﻿Luk.
3.
Lo matamfaim baba tikii sangful ma e lim ke Sisa Taiberius e ta king kere fan Rom, lo fam biing Ponsus Pailat e ta gawana ke prowins Judia, Erot ka ta gawana ke prowins Galili, ma tualik singe Filip ka ta gawana ke e u e prowins, Ituria ma Trakonitis, ma Laisanias ka ta gawana ke prowins Abilien, 
lo bala fam biing a Anas ma Kaiyafas ru ta um paklure fam pris, sunwar ke Deo e fespuek talo Jon sikow e Jekaraiya ulo male e tek ti kaltu. 
I e fes fawet ulo mara male liflifti e dan Jodan ka sesngeni lala e sunwar tifre tongge ini riu sangikis ma ri ku kepe e amfagu tarawen una fanangsi ini ri sam iksi e balbalri, usi Deo eu sangintafngi e fan tubiil keri. 
Profet Aisaiya e sam seti e sunwar Deo e peteng ini tifi aregii: “Ulo male e tek ti kaltu, angkiimkiim a neng e tautau aregii, ‘Fagati e sal ke Taufi, Fariisu e fan sal kia. 
Ofo e mara pimpa-i, ilufufu e pakpaklunmale lamlam ma pakpaklunmale balik, ku riis. Fan sal e guut e samusu riis, fan sal e soksok e samusu bilimlim. 
Ma tongge nano ri ku pari e faliunge Deo eu gow lo ri.’” 
Tongge fuunfuun ri puek use Jon una sa kepe e amfagu tarawen ma i ka war singri aregii, “Gam na fan siksikwan sii! Se e sau fate gam una finngeni e singmat na balasak ke Deo a ka bala puek? 
Gam samusu gow e konona fan sinang una fanangsi ini gam sam sangikis. Ma gam ku mele tofnge una war sing gam tibom ini ‘Abra-am e ta tamrer.’ Ya peteng tikin tif gam aregii, anwarow tinglo fatfat gii, Deo e fasi una famtet re berberat ke Abra-am. 
Palnget e sam ta ilo warow e fang kalut ma mara kalut a ri ka tibi firfira kausi, riu pokufuf ri una bas ilo bala iif.” 
Tongge a ri ka gatmo, “Ma le ku ta aiya, sa sekit kemem samusu gow?” 
I ka koso, “Se gii ka mel e e u e kolos kia, i e samusu tow e neng tife se gii ka tek ti kolos kia ma se a ka mel e fan tuan aiya, i e samusu gorot aiya ming.” 
Fa a ri ka ta tongge na kepkep mani, ri sa la ming una sa kepe e amfagu tarawen, ri ka gatmo, “Titsa, kemem samusu gow e sa?” 
I ka peteng tifri, “Gam u tibi awit wiyat ine e fis e mani gapman e a-uu lo gam una faran ini.” 
Kala galun soldia ri ka gatmo, “Ma kemem samusu gow e sa?” I ka koso, “Mele tungni e tikas una fen fofoes i gam ine ti mani ma mele oteng gurgurum ini una tatfeni e mani kia. Gam samusu balamas use sese fiimfiil ri fiil gam ini.” 
Tongge ri nene-i e Mesaiya, iya ri ka sangfuunfuun ulo balbalri ini Jon e ta i, tam e tam. 
Jon ka peteng tifri nano aregii, “Ya gu tarawen i gam ine dan. Safle e mu mel e ti kaltu e mu puek, rawas kia e kulfi e rawas kiang. Ya tibi ta konona kaltu e fasi ini yau pikii e amfinau lo su kia. I eu gu tarawen i gam ine Tangwa Riis ma iif. 
I eu puek are kaltu e puse lo saol una tii ine fam piinpiin tinglo fan wit, ma i ku sartiim ine fan wit ku touftiim iri ilo felun wit kia, safle fam piin eu bas ini lo iif e tibi metmet.” 
Ma Jon ka farawasnge ri ine mara warwar ma fabenge, ma ka sesngeni e konona sunwar tifri. 
Safle biing Jon e war na mata e gawana Erot, le i e sam tili e Erodias wok ke tualik, tura fan mok saksak ming i e sam gow lo, 
Erot e gow e neng e mok saksak ming ulo poktow e fan sinang saksak kia; i e towfu e Jon ulo felun rerek. 
Biing tongge ri kepkepe e amfagu tarawen, Yesus ming e kepe e amfagu tarawen. Ma pansumbiing i e nining, balambat e ipiik 
ma Tangwa Riis ka pu talo are anman e par are ambal. Ma neng e angkiimkiim ka tau tinglo balambat aregii, “O na Sikuang ya bur o tikin. Balang e gasgas lo o.” 
Gii Yesus e sam ngo are e tuul e sangful na matamfaim kia ma ka tofngeni e fam faim kia. I e ta tamat gii ri ka peteng ini i e ta sikow e Josef. Josef e ta sikow tamat e Eli, 
Eli sikow e Metat, Metat sikow e Liwai, Liwai sikow e Melki, Melki sikow e Janai, Janai sikow e Josef, 
Josef sikow e Matatias, Matatias sikow e Amos, Amos sikow e Naum, Naum sikow e Esli, Esli sikow e Nagai, 
Nagai sikow e Ma-at, Ma-at sikow e Matatias, Matatias sikow e Semein, Semein sikow e Josek, Josek sikow e Joda, 
Joda sikow e Joanan, Joanan sikow e Resa, Resa sikow e Serubabel, Serubabel sikow e Sialtiel, Sialtiel sikow e Neri, 
Neri sikow e Melki, Melki sikow e Adi, Adi sikow e Kosam, Kosam sikow e Elmadam, Elmadam sikow e Er, 
Er sikow e Josua, Josua sikow e Elieisa, Elieisa sikow e Jorim, Jorim sikow e Matat, Matat sikow e Liwai, 
Liwai sikow e Simion, Simion sikow e Juda, Juda sikow e Josef, Josef sikow e Jonam, Jonam sikow e Eliakim, 
Eliakim sikow e Melia Melia sikow e Mena, Mena sikow e Matata, Matata sikow e Neiten, Neiten sikow e Dewit, 
Dewit sikow e Jesi, Jesi sikow e Obet, Obet sikow e Boas, Boas sikow e Salmon, Salmon sikow e Nason, 
Nason sikow e Aminadap, Aminadap sikow e Ram, Ram sikow e Esron, Esron sikow e Peres, Peres sikow e Juda, 
Juda sikow e Jekop, Jekop sikow e Aisak, Aisak sikow e Abra-am, Abra-am sikow e Tera, Tera sikow e Naor, 
Naor sikow e Seruk, Seruk sikow e Re-u, Re-u sikow e Pelek, Pelek sikow e Eber, Eber sikow e Sela, 
Sela sikow e Kainen, Kainen sikow e Arfakat, Arfakat sikow e Sem, Sem sikow e Noa, Noa sikow e Lamek, 
Lamek sikow e Metusela, Metusela sikow e Enok, Enok sikow e Jaret, Jaret sikow e Ma-alalel, Ma-alalel sikow e Kenen, 
Kenen sikow e Enos, Enos sikow e Set, Set sikow e Adam, ma Adam e ta sikow tamat e Deo. 
