wali agali ndo wali agali taratara hearume aginaga keba timbuni henebe. Wali agali o biarume aguaore bami̱ya lalu ndi nde lalu karu irane aginagabe.
ACT 4:26 Dindi bibahendeni wali agalinaga kini hearume wai bule manda manda bu hagahaga bini. Haru haga dege degerume ngoai howa Anduane Homogohondobi ibunaga Mbirali Dabo Helenegohondobi handabe manga howa ani bini, lariyago, lalu Pidahanda lene.
ACT 4:27 Pida ibugua laabo halu lalu, Ogonidagua Herodobi Pondiasa Pailatebi libu haru Yu agalibi agali tara tara hearubi heba dindi ogoriani ngoai hene. Í̠naga Biabe Bia Haga Loma Biahene Yasu í̠na ibu Mbirali Dabo Helenego helo helarigo tigua ibuhondo handabe manga howa ti ani ngoai hene.
ACT 4:28 Ti ani biyagola bambaore í̠na í̠naga hongomebi hamemebi bule manda manda bu wiridagua bibahendeore lola hai hene.
ACT 4:29 Anigo Anduane Homogo-o tigua ina bolenaga bi hongo howa lalu hayago í̠ manda bibe. Iname í̠naga biabe bia haga kamago ti hondowa gi nahe í̠naga bi mana elahe howa loloma̱ya mo hongo habe larama.
ACT 4:30 Warago bo ngaru mo dabi hole í̠naga gi dogolabe. Í̠naga Biabe Bia Haga Loma Biahene Yasunaga minini howa nahendene alebi agalime nabiagane alebi iname buluma̱ya mo hongo habelo hame ledama, lene.
ACT 4:31 Tigua Ngode Datagaliwabehondo bi lai hayagola anda ti ngoai ho bereago ema bialu dumbirumbi ale bini. Ani biyagola Ngode Datagaliwabe Dinini ibugua tiha to̱lai hayagola tigua Ngode Datagaliwabe bi mana hongo howa lamialu hene.
ACT 4:32 Yasu mana yu tiga bu hearu ti minimebi gubalinimebi mbiraore ho hene. Ti mbiraore ho howa tinaga mbirale mbirale wiaru i̱ni hangunaga nale buru pale hearu talebu migi bini.
ACT 4:33 Abosolo biarume Anduane Homogo Yasu ibu homowa mo heya ho kaore lalu hongo howa lalu hene. Ani bialu heago hondowa Ngode Datagaliwabehanda ti bibahende mo turu halu biamogo timbuniore bialu hene.
ACT 4:34 Yasu mana yu tiga biyaru ti mbira buru palia nabi hene. Tinaga aria marume dindibi andabi yolo muwa muni miyago
ACT 4:35 abosolo biaruhondo mini. Ani miyagola abosolo biarume wali agali maru buru pale hearuhondo mulene wiadagua talebu migi bialu hene.
ACT 4:36 Ogonidagua bialu agali mbira mini Yosebe ibu Saibarasali Libai aguanene howa ibugua ibunaga dindi mbira yolo muwa muni miyago yalu ibalu abosolo biaruhondo mini. Abosolo biarume Yosebe ibu ka̱i̱ mini Banabasa laga hene. Mini ogoni inanaga bi lalu Mini mo hongo haga.
ACT 5:1 Ani biyadagua agali mbira Ananaia ibu one Sabairala libugua dindi mbira winigo yolo mini.
ACT 5:2 Muni muwa Ananaia ibu onela mini mo mbiraore howa ibugua muni ogoni tale bialu maru ngelalu maru abosolo biaru hearia yalu pene.
ACT 5:3 Yalu ibiyagola Pidahanda Ananaiahondo lalu, Í̠na Ngode Datagaliwabe Dinini mo hondo hole dama Heyolabeme í̠ gubaliniha daraga helo henge mirigo agibe. Í̠naga dindime yolo mirigo maru do harigome í̠na Ngode Datagaliwabe Dinini mo hondo hole biri.
ACT 5:4 Dindi yolo nami howa dindi í̠ninaga wiri. Í̠na dindi yolo muwa munibi í̠ninaga dege wiri ndobe. Í̠ bu miniha ogonidagua bule manda birigo agibe. Tindule larigo agalihondo ndo Ngode Datagaliwabehondo lari, lene.
ACT 5:5 Pidahanda ani layagola hale howa Ananaia ibu odope howa homo tongolo mini. Ogonidagua biya layago hale hayaru ti gi timbuni hene.
ACT 5:6 Ani biyagola igiri daliahe hearume ibuwa ibunaga tingini labolabome huba bialu tagira mo yalu puwa hora hene.
ACT 5:7 Tomo dawa duguabehe ale hayagola howa Ananaia one ibu agalini homayago manda nabi howa ibini.
ACT 5:8 Ibiyagola Pidahanda ibuhondo lalu, Dindime yolo miribigo muni bibahende ogonibe, lene. Ani layagola ibugua ladai bialu lalu, E̱ muni miribago bibahendeore ogoni, lene.
ACT 5:9 Ani layagola Pidahanda lalu, Í̠bi í̠ agalinibi libu haru Anduane Homogonaga Dinini ibugua agi birabe hondole ba handaribigo agibe. Í̠ agalini hora hayarume í̠bi yalu pole anda harabani áyu tamuha anda ibule ibarua, lene.
ACT 5:10 Ani layago hale howa ibu Pida geha abale odope howa homo tongolo mini. Ani homayagola igiri daliahe biaru ibalu ibu tongo lo mu wiago hondowa tigua ibunaga tingini tagira yalu puwa ibu agalini hora hayagoria dege hora hene.
ACT 5:11 Ani biya layago hale howa wali agali Yasu mana yu tiga biaga hearu bibahendebi wali agali marubi ti gi timbuniore hai hene.
ACT 5:12 Wali agali heba howa abosolo biarume agalime nabiagane alebi nahendene alebi dewa bialu hene. Yasu mana yu tiga bu hearu bibahende Anduane Homogonaga anda hane mbira mini Solomononaga Hane wiagoria ti mandagi ngoai haga hene.
ACT 5:13 Ani ngoai haga biyagola wali agali hearume Yasu mana yu tiga biaru de hondowa ti bayaleore ka lalu tinaga mini yaraga halu hene. Ani biya tiraga wali agali maru tagira hearume Yasu mana yu tiga bu hearu heba holene gi hene.
ACT 5:14 Anigoyu wali agali dewa hearume Anduane Homogohondo mini mbiraore wigi bialu Yasu aria hearuha ha tago haga bini.
ACT 5:15 Abosolo biarume biabe ogoni bialu heago hondowa tigua wali agali warago bo wiaru yalu ibuwa harigani mo ngelaga bini. Paliagane dagianibi tamungurunibi mo pale lowa hariga ti paleagoha Pida ibalu hariga ti padagoha ibiragola ibunaga muninime ti ge helo lowa ani ngelene.
ACT 5:16 Dindi maru Yarusaleme kaware wiaruha howa wali agali dewaoreme tinaga damene warago bo wiarubi dama daragahe hearubi yalu ibiyagola bibahende mo dabi halu bayale hai hene.
ACT 5:17 Ani biyagola loma binigo mo miaga haguane timbuni heagobi Sadiusi agali hearu ibu heba hagarubi tigua abosolo biarume bialu heago hondowa henge timbuniore lowa mo tandaga hole manda bini.
ACT 5:18 Ani manda buwa tigua abosolo biaru minu yalu puwa garabaya andaha helene.
ACT 5:19 Ani helearia ogoningi mbiraga Anduane Homogonaga dahuliyali mbirame garabaya anda panga dugualu abosolo biaru tagira haru puwa lalu,
ACT 5:20 Anduane Homogonaga andaha puwa holene gahengenaga mana wali agali lamilimu, lene.
ACT 5:21 Ani layago hale howa muna biyagola abosolo biarume Anduane Homogonaga andaha anda puwa wali agalihondo mana lawai halu hene. Loma binigo mo miaga haguane timbuni heagobi ibu heba haga hearubi tigua Ganisolo te lole Yu wali agalinaga agali ala hene miniwi hearu mo ngoai hene. Mo ngoai howa tigua lalu, Garabaya andaha howa agali biaru haru ibilo lamule pudaba, lene.
ACT 5:22 Ani layagola mamage haga biarume garabaya andaha puwa handalu hearia abosolo biaru naheya handala Ganisolo agali biaru lamule dai bini. Dai buwa tigua lalu,
ACT 5:23 Iname garabaya andaha puwa panga logo ndibu lo wiagobi mamage haga hearubi de handarima. Panga dugualu anda puwa agali biaru naheoreyane tí langule dai birima, lalu lamini.
ACT 5:24 Ani lamiyagola hale howa loma binigo mo miaga haguane hearubi Anduane Homogonaga anda mamage hagarunaga haru haga agali heagobi tigua abosolo biaru agua biyabe toba howa mini burugulo hene.
ACT 5:25 Ti mini burugulo hearia agali mbira ibuwa ibugua lalu, Hale hadaba. Agali garabaya andaha garabaya bu helarimiru ti Anduane Homogonaga andaha pu howa wali agalihondo mana lawai halu ka, lene.
ACT 5:26 Ani layagola mamage haru haga biago ibu mamage haga agali heba pialu abosolo biaru hearia puwa haru dai bini. Wali agali dewa hearume ina ege to̱le̱me bolebirago lowa tigua abosolo biaru hendore haru dai bini.
ACT 5:27 Haru dai buwa tigua abosolo biaru Ganisolo agali biaru bereagoria handade ho helene. Helayagola loma binigo mo miaga haguane timbuni biagome tigua bi lelo mo bi la halu lalu,
ACT 5:28 Yasu mini lalu mana lawai holene nawi lalu hongo howa langirimago. Ogoni mo wahalu mana biagoni Yarusaleme wali agalihondo loyogo larimi. Inahondo, Agali o homayagoni tígua barimi, loa ho kamigoni, lene.
ACT 5:29 Ani layagola Pidabi abosolo marubi tigua ladai bialu lalu, Agalime laradagua ndo Ngode Datagaliwabehanda laradagua buleberama.
ACT 5:30 Tígua Yasu homelo ira bangani ba para harimigola howa ina mamalinaga Ngode Datagaliwabe kago ibugua Yasu mo heya hene.
ACT 5:31 Yasu ibu Haru Hagabi Pele Ngiagabi helo Ngode Datagaliwabehanda ibu yaraga halu ibunaga gi tigahayagi berelene. Ngode Datagaliwabehanda ani biyago irane ogo. Isaraele wali agalime mini beregedelobi ko biyago domo wahelobi ani bini.
ACT 5:32 Inamebi Ngode Datagaliwabehanda ibunaga bi mana biaga karuhondo Dinini miyago ibuguabi ani biyagoni de hondowa latagi halu hagaru ina kamagoni, lalu lamini.
ACT 5:33 Bi ani layago hale howa Ganisolo agali biarume keba timbuni halu abosolo biaru homelo bo waholene nga lo manda bini.
ACT 5:34 Ani manda bialu hearia Perisi agali mbira Mana lo winigo lawai haga henego mini Gamaliele ibu heyini. Wali agali bibahende hearume ibu agali mini lene ka laga hene. Ibugua heyuwa lalu, Agali biaru tagira haru pudaba, lowa
ACT 5:35 Ganisolo biaruhondo lalu, Isaraelealiru-o agali uruni homelo bo waholene nga larimigo lone bayuwa manda bilimu.
ACT 5:36 Abale agali mbira mini Teudasa ibuwa ibugua lalu, I̱ agali timbuniore kogoni, layagola howa agali dewa handari maria (400) agima ti ibuha ho gimbu bini. Gabumaneme ibu homelo bayagola ibunaga talima piaga biaru purogo lalu mana lawai hayagobi ereba hai hene.
ACT 5:37 Ani biyagola howa mani gabumaneme yasia layangi Galiliali mbira mini Yudasa ibini. Ibuwa ibunaga bime wali agali dewa ibuha yamiai halu hearia gabumaneme ibubi homelo bo wahayagola ibunaga talima piaga biarubi purogo lai hene.
ACT 5:38 Ani binigo áyu agali o biaru heba te larimago tihondo mbira bia nabi wahalu helalimu. Agalime manda biagadagua bialu kayagua mana ogoni ereba holebira.
ACT 5:39 Ani ndo mana ti bialu kago tene Ngode Datagaliwabe howa bialu kayagua iname Ngode Datagaliwabela waitigi howa wayali habe nahe holeberama, lalu Gamalielehanda lene. Ibugua ani layagola hale howa Ganisolo agali biarume ibugua layadagua bulene nga manda bini.
ACT 5:40 Ani manda buwa tigua abosolo biaru olowa ibiyagola ti minu bowa lalu, Yasu mini lalu mana ogoni lone lawai nahalimu, lalu ti golope hene.
ACT 5:41 Ani biyagola abosolo biarume Ganisolo bereagoria howa tagira puwa ti Yasu mininaga taga pani tandaga nolene Ngode Datagaliwabehanda ngiyago mitangi bialu turu timbuni halu pene.
ACT 5:42 Ani buwa horo bibahendengi Anduane Homogonaga andaha howabi wali agali andagaruha howabi tigua Bi Mana Debene lawai halu, Yasu ibu Mbirali Dabo Helenego ka, lalu lamialu haabo hene.
ACT 6:1 Horo uruningi Yasu talima piaga dewa ho tago haabo hayagola Yu wali agali Girigi bi laga maru hearume Hiburu bi laga maru hearu heba lai lalu hene. Lai lalu howa lalu, Tígua horo bibahendengi tomo mbiraleru tale bigi bialu howa inanaga wali dalo bedaru embeda haga beramili, lalu lai lene.
ACT 6:2 Ani layagola abosolo homberiali (12) biarume wali agali Yasu mana yu tiga bu hearu bibahende mo ngoai howa lalu, Ina abosolo kamarume tomo mbiraleru tale bule Ngode Datagaliwabenaga bi mana lamulenego yu waharimayagua nakarulapedago.
ACT 6:3 Anigo inanaga hamene mbaliniru tígua tí aria agali kariali mini leneru Ngode Datagaliwabe Dinini to̱laihe mini gigabiwiru hondowa agali urunibi karu dabalimu. Dabowa biabe ogoni tigua haru helo helami̱ya, lene.
ACT 6:4 Ani lowa lalu, Iname nde Ngode Datagaliwabehondo bi lolenebi wali agalihondo ibunaga bi mana lamulenebi ogoni hangu buluma̱yanaga ani helami̱ya, lene.
ACT 6:5 Ani layagola wali agali bibahendeme, Bi ogoni karulapedago, lai hene. Ani lowa tigua Sibeni dabene. Sibeni ibu Ngode Datagaliwabehondo mini mbiraore wulenebi Ngode Datagaliwabe Dininibi ibuha to̱laihe hene. Sibeni dabowa tigua Pilibi Porogorasa Nigano imaru Timono Pamenasa Nigolasi uruni ti dabene. Nigolasi ibu Andiogoali howa alaore Yu wali agalinaga mana mo yinigo ti heba ho gimbu bu hene.
ACT 6:6 Bibahende ngoai ho hearume agali ti dabayaru abosolo hearia haru pu helayagola abosolo biarume Ngode Datagaliwabehondo bi lowa agali dabayarunaga haguaneni gi wini.
ACT 6:7 Ani biyagola howa Ngode Datagaliwabenaga bi mana loyogo lene. Yarusalemeni Yasu talima piaga wali agali dewaore ho tago haga bini. Loma binigo mo miaga agali dewa hearumebi Yasu mana yu tiga bini.
ACT 6:8 Ngode Datagaliwabenaga biamogo bia holenebi hongo holenebi Sibeniha to̱lai hayagola ibugua wali agali heba howa agalime nabiagane alebi nahendene alebi bialu hene.
ACT 6:9 Ani biyagola agali marume Sibeni baba lai lalu hene. Yu agali o biaru ti ngoai hagane anda mbira mini Golope Hene Agalirunaga Anda ogoninaga aria hene. Agali uruni ti Sairini howabi Alegandaria howabi agali maru Silisia howabi Esia howabi íbu howa tigua Sibeni baba lai lalu hene.
ACT 6:10 Lai lalu howa Ngode Datagaliwabe Dinini ibugua Sibeninaga mini mo gigabia hayagola Sibenihanda bi layago tigua bi layagome lo dambi nahabehe hene.
ACT 6:11 Lo dambi nahabeheyagola tigua agali marume nde lelonaga tihondo muni mini. Muni miya handala puwa tigua lalu, Sibeni ibugua Mosese Ngode Datagaliwabela mege bialu mana layago hale harima, lene.
ACT 6:12 Anidagua biyagome wali agali hearubi agali ala hene miniwi hearubi Mana lowinigo lawai haga hearubi mo keba hai hene. Mo keba hayagola tigua Ganisolo agali hearia Sibeni minu yalu pene.
ACT 6:13 Ani buwa tigua agali marume ke̱ halu nde lelo haru ibini. Haru ibiyagola tigua ke̱ howa lalu, Agali o kagonime Anduane Homogonaga anda loma bia hene biagobi Mosese heneyangi Mana lowinigobi mege bialu bi ko laabo haga ka.
ACT 6:14 Ibugua au laya, Nasareteali Yasuhanda Anduane Homogonaga anda ogoni gialo wahai halu mamalinaga mana Mosesehanda lowinigo mo aribia holebira, layago iname hale harima, lene.
ACT 6:15 Bi ani layagola hale howa Ganisolo agali bi lalu berearu bibahendeme Sibeni handaya halu hearia ibunaga dengui dahuliyalinaga ale hearia de hendene.
ACT 7:1 Loma binigo mo miaga haguane timbuni heagome Sibenihondo lalu, Tigua bi larago henene larabe, lene.
ACT 7:2 Ani layagola Sibenihanda ladai bialu lalu, Aba hameneru-o bi larogo hale hadaba. Ina mamali Abarahama ibu Haranaha nape Mesobodemiani hearia Ngode Datagaliwabe mini daliga taraore baya buruguleore kago ibu ha pani hene.
ACT 7:3 Ha pani howa ibugua Abarahamahondo lalu, Í̠naga dindibi damenerubi helalu dindi mbira i̱na walia holeberogoha pobe, lene.
ACT 7:4 Ani layagola hale howa Abarahama ibu Kaladia dindi wahalu Haranani hole pene. Ibu aba homayagola howa Harana wahalu dindi áyu tí kamigoha Ngode Datagaliwabehanda, Hole pu, layagola íbu hene.
ACT 7:5 Ogoningi Ngode Datagaliwabehanda Abarahamahondo dindi tu wuwa emeneorebi mbira nami howa ibugua, Dindi ogoni í̠bi í̠naga aguanenebi tí halimulo ngulebero, lalu lowini. Ngode Datagaliwabehanda bi ogoni layago Abarahama waneigini naheangi lowini.
ACT 7:6 Ngode Datagaliwabehanda Abarahamahondo bi lenego ogo, Í̠ aguaneneru mali handari maria (400) dindi tarani howa garabaya biabe ale bia halu kagola dindi tara agalirume ti mo tandaga holebira.
ACT 7:7 Ani bialu howa ti garabaya biabe ale bilo bia haga wali agaliru i̱na ti pani mulebero. Ani berogola í̠ aguanene biaru ti dindi tara wahalu dindi ogoriani ibuwa tigua i̱naga mini yaraga halu holebira, lalu Ngode Datagaliwabehanda ani laya, lene.
ACT 7:8 Sibeni ibugua laabo halu lalu, Ngode Datagaliwabehanda habo nalolene bi ogoni lo wiai howa ogoninaga manane wialu ibugua Abarahamahondo dongone podo mabu biaga mana bulene mo wini. Anigo Aisaga ibu ai̱yahanda taba hanayagola howa horo haliningi Abarahamahanda Aisaganaga dongone podo mabu bini. Ani biyadagua maha Aisagahanda Yagabanaga dongone podo mabu bini. Mahaore Yagaba ibuguabi ina Yu wali agali kamarunaga mamali homberiali (12) biaru emene galini howa tinaga dongone podo mabu biai haga hene, lalu Sibeni ibugua lene.
ACT 7:9 Sibenihanda lalu, Inanaga mamali beriali (11) urunime hombeane Yosebehondo handabe manga howa henge lalu ibu Iyibi dindiha garabaya biabe ale bilo agali maru hearuhondo muni ngidaba lowa ti muni mini. Yosebe ibu genda yu holene dewa wiagoria hearia Ngode Datagaliwabehanda ibu heba howa biamogo bini. Yosebe ibu Iyibi wali agalinaga kini hearia haru piyagola ibugua mana bayale bilobi mini gigabiwi helobi Ngode Datagaliwabehanda mini. Ani biyagola howa Iyibi wali agali hearubi kini andagaha wali agali hearubi ti bibahende haru helo kini biago ibugua Yosebe dabo helene.
ACT 7:11 Ani biyagola howa Iyibihabi Kenanahabi gaea timbuni bialu hina gari piyagola wali agali hearu tandaga nalu hene. Inanaga mamali biarume tomo nolene hai bialu hearia mbira handa walia nahe hene.
ACT 7:12 Handa walia nahe howa Iyibini tomo nga layago hale howa Yagaba ibugua ibu igini inanaga mamali biaruhondo, Tomo mo pudaba, lene.
ACT 7:13 Maha halu mende mo pialu hearia Yosebehanda ibu hameneruhondo, I̱ Yosebe kogoni, lalu la pani hene. Ani layagola howa Yosebe dameneru ka layago kini biagome hale hene.
ACT 7:14 Yosebe aba Yagababi ibu damene heba lamaga halu pira kariani duria (75) ti Iyibi ibilo Yosebehanda bi lawia hene.
ACT 7:15 Lawia hayagola ti bibahende Iyibini anda pu haabo howa mani Yagaba ibu iginirubi ti halu homai hene.
ACT 7:16 Yagaba Yosebela libunaga tingini hora hole Segeme dindi yalu dai bini. Dindi ogoniha ala Abarahamahanda Hamo iginihondo muni mialu homa hora holenaga homali dindi tu wa minigoria hora hene.
ACT 7:17 Ngode Datagaliwabehanda Abarahamahondo bi lowinigo lola holene tu kaware hayagola ina mamali Iyibini hayaru dewaore au loabe tobahe ho dame bu hene.
ACT 7:18 Ani bu heangi kini mende ibu Yosebe manda nabi heagome Iyibi wali agali handame ho hene.
ACT 7:19 Ibugua ina mamali mo hondo halu ti tandaga nelo, Tínaga waneigini galiru homelo tagiraha wahadaba, lene.
ACT 7:20 Ogoningi wali mbirame gali bayaleore mbira mini Mosese taba henene. Taba honowa ibu ai̱yahanda gali biago hondo halu ege tebirani ibu andaga tamuha bayuwa ngelo do ho berene.
ACT 7:21 Ani buwa tagiraha wahearia kini waneme ibu handa walia howa mondo bialu, I̱ igini, lowa hondo hene.
ACT 7:22 Mondo buwa tigua Mosesehondo Iyibialinaga mana gigabi wiago lawai hayagola bi lolenebi mana bulenebi gibi manda biai howa ibu agali timbuniore hene.
ACT 7:23 Mosese ibunaga mali pira maria (40) hayagola howa ibu damene Isaraele wali agali abi kabe hondole ti hearia polene manda bialu pene.
ACT 7:24 Puwa ibugua Iyibi agali mbirame Isaraele agali mbira balu hearia de hendene. Hondowa ibugua Isaraele agali biago pele mialu Iyibi agali biago bo wahene.
ACT 7:25 Mosesehanda manda bialu, I̱ togoni howa Ngode Datagaliwabehanda Isaraele wali agaliru golope holebira ti ani manda bu holebirago, Mosese ibu mitangi bini. Isaraele wali agaliru ti ani manda nabi hene.
ACT 7:26 Ani buwa egerebalene Isaraele agali kiralime gungu bialu hearia hondowa Mosesehanda mo hada hole manda bini. Ibugua lalu, Ogo labo-o hale hadaba. Libu gungu berabigo agibe. Libu hamenela ndobe, lene.
ACT 7:27 Ani layagola mendeali gungu biaga tene biagome Mosese he̱la amu howa ibuhondo lalu, Í̠na haru hagabi daba ki biagabi habelo helayadago aiwabe.
ACT 7:28 Abe í̠na Iyibi agali homelo bo waharidagua i̱bi bo wahole kebe, lene.
ACT 7:29 Bi ani layago hale howa Mosese ibu Iyibi wahalu Midiana dindiha hole ibida pu hene. Midianani howa ibu igini kira hene.
ACT 7:30 Mali pira maria (40) howa Mosese ibu dindi koni Hari Sainai kaware heagoria ira mbira hungu bialu hearia dahuliyali mbira Mosese hendelo ha pani hene.
ACT 7:31 Ani biyago hondowa Mosese mogo lalu bayuwa de hondole ira deagoria kaware pene. Kaware pialu hearia Anduane Homogonaga bi hale hene.
ACT 7:32 Anduane Homogohanda lalu, Í̠naga mamali Abarahama Aisaga Yagaba imaru tinaga Ngode Datagaliwabe i̱ kogoni, lene. Bi ani layuagola Mosese ibu gi timbuni howa duru lowa de hondolene gi hene.
ACT 7:33 Anduane Homogohanda ibuhondo lalu, Dindi í̠ kegoni i̱ni loma bia ho winini kego í̠ ge su hadalu wibe.
ACT 7:34 Iyibini howa i̱naga wali agali karu tandaga timbuni nalu kago i̱na de hendedo. Tigua u̱lu̱ lalu kago hale howa i̱na pele mule daluwa ko. Í̠ Iyibi poleberego pole íbu, laya, lene.
ACT 7:35 Sibenihanda layadagua laabo halu lalu, Mosese ogoni Isaraele wali agalime ibuhondo handabe manga howa lalu, Í̠ haru hagabi daba ki biagabi habelo helayadago aiwabe, tigua lene. Dahuliyali mbira ira hungu biyagoria ha pani hayagome biamogo bialu Mosese ogoni ti haru helobi pele milobi Ngode Datagaliwabehanda dabalu ibilene.
ACT 7:36 Iyibi howabi iba solowara mini Iba Daramabi bereagoria howabi mali pira mariani (40) dindi ko yobi wiagoria howabi Mosese ibugua agalime nabiagane alebi nahendene alebi bialu Iyibi howa Isaraele wali agali haru tagira pialu howa ani bini.
ACT 7:37 Mosese ogoni ibugua Isaraele wali agalihondo lalu, Ngode Datagaliwabehanda i̱ dabo helayadagua tíni ariaha howa ibugua ibunaga mana latagi haga mbirali tí heba helo dabo helolebira, lene.
ACT 7:38 Mosese ogoni ibu Isaraele wali agali ti dindi ko yobiha ngoai ho heagoria ti heba hene. Mosese ina mamali heba heagola dahuliyali mbiralime Hari Sainai heagoria howa ibuhondo bi laminigo ibubi Mosese heba hene. Ngode Datagaliwabenaga haabo holene mana inahondo langule Mosese ibugua hale howa yu tiga bini.
ACT 7:39 Mosesehanda bi layago ina mamali biarume hale habe manga howa ibu he̱lope hene. He̱lope howa tigua tinaga minime Iyibi dai bule hamelo hene.
ACT 7:40 Ani hame lowa tigua Aronohondo lalu, Iyibiha dai buluma̱ya mbirale mbirame ina haru helo bi pupu wulenaga gime wabibe. Ina Iyibi howa tagira ibuluma̱ya Mosesehanda haru hayago ai ibu pu ereba hayadago. Agoha piyadabe manda nabi kama, lene.
ACT 7:41 Ani lowa ogoningi tigua mbirale nogo bulumaga igini ale gime wabu helowa o biagohondo nogo bulumaga sibiru bo mialu hene. Inaneme bayale wabirimada, lowa ti bi pupu wialu tomo dewa dawa nene.
ACT 7:42 Ani biyagola Ngode Datagaliwabehanda ti erembira mialu tigua hari daliganaga yakundiruhondo bi pupu wilo helene. Ogonidagua Ngode Datagaliwabe mana latagi haga hearume mbugani gilibu winigo ogo, Isaraele wali agaliru-o mali pira mariani (40) dindi koha howa nogo bulumagabi sibibi bo mirimigo i̱hondo ndo bo ngirimi.
ACT 7:43 Dama Molegenaga balai anda yalu pirimi. Dama Lebananaga yakundi ale mbira ogonibi wabuwa yu ibaga bu harimi. Dama uruni bi pupu wulenaga wabirimigo awe marume tí minalu Babilono dindi amuraha haru pelo, Haru pudaba, lolebero, lalu gilibu nga, lalu Sibenihanda lene.
ACT 7:44 Ibugua laabo halu lalu, Inanaga mamalime dindi koha howa Ngode Datagaliwabe ti heba kago manda bule tigua Balai Anda wabu helene. Balai Anda ogoni Ngode Datagaliwabehanda Mosesehondo, Ogobi wabibe, lalu walia hayagobi tigua wabini.
ACT 7:45 Maha inanaga mamali iginirume ti aba pani ho aribia howa Balai Anda ogoni tigua yu aribia halu Yosua heba pene. Yosua heba pialu heagola Ngode Datagaliwabehanda bamba howa dindi tarani wali agali hearu bo ba tagi haga biyagola tigua dindi karulama pialu Balai Anda biago yalu puabo hene. Ogoningi howa Balai Anda biago dindi ogoriani helenego Debidi heneyangi haabo hene.
ACT 7:46 Debidihanda Ngode Datagaliwabe mo turu howa lalu, Í̠ Yagabanaga Ngode Datagaliwabe howa habelonaga anda buabago buabe, lene.
ACT 7:47 Ani lenego anda nabi heagola Solomono ibugua anda mbira Ngode Datagaliwabenaga helo lowa bini.
ACT 7:48 Ngode Datagaliwabe Daligaorene Daliga kago ibu anda agali gime biniruha nahaga ka. Ibunaga mana latagi haga mbirali heagome bi lo ngago ogo,
ACT 7:49 Anduane Homogo ibugua lalu, Dahuliya andaga i̱na haru holenenaga biragane wialu dindi bibahende ngaru i̱naga ge dogolope ho wiagane ngago tígua i̱ni holiyanaga anda abi ale buleberemibe. I̱ ha̱lo̱ biruliya henge agoha ngelaho kamibe.
ACT 7:50 Uruni bibahende i̱na wabirugo ndoyabe, lene lalu gilibu nga, lene.
ACT 7:51 Sibeni ibugua lalu, Tí wali agali bu mini giambeore kami. Tínaga bu mini Ngode Datagaliwabe mitangi nabiaga kagobi kami. Ibunaga mana hale habe manga howa hale nahagaore kami. Tí tínaga mamali henegobiore howa tígua Ngode Datagaliwabenaga Dininihondo manga ho haabo kamigoni.
ACT 7:52 Ngode Datagaliwabe mana latagi haga heneru mbirali tínaga mamalime mo tandaga nahe aiyabe. Bamba Ngode Datagaliwabe mana lama ibiyarume, Ngode Datagaliwabenaga Biabe Bia Haga mini tigabiwi ibuni ibulebira, laga biyagola tínaga mamalime bo wahaga bini. Ai tígua nde agali mini tigabiwi o biago ndelowa homelo bo waharimi.
ACT 7:53 Ngode Datagaliwabehanda ibunaga mana lowinigo dahuliyali togoni howa nginigo ogoni tígua yu howa nabiaga kami, lalu Sibenihanda lene.
ACT 7:54 Sibenihanda bi ogoni layago hale howa Ganisolo agali biarume keba timbuni howa ne gengero lene.
ACT 7:55 Ani biyagola Sibeniha Ngode Datagaliwabe Dinini to̱laihe howa ibugua dahuliya andaga handadaga halu Ngode Datagaliwabenaga wá taraore holenebi Yasu ibu Ngode Datagaliwabenaga gi tigahayagi heagobi de hendene.
ACT 7:56 De hondowa ibugua lalu, De handadaba. Dahuliya andaga dugua ho ngago. Agali Hole Ibiyago ibu Ngode Datagaliwabenaga gi tigahayagi kago de hendedo, lene.
ACT 7:57 Ani layagola Ganisolo agali biarume ga̱ timbuni lalu gi hondoneme hale hariga hangai hagahaga buwa ti bibahendeme ibu abale minini.
ACT 7:58 Sibeni minalu tanonaga pabe tagirahayagi gililo yalu puwa ibu homelo to̱le̱me bene. Bayarume tinaga labolabo daliga karulagane igiri daliahe mbira heago mini Solo ibugua wu helo golo mini.
ACT 7:59 Tigua Sibeni to̱le̱me balu heagola dege ibugua Anduane Homogo olalu lalu, Anduane Homogo Yasu-o i̱naga dinini yamibe, lene.
ACT 7:60 Ani lowa ibugua ge duli hanga ho biruwa dalimu olalu, Anduane Homogo-o tigua ko biragoninaga pani nami wahabe, lene. Ani lowa ibu homene.
ACT 8:1 Sibeni bo wahayagonaga Solohanda, Karulape birima, lo manda bini. Horo ogoningi howa Yasu mana yu tiga biaga Yarusalemeni hearu tandaga timbuniore nalu hene. Ti bibahende ibida pialu Yudiahabi Samariahabi purogo lene. Abosolo biaru ti dege pu nabi Yarusalemeni hondo hene.
ACT 8:2 Agali maru mini tigabiwi hearume dugu timbuni bialu Sibeninaga tingini hora hene.
ACT 8:3 Ani biyagola Solohanda Yasu mana yu tiga biaga bibahende biaru bo wahole manda bini. Ani manda buwa anda bibahendeha piai halu Yasu mana yu tiga biaga hearu wali agalibi gililo yalu tagira pialu garabaya andaha ba andanda bini.
ACT 8:4 Yasu mana yu tiga biaga biaru ibida purogo layarume Yasu mana lamima pene.
ACT 8:5 Pilibihanda Samaria dindini tano timbuni wiagoria puwa wali agali hearuhondo Mbirali Dabo Helene ibulebira lowinigo íbu ka lamialu hene.
ACT 8:6 Ani lamiyagola wali agali dewa hearume Pilibihanda agalime nabiagane ale biyago de handalu ibugua bi layago bayuwaore hale ho hene.
ACT 8:7 Dama dewa daraga hearia wara tagi haga biyagola ga̱ lalu tagira pugu bini. Wali agali kuduguhe wiarubi ge kohe hearubi mo dabi haga bini.
ACT 8:8 Ani biyagola tano ogoriani wali agali hearu turu timbuni ho hene.
ACT 8:9 Dindi ogoriani agali gamuyi mbira mini Saimono henego ibugua gamu tara biaabo hayago hondowa Samaria wali agali hearume mogolo hene. Saimono ibugua, I̱ agali timbuniore kogoni, layagola howa
ACT 8:10 wali agali mini lenebi mini nalenebi ta nabi bibahende hearume ibugua bi layago bayuwa hale hene. Bibahende biarume lalu, Agali o biago Ngode Datagaliwabenaga hongo holene karulo kago mini Hongo Timbuni ibu kagoni, laga hene.
ACT 8:11 Saimono ibugua bambaore howa gamu tara biaabo hayago wali agali biarume mogo lowa ibugua bi layago tigua bayuwa hale hene.
ACT 8:12 Pilibihanda tihondo Ngode Datagaliwabehanda Handame Ho Kagonaga bi mana debenebi Yasu Keriso íbu ka lalubi lamiyagola tigua yu tiga biyagola wali agali uruni baboraya bini.
ACT 8:13 Saimono ibubi yu tiga biyagola baboraya bini. Baboraya buwa ibu Pilibiha hapara ho howa Pilibihanda nahendene alebi agalime nabiagane alebi biyagola hondowa Saimono ibu mogolo hene.
ACT 8:14 Samaria wali agalime Ngode Datagaliwabe bi mana yu tiga bu ka layago hale howa abosolo Yarusalemeni hayaru tigua Pida Yonelahondo, Libugua hondo pudaba, lene.
ACT 8:15 Ani layagola libu Samaria wali agali Yasu mana yu tiga bu hearu hearia puwa tiha Ngode Datagaliwabe Dinini helo libugua Ngode Datagaliwabehondo bi la hene.
ACT 8:16 Ala Ngode Datagaliwabe Dinini tiha hole nadali ti Anduane Homogo Yasunaga mini degeni baboraya bu hene.
ACT 8:17 Ngode Datagaliwabehondo bi la howa Pida Yonela libugua wali agali biarunaga haguaneni gi wiyagola Ngode Datagaliwabe Dinini tiha hole dalini.
ACT 8:18 Abosolo biago labome wali agali haguaneni gi wiyagola Ngode Datagaliwabe Dinini tiha hole daliyago de hondowa Saimonohanda Pida Yonelahondo, Muni ngero, lalu,
ACT 8:19 I̱na i̱naga gime wali agali haguaneni werogola Ngode Datagaliwabe Dinini tiha hole dalilo hongo ogoni ngilibulo, lene.
ACT 8:20 Ani layagola Pidahanda ladai bialu lalu, Ngode Datagaliwabehanda turu howa bame ngirago munime mule manda birigo í̠bi í̠naga munibi libu haru heli dindi pilibulo.
ACT 8:21 Í̠naga bu mini tigabi ndo kego Ngode Datagaliwabehanda de hendedago biabe ogoni í̠naga ndogo í̠na bulene nawi.
ACT 8:22 Ko bulene manda birigonaga mini beregedalu Anduane Homogohanda domo wahelo ibuhondo bi labe.
ACT 8:23 Dimagoli holene kaubime í̠ha to̱lai howa ko buleneme í̠ dariba ho ngago de hendedo, lalu Pidahanda lene.
ACT 8:24 Ani layagola Saimonohanda Pida Yonelahondo lalu, Bi larigonidagua i̱hondo nabilo Anduane Homogohondo i̱naga la hadaba, lene.
ACT 8:25 Pida Yonela libugua Yasu Kerisohanda libuhondo biyago te lamuwa Anduane Homogonaga mana lamialu Yarusaleme dai bini. Dai bialu howa Samaria dindiha tano emene dewaruni wali agali hearuhondo Bi Mana Debene lamigi bima dai bini.
ACT 8:26 Anduane Homogonaga dahuliyali mbirame Pilibihondo lalu, Yarusaleme howa Gasa dindi pole hariga pedadagua unurahayagi pole manda bibe, lene. Hariga ogoni dindi ko wali agali nahagaha pole peda.
ACT 8:27 Ani layago hale howa Pilibihanda manda manda bialu pene. Hariga o pobe layagoriani pialu hearia Idiobiali mbira de hendene. Idiobiali o biagoni ibugua agali timbuni howa Idiobia Kuini wali mini Kandesi berenegonaga muni mbirale wiaru de hondo haga hene. Ibu Yarusalemeha Ngode Datagaliwabehondo bi lole penego karisini nogo hosime gili lagane wiagoria biralu dai bialu hearia Pilibi ibu de hendene. Idiobia agali biagome karisi ogoriani biralu pialu howa Ngode Datagaliwabenaga mana latagi haga Aisaiahanda mbugani bi gilibu winigo ibugua daga lama pialu hene.
ACT 8:29 Daga lama pialu hearia Ngode Datagaliwabe Dinini ibugua Pilibihondo lalu, Karisi kaware hapara halu poradagua pialu haruru pobe, lene.
ACT 8:30 Ani layagola Pilibi ibu gerai lalu karisi piyadagua kaware hapara howa haruru pialu Idiobia agali biagome Ngode Datagaliwabenaga mana latagi haga Aisaiahanda mbugani bi gilibu wini wiago daga layuagola hale hene. Hale howa Pilibihanda ibuhondo lalu, Bi daga laregoninaga irane manda bidebe, lene.
ACT 8:31 Ani layagola Idiobia agali biagome ladai bialu lalu, Mbiralime bi ogoninaga irane i̱ langi nabiyagua agua manda bibehe kobe, lene. Ani lowa ibugua Pilibihondo lalu, Iya mbaliya karisini birule iraga ha, lene.
ACT 8:32 Anduane Homogonaga mbugani bi gilibu wini ibugua daga layago ogo, Ibu nogo sibi homelo bole haru poragolabi nogo sibi igini ibunaga irini podaragolabi dembola ho hagadagua ibu ema nabi bi nale hene.
ACT 8:33 Tigua ibu mo emene halu taga pani nelo ibunaga godi tigatiga la nahene. Ibu dindini holene hamaro binigo ibunaga aguanenenaga te aiwa labehe kabe, lalu gilibu wini.
ACT 8:34 Hondo haga agali biagome Pilibihondo hale halu lalu, Ngode Datagaliwabe mana latagi haga ogonime bi o layadagoni ainaga lalu lenedabe. Ibuninaga lalu lenedabe be mendealinaga lalu lenedabe i̱ langi, lene.
ACT 8:35 Ani layagola agali biago ibuni Anduane Homogonaga mbugani bi daga layagoria howa Pilibihanda irane lamialu Yasunaga Bi Mana Debene marubi lamima pene.
ACT 8:36 Libu harigani pialu howa iba mbira bereagoha pialu hearia hondo haga biago ibugua lalu, Iba o bedagoniha baboraya bua kogo nabulene irane mbira ngabe, lene. [
ACT 8:37 Ani layagola Pilibihanda ladai bialu lalu, Í̠naga gubalinioreme Yasu Kerisohondo mini mbiraore wu keyagua baboraya bibehe kegoni, lene. Ani layagola agali biagome lalu, E̱ mini mbiraore wu ko. Yasu Keriso ibu Ngode Datagaliwabe Iginiore kagoni manda buwa yu tiga bido, lene.]
ACT 8:38 Ani lowa hondo haga biago ibugua karisi yaga agalihondo, Hondo ha, lowa ibubi Pilibibi libu haru ibaha dalipe howa Pilibihanda ibu baboraya bia hene.
ACT 8:39 Libu ibaha howa iraga hayagola Anduane Homogo Dinini ibugua Pilibi abale minu yalu piyagola hondo haga agali biagome Pilibi lone de nahende howa ibu turu timbuniore hama pene.
ACT 8:40 Pilibihanda ibu Asododoni haruyane hondowa ibugua ibaga bialu tano bibahendeha Bi Mana Debene lamima pialu Sisaria tano anda pene.
ACT 9:1 Ani bialu hea tambu Solohanda Anduane Homogonaga talima piaga hearuhondo keba howa bo wahole lowa de darama bu haabo hene. Ibugua loma binigo mo miaga haguane timbuni heago hearia puwa
ACT 9:2 lalu, Yu wali agalinaga ngoai hagane andaru hondo haga Damasagasani karuhondo muliya beba mbira gilibu ngibe. Yasunaga Harigani piaga karu wali agalibi ta nabi handa walia haruyagua minuwa Yarusaleme haru dai buliya beba ogoni gilibu ngibe, lene.
ACT 9:3 Beba miyagola howa Solo ibu Damasagasa anda nape kaware pialu hearia abale aube tobane buwa hari daligaha howa wá timbuni hadali hene.
ACT 9:4 Ani biyagola Solo ibu odowa dindini pilope ho wiaria mbiralime lalu, Solo-o Solo-o í̠na i̱ aginaga mo tandaga harilibe, layuagola ibu hale hene.
ACT 9:5 Ani layuagola Solohanda ladai bialu lalu, Anduane Homogo í̠ ai kebe, lene. Ani layagola mbirali ibugua lalu, Í̠na mo tandaga hariligo i̱ Yasu kogoni.
ACT 9:6 Í̠ heyalu Damasagasa tano pobe. Anda poregola mbiralime í̠na bulene ngago langulebira, lene.
ACT 9:7 Bi ani lalu hearia agali Solo heba piyaru ti bi nale ema nabi hondo halu bi layuago hale howa ti mbirali de nahende hene.
ACT 9:8 Solo ibu dindini wiaria howa heyalu de ngalayagola mbirale mbira de nahandabehe hene. Nahandabeheyagola tigua ibunaga gini yalu Damasagasa haru anda pene.
ACT 9:9 Anda puwa horo tebiru Solo de nahandabehe howa tomo ibabi nane hene.
ACT 9:10 Yasu talima piaga mbira mini Ananaiasa ibu Damasagasani hene. Ibu de gandeba handalu hearia Anduane Homogohanda, Ananaiasa, olene. Olayagola ibugua ladai bialu lalu, Anduane Homogo-o i̱ o kogoni, lene.
ACT 9:11 Ani layagola Anduane Homogohanda ibuhondo lalu, Hariga mini Tigatiga pedagoha puwa Yudasanaga andaga pole heyabe. Yudasanaga andagaha anda pialu í̠na Tasasali mbira mini Solo bedabe hale habe. Solo ogoni ibugua Ngode Datagaliwabehondo bi lalu bedagoni.
ACT 9:12 Ibugua de gandeba mbira handalu hearia agali mbira mini Ananaiasa ibuwa ibunaga de bayale helo ibu gime ibuninaga haguaneni wiyaria handayago, lene.
ACT 9:13 Ani layagola Ananaiasahanda ladai bialu lalu, Anduane Homogo-o agali ogonime í̠naga wali agali Yarusalemeni hearuhondo ko timbuni biyagonaga te wali agali dewame i̱ langiai haya.
ACT 9:14 Loma binigo mo miaga haguane karume ibuhondo hongo miyagola ibugua í̠ mitangi bialu lotu laga kamaru ina garabaya haru pole Damasagasa ogoriani minu ibiya, lene.
ACT 9:15 Ani layagola Anduane Homogohanda Ananaiahondo ladai bialu lalu, Agali ogoni i̱naga biabe bia helo dabaru. Ibugua Isaraele wali agali karubi wali agali tara tara karubi kini karubi tigua i̱ mini manda biai helo lamilo i̱na ibu dabo heledogo í̠na ibu karia pu.
ACT 9:16 Ibugua i̱naga minini howa biabe bialu karia ibu tandaga timbuni nolebiragonaga i̱nime ibu walia holebero, lene.
ACT 9:17 Ani layago hale howa Ananaiasa ibu pialu Solo andaga berearia anda pene. Anda puwa ibugua Solo haguaneni gi wialu lalu, Hamene Solo-o í̠naga de lone bayale helobi Ngode Datagaliwabe Dinini í̠ha to̱lai helobi Anduane Homogo Yasu ibuni í̠ harigani ibalu heria ha pani hayago ibugua i̱hondo pu laya handala ibiru, lene.
ACT 9:18 Ani layagola mbirale wena harene ale Solonaga deha howa ibira hayagola ibu lone bayale de handabehe hene. Ani biyagola Solo ibu heyuwa baboraya bini.
ACT 9:19 Baboraya buwa tomo karulape nowa ibunaga hongo ha dai bini. Damasagasani howa Solo ibu Yasu mana yu tiga biaga hearu heba horo maru dauru agima hene.
ACT 9:20 Ibu ha nabi abaleore ngoai hagane andaruha pugu bialu ibugua, Yasu ibu Ngode Datagaliwabe Iginiore ka, lalu hene.
ACT 9:21 Ani layagola bibahende hale hayarume mogo lowa lalu, Yarusalemeni howa Yasu mitangi bialu lotu laga hearu bo wahalu hayago agali ogonime ndobe. Oali howabi ibugua wali agali Yasu mitangi bialu lotu laga karu loma binigo mo miaga haguane karu karia minu yu dai bule ibiya ndobe, lene.
ACT 9:22 Ani layagola Solohanda hongo timbuniore howa mana lamialu hene. Lamialu howa ibugua lalu, Mbirali Dabo Helenego ibulebira lowinigo Yasu ibuore kagoni, layagola Yu agali Damasagasani hearu hale howa ibu heneneore walia harago manda buwa tigua ladai nabibehe hene.
ACT 9:23 Horo dewa peagola Yu agali hearu ngoai howa tigua Solo homelo bole lo manda bialu hene.
ACT 9:24 Ti ani lo manda bu heago hondowa mbiralime Solo lamini. Tigua Solo homelo bolenaga horombe mbiragabi Damasagasa pabe wa mabu biagonaga panga haraba bibahendeni yu haabo hene.
ACT 9:25 Ani bialu hearia mbiraga mbirungi Solonaga talima piaga hearume Solo nuha berelowa ege to̱le̱ pabe diri wiagoha puni hende howa yarali hene.
ACT 9:26 Solo ibu Yarusaleme puwa Yasu talima piaga hearu heba mandagi hole manda bini. Ani manda bu hearia tigua ibu Yasu talima piaga henene ndo ka mitangi buwa bibahendeme ibu hondowa gi ho hene.
ACT 9:27 Ani biyagola Banabasahanda Solo hearia puwa biamogo bialu abosolo biaru heba te lole ti hearia haru pene. Haru puwa Banabasa ibugua te lamialu Solo ibu harigani pialu hearia ibugua Anduane Homogo de handayagobi Anduane Homogohanda Solohondo bi layagobi lamini. Ibugua Solo ibu Damasagasani howa Yasu mini lalu mana hongo howa lamiyagobi ti lamini.
ACT 9:28 Ani lamiyagola Solo ibu ti heba mandagi howa Yarusaleme bibahendeha pume halu Yasu mini lalu mana hongo howa lamima ibaga bini.
ACT 9:29 Ani lamialu howa ibugua Yu agali Girigi bi laga hearu heba te lalu howa lai lene. Lai lowa tigua Solo homelo bole manda bialu hene.
ACT 9:30 Ani bule ka layago hale howa Yasu mana yu tiga biaga biarume Solo Sisaria haru puwa ibu Tasasa pelo ngua hene.
ACT 9:31 Ani biyagola howa Yudianibi Galilinibi Samarianibi Yasu mana yu tiga biaga bibahende hearu tandaga nane howa turu ho hene. Ngode Datagaliwabe Dinini ibugua ti biamogo biaabo hayagola hongo ho hearia wali agali marume Yasuhondo mini mbiraore wigi biyagola tiha ho gimbu bigi bini. Tigua Anduane Homogo mo tene haabo halu karulape hene.
ACT 9:32 Pida ibu dindi dewa wiaruha ibaga bialu howa Ngode Datagaliwabenaga wali agali Lidani hearu hearia nenege pene.
ACT 9:33 Puwa ogoriani agali mbira mini Ainiasa kuduguhe wiaria Pida ibu de hendene. Agali ogoni ibu paliaganeni hangu mali halira wiaabo hene.
ACT 9:34 Pidahanda ibu de hondowa lalu, Ainiasa-o Yasu Kerisohanda í̠ mo dabi harago heyalu í̠naga tamunguru huba bia, lene. Ani layago hale howa Ainiasa ibu abale heyini.
ACT 9:35 Heyayagola wali agali Lidanibi Sarononibi bibahende hearume Ainiasa hondowa mini beregedalu Anduane Homogohondo mini mbiraore wini.
ACT 9:36 Yasu mana yu tiga biaga wali mbira Tabida ibu mini Girigi bi lalu Dogasa ibu Yobani berene. Wali ogoni ibugua biabe bayale biaabo halu wali agali yagibano hearu biamogo biaga berene.
ACT 9:37 Ibu ani bialu berearia warago balu tongolo mini. Tongolo miyagola marume ibunaga tingini wayawaya buwa anda daliga hobane mbiraha moa hene.
ACT 9:38 Yoba tano ogoni Lida tano kaware wini. Ani winigo wali agali Yasu mana yu tiga biaga Yobani hearume Pida ibu Lidani ka layago hale howa agali kiralihondo lalu, Pida karia pialu agua lalibu. Hondo ha nabi ina kamaria abale íbu laya lalibu, lalu, Lama pudaba, lene.
ACT 9:39 Libugua bi ani layagola hale howa Pida ibu ti haru dai bini. Pida ibiyagola tigua anda daliga hobane mbira biagoha ibu haru pene. Haru ibiyago hondowa wali dalo dewa berearume dugu bigibigi bialu aga taratara Dogasahanda nahome biruwa lebini wiaru ibu de hendelo walia hene.
ACT 9:40 Ani biyagola Pidahanda ti bibahendehondo, Tagira pudaba, lowa ge duli hanga ho biruwa Ngode Datagaliwabehondo bi lene. Ani lowa ibugua tingini moa heagoria handade howa lalu, Tabida heya, lene. Ani layagola wali biago de ngalalu Pida hondowa ibu heyu berene.
ACT 9:41 Ani birayagola Pida ibugua wali biago heyilo gi mini. Ani buwa wali agali Yasu mana yu tiga biaga biarubi wali dalo biarubi ti bibahende, Ibidaba, lowa Pida ibugua, Wali biago heyu kago de handadaba, lene.
ACT 9:42 Wali agali bibahende Yobani hearume wali biago heyu ka layago hale howa dewalime Anduane Homogonaga mana yu tiga bini.
ACT 9:43 Ani biyagola Pida ibu horo dewaru Yobani howa agali mbira mini Saimono ibunaga biabe nogo dongone bayale hongohe helo mo bia haga heago hearia puwa ibu heba hene.
ACT 10:1 Ami agali pira pira (100) haru haga agali mbira mini Koniliasa ibu Sisariani hene. Ami agali uruni ti Lomo dindi howa ibinigo amime tinaga mini Idaliali Ami wini.
ACT 10:2 Koniliasa ibu lotu laga howa ibubi ibu andagaha hagarubi tigua Ngode Datagaliwabe mitangi bialu lotu laga hene. Ibugua Yu wali agali yagibano hearuhondo mbuni nabi muni mbiralebi talebu migi bialu Ngode Datagaliwabehondo bi laabo haga hene.
ACT 10:3 Horo mbirungi alendo ni gai layagola Koniliasahanda de gandeba mbira ibu handalu hearia Ngode Datagaliwabenaga dahuliyali mbira ibu hearia ibiyagola ibugua bayuwa de hendene. Ibuwa dahuliyali biagome ibuhondo lalu, Koniliasa-o, lene.
ACT 10:4 Ani layagola ibugua gi howa dahuliyali biago handawa bialu lalu, Agibe, lene. Ani layagola dahuliyali biagome ladai bialu lalu, Í̠na Ngode Datagaliwabehondo bi lariligobi mbirale mbira yagibanoruhondo miriligobi mitangi buwa Ngode Datagaliwabe ibu turu halu ladai bule ka.
ACT 10:5 Anigo agali mbira mini Saimono ibu mini mende Pida ibu Yobani kago ibu í̠ kegoria ibilo agali maruhondo, Damu pudaba, labe.
ACT 10:6 Agali mende mini Saimono dege ibu nogo dongone bayale hongohe helo mo bia haga kago ibu andagaha Saimono Pida ogoni nenege íbu kagoni. Saimononaga anda iba solowara angeni ka, lene.
ACT 10:7 Ani lowa dahuliyali biago ibu piyagola Koniliasahanda ibuninaga biabe bia haga kira heago labobi ami agali mbira Ngode Datagaliwabe mitangi biaga ibu heba haga heagobi tebirali uruni olowa
ACT 10:8 tihondo bibahende biyago lamialu, Yoba pudaba, lene.
ACT 10:9 Ani layago hale howa ti pene. Ani pialu howa ha anda mbira palialu egerebalene Yoba kaware pialu hea tambu horombe hanuni hayagola Pidahanda Ngode Datagaliwabehondo bi lole anda dangi mbalapeni iraga hene.
ACT 10:10 Ani lalu hearia Pida ibu tomo garibi lene. Marume tomo dawalu hea tambu Pida ibu de gandeba hendene.
ACT 10:11 Handalu hearia hari daliga budayagola mbirale labolabo timbuni ale nguini mariani yuwa dindiha yarali hayago de hendene.
ACT 10:12 Labolabo ale biagoriani nogo tara tarabi ega tara tarabi tombeme piagane ale tara tarabi heneria de hendene.
ACT 10:13 De handalu hearia bi mbirame ibuhondo lalu, Pida-o heyalu í̠na uruni bo nabe, layuago hale hene.
ACT 10:14 Hale howa Pidahanda lalu, Anduane Homogo-o í̠na bo nabe larigo aihondo laribe. I̱na í̠naga deni mbirale kobi nanagane alerubi nanaruli, lene.
ACT 10:15 Ani layagola bi biagome halu mende lalu, Ngode Datagaliwabehanda nolene nga lenego nanole nalabe, layuago hale hene.
ACT 10:16 Ogonidagua halu tebo buwa mbirale biago hari daligaha yamu dai bini.
ACT 10:17 De gandeba ogoni handayago Pidahanda irane agidabe lo mitangi bialu hearia agali tebira Koniliasa hearia howa ibiyarume ti ibalu, Saimono andaga agoha kabe, laga bialu handa walia howa panga tagiraha hene.
ACT 10:18 Tagiraha howa tigua olalu, Agali mbira mini Saimono Pida ibu o andaga bedabe, lene.
ACT 10:19 Pida ibu de gandeba handayago mitangi biaabo halu berearia Ngode Datagaliwabe Dinini ibugua Pidahondo lalu, Hale ha. Agali tebira í̠ hai bima ibiyago íbu ka.
ACT 10:20 Ani bidago í̠ heyalu dalia. Tigua, Ina mali̱ya, laragola ti heba pobe. Í̠ damu ibilo i̱na tihondo damu pudaba laru handala ibiyagoni, lene.
ACT 10:21 Ani layagola Pidahanda agali biaru hearia daluwa lalu, Agali hai bima ibirimigo i̱ kogoni. Aginaga ibirimibe, lene.
ACT 10:22 Ani layagola tigua ladai bialu lalu, Ami agali pira pira (100) haru haga Koniliasa ibugua inahondo, Pida damu pudaba, lalu langiya. Koniliasa ibu mini tigabiwi Ngode Datagaliwabe mitangi bialu lotu laga howa Yu wali agali bibahende karume, Ibu agali bayale ka, lai haga ka. Í̠ ibu andaga ibabelobi bi larego ibu hale helobi Ngode Datagaliwabenaga dahuliyali mbirame ibuhondo, Pida damu pu labe, laya, lalu Pida lamini.
ACT 10:23 Ani layagola Pidahanda agali tebira biaruhondo, O andaga palimi̱ya tamuha ibidaba, lene. Ti paluwa egerebalene Pida ibu manda manda buwa agali tebira ibiyarubi Yasu mana yu tiga biaga Yobani hearu marubi ti haru mandagi pene.
ACT 10:24 Pialu howa ha anda mbira palialu mendeni Sisaria anda pene. Tano ogoniha Koniliasahanda ibu damene nenegebi hearu mo ngoai howa ti Pida ibilo lowa hondo hene.
ACT 10:25 Ti ngoai ho hearia Pida anda ibalu hearia Koniliasahanda ibu lola howa ibu geha bulu palu ibira hene.
ACT 10:26 Ani biyagola Pidahanda ibu mo heya halu lalu, Heya. I̱bi agali í̠ kegobi dege kogoni, lene.
ACT 10:27 Libu anda tamuha pialu howa Pidahanda ibuhondo bi lamima pialu hearia wali agali dewa ngoai ho hearia Pida ibu de hendene.
ACT 10:28 De hondowa Pidahanda tihondo lalu, Mbirali Yuali howa ibu wali agali tara tara heba mandagi holebi nenege holebi nawi lowinigo ngago tí manda bidamigoni. Anigo i̱na agali maru kobi nakarulapebi ka mandabu hewaria Ngode Datagaliwabehanda ani manda bulene nawi lalu walia haya.
ACT 10:29 Ani biyago i̱ damu ibirimigola, Naibagua, nale abale ibirugo. Irane aginaga i̱ damu ibirimibe laro, lene.
ACT 10:30 Ani layagola Koniliasa ibugua lalu, Lebene alendo áyu kadagua ni gai layagola i̱naga andagani howa Ngode Datagaliwabehondo bi lalu berewaria agali mbira labolabo peleore karule i̱ denguihayagi abaleore íbu heneya.
ACT 10:31 Ani howa ibugua lalu, Koniliasa-o í̠na Ngode Datagaliwabehondo bi lariligo ibu hale hayagobi mbirale mbirale yagibanoruhondo miriligobi ibu mitangi bu ka.
ACT 10:32 Agali mbira mini Saimono Pida ibu Yobani kago í̠ kegoria ibilo agali maruhondo, Damu pudaba, labe. Agali mende mini Saimono ibu nogo dongone bayale hongohe helo mo bia haga kago ibu andagaha Saimono Pida ogoni nenege íbu kagoni. Saimononaga anda iba solowara angeni ka, laya.
ACT 10:33 Ani layagola i̱ hondoha nabi abaleore í̠ ibabelo damu pudaba laru. Hale howa ibiridago bayale biri. Anduane Homogohanda í̠hondo labe layadadagua labelo hale hole ina bibahende Ngode Datagaliwabe deni howa ngoai ho bedamagoni, lene.
ACT 10:34 Pidahanda lalu, Ngode Datagaliwabehanda wali agali bibahende ta nabi mitangi biaga kago ogoni heneneoreda handa walia ko.
ACT 10:35 Wali agali ta nabiore dindi bibahendeni Ngode Datagaliwabe mitangi bialu lotu lagabi mana tigabi biagabi karu ti hondowa ibugua turu haga ka.
ACT 10:36 Ngode Datagaliwabenaga mo palia haga Bi Mana Debene Yasu Keriso togoni howa lalu Isaraele wali agali laminigo tí manda bu kami. Yasu Keriso ogoni ibu wali agali bibahendenaga Anduane Homogo ka.
ACT 10:37 Yonehanda baboraya bulene mana lamiyagola Galili dindi howa Isaraele dindi bibahendeha galone timbuni biyagoni tí manda biai kami.
ACT 10:38 Ngode Datagaliwabehanda Nasareteali Yasuha ibunaga Dinini to̱lai helo hongohebi helo mo bia henego manda bu kami. Ngode Datagaliwabe ibuni ibula howa Yasuhanda dindi ogoriani pume halu ibaga bialu howa wali agalihondo bayale dege bialu dama Heyolabe daragahe hearu wara tagi haga bima pialu hene.
ACT 10:39 Yasuhanda Yarusalemeni howabi Isaraele dindi mbira mbirani howabi biyago iname de handai harima. Ani biyagola tigua ibu homelo ira bangani ba para hene.
ACT 10:40 Ani biyagola horo kiru howa teboneni Ngode Datagaliwabehanda Yasu mo heya howa wali agalime ibu de hendelo mo walia hene.
ACT 10:41 Mo walia hayagola Yu wali agali bibahendeme de hendene ndo Ngode Datagaliwabehanda ina ibunaga walia hagane holoma̱yanaga ala dabo helene kamaru inahondo ibu mo walia hene. Ngode Datagaliwabehanda ibu mo heya hayagola howa iname ibu heba tomo ibabi mandagi nalu harimago ina hangume ibu de handarima.
ACT 10:42 Yasuhanda inahondo lalu, Bi mana debene wali agalihondo lamialu wali agali ala homenerubi áyu karubi godi larangi bibahendenaga daba ki biaga holiya Ngode Datagaliwabehanda Yasu i̱ dabo helenego kogoni lalu lamilimu, laya.
ACT 10:43 Ala Ngode Datagaliwabe mana latagi haga bibahende henerume ibu mitangi bialu mbiwia halu lalu, Ibuhondo mini mbiraorewi karume ko biyaru Ngode Datagaliwabehanda Yasu ibu mininaga hongoni howa domo waholebira, lene.
ACT 10:44 Pidahanda bi lalu heaore dege Ngode Datagaliwabe Dinini wali agali bi mana hale ho hearuha hole dalini.
ACT 10:45 Ngode Datagaliwabehanda ibu Dinini wali agali tara tarahondobi miyago hondowa Yu agali Yasu mana yu tiga biaga Pida heba Yoba howa ibiyaru ti miniha mogolo hene.
ACT 10:46 Wali agali biarume bi tara lagalaga bialu, Ngode Datagaliwabe timbuniore ka, lalu ibu mini yaraga halu heago hondowa Yu agali ibiyarume ti miniha mogolo hene. Ani biyagola Pidahanda lalu,
ACT 10:47 Ngode Datagaliwabehanda inahondo ibu Dinini ngiyadagua tihondobi miragoni. Mbiralime, Ti ibame baboraya bulene nawi, labehe kabe, lene.
ACT 10:48 Ani lowa Pidahanda lalu, Yasu Kerisonaga minini howa baboraya bilimu, lalu lamini. Ani biyagola howa tigua Pidahondo, Horo marubi ina heba hami̱ya, lene.
ACT 11:1 Wali agali tara tara maru hearume Ngode Datagaliwabe bi mana mo yai halu ka layago abosolorubi Yasu mana yu tiga biaga Yudia bibahendeha hearubi ti hale hai hene.
ACT 11:2 Pida ibu Yarusaleme ibiyagola agali maru Yu agali hangunaga ndo agali tara taranaga dongone podo mabu bulene nga laga hearume Pida talini.
ACT 11:3 Talialu lalu, Í̠na Yu agali ndo agali tara dongone podo mabu nabiaga karunaga andaga nenege puwa ti heba tomo nalu harigo agibe, lene.
ACT 11:4 Ani layagola Pidahanda bibahende piganeore howa biyagoni te ti lamiai hene.
ACT 11:5 Ibugua lalu, I̱ Yobani howa Ngode Datagaliwabehondo bi lalu hewaria de gandeba mbira handaru. Handalu hewaria hari daligaha howa mbirale labolabo timbuni ale nguini mariani yuwa yarali haya.
ACT 11:6 Yarali hayagola i̱na labolabo ale biago bayuwa de handalu hewaria nogo tara tara hininibi gabuabi tombeme piagane ale tara tarabi ega tara tarabi de handaru.
ACT 11:7 De handalu hewaria bi mbirame i̱hondo lalu, Pida-o heyalu uruni í̠na bo nabe, layuago hale haru.
ACT 11:8 Hale howa i̱na ladai bialu lalu, Anduane Homogo-o í̠na bo nabe larigo aihondo laribe. I̱na mbirale kobi nanagane alebi nanaruli, laru.
ACT 11:9 Ani larugola bi biagome halu mende hari daligaha howa lalu, Ngode Datagaliwabehanda nolene nga lenego nanole nalabe, layuago hale haru.
ACT 11:10 Ogonidagua halu tebo buwa mbirale biago bibahende hari daligaha lone yamiai haya.
ACT 11:11 Yamiaiore heagola agali tebira Sisaria howa i̱ damu ibiyaru ti i̱ hewaria anda ibiya.
ACT 11:12 Anda ibiyagola Ngode Datagaliwabe Dinini ibugua i̱ langialu, Miniha agali tale nabi ti heba pobe, laya. Ani layagola howa Yasu mana yu tiga biaga waragariali o karu tibi ina haru Sisaria pialu Koniliasa andaga pirima.
ACT 11:13 Anda pirimagola Koniliasa ibugua ina langialu lalu, Dahuliyali mbira i̱ andagaha íbu hearia de handaru. Dahuliyali biagome lalu, Agali mbira mini Saimono Pida ibu Yobani kago í̠ kegoria ibilo agali maruhondo, Damu pudaba, labe.
ACT 11:14 Saimono Pida ogoni ibugua bi mana langiragome í̠bi í̠ andaga hagarubi tí bibahendeme pele mulene yuleberami, dahuliyalime laya lalu Koniliasahanda i̱ langiya, Pidahanda lene.
ACT 11:15 Pida ibugua ani lowa lalu, I̱na bi lalu hewaore dege Ngode Datagaliwabe Dinini ala inaha hole daliyadagua tihabi hole daliya.
ACT 11:16 Ani biyagola i̱na mitangi bialu hewaria ala Anduane Homogohanda bi lalu, Yone ibugua wali agali ibame baboraya bia henego Ngode Datagaliwabehanda ibu Dininime tí baboraya bulebira, layago mitangi budai biru.
ACT 11:17 Iname Anduane Homogo Yasu Kerisohondo mini mbiraore wirimagola Ngode Datagaliwabehanda ibu Dinini inahondo ngiyadagua ibugua Yu wali agali ndo tara tara uruni tihondo miragonida manda biru. Ani manda buwa i̱na Ngode Datagaliwabehondo, Ani mulene nawi, labehe harube, Pidahanda lene.
ACT 11:18 Ani layagola hale howa tigua talia nabi Ngode Datagaliwabe mini yaraga halu lalu, Ngode Datagaliwabehanda Yu wali agali hangu ndo tara tara mini beregedelobi holene gahenge yu helobi ti henge miyada, lene.
ACT 11:19 Sibeni homelo bayangi howa Yasu mana yu tiga biaga hearume tandaga nalu ibida purogo lene. Ti marume Pinisiabi Saibarasabi Andiogobi purogo lalu Yu wali agali degehondo Yasu mana lamima pene.
ACT 11:20 Yasu mana yu tiga biaga agali maru Saibarasalibi Sairinialibi ti marume Andiogoni anda puwa Yu wali agali hanguhondo ndo tara tarahondobi Anduane Homogo Yasunaga Bi Mana Debene lamialu hene.
ACT 11:21 Ani lamialu heagola Anduane Homogohanda ibunaga hongo walia hayagola wali agali dewaoreme mini beregedalu Anduane Homogohondo mini mbiraore wiai hene.
ACT 11:22 Ani biyagola Yasu mana yu tiga biaga Yarusalemeni hearume hale howa tigua Banabasahondo, Andiogo pu, lene.
ACT 11:23 Ani layagola Banabasa ibu Andiogoni anda puwa Ngode Datagaliwabehanda wali agali biamogo timbuni biyiyago hondowa ibugua turu howa ti mo hongo halu lalu, Tí bibahende henemane howabi mini bilinahe howabi Anduane Homogohondo mini mbiraore wu haabo halimu, lene.
ACT 11:24 Banabasa ibu agali bayale howa Ngode Datagaliwabehondo mini mbiraorewibi Ngode Datagaliwabe Dinini ibuha to̱laihebi henego hondowa wali agali dewaoreme Anduane Homogohondo mini mbiraore wini.
ACT 11:25 Ani biyagola Banabasa ibu Solo hai bule Tasasa pene.
ACT 11:26 Handa walia howa ibugua Solo Andiogo haru dai bini. Dai bu howa mali mbirani libugua Andiogoni howa Yasu mana yu tiga biaga hearu heba ngoai haga bialu ti bibahendehondo mana lawai halu hene. Andiogo ogoriani howa Yasu mana yu tiga biaga hearu ti mini Keriso hameigini pigane wini.
ACT 11:27 Horo uruningi Ngode Datagaliwabe mana latagi haga maru Yarusaleme howa Andiogo pene.
ACT 11:28 Ti mbirago mini Agabasa ibugua heyalu Ngode Datagaliwabe Dinininaga hongome mbiwia halu lalu, Dindi bibahendeni hina gari timbuni pume holebira, lene. Mbiwia ogoni hayago kini mini Kolodiasa heangi lola hene.
ACT 11:29 Yasu talima piaga hearume lo mbiraore halu ti hangu hangume muni mibehe wiadagua mandagi wialu Yasu mana yu tiga biaga Yudiani hagahaga bu hearu biamogo bialu, Tihondo wia hami̱ya, lene.
ACT 11:30 Ti ani lo manda biyadagua bialu tigua Banabasa Sololahondo lalu, Keriso hameigini karunaga agali ala hene miniwi karuhondo muni ogoni mule yalu pudaba, lene.
ACT 12:1 Ogoningi Kini Herodo ibugua Keriso hameigini maru hearu mo tandaga halu hene.
ACT 12:2 Ibugua Yonenaga hamene Yamese homelo ami agali mbirahondo lalu, Wai biaga ayu tibume ibu bo wahabe, lene.
ACT 12:3 Ani biyagola Yu agalime turu timbuni hayago hondowa Herodohanda lalu, Pidabi minule pudaba, lene. Mberedi Yidi Nahe Hirinigo Nolene Horo hayangi ani bini.
ACT 12:4 Tigua Pida minuwa garabaya andaha helene. Garabaya andaha helowa ami agali wabuni maria ma halume (16) Pida mamage ho ariari bilo ibu heba helene. Ani helowa Herodohanda, Bolangua Halu Penegonaga tomo nai haragola Pidanaga godi lole Yu wali agali kagoria ibu haru tagira pole, mitangi bini.
ACT 12:5 Ani binigo Pida ibu garabaya andaha hearia ami agali biarume mamage ho ariari bigi bini. Pida ibu ani hea tambu Keriso hameigini biarume ibu mitangi bialu Ngode Datagaliwabehondo ibunaga bi la haabo halu hene.
ACT 12:6 Yawi Herodo ibu Pidanaga godi lole wali agali karia haru tagira pole lowa áyu mbiragadagua Pida ami agali kira dombeneha palene. Pu seni kirame Pidanaga gi kirabalini hende howa palene. Ami agali marume garabaya anda panga tagirahayagi mamage ho hene.
ACT 12:7 Anduane Homogonaga dahuliyali mbira abale íbu howa anda hobane ogoniha wá timbuni hadali hene. Dahuliyali biagome Pida balu mo barila howa lalu, Abale heya, lene. Ani layagola pu seni kira biago Pidanaga gini howa minalu hado ibira hene.
ACT 12:8 Ani biyagola dahuliyali biagome lalu, Í̠naga nogo dongone ndibu lalu ge subi karula, lene. Ani layadagua Pidahanda biyagola dahuliyali biagome lalu, Í̠naga labolabo daligani karulaganebi karulalu mba, lene.
ACT 12:9 Ani lowa ibu piyadagua Pida talima pialu garabaya andaha howa tagira pene. Pida ibu pialu howa dahuliyalime i̱ henene haru porabe de gandeba handarobe ibu manda nabi howa pene.
ACT 12:10 Libu pialu howa ami agali mariali halu mbira mamage hearia bolangua halu ami agali mariali halu mende mamage hearubi bolangua halu pene. Ani bolangua halu tanoha polenaga panga ege to̱le̱ aeaneme wabini heagoria pene. Panga ogoni heagoria piyagola panga biago ibuni minalu duguayagola libu tagira pene. Tagira puwa hariga mbirani pialu howa dahuliyali biagome Pida helalu abale pu ereba hene.
ACT 12:11 Dahuliyali biago ereba hayagola Pidahanda ibu miniha mitangi bialu lalu, O biyagoni heneneore biyada manda bido. Herodohanda i̱hondo ko bulene manda biyagobi Yu agalirume i̱ tandaga noliya bulene manda biyagobi nabilo Anduane Homogohanda i̱ pele ngialu ibunaga dahuliyali ibilayadagoni, lene.
ACT 12:12 Ani manda buwa Pida ibu Yone Maga ai̱ya Meri andaga pene. Anda ogoniha wali agali dewa ngoai howa Pida mitangi bialu Ngode Datagaliwabehondo bi lalu berene.
ACT 12:13 Pida ibuwa ibugua anda biago panga tagirayagi howa gime bayagola biabe bia haga wandari mini Loda de hondole ibini.
ACT 12:14 Ibuwa bi layuago hale howa ibugua Pidanaga biore manda buwa turu timbuni halu panga dugua nabi wali agali biaru berearia gerai lalu dai bini. Dai buwa ibugua lalu, Pida ibu tagira ka, lamini.
ACT 12:15 Ani layagola tigua lalu, Í̠ lulu yarebe, lene. Ani layagola Lodahanda ladai bialu lalu, I̱ lulu ndo Pidaore ka, laabo hene. Laabo hayagola wali agali biarume, Ibunaga dahuliyali íbu ka, ladai bini.
ACT 12:16 Ti ani lalu hea tambu Pida gime panga baabo halu hene. Baabo hayagola hale howa tigua panga dugualu hearia Pidaore heago hondowa mini mogo lene.
ACT 12:17 Wali agali biaru ti bi nalelo Pidahanda gi gamu lalu Anduane Homogohanda ibu garabaya andaha howa haru tagira ibiyago te ti lamiai hene. Ani lamiai howa Pidahanda lalu, Bi o langirugoni Yamesebi Yasu mana yu tiga biaga karubi lamilimu, lene. Ani lowa Pida ibu dindi ogoni wahalu dindi mende pene.
ACT 12:18 Egerebalene hayagola Pida pu ereba hayiyago hondowa garabaya anda ami agali biarume gi timbuni howa, Pida abiyabe, lagalaga bialu mini burugulo hene.
ACT 12:19 Ani biyagola Herodohanda, Pida hai bu pudaba, layagola tigua hai bialu handa walia nahe hene. Handa walia naheyagola Herodohanda ami agali biaruhondo, Ibu ibida piyago agibe, lowa maruhondo, Ami agali o biaru bo wahalimu, lene. Ani biyagola howa Herodo ibu Yudia wahalu Sisaria pu hene.
ACT 12:20 Wali agali Taiani Saidonolani hearu baba Herodohanda keba timbuniore ho hene. Ani ho heagola dindi ogoni laboha howa agali maru tini ala mini mbiraore howa Herodo hearia polene manda bini. Ani manda bialu tigua Herodonaga anda hondo haga agali mini Balasadasa ala hondo pialu bi lo mbiraore hene. Bi lo mbiraore howa mani mo palia holene te lole ti Herodo hearia pene. Ani lole piyadago irane ti Herodonaga dindiha howa tomo yolo miaga henego manda buwa pene.
ACT 12:21 Horo mbira pongo bo winingi Herodo ibu kininaga labolabo bayale karulowa haru haganaga biraganeni biruwa ibugua wali agalihondo te timbuni laga hene.
ACT 12:22 Ani laga henego lalu hearia hale howa wali agali biarume, Bi o larago agalinaga ale ndodago mbirali gibi taraorenagada, lalu dalimu laabo halu hene.
ACT 12:23 Ani layagola Herodohanda mine halu Ngode Datagaliwabe mini yaraga holene manda nabi hearia Anduane Homogonaga dahuliyali mbirame Herodo warago belo mini. Warago bo wiaria ngoeme Herodo nayagola ibu tongolo mini.
ACT 12:24 Ngode Datagaliwabe bi mana loyogo lalu wali agali dewaoreme yu tiga bigi bini.
ACT 12:25 Banabasa Solola libugua Yarusalemeni biabe bule penego biai halu Yone Maga libu heba pialu Andiogoni dai bini.
ACT 13:1 Keriso hameigini Andiogoni hearu maru Ngode Datagaliwabe mana latagi haga halu maru Ngode Datagaliwabe mana lawai haga hene. Tinaga mini Banabasabi Simiono ibu ka̱i̱ mini Mindibi ibubi Sairiniali mini Lusiasabi Manaini ibu ala haru haga Herodo heba haga henego ibubi Solobi uruni hene.
ACT 13:2 Keriso hameigini biarume Anduane Homogo mitangi bialu lotu lalu howa tomo nane hagane manani hearia Ngode Datagaliwabe Dinini ibugua tihondo lalu, Banabasa Sololame biabe bilo lo manda bu ngodagua tígua libu loma bia ho heladaba, lene.
ACT 13:3 Ani layagola hale howa Keriso hameigini biaru tomo nane halu Ngode Datagaliwabehondo bi lowa tigua Banabasa Sololanaga haguaneni gi wialu lalu, Ai biabe bule pudaba, layagola libu pene.
ACT 13:4 Ngode Datagaliwabe Dinini ibugua Banabasa Solola pudaba lamiyagola libu Selusia pialu iba solowara angeni dalini. Selusia howa libu iba taluni biralu pialu dindi mbira iba dege dombeneha wiago mini Saibarasa ogoniha pene.
ACT 13:5 Puwa tano mbira mini Salamisi anda puwa libugua Yu wali agalinaga ngoai hagane andaruha anda pialu Ngode Datagaliwabe bi mana lamialu hene. Yone Maga ibugua libu biamogo bule ti haru pene.
ACT 13:6 Tigua lamima puabo halu Saibarasa dindi lene mendehayagi tano mini Paboso anda pene. Anda puwa gamugamu biaga agali mbira mini Ba-Yasu ti lola hene. Ba-Yasu ogoni ibu Yu agali howa, I̱ Ngode Datagaliwabe mana latagi haga kogo, lalu ke̱ halu laga hene.
ACT 13:7 Ani howa ibu gabumane haru haga agali Segiasa Polasa ibu manda timbunibi heago heba haga hene. Gabumane agali ogoni Ngode Datagaliwabe bi mana hale hoa howa ibugua Banabasa Solola ibilo olene.
ACT 13:8 Ani olayagola gamugamu biaga ibu mini Girigi bi lalu Elimasa laga ibugua gabumane agalime Yasu mana yu tiga bulilono mo perela hene.
ACT 13:9 Ani biyagola Solo marume ibu mini Polo laga henego ibuha Ngode Datagaliwabe Dinini to̱lai hayagola ibugua gamugamu biaga biago tiga tiga handade howa
ACT 13:10 lalu, Í̠ dama Heyolabenaga igini ke. Bayale bulene bibahende ngago í̠na waitigi ho kegoni. Mo hondo hagane mana bibahende í̠na biai harilibi Anduane Homogonaga mana tigabi ngago mo batara hole manda bu hariligobi kegoni.
ACT 13:11 Anduane Homogonaga gime í̠ baragola horo dewaru ni darago de nahandabehe holebere, lalu Polohanda lene. Ani layagola abaleore ginu arumahe aleme Elimasanaga de yi hayagola ibugua mbirali ibunaga gini yalu pelo hai bialu hene.
ACT 13:12 Ani biyago hondowa gabumane agali biagome Yasu mana yu tiga bini. Ibugua Anduane Homogonaga bi mana Polohanda lawai hayago mitangi bialu mini mogolo hene.
ACT 13:13 Polobi ibu heba hayarubi ti Paboso wahalu iba taluni biralu Pambilia dindi pialu tano mini Pega anda pene. Tano ogoriani howa Yone Maga ibu Polo Banabasala helalu Yarusaleme dai bini.
ACT 13:14 Ani biyagola libu Pega wahalu Pisidia dindinaga tano mbira mini Andiogo anda pene. Anda puwa Sabada horo hayangi libu Yu wali agalinaga ngoai hagane andaha pialu berene.
ACT 13:15 Ngoai hagane anda ogoniha berearia Mosese heneyangi Mana lo winigobi Ngode Datagaliwabe mana latagi hagarume mana gilibu winigobi beba uruniha howa agali marume dagalene. Dagalayagola howa ngoai hagane anda haru hagarume Polo Banabasalahondo bi lawia halu lalu, Hamene labo-o wali agali mini mo hongo holenenaga bi mana mbira yidabiyagua lamilibulo hame ledama, lene.
ACT 13:16 Ani layago hale howa Polo ibugua heyuwa gi gamu lowa lalu, Isaraeleali kamirubi wali agali tara tara Ngode Datagaliwabe mitangi bu haga kamirubi i̱na bi larogo tí hale hadaba.
ACT 13:17 Isaraelealinaga Ngode Datagaliwabe kago ibugua bamba inanaga mamali ti Iyibi dindini mbira nabaile hearia dabowa mo dewa hene. Ani buwa Ngode Datagaliwabehanda ibunaga hongo timbunime Iyibini howa ti haru tagira puwa
ACT 13:18 dindi ko wali agali nahaga wiagoriani hearia mali pira mariani (40) ibugua donge halu tinaga genda yu haabo hene.
ACT 13:19 Ani buwa Isaraeleali ti Kenana dindi anduane helo Ngode Datagaliwabehanda Kenanali hameigini tara tara kariaru Isaraelealime bo wa helene.
ACT 13:20 Ani bialu heane mali handari mariani pira duria agima (450) hene. Ani biyagola howa Ngode Datagaliwabe mana latagi haga Samuele ibilo Ngode Datagaliwabehanda agali haguanerume ti haru helo hela aribia haga bini.
ACT 13:21 Samuele heneyangi Isaraeleali hearume tinaga kini hame lowa tigua Samuelehondo, Mbirali dabo hela, lene. Ani layagola Ngode Datagaliwabehanda Beniyamini hameiginiha howa agali mbira Kisi igini mini Solo dabo helene. Ani biyagola Solo ibu tinaga kini heane mali pira maria (40) hene.
ACT 13:22 Mani Ngode Datagaliwabehanda Solo dugualu Debidi ibu tinaga kini helo dabo aribia ho helene. Ibugua Debidi mitangi bialu bi lenego ogo, Yasi igini Debidiore ibu agali i̱ hame ledogobi ka. Ibugua i̱na bia larodagua biaiore holebira, laya, lene.
ACT 13:23 Polohanda ani lowa lalu, Debidinaga aguanene mbirali Yasu ibu Isaraele wali agalinaga Pele Miaga helo Ngode Datagaliwabehanda bamba lo winidagua ibu helene.
ACT 13:24 Yasu ibuni biabe bule naibiha Yonehanda Isaraele wali agali lamialu, Ko birimigonaga bu mini beregedowa baboraya bilimu, lalu lamiaga hene.
ACT 13:25 Yone ibunaga biabe bumaro bulene tu kaware wiyagola ibugua wali agalihondo lalu, I̱ ai ka lo mitangi bidamibe. Tí mbirali ibilo hondo kamigo i̱ ndoore. Biabe bumaro berogola ibu ibulebirago de hondoleberemi. I̱na ibunaga ge su hadole nakarulapeore kogoni, lalu Yonehanda laya, lene.
ACT 13:26 Polohanda lalu, I̱ hamene mbaliniru-o tí Abarahama aguanene kamirubi wali agali tara tara Ngode Datagaliwabe mitangi bialu lotu lo haga kamirubi ina bibahendehondo Ngode Datagaliwabehanda pele mulenenaga mana lawia hayagoni.
ACT 13:27 Yarusalemeni wali agali hearumebi tinaga haru haga hearumebi Yasu ibu Pele Miaga ka manda nabi hene. Tigua Ngode Datagaliwabe mana latagi haga bamba henerume bi gilibu winigo ngago Sabada horo bibahendengi daga laabo hagago ogoni hale howa ti manda nabi dege hene. Manda nabi howa tigua Yasu homelo bolene nga layagola Ngode Datagaliwabe mana latagi haga biarume mbiwia halu lo winidagua lola hene.
ACT 13:28 Anigo Yasu homelo bolene irane handa walia nahe howa tigua Pailatehondo lalu, Ibu homelo ba, lene.
ACT 13:29 Andune Homogonaga mbugani Yasunaga te gilibu winigo ngadagua tigua biai hayagola maru hearume ibunaga tingini ira bangani wiaria yamuwa egeandaha hora hene.
ACT 13:30 Ani biyagola Ngode Datagaliwabehanda ibu mo heya hene.
ACT 13:31 Mo heya hayagola wali agali ala ibu heba Galili howa Yarusaleme piyarume ibu de hendelo horo dewani ibu ha pani haga bini. Ibu de handayarume áyu Isaraele wali agalihondo ibu walia hagane ti ka.
ACT 13:32 Anigo iyame tíhondo Bi Mana Debene langule íbu kaba. Ngode Datagaliwabehanda Yasu mo heya hayagome ala ina mamalihondo buleberoore lo winidagua áyu ina tinaga aguanene bu kamarunaga bia hayagoni. Iba Gana mendeni bi gilibu ngago ogo, I̱ igini í̠ kegoni. Áyu í̠ Aba i̱ harogoni, lenego gilibu nga.
ACT 13:34 Ngode Datagaliwabehanda Yasu mo heya howa ibunaga tingini homaliha togo nabilo lalu lenego ogo, Turu holene wiaabo haga bayaleru ala Debidihondo muleore bero lalu lo wirudagua Ngode Datagaliwabehondo mini mbiraorewi kamiru tíhondobi ngulebero, lalu lenego gilibu nga.
ACT 13:35 Ogonibi bi mende gilibu ngago ogo, Í̠naga biabe bia haga loma biahe helarigo ibunaga tingini togo nabilo helolebere, lenego gilibu nga.
ACT 13:36 Debidihanda Ngode Datagaliwabenaga biabe bulene winigo ibugua biai halu homene. Homayagola maru hearume ibu mamali hora heagoria dege ibunaga tingini hora hayagoria togo bini.
ACT 13:37 Ogoni biyadagua ndo Ngode Datagaliwabehanda mbirali homaliha howa mo heya hene biago ibunaga tingini togo nabini.
ACT 13:38 Ogonigo i̱ hamene mbaliniru-o Yasu ibu togoni howa ko birimago domolenenaga mana tíhondo langialu kabagoni tí bibahende kamiru manda biaiore halimulo hamelo kaba. Yasuhondo mini mbiraorewi karu ti bibahendenaga ko biyaru Mosese heneyangi Mana lowini ngagome nadomabehe wiaru ibugua domo wahai haga ka manda bilimu.
ACT 13:40 Anigo Ngode Datagaliwabe mana latagi haga biarume ala mbiwia halu lenego tíha lola holigo mamage halimu. Tigua mbiwia halu lenego ogo,
ACT 13:41 Mege biaga kamiru tí de handadaba. De hondowa mogo lalu homalimu. Áyu ogoni tí kamiruha biabe bialu kogo hondowa tígua mini mbiraore nawuleberami. Mbiralime tíhondo bayuwa langiragolabi tígua mini mbiraore nawuleberamiore, lalu lenego gilibu nga, lalu Polohanda lene.
ACT 13:42 Ani lai howa Polo Banabasala ngoai hagane andaha howa tagira pialu hearia wali agali biarume libuhondo lalu, Mana ogonibi hale holoma̱ya Sabada horo mendengi langule dai bilibu, lene.
ACT 13:43 Ani lowa wali agali ngoai hayaru tagira pialu purogo layagola Yu wali agalibi wali agali tara tara Yualinaga mana yu tiga biagabi dewa hearume Polo Banabasala heba pene. Pialu howa libugua o biaruhondo bi lalu, Ngode Datagaliwabenaga biamogo bia holene ngagoria hana ho haabo halimu, lalu lamini.
ACT 13:44 Sabada horo mendengi tano ogoriani wali agali bibahende hearu Anduane Homogonaga bi mana hale hole ngoai hene.
ACT 13:45 Wali agali dewaore ngoai ho hearu de hondowa Yuali hearume Polohondo henge lowa ibu mege bialu ibu bi mana lamiyago, Mana ogoni kooreda, lalu hene.
ACT 13:46 Ani layagola Polo Banabasalame hongo howa lalu, Ngode Datagaliwabe bi mana tíhondo ala langulene wini. Tígua mana ogoni erembira mialu haabobo holene hame nalarimigo tí wahalu iyame Yu wali agali ndo tara tara karuhondo lamima poleberaba.
ACT 13:47 Bulene mbira Anduane Homogohanda iya langiyago ogo, Yu wali agali ndo wali agali tara tarame de hendelo i̱na í̠ lamu hale ale heledogo. Í̠ togoni howa wali agali dindi bibahendeni karu pele mulene yu helo ani heledo, laya, lene.
ACT 13:48 Ani layago hale howa wali agali tara tara biarume turu halu lalu, Anduane Homogonaga bi mana bayaleore, lene. Maru hearume haabobo holene ogoni yu helo Ngode Datagaliwabehanda dabo heleneru tigua Yasu mana yu tiga bini.
ACT 13:49 Dindi ogoriani Anduane Homogonaga bi mana loyogo lene.
ACT 13:50 Ani biyagola Yuali biarume tano ogoninaga agali timbuni hearubi wali timbuni mini lene Ngode Datagaliwabehondo mitangi bialu lotu laga berearubi tigua Polo Banabasalahondo keba helo mo ha hene. Mo keba howa ti gimbu buwa tigua Polo Banabasala mo tandaga halu dindi ogoriani howa wara tagi hene.
ACT 13:51 Ani biyagola howa abosolo biago labome tigua biyagoni nakarulape birimi lalu walia halu abalu libunaga geni para hayago taulo wahalu Aigoniama pene.
ACT 13:52 Yasu mana yu tiga biaga Andiogoni hearu tiha turu holenebi Ngode Datagaliwabe Dininibi to̱laihe hene.
ACT 14:1 Andiogoali biarume Polo Banabasalahondo biyadagua Aigoniamalimebi ani dege bini. Polo Banabasala Yu wali agalinaga ngoai hagane andaha puwa libugua mana hongo howa lamiyagola Yu wali agalibi Girigi wali agalibi dewaoreme Yasu mana yu tiga bini.
ACT 14:2 Yuali Yasu mana yu tiga bibe manga ho hearume wali agali tara tara hearu tiguabi Yasu mana yu tiga bu hearuhondo handabe manga helo mo ha hene.
ACT 14:3 Aigoniamani Polo Banabasala horo dewaore hondo halu libugua Anduane Homogonaga mana hongo howa lamialu hene. Ani lamiyagola Anduane Homogonaga biamogo bia holene mana lamiyago heneneore langialu ka lalu walia helo Ngode Datagaliwabehanda agalime nabiagane alebi nahendene alebi libugua bilo libuhondo hongo mini.
ACT 14:4 Ani biyagola howa wali agali Aigoniamani hearu talebu ki buwa maru Yuali biaruhayagi halu maru abosolo biago labohayagi halu talebu ki bini.
ACT 14:5 Ani biyagola agali tara tara maru hearubi Yuali maru hearubi tinaga haru haga heba mandagi howa tigua abosolo biago labo tandaga nelo to̱le̱me bolene nga lo manda bini.
ACT 14:6 Ani lo manda bu ka layago hale howa Polo Banabasala ibida pialu Laigonia dindinaga tano mini Lisidarabi Debibi ogoninaga dindi kaware kaware wiaruhabi pene.
ACT 14:7 Dindi uruniha ibaga bialu libugua Bi Mana Debene lamima pene.
ACT 14:8 Lisidarani howa agali mbirali ge kohe hene. Ibu ai̱yahanda taba henenengi howa ge kohe ibaga bibe nahe berene.
ACT 14:9 Ani berearia Polohanda bi layago ibu hale hene. Hale ho berearia ibu ge dabi helonaga mini mbiraore wu bereago hondowa Polohanda ibu handade halu
ACT 14:10 bi dalimu lalu, Í̠ni heyu ha, lene. Ani layago hale howa agali biago ibu porabu daga halu heyuwa ibaga bu hene.
ACT 14:11 Polohanda ogoni biyago hondowa Laigonia wali agali dewaore ngoai ho hearume tininaga bi lowa dalimu lalu, Ina damahondo bi pupu weramaliru ti agali ale howa ina kamaria daliyada, lene.
ACT 14:12 Ani lowa tigua tininaga bi pupu wiaga mini wiadagua Banabasa ibu mini Susa wini. Polo ibu bi lagane tene ka manda buwa ibu mini Hemisi wini.
ACT 14:13 Tininaga dama mitangi bialu mini Susahondo bi pupu wulenaga anda Lisidara tano tagirahayagi bu hene. Susanaga loma binigo mo miaga agali heago ibugua palawaya pongo bu mabu biyago nogo bulumaga wangaberunaga mani karula howa bi pupu wulenaga anda panga haraba heagoria haru pene. Haru puwa loma binigo mo miaga agali biagobi wali agali dewa ngoai ho hearubi tigua Polo Banabasalahondo bo mulene manda buwa haru pene.
ACT 14:14 Ani bule bialu ka layago hale howa abosolo biago labome ani bulene nakarulapeore manda buwa libunaga labolabo lerelalu wali agali ngoai ho heagoha gerai lalu puwa dombeneha pu hene. Pu howa libugua dalimu lalu,
ACT 14:15 Agaliru-o ogoni agi beramibe. Iyabi agali dege tí kamigobi kabago tígua mbirale tara galone ndo ogonihondo bi pupu nawi wahalu mini beregedowa Ngode Datagaliwabe haluhe kago mitangi bu halimulo iyame Bi Mana Debene langule ibiriba. Ngode Datagaliwabe haluhe kago ibugua hari daligabi dindibi ibabi uruni bibahendeha karubi ngarubi wa biai hene.
ACT 14:16 Ala Ngode Datagaliwabehanda wali agali tini bua hayadagua bilo helene.
ACT 14:17 Ibugua bayale bibahende biyagome tígua ibu kaore manda bilimulo walia hene. Ibugua bayale biaga urubi dalu ibilagabi tomo bibahende mo anda haga biagabi tí nolene ngiagabi turu holene tínaga bu habaneha mo to̱lai hagabi kagoni, lene.
ACT 14:18 Ani lowa Polo Banabasala libugua wali agali ngoai ho hearume libuhondo nogo bulumagaru ngia nabilo lowa bi hongo howa lalu hene.
ACT 14:19 Yuali maru Pisidia dindinaga tano Andiogo howabi Aigoniama howabi ibuwa tigua tinaga bime wali agali dewaore tihayagi yamiai howa ti heba mini mo mbiraore hene. Mini mbiraore howa tigua Polo to̱le̱me bowa homaya mitangi buwa gililo yalu puwa tano tagirahayagi ngelene.
ACT 14:20 Ani biyagola Yasu mana yu tiga biaga biaru Polo wiagoria ibuwa ho mabu biyagola Polo ibu heyuwa tanoha dai bialu anda pene. Egerebalene ibubi Banabasabi libu Lisidara wahalu Debi pene.
ACT 14:21 Debini howa Polo Banabasalame Bi Mana Debene lamiyagola wali agali dewame Yasu mana yu tiga buwa Yasu talima piaga hene. Ani buwa libu Debi wahalu Lisidarabi Aigoniamabi Pisidia dindinaga tano Andiogobi dai bini.
ACT 14:22 Dai bialu howa libugua Yasu mana yu tiga biaga dindi uruniha hearume Yasu mana yu haabo helo mo hongo halu, Aniore haabo halimu, lalu pene. Libugua lawai halu lalu, Ngode Datagaliwabehanda Handame Ho Kagoria anda poloma̱ya iname dindini howa ga̱i̱ bibi dewaore hondoleberama, lalu lamini.
ACT 14:23 Ani lawai halu Keriso hameigini dindi tara tarani hearu Polo Banabasala ti heba howa libugua agali maru agali ala hene miniwi helo dabo helaga bini. Ani helowa libugua Ngode Datagaliwabehondo agali biarunaga bi la halubi tomo nane halubi wali agali Anduane Homogohondo mini mbiraorewi hearu Ngode Datagaliwabe ibugua ti biamogo bilo, Biamogo bia, lalu helalu libu pene.
ACT 14:24 Libugua Pisidia dindini ani bima pialu Pambilia anda pene.
ACT 14:25 Anda puwa libugua Pegani wali agali hearuhondo Bi Mana Debene lamialu howa Adeliani dalini.
ACT 14:26 Libugua biabe biai halu Adelia howa iba taluni biralu libu Siria dindinaga tano Andiogo dai bini. Dindi ogoni libu biabe bilo ala Keriso hameigini biarume Ngode Datagaliwabe ibugua libu biamogo bia helo loma bia ho helayagoha ogoriani lone dai bini. Biabe ogoni bumaro biyagoni manda buwa dai bini.
ACT 14:27 Andiogo anda puwa Polo Banabasalame Keriso hameigini hearu mo ngoai howa Ngode Datagaliwabe ibugua libuha howa biyago te tihondo lamiai hene. Libugua lalu, Yu wali agali ndo tara tarame Yasuhondo mini mbiraore wilo Ngode Datagaliwabehanda henge miyiya, lalu lamini.
ACT 14:28 Libu Andiogoni howa ege dewani Yasu mana yu tiga biaga hearu heba hene.
ACT 15:1 Agali maru Yudia howa Andiogo ibuwa tigua Yasu mana yu tiga biaga hearuhondo lawai halu lalu. Mosese heneyangi Mana lo winigodagua dongone podo mabu biagane mana nabirimiyagua Ngode Datagaliwabehanda tí pele nangulebira, lene.
ACT 15:2 Ani layagola hale howa Polo Banabasalame, Bi nakarulape larimigo, lalu ti heba lai gibi lalu hene. Ani lowa tigua lo manda bialu Polobi Banabasabi Keriso hameigini maru Andiogoni hearubi tigua mana ogoni lo tiga bule abosolobi agali ala hene miniwibi Yarusalemeni hearu hearia polene nga lo manda bini.
ACT 15:3 Ani lo manda biyagola howa Keriso hameigini hearume tihondo, Pudaba, layagola ti pene. Tigua pialu howa Pinisiahabi Samariahabi Yasu mana yu tiga biaga hearuhondo lalu, Wali agali tara tara karume Ngode Datagaliwabehondo mini mbiraore wu ka, lalu lamima pene. Bi ogoni layago hale howa Yasu mana yu tiga biaga biarume turu timbuni ho hene.
ACT 15:4 Ti Yarusaleme anda piyagola Keriso hameigini hearubi abosolo hearubi agali ala hene miniwi hearubi tigua tihondo, Ibirimida, lowa turu timbuni hene. Ani biyagola Polo Banabasalame Ngode Datagaliwabehanda libuha howa biyago te tihondo lamiai hene.
ACT 15:5 Ani layago hale howa Perisi aria Yasu mana yu tiga bu hearume heyuwa lalu, Agali tara tara Yasu mana yu tiga bulene manda bu kayagua ti dongone podo mabu bulene nga. Mosese heneyangi Mana lo winigobi tigua bilo lamulene nga, lene.
ACT 15:6 Bi ogoninaga lo tiga bule abosolobi agali ala hene miniwibi hearu ngoai hene.
ACT 15:7 Bi lagalaga biaabo halu howa Pidahanda heyuwa lalu, I̱ hameneru-o wali agali tara tarame Bi Mana Debene hale howa yu tiga bilo i̱na tihondo lamuliya abaleore Ngode Datagaliwabehanda tíha howa i̱ dabenego manda bidami.
ACT 15:8 Ngode Datagaliwabe ibu wali agali ta nabi bibahendenaga bu mini manda biai kago ibugua wali agali tara tara Yasu mana yu tiga bu hearu tibi karulape ka walia halu ibu Dinini ina ngiyadagua tihondobi miya.
ACT 15:9 Ngode Datagaliwabehanda inabi tibi dombeni tu nawini. Tigua Yasuhondo mini mbiraore wiyagola tinaga ko biyago ibugua domo wahai hene.
ACT 15:10 Anigo tígua Ngode Datagaliwabe ba hondole lowa nu genda timbuniore inamebi ina mamalimebi nahanabeheore biago Yasu mana yu tiga biaga karume henelo mo hana haramigo aginagabe.
ACT 15:11 Ani bulene nawi. Iname Ngode Datagaliwabehondo mini mbiraore weramagola Anduane Homogo Yasunaga biamogo bia holeneme ina pele ngiagadagua ti nde pele miaga, Pidahanda lene.
ACT 15:12 Ani layagola Banabasa Pololame Yu wali agali ndo tara tara heba howa Ngode Datagaliwabehanda libuha howa agalime nabiagane alebi nahendene alebi bibahende biyagoni libugua ngoai ho berearu lamini. Lamialu hearia ti bi naleore haleho berene.
ACT 15:13 Libugua bi lai hayagola Yamesehanda lalu, Hameneru-o i̱na bi larogo hale hadaba.
ACT 15:14 Ngode Datagaliwabe ibugua Yu wali agali ndo tara tara karu hame layago abale walia halu maru ibunaga helo dabayago Saimonohanda ina bayuwa langiya.
ACT 15:15 Langiyadagua Ngode Datagaliwabe mana latagi haga hearume bi ogoniore lowinigo nga. Anduane Homogonaga mbugani lo ngago ogo,
ACT 15:16 Anduane Homogohanda lalu, Awe i̱ dai bulebero. Dai buwa i̱na Debidihanda ala handame ho henedagua lone mbiralime handame helo helolebero. Handame ho holene ogoni podo ibira ho ngago muwa i̱na mo gini bialu mo hongo ho helolebero.
ACT 15:17 Anigo wali agali tara tara bibahendeme i̱ kogoria ibulebira. Dindi tara tarali i̱naga helo i̱na olaruru bibahende ibai holebira.
ACT 15:18 Bambaore Anduane Homogohanda wali agalime bi ogoni manda bilo anidagua lene, lalu, gilibu nga, lene.
ACT 15:19 Yamesehanda bi laabo halu lalu, I̱na manda bidogo ogo laro. Yu wali agali ndo tara tarame Ngode Datagaliwabehondo mini mbiraore wu karu ti iname mo genda holene nawi.
ACT 15:20 Ti genda nayilo iname tihondo beba gilibu pelami̱ya. Gili bialu lalu, Mbira ogo, Ne nolenebi nogobi damahondo bo minigo nolene nawigo nanalimu. Mende ogo, Wali agali kayu nayalimu. Tebone ogo, Nogo tara tararu egarubi ma gingima binigo darama heba nanalimu. Mane ogo, Darama ibuni nanalimu. Uruni hangu gilibu pelami̱ya.
ACT 15:21 Ogonigo bambaore howa Mosese heneyangi Mana lowinigo ngago Sabada horo bibahendengi ngoai hagane andaruha howa daga laabo haga. Mosese bi mana ogonibi tano bibahendeha agali marume lamiaabo haga, Yamesehanda lene.
ACT 15:22 Ani layagola howa abosolobi agali ala hene miniwibi Keriso hameiginirubi ti bibahende hearume lo mbiraore howa lalu, Ina kamaru aria agali maru Polo Banabasala heba Andiogo pelo dabami̱ya, lene. Ani lowa tigua Yudasa ibu mini mende Basabasa Sailasala ogoni labo dabene. Yasu mana yu tiga bu hearume agali ogoni laboha mini hana ho haga hene.
ACT 15:23 Beba ti yalu pelo gilibu minigo ogo. Ina abosolobi agali ala hene miniwibi tínaga Keriso hamene kamarume tí Yu wali agali ndo tara tara Keriso hameigini Siria dindihabi Siria dindinaga tano Andiogohabi Silisia dindihabi kamiru tíhondo turu howa beba ogo gilibu wia harama.
ACT 15:24 Ina aria marume tíhondo bi mana nakarulape langiyiyagome tí mini burugulo halimulo mo lulu ya hayiyago hale harima. Tigua ogonidagua lelo iname ani lalimu nale.
ACT 15:25 Anigo ina ngoai howa agali kira dabalu tí kamiria ibilo iname, Pudaba lami̱ya, lalu ina bibahende ani lo mbiraore harima. Libu inanaga hameneore Banabasa Polola heba ibulebira.
ACT 15:26 Banabasa Polola ogoni labome ina Anduane Homogo Yasu Kerisonaga biabe bialu homolene wiagoria kaware haabo hene.
ACT 15:27 Ani binigo Yudasa Sailasala dabarimago labome bebani bi gili birimadagua bime libugua langilo tí kamiria, Pudaba, larima.
ACT 15:28 Iname genda mbira tíhondo mo tago holilono Ngode Datagaliwabe Dinini ibubi inabi mini mbiraore howa galone maria dege tígua nabilimulo langerama uru.
ACT 15:29 Mbira ogo, Ne nolenebi nogobi damahondo bo minigo nolene nawigo nanalimu. Mende ogo, Darama ibuni nanalimu. Tebone ogo, Nogo tara tarabi egarubi ma gingima binigo darama heba nanalimu. Mane ogo, Wali agali kayu nabilimu. Uruni nayalimu larimago nabi wandialu harimiyagua bayale holeberami. Ai ogoni tí mitangi timbuni bu kama larama. Beba ogoni gilibu wia hene.
ACT 15:30 Yasu mana yu tiga biarume agali o biaruhondo, Pudaba, layagola ti Andiogo pene. Anda puwa tigua Yasu mana yu tiga bu hearu bibahende mo ngoai howa beba biago tihondo mini.
ACT 15:31 Ani miyagola Yasu mana yu tiga bu hearume beba dagalowa bi bayale o daga layagonime ti mo turu hai hene.
ACT 15:32 Yudasa Sailasala biago labo libugua Ngode Datagaliwabe mana latagi haga howa Yasu mana yu tiga bu biaru elahe helo mo hongo halu tihondo bi lamiaabo halu hene.
ACT 15:33 Libu Andiogoni Sarere dewa halu tinaga aria pigane, Pudaba, layaru hearia dai bilo Yasu mana yu tiga bu biarume turu howa, Dai bidaba, lene. [
ACT 15:34 Sailasa ibu Andiogoni hole manda buwa nape hondo hene.]
ACT 15:35 Polo Banabasala Andiogoni ege dewani howa libubi agali maru dewa heba tigua Anduane Homogonaga bi mana lawai ha lamigi bialu haga hene.
ACT 15:36 Ege maru howa Polohanda Banabasahondo lalu, Tano bibahende Anduane Homogonaga bi mana lamiribagoha Keriso hameigini karu ti agi bialu kabe handama mbaliya, lene.
ACT 15:37 Ani layagola Banabasa ibugua Yone ibu mini mende Maga mitangi bialu, Ina haru mali̱ya hamelo ko, lene.
ACT 15:38 Ani layagola Polohanda ladai bialu lalu, Yone Maga ogoni ibu ala iya heba pialu ina biabe biai nahe hema handala Pambiliani howa ibu iya wahalu dai biyago lone polene nakarulape, lene.
ACT 15:39 Ani layagola Polo Banabasalame lai timbuni lalu mini mbiraore nahe howa Banabasahanda Magahondo, Mba, lowa libu Saibarasa pole iba taluni biralu pene.
ACT 15:40 Ani biyagola Polohanda Sailasa dabowa Yasu mana yu tiga biaga Andiogoni biarume libuhondo lalu, Ngode Datagaliwabenaga biamogo bia holene libu heba helo, layagola libu haru pene.
ACT 15:41 Polohanda Sailasa heba Siriahabi Silisiahabi ibaga bialu howa Keriso hameigini dindi uruniha hearu ti Yasu mana yu haabo helo mo hongo hama pene.
ACT 16:1 Polo ibu puabo halu Debibi Lisidarabi pialu anda pene. Lisidara ogoriani Keriso hameigini mbira mini Timodi hene. Ibu ai̱yabi Keriso hamewane howa Yu wali berene. Ibu aba Girigiali hene.
ACT 16:2 Yasu mana yu tiga biaga Lisidaranibi Aigoniamanibi hearume Timodi ibu agali tigabiore ka laga hene.
ACT 16:3 Timodi ibu heba pole hame lowa Polohanda Timodinaga dongone podo mabu bini. Ani binigo irane ogo. Dindi ogoriani Yuali bibahende hearume Timodi aba ibu Girigiali henego manda biai ka manda buwa ani bini.
ACT 16:4 Ti tano dewaha ibaga bialu hearia abosolobi agali ala hene miniwibi Yarusalemeni hearume mana lo wiyadagua tigua Yasu mana yu tiga biaga hearu lamima pialu howa lalu, Mana ogoni bulene nga, lalu lamini.
ACT 16:5 Ani biyagola Keriso hameigini hearu Yasuhondo mini mbiraore wuleneha mo hongo halu horo bibahendengi wali agali dewame Yasuhondo mini mbiraore wuwa tiha ho tago halu hene.
ACT 16:6 Tigua Esiaha bi mana lamule pole biyaria Ngode Datagaliwabe Dinini ibugua lamule polene nawi walia hayagola ti Piriyabi Galesiabi tu wiagoria pene.
ACT 16:7 Misia dindi tu wiagoha pu hearia ti Bidiniaha anda pole manda biyagola Yasu Dinini ibugua polene nawi walia hene.
ACT 16:8 Ani walia hayagola ti Misiani puabo halu Toroasaha anda pene.
ACT 16:9 Anda pu howa mbiraga ogoningi Polo ibugua de gandeba handalu hearia Masedonia agali mbirame lalu, Ina biamogo bule Masedoniani íbu, lalu hearia de hendene.
ACT 16:10 Polohanda de gandeba ogoni handayagola iname Masedonia abale pole manda manda birima. Iname wali agali Masedoniani karuhondo Bi Mana Debene lamuluma̱ya Ngode Datagaliwabehanda walia hayida manda birima.
ACT 16:11 Iname iba taluni biralu Toroasa wahalu pia ho wialu Samoderese anda pirima. Ha anda mbira paluwa puabo halu Neabolisi anda pirima.
ACT 16:12 Ogoriani iba talu ngelalu dindi dindi pialu Pilibai anda pirima. Tano ogoni Masedonia dindinaga mbira Lomo gabumaneme haru haga henego ogoriani ina horo maru harima.
ACT 16:13 Sabada horo hayangi Pilibai tanonaga pabe tagirahayagi pialu iba angeni Yu wali agalime Ngode Datagaliwabehondo bi laga mbira wulebira badago mitangi bialu ina iba o piyadagoha angeni pirima. Ani buwa ina wali maru ngoai ho berearu heba biruwa bi lalu harima.
ACT 16:14 Taiadaira tano wali mbira mini Lidia bereago iname bi larimago ibu hale haya. Wali ogonime labolabo tagalitayabi yolo timbuni miaganego ogoninaga biyinaya biabe biaga biruwa ibugua Ngode Datagaliwabe mitangi bialu lotu laga berene. Polohanda bi mana lamialu hearia Lidia ibu mana ogoni yu tiga bilo Anduane Homogohanda ibunaga mini mo dugua hene.
ACT 16:15 Ani biyagola Lidiabi ibu andagaha hagarubi baboraya bini. Baboraya buwa Lidiahanda inahondo lalu, Anduane Homogonaga bi mana i̱na henene yu tiga bu bedogo manda bu kamiyagua i̱ andaga hami̱ya ma ibidaba, lene. Ibugua haya haabo halu ani layagola ina ibu andaga pirima.
ACT 16:16 Horo mbirungi ina Ngode Datagaliwabehondo bi lolenaga anda heagoha pialu hemaria wandari garabaya biabe ale bia haga bereago ibuha dama daraga heagome halaga mo bia hagago wandari ogoni ina lola harima. Wandari biago halaga biyagonaga wali agali hearume ibunaga anduane hearuhondo muni timbuni miaga hene.
ACT 16:17 Ina Polo heba pialu hemaria wandari ogoni ibu haruru ibuwa bi dalimu lalu, Agali uruni ti Ngode Datagaliwabe Daligaorene Daliga Kagonaga biabe bia haga kagoni. Pele mulene yu halimulo tigua langialu ka, lene.
ACT 16:18 Wandari biagome horo dewani bi ogoni laabo hayagola Polohanda hembo howa beregedalu dama daraga heagohondo lalu, Yasu Kerisonaga minini howa tagira pu laro, lene. Ani layaore dama biago tagira pene.
ACT 16:19 Ani biyagola wandari ogoninaga anduane biarume maha muni mulene henge nawulebira manda buwa tigua Polo Sailasala minalu ngoai hagane hama wiagoha haru haga hearu hearia gililo yalu pene.
ACT 16:20 Tigua Lomo gabumane godi laga biaru hearia haru puwa lalu, Yuali ogo labome inanaga tanoni wali agali karu mo ko hara.
ACT 16:21 Iname nabulene lo ngago libugua, Bilimu, lalu lawai halu ka. Mana lawai harago ina Lomo ho tene hene kamagome ani bulene nawiore, lene.
ACT 16:22 Ani layagola hale howa ngoai ho hearumebi Polo Sailasala bole bini. Gabumane haru haga biarume libunaga labolabo lerelo wahalu lalu, Gewame badaba, lene.
ACT 16:23 Tigua hongo halu baabo howa Polo Sailasala garabaya andaha gililo ba anda halu garabaya haru hagahondo lalu, Libu dariba halu bayuwa mamage habe, lene.
ACT 16:24 Ani layagola garabaya haru haga biagome libu garabaya anda hobane dombeneha gililo ba anda howa libunaga ge iraha gingidowa ngelene.
ACT 16:25 Mbi hanuni ale hayagola Polo Sailasalame Ngode Datagaliwabehondo bi lalu iba ganabi lalu layuago garabaya maru hearume hale hene.
ACT 16:26 Ani lalu hearia dumbirumbi timbuniore abale bialu garabaya anda gene mo ema bini. Ani biyagola anda biagonaga pangaru dugua hai halu ege pu seni garabaya agali dariba hayagobi hado ibira hai hene.
ACT 16:27 Ani biyagola garabaya haru haga biago palia hondo henego de ngalalu heyuwa panga bibahende dugua hai ho wiago hondowa garabaya biaru bibahende ibida piai kada mitangi bini. Ani mitangi buwa ibugua ibunaga wai biagane ayu tibu yamialu ibuni homole bole biyaria
ACT 16:28 Polohanda bi dalimu lalu, Ina bibahende nape hai kamagonigo í̠na homole bolene nawi, lene.
ACT 16:29 Ani layagola hale howa garabaya haru haga biagome, Lamu hale yalu ibidaba, lowa Polo Sailasala hearia gerai lalu puwa ibu gi howa duru lalu libunaga geha birape hene.
ACT 16:30 Ani buwa ibugua libu tagira haru puwa libuhondo lalu, Ogo labo-o Ngode Datagaliwabehanda i̱ pele ngilo i̱ agi buabe, lene.
ACT 16:31 Ani layagola libugua ladai bialu lalu, Anduane Homogo Yasu ibuhondo mini mbiraore wiriyagua pele ngulebira. Í̠bi í̠ andagaha hagarubi yu holeberami, lene.
ACT 16:32 Ani lowa libugua ibubi ibu andagaha haga biarubi tihondo Anduane Homogonaga bi mana lamialu hene.
ACT 16:33 Mbi hanuni ogoningi garabaya haru haga biagome libu haru puwa gewame dongoneni bayagonaga dere wayawaya bia hene. Ani buwa ibubi ibu andagaha hagarubi ti baboraya bini.
ACT 16:34 Baboraya buwa ibugua Polo Sailasala ibu andaga haru puwa libu tomo nelo mini. Ibubi ibu andagaha hagarubi ti Ngode Datagaliwabehondo mini mbiraore wiyagonaga turu timbuni halu hene.
ACT 16:35 Egerebagi hayagola Lomo gabumane haru haga biarume dandayi haru haga hearuhondo bi lawia halu lalu, Agali o biago labo golope helo lamilimu, lene.
ACT 16:36 Ani layagola hale howa garabaya haru haga biagome Polo lamialu lalu, I̱na libu gololiya gabumane haru haga biarume bi lawia hayadago. Tigua ani layago libu garabaya wahalu bi nale tendore pobehe, lene.
ACT 16:37 Ani layagola Polohanda dandayi haru haga ibiyaruhondo lalu, Iya Lomo ho tene howa kabago tigua godi nale wali agali dewa handaya ho helowa gewame iya bayago. Bowa garabaya andaha gililo ba anda haya. Anigo áyu iya pu yola halu polene ogonidagua nakarulapeore laro. Iya golope hole Lomo gabumane haru haga biarume tini ibulene nga, lene.
ACT 16:38 Polohanda layadagua dandayi haru haga biarume Lomo gabumane haru haga biaru lamiyagola, Polo Sailasala Lomo ho tene hene ka, layago hale howa ti gi hene.
ACT 16:39 Ani buwa tigua Polo Sailasala hearia pialu, Kagua birima, lowa garabaya andaha howa haru tagira pialu, Tano ogoni wahalu pudaba, lene.
ACT 16:40 Ani layagola Polo Sailasala garabaya anda wahowa wali mini Lidia ibunaga andaga pene. Anda ogoniha Yasu mana yu tiga bu hearu heba halu libugua ti elahe helo mo hongo hagane bi lamialu pene.
ACT 17:1 Polo Sailasala libu ibaga bialu howa Ambibolisibi Aboloniabi anda pialu Tesalonaiga anda pene. Tano ogoriani Yu wali agalinaga ngoai hagane anda mbira hene.
ACT 17:2 Ala Polo dindi maruni howa ngoai hagane andaha piagadagua ibu ngoai hagane anda ogoniha anda pene. Ngoai hagane anda ogoniha Polo ibugua Sabada horo halu tebirani wali agali ngoai ho hearu heba Anduane Homogonaga mbugani bi gilibu winigo dagalalu lo manda bialu hene. Ani lo manda bialu howa ibugua Mbirali Dabo Helenego ibu tandaga nalu homowa mo heya holene winigo lamialu hene. Lamialu lalu, Yasu ogoni ibugua biyago te áyu langerogo ibu Mbirali Dabo Helenegoore ka lalu langero, Polohanda lene.
ACT 17:4 Ani lamiyagola wali agali maru hearume, Ibu bi heneneore laya, manda buwa ti Polo Sailasala heba ho gimbu bini. Wali mini lene dewa berearubi Girigi wali agali Ngode Datagaliwabe mitangi bialu lotu laga dewa hearubi ti bibahendeme ogonidagua dege bini.
ACT 17:5 Ani biyagola howa Yu agali hearume henge lowa agali ko bame hama hama ibaga bu haga hearu dewa mo ngoai hene. Mo ngoai howa Yu agali biarubi agali ko biarubi keba halu bi dalimu layagome wali agali dindi ogoriani bibahende hearume gungu bibehe hene. Ani buwa tigua Polo Sailasala wali agali hearia haru pole libu hai bialu howa agali mbira mini Yaisana ibunaga andagaha minalu anda pene.
ACT 17:6 Anda puwa libu handa walia nahe howa tigua Yaisanabi Yasu mana yu tiga biaga maru hearubi gililo yalu gabumane haru haga hearia puwa bi dalimu lalu, Agali urume dindi dewani ko timbuni biame halu hayago ai inanaga dindini anda ibiyada.
ACT 17:7 Ibiyagola Yaisana ibugua ibunaga andagaha ti haru puwa palelene. Tigua handame haga kini mende mini Yasu ka lowa Lomonaga Kini kagome bulene mana lowinigo ngaru pugualu kagoni, lene.
ACT 17:8 Tigua bi ogoni layagola wali agali bibahende hearubi gabumane haru haga hearubi mo keba howa gungu bibehe hene.
ACT 17:9 Ani biyagola gabumane haru haga biarume Yaisanabi agali maru ibu heba dariba hayarubi tihondo lalu, Iname tí golope holoma̱yanaga muni ngulene lo ngadagua ngidaba, lene. Ani lowa muni miyagola gabumane haru haga biarume ti golope hene.
ACT 17:10 Horo ogoningi mbiraga hayagola Yasu mana yu tiga bu hearume Polo Sailasala Beria pelo, Pudaba, lene. Ani laya handala libu pialu Beriani anda puwa Yu wali agalinaga ngoai hagane andaha anda pene.
ACT 17:11 Wali agali Beriani hearu ti Tesalonaigani wali agali mini giambe hearubi ndo ti mini hade hene. Tigua Ngode Datagaliwabe bi mana turu halu hale hoa howa hale hene. Hale howa tigua Polohanda mana lamiyago henemanedabe hondole horo bibahendengi Anduane Homogonaga mbugani bi gilibu winigo dagalalu lo manda bialu hene.
ACT 17:12 Ani buwa ti dewalime Yasu mana yu tiga bini. Girigi wali mini lene berearubi Girigi agalibi ti dewaoreme Yasu mana yu tiga bini.
ACT 17:13 Ani biyagola howa Polohanda Berianibi Ngode Datagaliwabe bi mana lamialu ka layago hale howa Yu agali Tesalonaigani hearume Beriani ibuwa tigua wali agali hearu mo didola halu keba helo mo ha hene.
ACT 17:14 Ani biyagola Yasu mana yu tiga bu hearume Polohondo lalu, Iba solowara bedagohayagi abale polene nga, lene. Ani lowa agali marume ibu ngua ho pelo, Pudaba, lene. Ani buwa Sailasa Timodila libu nape Beriani hondo hene.
ACT 17:15 Polo haru piyarume ibu Adene tanoni ngua hayagola Polohanda bi lawia halu lalu, Sailasa Timodila i̱ koria abale ibilo lamilimu, lene. Ani laya handala ti Beriani dai bini.
ACT 17:16 Polo ibu Sailasa Timodila ibilo Adeneni hondo hearia tano ogoriani mbirale dewa bi pupu wule gime wabini wiaru hondowa ibu miniha genda timbuni hene.
ACT 17:17 Genda howa ibugua ngoai hagane andaha puwa Yu wali agali hearubi wali agali tara tara Ngode Datagaliwabe mitangi bialu lotu laga hearubi ti heba bi mana lo manda bialu hene. Magedi hama wiagoriani horo bibahendengi wali agali ibugu bialu hale haga biyaruhondo ibugua Ngode Datagaliwabe bi mana lamialu hene.
ACT 17:18 Agali maru ti Ebigurialirubi Sidoigialirubi mana tara ogoninaga lawai haga hearu tigua Polo baba ladai bigibigi bialu hene. Ti marume lalu, Miniwi tingi halu mine howa bi larago agi larabe, lene. Ti marume lalu, Dindi tarani mbirale tara dahuliyali alenaga mana lamira bada, lene. Tigua ogonidagua layago irane ogo. Polo ibugua Yasu mana lamialu Yasu ibuni mo heya hayago te layagonaga ani lene.
ACT 17:19 Ani lowa tigua Polo haru puwa tano ogoninaga ganisolo agali Ariobagasa hama ngoai howa bi lalu hearia haru pene. Haru puwa tigua lalu, Í̠na mana gahenge tara lawai hariligo ina hale hoa kamagoni.
ACT 17:20 Bi maru larigo taraoreyago bi ogoninaga tene manda buluma̱ya langibelo, lene.
ACT 17:21 Adeneali hearubi dindi tarali íbu hearubi tigua mana gahenge tara tara hale halu lo manda bialu horo bibahendengi ani biaabo haga hene.
ACT 17:22 Ani layagola Polo ibu tanonaga ganisolo agali biaru heba howa heyalu ibugua lalu, Adenealiru-o tígua mbirale mbirale beramiligo hondowa tí bi pupu wulene mana hame timbuni lo kamigo manda bido.
ACT 17:23 Tínaga tanoni ibaga bialu howa bi pupu wiagane anda dewa heane de handaru. De handalu hewaria mbirale lomabu miaga dabu mbira wabu wiagoriani bi mbira gilibu wiago ogo, Mbirali iname manda nabi kamago ibunaga, gilibu ngago ogoni i̱na de handaru. Tígua mbirali ogoni tí manda nabi howa ibuhondo mitangi beramiligo ibuninaga bi manaore i̱na áyu tí langerogoni.
ACT 17:24 Ngode Datagaliwabe ibu hari daligabi dindi bibahendebi dindi bibahendeni ngarubi karubi wabiai henego ibu hari daligahanagabi dindihanagabi Anduane Homogo ka. Ibu anda agalinaga gime wabiniruha nahaga ka.
ACT 17:25 Ibu nakarulape ndo karulapeore kago iname ibu biamogo bialu mbirale mbira mulene henge nawi. Irane ogo. Ibunime inanaga holenebi buhe̱ lolenebi bayale bibahende wali agali bibahendehondo mulene ngadagua ngiagane ibuni ka.
ACT 17:26 Ibugua agali mbira pigane wabiyagoha howa wali agali tara tara bibahende dindi tara taraha ho dame bima pelo purogo lai helene. Ani nabi howa alaore ibugua manda manda biai howa wali agali ti ogongi ogoha helo lowa manda manda buwa pongo bo wini.
ACT 17:27 Ibugua ti wabiyago irane ogo. Tigua hai bialu ibu harualo manda bialu handa walia helonaga ibugua ti wabini. Ngode Datagaliwabe ibu ina kamagoria kaundia ndo kaware haga ka.
ACT 17:28 Anigo mbiralime lalu, Tene ibuha howa ibunaga hongome ina dindini halubi ema bialubi bu kamagoni, lene. Ogonidagua tínaga ga̱wa̱ laga ale maru hearume tínaga la halu lalu, Inabi ibunaga waneigini kamagoni, laga.
ACT 17:29 Anigo ina ibunaga waneigini howa iname Ngode Datagaliwabe ibu ngolomebi silibamebi ege to̱le̱ taramebi agalime wabu wini ngaru ibu uruni ale ka lowa ani mitangi bulene nawi.
ACT 17:30 Ala wali agalime Ngode Datagaliwabe manda nabi howa biyagoni hondowa Ngode Datagaliwabehanda la nabi ka. Ai áyu ogoni ibugua, Wali agali dindi bibahendeni karu tigua ko biyagonaga mini beregedai halimu, lalu ka.
ACT 17:31 Ibugua agali mbirali dabayago ibu togoni howa wali agali dindi bibahendeni karu baba tigatiga daba ki bulenenaga horo mbira pongo bo winigo nga. Ibugua agali dabayago ogoni homayagola mo heya hayagome wali agali bibahendeore karu baba ogonidagua bulebiraore lalu walia hene, lalu Polohanda lene.
ACT 17:32 Polohanda mbirali homenego mo heya haya layago hale howa agali maru hearume oba halu Polo mege bini. Marume lalu, Bi áyu langirigo hale hoa kamago mani lone langibelo, lene.
ACT 17:33 Ani layagola Polo ibu ti helalu pene.
ACT 17:34 Piyagola wali agali maru hearu tigua Polo heba ha tago halu Yasuhondo mini mbiraore wini. Mini mbiraorewi agali mbira Daionisiasa ibu Ariobagasa ganisolo agali henego ibubi wali mbira Damarisi ibubi wali agali marumebi ani dege bini.
ACT 18:1 Ani biyagola howa Polo ibu Adene wahalu Korindi pene.
ACT 18:2 Korindi anda pu hearia Yu agali mbira mini Aguila lola hene. Aguila ibu Pondasali hene. Kini Kolodiasa ibugua Yu wali agali bibahende Lomoni hearuhondo, Piai hadaba, layagola Aguila ibu one Pirisilala haru ayure dege Idali dindi wahalu Korindi ibini. Polo ibu libu andaga nenege pene.
ACT 18:3 Puwa ibu libu heba mandagi howa Polo ibubi Aguila Pirisilabi ti haru balai anda wabiaga howa tigua yolo biabe ogoni mandagi bialu hene.
ACT 18:4 Ani bialu howa Polo ibu Sabada horo bibahendengi ngoai hagane andaha puwa Yu agalibi Girigi agalibi hearu ti Yasuhondo mini mbiraore wilo lowa ibugua tihondo bi hongo howa lamialu hene.
ACT 18:5 Sailasa Timodila libu Masedonia howa ibiyagola Polo ibu biabe bialu hayago wahalu ibugua Yu agali hearuhondo Yasu mana lamialu, Mbirali Dabo Helenego Yasu ibu ka, lalu bayuwa lamialu biabe ogoni dege bialu hene.
ACT 18:6 Ani lamigi biyagola agali hearume ibu gura bi ko la megebi bigi bialu hene. Ani biyagola Polohanda ti erembira mialu ibunaga labolaboni abalu para heago taulo wahalu tihondo bi hongo howa lalu, Tí koha pirimiyagua nde tíninaga biabe i̱naga ndo. Áyu ogoni howa i̱na Yuali ndo wali agali tara tara karuhondo Yasu mana lamule ti karia polebero, lene.
ACT 18:7 Ani lowa ti wahalu Polo ibu agali mbira Yuali ndo mini Tidiasa Yasadasa ibunaga andaga hole pene. Agali ogonime Ngode Datagaliwabe mitangi bialu lotu laga howa ibu andagabi ngoai hagane andabi emene kaware hene.
ACT 18:8 Ngoai hagane anda haru haga mini Karisibasabi ibu damenebi tigua Anduane Homogohondo mini mbiraore wu hene. Korindini wali agali maru hearu dewalime Yasu mana hale howa Yasuhondo mini mbiraore wiyagola ti bibahende baboraya bini.
ACT 18:9 Mbiraga mbirungi Polo ibu de gandeba mbira handalu hearia Anduane Homogo ibugua Polohondo lalu. Gi nahabe. Í̠ heba kogonigo wahalu pu nabi mana lamiaabo halu habe. Tano ogoriani wali agali dewa i̱naga wali agali kago mbiralime í̠ babe nahe holebira, lene.
ACT 18:11 Ani layago hale howa Polo ibugua wali agali hearuhondo Ngode Datagaliwabe bi mana lawai halu mali mbira mendegonaga ege waragariani haabo hene.
ACT 18:12 Lomo gabumaneme agali mbira mini Galio ibu Girigi wali agali Agaia dindini hearu haru haga helo helayangi howa Yuali hearu ngoai howa tigua Polo minalu godi laga andaha haru pene.
ACT 18:13 Haru puwa lalu, Wali agali karume Ngode Datagaliwabe mitangi bialu lotu lelo agali ogome mana lowinigo ngadagua ndo mana tara lalu lamialu ka, lene.
ACT 18:14 Ani layagola Polo ibu bi lolebiyaria Galiohanda Yu agali biaruhondo lalu, Ibugua mana koore biyagonaga lole ibirimiyagua nde i̱ keba nahe bayuwa hale holiya karulapeda.
ACT 18:15 Ai ani ndo tígua tíninaga bibi manabi lo ngago uruninaga lai lalu kamigodago nde tíni mo tiga bilimu. Ogoninaga dabagane i̱ naholebero, lene.
ACT 18:16 Ani lowa ibugua ti godi lagane andaha howa wara tagi helo ami agali hearu lamini.
ACT 18:17 Ani biyagola tigua ngoai hagane anda haru haga mini Sosodenisi heago minalu godi lagane anda tagirahayagi howa balu hene. Ani bayagola Galio ibu tininaga biabe bira mitangi bialu ibu bi mbira nale hene.
ACT 18:18 Polo ibu Yasu mana yu tiga bu hearu heba howa Korindini horo dewaru hondo hene. Ani buwa ibugua, Tí hondo halimu, lalu iba talu mbira Siria dindi pole wiagoha anda puwa Aguila Pirisilabi ti heba Siria dindi pene. Pole howa Sengiria tano iba solowara angeni howa Polohanda Ngode Datagaliwabehondo, Mbira bulebero, lalu lo wialu, Henemane laro, lowa walia halu ibunaga mandari podai hene.
ACT 18:19 Iba taluni biralu pialu Ebesa anda pene. Anda puwa Polo ibugua Aguila Pirisilabi ogoriani helalu pene. Helalu puwa ibu ngoai hagane anda heagoha anda puwa Yu agali hearu heba bi hongo howa lalu hene.
ACT 18:20 Ani layagola Yu agali maru hearume ibuhondo lalu, Ina heba mandagi haabo hami̱ya, lene. Tigua ani layagola Polohanda, E̱, nale howa
ACT 18:21 ibu pole howa ibugua tihondo lalu, Ngode Datagaliwabehanda i̱ tí kamiria dai buliya walia hayagua nde dai bulebero, lene. Ani lalu ibu Ebesa wahalu pene.
ACT 18:22 Polo ibu iba taluni biralu puabo halu Sisaria tano anda pene. Anda pialu ibu Yarusaleme puwa Keriso hameigini hearuhondo, Bayale kamibe, lalu te lalu howa Andiogo pene.
ACT 18:23 Andiogoni emene hondo howa Polo ibu pialu dindi maru Galesiahabi Piriyahabi puabo halu wali agali Yasu mana yu tiga bu hearu mo hongo haga bima pene.
ACT 18:24 Ogoningi Yu agali mbira mini Aboloso ibu Alegandariali heago Ebesa ibini. Ibu bi lamulene mugubeyi howa Anduane Homogonaga mbugani bi gilibu ngago bayuwa manda bu hene.
ACT 18:25 Ibugua Anduane Homogonaga Harigani piagane mana lo manda binigo bi hongo howa lalu Yasu mana tiga tigaore lawai haga hene. Aboloso ibu Yonehanda baboraya biagane mana biawai henego dege manda bu hene.
ACT 18:26 Abolosohanda ngoai hagane andaha howa gi nahe tigatiga handade halu lamialu hene. Ani layago hale howa Aguila Pirisilame Aboloso libunaga andaga haru pene. Haru puwa libugua Aboloso ibu Ngode Datagaliwabenaga Harigani piagane mana bayuwa manda biai helo tigatigaore lamialu hene.
ACT 18:27 Emene howa Aboloso ibu Girigi dindi Agaia polene manda bini. Ani pole manda biyagola wali agali Yasu mana yu tiga biaga Ebesani hearume ibu biamogo bialu Yasu mana yu tiga biaga Agaia dindini hearuhondo beba gilibu wia halu lalu, Aboloso ibu tí kamiria ibiragola ibuhondo turu halu, Hami̱ya, lalimu, lalu gilibu wia hene. Aboloso ibu Agaiani anda puwa wali agali Ngode Datagaliwabenaga biamogo bia holeneme ti biamogo biyagola Yasu mana yu tiga bini hearu ibugua ti bayuwa biamogo bialu hene.
ACT 18:28 Wali agali dewa ngoai ho hearia ibugua Anduane Homogonaga mbugani bi gilibu wigi biagoria howa lalu Mbirali Dabo Helenego ibu Yasu ka walia haga bialu bi hongo howa layagome Yu agali ibu heba bi wai biaga hearu taga halu nimu lene.
ACT 19:1 Aboloso ibu Korindini heagola Polo ibu dindi hayagoria howa ibaga bialu hari dewa iri dali bialu pialu Ebesa anda pene. Ebesa ogoriani Yasu mana yu tiga biaga hearu lola hene.
ACT 19:2 Lola howa ibugua tihondo bi lalu, Tígua Yasuhondo mini mbiraore wirimingi Ngode Datagaliwabe Dinini ibu tíha hole ibiyabe, lene. Ani layagola tigua ladai bialu lalu, Ngode Datagaliwabe Dinini ka larigo ina hale nahe harima, lene.
ACT 19:3 Ani ladai biyagola Polohanda lalu, Baboraya birimiyago aginagabe, lene. Ani layagola tigua ladai bialu lalu, Yonehanda baboraya biagane mana lawai henego ogoni hale howa birima, lene.
ACT 19:4 Tigua ani ladai biyagola Polo ibugua lalu, Wali agalime ti ko biyagonaga mini beregedowa baboraya biagane mana Yonehanda lawai haga hene. Yonehanda Isaraele wali agaliruhondo lalu, I̱ ala íbu kogo. Maha mbirali ibulebirago ibuhondo tígua mini mbiraore wulene nga, lene. Maha ibulebira layago o Yasu ibuni tí manda bilimu, lalu Polohanda lene.
ACT 19:5 Polohanda bi ani layagola hale howa Ebesani o biaru Anduane Homogo Yasunaga minini baboraya bini.
ACT 19:6 Ani biyagola Polohanda tinaga haguaneni ibunaga gi wiyagola Ngode Datagaliwabe Dinini tiha hole dalini. Daliyagola tigua bi tara tara lalu Ngode Datagaliwabe bi manabi lamialu hene.
ACT 19:7 Agali ani bialu biaru ti homberia (12) agima hene.
ACT 19:8 Ani biyagola howa ege tebiruni Polo ibu Yuali ngoai hagane andaha puabo haga hene. Puabo howa ibugua bi mana hongo howa lamialu wali agali hearu heba ladai bigi bialu Ngode Datagaliwabehanda Handame Ho Kagonaga mana lamialu hayago ogoni heneneore layada manda bilo lamiaabo halu hene.
ACT 19:9 Ani lamiaabo hayagola agali maru hearume mana yu tiga bibe manga howa ngoai ho hearu hale helo tigua Anduane Homogonaga Harigani piagane mana mege bialu bi ko lalu hene. Tigua ani biyagola Polo ibugua ti helalu Yasu mana yu tiga biaga biaru haru pene. Ani buwa horo bibahendengi horombe howa bi mana lo manda biaga anda mbira Tiranasanaga heago ogoniha puwa Polohanda Yasu mana lawai halu ladai bigi bialu hene.
ACT 19:10 Mali kirani Polohanda ani biaabo halu heagola Esia dindini Yu wali agalibi wali agali tara tarabi bibahende hearu tigua Anduane Homogonaga bi mana hale halu hene.
ACT 19:11 Ngode Datagaliwabehanda Poloha howa agalime nabiagane ale taraore bigi bialu hene.
ACT 19:12 Wali agali hearume Polonaga hangiyabobi ibunaga labolabo ibuni karulenegobi muwa wali agali warago bo wigi biagoria yalu pugu biyagola labolabo ogonime warago mo ereba halu dama daraga hearu wara tagi halu ani bini.
ACT 19:13 Ani biyagola Yu agali marume dindi dindi ibaga bialu howa dama daraga hearu wara tagi halu haga hene. Maru hearume Anduane Homogo Yasunaga mini lalu wara tagi hagadagua tigua nde ogonidagua bule manda bini. Tigua dama daraga hearuhondo lalu, Polohanda Yasu mana lamiagago Yasu ogoni mini lalu tagira pu larama, lene.
ACT 19:14 Yu wali agalinaga loma binigo mo miaga haguane timbuni ibu mini Siba henego ibunaga igini kariali henego tigua ani biaga hene.
ACT 19:15 Tigua ani bialu hearia dama daragahe mbira heagome tihondo lalu, I̱na Yasubi Polobi manda bu kogo. Tí ai kamibe i̱ manda nabido, lene.
ACT 19:16 Ani layagola agali dama ogoni daragahe hayagome keba tara howa Siba igini kariali biaru baabo halu ibunaga hongome ti bope howa tinaga labolabo lerelo wahayagola tigua ibunaga andagaha howa gerai lalu ibida pene.
ACT 19:17 Ani biya layago hale howa Yu wali agalibi wali agali tara tarabi Ebesani hearume mogo timbuni lowa Anduane Homogo Yasunaga mini yaraga halu hene.
ACT 19:18 Yasu mana yu tiga biaga dewali hearu ibuwa tigua wali agali hearu hale helo, Iname ko ogoni birima, lalu tigua biyagoni la pani hai hene.
ACT 19:19 Gamugamubi ililibi biaga dewa hearume tinaga gamugamubi ililibi biagane mananaga mbugaru bibahende yalu ibalu wali agali bibahende hearu de hendelo delai hene. Mbuga delayarunaga muni ala minigo daga lamaga howa muni dewaore kina ngui laa̱i̱ daosini pira duria (50,000) ale mini.
ACT 19:20 Ogonidagua hongo howa biyagola Anduane Homogonaga bi mana loyogo lalu hongo timbuniore halu anda haga bini.
ACT 19:21 Ani biyagola howa Polo ibuni lo manda bialu, Ala Masedoniabi Agaiabi pialu mani Yarusaleme puabo holebero, ibunaga miniha ani lo manda bini. Lo manda bialu, Ogonidagua piai howa i̱na Lomo tanobi nenege polene nga, lo manda bini.
ACT 19:22 Ani lo manda buwa ibugua ibunaga biamogo biaga Timodibi Erasadasabi libu ala Masedonia pelo, Bamba hadaba, lene. Libu ani pudaba lowa Polo ibu Esia dindini emene hondo hene.
ACT 19:23 Esia dindini emene hondo hearia Anduane Homogonaga Harigani piagane mana lawai hayagome Ebesani ko holene emene ndo timbuniore wini.
ACT 19:24 Agali mbira heago mini Demidiriasa ibugua mbirale tara tara silibame wabiaga hene. Wali agalime mbirale tara bi pupu wilonaga mini Ademisi wali ale wabu winigo ogoninaga anda ale mbira mbira emeneore Demidiriasahanda silibame wabiaga hene. Ibunaga biyinaya ogonime ibubi ibunaga biabe biaga hearubi tigua muni timbuni miaga hene.
ACT 19:25 Ani biaga henego ibugua ibunaga biabe biaga biarubi agali maru biabe ogonibi biaga hearubi mo ngoai howa tihondo lalu, Agaliru-o iname biabe ogoni beramaligonaga muni timbuni meramaligo manda bidami.
ACT 19:26 Agali Polo biago ibugua bialu kago tínime de handabehebi hale habehebi kami. Ibugua agua laga, Mbirale agali gime wabiniru uruni galone ndodago bi pupu wulene nawi, laga ka. Ibugua ani laragome wali agali dewaore oali Ebesani karumebi Esia dindini karumebi mana ogoni yu tiga biai halu kagoni.
ACT 19:27 Ti ani bialu kago iname biyinaya beramaligo hondowa tigua, Ogoni koore, lolebira bada manda bido. Ogoni dege ndo. Inanaga dama wali timbuni Ademisi ibunaga andabi galone ndo lowa ibunaga mini yaraga naholebira. Ademisi ogoni Esia dindini karumebi dindi tara tara dewani karumebi tigua ibuhondo bi pupu wiame haga ndobe, lalu Demidiriasahanda bi ogoni lene.
ACT 19:28 Bi ogoni layago hale howa agali ngoai hayarume keba timbuniore howa bi dalimu lalu, Ebesanaga Ademisi ibu timbuniore ka, laabo halu hene.
ACT 19:29 Ti ani layadagua wali agali maru dewa dindi ogoriani hearumebi lagalaga bialu loyogo lene. Masedoniali kira Gaiasabi Arisadagasabi Polo heba haga heago labo tigua libu minuwa Ebesalinaga ngoai hagane hama timbuniore wiagoria abale haru pene.
ACT 19:30 Polo ibugua wali agali dewa ngoai ho heagoria ibuni bi lole poa hayagola Yasu mana yu tiga biaga hearume, Napobe, lene.
ACT 19:31 Dindi ogonaga gabumane haru haga maru hearu ti Polo heba nenege ho haga henego tigua Polohondo bi lawia halu lalu, Í̠na ngoai hagane hamani bi lole napobeore, lene.
ACT 19:32 Ti ani lalu hea tambu wali agali dewaore ngoai hayarume hongo timbuni howa bi dalimu lalu hene. Tigua irane aginaga ngoai harimabe manda nabi howa ti marume bi tara mbirago layagola marume bi tara mendego lo yu aribia hayagola bi lagalaga bialu hene.
ACT 19:33 Yu agali hearume Aleganda ibu wali agalihondo bi lelo, Lole pu, layiyago hondowa wali agali marume lalu, Ina bi lagalaga bialu kamago tene ibuda, lo mitangi bini. Ani mitangi biyagola Aleganda ibu heyu howa gi gamu lowa, O biyagoni tene i̱bi i̱ heba hagarubi ina ndo, lalu walia hole bi lalu hene.
ACT 19:34 Bi lalu hearia wali agali biarume ibu Yu agaliyago hondowa bi dalimuore lalu, Ebesanaga Ademisi ibu timbuniore ka, lalu tomo dawa duguabehe ale hayagola howa ani laabo halu hene.
ACT 19:35 Ebesa tanonaga hondo haga heago ibugua wali agali bibahende hearuhondo, Bi hundiai hadaba, lene. Ani lowa ibugua tihondo lalu, Ebesa wali agaliru-o Ademisi timbuni kagonaga andabi ni habane hari daligaha howa ibira hene ngagobinaga mamage haga Ebesa tano dege ngago ina bibahendeme manda biai kamagoni.
ACT 19:36 Mbiralime ogoni mo yo handalu nahabane nalabehe ka. Anigo tí mini nawi howa nakarulape mbira buligo tínaga keba wahalimu.
ACT 19:37 Agali ogo labome bi pupunaga andaruha winigo mbira kayu nabi inanaga dama wali Ademisi biago mege nabi wiagoria tígua libu bame haru ibirimida.
ACT 19:38 Demidiriasabi ibunaga biabe biaga karubi tigua mbirali baba godi lole manda bu kayagua gabumane godi lagane agalime ogoninaga godi lolene horo maru pongo bo wini ngago ogoningi tigua godi labehe ka.
ACT 19:39 Ogoni dege ndo bi tarabi lolene manda bu kamiyagua nde gabumaneme Ebesani karuhondo, Bi galone lelo ngoai holene nga, larangi lolene nga.
ACT 19:40 Tí áyu birimigo Lomo gabumane karume inahondo, Tí gungu birimigoni, lalu ina baba godi labehe ka. Tí birimigo bulene nawi howa birimi. Mbiralime irane ogonaga birima lalu nalabehe ka, lalu guyuguyu biagome bi ogoni lene.
ACT 19:41 Ani lai howa ibugua bibahende ngoai ho hearuhondo, Purogo lai hadaba, lene.
ACT 20:1 Bi timbuni dalimu lagalaga biyago hundiai halu purogolo heagola Polohanda Yasu mana yu tiga biaga hearu mo ngoai howa mini mo hongo hagane bi ti lamialu, I̱ porogo tí hondo halimu, lene. Ani lowa ibu Masedonia pene.
ACT 20:2 Dindi uruniha ibaga bialu Polo ibugua Yasu mana yu tiga bu hagahaga biaruhondo mini mo hongo hagane bi lamigi bima pene. Ani bima pialu ibu Agaia anda puwa
ACT 20:3 ege tebira hene. Ege tebira howa Polo ibu iba taluni biralu Siria pole manda biyaria Yuali hearume ibu homelo bole ndindi lalu ka layago hale howa ibu Masedonia hariga pole dai buliya manda bini.
ACT 20:4 Agali Polo heba penego uru Beria howa Pirasa igini Sobadabi Tesalonaiga howa Arisadagasa Segundasalabi Debi howa Gaiasabi Esia dindi howa Tiyagasabi Torobimasabi Timodibi uruni pene.
ACT 20:5 Agali uruni ti bamba halu puwa ina ibuluma̱ya Toroasani hondo heneya.
ACT 20:6 Mberedi Yidi Nahe Hirinigonaga Horo piai hayagola ina iba taluni biralu Pilibai wahalu pirima. Ani pialu horo dauru iba taluni pialu howa Toroasa anda pialu ti hearia puwa sarere mbira ti heba harima.
ACT 20:7 Horo Sarerengi ne lope heagola ina tomo mandagi nole ngoai harima. Ngoai howa Polohanda wali agali hearu bi mana lamialu hene. Ibugua, Yawi i̱ polebero, lo mitangi buwa bi mana lamialu heane dege mbi hanuni hene.
ACT 20:8 Anda hobane daliga ngoai ho beremagoha lamu hale dewa da ho wini.
ACT 20:9 Igiri daliahe mbira mini Yudigasa ibu anda ogoninaga windoni berearia Polohanda bi mana lamiaabo hayagola ibu umu timbuni lene. Umu timbuni lowa Yudigasa palia hondo ho wiaria anda daliga bima irigi hene biagonaga be teboneni howa tagirahayagi pilo ibira hene. Ani biyagola agali marume Yudigasa yamialu hearia homo tongolo mu wiaria hendene.
ACT 20:10 Yamuwa homo tongolo miyada layago hale howa Polo ibu Yudigasa wiaria dalialu ibu tinginini palia dambi howa ibugua gime yania halu lalu, Ibu dére ngago gi nahadababe, lene.
ACT 20:11 Ani lowa Polo ibu anda daligaha iraga halu puwa mberedi gaibu baga buwa ti haru nene. Nowa ti heba te lalu biraabo howa muna biyagola Polo ibu ti helalu pene.
ACT 20:12 Igiri biago dabi ho heago hondowa tigua ibu andaga haru puwa ti turu hai hene.
ACT 20:13 Ina bamba halu iba taluni biralu Toroasa wahalu Asoso pirima. Ogoriani Polo ibu iba taluni berelo lola hole pirima. Ala Polohanda lalu, I̱ dindi harigani porogo tí bamba halu Asosoni lola hami̱ya, layadagua pirima.
ACT 20:14 Puwa ina Asosoni Polo lola halu ibu iba taluni anda íbu biralu ina haru Midilini pirima.
ACT 20:15 Midilini wahalu puwa mbiraga paluwa egerebalene handalu hemaria iba talu biago Kaioso handa de̱le̱ wiagoria pialu harimaya. Pialu howa mbi mende paluwa egerebalene Samoso anda pirima. Samoso wahalu puwa mbi tebone paluwa egerebalene Miledasa anda pirima.
ACT 20:16 Esia dindiha horo dewa bame mohole nabule lowa Polohanda Ebesa bolangua halu puabo hole manda bini. Yu wali agalinaga horo timbuni mini Pendigosi nakaore Yarusaleme abale anda pobeheyagua nde pole manda bini.
ACT 20:17 Miledasani howa Polohanda Keriso hameigini Ebesani hearunaga agali ala hene miniwi hearu ibu hearia ibilo bi lawia hene.
ACT 20:18 Ti ibiyagola Polohanda tihondo lalu, Esia dindini pigane ibirungi howa tí heba bialu harugo manda biai kami.
ACT 20:19 Yu agali hearume i̱ bole manda manda bialu mo tandaga halu hearia i̱na Anduane Homogonaga biabe bia haga howa i̱ni mini mo dindiha halu dugu bialu howa biabe bialu harugoni.
ACT 20:20 Wali agali ngoai ho heagoria howabi tínaga andagaha howabi i̱na tí Anduane Homogo mana langi lawai ha bigi bialu tí biamogo bulene galonego mbira yu donge nahe bibahende langiai harugo tíni manda bidamigoni.
ACT 20:21 Yu wali agalibi Yu wali agali ndo tara tarabi bu hearu ta nabi bibahendehondo, Ko birimigo erembira mialu mini beregedalu Ngode Datagaliwabehayagi halu inanaga Anduane Homogo Yasuhondo mini mbiraore wilimu, lalu hongo howa lamirugoni.
ACT 20:22 Ani bialu harugonigo ai Ngode Datagaliwabe Dinini ibugua i̱hondo bia laradagua bialu Yarusaleme pole ko. Yarusalemeni howa i̱hondo agi bulebirabe manda nabi howa pole ko.
ACT 20:23 Dindi bibahende i̱ haga birugoha hewaria Ngode Datagaliwabe Dinini ibugua i̱ langigi bialu, Garabaya bulenebi tandaga nolenebi handa walia haga bulebere, lalu langigi biya.
ACT 20:24 Anigo i̱ holenebi homolenebi o galone ndo mitangi bido. Ngode Datagaliwabenaga biamogo bia holene Bi Mana Debene lamule polene biabe ogoni Anduane Homogo Yasuhanda i̱hondo ngiyago bu maro bulenego galoneore ogoni mitangi bu ko, lene.
ACT 20:25 Polohanda laabo halu lalu, Ngode Datagaliwabehanda Handame Ho Kagonaga mana lamigi bialu i̱na tí bibahende hemiruha ibaga bialu haru. Ai tígua i̱ lone nahondoleberamiore manda bu ko.
ACT 20:26 Anigo i̱na áyu galone mbira hongo howa langerogo Ngode Datagaliwabehanda bulebiragonaga mana mbira yu donge nahe bibahende langiai harugo tí mbirali koha pirimiyagua nde tene i̱ ndo holebira laro.
ACT 20:28 Keriso hameigini nogo sibi ale karu tígua haru halimulo Ngode Datagaliwabe Dinini ibugua tí helayago uruni tinaga minibi tíninaga minibi bayuwa de hondo halimu. Ngode Datagaliwabenaga wali agali karu ti ibu igini homayagonaga darama pelayagome mo ibunaga henego tígua nogo sibi haru hagadagua ti haru halimu.
ACT 20:29 I̱ pedoha agali maru biango dudu ale hongoheme tí kamigoha ibalu Yasu mana yu tiga biaga nogo sibi ale kamiru bo paya bulebira manda bido.
ACT 20:30 Awe tíni mandagi hagane kamiru aria marume, Ina poramadagua ibidaba, lowa Yasu mana yu tiga biaga karu mo hondo holebira.
ACT 20:31 Ani bulebirago de hondo halimu. I̱na mali tebiruni horombebi mbiragabi tandaga nalu de iba ibalu howa tíni hangu hanguhondo lawai haabo harugo mitangi bilimu, lene.
ACT 20:32 Polohanda lamaro bialu lalu, Ngode Datagaliwabehanda tí hondo helobi ibunaga biamogo bia holene bi maname ibugua tí biamogo bilobi i̱na tí heledo. Mana ogonime ibugua tí mo hongo habehebi ibunaga wali agalihondo bayale ngulene ngadagua tíhondo ngibehebi ka.
ACT 20:33 I̱na mbiralinaga mbirale munibi labolabobi mbira dimagoli nahe haru.
ACT 20:34 I̱ninaga gime biabe birugome i̱nibi i̱ heba hayarubi ina tomobi mbirale mbiralebi karulape wu harimago tí manda bidamigoni.
ACT 20:35 Anduane Homogo Yasuhanda ibuni bi mbira layago ogo, Mbiralime í̠hondo mbirale mbira ngiyagua o turu emene howa í̠na mendealihondo mbirale mereyagua o turu timbuni holebere, ani layago mitangi bimi̱ya. Ani mitangi bialu howa i̱na bibahende bialu harugodagua biabe timbuni beramagome wali agali hongo nahe karu biamogo bulene ngago walia haru, lene.
ACT 20:36 Polohanda bi ogoni lai howa ibugua ti bibahende heba ge duli hanga ho biruwa Ngode Datagaliwabehondo bi lene.
ACT 20:37 Bi lai hayagola agali biaru bibahendeme Polo polebiragonaga dugu bialu yu nu̱nu̱ lalu hene.
ACT 20:38 Ala Polo ibugua, Tígua i̱ lone nahondoleberami, layagonaga mitangi buwa ti dara timbuniore hene. Dara howa ti Polo heba iba talu wiagoria pene.
ACT 21:1 Iname, Ai poramago tíni hondo halimu, lalu iba taluni biralu pia ho wialu Koso anda pirima. Koso yu wahalu Lode anda pirima. Ai Lode howa egerebalene pu dege bialu Padara anda pirima.
ACT 21:2 Padarani howa iba talu mende Ponisia dindi pole wiaria hondowa ina iba talu ogoriani biralu pirima.
ACT 21:3 Pialu howa iname Saibarasa dindi iba dege dombeneha wiago de hondowa gi lehayagi ngelalu bolangua halu Siria dindi puabo harima. Puabo howa Taia anda puwa dabudabu iba taluni wiyaru ogoriani tagu wulebirago manda buwa ina iba talu ngelalu tanoha pirima.
ACT 21:4 Taia tanoha anda puwa Yasu mana yu tiga biaga hearu handa walia howa iname ti heba sarere mbira hondo harima. Ngode Datagaliwabe Dinini ibugua Yasu mana yu tiga biaga o biaruha howa mo manda bia hayagola tigua Polohondo, Yarusaleme napobe, lene.
ACT 21:5 Ani layagoyu ina polene tu hayagola ti helalu pirima. Pialu ti bibahende tinaga one waneiginirubi tanoha howa ina haru pialu solowara angeni pirima. Puwa ina bibahendeme iba muni ge duli hanga ho biruwa Ngode Datagaliwabehondo bi larima.
ACT 21:6 Lai howa iname, Ai hangu hangume poramago hondo halimu lagalaga bialu larimagola tigua nde inahondo, Pudaba, lalu bialu tini andagaru purogo laya handala ina iba sibini biralu pole pirima.
ACT 21:7 Iba taluni biralu Taia yu wahalu puabo howa Tolemesi anda pirima. Anda puwa Yasu mana yu tiga biaga hearuhondo, Bayale kamibe, lalu ti heba horo mbira ho halu palirima.
ACT 21:8 Paluwa egerebalene iba taluni biralu pialu Sisaria anda pirima. Anda puwa Bi Mana Debene lamiaga mbira heago mini Pilibi ibu andaga puwa ibu heba harima. Ala Yarusalemeni howa agali karia biamogo biaga helo dabenego kane Pilibi ibu hene.
ACT 21:9 Ibunaga wane maria agali nape biruwa tigua Ngode Datagaliwabe bi mana latagi haga berene.
ACT 21:10 Ina ti heba horo maru ho hemaria Ngode Datagaliwabe mana latagi haga mbira heago mini Agabasa ibu Yudia howa ibini.
ACT 21:11 Ina hemaria ibuwa ibugua Polonaga nogo dongone yamuwa ibuninaga gi gebi huba bialu howa mbiwia halu lalu, Ngode Datagaliwabe Dinini ibugua agua laya, Nogo dongone ogoninaga anduanego Yu agali Yarusalemeni karume ogonidagua minu huba buwa Yuali ndo agali tarahondo minu mulebira, laya, lene.
ACT 21:12 Ani layagola hale howa inamebi wali agali hearumebi Polohondo lalu, Í̠na Yarusaleme puabo nahe waha, lalu la dege bialu lo erekui harima.
ACT 21:13 Ani laabo harimagola ibugua ladai bialu lalu, I̱ mini burugu laruago tí dugu biaabo harimigo agibe. I̱na Yarusalemeni howa i̱naga gi gebi huba bulene dege ndo Anduane Homogo Yasunaga mini yaraga helo i̱ homolene ngayaguabi nde karulape manda bu ko, lene.
ACT 21:14 Ani layagola ibunaga mini bilinahe wiago mo beregedabe naheyagola wahalu iname lalu, Anduane Homogohanda hame ledadagua bilo, larima.
ACT 21:15 Horo maru howa dabudabu huba bu yalu Yarusaleme pirima.
ACT 21:16 Yasu mana yu tiga biaga maru Sisaria howa ina heba yamaga halu pirima. Pialu howa Saibarasali mbira ibu Yasu mana yu tiga biaga bamba hene heago mini Nasono ibu andaga pu holoma̱ya tigua ina haru pene.
ACT 21:17 Yarusaleme anda pirimagola Yasu mana yu tiga biaga maru hearume, Ibalu harimida, lowa turu timbuni hene.
ACT 21:18 Horo mendengi Polo ina haru Yamese hearia pirima. Pialu hemaria Keriso hameigini hearunaga agali ala hene miniwi hearu ti mandagi ibu heba ngoai ho hearia
ACT 21:19 Polohanda tihondo lalu, Hameneru-o turuba, lowa Yuali ndo wali agali tara tara hearuha Ngode Datagaliwabehanda ibuha howa biabe bibahende biyaru te lamiai hene.
ACT 21:20 Ani lamiyagola hale howa ti bibahendeme Ngode Datagaliwabe mini yaraga halu hene. Ani buwa tigua Polohondo lalu, Hamene-o oalini emene tara nga manda bidego. Yu wali agali daosini dewaoreme Yasu mana yu tiga bu howa Mosese heneyangi Mana lowini ngago hongo howa yu haabo howa biaga ka.
ACT 21:21 Ani biaga karuhondo agali maru hearume lalu, Polo ibugua Yu wali agali dindi tara tarani karuhondo bi ogobi lamiaga. Mosese heneyangi Mana lowini ngagobi igirinaga dongone podo mabu biagane mana ngagobi Yu wali agalinaga mana ngagobi bibahende bulene nawiorego wahai halimu, lalu í̠na ogonidagua lawai haga ke, lalu tigua lamiyiya.
ACT 21:22 Marume í̠ oali íbu ka larago tigua haleore holebirago agi bimi̱yabe.
ACT 21:23 Iname laramadagua bibelo lalu agali maria o karu ti hangu hangume, Mbira heneneore bulebero, lalu Ngode Datagaliwabehondo bi hongo howa lo wiya.
ACT 21:24 Ogonigo ti Ngode Datagaliwabenaga deni dodo nahe helonaga mana bule poradagua í̠bi ti heba mandagi pialu tigua Ngode Datagaliwabehondo mbirale bo mulebiragonaga yolo í̠na mia habe. Ani beregola agali mariali uru tinaga mandari podai habehe holebira. Ogonidagua biriyagua marume, Polo ibu nakarulape biaga, lalu lamiyago hale hayarume inahondo ke̱ howa langiyada manda bialu Mosese heneyangi Mana lowini ngago í̠na biai haredane manda bulebira.
ACT 21:25 Yu wali agali ndo tara tara howa Yasu mana yu tiga biaga karu tihondo iname lo mbiraore howa beba gilibu pelarimago ogo Mbira ogo, Ne nolenebi nogobi damahondo bo minigo nolene nawi nanalimu. Mende ogo, Darama ibuni nanalimu. Tebone ogo, Nogo tara tararu egarubi ma gingima binigo darama heba nanalimu. Mane ogo, Wali agali kayu nayalimu. Ogonidagua lalu gilibu pelarima, lene.
ACT 21:26 Ani layagola Polohanda agali biaru heba pu paluwa egerebalene ti Ngode Datagaliwabenaga deni dodo nahe helonaga mana ti haru mandagi bini. Ani buwa Polo ibu Anduane Homogonaga andaha anda puwa tigua ti Ngode Datagaliwabenaga deni dodo nahe helonaga mana biala heago, Horo ogongi bumaro bulebira, lalu ibugua loma binigo mo miaga heago lamini. Mana ogoni bumaro buwa agali maria biaru hangu hangume Ngode Datagaliwabehondo mbirale bo mulene wini.
ACT 21:27 Mana ogoni bialu holenenaga horo karia winigo piai holene kaware wiagola Yu agali maru Esia dindiha howa ibiyarume Polo Anduane Homogonaga andaha hearia de hendene. De hondowa tigua wali agali bibahende hearume Polohondo keba helo tinaga bu mini mo heya hayagola tigua keba halu Polo minini.
ACT 21:28 Minuwa tigua dalimu lalu, Isaraelealiru-o biamogo bule ibidaba. Agali ogome dindi bibahendeha pume halu ibugua wali agali hearu lawai halu Isaraele wali agalibi Mosese heneyangi Mana lowini ngagobi Anduane Homogonaga anda ogonibi uruni galone ndo lalu haga. Ogoni hangu ndo ayuore ibugua Yuali ndo agali tara tara maru hearu Anduane Homogonaga anda haru anda ibalu anda ogoni loma bia hene hayago mo mebia hayiya, lene.
ACT 21:29 Tigua Ebesali mini Torobimasa ibu Polo heba tanoha hearia de hondowa Polohanda ibu Anduane Homogonaga andaha haru anda peda bada mitangi buwa bi ogoni lene.
ACT 21:30 Ani layagola howa Yarusaleme ogoniha, Ba ba, lowa bi lame halu wali agali bibahende gerai lalu hearume hongo hai howa tigua Polo minuwa Anduane Homogonaga andaha howa gililo yalu tagira pene. Ani buwa tigua Anduane Homogonaga anda panga bibahende abale payai hene.
ACT 21:31 Ani biyagola agali dewaore bu hearume Polo homelo bole biyaria mbirali heagome Lomo ami haru haga haguane hearia puwa, Yarusaleme wali agali bibahendeme gungu timbuni bialu ka, lalu lamini.
ACT 21:32 Ani layagola ami haru haga haguane biagome ami haru haga maru hearubi ami agali maru hearubi ti haru puwa wali agali ngoai ho hearia gerai lalu abale pene. Ami haru haga haguane biago ami agali maru heba ibiyago hondowa wali agali biarume Polo nabe wahene.
ACT 21:33 Ami haru haga haguane biagome Polo hearia pialu ibu yani howa ibugua ami agali biaruhondo lalu, Pu seni kirame ibu dariba hadaba, lene. Ani lowa ibugua wali agali hearuhondo lalu, Agali ogo aibe. Ibugua agi biyabe, lene.
ACT 21:34 Ani layagola wali agali ngoai ho hayarume ladai bialu bi taratara lagalaga bini. Ani lagalaga biyagola ami haru haga haguane biagome bi layaru irane handa walia nahe howa ami agali biaruhondo, Agali ogo aminaga andagaha haru pudaba, lene.
ACT 21:35 Ani haru pialu howa andaha irigi hagane wiagoria iraga halu pole biyaria wali agali ngoai ho hayarume keba timbuni haya handala ami agali biarume tinaga gime Polo yaraga ho yalu pene.
ACT 21:36 Wali agali biarume haruru pialu bi timbuni lalu, Ba homelo ba, lai hene.
ACT 21:37 Ami agali biarume Polo ami andagaha yalu anda pialu hearia Polohanda haru haga haguane biagohondo, I̱na í̠hondo bi mbira loa kogo loabe, lene. Ani layagola haru haga haguane biago ibugua lalu, Í̠ Girigi bi larilibe.
ACT 21:38 Iyibiali mbira ala gabumane heba wai bialu ibunaga wai biaga agali daosini maria (4,000) dindi ko wali agali nahaga wiagoria haru penego í̠ ndoda, lene.
ACT 21:39 Ani layagola Polohanda ladai bialu, I̱ Yualiore ko. Silisia dindinaga tano dunini Tasasa ngago i̱naga dalu ogonigo i̱ ogoni howa íbu ko. Wali agalihondo bi mbira loa kogo loabe, lene.
ACT 21:40 Ani layagola ami haru haga haguane biagome, E̱ la, layagola Polohanda ami anda togo wiagoriani howa bi hundilo gi gamu lene. Bi hundiyagola Polohanda Yu wali agalinaga bi lalu ogodagua lene.
ACT 22:1 I̱ aba hameneru-o tígua i̱hondo, Biri, larimigonaga i̱na nabi lalu ladai berogo hale halimu laro, lene.
ACT 22:2 Ani lalu hearia Yualinaga bi lowa layago hale howa agali hearume bi mbira nale nimulo hene. Nimulo heagola Polo ibugua lalu,
ACT 22:3 I̱ Yualiore ko. Silisia dindinaga tano Tasasa i̱naga dalu ogoni. Oali Yarusalemeni íbu hewaria Gamelielehanda i̱ lawai haga hene. Ina mamali Mana lowinigo ngadagua bulene nga lo manda bialu haru. Áyu tí kamirume Ngode Datagaliwabehanda bia laradagua bialu kamidagua dege i̱bi ani bialu haru.
ACT 22:4 Hariga áyu i̱ni pialu kogoriani ala marume pialu hearia i̱na mo tandaga halu maru homelo baru. I̱na wali agali minuwa garabaya andaha ba andanda biru.
ACT 22:5 Loma binigo mo miaga haguane timbuni kagobi Ganisolo agali bibahende karubi tigua i̱na larogoni henene binigodagua laralo manda bulebira. Tigua Yu agali tí hamene Damasagasani karuhondo beba i̱ yalu puwa muliya gilibu ngiya. Ngiyagola Hariga áyu i̱ni pialu kogoriani piaga heneyaru ege pu senime dariba howa balu Yarusaleme haru dai bule minu piru, lene.
ACT 22:6 Polohanda laabo halu lalu, I̱na Damasagasa kaware ngelowa harigani pialu hewaria horombe hanuni hayagola hari daligaha howa abaleore wá timbuni harali haya.
ACT 22:7 Ani biyagola i̱ dindini odowa pilope ho wiwaria mbiralime lalu, Solo-o Solo-o í̠na i̱ aginaga mo tandaga harilibe, layuagola hale haru.
ACT 22:8 Ani layuagola i̱na, Anduane Homogo-o í̠ ai kebe, ladai biru. Ani ladai birugola ibugua, Í̠na mo tandaga hariligo i̱ Nasareteali Yasu kogoni, laya.
ACT 22:9 Agali i̱ heba pirimaru ti wá hayago dege de handaya. Mbiralime i̱hondo bi layuago ibunaga bi ti nahalehe.
ACT 22:10 Ani biyagola i̱na lalu, Anduane Homogo-o i̱ agi buabe, laru. Ani larugola Anduane Homogo ibugua i̱hondo lalu, Í̠ heyalu Damasagasa pu. Anda pialu keria í̠na bulene ngago Ngode Datagaliwabehanda manda manda bu kago mbirali kagome langiai holebira, laya.
ACT 22:11 Wá timbuni hayagome i̱ de mo ko hayagola agali i̱ heba pirimaru tigua i̱ gini yalu haru pialu Damasagasa anda pirima.
ACT 22:12 Agali mbira mini Ananaiasa ibu Damasagasani hene. Ibu Ngode Datagaliwabe mitangi biaga howa inanaga Mana lowinigo ngadagua biaga henego Yu wali agali Damasagasani hearu bibahendeme ibu agali bayale tigabiore ka laga hene.
ACT 22:13 Agali ogoni ibugua i̱ hewaria ibuwa i̱hondo lalu, Hamene Solo-o í̠ de lone bayale handabe, laya. Ani layaore i̱ de lone bayale handabehe howa ibu de handaru.
ACT 22:14 Ibugua lalu, Ina mamalinaga Ngode Datagaliwabe kago ibugua hame ledago í̠na manda buwa bibelobi ibunaga Biabe Bia haga bu mini tigabiwi kago í̠na de handabelobi ibunime bi larago hale habelobi í̠ dabaya.
ACT 22:15 Í̠na de handarigobi hale harigobi wali agali bibahende lamule ibunaga walia hagane í̠ holebere, laya.
ACT 22:16 Ani lowa ibugua i̱hondo lalu, Ai hondo holene nawi. Áyu ogoni í̠ heyalu baboraya bulene nga. Í̠na ko birigo domo wahai helo Anduane Homogohondo bi labe, lalu laya, Polohanda lene.
ACT 22:17 Polohanda lamiaabo howa lalu, Ani biyagola i̱ Yarusaleme dai biru. Dai buwa Anduane Homogonaga andaha anda puwa Ngode Datagaliwabehondo bi lalu hewaria de gandeba mbira handaru.
ACT 22:18 Handalu hewaria Anduane Homogo ibuni íbu heneyago ibugua i̱hondo lalu, Í̠na i̱naga bi mana lameregola wali agali ogoriani karume hale habe manga holebirago í̠ Yarusaleme abale wahalu polene nga, langiya.
ACT 22:19 Ani langiyagola i̱na ladai bialu, Anduane Homogo-o i̱na ngoai hagane anda bu hearuha pume halu wali agali í̠hondo mini mbiraorewi hearu mini barugoni tini bayuwa manda biai ka.
ACT 22:20 Í̠naga walia hagane Sibeni bayangi i̱bi ti heba harugoni. Ibu homolene karulape lalu ibu homelo baga biarunaga labolabo daligani karulagane i̱na wu harugoni, laru.
ACT 22:21 Ani larugola Anduane Homogo ibugua i̱hondo lalu, Í̠ wali agali taratara kaundia karuha pobelo pu larogoni, laya, Polohanda lene.
ACT 22:22 Polohanda bi layago wali agali bu hayarume bayuwa hale ho howa ibugua wali agali taratara karuha polene te layagola tigua keba halu bi dalimu lalu, Agali ogonibi nahabehedago homelo bo waha, lene.
ACT 22:23 Tigua bi dalimuore lalu tininaga labolabo lerelalu abalu taulo ba dagadaga bialu hene.
ACT 22:24 Ani biyagola Lomo ami haru haga haguane biagome ami agali biaruhondo lalu, Ami anda tamuha Polo haru puwa Yu agali karume ibuhondo keba halu bi dalimu larago irane langilo ibu tibume balimu, lene.
ACT 22:25 Ani layadagua bialu tigua Polo dariba howa tibume bole biyaria Polohanda ami haru haga mbira heagohondo lalu, Lomo ho tene hene kagome ko biyagonaga godi nale howa ibu tibume bolene karulape lowini ngabe, lene.
ACT 22:26 Ani layago hale howa ami haru haga biagome ami haru haga haguane hearia puwa ibuhondo lalu, Agi berebe. Agali biagoni ibu Lomo ho tene heneyago, lene.
ACT 22:27 Ani layagola ami haru haga haguane biagome Polo hearia puwa ibuhondo lalu, Í̠ Lomo ho tene hene kebe langi, lene. Ani layagola Polohanda ladai bialu lalu, E̱, lene.
ACT 22:28 Ani layagola ami haru haga haguane biagome lalu, I̱ Lomo ho tene holenaga muni timbuni mirugoni, lene. Ibu ani layagola Polo ibugua ladai bialu lalu, I̱ ai̱yahanda i̱ taba hanayangi howa i̱ni Lomoali henego kogoni, lene.
ACT 22:29 Ani layagola agali ibu mo bila hole hearume ibu hearia howa ha amu hene. Ami haru haga haguane biagome Polo ibu Lomo ho tene hene ka layago hale howa ege pu senime dariba harugoni mitangi bialu gi hene.
ACT 22:30 Yu agalime Polo ibugua ko ogoni biya lalu heago hale howa ami haru haga haguane biagome Polo ibu ko agi biyadabe hai bulebero lo manda bini. Ani lo manda buwa egerebalene ibugua, Ege pu seni Polo dariba hayago hadadaba, lowa loma binigo mo miaga haguane hearubi Yu wali agalinaga Ganisolo agali bibahenderubi mo ngoai hene. Mo ngoai ho heagoria ibugua Polo haru íbu helene.
ACT 23:1 Polo ibu Ganisolo agali heagoria howa ibugua ti tigatiga handade halu lalu, I̱ hameneru-o. Bamba bialu harugobi áyu bialu kogobi mitangi bialu i̱naga miniha ko mbira do nahe kogonigo Ngode Datagaliwabe ibu de hendeda, lene.
ACT 23:2 Ani layagola loma binigo mo miaga haguane timbuni heago mini Ananaiasa ibugua agali maru Polo heagoria kaware hearuhondo lalu, Ibunaga ne hambuni badaba, lene.
ACT 23:3 Ani layagola Polohanda ibuhondo lalu, Í̠ anda hai tagirahayagi dege beni peleme hiraganegobi kego. Ngode Datagaliwabe ibugua í̠ bolebira. Í̠na i̱hondo Mana lowinigo ngago puguari lalu í̠ godi hale hole bedego. Ogonibi biruwa í̠na tihondo, Ibu badaba, larigome Mana lowinigo í̠ni puguari, lene.
ACT 23:4 Ibugua ani layagola agali Polo heagoria kaware hayarume ibuhondo lalu, Í̠na Ngode Datagaliwabenaga loma binigo mo miaga haguane timbuni o bedago mege berego agibe, lene.
ACT 23:5 Ani layagola Polohanda ladai bialu lalu, I̱ hameneru-o ibu loma binigo mo miaga haguane timbuni ka laramigo i̱ manda nabi haru. Wali agali tí kamirunaga haru haga kago tígua ibu mege bulene nawi, lalu Anduane Homogonaga mbugani gilibu ngago manda bido, lene.
ACT 23:6 Polohanda agali maru hearu ti Sadiusi aria maru Perisi aria heago hondowa ibugua Ganisolo ngoai ho hearuhondo bi dalimu lalu, I̱ hameneru-o i̱ ai̱ya abala Perisi aria howa i̱bi Perisi aria kogoni. Wali agali homeneru mo heya holebiragonaga i̱ mini dunu bia ho kogonaga áyu godi laramagoni, lene.
ACT 23:7 Ibugua ani layago hale howa Sadiusi aria biarubi Perisi aria biarubi ti lai lalu talebuki bu hene.
ACT 23:8 Sadiusi aria tigua wali agali homeneru mo heya nahagabi dahuliyalibi dininibi nahe laga henego Perisi aria tigua mana tebira uruni henemane yu tiga biai haga hene.
ACT 23:9 Anigo agali biarume lai lalu bi dalimuore laabo hayagola Mana lowinigo lawai haga maru hearu tibi Perisi aria howa tigua heyuwa bi hongo howa lalu, Agali ogonime kagua mbira agi biyabe ina handa walia nahe kama. Dininimebe be dahuliyalimebe tobane mbiralime ibuhondo bi lamiaore biyada mitangi bidama, lene.
ACT 23:10 Ani layagola tigua lai lowa gungu timbuniore bialu Polo yu gililo migimigi biraria Polo homabeheyane hondowa ami haru haga haguane biagome gi hene. Gi howa ibugua ami agali hearuhondo lalu, Ti gungu bialu karia puwa Polo ami anda tamuha haru pole damu pudaba, lene.
ACT 23:11 Ani biyagola ogoningi mbiraga Anduane Homogo Polo hearia ibuwa lalu, Í̠ gi nahe hongo ho habe. Oali Yarusalemeni howa ína i̱naga walia hagane harigodagua Lomo puwabi ani dege bulebere, lene.
ACT 23:12 Egerebalene Yu agali maru hearu ti ngoai howa Polo homelo bole manda manda bialu hene. Tigua, Ina tomo ibabi nane Polo yo pialu napelo bo tongolo milowa nami̱ya, lalu hongo howa lowini.
ACT 23:13 Ogoni bulene lo mbiraore howa manda manda bu bereneru ti lamaga howa pira maria (40) agima hene.
ACT 23:14 Ani lo manda buwa tigua loma binigo mo miaga haguane hearubi agali ala hene miniwi hearubi ti hearia puwa tihondo lalu, Iname tomo ibabi nane Polo yo pialu napelo bo tongolo milowa nami̱ya lalu hongo howa lo wirima, lene.
ACT 23:15 Ani lowa lalu, Anigo tígua Ganisolo agalinaga bi la halu ami haru haga haguane biagohondo bi lawia halu, Polo ibugua agi biyabe bayuwa hale holoma̱ya ina kamaria ibu haru ibabelo hame ledama, lalu henemane hame lowa le tingi halu bi ogoni lawia halimu. Ani beramigola Polo oali anda naibi wene ibalu karia iname ibu homelo bole yu birulumago, lalu Yu agali biarume ani lene.
ACT 23:16 Tigua bi ogoni lo manda biyago Polo ababuni mbirame hale hene. Hale howa ibugua ami anda tamuha puwa Polo lamini.
ACT 23:17 Lamiyagola Polohanda ami haru haga mbira heago olowa ibuhondo lalu, Igiri ogome ami haru haga haguanehondo bi mbira loa kago ibu karia haru pu, lene.
ACT 23:18 Ani layagola ami haru haga biagome igiri biago ami haru haga haguane hearia haru puwa ibuhondo lalu, Garabaya agali Polo ibugua i̱ olowa igiri ogome í̠hondo bi mbira loa kago haru pu layagola haru ibiru, lene.
ACT 23:19 Ani layagola ami haru haga haguane biagome igiri biagonaga gini yalu libuni hangu hole haru pu bagi howa ibuhondo lalu, Bi agi langule ibiribe, lene.
ACT 23:20 Ani layagola igiri biagome lalu, Yu agali haru haga marume lo mbiraore howa í̠hondo bi lawia halu, Polo ibu agi biyabe bayuwa hale holoma̱ya Ganisolo agali kamaria Polo haru ibabelo hame ledama, lalu tindule hamele tingi howa bi ani lawia holebirago
ACT 23:21 hale nahabe laro. Agali pira maria (40) agimame Polo ibilo hariga obeneni yu birulebirago. Tigua, Iname tomo ibabi nane Polo yo pialu napelo bo tongolo milowa nami̱ya, lalu hongo howa lo wiya. Tigua ani bule kago. Í̠na bi larego hale hole ka, lalu igiri biagome lamini.
ACT 23:22 Ani lamiyagola ami haru haga haguane biagome ibuhondo lalu, Í̠na bi o langirigoni mendeali nalamibe, lowa ibugua igiri biagohondo, Ai andaga pu, lene.
ACT 23:23 Ami haru haga haguane biagome ami haru haga kira olowa libuhondo lalu, Sisaria pole ami agali handari kirabi (200) nogo hosini biralu piaga agali pira kariabi (70) yandare yaga agali handari kirabi (200) ti bibahende mo ngoai howa áyu mbiraga u palueangi haragola pole manda manda bilimu.
ACT 23:24 Polo ibubi nogo hosini biralu pelonaga nogo hosi karulape haru ibalu ibu bayuwa mamage halu gabumane haru haga Peligisi karia haru pilimu, lene.
ACT 23:25 Ani lowa haru haga haguane biagome beba mbira gili bialu bi gili binigo ogo,
ACT 23:26 I̱ Kolodiasa Lisiasahanda i̱na gabumane haru haga timbuniore Peligisi í̠hondo beba ogo gilibu wia haro. Egerebagi laro.
ACT 23:27 Yu agali karume agali ogoni minuwa homelo bole biyaria ibu Lomo ho tene hene ka layago hale howa i̱bi i̱naga ami agalirubi iname ibu haru pirima.
ACT 23:28 Yu agali biaru tigua ibu ko ogo biya lalu agi larabe hale hoa howa tinaga Ganisolo agali ngoai ho heagoria i̱na ibu haru piru.
ACT 23:29 Haru puwa ibu homelo bolenenagabi garabaya bulenenagabi irane nawi ibugua ko mbira nabioreyane handa walia haru. Tigua ibu ko biya layago tene tininaga mana lo ngagonaga laya.
ACT 23:30 Yu agali hearume Polo homelo bole manda manda bu ka lalu mbiralime i̱ langiyagola i̱na í̠ keria ibu haru ibulene nga manda biru. Ibu ko biya layarume í̠ hale habelo lamule pudaba laru. Ai bi ogoni lalu beba ogoni gilibu wia haro, lene.
ACT 23:31 Ami agali biarume bilimu layadagua bialu tigua Polo damu puwa mbiraga ogoningi Andibadarisi tano haru pene.
ACT 23:32 Egerebalene ami agali dindidindi piaga biaru ti Yarusaleme ami andaga dai bini. Ami agali nogo hosini biralu piaga biaru ti Polo haru puabo hene.
ACT 23:33 Tigua Polo Sisaria haru pialu gabumane haru haga heagohondo beba mialu ibugua Polo handaya ho helo ibuhondo mini.
ACT 23:34 Ani biyagola gabumane haru haga biagome beba daga lowa Polohondo lalu, Í̠ anialibe, lene. Ani layagola Polohanda, I̱ Silisiali ko, layagola
ACT 23:35 ibugua Polohondo lalu, Í̠ ko biri layaru ti ibiragola í̠na bi ladai berego hale holebero, lene. Ani lowa ibugua, Gabumane anda kagoha ami agalime ibu handaya ho helo haru pudaba, lene.
ACT 24:1 Horo duria howa loma binigo mo miaga haguane timbuni mini Ananaiasa heago ibugua agali ala hene miniwi maru hearubi Lomo mana lo winidagua la haga mbira mini Tedalasa heago tinaga la helo tigua ibubi Sisaria haru pene. Puwa tigua gabumane haru haga Peligisi hearia pialu ibu hale helo Polohanda ko ogo biya lalu lamini.
ACT 24:2 Ani lamiyagola godi lalu howa tigua Tedalasa olayagola ibugua Polohanda ko ogo biya lalu bi layago ogo, Peligisi í̠ timbuniore kego. Í̠ mini gigabiwi howa ina haru haabo harigome ina kamagoria mo palia holene wiaabo kagoni. Ina kamaru bayale holoma̱ya mo tiga bulene dewa bialu kego karulapeda.
ACT 24:3 Ogonibi bulene ngadagua biame halu kego hondowa ina turu timbuni halu í̠hondo ka̱i̱ laabo haramali.
ACT 24:4 Í̠naga hale holene henge emene ngago manda buwa i̱na bi nemandi mbira hangu la harogo í̠na ina dara howa bayuwa hale habelo.
ACT 24:5 Ko bulene tene agali ogonimeyane handa walia kama. Ibugua Yu agali dindi bibahendeni karu mo gungu bia hagabi Nasareteali aria karunaga haru hagabi ibu dege ka.
ACT 24:6 Ibugua Ngode Datagaliwabenaga anda mo ko holebiyaria minarima. [Inanaga Mana lo winigo ngagome godi lolene lo ngadagua lolene manda bu harima. Ani manda bu hemaria
ACT 24:7 ami haru haga haguane Lisiasa ibuwa ibugua hongo timbuniore howa ibu haru piya.
ACT 24:8 Ani buwa Lisiasahanda, Agali ogonihondo ko biri lalu kamiru tígua gabumane haru haga Peligisi ibu hale helo tí ibu karia lamule pudaba, laya.] Agali ogoni í̠na mo bila hariyagua iname ibu ko ogo biya laramago bibahende henene biyadane handa walia holebere, lalu Tedalasahanda lai hene.
ACT 24:9 Yu agali hearu tiguabi Polohanda ko ogoni biya layago heneneore lara lalu lagimbu bini.
ACT 24:10 Bi ogoni lai hayagola gabumane haru haga biagome Polo ibu bi lelo ibuhondo, Ai í̠ la, lene. Ani layagola Polo ibugua lalu, Dindi ogoria wali agali karunaga godi hale hagane mali dewaoreni í̠ haabo hene kego manda bido. Ani manda bidogo tigua i̱hondo ko ogoni biri layagonaga í̠ hale habelo ladai bule i̱ turu ho ko.
ACT 24:11 Ala i̱na Ngode Datagaliwabe mitangi bialu lotu lole Yarusaleme pirungi howa horo áyu hombeane (12) kogo í̠ni manda bibehe ke.
ACT 24:12 Yu agalime i̱ Anduane Homogonaga andaha mbirali heba lai lalu ndo hewaria de handaya. Wali agali hearu tinaga ngoai hagane andaruhabi tanohabi howa i̱na ti mo gungu bia nahe hewaria ti de handaya.
ACT 24:13 Tigua áyu ogoni i̱hondo, Ko ogo biri, lalu kago henene larago tí manda bilimulo walia holene mbira nawi.
ACT 24:14 I̱na biruligo la pani harogo ogo. Tigua Hariga i̱ pialu kogo ogoni mo hondo holenaga manada laga kago. I̱na Hariga ogoriani pialu howa ina mamalinaga Ngode Datagaliwabe kago mitangi bialu lotu laruli. Mosese heneyangi Mana lowinigo ngagobi Ngode Datagaliwabe mana latagi haga hearume mbugani bi gili bu winigo ngagobi bibahende i̱na yu tiga bido.
ACT 24:15 Agali o karume wali agali bibahende bayale biagabi ko biagabi ta nabi homaragola howa Ngode Datagaliwabehanda ti mo heya holebiragonaga mini dunu bia ho kadagua i̱bi ani dege mini dunu bia ho ko.
ACT 24:16 Anigo i̱na Ngode Datagaliwabebi agalirubi i̱naga miniha ko mbira do nahe hendelo manda biaabo haruli, lene.
ACT 24:17 Polohanda laabo halu lalu, Ala i̱ Yarusaleme wahalu puwa mali dewa howa i̱na Yu wali agali yagibano hearu biamogo bialu tihondo muni mulebi Ngode Datagaliwabehondo mbirale bo mulebi i̱ Yarusaleme dai biru.
ACT 24:18 Dai buwa i̱ Anduane Homogonaga andaha howa Ngode Datagaliwabe deni dodo nahe holenaga mana biai howa mbira bule ibirugo bialu hewaria tigua i̱ de handaya. I̱ heba wali agali ngoai nahe lai gungubi nabi.
ACT 24:19 Yu agali maru Esia dindini howa íbu hearu ti dege hayagoni. Agali urunime i̱hondo, Í̠ ko biri, lalu kayagua nde í̠ hale habelo tinime bi ogoni lole oali ibulene nga.
ACT 24:20 I̱na Ganisolo agalihondo, I̱ mbira nabi, lalu ladai birugo hale hene agali o karume i̱na ko binigo manda bu kayagua nde áyu langilo.
ACT 24:21 I̱ Ganisolo agali biaru heba howa bi mbira dege larugo ogo, Wali agali homeneru mo heya holebiragonaga i̱ yu tiga bidogo, o larugonaga tígua godi horo áyu ogoni larimi laru, lalu Polohanda lene.
ACT 24:22 Ani layagola Peligisihanda Anduane Homogonaga Harigani piagane mana manda timbuni binigo godi lalu heago lamaro bialu lalu, Ami haru haga haguane Lisiasa ibu ibiragola í̠naga godi lala kamago tigua, Í̠ ko biri, layago biridabe nabidabe manda bulebero, lene.
ACT 24:23 Ani lowa ibugua ami haru haga agali Polo handaya ho hayagohondo lalu, Polo mamage howa dege ibuni bua haradagua bilobi ibunaga nenege karume ibu biamogo bule ibilobi henge mibe, lene.
ACT 24:24 Horo maru howa Peligisi ibu one Durusila ibu Yu wali berenego libu haru ibini. Ibuwa Peligisi ibugua, Polo damu pu, layagola Polo haru ibini, Ibuwa ibugua Keriso Yasuhondo mini mbiraore wulene mana lamiyagola Peligisi ibu hale hene.
ACT 24:25 Hale ho berearia Polohanda tigabi holenebi mini haru holenebi ina bibahendeme ko birimagonaga Daba Ki Bulene Horo Ngode Datagaliwabehanda pongo bo winigo lola hole wene ibiragobi lalu lamiyagola Peligisi ibu gi howa lalu, Lone hale holene henge ngangi í̠ ibabelo ololiya ai pu, lene.
ACT 24:26 Peligisi ibugua Polo heba bi lole olalu wiaabo hayago irane ibuhondo Polohanda muni ngilo hale howa ani bini.
ACT 24:27 Mali kira howa Peligisinaga pani Posiasa Pesedasa ibu gabumane haru haga howa ha aribia hene. Peligisihanda Yu agali hearu mo turu hole hame lowa Polo garabaya andaha helaabo hene.
ACT 25:1 Dindi ogoriani Pesedasa ibu haru hole ibini. Ibuwa horo tebira howa ibugua Sisaria wahalu Yarusaleme pene.
ACT 25:2 Yarusalemeni pu heagola loma binigo mo miaga haguane hearubi Yu wali agali haru haga hearubi tigua, Polo ko ogo biya, lalu ibu lamini. Tigua hongo howa Pesedasahondo lalu,
ACT 25:3 Ina biamogo bialu Polo Yarusaleme ibilo, Damu pudaba labe, lene. Ala tigua ndi lalu, Polo wene harigani ibalu kaore ibu homelo bole harigani yu birami̱ya, lalu biarume ani lene.
ACT 25:4 Ani layagola Pesedasahanda ladai bialu lalu, Polo ibu Sisariani garabaya kago. I̱ emene howa Sisaria dai buleberogo
ACT 25:5 agali ogoni ko mbira bidayagua tínaga haru haga karume godi lole i̱ heba pobehe, lene.
ACT 25:6 Ogoriani Pesedasa ibu ti heba horo halirabe pirabe agima halu Sisaria dai bini. Dai bu howa egerebalene Pesedasa godi laga andaha pu biruwa ibugua maru hearuhondo, Polo damu pudaba, lene.
ACT 25:7 Polo ibiyagola Yu agali Yarusaleme howa ibiyaru tigua Polo ho mabu buwa lalu, Agali ogoni ibugua ko timbuni dewaore biya, lene. Ko biya layago heneneore biya lalu walia habe nahe hene.
ACT 25:8 Polohanda ladai bialu, Yu wali agalinaga Mana lowinigo ngagobi Anduane Homogonaga andabi Lomonaga Kinibi urunihondo ko mbira i̱na nabi ko, lene.
ACT 25:9 Ani layagola Pesedasa ibugua Yu wali agali mo turu hole hame lowa Polohondo lalu, Í̠ ko biri layagonaga godi i̱ heba lole Yarusaleme poa kebe, lene.
ACT 25:10 Ani layagola Polohanda lalu, Godi laga anda ogo Lomo kininagago anda ogoha howa godi lolene ngago lole ko. I̱na Yu wali agalihondo ko mbira nabi kogo í̠ manda biai kegoni.
ACT 25:11 Bi mana lo ngago puguaruyaguabi ko mbira biruyagua birugonaga pani homolene ngayaguabi o karulape laro. Tigua i̱ ko biya layago henene ndo layagua nde mbiralime i̱ tihondo mulene nawi. Ogonigo Lomonaga Kini kago ibunime i̱naga godi lo tiga bilo hame ledo laro, lene.
ACT 25:12 Ani layago hale howa Pesedasa ibunaga lamogo biaga agali heba lo manda buwa ibugua Polohondo lalu, Lomonaga Kini ibugua i̱naga godi hale helo larigo ibu karia lo polebere, lene.
ACT 25:13 Sarere maru peha Kini Agiriba ibu one Benaisila libugua turu howa Pesedasa nenege hole Sisaria ibini.
ACT 25:14 Libu horo maru ogoriani howa Pesedasahanda Polonaga te kini biago lamialu lalu, Agali mbira Peligisihanda ala garabaya biyago oali haabo kago.
ACT 25:15 I̱ Yarusaleme pirungi Yualinaga loma binigo mo miaga haguanebi agali ala hene miniwi hearubi tigua lalu, Polohanda ko dewa biyago ibu pani mibe, laya.
ACT 25:16 Tigua ani layagola i̱na au ladai biru, Marume mbirali ko biya layagua handayadaru tigua lelobi o biagome ladai bilobi ti mandagi helowa ina Lomoalime lelo henge meramali. Ani nale howa iname pani nameramali, lamiru.
ACT 25:17 Ti godi lole oali ngoai hayagola i̱na egerebagi abaleore godi laga andaha pu biruwa tihondo, Polo damu pudaba, laru.
ACT 25:18 Ibugua ko biya layarume heyalu ibu koore biya lolebira mitangi bu harugo tigua ani nale.
ACT 25:19 Ti Ngode Datagaliwabe mitangi biagane manabi agali mbira mini Yasu homenego Polohanda, Ibu heyu ka, layagonagabi tigua uruninaga lai laya.
ACT 25:20 Lai layagonaga irane manda bule agi buabe toba howa i̱na Polohondo lalu, Í̠ ko biri layagonaga godi lole Yarusaleme polene karulape manda bu kebe, lamiru.
ACT 25:21 Ani lamirugola Polohanda lalu, O ndo. Lomonaga Kini kago ibunime i̱naga godi lo tiga bilo garabaya holebero, lene. Ibugua ani layagola i̱na ibu kini biago karia haru polene manda bialu howa dege garabaya haabo habe laru, lene.
ACT 25:22 Ani layagola Agiribahanda Pesedasahondo lalu, Agali ogonime bi larago i̱nime hale hoa ko, lene. Ani layagola Pesedasahanda ladai bialu lalu, Yawi ibugua bi lolebirago í̠ hale holebere, lene.
ACT 25:23 Egerebalene hayagola agalime yári timbuni buwa danda gamu bialu hearia Agiriba Benaisila libu ibini. Ibuwa libu ami haru haga haguane hearubi tano ogoninaga agali haguane hearubi heba gabumanenaga ngoai haga andaha pene. Anda puwa Pesedasahanda, Polo haru ibidaba, layagola tigua ibu haru ibini.
ACT 25:24 Haru ibiyagola Pesedasahanda lalu, Kini Agiribabi bibahende ina heba ngoai ho kamirubi agali o kagoni de handadaba. Yu wali agali Yarusalemeni karubi oali karubi ti bibahendeme i̱hondo, Ibugua ko timbuniore biyago ibu holene nawigo homelo bolene nga, lalu hongo howa ga̱ lalu laya.
ACT 25:25 Anigo i̱na manani ibu dabo handalu hewaria ibugua biyagonaga homelo bolene irane handa walia naheore haru. Lomonaga Kini kagome ibunaga godi lo tiga bilo Polohanda poa hayago ibu Lomonaga Kini karia haru polene manda bu ko.
ACT 25:26 Lomonaga Kini ibugua de hendelo ibu biyagonaga te bebani agi lalu gili buabe toba howa Agiriba í̠orebi bibahende kamirubi ibugua bi larago tí hale halimulo Polo haru ibiru. Iname hale howa ibugua biyadagonaga irane i̱na bebani gilibu wulene ngago manda bialu gili bulebero.
ACT 25:27 Mbirali garabaya kago ibugua ko biya laragonaga irane bayuwa bebani gili nabi howa bame haru polene nakarulapeore mitangi bu ko, lene.
ACT 26:1 Agiribahanda Polohondo lalu, Í̠nime lolene ngadagua labe, lene. Ani layagola Polohanda gi yaraga howa ibuni bialu hayadagua lalu laminigo ogo,
ACT 26:2 Kini Agiriba-o Yu agalime i̱hondo, Í̠ ko biri, layagonaga áyu i̱na í̠hondo ladai bule turu timbuni ko.
ACT 26:3 Turu timbuni ko larugo irane í̠na Yu wali agali kamarunaga manabi iname taratara manda beramaligobi í̠ manda biaiore kego. Áyu i̱na bi larogo bu ibira howa bayuwa hale habe.
ACT 26:4 I̱ igiri emeneni howa i̱na bialu harugo Yu wali agali bibahendeme manda bu ka. Pigane i̱naga dindini howabi Yarusalemeni howabi i̱ haabo harugo ti manda bu ka.
ACT 26:5 Pigane howa ina Ngode Datagaliwabe mitangi bulenenaga mana hongo howa yu karu aria mini Perisi karu ti baba haruligo Yu agali ti manda bu haabo ka. Ti ani manda bu kago tinime loa kayagua langibehe ka.
ACT 26:6 Ala Ngode Datagaliwabehanda inanaga mamalihondo bi mbira lowinigo bilo i̱na mini dunu bia ho kogonaga áyu godi lalu kamagoni.
ACT 26:7 Bi lowinigo ogoni hondole inanaga hameigini hombearia (12) karume mini dunu bia ho howa horombe mbiragabi Ngode Datagaliwabe mitangi bialu lotu lalu ibuhondo bi laabo halu ka. Kini-o bi lowinigo ogoni i̱na hondole mini dunu bia ho kogonaga Yu agali tigua, Í̠ ko biri, lalu ka.
ACT 26:8 Ngode Datagaliwabehanda wali agali homeneru mo heya haga kago mana ogoni tí áyu ngoai ho kamirume yu tiga nabibehe kamigo irane agibe.
ACT 26:9 Nasareteali Yasu mini mo ko hole i̱nime bulene nga ale biai hole i̱na mitangi bu harugoni.
ACT 26:10 Ani mitangi buwa i̱na Yarusalemeni howa ani bule harugoni. Loma binigo mo miaga haguane hearume i̱ hongo ngiyagola i̱na Ngode Datagaliwabenaga wali agali dewa garabaya biru. Tigua wali agali uruni homelo bolene nga layagola i̱nabi, E̱, larugoni.
ACT 26:11 Tigua, Yasu mana waharama, lelo i̱na ti mo la hole manda bialu ngoai hagane anda bibahenderuha pume halu i̱na maru hearuhondo, Ti balimu, laru. Tihondo keba timbuniore halu de darama buwa i̱na dindi tara tara kaundiaha pume halu ti mo tandaga halu harugoni, lene.
ACT 26:12 Polohanda lalu, I̱na ogonidagua buliya loma binigo mo miaga haguane hearume i̱ hongo ngialu bebanibi gilibu ngiyagola Damasagasa yalu pole pirugoni.
ACT 26:13 Ai Kini-o ina pialu hemaria horombe hanuni hayagola i̱bi agali i̱ heba pirimarubi ina hemagoria ni ale ndo wá timbuni taraore hari daliga howa hadali ho mabu biyago de handaru.
ACT 26:14 Ani biyagola ina bibahende dindini pilope howa odope ho wimaria mbiralime Yu wali agalinaga bi lowa lalu, Solo-o Solo-o í̠na i̱ aginaga mo tandaga harilibe. Ira dehe ngago hengedalu kego í̠nime í̠ni mo tandaga hare, laya.
ACT 26:15 Ani layagola i̱na ladai bialu, Anduane Homogo-o í̠ ai kebe, laru. Ani larugola Anduane Homogo ibugua lalu, Í̠na mo tandaga hariligo i̱ Yasu kogoni.
ACT 26:16 Í̠ni geme heyu habe. I̱naga biabe bia haga habelo i̱na í̠ dabo helole ha pani ho ko. Áyu í̠na i̱ kogo de handarigobi mani walia holeberogobi wali agali lamulebere.
ACT 26:17 Yu wali agali karubi wali agali tara tara karubi ti karia í̠ pu loleberogo tigua í̠ bo waholilono i̱na pele ngulebero.
ACT 26:18 Í̠na tinaga de mo ngala halu aruma kagoria howa wá kagoria haru polenebi dama Heyolabeme ti haru kagoria howa Ngode Datagaliwabehanda haru kagoria haru polenebi í̠na ani bulebere. Ani beregola tigua i̱hondo mini mbiraore wiragome i̱na tinaga ko biyago domo wahowa ti wali agali Ngode Datagaliwabehanda dabene karuhayagi helo helolebero, laya, Polohanda lene.
ACT 26:19 Polohanda laabo halu lalu, Kini Agiriba-o mbiralime dahuliya andaga howa walia halu bi layago i̱na mo wa nahe haru.
ACT 26:20 Ala Damasagasahabi Yarusalemehabi ibaga bialu mani Yudia dindi bibahendehabi Yuali ndo wali agali dindi tara tara hearuha puwa i̱na wali agali bibahende hearuhondo, Tí ko birimigonaga mini beregedowa Ngode Datagaliwabehondo mini mbiraore wuwa ani birimigo walia hole biabe tigatiga bialu holene nga, lalu lamiru.
ACT 26:21 Ani lamialu harugonaga Yu agali hearume i̱ Anduane Homogonaga andaha hewaria minuwa homelo bole manda biya.
ACT 26:22 Alabi áyubi horo bibahendeni Ngode Datagaliwabehanda i̱ biamogo biaabo hayagome i̱na oali howa wali agali emenebi timbunibi ta nabi karuhondo henene lolene lamialu ko. Ala Ngode Datagaliwabe mana latagi haga hearubi Mosesebi tigua ani bulebira lo winigodagua i̱na lalu ko.
ACT 26:23 Tigua lowinigo ogo, Mbirali Dabo Helenego ibuwa ibu homolebira. Homowa wali agali mani heyilo ibu ala heyu holebira, lenego gilibu nga. Irane ogonigo Yu wali agalibi wali agali tara tarabi ti wá holene hendelo ibugua haabobo holenaga pele ngulene mana lamule ibu ala heyu hene, Polohanda lene.
ACT 26:24 Polohanda ibu bialu hayagonaga te ani lamialu hearia Pesedasahanda ibuhondo dalimu lalu, Polo-o í̠ lulu yu ke. Mana taibi dewaore lo manda biaabo harigome í̠ mo lulu ya hayada, lene.
ACT 26:25 Ani layagola Polohanda ladai bialu lalu, Pesedasa í̠ timbuni kego. I̱ lulu ndo. I̱na bi o larogo palia hondo howa lulu bi ndo mini wuwa ogo ale larolo manda buwa heneneore lalu ko.
ACT 26:26 Kini Agiriba-o ogoni biyagoni í̠ manda bidego donge nahe i̱na langiai habehe kogoni. O biyagoni arumaha howa ndo biyago í̠ manda nabi ndo uruni bibahende manda biai kego manda bido.
ACT 26:27 Kini Agiriba-o Ngode Datagaliwabe mana latagi haga hearume bi mana lowinigo yu tiga bidebe. Yu tiga bidegoni manda bu ko, lene.
ACT 26:28 Ani layagola Agiribahanda Polohondo lalu, I̱ Keriso hameigini holiya áyu ogoni mo ha hole mitangi bu kebe, lene.
ACT 26:29 Ani layagola Polohanda ladai bialu lalu, Áyu ogonibi karulape awebi karulape degego í̠bi bibahende i̱na bi larogo hale ho kamirubi tí i̱ kogobi dege halimulo Ngode Datagaliwabehondo bi la halu kogoni. Ege pu seni urume i̱ dariba kagola kogobi dege tí nahalimulo hamelo ko, lene.
ACT 26:30 Ani layagola kini biagobi gabumane haru hagabi Benaisibi ti heba maru ngoai hayarubi bibahende biaru heyalu
ACT 26:31 tagiraha puwa tigua lagalaga bialu, Agali ogoni homelo bolenegobi garabaya bulenegobi ibugua ko bini mbira nawida, lene.
ACT 26:32 Ani layagola Agiribahanda Pesedasahondo lalu, Agali ogonime Lomonaga Kini kagome i̱naga godi lo tiga bilo naledale ibu golope kele, lene.
ACT 27:1 Tigua ina iba sibini biralu Idali dindi polene nga lo manda biyagola ami haru haga hearume Polobi garabaya agali marubi Yuliasahanda mamage halu haru pelo ibuhondo mini. Lomo ami dege maru agali pira pira (100) ti mini Lomo Kininaga ami laga henego uruninaga haru haga Yuliasa ibu hene.
ACT 27:2 Ina Adaramidiamalinaga iba sibi wiagoria biralu pirima. Iba sibi ogoni Esia dindinaga tano wigi biaru ange ange polene wini. Tesalonaiga howa Masedoniali mbira mini Arisadagasa ibu ina haru pirima.
ACT 27:3 Egerebalene ina Saidono anda pirima. Anda puwa Yuliasa ibugua Polo dara howa lalu, Í̠naga nenege oali karume mbirale í̠ buru paderu ale ngilo ti karia pobehe, lene.
ACT 27:4 Dindi ogoni wahalu pialu hemaria puyabu pu ladai biyagola dindi mbira iba dege dombeneha wiago mini Saibarasa puyabu pu nale wiagohayagi ina pu bagi halu pirima.
ACT 27:5 Pialu iba solowara timbuni Silisia dindibi Pambilia dindibi kaware bereago domowa ina Lisia dindinaga tano mbira Maira anda pirima.
ACT 27:6 Ogoriani ami haru haga biagome iba sibi mende Alegandarialinaga íbu wiago Idali dindi pole wiaria hondowa ibugua ina iba sibi ogoriani mali̱ya biradaba, lene.
ACT 27:7 Horo dewaru ina iba sibini biralu tendeore pugu bialu polene erekui timbuni handa walia halu Nidusu tano handa de̱le̱ wiagoria pirima. Puyabu pu ladai biyagome ina polene manda birimagoha pobe naheyagola dindi mbira iba dege dombeneha wiago mini Kiridi puyabu pu nale wiagohayagi pialu Salamone dindinaga gembone mbira wiago bolangua halu pirima.
ACT 27:8 Iba sibi biago iba ange ange pialu polene erekui timbuni handa walia halu puabo howa tano mini Iba Sibi Anda Pu Wiagane Bayale wiagoha anda pirima. Tano ogoni Lasea tano kaware wini.
ACT 27:9 Ina ogoriani horo dewaore haabo harima. Ko Domo Waholenenaga Horo bamba pongo bo winigo horo ogoni abale bolangua hayago ina polene manda bu harimagoha puabo harimayagua puyabu timbuni ibaganengigo homoleberemada manda birima. Ani manda buwa Polohanda tihondo lalu,
ACT 27:10 Agaliru-o oali howa polene koore nakarulapedane hendedo. Dabudabu ngarubi iba sibibi mo ko hai holebira. Ina marubi homoleberamago, lene.
ACT 27:11 Ani layagola hale howa ami haru haga biagome Polo nakarulape laya mitangi bini. Iba sibi yaga haguane heagobi iba sibi anduane heagobi libugua bi layago karulape laya mitangi bini.
ACT 27:12 Ira yuni gilo piai halu dagare biagane horo ibirangi dindi ogoniha iba sibi wiaabo holene nakarulape manda buwa agali dewa birayarume ti iba sibi wiagane biago yu wahalu iba hanuni pu ede halu Pinigisi tano anda pobehedabe hondo poa hene. Pinigisi tano ogoni Kiridi dindinaga iba angeni wiago ogoniha puyabu hongo howa naibaga wini. Anigo ira yuni gilo piai halu dagare biagane horo ibirangi ogoriani iba sibi wiaabo holene karulape nga ti manda bini.
ACT 27:13 Puyabu tendeore gi lehayagi howa pu lalu ibiyagola agali biarume ala ti lo manda manda bu hayadagua bulene nga mitangi bini. Ani mitangi buwa mbirale gendabi ege to̱le̱ aeaneme wabinigo iba sibi pu nabilo hende ho wiago ibaha ala mo ibira hayago tigua yaraga howa Kiridi dindi iba ange ange puabo hene.
ACT 27:14 Ani pialu hemaria puyabu hongohe timbuniore Kiridi dindihayagi howa bolangua halu ibini.
ACT 27:15 Ibalu howa puyabu ibiyagome iba sibi mo indi ande lene. Mo indi ande layagola puyabu pu ladai biaabo hayagome iba sibi pobe naheyagola puyabume pu lo yu piyadagua iba sibi biago yalu pelo birarima.
ACT 27:16 Dindi emene mbira iba dege dombeneha mini Koda wiago gi lehayagi bolangua halu hemaria puyabu emene biyagoha pirima. Pialu ina erekui timbuni howa iba sibi biagonaga iba talu emene hende ho iba iba yalu piaganego podolilono agali biarume iba talu o biago yaraga howa iba sibi timbuni biago daligani wuwa ema nabilo pongo bini. Iba sibi timbuni biagobi podolilono tigua pulimume dindiha daligahabi ndibuore lalu bayuwa pongo bini. Libia dindinaga ange kaware howa ibaha iba mu timbuni wiagome iba sibi yalu anda polilono ti gi hene. Gi howa iba sibinaga labolabo daliga yaraga ho helaganego tigua hado ibira howa puyabume pu lalu piyadagua iba sibi yalu pelo waho berene.
ACT 27:18 Puyabu hongo timbuni howa ibaabo hayagolabi iba yaribu timbuni biaabo hayagolabi horo mendengi tigua mbirale tara tara iba sibiha wiyaru ibaha mo pe hene.
ACT 27:19 Horo tebonengi iba sibinaga piagane mbirale maru pulimubi labolabobi irabi uruni ale wiaru tini gime ibaha mo pe hene.
ACT 27:20 Horo dewaru iname nibi yakundibi de nahende harima. Puyabu biago hongo timbuni howa ibaabo haya. Ani ibaabo hayagola ina bibahende homai holomada manda birima.
ACT 27:21 Agali biarume tomo nane haabo hayagola Polo ibugua ti dombeneha heyu howa tihondo lalu, Agaliru-o i̱na bi ala larugo hale halu Kiridi wahalu naibidamale nde genda timbuni áyu ngago nangaleda.
ACT 27:22 Ogonigo áyu gi nahe turu halimu laro. Tí mbirali nahomoleberamigo iba sibi dege ko halu podai holebira.
ACT 27:23 Ngode Datagaliwabe kago ibunaga i̱ kogonigo nde i̱na ibu mitangi bialu lotu lalu haruligo ogoni ibunaga dahuliyali mbira áyu mbiraga i̱ hewaria ibiya.
ACT 27:24 Ibuwa ibugua i̱hondo lalu, Polo-o í̠ gi nahabe. Lomonaga Kini deni í̠ pu holene nga. Ngode Datagaliwabe ibu mini bayale howa ibugua í̠ biamogo bialu agali bibahende í̠ heba iba sibini biralu poramiru mbirali nahome tí bibahende hai holeberami, laya lalu i̱ langiya.
ACT 27:25 Anigo agaliru-o gi nahe turu halimu laro. Bi ogoni i̱ langiyadagua lola holebiragonaga i̱na Ngode Datagaliwabe ogoni ibuhondo mini mbiraore wu ko.
ACT 27:26 Dindi mbira iba dege dombene ngagoha puyabume ina yalu pu waholebira, lalu Polohanda lene.
ACT 27:27 Horo pira mbirani maria (14) howa mbiraga hayagola ina iba solowara Medidereniana ibani hemaria puyabume ina pulu yu puabo haya. Mbi hanuni hayagola iba sibi yaga agali biarume iba ange emene kaware nga bada mitangi biya.
ACT 27:28 Ani mitangi buwa tigua iba magi hondole pu luni nguini mendeni gendabi mbira pongo bia howa ibaha mo ibira haya. Mo ibira howa yamuwa handalu hearia iba ulinaga magi mita pira maria (40) ale hendene. Ani handalu emene puwa lone ibira howa magi handalu hearia iba uli magi mita pira tebira (30) ale hendene.
ACT 27:29 Hondowa iba sibi biago ege to̱le̱ timbuni dewa wiagoria pu bedelaha holilono gi howa iba sibi pu nabilo tigua mbirale gendabi ege to̱le̱ aeaneme wabinigo maria pulimume hende ho manda bu winigo iba sibi erenehayagi howa ibaha yarali hene. Yarali howa muna bilotagi howa tigua Ngode Datagaliwabehondo bi lalu hene.
ACT 27:30 Iba sibi yaga agali biaru ti pu yola halu pole manda bini. Ani manda bialu howa tigua iba talu emene ala wiyago hadalu ibani wilo pulimume mo yarali hene. Ani buwa iba sibi haguanehayagi howa mbirale gendabi ege to̱le̱ aeaneme wabinigo maru ibaha mo ibira hetingi halu hearia
ACT 27:31 hondowa Polohanda ami haru hagabi ami agali biarubi tihondo lalu, Iba sibi yaga o karuni ti iba sibi ogoriani nahe piyagua tí homoleberami, lene.
ACT 27:32 Ani layagola ami agali biarume iba talu emene biago pelo pu hende hayago gandulope hene.
ACT 27:33 Ega bi lolene emene kaware nga manda buwa Polohanda agali biaru tomo nelonaga tihondo lalu, Horo pira mbirani maria (14) tí tomo nane haabo harimigo
ACT 27:34 ai áyu tí hongo helo tomo nolene ngaore laro. Tínaga mandari mbira dugu wa naholebiraore laro, lene.
ACT 27:35 Ani lowa Polohanda mberedi mbira muwa ti bereagoria howa ibugua Ngode Datagaliwabehondo ka̱i̱ lowa budalu nalu hene.
ACT 27:36 Ani biyagola ti gi hayago embeda howa bibahendeme tomo muwa naga naga bini.
ACT 27:37 Iba sibi ogoriani birarimaru daga lamaga howa handari kirani pira kariani waragaria (276) birarima.
ACT 27:38 Ina bibahendeme tomo karulape nai hemagola tigua iba sibi biago genda nahelo ladi ale mini widi bibahende winiru ibaha mo pebe bini.
ACT 27:39 Muna biyagola iba sibi yaga biarume dindi mbira wiago de hondowa dindi anibe toba hene. Anibe toba howa handalu hearia iba mu hama bayale wiago hondowa ogoriani iba sibi anda pu wibeheyagua wimi̱ya lo manda bini.
ACT 27:40 Ani manda buwa tigua mbirale gendabi ege to̱le̱ aeaneme wabini biarunaga pu gandulope hene. Ani bialu howa iba sibi tiga tiga pelonaga mo tiga biagane ira pume pongo bini wiaru hadene. Puyabume iba sibi yalu pelo tigua iba sibinaga labolabo haguanehayagi yaraga halu pongo bini. Pongo buwa ti iba angeni iba mu hama bayale wiagoria anda pole tiga tiga pialu hene.
ACT 27:41 Pialu howa iba sibi biago iba mu timbuni ibaha wu haealo dagaho wiagoha anda piya. Ani buwa iba sibi haguane iba mu wu haealo dagaho wiagoha guya howa ema nabibehe wini. Ani bu wiagola iba yaribu timbuni biyagome iba sibi herenehayagi baabo hayagola podo baga bini.
ACT 27:42 Ani biyagola garabaya agali bu hearu iba do̱lo yalu puwa iba angeni iraga howa ibida polilono ami agali biarume garabaya bibahende bo wahai hole lo manda bini.
ACT 27:43 Ti ani manda bu hearia ami haru haga biagome Polo homelo hame nale howa ami agali biaruhondo, Nabalimu, lene. Ani lowa ibugua bibahendehondo lalu, Iba do̱laga kamiru tí ala ibaha pora bialu do̱lo yalu iba angeha pudaba.
ACT 27:44 Tí maru iba nado̱laga kamiru mani ibaha pora bialu iba sibi ira podo ngarunaga pagaho yalu iba iba pudaba, lene. Ani layadagua buwa ina bibahende nahome bayale iba angeni anda piai harima.
ACT 28:1 Ina nahome bayale howa iba angeni anda piai harimagola wali agali ogoriani hearume, Dindi iba dege dombeneha wiago ogo mini Malada, langiya.
ACT 28:2 Wali agali dindi ogoriani haga hearume ina dara halu biamogo biya. Dalu ibalu dagare timbuni biyagola tigua ira timbuni delowa inahondo, Dagare dogo bimi̱ya ibidaba, laya.
ACT 28:3 Polohanda ira gabuni wiaru mo yalu ibuwa ira delalu hearia ira poboyogo biyagola puya mbira ira gabuni biagoha paleneyago tagira ibalu Polonaga gini haya ho wiaabo haya.
ACT 28:4 Ani haya ho wiaria de hondowa wali agali biarume tini lagalaga bialu, Agali ogonime wali agali homelo bagada. Iba solowaraha nahomeyagola ibu homelo dama mbira mini Pani Baga kago ibugua pani mira, laya.
ACT 28:5 Ti ani lalu hearia Polohanda ibunaga gi tanda layagola puya biago ira deagoha ibira howa dene. Polo ibu warago nabe bayale hene.
ACT 28:6 Ani biyagola Polonaga tingini to harabe be homo ibira harabe hondole wali agali biarume handaya ho hene. Handaya haabo hearia Poloni mbira nabi bayale heago hondowa tigua mitangi budai bialu lalu, Ibu agali ndo mbira tara gibiore ka, lene.
ACT 28:7 Dindi ogoriani kaware howa Malada dindinaga homogo mbira heago mini Pabaliasa ibunaga mabu maru wini. Ibugua inahondo turu halu, I̱ andaga hami̱ya, layagola horo tebiru ibu heba harima.
ACT 28:8 Pabaliasa ibunaga aba warago bowa tingini poboyogo bialu ti darama pialu wini. Ani bu wiaria puwa Polo ibugua Ngode Datagaliwabehondo bi lowa gime ela howa agali biago mo dabi hene.
ACT 28:9 Ani biyagola dindi ogoriani wali agali warago bo wiaru bibahende Polo hearia ibiyagola tibi ibugua mo dabi halu hene.
ACT 28:10 Ani biyagola tigua inahondo mbirale dewa ngiya. Maha ina pole birimaria polenenaga tomobi mbiralebi tigua inanaga iba taluni wia haya.
ACT 28:11 Malada dindi iba dege dombeneha wiago ogoriani ege tebira halu ina iba talu mbirani biralu pirima. Iba talu ogoni Alegandarialinaga wuwa ira yuni gilope howa dagare ibagane hororu birangi dindi ogoniha wu ge ho hagaha ngelo hene. Iba talu biago haguaneni mbirale mini Labo Laboli lalu irame wabu wini.
ACT 28:12 Pialu ina Sairagusu tanoha anda puwa horo tebiru hondo harima.
ACT 28:13 Horo tebira howa Sairagusu wahalu Legiama tano anda pirima. Pu paluwa egerebalene puyabu emene karulape ibiyagola ina pialu horo kira pialu howa Pudioli tano anda pirima.
ACT 28:14 Tano ogoniha howa Yasu mana yu tiga biaga hai bialu hemaria maru hearia handa walia harimagola tigua inahondo lalu, Sarere mbira hami̱ya, lene. Ani layagola nde ina harima. Ani halu pialu ina Lomo tano pole pirima.
ACT 28:15 Pialu hemaria Yasu mana yu tiga biaga Lomoni hearume, Polobi agali marubi harigani ibira, layago hale howa ti ina lola ho ibiyaria maru Abiasa magedi hama wiagoriani lola harima. Maru anda mini Ha̱lo Haga Anda Tebira heagoriani lola harima. Polohanda ti ibiyago de hondowa ibugua Ngode Datagaliwabehondo ka̱i̱ lalu ibunaga bu mini dungu lene.
ACT 28:16 Ina Lomo anda pirimagola gabumane agali heagome, Polo ibu anda mbiraha ibuni hangu helo habehe, lene. Polo ibida polilono ami agali mbirame mamage ho helene.
ACT 28:17 Horo tebira howa Polohanda Yu wali agali Lomoni hearunaga haru haga hearu mo ngoai hene. Ngoai hayagola Polohanda tihondo lalu, I̱ hameneru-o i̱na inanaga wali agali mo ko nahebi ina mamalinaga mana wirimago napuguibi hewaria Yarusalememi howa Yu agali hearume i̱ dariba howa Lomo gabumane hearuhondo miya.
ACT 28:18 Tigua godi lowa i̱ homole bolene irane handa walia nahe howa golope hole manda biya.
ACT 28:19 Ani manda biyagola Yu agali biarume, Ibu golope holene nawiore, layagola i̱na i̱ninaga damene Yuali hearuhondo, Kagua birimi, lolene manda nabiore haru. Howa Lomonaga Kini ibugua i̱naga godi hale helo polene nga lalu ogoni hangu lolene nga manda biru.
ACT 28:20 Anigo i̱na tí de hondolebi tí heba te lolebi hame laru. Nde mbirali ibilo Isaraele wali agali bibahendeme mini dunu bia ho kagonaga ege pu seni ogome i̱ dariba kagoni.
ACT 28:21 Ani layagola tigua Polohondo lalu, Yudiani haga hearume í̠na birigonaga beba inahondo wia nahe. Yudiani howa inanaga hamene ibiyarubi tigua te nale í̠na ko biri lalubi mbira nalangi.
ACT 28:22 Wali agali dindi bibahendeni karume, Mana ogoni yu tiga biaga í̠ ke aria kamiru ti koore ka, lalu hagago ina manda bidamago í̠na manda bu kegonaga ina hale hoa kamago langibelo, lene.
ACT 28:23 Ani lowa tigua Polo heba te ogoni lole horo mbira pongo bo wini. Horo ogoni lola hayangi Yu agali dewaore Polo heagoria íbu ngoai hene. Ngoai hayagola Polohanda egerebagi howa Ngode Datagaliwabehanda Handame Ho Kagonaga mana lamialu hayago irane lamialu heaore dege ne lene. Ibugua Mosese heneyangi Mana lowinigobi Ngode Datagaliwabe mana latagi haga hearume lowinigobi ngadagua lalu ti Yasu mana yu tiga bilo hame lowa lamialu hene.
ACT 28:24 Ani lamiyagola hale hayaru marume, Henene laya, manda buwa Yasu mana yu tiga bini. Ti marume Yasu mana yu tiga bibe manga hene.
ACT 28:25 Ani buwa ti bibahende mini mbiraore nahe howa bi lagalaga bialu pole biyaria Polohanda tihondo bi galone mbira laminigo ogo. Ibugua lalu, Ngode Datagaliwabe Dinini ibugua Ngode Datagaliwabe mana latagi haga Aisaiaha howa tínaga mamalihondo tiga tiga lene ndobe.
ACT 28:26 Ibugua lenego ogo, Wali agali uruni karia pialu tihondo lalu, Tígua bayuwa hale hara tiraga minime manda nabuleberami. Tígua de handaya haabo hara tiraga galone handa walia naholeberami.
ACT 28:27 Irane wali agali uruninaga mini ndibulo wahene ka. Tinaga haleme hale holilono hale ndibulo wahene ka. Tinaga deme hondolilono de ndibulo wahene ka. Ngode Datagaliwabehanda lalu, Tigua ani nabidale ti deme handalu haleme hale halu minime manda bialu i̱hondo mini beregedo kale. Ani bidale nde i̱na ti mo dabi kole, lalu gilibu nga, lene.
ACT 28:28 Polohanda tihondo lamaro bialu lalu, Ngode Datagaliwabenaga pele mulene bi mana ogoni wali agali tara tara karu lamule polene ngaore manda bilimu. Ti hale holebiraore, lene. [
ACT 28:29 Polohanda bi ogoni lai hayagola Yu agali biaru tini degedege hongo howa lai timbuni lagalaga bialu purogo lene.]
ACT 28:30 Polo ibugua anda paliyagonaga yolo migi bialu ogoriani mali kira halu wali agali bibahende ibu hearia ibiyaruhondo turu timbuni halu hene.
ACT 28:31 Ibugua Ngode Datagaliwabehanda Handame Ho Kagonaga mana ti lamialu Anduane Homogo Yasu Keriso manabi lawai halu hene. Lawai halu hearia mbiralime ibuhondo, Lawai nahabe, naleyagola ibugua bi hongo howa lalu lamialu hene.
ROM 1:1 I̱ Polo Keriso Yasunaga biabe bia haga kogo howa Ngode Datagaliwabehanda i̱ abosolo holiya dabowa ibunaga Bi Mana Debene lamuliya olo helenego kogoni.
ROM 1:2 Bi Mana Debene ogoni bamba Ngode Datagaliwabehanda ibunaga mana latagi hagaruha howa, Ngulebero, lalu lowinigo Anduane Homogonaga mbugani gilibu winigo nga.
ROM 1:3 Bi Mana Debene ogoni Ngode Datagaliwabe Igini inanaga Anduane Homogo Yasu Keriso henego kagonaga lo nga. Ibu dindi agalihayaginaga ibu Debidi aguanene hene.
ROM 1:4 Ibu Ngode Datagaliwabe hayaginaga walia halu ibunaga hongo gibioregome ibuni mo heya howa ibu Ngode Datagaliwabe Iginiore inanaga loma biaho helenego ka walia hene.
ROM 1:5 Wali agali dindi bibahendeni karu i̱na Keriso kagoria haru ibalu tigua ibuhondo mini mbiraore wilobi ibugua bia laradagua bilobi Ngode Datagaliwabehanda Kerisoha howa i̱ abosolo kogo howa Kerisonaga biabe ogoni bia holiya i̱hondo ngiya.
ROM 1:6 Wali agali dindi bibahendeni karu larugo Lomoni kamirunagabi laru manda bilimu. Tíbi Yasu Kerisonaga halimulo Ngode Datagaliwabehanda olene.
ROM 1:7 Irane ogonigo Lomoni bibahende kamiru Ngode Datagaliwabehanda tí gubalini howa ibunaga halimulo olayaru i̱na tíhondo beba ogoni gilibu wia haro. Ina Aba Ngode Datagaliwabebi Anduane Homogo Yasu Kerisobi libugua tíhondo biamogo bia holenebi mo palia holenebi ngilo hamelo ko.
ROM 1:8 Bi mbira ala lolene manda bidogo laro. Tígua mini mbiraore wu kamigoni wali agali dindi bibahendeni karume hale halu kagonaga i̱na tí bibahende mitangi bialu Yasu Kerisoha howa Ngode Datagaliwabehondo turu halu ka̱i̱ lalu ko.
ROM 1:9 Bi larogo heneneore laralo Ngode Datagaliwabe ibu manda biai ka. I̱na Ngode Datagaliwabe ogoni gubaliniore howa ibunaga biabe bia halu ibu Igini Yasu Kerisonaga Bi Mana Debene lamialu ko. I̱na Ngode Datagaliwabehondo bi lalu howa tí mitangi biaabo halu tínaga la haruligo ibu manda bu ka. Ibugua i̱ tí kamiria ibulene hame ledayagua henge ngilo ibuhondo bi lamialu ko.
ROM 1:11 Tí de handalu Ngode Datagaliwabe Dinini ibugua mo bayale holene ngiaga ngaru tí heba lo manda bialu tínaga mini hongo helo langule i̱ ibua ho ko.
ROM 1:12 Bi larogo irane tígua mini mbiraore ngamigome i̱ biamogo bilimulobi i̱na mini mbiraore ngogome tí biamogo bialubi inane biamogo bia biamogo bia bialu hami̱yanaga laro.
ROM 1:13 I̱ hamene mbaliniru-o tígua mbira ogoore manda bilimulo laro. Ala i̱na tí hemiria nenege ibule lowa dewa halu manda bigi bu haabo harugo biabe bulene wiarume i̱ yani haabo haya. I̱na dindi tara tarani howa Yu wali agali ndo tara tara karume Yasuhondo mini mbiraore wilonaga biabe bialu harudagua tí kamiria íbu howa wali agali maru karume Yasuhondo mini mbiraore wilimulo biabe ogoni bule hamelo ko.
ROM 1:14 Wali agali dindini holenenaga manda timbunibi karubi manda nabi karubi beba de handaga karubi de nahandaga karubi ti ta nabi bibahendehondo Bi Mana Debene nalami kogome i̱na ti baba dano ho ko.
ROM 1:15 Ani dano ho kogo i̱na tí Lomoni kamiruhondobi Bi Mana Debene langua ho ko.
ROM 1:16 I̱na Bi Mana Debene karulapeore ngago hondowa taga naharuligo irane Bi Mana Debene ogoninaga hongo holeneme Ngode Datagaliwabehanda wali agali bibahende ibuhondo mini mbiraore wu karu pele miaga ngagonaga taga naharuli. Mana ogoni ala Yu wali agalime hale henego áyu Yu wali agali hangu ndo tara tara karu tibi hale halu ka.
ROM 1:17 Ngode Datagaliwabehanda ibuhondo mini mbiraorewi karu tihondo, Í̠ mini tigabiwi ke, lagago Bi Mana Debeneme walia haga ka. Mini mbiraore wu haabo kagohondo hangu laga. Ani lagago Anduane Homogonaga mbugani lo ngago ogo, Ngode Datagaliwabehanda ibuhondo mini mbiraorewi kagohondo, Í̠ mini tigabiwi ke, laga ka. Wali agali ani lene karu ti degeme holene gahenge yu holebira, lalu gilibu nga.
ROM 1:18 Wali agali Ngode Datagaliwabe erembira mialu tinaga ko biragome maru karume mana henene ngago manda bulilono hapai haabo halu karu tinaga kohondo Ngode Datagaliwabehanda dahuliya andaga howa ibunaga keba holene waliaho winigo nga.
ROM 1:19 Ani biragohondo pani mulene ngago irane ogo. Ngode Datagaliwabe ibuni kagonaga ibunime mo pani henego wali agalime manda bibehe panigi nga.
ROM 1:20 Ngode Datagaliwabehanda bibahende wabiningi howa ibunaga nahandabehe winiyago ngarubi ibu hongo haabo kagobi ibuniore haabobo kagobi panigi wali agali bibahendeme handai habeheore ka. Ngode Datagaliwabehanda bibahende wabinigo wali agalime hondowa ani manda bibeheore ka. Anigo tigua, Ngode Datagaliwabe ka manda nabi harimadago, lolene henge nawi.
ROM 1:21 Tigua Ngode Datagaliwabe ka manda bia bidagoyu ibunaga mini mo yaraga holene ngadagua mo yaraga nahagabi ibuhondo turu halu ka̱i̱ nalagabi ka. Tigua mbirale habane ndogo hangu mitangi biagabi tinaga mini lulu ale arumahe howa biagabi ka.
ROM 1:22 Tigua, Mini gigabiwi kama, lagagoyu ti miniwi ndo lulu ale howa laga ka.
ROM 1:23 Tigua Ngode Datagaliwabe haabobo kago mitangi bialu ibunaga mini mo yaraga holene ngago wahowa mbirale gime wabinigo agali alebi ega alebi nogo tara tara alebi tombeme piaga tara tara alebi uruni alego mitangi bialu bi pupu wiaga ka.
ROM 1:24 Wali agali uruni ale karume tinaga minime dimagoli hara alebi tinaga tinginime tini degedege baba mana tagabiorebi bima pelo Ngode Datagaliwabehanda ti yupe hene ka.
ROM 1:25 Tigua Ngode Datagaliwabenaga henene lolene ngago yu wahowa ke̱ holene ngago yu aribia haga ka. Ani buwa tigua mbirale tara tara wabiaga tene Ngode Datagaliwabe kago ibuni wahowa mbirale ibugua wabiniruhondo bi pupu wialu haga ka. Wabiaga tene Ngode Datagaliwabe kago ibunaga mini hangu mo yaraga haabobo holene ngago. Aniore bialu helo laro.
ROM 1:26 Tigua ko ogoni biaabo hagago miniha dimagoli holene tagabi koorene ko ngarubi bima pelo Ngode Datagaliwabehanda ti yupe haga ka. Walime agali heba howa waneigini holene mana winigo wahowa tini degedege mana ko ngubi taraore biaga beda.
ROM 1:27 Agalime ogonidagua dege mana winigo wahowa agali tini degedege dimagoli gibiore howa tini mana ko ngubi taraore biaga ka. Ogonidagua ko tagabiore biragonaga Ngode Datagaliwabehanda pani ngi lalu tinime dano bialu kago mulebira.
ROM 1:28 Wali agalime Ngode Datagaliwabe mana henene ngago miniha yu holene manga haragome tini mini kome bua hara ale bilo ibugua ti yupe haga ka. Anigo tigua nabulene ngaru biaga ka.
ROM 1:29 Ti ko tara tarame to̱laihe howa uru ale biaga ka. Miniha ko dohe hagabi dimagoli hagabi ko bule lo manda biagabi i̱ nayido agini henge lagabi homelo bagabi gungu biagabi mo hondo hagabi ko andandabi hagabi diburibu lagabi
ROM 1:30 tini guraga guraga biagabi Ngode Datagaliwabe handabe manga hagabi mege biagabi miniha balagala hagabi mine hagabi ko bulene hariga hai biagabi aba ai̱yalanaga bi mo wahagabi
ROM 1:31 ti miniha ko dege mitangi biagabi buliya lalu lo wuwa lahondo hagabi maruhondo turubini nabiagabi dara nahagabi urunidagua bialu haga ka.
ROM 1:32 Tigua Ngode Datagaliwabenaga mana lowini ngagome mana uruni ale bialu karu homolene nga lo ngago manda bia buwa kedange howa mana uruniore biaabo halu haga ka. Uruni hangu ndo maru karume birago hondowabi ti kulo haga ka.
ROM 2:1 Wali agali marume nakarulape biragola í̠na tí nakarulape birimi larilibe. Ani lariliyagua nakarulape larili. Maruhondo tí nakarulape birimi lowa í̠nibi ti ale dege howa tigua birago ale biriligome í̠nibi ko dege ke lalu minida.
ROM 2:2 Ngode Datagaliwabehanda dabaga howa wali agali urunidagua biagagohondo godi tigatigaore laga ka manda bidama.
ROM 2:3 Í̠nibi ti bialu kadagua dege bialu howa í̠na maruhondo, Tí nakarulape birimi, lalu kego ogonidagua bialu howa í̠ Ngode Datagaliwabenaga godi lolene ngagoria howa yo pialu polebero manda bu kebe.
ROM 2:4 Ngode Datagaliwabe ibugua í̠hondo baya gibiore biaga kagobi pani abale nangiaga kagobi í̠ mitangi bialu ema nabi hondo haabo kagobi í̠na urunibi heba mo yo hondo dege kebe. Ngode Datagaliwabehanda í̠hondo bayale dege biaabo halu kagoni í̠ mini beregedabelonaga ndo birabe.
ROM 2:5 Ani biragoni bilowa í̠ mini giambeore halu beregedolene manda nabiore haabo kegoni. Anigo Horo Mbira tagira ibirangi Ngode Datagaliwabehanda kohondo ibunaga lembo holene walia halu godi tigabi lolebira. Larangi í̠ pani timbuniore ngilonaga í̠ni bialu kegome pani hiriribiore nolene mo tago haga bialu kegoni.
ROM 2:6 Ogoninaga wali agali bibahendeme biabe bialu harimadagua Ngode Datagaliwabehanda emena karulape ngulebira.
ROM 2:7 Wali agali marume Ngode Datagaliwabehanda tihondo bayale taraore holenebi mini lene holenebi holene ereba nahaganebi ngilonaga tai bialu biabe bayale biaabo halu ka. Tihondo Ngode Datagaliwabehanda haabobo holene mulebira.
ROM 2:8 Wali agali marume tini hangu mitangi bialu mana tigabi erembira mialu ko bulene dege mo tene haga ka. Ani biaga karu baba Ngode Datagaliwabehanda godi lowa tihondo ibunaga keba holene walia halu pani mulebira.
ROM 2:9 Wali agali ko biaga karu bibahendeme genda taraore holenebi tandaga nolenebi ngago nolebira. Yu wali agali karubi wali agali tara tara karubi ta nabi nolebira.
ROM 2:10 Ani bulebiragoyu wali agali mana bayale biaga karu tihondo Ngode Datagaliwabehanda bayale taraore holenebi mini lene holenebi mo palia holenebi mulebira. Yu wali agali karubi wali agali tara tara karubi ta nabihondo ani mulebira.
ROM 2:11 Irane Ngode Datagaliwabehanda wali agali bibahende ta nabihondo ogobi degedege biaga kagoni.
ROM 2:12 Yu wali agali ndo tara tara karume Mosese heneyangi Mana lowini ngago hale nahe hene ka. Tigua hale nahe howa ko bialu karu ti dinini kohayagi holebira. Yu wali agali karume Mana lowini ngago hale howa ko bialu karu mana ogoni ngagome ti dabaga.
ROM 2:13 Wali agalime Mana lowini ngago hale dege haragome Ngode Datagaliwabehanda tihondo, Í̠ mini tigabiwi ke, nalaga ka. Mana ogonime bibe lo ngadagua bialu kagohondo ibugua, Í̠ mini tigabiwi ke, laga ka.
ROM 2:14 Yu wali agali ndo tara tara karume Mana lowini ngago hale nahe howa Mana ogonime bibe lo ngadagua bupe halu biyagua ogo bulene bere ogo nabulene bere lalu tininaga minime lamiaga. Ti Mana lowini ngago hale nahe howa ani bigi bialu haga ka.
ROM 2:15 Tigua Mana lowini ngagome bibe lo ngadagua biragome mana ogoni tinaga miniha nga walia haga. Tinaga minimebi lamia dege bialu tigua birago marungi, Kagua biri, lalu mo mitangi bia halu marungi, Karulape biri, lalu mo mitangi bia haga ka.
ROM 2:16 Ani biagago i̱na Bi Mana Debene lamirulidagua Horo Mbira lola harangi Ngode Datagaliwabehanda Keriso Yasuha howa wali agali bibahende baba godi lalu tinaga miniha ko mitangi bini wia do karubi mo pani halu godi lolebira.
ROM 2:17 Anigo tí wali agali kamirume agua manda bulene wiaruabe. Tígua, Ina Yu wali agali kama, lowa Mana lowini ngago mo tiaga ho howa, Ina hangu Ngode Datagaliwabenaga wali agali baya kama, manda bu haramili.
ROM 2:18 Tígua Ngode Datagaliwabehanda hamelo kago manda buwa Mana lowini ngago lo manda biaabo harimigome mana ogo ko ogo bayale lalu daba ki bibehe kamigoni.
ROM 2:19 Tígua lalu, Ina wali agali de kohe karunaga hariga walia hagabi arumaha karunaga mo wá hagabi
ROM 2:20 mini gedaore karu mana biawai hagabi mana manda nabi karu lawai hagabi kamalo, manda bu kamigoni. Tígua lalu, Ina Mana lowini ngagoha bi mana bibahende manda bulenebi henene hangu lai holenebi ngago yu kamalo, manda bu kamigoni.
ROM 2:21 Tígua maru lawai haramiligo tíninaga biagago lalu mbira nalaramiligo irane agibe. Tígua mana lawai halu howa, Mbirale page nabibe, lalu lawai haramiligo tíni page naberamilini.
ROM 2:22 Tígua lalu, Wali agali kayu nayabe, laramiligo tíni kayu nayaramilini. Mbirale tara tarahondo bi pupu wiaga karu tí handabe manga haramiligo tíni mbirale tara tarahondo bi pupu wiaga anda kagoha howa kayu naberamilini.
ROM 2:23 Tígua lalu, Ina Ngode Datagaliwabenaga Mana lowini ngago manda bidamagoni, lowa mine halu, Ina hangunaga ngago, laramiligo. Wali agali tagira karume Ngode Datagaliwabe mege bilo ibunaga mana napuguaramilini.
ROM 2:24 Anduane Homogonaga mbugani lo ngago ogo, Yu wali agali tígua bialu kamigome Yu wali agali ndo tara tara karume Ngode Datagaliwabe mege bialu kagoni, lalu gilibu nga.
ROM 2:25 Mana lowini ngagome bibe lo ngadagua bialu howa dongone podo mabu biagane mana bulene karulape. Anigo Mana ogoni bibe lalu lo ngago puguarimiyagua dongone podo mabu biagane mana bulene nakarulape.
ROM 2:26 Yuali ndo agali tara mbira dongone podo mabu nabini kago ibugua Mana lowini ngagome bibe lo ngadagua biyagua Ngode Datagaliwabehanda agali ogoni ibubi dongone podo mabu bini tí ale dege ka manda bulebira ndobe.
ROM 2:27 Tígua Mana lowini ogoni gilibu ngago dongone podo mabu bialu ha kamigo howa Mana ogoni pugualu kami. Anidago nde dongone podo mabu nabi karume Mana ogoni lo ngadagua bialu howa Ngode Datagaliwabehanda godi larangi tigua, Yuali tí nakarulapeore bialu harimida, lalu walia holebira.
ROM 2:28 Anidago Yuali heneneoreru dongone podo mabu henemane bini mbira ai kabe. Dongone bame tagirahayagi hangu podo mabu bini kago ibu Yuali heneneore ndo ka.
ROM 2:29 Mbirali ibunaga bu habane Ngode Datagaliwabehondo loma bia ho hene kago ibu Yuali heneneore ka. Biabe ogoni birago Mana lowini ngagome biaga ndo Ngode Datagaliwabe Dinini ibuni biaga ka. Agali ogonibigo ibunaga mini agali yangoneme mo yaraga haga ndo Ngode Datagaliwabehanda mo yaraga haga ka.
ROM 3:1 Ani biagadago Yu wali agalime wali agali tara tara karu bolangua holenaga mbira ngabe. Dongone podo mabu biagane mana galone mbira ngabe.
ROM 3:2 E̱ wiaore bida ndobe. Mbira ogo Ngode Datagaliwabehanda ibunaga bi mana Yu wali agalime mo dunubia ho yu helo tihondo mini.
ROM 3:3 Ani binigo ti marume Ngode Datagaliwabe mitangi bialu mini bilina nahenedane handarimayagua iname agua lami̱yabe. Ti ani birago hondowa Ngode Datagaliwabe ibuguabi mini bilina naholebira lolene ngabe.
ROM 3:4 Ani ndoyago. Wali agali ti bibahendeme ke̱ hai haga kayaguabi Ngode Datagaliwabe ibu henene dege laabo haga kagoni. Anduane Homogonaga mbugani lo ngago ogo, Í̠na bi larego bibahende tigatiga hangu larili lalu walia holene nga. Tigua í̠ baba godi lole manda biyagua í̠ bolanguaore holene nga, lalu gilibu nga.
ROM 3:5 Iname ko beramagome Ngode Datagaliwabenaga tigabi bulene panigiore walia hayagua agi manda bibehe kamabe. Ngode Datagaliwabehanda iname ko birimagonaga pani ngiragola ibu nakarulape bira labehe holeberamabe. Dindi wali agalime bi laralidagua ogoni laro.
ROM 3:6 Ani nalabeheore. Ngode Datagaliwabe ibu tigabiore ndo kayagua ibugua wali agali bibahende agua mo daba ki bulebe.
ROM 3:7 Anidago i̱naga ke̱ holeneme Ngode Datagaliwabenaga henene lolene ngago panigiore walia helo lowa emene bogo para halu berogola Ngode Datagaliwabe ibunaga mini mo yaraga hayagua i̱ ko biaganaga pani nolene irane aginagadabe.
ROM 3:8 Ogonidagua manda bu kamayagua Ngode Datagaliwabenaga mini mo yaraga holene wilo ina ko bima lolene ngabe. Wali agali marume, Polohanda ani lalu ka, lowa i̱ mege biya. Ani biragonaga ti pani nolene ngadagua nolebiraore.
ROM 3:9 Anidago wali agali tara tara karu ale ndo ina Yu wali agali bayale kamabe. Ani nalabeheore. Ina Yu wali agali kamarubi wali agali tara tara karubi ta nabi ina bibahendeore kome bope hai henego kama lalu abale langirugoni.
ROM 3:10 Anduane Homogonaga mbugani lo ngago ogo, Wali agali mini tigabiwi mbira naheore.
ROM 3:11 Mini bayale gigabiwi hagabi Ngode Datagaliwabe mini yaraga hoa hagabi mbira naheore.
ROM 3:12 Wali agali bibahendeme Ngode Datagaliwabe erembira mialu piai haga ka. Ti bibahende habane nabulene hangu bu hama peda. Bayale biaga mbirali naheore.
ROM 3:13 Tigua wali agali homelonaga bi lahondo hagabi tinaga hégeme ke̱ gibi hagabi homelo bolene bi puya tomia palego ale tinaga ne hambuha howa tagira ibagabi
ROM 3:14 ha hiriribiore holene tinaga ne harigaha to̱laihebi ka.
ROM 3:15 Tigua wali agali mo tandaga holebi homelo bolebi abale manda biaga ka.
ROM 3:16 Ti poragoha pialu ko dege bima puabo haga ka.
ROM 3:17 Mo palia holenaga bulene mbira manda nabiniore ka.
ROM 3:18 Ngode Datagaliwabehondo mogolo holenebi manda nabiore ka, lalu gilibu nga.
ROM 3:19 Mana lowinigo bibahende ngago wali agali mana ogoni andaneha karunaga lo nga manda bu kama. Ani manda buwa wali agalime, Ina Mana ogoni manda nabi harima, nalelonaga Ngode Datagaliwabehanda wali agali dindi bibahendeni karunaga dabagane helo Mana ogoni ngagome walia ho ngagonigo manda bu kama.
ROM 3:20 Anigo mbiralime Mana lowinigo ogonime, Bibe, lo ngadagua biai hayagua Ngode Datagaliwabehanda ibu mini tigabiwi ka nalaga ka. Mana lowini ngagome ledago ogo, Wali agali ta nabi ko biaga kami, lalu walia ho nga.
ROM 3:21 Anigo áyu ogoni Ngode Datagaliwabehanda wali agali agua biragola mini tigabiwi ke laganegonaga hariga walia ho nga. Ogoni lalu mana bulene lo ngagome bulene mbira ogoniha nawiore. Mosese heneyangi Mana lowini ngagomebi Ngode Datagaliwabe mana latagi hagarumebi hariga ogoni walia henego nga.
ROM 3:22 Ani binigo Yasu Kerisohondo mini mbiraore wu kago hondowa Ngode Datagaliwabehanda wali agali ogoni ibu mini tigabiwi ka laga ka. Wali agali bibahende Yasu Kerisohondo mini mbiraore wu karu tihondo Ngode Datagaliwabehanda ani laga ka. Ina wali agali bibahende ta nabi ko birimagome ina pele ngulene Ngode Datagaliwabe kagoria kaundiaore kama.
ROM 3:24 Ani bu kamagonaga Ngode Datagaliwabehanda Keriso Yasuha howa ibunaga biamogo bia holene turu halu bame ngiragome mini tigabiwi ke laga ka. Keriso Yasu ibugua ti golope haga ka.
ROM 3:25 Keriso Yasu ibu homaragome ina wali agalinaga ko domolene henge wilo lowa Ngode Datagaliwabehanda ibu loma bia ho hene. Kerisohondo mini mbiraore wirarunaga ko Ngode Datagaliwabehanda domo wahelo ani loma bia ho hene. Ibugua ani binidagoni irane ibu mini tigabi kago walia holenaga ani bini. Alaore wali agalime ko biyago hondowa Ngode Datagaliwabehanda la nabi ibu mini timbuniwi howa ema nabi hene. Ai áyungi Ngode Datagaliwabehanda ibunaga tigabi holene walia halu wali agali bibahendeme ko birimaru ala nale henego áyu lalu ka. Ibugua ogonidagua bialu ibuni tigabiore ko lalubi Yasuhondo mini mbiraorewi karuhondo, Tí mini tigabiwi kami, lalubi walia haga ka.
ROM 3:27 Anidago ina mine aginaga holebe. Mine holene irane nawiore. Nawioredago irane agibe. Mana lowini ngagome, Bibe, ledadagua wali agalime biaganagabe. Ogoninaga ndo. Iname Yasuhondo mini mbiraore wu kamagonaga hangu.
ROM 3:28 Wali agalime Mana lowini ngagome, Bibe, lo ngadagua biai haragola ndo tigua Yasuhondo mini mbiraore wu kagola hangu Ngode Datagaliwabehanda, Tí tigabiwi kami, laga kago manda bidama.
ROM 3:29 Be Ngode Datagaliwabe ibu Yu wali agalinaga hangu kabe. Ibu wali agali tara tara karunagabi kagoni ndobe. Aniorego ibu bibahendenaga Ngode Datagaliwabe kagoni.
ROM 3:30 Ti bibahendenaga Ngode Datagaliwabe mbiraore ibuni dege kago ibugua Yu wali agalibi wali agali tara tarabi bibahende ta nabi Yasu Kerisohondo mini mbiraore wu karuhondo, Tí mini tigabiwi kami, laga ka.
ROM 3:31 Ani biagadago iname mini mbiraore wulene ogoni mo tene halu Mana lowini ngago mo waharamabe. Ani nalabeheore. Iname ani beramagome Mana lowini ngago mo hongo harama.
ROM 4:1 Ogonidagua manda buwa iname inanaga mamali Abarahama mitangi bialu agi labehe kamabe. Ibugua agi bialu henebe.
ROM 4:2 Ibugua biabe biyago hondowa Ngode Datagaliwabehanda ibuhondo, Í̠ mini tigabiwi ke, lenedale ibugua i̱nime birugoni lowa mine holene irane ngale. Ani nalabeheore. Ibugua Ngode Datagaliwabenaga deni howa i̱nime birugoni lowa mine holene irane nawiore ndobe.
ROM 4:3 Anduane Homogonaga mbugani lo ngago ogo, Abarahamahanda Ngode Datagaliwabehondo mini mbiraore wini. Ani wu heago hondowa Ngode Datagaliwabehanda, Ibu mini tigabiwi ka, lenego gilibu nga.
ROM 4:4 Wali agali biabe biragohondo yolo miaga. Yolo ogoni turu halu bame ngiyadalo manda nabi biabe birugonaga yolo ogoni ngiyadalo manda biaga.
ROM 4:5 Mbiralime ibuninaga hongome mbirale bigi berogome ibu mini tigabiwi ka lelo lowa mo tene nahe Ngode Datagaliwabehondo mini mbiraore wulene mo tene ho kayagua Ngode Datagaliwabehanda ibu ani bu kago hondowa o biagohondo, Í̠na ko biri, lolene winigo la nabi, Í̠ mini tigabiwi ke, laga ka.
ROM 4:6 Mbirali ibu mini tigabiwi ka lelo ibugua mana bayale bigi bulenego mo tene nahe kagohondo Ngode Datagaliwabehanda, Í̠ mini tigabiwi ke, laragola turu holene ngago ogoninaga Debidihanda bi lenego ogo,
ROM 4:7 Marume mana ko biniru Anduane Homogohanda domo wahalu mana liahe binirubi domo wahai henego ti turuore ho ka.
ROM 4:8 Mbirali ibugua ko biyago Anduane Homogohanda lone mitangi bu dai nabiaga kago ibu turuore ho ka, lenego gilibu nga.
ROM 4:9 Debidihanda turu holene o layadagoni dongone podo mabu biagane mana biaga karu ti hangunaga lo ngabe. Ani ndo. Dongone podo mabu biagane mana nabini karunagabi heba lo nga. Irane i̱na Anduane Homogonaga mbugani lo nga lalu larugo ogo, Abarahamahanda Ngode Datagaliwabehondo mini mbiraore wini. Ani wu heago hondowa Ngode Datagaliwabehanda, Ibu mini tigabiwi ka, lene, lalu gilibu nga.
ROM 4:10 Abarahama ibu mini mbiraore angi howa winibe. Ibu dongone podo mabu bihabe be nabihabe. Mani ndo alaore wu hene.
ROM 4:11 Ibu dongone podo mabu mani bini. Abarahama ibunaga dongone podo mabu binigo irane ibu mini mbiraore wu heago hondowa Ngode Datagaliwabehanda, Ibu mini tigabiwi ka, lene lalu mani manane ogonime walia hene. Ani binigo dongone podo mabu bini nabibi wali agali bibahende ta nabi Ngode Datagaliwabehondo mini mbiraorewi karuhondo ibugua, Mini tigabiwi ke, leneru tinaga mamali Abarahama hene ka.
ROM 4:12 Ogonidagua dongone podo mabu bini karu tinagabi mamali Abarahama dege ka. Ti dongone podo mabu biyagola tinaga mamali Abarahama ibu hene ndo. Abarahama ibu dongone podo mabu nabi howa ala Ngode Datagaliwabehondo mini mbiraore wu henedagua tiguabi ani wu hayagola ibu tinaga mamali hene.
ROM 4:13 Ngode Datagaliwabe ibugua Abarahamahondo lalu, Í̠bi í̠ aguanenebi tíhondo dindi bibahende ngulebero lalu, lowini. Ibugua bi ogoni lowinigo irane Abarahama ibu Yualinaga Mana lowini ngagome, Bibe, ledadagua biyago hondowa ndo. Ibu mini mbiraore wu heago hondowa Ngode Datagaliwabehanda, Ibu mini tigabiwi ka, lowa ani lamialu lowini.
ROM 4:14 Ani lowinigo Ngode Datagaliwabehanda, Ngulebero, lalu lo ngago Mana lo wini ngagome, Bibe, ledadagua biagaruhondo mule kayagua nde wali agalime Ngode Datagaliwabehondo mini mbiraore wulene galone ndo halu Ngode Datagaliwabehanda, Ngulebero, lalu lo winigohabi hongo nawi degeda.
ROM 4:15 Mana lowini ngagome ko biragohondo Ngode Datagaliwabenaga keba holene mo yu anda ibaga. Anigo bi mana nalo wigoha wali agali karume bi napuguaga ka.
ROM 4:16 Ogoninaga Ngode Datagaliwabe ibugua Abarahamahondo, Ngulebero, lalu lowinigo Abarahamanaga aguaneneru ti bibahendenagabi lalu turu halu henene bame ngulebero lene. Ani lenego tene Abarahamahanda Ngode Datagaliwabehondo mini mbiraore pigane wu henegome. Ogoni miagago tene Mana lowini ngagome, Bibe, ledadagua bialu karuhondo hangu ndo. Ogoninaga Abarahama ibu Ngode Datagaliwabehondo mini mbiraore pigane wu henedagua wu karu tihondobi miaga dege ka. Tene Abarahama ibu Ngode Datagaliwabehondo mini mbiraore ala wu henedagua ina bibahendeme mini mbiraore mani wu kamagonaga mamali ibu hene ka.
ROM 4:17 Anduane Homogonaga mbugani lo ngadagua ogo, I̱na dindi tara tarani í̠ hameigini dewa tara tara karunaga mamali habelo heledo, lalu gilibu nga. Ani lowa gilibu ngago Abarahamahondo, Ngulebero, lalu lo winigoha hongo ngago tene Ngode Datagaliwabehanda bi lo winigome. Abarahama ibu mini mbiraore wu henego Ngode Datagaliwabe ogoni ibunioreme homeneru mo heya hagabi ibunaga bime mbirale ala nawiniru mo wia hagabi henego kagoni.
ROM 4:18 Abarahama ibu Ngode Datagaliwabehondo mini mbiraore wialu Ngode Datagaliwabehanda, Ngulebero, lalu lo wiyago ngulebira lowa mini dunubia ho habe naheore wiagolabi ngulebiraore manda buwa minime dunubia ho haabo hene. Ibu ani ho hayagome Anduane Homogonaga mbugani, Í̠naga aguanene dewaore yakundi li harini karunidagua holebira, lalu gilibu ngadagua lola halu ibu hameigini tara tara dewaorenaga mamali hene.
ROM 4:19 Abarahama ibu mali handari mbira (100) agima howa ibunaga minime lo mitangi bialu. I̱ tingini hongo nahe homene ale kogobi i̱ oneme gali taba hanabe nahe dege bedagobi, lo mitangi bialu ibu Ngode Datagaliwabehondo mini mbiraore wu henego hadowa hama dai nabi mini mbiraore hongo howa wia ho haabo hene.
ROM 4:20 Ibugua mini mbiraore wu henego wa nahe Ngode Datagaliwabehanda, Ngulebero, lalu lo wiyagonaga mini kira nawi ngulebiraore layadagua manda bu haabo ho hene. Ibugua Ngode Datagaliwabehondo mini mbiraore wu henegome ibuni mo hongo haabo hayagola howa Ngode Datagaliwabenaga mini mo yaraga halu hene.
ROM 4:21 Irane ogoni ibugua Ngode Datagaliwabehanda ibuhondo, Ngulebero, lalu lo wiyago heneneore ngulebira lo manda bu hene.
ROM 4:22 Anigo Abarahama ibu mini mbiraore wu heago hondowa Ngode Datagaliwabehanda, Ibu mini tigabiwiore ka, lene.
ROM 4:23 Ibu mini tigabiwiore ka, lalu gilibu winigo ogoni Abarahamanaga hangu lalu ndo gilibu winigo nga.
ROM 4:24 Ina Anduane Homogo Yasu homowa mo heya hene Ngode Datagaliwabe kago ibuhondo mini mbiraore weramagome ibugua, Tí mini tigabiwi kami, lalu lolebiraruhondo inanagabi heba lalu gilibu winigo nga.
ROM 4:25 Iname ko birimagonaga Ngode Datagaliwabehanda Keriso ibu homo aribia helo helene. Ani binigo Ngode Datagaliwabe ibugua inahondo, Tí mini tigabiwi kami, lolenaga Keriso mo heya hene.
ROM 5:1 Ani binigo iname Ngode Datagaliwabehondo mini mbiraore wirimagola ibugua inahondo, Tí mini tigabiwi kami, lene kamago ina Anduane Homogo Yasu Kerisoha howa ina Ngode Datagaliwabela mo palia henego kamagoni.
ROM 5:2 Iname Ngode Datagaliwabehondo mini mbiraore wu hemago hondowa Yasu Kerisohanda ina Ngode Datagaliwabenaga biamogo bia holenehayagi áyu kamagoni holoma̱ya haru íbu heledagoni. Ani bu howa iname Ngode Datagaliwabenaga baya taraore holene karuloleberama lowa mini dunubiaho kamagonaga turu ho kamagoni.
ROM 5:3 Ani bu kamaria gendabi mbira ngangibi turu ho kamagonigo irane gendabi ngarume ina ema nabi howa hibu lalu holoma̱yanaga mo hibu lahaga nga manda bidamagoni.
ROM 5:4 Ema nabi howa hibu lalu holeneme Ngode Datagaliwabehanda, Bayale bialu harimi, lolene mo yu anda ibaga. Ibugua ani laragome mini dunubia ho holene mo yu anda ibaga.
ROM 5:5 Mini dunubia ho holene ogonime ina mo taga nahagago irane Ngode Datagaliwabehanda ibu Dinini inahondo turu halu bame ngiyago ibugua Ngode Datagaliwabenaga gubalini holene inanaga bu miniha to̱lai heledagome.
ROM 5:6 Inaneme hongo halu mbira bibe naheore hemaria Ngode Datagaliwabehanda horo pongo bo winiangi Kerisohanda ko biaga hemarunaga homo aribia hene.
ROM 5:7 Mana tigabi biaga kago ibu nahomelo mbiralime lalu, I̱na homo aribia haro, lolene mbira naholebira. Wali agali dara howa biamogo biaga kago ibu nahomelo mbiralime lalu, I̱na homo aribia haro, lolene taibiore.
ROM 5:8 Anigo ina ko hemago hondowa Ngode Datagaliwabehanda inahondo ibunaga gubalini timbuni holeneore walia halu ina homai holilono Keriso ibugua homo aribia hene.
ROM 5:9 Ibugua inanaga homo aribia hayagome Ngode Datagaliwabehanda inahondo, Tí mini tigabiwi kami, lelo mo wia hayagoni. Ani biyagome Ngode Datagaliwabehanda godi lalu ko biragohondo ibunaga keba holene walia harangi Kerisohanda ina pele ngialu inanaga la haganeore holebira.
ROM 5:10 Ina Ngode Datagaliwabela waitigi ho hemaria ibugua ibu Igini homo aribia helayagome ina mo ibu damene helene. Anigo áyu ina Ngode Datagaliwabenaga damene kamago Keriso ibunaga holeneme ina au pele ngulubada.
ROM 5:11 Ogoni dege ndo Anduane Homogo Yasu Keriso ibugua ina mo Ngode Datagaliwabenaga damene helenego kama. Ibuha howa Ngode Datagaliwabehanda ani binigonaga ina turu ho kamagoni.
ROM 5:12 Agali mbira hanguha howa ko bulene dindi bibahendeni anda ibini. Ibugua ko binigome homolene yu anda ibini. Ani binigo wali agali bibahende ko hai hene kamago homoleneme ina bibahende minai ka.
ROM 5:13 Mana lowini ngago nalowiha howa ko bulene dindi bibahendeni wiame ho wini. Mana ogoni nalowiha howa wali agalime ko binigo Ngode Datagaliwabehanda nadagale hene.
ROM 5:14 Ani binigo pigane Adama heneangi howa hama ibalu Mosese heneangi wali agali bibahende dombene ogoniha heneru homoleneme minai hene. Ngode Datagaliwabehanda, Nabibe, leago Adamahanda pugualu ko biyadagua nabini hearubi heba homoleneme minai hene. Agali mbira maha ogobi ibulebira lalu walia halu Adama ibu ala ibini.
ROM 5:15 Anigo agali kira ogoni labo libu ogobi labo labo ndo tara taraore hene. Irane Ngode Datagaliwabehanda turu halu inahondo bame ngiyago Adamahanda ko binigo ale ndo. Adamahanda ko yu anda ibinigome wali agali dewaore homai hene. Ngode Datagaliwabenaga biamogo bia holene ibuni turu halu bame ngiyago goaile baya gibiore nga. Agali mende Yasu Keriso ibunaga biamogo bia holeneha howa Ngode Datagaliwabehanda wali agali bibahendehondo ngiyago goaile gibiore nga.
ROM 5:16 Ngode Datagaliwabehanda turu halu bame ngiyago ogoni agali mbira biagome ko binigobi mandagi ndo taraore nga. Tarago irane Adamahanda ko mbira binigome Ngode Datagaliwabehanda godi lowa, Ko birida, lene. Ai maha wali agali dewaore ko bialu harimago Ngode Datagaliwabehanda dara halu biamogo bia holene walia halu ibugua, I̱na tí mo bayale haru, lolene nawi howa lene.
ROM 5:17 Bi ogo heneneore agali mbirame ko biyagola wali agali bibahende homoleneme minai henego kama. Agali mende Yasu Keriso ibugua biyago Adamanaga ko ogoni biyagobi ndo ibugua biyago goaile baya gibiore anda hene. Ngode Datagaliwabenaga biamogo bia holene goaile baya gibiore ngago ibugua wali agali ina bibahendehondo ta hayagobi mini tigabiwi holene turu halu bame ngiyagobi ina Keriso heba kamago howa hongo holeberama.
ROM 5:18 Ani howa Adamahanda ko mbira binigome Ngode Datagaliwabehanda wali agali bibahendehondo, Tí ko kami, lolene mo winidagua Kerisohanda tigabi mbira biyagome wali agali bibahende golope hai halu tihondo holene gahenge miaga.
ROM 5:19 Agali mbira ibugua Ngode Datagaliwabehanda, Nabibe, leago pugualu ko binigome wali agali bibahende mo ko hai hene. Ogonidagua biyagola agali mende ibugua Ngode Datagaliwabehanda layadagua biyagome Ngode Datagaliwabe ibugua wali agalihondo, Tí mini tigabiwi kami, lelo ani lolene mo wini.
ROM 5:20 Ko bulene koorene ko ngago walia hole Ngode Datagaliwabehanda Mana lo winigo ngini. Ko bulene koorene ko hayagola Ngode Datagaliwabenaga biamogo bia holene ngago ko bulene koorene ko henedagua ndo timbuniorene timbu ho nga.
ROM 5:21 Anigo wali agali homolene wiagome ko bulene hongo ho winidagua Ngode Datagaliwabehanda, Tí mini tigabiwi kami, laragome ibunaga biamogo bia holene hongo ho nga. Ngode Datagaliwabehanda biamogo bia holene ogonime ina haru halu inanaga Anduane Homogo Yasu Kerisoha howa haabobo holene yu holoma̱ya haru halu ka.
ROM 6:1 Ani binidago manda buwa iname agua labehe kamabe. Ngode Datagaliwabehanda ina biamogo bia ho wiaabo helo lowa ina ko bia to halu haabo habehe kama labehebe.
ROM 6:2 Ani nalabeheore. Ina kohayagi homarimago lone ko bialu haabo agua habehe kamabe.
ROM 6:3 Iname Keriso Yasu ibuha ho gimbu bialu baboraya birimangi ibu homayadagua inabi ibuha howa homarimagoni lo manda nabi kamibe.
ROM 6:4 Ina baboraya birimagonime Keriso Yasu ibu heba homalu hora hamaga harimagoni. Ani birimago buwa Keriso ibu Abanaga hongo taraore holeneme ibu mo heya hayagola heyalu piyadagua inabi holene gahengeni howa heyalu pole holene nga.
ROM 6:5 Ogonigo Keriso ibu homayadagua homarimagome ina ibuha ho gimbu bu kama. Ani ho gimbu bu howa ibu heyu kadagua inabi heyu holeberama.
ROM 6:6 Ko bulenenaga garabaya biabe ale biahaga naholoma̱ya iname ko bua holenenaga hongo Kerisohanda bo tongo lene. Ani biyagome inanaga mini ko ala tawe ngamago Kerisohanda ibuni heba ira bangani ba para ho wahenego ogoni manda bu kamagoni.
ROM 6:7 Ani binigo mbirali homaragola ko bulenenaga hongome ibu lone haru dai bibe nahe holebira.
ROM 6:8 Ina Keriso heba homarimago ina ibu heyu kadagua ibu heba holeberamago manda bu kamagoni.
ROM 6:9 Irane Keriso ibu homalu mo heya henego lone nahomolebiraore. Homoleneme ibu lone yani habe nahe holebira manda bu kama.
ROM 6:10 Ibu homenego ko buleneme ibu haru habe nahe nga. Ani binigo ibu áyu kagoni Ngode Datagaliwabela mbiraore howa haga ka.
ROM 6:11 Ogonidagua tígua, I̱ ko bulenehondo homene. Keriso Yasuha ho gimbu bu howa Ngode Datagaliwabela mini mbiraore howa kogoni, manda bulene nga.
ROM 6:12 Ani bialu tingini áyu kamigoni homaganenaga kamigo tíni mini kome hame ledadagua bulenaga ko buleneme tí haru helo helolene nawi.
ROM 6:13 tínaga tingini aria mbiragome ko bilonaga kohondo namilimu. Tí wali agali homaganehayagi hemiria holene gahengehayagi haru dai binigo hagadagua halu tíni Ngode Datagaliwabehondo lomabu milimu. Ani mialu howa tígua mana tigabi hangu bulenaga tínaga bulenerubi tínibi bibahende Ngode Datagaliwabehondo lomabu miai halimu.
ROM 6:14 Mana lo ngagome tí haru ka ndo. Ngode Datagaliwabenaga biamogo bia holeneme tí haru kago manda buwa ko buleneme tí haru helo helolene nawi.
ROM 6:15 Anigo mana lo ngagome ndo Ngode Datagaliwabenaga biamogo bia holeneme ina haru kago manda buwa iname ko bulene karulapebe. Ani nakarulapeore.
ROM 6:16 Tígua garabaya biabe ale bia haga hole mbiralihondo tíni muwa o biagome laradagua birimiyagua nde tínaga anduane ogoni ibu holebira. Ko bulenenaga bia harimiyagua nde tínaga anduane ogoni howa homolene wiaabo holebira. Ngode Datagaliwabehanda bia laradagua birimiyagua nde tínaga anduane ibu howa ibugua, Tí mini tigabiwi kami, lolene wulebirago manda nabi kamibe.
ROM 6:17 Ani ngago manda buwa ala tí ko bulenenaga garabaya biabe ale bia haga harimigo ai áyu mana lawai hayago hale howa bi henene ngago minime yu tiga bu kamigoni. Anigo iname Ngode Datagaliwabehondo turu halu ka̱i̱ lami̱ya.
ROM 6:18 Tí ko bulenenaga garabaya biabe ale bia haga hemiria Ngode Datagaliwabehanda ko bulenenaga hongo tongolope halu tí golope howa mana tigabi bilimulo tí mo Ngode Datagaliwabe ibunaga biabe bia haga helene.
ROM 6:19 tínaga mini gedaore kamigo manda buwa i̱na bi taibi ndo iname beramaligoria howa laro. Ala tígua mana dodohebi koorene ko wiarubi bialu tíni mo garabaya biabe ale bia haga halu tínaga bulenerubi tínibi bibahendeore ko wiaruhondo miai halu harimigoni. O birimidagua dege áyu tígua mana tigabi buleneme tí biabe mo bia haga bialu howa tínaga bulenerubi tínibi bibahendeore mana tigabi bulenehayagi loma bia ho holene nga.
ROM 6:20 Tí ko bulenenaga garabaya biabe ale bia haga harimiangi Ngode Datagaliwabenaga tigabi bulene bia nabi harimi.
ROM 6:21 Anigo mana ala bialu harimirunaga áyu taga ho kamigo ala bialu harimiangi mana o biagoniha howa lini bayale mbira agi handa walia harimibe. Mana o biaruni aleme homolene hangu yu anda ibaga.
ROM 6:22 Anigo áyu Ngode Datagaliwabehanda tí ko buleneha howa golope hayagola tí ibunaga biabe bia hagane wali agali kami. Ani kamigo howa tíni Ngode Datagaliwabehondo loma bia ho howa mbirale bibahende beramigo tene ibu mitangi bialu lini ogoni dalu kamigoni. Ani bu howa haabobo holene yu kami.
ROM 6:23 Irane ko bulene emena homolene nga. Ani manda buwa Ngode Datagaliwabehanda haabobo holene turu halu bame ngiagago inanaga Anduane Homogo Keriso Yasu ibuha ho gimbu bu howa yu holene nga.
ROM 7:1 I̱ hamene mbaliniru-o tígua mana lo ngaru manda bu kamigo i̱na mana áyu langerogo manda buleberamiore. Mbirali ibu dindini kataginaga dege mana lo ngarume ibu haru howa bulene ogo nga nabulene ogo nga lalu walia haga.
ROM 7:2 Ogoni ogodagua wali mbira agali one biruwa ibu agalini nahome kangi ibu agalinila biraabo helo mana lo ngagome wali biago dariba howa ibu agalinila berelaga. Ai ibu agalini homayagua mana lo ngagome ibu dariba hayago golope haragola wali biago hibaria biraga.
ROM 7:3 Anigo wali ogonime ibu agalini nahome helowa agali mendela pu bedayagua wali ogoni ibu agali kayu biaga beda. Ai ibu agalini homeneyagua wali hibaria biruwa ibu agali mende piyagua o karulape birulebira.
ROM 7:4 I̱ hamene mbaliniru-o tíbi ogonidagua dege kami. Tígua Mana lowini ngagohondo tí homene ale howa Keriso ibunaga tingini aria kami. Ani howa áyu ina Ngode Datagaliwabenaga biabe galone bialu holoma̱ya Ngode Datagaliwabehanda Keriso mo heya hayago tí ibunaga kami.
ROM 7:5 Anigo inanaga mini ala tawe ngamagome ina haru hayangi Mana lowini ngagome inaha howa ina ko buluma̱ya mo buahe haya. Ani mo buahe hayagola ina homolenenaga biabe bialu harima.
ROM 7:6 Mana lowini ngagome ala ina dariba henego áyu Ngode Datagaliwabehanda ina golope hai hayagola Mana ogoni lo ngagohondo homene ale kama. Mana ala tawe gilibu wini wiagonaga bialu harimago áyu nabi mana gahenge bialu kamago Ngode Datagaliwabe Dinini ibugua mo bia halu kagoni.
ROM 7:7 Anigo agua manda bibehe kamabe. Mana lowini ngago ibuni koda manda bibehe kamabe. Ani manda bibe naheore. Mana lowini ngagome ko ogo ale nga lalu i̱ mo manda bia hene. Mana lowini ngagome lalu, Mendealinaga mbirale ngago dimagoli nahabe, ledago nalo winidale i̱ dimagoli holene ogoni manda nabi kole.
ROM 7:8 Dimagoli nahabe, lalu lo wiagoha henge wiaria handa walia howa ko buleneme i̱ha mbirale tara tara dimagoli holiya mo hamela haya. Mana nalo wiangi ko bulenego ibu hongo nahe homene ale wini.
ROM 7:9 Mana lo wiagome bulene ogo nga nabulene ogo nga lalu nalo wiaha howa i̱ dére hagadagua haabo haru. Ai bulene ogo nga nabulene ogo nga lalu lowini wiago lo manda birugola ko buleneme i̱ha hongo halu heyaya.
ROM 7:10 Ani hongo howa i̱ bo home laya. Ani buwa bulene ogo nga nabulene ogo nga lalu mana lowini wiagome holene gahenge ngiagagome i̱ bo home laya.
ROM 7:11 Bulene ogo nga nabulene ogo nga lalu lowini wiagoha ko buleneme henge wiaria handa walia howa i̱ mo hondo halu bo home laya.
ROM 7:12 Mana lowini ngago Ngode Datagaliwabehanda lowinigome debeneore nga. Bulene ogo nga nabulene ogo nga lalu lowiago Ngode Datagaliwabehanda lowinigome debeneorebi tigabibi bayalebi nga.
ROM 7:13 Anigo mana bayale ogonime i̱ bo home layabe. Ani labe naheore. Ko buleneme i̱ bo home laya. Wali agalime ko ogo aleoreda manda bilo ko buleneme mana bayale ogoniha howa i̱ bo home laya. Anigo bulene ogo nga nabulene ogo nga lalu lowini wiagome ko ibu koorene ko nga lalu mo walia haga nga.
ROM 7:14 Mana lowini ngago tene Ngode Datagaliwabe howa longago manda bu kama. Ani manda buwa i̱ agali mini kowi kogoni howa ko bulene ngagome i̱ dariba kagola howa kome bia laradagua biruli.
ROM 7:15 Ani biruligo ogo ale bero manda nabi howa biruli. I̱na bua birago manda bidogo nabiruli i̱ hame naledogo bu aribia haruli.
ROM 7:16 I̱na nabuabi ngago beroangi Mana lowini ngago tigabi nga manda bido lalu walia haruli.
ROM 7:17 Ani biruligo ogoni i̱nime ndo biruli mini ko i̱ha ngagome biaga.
ROM 7:18 i̱naga mini ala taweha mbirale mbira bayale nawigo manda bu ko. Bayale bua kogo howa bibe nahe kogoni.
ROM 7:19 Bayale bua kogo nabiruli ko i̱ nabuabi ngago bu aribia haruli.
ROM 7:20 Mbira nabuabi ngago biruyagua i̱na ndo mini ko i̱ha ngagome biaga.
ROM 7:21 Anigo bulene mbira i̱ha ngago handa walia ko. Bayale bua kogoni howa ko bulene hangu dabaabo haruli.
ROM 7:22 Ngode Datagaliwabenaga mana lowini ngago mitangi bialu i̱ bu habaneha turu biaga.
ROM 7:23 Bulene tara mende i̱ha ngaria hendedo. Bulene ogonime i̱ minime hame ledagonaga bulene ogonila wai biaga ka. Bulene tara mende ogonime ko bulene i̱ha biabe bialu kagome i̱ dariba helo mo dariba haga.
ROM 7:24 Ai i̱ agali turu naheore kogoni. I̱ dongone áyu kogo homolene ngagoria haru porago napoliya aiwa pele ngibehe kabe.
ROM 7:25 Ngode Datagaliwabehanda Anduane Homogo Yasu Kerisoha howa pele ngulebirago ibuhondo turu halu ka̱i̱ lalu ko. Anigo i̱ ogobi ko. I̱nime i̱naga miniha mitangi hangume Ngode Datagaliwabenaga mana lowini ngago mitangi bibehe howa i̱naga mini ala taweme ko bulene hangunaga biabe bialu kogoni.
ROM 8:1 Anigo áyu wali agali Keriso Yasuha ho gimbu bu karu Ngode Datagaliwabehanda ti heba godi nalolebira.
ROM 8:2 Irane ogo Ngode Datagaliwabe Dinininaga bulene ngagome ina Keriso Yasuha ho gimbu bu kamagola holene gahenge ngiaga ka. Ko bulenenagabi homolenenagabi bulene wiagome i̱ dariba hearia Ngode Datagaliwabe Dinininaga bulene mana wiagome i̱ golope henego ko.
ROM 8:3 Wali agalinaga mini ala tawego gedaore ho winigo Mosese heneyangi Mana lowini ngagome mbira bibe nahe wiaria Ngode Datagaliwabehanda ibu Igini ibilayagome bini. Ani bialu Ngode Datagaliwabehanda mini ala tawe ko biagane wiagonaga godi lalu ko biagane ogoni wali agaliha wulene nawi lalu walia hene. Ani buwa ibu Igini ina ko kamago ale dege howa ko nabi inanaga ko birimago mo wahelo ibilene.
ROM 8:4 Ngode Datagaliwabehanda ogonidagua binigo irane ina mini ala tawe mo tene haramaligome ndo ibunaga Dinini mo tene ho kamarume Mana lowini ngagonaga tigabi bulene biai holoma̱ya ibugua ani bini.
ROM 8:5 Wali agali tinaga mini ala tawe mo tene ho karu tinaga mitangi bulene mini ala tawenaga hame ledagome tini haru haga. Wali agali Ngode Datagaliwabe Dinini mo tene ho karu tinaga mitangi bulene ibunaga Dinini ibu hame ledagome ti haru haga.
ROM 8:6 Mini ala taweme tínaga mitangi bulene haru helowa harimigome homolene yu anda ibaga. Ngode Datagaliwabe Dinini ibugua tínaga mitangi bulene haru helowa harimigome holene gahengeorebi mo palia holenebi yu anda ibaga.
ROM 8:7 Mbirali mini ala taweme ibunaga mitangi bulene haru helowa kayagua ibu Ngode Datagaliwabenaga mana lo ngago nabibehe howa nabiaga ka. Anigo ibugua Ngode Datagaliwabela waitigi ho ka.
ROM 8:8 Wali agali tinaga mini ala taweme hame laradagua biaga karume Ngode Datagaliwabe mo turu habe nahe ka.
ROM 8:9 Ngode Datagaliwabe Dinini tíha henene kayagua tínaga mini ala taweme hame laradagua ndo Ngode Datagaliwabe Dinini ibugua hame laradagua bialu holeberami. Mbirali ibuha Keriso Dinini naheyagua ogoni ibu Kerisonaga ndo ka.
ROM 8:10 Anigo ko buleneme tínaga tingini bo homolebirago Keriso tíha kayagua Ngode Datagaliwabe Dinini ibugua tíhondo holene gahengeore ngiaga ka. Irane Ngode Datagaliwabehanda, Tí mini tigabiwi kami, lene kamigo.
ROM 8:11 Ngode Datagaliwabehanda Yasu homayagola mo heya henego ibu Dinini tíha kayagua Keriso homayagola mo heya henedagua dege ibugua tínaga tingini homolebirago mo heya holebira. Irane Ngode Datagaliwabehanda ibu Dinini tíha kagome ani bulebira.
ROM 8:12 Anigo i̱ hamene mbaliniru-o ina dano ho kamago manda buwa mini ala taweme hame laradagua bialu holene nawi.
ROM 8:13 tínaga mini ala taweme hame laradagua bialu harimiyagua homoleberami. Ai Ngode Datagaliwabe Dinini ibugua tínaga ko beramiligo mo homa helo helarimiyagua tígua holene gahenge yu holeberami.
ROM 8:14 Wali agali Ngode Datagaliwabe Dinini ibugua haru helowa karu ti Ngode Datagaliwabenaga waneigini ka.
ROM 8:15 Ngode Datagaliwabehanda ibu Dinini ngiyago ibugua tí garabaya biabe ale bilimulo mo bia hagabi mo gi hagabi ndo ka. Ngode Datagaliwabe Dinini ibugua tí Ngode Datagaliwabenaga waneigini halimulo mo helaga ka. Ani helaragola iname Dinini ogoninaga hongoni howa Ngode Datagaliwabehondo, Aba i̱ Aba, laramili.
ROM 8:16 Ina Ngode Datagaliwabenaga waneigini kamago walia hole ibu Dininibi ina dininibi ho gimbu bu howa, Tí Ngode Datagaliwabe waneigini kami, lalu walia haga.
ROM 8:17 Ina Ngode Datagaliwabenaga waneigini kamago ibugua turu holene tara tara ibu waneigininaga wu kago inahondo ngulebira. Ani bialu Ngode Datagaliwabehanda Kerisonaga wia hene ngagobi Keriso ibu heba howa ina haru mandagi ngulebira. Keriso ibu tandaga nalu hayadagua inabi nalu harimayagua ina Keriso heba ibunaga bayale taraore holene mandagi karuloleberama.
ROM 8:18 Áyu tandaga nalu kamagobi naabo halu naholeberama. Awe Ngode Datagaliwabehanda inahondo bayale taraore holene walia halu ngulebirago tandaga áyu nalu kamago emene lowa bayale taraore holene timbuni gibiore ngulebira manda bu kogoni.
ROM 8:19 Ngode Datagaliwabehanda ibunaga waneigini kamaru mo walia helo mbirale ibugua wabiniru bibahendeme de hondoa howa hondo kagoni.
ROM 8:20 Mbirale bibahende Ngode Datagaliwabehanda wabiniru pani nai halu habane nabulene hai henego irane tinime ani bulene hame lalu hene ndo. Ti ko hai hayagola Ngode Datagaliwabehanda ani bulene manda bini. Mbirale bibahende Ngode Datagaliwabehanda wabiniru dindini togo biaganeme dariba ho ngaru horo mbirungi Ngode Datagaliwabehanda golope holebira. Golope holenebi bayale taraore holenebi ibunaga waneigini karulo kadagua uruni tibi mandagi howa karulolebira. Ogoninaga ina minime dunubia ho holene nga.
ROM 8:22 Mbirale Ngode Datagaliwabehanda wabiniru bibahendeme u̱lu̱ laabo halu walime gali taba honole biruwa tandaga nalu biragadagua u̱lu̱ laabo halu henego áyubi anidagua bialu haabo ka manda bidamagoni.
ROM 8:23 Mbirale Ngode Datagaliwabehanda wabiniru hangume ani lalu ka ndo inamebi lalu kama. Ibugua inahondo turu halu dewa bame ngulebirago aria pigane ibu Dinini ngiya. Ngode Datagaliwabe ibugua ina mo ibunaga waneigini halu inanaga bulenerubi inanebi bibahendeore golope hai helo kamatagi howa ani u̱lu̱ lalu kama.
ROM 8:24 Yasu Kerisohondo mini dunubia ho hemagola Ngode Datagaliwabehanda ina pele ngiya. Mbira hondole mini dunubia ho henego de handarimayagua mani mini dunubia ho holene nawiaga. Mbiralime mbirale de hendenego mani de hondole lowa mini dunubia ho haga aibe.
ROM 8:25 Iname mbirale deme nahende howa mini dunubia ho kamayagua ina ema nabi howa hondo holeberama.
ROM 8:26 Ogonidagua dege bialu ina hongo nahe kamaria Ngode Datagaliwabe Dinini ibugua biamogo bule ibaga. Iname Ngode Datagaliwabehondo bi agua lolebe toba ho kamagola ibunaga Dinini ibugua bime ndo minime lalu Ngode Datagaliwabehondo inanaga la haga ka.
ROM 8:27 Ani la halu howa Ngode Datagaliwabe Dinini ibugua Ngode Datagaliwabe hame ledadaguaore bialu ina Ngode Datagaliwabenaga wali agali kamarunaga la haga kagoni. Ani lagago wali agalinaga bu habaneha ngago ibugua de handagaore howa ibu Dinininaga miniha mitangi bidago manda biaga ka.
ROM 8:28 Ngode Datagaliwabehanda wali agali ibuhondo gubaliniherume biabe mbira irane bilo olene karu tihondo mbirale bibahende tara tara biaganego mani bayale helonaga hangu bigi biaga ka manda bu kama.
ROM 8:29 Ngode Datagaliwabehanda wali agali dabene karu ti ibu Igini ale helo daba bagi ho helenego irane ibu Igini ibuni wahene howa hamene mbalini dewa buhe aria helo helene.
ROM 8:30 Ani binigo Ngode Datagaliwabehanda wali agali daba bagi ho helene karu uruni ti olene. Ibugua olene karuhondo, Tí mini tigabiwi kami, lalu helene. Ani helowa ibunaga bayale taraore holene ti haru mandagi karulelo Ngode Datagaliwabehanda mo bimaga ho helene.
ROM 8:31 Uruni bibahende mitangi bialu ina agi manda bibehe kamabe. Ngode Datagaliwabe ibuni ina heba kagonigo ina baba waitigi ho habehe mbirali mbira ai kabe. Mbirali mbira naheore.
ROM 8:32 Ngode Datagaliwabehanda ibunaga Igini ngulene manga nahe howa inanaga homo aribia helo ngini. Ibu Igini ogonidagua nginigo bibahende ngulene ngaru turu halu bame ngulebiraore ndobe.
ROM 8:33 Wali agali Ngode Datagaliwabehanda dabene karuhondo, Tí ko kami, lalu lolene ai kabe. Mbirali naheore. Ngode Datagaliwabe ibunime, Tí mini tigabiwi kami, leneoredago.
ROM 8:34 Ngode Datagaliwabehanda ani lenego mbirali mbirame, Tí pani nolene nga, labehe ai kabe. Keriso Yasu ibu homa halu mo heya henego kago áyu Ngode Datagaliwabenaga gi tigahayagi pu biruwa ibugua Ngode Datagaliwabehondo inanaga la halu kago. Tí pani nolene nga, ani nalolebiraore.
ROM 8:35 Anigo Kerisohanda inahondo gubalini ho kago nahelo agileme ina mo dala hangu hangu haga bibehebe. Nabibeheore. Ga̱i̱ bibi hondolenebi genda yu holenebi mo tandaga holenebi garibilo holenebi yagibano holenebi mbirale hiriribi ngarubi homolenebi uruni bibahendeme ina mo dala hangu hangu haga nabibeheore.
ROM 8:36 Anduane Homogonaga mbugani lo ngago ogo, Ina Ngode Datagaliwabe í̠naga howa horo bibahendengi ina homolene hiriribi kaware ngagoria haabo kamagoni. Ina nogo sibi bole kagobi kamaria hondowa tigua ina mo tandaga haga ka, lalu gilibu nga.
ROM 8:37 Uruni ale handa walia harimayaguabi Keriso ibugua ina gubalini hene kago ibuha howa ina wayali holene gibiore yu kamagoni.
ROM 8:38 Keriso ibugua ina gubalini ho kago nahelo mbirale mbirame ina dala hangu hangu haga nabibeheore manda bu kogoni. Homolenemebi holenemebi nabibehe. Dahuliyali karumebi hari daligaha haru haga karumebi hongo holene yu karumebi nabibehe. Áyu kamangibi mani holeberamangibi nabibeheore.
ROM 8:39 Mbirale daligaha ngarumebi dindiha ngarumebi nabibehe. Anduane Homogo Yasu Kerisoha howa Ngode Datagaliwabenaga gubalini holene inanaga ngago nawilo Ngode Datagaliwabehanda mbirale bibahende wabiniru mbiraoreme ina mo dala hangu hangu nahabeheore wulebira.
ROM 9:1 Bi áyu larogo heneneore laro. I̱ Kerisoha ho gimbu bini kogo lalu ke̱ ndo haro. i̱naga mini Ngode Datagaliwabe Dinini ibugua haru kago mini ogonime i̱hondo heneneore lare lalu langiaga.
ROM 9:2 I̱ aria i̱naga Yu wali agali bibahende karu ti mitangi bialu i̱na genda timbuni handalu gubaliniha tandaga naabo halu ko. Ti Kerisohondo mini mbiraore wilonaga Ngode Datagaliwabehanda i̱ Kerisonaga kogonigo wahalu hariga koha polene ngale i̱na Ngode Datagaliwabehondo, Í̠na i̱nihondo ani bia, labehe kole.
ROM 9:4 Ngode Datagaliwabehanda ti ibunaga helo dabo helene. Ibugua ti mo ibunaga waneigini helowa ibunaga wá taraore holene tihondo walia hene. Ibugua tihondo ibunaga bi habo naloleneru lalu Mana lo wuwa tihondo mini. Tigua Ngode Datagaliwabehondo henene mitangi bialu ibunaga lotu lalu holene manda bu ka. Ibugua, Bulebero, lalubi, Ngulebero, lalubi lo ngago ti hale hene.
ROM 9:5 Ti Hiburu agali mini leneore henerunaga aguanene ka. Keriso ibubi agali hole daluwa ti ariaha hene. Ngode Datagaliwabehanda mbirale bibahende handame ho kago ibunaga mini yaraga haabobo helo hamelo ko. Ani bialu helo laro.
ROM 9:6 I̱na bi o larogoni Ngode Datagaliwabehanda, Bulebero, lalu lo ngago habo laya lalunaga ndo laro. Ibugua, Bulebero, lalu lo ngadagua bini. Irane Isaraele wali agali ti bibahende ndo maru dege Ngode Datagaliwabenaga wali agali ka.
ROM 9:7 Abarahamanaga aguaneneru ti bibahende ndo maru dege ibunaga waneigini ka. Ngode Datagaliwabehanda Abarahamahondo lalu, Aisaganaga aguaneneru dege í̠naga aguaneneru holebira, lalu lene.
ROM 9:8 Ani lenego dindi walime waneigini taba hanagadagua Isaraele aria taba henene karu ti Ngode Datagaliwabenaga waneigini ndo ka. Ibugua bi lalu lo ngadagua lola halu Abarahama aguaneneme taba henene karu ti Ngode Datagaliwabenaga waneigini ka.
ROM 9:9 Ogonigo ibuguabi lalu lo ngago ogo, Dai bulene tu harangi i̱ dai bulebero. Dai berogola Sara ibu igiri gali taba honolebira, lalu lo wini.
ROM 9:10 Ogoni hangu ndo bi mendebi laro. Lebeganaga igini kira henego libubi aba mbiraore ina mamali Aisaga dege hene.
ROM 9:11 Anigo Ngode Datagaliwabehanda manda bu henegodagua igiri mende dabenegome bilo ibugua Lebegahondo lalu, Igiri wahenegome igiri heyogonenaga biabe bia holebira, lene. Ngode Datagaliwabehanda bi ogoni igiri biago labo taba naheneha libugua ko bayalebi mbira nabiha howa lene. Anigo libugua biabe biyago hondowa ndo Ngode Datagaliwabehanda mende dabenegome ibugua ani bini.
ROM 9:13 Anduane Homogonaga mbugani lo ngago ogo, I̱na Yagaba gubalini halu Iso gubalini nahe haru, lalu gilibu nga.
ROM 9:14 Ani binidago manda buwa iname agi manda bibehe kamabe. Ngode Datagaliwabe ibu tigabi ndo harua manda bibehebe. Ani bibe naheore.
ROM 9:15 Ngode Datagaliwabehanda Mosesehondo lalu, I̱na biamogo bua biragohondo biamogo bialu dara holene walia hoa biragohondo dara halu haruli, lenego gilibu nga.
ROM 9:16 Ani biagago tene wali agalime hame laragomebi biragomebi ndo Ngode Datagaliwabe ibunaga dara howa biamogo buleneme ani biaga ka.
ROM 9:17 Irane Anduane Homogonaga mbugani Ngode Datagaliwabehanda Iyibinaga kinihondo bi lene ngago ogo, i̱naga hongo holene walia habelobi wali agali dindi bibahendeni karume i̱ manda bilobi i̱na í̠ kini habelo helaru, lenego gilibu nga.
ROM 9:18 Anigo Ngode Datagaliwabe ibunime dara howa biamogo bua birago biamogo bialu mini mo giambe hoa biragohondo mo giambe haga ka.
ROM 9:19 Ani larogo manda buwa tí mbiralime i̱hondo lalu, Ngode Datagaliwabehanda wali agalihondo, Í̠ ko biri, lalu agua labehe kabe. Ibugua hame ledadagua nabule aiwa labehe kabe, lolebira.
ROM 9:20 Tí mbiralime Ngode Datagaliwabehondo mangaba lalu ladai bule manda biriyagua í̠ ai kebe. Iba be dindime wabini ngagome ibu wabiaga biagohondo, Í̠na i̱ o ngogobi wabiridago irane aginagabe, nalagane.
ROM 9:21 Anigo be wabiaga biagome ibu hame laradagua be tara tara wabibehe ka ndobe. Dindi mbiraoregome dege budalu be mende debene galone timbuniorego bule wabialu be mende horo bibahende ta nabinaga wabialu ibuni hame laradagua bibehe kagoni.
ROM 9:22 Ngode Datagaliwabehanda binigo ogonidaguaore bini. Wali agalime manda bilo ibugua kohondo ibunaga keba holenebi ibunaga hongo holenebi walia hoa ho hene. Anigo Ngode Datagaliwabehanda ko biagaruhondo ibunaga keba holene walia habeheore wiagola walia nahe pani mibeheore wiagolabi pani nami ibu ema nabi howa hibu lalu hondo haabo hene.
ROM 9:23 Ani buwa Ngode Datagaliwabehanda ibunaga bayale taraore holene gibiore walia hoa ho hene. Ibunaga bayale taraore holene ogoni inaha to̱lai holoma̱ya ngule mo manda manda bu helenego kamaru ina ibugua dara howa biamogo biyagome ogoni walia hene.
ROM 9:24 Ogonigo Ngode Datagaliwabehanda Yu wali agali hangu olene ndo wali agali tara tara karu ariabi oleneru ina kamagoni.
ROM 9:25 Ogonidagua lalu Ngode Datagaliwabehanda Hoseanaga mbugani bi lo ngago ogo, Wali agali ala i̱naga ndo heneruhondo, i̱naga wali agaliore kami, lolebero. Hameigini tara heneru i̱na ala gubalini nahe harugohondo, i̱naga gubaliniore kami, lolebero.
ROM 9:26 Dindi mbiraha, Tí i̱naga wali agali ndo kami, lenego dindi ogoniha howa, Ngode Datagaliwabe haluhe kagonaga waneigini kami, lolebira, lalu gilibu nga.
ROM 9:27 Aisaiahanda Isaraele wali agali mitangi bialu mogo lowa lalu, Isaraele wali agali dewaore iba solowara angeni iba mu ale kayaguabi ti mbira mbira hangume pele mulene yulebira.
ROM 9:28 Wali agali bibahendeore baba Anduane Homogohanda godi larangi abaleore bi mbira hangu lalu lo waholebira, lene.
ROM 9:29 Ogonidagua Aisaiahanda bi ala lene lo ngago ogo, Anduane Homogo Hongo Haiheore kagome ina hameigini maru yu wa nahelenedale Sodomo wali agalibi Gomora wali agalibi ti homai henedagua inabi homai kamale, lalu gilibu nga.
ROM 9:30 Anidago iname agua manda bimabe. Agua manda bulene nga. Yu wali agali ndo tara tara hearume Ngode Datagaliwabehanda, Tí mini tigabiwi kami, lelonaga biabe bialu henegome ndo ti ibuhondo mini mbiraore wiyagola ibugua, Tí mini tigabiwi kami, lene.
ROM 9:31 Anigo Isaraele wali agalirume Ngode Datagaliwabehanda, Tí mini tigabiwi kami, lelonaga mana mbira bule hai bialu hearia handa walia naheore hene.
ROM 9:32 handa walia nahenego irane agimebe. Irane ogome tigua Ngode Datagaliwabehondo mini mbiraore wulene mo tene howa ndo tininaga bulene mana mo tene howa binigome ti handa walia nahe hene. Ani hai bialu hearia to̱le̱ mbira ge bidi lagane wiagome tinaga ge bo bidi lowa pilene.
ROM 9:33 Bi ogoninaga lalu Anduane Homogonaga mbugani lo ngago ogo, Hale hadaba. I̱na to̱le̱ mbira Saiono dindini ngeledo. O ngeledogome wali agalinaga ge bo bidi lolebira. To̱le̱ ogonime wali agali mo pila holebira. Anidagua ndo mbiralime ibuhondo mini mbiraore wiyagua ibu mini burugulo naholebiraore, lalu gilibu nga.
ROM 10:1 I̱ hamene mbaliniru-o Yu wali agali i̱ damene bibahende karume Ngode Datagaliwabenaga pele muleneore yamia nabiragola hame timbuniore lo kogoni. Ani hame lowa i̱na hongo howa Ngode Datagaliwabehondo tinaga bi la haabo halu kogoni.
ROM 10:2 I̱na ti ogobiore ka manda bu kogoni. Tigua Ngode Datagaliwabenaga biabe bulene hame timbuni lo kagoni howa biabe ogoni bia holenego irane bayuwa manda nabi howa hamelo ka.
ROM 10:3 Ngode Datagaliwabehanda wali agali mini tigabiwi ka lagago hariga ogoni ti manda nabiaga henego ka. Ani hene kago howa mini tigabiwi holene hariga tini bo wule manda buwa Ngode Datagaliwabehanda wali agali mini tigabiwi ka lagane hariga walia henego tigua yu tiga nabiaga henego ka.
ROM 10:4 Wali agali Kerisohondo mini mbiraore wiraru tihondo Ngode Datagaliwabehanda, Tí mini tigabiwi kami, lelo Mana lowinigo ngadagua Keriso ibugua bu maro bilene.
ROM 10:5 Ngode Datagaliwabehanda, Í̠ mini tigabiwi ke, lelo Mana lowini ngagome, Bibe, laradagua bulene nga lowa Mosesehanda bi mbira gilibu wini ngago ogo, Mbiralime Mana lowini ngagome, Bibe, laradagua bialu kayagua nde ibu holene tene ogoni holebira, lalu gilibu nga.
ROM 10:6 Anigo Ngode Datagaliwabehanda wali agali mini mbiraorewi karuhondo, Tí mini tigabiwi kami, lagagonaga bi mbira Anduane Homogonaga mbugani lo ngago ogo, Í̠naga miniha bi mbira ogodagua mitangi bulene nawi. Dahuliya andaga aiwa iraga halu polobadabe, lo nga. Ani lo mitangi birimayagua ogoni Keriso dalilo damu polenaga mitangi berama.
ROM 10:7 Bi mendebi lo ngago ogo, Humbirini andaga aiwa dalialu polobadabe, lo nga. Ani lo mitangi birimayagua ogoni Keriso iraga helo damu polenaga mitangi berama.
ROM 10:8 Bi kira ogoni laragonaga lo ngago ogo, Ngode Datagaliwabenaga bi mana ogoni tí kamigoha kaware nga. Tíni bu minihabi ne hambunibi nga, lalu gilibu ngago ogoni bi mana iname lameramaligo Ngode Datagaliwabehondo mini mbiraore wulenenaga lameramali.
ROM 10:9 Í̠na bime Yasu ibu Anduane Homogo ka latagi halu bu minime Ngode Datagaliwabehanda ibu mo heya hene kago yu tiga biriyagua Ngode Datagaliwabehanda í̠ pele ngulebira.
ROM 10:10 Anigo iname Ngode Datagaliwabehondo mini mbiraore weramagola ibugua, Tí mini tigabiwi kami, laga ka. Iname mini mbiraore wirimadagua walia halu bime latagi haramagola Ngode Datagaliwabehanda ina pele ngiaga ka.
ROM 10:11 Anduane Homogonaga mbugani lo ngago ogo, Mbiralime ibuhondo mini mbiraore wiyagua ibu mini burugulo naholebiraore, lalu gilibu nga.
ROM 10:12 Bi ogoni wali agali ta nabi bibahendenaga ngago irane Ngode Datagaliwabehanda Yu wali agalibi wali agali tara tarabi baba tu nawiaga ka. Ngode Datagaliwabe ibu bibahendenaga Anduane Homogo howa ibugua ibu olararu bibahendehondo turu holene timbuniore miaga ka.
ROM 10:13 Anduane Homogonaga mbugani lo ngadagua ogo, Anduane Homogo mini olararu Ngode Datagaliwabehanda ti pele mulebira, lalu gilibu nga.
ROM 10:14 Ani ngago tigua ibuhondo mini mbiraore nawiyagua ibu mini agua olabehebe. Bi mana hale naheyagua mini mbiraore agua wibehebe. Bi mana nalamidayagua hale agua habehebe.
ROM 10:15 Bi mana lamule piagahondo, Pu naledayagua bi mana agua lamibehebe. Anduane Homogonaga mbugani bi lo ngadagua ogo, Bi mana debene yalu ibiragola turu timbuniore holene nga, lalu gilibu nga.
ROM 10:16 Anigo Bi Mana Debene yalu ibiyago hale howa ti bibahendeme yu tiga biai nahe hene. Aisaiahanda bi lo ngago ogo, Anduane Homogo-o iname bi mana lamirimago hale halu aiwa yu tiga biyabe, lalu gilibu nga.
ROM 10:17 Anigo bi mana hale haramagome Kerisohondo mini mbiraore wulene mo anda haga. Bi mana ogoni Kerisohanda agua biya lalu lamulene nga.
ROM 10:18 Anigo bi mana lamirimago ti hale nahayadago henenebe laro. Henene ndo ti hale haiore hayagoni. Anduane Homogonaga mbugani lo ngadagua ogo, Tigua bi lenego dindi bibahendeha pume hene. Tigua bi mana laminigo dindi gimbuni bibahendeha piai hene, lalu gilibu nga.
ROM 10:19 I̱na lone laro, Isaraele wali agalime bi mana ogoni manda nabi henebe. Bi ogoni pigane Mosese ibunime ladai bialu Ngode Datagaliwabehanda lenedagua lamialu lo ngago ogo, I̱na wali agali hameigini mbira ka lene ndo karuhondo bayale bigi berogo hondowa tí kamirume, Inahondo bayale nabira agini, henge lolene mini wilo mo wia holebero. I̱na wali agali dindiha marume yo hendene karu tiha howa bigi berogo hondowa tí kamiru mo keba holebero, lalu lenego gilibu nga.
ROM 10:20 Aisaia ibugua Ngode Datagaliwabehanda lenedagua hongoore howa lalu, I̱ hai nabi hearume i̱ handa walia haya. Wali agali marume, Í̠ agoha kebe, nale hearu hendelo i̱ni ha pani haru, lalu lenego gilibu nga.
ROM 10:21 Ngode Datagaliwabehanda Isaraele wali agali mitangi bialu lenedagua Aisaiahanda lenego ogo, Wali agali bi mo wahalu bi ko hangu ladai biaga hearu pele mule i̱na i̱naga gi dogolo tagi ho haabo harugola ti naibiya, lalu lenego gilibu nga.
ROM 11:1 Anigo au laro. Ngode Datagaliwabehanda ibuninaga Isaraele wali agali yu wahayabe. Yu wa naheore. I̱nibi Isaraeleali howa Abarahamanaga aguanene Beniyamini hameigini aria mbirago i̱ kogoni.
ROM 11:2 Ngode Datagaliwabehanda ibuninaga wali agali piganengi dabeneru mbira yu wa nahe henego ka. Isaraele wali agalime mbira nakarulape biyangi Elayahanda genda howa Ngode Datagaliwabehondo bi lamini lalu Anduane Homogonaga mbugani lo ngago tí manda bidamigo ogo.
ROM 11:3 Anduane Homogo-o tigua í̠naga bi mana latagi haga hearu bo wahaya. Í̠naga loma binigo bo ngiagane dabu winiru gialo wahaya. Homane mbira i̱ dege ba nabi kogo tigua i̱bi bo wahole manda bialu ka, lenego gilibu nga.
ROM 11:4 Ani layagola Ngode Datagaliwabehanda ibuhondo bi agi ladai binibe. Ibugua ladai bialu lalu, Mbirale tara gime wabini mini Balahondo bi pupu wule ge duli hanga nahene agali daosini karia (7,000) i̱ninaga heledo, lalu ladai bini.
ROM 11:5 Anigo ina kamangibi ogonidagua dege nga. Ngode Datagaliwabehanda dara halu biamogo bia henegome Isaraele wali agali dabo heleneru aria mbira mbira ka.
ROM 11:6 Ngode Datagaliwabehanda wali agali dabeneru tigua biyagonaga dabene ndo ibugua ti dara halu biamogo bia henegome dabene ka. Wali agali tigua biyago hondowa Ngode Datagaliwabehanda ti dabenedale nde ibunaga dara halu biamogo bia holene ngago henene ndo ngaleda.
ROM 11:7 Ani binidago agi manda bibehe kamabe. Isaraele wali agalime mbira hai binigo handa walia nahe hene. Wali agali mbira mbira Ngode Datagaliwabehanda dabeneru ti hangume handa walia hene. Maru ti Ngode Datagaliwabehanda olenego hale nahe hale paihe hene.
ROM 11:8 Anduane Homogonaga mbugani lo ngadagua ogo, Ngode Datagaliwabehanda tinaga mini mo palia hondo helene. Ani hama ibinigo áyu ogoni tigua deme nahandabehebi haleme hale nahabehebi ka, lalu gilibu nga.
ROM 11:9 Ogonidagua dege Debidihanda bi lene ngago ogo, Ti ngoai howa tomo timbuni nagimbu bialu bedaria gono wedagoha tini delo. Ti pilo ngaria pani milo.
ROM 11:10 Ti de nahendelonaga tinaga de ndibu lelo. Ti tandaga naabo halu kagome tini mo gangu lelo, lenego gilibu nga.
ROM 11:11 Anigo ogo laro. Yu wali agali ti pilenego pilo wiaabo henebe. Ani nabi. Tigua ko binigome Yu wali agali ndo tara tara karu pele mulene henge wini. Ani pele miyago hondowa Yu wali agalime henge lolene mini wilo ani bini.
ROM 11:12 Yu wali agali tigua ko binigome wali agali dindi bibahendeni hearuha turu holene bayaleoreru yu anda ibini. Tigua Ngode Datagaliwabe mitangi bulene emeneore wialu yagibano ale henegome Yu wali agali ndo tara tara hearuha Ngode Datagaliwabenaga turu holene bayaleoreru yu anda ibini. Anigo Yu wali agali Ngode Datagaliwabe karia dai bule karu dai biragola wali agali bibahendeore heba turu holene timbuniorene timbu tinaga wulebira.
ROM 11:13 Áyu i̱na Yu wali agali ndo tara tara kamiru tíhondo larogo. Ina tínaga abosolo kogoni howa biabe galone bialu kogoni turu howa bialu ko.
ROM 11:14 Ani bialu kogo i̱na wali agali i̱ni aria karume tí turu holene yu kamigoni hondowa ti henge lolene mini wilo mo wia habehe kogoni. Ani wiraria Ngode Datagaliwabehanda ti maru pele mibehe holebira.
ROM 11:15 Ngode Datagaliwabehanda Yu wali agali yu wahayangi wali agali dindi bibahendeni karu ti Ngode Datagaliwabenaga waitigi ho hearia ibugua ti mo ibu damene helene. Anigo Ngode Datagaliwabehanda Yu wali agali lone ibuni karia haru dai birangi ti homaliha hora henego mo heya haradagua bu holebira.
ROM 11:16 Mberedi pigane hirinigo mbira podowa Ngode Datagaliwabehondo loma bia ho miniyagua nde mberedi podoha hene biagobi ibunaga dege nga. Ira mbiranaga pini Ngode Datagaliwabehondo loma bia ho miniyagua nde maganerubi ibunaga dege ka.
ROM 11:17 Ira olibenaga magane maru podo wahowa ira olibe dege mende tagiraha minalu anda hene kagonaga magane podowa ogonime magane ala podo wahayagoria gimbu bini. Yu wali agali ndo tara tara kamiru tí ira olibe tagiraha minalu anda hene ogoni ale kami. Ai áyu tí Yu wali agalinaga holene bayaleore ngagoha ho gimbu bu kami.
ROM 11:18 Ani kamigo tígua wali agali ira magane podo wahene karu mitangi bialu mine ho holene nawi. Tí mine aginaga holebe. Tí bame ira magane dege kamigodago tígua pini mo tiaga ho kami ndo ira pinime tí mo tiaga ho daga kagola kamigoni.
ROM 11:19 Bi ani larogo hale howa tígua ogodagua ladai bialu lalu, Nde agi. Ira magane uruni podo wahenedago irane i̱ ho aribia holiyanaga henge mo wialu ani binida, loleberami.
ROM 11:20 Ogoni heneneda. Ti mini mbiraore nawiyagola podo wahenego tí mini mbiraore wialu kamigome ho gimbu bu kamigoni. Ogoninaga tí mine holene henge nawigo mogolo holene nga.
ROM 11:21 Yu wali agali ti ira magane ogoni aria henego Ngode Datagaliwabehanda ti podo wahenego ibugua tí kamiru poda waha nabi helolebira manda bidamibe.
ROM 11:22 Bi ogo bayuwa manda bilimu. Ngode Datagaliwabe ibu bayale biagabi hongo howa godi lagabi kagoni manda bilimu. Ibugua ko biaga karuhondo hongo howa godi laga kago howa tí kamiruhondo bayale dege bialu kagoni. Ibugua nde tíhondo bayale bilo henge miaabo harimiyagua ani bulebira. Ani henge nami haabo harimiyagua tíbi ibugua podo waholebira.
ROM 11:23 Yu wali agali mini mbiraore nawi henedagua haabo nahe lone mini mbiraore wiyagua nde Ngode Datagaliwabehanda ti ira tene biago ibuniha helo hela dai bulebira. Ibugua ti ani hela dai bilabeheore kagoni.
ROM 11:24 Yu wali agali ndo tara tara kamiru tí olibe ira tagiraha minalu anda henegonaga magane podowa olibe ira mende hengenegoha ho gimbu bini ale kami. Yu wali agali ti olibe ira hengenego ale kago Ngode Datagaliwabehanda ti ala tini henegoha gimbu bia halu hela dai bulene taibi ndoore nga.
ROM 11:25 I̱ hamene mbaliniru-o bi galone mbira ala tí nahalehe harimigo áyu tí manda bilimulo hameledo. Galone mbira ogoni manda birimiyagua tígua mine howa, Ina mini timbuniwi kamalo, mitangi nabuleberami. Bi ogoni galone ogo. Isaraele wali agalime Ngode Datagaliwabehondo mini mbiraore wulene manga ho kago ogonidagua haabo naholebira. Yu wali agali ndo tara tara karume Ngode Datagaliwabehondo mini mbiraore wule heneru ti mini mbiraore wialu anda ibai helo hondo ka.
ROM 11:26 Ti ogonidagua anda ibai haragola Ngode Datagaliwabehanda Isaraele wali agali pele mulebira. Anduane Homogonaga mbugani lo ngadagua ogo, Pele Miaga ibu Saiono howa ibulebira. Ibiragola ibugua Yagaba aguanenerume ko bibahende bialu heneru domo waholebira.
ROM 11:27 I̱na tinaga ko domo wahowa tihondo habo nalolene bi ogo lo wulebero, lalu gilibu nga.
ROM 11:28 Yu wali agalime Bi Mana Debene hame nalenegome ti Ngode Datagaliwabela waitigi ho ka. Ani biyagola Yu wali agali ndo tara tara kamiru tí Ngode Datagaliwabenaga pele mulene mana ala hale harimi. Anigo Ngode Datagaliwabehanda Yu wali agalinaga mamali agali mini leneore heneruhondo habo nalolene bi lo wialu ibugua ti dabenego ti mo ibu damene ho heleneru ka.
ROM 11:29 Anigo Ngode Datagaliwabehanda wali agali dabeneru ibunaga turu holene tara tara winigo minirubi mani mini mende nawiaga tihondo miyaru mo yu dai nabiagabi ka.
ROM 11:30 Yu wali agali ndo tara tara tí kamigome ala Ngode Datagaliwabenaga bi mo wahalu harimi. Ai Yu wali agali tigua Ngode Datagaliwabenaga bi hale halu bia nabi wahaabo hayagola ibugua ibunaga dara halu biamogo bulene tíhondo ngiyago yu kamigoni.
ROM 11:31 Ogonidagua dege Ngode Datagaliwabehanda tíhondo dara halu biamogo biyago Yu wali agalime áyu ibunaga bi mo wahalu ka. Ibugua tibi dara halu biamogo bilo lowa tigua ani bialu ka.
ROM 11:32 Wali agali bibahendeme Ngode Datagaliwabenaga bi mo wahayagola ibugua ti garabaya ale helo helene. Ani helenego irane ibugua tihondo ibunaga dara halu biamogo bulene walia holenaga ani bini.
ROM 11:33 Ngode Datagaliwabe ibugua bibahendeore mitangi bialu baya gibiore biaga kagoni. Ibu mini gigabiwibi manda timbuniorebi kagoni. Ibugua bule manda biagago tene mbiralime nalabeheore ka. Ibunaga biagane mana mbiralime manda nabibeheore ka.
ROM 11:34 Anduane Homogonaga mbugani lo ngadagua ogo, Anduane Homogonaga mini aiwa manda bidabe. Ibuhondo, Agua bibe agua nabibe, lalu mbirali aiwa labehe kabe.
ROM 11:35 Ibugua pani ngia dai bilonaga ibuhondo mbirale mbira minigo mbirali ai kabe, lalu gilibu nga.
ROM 11:36 Mbirale bibahende karubi ngarubi wabiaiore henego ibu ka. Ani howa ibugua mbirale karubi ngarubi bibahendeore haru hai halu uruninaga anduaneore ibuni ka. Ngode Datagaliwabenaga mini yaraga haaboboore helo hamelo ko. Aniore bilo laro.
ROM 12:1 I̱ hamene mbaliniru-o Ngode Datagaliwabehanda inahondo dara howa biamogo timbuni biyago mitangi bialu i̱na tíhondo bi hongo howa laro. Ngode Datagaliwabe turu helo tígua ibuhondo tínaga bulenerubi tínibi loma bia ho helalimu. Tígua Ngode Datagaliwabe mitangi bialu tíninaga bu miniha ani birimiyagua lotu henene lolenego ogoni.
ROM 12:2 Dindi wali agali karume mana biagadagua bule ndo. Tí minibi mandabi gahenge helo Ngode Datagaliwabehanda tí mo tara helo halimu. Ani bialu howa ibugua hame ledago bayalebi ibu turu helo bulenebi baya buruguleore bulenebi manda bialu holeberami.
ROM 12:3 Ngode Datagaliwabehanda i̱ biamogo bulene nawi howa biamogo bialu i̱hondo mugube ngiyago mitangi bialu tíhondo bi laro. Tígua, Ina karulape kama, mitangi nabilimu. Mine holene nawi manda bialu tí hangu hangu howa, Ngode Datagaliwabehanda mini mbiraore wulene i̱hondo ngiyadagua dege kogoni, mitangi bialu halimu.
ROM 12:4 Ina tingini homane mbiraore kamago degeni howa aria tara tarame biabe tara tara beremali.
ROM 12:5 Ogonidagua ina tingini dewa kamagoni howa Kerisoha ho gimbu buwa homane mbiraore kama. Tingini mbiraoreni hene dege aria tara tara howa gimbu bu kadagua ina Kerisoha ho gimbu bu kamagoni.
ROM 12:6 Ngode Datagaliwabehanda ina biamogo bialu mugube tara tara ta hayadagua iname biabe bayuwa bulene nga. Ngode Datagaliwabe mana lamulene mugube yu kamayagua iname ibuhondo mini mbiraore ngamadagua ibunaga mana lamialu hami̱ya.
ROM 12:7 Biamogo bulene mugube yu kamayagua nde biamogo bialu hami̱ya. Lawai holene mugube yu kamayagua nde lawai halu hami̱ya.
ROM 12:8 Ina bi laramagome wali agali marunaga mini elahe helo mo hongo holene mugube yu kamayagua nde wali agali marunaga mini elahe helo mo hongo halu hami̱ya. Mbiralime ibunaga mbirale ngago mbuni nabi howa wali agali maruhondo turu halu talebu mulene nga. Mbiralime haru hagane hongo yu kayagua nde wali agali mitangi bialu bayuwaore haru halu ibunibi biabe bulene nga. Mbiralime wali agali hondowa biamogo bulene irane ngago handayagua nde turu howa biamogo bulene nga.
ROM 12:9 Tígua wali agalihondo gubalini hetingi nahe howa heneneore gubalini ho halimu. Ko ngago handabe manga halu bayale ngago yu tiga biaabo halimu.
ROM 12:10 Tí Kerisoha howa hamene mbalinima kamalo manda bialu turu howa gubalini hagahaga buwa wali agali maru ala mitangi bialu halimu.
ROM 12:11 Biabe bibe manga nahe hongo howa bialu halimu. Anduane Homogohondo gubalini heneneore howa ibunaga biabe poboyogobi bialu halimu.
ROM 12:12 Kerisohondo mini dunubia ho kamigome tí mo turu helo halimu. Mo ko holene tara tara tí kamigoria íbu ngagola ema nabi howa hibu lalu haabo halimu. Horo bibahendengi Ngode Datagaliwabehondo bi laabo halu halimu.
ROM 12:13 Keriso hameigini maru buru pale karuhondo tínaga mbirale ngamigo talebu milimu. Keriso hameigini ala nahendene tí kamiria ibiraruhondo, I̱ andaga palima ma, lalimu.
ROM 12:14 Wali agali marume tíhondo ko tara tara biragola tígua o biarunaga mini lalu Ngode Datagaliwabehondo, Biamogo bia habe, lalu tinaga la halimu. Ha halu pani mibe nale, Biamogo bibe, lalu lalimu.
ROM 12:15 Turu ho karu heba turu ho halimu. Dara howa dugu bialu karu heba dara howa dugu bialu halimu.
ROM 12:16 Wali agali ta nabi mitangi bialu bibahendehondo mana mbiraore ale dege biaga halimu. Mine nahe howa biabe emene emene bulene ngago ta nabi biai halimu. Tígua, I̱ mini timbuniwi kogo, lo mitangi nabilimu.
ROM 12:17 Mbiralime tíhondo ko biyagua tígua ko bia dai nabilimu. Wali agali bibahendeme mini mbiraore howa, Mana ogoni bayaleda, lai hagayagua o laragoni bialu halimu.
ROM 12:18 Wali agali ta nabi heba howa mo palia holene tene tí halimu.
ROM 12:19 I̱ hamene mbaliniru-o pani ba dai nabi Ngode Datagaliwabenaga keba holeneme ba dai bilo tí wahalimu. Anduane Homogonaga mbugani bi lo ngago ogo, Anduane Homogohanda lalu, Pani mulene i̱naga ngago i̱na ba dai bulebero, lenego, gilibu nga.
ROM 12:20 Anduane Homogonaga mbugani bi mende lo ngago ogo, Í̠la waitigi kago garibilo kayagua tomo nelo mibe. Ibugua iba noa ho kayagua iba nelo mibe. Ani biriyagua ibugua í̠hondo ko biyago mitangi bialu ibuni taga pani nolebira, lalu gilibu nga.
ROM 12:21 Ko ngagome tí bope holani hondowa tígua bayale beramigome ko ngago bope halu wayali hole halimu.
ROM 13:1 Ngode Datagaliwabe ibu bibahendenaga hongo holene tene kagome gabumane karu ti helo henge minigo tigua mana lo ngadagua iname bulene nga.
ROM 13:2 Gabumaneme bulene nga lalu lowinigo mbiralime nabiyagua ogoni ibugua Ngode Datagaliwabehanda gabumane helenegonaga mana puguara. Puguarago ibuni pani nolene nga.
ROM 13:3 Wali agali bayale bialu karume haru haga kago hondowa gi holene nawi. Ko bialu karume gi holene nga. Wali agali haru haga kago hondowa tí gi nahe hoa kamiyagua nde mana bayale ngaru bialu halimu. Ani bialu harimiyagua haru haga kagome tíhondo, Bayale birimida, lolebira.
ROM 13:4 Haru haga karu tigua Ngode Datagaliwabenaga biabe biahaga howa tí bayale halimulo biabe bialu ka. Tí ko birimiyagua haru haga biarume tíhondo hongo howa pani ngulebirago manda bialu gi ho halimu. Ti Ngode Datagaliwabenaga biabe biahaga howa Ngode Datagaliwabehanda pani mulene nga lowinigo haru haga urunime ko biaga karuhondo pani miaga ka.
ROM 13:5 Anigo iname Ngode Datagaliwabehanda ina pani nangilonaga hangu manda buwa bi larago hale halu bulene nga ndo. Inane minihabi dabalu gabumaneme larago hale halu buleneore nga manda bialu bulene nga.
ROM 13:6 Tígua dagisi muni meramiligobi irane ogoninaga gabumane karu tigua tigatiga biyagua Ngode Datagaliwabenaga biabe biahalu kagonaga meramili.
ROM 13:7 Anigo tihondo dagisi muni mulene ngadagua milimu. Tíninaga dagisi munibi mbirale tara tara ngamigonaga dagisi munibi milimu. Ti gabumane haru haga kago manda buwa yo handa nabi ti mitangi bulene ngadagua mitangi bilimu.
ROM 13:8 Tígua wali agali mbiralihondo dano ho nahalimu. Wali agali karuhondo gubalini holene dege dano ho halimu. Mbiralime wali agali karuhondo gubalini ho kayagua ibugua Mana lowini ngago bibahende biai haga ka.
ROM 13:9 Bi pira gilibu wini ngago aria maru ogo, Wali agali homelo nababe. Wali agali kayu nayabe. Mbirale page nabibe. Wali agali tinaga mbirale ngago dimagoli nahabe. Bi urunibi Ngode Datagaliwabe bi mana maru gilibu ngagobi bibahendenaga tene mbiraore ogo, Í̠na í̠ni gubalini ho harilidagua maru karu ta nabi gubalini ho habe, lalu gilibu nga.
ROM 13:10 Í̠na mbiralihondo gubalini ho keyagua o biagohondo kagua nabulebere. Anigo Mana lowini ngago bibahende bulene tene gubalini holeneha nga.
ROM 13:11 Tígua ogonidagua bialu holene ngago irane ogo. Horo áyu ogoni mitangi bialu palia hondo holene henge nawigo heyulene nga. Iname Yasuhondo mini mbiraore pigane wirimangi ina pele ngia maro bulene kaware ndo winigo áyu kawareore nga.
ROM 13:12 Ai aruma holene ereba halu egabi lalu wá holene kaware ha para haragoni. Ani birago arumaha howa mana bigi beremaliru áyu ogoriani biairi hami̱ya. Anigo wá kagoria howa wai biagane aleru karulo hami̱ya.
ROM 13:13 Wá holene kagoria howa tigatiga bialu hami̱ya. Badi ko dawe halu bulenebi lulu yu hole lulu iba nolenebi wali agali kayu yulenebi mana ko tara tara bulenebi gungu bulenebi henge lolenebi mana urunibi iname bulene nawiore.
ROM 13:14 Anigo Anduane Homogo Yasu Keriso ibunaga wai bulene hongo ngirago karulai halimu. tínaga mini ko ngamigome mana ko hame lagago bule nahinalimu.
ROM 14:1 Mbiralime Ngode Datagaliwabehondo mini mbiraore wu howa hongo nahe kayagua tígua ibu heba mandagi halimu. Mandagi howa ibugua bulene manda bidago laragola hale howa ibula lai nalalimu.
ROM 14:2 Mbirali ibu Ngode Datagaliwabehondo mini mbiraore wu kagome tomo bibahende ta nabi naga ka. Mendealime Ngode Datagaliwabehondo mini mbiraore wu kago ibu mini hongo nahe howa nema dege naga ka.
ROM 14:3 Tomo bibahende ta nabi naga kagome nema dege naga kago hondowa mege bulene nawi. Nema dege naga kagome ibu nde tomo bibahende ta nabi naga kago hondowa, Í̠na ko bere, lolene nawi. Irane Ngode Datagaliwabehanda o biagohondo turu ho kago manda buwa tí ani lolene nawi.
ROM 14:4 Tígua mendealinaga biabe biahaga kagome birago hondowa, Í̠na ko bere, lolene tínaga biabe ndo. Ibunaga haru haga kagome ibu birago hondowa bayale bere ko nakarulape bere lolene tene ibuni holebira. Anigo Anduane Homogo ibugua o biago bayale bilo mo hongo holebira.
ROM 14:5 Wali agali marume manda bialu horo bibahende ogobi degedege ndo horo mbiru dabalu dunini nga manda biaga ka. Marume ani ndo horo bibahende ta nabi ogobi degedege nga manda biaga ka. Wali agali bibahende kamaru inane hangu hangume mitangi bulene karulape agodabe dabalu duniniore mbira manda beremago yu tiga bulene nga.
ROM 14:6 Mbiralime horo mbira dunini nga mitangi bu kayagua Anduane Homogo mini yaraga holenaga ani mitangi biaga ka. Mbiralime tomo bibahende ta nabi nalu howa Ngode Datagaliwabehondo ka̱i̱ layagonaga ibugua Anduane Homogo mini yaraga halu tomo naga ka. Mendealime tomo maru nanaga kago Anduane Homogo mini yaraga holenaga ani bialu Ngode Datagaliwabehondo ka̱i̱ laga ka.
ROM 14:7 Ina kamarume mbirali ibu holene ibuni hangunaga halu ibu homolene ibuni hangunaga homalu ani bulene mbira nahe kama.
ROM 14:8 Ina harimayagua nde Anduane Homogonaga holeberama. Ina homarimayagua nde Anduane Homogonaga dege homoleberama. Anigo ina harimayaguabi homarimayaguabi ina Anduane Homogonaga dege kamagoni.
ROM 14:9 Keriso ibu wali agali karubi homayarubi tinaga Anduane Homogo hole ibugua homo tongolo mialu lone heyu ka.
ROM 14:10 Tí maru nema naga kamiru tígua tí hamene mbalinirume birago hondowa, Tí ko berami, laramiligo aginagabe. Tí maru tomo bibahende ta nabi naga kamiru nde tí hamene mbaliniru mege beramiligo aginagabe. Ina bibahendeore Ngode Datagaliwabehanda godi larangi ibu deni heyu holeberama.
ROM 14:11 Anduane Homogonaga mbugani lo ngago ogo, Anduane Homogohanda lalu, I̱ Ngode Datagaliwabe holenehe henene kodagua wali agali bibahende i̱ geha bulu palu ibira holebira. Ani buwa bibahendeoreme lalu, Í̠ Ngode Datagaliwabeore kego, lalu latagi hai holebiraore, lalu gilibu nga.
ROM 14:12 Anigo ina bibahendeore kamaru iname bialu harimagonaga te hangu hangume Ngode Datagaliwabehondo lamiaiore holeberama.
ROM 14:13 Ani manda bialu inaneme, Í̠na ko bere, lalu lagalaga bialu nahami̱ya. Tígua ani nabi howa bulene ngago ogo. Mbira bulene mitangi bu kamigo bulene ogonime tínaga hamene mbaliniru mo pila habeheyaguabi ko mo bia habeheyaguabi tígua ogonibi nabule manda bilimu.
ROM 14:14 I̱ Anduane Homogo Yasuha ho gimbu bu kogome bibahende ngaru ko ndo nga manda bido. Anigo mbiralime mbira bulene ngago hondowa ogoni ko nga manda bialu biyagua nde ogoni birago ko bira.
ROM 14:15 Tígua tomo mbira naramigome tínaga hamene mbalinirunaga mini mo genda harimiyagua tí gubalini howa ndo berami. Keriso ibugua homo aribia henegome mbirali mbira mo bayale henego tíni hangu mitangi bialu tomo narimigome ogoni ibu mo ko holani de hondo halimu.
ROM 14:16 Tígua mbira bulene bayale nga lo manda bialu beramigo marume hondowa bayale ndo ko nga lolani handalimu.
ROM 14:17 Ngode Datagaliwabehanda handame Ho Kagoria tomo tara tara nalubi iba tara tara nalubi ogonidagua bulenenaga ndo. Ogodagua bulene nga. Mini tigabi howa bulenebi mo palia holenebi turu holenebi Ngode Datagaliwabe Dinini ibugua ngiagago ogoninaga bulene nga.
ROM 14:18 Ani bulene ngadagua bialu howa mbiralime Kerisonaga biabe bia halu kago Ngode Datagaliwabehandabi wali agali marumebi ibu hondowa turu halu bayale birida lolene wulebira.
ROM 14:19 Anigo iname mo palia holenenagabi mo hongo hole biamogo bulenenagabi mana ogonibi inane bia hagahaga bialu holene nga.
ROM 14:20 Ngode Datagaliwabehanda biabe bialu kago tígua tomo naramigome mo ko nahalimu. Tomo bibahende ta nabi ngago nabehe kamigo tígua tomo mbira naramigome mendeali ko bilo mo bia habeheyagua tomo ogoni nolene nawi.
ROM 14:21 Mana tigabi bulene ngago ogo. Nogo tara tara naramigomebi waini iba naramigomebi mana mbira mbira beramigomebi tínaga hamene mbaliniru mo pila habeheyagua ogoni nabi wahalimu.
ROM 14:22 Mana ogoni manda bidedagua í̠bi Ngode Datagaliwabebi libuni dege manda bule ngelabe. Mbiralime mana mbira bulene karulape nga manda bu kago bialu howa ibuni miniha, I̱ kagua berodabe, lo mitangi nabi bayale berogo mitangi biyagua ibu turu ho ka.
ROM 14:23 Ogonidagua ibugua tomo nalu howa mini kira wuwa nayagua ibu mini mbiraore nawi howa narago hondowa Ngode Datagaliwabehanda, Í̠na kagua bere, lalu lamiaga ka. Mana bibahende ngaru bulene tene mini mbiraore wu howa biagago mbiralime mini kira wu howa biyagua ogoni birago ko biya.
ROM 15:1 Ina Ngode Datagaliwabehondo mini mbiraore hongo howa wu kamarume maru mini mbiraore hongo nahe wu karunaga genda yidago yamogo bulene nga. Inane hangunaga hame ledamago mitangi biaabo holene nawi.
ROM 15:2 Ani nabi ina hamene mbaliniru bayale helonagabi Ngode Datagaliwabehondo mini mbiraore wu howa hongo ho helonagabi ti mini elahe helo iname mo hongo holene nga.
ROM 15:3 Keriso ibugua ibuni hame leadagua nabiaga hene. Ani nabi henegonaga Anduane Homogonaga mbugani bi lo ngago ogo, Wali agali karume í̠hondo mege bialu bi laragoni i̱ni ibira ho nga, lalu gilibu nga.
ROM 15:4 Ina mini dunubia ho holene yu holoma̱ya Anduane Homogonaga mbugani bi bibahende ala gilibu ngagome ina ema nabi howa hibu lalu holenebi ina mini elahe helo mo hongo holenebi inahondo lawai holenaga nga.
ROM 15:5 Tígua Keriso Yasu ibugua bialu hayadagua bialu howa ema nabi hibu lalu holene tenebi mini elahe helo mo hongo holene tenebi Ngode Datagaliwabe ibu kago ibugua tínaga mini mo mbiraore hai helo hameledo.
ROM 15:6 Ani buwa tí bibahende mandagi mini mo mbiraore howa tígua Ngode Datagaliwabe ibu inanaga Anduane Homogo Yasu Keriso Aba kago manda bialu ibunaga mini yaraga haabo halu holene nga.
ROM 15:7 Wali agalime Ngode Datagaliwabe mini yaraga helo Keriso ibugua tí ibu heba hami̱ya ibidaba lalu yamiyadagua tíguabi nde tíni Keriso aria kamiru hami̱ya ibidaba lalu ya migimigi bilimu.
ROM 15:8 I̱na bi langerogo ogo. Ngode Datagaliwabe ibu mini bilinahe ka walia halu Keriso ibu Yu wali agalinaga biabe bia haga hene. Ibugua ani bia haga howa Ngode Datagaliwabehanda Yu wali agalinaga mamali heneruhondo, Bulebero, lalu, Ngulebero, lalu bi lowinigo lola helobi ani bini.
ROM 15:9 Ani bialu Yu wali agali hangu ndo tara tara hearu Ngode Datagaliwabehanda tihondo dara howa biamogo biyagonaga tigua Ngode Datagaliwabe mini yaraga helobi Keriso ibugua ani bini. Anduane Homogonaga mbugani lo ngadagua ogo. Yu wali agali ndo tara tara karu kagoha howa i̱na ka̱i̱ lalu í̠naga mini yaraga holebero. I̱na í̠naga mini yaraga halu í̠hondo iba gana lolebero, lalu gilibu nga.
ROM 15:10 Bi mendebi lo ngago ogo, Yu wali agali ndo tara tara kamiru aibe. Tígua Ngode Datagaliwabenaga wali agali ibugua dabene karu heba turu ha gimbu bu halimu, lalu gilibu nga.
ROM 15:11 Bi tebonebi lo ngago ogo, Yu wali agali ndo tara tara kamiru aibe. Tígua Anduane Homogo mini yaraga ho halimu. Wali agali bibahendeoreme ibunaga mini yaraga hai halimu, lalu gilibu nga.
ROM 15:12 Aisaia ibuguabi bi lo ngago ogo, Agali mini Yasi ibunaga aguanene mbira ibulebira. Ibugua Yu wali agali ndo tara tara karu haru helo Ngode Datagaliwabehanda mo helolebira. Ibiragola tigua ibuha mini dunubia ho holebira, lalu bi uruni gilibu nga.
ROM 15:13 Mini dunubia ho holene tene Ngode Datagaliwabe kago ibugua turu holenebi mo palia holenebi tígua ibuhondo mini mbiraore wu kamigome tíha to̱lai helo hameledo. Irane Ngode Datagaliwabe Dinininaga hongome tíha howa tínaga mini dunubia ho holene anda hai helonaga ogoni hame ledogoni.
ROM 15:14 I̱ hamene mbaliniru-o i̱ni manda bialu bayale bulenebi mana bayale tara tara bulenebi bibahende tíha to̱lai ho kamigo tínime karulape lawai hagahaga bibehe kamilo manda bido.
ROM 15:15 Ani kami tiraga i̱na beba ogoni gilibu werogoni mana mbira mbira bulene tí mo mitangi bia halu gi nahe elahe howa gilibu wero. I̱ Keriso Yasunaga biabe bia haga howa Yu wali agali ndo tara tara karunaga biabe bia holiya Ngode Datagaliwabehanda biabe baya gibi ogoni i̱hondo ngiya. Irane ogoninaga i̱ gi nahe elahe howa gilibu wero. I̱na loma binigo mo miaga agalime biabe biagadagua bialu howa Ngode Datagaliwabenaga Bi Mana Debene lamialu kogoni irane ogo. Yu wali agali ndo tara tara karu Ngode Datagaliwabe Dinini ibugua ti Ngode Datagaliwabenaga helo loma bia halu ibugua yamibeheore karulape helonaga i̱na Bi Mana Debene lamialu kogoni.
ROM 15:17 I̱ Keriso Yasuha ho gimbu bu howa Ngode Datagaliwabenaga biabe bia harogonaga i̱ turu habehe kogoni.
ROM 15:18 Yu wali agali ndo tara tara karume Ngode Datagaliwabehanda bia laradagua bilo haru holiyanaga Kerisohanda i̱ha howa biyago te ogoninaga dege i̱na gi nahe elahe howa langero. I̱na bi larugobi biabe birugobi agalime nabiagane ale birugobi nahendene ale bialu Ngode Datagaliwabe Dinininaga hongome ogoni bibahende bima ibirugo Keriso i̱ha howa ani bini. Anigo i̱na Yarusaleme howa Kerisonaga Bi Mana Debene lamima pu gimbu bialu Ilirigama dindi lamima anda pirugoni.
ROM 15:20 Kerisohanda biyagonaga mana wali agali ala hale nahe karu karia puwa Bi Mana Debene lamulene i̱na hameore lo wiaabo harugoni. Agali mendealime biabe ala binigoria i̱ bia aribia howa karulo nahole manda buwa ani bule hamelo haru.
ROM 15:21 Anduane Homogonaga mbugani lo ngadagua ogo, Ibugua biyagonaga te ala nalamini karume hondolebira. Ibunaga bi nahale hene karume manda bulebira, lalu gilibu nga.
ROM 15:22 Irane ogonigo i̱na tí kamiria dewa halu ibua ho hewaria dege ibulene henge nawiya.
ROM 15:23 Ai áyu i̱na dindi orahayagi biabe biai halu tí kamiria mali dewani ibua ho haabo harugo
ROM 15:24 ai áyu ogoni ibule manda bialu kogoni. I̱ Sebena dindi pialu howa tí mo bila hole hamelo ko. Tí heba turu howa nenege halu i̱ Sebena poliyanaga tígua i̱ biamogo bilimulo mitangi bu ko.
ROM 15:25 Áyu ogoni nde i̱na Ngode Datagaliwabenaga wali agali Yarusalemeni karu biamogo bulenaga mo yalu ti karia pole ko.
ROM 15:26 Keriso hameigini Masedoniani karubi Agaiani karubi tigua mini mbiraore howa Ngode Datagaliwabenaga wali agali yagibano Yarusalemeni karu dara howa biamogo bule lowa, Iname tihondo muni mimi̱ya, lenego ogoninaga pole ko.
ROM 15:27 Ani bulene manda binigo nde tigua yagibano uruni biamogo bulene dano ho harimada manda buwa bini. Yu wali agalime dinininaga turu holene wali agali tara tara karu lamialu biamogo binigo ai wali agali tara tara karume Yu wali agali dindini holenaga turu holeneme ti biamogo bulene nga.
ROM 15:28 Muni ogoni tigua i̱hondo wia hayago i̱na yalu pialu Keriso hameigini Yarusalemeni karuhondo mialu biabe ogoni biai halu i̱ Sebena pole pialu howa tí kamiria nenege ibalu polebero.
ROM 15:29 Ani bialu i̱na tí kamiria ibalu Kerisonaga turu holene i̱hondo talebu ngiyago i̱ha to̱lotagi howa ibuleberogo manda bido.
ROM 15:30 I̱ hamene mbaliniru-o tíhondo bi hongo howa larogo inanaga Anduane Homogo Yasu Kerisobi Ngode Datagaliwabe Dinini ibugua gubalini holene ngiyagobi mitangi buwa tígua i̱ heba mini mbiraore howa Ngode Datagaliwabehondo i̱naga bi la haabo hami̱ya laro.
ROM 15:31 Yudiani wali agali Ngode Datagaliwabehondo mini mbiraore nawi karume i̱ nabelobi i̱na Yarusalemeni howa Ngode Datagaliwabenaga wali agali karu biamogo bule biabe buleberogome mo turu helobi ogoninaga Ngode Datagaliwabehondo la haabo hami̱ya.
ROM 15:32 Ani buwa Ngode Datagaliwabehanda hame ledayagua i̱ha turu holene to̱lai howa tí kamiria nenege eberogola tígua i̱naga mini mo hongo holeberami.
ROM 15:33 Inanaga mo palia holene tene Ngode Datagaliwabe kago ibu tí bibahende heba haabo helo hamelo ko. Aniore bilo laro.
ROM 16:1 Ina aria Keriso hamewane Pibi ibugua Keriso hameigini Sengeriani karu biamogo biaga bedago manda buwa ibu ibiragola ibuhondo turu halimulo hameledo.
ROM 16:2 Anduane Homogo minini howa tígua Ngode Datagaliwabenaga wali agalime mana ogobi bulene ngadagua ibuhondo, Ina hami̱ya̱, lalu yamilimu. Ibugua wali agali dewa karubi i̱bi inahondo bayale biaabo haga bedago manda buwa tígua ibu biamogo bulene henge ngadagua biamogo bilimu.
ROM 16:3 Keriso Yasunaga biabe bialu howa Pirisila Aguilabi libugua i̱ heba biabe mandagi bialu harimago libuhondo, Libu mitangi bu ko, laro.
ROM 16:4 I̱ nahomoliya libugua libunaga holene wahalu homa holene manda biya. Libugua ani biyagonaga i̱nabi wali agali tara tara Keriso hameigini karu bibahendemebi ka̱i̱ timbuni larama.
ROM 16:5 Keriso hameigini libu andagaha ngoai haga karu tihondo, Tí mitangi bu ko, laro. I̱ nenege agali turubi Ebinidasa ibu Esia dindini howa Kerisohondo mini mbiraore wu henego pigane ibu kago i̱na ibuhondo, Í̠ mitangi bu ko, laro.
ROM 16:6 Meri ibugua tínaga biabe hongo howa bia hayago ibuhondobi, Í̠ mitangi bu ko, laro.
ROM 16:7 I̱ aria Yuali Andoronigasa Yuniasala libu i̱ heba garabaya andaha mandagi harimago libuhondobi, Libu mitangi bu ko, laro. Abosolo agali karume libu bayuwa manda bu kago. I̱ Keriso hameigini nahewaha libu ala Keriso hameigini henego ka.
ROM 16:8 I̱ nenege agali turubi Ambiliadasa iya Anduane Homogoha mbiraore ho haribago ibuhondobi, Í̠ mitangi bu ko, laro.
ROM 16:9 Urubanasa ibu ina heba Kerisonaga biabe mandagi bialu harimago ibuhondobi i̱ nenege agali turubi Sadagisi ibuhondobi, Libu mitangi bu ko, laro.
ROM 16:10 Abelese ibugua Keriso mitangi bu howa mini bilinahe ho haabo hayago walia henego ibuhondobi, Í̠ mitangi bu ko, laro. Arisidobulusu ibu damene karu tihondobi, Tí mitangi bu ko, laro.
ROM 16:11 Yu agali Herodiono ibuhondobi Nasisa ibu damene Keriso hameigini karu tihondobi, Tí mitangi bu ko, laro.
ROM 16:12 Taraibina Taraibosala libu Anduane Homogonaga biabe bia haga kago libuhondobi, Libu mitangi bu ko, laro. I̱ nenege agali turubi Pesisi ibugua Anduane Homogonaga biabe timbuniore bia halu henego kago ibuhondobi, Í̠ mitangi bu ko, laro.
ROM 16:13 Lubasa ibugua Anduane Homogonaga biabe bia halu howa marume biagadagua ndo ibugua ti bu bolangua halu biabe biaga kago ibuhondobi ibu ai̱yahondobi, Libu mitangi bu ko, laro. Ibu ai̱yahanda ibuni iginiore hondo hagadagua i̱bi hondo hayagonaga laro.
ROM 16:14 Asingiridasa Pelegono Hemese Padorobasa Hemasa imaruhondobi ti heba Keriso hameigini bibahende karuhondobi i̱na, Tí mitangi bu ko, laro.
ROM 16:15 Pilologasabi Yuliabi Nereasabi ibu mbalini bedagobi Olimbasabi ti heba Ngode Datagaliwabenaga wali agali bibahende karubi ti bibahendehondo, Tí mitangi bu ko, laro.
ROM 16:16 Tíni bibahendeme gi tigali bialu halimu. Kerisonaga wali agali bibahende karume tíhondo, Tí mitangi bu kama, lalu lawia hara.
ROM 16:17 I̱ hamene mbaliniru-o bi hongo howa larogo ogo. Agali maru karume Keriso hameigini mo talebu ki biagabi wali agali Ngode Datagaliwabehondo mini mbiraore wu karu mo pila hagabi ani biaga karu tí de hondo halimu. Tígua mana yu tiga birimigonaga waitigi ale karu ti heba mandagi nahalimu.
ROM 16:18 Mana ogoni biaga karu tigua ina Anduane Homogo Kerisonaga biabe bia haga ndo tini hame ledagonaga biabe biaga ka. Tigua bi timbuni lalu laragomebi mo turu holenaga lalu bi laragomebi wali agali mini gedaore karu mo hondo haga ka.
ROM 16:19 Tí kamirume Bi Mana Debene mitangi bialu mini bilinahe ho haabo kamigo wali agali bibahende karume hale hai ho ka. Irane ogoninaga i̱na tí mitangi bialu turu ho kogoni. Tígua bayale ngago hondowa mini gigabiwi halu ko ngagome tíni para holigo hogorale bu halimulo hame ledo.
ROM 16:20 Inanaga mo palia holene teneore Ngode Datagaliwabe kago ibugua dama Heyolabe tígua geme hengedalimulo tí ge dindiha berelolebira. Ina Anduane Homogo Yasunaga biamogo bia holene tí heba wiaabo helo hamelo ko.
ROM 16:21 Timodi ibu i̱la biabe mandagi bialu kabago ibugua tíhondo, Tí mitangi bu ko, lalu lawia hara. Lusiasa Yaisono Sosibada imarume ti Yu agali i̱ aria howa tíhondo, Tí mitangi bu kama, lalu lawia hara.
ROM 16:22 Beba ogoni Tediasa i̱na gili bia harogo i̱ Keriso hameigini howa tíhondo, I̱na tí mitangi bu ko, laro.
ROM 16:23 I̱ tomo ngialu haga Gaiasa ibu andagaha Keriso hameiginiru ngoai hagago ibugua tíhondo, Tí mitangi bu ko, lalu lawia hara. Erasadasa ibu tano ogoninaga muni hondo haga kago ibubi inanaga hameigini Kodasabi libugua tíhondo. Tí mitangi bu kaba, lalu lawia hara. [
ROM 16:24 Ina Anduane Homogo Yasu Kerisonaga biamogo bia holene tí bibahende kamigoha wiaabo helo hamelo ko. Aniore bilo laro.]
ROM 16:25 Tí Yasu Kerisohondo mini mbiraore wu kamigo hongo ho haabo halimulo Ngode Datagaliwabehanda tí mo hongo habehe ka. Yasu Kerisonaga Bi Mana Debene i̱na lamirulidaguabi bi heneneore ala mo pani nahe ngelenego áyu mo pani ho ngadaguabi Ngode Datagaliwabehanda tí mo hongo habeheore kagonaga iname ibunaga mini yaraga hami̱ya.
ROM 16:26 Anigo Ngode Datagaliwabe mana latagi haga henerume bi gilibu wini ngagome mana heneneore ogoni latagi halu lo nga. Ngode Datagaliwabe haluhe nahomaga kago ibugua mana ogoni wali agali dindi bibahendeni karu hale hai helo lamule pudaba lene. Ani lenego wali agali uruni tigua Ngode Datagaliwabehondo mini mbiraore wialu helobi ibugua bia laradagua bialu helobi mana ogoni lamule pudaba lene.
ROM 16:27 Yasu Keriso ibuha howa Ngode Datagaliwabe mbiraore kago ibu hangu mini gigabiwiore kago ibunaga mini yaraga haaboboore helo hamelo ko. Aniore bilo laro.
1CO 1:1 I̱ Polo. I̱ Keriso Yasunaga abosolo holiya Ngode Datagaliwabe ibuni hame leagome i̱ olene kogoni. I̱bi inanaga hamene Sosodenisibi iyame beba ogo tíhondo gilibu wia haraba.
1CO 1:2 Keriso hameigini Korindini kamiru bibahende Ngode Datagaliwabenaga loma bia hene halimulo ibugua tí olayaru Keriso Yasuha ho gimbu bu howa Ngode Datagaliwabenaga kami. Tíbi wali agali dindi bibahendeni karubi inabi ina bibahendenaga Anduane Homogo Yasu Kerisonaga mini olalu karume tí bibahendehondo
1CO 1:3 inanaga Aba Ngode Datagaliwabebi Anduane Homogo Yasu Kerisobi libugua biamogo bia holenebi mo palia holenebi ngilo hamelo ko.
1CO 1:4 Ngode Datagaliwabehanda Keriso Yasuha howa ibunaga biamogo bia holene tíhondo ngiyagonaga i̱na tí mitangi bialu i̱naga Ngode Datagaliwabehondo ka̱i̱ laabo halu ko.
1CO 1:5 Ani buwa tí Kerisoha ho gimbu bu howa mbirale bibahende karulapeore yu kami. Bi lolene bibahendebi manda bulene bibahendebi heba karulapeore yu kami.
1CO 1:6 Kerisohanda biyago lamulene mana tígua hongo howa yu tiga bialu
1CO 1:7 Anduane Homogo Yasu Keriso lone ha pani helo hondo kami tambu turu holene mbira nayi ndo bibahendeore yu hai ho kami.
1CO 1:8 Anduane Homogo Yasu Kerisonaga Horo haragola tí mbiralime ko birimi nalelo ibugua tí hongo haabo halimulo haru halu hamaro bulebira.
1CO 1:9 Ngode Datagaliwabehanda ibu Igini inanaga Anduane Homogo Yasu Keriso heba tí mo mbiraore howa halimulo olayago Ngode Datagaliwabe ogoni ibu mini bilinaheore kagoni.
1CO 1:10 I̱naga hamene mbaliniru-o Anduane Homogo Yasu Kerisonaga hongoni howa i̱na tí bibahendehondo bilimulo hame ledogo ogo. Tí talebu baga nabilimu. Tí bibahendeme bi laramigo mini mbiraore howa bi lolene nga. Mitangi bulenebi hame lolenebi mo mbiraore haiore howa holene nga.
1CO 1:11 Kalowi ibunaga damene marume, Tí lai lagalaga bialu kami, lalu i̱hondo bayuwaore langiai haya.
1CO 1:12 Ani langiyadagua langero. Tí hangu hangu howa bi tara tara lalu kami laya. Mbirame lalu, I̱ Polo aria kogoni, larimiya. Mendeme lalu, I̱ Aboloso aria kogoni, larimiya. Teboneme, I̱ Pida aria kogoni, larimiya. Maneme lalu, I̱ Keriso aria kogoni, larimiya lalu langiya.
1CO 1:13 Keriso ibu dewa talebu baga bu kabe. Polohanda ira bangani ba para howa tínaga homa henebe. Tí Polonaga talima piaga howa baboraya birimibe.
1CO 1:14 I̱na tí baboraya nabi Karisabasa Gaiasala dege baboraya birugonaga Ngode Datagaliwabehondo turu haro.
1CO 1:15 Anigo tí mbiralime Polonaga talima piaga howa baboraya bini lolene nawi.
1CO 1:16 O mbira embeda harudago Sebanasabi ibu damenebi ti haru i̱na baboraya biru. Ani birugo maru baboraya birube be nabibe mitangi nabi ko.
1CO 1:17 Kerisohanda i̱hondo, Baboraya bule í̠ pu, lene ndo. Ibugua, Ngode Datagaliwabe Bi Mana Debene lamima pobe, lene. Ani lowa Keriso ira bangani howa homa henegonaga hongo yu waholilono ibugua, Mini gigabiwi karume laralidagua ndo lalu Bi Mana Debene lamima pobe, lene.
1CO 1:18 Keriso ira bangani howa homa henegonaga mana hale howa hariga koha pialu karume mana ogoni lulu mana ale manda biaga. Anigo ina Ngode Datagaliwabenaga pele mulene yu kamarunaga mana ogoniha Ngode Datagaliwabenaga hongo holene nga.
1CO 1:19 Anigo Anduane Homogonaga mbugani bi lo ngago ogo, Mini gigabiwi karunaga mini gigabi wulene i̱na mo waholebero. Mana manda timbunibi karunaga manda bulene i̱na mo emene holebero, lalu gilibu nga.
1CO 1:20 Anigo wali agali mini gigabiwi karu mitangi bialu galone agi manda bibehebe. Mana manda timbunibi karu dindi bibahendenaga bime wai biaga karubi ti mitangi bialu galone agi manda bibehe kamabe. Dindinaga mini gigabiwi holene galone ndo mini nawi ale ngago lalu Ngode Datagaliwabehanda walia kagoni.
1CO 1:21 Ngode Datagaliwabehanda ibunaga mini gigabiwiore howa wali agali tininaga mini gigabi wuleneme ibuni manda nabibehe helo wini. Ani winigo irane iname lulu mana ale lameramaligome Yasu Kerisohondo mini mbiraorewi karu Ngode Datagaliwabehanda ti pele mule manda bini.
1CO 1:22 Yu wali agalime lalu, Agalime nabiagane ale walia ha, laga. Girigi wali agalime mini gigabi wulene hai biaga.
1CO 1:23 Anigo iname mana lamialu howa, Keriso ira bangani homa henego, lameramali. Mana ogoni hale howa Yu wali agalime irane mitangi nabiaga ka. Girigi wali agalime hale howa galone ndo lulu mana aleda laga ka.
1CO 1:24 Ngode Datagaliwabehanda Yu wali agalibi wali agali tara tarabi olo heleneru tigua mana ogoni hale howa Keriso ibu Ngode Datagaliwabenaga hongo holenebi ibunaga mini gigabi wulenebi mana ogoniha nga ti manda biaga.
1CO 1:25 Tígua Ngode Datagaliwabe ibu mini nawi ale ka mitangi beramilibe. Mini nawi ale ka mitangi birimiyagua ogoni wali agalinaga mini gigabi wiaga ale ndo ibu mini gigabiorewi ka. Ngode Datagaliwabe ibu hongo nahe ka mitangi beramilibe. Hongo nahe ka mitangi birimiyagua ogoni wali agalinaga hongo ale ndo ibu hongo gibiorehe ka.
1CO 1:26 Ogonigo hamene mbaliniru-o Ngode Datagaliwabehanda tí Kerisonaga halimulo olayangi tí abi harimibe mitangi bilimu. Dindialirume mitangi biagadagua tí mini gigabiwibi hongohebi mini lenebi dewa nahe mbira mbira hangu harimigoni.
1CO 1:27 Dindiali karume maru mini nawi ale ka laganego wali agali urunibi karu Ngode Datagaliwabehanda mini gigabiwi karu taga helonaga ti dabo helene. Dindiali karume maru hongo nahe ka laganego wali agali urunibi karu Ngode Datagaliwabehanda hongohe karu taga helonaga ti dabo helene.
1CO 1:28 Dindiali karume lalu, Wali agali maru ko mini nawi nakarulape habane nabulenebi ka, lagaru wali agali urunibi Ngode Datagaliwabehanda dabo helene. Ani binigo irane dindialime galonedalo mitangi biaganego tini galone ndodane hendelo ani bini.
1CO 1:29 Ani binigo wali agali bibahendeoreme Ngode Datagaliwabe deni howa mbiralime mine holene henge nawiore.
1CO 1:30 Ngode Datagaliwabe ibunime tí Keriso Yasuha ho gimbu bu howa ibugua inanaga mini gigabi wulene tene Keriso ibu helo hela hene. Keriso Yasu minini howa Ngode Datagaliwabehanda inahondo, Tí mini tigabiwi kami, lene. Kerisohanda ina mo Ngode Datagaliwabenaga wali agali hela halu ina golope hene kama.
1CO 1:31 Ani binigo Anduane Homogonaga mbugani lo ngadagua ogo, Mbiralime mbiralinaga mini mo yaraga hoa kayagua Anduane Homogohanda biyago mitangi bialu ibunaga mini hangu mo yaraga holene nga, lalu gilibu nga.
1CO 2:1 I̱ hamene mbaliniru-o i̱na tí hemiria pigane ibirungi Ngode Datagaliwabe bi mana henene ala mo pani nahe ngelenego langialu howa bi taibi manda timbuni bulenebi lalu ndo lawai haru.
1CO 2:2 I̱na tí heba howa mana maru mitangi nabi Yasu Keriso dege mitangi bialu ibu ira bangani homenego te ogoni hangu langulene nga manda bu harugoni.
1CO 2:3 I̱ tí heba íbu harungi hongo nahe gi halu duru lalu harugoni.
1CO 2:4 I̱na bi larugobi mana lawai harugobi mini gigabiwime tingi howa bi lalu ndo Ngode Datagaliwabe Dinininaga hongo tíhondo walia halu ogonime lawai harugoni.
1CO 2:5 Ani biyago Kerisohondo mini mbiraore wu kamigo agalinaga mini gigabi wuleneme ndo tene Ngode Datagaliwabe ibunaga hongoni howa birugome tí mini mbiraore wu kami.
1CO 2:6 Anigo i̱na Ngode Datagaliwabenaga wali agali mini bogabi karu tihondo mini gigabi wulene bi mana lamiruli. Mini gigabi wulenenaga bi mana ogoni dindialinaga ndo dindini agali haguane karu tinagabi ndo. Tinaga hongo holene ereba haragoni.
1CO 2:7 Mini gigabi wulenenaga bi mana laruligo o Ngode Datagaliwabenaga mini gigabi wulene bi mana ala mo pani nahe ngelenego laruli. Bi mana ogoni dindialirume nahendelonaga ani ngelene. Bamba dindi nawabi howa Ngode Datagaliwabehanda mini gigabi wulene bi mana ogoni inanaga baya taraore holene wilonaga ani dabo ngelene.
1CO 2:8 Dindini haru hagane hearume mana ogoni manda nabi hene. Manda bu henedale tigua mini daliga taraore lolenenaga Anduane Homogo ira bangani ba para nakale.
1CO 2:9 Anigo Anduane Homogonaga mbugani lo ngadagua ogo, Mbirale wali agali tinaga deme nahendenegobi tinaga haleme hale nahenegobi tinaga miniha andape nabinigobi ogoninagaore Ngode Datagaliwabehanda ibuhondo gubalini ho karu tihondoore mule manda manda bu ngelene, lalu gilibu nga.
1CO 2:10 Ogonigo Ngode Datagaliwabehanda ibu Dininiha howa inahondo ibunaga bi mana ogoni ala pani nahe ngelenego mo pani haya. Ngode Datagaliwabe Dinini ibugua bibahende de handai howa Ngode Datagaliwabenaga mana pani nahe ngelenegobi de handai ho ka.
1CO 2:11 Mbirali ibunaga mini ngago aiwa manda bidabe. Ibuni dege manda bu ka. Anigo Ngode Datagaliwabe ibunaga mini ngago ibu Dinini ibuni dege manda bu ka.
1CO 2:12 Ngode Datagaliwabehanda inahondo dindialinaga dinini ngiya ndo ibuni Dinini ibilayago ngiya. Ngode Datagaliwabehanda inahondo bibahende ngiyaru iname manda buluma̱yanaga ibugua ibu Dinini ogoni inahondo ngiya.
1CO 2:13 Anigo iname bi laramago dindialinaga mini gigabiwi howa lalu ndo kama. Ngode Datagaliwabe Dinini ibugua inahondo, La, laradagua iname Ngode Datagaliwabe Dininihe karu tihondo ibu Dinininaga mana lawai haramali.
1CO 2:14 Ngode Datagaliwabe Dinini ibugua ngiaga ngaru mbirali ibunaga bu habaneha Ngode Datagaliwabe Dinini nahe kagome yu habe nahe ka. Ibugua ogoni galone ndodago lowa manda nabiaga ka. Wali agalinaga bu habaneha Ngode Datagaliwabe Dininihe karu tigua dege galonedalo manda biaga ka.
1CO 2:15 Mbirali ibunaga bu habaneha Ngode Datagaliwabe Dininihe kago ibugua mbirale bibahende bayuwa manda bialu dababehe ka. Wali agali maru tinaga bu habaneha Ngode Datagaliwabe Dinini nahe karume Ngode Datagaliwabenaga wali agali ibunaga Dininihe karu bayuwa manda bialu nadababehe ka.
1CO 2:16 Anduane Homogonaga mbugani lo ngadagua ogo, Anduane Homogonaga bu mini aiwa manda bidabe. Ibuhondo, Agua bibe agua nabibe, lalu mbirali aiwa labehe kabe, lalu gilibu nga. Anigo Keriso hameigini kamarume ina Kerisonaga mini karulo kamagoni.
1CO 3:1 Ogonigo i̱ hamene mbaliniru-o i̱na wali agali maru tinaga bu habaneha Ngode Datagaliwabe Dininihe karuhondo bi larulidagua tí kamiruhondo ani labe nahe haru. I̱na dindi mana hangu biaga karuhondobi Keriso hameigini mini odahe ale karuhondobi larulidagua tíhondo bi ani lalu haru.
1CO 3:2 Tí waneigini gali ale mini boga nabi hemigo hondowa tomo daliahe nabe naheyagola i̱na tíhondo andu iba ale hangu ngirugoni. Dindi mana biagame bialu hagadagua tíguabi áyu bialu howa tomo daliahe nabe nahe kamigoni. Tígua i̱ nayido agini henge lalu bi wai bialu kamirume dindi mana biagame bialu hagadagua bialu kamigo walia haga ndobe.
1CO 3:4 Tí mbirame lalu, I̱ Polo aria kogoni, mendeme, I̱ Aboloso aria kogoni, lalu kamigo tí dindialime lalu hagadagua lalu kami ndobe.
1CO 3:5 Anigo Aboloso ibu ai kabe. Polo i̱bi ai kobe. Iya Ngode Datagaliwabenaga biabe bia haga agali haribagome tígua Anduane Homogohondo mini mbiraore wirimi. Anduane Homogohanda biabe tara tara tale bialu inahondo ngiyago iyahondo ngiyadagua bialu harabali.
1CO 3:6 Ngode Datagaliwabe mana egene ale pigane i̱na hangaru. Aboloso ibugua egene hangarugoria iba odo mialu haya. Anigo egene ogoni mo anda haga Ngode Datagaliwabe ibuni hangu ka.
1CO 3:7 Agali egene hangayago ibubi agali iba odo miyago ibubi libu haru tene ndo ka. Ngode Datagaliwabe ibugua egene mo anda hagago ibuni teneore ka.
1CO 3:8 Egene hangayago ibubi egeneni iba odo miyago ibubi libu mbiraore kagoni. Libu biabe biyadagua Ngode Datagaliwabehanda yolo hangu hangu mulebira.
1CO 3:9 Ogonigo iya Ngode Datagaliwabenaga biabe mandagi bialu kabago wali agali tí Ngode Datagaliwabenaga mabu ale kami. Tí Ngode Datagaliwabenaga anda alebi kami.
1CO 3:10 Ngode Datagaliwabehanda mugube ngiyadagua i̱ anda bulenenaga mandabi howa ina anda gene waru. Mendealime anda gene wa wirugoriani anda bialu ka. Ina hangu hangume howa biabe bayuwa berolo manda buwa bulene nga.
1CO 3:11 Yasu Keriso ibuniore anda gene helo Ngode Datagaliwabehanda ibu helenego gene mende helolene nawiore.
1CO 3:12 Marume gene o wa helayagoriani anda bialu howa ngolomebi silibamebi to̱le̱ tara tara muni dewa miaganemebi marume iramebi dangimebi widinaga iranemebi anda bulebira.
1CO 3:13 Kerisohanda dabolene Horo harangi biabe birimadagua bu pani holeberama. Horo ogoningi ira daragola ina hangu hangume biabe birimadagua walia holebira. Ira ogonime ina hangu hangunaga biabe birimadagua bo heda halu bayale birimadabe be ko birimadabe walia holebira.
1CO 3:14 Mbiralime anda gene o wa helayagoriani anda biyago nade haabo hayagua ibuhondo yolo mulebira.
1CO 3:15 Mendealime anda gene o wa helayagoriani anda biyago irame dai hayagua ibuhondo yolo nami ibu irame doligo lowa ibuni ibida tagira pu hagadagua pu holebiragonaga pele mia dege bulebira.
1CO 3:16 Tí bibahende Ngode Datagaliwabenaga anda kamigo Ngode Datagaliwabe Dinini tíha kago mitangi nabiore kamibe.
1CO 3:17 Anigo mbiralime Ngode Datagaliwabenaga anda mo ko hayagua Ngode Datagaliwabehanda o biago ibu nde mo ko holebira. Irane ibunaga anda loma bia hene kago nde ibunaga anda ogoni tíniore kamigoni.
1CO 3:18 Mbiralime ibuni mo hondo holene nawi. Dindini karume mitangi biagadagua tí kamigoha mbiralime, I̱ mini gigabiwi ko, mitangi bu kayagua ibu mini gigabiwiore holenaga ala ibu mini nawi ale ho dai bulene nga.
1CO 3:19 Irane dindini karume mini gigabi nga laganego Ngode Datagaliwabehanda handalu karia galone ndodane handaga ka. Anduane Homogonaga mbugani lo ngadagua ogo, Agalinaga mini gigabi wulene ngagome tini gono wu kago delo Ngode Datagaliwabehanda ngelo ka, lalu gilibu nga.
1CO 3:20 Ngode Datagaliwabenaga mbugani bi mende lo ngago ogo, Agali mini gigabiwi kagonaga mitangi bulene Anduane Homogohanda hondowa o ibu habane nabulenedane hondo ka, lalu gilibu nga.
1CO 3:21 Ogonigo mbiralime dindialiru tigua biaganeru hondowa mine holene nawi. Mbirale bibahendeore ngaru tí kamirunaga ngagoni ndobe.
1CO 3:22 Polobi Abolosobi Pidabi dindi bibahendeni karubi ngarubi holenebi homolenebi áyu ngagobi awe wulebiragobi bibahendeore ta nabi tínaga ngagoni.
1CO 3:23 Tí nde Kerisonaga kami. Keriso ibu nde Ngode Datagaliwabenaga ka.
1CO 4:1 Tígua ina Kerisonaga biabe bia haga agali kalo manda bilimu. Ngode Datagaliwabenaga bi mana henene ala mo pani nahe ngelenego ogoninaga haru hagane holoma̱ya ina mo hela henego kamagoni.
1CO 4:2 Biabe bia hagame bulene ngago ogo. Ibunaga Anduanehondo mini bilinahe holene nga.
1CO 4:3 Tíguabi maru karumebi, Polo nakarulape ka, lalu dabaramiligo ogoni galone ndo manda bido. I̱nime karulape kobe nakarulape kobe dababe nahe ko.
1CO 4:4 I̱na mbira birugo i̱naga miniha nakarulape biri nalangiaga. Ani nalangiragome i̱ karulapeore kogo labe nahe dege kogoni. Aguani manda bulene karulape biri nakarulape biri lalu langiaganego i̱naga biabe ndo Anduane Homogo ibunaga nga.
1CO 4:5 Anigo horo pongo bo winigo naibi ngaore tí áyu ogoni howa ko biri bayale biri laga bialu mbirali dabolene nawi. Anduane Homogo ibirangi hamaronaga daba ki ibuni bulebira. Ibugua ani bialu howa wali agalime mbirale arumahayagi do ho ngaru wá kagoria mo ngelalu bu miniha mbira bua ho ngaru ibugua latagi helalu bibahendeore mo pani hai holebira. Ani bialu Ngode Datagaliwabehanda wali agali hangu hanguhondo, Bayale biri, lolene ngadagua lolebira.
1CO 4:6 Hamene mbaliniru-o tí walia halu i̱na bi ogoni langirugo Abolosobi i̱bi iyanaga bi langirugoni. Iya walia haga ale howa bi mbira laganego tí lo manda bilimulo ogo, Wali agali mitangi bialu bulene lo winidagua manda bialu dege bulene nga, lalu gilibu nga. Tígua mine halu agali mbiranaga mini yaraga halu mendenaga mini mege bialu holene nawi.
1CO 4:7 Wali agali maru dindiha helo tí daliga helayadago aiwabe. Bibahendeore yu kamiru Ngode Datagaliwabehanda ngiyago yu kamigoni ndobe. Ngode Datagaliwabehanda ngiyago yu kamiyagua nde aginaga mine halu kamibe.
1CO 4:8 Áyu ogoni tígua mbirale wulenego wuwa hai kamigoni. Áyu ogoni tí homogoore kami. Tígua ina bolangua halu kini ale ho kamibe. Anigo inabi tíbi kini ale howa mandagi haru hami̱ya tí kini heneneore halimulo i̱na hamelo ko.
1CO 4:9 Ngode Datagaliwabehanda ina abosolo agali mahaore helayago mitangi bu ko. Wali agalibi dahuliyalibi bibahende de hendelo agali homelo bolene wulebira lenego ale ina kama.
1CO 4:10 Ina Kerisonaga mini yaraga halu kamaria hondowa marume lalu, Tí mini nawi ale kami, laga ka. Tí ani ndo. Tí Kerisoha howa marume lalu, Tí miniwi kami, laga ka. Ina hongo nahe kama. Tí hongohe kami. Ina mini lene ndo kama. Tí mini leneore kami.
1CO 4:11 Alabi áyubi ina tomo garibi lalu ibabi noa ho haga kama. Ina labolabo ko lerele bu hagabi marume ina bagagobi anda nahe palia andanda bu hagabi kama.
1CO 4:12 Ina holenenaga biabe gime hongo howa bialu haramali. Marume inahondo bi magubi laragola iname tihondo bi dendebi ladai beramali. Marume ina mo tandaga haragola iname mbira bia dai naberamali.
1CO 4:13 Marume ina mege biragola iname bi bayale dege ladai beramali. Ina dindi bibahendenaga ko ngubi ale howa wali agali bibahendenaga ti to waharagobi ho halu áyubi ani dege kamagoni.
1CO 4:14 I̱na tí taga halimulo bi ogoni bebani gilibu wia ndo haro. Tí i̱naga waneiginiore kamigo manda bialu i̱na tí mana manda bilimulo gilibu werogoni.
1CO 4:15 Tí Kerisoha howa tínaga haru hagane dewa daosini pira (10,000) kayagua tínaga aba mbira hangu kagoni. Anigo tí Keriso Yasuha hemigola i̱na Bi Mana Debene langialu tínaga aba i̱ harugoni.
1CO 4:16 Ogonigo i̱ kodagua tíbi halimulonagaore hame timbuni lo kogoni.
1CO 4:17 Tí aguani halimulonaga i̱na Timodi tí kamiria ibilarogoni. Ibu Anduane Homogoha howa i̱naga iginiore mini bilinahebi kagoni. Keriso Yasuha howa i̱na holene gahenge yu howa mana dunini yu haruligobi dindi uruni bibahendeni Keriso hameigini karuhondo lawai haruligobi uruni Timodi ibugua tí mo mitangi bia holebira.
1CO 4:18 Tí marume i̱ tí kamiria nahondo ibulebira lowa mine halu kami.
1CO 4:19 Anduane Homogohanda pu layagua nde abale ibulebero. I̱na ibuwa mine halu karume bi lararu hale hole ndo tinaga hongo holene abi ngabe hondole ibulebero.
1CO 4:20 Irane Ngode Datagaliwabehanda Handame Ho Kagoria tene bi lolene ndo hongo holeneore nga.
1CO 4:21 Tí agi hamelo kamibe. I̱na tí tibume boliya hamelo kamibe be gubaliniore howa mini gedaore holene yalu ibuliya hamelo kamibe.
1CO 5:1 Keriso hameiginiru tí kamigoha wali agali maru kayu bialu ka lalu marume i̱ langiya. Ogoni ko taraore birago Ngode Datagaliwabe mana manda nabi karumebi biagadagua ndo ko taraore bialu ka. Bi langiyagome lalu, Agali mbirame ibu aba one heba mandagi ibuni onela haradagua bialu ka, lalu langiya.
1CO 5:2 Ani biragola tí mine halu kamigo irane agibe. Tígua mine nahe taga timbuni howa dara halu agali ogonime nakarulape bialu kago ibu tí baba mandagi nahe tagira helalimu.
1CO 5:3 I̱ni tingini kaundia kogonigo i̱naga bu mini dininibi tí heba helowa kogoni. I̱na Anduane Homogo Yasunaga minini howa agali ogoni ibu ko timbuniore biya lalu dabarugoni. I̱na bi o larogoni tí heba mandagi howa laradagua bero.
1CO 5:4 Tí mandagi ngoai ho bedamigoria i̱naga bu mini dininibi tí heba mandagi biruwa inanaga Anduane Homogo Yasunaga hongo holene ina heba kagome
1CO 5:5 tígua agali ogonime ibunaga mini ko bo pelo ibu dama Heyolabenaga giha ya halimu. Irane Anduane Homogonaga Horo harangi ibu dinininaga pele mulene yu helo.
1CO 5:6 Tí mine halu kamigo bayale ndo. Bi mbira laganego ogo, Yidi emeneme balawa timbuni helo mo timbu haga, ani laganego tí manda bu kami.
1CO 5:7 Tí mberedi bayale aleore hole tígua yidi ko ala tawe ale ogoni mo wahalimu. Ani buwa tí mberedi bayale yidi nahe áyu dege hirini ale holeberami. Áyu nde tí ogonibi kamidalo manda bu kogoni. Bolangua Halu Penegonaga Horo mitangi bialu inanaga nogo sibi igini aleore howa Keriso ibuni loma bialu bo miagadagua ibugua homa hene.
1CO 5:8 Anigo iname mo mitangi bulene tomo áyu nalu mberedi yidi ala tawenaga ko bulenebi wali agali kayu bulenebi heba ndo mberedi yidi nahe bayaleorenaga mini gahengebi henene lolenebi heba nalu hami̱ya.
1CO 5:9 I̱na ala tíhondo beba gilibu wia harugo wali agali kayu biaga karu heba tí mandagi nahalimu lalu gilibu wia harugoni.
1CO 5:10 Ani gili birugo Ngode Datagaliwabe mitangi nabi karume wali agali kayu biagabi mbirale ngago dimagoli hagabi mbirale kayu bule mo hondo hagabi gime wabiniruhondo bi pupu wiagabi uruni mitangi bialu ndo laru. Tígua wali agali urunibi heba nahabehe mitangi bidamile nde dindi o kamigoria mandagi nahe wahalu polene ngale.
1CO 5:11 I̱na bi gili birugoni agua lalu gili biru. Wali agali mbiralime, I̱ Keriso hameigini kogoni, lowa o biagome wali agali kayu biagabi dimagoli hagabi gime wabiniruhondo bi pupu wiagabi bi gungu biagabi lulu yule lulu iba timbuni nagabi mbirale kayu bule mo hondo hagabi urunibi biaga heba mandagi nahe tomobi ibu heba nane halimu.
1CO 5:12 Wali agali tagira karu tihondo ogobi kami lolenego i̱naga biabe ndo. Ngode Datagaliwabe ibugua tihondo tí ogobi kami lolebira. Keriso hameigini tí mandagi kamiru dabolene tíninaga biabe ndobe. Anduane Homogonaga mbugani lo ngadagua ogo, Wali agali ko bialu kago ibu tagira helalimu, lalu gilibu nga.
1CO 6:1 Tí mbiralime Keriso hameigini mendela godi lolene ngagola Ngode Datagaliwabe mitangi nabiagane karume daba ki bilo haru poramiligo agibe. Ngode Datagaliwabenaga wali agali tínime mo tiga bulene nga ndobe.
1CO 6:2 Ngode Datagaliwabenaga wali agali iname dindi bibahendeni karunaga daba ki bulene inanaga wulebirago manda nabi kamibe. Anigo tígua wali agali dindi bibahendeni karunaga daba ki bulene tínaga ngayagua tígua áyu emene ngaru daba ki nabibehe kamibe.
1CO 6:3 Dahuliyalirume biraru iname dabolene wulebirago manda nabi kamibe. Anigo áyu dindini karume mbirale mbira biraru iname dababeheore kama ndobe.
1CO 6:4 Mbirale mbira biraru mo tiga bulene ngayagua Keriso hameigini ndo karume mo tiga bilo ti karia haru poleberamibe.
1CO 6:5 Tí taga habehe kamigoni. Tí kamigoria mbirale mbira biraru mo tiga bulene tíni aria mini gigabiwi mbira nahedabe.
1CO 6:6 Ani nabi howa Keriso hameigini mbirali ibugua Keriso hameigini mendealigo heba godi lolenaga Ngode Datagaliwabe mitangi nabi karume mo tiga bilo ti karia haru poramili.
1CO 6:7 Tígua ani bialu kamigome tí bibahende hongo ibira hai kamigo lalu walia haga. Marume tí mo hondo hayaguabi tínaga mbirale mo page yalu piyaguabi tígua la nabi waholenego bayale ndobe.
1CO 6:8 Tí ani nabi howa tígua tíni Keriso hameigini degedege howa mo hondo hagahaga bialubi tíninaga mbirale page bigibigi bialubi kami.
1CO 6:9 Ngode Datagaliwabe mana mo yo handagane karu tigua Ngode Datagaliwabehanda Handame Ho Kagoria ti holene henge nawulebiraorego manda nabi kamibe. Tínime tíni mo hondo nahalimu. Wali agali dabu nabi howa kayu biagabi gime wabiniruhondo bi pupu wiagabi wali agali dabu bu howa tara baba kayu biagabi agalime agali nenegene maru baba mana ko ngubi taraore biagabi
1CO 6:10 mbirale page biagabi mbirale ngago dimagoli hagabi lulu yule lulu iba timbuni nagabi bi gungu biagabi mbirale page bule mo hondo hagabi uruni bibahende biaga karume Ngode Datagaliwabehanda Handame Ho Kagoria ti holene henge nawulebiraore.
1CO 6:11 Ala tí maru ogonibi bialu harimigoni. Ani bialu hemiria Ngode Datagaliwabehanda tígua ko birimigo domo wahai howa ibunaga wali agaliore helo tí dabo bagi henego kami. Ngode Datagaliwabehanda tíhondo, Tí mini tigabiwi kami, lenego Anduane Homogo Yasu Keriso minini howabi inanaga Ngode Datagaliwabe Dinini ibuguabi tí ani helene kami.
1CO 6:12 Tí mbiralime lalu, I̱ mbirale bibahende ta nabi biai habehe kogoni, loleberami. E̱ ani bibehegoyu bibahende ta nabi ngagome tí mo bayale helonaga ndo nga. I̱na bibahende ta nabi ngaru biai habehe kogoni labehe howa mbirale urunime i̱ dariba habehe nga manda biruyagua nde nabulebero.
1CO 6:13 Tí marume lalu, Tomo tombenaga ngago tombe nde tomonaga nga ndobe lolebira. E̱ anigoyu Ngode Datagaliwabehanda tomobi tombebi kiroba mo wiamaro bilolebira ndobe. Inanaga tingini wali agali kayu bilo helene ndo Anduane Homogonaga biabe bilo helene. Anduane Homogo ibu nde ina tingininaga holene ngiaga ka.
1CO 6:14 Ngode Datagaliwabehanda ibunaga hongome Anduane Homogo mo heya henego inabi ibunaga hongome mo heya holebira.
1CO 6:15 Tínaga tingini hangu hangu howa Kerisonaga tingini ho kamigo manda bu kami. I̱na Kerisonaga tingini ogoni howa bayanda wali kayu biaga bedarunaga tinginiha gimbu bulene ngabe. Nawiore ndobe.
1CO 6:16 Agalime ibunaga tingini bayanda wali kayu biaga biago tinginiha gimbu biyagua libu tingini mo mbiraore hagago manda nabi kamibe. Anduane Homogonaga mbugani bi bayuwaore lo ngago ogo, Libu wali agali kira howa tingini mbiraore holebira, lalu gilibu nga.
1CO 6:17 Anigo mbiralime Anduane Homogoha gimbu biyagua libu dininiha howa mbiraore haga ka.
1CO 6:18 Wali agali kayu biaga kagoha nape ha bagi halimu. Wali agali mbirame ko maru birago ibunaga tingini tagirahayagi howa biaga. Wali agali kayu birago ibunime ibuninaga tingini mo ko haga.
1CO 6:19 Tínaga tingini hangu hangu howa Ngode Datagaliwabe Dinininaga anda kamigo manda nabi kamibe. Ngode Datagaliwabehanda ibu Dinini ogoni turu halu bame ngiyago ibu tíha haabo kagoni. Ai tí tíninaga ndo tí Ngode Datagaliwabenaga kami.
1CO 6:20 Ngode Datagaliwabehanda tí ibuninaga halimulo lowa yolo binigo mitangi buwa tígua tíninaga tinginime Ngode Datagaliwabe mini mo yaraga haabo halu halimu.
1CO 7:1 Ai tígua beba i̱hondo gilibu wia harimigonaga bi ladai bero. Agalime wali dabu nabi hole manda biyagua karulape.
1CO 7:2 Ani bibehego wali agali kayu dewa bialu kagodago agali bibahende hangu hangu howa tinaga one mbira mbira dabu bu berelolene nga. Wali bibahende tibi hangu hangu biruwa tinaga agalini mbira mbira heba birulene nga.
1CO 7:3 Agalime ibu onehondo bulene ngadagua bialu onemebi ibu agalinihondo bulene ngadagua bialu libuni mini hana haga bialu holene nga.
1CO 7:4 Ani howa one ibunaga tingini ibuni haru helonaga helene ndo ibu agalinime haru helonaga helene. Ogonidagua agalini ibubi ibunaga tingini ibuni haru helonaga helene ndo ibu oneme haru helonaga helene.
1CO 7:5 Ani buwa onene agalinila libuni degedege hame nale hagahaga bulene nakarulape. Oneme agalinila libu lo mbiraore howa, Iya Ngode Datagaliwabehondo bi galone maru lolene henge wilo emene hondo haba, laribiyagua o karulape. Ogoninaga bi galone maru ogoni Ngode Datagaliwabehondo lai howa onene agalinilame mandagi holene ngadagua holene nga. Tínaga mini haru nahabehe kamigo hondowa dama Heyolabeme ko mo bia holene henge hondoligo de hondo holene nga.
1CO 7:6 Ani buwa bi larugoni tí ani buleberami manda buwa bi lo wialu ndo tí ani bua biyagua nde bibehe lalu laro.
1CO 7:7 Ani larogo tí bibahende ina harulidagua halimulo hamelo kogoni. Ani ndo Ngode Datagaliwabehanda ina hangu hanguhondo mugube tara tara ngiyadagua yu kamagoni. Ani yu howa mbiralime mugube tara mbira ale yida mendealime nde mende ale yida.
1CO 7:8 Ai agali wali dabu nabi karubi wali maru agali nape bedarubi wali dalo bedarubi tíhondo bi mbira larogo. I̱ wali dabu nabi kodagua tíbi harimiyagua bayale dege.
1CO 7:9 Tí ani habe nahe kamiyagua nde wali agali dabu bulene nga. Tíni dimagoli ho holene nakarulapego dabuore bulene nga.
1CO 7:10 Wali agali dabu bu kamiru i̱na tí bilimulo bulene mbira ngago i̱na lenego ndo Anduane Homogohanda lowinigo ngadagua langero. Oneme ibu agalini wahalu polene nawi.
1CO 7:11 Ani bialu ibu wahalu piyagua agali mende polene nawi ibuni hangu birulene nga. Ani nakarulapeyagua ibu agalini karia lone dai bulene nga. Agalinime ibu one nogo dugualu pelolene nawi.
1CO 7:12 Tí maruhondo ina bi larogo Anduane Homogo ibugua i̱ langini ndo i̱ni laro. Tí mbirali Keriso hameigini howa ibu one Keriso hamewane ndo biruwa one biagome ibu agalini heba birulene nga manda biyagua agalinime nogo dugualu ibu one pelolene nawi.
1CO 7:13 Wali mbira Keriso hamewane biruwa ibu agalini Keriso hameigini ndo kayagua agalini biagome ibu one heba holene nga manda biyagua oneme ibuhondo, Wahalu porogo í̠ nogo dugu ngerogo, lolene nawi.
1CO 7:14 Ogonigo agalini Keriso hameigini ndo kagome ibu onela gimbu bu howa ibu Ngode Datagaliwabehayagi ka. Ogonidagua onene ibu Keriso hamewane ndo bedagome ibu agalinila gimbu bu howa ibu Ngode Datagaliwabehayagi beda. Ogonidagua bia nabiyagua libunaga waneiginiru Ngode Datagaliwabe mitangi nabiaga wali agalinaga waneigini ale hangu holebira. Anigo uruninaga waneigini kadagua ndo ti Ngode Datagaliwabehayagi ka.
1CO 7:15 Agaliniyaguabi oneneyaguabi Keriso hameigini ndo howa ibugua, Wahalu poro, layagua nde ogoni pelo helalimu. Wahalu poragola howa agaliniyaguabi oneneyaguabi Keriso hameigini howa kagome ibuni hame ledadagua bibehe holebira. Irane Ngode Datagaliwabehanda ina mo palia holene yu holoma̱ya olene kama.
1CO 7:16 Ani buwa onene í̠ Keriso hamewane biruwa í̠ agalini Keriso hameigini mo hela holenego manda nabi bedebe. Agalini í̠ Keriso hameigini howa í̠ one Keriso hamewane mo bira holenego manda nabi kebe.
1CO 7:17 Ngode Datagaliwabehanda tí olayangi tí hangu hanguhondo mugube tara tara ngiyadagua biabe bialu holene nga. I̱na Keriso hameigini dindi mbira mbirani ngoai ho karu ti bibahendehondo ogodagua bulene nga lalu lawai haruli.
1CO 7:18 Agali mbira Ngode Datagaliwabehanda ibu olayangi dongone podo mabubi heneyagua ibugua ogoni mo ereba holene nga mitangi bulene nawi. Agali mende Ngode Datagaliwabehanda ibu olayangi dongone podo mabu nabi heneyagua ibu dongone podo mabu bilo mitangi bulene nawi.
1CO 7:19 Dongone podo mabu bulenebi nabulenebi galone ndogo galoneore ogo. Ngode Datagaliwabehanda, Bilimu, lo winirudagua bulene nga.
1CO 7:20 Ngode Datagaliwabehanda tí olayangi bialu harimidagua áyu nde bialu holene nga.
1CO 7:21 Ngode Datagaliwabehanda í̠ olayangi garabaya biabe ale bia haga hene hariyagua nde genda nahabe. Anigo golope holene henge ngane hondo keyagua nde golope helabe.
1CO 7:22 Mbirali garabaya biabe ale bia haga howa Anduane Homogohanda ibu olayago áyu ibu Anduane Homogonaga golope ho helene kagoni. Ogonidagua mbirali garabaya biabe ale nabi hene howa Kerisohanda ibu olayago ibu Kerisonaga garabaya biabe ale bia haga ka.
1CO 7:23 Ngode Datagaliwabehanda tí ibunaga halimulo yolo timbuniore binigo agalinaga garabaya biabe ale bia haga nahalimu.
1CO 7:24 Hamene mbaliniru-o Ngode Datagaliwabehanda tí olayangi hangu hangu howa bialu harimidagua Ngode Datagaliwabela ho gimbu bu howa ogonidagua bialu holene nga.
1CO 7:25 Ai wali agali dabu nabini karunaga te larimiyago laro. Anduane Homogohanda i̱hondo, Ogodagua bilo lamibe, lalu mbira i̱ nalangi. Anduane Homogo ibugua i̱ dara halu biamogo biyagome i̱ mini bilinahe howa mitangi bidogobi langero.
1CO 7:26 Genda timbuniore yulene áyu ngago mitangi bialu mbirali ibu áyu kagobi hayagua karulape mitangi bido.
1CO 7:27 Í̠ one bere keyagua dugule manda nabibe. Í̠ wali dabu nabi igiri keyagua wali dabu bule tai nabibe.
1CO 7:28 O ndo í̠na wali dabu biriyagua kagua ndo biri. Wandari mbira agali nape bedago agali piyagua ibubi kagua biya ndo. Wali agali dabu bu karu genda yu halu kadagua tí genda urunibi yu halimulo hame nale ko.
1CO 7:29 Hamene mbaliniru-o i̱na bi larugoni irane ogo. Áyu horo tumagiore ngago manda bialu ogoningi agalime wali dabu bu kamiru ti dabu nabini karu ale holene nga.
1CO 7:30 Dugu bialu karume dara nahe karu ale holene nga. Oba halu karume turu nahe karu ale holene nga. Mbirale tara tara yolome muwa yu karume mbirale nayi hagadagua holene nga.
1CO 7:31 Dindi mana bialu karume mana ogoni mo tene nahe holene nga. Irane dindi mana áyu bialu karuni wiaabo nahe ereba holebira.
1CO 7:32 Tí mini burugu nale halimulo hamelo kogoni. Igiri wali dabu nabi kagome Anduane Homogo mo turu hole ibunaga biabe hangu bule mitangi biaga ka.
1CO 7:33 Agali wali dabubi kagome ibu one mo turu hole dindi mana mitangi timbuni biaga ka.
1CO 7:34 Anigo ibu mini kira wuwa biaga ka. Wandari mbira agali nape bedagobi wandari agalila nahene bedagobi ibu tinginibi minibi loma bia ho biruwa Anduane Homogonaga biabe bulene hangu mitangi biaga beda. Wali mbira agali pu bedago ibu agalini mo turu hole dindi mana mitangi timbuni biaga beda.
1CO 7:35 Bi ogoni larogo i̱na tí mo hangai halu ndo tí biamogo bua howa lalu kogoni. Tígua mana tigabibi bayale bulene ngagobi bialu mini tale nabi tíni Anduane Homogohondo loma bia ho howa ibunaga biabe hangu bialu halimulo hamelo kogoni.
1CO 7:36 Wandari igiribi libu lawini howa abale dabu nabule manda bu karia igiri ibugua ibunaga lawinihondo mitangi tigatiga ndo bialu ibu dimagoli halu dabu bulene nga manda biyagua o karulape libu dabu bilo. Dabu bulenego ko ndo.
1CO 7:37 Anigo igiri mendeme ibuni miniha mitangi bialu mini bilinahe howa dimagoli nahe ibunaga mini bayuwa haru halu wandari ogoni dabu nabi hole manda biyagua nde ogoni bayale dege.
1CO 7:38 Ogonigo igiri mbiragome lawini dabu biyagua ibu bayale bira. Igiri mendegome ibu lawini dabu nabi wahowa daloali hole manda biyagua ibu bayaleore bira.
1CO 7:39 Wali mbira ibu agalini nahome kayagua wali ogonime agalini wahalu agali mende polene nawi. Ibu agalini homaragola agali mende poa biyagua nde polene karulape nga. Ta nabi polene nga lalu ndo laro. Wali o biago ibu Keriso hameigini kago hangu polene nga.
1CO 7:40 Wali ogoni agali mende nape ibuni hangu birayagua ibu turu holebira. Bi ogoni larogo i̱ni hangu mitangi bialu laro. Anigo bi o larogoni Ngode Datagaliwabe Dinini i̱ heba howa laro mitangi bu ko.
1CO 8:1 Mbirale bi pupu wule gime wabiniruhondo tomo miaganego te larimiyagonaga ladai bero. Ina bibahende manda bulene yu kama laganego henene larimi. Anigo manda bulene ogonime mbirali mine holene mo anda haga nga. Gubalini holeneme ani biaga ndo biamogo bia holene mo anda haga nga.
1CO 8:2 Mbiralime lalu, I̱ manda biai ho kogoni, layagua ibu manda biai nahe wene dege manda bialu kagoni.
1CO 8:3 Mbirali ibugua Ngode Datagaliwabehondo gubalini ho kayagua ogoni ibu Ngode Datagaliwabehanda manda bu ka.
1CO 8:4 Anigo mbirale bi pupu wule gime wabiniruhondo tomo minigo nolene ngabe be nanolene ngabe manda bimi̱ya laro. Mbirale bi pupu wule wabini uruni holene nahe nga manda bidama. Ngode Datagaliwabe mbiraore hangu holenehe kago manda bu kama.
1CO 8:5 Wali agali marume hari daligaha dindihabi haga karuhondo bi pupu wiagarubi tinaga anduanerubi dewaore ka lagagoyu
1CO 8:6 iname manda bialu inanenaga Ngode Datagaliwabe mbiraore hangu kago ibu inanaga Aba ka manda bidama. Ibugua bibahendeore wabini howa ina ibunaga wali agali kamagoni. Anduane Homogo mbiraore hangu Yasu Keriso ibu ka. Keriso togoni howa Ngode Datagaliwabe bibahendeore wabinigo inabi Kerisoni howa kamagoni.
1CO 8:7 Wali agali bibahendeme bi henene ogoni manda nabi ka. Marume ala mbirale bi pupu wule wabiniru mitangi timbuni biaga henego áyubi tigua tomo naragola tomo ogoni mbirale bi pupu wule wabinirunaga mitangi bialu naga biagadalo manda biaga ka. Ani manda bialu tinaga miniha hongo nahe howa tomo ogonime ti mo ko hayadalo manda biaga ka.
1CO 8:8 Ina Ngode Datagaliwabela mini mbiraore hole tomo naramagome mo mbiraore holebira ndo. Tomo nane haramagome Ngode Datagaliwabe deni ina ko holeberama ndo. Tomo naramagomebi ina Ngode Datagaliwabe deni bayale holeberama ndo.
1CO 8:9 Ogonigo tíni bua biradagua bibehego tígua Keriso hameigini hongo nahe karu ko mo bia holigo dege de hondowa halimu.
1CO 8:10 Mana ogoni manda bulene yido larigo í̠ mbirale bi pupu wule wabinigonaga andaha biruwa tomo nalu bederia Keriso hameigini mbirali ibu miniha hongo nahe kagome í̠ narego de handayagua mbirale bi pupu wule wabinigohondo tomo minigonaga narego ibubi nelo mo na haregoni ndobe.
1CO 8:11 Anigo mbirali ogoni miniha hongo nahe kago i̱na manda bido larigome í̠ hamene ogoninaga Keriso ibugua homa henego í̠na mo pila holebere.
1CO 8:12 Ogonidagua biriyagua í̠na Keriso hameiginihondo ko bialu tinaga miniha hongo nahe kago mo tandaga haregome Kerisohondobi ko beregoni.
1CO 8:13 Anigo i̱na tomo narogome i̱ hamene mbaliniru ko mo bia habeheyagua i̱na nogo mbirini lone nanolebero. I̱ hamene mbaliniru ko bilo mo bia holene tene i̱ naholeberoore.
1CO 9:1 I̱na i̱ni bua biradagua bibehe ndo kobe. I̱ abosolo agali ndo kobe. I̱na inanaga Anduane Homogo Yasu deme handa nabiruyabe. Anduane Homogonaga biabe bialu harugome tí Keriso hameigini kamigoni ndobe.
1CO 9:2 Wali agali marume lalu, Polo ibu abosolo agali ndo ka, layaguabi tígua ani nalabeheore kamigoni. Tígua Anduane Homogoha howa holene yu kamigome i̱ abosolo agaliore ka lalu walia halu kami.
1CO 9:3 Wali agali marume i̱ guraragola i̱na bi ogodagua lalu ladai biruli.
1CO 9:4 I̱na biabe bialu kogonaga tomobi ibabi noliya i̱ ngulene nga ndobe.
1CO 9:5 Abosolo agali marubi Anduane Homogonaga hamenerubi Pidabi ti biagadagua i̱bi ibaga bialu howa Keriso hamewane i̱ one bedoyagua ibu i̱ heba ibaga bialu polene nga ndobe.
1CO 9:6 Ani bulene ngabe be Banabasa iya tomo nalu holenenaga biabe iyane dege bulene ngabe.
1CO 9:7 Ami agali yolo nami howa biabe biaga mbirali kabe. Mbiralime pu mbira lini daga mini gerebi ibuni hengenegonaga lini nanagane mbirali kabe. Mbiralime nogo bulumaga hinuwa andu iba hambu nanagane mbirali kabe.
1CO 9:8 Bi o langirugoni lairi hole hangu ndo larogoni. Mana lo winigome ani lo nga.
1CO 9:9 Mosese heneyangi Mana lowini ngago ogo, Widi gandulo winirunaga lini hondo ibira ibira bilo nogo bulumaga geme hengedama pelo haru pialu howa nogo bulumaganaga ne hangane hubua bulene nawi, lo nga. Ogonigo Ngode Datagaliwabehanda nogo bulumaga mitangi bialu lo winibe
1CO 9:10 be ina mitangi bialu lo winibe. Ibugua inaore mitangi bialu lo ngago ndobe. Agali mbira ibu widi hangaga kagobi mende ibu widi gandulaga kagobi libugua biabe ogoni bialu howa tomo mo tale bulene tu haragola libunaga talebu wia holebira lowa mini dunu bia howa holene nga.
1CO 9:11 Iname dinininaga egene tíha polarimago tígua inahondo tingininaga tomo karulape ngibehe ndobe.
1CO 9:12 Marume tíha howa ani ngulene nga manda bu kayagua iname nde tíhondo, Ngi, lolene irane timbuniore nga manda bu kama. Ina ani manda bu howa nale harimagoni. Iname Kerisonaga Bi Mana Debene lamulenenaga hariga hangai holilono ina harugo lowa hongo halu biabe bialu haramali.
1CO 9:13 Agali Anduane Homogonaga andaha biabe biagaru tigua Anduane Homogonaga anda ogoniha howa tomo miaga manda bidamigoni. Wali agalinaga mbirale bo lomabu mulene dabuni bo mialu karu tigua mbirale bo miyaru tale bialu howa tini nolene mo ngelaga ka manda bu kami ndobe.
1CO 9:14 Ogonidagua Anduane Homogohanda lo wialu lalu, Bi mana debene lamiaga karume tinaga tingini haru holenego biabe ogoniha howa mulene nga, lowini.
1CO 9:15 I̱na o laruruni mbira i̱ yu haru lalu ndo larugoni. I̱na beba o gili berogoni tígua i̱hondo mbira ngilimulo dano bialu ndo gili bero. Ogonidagua nabulego i̱ homolene ala hamelo ko. I̱naga miniha turu holene bayale ogoni marume mo galone ndo helo henge namuleberoore.
1CO 9:16 I̱na bi mana debene lamiruligonaga miniha ku lolene irane nawi lo manda bido. Bi mana debene lamulenenaga biabe buliya i̱hondo nginigo. Bi mana debene ogoni nalami haruyagua i̱ miniha genda ho holebero.
1CO 9:17 I̱na biabe berogoni bule i̱ni dabalu bini bialu koyagua yolo ngi labehe kogoni. Aguani ndo. Biabe bulene winidagua buliya Ngode Datagaliwabehanda i̱hondo, Bia, lalu ngiyago bialu kogoni.
1CO 9:18 I̱na ani berogonaga yolo agi mirulibe. Bi Mana Debene lamulenego galone gibiore yolo i̱na ngi labehe howa ngi nale bi mana debene lamerogoni yolo ogoni laruli.
1CO 9:19 Mbiralinaga garabaya biabe ale bia haga ndo i̱ agali dariba nahe ko. Aguani howa wali agali dewaore ta nabi Yasu Kerisohondo mini mbiraore wilo i̱ wali agali bibahendenaga garabaya biabe ale bia haga hole i̱ni harogoni.
1CO 9:20 I̱ Yu wali agali heba howa ti Yasu Kerisohondo mini mbiraore wilo ti hagadagua haruli. Mosese heneyangi Mana lowini ngago i̱ mo tene nahaga howa i̱na wali agali maru bi lowini ogoni mo tene ho haga karu heba howa ti Yasu Kerisohondo mini mbiraore wilo ti hagadagua haruli.
1CO 9:21 Ogonidagua Yu wali agali ndo tara tara Yualinaga Mana lowini ngago mitangi nabi karu heba howa i̱na ti Yasu Kerisohondo mini mbiraore wilo ti hagadagua haruli. Bi larogoni Ngode Datagaliwabenaga mana lo winigo waharuli lalu ndo i̱na Kerisohanda mana lo winidagua biai haruli.
1CO 9:22 Keriso hameigini mini hongo nahe karu heba howa ti Yasu Kerisohondo mini mbiraore wilo ti hongo nahe hagadagua haruli. Ogonigo i̱na wali agali ta nabi bibahendehondo bialu holene ngadagua bialu ti marume Yasu Kerisohondo mini mbiraore wilo i̱na biruligome walia haruli.
1CO 9:23 Uruni bibahende biai haruligo bi mana debene hangu mitangi bialu biruli. Wali agali marubi i̱bi ina bi mana debene ogoniha howa turu holene yu holenaga biruli.
1CO 9:24 Gerai larangi bibahende gerai lararu mbiraore hangume bolangua halu yolo miagago mandaore bu kamigoni. Anigo tí hangu hangu howa bolangua halu yolo mule tigatiga geraiore lalu halimu.
1CO 9:25 Gerai lagane bibahenderume gerai lole manda manda bialu howa ibu minibi tinginibi hongo helo lowa bialu haga. Bolangua howa ereba holenenaga yolo mule manda biaga. Iname ani ndogo haabobo holenenaga yolo karulami̱ya beramagoni.
1CO 9:26 Irane ogoninaga i̱na gerai lamaro bulene ngagoria hondo yalu tigatigaore gerai lalu piruli. Ogonidagua i̱na gime badene biaga ale howa bame bope naharuli.
1CO 9:27 I̱na i̱naga tingini haru hai howa baruli. Ani biruligo irane i̱na wali agali maru Yasu Kerisohondo mini mbiraore wilo mana lamialu kogoni Ngode Datagaliwabehanda i̱hondo, Í̠ bolangua nahedago yolo nangule, loligonaga bialu kogoni.
1CO 10:1 I̱ hamene mbaliniru-o ina mamalime Mosese talima peneru tigua binigo te ogoni tígua mitangi bilimulo hamelo kogoni. Beralibame ti bibahende haru penegobi iba solowara mini Iba Daramabi bereagoha bayuwa haru penegobi mitangi bilimu.
1CO 10:2 Ti bibahende beralibahabi iba solowarahabi Mosesenaga talima piaga howa baboraya ale bialu pene.
1CO 10:3 Ti bibahendeme tomo mbiraore Ngode Datagaliwabe Dinini ibugua minigo ogoni dege nalu
1CO 10:4 ibabi mbiraore ibugua minigo ogoni dege nalu hene. Ngode Datagaliwabe Dinininaga ege to̱le̱ ti heba penego iba ogoniha howa minigo tigua nalu hene. Ege to̱le̱ ogoni Keriso ibuni henego ka.
1CO 10:5 Ani bialu howa Ngode Datagaliwabehanda wali agali dewalime mana nakarulape bialu heago hondowa turu nahe howa tinaga tingini dindi ko yobi homo paya paya bu wilene.
1CO 10:6 O binidaruni bibahende iname manda buwa holoma̱yanaga bini. Iname wali agali uruni tigua mini ko tara wialu dimagoli hayadaguabi marume mbirale gime wabiniruhondo bi pupu wiyadaguabi mbira bulemini nabimi̱yanaga bini. Anduane Homogonaga mbugani ledadagua ogo, Wali agalirume biru ibira howa tomo ibabi nalu heyuwa dawe halu wali agali kayu bigibigi bialu hene, lalu gilibu nga.
1CO 10:8 Iname wali agali kayu nabimi̱ya. Ti marume ani bialu hearia horo mbirani hangu wali agali daosini dege pira kirani tebira (23,000) homai helene.
1CO 10:9 Anduane Homogohanda inahondo agi birabe hondolenaga iname ko bulene nawi. Ti marume ani bialu hearia puyame hayalu homelai hene.
1CO 10:10 Iname Ngode Datagaliwabe la hirulene nawiore. Ti marume Ngode Datagaliwabe la hiralu hearia Mo Homa Hagane Dahuliyalime ti bo paya bini.
1CO 10:11 Tihondo ani binigo te ogoni ina horo hamaro bulene tu kawareha kamarume nabuluma̱yanaga Anduane Homogonaga mbugani gilibu winigo nga.
1CO 10:12 Mbiralime ibu hongohe ko lo manda bu kago ibuni piloligo de hondo holene nga.
1CO 10:13 Ko mo bia holene bibahende tí kamiria ibiragoni wali agali bibahende ti karia ogonibi dege ibaga. Anigo Ngode Datagaliwabe ibu buleore lowinigo biaga kago ibugua lalu, Ko ngagome í̠ ko mo bia hole ngagola ko nabibelo i̱na í̠ biamogo bulebero, leda. Ani bialu ibida polene hariga walia holebira.
1CO 10:14 Anigo i̱naga nenege turubiruore-o mbirale gime wabiniruhondo bi pupu wiaga ngagoria ha para nahalimu.
1CO 10:15 Tí wali agali miniwi kamigo manda buwa i̱na tíhondo bi langerogo tíni dabalimu.
1CO 10:16 Iba be Ngode Datagaliwabehondo turu halu ka̱i̱ laramaligo ina iba be ogoniha howa naramangi Kerisonaga daramaha howa ina Keriso heba mo mbiraore haramali ndobe. Mberedibi gaibu baga beramaligo naramangi Kerisonaga tinginiha howa ina mo mbiraore haramali ndobe.
1CO 10:17 Mberedi homane mbiraore hangugo ina dewali howa mberedi homane mbiraore ogoniha naramaligo inabi dewali howa homane mbiraore kama.
1CO 10:18 Isaraele wali agali tigua biaganego mitangi bilimu. Mbirale mbira mbira Ngode Datagaliwabehondo loma bialu bo minigo nagarume tigua bo lomabu mulene dabunaga mana biagadagua bialu Ngode Datagaliwabe heba mini mbiraore ho haga ndobe.
1CO 10:19 I̱na larogoni ogo ale laralo manda bilimu. Mbirale bi pupu wule gime wabini ogoni galonebe be mbirale ogonihondo bo mulenego galonebe laro.
1CO 10:20 Ani ndoore laro. Bi larogoni irane ogo. Ngode Datagaliwabe mitangi nabiaga karume bo lomabu mulene dabuni mbirale mbira bo miraru Ngode Datagaliwabehondo ndo damahondo bo miaga. Anigo tí kamiru damala mo mbiraore halimulo i̱ hame nale ko.
1CO 10:21 Tígua Anduane Homogonaga iba beha howabi damanaga iba beha howabi kirabaliha howa nabe nahe kami. Anduane Homogonaga dagiani howabi damanaga dagiani howabi kirabalinaga tomo ngago nabe nahe kami.
1CO 10:22 Anduane Homogohanda inahondo keba helo iname mo keba hoa kamabe. Ibu hongohe kagobi ndo ina hongo timbuniorehe kamalo manda bu kamabe.
1CO 10:23 Marume lalu, Iname ta nabi bulene ngaru biai habehe kamagoni, laga. E̱ ani bibehego bulene bibahende ngaru bayale hangu ndo nga. Tígua, Iname ta nabi bulene ngaru biai habehe kama, laramiligo nde bulene bibahende ngarunime ina biamogo biai haga ndo nga.
1CO 10:24 Mbiralime ibuni hangu bayale hole mitangi bulene nawi wali agali maru bayale helo bule mitangi bulene nga.
1CO 10:25 Nogo mbirini magedini minigo nalu howa í̠ miniha damahondo bo minidalo manda nabi hariyagua ani tawebe nale howa nolene nga.
1CO 10:26 Anigo Anduane Homogonaga mbugani lo ngadagua ogo, Dindibi dindini ngaru bibahendebi Anduane Homogo ibunaga nga, lalu gilibu nga.
1CO 10:27 Mbirali Ngode Datagaliwabehondo mini mbiraore nawi kagome í̠hondo lalu, I̱ andaga tomo nabiya ibabe, layagua pole manda biriyagua ibugua tomo ngiragola í̠ miniha damahondo bo minidalo manda nabi howa ani tawebe nale nolene nga.
1CO 10:28 Ani bialu keria mbiralime lalu, Tomo ogoni mbirale bi pupu wule gime wabinigohondo mininaga nga, langiyagua nanabe. Ogoni nane waharegoni í̠ miniha damahondo bo minidalo manda birigome ndo agali biago ibugua manda buwa langiyagome ibubi ibu miniha manda biyagonagabi nane wahabe. Ani biagago mbiralime lalu, Agali mende ibunaga miniha mitangi biragome i̱na bua harogo mo hangai haganego irane agibe.
1CO 10:30 I̱na Ngode Datagaliwabehondo tomo ngiragonaga turu halu ka̱i̱ laruyagua tomo o ngiyagonaga ka̱i̱ larugo mendealime, Nakarulape bialu ka, lalu i̱ gurayagua irane agibe.
1CO 10:31 Ani lolebirago tígua bulenegobi tomo nolenegobi iba nolenegobi ta nabi bibahende beramigo bialu howa Ngode Datagaliwabenaga mini yaraga hole hangu mitangi bialu bilimu.
1CO 10:32 Tígua Yu wali agali karubi Yu wali agali ndo tara tara karubi Keriso hameigini karubi ti bibahende mo pila nahe bayuwa bialu halimu.
1CO 10:33 I̱na birulidagua tíguabi bialu halimu. I̱na bibahende biruligo bialu howa wali agali ta nabi biamogo bulene nga mitangi bialu biruli. I̱ninaga holene bayale helo mitangi bialu ndo tinaga holene bayale helo mitangi bialu tigua Ngode Datagaliwabenaga pele mulene yu helonaga biruli.
1CO 11:1 Kerisohanda biagadagua i̱na biruligo i̱na birulidagua tígua bilimu.
1CO 11:2 Tígua i̱ mitangi biaabo halu mana lagane wiyaru i̱na langirugodagua bialu kamigonaga i̱na tínaga mini yaraga halu kogoni.
1CO 11:3 Anigo galone mbira manda bu halimulo hamelo kogo ogo. Agali bibahende karunaga haguane Keriso ibu ka. Wali onenenaga haguane agalini ibu ka. Kerisonaga haguane Ngode Datagaliwabe ibu ka.
1CO 11:4 Ogonigo wali agali Ngode Datagaliwabe mitangi bialu lotu lole ngoai ho biruwa agali mbirame ibunaga hagua yi howa Ngode Datagaliwabehondo bi layaguabi ibunaga bi mana latagi hayaguabi ibu Keriso mo taga haga ka.
1CO 11:5 Ogonidagua tí Ngode Datagaliwabe mitangi bialu lotu lole ngoai ho biruwa wali mbirame ibunaga hagua yi nahe howa Ngode Datagaliwabehondo bi layaguabi ibunaga bi mana latagi hayaguabi ibu agalini mo taga haga beda. Wali ani biragome ibu wali mende mandari podo wahaihe bedagobi dege beda.
1CO 11:6 Wali biago ibu hagua yi naheyagua ibunaga mandari kagobi podo wahai habehe beda. Anigo wali mandari podo wahai howa birulenego tagabiorego ibu hagua yi ho birulene nga.
1CO 11:7 Agali ibu Ngode Datagaliwabe kagobi helo wabu helenego ibugua Ngode Datagaliwabenaga wá holene walia hatagi hagago ibunaga hagua yi holene nawi. Wali ibugua agalinaga wá holene walia hatagi haga beda.
1CO 11:8 Irane ogoninaga Ngode Datagaliwabehanda waliha howa agali wabini ndo. Ibugua agaliha howa wali wabini.
1CO 11:9 Mendebi ngago Ngode Datagaliwabehanda wali mitangi bialu agalime ibu biamogo bilo agali wabini ndo. Ibugua agali mitangi bialu walime ibu biamogo bilo wali wabini.
1CO 11:10 Ogoninagabi dahuliyali karunagabi mitangi bialu walime ibunaga agalini haguane ka walia halu ibunaga hagua yi holene nga.
1CO 11:11 Ina Anduane Homogoha ho gimbu bu howa wali ibuni hangu birabe nahe ogonidagua agali ibunibi hangu habe nahe.
1CO 11:12 Ngode Datagaliwabehanda agaliha howa wali wabinigodagua agali ibu walime taba hanaga. Bibahendeorenaga tene Ngode Datagaliwabe ibuni kagoni.
1CO 11:13 Tí Ngode Datagaliwabe mitangi bialu lotu lole ngoai ho biruwa walime ibunaga hagua yi nahe biruwa Ngode Datagaliwabehondo bi lolene karulape be nakarulapebe tíni dabalimu.
1CO 11:14 Ina wali agali bibahendenaga mana ala biagane winigo ngarume ina agi walia hagabe. Agali ibunaga mandari lu helolene nakarulapeore walia haga nga.
1CO 11:15 Wali ibunaga mandari lu helolenego ibunaga yári bayaleore ogoni. Wali ibunaga hagua yi helonaga Ngode Datagaliwabehanda ibuhondo mandari lu minigo.
1CO 11:16 I̱na bi o larogoninaga mbiralime lai loa hayagua i̱na ladai berogo ogo. Inabi Keriso hameigini bibahende haga karubi ina bibahendeme Ngode Datagaliwabe mitangi bialu lotu lole ngoai ho biruwa mana tara ndo mbiraore ogoni beramali laro.
1CO 11:17 Bulene nabulenebi languleberogo i̱na tínaga mini yaraga naholebero. Irane tí Ngode Datagaliwabe mitangi bialu lotu lole ngoai ho biruwa bayale bule hangu ndo tí ko dewa beremili.
1CO 11:18 Tí ngoai howa tíni talebu baga bialu haramili layago hale harugo bi ogoni henene dege layago i̱ manda bu ko.
1CO 11:19 Tí talebu baga bialu kamigo irane marume mana tigabi yu karu mo pani hai helonaga tale bialu kami.
1CO 11:20 Tí ngoai haramingi tígua Anduane Homogonaga tomo nolenaga ndo ngoai haramili.
1CO 11:21 Irane tígua nalu howa tíni hangu hangu naga naga bialu marume tomo nane garibilo berelowa marume waini iba timbuni nowa lulu yu haga kami.
1CO 11:22 Tíni andaga kamigoha howa tomobi ibabi nanabehe kamibe. Be tígua Keriso hameigini karuhondo handabe manga halu buru pale karubi mo taga hole manda buwa birimibe. Ogoninaga i̱na tíhondo agi loliya manda bu kamibe. I̱na tínaga mini yaraga hoabe. I̱na tínaga mini yaraga holene nawi ndobe.
1CO 11:23 Ogonigo bi mana abale tíhondo langirugoni Anduane Homogo ibugua i̱ langinigo ogo. Mbiraga mbirungi agalime Anduane Homogo Yasu nde layangi Yasuhanda mberedi muwa
1CO 11:24 Ngode Datagaliwabehondo turu halu ka̱i̱ lowa mberedi ogoni gaibu baga bini. Gaibu baga bialu howa lalu, I̱naga tingini ogonigo tí pele ngialu ngerogoni. Tígua i̱ mitangi bialu ani biaabo halimu, lene.
1CO 11:25 Mberedi miyadagua dege ibugua iba be mialu howa lalu, Iba be ogoniha habo nalolene bi gahenge lo winigo tene i̱naga daramaha ngagoni. Iba be ogoniha howa naramingi i̱ mitangi bialu nalimu, lene.
1CO 11:26 Tígua mberedibi iba be ogoniha bedagobi naramigome Anduane Homogo dai bilo tagi howa Yasuhanda inanaga homo aribia hene lalu mo walia haramili.
1CO 11:27 Anigo Anduane Homogonaga mberedibi iba be ogoniha bedagobi nalu howa mbiralime Yasuhanda pele ngialu ibunaga tingini nginigobe ibunaga darama pelenegobi mitangi nabi bame nope hayagua ko timbuniore bira.
1CO 11:28 Ala i̱ni agi bialu harube hangu hangu manda bimi̱ya. Ani manda buwa mberedibi iba be ogoniha bedagobi nolene nga.
1CO 11:29 Mbiralime ani nalu howa irane Anduane Homogonaga tinginidalo manda nabi bame nope hayagua ibuni pani nole hariga tai bira.
1CO 11:30 Irane ogonidagua birimigome tí maru hongo nahe halu maru warago bo wialu maru homa bigi biyagoni.
1CO 11:31 Ina ala agi bialu harimabe mitangi birimayagua Ngode Datagaliwabehanda inahondo, Nakarulape birimi, lolene nawulebira.
1CO 11:32 Ngode Datagaliwabehanda dindi mana biaga karuhondo, Tí nakarulape bialu harimigoni, lolene ngadagua inahondo nalolenaga Anduane Homogohanda ina birimagonaga áyu dabalu pani migi bialu ka.
1CO 11:33 Anigo i̱naga hamene mbaliniru-o ti Anduane Homogonaga tomo nole mandagi ngoai ho biruwa wali agali maru mitangi bialu ti haru mandagi nole hondo biralimu.
1CO 11:34 Tí ani ngoai ho biraramingi Ngode Datagaliwabehanda tíhondo, Nakarulape birimi, loligo mbirali ibu tomo garibilo kayagua ibuni andaga howa tomo ala nalu ibulene nga. Te maru larimigonaga i̱ eberongi mo tiga bulebero.
1CO 12:1 I̱naga hamene mbaliniru-o Ngode Datagaliwabe Dinini ibugua bame ngiagarunaga bi heneneore tígua bayuwa manda bilimulo hamelo kogoni.
1CO 12:2 Ngode Datagaliwabenaga mana manda nabi hemingi mbirale holene nahe bi pupu wule gime wabinirume tí haru pu tara haabo hayagola harimi.
1CO 12:3 Tígua manda bulene mbira ngago ogo, Ngode Datagaliwabenaga Dinini ibugua mbirali haru kagola o biagome Yasu mini lalu ha habe nahe holebira. Ogonidagua Ngode Datagaliwabe Dinini ibugua mbirali haru kagola ndo kayagua o biagome, Yasu ibu Anduane Homogo ka, nalabehe holebira.
1CO 12:4 Ngode Datagaliwabe Dinini mbiraore ogonime dege mugube tara tara bame ngiaga ka.
1CO 12:5 Biamogo bulene biabe tara tara ngago Anduane Homogo mbiraore ogoni hangunaga bia haga nga.
1CO 12:6 Biabe bulenenaga mugube tara tara ngago Ngode Datagaliwabe mbiraore hangu kagome biabe tara tara uruni bilo wali agali hangu hangu karunaga mugube tara tara mo ta haga ka.
1CO 12:7 Ibunaga Dinini ibu wali agaliha kago walia holenaga Ngode Datagaliwabehanda ti hangu hangu bayale helo miaga.
1CO 12:8 Dinini ogoni ibugua mbiralihondo mini gigabiwi howa mana lamialu holene miaga ka. Mendealihondo Dinini mbiraore ogonime dege manda bulenenaga bi lamialu holene miaga ka.
1CO 12:9 Ngode Datagaliwabe Dinini mbiraore ogonime dege mbiralihondo mini mbiraore hongo ho wulene mialu mendealihondo warago bo ngaru mo dabi holene hongo miaga ka.
1CO 12:10 Dinini ogoni ibugua mbiralihondo agalime nabiagane ale bilonaga hongo mialu mendealihondo Ngode Datagaliwabenaga bi mana lamulene mugube miaga ka. Tebonegome mugube tara tara midaruni hondowa ogo Ngode Datagaliwabe Dinini ibugua bira ogo dama ibugua bira lalu daba ki bulene mugube miaga ka. Ibugua mbiralihondo bi tara tara lelonaga mugube mialu mendealihondo bi tara tara larago hale howa ogoninaga irane garealo mulene mugube miaga ka.
1CO 12:11 Uruni bibahende Ngode Datagaliwabe Dinini mbiraore ogoni degeme biaga ka. Ibugua wali agali hangu hanguhondo mugube tara tara miagago ibuni mua biragohondo miaga ka.
1CO 12:12 Keriso ibu tingini mbiraore hangu ale howa ogoriani gebagene dewa wayida. Gebagene dewa tara tara uruni tingini mbiraore ogoniha hangu howa hatagi ka.
1CO 12:13 Ogonidagua Yu wali agali karubi Yuali ndo tara tara karubi garabaya biabe ale bia haga karubi nabini karubi ina bibahende tingini mbiraoreha holoma̱ya Ngode Datagaliwabe Dinini mbiraore ogoni degeme ina baboraya bu helaya. Ani buwa Ngode Datagaliwabehanda ina bibahendehondo ibu Dinini mbiraore ogoni ina hangu hangunaga bu miniha helo ngiya.
1CO 12:14 Ngode Datagaliwabehanda tingini wabialu howa gebagene mbira hangu ndo dewa wabu helene.
1CO 12:15 Geme lalu, Irane i̱ gi ndo kogodago i̱ tingini aria mbira ndo kogoni, layagua aguani layagome ibu mo tingini aria ndo helonaga ndo laga.
1CO 12:16 Haleme lalu, Irane i̱ de ndo kogodago i̱ tingini aria mbira ndo kogoni, layagua aguani layagome ibu mo tingini aria ndo helonaga ndo laga.
1CO 12:17 Tingini homane mbiraoreme de dege kale hale agua holedabe. Ibu hale dege kale nga agua holedabe.
1CO 12:18 Ogonidagua ndo Ngode Datagaliwabe ibugua tingini mbiraoreni gebagene tara tara bibahende ibuni heloa biyagoria helene.
1CO 12:19 Gebagene mbiraore hangu kale nde tingini nakaleda.
1CO 12:20 Gebagene dewa karuninaga tingini homane mbiraore ka.
1CO 12:21 Ani bidago deme lalu, I̱ gila mbira bulene henge nawi, nalabehe. Haguamebi lalu, Gela mbira bulene henge nawi, nalabehe.
1CO 12:22 Ani ndo tingini gebagene maru heledaru hongo nahe mitangi bidamaru heba nahe howa ina bayale nahabehe holeberama.
1CO 12:23 Ani buwa tingini gebagene maru mitangi bidamaru uruni iname bayuwa hondo haramali. Ani buwa tingini gebagene maru de hondolene nawi manda buwa yi halu
1CO 12:24 maru baya burugule karu ani bulene nawi. Ngode Datagaliwabe ibunime ina tingininaga gebagene maru galone ndodalo mitangi bidamaru mo galone halu tingini gebagene bibahende mo gimbu bu helene.
1CO 12:25 Anigo tinginini talebu baga nabi howa gebagene tara tara bibahenderume tini handaya hagahaga biaga ka.
1CO 12:26 Tingini gebagene mbiragome tandaga nayagua gebagene bibahende tandaga nai haga. Gebagene mbiranaga mini yaraga hayagua gebagene bibahende turu hai haga.
1CO 12:27 Anigo tí bibahende Kerisonaga tingini kamigoni. Ani buwa tí hangu hangu howa tingini ogoninaga gebagene mbira mbira kami.
1CO 12:28 Anigo Ngode Datagaliwabehanda Keriso hameigini bibahende heleneru ti hangu hangu heloa biyagoria helene. Ala ibugua abosolo helalu mende bi mana latagi haga helalu tebone lawai haga helalu mane agalime nabiagane ale bilobi mahaore warago bo ngaru mo dabi helobi biamogo biagane helobi haru hagane helobi bi tara tara hale naheneru lelobi helaya.
1CO 12:29 Ti bibahende abosolo hangu ndo ka. Bibahende bi mana latagi haga hangu ndo ka. Bibahende lawai haga hangu ndo ka. Ti bibahende agalime nabiagane ale biagane hangu ndo ka.
1CO 12:30 Warago bo ngaru mo dabi hagane hangu ndo ka. Ti bi tara tara hale naheneru lagane hangu ndo ka. Ti bi tara tara lararunaga galone garealo miagane hangu ndo ka. Uruni bulenenaga hongo tini yu haga haga bu ka.
1CO 12:31 Mugube duniniore ngaru yule hame timbuniore lo halimu. Uruni bulenenaga bayale gibiore bilimulo walia holebero.
1CO 13:1 I̱na gubalini nahe howa wali agali tara taranaga bi laruyaguabi dahuliyalinaga bi laruyaguabi i̱naga bi bame mbelo ngi̱la̱o̱ laganego alebi ga̱ timbuni laganego alebi holebero.
1CO 13:2 Ogonidagua i̱na Ngode Datagaliwabe mana latagi holene mugube yu haruyaguabi manda bulene bibahende yai ho haruyaguabi Ngode Datagaliwabehanda mana ala mo pani nahe ngelenego bibahende manda biai ho koyaguabi hari wedaru ema bialu pelonaga mini mbiraore wulene yu koyaguabi uruni yu howa i̱na gubalini holeneore nayi koyagua i̱ habane nabuleneore kogoni.
1CO 13:3 I̱naga mbirale bibahende ngoru tale bialu wali agalihondo miai haruyaguabi i̱naga tingini irame dai helo waharo laruyaguabi uruni gubalini howa ndoore biruyagua i̱ mo bayale naholebira.
1CO 13:4 Gubalini holeneme ema nabi hondo hagabi dara howa biamogo bia hagabi ka. Gubalini holeneme mendeali yidago i̱ nayido agini henge nalagabi ibuni mini yaraga nahagabi mine nahagabi ka.
1CO 13:5 Gubalini holene ogonime mana lehe nabiagabi habua nabiagabi abale kera nahagabi marume ibuhondo ko biyago mitangi bu wiaabo nahagabi ka.
1CO 13:6 Gubalini holeneme mana ko birago hondowa turu nahe howa mana tiga tiga birago hondowa turu haga ka.
1CO 13:7 Gubalini holeneme gendabi ngaru yu howa wahalu napiagabi ibunaga mini mbiraore wulenebi mini dunu biahe holenebi minime hibu laabo holenebi ereba nahaga nga.
1CO 13:8 Gubalini holene wiaabore holebira. Ngode Datagaliwabe mana latagi holene yu karu lamaro bulebira. Bi tara tara lolene mugube mini yu karu lamaro bulebira. Manda timbuni bulene yu karu mo ereba holebira.
1CO 13:9 Áyu ina manda bulene mugube yu howa tigi mbira hangu manda bidama. Ngode Datagaliwabe mana latagi holene mugube yu howa iname tigi mbira hangu lalu kama.
1CO 13:10 Mbirale baya buruguleore ngago ibirangi tigi mbira yu harimaru ereba holebira.
1CO 13:11 I̱ igiri emene hewangi waneigini emeneme laralidagua lalu miniha mitangi biralidagua bialu mbirale bule manda biralidagua bialu harugoni. Ai áyu agali kogonigo waneigini emeneme biagadagua i̱ nabi wahai haru.
1CO 13:12 Áyu dindini howa ina deme hendedamago iba wa̱i̱ auhe aleha handaredagua beramago. Awe dengui bayuwa handaya haga buleberama. Áyu tigi mbira hangu manda bidogo awe Ngode Datagaliwabe ibugua i̱ manda biai ho kadagua i̱nibi ibu manda biaiore holebero.
1CO 13:13 Ani bilo tambu howa irane tebira ogo ngelo kamagoni. Uruni mbira mini mbiraore wulene mende mini dunu bia ho holene tebone gubalini holene ngelo kamagoni. Uruni bibahendenaga duniniore gubalini holene ngelo kama.
1CO 14:1 Ogonigo tígua gubalini holene hongo howa tai bilimu. Ani buwa Ngode Datagaliwabe Dinini ibugua mugube bame ngiraru yule hamelo halimu. Ngode Datagaliwabenaga bi mana latagi holene mugube duniniore ogoni yule hamelo halimu.
1CO 14:2 Mbiralime bi tara wali agalime hale nahene layagua ibugua bi laragoni wali agalime hale helo ndo Ngode Datagaliwabehondo lamiaga ka. Ibugua bi henene lolene ala la pani nahe ngelenego Ngode Datagaliwabe Dinininaga hongome laragoni.
1CO 14:3 Anigo maru Ngode Datagaliwabe bi mana wali agalihondo latagi haragome ti biamogo bilobi mo hongo helobi mo turu helobi latagi haga.
1CO 14:4 Mbirali bi tara hale nahene laga biagome bi larago ibuni hangu biamogo bilo laga. Anigo Ngode Datagaliwabe bi mana latagi halu kagome Keriso hameigini bibahende karu biamogo biaga.
1CO 14:5 I̱na tí bi tara hale nahene lalimulo hamelo kogoyu tí bibahendeme Ngode Datagaliwabe mana latagi holene mugubeore yu halimulo hame timbuni lo kogoni. Ngode Datagaliwabenaga bi mana latagi haga kago ibugua bi laragome Keriso hameigini karu manda biloore laga kago ibu duniniore ka. Anigo bi tara hale nahenego laga biago ibugua bi larago mendealime lo beregedalu agua lara lolene naheyagua Keriso hameigini karu bayuwa biamogo bilo ndo layagua ibugua bi larago dunini ndo holebira.
1CO 14:6 Hamene mbaliniru-o ogonidagua i̱na tí kamiria bi tara hale nahene lole ibiruyagua tí biamogo agua buliyadabe. Ngode Datagaliwabehanda i̱hondo walia hayago nalangiruyaguabi manda bulene mbira nalangiruyaguabi Ngode Datagaliwabe mana latagi holenego naharuyaguabi mana mbira lawai naharuyaguabi i̱na tí biamogo nabibeheore.
1CO 14:7 Pilipe alebi ga̱wa̱ alebi ngarume bi bayuwa taba nabi ngi̱ngi̱a̱o̱ hangu layagua wali agalime iba gana ogo lara lalu ti agua manda bulebirabe.
1CO 14:8 Ami agalime mbelo biguli pu lalu be̱be̱ lalu galone ndonaga hangu layagua wai biaganeme wai bule manda manda agua bulebiradabe.
1CO 14:9 Ogonidagua tí kamirume bi tara hale nahenego lamirimiyagua marume agua laya lalu manda agua bilobe. Nde tígua bi larimiru puyabume yalu pelonaga larimi.
1CO 14:10 Dindi bibahendeha wali agali karume bi tara tara dewaore laga kago uruni bibahende bame lope nahaga galone lalu laga.
1CO 14:11 Anigo ibugua bi larago i̱na hale habe naheyagua agali bi layagoni ibu tarali holebira. I̱bi nde tarali holebero.
1CO 14:12 Anigo tígua Ngode Datagaliwabe Dinini ibugua mugube ngiraru yuleore lo howa Keriso hameigini karu mo hongo helonaga mugube maru ngiraru bayuwa yu tiga bu howa biabe bulene nga.
1CO 14:13 Bi hale nahene laragome lo beregedolenenaga mugube ngilo Ngode Datagaliwabehondo ngi lolene nga.
1CO 14:14 I̱na bi hale nahene lalu Ngode Datagaliwabehondo lamiruyagua i̱naga dininime dege lalu minime manda nabi bame lope holebero.
1CO 14:15 Ogonidagua biaruagodago i̱na agi bulene wiaruabe. I̱na i̱naga dininime hangu ndo minila haru howa Ngode Datagaliwabehondo bi lolebero. Ogonidagua i̱na iba gana loleberogobi i̱naga dininime hangu ndo minila haru howa lolebero.
1CO 14:16 Í̠na Ngode Datagaliwabehondo ka̱i̱ lalu howa í̠naga dinini degeme lariyagua mbirali tí heba ngoai ho bedagome í̠na bi larego hale nahene biago lalu lariyagua ibugua, E̱ ani bibe, agua lolobadabe. Í̠na bi larigo ogo ale lari lalu ibu manda bibe naheore bedagoni.
1CO 14:17 Í̠na Ngode Datagaliwabehondo ka̱i̱ larigo bi bayaleore lariyaguabi bi larigome mendeali biago ibu miniha anda pelo ndo lari.
1CO 14:18 Tígua bi hale naheneru laramili degego i̱na bi hale nahene lolenego tí bolanguaore howa laruligonaga Ngode Datagaliwabehondo ka̱i̱ lalu haruli.
1CO 14:19 Ani laruligo wali agali Ngode Datagaliwabe mitangi bialu lotu lole ngoai ho kagoria howa i̱na bi tara tara hale nahene dewa au lolebe tobahe lagimbu bulene hame nale kogoni. Wali agali ti bayuwa manda bilonaga i̱na bi dunini duria dege lawai hole laruyagua karulape ogoni.
1CO 14:20 I̱naga hamene mbaliniru-o waneigini emeneme mitangi biagadagua nabilimu. Galirume ko bulene mitangi nabi hagadagua tígua nde ogonibi howa mini dege bogabi halimu.
1CO 14:21 Anduane Homogonaga mbugani bi gilibu ngago ogo, Anduane Homogo ibugua lalu, I̱naga wali agali urunihondo bi tara lararunaga bime lamulebero. Dindi tarani howa ibirarunaga bimebi lamulebero. Ani lamerogola lamilowa tigua hale naholebiraore, lenego gilibu nga.
1CO 14:22 Anigo bi tara tara hale naheneru lolene mugube Ngode Datagaliwabehondo mini mbiraorewi karume manda bilo walia holenaga ndo ibuhondo mini mbiraore nawi karume manda bilo walia holenaga yu ka. Ngode Datagaliwabe mana latagi holene mugube ibuhondo mini mbiraore nawi karume manda bilo walia holenaga ndo Ngode Datagaliwabehondo mini mbiraorewi karume manda bilo walia holenaga yu ka.
1CO 14:23 Keriso hameigini kamiru tí bibahende lotu lole ngoai ho biruwa bi hale naheneru lagalaga birimiyagua maru Keriso mana bayuwa manda nabi haga karubi maru Kerisohondo mini mbiraore nawi karubi anda ibuwa tigua bi uruni laramigo hale howa tí lulu yu kamigoni lolebira ndobe.
1CO 14:24 Ani ndo tí bibahendeme Ngode Datagaliwabe mana latagi harimiyagua maru Keriso mana bayuwa manda nabi haga karumebi Kerisohondo mini mbiraore nawi karumebi anda ibuwa bi laramigo hale hararu tigua ko biyago miniha nogoba haragola tini hangu hangu i̱ni ko haruda manda bulebira.
1CO 14:25 Tininaga miniha oholene wia do hayaru tihondo walia haragola tigua taga halu bulu paluwa Ngode Datagaliwabenaga mini yaraga halu lalu, Ngode Datagaliwabe tí heba heneneore kagoni, lalu lolebira.
1CO 14:26 Anigo i̱naga hamene mbaliniru-o i̱na manda bidogo ogo. Tí Ngode Datagaliwabe mitangi bialu lotu lole ngoai ho biruwa mbirame iba gana lolenebi mendeme bi mana lawai holenebi teboneme Ngode Datagaliwabehanda ibuhondo bi lamiyago lamulenebi maneme bi tara hale nahene lalu lolenebi daunime bi tara hale nahene larago ogo ale lara lalu lamulenebi uruni yalu ngoai holeberami. Uruni bibahende birarume Keriso hameigini karu biamogo bilonaga dege bulene nga.
1CO 14:27 Marume bi tara hale nahene lole manda biyagua kirali tebiralime dege lolene nga. Mbiragome ala lai kagola maha mendealime laga bialu holene nga. Ani laragola mbiralime bi lo beregedalu ogo lara lalu lamulene nga.
1CO 14:28 Mbiralime bi ogo ale lara lalu lamulene nabereyagua o ngoai ho bedamigoria bi tara hale nahene laragome latagi nahe ibuni minime Ngode Datagaliwabehondo lamialu birulene nga.
1CO 14:29 Ani buwa kirali tebiralime dege Ngode Datagaliwabe mana lamulene yu kagome lamiragola tí bedamirume bi larago lo manda bialu birulene nga.
1CO 14:30 Ani bialu bedagoria Ngode Datagaliwabehanda mbirali hale halu birayaru ariahondo galone mbira mo walia hayagua bi lalu hayago ibu lala howa birulene nga.
1CO 14:31 Ani bialu ngoai ho bedamirume manda bilobi tinaga mini mo hongo holebi tí bibahendeme hangu hangu howa Ngode Datagaliwabe mana lamulene nga.
1CO 14:32 Ngode Datagaliwabe mana lamulene mugube yu kamirume bi laramigo tíni haru howa lolene nga.
1CO 14:33 Ngode Datagaliwabe ibu mo libilaba lagane tene ndo kago ibu mo palia hagane Ngode Datagaliwabe kagoni. Ngode Datagaliwabenaga wali agali dindi bibahendeni ngoai hagane ngagoria
1CO 14:34 walime bi nale birulene nga. Yu wali agalinaga Mana lowinigo ngadagua walime haru holene nawigo tigua bi nalebi birulene nga.
1CO 14:35 Tigua galone mbira tai bialu handa walia hole manda bua biyagua andagani howa tini agalinihondo hale holene nga. Ogoni irane wali agali ngoai ho bedagoria walime bi lolenego tagabiore.
1CO 14:36 Ngode Datagaliwabenaga bi mana pigane Korindi wali agali tíha howa tagira ibinibe be tí hangunaga yalu ibinibe.
1CO 14:37 Tí mbirali Ngode Datagaliwabenaga bi mana latagi haga kolo manda bu hayaguabi mugube Ngode Datagaliwabe Dinini ibugua ngiyago yu kolo manda bu hayaguabi i̱na tíhondo bi gilibu wia harogoni Anduane Homogohanda bi lo wia hayadalo ibugua manda bulene nga.
1CO 14:38 Mbiralime bi ogoni hale nahayagua tígua nde ibugua bi larago hale nahalimu.
1CO 14:39 Anigo i̱naga hamene mbaliniru-o tígua Ngode Datagaliwabe bi mana latagi holene mugube hame timbuni lo halimu. Ani buwa mbiralime bi tara hale nahene lagaruhondo, Tígua bi ogoni lolene nawi, nalalimu.
1CO 14:40 Bibahende beremiru bayuwa tigabi hanguore bulene nga.
1CO 15:1 Ogonigo i̱naga hamene mbaliniru-o i̱na Bi Mana Debene tíhondo langirugo hale howa tígua yu tiga birimigobi mini mbiraore wuwa mini bilinahe kamigobi ogoninaga i̱na tí lone mo mitangi bua kogoni.
1CO 15:2 Mana langirugoni hongo howa yu kamiyagua Ngode Datagaliwabehanda tí pele ngiragoni. Be ani ndo tí bame irane nahende howa yu tiga bu kamibe.
1CO 15:3 Galone timbuniore i̱hondo langiyadagua i̱na tíhondo langirugo ogo. Anduane Homogonaga mbugani gilibu ngadagua Keriso ibugua iname ko birimagonaga homa hene.
1CO 15:4 Anduane Homogonaga mbugani gilibu ngadagua dege ibunaga tingini hora hayagola horo teboneni Ngode Datagaliwabehanda ibu ho dai bilo mo heya hene.
1CO 15:5 Heyu howa ibu Pida de hendelo ala ha pani halu mani abosolo agali homberiali (12) biaru de hendelo ha pani hene.
1CO 15:6 Ani buwa ibu haruru ibaga biaga dewaore handari duria (500) agima ti mandagi hearia ibugua tibi de hendelo ha pani hene. Haruru ibaga biaga odaruni dewaore áyu kago mbira mbira dege homene.
1CO 15:7 Ani bialu ibu Yamese de hendelo ha pani howa abosolo maru bibahende hendelobi ha pani dege hene.
1CO 15:8 Maniore i̱ Polo nakarulape ko waneigini hono wahene ale hewaria ibugua i̱ de hondoliyabi ha pani haya.
1CO 15:9 Abosolo agali bibahende karu helowa i̱ niraore kogoni nde i̱na Ngode Datagaliwabenaga wali agali heneru mo tandaga haga harugonaga i̱ abosolo agali ka labe nahe harugoni.
1CO 15:10 Anigoyu Ngode Datagaliwabenaga biamogo bia holeneme i̱ áyu kogodagua holiya mo heya hayago kogoni. Ngode Datagaliwabehanda ibunaga biamogo bia holene i̱hondo ngiyago yuwa bame hope nahe howa i̱na biabe timbuniore bialu abosolo agali bibahende i̱na biabe birugome bu bolangua haru. Ani birugoni i̱ninaga hongome ndo Ngode Datagaliwabenaga biamogo bia holene i̱ha heagola birugoni.
1CO 15:11 Ogonigo mana ogoni i̱na langiruyaguabi tigua langiyaguabi ina bibahendeme mana mbiraore hangu dege langeramaligo tígua hale howa yu tiga bidami.
1CO 15:12 Anigo iname mana lamulene tene Keriso ibu homalu Ngode Datagaliwabehanda mo heya henego kagonaga lameramaligo tí marume wali agali homenego naheyulebiraore laramiligo irane agibe.
1CO 15:13 Ogoni henene larimiyagua Ngode Datagaliwabehanda Keriso mo heya nahe laramida.
1CO 15:14 Ngode Datagaliwabehanda Keriso mo heya nahenedale nde iname mana mbira lamulene nangale. Tíguabi nde mana yu tiga bulene nangale.
1CO 15:15 Ogoni dege ndo. Mende larogo wali agali homeneru Ngode Datagaliwabehanda mo heya nahagayagua iname ibugua Keriso mo heya hene larimago mo heya naheneyagua nde tigua ina ke̱ haga ka labehe holebira.
1CO 15:16 Wali agali homenego Ngode Datagaliwabehanda mo heya nahagayagua Kerisobi mo heya nahenedagoni.
1CO 15:17 Ngode Datagaliwabehanda Keriso mo heya naheneyagua tígua ibuhondo mini mbiraore wirimigo bame wuwa ko birimigo nadome ko bialu haabo kami.
1CO 15:18 Ani mitangi bu kamiyagua wali agali Kerisohondo mini mbiraore wu howa homeneru tibi hariga koha piya labehe kamagoni.
1CO 15:19 Iname dindini holene hangunaga Kerisohondo mini dunu bia ho kamayagua wali agalime maruhondo dara hagadagua ndo tigua inahondo dara timbuniore holene wulebira.
1CO 15:20 Ogonidagua nalabeheore. Manane Keriso ibu homalu Ngode Datagaliwabehanda heneneore mo heya henedagua wali agali bibahende homeneru ibugua mo heya holebira.
1CO 15:21 Agali mbira ibuha howa homolene wali agali bibahendeni yu anda ibinidagua agali mende ibuha howa mo heya holene yu anda ibini.
1CO 15:22 Wali agali bibahende Adamaha howa homolene winidagua wali agali Kerisoha howa mo heya holene wulebiraore.
1CO 15:23 Bulebirago ogo. Keriso ibuni ala heyiyadagua ibuni dai birangi ibunaga wali agali mo heya holebira.
1CO 15:24 Ani biragola hamaro bulene horo ibirangi Kerisohanda dama bibahende haru hagarubi hondo hagarubi hongoherubi ti bibahendenaga hongo bo podai holebira. Ani podai howa Keriso ibugua haru hayaruni ibu Aba Ngode Datagaliwabehondo miai holebira.
1CO 15:25 Ogoni irane Ngode Datagaliwabehanda waitigi bibahende biaru tinaga hongo bo podalu Kerisonaga geha mo ngelai helo Kerisohanda haru holene ngaore.
1CO 15:26 Ngode Datagaliwabehanda ibuni wayali halu maniore waitigi homanaga hongo bo podolebira.
1CO 15:27 Anduane Homogonaga mbugame ledago ogo. Ngode Datagaliwabehanda mbirale bibahende karubi ngarubi Kerisonaga geha ngelai ho ka, lalu gilibu nga. Mbirale bibahende lararu uruni heba Ngode Datagaliwabe ibuni bimaga naheore howa ibugua mbirale karubi ngarubi bibahende Kerisonaga geha mo ngelai kagoni lenego manda bimi̱ya.
1CO 15:28 Ani bidagola Ngode Datagaliwabehanda mbirale bibahende karubi ngarubi Keriso ibugua haru helo ibunaga andaneha mo ngelai holebira. Mo ngelai kagola nde Keriso ibu Ngode Datagaliwabe Iginiore howa Ngode Datagaliwabenaga andaneha ibuni helolebira. Ala Ngode Datagaliwabehanda mbirale hayarubi wiyarubi Kerisonaga geha mo ngelenego bibahende Ngode Datagaliwabe ibugua ibuni hangu daligaore howa hondo hagimbu biai holebira.
1CO 15:29 Bi mbira laro. Wali agali maru karume wali agali homeneru mitangi bialu tinaga baboraya mo bia hagago ti aginaga biagabe. Ti marume lalu, Wali agali homeneru naheyulebira, laganego bi ogoni heneneyagua wali agali homenerunaga baboraya bu wia haganego irane agibe.
1CO 15:30 Ogoni heneneyagua inamebi homolene kaware ngagoria ha para haabo haramaligo irane agibe.
1CO 15:31 Hamene mbaliniru-o horo bibahendeni i̱ homolene kaware ngagoria ha para haabo haruli. I̱na tí mitangi timbuni biaabo halu inanaga Anduane Homogo Keriso Yasuha howa holene yu kamagonaga bi ogoni latagi haro.
1CO 15:32 I̱na Ebesani howa nogo gabua tara tara baba gungu birugo dindi holene hangu mitangi bialu biruyagua agi karulolenaga bialu harube. Bi mbira laganego ngago ogo, Iya yawi dege homami̱ya kamago tomobi ibabi áyu kamaore nama nalarama, laga. Wali agali homeneru naheyulebirago lalu heneneyagua bi ani lolene karulape ngagoni.
1CO 15:33 Marume tí mo pila holigo manda bu holene bi lo ngago ogo. Wali agali mana ko biaga karu heba nenege hinu haabo harimiyagua tigua tí mo ko holebira, lagane lo nga.
1CO 15:34 Tí mini tigabi wiadai bialu ko bialu haramiligo yu wahalimu. I̱na tí tagaore halimulonaga larogo tí marume Ngode Datagaliwabe manda nabiore kami.
1CO 15:35 Marume bi ogodagua lolebira, Wali agali homeneru agua bialu mo heya holobadabe. Tinaga tingini abi ale holobadabe, lolebira.
1CO 15:36 Tí mini nawi kamibe. Tígua mbirale egene dindiha hangaramigola egene ogoni togo buwa mani doai laga ndobe.
1CO 15:37 Widi egeneyaguabi egene tarayaguabi hangaramiligo egene ibuni hangu hangaramili ndobe. Mani holebiragobi homane bibahende ndo hangarimi.
1CO 15:38 Ngode Datagaliwabehanda ibuni manda bidadagua egene ogoniha howa irane anda helo miaga. Ibugua egene tara tara uruni tinaga irane hangu hangu holene ngadagua miaga.
1CO 15:39 Dindini kamaru bibahendenaga tingini mbiraore hangu ndo tara tara bu kama. Wali agalinaga tingini tara ale nogo tara tara karunaga tingini tara ale ega tara tara bedarunaga tingini tara ale wena tara tara ibaha bedarunaga tingini tara ale lowa bu kamagoni.
1CO 15:40 Hari daligani mbirale tara tara karu tinaga tingini nde tara halu dindini mbirale tara tara karu tinaga tingini nde tara halu bidagoni. Hari daligani karu tinaga yári nde daligani kagobi halu dindini karu tinaga yári nde dindini kagobi kagoni.
1CO 15:41 Nibi egebi yakundirubi tinaga wá holene mbiraore hangu ndo tínaga wá holene tara tara kagoni. Yakundi uruni tinibi tinaga wá holene mbiraore hangu ndo wá holene tara tara haga bigi bidagoni.
1CO 15:42 Ogonidagua wali agali homeneru Ngode Datagaliwabehanda ti mo heya holebirago ogo. Homene tingini hora haramagola togo biaga wiyagoni. Ngode Datagaliwabehanda mo heya haragola togo nabi haabobo bu holebira.
1CO 15:43 Homa hora halu howa de hondoa nabi hongobi naheore hora haramali. Ngode Datagaliwabehanda homali howa mo heya haragola hongohe baya gibiore heyulebira.
1CO 15:44 Homa hora halu howa dindinaga tingini hayagobi hora haramaligoni. Ngode Datagaliwabehanda homali howa mo heya haragola dinininaga tingini holebira. Dindinaga tingini kamadagua dinininaga tingini nde holebira ndobe.
1CO 15:45 Anduane Homogonaga mbugani ogodagua leda, Agali mbira mini Adama Ngode Datagaliwabehanda pigane wabinigo ibu dindini holenehe hene, lalu gilibu nga. Ogonidagua ndo Adama mende mani henego ibu Dinini howa holene gahengeore miagane ka.
1CO 15:46 Dinini holene ala íbu haga ndo. Dindini holene ala howa mani dinini holene íbu haga.
1CO 15:47 Adama ala íbu henego Ngode Datagaliwabehanda ibu dindime wabu helene. Adama mende maha henego ibu dahuliya andaga howa dalini.
1CO 15:48 Wali agali dindialinaga kamaru ina mbirali dindime wabini biagobi kama. Wali agali dahuliya andaganaga kamaru ina mbirali dahuliya andaga howa dalini biagobi holeberema.
1CO 15:49 Agali dindime wabu helenego ale kamadagua agali dahuliya andaga howa dalinigo ibu ale holeberama.
1CO 15:50 Hamene mbaliniru-o bi larogoni irane tinginimebi daramamebi wabini karume Ngode Datagaliwabehanda Handame Ho Kagoria nakarulolebiraore. Togo biaga tinginime togo nabiaga ngagoria nakarulabehe ka.
1CO 15:51 Galone mbira ala mo pani nahe ngelenego langerogo hale halimu. Ina bibahende homai nahe howa biguli mbira lamaro biragola ina abaleore de pandi mugu laradagua bialu Ngode Datagaliwabehanda ina mo tara holebira. Biguli ogoni laragola homene biaru bibahende ti Ngode Datagaliwabehanda mo heya howa haabobo bu holene tingini karulolebira. Ani bialu Ngode Datagaliwabehanda ina bibahende mo tara holebira.
1CO 15:53 Ani buwa tingini togo biaga biaru wahalu togo nabiaga haabobo bu holenenaga karulo aribia holebira. Homagane tingini wiyaru wahalu nahomagane ngaru karulo aribia holebira.
1CO 15:54 Tingini togo biaga wiyaru tingini togo nabiaga ngaru karulo aribia halu tingini homaga wiyaru tingini nahomagane ngaru karulo aribia hai holebira. Ani biai kagola Anduane Homogonaga mbugani lo wiyadagua, Ngode Datagaliwabehanda homagane mo wahai halu ibuni wayali haiore kagoni, lalu gilibu ngadagua heneneore lola holebira.
1CO 15:55 Homa-o í̠naga wayali holene agiha ngebe. Homa-o í̠na bope holenego í̠ hongo agiha ngebe, lenego gilibu nga.
1CO 15:56 Homa ibu hongo miagane tene ko buleneme. Ko bulenenaga hongo Mana lowini ngagoha howa miaga.
1CO 15:57 Ani biagago áyu inanaga Anduane Homogo Yasu Kerisoha howa Ngode Datagaliwabehanda inahondo wayali holene ngidagonaga iname ibuhondo turu halu ka̱i̱ore laabo hami̱ya.
1CO 15:58 Anigo i̱naga hamene mbalini turubiru-o tí mini bilinahe howa ema nabi hongo hoore halimu. Anduane Homogonaga biabe bulene galone timbuni ngago manda bialu tígua ibunaga biabe bule manga nahe ebebe buwa biaabo halu halimu.
1CO 16:1 Ai Ngode Datagaliwabenaga wali agali Yudia dindini karu munime biamogo bulene ngagonaga i̱na Keriso hameigini Galesia dindini hagahaga bidaruhondo bilimu larudagua tíhondobi ani bulene nga laro.
1CO 16:2 Horo Sande bibahendengi tígua hangu hangu howa tínaga muni mirimidagua tale bialu muni maru mo bagi ho ngelaga bilimu. Ani birimiyagua i̱ tí kamiria eberoangi muni mo mogo bulene irane nawulebira.
1CO 16:3 I̱na íbu howa agali maru tígua dabarimigo Keriso hameigini Yarusalemeni karu karia muni yalu pelo tihondo i̱na beba gilibu yalu pudaba lolebero.
1CO 16:4 I̱ polene ngayagua nde ti i̱ heba poleberema.
1CO 16:5 I̱na Masedonia dindi polene ngaore manda bialu kogo pialu howa tí kamiria tagira ibagua.
1CO 16:6 Ibuwa tí heba emene lu holene mitangi bidogo ira yuni gilope howa dagare biagane horo bibahenderu tí heba haabo holebero bada. Aguani tí heba emene howa i̱na maha polene ngadagua poliya tígua i̱ biamogo bialu ngua holeberami.
1CO 16:7 I̱ tí kamiria ibalu abale bolangua halu polene hame nale kogoni. Anduane Homogohanda i̱ tí heba lu holene henge ngiyagua nde luore hami̱ya manda bu ko.
1CO 16:8 I̱na Pendigosi horo ibilo tangi i̱ Ebesa ogoriani holene manda bu ko.
1CO 16:9 Waitigi dewa karuni helowa i̱ ogoriani howa biabe bayuwa bulene henge timbuniore ngagoni.
1CO 16:10 Timodi ibu tí kamiria ibiyagua tígua ibu mo turu halu nenege hinu halimu. I̱na Anduane Homogonaga biabe bialu kodagua ibuguabi bialu kagoni.
1CO 16:11 Tígua Timodi handape nahe howa bayuwa de hondo halu i̱ kogoria dai bilo ibu ibaga bialu kagoria tígua biamogo bialu mo turu halimu. Ibu Keriso hameigini maru heba i̱ koria dai bulebira mitangi bialu kogoni.
1CO 16:12 Ai inanaga hamene Aboloso mitangi bialu bi mbira laro. Ibu Keriso hameigini maru heba tí kamiria ibilo i̱na mo poa haabo haruli. Ani bialu hewaria ibu áyu ogoni polene mitangi nabi ka. Mani ibu henge wirangi ibulebira.
1CO 16:13 Tígua mamage halubi mini mbiraore wirimigo bilinahe ho halubi gi nahe howa hongohe halubi halimu.
1CO 16:14 Biabe bibahende beremigo gubalini howa bialu halimu.
1CO 16:15 Sebanasabi ibu damenerubi ti hayago manda bu kami. Tigua wali agali Agaia dindini howa Yasu Kerisohondo mini mbiraore ti pigane wialu Ngode Datagaliwabenaga wali agali biamogo bulenaga biabe bialu kagoni.
1CO 16:16 I̱naga hamene mbaliniru-o uruni tigua biradagua tí kamirume nde talialu bialu halimu. Wali agali marubi ti heba biabe biamogo bialu karu de hondowa tigua biradagua tí kamirume nde talialu bialu halimu laro.
1CO 16:17 Sebanasa Podunadasa Agaigasa imaru ti i̱ hewaria ibiyagola i̱ turu timbuni harugoni. Tígua ibiradagua uruni tigua íbu aribia hayagoni.
1CO 16:18 Ti tebiralime tí mo turu hayadagua i̱bi mo turu hayago agali urunibi iname mitangi timbuni bulene nga.
1CO 16:19 Keriso hameigini Esia dindini hagahaga bu karume, Tí mitangi bu kama, lalu lawia hara. Aguila Pirisilala Keriso hameigini libunaga andagani ngoai hagarubi tigua, Ina Kerisoha howa turu halu tí mitangi bu kama, lalu lawia hara.
1CO 16:20 Keriso hameigini oali karumebi, Tí mitangi bu kama, lalu lawia hara. Tí bibahende kamiru gubalini halu gi tigani bialu mini yani howa turu haga bilimu.
1CO 16:21 I̱ Polohanda i̱ni gime gili bialu, Tí mitangi bu ko, lalu gili bero.
1CO 16:22 Mbirali Anduane Homogohondo gubalini naheyagua ibuhondo ha holene nga. Inanaga Anduane Homogo íbu-o.
1CO 16:23 Anduane Homogo Yasunaga biamogo bia holene tí heba wiaabo helo hamelo ko.
1CO 16:24 I̱ Keriso Yasuha howa i̱naga gubalini holene tí bibahendeha helaro.
2CO 1:1 I̱ Polo Ngode Datagaliwabe ibuni hame leagome Keriso Yasunaga abosolo kogoni. I̱bi ina hamene Timodibi iyame beba ogo tíhondo gilibu wia haraba. Keriso hameigini Korindini kamirubi Ngode Datagaliwabenaga wali agali bibahende Agaia dindini kamirubi tíhondo beba gilibu wia haraba.
2CO 1:2 Ngode Datagaliwabe ina Aba ibubi Anduane Homogo Yasu Kerisobi libugua biamogo bia holenebi mo palia holenebi tíhondo ngilo hamelo kaba.
2CO 1:3 Ina Anduane Homogo Yasu Kerisonaga Aba Ngode Datagaliwabe ibu ina Aba howa dara halu biamogo biagabi biamogo bulene bibahende ibuha howa ibai hagabi kago ibuhondo iname turu halu ka̱i̱ lami̱ya.
2CO 1:4 Genda bibahende ina kamagoria íbu ngagola ibugua ina biamogo biaga ka. Ani biradagua wali agali marunaga gendabi tara tara yu kagola Ngode Datagaliwabehanda inahondo biamogo biyadagua iname nde ti biamogo bibehe kama.
2CO 1:5 Keriso ibugua tandaga dewa nayadagua inamebi ibuha howa tandaga noloma̱ya ngeleda. Ogonidagua ibunaga biamogo bulene timbuniore ngago inamebi ibuha howa yu kama.
2CO 1:6 Iname tandaga narimayagua Ngode Datagaliwabehanda tí biamogo bilonagabi pele ngilonagabi naramali. Ogonidagua Ngode Datagaliwabehanda ina biamogo biyagua nde tíbi biamogo bulebira. Biamogo bialu howa tandaga iname nalu ema nabi hibu lalu haramadagua tíguabi ema nabi hibu lalu hongo haabo halimulo hongo holene ngulebira.
2CO 1:7 Anigo iname tíhondo mini dunu bia ho wiaabo haramali. Iname tandaga naramadagua tíguabi nalu howa biamogo bulene yu kamadagua tíguabi yu kamidalo manda bu kama.
2CO 1:8 I̱ hamene mbaliniru-o ina Esia dindini howa tandaga nalu harimago tí manda bu halimulo langerama. Gendabi gibi timbunioreme ina mo genda bia hayagola ina homolene hangu nga manda birima.
2CO 1:9 Ani manda bialu godi hale haganeme lalu, Tí homalimulo bolene nga, lagadagua layagola ina miniha gi ho hagadagua harima. Anidagua birimadagoni irane Ngode Datagaliwabe ibugua wali agali homeneru mo heya haga biago ka manda bialu ibunihondo hangu mini dunubia ho holoma̱yanaga ani bini.
2CO 1:10 Ina homolene gibi taraore wiagoria hemagola ina nahomoloma̱yanaga Ngode Datagaliwabehanda pele ngiyadagua lone pele ngulebira. Tígua Ngode Datagaliwabehondo inanaga bi la haramigome ina biamogo beramigo ibugua ina pele ngiyadagua ngiaabo holebira manda buwa ibuhondo mini dunu bia ho wiaabo kama. Ani buwa wali agali dewalime inanaga bi la hararu Ngode Datagaliwabehanda hale howa ina biamogo bulebira. Ani biragola hondowa tigua bi laraga halu ibuhondo turu halu ka̱i̱ lolebira.
2CO 1:12 Iname dindini tí heba howa bialu harimagonaga bi tiga tiga lolenebi mini do nahe howa bulenebi Ngode Datagaliwabehanda nginigome ina haru hayagonaga ina miniha mitangi bialu turu ho kama. Dindinaga mini gigabi wuleneme ndo biamogo bia holene hongo Ngode Datagaliwabeha howa ibiyagonaga ina haru hene.
2CO 1:13 Iyame tígua bi dagalabehegobi manda bibehegobi hangu gilibu wia haraba. Tígua áyu manda biai nahe kamigo manda biaiore halimulo hamelo ko. Ani manda buwa Anduane Homogo Yasunaga Horo ibirangi iname tí mitangi bialu turu timbuniore holeberamadagua tíguabi ina mitangi bialu turu timbuniore holeberami.
2CO 1:15 Aniore manda buwa tí halu ki mo turu halu biamogo bulenaga tí hemiria ala ibule manda manda bu haru.
2CO 1:16 I̱ Yudia dindi mani polenaga tígua biamogo bilimulo mitangi buwa i̱ Masedonia dindi pialu howabi dai bialu howabi tí kamiria ibule manda manda biru.
2CO 1:17 Aguani manda birudagoni i̱ kudaga howa layadalo manda birimibe. I̱na ibule manda bialu howa i̱ni hangu mitangi bialu e̱bi ndobi lamaga halu larulibe.
2CO 1:18 Ngode Datagaliwabe ibu heneneore kadagua i̱na tíhondo bi lo wirugo e̱bi ndobi lamaga halu ndo lo wiru.
2CO 1:19 Ogonigo Sailasabi Timodibi i̱bi iname Ngode Datagaliwabe Igini Yasu Keriso ibuore ka lalu tíhondo langialu harimago ibu e̱bi ndobi laga ndo ka. Ani ndo ibu e̱ dege laga ka.
2CO 1:20 Irane Ngode Datagaliwabehanda bi lowini ngaru bibahendenaga e̱ore laga ibu kagoni. Irane ogoninaga ibu mini yaraga hole iname Yasu Keriso minini howa, Ani bibe, laramali.
2CO 1:21 Iyabi tíbi Kerisoha mini bilinahe holoma̱ya Ngode Datagaliwabehanda ina mo bia haga ka. Ibunime ina daba bagi ho helene kama.
2CO 1:22 Ngode Datagaliwabe ibunime ina ibunaga kamago walia helobi ibugua yidaru bibahende inahondo ngulebiraore manda buluma̱yabi manane ibu Dinini inanaga bu habaneha heleda.
2CO 1:23 Ngode Datagaliwabe ibu i̱naga miniha manda biai kago ibu i̱naga la hagane helaro. I̱ tí hemiria Korindi naibirugoni irane i̱na bi larogome tí mo tandaga holeyane naibi harugoni.
2CO 1:24 Tígua Ngode Datagaliwabehondo mini mbiraore wuwa hongo ho haabo kamigo iname tíhondo, Mana ogobi yu tiga bidaba, lalu haru hole ndo kama. Ani biradagua iname tí turu halimulo tí heba biabe bialu kamagoni.
2CO 2:1 Anigo i̱na manda bialu hewaria tí mo genda holeyane i̱na tí kamiria lone naibule manda biru.
2CO 2:2 I̱na tí mo genda haruyagua nde aiwa i̱ mo turu holebirabe. Wali agali i̱na mo genda haruru tinime hangu mo turu holene wulebira.
2CO 2:3 Irane ogoninaga i̱na tíhondo beba mbira ala gilibu wia harugoni. I̱na tí hemiria ibiruyagua wali agali i̱ mo turu haga kamirume dege i̱ mo genda halimulo hame nale haru. Mbira manda bu kogo laro. I̱ turu ho koangi tíbi turu howa kamidalo manda bu ko.
2CO 2:4 I̱naga mini taulia ho howabi mini burugulo howabi de iba timbuni ibalu howabi i̱na tíhondo beba ala gilibu wia haru. Ani birugo i̱na tí mo genda holenaga ndo tí bibahendehondo i̱na gubalini ogobiore ho kada lalu manda bilimulonaga gili biru.
2CO 2:5 Ai tí kamigo aria mbiralime tí mbiraligo mo genda hayago i̱hondo ndo tí bibahendehondo mo genda hayagoni. O ndo tí maruhondo hangu mo genda hayagoni. Ogonigo i̱na ibuhondo bi hongo howa lolene hame nale ko.
2CO 2:6 Tí dewalime o biagonihondo tandaga nelo mirimigo karulape birimi manda bido.
2CO 2:7 Ai ogonigo ibugua ko tíhondo biyagonaga genda timbuni halu wahalu puabo holigo tígua ibugua ko biyago mitangi bialu la nabi dara halu biamogo bilimu.
2CO 2:8 Tígua ibuhondo gubalini ho henedane hendelo ani bilimu laro.
2CO 2:9 I̱na beba mbira ala tíhondo gilibu wia harugoni irane ogo alenaga. Tí agi bialu harimidabe hondolenagabi i̱na bi laruru bibahende tígua agua biaabo harimidabe hondolenagabi tí ba handarugoni.
2CO 2:10 Mbiralime ko biyago tígua la nabi waharimiyagua i̱na nde la nabi wa dege holebero. I̱na ani bulene ngayagua i̱na tí mitangi bialu Kerisonaga deni waharuli.
2CO 2:11 I̱na ogonidagua biruligo irane dama Heyolabe ibugua ohowa ina bope holigo lowa biruli. Iname dama Heyolabe ibugua ohowa biaganeru manda bu kama.
2CO 2:12 I̱na Kerisonaga Bi Mana Debene lamule Toroasa anda pirugola i̱na biabe ogoriani buliya Anduane Homogohanda henge timbuni ngiyane handa walia haru.
2CO 2:13 Anda íbu howa handalu hewaria i̱naga hamene Taidasa naheyane hondowa i̱ mini burugulo haru. Ani bu howa i̱na Toroasa wali agalihondo, Hondo halimu, lalu Masedonia dindi pole piru.
2CO 2:14 Ogonigo iname Ngode Datagaliwabehondo turu halu ka̱i̱ laabo hami̱ya. Irane ibugua ina Kerisoha howa Kerisonaga wayali holeneha puabo holoma̱ya haru kagoni. Mbirale ngabiame hagadagua Ngode Datagaliwabehanda wali agali bibahendeme Kerisonaga bi mana hale haame helo inaha howa ani biaga ka.
2CO 2:15 Anigo ina Kerisohanda mbirale Ngode Datagaliwabehondo ngabilo delaga inisenesi miaga ale howa iname wali agali Ngode Datagaliwabenaga pele mulene yu karubi hariga koha pialu karubi ta nabihondo yo meremali.
2CO 2:16 Mana ngabiaga ogoni hariga koha pialu karume ngubi homolenedane handa walia haga. Pele mulene yu karume ngabiore holene henenedane handa walia haga. Biabe ogonibi bibehe ai kabe.
2CO 2:17 Agali dewalime galone ndo mbirale tara tara mitangi biagadagua Ngode Datagaliwabenaga bi mana ani mitangi bialu ibunaga biabe biaga ka. Ina ani ndoore beremali. Ngode Datagaliwabehanda ina biabe bule pu lenego iname ibunaga deni howa Kerisonaga biabe bia haga howa mini do nahe Ngode Datagaliwabenaga bi mana lameramali.
2CO 3:1 Bi lone laramagoni iname mine halu ina bayaleore howa larimadalo mitangi bidamibe. Agali marume bebani ti bayaleore ka lalu gili binigo yalu ibagadagua iname tíhondo beba ogoni ale gilibu yalu ibulene karulapebe be tígua inahondo beba ogonibi yalu poloma̱ya gilibu ngulene karulapebe.
2CO 3:2 Inanaga beba gili bini ogonibi tíore howa wali agali bibahendeme manda bilobi de hendelobi tí inanaga bu habaneha gili bidagoni.
2CO 3:3 Beba ogoni Keriso ibunime gili bialu inahondo, Yalu pudaba, lenego waliaore halu kami. Beba ogoni ege to̱le̱ni gili bini ndo Ngode Datagaliwabe holenehe kago ibu Dinini ibugua wali agalinaga bu miniha gili bini.
2CO 3:4 Bi ogonidagua laramago irane ina Kerisoha howa Ngode Datagaliwabe karulapeore ka lalu mini mbiraore wuwa kamagome.
2CO 3:5 Inaha mbira hongo howa bayale bulene nawiorego inaneme biabe ogo bero nalabehe kama. Inanaga hongo holene tene Ngode Datagaliwabe ibuni ka.
2CO 3:6 Ngode Datagaliwabenaga habo nalolene bi gahenge lo ngagonaga biabe buluma̱ya ibunime mo bia haragola iname bialu kama. Habo nalolene bi gahenge ogoni bi ala lowinigo biagadagua ndo Ngode Datagaliwabe Dinini ibugua biaga ka. Bi ala lowini ngagome homagane yu anda ibaganego Ngode Datagaliwabe Dinini ibugua holene gahenge yu anda ibaga ka.
2CO 3:7 Ngode Datagaliwabehanda Mana lo winigo ege to̱le̱ni gili bialu Mosesehondo miniyangi ibunaga wá taraore holene walia hene. Wá taraore holene ogoni Mosesenaga denguini ibalu ereba hama daidai biyagola wá tara hongo timbuniore dege hayagome Isaraele wali agalime Mosese bayuwa handawa nabibehe hene. Mana lowini ngago ogonime homagane yu anda ibagago wá tara timbuniore holene ogonibi heba ibinigo
2CO 3:8 Ngode Datagaliwabe Dinini ibugua biabe bialu howa wá tara timbuniore hatagi holebira ndobe.
2CO 3:9 Mana ala taweme wá timbunihe howa, Tí koha polene nga, lolene yu anda ibinigo nde mana gahengeme, Tí mini tigabiwi kami, lolene yu anda ibalu wá tara timbuniorehe kago ndobe.
2CO 3:10 Ogonigo áyu wá tara timbuniore íbu kagome wá tara timbuni ala henego ai mo ereba haya labehe kama.
2CO 3:11 Mana ala tawe wiagoria wá tigi mbira hangu hayagobi ndo áyu wá taraore holene timbuni wiaabobo bu ngagoni ndobe.
2CO 3:12 Ogoni mitangi bialu iname mini dunubiahe howa iname gi nahe hongo howa bi latagi haramali.
2CO 3:13 Isaraele wali agalime Mosesenaga denguini wá taraore holene ibalu ereba halu heago de hondolilono ibugua ibunaga denguini labolabome yi hene. Mosese ibu ogoni biyadagua iname bulene nawi.
2CO 3:14 Isaraele wali agali uruni tinaga mini ndibulo hene. Áyubi tigua habo nalolene bi bamba lo winigonaga mbuga daga lalu karia tinaga mini labolabo ogoni aleme yi kagola daga lalu ka. Labolabo ale ogoni wali agalime Kerisoha hangu ho gimbu bu kagola Ngode Datagaliwabehanda mini mo ndibu laga labolabo ale ogoni mo waholebira.
2CO 3:15 Áyubi tigua Mosese heneyangi Mana lowinigo daga lalu karia labolabo ogoni alegome tinaga mini ndibulo dambi ho wiaabo ka.
2CO 3:16 Ani bidago Anduane Homogonaga mbugani lo ngadagua ogo, Mbirali ibugua mini beregedalu Anduane Homogohondo mini mbiraore wiragola Ngode Datagaliwabehanda labolabo ogoni mo waholebira, lalu gilibu nga.
2CO 3:17 Ai Anduane Homogobi Dininibi libu mbiraore kagoni. Anduane Homogo Dinini mbiralinaga bu miniha kayagua ibunaga mini ndibu layago duguape hene kagoni.
2CO 3:18 Ogonigo ina bibahende kamaru dengui yi nahe iba wa̱i̱ ale howa Anduane Homogonaga wá holene baya taraore inaha howa hatagi haga. Anduane Homogo ibu Dinini kago ibu inaha howa wá holene baya taraore hatagi halu ogonime ina ibuni ale holoma̱ya mo haga ka.
2CO 4:1 Ngode Datagaliwabehanda ina dara howa biabe ogoni buluma̱ya nginigo ina genda howa wahalu pole mitangi nabi howa bialu haramali.
2CO 4:2 Iname mini ko do howa bulenebi mana tagabi bulenebi erembira meremali. Iname wali agali mo hondo nahe Ngode Datagaliwabe bi mana mo tara howa nalami haramali. Wali agali bibahendenaga miniha tiga tiga manda bilo iname henene hangu lalu Ngode Datagaliwabenaga deni howa lamialu haramali.
2CO 4:3 Bi mana debene lameramaligo wia do ho ngayagua wali agali hariga koha pialu karu manda nabilo wia do ho ngagoni.
2CO 4:4 Dindini ko biaganaga haru haga ibugua wali agali uruninaga mini mo aruma kagola tigua Kerisohondo mini mbiraore nawi ka. Tiha wá harago ti de nahendelonaga ibugua mo ge haga ka. Wá holene ogoni Keriso ibu Ngode Datagaliwabe kagobi kagonaga wá taraore holene Bi Mana Debeneha howa ibalu wá halu ka.
2CO 4:5 Iname inanenaga mana biaganego lameremali ndo. Iname Yasu Keriso ibu Anduane Homogoore ka lalubi Yasu mitangi bialu tínaga biabe bia haga ina kama lalubi ani lameremali.
2CO 4:6 Ngode Datagaliwabehanda lalu, Arumaha howa wá hatagi ha, lenego ogoni ibugua inanaga bu miniha mo wá hole ibunaga wá holene heledagoni. Ngode Datagaliwabe ibugua ibunaga wá taraore holene Kerisonaga denguini howa wá hatagi harago ina manda buluma̱yanaga bira.
2CO 4:7 Yasu Kerisonaga mana galoneore baya burugule ogoni yu kamaru ina nagalone be dindime wabini ale kama. Ani kamago irane hongo holene timbuniore tene ina ndo Ngode Datagaliwabe ibuniore ka inaha howa walia holenaga kamagoni.
2CO 4:8 Ina tandaga naga bialu haramaligo inanaga hongo podalu ibira nahaga. Mini burugulo howa wahalu pu naberamali.
2CO 4:9 Waitigi dewa kagolabi nenege mbira ha dege biaga. Marume ina bope haragola homa nabi kama.
2CO 4:10 Inanaga tinginiha howa Yasunaga holene wali agalime de hendelo iname horo bibahendeni inanaga tinginiha Yasunaga homolene yu haramali.
2CO 4:11 Inanaga tinginiha howa Yasunaga holene walia helo iname Yasunaga biabe bia halu homolene kaware ngagoria haabo haramali.
2CO 4:12 Ani bialu howa homoleneme inaha biabe bialu kagola holeneme tíha biabe bialu kagoni.
2CO 4:13 Anduane Homogonaga mbugani bi lo ngago ogo, I̱na Ngode Datagaliwabehondo mini mbiraore wu harugo bi latagi harugoni, lalu gilibu nga. Iname ogonidagua ibuhondo mini mbiraore wu howa bi latagi haramali.
2CO 4:14 Ngode Datagaliwabehanda Anduane Homogo Yasu mo heya henego inabi mo heya halu tíbi inabi ibu kagoria haru polebira. Ani bulebiraore manda bu kamagoni.
2CO 4:15 Ogoni bibahende tí mitangi bialu bulebira. Ngode Datagaliwabenaga biamogo bia holeneme wali agali dewaoreha ibalu karularagola tigua Ngode Datagaliwabenaga mini yaraga halu ibuhondo turu halu ka̱i̱ lalu holebira.
2CO 4:16 Irane ogoninaga iname genda howa wahalu polene mitangi nabi haramali. Ina dindinaga tingini holene goba halu kagola inanaga dinini holene horo bibahendengi mo gahenge halu ka.
2CO 4:17 Iname tandaga emene tigi mbira áyu dege nalu kamagome maha wiaabobo holenaga bayale taraore holene tandaga emene áyu dege nalu kamagobi ndo bayale taraore holene timbuniore inahondo mo ngulebira.
2CO 4:18 Iname mbirale deme handabehe ngaru ndo deme nahandabehe ngaru bayuwa mitangi bu kama. Mbirale deme hendedamaru wiaabo naholebira mbirale deme nahendedamaru wiaaboboore wulebira.
2CO 5:1 Ogonigo áyu ina dindinaga tingini balai anda ale bu kamago goba haragola Ngode Datagaliwabehanda dahuliya andagani haabobo holene tingini anda ale agalinaga gime wabini ndo ibunime wabinigo inanaga ngule wia kago manda bu kama.
2CO 5:2 Inanaga tingini anda ale dahuliya andagani ngago áyu ogoni ina karulo hole hame timbuniore lowa karuore loliyago lalu hondo ho kama.
2CO 5:3 Tingini anda ale ogoni iname karulo howa ina tingini nahe naholeberama.
2CO 5:4 Ina dindinaga tingini balai anda ale ogoniha kamago howa genda halu u̱lu̱ lalu haramali. Ogonidagua beramaligo irane ina dindininaga tingini wahoa howa ndo dindinaga homagane tingini dahuliya andaganinaga tingini holene gahengeoreme ina karulai helo hamelo kama.
2CO 5:5 Tara ogonibi holoma̱ya Ngode Datagaliwabe ibugua inanaga mo manda manda bia howa inahondo bibahende ngulebiraru ngulebiraore manda buluma̱ya manane ibu Dinini ngidagoni.
2CO 5:6 Ani bidagonaga iname turu halu hongo ho haabo kama. Ina tingini anda ale áyu kamago howa Anduane Homogonaga andaga nahende kama manda bidama.
2CO 5:7 Irane iname áyu bialu kamago deme hondowa ndo mini mbiraore wuwa kamagoni.
2CO 5:8 Iname turu halu hongo ho howa tingini anda ale áyu kamagoni wahalu Anduane Homogo heba hole poa ho kama.
2CO 5:9 Áyu dindini howayaguabi dahuliya andagani howayaguabi iname Anduane Homogo turu helo ibu hame ledadagua bua kama.
2CO 5:10 Ogonigo ina bibahendeme bialu harimadagua Kerisohanda ina dabelo ibunaga deni ha pani hai holeberama. Ha pani howa inane dindini howa hangu hangu bayale bialu heneyaguabi kagua bialu heneyaguabi inane bialu harimadagua degedege ngulebira.
2CO 5:11 Ina Anduane Homogohondo gi holene irane ngago manda buwa iname wali agali ibuhondo mini mbiraore wilonaga mo wua haramali. Ngode Datagaliwabehanda ina manda biaiore ho ka. Ibugua ani manda bidadagua tíguabi tínaga bu miniha i̱ kogobi manda bidamilo hamelo ko.
2CO 5:12 Iname tíhondo, Ina bayale kama, lalu lone larama ndo. Tígua ina mitangi bialu turu holene iraneorego yu halimulonaga laramagoni. Irane ogonigo marume mbiralinaga miniha ndo tingini daliga hondowa mini yaraga halu bi larago hale howa tígua ladai bibehe halimulonaga larama.
2CO 5:13 Ina lulu ale kamayagua ina Ngode Datagaliwabe mitangi bialu biabe ogonibi kamagoni ndobe. Ina lulu ndo miniwi kamayagua ina tí mitangi bialu biabe ogonibi kamagoni ndobe.
2CO 5:14 Anigo wali agali bibahende homai holilono agali mbiralime homa henego ogoni wali agali bibahendenaga homa hene. Ogoni manda buwa Kerisonaga gubalini holeneme ina haru kagoni.
2CO 5:15 Keriso ibugua wali agali bibahendenaga homa henego irane wali agali bibahende kamirume tíni hangu mitangi bialu bua biradagua bialu halimulo ndo. Keriso ibugua tí mitangi buwa homalu heyinigo tígua ibu hanguore mitangi bialu talima pialu halimulonaga bini.
2CO 5:16 Ogonigo wali agalime dindini howa tingini daliga hondowa dabagadagua áyu iname ogonidagua dabolene nawi. Ala iname tingini daliga hondowa Kerisobi ogonidagua dabarimago ibu áyu ogonidagua nadabaramali.
2CO 5:17 Mbirali ibu Kerisoha ho gimbu bu kayagua ibu gahenge ka. Ala hayago wahowa holene gahenge yu ka.
2CO 5:18 Aguani mo ha hagane tene Ngode Datagaliwabe ka. Iname ibula waitigi ho hemaria ibugua ina mo ibunaga damene helene. Ibugua ani binigo wali agali marubi ibu damene dege helo mo hela holene biabe ogoni inahondo ngida.
2CO 5:19 Ani ngidago iname bi lamulene ogodagua, Ngode Datagaliwabehanda Kerisoha howa wali agali bibahende mo ibunaga damene hene, lalu lameramali. Wali agalime ko birimaru Ngode Datagaliwabehanda mitangi bu wiaabo nahaga. Ibugua ina ogodagua mo ibu damene haya lalu lamuluma̱ya inahondo lamulene ngiyagoni.
2CO 5:20 Aguani bidago iname Kerisohanda bi la laradagua lalu kamagola Ngode Datagaliwabehanda iname bi langeramagoha howa tíhondo bi langialu ka. Anigo iname Kerisohanda laradagua bialu tí Ngode Datagaliwabela waitigi ho harimigo ibugua tí mo ibu damene helo halimulo hame lowa larama.
2CO 5:21 Keriso ibugua ko mbira nabiagaore howa Ngode Datagaliwabehanda ina mitangi bialu ina Kerisoha ho gimbu bu howa ibunaga mini tigabi wulene yu holoma̱yanaga iname ko birimago ibugua Kerisohondo miai hene.
2CO 6:1 Iname Ngode Datagaliwabe heba biabe mandagi bialu howa tíhondo bi laramago ogo. Ibunaga biamogo bia holene yu kamigo mohole bialu yu wa nahalimu larama.
2CO 6:2 Ngode Datagaliwabehanda bi mbira larago hale hadaba. Biamogo bia holene tu winingi bi larigo hale haru. Pele ngulene horo winingi pele ngiru, lenego lalu gilibu nga. Ai hale hadaba. Ngode Datagaliwabenaga biamogo bia holene yu holene tu áyu ngagoni. Pele mulene horo áyu ngagoni.
2CO 6:3 Inanaga biabe bialu kamago mbiralime hondowa nakarulape bialu kamane nahendelo iname beramagome ti mo pila holigo lowa bayuwaore bialu haramali.
2CO 6:4 Ani bialu iname bibahende beremaligo bialu howa tandaga nalubi genda halubi tai bigi bialubi harugo lowa ema nabiore howa iname Ngode Datagaliwabenaga biabe biagaore kamagoni lalu walia haramali.
2CO 6:5 Marume ina kangome ba garabaya andaha haru puwa hela dewalime ina ho mabu buwa ba bia bigi bini. Iname ha̱lo nahe biabe biaabo halu ubi napale tomobi nane haabo harima.
2CO 6:6 Ani bialu mini gahengeore wuwabi Ngode Datagaliwabe mana bayuwa yani howabi ema nabi howa hibu lalubi maruhondo biamogo bialubi gubalini henene halubi uruni bibahende birimagomebi mana henene lameramagomebi Ngode Datagaliwabe Dininimebi Ngode Datagaliwabenaga hongomebi ina ibunaga biabe biagaore kamago lalu walia harimagoni. Iname mini tigabi wulenenaga wai biagane ale yu howa waitigi karia puwa balubi ti ina kamaria ibiragola ba dai bialubi haramali.
2CO 6:8 Marume ina mitangi bialu tigabi ka lalu haga marume ina guraga marume inahondo mege biaga marume inahondo ka̱i̱ laga. Iname bi henene lalu kamagola marume. Tí ke̱ haga kami, laga.
2CO 6:9 Agali bibahendeoreme ina manda biai haga howa marume ina nahendenehondo biradagua biaga. Ina homabeheore winigo nahome harimago dehendedemi. Ina mo tandaga dege henego homole ba nabi helene.
2CO 6:10 Marume ina mo genda haragola iname turu dege haabo haramali. Iname yagibano howa wali agali dewanaga bu mini mo homogo haramali. Ina mbirale mbira nayiore kamagoni howa bu mininaga ngagoni yu hai kama, laramali.
2CO 6:11 Inanaga nenege turubiore Korindini kamiru-o iname inanaga bu miniha tí gubalini timbuniore halu tíhondo tiga tigaore langialu harimagoni.
2CO 6:12 Iname inanaga bu mini tíhondo hangai nahe harimago tígua tíninaga bu mini inahondo hangai harimi.
2CO 6:13 I̱na i̱ waneiginihondo bi lamiradagua bialu tíhondo bi langerogo. Iname tíhondo gubalini haramadagua tígua nde inahondo aniore bilimu. Tínaga bu mini hada ho halimu.
2CO 6:14 Ngode Datagaliwabehondo mini mbiraore nawi karu heba galone mandagi bule mini mbiraore nahalimu. Ani nabibeheore nga. Kagua biagala tigabi biagala mbiraore agua habehebe. Wá holenebi aruma holenebi mandagi agua ho habehebe.
2CO 6:15 Keriso dama Heyolabela libu mini mbiraore agua habehe kabe. Ngode Datagaliwabehondo mini mbiraorewi kagobi mini mbiraore nawi kagobi libu hame mbiraore agua hagabe.
2CO 6:16 Ngode Datagaliwabenaga andala bi pupu wule gime wabu ngagola mo mbiraore agua habehebe. Ngode Datagaliwabe holenehe kagonaga anda ina kamagoni. Ngode Datagaliwabe ibunime bi lenego ogo, I̱naga wali agali heba mandagi hole i̱na ti kagoria i̱naga anda bu holebero. Tinaga Ngode Datagaliwabe i̱ holebero. Ti nde i̱naga wali agali holebira, lalu lene.
2CO 6:17 Ani lowa Anduane Homogo ibugua lalu, Tígua Ngode Datagaliwabe mitangi nabiaga karu helalu tíni hangu ha bagi howa halimu. Tígua Ngode Datagaliwabe deni ko ngago nabilimu. Ogoni nabirimiyagua nde i̱na tíhondo hami̱ya lolebero.
2CO 6:18 Tínaga aba i̱ holebero. I̱ waneiginiru tí holeberami, lalu Anduane Homogo Hongo Haiheore kagome ani lenego, lalu gilibu ngagoni.
2CO 7:1 I̱ nenege turubiru-o bi uruni Ngode Datagaliwabehanda bule lowini ngaru inahondo lowini. Aniore bidago tinginibi minibi mo ko haga ngaru bibahende iname mo wahalu Ngode Datagaliwabe mitangi buwa gi halu ibuhondo inane loma bia ho hai hami̱ya.
2CO 7:2 Tí bu miniha howa inahondo henge ngilimu. Iname mbiralihondo ko nabi mo ko nahebi mo hondo hole manda nabi kamagoni.
2CO 7:3 I̱na bi o larogo lalu tí ko nakarulape kami lalu ndo laro. Ala larudagua iname tíhondo gubaliniore howa laro. Ina harimayaguabi homarimayaguabi ina haru mandagi haabo holeberama.
2CO 7:4 I̱na tíhondo mini mbiraore wu howa i̱naga miniha yangalo kogoni. Ina gendabi dewa yu howa i̱naga miniha mo hongo holene to̱lalu turu holene to̱lo tagi ho kogoni.
2CO 7:5 Ina Masedonia dindini anda pu howabi ha̱lo naheore harima. Gendabiru wiame halu tagiraha wali agali maru baba lai lolenebi miniha gi holenebi winiya.
2CO 7:6 Ani bialu hemagola Ngode Datagaliwabehanda genda yu karu mo dabia bia haga kago Taidasa ibiyagola ina mo dabia bia hene.
2CO 7:7 Taidasa ibiyagome hangu ndo tígua ibu mo turu harimigonaga te langiyagomebi i̱ turu timbuniore biragola kogoni. Ibugua bi langiyago ogodagua laya, Iname Polo de hondoa ho kama, larimiyagobi tíni nakarulape birimigo manda bialu taga harimiyagobi tígua i̱naga bi la hole kama larimiyagobi hale howa i̱ turu timbuniore biragola kogoni.
2CO 7:8 Ala tíhondo beba gilibu wia harugome tí mo genda haruyane hondowa i̱na ani gili birugonaga kagua biruda nalolebero. Beba ogonime tí mo genda emene tigi mandi hayane hondowa i̱ tí dara habehe dege haru.
2CO 7:9 Ai áyu i̱ turu ho kogo irane i̱na tí mo genda harugonaga ndo tí genda harimigome tínaga mini mo beregedayagonaga i̱ turu ho kogoni. Tí genda harimigome Ngode Datagaliwabehanda tí mo bayale hayago ai iname tí mo ko nahe harima.
2CO 7:10 Genda holene ogonibi Ngode Datagaliwabehanda mo ha haganego mini mo beregedowa pele mulene yu holoma̱yanaga biaga. Ani biagago nakarulape ndo karulapeore nga. Anigoyu dindinaga genda holeneme homolene yu anda ibaga.
2CO 7:11 Tígua genda harimigome Ngode Datagaliwabehanda biyago manda bilimu. Ani biyagome tí mini mo hongo halu kagua nabi lalu lo tiga bilimulonagabi mo bia haya. Ko hondowa keba holenebi mogo lolenebi hame lolenebi hongo holenebi ko biyagonaga tandaga nelo mulenebi uruni bibahende Ngode Datagaliwabehanda mo mitangi bia haya. Ani birimigome tíha ko mbira nawiore lalu walia harimi.
2CO 7:12 Anigo i̱na tíhondo beba biago gilibu wia harugo mbiralime ko biyagonagabi ko biyagola mendealime tandaga nayagonagabi mitangi bialu ndo gili biru. Ani biradagua tígua Ngode Datagaliwabe deni howa inahondo mitangi timbuniore bu kamigo tíhondo walia holenaga gili biru.
2CO 7:13 Tígua aguani birimigome ina miniha turu ho harima. Ogoninaga dege ndo. Tígua Taidasa biamogo birimigo ibugua tíhondo turu timbuni ho heago hondowa inabi turu timbuni ho harima.
2CO 7:14 Ala i̱na Taidasahondo te lalu tínaga mini yaraga harugo i̱na larudagua tígua bialu hemigo ibuhondo walia harimigonaga i̱ taga nahe ko. Iname tíhondo henene hangu laabo halu harima. Ani larimadagua iname Taidasahondo te lalu tínaga mini yaraga halu harimago heneneore larimayane walia harimi.
2CO 7:15 Ogonigo ibugua tí bibahendeme bulene ngadagua bulebi Ngode Datagaliwabehondo gi halu nakarulape kama lalu ibu nenege hinarimigobi mitangi bialu tíhondo ibunaga gubaliniha yanga lalu ka.
2CO 7:16 I̱naga mini tíhondo hana hai holedago turu timbuniore ho kogoni.
2CO 8:1 Inanaga hamene mbaliniru-o Ngode Datagaliwabenaga biamogo bia holeneme Keriso hameigini Masedonia dindini hagahaga bu hearuha biyago tí manda bilimulo hamelo kamagoni.
2CO 8:2 Wali agali o biaru ba handalu genda timbuni hama pelene. Ani bu howa ti yagibanoore kamagoni nale turu timbuni halu muni dewaore mo mogo bialu mini.
2CO 8:3 I̱na henene larogo tigua mulene wiadagua ndo tinaga minime biamogo buaore howa dewaore mia tago halu mini.
2CO 8:4 Tigua Ngode Datagaliwabenaga wali agali Yudia dindini karu biamogo berama, lalu inahondo haya halu, Merama, lene.
2CO 8:5 Iname tigua mulebira lo manda birimagobi ndo bolanguaore howa mini. Ala tini Anduane Homogohondo loma bia halu mani Ngode Datagaliwabehanda hame leadagua inahondobi ngia dege biya.
2CO 8:6 Ani binigo Taidasa ibu biabe ogoni pigane bialu hayadagua biaabo habe larima. Ibugua biamogo bialu gubalini holenenaga biabe ogoni tí heba bu maro bilimulo iname ibuhondo, Í̠naore bibe, larimagoni.
2CO 8:7 Tígua bibahende yu kamigo mini mbiraore wulenebi bi lolenebi mana manda bulenebi biamogo bua holenebi inahondo gubalini holenebi dewaore yuwa bu mini homogo kami. Uruni yu howa gubalini holenenaga biabe ogoni tígua bia timbu halimulo hamelo kama.
2CO 8:8 I̱na tí ani bilimu lalu lo wia ndo bero. Wali agali marume biamogo timbuni bua haga ka lalu larugome tíguabi gubalini holene aguaore yu kamibe hondolenaga laro.
2CO 8:9 Inanaga Anduane Homogo Yasu Kerisonaga biamogo bia holene tí manda bu kami. Ibugua mbirale bibahende yu hai howa homogoore henego tí mitangi bialu ibuni mo yagibano ho dai bini. Ibuni mo yagibano hayagome tí homogo halimulonaga ani bini.
2CO 8:10 Ogoninaga i̱na manda bidodagua langero. Mali ala harimagonaga biabe biala harimigo áyu bu maro bulene nga. Tígua pigane muni mo mogo bulenenaga biabe ogoni hangu ndo tíni mua timbuniore howa mirimi.
2CO 8:11 Ogoni bu maro bule ala bigi bilimu. Pigane biabe ogoni bule hame lowa manda manda birimidagua áyu tínaga mini ngamidagua bu maro bule hame lalimu.
2CO 8:12 Tígua mbirale mua ho kamiyagua Ngode Datagaliwabehanda tí nayi kamigo manda bialu wu hayagobi ngira lalu turu holebira.
2CO 8:13 Wali agali maru genda nayilo i̱na genda tíhondo hangu mo ngia ndo berogo tígua áyu dewa yu kamigodago maru burupale karu biamogo bulene karulape ngagoni. Ani beramigola mani tí burupale kamigola tigua dewa yu howa tí nde biamogo bulebira. Ogonidagua biamogo bigibigi beramigome ogobi degedege holeberami.
2CO 8:15 Anduane Homogonaga mbugani lo ngadagua, Mbiralime tomo dewa mo mogo binigo nalu ibira nahe. Mendealime tomo emene mo mogo binigo no karulapene, lalu gilibu nga.
2CO 8:16 Iname tí biamogo bua kamadagua Ngode Datagaliwabehanda Taidasa ibubi mo bua hayagola kago ina Ngode Datagaliwabehondo turu halu ka̱i̱ lalu kama.
2CO 8:17 Iname Taidasahondo lalu, Í̠na Korindi wali agali karia polebe, larimagola ibugua turu howa lalu, E̱ i̱ ogoniha pole manda bu harugonigo polebero, laya.
2CO 8:18 Iname Taidasa heba Keriso hameigini mbirali ibu bi mana debene bayuwa lamiagago Keriso hameigini bibahende hagahaga bu karume, Ibu mini lene ka, laganego ibubi libu haru ibilarama.
2CO 8:19 Ogoni hangu ndo iname Anduane Homogonaga mini yaraga hole gubalini holenenaga biabe ogoni bialu howa biamogo bua kamaore lalu walia hole o biago ibu ina heba poloma̱ya Keriso hameigini hagahaga bu hearume ibu dabo helayiya.
2CO 8:20 Iname muni timbuni ogoni mua howa winigo mo mogo bialu howa tí marume, Nakarulape bialu kami, nalalimulonaga bayuwa hangu bialu kamagoni.
2CO 8:21 Ngode Datagaliwabenaga deni hangu ndo wali agalinaga denibi heba howa iname tigabi bulene ngadagua hangu beremali.
2CO 8:22 Ogonigo iname Keriso hameigini mendebi ti haru ibilaramagoni. Iname ibuhondo ba handa dewa bialu hemaria ibuha biamogo bua holene hangu wiaria handa walia harima. Áyu nde ibugua tíhondo mini bilinahe howa biamogo bua timbuniore ho kagoni.
2CO 8:23 Tígua Taidasa mitangi bialu ibu i̱ heba biabe mandagi bialu tí biamogo bule kabago mandabu harimidagua halimu. Keriso hameigini kirali Taidasa heba ibulebirago libu Keriso hameigini hagahaga bu karume tinaga pu helo dabayago libugua Kerisonaga mini yaraga halu kago manda bu halimu.
2CO 8:24 Iname tínaga mini yaraga haramaligo Keriso hameigini bibahende hagahaga bu karume heneneore leneda manda bilo agali ibiraruhondo tínaga gubalini holene walia halimu.
2CO 9:1 Ngode Datagaliwabenaga wali agali Yudia dindini karu biamogo bialu muni mo mogo bu wia haragonaga te tíhondo gilibu wia holenego irane nawi bada.
2CO 9:2 Tígua biamogo bua ho harimigo manda buwa i̱na Keriso hameigini Masedonia dindini hearuhondo tí kamirunaga mini yaraga halu lalu, Keriso hameigini Agaia dindini hearu tigua mali ala harimagonaga howa biamogo bulene manda bu hayagoni, lalu lamiru. Tígua ani manda bu kamigo lamirugola ti maru ogonidagua dege bua haya.
2CO 9:3 Anigo iname tínaga mini yaraga harimago bi bame leneda nalelonaga i̱na Keriso hamene uru tí kamiria ibilarogoni. Ani berogo i̱na larudagua tígua biamogo bule kamidalo manda bido.
2CO 9:4 Ani ndo i̱ Masedoniali heba ibuwa tí manda manda nabi kamiria handa walia harimayagua ina tí mini bilinaheore kamilo mitangi bu yalu ibirimagonaga taga paniore noleberama. Tíni nde taga pani timbuniore noleberamigoni.
2CO 9:5 Irane muni ogoni tígua mule lo wirimigo abale mo mogo bilimulonaga i̱na Keriso hamene urunihondo, Bamba halu pudaba, lalu i̱ni mani ibule manda biru. Ani buwa i̱ anda eberogola muni mo mogo bu ngamigo hondowa. Tí mua nahe howa ndo mua howa mirimida, lalu manda bulebero.
2CO 9:6 Mbira mitangi bulene ngago ogo. Mbiralime egene mbiraore hangu hangayagua tomo mbiraore hangu anda holebira. Mbiralime egene dewa hangayagua tomo dewa anda holebira.
2CO 9:7 Ogonigo tí hangu hangu howa mbirale mua nahe howa penge bialu, Mulene nawi harugo mero, lalu ndo ala hangu hangu mulene nga lo manda birimidagua milimu. Wali agali miniha turu howa miaga karu Ngode Datagaliwabehanda gubalini haga ka.
2CO 9:8 Ngode Datagaliwabehanda tíhondo ngulene ngadagua hangu ndo ngia tago halu ngibehe ka. Ani buwa tíni karulape yu halimulobi biabe bayale bibahende biamogo bilimulonagabi karulapeore ngia tago halu ngulebira.
2CO 9:9 Anduane Homogonaga mbugani lo ngago ogo, Ibugua yagibanohondo dewaore miaga ka. Ibunaga dara howa biamogo bia holene wiaabobo bida, lalu gilibu nga.
2CO 9:10 Anigo Ngode Datagaliwabehanda mabu hangaga kagohondo egene mialu tomo nolenebi miaga. Ani bialu ibugua tíhondo egene bibahende ngulene ngadagua ngialu mo anda halu tígua mbuni nabi dewa mirimigonaga ibugua mo timbuniore holebira.
2CO 9:11 Tígua inahondo muni ngirimigo meramagola wali agali dewalime Ngode Datagaliwabehondo turu halu ka̱i̱ lolebira. Ani laragola tí mbirale dewa miaabo halimulo Ngode Datagaliwabehanda tíhondo mbirale ngiaabo holebira.
2CO 9:12 Biamogo ogoni birimigome Ngode Datagaliwabenaga wali agali burupale karunaga dege ndo wali agali dewame turu howa ibuhondo ka̱i̱ore lelobi mo la harimi.
2CO 9:13 Tígua biamogo ogoni birimigome Ngode Datagaliwabehondo mini mbiraore wu kamigo walia harami. Ani walia haramigome Kerisonaga bi mana debeneha mini bilinahe kamigo hondowa wali agali dewalime Ngode Datagaliwabenaga mini yaraga holebira. Tí kamirume tihondobi maru karuhondobi dewaore talebu muleberamigonagabi Ngode Datagaliwabenaga mini yaraga holebira.
2CO 9:14 Anigo Ngode Datagaliwabehanda tíhondo biamogo bia holene timbuniore ngiyago hondowa tigua tí kamiru gubaliniore howa ibuhondo tínaga bi la holebira.
2CO 9:15 Ngode Datagaliwabehanda inahondo baya burugule bame nginigo manda bialu iname ibuhondo ka̱i̱ore lami̱ya.
2CO 10:1 I̱ Polo tí mitangi bilimulo i̱na bi mbira laro. Marume i̱ mitangi bialu lalu, Polo ibu ina heba howa hongo nahe gedaore hagago kaundiani howa inahondo hongo halu bi lalu ka, laga. Tigua ani laganegonaga i̱na ladai bialu Kerisonaga gedaore holenebi ibu biamogo bulenebi mitangi bialu tíhondo langero.
2CO 10:2 I̱na tí kamiria ibuwa bi hongo howa loliya tígua bi mo la nahalimu. Marume lalu, Tí dindini holene mitangi biaga kami, lagaru tihondo i̱na hongo howa bi labehe ko manda bido.
2CO 10:3 Ina heneneore dindini hene kamagoyu wai bialu kamago dindialinaga hameme biagadagua ndo bialu kama.
2CO 10:4 Iname wai bialu howa dindialinaga wai biagane aleru yuwa ndo Ngode Datagaliwabenaga wai biagane aleru hongoheore yu haramali. Ogoni yu howa wai pabe hongohe wedaru dugu wahalu ke̱ howa mana lamiaga ngarubi mo waharamali.
2CO 10:5 Wali agalime Ngode Datagaliwabe mana manda nabilo mine holene mana ngagome hangai ho ngaruni iname gialo wahalu tinaga mitangi bulene bibahende Kerisohanda bia laradagua bilo mo bia haramali.
2CO 10:6 Mo bia howa tígua bulene winigo biaiore kama lalu walia haramigola mana bulene ogoni hangai haga karuhondo iname pani mule manda bialu kama.
2CO 10:7 Tígua mbirale hendedamigo agalime handagadagua handalu kami. Tí mbiralime lalu, I̱ Kerisonagaore kogonilo, manda bu kayagua ibuni lone abiore harudabe hondole lone mitangi bu dai bulene nga. Irane ibu Kerisonaga kayagua nde ibu kadagua inabi Kerisonagaore kamagoni.
2CO 10:8 Anduane Homogohanda inahondo haru holene hongo ngiyago lalu i̱naga miniha yanga timbuni lo koyagua nde taga nahe kogoni. Haru holenenaga hongo ogoni Anduane Homogohanda inahondo nginigo ogonime tí mo ko holenaga ndo tí mini mbiraore wu kamigo mo anda haga bulenaga ngini.
2CO 10:9 I̱na tíhondo beba gilibu wia harurume tí mo gi hayadalo manda nabilimu.
2CO 10:10 Tí kamiru mbiralime lalu, Polohanda beba gili biyaru tandagabi hongoheda, lalu, Ibuni ina heba mandagi howa ibu hongo nahe howa ibunaga bi laragobi habane napaleda laga, lolebira.
2CO 10:11 Ani laga kagome ina kaundia howa tíhondo beba gilibu wia haramarubi tí heba howa tíhondo bule ibuleberamagobi tara ndo mbiraore ogonigo manda bu holene nga.
2CO 10:12 Agali marume tini mitangi bialu lalu, Ina baya gibi daligaore kama, manda biagaru ina heba ogobi degedege hole bimaga naholeberamaore. Agalime daliga ogobi kama, lalu tini harimidagua dabaga dabaga bialu karu ti luluore yu ka.
2CO 10:13 Iname ani ndo ina mini yaraga holene tu wini ngadagua pialu bolangua naholeberama. Tu ogoni Ngode Datagaliwabehanda winigo iname tí kamigohabi biabe ogonidagua dege bialu kama.
2CO 10:14 Iname Kerisonaga Bi Mana Debene tí kamiria yalu ibirimangi tí tu ogoriani hemigola iname bolangua halu nape harimagoni.
2CO 10:15 Marume biabe biyagonaga iname bini tingi halu mini yaraga holene manda nabi haramali. Ani biradagua mini mbiraore wulene tíha ngago anda helobi tí kamigoha howa iname biabe timbuniore bia tago holebi Ngode Datagaliwabehanda hameledadagua dege bule hamelo kama.
2CO 10:16 Ani buwa iname wali agali dindi tara tara ni paliragohayagi Bi Mana Debene lamibehe holeberama. Ani bialu agali marume biabe ala bialu hene ngagoria iname inanaga mini yaraga halu, Biabe birima, lolene henge nawulebira.
2CO 10:17 Anduane Homogonaga mbugani bi lo ngadagua ogo, Mbiralime mbiralinaga mini yaraga hoa kayagua ibugua Anduane Homogohanda biyago mitangi bialu ibunaga mini yaraga holene nga, lalu gilibu nga.
2CO 10:18 Ogoninaga mbiralime ibuni mitangi bialu, I̱ bayale ko, manda biragome galone nahaga. Ngode Datagaliwabehanda mbirali mitangi bialu ibu bayale ka lelo holenego o galoneore ngagoni.
2CO 11:1 I̱na lulu bi ale emene lole manda bidogo loliya henge ngiaore bidaba larogoni.
2CO 11:2 Ngode Datagaliwabehanda tí hamelo kadagua i̱na tí hamelo kogoni. Tí wandari agalila nahene ale daba bagi ho berelowa i̱na tí agali mbiraore hangume dabu bilo mule lo wirugo agali ogoni Keriso ibu ka.
2CO 11:3 Puyame o tara howa Iba mo hondo henedagua kome tínaga mini mo ko halu tígua Kerisohondo mini tigabi wu kamigobi gubalini holene yu kamigobi waholilono i̱ gi ho kogoni.
2CO 11:4 Irane agali tara tara ta nabi tí kamigoria ibuwa tigua Yasunaga bi mana lalu iname langirimagodagua ndo tara lalu langiragola tí turu halu hale hai haramiligonaga gi haro. Ani bialu tígua dinini tarabi bi mana debene tarabi yu tiga bu kamigoni. Ala Ngode Datagaliwabe Dininibi Bi Mana Debenebi ina heba howa yu tiga birimigobi ndo tara haluniore yu tiga bu kami.
2CO 11:5 I̱na tínaga abosolo haluni tara karuni ti daligaore kagoda lowa i̱ dindiha emene nira haruda mitangi nabi ko.
2CO 11:6 I̱na mana bime lolenenaga mugube nayi koyaguabi mana manda biai holene nayi ndo yu haiore kogoni. Mana manda biai holene ogoni iname horo bibahendeni bayale wiangibi ko wiangibi tíhondo walia haabo halu harima.
2CO 11:7 I̱na Ngode Datagaliwabenaga Bi Mana Debene tí langialu howa i̱na tíhondo yolo ngi nale haru. Tí mo bamba halimulonaga i̱ni maha harugoni. Ani birugo kagua birudabe.
2CO 11:8 I̱ tí heba howa biabe bialu harugo holiya Keriso hameigini marume i̱hondo yolo ngigi biya. Tiha howa kayu ale birugome tí kamiru biamogo bulenaga birugoni.
2CO 11:9 I̱ tí heba harimangi buru pale harugoni howa i̱na tíhondo mbirale mbira ngi nale haru. Keriso hameigini Masedonia dindini howa ibiyarume i̱ mbirale buru pale hewaru bibahende tigua yalu íbu ngiya. Ala i̱na tí mo genda nahe harudagua awebi ani dege bulebero.
2CO 11:10 Kerisonaga henene lolene i̱ha ngagome i̱ninaga mini yaraga haruligo Agaia dindi bibahendeni mbiralime hangai nahabehe holebira larogoni.
2CO 11:11 I̱na tí gubalini nahe howa bi ogoni larudabe. I̱na tí gubalini hoore kogoni Ngode Datagaliwabe ibu manda bu ka.
2CO 11:12 Mana haluni tara lamiaga karume tininaga mini yaraga holene henge handa walia nahelobi iname biabe beramalidagua tiguabi, Beramali, nalelobi i̱na áyu biabe bialu kogodagua biaabo holebero.
2CO 11:13 Agali uruni ti abosolo henene ndo ke̱ haga ka. Tigua tinaga biabe birago tindule lalu Kerisonaga abosolo henene karu ale tingi howa tini mo tara haga ka.
2CO 11:14 Bi ogoni hale howa mogo nalalimu. Dama Heyolabe ibuguabi mo wá haga dahuliyali bayale kagobi ale hole ibuni mo tara haga ka.
2CO 11:15 Ogoni ibunaga biabe biagarume biabe tigabi biaga ale hole tini mo tara holenego taibi ndo. Hamaro bulene wirangi tini biyagonaga pani nolene wiyadaguaore nolebira.
2CO 11:16 Ala larugo lone ladai berogo. Mbiralime lalu, Polo lulu ale ka, mitangi bulene nawi. Ani mitangi birimiyagua nde karulape dege i̱naga mini mo yaraga holiya irane emene wilo ani bilimu.
2CO 11:17 Nde áyu i̱na bi larogoni Anduane Homogohanda, La, laragola ndo laro. I̱ninaga mini mo yaraga harogonaga i̱na lulu ale howa bi laradagua lalu mini mo yaraga harogoni.
2CO 11:18 Wali agali dewalioreme dindi mana mitangi bialu tininaga mini mo yaraga hagago ogonidagua i̱na nde i̱ninaga mini mo yaraga holebero.
2CO 11:19 Tí mini timbuniorewi kamigo tígua agali lulu ale karu mitangi bialu tinaga bi larago hale hole turu haramili.
2CO 11:20 Mbiralime hongo howa tíhondo, Ogo bidaba, layaguabi tínaga mbirale ngamiru ohowa karulai hayaguabi tí dalimulonaga gono wayaguabi tí mo dindiha helayaguabi tínaga denguini gi habeme bayaguabi tígua ema nabi ani bilo haramiligoni.
2CO 11:21 Ani biyagonaga i̱ bia dai nabi haru lalu labe taga birago nde ina hongo nahe harimagomeda. Agali mbiralime gi nahe heyuwa ibuninaga mini yaraga halu kayagua i̱na nde gi nahe heyuwa lulume laradagua bialu i̱ninaga mini yaraga holebero.
2CO 11:22 Ti Hiburuali kabe. Aniyagua i̱bi kogoni. Ti Isaraele aria kabe. Aniyagua i̱bi kogoni. Ti Abarahamanaga aguanene kabe. Aniyagua i̱bi kogoni.
2CO 11:23 Ti Kerisonaga biabe biaga kabe. I̱na bi larogo lulu bi laradagua ndo biaruabe. I̱bi Kerisonaga biabe biaga howa ti helalu bu bolangua harugo i̱ kogoni. Tigua biabe biyagobi ndo i̱na hongo timbuni howa biabe bialu harugoni. Garabaya biyagolabi tibume bayagolabi homolene kaware wiagoria howabi dewa halu i̱na tandaga narugome ti bolangua howa ko.
2CO 11:24 Yualime i̱ mbiru baga bigi bialu dau halu nogo dongoneme pira tebirani dira (39) i̱ bayagoni.
2CO 11:25 Lomoalime mbiru baga bigi bialu halu tebo i̱ gewa tibume bayagoni. Marume halu mbira ege to̱le̱me i̱ bayagoni. Iba taluni biralu pialu hewaria halu tebo iba talu budu baga biyagonibi halu mbira i̱ iba solowaraha horo mbira mbiraga mbira lowa iba ogoniha ha ho wiru.
2CO 11:26 I̱na ibaga dewa biruru bialu hewaria iba li wiarunagabi pagealime bo waholene hearunagabi homolene wiagoria tagira pugu bialu haabo harugoni. Yuali i̱ aria hearumebi Yu agali ndo tara tara hearumebi i̱ homelo bole bigi biyagoria haga biru. Tano timbuniruha hewagolabi tayandaha hewagolabi iba solowara yaribu biyagoria hewagolabi ke̱ howa hamene laga bigi biaga hearu baba hewagolabi uruni bibahendeme i̱ homolene kaware wiagoria haabo haru.
2CO 11:27 I̱na biabe timbuni erekuibi tandagabibi bialu u napale halu gaea buwa bialu harugobi tomo ibabi nane garibi lowabi ha dege biru. Horo maruni tomo nolenebi u paliade holenebi labolabo karulolenebi henge handa walia naheore haga bigi birugoni.
2CO 11:28 Uruni hangu ndo maru i̱hondo bigi biyaru i̱na tí langiai nahabehedago horo bibahendeni Keriso hameigini hagahaga bidarunaga mitangi bialu i̱na gendabi uruni yu hai haruli.
2CO 11:29 Mbirali ibu hongo nahe kagola i̱bi ibu mitangi bialu hongo nahe haruli. Mbiralime mendeali ko bilo mo bia haragola i̱naga bu miniha taulia haragola haruli.
2CO 11:30 I̱na i̱ninaga mini yaraga holene ngayagua i̱ gedaore hongo nahe ko haruda lalu walia holenaga mitangi bialu mini yaraga holebero.
2CO 11:31 Anduane Homogo Yasu ibu Aba Ngode Datagaliwabe kagonaga mini yaraga haabo holene ngago ibugua i̱na tindule lalu ndo laralo manda bu ka.
2CO 11:32 I̱na Damasagasa hewaria Kini Aredasanaga haru haga heagome hama ogoriani pabe wearunaga harabani dandayi dewame i̱ minilo helene.
2CO 11:33 Tigua ani minule biyaria maru hearume i̱ nuha minu honowa ege to̱le̱ pabe daliga diri wiagoha howa pulimume hende howa yarali hayagola i̱ ibida puabo haru.
2CO 12:1 I̱nime i̱naga mini yaraga harogome bayale mo bia nahagago nde harugo i̱ninaga mini yaraga holeneore ngagodago haro. Ai Anduane Homogohanda i̱hondo de gandebaha walia hayagobi bi ala nahale henego la pani hayuagobi langero.
2CO 12:2 Ala mali deria (14) peha ogoningi Keriso hameigini mbirali dahuliya andaga daligaorene daligaha mo yaraga henego ibu manda bu ko. Heneneore penebe be agali ibu de gandeba hendenebe Ngode Datagaliwabe ibuni hangu manda bu ka.
2CO 12:3 I̱na bi o larugoni lone ladai bero. Agali ogoni ibu dahuliya andaga mo yaraga halu penego manda bu ko. Larudagua dege lone larogo ibu henene penebe be de gandeba hendenebe Ngode Datagaliwabe ibuni hangu manda bu ka. Ani mo yaraga hayagola agali o biagome bi layago hale henego ina dindialime ogo ale layagoda lalu nalabehebi inanaga ne hambumebi nalabehe dege wulebira.
2CO 12:5 Ani biyago i̱na i̱ninaga mini yaraga nahe agali o biagonaga mini mo yaraga holebero. I̱na i̱ninaga mini mo yaraga haruyagua nde i̱ hongo nahe gedaore kogo lalu walia halu dege mo yaraga holebero.
2CO 12:6 I̱na i̱ninaga mini mo yaraga hoa haruyagua bi henene hangu lalu holeberogome i̱ lulu ale howa ndo bi lolebero. Anigo tígua i̱na biruligo de handalubi bi laruligo hale howabi i̱naga mini bame mo yaraga halimulo hame nale howa i̱na i̱ninaga mini mo yaraga naholebero.
2CO 12:7 I̱na mbirale baya burugule tara tara de handarugonaga mine naholiyanaga Ngode Datagaliwabehanda i̱naga tinginiha tandaga timbuni nolene ngiya. Tandaga ogonime dama Heyolabenaga biabe biaga ale howa i̱ mine naholiyanaga i̱ mo emene haga.
2CO 12:8 Ani biyagola i̱na halu tebo Anduane Homogohondo bi lalu, I̱naga tandaga ogoni í̠na mo yalu pobelo hamelo ko, laru.
2CO 12:9 Ani larugola ibugua ladai bialu lalu, I̱naga biamogo bia holene karulape ngago í̠ hongo nahe kegola howa i̱naga hongo holene timbuniore nga, lene. Ogonigo Kerisonaga hongome i̱ haru kalo manda bu hole i̱ni hongo nahe gedaore kogonaga mo yaraga hole turu timbuni ho ko.
2CO 12:10 I̱na Keriso mitangi bialu hongo nahe holenebi bi ko i̱hondo laragolabi gendabi ngagolabi tandaga nolene ngagolabi taibi maru bulene ngagolabi uruni bibahende karulape laruli. I̱ni hongo nahe kogoni howa Ngode Datagaliwabeha hongo ho kogoni.
2CO 12:11 I̱na lulu yu kagome biagadagua bialu kogoni tígua mo bia harimigoni. Tígua, Polo ibu karulape kago, lolene ngagoni. Anigo i̱ agali habane nabulene koyagua tínaga abosolo haluni tara biaru ti daliga lowa i̱ dindiha emene nira ndo kogoni.
2CO 12:12 I̱na tí heba howa ema nabi haabo halu nahendene aleru bialubi agalime nabiagane aleru bialubi manane uruni bigi birugome i̱ abosolo kogoni lalu walia ka.
2CO 12:13 I̱na Keriso hameigini hagahaga bu karuhondo birudagua tíhondo mbira bulenego waharudabe. I̱na tíhondo, I̱ biamogo bialu mbirale ngidaba, nale harugo. Ogoni dege nabirugo i̱na kagua bialu harudago larogo tígua nde mitangi biaabo nahe wahalimu.
2CO 12:14 Ai áyu halu tebonengi i̱ tí kamiria nenege ibule manda bu kogoni. Ibuwa i̱na tíhondo, Mbirale ngidaba, nale holebero. Tínaga mbirale ngamiru i̱na hame nalego tíniore hamelo kogoni. Waneiginime tinaga aba ai̱yala haru howa mbirale ngaru mo miaga ndogo aba ai̱yalame libunaga waneigini haru howa mbirale ngaru mo miaga kagoni.
2CO 12:15 I̱na tí biamogo bulenaga i̱naga bibahende ngogobi i̱nibi heba ngiai hole turu ho kogoni. I̱na tí gubalini timbuniore ho haruligonaga tígua i̱ gubalini emeneore ho holeberamibe.
2CO 12:16 Ani larugome i̱na, Tí mo genda halu ndo, laruyagua tígua, E̱ henene lari, loleberami. Anigo mbiralime dege lalu, Polo ibugua ohowa ke̱ hayagome ina mo hondo haya, lolebira.
2CO 12:17 Ani biruyagua agua bialu mo hondo harudabe. Ngode Datagaliwabe mana lamiaga hearu tí hemiria ibilarugo agali uruni tíha howa i̱na tí mo hondo haruyabe.
2CO 12:18 Taidasa tí hemiria ibilo i̱na, Polene ngaore, lalu Keriso hameigini mbira Taidasa heba ibilo, Pilibu, laru. Taidasa ibu tí heba howa tínaga mbirale wimiru mbira ngi layabe. I̱bi Taidasabi Ngode Datagaliwabe Dinini mbiraoreme iya haru kagola iyame mana mbiraore dege lalu harabali ndobe.
2CO 12:19 Bi ogoni lalu harimago iname tíhondo birimagonaga ladai bialu kalo mitangi bidamibe. Ani ndo. Ina Ngode Datagaliwabenaga deni howa Keriso ibugua hame ledadagua lalu harima. Nenege turubioreru-o iname bibahende beramaliru tí biamogo bulenaga hangu beramali.
2CO 12:20 I̱ tí kamiria ibuwa i̱na tí halimulo hamelo kogobi ndo tara kamiria handa walia holigobi tígua nde i̱ holiyago hame ledamigobi ndo tara handa walia holigonagabi gi ho kogoni. Tí kamigoha bi gungu bulenebi henge lolenebi keba holenebi habua bulenebi la hirulenebi diburibu lolenebi mine holenebi mo mbiraore naholenebi urunibi wu kamiria handa walia holigo i̱ gi ho kogoni.
2CO 12:21 I̱ lone eberogola tí deni howa Ngode Datagaliwabehanda i̱ mo taga halu wali agali dewalime ala ko biyago tigua mana nabulene biyarubi wali agalime kayu biyarubi dimagoli hayarubi urunibi biyarunaga mini beregeda nabi ha ho ngaru hondowa i̱na dugu bulebero.
2CO 13:1 I̱na tí kamiria áyu halu tebone nenege eberogoni. Anduane Homogonaga mbugani lo ngadagua ogo, Mbiralime ko ogo biya, laragola kiralimebi tebiralimebi de hendene kayagua tigua henene handayadagua lo tiga bulene nga, lalu gilibu nga.
2CO 13:2 Bamba ko bialu hayaruhondobi maruhondobi bi mbira loa kogo. Ala i̱na tí hemiria halu mende nenege íbu haruangi langirugonidagua áyubi kaundia howa lone ogo langero. I̱na tí kamiria lone eberogola ko biaabo halu karu pani nane yo polene nawulebira.
2CO 13:3 Kerisohanda i̱ha howa bi latagi hagago handa waliaore holeberami. Ibugua tíhondo biagago hongo nahe howa ndo ibunaga hongo tíhondo waliaore haga ka.
2CO 13:4 Yasu ibu hongo nahe ale heago tigua ibu homelo ira bangani ba para henegoyu Ngode Datagaliwabenaga hongo holeneme ibu mo heya henego haabo ka. Iname ibuha ho gimbu bu howa inabi hongo nahe kama. Iname Keriso heba howa Ngode Datagaliwabenaga hongome tí mo tiga bialu holeberama.
2CO 13:5 Tí Kerisohondo mini mbiraore wu haabo harimidabe hondole tíni miniha bayuwa dabalu halimu. Keriso Yasu ibu tíha haore bidagoyu tíni wahalu tagira puabo harimiyagua hangu naholebira.
2CO 13:6 Iname wahalu tagira nape haabo kamago tí manda bilimulo hamelo ko.
2CO 13:7 Tígua kagua nabi halimulo iname Ngode Datagaliwabehondo tínaga bi la halu kama. Ani la halu howa iname bayuwa lawai haga kamago walia holenaga ndo marume ina wahalu tagira pene mbaulara layaguabi tí kamirume bayale tigabi hangu bilimulonaga iname Ngode Datagaliwabehondo bi la halu kama.
2CO 13:8 Iname henene lolene mo wahowa mbira biabe bibe nahe howa henene lolenenaga biabe dege beramali.
2CO 13:9 Ina hongo nahe kamagola tí hongohe kamigo ina turu haramali. Anigo tí mini bayaore wuwa Kerisoha hongohe halimulobi iname Ngode Datagaliwabehondo bi la halu kama.
2CO 13:10 I̱na tí kamiria íbu nabi howa bi ogoni ala gilibu wia harogo irane ogo. Tí kamiria eberogola howa hongo holene Anduane Homogohanda ngiyagome i̱na tíhondo hongo naholebero. Hongo holene ogonime tí mo ko holenaga ndo tí mini mbiraore wu kamigo mo anda haga bulenaga ngini.
2CO 13:11 Ai i̱ hamene mbaliniru-o hondo halimu laro. Mini bayaleore wuwa holene hai biaabo halu halimu. Tí bilimulonaga langiruru bayuwa yu halimu. Tíni mini mbiraore haga bialu mandagi howa mo palia holene yu halimu. Ani bialu harimiyagua gubalini holenebi mo palia holenebinaga Ngode Datagaliwabe ibu tí heba holebira.
2CO 13:12 Tini lola haga bigi bialu turu halu gi tigali bigibigi bilimu. Ngode Datagaliwabenaga wali agali bibahende oali karume, Tí mitangi bu kama, lalu la wia hara.
2CO 13:13 Anduane Homogo Yasu Kerisonaga biamogo bia holenebi Ngode Datagaliwabenaga gubalini holenebi Ngode Datagaliwabe Dinini ibugua tínaga mini mo mbiraore holenebi tíha wiaabo helo hamelo ko.
GAL 1:1 I̱ Polo. I̱ abosolo agali holiya wali agalime i̱ olalu, Ha, lene ndo. Tigua i̱ dabo helenebi ndo. Aba Ngode Datagaliwabehanda Yasu homayagola mo heya henego ibubi Yasu Kerisobi libugua i̱ abosolo holiya dabo helene.
GAL 1:2 Keriso hameigini i̱ heba oali kamarume Keriso hameigini Galesiani ngoai haga bidamiruhondo, Tí mitangi bu kama, lalu beba ogo gilibu wia harama.
GAL 1:3 Ina Aba Ngode Datagaliwabebi Anduane Homogo Yasu Kerisobi libugua tíhondo biamogo bia holenebi mo palia holenebi ngilo hamelo ko.
GAL 1:4 Ina Aba Ngode Datagaliwabehanda hamelo henedagua iname ko birimagonaga Keriso ibugua homo aribia hene. Áyu ko bu ngarume ina dariba kagonaga ibugua ina golope hole ani bini.
GAL 1:5 Ogoninaga iname Ngode Datagaliwabe mini yaraga haabo halu holene ngago aniore bimi̱ya.
GAL 1:6 Kerisonaga biamogo bia holeneme Ngode Datagaliwabehanda tí olayago tígua ibu abaleore wahalu bi mana mende hale hole poramigo i̱ mogolo ko.
GAL 1:7 Bi Mana Debene mende nawiore lalu langerogoni irane ogo. Wali agali maru karume tí mini kira wu halimulo Kerisonaga Bi Mana Debene mo tara hole manda bialu ka.
GAL 1:8 Iname Bi Mana Debene ala langirimagobi ndo maha ina mbiralimebi dahuliya andaga howa dahuliyalimebi bi mana mende ale langirimayagua ogoni ibuhondo, Heli dindi pu, lolene wulebira.
GAL 1:9 Ala iname larimadagua áyubi i̱na lone larogo. Mbiralime Bi Mana Debene ala yu tiga birimigobi ndo mana mende ale tíhondo langiyiyagua ogoni ibuhondo, Heli dindi pu, lolene wulebira.
GAL 1:10 Wali agalime i̱hondo turu helonaga bi larobe. Aninaga ndo laro. Ngode Datagaliwabehanda i̱hondo turu helo hamelo ko. Wali agalime i̱ hame lelo manda berobe. I̱na wali agalime i̱ hame lelo manda bu haabo kole nde i̱ Kerisonaga biabe bia haga ndo kole.
GAL 1:11 I̱ hamene mbaliniru bi o langerogo hale halimu. Bi Mana Debene i̱na langigi biruligo agalinaga ndo.
GAL 1:12 Agali mbirame i̱ langini ndo. Mbiralime i̱ lawai henebi ndo. Yasu Keriso ibunime i̱ walia haya.
GAL 1:13 Ala i̱na Yu wali agalinaga manani howa bialu harugo te langiyago tí hale harimi. Ngode Datagaliwabenaga wali agali heneru i̱na ti dara nahe howa mo tandaga halu bo wahai hole manda buwa hongo howa bialu haru.
GAL 1:14 Yu agali maru i̱ mandagiali hearume Yu wali agalinaga manani henedagua ndo i̱na ti bolangua halu mamali mana gibi wiarubi bialu harugoni.
GAL 1:15 Ngode Datagaliwabehanda dara howa biamogo bia hole lowa i̱ ai̱yahanda i̱ nataba heneha ibugua i̱ dabowa ibunaga biabe bia haga holiya loma bia ho heleneya.
GAL 1:16 Yu wali agali ndo wali agali tara tarahondo i̱na Bi Mana Debene lamuliyanaga Ngode Datagaliwabehanda ibu Igini i̱na de hondoliya ha pani helaya. Ani helayagola agali maru hearuhondo i̱ agua buadabe lalu te nale haru.
GAL 1:17 Abosolo agali ala hene Yarusalemeni hearu ti hearia i̱ de hondo nape i̱ Arebia dindi ala pialu mani Damasagasa dai biru.
GAL 1:18 Dai buwa mali tebira halu i̱ Yarusaleme Pida hearia te lole puwa ibula Sarere kira agima ho hariba.
GAL 1:19 Ogoriani abosolo agali maru i̱ de nahende Anduane Homogo hamene Yamese dege hearia de handaru.
GAL 1:20 Ani biru lalu tíhondo bi gilibu wia harogoni tindule lalu mbira gili nabi tigatigaore gili berogo Ngode Datagaliwabe ibu de hendeda.
GAL 1:21 Emene howa i̱na Siriabi Silisiabi puwa uruniha ibaga bu haru.
GAL 1:22 Ogoningi Keriso hameigini Yudiaha bu haga hearume i̱ de nahende hene.
GAL 1:23 Tigua wali agali marume te layago dege hale ho hene. Te layago ogo. Agali mbira ala ina mo tandaga halu Yasuhondo mini mbiraore wulenenaga mana ala mo wahai hole haga biagome áyu lone ibuni Yasunaga bi mana lamialu ka, layago hale ho heneya.
GAL 1:24 Anigo Ngode Datagaliwabehanda i̱hondo biyiyago mitangi bialu tigua ibunaga mini yaraga halu hene.
GAL 2:1 Mali pira mbirani maria (14) howa Banabasa iya Yarusaleme dai bialu Taidasabi, Ma, lalu ina haru pirima.
GAL 2:2 Ngode Datagaliwabehanda i̱ polene nga lalu walia hayagola piru. Puwa wali agali haru haga hearu mo ngoai howa Bi Mana Debene Yu wali agali ndo tara tarahondo i̱na lamialu haruligo ti lamiru. Lamirugo irane i̱na biabe ala birugobi áyu bialu kogobi bame bu wahole bulene hame nale haru.
GAL 2:3 Taidasa ibu Girigiali howa i̱la hagago dongone podo mabu biaga mana winigo ngadagua, Podolene nga, lalu tigua ina nalangiya.
GAL 2:4 Agali maru ti Keriso hameigini hetingi howa ina baba mandagi hole ibiyaru tigua, Taidasanaga dongone podo mabu bimi̱ya, lene. Ina Keriso Yasu heba ho gimbu buwa ibunaga golope hagane mana yu hemago agali ibiyarume ohowa de hondole ibini. Tigua ina lone dariba ho dai bule hame lene.
GAL 2:5 Bi Mana Debenenaga henene lolene tí kamigoha wiaabo helo agali biaruhondo gedaore howa e̱ lolene manda nabiore harima.
GAL 2:6 Agali maru haru haga mini lene mbaule hearume i̱hondo mana tara mbira nalangi. Agali maru haru haga mini lene mbauleya larugo henemane haru hagadalo manda nabido. Ngode Datagaliwabe ibu tingini dege de hondowa wali agali tale nabiaga ka.
GAL 2:7 Anigo Bi Mana Debene Yu wali agalihondo Pidahanda lamilo Ngode Datagaliwabehanda miya. Ani miyadagua Yu wali agali ndo tara tarahondo i̱na lamuliya Ngode Datagaliwabehanda i̱hondo ngiyago haru haga mini lene mbaule biarume ogonidagua manda biyiya.
GAL 2:8 Ngode Datagaliwabenaga hongome Pida ibu Yu wali agalinaga abosolo helo Ngode Datagaliwabehanda ibu helayadagua i̱bi Ngode Datagaliwabenaga hongome wali agali tara taranaga abosolo holiya i̱ heleda.
GAL 2:9 Ngode Datagaliwabehanda biabe ogoni i̱hondo ngiyiyago hondowa Yamese Pida Yonema ti haru haga agali mini lene mbaule howa Banabasa iya gi tigali biya. Iyame wali agali tara tara heba biabe bulubaya tigua nde Yu wali agali heba biabe bilo ina mini mbiraore howa ani bimi̱ya larima.
GAL 2:10 Tigua iyahondo bi mbira layago ogo. Yu wali agali iname bi mana lameramaru aria maru mbirale nawi buru pale karu mitangi bilibu, laya. O layadagonidagua mitangi bialu ani bule hame timbuni lowa i̱na ala bialu harugoni.
GAL 2:11 Pida ibu Andiogo ibuwa nakarulape biyagola wali agali hearu hale hai helo i̱na mana lalu Pida taliru.
GAL 2:12 Agali maru Yamese heagoria howa naibiha Pida ibu Keriso hameigini Yu wali agali ndo tara tara hearu heba mandagi tomo nalu haga hene. Agali biaru Yamese heagoria howa ibiyagola Pida ibugua agali o ibiyarume ti agali tara tara dongone podo mabu biagane mana bulene hame laga ka manda buwa gi halu ibu ala agali ta nabi heba mandagi tomo nayadagua nane wahene.
GAL 2:13 Yu agali maru Keriso hameigini hearumebi Banabasa ibubi ti hondowa gi halu mini kira wuwa Pidahanda biyadagua bini.
GAL 2:14 Tigua Bi Mana Debene henene ngadagua bule hariga tigabini ndo piyane hondowa ti bibahende hale hai helo i̱na Pida talialu bi larugo ogo, Í̠ Yu agali howa Yu agali hagadagua ndo hari. Wali agali tara tara karu hagadagua harigoni. Ani buwa wali agali tara tara karuhondo ti Yu wali agalime hagadagua halimu lalu agua labehe kebe, laru.
GAL 2:15 Wali agali tara tara ko biaga karu aria ndo kama. Ina Yu wali agali teneore kamagoni.
GAL 2:16 Ina Yu wali agali howa manda bidamago ogo. Mosese heneyangi Mana lowinigo ngadagua mbiralime bialu hayagua Ngode Datagaliwabehanda, Ibu mini tigabiwi ka, nalolebira. Mbiralime Yasu Kerisohondo mini mbiraore wu kayagua Ngode Datagaliwabehanda, Ibu mini tigabiwi ka, lolebira manda bidama. Ngode Datagaliwabehanda ina hondowa, Tí mini tigabiwi kami, lelo inamebi Keriso Yasuhondo mini mbiraore wu kama. Mana lowinigo ogoni ngadagua bialu harimagome ndo iname Kerisohondo mini mbiraore wu kamagome Ngode Datagaliwabehanda ani lolebira. Mbiralime Mana lowinigo ngadagua bialu kayagua Ngode Datagaliwabehanda ibuhondo, Í̠ mini tigabiwi ke, nalolebira.
GAL 2:17 Ina Kerisoha ho gimbu bidamagome Ngode Datagaliwabehanda inahondo, Tí mini tigabiwi kami, lolebira manda bu kama. Ani manda bu howa Yu wali agali ndo wali agali tara tara mini kowi karubi dege harimadane handa walia harimayagua nde tene Kerisohanda ina ko mo bia hayada labehe kamabe. Ani nalabeheore.
GAL 2:18 I̱na mana ala yu waharugo lone bu dai biruyagua Mana lowinigo puguaro lalu walia ko.
GAL 2:19 Ngode Datagaliwabeha bayale holiya Mana lowini ngagome i̱ mo homa henego homene ale kogoni. I̱ Kerisonaga ira bangani ibu heba ba para howa homarugoni.
GAL 2:20 Ai i̱ ndo kogoni. Keriso ibu i̱ha kagoni. Holene áyu kogoni Ngode Datagaliwabe Iginihondo mini mbiraore wu kogome kogoni. Ibugua i̱ gubalini howa homa aribia hayagoni.
GAL 2:21 Ngode Datagaliwabehanda ibunaga biamogo bia holene i̱hondo ngiyago mangabago waharo nale ko. Mana lowinigo ngadagua biaga karuhondo Ngode Datagaliwabehanda, Tí mini tigabiwi kami, lagayagua nde Keriso ibu bame homayada manda bibehe kama.
GAL 3:1 Galesia wali agaliru-o tí mini nawi harimidago aiwa mo lulu ya hayabe. Yasu Keriso ibu agua bialu ira bangani homaya lalu te langirugo bayuwa hale hai harimigoni.
GAL 3:2 Bi mbira ogo dege langilimulo hame ledo. Mana lowinigo ngadagua birimigome Ngode Datagaliwabehanda ibu Dinini ngiyabe be Bi Mana Debene hale howa mini mbiraore wirimigome ngiyabe.
GAL 3:3 Tí mini nawiore kamigo agibe. Pigane tenuwa Ngode Datagaliwabe Dinininaga hongoni howa harimi. Ai tíninaga hongome bia maro bule mitangi bu kamibe.
GAL 3:4 Keriso hameigini harimigonaga tandaga ala narimigo bameyabe. Bame ndo galoneorenaga narimilo manda bido.
GAL 3:5 Ngode Datagaliwabehanda tíhondo ibu Dinini ngialu tíha howa agalime nabiagane ale biagago tene Mosese heneyangi Mana lowinigo ngadagua birimigome biagabe be tígua Bi Mana Debene hale howa Kerisohondo mini mbiraore wirimigome biagabe.
GAL 3:6 Anduane Homogonaga mbugani bi lo ngago ogo, Abarahamahanda mini mbiraore wiyagola Ngode Datagaliwabehanda ibu mini tigabiwi ka, lene lalu gilibu nga.
GAL 3:7 Ani lenego wali agali Ngode Datagaliwabehondo mini mbiraorewi karu ti dege Abarahama aguanene henemane kago manda bilimu.
GAL 3:8 Anduane Homogonaga mbugani bi lo ngagome ala mbiwia ho wialu lalu, Wali agali tara tara Ngode Datagaliwabehondo mini mbiraorewi karu ti mini tigabiwi ka lolebira, lalu gilibu winigo nga. Bi mende lo ngago ogo, Í̠ha howa Ngode Datagaliwabehanda wali agali bibahende mo turu hai holebira, lalu gilibu nga. Anibidago bi ogoni Ngode Datagaliwabenaga mbugani lo ngagome Bi Mana Debene Abarahamahondo ala lamini.
GAL 3:9 Abarahamahanda Ngode Datagaliwabehondo mini mbiraore winigome turu holene yu hene. Ibugua turu holene yu henedagua iname Ngode Datagaliwabehondo mini mbiraore wu harimayagua turu holene yu holeberama.
GAL 3:10 Mini tigabi hole Mana lowinigo buleneha hana ho karuhondo, Tandaga nama pobe, lolene wulebira. Anduane Homogonaga mbugani bi lo ngago ogo, Mana lowini ngago biai nahaga karuhondo, Tandaga nama pobe, lolene wulebira.
GAL 3:11 Mana lowinigo manda buwa bialu karuhondo Ngode Datagaliwabehanda, Tí mini tigabiwi kami, nalolebira manda bido. Anduane Homogonaga mbugani lo ngago ogo, Ngode Datagaliwabehanda ibuhondo mini mbiraorewi karuhondo, Tí mini tigabiwi kami, laga ka. Ani lene karu ti dege holene gahenge yu holebira, lalu gilibu nga.
GAL 3:12 Mana lowini ngago bulene tene Ngode Datagaliwabehondo mini mbiraore wuleneme ndo. Anduane Homogonaga mbugani lo ngago ogo, Mbirali Mana lowini ngadagua bibahende biai haragome ibunaga holene tene ogoni holebira, lalu gilibu nga.
GAL 3:13 Mana lowini ngago nabiaga karuhondo, Tandaga nama pobe, lolene wulebira lowini. Iname tandaga nama polene wulebira lo wiyagome ina dariba ho wiaria Keriso ibugua pu aribia halu tandaga ogoni na halu ina golope hene. Anduane Homogonaga mbugani lo ngago ogo, Mbirali ira bangani ba para haragohondo Ngode Datagaliwabehanda, Tandaga nama pobe, lolene wulebira, lalu gilibu nga.
GAL 3:14 Ngode Datagaliwabehanda Abarahamahondo turu holene ngulebero lowinigo Keriso Yasuni howa wali agali tara tara karume yilonaga Keriso Yasu ibu homo aribia hene. Ani binigo Ngode Datagaliwabehanda, I̱ Dinini ngulebero, lowinigo ina Yasuhondo mini mbiraore wu kamagome yidamagoni.
GAL 3:15 I̱ hamene mbaliniru iname beramaligonaga bi yobage ale mbira larogo. Agali kiralime mini mbiraore howa ani bibiya lowa bi ogoni habo nalole lalu bebani gilibu wiribiyagua libu mendealime bi gilibu wiribigo napuguabehebi gilibu tago nahabehebi habo nalolene lalu bi gilibu wiribigodagua wiaabo holebira.
GAL 3:16 Ogonidagua Ngode Datagaliwabehanda Abarahamabi ibu aguanenegobi libuhondo ngulebero laga bialu lo wima ibini. Anduane Homogonaga mbugani lo ngagome bi ogoni aguaneneru lalu nale aguanenego lalu layago dewali lalu ndo mbiraoreli hangu lalu lenego gilibu ngago ogoni ibu Keriso lalu lene.
GAL 3:17 Bi larogoni tene ogonaga laro. Ngode Datagaliwabehanda habo nalolene bi lo wialu, Nguleberoore, lalu lowini. Bi ogoni lo wu heane mali dewaore handari mariani pira tebira (430) peagola maha Mana lo wiyagome habo nalolene bi ala lo winigo napuguabehe wini. Ngode Datagaliwabehanda ala, Ngulebero, lo winigo nawahabehe wiaabo holebira.
GAL 3:18 Ngode Datagaliwabehanda ngiagaru Mana lo winigo ngadagua biai haramagome ngiagadale nde Ngode Datagaliwabehanda ngulebero lo winigoria mo tene holene nangale. Ani bialu ndo Ngode Datagaliwabehanda bambaore Abarahama ibuhondo ngulebero lo winidaguaore mini.
GAL 3:19 Ani biniyagua Ngode Datagaliwabehanda Mana lo wilo laminigo irane aginagabe. Irane wali agalime mana ko agodabe manda bialu dabelonaga Ngode Datagaliwabehanda Mana lowini. Abarahama aguanene biago ibilo mana lo wiyagoria lola helo wini. Abarahama aguanene o biagohondo Ngode Datagaliwabehanda bi ala lowini. Mani Ngode Datagaliwabehanda Mana lowinigo dahuliyaliruha howa lamiyagola Mosese ibu dombegua howa wali agaliru lamini.
GAL 3:20 Mbirali hangu howa mendeali naheyagua dombegua aginaga holebe. Anigo Ngode Datagaliwabe mbiraore ibuni dege howa lowini.
GAL 3:21 Mana lo winigome Ngode Datagaliwabehanda ala, Ngulebero, lo winiru baba waitigi ho ngabe. Ani ndoyago. Mana lo winiru mbirame wali agalihondo holene gahenge mibehe winidale Ngode Datagaliwabehanda wali agalihondo, Í̠ mini tigabiwi ke, lolene mana ogoni ngale.
GAL 3:22 Anduane Homogonaga mbugani bi lo ngago ogo, Wali agali dindi bibahendeni kamaru mana konaga hongome ina dariba hai ka, lalu gilibu nga. Ani bidago wali agali Yasu Kerisohondo mini mbiraore weramagome Ngode Datagaliwabehanda, Ngulebero, lowinigo yu holoma̱yanaga nga.
GAL 3:23 Yasuhondo mini mbiraore wulene tagira naibiha Mosese heneyangi Mana lowinigo ogonime ina dariba hai hene. Yasuhondo mini mbiraore wulene tu tagira ibilo ina dariba ho wiaabo hene.
GAL 3:24 Ina Yasuhondo mini mbiraore wirimagome Ngode Datagaliwabehanda inahondo, Tí mini tigabiwi kami, lelo Mana lowinigo ngagome ina haru haga ale howa Keriso ibilo ina ibu karia haru pole haru haabo hene.
GAL 3:25 Yasuhondo mini mbiraore wulene áyu íbu ngago mana ala ina haru hayagome lone áyu haru haabo holene nawi.
GAL 3:26 Tí Keriso Yasuha ho gimbu bu howa ibuhondo mini mbiraore wirimigome Ngode Datagaliwabe waneigini kami.
GAL 3:27 Tí Kerisoha ho gimbu bu howa baboraya birimi. Ani birimigo Keriso ibuni kagobi holene ogoni karulo kami.
GAL 3:28 Yu wali agali karubi wali agali tara tara karubi garabaya biabe ale bia haga karubi garabaya nabini karubi wali bedarubi agali karubi tí bibahendeore ta nabi Keriso Yasuha ho gimbu bu howa mbiraore kami.
GAL 3:29 Tí Kerisonaga kamiyagua nde tí Abarahama aguanene kamigoni. Tí Abarahama aguanene howa Ngode Datagaliwabehanda ibuhondo, Nguleberoore, lo winigo tíbi yu holeberami.
GAL 4:1 I̱na bi larogo ogodagua laro. Agali mbira ibu igini kayagua igini ogoni ibu abanaga mbirale bibahende ngaru awe ibunaga wulebirago lowa ibu igiri emene katagi garabaya biabe ale bia haga mbirale nawi hagagobi haga.
GAL 4:2 Ibu abahanda mbirale mulene horo pongo bo winigo lola helo ibu emene katagi agali marume igiri ogoni de hondo howa biamogo bialu haga.
GAL 4:3 Ogonidagua ina mini gahenge holenenaga boga nabi hemangi iname dindi tawenagabi damanagabi garabaya biabe ale bia halu hene harima.
GAL 4:4 Ibilolene tu hayagola Ngode Datagaliwabehanda ibuni Igini ibilene. Ibu dindini wali bereago igini howa Yu wali agalinaga Mana lowinigo Yu wali agalime bialu headagua ibuguabi bialu henego
GAL 4:5 irane ogo. Ina Ngode Datagaliwabe waneigini holoma̱ya Mana lowinigo ogonime wali agali dariba karu ibugua golope hole ibini.
GAL 4:6 Tí Ngode Datagaliwabe waneigini kami lalu walia hole Ngode Datagaliwabehanda ibu Igini Dinini ibugua, Aba i̱ Aba, laga kago ina bu habaneha helo ibilene.
GAL 4:7 Ani binigo tí garabaya biabe ale bia haga ndo Ngode Datagaliwabe waneiginiore kami. Tí ibunaga waneigini kamigo ibugua ibu waneigini bibahendehondo mulene ngago tíhondo ngulebira.
GAL 4:8 Tí ala Ngode Datagaliwabe manda nabi harimingi dama hearunaga garabaya biabe ale bia haga harimigoni.
GAL 4:9 Ani binigo áyu tígua Ngode Datagaliwabe manda bu kamigo ogoni hangu ndo ogodagua laro Ngode Datagaliwabe ibuguabi tí manda bu kago helowa tígua ala mana ko hongo nahe dindi tawenagabi damanagabi garabaya biabe ale bia halu harimigo lone bule dai bialu kamigo agibe.
GAL 4:10 Tígua horo mbira mbiranibi ege mbira mbiranibi mali mbira mbiranibi Ngode Datagaliwabe mitangi bule ndo uruni hangu mo dunini howa ngoai haramili.
GAL 4:11 Ani beramiligo mitangi bialu i̱ gi ho kogoni. Tígua Ngode Datagaliwabe mana bilimulonaga biabe bialu harugo bibahende galone ndo bame bu wahole bialu harudabe.
GAL 4:12 I̱ hamene mbaliniru-o tí i̱ ale halimulo hame ledo. I̱ nde tí ale dege harugo kogoni ndobe. Tígua i̱hondo kagua mbira nabi harimigoni.
GAL 4:13 Ala i̱na tíhondo bi mana debene pigane langirugo irane manda bu kami. I̱ warago bo wuwa langulene henge mbira wiyagola i̱na tí langirugoni.
GAL 4:14 I̱ warago bo wiwagola tígua genda yu haabo howa i̱ handabe manga nahe harimi. Handabe manga nahe howa tígua Ngode Datagaliwabenaga dahuliyalihondo turu holenedagua i̱hondo turu ho harimi. Keriso Yasuhondobi turu holenedagua i̱hondo turu ho harimi.
GAL 4:15 Tí turu timbuniore ho harimigo ai áyu tínaga turu holene biagoni agoha ngabe. I̱na tí mitangi bialu bi ogo labehe ko. I̱ biamogo bulene hame timbuniore lalu tíninaga de haluwa ngibehedale nde i̱ halu ngidamile.
GAL 4:16 Anigo i̱na tíhondo bi henene langirugome tí baba mo waitigi harudabe.
GAL 4:17 Agali maru karume tí kamiru mitangi timbuni ho kama lalu karuni henene ndo lalu ka. Tinaga miniha ke̱ hagane do ho howa lalu ka. Tigua tí mitangi bu kadagua tígua ti mitangi bilimulo hame lowa i̱bi tí kamirubi ina mo dala hangu haga bule hame lowa bialu ka.
GAL 4:18 Tigua bialu kago galoneniore bialu kayagua ogonidagua bulene bayale. I̱ tí heba haruyaguabi naharuyaguabi ogonidagua mitangi biaabo holene nga.
GAL 4:19 I̱ waneiginioreru-o walime gali taba hanalu howa tandaga hagadagua Kerisonaga mini tíha anda haabo helo tandaga naabo halu ko.
GAL 4:20 I̱na tí heba henedale bi emene bayale ledolego ai tí heba naharugome tí mitangi bialu dara howa mini dege dindi ho kogoni.
GAL 4:21 Mana lowini ngagome dariba helo hamelo kamiru tíhondo laro. Mana lowinigo gilibu ngagome bi ledago tí bayuwa hale nahe harimibe.
GAL 4:22 Bi ledago ogo, Abarahama igini kira hene. Mendego ibu wali garabaya biabe ale bia haga berenego igini hene. Mendego ibu wali garabaya biabe nabini berenego igini hene.
GAL 4:23 Garabaya biabe ale bia haga wali berenegome ibu igini walime gali taba hanagadagua taba henene. Garabaya biabe nabini wali berenego ibugua ogonidagua ndo. Ala Ngode Datagaliwabehanda, Ngulebero, lo winidagua lola halu wali ogoni ibugua igiri taba henene.
GAL 4:24 Ogoninaga bi yobage ogo. Wali kira ogoni labo libu habo nalolene bi kira lowinigo ale manda bimi̱ya. Mendego ibu mini Hega ibu Hari Sainai weagoha howa ibuwa ibunaga waneigini hararume garabaya biabe ale bia haga helo taba henene.
GAL 4:25 Hega ibu Arebia dindiha Hari Sainai weagobi manda bimi̱ya. Ibu Yarusaleme wali agali áyu garabaya biabe ale bia haga karubi berene.
GAL 4:26 Anigo Yarusaleme mendego ibu dahuliya andagani garabaya biabe nabinigo ibu ina ai̱ya beda.
GAL 4:27 Anduane Homogonaga mbugani bi lo ngago ogo. Dalo wali bedego í̠ turu ho birabe. Gali taba hanalu howa tandaga nahendene bedego í̠ turu timbuni ho birabe. Wali ibu agalinila biraabo kago ibu waneigini holebiragobi ndo lowa wali ibu agalinime wahalu pene bedago ibu waneigini dewaore holebira, lalu gilibu nga.
GAL 4:28 I̱ hamene mbaliniru-o Ngode Datagaliwabehanda, Ngulebero, lo wuwa Aisaga miyadagua Ngode Datagaliwabehanda bi lo wiyagonaga ibu waneigini tí kamigoni.
GAL 4:29 Ogoningi walime gali taba hanagadagua igiri taba henene biagome Ngode Datagaliwabe Dininiha howa igiri taba henene biago mo tandaga halu hene. Ogonidagua áyubi mo tandaga haabo halu ka.
GAL 4:30 Anduane Homogonaga mbugani bi agi lo ngabe manda bimi̱ya. Bi lo ngago ogo. Garabaya biabe ale bia haga walibi ibu iginibi wara tagi hadaba. Garabaya biabe ale bia haga wali biago iginibi garabaya nabini wali biago iginibi libu abanaga paluni talebu ki bulene nawi, lalu gilibu nga.
GAL 4:31 Ani lenego i̱ hamene mbaliniru-o ina garabaya biabe ale bia haga wali biago waneigini ndo kama. Ina garabaya nabini wali biago waneigini kama.
GAL 5:1 Ina garabaya ale hemaria Keriso ibugua ina golopeore hene. Ani binigo manda buwa golope holene ogoni hongo howa yu halimu. Maru karume tí lone garabaya biabe ale bia haga helelo henge namilimu.
GAL 5:2 Bayuwa hale hadaba. I̱ Polo i̱na tí langerogo ogo. Tí dongone podo mabu biagane mana bilo e̱ larimiyagua Keriso ibu tínaga biamogo biaga ndo holebira.
GAL 5:3 Bi ogoni galoneore ngago lone larogo. Dongone podo mabu biagane mana bilo agali mbiralime e̱ layagua Mana lowinigo ngadagua bibahende ibugua biai holene nga.
GAL 5:4 Tígua Mana lowinigo beramigome Ngode Datagaliwabehanda, Tí mini tigabiwi kami, lolebira manda bu kamiru Kerisoha ho gimbu bu harimiru tínime yu wahalu pirimi. Tí Ngode Datagaliwabenaga biamogo bia holene ngagoria nahe tagirahayagi kami.
GAL 5:5 Ina nde Ngode Datagaliwabe Dinini ibugua ina mo hongo haragola Yasuhondo mini mbiraore wirimagome Ngode Datagaliwabehanda inahondo. Tí mini tigabiwi kami, lolebira. Ani lolebirago manda buwa mini dunu bia ho kama.
GAL 5:6 Ina Keriso Yasuha ho gimbu bu howa dongone podo mabu biagane mana bini nabiniyaguabi ta nabi howa iname Ngode Datagaliwabehondo mini mbiraore wuwa gubalini holene walia haga bialu kamago galoneore ogoni.
GAL 5:7 Ala tí Kerisonaga harigani bayale pialu harimigo tígua henene bulene ngago nabilimulo aiwa hangai hayabe. Ibugua agigo bia lalu hangai hayabe.
GAL 5:8 Ngode Datagaliwabe tí olaga kagome hangai haya ndo.
GAL 5:9 Yidi emeneme mberedi mo timbu haga ani lagane nga.
GAL 5:10 Ina Anduane Homogoha ho gimbu bu kamago mitangi bialu i̱na tí mini tara nawuleberamilo manda bu ko. Mbirali tínaga mini mo kira haga kago ibu aibe tobarago Ngode Datagaliwabehanda ogoni ibuhondo pani mulebira.
GAL 5:11 I̱ hamene mbaliniru-o tígua lalu, Polo ibu dongone podo mabu biagane mana bulene nga lalu lawai halu ka, lagago ogoni heneneyagua i̱ mo tandaga haabo harago irane aginagabe. Mana ogoni bulene ngale Keriso ira bangani homayagonaga lawai harogome tí mini mo burugula nakale.
GAL 5:12 Tínaga mini mo burugula halu karume tininaga wangabe nahe hole mo wahai helo hame ledo.
GAL 5:13 I̱ hamene mbaliniru-o tí nde golope hene halimulo Ngode Datagaliwabehanda tí dabo heledagoni. Ina golope hene kamago lo mitangi bialu inanenaga minime ko hame ledadagua ta nabi bulene nga manda nabilimu. Ani nabi gubalini holeneme tíni biamogo bia haga haga bialu halimu.
GAL 5:14 Mana lowinigo bibahende bimaga howa bi mbiraore ogo, Í̠na í̠ni gubalini harilidagua maru karu ta nabi gubalini ho habe.
GAL 5:15 Tí nogo gabua tara tararume gungu biagadagua birimiyagua tíni bo wahalu togo lolemeni de hondo halimu.
GAL 5:16 I̱na bi larogo ogo. Ngode Datagaliwabe Dinini ibugua tí haru helo helalimu. Ani haru helo helarimiyagua tínaga mini ko ngagome dimagoli hara ale nabuleberami.
GAL 5:17 Inanaga mini ko ngagome hame larago Ngode Datagaliwabe Dinini ibugua hame nalaga ka. Ngode Datagaliwabe Dinini ibugua hame ledago inanaga mini ko ngagome hame nalaga howa libu waitigi kagoni. Ani birago manda bialu tíni bua biradagua bibe nahe kami.
GAL 5:18 Ngode Datagaliwabe Dinini ibugua tí haru hayagua Mana lowini ngago andaneha naholeberami.
GAL 5:19 Mini kowi kagonaga mana ogobi nga. Wali agali dimagoli holenebi kayu bulenebi mana ko bulenebi
GAL 5:20 mbirale tarahondo bi pupu wulenebi hambu bolenebi nga. Wali agali handabe manga hagabi gungu biagabi henge lagabi keba hagabi ibuni hangunaga mitangi biagabi ka. Ani bialu tini mini mbiraore nahagabi haga haga biagabi
GAL 5:21 mendealinaga ngago dimagoli hagabi lulu yule lulu iba nagabi dawe hagabi mana ko uruni ale tara tara biaga ka. I̱na bi ala langirudagua halu mende langerogo mana urunibi bialu karume Ngode Datagaliwabehanda Handame Ho Kagoria naholebiraore laro.
GAL 5:22 Anigo Ngode Datagaliwabe Dinini ibugua lini ogobi daga. Gubalini holenebi turu holenebi mo palia holenebi ema nabi howa hibu lolenebi biamogo bulenebi bayale dege bulenebi mini bilinahe holenebi
GAL 5:23 mo dindiha holenebi mini haru holenebi Ngode Datagaliwabe Dinini ibugua lini urunibi daga ka. Urunibi bulene ngago mana lo ngagome hangai habe nahe nga.
GAL 5:24 Yasu Kerisonaga wali agali karume mini kobi mini konaga hame laganebi dimagoli haganebi ira bangani ba para hai hene.
GAL 5:25 Ngode Datagaliwabe Dinini ibugua inahondo holene gahenge ngiyago ibugua ina haru heloorebi helami̱ya.
GAL 5:26 Ina mine nahe hami̱ya. Inane keba haga haga nabi hami̱ya. Mendealinaga ngago i̱ nayido agini henge nale hami̱ya.
GAL 6:1 I̱ hamene mbaliniru-o tígua mbiralime mana ko mbira bialu karia handarimiyagua wali agali Ngode Datagaliwabe Dinini ibugua laradagua biaga kamirume mo tiga bialu halimu. Mo tiga bialu howa bi hongo howa nale gedaore howa bayuwa mo tiga bilimu. Tínibi ko mbira bulene hame loligo de hondo halimu.
GAL 6:2 Tíninaga genda yu kamigo ya hagahaga birimiyagua Kerisonaga mana lo ngadagua bialu holeberami.
GAL 6:3 Mbirali ibu emene dindiha howa, I̱ timbuni karulapeore ko, lo manda bu kayagua ibugua ibuni mo hondo hara.
GAL 6:4 Iname mana beramaligo bayalebe kobe inane hangu hangume dabami̱ya. Marume mana bialu kago hondowa ndo. Inane biaganego dege manda bialu, Mana ogoni bayaleda, manda biramayagua nde turu holene wulebira.
GAL 6:5 Ina hangu hangume inanenaga genda yulene ngadagua yu hami̱ya.
GAL 6:6 Kerisonaga bi mana hale halu bialu kagome ibunaga mbirale bayale mbira wigi bidago ibunaga lawai haga kago talebu mulene nga.
GAL 6:7 Tígua tíni mo hondo nahalimu. Mbiralime Ngode Datagaliwabe mo hondo habe nahe ka. Mbirali ibu tomo egene ibuni hangarago alenaga lini do nolebira.
GAL 6:8 Ibuni mini konaga dimagoli holene hangayagua ibu hangayagonaga lini homagane do nolebira. Ngode Datagaliwabe Dinini ibunaga hame ledago hangayagua ibugua hangayagonaga lini haabobo holene do nolebira.
GAL 6:9 Anigo iname biabe bayale bulene ngago manga nahe bialu hami̱ya. Wahalu nape biaabo halu harimayagua nde awe birimagonaga lini bayale dedagola do noleberama.
GAL 6:10 Ani manda buwa biabe bayale bulene henge ngangi wali agali bibahende ta nabihondo bayale bialu hami̱ya. Ngode Datagaliwabehondo mini mbiraorewi karu ina hameigini lowa tihondobi iname bayaleore bialu holene nga.
GAL 6:11 I̱na i̱ni gime tíhondo beba ogo gilibu wia harogo timbuni giligili berogo de handalimu.
GAL 6:12 Mine howa bi timbuni lalu dindini holene mana lalu karu ti degeme tíhondo dongone podo mabu biagane mana bulene nga laga kagoni ndobe. Ani lalu kago irane Keriso ira bangani homayagonaga te lalu lamiaga karume tandaga nagadagua tibi nolilono bi ani lalu ka.
GAL 6:13 Dongone podo mabu biagane mana bialu karume Mana lo winigo ngadagua ti biai nahaga ka. Tí kamiru dindi mana mbira ogoni bilo bia larimiyagua tigua tininaga mini yaraga halu, Tíbi bia dege birimigoni, lolenaga, Tí dongone podo mabu biagane mana bulene nga, lalu ka.
GAL 6:14 Ai i̱na Anduane Homogo Yasu Keriso ira bangani homayagonaga irane larogo hangume ibunaga mini yaraga halu holebero. Ibugua ira bangani homayagome dindi mana ngago i̱hayagi howa homaya. I̱ nde dindi mana ngagohondo homarugoni.
GAL 6:15 Dongone podo mabu biaga mana binibi nabinibi galone ndo. Ngode Datagaliwabehanda inanaga holene mo gahenge henego galoneore ogoni.
GAL 6:16 Wali agalime tinaga holene galoneore ogoni lowa mo tene ho karubi Ngode Datagaliwabenaga wali agali bibahende karubi tiha mo palia holenebi dara howa biamogo bulenebi wiaabo helo hamelo ko.
GAL 6:17 Bi lamaro bialu laro. Agalime i̱ bayago i̱naga tinginini motudu ngarume i̱ Yasunaga garabaya biabe bia haga henene ko lalu walia hagago mbiralime i̱ mo genda holene nawi.
GAL 6:18 I̱ hamene mbaliniru-o ina Anduane Homogo Yasu Keriso ibunaga biamogo bia holene tí bibahendeha wiaabo helo hamelo ko. Aniore bilo laro.
EPH 1:1 I̱ Polo. Ngode Datagaliwabe ibuni hame leagome Keriso Yasunaga abosolo kogoni. Ngode Datagaliwabenaga wali agali Keriso Yasuha ho gimbu bu haabo hene Ebesani kamiru tíhondo laro.
EPH 1:2 Ina Aba Ngode Datagaliwabebi Anduane Homogo Yasu Kerisobi libugua biamogo bia holenebi mo palia holenebi tíhondo ngilo hamelo ko.
EPH 1:3 Ina Anduane Homogo Yasu Kerisonaga Aba Ngode Datagaliwabehanda Kerisoha howa ina mo turu halu dinininaga mo bayale holene bibahende dahuliya andaga tawe ngago nginigonaga iname ibuhondo ka̱i̱ lami̱ya.
EPH 1:4 Ibugua dindi haribi mbirale bibahende uruniha karubi ngarubi wa nabi howa ina Kerisoha ho gimbu bu howa ibunaga holoma̱yabi ko mbira para nahe bayaleore ibu deni holoma̱yabi ibugua ina dabene. Bambaore Ngode Datagaliwabenaga gubalini holeneme
EPH 1:5 ina Yasu Kerisoni howa mo ibu waneigini hole manda bu hene. Ibuninaga hame leagome anidagua bini.
EPH 1:6 Ngode Datagaliwabehanda ibunaga biamogo bia holene baya taraore ngago ibu Iginioreha howa inahondo turu halu bame nginigo mitangi bialu iname ibu mini yaraga hami̱ya.
EPH 1:7 Keriso homayagome ina golope halu iname ko birimago domo wahai hene kama. Ngode Datagaliwabenaga biamogo bia holene timbuniore nga ndobe.
EPH 1:8 Biamogo bia holene ogoni ibugua mbuni nabi howa timbuniore inahondo ngini. Ibu mini gigabiwi mani holene manda biahe howa
EPH 1:9 Ngode Datagaliwabehanda manda manda bu winidagua mana ala pani nahe ngelenego Kerisoni howa bia maro bulene manda bu winigo inahondo mo pani haya.
EPH 1:10 Ngode Datagaliwabehanda manda bu winigo ogo. Ibugua hariha karubi ngarubi dindini karubi ngarubi bibahende wabinigo Keriso ibu haguane howa mo mbiraore halu mandagi helo manda bu wini. Ogonidagua manda bu winigo bia maro bulene horo ibugua ala pongo bo winigo lola harangi bia maro bulebira.
EPH 1:11 Ngode Datagaliwabehanda bulebero lo wuwa bulene manda bu winidagua biai hene. Ibugua ina Kerisoha ho gimbu bu howa ibunaga wali agali holoma̱ya ina dabene. Ibugua ina dabenego irane ogo. Ibugua piganengi manda bu winigo mo tene howa bulebero lo winidagua bini.
EPH 1:12 Anigo Kerisohondo pigane mini dunu bia ho hene kamaru iname ibunaga mini daliga taraore ngago yaraga halu hami̱ya.
EPH 1:13 Henene lolene Bi Mana Debene ngagome tí pele mulene mo yu halimulonaga langinigo hale howa tí Kerisohondo mini mbiraore wirimigoni. Ani wirimigola Ngode Datagaliwabehanda ibu Dinini ngulebero lo winidagua tíhondo ngiyagome tí ibuninaga kami lalu walia hene.
EPH 1:14 Ngode Datagaliwabehanda ibunaga wali agali karuhondo ngulebero lowinigo heneneore mo yuleberami lalu manane ibunaga Dinini ngini. Ngode Datagaliwabehanda ina ibunaga kamaru golope hai holebira lalu Dinini ngiyago ibugua ina langiaga. Anigo Ngode Datagaliwabenaga mini daliga taraore ngago yaraga halu hami̱ya.
EPH 1:15 Irane ogonigo tígua Anduane Homogo Yasuhondo mini mbiraore wu kamigobi Ngode Datagaliwabenaga wali agali bibahende karuhondo gubalini ho kamigobi hale harungi
EPH 1:16 i̱na Ngode Datagaliwabehondo tínaga ka̱i̱ laabo halu ko. I̱na ibuhondo bi lalu howa tí mitangi bialu tínaga la halu
EPH 1:17 ina Anduane Homogo Yasu Keriso ibunaga Ngode Datagaliwabe wá taraore holene Aba kago ibugua tíhondo ibu Dinini ngilo i̱na mibe lalu la haruli. Dinini ogoni ibugua tí mini mo gigabi halu Ngode Datagaliwabe manda bilimulo walia holebira.
EPH 1:18 I̱na tínaga bi la halu kogo ogo. Tí mini duguahe howa ibunaga manda bulene ngago manda bilimulobi Ngode Datagaliwabehanda tí mini dunu bia ho halimulo olenegonaga irane manda bilimulobi la halu ko. Ibugua ibunaga wali agalihondo turu holene bayaleru ngulebero lowini uruni baya burugule ngago manda bilimulobi la halu ko.
EPH 1:19 Ibuhondo mini mbiraorewi kamaru inaha ibugua hongo tara howa biabe birago hongo ogoni manda bilimulobi la halu ko. Ibugua hongo timbunime Keriso homayago mo heya howa dahuliya andagaha ibunaga gi tigahayagi berelenego hongo ogoni dege inaha ka.
EPH 1:21 Keriso ibu dahuliya andaga kagoria howa hari daligaha haru haga karubi hondo haga karubi hongo holene yu karubi homogo karubi ti bibahende bolangua hai halu Keriso ibu daligaore howa ibugua ti haru ka. Hongo tara taranaga mini dindini áyu ngarubi awe wulebirarubi bibahende bolangua hai halu ibu mini daligaore ka.
EPH 1:22 Ngode Datagaliwabehanda bibahende karubi ngarubi Kerisonaga geha mo wuwa Keriso hameigini karunaga Haguaneore daliga helo Keriso helene.
EPH 1:23 Keriso hameigini karu ti Kerisonaga tingini howa ibu heba homane mbiraore helo helaga ka. Homane mbiraore howa tinaga tene Keriso ibu howa mbirale bibahende ibuha hangu maro bida.
EPH 2:1 Ala tígua Ngode Datagaliwabehondo manga harimigonagabi ko birimigonagabi tí dinini homene ale harimigoni.
EPH 2:2 Ani bialu harimingi dindini mana ko wiaru hamelo harimigoni. Hari daligaha damanaga hongo holene haru haga kagome bia layadagua tígua bialu harimigoni. Haru haga ogonime áyu wali agali Ngode Datagaliwabe mana wahaga karu ti haru haga ka.
EPH 2:3 Ina bibahende kamarumebi tigua bialu henedagua dege harimagoni. Iname inanaga mini kome dimagoli holene wiadagua dimagoli halu inanaga tinginimebi minimebi hame layadagua bialu harimagoni. Wali agali bibahende hearubi dege hemaria Ngode Datagaliwabenaga lembo holene tibi inabi nolene wini.
EPH 2:4 Ani winigoyu Ngode Datagaliwabehanda inahondo gubalini timbuniore howa ibunaga dara halu biamogo bulene daliga gibiore nga.
EPH 2:5 Ani ngago iname Ngode Datagaliwabehondo manga ho howa dinini homene ale hemaria ibugua ina Keriso heba holoma̱ya hela dai bia hene. Ani biyago Ngode Datagaliwabenaga biamogo bia holeneme tí pele mulene yu kamigoni.
EPH 2:6 Ina Keriso Yasu heba ho gimbu bu howa dahuliya tawenaga iname Keriso heba haru holoma̱ya Ngode Datagaliwabehanda ina Keriso heba mo heyamaga ho helene.
EPH 2:7 Ibugua ani binigo irane ogo. Ibugua ina Keriso Yasuha howa inahondo gubalini holene walia hayagome ibunaga biamogo bia holene daliga gibiore ngago walia ho wiaabo helo ani bini.
EPH 2:8 Ngode Datagaliwabehanda biamogo bia henegome tí ibuhondo mini mbiraore wuwa pele mulene yu kami. Tíni bayale birimigome ndo Ngode Datagaliwabehanda turu halu bame ngini.
EPH 2:9 Tíni biabe birimigonaga yolo ndogo tí mine holene henge nawi.
EPH 2:10 Ngode Datagaliwabehanda ina áyu kamagobi holoma̱ya wabini. Ina Keriso Yasu heba ho gimbu bu howa iname biabe bayale ibugua manda manda bu winigo ngaru bialu holoma̱ya Ngode Datagaliwabehanda ina wabini.
EPH 2:11 Yu wali agali ndo tara tara kamiru tí hondowa Yu wali agalime, Tí dongone podo mabu biagane mana nabiaga kamigo ina biaga kama, laga kago agalime tinaga dongoneni biaganaga larago. Tí kamiruhondo larogo tí ala howa bialu harimigo mitangi bu dai bilimu.
EPH 2:12 O biagoningi tí Kerisola mbiraore ndo dala hangu ho harimigoni. Ngode Datagaliwabenaga wali agali ibugua dabeneru aria ndo tí tara harimigoni. Ngode Datagaliwabehanda ibunaga wali agalihondo, Ngulebero, lalubi, Bulebero, lalubi lowinigo mo tene howa habo nalolene bi lowiniru tíhondo ndo lowini. Tí dindi ogoria howa Ngode Datagaliwabe kagobi pele mulene yulenaga bi manabi manda nabi howa mini dunu bia ho holene irane nawi howa tíni hanguore harimigoni.
EPH 2:13 Tí ala kaundiaha harimigoyu Yasunaga darama pelayagome áyu tí Keriso ibu heba ho gimbu bu howa tí kaware mo helenego kamigoni.
EPH 2:14 Keriso ibunime Yu wali agalibi wali agali tara tarabi mo mbiraore hayagome mo palia holene ina nginigo nga. Tí ala hangu hangu howa waitigi ho harimigome tu winigo ibugua tinginime gialo wahene.
EPH 2:15 Yu wali agalibi Yu wali agali ndo tara tarabi howa wali agali mbiraore ibu heba ho gimbu bu helo tiga bialu mo mbiraore hole ibugua Yu wali agalinaga Mana lowinigome bia laradagua bulenebi mana mbira mbira bulenebi nabulenebi mo wahene. Ani bialu ibugua mo palia hene.
EPH 2:16 Keriso ibu ira bangani homayagome wali agalinaga handabe manga holenebi keba holenebi bibahende winiru mo wahai hene. Ibugua ani biyagome Yu wali agalibi wali agali tara tara bibahenderubi hameigini mo mbiraore howa Ngode Datagaliwabe karia haru dai bini.
EPH 2:17 Ani haru dai buwa Keriso ibugua tí wali agali ala Ngode Datagaliwabe kagoria kaundia hene kamiruhondobi wali agali Ngode Datagaliwabe kagoria kaware heneruhondobi mo palia holenenaga Bi Mana Debene langule ibini.
EPH 2:18 Kerisoni howa ina Yu wali agalibi wali agali tara tarabi bibahende kamaru Ngode Datagaliwabe Dinini mbiraore ibuha howa ina Aba karia ibabehe kama.
EPH 2:19 Anigo Yu wali agali ndo tara tara kamiru tí hameigini tarabi dindi taralibi ala harimigobi ndo kami. Áyu tí Ngode Datagaliwabenaga wali agali heba ho mbiraore howa ibunaga waneiginiore kamigoni.
EPH 2:20 Abosolobi Ngode Datagaliwabe mana latagi haga henerubi tigua anda gumuni mo winigoria anda genedane Keriso Yasu ibuni howa tíbi anda bu gimbu bini kami.
EPH 2:21 Anda ogoni Keriso ibugua yani ho howa anda Anduane Homogohondo loma bia ho helo mo anda halu ka.
EPH 2:22 Ibu heba ho gimbu bu howa tíbi wali agali marubi anda mbiraore ale bu gimbu bima iraga halu biala kami. Ngode Datagaliwabe ibunaga Dinini anda ogoniha ho kagoni.
EPH 3:1 Irane ogoninaga i̱ Polo tí Yu wali agali ndo tara tara kamirunaga koyane Keriso Yasunaga garabaya agali kogoni howa i̱na Ngode Datagaliwabehondo tínaga bi la haruli.
EPH 3:2 Tí bayale halimulonaga Ngode Datagaliwabehanda ibunaga biamogo bia holene nginigome biabe ogoni i̱na berogo bia holiya nginigo tí hale harimigoni.
EPH 3:3 Ngode Datagaliwabehanda manda manda bu winidagua mana ala pani nahe ngelenego i̱hondo mo pani haya. Ogoninaga tene nemandi tongolo baga buwa abale gili birugoni.
EPH 3:4 Tígua ogoni daga larimiyagua mana ala pani nahe Kerisoha do henego i̱ manda bu kodagua tí manda buleberami.
EPH 3:5 Ngode Datagaliwabehanda mana ala pani nahe ngelenego ogoni wali agali ala heneru ti nalamini. Áyu ibugua ibu Dininime ibunaga abosolo loma bia hene karubi Ngode Datagaliwabe mana latagi haga karubi tihondo mo pani ho nga.
EPH 3:6 Ibugua mana ala pani nahe ngelenego ogo. Bi mana debene ngagome wali agali tara tarabi Yu wali agali heba Ngode Datagaliwabenaga turu holene ngaru tihondobi miaga ka. Tibi inabi homane mbiraore kamago Ngode Datagaliwabehanda Keriso Yasuha howa, Ngulebero, lalu lowinigo tibi mo yu ka.
EPH 3:7 Ngode Datagaliwabehanda i̱hondo biamogo bia holene turu halu bame ngialu i̱ bi mana debenenaga biabe biaga holiya mo helene. I̱na ibunaga biabe bia holiya ibunaga hongome i̱ mo hongo haya.
EPH 3:8 Ngode Datagaliwabenaga wali agali maru karubi ndo i̱ dindihaore kogoni. I̱ ogonibi kogoni howa Kerisonaga baya burugule wiaabo hagane ngarunaga Bi Mana Debene wali agali tara tara karu hale helo i̱na lamule poliyanaga Ngode Datagaliwabehanda ngiya.
EPH 3:9 Ngode Datagaliwabehanda manda manda bu winidagua wali agali bibahende karume ibunaga mana ala pani nahe ngelenego galone hendelo i̱na latagi holiyabi ibugua biabe ogoni i̱hondo ngiya. Ngode Datagaliwabe ibu bibahendeore wabiaga howa ibugua galone ogoni bambaore howa pani nahe ngelaabo henego irane ogo.
EPH 3:10 Áyu o kamangi Keriso hameigini kamarume hariha haru haga karubi hongo tara tara karubi Ngode Datagaliwabehanda ibu mini gigabinaga manda bulene tara tara ngaru manda bilo ibugua ibunaga mana ala pani nahe ngelaabo hene.
EPH 3:11 Ngode Datagaliwabehanda manda manda bu wiaabo henedagua ogoni binigo ina Anduane Homogo Keriso Yasu ibuha howa bumaro bini.
EPH 3:12 Ina Keriso heba ho gimbu bu howa ibuhondo mini mbiraore wirimarume ina Ngode Datagaliwabe deni gi nahe hada payabu howa pu holene henge nga.
EPH 3:13 I̱na tínaga tandaga na harogo mitangi bialu tí genda nahalimulo hame ledogo ogoni. Tandaga ogoni narogo tí bayale halimulonaga nalu ko.
EPH 3:14 Ai bi ala lala harugo aria laro. Irane ogoninaga Aba deni i̱na ge duli hangu ho biruwa ibuhondo bi lalu ko.
EPH 3:15 Wali agali hameigini tara tara dahuliya andagani karubi dindini karubi bibahendenaga Aba ibu howa tinaga mini henene mo yu ka.
EPH 3:16 Ngode Datagaliwabenaga hongo taraore holene timbuniore ngago tíninaga bu habaneha hongo halimulo hongo ogoni ibu Dininime ngilonaga i̱na ibuhondo mia lalu bi la halu kogoni.
EPH 3:17 Tígua ibuhondo mini mbiraore wu kamigome Keriso ibugua tínaga bu habaneha íbu helobi tínaga pinibi tenebi gubalini holeneha wiaabo helonaga bi la halu kogoni.
EPH 3:18 Tíbi Ngode Datagaliwabenaga wali agali bibahende karubi tígua Kerisonaga gubalini holene magi lirahayagibi nirahayagibi lunagabi aranenagabi nguini maro nabi ngago tí manda bilimulonaga hongo ngilo i̱na Ngode Datagaliwabehondo mia lalu bi la halu kogoni.
EPH 3:19 Kerisonaga gubalini holene ogoni tígua manda biai nahabeheorego lowa ibunaga gubalini holene manda bu halimulo hame ledo. Ani manda beramigola Ngode Datagaliwabenaga mbirale baya burugule tara tara ibuniha ngaru tíha wu to̱lai holebira.
EPH 3:20 Iname ngi laramadaguabi mitangi bidamadaguabi ndo ibugua ibunaga hongo inaha biabe bialu kagome ngia tago ha bia tago ha bigi bialu kago
EPH 3:21 Keriso hameigini karuha howabi Keriso Yasuha howabi Ngode Datagaliwabenaga mini mo yaraga haabobo bilo lalu aniore bilo hamelo ko.
EPH 4:1 I̱ Anduane Homogonaga biabe biaga kogonaga garabaya agali kogo i̱na tíhondo hongo howa laro. Ngode Datagaliwabehanda tí olayangi howa tíhondo agua bialu holene nga layadaguaore bialu halimu.
EPH 4:2 Tíni mo dindi ho ha hogorale bu ha ema nabi howa hibu la bigi bialu halimu. Tínaga gubalini holene walia halu tíni biamogo bigi bigi bialu halimu.
EPH 4:3 Mo palia holeneme tí mo bimaga ho helaga ngagoni. Mo palia holene ogonime mini mbiraore holene Ngode Datagaliwabe Dinini ibugua ngiaganego bayuwa yania ho halimu.
EPH 4:4 Mini dunu bia ho holene tínaga wilo Ngode Datagaliwabehanda tí olenego ogoni mbiraore ngadagua tingini homane mbiraorebi ibu Dininibi mbiraore ka.
EPH 4:5 Anduane Homogobi mbiraore ka. Mini mbiraore wulenebi mbiraore nga baboraya bulenebi mbiraore nga.
EPH 4:6 Ngode Datagaliwabe mbiraore kago ibu wali agali bibahendenaga Aba howa ibu bibahendenaga Anduane Homogo ka. Ibugua ina bibahendeha howa biabe biaga ka.
EPH 4:7 Keriso ibugua ibunaga biamogo bia holene ngadagua ina bibahende hangu hanguhondo biamogo bulene muguberu ta halu ngini.
EPH 4:8 Anduane Homogonaga mbugani lo ngadagua ogo, Ibu hari daligahaore iraga halu pialu howa ibugua garabayaru dewa haru pene. Ibugua wali agalihondo biamogo bulene muguberu ta halu mini, lalu gilibu nga.
EPH 4:9 Anigo, Ibu hari daligahaore iraga halu pialu, ledagoni irane agibe. Bi ogoninaga irane ogo. Ala ibu dindihaore dalini.
EPH 4:10 Dindihaore dalinigo ogoni ibu dege hari daligahaore dahabaneha iraga halu penego mbiraore ibu ka. Ibugua daligahabi dindihabi bibahendeoreha ibuni haame holenaga ani bini.
EPH 4:11 Ibunioreme wali agalihondo biamogo bulene muguberu ta halu mini. Mugube uru ale mini. Maru ti abosolo helo mialu maru ti Ngode Datagaliwabe mana latagi haga helo mialu maru ti Bi Mana Debene lamima piaga helo mialu maru ti wali agali haru haga helobi lawai haga helobi mialu bini.
EPH 4:12 Keriso ibugua ani binigo irane ogo. Ngode Datagaliwabenaga wali agali bibahendeme ibunaga biabe bia helo mo manda manda bia howa Kerisonaga tingini mo anda halu hongo helonaga ibugua ani bini.
EPH 4:13 Ani biyagome ina bibahende mandagi howa ina mini mbiraore wulenebi Ngode Datagaliwabenaga Igini manda bulenebi mbiraore holeberama. Ina wali agali mini bogabi howa Keriso ibu daliga timbuniore kadagua inabi anda ho daga howa holeberama.
EPH 4:14 Ani howa waneiginime mini dewa nawi hagadaguabi puyabume iba mo yaribu bia haragola mbirale ibani ngago pulo yu puibu daibu biagadagua bialubi agali mo hondo hagane bu karume wali agali ko ngagoha pelonaga mo guya halu mana tinime wabu wini ngaru hangu lawai haga bu karubi ndo holeberema.
EPH 4:15 Ani ndo ina bibahendeme mana beramaligo bialu howa gubalini holenebi henene hangu lolenebi mo tene halu inanaga haguane Keriso ibuha anda ho daga holene nga.
EPH 4:16 Ibugua ina haru haragola tinginini hene dege bibahende tigatiga gimbu buwa gimbu biaga kuni kagome tingini mo mbiraore haga ka. Tinginini hene degeru hangu hangu howa tini biabe bulene ngadagua bialu kagola gubalini holeneme tingini ibuni bibahende mo anda halu hongo halu haga.
EPH 4:17 Anigo i̱na Anduane Homogonaga minini howa bi mbira buleneore ngago manda bialu larogo ogo, Wali agali Ngode Datagaliwabe manda nabi karume hagadagua nahalimu. Tigua galone ndo mitangi biagabi
EPH 4:18 tinaga mini arumahebi ka. Tinaga miniha manda nawibi mangahebi kago holene gahenge Ngode Datagaliwabehanda ngiaganego tihondo namini ka.
EPH 4:19 Ti taga holene embedahe howa tini mana ko bulene ngagohondo mialu mana ko tara tara nabuleneore ngaru biaabo halu haga ka.
EPH 4:20 Kerisonaga mana lo manda birimigo ogonibi ndo.
EPH 4:21 Ibunaga mana tí hale harimigoni. Tí ibunaga talima piaga howa Yasuha henene lolene ngago tigua tí lawai hayagoni.
EPH 4:22 Tíbi nde mini ala tawenaga biaga wiaru dege bialu harimigoni wahalimu. Mini ala tawe ogonime tíni mo hondo halu mo ko holenebi mana ko ngaru bulenaga tínaga bu miniha dimagoli holenebi ngaru wahai halimu.
EPH 4:23 Tínaga gubalinibi minibi mo gahengeore holene nga.
EPH 4:24 Mini gahenge karulalimu. Ngode Datagaliwabehanda mini gahenge ibuni ale wabinigo ogonime holene heneneorebi mana tigabibi bayalebi walia haga.
EPH 4:25 Anigo ina bibahende Kerisonaga tinginiha hene dege howa homane mbiraore kamagonaga tindule wahalu tí bibahendeme tíni Keriso hameiginiruhondo henene dege laga bialu halimu.
EPH 4:26 Tí keba harimiyagua nde keba ogonime tí ko maru bilimulo mo bia holigo de hondo halimu. Tígua keba ho haabo ho kamiore dege ni paluani hondo halimu.
EPH 4:27 Dama Heyolabe anda ibilo henge mbira namilimu.
EPH 4:28 Wali agali ala pagebibi heneru ti lone page nabi ti henemane holenagabi wali agali yagibano karu biamogo bulenagabi ti yolo biabe bulene nga.
EPH 4:29 Bi lalu howa mo ko holene bi nalalimu. Bi bayale biamogo bulene bibi mo hongo holene bibi tíni buru padamiru ale mo yu anda ibulene bibi bi uruni ale lalimu. Tígua bi ani laramigome wali agali hale hararu ti mo bayale holebira.
EPH 4:30 Tígua Ngode Datagaliwabe Dinini mo tandaga nahalimu. Tí Ngode Datagaliwabenaga kami lalu walia holene ibunaga Dinini íbu ka. Hamaro bulene Horo ibirangi Ngode Datagaliwabehanda tí golope heneneore holebira lalu manane ibunaga Dinini íbu kagoni.
EPH 4:31 Handabe manga ho haabo holenebi gungu abale porabu para holenebi keba holenebi wahai halimu. Bi ko dalimu lolenebi mege bialu lolenebi nalalimu. Bu habaneha lembo holene ale mbira nawilo halimu.
EPH 4:32 Ani nabi turubini dege bigi bialu bu habane gedaore howa mbiralime emene liahe mbira birago la nabi wahaga haga bialu Ngode Datagaliwabehanda Kerisonaga minini howa tínaga ko birimigo domo wahayadagua tíguabi nde la nabi wahalimu.
EPH 5:1 Tí Ngode Datagaliwabenaga waneigini ibugua gubalinihe kamiru tí ibu ale hole manda bu halimu.
EPH 5:2 Mbirale bayale ngabi Ngode Datagaliwabehondo loma bia haganebi bo miaganebi miragola Ngode Datagaliwabe turu haganego ogonidagua Keriso ibugua ina gubalini howa ina holoma̱yanaga ibuninaga holene pela hene. Gubalini holene ogonibime tí haru helo holene nga.
EPH 5:3 Tí Ngode Datagaliwabenaga wali agali kamigo howa wali agali kayu bulenebi tinginime ko maru ale bulenebi dimagoli holenebi uruni alenaga lalu bame tebi heba lolene nawiore.
EPH 5:4 Tígua bi dodohebi bi ko tombe nahebi hegebi labe naheore kamigoni. Ani ndo tí Ngode Datagaliwabehondo turu halu ka̱i̱ lalu holene nga.
EPH 5:5 Mbira heneneore larogo ogo. Wali agali kayu biagabi tinginime ko maru ale biagabi dimagoli hagabi dimagoli holene ogoni mbirale tarahondo bi pupu wiagane mana damenego mana uruni biagarume Ngode Datagaliwabebi Kerisobi libugua Handame Ho Kagoria ti holene henge nawulebira.
EPH 5:6 Uruni alenaga lalu mbiralime tíhondo bi ko tombe nahe laragome tí mo hondo holigo de hondo halimu. Uruni aleni wali agali Ngode Datagaliwabehanda bia laradagua nabi karu ibunaga lembo holene tiha wiaabo holebira.
EPH 5:7 Anigo wali agali urunibi biaga karu heba mandagi nahalimu.
EPH 5:8 Ala tínibi arumaha harimigoni. Áyu tí Anduane Homogonaga wali agali kamigo tí wá holene kagoria ho kami. Ani kamigo tí wá holenenaga wali agali holene ngadagua halimu.
EPH 5:9 Wá kagome bayale bulenebi mini tigabi holenebi henene lolenebi lini urunibi daabo haga ka.
EPH 5:10 Anduane Homogo turu helo bulene mana lo manda bialu halimu.
EPH 5:11 Wali agali aruma holenenaga mana ko biaga karu heba mandagi nahalimu. Tígua mana ko biraru wá holeneni mo pani halimu.
EPH 5:12 Anigo tigua ohowa mana ko bialu karunaga te lolene tagabidago nale waharo.
EPH 5:13 Mana bibahende biraru wá holene kagoria mo pani haragola mana ko uruninaga teneore handai holebira.
EPH 5:14 Mbirale mbira mo pani hayagua ogoni wá holene aria haga. Ogoninaga bi lo ngago ogo, Padego í̠ de ngalalu homolene ngagoria howa heyabe. Ani beregola Keriso ibugua í̠ni wá ha dali holebira, lalu gilibu nga.
EPH 5:15 Anigo tíni bialu haramigo bayuwa manda bilimu. Tígua wali agali mini nawi karu hagadagua nahe mini gigabiwi karu hagadagua halimu.
EPH 5:16 Horo áyu kamaruni koangi kamago manda buwa bayale bulenenaga henge áyu ngagonigo bayale bilimu.
EPH 5:17 Tí mini nawi ale nahe howa Anduane Homogohanda tígua bilimulo hamelo kago agidabe manda bilimu.
EPH 5:18 Tígua lulu yule waini iba nagimbu nabilimu. Ogonime tí mo ko haga nga. Ani nabi Ngode Datagaliwabe Dinini ibugua tíha tolai helo halimu.
EPH 5:19 Tígua Iba Gananaga bibi Ngode Datagaliwabenaga iba ganabi ibunaga Dinini ibugua iba gana tí lawai haragonagabi uruni alego lalu tínihondo lagalaga bialu halimu. Tínaga gubaliniha Ngode Datagaliwabe mini yaraga hoa howa Anduane Homogohondo Iba Gana bibi Ngode Datagaliwabenaga iba ganabi lalu halimu.
EPH 5:20 Inanaga Anduane Homogo Yasu Keriso minini howa tígua Aba Ngode Datagaliwabehondo bibahende íbu ngarunaga ka̱i̱ laabo halu halimu.
EPH 5:21 Tígua Keriso ibu teneore ka mitangi bu kamigo howa tíni mo dindihaore hagahaga bilimu.
EPH 5:22 Anduane Homogohanda bia larago beramilidagua onene bedamiru tígua tínaga agalinime bia laradagua bilimu.
EPH 5:23 Keriso hameigini karunaga haguane Keriso ibu kadagua agalini ibu onenenaga haguane kagoni. Keriso hameigini bibahende karu ti ibunaga tingini howa Keriso ibu tinaga Pele Miaga ka.
EPH 5:24 Keriso ibugua bia larago Keriso hameigini karu bibahendeme biagadagua oneneru tígua tí agalinime bia larago biaiore holene nga.
EPH 5:25 Kerisohanda ibunaga wali agali gubalini howa ibuninaga holene pela hayagoni. Ani gubalini hayadagua agalini kamiru tí one gubalini holene nga.
EPH 5:26 Keriso ibugua ani buwa Keriso hameigini karu bibahende ibame baboraya biyagomebi Ngode Datagaliwabenaga bi mana laminigomebi ti mo bayale howa ibugua ti Ngode Datagaliwabenaga helo ibuhondo loma bia ho mini.
EPH 5:27 Ibugua ani binigo irane Keriso hameigini karu bibahende bayale helo ko mbira do nahebi ko mbira nawibi mana ko binigonaga motudu nawibi gahengebi baya buruguleorebi howa ti ibunaga helo ibugua ti ibunihondo mulenaga ani bini.
EPH 5:28 Anigo ogonidagua agalinime ibuni tingini gubalini haralidagua ibu one gubalini holene nga. Ibu one gubalini hagagome ibuni gubalini haga ka.
EPH 5:29 Mbiralime ibuninaga tingini handabe manga nahaga. Keriso hameigini kamaru ina ibu tingini aria dege kamago Keriso ibugua bayuwa hondo hagadagua iname inanenaga tingini bayuwa hondo haramali.
EPH 5:31 Anduane Homogonaga mbugani bi lo ngadagua ogo, Irane ogonigo agali mbirame ibu aba ai̱yala helalu ibu onela mandagi howa libu mbiraore holebira, lalu gilibu nga.
EPH 5:32 Bi ogoniha ala pani nahe ngelenego áyu pani ho ngago galone heneneore timbuni aube tobahe nga. Galone ogoni Kerisobi Keriso hameigini bibahenderubi mbiraore holenenaga ngaria hendedo.
EPH 5:33 Galone ogoni tínagabi ngago ogo. Agalini bibahende kamiru tígua tíni gubalini haramilidagua tínaga one gubalini halimu. Onene bibahende bedamiru tígua nde tí agalininaga bi hale halu bilimu.
EPH 6:1 Waneiginiru-o tí Anduane Homogonaga kamigo tí aba aíyalame bi laradagua hale halu bulene ogoni tigabigo ani bialu halimu.
EPH 6:2 Bulene nabulenebi mana lowini ngarunaga Ngode Datagaliwabehanda la tago halu, Bulebero, lalu lowinigo pigane ogo. Tí aba ai̱yala mo yo handa nabi laradagua hale halu bilimu. Ani bialu harimiyagua tí bayale halu dindi ogoriani lu holeberami, lalu gilibu nga.
EPH 6:4 Waneigini aba ai̱yaru-o tígua tínaga waneiginiru haru howa lawanana bialu mo keba nahalimu. Ani nabi howa Anduane Homogonaga mana lawai halubi mini wilo mana lolene ngadagua lalubi halimu.
EPH 6:5 Garabaya biabe ale bia hagaru-o tígua tínaga haru haga dindini karu mitangi bialu tigua bia laradagua mogo lowa baya hangu bilimu. Bialu howa Kerisonaga biabe bia harolo mitangi bialu henene minime bilimu.
EPH 6:6 Tínaga haru hagame tí de hendedaore bayale berami lelonaga hangu ndo tí de nahendedahabi bayale bialu halimu. Tí Kerisonaga garabaya biabe ale bia haga howa Ngode Datagaliwabehanda hame ledago tígua gubalini howa biai halimu.
EPH 6:7 Garabaya biabe ale bia haga howa biabe beramigo bame agalinaga bia harolo mitangi bialu ndo Anduane Homogonaga berolo mitangi bialu turu halu bilimu.
EPH 6:8 Garabaya biabe ale bia haga kamirubi nabini kamirubi ta nabi tígua biabe bayale beramigonaga yolo Anduane Homogo ibugua tí ngulebirago mitangi bialu halimu.
EPH 6:9 Garabaya biabe ale bia hagarunaga haru hagaru-o tígua tínaga garabaya biabe ale bia hagaruhondo ogonidagua dege bialu halimu. Ani bialu howa tihondo, Nabirimiyagua bolebero larogoni, bi ogonibi nalalimu. Tinagabi garabaya biabe ale bia haganagabi tí bibahendenaga Haru Haga mbiraore dahuliya andaga kago manda bilimu. Ibugua tí birimigonaga dabalu howa ta nabi mbiraore kami mitangi bialu dabaga ka.
EPH 6:10 Bi lamaro bialu larogo ogo. Anduane Homogoha ho gimbu bu howa ibunaga hongo holene timbuni ngagome tí mo hongo helowa halimu.
EPH 6:11 Dama Heyolabenaga ohowa mo hondo hagane mana ngagoria pi nale hongo howa bolangua hole tígua Ngode Datagaliwabenaga wai biagane ale ngiraru karulai halimu.
EPH 6:12 Iname wali agali baba wai berama ndogo dama tara tara hari daligaha karu baba wai bialu kama. Haru hagarubi hondo hagarubi hongo tara tara arumaheha karubi ti baba iname wai bialu kama.
EPH 6:13 Anigo Ngode Datagaliwabenaga wai biagane aleru áyu ogoni karulalimu. Ko holene ngangi tígua waitigi baba hongo howa wai bu maro bialu hongohe dege haabo holeberami.
EPH 6:14 Ani manda buwa wai bule nendebu halimu. Henene lolene tínaga mandibu ale ndibulo wuwa mini tigabi galuhombeneni karulowa
EPH 6:15 mo palia holenenaga Bi Mana Debene lamima polene ge su ale karulo halimu.
EPH 6:16 Ngode Datagaliwabehondo mini mbiraore wulene humbi ale yu haabo halimu. Ogonime dama Heyolabeme hungu biaga timume tí bole biragola mo hundia habehe holeberami.
EPH 6:17 Pele mulene yu kamigo manda ale karulowa Ngode Datagaliwabe bi mana gilibu ngago ibunaga Dinini ibugua tíhondo ngiyago wai bulene ayu tibu ale mo yu halimu.
EPH 6:18 Ani bialu howa tígua Ngode Datagaliwabehondo, Biamogo bia, lalu laabo halimu. Ngode Datagaliwabe Dinini ibugua la lalu langiradagua bibahendenaga Ngode Datagaliwabehondo bi la haabo halimu. Ani bulenaga mamage halu wahalu nape hibu lalu halimu. Ngode Datagaliwabenaga wali agali bibahende karunaga tígua ibuhondo bi la haabo halimu.
EPH 6:19 Ngode Datagaliwabehanda i̱na bi lolenego langilo i̱nagabi nde bi la halu halimu. Ani langiragola i̱na gi nahe elahe howa bi mana debenenaga galone ala pani nahe ngelenego bayuwa lawai holiyanagabi bi la halimu.
EPH 6:20 Áyu nde i̱ dariba kagola kogoni howa bi mana debene ogoni lamima piaga i̱ kogoni. Anigo i̱na bi mana debene ogoni lamulene ngadagua gi nahe elahe howa lamuliyanagabi tígua Ngode Datagaliwabehondo bi la halimu.
EPH 6:21 Inanaga hameiginiore Tiyagasa ibu mini bilinahe howa Anduane Homogonaga biabe bia haga kago ibugua i̱ bayale kogobi i̱na bialu kogobi tí hale halimulo te ogoni tí langulebira.
EPH 6:22 Ibugua ani langilo i̱na tí kamiria ibu pu laro. Ibugua ina kamarume bialu kamagonaga te tí langiragola tínaga mini mo hongo holebira.
EPH 6:23 Aba Ngode Datagaliwabebi Anduane Homogo Yasu Kerisobi libugua Keriso hameigini bibahende tíhondo mo palia holenebi gubalini holenebi mini mbiraore wulene heba ngilo hamelo ko.
EPH 6:24 Inanaga Anduane Homogo Yasu Kerisohondo gubalini holene wa nahe yu haabo karu tí heba Ngode Datagaliwabenaga biamogo bia holene wiaabo helo hamelo ko.
PHI 1:1 Polo Timodibi iyame Keriso Yasunaga biabe bia haga howa Ngode Datagaliwabenaga wali agali Pilibaini Keriso Yasuha ho gimbu bu kamirubi Keriso hameiginiru haru haga kamirubi biamogo biaga kamirubi tí bibahendehondo beba ogo gilibu wia haraba.
PHI 1:2 Ina Aba Ngode Datagaliwabebi Anduane Homogo Yasu Kerisobi libugua biamogo bia holenebi mo palia holenebi tíhondo ngilo hame ledo.
PHI 1:3 I̱na tí mitangi beroangi Ngode Datagaliwabehondo ka̱i̱ laruli.
PHI 1:4 I̱na Ngode Datagaliwabehondo bi lalu howa tí bibahende mitangi biai halu turu howa bi la haruli.
PHI 1:5 Irane tígua i̱ biamogo bialu bi mana debene lamulene biabe ogoni pigane tehinarimangi howa bialu harimago áyubi bia ho wiaabo kamagonaga ibuhondo turu halu ka̱i̱ lalu kogoni.
PHI 1:6 Ngode Datagaliwabehanda tíha biabe bayale pigane biyagoni Keriso Yasunaga Horo harangi bia maro bule lowa ibugua bia ho wiaabo holebiralo manda bu ko.
PHI 1:7 Horo bibahendengi tí i̱naga gubaliniha mitangi bu wiaabo hagago ogoni tíhondo gubalini ho kogobiore bira. Biamogo bia holene biabe ogoni Ngode Datagaliwabehanda i̱hondo ngiyago i̱naga hangu ndo tíbi i̱ heba biabe mandagi howa bialu kama. I̱ ala garabaya nahe hewangibi áyu garabaya bidagola kogo howabi wali agalime Bi Mana Debene yu tiga bilo lamulenaga wai bialu kogola tíbi nde ina haru mandagi bialu harimago kamagoni.
PHI 1:8 I̱na tíhondo gubaliniore ho kogonigo gubalini holene ogoni Keriso Yasu ibuninaga gubaliniha howa ho kogoni larogola i̱na heneneore larogo Ngode Datagaliwabe ibu manda bu ka.
PHI 1:9 I̱na Ngode Datagaliwabehondo tínaga bi la haruligo ogo. Tínaga gubalini holene anda halu wiaabo helobi manda bulene henenebi daba ki bulene tiga tigabi heba anda halu wiaabo helonaga laruli.
PHI 1:10 Mbirale dabolene ngagola bayaleorego dabalimulonaga bi la haruli. Ani dabarimiyagua Kerisonaga Horo harangi tíni ko mbira para nahe tigatiga holeberami.
PHI 1:11 Ngode Datagaliwabe mini daliga taraore lelonagabi ibu mini mo yaraga helonagabi mana tigabiore bulenenaga lini Yasu Keriso ibunime ngiagago ogoni tíha to̱lai helo i̱na bi ogoni la haruli.
PHI 1:12 I̱ hamene mbaliniru-o i̱hondo mbirale biyarume Bi Mana Debene heneneore lo yu lelonaga biyago manda bilimulo hamelo ko.
PHI 1:13 Ani bidago haru haganaga ami agali mamage haga bibahende karubi maru bibahende ogoriani karubi tigua i̱ garabaya kogoni irane Kerisonaga biabe bia haga harugome kogoni manda biai ka.
PHI 1:14 Ai i̱ garabaya anda kogome Keriso hameigini dewa karu tinaga miniha mo hongo kagola tigua Anduane Homogohondo mini mbiraore hongohe wu ka. Ani bialu tigua Ngode Datagaliwabenaga bi mana lamialu howa mo hongoore haragola gi nahe lalu ka.
PHI 1:15 Ti marume tinaga miniha lai lolenebi ponana mini wu howabi Keriso mini lalu lamiaga ka. Ti marume mini henemane wu howa Kerisonaga mana lamiaga ka.
PHI 1:16 Bi mana debene wali agalime heneneore winidago lalu bayuwa yu tiga bilonaga i̱ garabaya andaha helayada manda buwa ti marume gubalini howa Kerisonaga mana lamiaga ka.
PHI 1:17 Marume mini henene wu howa ndo tini mini mo yaraga holenaga Kerisonaga mini lalu lamiaga ka. Tigua i̱ garabaya andaha koria tandaga nolene lone mo tago helonaga lamiaga ka.
PHI 1:18 Nde abini. Ti mini ko wu howa layaguabi bayale wu howa layaguabi ta nabi tigua Kerisonaga mana dege lamiaga kago mitangi buwa i̱ turu ho ko. Nde turu ha ho wiaabo holebero.
PHI 1:19 Irane tí kamirume Ngode Datagaliwabehondo i̱naga bi la ho wiaabo haramiligobi Yasu Keriso Dinini ibugua i̱ biamogo biaabo hagagomebi i̱ golope holebiraore manda bido.
PHI 1:20 I̱naga bu miniha howa bule hame lalubi mini dunubia ho kogobiore ogo. I̱na biruligobi bi laruligobi mitangi bialu yu wa naholeberoore. Horo bibahendengi áyu kogoni howa gi nahe mana lade haabo harulidagua laabo hole hame timbuni lo kogoni. I̱ haruyaguabi homaruyaguabi ta nabi i̱na berogome Kerisonaga mini yaraga holenaga bialu holebero.
PHI 1:21 I̱na manda bidogo ogo. I̱ haruyagua Kerisonaga mini yaraga halu holebero. Homaruyagua nde baya gibiore yu holebero.
PHI 1:22 Ani ndo i̱ tingini nahome haabo haruyagua i̱na biabe bayaleore biaabo holiyanaga biyadago loleberogoyu ago daboabe tobaho ko.
PHI 1:23 Kirabalime i̱ mini yani haga haga bidagola kogoni. I̱naore dindi ogo wahalu homalu Kerisola haabo hole polenegoore bayaleoredane hondo ko.
PHI 1:24 Ani bibehego tí mitangi bialu tí bayale halimulonaga i̱ tí heba haabo kogoni.
PHI 1:25 Aniore bidalo manda bidogo i̱ tí bibahende baba howa i̱na tí biamogo bialu Ngode Datagaliwabehondo mini mbiraore wu kamigoha anda holenebi turu holenebi wia tago helo holebero.
PHI 1:26 Ogonidagua i̱ tí heba lone kogola tígua Keriso Yasuha howa i̱ tínaga hameigini kogo mitangi bialu Kerisonaga mini yaraga holene irane timbuniore wulebira.
PHI 1:27 Anigo galone buleneore ngago ogo. Wali agali baba howa tígua bi laramirubi mana beremirubi bibahende Kerisonaga bi mana debeneme ledadaguaore bialu halimu. I̱na tí kamiria handama ibiruyaguabi naibiruyaguabi tí mini mbiraho ka larane hale holebero. Tí hongo howa biabe mandagi ogo bima lalu wali agali marume bi mana debene hale howa mini mbiraore wilonaga bialu kami manda bulebero.
PHI 1:28 Ani beramigola tí baba waitigi haga birarume tini koha polene ngagobi tí kamiru pele mulene yu holene ngagobi walia holebira. Ogoni Ngode Datagaliwabe ibunimeore bulebira.
PHI 1:29 Ngode Datagaliwabehanda tígua Kerisohondo mini mbiraore wulene hangu ndo ngini. Ibugua tí Kerisonaga howa tandaga na holenebi tíhondo ngini.
PHI 1:30 Ala i̱na wai ogonidagua dege bialu hewaria tí de handarimigoni. Áyubi ogonidagua dege bialu kogoni hale ho kamigoni. Wai ogoni dege tíguabi bialu kamigo manda bilimu.
PHI 2:1 Tí Kerisoha kamigome tí mo hongo hagabe. Ibunaga gubalini holeneme tínaga miniha mo turu hagabe. Tí Ngode Datagaliwabe Dininila mini mo mbiraore ho haramilibe. Tíni dara howa biamogo bia hagahaga beramilibe.
PHI 2:2 Turu holene i̱ha to̱lai helonaga tínaga mitangi ogobi degedege wia gubalini hagahaga bia mini mbiraore ha mini mo mbiraore howa bi mbiraore la bigi bialu halimu.
PHI 2:3 Tígua tíninaga mini mo yaraga holenagabi mine holenagabi mbira bulene nawi. Tíni mo dindiha halu wali agali maru karu mitangi bialu halimu. Ina daliga kamagobi ndo ti dindiha ka manda nabilimu.
PHI 2:4 Mbirale tíni hangunaga bule manda nabi howa wali agali maru karu mitangi bialu biamogo bule manda bilimu.
PHI 2:5 Tígua Keriso Yasu ibugua mini wiyadagua wilimu.
PHI 2:6 Ibugua piganengi howa mini wiyago Ngode Datagaliwabeore hene. Ibu Ngode Datagaliwabela ogobi labolabo haabo hole lowa yania ho wiaabo hole manda nabi hene.
PHI 2:7 Ani nabi ibuni ala hayago yupe halu ibu biabe bia haga ho dalini. Ina kamaru taba henenedagua ibubi taba hanalu mo agali hene. Ibu agali ibuniore halu ha pani hene.
PHI 2:8 Ibugua bulene winigo biaore halu ibuni mo dindiha halu nde homolenebi karulape lalu ira bangani homole pene.
PHI 2:9 Irane ogoninaga Ngode Datagaliwabehanda ibu mo heya halu daligaore helo helenego ka. Ani bu helowa ibugua marunaga mini bibahende bolangua hai halu ibuhondo mini timbuni gibiore mini.
PHI 2:10 Ani bidago hari daligaha karubi dindini kamarubi dindi andaneha karubi bibahendeme Yasunaga mini laragola hale howa ge duli hanga ho birai holebira.
PHI 2:11 Ani bu biruwa tigua latagi halu lalu, Yasu Keriso ibu Anduane Homogoore ka, lalu Aba Ngode Datagaliwabenaga mini yaraga halu lolebira.
PHI 2:12 Ani bidago i̱naga nenege turubiru-o i̱ tí heba harimangi i̱na bia larudagua hale halu tígua birimigoni. Áyu tíni hangu kamigoni howabi ina bia larodagua buleneore ngagoni. I̱na bi larogo haleore halu beramine. Tígua biabe bialu howa Ngode Datagaliwabehondo gi halubi inane hangu nakarulape kama mitangi bialubi tíninaga pele mulene Yasuhanda ngiyago ya maro bule ani bilimu.
PHI 2:13 Irane Ngode Datagaliwabe ibuni tínaga miniha howa biabe biaabo halu ka. Ibu turu helo biabe bulene tígua hame lalu bilimulo ibugua tí mo hamela halu biamogo bialu ka.
PHI 2:14 Wali agali marume tígua beramigo hondowa, Tí kagua bialu kami, nalelo tígua mbira beramigo bibahende bialu howa manga halu lai lalu howa nabilimu.
PHI 2:15 Ani birimiyagua wali agali mini kowibi mana ko biagabi karu ti heba howa tí Ngode Datagaliwabenaga waneigini baya burugule holeberami. Holenenaga bi mana lamialu kamiru yakundi harini dedagobi howa tígua mo wá halu holeberami. Ani bialu harimiyagua Kerisonaga Horo harangi i̱na harigani puabo halu harugobi biabe biaabo halu harugobi bame bu wahole ndo bialu harudagola tíhondo turu holebero.
PHI 2:17 Tígua Ngode Datagaliwabehondo mini mbiraore wirimigo ibuhondo mbirale bo lomabu miagadagua mirimigoni. Ogoni Ngode Datagaliwabehondo mialu howa waini iba odo tago hagadagua i̱naga darama pela tago holene wiagua nde i̱ turu holebero. I̱ turu ho kodagua tíbi turu hamaga holene nga.
PHI 2:18 Ogonidagua dege tí turu ho kamigoha i̱bi nde turu hamaga holebero.
PHI 2:19 I̱ turu holiya tígua bialu kamigo te hale hoa howa Anduane Homogohanda Timodi tí kamiria ibilolene nga layagua nde i̱na abale ibilagua.
PHI 2:20 I̱na mitangi birulidagua marume mitangi nabiaga Timodihanda hangu mitangi biaga kago tíbi mitangi bialuore ka.
PHI 2:21 Wali agali bibahendeme Yasu Kerisonaga biabe bulene mitangi nabi tininaga biabe bulene hangu mitangi bialu ka.
PHI 2:22 Timodi ibu bayaleore kago tí manda bidami. Igiri mbirame ibu aba biamogo biagadagua Timodi ibu i̱ heba bi mana debenenaga biabe bialu haribagoni tí manda bidami.
PHI 2:23 I̱ garabaya kogoni tigua agi birabe handamaro buwa nde Timodi tí kamiria abale ibilole manda bu ko.
PHI 2:24 Anduane Homogo ibugua hame ledadagua i̱hondo walia hayagua nde i̱bi abale ibule manda bido.
PHI 2:25 Ina hamene Ebaborodaidasa ibubi tí kamiria dai bilo pu lolene nga manda bido. I̱ buru pale hewaria tígua ibu, Pu, larimigome i̱ biamogo bule ibiya. Ibalu ibugua i̱la Yasunaga biabebi waibi mandagi bialu hariba.
PHI 2:26 Tígua ibu warago bo wiyago hale harimigo ibuni hale halu mini tumutumu wu howa tí kamiria ibule hamelo ka.
PHI 2:27 Ibu warago timbuniore balu homolene kaware winigo ani wiaria Ngode Datagaliwabehanda ibu dara halu biamogo biya. Ani biyadagoni ibu hangu ndo i̱hondobi dara halu biamogo biyago irane genda timbuni i̱ha wia tago ho winigo ibugua i̱ dara halu biamogo biya.
PHI 2:28 Anigo tígua ibu lone de hondowa turu halimulobi i̱naga dara holene ereba helobi ibu tí kamiria ibilo pu lolene karulape manda bu ko.
PHI 2:29 Ibu ibiragola tíbi ibubi Kerisoha howa tígua turu halu, Hama, lalimu. Agali ogonibihondo mitangi timbuniore bu holene nga.
PHI 2:30 Tígua i̱ biamogo bua ho hemigo tínime bibe naheyagola Ebaborodaidasa ibugua bia aribia haya. Ani biyagola nde Keriso mitangi bialu biabe bialu hearia homolene kaware wini.
PHI 3:1 Bi lamaro bialu larogo ogo. I̱ hamene mbaliniru-o Anduane Homogoha howa turu haabo halu halimu. Bi ala larugodagua lone labe manga nahe howa tí bayuwa bialu halimulo biamogo bialu laro.
PHI 3:2 Agali maru biango gabua ale howa ohalu mana ko biaga karume dongone podo mabu biagane mana harugo lowa bulene nga lagago tí de hondo halimu.
PHI 3:3 Dongone podo mabu biagane mana henemaneyi ti ndo ina kamagoni. Ngode Datagaliwabe Dinini ibu ina haru kagome Ngode Datagaliwabe henemane mitangi bialu ibunaga mini yaraga halu Keriso Yasuha howa ina turu haramali. Tingini tagirahayagi howa biaganego iname mo galone naharamali.
PHI 3:4 Tingini tagirahayagi howa biaganego galone ngayagua i̱ gi nahe karulape bibehe kogoni. Mbiralime mana ogoni mo galone hayagua i̱na mo galone timbuniore holene manda bibehe kogoni.
PHI 3:5 I̱ taba hanayangi howa horo halinini tigua i̱ dongone podo mabu bini. I̱ Isaraeleali howa Beniyamini hameigini mbirago kogoni. I̱ aba ai̱yala libu Hiburu wali agaliore henego i̱bi Hiburu agaliore kogoni. I̱ Perisi agali howa Yu wali agalinaga Mana lowini ngadagua bialu haga harugoni.
PHI 3:6 Perisi agalinaga mana ogoni yu tiga bu harugonaga hongo walia halu Keriso hameigini heneru balu mo tandaga haabo haru. Mana lowinigome bulenebi nabulenebi wiadagua biaiore harugo i̱hondo mbira nakarulape biri lolene nawini.
PHI 3:7 Áyu Kerisola howa ala galonedalo manda bialu harugoni ai nagaloneyane handa walia haru.
PHI 3:8 Ogoni dege ndo i̱naga Anduane Homogo Keriso Yasu manda bu holene bayale gibiore ngagome mbirale bibahendeore nagaloneyane handa walia hai kogoni. Aniyane i̱na Keriso mitangi bialu ala yu haruruni bibahende wahai haru. I̱naga yolo Keriso ibu kago i̱na yu tiga buwa i̱la ibula mbiraore holenaga bibahendeore ala yu harugoni ko ngubidago manda buwa wahai harogoni. Mana lowinigome bia layadagua i̱na bialu harugome mini tigabi wu ko manda bu harugo. Áyu ogonidagua ndo i̱na Keriso yu tiga bu kogome Ngode Datagaliwabehanda i̱hondo, Í̠ mini tigabiwi kegoni, layagola ko.
PHI 3:10 I̱na hameledogo hangu ogo i̱ Keriso manda buwa ibu homowa mo heya henegonaga hongobi manda bua ko. Ibugua tandaga nayadagua i̱bi tandaga nalu ibu homayadagua ibuha homolene hamelo ko.
PHI 3:11 Irane i̱ ibuha homowa mo heya holebiraore lowa mini dunu bia ho kogoni.
PHI 3:12 I̱na larugoni áyu i̱ bolangua howabi i̱ bayaleore kogoni lalubi ndo laru. Ani nabigo i̱ Keriso Yasu ibugua i̱ mo ibunaga henego kogoni howa ai i̱ hameledogo larugo muleore lalu hongo howa pialu kogoni.
PHI 3:13 Hamene mbaliniru-o heneneore larogo i̱na hameledo larugoni abale yu kogonidalo manda nabido. Galone mbiraore dege biruligo langero. I̱naga erembiraha ngaru embeda halu deme ngane hendedogo mule bayuwa hendedogoria hondo yalu puabo haruli.
PHI 3:14 Ngode Datagaliwabehanda Keriso Yasuni howa, Dahuliya andagani holene mo yule íbu, lalu olenego i̱hondo ngilo i̱na pumaro bulene ngagoria hondo yalu puabo halu ko.
PHI 3:15 Keriso hameigini mini bogabi kamaru iname ogonidagua mitangi bialu holene nga. Tí maru kamirume ogonidagua ndo tara bialu kamiyagua Ngode Datagaliwabehanda walia holebira.
PHI 3:16 Ogoni áyu kamagoni howa mana bayale ala mo yu harimagoni hongo howa yalu puabo hami̱ya.
PHI 3:17 Hamene mbaliniru-o tí bibahendeme i̱na birulidagua biaabo halimu. Iname bialu haramalidagua marume bialu karu de handalu bilimu.
PHI 3:18 I̱na tí ala langiaabo halu harugo áyu nde de ibala haru howa langerogo wali agali dewali tigua bialu kagome Keriso ira bangani homayagonaga mo waitigi haga ka.
PHI 3:19 Ani bialu karu ti heli dindi polene nga. Tini tinginime dimagoli holene hame lagabi ti taga holene ngagonaga mine halu karuni tigua dindini ngaru hangu mitangi buwa bialu haga.
PHI 3:20 Ai ina dahuliya andaganaga wali agali kamaru inanaga Pele Ngiaga Anduane Homogo Yasu Keriso dahuliya andaga howa daiore bilo lowa hondo kama.
PHI 3:21 Ibugua inanaga tingini hongo nahe kamagoni mo taraore halu ibuninaga tingini baya taraore kagobi dege mo karula holebira. Ibugua bibahende ngarubi karubi haru hai hole ibunaga hongo gibi kagome haru hagago hongo ogonime ina mo tara holebira.
PHI 4:1 I̱ hamene mbaliniru-o i̱na tí gubalini halu de hondole lalu ko. Tígua i̱ mo turu haramiligonagabi i̱na biabe birugonaga lini tí kamigo hondowabi i̱naga mini yanga ledagola ko. Ani bidago i̱naga nenege turubiru-o tí Kerisoha howa ema nabi mini bilina ho halimu.
PHI 4:2 Yuodia Sindigila libuhondo bi mbira loa kogo ogo. Libu Keriso hamewane biruwa mini mbiraore nahe bedabigo mini mbiraore ho biralibu laro.
PHI 4:3 I̱ hamene heneneore kego í̠na wali ogoni labo biamogo bia habe. Bi mana debenenaga biabe buliya libugua i̱ biamogo bia haya. Libugua biyadagua Kelemendi ibuguabi maru kamirumebi ina haru biabe mandagi birimagoni. Tinaga mini Ngode Datagaliwabenaga mbugani haabobo holene yu kamarunaga mini bilibu ngagoria bilibu ngagoni.
PHI 4:4 Tí Kerisoha ho gimbu bu kamigonaga turu haabo holene nga. Lone loyane berogo turuore ho halimu.
PHI 4:5 Wali agali bibahende karume ti mini baya gibiwi gedaore kamigo manda bilo mini baya gibi wuwa halimu. Anduane Homogo dai bulene tu kaware ngagoni.
PHI 4:6 Tí mini burugu lo nahe howa mbirale nayi kamiru Ngode Datagaliwabehanda ngilo bi lamiaabo halimu. Ibuhondo ngi lalu howa gubaliniore howa ka̱i̱ lalu ngi lalimu.
PHI 4:7 Ani larimiyagua tí Keriso Yasuha ho gimbu bu kamigo Ngode Datagaliwabenaga mo palia holene dindi agalinaga manda buleneme mitangi nabibehe ngago ogonime tínaga gubalinibi minibi haru holebira.
PHI 4:8 Bi ogo lamaro bialu laro. Hamene mbaliniru tínaga miniha bayale bulenebi mana bayalenaga mini yaraga holenebi henene lolenebi mini daliga wulenebi mini tigabi holenebi mini gahenge holenebi bayale holenebi mini lene holenebi urunibime tínaga miniha to̱lai helo halimu.
PHI 4:9 I̱na bi larugobi mana birugobi handalu mo yu harimigodagua bu manda bialu halimu. Ani birimiyagua mo palia holene ngiagane Ngode Datagaliwabe kago ibu tí heba holebira.
PHI 4:10 Bambaore tígua i̱ mitangi bialu biamogo birimidagua áyubi lone mitangi bialu biamogo bulene wiaria handa walia harimigonaga i̱ Anduane Homogoha howa turu ho kogoni. Tígua i̱ mitangi nabi harimi ndo mitangi biaabo howa biamogo bulene henge dege handa walia nahe harimi manda bido.
PHI 4:11 Ani birimigola i̱ buru pale harugo lalu ndo larogoni. I̱ni yidogoniore yuwa holenego karulapeoreyane handa walia kogoni.
PHI 4:12 I̱ nayi buru pale howabi dewa yu howabi mini bilina ho kogoni. Mbira hangu ogodagua bulene wiaria handa walia haru. Mbiraha piruyaguabi haruyaguabi tomo karulape nowa haruyaguabi nane haruyaguabi emene yu haruyaguabi timbuni yu haruyaguabi i̱ turu haabo ho kogoni.
PHI 4:13 Keriso ibugua i̱hondo hongo ngiragome i̱na bibahende bulenego hongo karulape ho ko.
PHI 4:14 Tígua nde i̱ genda dewa yu hewago hondowa biamogo birimigo bayaleore birimigoni.
PHI 4:15 Ala i̱na Masedonia dindi wahalu Bi Mana Debene pigane lamima pialu hewaria biabe ogoni i̱na buliyanaga Keriso hameigini Pilibai tanoni kamiru tí degeme i̱ biamogo bialu muni ngirimigoni.
PHI 4:16 I̱ Tesalonaiga hewariabi i̱ biamogo bialu harimigo halu mbira hangu ndo halu kibi biamogo birimigoni.
PHI 4:17 Tígua i̱hondo mbirale ngilimulo hame lowa hangu ndo tínaga yu kamiru Ngode Datagaliwabehanda maru ngia tago helonaga hamelo ko.
PHI 4:18 Tígua i̱naga wia harimiyago mirugonaga laro. O biaruni dewaoreya maru ibira holene yu ko. Tígua Ebaborodaidasa ibuhondo i̱naga mbirale wia harimiyaru bibahende yalu ibalu ngiyago dewaore bolangua howa ngirimiya. Mbirale ngabi bayaleore Ngode Datagaliwabehondo miragola hondowa Ngode Datagaliwabehanda turu hagago ale tígua i̱ ngirimigoni.
PHI 4:19 I̱naga Ngode Datagaliwabe kago ibugua ibunaga mbirale dewa baya gibi Keriso Yasuha ngaru tíhondo ngulene ngago karulapeore ngulebira.
PHI 4:20 Ngode Datagaliwabe ibu inanaga Aba kago ibunaga mini mo yaraga holene wiaaboboore bilo hamelo ko. Aniore bilo laro.
PHI 4:21 Ngode Datagaliwabenaga wali agali Keriso Yasuha ho gimbu bu kamiru hangu hanguhondo mitangi bu ko lalu lawia haro. Keriso hameigini i̱ heba karu tiguabi, Tí mitangi bu kama, lalu lawia hara.
PHI 4:22 Ngode Datagaliwabenaga wali agali maru ogoria karubi maru Lomonaga Kini andagaha karubi bibahendeme, Tí mitangi timbuni ho kama, lalu lawia hara.
PHI 4:23 Anduane Homogo Yasu Kerisonaga biamogo bia holene tí bibahende kamigoha wiaabo helo hamelo ko.
COL 1:1 I̱ Polo Ngode Datagaliwabe ibuni hame leagome Keriso Yasunaga abosolo kogoni. I̱bi ina hamene Timodi ibubi iyame
COL 1:2 Ngode Datagaliwabenaga wali agali tí ina hameigini Kerisoha howa mini bilinahe haabo howa Kolosini kamiru tíhondo beba ogo gilibu wia haraba. Ina Aba Ngode Datagaliwabe ibugua biamogo bulene nawi howa biamogo bia holenebi mo palia holenebi tíhondo ngilo hame ledo.
COL 1:3 Iyame inanaga Anduane Homogo Yasu Kerisonaga Aba Ngode Datagaliwabe ibuhondo tínaga bi la halu howa ka̱i̱ laabo harabali.
COL 1:4 Tí kamirume Keriso Yasuhondo mini mbiraore wiaabo howa kamigobi Ngode Datagaliwabenaga wali agali bibahende karuhondo gubalini ho haramiligobi iyame hale howa ka̱i̱ lalu harabali.
COL 1:5 Bi lamulene heneneore ogoni Bi Mana Debene tí hemiria pigane ibiyagola mana ogoniha tígua mini dunu bia ho holene wiago hale harimi. Ani buwa tígua mini mbiraore wirimigobi gubalini harimigobi tene tínaga mini dunu bia ho kamigo dahuliya andagaha do ho ngane hendedamigo ogoni.
COL 1:6 Bi mana debene ogonime turu holene lini dewa mo da halubi wali agali dindi bibahendeni kagoha anda halubi ka. Tígua Ngode Datagaliwabehanda biamogo bulene nawi howa biamogo bia holene ngiyago pigane hale howa heneneoreyane handa walia ho harimingi howa bi mana debene ogoni anda haabo halu ka.
COL 1:7 Ebaborasa inanaga biabe biamogo biaga turubiore kago ibugua Ngode Datagaliwabehanda biamogo bulene nawi howa biamogo bia hayago mana ogoni tíhondo lawai hayagoni. Ibugua mini bilinahe howa Kerisonaga biabe bialu iyanaga bia haga ka.
COL 1:8 Ngode Datagaliwabe Dinini ibugua tíhondo gubalini holene ngiyagoni Ebaborasahanda iyahondo langiya.
COL 1:9 Tí ogonibi kami lalu pigane hale haribangi howa iyame Ngode Datagaliwabehondo tínaga bi la haabo halu henego kaba. Ngode Datagaliwabehanda hame ledago manda bulene tíha to̱lai helobi mini gigabi wulenebi mitangi bulenebi bibahende ibunaga Dinini ibugua ngiaga ngaru tíha wilobi iyame Ngode Datagaliwabehondo bi la halu kaba.
COL 1:10 Ani larabago ibugua biragola tígua Anduane Homogohanda tí halimulo hame ledadagua halubi ibu turu helo bulene ngadagua bialubi holeberami. Ani bialu kamigola tíha howa lini bayale dewa datagi halu tígua biabe bayale tara tararu bialubi Ngode Datagaliwabe ogobi kagolo manda bulene anda halubi holeberami.
COL 1:11 Tínaga gendabiru ngagola ta nabi howa tí ema nabi hongo haabo halimulo Ngode Datagaliwabenaga hongo holene baya taraore kagome ibugua tí mo hongo helo laro. Ngode Datagaliwabehanda ibunaga wali agali wá holene kagoria kagola howa tihondo mule manda bu wini ngago Abahanda tí kamirubi ta halu ngule lowa tí mo karulape henego manda bialu tígua turu howa ibuhondo ka̱i̱ lalimu.
COL 1:13 Aruma holenenaga hongome ina dariba ho wiaria hondowa Ngode Datagaliwabehanda ina gini mialu ibu Igini gubaliniore ho kagome handame ho kagoria ina bayuwa haru anda ibuwa heleda.
COL 1:14 Igini ogoni ibugua iname ko birimago domo wahalu ina golope ho helene kama.
COL 1:15 Keriso ibu Ngode Datagaliwabe iname de nahandabehe kagobi howa ibugua ina walia halu ka. Ibu Ngode Datagaliwabe Igini wahene howa mbirale bibahende wabini karunagabi ngarunagabi ibu haguaneore ka.
COL 1:16 Ngode Datagaliwabehanda ibu Iginiha howa hariha karubi ngarubi dindini karubi ngarubi bibahende wabini. Deme handabehe karubi ngarubi nahandabehe karubi ngarubi hari daligaha hongo tara tarahe karubi homogo karubi haru haga karubi hondo haga karubi bibahendeore ibuha howa wabini. Ngode Datagaliwabehanda ibu Iginiha howa uruni bibahendeore ibu Igininaga helo wabiai hene.
COL 1:17 Uruni bibahendeore ala hene ndo Keriso ibu alaore howa bibahendeore karubi ngarubi ti Kerisoha ho gimbu bu halu ibugua tinaga holene yamaga hai howa ka.
COL 1:18 Keriso hameigini bibahende karu ibunaga tingini howa ibuni haguane ka. Tingini ogoninaga holene tene ibuni ka. Bibahende karubi ngarubinaga haguane ibuni hanguore helo ibu Ngode Datagaliwabe Igini wahene henego homalu tongolo miyagola mo heya hene.
COL 1:19 Ngode Datagaliwabehanda ibuni manda binidagua ibu Igini ibuni kagobiore kagoni.
COL 1:20 Ani binigo Ngode Datagaliwabehanda ibu Iginiha howa mbirale bibahendeore karubi ngarubi ibu kagoria haru dai bule manda bini. Ibu Igini ira bangani homayagome Ngode Datagaliwabehanda dindini karubi ngarubi hari daligaha karubi ngarubi bibahendeore mo palia hai howa ibuni kagoria haru dai biai hene.
COL 1:21 Ala tígua Ngode Datagaliwabe erembira mialu kaundiaore pu harimi. Ogoni tígua mana ko bialu harimigomebi mini ko wialu harimigomebi Ngode Datagaliwabela waitigi ho harimigoni.
COL 1:22 Áyu nde ibu Igini ibugua tandaga nalu homayagome Ngode Datagaliwabehanda tí ibunaga mo nenege helene kami. Ani binigo irane tíni ibuhondo loma bia hene howabi mini gahenge karulo howabi ko mbira tíha para nahebi kamigola ibunaga deni haru ibulenaga ani bini.
COL 1:23 Tígua nde Ngode Datagaliwabehondo mini mbiraore wirimigo ema nabi wiaabo ho halimu. Bi mana debene hale harimigome mini dunubiahe holene ngiyago yu wa nahe yani ho halimu. Bi mana debene ogoni wali agali dindi bibahendeni karuhondo lamiai henego ogoninaga biabe bia haga mo hela henego i̱ Polo kogoni.
COL 1:24 I̱na tínaga tandaga na harogonaga turu ho ko. Keriso hameigini bibahende karu Kerisonaga tingini kago i̱na i̱ninaga tinginiha tínaga tandaga na harogome Keriso ibugua tandaga ala nala ho winigo i̱na na tago halu namaro bero.
COL 1:25 Keriso hameigini bibahende karunaga biabe bia haga holiya Ngode Datagaliwabe ibugua i̱ dabo helenego kogoni. Tí bayale halimulonaga ibugua biabe ogoni i̱na buliya i̱hondo ngini. Biabe ogoni Kerisonaga bi mana galone ngaru lamiai holene i̱ ngiya.
COL 1:26 Kerisonaga bi mana ogoni Ngode Datagaliwabehanda bambaore wali agali bibahende hearuhondo mo pani nahe ngelenego áyu ogoni ibunaga wali agaliruhondoore walia halu ka.
COL 1:27 Ngode Datagaliwabehanda bamba manda bu winigo ngago ogoni mana ala mo pani nahe ngelenego ibunaga wali agalihondo walia holene manda bu hene. Wá holene bi mana baya burugule ogoni wali agali taratara bibahendeore karunaga nga. Bi ala mo pani nahe ngelenedagoni Keriso ibu tíha kagoni. Ani bidagome Ngode Datagaliwabenaga baya taraore holene tínagabi wulebirago mini dunubia ho holene nga.
COL 1:28 Ani bidago iname Kerisonaga mana galone wali agali bibahendeore karu ta nabihondo lamiai haramali. Iname wali agali bibahendeore Kerisoha ho gimbu bu howa mini bogabiore helo ibuhondo mule ti hangu hangu Ngode Datagaliwabe deni haru poramali. Ani bulenaga iname Ngode Datagaliwabenaga mini gigabi wulene ngiyarume wali agali bibahendeore mana nakarulape bialu holigo lowa ti lawai halu haramali.
COL 1:29 Biabe ogoni biai holenaga Kerisonaga hongo tara i̱ha howa biabe bialu kagome i̱ mo hongo halu kagola i̱na hibu lalu biabe erekuibi bialu kogoni.
COL 2:1 Tí kamirubi wali agali Leodisiani karubi wali agali maru i̱ de nahende karubi tí bibahendenaga biabe erekui ogobi howa bialu harugo lalu langua ko.
COL 2:2 Tí bibahende bu habaneha gi nahe howa hongo holene to̱lai helobi tíni gubalini hagahaga bu kamigome tí mo mbiraore helobi mini homogo holene manda bulene heneneoreme tí mini mbiraore wirimigo hongo helobi i̱na biabe ogoni bialu kogoni. Tí ogonibi kamigola Ngode Datagaliwabehanda bi ala mo pani nahe ngelenego Keriso ibuniore kago tí manda bu holeberami.
COL 2:3 Ngode Datagaliwabenaga mini gigabi wulenebi manda bulenebi baya burugule do ho ngaru uruni bibahende Keriso ibuni panga duguaga ki howa ibugua dugualu mo pani haga ka.
COL 2:4 Aniore bidago lalu langerogoni agali marume bi mana taranaga lalu ogoni heneneore larama laragola tí kamirume tigua bi laragoni baya gibiore larabe toba harimiyagua ogoni tí mo hondo holebirago de hondo halimu.
COL 2:5 I̱ni tí heba nahe kogonigo i̱naga mini dininila tí heba howa tígua Kerisoha mini mbiraore wuwa mini bilinahe haabo kamigo hondowa i̱ turu timbuni ho kogoni.
COL 2:6 Tígua Keriso Yasu ibu tínaga Anduane Homogo ka lalu yu tiga birimigo ibu heba ho gimbu bu haabo halimu.
COL 2:7 Tígua ira pini dindiha piagadagua tínaga pini Keriso ibuha pelowa halu anda geneni anda biagadagua tínaga holene Kerisoni tiaga ho halimu. Marume tíhondo lawai hayadagua tígua Kerisohondo mini mbiraore wirimigo hongo ho wiaabo halu ka̱i̱ lolene tíha howa to̱lo tagi helo halimu.
COL 2:8 Agali marume agalinaga manda bulenemebi dambabi lalu mo hondo holenemebi tí minuligo de hondo halimu. Tigua Keriso mo tene howa ndo tini mamalime mana lawai henegobi dindi tawebi damanagabi mo tene howa laga ka.
COL 2:9 Keriso ibu agali hole dindini ibu heangi Ngode Datagaliwabe kagobiore howa ibu tinginihe ka.
COL 2:10 Tíbi Kerisoha ho gimbu birimigome holeneore yu hai kamigoni. Dama haru haga karubi haguane maru karubi uruni bibahendenaga haguaneore Keriso ibu ka.
COL 2:11 Kerisoha ho gimbu bu kamiru agalinaga dongone podo mabu biagadagua bialu ndo Kerisonaga dongone podayagome tínaga mini konaga hongo podo wahalu tí golope henego kami.
COL 2:12 Tí baboraya birimingi tí Keriso heba hora hamaga harimi. Ngode Datagaliwabe ibu hongo timbunihe kagome Keriso mo heya henego tígua ibuhondo mini mbiraore wuwa baboraya birimigome tíbi Keriso heba mo heyamaga henego kami.
COL 2:13 Ala tígua ko birimigomebi tí Yu ndo wali agali tara tara howa Mana lowinigoha tagira harimigomebi tínaga dinini homene ale hemigola Ngode Datagaliwabehanda tí Keriso heba mo hela dai binigo kami. Iname ko bibahende birimago Ngode Datagaliwabe ibugua domo wahai hene.
COL 2:14 Mana lo wiago pugualu iname ko bialu harimagome dano ho hemaria Ngode Datagaliwabe ibunime mo wahene. Mana lowini ogonime bulene nga leagome ina dariba ho wiaria Ngode Datagaliwabehanda mo yalu puwa Kerisonaga ira bangani ba para ho wahene.
COL 2:15 Ira banga ogoriani Keriso ibugua hari daligaha haru haga hearubi hondo haga hearubi tinaga hongo holene wiaru bibahende tongolope hai howa wali agali bibahende de hendelo ibuni hangu wayali ko lalu ti hende howa haru halu puabo hene.
COL 2:16 Ani binigo wali agali marume tíhondo tomo ogo na ogo nanabe lolene nawi. Horo maru Ngode Datagaliwabehondo loma bia ho holene ngabe nawibe lolenebi Ege Mbira Ngabulo haragonaga tomo dawa nolene ngabe nawibe lolenebi Sabada horo mitangi bu holene ngabe nawibe lalu bi urunidagua tíhondo lolene nawi.
COL 2:17 Mana uruni maha ibulebiragonaga manane walia hene nga. Galoneore Keriso ibuni ka.
COL 2:18 Mbiralime emaga ale tara mbira hendenego te mine halu langiragome tí mo guya nahelo halimu. Ogoni ibugua ke̱ halu ibuni mo dindi hetingi howa lalu, Dahuliyalihondo bi pupu wuleneore nga, laga ka. Ani biaga kago ibu dindi mana hangu mitangi buwa irane nawi ngagoria mine halu
COL 2:19 ibugua Keriso inanaga haguane kago yu wahaga ka. Kerisonaga tingini ina kamago tingini ogoni Keriso ibuni haru howa tomo mialu kuni gungubunibi mo gimbu buwa Ngode Datagaliwabehanda anda helo hame ledadagua mo anda haga ka.
COL 2:20 Tí Keriso heba homamaga harimigome dindini howa biaganemebi damanaga hongomebi tí ala dariba ho wiyago golope henego kamigoni. Anigo dindi mana biaga karume bialu kadagua dege bialu kamigo irane agibe. Dindini karume bulenebi nabulenebi ngarunaga bi larago hale howa bialu kamigo agibe.
COL 2:21 Tigua bi urubi laga, Ogo nanabe. Ogo nayabe. Ogo ela nahabe, laga.
COL 2:22 Uruni ala agalime dege wabuwa lawai halu biaga winigo áyu uruni bibahende bialu karia galone nabulene wiaga.
COL 2:23 Tigua hibu lowa dahuliyalihondo bi pupu wiagabi ke̱ halu mo dindi hetingi hagabi tingini tandaga helo biagabi karu mana urunibi birago hondowa mini gigabiwinaga manani howa bira bada manda buleberami. Anigo mana urunibi biragome tingininaga dimagoli holene ngago mo wahelonaga ndo biaga ka.
COL 3:1 Tí Keriso heba halimulonaga mo heyamaga henego kami. Ani bu kamigo tígua dahuliya andaga Keriso ibuninaga dagiani Ngode Datagaliwabenaga gi tigahayagi bedagoha mbirale ngarunaga mitangi bialu ogoriani gubalini paga ho halimu.
COL 3:2 Mbirale dindini ngaru mitangi nabi daligani ngaru mitangi bialu ogoriani mini paga ho halimu.
COL 3:3 Irane tí homene howa tínaga holene Keriso heba Ngode Datagaliwabeha do howa kamigoni.
COL 3:4 Tínaga holene gahenge Keriso ibuniore kago ibu ha pani harangi tíbi ibu heba ha pani halu ibunaga baya taraore holene yu holeberami.
COL 3:5 Anigo tíha mini ala tawenaga hame lagane yu howa bialu kamiru mo homa halimu. Uruni wali agali kayu bulenebi mini ko wuwa bulenebi dimagoli holenebi hame lowa ela holenebi dimagoli howa í̠ hangu wua holenebi uruni bibahende mo homa hai halimu. Í̠ hangu wua holene larugo ogoni mbirale tarahondo bi pupu wiaga mana ale nga.
COL 3:6 Mana urunibi bialu Ngode Datagaliwabenaga mana mo wahaga karu tiha Ngode Datagaliwabenaga keba holene wulebira.
COL 3:7 Ala tingininaga hame lagane urunime tí haru howa tigua, Bidaba, layadagua bialu harimigoni.
COL 3:8 Anigo áyu mana uru bibahende wahai halimu. Keba holenebi dimagoli holenebi handabe manga holenebi wahaiore halimu. Mege bulenebi bi ko lolenebi tínaga ne harigaha howa tagira ibulene nawi.
COL 3:9 Tíni tindule lagalaga nabilimu. Mini ko wuwa bialu haramiligo golo wahowa
COL 3:10 mini gahengenaga karulo harimigoore kami. Mini gahenge ogoninaga wabiaga Ngode Datagaliwabe ibugua ibuni ale helo wabialu haabo ka. Tígua ibu kago manda biaiore halimulo ibugua tí ani mo manda bia halu ka.
COL 3:11 Ani biragome tí Yu wali agali ndo taratarabi Yu wali agalibi dongone podo mabu binibi nabinibi Girigi bi nalagabi mana nahendenego biagabi garabaya biabe ale bia hagabi nabia hagabi kamiyagua urunibi taratara ndo tí mbiraore hangu kami. Galoneorego Keriso ibuni hangu ka. Ibu ina bibahendeha hai ka.
COL 3:12 Tí Ngode Datagaliwabenaga wali agali bu kamigoni. Ibugua tí gubalini howa ibunaga halimulo tí dabo helenego kami. Anigo tígua dara holenebi biamogo bulenebi tíni mo dindiha ho holenebi bayuwa de hondowa bulenebi ema nabi howa hibu lolenebi urunibi karulai halimu.
COL 3:13 Tígua wali agali maru karu mitangi bialu biamogo bulenebi marume tíhondo ko biragola la nabi wahaga bialu halimu. Anduane Homogo ibugua tí ko birimigo domo wahayadagua tígua nde marume birago la nabi wahalimu.
COL 3:14 Bayale bulene uruni heba gubalini holene wia tago holene nga. Gubalini holene ogonime bibahende hangu hangu ngaru mo mbiraore howa baya gibi halu mo gimbu biaga.
COL 3:15 Kerisohanda mo palia holene tíhondo ngiyagome tínaga bu miniha bayuwa dabalu bilimulonaga ngidagoni. Mo palia holene ogoni tínaga wilo Ngode Datagaliwabehanda tí tingini homane mbiraoreha howa olene. Ani binigo tí turu halu ka̱i̱ lalu halimu.
COL 3:16 Kerisonaga bi mana baya burugule mini homogo holene ngago tínaga bu miniha helowa halimu. Mini gigabiwi howa tígua tíni lawai hagahaga bialu lo tiga bigibigi bialu halimu. Anduane Homogonaga mbugani iba gana ngagobi lotunaga iba ganabi Dinini ibugua tí iba gana lawai haragobi bayuwa bi tabalu tínaga bu miniha howa Ngode Datagaliwabehondo ka̱i̱ lalu halimu.
COL 3:17 Tígua beramirubi laramirubi bibahendeore Anduane Homogo Yasunaga minini howa bulene nga. Ani bialu Yasu togoni howa Aba Ngode Datagaliwabehondo ka̱i̱ lalu halimu.
COL 3:18 Agali oneru-o tí Keriso hamewane biruwa tínaga agalinime bia laradagua hale halu bilimu.
COL 3:19 Wali bereru-o tínaga onehondo bi tandagabi nale gubalini ho halimu.
COL 3:20 Waneiginiru-o tí Keriso hameigini howa tínaga aba ai̱yalame bi laradagua hale halu biaabo holene nga. Ogonidagua beremigome Ngode Datagaliwabe mo turu halu kami.
COL 3:21 Waneigini aba ai̱yaru-o tígua tínaga waneiginime genda holigo lawanana nabilimu.
COL 3:22 Garabaya biabe ale bia hagaru-o tígua tínaga haru haga dindini karume bia laradagua biai halimu. Tínaga haru hagame tí de hendedaore bayale biaga ka lelonaga hangu bulemini. Ani ndo tí de nahendedahabi mini tigabi wu howa bayale dege bialu halimu. Tígua Anduane Homogo mitangi bu kamigonaga biabe bialu kamigo manda buwa bialu halimu.
COL 3:23 Mbirale beramigo bibahende ta nabi bialu howa tígua agalinaga biabe bia harolo mitangi nabi Anduane Homogonaga biabe bia harolo mitangi bialu gubaliniore howa bilimu.
COL 3:24 Anduane Homogo ibugua tínaga yolo ngule wu kago manda bu halimu. Yolo ogoni ibugua ibunaga wali agali karuhondo mulebero lowinigo do ho ngago tígua yu holeberami. Tínaga Haguane henene Keriso ibuniore kago tígua biabe ogoni ibunagaore bia haramili.
COL 3:25 Ko bialu karu hangu hangu ta nabi ibuni ko biyadagua pani miadai bulebira. Ngode Datagaliwabe ibugua wali agali daba ki buwa tini biyadagua ogobi degedege daba ki bulebira.
COL 4:1 Haguane kamiru-o tínaga garabaya biabe ale bia haga karuhondo tiga tiga bulene ngadagua bialu halimu. Tíbi tínaga Haguane dahuliya andagaha helowa bialu kamigo manda buwa halimu.
COL 4:2 Ngode Datagaliwabehondo bi la ho wiaabo halimu. Ani bialu howa mini palia hondo nahe howa horo bibahendengi ibuhondo ka̱i̱ laabo halimu.
COL 4:3 Ani lalu howa dege tígua inanaga bi la halu halimu. Ani laramigola howa iname Ngode Datagaliwabenaga bi mana Kerisoha howa ala mo pani nahe ngelenego lamuluma̱ya Ngode Datagaliwabe ibugua ina henge ngialu panga dugua helonaga bi la halu halimu. Irane ogoninaga i̱ áyu garabaya kogoni.
COL 4:4 I̱na bi mana lamialu howa wali agalihondo lamulene ngadaguaore ti bayuwa wálelo lamuliyanaga Ngode Datagaliwabehondo bi la halimu.
COL 4:5 Wali agali Ngode Datagaliwabe mitangi nabi karu de hondowa tí mini gigabi wialu tihondo bayale bulene henge ngidaru mohole nabi halimu.
COL 4:6 Tígua bi lalu howa wali agalime hale hoa haabo helo bi bayuwa lalu halimu. Mbirame tí mo bila haragola tígua bayuwa ladai agua bule lowa manda bu halimu.
COL 4:7 Ina hamene turubiore Tiyagasa ibu mini bilinahe howa biabe biaabo hagago iname Anduane Homogonaga biabe mandagi birimago ibugua i̱na bialu kogonaga te hale halimulo tíhondo langulebira.
COL 4:8 Ibugua ani langilo i̱na ibu tí kamiria pu larogoni. Ibugua ina kamarume bialu kamagonaga te tí langiragome tínaga mini mo hongo holebira.
COL 4:9 Ina hamene turubiore Onisimasi ibu mini bilinahe howa tí aria mbira hayagoni ibubi Tiyagasa heba ibulebira. Libugua ogoria biraru te bibahende tí hondo ibalu langiai holebira.
COL 4:10 Agali Arisadagasa mbira iya haru garabaya kabago ibugua, Tí mitangi bialu ko, lalu lawia hara. Banabasanaga hanini Maga ibuguabi anidagua dege lawia hara. Ibu tí kamiria ibiyagua ibuhondo, Hama, lalu bayuwa haru halimu lalu ala langirugoni.
COL 4:11 Yosua ibu ka̱i̱ mini lalu Yasadasa ibuguabi, Tí mitangi bialu ko, lalu lawia hara. Agali tebirali uruni ti Yu agali howa Keriso hameigini hayago kagoni. Wali agali Ngode Datagaliwabehanda Handame Ho Kagoria helonaga tigua hangu i̱ heba mandagi biabe bialu harima. Tigua i̱ biamogo timbuniore bialu hayagoni.
COL 4:12 Ebaborasa ibubi tí kamiru aria mende howa Keriso Yasunaga biabe bia hagane dege kago ibuguabi, Tí mitangi bialu ko, lalu lawia hara. Ibugua horo bibahendengi Ngode Datagaliwabehondo tínaga bi hongo howa la halu tí kamirume Ngode Datagaliwabehanda hame ledago biaiore halubi tí mini bilinahebi mini bogabibi howa mini mbiraore wu halimulonaga bi la haabo haga ka.
COL 4:13 Ibugua tínaga biabe erekuibiore bia hayago i̱ de handarugo henemane bia haya labehe kogoni. Ibugua wali agali Leodisia karunagabi Hairabolisi karunagabi bia dege haya.
COL 4:14 Inanaga anogoda agali turubi Lugu ibuguabi Dimasa ibuguabi, Tí mitangi bialu ko, lalu lawia dege haragoni.
COL 4:15 Iname Keriso hameigini Leodisiani karuhondo, Tí mitangi bu kama, laya lalimu. Wali mbira Nimba bedagobi ibu andagani Keriso hameigini ngoai haga karubi tíhondo bi ani dege laya lalimu.
COL 4:16 Beba ogoni tí daga lalu hale halimu. Daga lai kagola Keriso hameigini Leodisiani karubi hale helo ti ngoai ho bedagoria daga lope hole manda bilimu. Keriso hameigini Leodisiani karume tíhondo beba wia holebirago daga lope dege halimu.
COL 4:17 Tígua Agibasa ibuhondo bi ogodagua lalimu. Anduane Homogonaga biabe í̠na bibelo ngiyago biaiore hole manda bu habe, laya lalimu.
COL 4:18 Gili bumaro bialu ogo dege i̱ Polo i̱ninaga gime i̱na tí mitangi bialu ko, lalu gili bero. I̱ pu senime garabaya binigo kogo embeda nahalimu. Ngode Datagaliwabenaga biamogo bia holene tíha wiaabo helo hamelo ko laro.
1TH 1:1 Polo Sailasa Timodi iname Keriso hameigini Tesalonaigani kamiru tíhondo beba ogo gilibu wia harama. Tí ina Aba Ngode Datagaliwabenagabi Anduane Homogo Yasu Kerisonagabi kamigoni. Biamogo bia holenebi mo palia holenebi tíha wilo hamelo kama.
1TH 1:2 Horo bibahendengi iname tí bibahende mitangi bialu Ngode Datagaliwabehondo bi lalu howa ka̱i̱ lalu tínaga minibi laabo haramali.
1TH 1:3 Ani lalu howa iname ina Aba Ngode Datagaliwabe naga deni howa tígua mini mbiraore wu howa biabe birimigobi gubalini howa biabe erekuibi birimigobi inanaga Anduane Homogo Yasu Kerisoha mini dunu bia howa mini bilinahe kamigobi mitangi bialu bi lameremali.
1TH 1:4 Ina hamene mbaliniru-o Ngode Datagaliwabehanda tí gubalini howa ibunagaore halimulo tí dabene kamigo mandabu kama.
1TH 1:5 Irane iname Bi Mana Debene tí kamigoha bime dege ndo hongomebi Ngode Datagaliwabe Dinini ibu heba bi mana ogoni heneneore manda biai howa yalu ibirima. Ina tí heba mandagi howa bialu harimagoni agua birima tí manda bidamigoni. Ogoni tíore bayale halimulonaga bialu harimagoni.
1TH 1:6 Iname bialu harimagobi Anduane Homogo ibugua biyagobi tígua hondowa bialu harimi. Tígua tandaga timbuni halu harugo lowa Ngode Datagaliwabe Dinininaga turu holene ngiyagome bi mana hale halu yu tiga bialu harimi.
1TH 1:7 Ani bialu howa Masedonia dindinibi Agaia dindinibi Yasu mana yu tiga biaga bibahende hearuhondo mana bayale walia halu harimi.
1TH 1:8 Masedonia dindihabi Agaia dindihabi Anduane Homogonaga bi mana tíha howa lo yalu piyago ogoni hangu ndo tígua Ngode Datagaliwabehondo mini mbiraore wirimigonaga heba dindi bibahendeni karume hale haame ho ka. Ani bidago iname nde bi mbira latago holene nawida.
1TH 1:9 Ina tí hemiria ibirimagola tígua inahondo turu halu nenege hinalu, Hama, larimigonaga wali agali dindi uruni bibahendeni karume te lalu ka. Tí ala mbirale gime wabiniruhondo bi pupu wiaga harimigo ai mini beregedalu Ngode Datagaliwabe ibu hangu henenebi holenehebi kagonaga biabe bule tígua ibuhondo mini mbiraore wirimigonaga te lalu ka.
1TH 1:10 Ngode Datagaliwabe Igini dahuliya andaga howa dai bilo tí hondo kamigonaga te lalu ka. Ngode Datagaliwabe Igini Yasu ibu ala homowa Ngode Datagaliwabe handa ibu mo heya henego ogoni ibugua ina Ngode Datagaliwabe naga lembo holene wulebiragoha naholoma̱yanaga gini mialu ka.
1TH 2:1 Hamene mbaliniru-o ina tí hemiria ibalu biabe bialu harimago bame bu wahole ndo birimayago tíni mandabu kamigoni.
1TH 2:2 Ina tí Tesalonaiga hemiria naibi Pilibai hemaore tano ogoriani hearume ina mo tandaga halu inahondo mege bialu hayagoni tí manda bu kami. Ani biyaruni bilowabi tí hemigoria inahondo handabe manga hayaruni helowabi iname tíhondo Bi Mana Debene Ngode Datagaliwabeha howa íbu ngago languluma̱ya Ngode Datagaliwabehanda ina mo hongo hene.
1TH 2:3 Ani binigo iname tíhondo bi laramago tene yolebi mini ko do howabi mbirali mo hondo holenagabi ndo laramagoni.
1TH 2:4 Ani ndo Ngode Datagaliwabehanda ina karulape hemane hondowa inahondo Bi Mana Debene lamulene biabe ngiyagola iname nde ibugua hame ledadagua laramali. Iname wali agali mo turu hole manda bialu ndo Ngode Datagaliwabehanda ina ogobiore howa bialu kagoda lalu miniha manda bu kago iname ibu mo turu holenaga manda bialu laramali.
1TH 2:5 Iname tí hemiria ibalu tí mo guya howa bi lalubi inanaga miniha dimagoli holene ngago yi howa bi lalubi ndo larimago manda bidamigoni. Ngode Datagaliwabe ibu ina de hondo kagoni.
1TH 2:6 Tí kamirumebi wali agali maru karumebi inanaga mini yaraga helo hame lowa ndo biabe birimagoni.
1TH 2:7 Ina Kerisonaga abosolo agali harimagoni howa tíhondo ina biamogo bulene ngago bidaba labehe howa nale harima. Ani nale howa waneigini ai̱yame ibu waneigini mitangi bialu bayuwa hondo hagadagua iname tí heba howa tíhondo ani bialu harima.
1TH 2:8 Iname tí gubalini timbuniore ho howa tíhondo Bi Mana Debene Ngode Datagaliwabeha howa íbu ngago hangu langule ndo tí inanaga gubaliniore harimigo iname inaneore tíhondo ngulenego karulape manda bu harima.
1TH 2:9 Hamene mbaliniru-o iname gime biabe erekuibi biaabo halu harimago tí mitangi nabi kamibe. Iname Bi Mana Debene Ngode Datagaliwabeha howa íbu ngago tí langialu harima. Langialu howa tí mo genda ya halu tígua mbira ngule manda nabilimulonaga ina horombe mbiragabi inane nalu holenenaga biabe erekuibi biaabo halu harima.
1TH 2:10 Iname bialu harimago Ngode Datagaliwabehanda handaya tíguabi de handarimigoni. Yasu mana yu tiga bu kamiru tíhondo iname mana bayalebi tigabibi hangu bialu kagua nabi harimagoni.
1TH 2:11 Waneigini abame ibu waneigini mitangi bialu tíhondo biagadagua iname tí hangu hanguhondo bialu harimago manda bidami.
1TH 2:12 Ani bialu howa iname tí mo hongo halubi mo turu halubi Ngode Datagaliwabe turu helo bialu holene ngadagua bialu halimu laabo halubi harimagoni. Ngode Datagaliwabe ibugua Handame Ho Kagoria tí anda puwa ibunaga bayale taraore holene yu halimulo ibugua tí olenego kami.
1TH 2:13 Iname Ngode Datagaliwabehondo ka̱i̱ laabo haramaligo irane mende ogo. Iname Ngode Datagaliwabe bi mana tí hemiria yalu ibalu langirimagola tígua hale howa agalinaga bi mana ndo Ngode Datagaliwabenaga bi manaoreda lalu hale halu yu tiga birimigoni áyubi wiaabo kagoni. Bi mana ogoni yu tiga bu kamiru tíha Ngode Datagaliwabe ibugua biabe bialu ka.
1TH 2:14 Hamene mbaliniru-o Yudia dindiha Yu agalirume Ngode Datagaliwabenaga wali agali Keriso hameigini hearu ti mo tandaga hayadagua tí damenerume tí mo tandaga halu hayada.
1TH 2:15 Yu agali urunime Anduane Homogo Yasubi Ngode Datagaliwabe mana latagi haga agali hearubi bo wahenego tigua inabi nde mo tandaga henego kama. Ani bialu hagarume Ngode Datagaliwabe mo turu nahagabi wali agali bibahende baba waitigi halu hagabi ka.
1TH 2:16 Ogoni hangu ndo tigua Yu wali agali ndo tara tara karume pele mulene yu helonaga bi mana iname lamuligo lowa hangai haabo holene manda bu hene. Tigua ko bibahende biaabo halu hayadagua bia tago halu bima iraga henego ogoni. Ani binigo Ngode Datagaliwabenaga lembo holene tini ibiraho ngeleda.
1TH 2:17 Hamene mbaliniru-o iname nde tí helalu emene pu bagi harimagola de nahende howa minime dege mitangi bu wuwa tí hameore lalu de hondoa halu lone denguiore hondolego lowa hariga tai bialu harima.
1TH 2:18 Iname tí hemiria dai bua timbuni ho harima. Polo i̱na halu mbira hangu ndo halu mendebi dai bulebiruria dama Heyolabeme inanaga hariga mo hangai haya.
1TH 2:19 Anduane Homogo Yasu dai birangi ibu deni howa ina wayali harimagonaga mini yaraga holene irane wilobi inanaga mini dunu bia holenebi mo turu holenebi tí ndo holeberamiyagua nde ai holebirabe.
1TH 2:20 Iname tínaga mini mo yaraga holenebi ina mo turu holenebi irane tíore kamigoni.
1TH 3:1 Iname tí de nahende howa ogoria ha ho wiaabo habe naheyagola iya hangu Adene dindini hondo holene nga manda birima.
1TH 3:2 Ani bialu howa iyame ina hamene Timodi tí hemiria ibilo pu lariba. Timodi ibu ina heba howa iname Kerisonaga Bi Mana Debene lamialu Ngode Datagaliwabenaga biabe mandagi bialu haramali. Ibugua tí mo hongo helobi mini mbiraore wirimigo biamogo bilobi tí hemiria ibilaribagoni.
1TH 3:3 Irane tí tandaga dewa nalu kamigo howa mini mbiraore wu harimigo yu wahalu napilimulonaga ibilaribagoni. Tandaga urunibi Ngode Datagaliwabehanda ina mo bayale holenaga ibilalu kago tíni manda bidami.
1TH 3:4 Anigo ina tí heba mandagi harimangi iname maha tandaga noleberama lalu tí abale langirimagoni. Ani bulebira langirimadagua birago bayuwa manda bidami.
1TH 3:5 Irane ogoninaga i̱na Timodi tí kamiria ibilarugoni. Tígua mini mbiraore wiaabo halu kamibe be agua birimibe toba hayagola hondo pu laru. I̱na mitangi birugola dama Heyolabeme tí ko mo bia halu iname biabe birimago mo ko halu ibira holigo ani mitangi biru.
1TH 3:6 Ai Timodi ibu tí kamigoria howa ina kamaria lone daibu ka. Dai buwa ibugua tí mini mbiraore wu haabo kami lalubi tí gubalini hagahaga bu kami lalubi bi turubiore ogoni inahondo langiya. Ani langialu ibugua tí ina mitangi biaabo halu iname tí de hondoa ho kamadagua tíguabi ina de hondoa ho kama larimiyago hale harima.
1TH 3:7 Hamene mbaliniru-o ibugua ani bidami lalu langiyagome ina genda holenebi tandaga nolenebi ngagoha howa tígua mini mbiraore wu haabo kami layago hale harimagome inanaga mini mo hongo haragola kama.
1TH 3:8 Anigo tígua Anduane Homogoha ho gimbu buwa mini bilina ho haabo kamiyagua nde ina turu howaore kamagoni.
1TH 3:9 Áyu iname tí mitangi bialu inanaga Ngode Datagaliwabehondo ka̱i̱ore labehe kama. Ina tí kamigo hondowa inanaga Ngode Datagaliwabe deni howa turu ho kamago ibuhondo ka̱i̱ larama.
1TH 3:10 Iname horombe mbiragabi tí hameore lowa Ngode Datagaliwabehondo bi lalu ina tínaga dengui hondoa kamago lalubi tígua mini mbiraore wu kamigo mo hongo ha tago holoma̱ya lalubi lamiaabo halu haramali.
1TH 3:11 Inanaga Aba Ngode Datagaliwabe ibunibi inanaga Anduane Homogo Yasu ibuguabi ina tí kamiria ibuluma̱ya haru ibilo hame ledama.
1TH 3:12 Anduane Homogo ibugua tíni gubalini hagahaga beramiligobi wali agali bibahende karuhondo gubalini haramiligobi mo anda haaboore helo larama. Tínaga gubalini holene ogoni iname tíhondo gubalini timbuni ho kamadaguaore halimulo hamelo kama.
1TH 3:13 Ogonidagua birimiyagua ibugua tínaga bu mini mo hongo holebira. Mo hongo haragola inanaga Anduane Homogo Yasu ibunaga wali agali heba bibahende dai biragola ina Aba Ngode Datagaliwabe deni howa tí ibunaga loma bia henebi tigabiore ko mbira para nahebi holeberami.
1TH 4:1 Ina hamene mbaliniru-o lamaro bialu bi mbira langeramago ogo. Tígua Ngode Datagaliwabe turu helonaga agua bialu holene nga lalu abale langirimago mandabu kami. Ogoni manda buwaore bialu harimigoni. Áyu iname Anduane Homogo Yasunaga minini howa tíhondo hongo howa lalu tígua bialu harimidagua dege bia tagoore halu bialu halimu larama.
1TH 4:2 Anigo irane Anduane Homogo Yasunaga hongoni howa iname tíhondo agua bialu holene nga lalu langirimago mandabu kamigoni.
1TH 4:3 Ani manda bialu Ngode Datagaliwabehanda tí mitangi bialu ibunaga loma bia hene howa wali agali kayu bulene tíha para nahe halimulo hame ledago ogoni.
1TH 4:4 Agali tí hangu hangu howa tínaga one bedagohondo tigabi dege bialu wali agali Ngode Datagaliwabe manda nabi karume dimagoli halu biagadagua ndo tigabi bulene ngadagua hangu bialu haru halimu.
1TH 4:6 Anigo mana ogoni mitangi bialu pugua nabi Keriso hameigini maruhondo mo hondo halu ko nabi halimu. Bi ogoni iname ala hongoore howa tí langialu harimagoni irane mana ko urunibi bialu karuhondo Anduane Homogohanda pani mulebira.
1TH 4:7 Iname wali agali kayu bigibigi bialu holoma̱ya ndo Ngode Datagaliwabehanda ibunaga loma bia hene howa bayale bialu holoma̱ya ina olo helenego kama.
1TH 4:8 Ani bulene ngago mbiralime mana áyu lawai halu kamagoni puguayagua ogoni ibu agalinaga bi ndo pugualu ka. Ngode Datagaliwabe ibu Dinini tíhondo ngiaga kago ogoni ibunaga bi pugualu kagoni.
1TH 4:9 Keriso hameigini kamiru tíni gubalini hagahaga bulene ngago agua halimu lalu gilibu wia holene nawi. Irane tíni agua bialu gubalini hagahaga bialu holene nga lalu Ngode Datagaliwabehanda tínihondo lawai hayago manda bidamigoni.
1TH 4:10 Gubalini holene ogoni yuwa Keriso hamewaneigini Masedonia dindini hearu bibahendehondo biamogo bialu harimi. Hamene mbaliniru-o ani bialu harimigodagua hangu ndo bia tagoore halu haabo halimu.
1TH 4:11 Ani bialu howa iname tíhondo ala langirimadagua miniha hogorale bu halu marunaga biabe birago hondowa hangu ndo tíninaga biabe beremigo mitangi bialu tínaga gime tomo nalu holenego biabe bialu hole harudalo manda buwaore halimu.
1TH 4:12 Ani bialu harimiyagua wali agali Yasu mana yu tiga nabi tagira karume tí hondowa bayaleore bialu kami lelobi tíni mbirale buru pale kamigo wali agalime ngilo mini mo hana holene hangu nawilobi halimu.
1TH 4:13 Ina hamene mbaliniru-o wali agali Yasuhondo mini mbiraore nawi howa mini dunu bia holene nayi karume mbirali homaragola ti yi lalu dara timbuniore hagadagua tí nahalimulo iname wali agali homeneru biagane mana henene manda bilimulo hame ledama.
1TH 4:14 Ani manda bidamagome Yasu ibu homowa lone heyu hayago yu tiga bidamagodagua Ngode Datagaliwabe ibugua wali agali Yasuhondo mini mbiraore wu howa homayaru ti Yasu heba haru dai bulebiragonaga yu tiga bu kamagoni.
1TH 4:15 Mana ogo Anduane Homogo ibugua lawai hayago langerama. Anduane Homogo dai birangi ina nahome dindini kamarume wali agali ala homayaru helalu ina abale napoleberama.
1TH 4:16 Horo ogoningi haragola Ngode Datagaliwabehanda bi dalimu lolebiragobi dahuliyali haguane mbira kagome bi lolebiragobi Ngode Datagaliwabenaga mbelo biguli lolebiragobi uruni ledagola Anduane Homogo ibuni dahuliya andaga howa dalipe holebira. Ani biragola wali agali Kerisohondo mini mbiraore wu howa homayaru ti ala heyulebira.
1TH 4:17 Ani bidagola ogoningi ina nahome dindini kamaru ibugua mo ngoai halu ti ala homene heyiyaru heba mandagi hari beralibaha Anduane Homogo lola hole poleberama. Ani bialu ina Anduane Homogo heba mandagi haabo holeberama.
1TH 4:18 Ani holeberamago bi ogoni lalu tíni miniha mo hongo hagahaga bialu halimu.
1TH 5:1 Hamene mbaliniru-o ani bulebira lalu bi ogoni langirimago horo ogoangi ibulebira lalubi mbirale mbira ogo ale bialu kamaria ibulebira lalubi iname tíhondo lone langulene nawi.
1TH 5:2 Irane ina mitangi nabi kamaria pageali mbiraga ibagadagua Anduane Homogonaga Horo ogonibi ibulebirago manda buwaore kamigoni.
1TH 5:3 Wali agalime lalu, Ina bayale wai nabi karulape hangu kama, lalu kaore mo ko holene abaleore ibira holebira. Waneigini ai̱ya gali taba honolene tu kaware haragola tandaga abale hagadagua ogonibi ibulebira. Ani biragola wali agalime yo polene henge nawulebira.
1TH 5:4 Hamene mbaliniru-o tí arumaha ndo kamigo pageali ibiragola mogo laramilidagua Horo ogoni ibiragola tí mogo lolene nawulebira.
1TH 5:5 Tí bibahende kamiru wá holenenaga kamigo tí horombenaga kami. Ina mbiraganagabi arumanagabi ndo kamagoni.
1TH 5:6 Anigo wali agali maru ti palia hondo kadagua nahe ina dengala howabi mini haru howabi holene nga.
1TH 5:7 Mbiraga haragola wali agalime palia hondo hagabi lulu iba nalu lulu yu hagabi ka.
1TH 5:8 Ani biagadagua ndo ina horombenaga kamagome ina mini haru howa holene nga. Ani bialu wai biagame mbirale galuhombeneni karulagadagua iname mini mbiraore wulenebi gubalini holenebi karulo holene nga. Ani karulalu wai biaga manda karulagadagua ina pele mulene ngiragonaga mini dunu bia holene karulo holene nga.
1TH 5:9 Ngode Datagaliwabehanda ibunaga lembo holene ngagonaga tandaga iname noloma̱ya ina dabo helene ndo. Anduane Homogo Yasu Kerisoha howa pele mulene yu holoma̱ya ibugua ina dabo helene kama.
1TH 5:10 Anduane Homogo Yasu Keriso ibu dai birangi ina dindini haabo kamaria ibiyaguabi homedamagola ibiyaguabi ta nabi ibu heba mandagi haabo holoma̱ya ibugua inanaga homa hene.
1TH 5:11 Ani bidago tígua tíni miniha mo hongo hagahaga bialubi biamogo bigibigi bialubi áyu bialu kamigonidagua biaabo halu halimu.
1TH 5:12 Ina hamene mbaliniru-o tí heba biabe mandagi bialu karu tigua tí Kerisoha kamiru haru howa hariga walia halubi lawai halubi kago manda bialu tihondo bayale hangu bialu halimulo hame ledama.
1TH 5:13 Tigua biabe bialu kago galoneore mitangi bialu tihondo gubalini howa bayaleore bialu tíni mo palia hagahaga bialu halimu.
1TH 5:14 Ina hamene mbaliniru-o tígua bulene ngago ogo. Biabe bibe manga haga karuhondo bi hongo howa lamilimu. Gi haga karu tinaga miniha hongo helo mo hongo halimu. Mini gedaorewi karu biamogo bilimu. Bibahendehondo abale keba nahe bi tendore lalu ema nabi hondo halimu.
1TH 5:15 Ani buwa mbiralime ko biragola ko dege bia dai bulamini de hondo halu tíni degedege bayale bigibigi biaabo holebi wali agali bibahende karuhondo bayale dege biaabo holebi harimadalo manda buwaore halimu.
1TH 5:16 Miniha turu haabo howa halimu.
1TH 5:17 Bibahende ta nabi ngarunaga Ngode Datagaliwabehondo bi laabo halu halimu.
1TH 5:18 Tí kamigoha bayale holene íbu ngayaguabi ko holene íbu ngayaguabi ta nabi bibahendengi Ngode Datagaliwabehondo ka̱i̱ lalu halimu. Tí Keriso Yasuha ho gimbu bu howa ani lalu halimulo Ngode Datagaliwabehanda hamelo ka.
1TH 5:19 Ngode Datagaliwabe Dinini ibugua tíha howa hungu bialu kago mo hundia nahalimu.
1TH 5:20 Mbiralime bi mana lamulene Ngode Datagaliwabehanda miyago langiragola hale habe manga nahalimu.
1TH 5:21 Bi larago bibahende tigatiga larabe yole larabe bayuwa dabalu bayalego dege mo yai halimu.
1TH 5:22 Ko bulene tara tara bibahende ngaru tí kamigoha íbu ngagola tíni para holani hondowa halimu.
1TH 5:23 Mo palia holene ngiaga Ngode Datagaliwabe ibugua tí ibunaga hai halimulo mo tiga bia helo laro. Ina Anduane Homogo Yasu Keriso dai bilonaga howa tínaga dininibi minibi tinginibi ko tara tara ngarume para nahe halimulo Ngode Datagaliwabe ibugua tí haru hai helo laro.
1TH 5:24 Tí olo helayago ibu mini bilinahe kago ibunime ani bulebiraore.
1TH 5:25 Hamene mbaliniru-o tígua Ngode Datagaliwabehondo bi lalu howa inanagabi la halimu.
1TH 5:26 Keriso hameigini bibahende kamiru gi tigani bigibigi bilimu.
1TH 5:27 Ina Anduane Homogonaga minini howa tíhondo bi hongo howa lalu beba ogoni Keriso hameigini bibahende karu hale hai helo daga lope halimu laro.
1TH 5:28 Anduane Homogo Yasu Kerisonaga biamogo bia holene tíha wiaabo helo hamelo kogoni.
2TH 1:1 Polo Sailasa Timodi iname Keriso hameigini Tesalonaigani kamiru tíhondo beba ogo gilibu wia harama. Tí ina Aba Ngode Datagaliwabenagabi Anduane Homogo Yasu Kerisonagabi kamigoni.
2TH 1:2 Ngode Datagaliwabe ina Ababi Anduane Homogo Yasu Kerisobi libugua tíhondo dara howa biamogo bia holenebi mo palia holenebi ngilo hamelo kama.
2TH 1:3 Ina hamene mbaliniru-o tí mitangi bialu iname Ngode Datagaliwabehondo ka̱i̱ lalu haabo holeneore nga. Ogonidaguaore bulene irane tígua mini mbiraore wu kamigo anda ho yangaore lalubi tíni gubalini ho hagahaga bialu kamigo ogoni timbuni anda ho yanga lalu kamigoni.
2TH 1:4 Irane ogoninaga Keriso hameigini dindi tara tarani karuhondo iname tínaga mini mo yaraga haramali. Waitigime tíhondo gendabi tandagabi ngiragola tígua manga nahe donge howa hibu lalu kamigonagabi Ngode Datagaliwabehondo mini mbiraore wiaabo halu kamigonagabi ogoninaga iname tínaga mini mo yaraga halu kamagoni.
2TH 1:5 Ngode Datagaliwabehanda tigabi hangu dabaga kagonaga walia halu wáleore ogo. Ibugua Handame Ho Kagoria ho yanga lelo tígua tandaga uruninaga genda yu haramigola ogoni tí Ngode Datagaliwabehanda Handame Ho Kagoria anda polene karulape holeberami.
2TH 1:6 Ngode Datagaliwabehanda tiga tiga hangu bulebira. Marume tí mo tandaga haragola ibugua nde ti mo tandaga holebira.
2TH 1:7 Ani buwa tíbi inabi tandaga nalu kamagola ibugua tandaga mo ereba holebira. Anduane Homogo Yasu ibunaga dahuliyali hongo gibiorehe karu heba dahuliya andaga howa dai birangi ani bulebira.
2TH 1:8 Ani bulebirago wali agali maru Ngode Datagaliwabehondo erembira mialu karubi inanaga Anduane Homogo Yasunaga Bi Mana Debene ngaru mo tene nahaga karubi pani mule lowa ira hungu bima bima ibulebira.
2TH 1:9 Ibiragola uruni ti koni haabo helo Anduane Homogo haganehayagi nahelobi ibunaga wá taraore holene ngago nahendelobi ibugua ti talebu ki howa pani tandaga nalu haabo helolebira.
2TH 1:10 Ani bule Anduane Homogo ibu Horo Mbira pongo bo winigo ogoni lola harangi ibiragola wali agali ibuhondo mini mbiraore wiyarume ti turu tara howa ibu mini yaraga halu ibu daligaore hai helolebira. Tíguabi nde Anduane Homogonaga mana tigabi langirimago yu tigabu kamigo wali agali uruni heba bimaga ho holeberami.
2TH 1:11 Ani manda buwa iname horo bibahendengi Ngode Datagaliwabehondo tínaga bi la haabo haramali. Ngode Datagaliwabehanda tí dindini howa bialu halimulo olayago holene ogoninaga tí bayale karulapeore halimulo iname ibuhondo bi la halu kama. Ibugua tígua bayale bulene bibahende bua kamigo ibunaga hongome mo bia helonagabi mini mbiraore wu howa biabe bibahende bialu kamigo bumaro bilonagabi iname bi la ho wiaabo halu kama.
2TH 1:12 Biamogo bibe, lalu harimagome biamogo biragola tígua inanaga Anduane Homogo Yasu mini mo yaraga holeberami. Ibuguabi tínaga mini mo yaraga holebira. Inanaga Ngode Datagaliwabebi Anduane Homogo Yasu Kerisobi libunaga biamogo bia holeneme ani bulebira.
2TH 2:1 I̱ hamene mbaliniru-o ina Anduane Homogo Yasu Keriso dai bulenenagabi ibu heba hole mo ngoai holenenagabi i̱na tí heba bi lolene henge ngagoni.
2TH 2:2 Anduane Homogonaga Horo Mbira pongo bo winigo áyu íbu nga lalu larago hale howa tí abale mini burugu lowa mogo nalalimu. Mbiralime Ngode Datagaliwabehanda ani bulebira lalu mbiwia hayaguabi mbiralime ibunaga mana lawai halu howa ani laya lalu layaguabi maru tigua bebani gili bialu howa ani laya lalu layaguabi hale nahalimu.
2TH 2:3 Ti marume uruni layadagua tara tara lalu tí mo hondo helo holemeni. Horo Mbira pongo bo winigo ogoni abale tagira naibulebira. Wali agalime Ngode Datagaliwabe handabe manga howa erembira mulebiragobi ibunaga mana lowini ngaru Mo Yo Handagane Mbirali ibu hapani holebiragobi ogonidagua ala tagira ibulebira. Mo Yo Handagane ogoni ibu mani heli dindi pelolene wulebira.
2TH 2:4 Ani ibalu wali agalinaga bi pupu wiagane bibahende ngarubi wali agalime dama tara taranagaore mitangi buwa mo tene hagane ngarubi Mo Yo Handagane ogonime uruni waitigi howa hengedape holebira. Ibuni uruni bibahende bolangua hai howa daligaore halu Ngode Datagaliwabenaga andahabi anda puwa, I̱ Ngode Datagaliwabe kogoni, lalu dagiani birulebira.
2TH 2:5 I̱ tí heba harungi uruni bibahende bulebiragonaga langiai harugodago tí mitangi nabi dege kamibe.
2TH 2:6 Ani kamiyagua mani tu wiragola Mo Yo Handagane Mbirali ha pani holebira. Áyu ogoningi ha pani nahelo ibunaga hariga hangai kago ogoni nde ogo aledalo tí manda biai kami.
2TH 2:7 Bi mana lo ngaru Mo Yo Handaganeme áyu ohowa biabe bialu ka. Mbira bia pani holebira lenego nabilo hangai haga kago ibu haru poragola bia pani holebira.
2TH 2:8 Bi mana lo ngaru Mo Yo Handagane Mbirali ogoni ha pani kagola Anduane Homogo Yasu ibalu ibunaga ne harigaha howa bu he̱ latagi haragome ogoni homelo bolebira. Ani bialu Anduane Homogo ibuniha wá taraore holene kagome ogoni bo wahai holebira.
2TH 2:9 Bi mana lo ngaru Mo Yo Handagane Mbiralime dama Heyolabenaga hongo yalu ibuwa agalime nabiagane alebi nahendene alebi tara tara ke̱ halu bule ibulebira.
2TH 2:10 Ani bialu ibugua ko tara tara bibahende ngarume wali agali koha polebiraru mo hondo halu hariga koha pelolebira. Ti koha polebirago irane pele mulene yu helo tigua henene lolene ngagohondo turu howa gubalini nahaga kago yu tiga nabi ka.
2TH 2:11 Ogoni birago hondowa Ngode Datagaliwabehanda tigua ke̱ holenenaga mana yu tiga bilo ko hangu bulene hongohe tiha howa biabe bilo ibilayagoni.
2TH 2:12 Ani biragola wali agali henene lolene yu tiga nabi mana ko ngaru dege turu howa biaga karuni bibahende Ngode Datagaliwabehanda godi lalu pani mulebira.
2TH 2:13 Hamene mbaliniru-o Anduane Homogohanda tí gubalini haga kagonaga iname horo bibahendengi Ngode Datagaliwabehondo ka̱i̱ loleneore nga. Ngode Datagaliwabe Dinini ibunaga hongome tí loma bia ho helolebi tígua henene lolene yu tiga bu halimulobi Ngode Datagaliwabehanda tí piganeore pele ngule dabo helene.
2TH 2:14 Ogoninaga iname Bi Mana Debene tíhondo lawai harimagoha howa Ngode Datagaliwabehanda tí olene. Ibugua Anduane Homogo Yasu Kerisonaga baya taraore holene tíbi yu halimulo ngule olene.
2TH 2:15 Anigo ina hamene mbaliniru-o mana henene ngaru iname tí heba harimangi howa lawai harimagobi beba mbirani bi gilibu ibilalu howa lawai harimagobi ogoni hongo howa yani halimu.
2TH 2:16 Ina Aba Ngode Datagaliwabe ibugua ina gubalini halu biamogo bulene nawi howa biamogo bialu inahondo ela ho haabo holenebi mini dunu biaho holenebi ngiya. Ibubi inanaga Anduane Homogo Yasu Keriso ibunibi tígua bayale bulene ngaru biai halimulo bayale lolene ngago lai halimulobi libugua tínaga bu miniha elahe holeneme to̱lai howa tí mo hongo helo hamelo kama.
2TH 3:1 Ina hamene mbaliniru-o Anduane Homogonaga bi mana tíha yulame hayadagua wali agali dindi tara tarani karume abale yu tiga bima pelonagabi tigua bi ogoni mo yaraga helonagabi tígua inanaga Ngode Datagaliwabehondo bi la halu halimu.
2TH 3:2 Bi mende ogonagabi lalimu. Wali agali bibahendeme bi galone ogoni yu tiga biaga hangu ndo manda buwa iname mini kowi karubi ko biaga karubi heba kamagola Ngode Datagaliwabehanda ina pele ngilo tígua ibuhondo bi la halu halimu.
2TH 3:3 Ani beramigola Anduane Homogo ibu mini bilinahe kago ibugua tí mo hongo halu ko biaga dama Heyolabeme tí ela nahelo mamage howa hondo holebira.
2TH 3:4 Ani buwa Anduane Homogo ibugua ina miniha mo mitangi bia hayagola tí mini mo wia haga kama. Ani biragola iname bia laramago áyu beramigo mani dege holeberemiore lo mitangi bidama.
2TH 3:5 Anduane Homogohanda tínaga bu mini Ngode Datagaliwabehanda gubalini holenehayagibi Kerisonaga ema nabi howa hibu laabo halu holenehayagibi manda biai halimulo haru pelo hame ledama.
2TH 3:6 Ina hamene mbaliniru-o iname Anduane Homogo Yasu Kerisonaga minini howa tíhondo ogodagua bilimu lalu langialu howa ina hamene mbalini maru biabe bulene manga hagabi iname ogodagua bulene nga laramagola nabiagabi karu heba tí mandagi nahalimu.
2TH 3:7 Iname birimadagua tíguabi ogonidagua dege bule lowa bayuwaore manda biai ho kamigoni. Ina tí heba harimangi biabe bulenenaga manga nahe bialu harimago handarimi.
2TH 3:8 Ani bialu hemagola tígua ina biamogo bialu tomo ngirimigoni iname bame nane yolo bialu dege narima. Bame nane inane gime biabe erekuibi pinditigi kaubibi bialu narima. Horombe mbiragabi tí mbiraligo genda yu nahelonaga inane biabe biaabo halu harima.
2TH 3:9 Biamogo bilimu nalabehe howa ndo lolene wiagola dege inaneme birimago manane tígua bilimulonaga ogonidagua walia halu birima.
2TH 3:10 Mbiralime biabe bulene hame nalaga kayagua ogoni ibu tomo nolene nawi lalu ina tí heba harimangi langialu harimagoni.
2TH 3:11 Iname bi ogoni larimagoni irane wali agali maru tí heba kamirume biabe bulene manga haga howa tigua wali agali marunaga bulene ngaru hangu handama ibaga buwa te lalu ka layagola hale howa larama.
2TH 3:12 Anduane Homogo Yasu Keriso ibunaga minini howa iname wali agali odaruni bame ibaga nabi howa tininaga biabe bayuwaore bialu mbirale tinime biabe biragome howa yu helonaga bi lo weramagoni.
2TH 3:13 Anigo hamene mbaliniru-o tígua bayale bulenenaga erekui halu manga nahalimu.
2TH 3:14 Tí kamigoria mbiralime bi galone beba ogoriani gilibu ibilaramago hale nahayagua ibu ogobi ka manda buwa ibuni taga helo tígua ibu heba mandagi nahalimu.
2TH 3:15 Wali agali ogoni ibu inanaga waitigi ka manda nabi howa ina hameigini ka manda buwa ibu mini wilonaga bi lamialu mo tiga bigi bialu halimu.
2TH 3:16 Anduane Homogo ibuni dege inanaga mo palia hagane tene kagome horo bibahendengibi mbirale ta nabi tara tara lola haramingibi tí mo palia helo hamelo kama. Anduane Homogo ibu tí bibahendeha helo hamelo kama.
2TH 3:17 I̱naga beba bibahendeni i̱niorenaga gi mugubeme gili biruligodagua beba ogorianibi i̱naga mini Polo i̱ninaga gioreme gili bialu tí mitangibu ko laro.
2TH 3:18 Ina Anduane Homogo Yasu Kerisonaga biamogo bia holene tí bibahendeha haabo helo hamelo ko laro.
1TI 1:1 I̱ Polo Keriso Yasunaga abosolo kogoni. Inanaga Pele Ngiaga Ngode Datagaliwabehandabi Keriso Yasu ina mini dunubia ho hagane tene kago ibuguabi i̱ abosolo helayagome kogoni.
1TI 1:2 Timodi-o í̠ mini mbiraore henene wu kegome i̱ igini ale kegoni. Aba Ngode Datagaliwabebi inanaga Anduane Homogo Keriso Yasubi libunaga biamogo bia holenebi dara holenebi mo palia holenebi í̠hondo ngilo hamelo ko.
1TI 1:3 Masedonia pole pialu howa i̱na í̠ Ebesani hondo habe larudagua hondo habelo hame ledo. Ebesali marume Ngode Datagaliwabe mana henene ngadagua ndo mbira lawai halu kago í̠na tihondo, Ogonidagua lawai nahalimu, lalu lamulene nga.
1TI 1:4 Tigua mamali te lalubi mamali mini dewa lo bila halubi tigua ogonidagua lalu kago bi ogoni aleme tini mo ko hagane nga. Bi ogoni ale laragome wali agalime Ngode Datagaliwabehondo mini mbiraore wilo biamogo nabiaga.
1TI 1:5 Bi larogo irane ogonaga laro. Bu mini gahenge holenebi miniha ko mbira do nahe holenebi Ngode Datagaliwabehondo mini mbiraore henemane wulenebi yu tigabu haramagome mana uruniha howa gubalini holeneore walia hatagi holebira.
1TI 1:6 Wali agali marume mana bayale ogoni wahalu bi galone nawini bi anda halu lulu yu ibaga bu ka.
1TI 1:7 Tigua Ngode Datagaliwabe mana lowinigo lawai haga hoa howa mine halu ogo ale larama lowa tene bayuwa manda nabi howa lawai haga ka.
1TI 1:8 Mana lowini ngago bulene ngadagua birimayagua bayale ogoni.
1TI 1:9 Mana bulene nabuleneru wabu wiagago wali agali bayale biaga karunaga ndo wabu wiaga. Wali agali mana puguagabi ko biagabi Ngode Datagaliwabe mitangi nabiagabi mini kowibi Ngode Datagaliwabe mana hame nalagabi dindi mana dege mitangi biagabi aba ai̱yala homelo bo wahagabi wali agali maru homelo bo wahagabi
1TI 1:10 wali agali kayu biagabi mana ko ngubi taraore biagabi yolo yalu damu ibilo lowa wali agali waneiginibi minu yalu piagabi ke̱ hagabi ke̱ howa henene laro lagabi mana henene ngago hame nale howa ko bulene ngago bia dege biagabi mana uruni ale biaga karunaga bulene nabuleneru wabu nga.
1TI 1:11 Mana henene larugoni bi mana debeneha ngago Ngode Datagaliwabe ibunaga turu holenebi wá taraore holenebi Bi Mana Debene ogoni i̱na lawai holiya ngiya.
1TI 1:12 Inanaga Anduane Homogo Keriso ibugua i̱ mini bilinahe ka manda bialu ibunaga biabe bia holiya i̱hondo hongo ngiya. Ibugua ani biyago i̱na ibuhondo turu howa ka̱i̱ lalu ko.
1TI 1:13 Ala i̱na ibu mini mege bialubi mo tandaga halubi bi ko marubi lalu harugoni. I̱na Keriso Yasuhondo mini mbiraore nawi howa ko bero manda nabi bialu hewago hondowa Ngode Datagaliwabehanda i̱ dara howa biamogo biya.
1TI 1:14 Ani bialu Anduane Homogohanda biamogo bia holene timbuni gibiore ngialu mini mbiraore wulenebi gubalini holenebi ina Keriso Yasuha ho gimbu bu kamagonaga ngago i̱hondo ngiya.
1TI 1:15 Iname bi henene hale halu yu tiga buluma̱ya ngago ogo. Wali agali bibahende mini kowi kamaru pele ngule Keriso Yasu dindini dalu hene. Ko biaga maru karubi ndo i̱ ko timbuniore biaga harugo kogoni.
1TI 1:16 Ani bialu hewagola wali agalime i̱ handalu maha Keriso Yasuhondo mini mbiraore wialu haabobo holene yu holebiraru tihondo Keriso Yasuhanda ibunaga keba ala awane naholene i̱ha howa walia haya. Ani walia holiya Ngode Datagaliwabehanda i̱ dara howa biamogo timbuni biya.
1TI 1:17 Handame Haga Kini haluhe nahomagabi iname de nahandabehebi ibuni dege Ngode Datagaliwabe ka lowa ibuhondo ka̱i̱ lolenebi ibu mini mo yaraga holenebi wiaabo halu holene nga. Aniore bilo laro.
1TI 1:18 I̱ igini Timodi-o ala í̠ mitangi bu howa iname mbiwia halu bi lo wirimaru ngago manda buwa í̠na bibelonaga laro. Mini mbiraore wiaabo halu howa miniha ko do nahe Ngode Datagaliwabenaga wai bayuwa hongo howa bialu habe laro. Agali marume tinaga miniha ko biyago mitangi bialu bayale lamiyago hale halu bia nabi hayagome Ngode Datagaliwabehondo mini mbiraore wu hayaru wahai haya.
1TI 1:20 Ani bialu hayaru aria agali kira Haimeniasa Alegandala kagoni. Libugua maha Ngode Datagaliwabe mege nabilonaga i̱na agali ogoni labo dama Heyolabenaga giha ya helaru.
1TI 2:1 Í̠na mbira bibelo hame ledogo ala langero. Iname wali agali bibahende karubi kini karubi gabumane bibahende karubi mitangi bialu Ngode Datagaliwabehondo bi lolene nga. Iname Ngode Datagaliwabehondo mitangi bulene ngadagua mitangi bialu mana tigabi bialu howa karulape holenebi mo palia holenebi yu holoma̱ya Ngode Datagaliwabehondo, Biamogo bia, lolenebi, Ngi, lolenebi, Ka̱i̱, lolenebi nga.
1TI 2:3 Bi bayale lolene ogonibime inanaga Pele Ngiaga Ngode Datagaliwabe mo turu haga.
1TI 2:4 Ibugua wali agali bibahende pele mulene yu helobi mana henene ngago manda bu helobi hamelo ka.
1TI 2:5 Ngode Datagaliwabe mbiraore hangu ka. Agali mbiraore Keriso Yasu kago ibu degeme dombegua howa Ngode Datagaliwabebi wali agalibi mo mbiraore haga ka.
1TI 2:6 Keriso Yasuhanda wali agali bibahende haru dai biai hole horo pongo bo winigongiore ibugua ibuninaga holene pelene. Ogoningi Ngode Datagaliwabehanda wali agali bibahendeore pele mule hame lowa walia hoa ho winigobiore walia hene.
1TI 2:7 Irane ogoninaga Ngode Datagaliwabehanda i̱ abosolo biabe buliya dabo helaya. Yuali ndo wali agali tara tara karuhondo henene lolene manabi Ngode Datagaliwabehondo mini mbiraore wulene manabi lawai haga holiya Ngode Datagaliwabehanda i̱ dabo heleayago ko. Bi o larogo tindule ndo heneneore larogoni.
1TI 2:8 Keriso hameigini dindi bibahendeni karume Ngode Datagaliwabehondo bi laabo helo hamelo ko. Agali urunime tini Ngode Datagaliwabehondo loma bia hene howa keba holenebi lai lolenebi mbira miniha do nahe howa Ngode Datagaliwabehondo bi lalu holene nga.
1TI 2:9 Ai bi mende ogo laro. Walime mine nahe howa agabi mbirale dongoneni karuledaru bayuwa karulolene nga. Mandari yáribi tingini yáribi mbirale ngolome wabini ngarubi pealobi aga yolo timbunime minirubi bulene nawi.
1TI 2:10 Wali Ngode Datagaliwabenaga bi mana yu tiga biaga bedarume biabe bayale bulene nga.
1TI 2:11 Walime mine nahe biruwa bi nale Ngode Datagaliwabe bi mana hale halu yu tiga bulene nga.
1TI 2:12 I̱na bi mbira larogo ogo. Ngode Datagaliwabehanda ala Adama wabuwa mani Iba wabini. Walime agali lawai helobi haru helobi helolene nawi. Walime bi naleore birulene nga.
1TI 2:14 Dama Heyolabeme Adama mo hondo nahe Iba ala mo hondo hayagola Ngode Datagaliwabe mana lowinigo wali biago ibugua puguai hene.
1TI 2:15 Ani binigo manda buwa walime waneigini taba hanalu biruwa Ngode Datagaliwabehondo mini mbiraore wu biruwabi gubalini ho biruwabi mini tigabi wu biruwabi mine nahe bialu birayagua Ngode Datagaliwabehanda ibu pele mulebira.
1TI 3:1 Bi henene lo ngago ogo. Agali mbirame Keriso hameigini haru hoa ho kayagua ibu biabe bayale hamelo kagoni.
1TI 3:2 Agali Keriso hameigini haru haga hole manda biyagua ibu mini tigabi holene nga. Ibu one mbira hangu bereme holene nga. Ibugua mbirale bibahende ngaru minila haru howa biagabi ibuni mini haru howa mana tigabi biagabi wali agali ta nabi ibu andaga ibilo nenege hinagabi lawai holene mugubeyimebi holene nga.
1TI 3:3 Lulu yule waini iba timbuni nagimbu biagamebi gungu bule abale porabu para hagamebi holene nawi. Wali agali bayuwa mitangi biagamebi mo palia hagamebi muni dimagoli nahagamebi holene nga.
1TI 3:4 Ibu one waneigini bayuwa haru hagamebi ibugua bi laragola ibu waneiginime hale hagamebi holene nga.
1TI 3:5 Agali ogonime ibu one waneigini bayuwa haru nahagayagua nde Keriso hameigini karu haru habe nahe holebira.
1TI 3:6 Ibu Keriso hameigini ayure heneme holene nawi. Ibu mine halu karia Ngode Datagaliwabehanda dama Heyolabe bo batagi ho helayadagua agali ogonibi ani buligo handalu habe.
1TI 3:7 Keriso hameigini ndo karume agali ogoni mini tigabi ka lene holene nga. Irane ibu Ngode Datagaliwabe mege bialu karia dama Heyolabeme gono ngagoha doligo.
1TI 3:8 Biamogo biaga agaliruni ti mini bayalewi bi kira nalagamebi holene nga. Waini iba nagimbu nabiagabi ohowa muni dibaudu nahagabi
1TI 3:9 miniha ko do nahe howa Ngode Datagaliwabehanda bi henene walia hene ngago yu tiga biaabo hagame holene nga.
1TI 3:10 Ti agi birabe hondole ala ba handalu keria karulape ka manda biriyagua ti biamogo biaga agali helo helolene nga.
1TI 3:11 Wali ti onemebi nde miniha ko mbira do nahebi diburibu nalagabi mbirale bibahende minila haru howa biagabi mana bibahende tigabi hangu bialu birulene nga.
1TI 3:12 Biamogo biaga agali ogoni ibu one mbiraore hangu bereme holene nga. Ani bialu ibu one waneiginibi bayuwa haru holene nga.
1TI 3:13 Biamogo biaga agali urunime biabe bayale birago wali agalime hondowa lalu, Agali uruni ti mini tigabiwi ka, lolebira. Ani laragola tigua Keriso Yasuha ho gimbu bu howa ibuhondo mini mbiraore wulene mana hongo howa lamulebira.
1TI 3:14 I̱na beba ogoni gili bialu howa í̠ kegoria abale ibulene mitangi bu ko.
1TI 3:15 Anigo emene ha dai bu haruyagua beba o gilibu wia harogoni daga lowa i̱na Ngode Datagaliwabenaga wali agali haru holene mana bayuwa manda bulebere. Ngode Datagaliwabenaga wali agali larogo ti Ngode Datagaliwabe holenehe kagome olo helayaru kagoni. Tigua Ngode Datagaliwabe mana heneneme anda gene dunini ale howa tini tiaga kagola kagoni.
1TI 3:16 Mana tene ala mo pani nahe ngelenego galone dunini timbuniore ngago mbiralime galone ndo nalabeheore. Ibu agali henene hole dindini dalini. Ngode Datagaliwabe Dinini ibugua Yasu tigabiore ka lalu walia hene. Dahuliyalirume ibu de hendene. Ibunaga bi mana wali agali dindi tara tarani hearu bibahendehondo loyogo lene. Wali agali dindi tara tarani hearume ibuhondo mini mbiraore wini. Ngode Datagaliwabehanda ibu dahuliya andaga haru dai bini.
1TI 4:1 Ngode Datagaliwabe Dinini ibugua mo wála howa lalu, Maniore haragola wali agali marume Ngode Datagaliwabe mana wahalu polebira. Ti wahalu puwa mo hondo hagane mana hale howa damanaga mana lawai harago yu tiga bulebira.
1TI 4:2 Mana ogoni mo hondo haga agalime ke̱ howa lawai hagago irame dene motudu ngagoria amburi biagadagua tinaga miniha ko do ho haabo kagome tinaga mini amburibi ka.
1TI 4:3 Agali urunibime lawai halu howa agalime wali dabu bulene nawi lalubi tomo maru nolene nawi lalubi lawai haga ka. Ngode Datagaliwabehanda tomo bibahende wali agalime nelo wabini. Ani binidago manda buwa Ngode Datagaliwabehondo mini mbiraore wu karume Ngode Datagaliwabehondo turu halu ka̱i̱ lowa nolene nga.
1TI 4:4 Ngode Datagaliwabehanda mbirale bibahende wabiniru bayale dege wabinigo uruni aria mbira waholene nawi. Iname Ngode Datagaliwabehondo turu halu ka̱i̱ lowa mo nolene nga.
1TI 4:5 Irane Ngode Datagaliwabehanda bi lowinigomebi iname ibuhondo bi laramagomebi Ngode Datagaliwabehanda, Ogoni bayaleda, lolebira.
1TI 4:6 Í̠na bi uruni Keriso hameiginihondo lamialu hariyagua nde Keriso Yasunaga biabe bia haga bayale holebere. Ngode Datagaliwabe mana lo ngagobi mana henene lawai harugo yu tiga bu kego mini mo hongo holene tomo ogoni í̠ni nalu haridane hondolebere.
1TI 4:7 Wali agali marume bi galone nawini bi anda howa lalu karu kagoria nahe í̠ wandialu habagi ho habe. Ngode Datagaliwabenaga bi mana galone ngago hangu lo manda biaabo halu habe.
1TI 4:8 Tingini hongo helonaga bia manda biriyagua o emene karulape. Áyu kamagonagabi awe holeberamagonagabi mini ibu hongo halu bayale helo Ngode Datagaliwabenaga bi mana lo manda biaabo harimayagua o karulapeore ogoni.
1TI 4:9 Bi henene ogo hale haiore howa yu tiga buluma̱yanaga lo nga.
1TI 4:10 Ngode Datagaliwabe ibugua wali agali bibahendeore Pele Miaga ka. Ibugua ani bialu kago iname nde ibuhondo mini mbiraore wu kamagonaga Pele Ngiagaore ka. Irane ogoninaga iname ibuhondo mini dunu bia ho howa biabe timbuni erekuibibi biaabo halu kamagoni.
1TI 4:11 Í̠na wali agalihondo mana uruni, Bulene nga, lalu hongo howa lamialu habe.
1TI 4:12 Wali agalime í̠ hondowa, Í̠ igiri emene ke, nalelo í̠na bi laregobi mana beregobi gubalini holenebi mini mbiraore wu kegobi mini gahengehe holenebi Keriso hameigini karume í̠ de handalu tibi í̠ kegobi helo habe.
1TI 4:13 I̱ ibuliya ketambu Anduane Homogonaga mbugani bi lo ngago wali agali hale helo daga lowa mana ogoni lawai halu lamigi bialu habe.
1TI 4:14 Ngode Datagaliwabe mana latagi haga hearume mbiwia hayangibi agali ala hene miniwi hearume í̠naga haguaneni gi wiyangibi Ngode Datagaliwabe Dinini ibugua í̠hondo mugube ngiyago yu kego ha do wa nahabe.
1TI 4:15 Wali agali bibahendeme mana bayale í̠ha anda harago hendelo í̠na mana uruni bu manda bialu hole í̠ni hongoheore howa bialu habe.
1TI 4:16 Í̠nibi í̠na mana lawai haregobi bayuwa de hondo habe. Ani bialu hariyagua í̠bi í̠na wali agali mana lamerego hale hararumebi pele mulene yu holeberami.
1TI 5:1 Agali wahe karuhondo talialu nalabe. Í̠ abahondo larilidagua dege lalu lo tiga bibe. Agali daliahe karuhondo í̠ hamenehondo larilidagua dege labe.
1TI 5:2 Wali wahe bedaruhondo í̠ ai̱yahondo birilidagua dege bibe. Wandari daliahe bedaruhondobi nde í̠ mbalinihondo mitangi tigabi birilidagua dege bialu habe.
1TI 5:3 Wali dalo bedaru biamogo biaga mbirali nahe ibu hangu bereagua biamogo bulene nga.
1TI 5:4 Wali dalo mendego ibunaga waneiginibi aguanebi kayagua tigua Ngode Datagaliwabe mana mitangi bialu wali dalo ogoni biamogo bulene nga. Irane ibugua ti ala emeneni biamogo biyago mitangi bialu biamogo bulene nga. Mana ogonidagua bialu karume Ngode Datagaliwabe mo turu haga ka.
1TI 5:5 Anigo wali dalo ibuni hanguore bedagome ibu Ngode Datagaliwabehondo mini dunubia ho biruwa horombe mbiragabi ibuhondo bi lalu, Í̠na i̱ biamogo bia, laabo halu biraga.
1TI 5:6 Wali dalo tebonego ibu ibuninaga tinginini bulenego hangu hame lalu mo tene haga bereagua ibunaga mini dininila kiroba homene beda.
1TI 5:7 Wali agali marume wali dalo bedaru mana ko birago hondowa mege buligo í̠na wali dalo biarubi ibu damenebi tihondo bi ogodagua lamibe.
1TI 5:8 Mbiralime ibu damenebi hameiginibi de handalu biamogo nabiyagua ibu Ngode Datagaliwabe mana lo ngago pugualu Ngode Datagaliwabe mitangi nabiaga karubi ndo ibu koorene ko ka.
1TI 5:9 Wali dalorunaga mini bebani gilibu ngegoha wali dalo maru mali pira waragaria (60) nape bedaru tinaga mini gili biatago nahabe. Wali dalo ala agali mbira hangu penegobi
1TI 5:10 biamogo biaga wali abogo beda lenegobi berene. Ibu waneigini bayuwa haru hagabi wali agali tara tara ibu andaga ibilo nenege hinagabi Keriso hameigininaga wali agali genda yu karu biamogo biagabi mana bayale tara tara biagabi berene. Wali dalo mana urunibi biaga berene bedaru tinaga mini hangu gili biatago holene nga.
1TI 5:11 Anigo wali dalo daliahe bedaru tinaga mini gili nabibe. Irane ogonaga larogo tigua agali maru polene hame lowa Kerisonaga biabe bialu biruliya lalu bi lowiyago pugualu Keriso erembira mialu polebira.
1TI 5:13 Ani bialu tigua tinaga horo pongo bo wiyago mohole bialu wali agali andaga ngaruha ge hai halu ko marubi bia tago halu bi diburibu loyu ibaga bialu wali agali mini lowa ndelalu bi nalene ngago lama ibaga bu haga.
1TI 5:14 Inahondo handabe manga ho karume ina mege bulene henge nawilo i̱na hame ledogo ogo. Wali dalo wahe ndo daliahe bedarume agali mende puwa waneigini taba hanalu tinaga andagani biabe bayuwa bialu birulene nga laro.
1TI 5:15 Wali dalo marume hariga tigabi ngago wahalu dama Heyolabe talima piaga beda.
1TI 5:16 Keriso hamewane mbira bedago ibu damene maru wali dalo bedayagua Keriso hameigini karu ti genda nahelo damene tinime biamogo bulene nga. Ani bialu Keriso hameigini karume wali dalo tini hanguore bedaru biamogo bibeheore wulebira.
1TI 5:17 Agali ala hene miniwi karume wali agali bayuwa haru howa mana lamialubi lawai halubi biabe erekuibi uruni bialu howa ti yolo karulape nolene nga.
1TI 5:18 Anduane Homogonaga mbugani bi lo ngago ogo, Widi gandulo winigo lini hondo ibira ibira bilo nogo bulumaga geme hengedama pelo haru howa bulumaganaga ne hangane huba bulene nawi, lalu gilibu nga. Bi mendebi lo ngago ogo. Biabe biaga kagome biabe biradagua yolo nolene nga, lalu gilibu nga.
1TI 5:19 Mbirame lalu, Agali ala hene miniwi abogohanda ko mbira biya, layagua ogoni hale nahabe. Kirali tebiralimebi, Henene ko biyaria de handarima, layagua o karulape mo tiga bulene nga.
1TI 5:20 Ani mo tiga bialu keria henene biniyagua Keriso hameigini bibahende karu deni helowa ti hale halu gi helo í̠na agali ko biyago hongo howa talibe.
1TI 5:21 I̱na Ngode Datagaliwabenaga denibi Keriso Yasunaga denibi dahuliyali loma bia henerunaga denibi howa í̠hondo bi hongo howa ogodagua laro. Í̠na bibelo bi maru o gilibu wia haroruni biai halu wali agali maru í̠ hame nalederuhondo ko bialu í̠ hame lederuhondo turubini bialu nabibe. Ani nabi bibahendehondo mana mbiraore hangu bialu habe.
1TI 5:22 Wali agali Anduane Homogonaga biabe bilo lowa loma bia helo haguaneni gi abale nawibe. Marume ko biyarunaga í̠ha para holani í̠ Ngode Datagaliwabenaga deni bayale hole manda buwa habe.
1TI 5:23 Iba ibuni hangu nanabe. Í̠ tombeha warago baraligo manda buwa waini iba emene mbira naga bialu habe.
1TI 5:24 Agali marume ko birago panigiore biagago wali agali bibahendeme manda biai howa lo tiga bule abale laga. Agali marume ko birago mendealime manda nabi bu donge ho kago maniore bia tagi haga.
1TI 5:25 Ogonidagua dege marume bayale birago wali agali bibahendeme manda biai haga. Bayale binigo maru manda nabini ngarubi do ho haabo habe nahe holebira.
1TI 6:1 Agali marume Ngode Datagaliwabebi ibunaga bi mana iname lawai haramagobi mege nabilo garabaya biabe ale biahaga karume tinaga anduane mitangi bialu tigua bia laradagua bulene nga.
1TI 6:2 Garabaya biabe ale bia haga karu tinaga anduane Keriso hameigini mbira heagua ogoni ibu agali dege kagoni lowa ibunaga bi larago mo waholene nawi. Tigua tinaga anduane biamogo birago ibu Keriso hameigini tini gubalini ho kago manda buwa biabe bayuwaore bulene nga. Mana uruni lamia lawai ha bigi bialu habe.
1TI 6:3 Mbiralime ina Anduane Homogo Yasu Kerisonaga bi henene lenego hame nale howa Yasu mana iname yu tiga bu kamagoni ngadagua ndo mana tara lawai hayagua
1TI 6:4 agali ogoni ibu manda nabi howa mine halu lawai halu ka. Ibu mini nawi howa bi dewa la gimbu bialu lai lolenebi bi gungubi biaga. Ani bima pialu dimagoli mini wuwa wali agali karu talebu ki bidagobi agua biya bada lowa lahiragabi
1TI 6:5 lai laabo hagabi mana urunibi hangu mo anda haga. Agali ogonibi biaga kago ibunaga mini ko howa mana henene ngaru yu wahai hene ka. Tigua manda bialu hearia Ngode Datagaliwabenaga mana lo ngagome ti mo homogo holebira manda biaga.
1TI 6:6 Mbiralime Ngode Datagaliwabe mana yu tiga bu howa dimagoli nahe ibuni wini ngagoore wu hayagua homogo heneneore holebira.
1TI 6:7 Ina ai̱yahanda ina taba hanayangi mbira agi yalu ibirimabe. Mbira nayi ibirima ndobe. Dindini howa mbira agi yalu poleberamabe.
1TI 6:8 Mbira nayi poleberama. Aniyagua mbirale tinginini bulenebi tomo nolenebi karulape ngamayagua nde karulape ogoni.
1TI 6:9 Anigo dindini dabudabu mo wia gimbu bule dimagoli ho karume ko mo bia holenenaga mana ngagoria pialu haga. Puwa mini nawi ale howa mo ko hole hame lolene gono ngagoha ti do wiaabo howa mo koore halu habane nabulene holebira.
1TI 6:10 Muni gubalini holene ngagome ko tara tara bibahendenaga tene nga. Wali agali marume muni gubalini hayagome Ngode Datagaliwabehondo mini mbiraore ala wiyago wahaya. Ani biyagome tinaga gubaliniha nogoba howa tandaga gibi naabo halu ka.
1TI 6:11 Anigo í̠ Ngode Datagaliwabenaga agali kegoni howa mana urunibi ngagoria wandialu habe. Ani bialu howa bulene ngaru uru. Mini tigabi holenebi Ngode Datagaliwabe mitangi bialu bulenebi Ngode Datagaliwabehondo mini mbiraore wulenebi gubalini holenebi hibu lolenebi bayale helo gedaore holenebi mana urunibi bialu habe.
1TI 6:12 Wali agalime bolangua hole hongo howa gerai lagadagua í̠na Ngode Datagaliwabehondo mini mbiraore wirigome haabobo holene yu kegoni yu howa bolangua hole hongo howa gerai labe. Í̠na wali agali dewame hale helo Ngode Datagaliwabehondo mini mbiraore wu ko lalu lapani haringi Ngode Datagaliwabehanda haabobo holene ogoni yu habelo ngule í̠ olayagoni.
1TI 6:13 Bibahendenaga holene miaga Ngode Datagaliwabe kago ibu deni howabi Keriso Yasuhanda Pondiasa Pailatehondo lapani halu i̱ Keriso kogoni lenego ibu deni howabi í̠na mbira bibelo í̠hondo hongo howa larogo ogo.
1TI 6:14 Ngode Datagaliwabehanda í̠hondo bibe layago mbira pugua nabi latago nahebi bialu keore dege Anduane Homogo Yasu Keriso hapani holene Horo tagira ibilo ani bialu habe.
1TI 6:15 Ngode Datagaliwabehanda Horo ogoni pongo bo winigo lola haragola Keriso ibu hapani holebira. Ngode Datagaliwabe ogoni ibu turu holene tene howa wali agali bibahende haru hai haga ibuni hangu ka. Dindini kini bibahende karunaga Handame Haga Kinibi dindini anduane homogo bibahende karunaga Anduane Homogobi ibu dege ka.
1TI 6:16 Ngode Datagaliwabe mbiraore hangu kago ogoni ibu nahomaga ka. Ibu wá holene teneore kago mbiralime ibu kagoha hapara habe nahe. Dindini karume Ngode Datagaliwabe de handabe nahe henego áyubi nde handabe nahe dege ka. Ibu mini mo yaraga habehebi ibu hongo haabo ka labehebi Ngode Datagaliwabe ibuninaga nga. Aniore wiaabo helo laro.
1TI 6:17 Dindini dabudabu dewawi karuhondo bi uru hongo howa lamibe. Mine nahe howa dindi dabudabu ereba haga ngaruha mini dunubia nahe Ngode Datagaliwabeha dege mini dunubia ho holene nga. Ngode Datagaliwabe ibugua mbuni nabi howa ina turu holoma̱ya bibahende bayale ngiai haga ka.
1TI 6:18 Dindi dabudabu dewawi biaruhondo bi hongo howa ogodagua lamibe, Biabe bayale dewa bulenebi biamogo bulenebi dabudabu ngamiru habua nabi tale bialu mulenebi mana uruninaga bulene ngadagua bialu halimu, lalu lamibe.
1TI 6:19 Tigua ogonidagua biragome tininaga mani holene mo tiga bu wulebira. Ani buwa holene heneneore ngago yu holebira.
1TI 6:20 Timodi-o Ngode Datagaliwabehanda biabe í̠na bibelo í̠hondo ngiyago bayuwa de hondowa bialu habe. Wali agali marume bi galone nawini bi anda halu, Ina mana manda biai kama, lalu kagoria nahe í̠ wandialu habe.
1TI 6:21 Ti marume lalu, Ina mana manda timbuni bu kama, lowa Ngode Datagaliwabehondo mini mbiraore wulene mo ba tara haya. Ngode Datagaliwabenaga biamogo bia holene tí bibahendeha haabo helo hamelo ko.
2TI 1:1 I̱ Polo Ngode Datagaliwabe ibuninaga hame leagome Keriso Yasunaga abosolo kogoni. Iname Keriso Yasuha howa holene gahenge yu holoma̱ya Ngode Datagaliwabehanda ala ngulebero lowinigo holene ogoni ibugua, Í̠na lamule pu, laya.
2TI 1:2 Timodi i̱ iginiore-o beba ogo í̠hondo gilibu wia haro. Aba Ngode Datagaliwabebi inanaga Anduane Homogo Keriso Yasubi libugua biamogo bia holenebi dara holenebi mo palia holenebi í̠hondo ngilo hamelo ko.
2TI 1:3 I̱na Ngode Datagaliwabehondo ka̱i̱ laro. I̱naga mamalime miniha ko do nahe howa Ngode Datagaliwabenaga biabe bialu henedagua i̱nabi ani bialu ko. Horombe mbiragabi ta nabi Ngode Datagaliwabehondo bi lalu howa í̠ mitangi biaabo halu ibuhondo ka̱i̱ laruli.
2TI 1:4 Í̠naga de iba ibiyago mitangi bialu turu holene i̱ha to̱lai helo í̠ lone de hondoa ho ko.
2TI 1:5 Í̠na Ngode Datagaliwabehondo mini mbiraore wirigoni heneneore wu haabo kego i̱na manda bu kogoni. Í̠ aguane Loisi í̠ ai̱ya Yunisila libugua Ngode Datagaliwabehondo mini mbiraore winidagua í̠nabi ani dege wu ke manda bu ko.
2TI 1:6 Irane ogonigo i̱naga gi í̠naga haguaneni wirugola Ngode Datagaliwabehanda mugube ngiyago anda helo ira hungu biagadagua mo hungu biahole mitangi bialu habe.
2TI 1:7 Ngode Datagaliwabehanda inahondo ibu Dinini ngiyago ibugua ina yurigihe holoma̱ya helaga ndo ka. Ibu Dinini ogoni ibugua hongo holenebi gubalini holenebi mini haru holenebi inaha to̱lai helo ngiaga ka.
2TI 1:8 Ogonigo inanaga Anduane Homogonaga mana walia hole í̠na taga nahe habe. I̱ Anduane Homogonaga garabaya agali kogo mitangi bialu í̠ taga nahe habe. Taga nahe howa Ngode Datagaliwabehanda hongo holene ngiradagua Bi Mana Debene lamulenenaga tandaga nolene ngagobi nalu habe.
2TI 1:9 Ngode Datagaliwabehanda ina pele ngialu ibunaga wali agali holoma̱ya ibugua ina olene. Ani binigo irane iname bayale birimagonaga ndo Ngode Datagaliwabe ibuninaga hame lolenemebi biamogo bia holenemebi ani bini. Bamba Ngode Datagaliwabehanda dindi wa nabi howa Keriso Yasuha howa ibunaga biamogo bia holene ogoni ngule lowini.
2TI 1:10 Mani inanaga Pele Ngiaga Keriso Yasu ibuni hapani hayangi howa ibugua biamogo bia holene ogoni inahondo walia hene. Keriso ibugua homolenenaga hongo tongolo wahowa bi mana debeneha howa haabobo holene walia hene.
2TI 1:11 I̱ Bi Mana Debene lamulene abosolobi lawai hagabi holiya Ngode Datagaliwabehanda dabo helene kogoni.
2TI 1:12 Anigo i̱ tandaga nalu kogo irane ogoninaga nalu ko. Ani bidogo taga nahe mini bilinahe howa i̱na ibuhondo mini mbiraore wirugo wu howa Ngode Datagaliwabehanda Horo Mbira pongo bo wini ngago lola helo ibugua mbirale i̱ha wia do hayago bayale wiaabo helo hondo holebirago yu tiga bidogoni.
2TI 1:13 I̱na í̠hondo bi mana tigatiga lawai harudagua biaabo hole hongo howa yu habe. Ani yu howa Keriso Yasuha ho gimbu bu howa mini mbiraore wulenebi gubalini holenebi inanaga ngago ogoniha howa haabo habe.
2TI 1:14 Ngode Datagaliwabe Dinini inaha kago ibunaga hongome í̠hondo mbirale bayale ngiyaru yu habe.
2TI 1:15 Pigelasa Hemoyanesila Esiali howa libu heba wali agali ogoniha hearu bibahendeme i̱ wahalu piai hayago í̠ manda bu kegoni.
2TI 1:16 Onesiborasa ibugua i̱ mo turu haabo hayago ibubi ibu damenerubi ti Anduane Homogohanda dara howa biamogo bilo hamelo ko. I̱ garabaya hewaria ibugua taga nahe howa
2TI 1:17 Lomo tanoni anda ibalu ibugua i̱ handa walia hole lowa hai biaabo haya.
2TI 1:18 Horo Mbira pongo bo wini ngago lola harangi Anduane Homogohanda ibuhondo dara howa biamogo bulene milo hamelo ko. Ebesa tanoni hewaria ibugua i̱ biamogo biaabo hayago í̠ manda bu kegoni.
2TI 2:1 I̱ igini-o biamogo bia holene ina Keriso Yasuha ho gimbu bu howa kamarunaga ngago í̠ nde ogoniha hongo ho habe.
2TI 2:2 Wali agali dewa hale ho helowa i̱na bi lawai haga biruruni í̠ hale harigonigo í̠na bi o larugoniore agali mini bilinahe lawai haga mugube yu karuhondo lamigi bialu habe. Mani nde tigua maruhondo lamilo manda buwa lamibe.
2TI 2:3 Anigo erekuibi mangabiru ngangi wahalu pu nabi howa hibu lalu Keriso Yasunaga ami agali mini bilinahe howa biabe bialu habe.
2TI 2:4 Ani howa ami agalime biabe bialu howa tinaga haru haga kago mo turu hole hame lowa tigua biabe tara mende nabiaga.
2TI 2:5 Mbiralime gerai lagago gerai langane mana lo ngadagua biai nahayagua ibu bolangua halu yolo miaganedagua namulebira.
2TI 2:6 Mbiralime tomo hangagago erekui biabe biragome tomo hini ngago ibuninaga wiagane.
2TI 2:7 I̱na bi o laroru mitangi bibe. Ani mitangi bialu kegola Anduane Homogo ibugua í̠hondo mo manda bia holebira.
2TI 2:8 Yasu Keriso homalu lone heyu hayagobi ibu Debidi aguanene hayagobi Bi Mana Debene ogoninaga lawai haruligoni mitangi bialu habe.
2TI 2:9 I̱na Bi Mana Debene ogoni lamialu haruligonaga agali marume i̱ mo tandaga halu ka. Agali ko biaga karu garabaya dariba hagadagua tigua i̱ dariba ho ka. Anigo Ngode Datagaliwabenaga bi mana dege dariba nahene.
2TI 2:10 Irane ogonigo wali agali Ngode Datagaliwabehanda dabayaru mitangi bialu pele ngulenebi bayale taraore haabo holenebi Keriso Yasuha ngago tigua yu helo i̱na hibu lalu ema nabi howa tandaga na halu ko.
2TI 2:11 Bi heneneore lagane ngago ogo Ina ibu heba homarimayagua nde inabi ibu heba dege haabo holeberama.
2TI 2:12 Ina hibu lalu ema nabi haabo harimayagua inabi haru haga howa ibu heba haru holeberama. Iname ibu erembira mialu ina ibu aria ndo kama larimayagua ibugua nde ina erembira ngialu, Tí i̱naga ndo kami, lolebira.
2TI 2:13 Iname mini bilinaho naharimayagua ibu mini bilinahe dege haabo kagome ibuni mo hondo habe nahe ka. lagane ngago gilibu nga.
2TI 2:14 Í̠na bi ogo wali agali mo mitangi bia haabo halu tigua bi tara tara nahabane ngarunaga bi mo anda howa gungu buligo í̠na Ngode Datagaliwabe deni howa tihondo, De hondo halimu, lalu lamibe. Bi ogoni aleme wali agali hale hararu mo bayale nahaga mo ko hagane nga.
2TI 2:15 Í̠na Ngode Datagaliwabenaga bi mana henene ngadagua tigatigaore lawai hole ibunaga deni howa taga nahe habe. Ngode Datagaliwabehanda í̠hondo turu howa, Bayuwaore bialu hari, lelo ani bialu habe.
2TI 2:16 Ani howa bi nagalone lalu kagoria í̠ nahe wandialu habagi habe. Bi urunibi laragome wali agalime Ngode Datagaliwabe erembira mialu pelonaga mo manga haga.
2TI 2:17 Mana ogoni aleme dere bidadagua bialu mo timbu howa wali agali mo ko hagane. Agali kira Haimeneasa Piledasa lalibugua mana ogonibi lawai haga ka.
2TI 2:18 Libu hariga tigabi ngago wahalu ina homalu heyu holeberamagonaga libugua lalu, Ina abale heyu harimagoni, laga ka. Ani larago hale howa wali agali marume mini mbiraore ala wiyago wahowa mini tara mende wiaribia halu ka.
2TI 2:19 Anigo ina mini mbiraore wulene tene Ngode Datagaliwabehanda anda gene ale helenego ema nabibehe haabo kagoni. Ogoriani bi kira gilibu wini ngago mbira ogo, Anduane Homogohanda wali agali ibuninaga karu manda biai ho ka. Bi mendegome lalu, Mbiralime i̱ Anduane Homogonaga ko, layagua ogoni ibu ko ngaruhondo erembira mialu wahalu polene nga, lalu gilibu nga.
2TI 2:20 Anda timbuniha ndisi tara tara dewa wiaganego maru ngolo silibamebi wabini wiaga. Maru nde irame wabini wialu maru nde dindi dongomame wabini wialu biaga. Ndisi maru biabe tara bulenaga dabo bagi ho ngelaga maru horo bibahendengi bulenaga wiaga.
2TI 2:21 Mbiralime mana ko bibahende ngaru uruni wahai hayagua ibu ndisi bayale dabo bagi ho wiaganedagua ibu Ngode Datagaliwabehondo loma bia ho holebira. Ibugua ibunaga Anduane biamogo bia halu biabe bayale bibahende bule holebira.
2TI 2:22 Igiri daliahe karume tinaga bu miniha dimagoli hagadagua nahe í̠ habagi howa agali bu miniha gahengeme Anduane Homogohanda ti biamogo bilo olaga karu baba howa mana tigabibi mini mbiraore wulenebi gubalini holenebi mo palia holenebi tai bialu habe.
2TI 2:23 Wali agali marume mini nawi howa irane nawini bi anda halu kagoria nape ti gungu bulebirago manda buwa ti heba nahe wandialu habe.
2TI 2:24 Ani howa Anduane Homogonaga biabe biaga karume gungu bulene nawiore. Tigua wali agali bibahende ta nabi karuhondo biamogo biagabi lawai haga mini bayalewibi kebabi nahe howa holene nga.
2TI 2:25 Tigua wali agali Ngode Datagaliwabenaga bi mana mo wahaga karu ti bayale helonaga hendore howa mo tiga bia holene nga. Ani biyagua mani tigua mana henene ngago manda bilobi mini beregedelobi Ngode Datagaliwabehanda henge mulebira.
2TI 2:26 Tigua mini wia dai bialu ala dama Heyolabeme hame layadagua bilo gono wedagoha ti mininigo mani gono ogoniha howa do gundu lalu ibida polebira.
2TI 3:1 Bi mbira ogo manda bibe. Hamaro bulene horo kaware harangi ko holene timbuni wulebira.
2TI 3:2 Wali agalirume tini hangu mitangi bulenebi muni dimagoli holenebi mine holenebi mege bulenebi bi koorene ko nakarulapeore lolenebi aba ai̱yalanaga bi mo waholenebi ka̱i̱ nalolenebi tigua Ngode Datagaliwabe mitangi nabi holenebi wulebira.
2TI 3:3 Wali agalihondo gubalini naholenebi dara naholenebi gurulenebi bo waholenebi keba timbuni holenebi bayale bulenela waitigi ho halu ani bulene wulebira.
2TI 3:4 Tigua tinaga damene waitigi karuhondo ndelo mulenebi mini nawi howa abale bulenebi, I̱ni mini timbuniorewi ko, lo mitangi bulenebi Ngode Datagaliwabe mo tene nahe tingininaga mana ngago dege mo tene holebira.
2TI 3:5 Tigua Ngode Datagaliwabe mana ngaru tingini degeme bialu ibunaga hongo holene henene ngago manda nabi holebira. Timodi-o wali agali urunibi karu heba mandagi nahabe.
2TI 3:6 Agali urunibi marume wali mini nawi ale bedaru andaga anda puwa wali uruninaga mini mo dariba haga. Wali urunime ko dewa ala biyagonaga genda howa lone dimagoli dege halu biraga.
2TI 3:7 Tigua mana lo manda bua howa mana henene yu tiga nabibehe beda.
2TI 3:8 Bamba Yanese Yambereselame Mosesehondo handabe manga halu henedagua wali agali urunibime mana henene ngago manga howa wahaga ka. Tigua minime tigatiga mitangi nabiaga howa Ngode Datagaliwabe mana yu tiga nabibehe ka.
2TI 3:9 Urunime ani bima puabo naholebira. Bamba heneyarume Yanese Yamberesela libu lulu ale nakarulape heago handa walia henedagua wali agali áyu karume uruni ti ogonibi dege kane handa walia holebira.
2TI 3:10 Anigo í̠ ogonibi ndo harili. I̱na mana lawai haruligobi biabe bialu haruligobi holene mo tene haruligobi í̠na ogonidagua bialu i̱ talima ibalu kegoni. I̱na Ngode Datagaliwabehondo mini mbiraore wu kogobi ema nabi haabo haruligobi gubalini ho haruligobi hibu lalu haruligobi
2TI 3:11 marume i̱hondo kagua biraligobi i̱ tandaga naruligobi í̠ manda bu ke. Andiogo tanobi Aigoniama tanobi Lisidara tanobi uruniha hewaria i̱hondo bibahende biyagonaga tandaga timbuni naabo halu harugo uruni bibahende í̠ manda biai kegoni. Anigo bibahende biyarunaga tandaga nalu hewago hondowa Anduane Homogohanda i̱ pele ngialu haru piya.
2TI 3:12 Wali agalime Keriso Yasuha ho gimbu bu howa Ngode Datagaliwabe mo tene holene nga manda biragola maru karume ti mo tandaga holebira.
2TI 3:13 Wali agali mana ko biagarubi bayaore tingi hagarubi ti ko howa hama pialu koorene ko holebira. Tigua wali agali mo hondo halu kagola dama Heyolabeme tinibi mo hondo halu holebira.
2TI 3:14 Í̠ nde mana henene lo manda bialu harigo yu tiga bu kegonigo hongo howa yu haabo habe. Í̠hondo mana lawai hayaru urumelo í̠ni manda bu kegoni.
2TI 3:15 Anduane Homogonaga mbugani bi lo ngago í̠ igiri emeneni howa lo manda biaabo halu harigo kegoni. Anduane Homogonaga mbugani bi lo ngagome mini gigabi mo wia halu Keriso Yasuhondo mini mbiraore wuleneme Ngode Datagaliwabehanda pele ngiaganego í̠ni manda bu kegoni.
2TI 3:16 Anduane Homogonaga mbugani bi bibahende lo ngaru agalime gili bilo Ngode Datagaliwabehanda ti mo manda bia hene. Ibunaga mbuga ogoni bi lo ngarume mana henene lawai holebi mana yole ngago mo tiga bulebi mana nakarulape ngago mo waholebi hariga tigabini holene mana lamulenebi ngagoni.
2TI 3:17 Anigo ina Ngode Datagaliwabenaga biabe biahaga kamaru bi mana ogonidagua lo ngagome mo karulapeore helaragola biabe bayale tara tara bulene mugube yu howa bayuwa bialu holeberama.
2TI 4:1 Keriso Yasu ibugua dabaga howa wali agali áyu karubi homenerubi heba godi lolebira. Ibugua dai bialu Handame Haga Kini howa wali agali bibahende haru holebirago mitangi bibe. Ngode Datagaliwabebi Keriso Yasubi libu deni howa i̱na í̠hondo bi ogoni hongo howa laro.
2TI 4:2 Mana ogoni lamialu howa horo bibahendengi lamiaabo habe. Wali agalime hale hoa hayaguabi nahayaguabi ta nabi harugo lowa ti hale hai helo lamiaabo habe. Í̠na ani lamialu howa mo tiga bialu talialubi mini elahe helo mo hongo halubi lolene ngadagua ema nabi howa hibu lalu lawai habe.
2TI 4:3 Awe wali agali marume bi mana henene hale habe manga howa tini hame ledadagua bulebira. Tigua bi mana tara nakarulape hale hoa howa bi mana ogoninaga lawai haga karu heba mandagi mo ngoai ho holebira.
2TI 4:4 Ngode Datagaliwabenaga bi mana henene ngago hale habe manga howa erembira mialu mamalinaga bi te tara tara nagalone ngaru hale hoa holebira.
2TI 4:5 Anigo í̠na horo bibahendengi mini haru haabo halu tandaga nolene ngayagua hibu lalu nalu habe. Bi Mana Debene lamiaga kego Ngode Datagaliwabenaga biabe bia haga howa biabe bibahende bulene ngaru bayuwa bialu biai habe.
2TI 4:6 I̱ nde i̱ni Ngode Datagaliwabehondo loma bialu bo mulene pongo bo winigo áyu ngagoni. I̱ dindini holene hamaro bule ko.
2TI 4:7 I̱na hongo howa gerai lalu henego ai i̱ pole winigoria pu maro biru. Ngode Datagaliwabehondo mini mbiraore wulene wa nahe wiaabo kogoni.
2TI 4:8 Anduane Homogo ibu Dabaga tigabi kago ibugua Horo Mbira pongo bo winingi i̱na bolangua harugonaga yolo wu kago i̱hondo ngulebira. Yolo ogoni Ngode Datagaliwabehanda i̱hondo, Í̠ mini tigabiwi kego, lolene wulebira. I̱ hanguhondo ndo wali agali Anduane Homogo dai bilo hame lowa hondo karu tihondobi tinaga ngago mulebira.
2TI 4:9 I̱ kogoria abaleore ibule manda bibe.
2TI 4:10 Demasa ibugua dindini holene mbirale ngaru gubalini howa i̱ wahalu ibu Tesalonaiga piya. Keresenese ibu Galesia piya. Taidasa ibu Dalamesia piya.
2TI 4:11 Lugu dege iya kaba. Maga ibu biabe biamogo bibehe kago í̠na ibu damu pialu libu haru ibalibu.
2TI 4:12 I̱na Tiyigasa ibu Ebesa pelo ibuhondo pu laru.
2TI 4:13 I̱ ibalu howa i̱naga aga luni Toroasani howa Kabasanaga andagani ngelarugo mo yalu mbuga ngelarugobi yalu ibabe. Mbuga maru nogo dongoneme wabinigo ngaru galone timbuniorego embeda holeni mo yabe.
2TI 4:14 Aleganda ibu ege to̱le̱ mini gabame mbirale tara tara wabiaga biago ibugua i̱hondo handabe manga timbuniore haya. Ani biyagonaga Anduane Homogohanda ibuhondo pani karulape mulebira.
2TI 4:15 Iname Ngode Datagaliwabenaga bi mana lameramaligonaga ibugua keba timbuni howa ina bo wahole manda bu kago í̠ nde de hondowa habe.
2TI 4:16 Godi halu mbira larimangi i̱na ladai birugola agali mbira i̱hayagi nahe bibahende wahalu piai haya. Tigua nakarulape ogoni biyago Ngode Datagaliwabehanda mitangi nabilo hame ledo.
2TI 4:17 Anduane Homogo ibugua i̱ wahalu pu nabi i̱la haabo howa mo hongo hayagola Yu wali agali ndo tara tara hearu ti hale helo i̱na Ngode Datagaliwabe bi mana lamiai harugoni. Tigua i̱ bo homelole biyaria Anduane Homogohanda i̱ yamiya.
2TI 4:18 Anduane Homogohanda i̱ ko bibahende ngagoria kogola i̱ yamiaabo howa dahuliya andaga ibuni Handame Ho Kagoria i̱ haru polebira. Ibunaga mini mo yaraga holene wiaaboboore bilo hamelo ko. Aniore bilo laro.
2TI 4:19 Pirisila Aguilabi Onesiborasa ibu damenerubi i̱na ti bibahende mitangi biaabo halu ko, layiya lalu lamibe.
2TI 4:20 Erasadasa ibu Korindini hondo haya. Torobimasa ibu warago bayagola Miledasani ngelalu piru.
2TI 4:21 Ira yuni gilope howa dagare ibagane hororu naibidaore i̱ kogoria abale ibulene ngago ibabe. Yubulasabi Pudenesebi Lainasabi Kolodiabi Keriso hameigini bibahendemebi, Tí mitangi ho kama, layiya lalu lamibe.
2TI 4:22 Anduane Homogo ibu í̠naga dinini heba halu Ngode Datagaliwabenaga biamogo bia holene tí bibahendeha wiaabo helo hamelo ko.
TIT 1:1 I̱ Polo Ngode Datagaliwabenaga biabe biahagabi Yasu Kerisonaga abosolobi kogoni. Wali agali Ngode Datagaliwabehanda dabayaru ti ibuhondo mini bilina ho haabo helobi bi mana henene yu tiga biai helobi i̱na ti biamogo buliya ibugua i̱ dabo helaya.
TIT 1:2 Haabo holene yule mini dunubia ho holene tene mana henene ngagoria nga. Haabo holene ogoni Ngode Datagaliwabe ibu mini bilinahe howa bibahende nawabi heangi, Ngulebero, lalu heneneore lowini.
TIT 1:3 Ngode Datagaliwabehanda horo mbiru pongo bo winigo lola hayagola holene ogoni ibunaga bi mana langialu inahondo mo pani haya. Inanaga Pele Ngiaga Ngode Datagaliwabe ibugua bi mana i̱na wali agalihondo lamuliyanaga biabe ogoni i̱hondo ngiya.
TIT 1:4 Ngode Datagaliwabehondo mini mbiraore wu harabaligo manda buwa Taidasa-o i̱ igini henene kego i̱hondo beba ogo gilibu wia haro. Aba Ngode Datagaliwabebi Pele Ngiaga Keriso Yasubi libugua í̠hondo biamogo bia holenebi mo palia holenebi ngilo hamelo ko.
TIT 1:5 Biabe biai nahe bulene maru wiago biai habelo i̱na í̠ Kiridi dindini habe lalu piru. Í̠na bialu habe larugo ogo. Tano bibahendeha Keriso hameigini karu haru helo agali ala hene miniwi karu mbira mbira dabo helabe, laru.
TIT 1:6 Agali ala hene miniwi uruni ti kagua nabiagamebi one mbira hangu beremebi tinaga waneiginime Keriso mana yu tiga biaga howa kagua nabi aba ai̱yalanaga bi larago hale hagamebi agali ogonibigo helolene nga, laru.
TIT 1:7 Agali Ngode Datagaliwabenaga wali agali haru holebirago mana tiga tiga biagago hangume haru helo dabo helabe. Ti mine nahagabi abale keba nahagabi lulu yule waini iba timbuni nanagabi gungu nabiagabi muni dibaudu nahagabi helolene nga.
TIT 1:8 Tigua wali agali nenege hinagabi bayale bibahende ngago bulene hame lagabi mini haru hagabi mini tigabiwibi Ngode Datagaliwabehondo tini loma bia henebi tinginime hame lagaru bibahende haru hai hagamebi holene nga.
TIT 1:9 Tigua bi mana heneneore lameramaligoni hangu hongo howa yu holene nga. Ogonibi howa tigua bi mana henene bayuwa lawai haragome wali agalinaga mini mo hongo halubi maru bi mana hame nalaga karu ti nakarulape harimadane hendelo walia halubi holebira.
TIT 1:10 Agali dewa mana henenego yu tiga nabiaga howa tigua bi nahabane ale la gimbu bialu wali agali mo hondo halu ka. Ogoni Yuali dongone podo mabu biaga karume ani biaga ka.
TIT 1:11 Tigua muni dimagoli howa mana ko nakarulape ngaru hangu lawai halu damene dewa bu karu mo gura hangu hangu helo mini burugula halu ka. Agali urunibime bi larago nalalimu lolene nga.
TIT 1:12 Bamba Kiridiali mbira tininaga mana latagi halu mbiwia haga henegome lalu, Kiridiali ke̱ hagabi nogo gabua ale ko hagabi tomo timbuni nagimbu buwa biabe manga hagabi ka, lene.
TIT 1:13 Ibugua bi ogoni lenego heneneore lene. Irane ogonigo ti Ngode Datagaliwabe mana hangu yu tiga biaabo helo í̠na ti hongo howa talialu lamibe.
TIT 1:14 Yualinaga mamali tebi agali degeme mana wabu wini ngarubi ti wahai helo ani talibe. Agali urunime mana henene ngaru hame nale wahai halu mana nakarulape ogoni lawai hagane tene ti ka.
TIT 1:15 Mini tigabiwi karume mbirale bibahende ngago tigabi dege mitangi biaga ka. Anigo Yasuhondo mini mbiraore nawi karume bibahende ngago ko dege mitangi biaga ka. Tinaga minibi mandabi ko hai hene ka.
TIT 1:16 Tigua bi degeme lalu, Ina Ngode Datagaliwabe mana manda biaihe kama, lagago tigua mana bia tagi haragome, Ina Ngode Datagaliwabe mana manda nabi kama, lalu walia haga. Tigua wali agalihondo handabe manga hagabi mana tigabi bibahende ngaru wahagabi ogonibi howa ti bayale mbira nabibehe holebira.
TIT 2:1 Í̠na Ngode Datagaliwabe bi mana henene lowini ngago bayuwa lawai halu habe.
TIT 2:2 Agali waheruhondo ogodagua lawai habe. Bayuwa mitangi bialubi mini wialubi mini haru halubi Yasuhondo mini mbiraore henene wiaabo ha gubalini ha hibu laabo halubi ani bialu holene nga, lalu lamigi bialu habe.
TIT 2:3 Wali waheruhondobi nde bi ogodagua lalu lawai habe. Diburibu lalu nalagabi waini ibame mini mo dariba nahelobi Ngode Datagaliwabehanda hame ledadagua bialu birulene nga. Tigua mana bayale biawai halu
TIT 2:4 wali daliaherume tinaga agalinibi waneiginibi gubalini holene nga.
TIT 2:5 Ti mini haru helobi mini gahenge wilobi andaga bayuwa hondo berelobi agalinime bi larago mo wa nahelobi ani bigi bilo lawai holene nga. Ani bialu bedayagua maru karume, Ngode Datagaliwabe mana ko nakarulapeda, lolene henge nawulebira.
TIT 2:6 Agali daliaheruhondo, Mini haru holene nga, lalu ogodagua lamibe.
TIT 2:7 Í̠nime mbirale bibahende berego bialu howa mana bayale berego marume hendelo biawai halu habe. Mana lawai halu howa í̠ mini bilinahebi tigabibi habe.
TIT 2:8 Í̠ baba waitigi ho karume í̠ gurulene henge handa walia nahelo bi galone hangu lamialu habe. Tigua ina guralu bi ko lolene henge handa walia nahe howa taga pani nolebira.
TIT 2:9 Garabaya biabe ale biahaga karume tinaga anduane mo turu halu tigua bia laradagua bialu bi la dai nabi howa bibahende biai holene nga.
TIT 2:10 Ti anduanenaga mbirale ngago kayu nabi howa bayale hangu biaabo halu mini bilinahe karia marume hondowa inanaga Pele Ngiaga Ngode Datagaliwabe mana, Bayaleoreda, lelo biawai halu howa walia habe.
TIT 2:11 Ngode Datagaliwabehanda wali agali bibahende pele mulene yu helo ibunaga biamogo bia holene walia hene.
TIT 2:12 Ngode Datagaliwabehondo, Mangaba, lalu erembira mialu ko bibahende bulenebi waholoma̱ya biamogo bia holene ogonime ina biawai haga. Mini haru holenebi tigabi holenebi Ngode Datagaliwabe mo tene holenebi dindini kamago howa ina ani bialu holoma̱ya biamogo biaholene ogonime ina biawai haga.
TIT 2:13 Ina dindini ani bialu howa inanaga Yasu Keriso ibu Ngode Datagaliwabe timbuni howa Pele Ngiaga kago ibunaga wá taraore holene hapani helo hondo kama. Horo turubi ogoni hondole mini dunubia ho kama.
TIT 2:14 Ina ko bulene wiagoria hemaria pele ngialu golope holebi ibunaga wali agali dege howa bayale bulene hame lalu ina mini gahengewi hangu holoma̱yabi ibugua ani homo aribia hene.
TIT 2:15 Mana ogoni wali agalihondo lawai halu habe. Ani lawai halu howa mini mo hongo halubi talialubi ani bigi bialu lolene ngadagua Ngode Datagaliwabenaga hongoni howa lalu habe. Wali agalime í̠ mo yo hendelo nabialu habe.
TIT 3:1 Keriso hameigini í̠ aria karu lone mo mitangi bia halu í̠na tihondo ogodagua lamibe. Tigua gabumane haru haga hongohe karume mana lo ngadagua bilobi mana bayale bibahende bulene manda bu helobi lamibe.
TIT 3:2 Tihondo agua lamibe, Mbiraligo guraga nabilimu. Bi gungu nabi howa mo palia halubi nenege hinalubi wali agali bibahendehondo gedaore howa bayale bialubi holene nga, lalu lamibe.
TIT 3:3 Au lamibe, Ala iname mini nawi howa mana pugualubi ko bialu tinginime hame lagane ko tara tara dewa wiarume dariba hayagola harima. Ani bialu howa iname wali agalihondo ko mitangi bialubi nayido agini henge lalubi harima. Wali agali marume inahondo handabe manga hayagola iname nde tihondo handabe manga ho harima.
TIT 3:4 Ani bialu hemagola dege ina Pele Ngiaga Ngode Datagaliwabehanda ibunaga biamogo bia holenebi gubalini holenebi inahondo walia halu pele ngiya.
TIT 3:5 Ibugua ina pele ngiyago irane iname biabe bayale mbira birimagonaga ndo ibunaga dara holene wiagome ina pele ngiya. Ngode Datagaliwabe Dinini ibugua ina wayawaya bialu mini gahenge taba hanalu holene gahengebi ngiya.
TIT 3:6 Ngode Datagaliwabehanda Pele Ngiaga Yasu Keriso togoni howa ibu Dinini inaha to̱lai helo ngiya.
TIT 3:7 Ani biyago irane Ngode Datagaliwabe ibugua Kerisonaga biamogo bia holeneme inahondo, Tí mini tigabiwi kami, laragola ina minime dunubia ho howa haabo holene yu hole kama.
TIT 3:8 Bi ogoni heneneore lo nga. Ngode Datagaliwabehondo mini mbiraorewi karume biabe bayale biaabo helo í̠na mana ogoni hongo howa lamialu haabo habelo hamelo ko. Biabe bayale ogonibi biragome wali agali bibahende biamogo bilonaga bulene nga.
TIT 3:9 Galone ndoni lai lolenebi mamali dewaru mini lo bila holenebi lai gungu bulenebi Mana lowinigonaga bi gungu bulenebi urunibi galone nabulene lagago í̠na urunidagua lalu kagoria nahe wandialu habe.
TIT 3:10 Mbiralime Keriso hameigini karu talebu ki bule bi nakarulape mbira layagua halu kibi lo tiga bialu lamibe. Lameregola ibu hale nahayagua wahalu tagira pu labe.
TIT 3:11 Agali ogonibi ibugua kagua biragome ibuni miniha ko ngagobi walia haga.
TIT 3:12 Ademasadabe be Tiyagasadabe hondowa i̱na mendealigo í̠ keria pu lagua. Libu mendealigo, Pu, laragola í̠na i̱ Nigobolisi tanoni koria ibuleore manda bibe. Ira yuni gilope howa dagare ibagane hororu birangi Nigobolisi tanoni holebero manda bu kogoni.
TIT 3:13 Mana bayale mo wála halu lamiaga Senasa ibubi Abolosobi libu ibaga bialu polebira. Libu harigani pialu karia buru pale holigo í̠na libu biamogo bule manda buwa habe.
TIT 3:14 Keriso hameigini ina aria habane nabulene nahelo horo bibahendeni biabe bayale hangu bialu wali agali maru buru pale karu henene biamogo bulene nga manda bilo lamibe.
TIT 3:15 Wali agali i̱ heba kamaru bibahendeme, Tí mitangi biaabo halu haramali, layiya lalu lamibe. Wali agali Ngode Datagaliwabe mana yu tiga bu karuhondo iname, Tí mitangi biaabo halu kamago, layiya lalu lamibe. Ngode Datagaliwabenaga biamogo bia holene tíha wiaaboboore wilo hamelo ko.
PHM 1:1 I̱ Polo Keriso Yasunaga biabe biahaga hewago hondowa marume i̱ dariba hayago kogoni. I̱bi ina hamene Timodibi iyame ina hameneore howa biabe mandagi beramali Pilimono í̠bi ina mbalini Abiabi Yasunaga ami agali Agibasabi Keriso hameigini í̠ andaga ngoai hagarubi tíhondo beba ogo gilibu wia haraba.
PHM 1:3 Inanaga Aba Ngode Datagaliwabebi Anduane Homogo Yasu Kerisobi libunaga biamogo bia holenebi mo palia holenebi tíhondo ngilo hamelo ko.
PHM 1:4 I̱na horo bibahendengi Ngode Datagaliwabehondo bi lalu howa í̠ mitangi bialu ka̱i̱ laruli.
PHM 1:5 Irane í̠na Ngode Datagaliwabenaga wali agalihondo gubalini ho kegobi Anduane Homogo Yasuhondo mini mbiraore wu kegobi hale haru.
PHM 1:6 Í̠na mini mbiraore wu kegonaga mana wali agali maruhondo lamialu kegoni howa ina Kerisoha hogimbu bu kamagonaga turu holene tara tara ngaru manda biai hami̱ya Ngode Datagaliwabehondo bi ani lalu ko.
PHM 1:7 Hamene-o í̠naga gubalini holene ngegome Ngode Datagaliwabenaga wali agali bibahendenaga gubalini mo turu hai hari. Ani birigome i̱ mo turu halu i̱naga mini mo hongo hari.
PHM 1:8 Irane Kerisoha i̱ í̠naga hamene howa mbirale mbira bulene nga ale í̠hondo hongo howa, Harugo bia, labehe kogonigo.
PHM 1:9 Nde abule i̱na í̠ gubalini timbuniore ho kogodago bame la hangu bero. Ani larogoni i̱ Polo Keriso Yasunaga bi lamiaga kogoni hewaria marume dariba henego áyu garabaya kogoni howa ani laro.
PHM 1:10 I̱ garabaya howa Onisimasi ibu Kerisohondo mini mbiraore wilo lowa Ngode Datagaliwabe mana lawai haru. Ani lawai harugola ibu mini mbiraore wiyago Kerisoha howa i̱ iginiore kago ibunaga la haro.
PHM 1:11 Ala ibu í̠la habane mbira nabulene hayago áyu nde í̠nagabi i̱nagabi galone biaholene kagoni.
PHM 1:12 Áyu í̠ kegoria daibi larogo. Ibu ibiradagua i̱naga gubalini holene ibu heba ibilaro.
PHM 1:13 Bi mana debene lawai haruligonaga garabaya kogoni koria í̠na i̱ biamogo biradagua Onisimasi ibugua bilo ibu i̱la, Haba, lole hame laru.
PHM 1:14 Anigo nde í̠na i̱ biamogo bia naloleberogo í̠ni bua biradagua dege bibe larogoni. Harugo mbira bia nalolebero. Í̠ni hame lededagua bia labelo henge ngero.
PHM 1:15 I̱na manda berogola Onisimasi ibu emene tigimandi hanguni pubagi ho hayagonigo nde abule horo bibahendeni ibu í̠nila haabo holeberabi.
PHM 1:16 Ai áyu ibu garabaya biabe ale biahaga hangu ndogo ibu Kerisoha howa iya hameneore kabagoni. Ibuhondo gubalini howa mitangi timbuni ho kogoni. Í̠na ibu garabaya biabe ale biahagabi Anduane Homogoha í̠naga hameneorebi ka mitangi buwa ibuhondo gubalini timbuniore ho holebere.
PHM 1:17 Í̠na iya mini mbiraore ho kabago manda biriyagua i̱ eberogola turu holenedaguaore Onisimasi ibiragola turu halu haru dai bibe.
PHM 1:18 Ibugua í̠hondo kagua mbira biniyaguabi í̠la dano mbira heneyaguabi i̱ha mo bade habe.
PHM 1:19 Ogoria i̱ninaga gime gili berogo. I̱ Polohanda yolo bia dai bulebero. I̱na í̠hondo mo mitangi bia habe naheorego irane í̠naga holene i̱hondo dano ho kegoni í̠ni manda bidegoni.
PHM 1:20 Anigo i̱naga hameneore Anduane Homogo mitangi bialu i̱ mo turu habe. Iya Kerisoha hamenela kaba manda bialu i̱ mo wála habe.
PHM 1:21 I̱na gili bialu howa manda berogola bi larugo hangu ndo bulebere. Maru biatago halu bulebere manda bido.
PHM 1:22 Ani bialu howa i̱ ibalu paluene anda hobane mbira manda manda bibe. Irane tígua i̱naga Ngode Datagaliwabehondo bi la halu kamigo ibugua ladai bialu i̱ tíni kamiria haru dai bulebira lowa mini dunu bia ho kogoni.
PHM 1:23 Ebaborasa ibubi Keriso Yasunaga biabe biyagola garabaya binigo i̱ heba kabago ibugua, Í̠ mitangi bialu ko, laya.
PHM 1:24 Agali maru i̱ heba mandagi biabe biaga Maga Arisadagasa Dimasa Luguma tiguabi anidagua dege laya.
PHM 1:25 Anduane Homogo Yasu Keriso ibunaga biamogo bia holene tíha wiaabo helo hamelo ko.
HEB 1:1 Bambaore Ngode Datagaliwabehanda inanaga mamali heneruhondo bi dewa haluore lamigi bialubi walia dewa tara taraore halubi ibunaga mana latagi haga hearuha howa ani bigi bialu hene.
HEB 1:2 Ani binigo horo áyu kamarunaga Ngode Datagaliwabehanda ibu Iginiha howa ina bibahendehondo bi langialu henego ka. Ngode Datagaliwabehanda ibu Iginiha howa dindi bibahendehabi hari daligahabi bibahendeore wabiai hene. Ani bialu ibugua bibahende wabiniyaruni Igini ogoni ibuninaga hai helo Ngode Datagaliwabe ibunime ibu dabo helene.
HEB 1:3 Ani bialu Ngode Datagaliwabe ibuni wá baya taraorehe kagobi ibu Iginihabi wá ogoni hatagi halu kagoni. Ngode Datagaliwabe ibuni kagobiore ibu Igini kagoni. Ibugua ibunaga bi gibi hongohe ngagome dindiha ngarubi hari daligaha karubi ina kamarubi bibahendeore ibuni yania hai ho kagoni. Ani bialu ibugua wali agali bibahendenaga ko domo waholenaga ibugua halu mbira hangu homo aribia halu ibu dahuliya andaga Ngode Datagaliwabe hongo gibiorehe kagonaga gi tigahayagi pu berenego beda.
HEB 1:4 Igini ogoni ibu dahuliyali karubi ndo daliga helonaga helene. Ogonidagua dege Ngode Datagaliwabehanda Igini ogoninaga minibi dahuliyalirunaga mini dindiha lowa ibunaga daligaore wini.
HEB 1:5 Anigo Ngode Datagaliwabehanda ibunaga dahuliyali karu mbiralihondo lalu, Í̠ i̱ Iginiore kegoni áyu í̠ aba i̱ harogo, lalu ogonidagua naleore dege ka. Bi mendebi Ngode Datagaliwabehanda dahuliyali karu mbiraligo mitangi bialu lalu, I̱ Igini ibu helo ibu aba i̱ holebero, lalubi ogonidagua nalene dege ka.
HEB 1:6 Ani nale howa Ngode Datagaliwabehanda ibu Igini mbiraoreore henego dindini ibilalu howa lalu, Ngode Datagaliwabenaga dahuliyali karu bibahendeme ibu mitangi bialu ibunaga mini yaraga halu holene nga, lene.
HEB 1:7 Ai Ngode Datagaliwabehanda dahuliyali karunaga mitangi bialu ogodagua lalu, Ngode Datagaliwabehanda ibunaga dahuliyali karuni puyabu pulagane helalu ibunaga biabe bia haga karu ira hungu biagane helaga, lene.
HEB 1:8 Ani lenego Ngode Datagaliwabehanda ibu Igininaga mitangi bialu ogodagua lalu, Ngode Datagaliwabe-o í̠na wali agali karu handame howa haru haabobo bu holebere. Í̠na í̠naga wali agali karu handame howa haru halu tihondo tigatiga hanunigo bialu kegoni.
HEB 1:9 Í̠na mana tigabi hanuniore bulenego gubalini howa mana ko bulenego hame naleore kegoni. Irane ogoninaga í̠naga Ngode Datagaliwabe ibugua í̠ dabalu í̠naga nenege karuhondo turu holene midagobi ndo í̠naga mini yaraga halu í̠hondoore turu holene daliga ngidagoni, lene.
HEB 1:10 Ibugua bi mendebi agua lalu, Anduane Homogo-o í̠na piganengi dindi wabialu í̠ninaga gime hari daligaha karubi wabirigoni.
HEB 1:11 Uruni bibahende ereba hai holebira. Aga bu henego goba halu ereba hagadagua ereba haragola í̠ni ha ho wiaabo holebere.
HEB 1:12 Dindibi hari daligabi bibahende í̠na aga pau lagadagua pau lalu aga karulenego golalu mendego karula aribia hagadagua aribia holebira. Anigoyu í̠ni kegobi dege ha ho wiaabo halu í̠naga hamaro bulene nawuleore bira, lene.
HEB 1:13 Ngode Datagaliwabehanda ibunaga dahuliyali karu mbiraligohondo ogodagua lene nawi, Í̠naga waitigi karu í̠naga geme hengedai habelo i̱na mo heloliya í̠ i̱naga gi tigahayagi ogoria birabe, lalu ogonidagua nalagaore ka.
HEB 1:14 Aniyagua dahuliyali karuni ti agi aledabe. Ti dinini howa Ngode Datagaliwabenaga biabe biaga mbira wali agalime pele mulene yu helo lowa dahuliyali urunime biamogo bia helo Ngode Datagaliwabehanda dalilenego ka.
HEB 2:1 Galone ogoni heneneoreyane hale harimadagua hale ho dungu lo bayuwa yu ndibu lalu hami̱ya. Ani nabi howa yu hadogoea larimayagua inanaga pele mulene ngidagoni yu waholeore berama.
HEB 2:2 Inanaga mamali heneruhondo dahuliyaliruha howa mana ogoni heneneorego lalu Ngode Datagaliwabehanda lawia henego tihondo lamini. Ani lamialu heagola wali agali marume mana ogoni hale halu bia nabi mo wahayaru tini pani nolene wiadagua nelo mini.
HEB 2:3 Ani bini ngago inahondo pele nginigo galone emene ndo timbuniore ngago lalu bayuwa hale nahe howa mo wahalu harimayagua nde ina yo polene nawulebiraore. Anduane Homogo ibunime pele ngulene ogoni pigane lope heneya. Ani lope hayagola wali agali hale hayarume heneneore walia halu inahondo langidagoni.
HEB 2:4 Ani langidagonaga Ngode Datagaliwabe ibugua agalime nabiaga alerubi nahendene ale tara tararubi bini. Ani bialu ibu Dinini kagonaga mugube tara tara ngaru ibuni hame ledadagua mo ta hene. Wali agali biarume ibu iginime langiyago mo henene helobi ibugua nde ani bia tago halu walia hayadagoni.
HEB 2:5 Ngode Datagaliwabehanda wali agalinaga gahenge holene mani wulebiragonaga te lalu kamago ibugua dahuliyali karume wali agali uruni ti haru helo nahelolebira.
HEB 2:6 Ani nabulebiradagua Anduane Homogonaga mbugani bi ogodagua lo nga. Ngode Datagaliwabe-o wali agali karu mitangi bu kegoni aginagabe. Wali agali damene dege karu í̠na ti nenege hinalu mitangi bu kegoni aginagabe.
HEB 2:7 Í̠na wali agali uruni ina emene tigi mbiranaga hangu dahuliyali karunaga andaneha helalu mani ina mo dunini helalu inahondo wá taraore holenebi mini lene lolenebi ngialu helarigoni.
HEB 2:8 Ani helalu bibahende karubi ngarubi í̠na urunime handame howa haru hai helo helarigoni, lalu gilibu nga. Bi ogoni ogodagua lalu lo nga, Ngode Datagaliwabehanda karubi ngarubi bibahende wali agali karume handame howa haru helo uruni helene ledagoni ibugua karubi ngarubi bibahendeore manda bialu lene. Ani lenedagua uruni bibahende wali agali iname handame howa haru karia áyu de nahende kamagoni.
HEB 2:9 Ani bidagoyu iname Yasu ibu emene tigi mbira hangunaga dahuliyali karu ti daliga helowa ibu mo dindiha helayagoni manda bidama. Ogoninaga Ngode Datagaliwabehanda ina biamogo bulene nawi howa biamogo bia halu Yasu ibugua ina bibahendenaga homa aribia helo lowa ani bini. Ibugua tandaga timbuni nalu homa aribia hayagonaga Ngode Datagaliwabehanda Yasu mo daliga gibiore helalu ibunaga mini mo yaraga henego áyu kago manda bidamagoni.
HEB 2:10 Ngode Datagaliwabehanda bibahende karubi ngarubi wabuwa ibuni handaya ho ka. Ibugua mbirale ogoni binigo Yasu mo baya buruguleore holenenaga ibu tandaga naragome ibunaga waneigini dewaore ibuninaga baya taraore holene yu helo lowa ani bini. Ani binigome Yasu ibunioreme waneigini o biaru pele mulene ngagoria haru pialu ka.
HEB 2:11 Yasu ibugua wali agalinaga ko bibahendeore domo wahai halu mo gahenge helaga ka. Ani biagago wali agali tinaga ko domo wahalu mo gahenge hene karu tibi Yasu ibubi ti Aba mbiraore hangu ka. Irane ogoninaga Yasuhanda taga nahe howa tihondo hamene mbalini laga kagoni.
HEB 2:12 Yasuhanda Ngode Datagaliwabehondo ogodagua lo nga, Í̠na biriru agua biri lalu i̱na i̱naga hamene mbaliniru lamulebero. Ti mo ngoai ho bedagoria i̱na í̠naga mini yaraga halu iba gana lolebero, leda.
HEB 2:13 Ibugua bi mendebi ogodagua lo nga, I̱naga mini Ngode Datagaliwabe ibunini paga ho holebero, lalu bi tebonebi ogodagua dege lo nga, Ngode Datagaliwabehanda waneigini i̱ baba holoma̱ya ngiraru heba kogoni, lalu gilibu nga.
HEB 2:14 Yasuhanda waneigini layaruni ti wali agali tinginihabi daramahabi howa hono winigo ibubi ogonidagua dege howa ibunaga mini tinginibi gali ibuniore bitagohe hene. Ogoni biyadagoni Yasu homayagome dama Heyolabe homanaga hongo yu kago bo wahole lowa ibugua ani bini.
HEB 2:15 Ani biyagome wali agali homolenaga gi holeneme ti dariba ho haabo hayaru Yasuhanda golope hene.
HEB 2:16 Ogoni Yasuhanda biabe ogoni biyago dahuliyali karu biamogo bule ndo biyagoni. Ogonidagua Anduane Homogonaga mbugani lo ngago ogo, Yasu ibugua Abarahamanaga aguanene karuore biamogo biaga, lalu gilibu nga.
HEB 2:17 Anigo Yasu ibu mini bilinahebi dara halu biamogo biagabi howa ibu Ngode Datagaliwabenaga biabe bialu inanaga loma binigo mo miaga haguane timbuni kago helonaga ibuni agali hamene hearu baba mo mbiraore halu ti heagobiore hene. Ogoni binigo irane ina wali agalime ko bibahende birimago domo waholene wilonaga ani bini.
HEB 2:18 Yasu ibu agali baba bitago ho hayangi ko bibahende wiarume ibu ba handayagobi mo tandaga hayagobi ibunaga wali agali kamaru ko ngaru bibahendeme ba handaragola ibunime ina biamogo bibehe kagoni.
HEB 3:1 Keriso hameigini i̱naga hamene mbaliniru-o tí Ngode Datagaliwabehanda olo helayaruore kamigoni. Iname Ngode Datagaliwabehondo mini mbiraore wu kamagoninaga Yasu loma binigo mo miaga haguane timbuni helo Ngode Datagaliwabehanda ibu ibilenego Yasu ibuniore bayuwa mitangi bialu hami̱ya.
HEB 3:2 Mosese ibugua Isaraele wali agali haru holene biabe bialu howa Ngode Datagaliwabehondo mini bilinaheore henedagua dege Ngode Datagaliwabehanda Yasu ibu biabe bilo dabo helenegonaga ibugua Ngode Datagaliwabehondo mini bilinahe howa biabe ogoni bialu hene.
HEB 3:3 Anda mbira bidago hondowa agali anda ogoni biyago mini lene ka lalu anda ibuni mini lene nalabeheore nga. Ogonidagua Mosese nira helowa Yasu ibu timbuni daligaore kago ibu mini leneore helolene nga.
HEB 3:4 Anda bu helama pedaruni agali mbirame binigo bu hama pedagoni. Ogonidagua mbirale bibahendeore Ngode Datagaliwabe ibunime wabu helai henego hai ka.
HEB 3:5 Mosese ibu Ngode Datagaliwabenaga biabe biahaga mini bilinaheore howa ibugua wali agali haru hene. Ani haru howa ibugua Ngode Datagaliwabehanda maha lolebiraru agua lolebira lalu lamigi bialu hene.
HEB 3:6 Anigo Keriso ibu Ngode Datagaliwabe Iginiore kago ibugua mini bilinaheore howa Ngode Datagaliwabenaga wali agali karu handa gimbu buwa haru kagoni. Iname mani bulebiragonaga mini dunubia howa mini bilinahebi hongohebi wiaabo harimayagua nde ina Ngode Datagaliwabenaga wali agaliore holeberama.
HEB 3:7 Anigo Ngode Datagaliwabe Dinini ibugua bi ogodagua leda, Tínaga mamali ala heneru tihondo Ngode Datagaliwabehanda bi lamialu heagola tigua hale howa nahe tingi halu tinaga bu miniha anda polani hondowa Ngode Datagaliwabela waitigi halu hene. Dindi ko yobi wali agali nahaga wiagoria Ngode Datagaliwabehanda ti haru heagola tigua ibu ba handalu hene. Ani binigo tígua nde Ngode Datagaliwabehanda tíhondo bi larago horo áyu hale harimiyagua nde tí mamalime binidagua nabilimu.
HEB 3:9 Ngode Datagaliwabehanda lalu, Dindi ko o biagoria mali pira maria (40) ti haru halu i̱na bima ibiruru bibahende handai dege howa tigua i̱ abi kabe hondole ba handalu hene.
HEB 3:10 Wali agali urunime ani bialu hayagola i̱na tihondo lemboore howa bi ogodagua laru, Wali agali urume horo bibahendengi hariga koha pialu haabo halu i̱naga bi lo wirugoni hale halu bibe manga haga karunida, laru.
HEB 3:11 I̱na ti hearuhondo lemboore howa bi hongohe mbira buleore lalu lowirugo, Wali agali uruniore i̱na dindi ti mini íbu ha̱lo birulene muleberogoria naanda polebiraore, lalu Ngode Datagaliwabe Dinini ibugua ani lene.
HEB 3:12 I̱ hamene mbaliniru-o tí kamiru aria mbirali ibunaga miniha mana koore bulene ngelo howa mini mbiraore wu hayago wahalu Ngode Datagaliwabe holenehe kago erembira mialu polenego dege de hondowa mamage ho halimu.
HEB 3:13 Ani nabilonaga áyu ogoni howa mana ko buleneme tínaga miniha mo giambe halu mo hondo nahe ngaore Anduane Homogonaga mbugani bi inahondo, Áyu ogoniore, lo ngadagua tíni biamogo bia hagahaga bialuore halimu.
HEB 3:14 Iname pigane howa mini mbiraore wirimagoni yu wa nahe hongo howa yani ho wiaaboore halu homalu waharimayagua nde ina Keriso ibuni heba mandagi haabo holeberama.
HEB 3:15 Anduane Homogonaga mbugani bi lo ngago ogo, Tínaga mamali ala heneru tihondo Ngode Datagaliwabehanda bi lamialu heagola tigua hale howa nahe tingi halu tinaga bu miniha anda polani hondowa Ngode Datagaliwabela waitigi halu hene. Ani binigo tígua nde Ngode Datagaliwabehanda tíhondo bi larago horo áyu hale harimiyagua nde tí mamalime binidagua nabilimu, lalu gilibu nga.
HEB 3:16 Ngode Datagaliwabehanda wali agalihondo bi lamialu heagola tigua hale howa nahe tingi halu tinaga bu miniha anda polani hondowa Ngode Datagaliwabe waitigi halu henedaruni arumebe. Uruni ti Isaraele wali agali Iyibi dindi howa Mosesehanda haru tagira peneru bibahendeme ogonidagua bialu hene.
HEB 3:17 Ngode Datagaliwabehanda mali pira mariani (40) keba haabo halu henedagoni wali agali aru bababe. Wali agalime mana ko biaabo halu hearia Ngode Datagaliwabehanda dindi ko biagoria wali agali uruni homo paya payabi lenedaruni baba keba halu hene.
HEB 3:18 Ngode Datagaliwabehanda lemboore halu bi hongo howa lo wialu lalu, Wali agali uruniore i̱na dindi ti mini íbu ha̱lo birulene muleberogoria naanda polebiraore, lalu lenego aihondo lenebe. Wali agali Ngode Datagaliwabe ibula waitigi halu hene uruni tihondoore lene.
HEB 3:19 Irane Ngode Datagaliwabehanda tihondo bi lamiyago hale halu tigua Ngode Datagaliwabehondo mini mbiraore nawi haabo hayagola tinaga miniha mo pe nahenegome Ngode Datagaliwabehanda tinaga dindi mini íbu ha̱lo berelo ngeleagoria ubanda holene nawiniyago hendedamagoni.
HEB 4:1 Ngode Datagaliwabehanda ina mini íbu ha̱lo berelolene ngulebero lalu lowinigo ogoni ai áyu inanehondo yade ho kagoni. Ani bidago ina mbiraligo mini íbu ha̱lo biralimulo ngulebero lalu lowini ngago ogoni dege habo lowa ubanda nahabehe holigo de hondo halimu.
HEB 4:2 Ogoni wali agali ala heneru ti Bi Mana Debene hale henedagua dege áyu inamebi ogoni hale harimagoni. Ala hene uruni tigua bi galoneore ogoni hale howa Ngode Datagaliwabehondo mini mbiraore nawi henegome ti biamogo nabini.
HEB 4:3 Ogonigo ina galoneoreda lalu Ngode Datagaliwabehondo mini mbiraore wu kamarume ibugua mini íbu ha̱lo birulene ngulebero lo wiyagoria ibu heba birule ubanda holeberama. Ngode Datagaliwabehanda bi ala lenedagua áyubi lowialu lalu, I̱na tihondo kebaore howa bi hongohe mbira buleore lalu lowirugo ogo, Wali agali uruniore i̱na dindi ti mini íbu ha̱lo birulene muleberogoria naanda polebiraore, lenego gilibu ngagoni. Ngode Datagaliwabehanda bambaore dindihabi hari daligahabi wabiniyangi howa ibugua biabe bumaro buwa dege bi ogonidagua lene.
HEB 4:4 Anduane Homogonaga mbugani gilibu ngaru mbiragoha lalu horo kanegonaga ogodagua leda, Ngode Datagaliwabehanda ibunaga biabe bibahende biyaru biai howa horo kaneni mini íbu ha̱lo berene, lalu gilibu nga.
HEB 4:5 Ani bini lalu bi ogoni dege Anduane Homogonaga mbugani halu mende ogodagua leda. I̱na dindi ti mini íbu ha̱lo birulene muleberogoria naanda polebiraore, lo ngagoni.
HEB 4:6 Wali agali ala henerume Ngode Datagaliwabehanda mini íbu ha̱lo birulene mo yulene winigo nayaminigo irane tigua Bi Mana Debene hale howa yu tiga nabiyagome ani bini. Ani binigo mini íbu ha̱lo birulene ogoni wali agali ibuhondo mini mbiraore wialu karume ubanda helonaga áyu panga dugua ho wiaabo kagoni.
HEB 4:7 Ogoni walia kago Ngode Datagaliwabehanda horo mende lone dabo ngelenego horo ogoni áyu kamagoniore leda. Ani lo hene lowa mali dewa peaha maniore Ngode Datagaliwabehanda Debidiha howa bi latagi henego Anduane Homogonaga mbugani abale gilibu wini langirugo ogo, Ngode Datagaliwabehanda tíhondo bi langirago horo áyu hale harimiyagua nde nahalehe tingi halu tínaga bu miniha anda polani hondowa giambe hatagi holamini nahalimu, lalu gilibu nga.
HEB 4:8 Yosua ibugua wali agali biaru dindi ha̱lo birulene Ngode Datagaliwabehanda mulebero lalu lo wiyago midale Ngode Datagaliwabe ibugua horo mende lalu naledaleore.
HEB 4:9 Ani bidago Ngode Datagaliwabenaga wali agali karume Ngode Datagaliwabe ibuni horo kaneni mini íbu ha̱lo birayadagua tibi nde mini íbu ha̱lo birulene wia ho ngagoni.
HEB 4:10 Ngode Datagaliwabehanda mini íbu ha̱lo birulene ngulebero lalu lo wiyagoria mbirali ubanda haragome ibu ogodagua bulebira. Ngode Datagaliwabehanda ibuni bibahende wabiai howa mini íbu ha̱lo birayadagua ibubi ibuninaga biabe bialu hayagonaga mini íbu ha̱lo birulebira.
HEB 4:11 Isaraele wali agalime Ngode Datagaliwabehanda tihondo bi lamiyago hale ha howa yu tiga nabiyagome tinaga mini íbu ha̱lo birulene mule lo wiyago habo lene. O habo layadagonidagua ina mbiraligo mini íbu ha̱lo birulene ogoriani ubanda naholene wuligo ina hangu hangume manga nahe hibuore lalu hami̱ya.
HEB 4:12 Ngode Datagaliwabenaga bi wai bulene ayu tibu ne kiroba gadeleore ngagobi ndo hongo taraorehe kagome biabe bialu kagoni. Bi ogonime tinginiha ne gadeleoregome mini dininila ngola haragohabi kuni dundugunila gimbu bidagohabi podama anda piaga. Bi ogonioreme wali agalinaga minime hame ledaru manda ngaru ogobiore wu kami lalu daba ki buwa langiaga.
HEB 4:13 Ani biagago mbirale mbira do howa Ngode Datagaliwabe ibu de nahendene wia do hene mbira nawiore. Dindihabi hari daligahabi bibahendeore ibunaga deni panigi angala paya paya bu wiai kagoni. Ina bibahendeme mbirale beramaru Ngode Datagaliwabe ibunihondoore inane hangu hangu howa ogobiore biru lalu lamigi buleberama.
HEB 4:14 Inanaga loma binigo mo miaga haguane timbuni daligaore kago ibu Ngode Datagaliwabe kagoria hole anda penego ogoni ibu Ngode Datagaliwabe Iginiore Yasu ka. Ani bidagonaga iname ibuhondo mini mbiraore wu kamagoni yu ndibu lowa haabo hami̱ya.
HEB 4:15 Iname mana ko nabule lowa nabulenenaga hongo nahe kamaria inanaga loma binigo mo miaga haguane timbuni ogoni ibu hondowa dara nahaga ndo dara timbuniore haga kagoni. Ibugua ina hongo nahe kamago manda biai ho ka. Inanaga loma binigo mo miaga haguane timbuni ogoni ibuni mana ko bulene bibahende wiarume inahondo ko mo bia halu hagadagua ibuhondobi mo bia halu hearia ibugua ko uruni bia nabi hondo wandiai halu wayaliore henego ka.
HEB 4:16 Aniorego ina mbirale buru padamagonaga Ngode Datagaliwabe ibugua ina biamogo bulene nawi howa biamogo bilo iname ibuhondo mini mbiraore wuwa bu miniha hada ho yalu kaware ibu kagoria hapara ho hami̱ya. Iname ogoriani poramagola ibugua dara holene ngirago yu howa gendabi mbira ngagola ibugua biamogo bulene nawi howa biamogo birago handa walia holeberama.
HEB 5:1 Loma binigo mo miaga haguane timbuni bibahende tigua wali agali karume ko biragonaga nogo tara tara bo lomabu mia helobi mbirale tara tara Ngode Datagaliwabehondo miniru lomabu mia helobi Ngode Datagaliwabenaga biabe ogoni bilo ibuni aria karuha howa dabalu helaga ka.
HEB 5:2 Loma binigo mo miaga haguane timbuni ogoni ibuni nde mana maruha hongo nahe gedaore dege howa ibugua wali agali maru mana manda nabi hearubi mini pu tara howa mana mbira liahe bialu hearubi hondowa ibugua bayuwa bu miniha tihondo dara halu biamogo bibehe ka.
HEB 5:3 Irane ibuni ogonibi dege kagonaga ibugua wali agali tinaga mana ko binirunaga nogo tara tara bo lomabu mia hagadagua ibuni ko biragonagabi bo lomabu miaga.
HEB 5:4 Anigo mbiralime ibuni hangu mitangi bialu, Loma binigo mo miaga haguane timbuni i̱ hole, lalu ibunime nadabaga. Ani nabi howa Ngode Datagaliwabe ibunime Arono loma binigo mo miaga haguane timbuni helo dabalu helenedaguaore mbira dabowa agali ogo helaro lalu Ngode Datagaliwabe ibuni hangume helaga ka.
HEB 5:5 Ani biagadagua dege Keriso ibugua ibuni hangume loma binigo mo miaga haguane timbuni i̱ holiya lowa ibuni dabene ndo ka. Anigo Ngode Datagaliwabehanda ibuhondo bi ogodagua leda, I̱ iginiore í̠ kegoni. Áyu í̠ Aba i̱ harogoni, lalu lene.
HEB 5:6 Ngode Datagaliwabehanda bi mendebi ogodagua dege leda, Loma binigo mo miaga Melegesedege ibu henegobi dege í̠ore loma binigo mo miaga haho wiaabo holebere, lalu lenego gilibu nga.
HEB 5:7 Yasu ala dindini dalu heneyangi howa ibuni nahomole Ngode Datagaliwabehanda biamogo bibehe kago manda buwa ibugua ibuhondo dugu bialu bi dalimu lalu hene. Ani lalu howa Yasu ibunaga hame mo dindiha halu Ngode Datagaliwabenaga mini mo yaraga hayagome Ngode Datagaliwabe ibugua Yasunaga bi layago hale hene.
HEB 5:8 Ibu Ngode Datagaliwabe Iginiore howa ibugua tandaga nolene nawinini nayagome Ngode Datagaliwabehanda hame leadagua bialu holene manda bini.
HEB 5:9 Ani buwa ibu baya buruguleore howa ibugua bi larago wali agalirume hale halu birarunaga pele miaabobo bulene tene Yasu ibuniore haabo henego kagoni.
HEB 5:10 Ani bidago Ngode Datagaliwabehanda loma binigo mo miaga haguane timbuni Melegesedege henegodagua Yasu ibubi loma binigo mo miaga haguane timbuniore ka lalu lowini.
HEB 5:11 Te ogoninaga tíhondo dewa langulene ngagoyu tígua hale halu abale mo yai nahe hendoreore mitangi bigi bialu kamigome bayuwa ogodagua lalu iname langiai habe nahe kamagoni.
HEB 5:12 Tí áyu mana lawai haga hangu hama polenengigoyu lone mbiralime Ngode Datagaliwabe mana pigane lawai hene biago dege tí lawai ho dai bilo kamigonida. Tomo daliahego nama polene tu lone andu no dai bialu kamigoni.
HEB 5:13 Mbirali andu no dai bialu kayagua ibu wene odahe dege haabo howa ibugua mana bayale ogoda ko ogoda lalu bayuwa dabolene mini nawi kagoni.
HEB 5:14 Tomo daliahe nolene ngaru wali agali bogabi karunaga nga. Uruni ti bogabi howa tigua mana bayale ogoda ko ogoda lalu bayuwa dababehe kagoni.
HEB 6:1 Ani bidago iname Kerisonaga mana pigane hale holene winidagua hale harimagoni ngelowa ai mini bogabi halu mana hongohe langiraru hale halu puabo hama. Iname mana ko habane nabulene ngarunaga biabe bialu harimaru erembira mialu Ngode Datagaliwabehondo mini mbiraore wu harimagonaga tene ogoni dege lone wu holene nawi.
HEB 6:2 Wali agali baboraya bu holenenagabi wali agali dabo bagi ho helararu haguaneni gi wulenenagabi wali agali homeneru heyu holebiragonagabi haabobo bu hole daba ki holenenagabi mana uruninaga lone lawai ho dai bulene nawi.
HEB 6:3 Ani bidago iname hatagi halu puabo hama. Ani buluma̱ya Ngode Datagaliwabe ibugua henge ngiyagua ogodagua bimi̱ya.
HEB 6:4 Ogonigo wali agali Yasuhondo mini mbiraore wu howa wahalu dai biyaru ti mini beregedalu lone haru dai agua bilabehebe. Uruni ti ala Ngode Datagaliwabenaga wá holenehayagi hayagobi tigua dahuliya andaga howa mbirale bame miyago dende handayagobi Ngode Datagaliwabe Dinini tiha íbu hayagoni.
HEB 6:5 Tigua Ngode Datagaliwabe bi mana manda bu hondowa bayaledalo hendene. Ani buwa tigua mani holebiragonaga hongo ogobiore bi hongohe layago hendene.
HEB 6:6 Ani biaiore hayago howa tigua Yasuhondo mini mbiraore wu hayago wahalu dai biya handarimini. Wali agali uruni tigua Ngode Datagaliwabe Igini biago ira bangani lone ba para halu ibunaga mini wali agali dewa bu kagoria mo taga haragoninaga ti mini beregedelo lone haru dai bibe naheore wulebira.
HEB 6:7 Ngode Datagaliwabehanda dindi mo baya haragola dalu ibilalu dindi ogoniha anda poragola agali dindi ogoni alu payabu ngarume mbirale baya hangarago galone bibehe anda haragola lini do naga.
HEB 6:8 Anigo dindi ogoriani mamunali aniherubi datanirubi hangu anda hayagua urunime galone nabibehedagola ogoni ibu Ngode Datagaliwabenaga ha holenehayagi kagola irame dalu do ereba haiore helolebira.
HEB 6:9 Ani anigo nenege turubiru-o iname bi ogonidagua larimayagua tí bayale bulenehayagi kami mitangi bialu kamagoni. Iname manda bialu howa tí pele minigohayagi howa turu holene bayaore yu kamilo manda buwa laramagoni.
HEB 6:10 Ngode Datagaliwabe ibu maruhondo gubalini halu maru handabe manga haga ndo ka. Tígua Keriso hameigini karuhondo biamogo birimigo bia ho ngamigome Ngode Datagaliwabenaga gubalini holene ogobi nga lalu walia harimi. Biabe uruni bialu kamigonaga ibugua embeda naholebira.
HEB 6:11 Tígua Ngode Datagaliwabehanda mani mbira bulebirago lowa mini dunubia ho kamigo heneneore bia pani holebiragonaga iname hame timbuniore lo kamago tí hangu hangu kamigome Ngode Datagaliwabe gubalini timbuni howa biabe bumaro bule bilimulo hame ledama.
HEB 6:12 Tígua áyu bialu kamigoni howa bibe manga halimulo iname hame nale kamagoni. Tígua wahalu pu ndo wali agali marume mini mbiraore wuwa ema nabi howa hibu lalu kadagua tíguabi ani dege beramigola Ngode Datagaliwabehanda mbira ngulebero lowiyago yuleberami.
HEB 6:13 Ngode Datagaliwabehanda Abarahamahondo mbira bulebero lowiningi ibugua mbira hongo howa lowialu bulebero lowiyago biaore bulebero lalu lamini. Bi ogoni lowule howa agali mbira Ngode Datagaliwabe ibuni timbuni mini daligawi kagobi mbira nahe ibuni hangu timbuni daliga henego ibuni mini lalu bulegobiore bi hongohe lowini.
HEB 6:14 Ani lowa Ngode Datagaliwabehanda Abarahamahondo lalu, I̱na í̠ biamogo bialu í̠hondo aguanene dewaore ngulebero, lalu lowini.
HEB 6:15 Abarahamahanda ema nabi howa hibu lalu ngilo lowa hondo haabo hene. Ani hondo hearia Ngode Datagaliwabehanda mbira ngulebero lalu lowiyago Abarahama ibugua mo yini.
HEB 6:16 Mbiralime mbira bule bi hongohe lowule howa agali ibuni kagobi ndo mende mini daligawi kagonaga mini lalu mbira bulegobi lowiaga. Ani lowiagago wali agalime bi o lowiyago mo wahole lowa bi anda nahelo mbirali biagome bi lowiyadaguore bule lowa ani biaga.
HEB 6:17 Ani biagago Ngode Datagaliwabehanda bule lowiyago mani yu holebiraruhondo beregeda nabi lowiyadaguore bulebira manda bilo ibugua bi hongoheore lalu lo wiatago hene.
HEB 6:18 Ani binigo bi kira ogoni Ngode Datagaliwabehanda bulebero lalu lowiyagobi hongo howa biaore bulebero lalu lo wiatago hayagobi bi mende lo aribia halu ibugua lahondo habe naheore ka. Anigo ina ibuha holene bayale winiyane handa walia howa kamaru ibugua inahondo ngule lowiyagoni ngiaore bulebiragonaga elahe howa ibuhondo mini dunubia holene yani ho hami̱ya.
HEB 6:19 Ngode Datagaliwabehanda inahondo ngule lowiyagoria hole lowa iname mini dunubia ho kamagoni mbirale gendabi timbuni ema nabibeheme hende haradagua bidagola kama. Ani bidago ha do holenebi mini hana ho holenebinaga mini dunubia ho holene ogoni dahuliya andaganaga Hobane Loma Bia Heneore agame hobaki bu ngagoria anda pialu pu bo ledagoni.
HEB 6:20 Ogoriani ina mani pu holoma̱ya Yasu inanaga biamogo bia haga howa ibugua ala puwa loma binigo mo miaga haguane timbuni Melegesedege ibugua bialu henegodagua dege ibubi bialu ha ho wiaabo henego ka.
HEB 7:1 Melegesedege ogoni ibu Saleme wali agalinaga kini howa Ngode Datagaliwabe Daligaorene Daliga kagonaga loma binigo mo miaga hene. Abarahama ibu wai bialu kini maria balu dai bialu hearia Melegesedege ibu Abarahama lola howa ibugua Abarahama biamogo bilo Ngode Datagaliwabehondo bi lahalu hene.
HEB 7:2 Ani biyagola Abarahamahanda mbirale wai bialu howa mo yalu ibiyaru pini dege dege Melegesedegehondo mini. Melegesedegenaga mini winigo irane kira ngago mbirago ogo, Mini Tigabi Wulenenaga Kini, lalu wini. Ai irane mendego ogo, Ibu Saleme wali agalinaga kini howa ibu mini Mo Palia Holenenaga Kini, lalu wini.
HEB 7:3 Melegesedege ibu ai̱ya abala henegobi ibu mamali henegobi ogodagua hene lalu mbira nalowiore. Ibu hono winigobi homenegobi ogodagua bini lalubi nalowi dege. Ibu Ngode Datagaliwabe Igini ale howa loma binigo mo miaga haho wiaabo holebira.
HEB 7:4 Ani holebirago ibu agali daligaore henego mitangi bidamigoni. Inanaga mamali mini lene henego Abarahama ibugua mbirale wai bialu howa miyaru pini dege dege Melegesedege mini.
HEB 7:5 Ani binigo Libainaga aguanene heneru ti loma binigo mo miaga agali howa Mosese heneyangi Mana lowini ngagome, Tígua Isaraele wali agaliha howa mbirale pini dege dege mo yaore bilimu, lo ngago ogoni tini ariaha howa mo yulene wini. Tini aria uruni Abarahama aguanene hene kayaguabi mo yulene wini.
HEB 7:6 Melegesedege ibu Libai aguanene ndo howa ibugua mbirale pini dege dege Abarahamaha howa mo yuwa Abarahama biamogo bilo Ngode Datagaliwabehondo bi lahalu hene. Ngode Datagaliwabehanda agali mbiragohondo, Nguleberoore, lowiyaru miyagola mo yinigo Abarahama ibuniore ogoni.
HEB 7:7 Heneneore ogo mbiralime mendeali biamogo bialu mo turu hagago ibugua mendeali biago bolangua halu daligaore ibu ka.
HEB 7:8 Loma binigo mo miaga agali ti homagarume mbirale pini dege dege mo mogo bialu haga. Ani hagago ai Melegesedegenaga lalu Anduane Homogonaga mbugani bi ledadagua mbirale pini dege dege mo mogo biyago mbirali haho wiaabo holebiragome mo mogo bini.
HEB 7:9 Bi ogoni ogodagua larama. Abarahamahanda mbirale pini dege dege minigodagua Libai ibuguabi mini. Mbirale pini dege dege minigo Libai aguanenerume ilu mogo bini.
HEB 7:10 Melegesedege ibu Abarahama lola henengi Libai nahono wiaha ibu mamali Abarahama tinginiha hene iname labehe kamagoni.
HEB 7:11 Libai ariarume loma binigo mo miaga howa biaga wiadagua bialu Mana lowini ngago Isaraele wali agali mo mini. Libai ariarume loma binigo mo miaga howa biabe biaga wiadagua bialu baya buruguleore bidale Arono ariaha howa ndo Melegesedege ariaha howa hapani holene henge nangale.
HEB 7:12 Anigo loma binigo mo miaga Libai aria wahalu aria mende ho aribia haragola nde mana lo ngarubi lone lowia aribia holene nga.
HEB 7:13 Inanaga Anduane Homogo mitangi bialu bi uruni longago ibu hameigini tara hene. Ani binigo Anduane Homogo hameigini henego aria mbirali loma binigo mo miaga howa biabe bialu nahene.
HEB 7:14 Ibu hameigini Yuda aria howa taba henenego manda biai kama. Mosese ibugua loma binigo mo miaganaga te lalu howa Yudanaga hameigini lalu nalene.
HEB 7:15 Ogoninaga galone mo waliaore halu loma binigo mo miaga tara hapani hayago ibu Melegesedege hayagobi ka.
HEB 7:16 Ibu loma binigo mo miaga helenego agali bime bulene nabulene lalu lowinirume ndo haabobo holene hongoheoreme helenego ogoni ibu haho wiaabo holebira.
HEB 7:17 Ogoninaga bi Anduane Homogonaga mbugani ogodagua longago, Í̠niore Melegesedege hayadagua loma binigo mo miaga ha ho wiaabo holebere, lalu gilibu nga.
HEB 7:18 Bi ala lowini ngaru hongo nahalu biamogo bibe naheyagola mo wahene.
HEB 7:19 Mosese heneyangi Mana lowinigome mbirale mbira mo baya buruguleore nahabehe wini. Ani binigo áyu mini dunubia ho holene bayaleoreme ngidago ogoniha howa ina Ngode Datagaliwabe kagoria kaware hapara habehe kamagoni.
HEB 7:20 Loma binigo mo miaga tara ogoni Yasu helalu howa Ngode Datagaliwabehanda heneneore lowa bi hongohe lowialu helene. Anigo agali maru loma binigo mo miaga heleneru heangi ti henene bi hongoheore lowialu helene ndo.
HEB 7:21 Anigo Yasu ibu loma binigo mo miaga mbira helene kago Ngode Datagaliwabehanda bi hongo howaore lowinigome helene. Ani helalu Ngode Datagaliwabehanda ibuhondo lalu, Anduane Homogo ibugua bi hongo howaore lowiyago wuwa lo beregeda nabuleore bira. Í̠na loma binigo mo miaga ha ho wiaaboboore bulebere, lalu lowini.
HEB 7:22 Anigo Yasu ibu loma binigo mo miaga baya taraore hene kago lalu bi habo nalolene ala lowiyago bolangua howa wulebiragonaga manane Yasu ibu ka.
HEB 7:23 Loma binigo mo miaga ala henego ti homenegome tigua biabe bia ho wiaabo nahabeheyagola dewa ha aribia haga hene.
HEB 7:24 Anigo Yasu ibu ha ho wiaaboore halu ibugua loma binigo mo miaga howa biabe bialu kago biairi halu mendealime ha aribia holene irane nawulebira.
HEB 7:25 Ani bidago Yasuhanda ha ho wiaabo howa Ngode Datagaliwabehondo wali agalinaga hongo howa lahalu kagome ibuniha howa bibahende Ngode Datagaliwabe karia poraru ibugua áyu ogonibi horo bibahendengibi pele miaaboore haga ka.
HEB 7:26 Yasu ibu Loma Binigo Mo Miaga Haguane Timbuniore howa ibugua inanaga mbirale buru pale kamaru bibahendeore ngiaga ka. Ibu baya gibi taraore howa ibuha lehebi mana kobi mbira nawiorego ko biaga karu kagoria nahe ibu habagi howa hari daligahayagi bolangua ho heleda.
HEB 7:27 Yasu ibu loma binigo mo miaga haguane timbuni maru karubi ndo. Tigua horo bibahendengi tininaga ko domelobi mani wali agalinaga ko domelobi mbirale bo lomabu miaga wini. Yasu ibuni bo loma bia hayangi halu mbira ogoni hangu biyagome horo bibahendenaga bo lomabu miai hene.
HEB 7:28 Mosese heneyangi Mana lowini ngagome agali maru tigabi ndo hearu loma binigo mo miaga haguane timbuni helo dabo helaga. Ani helaga binigo mani Ngode Datagaliwabehanda, Mbira bulebero, lo wialu bi hongo howaore lo wiatago henegome ibu Igini loma binigo mo miaga Haguane Timbuniore baya buruguleore ha ho wiaabo helo dabo helenego ka.
HEB 8:1 Bi o larimaruni irane inanaga Loma Binigo Mo Miaga Haguane Timbuni ogonibi kago dahuliya andaga howa ibu Ngode Datagaliwabe Daligaorene Daliga kagonaga haru howa biragane gi tigahayagi beda lalu larimagoni.
HEB 8:2 Yasu ibu Loma Binigo Mo Miaga Haguane Timbuni howa Balai Andaha Loma Bia Heneore Hobane heagoria howa biabe bialu ka. Balai anda henene ogoni agalime bini ndo Anduane Homogohanda helenego ka.
HEB 8:3 Dindini howa loma binigo mo miaga haguane timbuni mbira mbira ha aribia hagarume Ngode Datagaliwabehondo mbirale tara tara bu milobi nogo tara tara bo loma bialu milobi dabo helaga. Ani biagago inanaga Loma Binigo Mo Miaga Haguane Timbuni kago ibuguabi Ngode Datagaliwabehondo mbirale bo mulene nga.
HEB 8:4 Yu wali agalinaga Mana lowini ngadagua loma binigo mo miaga karu tigua Ngode Datagaliwabehondo mbirale lomabu mialu kagoni. Ani bialu kago Yasu ibu áyu dindini kale ibu loma binigo mo miaga holene nawidale.
HEB 8:5 Loma binigo mo miagame dindini howa bialu kagoni dahuliya andagani biagane tene ibuni ngagonaga manane ale bialu ka. Ani bialu kagoni Mosese heneyangi ogonibi dege wini. Ani winigo Mosese ibu Balai Anda bule manda biyagola Ngode Datagaliwabehanda ibuhondo lalu, Hari Sainaini howa walia harudaguaore bibahende biai holene nga manda bibe, lene.
HEB 8:6 Anigo áyu tinaga loma binigo mo miaganaga biabe bulene miyago nira lowa Yasu ibunaga loma binigo mo miaga biabe daligaore nga. Ogonidagua dege Ngode Datagaliwabela wali agalila Yasu ibugua dombegua howa bolangua holenaga habo nalolene bi mo hongo ho lowinigo nga. Bolangua holenaga habo nalolene bi ogoni tene Ngode Datagaliwabehanda, Wali agali mo bayale holebero, lalu lowinigome nga.
HEB 8:7 Habo nalolene bi pigane lowinigo karulape lowinidale nde habo nalolene bi halu mende lowulene nangale.
HEB 8:8 Anigo Ngode Datagaliwabehanda ibunaga wali agali karunaga ko mbira wiago hondowa ogodagua leda, Anduane Homogohanda lalu, I̱na habo nalolene bi gahenge Isaraele wali agalibi Yuda wali agalibi tihondo lo wuleberogo ogonaga horo kaware ibira.
HEB 8:9 I̱na bambaore tinaga mamali Iyibini howa ti gini yalu haru tagira pirungi ala tawenaga habo nalolene bi lo wiru. Ai gahengenaga habo nalolene bi áyu lo wuleberogo ala tawenaga biagobi ndo lowulebero. Ala tawenaga lowirugo tigua nabiyagola i̱na ti handaya nahe yu pe haru.
HEB 8:10 I̱na horo mani ibulebiragonaga Isaraele wali agalihondo habo nalolene bi lo wuleberogo ogo, Anduane Homogohanda lene. I̱na i̱naga bi lowini ngoruni tinaga miniha mo wialu tinaga bu habaneha gili bule dege bero. I̱ tinaga Ngode Datagaliwabe holebero. Ti nde i̱naga wali agali holebira.
HEB 8:11 Isaraele wali agali uruni tigua tinaga nenegealiruhondobi ti dameneruhondobi lalu, Anduane Homogo manda bia, lalu lawai holene nawulebira. Ogoninaga irane ti bibahende emene karumebi timbuni karumebi i̱ manda biai ho holebira.
HEB 8:12 Ani bulebirago i̱na tinaga ko biyaru domo wahalu tigua nakarulape biyarubi mitangi bia dai nabulebero, lalu lene.
HEB 8:13 Ngode Datagaliwabehanda habo nalolene bi gahenge laragonime habo nalolene bi bamba lowinigo mo haragaya helara. Mbirale mbira haragaya hayagua abale togo bialu ereba holebira.
HEB 9:1 Habo nalolene bi ala tawe lowinigome, Lotu ogodagua lalimu, lo wialu Balai Anda agali degeme binigoria lotu lolenagabi bia dege bini.
HEB 9:2 Balai Anda bu helowa hobaki henego hobane tagirahayagi Loma Bia Hene Hobane laga wini. Hobane ogoniha lamu hale wiagane iranebi tebolo dagiani mberedi Ngode Datagaliwabehondo lomabu mini wiaganebi wini.
HEB 9:3 Balai Anda ogoniha labolabo timbunime hobaki binigo hobane mende tamuhago mini Loma Bia Heneore Hobane laga wini.
HEB 9:4 Hobane ogoniha dabu mbira ngolome wabu ngelenego ogoriani mbirale ngabilo mini inisenesi Ngode Datagaliwabehondo lomabu delagane winigobi Habo Nalolene Bi lowinigonaga Mbogoyi ngolome para haamehe biagobi wini. Mbogoyi ogoniha be mbira ngolome wabinigoha mena winigobi ala Arononaga ira halimbu ogoriani yuni doaile winigobi ege to̱le̱ kirani bi pira gilibu winigobi heba mandagi wini.
HEB 9:5 Mbogoyi wiagoria emene daligani dahuliyali handalehe kira babaganehe Ngode Datagaliwabe ka manda bilonaga ngolome wabuwa helene. Libunaga babaganeme Mbogoyi biagonaga panga wali agalinaga ko domaga laga ngagoria yula dambi ho helene. Anigo ogodagua bini lalu bibahende ngaru áyu garealo bagabu langiai holene henge nawi.
HEB 9:6 Mbirale uruni mo tiga biagago ogodagua biaga. Horo bibahendengi loma binigo mo miaga biaru ti Balai Anda hobane tagirahayagi bulene winidagua bule piaga wini.
HEB 9:7 Ani biaga winigo loma binigo mo miaga haguane timbuni ibuni hangume hobane mende tamuhayagi piaga winigo ogoni mali mbiranaga horo mbira hanguni piaga wini. Pialu howa ibugua nogo tara tara bo lomabu miyarunaga darama hambuwa ko ibuni binigonagabi wali agalinaga ko tinime bero lalu bini ndo manda nabi howa binirunagabi Ngode Datagaliwabehondo mia hole yalu anda piaga hene.
HEB 9:8 Balai Anda biago haabo kagola Ngode Datagaliwabe Dinini ibugua mana biagane wini bibahende ngaru anda hobane mende tamuhayagi Loma Bia Heneoreha polene panga dugua nahe wene nga lalu bayuwa walia ka.
HEB 9:9 Balai Anda ogoni te lalu lama ibirimagoni áyu kamagonaga manane lalu irane mo walia ka. Bi ogoni galone Ngode Datagaliwabehondo mbirale bu mulenerumebi nogo tara tara bo lomabu mulenerumebi uruni bibahendeme wali agali Ngode Datagaliwabe mitangi bialu lotu laga karunaga mini mo bayale nahagaore nga.
HEB 9:10 Mana winidaruni irane tigua tomo iba naganebi wayawaya tara tara biaganebi mana uruni hangunaga wini. Urunidagua tingini tagirahayagi biagane winigo mani Ngode Datagaliwabehanda mana gahenge mo helolebiragonaga horo tu helo lowa ani biaga wini.
HEB 9:11 Ani bialu henego Keriso ibu mbirale bayale ngarunaga Loma Binigo Mo Miaga Haguane Timbuni howa abale íbu hene. Ibuwa balai andaha biabe bialu kago balai anda ala henego nira lowa ai áyu balai anda daligaorebi baya buruguleorebi ogoniha bialu ka. Ani ha kago balai anda ogoni agali gime wabinibi bibahende wabini ngaru ariabi ndo ka.
HEB 9:12 Keriso ibu balai anda biagoha anda piyangi Ngode Datagaliwabenaga Loma Bia Heneore Hobane wiagoria halu mbira hangu anda puwa haabo ka. O anda piyadagoni ibugua memenaga daramabi nogo bulumaganaga daramabi yalu Ngode Datagaliwabehondo mia hole ndo pene. Uruni miradagua ibugua ibuninaga daramame ina haabobo holoma̱yanaga pele ngule yalu pene.
HEB 9:13 Mana lowinigo ngadagua bule wali agali Ngode Datagaliwabenaga deni howa dodoheyagua loma binigo mo miaga agalime memenaga daramabi nogo bulumaga wangabenaga daramabi bulumaga igini bo delai henegonaga dangabi heba mo yalu puwa wali agali bu hearuni tindi tandalo ba haragola ogonime ti Ngode Datagaliwabe deni dodo nahe mo bayale haga laga wini.
HEB 9:14 Anigo mana ogonidagua biaga winigo nira lowa Kerisonaga daramame ko birimago domo waharagome bolangua hai haga. Keriso ibuha ko mbira nawiore howa ibugua haabobo hagane Dinini hongoni howa ibuni holene Ngode Datagaliwabehondo mini. Ani biyagome ina Ngode Datagaliwabe holenehe kagonaga biabe bialu holoma̱ya Keriso daramame mana galone nabulene o lama ibirimaru inanaga minini ngaru domaiore holebira.
HEB 9:15 Irane ogoninaga wali agali Ngode Datagaliwabehanda olo heleneru tigua Ngode Datagaliwabehanda, Turu ha ho wiaabo holene ngulebero, lowiniru yu helo Keriso ibu dombegua howa habo nalolene bi gahenge lowinigoria ge howa bialu ka. Ogoni bibehego irane habo nalolene bi ala lowinigome haru heangi wali agali ko biyago Keriso ibu homo aribia hayagome golope henego ka.
HEB 9:16 Mbiralime ibunaga paluni, Ogodagua tale bibe, lalu bebani gilibu wialu ibu homaragola paluni tale bibe gilibu wiyadagua bulene wulebira.
HEB 9:17 Ibu nahomeha paluni tale bulene bebani gilibu wiyadagua tale bulene irane nawulebira. Homaragola dege tale bulene wulebira.
HEB 9:18 Irane ogoninaga mbirale bo loma binigo daramame habo nalolene bi ala lowinigo dege mo hongo hene.
HEB 9:19 Mosesehanda wali agalihondo Mana lowinigonaga bulene nabulenebi lo ngadagua ala lamiai hene. Ani buwa mani ibugua nogo bulumaganaga daramabi memenaga daramabi hambialu iba heba mo bimaga howa ira mbira mini hisobonaga magane emene yunihe pu mbira nogo sibi irini iba daramabiha guyinime bo binigo yuwa daramaha ibira halu ogonime Mana lowini ngagonaga mbuganibi wali agali bibahende bu hearunibi tindi tandalo ba haga hene.
HEB 9:20 Ani bialu howa ibugua tihondo lalu, Habo nalolene bi tígua bialu halimulo Ngode Datagaliwabehanda lalu lowiyago darama ogonime mo hongo haragoni, lene.
HEB 9:21 Ani binidagua dege Mosesehanda Balai Andanibi lotu lolenenaga mbirale bibahende wiarunibi daramame tindi tandalo ba hene.
HEB 9:22 E̱ heneneore Mana lowini ngadagua mbirale bibahende ko ngaru daramame mo bayale haga wini. Ko birimarubi bo loma binigonaga darama hangume domo wahai haga wini.
HEB 9:23 Mbirale uruni bibahende tene ibuni dahuliya andagani ngarunaga manane dindini ngaru mana ogonidagua bialu domolene wini. Ani biagago dahuliya andagani ngaru tini dege mbirale tara baya buruguleore bo lomabu mulene nga.
HEB 9:24 Ogoni irane Keriso ibu Loma Bia Hene Hobane dahuliya andagani ngago arianaga manane ale agalime dindini wabu wiagoha naandape. Ibu dahuliya andaganiore anda puwa ibugua ogoriani Ngode Datagaliwabenaga deni hapara howa inanaga bi la halu ka.
HEB 9:25 Yu wali agalinaga loma binigo mo miaga haguane timbunime Loma Bia Heneore Hobane ngelenegoha mali bibahendengi nogo tara taranaga darama hambu yalu piaga wini. Anigo loma binigo mo miaga haguane timbuni biagome dewa halu piaga winidagua Keriso ibugua ibuni lomabu mule dewa halu anda puabo nahene.
HEB 9:26 Ibu anda puabo holene winidale nde dindi bibahende wabiyangiore howa ibugua tandaga dewa halu nama ibaabo kale. Anigo ai bibahendenaga hamaro buleneru kaware harago Keriso ibugua halu mbira hangu wali agali bibahendeme ko birima domo wahole lowa ibuni lomabu mulenaga hapani hene.
HEB 9:27 Ani binigo wali agali bibahende halu mbira hangu homolebira. Ani homaragola Ngode Datagaliwabehanda ti biyarunaga mo daba ki holebira.
HEB 9:28 Ogonidagua dege Kerisohandabi ina bibahendeme ko birimaru domo wahole halu mbira hangu ibuni Ngode Datagaliwabehondo lomabu mini. Ani binigo ibugua abale hapani hayadagua halu mendebi hapani holebira. Ani hapani halu ko mo domo wahole ndo wali agali ibu ibilo lowa hondo ho karu ti pele mulenaga hapani holebira.
HEB 10:1 Yu wali agalinaga Mana lowini ngago mana ogoni tene ibuni mbirale henene mani holebirarunaga bayuwa walia nahe auhe ale dege wini. Ani winigo mali bibahendengi Ngode Datagaliwabehondo mbirale bo mulene winidagua bo mia ho wiaabo haga. Ani bo mia ho wiaabo halu howa Mana lowini ngagome wali agali Ngode Datagaliwabe karia ibiraru mo bayale agua habehebe.
HEB 10:2 Wali agali Ngode Datagaliwabe mitangi bialu lotu laga hayarunaga ko biyaru domo wahenedale nde tigua biyaru miniha wini mbau nale howa bo mulenebi wakale.
HEB 10:3 Ani wa nahego bo lomabu miagane mana ngarume mali ibalu pugu biragola wali agalinaga ko biyaru mo mitangi bia haga nga.
HEB 10:4 Irane nogo bulumaganaga daramamebi nogo memenaga daramamebi wali agalinaga ko domo wa nahagaore nga.
HEB 10:5 Irane ogoninaga Keriso ibu dindini ibule howa ibugua Ngode Datagaliwabehondo lalu, Bo lomabu ngulenerubi mbirale bu lomabu ngulenerubi í̠ hame nale ke. Anigo í̠na i̱naga tingini mo manda manda bu howa ngini.
HEB 10:6 Nogo tara tara homa bibahende lomabu miaga dabuni bo delolenerumebi wali agali ko domo wahelonaga bo lomabu ngulenerumebi í̠ mo turu nahaga.
HEB 10:7 Aniyagola i̱na lalu, Ngode Datagaliwabe-o Mana lowini ngagonaga mbugani gilibu ngadagua i̱na í̠ hame ledego bule o kogoni, lalu gilibu nga.
HEB 10:8 Keriso ibugua bi pigane layago ogo, Bo lomabu ngulenerubi mbirale bu lomabu ngulenerubi nogo tara tara homa bibahende lomabu miaga dabuni bo delolenerubi wali agali ko domo wahelonaga bo lomabu ngulenerubi í̠ hame nale turubi nahe kegoni, lalu lene. Ibugua bo lomabu mulene uruni bibahende Mana lowini ngadagua bo miaga ka manda buwa bi ogoni lene.
HEB 10:9 Ani lowa Keriso ibugua bi mani lenego ogo, Ngode Datagaliwabe-o i̱na í̠ hame lededagua bule o kogoni, lalu lene. Ani layagola Ngode Datagaliwabehanda bo lomabu mulene mana ala winiru bibahende wahai halu Keriso ibuni lomabu miyagome mia aribia hene.
HEB 10:10 Ani binigo Yasu Keriso ibugua Ngode Datagaliwabehanda hame leadagua bialu ibuninaga tingini halu mbira hangu lomabu miyagome ina bibahendeme ko birimaru domo wahai haya.
HEB 10:11 Yu wali agalinaga loma binigo mo miaga mbira mbira kagome horo bibahendengi bulene wini wiadagua bialubi Ngode Datagaliwabehondo mbirale bo lomabu mulene wini wiadagua bia ho wiaabo haga ka. Mana anidagua biaganerume ko birimaru domo wa nahabeheore nga.
HEB 10:12 Ani bidago Keriso ibugua ko birimarunaga domo waholene hongo ha ho wiaabo helonaga ibuni halu mbira hangu bo lomabu muwa ibu Ngode Datagaliwabenaga gi tigahayagi pu beda.
HEB 10:13 Ani pu bedagoria ibugua Ngode Datagaliwabehanda Kerisonaga waitigi karu ibuninaga geni malia ho wilo hondo beda.
HEB 10:14 Ogonigo Keriso ibuni halu mbira hangu bo lomabu miyagome wali agalime ko biyago domo wahayaru ti mo bayaleore howa ha ho wiaabo heleda.
HEB 10:15 Anigo Ngode Datagaliwabe Dinini ibugua inahondo ogodagua langida. Pigane layago ogo,
HEB 10:16 Anduane Homogohanda lalu, Awe i̱na tihondo habo nalolene bi lo wuleberogo ogo. I̱naga mana lowini ngoru tinaga bu habaneha mo wialu tinaga bu mininibi gili bulebero, lalu lene.
HEB 10:17 Mani halu mende layago ogo, Tinaga ko biyarubi nakarulape hayarubi i̱na mitangi bia dai nabulebero, leda.
HEB 10:18 Anigo ko uruni domo wahai haragola mani ko domo wahelonaga mbirale bo lomabu mulene henge nawulebira.
HEB 10:19 I̱ hamene mbaliniru-o ogoninaga manda buwa Yasu ibu homo aribia hayago togoni howa ina Loma Bia Heneore Hobane ngagoha áyu awadaga poleneore nga.
HEB 10:20 Loma Bia Heneore Hobane ogoniha ina anda poloma̱ya Yasu ibugua hariga gahengebi holene tenebi aga gerelape ho wiyago ibuni togoni hariga ba hene. Aga ogoni mende ndo ibuninaga tingini wini.
HEB 10:21 Anigo ina loma binigo mo miaga timbuniore mbira Ngode Datagaliwabenaga wali agali handaya ho helowa kamagoni.
HEB 10:22 Irane ogoninaga iname inanaga bu miniha ko mbira do nahe howabi mini mbiraore wu kamagoria mini bilinahe howabi mana ko mbira wini mbau layago wahowabi ani bialu tinginiru iba gagaheme wayawaya bu howabi Ngode Datagaliwabe kagoria ha para ho hama.
HEB 10:23 Ani bialu Ngode Datagaliwabehanda mbira biaore bulebero lowiyago bulebiraore lowa Keriso aria ina kamago lalu iname hongo howa mini dunubia ho hami̱ya.
HEB 10:24 Ani bialu iname maru karubi mitangi bigibigi bialu gubalini holene walia halubi mana bayale bialubi biamogo bigibigi bialu hami̱ya.
HEB 10:25 Anigo iname mo ngoai haramaligo marume hado wahalu kadagua nahe mandagi ngoai haabo hami̱ya. Ani bialu inane hangu hangu mo hongo haga biaabo hami̱ya. Ogonidagua beramago irane Anduane Homogonaga Horo hamaro bulene kawareore ibiragonaga berama.
HEB 10:26 Anigo bi mana henenego inahondo langidaha iname, Ko mbira bero, lalu birimayagua ko uruni domo waholene mbirale bo lomabu mulene nawulebiraore.
HEB 10:27 Ai anigo mbira hangu bulebirago. Ngode Datagaliwabela waitigi halu manga haga karu ti Daba Ki holenebi ira gibioreme do mundu lai holebiragobi lalu mogo lowa hondo ha dege bulebira.
HEB 10:28 Mbiralime Mosese heneyangi Mana lowini ngago puguarago kirali tebiralimebi handarima lalu laragola mana puguaga biago maru karume dara nahe howa homelo bo wahaga.
HEB 10:29 Ani biagago mbiralime Ngode Datagaliwabe Iginihondo erembira mialu mo yo handagabi Ngode Datagaliwabenaga habo nalolene bi lowinigonaga daramame ibunaga ko domayago nagalone manda bu hagabi Ngode Datagaliwabe Dinini ibugua biamogo bulene nawi howa biamogo bia hagagohondo mege biagabi o biagohondo pani abiore mulubada.
HEB 10:30 Ngode Datagaliwabehanda bi mbira lenego ogo, Pani mulene i̱naga ngago i̱nime mia dai bulebero, lenego ina manda bu kama. Ibugua bi mende lenego ogo, Anduane Homogohanda ibunaga wali agali daba ki holebira, lalu gilibu nga.
HEB 10:31 Ngode Datagaliwabe holenehe kago ibugua wali agalihondo pani mule yu kago gi taraore ho holene nga.
HEB 10:32 Alaore tí bialu harimigo mitangi bu dai bilimu. Horo uruningi Ngode Datagaliwabenaga wá holene yu harimigo howa tígua tandaga timbuni nalu erekui handalu wa nahe yu ununu lo wiaabo harimi.
HEB 10:33 Horo marungi tí wali agali bu hearu deni howa marume mege bialu ba biyaru bilowa horo marungibi Keriso hameigini maru tandaga ogonibi dege nalu heagoha ti heba mandagi nalu holene nga manda birimi.
HEB 10:34 Ani buwa Keriso hameigini maru garabaya bu wiyaru tandaga nayadagua tíguabi tinaga tandaga biago namogo bia harimi. Ai tínaga dabudabu wimiru page bu yalu piyagola tígua haabobo holenenaga dabudabu yu kama manda bialu genda nahe turu ho harimi.
HEB 10:35 Tígua ogonidagua bialu howa miniha mo hongo holene yu kamigonaga emena timbuniore mo yalu ibulebirago yu wa nahe hongo ho halimu.
HEB 10:36 Tígua Ngode Datagaliwabehanda hame ledadagua bulebi ibugua, Ngiaore bulebero, lowiyago yu holebi tí ema nabi hibu lalu holene nga.
HEB 10:37 Anigo Anduane Homogonaga mbugani lo ngadagua ogo, Emeneore howa mbirali ibulebira lenego ibulebiraore. Ibu hondoha nabi abaleore ibulebira.
HEB 10:38 I̱naga wali agali mini tigabiwi karu tigua nde mini mbiraore wuwa holebira. Ti marume wahalu dai biyagua i̱na tihondo turu naholebero, lalu gilibu nga.
HEB 10:39 Ani bidago ina wahalu dai bialu pu ereba haga ndo kama. Anigo ina mini mbiraore wu howa pele mini kama.
HEB 11:1 Mini mbiraore wu holenego iname mbirale mani yu holeberamago mini dunu bia ho holenenagabi mbirale ngaru iname de nahende howa ngaore manda bu holenenagabi wu holene nga.
HEB 11:2 Wali agali bamba heneru tigua mini mbiraore wu henegome Ngode Datagaliwabehanda tihondo turu hene.
HEB 11:3 Ngode Datagaliwabe ibugua bi lenegome dindibi haribi bibahendeore wabiniru áyu mbirale bibahende handabehe kamaru uruni mbirale nahandabeheha howa wabini. Ani binigo ina mini mbiraore wu kamagome manda bu kama.
HEB 11:4 Kenihanda Ngode Datagaliwabe ibuhondo mbirale bu minigo bagi hene lowa Abele ibugua mini mbiraore wu henegome dege Ngode Datagaliwabehondo bo lomabu minigo bolangua howa mini. Abelehanda mini mbiraore wu henego togoni howa Ngode Datagaliwabehondo bo minigo hondowa Ngode Datagaliwabehanda ibuhondo, Í̠ mini tigabiwi ke, lalu, Karulape biri, lene. Abele ibu áyu nahe homenego ibugua mini mbiraore wu henedagonime áyu bi la ho nga.
HEB 11:5 Inogohanda Ngode Datagaliwabe ibuhondo mini mbiraore wu henegome ibu nahome hene. Ibu nahome heaore dege Ngode Datagaliwabehanda ibuni heagoria helo yalu iraga hene. Ani biyagola wali agalime ibu tai bialu handa walia habe nahe henego irane Ngode Datagaliwabehanda ibu yalu iraga henedagonime. Anduane Homogonaga mbugani lo ngago ogo, Inogo ibu yalu iraga nahe howa ibugua Ngode Datagaliwabe mo turu hene, lalu gilibu nga.
HEB 11:6 Ani binigo mbiralime mini mbiraore nawi howa Ngode Datagaliwabe mo turu habe nahe ka. Mbirali Ngode Datagaliwabe karia ibiragome Ngode Datagaliwabe kaore manda bialubi ibu mitangi bialu lotu laga karuhondo ibugua emena miaga ka manda bialubi mini mbiraore wu howa ibulene nga.
HEB 11:7 Ngode Datagaliwabe ibugua Noahondo awe bulebiragonaga mbira lamiyagola Noa ibugua de nahende howa mini mbiraore wu henegome hale halu yu tiga bu hene. Yu tiga bu howa ibugua Ngode Datagaliwabehanda, Bibe, layadagua bialu iba talu mbira wabuwa ibunibi ibu onebi ibu iginirubi ti onerubi anda puwa nahome berene. Noahanda ani binigome wali agali bibahende dindini heneru ti nakarulapeore hene walia hene. Ani buwa Ngode Datagaliwabehanda Noa mini mbiraore wu heago hondowa, Í̠ mini tigabiwi ke, lene.
HEB 11:8 Ngode Datagaliwabe ibugua Abarahamahondo, Dindi mbira ngiaore bulebero lalu lowirugoha hole pu, lenego Abarahama ibugua mini mbiraore wu henegome pole pene. Abarahama ibu, Ogoha poro, lalu pene ndo manda nabi howa ibunaga dindi wahalu pole pupe hene.
HEB 11:9 Abarahama ibu Ngode Datagaliwabehanda, Dindi ngiaore bulebero, lalu lo wiyagoria anda puwa ibugua kaundiali dindi ogoni bai nale howa mini mbiraore wu henedagonioreme ogoriani hene. Ani binigo Abarahama ibu balai andaha palu hagadagua mani Aisaga Yagabala libubi ani paliaga hene. Ngode Datagaliwabehanda, Dindi ngiaore bulebero, lalu Aisaga Yagabalahondobi lowiyago libugua mani yu tiga bu hene.
HEB 11:10 Irane Abarahama ibu tano mbira hongo ha ho wulenenaga geneni Ngode Datagaliwabe ibunime bia manda ala buwa binigoha anda pole hondo ho hene.
HEB 11:11 Abarahama ibu waneigini nahabehe wahe henego ai Sara ibubi waneigini nahabehe berenego Abarahama ibugua mini mbiraore wu heagome ibu waneigini habehe hene. Ani binigo irane Ngode Datagaliwabehanda, Ngiaore bulebero, lalu lowiyago bulebiraore lowa Abarahamahanda mini dunubia ho hene.
HEB 11:12 Abarahama ibu waheore tingini homene ale henego agali mbiraore ogoniha howa yakundi hari daligaha bu karubi iba angeni iba mu daga labe nahe emene emene ngarubibi ibu aguanene dewaore íbu hene.
HEB 11:13 Wali agali uruni bibahende mini mbiraore wu ha ho wiaabo howa homene. Mbirale mbirale Ngode Datagaliwabehanda, Ngiaore bulebero, lalu lowiyaru tigua dindini howa nayi henego mbirale uruni kaundiaore handa angua howa turu halu lalu, I̱na dindini howa bai nale togolo yu ibaga dege biaga kamagoni, lene.
HEB 11:14 Wali agali ogonidagua lalu karume dindi mbira tini hangunaga hole tai birago mo walia haga.
HEB 11:15 Tigua dindi wahalu ibiyago mitangitangi biaabo nahego mitangi biaabo henedale dindi ogoriani dai bulene henge winidale.
HEB 11:16 Ani ndogo tigua dindi hame lalu minime handayago dindi bayale taraore winigo dahuliya andaganaga handa angua hene. Wali agali uruni tigua, Inanaga Ngode Datagaliwabe í̠ ke, laragola ani lelo Ngode Datagaliwabehanda taga nahaga walia howa ibugua wali agali biarunaga tano wabu wini.
HEB 11:17 Ngode Datagaliwabe ibugua Abarahama ba hondole biyangi Abarahamahanda mini mbiraore wu hayago togoni howa ibu igini Aisaga Ngode Datagaliwabehondo bo lomabu mule bini. Ala Ngode Datagaliwabehanda, Ngiaore bulebero, lalu lowiyago Abarahamahondoore lowiya. Ani layago manda bia buwa dege Abarahamahanda ibu igini mbiraore hangu henego bo lomabu mule lo manda manda bu hene.
HEB 11:18 Ngode Datagaliwabehanda ala Abarahamahondo lamialu lalu, Í̠naga aguanene haore bulebira larugo Aisagaha howa hama tagira pu holebira, lalu lamini.
HEB 11:19 Ani lenego Abarahamahanda, Ngode Datagaliwabe ibugua Aisaga homedagola howa mo heya habehe ka, manda bu henegobiore Aisaga homene aleore biago Abarahamahondo ya dai bini.
HEB 11:20 Ogonidagua binigo Aisagahanda mini mbiraore wu henegome Yagaba Isolahondo maha holebiragonaga mo turu holeneru, Ngiaore bulebero, lalu lowini.
HEB 11:21 Yagaba ibu homolene kaware ngelowa ibugua mini mbiraore wu hayadagonime Yosebe igini kirali henego libu hangu hanguhondo mo turu holene bi lamigi bini. Ani lai howa Yagaba ibugua ibunaga halimbu ngunini malia howa Ngode Datagaliwabe mitangi bialu lotu lalu hene.
HEB 11:22 Yosebe ibu homolene kaware ngelowa ibugua mini mbiraore wialu anda henegome Isaraele wali agalime Iyibi dindi wahalu polebiragonaga lalubi ibuninaga kuni ogodagua bilimu lalubi lamiai hene.
HEB 11:23 Mosese aba ai̱yala libugua mini mbiraore wu henegome Mosese taba honowa ege tebira wia do hene. Libugua handalu hebira igiri biago baya gibioreyagola hondowa kini heagome, Igiri gali bibahende bo waholene nga, lalu bi hongohe lowiyago mo wahole gi nahe hene.
HEB 11:24 Mosese ibu anda halu mini boga bu howa ibugua mini mbiraore wu henegome lalu, Kini heago wanenaga igini i̱ ndo ko, lene.
HEB 11:25 Ibugua tigi mbira hangu ko bulenerunaga turu holene hame nale Ngode Datagaliwabenaga wali agali baba howa tandaga nolenego dabene.
HEB 11:26 Mosese ibugua Mbirali Dabo Helenego ibulebira lowinigo mitangi bialu taga pani nolene o galone ibuni nga lalu Iyibi dindini muni dabudaburu winigo bagi hene nagaloneore manda bu hene. Ani binigo awe emena yu holebiragoria minime handa anguaho hene.
HEB 11:27 Mosese ibugua mini mbiraore wu hayagome kini biagome keba hayagola gi nahe Iyibi dindi wahalu pene. Ani binigo ibugua Ngode Datagaliwabe deme nahandabehe kago handayago hondo yalu puabo hene.
HEB 11:28 Ogonidagua bialu ibugua mini mbiraore wu henedagonime Bolangua Halu Penegonaga tomo nolenenaga mana tenialu ogoningi bu wini. Ogonidagua bu wialu Homelo Baga Dahuliyalime Isaraele wali agalinaga igini waheneru homelo nabelo, Nogo sibinaga darama anda pangani tindi tandalo ba halimu, lalu lowini.
HEB 11:29 Isaraele wali agali ti mini mbiraore wu henegome iba solowara mini Daramabi bereago dindi yobini ubade haradagua bialu pene. Ani piyadagua Iyibi agalime pole poramalo manda bimiria ibame namu lalu nai hene.
HEB 11:30 Isaraele wali agali mini mbiraore wu henegome Yarigo tanonaga ege to̱le̱ pabe bu gimbu bima iraga heago horo karu pu mabu biyagola podo ibira hai hene.
HEB 11:31 Bayanda wali mbira Lahaba ibugua mini mbiraore wu berenegome Isaraele agali kira dindi hondo wule ibiyagola ibugua turu howa libuhondo, Hami̱ya ibidaba, lene. Ani lenegome Ngode Datagaliwabehanda ibu biamogo bialu maru bo wahenedagua ibu nabe berelene.
HEB 11:32 Te ogoni Gidionobi Baragabi Samasonobi Yabedabi Debidibi Samuelebi Ngode Datagaliwabe mana latagi hagarubi uruni bibahendenaga te lama puabo kolego lolene henge nawida.
HEB 11:33 Tigua mini mbiraore wu henegome dindi tara tarani agali bu hearu baba wai bialu wayali hene. Tigua mana tigabi binigome Ngode Datagaliwabehanda, Ngiaore bulebero, lalu lowinigo yu hene. Tigua budi gabua ale timbuni mini laiononaga ne hariga mo ndibu lalubi
HEB 11:34 ira hungu gibiore biyago mo hundia halubi hene. Marume wai biagane ayu tibume dibule biyagola ti nabe yo pialu pene. Ti hongo nahe henego mani mo hongo hene. Ani bialu tigua wai bialu howa hongo timbuni halu dindi tarali ami hearu bope halu ti wayali hene.
HEB 11:35 Wali Ngode Datagaliwabehondo mini mbiraore wu berenerume Ngode Datagaliwabehanda tinaga damene homeneru mo heya hayagola ti haru mandagi hene. Marume Ngode Datagaliwabehanda tihondo mo heya howa bayaleore holene milo ibuhondo erembira namule lowa tandaga timbuniore nalu homene.
HEB 11:36 Wali agali marume ti maru mege bialu maru tibume balu maru pu senime gi ge dariba howa garabaya andaha hela bigi bini.
HEB 11:37 Ai maru ege to̱le̱me homelo balu maru ira podaga tome podaki halu maru wai biagane ayu tibume homelo dibalu bini. Ti yagibano howa marume mo tandaga ha ba bigi biyagolabi tigua aga nogo sibinaga dongonebi memenaga dongonebi karulowa ibaga bu hene.
HEB 11:38 Ani bialu dindi ko yobi wali agali nahaga wiagoriabi hari barehabi tigua wai togolo yu ibaga bu hagadagua buwa ege andahabi dindi ha̱u̱habi palu haga hene. Wali agali mini timbuni taraorewi uruni ti dindi wali agali maru hearu baba bia tago nahe hene.
HEB 11:39 Wali agali mini mbiraore wu henedaruni bibahendeme Ngode Datagaliwabe wanakuini howa mini lene holene karulene. Mini ogoni karulenegoyu Ngode Datagaliwabehanda, Ngiaore bulebero, lalu lowiyago tigua mo ya nabi dege hene.
HEB 11:40 Mo ya nabi henedagoni irane Ngode Datagaliwabehanda ina mitangi bialu mbira bayale daligaore manda manda bu winigome. Ogoni tini hangu ndo tibi inabi mandagi howa baya buruguleore hai helole lowa manda manda bu winigome ti nayi hene.
HEB 12:1 Anigo wali agali bibahende mini mbiraore wu henedarunime biyadagua iname nde buluma̱ya manane walia ho nga. Irane ogoninaga mbirale bibahende inani ngarubi ko inani para ho ngarubi wahai halu iname gerai lolene ngagoria wiape kagola hibu lalu mali̱ya.
HEB 12:2 Ani pialu howa iname mini mbiraore wulene tenialubi wu maro bialubi Yasuha mini hana ho kamago ibuni handaya ho yalu puabo hami̱ya. Ibugua ira bangani homolene manga halu wa nahe pene. Irane ogoni maha turu holene yu holebiragonaga ibugua taga nahe ira bangani homayagome áyu Ngode Datagaliwabenaga haru howa biraganeni gi tigahayagi pu beda.
HEB 12:3 Anigo ibu tandaga nama piyagobi ko biaga hearume ibu handabe manga hayagobi mitangi bilimu. Yasu ibugua ani biyago mitangi buwa tí tínime mo genda halu wahalu pu nabilimu.
HEB 12:4 Tígua ko ngaru baba wai hongo howa bialu kamigo tí mbiraligo bo home nale kami.
HEB 12:5 Ngode Datagaliwabehanda tí ibunaga waneigini howa elahe halimulo bi mo hongo holene tíhondo larago embeda ho kamibe. Bi larago ogo, I̱ igini-o Anduane Homogohanda í̠ mo tiga biragola bayuwa hale ho habe. Ani bialu ibugua í̠ taliragola miniha genda nahabe.
HEB 12:6 Irane Anduane Homogo ibugua gubalini hararu bibahendehondo mo tiga biaga ka. Ibugua bibahende ibu waneigini kagola mana laga, lalu gilibu nga.
HEB 12:7 Áyu tandaga nalu kamigo abame baragola tandaga nagadagua nalu kami. Tígua tandaga nalu kamigoni Ngode Datagaliwabehanda tí ibunaga waneigini kami lalu walia haga. Igini ibu abahanda mana nalaga mbira kabe.
HEB 12:8 Ngode Datagaliwabe ibugua ibu waneigini bibahende mana lalu bagadagua tí maru nabe kayagua tí ibu waneigini heneneore ndo aba nahe hono wahene ale kami.
HEB 12:9 Ai ina aba dindini hene karu tigua ina mana laragola iname ti mitangi bu haramali. Ani mitangi harimadagua ina dinininaga Aba daliga kagohondo mitangi timbuniore bialu ibunaga andaneha holene nga ndobe.
HEB 12:10 Ina aba dindini hene karu tigua ina mo tiga bulene manda biyadagua tigi mbira dege baga biaga. Ani binigo Ngode Datagaliwabe ibugua inanenaga koyane ibuni baya burugule kagoha mandagi ha tago ho holoma̱yanaga mo tiga biaga ka.
HEB 12:11 Ibugua ina mana lalu barangi ina turu nahe keba dege dindi ho harima. Ani birimago maha mana lalu ogonidagua mo mini wia hene karu tigua mana tigabi biaganaga mo palia holene yu haga ka.
HEB 12:12 Irane ogoninaga tígua gi hi ho kamiru yaraga ho halu ge duli diri durulo kamiru mo hongo halu hadaba.
HEB 12:13 Ani bialu ge kohe kamiru ko ha timbu nahe dabi helo tígua hariga tigabini pialu haabo halimu.
HEB 12:14 Tigua mo palia holene yu howa wali agali karu baba ta nabi mandagi halimu. Holene baya burugule mbiralime nayi howa Anduane Homogo nahondolebirago tígua holene ogoni yu howa bialu hole lowa halimu.
HEB 12:15 Ani howa Ngode Datagaliwabehanda biamogo bulene nawi howa biamogo bia harago yu wahalu dai buligo mamage ho halimu. Datani ko kaubi mbira anda ho kaligo ogoninaga kaume mo kau bia hagadagua tí kamiru aria mbirali ogonibi holigo de hondo halimu.
HEB 12:16 Ani bialu tí mbiraligo wali kayu yagabi Ngode Datagaliwabenaga ngaru yo handagabi holigo de hondo halimu. Isohanda ogonidagua buwa tomo halu mbira hangu nole lowa ibu igini wahene howa aba pani ha aribia holene wiagome yolo bini.
HEB 12:17 Iso ibu maha ibu abanaga mo turu holene mo yua hayago tígua manda bidamigoni. Ani binidagoni irane ibugua biyago mbira balalu dai bule dugu bialu tai bia biyagolabi Ngode Datagaliwabehanda ibu yu wahenegome henge handa walia nahe hene.
HEB 12:18 Isaraele wali agali Hari Sainai weagoha íbu heagola Ngode Datagaliwabehanda biyagodagua tíhondobi nde bilo naibirimi. Isaraele wali agalime Hari Sainaini íbu howa ira hungu biyagobi aruma hayagobi hari biagoria mindi timbuni biyagobi puyabu hongohe u e layagobi
HEB 12:19 mbelo biguli be̱be̱ layuagobi mbiralime bi layuagobi uruni bibahende ti manda biai hene. Mbiralime bi o layuago tigua hale halu lalu, Bi mende inahondo nale waha, lene.
HEB 12:20 Ani lenego irane bime bilimu layuago ogo, Wali agalimebi nogo biangomebi mbiragome hari ogo ela hayagua homelo ege to̱le̱me balimu, layagola hale halu tigua gi howa, Bi nale waha, lene.
HEB 12:21 O handayago handalu mogoleoreyagola Mosesehanda lalu, I̱ diri durulalu gi taraore ho ko, lene.
HEB 12:22 Tígua ibirimigo uruni hondole ibirimi ndo. Tí Hari Saiono Ngode Datagaliwabe holenehe kagonaga tano dahuliyanaga Yarusaleme dahuliyali daosini au lolebe tobahe kagoriabi ibirimi.
HEB 12:23 Ngode Datagaliwabe waneigini wahene mini dahuliya andagani gilibuwi karu turu halu mo mogo bu kagoriabi tíbi ibu waneigini wahene dege howa íbu kami. Ani bialu tí wali agali bibahende daba ki holene Ngode Datagaliwabe kagoriabi wali agali ala bayale halu homayarunaga dinini mo baya burugule heleneru kagoriabi ibirimi.
HEB 12:24 Tígua habo nalolene bi gahengenaga dombegua Yasu kagoriabi ibunaga darama tindi tandalo ba hene ngagoriabi ibirimi. Darama ogoni Abelenaga darama ale ndo Yasunaga darama hongohe taraore ko domo wahai haga nga.
HEB 12:25 Ani bidago ibugua bi lararu tígua hale habe manga nahe bayuwa hale halimu. Mbirali dindini howa bi mana lamiyago hale habe manga hayaru ti yo pialu napene. Ani binigo Ngode Datagaliwabehanda dahuliya andagaha howa bi langirago hale howa iname mo waharimayagua yo pialu polene henge nawialu nawuleore bira.
HEB 12:26 Ala Ngode Datagaliwabenaga bi layangi layadagonime dindi bibahende mo imi ema biai hene. Ai áyubi ibugua lowialu lalu, I̱na halu mende mo imi ema bialu dindi hangu ndo hari daligahabi heba mo imi ema biaore holebero, lene.
HEB 12:27 Ibugua, Halu mende, lenego bibahende wabini ngaru imi ema bilalu mo waholebiragonaga tigatiga walia ho nga. Ani bulebirago irane mbirale bibahende mo imi ema bibe nahe ngaru wiaabo helonaga ani lene.
HEB 12:28 Anigo Ngode Datagaliwabe ibugua Handame Ho Kago mo imi ema nabibehe ngago yama pialu haramagonaga iname ibuhondo ka̱i̱ lalu hami̱ya. Ani buleberamago irane inanaga Ngode Datagaliwabe ibu ira dalu do au lagane kago mitangi bialu ibu turu helo iname ibu mo dunini helalu gi holenemebi mogo lolenemebi ibunaga mini yaraga halu lotu lalu hami̱ya.
HEB 13:1 Keriso hameigini howa tíni degedege gubalini hagahaga biaabo halu halimu.
HEB 13:2 Ani bialu howa wali agali dengui nahendene ibiraru turu howa tí andaga palimi̱ya ibidaba lalimu. Maru henerume ogonidagua bialu, Palimi̱ya ibidaba, layago dahuliyali ibiyago manda nabi howa lene.
HEB 13:3 Maru garabaya karu mitangi bialu minime ti heba mandagi haradagua bilimu. Ani bialu marume tandaga nalu kagoria mitangi bialu ti heba mandagi tandaga nalu haradagua bilimu.
HEB 13:4 Tí bibahende kamirume wali agali dabu bu holenenaga mana bayaleore ngago manda bu holene nga. Agalinimebi onenemebi mini hana haga bu holene nga. Wali agali kayu biagabi wali agali ma handagabi karu Ngode Datagaliwabehanda ti pani mulebira.
HEB 13:5 Muni dimagoli holeneme tí yania holani de hondo halimu. Tí holenenaga mbirale wu kamiru karulape ngama manda bu halimu. Ogoninaga irane Ngode Datagaliwabehanda ogodagua lo nga, I̱na tí yu wa naholebero. I̱na tí helalu napolebero, lalu gilibu nga.
HEB 13:6 Ani manda buwa iname hongo howa bi ogodagua lalu, Anduane Homogo ibugua i̱ biamogo biaga kago i̱ gi naholebero. Marume i̱hondo mbirale mbira agi bibehe kabe, labehe kamagoni.
HEB 13:7 Tínaga haru haga ala hene biarume Ngode Datagaliwabenaga mana langiyago mitangi bialu halimu. Ti halu homayago mitangi bu dai bialu ti mini mbiraore wu hayadagua talialu halimu.
HEB 13:8 Yasu Keriso ibu abebi áyubi maninagabi ibu hayagobi dege ha ho wiaabo haga ka.
HEB 13:9 Ani bidago mana haluni tara tara lawai hararume ti hariga tigabini pialu kamigo wahalu haru pu tara nahelo halimu. Miniha mo hongo holenego tomo nolene nanolenerume ngiaga ndo. Ngode Datagaliwabehanda biamogo bulene nawi howa biamogo biaganegome hongo ngirago iname mo yu holenego bayale nga. Wali agali maru tomo nolene nanolenenaga mana uruni wiadagua bialu hayaru mana urunime ti biamogo nabini.
HEB 13:10 Loma binigo mo miaga Yualinaga balai anda lotu laga kagoha biabe bialu karu tigua inanaga lomabu miaga dagiani lomabu mini ngago nolene nawi.
HEB 13:11 Yualinaga loma binigo mo miaga haguane timbuni ibugua nogo tara taranaga darama hambu yalu Loma Bia Heneore Hobane ngagoha anda puwa wali agalime ko biyaru domelo Ngode Datagaliwabehondo mo miaga. Ani bialu howa wali agalinaga balai anda bu heagoria howa tagirahayagi nogo biagonaga tingini delaga wini.
HEB 13:12 Irane ogoninaga Yasu ibugua wali agalime ko birimago ibunaga daramame domo wahalu mo gahenge hole lowa tano timbuni wiago tagirahayagi homa hene.
HEB 13:13 O biyadagoni manda bialu ibu tagirahayagi howa ibu taga pani naradagua iname namogo bia hami̱ya ma.
HEB 13:14 Dindi o kamagoria tano ina ha ho wiaabo holene nawidago iname tano mbira mani ibulebirago ibilo handaya ho kamagoni.
HEB 13:15 Iname ani kamagoni Yasuni howa Ngode Datagaliwabe mini yaraga holene lomabu mialu haabo hami̱ya. Ani bialu ina bime ne hambuni howa, Ibu inanaga Anduane Homogo ka, lalu latagi haramagome biaga.
HEB 13:16 Tínime mana bayale bialu biamogo bia hagahaga bialu halimu. Mana urunidagua bialu lomabu meramagome Ngode Datagaliwabe mo turu haga.
HEB 13:17 Tínaga haru haga karume tíhondo, Bidaba, laradagua bialu halimu. Tigua tí haru howa, Ogodagua birima, lalu Ngode Datagaliwabehondo lamulene wulebiragonaga ti mini ha̱lo ha nabi bayuwaore handaya ho haga ka. Anigo tigua, Bidaba, larago mo wa nahe bialu harimiyagua tigua biabe bialu kago turu howa bulebira. Ai tigua, Bidaba, larago mo waharimiyagua nde ti genda ho howa biragola ogonime tí biamogo bibe nahe holebira.
HEB 13:18 Ina mitangi bialu Ngode Datagaliwabehondo bi la haabo halimu. Iname horo bibahendengi tigabi bulene hangu hamelo kamago ina miniha ko mbira do naheore kamalo manda bu kamagoni.
HEB 13:19 Ani buwa tígua Ngode Datagaliwabehondo bi lalu ibugua i̱ tí kamiria abaleore daibilelo i̱na tí ogonidagua lalimulo hameore lo ko.
HEB 13:20 Inanaga Anduane Homogo Yasu Nogo Sibi Haru Haga Timbuniore kago ibugua lomabu miagane mana bialu homo aribia hayagola Ngode Datagaliwabehanda ibu mo heya hene. Ogoni biyagome habo nalolene bi lo wia ho wiaabo holebirago mo hongo hene. Mo palia hagane Ngode Datagaliwabe ibu hame ledadagua tígua bilimulo ibugua tí kamigoria mbirale mbira mbira bayale mo wia helo hameledo. Ani bialu Ngode Datagaliwabe ibugua Yasu Kerisoni howa inaha ibu turu hara ale bilobi hamelo ko. Kerisonaga mini yaraga ha ho wia dege bidane wia ho wilo. Aniore bilo hamelo ko.
HEB 13:22 I̱ hamene mbaliniru-o bebani tí mo hongo holenaga bi o gilibu wia harogo lu ndo nemandi degego bayuwa hale halimulo hame timbuni lo ko.
HEB 13:23 Ina hameigini Timodi garabaya golope halu tagira pelayago tí manda bilimulo hamelo ko. Timodi ibu abale ibiyagua i̱ tí kamiria eberongi iya haru ibuleberaba.
HEB 13:24 Tínaga haru haga bibahende tihondobi Ngode Datagaliwabe ibunaga wali agali bibahende tihondobi, Iname tí mitangi bu kama, lalu lawia haramago lamilimu. Keriso hameigini Idali dindini karu tigua, Tí mitangi bu kama lalu, lawia hara.
HEB 13:25 Ngode Datagaliwabe ibugua biamogo bulene nawi howa biamogo bia holene tí bibahendeha wiaabo helo hamelo ko.
JAM 1:1 I̱ Yamese Ngode Datagaliwabenagabi Anduane Homogo Yasu Kerisonagabi biabe bia haga kogo howa Ngode Datagaliwabenaga wali agali dindi bibahendeni purogo lo kamiru tí mitangi bialu beba ogo gilibu wia haro.
JAM 1:2 I̱ hamene mbaliniru-o mo tandaga holene tara tara tí kamigoria íbu ngagola turuho halimu.
JAM 1:3 Mo tandaga holene tara tara urunibi íbu ngagola tí agi mitangi beramibe hondolenaga ngago manda buwa Ngode Datagaliwabehondo mini mbiraore wirimigome bolangua ho halimulonaga nga. Genda dewa urunibi íbu ngagola yu howa hongo ho haabo holeberami.
JAM 1:4 Hongo haabo howa hibulo kamigome mini bogabi baya buruguleorebi karulapeorebi holeberami.
JAM 1:5 Anigo agi buabe toba ho harimiyagua Ngode Datagaliwabehondo bi lolene nga. Bi lalu howa mini gigabi wulene ngi lalu kagohondo ibugua nangule nale turu howa mo tago halu mulebira.
JAM 1:6 Anigo ngi lalu kamigo howa Ngode Datagaliwabehondo mini mbiraore wuwa ngulebiraore manda bialu bi lalimu. Mbiralime ibuhondo bi lalu howa mini dewa wuwa bi layagua ibu puyabu pu laragola iba yaribu bialu pu íbu dai bu biagagobi ka.
JAM 1:7 Ibugua mini dewa wuwa hariga mbiraoreni polene manda nabi hariga dewani polene manda bialu kagoni. Ogonibime Anduane Homogohondo mini mbiraore nawi howa mbira ngi laragola ngulebira mitangi bulene nawi.
JAM 1:9 Mbirali ibu Keriso hameigini howa yagibano kayagua Ngode Datagaliwabehanda ibu mo yaraga haragola turu holene nga.
JAM 1:10 Mendeali ibu Keriso hameigini howa homogo kayagua Ngode Datagaliwabehanda ibunaga mbirale ngaru mitangi nabi ibu mo dindi haragola turu holene nga. Irane balawaya minane anda hararu gau lalu ereba hagadagua mbirale dewawi karu homolebira.
JAM 1:11 Balawaya dedago nime da ba haragola gau lalu dogolope hagadagua homogo karu uruninaga biabe bialu kaore homalu bibahende ngelalu polebira.
JAM 1:12 Mo tandaga holene tara tara ngagola tígua ema nabi hongo howa hibu lalu haabo howa Ngode Datagaliwabehondo gubalini ho karuhondo holene gahenge Ngode Datagaliwabehanda, Ngulebero, layadagua ngulebiraore manda buwa tí turu holene nga.
JAM 1:13 Mo tandaga holene ngagome mbirali ko mo bia haragola ibugua lalu, Ngode Datagaliwabehanda i̱ ko mo bia halu ka, lolene nawi. Ko ngagome Ngode Datagaliwabe ko mo bia habe nahe nga. Ngode Datagaliwabe ibugua mbirali ko mo bia nahaga ka.
JAM 1:14 Mbirali ibuni dimagoli haragome ko mo bia holene tene nga.
JAM 1:15 Ibuni dimagoli howa ko biaga. Ko biyago anda howa homolene wulebira.
JAM 1:16 I̱ hamene mbalini turubiru-o tíni mo hondo nahalimu.
JAM 1:17 Ngode Datagaliwabe ibunime mbirale bibahende baya buruguleore ngaru turu halu bame ngiaga ka. Ngode Datagaliwabehanda hariha wá haga bibahende karu Wabiaga ibu ka. Ngode Datagaliwabe ibu tara nahagabi de handa tara nahagabi mo aruma nahabehebi kagoni.
JAM 1:18 Ngode Datagaliwabehanda bibahende wabuwa ina dunini holoma̱ya hame lowa ibunaga bi mana henene lolene ngagome mo gahenge ho helenego kama.
JAM 1:19 I̱ hamene mbalini turubiru-o mbira ogo mitangi bulene nga. Bibahendeme bi bayuwa hale hai hami̱ya. Anigo bi abale la nabi kebabi abale nahe hami̱ya.
JAM 1:20 Wali agalinaga keba holene ngagome Ngode Datagaliwabenaga tigabi bulene ngago mo bia nahaga.
JAM 1:21 Anigo ko bulene bibahende ngaru wahai halimu. Ngode Datagaliwabehanda bi mana tínaga bu habaneha hangayago manga nahe howa bayuwa yu tigabu halimu. Ani birimiyagua Ngode Datagaliwabenaga pele mulene yu holeberami.
JAM 1:22 Bi mana ogoni hale dege harimiyagua tíni mo hondo harami. Hale halu bulene nga manda bilimu.
JAM 1:23 Mbiralime iba wa̱yu̱ handalu puwa mani ibunaga dengui abi kobe toba halu embeda haga. Ogonidagua mbiralime bi mana hale howa bia nabiyagua ibu ogonibi ka.
JAM 1:25 Ngode Datagaliwabe bi mana baya buruguleore lowini ngagome wali agali golope haga. Mana ogoni mbiralime bayuwa mitangi bu haabo hayagua bi mana embeda nahe bulene ngadagua bialu ibugua Ngode Datagaliwabenaga turu holene handa walia holebira.
JAM 1:26 Mbiralime, I̱ Keriso hameigini ko, lowa ibunaga hége haru nahaga kayagua ibuni mo hondo hara. Mana yu kogo bamedago lowa ani laga ka.
JAM 1:27 Aba Ngode Datagaliwabehanda Keriso hameigini henemanebi tigabibi kayagua ti ogobiore holebira manda bu ka. Wali dalo bedarubi waneigini hono wahene karubi ti genda yu kagola biamogo bia holene nga. Ani bialu howa dindi mana ko ngarume tí mo pila holigo hondo wandialu halimu.
JAM 2:1 I̱ hamene mbaliniru-o Anduane Homogo Yasu Keriso ibu mini daliga lowa Anduane Homogo kago ibuhondo mini mbiraorewi kamiru tígua wali agali tale bialu homogo karuhondo turu halu yagibano karuhondo handabe manga halu bulene nawi.
JAM 2:2 Agali kira mendego ibu gi magibi aga bayalebi biai howa mendego ibu yagibano aga ko buda pugubi buwa libu tínaga lotu lagane andaha ibiyagua
JAM 2:3 tígua agali aga bayalebi kagohondo lalu, Biragane bayale ogoria birule íbu, lalu agali mende aga budu pugubi biagohondo lalu, Í̠ kegoriani hoa biyagua nde habe. Biruabiyagua nde ogoriani birabe,
JAM 2:4 laramiligo tínaga mini ko ngamigome wali agali talebu ki bialu kami.
JAM 2:5 I̱ hamene mbalini turubiru-o tí hale halimu. Yagibano karume Ngode Datagaliwabehondo mini mbiraore wulene timbuni yu tiga bilobi Ngode Datagaliwabehanda handame ho kagoria ti helobi ibugua ti dabo helene. Ibuhondo gubalini ho karu ibugua handame ho kagoria ti holebira lalu lowini.
JAM 2:6 Agali kira larugo yagibano biagohondo tígua handabe manga halu mo taga haramili. Homogo karume tí handabe manga halu, Godi lo ma, laga ndobe.
JAM 2:7 Tigua tí Yasu Kerisonaga mini bayale karulo kamigo hondowa tí mege biaga ka ndobe.
JAM 2:8 Ngode Datagaliwabehanda Handame Ho kagonaga mana lowinigo ibunaga mbugani longago ogo, Í̠na í̠ni gubalini ho harilidagua maru karu ta nabi gubalini ho habe, lalu gilibu nga. Ani lo ngadagua bialu kamiyagua ogoni bayaleore berami.
JAM 2:9 Mbirali kagohondo handabe manga ho kamiyagua Mosese heneyangi Mana lowini ngago pugualu ko berami.
JAM 2:10 Ngode Datagaliwabehanda bi mana lowini ngago mbiralime mana ogoni mbira hangu puguayagua ibugua bi mana bibahende ngago puguai haragoni.
JAM 2:11 Ngode Datagaliwabehanda lalu, Wali agali kayu nayabe, lalu bi mende, Homelo nababe, lene. Tí wali agali kayu nabi howa mbirali homelo barimiyagua Ngode Datagaliwabehanda bi mana bibahende lowinigo puguai harimi.
JAM 2:12 Ngode Datagaliwabe bi mana lowini ngagome wali agali golope hagago mana ogonime tí tale bulebirago tígua bi laramigobi mana beramigobi hondowa halimu.
JAM 2:13 Mbiralime wali agali maruhondo dara howa biamogo nabiyagua ogoninaga Ngode Datagaliwabehanda dabi ki birangi ibu dara naholebira. Anigo mbiralime wali agali dara halu biamogo bialu hayagua Ngode Datagaliwabehanda daba ki birangi ogoni ibu dara holebira.
JAM 2:14 I̱ hamene mbaliniru-o, Ngode Datagaliwabehondo mini mbiraore wu ko, lowa mana bayale biatagi naharimiyagua mana ogonibi beramigome tíni pele mibehedabe.
JAM 2:15 Keriso hameigini marume agabi tomo nolenebi nawi kagola
JAM 2:16 o biaruhondo aga tomobi nami howa tihondo lalu, Tí tomo karulape nalu aga bayale bialu turu halu hondo halimu, larimiyagua bayale beramibe.
JAM 2:17 Tí Ngode Datagaliwabehondo mini mbiraorewi kamiyagua nde mana beramigome walia halu biatagi halimu. Ibuhondo mini mbiraore wu howa mana bayale biatagi naharimiyagua mini mbiraore wulene ogoni hangu galone naholebira.
JAM 2:18 Mbiralime lalu, Mbirali ibu Ngode Datagaliwabehondo mini mbiraore wu haga ka mendeali ibu mana bayale bialu haga ka, lolebira. Ani laragohondo i̱na agua ladai bero. Mbiralime Ngode Datagaliwabehondo mini mbiraore wu ko lowa mana bayale nabiyagua i̱na ibu mini mbiraore wu ka agua manda buleberobe. I̱ nde mana bayale berogome Ngode Datagaliwabehondo mini mbiraore wu ko, lalu walia holebero.
JAM 2:19 Ngode Datagaliwabe ibu mbiraore kago manda biribe. Bayuwa manda birida. Dama karu ti nde anidagua dege manda bialu mogo lowa gi halu ka. Í̠ mini nawi kegoni.
JAM 2:20 Ngode Datagaliwabehondo mini mbiraore wu howa mana bayale biatagi nahayagua ogoni galone ndo berego manda nabi kebe.
JAM 2:21 Inanaga mamali Abarahamahanda ibu igini Aisaga Ngode Datagaliwabehondo bo lomabu miaga dabuni mule biyagola Ngode Datagaliwabehanda, Ibu mini tigabiwi ka, lene.
JAM 2:22 Ibugua mini mbiraore wu howa Ngode Datagaliwabehanda bia layadagua biatagi hayagome Ngode Datagaliwabehondo mini mbiraore ogobi wu ko lalu walia hene.
JAM 2:23 Ani biyagola Anduane Homogonaga mbugani bi lowinigo lola henego ogo, Abarahamahanda Ngode Datagaliwabehondo mini mbiraore wu heago hondowa Ngode Datagaliwabehanda, Ibu agali mini tigabiwi ka, lowa, I̱naga nenegeore ka, lalu gilibu nga.
JAM 2:24 Anigo mbiralime Ngode Datagaliwabehondo mini mbiraore wirago hangume ndo mana bayale birago hondowabi Ngode Datagaliwabehanda, Ibu mini tigabiwi dege ka, lolebira.
JAM 2:25 Bayanda wali mbira kayu bule muni ngi laga mini Lahaba berenego ibugua Isaraele agali kirali taya ibiyago labo yo pialu pelo lowa ibu andaga bira do helalu hariga tarani dai bilo walia hayagome ibubi mini tigabiwi holene yini.
JAM 2:26 Anigo mbiralinaga tinginibi dininibi mandagi naheyagua nde ibu homene ka. Ogonidagua Ngode Datagaliwabehondo mini mbiraore wulenebi mana bayale bulenebi mo mbiraore nahayagua Ngode Datagaliwabehondo mini mbiraore wulene degego homene ale ka.
JAM 3:1 I̱ hamene mbaliniru-o tí lawai hagane hole garere nabilimu. Daba ki birangi Keriso hameigini bibahende dabolebira. Dabalu howa lawai hagane kamaru inahondo hongo howaore dabolebira.
JAM 3:2 Ina bibahendeme kagua dewa beramali. Mbiralime bi ko nalaga kayagua ibu baya burugule howa ibunaga mini tinginibi haru hai haga ka.
JAM 3:3 Agalime nogo hosi gabua mo dambola howa nogo hosi ne hanganeha ege pu magui howa pume pongo buwa biabe hame ledamadagua bilo iname hosi haru haramali.
JAM 3:4 Iba sibi piagane mana manda bimi̱ya. Puyabu hongo howa pu laragola iba sibi timbuni ngago yagane agalime ibuni poa biragoha pole ira mbalape emeneme mo tiga biaga.
JAM 3:5 Hége emene koore howa bi biabe dege timbuniore biaga ka. Ira dene emeneme irabu timbuni ngago bo dai haga.
JAM 3:6 Hége ira dene ale ka. Ko bulene dewa ngaru hége ibuha howa tagira ibaga. Hégeme tingini bibahende tomia biai haga ka. Hégenaga hungu biagane tene heli dindiha nga.
JAM 3:7 Nogo ega tara tarabi dindini tombene piagane tara tarabi wena tara tarabi bibahendeore wali agalime mo dambola hagago
JAM 3:8 hége mo dambola habe nahe ka. Hége koorene ko ka. Hégeme bibahende tomia biai haga.
JAM 3:9 Inanaga hégeme Anduane Homogo ina Abahondo ka̱i̱ laramali. Ani buwa hége ogoni degeme agali Ngode Datagaliwabehanda ibuni ale helo wabini karubi ha haramali.
JAM 3:10 Ne hariga mbiraoreha howa ka̱i̱ lolenebi ha holenebi tagira ibaga. I̱ hamene mbaliniru-o mana ogonibi karulape ndo.
JAM 3:11 Iba gendo mbiraoreha howa iba kaubi dendebila ibagabe.
JAM 3:12 I̱ hamene mbaliniru-o pogeme hai dagabe. Pu mbira lini daga mini gerebi iraneme pogoli dagabe. Ogonidagua dege ibi iba kaubi bedagoha iba dendebi hambibehebe.
JAM 3:13 Tí kamigoha mini gigabiwi manda timbunibi mbira ai kabe. Mini gigabiwi mbira kayagua mine nahe ibuni mo dindiha halu mana bayale biragome walia holebira.
JAM 3:14 Anigo tínaga bu miniha henge lolenebi bi ko lolenebi habua bulenebi wu kamiyagua, Mini gigabiwi kogo, laramigome henene lolene ngago mo ko haramigo nalalimu.
JAM 3:15 Mini ogonibi wulene dahuliya andaga tawe ndo dindi tawe damanaga mini koha howa íbu nga.
JAM 3:16 Henge lolenebi habua bulenebi ngagoria mini mo mbiraore naholenebi ko bibahende bulenebi wulebira.
JAM 3:17 Anigo mini gigabiwi holene dahuliya andaga howa íbu ngagome mini wálewi holenebi mo palia holenebi hogorale bu holenebi nenege hinulenebi dara halu biamogo bulenebi mana bayale biatagi holenebi nga. Mini gigabiwi holene ogoni wali agali hoba migimigi nabiagabi tombene hondo kihe nahagabi nga.
JAM 3:18 Ani buwa mo palia haga kagome mo palia holene egene hongolebira. Anda haragola ibuhabi wali agali maruhabi mini tigabi holenenaga lini dolebira.
JAM 4:1 Tí lai lalu gungu bialu kamigo agiha howa tagira ibagabe. Tíni mini ko ngamigoha howa tagira ibaga ndobe.
JAM 4:2 Tígua mbirale ngago hame lowa henge lalu nayido agini homelo baramili. Marume mbirale yu karunaga henge lowa lai lalu gungu bialu kami. Anigo Ngode Datagaliwabehondo ngi nalarimigome nayi kamigoni.
JAM 4:3 Tígua ngi lalu howa mini ko wuwa tíni hangu mitangi bialu Ngode Datagaliwabehondo ngi larimigome nayi kamigoni.
JAM 4:4 Tí wali agali mini tigabiwi ndo mini kirawi kami. Dindi mana ko ngaru nenege hinalu kamiyagua Ngode Datagaliwabela waitigi tínime haru anda eberamigo nahende kamibe. Halu mende laro. Tí dindi mana ko ngaru nenege hinalu kamiyagua Ngode Datagaliwabela waitigi tínime haru anda eberamigoni.
JAM 4:5 Anduane Homogonaga mbugani bi o lo ngago bame lo ngabe, Ngode Datagaliwabehanda dinini inanaga bu habaneha helayagome ina henge lalu hamelo ka, lalu gilibu nga.
JAM 4:6 Anigo Ngode Datagaliwabehanda ina biamogo bulene nawi howa guaileore biamogo biahaga ka. Anduane Homogonaga mbugani bi lo ngago ogo, Mine haga karu Ngode Datagaliwabehanda ti he̱la dai biaga ka. Tini mo dindiha haga karu ibugua biamogo biaga, lalu gilibu nga.
JAM 4:7 Anigo tígua Ngode Datagaliwabehanda bia laradagua bilimu. Tígua dama Heyolabehondo, Mangaba, larimiyagua ibugua tí wahalu ibida polebira.
JAM 4:8 Ani buwa Ngode Datagaliwabe kagoria kaware hapara ho harimiyagua ibugua tí kamigoria kaware hapara ho holebira. Mana ko biaga kamigo wahai halimu. Tombene hondo kihe kamirume bu mini wále wu hole ko ngamigo wahai halimu.
JAM 4:9 Ko birimigo mitangi bialu dara halu dugu bilimu. Oba halu kamiru dugu bia aribia holene nga. Turu ho kamigo dara ho aribia holene nga.
JAM 4:10 Tígua Anduane Homogo deni howa tíni mo dindi halimu. Ani beramigola ibugua tí mo yaraga holebira.
JAM 4:11 I̱ hamene mbaliniru-o tíni guraga guraga nabilimu. Mbiralime Keriso hameigini gurayaguabi ibugua birago daba ki biyaguabi ogonime Mosese heneyangi Mana lowini ngago guralu daba ki bialu ka. Mana lowini ngago daba ki birimiyagua tígua Mana lowini ngago hale halu biaga ndo tí daba ki biaga kami.
JAM 4:12 Ngode Datagaliwabe ibu mana lowini ngago tenebi daba ki biagabi ibu dege ka. Ibuni degeme holene ngiagabi holene yamiagabi ka. Tígua wali agali tale bialu dabaga agalime daba ki biagadagua beramigo tí ai kama manda bidamibe.
JAM 4:13 Áyu yawibi i̱na dindi mbiraha puwa biyinaya bialu mali mbira hondo holebero, lalu kamiru tíhondo bi larogo hale hadaba.
JAM 4:14 Yawi agi bialu holedabe tí manda nabi kami. Ginu ngago tígua de handaramigola abale ereba hagagobi tí kamigoni.
JAM 4:15 Tígua ogodagua labehe. I̱na ogobi mendebi bialu holiya Anduane Homogo ibugua hame ledayagua nde ani bialu holebero, laramine.
JAM 4:16 Ani ndo tínime mine halu kudaga bi lagimbu bialu kamigo ko berami.
JAM 4:17 Mbiralime bayale bulene mbira ngago manda buwa bia nabi hayagua nde ko bialu ka.
JAM 5:1 Homogo kamiru tí hale hadaba. Mo ko holene dewa tínaga wulebirago mitangi bialu yi lalu dugu bilimu.
JAM 5:2 Dabudabu do harimigo goba haya. Aga tara tara wirimigo bombome naya.
JAM 5:3 Muni kuni ngolo silibabi wirimigo hagua biai haya. Hagua bidago hondowa tí ko birimigo lalu walia holebira. Irame dagadagua muni hagua bidagome tínaga tingini dolebira. Hamaro bulene horo kaware ngago ngelowa mbirale tara tara do harimi.
JAM 5:4 Mabu biabe bia hayaru mo hondo howa tinaga yolo nami ngamigome ko birimigo walia hara. Biabe bia hayaru maru mo hondo harimigonaga tigua bi larago Anduane Homogo Hongo Haiheore kagome hale halu ka.
JAM 5:5 Dindi ogoria howa tíni hangu mitangi bialu nogo habahe kagola bo nolene tu haralidagua tí homolene kaware nga manda nabi howa bibahende ta nabi hame ledamidagua biai halu kami.
JAM 5:6 Ko nabi hayaru, Ko biya, lowa tigua nde ladai bulene henge nawi heagola homelo bo waharimi.
JAM 5:7 I̱ hamene mbaliniru-o Anduane Homogo dai bilo tagi ema nabi howa hibu lalu halimu. Agalime tomo hongowa anda helonaga dalu ibilo ema nabi malia ho hagago mitangi bilimu.
JAM 5:8 Anduane Homogo dai bulene horo kaware ngago tí turu halu mini dunubia ho howa ema nabi halimu.
JAM 5:9 I̱ hamene mbaliniru-o Ngode Datagaliwabehanda daba ki bialu howa, Tígua kagua birimi, loligo tíni guraga guraga nabilimu. Daba Ki Biaga henemane ibu panga tagirahayagi howa tamuha ibule kago handalimu.
JAM 5:10 Ngode Datagaliwabe mana latagi haga agali bamba henerume Anduane Homogo mini lowa ti tandaga halu ema nabi howa hibu lalu henego manda bimi̱ya.
JAM 5:11 Tandaga timbuni halu ti hongo haabo howa turu holene handa walia hene laramali. Yobo te hale harimigoni. Ibugua Ngode Datagaliwabe mitangi bialu ema nabi howa hibu lalu haabo hayagola Anduane Homogohanda ibuhondo biyago manda bidami. Anduane Homogo kagome wali agali de hondowa dara timbuni halu biamogo biaga ka.
JAM 5:12 I̱ hamene mbaliniru-o ai galone timbuniore laro. Dahuliya andaga mini lalubi dindi mini lalubi mbirale tara ngago mini lalubi wanakui minalu bi nalalimu. Ngode Datagaliwabehanda, Í̠ kagua lari, loligo e̱bi ndobi ogoni dege lalimu.
JAM 5:13 Tí kamigo mbirali genda yu kayagua Ngode Datagaliwabehondo bi lolene nga. Ani buwa mbirali ibu turu hayagua Ngode Datagaliwabe mini yaraga halu iba gana lolene nga.
JAM 5:14 Mbirali kamigo warago bayagua ibugua Keriso hameigini agali ala hene miniwi karu ololene nga. Tigua o biago mini lalu Ngode Datagaliwabehondo bi lalu Anduane Homogo minini howa ibunaga tinginini olibe lininaga weli odo wulene nga.
JAM 5:15 Tígua Ngode Datagaliwabehondo mini mbiraore wuwa bi larimigome mbirali warago bo wiyago Anduane Homogohanda mo dabi holebira. Ani biragola ibugua ko biyago Ngode Datagaliwabehanda domo wahai holebira.
JAM 5:16 Wali agali maru kamigo dabi helo ko birimigo hangu hangu lapani hagahaga bialu ti mini lalu Ngode Datagaliwabehondo bi la haga bialu halimu. Mbirali mini tigabiwi kagome Ngode Datagaliwabehondo bi layagua Ngode Datagaliwabehanda hongo tara walia holebira.
JAM 5:17 Elaya ibu ina kamagobi dege howa ibugua dalu naibilo lalu Ngode Datagaliwabehondo mini dunubia ho howa bi layagola mali tebirani manegonaga ege waragaria dalu naibi gaea biaabo ho wini.
JAM 5:18 Ani biyagola howa ibugua Ngode Datagaliwabehondo bi lone lalu, Dalu ibila, layagola dalu ibalu dindi bayale halu tomo anda haga bini.
JAM 5:19 I̱ hamene mbaliniru-o galone ogo ala manda bilimu. Tí kamigo mbiralime mana henene ngago wahalu poragola mendealime hariga tigabini haru dai biyagua homolene ngagoria pu karia haru dai bulebira. Mana ko biaga karume ko dewa biyago Ngode Datagaliwabehanda domo wahai helo haru dai biyagome ibu biamogo bini.
1PE 1:1 I̱ Pida Yasu Kerisonaga abosolo kogoni howa bi ogoni gilibu wia haro. Tí Ngode Datagaliwabehanda dabene harimiru tíni dalu wahalu Pondasabi Galesiabi Kabadosiabi Esiabi Bidiniabi dindi uruniha bai naleha hole ibida purogo lo kamiru tíhondo bi ogo gilibu wia harogoni.
1PE 1:2 Aba Ngode Datagaliwabehanda manda bu winidagua tí dabowa heledagoni. Ibugua manda bu wialu ibu Dininime tí wali agali ibuninagaore loma bia hene howa Yasu Kerisohanda laradagua bilimulobi ibunaga daramame tí mo gahenge helobi ani dabo helayagoni. Uru-o biamogo bia holenebi mo palia holenebi tíha to̱lai helo hame lo kogoni.
1PE 1:3 Uru-o iname Anduane Homogo Yasu Kerisonaga Aba Ngode Datagaliwabe kagohondo ka̱i̱ lami̱ya. Ibugua ina dara timbuni howa biamogo bialu Yasu Keriso homayagola mo heya hayagome ibugua inahondo holene gahenge ngiya. Ani biyagome inabi mo heya holebiraore manda bialu mini dunu bia ho kama.
1PE 1:4 Ani bu howa Ngode Datagaliwabehanda turu holene tara tara baya gibiore wini ngaru ibunaga wali agaliruhondo mule lowa wia hene ngago iname muleore lowa minime dunu bia ho kamagoni. Uruni tínaga ngaru ko holilono Ngode Datagaliwabehanda dahuliya andagaha mo do ho kagoni.
1PE 1:5 Horo ha maro birangi Ngode Datagaliwabehanda pele mulene walia hole mo manda bu wini ngago ogoni mule hondo kamigoni. Ani hondo howa tí Ngode Datagaliwabehondo mini mbiraore weramigola ibunaga hongome tí mamage ho kago uruni tínaga lalu ibugua wia ka.
1PE 1:6 Anigo áyu mo tandaga holene tara tara dewa ngagola genda tandaga tigi mbira hangunaga nalu kamigonigoyu Ngode Datagaliwabehanda tínaga uruni wia do hayago mitangi bialu turu ho halimu.
1PE 1:7 Mo tandaga holene ngarume tí Ngode Datagaliwabehondo mini mbiraore henemane wu kamigo walia halimulonaga nga. Bi manane mbira ogo ala laro. Dindi tawe ngolo dudu baga bialu mo koore habehe ngago ogoni ngolo ibunioredabe be ngolo ibuni ndodabe hondole agalime irani delaga. Anigo tígua Ngode Datagaliwabehondo mini mbiraore wirimigo ngolo ale ndo baya gibiorego hongo ho wiaabo halimulonaga Ngode Datagaliwabehanda ba hondolene nga. Hongo ha ho wiaabo hararume Horo Mbira Yasu Keriso ha pani harangi mini mo yaraga holenebi wá taraore holenebi mini lene holenebi tínaga wulebira.
1PE 1:8 Tínaga deme ibu nahende howa ibuhondo gubalini ho haabo haramili. Áyubi deme ibu nahende dege howa ibuhondo mini mbiraore wu kami. Mini mbiraore wu kamigo irane ibugua tíhondo pele mulene ngiyagome. Ogonigo tí turu holene baya gibi nalabeheore yu kamigoni.
1PE 1:10 Bamba Ngode Datagaliwabe mana latagi haga henerume pele mulene ogoni tini manda bule baya hangu tai biaabo halu begelo handalu howa Ngode Datagaliwabehanda tíhondo áyu ngirago ngulebira lalu ala mbiwia hene.
1PE 1:11 Keriso Dinini ibugua Ngode Datagaliwabe mana latagi haga biaruha howa Keriso tandaga nolebira lalubi mani ibu mini lene daliga holene wulebira lalubi walia hayagola tigua ogoni angi ibulubadabe agua ibulubadabe lowa tai biaabo halu hene.
1PE 1:12 Ani bialu heagola Ngode Datagaliwabehanda o biaruhondo mo walia halu, Bi uruni tí manda bilimulonaga ndo wali agali mani hararume manda bilonaga nga, lalu mo walia hene. Anigo Ngode Datagaliwabehanda ibu Dinini dahuliya andaga howa ibilayagola ibunaga hongome Bi Mana Debene lawai haga karume tíhondo bi uruni langiya. Bi uruni dahuliyaliru tibi handawa bialu manda bua ka.
1PE 1:13 Anigo tínaga miniha dengala howa biabe bule manda manda bu halimu. Ani bialu howa Yasu Keriso ha pani haragola Ngode Datagaliwabehanda tí biamogo bialu mo turu holebirago manda buwa mini dunubia ho halimu.
1PE 1:14 Ngode Datagaliwabenaga bi hale halu bilimu. Ani bialu howa Ngode Datagaliwabe manda nabi hemingi hame laramiligome tínaga miniha lone karuloligo henge namilimu.
1PE 1:15 Ngode Datagaliwabe ibugua ibu mini baya burugule taraore howa tí olayago tígua mbirale tara tara bibahende beramigo bialu howa tíbi nde mini baya burugule taraore dege howa bialu halimu.
1PE 1:16 Anduane Homogonaga mbugani lo ngagome lalu, I̱ mini baya burugule taraore kodagua tíbi nde mini baya burugule taraore dege halimu, lalu gilibu nga.
1PE 1:17 Tígua Ngode Datagaliwabehondo bi lalu howa, Aba-o, laramiligo ibugua wali agali bibahende dabaga kago ibu mini kira nawiaga howa hangu hangume biyagonaga tigatiga dabaga ka. Ani dabaga kago manda buwa dindi ogoriani kamingi ibu mitangi bialu ibu andaneha haabo halimu.
1PE 1:18 Tí mamalime mana nahabane lawai hayagome tí dariba hearia ibugua tí golope hole yolo biyago manda biai kami. Tí golope hole ngolo silibabi ko haga ogoni aleme tí yolo bini ndo.
1PE 1:19 Nogo sibi igini duru nabiorego Ngode Datagaliwabehondo bo miaga henego ale Kerisonaga darama baya buruguleoreme tí golope halu pele ngini.
1PE 1:20 Ngode Datagaliwabehanda dindi wa nabi howa Keriso loma bia ho helenego maha tí biamogo bulenaga ibu ha pani helene.
1PE 1:21 Ngode Datagaliwabehanda Yasu Keriso homenego mo heya howa ibu daliga taraore yaraga ho helene. Ani biyagola Yasu Kerisoha howa tígua Ngode Datagaliwabehondo mini mbiraore wu kami. Ogoninaga tígua mini mbiraore wulenebi mini dunubia ho holenebi Ngode Datagaliwabe ibuni kagoni.
1PE 1:22 Bi mana heneneore lo ngago biai harimigome tíni mo gahenge harimi. Ani buwa tígua Kerisohondo mini mbiraore wu kamidagua marumebi mini mbiraore wu kago ti heba turu howa nenege hinu kamigoni. Ani bu howa tíni gubalini hagahaga bu halimu.
1PE 1:23 Tí tingini togo biaga arianaga waneigini halimulo ndo tingini togo nabi haabo holene arianaga waneigini halimulo Ngode Datagaliwabe mana wiaabo hene ngagome tí halu mende taba henene kami.
1PE 1:24 Anduane Homogonaga mbugani lo ngagome lalu, Wali agali bibahende karu datani anda hagadagua anda haga ka. Tinaga yári bulene ngaru balawaya minane anda harago ale nga. Datani biaru gau lalu balawaya lini dogolopebe biaga ka.
1PE 1:25 Ani biagadagua ndo Anduane Homogonaga bi mana ngago dege wiaabo haga winigo nga, lalu gilibu nga. Bi Mana Debene tí langiyago ogoni.
1PE 2:1 Anigo mana ko bibahende wahai halimu. Ke̱ holenebi tombene hondo kihe holenebi henge lolenebi mege bulenebi uruni bibahende nabilimu.
1PE 2:2 Gali áyuore taba henenerume andu noa haabo haralidagua tíguabi tí dinininaga andu gagahe ibirago noa haabo halimu. Nalu howa anda hama irigi haramigola pele mulene yu holeberami.
1PE 2:3 Ogoninaga bi Anduane Homogonaga mbugani lo ngagome lalu, Anduane Homogonaga biamogo bulene ngago tínime nalu dende hendene kamigoni, lalu gilibu nga.
1PE 2:4 Anduane Homogo ibu ege to̱le̱ holenehe kago ibu kagoria ibalimu. Ege to̱le̱ ogoni wali agalime hondowa dabo wahayago Ngode Datagaliwabehanda, Bayale galone pale, lowa dabo helene.
1PE 2:5 Dinininaga anda tíni halimulo tí ege to̱le̱ holenehe kamigo ibuwa ibugua anda ogoni bule tíbi yamilo tíni henge mu halimu. Yasu Kerisoni howa anda ogoniha Ngode Datagaliwabe ibugua tíha biabe bilo helalu tígua loma binigo mo miaga baya taraore howa mbirale Dinininaga loma bia heneru Ngode Datagaliwabe ibugua turu howa yilo ibuhondo tíni miaabo halu halimu.
1PE 2:6 Anduane Homogonaga mbugani lo ngagome lalu, Ege to̱le̱ mbira baya buruguleore dabarugo i̱na Saiono dindini anda bialu kogo anda gimbunihanaga ege to̱le̱ ogoni wero. Mbiralime ege to̱le̱ ogonihondo mini mbiraore wiyagua mini burugulo naholebiraore, lalu gilibu nga.
1PE 2:7 Mini mbiraorewi kamiru tígua ege to̱le̱ ogoni baya buruguleore nga mitangi beramili. Mini mbiraore nawi karu Anduane Homogonaga mbugani lo ngagome lalu, Ege to̱le̱ mbira anda biagame galone nabibehedago lowa dabo wahenego ege to̱le̱ ogoniore mo timbuni duniniore ho heleda, lalu gilibu nga.
1PE 2:8 Anduane Homogonaga mbugani bi mende lo ngagome lalu, Ege to̱le̱ ogonime wali agali marunaga ge bo bidi lolebira. Ege to̱le̱ ogonime wali agali maru mo pila holebira, lalu gilibu nga. Ti mo pilo ibira holobadago tene tigua Ngode Datagaliwabe bi mana wiago yu tiga nabi heago hondowa ani bilo Ngode Datagaliwabehanda helene.
1PE 2:9 Ai tí ogonibi ndo hameigini daba bagi ho henego aria kami. Handame Haga Kininaga loma binigo mo miaga tí kami. Wali agali Ngode Datagaliwabehondo loma bia hene helayaru aria tí kami. Tí Ngode Datagaliwabe ibuni hangunaga wali agali kamigoni. Ngode Datagaliwabehanda tí arumaha hemiria ibunaga wá holene baya gibi kagoria halimulo olayago ibugua mbirale bibahende baya gibiore biyaru tígua lamima pilimulo dabaya.
1PE 2:10 Abale tí ibunaga wali agali ndo harimigo áyu tí ibunagaore kamigoni. Abale tígua Ngode Datagaliwabenaga dara howa biamogo bulene manda nabi harimigo áyu tí ibunaga dara howa biamogo bulene yu kamigoni.
1PE 2:11 I̱ nenegeru-o tí dindi tara taraha howa ogoria togolo yu íbu haradagua bidamigo i̱na tíhondo bi mbira ogo lawia harogo hale halu bilimu. Tingininaga hame ledamirume tínaga dinini baba wai biaabo haganego urunime tí bolangua halu wayali helo henge namilimu.
1PE 2:12 Wali agali Ngode Datagaliwabe mana yu tiga nabi karu heba howa tígua mana bayale hangu biaabo halu kamigola tigua, Tí ko mbira ogo biya, nalelo halimu. Tí bayale dege biaga ka, lalu latagi helo bialu halimu. Ani beramigola Anduane Homogo dai bulene Horo harangi Ngode Datagaliwabe mana yu tiga nabiaga biarume Ngode Datagaliwabenaga mini mo yaraga holene hangu wulebira.
1PE 2:13 Anduane Homogo mo tene halu dindini haru hagane tara tara bibahende karume mana lo ngaru hale halu bialu halimu. Kini kagome bia laradaguabi
1PE 2:14 gabumane haru hagane ibugua helayarume laradaguabi bialu halimu. Urunime wali agali ko biaga karuhondo pani milobi wali agali bayale biagarunaga mini mo yaraga helobi heleda.
1PE 2:15 Tinaga biabe bayale beramigome wali agali mini nawi karume lulu bi larago mo hundia halimulo Ngode Datagaliwabehanda hame leda.
1PE 2:16 Tí wali agali golope hene howa halimu. Ani buwa, I̱ bame golope hene kogoda, lowa mana ko ohowa nabilimu. Ani nabi howa tí Ngode Datagaliwabenaga garabaya biabe ale bia haga halimu.
1PE 2:17 Wali agali bibahende karuhondo mana bayale walia halu bialu halimu. Yasu mana yu tiga biaga karuhondobi gubalini ho halimu. Ngode Datagaliwabehondo gi ho haabo halimu. Tínaga kini dindini kagohondobi mana bayale walia halu bialu halimu.
1PE 2:18 Tí maru biabe bia hagane kamirume biabe ogoninaga anduane ibugua laradagua hale halu bialu haabo halimu. Ani buwa anduane maru tí mitangi bialu darahe karume laradagua hangu ndo kuyama karume laradaguabi bialu haabo halimu.
1PE 2:19 Ngode Datagaliwabehanda hame ledago mo tene howa tígua ko nabi kamigola mbirame tí mo tandaga haragola hibu lalu hongo haabo harimiyagua Ngode Datagaliwabehanda tí mo turu holebira.
1PE 2:20 Tígua ko birimigonaga pani mbirame minu baragola tígua hibu lalu hongo harimiyagua nde bayale biruda manda nabilimu. Ani ndo tígua bayale dege beramigola mbirame tí mo tandaga haragola hibu lalu hongo haabo harimiyagua nde ogoninaga Ngode Datagaliwabehanda tí mo turu holebira.
1PE 2:21 Ngode Datagaliwabehanda tí tandaga ogonibi nalu halimulo olayagoni. Irane Keriso ibugua tínaga tandaga na hene. Ibugua o nenedagonidagua ina kamarume ibu talima pialu howa ani noleberama lalu walia ka.
1PE 2:22 Ibugua ko mbira nabiore halu ke̱ mbira hayanebi mbiralime hale naheore hene.
1PE 2:23 Marume Yasu mege biyagola ibugua mege bia dai nabi hene. Ibu tandaga nalu howa ibugua tihondo lalu, Tíbi pani noleberami, naleore hene. Ani nale ibugua Ngode Datagaliwabe ibu ko bayalela Dabaga tigabi kago manda buwa ibuhondo mini dunubia ho hene.
1PE 2:24 Iname ko bulenehayagi homene ale howa mana tigabi bulenehayagi dére holoma̱yabi ogoninaga Keriso ibugua ira bangani iname ko birimaru ibunaga tinginiha mo yai hene. Ibunaga tinginini motudu ngarume tí mo bayale henego kami.
1PE 2:25 Tí nogo sibi pu ereba hagadagua harimi. Anigo áyu tí bu mininaga Haru Haganebi Mamage Ho Haganebi talima pilimulonaga haru dai bu helenego kami.
1PE 3:1 Agali oneru tígua tí agalinime bia laradagua hale halu bilimu. Ani birimiyagua tí agalini Ngode Datagaliwabe bi mana yu tiga nabi karume wali tígua mana bayale dege beramigo hondowa mini beregedolene manda bulebira. Ani bilo wali tígua bi lolene nawulebirago
1PE 3:2 irane tígua tí agaliniore ka manda buwa mana tigabiore bialu bedamigo tí agalinime de hondolebira.
1PE 3:3 Wali tí bayaleore holenaga tínaga tinginini yári uru ale nabilimu. Mandari mo yári bia holenebi mbirale muni timbunime miaga gurubu gele gi pagidaru wulenebi dongoneni aga bidamirumebi tínaga tingini mo bayale hole lalu nabilimu.
1PE 3:4 Ani nabi tínaga bayale holene teneore tí mini tigabiore wu birulenebi hogorale bialu biraabo holenebi mana uruni de hondowa Ngode Datagaliwabe ibugua, Baya gibioreda, lolebira.
1PE 3:5 Ogonidagua wali maru bamba berenerume Ngode Datagaliwabe mana yu tiga buwa ibuhondo mini dunubia ho berene. Uruni tigua ti agalinime bia layadagua biyagome tini mo bayale ho berene.
1PE 3:6 Wali Sara ibu ogonibi bialu berene. Ibugua ibu agalini Abarahamahanda bia layadagua bialu, I̱naga haguane ogoni ka, laga berene. Tí bedamirume gi nahe biruwa mana bayale dege birimiyagua tí Saranaga wane biruleberami.
1PE 3:7 Ogonidagua dege agalini kamiru tí one ibu tí hongohe kamigobi ndo bedagoni manda bilimu. Ani bialu tí one mo yo handa nabi bayale mitangi bialu halimu. Tí one baba howa Ngode Datagaliwabehanda haabobo holene bame ngirago libu ogobi labolabo yule manda buwa ogonidagua bigi bialu halimu. Tígua Ngode Datagaliwabehondo bi laramigo mbirale mbirame ha pai nahelonaga ani bialu halimu.
1PE 3:8 Bi lamaro bialu ogo laro. Keriso hameiginiru tí bibahendeme minibi mitangibi mbiraore howa tíni hamene mbalini kama lalu gubalini ho hagahaga bialu tíni mo dindi halu miniha dara howa biamogo bigibigi bialu halimu.
1PE 3:9 Marume tíhondo ko biragola tígua nde ko bia dai nabi halu ha haragolabi ha hadai nabi halimu. Ogonibi biragola tígua turu holene bi ladai bilimu. Irane Ngode Datagaliwabehanda tí olayangi tí mo turu holene mbira nguleberoore lalu lowini.
1PE 3:10 Anduane Homogonaga mbugani lo ngagome agua leda, Mbirali ibu turu ho hangu hole hame lalu mbirale turubi hangu handama pole hame layaguabi ibugua bi kobi nale ke̱bi naheore holene nga.
1PE 3:11 Ko bulene ngaru erembira mialu mana bayaleore bulene nga. Ibunaga gubalinime mo palia holene henge tai bima puabo halu holeneore nga.
1PE 3:12 Irane Anduane Homogo ibugua wali agali mini tigabiwi karu handaya ho halu tigua ibuhondo bi lamirago ibugua hale haga kagoni. Anigoyu ibugua ko biaga karu hondowa turu nahaga kagoni, lalu gilibu nga.
1PE 3:13 Tígua mana bayale bua ho kamiyagua aiwa tíhondo ko bulebirabe.
1PE 3:14 Anigo tígua mana bayale bialu kamiria mo tandaga hayagua nde tí turu holene nga. Wali agali hondowa gi halu mini dege dindi nahalimu.
1PE 3:15 Ani nabi tígua miniha Keriso mo yaraga howa, I̱naga Anduane Homogoore ka, lalu halimu. Mbiralime tí mini dunubia ho kamigo hondowa, I̱ nde manda buliya langi, laragola tígua aguaore lamule lowa tíni ala manda manda bu halimu.
1PE 3:16 Bi lamialu howa hendore bayuwa lamilimu. Tínaga miniha tigabi hole ko birimigo do nahalimu. Ani do nahe harimiyagua tí Kerisonaga talima piaga howa mana bayale beremigo hondowa marume mege bialu mana ogoni bayale ndo koda lararu mani tini taga pani nolebira.
1PE 3:17 Tígua mana bayale bialu kamiria marume tí mo tandaga helo Ngode Datagaliwabehanda hamelo kayagua ogoni karulapeore nga. Ko bialu kamiria marume tí mo tandaga hayagua ogoni nakarulape.
1PE 3:18 Wali agali bibahendeme ko birimagonaga homolene winigo Keriso ibuni homo aribia hene. Ina mini kowi hemago Ngode Datagaliwabe kagoria haru polenaga ibu agali mini tigabiorewi howa ibugua ina bibahendenaga halu mbira hangu homo aribia hene. Tigua ibu bayagola tingini homenego ibunaga dinini nahome hene.
1PE 3:19 Ibuni dinini howa dinini dege maru humbirini andaha dariba ho wiaru mana lamule pene.
1PE 3:20 Ala Noahanda iba talu wabialu heneyangi bi mana lamialu hene. Noa ibugua lamialu heagola wali agali mini beregedelo Ngode Datagaliwabe ibugua hondo haabo henego ti marume hale howa mo wahayago biaru homenego uruninaga dinini hearu lamule pene. Wali agali halirali iba talu biagoha berearu ti hangu nahome yo pene.
1PE 3:21 Ogoni binigo irane baboraya beremagonaga walia ho nga. Ngode Datagaliwabe ibugua ina ibaha baboraya beramagome pele ngiaga. Ina baboraya bialu howa ibame tinaga tingini wayawaya biragola pele ngiaga ndo. Pele ngirago tene tígua mini beregedalu Ngode Datagaliwabehondo, Ko birimago domabe, lowa mani tínaga miniha ko do nahole ledamigola howa pele ngiaga ka. Ani bialu Keriso homowa heyiyagome tí pele ngiya lalu walia haga beramili.
1PE 3:22 Áyu Keriso ibu dahuliya andaga puwa Ngode Datagaliwabenaga gi tigahayagi biruwa ibugua dahuliyalirubi hari daligaha haru haganerubi hongo holenerubi haru howa handame hai ho ka.
1PE 4:1 Keriso ibunaga tingini tandaga nayadagua inabi tandaga noleore kamagonida manda buwa tínaga miniha hongoho holene nga. Mbirali ibu tingininaga tandaga nayagua ibu mana ko bulenenaga henge nawulebira.
1PE 4:2 Áyu dindi ogoriani kami tambu dindini holenenaga hame lagane ngarume tí haru helo henge nami Ngode Datagaliwabehanda hame ledagome tí haru helo halimu.
1PE 4:3 Ngode Datagaliwabe mana manda nabi karume bua howa bialu kadagua tí nde bialu hemine horo karulapeore harimigoni. Mana ko tagabi bulenebi dongonenaga dimagoli holenebi lulu yule lulu iba nolenebi bimagamaga bu howa kayu yagayaga bulenebi lulu iba nolenaga dawe holenebi mbirale tara tarahondo bi pupu koore loa nabi ngaru wulenebi mana urunibi bialu hemiria horo piai haya.
1PE 4:4 Wali agali Ngode Datagaliwabe manda nabi karume mana urunibi bialu howa koda mitangi nabi ti bialu kadagua bule tígua áyu ti kagoria naporamiligo ti mogolo hondowa tí mege biaga ka.
1PE 4:5 Ngode Datagaliwabehanda áyu karubi ala homenerubi daba ki bule manda manda bu kago daba ki birangi o biarume biyaru bibahende ibuhondo lapani holeneore wulebira.
1PE 4:6 Irane ogoninaga wali agali ala homeneru tihondo Bi Mana Debene lamini. Uruni ti dindini heangi wali agali bibahende kobi bayalebi biyagonaga dabolene ngadagua tibi dabene. Bi Mana Debene tihondo lamiyago irane tibi dinini howa Ngode Datagaliwabe heba helonaga lamini.
1PE 4:7 Mbirale bibahendenaga hamaro bulene horo kaware ngago tígua Ngode Datagaliwabehondo bi loleore tíni mini haru howabi dengala howabi halimu.
1PE 4:8 Mbirale maru dindiha lowa tíni gubalini ho hagahaga buleneore mo dunini ho halimu. Irane gubalini holeneme ko tara tara biniru la nabi biamogo bulebirago manda buwa ani bilimu.
1PE 4:9 Manga nahe howa wali agali maru tí andaga nenege ibilo henge migimigi bialu halimu.
1PE 4:10 Ngode Datagaliwabehanda tí hangu hanguhondo mugube tara tara ngiyadagua tí hangu hangume nde maru karu mo bayale hole tínaga mugube ngiyagome tíni biamogo bigibigi bulene nga.
1PE 4:11 Mbirali mana lamiagane kayagua nde ibugua Ngode Datagaliwabe bi mana lamialu holene nga. Mbirali ibu biamogo biagane kayagua nde ibugua Ngode Datagaliwabenaga hongo miragome biamogo bialu holene nga. Uruni bibahende beramigo Yasu Kerisoni howa marume Ngode Datagaliwabenaga mini mo yaraga helo ani bialu halimu. Mini yaraga holenebi hongo holenebi kirabali ibunaga wiaaboboore bulebira. Aniore bilo laro.
1PE 4:12 I̱naga nenege turubiru-o tandaga nolene mbirame tí ba handarago hondowa mogo nalalimu. Ogoni nabiagane ale mbira birago mitangi nabilimu.
1PE 4:13 Ani ndogo Keriso ibugua tandaga nayadagua inabi noloma̱ya ngiragonida manda bialu turu ho halimu. Irane ogo ibunaga wá taraore holene ha pani haragola tínaga bu miniha turu holene to̱lai helo ani nalu halimu.
1PE 4:14 Marume tí Kerisonaga talima piagane kamigo hondowa mege biyagua tí turu ho holene nga. Ogoni irane Ngode Datagaliwabe Dinini wáhe kago ibu daluwa tíha kagonaga bira.
1PE 4:15 Tí tandaga naramigonaga mbirali bo wahalu kamiriabi dabudabu kayu bialu kamiriabi ko timbuni ngaru bialu kamiriabi wali agali marunaga ngago yamuwa lalu kamiriabi uruni ale birimigonaga tandaga tí nolene nawilo halimu.
1PE 4:16 Ai tí Keriso hameigini kamigonaga tandaga narimiyagua ogoninaga taga nahalimu. Taga nahe howa Kerisonaga mini yu harimada manda buwa Ngode Datagaliwabehondo ka̱i̱ lalimu.
1PE 4:17 Wali agalime biyagonaga daba ki bulene tehinaragoni. Ani birangi Ngode Datagaliwabenaga wali agali ala daba ki bulene wulebira. Ibugua ina ala daba ki bulene ngayagua maru Bi Mana Debene yu tiga nabiaga karu ti agua hamaro bulubadabe.
1PE 4:18 Anduane Homogonaga mbugani lo ngadagua ogo, Wali agali bayale karu pele mulene yule erekuibiore nga. Ngode Datagaliwabe mitangi nabi mini kowi karu ti agua holobadabe, lalu gilibu nga.
1PE 4:19 Anigo nde maru Ngode Datagaliwabehanda hame ledahayagi howa tandaga nararu tigua mana tigabi biaabo halu bibahendeore Wabiagane ibu mini bilinahe kago manda buwa ti dinini polenenaga ibugua hondo heloore holene nga.
1PE 5:1 I̱ni agali ala hene miniwi kogoni howa tí agali ala hene miniwi kamirume mbira bilimulo langero. I̱na i̱ninaga deoreme Keriso ibu tandaga nayagonaga de handarugo mani ibuninaga wá taraore holene ha pani haragola i̱ nde mbira ngulebira. Ani bulebiragonaga i̱na tíhondo bi larogo ogo.
1PE 5:2 Tígua nogo sibi Ngode Datagaliwabehanda haru halimulo ngiyago turu howa haru halimu. Manga nahe howa Ngode Datagaliwabehanda hame ledadagua haru halimu. Biabe ogoni bialu howa yolo mule mitangi nabi biamogo bule hame lowa biabe bilimu.
1PE 5:3 Wali agali tígua haru halimulo ngiyago haru howa i̱ haru hagane timbuni kogoni mitangi nabi haru halimu. Ani buwa mana bayale beremilidagua tiguabi bilo haru halimu.
1PE 5:4 Nogo Sibi Haru Hagane Haguane ha pani haragola tígua wá taraore holenenaga emena guaileore wiaabo holene ngiragola yuleberami.
1PE 5:5 Ani buwa igiri daliahe kamiru tíbi agali ala hene miniwi karume laradagua bialu halimu. Ani buwa tí bibahendeme tíni mo dindi halu biamogo bigibigi bialu halimu. Irane Anduane Homogonaga mbugani bi lo ngagome lalu, Ngode Datagaliwabehanda mine haga karu he̱la dai bialu tini mo dindi haga karu ibugua biamogo biaga ka, lalu gilibu nga.
1PE 5:6 Anigo Ngode Datagaliwabehanda bayuwa manda buwa horo pongo bo winingi ibugua tí mo yaraga helo tíni mo dindi howa ibunaga gi hongohe andaneha halimu.
1PE 5:7 Ngode Datagaliwabehanda tí mitangi bu kagonigo tígua mbirale tara tara bibahende mitangi bialu mini tumatuma ho kamigo ibu lamiai halimu.
1PE 5:8 Tí dengala howa mamage ho halimu. Budi ale gabua timbuni laionome mbira bo nole ohowa hai bialu taya ibagabu hagadagua tínaga waitigi dama Heyolabe ibugua ani bialu ka.
1PE 5:9 Anigo tígua Ngode Datagaliwabehondo mini mbiraore hongoho wuwa dama Heyolabe he̱la tagi ho halimu. Keriso hameigini dindi tara tara bibahendeni karume tandaga ogonibi dege nalu kago manda bidami.
1PE 5:10 Ngode Datagaliwabe ibu biamogo bia holene bibahendenaga tene kagome tí Kerisoha ho gimbubu howa ibunaga wá taraore haabobo holene mbira ngule olaga ka. Tí tandaga tigi mbira naramigola howa ibugua tí mo baya burugule howa tí ema nabi halimulo mo hongo halu gene napodaganeni helolebira.
1PE 5:11 Ibunaga hongo holene wiaaboboore wilo hamelo ko. Aniore bilo laro.
1PE 5:12 I̱na beba nemandi ogoni tíhondo gilibu werogo Kerisoha i̱ hamene mini bilinaheore Sailasa ibugua i̱ biamogo biyagola i̱na tínaga beba gilibu wia harogo. Ngode Datagaliwabenaga biamogo bia holeneore ngago i̱ hendenego tí mo hongo holenaga langerogoni. Ngode Datagaliwabenaga biamogo bia holene ogoniha hongo ho haabo halimu.
1PE 5:13 Ngode Datagaliwabehanda dabo helene Keriso hameigini Babilononi karumebi i̱ igini Maga ibuguabi tíhondo, Tí mitangi bu kama, lalu lawia haragoni.
1PE 5:14 Tí Kerisoha howa tíni gubalini kamigo walia halu gi tigani bilimu. Tí Kerisonaga kamiru tíha mo palia holene wiaabo helo hamelo kogoni.
2PE 1:1 I̱ Saimono Pida Yasu Kerisonaga biabe bia hagabi abosolobi kogoni. Yasu Keriso inanaga Ngode Datagaliwabebi Pele Ngiagabi kago mini tigabiwi howa inahondo mini mbiraore wulene ngiaga. Mini mbiraore wulene ogoni baya gibiore ngiyago yu kamadagua tí maru yu kamiruhondo beba ogo gilibu wia haro.
2PE 1:2 Tígua Ngode Datagaliwabebi Yasu inanaga Anduane Homogobi manda bu kamigo howa biamogo bia holenebi mo palia holenebi tíha to̱laiore helo hamelo kogoni.
2PE 1:3 Keriso ibu Ngode Datagaliwabe howa ibunaga holene hongo taraore wialu wigome mbirale bibahende iname tigabiore bialu holoma̱yanaga ngiai haya. Ibunaga wá taraore holenebi bayale holenebi ina ngule olayago iname ibu manda bidamago togoni howa ibugua uruni ngiya.
2PE 1:4 Ngode Datagaliwabehanda inahondo mbirale turu halu bame ngulebero leneru baya buruguleorebi dunini gibiorebi lowinigo ngulenaga tehinalu uruni ngiya. Tígua uruni mo yai howa wali agali bibahende mo ko helonaga dimagoli holene mana dindi bibahendeni wini ngaru wandialu bolangua halu pilimulobi Ngode Datagaliwabe ibunaga mini ngago tíha wilobi ibugua uruni ngiya.
2PE 1:5 Irane ogonigo tígua hongo halu mini mbiraore wirimigoriani bayale holene mo tago halu bayale holene yu kamigoriani manda bulene mo tago halu yu halimu.
2PE 1:6 Ani buwa manda bulene yu kamigoriani mini haru holene mo tago halu mini haru holene yu kamigoriani hibu lalu hongo holene mo tago halu yu halimu. Ani buwa hibu lalu hongo holene yu kamigoriani tigabiore holene mo tago halu yu halimu.
2PE 1:7 Ani buwa tigabiore holene yu kamigoriani Keriso ariago nenege hinulene mo tago halu yu halimu. Ani buwa Keriso ariago nenege hinulene yu kamigoriani gubalini holene mo tago halu yu halimu.
2PE 1:8 Mugube uruni yu holene ngago tígua yu yanga lowa yu kamiyagua tí bame nahe biabe bialu holeberami. Ani bialu howa inanaga Anduane Homogo Yasu Keriso bayuwaore manda buwa biabe biaabo hagabi lini bayale dagabi holeberami.
2PE 1:9 Mbirali mana uruni nayi kago ibu mininaga de auhe mbirale kaundia ngago handabe nahe ka. Ibugua ko ala biyaru Ngode Datagaliwabehanda domo wahai hayago manda bibehegoyu ibu ogoni embeda holebira.
2PE 1:10 Anigo hamene mbaliniru-o Ngode Datagaliwabehanda tí dabowa olene kamigo walia hoa haabo halu bayale bialu halimu. Tígua ani bialu harimiyagua mini mbiraore ala wirimigo wahalu hope howa naholeberami.
2PE 1:11 Ani bialu Yasu Keriso inanaga Anduane Homogobi Pele Ngiagabi kago ibugua Handame Ho Haabo Kagoria anda polene tínaga ngagonigo anda poleberamiore.
2PE 1:12 Ani buleberamigo tí bi uruni langiyago manda biai howa bi ogoriani pini puwa hongo ho kamigonigoyu i̱na tí lone mo mitangi bia ho wiaabo holebero.
2PE 1:13 I̱ nahome koore howa tígua uruni mitangi bu dai bilimulo langiaabo holebero.
2PE 1:14 Inanaga Anduane Homogo Yasu Keriso ibunime i̱hondo tigatiga langiyago i̱na i̱naga tingini togo biaga ogoni golo wahalu polene tu kaware ngago manda bido.
2PE 1:15 Anigo tígua i̱ homedohabi i̱na bi o laroruni mitangi bu dai biaabo halimulonaga áyu i̱ nahome kongi bi uruni bayuwa hongo howa langiaabo holebero.
2PE 1:16 Inanaga Anduane Homogo Yasu Keriso ibu hongo gibiorehe howa dai bulebirago langirimagoni bame agali mbirame bi te lenego ilu yuwa ndo langirimagoni. Ina inanenaga deoreme ibunaga wá taraore holene baya burugule heagola de handarimagoni.
2PE 1:17 Iname de handalu hemaria Wá Taraore Holene Tene Ngode Datagaliwabe Ibuniore kagoria howa bi ladali halu lalu. I̱ Iginiore ogoni gubalini ho ko. Ibuhondo turu timbuni ho kogoni, lowa Aba Ngode Datagaliwabehanda Yasu mini mo yaraga halu ibuhondo wá taraore holene miya. Ani miyagola ina handarima.
2PE 1:18 Ina Yasu heba Ngode Datagaliwabenaga hari loma bia hene heagoriani hemaria bi ogoni dahuliya andagaha howa la dali hayago inanemeore hale harima.
2PE 1:19 Ani hale harimago Ngode Datagaliwabenaga bi mana latagi haga henerume mbiwia halu bi mana leneyaru heneneore leneya lowa iname yu tiga bu kamagoni. Ira hale arumaha wá hatagi hagadagua bi mana ogoni mo wála haga nga. Egabi naledaha yakundi mbira huririle tagira ibagadagua Horo Mbira pongo bo winigo tagira ibulebira. Tagira ibilobi Kerisonaga wá holeneme tínaga bu miniha wá hatagi helobi bi mana ogoni mo wála hagago yu tiga biaabo halimu.
2PE 1:20 Ala manda bulene ngago ogo. Mbirali ibuninaga manda hangume Anduane Homogonaga mbugani bi gilibu ngago garealo mibe nahe kago manda bilimu.
2PE 1:21 Bamba Ngode Datagaliwabenaga bi mana latagi haga henedaruni bi latagi halu howa mbira ibunime mbiwia hoa biyadagua mbiwia halu lene ndo. Agali henedarume Ngode Datagaliwabenaga bi mana latagi helo Ngode Datagaliwabe Dinini ibugua ti haru howa mo la hayagola tigua latagi haga bialu hene.
2PE 2:1 O henedaruningi wali agali hearuha howa Ngode Datagaliwabe mana henene ngadagua ndo latagi haga tingi halu maru hene. Uruni henedagua áyu tí kamigohabi agali marume mana henene ngadagua ndo lawai halu holebira. Tigua mana henene ndo mo koore hagane mana ngaru ohowa manda bu yalu ibulebira. Tigua Anduane Homogohanda ti golope hole biabe biyagonaga lalu, Ibu manda nabidama, lowa erembira mulebira. Ani biragome tini bo waholenebi kaware dege wulebira.
2PE 2:2 Ani biragola dewalime tinaga mana ko tara tara ngaru biradagua bule talima polebira. Tigua ko birago hondowa wali agali marume Mana Henene ngago mege bulebira.
2PE 2:3 Mana henene ngadagua ndo lawai hagane urunime dimagoli howa tígua muni milimulonaga ke̱ howa áyu dege wabu migi bialu te dewa langulebira. Tigua biragonaga Dabaga ibu bamba howa dabole manda mandabu henego haabo ka. Ti Bo Wahaga kago ibu palia hondo nahe yange yangebu wiaabo ka.
2PE 2:4 Dahuliyali maru ko biyaru Ngode Datagaliwabehanda tihondo pani nami wahene ndo. Ibugua ti heli dindi arumaheha helalu biyagonaga Daba Ki Bulene Horo ibilo daribaho heleda.
2PE 2:5 Ngode Datagaliwabehanda bamba wali agali bibahende dindini henedaruhondo pani nami wahene ndo. Wali agali ibu erembira mialu penedaru ti ibame nai helonaga ibugua iba li ibilene. Mana tigabi bulene lamiaga agali Noabi kariali ibu heba hayarubi ti hangu Ngode Datagaliwabehanda pele mini.
2PE 2:6 Ngode Datagaliwabe wahalu piagaru pani nolene lola holebiragonaga manane walia halu ibugua bi lo wiyadagua Sodomo Gomorabi bo heda halu do mundu lai helene.
2PE 2:7 Anigo Ngode Datagaliwabehanda agali Lode ibu mini bayalewi howa mana puguagane hearume mana ko tara tara biyaru hondowa genda yu haga biago ibu pele mialu haru tagira pene.
2PE 2:8 Agali bayale ogonime mana puguagane biaru baba howa horo bibahendengi tigua biyaru haleme hale halu deme handaga bialu howa ibugua tandagaore haabo halu hene.
2PE 2:9 Wali agali Ngode Datagaliwabe mitangi bu karu tandaga nalu kagoria howa Anduane Homogo ibugua ti pele mulene manda bida. Ani manda bu howa mana ko biaga karubi tigua biyagonaga Daba Ki Bulene Horo ibilo pani noleneha helolenebi ibugua manda dege bida.
2PE 2:10 Ani buwa marume dongonenaga dimagoli howa koorene ko ngaru bua howa biagabi Ngode Datagaliwabehanda bi lo ngaru yo handaga karubi ibugua pani guaileore mule manda bu ka. Mana henene ngadagua ndo lawai haga karu tigua donge halu bua biradagua bule elahe howa hari daligaha wáhe karu mitangi nabi mege biaga ka.
2PE 2:11 Dahuliyali karu tigua lawai haga o biarunaga hongobi manabi bolangua ho howa tigua Anduane Homogonaga deni howa o biaru ko biaga lalu gurabi megebi nabiaga.
2PE 2:12 Agali uruni ti tini bua biradagua bialu gabua tara tara irabuha hagadagua kagoni. Agalime gabua uruni bagadagua ti belo kagoni. Tigua mbiralenaga tene manda nabi ngaru mege bialu, Koorene koda, laga ka. Gabua tara tara agalime bo wahagadagua tibi ogonidagua dege Ngode Datagaliwabehanda bo waholebira.
2PE 2:13 Tigua maru mo tandaga hayagobi dege tinibi nde tandaga nelo mulebira. Tigua horombe howa tinginime dimagoli hara ale ta nabi biragome mo turu holene ogoni laga ka. Agali urunime taga nahe tí Keriso hameigini kamiru heba tomo mandagi nole íbu biruwa ti mo hondo haga biala hayago bule dai biaga ka.
2PE 2:14 Tigua wali dimagoli timbuniore howa tinaga deme wali handaya haabo halu kayu bule mitangi biaga ka. Ko bulene damene manga nahagaore ka. Wali agali maru miniha hongo nahe karu ko bilo tigua ndole bialu haru piaga ka. Tininaga miniha muni dimagoli mugubenego ka. Ngode Datagaliwabehanda ti pani nolene nga lenedagua naore bulebira.
2PE 2:15 Tigua hariga tigatiga wiago wahalu puwa tini pu lulu yu ka. Beo igini Balama ibugua ko biyagonaga muni yuleneore nga manda binidagua tiguabi hariga ogoniha pialu haga ka.
2PE 2:16 Balama ibugua ko biyagola nogo dongi bi nalaga biagome wali agalime bi laralidagua lalu Balama talini. Ngode Datagaliwabe mana latagi haga o biagome mini nawi howa ko bule harigani pialu heagoni ha pai holenaga ani lene.
2PE 2:17 Mana henene ngadagua ndo lawai haga o biaru ti iba gendo hundiraligo alebi ginu puyabume yalu poraligo alebi ka. Ngode Datagaliwabehanda ti aruma gibioreha helo henge mo winigo nga.
2PE 2:18 Tigua mine bi lalu bi nahabanebi lalu haga ka. Wali agali marume ko biaga karubi henego ai ko wahalu áyu dege tagira ibiraru pilelo o biarume tingininaga dimagoli holeneme ti mo pila hole gono waga ka.
2PE 2:19 Ngode Datagaliwabe mana henene ngadagua ndo lawai haga uruni ti tini mana ko birarume tini dariba kago helowa tigua lalu, Iname tí golopeore holeberama, lalu haga ka. Irane mbiralime birago bu mugu balu ibuni paraho wahayagua mana ogonime ibu bope kagola garabaya helolebira.
2PE 2:20 Wali agali marume Yasu Keriso inanaga Anduane Homogo Pele Ngiagabi kago manda biragome dindinaga mo ko hagane mana ngelalu wandialu ibida puwa maha dodo holene mana biarume ti lone minalu bolangua helo henge miyagua ti ko ala hayagobi ndo maha koorene ko holebira.
2PE 2:21 Tigua tigabi holene manabi Ngode Datagaliwabehanda, Bulene nga, lo ngarunibi tihondo lamiyago manda bu howa wahalu piyago manda nabidale emene bayale kale.
2PE 2:22 Tigua ani biyagonime bi lo ngadagua henene tagira piyadane hendedemagoni. Bi lo ngago mbira ogo, Biangome magu tagu wiyago lone no dai biaga ka. Bi mende ogo, Nogo wayawaya bo heledagola lone waruha bembo guyule piaga ka.
2PE 3:1 I̱naga nenege turubiru-o i̱na tíhondo beba halu mende ogoni gilibu wia harogoni. Tínaga bu miniha manda tigabi bu dai bilimulonaga mo mitangi bia halu beba kirabalini gilibu wia harugoni.
2PE 3:2 Ngode Datagaliwabe mana latagi haga loma bia ho henedarume bamba mbiwia halu bi lenedarubi Anduane Homogobi Pele Ngiagabi kagome bi lo wiyago tínaga abosolo agalidarume langiyagobi mitangi bu dai bilimulo hamelo ko.
2PE 3:3 Tígua dunini ogoore ala mandabu halimu. Horo hamaro beremahayagi agali maru tinaga mini kome hame ledadagua biaganeru ha pani howa uruni tigua tí mege bulebira. Uruni tigua tí mege bialu
2PE 3:4 au lolebira. Yasu ibu dai bulebero layabe. Ibu agoha kabe. Inanaga mamali homayangi howabi mbirale bibahende Ngode Datagaliwabehanda wabiyangi howabi wiyagobi dege wiaabo kagoni, lolebira.
2PE 3:5 Tigua manda bibehego bua nahagago mbira ogo. Ngode Datagaliwabehanda bi layagome haribi dindibi wabini. Ani buwa dindi uruni ibaha howa wia pani helalu iba dombeneha ngelene.
2PE 3:6 Iba ogonime dindi ogoriani henerubi winirubi bibahende namu layagola homai hene.
2PE 3:7 Haribi dindibi áyu ngaru maha bo heda hai hole Ngode Datagaliwabe ibunaga bime dege yaniho wiaabo heleda. Wali agali Ngode Datagaliwabe mitangi nabi mo yo handaga karume biyagonaga dabalu bo wahai holene horo ibilo Ngode Datagaliwabehanda tigua biyago mo wu haabo ka.
2PE 3:8 Ani bidago i̱naga nenege turubiru-o galone mbira ogo dege embeda nahalimu. Anduane Homogo ibugua horo mbira ogoni mali daosini mbira (1,000) ale manda bialu mali daosini mbira (1,000) ogoni horo mbira ale ogobi labolabo manda biaga ka.
2PE 3:9 Marume manda bialu Anduane Homogo ibugua mbira bulebero lenego hendore bigi biaga kabe toba ka. Ani ndo bibahendeore bo wahai holene hame nale howabi mini beregedai helo hame lowabi ibugua tí mitangi bialu hondo haabo haga ka.
2PE 3:10 Anduane Homogonaga Horo ibulebirago pageali ibiradagua ibulebira. Horo ogoningi hari daliga tula laho wiaabo halu ereba hai holebira. Ani biragola hari daligaha nibi egebi yakundibi karuni bibahende dalu do ereba haiore holebira. Ani biragola dindibi dindini mbirale ngaru bibahendebi ereba haiore holebira.
2PE 3:11 Mbirale uruni ogonidagua bialu mo ereba haiore helolebadago manda buwa tí wali agali abi ale holene wiaruadabe. Ngode Datagaliwabenaga Horo abale ibilo hondo howa tíni tigabi howa Ngode Datagaliwabehondo loma bia hene holene nga. Horo ogoningi hari daliga dalu do ereba halu hari daligaha nibi egebi yakundibi bibahende karuni pobo gibiore biragome do elai holebira.
2PE 3:13 Ani bulebirago Ngode Datagaliwabehanda hari gahengebi dindi gahengebi wabu ngelolebero lo wiyadagua bilo ina hondo kamagoni. Dindi gahenge ogoriani mana tigabi hangu bialu holene wulebira.
2PE 3:14 Anigo i̱naga nenege turubiru-o Horo odagoni ibilo kami tambu Ngode Datagaliwabenaga deni howa mini gahenge howabi ko mbira ya do naheorebi halimu. Ani buwa Ngode Datagaliwabela mo palia ho halimu.
2PE 3:15 Inanaga Anduane Homogo ibugua tí mitangi bialu hondo haabo kagoni irane tí pele mulene yu halimulonaga henge ngiyada manda bu halimu. Inanaga hamene turubi Polo ibugua mini gigabi wulene Ngode Datagaliwabehanda miyago wuwa ibugua ogonidagua dege tíhondo beba mbira gilibu wia hayiyagoni.
2PE 3:16 Ibugua beba bibahende gili bidagoniha galone uruninaga lalu ogonidagua dege gili biaga ka. Ibugua beba gili binidaruniha bi galone maru taibi ngago wali agali mini timbuni nawibi mini bilina nahebi karume galone lolene ngadagua ndo lawai haga ka. Tigua Anduane Homogonaga mbugani bi lo ngarubi maru tindule dege lawai haga ka. Ani biragome tini bo waholene tinime yu anda ibaga ka.
2PE 3:17 Ai i̱naga nenegeru-o tígua uruni abale manda biai ho kami. Tí mini bilinaho baya kamigoria howa pilalimulo mana yu tiga nabiaga karume tinaga ko biragome ndole bialu haru napelo mamage ho halimu.
2PE 3:18 Haru polani hondowa tí Yasu Keriso inanaga Anduane Homogobi Pele Ngiagabi kagonaga biamogo bia holenebi mini timbuniwi holenehabi tí anda ho howa yangalo halimu. Ibu wá taraore holene áyubi awebi wiaaboboore wilo hamelo ko. Aniore bilo laro.
1JO 1:1 Mbirale bibahende nawingi haabo holene Bi ibu hene. Iname Bi ogoni hale howabi deme hondowabi gime ela howabi tíhondo beba gilibu wia haramagoni.
1JO 1:2 Holene ogoni hapani hayagola iname de hondowa tí langialu kama. Haabo holene ogoni ibu Abala henegobi ina de hondoloma̱ya hapani hayagobi ogoninaga lalu langerama.
1JO 1:3 Ina Aba Iginila libuha ho gimbu bu kamadagua tíbi inaha ho gimbu bu halimulo ibugua bi layago iname hale howabi de hondowabi tí langerama.
1JO 1:4 Turu holene tíhabi inahabi to̱lai helo iname tíhondo beba ogo gilibu wia haramagoni.
1JO 1:5 Yasu ibuha howa bi layago iname hale howa tí langeramago ogo. Ngode Datagaliwabe ibu wá holene kago aruma holene mbira ibuha nawiore.
1JO 1:6 Anigo iname, Ngode Datagaliwabeha hogimbu bu kama, lalu howa aruma holenehayagi kamayagua iname bi laramagobi mana beremagobi ke̱ halu henene lolene nayi howa ko bialu kama.
1JO 1:7 Ngode Datagaliwabe ibu wá holene kadagua inabi wá holenehayagi ibaga bu kamayagua ina Ngode Datagaliwabenaga wali agali maru heba mini mo mbiraore ho holeberama. Ani buwa ibu Igini Yasu darama pela hayagome ko bibahende birimaru domo waharagome ina ibuha ho mbiraore ho kama.
1JO 1:8 Inaneme lalu, Ko mbira inaha nawiore kama, larimayagua Ngode Datagaliwabenaga henene lolene inaha nawi howa inane mo hondo halu kamagoni.
1JO 1:9 Iname ko birimaru lapani harimayagua Ngode Datagaliwabehanda ibu mini tigabi howa domo waholebero layadagua domo waholebira. Mana ko bibahende birimarubi domo wahai haga ka.
1JO 1:10 Inaneme, Ko nabiore kama, larimayagua Ngode Datagaliwabenaga bi inanaga bu habaneha nawi howa bi laramagome, Ngode Datagaliwabe ibu ke̱ haga ka, larama.
1JO 2:1 I̱ waneiginiru-o tí ko nabilimulo i̱na bi ogoni bebani gili bialu lawia haro. Ai ina mbiralime ko mbira birimayagua mini tigabiwi Yasu Keriso kagoni ibugua ibu Abahondo inanaga bi la haga ka.
1JO 2:2 Iname ko birimagonaga hangu ndo wali agali bibahende karume ko biyarunagabi domo waholene Keriso ibuniore ka.
1JO 2:3 Ngode Datagaliwabehanda mana lowini ngago iname hale halu birimayagua ina Ngode Datagaliwabe kago mandabiore kamagoni.
1JO 2:4 Ngode Datagaliwabehanda mana lowini ngago iname hale halu bia nabi howa, Ngode Datagaliwabe kago manda bido, larimayagua ina ke̱ howa lalu kamago henene lolene inaha nawiore howa larama.
1JO 2:5 Ngode Datagaliwabehanda, Bia, laradagua hale halu bialu kagome Ngode Datagaliwabenaga gubalini holene baya buruguleore ibuha ngagoni. Iname Ngode Datagaliwabeha hogimbu bu harimadabe manda buluma̱yanaga ogo.
1JO 2:6 Mbiralime, I̱ Ngode Datagaliwabeha hogimbu bu ko, lalu kagome Yasu Kerisohanda bialu henedagua bialu holene nga.
1JO 2:7 I̱ nenege turubiru-o Ngode Datagaliwabehanda mana lowini ngago iname buluma̱yanaga lowinigo i̱na tíhondo gilibu wia harogo ogoni gahenge ndo gilibu wia haro. Mana ogoni bamba piganengi lowini ngago iname tí langirimagola tí hale hai harimi.
1JO 2:8 Ai áyu lone gilibu wia harogo mana gahenge winidago mana ogoni henene ngago hendelo Kerisohanda biyagomebi tígua birimigomebi walia harimi. Anidagua bialu harimigome aruma holene ereba halu wá holene heneneore abale tagira íbu kagoni.
1JO 2:9 Mbiralime, Wá holeneha kogo, lowa ibu Keriso hameigini karuhondo gubalini nahe kayagua nde ibu aruma holeneha haabo ka.
1JO 2:10 Mbirali ibu Keriso hameigini karuhondo gubalini ho kayagua ibu wá holenehayagi ka. Anigo ibugua marume mana ko bilo mo bia holene ibuha nawiore.
1JO 2:11 Mbiralime Keriso hameigini gubalini nahe kayagua ibu aruma holeneha ibaga bialu ka. Ani ibaga bialu howa aruma kagome ibunaga de mo ndibula kagola ibu ogoha poro lalu ndo ibu pupe halu ka.
1JO 2:12 I̱ waneiginiru-o Kerisohanda biyagome tínaga mana ko birimiru domo wahai hayagonaga i̱na tíhondo beba gilibu wia haro.
1JO 2:13 Wali agali wahe mini bogabiru-o mbirali ibu ala haluhe haabobo henego ha ho wiaabo kago tí manda bidamigo i̱na tíhondo beba gilibu wia haro. Wandari igiri daliaheru-o tígua Ko Bulene Anduane kago bope halu tí wayali kamigo i̱na tíhondo beba ogo gilibu wia haro.
1JO 2:14 I̱ waneiginiru-o tí Aba kago manda bidamigo i̱na tíhondo beba gilibu wia haro. Wali agali wahe mini bogabiru-o mbirali ibu haluhe haabobo henego ha ho wiaabo kago tí manda bidamigo i̱na tíhondo beba ogo gilibu wia haro. Wandari igiri daliaheru-o tí hongohe kamigo Ngode Datagaliwabenaga bi lolene tínaga bu habaneha ngagome tígua Ko Bulene Anduane kago bope halu tí wayali kamigonaga i̱na tíhondo beba ogo gilibu wia haro.
1JO 2:15 Dindini ko biaga karunaga manabi ko bulene tara tara ngarubi mo tene nahalimu. Mbiralime dindini ko biaga karunaga mana mo tene halu kayagua ibu Aba Ngode Datagaliwabe gubalini nahaga ka.
1JO 2:16 Dindini ko bulene tara tara bibahende ngarubi mini kome de hondowa dimagoli holenebi mbirali ibuninaga mini mo yaraga holenebi uruni Aba Ngode Datagaliwabeha howa ibini ndo dindini ko biaga karunaga manaha howa ibini nga.
1JO 2:17 Dindini ko biaga karunaga mana ngarubi dimagoli holene bibahende ngarubi ereba hai holebira. Ani biragola Ngode Datagaliwabehanda, Bia, ledadagua bialu karu ti dege haabo holebira.
1JO 2:18 I̱ waneiginiru-o horo hamaro bulene tu kaware nga. Horo hamaro bulene tu kaware wiragola Kerisonaga Waitigi ibulebira layago hale harimadagua ibu waitigi dewa áyu íbu kago hondowa iname horo hamaro bulene tu kaware nga manda bidama.
1JO 2:19 Uruni ti ina kamaru aria ndogo ti ina helalu tagira piyiya. Ti ina aria heneneore kale ina baba mandagi mo mbiraore ho kamale. Ti bibahende ina kamaru aria ndo howa walia holenaga ti ina helalu tagira piyiya.
1JO 2:20 Kerisohanda tíhondo Ngode Datagaliwabe Dinini ngiyago tí bibahendeme henene lolene mandabu kami.
1JO 2:21 Tí henene lolene manda nabi kami lalu ndo tí henene lolene mandabu kamigobi henene loleneha howa ke̱ holene tagira ibabe nahe manda bidamigobi ogoninaga lalu i̱na tíhondo beba gilibu wia haro.
1JO 2:22 Anigo ke̱ haga ka aibe. Mbirali Dabo Helenego ibulebira lowinigo ibu Yasu ndo ka, laga karu ti ke̱ haga ka. Tigua Abahondobi Iginihondobi erembira miaga kago ti Kerisola Waitigi ka.
1JO 2:23 Mbiralime ibu Iginihondo erembira miaga kago ibu Abahondobi erembira dege miaga ka. Mendealime ibu Iginihondo mini mbiraore wiaga kago ibu Abahondobi mini mbiraore dege wiaga ka.
1JO 2:24 Tí nde pigane Ngode Datagaliwabehondo mini mbiraore wialu harimingi ibunaga mana hale howa tínaga miniha yu tigabu harimigo yani ho haabo halimu. Ani yu harimiyagua tí Aba Iginilaha hogimbu bu haabo holeberami.
1JO 2:25 Ogoninaga Kerisohanda inahondo, Haabo holene ngulebero, lalu lowinigo nga.
1JO 2:26 Tigua tí mo hondo hole manda bialu karunaga i̱na tíhondo bi ogoni bebani gilibu wia haro.
1JO 2:27 Kerisohanda tíhondo ibu Dinini ngiya. Ibu Dinini tíha kagola howa mendealime tí lawai holene henge nawi. Keriso Dinini ibugua bibahende tí lawai halu howa ke̱ halu ndo heneneore hangu lawai haga ka. Ibugua tíhondo lawai halu kadagua hale halu bialu Kerisoha hogimbu bu haabo halimu.
1JO 2:28 Anigo i̱ waneiginiru-o Keriso ibu hapani holene Horo harangi ina taga howa ha do holene irane nawilo mini dunubia ho halu dungulo howa ibuha hogimbu bu haabo holene nga.
1JO 2:29 Keriso ibu mini tigabiwi kago tí manda bidamigo wali agali mana tigabi bialu karu ti Ngode Datagaliwabe waneigini kago manda bidamini.
1JO 3:1 Aba Ngode Datagaliwabehanda inahondo, Tí i̱naga waneigini kamigo, lalu gubalini timbuni au ho kadabe ina handa nabi kama. Nde heneneore ina Ngode Datagaliwabe waneigini kamagonigo dindini ko biaga karume Aba Ngode Datagaliwabe manda nabi howa inabi manda nabi ka.
1JO 3:2 I̱ nenege turubiru-o ina áyu Ngode Datagaliwabe waneigini kamaru maha abi holeberamadabe toba ho kama. Iname mbira dege manda bidamago ogo. Keriso ibu hapani haragola ibu abi ale kabe ina de handalu ibu kagobiore holeberamalo manda bidama.
1JO 3:3 Ibugua ina ogonibi helolebira lowa minime dunubia ho haabo kamarume Keriso ibu baya buruguleore kagobi ina nde mo baya buruguleore helelo mitangitangi bialu kama.
1JO 3:4 Ko biaga karume Ngode Datagaliwabe mana lowini ngago mo wahaga ka. Ko bulene bibahende ngarume Ngode Datagaliwabe mana lowini ngago mo wahaga.
1JO 3:5 Ani mo wahagago Keriso ibugua ko domo wahole hapani ho hayagobi ko bulene ibuha nawiore kagobi tí manda bidami.
1JO 3:6 Kerisoha hogimbu bu karume ko nabiaga ka. Ko biaga karume Keriso handa nabi halu manda nabi ka.
1JO 3:7 I̱ waneiginiru-o mbiralime tí mo hondo holani de hondo halimu. Keriso ibu mini tigabiwi kagobi mbirali mana tigabi bialu kayagua ibubi mini tigabiwi ka.
1JO 3:8 Dama Heyolabe piganengi howa ko biaabo halu haga kagobi mbirali ko biaga kayagua ibu dama Heyolabe aria ka. Dama Heyolabeme ko bibahende biyaru Ngode Datagaliwabe Igini ibugua bo podai halu mo ereba haiore hole hapani ho henego ka.
1JO 3:9 Mbirali ibu Ngode Datagaliwabe waneigini hayayagua Ngode Datagaliwabenaga holene gahenge ibuha wia kagome ibu ko nabiaga ka. Ogoni ibu Aba Ngode Datagaliwabe bu hinu kagome ibu ko bibe nahe kagoni.
1JO 3:10 Anigo Ngode Datagaliwabe waneigini ogobi ka dama Heyolabe waneigini ogobi kalo manda bibehego ogodagua. Wali agalime mana tigabi nabiaga kayaguabi Keriso hameiginiru gubalini nahaga kayaguabi ti Ngode Datagaliwabe waneigini ndo kagoni.
1JO 3:11 Tígua pigane Ngode Datagaliwabehondo mini mbiraore wialu harimigo howa mana hale hai harimigo ogo. Inane gubalini ho hagahaga bu haabo holene ngagoni.
1JO 3:12 Ina Keni ale nahami̱ya. Keni ibu Ko Bulene Dama Heyolabe aria howa ibu hamene Abele homelo bene. Ibu hamene homelo benego irane agibe. Irane ibu hameneme mana tigabi biaga heagola Keni ibuni ko biaga henegome ibu hamene homelo bene.
1JO 3:13 Anigo i̱ hamene mbaliniru-o wali agali ko biaga karume tí handabe manga ho kayagua tí mogo nalalimu.
1JO 3:14 Iname ina hamene mbaliniru gubalini ho kamago ina homaganehayagi howa haabobo holenehayagi porabu ede ho kamagoni manda bidama. Mbirali ibu hamene mbaliniru gubalini nahaga kagome ibu homaganehayagi haabo ka.
1JO 3:15 Mbirali ibu hamene mbalinibi gubalini nahe handabe manga haga kagome ibu wali agali homelo bagane ale kagoni. Anigo wali agali homelo bagane kago haabobo holene mbira ibuha nawiore kago tí manda bidami.
1JO 3:16 Iname gubalini holene manda bidamago ogo. Keriso ibu inanaga homo aribia hayago manda buwa iname ina hamene mbalinirunaga homo aribia hole nendebu hami̱ya.
1JO 3:17 Mbirali homogo howa ibu hamene burupale kago de hondowa dara halu biamogo nabiyagua nde ibugua, I̱ Ngode Datagaliwabe gubalini ho ko, larago lolene nawiore ndodabe.
1JO 3:18 I̱ waneiginiru-o iname bame lope halu bime dege lalu gubalini holene nawi. Iname biabe bialu howabi pele mialu howabi inane gubalini henene ho hagahaga bu hami̱ya.
1JO 3:19 Anigo iname henene lolene aria kamagoni manda bialu Ngode Datagaliwabe deni howa inanaga bu miniha, Ko beramagonaga pani nolene nga, lalu langiyagua inanaga mini mo dambola holene karulolene nga. Irane ina mini emenewi kamagola Ngode Datagaliwabe ibu mini timbuniorewi howa bibahende manda bulene damene ngago ibu manda biai kago ina manda bidama.
1JO 3:21 Anigo i̱ nenege turubiru-o inanaga bu miniha, Ko beramagonaga pani nolene nga, lalu nalangiyagua Ngode Datagaliwabe deni howa ina mini dunubia ho howa ho dungulo holene nga.
1JO 3:22 Ngode Datagaliwabehanda mana lowini ngago iname buluma̱yanaga lowinigo hale halu ibugua hame ledadagua bialu kamagome ibuhondo, Mbirale bayale ogo bia, lamirimayagua ibugua hale halu abale bulebira.
1JO 3:23 Ngode Datagaliwabehanda mana lowini ngago iname buluma̱yanaga lowinigo ogo. Iname ibu Igini Yasu Kerisohondo mini mbiraore wuwa inane gubalini ho hagahaga bu holene nga. Keriso ibugua ogonidagua dege bulene nga lene.
1JO 3:24 Ngode Datagaliwabehanda mana lowini ngago iname buluma̱yanaga lowinigo hale halu bialu karu ti Ngode Datagaliwabeha hogimbu bu howa ibubi tiha hogimbu bu haga ka. Ibugua inahondo ibu Dinini ngiyagome Ngode Datagaliwabe ibu inaha hogimbu bu ka ina manda bidamagoni.
1JO 4:1 I̱ nenege turubiru-o Ngode Datagaliwabe mana henene ngadagua ndo latagi haga dewa dindi bibahendeni purogo lo kago wali agali marume, Ngode Datagaliwabe Dinini i̱naha ka, lalu kagola tígua tihondo mini mbiraore nawilimu. Nawi howa ala dinini ogoni Ngode Datagaliwabenagadabe ainagadabe lowa dabo hondolene nga.
1JO 4:2 Ibuha Ngode Datagaliwabe Dinini kabe be dinini tara kabe manda bulenego ogo. Mbiralime, Yasu Keriso ibu ina dindini agali kamagobiore daliniya, lalu latagi halu kago ibuha Ngode Datagaliwabe Dinini heneneore ka.
1JO 4:3 Anigo mbiralime, Yasu Keriso ibu ina dindini agali kamagobiore dalini ndoyago, lalu kago ibuha Ngode Datagaliwabe Dinini nahe Keriso Waitigi kagonaga dinini ibuha kagoni. Dinini ogoni ibu ibulebira layago tí hale harimigoni ibu áyu dindini íbu ka.
1JO 4:4 I̱ waneiginiru-o tí Ngode Datagaliwabe aria kamirume ibunaga mana henene ngadagua ndo latagi haga karu bope halu wayali kamigoni. Dindini ko biaga karu tiha dinini kago ibu hongo nahe ka. Ngode Datagaliwabe Dinini tíha haga kago ibu hongoheore bibahendenaga hongo bolanguahe kagoni.
1JO 4:5 Ngode Datagaliwabe mana henene ngadagua ndo latagi haga karu tigua dindini ko biaga karu aria howa dindini ko biaga karume laralidagua dege laragola dindini ko biaga karume hale haga ka.
1JO 4:6 Ina Ngode Datagaliwabe aria kamarume bi laramangi wali agali Ngode Datagaliwabe manda bu karume inanaga bi hale haga ka. Wali agali Ngode Datagaliwabe aria ndo karume inanaga bi hale nahaga ka. Ogonidagua henene laga Dininibi ke̱ haga dininibi iname dabalu tale bibehe kama.
1JO 4:7 I̱ nenege turubiru-o gubalini holene Ngode Datagaliwabeha howa ibini ngago iname inane gubalini hagahaga bu hami̱ya. Wali agali tinaga bu habaneha gubalini holenewi karu ti Ngode Datagaliwabe manda buwa ibu waneigini ka.
1JO 4:8 Nde Ngode Datagaliwabe ibuni gubalini holeneore kagonigo mbiralime gubalini holene ibunaga bu habaneha nawi kago ibu Ngode Datagaliwabe manda nabi ka.
1JO 4:9 Ngode Datagaliwabehanda ina gubalini ho kago walia halu ibu Igini mbiraore hangu henego ibuha howa ina holene gahenge yuluma̱yanaga ina dindini hemaria ibu Igini ibilene.
1JO 4:10 Gubalini holene tene ngago ogo, Iname Ngode Datagaliwabe gubalini harimane ndo. Ibugua ina gubalini howa ibu Iginime inanaga ko birimago domo wahole ibilene.
1JO 4:11 I̱ nenege turubiru-o Ngode Datagaliwabehanda ina gubalini ogonibi hayadagua iname inane gubalini hagahaga bu holene nga.
1JO 4:12 Ina bibahende kamagome Ngode Datagaliwabe nahende kamagoni. Anigo iname inane gubalini hagahaga bu harimayagua nde Ngode Datagaliwabe ibu inaha hogimbu bu howa inanaga bu habaneha ibunaga gubalini holene baya buruguleore ngeledagoni.
1JO 4:13 Ai ibugua inahondo ibu Dinini ngiyagome Ngode Datagaliwabe inaha hogimbu bu kagobi ina nde ibuha hogimbu bu kamagobi ina manda bidama.
1JO 4:14 Ngode Datagaliwabe ibugua ibu Igini ina dindi bibahendeni kamaru Pele Ngiaga helo ibilenego iname de hondowa lamialu kamagoni.
1JO 4:15 Mbiralime, Yasu ibu Ngode Datagaliwabe Igini ka, lalu latagi hayagua ibu Ngode Datagaliwabeha hogimbu bu halu Ngode Datagaliwabe ibu nde ibuha hogimbu bu haga ka.
1JO 4:16 Inaneme Ngode Datagaliwabehanda ina gubalini ho kalo manda buwa mini mbiraore wu kama. Ngode Datagaliwabe ibuni gubalini holeneore ka. Mbiralime Ngode Datagaliwabebi ibu hameiginibi gubalini haga kago ibu Ngode Datagaliwabeha hogimbu bu kagoni. Ani buwa Ngode Datagaliwabe ibu nde mbirali ogoniha hogimbu bu ka.
1JO 4:17 Daba Ki Bulene Horo harangi ina bu minime hongo howa elahe holoma̱ya inanaga bu habaneha gubalini holene baya buruguleorego ngeledagoni. Ani bidagome ina dindini kamaru Keriso kagobi kamagoni.
1JO 4:18 Wali agalinaga bu habaneha Ngode Datagaliwabenaga gubalini holene baya buruguleore ngeledagonime gi holene bo talia tagi hagago mbiralime gubalini holenebi gi holenebi ogoni labo bimaga howa yu habe nahe ka. Gi holene tene pani noleneha ngagonigo mbirali gi ho kagonaga bu habaneha Ngode Datagaliwabenaga gubalini holene baya buruguleore ogoni nawi.
1JO 4:19 Ngode Datagaliwabehanda ina ala gubalini hayagonaga iname Ngode Datagaliwabebi Keriso hameiginirubi gubalini habehe kamagoni.
1JO 4:20 Mbiralime Keriso hameigini karuhondo handabe manga howa, I̱ Ngode Datagaliwabehondo gubalini ho ko, layagua ibu ke̱ halu laragoni. Ibu Keriso hameigini karu de hondowa ti gubalini nahe kayagua ibu Ngode Datagaliwabe de nahendene howa gubalini habe nahe ka.
1JO 4:21 Kerisohanda mana iname buluma̱ya langiyago ogo. Iname Ngode Datagaliwabe gubalini ho kamadagua Keriso hameigini karubi gubalini ho holene nga.
1JO 5:1 Mbirali Dabo Helenego Yasu ibuore ka, lalu mini mbiraorewi karu ti Ngode Datagaliwabenaga waneigini ka. Mbiralime ibu aba gubalini ho kayagua ibu aba waneiginibi gubalini dege ho ka.
1JO 5:2 Iname Ngode Datagaliwabe gubalini halu ibugua mana bulene nga lowinigo hale halu birimayagua ina Ngode Datagaliwabe waneigini karubi gubalini ho harimada manda buleberema.
1JO 5:3 Heneneore laro. Ngode Datagaliwabehanda mana bulene nga lowinigo iname hale halu beramagome ina ibu gubalini ho kamago walia halu kama. Ibugua mana lowinigo ndelahe ndo bibeheore ngagoni.
1JO 5:4 Ogoninaga irane Ngode Datagaliwabe waneigini hangu hangu kamarume dindini ko bulene bibahende ngago bope halu ina wayali habehe kama. Yasu Kerisohondo mini mbiraorewi kamagome dindini ko bulene bibahende ngago bope halu ina wayali haramali.
1JO 5:5 Dindi bibahendeni ko ngago bope halu wayali habehe ka aibe. Mbiralime, Yasu ibu Ngode Datagaliwabe Iginiore ka, lalu mini mbiraorewi kago ibu hangume wayali habehe kagoni.
1JO 5:6 Mbirali ibiyago Yasu Keriso ibugua ibame baboraya bulebi darama pelolebi ibiya. Ibugua ibame baboraya bule hangu ndo darama pela halu homolebi ibiya. Ani bule ibiyago Ngode Datagaliwabe Dinini ibu henene lolene tene howa ibunime ogoni henemane biyagoni leda.
1JO 5:7 Ani binigonaga Ngode Datagaliwabe Dinini ibubi ibame baboraya biyagomebi darama pelayagomebi tebira uruni galone mbiraore dege ogoni lalu langiaga.
1JO 5:9 Wali agali degeme, De handarimago tigatiga ledamagoni, laragola iname, Henene lara, lowa mini mbiraore weramali ndobe. Ai tigua laralidagua ndo Ngode Datagaliwabe ibugua bi hongohe heneneore langialu ibu Iginihanda biyago langiya.
1JO 5:10 Ani langiyago mbiralime Ngode Datagaliwabe Iginihondo mini mbiraorewi kagonaga bu miniha ibu Iginihanda biyago Ngode Datagaliwabehanda laminigo mo yu ka. Mendealime Ngode Datagaliwabehanda ibu Iginihanda biyago laminigo yu tiga nabiyagua nde ibu Ngode Datagaliwabehondo mini mbiraore nawi howa, Ngode Datagaliwabe ibu ke̱ haga ka, manda bialu laragoni.
1JO 5:11 Bi langiyagonaga tene ogo. Ngode Datagaliwabehanda inahondo haabobo holene ngiyago ibu Iginiha howa mo ngiya.
1JO 5:12 Ani biyago Ngode Datagaliwabe Iginiha hogimbu bu karume haabobo holene ogoni yu ka. Ibu Iginiha hogimbu nabi karu ti haabobo holene ogoni nayi ka.
1JO 5:13 Wali agali Ngode Datagaliwabe Iginihondo mini mbiraorewi kamiru-o tí haabobo holene yu kamigo manda bilimulonaga i̱na tíhondo beba ogo gilibu wia haro.
1JO 5:14 Ina Ngode Datagaliwabe deni howa ina bu minime dunubia ho howa dungulo kamago ogo. Iname ibuhondo, Í̠na hame lededagua mbira bia, lalu hale harimayagua ibugua hale holebiralo mandabu kama.
1JO 5:15 Iname ibuhondo bi mbira laramagola ibugua hale holebiralo manda birimayagua ibuhondo, Mbira bia, lalu lameramagola ibugua hale halu bulebira manda bidama.
1JO 5:16 Tínaga hameigini mbirame ko mbira ibu dinini koha polenaga ndo bialu karia de handarimiyagua Ngode Datagaliwabehondo ibunaga bi la halimu. Ani la haramigola Ngode Datagaliwabehanda tí hameigini o biagohondo haabobo holene mulebira. Ogoni larogo ko mbira birago dinini koha polenaga ndo laro. Ko timbuni mbira dinini koha polenaga ngago ko ogoni biaga karu Ngode Datagaliwabehondo tinaga la halimu ndo laro.
1JO 5:17 Ko damene bibahende ko dege ngago lowa ko bulene maru ngago biragome dinini koha pelonaga ndo nga.
1JO 5:18 Ngode Datagaliwabe waneigini bibahende karu tigua ko biaabo nahaga ka iname manda bu kama. Ngode Datagaliwabe Igini ibugua ti mamage ho kagola dama Heyolabe ibugua ti mo ko habe nahe ka.
1JO 5:19 Dindi bibahendeni wali agali ko biaga karu dama Heyolabe ibugua ti handame ho kagoni helowa ina Ngode Datagaliwabenaga waneigini kamago mandabu kama.
1JO 5:20 Iname Ngode Datagaliwabe henene kago manda buluma̱ya ibu Igini ibugua ina mo manda bia hole ibiyagoni mandabu kama. Ina Ngode Datagaliwabe heneneore kagoha hogimbu bu howabi ibu Igini Yasu Kerisoha hogimbu bu howabi ani bu kamagoni. Ngode Datagaliwabe heneneore kago ogoni. Haabobo holene tene ogoni ibuniore ka.
1JO 5:21 Ai i̱ waneiginiru-o tígua mbirale gime wabinirunaga bi pupu nawi habagi ho halimu.
2JO 1:1 I̱ agali ala hene miniwi howa Keriso hameigini ngoai ho kamiru-o tíhondo beba gilibu wia harogoni. Henene lolene inaha ngagobi wiaaboore holebirago i̱na tí gubalini heneneore ho kogoni. I̱ hangu ndo henene lolene ogoni aria bibahende karumebi tí gubalini ho kagoni.
2JO 1:3 Aba Ngode Datagaliwabebi ibu Igini Yasu Kerisobi libugua inahondo biamogo bulene nawi howa biamogo bia holenebi dara holenebi mo palia holenebi ngilo hamelo ko. Uruni henene lolenebi gubalini holenebi heba inanaga wilo hamelo ko.
2JO 1:4 Aba Ngode Datagaliwabehanda mana bulene nga lowini ngadagua tí marume hale howa henene lolenehayagi kamigo hondowa i̱ turu timbuni ho ko.
2JO 1:5 Anigo Keriso hameiginiru-o tíhondo mana gahenge ndo mana piganengi lowini ngago iname Ngode Datagaliwabehondo mini mbiraore wialu harimangi howa hale haabo harimago mana ogoni gilibu wia harogo ogo. Iname gubalini hagahaga bu hami̱ya.
2JO 1:6 I̱na gubalini holene langerogoni walia holenaga iname Ngode Datagaliwabehanda mana lowini ngadagua bialu holene nga. Mana lowiyagoni ina bibahende Keriso hameigini pigane harimangi howa hale harimago ogo. Iname gubalini hagahaga bu holene nga.
2JO 1:7 Mo hondo haga dewa dindi bibahendeni purogolo hayarume Yasu Keriso dindi agaliore hole ibiyago ibu dindi agali hene ndo laga ka. Ogonidagua laga kagome ibu mo hondo haga agali howa Kerisola Waitigi haga ka.
2JO 1:8 Iname mbirale tí yu halimulo biabe birimagonaga yu waholigo Ngode Datagaliwabehanda tíhondo emena mulene ngago bibahende yu hai hole tíni mamage ho halimu.
2JO 1:9 Mbirali Kerisohanda lawai hayagohayagi howa tagiraha pogolo tagi hayagua ibu Ngode Datagaliwabela hogimbu nabi hene ka. Mendeali Kerisohanda mana lawai hayagoha ha ho wiaabo kayagua ibu Aba Iginilaha hogimbu bu hene ka.
2JO 1:10 Anigo mbiralime Kerisohanda lawai hayadagua ndo bi tara lalu lawai hole ibiyagua ibugua, Ebero, laragola, tígua, Habiya íbu, nale andagaha nenege birule ibilo hengebi namilimu.
2JO 1:11 Agali biagohondo, Habiya íbu, larimiyagua ko biaga biago heba ho bimagamaga bu holeberami.
2JO 1:12 Tíhondo bi dewa lolene manda bia bidogo bebani gili bialu lowia hole hame nalego inane handaya hagabu howa tí baba bi la doba bialu ina turu ho hami̱yanaga i̱ tí kamiria nenege ibule ko.
2JO 1:13 Ina Keriso hameigini oali ngoai haga kamarume, Tíore mitangi bu kama, lalu lawia harama.
3JO 1:1 I̱ agali ala hene miniwi howa Gaiasa í̠hondo beba ogo gilibu wia haro.
3JO 1:2 I̱ nenege turubi-o í̠naga dinini holene bayalehe kedagua í̠ warago nabe turu halu bayale dege habelo i̱na hamelo ko.
3JO 1:3 Henene lolenehayagi haabo harilidagua mini bilinahe howa henene loleneyi haabo ke lalu Keriso hameigini marume ibuwa i̱ langiyagola hale howa turu timbuni ho ko.
3JO 1:4 Mbiralime lalu, Í̠ waneigini henene lolenehayagi anda pu haabo ka, laragola hale howa i̱ turu timbuni ho haruli. Turu holene ogonime turu holene bibahende bolangua haga nga.
3JO 1:5 I̱ nenege turubi-o mini bilinahe howa Keriso hameiginiruhondo biamogo bigi bialu ti maru í̠ manda nabini hearubi biamogo bigi bialu kego nde baya hangu bialu kegoni laro.
3JO 1:6 Ti o biarume Keriso hameigini oali ngoai ho kamaruhondo langialu lalu, Gaiasa ibu gubalini hagane agalioreya, lalu langiya. Ani langiyaru ti ibaga bialu poradagua pelonaga Ngode Datagaliwabe mo turu helo í̠na ti biamogo bibe.
3JO 1:7 Tigua Kerisonaga Bi Mana Debene lama pole lowa wali agali Ngode Datagaliwabehondo mini mbiraore nawi hearume tihondo mbirale mbira milo henge nami wahalu piyiya.
3JO 1:8 Ani biyagonaga ina Keriso hameigini kamarume ti heba henene lolenenaga biabe bimaga hole ti biamogo bulene nga.
3JO 1:9 I̱na Keriso hameigini ngoai ho kamiruhondo beba mbira gilibu wia haru. Ani birugola Diodorebese ibugua ibuni mo haguane hoa howa i̱naga bi mo wahayiya.
3JO 1:10 Ibugua inanaga mini lalu wali agaliruhondo bi koorene kobi ke̱ holenebi laga bialu kago i̱ tí kamiria ibuwa ibugua mana ko ogoni biyagonaga tí manda biai halimulo i̱na latagi hai holebero. Ibugua ogoni hangu ndo biaga. Keriso hameigini marubi ibirangi ibugua, Ibirimida, lalu turu nahaga. Ani nabiaga howa wali agali marume ti ibiraruhondo, Andaga birule ibidaba, loa karu ti Keriso hameiginiru heba karia ibugua ti tagira pelo bo batagi hole manda biaga.
3JO 1:11 I̱ nenege turubi-o ko biaga karume biagadagua nabi bayale biaga karume biagadagua dege bialu habe. Wali agali bayale biaga karu ti Ngode Datagaliwabe aria ka. Ko biaga karume Ngode Datagaliwabe manda nabi ka.
3JO 1:12 Wali agali bibahendeme Demidiriasa ibu bayale ogobiore ka lene haga. Ibugua henene lolenehayagi howa ibu henene loleneyi kagobi walia halu ka. Inamebi ibu de hondowa ibu ogobiore ka lene haramali. Í̠na nde inane laramago tigatiga laradalo manda bide.
3JO 1:13 Í̠hondo dewa lolene manda bia bidogo bebani gilibu wialu lowia hole hame nale ko.
3JO 1:14 Emene howa iyane dengui handaya hagabu howa bi la doba bibiya i̱na í̠ keria abale ibule kogo.
3JO 1:15 Mo palia holene í̠ha wiaabo helo hameledo. Iya nenege oali karu bibahendeme í̠hondo, Iname í̠ore mitangi bu kama, lalu lawia harama. Iya nenege í̠ kegoria karu bibahende hangu hanguhondo iname, Tí mitangi timbuni bu kama, larama laya lalu lamibe.
JUD 1:1 I̱ Yudi Yasu Kerisonaga biabe biahaga Yamesenaga hamene kogoni. Wali agali Ngode Datagaliwabehanda olo helayaru tí Aba Ngode Datagaliwabe ibunaga gubalini holenehayagibi Yasu Kerisonaga haru holenehayagibi kamiru tíhondo beba ogo gilibu wia haro.
JUD 1:2 Ngode Datagaliwabenaga dara howa biamogo bulenebi mo palia holenebi gubalini holenebi tíha to̱laiore helo hamelo ko.
JUD 1:3 I̱naga nenege turubiru-o Ngode Datagaliwabehanda i̱bi tíbi ina bibahende pele ngiyagonaga beba mbira gili bule mitangitangiore bialu haru. Ani birugoyu i̱na tíhondo bi mende gilibu wia holene manda bido. Áyu Ngode Datagaliwabehanda daba bagiho heledarunaga mini mbiraore wulene ngiai hayago ogoninaga waitigi ibiraru baba hongo howa ladai bulene mandabu halimulonaga beba ogo gilibu wia haro.
JUD 1:4 Bi larogo irane agali maru Ngode Datagaliwabe mitangi nabiaga karume ohowa tí heba tagotago bu kagoni. Tigua mana koorene ko birago karulape berama lolenaga Ngode Datagaliwabenaga biamogo bia holene bi mana ngago mo tara haga ka. Ani bialu ina Haguane mbiraore Anduane Homogo Yasu Keriso ibu hangu kago tigua handa tara ho haga ka. Ani bialu karu tí koha pelo lalu bambaore Anduane Homogonaga mbugani mbiwia ho winigo lola haragoni.
JUD 1:5 Galone uru nde manda biai ho kami tiraga i̱na tí mo mitangi bia hoa dege halu ko. Anduane Homogohanda Isaraele wali agali Iyibi dindiha howa pele mialu haru tagira piyagome mani marume mini mbiraore nawiyagola howa bo home lai hene.
JUD 1:6 Ani buwa dahuliyali marubi ti holeneniore helayago wahalu tarani pu hayaru Horo hamaro birangi ti heba godi lole Ngode Datagaliwabehanda seni pume uli arumaheha dariba ho haabo heleda.
JUD 1:7 Dahuliyali biarume biyadagua wali agali Sodomo Gomorani hearumebi wali agali maru kaware ha parapara bu hearumebi tinginime ko bulenego hangu mitangitangi bialu dimagoli howa kayu koore tara tara bialu hene. Ani bialu hearu ti ira da ho wiaabo kagoria pani naabo halu kago ogoni manane ina bibahende hondoloma̱ya tigatigaore biapani ho nga.
JUD 1:8 Ogonidagua dege agali maru ohowa íbu bi tagotago bu karume de gandeba tara tara handararume tinime tinaga tingini mo ko helo handaga ka. Ani bialu tigua Ngode Datagaliwabenaga haru haga mana wiago mo nagalone hagabi dahuliyali wáhe karuhondo mege biagabi ka.
JUD 1:9 Agali o biarume mege biyadagua dahuliyali bibahendenaga haguane mini Maigelo ibugua mege nabi hene. Maigelohanda dama Heyolabe baba Mosesenaga tingini aiwa mo yulebe lalu garere biyangi ibugua dama Heyolabe mege nabi howa lalu, Anduane Homogo ibugua í̠ talilo helarogo, lene.
JUD 1:10 Agali o biarume mbirale ngaru tene manda nabi howa tigua mege bialu, Koorene koda, laga ka. Gabua tara tarame bua harago biagadagua agali o biarume bua harago biragome Ngode Datagaliwabehanda tini pani nelo mulene ngagoria helolebira.
JUD 1:11 Tigua Kenihanda bialu hayadagua dege bialu kagoni. Balamahanda biyadagua tiguabi muni mule mana ko bulenehayagi pialu kagoni. Korahanda doga halu wali agali hoba migimigi bilo mo bia hayagola bo wahayadagua tiguabi hoba migimigi biyagome bo waholene yu anda ibiya. Anigo tinaga mo ko holene timbu gibiore wulebirago dara holene nga.
JUD 1:12 Tígua Keriso hameigini gubalini holenenaga tomo nole ngoai haramingi taga nahe howa ta nabi bupe haragome ngoai holene uruni mo dodo haga ka. Tini dege mitangi bialu haga ka. Ginu maru dalu nayalu ibaga puyabume bame yalu poralidagua agali biaruni uruni ale ka. Wali agali uruni ti ira lini nadaga pini heba dugu wahene gabuniore wiagagobi ka.
JUD 1:13 Ti iba hongo howa yaribu bima porago ale howa tigua mana tagabi koore bialu karu iba haingoda yatagi hagadagua biatagi haga ka. Ti yakundi maru hariha howa pupe haga karu ale ka. Ngode Datagaliwabehanda ti haaboboore helonaga arumaore dumbilini aleha henge mo manda manda bu winigo nga.
JUD 1:14 Inogo ibu Adamanaga aguanene kane daba henegome uruninaga bambaore mbiwia halu lalu, Anduane Homogo ibuni dahuliyali loma bia hene daosini dewaore karu heba ibulebira.
JUD 1:15 Ibalu ibugua bibahende daba ki bulebira. Wali agali ko Ngode Datagaliwabe mitangi nabiaga karume ibu mo tene nahe howa biyarunagabi ibuhondo handabe manga halu bi koore engengebi layarunaga ibugua ti pani mulebira, lene.
JUD 1:16 Wali agali urunime horo bibahendengi guraga guraga bialubi marume biyada lalu ke̱ halu goea bialubi tini minime ko bua kadagua biagabi tinime tininaga biyago mo yaraga hagabi ka. Ani buwa tini hame ledago bulenaga maruhondo bime la deborebo bialu haga ka.
JUD 1:17 Anigo i̱naga nenegeru-o mbira mitangi bu dai bulene nga. Ina Anduane Homogo Yasu Kerisonaga abosolo karume ala langiyago mitangi bilimu.
JUD 1:18 Ogoninaga tigua tíhondo langialu howa lalu, Horo hamaro bulene kaware haragola agali maru tagira ibalu tí Ngode Datagaliwabenaga kamigo mege bialu mo tabirane holebira. Ani biaga uruni tini minime ko bua mitangi birago haruru pialu holebira, lene.
JUD 1:19 Agali urunime wali agali mo guru hangu haga bialu ka. Ti Ngode Datagaliwabe Dinini ibugua haru helowa ndo dindini holene hame ledarume ti haru helo ka.
JUD 1:20 Anigo i̱naga nenege uru-o tígua mini mbiraore wirimigoni Ngode Datagaliwabe mana baya gibiore yu tiga bu kamigo anda halu yanga lelo mo tagotago bigi bialu halimu. Ngode Datagaliwabe Dinininaga hongoni howa Ngode Datagaliwabehondo bi laabo halu halimu.
JUD 1:21 Ani bialu howa ina Anduane Homogo Yasu Keriso ibugua dara howa biamogo bialu tíhondo haabobo holene ngilo hondo kami tambu howa Ngode Datagaliwabenaga gubalini holenehayagi haabo halimu.
JUD 1:22 Tígua wali agali maru mini kira kirawi howa tobatobaho karu dara howa biamogo bialu halimu.
JUD 1:23 Wali agali maru ti pele mialu ira dedagoria howa abale gilila milimu. Maruhondo dara howa biamogo bialu tíni gi howa dege ani bialu halimu. Tinaga mini ko dimagoli hayagonaga aga dodohe ale karulo karu manga ho halimu.
JUD 1:24 Uru-o Ngode Datagaliwabehanda tí pi nale halimulo bayuwa haru habehe ka. Ibugua tíha konaga motudu nawiore howabi turu timbuniore howabi ibunaga wá taraore kagoria haru íbu helabehe kagoni.
JUD 1:25 Ngode Datagaliwabe ani bibeheore kagome ibu inanaga Pele Ngiaga mbiraore hangu kago Yasu Keriso ina Anduane Homogo togoni howa ibunaga mini yaraga holenebi handame ho holenebi hongohe holenebi haguane howa haru holenebi piganeoreni howa Ngode Datagaliwabe ibunaga winigo áyubi ngago awebi wiaaboboore wulebira. Aniore bilo laro.
REV 1:1 Bi moana ala pani nahe winigo Yasu Kerisohanda mo pani hayago mo mogo buwa mbuga ogoniha gilibu ngagoni. Mo pani holene ogoni Yasuhanda ibunaga biabe bia haga karuhondo mbirale tara tara abaleore bulebiraru walia helo Ngode Datagaliwabehanda Yasuhondo mini. Kerisohanda mbirale uruni dahuliyali mbiralihondo, Bi ogoni i̱naga biabe bia haga Yonehondo lamule pu, layagola ibuwa langiya.
REV 1:2 Yone i̱na handarudagua bibahende langiai halu Ngode Datagaliwabeha howa bi ogoni ibinigobi Yasu Keriso ibugua bi mana ogoni mo pani henegobi i̱ Yone i̱na handarudagua bibahendeore langiai halu gilibu wirugo nga.
REV 1:3 Bi ogo daga lararumebi mani bulebiragonaga bi o lo ngadagua daga lowa hale halu yu tiga birarumebi turu hai holebira. Mbirale tara tara uruni bibahende lola hai holene kawareore nga.
REV 1:4 Esia dindiha tano kariani Keriso hameigini kamiruhondo Yone i̱na bi ogo gilibu wia haro. Ngode Datagaliwabe áyu kagobi bamba henegobi mani holebiragobi ibugua biamogo bulene nawi howa biamogo bia holenebi mo palia holenebi tíhondo ngilo hamelo ko. Ngode Datagaliwabenaga handame ho biragane dagia ngagonaga wanakuihayagi dinini karia karu tigua biamogo bulene nawi howa biamogo bia holenebi mo palia holenebi tíhondo ngilo hamelo ko.
REV 1:5 Yasu Keriso ibu walia hagane mini bilinahe howabi homalu pigane mo heya henegobi dindi bibahendeni kini karunaga haguane kagobi ibugua biamogo bulene nawi howa biamogo bia holenebi mo palia holenebi tíhondo ngilo hamelo ko. Ko inane birimagome ina dariba henego hemaria Yasu ibunaga gubalini holeneme ina gubalini halu ibugua homo aribia hayagome ina golope hene.
REV 1:6 Ani buwa ina Ngode Datagaliwabehanda handame ho kagoria howa Keriso ibu Aba Ngode Datagaliwabenaga biabe bia haga holoma̱ya ibugua ina loma binigo mo miaga mo hela henego kama. Mini yaraga holenebi hongo holenebi Yasu Keriso ibunaga wia dege bidane wia ho wilo hamelo ko. Aniore bilo laro.
REV 1:7 Yasu ibu beralibani ibirago de handadaba. Ibirago ina kamarubi bamba ibu yandareme nogoba hayarumebi ina bibahendeme ibu de hondoleberama. Dindi bibahendeni wali agali kamarume ibu mitangi bialu dara howa dugu biai holeberama. Aniore buleberama.
REV 1:8 Anduane Homogo Ngode Datagaliwabe Hongo Haiheore kagobi bambaore haabo henegobi mani ha ho wiaabo holebiragobi ibugua lalu, I̱ piganeorebi mahaorebi kogoni, lalu ka.
REV 1:9 I̱ tínaga hamene mbalini Yone kogoni. I̱ Yasu talima piaga kogoni howa tí heba mandagi Ngode Datagaliwabehanda Handame Ho Kagoria kamagome ina ema nabi hibulo howa tandaga nalu hongo ho haabo kamagoni. Ngode Datagaliwabehanda bi lo winigobi Yasuhanda bi mana henene walia hayagobi i̱na lamialu hewaria tigua i̱ minuwa dindi emene Padamoso iba dege dombeneha wiagoria garabaya bu helaya.
REV 1:10 Ani bu helayagola hewaria Anduane Homogonaga horo hayangi Ngode Datagaliwabe Dinini ibu i̱ha karula haya. Ani karula hayagola bi mbira dalimu mbelo biguli ale i̱ erembirahayagi howa layuagola hale haru.
REV 1:11 Hale halu hewaria bi layuagome lalu, Í̠na deme handareru mbugani gili bibe. Gili buwa Keriso hameigini tano karia Ebesabi Simenabi Pegamamubi Taiadirabi Sadisibi Piladelebiabi Leodisiabi uruniha karuhondo gilibu pelabe, laya.
REV 1:12 I̱hondo bi layuago aiwa layadabe hondole beregedaru. Beregedowa handalu hewaria lamu hale irane karia ngolome wabini wiaria handaru.
REV 1:13 Ani handalu hewaria lamu hale wiagane wiagoha mbirali agali handalehe hearia handaru. Ibu aga luniore geni bia hanahebi nogo dongone ngolome wabinigo galuhombeneni wuwabi hea.
REV 1:14 Ibunaga mandari pewele nogo sibi iri alebi beraliba handalehebi ibunaga de ira hungu handalehebi
REV 1:15 ibunaga ge ege to̱le̱ boronosi demborere biaga handalehebi hea. Ibunaga bi iba pugu laragola u lagadagua layuagola hale haru.
REV 1:16 Ibunaga gi tigame yakundi karia yu hearia handaru. Handalu hewaria wai biagane ayu tibu mbira nene kiroba gadeleore ibunaga ne harigaha howa tagira ibiyaria handaru. Ibunaga dengui ni hanuni ha daraligobi hearia handaru. Uruni bibahende ibuni hearia handai haru.
REV 1:17 Ani hondowa gi howa mogo lalu ibunaga geha i̱ pilope howa homene ale ho wiruya. Ani buwa ibugua ibunaga gi tigame i̱ni wialu howa lalu, Gi nahabe. I̱ pigane henegobi maha holeberogobi kogoni.
REV 1:18 I̱ holenehe kogoni. I̱ ala homarugo ai áyu i̱ ha ho wiaabo hole ko. Homaganenagabi humbirini andanagabi bibahende i̱ninaga hongome haru haabo kogoni.
REV 1:19 Anigo mbirale bibahende hendederuni gili biai habe. Mbirale áyu íbu ngarubi mbirale maninaga wulebirarubi í̠na gili biai habe.
REV 1:20 Ai yakundi karia i̱naga gi tigame yidone hendedegobi lamu hale wiagane ngolome wabinigo karia ngaru hendedegobi uruninaga galone wia do hene ngago i̱na lapani harogo ogo. Yakundi karia uruni ti Keriso hameigini tano kariani biarunaga dahuliyali karia ka. Lamu hale wiagane karia biaruni Keriso hameigini tano kariani karu tini ka.
REV 2:1 Í̠na Ebesa tanoni Keriso hameigini karunaga dahuliyali kagohondo bi ogo gilibu wia habe. I̱ mbirali yakundi karia biaru gi tigame yuwa lamu hale irane karia ngolome wabini biaru ngagoha ibaga bialu howa i̱na bi ogo tíhondo lo wia haro.
REV 2:2 Tígua birimigoni manda bido. I̱na tí erekui biabe birimigobi hongo ho haabo harimigobi manda bido. Tí agali ko biaga karu hame nalaga kamigo i̱ manda bido. Tígua agali maru bi layaru ti abosolo henenedabe hondole ba handarimi. Ba hondowa ti abosolo henene howa ndo ke̱ haga heneyane handa walia harimigoni.
REV 2:3 Tí ema nabi hibu lalubi i̱ hame lewadagua bialu howa genda halu tandaga nalu howabi yu wa nahe haabo harimigoni.
REV 2:4 Tígua ogonidagua bialu ha kamigonigo mbirale mbira i̱ hame naledogo ogo. Ala tígua i̱ gubalini ho harimidagua áyu nahe kamigoni.
REV 2:5 Ala tí bayale birimigo áyu ko agua birimadabe hondole mitangi bu dai bidaba. Ani mitangi buwa mini beregedalu ala birimidagua bia dai bidaba. Tí ogonidagua nabi ko birimigo wa nahe harimiyagua i̱na tí kamiria ibalu tínaga lamu hale irane biago ngagoria howa i̱ni yamulebero.
REV 2:6 Ani anigo tígua mbira bayale bialu kamigo ogo. Nigolasi talima piagarume biaganego i̱na hame nalarulidagua tíguabi hame nale kamigoni.
REV 2:7 Tí halehe kamiyagua Ngode Datagaliwabe Dinini ibugua Keriso hameigini kamiru tí bibahendehondo bi larago agi larabe hale haramine. Keriso hameigini wai bialu wayali hararu ti hangu hanguhondo lamialu, Í̠na haabo holene ngiaganenaga ira Ngode Datagaliwabe mabuha kago ira ogoninaga lini do nabe, lolebero.
REV 2:8 Í̠na Simena tanoni Keriso hameigini karunaga dahuliyali kagohondo bi ogo gilibu wia habe. I̱ mbirali pigane henegobi maha holeberogobi ala homowa ai heyu dai bu kogome i̱na bi ogo tíhondo lo wia haro.
REV 2:9 Tígua genda howa tandaga nalu kamigobi tí yagibano kamigobi manda bu kogoni. Ani bia bidamigo tí homogoore kamigoni. Marume, Ina Yu wali agali kama, lalu hetingi howa tigua tí mege bialu bi koore layago manda bido. Uruni ti dama Heyolabe aria ka.
REV 2:10 Tí mbirale ngarunaga tandaga noleberemigo gi nahe halimu. Hale hadaba. Dama Heyolabeme tí kamiru aria maru garabaya bu helalu agi beramibe hondole ko mo bia holenaga bulebira. Genda halu tandaga nalu kamine horo pira polebira. Homolene wiyaguabi mini bilinahe howa i̱hondo mini mbiraore wiaabo halimu. Ani wiaabo howa wayali haramigonaga yolo haabo holene ngulebero.
REV 2:11 Tí halehe kamiyagua Ngode Datagaliwabe Dinini ibugua Keriso hameigini kamiru tí bibahendehondo bi larago agi larabe hale haramine. Keriso hameigini wai bialu wayali hararu ti halu mende homolene ngagome ela naholebira.
REV 2:12 Í̠na Pegamamu tanoni Keriso hameigini karunaga dahuliyali kagohondo bi ogo gilibu wia habe. Mbirali i̱ wai biagane ayu tibu ne kiroba gadeleore yidogo i̱na bi ogo tíhondo lo wia haro.
REV 2:13 Tí dindini kamigo dama Heyolabe ibunaga haru haga biragane dagia ngagoria kamilo manda bido. I̱hondo mini mbiraore wiaabo halu tígua i̱naga mini yu wa nahe hongo howa yani haabo kamigoni. Dama Heyolabe heagoria agali mbira mini bilinahe i̱naga mo walia haga Andibasi heago marume ibu homelo bayagolabi tígua i̱hondo mini mbiraore wiaabo harimigoni.
REV 2:14 Anigo mana maru tígua beramiligo i̱ hame nale kogo ogo. Tí kamiru aria marume Balamahanda mana lawai henego bialu ka. Balama ibugua Balaga biawai halu ogodagua bia lalu Isaraele wali agalime ko bilo mo bia hene. Tomo tara tara damahondo bo minigo nelo mo noa halubi wali agali kayu bilo lawai halubi hene.
REV 2:15 Anidagua dege wali agali marume Nigolasi arianaga mana ngaru bialu haga tí heba mandagi bu ka.
REV 2:16 Mana ko uruni bialu kamiru wahalu mini beregedadaba. Ani nabirimiyagua i̱na abale tí kamiria ibuwa i̱naga ne harigaha howa wai biagane ayu tibu tagira ibiragome wali agali uruni baba wai bulebero.
REV 2:17 Tí halehe kamiyagua Ngode Datagaliwabe Dinini ibugua Keriso hameigini kamiru tí bibahendehondo bi larago agi larabe hale haramine. Wai bialu wayali hararu tí hangu hanguhondo mena wia do henego nelo mulebero. Ani mialu i̱na ege to̱le̱ pele mbira mbirani mini gahenge gilibu ngago ti hangu hanguhondo mulebero. Mini gahenge gilibu ngago ogoni bibahendeme manda nabi kagola mo yarago ibuni hangume manda bulebira.
REV 2:18 Í̠na Taiadaira tanoni Keriso hameigini karunaga dahuliyali kagohondo bi ogo gilibu wia habe. I̱ Ngode Datagaliwabe Igini i̱naga de ira hungu alebi i̱naga ge ege to̱le̱ boronosi demborerebi ngaligobi kogo i̱na bi ogo lo wia haro.
REV 2:19 Tígua bialu kamigo i̱ manda bu ko. Tínaga gubalini holenebi mini bilinahe holenebi biabe bialu holenebi ema nabi howa hibu lolenebi tígua pigane bialu harimidagua ndo áyu timbuni bialu kamigo manda bu ko.
REV 2:20 Anigo mbira nakarulape bialu kamigo ogo. Wali Yasebele ibugua ke̱ howa lalu, I̱ Ngode Datagaliwabe mana latagi haga bedo, larago tígua mo tiga nabi kamigonaga turu nahe ko. Ibugua mana lawai haragome i̱naga biabe bia haga karu wali agali kayu bilobi tomo damahondo bo mini ngaru nelobi haru pu tara haga beda.
REV 2:21 I̱na ibu ko bialu kago wahalu mini beregedelo henge mia mirugolabi ibugua kayu bulene ogoni wahoa nahe beda.
REV 2:22 Ibu ogonibi bedagonaga ibubi agali ibu baba kayu biyarubi ga̱i̱ bibi timbuni hendelo i̱na ibu paliagane dagiani mo ba amu holebero. Tigua wali biago baba mana kooreru bialu haga wiyaru wahalu mini beregeda nabiyagua i̱na abale ogonidagua bulebero.
REV 2:23 Wali ogoni haruru piaga karubi homelo bo waholebero. Ani berogola Keriso hameigini tano bibahendeha bu karume i̱na wali agali bibahende hangu hangunaga mitangi bidarubi hame ledarubi manda biaiore ho kogo ti manda bulebira. I̱na tí hangu hangume bialu harimidagua yolo ngia dai bulebero.
REV 2:24 Ani bia buleberogo tí maru Taiadairani kamirume mana ko ogoni haruru napirimi. Marume dama Heyolabenaga mana do ho nga laraligo tígua lo manda nabi harimigo tíhondo gendabi maru yu halimulo mo ngia nabulebero laro.
REV 2:25 Anigo i̱ dai bule kogo dai nabido tambu tígua mbirale yu kamigo hongo howa yu ununu lo haabo halimu.
REV 2:26 Ani bialu howa wali agali wayali halu i̱na hame ledodagua bia ho wialu bia maro biraru tihondo hongo holene i̱ Abahanda i̱hondo ngiyadagua dege mulebero. Ani bialu tigua wali agali dindi tara tarani bu karu hongo taraore holene yu howa haru helobi be dindime wabini ngaru pambulo holobiradagua bilobi tihondo hongo holene mulebero. Yakundi egabi naledaha huririle tagira ibaganego tihondo mulebero.
REV 2:29 Tí halehe kamiyagua Ngode Datagaliwabe Dinini ibugua Keriso hameigini kamiru tí bibahendehondo bi larago agi larabe hale haramine.
REV 3:1 Í̠na Sadisi tanoni Keriso hameigini karunaga dahuliyali kagohondo bi ogo gilibu wia habe. I̱ Ngode Datagaliwabe Dinini karia haru kogobi yakundi karia yu kogobi i̱na bi ogo lo wia haro. Tígua ogodagua bialu kamigo manda bu ko. Tígua lalu, Ina dére mini lene kama, la laganegoyu i̱na tí homene kamigo manda bido.
REV 3:2 Anigo tígua heyuwa mbirale emene yu kamigo homai nakaore mo hongo hadaba. Tígua biabe bialu harimiru i̱naga Ngode Datagaliwabe wanakuini howa bu maro nabi dege kami.
REV 3:3 Mana tíhondo lawai hayagobi hale harimigobi mitangi bu dai buwa, Bilimu, layadagua bialu tínaga ko wahalu mini beregedadaba. Ani nabirimiyagua i̱na pageali ohowa ibagadagua ibalu tígua ibulebira manda nabi kamingiore ibulebero.
REV 3:4 Ani anigo tí Sadisi tanoni kamiru mbira mbirame tínaga agani dodo para nahe harimigoni. Ai nde uruni tíore karulape howa aga pele mo karulalu i̱ heba ibaga bialu holeberami.
REV 3:5 Maru wayali ho karume aga pele ogonibi karulolebira. Anigo tinaga mini wali agali haabo holene yu karunaga mini mbugani gilibu ngagoria ngaru doma nabulebero. Uruni i̱ Ababi ibunaga dahuliyalirubi kagoria howa i̱na lalu, Ti i̱naga ka, lalu hale hai helo latagi holebero.
REV 3:6 Tí halehe kamiyagua Ngode Datagaliwabe Dinini ibugua Keriso hameigini kamiru tí bibahendehondo bi larago agi larabe hale haremine.
REV 3:7 Í̠na Piladelebia tanoni Keriso hameigini karunaga dahuliyali kagohondo bi ogo gilibu wia habe. I̱ mbirali baya buruguleorebi heneneorebi kogo i̱na bi ogo lo wia haro. Ibugua Debidinaga panga gi wiyago yu howa panga mbira duguaragola mbiralime payabe nahe halu ai ibugua panga biago payaragola mbiralime duguabe nahe holebira.
REV 3:8 Tígua bialu haramiligo i̱ manda bu ko. Tí hongo emene yu kamigobi i̱naga mana lawai haruligodagua bialubi i̱hondo mini bilinahe harimigobi manda bu ko. I̱na tí buhayagi panga mbira dugua ho ngelarugo mbiralime payabe nahe.
REV 3:9 Hale halimu. Wali agali dama Heyolabe aria mandagi haga ti Yuali ndo howa ke̱ halu, Ina Yuali kama, laga karu i̱na ti tínaga geha mo bulu palu helolebero. Ani berogola ti bibahendeme i̱na tí gubalini hagada manda bulebira.
REV 3:10 I̱na tíhondo langialu, Ema nabi howa hibu lalimu, larugodagua wa nahe haabo harimigonaga wali agali bibahende ba hondole dindi bibahendeni mo ko holene ibirangi tí bayale halimulo mo wulebero.
REV 3:11 Emene howa i̱ abaleore ibulebero. Wayali holenenaga yu kamigo mbiralime page nabilo bayuwa yani ho halimu.
REV 3:12 Wayali ho karu ti Ngode Datagaliwabenaga andaha anda gene helo i̱na mo helolebero. I̱na helaroru tigua wahalu tagira nape ha ho wulebira. I̱na Ngode Datagaliwabe minibi ibunaga tano dahuliya andagaha howa daluebirago Yarusaleme gahengenaga minibi o biaru tini gili bulebero. I̱na i̱ni mini gahenegebi tini gili bu wulebero.
REV 3:13 Tí halehe kamiyagua Ngode Datagaliwabe Dinini ibugua Keriso hameigini kamiru tí bibahendehondo bi larago agi larabe hale haramine.
REV 3:14 Í̠na Leodisia tanoni Keriso hameigini karunaga dahuliyali kagohondo bi ogo gilibu wia habe. Walia hagane mini bilinahebi henenebi Aniore Biagane Tene i̱ kogo i̱ togoni howa Ngode Datagaliwabehanda bibahende wabinigo i̱nimeore bi ogo lo wia haro.
REV 3:15 Tí bialu harimigo i̱ manda bu ko. Ani manda bu kogo tí áyu tambeheore ndo poboheorebi ndo hope ho kamigo tí pobeheoreyaguabi tambeheoreyaguabi mendego hangu habelo hame timbuni lo ko.
REV 3:16 Anigo tí dombeni hope ho kamigonaga i̱na i̱ ne harigaha howa tí magu tagu tagi holebero.
REV 3:17 Tígua lalu, Ina karulape mbirale ngaru ale damene wiaihe homogo kamagoni, lalu kamigoni. Anidagua lalu ha kamigonigo ai tí nakarulapebi mini burugulebi kamigo tínime manda nabi kami. Tí yagibanobi tibabebi de kohebi kamigoni.
REV 3:18 Anigo i̱na ogo bia laro. Tí homogo heneneore holenaga i̱ha howa ngolo bayaleore helo irani delenego yolo bialu milimu. Ogoni hangu ndo tí taga howa tibabe harimigo yi hole aga peleore ngagobi yolo bialu karulalimu. Ani bialu tí de lone hondolenaga marasini deni ha̱i̱ hole yolo bialu ha̱i̱ halimu.
REV 3:19 I̱na gubalini haruliruhondo talialu mini wilo mana laruli. Ani biruligo tí hope kamigo wahowa mini wialu ko ngagoria howa mini beregedalimu.
REV 3:20 Hale hadaba. I̱na panga tagirahayagi howa panga dugua lalu ko. Mbiralime i̱naga bi larogo hale halu panga duguayagua i̱ ibu andaga anda ibuwa i̱ ibula tomo nalu ibubi i̱la tomo nolebira.
REV 3:21 Anigo i̱na wayali halu i̱ Abanaga handame ho biragane dagia ngagoriani ibula áyu bedodagua wali agali wayali hararu i̱na handame howa biragane dagia ngogoriani ti i̱ heba mandagi birulene henge tihondo mulebero.
REV 3:22 Tí halehe kamiyagua Ngode Datagaliwabe Dinini ibugua Keriso hameigini kamiru tí bibahendehondo bi larago agi larabe hale haramine.
REV 4:1 Ani leagola dege i̱na de gandeba mende handalu hewaria dahuliya andagani panga mbira dugua ho wiaria handaru. Handalu howa hale halu hewaria bi mbira dalimu mbelo biguli ale ala hale harugo bi ogonime i̱hondo lalu, Mani mbira bulebiragonaga i̱na í̠hondo walia holiya i̱ kogoria iraga ha, laya.
REV 4:2 Ani lalu heaore dege Ngode Datagaliwabe Dinini ibu i̱ha karula haya. Ani biyagola handalu hewaria dahuliya andagani Ngode Datagaliwabenaga handame howa biragane dagia wiagoriani mbirali berearia handaru.
REV 4:3 Ibunaga dengui domodomobi to̱le̱ baya burugule mini yasabebi kanelianibi ale hearia handaru. Ani buwa Ngode Datagaliwabenaga handame howa biragane dagia wiago ni domo to̱le̱ domo domobi mini emerolo aleme wa mabu biniya.
REV 4:4 Ngode Datagaliwabenaga handame howa biragane dagia wiago dombeneha ngelowa haru haga biragane dagia pira kirani maria (24) wu mabu bu wiagoriani dahuliyali haru haga pira kirani maria (24) aga pele buwabi haguaneni haru haganaga manda ngolome wabinigobi karulo berearia handaru.
REV 4:5 Ngode Datagaliwabenaga handame ho biragane dagia ogoriani howa hari daba bialu hari kilikulu timbuni lalu biya. Biragane dagia wiago buhayagi lamu hale karia dela heago uruni Ngode Datagaliwabe Dinini karia ka lalu dela hea.
REV 4:6 Handame ho biragane dagia ogoni wiago buhayagi dege iba solowara handalehe wiago ogoni ibu ngalayi ale wia. Biragane dagia ogonaga lenelene maria wiagoria holenehe mariali helene hearu ti de buha halu erembirahabi halu de haamehe hearume ho mabu bu hea.
REV 4:7 Ani biyadago aria mbira pigane timbuni heago budi gabua timbuni laiono handalehe hea. Mende heago nogo bulumaga wangabe handalehe hea. Tebone heago agalinaga dengui handalehe hea. Mane heago ega bodo hariawe ale yaga laluhe handalehe hea.
REV 4:8 Holenehe mariali helene biaru ti hangu hangume babagane waragaria howa tinaga tingini babagane andanehabe de haamehe hea. Tigua horombe mbiragabi ha̱lo nahe iba gana la ho wialu lalu, Anduane Homogo Ngode Datagaliwabe Hongo Haiheore ala henegobi áyu kagobi mani holebiragobi ibu baya buruguleore baya buruguleore baya buruguleore kagoni, lalu hea.
REV 4:9 Holenehe mariali helene biaru tigua iba gana layuagome mini lene lolenebi mini yaraga holenebi ka̱i̱ lolenebi mbirali handame ho biragane dagia ogo wiagoriani bedago ha dege bidane ha ho wulebiragohondo laga ka. Ani biragola
REV 4:10 dahuliyali haru haga pira kirani maria (24) biaru tigua mbirali handame ho biragane dagia wiagoria bereago ibunaga buha bulu palu ibira howa Ngode Datagaliwabe ibuni ha dege bidane ha ho wiaabo kagonaga mini yaraga haabo haga hea. Ani bialu tigua tinaga haru haga manda ngolome wabiniru golowa Ngode Datagaliwabenaga handame ho biragane dagia biago buhayagi ibira halu lalu,
REV 4:11 Inanaga Anduane Homogo Ngode Datagaliwabe í̠ kegoni. Ina wali agali bibahendeme mini lene lolenebi mini yaraga holenebi hongo holenebi í̠naga ngeloloma̱ya í̠ karulapeore kegoni. Uruni í̠naga ngelabehe kamago irane í̠na mbirale bibahende wabiai harigo howa tinaga wulenebi holenebi í̠naga hameme mirigonaga labehe kama, lalu hea.
REV 5:1 Mbirali handame ho biragane dagiani bereagonaga gi tigame mbuga mbira yu hearia handaru. Mbuga ogoni abene mendeha mendehabi gili bume howa wagaya ale kariame mo ndibulo para heneya.
REV 5:2 Ani handalu hewaria dahuliyali hongohe mbirame bi dalimu lowa lalu, Mbuga ogoni wagaya aleme ndibulo para ho ngago ogoni mbirali aiwa laga lalu mo anga labehe kabe, laya.
REV 5:3 Ani layagola dahuliya andagani karu ariamebi dindini karu ariamebi humbirini andagani karu ariamebi mbuga ogoni anga lalu hondolene mbira naheoreya.
REV 5:4 Mbuga ogoni anga lalu de handabehe mbirali naheoreyagola i̱na yi lalu dugu timbuni biru.
REV 5:5 Ani birugola dahuliyali haru haga biaru aria mbiralime i̱hondo lalu, Dugu nabibe. Yuda hameiginiha howa budi gabua ale timbuni Laiono ibu Debidinaga aguanene gibiore kago ibugua wayali howa mbuga wagaya ale kariame ndibulo para hene ngago laga lowa anga labehe ibuni dege kagoni handa, laya.
REV 5:6 Ani handa layagola handalu hewaria Nogo Sibi Igini Mbira handame ho biragane dagia wiago hanuni helowa holenehe mariali helene biarubi dahuliyali haru haga pira kirani maria (24) biarubi ho mabu bu hearia handaru. Nogo Sibi Igini o hayadagoni ibu homelo bene handalehe hea. Nogo Sibi Igini biago ibu haguaneni ne gayane kariahebi de kariahebi hea. De karia uruni Ngode Datagaliwabe Dinini karia ka lalu ti dindi bibahendeha pelaame hayaruya.
REV 5:7 Nogo Sibi Igini biagome mbirali handame ho biragane dagiani bereagonaga gi tigame mbuga yu heago ibu berearia puwa yamiya.
REV 5:8 Ibugua ogonidagua biyagola holenehe mariali helene biarubi dahuliyali haru haga pira kirani maria (24) biarubi Nogo Sibi Igini biago heagoria buhayagi bulu palu ibira haya. Uruni bibahende hangu hangume ga̱wa̱ ale timbunibi ndisi ngolome wabini hayadaruha mbirale ira hagua ngabilo delaga mini inisenesiru yu hea. Mbirale ngabi uruni Ngode Datagaliwabenaga wali agalime ibuhondo bi laganeru nga.
REV 5:9 Tigua iba gana gahenge lalu, Mbuga ogoni mo yuwa wagaya aleme ndibuledaru laga lalu anga labehe karulape í̠ kegoni. Irane ogoninaga í̠ homabelo bayagola darama pela harigome wali agali hameigini tara tara karubi bi tara tara laga karubi dindi tara tarani bu karubi tingini tara tara karubi bibahendeoreha howa ti Ngode Datagaliwabenaga helo haru dai biri.
REV 5:10 Ani bialu ti Ngode Datagaliwabenaga biabe biaga helo í̠na Ngode Datagaliwabehanda handame ho kagoria loma binigo mo miaga mo hela harigo ka. Ani biragome ti dindini howa wali agali haru holebira, lalu laya.
REV 5:11 I̱na lone handalu hewaria dahuliyali daosini dege daga labe nahe dewaoreme bi layuago hale haru. Dahuliyali uruni tigua Ngode Datagaliwabenaga handame ho biragane dagiabi holenehe mariali helene biarubi dahuliyali haru haga pira kirani maria (24) biarubi ho mabu bupe ho howa
REV 5:12 iba gana laraga halu lalu, Nogo Sibi Igini homelo bayago ibuhondo haru holenebi homogo holenebi mini gigabiwi holenebi hongo holenebi mini yaraga holenebi mini lene holenebi ka̱i̱ lolenebi uruni damenego mulene ibuni dege karulape ka, laya.
REV 5:13 Hale ha ho wialu hewaria dahuliya andaga hearubi dindini hearubi humbirini andaga hearubi iba solowaraha berearubi mbira mbira tara tara haame hearubi uruni bibahendeoreme iba gana lalu, Mbirali handame ho biragane dagiani bedagohondobi Nogo Sibi Igini kagohondobi ka̱i̱ lolenebi mini yaraga holenebi mini lene lolenebi hongo taraore holenebi wia dege bidane wia ho wilo hame ledama, lalu laya.
REV 5:14 Ani layagola holenehe mariali helene biarume ladai bialu lalu, Aniore bilo, laya. Ani layagola dahuliyali haru haga pira kirani maria (24) biarume bulu palu ibira howa libunaga mini yaraga halu hene.
REV 6:1 Ani biyagola howa i̱na handalu hewaria Nogo Sibi Igini biagome wagaya ale kariame mbuga ndibulo para hayago aria mbirago laga laya. Ani laga layagola hale halu hewaria holenehe mariali helene biaru aria mbiragome bi hari kulu lagadagua lalu, Íbu, laya.
REV 6:2 Ani layagola handalu hewaria nogo hosi pagabua peleore mbira hearia handaru. Mbirali nogo hosi ogoriani biralu piaga ibu danda mbira yu bereago ibuhondo haru haganaga manda miyago handaru. Ani miyagola ibugua wayali haga howa wayali hole biralu piya.
REV 6:3 Ani buwa Nogo Sibi Igini biagome wagaya ale mbuga para hayago aria mendego laga laya. Ani laga layagola hale halu hewaria holenehe mariali helene biaru aria mendegome lalu, Íbu, layago hale haru.
REV 6:4 Ani buwa nogo hosi mende hone tagira ibiya. Nogo hosi ogoriani biralu piaga biagohondo wali agaliru dindini howa tini dege dege wai bialu bo wahaga haga bilonaga hongo miya. Ani bialu ibuhondo wai biagane ayu tibu tara timbuni mbira miya.
REV 6:5 Ani buwa Nogo Sibi Igini biagome wagaya ale para hayago aria tebonego laga laya. Ani laga layagola hale halu hewaria holenehe mariali helene biaru aria tebonegome lalu, Íbu, layago hale haru. Ani layagola handalu hewaria nogo hosi mindi mbira hearia handaru. Mbirali nogo hosi ogoriani biralu piaga heago ibu mbirale genda magi handagane gime yu berearia handaru.
REV 6:6 I̱na ani hondowa hale halu hewaria holenehe mariali helene hayaruha howa bi ogodagua layua, Ladi ale mini widi gi kirabalime halu ki to̱lo yuwa horo mbiranaga yolo mulene nga. Ladi ale mini bali gi kirabalime waraga halu to̱lo yuwa horo mbiranaga yolo mulene nga. Anigo ira olibe linibi pu mbira lini daga mini gerebibi mo ko nahabe, lalu layuagola hale haru.
REV 6:7 Ani buwa Nogo Sibi Igini biagome wagaya ale para hayago aria manego laga laya. Ani laga layagola hale halu hewaria holenehe mariali helene biaru aria manegome lalu, Íbu, layago hale haru.
REV 6:8 Ani layagola handalu hewaria nogo hosi pagabuabi mbira hearia handaru. Mbirali nogo hosi ogoriani biralu piaga heago ibunaga mini Homa winigo ibalu maha Humbirininagabi kaware ibu piyadagua talima ibiya. Ogolabo ibugua wali ali dindi bibahende karu ma halu tu wuwa waimebi hina garimebi waragomebi nogo gabua tara taramebi wali agali manegonaga karu homelo belo tihondo hongo miya.
REV 6:9 Ani buwa Nogo Sibi Igini biagome wagaya ale para hayago aria daunigo laga laya. Ani laga layagola handalu hewaria wali agali dindini howa Ngode Datagaliwabe mana lamialu mini bilinahe howa walia hayagola homelo bayaru tinaga dinini lomabu miagane dabu andaneha hearia handaru.
REV 6:10 Tigua bi dalimu laraga halu lalu, Anduane Homogo Hongo Haiheore baya buruguleorebi heneneorebi kegoni. Wali agali dindini howa ina homoloma̱ya bayarunaga pani í̠na angi daba ki halu muleberebe, laya.
REV 6:11 Ani layagola Ngode Datagaliwabe ibugua ti ladai bialu lalu, Wali ali inaga i̱naga mana yu tigabu howa i̱naga biabe biahaga karu tí homole bayadagua dege tibi bo wahai helo tí emene ha̱lo biralimu, lowa tihondo aga peleru karulelo ta halu miya.
REV 6:12 Ani buwa handalu hewaria Nogo Sibi Igini biagome wagaya ale para hayago aria waraganego laga laya. Ani laga layagola dumbirumbi timbuniore bialubi ni mindi mbege nu mindibi ale halubi ege darama ale darama bumehebi haya.
REV 6:13 Poge li puyabu hongo howa pularagola hondopebe biagadagua yakundi daliga howa dindini ibira ibira biya.
REV 6:14 Hari daliga mbiri mbere bialu ereba halu dindi hari bibahende wearubi dindi iba dege dombeneha wiaru bibahendebi hayagoria ndo tara mbirani pu haga biya.
REV 6:15 Ani biyagola dindinaga kinirubi haru hagarubi ami agali haguanerubi homogo karubi hongo timbunihe karubi wali agali garabaya biabe ale bia hagarubi nabinirubi bibahendeore ege andahabi hari weagoria to̱le̱ wiaru andanehabi bira do hai haya.
REV 6:16 Ani bira do hearia tigua dindi hari wearuhondobi to̱le̱ wiaruhondobi olaraga halu lalu, Mbirali handame ho biragane dagiani bedagonaga deme ina hondoligonagabi Nogo Sibi Igini biagome inahondo keba howa pani nguligonagabi ina bu dambi halu mo ge hadaba, laya.
REV 6:17 Libunaga keba holene horo gibiore íbu ngago hapai howa wai bialu wayali habehe ai kabe, laya.
REV 7:1 Ani leagola i̱na handalu hewaria dahuliyali marialime dindi bibahendenaga gibuni maria ngagoniha howa puyabu maria dindinibi iba solowaranibi iranibi pu nalelo minu yania ho hearia handaru.
REV 7:2 Ani hondowa handalu hewaria dahuliyali mende ni tagira ibiragohayagi howa Ngode Datagaliwabe holenehe kagonaga magi yalu ibiyaria handaru. Ibugua dahuliyali mariali biaru ti dindi bibahende mo ko halu iba solowarabi mo ko halu bilo Ngode Datagaliwabehanda hongo miyaru tihondo bi dalimu olaamu halu lalu,
REV 7:3 Iname wali agali Ngode Datagaliwabenaga biabe bia haga karunaga wanakuini Ngode Datagaliwabenaga magi ala heloloma̱ya tígua dindi bibahendebi iba solowarabi irabi mo ko nahalimu, laya.
REV 7:4 Wali agali Ngode Datagaliwabenaga magi ti wanakuini helayaru daosini handari mbirani pira mariani maria (144,000) ka lalu langiyagola hale haru. Ti Isaraele hameigini homberiaha (12) howa heneya.
REV 7:5 Hameigini mbira mbiraha daosini homberia (12,000) dege dege Yudabi Lubenebi Gadabi Asabi Nabadalaibi Manasebi Simionobi Libaibi Isagabi Sebulunubi Yosebebi Beniyaminibi hameigini uruni tini wanakuini Ngode Datagaliwabenaga magi ogoni helaya.
REV 7:9 Ani biagola i̱na handalu hewaria wali agali au lolebe tobahe mbiralime daga labe naheore heago handaru. Ti tingini tara tara karubi hameigini tara tara karubi dindi tara tarani bu karubi bi tara tara laga karubi uruni ti Ngode Datagaliwabenaga handame ho biragane dagia wiagoria Nogo Sibi Igini biago heagoriabi buhayagi heyu heneya. Ti bibahendeme aga pele karulalu turu howa ira magane yunihe tini giha yu hearia handaru.
REV 7:10 Ti ani hearia tigua bi hongo howa laraga halu lalu, Pele mulene inanaga Ngode Datagaliwabe ibunaga handame ho biragane dagiani bedagoha howabi Nogo Sibi Igini biagoha howabi ibaga, lalu laya.
REV 7:11 Dahuliyali biaru bibahendebi dahuliyali haru haga biarubi holenehe mariali helene biarubi ti handame ho biragane dagia wiagoria ho mabu bupe haya. Ani bialu tigua handame ho biragane dagia biagoria buhayagi bulu palu ibira howa Ngode Datagaliwabe mini yaraga halu
REV 7:12 lalu, Aniore bibe. Mini yaraga holenebi wá taraore holenebi mini gigabiwi holenebi ka̱i̱ lolenebi mini lene holenebi hongo holenebi hongo tara timbuniore holenebi ina Ngode Datagaliwabenaga wia dege bidane wia ho wiaabo helo. Aniore bilo larama, lalu laya.
REV 7:13 Ani layagola dahuliyali haru haga biaru aria mbiragome i̱hondo lalu, Wali agali aga pele bu karuni ti ai kabe. Ti ani howa íbu kabe, laya.
REV 7:14 Ani layagola i̱na ladai bialu lalu, I̱ manda nabi kogo í̠nime manda bidegoni, lalu ladai biru. Ani larugola ibugua i̱hondo lalu, Wali agali uruni tigua ga̱i̱ mangabi gibiore wiagoria handalu howa pi nale ha ho wialu anda íbu kagoni. Uruni tigua tinaga aga Nogo Sibi Igini biagonaga daramame wayawaya bialu mo pele hayagola íbu kagoni.
REV 7:15 Irane ogoninaga Ngode Datagaliwabenaga handame ho biragane dagia wiago wanakuihayagi howa tigua horombe mbiragabi ibunaga anda ogoniha howa ibunaga biabe biaabo haga hea. Mbirali handame ho biragane dagia ogoriani bereago ibugua ti hondo haga hea.
REV 7:16 Ani bidagome ti mani hina garibi lolenebi iba noa holenebi nawulebiraore. Nimebi dolene tandagabi tara ngarumebi ti nadolebiraore.
REV 7:17 Ani nabulebirago irane Nogo Sibi Igini ibu handame ho biragane dagia ngagoria hanuni howa ibugua tinaga haru haga howa ti haabobo holene miagane iba duguaragoria haru polebira. Ani buwa Ngode Datagaliwabehanda tinaga de iba ibiraru domo waholebira.
REV 8:1 Nogo Sibi Igini biagome wagaya ale ndibulo para hayago aria kanego laga layagola dahuliya andagaha bi mbira nale dege wiane hina guyini duguabehe wiya.
REV 8:2 Ani biyagola i̱na handalu hewaria dahuliyali kariali Ngode Datagaliwabenaga wanakuihayagi hagaruhondo mbelo biguli karia mo miyane handaru.
REV 8:3 Dahuliyali mendeme mbirale nga biaga mini inisenesi ogoni delaga be ngolome wabini wiago yalu lomabu delagane dabu heagoria íbu haya. Ani heagola Ngode Datagaliwabenaga wali agali bibahendeme ibuhondo bi larago heba biamaga helo mbirale ira hagua ngabilo mini inisenesi delelonaga dewa ibuhondo miya. Ani miyadagoni ibugua lomabu delagane dabu ngolome wabini heago handame ho biragane dagia wiagoria buhayagi heago ogoriani delelo miya.
REV 8:4 Dahuliyali biagome Ngode Datagaliwabe wanakuihayagi howa ngabilo delaga mini inisenesinaga haguabi Ngode Datagaliwabenaga wali agalime ibuhondo bi lararubi biamaga halu ibunaga gini howa iraga helaya.
REV 8:5 Ani buwa dahuliyali biagome mbirale ngabilo mini inisenesi delaga be mo yuwa lomabu delagane dabu biagoria ira deago tabo gambiru to̱lowa be heba dindini ibira haya. Ani biyagola hari kilikulu lalu hari kulu timbuni lowa hari dababi bialu dindi dumbirumbibi bialu uruni bibahende biai haya.
REV 8:6 Ani biyagola dahuliyali kariali biarume mbelo biguli karia yu hayaru pu lole manda manda biya.
REV 8:7 Dahuliyali uruni aria mbiragome ibunaga biguli yayago pulaya. Ani pu layagola dalu dindi gunibi ira deaorebi darama heba bimaga howa dindini ibira haya. Ani biyagola dindi bibahende halu tebo tu wuwa tebonego dindibi irabi datanibi daiore haya.
REV 8:8 Ani biyagola dahuliyali mendegome ibunaga biguli yayago pulaya. Ani pu layagola mbirale mbira deago dindi hari timbuniore handaleheni ira daradagua biaore iba solowaraha bape haya. Ani biyagola solowara bibahende halu tebo tu wuwa tebonego mo darama bia haya.
REV 8:9 Ani biyagome ibaha wabu bereleneru halu tebo tu wuwa tebonego homai haya. Iba sibi ibani wiaru halu tebo tu wuwa tebonego mo ko hai haya.
REV 8:10 Ani biyagola dahuliyali tebonegome ibunaga biguli yayago pulaya. Ani pu layagola yakundi timbuni mbira ira hale daradagua deaore hariha howa iba piyagobi iba duguayagobi bibahende halu tebo tu wuwa tebonegoria ibira haya.
REV 8:11 Yakundi biago mini Kau Bulene. Iba nolene bibahende halu tebo tu wuwa tebonego kaubi haya. Kau biyagola wali agali dewame iba ogoni nayaru homai haya.
REV 8:12 Ani biyagola dahuliyali manegome ibunaga biguli yayago pulaya. Ani pu layagola ni halu tebo tu wuwabi ege halu tebo tu wuwabi yakundi bibahende halu tebo tu wuwabi tebonego dege degenaga wá holene hundiya. Ani biyagome horo mbirago halu tebo tu wuwa tebonegonaga wá holene nawiya. Ogonidagua dege mbi mbirago halu tebo tu wuwa tebonegonagabi wá holene nawiya.
REV 8:13 Ani biyagola i̱na handalu hewaria ega bodo hariawe ale mbira daligaha yagalalu pialu howa bi dalimu lalu, Hiriribiore hiriribiore. Dahuliyali dauni waragane kane biarume tinaga mbelo biguli yu karu pu laragola wali agali bibahende dindini bu karu abiore holobada, lalu layuagola hale haru.
REV 9:1 Ani hale harugola dahuliyali daunigome ibunaga biguli yayago pulaya. Ani pu layagola yakundi mbira dindini ibira hayagohondo dindi uli ko dama dege dariba ho wiaganegonaga panga gi miyaria handaru.
REV 9:2 Yakundi biagome dindi uli ko dama dege dariba ho wiagane biagonaga panga duguayagola hagua timbuni ira daradagua bialu da tagitagi biya. Dindi uli ogoni wiagoha howa hagua tagira ibiyagome ni ge halu dindi yi howa do yulame halu aruma helaya.
REV 9:3 Ani buwa pagaya aleru dewa haguaha howa dindini ibira hayaru tihondo mo tandaga bia holene alipiago alerume yu kagobi miya.
REV 9:4 Pagaya ale biarume datani irabi maru maru anda ho karubi, Mo ko nahalimu. Wali agali Ngode Datagaliwabenaga magi wanakuini naheru ti dege tandaga nelo milimu, lamini.
REV 9:5 Pagaya ale biarume wali agali uruni homelo ba nabi ege duriani tandaga dege mo nela helene. Mo tandaga haragonaga tandaga ogoni alipiagome hayaragola tandaga biagadagua dege biaga.
REV 9:6 Wali agali biarume ege duria urunini homolene taya bia biragolabi handa walia naholebira. Tigua homolene hamela ledaria homa ibu ti helalu ibida polebira.
REV 9:7 Handalu hewaria pagaya ale biaru ti nogo hosi wai bule manda manda bu hagadagua haya. Tinaga haguaneni haru haga manda ngolome wabini bu haradagua bialu tinaga dengui agali aleya.
REV 9:8 Tinaga mandari luore handalehe ai tinaga nebi budi gabua ale timbuni mini laiononaga ne handaleheya.
REV 9:9 Tinaga galuhombeneni wai biaga humbi ale gabame wabini karule handalehe hea. Ani bialu tinaga babaganeme bi layuago nogo hosime garo ale mini karisi gili lalu wai bule pialu laradagua layuago hale haru.
REV 9:10 Tinaga erene haniaganerubi alipiago ale howa erene ogonime ege duriani wali agali mo tandaga holene hongo yu hea.
REV 9:11 Dahuliyali mbira ibu dindi uli ko dama dege dariba ho helaga ngagonaga haru haga ka. Ibunaga mini Hiburu bi lalu, Abadono, Girigi bi lalu, Aboliono, inanaga bi lalu Mo Ko Haga.
REV 9:12 Hiriribi pigane biago biai hayago mani kira wene ibule nga.
REV 9:13 Ani biyagola dahuliyali waraganegome ibunaga biguli yayago pulaya. Ani pu layagola hale halu hewaria lomabu delagane dabu ngolome wabini Ngode Datagaliwabenaga wanakuihayagi heagonaga nguni mariaha howa bi layuago hale haru.
REV 9:14 Bi layuagome dahuliyali waragane biagohondo lalu, Dahuliyali mariali iba timbuni mini Yuberedisi poragoria dariba ho karu golope ha, lalu lamiayuago hale haru.
REV 9:15 Ani layagola dahuliyali mariali biaru golope haya. Irane áyu ogoniorenaga horobi ogoniorenaga egebi ogoniorenaga malibi tigua wali agali bibahende halu tebo tu wuwa tebonego homelo belonagahe lea.
REV 9:16 Ami agali nogo hosini biralu piaga la a̱i̱ a̱i̱ bialu daga au loabe tobahe (200 miliono ale) ka layago hale haru.
REV 9:17 De gandeba handalu hewaria nogo hosibi nogo hosini biralu piagarubi handaru. Tinaga galuhombeneni wai biaga humbi ale gabame wabini karulenego ira hungu daramabi alebi hari mindini alebi ege to̱le̱ ale mini salobanaga ambuabi alebi karulo heago handaru. Nogo hosi uruninaga haguane budi gabua ale timbuni mini laiononaga haguane handalehe howa tinaga ne harigaha howa ira hungubi haguabi ege to̱le̱ ale mini salobanaga haguabi tagira ibiya.
REV 9:18 Ira hungubi haguabi ege to̱le̱ ale mini salobanaga haguabi nogo hosi ne harigaha howa tagira ibiyarume wali agali bibahende halu tebo tu wu wiyago tebonego homelo bai haya.
REV 9:19 Ogoni irane nogo hosi uruni tinaga hongo ne harigahabi erenehabi hea. Tinaga erene puya haguane handalehe wiagome tigua wali agali mo tandaga helo hayaga.
REV 9:20 Wali agali maru homelo bayagola maru nabe heneru tigua bi pupu wulenaga tini gime wabiyaru yu wahalu mini beregeda nabi haya. Tigua mbirale dama mitangi bialu bi pupu wulenaga ngolomebi silibamebi boronosimebi ege to̱le̱ ibunimebi iramebi wabini uruninaga deme nahandagabi haleme hale nahagabi geme ibaga nabiagabi wabu wini. Urunihondo dama tara tarahondobi bi pupu wulene wa nahe yani ho wiaabo haya.
REV 9:21 Tigua wali agali homelo bolenerubi gamu gamu bulenerubi wali agali kayu bulenerubi mbirale page bulenerubi uruni bibahende biyarunaga mini beregeda nabi biaabo halu haya.
REV 10:1 Ani biyagola i̱na handalu hewaria dahuliyali hongohe mende dahuliya andagaha howa dalipe hayaria handaru. Dahuliyali ogoni beralibame ibu bo biyago ni domo ibunaga haguaneni bo bu mabubi hearia handaru. Ibunaga dengui ni daralidagua dalu ibunaga ge kiroba ira hungu ale hearia handaru.
REV 10:2 Ibugua ibunaga gini mbuga emene mbira angalo yu hea. Ibunaga ge tigago iba solowarani halu ge lego dindini howa
REV 10:3 bi dalimu budi gabua timbuni laionome ngororo laradagua lalu layuagola hale haru. Ibugua bi dalimu layadago leaha hari kulu kahalu kilikulu lalu ladai biayua.
REV 10:4 Tigua o layadagoni layaore dege i̱na gili bule birugola dahuliya andaga howa bi mbira layuagome lalu, Hari kulu karia biarume bi layuago gili nabi wia do habe, laya.
REV 10:5 Ani layuagola dahuliyali ala ibanibi dindinibi hearia handarugo ibugua ibunaga gi tigago dahuliya andaga doladaga hene.
REV 10:6 Ani buwa ibugua Ngode Datagaliwabe ha dege bialu ha ho wiaabo kagome hari daligabi dindibi iba solowarabi bibahende uruniha ngaru wabiyagonaga minini howa bi mbira lo wialu lalu, Ai hondo ha dai bu holene nawiore.
REV 10:7 Ani anigo dahuliyali kane biagome ibunaga mbelo biguli pu laragola Ngode Datagaliwabehanda mana bule lowa do ho ngelenego ibunaga biabe bialu mbiwia halu mana latagi haga biaruhondo ala lamiyadagua áyu bia maro bulebira, laya.
REV 10:8 O layadagoni leagola i̱na hale halu hewaria bi ala dahuliya andaga howa layuane hale harugome lone i̱hondo langialu lalu, Mbuga biago dahuliyali biagome áyu iba solowaranibi dindinibi heyu kago ibunaga gini angalo yidago yamule pu, laya.
REV 10:9 Ani layagola i̱na dahuliyali biago hearia puwa, Mbuga emene biago ngi, laru. Ani larugola ibugua i̱hondo lalu, Yamialu í̠ na. Naregola neha howa dende mone ibane dende ale bulebirago í̠naga tombeha howa kaubi bu hinulebira, laya.
REV 10:10 Ani layagola i̱na mbuga emene biago ibunaga giha howa yamuwa naru. Ani narugola neha howa dende mone ibane ale biya. Ani biyago mbedogo biwagola i̱naga tombeha howa kaubi bu hinaya.
REV 10:11 Ani biyagola i̱hondo ogodagua langialu laya, Wali agali dindi tara tarani bu karubi tingini tara tara bu karubi bi tara tara laga karubi dindi tara tarani kini karubi uruni tihondo Ngode Datagaliwabehanda bulebiragonaga lone lamialu habe, lalu langiya.
REV 11:1 Ani languwa ira kanogo mbira ale magi manda biagane gambe homane luni ale ngialu howa lalu, Ngode Datagaliwabenaga andabi lomabu delagane dabubi magi ogobi lalu manda bialu wali agali anda ogoni tamuha lotu lalu karu daga lalu bule pu.
REV 11:2 Ani bialu howa Ngode Datagaliwabenaga anda haneruha magi ogobi lalu manda nabibe. Irane wali agali Ngode Datagaliwabe mitangi nabiaga karu hane uruni tihondo mini nga. Wali agali uruni tigua Ngode Datagaliwabenaga Tano Loma Bia Hene ngagoriani ege pira mariani kira (42) hengedalu holebira.
REV 11:3 I̱na i̱naga walia haga kirali libugua dara howa walia holenaga aga karulalu howa Ngode Datagaliwabe mana horo daosini mbira handari kirani pira waragariani (1,260) lamule pelo, Pudaba, lolebero, laya.
REV 11:4 Walia haga kirali ogonilabo libu ira olibe kirabi lamu hale irane kirabi ka. Libu dindi bibahendenaga Anduane Homogo kagoria heyu ka.
REV 11:5 Mbiralime libu bole biyagua libunaga ne harigaha howa ira hungu tagira ibiragome libunaga waitigi hararu homelo baga. Ogonidagua biaganego mbiralime libu bole biyagua ogoni ibu homelo bolebira.
REV 11:6 Libugua Ngode Datagaliwabe mana lamialu howa dalu naibilo hari daligaha panga payulene hongo yu ka. Libugua iba dugua tagi hararu mo darama bia helolenenaga hongobi wali agali dindini karu homolene tara tarame boa birangi bolenenaga hongobi yu ka.
REV 11:7 Libugua Ngode Datagaliwabe mana lamiai kagola nogo gabua gibi mbirame dindi uli ko dama dege dariba ho ngagoha howa tagira ibalu libu baba wai bulebira. Nogo gabua gibi ogonime wayali halu libu homelo bolebira.
REV 11:8 Ani baragola libunaga tingini tano timbuni biagonaga hamani libunaga Anduane Homogo ira bangani ba para hayagoria ngelolebira. Tano ogoninaga mini bi manane lalu Sodomobi Iyibibi labehe nga.
REV 11:9 Horo tebiru howa manegonaga bu̱ lowa wali agali dindi tara tarani bu karumebi hameigini tara tara bu karumebi bi tara tara laga karumebi tingini tara tara karumebi libunaga tingini handaga bialu, Hora holene nawi, lolebira.
REV 11:10 Libu homaragola dindi wali agali biarume turu ho holebira. Ngode Datagaliwabe mana latagi haga kirali ogoni labome wali agali bibahendeore dindini bu heagoria tandaga nolene mo ibira hayago ai homayagonaga turu halu tigua mali lialu daweru halu mbirale mbirale bame migimigi bialu holebira.
REV 11:11 Ani biyagola horo tebiru howa manego bu̱ lowa holenenaga bu he̱ mulene Ngode Datagaliwabeha howa ibalu libuha anda pelayagola libu heyu hene. Heyu heago handayaru ti bibahendeme gi taraore haya.
REV 11:12 Ani biyagola dahuliya andaga howa bi dalimu ladali hayuago Ngode Datagaliwabe mana latagi haga kirali biago labome hale halu hebiria, Ogoria ibidaba, layuago hale haya. Ani hale halu libu waitigi hayarume handalu hearia libu dahuliya andaga beralibaha biatago halu iraga hayaria hendene.
REV 11:13 Ani iraga hayaore dumbirumbi timbuni biyagola tano pi halu tu wuwa pinigo bo poda paya bialu wali agali daosini karia (7,000) bo paya biai haya. Wali agali maru hearume ti gi taraore howa Ngode Datagaliwabe gibiore dahuliya andaga kagonaga mini yaraga haya.
REV 11:14 Hiriribi mende biago biai hayago ai tebonego áyu ogoni dege ibulebira.
REV 11:15 Dahuliyali kanegome ibunaga mbelo biguli pu layagola dahuliya andaga howa bi dewa dalimu lalu ogodagua layua, Wali agali dindi bibahendeni karu haru hagimbu bulene hongo inanaga Anduane Homogohabi ibunaga Mbirali Dabo helenego kagohabi ngago ibugua haru ha dege bidane ha ho wiaabobo holebira, lalu layuago hale haru.
REV 11:16 Ani leagola handalu hewaria dahuliyali haru haga pira kirani mariali (24) tinaga haru haga biragane dagiani Ngode Datagaliwabe buhayagi wiagoria biraga biaru tini bulu palu ibira howa Ngode Datagaliwabe mini yaraga halu
REV 11:17 lalu, Anduane Homogo Ngode Datagaliwabe Hongo Haiheore í̠ bamba henego áyubi kegoni. Í̠na í̠naga hongo holene yuwa haru holene tenialu kegonaga ina ka̱i̱ larama.
REV 11:18 Í̠naga keba holene horobi homeneru mo daba ki bulene horobi íbu nga. Ani ngago hondowa wali agali Ngode Datagaliwabe mitangi nabiaga karume keba taraore to̱laihe ka. Í̠naga biabe bialu mana latagi haga karubi í̠naga wali agali emene timbuni ta nabi bibahende í̠naga mini yaraga halu karubi tihondo emena mulene horo áyu íbu ngagoni. Wali agali dindi bo poda paya bialu hayaru tinaga bo paya bulene horo áyu íbu ngagoni, laya.
REV 11:19 Dahuliya andagani Anduane Homogonaga anda dugua ho wiagola Ngode Datagaliwabenaga Bi Habo Nalolene Mbogoyi wiago handabehe wia. Ani bialu hari daba migimege lalubi hari kilikulu lagalaga bialubi dumbirumbi bialubi dalu dindi guni timbuni ibira halu bigi biya.
REV 12:1 Ani biagola handalu hewaria nahendene ale tara mbira hari daligani hapani haya. Hapani hayadagoni wali mbira ni aga karulagadagua karulebi ge egeni hana howa haru haga manda yakundi homberia (12) karulebi berea.
REV 12:2 Ibu waneigini gali taba honolene kaware hayagola tandaga nalu yi layago hale haru.
REV 12:3 Ani handaya ho wiwaria dege nahendene ale tara mende hari daligani hapani haya. Hapani hayadagoni abagua ale mbira timbuni daramabi haguane kariahebi haguaneni ne gayane pirahebi hea. Haguane karia urunini kininaga manda karia karule hearia handaru.
REV 12:4 Abagua ale biago ibunaga ereneme yakundi halu tebo tu wuwa tebonego ndogayulo baga bialu dindini ibira helaya. Ani buwa waneigini gali taba hanaraore bo nole ibugua wali biago wanakuihayagi heyu howa hondo haya.
REV 12:5 Ani heagola wali biagome igiri mbira taba hanayago ibugua mani hongo taraore holene yu howa wali agali dindi tara tarani bu karu bibahende handame hai holebira. Ani bo nole biyaria dahuliyalime igiri biago yamialu Ngode Datagaliwabe kagoriabi ibunaga handame ho biragane dagia ngagoriabi yalu iraga haya.
REV 12:6 Wali biago ibu Ngode Datagaliwabehanda dindi ko yobi mbira wali agali nahagaha ibu berelo manda manda bu wiagoria ibida piya. Dindi ogoriani bedagola Ngode Datagaliwabehanda wali biago horo daosini mbira handari kirani pira waragaria (1,260) handaya ho holebira.
REV 12:7 Ogoni hondowa handalu hewaria dahuliya andagani wai biya. Ani biyagola dahuliyali Maigelobi ibunaga dahuliyalirubi tigua abagua ale biagobi ibunaga andaneha hagarubi ti baba wai bialu abagua ale biagobi ibunaga andaneha hagarubi tigua wai bia dai biya.
REV 12:8 Ani buwa Maigelobi ibunaga dahuliyalirubi tigua wayali howa abagua ale biagobi ibunaga andaneha haga biarubi ti dahuliya andagani holene nawi lalu bo batagi haya.
REV 12:9 Ngode Datagaliwabenaga dahuliyali biarume abagua ale timbuni biago puya bambaore wini ibu mini dama Heyolabe dindi bibahendeni karu mo hondo hai halu ko haga biago ibuore bo batagi haya. Ibubi ibunaga andaneha haga biarubi dindini bo barali hayaria handaru.
REV 12:10 Ani biyagola i̱na hale halu hewaria dahuliya andaga howa bi mbira dalimu lalu, Ngode Datagaliwabenaga pele mulene áyu ogoni íbu nga. Ngode Datagaliwabe ibu Handame Haga Kiniore howa ibunaga hongo áyu mo walia ho nga. Ai Ngode Datagaliwabenaga Mbirali Dabo Helene kago ibunaga handame ho holene hongo walia ho nga. Irane ogoninaga mbirali Ngode Datagaliwabe wanakuihayagi howa ibugua horombe mbiragabi inanaga hamene mbaliniru ti nakarulape biaga lalu haga biago ibu dahuliya andaga howa bo batagi haya.
REV 12:11 Inanaga hamene mbaliniru tigua Nogo Sibi Igini biagonaga daramamebi mana henene lamiyagomebi o biago bolangua halu wayali haya. Ani bulenaga tigua tininaga holene mitangi nabi homolene winiyagua homabehe haya.
REV 12:12 Anigo dahuliya andagani kamiru-o tí turu ho halimu. Dindini kamiru iba solowaraha bedamirubi dindibi iba solowarabi tíha ko gibiore wulebiragonaga dara holene nga. Ogoni irane dama Heyolabe tí kamiria daliyago ibunaga holene horo henge emene hangu ngago manda buwa ibugua keba timbuni ho ka, lalu laya.
REV 12:13 Abagua ale biago ibu dindini helo bope heneyane hondowa ibugua wali igiri taba hanayago biago piyadagua talima piya.
REV 12:14 Ani talima piyagola wali biago dindi ko yobi wali agali nahaga wiagoha yaga lalu pelo ega timbuni bodo hariawe alenaga babagane kira ibuhondo miya. Dindi ogoriani abagua ale biagome wali biago nabelo Ngode Datagaliwabehanda mali tebirani manegonaga bu̱ lowa handaya ho holebira.
REV 12:15 Abagua ale biagome talima piyago pialu howa iba lime wali biago yalu pelo ibunaga ne harigaha howa iba li timbuni tagira ibilaya.
REV 12:16 Ani berolo manda biaria dindime wali biago biamogo bialu ibunaga ne haria ha̱ lalu abagua ale biagonaga ne harigaha howa iba tagira ibiyago nai haya.
REV 12:17 Ani biyagonaga abagua ale biagome wali biagola keba timbuniore halu wali biagonaga aguanene baba wai bule piya. Aguanene uruni tigua Ngode Datagaliwabehanda, Bilimu, lowini ngadagua bialu Yasuhanda mana henene mo walia hayagoria mini bilina ho karu ti bibahendeore baba wai bule piya.
REV 12:18 Abagua ale biago ibu iba solowara angeni heyu haya.
REV 13:1 I̱na ani handaya ho wiwaria dege nogo tara mbira iba solowaraha howa tagira ibiyaria handaru. Nogo gabua gibi ogoni ibu haguane kariahebi haguaneni ne gayane pirahebi hea. Ne gayane pira hearu mbira mbirani haru haga manda emene karulowabi haguane karia hearu mbira mbirani mini Ngode Datagaliwabe mege bialu gilibu wiaria handaru.
REV 13:2 Nogo tara o biago ibu budi gabua ale timbuni mini lebadi handalehebi ibunaga ge biango gabua ale timbuni mini beanaga ge handalehebi ibunaga ne hariga budi gabua ale timbuni mini laiononaga ne hariga handalehe hea. Abagua ale biagome ibuninaga hongo mialu ibunaga haru haga biragane dagiabi haru holenenaga hongo gibiorebi nogo tara o biagohondo miya.
REV 13:3 Nogo tara ogoninaga haguane biaru mbirago homelo beneyago dabi ho hea. Wali agali bibahende dindini bu hearume mogolo hondowa nogo tara ogoni piyadagua haruru piya.
REV 13:4 Abagua ale biagome ibu haru holenenaga hongo nogo gabua gibi biagohondo miyago hondowa wali agali bibahendeme ibuhondo bi pupu wialu haya. Tigua nogo gabua gibi biagohondobi bi pupu wialu lalu, Nogo gabua gibi ogobi ai kabe. Ibu baba wai bibehe ai kabe, lalu lene.
REV 13:5 Nogo gabua gibi ogonime mine howa Ngode Datagaliwabe mege bialu bi lelowa Ngode Datagaliwabe ibugua nogo gabua gibi biagohondo ibu haru holenenaga hongo ege pira mariani kira (42) yu helo henge miya.
REV 13:6 Ani miyagola nogo tara ogoni ibugua Ngode Datagaliwabebi ibunaga minibi ibu haga wiagobi dahuliya andagani hearubi bibahendeore ha howa mege bialu hea.
REV 13:7 Nogo gabua gibi ogonime Ngode Datagaliwabenaga wali agali hearu baba wai bialu ti bo hana helo helene. Ibugua hameigini tara tara hearubi wali agali dindi tara tarani bu hearubi bi tara tara laga hearubi tingini tara tara hearubi bibahende haru hai helo henge miya.
REV 13:8 Dindi wa nabi howa wali agali haabo holene yu holebirarunaga mini mbugani gilibu ngaru heba wali agali bibahende dindini karu tinaga mini gili bimaga nahe tigua nogo gabua gibi ogoni mitangi bialu mo dunini ho helolebira. Mbuga ogoni Nogo Sibi Igini balu homelayago ibunaga nga.
REV 13:9 Anigo tí halehe kamiyagua nde hale haramine.
REV 13:10 Maru minu yalu pelo lowini karu minu yalu puore bulebira. Maru wai biagane tibume homelo belo lowini karu wai biagane tibu ogonime baore bulebira. Ani bulebiragonaga Ngode Datagaliwabenaga wali agali karu mini bilinahe ha ho wiaabo holenebi mini mbiraore wu holenebi nga.
REV 13:11 Ani handa ho wiwaria dege nogo gabua gibi mende dindiha howa tagira ibiyaria handaru. Nogo gabua gibi mende ogoni ibu haguaneni ne gayane kira nogo sibi igininaga ne gayane handalehe howa bi abagua ale biagome bi laradagua layago hale haru.
REV 13:12 Nogo gabua gibi mende ogonime nogo gabua gibi mbira biagonaga haru holenenaga hongo gibiore yu heagoria howa yu haya. Ani yu howa ibugua dindi bibahendebi wali agali bibahende karubi nogo gabua gibi mbira bene dabi hayagohondo bi pupu wilo mo wia haya.
REV 13:13 Nogo gabua gibi mende ogonime agalime nabiagane aleru bialu hari daligaha howa wali agali dindini bu hearu hendeaore ira hungu biaore ibira haya.
REV 13:14 Nogo gabua gibi mende ogonime nogo gabua gibi mbira biago heagoria agalime nabiagane aleru bilo bilayagome wali agali dindini bu hearu mo hondo haya. Nogo gabua gibi mende ogoni ibugua wali agali biaruhondo, Nogo gabua gibi mbira wai biagane ayu tibu biagome bene dabi hayago ibuni kagobi mbira bi pupu wulenenaga wa bidaba, lalu lamiya.
REV 13:15 Ani layadagoni bi pupu wulenaga wabiyago ibugua bi lelobi wali agali ibuhondo bi pupu nawirago homelo belobi nogo gabua gibi mende biago ibugua nogo gabua gibi ala ibiyago ibuni kagobi mbirale wabu wiyago ibuha buhe̱ pula anda helo helene.
REV 13:16 Nogo gabua gibi mende biagome wali agali emene timbunirubi homogo yagibanorubi garabaya biabe ale bia hagarubi bia nahagarubi bibahende gi tiganiyaguabi wanakuiniyaguabi magi wilo hongo halu mo wia haya.
REV 13:17 Ani biyago wali agali magi ogoni helayaru hangume yolo bialu mulenebi yolo ngilo mulenebi bibehe haya. Magi ogoni nogo gabua gibi mendegonaga miniyaguabi mini ogoninaga dagayaguabi nga.
REV 13:18 Ogoni manda bule lowa mini gigabiwi holene nga. Daga ogoni agalinaga mini walia ho ngago mbirali miniwiore kagome nogo gabua gibi mende biagonaga daga galone mo mini manda bibehe holebira. Daga ogoni handari waragariani pira waragariani waragaria (666) nga.
REV 14:1 I̱na lone handalu hewaria Nogo Sibi Igini biago Hari Saiononi heyu hearia handaru. Nogo Sibi Igini ogoni baba mandagi wali agali daosini handari mbirani pira mariani maria (144,000) ti wanakuini ibunaga minibi ibu Abanaga minibi gilibu wu hearia handaru.
REV 14:2 Ogoni hondowa hale halu hewaria dahuliya andagaha howa bi mbira iba pora bialu ue laradagua bialubi hari kilikulu dalimuore laradagua bialubi layuagola hale haru. Bi ogoni agali dewame ga̱wa̱ ale timbuniru laradagua layuagola hale haru.
REV 14:3 Wali agali daosini handari mbirani pira mariani maria (144,000) biaru ti Ngode Datagaliwabenaga handame ho biragane dagiabi holenehe mariali helene biarubi dahuliyali haru haga biarubi uruni buhayagi heyu hea handaru. Tigua iba gana gahenge tini hangume labehe wiaru lalu hea. Wali agali bibahende bu hearuni aria tini dege Ngode Datagaliwabehanda pele mialu haru dai biya.
REV 14:4 Agali uruni ti wali baba mandagi nahaga miniha ko mbira para naheore ka. Nogo Sibi Igini biago poradagua talima piaga ka. Ti wali agali bibahende bu hearuha howa Ngode Datagaliwabehanda pele mialu ibuhondobi Nogo Sibi Igini biagohondobi ti piganeore lomabu mini ka.
REV 14:5 Tigua ke̱ mbira hayaria nahende tiha ko mbira nawiore.
REV 14:6 I̱na handa ho dege wiwaria dahuliyali mbira hari daligani yagalo yalu piyaria handaru. Ibugua wali agali dindi bibahendeha tingini tara tara karubi hameigini tara tara karubi bi tara tara laga karubi wali agali dindi tara tarani karubi bibahendehondo haabobo holene Bi Mana Debene lope hole yagalo yalu piyaria handaru.
REV 14:7 Dahuliyali ogoni ibugua bi hongo howa laraga halu lalu, Ngode Datagaliwabe mini lene ka lowa ibu timbuniore kagonaga mini yaraga hadaba. Ibugua wali agali bibahende daba ki bulene áyu íbu nga. Ngode Datagaliwabe ibunioreme hari daligabi dindibi iba solowarabi iba duguararubi wabinigo ibuhondo ge duli hangaho biruwa ibu mini yaraga hadaba, lalu layuane hale haru.
REV 14:8 Ai i̱na handa ho dege wiwaria dahuliyali biago piyadagua dahuliyali mendebi talima pialu hearia handaru. Ibugua pialu howa lalu, Babilono mini lene timbuni podo ibira haya. Ibu podo bagabu ibiraore haya. Ibugua wali agali bibahende hearu ibunaga waini iba nelo mo na haya. Ibunaga waini iba ogoni wali agalime dimagoli tara halu kayu bilonaga mo na haya, lalu layago hale haru.
REV 14:9 I̱na handa ho dege wiwaria ai dahuliyali kira pigane ma bambala piyago piyadagua dahuliyali tebonego pialu bi hongo howa laraga halu lalu, Mbiralime nogo tara biagohondobi ibuni heagobiore wabu wini biagohondobi bi pupu wialu wanakuiniyaguabi giniyaguabi magi biago helayago
REV 14:10 ogoni ibuni Ngode Datagaliwabenaga waini iba nolebira. Waini iba ogoni Ngode Datagaliwabenaga keba holene gibiore hada nabi howa beha odo bereleda. Ani bidago wali agali nogo tara biagohondo bi pupu wialu magi biago karule karu ti dahuliyali loma bia hene hearubi Nogo Sibi Igini biagobi wanakuihayagi ira timbuni ege to̱le̱ ale mini saloba heba da ho wiagoriani dalu tandaga taraore nalu holebira.
REV 14:11 Ti tandaga taraore helo ira daragonaga hagua iraga ha dege bialu kane iraga ha ho wulebira. Ani buwa wali agali nogo tara biagohondobi ibuni heagobiore wabu wini biagohondobi bi pupu wialu nogo ogoninaga mini magihe karu ti mini íbu holene horombe mbiragabi nawulebira, lalu layago hale haru.
REV 14:12 Ani bulebiragonaga Ngode Datagaliwabenaga wali agali ibugua, Bilimu, lo wiyadagua bialu Yasuhondo mini bilinahe ho haabo karu ti hibu lalu hongo ha ho wiaabo holene nga.
REV 14:13 Ani hondowa hale ha dege bialu hewaria bi mbira dahuliya andagaha howa ladali halu lalu, Bi o larogo gili bia. Wali agali áyu ogoni howa Anduane Homogonaga biabe bialu kaore homararu ti turu ho holebira, lene. Ani layagola Ngode Datagaliwabe Dinini ibugua ladai bialu lalu, E̱ aniore bulebira. Tigua biabe erekuibi bialu hayago yolo ereba nahe tinaga wiaabo halu ha̱lo birulene karulowa turu howa mini íbu birulebira, lalu layago hale haru.
REV 14:14 I̱na handa ho dege wiwaria hari beraliba pele mbira handaru. Beraliba pele ogoriani mbirali agali handalehe berea. Ogoni ibugua ibunaga haguaneni haru haga manda ngolome wabini karulo halu ibunaga gime ayu tibu widi gandulaga garayabi mbira ne gadele yu hearia handaru.
REV 14:15 Handa dege bialu hewaria dahuliyali mende Ngode Datagaliwabenaga andaha howa tagira ibalu ibugua agali handalehe beralibani birayagohondo bi dalimu olaraga halu lalu, Dindini widi boga biai halu gandu lolene tu áyu íbu ngagonigo í̠naga ayu tibu garayabi yidegome widi gandula, laya.
REV 14:16 Ani layagola mbirali beralibani birayago ibugua ibunaga ayu tibu garayabi biago yarali halu dindini widi hearu gandu laya.
REV 14:17 Handa ho wia dege biwaria dahuliyali mendego dahuliya andaga Ngode Datagaliwabenaga andaha howa tagira ibalu ibuguabi ayu tibu garayabi ne gadele yalu ibiyago handaru.
REV 14:18 Ani bialu dahuliyali mendebi ibugua lomabu delagane dabuni ira deago handaya ho haga heago ibu o heagoria howa tagira ibiya. Tagira ibuwa ibugua dahuliyali ayu tibu garayabi ne gadele yu hayagohondo laraga halu lalu, Pu mbira lini daga mini gerebi dedaru ibirayadago í̠naga ayu tibu garayabi yidegome dindinaga mabuni howa gandula, laya.
REV 14:19 Ani layagola dahuliyali ayu tibu garayabi yu hayagome dindini ya dali halu gerebi mini dearu gandu laya. Gandu lowa ibugua gerebi lini biaru Ngode Datagaliwabenaga keba holenenaga pingidagane wiagoha mo bape haya.
REV 14:20 Ani biyagola tano timbuni tagirahayagi gerebi lini biaru pingidagane wiagoria pingida tagi haya. Ani biyagola gerebi lini pingidagane timbuniore ege to̱le̱ wiagoha howa darama tagira ibiyago iba li timbuni magi lu kilomida handari tebira (300) alebi ulinaga magi mida kira alebi ibiyaria handaru.
REV 15:1 Ani hondowa handalu hewaria dahuliya andagani nahendene ale tara mende gibibi mogolebi dahuliyali karialime bolene hongo karia yu hearia handaru. Bolene hongo uruni bamaro buleneya. Irane bolene hongo urunime Ngode Datagaliwabe ibu keba ogobi ka lalu walia hamaro bulebira.
REV 15:2 Ani handa ho wiwaria dege iba solowara ngalayi handalehe ira deaore bimaga ho wiaria handaru. Ogoni hondowa handalu hewaria wali agalime nogo tara biagobi ibuni kagobiore wabu wiyagobi ibunaga mini wiradagua daga mbira wia aribia helo wini kago ibunibi ti ibu baba wai bialu wayali hai hene bibahende hayaru hearia handaru. Tigua iba solowara ngalayi handalehe wiagoria heyu howa ga̱wa̱ timbuni Ngode Datagaliwabehanda tihondo miniru yu hea.
REV 15:3 Yu howa tigua Ngode Datagaliwabenaga biabe bia haga Mosese ibunaga iba ganabi Nogo Sibi Igini biagonaga iba ganabi lalu hea. Iba gana layadagoni ogo, Anduane Homogo Ngode Datagaliwabe Hongo Haiheore kego í̠na bialu hariliru gibiorebi timbuniorebi birili. Wali agali dindi tara tarani bu karunaga kini í̠ni kego í̠namana tigabiorebi heneneorebi birilida.
REV 15:4 Anduane Homogo-o í̠ hondowa gi naholene mbirali ai kabe. Í̠ timbuniore kego lalu latagi naholebirago aiwabe. Í̠ni dege baya buruguleore kegoni. Wali agali bibahendeoreme í̠naga tigabi buleneru handaya ho kamagonigo wali agali dindi tara tarani bu karume ibalu í̠naga mini yaraga hole ibulebira, lalu hearia hale haru.
REV 15:5 Ogoni hondowa handalu hewaria dahuliya andagani Ngode Datagaliwabenaga anda panga dugua ho wia. Panga dugua ho wiyadagoni tamuha Ngode Datagaliwabe ka manda bilonaga Balai Anda Loma Bia Heneore heago handaru.
REV 15:6 Dahuliyali kariali bolene hongo karia yu hayaru anda ogoniha howa tagira ibiya. Ti aga dodo nahe peweleore buwa nogo dongone ngolome wabiniru tinaga galuhombeneni wuwabi ibiyago handaru.
REV 15:7 Ibiyagola holenehe mariali helene biaru aria mbiragome dahuliyali kariali biaruhondo ndisi ngolome wabini kariaru uruniha Ngode Datagaliwabe ha dege bidane ha ho wiaabo kagonaga keba holene to̱laihe miya.
REV 15:8 Ani miyagola Ngode Datagaliwabenaga wá taraore holeneha howabi ibunaga hongo holeneha howabi hagua ibunaga anda ogoniha to̱lai haya. Ani to̱lai hayagola howa bolene hongo karia dahuliyali kariali biarume yalu ibiyaru bamaro nabiaha mbirali anda biagoha anda pobe nahe haya.
REV 16:1 Ogoni hondowa hale halu hewaria Ngode Datagaliwabenaga anda biagoha howa dahuliyali kariali biaruhondo bi mbira dalimuore layuago hale haru. Hale halu hewaria ogodagua layua. Ngode Datagaliwabenaga keba holene ndisi be kariaha ngaru dindini odope hole pudaba, lalu layuago hale haru.
REV 16:2 Ani layagola dahuliyali mbirago ibugua puwa ibunaga ndisi beha yayago dindini odope haya. Ani biyagola wali agali nogo taranaga magi ho hayarubi nogo tara ogoni ibuni kagobiore wabu wiyagohondo bi pupu wiyarubi uruni ti bibahendeni dere ti̱wa̱ ale tandaga timbuni bialu bia pani haya.
REV 16:3 Dahuliyali mendego ibugua ibunaga ndisi beha yayago iba solowarani odope haya. Ani biyagola iba solowara biago mbirali homenenaga darama ale bu hinalu iba solowaraha berelene biru wiaru bibahende homai haya.
REV 16:4 Dahuliyali tebonego ibugua ibunaga ndisi beha yayago iba piyaruriabi iba duguayaruriabi odope hayagola iba uruni darama bu hinaya.
REV 16:5 Ani biyagola hale halu hewaria dahuliyali iba damene bibahende hondo heagome lalu, Ngode Datagaliwabe í̠ Baya Buruguleore ala henegobi áyu kegoni. Í̠na daba ki birigo tiga tiga hangu dabarigoni.
REV 16:6 Tigua Ngode Datagaliwabenaga wali agali henerubi Ngode Datagaliwabe mana latagi haga henerubi ti balu darama pelayagonaga í̠na ti darama nelo mo miri. Ani mirigo ti mulene wiadaguaore miri, lalu layuagola hale haru.
REV 16:7 Ogoni hale howa hale halu hewaria mbirale lomabu delagane dabu heagoria howa bi mbira layuagome lalu ogodagua layua. Anduane Homogo Ngode Datagaliwabe Hongo Haiheore kego í̠naga daba ki bulene henene ngagoriabi tiga tiga ngagoriabi hangu daba ki birili, lalu layuagola hale haru.
REV 16:8 Dahuliyali manego ibugua ibunaga ndisi beha yayago nini odope haya. Ani biyagola ni poboyogo gibiore dayagome wali agali delo henge miya.
REV 16:9 Wali agali uruni ni poboyogobi dayagome dayagola tigua bolene hongo uruninaga haru haga Ngode Datagaliwabe kago ibunaga mini ha haya. Ani biyago tigua tinaga ko biyaru wahalu mini beregedowa Ngode Datagaliwabe gibiore kagonaga mini yaraga nahaya.
REV 16:10 Dahuliyali daunigo ibugua ibunaga ndisi beha yayago nogo ko tara biagonaga haru howa biragane dagiani odope haya. Ani biyagola nogo tara biagonaga haru holene wiagoria aruma haame hayagola wali agalime tandaga nalu tininaga hége neme pugu naya.
REV 16:11 Ani bialu tigua tandaga nayagonagabi dere bu hayagonagabi dahuliya andaganaga Ngode Datagaliwabe ha halu haya. Ani bialu hayago howa tigua tinaga mana ko bialu hayaru wahalu mini beregeda nabiya.
REV 16:12 Dahuliyali waraganego ibugua ibunaga ndisi beha yayago iba timbuni mini Yuberedisi piyagoria odope haya. Ani biyagola ni tagira ibiragohayagi howa kini hearu ibilonaga hariga wilo iba o biago hundiai haya.
REV 16:13 Ani biyagola handalu hewaria dama tebira yago handalehe hearia handaru. Dama tebira uruni ti abagua ale biagonaga ne harigaha howabi nogo tara biagonaga ne harigaha howabi mana henene ngadagua ndo latagi haga mbira heagonaga ne harigaha howabi tagira ibalu hearia handaru.
REV 16:14 Dama uruni ti dama koore agalime nabiagane ale bialu hagagonaga dama hea. Dama tebira urunime dindi tara taranaga kini bibahende karu karia piagago pialu kini uruni bibahende Ngode Datagaliwabe Hongo Haiheore kagonaga Horo timbuni harangi wai bilonaga haru íbu mogo bule piaga.
REV 16:15 Anduane Homogo ibugua lalu, Ai hale hadaba. I̱ pageali ohowa ibagadagua ibulebero. Ani buleberogo mbirali ibu wali agali bu kagoria ti babe napolebi taga naholebi ibunaga aga mamage halu palia nabi dengala ho kagome turu ho holebira, lalu laya.
REV 16:16 Dama tebira biarume kini biaru dindi mbira Hiburu bi lalu mini Amagedono wiagoria haru íbu mogo biya.
REV 16:17 Dahuliyali kanego ibugua ibunaga ndisi beha yayago daliga lira odope haya. Ani odope heagola Ngode Datagaliwabenaga andaha handame ho biragane dagia wiagoria howa bi mbira dalimu laraga halu lalu, Ai biaiore ogoni, layuago hale haru.
REV 16:18 Uruniore biai heagola hari dababi hari kilikulubi hari kulu timbunibi dumbirumbi gibiorebi biya. Dumbirumbi o biyadagonibiore mbira wali agali wabiniyangi howa biyariabi nahendenego áyu o biyadagoni maru biraliru bagi hene lowa gibiore biya.
REV 16:19 Tano timbuni wiago bu̱la tebo bialu dindi bibahendenaga tano wiaru poda holobiya. Ani biyagola Ngode Datagaliwabehanda Babilono tano mini lene timbuni biago mitangi bu dai bialu ibunaga beha howa waini iba ibunaga keba gibiore holene nelo mo na haya.
REV 16:20 Dindi iba dege dombeneha wiaru bibahende pu ereba halu hari wearubi bibahende ligua piyabe nigua piyabe toba halu nahandabehe haya.
REV 16:21 Dalu dindi guni timbuniore genda to̱le̱ timbuni genda magi kilogarama pira duria (50) ale hari daligaha howa wali agalini ibira haya. O ibira hayadagoni bolene hongo gibioreyago wali agali Ngode Datagaliwabe ha hayaru biarume tini ibira haya.
REV 17:1 Dahuliyali kariali ndisi be karia yu hayaru aria mbirago i̱ hewaria ibuwa lalu, Wali mbira kayu dege yaga mini lene bedago pani ogodagua mulebira lalu walia holiya mba íbu. Wali kayu yaga mini lene ogoni tano timbuni mbira iba dewa poraru angeni bu kago ibuniore laro, lalu laya.
REV 17:2 Dindi tara taranaga kini hayarume wali ogoni baba kayu yaga bialu haya. Ani biyagola wali agali dindi bibahendeni hearume ibunaga kayu yulene waini iba nalu no lulu yaga biya.
REV 17:3 Ngode Datagaliwabe Dinini ibu i̱ha karulo hayagola minime handalu hewaria dahuliyali biago ibugua i̱ dindi ko yobi wali agali nahaga wiagoha haru piya. Dindi ogoriani haru anda piyagola nogo gabua gibi daramabi Ngode Datagaliwabe mini mege bialu bi gili biamehe heagonaga erembirani wali mbira berearia handaru. Nogo gabua gibi ogoni haguane kariahebi haguaneni ne gayane pirahebi hea.
REV 17:4 Wali ogoni aga tagalitayabi darama biale bialehebi karulalu yári dewa ngolome wabinirubi to̱le̱ tara tara muni dewame minirubi pealo yári bulenaga muni dewame minirubi ibunini biame howa berea. Ani buwa be ngolome wabini mbiraha ibu kayu yayagonaga mana ko tara tara ngubiore to̱laihe ibunaga gime yu berea.
REV 17:5 Wali ogoninaga wanakuini mini mbira galone manda bibe nahe dohe ogodagua gilibu wia. Babilono mini lene timbuni bayanda wali dindi bibahendeni bedarubi mana ko ngubi taraore biaga dindi bibahendeni karubi tinaga ai̱ya o beda, lalu gilibu wia.
REV 17:6 Wali ogoni handalu hewaria Ngode Datagaliwabenaga wali agali tinaga daramabi Yasuhondo mini mbiraore wiyaru wa nahe wiaabo ho heagola homelo bayarunaga daramabi ibu no lulu yu berea. I̱na ibu handalu mogo lowa handawa biru.
REV 17:7 Ani birugola dahuliyali biagome i̱hondo hale halu lalu, Í̠ mogolohondo kego aginagabe. I̱na í̠hondo wali biagonaga mini galone manda bibe nahe do hene wiyagobi nogo tara biago haguane kariahebi haguaneni ne gayane pirahebi ibuni wali ogoni berelaga kagonaga galonebi langulebero.
REV 17:8 Nogo gabua gibi ogoni ala henego áyu nahe. Nogo gabua gibi ogoni ibu dindi uli ko dama dege dariba ho ngagoha howa áyu dege tagira ibule kago tagira ibiragola bo home lole haru polebira. Dindi wa nabi howa wali agali haabo holene yu karunaga mini mbugani gilibu ngaru heba gili bimaga nahe karu tigua nogo tara ogoni handaragola mogolo hondolebira. Nogo tara ogoni ala henego áyu nahegoyu lone hapani holebira.
REV 17:9 Ogoni manda bule lowa mini gigabiwi holenebi mo manda bia holenebi nga. Nogo gabua gibi biagoria haguane karia hayarunaga galone dindi hombene kariaya. Dindi hombene karia ogoriani wali biago ibu berea. Haguane karia o biaru dege ti dindinaga kini karialiya.
REV 17:10 Kini kariali biaru aria duriali homai ho halu waraganego haru kago kanego ibu áyu nahego mani holebira. Mani ibu harangi ibugua tigi mbira hangu haru holebira.
REV 17:11 Nogo gabua gibi ogoni ala mbiru ha henego áyu nahe. Ibu kini karia biaru aria dege kini halini kagola ibubi bo waholebira.
REV 17:12 Nogo gabua gibi biago haguaneni ne gayane pira hearia handarigo kini pira mani haru holebiraru handari. Ani handarigoni pirali o biarume nogo tara biago baba luore ndo nemandi dege haru helo hongo miragola kini holebira.
REV 17:13 Kini pira uruni ti mini mbiraore howa tinaga hongobi haru holene hongobi nogo gabua gibi biagohondo miaga.
REV 17:14 Tigua Nogo Sibi Igini biago baba wai bulebira. Wai bia bulebirago Nogo Sibi Igini biagobi ibugua wali agali dabo helene ibu talima piaga mini bilinahe karubi ibu heba mandagi howa wai bialu ti bibahende wayali holebira. Ani bulebirago irane ibugua anduane bibahende karunaga Anduane Homogobi kini bibahende karunaga Handame Haga Kinibi ibu ogonibi kagonaga ani bulebira, lalu dahuliyali biagome i̱ langiya.
REV 17:15 Dahuliyali biagome langia dege bialu lalu, Ibaru o piyane handarigoriani wali kayu yaga biago bedago iba uruni bibahende ti wali agali dindi tara tarani karubi wali agali ta nabi karubi wali agali tingini tara tara karubi wali agali bi tara tara laga karubi ka.
REV 17:16 Ani bidago ai nogo gabua gibinaga haguaneni ne pira hearia handarirumebi nogo gabua gibi ogonimebi wali mbira kayu dege yaga ogoni handabe manga gibi holebira. Ani bialu ibunaga mbirale bibahende ngaru mo yalu pialu ibuni ti babe berelolebira. Ani bialu tigua ibunaga tingini nalu ibu irame do mundu lai helolebira.
REV 17:17 Ogoninaga tigua mandagi howa bilobi tinaga haru holene hongo nogo tara biagohondo milobi Ngode Datagaliwabehanda ibunaga bi mana lo wiyago henene lola helo lowa ibugua tinaga bu miniha bua holene mo helaya.
REV 17:18 Ai wali í̠na handarigo ibu tano mini lene timbuni mbira dindi bibahendenaga kini karu ibugua haru hai haga kago handarigoni, lalu langiya.
REV 18:1 Ani langiyagola handalu hewaria dahuliyali mende dahuliya andagaha howa dalialu hearia handaru. Ibu haru holene hongo timbuniore yu howa ibunaga wá holeneme dindi bibahendeore wá hagimbu biya.
REV 18:2 Ibugua bi dalimu laraga halu lalu, Podo ibira haya. Babilono mini lene timbuni biago podo ibira hayaore. Ani biyagoriani áyu dama damene tara tara koore karu ibuha haame ho ka. Ega ko bibahende ta nabi ogoriani biru nga.
REV 18:3 Ani bidagoni wali agali dindi tara tarani bu hearume ibunaga waini iba nalu hene. Waini iba hongohe ogoni wali agalime dimagoli tara halu kayu yulenaga wini. Dindini kinirume ibu baba kayu yaga bialu haya. Ibunaga dimagoli gibiore holeneme dindini biyanaya biaga agaliru tigua tini mo homogo haya, lalu layago hale haru.
REV 18:4 Ogoni hondowa hale halu hewaria bi mende dahuliya andaga howa lalu, I̱naga wali agaliru-o tagira ibidaba. Tígua ibunaga ko bulene ngagoha nahe ibunaga pani nolene ngagoha nahe ibuha howa tagira ibai hadaba.
REV 18:5 Irane ibunaga mana ko buleneru wima iri iri bialu hari daliga wia iri haradagua bidago Ngode Datagaliwabehanda ibunaga mana ko bulene uruni embeda nahe mitangi bu ka.
REV 18:6 Ibugua tíhondo biyadagua tígua nde ogonidagua dege bia dai bidaba. Ibugua bibahende biyagonaga halu ki bia dai bidaba. Ibugua waini iba hongohe tí nalimulo manda manda bu wiyagonaga tíguabi ibu nelo waini iba hongo gibiorehe manda manda buwa ibunaga beha to̱lo bereladaba.
REV 18:7 Ibugua ibuninaga wá holenebi dindi dabudabu au lolebe tobahebi mo mogo bu wiyadaguaore tígua ibuhondo tandaga nolenebi genda holenebi mo midaba. Irane ibugua ibunihondo laabo halu lalu, I̱ kuini wali bayale bedo. I̱ wali dalo ndo bedo. I̱ genda holene mbira manda nabiore birulebero, lalu beda.
REV 18:8 Ibugua o layadagoninaga horo mbiru hanguni bolene hongoherume ibu bolebira. Bolene hongo uruni warago tara tarabi genda holenebi hina gari polenebi nga. Ogoni ibu dabagane Anduane Homogo Ngode Datagaliwabe ibu hongo gibiorehe ka. Ani bidagonaga irame Babilono dai holebira, layago hale haru.
REV 18:9 Dindi bibahendenaga kini ibu baba kayu yulenebi dimagoli holenebi bialu hayarume Babilono daragonaga hagua hungu biraru hondowa dugu yiyi lalu bulebira.
REV 18:10 Tigua ibu heba tandaga namaga holene gi howa ti amura kaundiaha holebira. Ani howa tigua lalu, Daraore abida dara gibiore auda. Babilono tano mini lene timbuni gibiore hayago bame emene tigi mbira tomo dawa duguabehe hanguni pani miyada, lalu laga.
REV 18:11 Dindini biyinaya biaga agali hearumebi Babilono mitangi bialu hame lowa dugu biagago irane tinaga dabudabu yolo mulene wiaru henge nawiore wiya.
REV 18:12 Tinaga ngolo silibabi to̱le̱ tara tara baya gibiorebi mbirale mini pealo muni dewa miagarubi tinaga aga labolabo baya tara tararu peleorebi tagalitayabi darama biale bialehebi ira tara tararu ngabibi nogo tara timbuni mini elebeninaga ne gayaneme wabinirubi ira yolo timbuni miagarubi ege to̱le̱ boronosime wabinirubi aeaneme wabinirubi to̱le̱ tara mini mabolome wabinirubi
REV 18:13 tomo mo dende bia hagane mini sinimonobi sibaisibi mondoro palena alebi mbirale hagua ngabilo delagane mini inisenesibi ira mbiranaga ibane mini muwebi mbirale ira wagaya ngabiorerubi nolenenaga waini ibarubi welirubi balawarubi widirubi nogo bulumagarubi sibirubi hosirubi nogo hosirume gili lagane garo mini karisirubi garabaya biabe ale biagarubi wali agalirubi uruni bibahendeore yolo namibeheyagola biyinaya biaga biarume hame lowa dugu biya.
REV 18:14 Biyinaya biaga urunime Babilonohondo lalu, Mbirale dabudabu bibahende í̠na wua harigo damene ereba hai haya. Ani bialu í̠naga homogo holene damene biarubi yári yári biarubi pu ereba hayago lone handa walia naholebere, laga ka.
REV 18:15 Dindini biyinaya biaga agali tano ogoriani howa biyinaya bialu homogo hayarume ibu heba tandaga namaga holene gi howa amura kaundiaha holebira. Ani howa tigua hame lowa dugu bialu
REV 18:16 lalu, Tano mini lene ogoni daraore abida dara gibiore auda. Ibu aga labolabo baya tara tararu peleorebi tagalitayaorebi darama biale bialehebi karulalu yári dewa ngolome wabinirubi to̱le̱ tara tara muni dewame minirubi mbirale mini pealo muni dewame minirubi ibunini biame haya.
REV 18:17 Ani buwa emene tigi mbira tomo dawalu duguabehe hanguni homogo holene uruni bibahende wahaiore haya, lalu laya. Iba sibi hondo haga hearubi wali agali yolo buwa berearubi iba sibi yaga hearubi iba sibini howa yolo biabe biaga bibahende hearubi amura kaundia howa
REV 18:18 ibu daragonaga hagua hungu biyaru hondowa bi hongo howa laraga halu lalu, Tano mini lene timbuni ogonibi mende nawiore, laya.
REV 18:19 Ani lalu tinaga haguaneni be abalu dugua ba daga halu ibu hame lowa dugu bialu lalu, Tano mini lene timbuni ogoni daraore abida dara gibiore auda. Iba sibi anduane iba sibi biabe solowarani bialu karu tano ogoriani bu wiarume ti mo homogo haya. Ani buwa emene tigi mbira tomo dawalu duguabehe hanguni homogo holene uruni bibahendeore wahaiore haya, laya.
REV 18:20 Babilono bo mundu layagonaga dahuliya andaga kamirume turu hadaba. Ngode Datagaliwabenaga wali agalirumebi abosolorumebi Ngode Datagaliwabe mana latagi hagarumebi turu hai hadaba. Irane tíhondo biaga biago ibu Ngode Datagaliwabehanda pani tiga tiga mulene wiadagua miya.
REV 18:21 Dahuliyali hongo gibiheore mbirame to̱le̱ timbuni mo yaraga howa iba solowaraha bape halu lalu, O bape harogonidagua tano mini lene timbuni Babilono biagobi bope halu mani lone handabe naheore holebira.
REV 18:22 Babilono í̠ha ga̱wa̱ ale timbuni laraligobi wali agalime bi laraligobi pilipe laraligobi mbelo biguli laraligobi mani lone hale naholebiraore. Biabe tara tara bu manda buwa biagaru í̠ha karia mani lone nahondolebiraore. Ani bialu balawa wabiaganaga widi lini dambiagane to̱le̱me bi larago mani lone hale naholebiraore.
REV 18:23 Í̠ha lamu halenaga wá karia mani lone nahondolebiraore. Ani bialu wandarirubi wandari uruni dabu biagarubi tigua dabu bialu howa bi larago mani lone nahale holebiraore. Dindi bibahendeni biyinaya biaga karu aria í̠naga biyinaya biaga agalirume ti bolangua howa hongoheore hea. Ani biago í̠na ke̱ howa gamu gamu tara tara birigome wali agali dindi bibahendeni hearu mo hondo hari, lalu layago hale haru.
REV 18:24 Ngode Datagaliwabe mana latagi haga hearunaga darama Ngode Datagaliwabenaga wali agali hearunaga daramabi dindini howa wali agali bo wahayaru bibahendenaga darama Babilonoha wiaria handa walia hayagonaga Babilono pani miya.
REV 19:1 Ogoni hondowa mani hale halu hewaria bi timbuni wali agali dewaore laradagua bialu dahuliya andagani howa lalu, Pele mulenebi mini lene lolenebi hongo holenebi ina Ngode Datagaliwabenaga ngago ibunaga mini yaraga hama.
REV 19:2 Ibunaga daba ki bulene henenebi tiga tigabi ngagoria ibugua daba ki biaga ka. Ani biaga kago ibugua wali kayu biaga biago ibunaga kayu yuleneme dindini wali agali mo ko halu hayago pani tiga tiga mulene wiadagua miya. Wali ogoni ibugua Ngode Datagaliwabenaga biabe bia haga hearu homelo bayagonaga Ngode Datagaliwabehanda ibuhondo pani miya, laya.
REV 19:3 Ani lowa tigua lone laraga halu lalu, Tano mini lene timbuni biago dayagonaga hagua iraga ha dege bidane iraga ha ho nga. Ani bidagonaga Ngode Datagaliwabenaga mini yaraga hama, lalu laya.
REV 19:4 Ani layagola dahuliyali haru haga pira kirani maria (24) biarubi holenehe maria helene biarubi tigua bulu palu ibira howa Ngode Datagaliwabe ibu ibunaga handame ho biragane dagiani bereagonaga mini yaraga halu lalu, Aniore bilo Ngode Datagaliwabenaga mini yaraga hama, laya.
REV 19:5 Ogoni hale howa hale ha ho dege bialu hewaria bi mbira handame ho biragane dagia wiagoria howa lalu, Ngode Datagaliwabenaga biabe bia haga bibahenderubi wali agali emene timbunibi ibuhondo henene mitangi biaga bibahenderubi iname inanaga Ngode Datagaliwabe mini yaraga hama, layuago hale haru.
REV 19:6 Hale ha ho wiwaria dege wali agali dewalime bi laradagua bialubi iba pora bialu ue laradagua bialubi hari kilikulu laradagua bialubi layuagoha howa tigua lalu, Anduane Homogo inanaga Ngode Datagaliwabe Hongo Haiheore kago ibu Handame Haga Kiniore kagoni. Ani kago iname ibunaga mini yaraga hama.
REV 19:7 Ani bidagonaga iname turu halu ka̱i̱ lowa ibu gibiore kagonaga mini yaraga hama. Nogo Sibi Igini biago dabu bulene tu halu dabu biagagome ibu dabu bilo lowa manda manda bu halu biyadagoni.
REV 19:8 Wandari dabu bule biyagohondo aga labolabo pele dodo nahe demborerebi minigo bu ka, lalu layago hale haru. Aga labolabo ogoni Ngode Datagaliwabenaga wali agalirume mana bayale biniru lalu wini.
REV 19:9 Ogoni hale ho hewagola dahuliyali biagome i̱hondo lalu, Bi o larogo gili bia. Nogo Sibi Igini dabu biragonaga tomo nole ibalimu leneru ti turu ho holene nga, laya. Dahuliyali ogonime ani lowa latago halu lalu, Bi uruni Ngode Datagaliwabenaga bi heneneore nga, lalu langiya.
REV 19:10 Ani langiyagola i̱na ibunaga geha duli hanga halu bulu paluwa ibuhondo lotu lolebiruria ibugua i̱hondo lalu, Ani nabibe. I̱ í̠bi hamene mbaliniru Yasuhanda mana henene mo pani hayago yani ho karubi aria biabe bia haga kogoni. Ani bidogo Ngode Datagaliwabe hangu mitangi bialu lotu lolene nga, laya. Yasuhanda mana henene mo pani hayagome Ngode Datagaliwabe mana latagi haga karu mo mitangi bia haga.
REV 19:11 Ogoni hale howa handalu hewaria dahuliya andaga dugua ho wiagoria nogo hosi pagabua mbira hearia handaru. Nogo hosi ogoriani biralu piagane heago ibu mini Bilinahebi Henenebi hea. Aniyago tiga tiga buleneme ibugua mo daba ki bialubi wai bialubi hagaya.
REV 19:12 Ibunaga de ira hungu ale howa ibunaga haguaneni haru haga manda dewa bu heneya. Ibuni mini mbira gilibu wiago ogoninaga irane ogo aledalo mbiralime manda bibe nahe ibuni hangume manda bida.
REV 19:13 Ibuni aga lu karulo heago darama hirame heya. Ibuni mini wiago Ngode Datagaliwabenaga Bi wia.
REV 19:14 Dahuliya andanaga ami bu hearume aga labolabo pele dodo nahe buwa nogo hosi pagabua dewani biralu ibu piyadagua talima piya.
REV 19:15 Ibunaga ne harigaha howa wai biagane ayu tibu ne gadeleheore mbira tagira ibiragome wali agali dindi tara tarani bu karu bo hana halu wayali holebira. Ani buwa ibugua hongo taraore holene yu howa wali agali biaru haru holebira. Ani bialu Ngode Datagaliwabe Hongo Haiheore kagonaga keba gibi holene gerebi lini pingidagane ege to̱le̱ guabawa uliha howa waini iba ibilo hengedalu pingida tagi holebira.
REV 19:16 Ibunaga aga luninibi ge mbarianenibi mini ogodagua gilibu wia, Kini bibahende karunaga Handame Haga Kinibi anduane homogo bibahende karunaga Anduane Homogoorebi i̱ kogoni, lalu gilibu wiago handaru.
REV 19:17 O handarudagoni hondowa handalu hewaria dahuliyali mbira nini heyu hearia handaru. Heyu howa ibugua ega yagalo yu ibaga bu hearu bibahendehondo bi laraga halu lalu, Ngode Datagaliwabenaga tomo timbuni nolene ngago nole mo mogo bu hole ibidaba.
REV 19:18 Tígua ibuwa kinirunaga tinginibi ami haru haga haguanerunaga tinginibi ami agalirunaga tinginibi nogo hosirunaga tinginibi nogo hosini biralu piagarunaga tinginibi wali agali garabaya biabe ale bia hagarunagabi nabinirunagabi timbunirunagabi emenerunagabi uruni bibahendenaga tingini nole ibidaba, lalu laya.
REV 19:19 Handa dege bialu hewaria nogo tara biagobi dindinaga kinirubi tinaga ami agalirubi mo mogo buwa tigua mbirali nogo hosini biralu piaga biagobi ibunaga amirubi baba wai bulebiya.
REV 19:20 Ani bule biyagola nogo gabua gibi biagobi ibunaga wanakuini howa mana henene ngadagua ndo latagi haga agalime nabiagane ale biyago ibubi minaya. Mana henene ngadagua ndo latagi haga biago ibugua agalime nabiagane ale biyarume nogo gabua gibi biagonaga magihe hayarubi wali agali nogo gabua gibi ogoni ibuni kagobi wabu wiyagohondo bi pupu wiaga hayarubi ti mo hondo haya. Nogo tara ogonibi mana henene ngadagua ndo latagi haga biagobi minayadagoni minuwa ira hungu bialu ege to̱le̱ ale mini salobame da ho wiagoria ti dére minu bape haya.
REV 19:21 Mbirali nogo hosini biralu piaga biagonaga ne harigaha howa wai biagane ayu tibu mbira tagira ibiyagome tinaga ami agaliru bo home lai haya. Ani biyagola ega bibahendeme ibuwa tingini uruni nalu nabe manga haya.
REV 20:1 I̱na ani handa ho dege wuwa handalu hewaria dahuliyali mbira dahuliya andaga howa dalipe hayago handaru. Ibunaga gini dindi uli ko dama dege dariba ho ngagonaga panga duguagane gibi pu seni timbuni hongohebi yalu daliya.
REV 20:2 Ogoni ibu daluwa ibugua abagua ale timbuni puya bambaore winigo ibu mini dama Heyolabe biago minuwa pu seni biagome mali daosini mbirani (1,000) dariba ho helaya.
REV 20:3 Mali daosini mbira (1,000) ogoni napedaha dama ogoni ibugua wali agali dindi tara tarani bu karu mo hondo nahelo lowa dahuliyali biagome dama ogoni dindi uli ko dama dege dariba ho wiaga biagoha minu bape halu panga logo ha anda howa duguabe nahe ndelaheore paya anda haya. Mali daosini mbira (1,000) pedagola dama ogoni ibu tigi mbira hangu tagira pu helolebira.
REV 20:4 Handa ho dege wuwa handalu hewaria haru howa biragane dagiaru handaru. Haru howa biragane dagia urunini berearuhondo mo daba ki bulene hongo miya. Ogoni hondowa wali agali Yasuhanda mana henene latagi hayagobi Ngode Datagaliwabenaga bi manabi tigua lamialu hayagola bo wahayarunaga dinini hearu handaru. Tigua nogo gabua gibi biagobi nogo ogoni ibuni kagobiore wabu wiyagobihondo bi pupu nawini. Nogo gabua gibi ogoninaga magi tinaga wanakuiniyaguabi giniyaguabi namia dege biya. Uruni ti homalu heyu dai bialu ti kini howa Keriso heba mali daosini mbirani (1,000) handame ho haya.
REV 20:5 Wali agali maru homene bibahenderu ti mali daosini mbira (1,000) piai heagola mo heya halu dai bu helaya. O biyadagoni wali agali homayaru pigane mo heya halu heyi layadagoni.
REV 20:6 Wali agali pigane o mo heya halu heyi layadagoniha howa mo heya hamaga hayaru ti mo bayale ho helayagola turu timbuniore ho ka. Ani bidago homagane homa mendeme ti home lolene hongo nawi. Ani bidago ti Ngode Datagaliwabebi Kerisobi libunaga loma binigo mo miaga howa tigua Keriso heba mali daosini mbirani (1,000) handame ho holebira.
REV 20:7 Ai mali daosini mbira (1,000) ogoni piai haragola dama Heyolabe logo ha anda howa garabaya helayago dugua halu yupe holebira.
REV 20:8 Ani biragola ibugua dindi bibahendeni wali agali tara tara ho giligalalo karu mo hondo hole tagira polebira. Dindi bibahende ogoni mini Gogo Magogola nga. Dama Heyolabe ibugua uruni bibahende wai bilo mo mogo bulebira. Mo mogo biragola dewa au lolebe tobahe iba mu emene emene iba solowara angeni ngaligobi holebira.
REV 20:9 Uruni tigua dindi bibahendeha purogo lai halu Ngode Datagaliwabenaga tano ibu gubalini hagane wiagobi ibunaga wali agali tano ogoniha haga bu hearubi ho mabu biai holebira. Ani bu hearia dahuliya andagaha howa ira deaore ibira halu ti do mundu lelaya.
REV 20:10 Ani bialu dama Heyolabe wali agali dindi tara tarani bu hearu mohondo haga biago minuwa ira hungu bialu ege to̱le̱ ale mini saloba heba do kundi bu wiagoria bape haya. O bape hayadagoni nogo tara biagobi mbirali mana henene ngadagua ndo latagi haga biagobi bape hayagoria dege bape haya. Ani biyago ti ogoriani horombe mbiragabi da dege bialu heane da ho wiaabobo holebiraore.
REV 20:11 I̱na ani handa ho dege wuwa handalu hewaria handame ho biragane dagia timbuniore mbira pele wiagobi ogoriani mbirali bereagobi handaru. Ibu heagoria howa dindi bibahendebi hari daligabi pu ereba hai halu lone handabe nahe haya.
REV 20:12 Ani biyagola wali agali timbuni emenerubi ala homayaru handame ho biragane dagia wiago wanakuihayagi heyu hearia handaru. Ani handalu hewaria ogoriani mbuga dewa angala ho wia handaru. Mbuga urunini wali agali homene daibu hearu tini ala biyarunaga gilibu wiadagua mo daba ki biya. Ani buwa mbuga tara mbira haabo holene yu karunaga mini gilibu wiagoria mbuga ogoni angalo wiya.
REV 20:13 Iba solowaraha homayaru ti dai bu haya. Homagane homaha howabi humbirini andagaha howabi homeneru dai bu hai haya. Ani biyagola tini hangu hangume bialu hayadagua mo daba ki biya.
REV 20:14 Ani buwa homaganenagabi humbirini andanagabi ira timbuni da ho wiagoria bape haya. Ira timbuni do ho wiagoria bape hayadagoni homagane homa mende ogoni.
REV 20:15 Wali agali haabo holene yu karunaga mini mbugani gilibu ngaru heba gili bimaga naheru ti ira timbuni da ho wiagoria minu bape haya.
REV 21:1 Uruni bibahende biyago handai howa handalu hewaria hari daliga gahengebi dindi gahengebi wiago handaru. Hari daliga pigane wiyagobi dindi pigane wiyagobi pu ereba halu iba solowarabi ligua piyabe nigua piyabe toba haya.
REV 21:2 Ani biyagola handalu hewaria Tano Loma Bia Hene Yarusaleme gahenge biago dahuliya andaga Ngode Datagaliwabe kagoha howa tagira ibalu daliya. O daliyadagoni wandarime ibu agalini lola hole yári buwa manda manda bialu howa ibiradagua bialu daliya.
REV 21:3 Ani daliagola handame ho biragane dagia wiagoria howa bi mbira dalimu lowa lalu, Ai Ngode Datagaliwabenaga anda wali agali bibahende kagoria ka. Ani bidago Ngode Datagaliwabe ibu ti baba halu ti ibunaga wali agali holebira. Ngode Datagaliwabe ibuni ti baba mandagi halu ibu tinaga Ngode Datagaliwabe holebira.
REV 21:4 Ani bialu ibugua tinaga deni de iba karu domo waholebira. Homolene homabi dara holenebi dugu bulenebi tandaga holenebi nawuleore bira. Mbirale ala tawe wiyaru mo ereba hai haya, lalu laya.
REV 21:5 Ani leagola handalu hewaria mbirali Ngode Datagaliwabenaga handame ho biragane dagia biagoriani bereagome lalu, Ai áyu i̱na mbirale bibahende gahenge wabu aribia haro, lowa ibugua i̱hondobi bi lalu, Bi ogo henene lara manda bialu mini bilinaho habehego gili bia, laya.
REV 21:6 Ani lowa ibugua lalu, Mbirale biaruni biai haya. I̱ ala harugobi mani holeberogobi piganeorebi mahaorebi ko. Mbirali iba noa haragohondo i̱na haabo holene ngiagane iba duguaragoha yolo nabi bame nelo henge mulebero.
REV 21:7 Ani buleberogo wayali hararume bibahende i̱ha howa mo yulebirago ogo. Tinaga Ngode Datagaliwabe i̱ halu tibi nde i̱naga waneigini holebira.
REV 21:8 Ani bulebirago dari karubi ke̱ haga karubi mana ko taraore biaga karubi wali agali homelo bo wahaga karubi wali agali kayu biaga karubi tomia tara tara biaga karubi gime wabiniruhondo bi pupu wiaga karubi ke̱ haga karubi ti bibahende ira hungu bialu ege to̱le̱ ale mini saloba heba da ho wiagoria holebira. Ani bulebiragoni homagane homa mende ogoni, laya.
REV 21:9 Dahuliyali karia ndisi be kariani bolene hongo to̱loyi biaru aria mbiragome i̱ hewaria ibuwa lalu, I̱na Nogo Sibi Igini biagonaga one dabu biyago í̠ walia holiya mba íbu, laya.
REV 21:10 Ani layagola Ngode Datagaliwabe Dinini ibu i̱ha karulo hayagola minime handalu hewaria dahuliyali biago ibugua i̱ hari timbuni weago neneni yalu pu helaya. Ani buwa ibugua Yarusaleme Tano Loma Bia Hene biago dahuliya andaga Ngode Datagaliwabe kagoria howa dalipe halu hearia i̱hondo walia haya.
REV 21:11 Tano ogoriani Ngode Datagaliwabenaga wá taraore holeneme ngiringaralo yalu dalipe halu hea. To̱le̱ muni dewame miagane mini yasababi ngalayi handalehe mbirabi ngiringara laradagua lea.
REV 21:12 Tano ogoni pabe timbuni daliga bu mabubi panga haraba homberiaya (12). Panga haraba homberia (12) uruni dahuliyali homberialime (12) handaya ho hea. Panga haraba urunini Isaraele hameigini homberia (12) biarunaga mini gilibu wia.
REV 21:13 Ani buwa tano ogoni lene leneha panga tebira ni tagira ibiragohayagi tebira mende unurahayagi tebira tebone uyura leneha tebira mane ni paliragonaga leneha halu bia.
REV 21:14 Tano ogoninaga pabe to̱le̱ gene hongohe homberiani (12) bia. To̱le̱ gene ogoriani Nogo Sibi Igini biagonaga abosolo homberiali (12) biarunaga mini gilibu wia.
REV 21:15 Dahuliyali i̱hondo bi layago ibugua tano biagonaga magibi panga biarunaga magibi pabe biagonaga magibi manda bule kanogo mbira ngolome wabini mbirale manda biagane gambe homane luni ale yu hea.
REV 21:16 Tano ogoni yanganaga magibi luninaga magibi ogobi labolaboya. Dahuliyali biagome tano ogoninaga magi manda biagane yiagome magi manda bialu hearia timbu gibiore halu lunagabi aranenagabi daliganagabi magi urubi dege dege kilomida daosini kirani handari kira (2,200) agima haya.
REV 21:17 Dahuliyali biagome pabe biago daliganaga magibi manda bialu hearia mida pira waragariani duria (65) agima haya. Magi iname manda beramalidagua ibugua manda biya.
REV 21:18 Pabe bu mabu biago to̱le̱ mini yasabame wabialu tano ibuni ngolo ngalayi handalehe hangume wabiniya.
REV 21:19 Tano ogoninaga pabe to̱le̱ gene hongohe homberiani (12) to̱le̱ tara tara muni dewa miaganerume yári bume hea. To̱le̱ gene hongohe bia aria to̱le̱ mini uru. Mbirago yasababi mendego sabaiabi tebonego agadebi manego emeralabi
REV 21:20 daunigo onegisibi waraganego kanelianabi kanego to̱le̱ ambuabi mini kosibi halinigo berilibi dinigo tobasabi pinigo kelesedonibi beanego tegosibi hombeanego amedisibi uruni bibahendeni pabe biago bia.
REV 21:21 Panga homberia (12) biaru pealo homberiame (12) wabiniya. Uruni aria mbira mbirago pealo homane mbira mbirame wabiniya. Tano biagonaga hariga piagane wiago ngolo ibuni ngalayi handalehe hangume wabiniya.
REV 21:22 Tano o handarudagonioreha Ngode Datagaliwabenaga anda mbira naheoreya. Ani naheyago irane tano ogoninaga anda Anduane Homogo Ngode Datagaliwabe Hongo Haiheore kagobi Nogo Sibi Igini biagobi libuni haame ka.
REV 21:23 Ngode Datagaliwabenaga wá taraore holene kagome wá haba halubi Nogo Sibi Igini biago ibuni tano ogoninaga lamu halebi kago kagola tano ogoriani nibi egebi dolene henge nawiya.
REV 21:24 Anidagua bidagome wali agali dindi bibahendeni karume tano ogoninaga wá holeneha ibaga bu holebira. Ibaga bu howa dindinaga kinirume tinaga homogo holene mbiraleru yalu anda ibulebira.
REV 21:25 Tano ogoninaga panga biaru horo bibahendengi paya nabi dugua ho wiaabo holebira. Dugua ho wiaabo holebirago irane tano ogoriani mbi lolene nawigome ani wulebira.
REV 21:26 Wali agali dindi tara tarani bu karu tinaga baya tara holenebi homogo holenebi tano ogoniha yalu anda ibulebira.
REV 21:27 Ani bia bulebirago mbirale dodoherubi mbirali mana tagabi ngaru biaga kagobi ke̱ haga kagobi tano ogoriani anda naibulebiraore. Haabo holene yu karunaga mini Nogo Sibi Igini biagonaga mbuga ngagoriani gili buwi karu ti dege ogoriani anda ibulebira.
REV 22:1 Uruni walia howa dahuliyali biagome lone walia halu haabo holene ngiagane iba ngalayi ngiringara laradaguabi mbira Ngode Datagaliwabebi Nogo Sibi Igini biagobinaga handame ho biragane dagia ngagoria howa tagira ibalu
REV 22:2 tano ogoninaga hama hanunini pialu heago walia haya. Haabo holene ngiagane iba biago ange mendeha mendehabi haabo holene ngiagane ira hea. Ira uruninaga lini mali mbiranaga ege mbira mbirani hombe (12) halu daga biagaya. Aniyago ira uruni yunirume wali agali dindi tara tarani bu karu mo dabi hagane hea.
REV 22:3 Mbirale bibahende Ngode Datagaliwabehanda ha hene karubi ngarubi tano ogoriani nahondolebiraore. Ngode Datagaliwabebi Nogo Sibi Igini biagobi libunaga handame ho biragane dagia wiago tano ogoriani wiragola Ngode Datagaliwabenaga biabe bia haga karume ibuhondo mitangi bialu lotu lolebira.
REV 22:4 Wali agali uruni tinaga wanakuini Ngode Datagaliwabenaga mini gilibi howa tigua ibunaga dengui hondolebira.
REV 22:5 Anduane Homogo Ngode Datagaliwabe ibu tinaga wá holene holebirago mbi lalu aruma holene nawiragola tigua lamu hale delolenebi ni dolenebi nawulebira. Ani biragola wali agali uruni kinime haru hagadagua tigua ogonibi howa ha ho wia dege bidane ha ho wiaabobo holebira.
REV 22:6 Dahuliyali biagome i̱hondo lalu, Bi uruni henene lara manda buwa mini dunubia ho holene nga. Ani bidago Anduane Homogo Ngode Datagaliwabe ibunaga mana latagi haga biaruhondo ibu Dinini miaga kago ibugua ibunaga biabe bia haga karu mbirale mbira áyu dege bulebiragonaga walia hole ibunaga dahuliyali mbira, Pu, laya, lalu laya.
REV 22:7 Yasuhanda lalu, Ai hale ha. I̱ áyu ogoni dege ibulebero. Ani ibuleberogo wali agali mbuga ogoniha mbirale mani bulebiragonaga gilibu ngarume laradagua bialu karu ti turu ho holene nga, lalu laya.
REV 22:8 I̱ Yone kogo i̱na mbirale uruni bibahende halebi halu handabi bialu biru. I̱na uruni bibahende halebi hale hai halu handabi handai howa dahuliyali i̱hondo mbirale o walia haga biago ibunaga geha duli hanga halu bulu paluwa ibuhondo mitangi bialu lotu lolebiruria
REV 22:9 ibugua i̱hondo lalu, Ani nabibe. I̱ í̠bi í̠ hamene mbalini Ngode Datagaliwabe mana latagi haga biarubi wali agali bibahende mbuga ogoriani bi mana gilibu ngarume laradagua bialu karubi ina mandagi howa biabe bia haga kogoni. Ani bidogo í̠na Ngode Datagaliwabe hangu mitangi bialu lotu lolene nga, lalu laya.
REV 22:10 Ani lowa ibugua la dege bialu lalu, Mbuga ogoniha mani bulebiragonaga bi lo ngaru bulene horo kaware harago wia do nahabe.
REV 22:11 Anigo mbirali ko bialu kago ibu ko bialu haabo holene nga. Mbirali ibunaga miniha ko ngubiru mitangi biaga kago ibunaga miniha ko ngubi uruni mitangi bialu haabo holene nga. Mbirali bayale bialu kago ibu bayale bialu haabo holene nga. Ai mbirali Ngode Datagaliwabehondo loma bia hene kago ibu ibu loma bia ho wiaabo holene nga, lalu laya.
REV 22:12 Ani leagola Yasuhanda lalu, Ai hale ha. I̱ áyu ogoni dege ibulebero. Ibalu wali agali ti hangu hangume biabe biyadagua emenaru mule yalu ibulebero.
REV 22:13 I̱ ala harugobi mani holeberogobi piganeorebi mahaorebi ko, lalu laya.
REV 22:14 Wali agali tinaga aga labolaboru dodo nahelo wayawaya biaga karume ti haabo holene ngiagane iranaga lini nolebi tano biagonaga panga haraba ngagoria bolangua halu anda polebi hongo yu ka. Ani bidaru ti turu ho holene nga.
REV 22:15 Anigo tano ogoni tagirahayagi wali agali mana ko taraore biagarubi tomia tara tara biagarubi wali agali kayu biagarubi wali agali homelo bo wahagarubi gime wabiniruhondo bi pupu wiagarubi ke̱ halu bime lalubi biagaru ti tagiraha ka.
REV 22:16 Yasuhanda lalu, I̱ Yasu i̱na i̱naga dahuliyali mbirame mana uruni i̱naga hameigini tano kariani kamiruhondo lope hole pu, laru. I̱ Debidinaga aguanene kogoni. I̱ yakundi egabi naledaha huririle tagira ibaganego kogoni, lalu laya.
REV 22:17 Ngode Datagaliwabe Dinini ibubi Nogo Sibi Igini biagonaga wandari dabu bulebiyagobi libugua lalu, Íbu, lara. Wali agali bibahende bi uruni hale hararumebi, Íbu, lolene nga. Mbirali iba noa ho kego íbu. Haabo holene ngiagane iba Ngode Datagaliwabehanda bame ngirago noa ho kagome nole ibulene nga.
REV 22:18 Ai i̱ Yonego i̱na mbirale mani bulebirarunaga mbiwia halu mbuga ogoriani gilibu ngago wali agali hale halu biraruhondo bi ogo hongo howa lowia haro. Bi ogoni lo ngagoha mbiralime latago hayagua ibuhondo Ngode Datagaliwabehanda bolene hongo mbuga ogoha lo ngadagua pani miatago holebira.
REV 22:19 Ani bialu bi ogoni mbiwia halu lowini ngarunaga mbiralime mbira mo wahayagua haabo holene ngiagane iranaga linibi Tano Loma Bia Hene biagobi mbuga ogoha lo ngadagua Ngode Datagaliwabehanda ogoni ibunaga mbirale mulene talebu winigo mo waholebira.
REV 22:20 Bi uruni bibahende ngaru, Heneneore nga, lalu walia haga kago ibugua lalu, E̱ heneneore i̱ áyu ogoni dege ibulebero, laya. Aniore bialu Anduane Homogo Yasu íbu.
REV 22:21 Anduane Homogo Yasunaga biamogo bia holene tí bibahendeha helo hamelo ko, lalu Yonehanda gili bini.
