GEN 1:1 सुरूवात दा परमेश्वर आकाश अदिक पृथ्‍वी इंद रचना माळदुन.
GEN 1:2 पृथ्‍वी बेकार अदिक सुनसान बिदकु ईरोद, अदिक गहरा नीर इन म्‍याकुच अंधार ईरोद; अदिक परमेश्वर उन आत्मा नीर इन म्‍याकुच वयाळतोगोद.
GEN 1:3 याग परमेश्वर अंदुन, “ऊजोळ आगेग,” रा ऊजोळ आगेत.
GEN 1:4 अदिक परमेश्वर ऊजोळ इक नोळदुन कि वळ्‍लीद आद; अदिक परमेश्वर ऊजोळ इक अंधार टु अलग माळदुन.
GEN 1:5 अदिक परमेश्वर ऊजुळ इक हागुल अदिक अंधार इक ईळ्‍ल्‍क अंदुन. अदिक द्‍यावगा आत बाक व्‍हातुर आत. ई प्रकार पयला दिन आगेत.
GEN 1:6 बाक परमेश्वर अंदुन, “नीर इन बीच दा ऊंद ईत्‍ता अंतर आगुल कि नीर येढ्‍ढ भाग आगेगुल.”
GEN 1:7 आग परमेश्वर ऊंद अंतर माळकु अदुर ल्‍यालमागोळोद नीर अदिक अदुर म्‍याकुच इन नीर इक अलग अलग माळदुन; अदिक हांग अच आत.
GEN 1:8 अदिक परमेश्वर आ अंतर इक आकाश अंदुन. बाक द्‍यावगा आत बाक व्‍हातुर आत. ई प्रकार दुसरा दिन आत.
GEN 1:9 बाक परमेश्वर अंदुन, “आकाश इन ल्‍यालमागोळोद नीर ऊंद जागा दा जमा आगेगुल अदिक वळ्गींद जागा कांळ्‍सुल,” अदिक हांग अच आत.
GEN 1:10 परमेश्वर वळ्गींद जागा अक पृथ्‍वी अंदुन, बाक जो नीर जमा आत अदरी आव समुद्र अंदुन: अदिक बाक परमेश्वर नोळदुन कि वळ्‍लीद आद.
GEN 1:11 बाक परमेश्वर अंदुन, “पृथ्‍वी टु हिवरा कचरा, अदिक बींजावाळा श्‍याणेव श्‍याणेव मार्र, अदिक काय कोळावाळा मार्र भी यदुरव बींजा अऊर दा टु ऊंद ऊंद इन जात इन अनुसार आद, पृथ्‍वी मा जगसुल,” अदिक हांग अच आद.
GEN 1:12 ई प्रकार पृथ्‍वी टु हिवरा कचरा, अदिक श्‍याणेव श्‍याणेव मार्र, यदुर दा तान तान जात इन अनुसार बींजा ईरतद, अदिक काय कोळावाळा मार्र यदुरव बींजा ऊंद ऊंद जात इन अनुसार अऊर दा ईरताव जगसुल: अदिक परमेश्वर नोळदुन कि वळ्‍लीद आद.
GEN 1:13 अदिक द्‍यावगा आत अदिक बाक व्‍हातुर आत. ई प्रकार तीसरा दिन आगेत.
GEN 1:14 बाक परमेश्वर अंदुन, “दिन इक ईळ्‍ल्‍क टु अलग माळोर साटी आकाश इन अंतर दा ज्‍योतीगोळ आगुल; अदिक अव चिन्हगोळ, अदिक नियत समयगोळ अदिक दिनगोळ, अदिक वर्षगोळ कारण आगुल;
GEN 1:15 अदिक अव ज्‍योतीगोळ आकाश इन अंतर दा पृथ्‍वी मा ऊजोळ कोळावाळा भी ठहरूसुल,” अदिक हांग अच आत.
GEN 1:16 आग परमेश्वर येढ्‍ढ धोड्‍डेव ज्‍योतीगोळ माळदुन; अदुर दा टु धोळ्‍द ज्योति इक हागुल दा प्रभुता माळोरसाटी अदिक श्‍याण ज्योति इक ईळ्‍ल्‍क दा प्रभुता माळोरसाटी माळदुन; अदिक तारागोळ इक भी माळदुन.
GEN 1:17 परमेश्वर अवरी आकाश इन अंतर मा इदुरसाटी ईटदुन कि अव पृथ्‍वी मा ऊजोळ कोळुल,
GEN 1:18 यतिकी हागुल अदिक ईळ्‍ल्‍क मा प्रभुता माळुल, अदिक ऊजुळ इक अंधकार से अलग माळुल: अदिक परमेश्वर नोळदुन कि वळ्लीद आद.
GEN 1:19 अदिक द्‍यावगा आत बाक व्‍हातुर आत. ई प्रकार चौथा दिन आगेत.
GEN 1:20 बाक परमेश्वर अंदुन, “नीर जीत्‍ता प्राणीगोळ से हापाळ अच तुम्‍मेगुल, अदिक पक्षी पृथ्‍वी इन म्‍याकुच आकाश इन अंतर मा उळुसुल.”
GEN 1:21 इदुरसाटी परमेश्वर जाती जाती इन धोळ धोळ नीर दाकळव जन्‍तुगोळ्‍द, अदिक आ सप्‍पा जीत्‍ता प्राणीगोळव भी रचना माळदुन जो नळुताव वयाळताव अऊर देल नीर हापाळ अच तुम्‍मेत, अदिक ऊंद ऊंद जाती इन ऊळुसावाळा पक्षीगोळ्द भी रचना माळदुन: अदिक परमेश्वर नोळदुन कि वळ्‍लीद आद.
GEN 1:22 अदिक परमेश्वर ईद अनकु अवरी आशीर्वाद कोट्‍टुन, “वाळुसतेला होगी, अदिक समुद्र अन नीर दा तुम्‍मेगी, अदिक पक्षी पृथ्‍वी मा वाळुसुल.”
GEN 1:23 अदिक द्यावगा आत बाक व्‍हातुर आत. ई प्रकार पाचवा दिन आगेत.
GEN 1:24 बाक परमेश्वर अंदुन, “पृथ्‍वी माकळव ऊंद ऊंद जाती इन जीत्‍ता प्राणी, मतलब घरेलु पशु, अदिक रांगसावाळा किळा, अदिक पृथ्‍वी इन वनपशु, जाती जाती इन वन-पशुगोळी, जाती जाती इन अनुसार पैदा आगुल,” अदिक हांग अच आत.
GEN 1:25 ई प्रकार परमेश्वर पृथ्‍वी इन जाती जाती इन वन-पशुगोळी, अदिक जाती जाती इन जमीन मा सप्‍पा रांगसावाळा किळागोळी माळदुन: अदिक परमेश्वर नोळदुन कि वळ्‍लीद आद.
GEN 1:26 बाक परमेश्वर अंदुन, “नाव मंळसा अक तान स्‍वरूप इन अनुसार तान समानता दा माळेव; अदिक अव समुद्र दाकळव मेनगोळ, अदिक आकाश इन पक्षीगोळ, अदिक मान्‍यागोळोव पशुगोळ, अदिक पुरा पृथ्‍वी मा, अदिक सप्‍पा रांगसावाळा किळागोळ मा जो पृथ्‍वी मा रांगस्‍ताव, अधिकार ईटी.”
GEN 1:27 आग परमेश्वर मंळसा अक तान स्‍वरूप इन अनुसार पैदा माळदुन, तांद अच स्‍वरूप इन अनुसार परमेश्वर आऊक पैदा माळदुन; गंळ्स अदिक आर्त माळकु आव मंळसागोळ्‍द रचना माळदुन.
GEN 1:28 अदिक परमेश्वर आंदरी आशीर्वाद कोट्‍टुन, अदिक आंदुर से अंदुन, “वाळुसी, अदिक पृथ्‍वी मा तुम्‍मेगी, अदिक अदरी तान अधिकार दा माळकोमी; अदिक समुद्र दाकळव मेनगोळ, अदिक आकाश इन पक्षीगोळ, अदिक पृथ्‍वी मा रांगसावाळा सप्‍पा जन्‍तुगोळ मा अधिकार ईटी.”
GEN 1:29 बाक परमेश्वर आंदुर से अंदुन, “केळी यास बींजावाळा श्‍याणेव श्‍याणेव मार्र पुरा पृथ्‍वी इन म्‍याकुच आव अदिक यास मार्रगोळ दा बींजावाला काय ईरताव, अव सप्‍पा ना नीमी कोटबुट्टीन; अव नीम भोजन इन साटी हूँ.
GEN 1:30 अदिक यास पृथ्‍वी इन पशु, अदिक आकाश इन पक्षी, अदिक पृथ्‍वी मा रांगसावाळा किळागोळ आव, अऊर दा जीवन इन प्राण आद, आ सप्‍पा अक तीनोर साटी ना सप्‍पा हिवरा हिवरा श्‍याणेव श्‍याणेव मार्र कोटीन,” अदिक हांग अच आत.
GEN 1:31 आग परमेश्वर जो येनारा माळीदुन सप्‍पा अक नोळदुन, कि अद हापाळ अच वळ्‍लीद आद, द्‍यावगा आत बाक व्‍हातुर आत. ई प्रकार आरवा दिन आगेत.
GEN 2:1 ई प्रकार आकाश अदिक पृथ्‍वी अदिक जो येनारा अदुर्दा आद अदुर्द रचना पुरा आत.
GEN 2:2 अदिक परमेश्वर तान क्‍याल्‍सा यदरी आव माळतोगोन सातवा दिशी पुरा माळदुन, अदिक आव तान माळदव पुरा क्‍याल्‍सागोळ से सातवा दिशी आराम माळदुन.
GEN 2:3 अदिक परमेश्वर सातवा दिशी इक आशीष कोट्‍टुन अदिक पवित्र ठहरूसदुन; यतिकी अदुर्दा आव जगत इन रचना अन तान सप्‍पा क्‍याल्‍सा देल आराम ताकोंडुन.
GEN 2:4 आकाश अदिक पृथ्‍वी इन रचना अन्‍द वृत्‍तान्‍त ईद आद कि याग अव उत्‍पन्‍न आदव मतलब या दिशी यहोवा परमेश्वर पृथ्‍वी अदिक आकाश इक माळदुन:
GEN 2:5 आग मैदान इन यातोदु पौधा जमीन मा ईला ईरोद, न मैदान इन यातोदु श्‍याण मार्र उगुसकु ईरोद, यतिकी यहोवा परमेश्वर पृथ्‍वी मा नीर ईला बरसुसीदुन, अदिक जमीन मा खेती माळोरसाटी याऊ मंळसा भी ईला ईरोन;
GEN 2:6 तरी भी कोहरा पृथ्‍वी टु येळतोगोद यदुर देल पुरा जमीन हस आगतोगोद.
GEN 2:7 आग यहोवा परमेश्वर मंळसा अक जमीन इन मुण्‍ण देल माळदुन, अदिक आऊन मुग्ग दा जीवन इन श्‍वास ऊरदुन; अदिक मंळसा जित्ता प्राणी आगेदुन.
GEN 2:8 अदिक यहोवा परमेश्वर पूर्व इन दी अदन दा ऊंद वाटीका हचदुन, अदिक अल मंळसा अक यारी आव माळीदुन, ईट बुट्‍टुन.
GEN 2:9 अदिक यहोवा परमेश्वर जमीन टु सप्‍पा प्रकार इन मार्र, जो नोळदुर दा मन मोहक अदिक अऊर काय तीनदुर दा वळ्‍लेव आव, हचदुन, अदिक बगीचा अन बीच दा जीवन इन मार्र इक अदिक भला अदिक बुरा अन ग्यान इन मार्र भी हचदुन.
GEN 2:10 आ वाटीका अक हस माळोरसाटी ऊंद महा गांगा अदन टु होळ्‍त अदिक अल टु मुंद वाळुसकु नाक धारागोळ दा वाटसेत.
GEN 2:11 पयला धारा अन हेसुर पीशोन ईरोद; ईद अदा हुन जो हवीला हेसुर इन पुरा द्‍याश इक येल व्‍हान्‍ना सीकतद, घेरस्‍कु आद.
GEN 2:12 आ द्‍याश इन व्‍हान्‍ना वळ्‍लीद ईरतद; अल मोती अदिक सुलैमानी कल्ल भी सीकताव.
GEN 2:13 दुसरा गांगा अन्द हेसुर गीहोन आद; ईद अदा हुन जो कूश इन पुरा द्‍याश इक घेरस्‍कु आद.
GEN 2:14 अदिक तीसरा गांगा अन्द हेसुर हिद्देकेल आद; ईद अदा हुन जो अश्शूर इन पूर्व इन दी वाहुसतद. अदिक चौथा गांगा अन्द हेसुर फरात आद.
GEN 2:15 आग यहोवा परमेश्वर मंळसा अक हुळकु अदन इन वाटीका दा ईट बुट्‍टुन, कि आव अल क्‍याल्‍सा माळुल अदिक आ वाटीका अन्द रक्षा माळुल.
GEN 2:16 अदिक यहोवा परमेश्वर मंळसा अक ईद आग्‍या कोट्‍टुन, “नी वाटीका अन्द सप्‍पा मार्र इन काय बेझीझक आगकु तीन सकत्‍या;
GEN 2:17 लेकीन भला या बुरा अन ग्यान इन जो मार्र आद, अदुर्द काय नी यागलु तिनबाळेत: यतिकी या दिशी नी अदुर्द काय तिनद्या अदा दिशी जरूर सोत्‍या.”
GEN 2:18 बाक यहोवा परमेश्वर अंदुन, “आदम उन आबना ईरोद वळ्‍लीद हैलेच; ना आऊन साटी ऊंद उपयुक्त सहायक माळाईन जो आऊन से मेल तीनुल.”
GEN 2:19 अदिक यहोवा परमेश्वर जमीन दा टु सप्‍पा जाती इन वनपशु अदिक आकाश इन सप्‍पा प्रकार इन पक्षीगोळ इक माळकु आदम उन हात्‍ती तंदुन कि आव नोळुल अदिक अऊर हेसुर येन येन ईटतान; अदिक आदम सप्‍पा जित्ता प्राणीगोळ इक जो जो हेसुर कोट्‍टुन, अदा अऊर हेसुर आगेत.
GEN 2:20 अदिक आदम सप्‍पा मान्‍ना दाकळव पशुगोळ, आकाश इन पक्षीगोळ, अदिक जमीन इन सप्‍पा वनपशु उन हेसुर ईटदुन, लेकीन आदम उक योग्य सहायक सिकीदील.
GEN 2:21 आग यहोवा परमेश्वर आदम उक भारी जप दा हाकबुट्‍टुन, अदिक याग आव मींगेदुन आग आव आऊन ऊंद पसली तेगुकु अदुर जागा दा मास तुमदुन.
GEN 2:22 अदिक यहोवा परमेश्वर आ पसली इक जो आदम दा टु तेगदीदुन, आर्त माळदुन; अदिक आकी आदम उन हात्‍ती तंदुन.
GEN 2:23 आग आदम अंदुन, “ईग ईक नान येलुगोळ दा टु येलु अदिक नान मास दा टु मास हुळ; इदुरसाटी ईकीन हेसुर आर्त आदीत, यतिकी ईक गंळ्स दा टु तेगुकु आग्‍यार.”
GEN 2:24 ई कारण मंळसा तान मोय-आप्प उक बिटकु तान हिंग्स उन सांगुळ ईत्‍तान, अदिक आंदुर येढ्ढु मुंदुर ऊंद तन आदार.
GEN 2:25 आदम अदिक आऊन हिंग्‍स येढ्‍ढु बिना कपळा देल ईरोर, लेकीन नाचोर ईला.
GEN 3:1 यहोवा परमेश्वर यास आळी दाकळव जनावर माळीदुन, आ सब दा हाव चालाक ईरोद; अद हाव आर्त इन से अंत, “येन खरा आद कि परमेश्वर अंदान, ‘नीव ईद बगीचा अन्‍द यातोदु मार्र इन काय तिनबाळेतीर’?”
GEN 3:2 आर्त हाव से अंदुर, “ई बगीचा अन मार्र इन काय नाव तीन सकतेव;
GEN 3:3 लेकीन जो मार्र बगीचा अन बीच दा आद, अदुर काय इन बारा दा परमेश्वर अंदान कि न रा नीव तीनेतीर अदिक न अदरी मुटेतीर, ईला रा सोतोदीर.”
GEN 3:4 आग हाव आर्त से अंत, “नीव सही दा सायतीदिल!
GEN 3:5 बल्‍की परमेश्वर जान्‍सतान कि या दिशी नीव अदुर काय तिंदीर अदा दिशी नीम कण्‍ण खुलसेदव, अदिक नीमी भला बुरा अन्द ग्‍यान सीकीत अदिक नीव परमेश्वर उन घाई आगेदीर.”
GEN 3:6 याग आर्त नोळदुर कि आ मार्र इन काय तीनोर साटी वळ्‍लीद, अदिक नोळदुर दा हापाळ लुभावना, अदिक ग्यान कोळोर साटी चहासा लायक आद; आग आक अदुर काय मुरूकु तिंदुर, अदिक तान गांड उक भी कोट्‍टुर, अदिक आव भी तिंदुन.
GEN 3:7 आग आ येढ्‍ढु मुंदुरव कण्‍णगोळ खुलसेदव, अदिक आंदरी मालुम आत कि आंदुर ऊगळा आर; इदुरसाटी आंदुर अंजीर इन याल्ला जोळ्स जोळ्‍सकु लंगोट माळदुर.
GEN 3:8 आग यहोवा परमेश्वर, जो हागुल इन ठंडा समय बगीचा दा वयाळ तोगोर, आंदरी शब्‍द केळ बत्‍त. आग आदम अदिक आऊन हिंग्‍स बगीचा अन मार्र इन बीच परमेश्वर उन से होचकोंडुर.
GEN 3:9 आग यहोवा परमेश्वर आदम उक कारूकु आऊन से केळदुन, “नी येल आय?”
GEN 3:10 आव अंदुन, “ना नीन शब्‍द बगीचा दा केळकु अंजेदीन, यतिकी ना ऊगळा ईरीन; इदुरसाटी होचकोंडीन.”
GEN 3:11 परमेश्वर अंदुन, “याव नीनी हेळदुन कि नी ऊगळा आय? याता मार्र इन काय ना नीनी तीनली मना माळीदिन, येन नी अदुर काय तींद्‍या?”
GEN 3:12 आदम अंदुन, “याता आर्त इक नी नान सांगुळ ईरली कोट्या आका आ मार्र इन काय नानी कोट्‍टुर, अदिक ना तिंदीन.”
GEN 3:13 आग यहोवा परमेश्वर आ आर्त से अंदुन, “नी ईद येन माळ्‍द?” आर्त अंदुर, “हाव नानी बहकुस बुळ्‍त, आग ना तिंदीन.”
GEN 3:14 आग यहोवा परमेश्वर हाव से अंदुन, “नी जो ईद माळ्‍द इदुरसाटी नी सप्‍पा मान्‍यागोळोव जनावरगोळ, अदिक सप्‍पा आळी दाकळव जनावर से येक्‍कुल श्रापित आय; नी व्‍हाटा अन सहारा देल नळद्‍या, अदिक जीवन तीम मुण्‍ण नेकतेला ईत्‍या:
GEN 3:15 अदिक ना नीन अदिक ई आर्त इन बीच दा, अदिक नीन वंश अदिक ईकीन वंश इन बीच दा सिट्‍ट पैदा माळाईन; आव नीन ताल्‍ला अक कुचलुस्‍यान अदिक नी आऊन तर काल इक कच्‍या.”
GEN 3:16 बाक आर्त से आव अंदुन, “ना नीन दुख अदिक नीन व्‍हाट्‍यादी आगोद दुख इक हापाळ वाळुसाईन; नी हापाळ दुख सहन माळकु पार उक पैदा माळ्‍या; अदिक नीन लालसा नीन गांड उन मा ईत्‍तीत, अदिक आव नीन मा प्रभुता माळ्‍यान.”
GEN 3:17 अदिक आदम से आव अंदुन, “नी जो तान हिंग्‍स उन मात केळ्‍द, अदिक या मार्र इन काय इन बारा दा ना नीनी आग्‍या कोटीदीन कि नी अदरी तिनबाळेत, अदरी नी तिंद इदुरसाटी जागा नीन कारण श्रापित आद. नी अदुर ऊपज जीवन तीम दुख इन सांगुळ तिनतोद्‍या;
GEN 3:18 अदिक अद नीन साटी मुळ्‍ल बेळ्‍दीत, अदिक नी केई इन ऊपज तिंद्या;
GEN 3:19 अदिक तान मेहनत इन कमाई इन रोट्‍टी तिनतोद्‍या, अदिक आखरी दा मुण्‍ण दा सिकेद्‍या यतिकी नी अदुर दा टु उच तेगुकु आग्या; नी मुण्‍ण रा हुय अदिक मुण्‍ण दा का मात सिकेद्‍या.”
GEN 3:20 आदम तान हिंग्‍स उन हेसुर हवा ईटदुन; यतिकी यास मंळसा जित्ता आर आ सप्‍पा मुंदुर आदिमाता आका आदुर.
GEN 3:21 अदिक यहोवा परमेश्वर आदम अदिक आऊन हिंग्‍स उन साटी तोगुल इन अँगरखा माळकु आंदरी हाकसुस बुट्‍टुन.
GEN 3:22 बाक यहोवा परमेश्वर अंदुन, “मंळसा भला बुरा अन ग्‍यान ताकोमकु नाम दा टु ऊंद इन घाई आगेग्‍यान: इदुरसाटी ईग हिंग आग बाळुल कि आव कय वाळुसकु जीवन इन मार्र इन काय भी मुरूकु तीन कोमुल अदिक सदा जीवित ईरूल.”
GEN 3:23 इदुरसाटी यहोवा परमेश्वर आऊक अदन इन बगीचा दा टु तेगु बुट्‍टुन कि आ जागा मा खेती माळुल यदुर दा टु आव माळकु आगीदुन.
GEN 3:24 इदुरसाटी आदम उक आव तेगु बुट्‍टुन अदिक जीवन इन हादी इन पहरा कोळोर साटी अदन इन बगीचा अन पूर्व दी जीत्‍ता प्राणीगोळी, अदिक नाकु दी वयाळावाळा ज्‍वालामय तलवार इक भी हासील माळ कोंडुन.
GEN 4:1 याग आदम तान हिंग्‍स हवा अन हाती होदुन आग आक व्‍हाट्‍यादी ईतकु कैन उक जनम कोट्‍टुर अदिक अंदुर, “नानी यहोवा अन सहारा देल ऊंद गंळ्स सिकदुन.”
GEN 4:2 बाक आक आऊन श्‍याण वार्ट हाबिल उक भी जनम कोट्‍टुर. हाबिल मर्र-म्यांडागोळी आळसावाळा आदुन, लेकीन कैन जागा मा खेती माळावाळा किसान आदुन.
GEN 4:3 येनारा दिन इन बाद्‍दा हिंग आत कि कैन तान जागा अन्द ऊपज दा टु यहोवा अन साटी भेंट तंदुन.
GEN 4:4 अदिक हाबिल भी तान मर्र-म्यांडा गोळोव पयला चिकोर दा टु भेंट येर्सली तंदुन अदिक अऊर न्याण भेंट येर्सदुन; आग यहोवा हाबिल अदिक आऊन भेंट इक रा ग्रहण माळदुन,
GEN 4:5 लेकीन कैन अदिक आऊन भेंट इक ग्रहण माळीदिल. आग कैन हापाळ सिट्‍ट दा बंदुन? अदिक आऊन मार्रा मा उदासी होट्‍ट बत्‍त.
GEN 4:6 आग यहोवा कैन से अंदुन, “नी येती सिट्‍टी बंद? अदिक नीन मार्रा मा उदासी यती बत्‍त?
GEN 4:7 अगर नी भला माळ्‍या रा येन नीन भेंट ग्रहण माळकु आगतीदील? अगर नी भला माळाल, रा पाप दरवाजा मा होचकु ईरतद; अदिक अदुर लालसा नीन दी ईत्‍तीत, अदिक नीनी अदुर मा प्रभुता माळोद आद.”
GEN 4:8 आग कैन तान वार्ट हाबिल से येनारा अंदुन; अदिक याग आंदुर मैदान मा ईरोर, आग कैन तान वार्ट हाबिल मा येरकु आऊक कोंद बुट्‍टुन;
GEN 4:9 आग यहोवा कैन से केळदुन, “नीन वार्ट हाबिल येल आन?” आव अंदुन, यम्‍बाल; येन ना तान वार्ट उन रखवाला हुईन?
GEN 4:10 आव अंदुन, “नी येन माळ्‍द? नीन वार्ट उन रक्‍ता जमीन टु नान दी चिळ्‍लासकु नान दोहाई कोळेत्‍याद!
GEN 4:11 इदुरसाटी ईग जागा नीन वार्ट उन रक्‍ता नीन कय देल कुडोर साटी तान बाय तेरदाद, अदुर दी टु नी श्रापित आय.
GEN 4:12 अगर नी जागा मा खेती माळ्‍या, तरी भी अदुर पुरा ऊपज बाक नीनी सिकतीदील; अदिक पृथ्‍वी मा भटकुसावाळा अदिक भगोळा आद्‍या.”
GEN 4:13 आग कैन यहोवा से अंदुन, “नान दण्ड सहन इन व्‍हार्या आद.
GEN 4:14 नोळ, नी ईंद इन दिशी नानी भूमी मा टु तेगद्‍या, अदिक ना नीन नजर इन मुंद ईराईन; अदिक पृथ्‍वी मा भटकुसावाळा अदिक भगोळा ईराईन; हिंग आग बाळुल कि जो यावारा नानी पाऊस्‍यान, नानी कोंद बुट्‍टान.”
GEN 4:15 ई कारण यहोवा आऊन से अंदुन, “जो यावारा कैन इक कोंदान आऊन सांगुळ येळ गुणा बदला ताकोमकु आदीत.” अदिक यहोवा कैन उन साटी ऊंद चिन्ह ठहरूसदुन हिंग आग बाळुल कि यावारा आऊक पाऊसकु कोंद बुळुल.
GEN 4:16 आग कैन यहोवा अन हाती टु होटोदुन, अदिक नोद हेसुर इन द्‍याश दा जो अदन इन पूर्व अन दी आद, ईरली कुरतुर.
GEN 4:17 याग कैन तान हिंग्‍स उन हाती होदुन आग आक व्‍हाट्‍यादी ईत्‍तुर, अदिक आक हनोक उक जनम कोट्‍टुर; बाक कैन ऊंद नगर बसुसदुन अदिक आ नगर इन हेसुर तान पार उन हेसुर मा हनोक ईटदुन.
GEN 4:18 अदिक हनोक देल ईराद पैदा आदुन, अदिक ईराद देल महूयाएल पैदा आदुन, अदिक महूयाएल देल मतूशाएल, अदिक मतूशाएल देल लेमेक पैदा आदुन.
GEN 4:19 लेमेक येढ्‍ढ हिंग्‍सुर माळदुन: आंदुर दा टु ऊंद इन हेसुर आदा, अदिक दुसरा अन हेसुर सिल्‍ला ईरोद.
GEN 4:20 आदा याबाल उक जन्म कोट्‍टुर. आव आ सप्‍पा लॉकुरव पुर्वज आदुन जो ड्‍यारागोळ दा ईरतोगोर अदिक जनावरगोळ सालुतोगोर.
GEN 4:21 अदिक आऊन वार्ट उन हेसुर यूबाल ईरोद. ईव आ लॉकुरव पुर्वज आदुन जो विणा अदिक कोळ्‍ल उयतोगोर.
GEN 4:22 अदिक सिल्‍ला भी तूबल-कैन हेसुर इनव पार उक जनम कोट्टुर: आव कासा अदिक लोहा अन सप्‍पा सामान माळावाळा आदुन. अदिक तूबल-कैन उन आकतींग नामा ईरोर.
GEN 4:23 अदिक लेमेक तान हिंग्‍सुर से अंदुन: “अने आदा अदिक अने सिल्‍ला, नान मात केळी, अने लेमेक उन हिंग्‍सुरा, नान मात ध्‍यान देल केळी: ना ऊंद गंळ्स उक याव नानी घायल माळीदुन, मतलब ऊंद जवान उक याव नानी चोट पोहचुसीदुन, कोंद बुटीन.”
GEN 4:24 अगर कैन उन बदला येळ गुणा रा लेमेक उन बदला सत्‍तर गुणा चुकुसकु आदीत.
GEN 4:25 आदम बाक मात तान हिंग्‍स उन हाती होदुन, अदिक आक ऊंद पार उक जनम कोट्‍टुर अदिक आऊन हेसुर ईद अनकु शेत ईटदुर: “परमेश्वर नान साटी हाबिल इन बदला, यारी कैन कोंद बुट्‍टीदुन, ऊंद अदिक पार कोट्‍टुन.”
GEN 4:26 शेत उक भी ऊंद पार पैदा आदुन. आव आऊन हेसुर एनोश ईटदुन. अदा समय टु लॉकुर यहोवा अन्‍द हेसुर ताकोमकु प्रार्थना माळली कुरतुर.
GEN 5:1 आदम उन वंशावली ई प्रकार देल आद. याग परमेश्वर मंळसा अन्द रचना माळदुन आग आव तांद अच स्‍वरूप इन घाई आऊक माळदुन.
GEN 5:2 आव आंदरी गंळ्स अदिक आर्त माळकु मंळसागोळ्‍द रचना माळदुन अदिक आंदरी आशीर्वाद कोट्‍टुन, अदिक रचना अन दिशी आंदुर हेसुर आदम ईटदुन.
GEN 5:3 याग आदम ऊंद सौ तीस वर्ष इन ईरोन, आग आऊन समानता दा, आऊन स्‍वरूप इन अनुसार, आऊन ऊंद पार पैदा आदुन. आव आऊन हेसुर शेत ईटदुन.
GEN 5:4 शेत उन जनम इन बाद्‍दा आदम येट्ट सौ वर्ष मात्त जीत्‍ता ईत्‍तुन, बाक आऊक भी मात्त पार पोरगोळ पैदा आदुर.
GEN 5:5 ई प्रकार देल आदम उन पुरा ऊमर ऊम्बत सौ तीस वर्ष इन आत; आग आव सोतोदुन.
GEN 5:6 याग शेत ऊंद सौ अईद वर्ष नव आदुन, आग आऊन से एनोश पैदा आदुन.
GEN 5:7 एनोश उन जनम इन बाद्‍दा शेत येट्‍ट सौ येळ वर्ष जीत्‍ता ईत्‍तुन, अदिक आऊक भी पार पोरगोळ पैदा आदुर.
GEN 5:8 ई प्रकार देल शेत उन पुरा ऊमर ऊम्बत सौ हन्‍नेळ वर्ष इन आत; अदुर बाद्‍दा आव सोतोदुन.
GEN 5:9 याग एनोश नब्‍बे वर्ष इनव आदुन, आग आऊन से केनान उन जनम आत.
GEN 5:10 केनान उन जनम इन बाद्‍दा एनोश येट्‍ट सौ पंदरा वर्ष जीत्‍ता ईत्‍तुन, आऊक भी मात्त पार पोरगोळ पैदा आदुर.
GEN 5:11 ई प्रकार देल एनोश उन पुरा ऊमर ऊम्बत सौ अईद वर्ष इन आत; अदुर बाद्‍दा आव सोतोदुन.
GEN 5:12 याग केनान सत्‍तर वर्ष ईनव आदुन, आग आऊन से महललेल उन जनम आत.
GEN 5:13 महललेल उन जनम इन बाद्‍दा केनान येट्‍ट सौ चालीस वर्ष जीत्‍ता ईत्‍तुन, आऊक पार पोरगोळ मात्त पैदा आदुर.
GEN 5:14 ई प्रकार देल केनान उन पुरा उमर ऊम्बत सौ हत्‍त वर्ष इन आत; अदुर बाद्‍दा आव सोतोदुन.
GEN 5:15 याग महललेल पैसट वर्ष इनव आदुन, आग आऊन से येरेद उन जनम आत.
GEN 5:16 येरेद उन जनम इन बाद्‍दा महललेल येट्‍ट सौ तीस वर्ष जीत्‍ता ईत्तुन, आऊक मात्त भी पार पोरगोळ पैदा आदुर.
GEN 5:17 ई प्रकार देल महललेल उन ऊमर येट्‍ट सौ पंच्‍यानव वर्ष इन आत; अदुर बाद्‍दा आव सोतोदुन.
GEN 5:18 याग येरेद ऊंद सौ बासठ वर्ष इन आदुन, आग आऊन से हनोक उन जनम आत.
GEN 5:19 हनोक उन जनम इन बाद्‍दा येरेद येट्‍ट सौ वर्ष जीत्‍ता ईत्‍तुन, आऊक मात्त पार पोरगोळ पैदा आदुर.
GEN 5:20 ई प्रकार देल येरेद उन पुरा ऊमर ऊम्बत सौ बासठ वर्ष इन आत; अदुर बाद्‍दा आव सोतोदुन.
GEN 5:21 याग हनोक पैसठ वर्ष इन आदुन, आग आऊन से मतूशेलह उन जनम आत.
GEN 5:22 मतूशेलह उन जनम इन बाद्‍दा हनोक मुर सौ वर्ष ताका परमेश्वर उन सांगुळ सांगुळ नळुतेला ईत्‍तुन, आऊक मात्त पार पोरगोळ पैदा आदुर.
GEN 5:23 ई प्रकार देल हनोक उन पुरा ऊमर मुर सौ पैसठ वर्ष इन आत.
GEN 5:24 हनोक परमेश्वर उन सांगुळ सांगुळ नळुतोगोन; बाक आव गायब आगेदुन, यतिकी परमेश्वर आऊक म्याकुच नेगु कोंडीदुन.
GEN 5:25 याग मतूशेलह ऊंद सौ सत्‍यासी वर्ष इन आदुन, आग आऊन से लेमेक उन जनम आत.
GEN 5:26 लेमेक उन जनम इन बाद्‍दा मतूशेलह येळ सौ बयासी वर्ष जीत्‍ता ईत्‍तुन, आऊक मात्त पार पोरगोळ पैदा आदुर.
GEN 5:27 ई प्रकार देल मतूशेलह उन पुरा ऊमर ऊम्बत सौ उनसत्तर वर्ष इन आत; अदुर बाद्‍दा आव सोतोदुन.
GEN 5:28 याग लेमेक ऊंद सौ बयासी वर्ष इन आदुन, आग आऊन से ऊंद पार उन जनम आत.
GEN 5:29 आव ईद अनकु आऊन हेसुर नूह ईटदुन, “यहोवा जो पृथ्‍वी इक श्राप कोटान, अदुर बारा दा ईव पार नाम क्‍याल्‍सा दा, अदिक आ कठिन मेहनत दा जो नाव माळतेव, नामी शांती कोट्‍टान.”
GEN 5:30 नूह उन जनम इन बाद्‍दा लेमेक अईद सौ पंच्‍यानव वर्ष जीत्‍ता ईत्‍तुन, आऊक मात्त पार पोरगोळ पैदा आदुर.
GEN 5:31 ई प्रकार देल लेमेक उन पुरा ऊमर येळ सौ सत्यातर वर्ष इन आत; अदुर बाद्‍दा आव सोतोदुन.
GEN 5:32 अदिक नूह अईद सौ वर्ष इन आदुन; अदिक नूह टु शेम, अदिक हाम, अदिक येपेत उन जनम आत.
GEN 6:1 बाक याग मंळसा धरती मा हापाळ वाळुसली कुरतुर, अदिक आंदुर पोरगोळ पैदा आदुर,
GEN 6:2 आग परमेश्वर उन पारगोळ मंळसा अन पोरगोळी नोळदुर, कि आंदुर सुंदर आर, अदिक यारी चाहासदुर आंदुर से मदा माळ कोंडुर.
GEN 6:3 आग यहोवा अंदुन, “नान आत्मा मंळसागोळ सांगुळ हमेशा साटी लळाई माळतीदील, यतिकी मंळसा भी शरीर अच हुन; आंदुर ऊमर ऊंद सौ ईप्‍पत वर्ष इन ईत्‍तीत.”
GEN 6:4 आ दिन दा पृथ्‍वी मा दानव ईरतोगोर; अदिक ईदुर बाद्‍दा याग परमेश्वर उन पार मंळसा अन पोरगोळ हात्‍ती होदुर आग आंदुर द्वारा जो पार पैदा आदुर आंदुर शूरवीर आगोर, यार्द किर्ती हाळाबाट्‍टुर से प्रचलित आद.
GEN 6:5 यहोवा नोळदुन कि मंळसा अन बुराई पृथ्‍वी मा वाळुसीग्‍याद, अदिक आंदुर मन इन विचार दा जो येनारा पैदा आगतद अद हमेशा गलत अच आगतद.
GEN 6:6 अदिक यहोवा पृथ्‍वी मा मंळसा अक माळदुर देल पछतासदुन, अदिक आव मन देल हापाळ दुखी आदुन.
GEN 6:7 आग यहोवा अंदुन, “ना मंळसा अक यारी ना निर्माण माळदीन पृथ्‍वी इन म्‍याकुच टु मिटुस बुळाईन; येन मंळसा, येन जनावर, येन रांगसावाळा किळा, येन आकाश इन पक्षी, सप्‍पा अक नाश माळ बुळाईन, यतिकी ना आंदरी माळदुर से पछतासतीन.”
GEN 6:8 लेकीन यहोवा अन्द अनुग्रह अन्द नजर नूह मा बन्सकु ईत्‍त.
GEN 6:9 नूह इन वंशावली ईद हुन. नूह धर्मी मंळसा अदिक तान समय दा लॉकुर दा खरा ईरोन; अदिक नूह परमेश्वर उन अच सांगुळ नळुतेला ईत्‍तुन.
GEN 6:10 नूह नोर मुर चिकोर ईरोर; शेम, हाम अदिक येपेत.
GEN 6:11 आ समय पृथ्‍वी परमेश्वर उन नजर दा बीगळुसेगीत, अदिक हिंसा देल तुमकु ईरोद.
GEN 6:12 अदिक परमेश्वर पृथ्‍वी मा जो नजर हाकदुन रा नोळदुन कि अद बिगळुसकु आद; यतिकी सप्‍पा प्राणीगोळ पृथ्‍वी मा तान तान चाल-चलन बिगळुस बुटीदव.
GEN 6:13 आग परमेश्वर नूह से अंदुन, “सप्‍पा प्राणीगोळ्द अन्‍त माळोद सवाल नान मुंद होट बंदाद; यतिकी आंदुर कारण पृथ्‍वी उपद्रव देल तुम्‍मेग्‍याद, इदुरसाटी ना आंदरी पृथ्‍वी सांगुळ नष्‍ट माळ बुळाईन.
GEN 6:14 इदुरसाटी नी गोपेर इन मार्र इन हुळ्ली इन ऊंद जहाज माळकोम, अदुर दा कमरागोळी माळेत, अदिक व्‍हार्या-बुळ्क अदुर मा राल हचेत.
GEN 6:15 ई ढंग देल नी अदरी माळेत: जहाज इन लंबाई मुर सौ कय, चौळाई पचास कय, अदिक ऊचाई तीस कय इन ईरूल.
GEN 6:16 जहाज दा ऊंद खिळकी माळेत, अदिक अदुर ऊंद कय म्‍याकुच टु अदुर छत माळेत, अदिक जहाज इन ऊंद दी ऊंद दरवाजा ईटेत; अदिक जहाज दा पयला, दुसरा, तीसरा खण्‍ड माळेत.
GEN 6:17 अदिक केळ, ना खुद पृथ्‍वी मा जल-प्रलय माळकु सप्‍पा प्राणीगोळ इक, यदुर दा जीवन प्राण आद, आकाश इन ल्‍यालमा टु नष्‍ट माळदुर मा आईन; अदिक सप्‍पा जो पृथ्‍वी मा आर सोतोदार.
GEN 6:18 लेकीन ना नीन सांगुळ वादा माळतीन; इदुरसाटी तान पारगोळ, आर्त, अदिक तान सास्सा सांगुळ दा प्रवेश माळेत.
GEN 6:19 अदिक सप्‍पा जित्ता प्राणी दा टु नी ऊंद ऊंद जाती इन येढ्‍ढ येढ्‍ढ, मतलब ऊंद नर अदिक मादा जहाज दा वोतकु, तान सांगुळ जीत्‍ता ईटेत.
GEN 6:20 हर ऊंद जाती इन पक्षी, अदिक हर ऊंद जाती इन जनावर, अदिक हर ऊंद जाती इन जमीन मा रांगसावाळा, सप्‍पा दा टु येढ्‍ढ येढ्‍ढ नीन हात्‍ती बंदव, नी अवरी जीत्‍ता ईटेत.
GEN 6:21 अदिक अलग अलग तिनोद सामान, अवरी नी हुळकु तान हात्‍ती जमा माळकु ईटेत; जो नीनी अदिक अऊर तिनोर साटी ईत्‍तीत.”
GEN 6:22 परमेश्वर उन ई आग्‍या अन अनुसार नूह माळदुन.
GEN 7:1 आग यहोवा नूह से अंदुन, “नी तान पुरा घराना अन सांगुळ जहाज मा होटोग; यतिकी ना ई समय इन लॉकुर दा टु नीनी का तान नजर इन मुंद धर्मी नोळीन.
GEN 7:2 सप्‍पा जाती इन शुद्ध जनावर दा टु रा नी येळ येळ जोळी मतलब नर अदिक मादा ताकोमेत; लेकीन जो जनावर शुद्‍ध हैलेच, अऊर दा टु येढ्‍ढ येढ्‍ढ ताकोमेत, मतलब नर अदिक मादा;
GEN 7:3 अदिक आकाश इन पक्षी दा टु भी येळ येळ जोळी, मतलब नर अदिक मादा ताकोमेत, कि अऊर वंश उळकु पुरा पृथ्‍वी इन म्‍याकुच बन्सकु ईरूल.
GEN 7:4 यतिकी येळ दिन अदिक बितुसदुर मा ना पृथ्‍वी मा चालीस दिन अदिक चालीस ईळ्‍ल्‍क ताका नीर बरसुसतेला ईराईन; अदिक यास प्राणीगोळी ना माळीन आ सप्‍पा अक पृथ्‍वी मा टु नाश माळ बुळाईन,”
GEN 7:5 यहोवा अन ई आग्‍या अन अनुसार नूह माळदुन.
GEN 7:6 नूह इन ऊमर आर सौ वर्ष इन ईरोद, याग जल-प्रलय पृथ्‍वी मा बत्‍त.
GEN 7:7 नूह तान पारगोळ, हिंग्‍स, अदिक तान सास्सागोळ सांगुळ जल-प्रलय से ऊळोर साटी जहाज मा होदुर.
GEN 7:8 शुद्ध अदिक अशुध्‍द, येढ्‍ढु प्रकार इन जनावर दा टु, पक्षीगोळ,
GEN 7:9 अदिक जमीन मा रांगसावाळा कीळागोळ दा टु भी, येढ्‍ढ येढ्‍ढ, मतलब नर अदिक मादा, जहाज दा नूह इन हाती होदोव, याता प्रकार परमेश्वर नूह अक आग्‍या कोटीदुन.
GEN 7:10 येळ दिन इन बाद्‍दा प्रलय इन नीर पृथ्‍वी मा बरली कुर्त.
GEN 7:11 याग नूह अन ऊमर इन आर सौ वर्ष इन दुसरा तिंगुळ इन सतरावा दिन बत्‍त; अदा दिशी धोळ्‍द गहरा समुद्र अन सप्‍पा सोतागोळ वळ्‍द कुरतव अदिक आकाश इन झरोखागोळ खुलसेदव.
GEN 7:12 अदिक माळ चालीस दिन अदिक चालीस ईळ्‍ल्‍क पृथ्‍वी मा आगतेला ईत्‍त.
GEN 7:13 ठीक अदा दिशी नूह तान पार शेम, हाम, अदिक येपेत, अदिक तान हिंग्‍स, अदिक मुरू सास्सागोळ सांगुळ,
GEN 7:14 अदिक आंदुर सांगुळ ऊंद ऊंद जाती इन सप्‍पा आळी दाकळव जनावर, अदिक घरेलु जनावर, अदिक ऊंद ऊंद जाती इन सप्‍पा पृथ्‍वी मा रांगसावाळा किळा, अदिक हर ऊंद जाती इन ऊळुसावाळा पक्षी, जहाज मा होदव.
GEN 7:15 यास प्राणीगोळ दा जीवन इन प्राण ईरोद अऊर सप्‍पा जातीगोळ दा टु येढ्‍ढ येढ्‍ढ नूह उन हाती जहाज दा होदोव.
GEN 7:16 अदिक जो होदोव, अव परमेश्वर उन आग्‍या अन अनुसार सप्‍पा जाती अन प्राणीगोळ दा टु नर अदिक मादा होदोव. आग यहोवा जहाज इन दरवाजा बंद माळ बुट्‍टुन.
GEN 7:17 पृथ्‍वी मा चालीस दिन ताका जल-प्रलय आगतेला ईत्‍त; अदिक हापाळ अच वाळुसतेला होत, यदुर देल जहाज म्‍याकुच येळली कुर्त; अदिक अद पृथ्‍वी मा टु म्‍याकुच येदोत.
GEN 7:18 नीर वाळुस्‍त वाळुस्‍त पृथ्‍वी मा हापाळ अच वाळुसेत, अदिक जहाज नीर इन म्‍याकुच म्‍याकुच तैरूस्‍तेला ईत्‍त.
GEN 7:19 नीर पृथ्‍वी मा हापाळ अच वाळुसेत, ईल ताका कि पुरा धरती मा यास भी धोड्‍डेव धोड्‍डेव पहाळीगोळ ईरोव, सप्‍पा मुळकेदव.
GEN 7:20 नीर पन्‍द्राह कय अदिक म्‍याकुच वाळुसेत, अदिक पहाळी भी मुळ्कदव.
GEN 7:21 अदिक येन पक्षी, येन घरेलु जनावर, येन आळी दाकळव जनावर, अदिक पृथ्‍वी मा सप्‍पा नळावाळा प्राणी, अदिक यास किळा पृथ्‍वी दा हापाळ तुम्‍मेगीदव, अव सप्‍पा अदिक सप्‍पा मंळसा सोतोदुर.
GEN 7:22 जो जो जागा मा ईरोर, अऊर दा टु यास मुंदुर्द मुग्गगोळ दा जीवन इन श्‍वास ईरोद, सप्‍पा सोतोदुर.
GEN 7:23 अदिक येन मंळसा, येन जनावर, येन रांगसावाळा जन्तु, येन आकाश इन पक्षी, जो जो भूमी मा ईरव सप्‍पा पृथ्‍वी मा टु नाश माळदेव; सिर्फ नूह, अदिक यास आऊन सांगुळ जहाज दा ईरोर, आंदुर अच ऊळदुर.
GEN 7:24 अदिक नीर पृथ्‍वी मा ऊंद सौ पचास दिन ताका थामस्‍कु ईत्‍त.
GEN 8:1 लेकीन परमेश्वर नूह अदिक यास आळी दाकळव जनावर अदिक घरेलु जनावर आऊन सांगुळ जहाज दा ईरव, आ सप्‍पा अन्द सुधी ताकोंडुन: अदिक परमेश्वर पृथ्‍वी मा हवा नळ्‍सदुन, अदिक नीर कम आगतेला बत्‍त;
GEN 8:2 अदिक गहरा समुद्र अन सोतागोळ अदिक आकाश इन झरोखागोळ बंद आगेदव; अदिक अदुर देल जो माळ आगतोगोद अद भी रूकसेत;
GEN 8:3 अदिक ऊंद सौ पचास दिन इन बाद्‍दा नीर पृथ्‍वी मा टु लगातार कम आगतेला ईत्‍त.
GEN 8:4 सातवा तिंगुळ इन सतरावा दिन इक, जहाज अरारत हेसुर इन पहाळी मा टिकसेत.
GEN 8:5 अदिक नीर हतवा तिंगुळ ताका कम आगतेला होत, अदिक हतवा तिंगुळ इन पयला दिशी इक पहाळीगोळ्‍द चोटीगोळ कांळ्सदव.
GEN 8:6 बाक हींग आत कि चालीस दिन इन बाद्‍दा नूह तान माळ्‍द जहाज इन खिळकी तेरूकु,
GEN 8:7 ऊंद काग्ग उक ऊळुस बुट्‍टुन: यागास ताका नीर पृथ्‍वी मा टु वंळ्‍गीदिल, आगासताका ताका काग्ग ईत्‍त आत्‍त वयाळतेला ईत्‍त.
GEN 8:8 बाक आव तान हाती टु ऊंद कबूतर इक भी ऊळुस बुट्‍टुन कि नोळुल कि नीर पृथ्‍वी मा टु कम आत कि ईला.
GEN 8:9 आ कबूतर इक तान काल टेक्‍सली येनु आधार सिकीदील, रा अद आऊन हाती जहाज मा वापस बत्त: यतिकी पुरा पृथ्‍वी इन म्‍याकुच नीर अच नीर तुमकु ईरोद. आग आव कय वाळुसकु अदरी तान हात्‍ती जहाज दा ताकोम कोंडुन.
GEN 8:10 बाक अदिक येळ दिन थाम्सदुर बाद्दा, आव अदा कबूतर इक जहाज दा टु मात ऊळुस बुट्‍टुन;
GEN 8:11 अदिक कबूतर द्‍यावगा अन वती आऊन हात्‍ती होट बत्‍त, रा येन नोळदुन कि अदुर चाचु दा जैतून इन ऊंद व्‍हाशोद याल्‍ला आद; ईदुर देल नूह जान्‍स कोंडुन कि नीर पृथ्‍वी मा टु कम आगेग्‍याद.
GEN 8:12 बाक येळ दिन अदिक थाम्‍सकु अदा कबूतर उक ऊळुस बुट्‍टुन; अद बाक आऊन हात्‍ती यागलु वापस बंदिदील.
GEN 8:13 नूह उन उमर इन आर सौ ऊंद वर्ष इन पयला तिंगुळ पयला दिन नीर पृथ्‍वी मा टु वंळगेत. आग नूह जहाज इन छत खोल्‍सकु येन नोळदुन कि धरती वंळगेग्‍याद.
GEN 8:14 अदिक दुसरा तिंगुळ इन सत्ताईसवा दिशी पृथ्‍वी पुरा रीति देल वंळगेत.
GEN 8:15 आग परमेश्वर नूह से अंदुन,
GEN 8:16 “नी तान पारगोळ, हिंग्‍स, सास्सागोळ सांगुळ जहाज दा टु होट्‍टबुळ.
GEN 8:17 येन पक्षी, येन जनावर, येन सप्‍पा प्रकार इनव रांगसावाळा किळा जो पृथ्‍वी मा रांगस्ताव यास शरीरधारी जीव जन्‍तु नीन सांगुळ आव, आ सप्‍पा अक तान सांगुळ तेगु कोम कि पृथ्‍वी मा अऊर देल हापाळ चिकोर आगुल; अदिक अव फलसुल फुलुसुल, अदिक पृथ्‍वी मा फैलुसेगुल.”
GEN 8:18 आग नूह, अदिक आऊनोर चिकोर अदिक हिंग्‍स, अदिक सास्सागोळ व्‍हार्या बंदुर:
GEN 8:19 अदिक सप्‍पा जनावर, रांगसावाळा किळा, अदिक पक्षी, अदिक यास भी जीव जन्‍तु पृथ्‍वी मा नळुताव वयाळताव, सप्‍पा जाती जाती माळकु जहाज दा टु व्‍हार्या होट्‍टव.
GEN 8:20 आग नूह यहोवा अन साटी ऊंद वेदी माळदुन; अदिक सप्‍पा शुद्ध जनावर अदिक सप्‍पा शुद्‍ध पक्षीगोळ दा टु येनारा येनारा हुडुकु वेदी मा होमबली येर्सदुन.
GEN 8:21 ईदुर मा यहोवा सुखदायक वास ताकोमकु सोचदुन, मंळसा अन कारण ना बाक यागलु धरती इक श्राप कोळतीदील, अगर मंळसा अन मन दा स्याणपणी टु येनारा पैदा आगतद अद बुरा अच आगतद; तरी भी ह्‍यांग ना सप्‍पा जीवगोळी ईग कोंदीन, हांग अवरी बाक यागलु कोनतीदिल.
GEN 8:22 ईग टु यागासताका पृथ्‍वी बन्सकु ईत्‍तीत, आगासताका बोऊसोद अदिक कडोद समय, ठंडी अदिक बिसुल, धूपकाल अदिक शीतकाल, ईळ्‍ल्‍क अदिक हागुल, हमेशा आगतेला ईत्‍ताव.
GEN 9:1 बाक परमेश्वर नूह अदिक आऊन चिकोरगोळी आशीष कोट्‍टुन अदिक आव अंदुन, “तान जिन्‍दगी माळी अदिक वाळुसी, अदिक पृथ्‍वी दा तुम्‍मेगी.
GEN 9:2 नीम्‍द अंज्‍क पृथ्‍वी इन सप्‍पा जनावर, अदिक सप्‍पा आकाश इन पक्षीगोळ, अदिक जमीन ईनव सप्‍पा रांगसावाळा कीळागोळ, अदिक समुद्र दाकळव सप्‍पा मेनगोळ मा बन्सकु ईत्तीत: ईव सप्‍पा नीम वश दा माळकु आगताव.
GEN 9:3 सप्‍पा रांगसावाळा किळा नीम्‍द आहार आदीत; ह्‍यांग नीमी हिवरा हिवरा श्याणेव मार्र कोटीदीन, हांग अच ईग सप्‍पा येनारा कोळतीन.
GEN 9:4 लेकीन मास इक जीव इन सांगुळ मतलब रक्‍ता अन सांगुळ नीव तिनबाळेतीर.
GEN 9:5 अदिक सही दा अच ना नीम्‍द रक्‍ता मतलब जीव इन बदला ताकोमाईन: सप्‍पा जनावरगोळ अदिक मंळसागोळ, येढ्‍ढु मुंदुर से अदरी ताकोमाईन; मंळसा अन जीव इन बदला ना ऊंद ऊंद वार्ट बंधु से ताकोमाईन.
GEN 9:6 जो यावारा मंळसा अन रक्‍ता वाहुस्‍यान आऊन रक्‍ता मंळसा से अच वाहुसकु आदीत, यतिकी परमेश्वर मंळसा अक तान अच स्‍वरूप इन अनुसार माळ्‍यान.”
GEN 9:7 अदिक नीव जींदगी माळी, अदिक वाळुसी, अदिक पृथ्‍वी मा हापाळ सा चिकोर पैदा माळकु अदुर्दा तुम्‍मेगी.
GEN 9:8 बाक परमेश्वर नूह अदिक आऊन चिकोरगोळ से अंदुन,
GEN 9:9 “केळी, ना नीम सांगुळ अदिक नीम बाद्‍दा जो नीम्‍द वंश ईत्‍तीत, आंदुर सांगुळ भी वादा माळतीन;
GEN 9:10 अदिक जीत्‍ता प्राणीगोळ सांगुळ भी जो नीम सांगुळ आव, येन पक्षी येन मान्‍यागोळोव जनावर येन पृथ्‍वी माकळव सप्‍पा आळी दाकळव जनावर, पृथ्‍वी नव यास जीव जन्‍तु जहाज दा टु होटाव.
GEN 9:11 अदिक ना नीम सांगुळ तान ईद वादा कटतीन कि सप्‍पा प्राणी मात जल-प्रलय सेल नाश आगतीदील: अदिक पृथ्‍वी इन नाश आगोर साटी मात जल-प्रलय आगतीदील.”
GEN 9:12 बाक परमेश्वर अंदुन, “जो वादा ना नीम सांगुळ, अदिक यास जीत्‍ता प्राणी नीम सांगुळ आव आ सप्‍पा अन सांगुळ भी युग-युग इन पीढ़ीगोळ साटी कटतीन, अदुर्द ईद चिन्ह आद :
GEN 9:13 ना बादल दा तान धनुष ईटीन, अद नान अदिक पृथ्‍वी इन बीच दा वादा अन चिन्ह आदीत.
GEN 9:14 अदिक याग ना पृथ्‍वी मा बादल फैलुसाईन आग बादल दा धनुष कांळ्सीत.
GEN 9:15 आग नान वादा जो नीम अदिक सप्‍पा जीत्‍ता शरीरधारी प्राणीगोळ सांगुळ कटकु आद; अदरी ना याद माळाईन, आग ईत्‍ता जल-प्रलय बाक आगतीदील यदुर देल सप्‍पा प्राणीगोळ्द विनाश आगुल.
GEN 9:16 बादल दा जो धनुष ईत्‍तीत ना अदरी नोळकु ई सदा अन वादा अक याद माळाईन, जो परमेश्वर उन अदिक पृथ्‍वी माकळव सप्‍पा जीत्‍ता शरीरधारी प्राणीगोळ बीच दा कटकु आद.”
GEN 9:17 बाक परमेश्वर नूह से अंदुन, “जो वादा ना पृथ्‍वी दाकळव सप्‍पा प्राणीगोळ सांगुळ कटीन, अदुर्द चिन्ह ईदा हुन.”
GEN 9:18 नूह उन चिकोर जो जहाज दा टु होट्‍टुर, आंदुर शेम, हाम अदिक येपेत ईरोर; अदिक हाम कनान उन आप्‍प आदुन.
GEN 9:19 नूह उन मुर चिकोर ईंदुरा उर, अदिक ईंदुर्द वंश पुरा पृथ्‍वी मा फैलुसेत.
GEN 9:20 नूह खेती किसानी माळली कुरतुन. अदिक आव अंगुर इन बेली हचदुन;
GEN 9:21 अदिक आव अंगुर इन रास्‍सा कुडुकु मतवाला आदुन; अदिक तान ड्‍यारा अन्द बुळ्‍क ऊगळा आगेदुन.
GEN 9:22 आग कनान उन आप्‍प हाम तान आप्‍प उक ऊगळा नोळदुन, अदिक व्‍हार्या बंदकु तान वार्टुरी हेळ बुट्‍टुन.
GEN 9:23 आग शेम अदिक येपेत येढ्‍ढु मुंदुर कपळा हुडुकु तान खांदा मा ईटदुर, अदिक हिंद इन दी उलटा नळुकु तान आप्‍प उन ऊगळा मय इक होचदुर, अदिक आंदुर तान बाय हिंद माळकु ईरोर इदुरसाटी आंदुर तान आप्‍प उक ऊगळा नोळीदील.
GEN 9:24 याग नूह उन नशा ईळदोत, आग आव जान्‍स कोंडुन कि आऊन श्‍याण पार आऊन सांगुळ येन माळदुन.
GEN 9:25 इदुरसाटी आव अंदुन, “कनान श्रापित आगुल: अद तान वार्ट बंधु उन दासगोळ्द दास आगुल.”
GEN 9:26 बाक आव अंदुन, “शेम उन परमेश्वर यहोवा धन्‍य आन, अदिक कनान शेम उन दास आगुल.
GEN 9:27 परमेश्वर येपेत उन वंश उक फैलुसुल; अदिक आव शेम उन ड्‍यारागोळ दा बसुसुल, अदिक कनान आऊन दास आगुल.”
GEN 9:28 जल-प्रलय इन बाद्‍दा नूह मुर सौ पचास वर्ष जीत्‍ता ईत्‍तुन.
GEN 9:29 ई प्रकार देल नूह उन पुरा ऊमर उम्बत सौ पचास वर्ष इन आत; अदुर बाद्‍दा आव सोतोदुन.
GEN 10:1 नूह उन पार शेम, हाम, अदिक येपेत ईरोर; आंदुरोर चिकोर जल-प्रलय इन बाद्‍दा पैदा आदुर: आंदुर्द वंशावली ईद हुन.
GEN 10:2 येपेत उन पारगोळ: गोमेर, मागोग, मादै, यावान, तूबल, मेशेक, अदिक तीरास आदुर.
GEN 10:3 गोमेर उन पारगोळ: अशकनज, रीपत, अदिक तोगर्मा आदुर.
GEN 10:4 अदिक यावान उन वंश दा एलीशा, अदिक तर्शीश, अदिक कित्ति, अदिक दोदानी लॉकुर आदुर.
GEN 10:5 इंदुर द्वारा जाती जाती नोर तटवर्तीय प्रदेश तान तान भाषा, कुल अदिक जाती इन अनुसार तान तान द्‍याश दा अलग आगेदुर.
GEN 10:6 हाम उन पारगोळ: कूश, मिस्त्र, पूत अदिक कनान आदुर.
GEN 10:7 अदिक कूश उन पारगोळ सबा, हवीला, सबता, रामा, अदिक सबूतका आदुर. अदिक रामा अन चिकोर शबा, अदिक ददान आदुर.
GEN 10:8 कूश उन वंश दा निम्रोद भी आदुन; पृथ्‍वी मा पयला वीर आवा आग्‍यान.
GEN 10:9 आव यहोवा अन नजर दा पराक्रमी शिकार आळावाळा ठहरूसदुन, ईदुर देल अद कहावत नळुत; “निम्रोद उन घाई यहोवा अन नजर दा पराक्रमी शिकार आळावाळा.”
GEN 10:10 आऊन राज्‍य अन सुरूवात शिनार द्‍याश दा बेबीलोन, एरेख, अक्‍कद अदिक कलने देल आत.
GEN 10:11 आ द्‍याश टु आव होटकु अश्शूर उक होदुन, अदिक नीनवे, रहोबोतीर अदिक कालह उक,
GEN 10:12 अदिक नीनवे अदिक कालह इन न्‍याड्या जो रेसेन आद, अदरी भी बसुसदुन; धोळ्‍द नगर ईदा हुन.
GEN 10:13 मिस्त्र अन वंश दा लूदी, अनामी, लहाबी, नप्‍तूही,
GEN 10:14 अदिक पत्रूसी, कसलूही अदिक कप्‍तोरी लॉकुर आदुर, कसलूहियों दा टु रा पलिश्ती लॉकुर होट्‍टुर.
GEN 10:15 कनान उन वंश दा आऊन धोळ पार सीदोन, तब हित्‍ती,
GEN 10:16 यबूसी, एमोरी, गिर्गाशी,
GEN 10:17 हिब्बी, अर्की, सीनी,
GEN 10:18 अर्वदी, समारी, अदिक हमाती जाती इन लॉकुर भी आदुर; बाक कनानीगोळ्द कुल भी फैलुसेत;
GEN 10:19 अदिक कनानीगोळ्द सीमा सीदोन टु हुडुकु गरार इन हादी टु आगकु गाजा ताका अदिक बाक सदोम अदिक गमोरा अदिक अदमा अदिक सबोयीम इन हादी टु आगकु लाशा ताका आत.
GEN 10:20 हाम उन वंश दा ईंदुरा पैदा आदुर, अदिक ईंदुर अलग अलग कुलगोळ, भाषागोळ, द्‍याशगोळ अदिक जातीगोळ अनुसार अलग अलग आगेदुर.
GEN 10:21 शेम, जो सप्‍पा एबेर वंशिगोळोव मूल गंळ्स आदुन, अदिक जो येपेत उन धोळ वार्ट ईरोन, आऊनोर भी चिकोर पैदा आदुर.
GEN 10:22 शेम उन चिकोर : एलाम, अश्‍शूर, अर्पक्षद, लूद अदिक अराम आदुर.
GEN 10:23 अराम उन चिकोर : ऊस, हूल, गेतेर अदिक मश आदुर.
GEN 10:24 अदिक अर्पक्षद शेलह अक, अदिक शेलह एबेर उक पैदा माळदुन.
GEN 10:25 अदिक एबेर उक येढ्ढ चिकोर आदुर, ऊंद पार उन हेसुर पेलेग ईद कारण देल ईटकु आत कि आऊन दिनगोळ दा पृथ्वी अन्द येढ्ढ भाग आदव, अदिक आऊन वार्ट उन हेसुर योक्तान ईरोद.
GEN 10:26 अदिक योक्तान उक अल्मोदाद, शेलेप, हसर्मावेत, येरह,
GEN 10:27 यदोरवाम, ऊजाल, दिक्ला,
GEN 10:28 ओबाल, अबीमाएल, शबा,
GEN 10:29 ओपीर, हवीला अदिक योबाब पैदा आदुर: ईंदुर अच सप्पा योक्तान उन चिकोर पैदा आदुर.
GEN 10:30 ईंदुर्द ईरोद ऊंद जागा मेशा टु हुळकु सपारा, जो पूर्व दा ऊंद पहाळी आद, अदुर हादी ताका आत.
GEN 10:31 शेम उन चिकोर ईंदुरा आदुर; अदिक ईंदुर अलग-अलग कुलगोळ, भाषागोळ, द्याशगोळ अदिक जातीगोळ अनुसार अलग-अलग आगेदुर.
GEN 10:32 नूह अन्द पारगोळ्द घराना ईदा हुन: अदिक आंदुर्द जातीगोळ्द हिसाब देल आंदुर वंशावली ईवा हु; अदिक जल-प्रलय इन बाद्दा पृथ्वी माकळव जातीगोळ इंदुर दा टु अच आगकु अलग आगेदव.
GEN 11:1 पुरा पृथ्‍वी मा ऊंद अच भाषा अदिक ऊंद अच बोली ईरोद.
GEN 11:2 आ समय इन लॉकुर पूर्व इन दी नळुत नळुत शिनार द्‍याश दा ऊंद मैदान सिक्त अदुर्दा बसुसेदुर.
GEN 11:3 आग आंदुर आपस दा अनली कुरतुर, “बरी, नाव ईटा माळ माळकु अवरी वळ्‍लीसा बेक्‍की दा बेईसाता.” अदिक आंदुर कल्‍ल इन जागा दा ईटा देल, अदिक चुना अन जागा मा मुण्‍ण इन गारा देल क्‍याल्‍सा तांकोडुर.
GEN 11:4 बाक आंदुर अंदुर, “बरी, नाव तान साटी ऊंद नगर अदिक ऊंद गुम्मट माळ कोमाता, यदुर्द चोटी आकाश उन सांगुळ मात माळुल, ई प्रकार देल नाव तान हेसुर माळाता, हिंग आगबाळुल कि नामी सप्‍पा पृथ्‍वी मा फैलुसोद बिळुल.”
GEN 11:5 याग लॉकुर नगर अदिक गुम्मट इक माळली कुरतुर, आग आंदरी नोळोर साटी यहोवा ईळुकु बंदुन.
GEN 11:6 अदिक यहोवा अंदुन, “नोळी, ना येन नोळेतीन कि आंदुर ऊंद अच जाती नोर उर अदिक आंदुर सप्‍पा मुंदुर्द ऊंद अच भाषा हुन. अगर आंदुर ईग ईद अनली कुरतार रा आंदुर जो येनारा भी माळोद ठांस कोंडार, आंदुर साटी येनारा भी माळोद असम्भव आगतीदील.
GEN 11:7 बरी, नाव ईळुकु आंदुर भाषा दा गळबळी हाकाता, कि आंदुर आबुर दाबुर बोली इक सम्‍सबाळुल.”
GEN 11:8 ई प्रकार यहोवा आंदरी अल टु पुरा पृथ्‍वी मा फैलुस बुट्‍टुन; अदिक आंदुर आ नगर इक माळोद बंद माळदुर.
GEN 11:9 ईद कारण आ नगर इन हेसुर बेबीलोन बीत्‍त; यतिकी पुरा पृथ्‍वी इन भाषा दा जो गळबळी आद, अद यहोवा अल्‍या हाकदुन, अदिक अल टु उच यहोवा मंळसागोळी पुरा पृथ्‍वी इन म्‍याकुच फैलुस बुट्‍टुन.
GEN 11:10 शेम उन वंशावली ई प्रकार देल आद. जल-प्रलय इन येढ्‍ढ वर्ष इन बाद्‍दा याग शेम ऊंद सौ वर्ष इनव आदुन, आग आऊन से अर्पक्षद उन जनम आत;
GEN 11:11 अदिक अर्पक्षद उन जनम इन बाद्‍दा शेम अईद सौ वर्ष जीत्‍ता ईत्‍तुन; अदिक आऊनोर अदिक भी पोर पारगोळ पैदा आदुर.
GEN 11:12 याग अर्पक्षद पैतीस वर्ष इनव आदुन, आग आऊन से शेलह उन जनम आत;
GEN 11:13 अदिक शेलह उन जनम इन बाद्‍दा अर्पक्षद नाक सौ मुर वर्ष अदिक जीत्‍ता ईत्‍तुन, अदिक आऊनोर अदिक भी पोर पारगोळ पैदा आदुर.
GEN 11:14 याग शेलह तीस वर्ष इनव आदुन, आग आऊन से एबेर पैदा आदुन;
GEN 11:15 एबेर उन जनम इन बाद्‍दा शेलह नाक सौ मुर वर्ष ताका जीत्‍ता ईत्‍तुन अदिक आऊनोर अदिक भी पोर पारगोळ पैदा आदुर.
GEN 11:16 एबेर याग चौतीस वर्ष इनव आदुन आग आऊन से पेलेग पैदा आदुन.
GEN 11:17 अदिक पेलेग उन जनम इन बाद्‍दा एबेर नाक सौ तीस वर्ष ताका जीत्‍ता ईत्‍तुन, अदिक आऊनोर अदिक भी पोर पारगोळ पैदा आदुर.
GEN 11:18 याग पेलेग तीस वर्ष इनव आदुन आग आऊन से रू पैदा आदुन.
GEN 11:19 अदिक रू उन जनम इन बाद्‍दा पेलेग येढ्‍ढ सौ ऊम्बत वर्ष ताका जीत्‍ता ईत्‍तुन, अदिक आऊनोर अदिक भी पोर पारगोळ पैदा आदुर.
GEN 11:20 रू याग बत्‍तीस वर्ष इनव आदुन आग आऊन से सरूग पैदा आदुन.
GEN 11:21 सरूग उन जनम इन बाद्‍दा रू येढ्‍ढ सौ येळ वर्ष ताका जीत्‍ता ईत्‍तुन, अदिक आऊक भी पोर पारगोळ पैदा आदुर.
GEN 11:22 याग सरूग तीस वर्ष ईनव आदुन रा आऊन से नाहोर पैदा आदुन.
GEN 11:23 नाहोर उन जनम इन बाद्दा सरूग येढ्‍ढ सौ वर्ष जीत्‍ता ईत्‍तुन, अदिक आऊक भी पोर पारगोळ पैदा आदुर.
GEN 11:24 याग नाहोर उनतीस वर्ष इनव आदुन रा आऊन से तेरह पैदा आदुन.
GEN 11:25 तेरह उन जनम इन बाद्‍दा नाहोर ऊंद सौ उन्‍नीस वर्ष ताका जीत्‍ता ईत्‍तुन, अदिक आऊक भी पोर पारगोळ पैदा आदुर.
GEN 11:26 तेरह याग सत्‍तर वर्ष इनव आदुन आग आऊन से अब्राहम, नाहोर अदिक हारान पैदा आदुर.
GEN 11:27 तेरह उन वंशावली ईद हुन. तेरह देल अब्राहम, नाहोर अदिक हारान पैदा आदुर; अदिक हारान से लूत पैदा आदुन.
GEN 11:28 हारान उन मृत्यु आऊन आप्प तेरह अन जीवन काल दा का कसदी अन ऊर हेसुर इन नगर दा आत्त, जो आऊन जन्म भूमी ईरोद.
GEN 11:29 अब्राहम अदिक नाहोर येढ्‍ढु मुंदुर मदा माळदुर. अब्राहम उन हिंग्‍स उन हेसुर सारै अदिक नाहोर उन हिंग्‍स उन हेसुर मिल्‍का ईरोद. ईक आ हारान उन पोर ईरोर, जो मिल्‍का अदिक यिस्‍का येढ्‍ढु मुंदुरव आप्‍प ईरोन.
GEN 11:30 सारै रा बाँझ ईरोर; आकी चिकोर आगीदील.
GEN 11:31 तेरह तान पार अब्राहम, अदिक तान नाती लूत, जो हारान उन पार ईरोन, अदिक तान सास्सा सारै, जो आऊन पार अब्राहम उन हिंग्‍स ईरोर, आ सप्‍पा मुंदुरी हुडुकु कसदी अन ऊर नगर टु होटकु कनान द्‍याश होगली इक होट्टुर; लेकीन हारान हेसुर इन द्‍याश दा पोहचुस्कु अल्‍या ईरली कुरतुर.
GEN 11:32 याग तेरह येढ्‍ढ सौ अईद वर्ष इनव आदुन; आग हारान द्‍याश दा सोतोदुन.
GEN 12:1 यहोवा अब्राहम से अंदुन, “तान द्‍याश, अदिक तान घरानागोळी, अदिक तान आप्‍प उन मान्‍ना अक बिटकु आ द्‍याश दा होटोग जो ना नीनी तोरसाईन.
GEN 12:2 अदिक ना नीन से ऊंद धोळ्‍द जाती माळाईन, अदिक नीनी आशीष कोळाईन, अदिक नीन हेसुर महान माळाईन, अदिक नी आशीष इन मूल आद्‍या.”
GEN 12:3 जो आशीर्वाद कोळुल, आंदरी ना आशीष कोळाईन; अदिक जो नीनी कोसुस्‍यार, आऊक ना श्राप कोळाईन; अदिक भूमी माकळोर सप्‍पा कुल नीन द्वारा आशीष ताकोंडार.
GEN 12:4 यहोवा अन ई वचन इन अनुसार अब्राहम नळदुन, अदिक लूत भी आऊन सांगुळ नळदुन; अदिक अब्राहम याग हारान द्‍याश टु होट्‍टुन आ समय आव पचहत्तर वर्ष इनव ईरोन.
GEN 12:5 ई प्रकार देल अब्राहम तान हिंग्‍स सारै, अदिक तान पुतणा लूत उक, अदिक जो धन आंदुर जमा माळीदुर, अदिक जो प्राणी आंदुर हारान दा हासील माळीदुर, सप्‍पा अक हुडुकु कनान द्‍याश दा होगली होट्‍टुर; अदिक आंदुर कनान द्‍याश दा होट्‍ट बंदुर.
GEN 12:6 आ द्‍याश इन बीच टु होगतेला अब्राहम शकेम दा, येल मोरे अन बांज इन मार्र आद, पोहचुसदुन. आ समय आ द्‍याश दा कनानी लॉकुर ईरतोगोर.
GEN 12:7 आग यहोवा अब्राहम उक दर्शन कोटकु अंदुन, “ईद द्‍याश ना नीन वंश इक कोळाईन.” अदिक आव यहोवा अन साटी अल ऊंद वेदी माळदुन, याव आऊक दर्शन कोटीदुन.
GEN 12:8 बाक अल टु मुंद वाळुसकु आव आ पहाळी मा बंदुन, जो बेतेल इन पूर्व इन दी आद, अदिक तान ड्‍यारा आ जागा मा नीदरूसदुन यदुर पश्‍चिम इन दी बेतेल अदिक पूर्व दी ऐ आद. अल भी आव यहोवा अन साटी ऊंद वेदी माळदुन अदिक यहोवा अन्द साटी प्रार्थना माळदुन.
GEN 12:9 अदिक अब्राहम मुंद वाळुसकु दक्षिण द्‍याश इन दी वोळेदुन.
GEN 12:10 आ द्‍याश दा अकाल बीत्‍त : इदुरसाटी अब्राहम मिस्त्र द्‍याश इक होटोदुन कि अल परदेशी आगकु ईरूल यतिकी द्‍याश दा भयंकर अकाल बिदकु ईरोद.
GEN 12:11 बाक हिंग आत कि मिस्त्र इन हात्‍ती पोहचुस्कु, आव तान हिंग्‍स सारै से अंदुन, “केळ, नानी मालुम आद कि नी ऊंद सुंदर आर्त आय;
GEN 12:12 अदिक मिस्त्र लॉकुर नीनी नोळ्‍यार रा अंदार, ‘इक आऊन हिंग्‍स उर,’ इदुरसाटी आंदुर रा नीनी कोंद बुट्‍टार, लेकीन नीनी जीत्ता ईट बुट्‍टार.
GEN 12:13 अत: ईद अनेत, ना आऊन आकतींग हुईन, यदुर देल नीन कारण नान कल्‍याण आगुल, अदिक नान प्राण नीन कारण ऊळदोगुल.”
GEN 12:14 बाक हिंग आत कि याग अब्राहम मिस्‍त्र दा बंदुन, आग मिस्त्र लॉकुर आऊन हिंग्‍स उक नोळदुर कि आक हापाळ सुंदर आर.
GEN 12:15 अदिक फिरौन इन हाकिमगोळ आकी नोळकु फिरौन उन मुंद आकिन प्रशंसा माळदुर; इदुरसाटी आक आर्त फिरौन उन मान्‍या पोहचुस्कु आदुर.
GEN 12:16 अदिक फिरौन आकिन कारण अब्राहम उन भलाई माळदुन; अदिक आऊक मर्र-माट्‍ट, वस्‍ता-गोसी, दास-दासीगोळ, गधा-गदहीगोळ, अदिक ऊँट सिकदव.
GEN 12:17 लेकीन यहोवा फिरौन अदिक आऊन घराना मा, अब्राहम उन हिंग्‍स सारै अन कारण धोळ धोळ परेशानीगोळ हाकदुन.
GEN 12:18 आग फिरौन अब्राहम उक कारसुसकु आऊन से अंदुन, “नी नान सांगुळ ईद येन माळ्‍द? नी नानी येती हेळीदिल कि आक नीन हिंग्‍स उर?
GEN 12:19 नी येती अंद कि आक नीन आकतींग उर? ना आकी तान हिंग्‍स माळोर साटी कोंडीन; लेकीन ईग तान हिंग्‍स उक हुडुकु ईल टु होटोग.”
GEN 12:20 अदिक फिरौन तान मंळसागोळी आऊन बारा दा आग्‍या कोट्‍टुन अदिक आंदुर आऊक अदिक आऊन हिंग्‍स उक, सप्‍पा संपत्‍ती सांगुळ जो आऊन ईरोद, विदा माळ कोंडुर
GEN 13:1 आग अब्राहम तान हिंग्‍स अदिक तान सप्‍पा संपत्ती हुडुकु, लूत उक भी सांगुळ हुडुकु, मिस्त्र अक बिटकु कनान इन दक्षिण द्‍याश दा बंदुन.
GEN 13:2 अब्राहम मर्र-म्यांडागोळ, वस्‍ता-गोसी, अदिक व्‍हान्‍ना बेळ्ली इन हापाळ धनी ईरोन.
GEN 13:3 बाक आव दक्षिण द्‍याश टु नळुकु बेतेल इन हात्‍ती अदा जागा मा पोहचुसदुन, येल आव पयले तान ड्‍यारा नीदरूसीदुन, जो बेतेल अदिक ऐ इन बीच दा आद.
GEN 13:4 ईद जागा आ वेदी इन हुन, यदरी आव पयले माळीदुन; अदिक अल अब्राहम मात यहोवा से प्रार्थना माळदुन.
GEN 13:5 लूत उन हात्‍ती भी, जो अब्राहम उन सांगुळ नळोन, मर्र-म्यांडागोळ, वस्‍ता-गोसीगोळ, अदिक ड्‍यारा ईरव.
GEN 13:6 इदुरसाटी आ द्‍याश दा आ दिनगोळ साटी येक्‍कुल जागा ईला ईरोद कि आंदुर सांगुळल्‍या ईरूल: यतिकी आंदुर हात्‍ती हापाळ धन ईरोद इदुरसाटी आंदुर सांगुळल्‍या ईर सकीदील.
GEN 13:7 अब्राहम अदिक लूत उन मर्र-माट्‍ट, अदिक वस्‍ता-गोसी नोर चरवाहागोळ दा झगळा आत. आ समय दा कनानी अदिक परिज्जी लॉकुर आ द्‍याश दा ईरतोगोर.
GEN 13:8 आग अब्राहम लूत से अनली कुरतुन, “नान अदिक नीन बीच, अदिक नान अदिक नीन चरवाहागोळ बीच दा झगळा आग बाळुल; यतिकी नाव लॉकुर वार्ट-बंधु आयेव.
GEN 13:9 इदुरसाटी नी नान से अलग आगेग, येन नीन मुंद पुरा द्‍याश हैलेच? अगर नी ऊजवा कय दी होद्‍या, रा ना डाक्‍या कय दी होगाईन; अगर नी डाक्‍या कय दी होद्‍या, रा ना ऊजवा कय दी होगाईन.”
GEN 13:10 आग लूत कण्‍ण नेगुकु, यरदन गांगा अन हात्‍ती गोळोद सप्‍पा तराई नोळदुन कि अद सप्‍पा सिंचकु आद. यागासताका यहोवा सदोम अदिक गमोरा अक नाश ईला माळीदुन, आगासताका सोअर इन हादी ताका अद तराई यहोवा अन बगीचा, अदिक मिस्त्र द्‍याश इन घाई ऊपजाऊ ईरोद.
GEN 13:11 इदुरसाटी लूत तान साटी यरदन इन सप्‍पा तराई नीवळुस्‍कु पूर्व दी होटोदुन, अदिक आंदुर आबुर-दाबुर से अलग आगेदुर.
GEN 13:12 अब्राहम कनान द्‍याश दा ईत्‍तुन, लेकीन लूत आ तराई इन नगरगोळ दा ईरली कुरतुन; अदिक तान ड्‍यारा सदोम इन हात्‍ती नीदरूसदुन.
GEN 13:13 सदोम इन लॉकुर यहोवा अन लेखा दा हापाळ बुरा अदिक पापी ईरोर.
GEN 13:14 याग लूत अब्राहम से अलग आगेदुन आग अदुर बाद्‍दा यहोवा अब्राहम से अंदुन, “कण्‍ण नेगुकु या जागा मा नी आय अल टु उत्‍तर-दक्षिण, पूर्व-पश्‍चिम, नाकु दी नोळ.
GEN 13:15 यतिकी याट जमीन नीनी कांळ्सतद, आ सप्‍पा जागा ना नीनी अदिक नीन वंश इक युग युग इन साटी कोळाईन.
GEN 13:16 अदिक ना नीन वंश इक पृथ्‍वी इन धुळा अन किनकागोळ घाई माळाईन, ईल ताका कि जो यावारा पृथ्‍वी इन धुळा अन किनकागोळी आळु सक्‍यान आवा नीन वंश भी आळु सक्‍यान.
GEN 13:17 येळ, ई द्‍याश इन लंबाई अदिक चौळाई दा नळु वयाळ, यतिकी ना अदरी नीनी का कोळाईन.”
GEN 13:18 ईदुर बाद्‍दा अब्राहम तान ड्‍यारा बिचकु, मम्रे अन बांज मार्रगोळ बीच जो हेब्रोन दा ईरव, होगकु ईरली कुरतुन; अदिक अल भी आव यहोवा अन्द ऊंद वेदी माळदुन.
GEN 14:1 शिनार उन राजा अम्रापेल, अदिक एल्लासार उन राजा अर्योक, अदिक एलाम उन राजा कदोर्लाओमेर, अदिक गोयीस उन राजा तिदाल उन दिनगोळ दा हिंग आत,
GEN 14:2 कि आंदुर सदोम उन राजा बेरा, अदिक गमोरा अन राजा बिर्शा, अदिक अदमा अन राजा शिनाब, अदिक सबोयीम उन राजा शमेबेर, अदिक बेला जो सोअर भी कहलुसतान, ई राजागोळ्द विरूद्ध युद्ध माळदुन.
GEN 14:3 इंदुर अईदु मुंदुर सिद्दीम हेसुर इन तराई दा, जो खारा समुद्र अन हात्‍ती आद, एकता माळदुर.
GEN 14:4 हन्‍नेळ वर्ष ताका रा इंदुर कदोर्लाओमेर उन हात्‍ती ईतकु स्यावा माळदुर; लेकीन तेरहवा वर्ष दा आऊन खिलाप विद्रोह माळदुर.
GEN 14:5 चौहदावा वर्ष दा कदोर्लाओमेर अदिक आऊन संगी राजा बंदुर, अदिक अशतरोत्‍कनम दा रपाईयो अक, अदिक हाम दा जूजियोगोळ इक, अदिक शाबेकिर्यातैम दा एमियोगोळ इक,
GEN 14:6 अदिक सेईर हेसुर इन पहाळी मा होरी अक बडुत बडुत आ एल्‍पारान ताका जो आळी इन हात्‍ती आद, पोहचुसेदुर.
GEN 14:7 अल आंदुर वापस आगकु एन्‍मिशपात इक बंदुर, जो कादेश भी कहलुसतद, अदिक अमालेकियों अन पुरा द्‍याश इक अदिक आ एमोरीगोळी भी जीक्स कोंडुर, जो हससोन्‍तामार दा ईरतोगोर.
GEN 14:8 आग सदोम, गमोरा, अदमा, सबोयीम, अदिक बेला, जो सोअर भी कहलुसतान; इंदुरव राजा होट्‍टुर अदिक सिद्दीम हेसुर इन तराई दा, आंदुर सांगुळ युद्ध इन साटी पाँती कटदुर:
GEN 14:9 मतलब एलाम उन राजा कदोर्लाओमेर, गोयीम उन राजा तिदाल, शिनार उन राजा अम्रापेल, अदिक एल्लासार उन राजा अर्योक, ई नाकु मुंदुर्द खिलाप आ अईदु मुंदुर पाँती कटदुर.
GEN 14:10 सिद्दीम हेसुर इन तराई दा येल दलदला मुण्‍ण इन खॉदरा अच खॉदरा ईरव; सदोम अदिक गमोरा अन राजा ओळ्‍त ओळ्‍त अऊर दा बिदोदुर, अदिक जो ऊळदोदुर आंदुर पहाळी मा वोळेदुर.
GEN 14:11 आग आंदुर सदोम अदिक गमोरा अन सप्‍पा धन अदिक भोजन वस्‍तुगोळ इक लूट पाट माळकु वोळेदुर.
GEN 14:12 अदिक अब्राहम उन पुतणा लूत, जो सदोम दा ईरतोगोन, आऊक भी आंदुर धन इन सांगुळ ओत कोंडुर.
GEN 14:13 आग ऊंद मंळसा जो ओळकु ऊळदोगीदुन आव होगकु इब्री अब्राहम उक समाचार कोट्‍टुन; अब्राहम रा एमोरी मम्रे, जो एश्‍कोल अदिक आनेर उन वार्ट ईरोन, आऊन बांज मार्रगोळ बीच दा ईरतोगोन; अदिक ई लॉकुर अब्राहम उन सांगुळ वादा कटकु ईरोर.
GEN 14:14 ईद केळकु कि आऊन पुतणा बंदी माळकु आग्‍यान, अब्राहम तान मुर सौ अठराह कल्‍द मंळसा, युद्ध कौशल दा निपुण दासगोळी हुडुकु जो आऊन कुटुम्‍ब दा पैदा आगीदुर, अस्त्र-शस्त्र धारण माळकु दान ताका आंदुर्द पीछा माळदुन;
GEN 14:15 अदिक तान दासगोळ्‍द अलग अलग दल कटकु ईळ्‍ल्‍क इक आंदुर मा चळाई माळकु आंदरी कोंद बुट्‍टुर अदिक होबा ताका, जो दमिश्क इन उत्‍तर इन दी आद, आंदुर्द पीछा माळदुन.
GEN 14:16 अदिक आव सप्‍पा धन इक, अदिक तान पुतणा लूत अदिक आऊन धन इक, अदिक आर्तेर इक, अदिक सप्‍पा बंदीगोळी वापस तंदुन.
GEN 14:17 याग आव कदोर्लाओमेर अदिक आऊन साथी राजागोळी हारूसकु वापस बरोन, रा सदोम इन राजा, शाबे इन घाटी जो राजा अन घाटी अनकु आगतद, आऊन से भेंट माळली बंदुन.
GEN 14:18 आग शालेम इन राजा मलिकिसिदक, रोट्‍टी अदिक अंगुर इन रास्सा तंदुन. आव परमप्रधान परमेश्वर उन याजक ईरोन.
GEN 14:19 आग आव आऊक ईद आशीर्वाद कोट्‍टुन “स्‍वर्ग अदिक पृथ्‍वी इक माळावाळा परमप्रधान परमेश्वर उन दी टु अब्राहम धन्‍य आगुल;
GEN 14:20 परमप्रधान परमेश्वर भी धन्‍य आन, याव नीन दुश्‍मनगोळी नीन वश दा माळ कोंडुन. बाक अब्राहम आऊक सप्‍पा वस्‍तुगोळ्‍द हतवा अंश कोट्‍टुन.”
GEN 14:21 आग सदोम इन राजा अब्राहम से अंदुन, “लॉकुरी रा नानी कोळ अदिक धन संपत्ती तान साटी ईट बुळ.”
GEN 14:22 अब्राहम सदोम इन राजा से अंदुन, “ना स्‍वर्ग अदिक पृथ्‍वी इन परमप्रधान परमेश्वर यहोवा अन कसम ताकोंडीन,
GEN 14:23 आऊन ना ईद किर्‍या तिनतीन, कि जो येनारा नींद आद अदुर दा टु ना रा ऊंद सूत, अदिक ना जुता अन बंध, अदिक न येनारा वस्‍तु ताकोमाईन कि नी हिंग अन बाळुल कि अब्राहम नांद अच कारण धनी आग्‍यान.
GEN 14:24 लेकीन जो येनारा ई हारोदोर तीन कोंडार अदिक आंदुर्द भाग, जो नान सांगुळ होगीदुर मतलब आनेर, एश्‍कोल, अदिक मम्रे, ना वापस माळतीदील, आंदुर रा तान तान हिस्‍सा ईट कोमुल.”
GEN 15:1 ई मातगोळ बाद्‍दा यहोवा अन ईद वचन दर्शन दा अब्राहम उन हात्‍ती पोहचुस्‍त: “हे अब्राहम, अंजबाळ; नीन ढाल अदिक नीन हापाळ धोळ्‍द प्रतिफल ना हुईन.”
GEN 15:2 अब्राहम अंदुन, “हे प्रभु यहोवा, ना रा बीना चिकोर इन आईन, अदिक नान मान्‍ना अन वारीस ईव दमिश्कवासी एलीएजेर आदान, अत: नी नानी येन कोट्या?”
GEN 15:3 अदिक अब्राहम अंदुन, “नानी रा नी वंश कोटीदील, अदिक येन नोळतीन कि नान मान्‍या पैदा आग्‍यान ऊंद जन नान वारीस आदान.”
GEN 15:4 आग यहोवा अन वचन आऊन हात्‍ती पोहचुस्त, “ईव नीन वारीस आगतीदील, नीन जो खुद इनव पार आदान, आवा नीन वारीस आदान.”
GEN 15:5 अदिक आव आऊक व्हार्या वोतकु अंदुन, “आकाश इन दी नोळकु तारागोळी आळु, येन नी अवरी आळु सकत्‍या? बाक आव आऊन से अंदुन, नीन वंश हिंग अच आदीत.”
GEN 15:6 आव यहोवा मा विश्वास माळदुन; अदिक यहोवा ई मात इक आऊन लेख दा धर्म आळदुन.
GEN 15:7 आग आव आऊन से अंदुन, “ना आवा यहोवा हुईन जो नीनी कसदी अन ऊर नगर टु व्‍हार्या तंदुन, कि नीनी ई द्‍याश इन अधिकार कोळाईन.”
GEN 15:8 अब्राहम अंदुन, “हे प्रभु यहोवा, ना ह्‍यांग जानसाईन कि ना ईदुर्द अधिकारी आगाईन?”
GEN 15:9 यहोवा आऊन से अंदुन, “नान साटी मुर वर्ष इन ऊंद कलोर, अदिक मुर वर्ष इन ऊंद मर्र, अदिक मुर वर्ष इन ऊंद म्यांडा, अदिक ऊंद फंडकुल अदिक कबूतर इन ऊंद पाड्‍डा हुडु.”
GEN 15:10 ई सप्‍पा जनावर हुडुकु आव अऊर बीच दा टु तुकळा माळदुन, अदिक तुकळागोळी आमने सामने ईटदुन; लेकीन पक्षीगोळोव आव तुकळा माळीदिल.
GEN 15:11 याग मासाहारी पक्षी लाशगोळ मा झपटुसदव, आग अब्राहम अवरी तुळकाळ्स बुट्‍टुन.
GEN 15:12 याग सुर्य अन मुळकोद समय आत, आग अब्राहम उक भारी जप बत्‍त; अदिक नोळी, हापाळ अंज्क अदिक महा अंधकार आऊक घेर्सकोम्‍त.
GEN 15:13 आग यहोवा अब्राहम से अंदुन, “ईद सही दा जान्‍स कि नीन वंश पराया द्‍याश दा परदेशी आगकु ईत्‍तार, अदिक आ द्‍याश इन लॉकुरोर दास आगेदार; अदिक आंदुर आंदरी नाक सौ वर्ष ताका दु:ख कोट्‍टार.
GEN 15:14 बाक याता द्याश इन आंदुर दास आदार आऊक ना दण्‍ड कोळाईन: अदिक अदुर बाद्‍दा आंदुर धोळ्‍द धन अल टु हुडुकु बंदार.
GEN 15:15 नी रा तान पुर्वजगोळ सांगुळ मीलुसेद्‍या; नीनी पुरा बुढ़ापा दा मुण्ण कोटकु आदीत.
GEN 15:16 लेकीन आंदुर नाकवा पीढ़ी दा ईल मात बंदार : यतिकी ईगासताका एमोरी इन अधर्म पुरा आगली आद.”
GEN 15:17 अदिक हिंग आत कि याग सुर्य मुळकेत अदिक हापाळ अंधार आत, आग ऊंद बेक्‍की इन भट्टी यदुर दा टु धुंगा येळ तोगोद अदिक ऊंद होततेला मशाल कांळ्‍स्‍त जो आ तुकळा गोळ बीच दा टु आगकु होटबुळ्‍त.
GEN 15:18 ईदा दिशी यहोवा अब्राहम उन सांगुळ ईद वादा माळदुन, “मिस्त्र अन महानद टु हुडुकु फरात हेसुर इन धोळ्‍द नद ताका याट द्‍याश आद,
GEN 15:19 मतलब केनियो, कनिज्‍जियों, कदमोनियों,
GEN 15:20 हित्ती, परिज्जी, रपाईयो
GEN 15:21 एमोरीगोळ, कनानीगोळ, गिर्गाशीगोळ, अदिक यबूसीगोळ द्‍याश ना नीन वंश इक कोटीन.”
GEN 16:1 अब्राहम उन हिंग्‍स सारै अन याऊ पार ईला ईरोन. आकिन हाजिरा हेसुर इन ऊंद मिस्त्री दासी ईरोर.
GEN 16:2 सारै अब्राहम से अंदुर, “नोळ, यहोवा रा नान क्‍वाता बंद माळकु ईट्‍यान, इदुरसाटी ना नीन से विनती माळतीन कि नी नान दासी इन हात्‍ती होग; आग सकतद कि नान मान्‍ना आकिन द्वारा बसुसेगुल.” सारै अन ईद मात अब्राहम मान्‍स कोंडुन.
GEN 16:3 इदुरसाटी याग अब्राहम उक कनान द्‍याश दा ईरतेला हत्‍त वर्ष आगेगीदव आग आऊन हिंग्‍स सारै तान मिस्त्री दासी हाजिरा अक हुडुकु तान गांड अब्राहम उक कोट्‍टुर, कि आक आऊन हिंग्‍स आगुल.
GEN 16:4 आव हाजिरा अन हात्‍ती होदुन, अदिक आक गर्भवती आदुर. याग आक जान्सदुर कि आक गर्भवती आर, आग आक तान स्‍वामिनी इक बेकार नजर देल नोळली कुरतुर.
GEN 16:5 आग सारै अब्राहम से अंदुर, “जो नान मा उपद्रव आत अद नींद अच ताल्‍ला मा ईरूल. ना रा तान दासी इक नीन हिंग्‍स माळ बुटीन; लेकीन याग आक जान्सदुर कि आक गर्भवती आर, आग आक नानी बेकार सम्‍सली कुरतुर; इदुरसाटी यहोवा नीन अदिक नान बीच दा न्‍याय माळुल.”
GEN 16:6 अब्राहम सारै से अंदुन, “नोळ, नीन दासी नीन वश दा आर; ह्‍यांग नीनी भला हततद हांग अच आकिन सांगुळ माळ.” आग सारै आक इक दुख कोळली कुरतुर, अदिक आक आकिन मुंदु टु ओळेदुर.
GEN 16:7 आग यहोवा अन दूत आकी आळी दा शूर इन हादी मा नीर इन ऊंद झरना अन हात्‍ती नोळकु अंदुन,
GEN 16:8 “हे सारै अन दासी हाजिरा, नी येल टु बरेत्‍या अदिक येल होगेत्‍या?” आक अंदुर, “ना तान स्‍वामिनी इन मुंदु टु ओळकु बंदीन.”
GEN 16:9 यहोवा अन दूत आकिन से अंदुन, “तान स्‍वामिनी इन हात्‍ती होटोग अदिक आकिन वश दा ईर.”
GEN 16:10 अदिक यहोवा अन दूत आकिन से ईद भी अंदुन, “ना नीन वंश इक हापाळ वाळुसाईन, ईल ताका कि हापाळ वाळुसदुर कारण आऊन गिनती आग सकतीदिल.”
GEN 16:11 अदिक यहोवा अन दूत आकिन से अंदुन, “नोळ, नी गर्भवती आय, अदिक चिग्‍द हाळद्‍या; नी आऊन हेसुर इश्‍माएल ईटेत, यतिकी यहोवा नीन दुख इन हाल केळ कोंडान.
GEN 16:12 अदिक मंळसा आळी दाकळोद गधा अन घाई ईत्‍तान, आऊन कय सप्‍पा मुंदुर खिलाप येद्‍दव; अदिक आव तान सप्‍पा वार्टुर बीच दा बसुस्कु ईत्‍तान.”
GEN 16:13 आग यहोवा याव आकिन से मातगोळ हेळीदुन आकिन हेसुर आव “नी नोळावाळा ईश्वर” ईटदुन अदिक अंदुन, येन ना ईल भी आऊक नोळदुर बाद्‍दा भी जीत्‍ता ईतोदिन.
GEN 16:14 ईद कारण आ भाय इन हेसुर लहैरोई भाय बीत्‍त; अद रा कादेश अदिक बेरेद इन बीच दा आद.
GEN 16:15 हाजिरा अक अब्राहम उन द्वारा ऊंद पार आदुन; अदिक अब्राहम तान पार उन हेसुर, यारी हाजिरा जनम कोटीदुर, इश्‍माएल ईटदुर.
GEN 16:16 याग हाजिरा अब्राहम उन द्वारा इश्‍माएल उक जनम कोट्‍टुर आ समय अब्राहम छियासी वर्ष इनव ईरोन.
GEN 17:1 याग अब्राहम निन्‍यानवे वर्ष इनव आगेदुन, आग यहोवा आऊक दर्शन कोटकु अंदुन, “ना सर्वशक्तिमान ईश्‍वर हुईन; नान उपस्‍थिति दा नळु अदिक सिद्ध आगतेला होग.
GEN 17:2 ना नीन सांगुळ वादा माळाईन, अदिक नीन वंश इक हापाळ अच वाळुसाईन.”
GEN 17:3 आग अब्राहम बाय इन भार बिद्‍दुन; अदिक परमेश्वर आऊन से ईव मातगोळी माळतेला ईत्‍तुन,
GEN 17:4 “नोळ, नान वादा नीन सांगुळ कटकु ईत्‍तीत, इदुरसाटी नी जातीगोळ समूह अन मूल आप्‍प आगेद्‍या.
GEN 17:5 इदुरसाटी ईग टु नीन हेसुर अब्राहम ईरतीदील, लेकीन नीन हेसुर अब्राहम आदीत; यतिकी ना नीनी जातीगोळ समूह अन मूल आप्‍प ठहरूस बुटीन.
GEN 17:6 ना नीनी हापाळ फलवन्‍त माळाईन, अदिक नीनी जाती जाती इन मूल माळाईन, अदिक नीन वंश दा राजा पैदा आदार.”
GEN 17:7 अदिक ना नीन सांगुळ, अदिक नीन बाद्‍दा पीढ़ी पीढ़ी ताका नीन वंश इन सांगुळ भी ई आशय इन युग युग इन वादा कटतीन, कि ना नीन अदिक नीन बाद्‍दा नीन वंश इनव भी परमेश्वर ईराईन.
GEN 17:8 अदिक ना नीनी इक, अदिक नीन बाद्‍दा नीन वंश इक भी, ईद सप्‍पा कनान द्‍याश यदुर दा नी परदेशी आगकु ईरत्‍या, युग युग इन साटी कोट बुळाईन; अदिक ना आंदुरव परमेश्वर आगाईन.
GEN 17:9 बाक परमेश्वर अब्राहम से अंदुन, “नी भी नान सांगुळ कट्‍द वादा अन पालन माळेत; नी अदिक नीन बाद्‍दा नीन वंश भी तान तान पीढ़ी दा अदुर्द पालन माळुल.
GEN 17:10 जो वादा नीन अदिक नान बीच तथा नीन बाद्‍दा नीन वंशज इन बीच दा आद अदिक जो नीव मान्‍सतोदिर अद ईद हुन कि नीम दा टु हर ऊंद मंळसा अन खतना माळकु आदीत.
GEN 17:11 नीव तान तान खतना माळ कोमेतीर: जो वादा नीम अदिक नान बीच दा आद, अदुर्द ईदा चिन्ह आदीत.
GEN 17:12 अदिक नीम पीढ़ी टु पीढ़ी ताका नीम बीच दा येट्‍ट दिन इन सप्‍पा पारगोळ्‍द खतना माळकु आगुल; चाहे आव नीम मान्‍या पैदा आगीदान या यातोवारा परदेशी इन हाती टु पैस्या देल कोंडकु यती ईला आगीदान अदिक नीम वंश इनव येती ईला आगीदान.
GEN 17:13 जो दास नीन मान्‍या पैदा आगीदान या नीन धन देल कोंडकु आगीदान आऊन खतना जरूर माळकु आगुल; ई प्रकार नान वादा अन ईद चिन्‍ह युग युग ताका नीम शरीर दा बन्सकु ईत्‍तीत.
GEN 17:14 लेकीन जो मंळसा खतना रहित ईरूल, मतलब यार्द खतना ईला आगीदाद, आव प्राणी तान लॉकुर दा टु नष्‍ट माळकु आगुल, यतिकी आव नान सांगुळ कट्‍द वादा अक मुर्द बुट्‍टुन.”
GEN 17:15 बाक परमेश्वर अब्राहम से अंदुन, “नीन हिंग्‍स जो सारै आर, आकी नी ईगी टु सारै अनबाळेत, आकिन हेसुर सारा ईत्‍तीत.
GEN 17:16 अदिक ना आकी आशीष कोळाईन, अदिक सही दा नीनी आकिन द्वारा ऊंद चिग्‍द कोळाईन. अदिक ना आकी आशीष कोळाईन अदिक आक जाती जाती इन जननी आदार; अदिक आकिन से राज्‍य राज्‍य अन राजागोळ पैदा आदार.”
GEN 17:17 आग अब्राहम बाय इन भार देल बिद्‍दुन अदिक नेगली कुरतुन, अदिक अनली कुरतुन, “येन सौ वर्ष इन मंळसा अन भी चिग्‍द आदीत अदिक येन सारा जो नब्‍बे वर्ष इन आर चिग्‍द हाळदार?”
GEN 17:18 अदिक अब्राहम परमेश्वर से अंदुन, “इश्‍माएल नीन नजर दा बन्सकु ईरूल! ईदा हापाळ आद.”
GEN 17:19 आग परमेश्वर अंदुन, सही दा नीन हिंग्‍स सारा नीन से ऊंद पार पैदा आदान; अदिक नी आऊन हेसुर इसहाक ईटेत; अदिक ना आऊन सांगुळ हिंग वादा माळाईन जो आऊन बाद्‍दा आऊन वंश इन साटी युग-युग इन वादा आदीत.
GEN 17:20 इश्‍माएल इन बारा दा भी ना नींद केळीन; ना आऊक भी आशीष कोळाईन, अदिक आऊक फलवन्‍त माळाईन अदिक हापाळ अच वाळुस बुळाईन; आऊन से हन्‍नेळ प्रधान पैदा आदार, अदिक ना आऊन से ऊंद धोळ्‍द जाती माळाईन.
GEN 17:21 लेकीन ना तान वादा इसहाक इन सांगुळ अच कटाईन जो सारा से सामने वर्ष ईदा नीवळुस्द समय दा पैदा आदान.
GEN 17:22 आग परमेश्वर अब्राहम से मातगोळ माळोद बंद माळदुन अदिक आऊन हाती टु म्‍याकुच येरेदुन.
GEN 17:23 आग अब्राहम तान पार इश्‍माएल उक अदिक आऊन मान्‍या यास पैदा आगीदुर सप्‍पा लॉकुर इक अदिक यारी आव धन कोटकु कोंडीदुन, मतलब आऊन मान्‍या यास मंळसागोळ ईरोर, आ सप्‍पा मुंदुरी हुडुकु अदा दिशी परमेश्वर उन वचन इन अनुसार आदुर्द खतना माळदुन.
GEN 17:24 याग अब्राहम उन खतना आत आग आव निन्‍यानवे वर्ष ईनव ईरोन.
GEN 17:25 अदिक याग आऊन पार इश्‍माएल उन खतना आत आग आव तेरह वर्ष ईनव ईरोन.
GEN 17:26 अब्राहम अदिक आऊन पार इश्‍माएल येढ्‍ढु मुंदुर्द खतना ऊंदा दिशी आत;
GEN 17:27 आऊन सांगुळ अच आऊन मान्‍यागोळोर सप्‍पा मंळसागोळ्‍द जो मान्‍या पैदा आदुर अदिक जो परदेशीगोळ कय देल पैस्या देल कोंडकु आगीदुर, खतना आत.
GEN 18:1 याग अब्राहम हागुल इन कळकळास्‍त बिसुल दा तान ड्‍यारा अन दरवाजा मा कुर्तकु ईरोन आग यहोवा मम्रे अन बांज मार्र इन हाती आऊन मुंद प्रकट आदुन.
GEN 18:2 अदिक याग आव तान कण्‍ण म्याकुच नेगदुन रा नोळदुन कि मुर मंळसा नान मुंद नीदुरकु आर. आंदरी नोळकु आव आंदुर से सीकली ड्‍यारा अन दरवाजा टु ओळदुन, अदिक जमीन मा बिदकु आव प्रणाम माळदुन,
GEN 18:3 अदिक अंदुन, “नान प्रभु, अगर नान मा नींद कृपा दृष्‍टि आद रा तान दास उन हाती टु हिंग अच होगबाळेत.
GEN 18:4 थ्‍वाळासा नीर तनकु आगुल यदुर देल कि नीव लॉकुर तान काल तोळकु ई मार्र इन ल्‍यालमा आराम माळी.
GEN 18:5 नीव रा तान दास उन मान्‍या बंदीर, इदुरसाटी ना येनारा रोट्‍टीगोळ तराईन कि नीव तीनकु तृप्‍त आगी, अदुर बाद्‍दा नीव होटोगेतीर.” आंदुर अंदुर, “ह्‍यांग नी अंद हांग अच माळ.”
GEN 18:6 अब्राहम ड्‍यारा दा सारा अन हाती जल्‍दी होगकु अंदुन, “तुरन्‍त हत्‍त किलो मैदा हुडुकु काल्‍सकोम अदिक रोट्‍टी माळ.”
GEN 18:7 बाक अब्राहम वस्‍ता-वाळी इन झुंड दी ओळदुन अदिक ऊंद कोमल अदिक वळ्‍लीद पाड्‍डा हुडुकु तान सेवक उक कोट्‍टुन, अदिक आव अदरी जल्‍दी से बेईसदुन.
GEN 18:8 आग आव हाल अदिक दही अदिक पाड्‍डा अन मास, जो आव बेईसुसीदुन, आंदुर मुंद वाट्‍स बुट्‍टुन; अदिक खुद मार्र इन ल्‍यालमा आंदुर हात्‍ती नीदुरकु ईत्‍तुन, अदिक आंदुर तीनली कुरतुर.
GEN 18:9 आंदुर आऊन से केळदुर, “नीन हिंग्‍स सारा येल आर?” आव अंदुन, “आक रा ड्‍यारा दा आर.”
GEN 18:10 आव अंदुन, “ना ब्‍यासक्‍या अन दिनगोळ दा सही दा नीन हात्‍ती मात्‍त बराईन, अदिक नीन हिंग्‍स सारा अक ऊंद पार पैदा आदान.” सारा ड्‍यारा अन दरवाजा मा जो अब्राहम उन हिंद ईरोर, केळोर.
GEN 18:11 अब्राहम अदिक सारा येढ्‍ढु मुंदुर हापाळ हाळाबाट्ट आगेगीदुर; अदिक सारा अन व्‍हार्या आगोद बंद आगेगीत.
GEN 18:12 इदुरसाटी सारा मन दा नेगकु अनली कुरतुर, “ना रा हाळामुंड आईन, अदिक नान गांड भी हाळाबाट्ट आन, रा येन नानी ईद सुख आदीत?”
GEN 18:13 आग यहोवा अब्राहम से अंदुन, “सारा ईद अनकु येती नेगदुर कि ना जो ईट हाळामुंड आईन, येन सही दा जनम कोळ सकाईन?
GEN 18:14 येन यहोवा अन साटी येनारा भी क्‍याल्‍सा कठीण आद? ना सही समय मा मतलब सामने वर्ष ईदा समय नीन हात्‍ती मात बराईन अदिक सारा अन मोगुल दा ऊंद पार ईत्‍तान.”
GEN 18:15 आग सारा अंज्‍क इन मारा ईद अनकु तान मय तेगदुर, “ना नेगीदिल.” आव अंदुन, “ईला नी रा नेगीद.”
GEN 18:16 बाक आ मंळसागोळ अल टु नळदुर अदिक सदोम इन दी नोळदुर; अदिक अब्राहम आंदरी सार माळोर साटी आंदुर सांगुळ सांगुळ नळदुन.
GEN 18:17 आग यहोवा अंदुन, “ईद जो ना माळतीन, अदरी येन ना अब्राहम से होचकोमकु ईटाईन?
GEN 18:18 अब्राहम से रा सही दा ऊंद धोळ्‍द अदिक सामर्थी जाती पैदा आदीत, अदिक पृथ्‍वी इन सप्‍पा जातीगोळ आऊन द्वारा आशीष सिक्कीत.
GEN 18:19 यतिकी ना जान्‍सतीन कि आव तान चिकोरी अदिक परिवार इक, जो आऊन हिंद ईतोदार, आग्‍या कोट्‍टान कि आंदुर यहोवा अन हादी दा अटल बन्सकु ईरूल, अदिक धर्म अदिक न्‍याय माळतेला ईरूल; ताकी जो येनारा यहोवा अब्राहम उन बारा दा अंदान अदरी पुरा माळुल.”
GEN 18:20 बाक यहोवा अंदुन, “सदोम अदिक गमोरा अन चिल्‍ळासोद वाळुसीग्‍याद, अदिक आंदुर्द पाप हापाळ भारी आगेग्‍याद;
GEN 18:21 इदुरसाटी ना ईळुकु नोळाईन कि अदुर घाई चिल्‍ळासोद नान कीव ताका पोहचुस्‍याद, आंदुर ठीक हांग अच क्‍याल्‍सा माळ्‍यार कि ईला; अदिक ईला माळीदार रा ना अदरी जान्स कोमाईन.”
GEN 18:22 आग आ मंळसागोळ अल टु तिर्गकु सदोम इन दी होगली कुरतुर; लेकीन अब्राहम यहोवा अन मुंद नीदुरकु ईत्‍तुन.
GEN 18:23 आग अब्राहम आऊन हात्‍ती होगकु अनली कुरतुन, “येन नी सही दा दुष्ट उन सांगुळ धर्मी इन भी नाश माळ्‍या?
GEN 18:24 अगर आ नगर दा पचास मंळसा धर्मी ईरूल, रा येन नीव आ नगर इक नाश माळीर? येन आ पचास धर्मीगोळ कारण बाकी सप्‍पा लॉकुर ऊळु सकालुर?
GEN 18:25 ई प्रकार इन क्‍याल्‍सा माळोद नीम से दुर ईरूल दुष्ट मंळसा अन सांगुळ धर्मी मंळसा अक कोंद कोमोद, बुरा अदिक धर्मी इन सांगुळ ऊंद घाई व्‍यवहार माळोद. हिंग माळोद नीम से दुर ईरूल! येन सप्‍पा पृथ्‍वी इन न्‍यायी न्‍याय माळतीदील?”
GEN 18:26 यहोवा अंदुन, “अगर नानी सदोम शहर दा पचास धर्मी मंळसा सीकतार, रा ना आंदुर कारण पुरा शहर इक बिट बुळाईन.”
GEN 18:27 अब्राहम मात अंदुन: “हालाकी ना सिर्फ मुण्‍ण अदिक राख हुईन, तरी भी ना प्रभु से मात माळोद हिम्‍मत माळीन,
GEN 18:28 अगर अल पचास दा टु अईद धर्मी कम आगेदार, रा येन नीव अईद धर्मी कम आगदुर कारण पुरा नगर इन नाश माळीर?” यहोवा उत्‍तर कोट्‍टुन, “अगर नानी अल पैतालीस भी सीकतार, रा ना आ नगर इक नाश माळतीदील.”
GEN 18:29 ऊंद घन मात अब्राहम यहोवा से अंदुन, “अगर अल चालीस अच धर्मी सीक्‍यार रा?” यहोवा उत्‍तर कोट्‍टुन, “आ चालीस इन कारण भी ना नाश माळतीदील.”
GEN 18:30 आग अब्राहम अंदुन, प्रभु नान मा नाराज आगबाळ, “लेकीन नानी माताळगोळ. अगर अल तीस अच धर्मी सीक्‍यार रा?” यहोवा उत्‍तर कोट्‍टुन, “अगर नानी अल तीस भी सीकतार रा नाश माळतीदील.”
GEN 18:31 आग अब्राहम अंदुन, “प्रभु, ना नीम से मात माळोद रा हिम्‍मत माळ अच कोंडीन; ईद भी आग सकतद कि अल ईप्‍पत अच सीकतार रा?” यहोवा उत्‍तर कोट्‍टुन, “आ ईप्‍पत इन कारण भी ना आ नगर इक नाश माळतीदील.”
GEN 18:32 बाक अब्राहम अंदुन, “हे प्रभु, नी सिट्‍ट दा बरबाळ, आखरी घन ना नीन से विनती माळतीन. अगर अल हत्‍त अच सीक्‍यार रा?” यहोवा उत्‍तर कोट्‍टुन, “ना आ हत्‍त इन कारण आ नगर इक नाश माळतीदील.”
GEN 18:33 याग यहोवा अन अब्राहम से मात माळकु आत, रा आव अल टु होटोदुन, अदिक अब्राहम तान मान्‍या वापस होटोदुन.
GEN 19:1 द्‍याव मुळकास ताका आ येढ्‍ढ स्वर्गदूत सदोम पोहचुसदुर. ई समय लूत सदोम इन प्रवेश दरवाजा मा अच कुर्तकु ईरोन. स्‍वर्गदूतगोळ मा नजर बीळतेला अच लोत आंदुर से मुलाकात माळोरसाटी नीदुरदुन अदिक आंदरी नमस्‍कार माळदुर.
GEN 19:2 अदिक अंदुन, “हे नानोर प्रभुगोळा, नीव तान सेवक उन मान्‍या बरी. नीव तान काल तोळकु ईळ्‍ल्‍की ईल ईरी अदिक व्हातर्‍या तान यात्रा मा मुंद होगी.” लेकीन आंदुर उत्‍तर कोट्‍टुर, “ईला, ईळ्‍ल्‍क रा नाव ईल नगर इन चौक दा व्‍यतीत माळेव.”
GEN 19:3 अदिक लोत आंदुर से हापाळ विनती माळकु आंदरी राजी माळदुन; इदुरसाटी आंदुर आऊन सांगुळ नळुकु आऊन मान्‍या बंदुर; अदिक लोत आंदुर साटी भोजन तैयार माळदुन, अदिक बिना खमीर इन रोट्‍टी माळकु आंदरी तीन्‍सदुन.
GEN 19:4 आंदुर मींगा से पयले, सदोम नगर इन मंळसागोळ, हारोदोर से हाळाबाट्‍टुर ताका, बल्‍की नाकु दिकळोर सप्‍पा लॉकुर बंदकु आ मान्‍ना अक घेर्स कोंडुर;
GEN 19:5 अदिक लूत उक कारूकु अनली कुरतुर, “जो मंळसा ईंद ईळ्‍ल्‍की नीन हाती बंदार आंदुर येल आर? आंदरी नाम हाती व्‍हार्या तर, कि नाव आंदुर से संभोग माळेव.”
GEN 19:6 आग लूत आंदुर हाती व्‍हार्या होदुन, अदिक दरवाजा अक तान हिंद बंद माळकु अंदुन,
GEN 19:7 “हे नान वार्टुरा, हिंग बुराई माळबाळी.
GEN 19:8 केळी, नानोर येढ्‍ढ पोरगोळ आर अदिक आंदुर ईगासताका यातोदु मंळसा अन बाय नोळीदील, इच्‍छा ईतीदाद रा ना आंदरी नीम हाती व्‍हार्या तराईन, अदिक नीमी ह्‍यांग वळ्‍लीद हततद हांग व्‍यवहार आंदुर से माळी: लेकीन ई मंळसागोळ से येनु माळबाळी; यतिकी ईंदुर नान मान्‍या बंदार.”
GEN 19:9 आंदुर अंदुर, “सरकुसेग!” बाक आंदुर अनली कुरतुर, “नी ऊंद परदेशी आगकु ईल ईरोर साटी बंद्‍या लेकीन इग न्‍यायी भी बन्सकु कुरत्‍या; इदुरसाटी ईग नाव आंदुर से भी वाळुसकु नीन सांगुळ बुराई माळेव.” अदिक आंदुर आ मंळसा लूत उक हापाळ दब्सली कुरतुर, अदिक दरवाजा मुरोरसाटी हाती बंदुर.
GEN 19:10 आग आ पावनागोळ कय वाळुसकु लूत उक तान हाती मान्‍या जेळदूर, अदिक दरवाजा अक बंद माळ कोंडुर.
GEN 19:11 अदिक आंदुर येन स्‍याणेर, येन धोड्‍डेर, सप्‍पा मंळसागोळी जो मान्‍या अन दरवाजा मा ईरोर कुढ्‍ढ माळ बुट्‍टुर, अत: आंदुर दरवाजा अक ताळुत ताळुत थकसेदुर.
GEN 19:12 बाक आ पावनागोळ लूत से केळदुर, “ईल नीनोर अदिक यार यार आर? जवाई, पारगोळ, पोरगोळ, अदिक नगर दा नीन यावारा ईतीदान, आ सप्‍पा अक हुळकु ई जागा टु होटबुळ.
GEN 19:13 यतिकी नाव आ जागा अक नाश माळोर आयेव, इदुरसाटी कि ईदुर्द चिल्‍ळासोद यहोवा अन हाती वाळुसीग्‍याद; अदिक यहोवा नामी ईदुर्द सत्‍यानाश माळोर साटी कळ्‍यान.”
GEN 19:14 आग लूत होटकु तान जवाईगोळी, यार सांगुळ आऊन पोरगोळ्‍द सगाई आगेगीत, समझुसकु अंदुन, “येळी, ई जागा टु नळी; यतिकी यहोवा ई नगर इक नाश माळावाळा आन.” आऊन जवाईगोळ आऊन मज्‍याक हार्सली कुरतुर.
GEN 19:15 याग व्‍हातुर आगली कुर्त, आग दूतगोळ लूत उक हिंग माळली अंदुर, “येळ, तान हिंग्‍स अदिक येढ्‍ढु पोरगोळी जो ईल आर वोय: ईलारा नी भी ई नगर इन अधर्म दा भस्‍म आगेद्‍या.”
GEN 19:16 लेकीन आव विलम्‍ब माळतेला ईत्‍तुन, ईदुर मा आ मंळसागोळ आऊक अदिक आऊन हिंग्‍स, अदिक येढ्‍ढु पोरगोळ कय हुळदुर; यतिकी यहोवा अन दया आऊन मा ईरोद; अदिक आऊक तेगुकु नगर इन व्‍हार्या माळदुर.
GEN 19:17 अदिक हिंग आत कि याग आंदुर आंदरी व्‍हार्या तेगदुर, आग आव अंदुन, “तान जीव हुडुकु ओळेग; हिंद नोळ बाळेत, अदिक तराई दा थाम्‍सबाळेत; आ पहाळी मा ओळेगेत, ईलारा नी भी भस्‍म आगेद्‍या.”
GEN 19:18 लूत आंदुर से अंदुन, “हे प्रभु, हिंग माळबाळ!
GEN 19:19 नोळ, नीन दास मा नींद अनुग्रह अन नजर आद, अदिक नी ईदुर्दा हापाळ कृपा तोर्स्‍द, कि नान जीव इक ऊळ्‍सद; लेकीन ना पहाळी मा ओळ सकालीन, कि हिंग आगबाळुल, कि यातोदारा परेशानी नान मा बंदकु बिळुल, अदिक ना सोतोगाईन.
GEN 19:20 नोळ, अद नगर हिंग हाती आद कि ना अल ओळ सकतीन, अदिक अद स्यांळ्द भी आद. नानी अल अच ओळगोळी, येन आ नगर स्यांळ्द हैलेच? अदिक नान जीव ऊळदोदीत.”
GEN 19:21 आव आऊन से अंदुन, “नोळ, ना ई बारा दा भी नीन विनती स्‍वीकार माळीन, कि याता नगर इन चर्चा नी माळ्‍द, अदरी ना नाश माळतीदील.
GEN 19:22 जल्‍दी अल ओळतेला होटोग; यागासताका नी अल होगाल आगासताका ना येनु माळ सकतीदिल.” ईदा कारण आ नगर इन हेसुर सोअर बीत्‍त.
GEN 19:23 लूत उन सोअर इन हाती पोहचुसतेला अच सूर्य पृथ्‍वी मा उदय आत.
GEN 19:24 आग यहोवा तान दी टु सदोम अदिक गमोरा मा आकाश टु गन्‍धक अदिक बेक्‍की बरसुसदुन;
GEN 19:25 अदिक आ नगरगोळी अदिक पुरा तराई, अदिक नगर दाकळोर सप्‍पा ईरावाळेर इक, जमीन इन सप्‍पा ऊपज सांगुळ नाश माळ बुट्‍टुन.
GEN 19:26 लूत उन हिंग्‍स जो आऊन हिंद ईरोर हिंद पलटुसकु नोळदुर, अदिक आक ऊप्‍प इन खंबा बनसेदुर.
GEN 19:27 व्हातर्‍या का येदकु अब्राहम आ जागा मा होदुन, येल आव यहोवा अन हाती नीदुरकु ईरोन;
GEN 19:28 अदिक सदोम, अदिक गमोरा, अदिक आ तराई इन सप्‍पा द्‍याशगोळ दी कण्‍ण नेगुकु येन नोळदुन कि आ द्‍याश दा टु धधकुसतेला भट्‍टी घाई धुंगा येळेत्‍याद.
GEN 19:29 अदिक हिंग आत कि याग परमेश्वर आ तराई इन नगरगोळी, यदुर दा लूत ईरतोगोन, उलटा पुलटा माळकु नाश माळदुन, आग आव अब्राहम उक याद माळकु लूत उक आ घटना देल उळ्स बुट्‍टुन.
GEN 19:30 लूत सोअर इक बिट बुट्‍टुन, अदिक पहाळी मा तान येढ्‍ढु पोरगोळ सांगुळ ईरली कुरतुन; यतिकी आव सोअर दा ईरोर से अंजोन; इदुरसाटी आव अदिक आऊन येढ्‍ढु पोरगोळ अल ऊंद गुफा दा ईरली कुरतुर.
GEN 19:31 आग धोळ पोर स्‍याण पोर से अंदुर, “नाम आप्‍पा हाळाबाट्‍ट आन, अदिक पृथ्‍वी तीम दा हिंग याऊ मंळसा हैलेच जो दुनिया अन रीति इन अनुसार नाम हाती बरूल, अदिक नाव आंदुर से चिकोर पैदा माळेव.
GEN 19:32 इदुरसाटी बर, नाव तान आप्‍प उक अंगुर इन रास्सा कुळ्‍सकु, आऊन सांगुळ मींगाता, यदुर देल कि नाव तान आप्‍प उन वंश इक उळ्‍सकु ईट्‍टेव.”
GEN 19:33 अत: आंदुर अदा दिशी ईळ्‍लकी इन वती तान आप्‍प उक अंगुर इन रास्सा कुळ्‍सदुर, आग धोळ पोर होगकु तान आप्‍प उन हाती मींगेदुर; लेकीन आक जानसीदिल, कि आक याग मींगदुर, अदिक याग येदोदुर.
GEN 19:34 अदिक हिंग आत कि दुसरा दिशी धोळ पोर स्‍याण पोर से अंदुर, “नोळ, नीन ईळ्‍लकी ना तान आप्‍प उन सांगुळ मींगदीन; इदुरसाटी ईंद भी ईळ्‍लकी नाव आऊक अंगुर इन रास्सा कुळसाता; आग नी आऊन सांगुळ मींगेत कि नाव तान आप्‍प उन द्वारा वंश पैदा माळेव.”
GEN 19:35 अत: आंदुर आ दिशी भी ईळ्‍ल्‍क इन वती तान आप्‍प उक अंगुर इन रास्सा कुळ्‍सदुर, अदिक स्‍याण पोर होगकु आऊन हाती मींगेदुर; लेकीन आकी भी मींगोद अदिक येळोद ग्‍यान ईला ईरोद.
GEN 19:36 ई प्रकार देल लूत इन येढ्‍ढु पोरगोळ तान आप्‍प उन दी टु व्‍हाट्‍यादी आदुर.
GEN 19:37 धोळ पोर ऊंद पार उक हाळदुर, अदिक आऊन हेसुर मोआब ईटदुर; आव मोआब हेसुर इन जाती इन जो ईंद ताका आद मूल आप्‍प मान्सकु आदुन.
GEN 19:38 अदिक स्‍याणेर पोर भी ऊंद पार उक हाळदुर, अदिक आऊंद हेसुर बेनअम्‍मी ईटदुर; आव अम्मोन वंशिगोळ जो ईंद ताका आर मूल आप्‍प आदुन.
GEN 20:1 बाक अब्राहम अल टु होटकु कनान इन दक्षिण द्‍याश दा बंदकु कादेश अदिक शूर इन बीच दा थाम्‍सदुन, अदिक गरार दा ईरली कुरतुन.
GEN 20:2 अदिक अब्राहम तान हिंग्‍स सारा अन बारा दा अनली कुरतुन, “आक नान आकतींग हुळ,” इदुरसाटी गरार इन राजा अबीमेलेक दूत कळुकु सारा अक कार्सदुन.
GEN 20:3 ईळ्‍ल्‍क इक परमेश्वर कान्‍सा दा अबीमेलेक इन हाती बंदकु अंदुन, “केळ याता आर्त इक नी ईट्‍या, आकिन कारण नी सोतोद्‍या, यतिकी आक मदावळ्त आर.”
GEN 20:4 लेकीन अबीमेलेक आकिन हाती होगली का ईरोन; इदुरसाटी आव अंदुन, “हे प्रभु, येन नी निर्दोष जाती अन भी घात माळ्‍या?
GEN 20:5 येन आव खुद अच नान से अंदिदील, ‘आक नान आकतींग हुळ?’ अदिक आ आर्त भी अंदुर कि, ‘आव नान वार्ट हुन,’ ना रा तान मन इन खराई अदिक तान व्‍यवहार इन सच्‍चाई देल ईद क्‍याल्‍सा माळीन.”
GEN 20:6 परमेश्वर आऊन से कान्‍सा दा अंदुन, “हा, ना भी जान्‍सतीन कि तान मन इन खराई देल नी ईद क्‍याल्‍सा माळ्‍या अदिक ना नीनी रोक्‍सकु भी ईटीन कि नी नान विरूद्ध पाप माळबाळेत; ईदा कारण ना नीनी आकी मुट गोटीदील.
GEN 20:7 इदुरसाटी ईग आ मंळसा अन हिंग्‍स उक आऊक वापस माळ कोम; यतिकी आव नबी हुन, अदिक नीन साटी प्रार्थना माळ्‍यान, अदिक नी जीवन जीऊसतेला ईत्‍या लेकीन अगर नी आऊक वापस माळतीदील रा ध्‍यान ईटेत, कि नी, अदिक नीनोर यास भी लॉकुर आर, सप्‍पा सही दा सोतोदार.”
GEN 20:8 व्हातर्‍या अबीमेलेक झट से यदकु तान सप्‍पा क्‍याल्‍सा माळावाळेर इक कारूकु आंदरी ईव सप्‍पा मातगोळी हेळदुन; अदिक आ लॉकुर हापाळ अंजेदुर.
GEN 20:9 आग अबीमेलेक अब्राहम उक कारसुसकु अंदुन, “नी नाम से ईद येन माळ्‍द? अदिक ना नींद येन बीगळुसीदिन कि नी नान मा अदिक नांद राज्‍य अन म्‍याकुच हिंग धोळ्‍द पाप हाक्क कोंड्‍या? नी नान सांगुळ अद क्‍याल्‍सा माळ्‍या जो सही ईला ईरोद.”
GEN 20:10 बाक अबीमेलेक अब्राहम से केळदुन, “नी येन सम्सकु ईत्‍ता क्‍याल्‍सा माळ्‍द?”
GEN 20:11 अब्राहम अंदुन, “ना ईद सोचीदिन कि ई जागा दा परमेश्वर उन येनु अंज्क ईला ईतीदाद; इदुरसाटी ई लॉकुर नान हिंग्‍स उन कारण नानी कोंद बुट्‍टार.”
GEN 20:12 लेकीन आक सही दा नान आकतींग हुळ, आक नान आप्‍प उन पोर हुळ लेकीन नान मोय इन पोर आलच; बाक आक नान हिंग्‍स आगेदुर.
GEN 20:13 बाक हिंग आत कि याग परमेश्वर नानी तान आप्‍प उन मान्‍ना बिटकु होळोद आग्‍या कोट्‍टुन, आग ना आऊन से अंदीन, “ईट कृपा नीनी नान मा माळोद बीद्‍दीत कि नाव येढ्‍ढु मुंदुर येल-येल भी होदेव अल-अल नी नान बारा दा अनेत ईव नान वार्ट हुन.”
GEN 20:14 आग अबीमेलेक मर्र-म्यांडा, गोसी-वस्‍ता, अदिक दास-दासीगोळ हुडुकु अब्राहम उक कोट्‍टुन, अदिक आऊन हिंग्‍स सारा अक भी आऊक वापस माळ कोंडुन.
GEN 20:15 अदिक अबीमेलेक अंदुन, “नोळ, नांद द्‍याश नीन मुंद आद; येल नीनी हततद अल ईर.”
GEN 20:16 अदिक सारा से अबीमेलेक अंदुन, “नोळ, नीन वार्टुर इक ऊंद हजार बेळ्ली नव सिक्‍कागोळ कोट्टीन. आ सप्पा लॉकुर्द नजर दा नी निर्दोष आय आ सप्पा लॉकुर इक पता नळदीत कि नी यातोदु गलत क्याल्सा माळीदिल.”
GEN 20:17 आग अब्राहम परमेश्वर से प्रार्थना माळदुन, अदिक यहोवा अबीमेलेक, अदिक आऊन हिंग्‍स, अदिक दासीगोळी चंगा माळदुन अदिक आंदुर चिकोर हाळुली कुरतुर.
GEN 20:18 यतिकी यहोवा अब्राहम उन हिंग्‍स सारा अन कारण अबीमेलेक उन सप्‍पा आर्तगोळ्‍द कोखगोळी पुरा रीति देल बंद माळकु ईटीदुन.
GEN 21:1 यहोवा ह्‍यांग अंदीदुन हांग अच सारा अन सुधी ताकोमकु आकिन सांगुळ तान वादा अन्द अनुसार माळदुन.
GEN 21:2 सारा व्‍हाट्‍यादी ईत्‍तुर अदिक आक अब्राहम उक याग आव हाळाबाट्‍ट आगेगीदुन, परमेश्वर इन नीवळुस्द समय दा सारा ऊंद पार उक जनम कोट्‍टुर.
GEN 21:3 अब्राहम आ पार उन हेसुर इसहाक ईटदुन यारी सारा पैदा माळीदुर.
GEN 21:4 याग आऊन पार इसहाक येट्‍ट दिन इनव आदुन, आग अब्राहम परमेश्वर उन आग्‍या अन अनुसार आऊन खतना माळदुन.
GEN 21:5 इसहाक उन जनम इन समय अब्राहम उन उमर ऊंद सौ वर्ष इन ईरोद.
GEN 21:6 सारा अंदुर, “नानी परमेश्वर खुशी देल तुम कोंडुन अदिक जो यावारा ईद मात केळ्‍यान, आव भी खुश आदान.”
GEN 21:7 अदिक आक ईद भी अंदुर, “अब्राहम से याव अनतोगोन कि सारा चिग्‍द उक हाल कुळस्‍यार? लेकीन ना आऊन हाळाबाट्‍ट इन समय दा आऊक ऊंद पार कोट्‍टीन.”
GEN 21:8 अदिक आव पार वाळुसदुन अदिक आऊंद हाल बिळसुस्‍कु आत; अदिक इसहाक उन हाल बिळसुसा दिशी अब्राहम धोळ्‍द ऊमोद कोट्‍टुन.
GEN 21:9 लेकीन सारा नोळदुर कि मिस्त्री हाजिरा अन पार, जो अब्राहम से पैदा आगीदुन, मज्‍याक हार्स्‍त कांळ्‍सदुन.
GEN 21:10 ईद कारण आक अब्राहम से अंदुर, “ई दासी अक पार उन सांगुळ तेगुकोम: यतिकी ई दासी अन पार नान पार इसहाक उन सांगुळ हिस्सेदार आगतीदील.”
GEN 21:11 ईद मात अब्राहम उक तान पार उन कारण बुरा हत्‍त.
GEN 21:12 आग परमेश्वर अब्राहम से अंदुन, “आ पार अदिक तान दासी अन कारण नीनी बुरा हतबाळुल; जो मात सारा नीन से अनतार, अदरी मान्‍स, यतिकी जो नीन वंश अनकु आदान अद इसहाक से अच नळदीत.
GEN 21:13 दासी इन पार से भी ना ऊंद जाती पैदा माळाईन इदुरसाटी आव नीन वंश हुन.”
GEN 21:14 इदुरसाटी अब्राहम व्हातर्‍या जल्‍दी यदकु रोट्‍टी अदिक नीर देल तुमकु तोगुल इन झ्‍वारा भी हाजिरा अदिक आकिन पार उक कोट्‍टुन, अदिक आकी अल टु होगली हेळदुन हाजिरा अल टु होट्‍ट बुट्‍टुर अदिक बेर्शेबा अन आळी दा भटकुसतेला ईत्‍तुर.
GEN 21:15 याग झ्‍वारा अन नीर खतम आगेत, आग आक पार उक झाळी इन ल्‍यालमा बिट बुट्‍टुर.
GEN 21:16 अदिक आक तीर इन थप्पा अन दुरी मा होगकु आऊन दी बाँय माळकु कुर्तोदुर, “यतिकी आक तान पार उन वर्लोद अदिक आऊन परेशानी नोळ ईला सकोर.” अदिक अल कुर्तकु उच आक वर्लली कुरतुर.
GEN 21:17 परमेश्वर आ पार उन वर्लोद केळदुन अदिक स्‍वर्ग टु परमेश्वर उन दूत हाजिरा से केळदुर, “हे हाजिरा, येन आत नी? अंजबाळ; यतिकी परमेश्वर पार उन वर्लोद केळ कोंडुन.
GEN 21:18 ईग येळ, तान पार उक नेगु, यतिकी ना आऊन से ऊंद धोळ्‍द जाती पैदा माळाईन.”
GEN 21:19 ईद अनतेला परमेश्वर हाजिरा अक ऊंद भाय तोर्सदुन, आक आ भाय दा टु नीर तेगुकु तान पार उक कुळ्‍सदुर.
GEN 21:20 आव पार परमेश्वर उन अनुग्रह देल धोड्‍डेव आगेदुन अदिक आव पारान हेसुर इन सुनसान जागा दा ईरतोगोन; अदिक धनुषधारी बन्‍सेदुन.
GEN 21:21 आव पारान हेसुर इन आळी दा ईरतोगोन; अदिक आऊन मोय आऊन साटी मिस्त्र द्‍याश टु ऊंद आर्त बेळसुसदुर.
GEN 21:22 आ दिनगोळ दा हींग आत कि अबीमेलेक तान सेनापती पीकोल उक सांगुळ हुडुकु अब्राहम से अनली कुरतुन, “जो येनारा नी माळत्‍या अदुर दा परमेश्वर नीन सांगुळ ईरतान;
GEN 21:23 इदुरसाटी नी परमेश्वर उन कसम तिन कि नी नानी, नान वंशगोळ से अदिक नान भावी पीढ़ीगोळ से यागलु ध्वाका माळतीदील, लेकीन नी नाम मा दया माळेत ह्‍यांग ना नीन से माळीदिन.”
GEN 21:24 अदिक अब्राहम अंदुन, “ना नीन से वादा माळतीन.”
GEN 21:25 अदिक अब्राहम अबीमेलेक उक ऊंद भाय इन बारा दा जो अबीमेलेक उन दासगोळ ताकत देल ताकोम कोंडीदुर, उलाहना कोट्‍टुन.
GEN 21:26 आग अबीमेलेक अंदुन, “ना जानसालीन कि याव ईद क्‍याल्‍सा माळ्‍यान; अदिक नी भी नानी हेळीदिल, अदिक न ईदुर बारा दा ना ईदुर पयला केळीन.”
GEN 21:27 आग अब्राहम मर्र-म्यांडा, अदिक वस्‍ता-गोसी अबीमेलेक उक कोट्‍टुन; अदिक आंदुर येढ्‍ढु मुंदुर आपस दा वादा माळदुर.
GEN 21:28 अब्राहम येळ म्यांडा अन्द पाड्डागोळी झुंड टु अलग माळकु ईटदुन.
GEN 21:29 आग अबीमेलेक अब्राहम से केळदुन, “ईव येळ पाड्डागोळ्‍द, जो नी अलग ईट्‍या, इऊर येन मतलब आद?”
GEN 21:30 अब्राहम अंदुन, “नी ईव येळ पाड्डागोळी हुडु ताकी ईद नाम बीच गवाह ईत्‍तीत, कि ईद भाय ना अगळीन.”
GEN 21:31 आंदुर येढ्‍ढु मुंदुर जो आ जागा मा आपस दा वादा माळीदुर, ईदा कारण अदुर्द हेसुर बेर्शेबा बीत्‍त.
GEN 21:32 याग आंदुर बेर्शेबा दा वादा माळदुर, आग अबीमेलेक अदिक आऊन सेनापती पीकोल, येदकु पलिश्तीगोळ द्‍याश दा होटोदुर.
GEN 21:33 बाक अब्राहम बेर्शेबा दा झाऊ उन ऊंद मार्र हचदुन, अदिक अल यहोवा जो सनातन परमेश्वर आन, आराधना माळदुन.
GEN 21:34 अब्राहम पलिश्तीगोळ द्‍याश दा हापाळ दिन ताका परदेशी आगकु ईत्‍तुन.
GEN 22:1 थ्‍वाळासा समय इन बाद्‍दा, परमेश्वर अब्राहम उन परीक्षा ताकोंडुन, परमेश्वर आऊन से अंदुन, “हे अब्राहम!” अब्राहम उत्‍तर कोट्‍टुन, “हे प्रभु! येन आग्या आद, ना ईल आईन.”
GEN 22:2 परमेश्वर अंदुन, “तान पार उक मतलब तान धोळ पार इसहाक उक, यार से नी प्रेम ईटत्या, सांगुळ हुडुकु मोरिय्‍याह द्‍याश दा होटोग, अदिक अल आऊक ऊंद पहाळी इन म्‍याकुच जो ना नीनी हेळाईन होमबली माळकु येर्स.”
GEN 22:3 दुसरा दिशी अब्राहम व्हातर्‍या जल्‍दी येदकु तान गधा मा हुल्ली कसुसकु तान येढ्‍ढ सेवकगोळ, अदिक तान पार इसहाक उक सांगुळ हुळदुन, अदिक होमबली साटी हुळ्ली सीळदुन; आग होटकु आ जागा अन दी होदुन, यदुर चर्चा परमेश्वर आऊन से माळीदुन.
GEN 22:4 तीसरा दिशी अब्राहम कण्‍ण नेगुकु आ जागा अक दूर टु नोळदुन.
GEN 22:5 अदिक अब्राहम तान सेवकगोळ से अंदुन, “गधा अन हाती ईल्या थाम्‍सकु ईरी; ईव पार अदिक ना अल ताका होगकु, अदिक नमस्‍कार माळकु, बाक नीम हाती वापस बंदेव.”
GEN 22:6 अब्राहम होमबली इन साटी तैयार माळदव हुळ्‍लीगोळ इसहाक उन कय दा हुळसुस बुट्‍टुन अदिक खुद बेक्‍की अदिक कत्ती हुळदुन, अदिक येढ्‍ढु मुंदुर सांगुळ नळु कुरतुर.
GEN 22:7 इसहाक तान आप्‍प अब्राहम से अंदुन, “हे नान आप्‍प?” आव अंदुन, “हे नान पारा, येन मात आद?” आव अंदुन, “नोळ, बेक्‍की अदिक हुळ्ली रा आव; लेकीन होमबली साटी म्यांडा अन्द पाड्डा येल आद?”
GEN 22:8 अब्राहम अंदुन, “हे नान पारा, परमेश्वर होमबली इन म्यांडा अन उपाय खुद अच माळ्‍यान.” अदिक आंदुर येढ्‍ढु मुंदुर सांगुळ सांगुळ मुंद नळुतेला होदुर.
GEN 22:9 याग आंदुर जागा मा पोहचुसदुर, यदरी परमेश्वर आऊक हेळीदुन, आग अब्राहम अल वेदी माळकु हुळ्‍लीगोळ इक नीवळुस नीवळुसकु ईटदुन, अदिक तान पार इसहाक उक कटकु वेदी मा ईटदव हुळ्‍लीगोळ म्‍याकुच ईट बुट्‍टुन.
GEN 22:10 बाक अब्राहम कय वाळुसकु कत्ती अक हुळदुन कि तान पार उक बली माळुल.
GEN 22:11 आग यहोवा अन दूत स्‍वर्ग टु कारूकु अंदुन, “हे अब्राहम, हे अब्राहम!” अब्राहम अंदुन, “नोळ, ना ईल आईन.”
GEN 22:12 यहोवा अंदुन, “आ पार उन मा कय नेगुबाळ, अदिक आऊक येनु माळबाळ; ईग नानी मालुम आगेग्‍याद कि नी परमेश्वर उन भय मान्‍सत्‍या, यतिकी नी नान साटी तान ऊंदलौता पार उक भी बलिदान माळोर साटी तैयार आगेग्‍या.”
GEN 22:13 आग अब्राहम कण्‍ण नेगदुन, अदिक येन नोळदुन, कि आऊन हिंद ऊंद म्यांडा तान सींगगोळ से ऊंद झाळी दा फसुसकु आद; अत: अब्राहम होगकु आ म्यांडा अक हुळदुन, अदिक तान पार उन जागा मा होमबली माळकु येर्सदुन.
GEN 22:14 अब्राहम आ जागा अन हेसुर यहोवा यिरे ईटदुन, मतलब यहोवा उपाय माळावाळा, इदुरसाटी ईंद भी ईद अनकु आगतद, “यहोवा अन पहाळी मा उपाय माळकु आदीत.”
GEN 22:15 बाक दुसरा घन यहोवा अन दूत स्‍वर्ग टु अब्राहम उक कारूकु अंदुन,
GEN 22:16 यहोवा अन ईद वाणी आद, “कि ना तांद अच कसम तिनतीन कि नी जो क्‍याल्‍सा माळ्‍या तान पार, बल्‍की तान ऊंदलौता पार उक भी, बिटीदिल;
GEN 22:17 ईद कारण ना सहीदा नीनी आशीष कोळाईन; अदिक सहीदा नीन वंश इक तारागण, अदिक समुद्र तट इन रेत इन कनगोळ घाई अनगिनत माळाईन, अदिक नीन वंश तान दुश्‍मनगोळ नगर इन अधिकारी आदार;
GEN 22:18 अदिक पृथ्‍वी इन सप्‍पा जातीगोळ नीन वंश इन द्वारा नान से आशीर्वाद प्राप्त माळ्‍यार: यतिकी नी नांद आग्या मान्सकु अदुर पालन माळ्द.”
GEN 22:19 आग अब्राहम तान सेवक उन हाती वापस बंदुन, अदिक आंदुर सप्‍पा बेर्शेबा अक सांगुळ सांगुळ होदुर; अदिक अब्राहम बेर्शेबा दा ईरली कुरतुन.
GEN 22:20 ई मातगोळ बाद्‍दा हिंग आत कि अब्राहम उक ईद समाचार सीक्‍त, “मिल्‍का भी मोय बनसेदुर; आक नीन वार्ट नाहोर उन साटी पार उक जनम कोटार.
GEN 22:21 धोळ पार ऊस, आऊन वार्ट बुज, कमूएल आराम उन आप्‍प,
GEN 22:22 बाक केसेद, हाजो, पिलदाश, यिदलाफ अदिक बतूएल.”
GEN 22:23 बतूएल रिबका अन आप्‍प आदुन. अब्राहम उन वार्ट नाहोर टु मिल्‍का देल ईंदुर येळ पार पैदा आदुर.
GEN 22:24 नाहोर उन रखैल रियूमाह अन भी ईंदुर पार आदुर: तेबाह, गाहम, ताहाश अदिक माकाह.
GEN 23:1 सारा रा ऊंद सौ सताईस वर्ष ताका होदुर; अदिक याग सारा अन ईट ऊमर आत;
GEN 23:2 आग आक किर्यतर्बा दा सोतोदुर. ईद रा कनान द्‍याश दा आद, अदिक इदरी हेब्रोन भी अनकु आगतद. इदुरसाटी अब्राहम सारा अन साटी वर्लली अल होदुन.
GEN 23:3 आग अब्राहम लाश इन हाती टु येदकु हित्‍तीगोळ से अनली कुरतुन,
GEN 23:4 “ना बीच दा पावना अदिक परदेशी आईन; नानी तान बीच दा मरघट साटी हिंग जागा कोळी जो नान खुद इन आगुल, ताकी ना तान सोत्‍तकु हिंग्स उक नळ्‍स सकाईन.”
GEN 23:5 हित्‍ती अन लॉकुर अब्राहम से अंदुर,
GEN 23:6 “हे नावम प्रभु, नाम्‍द केळ; नी नाम बीच दा धोड्‍डेव प्रधान आय. नाम कब्र दा टु यदरी नी चाहास्‍या अदुर्दा तान सोत्‍तुर इक नळ्‍स; नाम दा टु याऊ नीनी तान कब्र ताकोमोर से रोक्‍सतीदिल, कि तान सोत्‍तुर इक अदुर्दा नळ्‍स सकतीदिल.”
GEN 23:7 आग अब्राहम येदकु नीदुरदुन, अदिक हित्‍तीगोळ मुंद, जो आ द्‍याश इन ईरावाळेर ईरोर, नमस्‍कार माळकु अनली कुरतुन,
GEN 23:8 “अगर नीम्‍द ईद इच्‍छा आद कि ना तान सोत्‍तुर इक नळ्सकु तान कण्‍ण देल दुर माळाईन, रा नांद प्रार्थना आद, कि सोहर उन पार एप्रोन से नान साटी विनती माळी,
GEN 23:9 कि आव तान मकपेलावाळा गुफा, जो आऊन भूमी इन सीमा मा आद; अदुर्द पुरा किमत ताकोमकु नानी कोट बुळ, कि अद नीम बीच दा मरघट साटी नांद खुद इन भूमी आगुल.”
GEN 23:10 एप्रोन रा हित्तीयो अन बीच दा अल कुर्तकु ईरोन, इदुरसाटी यास हित्‍ती आऊन नगर इन फाटक टु आगकु अंदर होगतोगोर, आंदुर मुंद एप्रोन अब्राहम से अंदुन,
GEN 23:11 “हे नान प्रभु; नांद मात केळ; ना नीनी आ गुफा केई सांगुळ नान संबंधीगोळ मुंद कोळेतीन, नी ईदुर दा तान हिंग्‍स उक नळ्‍स बुळ.”
GEN 23:12 अब्राहम मात आ लॉकुरी बांगकु नमस्‍कार माळदुन
GEN 23:13 अदिक लॉकुर्द केळतेला अच एप्रोन से अंदुन, “नांद मात केळ, नीनी ना आ केई इंद किमत कोळाईन, नी ईदरी स्‍वीकार माळकोम ताकी ना तान हिंग्‍स उक नळ्‍स सकाईन.”
GEN 23:14 ईद केळतेला अच एप्रोन अब्राहम से अंदुन,
GEN 23:15 “हे नान प्रभु, नांद मात केळ; ई केई इन किमत सिर्फ नाक सौ शेकेल चांदी इन सिक्‍का आद, लेकीन ईद नीन साटी अदिक नान साटी येनु हैलेच, नी तान हिंग्‍स उक मुण्‍ण कोटबुळ.”
GEN 23:16 अब्राहम एप्रोन इन मात मान्‍सकु आऊक आस किमत इन चांदी तौलुसकु कोट्‍टुन, यास आव हित्‍तीगोळ मुंद अनतेला केळीदुन, मतलब नाक सौ ईत्‍ता शेकेल जो व्‍यापारीगोळ दा नळुतोगव.
GEN 23:17 इदुरसाटी एप्रोन उन अद केई अदिक गुफा, जो मकपेला दा मम्रे अन हाती ईरोद, अदिक केई इन सप्‍पा मार्र जो अदुर्दा अदिक अदुर नाकु दी सीमा अन अंदर ईरव.
GEN 23:18 सप्‍पा अब्राहम उक कोट्‍ट बुट्‍टुन, यास भी मुंदुर हित्‍ती इन शहर इन फाटक मा जमा आगीदुर, आ सप्‍पा मुंदुर मुंद अद संपत्‍ती अब्राहम उन अधिकार दा पक्‍का रीति देल होट्‍ठबत्त.
GEN 23:19 अदुर बाद्‍दा अब्राहम तान हिंग्‍स सारा अक मकपेला अन केई इन गुफा दा नळ्‍स कोंडुन, जो कनान द्‍याश इन मम्रे, मतलब हेब्रोन इन हाती ईरोद.
GEN 23:20 ई प्रकार हित्‍तीगोळ द्वारा अद केई अदिक अदुर दाकळोद गुफा मरघट इन रूप दा अब्राहम उन अधिकार दा कोटकु आत.
GEN 24:1 अब्राहम हापाळ बाट्‍ट आगेगीदुन, अदिक यहोवा आऊक सप्‍पा प्रकार देल आशीषित माळीदुन.
GEN 24:2 अब्राहम तान पुराना सेवक से, जो मान्‍ना अन अदिक पुरा संपत्‍ती इंद देखभाल माळतोगोन, अंदुन, “नी तान कय नान जांघ मा ईट.
GEN 24:3 अदिक नान से आकाश अदिक पृथ्‍वी अन परमेश्वर यहोवा अन ई बारा दा कसम तीन, कि नी नान पार उन साटी कनानीगोळ्द पोरगोळ दा टु, यार बीच दा ना ईरतीन, यारीकु तरतीदील.
GEN 24:4 लेकीन नी नान द्‍याश दा नानोर अच घराना हाती होगकु नान पार इसहाक उन साटी ऊंद हिंग्‍स तन कोट्या.”
GEN 24:5 दास आऊन से अंदुन, “आ स्‍थिती दा ना येन माळाईन, याग आ आर्त ई द्‍याश दा बरोद ईला चाहस्यार रा; येन ना नीन पार उक आ द्‍याश दा वोयाईन, येल टु नी बंद्या?”
GEN 24:6 ईदुर मा अब्राहम अंदुन, “नी नान पार उक अल यागलु ओयबाळेत.”
GEN 24:7 यहोवा जो स्‍वर्ग इन परमेश्वर आन, याव नानी नान आप्‍प उन मान्‍या टु अदिक नांद जनम स्थान टु तनकु नान से कसम तीनकु अंदुन कि “ना ईद द्‍याश नीन वंश इक कोळाईन; आवा तान दूत नींद मुंद मुंद कळ्‍यान, कि नी नान पार उन साटी अल टु ऊंद आर्त तंद्या.
GEN 24:8 अगर पोर नीन सांगुळ बरोर साटी मना माळतार, आग नी नान कसम देल मुक्त आगेद्‍या, लेकीन ध्‍यान ईटेत कि नी नान पार उक अल वापस ओयबाळेतीर.”
GEN 24:9 इदुरसाटी आ सेवक तान स्वामी अब्राहम उन जांघ इन ल्‍यालमा तान कय ईटदुन अदिक ई बारा दा कसम तीनकु अब्राहम से वादा माळदुन.
GEN 24:10 आग आ सेवक तान स्वामी अन झुंड दा टु हत्‍त ऊँटगोळ हुळदुन अदिक अऊर मा तान स्वामी इन दी टु अलग अलग सामान कटदुन अदिक नाहोर उन गृह नगर उत्‍तर-पश्‍चिम मेसोपोतामिया इन दी होगली कुरतुन.
GEN 24:11 नगर इन व्‍हार्या पोहचुस्कु आव ऊँटगोळी भाय इन हाती कुर्सबुट्‍टुन; ईद द्‍यावगा अन समय ईरोद. ईदा समय आर्तेर नीर तुमली व्‍हार्या बरतोगोर.
GEN 24:12 आग सेवक प्रार्थना माळदुन, “यहोवा, नान स्वामी अब्राहम उन परमेश्वर, नान क्‍याल्‍सा अक सफल माळ अदिक नान स्वामी अब्राहम मा दया माळ.
GEN 24:13 नोळ, ना नीर इन सोता अन हाती नीदुरकु आईन; अदिक नगरवासी इन पोरगोळ नीर तुमोर साटी होळतार.
GEN 24:14 इदुरसाटी आगगोळ कि या पोर इन से ना अनाईन, ‘तान माळका नान दी बांग्‍स, कि ना कुडाईन,’ अदिक आक अनुल, ‘हुडु, कुडुकोम, बाद्‍दा ना नीन ऊँटगोळी भी कुळसाईन,’ इक आका आगुल यारी नी तान दास इसहाक उन साटी ठहरूस्‍या; ईदा रीति देल ना जान्‍स कोमाईन कि नी नान स्वामी मा करूणा माळ्‍या.”
GEN 24:15 ईदुर पयले कि आऊन प्रार्थना खतम आगाईत, रिबका नगर इन व्‍हार्या तान खांदा मा माळका हुडुकु नीर तुमोर साटी बंदुर, आक मिल्‍का अन पार बतूएल उन पोर ईरोर अदिक मिलकाह अब्राहम उन वार्ट नाहोर उन हिंग्‍स ईरोर.
GEN 24:16 रिबका हापाळ सुंदर ईरोर, कुवारा ईरोर; ईगासताका यातोदु मंळसा अन बाय ईला नोळीदुर, आक ल्‍यालमा सोता मा होदुर, तान माळका नीर देल तुमदुर अदिक बाक म्‍याकुच बंदुर.
GEN 24:17 आग आ दास आकिन से भेंट माळोर साटी ओळदुन, अदिक आकिन से अंदुन, “तान माळका दा टु थ्‍वाळासा नीर नानी कुळ्‍सकोम.”
GEN 24:18 आक अंदुर, “हे नान प्रभु, हुडु, कुडुकोम,” अदिक आक फुरताई देल माळका ईळ्सकु कय दा हुडुकु आऊक नीर कुळ्स कोंडुर.
GEN 24:19 याग आक आऊक नीर कुळ्स कोंडुर, आग आक अंदुर, “ना नीन ऊँटगोळ साटी नीर तरतीन, यागासताका अव पुरा संतुष्ट आगेगालव.”
GEN 24:20 इदुरसाटी रिबका झट से माळका अन नीर ऊँटगोळ साटी माळ्द धोनी दा पलटुसदुर, आग आक अदिक नीर तरोर साटी भाय दी वोळदुर अदिक आक सप्पा ऊँटगोळी नीर कुळ्सदुर.
GEN 24:21 नौकर आऊक सुंगा मुंगा ध्यान देल नोळदुन. आव तय माळोद चाहासोन कि यहोवा शायद मात मान्स कोंडुन कि ईला.
GEN 24:22 याग ऊँटगोळ नीर कुडु कोंडव आग आ मंळसा आरदा त्वारा व्हान्ना अन ऊंद नतनी तेगुकु आकी कोट्टुन, अदिक हत्त त्वारा व्हान्ना अन बांगळा आकिन कय दा हाकसुसदुन;
GEN 24:23 अदिक केळदुन, “नी यार पोर हुय? ईद नानी हेळ. येन नीन आप्प उन मान्या नाम ईरोर साटी जागा आद?”
GEN 24:24 आक उत्तर कोट्टुर, “ना रा नाहोर उन पैदा माळ्द मिल्‍का अन पार बतूएल उन पोर हुईन.”
GEN 24:25 बाक आक आऊन से अंदुर, “नाम मान्या काड्डा अदिक चारा हापाळ आद, अदिक थामसोर साटी जागा भी आद.”
GEN 24:26 आग आ मंळसा ताल्ला बांग्सकु यहोवा अक नमस्कार माळकु अंदुन,
GEN 24:27 “धन्य आय नान स्वामी अब्राहम उन परमेश्वर यहोवा, याव तान करूणा अदिक सच्चाई इक नान स्वामी मा टु हटुसीदिल: यहोवा नानी ठीक हादी मा नळ्सकु नान स्वामी इन वार्टुर मान्या पोहचुस बुट्टुन.”
GEN 24:28 आग आ पोर ओळकु तान मोय इक ई घटना अन सप्पा हाल हेळ बुट्टुर.
GEN 24:29 आग लाबान जो रिबका अन वार्ट ईरोन, व्हार्या भाय इन हाती आ मंळसा अन दी ओळदुन.
GEN 24:30 अदिक हिंग आत कि याग आव अद नतनी अदिक तान आकतींग रिबका अन कय दा अव बाळा भी नोळदुन, अदिक आकिन ईद मात भी केळदुन कि आ मंळसा नान से हिंग मातगोळ अंदुन; आग आव आ मंळसा अन हाती होदुन; अदिक येन नोळदुन, कि आव सोता अन हाती ऊँटगोळ हाती नीदुरकु ईरोन.
GEN 24:31 आव अंदुन, “हे यहोवा अन दी टु धन्य मंळसा अंदर बर नी यती व्हार्या नीदुरकु आय? ना मान्ना अक, अदिक ऊँटगोळ साटी भी जागा तैयार माळीन.”
GEN 24:32 दुर आ मंळसा मान्या बुळ्क होदुन; अदिक लाबान ऊँटगोळ काठिगोळी खोल्सकु काड्डा अदिक चारा कोट्टुन; अदिक आऊन अदिक आऊन साथीगोळ काल तोळुली नीर कोट्टुन.
GEN 24:33 आग अब्राहम उन दास उन मुंद जलपान साटी येनारा ईटकु आत; लेकीन आव अंदुन “ना यागासताका तान बातणी अन कोमालीन, आगासताका येनु तीनतीदिल.” लाबान अंदुन, “अन कोम.”
GEN 24:34 आग सेवक अंदुन, “ना रा अब्राहम उन दास हुईन.
GEN 24:35 यहोवा नान स्वामी इक हापाळ आशीष कोटान; इदुरसाटी आव महान धनवान मंळसा आगेग्यान; अदिक आव आऊक मर्र-म्यांडा, गोसी, व्हान्ना, पैस्या, दास-दासीगीतेर, ऊँट अदिक गधागोळ कोटान.
GEN 24:36 अदिक नान स्वामी इन हिंग्स सारा अक हाळामुंड इन समय दा ऊंद पार पैदा आग्यान; अदिक आ पार उक अब्राहम तान सप्पा येनारा कोट्ट बुटान.
GEN 24:37 नान स्वामी नानी ईद कसम कोटान, कि ‘ना आऊन पार उन साटी कनानीगोळ पोर दा टु यार द्याश दा आव ईर तोगोन, यातारा भी आर्त इक तरबाळेत.
GEN 24:38 ना आऊन आप्प उन मान्या, अदिक परिवार इन लॉकुर हाती होगकु आऊन पार उन साटी ऊंद आर्त तराईन.’
GEN 24:39 आग ना तान स्वामी से अंदीन, ‘अगर आ आर्त नान हिंद बरतीदील.’
GEN 24:40 आग आव नान से अंदुन, ‘यहोवा, यार मुंद ना नळुतेला बंदीन, आव नीन सांगुळ तान दूत कळुकु नीन यात्रा अक सफल माळ्यान; अदिक नी नान परिवार, अदिक नान आप्प उन घराना दा टु नान पार उन साटी ऊंद आर्त तर सक्या.
GEN 24:41 नी आग अच नान कसम देल मुक्त आद्या, याग नी नान परिवार इन लॉकुर हाती पोहचुस्या; अदिक अगर आंदुर नीनी यातोरारा आर्त कोळतीदील, रा नी नान कसम दा टु बिटोद्या.’”
GEN 24:42 इदुरसाटी ईंद ना आ भाय इन हाती होगकु अनली कुरतीन, हे नान स्वामी अब्राहम उन परमेश्वर यहोवा अगर नी नान ई यात्रा अक सफल माळत्या;
GEN 24:43 रा नोळ ना नीर इन भाय इन हाती निदुरकु आईन; अदिक हिंग आगुल, कि जो पोर नीर तुमली बंदार, अदिक ना आकिन अनाईन, “तान माळका दा टु नानी थ्वाळासा नीर कुळ्स,”
GEN 24:44 अदिक आक नान से अनुल, “कुडु कोम, अदिक ना नीन ऊँटगोळ कुडोर साटी भी नीर तुमकु कोळाईन,” आक आका आर्त ईरूल यारी नी नान स्वामी इन पार उन साटी ठहरूस्या.
GEN 24:45 ना मन इन मन दा ईद अनीन अच, कि नोळ रिबका ताल्ला मा माळका हुडुकु बंदुर; बाक आक सोता अन हाती ईळकु तुमली कुरतुर. ना आकिन से अंदीन, “नानी नीर कुळ्स.
GEN 24:46 अदिक आक जल्दी से तान माळका अक ताल्ला मा टु ईळ्सकु अंदुर, ‘ईका, कुडुकोम, हिंद ना नीन ऊँटगोळी भी कुळसाईन,’ ई प्रकार ना कुळदीन, अदिक आक ऊँटगोळी भी कुळ्सदुर.
GEN 24:47 आग ना आकिन से केळदिन, नी यार पोर हुय? अदिक आक अंदुर, ना रा नाहोर उन पैदा माळ्द मिल्‍का अन पार बतूएल उन पोर हुईन,” “आग ना आकिन मुग्‍ग दा नतनी, अदिक आकिन कय दा अव बाळा हाकसुसदीन.
GEN 24:48 बाक ना ताल्ला बांग्सकु यहोवा अक नमस्कार माळदीन, अदिक तान स्वामी अब्राहम उन परमेश्वर यहोवा अक धन्य अंदीन, यतिकी आव नानी वळ्लीद हादी देल पोहचुसदुन कि ना तान स्वामी अन पार उन साटी आऊन रीस्तेदार उन पोर इक ओयाईन.
GEN 24:49 ईग हेळ कि नी येन माळ्या? येन नी नान स्वामी मा दया माळ्या अदिक तान पोर आऊक कोट्या? या नी तान पोर इक कोळोर साटी मना माळ्या? नानी हेळ, यदुर देल ना ईद समसाईन कि नानी येन माळोद आद.”
GEN 24:50 आग लाबान अदिक बतूएल उत्तर कोट्टुर, “ईद मात यहोवा अन दी टु आग्याद; इदुरसाटी नाव लॉकुर नीन से न रा भला अन सकतेव अदिक न बुरा.
GEN 24:51 नोळ, रिबका नीन मुंद आर, आकी ओय, अदिक आक यहोवा अन वचन इन अनुसार, नीन स्वामी इन पार उन हिंग्स आगेगुल.”
GEN 24:52 आंदुर्द ईद मात केळकु, अब्राहम उन दास जमीन मा बिदकु यहोवा अक नमस्कार माळदुन.
GEN 24:53 आग आव रिबका अक अव भेंटगोळ कोट्टुन जो आव सांगुळ तंदीदुन, आव रिबका अक व्हान्ना अदिक चांदी ईनव ईसरा कोट्टुन अदिक हापाळ वळ्लेव कपळा कोट्टुन, आव आकिन वार्ट अदिक आकिन मोय इक किमती भेंटगोळ कोट्टुन.
GEN 24:54 दास अदिक आऊन सांगुळ इनोर मंळसा अल थाम्सदुर अदिक तिंदुर कुळदुर, अल आंदुर ईळ्लक तीम ईत्तुर, आंदुर दुसरा दिशी व्हातर्या यद्दुर अदिक अंदुर “ईग नाव तान स्वामी इन हाती होदेव.”
GEN 24:55 रिबका अन मोय अदिक वार्ट अंदुन, “रिबका अक नाम लॉकुर हाती अदिक येनारा दिन ईरगोळी, आकी हत्त दिन ताका नाम हाती अदिक ईरगोळी, अदुर बाद्दा आक होग सकतार.”
GEN 24:56 लेकीन दास आंदुर से अंदुन, “नान से हादी कायसुसबाळी, यहोवा नान यात्रा सफल माळ्यान, ईग नानी तान स्वामी इन हाती होगगोळी.”
GEN 24:57 रिबका अन वार्ट अदिक आकिन मोय अंदुर, “नाव लॉकुर रिबका अक कारदेव अदिक आकिन से केळेव कि आक येन चाहसतार?”
GEN 24:58 आंदुर रिबका अक कारदुर अदिक आकिन से अंदुर, “येन नी ई मंळसा अन सांगुळ ईग होगोद चाहसत्या?” रिबका अंदुर, “हव, ना होगाईन.”
GEN 24:59 इदुरसाटी आंदुर रिबका अक अब्राहम उन दास अदिक आऊन सांगुळ आऊन मंळसागोळ सांगुळ होग गोट्टुर, रिबका अन दासी भी आंदुर सांगुळ होदुर.
GEN 24:60 अदिक आंदुर रिबका अक आशीर्वाद कोटकु अंदुर, “हे नामोर आकतींग, नी हजारो लाखगोळ्द आदिमाता आगुल, अदिक नीन वंश तान दुश्मनगोळ्द नगर इन अधिकारी आगुल.”
GEN 24:61 आग रिबका तान सहेलीगोळ सांगुळ होदुर; अदिक ऊँट मा येरकु आ मंळसा अन हिंद आदुर, ई प्रकार आ दास रिबका अक हुडुकु नळदुन.
GEN 24:62 इसहाक जो दक्षिण द्याश दा ईरतोगोन, लहैरोई हेसुर इन भाय टु आगकु सुनसान प्रदेश दा होटकु बरतोगोन.
GEN 24:63 द्यावगा अन वती आव मैदान दा ध्यान माळोर साटी होटीदुन; अदिक आव कण्ण नेगुकु येन नोळदुन, कि ऊँटगोळ नळुकु बरेत्याव.
GEN 24:64 रिबका भी कण्‍ण नेगुकु इसहाक उक नोळदुर, अदिक नोळतेला अच ऊँटगोळ मा टु ईळदोदुर.
GEN 24:65 आग आक तान दास से केळदुर, “जो मंळसा मैदान मा नाम दी बरेत्यान, आव याव हुन?” दास अंदुन, “आव रा नान स्वामी हुन.” आग रिबका सेरग्या हुडुकु तान बाय मा ईटदुर.
GEN 24:66 दास इसहाक से तान सांगुळ आग्द घटना अन वर्णन माळदुन.
GEN 24:67 आग इसहाक रिबका अक तान मोय सारा अन ड्यारा दा तंदुन, अदिक आकिन से मदा माळकु आकिन से प्यार माळदुन. ई प्रकार इसहाक उक मोय इन मृत्यु उन बाद्दा शांती प्राप्त आत.
GEN 25:1 आग अब्राहम मात्त ऊंद आर्त से मदा माळदुन यार्द हेसुर कतूरा ईरोद.
GEN 25:2 आकिन से जिम्रान, योक्षान, मदना, मिद्यान, यिशबाक, अदिक शूह पैदा आदुर.
GEN 25:3 योक्षान देल शबा अदिक ददान पैदा आदुर; अदिक ददान उन वंश दा अश्‍शूरी, लतूशी, अदिक लुम्‍मी लॉकुर आदुर.
GEN 25:4 मिद्यान उन पार एपा, एपेर, हनोक, अबीदा, अदिक एल्‍दा आदुर, ईंदुर सप्‍पा कतूरा अन चिकोर आदुर.
GEN 25:5 इसहाक उक रा अब्राहम तान सप्‍पा येनारा कोट्‍टुन.
GEN 25:6 लेकीन तान रखैल उन चिकोरी, थ्‍वाळा थ्‍वाळा कोटकु तान जीत्‍ता जीवन दा तान पार इसहाक उन हात्‍ती टु पूर्व दिशा दा कळु कोंडुन.
GEN 25:7 अब्राहम उन पुरा ऊमर ऊंद सौ पचहत्तर वर्ष इन आत.
GEN 25:8 अब्राहम उन दीर्घायु आगा कारण मतलब पुरा हाळाबाट अवस्‍था दा जीव बीटोत; अदिक आव तान लॉकुर दा होगकु सीकेदुन.
GEN 25:9 आऊन पार इसहाक अदिक इश्‍माएल, हित्ती सोहर उन पार एप्रोन इन मम्रे अन्द पूर्व दिशा अन्द जागा दा, जो मकपेला अन गुफा ईरोद, अल आऊक मुण्‍ण कोट्‍टुर;
GEN 25:10 मतलब जो जागा अब्राहम हित्‍तीगोळ हाती टु कोंडीदुन; अल्‍या अब्राहम, अदिक आऊन हिंग्‍स सारा, येढ्‍ढु मुंदरी मुण्‍ण कोटकु आत.
GEN 25:11 अब्राहम उन सोत्‍तुर बाद्‍दा, परमेश्वर आऊन पार इसहाक उक आशीष कोट्‍टुन, जो आ समय लहैरोई हेसुर इन भाँय इन हात्ती ईरतोगोन.
GEN 25:12 अब्राहम उन पार इश्‍माएल जो सारा अन मिस्त्री दासी हाजिरा देल पैदा आगीदुन, आऊन ईद वंशावली आद.
GEN 25:13 इश्‍माएल उन चिकोर्द हेसुर अदिक वंशावली ईद हुन: मतलब इश्‍माएल उन धोळ पार नबायोत, बाक केदार, अदबएल, मिबसाम,
GEN 25:14 मिश्‍मा, दूमा, मस्सा,
GEN 25:15 हदद, तेमा, यतूर, नापीश, अदिक केदमा.
GEN 25:16 इश्‍माएल उन चिकोर ईंदुरा आदुर, अदिक ईंदुरवा हेसुर इन अनुसार ईंदुर ऊरानव, अदिक छावनीगोळ हेसुर भी बीद्‍दव; अदिक ईंदुर अच हन्‍नेळ मुंदुर तान तान कुल इन प्रधान आदुर.
GEN 25:17 इश्‍माएल उन पुरा ऊमर ऊंद सौ सैंतीस वर्ष इन आत; आग आव सोतोदुन, अदिक तान सोतकु पुर्वजगोळ दा होगकु सीकेदुन.
GEN 25:18 अदिक आऊन वंश हवीला से शूर ताका, जो मिस्त्र द्याश इन पूर्व अश्शूर इन हादी मा आद, बसुसेदुर; अदिक आदुर्द भाग आदुर्द सप्‍पा वार्टुर न्याड्या दा बिदकु आद.
GEN 25:19 अब्राहम उन पार इसहाक उन वंशावली ईद हुन; अब्राहम से इसहाक पैदा आदुन;
GEN 25:20 अदिक इसहाक चालीस वर्ष इनव आगकु रिबका अक, जो पद्‍दनराम इन वासी, अरामी बतूएल इन पोर, अदिक अरामी वंशीय लाबान इन आकतींग ईरोर, मदा माळदुन.
GEN 25:21 इसहाक उन हिंग्‍स रा बाँझ ईरोर इदुरसाटी आव तान हिंग्‍स उन दी टु यहोवा से विनती माळदुन; अदिक आऊन विनती केळदुन, ई प्रकार आऊन हिंग्‍स रिबका गर्भवती ईत्‍तुर.
GEN 25:22 चिकोर आकिन गर्भ दा आबुर दाबुर इक धक्‍का कोळतेला ईरतोगोर. आग रिबका अंदुर, “ईद येन आगेत्‍याद नान सांगुळ?” अदिक आक यहोवा से केळली होदुर.
GEN 25:23 यहोवा आकिन से अंदुन, “नीन गर्भ दा येढ्‍ढ जातीगोळ आव, आंदुर दा टु येढ्‍ढ समूह अन लॉकुर होटकु अलग आदार; ऊंद समूह अन लॉकुर दुसरा से येक्‍कुल ताकतवर आदार, अदिक धोड्‍डेव श्‍याण्णेव उन स्यावा माळ्‍यान.”
GEN 25:24 याग आकिन दुख इन समय बत्‍त, रा आकिन गर्भ दा जुळवा चिकोर ईरोर.
GEN 25:25 जो पयला पार आदुन आव क्याचांद ईरोन, अदिक आऊन पुरा शरीर चुट्‍टगोळ देल तुमकु ईरोद; ईद कारण आऊन हेसुर एसाव ईटकु आत.
GEN 25:26 ईदुर बाद्‍दा आऊन वार्ट उन जनम आत, जो तान कय देल तान वार्ट एसाव उन काल हुडुकु ईरोन; आग आऊन हेसुर याकूब ईटकु आत. याग रिबका आऊक जनम कोट्‍टुर आग इसहाक साठ वर्ष इन ईरोन.
GEN 25:27 बाक आ चिकोर धोड्‍डेर आगली कुरतुर अदिक एसाव रा वनवासी आगकु चालाक शिकार आळावाळा आगेदुन, लेकीन याकूब सीधा मंळसा ईरोन, अदिक ड्‍यारागोळ दा ईरतोगोन.
GEN 25:28 एसाव इसहाक उन प्यारा ईरोन यतिकी इसहाक उक मांस हापाळ वळ्‍लीद हततोगोद, लेकीन याकूब रिबका अन प्यारा ईरोन.
GEN 25:29 ऊंद घन याग याकूब कम बेक्‍की दा येनारा बेईसोन, आग एसाव आळी टु बंदुन अदिक आव हापाळ हस्‍तकु ईरोन.
GEN 25:30 आव याकूब से अंदुन, “नानी हापाळ हसू हत्‍याद; नी जो बेईसीत्‍या, जल्‍दी माळकु अदुर दा टु नानी येनारा तीनली कोळ.” ईदा कारण आद कि आऊक एदोम भी अनकु आग्‍याद.
GEN 25:31 लेकीन याकूब आऊन से अंदुन, “पयले नी तान धोळ आगोद अधिकार नानी कोळ.”
GEN 25:32 एसाव अंदुन, “नोळ, हसु देल नान जीव होळेत्‍याद; धोळ आगोद अधिकार देल नानी येन फायदा आद?”
GEN 25:33 लेकीन याकूब अंदुन, “रा पयले नी नान से कसम ताकोम.” आग एसाव कसम तीनकु तान धोळ आगोद अधिकार याकूब उन कय दा मार कोंडुन.
GEN 25:34 आग याकूब एसाव उक येनारा रोट्‍टी अदिक बेईस्‍द मसूर इन ताग्गा कोट्‍टुन. एसाव तिंदुन कुळदुन, अदिक येदकु होटोदुन. ई प्रकार एसाव तान धोळ आगोद अधिकार इक तुच्‍छ सम्‍सदुन.
GEN 26:1 आ द्‍याश दा अकाल बीत्‍त. हिंग अच अकाल अब्राहम उन समय दा भी बिद्दीत अदिक इसहाक गरार दा पलिश्तीगोळ राजा अबीमेलेक उन हाती होदुन.
GEN 26:2 यहोवा इसहाक उक दर्शन कोटकु अंदुन, “मिस्त्र द्‍याश इक होगबाळ; लेकीन आ द्‍याश दा ईर, येल ना हेळाईन.
GEN 26:3 येनारा समय साटी ई द्‍याश दा ईर, अदिक ना नीन सांगुळ ईराईन अदिक नीनी आशीष कोळाईन. ना ईद द्‍याश नीनी अदिक नीन वंश इक कोळाईन अदिक नीन आप्‍प अब्राहम से माळ्‍द तान वादा अक पुरा माळाईन,
GEN 26:4 ना नीन वंश इक आकाश इन तारागन इन घाई माळाईन; अदिक ना नीन वंश इक ईद सप्‍पा द्‍याश कोळाईन, अदिक पृथ्‍वी इन सप्‍पा जातीगोळ नीन वंश इन कारण तानीक धन्‍य मानसीत.
GEN 26:5 यतिकी अब्राहम नान केळदुन, अदिक जो ना आऊक सौप्‍सदिन अदरी अदिक नान आग्‍यागोळ, विधिगोळ अदिक व्यवस्था अन पालन माळदुन.”
GEN 26:6 इदुरसाटी इसहाक गरार नगर दा ईतोदुन.
GEN 26:7 याग आ जागा नोर लॉकुर आऊन हिंग्‍स उन बारा दा केळदुर, आग आव अंदुन, “आक नान आकतींग हुळ,” यतिकी आव ईद अनोर से अंजोन, “आक नान हिंग्‍स हुळ.” आव सोचोन, “ई जागा दाकळोर लॉकुर रिबका अन कारण शायद नानी कोंद बुट्‍टार, यतिकी आक सुंदर आर.”
GEN 26:8 याग आऊक अल ईरतेला हापाळ दिनगोळ आदव, आग ऊंद दिन पलिश्तीगोळ राजा अबीमेलेक खिळकी दा टु येन नोळदुन कि इसहाक तान हिंग्‍स रिबका अन सांगुळ प्यार माळेत्‍यान.
GEN 26:9 आग अबीमेलेक इसहाक उक कारसुसकु अंदुन, “आक रा सही दा नीन हिंग्‍स हुळ; बाक नी आकी यती तान आकतींग अंद?” इसहाक उत्‍तर कोट्‍टुन, “ना सोचीदिन, कि हिंग आगबाळुल कि आकिन कारण नान सायोद आगुल.”
GEN 26:10 अबीमेलेक अंदुन, “नी नाम से ईद येन माळ्‍द? हिंग रा प्रजा दा टु यावारा नीन हिंग्‍स उन सांगुळ सही दा कुकर्म माळ सकतान, अदिक नी नामी पाप दा फसुसाईद.”
GEN 26:11 इदुरसाटी अबीमेलेक तान पुरा प्रजा अक आग्‍या कोट्‍टुन, “जो यावारा आ मंळसा अक या आ आर्त इक मुट्‍यान, आव सही दा कोंदसुसकु आदान.”
GEN 26:12 इसहाक आ द्‍याश दा खेती माळदुन अदिक आऊक अदा वर्षी सौ गुणा फसल सिक्‍त, यतिकी यहोवा आऊक आशीष कोट्‍टुन.
GEN 26:13 आव धनवान आगेदुन; आऊन धन वाळुसतेला ईत्‍त अदिक आव हापाळ धनवान आगेदुन.
GEN 26:14 आऊन हाती ईस मर्र-म्यांडा, जनावर अदिक सेवक आगेदुर कि पलिश्तीगोळ आऊन से होतली कुरतुर.
GEN 26:15 इदुरसाटी आ सप्‍पा भायगोळी, जो आऊन आप्‍प अब्राहम उन सेवकगोळ आऊन आप्‍प उन समय अगळीदुर, पलिश्तीगोळ मुण्‍ण देल मुचकु बंद माळ बुट्‍टुर.
GEN 26:16 आग अबीमेलेक इसहाक से अंदुन, “नी नाम हाती टु दुर होटोग, यतिकी नी नाम से हापाळ येक्‍कुल धनवान आगेग्‍या.”
GEN 26:17 इदुरसाटी इसहाक अल टु होटोदुन अदिक गरार घाटी दा ड्‍यारा नीदरूस्‍कु अल ईरली कुरतुन.
GEN 26:18 इसहाक आ भायगोळी मात अगळुसदुन, जो आऊन आप्‍प उन समय दा अगुळकु आगीदव, अदिक अवरी पलिश्तीगोळ अब्राहम उन सोत्‍तुर बाद्‍दा मुच्‍च कोंडीदुर, अदिक आव आ भायगोळ्‍द अवा हेसुर ईटदुन जो आऊन आप्‍प ईटीदुन.
GEN 26:19 इसहाक उन सेवकगोळी घाटी दा अगळा वती अल ऊंद सय नीर इन झरना सीक्‍त.
GEN 26:20 ईदुर मा गरार इन चरवाहागोळ इसहाक उन चरवाहागोळ सांगुळ झगळा माळदुर अदिक अंदुर, “ईद नीर नाम्‍द हुन!” इदुरसाटी इसहाक आ भाय इन हेसुर ऐसेक ईटदुन, यतिकी आंदुर आऊन से झगळा माळदुर.
GEN 26:21 आग आंदुर दुसरा भाय अगुळदुर, लेकीन आंदुर अदुर मा भी झगळा माळदुर; इदुरसाटी इसहाक आ भाय इन हेसुर सितनाह ईटदुन.
GEN 26:22 आग आव अल टु होटोदुन अदिक ऊंद अदिक भाय अगुळदुर, अदिक ईदुर मा याऊ झगळा माळीदिल. इसहाक ईद अनकु आ भाय इन हेसुर रहोबोत ईटदुन, “ईग यहोवा नामी हापाळ नीर कोटान, अदिक नाव ई द्‍याश दा उन्‍नती माळेव.”
GEN 26:23 अल टु इसहाक बेर्शेबा अक होदुन.
GEN 26:24 अदा ईळ्लकी यहोवा आऊक दर्शन कोटकु अंदुन, “ना नीम आप्‍प अब्राहम उन परमेश्वर हुईन. अंजबाळ, यतिकी नान नीन सांगुळ आईन; ना नीनी तान सेवक अब्राहम उन कारण आशीष कोळाईन अदिक नीन वंश इक वाळुसाईन.”
GEN 26:25 आग इसहाक अल ऊंद वेदी माळदुन अदिक यहोवा अन आराधना माळदुन. अल आव तान ड्‍यारा नीदरूसदुन अदिक अल आऊन सेवकगोळ ऊंद भाय अगुळदुर.
GEN 26:26 आग अबीमेलेक तान सलाहकार अहुज्‍जत, अदिक तान सेनापती पीकोल उक सांगुळ हुडुकु, गरार नगर टु आऊन हाती होदुन.
GEN 26:27 इसहाक आंदुर से अंदुन, “नीव नान से दुश्मनी माळकु तान हाती टु तेगु बुटीदिर, ईग नान हाती यती बंदीर?”
GEN 26:28 आंदुर अंदुर, “नाव साफ-साफ नोळदेव कि यहोवा नीन सांगुळ आन; इदुरसाटी नाव अंदेव, ‘नीन अदिक नाम बीच दा कसम इन वादा ईर पायजे.’ इदुरसाटी नाव नीन से ऊंद वादा माळोद चाहसतेव.
GEN 26:29 कि ह्‍यांग नाव नीनी मुठीदिल, बल्‍की नीन सांगुळ सिर्फ भलाई माळेव, अदिक नीनी कुशल क्षेम देल सार माळदुन, अदुर अनुसार नी भी नाम से यातोदु बुराई माळतीदील. अदिक नी प्रभु उन आशीष सिक्त मंळसा हुय.”
GEN 26:30 आग इसहाक आंदुर साटी ऊंद भोज इन आयोजन माळदुन, अदिक आंदुर तिंदुर अदिक कुळदुर.
GEN 26:31 दुसरा दिशी एकदम व्हातर्‍या येदकु आबुर दाबुर सांगुळ कसम ताकोंडुर. आग इसहाक आंदुर सार माळदुन, अदिक आंदुर शांती देल आ जागा टु होटोदुर.
GEN 26:32 आ दिशी इसहाक उन सेवकगोळ बंदकु आऊक आ अगुळकु भाय इन बारा दा हेळदुन, यदरी आंदुर अगळीदुर, आंदुर अंदीदुर, “नामी नीर सिकेग्‍याद!”
GEN 26:33 इसहाक आ भाय इन हेसुर शिबा ईटदुन, अदिक ईंद ताका आ नगर इन हेसुर बेर्शेबा आद.
GEN 26:34 याग एसाव चालीस वर्ष इन आदुन, आग आव हित्ती बेरी अन पोर यहूदीत, अदिक हित्‍ती एलोन उन पोर बासमत इक हिंग्‍स माळदुन;
GEN 26:35 अदिक ई आर्तेर इन कारण इसहाक अदिक रिबका अन मन इक दुख आत.
GEN 27:1 याग इसहाक बाट्‍ट आगेदुन, अदिक आऊन कण्‍णगोळ हिंग कमजोर आगेदव कि आव नोळ ईला सकोन, आग आव तान धोड्‍डेव पार एसाव उक कारदुन अदिक अंदुन, “हे नान पारा.” आव अंदुन, “येन आग्‍या आद नान आप्‍पा?”
GEN 27:2 इसहाक अंदुन, “ना रा हाळाबाट्‍ट आगेगीन अदिक जानसालीन कि याग सायाईन.
GEN 27:3 इदुरसाटी ईग नी तान तरकस अदिक धनुष हुडु अदिक आळी दा होग अदिक नान साटी यातोदारा आळी दाकळोद जनावर शिकार माळकु तर.
GEN 27:4 अदिक नान पसंद इन अनुसार सवाद भोजन माळकु नान हाती तनकु कोळेत, कि अदरी तीनकु सायोर से पयले नीनी जी तुमकु आशीर्वाद कोळाईन.”
GEN 27:5 याग इसहाक तान पार एसाव से मातगोळ हेळोन, आग रिबका आंदुर मातगोळ केळोर. याग एसाव आळी दा शिकार माळोर साटी होटोदुन,
GEN 27:6 आग रिबका तान पार याकूब से अंदुर, “नोळ, ना नीन आप्‍प उक नीन वार्ट एसाव से ईद अनतेला केळीन,
GEN 27:7 ‘शिकार माळकु नान साटी सवाद भोजन माळकु तर कि ना अदरी तीनाईन अदिक तान सायोर से पयले यहोवा अन मुंद आशीष कोळाईन.’
GEN 27:8 इदुरसाटी ईग, हे नान पारा, नांद केळ, अदिक ईद आग्‍या मान्‍स,
GEN 27:9 कि मर्रगोळ हाती होगकु मर्रगोळोव येढ्‍ढ वळ्‍लेव वळ्‍लेव पाड्डा तर; अदिक ना नीन आप्‍प उन साटी आऊन पसंद इन अनुसार सवाद भोजन माळकु कोळाईन.
GEN 27:10 आग नी अदरी तान आप्‍प उन हाती ओयत, कि आव अदरी तीनकु सायोर से पयले नीनी आशीर्वाद कोळुल.”
GEN 27:11 याकूब तान मोय रिबका से अंदुन, “केळ, नान वार्ट एसाव उन मय मा पुरा चुट्‍टी आव लेकीन नान मय मा हैलेच.
GEN 27:12 अगर नान आप्‍प नानी अजमुस्यान रा, ना तान आप्‍प उन नजर दा ख्‍वाटा बीळाईन; अदिक आशीष इन बदला दा श्राप अच कमुसाईन.”
GEN 27:13 आऊन मोय आऊन से अंदुर, “हे नान पारा, श्राप नीन मा ईला नान मा बिळुल, नी सिर्फ नांद केळ, अदिक होगकु अव पाड्‍डागोळ नान हाती तर.”
GEN 27:14 आग याकूब होगकु आ पाड्‍डागोळी तान मोय इन हाती तंदुन, अदिक मोय आऊन पसंद इन अनुसार सवाद भोजन माळकु कोट्‍टुर.
GEN 27:15 आग रिबका तान पयला पार एसाव उन सुंदर कपळा, जो आकिन मान्‍या ईरव, तान स्याण पार याकूब उक हाकसुस बुट्‍टुर.
GEN 27:16 आक मर्र इन पाड्डा अन तोगुल देल आऊन कयगोळ्द हिस्‍सा अदिक कुतक्‍या अक भी ढाक्‍स कोंडुर.
GEN 27:17 आग आक तान कास्‍द सवाद मांस इक अदिक रोट्‍टीगोळी हुडुकु याकूब उक कोट्‍टुर.
GEN 27:18 तान आप्‍प उन हाती होगकु याकूब अंदुन, “आप्‍पा.” इसहाक उत्‍तर कोट्‍टुन, “येन पारा, याव हुय नी?”
GEN 27:19 याकूब तान आप्‍प उक उत्‍तर कोट्‍टुन, “ना नीन धोड्‍डेव पार एसाव हुईन. ना अद सप्‍पा माळदीन, ह्‍यांग नी अंदीद. कृपया कुर अदिक नांद शिकार माळ्‍द भोजन माळ अदिक नानी तान आशीष कोळ.”
GEN 27:20 इसहाक तान पार से अंदुन, “हे नान पारा, येन कारण आद कि शिकार नीनी ईट जल्‍दी सीकेत?” आव उत्‍तर कोट्‍टुन, “नीन परमेश्वर यहोवा अदरी नान मुंद माळ बुट्‍टुन.”
GEN 27:21 बाक इसहाक याकूब से अंदुन, “हे नान पारा, हाती बर, ना नीनी ताळुकु नोळतीन, कि नी सही दा नान पार एसाव हुय या ईला.”
GEN 27:22 आग याकूब तान आप्‍प इसहाक उन हाती होदुन, अदिक आव आऊक ताळुकु अंदुन, “आवाज रा याकूब घाई आद लेकीन कय एसाव उन घाई आव.”
GEN 27:23 इसहाक आऊक अरतीदिल, यतिकी आऊन कय मा हांगा चुट्‍टी ईरव ह्‍यांग एसाव उन ईरव. इदुरसाटी इसहाक याकूब उक आशीष कोट्‍टुन.
GEN 27:24 इसहाक केळदुन, “येन नी सहीदा नान पार एसाव हुय?” याकूब उत्‍तर कोट्‍टुन, “हव.”
GEN 27:25 आग इसहाक अंदुन, “हे नान पारा, तान शिकार देल बेईस्‍द येनारा भोजन नान साटी तीनली तर, ताकी ना नीनी तान आशीष कोळाईन.” आग आव अदरी आऊन हात्ती तंदुन, अदिक आव तिंदुन; अदिक आव आऊन हात्ती अंगुर इन रास्सा भी तंदुन, अदिक आव कुळदुन.
GEN 27:26 आग आऊन आप्‍प इसहाक आऊन से अंदुन, “हे नान पारा, ईल बर अदिक नानी चुम्‍स.”
GEN 27:27 इदुरसाटी याकूब आऊन हाती होदुन अदिक आऊक चुम्सदुन, याग इसहाक उक आऊन कपळा दा टु एसाव उन सुंगध बत्‍त, इदुरसाटी आव आऊक आशीष कोळतेला अंदुन, “नान पार उन खुशबू परमेश्वर यहोवा अन आशीष देल मैदान दा फैलुसीग्‍याद.
GEN 27:28 परमेश्वर नीनी आकाश टु ओद, अदिक जमीन इन वळ्‍लीद से वळ्‍लीद फसल, अदिक हापाळ सा अनाज अदिक व्‍हाशोद अंगुर इन रास्‍सा कोळुल;
GEN 27:29 सप्‍पा राज्‍य अन लॉकुर नींद स्यावा माळुल, जाती जाती इन लॉकुर नींद मुंद झुकसुल, नी तान वार्टुर्द स्वामी आगुल, अदिक नीन मोय इन चिकोर नीनी नमस्‍कार माळुल. जो नीनी श्राप कोळतान आव खुद अच श्रापीत आगुल, अदिक जो नीनी आशीर्वाद कोट्‍टान आऊक आशीष सिकुल.”
GEN 27:30 याग इसहाक याकूब उक आशीष कोट्‍ट बुट्‍टुन आग आऊन वार्ट एसाव शिकार माळकु मान्‍या बंदुन.
GEN 27:31 आव जल्‍दी सवाद भोजन तैयार माळदुन अदिक तान आप्‍प से अंदुन “आप्‍पा, येळ अदिक सवाद भोजन तीनकु नानी आशीष कोळ.”
GEN 27:32 आऊन आप्‍प इसहाक आऊन से केळदुन, “याव हुय नी?” आव अंदुन, “ना नीन धोड्‍डेव पार एसाव हुईन.”
GEN 27:33 ईद केळकु इसहाक नळ्‍गतेला अंदुन, “रा आव याव ईरोन, जो नान साटी भोजन तंदीदुन? अदिक ना आऊक आशीष भी कोट्‍टीन, ईग आव आशीषित अच ईत्‍तान!”
GEN 27:34 तान आप्‍प उन ईद मात केळकु एसाव हापाळ वर्लली कुरतुन अदिक आव तान आप्‍प से अंदुन, “हे नान आप्‍पा, नानी भी आशीष कोळ!”
GEN 27:35 इसहाक अंदुन, “नीन वार्ट ध्‍वाका कोट्‍टुन अदिक आशीष ताकोम कोंडुन.”
GEN 27:36 एसाव अंदुन, “अदुर साटी याकूब हेसुर सही हैलेच, येढ्‍ढ घन आव नान सांगुळ गलत माळदुन: पयले आव नान धोड्‍डेव आगोद अधिकार ताकोम कोंडुन अदिक ईग नान आशीष भी कदू कोंडुन!” आग एसाव तान आप्‍प से केळदुन, “येन नी नान साटी ऊंद भी आशीष मीक्‍सकु ईटीदिल?”
GEN 27:37 इसहाक एसाव से अंदुन, “ना रा आऊक नीन स्वामी माळ कोंडीन. अदिक सप्‍पा संबंधीगोळी आऊन सेवक माळकु आऊक सौप्स कोंडीन अदिक आऊक अनाज अदिक व्‍हाशेव अंगुर इन रास्सा देल तुमकु ईरोद आशीष कोट्‍टीन, ईग नान पारा, नीन साटी ना येन माळाईन?”
GEN 27:38 एसाव तान आप्‍प से केळदुन, “हे नान आप्‍पा, येन नीन हाती नान साटी ऊंद भी आशीष हैलेच? अदिक वर्लतेला अनली कुरतुन कि हे नान आप्‍पा नानी भी आशीष कोळ!”
GEN 27:39 आग इसहाक अंदुन, “नीन मान्‍ना वळ्‍लीद ऊपज वाळा जागा टु दूर ईरूल अदिक अदुर मा आकाश टु ओद बिळबाळुल.
GEN 27:40 नी तान तलवार इन ताकत देल जीत्‍ता ईत्‍या. नी तान वार्टुन स्यावा माळ्‍या; लेकीन हा, लेकीन नी आजादी इन साटी लळुस्‍या, अदिक नी तान म्‍याकुच बीत्‍त आऊन प्रतिबन्‍ध इक मुरूकु भीट्‍या.”
GEN 27:41 एसाव तान वार्ट याकूब से तान आप्प उन कोळ्द आशीष इन कारण सिट्‍ट माळली कुरतुन अदिक मन दा हिंग सोचली हतदुन कि “आप्‍प उन सोत्‍तुर बाद्‍दा आऊन हत्‍या माळ कोमाईन.”
GEN 27:42 याग रिबका अक तान धोड्‍डेव पार उन सिट्‍ट कांळ्सली कुर्त आग याकूब उक कारसुसकु आऊन से अंदुर, “नीन वार्ट एसाव उन मन दा नीन साटी हापाळ सिट्‍ट आद. केळ, नीन वार्ट एसाव नीनी कोन्‍नोद विचार माळेत्‍यान.
GEN 27:43 इदुरसाटी नी ईल टु ओळकु नान वार्ट लाबान उन मान्‍या हारान नगर होटोग.
GEN 27:44 अल होगकु येनारा समय ईर, यागास ताका नीन वार्ट उन सिट्‍ट खतम आगेगाल.
GEN 27:45 यागास ताका नीन वार्ट उन सिट्‍ट खतम आदीत, अदिक आव मारतोदान कि नी आऊन सांगुळ येन माळ्‍द, आग ना नीनी अल टु कारू कोमाईन.” हिंग येती आगुल कि उंद अच दिन दा नान इक येढ्ढु पारगोळ से वंचित आगोद बिळुल.
GEN 27:46 ऊंद दिशी रिबका इसहाक से केळदुर, “हित्‍ती इन ई पोरगोळ नान जीवन दुखी माळ बुट्‍टार. अगर याकूब भी हेथ इन पोरगोळ दा टु यारीकारा, तान हिंग्‍स माळ कोंडान रा नान साटी जीऊसोद अदिक भी मुश्‍किल आगेदीत?” इदुरसाटी याकूब उक आऊन मामा लाबान उन मान्‍या कळु कोम.
GEN 28:1 इदुरसाटी इसहाक याकूब उक आशीष कोट्‍टुन अदिक अंदुन: “कि कनानी पोरगोळ से मदा माळबाळेत.
GEN 28:2 लेकीन पद्‍दनराम दा तान आजा बतूएल उन मान्‍या होगकु अल तान मामा लाबान उन ऊंद पोर इक हिंग्स माळ कोमेत.
GEN 28:3 सर्वशक्तिमान परमेश्वर नीनी आशीष कोळुल, अदिक फलवंत माळकु नीनी वाळुसुल, अदिक नी राज्‍य राज्‍य अन मंडली इन मूल आगुल.
GEN 28:4 परमेश्वर नीनी अद आशीष कोळुल जो अब्राहम उक कोटीदुन, नीनी अदिक नीन वंश इक, आ द्‍याश इक अधिकारी माळुल.”
GEN 28:5 ई सप्‍पा आशीषित वचन इन सांगुळ इसहाक याकूब उक सार माळदुन. याकूब तान अदिक एसाव इन मोय रिबका अन वार्ट अरामीवासी लाबान इन मान्‍या होटोदुन, जो पद्‍दनराम इन बतूएल अन चिकोर ईरोर.
GEN 28:6 एसाव उक मालूम आगेगीत कि इसहाक याकूब उक आशीष कोटकु पद्‍दनराम क्षेत्र दा कळुदुन ताकी आव तान साटी हिंग्‍स नीवळुसुल, अदिक आदेश भी कोट्‍टुन कि आव कनानी आर्त इन से मदा माळबाळुल,
GEN 28:7 अदिक याकूब तान आप्‍प अदिक मोय इन मात इक मान्सतेला पद्‍दनराम दा होटोदुन.
GEN 28:8 आग एसाव उक ईद समझ दा होट्‍ट बत्‍त, कि आऊन आप्‍प इसहाक कनान द्‍याश इन पोरगोळ पसंद हैलेच.
GEN 28:9 इदुरसाटी एसाव तान हिंग्‍स उन अलावा अब्राहम उन पार इश्‍माएल इन पोर माहालाथ से, जो नबायोत इन आकतींग ईरोर, मदा माळ कोंडुन.
GEN 28:10 याकूब बेर्शेबा से होटकु हारान इन दी होदुन.
GEN 28:11 अदिक आव ऊंद जागा दा पोहचुस्कु ईळ्‍ल्‍क अल्‍या कढोद विचार माळदुन, यतिकी सुर्य मुळकेगीत; इदुरसाटी आव आ जागा अन कल्‍लगोळ दा टु ऊंद कल्‍ल हुडुकु तान ऊसा माळकु ईटदुन, अदिक अदा जागा दा मींगेदुन.
GEN 28:12 आग आव कांन्‍सा दा येन नोळदुन, कि ऊंद सीळी पृथ्‍वी मा नीदुरकु आद, अदिक अदुर स्‍यांडा स्‍वर्ग ताका पोहचुस्कु आद; अदिक परमेश्वर उन दूतगोळ अदुर मा येरतार अदिक ईळुतार.
GEN 28:13 अदिक यहोवा अदुर म्‍याकुच निदुरकु अनतान, “ना यहोवा, नीन आजा अब्राहम उन परमेश्वर, अदिक इसहाक उन भी परमेश्वर हुईन; या जागा मा नी मिंगकु आय, अदरी ना नीनी अदिक नीन वंश इक कोळाईन.
GEN 28:14 अदिक नीन वंश जमीन इन धूळा अन खाळा अन घाई हापाळ आदीत, अदिक पश्‍चिम, पूर्व, उत्‍तर, दक्षिण, नाकु दी फैलुसतेला होदीत: अदिक नीन अदिक नीन वंश इन द्वारा पृथ्‍वी इन सप्‍पा कुल आशीष ताकोंडार.
GEN 28:15 अदिक केळ, ना नीन सांगुळ ईराईन, अदिक नी येल्‍यारा भी होगत्‍या अल नीन रक्षा माळाईन, अदिक नीनी ई द्‍याश दा वापस ताराईन: ना तान अंदुर इक पुरा माळ कोमालीन आगासताका नीनी बिळतीदील.”
GEN 28:16 आग याकूब येद्‍दुन, अदिक अनली कुरतुन, “सही दा ई जागा दा यहोवा आन; अदिक ना ई मात इक ईला जानसीन.”
GEN 28:17 अदिक अंजकु आव अंदुन, “ईद जागा येन ईद भयानक आद! ईद रा परमेश्वर उन भवन उक बीळ अदिक येनु आगसकाल; बल्‍की ईद स्‍वर्ग इन फाटक अच आगीदाद.”
GEN 28:18 व्‍हातर्याका याकूब येद्‍दुन, अदिक तान ऊसा अन कल्‍ल हुडुकु अदुर्द खंबा नीदरूसदुन, अदिक आव अदुर ताल्‍ला मा याण्‍णा हाक्‍क कोंडुन.
GEN 28:19 अदिक आव आ जागा अन हेसुर बेतेल ईटदुन; लेकीन आ नगर इन हेसुर पयले लूज ईरोद.
GEN 28:20 याकूब ईद मन्नत ताकोंडुन, “अगर परमेश्वर नान सांगुळ ईतकु ई यात्रा दा नान रक्षा माळुल, अदिक नानी तीनोर साटी रोट्‍टी, अदिक हाक्‍कोर साटी कपळा कोळुल,
GEN 28:21 अदिक नानी नान आप्‍प उन मान्‍ना ताका सुरक्षित पोहचुस्‍यान, यहोवा अच नान परमेश्वर आदान.
GEN 28:22 ईद कल्‍ल, यदरी ना खंबा माळकु निदरूसीन, परमेश्वर उन मान्‍ना आदीत अदिक नी जो येनारा नानी कोट्या, सही दा : ना अदुर्द दशमांश नीन इच कोळाईन.”
GEN 29:1 बाक याकूब तान हादी हुळदुन, अदिक पूर्वियों अन द्‍याश दा बंदुन.
GEN 29:2 अदिक आव येन नोळदुन कि, मैदान दा ऊंद भाय आद, अदिक अदुर हाती म्यांडा मर्र इन मुर झुंड कुर्तकु आव; यतिकी जो कल्‍ल आ भाय इन बाय मा ईटकु ईरतोगोद, यदुर दा टु झुंडगोळी नीर कुळ्‍सकु आगतोगोद, अद भारी ईरोद.
GEN 29:3 अदिक याग सप्‍पा झुंड अल जमा आगतोगोव आग चरवाहगोळ आ कल्‍ल इक भाय इन बाय मा टु सरकुसकु म्यांडा मर्रगोळी नीर कुळ्‍सतोगोर, अदिक बाक कल्‍ल इक भाय इन बाय मा हांग च्‍या हांगा ईटतोगोर.
GEN 29:4 अत: याकूब चरवाहागोळ से केळदुन, “हे नान वार्टुरा, नीव येलेर हुईर?” आंदुर अंदुर, “नाव हारान इन नोर हुयेव.”
GEN 29:5 आग आव आंदुर से केळदुन, “येन नीव नाहोर उन नातु लाबान उक जान्‍सतीर?” आंदुर अंदुर, “हव, नाव आऊक जान्‍सतेव.”
GEN 29:6 बाक आव आंदुर से केळदुन, “येन आव सुरक्षित आन?” आंदुर अंदुर, “हव, सुरक्षित आन अदिक नोळ, आऊन पोर राहेल म्यांडा मर्र इक हुडुकु बरेत्‍यार.”
GEN 29:7 आव अंदुन, “नोळ, ईगल्‍या रा द्‍याव होगली आद बाक ईट जल्‍दी म्यांडा मर्रगोळ इक यती जमा माळेतीर, ईगल्‍या अवरी नीर कुळ्‍सकु आळगोळी.”
GEN 29:8 लेकीन आंदुर अंदुर, “ईला, सप्‍पा म्यांडा मर्रगोळ ऊंद सांगुळ बंदुर मा अच भाय टु कल्‍ल हटुसकु म्यांडा मर्रगोळ इक नीर कुळ्‍सकु आगतद.”
GEN 29:9 आंदुर्द ईद मातचीत आगोद, कि राहेल जो जनावर आळ्‍सतोगोर, तान आप्‍प उन म्यांडा मर्रगोळी हुडुकु बंदुर.
GEN 29:10 तान मामा लाबान इन पोर राहेल इक, अदिक आऊन म्यांडा मर्रगोळी भी नोळकु याकूब उन हाती होगकु भाय इन बाय मा टु कल्‍ल इक सरकुसकु तान मामा लाबान उन म्यांडा मर्रगोळी नीर कुळ्‍सदुर.
GEN 29:11 आग याकूब राहेल उक चुम्‍सदुन, अदिक धोळ्‍द आवाज देल वर्लदुन.
GEN 29:12 अदिक याकूब राहेल इक हेळ बुट्‍टुन, कि ना नीन फुफेरा वार्ट हुईन, मतलब रिबका अन पार हुईन. आग आक ओळकु होदुर अदिक तान आप्‍प उक हेळदुर.
GEN 29:13 तान भास्‍या अन समाचार केळतेला अच लाबान आऊन से भेंट माळोर साटी ओळदुन, अदिक आऊक छिना देल हचकु चुम्‍सदुन, बाक तान मान्‍या तंदुन. अदिक याकूब लाबान से तान सप्‍पा हालचाल हेळदुन.
GEN 29:14 आग लाबान याकूब से अंदुर, “नी रा सही दा नान येलु अदिक मास हुय.”अदिक याकूब ऊंद तींगुळ ताका आऊन सांगुळ ईत्‍तुन.
GEN 29:15 आग लाबान याकूब से अंदुन, “इदुरसाटी कि नान रिश्तेदार हुय, ईद वळ्‍लीद हैलेच, कि नी नान साटी बीना पैस्‍या देल क्‍याल्‍सा माळ्या इदुरसाटी नी पैस्‍या ताकोमकु क्‍याल्‍सा माळेत?”
GEN 29:16 लाबान उन येढ्‍ढ पोरगोळ ईरोर. धोळ पोर इन हेसुर लियाह अदिक स्‍याण पोर इन हेसुर राहेल ईरोद.
GEN 29:17 लियाह अन कण्‍णगोळ धुंधला ईरव लेकीन राहेल रूपवान अदिक सुंदर ईरोर.
GEN 29:18 याकूब राहेल इक प्रेम माळली कुरतुन, याकूब लाबान से अंदुन, “नीन स्‍याण पोर राहेल इक पाऊसोर साटी ना येळ वर्ष नीन स्यावा माळोरसाटी तैयार आईन.”
GEN 29:19 लाबान अंदुन, “आकी पराया गंळ्स उक कोळदुर देल नीन इक कोळोद वळ्लीद आदीत; नी ईल्या नाम सांगुळ ईर.”
GEN 29:20 इदुरसाटी याकूब राहेल इक पाऊसोर साटी येळ वर्ष स्यावा माळदुन. लेकीन आऊक ईद समय हापाळ कम हत्‍त यतिकी आव राहेल से हापाळ प्रेम माळतोगोन.
GEN 29:21 बाक याकूब लाबान से अंदुन, “येळ वर्ष आगेदव ईग नीन पोर राहेल नानी कोळ ताकी नांद मदा आगेगुल.”
GEN 29:22 लाबान तान समाज इन लॉकुरी कारसुसकु सप्‍पा मुंदरी मदा अन्द जेवन तीन्‍सदुन.
GEN 29:23 द्‍यावगा आव तान पोर लियाह अक याकूब उक कोट्‍ट बुट्‍टुन अदिक याकूब आकिन सांगुळ मदा माळदुन.
GEN 29:24 लाबान तान दासी जिल्‍पा अक भी लियाह अक आकिन दासी आगोर साटी कोट्‍ट बुट्‍टुन.
GEN 29:25 याग याकूब उक मालुम आत कि आक रा लियाह ईरोर! याकूब लाबान से केळदुन, “ईद येन माळ्‍द नी नान सांगुळ? ना नीन स्यावा राहेल इन साटी माळीन? बाक नी नान सांगुळ ईत्‍ता ध्‍वाका यती माळ्‍द?”
GEN 29:26 लाबान अंदुन, “नाम समाज दा धोड्‍डेर पोर बिटकु स्‍याण पोर इन मदा माळ सकालुर.”
GEN 29:27 “ईद हप्ता रा पुरा माळ; बाक दुसरा भी नीनी आ स्यावा साटी सीक्‍यार जो नी नान सांगुळ ईतकु अदिक येळ वर्ष ताका माळ्‍या.”
GEN 29:28 याकूब हिंगा माळदुन, अदिक लियाह अन हप्ता पुरा माळदुन; आग लाबान आऊक तान पोर राहेल भी कोट्‍टुन, कि आक आऊन हिंग्‍स आगुल.
GEN 29:29 लाबान तान पोर राहेल इन दासी आगोर साटी तान दासी बिल्हा अक कोट्‍ट बुट्‍टुन.
GEN 29:30 आग याकूब राहेल इन हाती भी होदुन, अदिक आकिन प्रेम लियाह से येक्‍कुल आकिन मा अच आत, अदिक आव लाबान उन सांगुळ ईतकु येळ वर्ष अदिक स्यावा माळदुन.
GEN 29:31 याग यहोवा नोळदुन कि लियाह अप्रिय आदुर, आग आव आकिन कोख खोल्सदुन, लेकीन राहेल बाँझ ईत्‍तुर.
GEN 29:32 अत: लियाह व्‍हाट्‍यादी ईत्‍तुर, अदिक आकिन से ऊंद पार पैदा आदुन, अदिक आक ईद अनकु आऊन हेसुर रूबेन ईटदुर, “यहोवा नान दुख मा नजर माळदुन, ईग नान गांड नान से प्रेम ईट्‍यान.”
GEN 29:33 बाक लियाह अक अदिक ऊंद पार आत. आक अंदुर, “यतिकी यहोवा ईद केळ कोंडुन कि ना तान गांड उक पसंद हैलेच अदिक नानी ईद ऊंद अदिक पार कोट्‍टुन.”आक आऊन हेसुर शिमोन ईटदुर.
GEN 29:34 लियाह मात्‍त व्‍हाट्‍यादी ईत्‍तुर याग आकी पार पैदा आदुन आग आक अंदुर, “ईग नान गांड नान से जुळसेदान यतिकी ना आऊन मुर पारगोळी जनम कोटीन.” इदुरसाटी लियाह तीसरा पार उन हेसुर लेवी ईटदुर.
GEN 29:35 आक अदिक ऊंद पार उक जनम कोट्‍टुर, “ईग ना यहोवा अन स्‍तुति माळाईन,” इदुरसाटी आक आ पार उन हेसुर यहूदा ईटदुर. अदुर बाद्‍दा लियाह अक चिकोर आगोद बंद आगेत.
GEN 30:1 याग राहेल ईद नोळदुर कि याकूब उन साटी आकिन द्वारा यारू चिकोर आगीदील, रा आकी तान आकतींग से नफरत पैदा आगेत. आक याकूब से झगळा माळली कुरतुर कि, “नानी चिग्‍द कोळ, ईलारा ना सोतोगाईन!”
GEN 30:2 आग याकूब राहेल से सिट्‍ट देल चिळ्‍लासदुन अदिक अंदुन, “येन ना परमेश्वर उन जागा मा आईन कि ना नींद बंद कोख खोल्‍स सकाईन?”
GEN 30:3 ईद केळकु आक अंदुर, “रा नान दासी बिल्हा अन हात्‍ती होग, ताकी आकिन द्वारा ना मोय बनसाईन.”
GEN 30:4 इदुरसाटी राहेल याकूब उक तान दासी बिल्हा अक हिंग्‍स उन रूप दा कोट्‍ट बुट्‍टुर, अदिक याकूब बिल्हा अन सांगुळ वैवाहिक संबंध माळदुन.
GEN 30:5 बिल्हा व्‍हाट्‍यादी ईत्‍तुर अदिक आकी याकूब से ऊंद पार पैदा आदुन.
GEN 30:6 आग राहेल अंदुर, “परमेश्वर नांद न्‍याय माळदुन अदिक नांद दुहाई केळदुन अदिक नानी पार कोट्‍टुन.” आक आऊन हेसुर दान ईटदुर.
GEN 30:7 बाक राहेल इन दासी बिल्हा मात्त व्‍हाट्‍यादी ईत्‍तुर अदिक आक याकूब से दुसरा पार उक पैदा माळदुर.
GEN 30:8 आग राहेल अंदुर, “ना तान आकतींग इन सांगुळ हापाळ मेहनत माळीन अदिक ईग ना जीकेसेगीन.” इदुरसाटी ई पार उन हेसुर नप्ताली ईटकु आत.
GEN 30:9 याग लियाह नोळदुर कि आकिन अदिक चिकोर आगोद थामसेग्‍याद, आग आक तान दासी जिल्‍पा अक याकूब उक हिंग्‍स उन रूप दा कोट्‍ट बुट्‍टुर.
GEN 30:10 लियाह अन दासी जिल्‍पा याकूब देल ऊंद पार उक जनम कोट्‍टुर.
GEN 30:11 लियाह सोचदुर, “ह्‍यांग धन्‍यता आद ईद!” इदुरसाटी आ पार उन हेसुर गाद ईटदुर.
GEN 30:12 लियाह अन दासी जिल्‍पा याकूब से दुसरा पार उक पैदा माळदुर.
GEN 30:13 आग लियाह सोचदुर, “ना धन्‍य आईन अदिक आर्तेर नानी धन्‍य अंदार.” इदुरसाटी ई पार उन हेसुर आशेर ईटदुर.
GEN 30:14 केई दा गोदी इन कटाई इन समय रूबेन याग केई दा होदुन आऊक अल येनारा व्‍हाट्‍यादी माळावाळा काय सिकदव, अवरी आव तान मोय लियाह अन हाती तंदुन. राहेल लियाह से अंदुर, “नानी भी थ्‍वाळासा दूदाफल कोट बुळ.”
GEN 30:15 लियाह राहेल से अंदुर, “येन ईद काफी हैलेच कि नी नान से नान गांड कसु कोंड? अदिक ईग नान पार उन तंदव दूदाफल भी हुडोद चाहसत्‍या?” आग राहेल आकिन से अंदुर, “अगर नी नानी ईद मार्र कोट्या, रा ना ईंद इन ईळ्‍ल्‍क नीनी याकूब उन सांगुळ ईरोद इजाजत कोळाईन.”
GEN 30:16 याग द्‍यावगा याकूब केई दा टु बंदुन आग लियाह याकूब से अंदुर, “ना नीन साटी तान पार द्वारा तंद दूदाफल इक कोटकु नीनी कोंड कोंडीन.”
GEN 30:17 परमेश्वर लियाह से केळदुन. आक व्‍हाट्‍यादी ईत्‍तुर अदिक याकूब उक पाचवा पार कोट्‍टुर.
GEN 30:18 ईदुर मा लियाह अंदुर कि, “परमेश्वर नानी नान मजदुरी कोट्‍टुन यतिकी ना तान दासी इक तान गांड उक कोट्‍टीन.” अदिक इदुरसाटी आऊन हेसुर इस्साकार ईटदुर.
GEN 30:19 बाक लियाह मात्त व्‍हाट्‍यादी ईत्तुर. आक याकूब से छटवा पार उक जनम कोट्‍टुर.
GEN 30:20 आग लियाह अंदुर, “परमेश्वर नानी वळ्‍लीद दान कोटान; ई घनी नान गांड नान सांगुळ बन्सकु ईत्‍तान, यतिकी ना आऊक आर चिकोर कोटीन” अदिक इदुरसाटी आ पार उन हेसुर जबूलून ईटदुर.
GEN 30:21 बाक येनारा समय इन बाद्‍दा लियाह अक ऊंद पोर आदुर, आकिन हेसुर दीना ईटदुर.
GEN 30:22 ईदुर बाद्‍दा परमेश्वर राहेल मा दया माळदुन. परमेश्वर राहेल उन प्रार्थना केळदुन अदिक आकी व्‍हाट्‍यादी ईरोर साटी समक्ष माळदुन.
GEN 30:23 आकी ऊंद पार आदुन, अदिक आक अंदुर, “परमेश्वर नांद कलंक मिटुस बुट्‍टुन.”
GEN 30:24 ईद अनतेला आऊक यूसुफ हेसुर कोट्‍टुर, “परमेश्वर यहोवा नानी ऊंद पार अदिक कोट्‍टान.”
GEN 30:25 याग राहेल से यूसुफ पैदा आदुन, आग याकूब लाबान से अंदुन, “नानी सार माळ कि ना तान द्‍याश अदिक तान जागा अक वापस होगाईन.
GEN 30:26 नान हिंग्‍सुर अदिक नानोर चिकोर, यार साटी ना नींद स्यावा माळदीन, आंदरी नानी कोळ कि ना होटोगाईन; नी रा जान्सत्या कि ना नींद ह्‍यांग स्यावा माळीन.”
GEN 30:27 लाबान आऊन से अंदुन, “यहोवा अन दी टु नानी ईद मालुम आग्‍याद, कि नानी जो अनुग्रह सिक्‍याद, अद नींद अच कारण सिक्‍याद. इदुरसाटी नी नान से नाराज हैलेच, रा नी नान मान्‍या अच ईर.”
GEN 30:28 लाबान अंदुन, “स्यावा अन बदला नी येन चाहसत्‍या ना नीनी अदा कोळाईन.”
GEN 30:29 लेकीन याकूब लाबान से अंदुन, “ना नीन स्यावा ह्‍यांग माळीन, ईद मात नीन से होचकोमकु हैलेच, अदिक नीन जनावरगोळ्‍द भी देखरेख ना ह्‍यांग माळीन.
GEN 30:30 पयले जनावरगोळ कम ईरव लेकीन ईग हापाळ आगेग्‍याव. ना जो भी क्‍याल्‍सा माळीन, अदुर दा यहोवा आशीष कोटान. लेकीन ईग ना तान घराना अन बारा दा सोचोद चाहसतीन.”
GEN 30:31 आग लाबान केळदुन, “नींद मजदूरी येन ईत्‍तीत?” याकूब अंदुन, “नी नानी येनु कोळबाळ. लेकीन, नी चाहास्‍या रा नीन जनावरगोळ्‍द आळसोद अदिक देखभाल माळतेला ईराइन:
GEN 30:32 ईंद ना नीन म्यांडा मर्रगोळ बीच दा टु आगकु होळाईन, अदिक जो म्यांडा या मर्र चिट्टीवाळा या चितकबरी ईत्‍तीत, अदिक जो म्यांडा करीद ईतीदाद, अदिक जो मर्र चितकबरी अदिक चिट्टीवाळा ईतीदाद, अवरी ना अलग माळकु ईटाईन; अदिक नान मजदूरी दा अव अच ठहरूस्‍याव.
GEN 30:33 अदिक याग मुंद नान मजदूरी इन चर्चा नीन मुंद नळदीत, आग धर्म इन ईद गवाही आदीत; मतलब मर्रगोळ दा टु जो यातोदारा न चिट्टीवाळा न चितकबरी ईरूल, अदिक म्यांडागोळ दा टु जो करीद ईला ईरूल, अगर नान हाती होळतद रा काळ्लपनी इन ठहरूसीत.”
GEN 30:34 आग लाबान अंदुन, “ठीक आद नी ह्‍यांग चाहसत्‍या हांग अच माळ.”
GEN 30:35 अत: आव अदा दिशी सप्‍पा धारीवाळा अदिक चितकबरे व्‍हातगोळ, अदिक सप्‍पा चिट्टीवाळा अदिक चितकबरी मर्रगोळी, मतलब अऊर दा थ्‍वाळासा चमकदार ईरोद, अवरी अदिक सप्‍पा करेव म्यांडागोळ इक भी अलग माळकु तान पार उन कय दा सौप्स बुट्‍टुन.
GEN 30:36 आग आव तान अदिक याकूब उन बीच दा मुर दिन इन यात्रा अन दुरी माळ कोंडुन. ईग याकूब लाबान उन मीकदव म्यांडा मर्रगोळ्द झुंड इक आळस्ली कुरतुन.
GEN 30:37 येनारा समय इन बाद्‍दा याकूब चिनार, बादाम अदिक अर्मोन इन मार्र इन डगालगोळ हुडुकु अऊर्द स्‍याक्‍का छिल्‍सकु अऊर मा बिळीद धारगोळ माळदुन ईदुर देल आ डगालगोळ बुळ्‍क बिळीद भाग कांळ्सली कुर्त.
GEN 30:38 बाक याकूब ई छळीगोळ इक डोंगीगोळ दा सजुस बुट्‍टुन, येल म्यांडागोळ नीर कुडुतोगोव, आग आव मर्रगोळ गाबन आदव,
GEN 30:39 अदिक याग पाड्‍डा आगतोगोव रा अव धारीयुक्‍त, चित्‍तीयुक्‍त या धब्‍बायुक्‍त आगतोगोव.
GEN 30:40 याकूब अवरी अलग माळतोगोन, अदिक लाबान उन म्यांडा मर्रगोळ बाय इक चिट्टीवाळा अदिक सप्‍पा करेव पाड्‍डा दी माळ कोंडुन; अदिक तान झुंडगोळी अऊर से अलग ईटदुन, अदिक लाबान उन म्यांडा मर्रगोळ से सीक गोटीदील.
GEN 30:41 अदिक याग याग ताकतवर म्यांडा मर्रगोळ गाबन आगतोगोव, आग आग याकूब आ छळीगोळी कठौता दा अऊर मुंद ईट बुळतोगोन; यदुर देल अव छळीगोळ इक नोळतेला अच गाबन आगेगुल.
GEN 30:42 लेकीन याग अऊर सांगुळ निर्बल म्यांडागोळ ईरतोगोव, आग आव अव छळीगोळ अऊर हाती ईला ईटतोगोन. परिणाम स्‍वरूप सप्‍पा कमजोर म्यांडागोळ लाबान उन सशक्‍त म्यांडा याकूब उन पक्ष दा होट बरतोगोव.
GEN 30:43 इदुरसाटी याकूब हापाळ धनवान आगेदुन, आऊन हाती हापाळ म्यांडा मर्रगोळ दास दासीगोळ ऊँट अदिक गधा भी ईरव.
GEN 31:1 याकूब उन कीव मा ईद समाचार बत्‍त कि लाबान उन पार बळबुळसोन, “याकूब रा अद सप्‍पा हळपुस बुट्‍टुन, जो नाम आप्‍प उन ईरोद अदिक ईग आव नाम आप्‍प उन धन-संपत्‍ती इन आधार मा परिपुर्ण बनस्‍कु कुरतान.”
GEN 31:2 अदिक याकूब लाबान उन चेहरा नोळदुन अदिक व्यव्हार जान्स कोंडुन, कि आव आऊन प्रती पयला अन घाई हैलेच.
GEN 31:3 आग यहोवा याकूब से अंदुन, “तान आप्‍प दादागोळ द्‍याश अदिक तान जनम भूमी इक होटोग, अदिक ना नीन सांगुळ ईराईन.”
GEN 31:4 आग याकूब राहेल अदिक लियाह अक, मैदान दा तान म्यांडा मर्रगोळ हाती कारसुसकु अंदुन,
GEN 31:5 नीम आप्‍प उन चेहरा देल समझ बरतद, कि आव रा नानी पयले अन घाई ईग नोळालुन; लेकीन नान आप्‍प उन परमेश्वर नान सांगुळ आन.
GEN 31:6 अदिक नीव भी जान्‍सतीर, कि ना नीम आप्‍प उन स्यावा माळीन.
GEN 31:7 तरी भी नीम आप्‍प नान से छल माळकु नान मजदुरी इक हत्‍त घन बदलुस बुट्‍टुन; लेकीन परमेश्वर आऊक नान नुकसान माळ गोटीदील.
GEN 31:8 याग नीन आप्‍प अंदुन, चिट्टीवाळा पाड्‍डागोळ नीन मजदुरी आदव, आग सप्‍पा मर्र, म्यांडागोळ चिट्टीवाळा अच हाळुली कुरतव, अदिक याग आव अंदुन, धारीवाळा पाड्‍डा नीन मजदुरी ठहरूसेव, आग सप्‍पा मर्र म्यांडागोळ धारीवाळा हाळुली कुरतव.
GEN 31:9 ईद रीति देल परमेश्वर नीम आप्‍प उन जनावर हुडुकु नानी कोट्‍ट बुट्‍टुन.
GEN 31:10 मर्र म्यांडागोळ्‍द गाबन आगा समय ना कांसा दा येन नोळदीन, कि जो व्हात मर्रगोळ मा येरव, अव धारीवाळा, चिट्टीवाळा, अदिक धब्‍बावाळा हूँ.
GEN 31:11 आग परमेश्वर उन दूत कांसा दा नान से अंदुन, “हे याकूब,” ना अंदीन, “येन आग्‍या.”
GEN 31:12 आव अंदुन, “कण्‍ण नेगुकु आ सप्‍पा व्हातगोळी जो मर्रगोळ मा येरीत्‍याव, नोळ, कि अव धारीवाळा, चिट्टीवाळा, अदिक धब्‍बावाळा हूँ; यतिकी जो येनारा लाबान नीन से माळतान, अद ना नोळीन.
GEN 31:13 ना आ बेतेल इन परमेश्वर हुईन, येल नी ऊंद कल्ल इन खंबा मा याण्‍णा हाक्‍क कोंडीद अदिक नांद मन्नत मानसीद. ईग नी, ई द्‍याश टु होटकु तान जनम भूमी इक होटोग.”
GEN 31:14 आग राहेल अदिक लियाह आऊन से अंदुर, “येन नाम आप्‍प उन मान्‍या ईग भी नाम येनारा भाग या अंश मिक्‍कु आद?
GEN 31:15 येन नाव आऊन नजर दा पराया ईला ठहरूसेव? नोळ, आव रा नामी मार्र कोंडुन, अदिक नाम पैस्यागोळ इक तिनकु कुरतान.
GEN 31:16 इदुरसाटी परमेश्वर नाम आप्‍प उन याट धन ताकोम कोंडान, अद नाम्‍द, अदिक नाम चिकोर्द हुन; ईग जो येनारा परमेश्वर नीन से अंदान, अदा माळ.”
GEN 31:17 आग याकूब तान चिकोरी अदिक तान हिंग्‍सुरी ऊँटगोळ मा कुर्सदुन;
GEN 31:18 अदिक यास जनावरगोळ इक जो पद्‍दनराम दा जमा माळकु धनवान आगीदुन, आ सप्‍पा अक कनान दा तान आप्‍प इसहाक उन हाती होगोद इच्‍छा देल, सांगुळ ओतुन.
GEN 31:19 लाबान रा तान म्यांडा अन चुट्टीगोळ कडोर साटी होटोगीदुन, अदिक राहेल तान आप्‍प उन मान्‍यागोळ द्यावगोळी कदुकु ओतुन.
GEN 31:20 अत: याकूब लाबान अरामी इन हाती काळ्‍लपणी देल होटोदुन, अदिक आऊक हेळीदिल कि ना ओळेतीन.
GEN 31:21 आव तान सप्‍पा येनारा हुडुकु ओळदुन, अदिक महानदी इन आप्पाटी ईळुकु तान बाय गिलाद इन पहाळी‍ द्‍याश दी माळदुन.
GEN 31:22 तीसरा दिशी लाबान उक समाचार सिक्‍त कि याकूब ओळेग्‍यान.
GEN 31:23 इदुरसाटी आव तान वार्टगोळ सांगुळ आऊन येळ दिन ताका पीछा माळदुन, अदिक गिलाद इन पहाळी द्‍याश दा आऊक होगकु मिलुसदुन.
GEN 31:24 आग परमेश्वर ईळ्‍ल्‍क इन कांसा दा अरामी लाबान उन हाती होगकु अंदुन, “सावधान ईर, नी याकूब से न रा भला अनेत अदिक न बुरा.”
GEN 31:25 याकूब उन ड्‍यारा गिलाद हेसुर इन पहाळी द्‍याश दा निदरूसकु बिदकु ईरोद; अदिक लाबान भी तान वार्ट उन सांगुळ तान ड्‍यारा अदा पहाळी द्‍याश दा नीदरूसदुन.
GEN 31:26 आग लाबान याकूब से अनली कुरतुन, “नी ईद येन माळ्‍द, कि नान हाती टु काळ्‍लपनी देल होटबंद, अदिक नान पोरगोळी हिंग तनकोंड, ह्‍यांग यावारा तलवार इन ताकत देल बंदी माळकु आगीदार?
GEN 31:27 नी यती होचकुमकु ओळकु बंद, अदिक नान से बिना येनु अनकु नान हाती टु काळ्‍लपनी देल होटबंद; ना रा नीनी आनन्‍द इन सांगुळ टापटी अदिक विणा मुर्सतेला, अदिक हाळ हाळतेला सार माळायदीन?
GEN 31:28 नी रा नानी तान पोर-पारगोळी भी चुम्‍स गोटीदील? नी ईद मुर्खता माळ्‍द.
GEN 31:29 नीम लॉकुर्द नुकसान माळोद ताकत नान कय दा रा आद; लेकीन नीम आप्प उन परमेश्वर नान से होत आ ईळ्लकी अंदुन, ‘सावधान! नी याकूब से येनु बुरा भला अनबाळेत.’
GEN 31:30 वळ्लीद आद, नीनी तान आप्‍प उन हाती ईरोद इच्‍छा आद, मान्‍स कोंडीन; लेकीन येन जरवत ईरोद नीमी नान मान्यागोळोव द्यावगोळी कदोद?”
GEN 31:31 आग याकूब लाबान उक उत्‍तर कोट्‍टुन, “ना ईद सोचकु अंजेगीदिन, कि नी नान से तान पोरगोळी कसु कोमाईद.
GEN 31:32 यार हाती भी नी तान द्‍यावगोळी नोळ्‍या, आव जीत्‍ता ईरतीदील. नान हाती नींद जो येनारा भी होट्‍टीत, अदरी वार्टुर मुंद अरूकु हुडुकोम.” यतिकी याकूब ईला जानसोन कि राहेल मान्‍यागोळोव द्यावगोळी कदुकु तंदार.
GEN 31:33 ईद केळकु लाबान, याकूब अदिक लियाह अदिक येढ्‍ढु दासीगोळ ड्‍यारा दा होदुन; अदिक येनु सिकीदिल. आग लियाह अन ड्‍यारा दा टु होटकु राहेल इन ड्‍यारा दा होदुन.
GEN 31:34 राहेल रा मान्‍यागोळ द्यावगोळी ऊँट इन जीन मा ईटकु अदुर्द बेन मा कुर्तकु ईरोर. लाबान आकिन पुरा ड्‍यारा दा नोळदुर मा भी सीकिदील.
GEN 31:35 राहेल तान आप्‍प उन से अंदुर, “हे नान प्रभु; नी सिट्‍टी बरबाळ. ना नीन हाती नीदरा लायक हैलेच; यतिकी ना ई समय व्‍हार्या आगीन.” आग लाबान उन ढुंढस्‍दुर मा भी आऊक अव मान्‍यागोळोव द्यावगोळ सिक सकीदील.
GEN 31:36 आग याकूब सिट्‍टी बंदकु लाबान से झगळा माळली कुरतुन, अदिक आऊन से अंदुन, “नांद येन अपराध आद?” नांद येन पाप आद, कि नी ईट सिट्‍टी बंदकु नांद पीछा माळ्‍द?
GEN 31:37 नी जो नांद पुरा सामान इक ढुंढस्‍कु नोळ्‍द, रा नीनी नीन मान्‍यागोळ्‍द सामान दा टु येन सिक्‍त? येनारा सिकीदाद रा अदरी ईल नान अदिक तान वार्टुर्द मुंद ईट बुळ, अदिक आंदुर नाम येढ्‍ढु बीच दा न्‍याय माळुल.
GEN 31:38 ई ईप्‍पत वर्षगोळ टु ना नीन हाती ईत्‍तीन; इटुर दा रा ना नीन मर्र म्यांडागोळ्‍द गर्भ ईळुत, अदिक न नीन म्यांडागोळ मास ना यागलु तिनदीदील.
GEN 31:39 यवरी आळी दाकळव जनावरगोळ कोन्‍नोव अवरी ना नीन हाती तरतोगीन, अऊर्द नुकसान नाच नेगुतोगीन; बाक हागुलीन वती चोरी आगोद या ईळ्‍ल्‍क इन वती, नी नान से अच अऊर नुकसान ताकोमतोग्‍या.
GEN 31:40 नांद रा ईद दशा ईरोद कि हागुल इन वती पसीना अदिक ईळ्‍ल्‍क इन वती सोळ नानी तीन कोम्‍त; अदिक जप नान कण्‍णगोळ दा टु ओळेगोद.
GEN 31:41 ईप्‍पत वर्ष ताका ना नीन मान्‍या ईत्‍तीन; चौदह वर्ष रा ना नीन येढ्‍ढु पोरगोळ साटी नींद स्यावा माळदीन अदिक आर वर्ष नीन मर्र म्यांडागोळ साटी, अदिक नी नान मजदुरी इक हत्‍त घन बदलुस बुट्‍ट.
GEN 31:42 “नान आप्‍प उन परमेश्वर मतलब अब्राहम उन परमेश्वर, यार्द अंज्क इसहाक भी ईटतान, अगर नान दी ईला ईरायदुन, रा सही दा नी ईग नानी खाली कय होग गोळाईद. नान दुख अदिक नान कय इन मेहनत नोळकु परमेश्वर होत आ ईळ्‍ल्‍की नान मा चिल्‍ळासदुन.”
GEN 31:43 ईद मात केळकु लाबान याकूब उक ईद उत्‍तर कोट्‍टुन, “ई आर्तेर नान पोरगोळ हुळ, ई चिकोर नान चिकोर हुळ, ई मर्र म्यांडा भी नानव अच हूँ अदिक जो येनारा नीनी कांळ्सीत्‍याद, अद नांद अच हुन; लेकीन ईग ना तान पोरगोळ अदिक ई चिकोर्द येन माळाईन, जो ईंदुर्द औलाद हुन?
GEN 31:44 ईग बा, ना अदिक नी येढ्‍ढु मुंदुर आपस दा वादा माळाता, अदिक अद नींद अदिक नान बीच दा कसम ठहरूसकु ईरूल.”
GEN 31:45 आग याकूब ऊंद कल्‍ल हुडुकु अदुर्द ऊंद खंबा नीदरूसदुन.
GEN 31:46 आग याकूब तान लॉकुर से अंदुन, “कल्‍लगोळ जमा माळी,” ईद केळकु आंदुर कल्‍लगोळ जमा माळकु ऊंद ढेर हचदुर अदिक अदा ढेर इन हाती आंदुर ऊंडुर.
GEN 31:47 आ ढग इन हेसुर लाबान रा यज्र सहादूधा ईटदुन, लेकीन याकूब गिलियाद ईटदुन.
GEN 31:48 लाबान अंदुन, “ईद ढेर ईंद टु नीन अदिक नान बीच दा कसम ईत्‍तीत.” ईद कारण अदुर हेसुर गिलियाद ईटकु आत,
GEN 31:49 अदिक मिस्पा भी; यतिकी आव अंदुन, “याग नाव आबुर दाबुर से दूर ईत्‍तेव आग यहोवा नांद अदिक नींद देखभाल माळतेला ईरूल.
GEN 31:50 अगर नी नान पोरगोळी दुख कोट्या, या आंदुर सिवाय अदिक आर्तेर सांगुळ मदा माळ्‍या, रा नाम सांगुळ याऊ मंळसा रा ईरतीदील; लेकीन नोळ नीन अदिक नान बीच दा परमेश्वर गवाह ईत्‍तान.”
GEN 31:51 बाक लाबान याकूब से अंदुन, “ई ढेर इक नोळ अदिक ई कल्ल इन खंबा अक भी नोळ, यारी ना तान अदिक नीन बीच दा नीदरूस्‍यान.
GEN 31:52 ईद ढेर अदिक ईद खंबा येढ्‍ढु ई मात इन गवाह ईरूल कि नुकसान माळोद इच्‍छा देल न रा ना ई ढेर इक नाहाकुसकु नीन हाती होगाईन, न रा नी ई ढेर अदिक ईद कल्ल इन खंबा अक नाहाकुसकु नान हाती बंद्‍या.
GEN 31:53 अब्राहम अदिक नाहोर अदिक आंदुरव आप्‍प; मुरू मुंदुरव जो परमेश्वर आन, आवा नाम येढ्‍ढु मुंदुर बीच दा न्‍याय माळुल.” आग याकूब आऊन कसम तिंदुन यार्द अंज्‍क आऊन आप्‍प इसहाक ईटतोगोन.
GEN 31:54 अदिक याकूब आ पहाळी मा ऊंद जनावर इक हुळकु बलि येर्सदुन, अदिक तान वार्टुरी ऊमोद तीन्‍सदुन, आग आंदुर भोजन माळकु पहाळी मा ईळ्‍ल्‍क कळदुर.
GEN 31:55 व्‍हातर्याका लाबान येद्‍दुन, अदिक तान पोर पारगोळी चुम्‍सकु अदिक आशीर्वाद कोटकु होट्‍टुन अदिक तान जागा अक वापस होट्‍ट बंदुन.
GEN 32:1 याकूब भी तान हादी हुळदुन अदिक परमेश्वर उन दूत आऊक बंदकु सिकदुर.
GEN 32:2 आंदरी नोळतेला अच याकूब अंदुन, “ईद रा परमेश्वर उन दल हुन.”इदुरसाटी आव आ जागा अन हेसुर महनैम ईटदुन.
GEN 32:3 आग याकूब सेईर द्‍याश दा, मतलब एदोम द्‍याश दा, तान वार्ट एसाव उन हाती तान मुंद ऊंद खबरीगोळ इक कळुदुन.
GEN 32:4 अदिक आव आंदरी आग्‍या कोट्‍टुन, “नान प्रभु एसाव से ईद अनेत; कि नीन दास याकूब नीन से ईद अनतान, कि ना लाबान उन मान्‍या परदेशी आगकु ईगासताका ईत्‍तीन;
GEN 32:5 अदिक नान हाती वस्‍ता-गोसी, गधा, मर्र-म्यांडा, अदिक दास-दासीगोळ आर अदिक ना तान प्रभु उन हाती इदुरसाटी बातणी कळीन कि नीन अनुग्रह अन नजर नान मा ईरूल.”
GEN 32:6 आ खबरीगोळ याकूब उन हाती वापस बंदकु अनली कुरतुर, “नाव नीन वार्ट एसाव उन हाती होगीदेव, अदिक आव भी नीन सांगुळ मुलाकात माळोर साटी नाक सौ लॉकुर सांगुळ बरेत्‍यान.”
GEN 32:7 आग याकूब हापाळ अंजेदुन, अदिक संकट दा बिदोदुन: अदिक ईद सोचकु, तान साथीगोळ सांगुळ, मर्र म्यांडागोळ, अदिक वस्‍ता गोसीगोळ, अदिक ऊँटगोळ भी अलग अलग माळकु येढ्‍ढ दल माळदुन,
GEN 32:8 कि अगर एसाव बंदकु पयला दल इक बडोद चालु माळ्‍यान, रा दुसरा दल ओळकु ऊळदोदीत.
GEN 32:9 बाक याकूब अंदुन, “हे यहोवा, हे नान आजा अब्राहम उन परमेश्वर, हे नान आप्‍प इसहाक उन परमेश्वर, नी रा नान से अंदिद कि तान द्‍याश अदिक जनम भूमी दा वापस होटोग, अदिक ना नींद भलाई माळाईन:
GEN 32:10 नी जो जो क्‍याल्‍सा तान करूणा अदिक सच्‍चाई देल तान दास इन सांगुळ माळ्‍या, कि ना जो तान छळी इक अच हुडुकु यरदन गांगा इन आप्पाटी ईळदीन, अदिक ईग नानव येढ्‍ढ दल आगेग्‍याव, नी ईत्‍ता ईत्‍ता क्‍याल्‍सा दा टु ऊंद इन भी लायक रा हैलेच.
GEN 32:11 नान विनती केळकु नान वार्ट एसाव उन कय देल नानी ऊळ्‍स ना रा आऊन से अंजतीन, यागलु हिंग आग बाळुल कि आव बंदकु नानी अदिक मोय इन सांगुळ चिकोरी भी कोंद कोमुल.
GEN 32:12 नी रा अंद्‍या, कि ना सही दा नीन भलाई माळाईन, अदिक नीन वंश इक समुद्र अन धुळाकणगोळ घाई हापाळ वाळुसाईन, जो हापाळ संख्‍या अन कारण आळुकु आगतीदील.”
GEN 32:13 आव आ दिन इन ईळ्‍ल्‍क अल्‍या ईत्‍तुन; अदिक जो येनारा आऊन हाती ईरोद अदुर दा टु तान वार्ट एसाव उक भेंट कोळोर साटी छाट्‍स छाट्‍सकु तेगदुन;
GEN 32:14 मतलब येढ्‍ढ सौ मर्रगोळ, अदिक ईप्‍पत व्‍हातगोळ, अदिक येढ्‍ढ सौ म्यांडागोळ, अदिक ईप्‍पत म्यांडा,
GEN 32:15 अदिक पाड्डागोळ सांगुळ हाल कोळावाळा तीस ऊँटनीगोळी, अदिक चालीस गोसी, अदिक हत्‍त वस्‍ता, अदिक ईप्‍पत गधागोळी अदिक अदुरव ईप्‍पत पाड्‍डा.
GEN 32:16 ईवरी आव झुंड माळकु, तान दासगोळी कोटकु आंदुर से अंदुन, “नान मुंद होगी; अदिक झुंडगोळ बीच दा अंतर ईटी.”
GEN 32:17 बाक आव दुसरा झुंडवाळा अक ईद आग्‍या कोट्‍टुन, “याग नान वार्ट एसाव नीनी सिक्‍यान, अदिक केळली कुरतान, ‘नी यार दास हुय, अदिक अंदकु आगतद, अदिक ईंदुर नीन मुंद मुंद आर, आंदुर यारोर हुळ.’”
GEN 32:18 आग अनेत, “ईव नीन दास याकूब उन हु. हे नान प्रभु एसाव, ईव भेंट नीन इक कोळोर साटी नीन हाती कळुकु आग्‍याव, अदिक आव खुद भी नाम हिंद हिंद बरेत्‍यान.”
GEN 32:19 याकूब ईदा मात दुसरा अदिक तिसरा अदिक आ सप्‍पा से अंदुन, जो आंदुर हिंद हिंद बरोर. हिंग अच आग्या कोट्टुन कि याग एसाव नीम इक सिकुल आग ईदा प्रकार देल आऊन से अनेतीर.
GEN 32:20 नीव ईद अनेतीर, “नीन वार्ट याकूब हिंद बरेत्‍यान.” यतिकी याकूब सोचदुन कि, “ईस भेंट कोटकु ना एसाव उक खुश माळ बुळाईन. ईदुर बाद्‍दा ना आऊन सांगुळ होगाईन, आग जरूर, आव नानी माफ माळ कोंडान.”
GEN 32:21 इदुरसाटी अद झुंड इन भेंट याकूब उन से पयला आपाटी ईळुत, अदिक आव खुद आ ईळ्लक इक ड्यारा दा ईत्तुन.
GEN 32:22 अदा ईळ्‍ल्‍की आव येद्‍दुन अदिक तान येढ्‍ढु हिंग्‍सुर, अदिक येढ्‍ढु दासीगोळ, अदिक हनुन चिकोरगोळी सांगुळ हुडुकु घाट दा टु यब्बोक गांगा अन्द आप्पाटी ईळदोदुन.
GEN 32:23 याकूब सप्‍पा मुंदरी गांगा अन्द आप्पाटी कळु कोंडुन.
GEN 32:24 अदिक याकूब अल्‍या रूकसेदुन. ऊंद आरी अल बंदकु व्‍हातुर ताका आऊन से मल्‍लयुद्ध माळतेला ईत्‍तुन.
GEN 32:25 याग आ आरी नोळदुन कि आव याकूब उक हारूस सकालुन आग आव याकूब उन जांघ इन नस इक मुटदुन अदिक मल्‍लयुद्ध माळ्‍त माळ्‍त अच आऊन नस येरेत.
GEN 32:26 ईद आगदुर मा आ मंळसा याकूब से अंदुन, “ईग नानी होगगोळ.” लेकीन याकूब आ मंळसा से अंदुन, “ईला. ना नीनी आगासताका होगगोळालीन, यागासताका नी नानी आशीष कोळतीदील.”
GEN 32:27 आग आव याकूब से केळदुन, “नींद हेसुर येन आद?” आव अंदुन, “याकूब.”
GEN 32:28 आग आ मंळसा आऊन से अंदुन, “ईग टु नींद हेसुर याकूब ईला बल्‍की इस्त्राएल ईत्‍तीत, यतिकी परमेश्वर से अदिक मंळसागोळ से मेहनत माळतेला नी जीकसेग्‍या.”
GEN 32:29 आग याकूब आ मंळसा से अंदुन, “कृपया नी नानी तान हेसुर हेळ.” आ मंळसा उत्‍तर कोट्‍टुन, “येन माळ्‍या नान हेसुर जान्‍सकु?” अदिक आग आ मंळसा अल्‍या याकूब उक आशीष कोट्‍टुन.
GEN 32:30 आग याकूब ईद अनकु आ जागा अन हेसुर पनीएल ईटदुन; “परमेश्वर उक आमने सामने नोळदुर मा भी नान जीव ऊळदोत.”
GEN 32:31 पनीएल इन हाती टु नळुत नळुत सूर्य उदय आगेत, अदिक आव जाँघ इन नस यरदुर देल लंगळुसतोगोन.
GEN 32:32 ई घटना अक याद माळतेला इस्त्राएल वंश ईंद ताका जाँघ इन पुट्‍टा अन मांसपेशी इक तिनालुर यतिकी ईदा मांसपेशी मा याकूब उक दुख आगीत. यतिकी आ मंळसा याकूब उन जाँघ इक मुटीदुन.
GEN 33:1 अदिक याकूब कण्‍ण नेगुकु ईद नोळदुन, कि एसाव नाक सौ लॉकुर सांगुळ बरेत्‍यान. आग आव चिकोरी अलग-अलग वाट्‍सकु लियाह अदिक राहेल अदिक येढ्‍ढु दासीगोळ इक सौप्स बुट्‍टुन.
GEN 33:2 अदिक आव सप्‍पा मुंदुर मुंद पारगोळ सांगुळ दासीगोळी आंदुर हिंद पारगोळ सांगुळ लियाह अक, अदिक सप्‍पा मुंदुर हिंद राहेल अदिक यूसुफ उक ईटदुन,
GEN 33:3 अदिक खुद आ सप्‍पा मुंदुर मुंद वाळुसदुन अदिक येळ घन धरती मा बिदकु नमस्‍कार माळदुन, अदिक तान वार्टुन हात्ती पोहचुसदुन.
GEN 33:4 आग एसाव आऊन से भेंट माळोर साटी ओळदुन, अदिक आऊक दिल देल हचकु, याद्दा देल चिपकुसकु चुम्‍सदुन; बाक आंदुर येढ्‍ढु मुंदुर वर्लली कुरतुर.
GEN 33:5 आग एसाव कण्‍ण नेगुकु आर्तेरी अदिक चिकोरी नोळदुन; अदिक केळदुन, “ईंदुर जो नीन सांगुळ आर आंदुर यार उर?” आव अंदुन, “ईंदुर नीन दास उन चिकोर उर, यारी परमेश्वर अनुग्रह माळकु नानी कोटान.”
GEN 33:6 अदिक दासीगोळ तान तान चिकोरगोळ सांगुळ हाती बंदुर अदिक बांगकु नमस्‍कार माळदुर.
GEN 33:7 हांग अच लियाह भी तान चिकोरगोळ सांगुळ हाती बंदुर, आक भी बांगकु नमस्‍कार माळदुर अदिक बाक राहेल इन सांगुळ यूसुफ भी बंदुन अदिक नमस्‍कार माळदुन.
GEN 33:8 एसाव याकूब से केळदुन, “ईद धोळ दल, गोसी नानी येती कोट्‍ट, समझ दा बंदीदिल.” याकूब अंदुन, “नान स्वामी, ना ईदुर द्वारा नींद अनुग्रह ताकोमोद चाहसतीन.”
GEN 33:9 एसाव अंदुन, “हे नान वार्टा नान हाती सब येनारा आद. अदिक जो भी नींद आद, अदरी तांद अच हाती ईरगोळ.”
GEN 33:10 याकूब अंदुन, “ईला! अगर नींद अनुग्रह नान मा आद, रा नान दी टु ई भेंटगोळी स्‍वीकार माळ कोम; यतिकी नीनी नोळकु हत्‍त कि ना परमेश्वर उन दर्शन माळ कोंडीन, अदिक नी नानी दिल देल स्‍वीकार भी माळ्‍द.
GEN 33:11 इदुरसाटी ईद भेंट जो नीनी कळुकु आग्‍याद, ग्रहण माळ; यतिकी परमेश्वर नान मा अनुग्रह माळ्‍यान, अदिक नान हाती हापाळ आद.” याग आव आऊन से हापाळ विनती माळदुन, आग आव भेंट इक ग्रहण माळदुन.
GEN 33:12 बाक एसाव अंदुन, “बर, नाव मुंद होगाता: अदिक ना नींद मुंद मुंद नळाईन.”
GEN 33:13 याकूब अंदुन, “हे नान प्रभु, नी जान्सत्‍या कि नान सांगुळ स्यांण पारगोळ, अदिक म्यांडा मर्रगोळ अदिक गोसी जो हाल कोळावाळा आव, अगर ईत्‍ता जनावर ऊंद दिन भी येक्‍कुल नळ्सकु आदाव, रा सप्‍पा च्‍या सप्‍पा सोतोदव.
GEN 33:14 ईदुर साटी नान प्रभु तान दास से मुंद होटुगुल, अदिक ना ई जनावरगोळ गती अन अनुसार, जो नान मुंद आद, अदिक चिकोर्द गती इन अनुसार धीरा धीरा नळुकु सेईर नगर दा तान प्रभु उन हाती पोहचुसाईन.”
GEN 33:15 आग एसाव याकूब से अंदुन, “ना तान संगीगोळी नीन हाती बिट्ट बुळतीन.” आग याकूब अंदुन, “येन ईदुर्द जरवत आद? नान मा नान प्रभु स्वामी इन अनुग्रह बन्सकु ईरूल, ईदा काफी आद.”
GEN 33:16 इदुरसाटी एसाव अदा दिशी सेईर नगर इक होटोदुन.
GEN 33:17 याकूब सुक्कोत इन दिशा दा मुंद वाळुसेदुन. अदिक अल तान साटी ऊंद मान्ना, अदिक जनावरगोळ साटी झोपळी माळदुन, ईदा कारण आ जागा अन्द हेसुर सुक्कोत बित्त.
GEN 33:18 अदिक याकूब जो पद्‍दनराम टु बंदीदुन, आव कनान द्‍याश इन शकेम नगर इन हाती कुशल देल पोहचुस्कु नगर इन मुंद ड्‍यारा निदरूसदुन.
GEN 33:19 याता जागा मा आव ड्‍यारा नीदरूसदुन, आ जमीन इक आव शकेम उन आप्‍प, हमोर उन पारगोळ से ऊंद सौ चांदी इन मुद्रागोळ कोटकु कोंडीदुन.
GEN 33:20 बाक याकूब अल ऊंद वेदी माळदुन, अदिक अदुर हेसुर आव एल-एलोहे-इस्त्राएल ईटदुन.
GEN 34:1 ऊंद दिशी लियाह अन पोर दीना, जो याकूब से पैदा आगीदुर, आ द्‍याश इन पोरगोळ से मुलाखात माळली होट्‍टुर.
GEN 34:2 आग आ द्‍याश इन प्रधान हिब्बी हमोर उन पार शकेम आकी नोळदुन, अदिक आकी वोतकु आकिन सांगुळ कुकर्म माळकु आकी भ्रष्‍ट माळ बुट्‍टुन.
GEN 34:3 आग आऊन मन याकूब उन पोर दीना से हत्‍तेत. अदिक आव आ पोर इन से प्रेम इन मातगोळ माळदुन, अदिक आकिन से प्रेम माळली कुरतुन.
GEN 34:4 शकेम तान आप्‍प हमोर से अंदुन, “नान मदा ई पोर इन से माळकु कोळ.”
GEN 34:5 याग याकूब उक पता हत्‍त कि शकेम आऊन पोर दीना अक खराब माळ बुटान, आ समय आऊन पारगोळ जनावरगोळ सांगुळ मैदान दा ईरोर; इदुरसाटी याकूब आंदुर बरासताका सुंगा ईत्‍तुन.
GEN 34:6 आग शकेम उन आप्‍प हमोर याकूब उन सांगुळ मातकात माळोरसाटी आऊन हाती होदुन.
GEN 34:7 याकूब उन पारगोळ ईद केळतेला अच मैदान टु हापाळ उदास अदिक सिट्‍ट दा बंदुर; यतिकी शकेम याकूब उन पोर इन सांगुळ कुकर्म माळकु इस्त्राएल इन घराना टु मूर्खता अन हिंग क्‍याल्‍सा माळीदुन, यदुर्द माळोद बराबर ईला ईरोद.
GEN 34:8 हमोर आ सप्‍पा से अंदुन, “नान पार शकेम उन मन नीन पोर मा हापाळ आद, इदुरसाटी नीन पोर इक आऊन हिंग्‍स उन रूप दा आऊक कोटबुळ.
GEN 34:9 नाम सांगुळ वैवाहिक संबंध माळ कोमी नीव नामी तान पोरगोळ कोळी अदिक नाम पोरगोळ नीव ईटी.
GEN 34:10 ई प्रकार नीव नाम सांगुळ ई द्‍याश दा मिलुस्‍कु ईर सक्‍कीर; नीव ई द्‍याश दा ईरी, धंधा माळी अदिक संपत्‍ती हासील माळतेला ईरी.”
GEN 34:11 अदिक शकेम भी दीना अन आप्‍प अदिक वार्टुर से अंदुन, “अगर नान मा कृपा दृष्‍टी माळेतीर, रा जो येनारा नीव नान से अंदीर, अद ना कोळाईन.
GEN 34:12 नीव पोर इन साटी जो भी किमत बेळीर अदरी ना पुरा माळाईन. लेकीन नान मदा आ पोर इन से अच माळी.”
GEN 34:13 आग ईद सोचकु कि शकेम आंदुर आकतींग दीना अक खराब माळदुन, याकूब उन पारगोळ शकेम अदिक आऊन आप्‍प हमोर उक छल इन सांगुळ ईद उत्‍तर कोट्‍टुर,
GEN 34:14 “नाव हिंग क्‍याल्‍सा माळ सकालेव कि यातोदारा खतनारहित मंळसा अक तान आकतींग इक कोट्‍टेव; यतिकी हिंग माळदुर देल नामी हेसुर हुळदार.
GEN 34:15 ई मात मा नाव नीम्‍द मांन्‍स कोंडेव कि नाम घाई नीम दा टु हर ऊंद मंळसा अन खतना माळकु आगुल.
GEN 34:16 आग नाव तान पोरगोळ नीमी मदा साटी कोट्‍टेव, अदिक नीम सांगुळ बसुस्कु भी ईत्‍तेव, अदिक नाव येढ्‍ढु ऊंद अच समुदाय इन मंळसा आगेदेव.
GEN 34:17 लेकीन अगर नीव नाम मात ईला केळकु तान खतना माळसुसतीदिल, रा नाव तान पोर इक हुडुकु ईल टु होटोदेव.”
GEN 34:18 आंदुर्द ई मातगोळ मा हमोर अदिक आऊन पार शकेम खुश आदुन.
GEN 34:19 अदिक आ हारोदव जो याकूब उन पोर इक चाहासोन, ई क्‍याल्‍सा अक माळदुर दा आव समय माळीदिल. आव रा तान आप्‍प उन सप्‍पा घराना दा येक्‍कुल सम्‍मानीत मंळसा ईरोन.
GEN 34:20 इदुरसाटी हमोर अदिक आऊन पार शकेम तान नगर इन फाटक इन हाती होगकु नगरवासीगोळी ईद समझुसली कुरतुर;
GEN 34:21 “ई मंळसागोळ रा नाम सांगुळ मेल देल ईरोद चाहसतार; लेकीन आंदरी ई द्‍याश दा ईतकु लेन देन माळगोळी; नोळी, ईद द्‍याश आंदुर साटी भी हापाळ आद; बाक नाव लॉकुर आंदुर पोरगोळी हिंग्‍स माळ सकतेव, अदिक तान पोरगोळ आंदरी कोळ सकतेव.
GEN 34:22 ईंदुर ऊंद अच मात मा नाम सांगुळ ईरोर साटी सहमत आग्‍यार, कि नाम सप्‍पा मंळसागोळ्‍द खतना माळकु आगुल, ह्‍यांग आंदुर्द माळकु आगतद कि नाव सप्‍पा मुंदुर ऊंद आगेगुल.
GEN 34:23 येन आंदुरव मर्र म्यांडा, अदिक वस्‍ता गोसी बल्‍की आंदुरव सप्‍पा जनावर अदिक धन-संपत्ती नाम्‍द आगतीदील? ईटा माळी कि नाव लॉकुर आंदुर्द मात मान्‍स कोंडेव, रा आंदुर नाम सांगुळ निसास माळली कुरतार.”
GEN 34:24 इदुरसाटी यास भी आ नगर इन फाटक टु होळतोगोर, आ सप्‍पा मुंदुर हमोर उन अदिक आऊन पार शकेम उन मात मान्‍सदुर; अदिक हर ऊंद मंळसा अन खतना माळकु आत, यास आ नगर इन फाटक टु होळ तोगोर.
GEN 34:25 तीसरा दिशी, याग आ लॉकुर दुख दा बिदकु ईरोर, आग हिंग आत कि शिमोन अदिक लेवी याकूब उन येढ्‍ढु पारगोळ, जो दीना अन वार्टुर ईरोर, तान-तान तलवार हुडुकु आ नगर दा बेधळक होगकु सप्‍पा मंळसागोळी घात माळदुर.
GEN 34:26 हमोर अदिक आऊन पार शकेम उक आंदुर तलवार देल कोंद बुट्‍टुर, अदिक दीना अक शकेम उन मान्‍या टु तेगुकु ओतुर.
GEN 34:27 अदिक याकूब उन दुसरा चिकोर नगर इक लुट्‍स बुट्‍टुर, यतिकी आंदुर आऊनोर आकतींग इक खराब माळ बुटीदुर.
GEN 34:28 आंदुर मर्र म्यांडा, अदिक वस्‍ता गोसी, अदिक गधागोळ, अदिक नगर अदिक मैदान दा जो येनारा ईरोद सप्‍पा हुडु कोंडुर.
GEN 34:29 आंदुर आंदुर्द सप्‍पा संपत्‍ती मा अधिकार माळकु अदरी लुट्‍स बुट्‍टुर, ईल ताका कि आंदुर आंदुरोर हिंग्‍सुरी अदिक आंदुर चिकोरी बंदी माळकु सप्‍पा येनारा जो आंदुर मान्‍यागोळ दा ईरोद, लुट्‍स बुट्‍टुर.
GEN 34:30 आग याकूब शिमोन अदिक लेवी से अंदुन, “नीव जो ई द्‍याश इन निवासी कनानीगोळ अदिक परिज्जी अन मन दा नान प्रती सिट्‍ट पैदा माळीर, ईदुर देल नीव नानी मुसीबत दा हाकदीर, यतिकी नान सांगुळ रा थ्‍वाळासा अच लॉकुर आर, इदुरसाटी आंदुर जमा आगकु नान मा चळाई माळ्‍यार, अदिक नानी कोंद बुट्‍टार, रा ना तान घराना अन्द सांगुळ नाश आगेगाईन.”
GEN 34:31 आंदुर अंदुर, “येन शकेम उक नाम आकतींग इन सांगुळ वेश्‍या अन घाई व्यवहार माळोद वळ्लीद ईरोद?”
GEN 35:1 आग परमेश्वर याकूब से अंदुन, “ईल टु होटकु बेतेल इक होग, अदिक अल्‍या ईर; अदिक अल परमेश्वर उन साटी वेदी माळ, याव नीनी आ समय दर्शन कोट्‍टुन या समय नी तान वार्ट एसाव उन अंज्‍क देल ओळतोग्‍या.”
GEN 35:2 आग याकूब तान घराना, अदिक आ सप्‍पा से भी जो आऊन सांगुळ ईरोर, अंदुन, “ई समय नीम हाती जो पराया द्यावगोळ आर, आंदरी दुर माळ बुळी अदिक तान तान इक शुद्ध माळकु तान कपळा बदलुस बुळी.
GEN 35:3 अदिक बरी, नाव ईल टु होटकु बेतेल इक होगाता; अल ना परमेश्वर उन साटी ऊंद वेदी माळाईन, याव संकट इन दिनगोळ दा नांद केळदुन, अदिक याता हादी देल ना नळु तोगीन, अदुर दा नान सांगुळ ईत्‍तुन.”
GEN 35:4 ईद केळकु आंदुर याकूब उक सप्‍पा पराया द्याव कोट्‍ट बुट्‍टुर, जो आंदुर तान हाती ईटीदुर. ईदुर अलावा कीव इन कुण्‍डगोळ भी कोट्‍टुर. याकूब ई सप्‍पा अक आ बांज मार्र इन ल्‍यालमा नळ्‍सदुन, जो शकेम इन हाती ईरोद.
GEN 35:5 याग आंदुर अल टु होट्‍टुर आग पुरा नगर मा परमेश्वर उन अंज्‍क बिदकु ईरोद. याऊ भी याकूब उन चिकोर्द पीछा माळीदिल.
GEN 35:6 याकूब आ सप्‍पा मुंदुर सांगुळ जो आऊन सांगुळ ईरोर, कनान द्‍याश इन लूज नगर इक बंदुन. अद नगर इक बेतेल भी अनकु आगतद.
GEN 35:7 अल आव ऊंद वेदी माळदुन, अदिक आ जागा अन हेसुर एल-बेतेल ईटदुन; यतिकी याग आव तान वार्ट उन अंज्‍क देल ओळतोगोन आग परमेश्वर आऊन मा अल्‍या‍ प्रगट आगीदुन.
GEN 35:8 अदिक रिबका अक हाल कुळसावळ्‍त दाई दबोरा सोतोदुर, अदिक बेतेल इन बांज मार्र इन हाती आकी मुण्‍ण कोटकु आत, अदिक आ बांज मार्र इन हेसुर अल्‍लोनबक्‍कूत ईटकु आत.
GEN 35:9 बाक याकूब उन पद्‍दनराम टु बंदुर बाद्‍दा परमेश्वर दुसरा घन आऊक दर्शन कोटकु आशीष कोट्‍टुन.
GEN 35:10 अदिक परमेश्वर आऊन से अंदुन, “ईगास ताका रा नीन हेसुर याकूब ईत्‍त; लेकीन मुंदु टु नीन हेसुर याकूब ईरतीदील, नी इस्त्राएल कहलुस्‍या.” ई प्रकार आव आऊन हेसुर इस्त्राएल ईटदुन.
GEN 35:11 बाक परमेश्वर आऊन से अंदुन, “ना सर्वशक्तिमान प्रभु हुईन. नी फलुस फुलुस अदिक वाळुस; अदिक नीन से ऊंद जाती बल्‍की जातीगोळ्‍द ऊंद धोळ मंडली भी पैदा आदीत, अदिक नीन वंश दा राजा पैदा आदार.
GEN 35:12 अदिक जो द्‍याश ना अब्राहम अदिक इसहाक उक कोटीन, अदा द्‍याश नीनी कोळतीन, अदिक नीन हिंद नीन वंश इक भी कोळाईन.”
GEN 35:13 आग परमेश्वर आ जागा दा, येल आव याकूब से मातगोळ माळदुन, आंदुर हाती टु म्‍याकुच येरेदुन.
GEN 35:14 अदिक या जागा दा परमेश्वर याकूब से मातगोळ हेळदुन, अल याकूब कल्‍ल इन ऊंद खंबा नीदरूसदुन, अदिक अदुर मा अंगुर इन रास्सा अदिक जैतुन इन याण्‍णा हाक्‍क बुट्‍टुन.
GEN 35:15 येल परमेश्वर याकूब से मातगोळ माळदुन, आ जागा अन हेसुर आव बेतेल ईटदुन.
GEN 35:16 बाक आंदुर बेतेल टु नळोद चालु माळदुर; अदिक एप्राता नगर थ्वाळासा अच दुर ईरोद कि राहेल इक पार हाळोद दुख सिकली कुर्त.
GEN 35:17 याग आकी हापाळ दुख येळतोगोद आग दाई आकिन से अंदुर, “अंजबाळ; ईग भी नीनी पार अच आदीत.”
GEN 35:18 आग हिंग आत कि आक सोतोदुर, अदिक जीव होळ्‍त-होळ्‍त आक आ पार उन हेसुर बेनोनी ईटदुर; लेकीन आऊन आप्‍प आऊन हेसुर बिन्यामीन ईटदुन.
GEN 35:19 अदिक राहेल सोत्‍तुर, अदिक एप्राता, मतलब बैतलहम हादी दा, आकी मुण्‍ण कोटकु आत.
GEN 35:20 अदिक याकूब आकिन कब्र मा ऊंद खंबा नीदरूसदुन: राहेल इन कब्र अन अद खंबा ईंद ताका बन्सकु आद.
GEN 35:21 बाक इस्त्राएल तान यात्रा चालु माळदुन अदिक एदेर हेसुर इन गुम्‍मट इन मुंद तान ड्‍यारा नीदरूसदुन.
GEN 35:22 याग याकूब आ द्‍याश दा ईरोन, आग ऊंद दिशी हिंग आत कि रूबेन होगकु तान आप्‍प उन रखैल बिल्हा अन सांगुळ कुकर्म माळदुन; अदिक ईद मात इस्त्राएल उक मालुम आत. याकूब उक हनुन पारगोळ ईरोर.
GEN 35:23 अदुर दा टु लियाह अन चिकोर ईंदुर ईरोर; मतलब याकूब उन धोळ पार रूबेन, बाक शिमोन, लेवी, यहूदा, इस्साकार, अदिक जबूलून.
GEN 35:24 अदिक राहेल इन चिकोर ईंदुर ईरोर; मतलब यूसुफ, अदिक बिन्यामीन.
GEN 35:25 अदिक राहेल इन दासी बिल्हा अन चिकोर ईंदुर ईरोर; मतलब दान, अदिक नप्ताली.
GEN 35:26 अदिक लियाह अन दासी जिल्‍पा अन चिकोर ईंदुर ईरोर : मतलब गाद, अदिक आशेर. याकूब उन इंदुर अच चिकोर आदुर, जो आऊन से पद्‍दनराम क्षेत्र दा पैदा आदुर.
GEN 35:27 अदिक याकूब मम्रे दा, जो किर्यतर्बा, मतलब हेब्रोन हुन, येल अब्राहम अदिक इसहाक परदेशी आगकु ईतीदुर, तान आप्‍प इसहाक उन हाती बंदुर.
GEN 35:28 इसहाक उन ऊमर ऊंद सौ अस्‍सी वर्ष इन आत.
GEN 35:29 अदिक इसहाक उन जीव बीटोत, अदिक आव सोतोदुन, अदिक आव बाट्‍ट अदिक पुरा ऊमर इन आगकु तान लॉकुर दा होगकु सीकेदुन; अदिक आऊन पार एसाव अदिक याकूब आऊक मुण्‍ण कोट्‍टुर.
GEN 36:1 एसाव जो एदोम भी कहलुसतान, आऊन ईद वंशावली हुन.
GEN 36:2 एसाव रा कनानी पोरगोळ सांगुळ मदा माळदुन; मतलब हित्ती एलोन इन पोर आदा अक, अदिक ओहोलीबामा अक जो अना अन पोर, अदिक हिब्बी सिबोन इन नाती ईरोर.
GEN 36:3 बाक आव इश्‍माएल इन पोर बासमत इक भी, जो नबायोत इन आकतींग ईरोर, मदा माळदुन.
GEN 36:4 आदा रा एसाव उन द्वारा एलीपज उक, अदिक बासमत रूएल उक जनम कोट्‍टुर.
GEN 36:5 अदिक ओहोलीबामा यूश, अदिक यालाम, अदिक कोरह उक पैदा माळदुर, एसाव इन ईंदुर अच चिकोर कनान द्‍याश दा पैदा आदुर.
GEN 36:6 एसाव तान हिंग्‍सुर, अदिक पोर-पारगोळ, अदिक मान्‍यागोळोव सप्‍पा जनावरगोळ, अदिक तान मर्र-म्यांडा; अदिक वस्ता गोसी पयला सप्‍पा जनावरगोळ, अदिक तान सप्‍पा सम्पती इक, जो आव कनान द्‍याश दा जमा माळीदुन, हुडुकु तान वार्ट याकूब उन हाती टु दुसरा द्‍याश इक होटोदुन.
GEN 36:7 यतिकी आंदुर्द सम्पती ईट आगेगीत, कि आंदुर तान सांगुळ ईला ईट सकोर; अदिक हापाळ जनावरगोळ कारण आ द्‍याश दा, येल आंदुर परदेशी आगकु ईर तोगोर, अव समुस सकीदील.
GEN 36:8 एसाव जो एदोम भी कहलुसतद, सेईर हेसुर इन पहाळी द्‍याश दा ईरली कुरतुन.
GEN 36:9 सेईर हेसुर इन पहाळी द्‍याश दा ईरावाळेर एदोम उन मूल मंळसा एसाव इन वंशावली ईद हुन.
GEN 36:10 एसाव उन पारगोळ हेसुर ईव हू; मतलब एसाव उन हिंग्‍स आदा अन पार एलीपज, अदिक एसाव उन हिंग्‍स बासमत उन पार रूएल.
GEN 36:11 अदिक एलीपज उन ई पारगोळ आदुर; मतलब तेमान, ओमार, सपो, गाताम, अदिक कनज.
GEN 36:12 एसाव उन पार एलीपज उन तिम्‍ना हेसुर इन ऊंद रखैल ईरोर, याक एलीपज इन द्वारा अमालेक इक जनम कोट्टुर: एसाव उन हिंग्‍स आदा अन वंश दा ईंदुर अच पैदा आदुर.
GEN 36:13 रूएल इन ई पारगोळ आदुर; मतलब नहत, जेरह, शम्‍मा, अदिक मिज्‍जा एसाव उन हिंग्‍स बासमत इन वंश दा ईंदुर अच पैदा आदुर.
GEN 36:14 ओहोलीबामा जो एसाव उन हिंग्‍स, अदिक सिबोन उन नातुगीत अदिक अना अन पोर ईरोर, आकिन ई पारगोळ आदुर: मतलब आक एसाव उन द्वारा यूश, यालाम अदिक कोरह अक जनम कोट्‍टुर.
GEN 36:15 एसाव उन पारगोळ दा अधिपती ईंदुर ईरोर: एसाव उन धोळ पार एलीपज उन वंश दा टु तेमान अधिपती, ओमार अधिपती, सपो अधिपती, कनज अधिपती,
GEN 36:16 कोरह अधिपती, गाताम अधिपती, अमालेक अधिपती एलीपज उन वंशीगोळ दा टु, एदोम द्‍याश दा ईंदुर अच अधिपती आदुर; अदिक ईंदुर अच आदा अन वंश दा पैदा आदुर.
GEN 36:17 एसाव उन पार रूएल उन वंश दा ईंदुर स्‍याणा आदुर; मतलब नहत अधिपती, जेरह अधिपती, शम्‍मा अधिपती, मिज्‍जा अधिपती रूएल वंशिगोळ दा टु, एदोम द्‍याश दा ईंदुर अच अधिपती आदुर; अदिक ईंदुर अच एसाव उन हिंग्‍स बासमत इन वंश दा पैदा आदुर.
GEN 36:18 एसाव उन हिंग्‍स ओहोलीबामा इन वंश दा ईंदुर पैदा आदुर; मतलब यूश अधिपती, यालाम अधिपती, कोरह अधिपती, अना अन पोर ओहोलीबामा जो एसाव उन हिंग्‍स ईरोर आकिन वंश दा ईंदुर अच पैदा आदुर.
GEN 36:19 एसाव जो एदोम भी कहलुसतान, आऊन वंश ईव अच हु, अदिक आंदुर अधिपती भी ईंदुर अच आदुर.
GEN 36:20 सेईर जो होरी हेसुर इन जाती नव ईरोन, आऊन ई चिकोर आ द्‍याश दा पयला टु उच ईरतोगोर; मतलब लोतान, शोबाल, सिबोन, अना,
GEN 36:21 दीशोन, एसेर, अदिक दीशान: एदोम द्‍याश दा सेईर इन ईंदुर अच होरी जातीवाळेर अधिपती आदुर.
GEN 36:22 लोतान उन पार, होरी, अदिक हेमाम ईरोर; अदिक लोतान उन आकतींग तिम्‍ना ईरोर.
GEN 36:23 शोबाल उन ई पारगोळ आदुर: मतलब आल्‍वान मानहत, एबल, शपो, अदिक ओनाम.
GEN 36:24 अदिक सीदोन उन ई पारगोळ आदुर: अय्या, अदिक अना; ईव आवा अना हुन यारी सुनसान जागा दा तान आप्‍प सिबोन उन गधागोळी आळ्‍स्त आळ्‍स्‍त बीसी नीर इन झरनागोळ सीकदव.
GEN 36:25 अदिक अना अक दीशोन हेसुर ईनव पार आदुन, अदिक आवा अना अक ओहोलीबामा हेसुर ईनोर पोर आदुर.
GEN 36:26 दीशोन उक ई पारगोळ आदुर: हेमदान, एशबान, यित्रान, अदिक करान.
GEN 36:27 एसेर उन ई पारगोळ आदुर: बिल्हान, जावान, अदिक अकान.
GEN 36:28 दीशान उन ई पारगोळ आदुर: ऊस, अदिक अरान.
GEN 36:29 होरी जाती नोर अधिपती ईंदुर लॉकुर आदुर: लोतान अधिपती, सिबोन अधिपती, शोबाल अधिपती, अना अधिपती,
GEN 36:30 दीशोन अधिपती, एसेर अधिपती, दीशान अधिपती; सेईर द्‍याश दा होरी जाती नोर ईंदुर अच अधिपती आदुर.
GEN 36:31 बाक याग इस्त्राएलगोळ मा राज्य माळावाळेर राजागोळ पयले एदोम द्‍याश मा ई राजागोळ राज्य माळदुर;
GEN 36:32 बोर उन पार बेला एदोम दा राज्‍य माळदुन, अदिक आऊन शहर इन हेसुर दिन्‍हाबा आद.
GEN 36:33 बेला अन सोत्‍तुर मा, बोस्रा निवासी जेरह उन पार योबाब आऊन जागा मा राजा आदुन.
GEN 36:34 योबाब उन सोत्‍तुर मा, तेमानियों अन निवासी हूशाम आऊन जागा मा राजा आदुन.
GEN 36:35 बाक हूशाम उन सोत्‍तुर मा, बदद उन पार हदद आऊन जागा मा राजा आदुन ईव आवा हुन याव मिद्यानियागोळी मोआब इन द्‍याश दा हारूस कोंडुन, अदिक आऊन शहर इन हेसुर अबीत आद.
GEN 36:36 बाक हदद उन सोत्‍तुर मा, मस्रेकावासी सम्‍ला आऊन जागा मा राजा आदुन.
GEN 36:37 बाक सम्‍ला अन सोत्‍तुर मा, शाऊल जो महानद इन तटवाला रहोबोत नगर इन ईरोन, आव आऊन जागा मा राजा आदुन.
GEN 36:38 शाऊल उन सोत्‍तुर मा, अकबोर उन पार बाल्‍हानान आऊन जागा मा राजा आदुन.
GEN 36:39 अकबोर उन पार बाल्‍हानान उन सोत्‍तुर मा, हदर आऊन जागा मा राजा आदुन अदिक आऊन शहर इन हेसुर पाऊ आद; अदिक आऊन हिंग्‍स उन हेसुर महेतबेल आद, जो मेजाहाब इन नाती अदिक मत्रेद उन पोर ईरोर.
GEN 36:40 एसाव उन वंश दा जो अधिपती ईरोर आंदुरव हेसुर: तिम्‍ना, अलवाह, यथेथ,
GEN 36:41 ओहोलीबामा अधिपती, एला अधिपती, पीनोन अधिपती, ,
GEN 36:42 कनज अधिपती, तेमान अधिपती, मिबसार अधिपती,
GEN 36:43 मग्‍दीएल अधिपती, ईराम अधिपती एदोम वंशीगोळ जो द्‍याश इक तान माळ कोंडीदुर, आऊन निवास जागा दा ईंदुर अच अधिपती आदुर; अदिक एदोमी जाती इन मूल मंळसा एसाव हुन.
GEN 37:1 याकूब रा कनान द्‍याश दा परदेशी आगकु ईरतोगोन, येल आऊन आप्‍प परदेशी आगकु ईरोन.
GEN 37:2 अदिक याकूब उन वंश इन वृत्‍तान्‍त ईद आद; यूसुफ सतरा वर्ष इन आगकु तान वार्टुर सांगुळ मर्र-म्यांडा आळ्‍सतोगोन; अदिक आ पार तान आप्‍प उन हिंग्‍स बिल्हा, अदिक जिल्‍पा अन पारगोळ सांगुळ ईरतोगोन; अदिक आदुर्द बुराई इन समाचार तान आप्‍प उन मुंद पोहचुस तोगोन.
GEN 37:3 अदिक इस्त्राएल तान सप्‍पा पारगोळ से येक्‍कुल प्रेम यूसुफ से ईट तोगोन, यतिकी आव आऊन हाळाबाट्‍ट पनी नव पार ईरोन: अदिक आव आऊन साटी रंग बिरंगी अंगरखा माळसुसदुन.
GEN 37:4 लेकीन याग आऊन वार्टुर नोळदुर, कि नामव आप्‍प नाम सप्‍पा वार्टुर से येक्‍कुल आऊन से प्रेम माळतान, आग आंदुर आऊन से दुश्मनी ईटली कुरतुर अदिक आऊन सांगुळ वळ्लीसा मात ईला हेळतोगोर.
GEN 37:5 यूसुफ कांसा नोळदुन, अदिक तान वार्टुर से अदुर्द वर्णन माळदुन; आगी टु आंदुर आऊन से अदिक भी दुश्मनी माळली कुरतुर.
GEN 37:6 आव आंदुर से अंदुन, “जो कांसा ना नोळदीन, अदरी केळी
GEN 37:7 नाव लॉकुर केई दा पेंडी कटीतेव, अदिक येन नोळतीन कि नान पेंडी येदकु सीधा नीदरेत; आग नीम पेंडी नान पेंडी इक नाकु दी टु घेर्स कोंडव अदिक अदरी नमस्‍कार माळली कुरतव.”
GEN 37:8 आग आऊन वार्टुर आऊन से अंदुर, “येन नी सही दा नाम मा राज्‍य माळ्‍या? या येन नी सही दा नाम मा प्रभुता माळ्‍या?” इदुरसाटी आंदुर आऊन कांसा अदिक आऊन मात इन कारण आऊन से अदिक भी येक्‍कुल दुश्‍मनी माळली कुरतुर.
GEN 37:9 बाक आव अदिक ऊंद कांसा नोळदुन, अदिक तान वार्टुर हाती अदुर्द भी वर्णन माळदुन, “केळी, ना अदिक ऊंद कांसा नोळदिन, कि सुर्य अदिक चन्‍द्रमा, अदिक हनुन तारागोळ नानी नमस्‍कार माळीत्‍याव.”
GEN 37:10 ईद कांसा अन आव तान आप्‍प अदिक तान वार्टुर से वर्णन माळदुन; आग आऊन आप्‍प आऊक दनकुसकु अंदुन, “ईद ह्‍यांग कांसा आद जो नी नोळ्‍द? येन सही दा ना अदिक नीन मोय अदिक नीन वार्टुर सप्‍पा मुंदुर होगकु नीन मुंद धरती मा बिदकु नमस्‍कार माळेव?”
GEN 37:11 आऊन वार्टगोळ रा आऊन से सिट्‍ट माळतोगोर; लेकीन आऊन आप्‍प आऊन आ मातगोळ इक याद ईटदुन.
GEN 37:12 यूसुफ उन वार्टुर तान आप्‍प उन मर्र-म्‍यांडागोळी आळसोर साटी शकेम उक होदुर.
GEN 37:13 आग इस्त्राएल यूसुफ से अंदुन, “नीन वार्टुर रा शकेम दा का मर्र म्यांडा आळ्‍सतीदार, इदुरसाटी होग, ना नीनी आंदुर हाती कळुतीन.” आव आऊन से अंदुन, “ठीक आद ना तैयार आईन.”
GEN 37:14 इस्त्राएल आऊन से अंदुन, “होग, तान वार्टगोळ अदिक मर्र म्यांडागोळ्‍द हाल नोळकु बा कि आंदुर ठीक रा आर, बाक नान हाती समाचार तर.” अत: आव आऊक हेब्रोन इन तराई दा सार माळ कोंडुन. अदिक आव शकेम दा बंदुन.
GEN 37:15 याग यूसुफ ऊंद मैदान दा ईत्‍त आत्‍त नोळोन, आग ऊंद मंळसा आऊक सिकदुन, आव आऊन से केळदुन, “येन ढुंढसीत्‍या नी?”
GEN 37:16 आव अंदुन “ना रा तान वार्टुरी नोळीतीन कृपा माळकु नानी हेळ कि आंदुर मर्र म्यांडा येल आळसीत्‍यार?”
GEN 37:17 आ मंळसा अंदुन, “आंदुर रा ईल टु होटोग्‍यार; अदिक आंदरी ना अनतेला केळदीन, बरी, ‘नाव दोतान इक होगाता.’” इदुरसाटी यूसुफ तान वार्टुर हिंद होदुन, अदिक आंदरी दोतान नगर दा नोळदुन.
GEN 37:18 याग आंदुर आऊक दुर टु बरतेला नोळदुर, रा आऊन हाती बरोर से पयले अच आऊक कोंद बुळोद योजना माळदुर.
GEN 37:19 अदिक आंदुर आपस दा अनली कुरतुर, “नोळी, आव कांसा नोळावाळा बरेत्‍यान.
GEN 37:20 नळी, नाव आऊक कोंदकु ईल यातोदारा गड्‍डा दा भीट बुळाता, अदिक नाव अन बुळाता, कि आऊक यातोदारा आळी दाकळोद जनावर तीन बुळ्‍त बाक नाव नोळाता कि आऊन कांसा अन येन आगतद.”
GEN 37:21 लेकीन रूबेन यूसुफ उक ऊळसोद चाहासोन. इदुरसाटी रूबेन अंदुन “नाव यूसुफ उक जान ठाय कोनालेव;
GEN 37:22 बल्‍की नाव आऊक यातोदारा गड्‍डा दा हाक्‍क बुळाता,” रूबेन हिंग इदुरसाटी माळदुन कि आव यूसुफ उक उळ्‍सकु तान आप्‍प उक कोट्‍ट बुळुल.
GEN 37:23 ह्‍यांग यूसुफ तान वार्टुर हाती बंदुन, आंदुर यूसुफ उन रंग बिरंगा कपळा, जो आव हाक्‍कु ईरोन ईळ्‍सदुर,
GEN 37:24 अदिक यूसुफ उक ऊंद वळ्गींद गड्‍डा दा हाक्‍क बुट्‍टुर, यदुर दा नीर ईला ईरोद.
GEN 37:25 ईद माळकु आंदुर ऊमली कुरतुर. आग आंदुर नोळदुर कि इश्‍माएलीगोळ्‍द ऊंद दल ऊँटगोळ मा सुगन्ध द्रव्य, बलसान, अदिक गन्धरस मंण्‍सकु, गिलाद टु मिस्त्र अक होगेत्याद.
GEN 37:26 आग यहूदा तान वार्टुर से अंदुन, “तान वार्ट उक कोण्‍णोद अदिक आऊन खुन होचकोमसुसकु येन लाभ आदीत?
GEN 37:27 नाव ईऊक ई इश्‍माएलीगोळी मार्र कोमाता, नाव ईऊक कोनालेव, यतिकी आव नामव वार्ट हुन, नाम तान रक्‍ता हुन.” वार्टुरी ईद मात वळ्लीद हत्‍त.
GEN 37:28 आटा वती येनारा मिद्‍यानी व्‍यापारी भी अल टु होट्‍टुर, आग आंदुर आंदुर्द मदत देल यूसुफ उक गड्‍डा दा टु व्‍हार्या तेगदुर अदिक आऊक इश्‍माएलीगोळी ईप्‍पत बेळ्ली इन सिक्‍कागोळ दा मार्र कोंडुर; अदिक आंदुर यूसुफ उक मिस्त्र द्याश दा ओतुर.
GEN 37:29 रूबेन गड्‍डा दा वापस बंदकु येन नोळदुन कि यूसुफ गड्‍डा दा हैलेच; इदुरसाटी आव तान कपळा हरदुन,
GEN 37:30 अदिक तान वार्टुर हाती बंदकु अनली कुरतुन, “पार रा हैलेच; ईग ना यात होगाईन?”
GEN 37:31 आग आंदुर यूसुफ उन कपळा हुळदुर, अदिक ऊंद व्हात इक कोंदकु अदुर रक्‍ता दा अदरी मुळकुसदुर.
GEN 37:32 अदिक आंदुर आ रंग बिरंगा अंगरखा अक तान आप्‍प उन हाती कळुकु ईद संदेश कळुदुर; “ईद नामी सिक्‍याद, अत: नोळकु अरूकोम कि ईद नीन पार उन अंगरखा हुन का आलच.”
GEN 37:33 आव अदरी अरू कोंडुन, अदिक अंदुन, “हव ईद नान पार उन कपळा हुन; यातोदारा दुष्‍ट जनावर आऊक तीन बुळ्‍त; बिना संदेह यूसुफ तुकळा तुकळा माळकु आग्‍यान.”
GEN 37:34 आग याकूब तान कपळा हरदुन अदिक नेळु मा टाट गुंळ्‍सदुन, अदिक तान पार उन साटी हापाळ दिन ताका वर्लतेला ईत्‍तुन.
GEN 37:35 अदिक आऊन सप्‍पा पोर पारगोळ आऊक शांती कोळोद कोशिश माळदुर; लेकीन आऊक शांती सिकीदील; अदिक आव ईदा माळतेला ईत्‍तुन, “ना वर्लतेला तान पार उन हाती अधोलोक दा ईळदोगाईन.” ई प्रकार आऊन आप्‍प आऊन साटी वर्लतेला अच ईत्‍तुन.
GEN 37:36 ई बीच मिद्‍यानीगोळ यूसुफ उक मिस्त्र दा ओतकु पोतीपर हेसुर इन फिरौन उन ऊंद हाकिम अदिक अंगरक्षकगोळ प्रधान, उन कय दा मार्र बुट्‍टुर.
GEN 38:1 अवा दिनगोळ दा हिंग आत कि यहूदा तान वार्टगोळ हाती टु होटोदुन, अदिक हीरा हेसुर इन ऊंद अदुल्‍लामवासी मंळसा अन हाती ड्‍यारा हाक्कु आऊन हाती ईरली कुरतुन.
GEN 38:2 अल यहूदा शुआ हेसुर इन ऊंद कनानी मंळसा अन पोर इक नोळदुन; अदिक आकिन से मदा माळकु आकिन हाती होदुन.
GEN 38:3 आक व्‍हाट्‍यादी ईत्‍तुर, अदिक आकी ऊंद पार आदुन; अदिक यहूदा आऊन हेसुर एर ईटदुन.
GEN 38:4 अदिक आक मात व्‍हाट्‍यादी ईत्‍तुर, अदिक ऊंद पार आदुन; अदिक आऊन हेसुर ओनान ईटकु आत.
GEN 38:5 बाक आकी अदिक ऊंद पार आत, अदिक आऊन हेसुर शेला ईटकु आत; अदिक या समय आऊन जनम आत आ समय यहूदा कजीब नगर दा ईरतोगोन.
GEN 38:6 अदिक यहूदा तामार हेसुर इन आर्त से धोड्‍डेव पार एर उन मदा माळ कोट्‍टुन.
GEN 38:7 लेकीन यहूदा अन आव धोड्‍डेव पार एर यहोवा अन नजर दा दुष्‍ट ईरोन, इदुरसाटी प्रभु आऊक कोंद बुट्‍टुन.
GEN 38:8 आग यहूदा ओनान से अंदुन, “तान अतक्या अन हाती होग, अदिक आकिन सांगुळ मैदाण आगोद धर्म पुरा माळकु तान वार्ट उन साटी औलाद पैदा माळ.”
GEN 38:9 ओनान रा जानसोन संतान रा नानोर कहलुसतीदील; इदुरसाटी हिंग आत कि याग आव तान अतक्या अन हाती होदुन, आग आव जमीन मा तान वीर्य केडुकु नाश माळ बुट्‍टुन, यदुर देल हिंग आग बाळुल कि आऊन वार्ट उन हेसुर देल वंश नळु बाळुल.
GEN 38:10 ईद क्‍याल्‍सा जो आव माळदुन अदुर देल यहोवा खुश आगीदील अदिक प्रभु आऊक भी कोंद बुट्‍टुन.
GEN 38:11 आग यहूदा ई अंज्‍क इन कारण कि हिंग आगबाळुल कि तान वार्टुर घाई शेला भी सायुल, तान सास्सा तामार से अंदुन, “यागासताका नान पार शेला स्याणा आगेगालुन आगासताका तान आप्‍प उन मान्‍या अच रांड्यागीत ईर.” इदुरसाटी तामार तान आप्‍प उन मान्‍या होगकु ईरली कुरतुर.
GEN 38:12 हापाळ समय बितुसदुर मा यहूदा अन हिंग्‍स जो शुआ अन पोर ईरोर, आक सोतोदुर; बाक यहूदा अन दुख इन दिनगोळ होगदुर मा तान संगी हीरा अदुल्‍लामवासी सांगुळ तान मर्र-म्यांडागोळ चुट्‍टी कडावाळेर हाती तिम्ना नगर इक होदुन.
GEN 38:13 अदिक तामार इक ईद समाचार सिक्‍त, “नीन मॉव तान मर्र-म्यांडागोळ्‍द चुट्‍टी कळसुसोर साटी तिम्ना नगर इक होगेत्‍यान.”
GEN 38:14 आग तामार तान रांड्यागीत इन कपळा ईळ्‍सदुर, अदिक तान बाय घुंघट देल होचकोमकु ऊंद चादर गुंळ्‍स कोंडुर अदिक तिम्ना अन हादी मा एनैम इन प्रवेश दरवाजा मा कुरतोदुर. आक ईद इदुरसाटी माळदुर यतिकी आकिन देर शेला हारोदव आगेगीदुन अदिक आऊन से आकिन मदा माळकु आगीदील.
GEN 38:15 याग यहूदा आकी नोळदुन, आकी आव वेश्‍या सम्‍सदुन; यतिकी आक तान बाय होचकोमकु ईटीदुर.
GEN 38:16 आव हादी मा टु आकिन दी तिर्गदुन, अदिक आकिन से अनली कुरतुन, “नानी तान हाती बरगोळ,” यतिकी आऊक मालुम ईला ईरोद कि आक आऊन सास्सा हुळ. अदिक आक अनली कुरतुर, “अगर ना नीनी तान हाती बरगोळाईन, रा नी नानी येन कोट्या?”
GEN 38:17 आव अंदुन, “ना नीनी तान झुंड दा टु ऊंद मर्री अन पाड्डा कळु बुळाईन.” आग तामार अंदुर, “अदरी कळासताका अदुर बदला दा येन कोट्या?”
GEN 38:18 आव केळदुन, “नी येन चाहसत्‍या?” आक उत्‍तर कोट्‍टुर, “तान मुहर, अदिक बाजुबन्‍द, अदिक तान कय इन छळी.” आग आव आकी अव सामान कोट्‍टुन, अदिक आकिन हाती होदुन, अदिक आक आऊन से व्‍हाट्‍यादी ईत्‍तुर.
GEN 38:19 आग आक येदकु होटोदुर, अदिक तान घुंघट ईळ्सकु तान रांड्यापन इन पहनावा मात हाक्‍क कोंडुर.
GEN 38:20 याग यहूदा तान अदुल्‍लामवासी संगी इन कय दा अद मर्र इन पाड्डा आ आर्त इन साटी कळुदुन, गहान ईटकु वस्तु आ आर्त इन कय देल बिळस्कु तरूल; रा अल आऊक आ आर्त सिकीदील.
GEN 38:21 आव ईत्‍त आत्‍त लॉकुरी केळदुन कि, “आक वेश्‍या येल आर, एनैम इन हादी मा कुरतोगोर?” आंदुर अंदुर, “ईल यारू वेश्‍या यागलु ईरोर अच ईला.”
GEN 38:22 इदुरसाटी आव यहूदा अन हाती वापस बंदकु अंदुन, “नानी आक सिकीदील; अदिक आ जागा नोर लॉकुर अंदुर, ‘ईल रा यातोदु वेश्‍या ईरालुर.’”
GEN 38:23 “आग यहूदा अंदुन, ठीक आद, अव निशान इन बंधक वस्तु आकिन हाती इच ईरगोळ, ईलारा नाव लॉकुर तुच्छ आळुकु आदेव; नोळ, ना मर्री इन पाड्डा कळु बुटीदीन, लेकीन आक नीनी सिकीदील.”
GEN 38:24 लगभग मुर तींगुळ बाद्‍दा यहूदा अक ईद समाचार सिक्‍त, “नीन सास्सा तामार व्यभिचार माळ्‍यार; बल्‍की आक व्‍यभिचार देल व्‍हाट्‍यादी भी आगेग्‍यार.” आग यहूदा अंदुन, “आकी व्‍हार्या तरी कि आकी होत्‍ताकु आगुल.”
GEN 38:25 याग आकी व्‍हार्या तेगुकु आगोद, आग आक, तान मॉव उन हाती ईद अनकु कळुदुर, “या मंळसा अन ई सामान हुन, आऊन से अच ना व्‍हाट्‍यादी आईन,” बाक आक ईद भी अनकु कळुदुर, “अरू रा सही कि ईद मुहर, अदिक बाजुबन्‍द, अदिक छळी यार्द हुन.”
GEN 38:26 यहूदा अव समान नोळतेला अच पहचान्‍स कोंडुन अदिक अंदुन, “आक रा नान कम दोषी आर, यतिकी ना अच आकी शेला अन हिंग्‍स आगोर से रोक्‍सीदिन.” यहूदा आकी बाक यागलु कय हचीदिल.
GEN 38:27 याग आकिन हाळोद समय बत्‍त, आग ईद पता हत्‍त कि आकिन व्‍हाट्‍या दा येढ्‍ढ चिकोर आर.
GEN 38:28 याग आक हाळुली कुरतुर आग ऊंद पार ऊंद कय व्‍हार्या बत्‍त, अदिक दाई क्‍याचांद धागा हुडुकु आऊन कय दा ईद अनतेला कटदुर, “पयले ईवा पैदा आग्‍यान.”
GEN 38:29 लेकीन आव तान कय बुळ्‍क जेळदुन अदिक आऊन वार्ट उन जनम आऊन से पयला आत. आग दाई अंदुर, “नी पयले व्‍हार्या होट्‍टुर दा समर्थ आद!” इदुरसाटी आऊन हेसुर पेरेस ईटकु आत.
GEN 38:30 हिंद आऊन वार्ट यार्द कय दा क्‍याचांद सुत कटकु ईरोद पेरेस आदुन, अदिक आऊन हेसुर जेरह ईटकु आत
GEN 39:1 याग यूसुफ मिस्त्र दा पोहचुस्कु आदुन, आग पोतीपर हेसुर ईनव ऊंद मिस्‍त्री, जो फिरौन इन हाकिम, अदिक अंगरक्षकगोळव प्रधान ईरोन, आऊक इश्‍माएलीगोळ कय दा टु जो आऊक अल ओतीदुर, पैस्या कोटकु कोंडुन.
GEN 39:2 यूसुफ तान मिस्त्री स्वामी इन मान्‍या ईरतोगोन, अदिक यहोवा आऊन सांगुळ ईरोन; इदुरसाटी सफल धनी मंळसा आगेदुन.
GEN 39:3 अदिक यूसुफ उन स्वामी नोळदुन, कि यहोवा आऊन सांगुळ ईरतान, अदिक जो क्‍याल्‍सा आव माळतान अवरी यहोवा आऊन कय देल सफल माळ कोमतान.
GEN 39:4 आग आऊन अनुग्रह अन नजर आऊन मा आत, अदिक यूसुफ आऊन स्यावा टहल माळोरसाटी निवळुसकु आदुन; बाक आव आऊक तान मान्ना अन्द अधिकारी माळकु सप्‍पा येनारा आऊन कय दा कोट्‍ट बुट्‍टुन.
GEN 39:5 याग टु आव आऊक तान मान्‍या अन्द अदिक सप्‍पा सम्‍पती इन अधिकारी माळीदुन, आग टु यहोवा यूसुफ उन कारण आ मिस्त्री इन मान्‍या आशीष कोळली कुरतुन; अदिक येन मान्‍या, येन केई दा, आऊन जो येनारा भी ईरोद, सप्‍पा मा यहोवा अन आशीष आगली कुर्त.
GEN 39:6 इदुरसाटी आव तान सप्‍पा येनारा यूसुफ उन कय दा ईल ताका बीट बुट्‍टुन कि तान तीना रोट्‍टी इक बिटकु, आव तान सम्‍पती इन हाल येनु ईला जानसोन. यूसुफ सुंदर अदिक रूपवान ईरोन.
GEN 39:7 ईव मातगोळ बाद्‍दा हिंग आत, कि आऊन स्वामी इन हिंग्‍स यूसुफ उन दी नोळदुर अदिक अंदुर, “नान सांगुळ मींग.”
GEN 39:8 लेकीन आव मना माळकु तान स्वामी इन हिंग्‍स से अंदुन, “केळ, जो येनारा ई मान्‍या आद अद नान कय दा आद; अदरी नान स्वामी येनु जानसालुन, अदिक आव तान सप्‍पा येनारा नान कय दा सौप्स बुट्‍टान.
GEN 39:9 ई मान्‍या नान से धोड्‍डेव याऊ हैलेच; नान स्वामी नानी नीन अलावा यातोदु वस्‍तु से अलग ईटीदिल, यतिकी नी आऊन हिंग्‍स हुय. इदुरसाटी ईद ह्‍यांग संभव आद कि ना ईत्‍ता दुष्‍टता माळकु परमेश्वर उन विरूद्ध पाप माळाईन?”
GEN 39:10 अदिक हिंग आत कि आक रोज यूसुफ से मातगोळ माळतेला ईत्‍तुर, लेकीन आव आकिन मान्‍सीदील कि आकिन हाती मींगाईन या आकिन सांगुळ ईराईन.
GEN 39:11 ऊंद दिशी येन आत कि यूसुफ तान क्‍याल्‍सा माळोर साटी मान्‍या होदुन, अदिक मान्‍यागोळोर सेवकगोळ दा टु याऊ भी मान्‍या अन बुळ्‍क ईला ईरोन.
GEN 39:12 आग आ आर्त आऊन कपळा हरकु अंदुर, “नान सांगुळ मींग,” लेकीन आव तान कपळा आकिन कय दा बिटकु ओळदुन, अदिक व्‍हार्या होट्‍ट बुट्‍टुन.
GEN 39:13 ईद नोळकु कि आव तान कपळा नान कय दा बिटकु व्‍हार्या ओळदुन,
GEN 39:14 आक सप्‍पा सेवकगोळी कारदुर अदिक अंदुर, “ईद नोळी, नान गांड ई इब्री मंळसा अक नान देखभाल माळोरसाटी ईट्‍यान लेकीन आव नानी खराब माळली नान हाती बंदुन आग ना चिळ्लासदीन.
GEN 39:15 अदिक नान धोळ्‍द आवाज केळकु आव तान कपळा नान हाती बिटकु ओळदुन, अदिक व्‍हार्या होट्‍ट बुट्‍टुन.”
GEN 39:16 अदिक आक आऊन कपळा आऊन स्वामी इन बरास ताका तान हाती ईटदुर.
GEN 39:17 तान गांड उन बंदुर मा आक हेळदुर कि : “नी या इब्री दास उक ईल तंद्या, आव नान अपमान माळोर साटी ईल बंदीदुन.
GEN 39:18 अदिक याग ना धोळ आवाज दा चिळ्लासदीन, आग आव तान कपळा नान हाती बिटकु व्‍हार्या ओळेदुन.”
GEN 39:19 तान हिंग्‍स उन ई मातगोळ केळकु कि नीन दास नान सांगुळ ईत्‍ता-ईत्‍ता क्‍याल्‍सा माळदुन, यूसुफ उन स्वामी इन कोप भळकुस्‍त.
GEN 39:20 अदिक यूसुफ उन स्वामी आऊक हुडुकु जेल दा, येल राजा अन कैदी बंद ईरोर, हाकसुस बुट्‍टुन; अत: आव आ बंदीगृह दा ईत्‍तुन.
GEN 39:21 लेकीन यहोवा यूसुफ उन सांगुळ सांगुळ ईत्‍तुन, अदिक आऊन मा करूणा माळदुन, अदिक जेल इन दरोगा अन अनुग्रह अन नजर आऊन मा आत.
GEN 39:22 इदुरसाटी जेल इन दरोगा आ सप्‍पा बंदीगोळी, जो कारागार दा ईरोर, यूसुफ उन कय दा सौप्स बुट्‍टुन; अदिक जो जो क्‍याल्‍सा आंदुर अल माळतोगोर, अद आऊन आग्‍या देल अच आगतोगोद.
GEN 39:23 यूसुफ उन वश दा जो येनारा ईरोद अदुर दा टु जेल इन दरोगा अक येनारा भी वस्‍तु नोळोद ईला बिळतोगोद; यतिकी यहोवा यूसुफ उन सांगुळ ईरोन; अदिक जो येनारा आव माळतोगोन, यहोवा आऊक अदुर दा सफलता कोळतोगोन.
GEN 40:1 ई मातगोळ बाद्‍दा हिंग आत, कि मिस्त्र अन राजा नोर कुळसावाळा अदिक खाना माळावाळा तान स्वामी अन खिलाप येनारा अपराध माळदुर.
GEN 40:2 आग फिरौन तान आ हाकिमगोळ, मतलब कुळसावाळा अन प्रधान, अदिक खाना माळावाळा अन प्रधान मा क्रोधित आगकु
GEN 40:3 आंदरी कैद माळसुसकु, अंग रक्षकगोळ प्रधान उन मान्‍या अन अदा बंदीगृह दा, येल यूसुफ बंदी ईरोन, हाकसुस बुट्‍टुन.
GEN 40:4 आग अंग रक्षकगोळ प्रधान आंदरी यूसुफ उन कय दा सोप्सदुन, अदिक आव आंदुर्द स्यावा टहल माळली कुरतुन; अत: आंदुर येनारा दिन ताका बंदीगृह दा ईत्‍तुर.
GEN 40:5 आग ऊंद ईळ्‍ल्‍की येढ्‍ढु मुंदुर अलग अलग कांसा नोळदुर, अदिक हर ऊंद कांसा अन तान अलग अलग मतलब ईरोद.
GEN 40:6 यूसुफ दुसरा दिशी व्हातर्या आंदुर हाती होदुन. अदिक नोळदुन कि येढ्ढु मुंदुर हापाळ परेशान ईरोर.
GEN 40:7 इदुरसाटी आव फिरौन उन आ हाकिमगोळ से, जो आऊन सांगुळ आऊन स्वामी इन मान्ना अन्द जेल दा ईरोर, केळदुन, “ईंद नीम्द बाँय येती उदास आद?”
GEN 40:8 येढ्ढु मुंदुर उत्तर कोट्टुर, “होत आ ईळ्लकी नाव कांसा नोळदेव,” लेकीन नामी समसाल “कि कांसा अन मतलब येन हुन?” याऊ हिंग मंळसा हैलेच जो कांसागोळ्द व्याख्या माळुल या नामी स्पष्ट हेळुल. यूसुफ आंदुर से अंदुन, “केवल परमेश्वर अच हिंग आन जो कांसागोळी सम्सतान अदिक अऊर्द व्याख्या माळतान. इदुरसाटी ना निवेदन माळतीन कि तान कांसा नानी हेळी.”
GEN 40:9 इदुरसाटी अंगुर इन रास्सा कोळावाळा सेनापती यूसुफ उक तान कांसा हेळदुन. आव अंदुन, “ना कांसा दा अंगुर इक बेली नोळदीन.
GEN 40:10 आ अंगुर इन बेली इन मुर खांदीगोळ ईरव. ना आ खांदीगोळ मा फूल बरतेला अदिक अवरी अंगुर हततेला नोळदीन.
GEN 40:11 अदिक फिरौन उन कटोरा नान कय दा ईरोद; अदिक ना आ अंगुरगोळी हुडुकु फिरौन उन कटोरा दा हिंडदीन अदिक कटोरा अक फिरौन उन कय दा कोट्टीन.”
GEN 40:12 यूसुफ आऊन से अंदुन, “ईदुर्द काय ईद हुन: मुर खांदा अन मतलब मुर दिन हुन
GEN 40:13 इदुरसाटी ईग टु मुर दिन इन बुळ्क नीन ताल्ला ऊँचा माळ्यान, अदिक मात नीन पद मा नीनी नीवळुस्यान, अदिक पयले अन घाई फिरौन उन कुळसावाळा आगकु आऊन कटोरा आऊन कय दा मात कोळतोद्या.
GEN 40:14 अत: याग नीन भला आगेदीत आग नानी याद माळेत, अदिक नान मा दया माळकु फिरौन से नान चर्चा माळेत, अदिक ई जेल टु नानी बीळसुस बुळेत.
GEN 40:15 यतिकी सही दा इब्रानीगोळ्द द्याश टु नानी कदुकु तनकु आग्याद, अदिक ईल भी ना यातोदु हिंग क्याल्सा माळीदिल, यदुर कारण ना ई जेल दा हाक्कु आगाईन.”
GEN 40:16 रोट्टी माळावाळा नोळदुन कि दुसरा नौकर उन कांसा वळ्‍लीद ईरोद. इदुरसाटी रोट्टी माळावाळा यूसुफ से अंदुन, “ना भी कांसा नोळीन. ना नोळदीन कि नान ताल्ला मा बिळीद मुर रोट्टीगोळोव फुट्टी आव.
GEN 40:17 सबसे म्याकुच इन फुट्टी दा फिरौन उन साटी सप्पा प्रकार इन कासदव भोजन आव. ईद भोजन राजा अन साटी ईरोद. लेकीन ई भोजन इक पक्षीगोळ तीनव.”
GEN 40:18 यूसुफ उत्तर कोट्टुन, “ना नीनी हेळाईन कि कांसा अन मतलब येन आद? मुर फुट्टीगोळ्द मतलब मुर दिन हुन.
GEN 40:19 ईग टु मुर दिन इन पयले फिरौन नीन ताल्ला कळसुसकु नीनी ऊंद मार्र मा लटकुस बुट्टान, अदिक पक्षी नीन मास इक तीळ्स तीळ्सकु तींदव.”
GEN 40:20 अदिक तीसरा दिशी फिरौन उन जनम दिन ईरोद, आव तान सप्पा क्याल्सा माळावाळेर इक भोजन कोट्टुन, अदिक आंदुर दा टु कुळसावाळा प्रधान, अदिक कासावाळा प्रधान येढ्ढु मुंदुरी जेल दा टु तेगसुसदुन.
GEN 40:21 कुळसावाळा सेनापती अक रा कुळसावाळा अन पद मा मात नीवळुसदुन, अदिक आव फिरौन उक कय दा कटोरा कोळली कुरतुन.
GEN 40:22 लेकीन फिरौन रोट्टी माळावाळा अक कोंद बुट्टुन. ह्यांग मातगोळ यूसुफ हेळीदुन हांग अच आत.
GEN 40:23 तरी भी कुळसावाळा प्रधान यूसुफ उक याद माळीदिल; लेकीन आऊन मारतोदुन.
GEN 41:1 पुरा येढ्‍ढ वर्ष आगदुर मा फिरौन ईद कांसा नोळदुन कि आव नील गांगा अन किनारा मा निदुरकु आन.
GEN 41:2 अदिक आ नील गांगा दा टु येळ सुंदर अदिक मोटा-मोटा गोसी होटकु किनारा अन काड्डा तिनली कुरतव.
GEN 41:3 अदिक, येन नोळदुन कि अऊर हिंद अदिक येळ गोसीगोळ, जो कुरूप अदिक कमजोर आव, नील गांगा टु होट्टव; अदिक दुसरा गोसीगोळ हात्ती गांगा अन तट मा होगकु नीदुरदव.
GEN 41:4 ईव येळु कमजोर गोसी, सुंदर मोटा येळ गोसीगोळी तीन कोंडव, आग फिरौन येद्दुन.
GEN 41:5 फिरौन मात्त मिंगदुन अदिक दुबारा कांसा नोळदुन. आव कांसा दा अनाज इन येळ लॉम्बा, ऊंद अनाज इन हिंद ऊगुसतेला नोळदुन. अनाज इन लॉम्बागोळ मोटा अदिक वळ्लेव ईरव.
GEN 41:6 अदिक, येन नोळदुन कि अऊर हिंद येळ लॉम्बागोळ पतला अदिक पुरवाई टु मुरझुस्कु होट्टव.
GEN 41:7 आग पतला लॉम्बागोळ येळ मोटा लॉम्बागोळी तीन कोंडव. ईदुर देल फिरौन उन जप खुलसेत अदिक आव समसेदुन कि अद कांसा ईरोद.
GEN 41:8 व्हातुर आगदुर मा राजा अन्द मन बेचैन आदुन, इदुरसाटी आ कांसा अन मतलब जानसोर साटी मिस्त्र द्याश इन सप्पा ज्योतिषगोळी अदिक जादूगर कारसुसदुन अदिक फिरौन आंदरी तान येढ्ढु कांसागोळ हेळदुन लेकीन याऊ भी आ कांसागोळ्द मतलब हेळ सकीदील.
GEN 41:9 आग प्रधान कुळसावाळा फिरौन से अंदुन, “ईंद नानी तान पाप याद बरेत्याद.
GEN 41:10 याग फिरौन तान दासगोळ से सीट्टी बंदीदुन, नानी अदिक रोट्टी माळावाळा प्रधान उक कैद माळकु अंगरक्षकगोळ प्रधान उन मान्या बंदीगृह दा हाकीदुन;
GEN 41:11 आग नाव येढ्ढु मुंदुर ऊंद अच ईळ्लकी, तान तान हुनर इन अनुसार कांसा नोळीदेव;
GEN 41:12 अदिक अल नाम सांगुळ ऊंद इब्री हारोदव ईरोन, जो अंगरक्षकगोळ प्रधान उन दास ईरोन; अत: नाव आऊक हेळदेव, अदिक आव नाम कांसागोळ्द मतलब नाम से अंदुन, नाम दा ऊंद ऊंद उन कांसा अन मतलब आव नामी हेळदुन.
GEN 41:13 अदिक ह्यांग काय आव नाम से अंदिदुन, हांग अच आत भी, मतलब नानी रा नान पद मात सीक्त, लेकीन आव फासी मा लटकुसकु आदुन.”
GEN 41:14 आग फिरौन यूसुफ उक बुलावा कळुदुन. अदिक आव झटपट जेल टु व्हार्या तेगसुसकु आदुन, अदिक चुट्टी माळकु, अदिक कपळा बदलुसकु फिरौन उन मुंद बंदुन.
GEN 41:15 फिरौन यूसुफ से अंदुन, “ना ऊंद कांसा नोळीन, अदिक अदुर मतलब हेळावाळा याऊ भी हैलेच; अदिक ना नीन बारा दा केळीन, कि नी कांसा केळतेला अच अदुर मतलब हेळबुळत्या.”
GEN 41:16 यूसुफ फिरौन से अंदुन, “ना रा येनु जान्सालीन: परमेश्वर फिरौन उन साटी शुभ वचन कोट्टुन.”
GEN 41:17 बाक फिरौन यूसुफ से अनली कुरतुन, “ना तान कांसा दा नोळदिन, कि ना नील गांगा अन किनारा मा निदुरकु आईन.
GEN 41:18 बाक, येन नोळदीन, कि नील गांगा दा टु येळ मोटा अदिक सुंदर गोसीगोळ होटकु व्हार्या बंदव अदिक किनारा अक काड्डा तिनली कुरतव.
GEN 41:19 बाक, येन नोळदीन, कि अऊर हिंद येळ गोसी अदिक होट्टव, जो पतला, अदिक हापाळ कुरूप, अदिक कमजोर आव; ना रा सप्पा मिस्त्र द्याश दा ईत्ता खराब गोसी यागलु नोळीदील.
GEN 41:20 ईव कमजोर अदिक खराब गोसीगोळ आ पयला येळु गोसीगोळी तीन कोंडव.
GEN 41:21 अदिक याग अव अवरी तीन कोंडव आग ईद ईला मालुम आगोद कि अव अवरी तीन कोंडव, यतिकी अव पयला अन घाई हांग च्या हांगा खराब ईरव. आग ना यदोदीन.
GEN 41:22 बाक ना दुसरा कांसा नोळदीन, कि ऊंद अच कोर दा येळ वळ्लेव वळ्लेव अदिक अन्न देल तुमकु लॉम्बागोळ होट्टव.
GEN 41:23 बाक येन नोळतीन, कि अऊर हिंद अदिक येळ लॉम्बागोळ मुरझुसकु अदिक पतला अदिक बीसी हवा देल नष्ट ईरव.
GEN 41:24 अदिक आ पतला लॉम्बागोळ आ येळ वळ्लेव वळ्लेव लॉम्बागोळ तीन कोंडव. ईदरी ना ज्‍योतिषिगोळी हेळदीन, लेकीन ईवरी समझुसावाळा याऊ सीकीदील.”
GEN 41:25 आग यूसुफ फिरौन से अंदुन, “फिरौन उन कांसा ऊंद अच हुन, परमेश्वर जो क्याल्सा माळोद चाहासतान, अदरी आव फिरौन मा प्रगट माळ्‍यान.
GEN 41:26 अव येळ वळ्लेव वळ्लेव गोसी येळ वर्ष हुव; अदिक अव येळ लॉम्बागोळ भी येळ वर्ष हुव; कांसा ऊंद हुन.
GEN 41:27 बाक अऊर हिंद जो दुर्बल अदिक कुडौल गोसीगोळ होट्टव, अदिक जो येळ मुरझुसकु अदिक पतला अदिक बीसी हवा देल नष्ट आगकु लॉम्बागोळ होट्टव, अव अकाल इन येळ वर्ष ईत्तव.”
GEN 41:28 ईद अदा मात हुन जो ना फिरौन से अन कोंडीन, कि परमेश्वर जो क्याल्सा माळोद चाहासतान, अदरी आव फिरौन उक तोर्सदुन.
GEN 41:29 केळ, सप्पा मिस्त्र द्याश दा येळ वर्ष रा हापाळ उपज इन आदीत.
GEN 41:30 अदुर बाद्दा येळ वर्ष अकाल ईनव बंदव, अदिक सप्पा मिस्त्र द्याश दा लॉकुर ई सप्पा उपज इक मारतोदार; अदिक अकाल देल द्याश इन नाश आदीत.
GEN 41:31 अद कि अकाल ईट भयानक आदीत कि वळ्लीद फसल अदिक उपज द्याश दा यारीकु याद ईरतीदील?
GEN 41:32 अदिक फिरौन जो ईद कांसा येढ्ढ घन नोळदुन ईदुर्द भेद ईदा हुन कि ईद मात परमेश्वर उन दी टु नीवळुसकु आगेग्याद, अदिक परमेश्वर ईदरी जल्दी पुरा माळ्यान.
GEN 41:33 “इदुरसाटी ईग फिरौन यातोवारा समझदार अदिक बुध्दिमान मंळसा अक नोळकु आऊक मिस्त्र द्याश इन प्रधानमंत्री ठहरूसुल.
GEN 41:34 फिरौन ईद माळुल कि द्याश मा अधिकारीगोळी नीवळुसुल, अदिक यागासताका खुसहाल इन येळ वर्ष ईत्तव आगासताका आव मिस्त्र द्याश इन उपज इन पाचवा हिस्सा ताकोमुल.
GEN 41:35 अदिक आंदुर ई वळ्लेव वर्षगोळ दा सप्पा प्रकार इन भोजन वस्तुगोळ जमा माळुल, अदिक नगर-नगर दा भंडार मान्ना भोजन इन साटी, फिरौन उन वश दा माळकु अऊर्द रक्षा माळुल.
GEN 41:36 अदिक अव भोजन वस्तु अकाल इन आ येळ वर्षगोळ साटी, जो मिस्त्र द्याश दा बंदव, द्याश इन भोजन ई निमित्त ईटकु ईरूल, यदुर देल द्याश आ अकाल देल सत्यानाश आग बाळुल.”
GEN 41:37 ईद मात फिरौन अदिक आऊन सप्पा क्याल्सा माळावाळेर इक वळ्लीद हत्त.
GEN 41:38 इदुरसाटी फिरौन तान क्याल्सा माळावाळेर से अंदुन, “येन नामी ईत्ता मंळसा, ह्यांग ईव आन, यार मा परमेश्वर उन आत्मा ईरतद, सिक सकतान?”
GEN 41:39 बाक फिरौन यूसुफ से अंदुन, “परमेश्वर जो नीनी ईट ग्यान कोटान, कि नीन बराबर याऊ समझदार अदिक बुद्धिमान हैलेच;
GEN 41:40 ई कारण नी नान मान्या अन अधिकारी ईत्या, अदिक नीन आग्या अन अनुसार नान पुरा प्रजा नळदीत, सिर्फ राजगद्दी इन बारा दा ना नीन से धोड्डेव ठहरूसाईन.”
GEN 41:41 बाक फिरौन यूसुफ से अंदुन, “केळ, ना नीनी मिस्त्र अन सप्‍पा द्याश इन म्याकुच अधिकारी ठहरूस बुळतीन.”
GEN 41:42 आग फिरौन तान कय दा टु मुहर वाला ऊंगरा तेगुकु यूसुफ उन कय दा हाकसुसदुन; अदिक आऊक वळ्लेव मलमल इन कपळा हाकसुसदुन, अदिक आऊन कुत्या दा व्हान्ना अन माला हाकदुन;
GEN 41:43 अदिक आऊक तान दुसरा रथ मा येर्सदुन; अदिक लॉकुर आऊन मुंद मुंद ईद प्रचार माळतेला नळदुर, कि ट्वागंरा टेक्सकु नमस्कार माळी अदिक आव आऊक मिस्त्र द्याश इन म्याकुच प्रधानमंत्री ठहरूसदुन.
GEN 41:44 बाक फिरौन यूसुफ से अंदुन, “फिरौन रा ना हुईन, अदिक मिस्त्र द्याश दा याऊ भी नीन आग्या अन बीना कय काल आळगाळस्तिदील,”
GEN 41:45 फिरौन यूसुफ उन हेसुर सापनत-पानेह ईटदुन. अदिक ओन नगर इन याजक पोतीपेरा अन पोर आसनत सांगुळ आऊन मदा माळसुसदुन. अदिक यूसुफ सप्पा मिस्त्र द्याश दा दौरा माळली कुरतुन.
GEN 41:46 याग यूसुफ मिस्त्र अन राजा फिरौन उन हात्ती निदुरदुन, आग आव तीस वर्ष इनव ईरोन. आव फिरौन उन हात्ती टु होटकु सप्पा मिस्त्र द्याश दा दौरा माळली कुरतुन.
GEN 41:47 सुख इनव येळु वर्ष दा जमीन हापाळ अन्न पैदा माळतेला ईत्त.
GEN 41:48 अदिक यूसुफ आ येळु वर्षगोळ दा सप्‍पा प्रकार इन भोजन वस्तुगोळ, जो मिस्त्र द्याश दा आगतोगोद, जमा माळकु नगरगोळ दा ईटतोगोन, अदिक हर ऊंद नगर इन नाकु दीकळव केईगोळ्द भोजन वस्तुगोळ इक आव अदा नगर दा जमा माळतेला ईत्तुन.
GEN 41:49 ई प्रकार यूसुफ अन्न इक समुद्र अन धुळा अन्द घाई बहुतायत देल राशी आळकु ईटदुन, ईल ताका कि आव अऊर्द आळोद बंद माळ बुट्टुन; यतिकी अव असंख्य आगेगीदव.
GEN 41:50 अकाल इक पयला वर्ष बरोर से पयला यूसुफ उन येढ्ढ चिकोर, ओन नगर इन याजक पोतीपेरा अन पोर आसनत देल पैदा आदुर.
GEN 41:51 अदिक यूसुफ तान पयला पार उन हेसुर ईद अनकु मनश्शे ईटदुन, “कि परमेश्वर नान से सप्पा क्लेश, अदिक नान आप्प उन सप्पा घराना मारसुसदुन.”
GEN 41:52 दुसरा अन हेसुर आव ईद अनकु एप्रैम ईटदुन, कि “नानी दुख भोगस्दुर इन द्याश दा परमेश्वर फलवंत माळदुन.”
GEN 41:53 अदिक मिस्त्र द्याश इन वळ्लीद फसल पकुसोद येळ वर्ष खतम आगेदव.
GEN 41:54 अदिक यूसुफ उन अना अनुसार येळ वर्षगोळ साटी अकाल शुरू आगेत. सप्पा द्याशगोळ दा अकाल बिळली कुर्त; लेकीन सप्पा मिस्त्र द्याश दा अन्न ईरोद.
GEN 41:55 याग मिस्त्र अन सप्‍पा द्याश हसु देल सायली कुर्त; आग प्रजा फिरौन से चिळ्लास चिळ्लासकु अन्न बेळली कुर्त; अदिक आव सप्‍पा मिस्त्रीगोळ से अनतोगोन, “यूसुफ उन हाती होगी; अदिक जो येनारा आव नीम से अंदान, अदा माळी.”
GEN 41:56 इदुरसाटी याग अकाल सप्‍पा पृथ्वी मा फैलुसेत, अदिक मिस्त्र द्याश दा अकाल इन भयंकर रूप आगेत, आग यूसुफ सप्‍पा भंडारगोळी तेगु तेगुकु मिस्त्रीगोळ कय देल अन्न मारली कुरतुन.
GEN 41:57 इदुरसाटी सप्‍पा पृथ्वी इन लॉकुर मिस्त्र दा अन्न कोमोर साटी यूसुफ उन हाती बरली कुरतुर, यतिकी सप्पा पृथ्वी मा भयंकर अकाल ईरोद.
GEN 42:1 याग याकूब केळदुन कि मिस्त्र द्याश दा अन्‍न आद, आग आव तान चिकोर से अंदुन, “नीव आबुर दाबुर बाय यती नोळेतीर.”
GEN 42:2 बाक आव अंदुन, “ना केळीन कि मिस्त्र दा अन्न आद; इदुरसाटी नीव लॉकुर अल होगकु नाम साटी अन्न कोंडकु तरी, यदुर देल ना सायतीदील, बल्‍की जीत्ता ईत्तेव.”
GEN 42:3 अत: यूसुफ उन हत्त वार्टुर अन्न कोमोर साटी मिस्त्र अक होदुर.
GEN 42:4 लेकीन यूसुफ उन वार्ट बिन्यामीन उक याकूब ईद सोचकु वार्टुर सांगुळ कळीदील कि यागलु हिंग आग बाळुल कि आऊन मा यातोदु मुश्किल बंदकु बिळुल.
GEN 42:5 ई प्रकार जो लॉकुर अन्न कोमली बंदुर आंदुर सांगुळ इस्त्राएल उन पारगोळ भी बंदुर; यतिकी कनान द्याश दा भी भारी अकाल ईरोद.
GEN 42:6 यूसुफ रा मिस्त्र द्याश इन प्रधानमंत्री ईरोन, अदिक आ द्याश इन सप्पा लॉकुरव कय दा आवा अन्न मारतोगोन; इदुरसाटी याग यूसुफ उन वार्ट बंदुर आग जमीन मा बाय इन भार देल बांगकु आऊक नमस्कार माळदुर.
GEN 42:7 आंदरी नोळकु यूसुफ अरू रा कोंडुन, लेकीन आंदुर मुंद भोला आगकु कठोरता अन सांगुळ आंदुर से केळदुन, “नीव येल टु बंदीर?” आंदुर अंदुर, “नाव रा कनान द्याश टु अन्न कोमोर साटी बंदेव.”
GEN 42:8 यूसुफ तान वार्टुरी अरू कोंडुन, लेकीन आंदुर आऊक अरतीदील.
GEN 42:9 आग यूसुफ तान आ कांसागोळी याद माळकु जो आव आंदुर बारा दा नोळीदुन, आंदुर से अनली कुरतुन, “नीव भेदीगोळ हुईर; ई द्याश इन हालत नोळली बंदीर.”
GEN 42:10 आंदुर आऊन से अंदुर, “ईला, ईला, हे प्रभु, नीन दास तीना वस्तु कोमोर साटी बंदार.
GEN 42:11 नाव सप्पा ऊंद अच आप्प उन चिकोर हुयेव, नाव सच्चा मंळसागोळ आयेव; नीन दासगोळ हूएव भेदीगोळ ईला.”
GEN 42:12 आव आंदुर अंदुन, “ईला ईला, नीव ई द्याश इन हालत नोळोर साटी अच बंदीर.”
GEN 42:13 आंदुर अंदुर, “नाव नीनोर दास हन्नेळ वार्टुर आयेव, अदिक कनान वासी ऊंद अच मंळसा नोर चिकोर हुयेव, अदिक श्याण्णेव ई समय नाम आप्प उन हाती आन, अदिक ऊंद वार्ट सोतोदुन.”
GEN 42:14 आग यूसुफ आंदुर से अंदुन, “ना नीम से अन कोंडीन कि नीव भेदीगोळ हुईर;
GEN 42:15 अत: ई रीति देल नीव परखुसकु आदीर, फिरौन उन जीवन इन कसम, यागासताका नीम श्याण्णेव वार्ट ईल बरालुन आगासताका नीव ईल टु होळ सकालीर.
GEN 42:16 इदुरसाटी तान दा टु ऊंद मंळसा अक कळी कि आव नीम वार्ट उक तरूल, अदिक नीव लॉकुर नाम्द देखरेख दा ईत्तीर; ई प्रकार नीम मातगोळी परखुसकु आदीत कि नीम दा सच्चाई आद का हैलेच. अगर सच्चा ठहरूसतीदील आग रा फिरौन उन जीवन इन कसम नीव सही दा भेदीगोळ सम्सकु आदीर.”
GEN 42:17 आग आव आंदरी मुर दिन ताका बंदी माळकु ईटदुन.
GEN 42:18 तीसरा दिशी यूसुफ आंदुर से अंदुन, “ऊंद क्याल्सा माळी आग जीत्ता ईत्तीर; यतिकी ना परमेश्वर उन भय मान्सतीन;
GEN 42:19 अगर नीव सीधा मंळसा हुईर, रा नीम सप्पा वार्टुर दा टु ऊंद मंळसा ई बंदीगृह दा बंदी ईरूल; अदिक नीव तान मान्नावाळेर्द हसु मिटुसोद साटी अनाज वई,
GEN 42:20 अदिक तान श्याण वार्ट उक नान हाती तरी; ई प्रकार नीम मातगोळ सच्चा ठहरूसेव, अदिक नीव कोंदसुसकु आगतीदील.” आग आंदुर हांग अच माळदुर.
GEN 42:21 आंदुर आपस दा अंदुर, “बिलकुल नाव तान वार्ट उन बारा दा दोषी आयेव, यतिकी याग आव नाम से गिळगिळास्कु विनती माळदुन, आग भी नाव ईद नोळकु कि आऊन जीवन ह्यांग संकट दा आद, आऊंद केळीदील; ईदा कारण नाव भी ईग ईद संकट दा बिदकु आयेव.”
GEN 42:22 रूबेन आऊन से अंदुन, “येन ना नीम से अंदिदीन कि पार उन अपराधी आगबाळी? लेकीन नीव केळीदील. नोळी, ईग आऊन रक्ता अन बदला ताकोमकु आदीत.”
GEN 42:23 यूसुफ तान वार्टुर से मात माळोर साटी ऊंद दुसरा भाषा देल क्याल्सा ताकोमोन. इदुरसाटी वार्टुर ईला जानसोर कि यूसुफ आंदुर भाषा जान्सतान. लेकीन आंदुर जो अनतोगोर अदरी यूसुफ केळोन अदिक समसोन.
GEN 42:24 आंदुर मातगोळ से यूसुफ हापाळ दुखी आदुन. इदुरसाटी यूसुफ आंदुर से अलग हटसेदुन अदिक वर्लली कुरतुन. थ्वाळासा समय दा यूसुफ आंदुर हाती बंदुन. आव वार्टुर दा टु शिमोन उक हुळदुन अदिक आऊक बंदी माळदुन याग कि अन्य वार्टुर नोळतेला ईत्तुर.
GEN 42:25 आग यूसुफ आग्या कोट्टुन, कि आंदुरव बॉरागोळी अन्न देल तुमी अदिक ऊंद ऊंद मंळसा बॉरा दा आंदुर पैस्यागोळी भी ईट बुळी, बाक आंदरी हादी इन साटी भोजन वस्तु कोळी. आंदुर सांगुळ हिंग अच माळकु आत.
GEN 42:26 आग आंदुर तान अनाज इन बॉरागोळ इक तान गधागोळ मा लादस्कु अल टु होदुर.
GEN 42:27 आंदुर सप्पा वार्टुर ईळ्‍ल्‍क इक थाम्सदुर अदिक गधा अक चारा कोळोर साटी वार्टुर दा टु ऊंद येनारा अन्न इन साटी तान बॉरा तेरदुन अदिक आव धन तान बॉरा दा नोळदुन.
GEN 42:28 आव तान वार्टुर से अंदुन, “नोळी, जो किमत ना अन्‍न साटी कोटीदीन, अद ईल आद. यावारा नान बॉरा दा ईद धन वापस माळ कोंडान. आंदुर सप्पा वार्टुर हापाळ अंजेदुर. आंदुर आपस दा मातगोळ हेळदुर, परमेश्वर नाम लॉकुर सांगुळ येन माळेत्यान?”
GEN 42:29 आंदुर वार्टुर कनान द्याश दा तान आप्प याकूब उन हाती होदुर. आंदुर जो येनारा आगीत तान आप्प उक हेळदुर.
GEN 42:30 आंदुर अंदुर, “जो मंळसा आ द्याश इन स्वामी आन, आव नाम से कठोरता देल मात हेळदुन, अदिक नामी द्याश इन भेदीगोळ अंदुन.
GEN 42:31 आग नाव आऊन से अंदेव, ‘नाव सीधा लॉकुर आयेव, भेदीगोळ ईला.
GEN 42:32 नाव हन्नेळ वार्टुर ऊंद अच आप्प उन चिकोर हुयेव, ऊंद रा सोत्तुन, लेकीन श्याण्णेव ई समय कनान द्याश दा नाम आप्प उन हात्ती आन.’
GEN 42:33 आग आ मंळसा जो आ द्याश इन स्वामी आन, नाम से अंदुन, ‘ईदुर देल मालुम आगेदीत कि नीव सीधा मंळसागोळ आईर; नीव ताम दा टु ऊंद इक नान हाती बिटकु तान मान्या वाळेर्द हसु मीटसोर साटी येनारा अनाज वई.
GEN 42:34 अदिक तान श्याण वार्ट उक नान हाती तरी. आग नानी विश्वास आगेदीत कि नीव भेदीगोळ आलच, सीधा लॉकुर आईर. बाक ना नीम वार्ट उक नीम लॉकुर कोट बुळाईन, अदिक नीव ई द्याश इन सांगुळ लेन देन माळ सकीर.’”
GEN 42:35 आग सप्पा वार्टुर तान बॉरागोळ दा टु अन्न तेगोर साटी होदुर अदिक हर ऊंद वार्ट तान धन इन चिला तान अन्न अन बॉरा दा नोळदुन. वार्टुर अदिक आप्प धन इक नोळदुर अदिक आंदुर हापाळ अंजेदुर.
GEN 42:36 आग आंदुरव आप्प याकूब आंदुर से अंदुन, “नीव लॉकुर नानी बिना औलाद इन माळ कोंडीर, नोळी, यूसुफ ईतीदील, अदिक शिमोन भी बंदिदील, अदिक ईग नीव बिन्यामीन उक भी ओयोद चाहासतीर. ईव सप्पा परेशानीगोळ नान मा बंदाव.”
GEN 42:37 रूबेन तान वार्ट से अंदुन, “अगर ना आऊक नीन हाती तरतीदील, रा नान येढ्ढु पारगोळ इक कोंद बुळेत; नी आऊक नान कय दा कोट्टबुळ, ना आऊक नीन हाती मात पोहचुस बुळाईन.”
GEN 42:38 आव अंदुन, “नान पार नीन सांगुळ होगतीदील; यतिकी आऊन वार्ट सोतोग्यान, अदिक ईग आव आबना आन : इदुरसाटी याता हादी देल नी होद्या, अल अगर आऊन मा यातोदारा विपत्ती बंदीत, आग रा ना नीम कारण ई हाळाबाट्ट इन समय दा दुख इन सांगुळ अधोलोक दा होटोगाईन.”
GEN 43:1 कनान द्याश दा अकाल अदिक भी भयंकर आगतेला होत.
GEN 43:2 याग अद अनाज जो आंदुर मिस्त्र टु तंदीदुर, खतम आत आग आंदुर आप्प आंदुर से अंदुन, “मात होगकु नाम साटी येनारा अदिक भोजन वस्तु कोंडकु तरी.”
GEN 43:3 आग यहूदा आंदुर से अंदुन, “आ मंळसा नामी चेतावनी कोटकु अंदुन, ‘अगर नीम वार्ट नीम सांगुळ बरतीदील, रा नीव नान हाती बर सकतीदील.’
GEN 43:4 इदुरसाटी अगर नी नाम वार्ट उक नाम सांगुळ कळ्या, आग रा नाव नीन साटी भोजन वस्तु कोंडकु तंदेव;
GEN 43:5 लेकीन अगर नी आऊक कळुतिदील, रा नाव होगतीदील, यतिकी आ मंळसा नाम से अंदान, ‘अगर नीम वार्ट नीम सांगुळ ईरतीदील, रा नीव नान हाती बर सकतीदील.’”
GEN 43:6 इस्त्राएल याकूब से अंदुन, “नीव लॉकुर आ मंळसा से यती अंदीर, कि नीमव दुसरा वार्ट भी आन. नीव लॉकुर नान सांगुळ ईत्ता बुरा मात यती माळदीर?”
GEN 43:7 आंदुर अंदुर, “याग आ मंळसा नाम्द अदिक नामोर रिश्तेदारगोळ्द स्थिति इन बारा दा केळदुन, ‘येन नीमव आप्प ईगासताका जीत्ता आन?’ आग नाव ई प्रश्नगोळ अनुसार आऊन से वर्णन माळदेव; बाक नाव येन जानसेव कि आव अंदान, ‘तान वार्ट उक ईल तरी.’”
GEN 43:8 बाक यहूदा तान आप्प इस्त्राएल से अंदुन, “आ पार उक नान सांगुळ कळी, कि नाव होटोदेव; ईदुर देल नाव, अदिक नी, अदिक नाम चिकोर सायतीदिल, बल्‍की जित्ता ईत्तार.
GEN 43:9 ना विश्वास दिलुसतीन कि आव सुरक्षित ईत्तान. ना ईदुर्द उत्तरदायी ईराईन. अगर ना आऊक नीम हाती वापस तरतीदील रा सदा अन साटी नानी दोषी ठहरूस सकतीर.
GEN 43:10 अगर नीव नामी पयले होग गोळाईदिर रा भोजन इन साटी नाव लॉकुर येढ्ढ यात्रागोळ ईगासताका माळ कोमायदेव.”
GEN 43:11 आग आंदुर आप्प इस्त्राएल अंदुन “अगर सहीदा ईत्ता मात आद, रा ईद माळी; ई द्याश इन वळ्लीद वळ्लीद वस्तु दा टु येनारा तान बॉरा दा आ मंळसा अन साटी भेंट वई: ह्यांग कि थ्वाळासा ढीक, अदिक थ्वाळासा शयद, अदिक येनारा सुगन्ध द्रव्य, अदिक गन्धरस, पिस्ते, अदिक बादाम.
GEN 43:12 बाक तान तान सांगुळ येढ्ढ गुणा येक्‍कुल पैस्या वई; अदिक जो पैस्या नीम बॉरा दा ईटकु वापस माळकु आगीदव, अवरी भी वई; आग सकतद ईद भूल देल आगीदाद.
GEN 43:13 तान वार्ट उक भी सांगुळ हुडुकु आ मंळसा अन हाती मात्त होगी,
GEN 43:14 अदिक सर्वशक्तिमान परमेश्वर आ मंळसा अक नीम मा दयालु माळ्यान, यदुर देल कि आव नीम दुसरा वार्ट उक अदिक बिन्यामीन उक भी बर गोळुल: अदिक अगर ना निर्वंश आगतीन रा आगगोळी.”
GEN 43:15 आग आ मंळसागोळ अव भेंट, अदिक दुगणा पैस्या, अदिक बिन्यामीन उक भी सांगुळ हुळदुर, अदिक होट्टुर अदिक मिस्त्र दा पोहचुस्कु यूसुफ उन मुंद नीदुरदुर.
GEN 43:16 आंदुर सांगुळ बिन्यामीन उक नोळकु यूसुफ तान मान्या अन अधिकारीगोळ से अंदुन, “आ मंळसागोळी मान्या दा तरी, यतिकी आ लॉकुर हागुल नान सांगुळ भोजन माळ्‍यार.”
GEN 43:17 आग आव अधिकारी मंळसा यूसुफ उन अना अनुसार आ मंळसागोळी यूसुफ उन मान्या वोतुन.
GEN 43:18 याग आंदुर यूसुफ उन मान्या पोहचुस्कु आदुर आग आंदुर आपस दा अंजकु अनली कुरतुर, “जो पैस्या पयला घन नाम बॉरागोळ दा वापस माळकु आगीदव, अदुर्दा कारण नाव बुळ्क पोहचुस्कु आगेव; कि आव मंळसा नाम मा येरूल, अदिक नामी वश दा माळकु तान दास माळ्यान, अदिक नाम गधागोळी भी कसुल.”
GEN 43:19 आग आंदुर यूसुफ उन मान्या अन अधिकारी अन हाती होगकु मान्या अन दरवाजा मा होगकु ई प्रकार अनली कुरतुर,
GEN 43:20 “हे नाम प्रभु, याग नाव पयला घन अन्न कोमोर साटी बंदीदेव,
GEN 43:21 आग नाव सराय दा पोहचुस्कु तान बॉरागोळी तेरदेव, रा येन नोळदेव, कि ऊंद ऊंद मंळसा अन पुरा पुरा पैस्या आऊन बॉरा दा ईटकु आव; इदुरसाटी नाव आ पैस्यागोळी मात्त वापस तंदेव.
GEN 43:22 अदिक दुसरा पैस्या भी भोजन वस्तु कोमोर साटी तंदेव; नाव जानसालेव कि नाम बॉरागोळ दा नामव पैस्या याव ईट कोंडीदुन.”
GEN 43:23 आव अंदुन, “नीम्द वळ्लीद आगुल, अंजबाळी: नीम परमेश्वर, जो नीम आप्प उन भी परमेश्वर हुन, आवा नीमी नीम बॉरा दा धन कोटीदान, नीम पैस्या रा नानी सीकीगित.” बाक आव शिमोन उक तेगुकु आंदुर सांगुळ माळ बुट्टुन.
GEN 43:24 सेवक आ लॉकुरी यूसुफ उन मान्या वोतुन. आव आंदरी नीर कोट्टुन अदिक आंदुर तान काल तोळदुर. आगासताका आव आंदुर गधागोळी तीनली चारा कोट्टुन.
GEN 43:25 वार्टुर केळदुर कि आंदुर यूसुफ उन सांगुळ भोजन माळ्यार. इदुरसाटी आऊन साटी तान भेंट तैयार माळदुर दा हागुल ताका हतकु ईत्तुर.
GEN 43:26 यूसुफ मान्या बंदुन अदिक वार्टुर आऊक भेंट कोट्टुर जो आंदुर तान सांगुळ तंदीदुर. आग आंदुर जमीन मा बांगकु प्रणाम माळदुर.
GEN 43:27 यूसुफ आंदुर से आंदुर्द कुशल केळदुन. यूसुफ अंदुन, “नीम लॉकुर बाट्ट आप्प यार बारा दा नीव हेळीदीर, वळ्लेव रा आन? येन आव ईगासताका जीत्ता आन?”
GEN 43:28 वार्टुर उत्तर कोट्टुर, “महोदय, नाम आप्प वळ्लेव आन. आव ईगासताका जीत्ता आन” अदिक आंदुर मात्त यूसुफ उन मुंद बांगदुर.
GEN 43:29 आग यूसुफ तान वार्ट बिन्यामीन उक नोळदुन. अदिक यूसुफ अंदुन, “येन ईव नीम लॉकुरव सबसे श्याण्णेव वार्ट हुन यार्द बारा दा नीव हेळीदीर?” आग यूसुफ बिन्यामीन से अंदुन, “परमेश्वर नीन मा अनुग्रह माळुल.”
GEN 43:30 यूसुफ खोली दा टु व्हार्या ओळतेला होदुन. यूसुफ हापाळ चाहासोन कि आव तान वार्टुर से हापाळ प्रेम माळतान. आव वर्लदुर घाई आगोन, लेकीन आव ईला चाहासोन कि आऊन वार्ट आऊक वर्लतेला नोळुल. इदुरसाटी आव तान खोली दा ओळतेला होदुन अदिक अल्या वर्लदुन.
GEN 43:31 आग यूसुफ तान बाय तोळदुन अदिक व्हार्या बंदुन. आव तान तानीक संभाळसदुन अदिक अंदुन, “ईग भोजन माळोद समय आद.”
GEN 43:32 आग आंदुर यूसुफ उन साटी अलग, अदिक आऊन वार्टुर साटी अलग, अदिक जो मिस्त्री आऊन सांगुळ तीन तोगोर, आंदुर साटी भी अलग भोजन वाट्सदुर; इदुरसाटी कि मिस्त्री इब्रीगोळ सांगुळ भोजन माळ सकालुर, बल्‍की मिस्त्री हिंग माळोद घृणा सम्स तोगोर.
GEN 43:33 रा यूसुफ उन वार्ट आऊन मुंद, धोड्डेर पयले, अदिक श्याण्णेर हिंद, तान तान अवस्था अन अनुसार, क्रम देल कुर्सकु आदुर; ईद नोळकु आंदुर विस्मित आगकु आबुर दाबुर दी नोळली कुरतुर.
GEN 43:34 आग यूसुफ तान मुंद टु भोजन वस्तुगोळ नेगु नेगुकु आंदुर हाती कळुली कुरतुन, अदिक बिन्यामीन उक तान वार्टुर से अईद गुणा भोजन वस्तु सिक्त. अदिक आंदुर आऊन सांगुळ हापाळ तिंदुर कुळदुर.
GEN 44:1 आग आव तान मान्या अन अधिकारी इक आग्या कोट्टुन, “ई मंळसागोळ बॉरागोळ दा याट भोजन वस्तु बर सकताव आट तुमकोळी, अदिक ऊंद ऊंद मंळसा अन पैस्या अक आंदुरव बॉरा अन बाय मा ईट बुळी.
GEN 44:2 अदिक नांद चांदी इन कटोरा श्याण वार्ट उन बॉरा अन बाय मा आऊन अन्न अन पैस्या अन सांगुळ ईट बुळी.” यूसुफ उन ई आग्या अन अनुसार आव माळदुन.
GEN 44:3 दुसरा दिशी हापाळ व्हातर्या सप्पा वार्टुर तान गधागोळ सांगुळ तान द्याश इक वापस कळुकु आदुर.
GEN 44:4 याग आंदुर नगर इक बिट्ट बुट्टुर, यूसुफ तान सेवक से अंदुन, “होग अदिक आ लॉकुर्द पीछा माळ. आंदरी रोक्स अदिक आंदुर से अन, ‘नाव लॉकुर नीम लॉकुर प्रती वळ्लेव ईत्तेव. लेकीन नीव लॉकुर नाम मान्या काळ्लपनी यती माळदीर? नीव लॉकुर यूसुफ उन चांदी इन कटोरा यती कदुदीर?
GEN 44:5 येन अद ईद वस्तु आलच यदुर दा नान स्वामी आप्प आन, अदिक यदुर देल आव गुप्त मातगोळ भी माळतान? नी जो ईद माळ्या अद बुरा आद.’”
GEN 44:6 आग आव आंदरी हुळदुन, अदिक हिंगा मातगोळ आंदुर से अंदुन.
GEN 44:7 आंदुर आऊन से अंदुर, “हे नामव प्रभु, नी हिंग मातगोळ यती अनत्या? हिंग क्याल्सा माळेत नीन दासगोळ से दुर ईरूल.
GEN 44:8 नोळ जो पैस्या नाम बॉरागोळ बाय मा होटीत, याग नाव अदरी कनान द्याश टु तनकु नीनी वापस कोट्टेव, आग भला, नीन स्वामी इन मान्या टु नाव यातोदारा चांदी या व्हान्ना अन वस्तु ह्यांग कदू सकतेव?
GEN 44:9 नीन दासगोळ दा टु यारदारा हाती भी अद होट्टीत, आऊक कोंदकु आगुल, अदिक नाव भी तान आ प्रभु उन दास आगेदेव.”
GEN 44:10 आव अंदुन, “नीम्द अच अनोद सही, यार हाती भी अद कटोरा होट्टीत आव नान दास आदान; अदिक नीव लॉकुर निर्दोष ठहरूसीर.”
GEN 44:11 ईदुर मा आंदुर जल्दी तान तान बॉरागोळी ईळ्सकु जमीन मा ईटकु अवरी तेगुली कुरतुर.
GEN 44:12 आग आव ढुंढ्‍सली कुरतुन, अदिक श्याणेव उन हाती टु धोड्डेव उन बॉरा ताका खोज माळदुन: अदिक कटोरा बिन्यामीन उन बॉरा दा सीक्त.
GEN 44:13 आग आंदुर दुख दा तान तान कपळा हरदुर, अदिक तान तान गधागोळ लादस्कु नगर इक वापस होदुर.
GEN 44:14 याग यहूदा अदिक आऊन वार्ट यूसुफ उन मान्या पोहचुसदुर, अदिक यूसुफ अल्या ईरोन, आग आंदुर आऊन मुंद जमीन मा बिद्दुर.
GEN 44:15 यूसुफ आंदुर से अंदुन, “नीव लॉकुर ईद ह्यांग क्याल्सा माळीर? येन नीव जानसीर नान जसा मंळसा गुप्त मातगोळ इक जान्स सकतीन?”
GEN 44:16 यहूदा अंदुन, “नाव लॉकुर तान प्रभु से येन अंदेव? नाव येन अनकु तान तान इक निर्दोष ठहरूसेव? परमेश्वर नीन दासगोळ्द अधर्म इक हुडु कोंडान. नाव, अदिक यार हाती कटोरा होटाद आव भी, नाव सप्पा तान प्रभु उन दास अच हुयेव.”
GEN 44:17 आव अंदुन, “हिंग माळोद नान से दुर ईरूल, याता मंळसा अन हाती कटोरा होटाद, आवा नान दास आदान; अदिक नीव लॉकुर तान आप्प उन हाती कुशल देल होटोगी.”
GEN 44:18 आग यहूदा आऊन हाती होगकु अनली कुरतुन, “हे नान प्रभु, नीन दास उक तान प्रभु से ऊंद मात अनोद आग्या कोळ, अदिक नीन कोप नीन दास मा भळकुस बाळुल; यतिकी नी रा फिरौन उन घाई आय.
GEN 44:19 नान प्रभु तान दासगोळ से केळीदुन, ‘येन नीम आप्प या दुसरा वार्टुर आर?’
GEN 44:20 अदिक नाव नीनी उत्तर कोट्टेव, नामव ऊंद आप्प आन, आव हाळाबाट्ट आन अदिक नामव ऊंद श्याणेव वार्ट आन, नाम आप्प आऊन से हापाळ प्यार माळतान, यतिकी आऊन जनम आऊन बुळापा दा आगीत, आव आबना पार आन. नाम आप्प आऊन से हापाळ प्यार माळतान.
GEN 44:21 आग नी नाम से अंदीद, ‘आ वार्ट उक नान हाती तरी. ना आऊक नोळोद चाहसतीन.’
GEN 44:22 आग नाव तान प्रभु से अंदिदेव, ‘आव पार बर सकालुन. आव तान आप्प उक बीळ सकालुन, ईदारा आऊन आप्प सोतोदान.’
GEN 44:23 अदिक नी तान दासगोळ से अंद, ‘अगर नीम श्याण वार्ट नीम सांगुळ बरतीदील, रा नीव नान हाती बाक बर सकतीदिल.’
GEN 44:24 इदुरसाटी नाव लॉकुर तान आप्प उन हाती होदेव अदिक नी जो टान प्रभु उन बारा दा अंदीद, आऊक हेळदेव.”
GEN 44:25 “आग नाम आप्प अंदुन, ‘मात्त होगकु नाम साटी थ्वाळासा भोजन वस्तु कोंडकु तरी.’
GEN 44:26 अदिक नाव लॉकुर तान आप्प से अंदेव, नाव लॉकुर तान सब से श्याणेव वार्ट उन बीना होग सकालेव, शासक अंदान कि आव आगासताका नाम लॉकुरी अनाज मारतीदिल यागासताका आव नाम श्याणेव वार्ट उक नोळ कोमालुन.”
GEN 44:27 आग नान आप्प नाव लॉकुर से अंदुन, “नीव जान्सतीर कि नान हिंग्स राहेल नानी येढ्ढ पार कोट्टुर.
GEN 44:28 ना ऊंद पार उक दुर होग गोट्टीन अदिक आव आळी दाकळव जनावर द्वारा सोतोदुन अदिक आग टु ना आऊक नोळीदील.
GEN 44:29 अगर नीव लॉकुर नान दुसरा पार उक नान से दुर वोतीर अदिक आऊक येनारा आगेतद रा नानी ईट दुख आदीत कि ना सोतोगाईन.”
GEN 44:30 इदुरसाटी अगर ईग नाव तान सब से श्याणेव वार्ट उन बीना मान्नी होदेव आग नाव आप्प उक ईद नोळोद बिद्दीत, ईव श्याणेव पार नाम आप्प उन जीवन दा सब से येक्‍कुल महत्व ईटतान.
GEN 44:31 याग आव नोळ्यान कि श्याणेव पार नाम सांगुळ हैलेच रा आव सोतोदान अदिक ईद नाम लॉकुर्द दोष ईत्तीत. नाव लॉकुर तान आप्प उन हापाळ दुख अदिक सायोद कारण आदेव.
GEN 44:32 “ना श्याण पार उन जिम्मेदारी ताकोंडीन, ना तान आप्प से अंदीन, ‘अगर ना आऊक नीन हाती वापस तरतीदील रा नी नानी पुरा जीवन तीम दोषी ठहरूस सकत्या.’
GEN 44:33 इदुरसाटी ईग ना नीन से बेळतीन, अदिक नीन से प्रार्थना माळतीन कि कृपा माळकु श्याण पार उक तान वार्टगोळ सांगुळ वापस होग गोळ अदिक ना ईल ईराईन अदिक नीन दास आगाईन.
GEN 44:34 ना तान आप्प उन हाती वापस होग सकालीन अगर नाम सांगुळ श्याणेव वार्ट ईरतीदील, ना ईद मात देल हापाळ अंजकु आईन कि नान आप्प उन सांगुळ येन आदीत.”
GEN 45:1 आग यूसुफ आ सप्पा मुंदुर मुंद, जो आऊन आस पास नीदुरकु ईरोर, तान इक अदिक रोक्स सकीदील; अदिक कारूकु अंदुन, “नान आस पास इन सप्‍पा लॉकुर इक व्हार्या माळ बुळी.” वार्टुर मुंद खुद इक प्रगट माळा वती यूसुफ उन सांगुळ अदिक याऊ ईला ईरोन.
GEN 45:2 आग आव चिल्ळास चिल्ळासकु वर्लली कुरतुन; अदिक मिस्त्रीगोळ केळदुर, अदिक फिरौन उन मान्यागोळ लॉकुरी ईदुर्द समाचार सीक्त.
GEN 45:3 आग यूसुफ तान वार्टुर से अनली कुरतुन, “ना यूसुफ हुईन, येन नान आप्प ईगासताका जित्ता आन?” ईदुर्द उत्तर आऊन वार्टुर कोळ सकीदील; यतिकी आंदुर आऊन मुंद घबरूसेदुर.
GEN 45:4 बाक यूसुफ तान वार्टुर से अंदुन, “नान हाती बरी.” ईद केळकु आंदुर हाती होदुर. बाक आव अंदुन, “ना नीम वार्ट यूसुफ हुईन, यारी नीव मिस्त्र बरावाळा अक मार बुटीदिर.
GEN 45:5 ईग नीव लॉकुर पचतासबाळी, अदिक नीव जो नानी ईल मार बुट्टीर, ईदुर से उदास आगबाळी; यतिकी परमेश्वर नीम जीव उळसोर साटी नानी नीम मुंद कळु कोंडान.
GEN 45:6 यतिकी ईग येढ्ढ वर्ष टु ई द्याश दा अकाल आद; अदिक ईग अईद वर्ष अदिक हिंगा ईत्तव यतिकी अऊर दा ना ईग नांगर नळदीत अदिक न अनाज कडुकु आदीत.
GEN 45:7 परमेश्वर नानी नीम मुंद इदुरसाटी कळ्यान कि नीव पृथ्वी मा जीत्ता ईरूल, अदिक नीम जीव इन ऊळोर से नीम वंश वाळुसुल.
GEN 45:8 ई रीति देल ईग नान इक ईल कळावाळेर नीव आलच, परमेश्वर अच ठहरूसदुन; अदिक आवा नानी फिरौन उन आप्प घाई, अदिक आऊन सप्पा मान्ना अन स्वामी, अदिक सप्पा मिस्त्र द्याश इन अधिकारी ठहरूस बुटान.
GEN 45:9 ईग जल्दी नान आप्प उन हाती होगकु अनी, ‘नीन पार यूसुफ ई प्रकार अनेत्यान, कि परमेश्वर नानी सप्पा मिस्त्र द्याश इन अधिकारी ठहरूस्यान; इदुरसाटी नी नान हाती बीना समय माळकु होटबर.
GEN 45:10 अदिक नीन निवास गोशेन द्याश दा ईत्तीत, अदिक नी पारगोळ, नातुगोळ, व्हात-मर्रीगोळ, गोस-वस्‍तागोळ, अदिक तान सप्पा येनारा अन सांगुळ नान हाती ईत्या.
GEN 45:11 अदिक अकाल ईनव अईद वर्ष अदिक ईत्तव, अऊर दा ना अल्या नींद पालन पोषण माळाईन; हिंग आगबाळुल कि नी, अदिक नींद घराना, बल्‍की यास नीनोर जनावर आव, आंदुर हसु देल सायुल.’
GEN 45:12 अदिक नीव तान कण्ण देल नोळेतीर, अदिक नान वार्ट बिन्यामीन भी तान कण्‍ण देल नोळेत्यान कि जो नाम से मातगोळ माळेत्यान आव यूसुफ हुन.
GEN 45:13 नीव नान सप्पा वैभव इन, जो मिस्त्र दा आद अदिक जो येनारा नीव नोळदीर, आ सप्पा अन नान आप्प से वर्णन माळेतीर; अदिक तुरन्त नान आप्प उक ईल तरेतीर.”
GEN 45:14 अदिक आव तान वार्ट बिन्यामीन उक याद्दा देल हचकु वर्लदुन; अदिक बिन्यामीन भी आऊन याद्दी इक लपटुसकु वर्लदुन.
GEN 45:15 आव तान सप्पा वार्टगोळी चुम्सकु आंदुर साटी वर्लदुन, अदुर बाद्दा आऊन वार्टुर आऊन सांगुळ मातगोळ हेळली कुरतुर.
GEN 45:16 ई मात इन समाचार कि यूसुफ उन वार्टुर बंदार, फिरौन उन भवन ताका पोहचुसेत, अदिक ईदुर देल फिरौन अदिक आऊन कर्मचारी खुश आदुर.
GEN 45:17 इदुरसाटी फिरौन यूसुफ से अंदुन, “तान वार्टुर से अन कि ऊंद क्याल्सा माळ्‍यार: आंदरी याट अनाज हततद तान जनावरगोळ मा मंळ्सकु, कनान द्याश इक वापस होगुल.
GEN 45:18 अदिक तान आप्प अदिक तान तान मान्या अन लॉकुरी हुडुकु नान हाती बंदार: अदिक मिस्त्र द्याश दा जो येनारा भी वळ्लीद से वळ्‍लीद आद अद ना नीमी कोळाईन, अदिक नीमी द्याश इन वळ्लीद से वळ्लीद पदार्थ तीनली सीक्कीत.
GEN 45:19 अदिक नीनी आग्या सिक्याद, ‘नीव ऊंद क्याल्सा माळी कि मिस्त्र द्याश टु तान चिकोरी अदिक आर्तेर साटी गाळागोळ वोई, अदिक तान आप्प उक तरी.
GEN 45:20 अदिक तान सामान इन चिन्ता माळ बाळेतीर; यतिकी सप्‍पा मिस्त्र द्याश दा जो येनारा वळ्लीद से वळ्लीद आद अद नीम्द हुन.’”
GEN 45:21 इस्त्राएल उन पारगोळ हांग अच माळदुर; अदिक यूसुफ फिरौन उन आग्या अनुसार आंदरी गाळागोळ कोट्टुन, अदिक हादी साटी भोजन इन सामान भी कोट्टुन.
GEN 45:22 आंदुर दा टु ऊंद ऊंद मंळसा अक रा ऊंद ऊंद जोळा कपळा भी कोट्टुन; अदिक बिन्यामीन उक मुर सौ रूपया अन बेळ्ली नव सिक्का अदिक अईद जोळा कपळा कोट्टुन.
GEN 45:23 तान आप्प उन हाती आव जो कळुदुन अद ईद हुन, मतलब मिस्त्र अन वळ्लीद वस्तुगोळ देल तुमकु हत्त गधा, अदिक अनाज अदिक रोट्टी अदिक आऊन आप्प उन हादी साटी भोजन वस्तु देल तुमकु हत्त आर्त गधागोळ.
GEN 45:24 आग आव तान वार्टुरी सार माळदुन, अदिक आंदुर नळदुर; अदिक आव आंदुर से अंदुन, “हादी मा येल्यारा झगळा माळबाळेतीर.”
GEN 45:25 मिस्त्र टु नळुकु आंदुर कनान द्याश दा तान आप्प याकूब उन हाती पोहचुसदुर.
GEN 45:26 अदिक आऊन से ईद वर्णन माळदुर, “यूसुफ ईगासताका जीत्ता आन, अदिक सप्पा मिस्त्र द्याश मा प्रभुता आवा माळतान.” लेकीन आव आंदुर मा विश्वास माळीदिल, अदिक आव तान तान दा ईला ईरोन.
GEN 45:27 आग आंदुर तान आप्प याकूब से यूसुफ उन सप्पा मातगोळ, जो आव आंदुर से अंदीदुन, अंदुर; याग आव आ गाळागोळ इक नोळदुन, जो यूसुफ आऊक तरोर साटी कळीदुन, आग आऊन चित्त थामसेत.
GEN 45:28 अदिक इस्त्राएल अंदुन, “बस, नान पार यूसुफ ईगासताका जीत्ता आन; ना तान मृत्यु से पयले होगकु आऊक नोळाईन.”
GEN 46:1 आग इस्त्राएल तान सप्पा येनारा हुडुकु बेर्शेबा अक होदुन, अदिक अल तान आप्प इसहाक उन परमेश्वर उक बलिदान येर्सदुन.
GEN 46:2 आग परमेश्वर इस्त्राएल से ईळ्लक इक दर्शन दा अंदुन, “हे याकूब हे याकूब.” आव अंदुन, “येन आग्या.”
GEN 46:3 आव अंदुन, “ना परमेश्वर नीन आप्प उन परमेश्वर हुईन, नी मिस्त्र होगली अंजबाळ; यतिकी ना नीन से अल ऊंद धोळ्द जाती माळाईन.
GEN 46:4 ना नीन सांगुळ सांगुळ मिस्त्र अक बरतीन; अदिक ना नीनी अल बाक सही दा तराईन; अदिक यूसुफ तान कय देल नीन कण्ण इक बंद माळ्यान.”
GEN 46:5 आग याकूब बेर्शेबा टु नळदुन; अदिक मिस्त्र ताका यात्रा माळदुन, इस्त्राएल उन चिकोर, मतलब याकूब इन चिकोर तान आप्प, तान हिंग्सगोळ अदिक तान सप्‍पा चिकोर इक मिस्त्र तंदुर, आंदुर फिरौन द्वारा कळुकु आगीदव आ गाळागोळ देल यात्रा माळदुर.
GEN 46:6 आंदुर तान व्हात मर्र, वस्ता गोस, अदिक कनान द्याश दा तान जमा माळ्द सप्पा धन इक हुडुकु मिस्त्र दा बंदुर.
GEN 46:7 अदिक याकूब तान पोर पारगोळ, नातु नातीगोळ, मतलब तान वंश इक तान सांगुळ मिस्त्र दा तंदुन.
GEN 46:8 याकूब उन सांगुळ जो इस्त्राएली, मतलब आऊन पारगोळ, नातीगोळ, पयले मिस्त्र दा बंदुर, आंदुर हेसुर ईव आव याकूब उन धोड्डेव पार रूबेन ईरोन.
GEN 46:9 अदिक रूबेन उन पार हनोक, पल्लू, हेस्त्रोन, अदिक कर्मी ईरव.
GEN 46:10 शिमोन उन पार, यमूएल, यामीन, ओहद, याकीन, सोहर, अदिक ऊंद कनानी आर्त से पैदा आगीदुन शाऊल भी ईरोन.
GEN 46:11 लेवी इन पार गेर्शोन, कहात, अदिक मरारी ईरोर.
GEN 46:12 यहूदा अन एर, ओनान, शेला, पेरेस, अदिक जेरह हेसुर इन पारगोळ आगीदुर; लेकीन एर अदिक ओनान कनान द्याश दा सोतोगीदुर; अदिक पेरेस उन पारगोळ, हेस्रोन अदिक हामुल ईरोर.
GEN 46:13 इस्साकार उन पारगोळ, तोला, पुब्बा, योब अदिक शिम्रोन ईरोर.
GEN 46:14 जबूलून उन पारगोळ, सेरेद, एलोन, अदिक यहलेल ईरोर.
GEN 46:15 लियाह अन पारगोळ जो याकूब देल पद्‍दनराम दा पैदा आगीदुर, आंदुर पारगोळ नातीगोळ ईंदुर अच ईरोर, अदिक ईंदुर से येक्‍कुल आव आंदुर सांगुळ ऊंद पोर दीना अक जनम कोटीदुन. ईल ताका रा याकूब उन सप्पा वंश वाळेर तैतीस लॉकुर आदुर.
GEN 46:16 बाक गाद इन पारगोळ, सपोन, हाग्गी, शूनी, एसबोन, एरी, अरोदी, अदिक अरेली ईरोर.
GEN 46:17 आशेर इन पारगोळ, यिम्ना, यिक्ष्वा, यिक्ष्वी, अदिक बरीआ ईरोर, अदिक आंदुर आकतींग सेरह ईरोर; अदिक बरीआ अन पारगोळ, हेबेर अदिक मल्कीएल ईरोर.
GEN 46:18 जिल्‍पा, यारी लाबान तान पोर लियाह अक कोटीदुन, आऊन पारगोळ नातीगोळ पयले ईंदुर अच ईरोर; अदिक आऊन द्वारा याकूब उन सोलह लॉकुर पैदा आदुर.
GEN 46:19 बाक याकूब उन हिंग्स राहेल इन पारगोळ यूसुफ अदिक बिन्यामीन ईरोर.
GEN 46:20 अदिक मिस्त्र द्याश दा ओन नगर इन याजक पोतीपेरा अन पोर आसनत देल यूसुफ उन पारगोळ पैदा आदुर, मतलब मनश्शे अदिक एप्रैम.
GEN 46:21 बिन्यामीन उन पारगोळ, बेला, बेकेर, अश्बेल, गेरा, नामान, एही, रोश, मूप्पीम, हूप्पीम, अदिक अर्द ईरोर.
GEN 46:22 राहेल इन पारगोळ जो याकूब से पैदा आदुर आंदुरोर ईंदुर अच पारगोळ ईरोर; आऊन ई सप्पा पारगोळ नातीगोळ चौदहा औलाद आदुर.
GEN 46:23 बाक दान उन पार हूशीम ईरोन.
GEN 46:24 नप्ताली इन पारगोळ, यहसेल, गूनी, येसेर, अदिक शिल्लेम ईरोर.
GEN 46:25 बिल्हा दासी, यारी लाबान तान पोर राहेल इक कोट्टुन, आऊन पारगोळ, नातीगोळ ईंदुर अच हुळ; आऊन द्वारा याकूब उन वंश दा येळ औलाद पैदा आदुर.
GEN 46:26 याकूब उन निज वंश इन प्राणी जो मिस्त्र दा बंदुर, आंदुर आऊन सास्सागोळी बिटकु सप्पा छियासठ लॉकुर आदुर.
GEN 46:27 अदिक यूसुफ उन पारगोळ, जो मिस्त्र दा आऊन से पैदा आदुर, आंदुर येढ्ढ प्राणी ईरोर; ई प्रकार याकूब उन घराना अन लॉकुर जो मिस्त्र दा बंदुर आंदुर सप्पा मुंदुर सत्तर आदुर.
GEN 46:28 बाक आव यहूदा अक मुंद यूसुफ उन हाती कळुदुन कि आव आऊक गोशेन इक हाती तोरस्यान; अदिक आंदुर गोशेन द्याश बंदुर.
GEN 46:29 आग यूसुफ तान रथ तेगुकु तान आप्प इस्त्राएल उन सांगुळ मुलाकात माळोर साटी गोशेन द्याश इक होदुन, अदिक आऊन से मुलाकात माळकु आऊन याद्दी अक चिपकुसोन, अदिक हापाळ समय ताका आऊन याद्दी इक चिपकुसकु वर्लतेला ईत्तुन.
GEN 46:30 आग इस्त्राएल यूसुफ से अंदुन, “ना ईग सोतोगाईन भी रा खुश आईन, यतिकी नीनी जीत्ता नोळदीन अदिक नीन बाय नोळ कोंडीन.”
GEN 46:31 आग यूसुफ तान वार्टुर से अदिक तान आप्प उन घराना सांगुळ अंदुन, “ना फिरौन उक होगकु ईद समाचार कोळाईन, ‘नान वार्टुर अदिक नान आप्प उन घराना अन सप्पा लॉकुर, जो कनान द्याश दा ईर तोगोर, आंदुर नान हाती होट्ट बंदार;
GEN 46:32 अदिक आंदुर चरवाहा आर, यतिकी आंदुर जनावरगोळी पाल्सतार; इदुरसाटी आंदुर तान मर्र म्यांडा, गोसी वस्ता, अदिक जो येनारा आंदुर्द आद, सप्‍पा तंदार.’
GEN 46:33 याग फिरौन नीमी कारूकु केळ्यान, ‘नीम्द क्याल्सा धंदा येन आद?’
GEN 46:34 आग अनेतीर, ‘नीन दास लड़कपन टु हुडुकु ईंद ताका जनावरगोळी पाल्सतेला बंदेव, बल्‍की नाम हाळाबाट्टगोळ भी हिंगा माळतेला बंदार.’ ईदुर देल नीव गोशेन द्याश दा ईर सकीर; यतिकी सप्‍पा चरवाहागोळ से मिस्त्री लॉकुर सिट्ट माळतार.”
GEN 47:1 आग यूसुफ फिरौन उन हाती होगकु ईद समाचार कोट्टुन, “नान आप्प अदिक नानोर वार्टुर, अदिक आंदुर जनावरगोळ अदिक जो येनारा आंदुर्द आद, सप्पा कनान द्याश टु होट्ट बंदाद; अदिक ईग रा आंदुर गोशेन द्याश दा आर.”
GEN 47:2 बाक आव तान वार्टुर दा टु अईद मुंदुरी हुडुकु फिरौन उन मुंद नीदरूसदुन.
GEN 47:3 फिरौन आऊन वार्टुर से केळदुन, “नीम्द क्याल्सा धंदा येन आद?” आंदुर फिरौन से अंदुर, “नीन दास चरवाहा आर, अदिक नाम पुर्वज भी चरवाह ईरोर.”
GEN 47:4 बाक आंदुर फिरौन से अंदुर, “नाव ई द्याश दा परदेशी घाई ईरली बंदेव; यतिकी कनान द्याश दा भारी अकाल इन कारण नीन दासगोळ मर्र म्यांडागोळ साटी चारा ईतीदील; इदुरसाटी तान दासगोळी गोशेन द्याश दा ईरोद आग्या कोळ.”
GEN 47:5 आग फिरौन यूसुफ से अंदुन, “नीन आप्प अदिक नीन वार्टुर नान हाती होट्ट बंदार,
GEN 47:6 अदिक मिस्त्र द्याश नीन मुंद बिदकु आद; ई द्याश इन जो सब से वळ्लीद भाग ईतीदाद, अदुर दा तान आप्प अदिक तान वार्टुरी बसुसकोम, मतलब आंदुर गोशेन द्याश दा अच ईरूल; अदिक अगर नी जान्सतीद्या, कि आंदुर दा टु मेहनती मंळसा आर रा आंदरी नान जनावरगोळ अधिकारी माळ कोम.”
GEN 47:7 आग यूसुफ तान आप्प याकूब उक वतकु फिरौन उन हाती नीदरूसदुन; अदिक याकूब फिरौन उक आशीर्वाद कोट्टुन.
GEN 47:8 आग फिरौन याकूब उक केळदुन, “नी यास वर्ष ईनव आय?”
GEN 47:9 याकूब फिरौन से अंदुन, “ना ऊंद सौ तीस वर्ष परदेशी आगकु तान जीवन बितुस कोंडीन; नान जीवन इन दिन थ्वाळासा अदिक दुख देल भी तुमकु ईरव, अदिक नान आप्प दादागोळ परदेशी आगकु यास दिन ताका जीत्ता ईत्तुर आस दिन इनव ना आगली का आईन.”
GEN 47:10 अदिक याकूब फिरौन उक आशीर्वाद कोट्टुन अदिक आऊन हाती टु होटोदुन.
GEN 47:11 आग यूसुफ तान आप्प अदिक वार्टुरी बसुस बुट्टुन, अदिक फिरौन उन आग्या अन अनुसार मिस्त्र द्याश इन वळ्लीद से वळ्लीद भाग दा, मतलब रामसेस हेसुर इन प्रदेश दा, जागा कोटकु आंदरी सौप्स कोंडुन.
GEN 47:12 अदिक यूसुफ तान आप्प उन, अदिक तान वार्टुर्द, अदिक आप्प उन सप्पा घराना अन, ऊंद ऊंद इन बाल बच्चागोळ्द गिनती इन अनुसार, अनाज कोटकु आंदुर्द पालन पोषण माळली कुरतुन.
GEN 47:13 आ सप्‍पा द्याश दा तीनोर साटी येनु ईतीदील; यतिकी अकाल हापाळ भारी ईरोद, अदिक अकाल इन कारण मिस्त्र अदिक कनान द्याश त्रस्त आगेदव.
GEN 47:14 अदिक यास पैस्या मिस्त्र अदिक कनान द्याश दा ईरोद, सप्पा अक यूसुफ आ अनाज इन बदला, जो आऊन निवासी कोम तोगोर, जमा माळकु फिरौन उन मान्ना दा पोहचुसदुर.
GEN 47:15 याग मिस्त्र अदिक कनान द्याश इन पैस्या खतम आगेत, आग मिस्त्री लॉकुर यूसुफ उन हाती बंदकु अनली कुरतुर, “नामी भोजन वस्तु कोळ; येन नाव पैस्या अन ईला ईत्तुर देल नीन ईत्तुर मा सोतिदेव?”
GEN 47:16 यूसुफ अंदुन, “अगर पैस्या हैलेच रा तान जनावरगोळ कोट्ट बुळी, अदिक ना अऊर बदला दा नीमी तिनली कोळाईन.”
GEN 47:17 आग आंदुर तान जनावरगोळी यूसुफ उन हाती तंदुर; अदिक यूसुफ आंदरी आंदुरव घ्वाळागोळ, मर्रगोळ, गोसीगोळ, अदिक गधागोळ बदला तीनली कोळली कुरतुन: आ वर्ष दा आव सप्पा जातीगोळ जनावरगोळ बदला भोजन कोटकु अऊर्द पालन पोषण माळतेला ईत्तुन.
GEN 47:18 अद वर्ष रा हिंगा होटोत; आग मुंदळोद वर्ष दा आंदुर आऊन हाती बंदकु अंदुर, “नाव तान प्रभु से ईद मात होचकु ईटतीदिल कि नाम्द पैस्या खतम आगेग्याद, अदिक नामव सप्पा प्रकार इन जनावरगोळ नाम प्रभु नव आगेग्याव; इदुरसाटी ईग नाव नाम प्रभु उन मुंद नाम्द शरीर अदिक जागा अक बिटकु अदिक येनु ईतीदील.
GEN 47:19 नीन नोळतेला अच नाव सही दा सोतोदेव, लेकीन अगर नी नामी भोजन वस्तु कोळत्या रा नाव फिरौन उक तान जमीन कोट्टेव अदिक आऊन दास आगेदेव, नामी बींजा कोळी यवरी नाव बोऊस सक्केव. आग नाव लॉकुर जीत्ता ईत्तेव अदिक सायतीदिल अदिक जमीन नाम लॉकुर साटी मात्त अनाज उगुसीत.”
GEN 47:20 आग यूसुफ मिस्त्र अन सप्पा जमीन इक फिरौन उन साटी कोंड कोंडुन; यतिकी आ भयंकर अकाल इन बिद्दुर देल मिस्त्रीगोळी तान तान केई मारोद बीत्त, ई प्रकार सप्पा जमीन फिरौन उन आगेत;
GEN 47:21 अदिक ऊंद छोर टु हुडुकु दुसरा छोर ताका सप्पा मिस्त्र द्याश दा जो प्रजा ईर तोगोद, अदरी आव नगरगोळ दा तनकु बसुस कोंडुन.
GEN 47:22 लेकीन याजकगोळ्द जमीन आव कोंडीदिल यतिकी याजकगोळ साटी फिरौन उन दी टु नित्य भोजन इन बंदोबस्त ईरोद, अदिक नित्य जो भोजन फिरौन आंदरी कोळ तोगोन अदरी आंदुर तीन तोगोर, ई कारण आंदरी तान जमीन मारोद बिदीदील.
GEN 47:23 आग यूसुफ प्रजा अन लॉकुर से अंदुन, “केळी, ना ईंद इन दिशी नीमी अदिक जमीन इक भी फिरौन उन साटी कोंड कोंडीन; नोळी नीम साटी ईल बींजा आद, ईदरी जमीन दा बोऊसी.
GEN 47:24 अदिक जो येनारा उपज आदीत अदुर्द पाचवा अंश फिरौन उक कोळेतीर, बाकी नाक अंश नीमव ईत्तव कि नीव अदरी तान केई दा बोऊसी, अदिक तान तान बाल बच्चा अदिक तान मान्या नोर अन्य लॉकुर सांगुळ तीनुल.”
GEN 47:25 आंदुर अंदुर, “नी नामी ऊळ्स बुट्या; नाम प्रभु उन अनुग्रह अन नजर नाम मा बन्सकु ईरूल, अदिक नाव फिरौन उन दास आगकु ईत्तेव.”
GEN 47:26 ई प्रकार यूसुफ मिस्त्र अन जमीन इन बारा दा हिंग नियम ठहरूसदुन, जो ईंद ताका नळेत्याद कि अईवा अंश फिरौन उक सीकुल; केवल याजकगोळ्द जमीन फिरौन उन आगीदील.
GEN 47:27 इस्त्राएली मिस्त्र अन गोशेन द्याश दा ईरली कुरतुर; अदिक अल ईद जमीन आंदुर वश दा ईरोद; अदिक आंदुर फुलुसदुर अदिक हापाळ वाळुसदुर.
GEN 47:28 मिस्त्र द्याश दा याकूब सत्रह वर्ष जीत्ता ईत्तुन: ई प्रकार याकूब उन उमर ऊंद सौ सैंतालीस वर्ष इन आत.
GEN 47:29 याग इस्त्राएल उन सायोद दिन हाती होट्ट बत्त, आग आव तान पार यूसुफ उक कारसुसकु अंदुन, “अगर नीन अनुग्रह नान मा ईतीदाद, रा तान कय नान जांघ मा ईटकु कसम तीन कि नी नान सांगुळ कृपा अदिक सच्चाई इन ईद क्याल्सा माळ्या कि नानी मिस्त्र दा मुण्‍ण कोळतीदील.”
GEN 47:30 याग ना तान आप्प दादागोळ सांगुळ सोतोगाईन, आग नी नानी मिस्त्र टु नेगुकु आंदुर्दा कब्रस्तान दा ईट्या, आग यूसुफ अंदुन, “ना नीन वचन इन अनुसार माळाईन.”
GEN 47:31 बाक आव अंदुन, “नान से कसम तीन.” अत: आव आऊन से कसम तीनदुन. आग इस्त्राएल व्हर्स इन ताल्ला अन दी ताल्ला बांग्सकु प्रार्थना माळदुन.
GEN 48:1 ई मातगोळ बाद्दा यावारा यूसुफ से अंदुन, “केळ, नीन आप्प बिमार आन.” आग आव मनश्शे अदिक एप्रैम हेसुर नोर तान येढ्ढु चिकोरी सांगुळ हुडुकु आऊन हाती होदुन.
GEN 48:2 यावारा याकूब उक हेळ बुट्टुन, “नीन पार यूसुफ नीन हाती बरेत्यान,” आग इस्त्राएल तान तान इक संभाळसकु व्हर्स मा कुरतोदुन.
GEN 48:3 अदिक याकूब यूसुफ से अंदुन, “सर्व सर्वशक्तिमान परमेश्वर कनान द्याश इन लूज नगर इन हाती नानी दर्शन कोटकु आशीष कोट्टुन,
GEN 48:4 अदिक अंदुन, ‘केळ, ना नीनी फलवन्त माळकु वाळुसाईन, अदिक नीनी राज्य राज्य अन मंडली इन मूल मंळसा माळाईन, यदुर देल कि अद सदा ताका आंदुर्द तान खुद इन जमीन आगकु ईरूल.’
GEN 48:5 अदिक ईग नीन येढ्ढु पारगोळ, जो मिस्त्र दा नान बरोर से पयले पैदा आग्यार, आंदुर नानोर अच ठहरूस्यार; मतलब या रीति देल रूबेन अदिक शिमोन नानोर आर, अदा रीती देल एप्रैम अदिक मनश्शे भी नानोर ठहरूस्यार.
GEN 48:6 अदिक आंदुर बाद्दा नीनोर जो सन्तान पैदा आदार, आंदुर नीनोर रा ठहरूस्यार; लेकीन बटवारा अन समय आंदुर तान वार्टुर अच वंश दा आळकु आदार.
GEN 48:7 याग ना पद्दान टु बर तोगीन, आग एप्राता पोहचुसोर थ्वाळासा पयले राहेल कनान द्याश दा, हादी मा, नान मुंद सोतोदुर; अदिक ना आकी अल्या, मतलब एप्राता जो बैतलहम भी कहलुसतद, अदा हादी मा मुण्ण कोट्टीन.”
GEN 48:8 आग इस्त्राएल यूसुफ उन पारगोळी नोळदुन, आव केळदुन, “ई पारगोळ यार उर?”
GEN 48:9 यूसुफ तान आप्प से अंदुन, “ईंदुर नानोर पारगोळ उर. ईंदुर आ पारगोळ उर यारी परमेश्वर नानी कोटान.” इस्त्राएल अंदुन, “तान पारगोळी नान हाती तर. ना आंदरी आशीर्वाद कोळाईन.”
GEN 48:10 इस्त्राएल बाट्ट ईरोन अदिक आऊन कण्णगोळ वळ्लेव ईला ईरव, इदुरसाटी यूसुफ तान पारगोळी तान आप्प उन हाती वोतुन, याकूब पारगोळी चुम्सदुन अदिक याद्दी चीपकुसदुन.
GEN 48:11 आग इस्त्राएल यूसुफ से अंदुन, “ना यागलु ईला सोचीदिन कि ना नीम्द बाय बाक यागलु नोळाईन, लेकीन नोळी, परमेश्वर नीनी अदिक नीन पारगोळी भी नानी तोर्सदुन.”
GEN 48:12 आग यूसुफ पारगोळी याकूब उन क्वारा दा टु हुळदुन अदिक आंदुर आऊन आप्प उन मुंद प्रणाम माळोर साटी बांगदुर.
GEN 48:13 यूसुफ एप्रैम उक तान उजवा दी माळदुन अदिक मनश्शे अक तान डाक्या दी, ई प्रकार एप्रैम इस्त्राएल उन उजवा दी ईरोन अदिक मनश्शे याकूब उन डाक्या दी ईरोन.
GEN 48:14 लेकीन इस्त्राएल तान कय इन दिशा बदलुसकु तान उजवा कय श्याण पार एप्रैम उन ताल्ला मा ईटदुन अदिक आग डाक्या कय इक याकूब उन धोड्डेव पार मनश्शे अन ताल्ला मा ईटदुन, यतिकी मनश्शे अन जनम पयले आगीत.
GEN 48:15 अदिक याकूब यूसुफ उक आशीर्वाद कोट्टुन अदिक अंदुन, “नान पुर्वज अब्राहम अदिक इसहाक नाम परमेश्वर उन उपासना माळदुन अदिक आवा परमेश्वर नान जीवन इक संभाळसावाळा बन्सदुन.
GEN 48:16 अदिक आवा दूत नानी सप्पा कष्टगोळ देल उळ्सदुन, अदिक नान प्रार्थना आद कि ई पारगोळी आव आशीर्वाद कोळुल, ईग ई पारगोळी नान हेसुर सिक्‍कीत, आंदरी नाम पुर्वज अब्राहम अदिक इसहाक उन हेसुर सिक्‍कीत, ना प्रार्थना माळतीन कि आंदुर ई धरती मा धोड्डेव परिवार अदिक राष्ट्र आदार.”
GEN 48:17 यूसुफ नोळदुन कि आऊन आप्प एप्रैम उन ताल्ला मा उजवा कय ईट्यान, आव यूसुफ उन खुश माळ सकीदील, यूसुफ तान आप्प उन कय हुळदुन, आव आऊन कय एप्रैम उन ताल्ला मा टु सरकुसकु मनश्शे अन ताल्ला मा ईटोद चाहासोन.
GEN 48:18 अदिक यूसुफ तान आप्प से अंदुन, “हे आप्पा, हिंग ईला; यतिकी धोळ पार ईवा हुन; तान उजवा कय ईऊन ताल्ला मा ईट्ट.”
GEN 48:19 लेकीन आऊन आप्प अंदुन, “पारा, ना जान्सतीन, मनश्शे अन जनम पयले आग्याद अदिक आव महान आदान, आव हापाळ सा लॉकुरव आप्प भी आदान, लेकीन श्याण्णेव वार्ट धोड्डेव वार्ट उन से धोड्डेव आदान अदिक श्याण्णेव वार्ट उन परिवार हापाळ धोळ्द आदीत.”
GEN 48:20 ई प्रकार इस्त्राएल आ दिशी आंदरी आशीर्वाद कोट्टुन, आव अंदुन, “इस्राएल इन लॉकुर नीन हेसुर आशीर्वाद कोळोर साटी प्रयोग माळ्यार, नीम कारण कृपा हासील माळ्यार, लॉकुर प्रार्थना माळ्यार, परमेश्वर नीमी एप्रैम अदिक मनश्शे घाई माळुल.” ई प्रकार याकूब एप्रैम उक मनश्शे से धोड्डेव माळदुन.
GEN 48:21 आग इस्त्राएल यूसुफ से अंदुन, “नोळी नान सायोद समय हाती होट्ट बंदाद. लेकीन परमेश्वर नीम सांगुळ ईग भी ईत्तान, आव नीमी नीम पुर्वजगोळ द्याश ताका वापस वोतान.
GEN 48:22 ना नीमी हिंग येनारा कोटीन जो नीम वार्टुरी कोटीदील. ना नीमी अद पहाळी कोळतीन यदरी ना एमोरी लॉकुर से जीकसीदिन, आ पहाळी साटी ना तान तलवार अदिक तान बाण देल युध्द माळीदिन अदिक नान जीत आगीत.”
GEN 49:1 बाक याकूब तान पारगोळ इक ईद अनकु कारदुन, “जमा आगेगी, ना नीम इक हेळाईन कि आखरी दिनगोळ दा नीम मा येन येन बितुसीत.”
GEN 49:2 याकूब उन पारगोळा, ऊंद सांगुळ बरी अदिक केळी, तान आप्प इस्त्राएल उन केळी.
GEN 49:3 “हे रूबेन, नी नान धोड्डेव पार हुय, नी नान पयला पार अदिक नान ताकत इन पयला सबुत हुय, नानी नान सप्पा पारगोळ से येक्‍कुल गर्व नीन मा आद अदिक नी सबसे यक्कुल ताकतवर आय.
GEN 49:4 नी जो नीर इन घाई उबलुसावाळा आय, नी नान सप्‍पा पारगोळ से येक्‍कुल महत्व अन आग सकतीदील, नी आ आर्त इन सांगुळ मींग्या अदिक आकी अपवित्र माळ्या जो नीन आप्प उन दासी ईरोर, नी तान आप्प उन व्हर्स मा काल ईट्या.”
GEN 49:5 “शिमोन अदिक लेवी वार्टुर उर, आंदरी तान तलवारगोळ से आळोद प्रिय आद.
GEN 49:6 हे नान जीव, आंदुर मर्म दा बीळ बाळ, हे नान महिमा, आंदुर्द सभा दा मीसळुसबाळ; यतिकी आंदुर कोप देल मंळसागोळी कोंदार, अदिक तान अच इच्छा मा नळुकु वस्तागोळी अपंग माळ्यार.
GEN 49:7 आंदुर्द सिट्ट ऊंद अभिश्राप आद, ईंदुर हापाळ कठोर अदिक तान पागलपन दा सिट्ट दा आर, याकूब उन द्याश दा ईंदुर्द परिवारगोळ दा तान जमीन ईरतीदील, आंदुर पुरा इस्त्राएल द्याश दा फैलुस्यार.”
GEN 49:8 “यहूदा, नीन वार्टुर नीन प्रशंसा माळ्यार, नी तान दुश्मनगोळी हारूस्या, नीन वार्टुर नीन मुंद झुकस्यार.
GEN 49:9 यहूदा आ हुल्ल इन घाई आन याव यातोदारा जनावर इक कोंदान, हे नान पारा, नी तान शिकार मा नीदुरकु हुल्ल इन घाई आय जो आराम माळोर साटी मींगतद. अदिक याऊ ईट हिम्मतवाळा हैलेच कि अदरी छेळस्यान.
GEN 49:10 यागासताका शीलो बराल्द आगासताका ना रा यहूदा से राजदण्ड बिट्टीत, ना आऊन वंश से व्यवस्था कोळावाळा अलग आदान; अदिक राज्य राज्य अन लॉकुर आऊंद अधीन आगेदार.
GEN 49:11 आव तान गधा अक अंगुर इन बेली इक कटतान, आव तान गधा अन पाड्डा अक सबसे वळ्लीद अंगुर इन बेली इक कटतान, आव तान कपळागोळी ओगोर साटी सबसे वळ्लीद अंगुर इन रास्सा अन उपयोग माळतान.
GEN 49:12 आऊन कण्ण अंगुर इन रास्सा अन्द घाई क्याच्यान ईरताव. आऊन हल्ल हाल इन घाई बिळेव आव.”
GEN 49:13 “जबूलून समुद्र अन हाती ईत्तान, ईऊंद समुद्री तट ड्वांगागोळ साटी सुरक्षित ईत्तीत, ईऊंद प्रदेश सीदोन ताका फैलुसकु ईत्तीत.”
GEN 49:14 “इस्साकार आ गधा अन घाई आन याव हापाळ कठोर क्याल्सा माळ्यान, आव भारी बोझ आळका कारण पस्त बिदान.
GEN 49:15 आव नोळ्यान कि आऊन आराम इन जागा वळ्लीद आद, तथा ईद कि आऊन जमीन सुहाबनी आद. आग आव भारी बोझ नेगुली तैयार ईत्तान. आव दास इन रूप दा क्याल्सा माळोद स्वीकार माळ्यान.”
GEN 49:16 “दान तान लॉकुर्द न्याय हांगा माळ्यान ह्यांग इस्त्राएल उन अन्य परिवार माळतार.
GEN 49:17 दान हादी माकळोद ऊंद हाव, अदिक हादी माकळोद ऊंद नाग ईत्तीत, जो घ्वाळा अन्द नली इक डंसुसताद, अदुर देल अदुर सवार पछाळ तिनकु हिंद बिदोगतान.”
GEN 49:18 “हे यहोवा, ना उद्धार इन हादी कायेतीन.”
GEN 49:19 “डाकुगोळ्द ऊंद गिरोह गाद मा आक्रमण माळीत, लेकीन गाद आंदरी बडुकु तुकाळसीत.”
GEN 49:20 “आशेर द्याश इन जमीन हापाळ वळ्लीद उपज कोट्टीत. आऊक अल्या भोजन सिक्‍कीत जो राजागोळ साटी उपयुक्त आदीत.”
GEN 49:21 “नप्ताली स्वतन्त्र वळावाळा हिरण इन घाई आद अदिक आऊन बोली अऊर्द सुन्दर चिकोर घाई आद.”
GEN 49:22 “यूसुफ हापाळ सफल आन, यूसुफ कयगोळ देल हतकु अंगुर इन बेली इन घाई आन, आव सोता अन हाती हतदव अंगुर इन बेली इन घाई आन, बाडा अन सहारा उग्सद अंगुर इन बेली इन घाई आन.
GEN 49:23 हापाळ सा लॉकुर आऊन विरूद्‍ध आदुर अदिक आऊन से लळुसदुर, धर्नुधारी लॉकुर आऊक पंसद माळालुर.
GEN 49:24 लेकीन आव तान ताकतवर बाण अदिक कुशल भुजागोळ देल युध्द जिक्सदुन, आव याकूब उन ताकतवर परमेश्वर चरवाह, इस्त्राएल इन चट्टान देल शक्ति सिकतद.
GEN 49:25 ईद नान आप्प आ ईश्वर उन क्याल्सा हुन, जो नीन सहायता माळ्यान, आ सर्वशक्तिमान उन जो नीनी म्याकुच टु आशीर्वादगोळी, अदिक ल्यालमा टु गयरा नीर दा टु आशीर्वाद, अदिक माल्लागोळ्द अदिक गर्भगोळ्द आशीर्वाद कोट्टान.”
GEN 49:26 नान मोय आप्प उन हापाळ सा वळ्लेव चीजगोळ आगतेला ईत्तव अदिक नीम आप्प से नानी अदिक येक्‍कुल आशीर्वाद सिक्त, नीम वार्टुर नानी मारोद चाहासदुर, लेकीन ईग नीमी ऊंद धोळ्द पर्वत इन घाई, नान सप्पा आशीर्वाद इन ढग सिक्‍कीत.
GEN 49:27 “बिन्यामीन ऊंद हिंग हस्तकु भेड़ीया अन घाई आन जो व्हातर्या कोनतद अदिक अदरी तीनतद, द्यावगा ईद मिग्द माग्द देल क्याल्सा नळ्सतद.”
GEN 49:28 इस्त्राएल उन हन्नेळ परिवार ईवा हु अदिक आंदुर आप्प याता याता वचन देल आंदरी आशीर्वाद कोट्टुन, आंदुर ईंदुर उर; ऊंद ऊंद इक आशीर्वाद इन अनुसार आव आशीर्वाद कोट्टुन.
GEN 49:29 आग आव आंदरी ईद अनकु आग्या कोट्टुन, “याग ना सायाईन रा ना तान लॉकुर बीच दा ईरोद चाहसतीन, ना तान पुर्वजगोळ सांगुळ हित्ती एप्रोन इन केईगोळ गुफा दा नळ्सकु आगोद चाहसतीन.
GEN 49:30 मतलब अदा गुफा दा जो कनान द्याश दा मम्रे अन मुंदळोद मकपेला अन जमीन दा आद; आ जमीन इक अब्राहम हित्ती एप्रोन उन कय देल इदुरसाटी कोडींदुन, कि अद कब्रस्तान साटी आऊन खुद इन जमीन आगुल.
GEN 49:31 अल अब्राहम अदिक आऊन हिंग्स सारा अक मुण्ण कोटकु आगीत, अदिक अल्या इसहाक अदिक आऊन हिंग्स रिबका अक भी मुण्ण कोटकु आत; अदिक अल्या ना लियाह अक भी मुण्ण कोट्टीन.”
GEN 49:32 अद जमीन अदिक अदुर दाकळोद गुफा हित्‍तीगोळ हात्ती टु कोडंकु आगीत.
GEN 49:33 याकूब याग तान पारगोळी ईद आग्या कोट्टुन, आग तान काल व्हर्स मा नेगुकु जीव बिट्टुन, अदिक तान लॉकुर दा होगकु मीलुसदुन.
GEN 50:1 आग यूसुफ तान आप्प उन बाय मा बिदकु वर्लदुन अदिक आऊक चुम्सदुन.
GEN 50:2 अदिक यूसुफ आ वैध्यगोळी, जो आऊन सेवक ईरोर, आग्या कोट्टुन कि आऊन आप्प उन लाश मा सुगन्ध द्रव्य तुमुल; आग वैध्यगोळ इस्त्राएल उन लाश दा सुगन्ध द्रव्य तुमदुर.
GEN 50:3 अदिक आऊनव चालीस दिन पुरा आदव, यतिकी यार लाश दा सुगन्ध द्रव्य तुमकु आगतद, आंदरी ईसा दिन पुरा हत्ताव; अदिक मिस्त्री लॉकुर अदुर साटी सत्तर दिन ताला विलाप माळतेला ईत्तुर.
GEN 50:4 याग आऊनव विलाप उन दिनगोळ बितसेदव, आग यूसुफ फिरौन उन घराना अन लॉकुर से अनली कुरतुन, “अगर नीम अनुग्रह अन नजर नान मा ईतीदाद रा नान ईद बातणी फिरौन उक केळसी,
GEN 50:5 नान आप्प ईद अनकु, ‘नोळ ना सोत्तुर मा आईन,’ नानी ईद कसम तीन्सदुन, ‘जो कब्र ना कनान द्याश दा अगळुसीन अल्या नी नानी मुण्‍ण कोळेत.’ इदुरसाटी ईग नानी अल होगकु तान आप्प उक मुण्ण कोळोद आग्या कोळुल, अदुर बाद्दा ना वापस होट बराईन.”
GEN 50:6 आग फिरौन अंदुन, “होगकु तान आप्प उन तिन्सद कसम अन अनुसार आऊक मुण्‍ण कोळ.”
GEN 50:7 इदुरसाटी यूसुफ तान आप्प उक मुण्ण कोळोर साटी होदुन, अदिक फिरौन इन सप्पा कर्मचारी, मतलब आऊन भवन इन स्याणा मंळसागोळ अदिक मिस्त्र द्याश इन स्याणागोळ आऊन सांगुळ होदुर.
GEN 50:8 अदिक यूसुफ उन मान्या गोळोर सप्पा लॉकुर, अदिक आऊन वार्टुर, अदिक आऊन आप्प उन मान्या गोळोर सप्पा लॉकुर भी सांगुळ होदुर; लेकीन आंदुर तान चिकोरी, अदिक मर्र म्यांडा, अदिक गोसीगोळी गोशेन प्रदेश दा बिटकु बंदुर.
GEN 50:9 अदिक आऊन सांगुळ रथ अदिक सवार होदुर, ई प्रकार भीळ हापाळ आगेत.
GEN 50:10 याग आंदुर आताद उन खलयान ताका, जो यरदन गांगा अन आप्पाटी आद, पोहचुसदुर, आग अल हापाळ भारी विलाप माळदुर, अदिक यूसुफ तान आप्प उन साटी येळ दिन इन विलाप माळसुसदुन.
GEN 50:11 आताद इन खलिहान दाकळोद विलाप इक नोळकु आ द्याश इन ईरावाळेर कनानीगोळ अंदुर, “ईद रा मिस्त्री लॉकुर्द भारी विलाप आगीदाद.” ईदा कारण आ जागा अन हेसुर आबेल मिस्रेम बित्त, अदिक अद यरदन इन आप्पाटी आद.
GEN 50:12 इस्त्राएल उन पारगोळ ठीक अदा क्याल्सा माळदुर यदुर आव आंदरी आग्या कोटीदुन:
GEN 50:13 मतलब आंदुर आऊक कनान द्याश दा वोतकु मकपेला अन आ जमीन इन गुफा दा, जो मम्रे अन मुंद आद, मुण्ण कोट्टुर; यदरी अब्राहम हित्ती एप्रोन उन कय देल इदुरसाटी कोंडीदुन, कि अद कब्रस्तान इन साटी आंदुर्द खुद इन जागा ईरूल.
GEN 50:14 तान आप्प उक मुण्‍ण कोटकु यूसुफ तान वार्टुर अदिक आ सप्पा सांगुळ, जो आऊन आप्प उक मुण्ण कोळोर साटी सांगुळ बंदीदुर, मिस्त्र वापस बंदुन.
GEN 50:15 याग यूसुफ उन वार्टर नोळदुन कि नाम आप्प सोतोग्यान, रा अनली कुरतुर, “कदाचित यूसुफ ईग नाम हिंद बिद्दान, अदिक याट बुरा नाव आऊन सांगुळ माळीदेव सप्पा अन पुरा बदला नाम सांगळ ताकोंडान रा.”
GEN 50:16 इदुरसाटी आंदुर यूसुफ उन हाती ईद अनकु कळुदुर, “नीन आप्प सायोर से पयले नामी ईद आग्या कोटीदुन,
GEN 50:17 ‘नीव लॉकुर यूसुफ से ई प्रकार अनेतीर, कि नाव विनती माळतेव, कि नाव विनती माळतेव नी तान वार्टुर्द अपराध अदिक पाप इक क्षमा माळ; नाव नीन से बुरा माळीदेव, लेकीन ईग तान आप्प उन परमेश्वर उन दासगोळ्द अपराध क्षमा माळ.’” आंदुर्द ईद मात केळकु यूसुफ वर्लली कुरतुन.
GEN 50:18 अदिक आऊन वार्टुर भी आऊन मुंद होगकु वर्लली कुरतुर, अदिक अंदुर, “नोळ, नाव नीनोर दास हुयेव.”
GEN 50:19 यूसुफ आंदुर से अंदुन, “अंज बाळी, येन ना परमेश्वर उन जागा मा आईन?
GEN 50:20 अगर नीव नान साटी बुरा विचार माळीदीर, लेकीन परमेश्वर अदा मात दा भलाई इन विचार माळदुन, यदुर देल आव हिंग माळुल, ह्यांग ईंद इन दिन प्रगट आद, कि हापाळ सा लॉकुरव जीव ऊळ्दकु आव.
GEN 50:21 इदुरसाटी ईग अंज बाळी: ना नीम्द अदिक नीमोर चिकोर्द पालन-पोषण माळतेला ईराइन.” ई प्रकार आव आंदरी समझुसकु शांती कोट्टुन.
GEN 50:22 यूसुफ तान आप्प उन घराना अन सांगुळ मिस्त्र दा ईत्तुन, अदिक यूसुफ ऊंद सौ हत्त वर्ष जीत्ता ईत्तुन.
GEN 50:23 अदिक यूसुफ एप्रैम उन नातीगोळी नोळदुन अदिक मनश्शे अन नातीगोळ, जो माकीर उन पारगोळ ईरोर, आंदुर पैदा आदुर अदिक यूसुफ आंदरी तान क्वारा दा हुळदुन.
GEN 50:24 यूसुफ तान वार्टुर से अंदुन, “ना रा सायोर मा आईन; लेकीन परमेश्वर सही दा नीम्द सुधी ताकोंडान, अदिक नीमी ई द्याश टु तेगुकु आ द्याश दा पोहचुस्यान, यदरी कोळोद आव अब्राहम, इसहाक, अदिक याकूब से कसम तिंदीदुन.”
GEN 50:25 बाक यूसुफ इस्त्राएलीगोळ से ईद अनकु कि परमेश्वर सही दा नीम्द सुधी ताकोंडान, आंदरी ई बारा अन कसम तीन्सदुन, “नाव नीन येलुगोळी ईल टु आ द्याश दा वोतेव.”
GEN 50:26 ई प्रकार यूसुफ ऊंद सौ हत्त वर्ष इनव आगकु सोतोदुन: अदिक आऊन लाश दा सुगन्ध द्रव्य तुमकु आत, अदिक अद लाश मिस्त्र दा ऊंद लाश पेटी दा ईटकु आत.
EXO 1:1 इस्त्राएल मतलब याकूब उन पारगोळ हेसुर, जो तान तान घराना अक हुडुकु याकूब उन सांगुळ मिस्त्र द्‍याश दा बंदुर, ईंदुर उर:
EXO 1:2 रूबेन, शिमोन, लेवी, यहूदा,
EXO 1:3 इस्साकार, जबूलून, बिन्यामीन,
EXO 1:4 दान, नप्ताली, गाद अदिक आशेर.
EXO 1:5 अदिक यूसुफ रा मिस्त्र दा पयला अच होट बंदीदुन. याकूब उन निज वंश दा जो पैदा आदुर आंदुर सप्‍पा सत्‍तर लॉकुर ईरोर.
EXO 1:6 यूसुफ अदिक आऊन सप्‍पा वार्टुर अदिक आऊन पीढ़ी इन सप्‍पा लॉकुर सोतोदुर.
EXO 1:7 लेकीन इस्त्राएल इन सन्‍तान वाळुसली हतदुर; अदिक आ लॉकुर हापाळ सामर्थी माळतेला होदुर, अदिक ईट वाळुसेदुर कि पुरा द्‍याश आंदुर से तुम्‍मेत.
EXO 1:8 मिस्त्र दा ऊंद व्हाशोव राजा गद्‍दी मा कुरतुन जो यूसुफ इक ईला जानसोन.
EXO 1:9 आव तान प्रजा से अंदुन, “नोळी, इस्त्राएलीगोळ नाम से गिनती दा अदिक सामर्थ्य दा यक्‍कुल वाळुसेग्‍यार.
EXO 1:10 इदुरसाटी बरी, नाव आंदुर सांगुळ चतुराई देल बर्ताव माळाता, ईलारा हींग आगबाळुल कि याग आंदुर हापाळ वाळुसेदार अदिक अगर संग्राम इन समय होट बंदीत, रा नाम दुश्‍मनगोळ से मिलुसकु नाम से लळाई माळुल अदिक ई द्‍याश टु होटबुळुल.”
EXO 1:11 इदुरसाटी आंदुर आंदुर मा बेगारी माळसुसावाळेरी नियुक्‍त माळदुर कि आंदुर आंदुर मा भार हाक्‍क-हाक्‍कु आंदरी दुख कोळुल; अदिक आंदुर फिरौन उन साटी पितोम अदिक रामसेस हेसुर इन नगरगोळ दा भंडार माळदुर.
EXO 1:12 लेकीन ह्‍यांग ह्‍यांग आंदुर आंदरी दुख कोळ्‍त ईत्‍तुर, हांग हांग आंदुर वाळुस्‍त अदिक फैलुसतेला होदुर; इदुरसाटी मिस्त्री लॉकुर इस्त्राएलीगोळ से हापाळ अंजेदुर.
EXO 1:13 तरी भी मिस्त्रीगोळ इस्त्राएलीगोळ से कठोरता अन सांगुळ स्यावा माळसुसदुर,
EXO 1:14 अदिक आंदुर जीवन इक गारा, ईटा अदिक केई इन ब्‍यार्र-ब्‍यार्र क्‍याल्‍सा अन कठिन स्यावा देल जीना मुश्किल माळ बुट्‍टुर; जो याता क्‍याल्‍सा दा आंदुर आंदुर से स्‍यावा माळसुसतोगोर अदुर दा आंदुर कठोरता देल व्‍यवहार माळतोगोर.
EXO 1:15 शिप्रा अदिक पूआ हेसुर इनोर येढ्‍ढ इब्री सुईनगितेर इक मिस्त्र अन राजा आग्‍या कोट्‍टुन,
EXO 1:16 “याग नीव इब्री आर्तेर्द बारतपन माळा समय नीम इक पता नळुल कि आग अगर पार आगुल रा आऊक कोंद बुळेतीर, अदिक पोर आगुल रा जीत्‍ता ईर गोळेतीर.”
EXO 1:17 लेकीन आ सुईनगितेर परमेश्वर उन अंज्‍क मान्‍सतोगोर, इदुरसाटी मिस्त्र अन राजा अन आग्‍या ईला मान्‍सकु पारगोळी भी जीत्‍ता बिटबुळ तोगोर.
EXO 1:18 आग मिस्त्र अन राजा आंदरी कारसुसकु केळदुन, “नीव जो पारगोळी जीत्‍ता बिट बुळतीर, रा हींग येती माळतीर?”
EXO 1:19 सुईनगितेर फिरौन उक उत्‍तर कोट्‍टुर, “इब्री आर्तेर मिस्त्री आर्तेर घाई हैलेच; आंदुर हींग फुर्तीला आर कि सुईनगितेर्द बरा से पयला अच आंदरी चिग्‍द पैदा आगेगतद.”
EXO 1:20 इदुरसाटी परमेश्वर सुईनगितेर सांगुळ भलाई माळदुन; अदिक आ लॉकुर वाळुसकु हापाळ सामर्थी आगेदुर.
EXO 1:21 परमेश्वर आंदुर मान्‍ना बसुसदुन, यतिकी सुईनगितेर परमेश्वर उन अंज्‍क मान्‍सतोगोर.
EXO 1:22 आग फिरौन राजा तान सप्‍पा प्रजा अक आग्‍या कोट्‍टुन, “इब्रीगोळोर यासारा भी पारगोळ पैदा आदार आ सप्‍पा मुंदुरी नीव नील गांगा दा हाक्‍क बुळेतीर, अदिक सप्‍पा पोरगोळी जीत्‍ता ईरगोळेतीर.”
EXO 2:1 लेवी इन घराना अन ऊंद मंळसा ऊंद लेवी वंश इन आर्त इन से मदा माळ कोंडुन.
EXO 2:2 आक आर्त व्‍हाट्‍टा दी ईत्‍तुर अदिक आक इक ऊंद पार पैदा आदुन; अदिक ईद नोळकु कि ई चिग्‍द सुंदर आन, आऊक आव मुर तिंगुळ ताका होचकोमकु ईटदुर.
EXO 2:3 याग आक आऊक मात्‍त होचकोमकु ईट सकीदील आग आऊन साटी सरकंडागोळ्‍द ऊंद फुट्टी तनकु, अदुर मा चिक्‍कन मुण्‍ण अदिक डांबर हचदुर, अदिक अदुर दा पार उक ईटकु नील गांगा अन किनारा मा काड्डागोळ्‍द न्‍याड्या बिटकु बंदुर.
EXO 2:4 आ पार उन आकतींग दुर निदुरकु ईत्‍तुर अदिक नोळोर कि आऊन सांगुळ येन आगतद.
EXO 2:5 आग फिरौन उन पोर मय तोळोर साटी नील हेसुर इन गांगा अन किनारा मा बंदुर. आकिन दासीगितेर गांगा अन किनारा-किनारा टेटाळली हतदुर. आग आक काड्डागोळ बीच दा फुट्टी इक नोळकु तान दासगीत इक अदरी तरोर साटी कळुदुर.
EXO 2:6 याग आक अदरी तेरूकु नोळदुर कि ऊंद वर्लतेला चिग्‍द आद, आग आक इक दया बत्‍त अदिक आक अंदुर, “ईव रा यातारा इब्री आर्त इन चिग्‍द आगीदान.”
EXO 2:7 आग चिग्‍द उन आकतींग फिरौन उन पोर इन से अंदुर, “येन ना होगकु इब्री आर्तेर दा टु यातारा आर्त इक नीन हात्‍ती कारूकु तराईन, जो नीन साटी चिग्‍द उक हाल कुळ्‍सतोगुल?”
EXO 2:8 फिरौन उन पोर अंदुर, “होग.” आग पोर होगकु चिग्‍द उन मोय इक कारूकु तंदुर.
EXO 2:9 फिरौन उन पोर आकिन से अंदुर, “नी ई चिग्‍द उक ओतकु नान साटी हाल कुळ्‍सतोग, अदिक ना नीनी मजदूरी कोळाईन.” आग आ आर्त चिग्‍द उक ओतकु हाल कुळ्‍सली हतदुर.
EXO 2:10 याग चिग्‍द थ्‍वाळासा धोड्‍डेव आदुन आग आक आऊक फिरौन उन पोर इन हात्‍ती ओतुर, अदिक आव आकिन पार ठहरूसदुन; अदिक आक ईद अंदकु आऊन हेसुर मूसा ईटदुर, “ना ईऊक नीर दा टु तेगदिदीन.”
EXO 2:11 हींग आत कि याग मूसा हारोदव आदुन, आ दिनगोळ दा आव व्‍हार्या तान वार्ट-बन्‍धुगोळ हात्‍ती होगकु आंदुर दुखगोळ मा नजर हाक्कदुन; आग आव नोळदुन कि ऊंद मिस्त्री मंळसा आऊन ऊंद इब्री वार्ट उक बडेत्‍यान.
EXO 2:12 आव ईत आत नोळदुन कि याऊ हैलेच, रा आ मिस्त्री मंळसा अक कोंद बुट्‍टुन अदिक धुळा दा मुच्‍च बुट्‍टुन.
EXO 2:13 बाक दुसरा दिशी व्‍हार्या होगकु आव नोळदुन कि येढ्‍ढ इब्री मंळसा आपस दा बडाबडी माळेत्‍यार. आव अपराधी से अंदुन, “नी तान वार्ट उक येती बडुत्‍या?”
EXO 2:14 आव अंदुन, “याव नीनी नाम लॉकुर मा हाकिम अदिक न्‍यायी ठहरूसदुन? याता प्रकार देल नी मिस्त्री मंळसा अक कोंद बुट्‍ट, येन हांगा नी नानी भी कोन्‍नोद चाहासत्‍या?” आग मूसा ईद विचार माळकु अंजेदुन, “निश्‍चय ई मात खुल्‍सेग्‍याद.”
EXO 2:15 याग फिरौन ई मात केळदुन आग मूसा अक कोन्‍नोद युक्‍ति माळदुन. लेकीन मूसा फिरौन उन मुंदु टु ओळदुन, अदिक मिद्यान द्‍याश दा होगकु ईरली कुरतुन; अदिक आव अल ऊंद भाय इन हात्‍ती कुर्तोदुन.
EXO 2:16 मिद्यान इन याजक उन येळ पोरगोळ ईरोर; अदिक आंदुर अल बंदकु नीर तुमली हतदुर कि डोनी दा तुमकु तान आप्‍प उन म्यांडा अदिक मर्रगोळी कुळसुल.
EXO 2:17 आग चरवाहागोळ बंदकु आंदरी हटुसली हतदुर; इदुर मा मूसा निदुरकु आंदुर सहायता माळदुन, अदिक म्यांडा अदिक मर्रगोळी नीर कुळ्‍सदुन.
EXO 2:18 याग आंदुर तान आप्‍प रूएल उन हात्‍ती वापस बंदुर, आग आव आंदुर से केळदुन, “येन कारण आद कि ईंद नीव राटनेरी वापस होट बंदीर.”
EXO 2:19 आंदुर अंदुर, “ऊंद मिस्त्री मंळसा नामी चरवाहगोळ कय दा टु बिळ्सदुन, अदिक नाम साटी हापाळ नीर तुमकु म्यांडा अदिक मर्रगोळी कुळ्‍सदुन.”
EXO 2:20 आग आव तान पोरगोळ से अंदुन, “आव मंळसा येल आन? नीव आऊक येती बिटकु बंदीर? आऊक कारूकु तरी कि आव भोजन माळ्‍यान.”
EXO 2:21 अदिक मूसा आ मंळसा अन सांगुळ ईरली तयार आदुन. आव आऊन से तान पोर सिप्पोरा अन मदा माळ बुट्‍टुन.
EXO 2:22 आक इक ऊंद पार पैदा आदुन, आग मूसा ईद अंदकु, “ना दुसरा द्‍याश दा परदेशी आईन,” आऊन हेसुर गेर्शोम ईटदुन.
EXO 2:23 हापाळ दिन बितुसदुर बाद्‍दा मिस्त्र अन राजा सोतोदुन. इस्त्राएली कठिन स्यावा अन कारण राहत इन श्वास ताकोमली कुरतुर, अदिक कारूली कुरतुर, अदिक आंदुर दुहाई जो कठिन स्‍यावा अन कारण आत अद परमेश्वर ताका पोहचुस्त.
EXO 2:24 परमेश्वर आंदुर तकलीफ केळकु तान वाचा अक, जो आव अब्राहम, इसहाक, अदिक याकूब उन सांगुळ कटीदुन, याद माळदुन.
EXO 2:25 अदिक परमेश्वर इस्त्राएलीगोळ मा नजर माळकु आंदुर मा चित्त हचदुन.
EXO 3:1 मूसा तान मॉव यित्रो हेसुर इनव मिद्यान उन याजक उन म्यांडा अदिक मर्रगोळी आळ्‍सतोगोन; अदिक आव अवरी आळी इन पश्चिम दी होरेब हेसुर इन परमेश्वर उन पर्वत इन हात्‍ती ओतुन.
EXO 3:2 अदिक परमेश्वर उन दूत ऊंद मुळ्‍ल इन झाळी इन न्‍याड्या बेक्‍की इन ज्‍वाला दा आऊक दर्शन कोट्‍टुन; अदिक आव कण्‍ण म्‍याकुच माळकु नोळदुन कि झाळी होतेत्‍याद, लेकीन भस्‍म आगाल.
EXO 3:3 आग मूसा बिचार माळदुन, “ना आत होगकु ई धोळ्‍द आश्चर्य अक नोळाईन कि अद झाळी येती होत कोमाल.”
EXO 3:4 याग यहोवा नोळदुन कि मूसा नोळोर साटी तिर्गकु बरेत्‍यान, आग परमेश्वर आऊक झाळी इन बीच दा टु कारदुन, “हे मूसा, हे मूसा!” मूसा अंदुन, “येन आग्‍या.”
EXO 3:5 आव अंदुन, “ईत हात्ती बरबाळ; अदिक तान कालगोळ दा टु जुतागोळ ईळ्‍सबुळ, यतिकी याता जागा मा नी निदुरकु आय अद पवित्र जागा हुन.”
EXO 3:6 बाक आव अंदुन, “ना नीन आप्‍प उन परमेश्वर, अदिक अब्राहम उन परमेश्वर, इसहाक उन परमेश्वर, अदिक याकूब उन परमेश्वर हुईन.” आग मूसा अन्द जो परमेश्वर उन दी नोळोद हिम्मत ईला ईरोद, तान मार्रा होच बुट्‍टुन.
EXO 3:7 बाक यहोवा अंदुन, “ना तान प्रजा अन लॉकुर जो मिस्त्र दा आर, आंदुर दुखगोळी निश्‍चय नोळीन; अदिक आंदुर जो किटरोद मयनत माळसुसावाळेर कारण आगतद अदरी भी ना केळीन, अदिक आंदुर तकलीफ मा ना चित्त हचीन;
EXO 3:8 इदुरसाटी ईग ना ईळुकु बंदीन कि आंदरी मिस्त्रीगोळ कय दा टु बिळसुसाईन, अदिक आ द्‍याश दा टु तेगुकु मात्‍त ऊंद वळ्‍लीद धोळ्‍द द्‍याश दा, यदुर दा हाल अदिक शयद इन धारागोळ वाहुसताव मतलब कनानी, हित्ती, एमोरी, परिज्जी, हिब्बी, अदिक यबूसी लॉकुर जागा दा पोहचुसाईन.
EXO 3:9 इदुरसाटी ईग केळ, इस्त्राएलीगोळ्‍द किटरोद नानी केळ सिक्‍याद, अदिक मिस्त्रीगोळ्द आंदुर मा अत्याचार माळोद भी नानी कांळस्‍याद.
EXO 3:10 इदुरसाटी बर, ना नीनी फिरौन उन हात्‍ती कळुतीन कि नी नान इस्त्राएली प्रजा अक मिस्त्र दा टु तेगुकु तंद्या.”
EXO 3:11 लेकीन मूसा परमेश्वर से अंदुन, “ना याव हुईन जो फिरौन उन हात्‍ती होगाईन, अदिक इस्त्राएलीगोळी मिस्त्र दा टु तेगुकु तराईन?”
EXO 3:12 परमेश्वर अंदुन, “निश्‍चय ना नीन सांगुळ ईराईन; अदिक ई मात इन कि नीन कळावाळा ना हुईन, नीन साटी ईद चिन्ह ईत्‍तीत कि याग नी आ लॉकुरी मिस्त्र दा टु तेगु कोंड्‍या, आग नी ईदा पहाळी मा नान उपासना माळ्‍या.”
EXO 3:13 मूसा परमेश्वर से अंदुन, “याग ना इस्त्राएलीगोळ हात्‍ती होगकु आंदुर से अनाईन, ‘नीम पुर्वजगोळ परमेश्वर नानी नीम हात्‍ती कळ्‍यान,’ आग अगर आंदुर नान से केळुल, ‘आऊन येन हेसुर आद?’ आग ना आंदरी येन हेळाईन?”
EXO 3:14 परमेश्वर मूसा से अंदुन, “ना जो आईन अद आईन.” बाक आव अंदुन, “नी इस्त्राएलीगोळ से अनेत, ‘यार्द हेसुर ना हुईन अदिक आवा नानी नीम हात्‍ती कळ्‍यान.’”
EXO 3:15 अदिक परमेश्वर मूसा से ईद भी अंदुन, “नी इस्त्राएलीगोळ से ईद भी अनेत, ‘नीम पुर्वजगोळ परमेश्वर, अदिक अब्राहम उन परमेश्वर, इसहाक उन परमेश्वर, अदिक याकूब उन परमेश्वर, यहोवा, आवा नानी नीम हात्‍ती कळ्‍यान. नोळ, हमेशा ताका नान हेसुर ईदा ईत्‍तीत, अदिक पीढ़ोन पीढ़ी दा नान याद ईदुर देल अच आगतेला ईत्‍तीत.’
EXO 3:16 इदुरसाटी ईग होगकु इस्त्राएली हाळाबाट्टुर इक जमा माळ, अदिक आंदुर से अन, ‘नीम आप्‍प अब्राहम, इसहाक, अदिक याकूब उन परमेश्वर, यहोवा नानी दर्शन कोटकु ईद अंदान कि ना नीम मा अदिक नीम से जो बर्ताव मिस्त्र दा माळकु आगतद अदुर मा भी चित्त हचीन;
EXO 3:17 अदिक ना ठान्‍स कोंडीन कि नीमी मिस्त्र अन दुखगोळ दा टु तेगुकु कनानी, हित्ती, एमोरी, परिज्जी, हिब्बी, अदिक यबूसी लॉकुर द्‍याश दा ओयाईन, जो हींग द्‍याश आद कि यदुर दा हाल अदिक शयद इन धारागोळ वाहुसताव.’”
EXO 3:18 आग आंदुर नीन मानस्‍यार; अदिक नी इस्त्राएली हाळाबाट्टगोळ सांगुळ हुडुकु मिस्त्र अन राजा अन हात्‍ती होगकु आऊन से ईद अनेत, “इब्रीगोळ्‍द परमेश्वर, यहोवा से नाम मुलाकात आग्‍याद; ‘इदुरसाटी ईग नामी मुर दिन इन हादी मा आळी दा होगगोळ कि तान परमेश्वर उक बलिदान येर्सेव.’
EXO 3:19 ना जान्‍सतीन कि मिस्त्र अन राजा नीमी आगासताका होग गोळतीदील, यागासताका कि ऊंद ताकतवर कय आऊक मजबुर माळाल्द.
EXO 3:20 इदुरसाटी ना कय वाळुसकु आ सप्‍पा आश्‍चर्य कर्मगोळ से, जो मिस्त्र अन बीच दा माळाईन, आ द्‍याश इक बडाईन; अदिक अदुर बाद्‍दा आव नीमी होग गोट्‍टान.”
EXO 3:21 “आग ना मिस्त्रीगोळ से तान ई प्रजा अन अनुग्रह माळसुसाईन; अदिक याग नीव होट्‍टीर आग खाली कय देल होळतीदील.
EXO 3:22 उलटा नीम ऊंद ऊंद आर्त तान तान मान्‍ना हातळोर, अदिक आंदुर्द मान्‍या ईरावाळेर से व्‍हान्‍ना- बेळ्ली इन ईसरावाळी, अदिक कपळा बेळ कोंडार, अदिक नीव अवरी तान पार अदिक पोरगोळी हाकसुसेतीर; ई प्रकार देल नीम मिस्त्रीगोळी लुट्‍सीर.”
EXO 4:1 आग मूसा उत्‍तर कोट्‍टुन, “आंदुर नान विश्वास माळतीदील अदिक नांद केळतीदील, बल्‍की अंदार, ‘यहोवा नीनी दर्शन कोटीदील.’”
EXO 4:2 यहोवा आऊन से अंदुन, “नीन कय दा अद येन हुन?” आव अंदुन, “कोल.”
EXO 4:3 आव अंदुन, “अदरी भुमी मा हाक्‍कबुळ.” याग आव अदरी भुमी मा हाकदुन आग अद हाव बनसेत, अदिक मूसा अदुर मुंदु टु ओळदुन.
EXO 4:4 आग यहोवा मूसा से अंदुन, “कय वाळुसकु अदुर पुछी हुडु कोम, याग आव कय वाळुसकु अदरी हुळदुन आग अद आऊन कय दा मात्‍त कोल बनसेत. कि आ लॉकुर विश्‍वास माळुल कि नीम पुर्वजगोळ परमेश्वर मतलब अब्राहम उन परमेश्वर, इसहाक उन परमेश्वर, अदिक याकूब उन परमेश्वर, यहोवा नीनी दर्शन कोटान.”
EXO 4:5 ताकी आ लॉकुर विश्वास माळुल कि “नीम पुर्वजगोळ परमेश्वर मतलब अब्राहम उन परमेश्वर, इसहाक उन परमेश्वर, अदिक याकूब उन परमेश्वर, यहोवा नीनी दर्शन कोटान.”
EXO 4:6 बाक यहोवा आऊन से ईद भी अंदुन, “तान कय याद्‍दा मा ईटकु झाक्‍स.” इदुरसाटी आव तान कय याद्‍दा मा ईटकु झाक्‍स बुट्‍टुन; बाक याग अदरी तेगदुन आग येन नोळदुन कि आऊन कय कोढ़ इन कारण बरफ इन घाई बिळीद आगेग्‍याद.
EXO 4:7 आग आव अंदुन, “तान कय याद्‍दा मा मात्‍त ईटकु झाक्‍स.” आव तान कय याद्‍दा मा ईटकु मात्‍त झाक्‍सदुन; अदिक याग आव अदरी याद्‍दा मा टु तेगदुन रा येन नोळतान कि आऊन पुरा मय पयला अन्द घाई आगेत.
EXO 4:8 आग यहोवा अंदुन, “अगर आंदुर नीन मात इन विश्वास माळतीदील, अदिक पयला चिन्‍ह अक मान्‍सतीदील, रा दुसरा चिन्ह अन विश्‍वास माळ्‍यार.
EXO 4:9 अदिक अगर आंदुर ई येढ्‍ढु चिन्हगोळ्द विश्वास माळतीदील अदिक नीन मातगोळी केळालुर, आग नी नील गांगा टु थ्‍वाळासा नीर हुडुकु वंळगींद जमीन मा हाक्‍क बुळेत; अदिक जो नीर नी गांगा दा टु तेगद्‍या अद वंळगींद जमीन मा रक्‍ता बनसेदीत.”
EXO 4:10 मूसा यहोवा से अंदुन, “हे नान प्रभु, ना माताळदुर दा निपुण हैलेच, न पयला ईरीन, अदिक न यागी टु नी तान दास उन से मात हेळली हद; ना रा मार्रा अदिक ल्‍यालग्‍या अन तोतळा मंळसा आईन.”
EXO 4:11 यहोवा आऊन से अंदुन, “मंळसा अन बाय याव माळ्‍यान? अदिक मंळसा अक मुक्‍का, या बयरा, या नोळावाळा, या कुढ्‍ढ, ना यहोवा अक बिटकु मात्‍त याव माळतान?
EXO 4:12 ईग होग, ना नीन दण्ण इन सांगुळ ईतकु जो नानी अनोद ईत्‍तीत अद नीनी कल्‍सतोगाईन.”
EXO 4:13 आव अंदुन, “हे नान प्रभु, कृपया यावारा दुसरा अक कळु कोम.”
EXO 4:14 आग यहोवा अन गुस्सा मूसा मा भळकुस्‍त अदिक आव अंदुन, “येन नीन वार्ट लेवीय वंश इन हारून आल्‍लच? नानी निश्‍चय आद कि आव माताळदुर दा निपुण आन, अदिक आव नीन से मुलाकात इक होटकु बरतान; अदिक नीनी नोळकु मन दा खुश आदान.
EXO 4:15 नी आऊन से मात्त माळेत, अदिक आऊक हेळेत, कि येन माळोद आद, ना आऊक अदिक नीन इक माताळली मदत माळाईन अदिक नीम इक येन माळोद आद, ‘कलसाईन.’
EXO 4:16 हारून नीन दी टु लॉकुर से मातगोळ माळतेला ईत्‍तान; आव नीन साटी बाय इन दण्ण अदिक नी आऊन साटी परमेश्वर उन घाई ठहरूस्‍या.
EXO 4:17 अदिक नी ई कोल इक कय दा हुडुकु ओय, अदिक ईदुर देल अच चिन्हगोळी तोर्सेत.”
EXO 4:18 आग मूसा तान मॉव यित्रो अन हात्‍ती वापस बंदुन अदिक आऊन से अंदुन, “नानी सार माळ कि ना मिस्त्र दा ईरावाळेर तान वार्टुर हात्‍ती होगकु नोळाईन कि आंदुर ईगासताका जीत्‍ता आर या ईला.” यित्रो अंदुन, “कुशल देल होग.”
EXO 4:19 अदिक यहोवा मिद्यान द्‍याश दा मूसा से अंदुन, “मिस्त्र अक वापस होटोग; यतिकी जो मंळसागोळ नीन जीव इन प्यासा ईरोर आंदुर सप्‍पा सोतोग्यार.”
EXO 4:20 आग मूसा तान हिंग्‍स अदिक चिकोरी गदा मा येर्सकु मिस्त्र द्‍याश दी परमेश्वर उन आ कोल इक कय दा हुडुकु वापस होदुन.
EXO 4:21 आग यहोवा मूसा से अंदुन, “याग नी मिस्त्र दा पोहचुस्‍या रा ध्‍यान ईटेत कि जो चमत्कार ना नीन वश दा माळीन आ सप्‍पा अक फिरौन उक तोर्सेत; लेकीन ना आऊन मन इक कठोर माळाईन, अदिक आव नान प्रजा अक होगगोळतीदील.
EXO 4:22 अदिक नी फिरौन से अनेत, ‘यहोवा ईद अनतान, कि इस्त्राएल नान धोळ पार हुन,
EXO 4:23 अदिक ना जो नीन से अंद कोंडीन नान पार उक होगगोळ कि आव नान स्यावा माळ्‍यान; अदिक नी ईगासताका आऊक होग गोटीदील, ई कारण ना ईग नीन धोळ पार उक घात माळाईन.’”
EXO 4:24 आग हींग आत कि हादी मा ईरोद जागा दा यहोवा मूसा से मुलाकात माळकु आऊक कोंद बुळोद चाहासदुन.
EXO 4:25 आग सिप्पोरा ऊंद तेज चकमक कल्‍ल हुडुकु तान पार उन खतना माळ बुट्टुर, अदिक मूसा अन कालगोळ मा ईद अंदकु भीट बुट्‍टुर, “निश्‍चय नी नान साटी रक्‍ता वाहुसावाळा नान गांड्‍ड हुय.”
EXO 4:26 आग यहोवा आऊक बिट बुट्‍टुन. आ समय खतना अन कारण आक माताळदुर, “नी रक्‍ता वाहुसावाळा गांड्‍ड हुय.”
EXO 4:27 आग यहोवा हारून से अंदुन, “मूसा से मुलाकात माळली आळी दा होग.” आव होदुन अदिक परमेश्वर उन पर्वत मा आऊन से सिकदुन अदिक आऊन पवित्र चुम्‍बन ताकोंडुन.
EXO 4:28 आग मूसा हारून उक ईद हेळसुसदुन कि यहोवा येन येन मातगोळ हेळकु आऊक कळ्‍यान, अदिक याता याता चिन्ह तोरसोद आग्‍या आऊक कोटान.
EXO 4:29 आग मूसा अदिक हारून होगकु इस्त्राएलीगोळ्‍द सप्‍पा पुर्वजगोळी जमा माळदुर.
EXO 4:30 अदिक यास मातगोळ यहोवा मूसा से अंदीदुन अद सप्‍पा हारून आंदरी केळ्‍सदुन, अदिक लॉकुर कण्णगोळ मुंद अव चिन्ह भी तोर्सदुर.
EXO 4:31 अदिक लॉकुर आंदुर विश्वास माळदुर; अदिक ईद केळकु कि यहोवा इस्त्राएलीगोळ्‍द सुधी ताकोंडान अदिक आंदुर दुखगोळ मा दृष्‍टी माळ्‍यान, आंदुर म्यांडा बांग्‍सकु दण्‍डवत माळदुर.
EXO 5:1 आग मूसा अदिक हारून होगकु फिरौन से अंदुर, “इस्त्राएल इन परमेश्वर यहोवा ईद अनतान: ‘नान प्रजा अन लॉकुरी होगगोळ कि आंदुर आळी दा नान साटी हाब्‍ब मनुस्‍यार.’”
EXO 5:2 फिरौन अंदुन, “यहोवा याव हुन कि ना आऊन वचन मान्‍सकु इस्त्राएलीगोळी होगगोळाईन? ना यहोवा अक अरालीन, अदिक ना इस्त्राएलीगोळी होगगोळतीदील.”
EXO 5:3 आंदुर अंदुर, “इब्रीगोळ परमेश्वर नाम से मुलाकात माळ्यान; इदुरसाटी नामी आळी दा मुर दिन इन हादी मा होगगोळ, कि तान परमेश्वर यहोवा अन साटी बलिदान माळेव, हींग आगबाळुल कि आव नाम दा मरी फैलुस्‍यान या तलवार नळसुस्यान.”
EXO 5:4 मिस्त्र अन राजा आंदुर से अंदुन, “हे मूसा, हे हारून, नीव येती लॉकुर से क्‍याल्‍सा बिळसुसोद चाहासतीर? नीव होगकु तान तान ओझा नेगी.”
EXO 5:5 अदिक फिरौन अंदुन, “केळी, ई द्‍याश दा आ लॉकुर हापाळ आगेग्‍यार, बाक नीव आंदरी मयनत देल आराम कोळोद चाहासतीर!”
EXO 5:6 फिरौन अदा दिशी आ मयनत माळसुसावाळेर इक जो आ लॉकुर म्‍याकुच ईरोर, अदिक आंदुर स्याणा अक ईद आग्‍या कोट्‍टुन,
EXO 5:7 “नीव जो ईगासताका ईटागोळ माळोर साटी लॉकुरी भुसा कोळतोगीर, अद मुंदु टु कोळ बाळेतीर; आंदुर खुद अच होगकु तान साटी भुसा जमा माळुल.
EXO 5:8 तरी भी यास ईटागोळ ईगासताका आंदरी माळव बिळव आसा मुंद भी आंदुर से माळसुसेतीर, ईटागोळ्‍द गिनती येनु गोर्त माळबाळेतीर; यतिकी आंदुर आलसी आर, ई कारण ईद अंदकु चिळ्लासतार, ‘नाव होगकु तान परमेश्वर उन साटी बलिदान माळेव.’
EXO 5:9 आ मंळसागोळ से मात्‍त यक्‍कुल क्‍याल्‍सा माळसुसकु आगुल कि आंदुर अदुर दा मयनत माळतेला ईरूल अदिक ख्‍वाटा मातगोळ मा ध्‍यान कोळबाळुल.”
EXO 5:10 आग लॉकुर मयनत माळसुसावाळेर अदिक मुखियागोळ व्‍हार्या होगकु आंदुर से अंदुर, “फिरौन हींग अनतान, ‘ना नीमी भुसा कोळालीन.
EXO 5:11 नीवा खुद होगकु भुसा ढुंढ्सकु तरी; लेकीन नीम क्‍याल्‍सा येनु अच गोर्त माळकु आगतीदील.’”
EXO 5:12 इदुरसाटी आ लॉकुर पुरा मिस्त्र द्‍याश दा तितर बितर आदुर कि भुसा अन बदला लेल्‍ल इन छळी तंदुर.
EXO 5:13 मयनत माळसुसावाळेर ईद अंद अंदकु आंदुर से जल्‍दी माळसुस्‍त ईत्‍तुर, कि याता प्रकार देल नीव काड्‍डा ताकोमकु माळतोगीर अदा प्रकार देल तान हर दिन इन क्‍याल्‍सा ईग भी पुरा माळी.
EXO 5:14 अदिक इस्त्राएलीगोळ दा टु याता मुखियागोळी फिरौन उन मयनत माळसुसावाळेर आंदुर अधिकारी ठहरूसीदुर, आंदुर बळ्‍सकोंडुर अदिक आंदुर से केळकु आत, “येन कारण आद कि नीव तान ठहरूस्‍द ईटागोळ गिनती इन अनुसार पयला अन घाई नाळ अदिक ईंद पुरा माळसुसीदील?”
EXO 5:15 आग इस्त्राएलीगोळ्‍द मुखियागोळ होगकु फिरौन उन दुहाई ईद अंदकु कोट्‍टुर, “नी तान दासगोळ से हींग बर्ताव येती माळत्‍या?
EXO 5:16 नीन दासगोळी भुसा रा कोटकु अच आगाल अदिक आंदुर नाम से अनतोगतार, ‘ईटागोळ माळी, ईटागोळ माळी, ’ अदिक नीन दासगोळ भी बळ्‍सकोंडार; लेकीन दोष नींदा लॉकुर्द आद.”
EXO 5:17 फिरौन अंदुन, “नीव आलसी अदिक कोळी आईर; ईदा कारण अनतीर कि नामी यहोवा अन साटी बलिदान माळली होगगोळ.
EXO 5:18 ईग होगकु तान क्‍याल्‍सा माळी; अदिक भुसा नीमी सिकतीदील, लेकीन ईटागोळ्‍द गिनती आट अच पुरा माळोद बिद्‍दीत.”
EXO 5:19 याग इस्त्राएलीगोळ्‍द सरदारगोळ ई मात केळदुर कि आंदुर ईटागोळ्‍द गिनती गोर्त आगतीदील, अदिक हर दिशी आटा क्‍याल्‍सा पुरा माळोद बिद्‍दीत, आग आंदुर अर्त कोंडुर कि आंदुर संकट इन दिन होट बंदाव.
EXO 5:20 याग आंदुर फिरौन उन हात्‍ती टु व्‍हार्या होट बुट्‍टुर आग मूसा अदिक हारून, जो आंदुर से मुलाकात माळली निदुरकु ईरोर, आंदरी सिकदुर;
EXO 5:21 अदिक आंदुर मूसा अदिक हारून से अंदुर, “यहोवा नीम मा दृष्‍टी माळकु न्‍याय माळुल, यतिकी नीव नामी फिरौन अदिक आऊन कर्मचारीगोळ नजर दा घृणित ठहरूसकु नामी घात माळोर साटी आंदुर कय दा तलवार कोट बुटीर,”
EXO 5:22 आग मूसा यहोवा अन हात्‍ती होगकु अंदुन, “हे प्रभु, नी ई प्रजा अक तकलीफ येती कोट्ट? अदिक नी नानी ईल येती कळुद?
EXO 5:23 यागी टु ना नीन हेसुर देल फिरौन उन हात्‍ती मात हेळोर साटी होदीन आगी टु आव ई प्रजा अन सांगुळ बुरा अच दुरव्‍यवहार माळ्‍यान, अदिक नी तान प्रजा अन येनु अच छुटकारा माळीदील.”
EXO 6:1 बाक यहोवा मूसा से अंदुन, “ ना फिरौन उन सांगुळ माळाईन, ईग नी अदरी नोळ्‍या, आव नान महान शक्ती इन कारण तान द्याश टु आंदरी कळाईन बिना संकोच देल नान महान शक्ती इन कारण आव आंदरी तेग्द बुट्टान.”
EXO 6:2 परमेश्वर मूसा से अंदुन, “ना यहोवा हुईन.
EXO 6:3 ना सर्वशक्तिमान ईश्‍वर उन हेसुर देल अब्राहम, इसहाक, अदिक याकूब उक दर्शन कोळीन, लेकीन यहोवा अन हेसुर देल ना आंदुर मा प्रगट आगीदील.
EXO 6:4 अदिक ना आंदुर सांगुळ तान वाचा मजबुत माळीन, मतलब कनान द्‍याश यदुर दा आंदुर परदेशी आगकु ईरतोगोर, आऊक आंदरी कोट बुळाईन.
EXO 6:5 इस्त्राएली यारी मिस्त्री लॉकुर दासत्‍व दा ईटतार, आंदुर कन्नासोद भी केळकु ना तान वाचा अक याद माळीन.
EXO 6:6 ई कारण नी इस्त्राएलीगोळ से अन, ‘ना यहोवा हुईन, अदिक नीमी मिस्त्रीगोळ बोझ इन ल्‍यालमा टु तेगाईन, अदिक आंदुर स्‍यावा दा टु नीमी बिळसाईन, अदिक तान भुजागोळ वाळुसकु अदिक भारी दण्‍ड कोटकु नीमी बिळ्‍स बुळाईन,
EXO 6:7 अदिक ना नीमी तान प्रजा माळोर साटी अपनुस कोमाईन, अदिक ना नीम परमेश्वर ठहरुसाईन; अदिक नीव जान्‍स कोंडीर कि ना नीम परमेश्वर यहोवा हुईन जो नीमी मिस्त्रीगोळ्द बोझ इन ल्‍यालमा टु तेगुकु तंदीन,
EXO 6:8 अदिक याता द्‍याश इन कोळोद किर्‍या ना अब्राहम, इसहाक, अदिक याकूब से तिंदीदीन अदुर दा नीमी पोहचुस्कु अदरी नीम्‍द अधिकार माळ बुळाईन. ना रा यहोवा हुईन.’”
EXO 6:9 ई मातगोळ मूसा इस्त्राएलीगोळी केळ्‍सदुन, लेकीन आंदुर मन इन बेचैनी अदिक स्यावा अन क्रुरता अन कारण आऊन केळीदील.
EXO 6:10 आग यहोवा मूसा से अंदुन,
EXO 6:11 “नी होगकु मिस्त्र अन राजा फिरौन से अन कि इस्त्राएलीगोळी तान द्‍याश दा टु होगगोळ.”
EXO 6:12 लेकीन मूसा यहोवा से अंदुन, “नोळ, इस्त्राएलीगोळ नान केळीदील; बाक फिरौन नान तोतळा माताळावाळा अन ह्‍यांग केळ्‍यान?”
EXO 6:13 आग यहोवा मूसा अदिक हारून उक इस्त्राएलीगोळ अदिक मिस्त्र अन राजा फिरौन उन साटी ई अभिप्राय देल आग्‍या कोट्‍टुन कि आंदुर इस्त्राएलीगोळी मिस्त्र द्‍याश टु तेगुकु ओयुल.
EXO 6:14 आंदुर पुर्वजगोळ्‍द घराना नोर मुख्‍य मंळसा ईंदुर उर: इस्त्राएल उन धोळ पार, रूबेन उन पारगोळ: हनोक, पल्लू, हेस्त्रोन अदिक कर्मी; ईंदुर देल अच रूबेन उन वंश होट्‍टव.
EXO 6:15 शिमोन उन पारगोळ: यमूएल, यामीन, ओहद, याकीन अदिक सोहर, अदिक ऊंद कनानी आर्त इन पार शाऊल; ईंदुर देल अच शिमोन उन कुल होट्‍टव.
EXO 6:16 लेवी इन पारगोळ यार देल आंदुर्द वंशावली नळदाव, आंदुर हेसुर ईव हुव: मतलब गेर्शोन, कहात अदिक मरारी; अदिक लेवी इन पुरा अवस्‍था ऊंद सौ सदतीस साल इन आत.
EXO 6:17 गेर्शोन उन पार यार देल आंदुर कुल नळदाद: लिबनी अदिक शिमी.
EXO 6:18 कहात उन पारगोळ: अम्राम, यिसहार, हेब्रोन अदिक उज्जीएल; अदिक कहात उन पुरा अवस्‍था ऊंद सौ सदतीस साल उन आत.
EXO 6:19 मरारी इन पारगोळ: महली अदिक मूशी. लेवीगोळ्‍द कुल यार देल आंदुर वंशावली नळदाद ईंदुरा हुर.
EXO 6:20 अम्राम तान फुय योकेबेद से मदा माळदुन अदिक आकिन से हारून अदिक मूसा पैदा आदुर; अदिक अम्राम उन पुरा अवस्‍था ऊंद सौ सदतीस साल इन आत.
EXO 6:21 यिसहार उन पारगोळ: कोरह, नेपेग अदिक जिक्री ईरोर.
EXO 6:22 उज्जीएल उन पारगोळ: मीशाएल, एलसाफान अदिक सित्री.
EXO 6:23 हारून अम्‍मीनादाब उन पोर, अदिक नहशोन उन आकतींग एलीशेबा से मदा माळदुन; अदिक आकिन से नादाब, अबीहू, एलीआजर अदिक ईतामार पैदा आदुर.
EXO 6:24 कोरह अन पारगोळ: अस्‍सीर, एलकाना अदिक अबीआसाप; अदिक ईंदुर देल अच कोरह वंश इन कुल टु होट्‍टुर.
EXO 6:25 हारून उन पार एलीआजर पूतीएल उन पोर इन से मदा माळदुन; अदिक आकिन से पीनहास पैदा आदुन. ईंदुर देल अच आंदुर कुल नळुत. लेवीगोळ्‍द पुर्वजगोळ घराना नोर मुख्‍य मंळसागोळ ईंदुरा उर.
EXO 6:26 हारून अदिक मूसा ईंदुरा हुर यारी यहोवा ईद आग्‍या कोट्टान: “इस्त्राएलीगोळी दल दल माळकु आंदरी जमा माळकु मिस्त्र द्‍याश टु तेगुकु तरी.”
EXO 6:27 ईंदुर आंदुरा मूसा अदिक हारून हुर यार मिस्त्र द्‍याश इन राजा फिरौन से अंदुर कि नाव इस्त्राएलीगोळी मिस्त्र द्‍याश टु तेगुकु वोतेव.
EXO 6:28 याग यहोवा मिस्त्र द्‍याश दा मूसा से ईद मात अंदुन,
EXO 6:29 “ आव मूसा से अंदुन, ना यहोवा हुईन; इदुरसाटी जो येनारा ना नीन से अनाईन अद सप्‍पा मिस्त्र अन राजा फिरौन से अनेत.”
EXO 6:30 लेकीन मूसा यहोवा अक उत्‍तर कोट्‍टुन, “ना रा माताळदुर दा तोतळा आईन; अदिक फिरौन ह्‍यांग नांद केळ्‍यान?”
EXO 7:1 आग यहोवा मूसा से अंदुन, “केळ, ना नीनी फिरौन उन साटी परमेश्वर उन घाई ठहरूसतीन; अदिक नीन वार्ट हारून नीन नबी ठहरूस्‍यान.
EXO 7:2 जो जो आग्‍या ना नीनी कोळाईन अदा नी अनेत, अदिक हारून अदरी फिरौन से अंदान, यदुर देल आव इस्त्राएलीगोळी तान द्‍याश दा टु होळगोट्‍टान.
EXO 7:3 लेकीन ना फिरौन उन मन इक कठोर माळाईन, अदिक तान हापाळ सा चिन्‍ह अदिक चमत्कार मिस्त्र द्‍याश दा तोरसुसाईन.
EXO 7:4 तरी भी फिरौन नीम्‍द केळतीदील; अदिक ना मिस्त्र द्‍याश मा तान कय नेगुकु मिस्त्रीगोळी भारी दण्‍ड कोटकु तान सेना मतलब तान इस्त्राएली प्रजा अक मिस्त्र द्‍याश टु तेग्‍द बुळाईन.
EXO 7:5 अदिक याग ना मिस्त्र मा कय वाळुसकु इस्त्राएलीगोळी आंदुर बीच दा टु तेगाईन, आग मिस्त्री अर्त कोंडार कि ना यहोवा हुईन.”
EXO 7:6 आग मूसा अदिक हारून यहोवा अन आग्‍या अन अनुसार अच माळदुन.
EXO 7:7 याग आंदुर फिरौन से मात माळली कुरतुर आग मूसा अस्‍सी साल इन, अदिक हारून तिर्‍यास्सी साल इन ईरोन.
EXO 7:8 बाक यहोवा मूसा अदिक हारून से ईत्‍ता प्रकार अंदुन,
EXO 7:9 “याग फिरौन नीम से अनुल, ‘तान प्रमाण इन यातोदारा चमत्कार तोर्सी,’ आग नी हारून से अनेत, ‘तान कोल हुडुकु फिरौन उन मुंद हाक्‍क बुळ कि अद हाव बनसेगुल.’”
EXO 7:10 आग मूसा अदिक हारून फिरौन उन हात्‍ती होगकु यहोवा अन आग्‍या अन अनुसार माळदुर; अदिक याग हारून तान कोल फिरौन अदिक आऊन कर्मचारीगोळ्‍द मुंद हाकदुन, आग अद हाव बनसेत.
EXO 7:11 आग फिरौन पण्‍डीतगोळ अदिक जादु टोना माळावाळेरी कारसुसदुन; अदिक मिस्त्र अन जादूगरगोळ बंदकु तान तान तंत्र-मंत्र देल हांगा माळदुर.
EXO 7:12 आंदुर भी तान तान कोलगोळी हाक्‍क बुट्‍टुर, अदिक अव भी हाव बनसेदव. लेकीन हारून उन कोल आंदुर कोलगोळी नुंगबुळ्‍त.
EXO 7:13 लेकीन फिरौन उन मन मात्‍त यक्‍कुल कठिन आगेत, अदिक यहोवा अन वचन इन अनुसार आव मूसा अदिक हारून उन मातगोळी मान्‍सीदील.
EXO 7:14 आग यहोवा मूसा से अंदुन, “फिरौन उन मन कठोर आगेग्‍याद अदिक आव ई प्रजा अक होग गोळालुन.
EXO 7:15 याग फिरौन व्‍हातुर इन होती गांगा अन्द किनारा मा बंदान आ समय नी आऊन हात्ती होगेत; अदिक जो कोल हाव बनसेगीत, अदरी कय दा हुडुकु नील गांगा अन किनारा मा आऊन से मुलाकात माळोर साटी निदुरकु ईरेत.
EXO 7:16 अदिक आऊन से ईत्‍ता प्रकार अनेत, ‘इब्रीगोळ परमेश्वर यहोवा नानी ईद अनोर साटी नीन हात्‍ती कळ्‍यान कि नान प्रजा अन लॉकुरी होगगोळ, यदुर देल आंदुर आळी दा नान उपासना माळ्‍यार; अदिक ईगास ताका नी नान मात मान्सीदील.
EXO 7:17 यहोवा ईद अनतान, ईदुर देल नी जान्‍स कोंड्‍या कि ना अच परमेश्वर हुईन; नोळ, ना तान कय इन कोल इक नील गांगा अन किनारा मा बडाईन, अदिक नीर रक्‍ता बन्‍सेदीत,
EXO 7:18 अदिक जो मेनगोळ नील गांगा दा आव अव सोतोदाव, अदिक गांगा वास बरली हत्तीत, अदिक गांगा अन नीर कुडोर साटी मिस्त्रीगोळ्द योग्य ईरतीदील.’”
EXO 7:19 बाक यहोवा मूसा से अंदुन, “हारून से अन कि तान कोल हुडुकु मिस्त्र द्‍याश दा याट नीर आद, मतलब अदुर्द गांगागोळ, नयरगोळ, झीलगोळ, अदिक डोबनगोळ, सप्‍पा अन म्‍याकुच तान कय वाळुस कि अऊर्द नीर रक्‍ता बनसेगुल; अदिक पुरा मिस्त्र द्‍याश दा काठ अदिक कल्‍ल येढ्‍ढु भाति इन नीर इन पात्रगोळ दा रक्‍ता अच रक्‍ता आगेदीत.”
EXO 7:20 आग मूसा अदिक हारून यहोवा अन आग्‍या अन अनुसार माळदुर, मतलब आव कोल इक नेगुकु फिरौन अदिक आऊन कर्मचारीगोळ्‍द नोळतेला नील गांगा अन नीर मा बळदुन, अदिक गांगा अन सप्‍पा नीर रक्‍ता बनसेत.
EXO 7:21 अदिक नील गांगा दा जो मेनगोळ ईरव अव सोतोदव; अदिक गांगा दा टु वास बरली कुर्त, अदिक मिस्त्री लॉकुर गांगा अन नीर कुडु सकीदील; अदिक पुरा मिस्त्र द्‍याश दा रक्‍ता अच रक्‍ता आगेत.
EXO 7:22 आग मिस्त्र अन जादूगरगोळ भी तान तंत्र-मंत्र देल हांगा माळदुर; तरी भी फिरौन उन मन कठोर आगेत, अदिक यहोवा अन अना अनुसार आव मूसा अदिक हारून उन मान्‍सीदील.
EXO 7:23 फिरौन ईदुर मा भी ध्‍यान कोटीदील, अदिक मार्रा तिर्गुसकु तान मान्‍नी होटोदुन.
EXO 7:24 अदिक सप्‍पा मिस्त्री लॉकुर कुडा नीर इन साटी नील गांगा अन आसपास अगुळली हतदुर, यतिकी आंदुर गांगा अन नीर ईला कुडु सकोर.
EXO 7:25 याग यहोवा नील गांगा अक बळदीदुन आगी टु येळ दिन आगेगीदव.
EXO 8:1 आग यहोवा मात्‍त मूसा से अंदुन, “फिरौन उन हात्ती होगकु अन, ‘यहोवा नीन से ईत्‍ता प्रकार देल अनतान: नान प्रजा अन लॉकुरी होगगोळ यदुर देल आंदुर नान आराधना माळ्‍यार.
EXO 8:2 लेकीन अगर आंदरी होगगोळतीदील रा केळ, ना भ्यापकागोळी कळुकु नीन सप्‍पा द्‍याश इक हानि पोहुचुसावाळा आईन.
EXO 8:3 अदिक नील गांगा भ्यापकागोळ देल तुम्‍मेदित, अदिक अव नीन भवन दा, अदिक नीन हासक्‍या मा, अदिक नीन कर्मचारीगोळ मान्‍नगोळ दा, अदिक नीन प्रजा मा उलटा नीन भट्‍टागोळ अदिक हीठ कालसोद पात्रगोळ दा भी येरेदाव;
EXO 8:4 अदिक नीन मा, अदिक नीन प्रजा अदिक नीन कर्मचारीगोळ, सप्‍पा मुंदुर मा भ्यापकागोळ येरेदाव.’”
EXO 8:5 बाक यहोवा मूसा अक आग्‍या कोट्‍टुन, “हारून से अंदकोम कि गांगागोळ, नयरगोळ, अदिक झीलगोळ म्‍याकुच कय वाळुसकु कोल इन सांगुळ भ्यापकागोळी मिस्त्र द्‍याश मा येर्सकु तरूल.”
EXO 8:6 इदुरसाटी हारून मिस्त्र द्‍याश इन जलाशयगोळ म्‍याकुच तान कय वाळुसदुन; अदिक भ्यापकागोळ मिस्त्र द्‍याश मा येरकु अदरी होच बुट्‍टव.
EXO 8:7 अदिक जादूगरगोळ भी हांगा तंत्र-मंत्र देल मिस्त्र द्‍याश मा भ्यापकागोळ येर्सकु तंदुर.
EXO 8:8 आग फिरौन मूसा अदिक हारून उक कारसुसकु अंदुन, “यहोवा से विनती माळी कि आव भ्यापकागोळी नान से अदिक नान प्रजा से दुर माळुल; अदिक ना इस्त्राएली लॉकुरी होगगोळाईन. यदुर देल आंदुर यहोवा साटी बलिदान माळुल.”
EXO 8:9 आग मूसा फिरौन से अंदुन, “ईट मात साटी नी नानी आदेश कोळ कि ईग ना नीन अदिक नीन कर्मचारीगोळ, अदिक प्रजा अन निमित्त याग विनती माळाईन, कि यहोवा नीन हात्‍ती टु अदिक नीन मान्‍नगोळ दा टु भ्यापकागोळी दुर माळुल, अदिक अव सिर्फ नील गांगा दा सिकुल?”
EXO 8:10 आव अंदुन, “नाळ.” आव अंदुन, “नीन वचन इन अनुसार आदीत, यदुर नीनी ईद भास आगेगुल कि नाम परमेश्वर यहोवा अन तुल्‍य दुसरा याऊ हैलेच.
EXO 8:11 अदिक भ्यापकागोळ नीन हात्‍ती टु अदिक नीन मान्‍नगोळ दा टु अदिक नीन कर्मचारीगोळ अदिक प्रजा अन हात्‍ती टु दुर आगकु सिर्फ नील गांगा दा अच ईत्‍ताव.”
EXO 8:12 आग मूसा अदिक हारून फिरौन उन हात्‍ती टु होटोदुर; अदिक मूसा आ भ्यापकागोळ बारा दा, यहोवा अन दुहाई कोट्‍टुन जो आव फिरौन मा कळीदुन.
EXO 8:13 अदिक यहोवा मूसा अन अना हिसाब देल माळदुन; अदिक भ्यापकागोळ मान्‍नगोळ, आंगुळगोळ, ऊरगोळ अदिक केईगोळ दा सोतोदव.
EXO 8:14 अदिक मिस्त्री लॉकुर जमा माळकु अऊर्द ढेर हच बुट्‍टुर, अदिक पुरा द्‍याश वास देल तुम्‍मेत.
EXO 8:15 लेकीन याग फिरौन नोळदुन कि ईग आराम सिक्‍याद आग यहोवा अन कहना अन अनुसार आव मात्‍त तान मन कठोर माळदुन, अदिक आंदुर केळीदील.
EXO 8:16 बाक यहोवा मूसा से अंदुन, “हारून उक आग्‍या कोळ, ‘नी तान कोल वाळुसकु जमीन इन गागरा मा बडु, यदुर देल अद मिस्त्र द्‍याश तीम दा पिसोर्‍यागोळ बनसेगुल.’”
EXO 8:17 मुंद आंदुर हांगा माळदुर; मतलब हारून कोल इक हुडुकु कय वाळुसकु जमीन इन गागरा मा बळदुन, आग मंळसा अदिक जनावरगोळ येढ्‍ढु मा पिसोर्‍यागोळ आगेदव, अदिक सप्‍पा मिस्त्र द्‍याश दा भुमी इन गागरा पिसोर्‍यागोळ बन्‍सेदव.
EXO 8:18 आग जादूगरगोळ चाहासदुर कि तान तंत्र-मंत्रगोळ्द शक्‍ति देल नाव भी पिसोर्‍यागोळ तंदेव, लेकीन आंदुर सफल आग सकीदील. ई प्रकार मंळसागोळ अदिक जनावरगोळ येढ्‍ढु मा पिसोर्‍यागोळ बन्सकु ईत्‍तव.
EXO 8:19 आग जादूगरगोळ फिरौन से अंदुर, “ईद रा परमेश्वर उन कय इन क्‍याल्‍सा हुन.” तरी भी यहोवा अन कहना अन अनुसार फिरौन उन मन कठोर आगतेला ईत्‍त, अदिक आव मूसा अदिक हारून उन मात मान्‍सीदील.
EXO 8:20 बाक यहोवा मूसा से अंदुन, “व्हातऱ्या का येदकु फिरौन उन मुंद निदरेत, आव रा नील गांगा अन्द किनारा मा बंदान, अदिक आऊन से अनेत, ‘यहोवा नीन से ईद अनतान: नान प्रजा अन लॉकुरी होगगोळ कि आंदुर नान आराधना माळुल.
EXO 8:21 अगर नी नान प्रजा अक होगगोळतीदील रा केळ, ना नीन मा अदिक नीन कर्मचारीगोळ अदिक नीन प्रजा मा, अदिक नीन मान्‍नगोळ दा झुण्‍ड इन झुण्‍ड नॉणगोळी कळाईन; अदिक मिस्त्रीगोळ मान्‍ना अदिक आंदुर ईरा जागा भी नॉणगोळ देल तुम्‍मेदीत.
EXO 8:22 लेकीन आ दिशी ना गोशेन द्‍याश इक यदुर दा नान प्रजा ईरतद ब्‍यार्र माळाईन, अदिक अदुर दा नॉणगोळ्‍द झुण्‍ड ईरतीदील; यदुर देल नी जान्‍स कोम कि पृथ्‍वी इन न्याड्या दा ना अच यहोवा हुईन.
EXO 8:23 अदिक ना तान प्रजा अदिक नीन प्रजा दा अंतर पैदा माळाईन. ईद चिन्‍ह चमत्कार नाळ आदीत.’”
EXO 8:24 अदिक यहोवा हांगा माळदुन, अदिक फिरौन उन भवन अदिक आऊन कर्मचारीगोळ्‍द मान्‍नगोळ दा, अदिक सप्‍पा मिस्त्र द्‍याश दा नॉणगोळ्‍द झुण्‍ड इन झुण्‍ड तुम्‍मेदव, अदिक नॉणगोळ मारा देल आ द्‍याश नष्‍ट आत.
EXO 8:25 आग फिरौन मूसा अदिक हारून उक कारसुसकु अंदुन, “नीव होगकु तान परमेश्वर उन साटी ईदा द्‍याश दा बलिदान येरसी.”
EXO 8:26 मूसा अंदुन, “हींग माळोद उचित हैलेच; यतिकी नाव तान परमेश्वर यहोवा अन साटी मिस्त्रीगोळ्द हिंग घृणित वस्‍तु बलिदान येरसेव; अदिक अगर नाव मिस्त्रीगोळ नोळ्‍त आंदुर्द घृणित वस्‍तु बलिदान येरसेव रा येन आंदुर नाम मा पथराव माळतीदील?
EXO 8:27 नाव सुनसान आळी दा मुर दिन इन हादी मा होगकु तान परमेश्वर यहोवा अन साटी ह्यांग आव नाम से अंदान हांग अच अल नाव बलिदान येरसेव.”
EXO 8:28 फिरौन अंदुन, “ना नीमी आळी दा होगगोळाईन कि नीव तान परमेश्वर यहोवा अन साटी बलिदान येरसी; सिर्फ यक्कुल दुर होगबाळेतीर, अदिक नान साटी प्रार्थना माळी.”
EXO 8:29 आग मूसा उत्तर कोट्टुन, “केळ, ना नीन हात्‍ती टु व्‍हार्या होगकु यहोवा से प्रार्थना माळाईन कि नॉणगोळ्द झुण्‍ड नीन, अदिक नीन कर्मचारीगोळ, अदिक प्रजा अन हात्‍ती टु नाळ अच दुर माळाईन; लेकीन फिरौन मुंद कपट माळकु नामी यहोवा अन्द साटी बलिदान माळली होगोर साटी मना माळबाळुल.”
EXO 8:30 आग मूसा फिरौन उक बिट्ट बुट्टुन अदिक आऊन हात्‍ती टु व्‍हार्या होगकु यहोवा से प्रार्थना माळदुन.
EXO 8:31 अदिक यहोवा मूसा अन अना हिसाब देल नॉणगोळ्‍द झुण्‍डगोळी फिरौन, अदिक आऊन कर्मचारीगोळ, अदिक आऊन प्रजा से दुर माळदुन; ईल ताका कि ऊंद भी नॉण मिक्‍कु ईतीदील.
EXO 8:32 आग फिरौन ई घन भी तान मन इक कठोर माळदुन, अदिक आ लॉकुरी होग गोटीदील.
EXO 9:1 बाक यहोवा मूसा से अंदुन, “फिरौन उन हात्ती होगकु अन, ‘इब्रीगोळ परमेश्वर यहोवा नीन से ईत्‍ता प्रकार देल अनतान: नान प्रजा अन लॉकुरी होगगोळ कि आंदुर नान आराधना माळुल.
EXO 9:2 अदिक अगर नी आंदरी होगगोळाल अदिक ईग भी हुडुकु ईत्‍या,
EXO 9:3 रा केळ, नीन जो घ्वाळागोळ, गदागोळ, ऊँटगोळ, गोसी-वस्ता, म्यांडा-मर्री ईव सप्‍पा मैदान दा आव, अऊर मा यहोवा अन कय हिंग कुरतीत कि हापाळ धोळ्‍द मरी बंदीत.
EXO 9:4 लेकीन यहोवा इस्त्राएलीगोळ जनावरगोळ दा अदिक मिस्त्रीगोळ जनावरगोळ दा हींग अंतर पैदा माळ्‍यान कि जो पशु इस्‍त्राएलीगोळव हुव अऊर दा टु यातव भी सायतीदील.’”
EXO 9:5 बाक यहोवा ईद अंदकु ऊंद समय निश्‍चित माळदुन, “ना ईद क्‍याल्‍सा ई द्‍याश दा नाळ माळाईन.”
EXO 9:6 दुसरा दिशी यहोवा हींग अच माळदुन; अदिक मिस्त्रीगोळव रा सप्‍पा जनावरगोळ सोतोदव, लेकीन इस्त्राएलीगोळ्‍द ऊंद भी जनावर सोतीदील.
EXO 9:7 अदिक फिरौन लॉकुरी कळुदुन, लेकीन इस्त्राएलीगोळ्‍द जनावरगोळ दा टु ऊंद भी ईला सोतीत. तरी भी फिरौन उन मन कठोर आगेत, अदिक आव आ लॉकुरी होग गोटीदील.
EXO 9:8 बाक यहोवा मूसा अदिक हारून से अंदुन, “नीव येढ्‍ढु मुंदुर भट्‍टी दा टु ऊंद ऊंद मुट्‍ठी राखळ हुडु कोमी, अदिक मूसा अदरी फिरौन उन मुंद आकाश दी हार्सबुळ.
EXO 9:9 आग अद श्‍याण्‍द गागरा आगकु सप्‍पा मिस्त्र द्‍याश दा मंळसागोळ अदिक जनावर येढ्‍ढु मा फफोलागोळ अदिक फॉळा बनसेदीत.”
EXO 9:10 इदुरसाटी आंदुर भट्‍टी इन ठॉमा तीम राखळ हुडुकु फिरौन उन मुंद निदुरदुर, अदिक मूसा अदरी आकाश दी हार्स बुट्‍टुन, अदिक अद मंळसागोळ अदिक जनावरगोळ येढ्‍ढु मा फफोला अदिक फॉळा बनसेत.
EXO 9:11 आ फॉळागोळ कारण जादूगरगोळ मूसा अन मुंद निदुरकु ईर सकीदील, यतिकी आ फॉळा ह्‍यांग मिस्त्रीगोळ्द ईरव हांग अच जादूगरगोळ्‍द भी होटीदव.
EXO 9:12 लेकीन यहोवा फिरौन उन मन इक कठोर माळ बुट्‍टुन, अदिक ह्‍यांग यहोवा मूसा से अंदीदुन, आव आऊन केळीदील.
EXO 9:13 बाक यहोवा मूसा से अंदुन, “व्‍हातर्‍या का येदकु फिरौन उन मुंद निदुर, अदिक आऊन से अन, ‘इब्रीगोळ परमेश्वर यहोवा ईत्‍ता प्रकार देल अनतान: नान प्रजा अन लॉकुरी होगगोळ कि आंदुर नान आराधना माळुल.
EXO 9:14 ईलारा ई घन ना नीन मा, अदिक नीन कर्मचारीगोळ अदिक नीन प्रजा मा हर प्रकार इन विपत्‍तीगोळ हाकाईन, यदुर देल नी जान्‍स कोम कि पुरा पृथ्‍वी मा नान तुल्‍य दुसरा याऊ हैलेच.
EXO 9:15 ना रा ईग कय वाळुसकु नीनी अदिक नीन प्रजा अक माहामारी देल कोन्‍नायदीन, अदिक पृथ्‍वी मा टु नीन सत्‍यानाश आगेगाईत;
EXO 9:16 लेकीन खराखुरा ना नीनी ईदा उद्देश देल जीत्ता ईटीन कि नीनी तान सामर्थ्य तोरसाईन, अदिक तान हेसुर पुरा पृथ्‍वी मा प्रसिद्ध माळाईन.
EXO 9:17 येन नीव ईग भी अहंकारी आईर अदिक नान लॉकुर इक होगगोळालीर?
EXO 9:18 केळ, ना नाळ ईदा समय हींग भंयकर गारपीठ इन माळ बरसुसाईन, यऊर हिसाब देल मिस्त्र अन नीव बिळा दिशी टु रा ईगासताका यागलु बिदीदील.
EXO 9:19 इदुरसाटी ईग लॉकुर इक कळुकु तान सप्पा जनावरगोळी अदिक नीन हात्ती खुला मैदान क्षेत्र दा आव सप्‍पा अक सुरक्षित जागा मा ओतकु ईटकु आगुल; ईला रा यास मंळसा या जनावर मैदान दा असुरक्षित ईत्‍ताव, अवरी मान्‍या जमा माळकु आगतीदील रा, अऊर मा गारपीठ बिद्‍दीत, अदिक अव सोतोदाव.’”
EXO 9:20 इदुरसाटी फिरौन उन कर्मचारीगोळ दा टु जो लॉकुर यहोवा अन वचन इन अंज्‍क मान्‍सतोगोर आंदुर तान तान सेवकगोळ अदिक जनावरगोळी मान्‍या ओत कोंडुर.
EXO 9:21 लेकीन यार यहोवा अन वचन मा मन हचीदील आंदुर तान सेवकगोळ अदिक जनावरगोळी मैदान दा ईर गोट्टुर.
EXO 9:22 आग यहोवा मूसा से अंदुन, “तान कय आकाश दी वाळुस कि सप्पा मिस्त्र द्‍याश इन मंळसागोळ, जनावरगोळ, अदिक केई इन मार्रमठगोळ अदिक सप्‍पा उपज मा गारपीठ बिळुल.”
EXO 9:23 आग मूसा तान कोल इक आकाश दी नेगदुन, अदिक यहोवा अन सामर्थ्‍य देल बिजली कळकुळसोद अदिक गारपीठ बिळली हतदव अदिक बेक्‍की पृथ्‍वी ताका बर कुर्त. ईत्‍ता प्रकार देल यहोवा मिस्त्र द्‍याश मा गारपीठ बरसुसदुन.
EXO 9:24 जो गारपीठ बिळतोगोद अऊर सांगुळ बेक्‍की भी मिसळुसकु ईरोद, अदिक अव गारपीठगोळ ईट भारी ईरव कि यागी टु मिस्त्र द्याश बसुस्कु ईरोद आगी टु मिस्त्र द्‍याश तिमुर दा हिंग गारपीठ यागलु बिळली ईरव.
EXO 9:25 इदुरसाटी मिस्त्र द्‍याश तिमुर्द केईगोळ दा येन मंळसा, येन जनावर, यास ईरोर सप्‍पा गारपीठ देल सोतोदव, अदिक गारपीठ देल केई इन पुरा उपज बरबाद आगेत, अदिक मैदान इन सप्‍पा मार्रमठ भी मुर्दोदव.
EXO 9:26 सिर्फ गोशेन प्रदेश दा यल इस्त्राएलीगोळ ईरतोगोर गारपीठ बिदीदील.
EXO 9:27 आग फिरौन मूसा अदिक हारून उक बुलावा कळुदुन अदिक आंदुर से अंदुन, “ई घन ना पाप माळीन; यहोवा न्‍यायी आन, अदिक ना अदिक नान प्रजा अन्यायी आद.
EXO 9:28 बिजली कळकुळसोद अदिक गारपीठ बिळोद रा हापाळ आगेत; ईग यहोवा से विनती माळी; आग ना नीम लॉकुरी होगगोळाईन, अदिक नीमी रोक्‍सकु आगतीदील.”
EXO 9:29 मूसा आऊन से अंदुन, “नगर दा टु होळ्‍त अच ना यहोवा दी कय फैलुसाईन, आग बादल इन गरजुसोद बंद आगेदीत अदिक गारपीठ भी यागलु बिळतीदील, इदुर देल नी जान्‍स कोंड्‍या कि पृथ्‍वी यहोवा अंद अच हुन.
EXO 9:30 तरी भी ना जान्‍सतीन कि ना रा नी अदिक ना नीन कर्मचारीगोळ यहोवा परमेश्वर उन अंज्‍क मानसालुर.”
EXO 9:31 सन अदिक जौ रा गारपीठ देल बरबाद आदव, यतिकी जौ इन लॉम्बागोळ होटबुटीदव अदिक सन दा कली अदिक फुल हतकु ईरव.
EXO 9:32 लेकीन यातोदु गोदी बरबाद आगीदील, यतिकी अव बाद्दा हण्ण आगताव.
EXO 9:33 याग मूसा फिरौन उन हात्ती टु नगर इन व्‍हार्या होटकु यहोवा दी कय फैलुस्कु प्रार्थना माळदुन, आग बादल इन गरजुसोद अदिक गारपीठ इन बिळोद बंद आत, अदिक बाक बाद्‍दा माळ धरती मा बिदीदील.
EXO 9:34 लेकीन ईद नोळकु कि माळ अदिक गारपीठ अदिक बादलगोळ्‍द गरजुसोद बंद आगेत, फिरौन तान कर्मचारीगोळ सांगुळ मात्‍त तान मन इक कठोर माळकु पाप माळदुन.
EXO 9:35 ईत्‍ता प्रकार देल फिरौन उन मन जिद्दी आगतेला ईत्‍त, अदिक आव इस्त्राएलीगोळी होग गोटीदील ह्‍यांग कि यहोवा मूसा अन द्वारा अनसुसीदुन.
EXO 10:1 बाक यहोवा मूसा से अंदुन, “फिरौन उन हात्‍ती होग; यतिकी ना अच आऊन अदिक आऊन कर्मचारीगोळ्‍द मन इक इदुरसाटी कठोर माळ बुटीन कि तान चिन्ह चमत्कार आंदुर बीच दा तोरसाईन;
EXO 10:2 अदिक नीव लॉकुर तान पारगोळ अदिक नातुगोळ से इदुर्द वर्णन माळी कि यहोवा मिस्त्रीगोळ्द ह्‍यांग मज्‍याक दा हार्सदीन अदिक आंदुर न्याड्या दा यास चमत्कार चिन्‍ह आंदुर बीच दा प्रगट माळदीन; यदुर देल नीव ईद जान्‍स कोंडीर कि ना अच यहोवा हुईन.”
EXO 10:3 आग मूसा अदिक हारून फिरौन उन हात्‍ती होगकु अंदुर, “इब्रीगोळव परमेश्वर नीन से ईत्‍ता प्रकार देल अनतान: नी यागासताका नान मुंद गरीब आगदुर देल संकोच माळतेला ईत्‍या? नान प्रजा अन लॉकुरी होगगोळ कि आंदुर नान उपासना माळ्‍यार.
EXO 10:4 अगर नी नान प्रजा अक होगगोळाल रा केळ, नाळ ना नीन द्‍याश दा फाफागोळ तराईन,
EXO 10:5 अदिक अव धरती इक हिंग मुच्‍च बुट्‍टाव कि कांळ्‍सकु बिळतीदील; अदिक नीम जो येनारा ओद देल मिक्केत्याद अदरी अव साफ माळ बुट्‍टाव, अदिक नीम यास मार्रगोळ मैदान दा हतकु आव अवरी भी अव साफ माळ बुट्‍टाव,
EXO 10:6 अदिक अव नींद अदिक नीन सप्‍पा कर्मचारीगोळ्‍द, ईलताका कि सप्‍पा मिस्त्रीगोळ मान्‍या तुम्‍मेदाव; ईस फाफागोळ नीन आप्‍प दादागोळ या आंदुरोर पुर्वजगोळ यागी टु धरती मा पैदा आग्‍यार आगी टु ईंद ताका यागलु नोळीदील.” आग आव तिर्गकु फिरौन उन हात्‍ती टु व्‍हार्या होटोदुन.
EXO 10:7 आग फिरौन उन कर्मचारीगोळ आऊन से अनली हतदुर, “आव यागासताका नाम साटी फंदा बन्सकु ईत्‍तान? आ मंळसागोळी होगगोळ कि आंदुर तान परमेश्वर यहोवा अन उपासना माळुल. येन नी ईगासताका जान्साल कि पुरा मिस्त्र नष्‍ट आगेग्‍याद?”
EXO 10:8 आग मूसा अदिक हारून फिरौन उन हात्‍ती मात्‍त कार्सुसकु आदुर, अदिक आव आंदुर से अंदुन, “होटोगी, तान परमेश्वर यहोवा अन उपासना माळी; लेकीन आंदुर जो होगावाळेर आर यार-यार उर?”
EXO 10:9 मूसा अंदुन, “नाव रा पार-पोरगोळ, म्यांडा-मर्रगोळ, वस्‍ता-गोसीगोळ समेत उलटा चिकोर टु रा हाळाबाट्‍टुर ताका सप्‍पा अन सप्‍पा होदेव, यतिकी नामी यहोवा अन साटी हाब्‍बा माळोद आद.”
EXO 10:10 आव ईत्‍ता प्रकार देल आंदुर से अंदुन, “यहोवा नीम सांगुळ ईरूल अगर ना नीमी चिकोर समेत होगगोळतीन; नोळी, नीम मन दा बुराई आद.
EXO 10:11 ईला, हिंग आग सकतीदील; नीव मंळसा अच होगकु यहोवा अन उपासना माळी, नीव ईदा रा चाहासीर.” अदिक आंदुर फिरौन उन मुंदु टु तेग्‍सुसकु आदुर.
EXO 10:12 आग यहोवा मूसा से अंदुन, “मिस्त्र द्‍याश इन म्‍याकुच तान कय वाळुस कि फाफागोळ मिस्त्र द्‍याश मा येरकु जमीन इन याटारा भी अनाज अदिक बाकी ओद देल मिक्‍कु आद सप्‍पा अक साफ माळ बुळुल.”
EXO 10:13 इदुरसाटी: मूसा तान कोल मिस्त्र द्‍याश इन म्‍याकुच वाळुसदुन, आग यहोवा हागुल तीम अदिक ईळ्‍ल्‍क तीम द्‍याश तीम दा पूर्व अन हवा वाहुसदुन; अदिक याग व्‍हातुर आत आग आ हवा दा फाफागोळ बंदव.
EXO 10:14 अदिक फाफागोळ येरकु मिस्त्र द्‍याश इन सप्‍पा जागागोळ दा बसेरा माळदव, अऊर्द झुण्‍ड हापाळ भारी ईरोद, उलटा न रा अऊर से पयले हींग फाफागोळ बंदीदव, अदिक न अऊर बाद्‍दा हींग फाफागोळ यागलु बंदाव.
EXO 10:15 अव रा सप्‍पा धरती मा होच्‍चेदव, ईलताका कि द्‍याश दा अंधार आगेत; अदिक अदुर सप्‍पा अनाज अदिक बाकी अदिक मार्रगोळ्द सप्‍पा कायगोळ, मतलब, जो येनारा ओद देल मिक्‍कु ईरोद, सप्‍पा अक अव साफ माळ बुट्‍टव; ईलताका कि मिस्त्र द्‍याश तीम दा न रा यातारा मार्र मा येनारा हरयाली मिक्‍कु ईत्‍त अदिक न केईगोळ दा अनाज ईत्‍त.
EXO 10:16 आग फिरौन तुरन्‍त मूसा अदिक हारून उक कार्सुसकु अंदुन, “ना रा नीम परमेश्वर यहोवा अन अदिक नीम भी अपराध माळीन.
EXO 10:17 इदुरसाटी सिर्फ ई घन नान अपराध क्षमा माळी, अदिक तान परमेश्वर यहोवा से विनती माळी कि आव नान म्‍याकुच टु ई मृत्‍यु उक दुर माळुल.”
EXO 10:18 आग मूसा फिरौन उन हात्‍ती टु होटकु यहोवा से विनती माळदुन.
EXO 10:19 आग यहोवा हापाळ प्रचंड पश्‍चिमी हवा वाहुसकु फाफागोळी ऊळुसकु क्याचाँद समुद्र दा हाक्‍क बुट्‍टुन, अदिक मिस्त्र अन यातोदु जागा दा ऊंद भी फाफा मिक्‍कु ईतीदील.
EXO 10:20 तरी भी यहोवा फिरौन उन मन इक कठोर माळ बुट्‍टुन, यदुर देल आव इस्त्राएलीगोळी होग गोटीदील.
EXO 10:21 बाक यहोवा मूसा से अंदुन, “तान कय आकाश दी वाळुस कि मिस्त्र द्‍याश इन म्‍याकुच अंधार आगेगुल, ईत्‍ता अंधार कि अद कय इक हतुल.”
EXO 10:22 आग मूसा तान कय आकाश दी वाळुसदुन, अदिक पुरा मिस्त्र द्‍याश दा मुर दिन ताका कारकीट अंधार ईत्‍त.
EXO 10:23 मुर दिन ताका न रा यारारा यारीकारा नोळदुर, अदिक न यावारा तान जागा मा टु येद्‍दुन; लेकीन सप्‍पा इस्त्राएलीगोळ मान्‍या ऊजुळ ईत्‍त.
EXO 10:24 आग फिरौन मूसा अक कार्सुसकु अंदुन, “नीव लॉकुर होगी, यहोवा अन उपासना माळी; तान चिकोरी भी तान सांगुळ ओयी; सिर्फ तान म्यांडा-मर्रगोळ अदिक वस्त-वाळीगोळी बिटकु होगी.”
EXO 10:25 मूसा अंदुन, “नीनी नाम कय दा मेलबलि अदिक होमबली इन जनावरगोळ भी कोळव बिद्दाव, यवरी नाव तान परमेश्वर यहोवा अन साटी येर्सेव.
EXO 10:26 इदुरसाटी नाम जनावरगोळ भी नाम सांगुळ होदाव, अऊर ऊंद खुर भी ईरतीदील, यतिकी अऊर दा टु ना नामी तान परमेश्वर यहोवा अन उपासना अन सामान ताकोमव बिद्दाव, अदिक नाव यागासताका अल पोचुसालेव आगासताका जान्‍सालेव कि येन येन हुडुकु यहोवा अन उपासना माळोद बिद्‍दीत.”
EXO 10:27 लेकीन यहोवा फिरौन उन मन जिद्दी माळ बुट्‍टुन, यदुर देल आव आंदरी होग गोटीदील.
EXO 10:28 आग फिरौन आऊन से अंदुन, “नान मुंदु टु होटोग; अदिक सचेत ईर; नानी तान मार्रा बाक तोर्सबाळेत; यतिकी याता दिशी नी नानी मार्रा तोरस्‍या अदा दिशी नी कोन्‍सुसकु आद्‍या.”
EXO 10:29 मूसा अंदुन, “नी बराबर अंद्‍या; ना नीन मार्रा बाक यागलु नोळतीदील.”
EXO 11:1 बाक यहोवा मूसा से अंदुन, “मात्‍त ऊंद मुसीबत ना फिरौन अदिक मिस्त्र द्‍याश मा हाकतीन, अदुर बाद्‍दा आव नीम लॉकुरी अल टु होग गोट्‍टान; अदिक याग होग गोट्‍टान आग नीम सप्‍पा मुंदरी निश्‍चय तेग्‍द बुट्‍टान.
EXO 11:2 ईग नान प्रजा अक नान ईद आग्‍या केळ्स कि ऊंद ऊंद मंळसा अदिक ऊंद ऊंद आर्त तान तान मान्‍ना हातळोरवाळेर से, व्‍हान्‍ना-बेळ्ली इन ईसरावाळी बेळ कोमुल.”
EXO 11:3 आग यहोवा मिस्त्रीगोळी तान प्रजा मा दयालु माळदुन. अदुर बाद्‍दा आव मंळसा मूसा, मिस्त्र द्‍याश दा फिरौन उन कर्मचारीगोळ अदिक साधारण लॉकुर नजर दा हापाळ महान ईरोन.
EXO 11:4 बाक मूसा फिरौन से अंदुन, “यहोवा ईत्‍ता प्रकार देल अनतान: आर्धा ईळ्‍ल्‍क इन हात्‍तीपास ना मिस्त्र द्‍याश इन बीच दा आगतेला नळाईन.
EXO 11:5 आग मिस्त्र दा सिंहासन मा कुरावाळा फिरौन टु हुडुकु चक्‍की पिसुसावळ्त दासगीती ताका अन पयला धोळ पारगोळ; उलटा जनावरगोळ ताका अन पयला पाड्डा सोतोदाव.
EXO 11:6 अदिक सप्‍पा मिस्त्र द्‍याश दा धोळ्‍द हाहाकार मचुसेदीत, ईल ताका कि अदुर घाई न रा यागल्‍यारा आगीदील अदिक न यागलु आदीत.
EXO 11:7 लेकीन इस्त्राएलीगोळ्‍द खिलाप, येन मंळसागोळ येन जनावरगोळ, यावारा मा यातोदु नाय भी बेगुळतीदील; यदुर देल नीव जान्‍स कोमी कि मिस्त्रीगोळ अदिक इस्‍त्राएलीगोळ दा ना यहोवा भेद माळतीन.
EXO 11:8 आग नीनोर ई सप्‍पा कर्मचारीगोळ नान हात्‍ती बंदकु म्यांडा बांग्सकु नानी दण्डवत माळकु ईद अंदार, ‘तान सप्‍पा परिवार इन समेत होटबुळ.’ अदिक अदुर बाद्‍दा ना होटबुळाईन.” ईद अंदकु मूसा हापाळ सिट्‍ट दा फिरौन उन हात्‍ती टु होट बुट्‍टुन.
EXO 11:9 यहोवा मूसा से अंद बुटीदुन, “फिरौन नीम मातगोळ केळतीदील; यतिकी नान इच्‍छा आद कि मिस्त्र द्‍याश दा हापाळ चमत्कार माळाईन.”
EXO 11:10 मूसा अदिक हारून फिरौन उन मुंद ई सप्‍पा चमत्कार माळदुर; लेकीन यहोवा फिरौन उन मन मात्‍त कठोर माळ बुट्‍टुन, इदुरसाटी आव इस्त्राएलीगोळी तान द्‍याश दा टु होग गोटीदील.
EXO 12:1 बाक यहोवा मिस्त्र द्‍याश दा मूसा अदिक हारून से अंदुन,
EXO 12:2 “ईद तिंगुळ नीम लॉकुर साटी सुरवात इन ठहरूसुल; मतलब साल इन पयला तिंगुळ ईदा ठहरूसुल.
EXO 12:3 इस्त्राएली इन सप्‍पा मंडली से ईत्‍ता प्रकार देल अनी; ईदा तिंगुळ इन दसवा दिशी इक नीव तान तान पुर्वजगोळ्‍द घरानागोळ्द अनुसार, घराना अन हींद ऊंद ऊंद पाड्डा कोंडकु ईटी;
EXO 12:4 अदिक अगर यारदारा घराना दा ऊंद पाड्डा अन तिनोर साटी मंळसागोळ गोर्त ईतीदार, रा आव तान सब से हात्‍ती ईरावाळा मंळसा अन सांगुळ जनावरगोळ्‍द गिनती इन अनुसार ऊंद पाड्‍डा कोंडकु ईटुल; अदिक नीव हर ऊंद उन तिना हिसाब देल पाड्‍डगोळ्‍द हिसाब माळेतीर.
EXO 12:5 नीम पाड्डा निर्दोष अदिक ऊंद साल इन नर ईरूल, अदिक अदरी चाहे म्यांडागोळ दा टु कोमेत या चाहे मर्रगोळ दा टु.
EXO 12:6 अदिक ई तिंगुळ इन चौदावा दिन ताका अदरी ईटकु ईरेत, अदिक आ दिशी द्‍यावमुळका अन होती इस्त्राएल इन सप्‍पा मंडली इन लॉकुर अदरी बलि येरसुल.
EXO 12:7 आग आंदुर अदुर रक्‍ता दा टु येनारा हुडुकु याता मान्‍या पाड्‍डा तिंदार अऊर्द दरवाजा अन येढ्‍ढु बाजु दा अदिक चौखट इन म्‍याकुच हचुल.
EXO 12:8 अदिक आंदुर आ मास इक अदा ईळ्‍ल्‍की बेक्‍की दा सुटकु अखमीरी रोट्‍टी अदिक केय सागपात इन सांगुळ तिनुल.
EXO 12:9 अदरी ताल्‍ला, काल, अदिक अतळीगोळ समेत बेक्‍की दा सुटकु तिनेतीर, कच्‍चा या नीर दा येनारा भी बेईसकु तिनबाळेतीर.”
EXO 12:10 अदुर दा टु येनारा भी व्‍हातुर ताका ईटबाळेतीर, अदिक अगर येनारा व्‍हातुर ताका ईतोदीत भी, रा अदरी बेक्‍की दा होताक बुळेतीर.
EXO 12:11 अदिक अदुर तिनोद ईद विधी आद: नेळु कटकु, काल दा जुता हाक्‍कु, अदिक कय दा कोल हुडुकु अदरी फुरताई देल तिनेतीर; अद रा यहोवा अन हाब्ब ईत्‍तीत.
EXO 12:12 यतिकी आ ईळ्‍ल्‍की ना मिस्त्र द्‍याश इन बीच दा टु आगतेला होगाईन, अदिक मिस्त्र द्‍याश इन येन मंळसागोळ येन जनावरगोळ, सप्‍पा अन पहिलौठागोळी कोन्‍नाईन; अदिक मिस्त्र अन सप्‍पा देवतागोळी भी ना दण्‍ड कोळाईन; ना यहोवा हुईन.
EXO 12:13 अदिक याता मान्‍नगोळ दा नीव ईत्‍तीर अऊर मा आ रक्‍ता नीम साटी चिन्ह ठहरूसीत; मतलब ना आ रक्‍ता अक नोळकु नीमी बिटकु होगाईन, अदिक याग ना मिस्त्र द्‍याश इन लॉकुरी कोन्‍नाईन, आग अद विपत्‍ती नीम मा बिळतीदील अदिक नीम नाश आगतीदील
EXO 12:14 अदिक अद दिन नीमी याद तोरसावाळा ठहरूसीत, अदिक नीव अदरी यहोवा अन साटी हाब्‍ब माळकु मान्‍सेतीर; अद दिन नीम पीढ़ीगोळ दा हमेशा अन विधी जान्‍सकु हाब्‍ब मान्‍सकु आगुल.
EXO 12:15 अदिक परमेश्वर अंदुन, “येळ दिन ताका अखमीरी रोट्‍टी तिनतोगेतीर, अऊर दा टु पयला अच दिशी तान तान मान्‍या दा टु खमीर हटुस बुळेतीर, उलटा जो यावारा पयला दिशी टु रा सातवा दिन ताका यातोदारा खमीर वस्तु तिनुल, आव जीव इस्त्राएलीगोळ दा टु नाश माळकु आगुल.
EXO 12:16 पयला दिशी ऊंद पवित्र सभा, अदिक सातवा दिशी भी ऊंद पवित्र सभा माळेतीर; आ येढ्ढु दिनगोळ दा यातोदारा क्याल्सा माळकु आगबाळुल; सिर्फ याता जीव इन जो तिनोद आद आऊन क्याल्सा माळोद आग्या आद.
EXO 12:17 इदुरसाटी नीव बिना खमीर इन रोट्टी इन हाब्‍ब मान्सेतीर, यतिकी अदा दिशी मान्सी ना नीमी दल दल माळकु मिस्त्र द्याश टु तेगदीन; ई कारण देल अद दिन नीम पीढ़ीगोळ दा हमेशा विधी मान्सकु आगुल.
EXO 12:18 पयला तिंगुळ इन चौदावा दिन इन द्यावमुळका टु रा एक्कीसवा दिन इन द्यावमुळका ताका नीव अखमीरी रोट्टी तिनतोगेतीर.
EXO 12:19 येळ दिन ताका नीम मान्नगोळ दा थ्वाळासा भी खमीर मिक्‍कु ईरबाळुल, उलटा जो यावारा यातोदारा खमीर वस्तु उक तिनुल, चाहे आव देशी ईरूल या चाहे परदेशी, आव जीव इस्त्राएलीगोळ मंडली दा टु नाश माळकु आगुल.
EXO 12:20 यातोदारा खमीर इन वस्तु तिनबाळेतीर; तान सप्पा मान्नगोळ दा बिना खमीर इन रोट्टी तिनतोगेतीर.”
EXO 12:21 आग मूसा इस्त्राएल इन सप्पा पुरनिगोळी कारूकु अंदुन, “नीव तान तान कुल इन अनुसार ऊंद ऊंद पाड्डा ब्यार्र माळकु ईटी, अदिक फसह हाब्ब इन पाड्डा बलि माळेतीर.
EXO 12:22 अदिक एजोब मार्र इन ऊंद जळी हुडुकु अद पात्र दाकळोद रक्ता दा मुळकुळसेतीर अदिक अदुर देल अदुर दाकळोद रक्ता दरवाजा अन पट्टी इक अदिक येढ्ढु बाजु दा हचेतीर; अदिक व्हातुर ताका नीम दा टु याऊ मान्या टु व्हार्या होळबाळुल.
EXO 12:23 यतिकी यहोवा द्याश इन बीच दा आगकु मिस्त्रीगोळी कोनतेला होदान; इदुरसाटी यल यल अव चौखट इन क्वानागोळ, अदिक येढ्ढु बाजु मा आ रक्ता अक नोळ्यान, अल अल आव आ दरवाजा अक बिळतेला होदान, अदिक नाश माळावाळेरी नीम मान्नगोळ दा कोन्नोर साटी होगगोळतीदील.
EXO 12:24 बाक नीव ई नियम इक तान अदिक तान वंश इन साटी हमेशा अन नियम जान्सकु मान्सतोगी.
EXO 12:25 याग नीव आ द्याश दा यदरी यहोवा तान अना हिसाब देल नीमी प्रदान माळ्यान, आग ईद क्याल्सा माळतोगेतीर.
EXO 12:26 अदिक याग नीम चिकोर नीमी केळ्यार, ‘ई नियम देल नीम्द येन मतलब आद?’
EXO 12:27 आग नीव आंदरी ईद उत्तर कोळेतीर, ‘यहोवा जो मिस्त्रीगोळी कोन्ना समय मिस्त्र दा ईरावाळेर नाव इस्त्राएलगोळ मान्नगोळी बिटकु नाम मान्नगोळी ऊळ्सदुन, ईदा कारण आऊन फसह हाब्ब इन ईद बलिदान माळकु आगतद.’ आग लॉकुर म्यांडा बांग्सकु दण्डवत माळकु आराधना माळदुर.”
EXO 12:28 आग आ इस्त्राएलीगोळ होगकु, जो आग्या यहोवा मूसा अदिक हारून उक कोटीदुन, अदुर दा अनुसार माळदुर.
EXO 12:29 हींग आत कि आर्धा ईळ्लकी यहोवा मिस्त्र द्याश दा सिंहासन मा कुरावाळा फिरौन उन हात्ती टु रा जेल दा बिदकु कैदी ताका, सप्पा मुंदुर्द पहिलौठा अक, उलटा जनावरगोळ्द पहिलौठा अक कोंद बुट्टुन.
EXO 12:30 अदिक फिरौन ईळ्लकी का येदकु कुरतुन, अदिक आऊन सप्पा कर्मचारी, उलटा सप्पा मिस्त्रीगोळ यद्दुर; अदिक मिस्त्र द्याश दा हापाळ धोळ्द हाहाकार मचुसेत, यतिकी ऊंद भी हींग मान्ना ईला ईरोद यल याऊ सोतीदान ईला.
EXO 12:31 आग फिरौन ईळ्लक इक मूसा अदिक हारून उक कारसुसकु अंदुन, “नीव इस्त्राएलीगोळ समेत नान प्रजा अन बीच दा टु होटबुळी; अदिक तान अना हिसाब देल होगकु यहोवा अन आराधना माळी. ह्यांग नीव अंदिदीर.
EXO 12:32 तान अना हिसाब देल तान म्यांडा-मर्रगोळ अदिक वस्ता-गोसीगोळी सांगुळ ओयी; अदिक नानी आशीर्वाद कोटकु होगी.”
EXO 12:33 मिस्त्री जो अनतोगोर, नाव रा सप्पा सोतोगेव, आंदुर इस्त्राएली लॉकुर मा दबाव हाकतेला अंदुर, “द्याश दा टु राटनेरी होटबुळी.”
EXO 12:34 आग आंदुर तान काल्सद हीट्ट इक बिना खमीर कोळ्द अच कठौती समेत कपड़ागोळ दा कटकु तान तान खांदागोळ मा हाक्‍क बुट्टुर.
EXO 12:35 इस्त्राएलीगोळ मूसा अन कहना अन अनुसार मिस्त्रीगोळ से व्हान्ना-बेळ्ली इन ईसरागोळ अदिक कपड़ागोळ बेळ कोंडुर;
EXO 12:36 अदिक यहोवा मिस्त्री लॉकुरी तान प्रजा अन लॉकुर मा हींग दया माळदुन कि आंदुर जो जो बेळदुर अद सप्पा आंदरी सिक्त. ईत्ता प्रकार देल इस्त्राएली लॉकुर मिस्त्रीगोळी लुटुस कोंडुर.
EXO 12:37 आग इस्त्राएली लॉकुर रामसेस टु कूच माळकु सुक्कोत नगर इक होदुर, अदिक चिकोर चिंणगेरी अदिक आर्तेर इक बिटकु आंदुर लगभग आर लाख पैदल नळावाळेर मंळसागोळ ईरोर.
EXO 12:38 आंदुर सांगुळ हापाळ गैर-इस्राएली लॉकुर्द भीळ भी होत, अदिक म्यांडा, मर्रगोळ, वस्ता गोसीगोळ, हापाळ सा जनावर भी सांगुळ होदव.
EXO 12:39 अदिक जो काल्सद हीट्ट आंदुर मिस्त्र टु सांगुळ ओतीदुर अदुर्द आंदुर बिना खमीर कोळ्द रोट्टीगोळ माळदुर; यतिकी आंदुर मिस्त्र दा टु हींग बरबस तेगुकु आदुर कि आंदरी मौका भी सिकीदील कि हादी मा तिनोर साटी येनारा हुडु कोंडेव, ईदा कारण अद काल्सद हीट्ट बिना खमीर इन ईरोद.
EXO 12:40 मिस्त्र दा ईरावाळेर इस्त्राएली लॉकुरी अल परदेशी ईतकु नाक सौ तीस साल आगेगीदव.
EXO 12:41 अदिक आ नाक सौ तीस साल आगदुर मा, बराबर अदा दिशी, यहोवा अन पुरा सेना मिस्त्र द्याश दा टु होटबुळ्त.
EXO 12:42 यहोवा इस्त्राएलीगोळी मिस्त्र द्याश दा टु तेगुकु तंदुन, ई कारण आ ईळ्लक आऊन निमित्त मानसोर साटी योग्य आद; ईद यहोवा अन अदा ईळ्लक हुन यदुर्द पीढ़ोन पीढ़ी दा मानसोद इस्त्राएली लॉकुर्द साटी जरूरी आद.
EXO 12:43 बाक यहोवा मूसा अदिक हारून से अंदुन, “हाब्ब अन नियम ईद हुन: यावारा परदेशी अदुर दा टु तिनबाळुल;
EXO 12:44 लेकीन जो यारदारा कोम्द दास आगीदान, अदिक नीव लॉकुर आऊन खतना माळीदीर, आव रा अदुर दा टु तिन सक्यान.
EXO 12:45 लेकीन परदेशी अदिक क्याल्सा माळावाळेर अदुर दा टु तिनबाळुल.
EXO 12:46 आऊन तिनोद ऊंदा मान्या दा ईरूल; मतलब नीव आऊन मास दा टु येनु मान्या अन व्हार्या ओयबाळेतीर; अदिक पशुबलि उन यातोदारा भी येलु मुरूबाळेतीर.
EXO 12:47 हाब्‍ब अक मानसोद इस्त्राएल इन पुरा मंडली इन कर्तव्य आद.
EXO 12:48 अदिक अगर यावारा परदेशी नीम लॉकुर सांगुळ ईतकु यहोवा अन साटी हाब्ब मानसोद चाहास्यान, रा आव तान अल इन सप्पा मंळसागोळ्द खतना माळसुसुल, आग आव हात्ती बंदकु अदरी मानसुल; अदिक आव देशी मंळसा अन घाई ठहरूस्यान. लेकीन यावारा खतना रहित मंळसा अदुर दा टु तीन ईला पायजे.
EXO 12:49 आऊन व्यवस्था देशी अदिक नीम बीच दा ईरावाळेर परदेशी येढ्ढु मुंदुर साटी ऊंदा ईरूल.”
EXO 12:50 ईद आग्या जो यहोवा मूसा अदिक हारून उक कोट्टुन अदुर्द अनुसार सप्पा इस्त्राएली लॉकुर माळदुर.
EXO 12:51 अदिक बराबर अदा दिशी यहोवा इस्त्राएलीगोळी मिस्त्र द्याश दा टु दल बल माळकु तेगुकु ओतुन.
EXO 13:1 बाक यहोवा मूसा से अंदुन,
EXO 13:2 “येन मंळसा नव येन जनावरगोळव, इस्त्राएलीगोळ दा यास तान तान मोय इन पहिलौठा आर, आंदरी नान साटी पवित्र मानसेत; अद नांदा हुन.”
EXO 13:3 बाक मूसा लॉकुर से अंदुन, “ई दिन इक याद ईटी, यदुर दा नीव लॉकुर दासत्व अन मान्या, मतलब मिस्त्र द्याश टु होटकु बंदीर; यहोवा नीमी अल टु तान कय इन ताकद देल तेगुकु तंदान; इदुर दा खमीरी रोट्टी तिनकु आगबाळुल.
EXO 13:4 आबीब इन तिंगुळ दा ईंद इन दिशी नीव होटीर.
EXO 13:5 इदुरसाटी याग यहोवा नीमी कनानी, हित्ती, एमोरी, हिब्बी, अदिक यबूसी लॉकुर द्याश दा पोहचुस्यान, यदरी कोळोद किर्‍या आव नीम आप्प दादागोळ से तिंदीदुन, अदिक यदुर दा हाल अदिक शयद इन धारागोळ वाहुसताव, आग नीव ईदा तिंगुळ दा हाब्‍ब मानसेतीर.
EXO 13:6 येळ दिन ताका अखमीरी रोट्टी तिनतोगेतीर, अदिक सातवा दिशी यहोवा अन साटी हाब्‍ब मानसेतीर.
EXO 13:7 ई येळु दिनगोळ दा अखमीरी रोट्टी तिनकु आगुल, उलटा नीम द्याश भर दा न खमीरी रोट्टी, न खमीर नीम हात्ती कांळ्सकु बिळुल.
EXO 13:8 अदिक आ दिशी नीव तान तान पारगोळी ईद अंदकु समझुस बुळेतीर कि ईद नाव अदा क्याल्सा अन कारण माळतेव, जो यहोवा नाम मिस्त्र द्याश टु होटकु बरा होती नाम साटी माळीदुन.
EXO 13:9 बाक ईद नीम साटी नीम कय दा ऊंद चिन्ह आदीत, अदिक नीम कण्णगोळ मुंद याद माळसुसावाळा वस्तु ठहरूसुल; यदुर दा यहोवा अन व्यवस्था नीम बाय मा ईरूल: यतिकी यहोवा नीमी तान ताकदवर कयगोळ देल मिस्त्र दा टु तेगदान.
EXO 13:10 ई कारण नीव ई विधी इक हर साल सही समय मा मान्सतोगेतीर.
EXO 13:11 “बाक याग यहोवा आ किर्‍या अन अनुसार, जो आव नीम आप्प दादागोळ से अदिक नीम से भी तिंदान, नीमी कनानीगोळ द्याश दा पोहचुस्कु अदरी नीमी कोट बुट्टान,
EXO 13:12 आग नीम दा टु यास तान तान मोय इन पहिलौठा आईर आंदरी, अदिक नीम जनावरगोळ दा जो हींग ईतीदार अवरी भी यहोवा अन साटी अर्पण माळेतीर; सप्पा नर नारी रा यहोवा नोर अच हुव.
EXO 13:13 अदिक गधा अन हर ऊंद पहिलौठा अन बदला पाड्डा कोटकु अदरी बिळसुस बुळेतीर, अदिक अगर नीव अदरी बिळसोद चाहासालीर रा अदुर्द कुतक्या मुरकुळ्स बुळेतीर. लेकीन तान सप्पा पहिलौठा पारगोळी बदला कोटकु बिळ्स कोमेतीर.
EXO 13:14 अदिक मुंदळव दिनगोळ दा याग नीम पारगोळ नीम से केळुल, ‘ईद येन हुन?’ रा आंदुर से अनेतीर, ‘यहोवा नाम लॉकुरी दासत्व अन मान्या दा टु, मतलब मिस्त्र द्याश टु तान कयगोळ ताकद देल तेगुकु तंदान.
EXO 13:15 आ समय याग फिरौन कठ्ठर आगकु नामी होगगोळोद चाहासीदील, आग यहोवा मिस्त्र द्याश दा मंळसागोळ हात्ती टु हुडुकु रा जनावरगोळ ताका सप्पा अन पहिलौठागोळी कोंद बुट्टुन. ईदा कारण जनावरगोळ दा टु यास तान-तान मोय इन पहिलौठा नर आव, अवरी नाव यहोवा अन साटी अर्पण माळतेव; लेकीन तान सप्पा पहिलौठा पारगोळी बदला कोटकु बिळ्स बुळतेव.’
EXO 13:16 ईद नीम कयगोळ मा ऊंद चिन्ह घाई अदिक नीम भऊगोळ्द बीच टिका अन घाई ठहरूसुल; यतिकी यहोवा नाम लॉकुरी मिस्त्र दा टु तान कय इन ताकद देल तेगुकु तंदान.”
EXO 13:17 याग फिरौन लॉकुरी होगोद आग्या कोट बुट्टुन, आग यतिकी पलिश्तीगोळ्द द्याश दा टु आगतेला जो हादी होगतद अद श्‍याण्‍द ईरोद; तरी भी परमेश्वर ईद विचार माळकु आंदरी आ हादी देल वोतीदील कि ईलारा हिंग आगबाळुल कि याग ई लॉकुर लळाई नोळुल आग पछतासकु मिस्त्र अक वापस बरूल.
EXO 13:18 इदुरसाटी परमेश्वर आंदरी चक्कर तिन्सकु क्याचाँद समुद्र अन आळी इन हादी टु ओतुन. अदिक इस्त्राएलीगोळ पात कटकु मिस्त्र दा टु होट बुट्टुर.
EXO 13:19 अदिक मूसा यूसुफ उन येलुगोळी सांगुळ हुडुतेला होदुन; यतिकी यूसुफ इस्त्राएलीगोळ से ईद अंदकु, “परमेश्वर जरूर नीम्द सुधी ताकोंडान, आंदरी ई बारा अन धोळ्द किर्‍या तिन्सीदुन कि आंदुर आऊन येलुगोळी तान सांगुळ ईल टु ओतार.”
EXO 13:20 बाक आंदुर सुक्कोत टु कूच माळकु आळी दी आप्पाटी एताम दा ड्यारा हाकदुर.
EXO 13:21 अदिक यहोवा आंदरी हागुल इन होती हादी तोरसोर साटी बादल इन खम्भा दा, अदिक ईळ्लकी ऊजुळ कोळोर साटी बेक्‍की इन खम्भा दा आगकु आंदुर मुंद मुंद नळुतोगोन, यदुर देल आंदुर ईळ्लक अदिक हागुल नळु सकुल.
EXO 13:22 आव ना रा बादल इन खम्भा अक हागुल इन होती अदिक ना बेक्‍की इन खम्भा अक ईळ्लकी लॉकुर मुंदु टु हटुसदुन.
EXO 14:1 आग यहोवा मूसा से अंदुन,
EXO 14:2 “इस्त्राएलीगोळी आग्या कोळ कि आंदुर वापस होगकु मिग्दोल अदिक समुद्र अन न्याड्या, पीहाहीरोत इन हात्ती, बालसपोन इन मुंद तान ड्यारा निदरूसुल, अदुर्दा मुंद समुद्र अन किनारा मा ड्यारागोळ निदरूसुल.
EXO 14:3 आग फिरौन इस्त्राएलीगोळ बारा दा विचार माळ्यान, आंदुर द्याश इन उलझनगोळ दा फसुसकु आर अदिक आळी दा घिरूसेग्यार.
EXO 14:4 आग ना फिरौन उन मन इक कट्टर माळ बुळाईन, अदिक आव आंदुर्द पीछा माळ्यान. आग फिरौन अदिक आऊन सप्पा सेना अन द्वारा नांद महिमा आदीत; अदिक मिस्त्री लॉकुर अर्त कोंडार कि ना यहोवा हुईन.” अदिक आंदुर हांगा माळदुर.
EXO 14:5 याग मिस्त्र अन राजा अक ईद खबर सिक्त कि आ लॉकुर ओळेग्यार, आग फिरौन अदिक आऊन कर्मचारीगोळ्द मन आंदुर खिलाप पलटुसेत, अदिक आंदुर अनली हतदुर, “नाव ईद येन माळदेव कि इस्त्राएलीगोळी तान दासत्व दा टु छुटकारा कोटकु होग गोट्टेव?”
EXO 14:6 आग आव तान रथ तयार माळदुन अदिक तान सेना अक सांगुळ हुळदुन.
EXO 14:7 आव आर सौ वळ्लेव से वळ्लेव रथ उलटा मिस्त्र अन सप्पा रथ हुळदुन अदिक आ सप्पा रथगोळ मा सरदारगोळी कुर्सदुन.
EXO 14:8 अदिक यहोवा मिस्त्र अन राजा फिरौन उन मन इक कट्टर माळ बुट्टुन. इदुरसाटी आव इस्त्राएली लॉकुर्द पीछा माळदुन; लेकीन इस्त्राएली बिना रूक्सद होटकु होगतोगोर.
EXO 14:9 लेकीन फिरौन उन सप्पा घ्वाळागोळ, अदिक रथगोळ, अदिक अऊर मा सवारगोळ समेत मिस्त्री सेना आंदुर पीछा माळकु आंदुर हात्ती, जो पीहाहीरोत इन हात्ती, बालसपोन इन मुंद, समुद्र अन किनारा मा ड्यारा हाक्‍कु ईरोर, पोहचुसदुर.
EXO 14:10 याग फिरौन हात्ती बंदुन, आग इस्त्राएली लॉकुर कण्ण नेगुकु येन नोळदुर कि मिस्त्री नाम पीछा माळतेला बरेत्यार; अदिक इस्त्राएलीगोळ हापाळ अंजेदुर, अदिक किटुरकु यहोवा अन दोहाई कोळ कुरतुर;
EXO 14:11 अदिक आंदुर मूसा से अनली हतदुर, “येन मिस्त्र दा कब्रगोळ ईला ईरव जो नी नामी अल टु सायोर साटी आळी दा तंदकु भिट्ट? नी नाम से ईद येन माळ्द कि नामी मिस्त्र टु तेगुकु तंद?
EXO 14:12 येन नाव नीन से मिस्त्र दा का ईदा मात अनतेला ईतीदील कि नामी ईरगोळ कि नाव मिस्त्रीगोळ्द स्यावा माळेव? नाम साटी आळी दा सायदुर अलावा मिस्त्रीगोळ्द स्यावा माळोद वळ्लीद ईरोद.”
EXO 14:13 मूसा लॉकुर से अंदुन, “अंजबाळी, निदुर निदुरकु अद उद्धार इन क्याल्सा नोळी, जो यहोवा ईंद नीम साटी माळ्यान; यतिकी याता मिस्त्रीगोळी नीव ईंद नोळतीर, आंदरी बाक यागलु नोळतीदील.
EXO 14:14 यहोवा खुद अच नीम साटी लळाई माळ्यान, इदुरसाटी नीव सुंगामुंगा ईरी.”
EXO 14:15 आग यहोवा मूसा से अंदुन, “नी येती नान दोहाई कोळेत्या? इस्त्राएलीगोळी आग्या कोळ कि आंदुर ईल टु कूच माळुल.
EXO 14:16 अदिक नी तान कोल नेगुकु तान कय समुद्र अन म्याकुच वाळुस, अद येढ्ढ भाग आगेदीत; आग इस्त्राएली समुद्र अन न्याड्या दा टु आगतेला वळ्गींद जागा मा होटोदार.
EXO 14:17 अदिक केळ, ना खुद मिस्त्रीगोळ्द मनगोळी कट्टर माळतीन, अदिक आंदुर अल भी आंदुर्द पीछा माळ्यार. आग फिरौन अदिक आऊन सप्पा सेना, अदिक रथगोळ अदिक सवारगोळ्द विनाश इन द्वारा नांद महिमा आदीत.
EXO 14:18 अदिक याग फिरौन, अदिक आऊन रथगोळ, अदिक घुळसवारगोळ मा विजय द्वारा नांद महिमा आदीत, आग मिस्त्री लॉकुर अर्त कोंडार कि ना यहोवा हुईन.”
EXO 14:19 आग परमेश्वर उन दूत जो इस्त्राएली सेना अन मुंद मुंद नळुतोगोन होगकु आंदुर हींद आगेदुन; अदिक बादल इन खम्भा आंदुर मुंदु टु हटुसकु आंदुर हींद निदुरकु ईत्त.
EXO 14:20 ईत्ता प्रकार देल आव मिस्त्रीगोळ्द सेना अदिक इस्त्राएलीगोळ्द सेना अन न्याड्या दा होटबंदुन; बादल अदिक अंधार रा ईरोद, तरी भी ईळ्लक इन होती आंदरी ऊजुळ सिकतेला ईत्त; अदिक आंदुर ईळ्लक तीम आबुर दाबुर हात्ती बंदिदील.
EXO 14:21 आग मूसा तान कय समुद्र अन म्याकुच वाळुसदुन; अदिक यहोवा ईळ्लक तीम प्रचड पूरवी हवा नळ्सदुन, अदिक समुद्र अक येढ्ढ भाग माळकु नीर हिंग हटुस बुट्टुन, यदुर देल अदुर न्याड्या समुद्र अन्द नीर येढ्ढ भाग आगेत अदिक वळ्गींद जागा आगेत.
EXO 14:22 आग इस्त्राएली लॉकुर समुद्र अन न्याड्या वळ्गींद जागा मा टु आगतेला नळदुर, अदिक नीर आंदुर्द डाक्या अदिक ऊजवा कय दी दीवार इन क्याल्सा माळतोगोद.
EXO 14:23 आग मिस्त्री, मतलब फिरौन उन सप्पा घ्वाळागोळ, रथ अदिक सवारगोळ आंदुर पीछा माळतेला समुद्र अन न्याड्या दा टु होटोदुर.
EXO 14:24 अदिक ईळ्लक इन आखरी पहर दा यहोवा बादल अदिक बेक्‍की इन खम्भा दा टु मिस्त्रीगोळ सेना मा दृष्टी माळकु आंदरी घबरूस बुट्टुन.
EXO 14:25 अदिक आव आंदुर्द रथगोळ्द चक्कागोळी तेग्द बुट्टुन, यदुर देल आंदुर रथ नळसोद कठिन आगेत. आग मिस्त्री आपस दा अनली हतदुर, “बरी, नाव इस्त्राएलीगोळ मुंदु टु ओळाता; यतिकी यहोवा आंदुर दी टु मिस्त्रीगोळ खिलाप लळाई माळेत्यान.”
EXO 14:26 बाक यहोवा मूसा से अंदुन, “तान कय समुद्र अन म्याकुच वाळुस कि नीर मिस्त्रीगोळ, अदिक आंदुर रथगोळ, अदिक सवारगोळ मा मात्त वाहुसुल.”
EXO 14:27 आग मूसा तान कय समुद्र अन म्याकुच वाळुसदुन, अदिक व्हातुर आग्त आग्त येन आत कि समुद्र मात्त ह्यांग इन हांगा आगेत; अदिक मिस्त्री उलटा ओळली हतदुर, लेकीन यहोवा आंदरी समुद्र अन न्याड्या दा अच वाहुस बुट्टुन.
EXO 14:28 अदिक नीर इन पलटुसदुर देल, यास रथ अदिक घुळसवारगोळ इस्त्राएलीगोळ हींद समुद्र दा बंदीदुर, आंदुर सप्पा उलटा फिरौन उन सप्पा सेना अदुर दा मुळकेत, अदिक आंदुर दा टु ऊंद भी ऊळदीदील.
EXO 14:29 लेकीन इस्त्राएलीगोळ समुद्र अन न्याड्या वळ्गींद जागा मा टु आगतेला होटोदुर, अदिक नीर आंदुर्द डाक्या अदिक ऊजवा येढ्ढु दी दीवार बनस्कु नीदुरकु ईरोद.
EXO 14:30 ईत्ता प्रकार देल यहोवा आ दिशी इस्त्राएलीगोळी मिस्त्रीगोळ्द वश दा टु बिळ्सदुन; अदिक इस्त्राएलीगोळ मिस्त्रीगोळी समुद्र अन किनारा मा सोतकु नोळदुर
EXO 14:31 अदिक यहोवा मिस्त्रीगोळ मा जो तान पराक्रम तोर्सुसीदुन, अदरी नोळकु इस्त्राएलीगोळ यहोवा अन अंज्क मान्सदुर अदिक यहोवा मा अदिक आऊन दास मूसा मा विश्वास माळदुर.
EXO 15:1 आग मूसा अदिक इस्त्राएलीगोळ यहोवा अन साटी ईद हाळ हाळदुर. आंदुर अंदुर, ना यहोवा अन हाळ हाळाईन, यतिकी आव महाप्रतापी ठहरूस्यान; आव घ्वाळागोळ सांगुळ घुळसवारगोळी समुद्र दा वाहुस बुट्टुन.
EXO 15:2 यहोवा नान बल अदिक भजन इन विषय हुन, अदिक आवा नान उद्धार भी ठहरूस्यान; नान परमेश्वर आवा हुन, ना आऊंदा स्तुति माळाईन, ना आऊन साटी निवासस्थान माळाईन, नान पुर्वजगोळ्द परमेश्वर आवा हुन, ना आऊन सराहना माळाईन.
EXO 15:3 यहोवा योद्धा आन; आऊन हेसुर प्रभु आद.
EXO 15:4 आव फिरौन उन रथगोळ अदिक सेनागोळी आव समुद्र दा भिट बुट्टुन; अदिक आऊन वळ्लेव से वळ्लेव रथगोळ क्याचाँद समुद्र दा मुळकेदव.
EXO 15:5 गयरा नीर आंदरी मुचबुळ्त; आंदुर कल्ल घाई गयरा जागागोळ दा मुळकेदुर.
EXO 15:6 हे यहोवा, नीन ऊजवा कय शक्ति दा महाप्रतापी आत; हे यहोवा, नीन ऊजवा कय दुश्मन उक केचकांदा माळ बुळतद.
EXO 15:7 नी तान विरोधीगोळी तान महाप्रताप से केळ्द बुळत्या; नी तान क्रोध भळकुसत्या, अदिक आंदुर भूसा अन घाई भस्म आगेगतार;
EXO 15:8 नीन मुग्ग इन श्वास देल नीर ऊंदाओजी आगेत, धारागोळ ढेर इन घाई रूक्सदव; समुद्र अन बीच दा गयरा नीर जम्सेत.
EXO 15:9 दुश्मन अंदिदुन, “ना पीछा माळाईन, ना होगकु हुडाईन, ना लुट इन माल इक वाट्स कोमाईन, अऊर देल नान जीव तुम्मेदीत. ना तान तलवार जेडुतेला अच तान कय देल आंदरी नष्ट माळ बुळाईन.”
EXO 15:10 नी तान श्वास इन पवन नळ्सद, आग समुद्र आंदरी मुचबुळ्त; आंदुर भयानक नीर दा काच इन घाई मुळकेदुर.
EXO 15:11 हे यहोवा, देवतागोळ दा नीन तुल्य यार आर? नी रा पवित्रता अन कारण महाप्रतापी, अदिक तान स्तुति माळावाळेर्द अंज्क इन योग्य, अदिक आश्चर्यकर्म इन कर्ता हुय.
EXO 15:12 नी तान ऊजवा कय वाळुस्द, अदिक धरती दुश्मनगोळ इक नुंगबुटाद.
EXO 15:13 तान करूणा देल नी तान बिळ्सद प्रजा अन अगुवाई माळ्या, तान ताकद देल नी अदरी तान पवित्र निवासस्थान इक ओयेत्या.
EXO 15:14 द्याश द्याश इन लॉकुर केळकु नळग्यार; पलिश्तीगोळ्द जीवा अन हाल बेहाल आगेदव.
EXO 15:15 एदोम उन अधिपति व्याकुल आदार; मोआब उन पयलवान नळ्गतेला यद्दार; सप्पा कनान दा ईरावाळेर्द मन पिघलुसेदाव.
EXO 15:16 आंदुर दा अंज्क अदिक घबराहट तुम्मेदीत; नीन खांदागोळ प्रताप देल आंदुर कल्ल इन घाई निर्जीव आगेदार. यागासताका, हे यहोवा, नीन प्रजा अन लॉकुर होटबुळालुर, यागासताका नीन प्रजा अन लॉकुर यारी नी कोंड्या आप्पाटी होटबुळालुर.
EXO 15:17 नी आंदरी पोहचुस्कु तान खुद इन भागवाळा पहाळी मा बसुस्या, ईद अदा जागा हुन, हे यहोवा, यदरी नी तान निवास इन साटी बनुस्या, अदिक अदा पवित्रस्थान हुन यदरी, हे प्रभु, नी खुद अच स्थिर माळ्या.
EXO 15:18 यहोवा हमेशा हमेशा राज्य माळ्त ईत्‍तान.
EXO 15:19 ईद हाळ हाळोद कारण ईद आद, कि फिरौन उन घ्वाळागोळ, रथगोळ अदिक सवारगोळ समेत समुद्र अन न्याड्या दा होटोदुर, अदिक यहोवा आंदुर म्याकुच समुद्र अन नीर वाहुसदुन; लेकीन इस्त्राएलीगोळ समुद्र अन न्याड्या वळ्गींद जागा मा टु आगतेला होटोदुर.
EXO 15:20 आग हारून उन आकतींग मरियम हेसुर नबिया कय दा टापटी हुळदुर; अदिक सप्पा आर्तेर टापटी हुडुकु कुणुतेला आकिन हींद आगेदुर.
EXO 15:21 अदिक मरियम आंदुर सांगुळ ईद हाळ हाळ्त होदुर: “यहोवा अन हाळ हाळी, यतिकी आव महाप्रतापी ठहरूस्यान; घ्वाळागोळ समेत सवारगोळी आव समुद्र दा भिट बुटान.”
EXO 15:22 आग मूसा इस्त्राएली लॉकुरी क्याचाँद समुद्र अन मुंद ओतुन, अदिक आंदुर शूर हेसुर इन आळी दा बंदुर; अदिक आळी दा होगतेला मुर दिन ताका नीर इन सोता सिकीदिल.
EXO 15:23 बाक मारा हेसुर इन ऊंद जागा मा पोहचुसदुर, अलेव नीर खर्ट ईरोव, अदरी आंदुर कुडु सकीदील; ई कारण आ जागा अन हेसुर मारा बित्त.
EXO 15:24 आग आंदुर ईद अंदकु मूसा अन विरोध दा बकबक माळली हतदुर, “नाव येन कुळदेव?”
EXO 15:25 आग मूसा यहोवा अन दोहाई कोट्टुन, अदिक यहोवा आऊक ऊंद मार्र हेळ बुट्टुन, यदरी याग आव नीर दा हाकदुन, आग अद नीर सय आगेत. अल्या यहोवा आंदुर साटी ऊंद विधि अदिक नियम माळदुन, अदिक अल्या आव ईद अंदकु आंदुर्द परीक्षा माळदुन,
EXO 15:26 “अगर नी तान परमेश्वर यहोवा अन वचन तन मन देल केळ्या, अदिक आऊन आग्यागोळ मा कीव हच्या, अदिक आऊन सप्पा विधिगोळी मानस्या, रा यास रोग ना मिस्त्रीगोळ मा कळीन अऊर दा टु ऊंद भी नीन मा कळुतीदील; यतिकी ना नीमव चंगा माळावाळा यहोवा हुईन.”
EXO 15:27 आग आंदुर एलीम इक बंदुर, यल नीर इनव हन्नेळ सोतागोळ अदिक सत्तर खजूर इन मार्रगोळ ईरव; अदिक अल आंदुर नीर इन हात्ती ड्यारागोळ नीदरूसदुर.
EXO 16:1 बाक एलीम टु कूच माळकु इस्त्राएलीगोळ्द सप्पा मंडली, मिस्त्र द्याश दा टु होळदुर बाद्दा दुसरा तिंगुळ इन पंद्रावा दिशी, सीन हेसुर इन आळी दा, जो एलीम अदिक सीनै पहाळी इन बीच दा आद, पोहचुस्त.
EXO 16:2 आळी दा इस्त्राएलीगोळ्द सप्पा मंडली मूसा अदिक हारून उन विरोध दा बळबळ माळली कुरतुर.
EXO 16:3 अदिक इस्त्राएली आंदुर से अनली हतदुर, “याग नाव मिस्त्र द्याश दा मास इन गळग्यागोळ हात्ती कुर्तकु मनमानी ऊमतोगेव, आग अगर नाव यहोवा अन कय देल कोन्सुसकु भी आगायदेव रा वळ्लीद अदा ईरोद; लेकीन नीव नामी ई आळी दा इदुरसाटी तेगुकु तंदीर कि ई सप्पा समाज इक उपासा कोंद बुळी.”
EXO 16:4 आग यहोवा मूसा से अंदुन, “नोळी, ना नीम लॉकुर साटी आकाश टु तिनोद वस्तु बरसुसाईन; अदिक ई लॉकुर हर दिशी व्हार्या होगकु हर दिन इन तिनोद जमा माळ्यार, इदुर देल ना आंदुर्द परीक्षा माळाईन कि ईंदुर नान व्यवस्था मा नळदार या ईला.
EXO 16:5 अदिक हिंग आदीत कि सहावा दिशी अद तिनोद दुगना आदीत, इदुरसाटी जो येनारा आंदुर आ दिशी जमा माळ्यार अदरी तयार माळकु ईटुल.”
EXO 16:6 इदुरसाटी मूसा अदिक हारून सप्पा इस्त्राएलीगोळ से अंदुर, “द्यावमुळका अक नीव जान्स कोंडीर कि जो नीमी मिस्त्र द्याश दा टु तेगुकु तंदान आव यहोवा हुन,
EXO 16:7 अदिक हुंजकुका नीमी यहोवा अन तेज कांळ्सकु बिद्दीत, यतिकी नीव जो यहोवा अन बारा दा कुळकुळ माळतीर अदरी आव केळतान. अदिक नाव येन हुयेव जो नीव नाम मा कुळकुळ माळतीर?”
EXO 16:8 बाक मूसा अंदुन, “ईद आग आदीत याग यहोवा द्यावमुळका अक नीमी तिनोर साटी मास अदिक हुंजकुका व्हाट्टतीम रोट्टी कोट्टान; यतिकी नीव जो आऊन मा कुळकुळ माळतीर अदरी आव केळतान. अदिक नाव येन हुयेव? नीम कुळकुळ माळोद नाम मा ईला यहोवा मा अच आगतद.”
EXO 16:9 बाक मूसा हारून से अंदुन, “इस्त्राएलीगोळ्द सप्पा मंडली इक आग्या कोळ कि यहोवा अन मुंद उलटा आऊन हात्ती बरूल, यतिकी आव आंदुर्द कुळकुळ माळोद केळ्यान.”
EXO 16:10 अदिक हिंग आत कि याग हारून इस्त्राएलीगोळ्द सप्पा मंडली से हिंग मातगोळ माताळोन कि अचानक आंदुर आळी दी कण्णगोळ नेगुकु नोळदुर, अदिक आंदरी यहोवा अन तेज बादल दा कांळ्सली कुर्त.
EXO 16:11 आग यहोवा मूसा से अंदुन,
EXO 16:12 “इस्त्राएलीगोळ्द कुळकुळ माळोद ना केळीन; आंदुर से अंदकोम कि येढ्ढ द्यावमुळका अन होती नीव मास तिंदीर अदिक हुंजकुका नीव रोट्टी देल तृप्त आगेदीर; अदिक नीव ईद जान्स कोंडीर कि ना नीम परमेश्वर यहोवा हुईन.”
EXO 16:13 आग हिंग आत कि द्यावमुळका लावागोळ बंदकु सप्पा छावनी मा कुर्तोदव; अदिक हुंजकुका छावनी इन नाकु दी ओद बित्त.
EXO 16:14 अदिक याग ओद वंळ्गेत रा येन नोळतार कि आळी इन जागा मा श्याण श्याण कचरा पाला अन तुकळा अन घाई कांळ्सदव.
EXO 16:15 ईद नोळकु इस्त्राएलीगोळ, जो ईला जानसोर कि ईद येन वस्तु हुन, आंदुर आपस दा अनली हतदुर ईद रा मन्ना हुन. आग मूसा आंदुर से अंदुन, “ईद अदा तिनोद वस्तु हुन यदरी यहोवा नीमी तिनली कोळतान.
EXO 16:16 जो आग्या यहोवा कोटान अद ईद हुन: नीव अदुर दा टु तान जरवत इन हिसाब देल तिनोर साटी जमा माळतोगेतीर, मतलब तान तान जीवागोळ्द गिनती इन अनुसार, हर मंळसा अन हींद ऊंद ऊंद ओमेर जमा माळेतीर; यार ड्यारा दा यास आर आव आंदुर्दा साटी जमा माळुल.”
EXO 16:17 अदिक इस्त्राएलीगोळ हांगा माळदुर; अदिक यारारा यक्कुल अदिक यारारा थ्वाळासा जमा माळ कोंडुर.
EXO 16:18 याग आंदुर अदरी ओमेर देल आळदुर, आग यार हात्ती यक्कुल ईरोद आऊन येनु मिक्‍कु ईतीदील, अदिक यार हात्ती थ्वाळासा ईरोद आऊक येनु गोर्त होगीदील; यतिकी ऊंद ऊंद मंळसा तान तिना लायक अच जमा माळीदुन.
EXO 16:19 बाक मूसा आंदुर से अंदुन, “यावारा ईदुर दा टु येनारा व्हातुर ताका मिक्सकु ईटबाळुल.”
EXO 16:20 लेकीन भी आंदुर मूसा अन मात मान्सीदील; इदुरसाटी याग यारारा यारारा अदुर दा टु येनारा व्हातुर ताका मिक्सकु ईटदुर, रा अदुर दा किळा हत्तेदव अदिक अद नारली कुर्त; आग मूसा आंदुर मा सिट्टी बंदुन.
EXO 16:21 आंदुर हुंजकुका हर दिशी तान जरवत इन हिसाब देल तिनोर साटी जमा माळबुळतोगोर, अदिक याग बिसुल कळक आगतोगोद, आग अद गलुसेगोद.
EXO 16:22 बाक हिंग आत कि सहावा दिशी आंदुर दुगना, मतलब हर मंळसा अन हींद येढ्ढ येढ्ढ ओमेर जमा माळ बुट्टुर, अदिक मंडली इन सप्पा प्रधानगोळ बंदकु मूसा अक हेळ बुट्टुर.
EXO 16:23 आव आंदुर से अंदुन, “ईद अदा मात हुन जो यहोवा माताळ्यान, यतिकी नाळ परविश्राम, मतलब यहोवा अन साटी पवित्र विश्राम आदीत, इदुरसाटी नीमी जो तन्दुर दा कासोद आद अदरी कासी, अदिक जो बेईसोद आद अदरी बेईसी, अदिक ईदुर दा टु यास मिक्क्याव अदरी व्हातुर साटी ईटकु बिटबुळी.”
EXO 16:24 याग आंदुर अदरी मूसा अन ई आग्या अन अनुसार व्हातुर ताका ईटकु बिटबुट्टुर, आग अद ना रा नार्त, अदिक ना अदुर दा किळा हतदव.
EXO 16:25 आग मूसा अंदुन, “ईंद अदरी का तिनी, यतिकी ईंद यहोवा अन विश्राम दिन आद; इदुरसाटी ईंद अद नीमी मैदान दा सिकतीदील.
EXO 16:26 आर दिन रा नीव अदरी जमा माळीर; लेकीन सातवा दिन विश्राम इन दिन हुन, आ दिशी अद सिकतीदील.”
EXO 16:27 तरी भी लॉकुर दा टु यारारा यारारा सातवा दिशी भी जमा माळोर साटी व्हार्या होदुर, लेकीन आंदरी येनु सिकीदील.
EXO 16:28 आग यहोवा मूसा से अंदुन, “नीव लॉकुर नान आग्यागोळ अदिक व्यवस्था अक यागासताका मान्सतीदील?
EXO 16:29 नोळी, यहोवा जो नीमी विश्राम इन दिन कोटान, ईदा कारण आव सहावा दिशी नीमी येढ्ढ दिन इन तिनोद कोळतान; इदुरसाटी नीव तान तान अल कुर्तकु ईरेतीर, सातवा दिशी याऊ तान जागा मा टु व्हार्या होगबाळेतीर.”
EXO 16:30 इदुरसाटी लॉकुर सातवा दिशी विश्राम माळदुर.
EXO 16:31 इस्त्राएल इन घराना आ वस्तु उन हेसुर मन्ना ईटदुर; अदिक अद धनिया अन घाई बिळीद ईरोद, अदिक अदुर स्वाद सयद इन माळ्द बट्टी इन घाई का ईरोद.
EXO 16:32 बाक मूसा अंदुन, “यहोवा जो आग्या कोटान अद ईद हुन कि मन्ना दा टु ओमेर तुमकु तान वंश इन पिढ़ी पिढ़ी इन साटी ईटबुळी, यदुर देल आंदुर जान्सुल कि यहोवा नामी मिस्त्र द्याश टु तेगकु आळी दा ह्यांग रोट्टी तिन्सतोगोन.”
EXO 16:33 आग मूसा हारून से अंदुन, “ऊंद घागरी हुडुकु अदुर दा ओमेर तुमकु अदरी यहोवा अन मुंद ईटबुळ कि अद नीम पिढ़ी इन साटी ईटकु आगुल.”
EXO 16:34 ह्यांग आग्या यहोवा मूसा अक कोटीदुन, अदुर्दा हिसाब देल हारून अदरी साक्षी इन सन्दुक इन मुंद ईट बुट्टुन कि अद अल्या ईटकु आगुल.
EXO 16:35 इस्त्राएली लॉकुर यागासताका बसुस्द द्याश दा पोहचुसिदील आगासताका, मतलब चालीस साल ताका मन्ना तिनतेला ईत्तुर; आंदुर यागासताका कनान द्याश इन सीमा मा पोहचुसीदील आगासताका मन्ना तिनतेला ईत्तुर.
EXO 16:36 ऊंद ओमेर रा एपा अन दसवा हिस्सा हुन.
EXO 17:1 बाक इस्त्राएलीगोळ्द सप्पा मंडली सीन हेसुर इन आळी दा टु होळ्त, अदिक यहोवा अन आग्या अन अनुसार कूच माळकु रपीदीम दा तान ड्यारागोळ हाकदुर; अदिक अल आ लॉकुरी कुडव नीर सिकीदील.
EXO 17:2 इदुरसाटी आंदुर मूसा से वाद विवाद माळकु अनली हतदुर, “नामी कुडव नीर कोळ.” मूसा आंदुर से अंदुन, “नीव येती नान से वाद विवाद माळतीर? अदिक यहोवा अन परीक्षा येती माळतीर?”
EXO 17:3 बाक अल लॉकुरी निरळ्क हत्त, आग आंदुर ईद अंदकु मूसा मा कुळकुळ माळली हतदुर, “नी नामी चिकोर-चिणगेर अदिक जनावरगोळ समेत निरळ्क देल कोन्नोर साटी मिस्त्र दा टु येती तनकोंड्या?”
EXO 17:4 आग मूसा यहोवा अन दोहाई कोट्टुन, अदिक अंदुन, “ई लॉकुर सांगुळ ना येन माळाईन? ई सब मुंदुर नान मा पथराव माळली तयार आर.”
EXO 17:5 यहोवा मूसा से अंदुन, “इस्त्राएल इन स्याणा लॉकुर दा टु थ्वाळासा लॉकुरी तान सांगुळ हुडु कोम; अदिक याता कोल देल नी नील गांगा दा बळदीद, अदरी तान कय दा हुडुकु लॉकुर मुंद नळु.
EXO 17:6 नोळ, ना नीन मुंद नळुत होरेब पहाळ इन ऊंद चट्टान मा निदुरकु ईराईन; अदिक नी आ चट्टान मा बडेत, आग अदुर दा टु नीर होट्टीत, यदुर देल ई लॉकुर कुडुल.” आग मूसा इस्त्राएल इन स्याणा लॉकुर्द नोळ्त हांगा माळदुन.
EXO 17:7 अदिक मूसा आ जागा अन हेसुर मस्सा अदिक मरीबा ईटदुन, यतिकी इस्त्राएलीगोळ अल वाद विवाद माळीदुर, अदिक यहोवा अन परीक्षा ईद अंदकु माळदुर, “येन यहोवा नाम बीच दा आन या ईला?”
EXO 17:8 आग अमालेकिगोळ जाती बंदकु रपीदीम दा इस्त्राएलीगोळ से लळाई माळली हतदुर.
EXO 17:9 आग मूसा यहोशू से अंदुन, “नाम साटी हापाळ गणसुर इक निवळुसकु छाट्स कोम, अदिक नाळ व्हार्या होगकु अमालेकिगोळ से लळाई माळ; अदिक ना नाळ परमेश्वर उन कोल कय दा हुडुकु पहाळी इन चोटी मा निदुरकु ईराईन.”
EXO 17:10 जसा मूसा अन ई आग्या अन अनुसार यहोशू अमालेकिगोळ से लळाई माळली हतदुन; अदिक मूसा, हारून, अदिक हूर पहाळ इन चोटी मा येरेदुर.
EXO 17:11 याग याग मूसा तान कय नेगुकु ईटतोगोन आग आग इस्त्राएल जीत हासिल माळतोगोद; लेकीन याग याग आव अदरी ल्यालमा माळतोगोन आग आग अमालेक प्रबल आगतोगोद.
EXO 17:12 लेकीन याग मूसा नव कयगोळ तुम्मेदव, आग आंदुर ऊंद कल्ल हुडुकु मूसा अन ल्यालमा ईट बुट्टुर, अदिक आव अदुर मा कुर्तोदुन, अदिक हारून अदिक हूर ऊंद ऊंद कय हुडुकु संभाळ्सकु ईटदुर; अदिक आऊन कयगोळ द्यावमुळका ताका स्थिर ईत्तव.
EXO 17:13 अदिक यहोशू तान लॉकुर समेत अमालेकिगोळी तलवार इन बल देल हारूस बुट्टुन.
EXO 17:14 आग यहोवा मूसा से अंदुन, “ईद मात याद इक साटी किताब दा लिख्स कोम अदिक यहोशू उक केळ्सबुळ कि ना आकाश इन ल्यालमा टु अमालेक इन याद चिन्ह भी पुरा रीति देल मिटुस बुळाईन.”
EXO 17:15 आग मूसा ऊंद वेदी तयार माळकु अदुर्द हेसुर यहोवा निस्सी ईटदुन;
EXO 17:16 अदिक आव अंदुन, “यहोवा प्रभु उन झंडा हुळकु ईरी. कि यहोवा अमालेकिगोळ से पिढ़ी टु पिढ़ी ताका लळाई माळतेला ईत्‍तान.”
EXO 18:1 याग मूसा अन मॉव मिद्यान इन याजक यित्रो ईद केळदुन कि परमेश्वर मूसा अदिक तान प्रजा इस्त्राएल इन साटी येन येन माळ्यान, मतलब ईद कि याता प्रकार देल यहोवा इस्त्राएलीगोळी मिस्त्र दा टु तेगुकु तंदान,
EXO 18:2 आग मूसा अन मॉव यित्रो मूसा अन हिंग्स सिप्पोरा अक, जो पयले टु ना आप्प उन मान्या कळुकु आगीदुर,
EXO 18:3 अदिक आऊन येढ्ढु चिकोरी भी तंदुन; ईंदुर दा टु ऊंद उन हेसुर मूसा ईद अंदकु गेर्शोम ईटीदुन: “ना दुसरा द्याश दा परदेशी आगीन.”
EXO 18:4 अदिक दुसरा अन हेसुर आव ईद अंदकु एलीएजेर ईटदुन: “नान आप्प उन परमेश्वर नान सहायक आगकु नानी फिरौन उन तलवार देल ऊळ्सदुन.”
EXO 18:5 मूसा अन हिंग्स अदिक पारगोळी, आऊन मॉव यित्रो सांगुळ हुडुकु मूसा अन हात्ती आळी दा आ जागा मा बंदुन, यल परमेश्वर उन पहाळ इन हात्ती आऊन ड्यारा ईरोद.
EXO 18:6 अदिक बंदकु आव मूसा अन हात्ती ईद बातणी कळुदुन, “ना नीन मॉव यित्रो हुईन, अदिक येढ्ढु पारगोळ समेत नीन हिंग्स उक नीन हात्ती तनकोटीन.”
EXO 18:7 आग मूसा तान मॉव उन से मुलाकात माळोर साटी होट्टुन, अदिक आऊक दण्डवत माळकु मुत ताकोंडुन; अदिक आंदुर आबुर दाबुर हालचाल केळकु ड्यारा अन्द बुळ्क होदुर.
EXO 18:8 अल मूसा तान मॉव उन से सप्पा क्याल्सागोळ्द वर्णन माळदुन कि यहोवा इस्त्राएलीगोळ निमित्त फिरौन अदिक मिस्त्रीगोळ से येन येन माळदुन, अदिक इस्त्राएलीगोळ यात्रा दा याता याता कष्ट नेगदुर, बाक यहोवा आंदरी ह्यांग ह्यांग बिळ्त बंदान.
EXO 18:9 आग यित्रो आ सप्पा भलाई इन कारण जो यहोवा इस्त्राएलीगोळ सांगुळ माळीदुन, कि आंदरी मिस्त्रीगोळ्द वश दा टु बिळ्सीदुन, खुश आगकु अंदुन,
EXO 18:10 यित्रोगोळ अंदुर “धन्य आन यहोवा, याव नीमी फिरौन अदिक मिस्त्रीगोळ्द वश दा टु बिळ्सदुन, याव नीम लॉकुरी मिस्त्रीगोळ्द मुठ्ठी दा टु बिळस्यान.
EXO 18:11 ईग ना अर्त कोंडीन कि यहोवा सप्पा देवतागोळ से धोड्डेव आन; उलटा आ बारा दा भी यदुर देल आंदुर इस्त्राएलीगोळ सांगुळ अहंकारपुर्ण व्यवहार माळीदुर.”
EXO 18:12 आग मूसा अन मॉव यित्रो परमेश्वर उन साटी होमबली अदिक मेलबलि येर्सदुन, अदिक हारून इस्त्राएलीगोळ्द सप्पा पुरनियागोळ समेत मूसा अन मॉव यित्रो अन सांगुळ परमेश्वर उन मुंद प्रार्थना माळदुर अदिक ऊमली कुरतुर.
EXO 18:13 दुसरा दिशी मूसा लॉकुर न्याय माळोर साटी कुरतुन, अदिक द्यावमुळका टु व्हातुर ताका लॉकुर मूसा अन आस पास निदुरकु ईत्तुर.
EXO 18:14 ईद नोळकु कि मूसा लॉकुर साटी येन येन माळतान, आऊन मॉव अंदुन, “ईद येन क्याल्सा हुन जो नी लॉकुर साटी येन क्याल्सा माळत्या? येन कारण आद कि नी आबना कुर्तकु ईरत्या, अदिक लॉकुर द्यावमुळका टु व्हातुर ताका नीन आस पास निदुरकु ईरतार?”
EXO 18:15 मूसा तान मॉव उन से अंदुन, “ईदुर कारण ईद आद कि लॉकुर नान हात्ती परमेश्वर से केळली बरतार.
EXO 18:16 याग याग आंदुर यातोदारा मुकदमा आगतद आग आग आंदुर नान हात्ती बरतार, अदिक ना आंदुर न्याड्या दा न्‍याय माळतेला, अदिक परमेश्वर उन विधि अदिक व्यवस्था आंदरी समझुसतीन.”
EXO 18:17 मूसा अन मॉव आऊन से अंदुन, “जो क्याल्सा नी माळत्या, अद वळ्लीद हैलेच.
EXO 18:18 ईदुर देल नी येन, उलटा ई लॉकुर भी जो नीन सांगुळ आर जरूर थक्सेदार, यतिकी ईद क्याल्सा नीन साटी हापाळ भारी आद; नी ईदरी आबना माळ सकाल.
EXO 18:19 इदुरसाटी ईग नान केळकोम, ना नीनी सम्मति कोळतीन, अदिक परमेश्वर नीन सांगुळ ईरूल! नी ई लॉकुर साटी परमेश्वर उन हात्ती होगतोग, अदिक ईंदुर्द मुकदमागोळी परमेश्वर उन हात्ती नी पोहचुसतोग.
EXO 18:20 ईंदरी परमेश्वर उन आग्या अदिक नियम कल्सेत, अदिक याता हादी मा ईंदरी नळोद, अदिक जो जो क्याल्सा ईंदरी माळोद आद, अद हेळबुळतोग.
EXO 18:21 बाक नी ई सप्पा लॉकुर दा टु ईत्ता मंळसागोळी छाट्सबुळ, जो गुणी, अदिक परमेश्वर उन अंज्क मान्सावाळेर, सच्चा, अदिक अन्याय इन लाभ देल घृणा माळावाळेर ईरूल; अदिक आंदरी हजार-हजार, सौ-सौ, पचास-पचास, अदिक हत्त-हत्त मंळसागोळ मा प्रधान नियुक्त माळबुळ.
EXO 18:22 अदिक आंदुर हर सप्पा समय लॉकुर्द न्याय माळतोगुल; अदिक श्याण-श्याणेव मुकदमागोळ्द न्याय खुद अच माळतोगुल; आग नीन भार हल्का आदीत, यतिकी ई भार इक आंदुर भी नीन सांगुळ नेगदार
EXO 18:23 अगर नी ईद उपाय माळ्या, अदिक परमेश्वर नीनी हिंग आग्या कोळुल, रा नी ठहरूस सक्या, अदिक ई सप्पा लॉकुर तान जागा अक कुशल देल पोहचुस सक्यार.”
EXO 18:24 तान मॉव उन ईद मात मान्सकु मूसा आऊन सप्पा वचनगोळ्द अनुसार माळदुन.
EXO 18:25 इदुरसाटी मूसा सप्पा इस्त्राएलीगोळ दा टु गुणी मंळसागोळी निवळुसकु आंदरी हजार-हजार, सौ-सौ, पचास-पचास, हत्त-हत्त लॉकुरगोळ मा अधिकारी ठहरूसदुन.
EXO 18:26 अदिक आंदुर सप्पा लॉकुरगोळ्द न्याय माळली हतदुर; जो मुकदमा कठिन ईरतोगोद अदरी आंदुर मूसा अन हात्ती तरतोगोर, अदिक सप्पा श्याण मुकदमागोळ्द न्याय आंदुर खुद अच माळतोगोर.
EXO 18:27 आग मूसा तान मॉव उक सार माळदुन, अदिक आव तान द्याश इन हादी हुळदुन.
EXO 19:1 इस्त्राएलीगोळी मिस्त्र द्याश दा टु होटकु याता दिशी मुर तिंगुळ आदव, आ दिशी आंदुर सीनै अन आळी दा बंदुर.
EXO 19:2 अदिक याग आंदुर रपीदीम टु कूच माळकु सीनै अन आळी दा बंदुर, आग आंदुर आळी दा ड्यारागोळ मंळ्सदुर; अदिक अल्या पहाळ इन मुंद इस्त्राएलीगोळ छावनी हाकदुर.
EXO 19:3 आग मूसा पहाळी मा परमेश्वर उन हात्ती येरेदुन, अदिक यहोवा पहाळी मा आऊक कारूकु अंदुन, “याकूब उन घराना से हिंग अन, अदिक इस्त्राएलीगोळी नान ईद वचन केळ्स:
EXO 19:4 ‘नीव नोळीर कि ना मिस्त्रीगोळ से येन येन माळीन; नीमी मान्सी गिधाळ पक्षी इन पंखगोळ मा येर्सकु तान हात्ती तंदीन.
EXO 19:5 इदुरसाटी ईग अगर नीव निश्चय नान नियम इक मान्सीर, अदिक नान वाचा अन पालन माळीर, रा सप्पा लॉकुर दा टु नीवा नान निज धन ठहरुसीर; समस्त पृथ्वी रा नांद अच हुन.
EXO 19:6 अदिक नीव नान नजर दा याजकगोळ्द राज्य अदिक पवित्र राष्ट्र ठहरूसीर.’ जो मातगोळ नीनी इस्त्राएलीगोळ से अनव आव अव ईवा हुव.”
EXO 19:7 आग मूसा बंदकु पुरनिए लॉकुर्द स्‍याणागोळी कार्सुसदुन, अदिक ई सप्पा मातगोळ, यऊर्द माताळोद आग्या यहोवा आऊक कोटीदुन, आंदरी समझुस बुट्टुन.
EXO 19:8 अदिक सप्पा लॉकुर मिलुसकु माताळ कुरतुर, “जो येनारा यहोवा अंदान अद सप्पा नाव जरूर माळेव.” लॉकुर ई मातगोळ मूसा यहोवा अक केळ्सदुन.
EXO 19:9 आग यहोवा मूसा से अंदुन, “केळ, ना बादल इन अंधार दा आगकु नीन हात्ती बरतीन, इदुरसाटी कि याग ना नीन से मातगोळ हेळाईन आग आ लॉकुर केळुल, अदिक हमेशा नीन मा विश्वास माळुल.” अदिक मूसा यहोवा से लॉकुर्द मातगोळ्द वर्णन माळदुन.
EXO 19:10 आग यहोवा मूसा से अंदुन, “लॉकुर हात्ती होग अदिक आंदरी ईंद अदिक नाळ पवित्र माळेत, अदिक आंदुर तान फळक्या वग्द कोमुल,
EXO 19:11 अदिक आंदुर तिसरा दिन ताका तयार आगेगुल; यतिकी तिसरा दिशी यहोवा सप्पा लॉकुर्द नोळ्त सीनै पहाळ मा ईळुकु बंदान.
EXO 19:12 अदिक नी लॉकुर साटी नाकु दी वाळा कटकु कोळेत, अदिक आंदुर से अनेत: ‘नीव सचेत ईरेतीर कि पहाळी मा येरतीदील अदिक अदुर सीमा अक भी मुटतीदील; अदिक जो यावारा पहाळी इक मुट्यान आव जरूर कोंदकु आदान.
EXO 19:13 अदरी याऊ कय देल मुटबाळुल; जो मुट्यान आऊन मा कल्लगोळ भिटकु आगुल, या आऊक तीर देल कोंदकु आगुल; चाहे जनावर चाहे मंळसा, आव ऊळ्दकु ईरबाळुल.’ याग म्याळा अन्द मार्र इन नरसिंगा वाळा शब्द देर ताका केळ बरूल, आग लॉकुर पहाळ मा येर्‍यार.”
EXO 19:14 आग मूसा पहाळ मा टु ईळुकु लॉकुर हात्ती बंदकु आंदरी पवित्र माळसुसदुन; अदिक आंदुर तान फळक्या वग्द बुट्टुर.
EXO 19:15 अदिक मूसा लॉकुर से अंदुन, “तिसरा दिशी ताका तयार आगेगी; आर्तेर हात्ती होगबाळेतीर.”
EXO 19:16 याग तिसरा दिन बत्त आग व्हातुर आगतेला अच बादल गरजुसली अदिक बिजली चमकुसली हत्त, अदिक पहाळी मा करीद बादल छाऊसेत, बाक नरसिंगा अन धोळ्द भारी शब्द आत, अदिक छावनी दा यास लॉकुर ईरोर सप्पा नळ्गली हतदुर.
EXO 19:17 आग मूसा लॉकुरी परमेश्वर उन से भेंट माळोर साटी छावनी दा टु तेगुकु तंदुन; अदिक आंदुर पहाळ इन ल्यालमा निदुरदुर.
EXO 19:18 अदिक यहोवा जो बेक्‍की दा टु आगकु सीनै पहाळ मा ईळदीदुन, ई कारण देल पुरा पहाळ धूंगा देल तुम्मेत, अदिक अदुर्द धुंगा भट्टी इन घाई होळोद, अदिक पुरा पहाळ हापाळ नळगोद.
EXO 19:19 बाक याग नरसिंगा अन शब्द तीव्रता देल वाळुस्त अदिक हापाळ भारी आगतेला होत, आग मूसा माताळदुन, अदिक परमेश्वर वाणी केळ्सकु आऊक उत्तर कोट्टुन.
EXO 19:20 अदिक यहोवा सीनै पहाळ इन चोटी टु ल्‍यालमा ईळदुन; अदिक मूसा अक पहाळ इन चोटी मा कारदुन, अदिक मूसा म्याकुच येरेदुन.
EXO 19:21 आग यहोवा मूसा से अंदुन, “ल्यालमा ईळुकु लॉकुरी चेतावनी कोळ, ईलारा हिंग आगबाळुल कि आंदुर वाळा मुर्दकु यहोवा अन हात्ती नोळली होकुल, अदिक आंदुर दा टु हापाळ सा नष्ट आगेगुल.
EXO 19:22 अदिक याजक जो यहोवा अन हात्ती बरतोगतार आंदुर भी तान इक पवित्र माळुल, ईलारा हिंग आगबाळुल कि यहोवा आंदरी दंड कोळुल.”
EXO 19:23 मूसा यहोवा से अंदुन, “आ लॉकुर सीनै पहाळ मा येर सकालुर; नी रा खुद नामी ईद अंदकु चेतावनी कोट कि पहाळ इन नाकु दी वाळा कटकु अदरी पवित्र ईटी.”
EXO 19:24 यहोवा आऊक उत्तर कोट्टुन, “ईळ्द रा होग, अदिक हारून समेत नी म्याकुच बर; लेकीन याजक अदिक साधारण लॉकुर यहोवा अन हात्ती वाळा मुर्दकु येर्त बरबाळुल, हिंग आगबाळुल कि यहोवा आंदरी दंड कोळुल.”
EXO 19:25 इदुरसाटी ई मातगोळ मूसा लॉकुर हात्ती ईळ्दकु आंदरी केळ्सदुन.
EXO 20:1 आग परमेश्वर ई सप्पा वचन माताळदुन:
EXO 20:2 “ना नीन परमेश्वर यहोवा हुईन, जो नीनी दासत्व अन मान्ना मतलब मिस्त्र द्याश दा टु तेगुकु तंदान.”
EXO 20:3 “नी नानी बिटकु दुसरा अक परमेश्वर मान्सबाळेत.”
EXO 20:4 “नी तान साटी यातोदु मुर्ति अगुळकु माळ बाळेत, ना यारदारा प्रतिमा बनुसेत, जो आकाश दा, या पृथ्वी मा, या पृथ्वी इन नीर दा आद.”
EXO 20:5 नी आंदरी दण्डवत माळबाळेत, अदिक ना आंदुर्द उपासना माळेत; यतिकी ना नीन परमेश्वर यहोवा जलन (ईर्ष्या) ईटावाळा परमेश्वर हुईन, अदिक जो नान से दुश्‍मनी ईटतार, आंदुर पारगोळ, नातु नतरागोळ, अदिक पळनातुगोळी भी पित्तरगोळ्द दण्ड कोळतोगतीन,
EXO 20:6 लेकीन जो नान से प्रेम ईटतार अदिक नान आग्यागोळी मान्सतार, आ हजारों पीढ़ीगोळ मा करूणा माळतोगतीन.
EXO 20:7 “नी तान परमेश्वर उन हेसुर व्यर्थ ताकोमबाळेत; यतिकी जो यहोवा अन हेसुर व्यर्थ ताकोंडान आव आऊक निर्दोष ठहरूसतीदील.”
EXO 20:8 “नी विश्राम दिन इक पवित्र मानसोर साटी याद ईटेत.
EXO 20:9 आर दिन रा नी मयनत माळकु तान सप्पा क्याल्सा-धंधा माळेत;
EXO 20:10 लेकीन सातवा दिशी नीन परमेश्वर यहोवा अन साटी विश्राम दिन आद. अदुर दा नी ना रा यातोदु प्रकार इन क्याल्सा-धंधा माळेत, अदिक ना नीन पार, ना नीन पोर, ना नीन दास, ना नीन दासगीत, ना नीन जनावर, ना यातोवारा परदेशी जो नीन फाटकगोळ्द अंदर ईरूल.
EXO 20:11 यतिकी आर दिन दा यहोवा आकाश, अदिक पृथ्वी, अदिक समुद्र, अदिक जो येनारा अऊर दा आद, सप्पा अक बनुसदुन, अदिक सातवा दिशी विश्राम माळदुन; ई कारण देल यहोवा विश्राम दिन इक आशीष कोट्टुन अदिक अदरी पवित्र ठहरूसदुन.”
EXO 20:12 “नी तान आप्प अदिक तान मोय इन आदर माळेत, यदुर देल जो द्याश नीन परमेश्वर यहोवा नीनी कोळतान अदुर दा नी हापाळ दिन ताका ईत्या.”
EXO 20:13 नी खुन माळबाळेत.
EXO 20:14 नी व्यभिचार माळबाळेत.
EXO 20:15 नी काळ्लपनी माळबाळेत.
EXO 20:16 नी यारदारा खिलाप ख्वाटा गवाही कोळबाळेत.
EXO 20:17 “नी यारदारा मान्नोद लालच माळबाळेत; ना रा यारदारा आर्त इन लालच माळेत, अदिक ना यारदारा दास-दासगीत या वस्त-वाळींद, ना यारदारा यातोदु वस्तु उन लालच माळेत.”
EXO 20:18 सप्पा लॉकुर गर्जन अदिक बिजली अदिक नरसिंगा अन शब्द केळ्त, अदिक धुंगा येळ्त पहाळ इक नोळतेला ईत्तुर, अदिक नोळकु, नळ्गतेला दुर निद्रेदुर;
EXO 20:19 अदिक आंदुर मूसा से अनली हतदुर, “नी ना नाम से मातगोळ हेळ, आग रा नाव केळ सक्केव; लेकीन परमेश्वर नाम से मात हेळबाळुल, हिंग आगबाळुल कि नाव सोतोदेव.”
EXO 20:20 मूसा लॉकुर से अंदुन, “अंजबाळी; यतिकी परमेश्वर इदुरसाटी बंदान कि नीम परीक्षा माळुल, अदिक आऊन अंज्क नीम मन दा बन्सकु ईरूल कि नीव पाप माळतीदील.”
EXO 20:21 अदिक आ लॉकुर दुर अच निदुरकु ईत्तुर लेकीन मूसा आ घोर अंधार इन हात्ती होदुन यल परमेश्वर ईरोन.
EXO 20:22 आग यहोवा मूसा से अंदुन, “नी इस्त्राएलीगोळी नान ई वचन केळ्स: नीव लॉकुर खुद अच नोळीर कि ना नीम सांगुळ आकाश से मातगोळ हेळीन.
EXO 20:23 नीव नान सांगुळ यारीकारा सम्मिलित माळबाळेतीर, मतलब तान साटी बेळ्ली या व्हान्ना देल देवतागोळी घळुसबाळेतीर.
EXO 20:24 नान साटी मुण्ण इन ऊंद वेदी बनुसेतीर, अदिक तान भेड़-मर्रगोळ अदिक वस्ता-गोसीगोळ्द होमबली अदिक मेलबली इक अदुर मा येर्सेतीर; अदिक हर ऊंद जागा दा यल यल ना तान हेसुर इन याद माळसुसाईन अल अल ना बंदकु नीमी आशीष कोळाईन.
EXO 20:25 अदिक अगर नीव नान साटी कल्लगोळ्द वेदी माळीर, रा तराशकु कल्लगोळ देल माळबाळेतीर; यतिकी यल नीव अदुर मा तान औजार हचदीर अल नीव अदरी अशुद्ध माळ बुट्टीर.
EXO 20:26 अदिक नान वेदी मा सीळी देल यागलु येरबाळेतीर, ईलारा हिंग आगबाळुल कि नीन मय अदुर मा ऊगळा कांळ्सकु बिळुल.”
EXO 21:1 बाक जो नियम नीनी आंदरी समझुसोद आद अव ईव हुव:
EXO 21:2 याग नीव यातोवारा इब्री दास उक कोंडीर, आग आव आर साल ताका स्यावा माळतेला ईरूल.
EXO 21:3 अगर आव आबना बंदान, रा आबना अच होटोगुल; अगर हिंग्स उन सांगुळ बंदान, रा आऊन सांगुळ आऊन हिंग्स भी होटोगुल.
EXO 21:4 अगर आऊन स्वामी आऊक हिंग्स उक कोटान अदिक आकिन से आऊन पारगोळ अदिक पोरगोळ पैदा आग्यार, रा आऊन हिंग्स अदिक चिकोर आ स्वामी नोर अच ईरूल, अदिक आव आबना होटोगुल.
EXO 21:5 लेकीन अगर आव दास हिम्मत देल अनुल, ना तान स्वामी, अदिक तान हिंग्स, अदिक चिकोर से प्यार ईटतीन; इदुरसाटी ना स्वतंत्र आगकु होगतीदील;
EXO 21:6 रा आऊन स्वामी आऊक परमेश्वर उन हात्ती ओयुल; बाक आऊक द्वार इन कवाळ या बाजु उन हात्ती ओतकु आऊन किव दा चुजी देल गड्डा माळुल; आग आव हमेशा आऊन स्यावा माळ्त ईरूल.
EXO 21:7 “अगर यावारा तान पोर इक दासगीत आगोर साटी मार बुळुल, रा आक दासगीत इन घाई व्हार्या होगबाळुल.
EXO 21:8 अगर आकिन स्वामी आक इक तान हिंग्स माळुल, अदिक बाक आकिन से खुश ईला ईरूल, रा आव आक इक दाम बेळकु होगगोळुल; आकिन विश्वासघात माळदुर बाद्दा आक इक परदेशी लॉकुर कय दा मारोद अधिकार आऊक ईरतीदील.
EXO 21:9 अगर आव आकिन मदा तान पार उन से माळ्यान, रा आकिन से पोर इन घाई व्यवहार माळुल.
EXO 21:10 चाहे आव दुसरा हिंग्स येती माळबाळुल, तरी भी आव आकिन ऊम्मोद, कपळा, अदिक वैवाहिक व्यवहार गोर्त माळबाळुल.”
EXO 21:11 अदिक अगर आव ई मुरू मातगोळ दा घटी माळुल, रा आ आर्त बिना दाम कोळ्द अच होटोगुल.
EXO 21:12 “जो यातारा मंळसा अक हिंग बडुल कि आव सोतोगुल, रा आव भी जरूर कोन्सुसकु आगुल.
EXO 21:13 अगर आव आऊन घात दा कुर्तकु हैलेच, अदिक परमेश्वर उन इच्छा देल अच आव आऊन कय दा बिदोग्यान, रा हिंग कोनावाळा अन ओळावाळा अन साटी ना ऊंद जागा ठहरूसाईन यल आव ओळेगुल.
EXO 21:14 लेकीन अगर यावारा ज्यान बुजुसकु यारदारा मा चढ़ाई माळकु आऊक छल देल घात माळुल, रा आऊक कोन्द बुळोर साटी नान वेदी इन हात्ती टु भी अलग ओयेतीर.”
EXO 21:15 “जो तान मोय या आप्प उक मार-पीट माळ्यान आव जरूर कोंदकु आगुल.”
EXO 21:16 “जो यावारा यातारा मंळसा अक कदुल, चाहे आऊक ओतकु मारबुळुल, चाहे आव आऊन अल कांळ्सकु बिळुल, रा आव भी जरूर कोंदकु आगुल.”
EXO 21:17 “जो तान मोय या आप्प उक शराप कोट्टान आव भी जरूर कोंदकु आगुल.”
EXO 21:18 “अगर मंळसागोळ बाय मुरसुल, अदिक आबुर दाबुरी कल्ल या बुक्‍की देल हिंग बडुल कि आव सायबाळुल लेकीन हासक्या मा बिदकु ईरूल,
EXO 21:19 रा याग आव यदकु कोल इन सहारा देल व्हार्या कुरली येळली हतुल, आग आव बडावाळा निर्दोष ठहरूसुल; आ दशा दा आव आऊन बिदकु ईरोद समय इन भरपाई तुमुल, अदिक आऊक भला चंगा भी माळकोळुल.”
EXO 21:20 “अगर यावारा तान दास या दासगीत इक सोंटा देल हिंग बडुल कि आव आऊन बळदुर देल सोतोगुल, आग आऊक जरूर दण्ड कोटकु आगुल.
EXO 21:21 लेकीन अगर आव ऊंद येढ्ढ दिन जित्ता ईरूल, रा आऊन स्वामी इक दण्ड कोटकु आगबाळुल; यतिकी आ दास आऊन धन हुन.”
EXO 21:22 “अगर मंळसा आपस दा बडाबडी माळकु यातारा ईत्ता आर्त जो व्‍हाट्‍यादी आर आक इक हिंग चोट पोहचुसुल कि आकिन गर्भ बिदोगुल, लेकीन मात्त येनु नुकसान आगबाळुल, रा बडावाळा से आट दण्ड ताकोमकु आगुल याट आ आर्त इन गण्स पंच लॉकुर्द सम्मति देल ठहरूस्यान.
EXO 21:23 लेकीन अगर आ आर्त मार पीट देल सोतोदार, रा जीव इन बदला जीव इन,
EXO 21:24 अदिक कण्ण इन बदला कण्ण इन, अदिक हल्ल इन बदला हल्ल इन, अदिक कय इन बदला कय इन, अदिक काल इन बदला काल इन,
EXO 21:25 अदिक दाग इन बदला दाग इन, अदिक घाव इन बदला घाव इन, अदिक मार इन बदला मार इन दण्ड आगुल.”
EXO 21:26 “याग यावारा तान दास या दासगीत इन कण्ण मा हिंग बडुल कि अद वळ्दोगुल, रा आव आऊन कण्ण इन बदला आऊक आजाद माळकु होगगोळुल.
EXO 21:27 अदिक अगर आव तान दास या दासगीत इक बडुकु आऊन हल्ल मुर्द बुळुल, रा आव आऊन हल्ल इन बदला आऊक आजाद माळकु होगगोळुल.”
EXO 21:28 “अगर वस्ता यावारा मंळसा या आर्त इक हिंग सींग बडुल कि आव सोतोगुल, रा अद वस्ता जरूर पथराव माळकु कोंदकु आगुल, अदिक अदुर्द मास तिनकु आगबाळुल; लेकीन वस्ता अन स्वामी निर्दोष ठहरूसुल.
EXO 21:29 लेकीन अगर आ वस्ता अन सींग होडोद आदत पयले टु ना आद, अदिक अदुर्द स्वामी इक ई मात मालुम ईरदुर बाद्दा भी अदरी कटकु ईटीदील, अदिक अद यातारा मंळसा या आर्त इक कोंद बुळुल, आग रा आ वस्ता मा पथराव माळकु आगुल, अदिक अदुर्द स्वामी इक भी कोंदकु आगुल.
EXO 21:30 अगर आऊन मा फिरोती ईटकु आग्याद रा आव तान जीव ऊळसोर साटी तान मा कुर्द फिरोती इक कोट बुळुल.
EXO 21:31 चाहे वस्ता यातारा पार उक, चाहे पोर इक कोंदाद, तरी भी ईदा नियम इन अनुसार अदुर्द स्वामी इन सांगुळ व्यवहार माळकु आगुल.
EXO 21:32 अगर वस्ता यातारा दास या दासगीत इक सींग होळदीदाद, रा वस्ता अन स्वामी आ दास इन स्वामी इक तीस शेकेल बेळ्ली कोळुल, अदिक आ वस्ता मा पथराव माळकु आगुल.”
EXO 21:33 “अगर यावारा मंळसा गड्डा तेरूकु या अगुळकु अदरी मुचालुन, अदिक अदुर दा यारदारा वस्ता या गदा बिदोगुल,
EXO 21:34 रा आ गड्डा यार्द हुन आव आ नुकसान इक तुम कोळुल; आव जनावर इन स्वामी इक अदुर्द मोल कोळुल, अदिक सोतकु जनावर इन लाश गड्डावाळा अन ठहरूसुल.”
EXO 21:35 “अगर यारदारा वस्ता यातारा दुसरा मंळसा अन वस्ता अक हिंग चोट पोहचुसुल कि अद सोतोगुल, रा आ येढ्ढु मंळसागोळ जित्ता वस्ता अक मारकु अदुर्द मोल आपस दा आर्धा आर्धा वाट्स बुळुल; अदिक सोतकु जनावर इन लाश इक भी हांगा वाट्सुल.
EXO 21:36 अगर ईद प्रगट आगुल कि आ वस्ता अन पयले टु ना सींग होडोद आदत ईरोद, लेकीन अदुर्द स्वामी अदरी कटकु ईटीदील, रा जरूर आव वस्ता अन बदला वस्ता तुम कोळुल, लेकीन सोतकु वस्ता अन लाश आऊंदा ठहरूसुल.”
EXO 22:1 “अगर यावारा मंळसा वस्ता, या भेड़, या मर्री कदुकु अदुर्द घात माळुल या मार बुळुल, रा आव वस्ता अन बदला अईद वस्ता, अदिक भेड़-मर्रगोळ बदला नाक भेड़-मर्रगोळ तुमकु कोळुल.
EXO 22:2 अगर काळ्ल काळ्लपनी माळतेला हुडुकु आगुल, अदिक आऊन मा हिंग मार बिळुल कि आव सोतोगुल, रा आऊन खुन इन दोष हतबाळुल;
EXO 22:3 अगर सुर्य होटबुटाद, रा आऊन खुन इन दोष हतुल; जरूरी आद कि आव नुकसान तुमकु कोळुल, अदिक अगर आऊन हात्ती येनु हैलेच, रा आव काळ्लपनी इन कारण मारकु आगेगुल.”
EXO 22:4 अगर काळ्लपनी माळ्द वस्ता, या गदा, या भेड़, या मर्री आऊन कय दा जित्ता कांळसुल, रा आव अऊर्द येढ्ढ गुणा तुमकु कोळुल.
EXO 22:5 “अगर यावारा तान जनावर से यारदारा केई या अंगुर इन बेली चरूसुल, मतलब तान जनावर इक हिंग बिटबुळुल कि अद दुसरा अन केई दा चरूसुल, रा आव तान केई इन अदिक तान अंगुर इन बेली इन वळ्लीद से वळ्लीद उपज दा टु आ नुकसान इक तुम कोळुल.”
EXO 22:6 “अगर यावारा बेक्‍की होताकुल, अदिक अद मुळ्लगोळ दा हत्तेगुल अदिक फुलगोळ ढग या अनाज या ऊब्बा केई होत्तेगुल, रा याव बेक्‍की होताक्यान आव आ नुकसान इक जरूर तुम कोळुल.”
EXO 22:7 “अगर यावारा दुसरा अन हात्ती रूपये या सामग्री ईटली कोळुल, अदिक अद आऊन मान्या दा टु काळ्लपनी आगुल, रा अगर काळ्ल हुडुकु आगुल रा येढ्ढ गुणा आऊका तुम कोळोद बिद्दीत.
EXO 22:8 अगर काळ्ल हुडुकु ईला आगुल, रा मान्यागोळ स्वामी परमेश्वर उन हात्ती तनकु आगुल कि पक्‍का आगेगुल कि आव तान वार्ट-बन्धुगोळ्द सम्पत्ति मा कय हच्यान या ईला.
EXO 22:9 चाहे वस्ता, चाहे गदा, चाहे भेड़ या मर्री, चाहे कपळा, चाहे यातोदारा प्रकार इन ईत्ता काळ्द वस्तु उन बारा दा अपराध येती हचकु आगबाळुल, यदरी येढ्ढ मुंदुर तान तान अनतीर, रा येढ्ढु मुंदुर्द मुकदमा परमेश्वर उन हात्ती बरूल; अदिक यारी परमेश्वर दोषी ठहरूसुल आव दुसरा अक येढ्ढ गुणा तुम कोळुल.”
EXO 22:10 “अगर यावारा दुसरा अक गदा या वस्ता या भेड़-मर्रगोळ या यातोदारा दुसरा जनावर ईटोर साटी सोप्सुल, अदिक यारदारा बिना नोळ्द आव सोतोगुल, या घाव तिनुल, या हकाल्सकु आगुल,
EXO 22:11 रा आ येढ्ढु मुंदुर बीच दा यहोवा अन किर्‍या तिन्सकु आगुल, ना ईऊन सम्पत्ति इक कय हचीदील; आग सम्पत्ति इन स्वामी ईदरी खरा मानसुल, अदिक दुसरा अक आऊक येनारा भी तुम कोळोद बिळतीदील.
EXO 22:12 अगर अद खराखुरा आऊन अल टु काळ्लपनी माळकु आग्याद, रा आव स्वामी इक नुकसान तुम कोळुल.
EXO 22:13 अदिक अगर अद हर्दकु आग्याद, रा अद हर्दकु उक प्रमाण इन साटी तरूल, आग आऊक अदरी भी तुम कोळोद बिळतीदील.”
EXO 22:14 “बाक अगर यावारा दुसरा से जनावर बेळकु तरूल, अदिक अदुर्द स्वामी इन ईला ईत्तुर कारण देल अदरी चोट हतुल या अद सोतोगुल, रा जरूर अदुर्द नुकसान तुम कोळुल.
EXO 22:15 अगर अदुर्द स्वामी सांगुळ ईरूल, रा दुसरा अक अदुर्द नुकसान तुमोद बिळबाळुल; अदिक अगर अद किराया अन ईरूल रा अदुर्द नुकसान अदुर्द किराया दा होट बत्त.”
EXO 22:16 “अगर यावारा मंळसा यातारा कुवारा पोर इक, यार्द मदा अन मात ईला नळदीदाद, आकी फुसलुस्कु आकिन सांगुळ कुकर्म माळुल, रा आव जरूर आकिन मोल कोटकु आकिन से मदा माळ कोमुल.
EXO 22:17 लेकीन अगर आकिन आप्प आक इक कोळोर साटी बिलकुल इनकार तुमुल, रा कुकर्म माळावाळा पोरगोळ्द मोल इन रिति इन अनुसार पैस्या आळ्दकु कोळुल.”
EXO 22:18 “नी जादू-टोना माळावळ्त इक जित्ता ईरगोळबाळेत.
EXO 22:19 “जो यावारा यातोदारा जनावर से कुकर्म माळुल रा आव जरूर कोंदकु आगुल.
EXO 22:20 “जो यावारा यहोवा अक बिटकु यातारा दुसरा देवता अन साटी बलि येर्सुल आऊन सत्यानाश माळकु आगुल.
EXO 22:21 “नीव परदेशीगोळी ना सतुसेतीर अदिक ना आंदुर मा अंधार माळेतीर, यतिकी मिस्त्र द्याश दा नीव भी परदेशी ईरीर.
EXO 22:22 यातारा रांड्यागीत या अनाथ चिग्द उक दुख कोळ बाळेतीर.
EXO 22:23 अगर नीव ईत्ता लॉकुरी यातारा प्रकार इन दुख कोट्टीर अदिक आंदुर नांद दोहाई कोट्टार, रा ना जरूर आंदुर दोहाई केळाईन;
EXO 22:24 आग नान सिट्ट भळकुसीत, अदिक ना नीमी तलवार देल कोंसुसाईन, अदिक नीम हिंग्सुर रांड्यागीतेर अदिक नीम चिगदुर अनाथ आगेदार.
EXO 22:25 “अगर नी नान प्रजा दा टु यावारा गरीब मंळसा अक जो नीन हात्ती ईरतीदान पैस्या अन कर्ज कोट्या रा आऊन से शाहुकार उन घाई ब्याज ताकोम बाळेत.
EXO 22:26 अगर नी यागल्यारा तान वार्ट बन्धु उन कपळागोळी बन्धक माळकु ईट भी कोंड्या, रा द्यावमुळका से पयले आऊक वापस माळबुळेत;
EXO 22:27 यतिकी अद आऊन ऊंदा होदोद हुन, आऊन मय इन अदा आबना कपळा ईत्तीत; बाक आव यदरी होदुकु मिंग्यान? अदिक याग आव नान दोहाई कोट्टान आग ना आऊन केळाईन, यतिकी ना करूणामय आईन.
EXO 22:28 “परमेश्वर उक श्राप कोळबाळेत, अदिक ना तान लॉकुर्द प्रधान उक श्राप कोळेत.
EXO 22:29 “तान केईगोळ्द उपज अदिक कायगोळ्द रास्सा दा टु थ्वाळासा नानी कोळदुर दा समय माळबाळेत. तान पारगोळ दा टु पयला पार नानी कोळेत.
EXO 22:30 हांगा तान गोसीगोळ अदिक भेड़-मर्रीगोळ्द पयला भी कोळेत; येळ दिन ताका रा चिग्द तान मोय इन सांगुळ ईरूल, अदिक आठवा दिशी नी अदरी नानी कोट बुळेत.
EXO 22:31 “नीव नान साटी पवित्र मंळसा हुईर; ई कारण जो जनावर मैदान दा सोतकु सिक्‍कीत अदुर्द मास तिनबाळेतीर, अदरी नाय इन मुंद बिट्ट बुळेतीर.
EXO 23:1 “ख्वाटा मातगोळ फैलुसबाळेतीर. अन्यायी गवाह ईतकु दुष्ट मंळसा अन साथ कोळ बाळेतीर.
EXO 23:2 बुराई माळोर साटी ना रा हापाळ मुंदुर हींद आगेगीतीर; अदिक ना आंदुर हींद ओयाळतेला मुकदमा दा न्‍याय बिगळुसली गवाही कोळेतीर;
EXO 23:3 अदिक कंगाल उन मुकदमा दा आऊन भी पक्ष माळ बाळेत.
EXO 23:4 “अगर नीन दुश्मन उन वस्ता या गदा भटकुसतेला नीनी सिकुल, रा अदरी आऊन हात्ती जरूर वापस तनकोळेत.
EXO 23:5 बाक अगर नी तान दुश्मन उन गदा अक बोझ इन मारा देल वोतकु नोळ्या, रा चाहे अदरी अदुर्द स्वामी इन साटी बिळ्सली नीन मन आगतीदील, तरी भी जरूर स्वामी इन साथ कोटकु अदरी बिळ्स बुळेत.
EXO 23:6 “नीन लॉकुर दा टु जो गरीब ईरूल आऊन मुकदमा दा न्याय बिगळुस बाळेत.
EXO 23:7 ख्वाटा मुकदमा देल दुर ईरेत, अदिक निर्दोष अदिक न्यायी इक घात माळबाळेत, यतिकी ना दुष्ट मंळसा अक निर्दोष ठहरूसतीदील,
EXO 23:8 रिश्वत ताकोम बाळेत, यतिकी रिश्वत नोळावाळेर इक भी कुढ्ढ माळ बुळतद अदिक न्‍यायी मंळसागोळ्द मातगोळी ऊलटुस बुळतद.
EXO 23:9 “परदेशी मा अंधार माळ बाळेत; नीव रा परदेशी इन मन इन मातगोळी अरूतीर, यतिकी नीव भी मिस्त्र द्याश दा परदेशी ईरीर.
EXO 23:10 “आर साल रा तान जमीन दा बोऊसेतीर अदिक अदुर्द उपज जमा माळेतीर;
EXO 23:11 लेकीन सातवा साल दा अदरी पळ्याव ईरगोळेतीर अदिक हांगा बिट्ट बुळेतीर, मतलब नीन वार्ट बन्धुगोळ दा टु जो कंगाल ईतीदार आंदुर अदुर दा ऊगुस्द तिंदार, अदिक आंदुर तिनकु आगदुर बाद्दा जो मिक्कीत अव जनावरगोळ तिंदाव. तान अंगुर अदिक जैतून इन बेली दा टु भी हिंगा माळेत.
EXO 23:12 आर दिन ताका तान क्याल्सा कळी माळेतीर, अदिक सातवा दिशी आराम माळेतीर ताकी नान वस्ता अदिक गदागोळ भी विश्राम माळुल, अदिक नीन दासगीतेर्द पारगोळ अदिक परदेशी भी तान जीव ठंडा माळ सकुल.
EXO 23:13 जो येनारा ना नीम से अंदीन अदुर दा सावधान ईरेतीर; अदिक दुसरा देवतागोळ्द हेसुर इन चर्चा माळबाळेतीर, उलटा अव नीम बाय दा टु केळकु भी आगबाळुल.
EXO 23:14 “हर साल मुर घन नान साटी हाब्बा मनुसेतीर.
EXO 23:15 अखमीरी रोट्टी इन हाब्बा मनुसेतीर; अदुर दा नान आग्या अन अनुसार अबीब तिंगुळ इन नियत समय मा येळ दिन ताका अखमीरी रोट्टी तिनतोगेतीर, यतिकी अदा तिंगुळ दा नीव मिस्त्र दा टु होटकु बंदीदीर. याऊ निरा कय देल नान मुंद बरबाळुल.
EXO 23:16 याग नीन बोऊस्द केई इन पयला उपज तयार आगुल, आग कटाई इन हाब्बा मान्सेत. साल इन आखरी दा याग नी मयनत इन काय जमा माळकु ढेर हच्या, आग जमावळा अन हाब्बा मान्सेत.
EXO 23:17 हर साल मुरू घन नीन सप्पा मंळसागोळ प्रभु यहोवा अक तान मार्रा तोर्सुल.
EXO 23:18 “नान बलि इन जनावर इन रक्ता खमीरी रोट्टी इन सांगुळ येर्स बाळेतीर, अदिक ना नान हाब्बा अन वळ्लीद बलिदान दा टु येनारा व्हातुर ताका ईरगोळेतीर.
EXO 23:19 तान जमीन इन पयला उपज इन पयला हिस्सा तान परमेश्वर यहोवा अन भवन दा तरेतीर. मर्री इन पाड्डा अदुर्द मोय इन हाल दा बेईस बाळेतीर.
EXO 23:20 “केळ, ना ऊंद दूत नीन मुंद मुंद कळुतीन जो हादी मा नीन रक्षा माळीत, अदिक याता जागा अक ना तयार माळीन अल नीनी पोहचुसीत.
EXO 23:21 अदुर मुंद सावधान ईरेत, अदिक अदुर्द मान्सेत, अदुर विरोध माळबाळेत, यतिकी अद नीम अपराध क्षमा माळतीदील; इदुरसाटी कि अदुर दा नान हेसुर ईरतद.
EXO 23:22 अगर नी खराखुरा अदुर्द केळ्या अदिक जो येनारा ना अनाईन अद माळ्या, रा ना नीन दुश्मन इन दुश्मन अदिक नीन द्रोहीगोळ्द द्रोही आगाईन.
EXO 23:23 ईत्ता रिति देल नान दूत नींद मुंद मुंद नळुतेला नीनी एमोरी, हित्ती, परिज्जी, कनानी, हिब्बी, अदिक यबूसी लॉकुर अल पोहचुसीत, अदिक ना आंदुर्द सत्यानाश माळ बुळाईन.
EXO 23:24 आंदुर देवतागोळी दण्डवत माळबाळेतीर, अदिक ना आंदुर उपासना माळेतीर, अदिक ना आंदुर घाई क्याल्सा माळेतीर, उलटा आ मुर्तिगोळ्द पुरा रिति देल सत्यानाश माळ बुळेतीर, अदिक आ लॉकुर्द स्तंभगोळ्द तुकळा तुकळा माळ बुळेतीर.
EXO 23:25 नी तान परमेश्वर यहोवा अन उपासना माळेत, आग आव नीन अनाज नीर मा आशीष कोट्टान, अदिक नीन बीच दा टु रोग दुर माळ्यान.
EXO 23:26 नीन द्याश दा ना रा यारदारा गर्भ बिद्दीत अदिक ना यारारा वांजला ईत्तार; अदिक नीन उमर ना पुरा माळाईन.
EXO 23:27 यास लॉकुर बीच दा नी होद्या आ सप्पा लॉकुर मन दा ना तान अंज्क पयले टु हिंग समुस बुळाईन कि आंदरी व्याकुल माळ बुळाईन, अदिक ना नीनी सप्पा दुश्मनगोळ्द बेन तोर्साईन.
EXO 23:28 अदिक ना नीन से पयले गंदवल कळाईन जो हिब्बी, कनानी, अदिक हित्ती लॉकुरी नीन मुंदु टु तुरकाळ्सकु दुर माळ बुट्टव.
EXO 23:29 ना आंदरी नीन मुंदु टु ऊंदा साल दा तेग्द बुळालीन, हिंग आगबाळुल कि द्याश ऊजळुसेगुल, अदिक पालतु जनावर वाळुसकु नीनी दुख कोळली हतुल.
EXO 23:30 यागासताका नीन संख्या वाळुसकु द्याश इक तान अधिकार दा माळ कोमाल आगासताका ना आंदरी नीन मुंदु टु थ्वाळा थ्वाळा माळकु तेगुतेला ईराईन.
EXO 23:31 ना क्याचाँद समुद्र टु हुडुकु पलिश्तीगोळ्द समुद्र ताका अदिक आळी टु हुडुकु फरात महानद ताका द्याश इक नीन वश दा माळ बुळाईन; ना आ द्याश इन ईरावाळेर इक भी नीन वश दा माळ बुळाईन, अदिक नी आंदरी तान मुंदु टु बरबस तेगद्या.
EXO 23:32 नी ना रा आंदुर से वाचा कटेत अदिक ना आंदुर देवतागोळ से.
EXO 23:33 आंदुर नीन द्याश दा ईरली ईला पायजे, हिंग आगबाळुल कि आंदुर नीन से नान विरूद्‍ध पाप माळसुसुल; यतिकी अगर नी आंदुर देवतागोळ्द आराधना माळ्या, रा ईद नीन साटी फंदा बन्सीत.”
EXO 24:1 बाक यहोवा मूसा से अंदुन, “नी हारून, नादाब, अबीहू, अदिक इस्त्राएलीगोळ्द सत्तर स्याणागोळ समेत यहोवा अन हात्ती म्याकुच बंदकु दुर टु दण्डवत माळेत.
EXO 24:2 सिर्फ मूसा यहोवा अन हात्ती बरूल; लेकीन आंदुर हात्ती बरबाळुल, अदिक दुसरा लॉकुर आऊन सांगुळ म्याकुच बरबाळुल.”
EXO 24:3 मूसा लॉकुर हात्ती होगकु यहोवा अन सप्पा मातगोळ अदिक सप्पा नियम केळ्स बुट्टुन. आग सप्पा लॉकुर ऊंद स्वर दा माताळ कुरतुर, “यास मातगोळ यहोवा अंदान आ सप्पा मातगोळी नाव मान्सेव.”
EXO 24:4 आग मूसा यहोवा अन सप्पा वचन लिख्स बुट्टुन; अदिक हुंजकुका येदकु पहाळ इन ल्यालमा ऊंद वेदी अदिक इस्त्राएल इन हन्नेळ गोत्रगोळ अनुसार हन्नेळ खम्भागोळ भी माळसुसदुन.
EXO 24:5 आग आव हापाळ इस्त्राएली जवान मंळसागोळी कळुदुन, यार यहोवा अन साटी होमबली अदिक वस्तागोळ्द मेलबली येर्सदुर.
EXO 24:6 अदिक मूसा आर्धा रक्ता हुडुकु वाटी दा ईटदुन, अदिक आर्धा वेदी मा सिप्स बुट्टुन.
EXO 24:7 आग वाचा अन किताब हुडुकु लॉकुरी वाचुसकु केळ्सदुन; अदरी केळकु आंदुर अंदुर, “जो येनारा यहोवा अंदान आ सप्पा मातगोळी नाव माळेव, अदिक आऊन आग्या मान्सेव.”
EXO 24:8 आग मूसा रक्ता हुडुकु लॉकुर मा सिप्स बुट्टुन, अदिक आंदुर से अंदुन, “नोळी, ईद आ वाचा अन रक्ता हुन, यदरी यहोवा ई सप्पा वचनगोळ मा नीम सांगुळ कट्यान.”
EXO 24:9 आग मूसा, हारून, नादाब, अबीहू अदिक इस्त्राएलीगोळ्द सत्तर स्याणा लॉकुर म्याकुच होदुर,
EXO 24:10 अदिक इस्त्राएल इन परमेश्वर उन दर्शन माळदुर; अदिक आऊन काल दिशी नीलमणि इन चौरंग घाई येनतरी ईरोद, जो आकाश इन घाई का स्वच्छ ईरोद.
EXO 24:11 अदिक आव इस्त्राएलीगोळ्द प्रधानगोळ मा कय वाळुसीदील; आग आंदुर परमेश्वर उन दर्शन माळदुर, अदिक तिंदुर कुळदुर.
EXO 24:12 आग यहोवा मूसा से अंदुन, “पहाळी मा नान हात्ती येरकु बा, अदिक अल्या ईर; अदिक ना नीनी कल्लगोळ्द पाटीगोळ, अदिक तान लिख्सद व्यवस्था अदिक आग्या कोळाईन कि नी आंदरी कलस्या.”
EXO 24:13 आग मूसा यहोशू हेसुर इनव तान सेवक समेत परमेश्वर उन पहाळ मा येरेदुन.
EXO 24:14 अदिक स्याणागोळ से आव ईद अंदकु होदुन, “यागासताका नाव नीम हात्ती वापस बरालेव आगासताका नीव ईल्या नाम हादी कायतेला ईरी; अदिक केळी, हारून अदिक हूर नीम सांगुळ आर; अगर यारदारा मुकदमा आदीत रा आंदुर दा हात्ती होगुल.”
EXO 24:15 आग मूसा पहाळ मा येरेदुन, अदिक बादल पहाळ इक मुचबुळ्त.
EXO 24:16 आग यहोवा अन्द तेज सीनै पहाळ मा निवास माळ्त, अदिक अद बादल आऊन मा आर दिन ताका मुचकु ईत्त; अदिक सातवा दिशी आव मूसा अक बादल इन बीच दा टु कारदुन.
EXO 24:17 इस्त्राएलीगोळ्द नजर दा यहोवा अन्द महिमा पहाळ इन चोटी मा प्रचंड बेक्‍की इन घाई कांळ्सकु बिळतोगोद.
EXO 24:18 आग मूसा बादल इन बीच दा प्रवेश माळकु पहाळ मा येरेदुन. अदिक आव पहाळ मा चालीस दिन अदिक चालीस ईळ्लक ईत्तुन.
EXO 25:1 यहोवा मूसा से अंदुन,
EXO 25:2 “इस्त्राएलीगोळ से ईद अनेत कि नान साटी भेंट तरूल यास तान इच्छा देल कोळोद चाहास्यार आ सप्पा मुंदुर से नान भेंट ताकोमेत.
EXO 25:3 अदिक याता वस्तुगोळ्द भेंट आंदुर से ताकोमोद आद अव ईव हुव; मतलब व्हान्ना, बेळ्ली, पीतळ,
EXO 25:4 नीळा, जांभळा अदिक क्याचांद रंग इन कपळा, महीन मलमल कपळा, मर्री इन चुट्टी,
EXO 25:5 क्याचांद रंग देल रंग्सकु म्यांडागोळ्द तोगुल, सूइसगोळ्द तोगुल, बबूल इन हुळ्ली,
EXO 25:6 ऊजुळ इन साटी याण्‍णा, अभिषेक इन याण्णा साटी अदिक सुगन्धित लुबान साटी सुगन्धद्रव्य,
EXO 25:7 एपोद अदिक चपरास इन साटी सुलैमानी कल्ल, अदिक जळुसोर साटी मणि.
EXO 25:8 अदिक आंदुर नान साटी ऊंद पवित्रस्थान माळुल कि ना आंदुर बीच दा निवास माळाईन.
EXO 25:9 जो येनारा ना नीनी तोर्सतीन, मतलब निवासस्थान अदिक अदुर सप्पा सामान इन नमुना, अदुर्दा हिसाब देल नीव लॉकुर अदरी माळेतीर.”
EXO 25:10 “बबूल इन हुळ्ली इन ऊंद सन्दुक माळकु आगुल; अदुर लंबाई ढाई कय, अदिक चौळाई अदिक ऊचाई दिळ दिळ कय ईरूल.
EXO 25:11 अदिक अदरी शुद्ध व्हान्ना देल बुळ्क अदिक व्हार्या मळुसेतीर, अदिक सन्दुक इन म्याकुच नाकु दी व्हान्ना अन पट्टी बनुसेतीर.
EXO 25:12 अदिक व्हान्ना अन नाक कळागोळ घळुसकु अदुर नाकु कालगोळ मा, ऊंद दी येढ्ढ कळा अदिक दुसरा दी भी येढ्ढ कळा हचुसेतीर.
EXO 25:13 बाक बबूल इन हुळ्ली इन कोलगोळ माळसुसेतीर, अदिक अवरी भी व्हान्ना देल मळुसेतीर.
EXO 25:14 अदिक कोलगोळी सन्दुक इन येढ्ढु दीकळव कळागोळ दा हाकेतीर, यदुर देल अऊर शक्ति देल सन्दुक नेगुकु आगुल.
EXO 25:15 अव कोलगोळ सन्दुक इन कळागोळ दा हतकु ईरूल; अदिक अदुर देल अलग माळकु आगबाळुल.
EXO 25:16 अदिक जो गवाही इन चिट्टी ना नीनी कोळाईन अदरी अदा सन्दुक दा ईटेत.”
EXO 25:17 “बाक शुद्ध व्हान्ना अन ऊंद प्रायश्चित इन झाकनी माळसुसेतीर, अदुर्द लंबाई ढाई कय, अदिक चौळाई दिळ कय ईरूल.
EXO 25:18 अदिक व्हान्ना मळुसकु येढ्ढ करूब माळसुसकु प्रायश्चित इन झाकनी इन येढ्ढु क्वाना मा हचुसेत.
EXO 25:19 ऊंद करूब ऊंद क्वाना मा अदिक दुसरा करूब दुसरा क्वाना मा हचुसेत; अदिक करूबगोळी अदिक प्रायश्चित इन झाकनी इक ऊंदा तुकळा देल माळकु अदुर्द येढ्ढु क्वाना मा हचुसेत.
EXO 25:20 आ करूबगोळ्द पंख म्याकुच टु हिंग फैलुस्कु बनसुल कि प्रायश्चित इन झाकनी अऊर देल मुचकु ईरूल, अदिक अऊर मार्रगोळ आमने-सामने अदिक प्रायश्चित इन झाकनी दी ईरूल.
EXO 25:21 अदिक प्रायश्चित इन झाकनी इक सन्दुक इन म्याकुच हचुसेत; अदिक जो गवाही इन चिट्टी ना नीनी कोळाईन अदरी सन्दुक इन बुळ्क ईटेत.”
EXO 25:22 ना अदुर म्याकुच ईतकु नीन से मुलाकात माळतोगाईन; अदिक इस्त्राएलीगोळ्द साटी यास आग्यागोळ नानी नीनी कोळोद बिद्दीत, आ सप्पा अन बारा दा प्रायश्चित इन झाकनी इन म्याकुच टु अदिक आ करूबगोळ्द न्याड्या दा टु, जो गवाही इन चिट्टी इन सन्दुक मा ईत्ताव, नीन से मातकात हेळतोगाईन.
EXO 25:23 “बाक बबूल इन हुळ्ली इन ऊंद मेज माळसुसेत; अदुर लंबाई येढ्ढ कय, चौळाई ऊंद कय, अदिक ऊचाई दिळ कय ईरूल.
EXO 25:24 अदरी शुद्ध व्हान्ना देल मळसुसेत, अदिक अदुर नाकु दी व्हान्ना अन ऊंद पट्टी माळसुसेत.
EXO 25:25 अदिक अदुर नाकु दी नाक बेळ्ल चौळा ऊंद पटरी माळसुसेत, अदिक ई पटरी इन नाकु दी व्हान्ना अन ऊंद पट्टी माळसुसेत.
EXO 25:26 अदिक व्हान्ना नव नाक कळा माळसुसकु मेज इन आ नाकु क्वाना दा हचुसेत जो अदुर्द नाकु कालगोळ दा ईत्ताव.
EXO 25:27 अव कळागोळ पटरी इन हात्ती का ईरूल, अदिक मेज नेगोर साटी कोलगोळ ईटेत.
EXO 25:28 कोलगोळी बबूल इन हुळ्ली देल माळसुसकु व्हान्ना देल मळसुसेत, अदिक मेज अऊर देला नेगुकु आगुल.
EXO 25:29 अदिक अऊर परात अदिक धूपदान, अदिक मग्गागोळ अदिक रीचुसव कटोरीगोळ, सप्पा शुद्ध व्हान्ना अन माळसुसेत.
EXO 25:30 अदिक मेज मा नान मुंद भेंट इन रोट्टीगोळ हमेशा ईटतोगेत.”
EXO 25:31 “बाक शुद्ध व्हान्ना अन ऊंद दिवट माळसुसेत. ईद दिवट घळुस्द व्हान्ना देल बन्सकु ईरूल; अदुर्द पुष्पकोष, गाठ अदिक फूल, सप्पा ऊंदा तुकळा अन बन्सकु ईरूल;
EXO 25:32 अदिक अदुर किनारागोळ देल आर डगाली होळुल, मुर डगालीगोळ रा दिवट इन ऊंद दी टु अदिक मुर डगालीगोळ अदुर दुसरा दी टु होटकु ईरूल;
EXO 25:33 ऊंद ऊंद डगाली दा बादाम इन फूल इन घाई मुर मुर पुष्पकोष, ऊंद ऊंद गाठ, अदिक ऊंद ऊंद फूल ईरूल; दिवट दा टु होळ्द आरू डगालीगोळ्द ईदा आकार या रूप ईरूल;
EXO 25:34 अदिक दिवट इन डण्डी दा बादाम इन फूल इन घाई नाक पुष्पकोष तान तान गाठ अदिक फूल समेत ईरूल;
EXO 25:35 अदिक दिवट दा टु होळ्द आरू डगालीगोळ दा टु येढ्ढ येढ्ढ डगालीगोळ्द ल्यालमा ऊंद ऊंद गाठ ईरूल, अव दिवट समेत ऊंदा तुकळा अन बन्सकु ईरूल.
EXO 25:36 अऊर्द गाठगोळ अदिक डगालीगोळ, सप्पा दिवट समेत ऊंदा तुकळा अन ईरूल, शुद्ध व्हान्ना मळुसकु पुरा दिवट ऊंदा तुकळा अन माळसुसेत.
EXO 25:37 अदिक येळ दिंग्या माळसुसेत; अदिक दिंग्या होताक्कु आगुल कि अव दिवट इन मुंद ऊजुळ कोळुल.
EXO 25:38 अदुर्द चिमटा अदिक ताटी सप्पा शुद्ध व्हान्ना अन ईरूल.
EXO 25:39 अद सप्पा ई पुरा सामान समेत चौतीस किलो तीम शुद्ध व्हान्ना अन बनसुल.
EXO 25:40 अदिक सावधान ईतकु ई सप्पा वस्तुगोळी आ नमुना अन घाई माळसुसेत, जो नीनी ई पहाळी मा तोर्सकु आग्याद.”
EXO 26:1 “बाक निवासस्थान इन साटी हत्त पळदागोळ माळसुसेत; ईव निवळुस्द महीन मलमल देल माळ्द नीळा, जांभळा, अदिक क्याचांद रंग इन कपळा अन ईरूल, अदिक ईऊर दा यावारा कुशल कारीगर से करूबगोळ्द कढ़ाई माळसुसेत.
EXO 26:2 ऊंद ऊंद पळदागोळ्द लंबाई आट्ठावीस कय अदिक चौळाई नाक कय इन ईरूल: सप्पा पळदागोळ ऊंदा नाप इनव ईरूल.
EXO 26:3 अईद पळदागोळ आबुर दाबुर देल जुळ्सकु ईरूल; अदिक बाक जो अईद पळदागोळ ईत्ताव अव भी आबुर दाबुर देल जुळ्सकु ईरूल.
EXO 26:4 अदिक यल ईव येढ्ढु पळदागोळ जोळ्सकु आगुल अल इन येढ्ढु किनारा मा नीळा नीळा फन्दागोळ हचुसेत.
EXO 26:5 येढ्ढु किनारा दा पचास पचास फन्दागोळ हिंग हचुसेत कि अव आमने-सामने ईरूल.”
EXO 26:6 अदिक व्हान्ना नव पचास आकळागोळ माळसुसेत; अदिक पळदागोळी ईवा आकळागोळ देल हिंग जोळसुसेत कि निवासस्थान मिलुसकु ऊंद आगेगुल.
EXO 26:7 “बाक निवास इन म्याकुच तम्बु उन क्याल्सा कोळोर साटी मर्री इन चुट्टी इन हनुन पळदागोळ माळसुसेत.
EXO 26:8 ऊंद ऊंद पळदा अन लंबाई तीस कय अदिक चौळाई नाक कय इन ईरूल; हनुन इन हनुन पळदागोळ ऊंदा नाप इनव ईरूल.
EXO 26:9 अदिक अईद पळदा अलग अदिक बाक आर पळदागोळ अलग जोळसुसेत, अदिक छटवा पळदा अक तम्बु उन मुंद मुरूकु येढ्ढ माळ बुळेत.
EXO 26:10 अदिक नी पचास आकळागोळ आ पळदागोळ किनारा दा जो व्हार्या टु मिसळुसकु आदीत अदिक पचास अच आकळागोळ दुसरा दिकळोद पळदा अन किनारा दा जो व्हार्या टु मिसळुसकु आदीत माळसुसेत.
EXO 26:11 अदिक पीतळा अन पचास आकळागोळ माळेत, अदिक आकळागोळी फन्दागोळ दा हचकु तम्बु उक हिंग जोळसुसेत कि अव मिलुसकु ऊंद आगेगुल.
EXO 26:12 अदिक तम्बु उन पळदागोळ्द हिलगुसतेला भाग, मतलब जो आर्धा पट ईत्तीत, अद निवास इन हिंदळा भाग दी लटकुस्त ईरूल.
EXO 26:13 अदिक तम्बु उन पळदागोळ्द लंबाई दा टु कय तीम ईत्त, अदिक कय तीम आत्त निवास इन मुच्चोर साटी अदुर्द येढ्ढु दी लटकुस्त ईरूल.”
EXO 26:14 बाक तम्बु उन साटी क्याचांद रंग देल रंगुस्द म्यांडागोळ्द तोगुल इन ऊंद होदोद अदिक अदुर म्याकुच सूइसगोळ तोगुल इन भी ऊंद होदोद माळसुसेत.
EXO 26:15 “बाक निवास इक निदरूसोर साटी बबूल इन हुळ्लीगोळ्द तख्तागोळ माळसुसेत.
EXO 26:16 ऊंद ऊंद तख्ता अन लंबाई हत्त कय अदिक चौळाई दिळ कय इन ईरूल.
EXO 26:17 ऊंद ऊंद तख्ता दा आबुर दाबुर से जोळ्सद येढ्ढ येढ्ढ चूली ईरूल; निवास इन सप्पा तख्तागोळी ईदा प्रकार देल माळसुसेत.
EXO 26:18 निवास इन साटी जो तख्तागोळ नी माळसुस्या अऊर दा टु ईप्पत तख्तागोळ रा दक्षिण दिकळोद साटी ईरूल;
EXO 26:19 अदिक ईप्पत तख्तागोळ ल्यालमा बेळ्ली इन च्यालीस कुर्चीगोळ माळसुसेत, मतलब ऊंद ऊंद तख्तागोळ ल्यालमा अदुर चूलीगोळ साटी येढ्ढ येढ्ढ कुर्चीगोळ.
EXO 26:20 निवास इन दुसरा दी, मतलब उत्तर दिकळोद साटी ईप्पत तख्तागोळ माळसुसेत;
EXO 26:21 अदिक अऊर साटी बेळ्ली इन च्यालीस कुर्चीगोळ माळसुसेत, मतलब ऊंद ऊंद तख्तागोळ ल्यालमा येढ्ढ येढ्ढ कुर्चीगोळ ईरूल.
EXO 26:22 निवास इन हिंदळा भाग दी, मतलब पश्चिम दिकळोद साटी आर तख्तागोळ माळसुसेत.
EXO 26:23 अदिक हिंदळा भाग दा निवास इन क्वानागोळ साटी येढ्ढ तख्तागोळ माळसुसेत;
EXO 26:24 अदिक ईव ल्यालमा टु येढ्ढ येढ्ढ भाग इनव ईरूल, अदिक येढ्ढु भाग म्याकुच इन क्वाना ताका ऊंद ऊंद कळा दा मिलुसकु आगुल; येढ्ढु तख्तागोळ्द ईदा रूप ईरूल; ईद येढ्ढु क्वाना अन साटी ईरूल.”
EXO 26:25 अदिक येठ्ठ तख्तागोळ ईरूल, अदिक अऊर्द बेळ्ली इन सॉळा कुर्चीगोळ ईरूल; मतलब ऊंद ऊंद तख्ता अन ल्यालमा येढ्ढ येढ्ढ कुर्चीगोळ ईरूल.
EXO 26:26 “बाक बबूल इन हुळ्ली इन बेंडागोळ माळसुसेत, मतलब निवास इन ऊंद दिकळोद तख्तागोळ साटी अईद,
EXO 26:27 अदिक निवास इन दुसरा दिकळोद तख्तागोळ साटी अईद बेंडागोळ, अदिक निवास इन जो भाग पश्चिम दी हिंदळा भाग दा ईत्तीत, अदुर साटी अईद बेंडागोळ माळसुसेत.
EXO 26:28 न्याड्यागोळ्द बेंडा जो तख्तागोळ्द न्याड्या दा ईत्तीत अद तम्बु उन ऊंद क्वाना टु दुसरा क्वाना ताका पोहचुसुल.
EXO 26:29 बाक तख्तागोळी व्हान्ना देल मळसुसेत, अदिक अऊर्द कळागोळ जो बेंडागोळ्द मान्नोद क्याल्सा कोट्टाव अवरी भी व्हान्ना देल माळसुसेत; अदिक बेंडागोळी भी व्हान्ना देल मळसुसेत.
EXO 26:30 अदिक निवास इक ईदा रिति देल निदरूसेत ह्यांग ई पहाळ मा नीनी तोर्सकु आग्याद.”
EXO 26:31 “बाक नीळा, जांभळा अदिक क्याचांद रंग इन अदिक महीन मलमल इन ऊंद न्याड्यागोळ्द पळदा माळसुसेत; यदुर मा कुशल कारीगर उन द्वारा करूब कढ़ाई माळकु आगुल.
EXO 26:32 अदिक अदरी व्हान्ना देल मळुस्द बबूल इन नाक खम्भागोळ मा हिलगुसेत, ईऊर्द आकळागोळ व्हान्ना नव ईरूल, अदिक ईव बेळ्ली इन नाक कुर्चीगोळ मा निदुरकु ईरूल.
EXO 26:33 अदिक न्याड्यागोळ्द पळदा अक आकळागोळ्द ल्यालमा हिलगुसकु, अदुर आळ दा गवाही इन चिट्टी इन सन्दुक अंदर तरेत, ई प्रकार अद न्याड्यागोळ्द पळदा नीम साटी पवित्रस्थान इक परम पवित्रस्थान दा ब्यार्र माळकु ईरूल.
EXO 26:34 बाक परम पवित्रस्थान दा गवाही इन चिट्टी इन सन्दुक उन म्याकुच प्रायश्चित इन झाकनी इक ईटेत.
EXO 26:35 अदिक आ पळदा अन व्हार्या निवास इन उत्तर दी मेज ईटेत; अदिक दक्षिण दी मेज इन मुंद दीवट ईटेत.
EXO 26:36 बाक तम्बु उन दरवाजा अन साटी नीळा, जांभळा अदिक क्याचांद रंग इन अदिक महीन मलमल सुक्ष्म सनी इन कपळा अन कढ़ाई इन क्याल्सा माळ्द ऊंद पळदा माळसुसेत.
EXO 26:37 अदिक ई पळदा अन साटी बबूल इन अईद खम्भागोळ माळसुसेत, अदिक अवरी व्हान्ना देल मळसुसेत; अऊर कळागोळ व्हान्ना नव ईरूल, अदिक अऊर साटी पीतळा अन अईद कुर्चीगोळ ढाल्सकु माळसुसेत.”
EXO 27:1 “बाक वेदी इक बबूल इन हुळ्ली इन, अईद कय ऊद्द अदिक अईद कय चौळा माळसुसेत; वेदी चौकोन ईरूल, अदिक अदुर्द ऊचाई मुर कय इन ईरूल.
EXO 27:2 अदिक अदुर्द नाकु क्वाना मा नाक सींग माळसुसेत; अव अदुर समेत ऊंदा तुकळा नव ईरूल, अदिक अदरी पीतळा देल मळसुसेत.
EXO 27:3 अदिक अदुर राखळ नेगोद पात्र, अदिक पावळागोळ, अदिक कटोरागोळ, अदिक काटागोळ, अदिक अंगीठीगोळ माळसुसेत; अदुर सप्पा सामान पीतळा अन माळसुसेत.
EXO 27:4 अदुर साटी पीतळा अन जाली इन ऊंद पेटी माळसुसेत; अदिक अदुर नाकु क्वाना दा पीतळा अन नाक कळागोळ हचुसेत.
EXO 27:5 अदिक आ पेटी इक वेदी इन नाकु दिकळोद कंगनी इन ल्यालमा हिंग हचुसेत कि अद वेदी इन ऊचाई इन मध्य ताका पोहचुसुल.
EXO 27:6 अदिक वेदी इन साटी बबूल इन हुळ्ली इन कोलगोळ माळसुसेत, अदिक अवरी पीतळ देल मळसुसेत.
EXO 27:7 अदिक कोलगोळ कळागोळ दा हाक्‍कु आगुल कि याग याग वेदी नेगुकु आगुल आग अव अदुर येढ्ढु किनारा मा ईरूल.
EXO 27:8 वेदी इक तखतगोळ से पोकर माळसुसेत; ह्यांग अव ई पहाळ मा नीनी तोर्सकु आग्याद हांगा माळकु आगुल.”
EXO 27:9 “बाक निवास इन आंगुळ इक माळसुसेत. अदुर दक्षिण इन दिकळोद साटी महीन मलमल सूक्ष्म सनी इन कपळा अन पळदागोळ ईरूल, अदुर लंबाई सौ कय इन ईरूल; ऊंद किनारा मा ईटा ईरूल.
EXO 27:10 अदिक अऊर साटी ईप्पत खम्भागोळ बनसुल, अदिक ईऊर साटी पीतळा अन ईप्पत कुर्चीगोळ बनसुल, अदिक खम्बागोळ्द कुन्डागोळ अदिक अऊर्द पट्टीगोळ बेळ्ली नव ईरूल.
EXO 27:11 अदिक अदा प्रकार देल आंगुळ इन उत्तर दिकळोद लंबाई दा भी सौ कय ऊद्द पळदागोळ ईरूल, अदिक अऊर साटी भी ईप्पत खम्भागोळ अदिक ईऊर साटी भी पीतळा अन ईप्पत खानागोळ ईरूल; अदिक आ खम्बागोळ्द कुन्डागोळ अदिक पट्टीगोळ बेळ्ली नव ईरूल.
EXO 27:12 बाक आंगुळ इन चौळाई दा पश्चिम दी पचास कय इन पळदागोळ ईरूल, अऊर साटी खम्भागोळ हत्त अदिक खानागोळ भी हत्त ईरूल.
EXO 27:13 पूर्व दी आंगुळ इन चौळाई पचास कय इन ईरूल.
EXO 27:14 आंगुळ इन दरवाजा अन ऊंद दी पंदरा कय इन पळदागोळ ईरूल, अदिक अऊर साटी खम्भागोळ मुर अदिक खानागोळ मुर ईरूल;
EXO 27:15 अदिक दुसरा दी भी पंदरा कय इन पळदागोळ ईरूल, अऊर साटी भी खम्भागोळ मुर अदिक खानागोळ मुर ईरूल.
EXO 27:16 आंगुळ इन दरवाजा अन साटी ऊंद पळदा माळसुसेत, जो नीळा, जांभळा अदिक क्याचांद रंग इन कपळा अदिक महीन मलमल सूक्ष्म सनी इन कपळा अन कामदार बन्सकु ईप्पत कय इन ईरूल, अदुर साटी खम्भागोळ नाक अदिक खानागोळ भी नाक ईरूल.
EXO 27:17 आंगुळ इन नाकु दिकळव सप्पा खम्भागोळ बेळ्ली इन पट्टीगोळ देल जुळ्सकु ईरूल, अऊर कुन्डागोळ बेळ्ली नव अदिक खानागोळ पीतळा नव ईरूल.
EXO 27:18 आंगुळ इन लंबाई सौ कय इन, अदिक अदुर चौळाई पचास कय इन, अदिक अदुर पळदा अन ऊचाई अईद कय इन ईरूल, अदिक अद महीन मलमल सूक्ष्म सनी इन कपळा अन बनसुल, अदिक खम्बागोळ्द खानागोळ पीतळा नव ईरूल.
EXO 27:19 निवासस्थान इन अलग अलग प्रकार इन बर्तन अदिक सप्पा सामान अदिक अदुर सप्पा खुटागोळ अदिक आंगुळ इनव भी सप्पा खुटागोळ पीतळा नव अच ईरूल.”
EXO 27:20 बाक नी इस्त्राएलीगोळी आग्या कोळेत, कि नान हात्ती दीवट इन साटी कुट्सकु तेग्द जैतून इन निर्मल याण्णा तरेतीर, यदुर देल दिंग्या हमेशा होततेला ईरूल.
EXO 27:21 मिलाप इन तम्बु दा, आ न्याड्यावाळा पळदा देल व्हार्या जो गवाही इन चिट्टी इन मुंद आदीत, हारून अदिक आऊन पारगोळ दीवट द्यावमुळका टु व्हातुर ताका यहोवा अन मुंद सजुसकु ईटुल. ईद विधि इस्त्राएलीगोळ्द पीढ़ीगोळ साटी हमेशा बन्सकु ईत्तीत.
EXO 28:1 “बाक नी इस्त्राएलीगोळ दा टु तान वार्ट हारून, अदिक नादाब, अबीहू, एलीआजर अदिक ईतामार हेसुर इनोर आऊन पारगोळी तान हात्ती तरेत कि आंदुर नान साटी याजक उन क्याल्सा माळुल.
EXO 28:2 अदिक नी तान वार्ट हारून उन साटी वैभव अदिक शोभा अन निमित्त पवित्र कपळा माळसुसेत.
EXO 28:3 अदिक यास मुंदुर्द मन दा बुद्धि आद, यारी ना बुद्धि कोळावाळा आत्मा देल परिपुर्ण माळीन, आंदरी नी हारून उन कपळा माळोद आग्या कोळ कि आंदुर नान निमित्त याजक उन क्याल्सा माळोर साटी पवित्र बनसुल.
EXO 28:4 जो कपळा आंदरी माळव बिद्दाव अव ईव हुव, मतलब छातीबन्द, अदिक एपोद, अदिक बागा, नाक खाना अन अंगरखा, पगळी अदिक कमरबन्द; ईवा पवित्र कपळा नीन वार्ट हारून अदिक आऊन पारगोळ साटी माळकु आगुल कि आंदुर नान साटी याजक उन क्याल्सा माळुल.
EXO 28:5 अदिक आंदुर व्हान्ना अदिक नीळा अदिक जांभळा अदिक क्याचांद रंग इन अदिक सूक्ष्म सन इन कपळा हुडुल.”
EXO 28:6 “आंदुर एपोद उक व्हान्ना अदिक नीळा, जांभळा अदिक क्याचांद रंग इन कपळा अन अदिक महीन मलमल सूक्ष्म सनी इन कपळा तयार माळुल, जो निपुण कढ़ाई इन क्याल्सा माळावाळा अन कय इन क्याल्सा ईरूल.
EXO 28:7 अद ईत्ता प्रकार देल जोळ्सकु आगुल कि अऊर येढ्ढु बाक्का अन क्वानागोळ आपस दा मिलुसकु ईरूल.
EXO 28:8 अदिक एपोद मा जो कढ़ुक्द पट्टी ईत्तीत अदुर बनावट अदुर्दा घाई ईरूल, अदिक अव येढ्ढु बिना जोळ इन ईरूल, अदिक व्हान्ना अदिक नीळा, जांभळा अदिक क्याचांद रंग इन अदिक महीन मलमल सूक्ष्म सनी इन कपळा अन ईरूल.
EXO 28:9 बाक येढ्ढ सुलैमानी मणि हुडुकु अऊर मा इस्त्राएल इन पारगोळ हेसुर अग्ळुसेत,
EXO 28:10 आंदुर हेसुरगोळ दा टु आर ऊंद मणि मा अदिक मिग्द आर हेसुर दुसरा मणि मा, इस्त्राएल इन पारगोळ्द उत्पत्ति इन अनुसार अग्ळुसेत.
EXO 28:11 ह्यांग जौहरी मुद्रा मा नक्काशी माळतान हांग अच नी भी येढ्ढ मणिगोळी इस्त्राएल इन पारगोळ्द हेसुर इन अनुसार अग्ळुसेत अदिक अवरी व्हान्ना अन खानगोळ दा जळुस बुळेत.
EXO 28:12 अदिक येढ्ढु मणिगोळी एपोद इन बाक्कागोळ मा हचुसेत,अव इस्त्राएलीगोळ्द याद तोरसुसावाळा मणि ठहरूस्याव; मतलब हारून आंदुर हेसुर यहोवा अन मुंद तान येढ्ढु बाक्कागोळ मा याद साटी हचकु ईरूल.
EXO 28:13 “बाक व्हान्ना नव खानागोळ माळसुसेत,
EXO 28:14 अदिक डोरीगोळ घाई गुथुस्द येढ्ढ जंजीर शुद्ध व्हान्ना अन माळसुसेत; अदिक गुथुस्द जंजीरगोळी आ खानागोळ दा जळुसेत.”
EXO 28:15 बाक न्याय इन चपरास इक भी कढ़ाई इन क्याल्सा अन माळसुसेत, एपोद इन घाई व्हान्ना, अदिक नीळा, जांभळा अदिक क्याचांद रंग इन अदिक महीन मलमल सूक्ष्म सनी इन कपळा अन अदरी माळसुसेत.
EXO 28:16 अद चौकोन अदिक दोहरी ईरूल, अदिक अदुर लंबाई अदिक चौळाई ऊंद ऊंद बित्ता अन ईरूल.
EXO 28:17 अदिक अदुर दा नाक पंग्ति मणि जळुसेत. पयला पंग्ति दा रा माणिक्य, पुखराज अदिक पन्ना ईरूल;
EXO 28:18 दुसरा पंग्ति दा मरकत, नीलमणि अदिक हीरा:
EXO 28:19 तिसरा पंग्ति दा लशम, सुर्यकांत अदिक नीलम;
EXO 28:20 अदिक चौथा पंग्ति दा फिरोजा, सुलैमानी मणी अदिक यशब ईरूल; ईव सप्पा व्हान्ना अन खान दा जळुसकु आगुल.
EXO 28:21 अदिक इस्त्राएल इन पारगोळ्द यास हेसुर आव आस मणि ईरूल, मतलब मतलब अदुर्द हेसुरगोळ्द गिनती इन अनुसार ह्न्नेळ हेसुर अगळुल, हन्नेळ गोत्र दा टु ऊंद ऊंद उन हेसुर ऊंद ऊंद मणि मा हिंग अगळुल ह्यांग मोहर इन नक्काशी अगुळकु आगतद.
EXO 28:22 बाक चपरास मा डोरीगोळ घाई गुथुस्द शुद्ध व्हान्ना अन जंजीर हचुसेत;
EXO 28:23 अदिक चपरास दा व्हान्ना अन येढ्ढ कळीगोळ हचुसेत, अदिक येढ्ढु कळीगोळी चपरास इन येढ्ढु क्वाना मा हचुसेत.
EXO 28:24 अदिक व्हान्ना नव येढ्ढु जंजीरगोळी आ येढ्ढु कळीगोळ दा जो चपरास इन क्वानागोळ मा ईत्ताव हचुसेत;
EXO 28:25 अदिक गुथुस्द येढ्ढु जंजीरगोळ्द येढ्ढु मिग्द क्वानागोळी येढ्ढु खानागोळ दा जळुसकु एपोद इन येढ्ढु बाक्कागोळ्द बंधनगोळ मा अदुर मुंद हचुसेत.
EXO 28:26 बाक व्हान्ना नव मात्त येढ्ढ कळीगोळ माळसुसकु चपरास इन येढ्ढु क्वाना मा, अदुर आ कोर मा जो एपोद इन बुळ्क दी ईत्तीत हचुसेत.
EXO 28:27 बाक अऊर अलावा व्हान्ना नव मात्त येढ्ढ कळीगोळ माळसुसकु एपोद इन येढ्ढु बाक्कागोळ्द बंधनगोळ मा, ल्यालमा टु अदुर मुंद अदिक अदुर जोळ इन हात्ती एपोद इन कढ़ाई माळ्द पट्टा अन म्याकुच हचुसेत.
EXO 28:28 अदिक चपरास तान कळीगोळ द्वारा एपोद इन कळीगोळ दा नीळा जाळी देल कटसुसकु आगुल, ई रिति देल अद एपोद इन कढ़ाई माळ्द पट्टा मा बन्सकु ईरूल, अदिक चपरास एपोद मा टु अलग आगबाळुल.
EXO 28:29 याग याग हारून पवित्रस्थान दा प्रवेश माळुल, आग आग आव न्याय इन चपरास मा तान दिल इन म्याकुच इस्त्राएलीगोळ्द हेसुरगोळी हचकु ईरूल, यदुर देल यहोवा अन मुंद आंदुर याद हमेशा ईरूल.
EXO 28:30 अदिक नी न्याय इन चपरास दा ऊरीम अदिक तुम्मीम इक ईटेत, अदिक याग याग हारून यहोवा अन मुंद बरूल, आग आग अव आऊन दिल इन म्याकुच ईरूल, ई प्रकार देल हारून इस्त्राएलीगोळ साटी यहोवा अन न्याय इक तान दिल इन म्याकुच हमेशा हचकु ईरूल.
EXO 28:31 “बाक एपोद उन बागा अक पुरा नीळा रंग इन माळसुसेत.
EXO 28:32 अदुर बनावट हिंग ईरूल कि अदुर न्याड्या दा ताल्ला हाक्‍कोर साटी ख्वादरा ईरूल, अदिक आ ख्वादरा अन नाकु दी बख्तर इन ख्वादरा अन घाई ऊंद बुनुस्द कोर ईरूल कि अद हरूतीदील.
EXO 28:33 अदुर्द ल्यालमागोळ्द घ्यारा दा नाकु दी नीळा, जांभळा अदिक क्याचांद रंग इन कपळा अन अनार माळसुसेत, अदिक अदुर न्याड्या न्याड्या नाकु दी व्हान्ना अन घंटीगोळ हचुसेत,
EXO 28:34 मतलब ऊंद व्हान्ना अन घंटी अदिक ऊंद अनार, बाक मात्‍त ऊंद व्हान्ना अन घंटी अदिक ऊंद अनार, ईदा प्रकार देल बागा अन ल्यालमागोळ्द घ्यारा दा नाकु दी हिंग अच ईरूल.
EXO 28:35 अदिक हारून आ बागा अक स्यावा टहल माळाहोती हाकुल, कि याग याग आव पवित्रस्थान इन बुळ्क यहोवा अन मुंद होगुल या व्हार्या होळुल, आग आग अदुर्द आवाज केळ बरूल, ईलारा आव सोतोदान.”
EXO 28:36 “बाक शुद्ध व्हान्ना अन ऊंद पट्टी माळसुसेत, अदिक ह्यांग छापा दा हांगा अदुर दा अक्षर अगुळकु आगुल, मतलब ‘यहोवा अन साटी पवित्र.’
EXO 28:37 अदिक अदरी नीळा फिता देल कटेत; अदिक अद पगळी इन मुंदळोद हिस्सा मा ईरूल.
EXO 28:38 अद हारून उन माथा मा ईरूल, इदुरसाटी कि इस्त्राएली जो येनारा पवित्र ठहरूसुल, मतलब यास पवित्र वस्तुगोळ भेंट दा येर्सुल आ पवित्र वस्तुगोळ्द दोष हारून नेगुतेला ईरूल, अदिक अद हमेशा आऊन माथा मा ईरूल, यदुर देल यहोवा आंदुर से खुश ईरूल.”
EXO 28:39 अंगरखा अक सूक्ष्म सनी इन कपळा अन नाक खानावाळा माळसुसेत, अदिक ऊंद पगळी भी सूक्ष्म सन इन कपळा अन माळसुसेत, अदिक बेलबुटा अन कढ़ाई इन क्याल्सा माळ्द ऊंद कमरबन्द भी माळसुसेत.
EXO 28:40 “बाक हारून उन पारगोळ साटी भी अंगरखागोळ अदिक कमरबन्द अदिक टोपीगोळ माळसुसेत; ई कपळागोळ भी वैभव अदिक शोभा अन साटी माळकु आगुल.
EXO 28:41 तान वार्ट हारून अदिक आऊन पारगोळी ईवा कपळागोळ हाकसुसकु आंदुर अभिषेक अदिक संस्कार माळेत, अदिक आंदरी पवित्र माळेत कि आंदुर नान साटी याजक उन क्याल्सा माळुल.
EXO 28:42 अदिक आंदुर साटी सन इन कपळा अन जंग्यागोळ माळसुसेत यदुर देल आंदुर मय झाक्सकु ईरूल, अव नेळु टु रा जांग ताका अच ईरूल;
EXO 28:43 अदिक याग याग हारून या आऊन पारगोळ मिलाप इन तम्बु दा प्रवेश माळुल, या पवित्र स्थान दा स्यावा टहल माळली वेदी इन हात्‍ती होगुल, आग आग आंदुर आ जंग्यागोळी हाक्‍कु ईरूल, ईलारा हिंग आगबाळुल कि आंदुर पापी ठहरूसुल अदिक सोतोगुल. ईद हारून उन साटी अदिक आऊन बाद्दा आऊन वंश इन साटी भी हमेशा अन विधी ठहरूसुल.”
EXO 29:1 “आंदरी पवित्र माळली जो क्याल्सा नानी आंदुर सांगुळ माळोद आद कि आंदुर नान साटी याजक इन क्याल्सा माळुल, अद ईद हुन: ऊंद निर्दोष पाड्डा अदिक येढ्ढ निर्दोष म्यांडागोळ हुडेत,
EXO 29:2 अदिक अखमीरी रोट्टी, अदिक याण्णा देल मुळकुळ्सद मैदा नव अखमीरी फुलकागोळ, अदिक याण्णा देल चुपळुस्द अखमीरी पापळगोळ भी हुडेत. ईव सप्पा गोदी नव मैदा नव माळसुसेत.
EXO 29:3 ईवरी ऊंद फुट्टी दा ईटकु आ फुट्टी इक आ पाड्डा अदिक आ येढ्ढु म्यांडागोळ समेत हात्ती तरेत.
EXO 29:4 बाक हारून अदिक आऊन पारगोळी मिलाप इन तम्बु उन दरवाजा अन हात्ती तंदकु नीर देल मय तोळसुसेत.
EXO 29:5 आग आ फळक्यागोळी हुडुकु हारून उक अंगरखा अदिक एपोद इन बागा हाकसुसेत,अदिक एपोद अदिक चपरास कटेत, अदिक एपोद इन घळुस्द पट्टा भी कटेत;
EXO 29:6 अदिक आऊन ताल्ला मा पगळी इक ईटेत, अदिक पगळी मा पवित्र मुकुट इक ईटेत.
EXO 29:7 आग शुद्ध याण्णा हुडुकु आऊन ताल्ला मा हाक्कु आऊक निवळुसेतीर.
EXO 29:8 बाक आऊन पारगोळी हात्ती तनकु आंदरी अंगरखा हाकसुसेत,
EXO 29:9 अदिक आंदुर मतलब हारून अदिक आऊन पारगोळ्द नेळु कटेत अदिक आंदुर ताल्ला मा टोपीगोळ ईटेत; यदुर देल याजक इन पद मा हमेशा आंदुर हक्क ईरूल. ई प्रकार हारून अदिक आऊन पारगोळ्द संस्कार माळेत.”
EXO 29:10 “आग पाड्डा अक मिलाप इन तम्बु उन मुंद तरेत. हारून अदिक आऊन पारगोळ पाड्डा अन ताल्ला मा तान तान कय ईटुल,
EXO 29:11 आग आ पाड्डा अक यहोवा अन हात्ती मिलाप इन तम्बु उन दरवाजा मा बलि येर्सेत,
EXO 29:12 अदिक पाड्डा अन रक्ता दा टु थ्वाळासा ताकोमकु तान बेळ्ल देल वेदी इन सींगगोळ मा हचेत, अदिक मिग्द सप्पा रक्ता अक वेदी इन पाया मा रीचुस बुळेत,
EXO 29:13 अदिक याता चरबी देल अतळीगोळ होचकु ईरताव, अदिक जो झिल्ली ईरग्या अन म्याकुच ईरतद, अवरी अदिक येढ्ढु गुर्दागोळी अऊर म्याकळोद चरबी समेत हुडुकु सप्पा अक वेदी मा होताकेत.
EXO 29:14 लेकीन पाड्डा अन मास, अदिक तोगुल, अदिक शेंगणी, छपर्या दा टु व्हार्या बेक्‍की दा होताक बुळेत; यतिकी ईद पापबली ईत्तीत.”
EXO 29:15 “बाक ऊंद म्यांडा हुडेत, अदिक हारून अदिक आऊन पारगोळ अदुर्द ताल्ला मा तान तान कय ईटुल,
EXO 29:16 आग आ म्यांडा अक बलि येर्सेत, अदिक अदुर्द रक्ता हुडुकु वेदी मा नाकु दी सिप्सेत.
EXO 29:17 आग आ म्यांडा अक तुकळा तुकळा दा कडेत, अदिक अदुर्द पासळीगोळ अदिक कालगोळी तोळुकु अदुर्द तुकळा अदिक ताल्ला अन म्याकुच ईटेत,
EXO 29:18 अदिक आ पुरा म्यांडा अक वेदी मा होताकेत; अद रा यहोवा अन साटी होमबली आदीत; अद सुखदायक सुगन्ध अदिक यहोवा अन साटी हवन आदीत.”
EXO 29:19 बाक दुसरा म्यांडा अक हुडेत; अदिक हारून अदिक आऊन पारगोळ अदुर्द ताल्ला मा तान तान कय ईटुल,
EXO 29:20 आग आ म्यांडा अक बलि येर्सेत, अदिक अदुर्द रक्ता दा टु थ्वाळासा हुडुकु हारून अदिक आऊन पारगोळ्द ऊजवा कीव इन म्याकुच, अदिक आंदुर्द ऊजवा कय अदिक ऊजवा काल इन धोळ्द बेळ्ल मा हचेत, अदिक रक्ता अक वेदी मा नाकु दी सिप्स बुळेत.
EXO 29:21 बाक वेदी माकळोद रक्ता अदिक अभिषेक इन याण्णा, ई येढ्ढु दा टु थ्वाळा थ्वाळा हुडुकु हारून अदिक आऊन पारगोळ, अदिक आंदुर्द कपळागोळ मा भी सिप्स बुळेत; आग आव अदिक आऊन पारगोळ भी, तान तान कपळागोळ समेत पवित्र आगेदार.
EXO 29:22 आग म्यांडा अक संस्कार इन जान्सकु अदुर दा टु चरबी अदिक मोटा पुछी इक, अदिक याता चरबी देल पासळीगोळ होचकु ईरताव अदरी, अदिक कलेजा माकळोद झिल्ली इक, अदिक चरबी समेत येढ्ढु गुर्दागोळी, अदिक ऊजवा जांघ इक हुडेत,
EXO 29:23 अदिक अखमीरी रोट्टी इन फुट्टी जो यहोवा अन मुंद ईटकु ईत्तीत अदुर दा टु भी ऊंद रोट्टी, अदिक याण्णा देल मुच्द मैदा अन ऊंद फुलका, अदिक ऊंद पापळ हुडुकु,
EXO 29:24 ई सप्पा अक हारून अदिक आऊन पारगोळ्द कयगोळ दा ईटकु आलगाळ्सकु आगोद भेंट ठहरूसकु यहोवा अन मुंद आलगाळ्सकु आगुल.
EXO 29:25 आग आ वस्तुगोळी आंदुर कयगोळ दा टु हुडुकु होमबली इन वेदी मा होताक बुळेत, यदुर देल अद यहोवा अन मुंद सुखदायक सुगन्ध ठहरूसुल; अद यहोवा अन साटी हवन आदीत.
EXO 29:26 बाक हारून इन संस्कार इन जो म्यांडा ईत्तीत अदुर्द याद्दा अक हुडुकु आलगाळ्सकु आगोद भेंट इन साटी यहोवा अन मुंद आलगाळ्सेत; अदिक अद नीन भाग ठहरूसीत.
EXO 29:27 अदिक हारून अदिक आऊन पारगोळ्द संस्कार इन जो म्यांडा ईत्तीत, अदुर दा टु आलगाळ्सकु आगोद भेंट इन याद्दा जो आलगाळ्सकु आदीत, अदिक नेगुकु आगोद भेंट इन जांघ जो नेगुकु आदीत, ई येढ्ढु उक पवित्र ठहरूसेत.
EXO 29:28 अदिक ईद हमेशा अन विधि इन रिति मा इस्त्राएलीगोळ्द दी टु आऊन अदिक आऊन पारगोळ्द भाग ठहरूसुल यतिकी ईव नेगुकु आगोद भेटगोळ ठहरूस्याव; अदिक ईद इस्त्राएलीगोळ्द दी टु आंदुर्द मेलबलीगोळ दा टु यहोवा अन साटी नेगुकु आगोद भेंट ईत्तीत.
EXO 29:29 “हारून नव जो पवित्र कपळा ईत्ताव अव आऊन बाद्दा आऊन पारगोळ नातुगोळी सिकतेला ईरूल, यदुर देल अवरी का हाकतेला आंदुर अभिषेक अदिक संस्कार माळकु आगुल.
EXO 29:30 आऊन पारगोळ दा टु जो आऊन जागा मा याजक आदान, आव याग पवित्रस्थान दा स्यावा टहल माळली मिलाप इन तम्बु दा पयले बरूल, आग आ कपळागोळी येळ दिन ताका हाक्कु ईरूल.”
EXO 29:31 “बाक याजक इन संस्कार इन जो म्यांडा ईत्तीत अदरी हुडुकु अदुर मास यातारा पवित्रस्थान दा बेईसेतीर;
EXO 29:32 आग हारून तान पारगोळ समेत आ म्यांडा अन मास अदिक फुट्टी इन रोट्टी, येढ्ढु उक मिलाप इन तम्बु उन दरवाजा मा तिनुल.
EXO 29:33 याता पदार्थ देल आंदुर संस्कार अदिक आंदरी पवित्र माळोर‍ साटी प्रायश्चित माळकु आदीत अवरी रा आंदुर तिनुल, लेकीन पराया कुल इन यावारा अवरी तिनबाळुल, यतिकी अव पवित्र ईत्ताव.
EXO 29:34 अगर संस्कार इन मास या रोट्टी दा टु थ्‍वाळासा व्हातुर ताका मिक्‍कु ईरूल, रा आ मिग्द मास या रोट्टी इक बेक्‍की दा होताकेतीर, अद तिनकु आगबाळुल; यतिकी अद पवित्र ईत्तीत.”
EXO 29:35 “ना नीनी जो जो आग्या कोटीन; आ सप्पा अन अनुसार नी हारून अदिक आऊन पारगोळ से माळेत; अदिक येळ दिन ताका आंदुर संस्कार माळतेला ईरेत,
EXO 29:36 मतलब पापबली इन ऊंद पाड्डा प्रायश्चित इन साटी हर रोज येर्सेत. वेदी इक भी प्रायश्चित माळा घनी शुद्ध माळेत, अदिक अदरी पवित्र माळोर साटी आंदुर अभिषेक माळेत.
EXO 29:37 येळ दिन ताका वेदी इन साटी प्रायश्चित माळकु अदरी पवित्र माळेत, अदिक वेदी परमपवित्र ठहरूसीत; अदिक जो येनारा अदुर से मुटकु आदीत अद भी पवित्र आगेदीत.”
EXO 29:38 “जो वेदी मा हमेशा येर्सव बिद्दाव अव ईव हुव: हर रोज ऊंद ऊंद साल इनव येढ्ढ भेड़ इन पाड्डागोळ.
EXO 29:39 ऊंद भेड़ इन पाड्डा अक रा हुंजकुका, अदिक दुसरा भेड़ इन पाड्डा अक द्यावमुळका होती येर्सेत;
EXO 29:40 अदिक पयला भेड़ इन पाड्डा अन सांगुळ हीन इन चौथाई कुटकागोळ होळ्द याण्णा देल मुच्द एपा अन दसवा भाग मैदा, अदिक अर्घ इन साटी हीन इन चौथाई अंगुर इन रास्सा कोळेत.
EXO 29:41 अदिक दुसरा भेड़ इन पाड्डा अक द्यावमुळका अन होती येर्सेत, अदिक अदुर सांगुळ हुंजकुका अन रिति इन अनुसार अन्नबलि अदिक अर्घ येढ्ढु कोळेत, यदुर देल अद सुखदायक सुगन्ध अदिक यहोवा अन साटी हवन ठहरूसुल.
EXO 29:42 नीम पीढ़ो अन पीढ़ी दा यहोवा अन मुंद मिलाप इन तम्बु उन दरवाजा मा नित्य हिंगा होमबली आग्त ईरूल; ईद अद जागा हुन यदुर दा ना नीम लॉकुर से इदुरसाटी सिकतोगाईन कि नीन से मातगोळ माळाईन.
EXO 29:43 ना इस्त्राएलीगोळ से अल्या सिकतोगाईन अदिक अद तम्बु नान तेज देल पवित्र माळकु आदीत;
EXO 29:44 अदिक ना मिलाप इन तम्बु अदिक वेदी इक पवित्र माळाईन, अदिक हारून अदिक आऊन पारगोळी भी पवित्र माळाईन कि आंदुर नान साटी याजक उन क्याल्सा माळुल.
EXO 29:45 अदिक ना इस्त्राएलीगोळ न्याड्या निवास माळाईन, अदिक आंदुर परमेश्वर ठहरूसाईन.”
EXO 29:46 आग आंदुर अर्त कोंडार कि ना यहोवा आंदुर परमेश्वर हुईन, जो आंदरी मिस्त्र द्याश दा टु तेगुकु तंदीन कि आंदुर न्याड्या निवास माळाईन; ना अच आंदुर परमेश्वर यहोवा हुईन.
EXO 30:1 “बाक धूप होताकोर साटी बबूल इन हुळ्ली इन वेदी बनुसेत.
EXO 30:2 अदुर लम्बाई ऊंद कय अदिक चौळाई ऊंद कय इन ईरूल, अद चौकोन ईरूल, अदिक अदुर ऊचाई येढ्ढ कय इन ईरूल, अदिक अदुर सींग अदुर्दा तुकळागोळ देल बन्सकु आगुल.
EXO 30:3 अदिक वेदी इन म्याकळव पल्लागोळ अदिक नाकु दीकळव बाजुगोळ अदिक सींगगोळी शुद्ध व्हान्ना देल मळुसेत, अदिक इदुर नाकु दी व्हान्ना अन ऊंद बाळ बनुसेत.
EXO 30:4 अदिक इदुर बाळ इन ल्यालमा इदुर आमने सामने अन येढ्ढु पल्लागोळ मा व्हान्ना अन येढ्ढ येढ्ढ कळागोळ बन्सकु इदुर येढ्ढु दी हचेत, अव इदुर्द नेगव डंडागोळ खानागोळ्द क्याल्सा कोट्टाव.
EXO 30:5 डंडागोळी बबूल इन हुळ्ली इन बन्सकु अवरी व्हान्ना देल मळुसेत.
EXO 30:6 अदिक नी अदरी आ पळदा अन मुंद ईटेत जो गवाही इन चिट्टी इन सन्दुक इन मुंद आद, मतलब प्रायश्चित इन झाकनी इन मुंद जो गवाही इन चिट्टी इन म्याकुच आद, अल्या ना नीन से मुलाकात माळतोगाईन.
EXO 30:7 अदिक अदा वेदी मा हारून सुगन्धित धूप होताकुल; हर रोज हुंजकुका याग आव दिंग्या अक ठीक माळुल आग आव धूप होताकुल,
EXO 30:8 अदिक द्यावमुळका अन होती याग हारून दिंग्यागोळी होताकुल आग धूप होताकतेला ईरूल, ईद धूप यहोवा अन मुंद नीम पीढ़ोन पीढ़ी दा नित्य होताक्कु आगुल.
EXO 30:9 आ वेदी मा नीव यातोदारा दुसरा प्रकार इन धूप होताक बाळेतीर, अदिक ना अदुर मा होमबली अदिक ना अन्नबलि येर्सेतीर; अदिक ना अदुर मा अर्घ कोळेतीर.
EXO 30:10 हारून साल दा ऊंद घन इदुर सींगगोळ मा प्रायश्चित माळुल; अदिक नीम पीढ़ोन पीढ़ी दा साल दा ऊंद घन प्रायश्चित इन पापबली इन रक्ता देल इदुर मा प्रायश्चित माळकु आगुल; ईद यहोवा अन साटी परमपवित्र आद.”
EXO 30:11 आग यहोवा मूसा से अंदुन,
EXO 30:12 “याग नी इस्त्राएलीगोळ्द गिनती ताकोमली हत्या, आग आळा होती यार्द गिनती आगीदाद आंदुर तान तान जीवा अन साटी यहोवा अक प्रायश्चित इन शुल्क कोळुल, यदुर देल याग नी आंदुर गिनती माळतेला ईत्या आ समय यातोदारा विपत्ति आंदुर मा बंदकु बिळबाळुल.
EXO 30:13 यास लॉकुर आळ्दकु आदार आंदुर पवित्रस्थान इन शेकेल इन अनुसार आर्धा शेकेल कोळुल ईद शेकेल ईप्पत गेरा अन ईरतद, यहोवा अन भेंट आर्धा शेकेल ईरूल.
EXO 30:14 ईप्पत साल या अदुर से यक्कुल अवस्था नोर यास आळ्दकु आगुल आंदुर दा टु ऊंद ऊंद मंळसा यहोवा अक शुल्क कोळुल.
EXO 30:15 याग नीम जीवा अन प्रायश्चित इन निमित्त यहोवा अन भेंट अर्पित माळकु आगुल, आग ना रा अमिर लॉकुर आर्धा शेकेल से यक्कुल कोळुल; अदिक ना गरीब लॉकुर अदुर से गोर्त कोळुल.
EXO 30:16 अदिक नी इस्त्राएलीगोळ से प्रायश्चित इन रूपये ताकोमकु मिलाप इन तम्बु उन क्याल्सा दा हचेत; यदुर देल अद यहोवा अन मुंद इस्त्राएलीगोळ्द स्मरणार्थ चिन्ह ठहरूसुल, अदिक आंदुर जीवगोळ्द प्रायश्चित भी आगुल.”
EXO 30:17 यहोवा मूसा से अंदुन,
EXO 30:18 “तोळोर साटी पीतळा अन ऊंद हौदी, अदिक अदुर पाया भी पीतळा अन बनुसेत. अदरी मिलाप इन तम्बु अदिक वेदी इन न्याड्या दा ईटकु अदुर दा नीर तुम बुळेत;
EXO 30:19 अदिक अदुर दा हारून अदिक आऊन पारगोळ तान तान कय काल तोळु तोगुल.
EXO 30:20 याग याग आंदुर मिलाप इन तम्बु दा प्रवेश माळुल आग आग आंदुर कय काल नीर देल तोळुल, ईलारा सोतोदार; अदिक याग याग आंदुर वेदी इन हात्ती स्यावा टहल माळली, मतलब यहोवा अन साटी हवन होताकली बरूल आग आग आंदुर कय काल तोळुल, हिंग आगबाळुल कि आंदुर सोतोगुल.
EXO 30:21 ईद हारून अदिक आऊन पीढ़ोन पीढ़ी इन वंश इन साटी हमेशा अन विधि ठहरूसुल.”
EXO 30:22 बाक यहोवा मूसा से अंदुन,
EXO 30:23 “नी वळ्लीद से वळ्लीद सुगन्धद्रव्य कोम, मतलब पवित्रस्थान इन शेकेल इन अनुसार अईद सौ लुबान तान ताना होळ्द गन्धरस, अदिक अदुर आर्धा, मतलब ढाई सौ शेकेल सुगन्धित कलमी, अदिक ढाई सौ शेकेल सुगन्धित अगर,
EXO 30:24 अदिक अईद सौ शेकेल तेजपान, अदिक ऊंद हीन जैतून इन याण्णा कोंडकु
EXO 30:25 अऊर से अभिषेक इन पवित्र याण्णा, मतलब गन्धरस इन रिति देल तयार माळ्द सुगन्धित याण्णा माळसुसेत; ईद अभिषेक इन पवित्र याण्णा ठहरूसुल.
EXO 30:26 अदिक अदुर देल मिलाप इन तम्बु उन, अदिक गवाही इन चिट्टी इन सन्दुक इन,
EXO 30:27 अदिक सप्पा सामान समेत मेज इन, अदिक सामान समेत दीवट इन, अदिक धूपवेदी इन,
EXO 30:28 अदिक सप्पा सामान समेत होमबली वेदी इन, अदिक पाया समेत गंगार इन अभिषेक माळेत,
EXO 30:29 अदिक अवरी पवित्र माळेत, यदुर देल अव परमपवित्र ठहरूसुल; अदिक जो येनारा अऊर से मुटकु आदीत अद पवित्र आगेदीत.
EXO 30:30 बाक हारून उन आऊन पारगोळ सांगुळ अभिषेक माळेत, अदिक ई प्रकार देल आंदरी नान साटी याजक इन क्याल्सा माळोर साटी पवित्र माळेत.
EXO 30:31 अदिक इस्त्राएलीगोळी नान ईद आग्या केळसेत, ‘ईद याण्णा नीम पीढ़ोन पीढ़ी दा नान साटी पवित्र अभिषेक इन याण्णा आदीत.
EXO 30:32 ईद यातारा मंळसा अन मय मा हाक्कु आगबाळुल, अदिक मिलावट दा अदुर घाई मात्त येनु माळ बाळेतीर; ईद पवित्र आद, ईद नीम साटी भी पवित्र आदीत.
EXO 30:33 जो यावारा ईदुर घाई येनारा बनुसुल, या जो यावारा ईदुर दा टु येनारा पराया कुलवाळेर मा हचुल, आव तान लॉकुर दा टु नष्ट माळकु आगुल.’”
EXO 30:34 बाक यहोवा मूसा से अंदुन, “बोल, नखी अदिक कुन्दरू, ईव सुगन्धद्रव्य शुद्ध लुबान समेत कोमेत, ईव सप्पा ऊंद तवल इनव ईरूल,
EXO 30:35 अदिक ईऊर धूप मतलब ऊप्प मिसळुसकु गन्धी इन रिति इन अनुसार शुद्ध अदिक पवित्र सुगन्धद्रव्य माळसुसेत.
EXO 30:36 बाक अदुर दा टु थ्वाळासा पिसुसकु बारीक माळकु हाकेत, आग अदुर दा टु थ्वाळासा मिलाप इन तम्बु दा गवाही इन चिट्टी इन मुंद, यल ना नीन से मुलाकात माळतोगाईन, ईटेत; अद नीम साटी परमपवित्र आदीत.
EXO 30:37 जो धूप नी माळसुस्या, मिलावट दा अदुर घाई नीव लॉकुर तान साटी मात्त येनारा माळ बाळेतीर; अद नीम मुंद यहोवा अन साटी पवित्र आदीत.
EXO 30:38 जो यावारा वास ताकोमोर साटी अदुर घाई येनारा बनुसुल आव तान लॉकुर दा नष्ट माळकु आगुल.”
EXO 31:1 बाक यहोवा मूसा से अंदुन,
EXO 31:2 “केळ, ना ऊरी इन पार बसलेल उक, जो हूर उन नातु अदिक यहूदा अन गोत्र नव हुन, हेसुर ताकोमकु कारूतीन.
EXO 31:3 अदिक ना आऊक परमेश्वर उन आत्मा देल जो बुद्धि, हुनर, ग्यान, अदिक हर प्रकार इन क्याल्सागोळ्द समझ कोळावाळा आत्मा हुन, परिपुर्ण माळतीन,
EXO 31:4 यदुर देल आव कारीगरी इन क्याल्सा बुद्धि देल तेगु तेगुकु हर प्रकार इन बनावट दा, मतलब व्हान्ना, बेळ्ली, अदिक पीतळा दा,
EXO 31:5 अदिक जळुसोर साटी मणि कळदुर दा, अदिक हुळ्ली मा नकाशा अन क्याल्सा माळुल.
EXO 31:6 अदिक केळ, ना दान इन गोत्रवाळेर अहीसामाक उन पार ओहोलीआब उक आऊन सांगुळ माळ बुळतीन; उलटा यास दिमागदार आर आ सप्पा मुंदुर दिल दा ना बुद्धि कोळतीन, यदुर देल यास वस्तुगोळ्द आग्या ना नीनी कोटीन आ सप्पा अक आंदुर बनुसुल;
EXO 31:7 मतलब मिलाप इन तम्बु, अदिक गवाही इन चिट्टी इन सन्दुक अदिक अदुर माकळोद प्रायश्चित इन झाकनी अदिक तम्बु उन सप्पा सामान,
EXO 31:8 अदिक सामान समेत मेज, अदिक सप्पा समान समेत शुद्ध व्हान्ना अन दीवट, अदिक धूपवेदी,
EXO 31:9 अदिक सप्पा सामान समेत होमबली वेदी, अदिक पाया समेत गंगार,
EXO 31:10 अदिक होलदव कपळा, अदिक हारून याजक उन याजकवाळा क्याल्सा नव पवित्र कपळा, अदिक आऊन पारगोळ्द कपळा,
EXO 31:11 अदिक अभिषेक इन याण्णा, अदिक पवित्रस्थान इन साटी सुगन्धित धूप, अदिक ई सप्पा अक आंदुर आ सप्पा आग्यागोळ्द अनुसार बनुसुल जो ना नीनी कोटीन.”
EXO 31:12 बाक यहोवा मूसा से अंदुन,
EXO 31:13 “नी इस्त्राएलीगोळ से ईद भी अनेत, ‘निश्चय नीव नान विश्राम दिनगोळी मान्सेतीर, यतिकी नीम पीढ़ोन पीढ़ी दा नान अदिक नीम लॉकुर न्याड्या ईद ऊंद चिन्ह ठहरूस्याद, यदुर देल नीव ईद मात याद ईटी कि यहोवा नाम पवित्र माळावाळा हुन.
EXO 31:14 ई कारण नीव विश्राम दिन इक मान्सेतीर, यतिकी आव नीम साटी पवित्र ठहरूस्यान; जो आऊक अपवित्र माळुल आव जरूर कोन्सुसकु आगुल: जो यावारा आ दिनगोळ दा येनारा क्याल्सा-कळी माळुल आ मंळसा तान लॉकुर न्याड्या दा टु नष्ट माळकु आगुल.
EXO 31:15 आर दिन रा क्याल्सा-कळी माळकु आगुल, लेकीन सातवा दिन परम विश्राम इन दिन अदिक यहोवा अन साटी पवित्र आद; इदुरसाटी जो यावारा विश्राम इन दिन दा येनारा क्याल्सा-कळी माळुल आव जरूर कोन्सुसकु आगुल.
EXO 31:16 इदुरसाटी इस्त्राएली विश्राम दिन इन मान्सतोगुल, उलटा पीढ़ोन पीढ़ी दा अदरी हमेशा अन वाचा अन विषय जान्सकु मानसुल.
EXO 31:17 अद नान अदिक इस्त्राएलीगोळ न्याड्या दा हमेशा ऊंद चिन्ह ईत्तीत, यतिकी आर दिन दा यहोवा आकाश अदिक धरती इक बनुसदुन, अदिक सातवा दिशी विश्राम माळकु तान जीव ठंडा माळदुन.’”
EXO 31:18 याग परमेश्वर मूसा से सीनै पहाळी मा हिंग मात माळ कोंडुन, आग आव आऊक तान बेळ्ल देल लिख्सद गवाही कोळावाळा कल्ल इन येढ्ढु तखतगोळ कोट्टुन.
EXO 32:1 याग लॉकुर नोळदुर कि मूसा अक पहाळी मा टु ईळुली समय हतेत्याद, आग आंदुर हारून उन हात्ती जमा आगकु अनली हतदुर, “ईग नाम साटी देवता माळ, जो नाम मुंद मुंद नळुल; यतिकी आ मंळसा मूसा अक जो नामी मिस्त्र द्याश दा टु तेगुकु तंदान, नाव जान्सालेव कि येन आग्याद?”
EXO 32:2 हारून आंदुर से अंदुन, “नीम हिंग्सुर अदिक पार पोरगोळ्द किवगोळ दा व्हान्ना अन जो बालीगोळ आव अवरी ईळसी, अदिक नान हात्ती तरी.”
EXO 32:3 आग सप्पा लॉकुर आंदुर किवगोळ दा टु व्हान्ना अन झुक्कागोळ ईळ्सदुर, अदिक हारून उन हात्ती तंदुर.
EXO 32:4 हारून झुमकागोळ आंदुर कय देल ताकोंडुन, अदिक अवरी पिघलुसकु ऊंद साचा दा व्हान्ना हाकदुन, अदिक व्हान्ना अन ऊंद पाड्डा बनुसदुन. आग लॉकुर अनली हतदुर, “हे इस्त्राएल, नीन ईश्वर जो नीनी मिस्त्र द्याश दा टु बिळ्सकु तंदान, आव ईवा हुन.”
EXO 32:5 ईद नोळकु कि हारून अदुर मुंद ऊंद वेदी माळसुसदुन; अदिक ईद प्रचार माळदुन, “नाळ यहोवा अन साटी हाब्बा ईत्तीत.”
EXO 32:6 अदिक दुसरा दिशी लॉकुर हुंजकुका येदकु होमबली येर्सुल, अदिक मेलबली तरूल; बाक कुर्तकु तिंदुर कुळदुर, अदिक येदकु गलत क्याल्सा माळली कुरतुर.
EXO 32:7 आग यहोवा मूसा से अंदुन, “ल्यालमा ईळदोग, यतिकी नीन प्रजा अन लॉकुर, यारी नी मिस्त्र द्याश दा टु तेगुकु तंद्या, आंदुर बिगळुसेग्यार;
EXO 32:8 अदिक याता हादी मा नळोद आग्या ना आंदरी कोटीदीन अदरी राटनेरी बिटकु आंदुर ऊंद पाड्डा घळुसकु माळ बुट्टुर, बाक अदरी दण्डवत माळदुर, अदिक अदुर साटी बलि भी येर्सदुर, अदिक ईद अंदार, ‘हे इस्त्राएलीगोळा, नीम ईश्वर जो नीमी मिस्त्र द्याश दा टु बिळ्सकु तंदान आव ईवा हुन.’”
EXO 32:9 बाक यहोवा मूसा से अंदुन, “ना ई लॉकुरी नोळदीन, अदिक केळ, आंदुर जिद्दी आर.
EXO 32:10 ईग नानी रोक्सबाळ, नान कोप आंदुर मा भळकुसकु येदाद यदुर देल ना आंदरी भस्म माळाईन; लेकीन नीन देल ऊंद धोळ्द वंश पैदा माळाईन.”
EXO 32:11 आग मूसा तान परमेश्वर यहोवा अक ईद अंदकु मनुसली हतदुन, “हे यहोवा, नीन कोप तान प्रजा मा येती भळकुसकु येदाद यदुर देल नी धोळ्द सामर्थ्य अदिक बलवन्त कय इन द्वारा मिस्त्र द्याश दा टु तेगुकु तंद्या?
EXO 32:12 मिस्त्री लॉकुर ईद ईला अन पायजे, ‘आव आंदरी बेकार अभिप्राय देल मतलब पहाळगोळ दा घात माळकु धरती मा टु मिटुस बुळोद मनसा देल तेगुकु ओतुन?’ नी तान भळकुस्द कोप इक शांत माळ, अदिक तान प्रजा अक ईत्ता हानि माळबाळ.
EXO 32:13 तान दास अब्राहम, इसहाक, अदिक इस्त्राएल इक याद माळ यार देल नी तांदा किर्‍या तिनकु ईद अंदीद, ‘ना नीम वंश इक आकाश इन तारागोळ्द तुल्य हापाळ बनुसाईन, अदिक ईद पुरा द्याश यार्द ना चर्चा माळीन नीम वंश इक कोळाईन कि आंदुर अदुर अधिकारी हमेशा बन्सकु ईरूल.’”
EXO 32:14 आग यहोवा तान प्रजा अन हानि माळदुर देल जो आव अंदीदुन पछतासदुन.
EXO 32:15 आग मूसा तिर्गकु गवाही इन येढ्ढु पाटीगोळी कय दा हुडुकु पहाळी मा टु ईळ्दोदुन. आ पाटीगोळ्द येढ्ढु बाजु दी लिख्सकु ईरोद,
EXO 32:16 अदिक आ पाटीगोळ परमेश्वर उन बनुस्द ईरव, अदिक अऊर मा जो नळ्सकु लिख्सकु ईरोद अद परमेश्वर उन लिख्सद ईरोद.
EXO 32:17 याग यहोशू अक लॉकुर्द कलकल इन शब्द केळ बत्त, आग आव मूसा से अंदुन, “छावनी दा टु लळाई इन घाई शब्द केळ बरेत्याद.”
EXO 32:18 आव अंदुन, “ईद जो शब्द आद अद ना रा जीतुसावाळेर्द हुन, अदिक ना हारूसावाळेर्द हुन; नानी रा हाळ इन शब्द केळ बरेत्याद.”
EXO 32:19 छावनी इन हात्ती बरतेला अच मूसा अक आ पाड्डा अदिक कुणोद कांळ्सकु बिळ्त, आग मूसा अन कोप भळकुसकु येळ्त, अदिक आव पाटीगोळी तान कय देल पहाळी इन ल्‍यालमा आपटुसकु मुर्द बुट्टुन.
EXO 32:20 आग आव आंदुर्द माळ्द पाड्डा अक हुडुकु बेक्‍की दा हाक्कु होताक बुट्टुन. अदिक आरूकु चकनाचुर माळदुन, अदिक नीर इन म्याकुच भिट्ट बुट्टुन, अदिक इस्त्राएलीगोळी अदरी कुळसुस बुट्टुन.
EXO 32:21 आग मूसा हारून से अनली हतदुन, “ई लॉकुर नीन सांगुळ येन माळदुर कि नी ईंदरी ईसतोळीद धोळ्द पाप दा फसुस्द?”
EXO 32:22 हारून उत्तर कोट्टुन, “नान स्वामी इन कोप भळकुस बाळुल; नी रा ई लॉकुरी जान्सत्या अच कि ईंदुर बुराई दा मन हचकु ईरतार.
EXO 32:23 अदिक आंदुर नान से अंदुर, ‘नाम साटी देवता माळ जो नाम मुंद मुंद नळुल; यतिकी आ मंळसा मूसा अक, जो नामी मिस्त्र द्याश दा टु बिळ्सकु तंदान, नाव अरालेव कि येन आत?’
EXO 32:24 आग ना आंदुर से अंदीन, यार यार हात्ती व्हान्ना बेळ्ली आव, आंदुर अवरी ईळ्सकु तरूल; अदिक याग आंदुर नानी अवरी कोट्टुर, ना अवरी बेक्‍की दा हाक्क बुट्टीन, आग ईद पाड्डा होटकु बत्त.”
EXO 32:25 हारून आ लॉकुरी हिंग खुला माळ बुटीदुन कि आंदुर तान विरोधीगोळ्द बीच दा उपास इन योग्य आगेदुर.
EXO 32:26 आंदरी खुला नोळकु मूसा छावनी इन निकास मा निदुरकु अंदुन, “जो यावारा यहोवा अन दीकळव आन आव नान हात्ती बरूल;” आग सप्पा लेवीगोळ आऊन हात्ती जमा आदुर.
EXO 32:27 आव आंदुर से अंदुन, “इस्त्राएल इन परमेश्वर यहोवा ईद अनतान कि तान तान नेळु मा तलवार हीलगुसकु छावनी इन ऊंद निकास टु दुसरा निकास ताका तिर्ग तिर्गकु तान तान वार्टुर, संगीगोळ, अदिक मान्ना अन हात्तीवाळेर्द घात माळी.”
EXO 32:28 मूसा अन ई वचन इन अनुसार लेवीगोळ माळदुर; अदिक आ दिशी मुर हजार इन हात्ती पास लॉकुर कोन्सुसकु आदुर.
EXO 32:29 बाक मूसा अंदुन, “ईंद इन दिशी यहोवा अन साटी तान याजक पद इन संस्कार माळी, उलटा तान तान पारगोळ अदिक वार्टुर्द भी विरूद्‍ध आगकु हिंग माळी यदुर देल आव ईंद नीमी आशीष कोळुल.”
EXO 32:30 दुसरा दिशी मूसा लॉकुर से अंदुन, “नीव हापाळ अच पाप माळीर. ईग ना यहोवा अन हात्ती येरेगाईन; सम्भव आद कि ना नीम पाप इन प्रायश्चित माळ सकाईन.”
EXO 32:31 आग मूसा यहोवा अन हात्ती होगकु अनली हतदुन, “हाय हाय, आ लॉकुर व्हान्ना अन देवता माळसुसकु हापाळ अच पाप माळ्यार.
EXO 32:32 तरी भी ईग नी आंदुर पाप क्षमा माळ ईलारा तान लिख्सद किताब दा टु नान हेसुर कळ्द बुळ.”
EXO 32:33 यहोवा मूसा से अंदुन, “याव नान खिलाप पाप माळ्यान आऊंदा हेसुर ना तान किताब दा टु कळ्द बुळाईन.
EXO 32:34 ईग नी होगकु आ लॉकुरी आ जागा दा ओय यदुर्द चर्चा ना नीन से माळीदिन; नोळ, नान स्वर्गदूत नीन मुंद मुंद नळदान. लेकीन याता दिशी ना दण्ड कोळली हताईन आ दिशी आंदरी ई पाप इन भी दण्ड कोळाईन.”
EXO 32:35 इदुरसाटी यहोवा आ लॉकुर मा विपत्ति हाकदुन, यतिकी हारून उन बनुस्द पाड्डा अक आंदुरा माळसुसीदुर.
EXO 33:1 बाक यहोवा मूसा से अंदुन, “नी आ लॉकुरी यारी मिस्त्र द्याश दा टु बिळ्सकु तंद्या सांगुळ हुडुकु आ द्याश इक होग, यदुर बारा दा ना अब्राहम, इसहाक, अदिक याकूब से किर्‍या तिनकु अंदीदीन कि ना अदरी नीम वंश इक कोळाईन.
EXO 33:2 अदिक ना नीन मुंद मुंद ऊंद दूत उक कळाईन, अदिक कनानी, एमोरी, हित्ती, परिज्जी, हिब्बी अदिक यबूसी लॉकुरी बरबस तेग्द बुळाईन.
EXO 33:3 नीव लॉकुर आ द्याश इक होगी यदुर दा हाल अदिक शयद इन धारा वाहुसताव; लेकीन नीव जिद्दी आईर, ई कारण ना नीम बीच दा आगकु नळुतीदील, हिंग आगबाळुल कि ना हादी मा नीम अन्त माळ बुळाईन.”
EXO 33:4 ईद बेकार बातणी केळकु आ लॉकुर विलाप माळली हतदुर; अदिक याऊ तान ईसरावाळी हाक्कु ईतीदील.
EXO 33:5 यतिकी यहोवा मूसा से अंद बुटीदुन, “इस्त्राएलीगोळी नान ईद वचन केळ्स, ‘नीव लॉकुर रा जिद्दी आईर; अगर ना घळी तिमुर साटी नीम बीच दा आगकु नळाईन, रा नीम अन्त माळ बुळाईन. इदुरसाटी ईग तान तान ईसरा तान मय दा टु ईळ्सबुळी कि ना जान्साईन कि नीम सांगुळ येन माळ पायजे.’”
EXO 33:6 इदुरसाटी इस्त्राएली होरेब पहाळी टु हुडुकु मुंद ताका तान ईसरा ईळ्सकु ईरूल.
EXO 33:7 मूसा तम्बु उक छावनी टु व्हार्या उलटा दुर निदरूसकु ईटतोगोन, अदिक अदरी मिलाप इन तम्बु अनतोगोन. अदिक जो यावारा यहोवा अक ढुंढ्सतोगोन आव अद मिलाप इन तम्बु उन हात्ती जो छावनी इन व्हार्या ईरोद, होट बुळतोगोद.
EXO 33:8 याग याग मूसा तम्बु उन हात्ती होगोन, आग आग सप्पा लॉकुर येदकु तान तान ड्यारा अन दरवाजा मा निद्रेगोर, अदिक यागास ताका मूसा आ तम्बु दा प्रवेश ईला माळतोगोन आगासताका ताका आऊन दी तार हचकु नोळतोगोर.
EXO 33:9 याग मूसा आ तम्बु दा प्रवेश माळतोगोन, आग बादल इन खम्बा ईळुकु तम्बु उन दरवाजा मा रुक्सेगोद, अदिक यहोवा मूसा से मातगोळी हेळली हत्तेगतोगोन.
EXO 33:10 अदिक सप्पा लॉकुर याग बादल इन खम्बा अक तम्बु उन दरवाजा मा रूक्सकु नोळतोगोर, आग येदकु तान तान ड्यारा अन दरवाजा मा टु ट्वांगरा टेक्सकु दण्डवत माळतोगोर.
EXO 33:11 अदिक यहोवा मूसा से ईत्ता प्रकार देल आमने सामने मातगोळ हेळतोगोन, याता प्रकार देल यावारा तान वार्ट उन से मात हेळतान. अदिक मूसा रा छावनी दा वापस बरतोगोन, लेकीन यहोशू हेसुर इन ऊंद हारोदव मंळसा, जो नून उन पार अदिक मूसा अन सेवक ईरोन, आव तम्बु दा टु ईला होळतोगोन.
EXO 33:12 मूसा यहोवा से अंदुन, “केळ नी नान से अनत्या, ई लॉकुरी हुडुकु ओय; लेकीन ईद हेळीदील कि नी नान सांगुळ यारी कळ्या. तरी भी नी अंद्या, ना नीनी हेसुर देल जान्सतीन, अदिक नीन मा नान अनुग्रह अन दृष्टी आद.
EXO 33:13 अदिक ईग अगर नान मा नीन अनुग्रह अन दृष्टी आगुल, रा नानी तान गति समजुस बुळ, यदुर देल याग ना नीन ग्यान हासिल माळाईन आग नीन अनुग्रह अन दृष्टी नान मा बन्सकु ईरूल. बाक ईद भी ध्यान ईट कि ईद जाति नीन प्रजा हुन.”
EXO 33:14 यहोवा अंदुन, “ना खुद नीन सांगुळ नळाईन अदिक नीनी विश्राम कोळाईन.”
EXO 33:15 आव आऊन से अंदुन, “अगर नी खुद नळुतिदील, रा नामी ईल टु मुंद ओयबाळ.
EXO 33:16 ईद ह्यांग अर्तकु आगुल कि नीन अनुग्रह अन दृष्टी नान मा अदिक तान प्रजा मा आद? येन ईदुर देल ईला कि नी नाम सांगुळ सांगुळ नळद्या, यदुर देल ना अदिक नीन प्रजा अन लॉकुर पृथ्वी तिमुर्द सप्पा लॉकुर से अलग ठहरूसुल?”
EXO 33:17 यहोवा मूसा से अंदुन, “ना ईद क्याल्सा भी, यदुर्द चर्चा नी माळ्या, माळाईन; यतिकी नान अनुग्रह अन दृष्टी नीन मा आद, ना नीनी नीन हेसुर देल जान्सतीन.”
EXO 33:18 मूसा अंदुन, “नानी तान तेज तोर्स बुळ.”
EXO 33:19 आव अंदुन, “ना नीन हात्ती आगकु नळुतेला नीनी तान पुरा भलाई तोर्साईन, अदिक नीन हात्ती यहोवा हेसुर इन प्रचार माळाईन; अदिक यदुर मा ना अनुग्रह माळोद चाहासाईन आऊन मा अच अनुग्रह माळाईन, अदिक यार मा दया माळोद चाहासाईन आऊन मा का दया माळाईन.”
EXO 33:20 बाक आव अंदुन, “नी नान बाय इन दर्शन माळ सकाल; यतिकी मंळसा नान बाय इन दर्शन माळकु जित्ता ईर सकालुन.”
EXO 33:21 बाक यहोवा अंदुन, “केळ, नान हात्ती ऊंद जागा आद, ईल नी आ चट्टान मा निदुर;
EXO 33:22 अदिक याग ताका नान तेज नीन मुंद आगकु नळुतेला ईत्तीत, आग ताका ना नीनी धोळ्द कल्ल इन दरार दा ईटाईन अदिक यागासताका ना नीन मुंदु टु आगतेला होगालीन आगासताका तान कय देल नीनी मुचकु ईटाईन;
EXO 33:23 बाक ना तान कय नेग्द बुळाईन, आग नी नान बेन इन रा दर्शन माळ्या; लेकीन नान बाय इन दर्शन आगतीदील.”
EXO 34:1 बाक यहोवा मूसा से अंदुन, “पयला तखतगोळ घाई कल्ल इन येढ्ढ मात्त तखतगोळ केदुर कोम; आग जो वचन आ पयला तखतगोळ मा लिख्सकु ईरव, यवरी नी मुर्द बुट्ट, अवा वचन ना आ तखतगोळ मा भी लिख्साईन.
EXO 34:2 व्हातर्या तयार ईरेत, अदिक व्हातर्या सीनै पहाळी मा येरकु अदुर स्यांडा मा नांद मुंद नीदरेत.
EXO 34:3 नीन सांगुळ याऊ येर ईला पायजे, उलटा पहाळी तीमुर मा याऊ मंळसा येल्यारा कांळ्सबाळुल; अदिक ना मर्री-म्यांडा अदिक ना वस्त-वाळी भी पहाळी इन मुंद चरूस ईला पायजे.”
EXO 34:4 आग मूसा पयला तखतगोळ घाई येढ्ढ मात्त तखतगोळ गळुसदुन; अदिक हुंजकुका येदकु तान कय दा कल्ल इन अव येढ्ढु तखतगोळ हुडुकु यहोवा अन आग्या अन अनुसार सीनै पहाळी मा येरेदुन.
EXO 34:5 आग यहोवा बादल दा ईळुकु आऊन सांगुळ अल निदुरकु यहोवा अन हेसुर प्रचार माळदुन.
EXO 34:6 यहोवा आऊन मुंद आगकु ईद प्रचार माळतेला नळदुन, “यहोवा, यहोवा, ईश्वर दयालु अदिक अनुग्रहकारी, कोप माळदुर दा धीरजवन्त, अदिक हापाळ करूणामय अदिक सत्य,
EXO 34:7 हजारों पीढ़ी ताका लगातार करूणा माळावाळा, अधर्म अदिक अपराध अदिक पाप इन क्षमा माळावाळा हुन, लेकीन दोषी इक आव यातोदु प्रकार देल निर्दोष ठहरूसतीदील; आव आप्पुर्द अधर्म इन दण्ड आऊन चिकोर उलटा नातु अदिक पळनातुगोळी भी कोळावाळा हुन.”
EXO 34:8 आग मूसा तुरन्त धरती दी ट्वांगरा टेक्सकु बांगकु दण्डवत माळदुन.
EXO 34:9 अदिक आव अंदुन, “हे प्रभु, अगर नीन अनुग्रह अन दृष्टी नान मा आगुल, रा प्रभु नाव लॉकुर न्याड्या दा टु आगतेला होदेव; ई लॉकुर जिद्दी रा आर, तरी भी नाम अधर्म अदिक पाप इक क्षमा माळ अदिक नामी तान निज भाग मान्सकु ग्रहण माळ.”
EXO 34:10 आव अंदुन, “केळ, ना ऊंद वाचा कटतीन. नीन सप्पा लॉकुर मुंद ना हिंग आश्चर्यकर्म माळाईन ह्यांग धरती मा अदिक सप्पा द्याशगोळ दा यागलु आगीदील; अदिक आ सप्पा लॉकुर यार न्याड्या नी ईरत्या यहोवा अन कार्य अक नोळ्यार; यतिकी जो ना नीम लॉकुर साटी माळदुर मा आईन अद भयंकर क्याल्सा आद.
EXO 34:11 जो आग्या ना ईंद नीमी कोळतीन अदरी नीव लॉकुर मान्सेतीर. नोळी, ना नीम मुंदु टु एमोरी, कनानी, हित्ती, परिज्जी, हिब्बी अदिक यबूसी लॉकुरी तेगुतीन.
EXO 34:12 इदुरसाटी सावधान ईरेत कि याता द्याश दा नी होगावाळा आय अलेर ईरावाळेर से वाचा कट बाळेत; ईलारा हींग आगबाळुल कि अद नीन साटी फंदा ठहरूसुल.
EXO 34:13 इदुरसाटी आंदुर वेदीगोळी केळ्द बुळेत, आंदुर मुंडागोळी मुर्द बुळेत, अदिक आंदुर अशेरा हेसुर इन मुर्तीगोळी कळ्द बुळेत;
EXO 34:14 यतिकी नीनी यावारा दुसरा अक ईश्वर माळकु दण्डवत माळोद आग्या हैलेच, यतिकी यहोवा यार हेसुर जलनशील आद, आव होतकु येळावाळा परमेश्वर हुन,
EXO 34:15 हींग आगबाळुल कि नी आ द्याश इन ईरावाळेर से वाचा कट्या, अदिक आंदुर तान देवतागोळ्द हींद आगोद व्यभिचार माळुल, अदिक आंदुर साटी बलिदान भी माळुल, अदिक यावारा नीनी बावस्या कोळुल अदिक नी भी आऊन बलिपशु उन मास तीन,
EXO 34:16 अदिक नी आंदुर पोरगोळी तान पारगोळ मदा साटी तरेत, अदिक आंदुर पोरगोळ जो खुद तान देवतागोळ्द हींद आगोद व्यभिचार माळतार नीन पारगोळ से भी तान देवतागोळ्द हींद आगोद व्यभिचार माळसुसुल.
EXO 34:17 “नीव देवतागोळ्द मूर्तीगोळ ढाल्सकु माळ बाळेतीर.
EXO 34:18 “अखमीरी रोट्टी इन हाब्ब मान्सेत. अदुर दा नान आग्या अन अनुसार आबीब तिंगुळ अन नियत समय मा येळ दिन ताका अखमीरी रोट्टी तिनतोगेत; यतिकी नी मिस्त्र टु आबीब तिंगुळ दा होटकु बंद.
EXO 34:19 हर ऊंद पहिलौठा नानव हुन; अदिक येन पाड्डा, येन मेम्ना, नीन जनावरगोळ दा टु जो नर पहिलौठा आव अव सप्पा नानव अच हुव.
EXO 34:20 गदा अन पहिलौठा अन बदला मेम्ना कोटकु अदरी बीळसेत, अगर नी अदरी बीळसोद चाहासाल रा अदुर म्यांडा मुर्द बुळेत. लेकीन तान सप्पा पहिलौठा पारगोळी बदला कोटकु बीळसेत. नानी याऊ नीरा कय तान मार्रा तोर्स बाळुल.
EXO 34:21 “आर दिन रा मयनत माळेत, लेकीन सातवा दिशी विश्राम माळेत; उलटा नागर जोत्सा होती अदिक परा हचा समय दा भी विश्राम माळेत.
EXO 34:22 अदिक नी हप्तागोळ्द हाब्‍ब मनुसेत यदरी पयले परा हच्द गोदी इन हाब्‍ब अंदकु आगतद, अदिक साल इन आखरी दा बटोरन इन भी हाब्‍ब मनुसेत.
EXO 34:23 साल दा मुर घन नीन सप्पा मंळसागोळ इस्त्राएल इन परमेश्वर प्रभु यहोवा अक तान मार्रा तोर्सुल.
EXO 34:24 यतिकी ना गैरयहूदीगोळी नीन मुंदु टु तेगुकु नीन सीमागोळी वाळुसाईन; अदिक याग नी तान परमेश्वर यहोवा अक तान मार्रा तोरसोर साटी साल दा मुर अनली बर्तोद्या, आग याऊ नीन जमीन इन लालच माळतीदील.
EXO 34:25 “नान बलिदान इन रक्ता अक खमीर सांगुळ येर्स बाळेत, अदिक ना फसह अन हाब्ब अन बलिदान दा टु येनारा व्हातुर ताका मिक्सकु ईटेत.
EXO 34:26 तान जमीन इन पयला उपज इन पयला भाग तान परमेश्वर यहोवा अन भवन दा तरेत. मर्री इन पाड्डा अक अदुर्द मोय इन हाल दा बेईस बाळेत.”
EXO 34:27 आग यहोवा मूसा से अंदुन, “ई वचन लिख्स कोम; यतिकी ईवा वचनगोळ अनुसार ना नीन अदिक इस्त्राएल इन सांगुळ वाचा कटीन.”
EXO 34:28 मूसा अल यहोवा अन सांगुळ चालीस दिन अदिक चालीस ईळ्लक ईत्तुन; अदिक आगासताका ना रा आव रोट्टी तिंदुन अदिक ना नीर कुळदुन. अदिक आव आ पाटीगोळ मा वाचा अन वचन मतलब हत्त आग्यागोळ लिख्स बुट्टुन.
EXO 34:29 याग मूसा गवाही इन येढ्ढु तखतगोळ कय दा हुडुकु सीनै पहाळ टु ईळोन आग यहोवा अन सांगुळ मात हेळदुर कारण आऊन मार्रा दा टु किरण होळोव, लेकीन आव ईद ईला जानसोन कि आऊन मार्रा दा टु किरण होळेत्याव.
EXO 34:30 याग हारून अदिक सप्पा इस्त्राएलीगोळ मूसा अक नोळदुर कि आऊन मार्रा दा टु किरण होळेत्याव, आग आंदुर आऊन हात्ती होगोर से अंजेदुर.
EXO 34:31 आग मूसा आंदरी कारदुन; अदिक हारून मंडली इन सप्पा प्रधानगोळ समेत आऊन हात्ती बंदुन, अदिक मूसा आंदुर से मात हेळली हतदुन.
EXO 34:32 इदुर बाद्दा सप्पा इस्त्राएलीगोळ हात्ती बंदुर, अदिक यास आग्यागोळ यहोवा सीनै पहाळ मा आऊन सांगुळ मात हेळा होती कोटीदुन, अव सप्पा आव आंदरी हेळदुन.
EXO 34:33 यागासताका मूसा आंदुर से मात हेळ कोंडीदील आगासताका तान मार्रा मा ओढ़ना हाक्कु ईत्तुन;
EXO 34:34 लेकीन याग याग मूसा बुळ्क यहोवा से मात हेळली आऊन मुंद होगोन, आग आग आव आ ओढ़नी इक होळा समय ताका तेगकु ईटतोगोन; बाक व्हार्या बंदकु जो जो आग्या आऊक सिकतोगोद अवरी इस्त्राएलीगोळ से हेळबुळतोगोन.
EXO 34:35 इस्त्राएली मूसा अन मार्रा नोळतोगोर कि आऊन मार्रा दा टु किरण होळताव; अदिक यागासताका आव यहोवा से मात हेळली बुळ्क ईला होगतोगोन आगासताका आव आ ओढ़नी इक हाक्कु ईरतोगोन.
EXO 35:1 मूसा इस्त्राएलीगोळ्द सप्पा मंडली इक जमा माळकु आंदुर से अंदुन, “याता क्याल्सागोळ्द माळोद आग्या यहोवा कोटान अव ईव हुव.
EXO 35:2 आर दिन रा क्याल्सा-कळी माळकु आगुल, लेकीन सातवा दिशी नीम साटी पवित्र अदिक यहोवा अन साटी परम विश्राम इन दिन ठहरूसुल; अदुर दा जो यावारा क्याल्सा-कळी माळ्यान आव कोन्सुसकु आगुल;
EXO 35:3 उलटा विश्राम इन दिशी नीव तान तान मान्नगोळ दा बेक्‍की ताका होताक बाळेतीर.”
EXO 35:4 बाक मूसा इस्त्राएलीगोळ्द सप्पा मंडली से अंदुन, याता मात इन आग्या यहोवा कोटान अद ईद हुन.
EXO 35:5 नीम हात्ती टु यहोवा अन साटी भेंट ताकोमकु आगुल, मतलब यास तान इच्छा देल कोळोद चाहसुल आंदुर यहोवा अन भेंट माळकु ईव वस्तुगोळ तरूल; मतलब व्हान्ना, बेळ्ली, पीतल;
EXO 35:6 नीळा, जांभळा रंग इन अदिक क्याचांद रंग इन कपळा, सुक्ष्म सन इन कपळा; मर्री इन चुट्टी,
EXO 35:7 क्याचांद रंग देल रंगकु म्यांडागोळ्द तोगुल, सूइसगोळ्द तोगुल; बबूल इन हुळ्ली,
EXO 35:8 ऊजुळ कोळोर साटी याण्णा, अभिषेक इन याण्णा अदिक धूप इन साटी सुगन्धद्रव्य,
EXO 35:9 बाक एपोद अदिक चपरास इन साटी सुलैमानी मणि अदिक जळुसोर साटी मणि.
EXO 35:10 “नीम दा टु यास मुंदुरव दिल दा बुद्धि इन ऊजुळ आद आंदुर सप्पा बंदकु याता याता वस्तु उन आग्या यहोवा कोटान अव सप्पा बनुसुल.
EXO 35:11 मतलब तम्बु, अदिक आवरण समेत निवास, अदिक अदुर घुंडी, पट्टीगोळ, बेंडगोळ, खम्बागोळ अदिक कुर्चीगोळ;
EXO 35:12 बाक डण्डागोळ समेत सन्दुक, अदिक प्रायश्चित इन झाकनी, अदिक बीच इन पळदा;
EXO 35:13 डण्डागोळ अदिक सप्पा सामान समेत मेज, अदिक भेंट इन रोट्टीगोळ;
EXO 35:14 सामान अदिक दिंग्यागोळ समेत ऊजुळ कोळावाळा दीवट, अदिक ऊजुळ कोळोर साटी याण्णा;
EXO 35:15 डण्डागोळ समेत धूपवेदी, अभिषेक इन याण्णा, सुगन्धित धूप, अदिक निवास इन दरवाजा मा पळदा;
EXO 35:16 पीतल इन झंझरी, डण्डागोळ समेत होमबली वेदी, पाया समेत गंगार;
EXO 35:17 खम्बागोळ अदिक अऊर्द कुर्चीगोळ समेत आंगुळ इन पळदागोळ, अदिक आंगुळ इन दरवाजा मा पळदागोळ;
EXO 35:18 निवास अदिक आंगुळ येढ्ढु उन खुटागोळ, अदिक डोरीगोळ;
EXO 35:19 पवित्रस्थान दा स्यावा टहल माळोर साटी कळुस्द कपळा, अदिक याजक इन क्याल्सा माळोर साटी हारून याजक उन पवित्र कपळा, अदिक आऊन पारगोळव कपळा.”
EXO 35:20 आग इस्त्राएलीगोळ्द सप्पा मंडली मूसा अन मुंदु टु वापस होत्त.
EXO 35:21 अदिक यास मुंदुरी उत्साह आत अदिक यास मुंदुर मन दा हींग इच्छा उत्पन्न आगित, आंदुर मिलाप इन तम्बु उन क्याल्सा माळली अदिक अदुर सप्पा स्यावा अदिक पवित्र कपळागोळ्द माळोर साटी यहोवा अन भेंट तरली हतदुर.
EXO 35:22 येन आर्तेर, येन मंळसागोळ, यास मुंदुर मन दा हींग इच्छा उत्पन्न आगित आंदुर सप्पा कुत्या दाकळोद हार, कीव दाकळव नथनी, ऊंगरा, अदिक बांगळा व्हान्ना अन ईसरा तरली हतदुर, ईत्ता प्रकार देल यास मंळसा यहोवा अन साटी व्हान्ना अन भेंट इन कोळावाळेर ईरोर आंदुर सप्पा मुंदुर अवरी तंदुर.
EXO 35:23 अदिक याता याता मंळसा अन हात्ती नीळा, जांभळा या क्याचांद रंग इन कपळा, या सुक्ष्म सन इन कपळा, या मर्री इन चुट्टी, या क्याचांद रंग देल रंगकु म्यांडागोळ्द तोगुल, या सूइसगोळ्द तोगुल ईरव आंदुर अवरी तंदुर.
EXO 35:24 बाक याट बेळ्ली, या पीतळा अन भेंट इन कोळावाळेर ईरोर आंदुर यहोवा अन साटी ईत्ता भेंट तंदुर; अदिक यार यार हात्ती स्यावा अन यातोदारा क्याल्सा अन साटी बबूल इन हुळ्ली ईरोद आंदुर अदरी तंदुर.
EXO 35:25 अदिक यास आर्तेर मन दा बुद्धि इन ऊजुळ ईरोद आंदुर तान कय देल लूला कातुस कातुसकु नीळा, जांभळा अदिक क्याचांद रंग इन, अदिक सुक्ष्म सन इन कातुस्द लूला अक तंदुर.
EXO 35:26 यास आर्तेर मन दा हींग बुद्धि इन ऊजुळ ईरोद आंदुर मर्री इन चुट्टी भी कातुसदुर.
EXO 35:27 अदिक प्रधान लॉकुर एपोद अदिक चपरास इन साटी सुलैमानी मणि, अदिक जळुसोर साटी मणि,
EXO 35:28 अदिक ऊजुळ कोळली अदिक अभिषेक अदिक धूप इन सुगन्धद्रव्य अदिक याण्णा तंदुर.
EXO 35:29 याता याता वस्तु उन माळोद आग्या यहोवा मूसा अन द्वारा कोटीदुन अदुर साटी जो येनारा जरूरी ईरोद, अदरी आ सप्पा मंळसागोळ अदिक आर्तेर तंदुर, यार मन दा हींग इच्छा उत्पन्न आगित. ईत्ता प्रकार देल इस्त्राएली यहोवा अन साटी तांद अच इच्छा देल भेंट तंदुर.
EXO 35:30 आग मूसा इस्त्राएलीगोळ से अंदुन, “केळी, यहोवा यहूदा अन गोत्रवाळेर बसलेल उक, जो ऊरी इनव पार अदिक हूर इन नातु हुन, हेसुर ताकोमकु कारस्यान;
EXO 35:31 अदिक आव आऊक परमेश्वर उन आत्मा देल हींग परिपुर्ण माळ्यान कि सप्पा प्रकार इन बनावट इन साटी आऊक ईत्ता बुद्धि, समझ, अदिक ग्यान सिक्याद
EXO 35:32 कि आव कारीगरी इन युक्तिगोळ तेगुकु व्हान्ना, बेळ्ली अदिक पीतळा दा,
EXO 35:33 अदिक जळुसोर साटी मणि कळदुर दा अदिक हुळ्ली मा नकाशा माळदुर दा, उलटा बुद्धि देल सप्पा प्रकार इन तेग्द बनावट दा क्याल्सा माळ सकुल.
EXO 35:34 बाक यहोवा आऊन मन दा दान इन गोत्रवाळेर अहीसामाक उन पार ओहोलीआब उन मन दा भी शिक्षा कोळोद शक्ति कोटान.
EXO 35:35 ई येढ्ढु मुंदुर मन इक यहोवा हींग बुद्धि देल परिपुर्ण माळ्यान कि आंदुर नकाशा तेगदुर दा अदिक गळुसावाळेर अदिक नीळा, जांभळा अदिक क्याचांद रंग इन सन इन कपळा दा कातुसावाळेर अदिक बुनाई माळावाळेर आगुल, उलटा सप्पा प्रकार इन बनावट दा, अदिक बुद्धि देल क्याल्सा तेगदुर दा सप्पा प्रकार इन क्याल्सा माळुल.
EXO 36:1 “बसलेल अदिक ओहोलीआब अदिक सप्पा बुध्दिमान यारी यहोवा हींग बुद्धि अदिक समझ कोटान कि आंदुर यहोवा अन सप्पा आग्यागोळ्द अनुसार पवित्रस्थान इन स्यावा अन साटी सप्पा प्रकार इन क्याल्सा माळोद जानसुल, आंदुर सप्पा ईद क्याल्सा माळुल.”
EXO 36:2 आग मूसा बसलेल अदिक ओहोलीआब अदिक सप्पा बुध्दिमानगोळी यार मन दा यहोवा बुद्धि इन ऊजुळ कोटीदुन, मतलब यार यार इक हात्ती बंदकु क्याल्सा माळोद उत्साह आगित आ सप्पा मुंदुरी कार्सुसदुन;
EXO 36:3 अदिक इस्त्राएली जो जो भेंट पवित्रस्थान इन स्यावा अन क्याल्सा अदिक अदुर बनुसोर साटी तंदीदुर, अवरी आ मंळसागोळ मूसा अन कय देल हुडु कोंडुर. आग भी लॉकुर रोज हुंजकुका आऊन हात्ती भेंट तान इच्छा देल तरतेला ईत्तुर;
EXO 36:4 अदिक यास बुध्दिमान पवित्रस्थान इन क्याल्सा माळतोगोर आंदुर सप्पा तान तान क्याल्सा बिटकु मूसा अन हात्ती बंदुर,
EXO 36:5 आंदुर मूसा से अंदुर, “याता क्याल्सा अक माळोद आग्या यहोवा कोटान अदुर साटी याट पायजे अदुर से यक्कुल आंदुर तंदार.”
EXO 36:6 आग मूसा पुरा छावनी दा ई आग्या अन प्रचार माळसुसदुन, “येन मंळसा, येन आर्तेर, यावारा पवित्रस्थान इन साटी मात्त भेंट तरबाळुल.” ईत्ता प्रकार देल लॉकुर मात्त भेंट तरोर से रोक्सकु आदुर;
EXO 36:7 यतिकी सप्पा क्याल्सा माळोर साटी याट सामान जरूरी ईरोद, अदुर से यक्कुल माळावाळेर हात्ती होटबंदीत.
EXO 36:8 क्याल्सा माळावाळेर याट बुध्दिमान ईरोर आंदुर निवास इन साटी वाट्सद सुक्ष्म सनी इन कपळा अन, अदिक नीळा, जांभळा अदिक क्याचांद रंग इन सन इन कपळा अन हत्त पळदागोळी कळुस्द करूबगोळ सहित माळदुर.
EXO 36:9 ऊंद ऊंद पळदा अन लंबाई अठ्ठावीस कय अदिक चौळाई नाक कय इन आत; सप्पा पळदागोळ ऊंदा नाप इनव बन्सदव.
EXO 36:10 आव अईद पळदागोळ आबुर दाबुर से जोळ्सदुन, अदिक मात्त दुसरा अईद पळदागोळ भी आबुर दाबुर से जोळ्स बुट्टुन.
EXO 36:11 अदिक यल ई पळदागोळ जोळ्सकु आदव अल इन येढ्ढु क्वाना मा आव नीळा नीळा फन्दागोळ हचदुन.
EXO 36:12 आव येढ्ढु क्वाना दा पचास पचास फन्दागोळ ईत्ता प्रकार देल हचदुन कि अव आबुर दाबुर मुंद ईरव.
EXO 36:13 अदिक आव व्हान्ना अन पचास आकळागोळ बनुसदुन, अदिक अऊर द्वारा पळदागोळी आबुर दाबुर से हींग जोळ्सदुन कि निवास मिलुसकु ऊंद आगेत.
EXO 36:14 बाक निवास इन म्याकुच इन तम्बु उन म्याकुच होचोर साटी आव मर्री इन चुट्टी इन हनुन पळदागोळ बनुसदुन.
EXO 36:15 ऊंद ऊंद पळदा अन लंबाई तीस कय अदिक चौळाई नाक कय इन आत; अदिक हनुन पळदागोळ ऊंदा नाप इनव ईरव.
EXO 36:16 ईऊर दा टु आव अईद पळदागोळ अलग अदिक आर पळदागोळ अलग जोळ्सदुन.
EXO 36:17 अदिक यल येढ्ढु जोळ्सकु आदव अल इन क्वाना दा आव पचास पचास फन्दागोळ हचदुन.
EXO 36:18 अदिक आव तम्बु उन जोळसोर साटी पीतळा अन पचास आकळागोळ भी बनुसदुन यदुर देल अव ऊंद आगेगुल.
EXO 36:19 अदिक आव तम्बु उन साटी क्याचांद रंग देल रंगकु म्यांडागोळ्द तोगुल इन ऊंद ओळनी अदिक अदुर म्याकुच इन साटी सूइसगोळ तोगुल इन भी ऊंद ओळनी बनुसदुन.
EXO 36:20 बाक आव निवास इन साटी बबूल इन हुळ्ली इन तखतगोळी निदुरकु ईरोर साटी बनुसदुन.
EXO 36:21 ऊंद ऊंद पाटीगोळ्द लंबाई हत्त कय अदिक चौळाई दिळ कय इन आत.
EXO 36:22 निवास इन सप्पा तखतगोळी आव ईत्ता प्रकार देल बनुसदुन, ऊंद ऊंद तखत दा आबुर दाबुर से जोळ्सकु येढ्ढ येढ्ढ चुलीगोळ बन्सदव.
EXO 36:23 आव निवास इन साटी तखतगोळी ईत्ता प्रकार देल बनुसदुन कि दक्षिण दी ईप्पत तखतगोळ हतुल;
EXO 36:24 अदिक ई ईप्पत इन ईप्पत तखतगोळ्द ल्यालमा बेळ्ली नव च्यालीस कुर्चीगोळ, मतलब ऊंद ऊंद तखत इन ल्यालमा अदुर येढ्ढ चुलीगोळ साटी आव येढ्ढ कुर्चीगोळ बनुसदुन.
EXO 36:25 अदिक निवास इन दुसरा दी, मतलब उत्तर दीकळोद साटी भी आव ईप्पत तखतगोळ बनुसदुन;
EXO 36:26 अदिक ईऊर साटी भी आव बेळ्ली इन च्यालीस कुर्चीगोळ, मतलब ऊंद ऊंद पाटीगोळ ल्यालमा येढ्ढ येढ्ढ कुर्चीगोळ बनुसदुन.
EXO 36:27 अदिक निवास इन हींदळोद भाग दी, मतलब पश्चिम दीकळोद साटी आव आर तखतगोळ बनुसदुन.
EXO 36:28 अदिक हींदळोद भाग दा निवास इन क्वाना अन साटी आव येढ्ढ तखतगोळ बनुसदुन.
EXO 36:29 अव ल्यालमा टु येढ्ढ येढ्ढ भाग इनव बन्सदव, अदिक येढ्ढु भाग म्याकळव सिरा ताका ऊंद ऊंद कळा दा मिलुसकु आदव; आव आ येढ्ढु पाटीगोळ्द आकार हींग अच बनुसदुन.
EXO 36:30 ईत्ता प्रकार देल येठ्ठ तखतगोळ आदव, अदिक अऊर्द बेळ्ली इन सॉळा कुर्चीगोळ आदव; मतलब ऊंद ऊंद तखतगोळ ल्यालमा येढ्ढ येढ्ढ कुर्चीगोळ आदव.
EXO 36:31 बाक आव बबूल इन हुळ्ली इन बेंडगोळ बनुसदुन, मतलब निवास इन ऊंद दीकळोद तखतगोळ साटी अईद बेंडगोळ,
EXO 36:32 अदिक निवास इन दुसरा दीकळोद तखतगोळ साटी अईद बेंडगोळ, अदिक निवास इन जो किनारा पश्चिम दी हींदळा भाग दा ईरोद अदुर साटी भी अईद बेंडगोळ बनुसदुन.
EXO 36:33 अदिक आव बीच इन बेंड इक तखतगोळ बीच दा तम्बु उन ऊंद सिरा से दुसरा सिरा ताका पोहचुसोर साटी बनुसदुन.
EXO 36:34 अदिक तखतगोळी आव व्हान्ना देल मळुसदुन, अदिक बेंडगोळ्द मान्ना अन क्याल्सा कोळावाळा कळागोळी व्हान्ना नव बनुसदुन, अदिक बेंडगोळी भी व्हान्ना देल मळुसदुन.
EXO 36:35 बाक आव नीळा, जांभळा अदिक क्याचांद रंग इन कपळा अन, अदिक सुक्ष्म सन इन कपळा अन बीच इन पळदा बनुसदुन; अद कळाई इन क्याल्सा माळ्द करूबगोळ्द सांगुळ बनुस्त.
EXO 36:36 आव अदुर साटी बबूल इन नाक खम्बा बनुसदुन, अदिक अवरी व्हान्ना देल मळुसदुन; अऊर हुकगोळ व्हान्ना नव बन्सदव, अदिक आव अऊर साटी बेळ्ली नव नाक कुर्चीगोळ बनुसदुन.
EXO 36:37 आव तम्बु उन दरवाजा अन साटी भी नीळा, जांभळा अदिक क्याचांद रंग इन सन इन कपळा अन, अदिक सुक्ष्म सनी इन कपळा अन कढ़ाई इन क्याल्सा माळ्द पळदा बनुसदुन;
EXO 36:38 अदिक आव हुकगोळ समेत अदुर्द अईद खम्बा भी बनुसदुन, अदिक अऊर सिरागोळ अदिक जोळसोद छळीगोळी व्हान्ना देल मळुसदुन, अदिक अऊर अईद कुर्चीगोळ पीतळा अन बनुसदुन.
EXO 37:1 बाक बसलेल बबूल इन हुळ्ली इन सन्दुक बनुसदुन; अदुर्द लंबाई येढ्ढवार कय, चौळाई दिळ कय, अदिक ऊचाई दिळ कय इन ईरोद.
EXO 37:2 आव अदरी बुळ्क व्हार्या शुद्ध व्हान्ना देल मळुसदुन, अदिक अदुर नाकु दी व्हान्ना अन बाड़ बनुसुदुन.
EXO 37:3 अदिक अदुर नाकु कालगोळ मा हचली आव व्हान्ना नव नाक कळागोळ माळदुन, येढ्ढ कळा ऊंद दी अदिक येढ्ढ कळा दुसरा दी हतदव.
EXO 37:4 बाक आव बबूल इन डण्डागोळ माळदुन, अदिक अवरी व्हान्ना देल मळुसदुन,
EXO 37:5 अदिक अवरी सन्दुक इन येढ्ढु दीकळोद कळागोळ दा हाकदुन कि अऊर सहारा देल सन्दुक नेगुकु आगुल.
EXO 37:6 बाक आव चोखा व्हान्ना देल प्रायश्चित इन झाकनी माळदुन; अदुर लंबाई येढ्ढवार कय अदिक चौळाई दिळ कय इन ईरोद.
EXO 37:7 अदिक आव व्हान्ना मळुसकु येढ्ढ करूब प्रायश्चित इन झाकनी इन येढ्ढु क्वाना मा बनुसदुन;
EXO 37:8 ऊंद करूब ऊंद क्वाना मा, अदिक दुसरा करूब दुसरा क्वाना मा बनुस्त; आव अवरी प्रायश्चित इन झाकनी इन सांगुळ ऊंदा तुकळा अन येढ्ढु क्वाना मा बनुसदुन.
EXO 37:9 अदिक करूबगोळ्द पंख म्याकुच टु फैलुसदुर घाई बन्सदव, अदिक आ पंखगोळ देल प्रायश्चित इन झाकनी मुचकु बनुस्त, अदिक अऊर बाय आमने सामने अदिक प्रायश्चित इन झाकनी दी माळ्द बन्सदव.
EXO 37:10 बाक आव बबूल इन हुळ्ली इन मेज इक माळदुन; अदुर लंबाई येढ्ढ कय, चौळाई ऊंद कय, अदिक ऊचाई दिळ कय इन ईरोद;
EXO 37:11 अदिक आव अदरी शुद्ध व्हान्ना देल मळुसदुन, अदिक अदुर दा नाकु दी व्हान्ना अन ऊंद बाड़ माळदुन.
EXO 37:12 अदिक आव अदुर साटी नाक बेळ्ल चौळा ऊंद चौखट, अदिक ई पटरी इन साटी नाकु दी व्हान्ना अन ऊंद बाड़ माळदुन.
EXO 37:13 आव मेज इन साटी व्हान्ना अन नाक कळागोळ माळकु आ नाकु क्वानागोळ दा हचदुन, जो अऊर नाकु कालगोळ मा ईरव.
EXO 37:14 अव कळागोळ चौखट इन हात्ती मेज नेगव डण्डागोळ्द खानागोळ क्याल्सा कोळली बन्सदव.
EXO 37:15 आव मेज नेगोर साटी डण्डागोळी बबूल इन हुळ्ली इन बनुसदुन अदिक व्हान्ना देल मळुसदुन.
EXO 37:16 अदिक आव मेज माकळोद सामान मतलब परात, धूपदानी, कटोरागोळ, अदिक रीचुसव बरतन सप्पा शुद्ध व्हान्ना देल बनुसदुन.
EXO 37:17 बाक आव शुद्ध व्हान्ना गढ़ इन पाया अदिक डण्डी समेत दीवट इक माळदुन; अदुर पुष्पकोष, गाठ, अदिक फूल सप्पा ऊंदा तुकळा नव बन्सदव.
EXO 37:18 अदिक दीवट दा टु होळ्द आर डगालगोळ बनुसदव; मुर डगालगोळ अदुर ऊंद दी टु अदिक मुर डगालगोळ अदुर दुसरा दी टु होटकु बन्सदव.
EXO 37:19 ऊंद ऊंद डगाली दा बदाम इन फूल इन घाई मुर मुर पुष्पकोष, ऊंद ऊंद गाठ, अदिक ऊंद ऊंद फूल बन्सत; दीवट दा टु होळ्द आ आर डगालगोळ्द ईदा आकार आत.
EXO 37:20 अदिक दीवट इन डंडा दा बदाम इन फूल इन घाई तान तान गाठ अदिक फूल समेत नाक पुष्पकोष बन्सदव.
EXO 37:21 अदिक दीवट दा टु होळ्द आर डगालगोळ दा टु येढ्ढ येढ्ढ डगालगोळ्द ल्यालमा ऊंद ऊंद गाठ दीवट इन सांगुळ ऊंदा तुकळा अन बन्सदव.
EXO 37:22 गाठगोळ अदिक डगालगोळ सप्पा दीवट इन सांगुळ ऊंदा तुकळा अन बन्सदव; पुरा दीवट नळ्सद शुद्ध व्हान्ना अन अदिक ऊंदा तुकळा अन बन्सत.
EXO 37:23 अदिक आव दीवट इन येळ दिंग्या अदिक थाली अदिक गुलदान शुद्ध व्हान्ना अन माळदुन.
EXO 37:24 आव सप्पा सामान समेत दीवट इक लगभग चौतीस किलो तिमुर्द व्हान्ना अन माळदुन.
EXO 37:25 बाक आव बबूल इन हुळ्ली इन धूपवेदी भी माळदुन; अदुर लंबाई ऊंद कय अदिक चौळाई ऊंद कय इन ईरोद; अद चौकोन बन्सत, अदिक अदुर ऊचाई येढ्ढ कय इन ईरोद; अदिक अदुर सींग ऊंद अच तुकळा नव माळकु ईरव.
EXO 37:26 म्याकळव पल्लागोळ अदिक नाकु दीकळव बाजुगोळ अदिक सींगगोळ समेत आव आ वेदी इक शुद्ध व्हान्ना देल मळुसदुन; अदिक अदुर नाकु दी व्हान्ना अन ऊंद बाड़ माळदुन,
EXO 37:27 अदिक आ बाड़ इन ल्यालमा अदुर येढ्ढु पल्लागोळ मा आव व्हान्ना नव येढ्ढ कळागोळ बनुसदुन, जो अदुर नेगव डण्डागोळ्द खाचागोळ क्याल्सा कोळुल.
EXO 37:28 अदिक डण्डागोळी आव बबूल इन हुळ्ली इन बनुसदुन अदिक व्हान्ना देल मळुसदुन.
EXO 37:29 आव अभिषेक इन पवित्र याण्णा अदिक सुगन्धद्रव्य अन धूप ईदा रिति इन अनुसार माळदुन.
EXO 38:1 बाक आव बबूल इन हुळ्ली इन होमबली वेदी भी बनुसदुन; अदुर लंबाई अईद कय अदिक चौळाई अईद कय इन ईरोद; ईत्ता प्रकार देल अद चौकोन बनुस्त, अदिक ऊचाई मुर कय इन ईरोद.
EXO 38:2 आव अदुर नाकु क्वाना मा अदुर नाक सींग बनुसदुन, अव अदुर सांगुळ बिना जोळ इन बनुसदव; अदिक आव अदरी पीतळा देल मळुसदुन.
EXO 38:3 अदिक आव वेदी इन सप्पा सामान, मतलब अदुर गळग्यागोळ, पावळागोळ, वाटीगोळ, काटागोळ अदिक करचीगोळी बनुसदुन. अदुर सप्पा सामान आव पीतळा अन बनुसदुन.
EXO 38:4 अदिक वेदी इन साटी अदुर नाकु दीकळोद कंगनी इन ल्यालमा आव पीतळा अन जाली इन ऊंद झंझरी बनुसदुन, अद ल्यालमा टु वेदी इन ऊचाई इन बीच ताका पोहचुस्त.
EXO 38:5 आव पीतळा अन झंझरी इन नाकु क्वाना अन साटी नाक कळागोळ घळुसदुन, जो डण्डागोळ्द खानागोळ क्याल्सा कोळुल.
EXO 38:6 बाक आव डण्डागोळी बबूल इन हुळ्ली इन बनुसदुन अदिक पीतळा देल मळुसदुन.
EXO 38:7 आग आव डण्डागोळी वेदी इन किनारा अन कळागोळ दा वेदी इन नेगोर साटी हाक बुट्टुन, वेदी इक आव तखतगोळ देल पोकर बनुसदुन.
EXO 38:8 आव गंगार अदिक अदुर्द पाया येढ्ढु पीतळ इन माळदुन, ईद मिलाप इन तम्बु उन द्वार मा स्यावा माळावाळेर आर्तेर्द पीतळ इन आरसा देल माळकु आदव.
EXO 38:9 बाक आव आंगुळ बनुसदुन; अदिक दक्षिण दीकळोद साटी आंगुळ इन पळदागोळ सुक्ष्म सन इन कपळा नव ईरव, अदिक सप्पा मिलुसकु सौ कय ऊद्द ईरव;
EXO 38:10 अऊर साटी ईप्पत खम्बागोळ, अदिक ईऊर्द पीतळा अन ईप्पत कुर्चीगोळ बनुसदव; अदिक खम्बागोळ्द घुंडीगोळ अदिक जोळसोद कळीगोळ बेळ्ली नव बनुसदव.
EXO 38:11 अदिक उत्तर दीकळोद साटी भी सौ कय ऊद्द पळदागोळ बनुसदव; अदिक अऊर साटी ईप्पत खम्बागोळ, अदिक ईऊर्द पीतळा अन ईप्पत अच कुर्चीगोळ बनुसदव, अदिक खम्बा नव घुंडीगोळ अदिक जोळसोद कळी बेळ्ली नव बनुसदव.
EXO 38:12 अदिक पश्चिम दीकळोद साटी सप्पा पळदागोळ मिलुसकु पचास कय इन ईरव; अऊर साटी हत्त खम्बागोळ अदिक हत्त अच अऊर कुर्चीगोळ ईरव, अदिक खम्बागोळ्द घुंडीगोळ अदिक जोळसोद छळीगोळ बेळ्ली नव ईरव.
EXO 38:13 अदिक पूर्व दी भी अव पचास कय इनव ईरव.
EXO 38:14 आंगुळ इन दरवाजा अन ऊंद दिकळोद साटी पंदरा कय इन पळदागोळ बन्सदव, अदिक अऊर साटी मुर खम्बा अदिक मुर कुर्चीगोळ ईरव.
EXO 38:15 अदिक आंगुळ इन दरवाजा अन दुसरा दी भी हांगा बनुसीत; अदिक आंगुळ इन दरवाजा अन ईत्त अदिक आत्त पंदरा पंदरा कय इन पळदा बन्सकु ईरव; अदिक अऊर साटी मुर मुर खम्बा, अदिक मुर मुर कुर्चीगोळ भी ईरव.
EXO 38:16 आंगुळ इन नाकु दी सप्पा पळदा सुक्ष्म सन इन कपळा अन बन्सकु ईरव.
EXO 38:17 अदिक खम्बागोळ्द कुर्चीगोळ पीतळा अन अदिक घुंडीगोळ अदिक छळी बेळ्ली इन बनुसदव, अदिक अऊर क्वाना बेळ्ली देल मळुसकु आदव, अदिक आंगुळ इन सप्पा खम्बा बेळ्ली इन छळी देल जोळ्सकु आगीदव.
EXO 38:18 आंगुळ इन दरवाजा अन पळदागोळ मा बेल बुटा अन क्याल्सा माळकु आगित, अदिक अव नीळा, जांभळा अदिक क्याचांद रंग इन सन इन कपळा अन, अदिक सुक्ष्म सनी इन कपळा अन बन्सकु आगीदव; अदिक अदुर लम्बाई ईप्पत कय इन ईरोद, अदिक अदुर ऊचाई आंगुळ इन कनात इन चौळाई इन घाई अईद कय इन बनुस्त.
EXO 38:19 अदिक अऊर साटी नाक खम्बा अदिक खम्बागोळ्द नाक अच कुर्चीगोळ पीतळा अन बनुसदव, अऊर घुंडीगोळ बेळ्ली नव बनुसदव, अदिक अऊर क्वानागोळ बेळ्ली देल मळुसकु आदव, अदिक अऊर पट्टीगोळ बेळ्ली नव बनुसदव.
EXO 38:20 अदिक निवास अदिक आंगुळ इन नाकु दिकळोद सप्पा खुटागोळ पीतळा अन बन्सकु ईरव.
EXO 38:21 गवाही इन‍ चिट्टी इन निवास इन सामान जो लेवीगोळ्द स्यावा कार्य अन साटी बनुस्त, अदिक यदुर गिनती हारून याजक उन पार ईतामार उन द्वारा मूसा अन कहना देल आगित, अदुर विवरण ईद आद.
EXO 38:22 याता याता वस्तु उन माळोद आग्या यहोवा मूसा अक कोटीदुन अदरी यहूदा अन गोत्र वाळा बसलेल, जो हूर उन नातु अदिक ऊरी इन पार ईरोन, माळ बुट्टुन.
EXO 38:23 अदिक आऊन सांगुळ दान इन गोत्र वाळा, अहीसामाक उन पार, ओहोलीआब ईरोन, जो नकाशी माळली अदिक कळुसावाळा अदिक नीळा, जांभळा अदिक क्याचांद रंग इन अदिक सुक्ष्म सन इन कपळा दा कढ़ाई माळावाळा निपुन कारीगर ईरोन.
EXO 38:24 पवित्रस्थान इन सप्पा क्याल्सा दा जो भेंट इन व्हान्ना हत्त अद पवित्रस्थान इन शेकेल इन हिसाब देल उंत्तीस किक्कार अदिक येळ सौ तीस शेकेल ईरोद, मतलब ऊंद हजार येढ्ढ किलो.
EXO 38:25 अदिक मंडली इन आळ्दकु लॉकुर्द भेंट इन बेळ्ली पवित्रस्थान इन शेकेल इन हिसाब देल सौ किक्कार अदिक सतरा सौ पच्यात्तर शेकेल मतलब मुर हजार नाक सौ तीस किलो ईरोद.
EXO 38:26 मतलब यास ईप्पत साल इनोर अदिक अदुर से यक्कुल उमर इनोर आळ्दकु आगीदुर, आंदुर आर लाख मुर हजार अईद सौ पचास मंळसा ईरोर, अदिक ऊंद ऊंद मुंदुर दी टु पवित्रस्थान इन शेकेल इन अनुसार आर्धा शेकेल, जो ऊंद बेका लगभग आर ग्राम सिक्त.
EXO 38:27 अदिक अद सौ किक्कार बेळ्ली पवित्रस्थान अदिक बीच इन पळदा येढ्ढु कुर्चीगोळ्द ढाल्सदुर दा हत्तेत; सौ किक्कार देल सौ कुर्चीगोळ बनुसदव, ऊंद ऊंद कुर्ची ऊंद किक्कार इन बनुस्त.
EXO 38:28 अदिक सतरा सौ पच्यात्तर शेकेल जो ऊळदोत अऊर देल खम्बागोळ्द घुंडीगोळ बन्सकु आत, अदिक खम्बागोळ्द टोकगोळ मळुसकु आदव, अदिक अऊर छळीगोळ भी बन्सकु आदव.
EXO 38:29 अदिक भेंट इन पितळा सत्तर किक्कार अदिक येढ्ढ हजार नाक सौ शेकेल ईरोद;
EXO 38:30 इदुर देल मिलाप इन तम्बु उन दरवाजा अन कुर्चीगोळ, अदिक पितळा अन वेदी, पितळा अन झंझरी, अदिक वेदी इन सप्पा सामान;
EXO 38:31 अदिक आंगुळ इन नाकु दिकळव कुर्चीगोळ, अदिक अदुर दरवाजा अन कुर्चीगोळ, अदिक निवास, अदिक आंगुळ इन नाकु दिकळव खुटागोळ भी बन्सकु आदव.
EXO 39:1 बाक आंदुर नीळा, जांभळा अदिक क्याचांद रंग इन कळुस्द कपळा पवित्रस्थान इन स्यावा अन साटी, अदिक हारून उन साटी भी पवित्र कपळा माळदुर; याता प्रकार देल यहोवा मूसा अक आग्या कोटीदुन.
EXO 39:2 आव विशेष प्रकार इक कपळा अन्द व्हान्ना, अदिक नीळा, जांभळा अदिक क्याचांद रंग इन कपळा अन, अदिक सुक्ष्म सन इन कपळा अन बनुसदुन.
EXO 39:3 अदिक आंदुर व्हान्ना पीठ्स पीठ्सकु अदुर्द पतरी माळदुर, बाक पतरीगोळी कडु कडुकु तार माळदुर, अदिक कुशल कारागीरगोळ आ तारगोळी नीळा, जांभळा अदिक क्याचांद रंग इन कपळा दा, अदिक सुक्ष्म सन इन कपळा दा कळाई इन बनावट देल मिलुस बुट्टुर.
EXO 39:4 एपोद इन जोळ्सली आंदुर अदुर बाक्कागोळ माकळोद बंधन माळदुर, अद तान येढ्ढु क्वानागोळ से जोळ्सकु आत.
EXO 39:5 अदिक अदुर कसुसोर साटी जो काळ्सद पट्टा अदुर मा बनुस्त, अद अदुर सांगुळ बिना जोळ इन, अदिक अदुर्दा बनावट इन अनुसार, मतलब व्हान्ना अदिक नीळा, जांभळा अदिक क्याचांद रंग इन कपळा अन, अदिक सुक्ष्म सन इन कपळा अन बनुस्त; याता प्रकार देल यहोवा मूसा अक आग्या कोटीदुन.
EXO 39:6 आंदुर सुलैमानी मणि कडुकु अऊर दा इस्त्राएल इन हन्नेळ पारगोळ हेसुर, ह्यांग छापा अगुळकु आगतद हांगा अगुळदुर, अदिक व्हान्ना नव खानगोळ दा जळुस बुट्टुर.
EXO 39:7 अदिक आव आंदरी एपोद इन बाक्का अन बन्धनगोळ मा हचदुन, यदुर देल इस्त्राएलीगोळ लॉकुर साटी याद माळसुसावाळा मणि ठहरूसुल; याता प्रकार देल यहोवा मूसा अक आग्या कोटीदुन.
EXO 39:8 आव सीनाबन्द इक एपोद इन घाई व्हान्ना अन, अदिक नीळा, जांभळा अदिक क्याचांद रंग इन कपळा अन, अदिक सुक्ष्म सन इन कपळा दा बेल बुटा अन क्याल्सा माळदुन.
EXO 39:9 सीनाबन्द चौकोन बनुस्त; अदिक आंदुर अदरी दोहरा माळदुर, अदिक अद दोहरा आगकु ऊंद बित्ता ऊद्द अदिक ऊंद बित्ता चौळा आत.
EXO 39:10 अदिक आंदुर अदुर दा नाक लाईन दा मणि हाकदुर. पयला लाईन दा माणिक्य; पुखराज, अदिक लालड़ी हाकदुर;
EXO 39:11 अदिक दुसरा लाईन दा मरकत, नीलमणि, अदिक हीरा;
EXO 39:12 अदिक तीसरा लाईन दा लशम, सुर्यकांत, अदिक नीलम;
EXO 39:13 अदिक चौथा लाईन दा फिरोजा, सुलैमानी मणी, अदिक यशब हाकदुर; ई सप्पा अलग अलग सीना अन खानगोळ दा हाक्कु आदव.
EXO 39:14 अदिक ई मणि इस्त्राएल इन पारगोळ्द हेसुरगोळ गिनती इन अनुसार हन्नेळ ईरव; हन्नेळ गोत्रगोळ दा टु ऊंद ऊंद हेसुर ह्यांग छापा अगुळकु आगतद हांगा अगुळकु आत.
EXO 39:15 अदिक आंदुर सीनाबन्द मा डोरीगोळ घाई गुथुस्द खरा व्हान्ना अन जंजीर माळकु हचदुर;
EXO 39:16 बाक आंदुर व्हान्ना नव येढ्ढ खाना, अदिक व्हान्ना अन येढ्ढ कळीगोळ माळकु येढ्ढु कळीगोळी सीनाबन्द इन येढ्ढु क्वाना मा हचदुर;
EXO 39:17 आग आंदुर व्हान्ना नव येढ्ढु गुथुस्द जंजीरगोळी सीनाबन्द इन क्वाना माकळोद येढ्ढु कळीगोळ दा हचदुर.
EXO 39:18 अदिक गुथुस्द येढ्ढु जंजीरगोळ्द मिक्द येढ्ढु क्वानागोळी आंदुर येढ्ढु खानागोळ दा हाक्कु, विशेष कपळा अन्द मुंद येढ्ढु बाक्का अन बन्धनगोळ मा हचदुर.
EXO 39:19 आग आंदुर व्हान्ना अन अदिक येढ्ढ कळीगोळ माळकु सीनाबन्द इन येढ्ढु क्वाना मा अदुर आ कोर मा, जो एपोद इन बुळ्क इन भाग दा ईरोद, हचदुर.
EXO 39:20 अदिक आंदुर व्हान्ना अन मात्त येढ्ढ कळीगोळ भी माळकु एपोद इन येढ्ढु बाक्का अन बन्धनगोळ मा ल्यालमा टु अदुर मुंद, अदिक जोळ इन हात्ती विशेष कपळा अन्द काळुस्द पट्टा मा म्याकुच हचदुर.
EXO 39:21 आग आंदुर सीनाबन्द इक अदुर कळीगोळ द्वारा एपोद इन कळीगोळ दा नीळा फिता देल हींग कटदुर कि अद एपोद इन काळुस्द पट्टा अन म्याकुच ईरूल, अदिक चपरास एपोद देल अलग आग सकबाळुल; ह्यांग यहोवा मूसा अक आग्या कोटीदुन.
EXO 39:22 बाक एपोद इन कुर्ता पुरा नीळा रंग इन माळकु आत.
EXO 39:23 अदिक अदुर बनावट हींग आत कि अदुर न्याड्या गोठ इन गड्डा अन घाई ऊंद गड्डा बनुस्त, अदिक गड्डा अन नाकु दी ऊंद कोर बनुस्त कि अद हरूबाळुल.
EXO 39:24 आंदुर अदुर्द ल्यालमा अन घ्यारा दा नीळा, जांभळा अदिक क्याचांद रंग इन कपळा अन अनार माळदुर.
EXO 39:25 आंदुर शुद्ध व्हान्ना अन घंटीगोळ भी माळकु बागा अन ल्यालमा अन घ्यारा अन नाकु दी अनारगोळ्द बीचोबीच हचदुर;
EXO 39:26 मतलब बागा अन ल्यालमागोळ्द घ्यारा अन नाकु दी ऊंद व्हान्ना अन घंटी, अदिक ऊंद अनार, बाक ऊंद व्हान्ना अन घंटी, अदिक ऊंद अनार हचकु आत कि अवरी हाक्कु स्यावा टहल माळुल; ह्यांग यहोवा मूसा अक आग्या कोटीदुन.
EXO 39:27 बाक आंदुर हारून, अदिक आऊन पारगोळ साटी बनुस्द सुक्ष्म सन इन कपळा अन अंगरखा,
EXO 39:28 अदिक सुक्ष्म सनी इन कपळा अन पगळी, अदिक सुक्ष्म सन इन कपळा अन सुंदर टोपीगोळ; अदिक सुक्ष्म सनी इन कपळा अन जंग्यागोळ,
EXO 39:29 अदिक सुक्ष्म सन इन कपळा अन अदिक नीळा, जांभळा अदिक क्याचांद रंग इन कढ़ाई इन क्याल्सा माळ्द पगळी; ई सप्पा अक याता प्रकार देल यहोवा मूसा अक आग्या कोटीदुन हांगा माळदुन.
EXO 39:30 बाक आंदुर पवित्र मुकुट इन पट्टी शुद्ध व्हान्ना अन माळदुर; अदिक ह्यांग छापा दा हांगा अदुर दा ई अक्षर अगुळकु आदव, मतलब “यहोवा अन साटी पवित्र.”
EXO 39:31 अदिक आंदुर अदुर दा नीळा जाळी हचदुर, यदुर देल अद म्याकुच पगळी मा ईरूल, याता प्रकार देल यहोवा मूसा अक आग्या कोटीदुन.
EXO 39:32 ईत्ता प्रकार देल मिलाप इन तम्बु उन निवास इन सप्पा क्याल्सा खतम आदव, अदिक याता याता क्याल्सा अन आग्या यहोवा मूसा अक कोटीदुन, इस्त्राएलीगोळ अदुर्दा अनुसार माळदुर.
EXO 39:33 आग आंदुर निवास इक मूसा अन हात्ती तंदुर: मतलब घुंडीगोळ, पाटीगोळ, बेंडगोळ, खम्बागोळ, कुर्चीगोळ आदि सप्पा सामान समेत तम्बु;
EXO 39:34 अदिक क्याचांद रंग देल रंगुस्द म्यांडागोळ्द तोगुल इन होदोद, अदिक सूइसगोळ तोगुल इन होदोद, अदिक न्याड्या अन पळदा;
EXO 39:35 डंडा सहित साक्षीपत्र इन सन्दुक, अदिक प्रायश्चित इन झाकनी;
EXO 39:36 सप्पा सामान समेत मेज, अदिक भेंट इन रोट्टीगोळ;
EXO 39:37 सप्पा सामान सहित दिवट, अदिक अदुर सजावट इन दिंग्या, अदिक ऊजुळ कोळोर साटी याण्णा;
EXO 39:38 व्हान्ना अन वेदी, अदिक अभिषेक इन याण्णा; अदिक सुगन्धित धूप, अदिक तम्बु उन दरवाजा अन पळदा;
EXO 39:39 पीतळ इन झंझरी, डण्डागोळ अदिक सप्पा सामान समेत पीतळ इन वेदी; अदिक पाया सांगुळ गंगार;
EXO 39:40 खम्बागोळ अदिक कुर्चीगोळ समेत आंगुळ इन पळदागोळ, अदिक आंगुळ इन दरवाजा अन पळदा, अदिक डोरीगोळ, अदिक खुटागोळ, अदिक मिलाप इन तम्बु उन निवास इन स्यावा अन सप्पा सामान;
EXO 39:41 पवित्रस्थान दा स्यावा टहल माळोर साटी बेल बुटा काळुस्द कपळा, अदिक हारून याजक उन पवित्र कपळा, अदिक आऊन पारगोळ्द कपळा यवरी हाक्कु आंदरी याजक उन क्याल्सा माळोद ईरोद.
EXO 39:42 मतलब जो जो आग्या यहोवा मूसा अक कोटीदुन अऊर्दा अनुसार इस्त्राएलीगोळ सप्पा क्याल्सा माळदुर.
EXO 39:43 आग मूसा सप्पा क्याल्सा अन निरीक्षण माळकु नोळदुन कि आंदुर यहोवा अन आग्या अन अनुसार सप्पा येनारा माळदुर. अदिक मूसा आंदरी आशीर्वाद कोट्टुन.
EXO 40:1 बाक यहोवा मूसा से अंदुन,
EXO 40:2 “पयला तिंगुळ इन पयला दिन इक नी मिलाप इन तम्बु उन निवास इक निद्रुस बुळेत.
EXO 40:3 अदिक अदुर दा साक्षीपत्र अन सन्दुक इक ईटकु बीच इन पळदा देल व्हर्तुस बुळी.
EXO 40:4 अदिक मेज इक बुळ्क ओतकु जो येनारा अदुर मा सजुसोद आद अदरी सजुस बुळेत; आग दीवट इक बुळ्क ओतकु अदुर दिंग्यागोळी होताक बुळेत.
EXO 40:5 अदिक साक्षीपत्र अन सन्दुक इन मुंद व्हान्ना अन वेदी इक, जो धूप इन साटी आद अदरी ईटेत, अदिक निवास इन दरवाजा अन पळदा अक हच बुळेत.
EXO 40:6 अदिक मिलाप इन तम्बु उन निवास इन दरवाजा अन मुंद होमवेदी इक ईटेत.
EXO 40:7 अदिक मिलाप इन तम्बु अदिक वेदी इन न्याड्या हौदी इक ईटकु अदुर दा नीर तुमेत.
EXO 40:8 अदिक नाकु दिकळोद आंगुळ इन कनात इक निद्रुसेत, अदिक आ आंगुळ इन दरवाजा मा पळदा अक हिलगुस बुळेत.
EXO 40:9 अदिक अभिषेक इन याण्णा हुडुकु निवास इन अदिक जो येनारा अदुर दा ईत्तीत सप्पा येनारा अन अभिषेक माळेत, अदिक सप्पा सामान समेत अदरी पवित्र माळेत; आग अद पवित्र ठहरूसीत.
EXO 40:10 सप्पा सामान समेत होमबली वेदी इन अभिषेक माळकु अदरी पवित्र माळेत; आग अद परम पवित्र ठहरूसीत.
EXO 40:11 पाया समेत गंगार इन भी अभिषेक माळकु अदरी पवित्र माळेत.
EXO 40:12 आग हारून अदिक आऊन पारगोळी मिलाप इन तम्बु उन दरवाजा मा ओतकु नीर देल मय तोळसुसेत,
EXO 40:13 अदिक हारून उक पवित्र कपळा हाकसुसेत, अदिक आऊन अभिषेक माळकु आऊक पवित्र माळेत कि आव नान साटी याजक उन क्याल्सा माळुल.
EXO 40:14 अदिक आऊन पारगोळी ओतकु अंगरखा हाकसुसेत,
EXO 40:15 अदिक ह्यांग नी आंदुर आप्प उन अभिषेक माळ्या हांगा आंदुर्द भी अभिषेक माळेत कि आंदुर नान साटी याजक उन क्याल्सा माळुल; अदिक आंदुर अभिषेक आंदुर्द पीढ़ोन पीढ़ी अन साटी आंदुर्द हमेशा अन याजकपद इन चिन्ह ठहरूसीत.”
EXO 40:16 ईत्ता प्रकार देल मूसा, जो आग्या यहोवा आऊक कोटीदुन अदुर्दा अनुसार माळदुन.
EXO 40:17 अदिक दुसरा साल इन पयला तिंगुळ इन पयला दिशी निवास निद्रुसकु आत.
EXO 40:18 मूसा निवास इक निद्रुसुसदुन, अदिक अदुर कुर्चीगोळ हुळकु अदुर तखत हचकु अऊर दा बेंड हाकदुन, अदिक अदुर खम्बागोळी निद्रुसदुन;
EXO 40:19 अदिक आव निवास इन म्याकुच तम्बु उक फैलुसदुन, अदिक तम्बु उन म्याकुच आव ओढ़ना अक हचदुन; याता प्रकार देल यहोवा मूसा अक आग्या कोटीदुन.
EXO 40:20 अदिक आव साक्षीपत्र अक हुडुकु सन्दुक दा ईटदुन, अदिक सन्दुक दा डण्डागोळी हचकु अदुर म्याकुच प्रायश्चित इन झाकनी इक ईट कोट्टुन;
EXO 40:21 अदिक आव सन्दुक इक निवास दा पोहचुसदुन, अदिक बीच इन पळदा अक हिलगुसकु साक्षीपत्र अन सन्दुक इक अदुर बुळ्क माळदुन; याता प्रकार देल यहोवा मूसा अक आग्या कोटीदुन.
EXO 40:22 अदिक आव मिलाप इन तम्बु दा निवास इन उत्तर दिशा दी न्याड्या अन पळदा से व्हार्या मेज इक हचदुन,
EXO 40:23 अदिक अदुर मा आव यहोवा अन मुंद रोट्टी सजुसकु ईटदुन; याता प्रकार देल यहोवा मूसा अक आग्या कोटीदुन.
EXO 40:24 अदिक आव मिलाप इन तम्बु दा मेज इन मुंद निवास इन दक्षिण दिशा दी दीवट इक ईटदुन,
EXO 40:25 अदिक आव दिंग्यागोळी यहोवा अन मुंद होताक बुट्टुन; याता प्रकार देल यहोवा मूसा अक आग्या कोटीदुन.
EXO 40:26 अदिक आव मिलाप इन तम्बु दा न्याड्या अन पळदा अन मुंद व्हान्ना अन वेदी इक ईटदुन,
EXO 40:27 अदिक आव अदुर मा सुगन्धित धूप होताकदुन; याता प्रकार देल यहोवा मूसा अक आग्या कोटीदुन.
EXO 40:28 अदिक आव निवास इन दरवाजा मा पळदा अक हचदुन.
EXO 40:29 अदिक मिलाप इन तम्बु उन निवास इन दरवाजा मा होमवेदी इक ईटकु अदुर मा होमबलि अदिक अन्नबलि इक येर्सदुन; याता प्रकार देल यहोवा मूसा अक आग्या कोटीदुन.
EXO 40:30 अदिक आव मिलाप इन तम्बु अदिक वेदी इन न्याड्या गंगार इक ईटकु अदुर दा तोळोर साटी नीर हाकदुन.
EXO 40:31 अदिक मूसा, हारून अदिक आऊन पारगोळ अदुर दा तान तान कय काल तोळदुर;
EXO 40:32 अदिक याग याग आंदुर मिलाप इन तम्बु दा या वेदी इन हात्ती होगतोगोर आग आग आंदुर कय काल तोळु तोगोर; याता प्रकार देल यहोवा मूसा अक आग्या कोटीदुन.
EXO 40:33 अदिक आव निवास इन नाकु दी अदिक वेदी इन आसपास आंगुळ इन कनात इक निद्रुसुसदुन, अदिक आंगुळ इन दरवाजा अन पळदा अक हिलगुस बुट्टुन. ईत्ता प्रकार देल मूसा सप्पा क्याल्सा पुरा माळदुन.
EXO 40:34 आग बादल मिलाप इन तम्बु मा छासेत, अदिक यहोवा अन तेज निवास स्थान दा तुम्मेत.
EXO 40:35 अदिक बादल मिलाप इन तम्बु मा रूकसेत, अदिक यहोवा अन तेज निवास स्थान दा तुम्मेत, ई कारण मूसा अदुर दा प्रवेश माळ सकीदील.
EXO 40:36 इस्त्राएलीगोळ्द पुरा यात्रा दा हींग आगतोगोद, कि याग याग अद बादल निवास इन म्याकुच टु येळोद आग आग आंदुर अल टु नळोद चालु माळतोगोर;
EXO 40:37 अदिक अगर अद ईला येळतोगोद, रा याता दिशी ताका अद ईला येळतोगोद आ दिशी ताका आंदुर अल टु ईला नळुतोगोर.
EXO 40:38 इस्त्राएल इन लॉकुर इन पुरा यात्रा दा हागुल इक रा यहोवा अन बादल निवास मा, अदिक ईळ्लकी अदा बादल दा बेक्‍की आ सप्पा मुंदुरी कांळ्सकु बिळतोगोद.
LEV 1:1 आग यहोवा मूसा अक कारूकु भेटवाळा तम्बु दा टु आऊन से अंदुन,
LEV 1:2 इस्राएलिगोळ सांगुळ मातगोळ माळ अदिक आंदुर से ईद अन, याग नीम दा टु यावारा मंळसा यहोवा अन्‍द साटी बलिदान तरूल रा आव पालस्द पशु ईला रा म्यांडा मर्रगोळ दा टु उच तनकु येरसुल.
LEV 1:3 अगर आऊन चढ़ावा पालस्द पशु दा टु होमबली आगुल रा आव दोषरहित नर इक येरसुल. आव अदरी भेंटमाळोद तम्बू उन दरवाजा मा येरसुल कि अद खुद यहोवा अन्द मुंद ग्रहण लायक ठहरूसुल.
LEV 1:4 आव तान कय होमबली इन पशु उन ताल्ला मा ईटुल, अदिक अद आंदुर साटी प्रायश्चित माळोर साटी ग्रहण माळकु आदीत.
LEV 1:5 आग आव आ वासरू उक यहोवा अन्द मुंद बली येरसुल, अदिक हारून उन पार जो याजक आन आंदुर रकत इक हात्ती ओतकु आ वेदी इन नाकु दी सिपसुल जो भेंटमाळोद तम्बू उन दरवाजा मा आद.
LEV 1:6 आग आव आ होमबली इन पशु उन तोगुल तेगुकु आ पशु उन तुकळा-तुकळा माळ बुळुल.
LEV 1:7 आग हारून याजक उन पार वेदी मा बेक्की ईटुल, अदिक बेक्की मा हुळ्ली रचस्कु ईटुल.
LEV 1:8 अदिक हारून उन पार जो याजक आन अऊर ताल्ला अदिक न्याण सांगुळ पशु उन तुकळागोळी आ हुळ्ली मा जो वेदी इन बेक्की मा आद रचस्कु ईटुल,
LEV 1:9 अदिक आव अदुर्द कळ्लपच्चीगोळी अदिक कालगोळी नीर देल तोळुल. आग याजक ईव सप्पा अक होमबली माळकु वेदी मा होताकुल कि अद होमबली यहोवा अन साटी सुखदायक सुगन्धित बलिदान ठहरूसुल.
LEV 1:10 “अगर आव म्यांडागोळ या व्हातगोळी होमबली येरसुल रा तंदरूस्त नर उक येरसुल;
LEV 1:11 अदिक आव अदरी वेदी इन उत्तरी दिशा दी यहोवा अन मुंद बली माळुल अदिक हारून उन पार जो याजक आन अदुर्द रकत इक वेदी इन नाकु दी सिपसुल.
LEV 1:12 अदिक आव अदरी तुकळा-तुकळा माळुल, ताल्ला अदिक न्याण इक अलग माळुल, अदिक याजक ईव सप्पा चीज इक आ हुळ्ली मा रचकु ईटुल जो वेदी इन बेक्की मा ईत्तीत;
LEV 1:13 अदिक आव अदुर्द कळ्लपच्चीगोळी अदिक कालगोळी नीर देल तोळुल. अदिक याजक सप्पा चीज इक हात्ती वोतकु वेदी मा होताकुल कि अद होमबली आगुल अदिक यहोवा अन्द साटी सुखदायक सुगन्धवाळा बलिदान ठहरूसुल.”
LEV 1:14 “अगर आव यहोवा अन्द साटी पक्षीगोळ्द होमबली येरसुल, रा पंडुका या कबूतर इन पाड्डगोळ्द चढ़ावा येरसुल.”
LEV 1:15 याजक अदरी वेदी इन हात्ती वतकु अऊरव कुतक्या मुरकुळ्सकु ताल्ला अक धळ देल अलग माळुल, अदिक वेदी मा होताकुल; अदिक अदुर्द पुरा रकत आ वेदी इन बाजु मा केडुकु आगुल;
LEV 1:16 अदिक आव कुतक्या-थैली अदिक पिक्‍कागोळी तेगुकु वेदी इन पूर्व दी राख हाक्कोद जागा मा भीट बुळुल.
LEV 1:17 आग आव येढ्ढु पिक्‍कागोळी हुडुकु अदरी बीच दा टु हरूल, लेकीन अदरी अलग-अलग माळबाळुल. आग याजक अदरी वेदी मा आ हुळ्ली इन म्याकुच ईटकु जो बेक्की मा ईत्तीत होताकुल कि अद होमबली अदिक यहोवा अन्द साटी सुखदायक सुगन्धवाळा बलिदान ठहरूसुल.
LEV 2:1 याग यावारा यहोवा अन्द साटी अन्नभेट इन चढ़ावा येरसोद चाहसुल, रा आव मैदा येरसुल; अदिक अदुर मा याण्णा हाक्कु अदुर म्याकुच लुबान ईटुल;
LEV 2:2 अदिक आव अदरी हारून इन पारगोळ हात्ती जो याजक आन तरूल. अदिक अन्नभेट इन याण्णा मिलुस्द मैदा दा टु ई तरीका देल तान ठ्वामा तुमकु तेगुल कि सप्पा लुबान अदुर दा होट बरूल; अदिक याजक आंदरी याद दिलुसोद भाग इन साटी वेदी मा होमबली होताकुल कि ईद यहोवा अन्द साटी सुखदायक सुगन्धित भेंट ठहरूसुल.
LEV 2:3 अदिक अन्नभेट दा टु जो मिक्कु ईरूल अद हारून अदिक आऊन पारगोळ्द ठहरूसुल; ईद यहोवा अन्द होमबली दा टु परम पवित्र भाग आदीत.
LEV 2:4 “याग नी अन्नभेट इन साटी तंदुर दा कासकु चढ़ावा येरस्या, रा अद याण्णा दा मिलुस्कु अखमीरी मैदा अन्द फुलका, या याण्णा दा चोपळुस्कु अखमीरी रोट्टीगोळ्द ईरूल.”
LEV 2:5 अदिक अगर नीन चढ़ावा तावा मा कासकु अन्नभेट ईरूल, रा अद याण्णा देल मिलुस्कु अखमीरी मैदा अन्द ईरूल;
LEV 2:6 अदरी तुकळा-तुकळा माळकु अदुर मा याण्णा हाकेत, आग अद अन्नभेट आगेदीत.
LEV 2:7 अदिक ईद नींद चढ़ावा कळाई दा ताळस्कु अन्नभेट ईरूल, रा अद मैदा देल याण्णा दा माळकु आगुल.
LEV 2:8 अदिक जो अन्नभेट इन ई वस्तुगोळ दा टु यारदारा माळकु ईरूल अदरी यहोवा अन्द मुंद ओईल; अदिक याग अद याजक उन हात्ती तंदकु आगुल, आग याजक अदरी वेदी इन मुंद ओईल.
LEV 2:9 अदिक याजक अन्नभेट दा टु याद तोरसोर भाग इक तेगुकु होमबली मा होताकुल कि अद यहोवा अन्द साटी सुखदायक सुगन्धवाळा भेंट ठहरूसुल;
LEV 2:10 अदिक अन्नबली दा टु जो मिक्कु ईरूल अद हारून अदिक आऊन पारगोळ्द ठहरूसुल; अद यहोवा अन्द होमबली दा परम पवित्र भाग आदीत.
LEV 2:11 “यातोदारा भी अन्नभेट यदरी नीव यहोवा अन्द साटी येरसी खमीर मिलुस्कु माळकु आगबाळुल; नीव यागलु होमबली दा यहोवा अन्द साटी खमीर अदिक शयद होताक बाळेतीर.”
LEV 2:12 नीव इंदरी पयला उपज इन चढ़ावा बनुस्कु यहोवा अन्द साटी येर्सेतीर, लेकीन अव सुखदायक सुगन्ध इन साटी वेदी मा येर्सकु आगबाळुल.
LEV 2:13 बाक तान सप्पा अन्नभेटगोळ इक नमकीन माळेतीर; अदिक तान यातोदारा भी अन्नभेट इक तान परमेश्वर उन सांगुळ वादा अन्द ऊप्प देल नमकीन आगगोळ बाळेतीर; तान सप्पा चढ़ावागोळ्द सांगुळ ऊप्प भी येर्सेतीर.
LEV 2:14 “अगर नी यहोवा अन्द साटी पयला उपज इन अन्नभेट येरस्या, रा तान पयला उपज इन अन्नभेट इन साटी बेक्की दा सुटकु हिवरा-हिवरा लॉम्बागोळी, मतलब हिवरा-हिवरा लॉम्बागोळी सुटकु मसलुस कोमेत, आग अनाज इक येर्सेत.
LEV 2:15 अदिक अदुर दा याण्णा हाकेत, अदिक अदुर म्याकुच लुबान ईटेत; आग अद अन्नभेट आगेदीत.
LEV 2:16 अदिक याजक सुटकु तेग्द अन्न अक, अदिक याण्णा अक, अदिक पुरा लुबान इक याद तोरसोद भाग माळकु होताक बुळुल; अद यहोवा अन्द साटी होमबली इन बेक्की ठहरूसुल.
LEV 3:1 “अगर आऊन चढ़ावा मेल-मिलाप इन आगुल, अदिक अगर आव पालस्द पशु दा टु यारीकारा येरसुल, रा बाक अद पशु नर आगुल या मादा, लेकीन जो तंदरूस्त ईरूल अदरी का आव यहोवा अन्द मुंद येरसुल.
LEV 3:2 अदिक आव तान कय तान चढ़ावा अन्द पशु उन ताल्ला मा ईट्टुल अदिक अदरी भेंटमाळोद तम्बू उन दरवाजा मा बली कोळुल; अदिक हारून उन पार जो याजक आन आंदुर आऊन रकत इक वेदी इन नाकु दी सिपसुल.
LEV 3:3 आव मेल-मिलाप दा टु यहोवा अन्द साटी होमबली इन बेक्की मा हाकुल, मतलब या न्याणद देल कळ्लपच्चीगोळ ढाक्सकु ईरताव, अदिक जो न्याण अदुर्दा गुंळ्सकु ईरतद अद भी,
LEV 3:4 अदिक येढ्ढु फॉफसागोळ अदिक अदुर म्याकुच इन न्याण जो नेळु उन हात्ती ईरतद, अदिक फॉफसा अन सांगुळ ईरग्या अन्द म्याकुच इन परत, ईव सप्पा अक आव अलग माळुल.
LEV 3:5 आग हारून इन पार इदरी वेदी मा आ होमबली इन म्याकुच होताकुल, जो आ हुळ्लीगोळ मा ईत्तीत जो बेक्की इन म्याकुच आद, कि ईद यहोवा अन्द साटी सुखदायक सुगन्धवाळा भेंट ठहरूसुल.
LEV 3:6 “अगर यहोवा अन्द मेल-मिलाप बलिदान इन साटी चढ़ावा पालस्द पशु दा टु ईरूल, रा चाहे अद नर आगुल या मादा, लेकीन जो तंदरूस्त ईरूल अदरी का आव येरसुल.
LEV 3:7 अगर आव म्यांडा अन्द पाड्डा येर्सतान, रा अदरी यहोवा अन्द मुंद येरसुल,
LEV 3:8 अदिक आव तान चढ़ावा अन्द पशु उन ताल्ला मा कय ईटुल अदिक अदरी भेंटमाळावाळा तम्बु उन मुंद बली कोळुल; अदिक हारून उन पार अदुर रकत इक वेदी इन नाकु दी सिपसुल.
LEV 3:9 आग मेलबली इक यहोवा अन्द साटी बेक्की इन होमबली मा हाकुल, अदिक अदुर न्याण तुमकु धोळ पुसटी अद रीढ़ इन हात्ती टु अलग माळुल, अदिक या न्याण देल कळ्लपच्चीगोळ ढाक्सकु ईरताव, अदिक जो न्याण अदुर्दा गुंळ्सकु ईरतद,
LEV 3:10 अदिक येढ्ढु फॉफसागोळ, अदिक जो न्याण अदुर म्याकुच नेळु उन हात्ती ईरतद, अदिक फॉफसागोळ सांगुळ ईरग्या अन म्याकुच इन झिल्ली, ईव सप्पा चीज इक आव अलग माळुल.
LEV 3:11 अदिक याजक इदरी होमबली मा होताकुल; ईद यहोवा अन्द साटी भेंट रूपी ऊमोद ठहरूसुल.
LEV 3:12 “अगर आव मर्री येरसुल, रा अदरी यहोवा अन्द मुंद येरसुल.
LEV 3:13 अदिक आव तान कय अदुर ताल्ला मा ईटुल, मात्त अदरी भेंटमाळोद तम्बू उन मुंद बली कोळुल; अदिक हारून उन पार अदुर्द रकत इक वेदी इन नाकु दी सिपसुल.
LEV 3:14 आग आव अदुर दा टु तान चढ़ावा यहोवा अन्द साटी बेक्की इन होमबली मा येरसुल, अदिक या न्याण देल कळ्लपच्चीगोळ ढाक्सकु ईरताव, अदिक जो न्याण अदुर्दा गुंळ्सकु ईरतद अद भी,
LEV 3:15 अदिक येढ्ढु फॉफसागोळ अदिक जो न्याण अदुर म्याकुच नेळु उन हात्ती ईरतद, अदिक फॉफसागोळ सांगुळ ईरग्या अन्द म्याकुच इन परत, ईव सप्पा चिज इक आव अलग माळुल.
LEV 3:16 अदिक याजक इदरी होमबली मा होताकुल; ईद भेंट रूपी ऊमोद हुन जो सुखदायक सुगन्ध इन साटी ईरतद; यतिकी पुरा न्याण यहोवा अन हुन.
LEV 3:17 ईद नीम ईरा जागा दा नीम पीढ़ी-पीढ़ी इन साटी हमेशा अन्द विधी ठहरूसीत कि नीव न्याण अदिक रकत यागलु तिनबाळी.”
LEV 4:1 बाक यहोवा मूसा से अंदुन,
LEV 4:2 “इस्राएलिगोळ से ईद अन कि अगर यावारा मंळसा आ क्याल्सागोळ दा टु यदरी यहोवा मना माळीदुन, यातोदारा क्याल्सा अक भूल देल माळकु पापी आगेगुल; अदिक इंदुर दा टु यावारा ऊंद मंळसा माळ्यान.”
LEV 4:3 अदिक अभिषित याजक हिंग पाप माळुल, अदुर देल प्रजा दोषी ठहरूसुल, रा तान पाप इन कारण आव ऊंद हारोद वस्ता अक यहोवा अन्द पापबली माळकु येरसुल.
LEV 4:4 आव आ हारोद वस्ता अक भेंटमाळोद तम्बू उन दरवाजा मा यहोवा अन्द मुंद ओतकु अदुर ताल्ला मा कय ईटुल, अदिक आ हारोद वस्ता अक यहोवा अन मुंद बली कोळुल.
LEV 4:5 अदिक अभिषित याजक हारोद वस्ता अन्द रकत दा टु येनारा ओतकु भेंटमाळोद तम्बू दा ओईल;
LEV 4:6 अदिक याजक तान बेल्ल रकत दा नेनाक-नेनाक्कु अदिक अदुर दा टु येनारा ओतकु पवित्र जागा अन्द न्याड्यावाळा परदा अन्द मुंद यहोवा अन मुंद येळ घन सिपसुल.
LEV 4:7 अदिक याजक आ रकत दा टु येनारा मात्त हुळकु सुगन्धित धूप इन वेदी इन सींगगोळ मा जो भेंटमाळोद तम्बू दा आद यहोवा अन्द मुंद हचदुर; बाक वस्ता अन्द सप्पा रकत इक वेदी इन पायवा मा होमबली इन वेदी जो भेंट माळोद तम्बू उन दरवाजा मा आद हाक्क बुट्टुर.
LEV 4:8 बाक आव पापबली इन वस्ता अन्द सप्पा न्याण इक अदुर दा टु अलग माळुल, मतलब या न्याण देल कळ्लपच्चीगोळ झाक्सकु ईरताव, अदिक याट न्याण अदुर्दा गुंळ्सकु आगतद,
LEV 4:9 अदिक येढ्ढु फॉफसागोळ अदिक अदुर म्याकुच इन न्याण जो नेळु उन हात्ती ईरतद, अदिक फॉफसागोळ सांगुळ ईरग्या अन्द म्याकुच इन परत, ईव सप्पा चिज इक हिंग अलग माळुल,
LEV 4:10 ह्यांग मेल-मिलाप इन चढ़ावा अन वस्ता से अलग माळकु आगताव, अदिक याजक ईदरी होमबली इन वेदी मा होताकुल.
LEV 4:11 लेकीन आ पाड्डा अन्द तोगुल, काल, ताल्ला, कळ्लपच्चीगोळ, सेंगळी,
LEV 4:12 अदिक पुरा मास, मतलब पुरा वस्ता छावनी से व्हार्या शुद्ध जागा मा, यल राख हाक्कु आदीत, ओतकु हुळ्लीगोळ मा ईटकु बेक्की देल होताकुल; यल राख हाक्कु आगतद अद अल्या होताक्कु आगुल.
LEV 4:13 “अगर इस्राएल इन पुरा मंडली अग्यानता अन कारण पाप माळुल अदिक अद मात मंडली इन कण्णगोळ देल होचकु आद, अदिक आंदुर यहोवा अन्द यातोदु आग्या अन खिलाप येनारा माळकु दोषी ठहरूस्यार.”
LEV 4:14 रा याग आंदुर्द माळ्द पाप प्रगट आगुल आग मंडली ऊंद वस्ता अक पापबली माळकु येरसुल. आव अदरी भेंटमाळोद तम्बू उन मुंद ओईल,
LEV 4:15 अदिक मंडली इन स्याणा हाळाबाट्टुर तान-तान कयगोळी यहोवा अन्द मुंद वस्ता अन ताल्ला मा ईटुल, अदिक आ वस्ता यहोवा अन्द मुंद बली माळकु आगुल.
LEV 4:16 आग अभिषिक्त याजक वस्ता अन्द रकत दा टु थ्वाळासा भेटवाळा तम्बु दा ओईल;
LEV 4:17 अदिक याजक तान बेळ्ल रकत दा नेनाक-नेनाक्कु अदरी न्याड्यावाळा परदा अन्द मुंद येळ घन यहोवा अन्द मुंद सिपसुल.
LEV 4:18 अदिक अदा रकत दा टु वेदी इन सींगगोळ मा जो यहोवा अन्द मुंद भेंट माळोद तम्बू दा आद हचुल; अदिक मिक्द सप्पा रकत होमबली इन वेदी इन पायवा मा जो भेंटमाळोद तम्बू उन दरवाजा मा आद हाक्क बुळुल.
LEV 4:19 अदिक याजक वस्ता अन सप्पा न्याण तेगुकु वेदी मा होताकुल.
LEV 4:20 ह्यांग पापबली इन वस्ता अन्द सांगुळ माळीद हांग अच ईदुर सांगुळ भी माळुल; ई प्रकार याजक इस्राएलीगोळ साटी प्रायश्चित माळुल, आग आंदुर पाप माफ माळकु आदव.
LEV 4:21 अदिक आ वस्ता अक छावनी टु व्हार्या ओतकु हांग अच होताकुल ह्यांग पयले वस्ता अक होताकीद; ईद रा मंडली इन निमित्त पापबली ठहरूसीत.
LEV 4:22 “याग यावारा प्रधान गंळ्स पाप माळुल, मतलब तान परमेश्वर यहोवा अन्द यातोदारा भी आग्या अन्द खिलाप भूल देल येनारा माळकु दोषी आगेगुल,
LEV 4:23 अदिक आऊन पाप आऊन मा प्रगट आगेगुल, रा आव ऊंद तंदरूस्त व्हात बलिदान माळोर साटी तरूल;
LEV 4:24 अदिक व्हात इन ताल्ला मा तान कय ईटुल, अदिक व्हात इक आ जागा मा बली माळुल यल होमबली पशु यहोवा अन्द मुंद बली माळकु आगताव; ईद पापबली ठहरूसीत.”
LEV 4:25 आग याजक तान बेळ्लगोळ देल पापबली पशु उन रकत दा टु थ्वाळासा ताकोमकु होमबली इन वेदी इन सींगगोळ मा हचुल, अदिक अदुर्द रकत होमबलि इन वेदी इन पायवा मा पलटुस बुळुल.
LEV 4:26 अदिक आव अदुर्द पुरा न्याण इक मेलबली इन न्याण इन घाई वेदी मा होताकुल; अदिक याजक आऊन पाप इन बारा दा प्रायश्चित माळुल, आग आव माफ माळकु आदान.
LEV 4:27 “अगर साधारण लॉकुर दा टु यावारा अग्यानता देल पाप माळुल, मतलब यातोदारा हिंग क्याल्सा यदरी यहोवा मना माळीदान अदरी माळकु दोषी ठहरूसुल, अदिक आऊन अद पाप आऊन मा प्रगट आगेगुल,
LEV 4:28 रा आव आ पाप इन कारण ऊंद तंदरूस्त मर्री बलिदान माळोर साटी तरूल;
LEV 4:29 अदिक आव तान कय पापबली पशु उन ताल्ला मा ईटुल, अदिक होमबली इन जागा मा पापबलि पशु उन बलिदान माळुल.”
LEV 4:30 अदिक याजक अदुर रकत दा टु तान बेळ्ल देल थ्वाळासा ताकोमकु होमबली इन वेदी इन सींगगोळ मा हचुल, अदिक अदुर सप्पा रकत इक अदा वेदी इन पायवा मा पलटुस बुळुल.
LEV 4:31 अदिक आव अदुर्द सप्पा न्याण इक मेलबली पशु उन घाई अलग माळुल, आग याजक आऊक वेदी मा यहोवा अन्द निमित्त सुखदायक सुगन्ध इन साटी होताकुल; अदिक ई प्रकार याजक आऊन साटी प्रायश्चित माळुल, आग आऊक माफी सिक्कीत.
LEV 4:32 “अगर आव पापबली इन साटी ऊंद म्यांडा अन्द पाड्डा तरूल, रा अद तंदरूस्त मादा ईरूल,
LEV 4:33 अदिक आव तान कय पापबली पशु उन ताल्ला मा ईटुल, अदिक अदरी पापबलि इन साटी अल्या बलिदान माळुल यल होमबली पशु बली माळकु आगताव.”
LEV 4:34 आग याजक तान बेळ्लगोळ देल पापबली इन रकत दा टु थ्वाळासा ताकोमकु होमबली इन वेदी इन सींगगोळ मा हचुल, अदिक अदुर्द सप्पा रकत इक वेदी इन पायवा मा पलटुस बुळुल.
LEV 4:35 अदिक आव अदुर्द सप्पा न्याण इक मेलबलीवाळा मेमना अन्द न्याण इन घाई अलग माळुल, अदिक याजक अदरी होमबली मा यहोवा अन्द चढावागोळ्द म्याकुच होताकुल; अदिक ई प्रकार याजक आऊन पाप साटी प्रायश्चित माळुल, अदिक आव माफ माळकु आदान.
LEV 5:1 “अगर यावारा गवाह आगकु हिंग पाप माळुल कि किर्‍या तिन्सकु केळकु भी कि येन नी ईद केळ्द अथवा जान्सत्या, अदिक अद मात प्रगट माळबाळुल, रा आऊक तान दोष इन भार नेगोद बिद्दीत.”
LEV 5:2 अथवा अगर यावारा यातोदारा अशुद्ध वस्तु उक अग्यानता देल मुट्ट बुळुल, रा चाहे आव अशुद्ध जंगली पशु उक, चाहे अशुद्ध घरेलु पशु उक, चाहे अशुद्ध रेंगसावाळा जीव-जन्तु उन लाश आगुल, रा आव अशुद्ध आगकु दोषी ठहरूस्यान.
LEV 5:3 अथवा अगर यावारा मंळसा यातोदारा अशुद्ध वस्तु उक अग्यानता देल मुट्ट कोमुल, चाहे अद अशुद्ध वस्तु यातोदारा भी प्रकार इन यती आगबाळुल यदुर देल लॉकुर अशुद्ध आगेगतार रा याग आव आ मात इक जान्स कोंडान आग आव दोषी ठहरूस्यान.
LEV 5:4 अगर यावारा बुरा या भला माळली इक बिना सोच सम्सकु किर्‍या तिंदान, चाहे यातोदारा प्रकार इन मात दा आ मंळसा बिना सोच बिचार देल किर्या तिनकु अनुल, रा हिंग मात दा आव दोषी आ घळी दा ठहरूस्यान याग आऊक मालूम आगेदीत.
LEV 5:5 आग आव ई मातगोळ दा टु यातोदारा भी मात दा दोषी ईरूल, आग या विषय दा आव पाप माळीदान आव अदरी मान्स कोमुल,
LEV 5:6 अदिक आव यहोवा अन्द मुंद तान दोषबली तरूल, मतलब आ पाप इन कारण आव ऊंद मादा म्यांडा या मर्री पापबली माळोर साटी तरूल; आग याजक आ पाप इन बारा दा आऊन साटी प्रायश्चित माळुल.
LEV 5:7 “अगर आऊक म्यांडा या मर्री कोळोद सामर्थ्य ईला ईतीदाद, रा तान पाप इन कारण येढ्ढ पंडुक या कबूतर इन पाड्डा दोषबली येरसोर साटी यहोवा अन्द हात्ती तरूल, अदुर दा टु ऊंद रा पापबली इन साटी अदिक दुसरा होमबली इन साटी.
LEV 5:8 आव अवरी याजक उन हात्ती तरूल, अदिक याजक पापबली माळकु आत अदरी पयले येरसुल, अदिक अदुर्द ताल्ला कुतक्या टु मुरकुळ्स बुळुल, पर अलग माळबाळुल,
LEV 5:9 अदिक आव पापबली पशु उन रकत दा टु येनारा तरी वेदी इन बाजु मा सिपसुल, अदिक जो रकत मिक्कु ईरूल अद वेदी इन पायवा मा हाक्कु आगुल; आव रा पापबली ठहरूस्यान.
LEV 5:10 आग दुसरा पक्षी अक अद नियम इन अनुसार होमबली माळुल, अदिक याजक आऊन पाप इन प्रायश्चित माळुल, अदिक आग आव माफ माळकु आदान.
LEV 5:11 “अगर आव येढ्ढ पंडुक या कबूतर इन येढ्ढ पाड्डा भी कोळ ईला सकुल, रा आव तान पाप इन कारण तान चढ़ावा एपा अन्द हतवा भाग मैदा पापबली माळकु तरूल; अदुर मा न रा आव याण्णा हाकुल, अदिक न लुबान ईट्टुल यतिकी अद पापबली आदीत.
LEV 5:12 आव अदरी याजक उन हात्ती तरूल, अदिक याजक अदुर दा टु तान ठ्वामा तीम याद तोरसोद भाग जान्सकु होमबली मा यहोवा अन्द बेक्कीगोळ्द म्याकुच होताकुल; अद रा पापबली ठहरूसीत.
LEV 5:13 अदिक ई मातगोळ दा टु यातोदारा भी मात इन बारा दा जो यावारा पाप माळुल, याजक आऊन प्रायश्चित माळुल, अदिक आग अद पाप माफ माळकु आदीत. अदिक ई पापबली इन मिक्कु अन्नबली इन मिक्कु मैदा याजक उन ठहरूसीत.”
LEV 5:14 बाक यहोवा मूसा अक ईद आदेश कोट्टुन,
LEV 5:15 “ अगर यावारा मंळसा विश्वासघात माळुल अदिक अनजाना दा यहोवा अन्द पवित्र वस्तुगोळ्द संदर्भ दा पाप माळुल, रा आव तान द्वारा माळकु विश्वासघात इन साटी यहोवा अन्द मुंद दोषबली इन रूप दा म्यांडा दा टु ऊंद तंदरूस्त म्यांडा भेंट माळुल, अदुर किंमत पवित्र जागा अन्द शेकेल इन अनुसार बेळ्ल तीम ईरूल, ईद दोषबली हुंद.
LEV 5:16 आव या पवित्र वस्तु उन बारा दा पाप माळदुन, अदुर साटी आव नुकसान इन भरपाई माळुल. आव इदुर दा इदुर्द पाचवा भाग इक जोळ्सकु याजक उक सौप्स बुळुल. याजक दोषबली इन म्यांडा अन्द सांगुळ आऊन साटी प्रायश्चित माळुल अदिक आऊन ईद पाप माफ माळकु आदीत.
LEV 5:17 “अगर यावारा मंळसा पाप माळतान अदिक यावारा भी अद क्याल्सा माळतान, जो यहोवा अन्द दी टु मना माळकु आग्याद, अगर आव इदुर देल अनजान आन, तौभी आव दोषी आन अदिक तान दण्ड इन भार नेगदान.
LEV 5:18 बाक आव दोषबली इन साटी म्यांडा दा टु उचित किंमत इन ऊंद तंदरूस्त म्यांडा तरूल कि याजक आ मंळसा अन्द द्वारा माळकु आ विश्‍वासघात इन साटी, जो आव अनजाना दा माळीदुन, प्रायश्चित माळुल, अदिक आऊन ईद विश्वासघात माफ माळकु आदीत.
LEV 5:19 ईद ऊंद दोषबली हुंद; बिना संकोच आव यहोवा अन्द नजर दा दोषी ईरोन.”
LEV 6:1 बाक यहोवा मूसा अक अंदुन,
LEV 6:2 यहोवा अन्द विरूद्ध अगर यावारा मंळसा पाप माळकु विश्वासघात माळुल या तान मान्ना हातळोर मंळसा अन्द द्वारा सौप्सकु आग्याद धन-दौलत या अदुर्द देखभाल इन बारा दा आऊन से छल माळुल या आऊक लुटसुल या तान मान्ना हातळोर मंळसा अक सतुसुल,
LEV 6:3 या आऊक यातोदारा काळ्‍दकु वस्तु प्राप्त आगुल अदिक आव इदुर बारा दा ख्वाटा माताळकु ख्वाटा किर्या तिनुल, आग इदुर दा टु यातोद भी क्याल्सा माळोद द्वारा मंळसा पापी ठहरूस्तार;
LEV 6:4 “रा याग आव हिंग क्याल्सा माळकु दोषी आगेगुल, आग जो भी वस्तु आव लुट्स्दुन, या अत्याचार माळकु, या धन-दौलत, या काळ्द चिज जो आऊक सिक्त;
LEV 6:5 यातोदारा वस्तु यती आगबाळुल यदुर बारा दा आव ख्वाटा किर्या तिंदीदान; रा आव अदरी पूरा-पूरा वापस माळबुळुल, अदिक पाचवा भाग भी वाळुस्कु तुम्म बुळुल, या दिशी ईद मालुम आगुल कि आव दोषी आन, अदा दिशी आ वस्तु यार्द हुन आऊक वापस माळबुळुल.
LEV 6:6 अदिक आव यहोवा अन्द मुंद तांद दोषबली भी तरूल, मतलब ऊंद तंदरूस्त म्यांडा दोषबली इन साटी याजक उन हात्ती तरूल, अद आटा किंमत इन ईरूल यास याजक ठहरूसुल.
LEV 6:7 ई प्रकार याजक आऊन साटी यहोवा अन्द मुंद प्रायश्चित माळुल, अदिक या क्याल्सा अक माळकु आव दोषी आगेग्यान अदुर्द माफी आऊक सिक्कीत.”
LEV 6:8 बाक यहोवा मूसा से अंदुन,
LEV 6:9 “हारून अदिक आऊन पारगोळ इक आग्या कोटकु ईद अन कि होमबली इन विधी ईद हुन: होमबली पूरा ईळ्लक टु हुळकु व्हातुर ताका वेदी इन बेक्की वेदी मा होततेला ईरूल.
LEV 6:10 याजक तान सन इन कपळा अदिक तान मय मा मलमल इन जंग्या हाकुल; अद वेदी इन राख, जो बेक्की द्वारा होत्‍ताकु आगीत, नेगुल अदिक अदरी वेदी इन ऊंद बाजु दा ईट बुळुल.
LEV 6:11 इदुर बाद्दा आव तान ईव कपळा तेगुकु दुसरा कपळा हाकुल अदिक राख इक छावनी इन व्हार्या ऊंद शुद्ध जागा मा वोईल.
LEV 6:12 वेदी मा बेक्की होततेला ईरूल. ईद नून बाळुल, लेकीन याजक इदुर मा हर रोज हुळ्ली ईटुल; इदुर मा होमबली इक ईट्टुल अदिक इदुर मा मेलबली इन न्याणद वाळा भाग इक बेक्की दा होताकतेला ईरी.
LEV 6:13 वेदी मा बेक्की लगातार होततेला ईरूल. ईद नून बाळुल.
LEV 6:14 “अन्नभेट येरसोर साटी ईद विधी आद हारून उन पार इदरी यहोवा अन्द साटी वेदी इन मुंद पेश माळुल.
LEV 6:15 अदुर दा टु ऊंद याजक ई अन्नभेट दा टु ऊंद ठ्वामा तीम हीट, याण्णा अदिक ईदुर मा ईटकु पुरा लुबान इक ताकोमुल अदिक इदरी वेदी इन बेक्की दा होताकुल. ईद यहोवा अक याद बली इन साटी भेंट माळ्द सुखदायक सुगन्ध हुंद.
LEV 6:16 इदुर दा टु जो भाग मिक्कुल, हारून अदिक आऊन पार आऊन इस्तेमाल माळुल. इदुर इस्तेमाल पवित्र जागा दा बिना खमीर इन रोट्टी इन रूप दा माळकु आगुल; आंदरी भेंटमाळोद तम्बू उन आंगुळ दा अच तिनुल.
LEV 6:17 इदरी खमीर इन सांगुळ कासकु आगबाळुल; ना इदरी आंदुर भाग इन रूप दा तान होमबली दा टु प्रदान माळदुन, ईद पापबली अदिक दोषबली इन घाई परम पवित्र आद.
LEV 6:18 हारून उन पारगोळ दा टु हर ऊंद पार इदरी तीनुल; यहोवा अक भेंट माळ्द होमबली गोळ दा टु नीम्द पीढ़ीगोळ साटी ईद हमेशा अन्द विधी हुंद. जो यावारा ई बलिगोळ इक मुट्‍यान, आव तान-ताना पवित्र आगेदान.”
LEV 6:19 यहोवा मूसा अक ईद आदेश कोट्टुन,
LEV 6:20 “या दिशी हारून उन अभिषेक आगुल आ दिशी आव तान पारगोळ सांगुळ यहोवा अक ईद चढ़ावा येरसुल; मतलब एपा अन्द हतवा भाग हीट्ट हमेशा अन्नभेट दा येरसुल, अदुर दा आर्धा व्हातर्या का अदिक आर्धा द्यावगा अन्द समय येरसुल.
LEV 6:21 अद तावा मा याण्णा अन्द सांगुळ कासकु आगुल; याग अद याण्णा देल पुरा बेंदोदित आग अदरी तरेतीर, ई अन्नभेट इन बेंदकु तुकळागोळ यहोवा अन सुखदायक सुगन्ध इन साटी येर्सेतीर.
LEV 6:22 हारून उन पारगोळ दा टु जो भी आ याजक पद मा विराजमान आदान, आव भी अदा प्रकार इन चढ़ावा येरसुल; ईद विधी हमेशा अन्द साटी हुंद, कि यहोवा अन्द मुंद अद पुरा चढ़ावा होत्‍ताकु आगुल.
LEV 6:23 याजक उन हर ऊंद अन्नभेट पुरा तरीका देल होत्‍ताकु आगुल. इदरी तिनोद आगबाळुल.”
LEV 6:24 यहोवा मूसा अक ईद आदेश कोट्टुन,
LEV 6:25 “हारून अदिक आऊन पारगोळ से ईद अन कि पापबली इन विधी ईद हुन; या जागा दा होमबली पशु कोंदकु आगतद अदुर दा का पापबली पशु भी यहोवा अन्द मुंद बली माळकु आगुल; आव परम पवित्र आन.
LEV 6:26 जो याजक पापबली येरसुल आव अदरी तिनुल; अद पवित्र जागा दा, मतलब भेंटमाळोद तम्बू उन आंगुळ दा तिनकु आगुल.
LEV 6:27 जो यावारा इदुर मास इक मुट्ट बुट्टान, आव पवित्र आगेदान; अगर अदुर्द रकत इन छीटागोळ यारदारा कपळागोळ मा बंदकु बिळुल, रा जरूरी आद कि इदरी यातोदारा पवित्र जागा दा अच तोळुकु आगुल.
LEV 6:28 अदिक अद मुण्ण इन गळग्या यदुर्दा अद कासकु आगीदाद वडुकु आगुल; अगर अद पीतल इन बरतन दा उबालस्कु आगीदाद, रा अद उदकु आगुल, अदिक नीर देल तोळुकु आगुल.
LEV 6:29 याजकगोळ दा टु सप्पा गंळ्सुर अदरी तीन सकतार; अद परम पवित्र वस्तु आद.
LEV 6:30 लेकीन या पापबली पशु उन रकत दा टु थ्वाळासा भी रकत भेंटमाळोद तम्बू उन बुळ्क पवित्र जागा दा प्रायश्चित माळली पोहचुस्कु आगुल अदुर मास यागलु तिनकु आगबाळुल; अद बेक्की दा होत्‍ताकु आगुल.”
LEV 7:1 “बाक दोषबली इन विधी ईद हुन. अद हापाळ वळ्लीद आद:
LEV 7:2 या जागा मा होमबली पशु उन बली कोळतार अदा जागा मा दोषबली पशु भी बली माळुल, अदिक अदुर्द रकत इक याजक वेदी मा नाकु दी सिपसुल.”
LEV 7:3 अदिक आव अदुर्द सप्पा न्याण इक येरसुल, मतलब अदुर्द चर्बीवाळा पुसटी इक, अदिक या न्याण देल कळ्लपच्चीगोळ होचकु ईरताव अव भी,
LEV 7:4 अदिक येढ्ढु फॉफसागोळ अदिक जो न्याण अदुर म्याकुच अदिक नेळु उन हात्ती ईरतद, अदिक फॉफसागोळ सांगुळ ईरग्या अन्द म्याकुच इन परत; ई सप्पा अक आव अलग माळुल;
LEV 7:5 अदिक याजक इदरी होमबली मा यहोवा अन्द साटी बेक्की मा होताकुल; आग आव दोषबली आदान.
LEV 7:6 याजकगोळ दा टु सप्पा गंळ्सुर इदुर दा टु तिन सकतार; अद यातोदारा पवित्र जागा दा तिनकु आगुल; यतिकी अद हापाळ वळ्लीद आद.
LEV 7:7 ह्यांग पापबली आद हांग अच दोषबली भी आद, आ येढ्ढु बलिगोळ्द ऊंद अच विधी आद; जो याजक आ बेलीगोळ येर्सकु पाप इक होचकोमुल आवा आ वस्तुगोळी ताकोमुल.
LEV 7:8 अदिक जो याजक यावारा मंळसा अन्द साटी होमबली इक येरसुल आ होमबली पशु उन तोगुल इक आवा याजक हुडु कोमुल.
LEV 7:9 अदिक भट्टी दा, या कढ़ई दा, या तावा दा सुटकु आग्याव अव सप्पा अन्नभेट आ याजक उन आदीत जो अवरी येर्सतान.
LEV 7:10 हर ऊंद अन्नभेट, चाहे याण्णा मिलुस्कु ईरूल या वळ्गींद ईरूल, हारून उन सप्पा पारगोळ इक बराबर मात्रा दा सिक्कीत.
LEV 7:11 “आ मेल-मिलाप बलिदान इन साटी, जो यहोवा अन्द मुंद येर्सकु आगुल, अदुर साटी विधी ईद हुन:”
LEV 7:12 “अगर आव इदरी आभार इन रूप दा भेंट माळतान, रा आव आभार बली इन सांगुळ याण्णा दा बेंदकु अखमीरी रोट्टी, याण्णा दा बेंदकु अखमीरी सुवारी अदिक याण्णा देल बेंदकु मैदा अन्द रोट्टी भेंट माळुल.”
LEV 7:13 अदिक आव तान धन्यवादवाळा मेल-मिलाप बलिदान इन सांगुळ खमीरी रोट्टीगोळ भी येरसुल.
LEV 7:14 अदिक हिंग ऊंद-ऊंद रोट्टी नेगुकु यहोवा अक भेंट माळकु येरसुल; अद मेल-मिलाप बलिदान इन रकत इक सिपसावाळा याजक उन आदीत.
LEV 7:15 अदिक आ धन्यवादवाळा मेलबली इन मास बलिदान येरसोद दिशी इच तिनकु आगुल; अदुर दा टु येनारा भी मिक्कु ईर बाळुल.
LEV 7:16 लेकीन अगर अदुर्द बलिदान इन चढ़ावा मन्नत इन या खुद इन इच्छा अन ईरूल, रा आ बलिदान इक या दिशी आव येर्सकु आगुल अदा दिशी अद तिनकु आगुल, अदिक अदुर दा टु जो मिक्कु ईरूल अद दुसरा दिशी भी तिनकु आगुल.
LEV 7:17 लेकीन जो येनारा बलिदान इन मास दा टु तिसरा दिन ताका मिक्कु ईरूल रा अद बेक्की दा होत्‍ताकु आगेगुल.
LEV 7:18 इदुरसाटी अगर अद मेल-मिलाप बलिदान इन पशु उन चिच्ची इक तिसरा दिशी तिनकोमतान, जो अदरी भेंट माळदुन, रा अद बली स्वीकार आगतीदील अदिक आऊन साटी लाभदायक भी आगतीदिल. ईद अशुद्ध सम्सकु आदीत अदिक जो यावारा मंळसा इदरी तिनतान, आव खुद तान दोष नेगदान.
LEV 7:19 “बाक जो मास यावारा अशुद्ध वस्तु देल मुटकु आगुल अद तिनकु आगबाळुल; अद बेक्की दा होत्‍ताकु आगुल. बाक मेल-मिलाप बलिदान इन मास यास मुंदुर शुद्ध आर आंदुर अच तिनुल,
LEV 7:20 लेकीन जो अशुद्ध आगकु यहोवा अन्द मेल-मिलाप बलिदान इन मास दा टु येनारा तिनुल रा आव तान लॉकुर दा टु नाश माळकु आगुल.
LEV 7:21 अदिक अगर यावारा यातोदारा अशुद्ध वस्तु उक कय देल मुटकु यहोवा अन्द मेल-मिलाप बलिदान पशु उन मास दा टु तिंदान, रा आव भी तान लॉकुर दा टु नाश माळकु आदान, चाहे आव मंळसा अन यातोदारा अशुद्ध वस्तु या अशुद्ध पशु या यातोदारा भी अशुद्ध अदिक घृणित वस्तु आगुल.”
LEV 7:22 बाक यहोवा मूसा से अंदुन,
LEV 7:23 “इस्राएलीगोळ से ई प्रकार देल अन: नीव लॉकुर न रा वस्ता अन्द येनारा न्याण तिनेतीर अदिक न म्यांडा या मर्री इन.
LEV 7:24 अदिक जो पशु खुद सोतोगुल, अदिक जो दुसरा पशु देल हर्दकु आगुल, अदुर्द न्याण दुसरा क्याल्सा दा तरेतीर, लेकीन अदरी यागलु तिनबाळेतीर.
LEV 7:25 जो यावारा हिंग पशु उन न्याण तिंदान यदुर दा टु लॉकुर थ्वाळासा यहोवा अन्द साटी होमबली माळकु येर्सतार अद तिनावाळा तान लॉकुर दा टु नाश माळकु आदान.
LEV 7:26 अदिक नीव तान मान्या यातोदारा प्रकार इन रकत, चाहे पक्षी इन चाहे पशु उन आगुल, तिनबाळेतीर.
LEV 7:27 हर ऊंद प्राणी जो यातोदारा प्रकार इन रकत इक तिंदान आव तान लॉकुर दा टु नाश माळकु आदान.”
LEV 7:28 बाक यहोवा मूसा से अंदुन,
LEV 7:29 “इस्राएलीगोळ से ई प्रकार देल अन : जो यहोवा अन्द साटी मेल-मिलाप बलिदान येरसुल आव अदा मेल-मिलाप बलिदान दा टु यहोवा अन्द हात्ती भेंट तरूल;
LEV 7:30 आव तान अच कयगोळ देल यहोवा अन्द होमबली इक, मतलब याद्दा सांगुळ न्याण इक तरूल कि याद्दा हालुसोद भेंट माळकु यहोवा अन्द मुंद हालुस्कु आगुल.”
LEV 7:31 अदिक याजक न्याण इक रा वेदी मा होताकुल, लेकीन याद्दा हारून अदिक आऊन पारगोळ्द आदीत.
LEV 7:32 बाक नीव तान मेलबलीगोळ दा टु ऊजवा जांघ इक भी नेगोद भेंट माळकु याजक उक कोळेतीर;
LEV 7:33 हारून उन पारगोळ दा टु जो मेल-मिलाप बलिदान इन रकत अदिक न्याण इक येरसुल ऊजवा जांघ आऊंदा भाग आदीत.
LEV 7:34 यतिकी इस्राएलीगोळ्द मेलबलीगोळ दा टु हालुसोद भेंट इन याद्दा अदिक नेगोद भेंट इन जांघ इक हुळकु ना याजक हारून अदिक आऊन पारगोळ इक कोटीन, कि ईद हमेशा इस्राएलीगोळ दी टु आंदुर्द हक बन्सकु ईरूल.
LEV 7:35 “या दिशी हारून अदिक आऊन पार यहोवा अन्द हात्ती याजक पद इन साटी तनकु आदुर, अदा दिशी यहोवा अन्द होमबली गोळ दा टु आंदुर्द ईदा अभिषित भाग ठहरूसकु आत;
LEV 7:36 मतलब या दिशी यहोवा आंदुर्द अभिषेक माळदुन अदा दिशी आव आग्या कोट्टुन कि आंदरी इस्राएलीगोळ दी टु ईद भाग हमेशा सिकतेला ईरूल; आंदुर्द पीढ़ी-पीढ़ी इन साटी आंदुर्द ईदा हक ठहरूसकु आत.”
LEV 7:37 होमबली, अन्नभेट, पापबली दोषबली, याजकगोळ्द संस्कार बली, अदिक मेल-मिलाप बलिदान इन व्यवस्था ईदा हुन;
LEV 7:38 याग यहोवा सीनै पर्वत इन हात्ती इन आळी दा मूसा अक आग्या कोट्टुन कि इस्राएली नान साटी येन-येन चढ़ावा येरस्यार, आग आव आंदरी ईदा व्यवस्था कोटीदुन.
LEV 8:1 बाक यहोवा मूसा से अंदुन,
LEV 8:2 “नी हारून अदिक आऊन पारगोळ्द कपळागोळ इक, अदिक अभिषेक इन याण्णा, अदिक पापबली इन हारोद वस्ता, अदिक येढ्ढु म्यांडागोळ, अदिक अखमीरी रोट्टी इन फुट्टीगोळ इक हुडुकु
LEV 8:3 भेंटमाळोद तम्बू उन द्वार मा तर, अदिक अल्या पुरा मंडली इक जमा माळ.”
LEV 8:4 यहोवा अन्द ई आग्या अन्द अनुसार मूसा माळदुन; अदिक मंडली भेंटमाळोद तम्बू उन द्वार मा जमा आत.
LEV 8:5 आग मूसा मंडली से अंदुन, “जो क्याल्सा माळोद आग्या यहोवा कोट्टुन अद ईद हुन.”
LEV 8:6 बाक मूसा हारून अदिक आऊन पारगोळ इक हात्ती वोतकु नीर देल मय तोळसुसदुन.
LEV 8:7 आग आव हारून उक अंगरखा हाकसुसदुन, अदिक आऊन नेळु मा कमरबन्द कटकु झागा हाकसुस बुट्टुन, अदिक एपोद हचकु एपोद इन नक्षीदार सुंदर पट्टा देल एपोद इक कटकु कसुसबुट्टुन.
LEV 8:8 बाक मूसा आऊन मा सीनाबन्द कटदुन अदिक अदुर्दा ऊरीम तुम्मीम ईट बुट्टुन.
LEV 8:9 आग आव आऊन ताल्ला मा पगळी कटकु पगळी इन मुंद व्हान्ना अन्द पट्टी अक, मतलब पवित्र मुकुट इक हचदुर, या प्रकार देल यहोवा मूसा अक आग्या कोटीदुन.
LEV 8:10 आग मूसा अभिषेक इन याण्णा हुळकु पवित्र निवास दा जो येनारा अदुर्दा ईरोद आ सप्पा चिजगोळ्द भी अभिषेक माळकु अवरी पवित्र माळदुन.
LEV 8:11 अदिक आ याण्णा दा टु थ्वाळासा याण्णा आव वेदी मा येळ घन सिपसदुन, अदिक सप्पा सामान सांगुळ वेदी इन अदिक पायवा सांगुळ गंगार इन अभिषेक माळकु अवरी पवित्र माळदुन.
LEV 8:12 अदिक आव अभिषेक इन याण्णा दा टु थ्वाळासा हारून उन ताल्ला मा हाक्कु आऊन अभिषेक माळकु आऊक पवित्र माळदुन.
LEV 8:13 बाक मूसा हारून उन पारगोळ उक हात्ती तनकु, अंगरखा हाकसुसकु, नेळु उन पट्टा कटकु आऊन ताल्ला मा टोपी ईटबुट्टुन, या प्रकार देल यहोवा मूसा अक आग्या कोटीदुन.
LEV 8:14 आग आव पापबली इन हारोद वस्ता अक आंदुर हात्ती वोतुन; अदिक हारून अदिक आऊन पारगोळ तान-तान कय पापबली इन वस्ता अन्द ताल्ला मा ईट्टुल.
LEV 8:15 आग अद बली माळकु आत, अदिक मूसा अदुर्द रक्ता इक हुळकु बेळ्ल देल वेदी इन नाकु सींगगोळ मा हचकु पवित्र माळदुन, अदिक रकत इक वेदी इन पायवा मा पलटुस बुट्टुन, अदिक आऊन साटी प्रायश्चित माळकु अवरी शुद्ध माळदुन.
LEV 8:16 अदिक मूसा कल्लगोळ्द म्याकुच इन सप्पा न्याणद, अदिक ईरग्या अन्द म्याकुच इन परत, अदिक न्याणद सांगुळ येढ्ढु क्वातागोळ इक हुळकु वेदी मा होताकदुन.
LEV 8:17 लेकीन बली माळ्द वस्ता दा टु जो येनारा मिक्कु ईत्तीत अदरी, मतलब सेंगळी सांगुळ अदुर तोगुल अदिक चिच्ची इक आव छावनी टु व्हार्या बेक्की दा होताकदुन, या प्रकार देल यहोवा मूसा अक आग्या कोटीदुन.
LEV 8:18 बाक आव मेल-मिलाप इन म्यांडा अक हात्ती वोतुन, अदिक हारून अदिक आऊन पारगोळ इक तान-तान कय म्यांडा अन्द ताल्ला मा ईट्टुल.
LEV 8:19 आग अद बली माळकु आत, अदिक मूसा अदुर्द रकत इक वेदी मा नाकु दी सिपसदुन.
LEV 8:20 आग म्यांडा तुकळा-तुकळा माळकु आत, अदिक मूसा ताल्ला अदिक न्याण सांगुळ तुकळागोळ इक होताकदुन.
LEV 8:21 आग कल्लगोळ अदिक काल नीर देल तोळुकु आदव, अदिक मूसा पूरा म्यांडा अक वेदी मा होताकदुन, अदिक अद सुखदायक सुगन्ध कोळोर साटी होमबली अदिक यहोवा अन्द साटी होमबली आगेत, या प्रकार देल यहोवा मूसा अक आग्या कोटीदुन.
LEV 8:22 बाक आव दुसरा म्यांडा अक जो अभिषेक इन म्यांडा ईरोद हात्ती वोतुन, अदिक हारून अदिक आऊन पारगोळ तान-तान कय म्यांडा अन्द ताल्ला मा ईट्टुल.
LEV 8:23 आग अद बली माळकु आत, अदिक मूसा अदुर रकत दा टु थ्वाळासा हुळकु हारून इन ऊजवा किव इन स्यांडा मा अदिक अदुर ऊजवा कय अदिक ऊजवा काल इन बेळ्लगोळ मा हचदुन.
LEV 8:24 अदिक आव हारून उन पारगोळ इक हात्ती वोतुन, अदिक रकत दा टु थ्वाळासा ऊंद-ऊंद पार उन ऊजवा कीव इन स्यांडा मा अदिक ऊजवा कय अदिक ऊजवा काल इन बेळ्लगोळ मा हचदुन; अदिक मूसा रकत इक वेदी मा नाकु दी सिपसदुन.
LEV 8:25 अदिक आव न्याणद पुसटी, अदिक कल्लगोळ म्याकळोद सप्पा न्याणद, अदिक ईरग्या माकळोद परत सांगुळ येढ्ढु क्वातागोळ, अदिक ऊजवा जाँघ, ईव सप्पा हुळकु अलग ईट्टुल;
LEV 8:26 अदिक अखमीरी रोट्टी इन फुट्टी जो यहोवा अन्द मुंद ईटकु आगीत अदुर दा टु ऊंद अखमीरी रोट्टी, अदिक याण्णा हतकु मैदा अन्द ऊंद रोट्टी, अदिक ऊंद पापळ हुळकु न्याणद अदिक ऊजवा जाँघ मा ईट बुट्टुन;
LEV 8:27 अदिक ईव सप्पा चीजगोळ हारून अदिक आऊन पारगोळ कयगोळ मा ईटकु आत, अदिक हालुसोद भेंट इन साटी यहोवा अन्द मुंद हालुस्कु आत.
LEV 8:28 आग मूसा आंदरी मात्त आंदुर कयगोळ दा टु हुळकु आंदरी वेदी मा होमबली इन म्याकुच होताकदुन, ईद सुखदायक सुगन्ध कोळोर साटी बलिदान इन भेंट अदिक यहोवा अन्द साटी संतोष हुंद.
LEV 8:29 आग मूसा याद्दा अक हुळकु हालुसोद भेंट इन साटी यहोवा अन्द मुंद आळगाळस्दुन; अदिक अभिषेक इन म्यांडा दा टु मूसा अन्द भाग ईदा ठहरूस्त ह्यांग यहोवा मूसा अक आग्या कोटीदुन.
LEV 8:30 आग मूसा अभिषेक इन याण्णा अदिक वेदी माकळोद रकत, येढ्ढु दा टु थ्वाळासा हुळकु हारून अदिक आऊन कपळागोळ मा, अदिक आऊन पारगोळ अदिक आंदुर कपळागोळ मा भी सिपसदुन; अदिक आव कपळागोळ सांगुळ हारून उक भी पवित्र माळदुन.
LEV 8:31 आग मूसा हारून अदिक आऊन पारगोळ से अंदुन, “चिच्ची इक भेंटमाळोद तम्बू उन दरवाजा मा कासी, अदिक आ रोट्टी इक जो अभिषेक इन फुट्टी दा आव अवा तिनी, ह्यांग ना आग्या कोट्टीन कि हारून अदिक आऊन पारगोळ अच अदरी तिनुल.
LEV 8:32 अदिक चिच्ची अदिक रोट्टी दा टु जो मिक्कु ईतोगुल अदरी बेक्की दा होताक बुळेत.
LEV 8:33 अदिक यागासताका नीम्द अभिषेक इन दिन पुरा आगालव आगासताका, मतलब येळ दिन ताका भेंटमाळोद तम्बू उन दरवाजा अन्द व्हार्या होगबाळेतीर, यतिकी आव येळ दिन ताका नीम्द अभिषेक माळतेला ईत्तान.
LEV 8:34 या प्रकार ईंद माळकु आग्याद हांग अच माळोद आग्या यहोवा नानी कोटान, ईदुर देल नीम्द पाप ढाँपस्कु आदव.
LEV 8:35 इदुरसाटी नीव भेंटमाळोद तम्बू उन द्वार मा येळ दिन ताका ईळ्लक-हागुल ठहरूसकु ईरेतीर, ईद यहोवा अन्द आग्या अक नीव ईला मानसेतीर रा नीव सोत्तीर; कारण परमेश्वर नानी हिंग अच आग्या कोटान.”
LEV 8:36 आग यहोवा अन्द ईवा सप्पा निर्देशगोळ्द आग्यागोळ अनुसार जो आव मूसा अन द्वारा कोटीदुन हारून अदिक आऊन पारगोळ माळदुर.
LEV 9:1 आठवा दिशी मूसा हारून अदिक आऊन पारगोळ इक अदिक इस्राएली पुरनिएगोळ इक कार्सुसकु हारून से अंदुन,
LEV 9:2 बाक हारून अंदुन, “पापबली इन साटी ऊंद तंदरूस्त म्यांडा अन्द पाड्डा, अदिक होमबली इन साटी ऊंद तंदरूस्त म्यांडा हुळकु यहोवा अन्द मुंद भेंट येर्स.”
LEV 9:3 अदिक इस्राएलीगोळ देल ईद अन, “नीव पापबली इन साटी ऊंद व्हात, अदिक होमबली इन साटी ऊंद पाड्डा अदिक ऊंद म्यांडा अन्द पाड्डा हुडी, जो ऊंद वर्ष इन ईरूल अदिक तंदरूस्त ईरूल,
LEV 9:4 अदिक मेलबली इन साटी यहोवा अन्द मुंद येरसोर साटी ऊंद वस्ता अदिक म्यांडा, अदिक याण्णा हचकु मैदा अन्द ऊंद अन्नभेट भी तंदकोमी; यतिकी ईंद यहोवा नीमी इक दर्शन कोट्टान.”
LEV 9:5 अदिक या-या चीज इक आग्या मूसा कोट्टुन आ सप्पा चीज इक आंदुर भेंटमाळोद तम्बू उन मुंद तरूल; अदिक पुरा मंडली हात्ती होगकु यहोवा अन्द मुंद निदरूत.
LEV 9:6 आग मूसा अंदुन, “ईद अद क्याल्सा हुन यदरी माळोर साटी यहोवा आग्या कोटीदुन कि नीव अदरी माळी; अदिक यहोवा अन्द महिमा नीम इक कांळ्सीत.”
LEV 9:7 आग मूसा हारून से अंदुन, “यहोवा अन्द आग्या अन्द अनुसार वेदी इन हात्ती होगकु तान पापबली अदिक होमबली इक येर्सकु तान अदिक सप्पा जनता अन्द साटी प्रायश्चित माळ अदिक जनता अन्द चढ़ावा अक भी येर्सकु आंदुर साटी प्रायश्चित माळ.”
LEV 9:8 इदुरसाटी हारून वेदी इन हात्ती होगकु तान पापबली इन पाड्डा अक बलिदान माळदुन.
LEV 9:9 अदिक हारून उन पार रकत इक आऊन हात्ती ओतुर, आग आव तान बेळ्ल इक रकत दा नेनाक्कु वेदी इन सींगगोळ मा हचदुन, अदिक मिक्कु रकत इक वेदी इन पायवा मा पलटुस बुट्टुन;
LEV 9:10 अदिक पापबली दाकळोद न्याणद अदिक क्वातागोळ अदिक ईरग्या माकळोद परत इक आव वेदी मा होताकदुन, ह्यांग यहोवा मूसा अक आग्या कोटीदुन.
LEV 9:11 अदिक मास अदिक तोगुल इक आव छावनी टु व्हार्या बेक्की दा होताकदुन.
LEV 9:12 आग होमबली पशु उक बलिदान माळदुन; अदिक हारून उन पारगोळ रकत इक आऊन कय दा कोट्टुर, अदिक आव अदरी वेदी मा नाकु दी सिप्स बुट्टुन.
LEV 9:13 आग आंदुर होमबली पशु उक तुकळा-तुकळा माळकु ताल्ला सांगुळ आऊन कय दा कोट बुट्टुर अदिक आव अवरी वेदी मा होताक बुट्टुन.
LEV 9:14 अदिक आव कल्लगोळी अदिक कालगोळी इक तोळुकु वेदी मा होमबली इन म्याकुच होताकदुन.
LEV 9:15 आग आव लॉकुर्द चढ़ावा अक मुंद ओतकु अदिक आ पापबली इन व्हात इक जो आंदुर साटी ईरोद हुळकु अदुर बलिदान माळदुर, अदिक पयला अन्द घाई अदरी भी बलिदान माळकु येर्सदुर.
LEV 9:16 अदिक आव होमबली इक भी हात्ती ओतकु विधी इन अनुसार येर्सदुन.
LEV 9:17 अदिक अन्नभेट इक भी हात्ती ओतकु अदुर दा टु ठ्वामा तीम हुडुकु वेदी मा होताकदुन, ईद व्हातुर इन होमबली इन अलावा येर्सकु आत.
LEV 9:18 वस्ता अदिक म्यांडा, मतलब जो मेल-मिलाप बली पशु, जनता अन्द साटी ईरोद अव भी बली माळकु आदव; अदिक हारून उन पारगोळ रकत इक आऊन कय दा कोट्टुर, अदिक आव अदरी वेदी मा नाकु दी सिप्स बुट्टुन;
LEV 9:19 अदिक आंदुर वस्ता अन्द न्याण इक, अदिक म्यांडा दा टु न्याणद पुसटी इक, अदिक या न्याणद देल कल्लगोळ होचकु ईरताव अदरी, अदिक क्वाता सांगुळ ईरग्या माकळोद परत इक भी आऊन कय दा कोट्टुर;
LEV 9:20 अदिक आंदुर न्याण इक याद्दागोळ मा ईटदुर; अदिक आव अद ण्याण वेदी मा होताकदुन,
LEV 9:21 लेकीन याद्दागोळ अदिक ऊजवा जाँघ इक हारून मूसा अन आग्या अन्द अनुसार हालुसोद भेंट इन साटी यहोवा अन्द मुंद आळगाळस्दुन.
LEV 9:22 आग हारून लॉकुर दी कय वाळुस्कु आंदरी आशीर्वाद कोट्टुन; अदिक पापबली, होमबली, अदिक मेल-मिलाप इन बली इक येर्सकु आव ल्‍यालमा ईळुतेला बंदुन.
LEV 9:23 आग मूसा अदिक हारून भेंटमाळोद तम्बू दा होदुर, अदिक अल टु होटकु लॉकुरी आशीर्वाद कोट्टुर; आग यहोवा अन्द महिमा सप्पा लॉकुरी कांळ्सत.
LEV 9:24 अदिक यहोवा अन्द मुंद टु बेक्की होळ्त न्याण सांगुळ होमबली इक वेदी मा भस्म माळदुन; इदरी नोळकु लॉकुर जय-जयकार इन नारा हचदुर, अदिक तान-तान बाय इन भार देल बांगकु प्रणाम माळदुर.
LEV 10:1 आग हारून उन नादाब अदिक अबीहू हेसुर ईनव येढ्ढ पारगोळ तान-तान धूपदान हुळदुर, अदिक अदुर दा बेक्की तुमदुर, अदिक अदुर दा लुबान हाक्कु आ अनुचित बेक्की इक यदुर आग्या यहोवा कोटिदील यहोवा अन्द मुंद अर्पित माळदुर.
LEV 10:2 आग यहोवा अन्द मुंद टु बेक्की होळ्‍त अदिक आ येढ्ढु मुंदरी भस्म माळ बुट्टुन, अदिक आंदुर यहोवा अन्द मुंद सोतोदुर.
LEV 10:3 आग मूसा हारून से अंदुन, “ ईद अदा मात हुंद यदरी यहोवा अंदीदुन, कि जो नांद हात्ती बंदान जरूरी आद कि आव नानी पवित्र जानसुल, अदिक पुरा जनता अन्द मुंद नांद महिमा माळुल.” अदिक हारून सुंगा ईत्तुन.
LEV 10:4 आग मूसा मीशाएल अदिक एलसाफान उक जो हारून इन काका उज्जीएल उन पार ईरोन कारूकु अंदुन, “हात्ती बरी, अदिक तान मुतणागोळ इक पवित्र जागा अन्द मुंद टु नेगुकु छावनी इन व्हार्या वोई.”
LEV 10:5 मूसा अन्द आग्या अन्द अनुसार आंदुर हात्ती होगकु आंदरी अंगरखा सांगुळ नेगुकु छावनी इन व्हार्या ओतुर.
LEV 10:6 आग मूसा हारून से अदिक आऊन पार एलीआजर अदिक ईतामार से अंदुन, “ नीव लॉकुर तान ताल्लागोळ चुट्टी बगरूसबाळी, अदिक न तान कपळागोळी हरूबाळी, हिंग आगबाळुल कि नीव भी सोतोदीर, अदिक पुरा मंडली मा आऊन गुस्सा भळकुसुल; लेकीन इस्राएल इन सप्पा घराना अन्द लॉकुर जो नीम्द वार्टबन्धु आर नादाब अदिक अबीहू यहोवा अन्द हचकु बेक्की मा होत्तुर शोक माळुल.
LEV 10:7 अदिक नीव लॉकुर भेंटमाळोद तम्बू उन दरवाजा अन्द व्हार्या होगबाळेतीर, हिंग आगबाळुल कि नीव सोतोदीर; यतिकी यहोवा अन्द अभिषेक इन याण्णा नीम मा हतकु आद.” मूसा अन्द ई वचन इन अनुसार आंदुर हिंग माळदुर.
LEV 10:8 बाक यहोवा हारून से अंदुन,
LEV 10:9 “याग-याग नी या नीन पार भेंटमाळोद तम्बू दा बंदीर आग-आग नीम दा टु यावारा भी अंगुर इन रास्सा अदिक सारा कुडुकु ईरबाळुल अदिक न यातोदु प्रकार इन सार्रा, ईलारा हिंग आगबाळुल कि नीव सोतोदीर; नीम्द पीढ़ी-पीढ़ी दा ईद विधी नळुतेला ईरूल,
LEV 10:10 ईदुर देल नीव पवित्र अदिक अपवित्र दा, अदिक शुद्ध अदिक अशुद्ध दा अंतर माळ सकी;
LEV 10:11 अदिक इस्राएलीगोळ इक आ सप्पा विधीगोळ इक कल्स सकुल यदरी यहोवा मूसा अन्द द्वारा आंदरी हेळ बुट्टान.”
LEV 10:12 बाक मूसा हारून से अदिक आऊन मिक्कु येढ्ढु पार एलीआजर अदिक ईतामार से भी अंदुन, “यहोवा अन्द चढ़ावा दा टु जो अन्नभेट मिक्कु आद अदरी हुळकु होमबली इन हात्ती बिना खमीर हचकु तिनी, यतिकी आव हापाळ वळ्लीद आद;
LEV 10:13 अदिक नीव अदरी यातोदारा पवित्र जागा दा तिनी, अद यहोवा अन्द होमबली दा टु नींद अदिक नीन पारगोळ्द हक आद; यतिकी नानी हिंग अच आग्या सिक्याद.
LEV 10:14 आग हालुस्कु भेंट इन याद्दा अदिक नेग्द भेंट इन जाँघ इक नीव लॉकुर, मतलब नी अदिक नीन पोर-पारगोळ सप्पा यातोदारा शुद्ध जागा दा तिनी; यतिकी आ इस्राएलीगोळ्द मेल-मिलाप इन बली दा टु नीनी अदिक नीन चिकोरगोळ्द हक ठहरूस्कु आगेग्याद.
LEV 10:15 न्याण इन होमबली गोळ सांगुळ जो नेग्द जाँघ अदिक हालुस्कु याद्दा यहोवा अन्द मुंद हालुसोर साटी बंदीत, ईद भाग यहोवा अन्द आग्या अन्द अनुसार हमेशा अन्द विधी इन व्यवस्था देल नींद अदिक नीन चिकोरगोळ साटी हुंद.”
LEV 10:16 बाक मूसा पापबली इन व्हात इन खोजबीन माळदुन, रा येन मालुम आत कि अद होत्‍ताकु आग्याद, इदुरसाटी एलीआजर अदिक ईतामार जो हारून उन पार मिक्कु ईरोर आंदुर से आव गुस्सा दा बंदकु अनली कुरतुन,
LEV 10:17 “पापबली जो परम पवित्र आद अदिक अदरी यहोवा नीमी इदुरसाटी कोटीदुन कि नीव मंडली इन अधर्म इन भार ताम मा नेगुकु आंदुर साटी यहोवा अन्द मुंद प्रायश्चित माळी, नीव आऊन मास पवित्र जागा दा येती तिंदीदील?
LEV 10:18 नोळी, आऊन रकत पवित्र जागा अन्द बुळ्क रा तंदकु उच आगीदिल, बिना सक देल उचित ईरोद कि नीव नांद आग्या अन्द अनुसार आऊन चिच्ची इक पवित्र जागा दा तिनायदीर.”
LEV 10:19 इदुर उत्तर हारून मूसा अक ई प्रकार देल कोट्टुन, “नोळ, ईंद अच आंदुर तान पापबली अदिक होमबली इक यहोवा अन्द मुंद येर्सदुर; बाक नान मा हिंग मुसिबतगोळ होट बंदाव! इदुरसाटी अगर ना ईंद पापबली इन चिच्ची तिनायदीन रा येन ईद मात यहोवा अन्द मुंद भला ईराइत?”
LEV 10:20 याग मूसा ईद केळदुन आग आऊक वळ्लीद हत्त.
LEV 11:1 बाक यहोवा मूसा से अदिक हारून से अंदुन,
LEV 11:2 “इस्राएलीगोळ से अन: यास पशु धरती मा आव आ सप्पा दा टु नीव ई जीवधारीगोळ्द मास तिन सकतीर.
LEV 11:3 पशु गोळ दा टु यास चिरूसकु या हर्दकु खुर इन ईरताव अदिक कवरी माळताव अवरी तिन सकतीर.”
LEV 11:4 लेकीन कवरी माळावाळा या हर्दकु खुरवाळा दा टु ई पशुगोळी तिनबाळेतीर, मतलब ऊँट, जो कवरी रा माळतद लेकीन चिरा खुर इन ईराल, ईदुरसाटी अद नीम्द साटी अशुद्ध ठहरूस्कु आग्याद.
LEV 11:5 अदिक चट्टानी बिज्जू, जो कवरी रा माळतद लेकीन चिरा खुर इन ईराल, अद भी नीम्द साटी अशुद्ध आद.
LEV 11:6 अदिक खरगोश, जो कवरी रा माळतद लेकीन चिरा खुर इन ईराल, ईदुरसाटी अद भी नीम्द साटी अशुद्ध आद.
LEV 11:7 अदिक हंदी, जो चिरा मतलब हर्दकु खुर इन रा ईरतद लेकीन कवरी माळाल, इदुरसाटी अद नीम्द साटी अशुद्ध आद.
LEV 11:8 ईऊर मास दा टु येनारा भी तिनबाळेतीर, अदिक ईऊरव मुर्दा अक मूठ भी बाळेतीर; ईव रा नीम्द साटी अशुद्ध आव.
LEV 11:9 “बाक यास नीर ईनव जन्तु आव ईऊर दा टु नीव इंदरी तिन सकतीर, मतलब समुद्र या गांगागोळ नीर इन जन्तुगोळ दा टु यासरव पिक्का अदिक छिलका ईरताव आंदरी तिन सकतीर.”
LEV 11:10 अदिक नीर दा ईरावाळेर प्राणीगोळ दा टु यास जीवधारी बिना पिक्का अदिक खवला अन्द समुद्र या गांगागोळ दा ईरताव अव सप्पा नीम्द साटी घृणित आव.
LEV 11:11 अव नीम्द साटी घृणित ठहरूस्याव; नीव अऊर दा टु येनारा भी तिन बाळेतीर, अदिक अऊर मुर्दागोळी इक अशुद्ध जान्सेतीर.
LEV 11:12 नीर दा या जन्तु उन पिक्का अदिक छिलकागोळ ईरालव अव नीम्द साटी अशुद्ध आव.
LEV 11:13 “बाक पक्षिगोळ दा टु ईवरी अशुद्ध जान्सेतीर, ईव अशुद्ध आगोद कारण देल तिनकु आगबाळुल, मतलब गरूळ, दाळीवाळा गिधाळ, करीद गिधाळ,
LEV 11:14 चील, अदिक अलग-अलग जाती नव घार,
LEV 11:15 अदिक अलग-अलग जाती नव काग्गगोळ,
LEV 11:16 शुतुरमुर्ग, ईळ्लक इन सिकरा, पानकोंबळी, अदिक अलग-अलग जाती नव पानकोंबळी,
LEV 11:17 स्यांळ्द पिंजोळ्ला, बगला, धोळ्द पिंजोळ्ला,
LEV 11:18 बगला, धोळ उल्लू, राजहँस, पानकोंबळी, गिधाळ,
LEV 11:19 सारस, अलग-अलग जाती नव बगलागोळ, टिटवी अदिक चमगादळ.”
LEV 11:20 यास पिक्कावाळेर कीळागोळ नाक कालगोळ बल मा नळुताव अव सप्पा नीम्द साटी अशुद्ध आव.
LEV 11:21 लेकीन रेंगसावाळेर अदिक पिक्कावाळेर जो नाक नाक कालगोळ बल मा नळुताव, अऊरव भूमी मा हारली वोळली टांगगोळ ईरताव आंदरी रा तिन सकतीर.
LEV 11:22 अव ईव हुव, मतलब अलग-अलग जाती नव हत्तीफाफागोळ, फनगे अदिक झींगुर.
LEV 11:23 लेकीन अदिक सप्पा रेंगसावाळेर पिक्कावाळेर जो नाक काल वाळेर ईरताव अव नीम्द साटी अशुद्ध आव.
LEV 11:24 “ईऊर कारण नीव अशुद्ध ठहरूसीर; यावारा ईऊर लोथ मुठबुळुल आव द्यावगा ताका अशुद्ध ठहरूस्यान.
LEV 11:25 अदिक जो ईऊर लोथ दा टु येनारा भी नेगुल आव तान कपळा वोगुल अदिक द्यावगा ताका अशुद्ध ईरूल.
LEV 11:26 बाक यास पशु चिरा खुर इन ईरताव लेकीन न रा बिलकुल हर्दकु खुर इन अदिक न कवरी माळावाळा आव अव नीम साटी अशुद्ध आव; जो यावारा अवरी मुट्‍यान आव अशुद्ध ठहरूस्यान.
LEV 11:27 अदिक नाक काल इन बल आळावाळेर दा टु यास पंजागोळ बल मा नळुताव अव सप्पा नीम साटी अशुद्ध आव; जो यावारा आंदुर लोथ मुट्‍यान आव द्यावगा ताका अशुद्ध ईत्तान.
LEV 11:28 अदिक जो यावारा अऊर लोथ नेगदान आव तान कपळा तोळुल अदिक द्यावगा ताका अशुद्ध ईरूल; यतिकी अव नीम्द साटी अशुद्ध आव.
LEV 11:29 “अदिक जो धरती मा रांगस्ताव अऊर दा टु ईव रेंगसावाळेर नीम्द साटी अशुद्ध आव, मतलब घोरपळ, ईळ्ल, अदिक अलग-अलग जाती नव डोकेला,
LEV 11:30 अदिक ईजगुर, मगर, सापसिरोली, सांडा, डोकेला.
LEV 11:31 सप्पा रेंगसावाळेर दा टु ईव अच नीम्द साटी अशुद्ध आव; जो यावारा ईऊर लोथ मुट्‍यान आव द्यावगा ताका अशुद्ध ईरूल.
LEV 11:32 अदिक ईऊर दा टु अऊर लोथ यातोदारा वस्तु मा बिदोगुल अद भी अशुद्ध ठहरूसीत, चाहे अद हुळ्ली इन यातोदारा बरतन ईरूल, चाहे कपळा, चाहे तोगुल, चाहे बॉरा, चाहे यातोदारा क्याल्सा अन्द यातोदारा भी बरतन यती आगबाळुल; अव नीर दा हाक्कु आदीत, अदिक द्यावगा ताका अशुद्ध ईरूल, आग शुद्ध सम्सकु आदीत.
LEV 11:33 अदिक अगर मुण्ण इन यातोदारा बरतन ईरूल ईदुर दा ईव जन्तुगोळ दा टु यावारा बिळुल, रा अद बरतन दा जो येनारा ईरूल अद अशुद्ध ठहरूसुल, अदिक बरतन इक नीव ओळ्द बुळेतीर.
LEV 11:34 अदुर दा तिना लायक भोजन ईरूल, अदुर दा नीर इन छुआव ईरूल अद सप्पा अशुद्ध ठहरूसुल; बाक अगर यातोदारा हिंग बरतन दा कुडोर साटी येनारा ईरूल रा अद भी अशुद्ध ठहरूसुल.
LEV 11:35 अदिक अगर लोथ दा टु येनारा तंदुर या चुली मा बिळुल रा अद भी अशुद्ध ठहरूसुल, अदिक मुरकु आगुल; यतिकी अद अशुद्ध आगेदीत, अद निम्द साटी भी अशुद्ध ठहरूसीत.
LEV 11:36 लेकीन झरना या क्यार्रा यदुर दा नीर जमा ईरूल अद रा शुद्ध अच ईरूल; लेकीन जो ईऊर लोथ इक मुठ्ठुल आव अशुद्ध ठहरूसुल.
LEV 11:37 अदिक अगर ईऊर लोथ दा टु येनारा भी यातोदारा प्रकार इन बींजा मा जो बोऊसा साटी ईरूल, रा अद बींजा शुद्ध ईरूल.
LEV 11:38 पर अगर बींजा मा नीर हाक्कु आगीदाद अदिक हिंद लोथ दा टु येनारा अदुर मा बिदोगुल, रा अद नीम्द साटी अशुद्ध ठहरूसुल.
LEV 11:39 “बाक या पशुगोळ इक तिनोद आग्या नीम इक कोटकु आग्याद अगर अदुर दा टु यातोदारा पशु सोतोगुल, रा जो यावारा अदुर लोथ इक मुठ्ठुल आव द्यावगा ताका अशुद्ध ईरूल.
LEV 11:40 अदिक अऊर लोथ दा टु जो यावारा येनारा तिनुल आव तान कपळा तोळुल अदिक द्यावगा ताका अशुद्ध ईरूल; अदिक जो यावारा अऊर लोथ नेगुल आव भी तान कपळा तोळुल अदिक द्यावगा ताका अशुद्ध ईरूल.
LEV 11:41 “सप्पा प्रकार इन धरती मा रेंगसावाळेर जन्तु घिनौना आव; अव तिनकु आग बाळुल.
LEV 11:42 धरती मा रेंगसावाळेर दा टु यास व्हाट्टा या नाक कालगोळ मा ईरताव, अवरी नीव तिनबाळेतीर; यतिकी अव घिनौना आव.
LEV 11:43 नीव यातोदारा प्रकार इन रेंगसावाळेर जन्तु उन द्वारा तान तान इक घिनौना माळबाळेतीर; अदिक न अऊर द्वारा तान इक अशुद्ध माळकु अपवित्र ठहरूसेतीर.
LEV 11:44 यतिकी ना नीम्द परमेश्वर यहोवा हुईन; ई कारण खुद इक शुद्ध माळकु पवित्र बन्सकु ईरी, यतिकी ना पवित्र आईन. इदुरसाटी नीव यातोदारा भी प्रकार इन रेंगसावाळेर जन्तु उन द्वारा जो धरती मा नळुताव तान तान इक अशुद्ध माळबाळेतीर.
LEV 11:45 यतिकी ना आ यहोवा हुईन जो नीमी मिस्त्र द्याश टु इदुरसाटी तेगुकु तंदीन कि नीम्द परमेश्वर ठहरूसाईन; इदुरसाटी नीव पवित्र बन्सी, यतिकी ना पवित्र आईन.”
LEV 11:46 पशु गोळ, पक्षिगोळ, अदिक सप्पा नीर दा ईरावाळेर प्राणीगोळ, अदिक धरती मा सप्पा रेंगसावाळेर प्राणीगोळ्द बारा दा ईदा व्यवस्था आद,
LEV 11:47 कि शुद्ध अशुद्ध अदिक तिनालायक या बिन तिनालायक जीवधारीगोळ दा भेद माळकु आगुल.
LEV 12:1 बाक यहोवा मूसा से अंदुन,
LEV 12:2 “इस्राएलीगोळ से अन: जो आर्त व्हाट्या दी ईरूल अदिक आकीन पारगोळ ईरूल, रा आक येळ दिन ताका अशुद्ध ईत्तार; या प्रकार देल आक व्हार्या आगकु ईरतार हांग अच अशुद्ध ईर पायजे.”
LEV 12:3 अदिक आठवा दिशी चिग्द उन खतना माळकु आगुल.
LEV 12:4 बाक आक आर्त तान खुन होगोद स्त्राव दा टु शुद्ध आगोर साटी तेत्तीस दिन ईरूल; अदिक यागासताका आकीन शुद्ध आगोद दिन पुरा न आगुल आगासताका आक न रा यातोदारा पवित्र जागा दा प्रवेश माळुल.
LEV 12:5 अदिक अगर आकी पोर आत, रा मासीक पाळी इन होती ह्यांग आक ईरतोगोर हांग अच आक चौदा दिन अशुद्ध ईरूल; आकी तान रकत स्त्राव दा टु शुद्ध आगोर साटी छैसठ दिन हत्याव.
LEV 12:6 “याग आकीन शुद्ध आगोद दिन पुरा आगुल, आग चाहे आकी पार आगुल या बाक पोर, आक होमबली इन साटी ऊंद वर्ष इन म्यांडा अन्द पाड्डा, अदिक पापबली इन साटी कबूतर इन ऊंद पाड्डा या पंडुकी, भेंटमाळोद तम्बू उन दरवाजा मा याजक उन हात्ती तरूल.”
LEV 12:7 आग याजक अवरी यहोवा अन्द मुंद भेंट येर्सकु आकीन साटी प्रायश्चित माळुल; अदिक आक तान मासीक पाळी इन अशुद्धता बिटकु शुद्ध ठहरूस्यार. “याता आर्त इक पार या पोर पैदा आगुल आंदुर साटी ईदा व्यवस्था आद.”
LEV 12:8 अदिक अगर आव म्यांडा कोळदुर दा असमर्थ ईरूल, रा येढ्ढ पंडुकी या कबूतर इन येढ्ढ पाड्डा, ऊंद रा होमबली अदिक दुसरा पापबली इन साटी कोळुल; अदिक याजक आकीन साटी प्रायश्चित माळुल, आग आक शुद्ध ठहरूस्यार.
LEV 13:1 बाक यहोवा मूसा अदिक हारून से अंदुन,
LEV 13:2 “याग यावारा मंळसा अन्द मय इन तोगुल दा सुजन या चट्टा या दाग ईरूल, अदिक इदुर देल आऊन तोगुल दा कोळ इन व्याधि इन घाई येनारा कांळ्सकु बिळुल रा आऊक हारून याजक उन हात्ती या आऊन पार जो याजक आन, आंदुर दा टु यारीकारा हात्ती ओईल.
LEV 13:3 याग याजक आऊन तोगुल इन चट्टा अक नोळुल, अदिक अगर आ चट्टा अन जागा अन्द चुट्टीगोळ बिळेव आगेग्याव अदिक चट्टा तोगुल देल गहरा कांळ्सकु बिळुल, रा आव जान्स कोमुल कि कोढ़ इन चट्टा हुव; अदिक याजक आ मंळसा अक नोळकु आऊक अशुद्ध ठहरूसुल.
LEV 13:4 पर अगर अद चट्टा आऊन तोगुल दा बिळीद ईरूल, लेकीन तोगुल देल गयरा कांळ्सबाळुल, अदिक अलेव चुट्टी बिळेव हैलेच, रा याजक आऊक येळ दिन ताका अलग माळकु ईटुल;
LEV 13:5 अदिक सातवा दिशी याजक आऊक नोळुल, अदिक अगर अद चट्टा ह्यांग चा हांग अच कांळ्सुल अदिक आऊन तोगुल दा फैलुसकु ईरबाळुल, रा याजक आऊक मात्त येळ दिन ताका अलग माळकु ईटुल;
LEV 13:6 अदिक सातवा दिशी याजक आऊक मात नोळुल, अदिक अगर नोळुल कि चट्टा अन चमक कम आद अदिक चट्टा तोगुल मा फैलुसकु हैलेच, रा याजक आऊक शुद्ध ठहरूसुल; यतिकी आऊन रा तोगुल दा सिर्फ चट्टा आद; अदिक आव तान कपळा तोळुकु शुद्ध आगेगुल.
LEV 13:7 पर अगर याजक उन आ जाच इन बाद्दा यदुर दा आव शुद्ध ठहरूसकु आगीदुन, अद चट्टा आऊन तोगुल मा हापाळ फैलुसेग्याद, रा आव बाक याजक उक तोर्सकु आगुल;
LEV 13:8 अदिक अगर याजक उक कांळ्सुल कि चट्टा तोगुल दा फैलुसेग्याद, रा आव आऊक अशुद्ध ठहरूसुल; यतिकी अद कोढ़ अच हुन.
LEV 13:9 “अगर कोढ़ इन घाई चट्टा यातोदारा मंळसा अक ईरूल, रा आऊक याजक उन हात्ती पोहचुस्कु आगुल;
LEV 13:10 अदिक याजक आऊक नोळुल, अदिक अगर अद सुजन आऊन तोगुल दा बिळीद आगुल, अदिक अदुर कारण चुट्टी भी बिळेव कांळ्सुल, अदिक आ सुजन दा बिना तोगुल इन मास ईरूल,
LEV 13:11 रा याजक जानसुल कि आऊन तोगुल दा हाळोद कोढ़ आद, इदुरसाटी आव आऊक अशुद्ध ठहरूसुल; अदिक बंद ईटबाळुल, यतिकी आव रा अशुद्ध आन.
LEV 13:12 अदिक अगर कोढ़ यावारा मंळसा अन्द तोगुल दा ईल ताका फैलुसेगुल, कि येल्यारा भी याजक नोळुल रोगी इन ताल्ला टु तरकाल ताका कोढ़ पुरा तोगुल इक जकळुस कोंडाद,
LEV 13:13 रा याजक ध्यान देल नोळुल, अदिक अगर कोढ़ आऊन पुरा मय इक जकळुस कोंडाद, रा आव आ मंळसा अक शुद्ध ठहरूसुल; अदिक आऊन मय जो बिलकुल बिळीद आगेग्याद आव शुद्ध अच ठहरूसुल.
LEV 13:14 पर याग आऊन दा बिना तोगुल इन मास कांळ्सकु बिळुल, आग रा आव अशुद्ध ठहरूस्यान.
LEV 13:15 अदिक याजक बिना तोगुल इन मास इक नोळकु आऊक अशुद्ध ठहरूसुल; यतिकी हांगा बिना तोगुल इन मास अशुद्ध अच ईरतद; अद कोढ़ हुन.
LEV 13:16 पर अगर अद बिना तोगुल इन मास बाक बिळीद आगेदीत, रा आव मंळसा याजक उन हात्ती होटोगुल,
LEV 13:17 अदिक याजक आऊक नोळुल, अदिक अगर अद चट्टा दुबारा मात्त बिळीद आगेत्याद, रा याजक रोगी इक शुद्ध जान्सुल; आव शुद्ध आन.
LEV 13:18 “बाक अगर यावारा मंळसा अन्द तोगुल दा फ्वाळा आगकु चंगा आगेग्यान,
LEV 13:19 अदिक फ्वाळा अन्द जागा दा बिळीद सुजन या क्याचांद घाई बिळीद दाग ईरूल, रा अद याजक उक तोर्सकु आगुल;
LEV 13:20 अदिक याजक आ सुजन इक नोळुल, अदिक अगर अद तोगुल देल गयरा कांळ्सकु बिळुल, अदिक अदुर चुट्टी भी बिळेव आगीदाव, रा याजक ईद जान्सकु आ मंळसा अक अशुद्ध ठहरूसुल; यतिकी अद कोढ़ इन चट्टा हुन जो फ्वाळा दा टु वडुकु होटाद.
LEV 13:21 लेकीन अगर याजक नोळुल कि अदुर्दा बिळीद चुट्टी हैलेच, अदिक अद तोगुल देल गयरा हैलेच, अदिक अदुर्द चमक कम आगेग्याद, रा याजक आ मंळसा अक येळ दिन ताका बंद माळकु ईटुल.
LEV 13:22 अदिक अगर अद चट्टा आ समय ताका तोगुल दा खराखुरा फैलुसेगुल, रा याजक आ मंळसा अक अशुद्ध ठहरूसुल; यतिकी अद कोढ़ इन चट्टा हुन.
LEV 13:23 लेकीन अगर अव दाग फैलुसालव अदिक तान जागा मा का बन्सकु ईरताव, रा अद फ्वाळा अन्द दाग हुन; याजक आ मंळसा अक शुद्ध ठहरूसुल.
LEV 13:24 “बाक अगर यावारा मंळसा अन्द तोगुल दा होत्‍तोद घाव ईरूल, अदिक आ होतकु घाव दा बिना तोगुल इन दाग क्याचांद आगतेला बिळीद या बिळीद अच आगेगुल,
LEV 13:25 रा याजक आऊक नोळुल, अदिक अगर आ दाग दाकळव चुट्टी बिळेव आगेग्याव अदिक अद तोगुल से गयरा कांळ्सकु बिळुल, रा अद कोढ़ हुन; जो आ होतकु दाग दा टु वडुकु होटाद; याजक आ मंळसा अक अशुद्ध ठहरूसुल; यतिकी आऊन दा कोढ़ इन चट्टा आद.
LEV 13:26 पर अगर याजक नोळुल, कि दाग दा बिळीद चुट्टी हैलेच अदिक न अद तोगुल से येनु गयरा हैलेच, अदिक अदुर्द चमक कम आगेग्याद, रा याजक आऊक येळ दिन ताका अलग माळकु ईटुल,
LEV 13:27 अदिक सातवा दिशी याजक आऊक नोळुल, अदिक अगर अद तोगुल दा फैलुसेग्याद, रा आव आ मंळसा अक अशुद्ध ठहरूसुल; यतिकी आऊक कोळ इन चट्टा आद.
LEV 13:28 लेकीन अगर अद दाग तोगुल दा ईला फैलुसीदाद अदिक तान जागा मा यल इन अल बन्सकु ईरूल, अदिक अदुर्द चमक कम आगेग्याद, रा अद होतदुर कारण बातकु आद, याजक आ मंळसा अक शुद्ध ठहरूसुल; यतिकी अद दाग होतदुर कारण देल आद.
LEV 13:29 “बाक अगर यावारा गंळ्स या आर्त इन ताल्ला मा, या गंळ्स उन दाढ़ी दा चट्टा ईरूल,
LEV 13:30 रा याजक चट्टा अक नोळुल, अदिक अगर अद तोगुल से गयरा कांळ्सकु बिळुल, अदिक अदुर दा भुरा-भुरा पतला चुट्टी ईरूल, रा याजक आ मंळसा अक अशुद्ध ठहरूसुल; अद चट्टा चर्मरोग, मतलब ताल्ला या दाढ़ी इन कोढ़ हुन.
LEV 13:31 अदिक याजक चर्मरोग अन्द चट्टा अक नोळुल, कि अद तोगुल से गयरा हैलेच अदिक अदुर्दा करेव-करेव चुट्टी हैलेच, रा याजक चर्मरोग अन्द रोगी इक येळ दिन ताका अलग माळकु ईटुल,
LEV 13:32 अदिक सातवा दिशी याजक चट्टा अक नोळुल, आग अगर चर्मरोग फैलुसकु ईला ईरूल, अदिक अदुर्दा भुरा-भुरा चुट्टी ईला ईरूल, अदिक चर्मरोग तोगुल से गयरा कांळ्सकु ईला बिळुल,
LEV 13:33 रा आ मंळसा अक मुंडन माळकु आगुल, लेकीन यल चर्मरोग आग्याद अल मुंडन माळकु आग बाळुल; अदिक याजक आ चर्मरोग हतकु मंळसा अक अदिक भी येळ दिन ताका अलग माळुल;
LEV 13:34 अदिक सातवा दिशी याजक चर्मरोग अक नोळुल, अदिक अगर अद चर्मरोग तोगुल दा फैलुस्कु हैलेच अदिक तोगुल से गयरा कांळ्सकु बिळाल, रा याजक आ मंळसा अक शुद्ध ठहरूसुल; अदिक आव तान कपळा वगुकु शुद्ध ठहरूसुल.
LEV 13:35 पर अगर आऊन शुद्ध ठहरूसोद बाद्दा चर्मरोग तोगुल दा थ्वाळासा भी फैलुसुल,
LEV 13:36 रा याजक आऊक नोळुल, अदिक अगर अद तोगुल दा फैलुसकु ईरूल, रा याजक भुरा चुट्टी इक ढुंढ्स बाळुल, यतिकी आ मंळसा अशुद्ध आन.
LEV 13:37 लेकीन अगर आऊन नजर दा अद चर्मरोग ह्यांग इन हांग बन्सकु ईरूल, अदिक अदुर्दा करेव-करेव चुट्टी जमस्कु ईरूल, रा आव जान्सुल कि दाग वळ्लीद आगेग्याद, अदिक आ मंळसा शुद्ध आन; याजक आऊक शुद्ध अच ठहरूसुल.
LEV 13:38 “बाक अगर यावारा गंळ्स या आर्त इन तोगुल दा बिळेव दाग ईरूल,
LEV 13:39 रा याजक नोळुल, अदिक अगर आऊन तोगुल दा अव दाग कम बिळेव ईरूल, रा आव जान्सुल कि आऊन तोगुल दा होटकु दाद अच हुन; आ मंळसा शुद्ध ठहरूसुल.
LEV 13:40 “बाक या मंळसा अन्द ताल्ला अन्द चुट्टीगोळ झळसेग्याव, रा जान्सेतीर कि आव टकला रा आन लेकीन शुद्ध आन.
LEV 13:41 अदिक यावारा मंळसा अन्द ताल्ला अन्द मुंदळव चुट्टी झळसेग्याव, रा आव ताल्ला देल रा टकला आन लेकीन शुद्ध आन.
LEV 13:42 लेकीन अगर टकला ताल्ला मा या टकला ह्याणा मा क्याचांद बिळीद चट्टा ईरूल, रा जान्सेतीर कि अद आऊन टकला ताल्ला या टकला ह्याणा मा होटकु कोढ़ हुन.
LEV 13:43 इदुरसाटी याजक अदरी नोळुल, अदिक अगर चट्टा अन्द सुजन आऊन टकला ताल्ला या टकला माथा मा हिंग लाली हुळकु बिळीद ईरूल जसा चमळी इन कोढ़ दा ईरतद,
LEV 13:44 रा आ मंळसा कोढ़ी आन अदिक अशुद्ध आन; अदिक याजक आऊक जरूर अशुद्ध ठहरूसुल; यतिकी अद चट्टा आऊन ताल्ला मा आद.
LEV 13:45 “यारदा ई चट्टा ईरूल आ कोढ़ी इन कपळा हरकु अदिक ताल्ला अन्द चुट्टी बगरूस्कु ईरूल, अदिक आव तान म्याकळोद टुट्टी इक मुचकु अशुद्ध-अशुद्ध कारूतेला ईरूल.
LEV 13:46 यास दिन ताका अद चट्टा आऊन दा ईरूल आस दिन ताका आव रा अशुद्ध ईत्तान; अदिक आव अशुद्ध ठहरूसकु ईरूल; इदुरसाटी आव आबना अच ईरूल, आऊन ईरोद जागा छावनी इन व्हार्या ईरूल.
LEV 13:47 “बाक या कपळा दा कोढ़ इन चट्टा ईरूल, चाहे अद कपळा ऊन इन ईरूल या सन इन,
LEV 13:48 अद चट्टा चाहे आ सनी या ऊन इन कपळा अन्द होल्द ईरूल या बन्सकु ईरूल, या अद चट्टा तोगुल दा या तोगुल इन माळकु यातोदारा वस्तु दा ईरूल,
LEV 13:49 अगर अद चट्टा यातोदारा कपळा अन्द चाहे होल्द ईरूल चाहे बन्सकु ईरूल, या तोगुल दा या तोगुल इन यातोदारा वस्तु दा हिवरा ईरूल या क्याचाँद सा ईरूल, रा जान्सेतीर कि अद कोढ़ इन चट्टा हुंद अदिक अद याजक उक तोर्सकु आगुल.
LEV 13:50 अदिक याजक चट्टा अक नोळुल, अदिक चट्टा हतकु आ वस्तु उक येळ दिन इन साटी अलग माळुल;
LEV 13:51 अदिक सातवा दिशी आव आ चट्टा अक नोळुल, अदिक अगर अद कपळा अन्द चाहे होल्द ईरूल चाहे बन्सकु ईरूल, या तोगुल दा या तोगुल इन माळ्द यातोदारा वस्तु दा फैलुस्कु ईरूल, रा जान्सेतीर कि चट्टा हानिकारक कोळ हुंद, इदुरसाटी अद वस्तु , चाहे ह्यांगारा क्याल्सा दा येती न बरबाळुल, तो भी शुद्ध ठहरूसीत.
LEV 13:52 आव आ कपळा अक अदुर्द ताना या बाना दा अद चट्टा ईरूल, चाहे अद ऊन इन ईरूल चाहे सनी इन ईरूल, या तोगुल इन, या तोगुल इन वस्तु ईरूल, अदरी होताकबुळुल, अद चट्टा हानिकारक कोढ़ इन हुंद; अद वस्तु बेक्की दा होताक्कु आगुल.
LEV 13:53 “अगर याजक नोळुल कि अद चट्टा आ कपळा अन्द होल्द या बन्सकु, या तोगुल इन वस्तु दा फैलुसकु हैलेच,
LEV 13:54 रा या वस्तु दा चट्टा ईरूल अदरी तोळोद आग्या याजक कोळुल, आग आऊक मात्त येळ दिन ताका अलग माळकु ईट्टुल;
LEV 13:55 अदिक आऊन तोळदुर बाद्दा याजक आऊक नोळुल, अदिक अगर चट्टा अन्द न रा रंग बदलुसकु ईरूल, अदिक न चट्टा फैलुसकु ईरूल, रा जान्सेतीर कि अद अशुद्ध आद; अदरी बेक्की दा होताकेतीर, यतिकी चाहे अद चट्टा बुळ्क चाहे म्याकुच ईरूल तो भी अद फैलुसावाळा चट्टा हुन.
LEV 13:56 पर अगर याजक नोळुल, कि आऊन तोळदुर बाद्दा चट्टा अन्द चमक कम आगेग्याद, रा आव अदरी कपळा अन्द चाहे होल्द चाहे बन्सकु दा टु, या तोगुल दा टु हरूकु तेगुल;
LEV 13:57 अदिक अगर अद चट्टा आग भी आ कपळा अन्द होल्द या बन्सकु दा, या तोगुल इन आ वस्तु दा कांळ्सकु बिळुल, रा जान्सेतीर कि अद वोळकु होळ्त चट्टा हुंद; अदिक यदुर्दा अद चट्टा ईरूल अदरी बेक्की दा होताकेतीर.
LEV 13:58 अगर आ कपळा देल अदुर्द होल्द या बन्सकु दा चट्टा ईरूल, या तोगुल इन जो वस्तु ईरूल अदरी याग तोळुकु आगुल अदिक चट्टा होगतेला ईरूल, रा अद दुसरा घन तोळुकु शुद्ध ठहरूसुल.”
LEV 13:59 ऊन या सनी इन कपळा अन्द होल्द या बन्सकु दा, या तोगुल इन यातोदारा वस्तु दा जो कोढ़ इन चट्टा ईरूल अदुर शुद्ध अदिक अशुद्ध ठहरूसोद ईदा व्यवस्था हुंद.
LEV 14:1 बाक यहोवा मूसा से अंदुन,
LEV 14:2 “कोढ़ी इन शुद्ध ठहरूसोद व्यवस्था ईद हुन., आव याजक उन हात्ती पोहचुस्कु आगुल;
LEV 14:3 अदिक याजक छावनी इन व्हार्या होगुल, अदिक याजक आ कोढ़ी इक नोळुल, अदिक अगर आऊन कोढ़ इन चट्टा चंगा आग्याद,
LEV 14:4 रा याजक आग्या कोळुल कि शुद्ध ठहरूसावाळा साटी येढ्ढ शुद्ध अदिक जीत्ता पक्षी, देवदार इन हुळ्ली, अदिक क्याचाँद रंग इन कपळा अदिक जूफा अन मार्र ईव सप्पा हुळकु होगुल;
LEV 14:5 अदिक याजक आग्या कोळुल कि ऊंद पक्षी वाहुसतेला नीर इन म्याकुच मुण्ण इन भांडा दा बलि माळकु आगुल.
LEV 14:6 आग अद जीत्ता पक्षी इक देवदार इन हुळ्ली अदिक क्याचाँद रंग इन कपळा अदिक जूफा अन मार्र ईव सप्पा अक हुळकु ऊंद सांगुळ आ पक्षी इन रकत दा जो वाहुसतेला नीर इन म्याकुच बलि माळकु आग्याद;
LEV 14:7 अदिक कोढ़ देल शुद्ध ठहरूसावाळा मा येळ घन सिप्सकु आऊक शुद्ध ठहरूसुल, आग आ जीत्ता पक्षी इक मैदान दा बिटबुळुल.”
LEV 14:8 अदिक शुद्ध ठहरूसावाळा तान कपळागोळ इक तोळुल, अदिक सप्पा चुट्टी बोळस्कु नीर देल मय तोळुल, आग आव शुद्ध ठहरूस्यान; अदिक अदुर बाद्दा आव छावनी दा बरूल, लेकीन येळ दिन ताका ड्यारा टु व्हार्या अच ईरूल.
LEV 14:9 अदिक येळवा दिशी आव ताल्ला, दाढ़ी अदिक भौऊ उन सप्पा चुट्टी मुंडुसुल, अदिक सप्पा अंग मुंडन माळसुसुल, अदिक तान कपळागोळ इक तोळुल, अदिक नीर देल मय तोळुल, आग आव शुद्ध ठहरूस्यान.
LEV 14:10 “आठवा दिशी आव येढ्ढ तंदरूस्त म्यांडा अन्द पाड्डागोळ, अदिक ऊंद वर्ष इन तंदरूस्त म्यांडा अन्द पाड्डा, अदिक अन्नभेट इन साटी याण्णा देल हचकु एपा अन्द अईद किलो मैदा, अदिक आरधा लीटर याण्णा तरूल.
LEV 14:11 अदिक शुद्ध ठहरूसावाळा याजक ई वस्तुगोळ सांगुळ आ शुद्ध आगावाळा मंळसा अक यहोवा अन्द मुंद भेंटमाळोद तम्बू उन द्वार मा निदुरकु ईरूल.”
LEV 14:12 आग याजक ऊंद म्यांडा अन्द पाड्डा हुळकु दोषबली इन साटी अदरी अदिक आरधा लीटर इन आसपास याण्णा अक हात्ती तरूल, अदिक ईव येढ्ढु उक हालुसोद भेंट इन साटी यहोवा अन्द मुंद हालुसुल;
LEV 14:13 अदिक आव आ म्यांडा अन्द पाड्डा अक अदा जागा दा यल अद पापबली अदिक होमबली पशुगोळ्द बलिदान माळतेला ईरूल, मतलब पवित्र जागा दा बलिदान माळुल; यतिकी जसा पापबली याजक उन निज भाग आदीत हांग अच दोषबली भी आऊन दा निज भाग ठहरूसीत; आव परमपवित्र आन.
LEV 14:14 आग याजक दोषबली इन रकत दा टु थ्वाळासा हुळकु शुद्ध ठहरूसावाळा अन्द ऊजवा कीव इन ताल्ला मा, अदिक आऊन ऊजवा कय अदिक ऊजवा कय इन बेल्लगोळ मा हचुल.
LEV 14:15 आग याजक आ लोज तीम याण्णा दा टु थ्वाळासा हुळकु तान डाक्या कय इन हथेली मा हाकुल,
LEV 14:16 अदिक याजक तान ऊजवा कय इन बेल्ल इक तान डाक्या हथेली इन याण्णा दा डोब्सकु आ याण्णा दा टु येनारा तान बेल्लगोळ देल यहोवा अन्द मुंद येळ घन सिपसुल.
LEV 14:17 अदिक जो याण्णा आऊन हथेली मा ईतोदित याजक अदुर दा टु येनारा शुद्ध आगावाळा अन्द ऊजवा कीव इन ताल्ला मा, अदिक आऊन ऊजवा कय अदिक ऊजवा काल इन बेल्लगोळ मा दोषबली इन रकत इन म्याकुच हचुल;
LEV 14:18 अदिक जो याण्णा याजक उन हथेली मा ईतोदित अदरी आव शुद्ध आगावाळा अन्द ताल्ला मा हाक्क बुळुल. अदिक याजक आऊन साटी यहोवा अन्द मुंद प्रायश्चित माळुल.
LEV 14:19 याजक पापबली इक भी येर्सकु आऊन साटी जो तान अशुध्दता देल शुद्ध आगावाळा ईरूल प्रायश्चित माळुल; अदिक आऊन बाद्दा होमबली पशु उन बलिदान माळकु
LEV 14:20 अन्नभेट सांगुळ वेदी मा येरसुल अदिक याजक आऊन साटी प्रायश्चित माळुल, अदिक आव शुद्ध ठहरूस्यान.
LEV 14:21 “लेकीन अगर आव गरीब ईरूल अदिक येनारा तरोर साटी आऊन हात्ती पूंजी ईला ईरूल, रा आव तान प्रायश्चित माळसुसोर साटी, हालुसोद साटी म्यांडा अन्द पाड्डा दोषबली इन साटी, अदिक याण्णा देल हतकु एपा अईद किलो मैदा अन्नभेट माळकु, अदिक आरधा किलो याण्णा तरूल;
LEV 14:22 अदिक येढ्ढ पंडुक, या कबूतर इन येढ्ढ पाड्डा तरूल, जो आव तर सकुल; अदिक इदुर दा टु ऊंद रा पापबली इन साटी अदिक दुसरा होमबली इन साटी ईरूल.
LEV 14:23 अदिक आठवा दिशी आव ई सप्पा अक तान शुद्ध ठहरूसोर साटी भेंटमाळोद तम्बू उन द्वार मा, यहोवा अन्द मुंद, याजक उन हात्ती तरूल;
LEV 14:24 आग याजक आ आरधा किलो याण्णा अदिक दोषबलीवाळा म्यांडा अन्द पाड्डा अक हुळकु हालुसोद भेंट इन साटी यहोवा अन मुंद आळगाळसुल.
LEV 14:25 बाक दोषबली इन म्यांडा अन्द पाड्डा अन बलिदान माळकु आगुल; अदिक याजक अदुर रकत दा टु थ्वाळासा हुळकु शुद्ध ठहरूसावाळा अन्द ऊजवा कीव इन ताल्ला मा, अदिक आऊन ऊजवा कय अदिक ऊजवा काल इन अंगूठागोळ मा हचुल.
LEV 14:26 बाक याजक आ याण्णा दा टु थ्वाळासा तान डाक्या कय इन हथेली मा हाक्कु,
LEV 14:27 तान ऊजवा कय इन बेल्ल देल तान डाक्या हथेली माकळोद याण्णा दा टु याजक थ्वाळासा यहोवा अन्द मुंद येळ घन सिपसुल;
LEV 14:28 बाक याजक तान हथेली माकळोद याण्णा दा टु येनारा शुद्ध ठहरूसावाळा अन्द ऊजवा कीव इन ताल्ला मा, अदिक आऊन ऊजवा कय अदिक ऊजवा काल इन बेल्लगोळ, मा दोषबली इन रकत इन जागा मा हचुल.
LEV 14:29 अदिक जो याण्णा याजक उन हथेली मा ईतोगुल अदरी आव शुद्ध ठहरूसावाळा साटी यहोवा अन्द मुंद प्रायश्चित माळोर साटी कीव इन क्वाना मा हाक्क बुळुल.
LEV 14:30 आग आव पंडुक या कबूतर इन पाड्डागोळ दा टु जो आव तर सकीदान ऊंद पाड्डा अक येरसुल,
LEV 14:31 मतलब जो पक्षी आव तर सकीदान, अदुर दा टु ऊंद पाड्डा अक पापबली इन साटी अदिक अन्नभेट सांगुळ दुसरा अक होमबली इन साटी येरसुल; ई रीती देल याजक शुद्ध ठहरूसावाळा अन्द साटी यहोवा अन्द मुंद प्रायश्चित माळुल.
LEV 14:32 यारी कोढ़ इन चट्टा आग्याव, अदिक आऊन ईट पूंजी ईला ईरूल कि आव शुद्ध ठहरूसोद सामान तर सकुल, रा आऊन साटी ईदा व्यवस्था आद.”
LEV 14:33 बाक यहोवा मूसा अदिक हारून से अंदुन,
LEV 14:34 “याग नीव लॉकुर कनान द्याश दा पोहचुसीर, यारी ना नीम्द खुद इन भूमी आगोर साटी नीमी कोळतीन, आ समय अगर ना कोढ़ इन चट्टा नीम्द अधिकार इन यातोदारा मान्ना दा तोरसाईन,
LEV 14:35 रा यार्द अद मान्ना ईरूल आव बनकु याजक उक हेळ बुळुल कि नानी हिंग कांळ्सकु बिळतद कि मान्ना दा मान्सी यावारा चट्टा आद.
LEV 14:36 आग याजक आग्या कोळुल कि आ मान्ना दा चट्टा नोळोर साटी नांद होगोर से पयला अदरी खाली माळी, ईलारा हिंग ना आगुल कि जो येनारा मान्ना दा ईरूल सब अशुद्ध ठहरूसुल; अदिक ईदुर बाद्दा याजक मान्ना नोळली बुळ्क होगुल.
LEV 14:37 आग आव आ चट्टा अक नोळुल; अदिक अगर अद चट्टा मान्ना अन्द दिवारगोळ मा हिवरा-हिवरा या क्याचाँद-क्याचाँद मान्सी अगुळकु लकीरगोळ्द रूप दा ईरूल, अदिक ईव लकीरगोळ दिवार दा खोल कांळ्सकु बिळतद,
LEV 14:38 रा याजक मान्ना टु व्हार्या द्वार मा होगकु मान्ना अक येळ दिन ताका बंद माळकु ईट्टुल.
LEV 14:39 अदिक येळवा दिशी याजक बनकु नोळुल; अदिक अगर अद चट्टा मान्ना अन्द दिवारगोळ मा फैलुस्कु ईरूल,
LEV 14:40 रा याजक आग्या कोळुल कि या कल्लगोळ इक चट्टा आद अदरी तेगुकु नगर टु व्हार्या यातोदारा अशुद्ध जागा दा भीळ बुळुल;
LEV 14:41 अदिक आव मान्ना अन्द बुळ्क इन बुळ्क नाकु दी वरपुसुल, अदिक अद वरपुस्द मुण्ण नगर इन व्हार्या यातोदारा अशुद्ध जागा दा हाक्कु आगुल;
LEV 14:42 अदिक आ कल्लगोळ जागा दा अदिक दुसरा कल्ल हुळकु हचुल अदिक याजक ताजा गारा हुळकु मान्ना अन्द जुळाई माळुल.
LEV 14:43 “अगर कल्लगोळ तेगुकु आगोद अदिक मान्ना अन्द वरपुस्द जुळाई अदिक पोचकु आगोद बाद्दा अद चट्टा बाक मान्ना दा मात्त होळुल,
LEV 14:44 रा याजक बनकु नोळुल; अदिक अगर अद चट्टा मान्ना दा फैलुसेग्याद, रा आव जान्स कोमुल कि मान्ना दा हानिकारक कोढ़ आद; अद मान्ना अशुद्ध आद.
LEV 14:45 अदिक अद सप्पा गारा सांगुळ कल्ल, हुळ्ली अदिक मान्ना अक अगुळकु केडु बुळुल; अदिक आ सप्पा वस्तुगोळ इक नेगुकु नगर टु व्हार्या यातोदारा अशुद्ध जागा मा भिळसुस बुळुल.
LEV 14:46 अदिक यागासताका अद मान्ना बंद ईरूल आगासताका अगर यावारा अदुर्दा होगुल रा आव द्यावगाताका अशुद्ध ईरूल;
LEV 14:47 अदिक जो यावारा आ मान्ना दा मिंगुल आव तान कपळागोळ इक तोळुल; अदिक जो यावारा आ मान्ना दा येनारा तिनुल आव भी तान कपळागोळ इक तोळुल.
LEV 14:48 “पर अगर याजक बनकु नोळुल कि यागी टु मान्ना लिपस्कु आग्याद आगी टु अदुर्दा चट्टा फैलुसीदिल, रा ईद जान्सकु कि अद चट्टा दुर आगेग्याद, मान्ना अक शुद्ध ठहरूसुल.
LEV 14:49 अदिक आ मान्ना अक पवित्र माळोर साटी येढ्ढ पक्षी, देवदार इन हुळ्ली, क्याचाँद रंग इन कपळा अदिक जूफा अन मार्र तरूल,
LEV 14:50 अदिक ऊंद पक्षी वाहुसतेला नीर इन म्याकुच मुण्ण इन बर्तन दा बलिदान माळुल,
LEV 14:51 आग अद देवदार मार्र इन हुळ्ली, क्याचाँद रंग इन कपळागोळ अदिक जूफा अदिक जीत्ता पक्षी ई सप्पा अक हुळकु बलिदान माळ्द पक्षी इन रकत दा अदिक वाहुसतेला नीर दा मुळकुस बुळुल, अदिक आ मान्ना मा येळ घन सिपसुल.
LEV 14:52 ईद प्रकार अद पक्षी इन रकत, अदिक वाहुसतेला नीर, अदिक जीत्ता पक्षी, अदिक देवदार मार्र इन हुळ्ली, अदिक जूफा अदिक क्याचाँद रंग इन कपळा अन्द द्वारा मान्ना अक पवित्र माळुल;
LEV 14:53 आग आव जीत्ता पक्षी इक नगर टु व्हार्या मैदान दा बिट्ट बुळुल; ईदा रीती देल आव मान्ना अन्द साटी प्रायश्चित माळुल, आग आव शुद्ध ठहरूस्यान.”
LEV 14:54 सप्पा प्रकार इन कोढ़ इन चट्टा, अदिक सेंहुएँ,
LEV 14:55 अदिक कपळा, अदिक मान्ना अन्द कोढ़,
LEV 14:56 अदिक सुजन, अदिक फ्वाळा, अदिक दाग इन बारा दा,
LEV 14:57 शुद्ध अदिक अशुद्ध ठहरूसोद शिक्षा कोळोद व्यवस्था ईदा हुंद. सप्पा प्रकार इन कोढ़ इन व्यवस्था ईदा हुंद.
LEV 15:1 बाक यहोवा मूसा अदिक हारून से अंदुन,
LEV 15:2 “इस्राएलीगोळ से अनी कि या-या गंळ्स उन मय दा टु स्त्राव होगुल, रा आव स्त्राव इन कारण देल अशुद्ध ठहरूसुल.
LEV 15:3 अद चाहे वाहुसतेला ईरूल, चाहे वाहुसोद बंद भी ईरूल, तो भी आऊन अशुध्दता बनस्कु ईत्तीत.
LEV 15:4 यारी स्त्राव ईरूल आव या-या बिछौना मा मिंगुल अद अशुद्ध ठहरूसुल. या वस्तु मा आव कुरतान अद भी अशुध्द ठहरूसुल.
LEV 15:5 अदिक जो यावारा आऊन हासक्या अक मुटुल आव तान कपळागोळ इक तोळुकु नीर देल मय तोळुल, अदिक द्यावगाताका अशुद्ध ठहरूसकु ईरूल.
LEV 15:6 अदिक यार दा स्त्राव ईरूल अदिक आव या वस्तु मा कुर्तकु ईरूल, अदुर मा जो यावारा कुरूल आव तान कपळागोळ इक तोळुकु नीर देल मय तोळुल, अदिक द्यावगाताका अशुद्ध ठहरूसकु ईरूल.
LEV 15:7 अदिक यारदा स्त्राव ईरूल आऊन से जो यावारा मुटकु आगुल आव तान कपळागोळ इक तोळुकु नीर देल मय तोळुल अदिक द्यावगाताका अशुद्ध ईरूल.
LEV 15:8 अदिक यारदा स्त्राव ईरूल अगर आव यातोदारा शुद्ध मंळसा मा ऊगळुल, रा आव तान कपळागोळ इक तोळुकु नीर देल मय तोळुल, अदिक द्यावगा ताका अशुद्ध ईरूल.
LEV 15:9 अदिक यारदा स्त्राव ईरूल आव सवारी या वस्तु मा कुरूल अद अशुद्ध ठहरूसुल.
LEV 15:10 अदिक जो यावारा यातोदारा वस्तु उक जो आऊन ल्‍यालमा ईटकु ईरूल मुटुल, आव द्यावगाताका अशुद्ध ईरूल; अदिक जो यावारा हिंग यातोदारा वस्तु उक नेगुल आव तान कपळागोळ इक तोळुकु नीर देल मय तोळुल, अदिक द्यावगाताका अशुद्ध ईरूल.
LEV 15:11 अदिक यारदा स्त्राव ईरूल आव यावारा वळ्लीद मंळसा अक बिना कय तोळुकु मुटुल रा आ मंळसा तान कपळागोळ इक तोळुकु नीर देल मय तोळुल, अदिक द्यावगाताका अशुद्ध ईरूल.
LEV 15:12 अदिक यारदा स्त्राव ईरूल आव मुण्ण इन यातोदारा बर्तन इक कय हचुल अद वळकु आगुल, अदिक हुळ्ली इन माळ्द सप्पा प्रकार इन बर्तन नीर देल तोळुकु आगुल.
LEV 15:13 “बाक यारदा स्त्राव ईरूल आव याग तान रोग देल चंगा आगेगुल, आगी टु शुद्ध ठहरूसोद येळ दिन आळु कोमुल, अदिक अऊरव बितुसदुर मा तान कपळागोळ इक तोळुकु वाहुसतेला नीर देल मय तोळुल; आग आव शुद्ध ठहरूस्यान.
LEV 15:14 अदिक आठवा दिशी आव येढ्ढ पंडुक या कबूतर इन येढ्ढ पाड्डा हुळकु भेंटमाळोद तम्बू उन द्वार मा यहोवा अन्द मुंद होगकु अवरी याजक उक कोळुल.
LEV 15:15 आग याजक अऊर दा टु ऊंद पापबली; अदिक दुसरा अक होमबली इन साटी भेंट येरसुल; अदिक याजक आऊन साटी आऊन स्त्राव इन कारण यहोवा अन्द मुंद प्रायश्चित माळुल.
LEV 15:16 “बाक अगर यावारा गंळ्स उन वीर्यपात आगेगुल, रा आव तान पुरा मय इक नीर देल तोळुल, अदिक द्यावगाताका अशुद्ध ईरूल.
LEV 15:17 अदिक यातोदारा कपळा या तोगुल मा अद वीर्य बिळुल अद नीर देल तोळुकु आगुल, अदिक द्यावगाताका अशुद्ध ईरूल.
LEV 15:18 अदिक जब यावारा गंळ्स आर्त से प्रसंग माळुल रा आंदुर येढ्ढु मुंदुर नीर देल मय तोळुल, अदिक द्यावगाताका अशुद्ध ईरूल.
LEV 15:19 “बाक याग यातोदारा आर्त मासीक पाळी देल ईरूल, रा आक येळ दिन ताका अशुद्ध ठहरूसकु ईरूल, अदिक जो यावारा आकीक मुटुल आव द्यावगाताका अशुद्ध ईरूल.
LEV 15:20 अदिक यागासताका अशुद्ध ईरूल आगासताका या-या वस्तु मा आक मिंगुल, अदिक या-या वस्तु मा आक कुरूल अव सप्पा अशुद्ध ठहरूसुल.
LEV 15:21 अदिक जो यावारा आकीन हासक्या अक मुटुल आव तान कपळा अक तोळुकु नीर देल मय तोळुल, अदिक द्यावगाताका अशुद्ध ईरूल.
LEV 15:22 अदिक जो यावारा यातोदारा वस्तु उक मुटुल यदुर मा आक कुर्तकु ईरूल आव तान कपळा तोळुकु नीर देल मय तोळुल, अदिक द्यावगाताका अशुद्ध ईरूल.
LEV 15:23 अदिक अगर हासक्या या अदिक यातोदारा वस्तु मा यदुर मा आक कुर्तकु ईरूल मुटदुर समय आकीन रकत हतकु ईरूल, रा मुट्ठावाळा द्यावगाताका अशुद्ध ईरूल.
LEV 15:24 अदिक अगर यावारा गंळ्स आकीन से प्रसंग माळुल, अदिक आकीन रकत आऊक हत्तेगुल, रा आ गंळ्स येळ दिन ताका अशुद्ध ईरूल, अदिक या-या हासक्या मा आक मिंगुल अव सप्पा अशुद्ध ठहरूसुल.
LEV 15:25 “बाक अगर यातोदारा आर्त इन तान मासीक धर्म इन नियुक्त समय देल येक्कुल दिन ताका रकत वाहुसतेला ईरूल, या आ नियुक्त समय देल येक्कुल समय ताका मासीक धर्म ईरूल, रा यागासताका आक हिंग दशा दा ईरूल आगासताका आक अशुद्ध ठहरूसकु ईरूल.
LEV 15:26 आकीन मासीक पीळा ईरोद सप्पा दिनगोळ दा या-या बिछौना मा आक मिंगीदुर अव सप्पा आकीन मासीक धर्म इन बिछौना अन्द घाई ठहरूसुल; अदिक या-या वस्तु मा आक कुरूल अव भी आकीन मासीक धर्म ईरोद दिनगोळ्द घाई अशुद्ध ठहरूसुल.
LEV 15:27 अदिक जो यावारा आ वस्तुगोळ इक मुटुल अव अशुद्ध ठहरूसुल, इदुरसाटी आव तान कपळागोळ इक तोळुकु नीर देल मय तोळुल, अदिक द्यावगाताका अशुद्ध ईरूल.
LEV 15:28 अदिक याग आ आर्त तान मासीक धर्म देल शुद्ध आगेगुल, आगी टु आक येळ दिन आळु कोमुल, अदिक आ दिनगोळ बितुसदुर मा आक शुद्ध ठहरूसुल.
LEV 15:29 बाक आठवा दिशी आक येढ्ढ पंडुक या कबूतर इन येढ्ढ पाड्डा हुळकु भेंटमाळोद तम्बू उन द्वार मा याजक उन हात्ती होगुल.
LEV 15:30 आग याजक ऊंद पाड्डा अक पापबली अदिक दुसरा अक होमबली इन साटी येरसुल; अदिक याजक आकीन साटी आकीन मासीक धर्म इन अशुध्दता अन्द कारण यहोवा अन्द मुंद प्रायश्चित माळुल.
LEV 15:31 “ई प्रकार देल नीव इस्राएलीगोळ इक आंदुर अशुद्धता देल अलग ईटी, ईलारा हिंग न आगुल कि आंदुर यहोवा अन्द निवास इक जो आंदुर न्याड्या दा आर अशुद्ध माळकु तान अशुद्धता दा फसुसकु सोतोगुल.”
LEV 15:32 यारदा स्त्राव ईरूल अदिक जो गंळ्स वीर्यपात आगदुर देल अशुद्ध ईरूल;
LEV 15:33 अदिक जो आर्त मासीक धर्म दा ईरूल, अदिक येन गंळ्स येन आर्त, इंदुर दा टु यारीकारा धातुरोग ईरूल, अदिक जो गंळ्स अशुद्ध आर्त इन सांगुळ प्रसंग माळुल, ई सप्पा मुंदुर साटी ईदा व्यवस्था हुंद.
LEV 16:1 जब हारून उन येढ्ढ पारगोळ यहोवा अन्द मुंद आऊन हात्ती होगकु सोतोदुर, अदुर बाद्दा यहोवा मूसा से मातगोळ माळदुन;
LEV 16:2 अदिक यहोवा मूसा से अंदुन, “तान वार्ट हारून से अन कि सन्दुक इन म्याकुच इन प्रायश्चितवाळा ढकनगोळ्द मुंद, न्याड्यावाळा पळदागोळ्द बुळ्क, अति पवित्र जागा दा हर समय प्रवेश माळबाळी, ईलारा सोतोदान; यतिकी ना प्रायश्चितवाळा ढकनगोळ्द म्याकुच बादल दा कांळ्सकु बिळाईन.”
LEV 16:3 याग हारून अति पवित्र जागा दा प्रवेश माळुल आग ई रीति देल प्रवेश माळुल, मतलब पापबली इन साटी ऊंद वस्ता अक अदिक होमबली इन साटी ऊंद म्यांडा अक हुळकु बरूल.
LEV 16:4 आव सन इन कपळा अन्द पवित्र अंगरखा, अदिक तान तन मा सनी इन कपळा अन्द जंग्या हाक्कु, अदिक सनी इन कपळा अन्द पट्टा, अदिक सनी इन कपळा अन्द पगळी कटकु प्रवेश माळुल; ईव पवित्र कपळा हूँ, अदिक आव नीर देल मय तोळुकु ईवरी हाकुल.
LEV 16:5 बाक आंदुर इस्राएलिगोळ्द मंडली इन हात्ती टु पापबली इन साटी येढ्ढ व्हातगोळ अदिक होमबली इन साटी ऊंद म्यांडा कोमुल.
LEV 16:6 अदिक हारून आ पापबली इन वस्ता अक जो आऊंदा साटी आदीत येर्सकु तान अदिक तान घराना अन्द साटी प्रायश्चित माळुल.
LEV 16:7 अदिक आ येढ्ढु व्हातगोळ इक हुळकु भेंटमाळोद तम्बू उन द्वार मा यहोवा अन्द मुंद निदरूसुल;
LEV 16:8 अदिक हारून येढ्ढु व्हातगोळ मा चिट्टीगोळ हाकुल, ऊंद चिट्ठी यहोवा अन्द साटी अदिक दुसरा अजाजेल उन साटी ईरूल.
LEV 16:9 अदिक या व्हात मा यहोवा अन्द हेसुर इन चिट्टी होळुल अदरी हारून पापबली इन साटी येरसुल;
LEV 16:10 लेकीन या व्हात मा अजाजेल उन साटी चिट्टी होळुल आव यहोवा अन्द मुंद जीत्ता निदरूसकु आगुल कि अदुर देल प्रायश्चित माळकु आगुल, अदिक अद अजाजेल उन साटी आळी दा बिटकु आगुल.
LEV 16:11 “हारून आ पापबली इन वस्ता अक, जो आऊंदा साटी आदीत, हात्ती हुळकु बरूल, अदिक अदरी बलिदान माळकु तान अदिक तान घराना अन्द साटी प्रायश्चित माळुल.
LEV 16:12 अदिक जो वेदी यहोवा अन्द मुंद आद, अदुर माकळव होततेला कोयलागोळ देल तुमकु धूपदान इक हुळकु, अदिक तान येढ्ढु मुट्ठीगोळ इक कुटकु सुगन्धित धूप देल तुमकु, न्याड्यावाळा परदा अन्द बुळ्क तनकु
LEV 16:13 आ धूप इक यहोवा अन्द मुंद बेक्की दा हाकुल, यदुर देल धूप इन धुंगा साक्षीपत्र अन्द म्याकुच इन प्रायश्चित इन ढकन इन म्याकुच छासेगुल, ईला रा अद सोतोदीत;
LEV 16:14 आग आव वस्ता अन्द रकत दा टु थ्वाळासा हुळकु पूरब इन दी प्रायश्चित इन ढकन इन म्याकुच तान बेल्लगोळ देल सिपसुल, अदिक बाक आ रकत दा टु थ्वाळासा बेल्लगोळ्द द्वारा आ ढकन उन मुंद भी येळ घन सिप्स बुळुल.”
LEV 16:15 बाक आव आ पापबली इन व्हात इक जो साधारण जनता अन्द साटी ईत्तीत बलिदान माळकु अदुर्द रकत इक न्याड्यावाळा परदा अन्द बुळ्क तरूल, अदिक या प्रकार वस्ता अन्द रकत देल आव माळीदुन ठीक हांग अच आव व्हात इन रकत देल भी माळुल, मतलब अदरी प्रायश्चित इन ढकन इन म्याकुच अदिक आऊन मुंद सिपसुल.
LEV 16:16 अदिक आव इस्राएली लॉकुर्द अशुध्दता, अदिक अपराधगोळ, अदिक आंदुरव सप्पा पापगोळ्द कारण पवित्र जागा अन्द साटी प्रायश्चित माळुल; अदिक भेंट माळोद तम्बु जो आंदुर सांगुळ आंदुर भाँति-भाँति इन अशुद्धता अन्द बीच ईरतद अदुर साटी भी आव हांग अच माळुल.
LEV 16:17 जब हारून प्रायश्चित माळोर साटी अति पवित्र जागा दा प्रवेश माळुल, आगी टु यागासताका आव तान अदिक तान घराना अदिक इस्राएल इन पुरा मंडली इन साटी प्रायश्चित माळकु व्हार्या होळ बाळुल आगासताका यावारा मंळसा भेंटमाळोद तम्बू दा ईरबाळुल.
LEV 16:18 बाक आव होटकु आ वेदी इन हात्ती जो यहोवा अन्द मुंद आन होगुल अदिक आऊन साटी प्रायश्चित माळुल, मतलब वस्ता अन्द रकत अदिक व्हात इन रकत येढ्ढु दा टु थ्वाळासा हुळकु आ वेदी इन नाकु क्वाना अन्द सींगगोळ मा हचुल.
LEV 16:19 अदिक आ रक्ता दा टु थ्वाळासा तान बेल्लगोळ्द द्वारा येळ घन अदुर मा छिळकुसकु अदरी इस्राएली लॉकुर्द अशुध्दता बिळस्कु शुद्ध अदिक पवित्र माळुल.
LEV 16:20 “याग आव पवित्र जागा अदिक भेंटमाळोद तम्बू अदिक वेदी इन साटी प्रायश्चित माळ कोंडुर बाद्दा, आग जीत्ता व्हात इक मुंद तरूल;
LEV 16:21 अदिक हारून तान येढ्ढु कय इक जीत्ता व्हात मा ईटकु इस्राएलिगोळ्द सप्पा दुष्कर्म इन सप्पा क्याल्सागोळ, अदिक आंदुरव सप्पा अपराधगोळ, मतलब आंदुरव सप्पा पापगोळ इक अंगीकार माळुल, अदिक आंदरी व्हात इन ताल्ला मा हुळकु अदरी यावारा मंळसा अन्द कय जो ई क्याल्सा अन्द साटी तयार ईरूल सुनसान आळी दा कळुकु बिळ्स बुळुल.
LEV 16:22 अद व्हात आंदुर सप्पा दुष्कर्म इन क्याल्सागोळ इक तान म्याकुच लादस्कु यातोदारा सुनसान जागा दा नेगुकु वोतान; इदुरसाटी आ व्हात इक आळी दा बिटबुळुल.
LEV 16:23 “आग हारून भेंटमाळोद तम्बू दा बरूल, अदिक या सन इन कपळा गोळ इक हाक्कु आव अति पवित्र जागा दा प्रवेश माळीदुन अदरी तेगुकु अल्या ईट बुळुल.
LEV 16:24 बाक आव यातोदारा पवित्र जागा दा नीर देल मय तोळुकु तान रोजी नव कपळा हाक्क कोमुल, अदिक व्हार्या होगकु तान होमबलि अदिक साधारण जनता अन्द होमबली इक येर्सकु तान अदिक जनता अन्द साटी प्रायश्चित माळुल.
LEV 16:25 अदिक पापबली इन चरबी इक आव वेदी मा होताकुल.
LEV 16:26 अदिक जो मंळसा व्हात इक अजाजेल उन साटी बिटकु बरूल आव भी तान कपळागोळ इक तोळुल, अदिक नीर देल मय तोळुल, अदिक आग आव छावनी दा प्रवेश माळुल.
LEV 16:27 अदिक पापबली इन पाड्डा अदिक पापबलि इन व्हात इक भी अदुर रकत पवित्र जागा दा प्रायश्चित माळोर साटी पोहचुस्कु आगुल अव येढ्ढु छावनी टु व्हार्या पोहचुस्कु आगुल; अदिक अऊर तोगुल, चिच्ची, अदिक सेंगळी बेक्की दा होताक्कु आगुल.
LEV 16:28 अदिक जो अवरी होताकुल आव तान कपळागोळ इक तोळुल, अदिक नीर देल मय तोळुल, अदिक इदुर बाद्दा आव छावनी दा प्रवेश माळुल.
LEV 16:29 “नीव लॉकुर साटी ईद सदा अन्द विधी आदीत कि सातवा तिंगुळ इन दसवा दिन इक नीव उपास माळेतीर, अदिक आ दिन यावारा, चाहे अद नीम्द खुद इन द्याश इन ईरूल चाहे नीम्द न्याड्या ईरावाळा यावारा देशी या परदेशी ईरूल, यावारा भी यातोदारा प्रकार इन क्याल्सा धंदा माळबाळुल;
LEV 16:30 यतिकी आ दिन नीमी शुद्ध माळोर साटी नीम्द निमित्त प्रायश्चित माळकु आदीत; अदिक नीव तान सप्पा पापगोळ देल यहोवा अन्द मुंद पवित्र ठहरूसीर.
LEV 16:31 ईद नीम्द साटी परम आराम इन दिन ठहरूसीत, अदिक नीव आ दिन उपास माळेतीर अदिक यातोदारा प्रकार इन क्याल्सा धंदा माळेतीर; ईद सदा अन्द विधी हुंद.
LEV 16:32 अदिक जो तान आप्प उन जागा मा याजक पद इन साटी अभिषेक अदिक शुद्ध माळकु आगुल आ याजक प्रायश्चित माळुल, मतलब आव सन इन कपळा गोळ इक हाक्कु,
LEV 16:33 पवित्र जागा, अदिक भेंटमाळोद तम्बू, अदिक वेदी इन साटी प्रायश्चित माळुल; अदिक याजक उन अदिक मंडली इन सप्पा लॉकुर साटी भी प्रायश्चित माळुल.
LEV 16:34 अदिक ईद नीम्द साटी सदा अन्द विधी आदीत, कि इस्राएलिगोळ्द साटी हर साल ऊंद घन नीम्द पुरा पापगोळ्द साटी प्रायश्चित माळकु आगुल.” यहोवा अन्द ई आग्या अन्द अनुसार जो आव मूसा अक कोटीदुन, हारून माळदुन.
LEV 17:1 बाक यहोवा मूसा से अंदुन,
LEV 17:2 “हारून अदिक आऊन पारगोळ से अदिक सप्पा इस्राएलिगोळ से अन कि यहोवा ईद आग्या कोट्टान:
LEV 17:3 इस्राएल इन घराना दा टु यावारा मंळसा ईरूल जो म्यांडा अन्द पाड्डा, या मर्री इक, चाहे छावनी दा चाहे छावनी टु व्हार्या घात माळकु
LEV 17:4 भेंटमाळोद तम्बू उन द्वार मा, यहोवा अन्द निवास इन मुंद यहोवा अक येर्सोद निमित्त वोयबाळुल, रा आ मंळसा अक रकत वाहुसोद दोष हत्तीत; अदिक आ मंळसा जो रकत वाहुसावाळा ठहरूस्यान, आव तान लॉकुर न्याड्या टु नष्ट माळकु आदान.
LEV 17:5 ई विधी इन ईद कारण आद कि इस्राएली तान बलिदान अवरी आंदुर खुला मैदान दा वध माळतार, आंदुर अवरी भेंटमाळोद तम्बू उन द्वार मा याजक उन हात्ती, यहोवा अन्द हात्ती, यहोवा अन्द साटी वोतकु आऊंदा साटी मेल-मिलाप बलि माळकु बलिदान माळकु आगुल;
LEV 17:6 अदिक याजक रकत इक भेंटमाळोद तम्बू उन द्वार मा यहोवा अन्द वेदी इन म्याकुच सिपसुल, अदिक चरबी इक आऊन सुखदायक सुगन्ध इन साटी होताकुल.
LEV 17:7 आंदुर जो व्हातगोळ्द पूजक ईतकु व्यभिचार माळतार, आंदुर बाक तान बलि पशुगोळ इक आंदुर साटी बलिदान माळबाळुल. नीम्द पीढ़ीगोळ साटी ईद सदा अन्द विधी आदीत.
LEV 17:8 “ नी आंदुर से अन कि इस्राएल इन घराना अन्द लॉकुर दा टु या आंदुर न्याड्या ईरावाळेर परदेशीगोळ दा टु यावारा मंळसा यती ईरबाळुल जो होमबलि या मेलबलि येरसुल,
LEV 17:9 अदिक अदरी भेंटमाळोद तम्बू उन द्वार मा यहोवा अन्द साटी येरसोर साटी तरबाळुल; आ मंळसा तान लॉकुर दा टु नष्ट माळकु आदान.
LEV 17:10 “बाक इस्राएल इन घराना अन्द लॉकुर दा टु या आंदुर न्याड्या ईरावाळेर परदेशीगोळ दा टु यावारा मंळसा यती ईरबाळुल जो यातोदारा प्रकार इन रकत तिनुल, ना आ रकत तिनावाळा अन्द दी टु तान बाय तिर्गुस बुळाईन विमुख अदिक आऊन लॉकुर न्याड्या दा टु नष्ट माळ बुळाईन.
LEV 17:11 यतिकी मय इन जीव रकत दा ईरतद; अदिक अदरी ना नीम लॉकुरी वेदी मा येरसोर साटी कोट्टीन कि नीम्द जीवगोळ साटी प्रायश्चित माळकु आगुल; यतिकी जीव इन साटी रकत टु उच प्रायश्चित आगतद.
LEV 17:12 ई कारण ना इस्राएलिगोळ से अनतीन कि नीम दा टु यावारा प्राणी रकत तिनबाळुल, अदिक जो परदेशी नीम्द न्याड्या ईरतान आव भी रकत यागलु तिनबाळुल.”
LEV 17:13 “इस्राएलिगोळ दा टु या आंदुर न्याड्या ईरावाळेर परदेशीगोळ दा टु, यावारा मंळसा यती ईरबाळुल, जो शिकार माळकु तिनोद योग्य पशु या पक्षी इक हुडुल, आव अऊर रकत इक पलटुस्कु धुळा देल झाक्स बुळुल.
LEV 17:14 यतिकी मय इन जीव जो आद अद आऊन रकत अच हुंद जो आऊन जीव इन सांगुळ ऊंद आद; इदुरसाटी ना इस्राएलिगोळ से अनतीन कि यातोदु प्रकार इन प्राणी इन रकत इक नीव तिनबाळेतीर, यतिकी सप्पा प्राणीगोळ्द जीव आंदुर रकत अच हुंद; जो यावारा अदरी तिंदान आव नष्ट माळकु आदान.”
LEV 17:15 “अदिक चाहे अद देशी ईरूल या परदेशी ईरूल, जो यावारा यातोदारा लोथ या हर्दकु पशु उन चिच्ची तिनुल आव तान कपळागोळ इक तोळुकु नीर देल मय तोळुल, अदिक द्यावगाताका अशुद्ध ईरूल; आग आव शुद्ध आदान.
LEV 17:16 लेकीन अगर आव अवरी ईला तोळदान अदिक मय तोळुतीदिल, रा आऊक तान दुष्कर्म इन भार खुद नेग्गोद बिद्दीत.”
LEV 18:1 बाक यहोवा मूसा से अंदुन,
LEV 18:2 इस्राएलिगोळ से अन कि ना नीम्द परमेश्वर यहोवा हुईन.
LEV 18:3 नीव मिस्त्र द्याश इन क्याल्सागोळ्द अनुसार व्यवहार माळबाळेतीर, यदुर्दा नीव ईरतोगीर, माळबाळेतीर; अदिक कनान द्याश इन अनुसार भी, यल ना नीमी ओयेतीन, माळबाळेतीर; अदिक न आ द्याशगोळ्द विधीगोळ मा नळेतीर.
LEV 18:4 नांद अच नियमगोळ इक मान्सेतीर, अदिक नांद अच विधीगोळ इक मान्सतेला अदुर मा नळेतीर. ना नीम्द परमेश्वर यहोवा हुईन.
LEV 18:5 इदुरसाटी नीव नांद नियमगोळ अदिक नांद विधीगोळ इक हमेशा मान्सेतीर; जो मंळसा अवरी मानस्यान आव अऊर कारण जीत्ता ईत्तान. ना यहोवा हुईन.
LEV 18:6 “नीम दा टु यावारा तान यातोवारा हात्ती नव कुटुम्बिगोळ सांगुळ शारीरिक संबंध माळबाळी. ना यहोवा हुईन.”
LEV 18:7 तान मोय इन मय, जो नीम्द आप्प उन मय हुंद, आकीन से शारीरिक संबंध ईटबाळी; आक रा नीम्द मोय उर, इदुरसाटी नीव आकीन सांगुळ शारीरिक संबंध ईटबाळी.
LEV 18:8 तान सौतेला मोय से भी शारीरिक संबंध ईटबाळ; अदुर देल नींद आप्प उन ईज्जत होदीत.
LEV 18:9 तान आकतींग चाहे सगा ईरूल चाहे सौतेला ईरूल, चाहे आक मान्या दा पैदा आग्यार चाहे व्हार्या, आकीन से शारीरिक संबंध ईटबाळ.
LEV 18:10 नी तान नातुगीतिन सांगुळ शारीरिक संबंध ईटबाळ, बाक आक नींद पार उन पोर ईरूल या बाक नीन पोर इन पोर ईरूल; अदुर देल नींद अच बदनामी आदीत!
LEV 18:11 नीम्द सौतेला आकतींग जो नीम्द आप्प से पैदा आदुर, आक नीम्द आकतींग उर, ई कारण नी आकीन से शारीरिक संबंध ईटबाळ.
LEV 18:12 तान फूफी इन से शारीरिक संबंध ईटबाळ; आक रा नींद आप्प उन हात्तीनोर नातावळ्त उर.
LEV 18:13 तान मावसी से शारीरिक संबंध ईटबाळ; यतिकी आक नींद मोय इन आकतींग हुळ.
LEV 18:14 नी तान काका अन्द बेईजती माळबाळ, मतलब आऊन हिंग्स से शारीरिक संबंध ईटबाळ; आक रा नीम्द काकी हुळ.
LEV 18:15 तान सासा अन्द सांगुळ शारीरिक संबंध ईटबाळ, आक रा नीन पार उन हिंग्स उर, ई कारण नीव आकीन सांगुळ शारीरिक संबंध ईटबाळ.
LEV 18:16 तान भाभी इन सांगुळ शारीरिक संबंध ईटबाळ, अदुर देल नींद वार्ट उन ईज्जत होदीत.
LEV 18:17 ऊंदाकान आर्त इन अदिक आकीन पोर इन म्हणजेच येढ्ढु मुंदरी मतलब आकीन नातुगीत इन सांगुळ बाक आक आकीन पोर इन पोर ईरूल या पार उन पोर ईरूल शारीरिक संबंध ईटबाळी. कारण आंदुर आकीन हात्तीनोर नातागोळ उर; हिंग माळोद महापाप आद.
LEV 18:18 नींद हिंग्स जीत्ता ईतकु आकीन आकतींग इक हिंग्स माळकु आकीन सवत तरबाळ; अदुर देल आंदुर आबुर दाबुर्द दुश्मन आदार; नी आकीन आकतींग इन सांगुळ शारीरिक संबंध ईटबाळ.
LEV 18:19 “बाक यागासताका याकारा आर्त तान महावारी इन कारण अशुद्ध ईरूल आगासताका आकीन सांगुळ शारीरिक संबंध ईटबाळ.”
LEV 18:20 बाक नी तान वार्ट बन्धु उन हिंग्स उन सांगुळ शारीरिक संबंध ईटबाळ. अदुर देल नी अशुद्ध आद्या.
LEV 18:21 तान औलाद दा टु यारीकारा मोलेक द्याव इन साटी होम माळकु येर्सबाळेतीर, अदिक न तान परमेश्वर उन हेसुर इक अपवित्र ठहरूसेतीर; ना यहोवा हुईन.
LEV 18:22 स्त्रीगमन उन रीती पुरूषगमन माळबाळेतीर; अद रा घिनौना क्याल्सा हुंद.
LEV 18:23 यातोदारा पशु उन सांगुळ पशुगमन माळकु अशुद्ध आगबाळेतीर, अदिक न यावारा आर्त पशु उन मुंद इदुरसाटी नीदुरकु ईरूल कि आकीन सांगुळ कुकर्म माळुल; ईद रा उलटा मात हुंद.
LEV 18:24 “हिंग-हिंग यातोवारा भी क्याल्सा माळकु अशुद्ध आगबाळेतीर, यतिकी या जातीगोळ इक ना नीम्द मुंद टु तेगदुर मा आईन आंदुर हिंग-हिंग क्याल्सा माळकु अशुद्ध आगेग्यार;
LEV 18:25 अदिक आंदुर द्याश भी अशुद्ध आगेग्याद, ई कारण ना आऊन मा आऊन दुष्कर्म अन दण्ड कोळतीन, अदिक अद द्याश तान ईरावाळेर इन तेगु बुळतद.
LEV 18:26 ई कारण नीव लॉकुर नांद विधीगोळ अदिक नियमगोळ इक हमेशा मानसेतीर, अदिक चाहे देशी, चाहे नीम्द न्याड्या ईरावाळा परदेशी ईरूल, नीम दा टु यावारा भी हिंग घिनौना क्याल्सा माळबाळेतीर;
LEV 18:27 यतिकी हिंग सप्पा घिनौना क्याल्सागोळ इक आ द्याश इन मंळसा जो नीम से पयला अदुर्दा ईरतोगोर, आंदुर माळतेला बंदार, ईदुर देला अद द्याश अशुद्ध आग्याद.
LEV 18:28 ईग हिंग ना आगुल कि या रीती देल जो राज्य नीम से पयला आ द्याश दा ईरतोगोद, अदरी आव तेगु बुट्टुन, अदा रीती देल याग नीव आऊक अशुद्ध माळी, रा आव नीम इक भी तेगु बुट्टान.”
LEV 18:29 “जो यावारा हिंग घिनौना क्याल्सा माळतान आंदुर सप्पा प्राणी तान लॉकुर दा टु नष्ट माळकु आदार.”
LEV 18:30 “ईद आग्या जो ना नीम्द मान्सोर साटी कोट्टीन, अदरी नीव मानसेतीर, अदिक जो घिनौना रीतिगोळ नीम से पयला प्रचलित आद, अदुर्दा टु यातोदारा रीती मा नळुबाळेतीर, अदिक न अदुर कारण अशुद्ध आगेतीर. ना नीम्द परमेश्वर यहोवा हुईन.”
LEV 19:1 बाक यहोवा मूसा से अंदुन,
LEV 19:2 “इस्राएलिगोळ्द पुरा मंडली से अन कि नीव पवित्र बन्सकु ईरी; यतिकी ना नीम्द परमेश्वर यहोवा पवित्र आईन.”
LEV 19:3 नीव तान-तान मोय अदिक तान-तान आप्प उन आदर माळी, अदिक नांद आराम दिनगोळ्द अंज्क मान्सी ना नीम्द परमेश्वर यहोवा हुईन.
LEV 19:4 नीव मुरतीगोळ दी तिर्ग बाळेतीर, अदिक भगवानगोळ्द मुरतीगोळ इक ढाल्सकु माळबाळेतीर; ना नीम्द परमेश्वर यहोवा हुईन.
LEV 19:5 “याग नीव यहोवा अन्द साटी मेल-मिलाप बली माळी, आग हिंग बलिदान माळेतीर यदुर देल ना नीम से प्रसन्न आगेगाईन.
LEV 19:6 अदुर चिच्ची बलिदान इन दिशी अदिक दुसरा दिशी तिनकु आगुल, लेकीन तीसरा दिन ताका जो मिक्कु ईरूल अद बेक्की दा होत्‍ताकु आगुल.
LEV 19:7 अगर अदुर दा टु येनारा भी तीसरा दिन भी तिनकु आगुल, रा ईद अशुध्‍द ठहरूस्यान, अदिक ग्रहण माळकु आगतीदिल.
LEV 19:8 अदिक अदरी तिनावाळा यहोवा अन्द पवित्र पदार्थ अक अपवित्र ठहरूसतान, इदुरसाटी आऊक तान दुष्कर्म अन भार खुद नेग्गोद बिद्दीत; अदिक अद प्राणी तान लॉकुर दा टु नष्ट माळकु आदीत.”
LEV 19:9 “बाक याग नीव तान द्याश इन केई कळदीर, आग तान केई इन क्वाना-क्वाना ताका पूरा कडु बाळेतीर, अदिक कळकु केई इन बिदकु लॉम्बागोळ इक आयबाळेतीर.
LEV 19:10 अदिक तान अंगुर इन बेली इन दाना-दाना मुरूबाळेतीर, अदिक तान अंगुर इन बेली इन झळस्कु अंगुरगोळ इक नेगुबाळेतीर; अवरी गरीब अदिक परदेशी लॉकुरगोळ साटी बिट्ट बुळेतीर; ना नीम्द परमेश्वर यहोवा हुईन.”
LEV 19:11 “नीव काळ्लपन माळबाळेतीर, अदिक आबुर-दाबुर देल, कपट माळबाळेतीर, अदिक झुठ माताळबाळेतीर.”
LEV 19:12 नीव नांद हेसुर इन ख्वाटा कसम तिनकु तान परमेश्वर उन हेसुर अपवित्र ठहरूसबाळेतीर; ना यहोवा हुईन.
LEV 19:13 “आबुर-दाबुर मा अंधेर माळबाळेतीर, अदिक आबुर-दाबुर इक लुट्‍स बाळेतीर. मजदुर उन मजदुरी नींद हात्ती पुरा ईळ्लक हागुल ईर बाळुल.”
LEV 19:14 बयरा मंळसा अक सराप कोळ बाळेतीर, अदिक कुढ्ढ मंळसा अन्द मुंद ठोकर ईटबाळेतीर; अदिक तान परमेश्वर उन भय मानसेतीर; ना यहोवा हुईन.
LEV 19:15 “न्याय दा कुटीलता माळबाळेतीर; अदिक न रा कंगाल उन पक्ष ताकोमेतीर अदिक न धोळ मंळसा अन्द बाय नोळकु विचार माळोद; आबुर-दाबुर्द न्याय धार्मिकता देल माळेतीर.”
LEV 19:16 नीव तान लॉकुर न्याड्या दा निंदा माळतेला वयाळबाळेतीर, अदिक आबुर-दाबुर्द रकत वाहुसोद योजनागोळ माळबाळेतीर; ना यहोवा हुईन.
LEV 19:17 “तान मन दा आबुर दाबुर्द प्रति द्वेष ईटबाळेतीर; गलत माळदुर मा तान मान्ना हातळोर इक अवश्य डाटसेतीर, लेकीन आंदुर्द अपराध दा सहभागी आगबाळेतीर ईला रा आऊन पाप इन भार नीनी नेग्गोद बिद्दीत.”
LEV 19:18 बदला ताकोमबाळेतीर, अदिक तान लॉकुर अदिक मान्ना हातळोर वार्टुर से दुश्मनी ईट बाळेतीर, लेकीन आबुर-दाबुर से तान घाई प्रेम ईटेतीर; ना यहोवा हुईन.
LEV 19:19 “नीव नांद विधीगोळ इक हमेशा मानसेतीर. तान जनावरगोळ इक दुसरा जाती इन जनावरगोळ से व्‍हाट्‍यादी आगगोळ बाळेतीर; तान केई दा येढ्ढ प्रकार इन बींजा ऊंद सांगुळ बोऊसगोळ बाळेतीर; अदिक सनी अदिक ऊन इन मिलावट देल माळकु कपळा हाक्क बाळेतीर.”
LEV 19:20 बाक याकारा आर्त दासी ईरूल, अदिक आकीन सगाई यावारा गंळ्स से आगुल, लेकीन आक न रा दास देल अदिक न स्वतंत्र माळकु आगुल; आकीन से अगर यावारा कुकर्म माळुल, रा आ येढ्ढु मुंदरी दण्ड रा सिक्‍कुल, पर आ आर्त इन स्वाधीन न आगोद कारण आंदुर येढ्ढु मुंदुर कोंदकु आगबाळुल.
LEV 19:21 पर आव गंळ्स भेंटमाळोद तम्बू उन द्वार मा यहोवा अन्द हात्ती ऊंद म्यांडा दोषबली इन साटी तरूल.
LEV 19:22 अदिक याजक आऊन माळ्द पाप इन कारण दोषबली इन म्यांडा अन द्वारा आऊन साटी यहोवा अन्द मुंद प्रायश्चित माळुल; आग आऊन माळ्द पाप क्षमा माळकु आगुल.
LEV 19:23 “बाक याग नीव कनान द्याश दा पोहचुस्कु यातोदारा प्रकार इन काय इन मार्र हचेतीर, रा अदुर काय मुर वर्ष ताका नीम्द साटी मान्सी खतनारहित मान्सकु ईरूल; इदुरसाटी अदुर दा टु थ्वाळासा भी तिनकु आगबाळुल.
LEV 19:24 अदिक चौथा वर्ष दा अऊर सप्पा काय यहोवा अन्द स्तुति इन भेंट इन रूप दा पवित्र ठहरूसुल.
LEV 19:25 आग पाचवा वर्ष दा नीव अऊर काय तिनेतीर, इदुरसाटी कि अऊर देल नीम इक हापाळ काय सिक्याव; ना नीम्द परमेश्वर यहोवा हुईन.”
LEV 19:26 “नीव रकत हतकु यातोदारा चिच्ची इक तिनबाळेतीर. अदिक टोना माळबाळेतीर, अदिक शुभ अदिक अशुभ मुहुर्तगोळ इक मान्सबाळेतीर.”
LEV 19:27 तान ताल्ला मा घ्यारा ईटकु मुंडन माळबाळेतीर, अदिक तान गाल्ला माकळव चुट्टीगोळ इक बोळ्सबाळेतीर.
LEV 19:28 लाशगोळ कारण तान मय इक बिलकुल चिर्सबाळेतीर, अदिक अदुर्दा छाप हचबाळेतीर; ना यहोवा हुईन.
LEV 19:29 तान पोरगोळ इक वेश्या माळकु अपवित्र माळबाळेतीर, हिंग ना आगुल कि द्याश वेश्यागमन इन कारण दुष्टता देल तुम्मेगुल.
LEV 19:30 नांद आराम दिन इक मानसेतीर, अदिक नांद पवित्र जागा अन्द भय हमेशा मानसेतीर; ना यहोवा हुईन.
LEV 19:31 “इंद्रजालवाळा अदिक भूत इक तुळकाळसावाळा दी होगबाळेतीर, अदिक हिंग मंळसागोळ्द खोज माळकु आंदुर कारण अशुद्ध आगबाळेतीर; ना नीम्द परमेश्वर यहोवा हुईन.
LEV 19:32 “हाळाबाट्ट उन मुंद येदकु नीदरेतीर, अदिक हाळाबाटुर्द आदर मान माळेतीर, अदिक तान परमेश्वर उन भय हमेशा मानसेतीर; ना यहोवा हुईन.
LEV 19:33 “ अगर यावारा परदेशी नीम्द द्याश दा नीम्द सांगुळ ईरूल, रा आऊक सतुसबाळेतीर.
LEV 19:34 जो देशी या परदेशी नीम्द सांगुळ ईरूल आव नीम्द साटी द्याशवाळा अन्द घाई ईरूल, अदिक आऊन से तान अच घाई प्रेम ईटेतीर; यतिकी नीव भी मिस्त्र द्याश दा परदेशी ईरीर; ना नीम्द परमेश्वर यहोवा हुईन.
LEV 19:35 “नीव न्याय दा, अदिक परिमान दा, अदिक तवल दा, अदिक नाप दा, कुटीलता माळबाळेतीर.
LEV 19:36 खरा तराजू, खरा बट्ट, खरा एप्पा, अदिक धर्म इन खरा लीटर नीम्द हात्ती ईरूल; ना नीम्द परमेश्वर यहोवा हुईन जो नीम इक मिस्त्र द्याश टु तेगुकु तंदीन.
LEV 19:37 इदुरसाटी नीव नांद सप्पा विधिगोळ इक अदिक सप्पा न्याय इन नियमगोळ इक मान्सतेला हमेशा पालन माळी; ना यहोवा हुईन.”
LEV 20:1 बाक यहोवा मूसा से अंदुन,
LEV 20:2 “इस्राएलिगोळ से अन कि इस्राएलीगोळ दा टु, या इस्राएलीगोळ्द न्याड्या ईरावाळेर परदेशीगोळ दा टु, यावारा यती ईरबाळुल, जो तान यातोदारा औलाद इक मोलेक द्याव उक बलिदान माळुल आव निश्चय कोंदकु आगुल; अदिक जनता आऊन मा कल्लगोळ भिळुल.
LEV 20:3 ना भी आ मंळसा अन्द विरूद्ध आगकु, आऊक आऊन लॉकुर दा टु ई कारण नाश माळाईन, कि आव तान औलाद मोलेक द्याव उक कोटकु नांद पवित्र जागा अक अशुद्ध माळदुन, अदिक नांद पवित्र हेसुर इक अपवित्र ठहरूसदुन.
LEV 20:4 अदिक अगर यावारा तान औलाद मोलेक उक बलिदान माळुल, अदिक जनता आऊन बारा दा आनाकानी माळुल, अदिक आऊक कोंनबाळुल,
LEV 20:5 आग रा ना खुद आ मंळसा अदिक आऊन घराना अन्द विरूद्ध आगकु आऊक अदिक यास मुंदुर आऊन हिंद आगकु मोलेक द्याव उन सांगुळ व्यभिचार माळुल आ सप्पा मुंदरी आंदुर लॉकुर्द न्याड्या दा टु नाश माळाईन.”
LEV 20:6 “बाक जो मंळसा इंद्रजालवाळा या भूत तुळकाळसावाळा अन्द दी तिर्गकु, अदिक आंदुर हिंद आगकु व्यभिचारी आगुल, आग ना आ मंळसा अन्द विरूद्ध आगकु आऊक आऊन लॉकुर्द न्याड्या दा टु नाश माळ बुळाईन.”
LEV 20:7 इदुरसाटी नीव तान तान इक पवित्र माळी; अदिक पवित्र बन्सकु ईरी; यतिकी ना नीम्द परमेश्वर यहोवा हुईन.
LEV 20:8 अदिक नीव नांद विधिगोळ इक मानसेतीर, अदिक अदुर पालन भी माळेतीर; यतिकी ना नीमी पवित्र माळावाळा यहोवा हुईन.
LEV 20:9 “यावारा यती न ईरबाळुल, जो तान आप्प या मोय इक सराप कोळुल आव निश्चय कोंदकु आगुल; आव तान आप्प या मोय इक सराप कोट्टुन, ई कारण आऊन रकत आऊन ताल्ला मा बिद्दीत.”
LEV 20:10 “बाक अगर यावारा मंळसा दुसरा अन आर्त इन सांगुळ व्यभिचार माळुल, रा याव यावारा दुसरा अन्द आर्त इन सांगुळ व्यभिचार माळीदान रा आव व्यभिचारी अदिक आक व्यभिचारिणी येढ्ढु मुंदुर निश्चित कोंदकु आगुल.”
LEV 20:11 अगर यावारा तान मोय इन सांगुळ मिंगुल, आव तान आप्प उन ईज्जत उघळुसावाळा ठहरूस्यान; इदुरसाटी आंदुर येढ्ढु मुंदुर निश्चित कोंदकु आगुल, आंदुर खुन आंदुर्दा ताल्ला मा बिद्दीत.
LEV 20:12 अगर यावारा तान सासा अन्द सांगुळ मिंगुल, रा आंदुर येढ्ढु मुंदुर निश्चित कोंदकु आगुल; यतिकी आंदुर उलटा क्याल्सा माळावाळेर ठहरूस्यार, अदिक आंदुर खुन आंदुर्दा ताल्ला मा बिद्दीत.
LEV 20:13 अगर यावारा मंळसा यातारा दुसरा मंळसा अन सांगुळ बेकार क्याल्सा माळतान, जसा यातोरारा आर्त इन सांगुळ माळुल, रा आंदुर येढ्ढु घिनौना क्याल्सा माळावाळेर ठहरूस्यार; ई कारण आंदुर निश्चित कोंदकु आगुल, आंदुर खुन आंदुर्दा ताल्ला मा बिद्दीत.
LEV 20:14 अगर यावारा तान हिंग्स अदिक तान आत्ता अक येढ्ढु मुंदरी ईट्टुल, रा ईद महापाप हुंद; इदुरसाटी आ गंळ्स अदिक आ आर्तेर मुरू चा मुरू मुंदुर बेक्की दा होत्‍ताकु आगुल, अदुर देल नीम्द न्याड्या दा महापाप आगबाळुल.
LEV 20:15 बाक अगर यावारा गंळ्स पशु से संबंध माळतीदान, रा गंळ्स अदिक पशु येढ्ढु निश्चित कोंदकु आगुल.
LEV 20:16 अगर याकारा आर्त पशु उन हात्ती होगकु अदुर सांगुळ कुकर्म माळुल, रा नी आ आर्त अदिक पशु येढ्ढु उक घात माळेत; आंदुर निश्चित कोंदकु आगुल, आंदुर खुन आंदुर्दा ताल्ला मा बिद्दीत.
LEV 20:17 “अगर यावारा तान आकतींग इक, चाहे आऊन सगा आकतींग ईरूल चाहे सौतेला आकतींग, आकीन ऊगळा मय नोळुल, अदिक आऊन आकतींग भी आऊन ऊगळा मय नोळुल रा ईद नाच्कवाळा मात हुंद, आंदुर येढ्ढु तान जातीनोर वार्टुर्द कण्णगोळ मुंद नाश माळकु आगुल; यतिकी जो तान आकतींग इन मय ऊगुळसावाळा ठहरूस्यान आऊक तान दुष्कर्म अन्द भार खुद नेग्गोद बिद्दीत.”
LEV 20:18 बाक अगर यावारा गंळ्स याकारा ऋतुमती आर्त इन सांगुळ मिंगकु आकीन मय ऊगुळस्यान, रा आ गंळ्स आकीन रूधिर इन सोता अक ऊगळुसावाळा ठहरूस्यान, अदिक आ आर्त तान रूधिर इन सोता अक ऊगुळ्सावळ्त ठहरूस्यार; ई कारण आंदुर येढ्ढु मुंदुर तान लॉकुर्द न्याड्या दा टु नाश माळकु आगुल.
LEV 20:19 तान मावसी या फुफी इन मय ऊगळुस बाळेतीर, यतिकी जो अदरी ऊगुळस्यान तान हात्तीगोळोर रिश्तेदारगोळ इक नंगा माळतान; इदुरसाटी इंदरी येढ्ढु मुंदरी तान दुष्कर्म अन्द भार नेग्गोद बिद्दीत.
LEV 20:20 अगर यावारा तान काकी इन सांगुळ मिंगुल, रा आव तान काका अन्द ईज्जत ऊगुळसावाळा ठहरूस्यान; इदुरसाटी आंदुर येढ्ढु मुंदुर तान पाप इन भार इक नेगुतेला निर्वंश सोतोदार.
LEV 20:21 अगर यावारा तान भाभी इक तान हिंग्स माळुल, रा इदरी घिनौना क्याल्सा जान्सेतीर; अदिक आव तान वार्ट उन ईज्जत ऊगुळसावाळा ठहरूस्यान, ई कारण आंदुर येढ्ढु मुंदुर बिना औलाद देल ईत्तार.
LEV 20:22 “नीव नांद सप्पा विधिगोळ अदिक नांद सप्पा नियमगोळ इक समझ इन सांगुळ मानसेतीर; इदुर देल ईद आगबाळुल कि या द्याश दा ना नीमी ओयेतीन अद नीमी भिट्ट बुळुल.
LEV 20:23 अदिक या राज्य अन लॉकुर इक ना नीम्द मुंद टु तेगुतीन आंदुर्द रीती-रस्म मा नळुबाळेतीर; यतिकी आ लॉकुर जो ईव सप्पा कुकर्म माळदुर, ईदा कारण नानी आंदुर से घृणा आगेग्याद.
LEV 20:24 पर ना नीव लॉकुर से अनतीन कि नीव रा आंदुर्द भूमि इन अधिकारी आदीर, अदिक ना ई द्याश इक यदुर्दा हाल अदिक शयद इन धारागोळ वाहुसताव नीम्द अधिकार दा माळ बुळाईन; ना नीम्द परमेश्वर यहोवा हुईन याव नीमी अन्य द्याशगोळ्द लॉकुर से अलग माळदुन.
LEV 20:25 ई कारण नीव शुद्ध अदिक अशुद्ध पशुगोळ दा, अदिक शुद्ध अदिक अशुद्ध पक्षिगोळ दा भेद माळोद; अदिक यातोदारा पशु या पक्षी या यातोदारा प्रकार इन भूमी मा रेंगसावाळा जीवजन्तु यती आगबाळुल, यारी ना नीम्द साटी अशुद्ध ठहरूसकु वर्जित माळदीन, अदुर देल खुद इक अशुद्ध माळबाळेतीर.
LEV 20:26 नीव नान साटी पवित्र बन्सकु ईरेतीर; यतिकी ना यहोवा खुद पवित्र आईन, अदिक ना नीम इक अदिक द्याशगोळ्द लॉकुर से इदुरसाटी अलग माळदीन कि नीव हमेशा नांद अच बन्सकु ईरी.
LEV 20:27 “अगर यावारा गंळ्स या आर्त इंद्रजालवाळा या भूत इन साधना माळुल, रा आव निश्चित कोंदकु आगुल; हिंग मंळसागोळ मा कल्लगोळ भिटकु आगुल, आंदुर खुन आंदुर्दा ताल्ला मा बिद्दीत.”
LEV 21:1 बाक यहोवा मूसा से अंदुन, “हारून उन पार जो याजक आन आंदुर से अन कि नीम्द लॉकुर दा टु यावारा भी शाईल, रा आऊन कारण नीम दा टु यावारा खुद इक अशुद्ध माळबाळुल;
LEV 21:2 तान हात्तीनोर कुटुम्बिगोळ इक, मतलब तान मोय, या आप्प, या पार, या पोर, या वार्ट उन साटी,
LEV 21:3 या तान कुवारा आकतींग आकीन मदा आगीदिल, यार्द हात्ती इन संबंध आद; आंदुर साटी आव तान इक अशुद्ध माळ सकतान.
LEV 21:4 पर याजक आगोर नाता देल आव तान लॉकुर दा प्रधान आन, इदुरसाटी आव खुद इक हिंग अशुद्ध माळबाळुल कि अपवित्र आगेगुल.”
LEV 21:5 याजक तान ताल्ला अन्द चुट्टी मुंडन माळबाळुल, अदिक तान गाल्ला अन्द चुट्टी इक भी बोळ्स बाळुल, अदिक तान मय मा घाव माळबाळुल.
LEV 21:6 आंदुर तान परमेश्वर उन साटी पवित्र बन्सकु ईरूल, अदिक तान परमेश्वर उन हेसुर अपवित्र माळबाळुल; यतिकी आंदुर यहोवा अन्द होमबली अक जो आंदुर परमेश्वर उन भोजन हुंद येर्सतार; ई कारण आंदुर पवित्र बन्सकु ईरूल.
LEV 21:7 याजक पवित्र रीती देल परमेश्वर उन स्यावा माळतान अनकु आव भ्रष्ट आगकु आर्त इक, वेश्या अक, या गांड्ड उक बिटकु आर्त इक तान हिंग्स माळबाळुल.
LEV 21:8 इदुरसाटी नी याजक उक पवित्र जान्सेत, यतिकी आव नीम्द परमेश्वर उक भोजन येर्सतान; इदुरसाटी आव नींद नजर दा पवित्र ठहरूसुल; यतिकी ना यहोवा, जो नीमी पवित्र माळतीन, पवित्र आईन.
LEV 21:9 अदिक अगर याजक उन पोर वेश्या बन्सकु तान तान इक अपवित्र माळुल, रा आक तान आप्प उक अपवित्र ठहरूस्तार; आकी बेक्की दा होताक्कु आगुल.
LEV 21:10 “जो तान वार्टुर दा महायाजक ईरूल, आऊन ताल्ला मा अभिषेक उन याण्णा हाक्कु आगुल, अदिक आऊन पवित्र कपळागोळ इक हाक्‍कोर साटी संस्कार आग्याद, आव तान ताल्ला अन्द चुट्टी बगरूसगोळ बाळुल, अदिक तान कपळागोळ इक हरू बाळुल;
LEV 21:11 अदिक न आव यातोदारा लोथ इन हात्ती होगुल, अदिक न तान आप्प या मोय इन कारण खुद इक अशुद्ध माळुल;
LEV 21:12 अदिक आव पवित्र जागा टु व्हार्या भी होळबाळुल, अदिक न तान परमेश्वर उन पवित्र जागा अक अपवित्र ठहरूसुल; यतिकी आव तान परमेश्वर उन अभिषेक उन याण्णारूपी मुकुट धारण माळकु आन; ना यहोवा हुईन.
LEV 21:13 अदिक आव कुवारा आर्त इन सांगुळ मदा माळुल.
LEV 21:14 जो रांड्यागीत, या छोळचिट्टी कोटकु आग्यार आक, या भ्रष्ट, या वेश्या ईरूल, हिंग आर्त से आव मदा माळबाळुल, आव तान अच लॉकुर न्याड्या दा टु यातोदारा कुवारा पोर से मदा माळुल.
LEV 21:15 अदिक आव तान औलाद इक तान लॉकुर दा अपवित्र माळबाळुल; यतिकी ना आकीक पवित्र माळावाळा यहोवा हुईन.”
LEV 21:16 बाक यहोवा मूसा से अंदुन,
LEV 21:17 “हारून से अन कि नींद वंश इन पीढ़ी-पीढ़ी दा जो यावारा येनारा भी शारीरिक दोष ईरूल आव तान परमेश्वर उन भोजन येरसोर साटी हात्ती बर बाळुल.
LEV 21:18 यावारा यती ईरबाळुल, यारदा दोष ईरूल, आव हात्ती बरबाळुल, चाहे आव कुढ्ढ ईरूल, चाहे लंगळा, चाहे मुग्ग कुरकु ईरूल, चाहे आऊन येनारा यक्कुल अंग ईरूल,
LEV 21:19 या आऊन काल, या कय लूला ईरूल,
LEV 21:20 या आव कुबळा, या बुटरा ईरूल, या आऊन कण्णगोळ दा दोष ईरूल, या आ मंळसा अक बिळीद दाग या खुजली ईरूल, या आव नपुंसक ईरूल;
LEV 21:21 हारून याजक उन वंश दा टु यारदारा दा यातोदारा भी शारीरिक दोष ईरूल, आव यहोवा अन्द होमबली येरसोर साटी हात्ती बरबाळुल; आव जो दोषयुक्त आन यागलु भी तान परमेश्वर उक भोजन येरसोर साटी हात्ती बरबाळुल.
LEV 21:22 आव तान परमेश्वर उन पवित्र अदिक अपवित्र येढ्ढु प्रकार इन भोजन इक तिनुल,
LEV 21:23 लेकीन आऊन दोष इन कारण आव न रा न्याड्यावाळा परदा अन्द बुळ्क बरूल अदिक न वेदी इन हात्ती, इदुर देल हिंग न आगुल कि आव नान पवित्र जागागोळ इक अपवित्र माळुल; यतिकी ना आंदरी पवित्र माळावाळा यहोवा हुईन.”
LEV 21:24 इदुरसाटी मूसा हारून अदिक आऊन पारगोळ इक तथा सप्पा इस्राएलीगोळ इक ईव मातगोळ अनतेला केळ्सदुन.
LEV 22:1 बाक यहोवा मूसा से अंदुन,
LEV 22:2 “हारून अदिक आऊन पारगोळ से अन कि इस्राएलिगोळ्द पवित्र माळ्द वस्तुगोळ से यदरी आंदुर नान साटी पवित्र माळतार अलग ईरूल, अदिक नान पवित्र हेसुर इक अपवित्र माळबाळुल; ना यहोवा हुईन.”
LEV 22:3 अदिक आंदुर से अन कि नीम्द पीढ़ी-पीढ़ी दा नीम्द पुरा वंश दा टु जो यावारा तान अशुध्दता अन्द दशा दा आ पवित्र माळ्द वस्तुगोळ्द हात्ती होगुल, यारी इस्राएली यहोवा अन्द साटी पवित्र माळतार, आ मंळसा नान मुंद टु नाश माळकु आदान; ना यहोवा हुईन.
LEV 22:4 हारून उन वंश दा टु यावारा यती ईरबाळुल, जो कोढ़ी ईरूल, या आऊन रकत होगतेला ईरूल, आ मंळसा यागासताका शुद्ध आगालुन, आगासताका पवित्र माळ्द वस्तुगोळ दा टु येनारा भी तिनबाळुल. अदिक जो लोथ इन कारण अशुद्ध आग्यान, या आऊन वीर्य स्खलित आग्याद, हिंग मंळसा अक जो यावारा मुटुल,
LEV 22:5 अदिक जो यावारा यातोदारा हिंग रेंगसावाळा जन्तु उक मुटुल अदुर देल लॉकुर अशुद्ध आग सकतार, इंदुर दा टु यारीकारा मुटुल आऊन दा यातोदारा प्रकार इन अशुद्धता ईरूल जो आऊक भी हत्त सकतद.
LEV 22:6 रा आ याजक जो इंदुर दा टु यारीकारा मुटुल द्यावगाताका अशुद्ध ठहरूसकु ईरूल, अदिक यागासताका नीर देल मय तोळुकोमालुन, आगासताका पवित्र वस्तुगोळ दा टु येनारा भी तिनबाळुल.
LEV 22:7 आग सूर्य अस्त आगोर मा आव शुद्ध ठहरूस्यान; अदिक आग आव पवित्र वस्तुगोळ दा टु तिन सक्यान, यतिकी आऊन भोजन अदा हुंद.
LEV 22:8 जो जनावर तान देल सोताद या पशु देल हरूकु आग्याद अदरी तिनकु आव तान तान इक आव अशुद्ध माळबाळुल; ना यहोवा हुईन.
LEV 22:9 इदुरसाटी याजक लॉकुर नांद सौप्सकु आग्याद नियमगोळ्द पालन माळुल, हिंग ना आगुल कि आंदुर अवरी अपवित्र माळकु पाप इन भार नेगुल, अदिक इदुर कारण सोतोगुल; ना आंदरी पवित्र माळावाळा यहोवा हुईन.
LEV 22:10 “पराया कुल इन जन, यातोदारा पवित्र वस्तु उक तिनबाळुल, चाहे आव याजक उन अतिथी ईरूल या मजदुर ईरूल, तो भी आव यातोदारा पवित्र वस्तु तिनबाळुल.
LEV 22:11 अगर याजक यातोवारा दास उक पैस्या कोटकु कोमुल, रा आ दास अदुर दा टु तिन सकतान; अदिक जो याजक उन मान्ना दा पैदा आग्यान आंदुर भी आऊन भोजन दा टु तिनुल.
LEV 22:12 अदिक अगर याजक उन पोर पराया कुल इन यावारा गंळ्स से मदा आगुल, रा आव भेंट माळ्द पवित्र वस्तुगोळ दा टु तिनबाळुल.
LEV 22:13 अगर याजक उन पोर रांड्यागीत या छोळचिट्टी माळकु ईरूल, अदिक आकीन औलाद ईर बाळुल, अदिक आक तान स्यांण पनी इन अवस्था अन्द रीती इन अनुसार तान आप्प उन मान्ना दा ईरतीदार, रा आक तान आप्प उन भोजन दा टु तिनुल; पर पराया कुल इन यावारा अदुर दा टु तिनबाळुल.”
LEV 22:14 “अदिक अगर यावारा मंळसा यातोदारा पवित्र वस्तु दा टु येनारा भुल देल तिन कोमुल, रा आव अदुर पाचवा भाग वाळुस्कु अदरी याजक उक तुमकु कोळुल.
LEV 22:15 आंदुर इस्राएलीगोळ्द पवित्र माळ्द वस्तुगोळ इक, अवरी आंदुर यहोवा अन्द साटी येरसुल, अपवित्र माळबाळुल.
LEV 22:16 आंदुर आंदरी तान पवित्र वस्तुगोळ दा टु तिनस्कु आंदुर से अपराध इन दोष नेगसुसबाळुल; ना आंदरी पवित्र माळावाळा यहोवा हुईन.”
LEV 22:17 बाक यहोवा मूसा से अंदुन,
LEV 22:18 “हारून अदिक आऊन पारगोळ से अदिक इस्राएलीगोळ इक समझुसकु अन की इस्राएल इन घराना या इस्राएलीगोळ दा ईरावाळेर परदेशीगोळ दा टु यावारा यती ईरबाळुल, जो मन्नत या स्वेच्छाबलि माळोर साटी यहोवा अक यावारा होमबली येरसुल,
LEV 22:19 रा तान निमित्त ग्रहण योग्य ठहरूसोर साटी पालस्द पशु दा टु वस्ता या मर्री या म्यांडा दा टु तंदरूस्त नर येर्सकु आगुल.
LEV 22:20 अदुर्दा यातोदारा दोष ईरूल अदरी येर्सबाळेतीर; यतिकी अद नीम्द निमित्त ग्रहण योग्य ठहरूसतीदील.
LEV 22:21 अदिक जो यावारा पालस्द पशु या म्यांडा-मर्रगोळ दा टु विशेष वस्तु मन्नत माळोर साटी या स्वेच्छाबलि इन साटी यहोवा अक मेल-मिलाप बली येरसुल, रा ग्रहण आगोर साटी अवश्य आद कि आव निर्दोष आगुल, आऊन दा यातोदारा भी दोष ईरबाळुल.
LEV 22:22 जो कुढ्ढ या मय इन मुरकु या लूला ईरूल, अथवा आऊन दा फ्वाळा या पपळी या खुजली ईरूल, हिंग चीजगोळी यहोवा अन्द साटी येर्सबाळेतीर, अवरी होमबली मा यहोवा अन्द साटी बली येर्सबाळेतीर.
LEV 22:23 यातोदारा वस्ता या म्यांडा या व्हात इन यातोदारा अंग येक्कुल या कम ईरूल अदरी स्वेच्छाबलि इन साटी येर्स सकतीर, लेकीन मन्नत पुरा माळोर साटी अद ग्रहण माळकु आगतीदिल.
LEV 22:24 यारव अंड दब्सकु या कुचलस्कु या मुरकु या कडुकु ईरूल अवरी यहोवा साटी येर्स बाळेतीर, अदिक तान द्याश दा भी हिंग क्याल्सा माळबाळेतीर.”
LEV 22:25 “बाक ईऊर दा टु यारीकारा अक नीव तान परमेश्वर उन भोजन जानस्कु यावारा परदेशी से हुळकु येर्सबाळेतीर; यतिकी अऊर्दा दोष आद, इदुरसाटी अव नीम्द निमित्त ग्रहण आगतीदिल.”
LEV 22:26 बाक यहोवा मूसा से अंदुन,
LEV 22:27 “याग वस्ता या म्यांडा या मर्री पैदा आगुल, रा अद येळ दिन ताका तान मोय इन सांगुळ ईरूल; बाक आठवा दिन टु मुंद अद यहोवा अन्द होमबली येरसोर साटी ग्रहण योग्य ठहरूसीत.
LEV 22:28 चाहे वस्ता, चाहे म्यांडा या मर्री ईरूल, अदरी अदिक अदुर पाड्डा अक ऊंद अच दिन दा बली माळबाळेतीर.
LEV 22:29 अदिक याग नीव यहोवा अन्द साटी धन्यवाद इन मेल-मिलाप बली येरसीर, रा अदरी ईदा रिती देल माळेतीर यदुर देल अद ग्रहण योग्य ठहरूसुल.
LEV 22:30 अद अदा दिन तिनकु आगुल, अदुर्दा टु येनारा भी व्‍हातुर ताका ईर बाळुल; ना यहोवा हुईन.
LEV 22:31 “इदुरसाटी नीव नांद आग्यागोळ इक मानसेतीर अदिक पालन माळेतीर; ना यहोवा हुईन.
LEV 22:32 अदिक नांद पवित्र हेसुर इक अपवित्र ठहरूसबाळेतीर, यतिकी ना इस्राएलीगोळ्द न्याड्या अवश्य अच पवित्र अच मान्सकु आगाईन; ना नीम्द पवित्र माळावाळा यहोवा हुईन,
LEV 22:33 जो नीमी इक मिस्त्र द्याश टु तेगुकु तंदान यदुर देल नीम्द परमेश्वर बन्सकु ईराइन; ना यहोवा हुईन.”
LEV 23:1 बाक यहोवा मूसा से अंदुन,
LEV 23:2 “इस्राएलीगोळ से अन कि यहोवा अन्द हाब्ब अदुर दा नीम इक पवित्र सभा जमा माळोर साटी ठहरूस्कु समय मा प्रचार माळोद बिद्दीत, नांद अव हाब्ब ईव हु.”
LEV 23:3 “आर दिन क्याल्सा धंदा माळकु आगुल, लेकीन येळवा दिन परम आराम इन अदिक पवित्र सभा अन्द दिन हुंद; अदुर दा यातोदारा प्रकार इन क्याल्सा धंदा माळकु आगबाळुल; अद नीम्द सप्पा मान्नागोळ दा यहोवा अन्द आराम दिन ठहरूसुल.
LEV 23:4 “बाक यहोवा अन्द पर्व अदुर दा टु ऊंद-ऊंद मंळसा अन्द ठहरूस्द समय दा नीमी पवित्र सभा माळोर साटी प्रचार माळोद बिद्दीत अव ईव हूँ.
LEV 23:5 पयला तिंगुळ इन चौदावा दिन इक द्यावगा अन्द समय यहोवा अन्द फसह आगतेला ईरूल.
LEV 23:6 अदिक अदा तिंगुळ इन पन्द्रहवा दिन इक यहोवा अन्द साटी अखमीरी रोट्टी इन पर्व आगतेला ईरूल; अदुर दा नीव येळ दिन ताका अखमीरी रोट्टी तिनतेला ईरेतीर.
LEV 23:7 अदुर दा टु पयला दिन नीम्द पवित्र सभा आगुल; अदिक आ दिशी कष्ट इन यातोदारा क्याल्सा माळबाळेतीर.
LEV 23:8 अदिक येळवा दिशी नीव यहोवा अक होमबली येर्सेतीर; अदिक येळवा दिन पवित्र सभा आगुल; आ दिशी कष्ट इन यातोदारा क्याल्सा माळबाळेतीर.”
LEV 23:9 बाक यहोवा मूसा से अंदुन,
LEV 23:10 “इस्राएलीगोळ से अन कि याग नीव आ द्याश दा प्रवेश माळी यारी यहोवा नीमी कोळतान अदिक अदुर दा टु केई कढी, आग तान-तान हण्ण केई इन पयला उपज इन फसल याजक उन हात्ती तरेतीर;
LEV 23:11 अदिक आव आ पेंड़ी इक यहोवा अन्द मुंद हालुसुल कि अद नीम्द निमित्त ग्रहण माळकु आगुल; याजक अदरी आराम दिन इन दुसरा दिशी हालुसुल.
LEV 23:12 अदिक या दिशी नीव आ पेंड़ी इक हालुसीर अदा दिशी ऊंद वर्ष इन तंदरूस्त म्यांडा अन्द पाड्डा यहोवा अन्द साटी होमबली येर्सेतीर.
LEV 23:13 अदिक अदुर सांगुळ अन्नभेट एपा अन्द येढ्ढ हतवा अंश याण्णा हचकु मैदा अन्द ईरूल अद होमबली सुखदायक सुगन्ध इन साटी यहोवा अन्द साटी पेयबली आगुल; अदिक अदुर सांगुळ इन अर्घ हीन भर इन चौथाई भाग अंगुर इन रास्‍सा ईरूल.
LEV 23:14 अदिक यागासताका ई चढ़ावा अक नीव तान परमेश्वर उन हात्ती वोयतीदिल, आ दिन ताका व्हाशोद केई दा टु रोट्टी तिनबाळेतीर अदिक सुटकु अन्न अदिक हिवरा लॉम्बा तिनबाळेतीर; ईद नीम्द पीढ़ी-पीढ़ी दा नीम्द पुरा घरानागोळ दा हमेशा अन्द विधी ठहरूसुल.
LEV 23:15 “बाक आ आराम दिन इन दुसरा दिन टु, मतलब या दिशी नीव हालुस्कु आगोद भेंट इन फसल इक तरेतीर, आ दिन टु पुरा येळ आराम दिन आळकोमेतीर;
LEV 23:16 येळवा आराम दिन इन अगला दिन ताका पचास दिन आळेतीर, अदिक पचासवा दिन यहोवा अन्द साटी व्हाशोद अन्नभेट येर्सेतीर.
LEV 23:17 नीव तान मान्नागोळ दा टु एपा अन येढ्ढ हतवा अंश मैदा अन्द येढ्ढ रोट्टीगोळ इक हालुसोद भेंट इन साटी तरेतीर; अव खमीर इन सांगुळ कासकु आगुल, अदिक यहोवा अन्द साटी पयला फसल ठहरूसुल.
LEV 23:18 अदिक आ रोट्टी इन सांगुळ ऊंद-ऊंद वर्ष इन येळ तंदरूस्त म्यांडा अन्द पाड्डा, अदिक ऊंद पाड्डा, अदिक येढ्ढ म्यांडागोळ येर्सेतीर; आंदुर तान-तान सांगुळ अन्नभेट अदिक अर्घ सांगुळ यहोवा अन्द साटी होमबली इन घाई येर्सकु आगुल, मतलब अव यहोवा अन्द साटी सुखदायक सुगन्ध कोळावाळा बली ठहरूसुल.
LEV 23:19 बाक पापबली इन साटी ऊंद व्हात, अदिक मेलबली इन साटी ऊंद-ऊंद वर्ष इन म्यांडा अन्द पाड्डा येरसुल.
LEV 23:20 आग याजक आंदरी पयला उपज इन रोट्टी सांगुळ यहोवा अन्द मुंद हालुसोद भेंट इन साटी हालुसुल, अदिक ई रोट्टीगोळ्द सांगुळ अव येढ्ढ म्यांडा अन्द पाड्डागोळ भी हालुस्कु आगुल; अव यहोवा अन्द साटी पवित्र, अदिक याजक उन भाग ठहरूसुल.
LEV 23:21 अदिक नीव आ दिशी ईद प्रचार माळेतीर, कि ईंद नाम्द ऊंद पवित्र सभा आदीत; अदिक कष्ट इन यातोदारा क्याल्सा माळबाळेतीर; ईद नीम्द पुरा घराना दा नीम्द पीढ़ी-पीढ़ी दा हमेशा अन्द विधी ठहरूसुल.
LEV 23:22 “याग नीव तान द्याश इन केईगोळ कढी, आग तान केई इन क्वानागोळ इक पुरा रीती देल कडु बाळेतीर, अदिक केई दा बिदकु लॉम्बागोळ इक जमा माळबाळेतीर; अदरी गरीब अदिक परदेशीगोळ्द साटी बिटबुळेतीर; ना नीम्द परमेश्वर यहोवा हुईन.”
LEV 23:23 बाक यहोवा मूसा से अंदुन,
LEV 23:24 “इस्राएलीगोळ से अन कि येळवा तिंगुळ इन पयला दिन इक नीम्द साटी खास आराम दिन ईरूल; आ दिन इक याद तोरसोर साटी नरसिंगगोळ ऊयकु आगुल, अदिक ऊंद पवित्र सभा जमा आगुल.
LEV 23:25 आ दिशी नीव कष्ट इन यातोदारा क्याल्सा माळबाळेतीर, अदिक यहोवा अन्द साटी ऊंद होमबली येर्सेतीर.”
LEV 23:26 बाक यहोवा मूसा से अंदुन,
LEV 23:27 “अदा येळवा तिंगुळ इन हतवा दिन पाप होचकु ईटोद दिन मान्सकु आगुल; अद नीम्द पवित्र सभा अन्द दिन आदीत, अदिक अदुर दा नीव उपास माळेतीर अदिक यहोवा अन्द होमबली येर्सेतीर.
LEV 23:28 आ दिशी नीव यातोदु प्रकार इन क्याल्सा धंदा माळबाळेतीर; यतिकी अद पाप होचकु ईटोद दिन नियुक्त माळकु आग्याद अदुर दा नीम्द परमेश्वर यहोवा अन्द मुंद नीम्द पाप होचकु आदीत.
LEV 23:29 इदुरसाटी जो मंळसा आ दिशी उपास माळतीदील आव तान लॉकुर दा टु नाश माळकु आदान.
LEV 23:30 अदिक जो मंळसा आ दिशी यातोदारा प्रकार इन क्याल्सा धंदा माळुल आ मंळसा अक ना आऊन लॉकुर न्याड्या दा नाश माळ बुळाईन.
LEV 23:31 नीव यातोदु प्रकार इन क्याल्सा धंदा माळबाळेतीर; ईद नीम्द पीढ़ी-पीढ़ी दा नीम्द घराना दा हमेशा अन्द विधी ठहरूसुल.
LEV 23:32 अद दिन नीम्द साटी विशेष आराम इन ईरूल, अदुर दा नीव उपास माळेतीर; अदिक आ तिंगुळ इन ऊंम्बत दिन इन द्यावगा टु दुसरा द्यावगा ताका तान आराम दिन मान्सतेला ईरेतीर.”
LEV 23:33 बाक यहोवा मूसा से अंदुन,
LEV 23:34 “इस्राएलीगोळ से अन कि अदा येळवा तिंगुळ इन पन्द्रहवा दिन टु येळ दिन ताका यहोवा अन्द साटी झोपळीगोळ्द पर्व मान्सकु आगुल.
LEV 23:35 पयला दिन पवित्र सभा ईरूल; अदुर दा कष्ट इन यातोदारा क्याल्सा माळबाळेतीर.
LEV 23:36 येळु दिन यहोवा अन्द साटी होमबली येर्सतेला ईरेतीर, बाक आठवा दिन नीम्द पवित्र सभा आगुल, अदिक यहोवा अन्द साटी होमबली येर्सेतीर; अद महासभा अन्द दिन हुंद, अदिक अदुर दा कष्ट इन यातोदारा क्याल्सा माळबाळेतीर.
LEV 23:37 “यहोवा अन्द ठहरूस्कु आग्याव पर्व ईव अच हूँ, इदुर दा नीव यहोवा अन्द होमबली येर्सेतीर, अदिक अन्नभेट, मेलबली, अदिक पेयबली, हर ऊंद तान-तान ठहरूस्कु आग्याद समय मा येर्सकु आगुल अदिक पवित्र सभा अन्द प्रचार माळेतीर.
LEV 23:38 ईव सप्पा देल यक्कुल यहोवा अन्द आराम दिन इक मानसेतीर, अदिक तान भेटगोळ्द, अदिक सप्पा मन्नतगोळ, अदिक खुद इन इच्छा अन्द बलिगोळ इक जो यहोवा अक अर्पण माळेतीर येर्सकु आगुल.
LEV 23:39 “बाक येळवा तिंगुळ इन पन्द्रहवा दिन इक, याग नीव केई इन उपज इक जमा माळ बुट्टीर, आग येळ दिन ताका यहोवा अन्द पर्व मानसेतीर; पयला दिन विशेष आराम दिन ईरूल, अदिक येळवा दिशी आराम दिन ईरूल.
LEV 23:40 अदिक पयला दिन नीव वळ्लीद-वळ्लीद मार्रगोळ्द उपज, अदिक खजूर इन डगालगोळ, अदिक डाट मार्रगोळ्द डगालीगोळ, अदिक गांगा दा टु मजनू हेसुर इन मार्र इक हुळकु तान परमेश्वर यहोवा अन्द मुंद येळ दिन ताका आनन्द माळेतीर.
LEV 23:41 प्रति वर्ष येळ दिन ताका यहोवा अन्द साटी पर्व मानसेतीर; ईद नीम्द पीढ़ी-पीढ़ी दा सदा अन्द विधी ठहरूसुल, कि येळवा तिंगुळ दा ईद पर्व मान्सकु आगुल.
LEV 23:42 येळ दिन ताका नीव झोपळीगोळ दा ईरेतीर, मतलब यास जन्म टु इस्राएली आर या देशी परदेशी आंदुर सप्पा अन सप्पा झोपळीगोळ दा ईरूल,
LEV 23:43 इदुरसाटी कि नीम्द पीढ़ी-पीढ़ी इन लॉकुर ध्यान ईटुल, कि याग यहोवा नाव इस्राएलीगोळ इक मिस्त्र द्याश टु तेगुकु तरोन आग आव आंदरी झोपळीगोळ दा ईटीदुन; ना नीम्द परमेश्वर यहोवा हुईन.”
LEV 23:44 अदिक मूसा इस्राएलीगोळ इक यहोवा अन्द पर्व अन ठहरूस्कु आग्याद समय अनकु केळ्सदुन.
LEV 24:1 बाक यहोवा मूसा अक अंदुन,
LEV 24:2 “ इस्राएलीगोळ इक ईद आग्या कोळ कि नांद हात्ती ऊजुळ कोळोद साटी कय देल कांळ्सकु तेग्द जैतून इन शुद्‍ध याण्णा तरेत, कि दिंग्या हमेशा होततेला ईरूल.
LEV 24:3 हारून अदरी भेंटमाळोद तम्बू दा, किर्या चिट्टी इन न्याड्यावाळा परदा टु व्हार्या, यहोवा अन्द मुंद हमेशा द्यावगा टु व्हातुर ताका सजुसकु ईट्टुल; ईद नीम्द पीढ़ी-पीढ़ी टु हमेशा अन्द विधी ठहरूसुल.
LEV 24:4 आव दिंग्यागोळ इक व्हान्ना अन्द दीवट मा यहोवा अन्द मुंद हमेशा सजुसकु ईट्टुल.
LEV 24:5 “नी मैदा हुळकु हन्नेळ रोट्टीगोळ कासेत, हर ऊंद रोट्टी दा एपा अन्द येढ्ढ हतवा अंश मैदा ईरूल.
LEV 24:6 आग आंदुर येढ्ढ पंगतगोळ माळकु, ऊंद-ऊंद पंगत दा आर-आर रोट्टीगोळ, साफ मेज मा यहोवा अन्द मुंद ईटेत.
LEV 24:7 अदिक ऊंद-ऊंद पंगत मा शुद्ध लुबान ईटेत कि अद रोट्टी याद तोरसावाळा वस्तु अदिक यहोवा अन्द साटी होमबली ईरूल.
LEV 24:8 हर ऊंद आराम दिन इक आव अदरी हमेशा यहोवा अन्द मुंद लाईन देल ईट्टुल, ईद सदा अन्द वादा अन्द रीती इस्राएलीगोळ दी टु आगतेला ईरूल.
LEV 24:9 अदिक अद हारून अदिक आऊन पारगोळ्द आदीत, अदिक आंदुर रोट्टी यातोदारा पवित्र जागा दा तिनुल, यतिकी अद यहोवा अन्द होमबली दा टु हमेशा अन्द विधी इन अनुसार हारून उन साटी शुद्ध पवित्र वस्तु ठहरूसकु आद.”
LEV 24:10 आ दिनगोळ दा याकारा इस्राएली आर्त इन पार, आऊन आप्प मिस्त्र दा ईरावाळा गंळ्स ईरोन, इस्राएलिगोळ्द न्याड्या होटोदुन; अदिक आव इस्राएली आर्त इन पार अदिक ऊंद इस्राएली गंळ्स छावनी इन न्याड्या आपस दा मार पीट माळली कुरतुर,
LEV 24:11 अदिक आव इस्राएली आर्त इन पार यहोवा अन्द हेसुर इन निन्दा माळकु सराप कोळली कुरतुन. ईद केळकु लॉकुर आऊक मूसा अन्द हात्ती ओतुर. आऊन मोय इन हेसुर शलोमीत ईरोद, जो दान इन गोत्र अन्द दिब्री इन पोर ईरोर.
LEV 24:12 आंदुर आऊक तान देखभाल दा ईटदुर, यदुर देल यहोवा अन मन आंदुर मा प्रगट आग सकुल.
LEV 24:13 आग यहोवा मूसा से अंदुन,
LEV 24:14 “नीव लॉकुर आ सराप कोळावाळा मंळसा अक छावनी टु व्हार्या वोई; अदिक यास मुंदुर आ निन्दा केळदुर आंदुर सप्पा तान-तान कय आऊन ताल्ला मा ईटी, आग पुरा मंडली इन लॉकुर आऊन मा कल्लगोळ भीळी.
LEV 24:15 अदिक नी इस्राएलीगोळ से अन कि यावारा यती ईर बाळुल, जो तान परमेश्वर उक सराप कोळुल आऊक तान पाप इन भार नेगोद बिद्दीत.
LEV 24:16 यहोवा अन्द हेसुर इन निन्दा माळावाळा निश्चित रूप देल कोंदकु आगुल; पुरा मंडली इन लॉकुर निश्चित रूप देल आऊन मा कल्लगोळ बडुल; चाहे द्याश इन मंळसा ईरूल या परदेशी, अगर यावारा यहोवा अन्द हेसुर इन निन्दा माळुल रा आव कोंदकु आगुल.
LEV 24:17 “बाक जो यावारा याऊ मंळसा अक जान देल कोनुल आव निश्चित रूप देल कोंदकु आगुल.
LEV 24:18 अदिक जो यावारा यारदु मान्नागोळ्द पशु उक जान देल कोनुल आव अदुर भरपाई माळुल, मतलब प्राणी इन बदला प्राणी कोळुल.
LEV 24:19 “बाक अगर यावारा दुसरा मंळसा अक दुख पोहचुसुल, रा जसा आव माळदुन हांग अच आऊन सांगुळ भी माळकु आगुल,
LEV 24:20 मतलब येलु मुरदुर बदला दा येलु मुरूल, कण्ण इन बदला कण्ण, हल्ल इन बदला हल्ल, जसा दुख आ मंळसा दुसरा अक कोट्टुन हांग अच आंदरी भी कोटकु आदीत.
LEV 24:21 पशु उक कोन्नावाळेर अदुर भरपाई कोळुल, लेकीन मंळसा अक कोनावाळा अक निश्‍चय कोंदकु आगुल.
LEV 24:22 नीम्द नियम ऊंद अच ईरूल, जसा द्याश इन लॉकुर साटी हांग अच परदेशी लॉकुर साटी भी ईरूल; ना नीम्द परमेश्वर यहोवा हुईन.”
LEV 24:23 बाक मूसा इस्राएलीगोळ इक ईद समझुसदुन; आग आंदुर आ सराप कोळावाळा अक छावनी टु व्हार्या वोतकु आऊन मा कल्लगोळ भिट्टुर. अदिक इस्राएलीगोळ हांग अच माळदुर ह्यांग यहोवा मूसा अक आग्या कोटीदुन.
LEV 25:1 बाक यहोवा सीनै पर्वत इन हात्ती मूसा से अंदुन,
LEV 25:2 “इस्राएलीगोळ से अन कि याग नीव आ द्याश दा प्रवेश माळी जो ना नीमी कोळतीन, आग भूमी इक यहोवा अन्द साटी आराम सिकतेला ईरूल.
LEV 25:3 आर वर्ष रा तान-तान केई बोऊसी, अदिक आर वर्ष तान-तान अंगुर इन बेली इक छाट-छाटस्कु केई इन उपज जमा माळेतीर;
LEV 25:4 लेकीन येळवा वर्ष भूमि अक यहोवा अन्द साटी वळ्लीद आराम घळी सिकतेला ईरूल; अदुर दा न रा तान केई बोऊसोद अदिक न तान अंगुर इन बेली छाटसोद.
LEV 25:5 जो येनारा कळकु केई दा खुद देल बेळुल अदरी कळुबाळेतीर, अदिक तान बिना छाट्स्द अंगुर इन एल इक अंगुरगोळ इक कोय बाळेतीर; यतिकी अद भूमी इन साटी वळ्लीद आराम इन वर्ष आदीत.
LEV 25:6 भूमी इन आराम घळी इन उपज देल नीम इक, अदिक नीम्द दास-दासी इक, अदिक नीम्द सांगुळ ईरावाळेर मजदूरगोळी अदिक परदेशीगोळ इक भी ऊमोद सिक्कीत;
LEV 25:7 अदिक नीम्द पशुगोळ इक अदिक द्याश दा यास जीवजन्तु आव अऊर भी ऊमोद भूमी इन सप्पा उपज देल आदीत.”
LEV 25:8 “येळ आराम वर्ष, मतलब येळ गुणा येळ वर्ष आळेतीर, येळु आराम वर्षगोळ्द ईद समय उनपचास वर्ष आदीत.
LEV 25:9 आग येळवा तिंगुळ अन्द हतवा दिन इक, मतलब प्रायश्चित इन दिन, जय-जयकार इन महाशब्द इन नरसिंगा तान पुरा द्याश दा सप्पा जागा मा भी ऊयसुसेतीर.
LEV 25:10 अदिक आ पचासवा वर्ष इक पवित्र माळकु मानसेतीर, अदिक द्याश इन पुरा निवासीगोळ्द साटी छुटकारा अन्द प्रचार माळेतीर; अद वर्ष नीम साटी आजादी प्राप्ति इन वर्ष अनकु आगुल; अदुर दा नीम तान-तान खुद इन जागा अदिक तान-तान घराना दा वापस होगेतीर.
LEV 25:11 नीम्द अल अद पचासवा वर्ष आजादी प्राप्ति इन वर्ष कहलुसीत; अदुर दा नीव न बोऊसेतीर, अदिक जो तान ताना बेळीत अदरी भी कडु बाळेतीर, अदिक न बिना छाट्स्द अंगुर इन एल इक मुरूबाळेतीर.
LEV 25:12 यतिकी अद रा आजादी प्राप्ति इन वर्ष आदीत; अद नीम्द साटी पवित्र आदीत; नीव अदुर उपज केई दा टु उच ताकोम ताकोमकु तिनेतीर.”
LEV 25:13 “ई आजादी प्राप्ति इन वर्ष दा नीव तान-तान खुद इन जागा दा वापस बंदीर.”
LEV 25:14 अदिक अगर नीव तान वार्टुर कय देल येनारा मारीर या तान वार्टुर से येनारा कोंडीर, रा नीव आबुर दाबुर मा अन्याय माळबाळेतीर.
LEV 25:15 आजादी प्राप्ति इन वर्ष इन बाद्दा यास वर्ष बितुस्याव अऊर गिनती इन अनुसार किंमत ठहरूसकु आबुर दाबुर से कोंड कोमेतीर, अदिक मिग्द वर्षगोळ्द उपज इन अनुसार आव नीन कय दा मारूल.
LEV 25:16 याट वर्ष मात्त ईरूल आट अच किंमत वाळुसेतीर, अदिक यास वर्ष कम ईरूल आट अच किंमत घटुसुल, यतिकी वर्ष इन उपज इन संख्या याट ईरूल आट अच आव नीन कय दा मार्यान.
LEV 25:17 नीव तान-तान वार्टुर मा अन्याय माळबाळेतीर; तान परमेश्वर उन अंज्क मानसेतीर; ना नीम्द परमेश्वर यहोवा हुईन.
LEV 25:18 “इदुरसाटी नीव नांद विधीगोळ इक मानसेतीर, अदिक नान नियमगोळ मा समझ बुझुस्कु नळेतीर; यतिकी हिंग माळदुर देल नीव आ द्याश दा निडर कुर्तकु ईत्तीर.
LEV 25:19 भूमी तान उपज उपजुसतेला ईत्तीत, अदिक नीव व्हाट्टतीम तिनतेला ईत्तीर, अदिक आ द्याश दा निडर कुर्तकु ईत्तीर.”
LEV 25:20 अदिक अगर नीव अनी कि येळवा वर्ष दा नाव येन तिनदेव, “न रा नाव बोऊसेव न तान केई इन उपज जमा माळेव?”
LEV 25:21 रा जान्सी कि ना नीम इक छठवा वर्ष दा हिंग आशीष कोळाईन, कि भूमि इन उपज मुर वर्ष ताका क्याल्सा दा बंदीत.
LEV 25:22 नीव आठवा वर्ष दा बोऊसेतीर, अदिक हाळोद उपज दा टु तिनतेला ईत्तीर, अदिक ऊम्बत वर्ष इन उपज यागासताका सिकतीदील आगासताका नीव हाळोद उपज दा टु तिनतेला ईत्तीर.
LEV 25:23 “जागा हमेशा अन्द साटी मारकु आगबाळुल, यतिकी जागा नांद हुन; अदिक अदुर दा नीव परदेशी अदिक व्हार्या नोर लॉकुर ईत्तीर.”
LEV 25:24 लेकीन नीव तान भाग इन पुरा द्याश दा जागा अक बिळ्स गोळेतीर.
LEV 25:25 “अगर नींद यावारा वार्टबन्धु कंगाल आगकु तान खुद इन जागा दा टु येनारा मारबुळुल, रा आऊन परिवार दा टु जो सबसे हात्ती आन आव बंदकु तान वार्टबन्धु उन मार्द भाग इक बिळ्स कोमुल.
LEV 25:26 अगर यावारा मंळसा अन्द साटी याऊ बिळसावाळा ईला ईरूल, अदिक आऊन हात्ती ईट धन ईरूल कि खुद अच तान भाग इक बिळ्स सकुल,
LEV 25:27 रा आव अदुर मार्द समय टु वर्षगोळ आळुकु मिक्कु वर्षगोळ्द उपज इन किंमत आऊक, याव अदुर्द किंमत कोटकु कोंडुन, वापस माळ बुळुल; आग आव तान खुद इन जागा अन्द अधिकारी आगेगुल.
LEV 25:28 लेकीन अगर आऊन हात्ती ईट पूंजी ईला ईरूल कि अदरी बाक तान माळ सकुल, रा आऊन मार्द जागा आजादी प्राप्ति इन वर्ष ताका कोमावाळा अन्द कय दा ईरूल; अदिक आजादी प्राप्ति इन वर्ष दा बिट्टोगुल आग आव मंळसा तान खुद इन जागा अन्द मात्त अधिकारी आगेदान.”
LEV 25:29 “बाक अगर यावारा मंळसा शहरपनाहवाळा नगर दा कुर्तकु मान्ना मारूल, रा अद मारदुर बाद्दा साल भर इन अंदर अदरी बिळ्स सक्यान, मतलब पुरा साल तीम आ मंळसा अक बिळसोद अधिकार ईत्तीत.
LEV 25:30 लेकीन अगर आव साल तिमुर दा बीळ्सतीदिल, रा अद मान्ना जो शहरपनाहवाळा नगर दा ईरूल कोमावाळा अन्द बन्सकु ईरूल, अदिक पीढ़ी-पीढ़ी दा आऊंदा औलाद इन माळकु ईरूल; अदिक आजादी प्राप्ति इन वर्ष इन साल दा भी बिळ्सकु आग बाळुल.
LEV 25:31 लेकीन बिना शहरपनाह अन्द ऊरगोळ्द मान्ना रा द्याश इन केईगोळ्द भाग इन घाई आळकु आगुल; आंदुर्द बिळ्सकु भी आगेदीत, अदिक आंदुर आजादी प्राप्ति इन वर्ष इन साल दा बिटोदार.”
LEV 25:32 फिर भी लेवीगोळ्द खुद इन भाग इन नगरगोळ्द जो मान्ना ईरूल आंदरी लेवीगोळ याग चाहसुल आग बिळसुल.
LEV 25:33 अदिक अगर यावारा लेवी तान भाग ईला बिळस्यान, रा अद मार्द मान्ना जो आऊन भाग इन नगरगोळ दा ईरूल आजादी प्राप्ति इन वर्ष इन साल दा बिळ्सकु आगुल; यतिकी इस्राएलीगोळ्द न्याड्या लेवीगोळ्द भाग आंदुर नगरगोळ दा अव मान्नागोळ अच हूँ.
LEV 25:34 लेकीन आंदुर नगरगोळ्द नाकु दी चराई इन भूमी मारकु आग बाळुल; यतिकी अद आंदुर हमेशा अन्द भाग आदीत.
LEV 25:35 “बाक अगर नीन यावारा वार्टबन्धु कंगाल आगेगुल, अदिक आऊन दश्या नींद मुंद तरस तिना योग्य आगेगुल, रा नी आऊक संभालसेत; आव परदेशी या वार्ट उन घाई नींद सांगुळ ईरूल.
LEV 25:36 आऊन से ब्याज या बळोतरी ताकोमबाळेत; तान परमेश्वर उन अंज्क मानसेतीर; अदुर देल नीन वार्टबन्धु नीन सांगुळ जीवन निर्वाह माळ सकुल.
LEV 25:37 आऊक ब्याज मा पैस्या कोळबाळेत, अदिक आऊक ऊमोद वस्तु लाभ इन लालच देल कोळबाळेत.
LEV 25:38 ना नीम्द परमेश्वर यहोवा हुईन; ना नीमी कनान द्याश कोळोर साटी अदिक नीम्द परमेश्वर ठहरूसोद मनसा देल नीम इक मिस्त्र द्याश टु तेगुकु तंदीन.”
LEV 25:39 “बाक अगर नींद यावारा वार्टबन्धु नीन मुंद कंगाल आगकु तान-तान इक नीन कय दा मार्र बुळुल, रा आऊन से दास उन घाई स्यावा माळसुसबाळेत.
LEV 25:40 आंदुर नीन सांगुळ मजदुर या यात्री इन घाई ईरूल, अदिक आजादी प्राप्ति इन वर्ष ताका नीन सांगुळ ईतकु स्यावा माळतेला ईरूल;
LEV 25:41 आग आंदुर बाल-बच्यागोळ सांगुळ नीन हात्ती टु होटबुळुल, अदिक तान परिवार दा अदिक तान आप्प उन मुतीगोळ्द खुद इन जागा दा वापस होट बरूल.
LEV 25:42 यतिकी आंदुर नान अच दास उर, आंदरी ना मिस्त्र द्याश टु तेगुकु तंदिदीन; इदुरसाटी आंदुर दास इन रीती देल मारकु आगबाळुल.
LEV 25:43 आऊन मा कठोरता देल अधिकार माळबाळेतीर; तान परमेश्वर उन अंज्क मान्सतेला ईरेतीर.”
LEV 25:44 नीन जो दास-दासीगोळ ईरूल आंदुर नीम्द नाकु दीकळोर राज्यगोळ दा टु ईरूल, अदिक दास अदिक दासीगोळ आंदुर दा टु उच कोमेतीर.
LEV 25:45 जो यात्री लॉकुर नीम्द न्याड्या दा परदेशी आगकु ईत्तार, आंदुर दा टु अदिक आंदुर घराना दा टु भी जो नीम्द आस-पास ईरूल, अदिक जो नीम्द द्याश दा पैदा आग्यार, आंदुर दा टु नीव दास अदिक दासीगोळी कोंडकोमी; अदिक आंदुर नीम्द भाग ठहरूसुल.
LEV 25:46 नीव तान पारगोळ इक भी जो नीम्द बाद्दा आदार आंदरी अधिकारी माळ सकीर, अदिक आंदुर अदुर भाग ठहरूसुल; अऊर दा टु नीव सदा तान साटी दास ताकोमेतीर, लेकीन नीम्द वार्टगोळ जो इस्राएली आर आंदुर मा तान अधिकार कठोरता देल जतुसबाळेतीर.
LEV 25:47 “बाक अगर नींद मुंद यावारा परदेशी या यात्री धनी आगेगुल, अदिक आऊन मुंद नीन वार्ट कंगाल आगकु तान खुद इक नींद मुंद आ परदेशी या यात्री या आऊन वंश इन कय दा मार्र बुळुल,
LEV 25:48 रा आऊन भाग मारकु आगोद बाद्दा आव बाक बिळ्सकु आग सकतान; आऊन वार्टुर दा टु यावारा आऊक बिळ्स सकतान,
LEV 25:49 या आऊन काका, या काका अन्द पार, अदिक आऊन कुल इन यावारा भी हातीगोळोव परीवारवाळा आऊक बिळ्स सकतान; या अगर आव धनी आगेदान, रा आव खुद अच तान इक बिळ्स सकतान.
LEV 25:50 आव तान किंमत कोळावाळा अन्द सांगुळ तान मारोद वर्ष टु आजादी प्राप्ति इन वर्ष ताका हिसाब माळुल, अदिक आऊन मारोद किंमत वर्षगोळ्द गिनती इन अनुसार आगुल, मतलब अद किंमत मजदुर उन दिनगोळ घाई आऊन सांगुळ आदीत.
LEV 25:51 अगर आजादी प्राप्ति इन वर्ष इन हापाळ वर्ष ईतोगुल, रा यास पैस्यागोळ देल अद कोंडकु आग्याद अदुर दा टु आव तान बिळसोद किंमत आट अच वर्ष इन अनुसार लौटुस बुळुल.
LEV 25:52 अगर आजादी प्राप्ति इन वर्ष इन थ्वाळासा वर्ष ईतोगुल, तो भी आव तान स्वामी इन सांगुळ हिसाब माळकु तान बिळसोद किंमत आट अच वर्ष इन अनुसार लौटुस बुळुल.
LEV 25:53 आंदुर तान स्वामी इन सांगुळ आ मजदुर उन घाई ईरूल आऊन हार्दिक मजदुरी ठहरूसकु आगतद; अदिक आऊन स्वामी आऊन मा नींद मुंद कठोरता देल अधिकार जतुसबाळुल.”
LEV 25:54 अदिक अगर आंदुर ई रीतिगोळ देल बिळ्सकु आगतीदिल, रा आंदुर आजादी प्राप्ति इन वर्ष दा तान बाल-बच्या सांगुळ बिळस्कु आगुल.
LEV 25:55 यतिकी इस्राएली नांद अच दासगोळ उर; आंदुर मिस्त्र द्याश टु नांद अच तेग्द दास उर; ना नीम्द परमेश्वर यहोवा हुईन.
LEV 26:1 “नीव तान साटी मुरती माळबाळी, अदिक न यातोदारा अगुळ्द मूर्ति या खंबा तान साटी निदरूसेतीर, अदिक न तान द्याश दा प्रणाम माळोर साटी नक्काशीदार कल्ल स्थापित माळेतीर; यतिकी ना नीम्द परमेश्वर यहोवा हुईन.”
LEV 26:2 नीव नांद आराम दिनगोळ्द पालन माळेतीर अदिक नांद पवित्र जागा अन्द अंज्क माळी; ना यहोवा हुईन.
LEV 26:3 “अगर नीव नांद विधीगोळ मा नळी अदिक नांद आग्यागोळी मान्सकु पालन माळी,
LEV 26:4 रा ना नीम्द साटी समय-समय मा माळ बरसुसाईन, बाक भूमी तान उपज पैदा माळीत, अदिक केई इन मार्रगोळ तान-तान काय कोट्टाव;
LEV 26:5 ईल ताका कि नीव अंगुर मुरा समय भी दावनी माळतेला ईत्तीर, अदिक बोऊसा समय भी व्हाट्टा तीम अंगुर मुरूतेला ईत्तीर, अदिक नीव मनमानी रोट्टीगोळ तिनतेला ईत्तीर, अदिक तान द्याश दा निडर कुर्तकु ईत्तीर.”
LEV 26:6 अदिक ना नीम्द द्याश दा सुख चैन कोळाईन, अदिक नीव मिंगेतीर अदिक नीमी यावारा अंजुसावाळा ईरतीदील; अदिक ना आ द्याश दा खतरनाक प्राणीगोळ इक ईरगोळालीन, अदिक तलवार नीम्द द्याश दा नळ्सगोळालीन.
LEV 26:7 अदिक नीव तान दुश्मनगोळी इक बडुकु तुळकाळसेतीर, अदिक आंदुर नीम्द तलवार देल कोंदकु आदार.
LEV 26:8 नीम दा टु अईद मंळसा सव मुंदरी अदिक सव मंळसा हत्त हजार मंळसागोळी खदाळस्यार; अदिक नीम्द दुश्मन तलवार देल नीम्द मुंद-मुंद कोंदकु आदार;
LEV 26:9 अदिक ना नीम्द दी कृपादृष्टी ईटाईन अदिक नीमी फलवन्त माळाईन अदिक वाळुसाईन, अदिक नीम्द सांगुळ तान वादा अक पुरा माळाईन.
LEV 26:10 अदिक नीव ईटकु हाळोद अनाज इक तिंदीर, अदिक व्‍हाशोद ईत्तीत तो भी हाळोद अनाज इक तेगदीर.
LEV 26:11 अदिक ना नीम्द न्याड्या तान ईरोद जागा माळकु ईट्टाइन, अदिक नांद जीव नीम से घृणा माळतीदील.
LEV 26:12 अदिक ना नीम्द न्याड्या नळाईन वयाळाईन, अदिक नीम्द परमेश्वर बन्सकु ईराइन, अदिक नीव नांद प्रजा बन्सकु ईरेतीर.
LEV 26:13 ना रा नीम्द आ परमेश्वर यहोवा हुईन, जो नीम इक मिस्र द्याश टु इदुरसाटी तेगुकु तंदीन कि नीव मिस्त्रगोळ्द दास बन्सकु ईरबाळेतीर; अदिक ना नीम्द जुआळी इक मुरू बुट्टीन, अदिक नीमी सीधा निदरूसकु नळ्सदीन.
LEV 26:14 “अगर नीव नांद केळतीदिल, अदिक इव सप्पा आग्यागोळ इक ईला मानसीर,
LEV 26:15 अदिक नांद विधिगोळ इक निकम्मा जान्सीर, अदिक नीम्द आत्मा नांद निर्णयगोळ देल घृणा माळुल, अदिक नीव नांद सप्पा आग्यागोळ्द पालन माळतीदील, बल्की नांद वादा अक मुरदिर,
LEV 26:16 रा ना नीम से ईद माळाईन; मतलब ना नीमी इक बेचैन माळाईन, अदिक क्षयरोग अदिक मय देल पीड़ित माळाईन, अदिक ईऊर कारण नीम्द कण्णगोळ धुंधला आगेदव, अदिक नीम्द मन अति उदास आदीत. अदिक नीम्द बींजा बोऊसोद व्यर्थ आदीत, यतिकी नीम्द दुश्मन आऊन उपज तिन कोंडार;
LEV 26:17 अदिक ना भी नीम्द विरूद्ध आगेगाईन, अदिक नीव तान दुश्मनगोळ देल हारूसेदीर; अदिक नीम्द दुश्मन नीम्द म्याकुच अधिकार माळ्यार, अदिक याग यावारा नीम इक खदळुसतीदिल तो भी नीव ओळीर.”
LEV 26:18 अदिक अगर नीव ईव मातगोळ्द म्याकुच भी नांद केळबाळेतीर, रा ना नीम्द पापगोळ्द कारण नीमी येळ गुणा सजा मात्त कोळाईन,
LEV 26:19 अदिक ना नीम्द बल इन घमण्ड मुरूबुळाईन, अदिक नीम्द साटी आकाश इक मान्सी ल्वाहा अन्द अदिक भूमी इक मान्सी पीतल इन माळ बुळाईन;
LEV 26:20 अदिक नीम्द बल अकारथ गऊसकु आदीत, यतिकी नीम्द केई तान उपज पैदा माळतीदील, अदिक भूमि इन मार्रगोळ तान काय कोळतीदील.
LEV 26:21 “अगर नीव नांद विरूद्ध नळुतेला अच ईत्तीर, अदिक नांद कहना मान्सतीदील, रा ना नीम्द पापगोळ्द अनुसार नीम्द म्याकुच अदिक येळ गुणा संकट हाकाईन.
LEV 26:22 अदिक ना नीम्द न्याड्या आळी दाकळोव पशु कळाईन, जो नीम इक बिना चिकोर्द माळबुट्टार, अदिक नीम्द घरेलु पशुगोळ इक नाश माळ बुट्टार, अदिक नीम्द गिनती घटुस्यार, यदुर देल नीम्द सळकगोळ सूना आगेदव.”
LEV 26:23 “बाक अगर नीव ई मातगोळ मा भी नांद ताळना देल ईला सुधुरसीर, अदिक नांद विरूद्ध नळुतेला अच ईत्तीर,
LEV 26:24 रा ना भी नीम्द विरूद्ध नळाईन, अदिक नीम्द पापगोळ्द कारण ना खुद अच नीम इक येळ गुणा दंड कोळाईन.
LEV 26:25 अदिक ना नीम मा ऊंद हिंग तलवार नळसुसाईन, जो वादा मुरोद पुरा-पुरा बदला ताकोमीत; अदिक याग नीव तान नगरगोळ दा होग होगकु जमा आदीर आग ना नीम्द न्याड्या मरी फैलुसाईन, अदिक नीमी तान दुश्मनगोळ्द कय दा सौप्स बुळाईन.
LEV 26:26 याग ना नीम्द साटी अनाज इन आधार इक बंद माळ बुळाईन, आग हत्त आर्तेर नीम्द रोट्टी ऊंद अच तंदुर दा कासकु तौलुस तौलुसकु वाटस्यार; अदिक नीव तिनकु भी तृप्त आगतीदिल.”
LEV 26:27 “बाक अगर नीव इदुर म्याकुच भी नांद केळतीदिल, अदिक नांद विरूद्ध नळुतेला अच ईत्तीर,
LEV 26:28 रा ना तान न्याय दा नीम्द विरूद्ध नळाईन, अदिक नीम्द पापगोळ्द कारण नीम इक येळ गुणा दंड यक्कुल भी कोळाईन.
LEV 26:29 अदिक नीम इक तान पार अदिक पोरगोळ्द चिच्ची तिनोद बिद्दीत.
LEV 26:30 अदिक ना नीम्द पूजा अन्द ऊँचा जागा अक नष्ट माळाईन, अदिक नीम्द सुगंधित धूप वेदी इक मुरू बुळाईन, अदिक नीम्द लोथगोळ्द नीम्द मुरूकु मुर्तीगोळ मा भीळ बुळाईन; अदिक नांद आत्मा अक नीम से घृणा आगेदीत.
LEV 26:31 अदिक ना नीम्द नगरगोळ इक ऊजळुस बुळाईन, अदिक नीम्द पवित्र जागा अक ऊजळुस बुळाईन, अदिक नीम्द सुखदायक सुगन्ध ग्रहण माळालीन.
LEV 26:32 अदिक ना नीम्द द्याश इक सूना माळ बुळाईन, अदिक नीम्द दुश्मन जो अदुर दा ईरतार आंदुर ई मातगोळ्द कारण चकित ईत्तार.
LEV 26:33 अदिक ना नीमी द्याश-द्याश इन न्याड्या तितर-बितर माळाईन, अदिक नीम्द हिंद-हिंद तलवार जेडुकु ईराइन; अदिक नीम्द द्याश सूना आगेदीत, अदिक नीम्द नगर ऊजळुसेदाव.”
LEV 26:34 “आग यास दिन अद द्याश सूना बिदकु ईत्तीत अदिक नीव तान दुश्मनगोळ द्याश दा ईरेतीर आस दिन आव तान आराम दिनगोळ इक मान्सतेला ईत्तान. आग अच अद द्याश इक आराम सिक्कीत, मतलब तान आराम दिनगोळ इक मान्सतेला ईत्तान.
LEV 26:35 यास दिन अद सूना बिदकु ईत्तीत आस दिन अदरी आराम ईत्तीत, मतलब जो आराम अदरी नीम्द अल कुर्तकु ईरोद समय नीम्द आराम दिनगोळ दा सिक्कीदील अद अदरी आग सिक्कीत.”
LEV 26:36 अदिक नीम दा टु जो वाचुसकु ईत्तार अदिक तान दुश्मनगोळ्द द्याश दा ईत्तार आंदुर दिल दा ना निराशा पैदा माळाईन; अदिक आंदुर याल्ला अन्द मुरदुर देल भी वोळ्यार, अदिक आंदुर हिंग वोळ्यार ह्यांग यावारा तलवार देल ओळतान, अदिक यावारा बिना पीछा माळकु भी आंदुर बिदोदार.
LEV 26:37 याग यावारा पीछा माळावाळा ईरबाळुल आग भी मान्सी तलवार इन अंज्क देल आंदुर आबुर दाबुर देल ठ्वाकरा तिनकु बीळतेला होदार, अदिक नीम इक तान दुश्मनगोळ्द मुंद ठहरूसोद येनारा शक्ती ईरतीदील.
LEV 26:38 आग नीव द्याश-द्याश इन न्याड्या दा पोहचुस्कु नाश आगेदीर, अदिक नीम्द दुश्मनगोळ्द भूमी नीम इक तिंद बुट्टीत.
LEV 26:39 अदिक नीम दा टु जो वाचुसकु ईत्तार आंदुर तान दुश्मनगोळ्द द्याशगोळ दा तान दुष्कर्म इन कारण गलुस्यार; अदिक तान आप्प उन मुतीगोळ्द दुष्कर्म इन क्याल्सागोळ्द कारण भी आंदुर आंदुर्दा घाई गलुसेदार.
LEV 26:40 “पर अगर आंदुर तान अदिक तान आप्प उन मुतीगोळ्द दुष्कर्म इक मान्स कोंडार, कि नाव यहोवा अन्द विरूद्ध नळदेव,
LEV 26:41 ईदा कारण आव नाम्द विरूद्ध आगकु नामी दुश्मनगोळ्द द्याश दा तंदुन. अगर आ समय आऊन खतनारहित दिल दबुसीत अदिक आंदुर आ समय तान दुष्कर्म इन दण्ड इक अंगीकार माळ्यार;
LEV 26:42 आग जो वादा ना याकूब उन सांगुळ कटीदिन अदरी ना याद माळाईन, अदिक जो वादा ना इसहाक देल अदिक जो वादा ना अब्राहम देल कटीदुन अवरी भी याद माळाईन, अदिक आ द्याश इक भी ना याद माळाईन.
LEV 26:43 लेकीन अद द्याश आंदुर बिना सूना बिदकु ईत्तीत, अदिक अऊर बिना सूना ईतकु भी तान आराम दिनगोळ इक मान्सतेला ईत्तान; अदिक आ लॉकुर तान दुष्कर्म इक अंगीकार माळ्यार, ईदा कारण देल कि आंदुर नांद आग्यागोळ्द उल्लंघन माळीदुर, अदिक आंदुर आत्मागोळ इक नांद विधीगोळ देल घृणा ईरोद.
LEV 26:44 ईटुर मा भी याग आंदुर तान दुश्मनगोळ द्याश दा ईत्तार, आग ना आंदरी ई प्रकार देल बिळालीन, अदिक न आंदुर से हिंग घृणा माळाईन कि आंदुर सर्वनाश माळ बुळुल अदिक तान आ वादा अक मुरू बुळाईन जो ना आंदुर से कटीदिन; यतिकी ना आंदुर यहोवा परमेश्वर हुईन;
LEV 26:45 लेकीन ना आंदुर भलाई इन साटी आंदुर आप्प उन मुतीगोळ देल कटकु वादा अक याद माळाईन, यारी ना दुसरा राज्य अन्द लॉकुर्द कण्णगोळ्द मुंद टु मिस्त्र द्याश टु तेगुकु तंदीन कि ना आंदुर परमेश्वर ठहरूसाईन; ना यहोवा हुईन.”
LEV 26:46 जो-जो विधीगोळ अदिक नियम अदिक व्यवस्था यहोवा तान दी टु इस्राएलीगोळ्द साटी सीनै पर्वत मा मूसा अन्द द्वारा ठहरूसकु ईरोद अव ईव अच हूँ.
LEV 27:1 बाक यहोवा मूसा से अंदुन,
LEV 27:2 “इस्राएलीगोळ से ईद अन कि याग यावारा विशेष मन्नत मानसुल, रा मन्नत माळ्द मंळसा नींद ठहरूसोद अनुसार यहोवा दोर आदार;
LEV 27:3 इदुरसाटी अगर आव ईप्पत वर्ष या अदुर से यक्कुल अदिक साठ वर्ष से कम ऊमर इन गंळ्स ईरूल, रा आऊन साटी पवित्र जागा अन्द शेकेल इन अनुसार पचास शेकेल इन बेळ्ली नव तुकळागोळ ठहरूसुल.”
LEV 27:4 अगर आक आर्त ईरूल, रा तीस शेकेल ठहरूसुल.
LEV 27:5 बाक अगर आंदुर ऊमर अईद वर्ष या अदुर से यक्कुल अदिक ईप्पत वर्ष से कम इन ईरूल, रा पार उन साटी रा ईप्पत शेकेल, अदिक पोर इन साटी हत्त शेकेल ठहरूसुल.
LEV 27:6 अगर आंदुर ऊमर ऊंद तिंगुळ इन या अदुर से यक्कुल अदिक अईद वर्ष से कम इन ईरूल, रा पार उन साटी रा अईद शेकेल, अदिक पोर इन साटी मुर शेकेल ठहरूसुल.
LEV 27:7 बाक अगर आऊन ऊमर साठ वर्ष इन या अदुर से यक्कुल ईरूल, अदिक आव गंळ्स ईरूल रा आऊन साटी पन्द्रह शेकेल ठहरूसुल.
LEV 27:8 “लेकीन अगर यावारा ईट गरीब ईरूल कि याजक उन ठहरूसकु आग्याद दाम कोळ सकालुन, रा आव याजक उन मुंद निदरूसकु आगुल, अदिक याजक आऊन पूंजी ठहरूसुल, मतलब याट मन्नत माळावाळेर से आग सकुल, याजक आऊन दा अनुसार ठहरूसुल.”
LEV 27:9 “बाक या पशुगोळ दा टु लॉकुर यहोवा अक चढ़ावा येर्सतार, अगर हिंगुर दा टु यावारा मन्‍नत माळकु आगुल, रा जो पशु यावारा यहोवा अक कोळुल अद पवित्र ठहरूसीत.
LEV 27:10 आव अदरी यातोदु प्रकार देल ईला बदलुसुल, ईला रा अद बुरा अन्द बदला वळ्‍लींद, अदिक न वळ्लीद इन बदला बुरा कोळुल; अदिक अगर आव आ पशु उन बदला दुसरा पशु कोळुल, रा आव अदिक आऊन बदला येढ्ढु पवित्र ठहरूसीत.
LEV 27:11 अदिक या पशुगोळ दा टु यहोवा अन्द साटी चढ़ावा येरसालुर हिंगुर दा टु अगर अद ईरूल, आंदुर आऊक याजक उन मुंद निदरूस बुळुल,
LEV 27:12 आग याजक पशु उन गुण-अवगुण येढ्ढु विचार माळकु अदुर किंमत ठहरूसुल; अदिक यास याजक ठहरूसुल अदुर किंमत आट अच ठहरूसुल.
LEV 27:13 पर अगर मन्‍नत माळावाळा आऊक यातोदारा प्रकार देल बिळसोद चाहसुल, रा जो किंमत याजक ठहरूसदुन अदुर दा आऊन अईदवा भाग मात्त यक्कुल वाळुसकु कोळुल.”
LEV 27:14 “बाक अगर यावारा तान मान्ना यहोवा अन्द साटी पवित्र ठहरूसकु मन्‍नत माळुल, रा याजक आऊन गुण-अवगुण येढ्ढु विचार माळकु आऊन किंमत ठहरूसुल; अदिक याट याजक ठहरूसुल आऊन किंमत आट अच ईरूल.
LEV 27:15 अदिक अगर मान्नी इक पवित्र माळावाळा आऊक बिळसोद चाहसुल, रा यास पैस्या याजक आऊन किंमत ठहरूसदुन अदुर दा आव अईदवा भाग मात्त यक्कुल वाळुसकु कोळुल, आग अद मान्ना आऊंद अच ईत्तीत.”
LEV 27:16 “बाक अगर यावारा तान खुद इन जागा अन्द यातोदारा भाग यहोवा अन्द साटी पवित्र ठहरूसोद चाहसुल, रा अदुर किंमत इदुर अनुसार ठहरूसुल, कि अदुर दा याट बींजा बिद्दीत; याट भूमी दा होमेर तीम जऊ बिद्दीत आटुर दा किंमत पचास शेकेल ठहरूसीत.
LEV 27:17 अगर आव तान केई आजादी प्राप्ति इन वर्ष टु उच पवित्र ठहरूसुल, रा अदुर किंमत नींद ठहरावीन अनुसार ठहरूसुल;
LEV 27:18 अदिक अगर आव तान केई आजादी प्राप्ति इन वर्ष इन बाद्दा पवित्र ठहरूसुल, रा याट वर्ष दुसरा आजादी प्राप्ति इन वर्ष इक बाकी ईरूल अऊर दा अनुसार याजक आऊन साटी पैस्या अन्द हिसाब माळुल, आग यास हिसाब दा बरूल आटा याजक उन ठहरूसोर देल कम आगुल.
LEV 27:19 अदिक अगर केई इक पवित्र ठहरूसावाळा अदरी बिळसोद चाहसुल, रा जो किंमत याजक ठहरूसदुन अदुर दा अद अईदवा भाग मात्त यक्कुल वाळुसकु कोळुल, आग केई आऊंदा ईत्तीत.
LEV 27:20 अदिक अगर आव केई इक बिळसोद ईला चाहस्यान, या आव अदरी दुसरा अन कय दा मारीदान, रा केई मुंद भी यागलु बिळस्कु आगबाळुल;
LEV 27:21 लेकीन याग अद केई आजादी प्राप्ति इन वर्ष दा बिळस्कु आगुल, आग पुरा रीती देल भेंट माळकु आत केई इन घाई यहोवा अन्द साटी पवित्र ठहरूसुल, मतलब अद याजक उन अच खुद इन जागा आगेगुल.”
LEV 27:22 बाक अगर यावारा तान कोंडकु केई, जो आऊन खुद इन भूमी इन केईगोळ दाकळोद ईरबाळुल, यहोवा अन्द साटी पवित्र ठहरूसुल,
LEV 27:23 रा याजक आजादी प्राप्ति इन वर्ष ताका हिसाब माळकु आ मंळसा अन्द साटी यास ठहरूसदुन आट अच आव यहोवा अन्द साटी पवित्र जान्सकु अदा दिशी कोटबुळुल.
LEV 27:24 आजादी प्राप्ति इन वर्ष दा अद केई आऊंदा अधिकार दा याऊन से अद कोंडकु आग्याद बाक होट्ट बरूल, मतलब याऊन अद खुद इन जागा ईरूल आऊंदा बाक आगेगुल.
LEV 27:25 या-या वस्तु उन किंमत याजक ठहरूसदुन अदुर किंमत पवित्र जागा अन्द शेकेल इन हिसाब देल ठहरूसुल: शेकेल ईप्पत गेरा अन्द ठहरूसुल.
LEV 27:26 “लेकीन मान्नागोळ पशुगोळ दा टु पयला पाड्डा, जो पयला पैदा आगोद कारण यहोवा अन्द ठहरूसकु आन, अदरी यावारा पवित्र ठहरूसबाळुल; चाहे अद पाड्डा ईरूल, चाहे म्यांडा या मर्री इन पाड्डा, अद यहोवा अन्द अच हुंद.
LEV 27:27 लेकीन अगर अद अशुद्ध पशु उन आगुल , रा आऊन पवित्र ठहरूसावाळा अदरी याजक उन ठहरूसकु आग्याद किंमत इन अनुसार अदुर अईदवा भाग मात्त वाळुसकु बिळ्स सकतान; अदिक अगर अद बिळ्सकु आगीदिल, रा याजक उन ठहरूसकु किंमत मा मारकु आगुल.
LEV 27:28 “लेकीन तान पुरा वस्तुगोळ दा टु जो येनारा यावारा यहोवा अन्द साटी अर्पण माळुल, चाहे मंळसा आगुल चाहे पशु, चाहे आऊन खुद इन केई आगुल, हिंग यातोदारा अर्पण माळ्द वस्तु मारकु आगबाळुल न बिळ्सकु आगुल; जो येनारा अर्पण माळकु आगुल अद यहोवा अन्द साटी भेंट पवित्र ठहरूसुल.
LEV 27:29 मंळसागोळ दा टु जो यावारा मृत्यु दण्ड इन साटी अर्पण माळकु आदुन, आऊक बिळ्सकु आगबाळुल; अवश्य आद आव कोंदकु आगुल.
LEV 27:30 “बाक जागा अन्द उपज इन पुरा दशमांश, चाहे अद जागा अन्द बींजा आगुल चाहे मार्र इन काय, ईव यहोवा अन्द हूँ; अद यहोवा अन्द साटी पवित्र ठहरूसुल.
LEV 27:31 अगर यावारा तान दशमांश दा टु येनारा वापस ताकोमोद चाहसुल, रा अईदवा भाग वाळुसकु अदरी बिळसुल.
LEV 27:32 अदिक गोसी-वस्ता अदिक म्यांडा-मर्रगोळ, मतलब जो-जो पशु आळोर साटी कोल इन ल्‍यालमा टु होट्टबुळावाळेर आव अऊर दशमांश, मतलब हत्त-हत्त पशुगोळ दा टु ऊंद-ऊंद पशु यहोवा अन्द साटी पवित्र ठहरूसुल.
LEV 27:33 यावारा अऊरव गुण-अवगुण विचार माळबाळुल, अदिक न अवरी बदलुसुल; अगर यावारा अवरी बदलुस भी कोंडुन, रा आव अदिक आऊन बदला येढ्ढु पवित्र ठहरूसुल; अदिक अव यागलु बिळ्सकु आगबाळुल.”
LEV 27:34 जो आग्यागोळी यहोवा इस्राएलीगोळ साटी सीनै पर्वत मा मूसा अक कोटीदुन, अव ईव अच हूँ.
JOS 1:1 परमेश्वर उन सेवक मूसा अन्द सोत्तुर बाद्दा, परमेश्वर यहोशू से जो नून उन पार ईरोन अंदुन,
JOS 1:2 “नान सेवक मूसा सोतोदुन. ईग ई लॉकुर अदिक नीव यरदन गांगा अन्द आप्पाटी होगी. नीमी आ द्याश दा होग पायजे यारी ना इस्त्राएल इन लॉकुर इक मतलब नीमी कोळेतीन.
JOS 1:3 ना मूसा अक ईद वचन कोटीदिन की ईद द्याश ना नीमी कोळाईन. इदुरसाटी ना नीमी अद हर ऊंद प्रदेश कोळाईन, जो यातोदारा जागा मा भी नीव होदीर.
JOS 1:4 दक्षिण दा आळी टु उत्तर दा लबानोन इन पहाळी ताका, पूर्व दा फरात महानदी अदिक हित्ती जाती अन सप्पा लॉकुर द्याश टु पश्चिम दा महासमुद्र ताका ठहरूसीत.
JOS 1:5 ना मूसा अन्द सांगुळ ईरीन अदिक ना हांग अच नीम्द सांगुळ ईराईन. नीम्द पुरा जीवन दा, नीमी यावारा भी मंळसा रोकसोर दा समर्थ आगतीदील. ना नीमी बिळालीन. ना यागलु नीम से दुर आगालीन.”
JOS 1:6 “यहोशू, नीमी शक्तिशाली अदिक साहसी आग पायजे! नीमी ई लॉकुर अगुवा आग पायजे अदुर देल आंदुर तान द्याश वापस ताकोम सकुल. ईद अदा द्याश हुन अदरी ना आंदरी कोळोर साटी आंदुर पूर्वजगोळ इक वचन कोटीदिन.
JOS 1:7 लेकीन नीमी ऊंद दुसरा मात इन बारा दा भी मजबुत अदिक साहसी ईरोद बिद्दीत. नीमी आ आदेशगोळ्द पालन निश्चय इन सांगुळ माळ पायजे, यारी नान सेवक मूसा नीमी कोट्टान. अगर नीव आऊन शिक्षागोळ्द ठीक-ठीक पालन माळीर, रा नीव जो येनारा माळीर अदुर्दा सफल आदीर.
JOS 1:8 आ व्यवस्था अन्द किताब दा लिखस्द मातगोळ इक सदा याद ईटी. नीव आ किताब इन अध्ययन ईळ्लक हागुल माळी, आगल्या नीव अदुर्दा लिखस्द आदेशगोळ्द पालन इन बारा दा विश्वस्त ईर सकतीर. अगर ईद नीव माळीर, रा नीव बुध्दिमान बनसीर अदिक जो येनारा माळीर अदुर्दा सफल आदीर.
JOS 1:9 याद ईटी, कि ना नीमी शक्तिशाली अदिक साहसी बन्सकु ईरोद आदेश कोटीदिन. इदुरसाटी यागलु भयभीत आग बाळेतीर, यतिकी नीम्द परमेश्वर यहोवा नीम्द सांगुळ सप्पा जागा दा ईत्तान, एल नीव होदीर.”
JOS 1:10 आग यहोशू प्रजा अन मुख्य लॉकुरी ईद आग्या कोट्टुन,
JOS 1:11 “ड्यारा टु आगकु होगी अदिक लॉकुर इक तयार आगली अनी. लॉकुर से अनी, ‘थ्वाळासा भोजन तयार माळ कोमुल. ईग टु मुर दिन बाद, नाव लॉकुर यरदन गांगा पार माळेव. नाव लॉकुर होदेव अदिक आ द्याश इक ताकोंडेव यारी नीम्द परमेश्वर यहोवा नीमी कोळेत्यान.’”
JOS 1:12 आग यहोशू रूबेनिगोळ, गादीगोळ, अदिक मनश्शेगोळ्द आर्धा वंश इन लॉकुर से अंदुन,
JOS 1:13 “अदरी याद ईटी, जो परमेश्वर उन सेवक मूसा नीमी अंदीदुन. आव अंदीदुन कि परमेश्वर, नीम्द यहोवा अक अदिक नीमी आराम इन साटी जागा कोट्टान. परमेश्वर ईद द्याश नीमी कोट्टान.
JOS 1:14 नीम हिंग्सुर, बाल- बच्यागोळ, अदिक जनावरगोळ रा ई द्याश दा ईत्तव जो मूसा नीमी यरदन इन ईपाटी का कोटान, लेकीन नीव जो योध्दा शस्त्र नेगुकु तान वार्टुर्द मुंद मुंद आपाटी ईळुकु नळदीर, अदिक आंदुर्द मदत माळी.
JOS 1:15 अदिक याग परमेश्वर आंदरी हींग आराम कोट्टान ह्यांग आव नीमी कोट्ट बुटान, अदिक आंदुर भी नीम परमेश्वर यहोवा अन कोळ्द द्याश इन अधिकारी आगेदार; आग नीव तान अधिकार इन द्याश दा, जो परमेश्वर उन दास मूसा यरदन इन ईपाटी पूर्व अन दी नीमी कोटान, वापस बंदकु ईदुर अधिकारी आदार.”
JOS 1:16 आग लॉकुर यहोशू उक उत्तर कोट्टुर, “जो भी माळोर साटी नीव आदेश कोट्टीर, नाव लॉकुर माळेव! या जागा मा कळेतीर,नाव लॉकुर होदेव!
JOS 1:17 नाव लॉकुर पुरा तरीका देल मूसा अन्द आग्या मान्सदेव. अदा तरीका देल नाव लॉकुर अव सप्पा मानसेव जो नीव अंदीर. नाव लॉकुर यहोवा से केवल ऊंद मात चाहसतेव. नाव लॉकुर परमेश्वर यहोवा से ईदा मांग माळतेव कि आव नीम सांगुळ हांग अच ईरूल जसा आव मूसा अन्द सांगुळ ईरोन.
JOS 1:18 आग, अगर यावारा मंळसा नीम्द आग्या मानसोर से इंकार माळतान या यावारा मंळसा नीम्द विरूद्ध निदुरतान, आव कोंदकु आदान. केवल शक्तिशाली अदिक साहसी ईरी!”
JOS 2:1 नून उन पार यहोशू अदिक सप्पा लॉकुर शित्तिम दा ड्यारा हाकीदुर. यहोशू येढ्ढ गुप्तचरगोळ इक कळुदुन. यातोदारा दुसरा मंळसा अक ईद पता हतीदिल कि यहोशू ई लॉकुर इक कळीदुन. यहोशू ई लॉकुर से अंदुन, होगी अदिक प्रदेश इन जाँच माळी, इदुरसाटी आ मंळसागोळ यरीहो होदुर. आंदुर ऊंद वेश्या अन मान्या होदुर अदिक अल ईत्तुर. आ आर्त इन हेसुर राहाब ईरोद.
JOS 2:2 यावारा दुसरा मंळसा यरीहो अन्द राजा से अंदुन, “इस्त्राएल इन थ्वाळासा मंळसागोळ ईंद ईळ्लकी नाम्द द्याश इन भेद ताकोमली बंदार.”
JOS 2:3 इदुरसाटी यरीहो अन्द राजा राहाब उन मान्या ईद बातणी कळुदुन: “आ मंळसागोळी होतुर्सबाळी जो बंदकु नीम्द मान्ना दा ठहरूसकु आर. आंदरी व्हार्या तरी. आंदुर भेद ताकोमली नाम द्याश दा बंदार.”
JOS 2:4 आ आर्त येढ्ढु मंळसागोळ इक होतुर्सुकु ईटीदुर. लेकीन आर्त अंदुर, “आंदुर येढ्ढ मंळसागोळ बंदीदुर, लेकीन ना जानसालीन कि आंदुर यल टु बंदीदुर.
JOS 2:5 नगर द्वार बंद आगोद समय आंदुर मंळसागोळ द्यावगा होटोदुर. ना जानसालीन कि आंदुर यल होदुर. लेकीन अगर नीव रा़टनेरी होदीर, रा शायद आंदरी हुडु कोंडीर.”
JOS 2:6 आक आंदरी मान्ना अन्द छत मा येर्सकु सन इन हुळ्लीगोळ्द ल्यालमा होतुर्सीदुर जो आक हुळ्लीगोळी छत मा जमा माळकु ईटीदुर.
JOS 2:7 इदुरसाटी इस्राएल इन येढ्ढ मंळसागोळ्द खोज दा राजा अन्द मंळसागोळ होटोदुर. राजा अन्द मंळसागोळ्द द्वारा नगर बिट्टुर तुरंत बाद नगर द्वार बंद माळकु आदव. आंदुर आ जागागोळ मा होदुर यल टु लॉकुर यरदन गांगा अक पार माळतोगोर.
JOS 2:8 येढ्ढु मंळसागोळ ईळ्लक इक मिंगोद तयारी दा ईरोर. लेकीन आ आर्त छत मा होदुर अदिक आक आंदुर से मात माळदुर.
JOS 2:9 राहाब अंदुर, “ना जान्सतीन कि ईद द्याश यहोवा नीम्द लॉकुरी कोट्टुन. नीव नाम लॉकुरी भयभीत माळतीर. ई द्याश दा ईरावाळेर सप्पा मुंदुर नीम लॉकुर से भयभीत आर.
JOS 2:10 नाव लॉकुर अंज्कु आयेव यतिकी नाव केळदेव कि यहोवा नीव लॉकुर्द मदत ह्यांग माळदुन. नाव केळदेव की नीव मिस्त्र टु व्हार्या बंदीर रा यहोवा क्याचाँद समुद्र इन नीर इक वंळगास बुट्टुन. नाव लॉकुर ईद भी केळदेव की नीव लॉकुर येढ्ढ एमोरी राजागोळ इक सीहोन अदिक ओग इन सांगुळ येन माळदीर नाव लॉकुर केळदेव की नीव लॉकुर यरदन गांगा अन पूर्व दा ईरावाळेर आ येढ्ढ राजागोळ इक ह्यांग नष्ट माळदीर.
JOS 2:11 नाव लॉकुर आ घटनागोळ इक केळदेव अदिक हापाळ येक्‍कुल अंजदेव अदिक ईग नाम दा टु यावारा मंळसा ईट साहसी हैलेच कि नीव लॉकुर से लळाई माळ सकुल. यती? यतिकी नीमव परमेश्वर यहोवा म्याकुच आकाश अदिक ल्‍यालमा पृथ्वी इन परमेश्वर हुन.
JOS 2:12 रा ईग, ना चाहसतीन कि नीव नानी वचन कोळी. ना नीम्द मदत माळदीन अदिक नीम मा दया माळदीन. इदुरसाटी यहोवा अन्द मुंद वचन कोळी कि नीव नाम परिवार मा दया माळीर. कृपया नानी अनी कि नी हिंग माळेत.
JOS 2:13 नान से नीव ईद अनी कि नीव नान परिवार इक जित्ता ईर गोट्टीर आंदुर दा नान आप्प, मोय, वार्ट, आकतींगेर, अदिक आंदुर्द परिवार ईत्तीत. नीव प्रतिग्या माळी कि नीव नानी सायोर देल वाचुसीर.”
JOS 2:14 आ मंळसागोळ आकिन मातगोळी मान्स कोंडुर. आंदुर अंदुर, “ नाव नीम जीवन इन साटी तान जीवन इन बाजी हच बुट्टेव. यातोदारा मंळसा अक ईद हेळबाळी कि नाव येन माळीतेव. आग याग यहोवा नाव लॉकुर इक नाम्द द्याश कोट्टान, आग नाव नीम मा दया माळेव. नीव नाम लॉकुर मा विश्वास माळ सकतीर.”
JOS 2:15 आ आर्त इन मान्ना नगर इन दिवार इन बुळ्क बन्सकु ईरोद. ईद दिवार इन ऊंद हिस्सा ईरोद. इदुरसाटी आर्त खिळकी दा टु आ भेदीगोळी ईळोर साटी जाळी इन उपयोग माळदुर.
JOS 2:16 आग आर्त आंदुर से अंदुर, “पहाळीगोळ मा होगी, ईदुर देल राजा अन्द मंळसागोळ नीमी हुडु सकतीदील. अल मुर दिन होचकु ईरी. राजा अन्द मंळसागोळ याग वापस बंदार आग नीव तान हादी देल होग सकतीर.”
JOS 2:17 मंळसागोळ आकिन से अंदुर, “जो किर्‍या नी नामी तिनस्या, अदुर विषय दा नाव निर्दोष ईत्तेव.
JOS 2:18 नी ईद क्याचांद जाळी इन उपयोग नाम लॉकुरी ऊळ्दकु ओळोर साटी माळेत्या. नाव लॉकुर ई द्याश दा वापस बंदेव. आ समय नी ई जाळी इक तान खिळकी देल जरूर कटकु ईटेत. नीनी तान आप्प, तान मोय, तान वार्ट, अदिक तान पुरा परिवार इक तान सांगुळ ई मान्या ईटोद बिद्दीत.
JOS 2:19 नाव लॉकुर हर ऊंद मंळसा अक सुरक्षित ईट्टेव जो ई मान्ना दा ईत्तान. अगर नीम मान्ना अन्द बुळ्क यारीकारा चोट पहुचुस्तद, रा अदुर साटी नाव लॉकुर दोषी ईत्तेव. अगर नीम मान्ना टु यावारा मंळसा व्हार्या होदान, रा आव कोंदकु आग सकतान. आ मंळसा साटी नाव दोषी ईरतीदील.
JOS 2:20 नाव ईद वचन नीनी कोळतेव. लेकीन अगर नी यारीकारा हेळ्या कि नाव येन माळेतेव, रा नाव तान ईद वचन देल आजाद आदेव.”
JOS 2:21 आर्त उत्तर कोट्टुर, “ना इदरी स्वीकार माळतीन.” आर्त नमस्कार माळदुर अदिक आंदुर आकिन मान्ना बिट्टुर. आर्त खिळकी टु क्याचाँद जाळी कटदुर.
JOS 2:22 भेदी आकिन मान्ना बिटकु पहाळीगोळ दा होटोदुर. येल आंदुर मुर दिन ईत्तुर. राजा अन्द मंळसागोळ पुरा सळक मा आंदुर्द खोज माळदुर. मुर दिन इन बाद्दा राजा अन्द मंळसागोळ खोज बंद माळ बुट्टुर. आ सिपाहीगोळ आंदरी ढुंढ्स सकीदील, रा सिपाहीगोळ नगर दा वापस होट्ट बंदुर.
JOS 2:23 आग येढ्ढु भेदीगोळ यहोशू उन हात्ती वापस बरोद सुरूवात माळदुर. आ मंळसागोळ पहाळीगोळी बिट्टुर अदिक गांगा अक पार माळदुर. आंदुर नून उन पार यहोशू उन हात्ती होदुर. आंदुर जो येनारा पता हचीदुर, यहोशू उक हेळदुर.
JOS 2:24 आंदुर यहोशू उक अंदुर, “यहोवा खराखुरा पुरा द्याश नाव लॉकुर इक कोट बुट्टान. आ द्याश इन सप्पा लॉकुर नाम लॉकुर से भयभीत आर.”
JOS 3:1 यहोशू व्हातर्या येद्दुन, अदिक इस्त्राएल इन सप्पा लॉकुर यद्दुर अदिक शित्तिम इक आंदुर बिट्ट बुट्टुर. आंदुर यरदन गांगा ताका यात्रा माळदुर. आंदुर आप्पाटी होगोर से पयले यरदन गांगा मा ड्यारा हचदुर.
JOS 3:2 अदिक मुर दिन इन बाद्दा स्याणागोळ छावनी इन बीच होगकु
JOS 3:3 प्रजा अन लॉकुरी ईद आग्या कोट्टुर, “याग नीमी तान परमेश्वर यहोवा अन वाचा अन सन्दुक अदिक आ लेवी याजक जो अदरी नेगुकु काणस्यान, आग तान जागा मा टु यदकु आऊन हींद हींद नळेतीर,
JOS 3:4 लेकीन आऊन अदिक नीम बीच दा येढ्ढ हजार कय ईट अन्तर ईरूल; नीव सन्दुक इन हाती होगबाळेतीर. ताकी नीव नोळ सकीर, कि याता हादी टु नीमी नळोद आद, यतिकी ईगासताका नीव ई हादी मा आगकु नळदिदील.”
JOS 3:5 बाक यहोशू इस्त्राएली लॉकुर से अंदुन, “नीव तान तान इक पवित्र माळी; यतिकी नाळ इन दिशी यहोवा नीम बीच दा आश्चर्यकर्म माळ्यान.”
JOS 3:6 आग यहोशू याजकगोळ से अंदुन, “वाचा अन सन्दुक नेगुकु लॉकुर्द मुंद मुंद नळी.” आग आंदुर वाचा अन सन्दुक नेगुकु मुंद मुंद नळदुर.
JOS 3:7 आग यहोवा यहोशू से अंदुन, “ईंद इन दिन टु ना सप्पा इस्त्राएलगोळ हाती नींद प्रशंसा माळोद चालु माळाईन, यदुर देल आंदुर जानसुल कि ह्यांग ना मूसा अन सांगुळ ईरतोगीन हांग अच ना नीन सांगुळ भी आईन.
JOS 3:8 अदिक नी वाचा अन सन्दुक इक नेगावाळेर याजकगोळी ईद आग्या कोळ, ‘याग नीव यरदन इन नीर इन किनारा मा पोहचुसीर, आग यरदन दा नीदुरकु ईरेतीर.’”
JOS 3:9 आग यहोशू इस्त्राएली लॉकुर से अंदुन, “हाती बंदकु तान परमेश्वर यहोवा अन वचन केळी.”
JOS 3:10 अदिक यहोशू अनली कुरतुन, “ईदुर देल नीव जान्स कोंडीर कि जीत्ता परमेश्वर नीम बीच दा आन, अदिक आव नीम मुंदु टु नि:सन्देह कनानीगोळी, हित्तीगोळी, हिब्बीगोळी, परिज्जीगोळी, गिर्गाशीगोळी, एमोरिगोळी, अदिक यबूसीगोळी आंदुर द्याश दा टु तेगु बुट्टान.
JOS 3:11 केळी, सप्पा पृथ्वी नोर प्रभु अन वाचा अन सन्दुक नीम मुंद मुंद यरदन दा होगदुर मा आद.
JOS 3:12 इदुरसाटी ईग इस्त्राएल इन गोत्रगोळ दा टु हन्नेळ मंळसागोळी नीवळुसी, आंदुर ऊंद ऊंद गोत्र दा टु ऊंद मंळसा ईरूल.
JOS 3:13 अदिक याता समय दा पृथ्वी दाकळोर प्रभु यहोवा अन वाचा अन सन्दुक नेगावाळेर याजकगोळ काल यरदन गांगा अन नीर दा बिद्दव, आ समय यरदन इन म्याकुच टु वाहुसतेला नीर थामसेदीत, अदिक ढेर आगकु थाम्सकु ईत्तीत.”
JOS 3:14 इदुरसाटी याग लॉकुर यरदन गांगा अन आप्पाटी होगोर साटी होट्टुर, अदिक याजक वाचा अन सन्दुक नेगुकु लॉकुर मुंद मुंद नळदुर,
JOS 3:15 अदिक सन्दुक इक नेगावाळेर यरदन मा पोहचुसदुर, अदिक सन्दुक इक नेगावाळेर याजकगोळ काल यरदन तीर इन नीर दा मुळ्कदव, यरदन इन नीर रा कटनी इन समय इन सप्पा दिन तान तट इन म्याकुच म्याकुच वाहुसतेला ईरतद,
JOS 3:16 आग जो नीर म्याकुच इन दी टु वाहुसकु बरताव अव हापाळ दुर, मतलब आदाम नगर इन हात्ती जो सारतान नगर इन हात्ती रूक्सकु ऊंद ढेर आगेत, अदिक दिवाल घाई येदकु ईत्त, अदिक जो नीर अराबा अन समुद्र जो मृत समुद्र भी कहलुस्तद, अदुर दी वाहुसकु होगोद, अद पुरा रीति देल वंळ्गेत; अदिक प्रजा अन लॉकुर यरीहो अन मुंद आपाटी ईळदोदुर.
JOS 3:17 अदिक याजक यहोवा अन सन्दुक नेगुकु यरदन इन बीचोबीच होगकु जागा मा स्थिर निदुरकु ईत्तुर, आखरी दा अद सप्पा जाती अन लॉकुर यरदन गांगा अन पार आगेदुर.
JOS 4:1 याग आ सप्पा जाती इन लॉकुर यरदन गांगा अन आप्पाटी ईळदुर, आग यहोवा यहोशू से अंदुन,
JOS 4:2 “लॉकुर दा टु हन्नेळ मंळसागोळी नीवळुस कोमी, हर ऊंद वंश दा टु ऊंद मंळसा निवळुसकु ईद आग्या कोळी.
JOS 4:3 अदिक लॉकुर से अनी कि आंदुर अल यरदन गांगा दा नोळुल यल याजकगोळ नीदुरकु आर, आंदुर अल हन्नेळ कल्लगोळ ढुंढस्कु तेगुली हेळी, आ हन्नेळ कल्लगोळी तान सांगुळ वोई, आ हन्नेळ कल्लगोळी आ जागा मा ईटी येल नीव ईंद ईळ्लकी ईत्तीर.”
JOS 4:4 आग यहोशू आ हन्नेळ मंळसागोळी, यारी आव इस्त्राएलगोळ हर ऊंद वंश दा टु नीवळुसकु थाम्सकु ईटीदुन,
JOS 4:5 यहोशू आंदुर से अंदुन, “नीव तान परमेश्वर यहोवा अन सन्दुक इन मुंद यरदन इन बीच दा होगकु इस्त्राएलगोळ वंश इन गिनती इन अनुसार ऊंद ऊंद कल्ल नेगुकु तान तान खांदा मा ईटी,
JOS 4:6 यदुर देल ईद नीम लॉकुर इन बीच दा चिन्ह ठहरूसुल, अदिक मुंद याग नीम चिकोर ईद केळुल, ‘ई कल्लगोळ्द येन मतलब आद?’
JOS 4:7 आग नीव आंदरी ईद उत्तर कोळेतीर, कि यरदन गांगा अन नीर परमेश्वर उन वाचा अन सन्दुक इन मुंद येढ्ढ भाग आगेगीदव; यतिकी याग आंदुर यरदन गांगा पार माळकु बरोर, आग यरदन गांगा अन नीर येढ्ढ भाग आगेगीदव. इदुरसाटी अव कल्लगोळ इस्त्राएल इक हमेशा अन साटी याद दिलुसावाळा ठहरूसेव.”
JOS 4:8 यहोशू उन ई आग्या अन अनुसार इस्त्राएलगोळ माळदुर, ह्यांग यहोवा यहोशू से अंदीदुन हांग अच आंदुर इस्त्राएलीगोळ्द वंश इन गिनती इन अनुसार हन्नेळ कल्ल यरदन इन बीच दा टु नेगदुर; अदिक आंदरी तान सांगुळ वोतकु येल आंदुर थामसीदुर ईट बुट्टुर,
JOS 4:9 यहोशू भी यहोवा अन पवित्र सन्दुक इक वयावाळेर याजक येल नीदुरकु ईरोर, अल्या यरदन गांगा अन बीच दा हन्नेळ कल्ल निदरूसदुन; अव ईंद ताका अल्या अदा जागा मा आव.
JOS 4:10 यहोवा यहोशू उक आदेश कोटीदुन कि आव लॉकुर से अनुल कि आंदरी येन माळोद आद. अव अवा मातगोळ ईरव, यवरी अवश्य अनोर साटी मूसा यहोशू से अंदीदुन. इदुरसाटी पवित्र सन्दुक इक वयावाळेर याजक यरदन गांगा अन बीच दा आगासताका नीदुरकु ईत्तुर, यागासताका ई सप्पा क्याल्सा पुरा आगीदील, लॉकुर जल्दी माळदुर अदिक गांगा अक पार माळदुर.
JOS 4:11 याग लॉकुर गांगा अन आप्पाटी होटोदुर आग याजक यहोवा अन सन्दुक इक हुडुकु लॉकुर मुंद बंदुन.
JOS 4:12 अदिक रूबेनी, गादी, अदिक मनश्शे अन आर्धा वंश इन लॉकुर मूसा अन अनोद हिसाब देल युध्द इन हथियार कटकु इस्त्राएलीगोळ्द मुंद आपाटी आगेदुर;
JOS 4:13 लगभग चालीस हजार सैनिक, जो युध्द साटी तैयार ईरोर, यहोवा अन मुंदु टु होदुर, आंदुर यरीहो अन मैदान दा पोहचुसदुर.
JOS 4:14 आ दिशी यहोवा सप्पा इस्त्राएलीगोळ मुंद यहोशू उन महिमा वाळुसदुन; अदिक ह्यांग आंदुर मूसा अन भय मानसोर हांग अच यहोशू उन भी भय आऊन जीवन तीम मान्सतेला ईत्तुर.
JOS 4:15 आग यहोवा यहोशू से अंदुन,
JOS 4:16 “वाचा अन सन्दुक नेगावाळेर याजकगोळी आग्या कोळ कि यरदन दा टु व्हार्या बंदार.”
JOS 4:17 रा यहोशू याजकगोळी आग्या कोट्टुन, “यरदन गांगा दा टु व्हार्या बरी.”
JOS 4:18 अदिक ह्यांग अच यहोवा अन वाचा अन सन्दुक नेगावाळेर याजक यरदन गांगा दा टु व्हार्या बंदुर, अदिक आंदुरव काल जागा मा बिद्दव, आग अच यरदन गांगा अन नीर तान जागा दा बत्त, अदिक पयला घाई तटगोळ मा म्याकुच वाहुसली कुर्त.
JOS 4:19 पयला तींगुळ इन हतवा दिशी इक प्रजा अन लॉकुर यरदन गांगा दा टु होटकु यरीहो अन पुर्वी सीमा मा गिलगाल दा तान ड्यारा हाकदुर.
JOS 4:20 अदिक जो हन्नेळ कल्ल यरदन गांगा दा टु तेगुकु आगीदव, अवरी यहोशू गिलगाल दा निदरूसदुन.
JOS 4:21 आग आव इस्त्राएलगोळ से अंदुन, “मुंद याग नीम चिकोर तान तान आप्प से ईद केळुल, ‘ईव कल्लगोळ्द येन मतलब आद?’
JOS 4:22 आग नीव आंदरी ईद हेळेतीर, ‘ई यरदन गांगा अक नाव इस्त्राएलीगोळ वंळ्गींद जागा मा नळुकु आपाटी होगीदेव.’
JOS 4:23 यतिकी ह्यांग नीम परमेश्वर यहोवा क्याचाँद समुद्र अक नाम आप्पाटी आगासताका नाम मुंद टु सरकुसकु वंळ्गीद ईटीदुन, हांग अच आव यरदन गांगा अन नीर भी नीम आप्पाटी आगासताका नीम मुंद टु सरकुसकु वंळ्गीद ईटदुन;
JOS 4:24 इदुरसाटी कि पृथ्वी इन सप्पा द्याशगोळ लॉकुर जानसुल कि यहोवा अन कय ताकतवर आद; अदिक नीव हमेशा तान परमेश्वर यहोवा अन अंज्क मान्सतेला ईरी.”
JOS 5:1 याग यरदन इन पश्चिम इन दी ईरावाळेर एमोरियागोळ सप्पा राजागोळ, अदिक समुद्र अन हाती ईरावाळेर कनानीगोळ सप्पा राजागोळ ईद केळदुर, कि यहोवा इस्त्राएलीगोळ पार आगासताका आंदुर मुंदु टु यरदन इन नीर सरकुसकु वंळ्गींद ईट्यान, आग इस्त्राएलीगोळ्द अंज्क इन मारा आंदुर्द मन घबरूसेत, अदिक आंदुर्द जीव दा जीव ईतीदील.
JOS 5:2 आ समय यहोवा यहोशू से अंदुन “चकमक कल्ल इन चाकुगोळी माळसुसकु दुसरा घन इस्त्राएलीगोळ्द खतना माळसुस कोम.”
JOS 5:3 आग यहोशू चकमक कल्ल इन चाकुगोळी माळसुसकु खतना हेसुर इन पहाळी मा इस्त्राएली लॉकुर्द खतना माळसुसदुन.
JOS 5:4 अदिक यहोशू जो खतना माळसुसदुन, ईदुर्द कारण ईद हुन, कि यास मंळसा युध्द इन योग्य मिस्त्र दा टु होटीदुर आंदुर सप्पा मिस्त्र टु होट्टुर मा आळी इन हादी मा सोतोगीदुर.
JOS 5:5 जो मंळसा मिस्त्र द्याश टु होटीदुर आ सप्पा मुंदुर्द रा खतना आगेगीत, लेकीन यास आंदुर्द मिस्त्र टु होट्टुर मा आळी इन हादी मा पैदा आदुर आंदुर दा टु यारदु खतना ईला आगीत.
JOS 5:6 यतिकी इस्त्राएली रा चालीस वर्ष ताका आळी दा वयाळतेला ईत्तुर, यागासताका आ सप्पा जाती इन लॉकुर, मतलब यास युध्द अन योग्य लॉकुर मिस्त्र टु होटीदुर आंदुर नष्ट आगेगीदील, यतिकी आंदुर यहोवा अन ईला मान्सीदुर; इदुरसाटी यहोवा आंदुर से किर्‍या तिनकु अंदीदुन, कि जो द्याश ना नीम पुर्वजगोळ से किर्‍या तीनकु नीमी कोळली हेळीदीन, अदिक अदुर दा हाल अदिक शयद इन धारागोळ वाहुसताव, अद द्याश ना नीमी तोर्सतीदील.
JOS 5:7 रा आ लॉकुर पारगोळ यारी यहोवा आंदुर जागा मा पैदा माळीदुन, आदुर्द खतना यहोशू से माळसुसदुन, यतिकी हादी मा आंदुर्द खतना ईला आगदुर कारण आंदुर खतना रहित ईरोर.
JOS 5:8 अदिक याग आ सप्पा जाती इन लॉकुर्द खतना आगेत, आग आंदुर चंगा आगासताका तान तान जागा मा ड्यारा दा ईत्तुर.
JOS 5:9 आग यहोवा यहोशू से अंदुन, “नीम्द निंदा जो मिस्त्रीगोळ दा आग्याद, अदरी ना ईंद दुर माळदीन.” ई कारण आ जागा अन हेसुर ईंद इन दिन ताका गिलगाल बिदाद.
JOS 5:10 इदुरसाटी इस्त्राएली गिलगाल दा ड्यारा हाक्कु ईत्तुर, अदिक आंदुर यरीहो अन हाती मैदान दा तिंगुळ इन चौदावा दिशी द्यावगा अन होती हाब्ब मान्सदुर.
JOS 5:11 अदिक हाब्ब इन दुसरा दिशी आंदुर आ द्याश इन उपज दा टु अखमीरी रोट्टी अदिक अदा दिशी टु सुळ्द दाना भी तीनली कुरतुर.
JOS 5:12 अदिक याता दिन टु आंदुर आ द्याश इन फसल दा टु तीनली कुरतुर, अदा दिशी व्हातर्या का मन्ना बंद आगेत; अदिक इस्त्राएलगोळी मुंद यागलु मन्ना सिकीदील, लेकीन आ वर्ष आंदुर कनान द्याश इन फसल दा टु तिंदुर.
JOS 5:13 याग यहोशू यरीहो अन हाती ईरोन आग आव तान कण्‍ण नेगदुन, अदिक येन नोळदुन, कि कय दा उगळा तलवार हुडुकु ऊंद मंळसा मुंद नीदुरकु आन; अदिक यहोशू आऊन हाती होगकु केळदुन, “येन नी नाम दिकळव हुव, या नाम दुश्मनगोळ दिकळव?”
JOS 5:14 आग आव उत्तर कोट्टुन, “ईला; बल्‍की ना यहोवा अन सेना अन प्रधान आगकु ईग बंदीन.” आग यहोशू जमीन मा ट्वांगरा टेक्सकु नमस्कार माळदुन, अदिक आऊन से अंदुन, “तान दास उन साटी नान प्रभु उन येन आग्या आद?”
JOS 5:15 यहोवा अन सेना अन प्रधान यहोशू से अंदुन, “तान केरू काल दा टु तेगुकोम, यतिकी या जागा मा नी नीदुरकु आय अद पवित्र आद.” आग यहोशू हांग अच माळदुन.
JOS 6:1 यरीहो अन सप्पा फाटक इस्त्राएलीगोळ अंज्क इन कारण लगातार बंद ईत्तव, अदिक याऊ व्हार्या ईला होगसकोन अदिक बुळ्क ईला होगसकोन.
JOS 6:2 बाक यहोवा यहोशू से अंदुन, “केळ, ना यरीहो अक आऊन राजा अदिक शूरवीरगोळ सांगुळ नीन वश दा माळ कोळतीन.
JOS 6:3 इदुरसाटी नीम दा यास योध्दा आर नगर इक घेर्स कोमुल, अदिक आ नगर इन नाकु दी हागुल ऊंद घन वयाळकु बरूल. अदिक आर दिन ताका हिंग अच माळेतीर.
JOS 6:4 म्यांडागोळ्द सींग इन माळ्द तुरहीगोळ हुडुकु येळ याजकगोळी नळुगोळी, याजकगोळ से अनी कि आंदुर पवित्र सन्दुक इन मुंद नळदार, सातवा दिशी नगर इन नाकु दी येळ फ्यारा माळी, याजकगोळ से अनी कि आंदुर नळुतेला तुरही मुरस्यार.
JOS 6:5 याजक तुरहीगोळ देल धोळ्द आवाज माळ्यार, याग नीव आ आवाज केळीर रा नीव सप्पा लॉकुर से गर्जन सुरू माळली हेळीतीर, याग नीव हिंग माळीर रा नगर इन दिवारगोळ बिदोदव, आग नीम लॉकुर सीधा नगर दा होदार.”
JOS 6:6 ई प्रकार नून उन पार यहोशू याजकगोळी जमा माळदुन, यहोशू आंदुर से अंदुन, “यहोवा अन पवित्र सन्दुक इक हुडुकु नळी अदिक येळ याजकगोळी तुरही हुडुकु नळुली हेळी, आ याजकगोळी सन्दुक इन मुंद नळु पायजे.”
JOS 6:7 बाक आव लॉकुर से अंदुन, “मुंद वाळुस्कु नगर इन नाकु दी वयाळकु बरी; अदिक अस्त्र शस्त्र वाळेर मंळसा यहोवा अन सन्दुक इन मुंद मुंद नळी.”
JOS 6:8 अदिक याग यहोशू लॉकुर से ईद मात अंदुन, रा आंदुर येळ याजक जो यहोवा अन मुंद येळ तुरही हुडुकु ईरोर तुरही उयतेला नळदुर, अदिक याजक यहोवा अन पवित्र सन्दुक आंदुर हिंद हिंद हुळकु नळोर.
JOS 6:9 अस्त्र शस्त्र वाळेर मंळसागोळ याजकगोळ मुंद नळोर, अदिक पवित्र सन्दुक इन हिंद नळावाळेर लॉकुर तुरही मुरसोर अदिक सांगुळ नळोर.
JOS 6:10 अदिक यहोशू लॉकुरी आग्या कोट्टुन, “यागासताका ना नीमी जयजयकार माळोद आग्या कोळालीन, आगासताका जयजयकार माळबाळेतीर, अदिक न निम्द येनारा शब्द केळदुर दा बरूल, अदिक यातोदु मात नीम बाय दा टु होळ ईला पायजे; याग ना नीमी आग्या कोळाईन आग जयजयकार माळेतीर.”
JOS 6:11 आव यहोवा अन सन्दुक इक ऊंद घन नगर इन नाकु दी वयाळसदुन; आग आंदुर छावनी दा बंदुर, अदिक ईळ्लक अल्या कळदुर.
JOS 6:12 यहोशू व्हातर्या येद्दुन, अदिक याजकगोळ यहोवा अन सन्दुक नेगु कोंडुर.
JOS 6:13 अदिक आ येळ याजकगोळ व्हात इन सींग इन येळ तुरही हुळदुर अदिक यहोवा अन सन्दुक इन मुंद मुंद मुर्सतेला नळदुर; अदिक आंदुर मुंद अस्त्र शस्त्र वाळेर मंळसा नळदुर, अदिक हिंद वाळेर यहोवा अन सन्दुक इन हिंद हिंद नळदुर, अदिक याजकगोळ तुरही मुर्सतेला नळदुर.
JOS 6:14 ई प्रकार आंदुर दुसरा दिशी भी ऊंद घन नगर इन नाकु दी वयाळकु छावनी दा वापस बंदुर, अदिक ई प्रकार आंदुर आर दिन ताका माळदुर.
JOS 6:15 बाक आंदुर सातवा दिशी हापाळ जल्दी यदकु अदा रीति देल नगर इन नाकु दी येळ घन वयाळकु बंदुर; सिर्फ अदा दिशी आंदुर येळ घन वयाळदुर.
JOS 6:16 आग सातवा घन याग याजक तुरही ऊरूतोगोर, आग यहोशू लॉकुर से अंदुन, “जयजयकार माळी; यतिकी यहोवा ई नगर इक नीमी कोट्ट बुटान.
JOS 6:17 नगर अदिक अदुर्द हर ऊंद वस्तु प्रभु अक बली अन रूप दा अर्पीत माळकु नाश आगेदीत; केवल राहाब वेश्या अदिक यास आकिन मान्या आर आंदुर जित्‍ता बिटकु आदार, यतिकी आक नाम कळुदव दूतगोळी होचकु ईटीदुर.
JOS 6:18 अदिक नीव नाश माळ्द वस्तुगोळ से सावधानी देल तान तान इक अलग ईटी, हींग आगबाळुल कि नाश इन वस्तु ठहरूस्कु बाद्दा अदा नाश इन वस्तु दा टु येनारा ताकोम कोमी, अदिक ईत्ता प्रकार देल इस्त्राएली छावनी इक भ्रष्ट माळकु अदरी कष्ट दा हाक्क बुळी.
JOS 6:19 सप्पा व्हान्ना, बेळ्ली अदिक जो बर्तन पीतल अदिक लोहा नव आव, अव यहोवा अन साटी पवित्र आव, अदिक आऊंदा भंडार दा ईटकु आगुल.”
JOS 6:20 आग लॉकुर जयजयकार माळदुर, अदिक याजक नरसिंगा ऊरूतेला ईत्तुर. अदिक याग लॉकुर नरसिंगा अन्द शब्द केळदुर रा बाक हापाळ धोळ्द आवाज देल आंदुर जयजयकार माळदुर, आग नगर इन दिवाल बिदोत, अदिक लॉकुर तान तान मुंदी टु आ नगर मा येरेदुर, अदिक नगर इक ताकोम कोंडुर.
JOS 6:21 अदिक येन गंळ्सुर, येन आर्तेर, येन हारोदोर, येन हाळाबाट्टुर, बल्‍की गोसीगोळ, म्यांडागोळ, मर्रगोळ, गदहागोळ, अदिक यास नगर दा ईरोर, आ सप्पा मुंदरी आंदुर नाश इन वस्तु सम्सकु तलवार देल कोंद बुटुर.
JOS 6:22 आग यहोशू आ येढ्ढु मंळसागोळ से जो आ द्याश इन भेद ताकोमली होगीदुर अंदुन, “तान किर्‍या अन अनुसार आ वेश्या अन मान्या होगकु आकी अदिक जो आकिन हात्ती ईतीदार आंदरी भी तेगुक तरी.”
JOS 6:23 आग आ येढ्ढु हारोदोर भेदीगोळ अंदर होगकु राहाब इक, अदिक आकिन मोय-आप्प, वार्टुर अदिक सप्‍पा मुंदरी जो आकिन मान्या ईरतोगोर, बल्‍की आकिन सप्‍पा परिवार इक तेगुकु तंदुर, अदिक इस्त्राएल इन छावनी टु व्हार्या कुर्स बुटुर.
JOS 6:24 आग आंदुर नगर इक अदिक जो येनारा अदुर दा ईरोद, सप्‍पा अक बेक्‍की हचकु होताक बुटुर; सिर्फ व्हान्ना, बेळ्ली अदिक जो बर्तन पीतल अदिक लोहा नव ईरव, अवरी आंदुर यहोवा अन भवन इन भंडार दा ईट बुटुर.
JOS 6:25 अदिक यहोशू राहाब वेश्या अदिक आकिन आप्प उन घराना अक, बल्‍की आकिन सप्‍पा लॉकुरी जित्‍ता बिट्ट बुटुर, अदिक ईगासताका आकिन वंश इस्त्राएलीगोळ बीच दा ईरतद, यतिकी जो दूतगोळी यहोशू यरीहो अन भेद ताकोमली कळीदुन आंदरी आक होचकु ईटीदुर.
JOS 6:26 बाक अदा समय यहोशू इस्त्राएलीगोळ मुंद किर्‍या तिंदुन, अदिक अंदुन, “जो मंळसा येदकु ई नगर यरीहो अक मात्त माळ्यान आव यहोवा अन दी टु श्रापित आदान. याग आव अदुर्द पायवा हाक्यान आग आऊन धोळ पार सोत्तान, अदिक याग आव अदुर फाटकगोळी हचुस्यान आग आऊन श्याण्णेव पार सोतोदान.”
JOS 6:27 अदिक यहोवा यहोशू अन सांगुळ ईत्तुन; अदिक यहोशू अन्द कीर्ति आ सप्पा द्याश दा फैलुसेत.
JOS 7:1 लेकीन इस्त्राएलीगोळ भेंट इन वस्तुगोळ बारा दा विश्वासघात माळदुर; मतलब यहूदा वंश इन आकान, जो जेरहवंशी जब्दी अन नातु अदिक कर्मी अन पार ईरोन, आव भेंट इन चिजगोळ दा टु येनारा ताकोम कोंडुन; ई कारण देल यहोवा अन कोप इस्त्राएलीगोळ मा भळकुसेत.
JOS 7:2 यहोशू यरीहो टु आई हेसुर इन नगर इन हाती, जो बेतावेन टु हतकु बेतेल इन पूर्व अन दी आद, येनारा मंळसागोळी ईद अनकु कळुदुन, “होगकु द्याश इन भेद तरी.” अदिक आ मंळसागोळ होगकु आई नगर इन भेद ताकोंडुर.
JOS 7:3 अदिक आंदुर यहोशू उन हाती वापस बंदकु अंदुर, “सप्पा लॉकुर अल होगबाळुल, येढ्ढ मुर हजार मंळसा होगकु आई नगर इक जीक्स सकतार; सप्पा लॉकुरी अल होगोद कष्ट कोळबाळ, यतिकी आ लॉकुर थ्वाळासा अच आर.”
JOS 7:4 इदुरसाटी लगभग मुर हजार लॉकुर अल होदुर; लेकीन आई नगर इन ईरावाळेर मुंद टु ओळेदुर,
JOS 7:5 आग आई नगर इन ईरावाळेर आंदुर दा टु छत्तीस मुंदुरी कोंद बुट्टुर, अदिक तान फाटक टु शबारीम ताका आंदुर्द पीछा माळकु उतार भाग दा आंदरी कोनतेला होदुर. आग लॉकुर्द मन पिघलुसकु थंडा बिदोत.
JOS 7:6 आग यहोशू तान कपळा हरदुर, अदिक आव अदिक इस्त्राएली बाट्ट लॉकुर यहोवा अन सन्दुक इन मुंद बाय इन भार देल बिदकु जमीन मा द्यावगा ताका बिदकु ईत्तुर; अदिक आंदुर तान तान ताल्ला मा धुळा हाकदुर.
JOS 7:7 अदिक यहोशू अंदुन, “हाय, प्रभु यहोवा, नी तान ई प्रजा अक यरदन इन पार यती तंद? येन नामी एमोरिया अन वश दा माळकु नष्ट माळोर साटी तंद्या? भला आगेत कि नाव संतोष माळकु यरदन इन आप्पाटी ईरायदेव!
JOS 7:8 हाय, प्रभु ना येन अनाईन, याग इस्त्राएलगोळ तान दुश्मनगोळी बेन तोरस्यार!
JOS 7:9 यतिकी कनानी जाती बल्‍की ई द्याश इन सप्पा ईरावाळेर ईद केळकु नामी घेर्स कोंडार, अदिक नाम हेसुर पृथ्वी मा टु मिटुस कोंडार; बाक नी तान धोळ्द हेसुर इन साटी येन माळ्या?”
JOS 7:10 यहोवा यहोशू से अंदुन, “येळ, नीदरेग, नी यती ई प्रकार बाय इन भार जमीन मा बिदकु आय?
JOS 7:11 इस्त्राएलगोळ पाप माळ्यार; अदिक जो वाचा ना आंदुर से तान सांगुळ कटसुसीदीन अदरी आंदुर मुर्द बुटार, आंदुर भेंट इन वस्तुगोळ दा टु ताकोंडुर, बल्‍की चोरी भी माळदुर, अदिक छल माळकु अदरी तान सामान दा ईट कोंडार.
JOS 7:12 ई कारण इस्त्राएली तान दुश्मनगोळ मुंद नीदुरकु ईर सकालुर; आंदुर तान दुश्मनगोळी बेन तोर्सतार, इदुरसाटी कि आंदुर खुद अर्पन इन वस्तु आगेग्यार. अदिक यागासताका नीव तान बीच दा टु भेंट इन वस्तु उन सत्यानाश माळ कोमालीर, आगासताका ना मुंद नीम सांगुळ ईर सकालीन.
JOS 7:13 येळ, प्रजा अन लॉकुरी पवित्र माळ, आंदुर अन; ‘व्हातर्या ताका तान तान इक पवित्र माळकु ईटी; यतिकी इस्त्राएली इन परमेश्वर ईद अनतान, “हे इस्त्राएल, नीन बीच दा भेंट इन वस्तु आद; इदुरसाटी यागासताका नी अर्पन इन वस्तु इक तान बीच दा टु दुर माळाल आगासताका नी तान दुश्मनगोळ मुंद नीदुरकु ईर सकाल.”
JOS 7:14 नाळ व्हातर्या नीम सप्पा मुंदरी यहोवा अन मुंद नीदरोद बिद्दीत, सप्पा परिवार समूह यहोवा अन मुंद पेश आदर, यहोवा ऊंद परिवार समूह अक नीवळुस्यान, आग सिर्फ अदा परिवार यहोवा अन मुंद नीदरीत, आग आ परिवार समूह दा टु यहोवा ऊंद वंश इक नीवळुस्यान. आग बस अदा वंश यहोवा अन मुंद निदुरकु ईत्तीत, आग यहोवा आ वंश इन हर परिवार इन परख माळ्यान, आग यहोवा आ वंश दा टु ऊंद परिवार इक नीवळुस्यान, आग अद परिवार आबना यहोवा अन मुंद नीदुरकु ईत्तीत, आग यहोवा आ परिवार इन हर मंळसा अन जाँच माळ्यान.
JOS 7:15 आग जो मंळसा भेंट इन वस्तु ईटकु हुळसुसकु आदान, अदिक जो येनारा आऊन ईतीदाद बेक्‍की दा हाक्कु होताक्कु आदीत; यतिकी आव यहोवा अन वादा अक मुरदान, अदिक इस्त्राएल दा अनुचित कर्म माळ्यान.’”
JOS 7:16 यहोशू व्हातर्या येदकु इस्त्राएलगोळी वंश वंश माळकु हात्ती वोतुन, अदिक यहूदा अन वंश हुळसुसकु आत;
JOS 7:17 आग आव यहूदा अन परिवार इक हात्ती माळदुन, अदिक जेरह वंशगोळ कुल हुळसुसकु आत; बाक जेरह वंशगोळ घराना अन ऊंद ऊंद मंळसा अक हात्ती तंदुन, अदिक जब्दी हुळसुसकु आदुन;
JOS 7:18 आग यहोशू ई परिवार इन सप्पा मंळसागोळी यहोवा अन मुंद बरली हेळदुन, यहूदा कर्मी इन पार आकान इक नीवळुसदुन, कर्मी जब्दी इन पार ईरोन अदिक जब्दी जेरह उन पार ईरोन.
JOS 7:19 आग यहोशू आकान से अनली कुरतुन, “हे नान पारा, इस्त्राएल उन परमेश्वर उन महिमा माळ, अदिक आऊन स्तुति माळ; अदिक जो येनारा नी माळ्या अद नानी हेळबुळ, अदिक नान से येनु छप्सबाळ.”
JOS 7:20 आकान यहोशू उक उत्तर कोट्टुन, “सहीदा ना इस्त्राएल उन परमेश्वर यहोवा अन विरूद्‍ध पाप माळीन, अदिक ई प्रकार ना माळीन,
JOS 7:21 कि याग नानी लूट दा शिनार द्याश इन ऊंद सुंदर ओढ़ना, अदिक येढ्ढ किलो बेळ्ली, अदिक आर्धा किलो व्हान्ना अन ऊंद ईटा कांळ्सत, आग ना अऊर्द लालच माळकु अवरी ईट बुट्टीन; अव नान ड्यारा अन बुळ्क जमीन दा नळ्सकु आव, अदिक सब से ल्यालमा बेळ्ली आद.”
JOS 7:22 आग यहोशू थ्वाळासा लॉकुरी कळुदुन, अदिक आंदुर आ ड्यारा दा होदुर; अदिक येन नोळदुर, कि अव वस्तु आऊन ड्यारा दा नळ्सकु आव, अदिक सप्पा अन ल्यालमा बेळ्ली आद.
JOS 7:23 अवरी आंदुर ड्यारा दा टु तेगुकु यहोशू अदिक सप्पा इस्त्राएलीगोळ हाती तनकु यहोवा अन मुंद ईट बुट्टुर.
JOS 7:24 आग सप्पा इस्त्राएलगोळ सांगुळ यहोशू जेरहवंशी आकान उक, अदिक आ बेळ्ली अदिक आ ओढ़ना अक अदिक व्हान्ना अन ईटा अक, अदिक आऊन पोर पारगोळी, अदिक आऊन वस्तागोळी, गदहा अदिक मर्र म्यांढ्ढा अक, अदिक आऊन ड्यारा अक, मतलब जो येनारा आऊन ईरोद आ सप्पा अक आकोर हेसुर इन घाटी दा वोतुन.
JOS 7:25 आग यहोशू आऊन से अंदुन, “नी नामी यती कष्ट कोट्या? ईंद इन दिन यहोवा नीनी कष्ट कोट्टान.” आग सप्पा इस्त्राएलगोळ आऊन मा पथराव माळदुर; अदिक आंदरी बेक्‍की दा हाक्कु होताकदुर, अदिक आंदुर म्याकुच कल्लगोळ हाक बुट्टुर.
JOS 7:26 अदिक आंदुर आऊन म्याकुच कल्लगोळ्द धोळ्द ढग माळ कोंडुर जो ईंद ताका माळकु आद; आग यहोवा अन भळकुसकु कोप शांत आगेत. ई कारण आ जागा अन हेसुर ईंद ताका आकोर इन घाटी बिदकु आद
JOS 8:1 आग यहोवा यहोशू से अंदुन, “अंजबाळ, अदिक नीन मन कच्चा आगबाळुल; नेळु कटकु सप्पा योध्दागोळी सांगुळ हुडु, अदिक आई नगर मा चळाई माळ; केळ, ना आई नगर इन राजा अक आऊन प्रजा अदिक आऊन नगर अदिक जागा अन सांगुळ नीन वश दा माळ कोंडीन.
JOS 8:2 अदिक ह्यांग नी यरीहो नगर अदिक अदुर राजा से माळ्द हांग अच आई नगर अदिक अदुर राजा अन सांगुळ भी माळेत; सिर्फ नीव जनावरगोळ सांगुळ आऊन लुट रा तान साटी ताकोम सक्या; इदुरसाटी आ नगर इन हींद तान मंळसागोळी घात दा हचबुळी.”
JOS 8:3 अत: यहोशू सप्पा योध्दागोळ सांगुळ आई नगर मा चळाई माळोद तैयारी माळदुन; अदिक यहोशू तीस हजार मंळसागोळी जो शूरवीर ईरोर नीवळुसकु ईळ्लकी का आग्या कोटकु कळुदुन.
JOS 8:4 अदिक आंदरी ईद आग्या कोट्टुन, “केळी, नीव आ नगर इन हिंद इन दी घात हचकु कुर्तकु ईरेतीर; नगर टु हापाळ दुर होगबाळेतीर, अदिक सप्पा लॉकुर तैयार ईरेतीर;
JOS 8:5 अदिक ना तान सप्पा साथीगोळ सांगुळ आ नगर इन हाती होगाईन, अदिक याग आंदुर पयले अन घाई नाम सामना माळोर साटी होट्टार, आग नाव आंदुर मुंदु टु ओळेव;
JOS 8:6 आग आंदुर ईद सोचकु, कि आंदुर पयले अन घाई नाम मुंदु टु ओळेत्यार, नाम्द पीछा माळ्यार; ई प्रकार नाव आंदुर मुंदु टु ओळकु आंदरी नगर टु दुर तेगुकु वोतेव;
JOS 8:7 आग नीव तान होचकोमकु जागा मा टु बरेतीर अदिक नगर मा अधिकार माळ कोमेतीर, नीम परमेश्वर यहोवा नीमी जिकसोद ताकत कोट्टान.
JOS 8:8 नीमी अदा माळ पायजे जो यहोवा अनतान, नान मा नजर ईटी, ना नीमी आक्रमण इन आदेश कोळाईन. नीव याग नगर मा अधिकार माळीर आग अदरी होताक कोमेतीर.”
JOS 8:9 आग यहोशू आ सैनिकगोळी आंदुर्द होचकोमोद जागा मा कळु बुट्टुन अदिक हादी कायली कुरतुन, आंदुर बेतेल अदिक आई नगर इन बीच ऊंद जागा मा होदुर, ईद जागा आई नगर इन पश्चिम दा ईरोद. यहोशू तान लॉकुर सांगुळ ईळ्लक तीम अल्या ईत्तुन.
JOS 8:10 यहोशू व्हातर्या येद्दुन, अदिक लॉकुर गिनती माळकु इस्त्राएली स्याणागोळ सांगुळ लॉकुर मुंद मुंद आई नगर इन दी होदुन.
JOS 8:11 अदिक आऊन सांगुळोर सप्पा योध्दा येरेदुर, अदिक आई नगर इन हाती पोहचुस्कु आऊन मुंद उत्तर इन दी ड्यारा हाक्क बुट्टुर, अदिक आंदुर अदिक आई नगर इन बीच ऊंद घाटी ईरोद.
JOS 8:12 आग आव लगभग अईद हजार मंळसा नीवळुसकु बेतेल अदिक आई नगर इन बीच दाकळोद इन पश्चिम इन दी आंदरी घात दा कुरसुस बुट्टुन.
JOS 8:13 अदिक याग लॉकुर नगर इन उत्तर इन सप्पा सेना अक अदिक आऊन पश्चिम इन दी घात दा कुर्तकु ईरोर आंदरी भी ठिकाणा मा माळ कोंडुन, आग यहोशू अदा दिशी ईळ्लकी घाटी इन बीच होदुन.
JOS 8:14 याग आई नगर इन राजा ईद नोळदुन, आग आंदुर फुर्ती माळकु व्हातर्या येद्दुर, अदिक राजा तान सप्पा प्रजा अक हुडुकु इस्त्राएलीगोळ मुंद आंदुर लळुसली तेगुकु ठहरूस्द जागा मा जो अराबा अन मुंद आद पोहचुसदुन; अदिक आव ईला जानसोन कि नगर इन हिंद लॉकुर घात हचकु कुर्तकु आर.
JOS 8:15 आग यहोशु अदिक सप्पा इस्त्राएलीगोळ पीछा माळोर साटी कारू कारूकु कार्सकु आदुर; अदिक आंदुर यहोशू अन पीछा माळतेला नगर टु दुर होटोदुर.
JOS 8:16 आग नगर इन सप्पा लॉकुर इस्त्राएलीगोळ्द पीछा माळोर साटी कारूकु आदुर; अदिक आंदुर यहोशू उन पीछा माळतेला नगर टु दुर होट्ट बुट्टुर.
JOS 8:17 अदिक ना आई नगर दा अदिक ना बेतेल दा याऊ मंळसा ईतीदील, जो इस्त्राएल इन पीछा माळोर साटी ईला होगीदान; अदिक आंदुर नगर इक खुला बिटकु इस्त्राएलीगोळ्द पीछा माळदुर.
JOS 8:18 आग यहोवा यहोशू से अंदुन, “तान कय इन बर्छा आई नगर इन दी वाळुस; यतिकी ना अदरी नीन कय दा कोट्ट बुळाईन.” अदिक यहोशू तान कय इन बर्छा अक नगर इन दी वाळुसदुन.
JOS 8:19 आऊन कय वाळुसतेला अच जो लॉकुर घात दा कुर्तकु ईरोर आंदुर झटपट तान जागा मा टु येद्दुर, अदिक वोळकु नगर दा प्रवेश माळदुर अदिक अदरी ताकोम कोंडुर; अदिक झटपट अल बेक्‍की हच बुट्टुर.
JOS 8:20 याग आई नगर इन लॉकुर हिंद तिर्गकु नोळदुर, रा येन नोळदुर, कि नगर इन धुंगा आकाश इन दी येळेत्याद; अदिक आंदरी ना ईत्त वोळोद शक्ति ईत्त, अदिक ना रा आत्त, अदिक जो लॉकुर आळी इन दी वोळोर आंदुर तिर्गकु तान खेदाळसा वाळेर मा बिद्दुर.
JOS 8:21 याग यहोशू अदिक सप्पा इस्त्राएलगोळ नोळदुर कि घातीगोळ नगर इक ताकोम कोंडुर, अदिक अदुर धुंगा येळेत्याद, आग वापस बंदकु आई नगर इन मंळसागोळी कोनली कुरतुर.
JOS 8:22 आग आ सैनिक जो होचकोमकु ईरोर, युध्द दा मदत साटी नगर टु व्हार्या बंदुर. आई नगर इन सैनिक इन येढ्ढु दी इस्त्राएल ईनोर सैनिक ईरोर, आई नगर ईनोर सैनिक जाल दा फसुसीगिदुर. इस्त्राएल आंदरी पराजीत माळदुर. आंदुर आगासताका लळुसतेला ईत्तुर यागासताका आई इन ऊंद भी मंळसा जित्ता ईला ईरोन, आंदुर दा टु याऊ वोळ सकिदील.
JOS 8:23 लेकीन आई अन राजा जित्ता बिटकु आदुन. यहोशू उन सैनिक आऊक आऊन हाती तंदुर.
JOS 8:24 युध्द इन समय, इस्त्राएल इन सेना आई नगर इन सैनिकगोळी मैदानगोळ दा अदिक मरूभूमी दा ढकलुसदुर अदिक ई प्रकार इस्त्राएल इन सेना आई नगर टु सप्पा सैनिकगोळी कोन्नोद क्याल्सा मैदानगोळ दा अदिक मरूभूमी दा पुरा माळदुर. आग इस्त्राएल नोर सप्पा सैनिक आई इक बंदुर. आग आंदुर आ लॉकुरी जो नगर दा जीत्ता ईरोर तलवार देल कोंद बुट्टुर.
JOS 8:25 आ दिशी आई नगर इन सप्पा लॉकुर सोत्तुर, अल हन्नेळ हजार आर्तेर अदिक मंळसागोळ ईरोर.
JOS 8:26 यतिकी यागासताका यहोशू आई नगर इन सप्पा निवासीगोळ्द सत्यानाश माळ कोंडीदिल आगासताका तान कय, यदुर देल बर्छा वाळुसीदुन, बाक जेळदीदील.
JOS 8:27 यहोवा अन आ आग्या अन अनुसार जो आव यहोशू उक कोटीदुन इस्त्राएलीगोळ जनावर अदिक नगर इन लुट तान माळ कोंडुन.
JOS 8:28 आग यहोशू आई नगर इक होताकसुस दुन अदिक अदरी सदा साटी खंडर माळ कोंडुन: अद ईंद ताका भर भंगाळ आद.
JOS 8:29 अदिक आई नगर इन राजा अक आव द्यावगा ताका मार्र मा लटकुसकु ईटदुन; अदिक सूर्य मुळ्क्त मुळ्क्त यहोशू उन आग्या देल आऊन लाश मार्र मा टु ईळ्सकु नगर इन फाटक इन मुंद भीटकु आत, अदिक आऊन मा कल्लगोळ्द धोळ्द ढेर हाक्कु आत, जो ईंद ताका माळकु आद.
JOS 8:30 आग यहोशू इस्त्राएल उन परमेश्वर यहोवा अन साटी एबाल पहाळी मा ऊंद वेदी माळसुसदुन,
JOS 8:31 ह्यांग यहोवा अन दास मूसा इस्त्राएलगोळी आग्या कोटीदुन, अदिक ह्यांग मूसा अन व्यवस्था अन किताब दा लिख्सकु आद, आव हींग कल्लगोळ्द ऊंद वेदी माळदुन यदुर मा यातोदु प्रकार इन औजार नळ्सकु आगीदील. अदिक अदुर मा आंदुर यहोवा अन साटी होमबली अदिक मेलबली येर्सदुर.
JOS 8:32 अदा जागा मा यहोशू इस्त्राएलीगोळ मुंद आ कल्लगोळ म्याकुच मूसा अन व्यवस्था, जो आव लिखसीदुन, अदुर्द नकल माळसुसदुन.
JOS 8:33 अदिक आंदुर, येन देशी येन परदेशी, इस्त्राएल इन सप्पा लॉकुर पवित्र संदुक इन नाकु दी नीदुरकु ईरोर. आंदुर आ लेवीवंशी याजकगोळ मुंद नीदुरकु ईरोर, जो यहोवा अन वादा अन पवित्र सन्दुक इक हुडुकु नळोर. इस्त्राएली अदिक गैर इस्त्राएली सप्पा लॉकुर अल नीदुरकु ईरोर अदिक अन्य आरधा लॉकुर गरिज्जीम पर्वत इन मुंद नीदुरकु ईरोर. यहोवा अन सेवक मूसा आंदुर से हिंग माळली अंदीदिन. मूसा आंदुर से हिंग माळोरसाटी ई आशीर्वाद इन साटी अंदीदुन.
JOS 8:34 आग यहोशू व्यवस्था अन सप्पा वचनगोळी वाचुसदुन. यहोशू आशीर्वाद अदिक अभिशाप वाचुसदुन. आव सप्‍पा येनारा आ तरीका देल वाचुसदुन, याता तरीका देल अद व्यवस्था अन किताब दा लिख्सकु ईरोद.
JOS 8:35 इस्त्राएल इन सप्‍पा लॉकुर अल जमा ईरोर, सप्‍पा आर्तेर, चिकोर अदिक इस्त्राएल इन लॉकुर सांगुळ ईरावाळेर सप्पा विदेशी अल जमा ईरोर अदिक यहोशू मूसा अन द्वारा कोटकु आग्‍याव हर ऊंद आदेश उक वाचुसदुन.
JOS 9:1 ईद केळकु हित्ती, एमोरी, कनानी, परिज्जी, हिब्बी, अदिक यबूसी, यास राजा यरदन इन ईप्पाटी पहाळी द्याश दा अदिक ल्यालमा अन द्याश दा, अदिक लबानोन इन मुंद इन महासागर इन किनारा मा ईरतोगोर,
JOS 9:2 आंदुर ऊंद मन आगकु यहोशू अदिक इस्त्राएलीगोळ सांगुळ लळाई माळोर साटी जमा आदुर.
JOS 9:3 याग गिबोन इन निवासीगोळ केळदुर कि यहोशू यरीहो अदिक आई नगर से येन येन माळदुर,
JOS 9:4 आग आंदुर छल माळदुर, अदिक राजदूतगोळ भेष माळकु तान गदहागोळ मा हाळोव बॉरागोळ, अदिक हाळोव हरदव, अदिक जोळ्सदव दाखमधु अन चिलागोळ कटदुर
JOS 9:5 तान कालगोळ दा हाळोव केरू, अदिक मय मा हाळोव कपळा हाक्कु, अदिक तान भोजन इन साटी वंळ्गींद अदिक बुर्सी हद्द रोट्टी हुळदुर.
JOS 9:6 आग आंदुर गिलगाल इन छावनी दा यहोशू उन हाती होगकु आऊन से अदिक इस्त्राएली मंळसागोळ से अनली कुरतुर, “नाव दुर द्याश टु बंदेव; इदुरसाटी ईग नीव नाम से वादा माळी.”
JOS 9:7 इस्त्राएली मंळसागोळ आ हिब्बीगोळ से अंदुर, “येन मालुम नीव नाम बीच दा का ईरतीदीर; बाक नाव नीम से वादा ह्यांग माळेव?”
JOS 9:8 आंदुर यहोशू से अंदुर, “नाव नीनोर दास हुयेव.” आग यहोशू आंदुर से अंदुन, “नीव यार हुईर? अदिक येल टु बंदीर?”
JOS 9:9 आंदुर आऊन से अंदुर, “नीन दास हापाळ दुर इन द्याश टु नीन परमेश्वर यहोवा अन हेसुर केळकु बंदार; यतिकी नाव ईद सप्पा केळेव, मतलब आऊन किर्ती अदिक जो येनारा आव मिस्त्र दा माळदुन,
JOS 9:10 अदिक जो येनारा आव एमोरिया अन येढ्ढु राजागोळ सांगुळ माळदुन जो यरदन इन आप्पाटी पूर्व दिशा दी ईरतोगोर, मतलब हेशबोन इन राजा सीहोन से, अदिक बाशान उन राजा ओग से जो अश्तारोत दा ईरोन.
JOS 9:11 इदुरसाटी नाम मान्यागोळोर बाट्टुर अदिक नाम द्याश इन सप्पा निवासीगोळ नाम से अंदुर, कि हादी इन साटी तान सांगुळ भोजन इन सामान हुळकु आंदुर से सीकली होगी, अदिक आंदुर से अनेतीर, कि नाव नीमोर दास हुयेव; इदुरसाटी ईग नीव नाम से वादा माळी.
JOS 9:12 नामव रोट्टीगोळी नोळी, याग नाव लॉकुर मान्ना बीटीदेव आग ईव बिस्स अदिक ताजा ईरव. लेकीन ईग नी नोळेत्या कि ईव वंळ्गेदव अदिक ईवरी बुर्सी हत्तेग्याद.
JOS 9:13 बाक ईव अंगुर इन रास्सा अन चिला नाव तुमीदेव, आग रा व्हाशेव ईरव, लेकीन नोळी ईग ईव हरदोग्याव; अदिक नामव ईव कपळा अदिक केरूगोळ हापाळ लम्बा यात्रा अन कारण पुराना आगेग्याव.”
JOS 9:14 आग आ मंळसागोळ यहोवा से बीना सलाह ताकोमकु आंदुर भोजन दा टु थ्वाळासा तिंद कोंडुर.
JOS 9:15 आग यहोशू आंदुर से मेल माळकु आंदुर से ईद वादा माळदुन, कि नीमी जीत्ता बीट्टेव; अदिक मंडली इन स्याणागोळ आंदुर से किर्‍या तिंदुर.
JOS 9:16 आंदुर सांगुळ वादा माळदुर मुर दिन इन बाद्दा आंदरी ईद समाचार सिक्त, कि आंदुर नाम हात्तीगोळोर ईरावाळेर लॉकुर उर, अदिक नाम बीच दा अच बसुस्कु आर.
JOS 9:17 आग इस्त्राएली अल टु होटकु तीसरा दिशी आंदुर नगरगोळी यूर हेसुर गिबोन, कपीरा, बेरोत, अदिक किर्यत्यारीम दा पोहचुसदुर.
JOS 9:18 अदिक इस्त्राएलगोळ आंदरी कोंदीदील, यतिकी मंडली इन स्याणागोळ आंदुर सांगुळ इस्त्राएल ईनव परमेश्वर उन किर्‍या तिंदीदुर. आग सप्पा मंडली इन लॉकुर स्याणागोळ्द विरूद्ध कुळकुळसली हतदुर.
JOS 9:19 आग सप्पा प्रधानगोळ सप्पा मंडली से अंदुर, “नाव आंदुर से इस्त्राएल इन परमेश्वर उन किर्‍या तिंदेव, इदुरसाटी ईग नाव आंदरी कय हच सकालेव.
JOS 9:20 नाव आंदुर से ईदा माळेव कि आ किर्‍या अन अनुसार नाव आंदरी जीत्ता बीट्ट बुट्टेव, ईलारा नाम्द तिंद किर्‍या अन कारण नाम मा क्रोध बीद्दीत.”
JOS 9:21 बाक स्याणागोळ आंदुर से अंदुर, “आंदुर जीत्ता बिटकु आगुल.” अत: स्याणागोळ ईद वचन इन अनुसार आंदुर सप्पा मंडली इन साटी हुळ्ली कडावाळेर अदिक नीर तुमावाळेर आदुर.
JOS 9:22 बाक यहोशू गिबोन नगर इन लॉकुरी कारूकु अंदुन, “नीव रा नाम बीच दा का ईरतीर, बाक नीव नाम से ईद अनकु यती छल माळदीर, कि नाव नीम से हापाळ दुर ईरतेव?
JOS 9:23 इदुरसाटी ईग नीव श्रापित आईर, अदिक नीम दा टु याऊ हिंग ईरतीदील जो दास, मतलब नान परमेश्वर उन भवन इन साटी हुळ्ली कडावाळा अदिक नीर तुमावाळा ईरतीदील.”
JOS 9:24 आंदुर यहोशू उक उत्तर कोट्टुर, “नीन दासगोळ्द ईद सहीदा हेळकु आगीत, कि नीन परमेश्वर यहोवा तान दास मूसा अक आग्या कोटीदुन कि नीमी अद सप्पा द्याश कोळुल, अदिक आंदुर सप्पा ईरावाळेरळ्द नीम मुंदु टु सर्वनाश माळुल; इदुरसाटी नाम लॉकुरी नीम कारण देल तान जीवगोळ्द लाले बीद्दव, इदुरसाटी नाव हिंग क्याल्सा माळदेव.
JOS 9:25 अदिक ईग नाव नीन वश दा आयेव, ह्यांग व्यवहार नीनी वळ्लीद हततद अदिक वळ्लीद सम्सतद हांगा नी नाम सांगुळ माळ.”
JOS 9:26 आग आव हांग अच माळदुन, अदिक आंदरी इस्त्राएलगोळ कय दा टु हिंग उळ्सदुन, कि आंदुर आंदरी कोनोर साटी होगीदिल.
JOS 9:27 लेकीन यहोशू अदा दिशी आंदरी मंडली इन साटी, अदिक जो जागा यहोवा अन साटी नीवळुसकु आगीत आऊन वेदी साटी, हुळ्ली कडावाळेर अदिक नीर तुमावाळेर नीवळुसदुन, ह्यांग कि ईंद ताका आद.
JOS 10:1 याग यरूशलेम उन राजा अदोनीसेदेक केळदुन कि यहोशू आई नगर इक ताकोम कोंडुन, अदिक अदुर सत्यानाश माळ कोंडुन, अदिक आव यरीहो अदिक अलेव राजा से माळदुन हांग अच आई नगर अदिक अदुर राजा से माळदुन, अदिक ईद भी केळदुन कि गिबोन इन निवासीगोळ इस्त्राएली से मेल माळदुन, अदिक आंदुर बीच ईरली कुरतार,
JOS 10:2 आग आंदुर हापाळ अंजेदुर, यतिकी गिबोन धोळ्द नगर बल्की राजनगर इन तुल्य अदिक आई नगर से धोळ्द ईरोद, अदिक अलेर सप्पा निवासी शूरवीर ईरोर.
JOS 10:3 इदुरसाटी यरूशलेम इन राजा अदोनीसेदेक इन हेब्रोन इन राजा होहाम, यर्मूत इन राजा पिराम, लाकीश ओन राजा यापी, अदिक एग्लोन इन राजा दबीर इन हाती ईद बातणी कळुदुन:
JOS 10:4 “नान हाती बंदकु नान मदत माळी, अदिक नळी नाव गिबोन इक कोनाता; यतिकी आव यहोशू अदिक इस्त्राएलगोळ से मेल माळ कोंडुन.”
JOS 10:5 इदुरसाटी यरूशलेम, हेब्रोन, यर्मूत, लाकीश, अदिक एग्लोन इन अईदु एमोरी राजागोळ तान तान सप्पा सेना जमा माळकु चळाई माळ कोंडुर, अदिक गिबोन इन मुंद ड्यारा हाक्कु अदुर से युध्द छेळ्स बुट्टुर.
JOS 10:6 आग गिबोन इन निवासीगोळ गिलगाल इन छावनी दा यहोशू उन हाती ईद बातणी कळुदुर, “तान दासगोळ दी टु नी तान कय सरकुस बाळेत; जल्दी नाम हाती बंदकु नामी ऊळ्स, अदिक नाम्द मदत माळ; यतिकी पहाळी मा ईरावाळेर एमोरिया अन सप्पा राजा नाम विरूद्‍ध जमा आग्यार.”
JOS 10:7 आग यहोशू सप्पा योध्दागोळ अदिक सप्पा शूरवीरगोळ सांगुळ गिलगाल टु नळदुन.
JOS 10:8 अदिक यहोवा यहोशू से अंदुन, “आंदुर से अंजबाळ, यतिकी ना आंदरी नीन कय दा माळ बुटीन; आंदुर दा ऊंद भी मंळसा नीन मुंद टिक्स सकतीदिल.”
JOS 10:9 आग यहोशू रातोरात गिलगाल टु होगकु एकाएक आंदुर मा चढ़ाई माळदुन .
JOS 10:10 आग यहोवा हिंग माळदुन कि आंदुर इस्त्राएलगोळ से घबरूसेदुर, अदिक इस्राएली गिबोन इन हाती आंदुर्द धोळ्द संहार माळदुर, अदिक बेथोरोन इन चळाव मा आंदुर्द पीछा माळकु अजेका अदिक मक्केदा ताका आंदरी कोनतेला होदुर.
JOS 10:11 बाक आंदुर इस्त्राएलगोळ मुंदु टु ओळकु बेथोरोन इन तराई मा बंदुर, आग अजेका पोहचुसा ताका यहोवा आकाश टु धोड्डेव धोडडेव गारपीट आंदुर मा बरसुसली कुरतुन, अदिक आंदुर सोतोदुर; जो गारपीट देल सोत्तुर आंदुर गिनती इस्त्राएलगोळ तलवार से सोतकु आदुर आंदुर से येक्‍कुल ईरोद.
JOS 10:12 आ समय, मतलब याता दिशी यहोवा एमोरिगोळी इस्त्राएलगोळ वश दा माळदुन, आ दिशी यहोशू यहोवा से इस्त्राएलगोळी नोळतेला ई प्रकार अंदुर, “हे सूर्य, नी गिबोन मा, अदिक हे चन्द्रमा, नी अय्यालोन इन तराई इन म्याकुच थाम्सकु ईर.”
JOS 10:13 अदिक सूर्य आ समय ताका थाम्सकु ईत्त, अदिक चंद्रमा आ समय ताका ठहरूस्कु ईत्त, यागासताका आ जाती इन लॉकुर तान दुश्मनगोळ से बदला तांकोडीदील. येन ईद मात याशार हेसुर इन किताब दा लिख्सकु हैलेच कि सूर्य आकाश मण्डल इन बीचोबीच ठहरूस्कु ईत्त, अदिक लगभग पुरा दिन ताका मुळकीदिल?
JOS 10:14 न रा अदुर से पयले यातोदु हिंग दिन आत अदिक न अदुर बाद्दा, यदुर दा यहोवा यातारा मंळसा अन केळीदान; यतिकी यहोवा रा इस्त्राएली इन दी टु लळुसोन.
JOS 10:15 आग यहोशू सप्पा इस्त्राएलीगोळ सांगुळ गिलगाल इन छावनी इक वापस होटोदुन.
JOS 10:16 आंदुर अईदु राजा ओळकु मक्केदा नगर इन हाती इन गुफा दा होच कोंडुर.
JOS 10:17 आग यहोशू उक ईद समाचार सिक्त, “अईदु राजा मक्केदा अन हाती इन गुफा दा होचकोमकु नामी सिक्यार.”
JOS 10:18 यहोशू अंदुन, “गुफा अन बाय मा धोड्डेव धोड्डेव कल्ल हचकु अऊर्द देखभाल इन साटी मंळसागोळी अदुर हाती कुर्सबुळी;
JOS 10:19 लेकीन नीव ठहरूसबाळी, तान दुश्मनगोळ्द पीछा माळकु आंदुर दा टु जो जो पिछळुस्यार आंदरी कोंद बुळी, आंदरी तान तान नगर दा प्रवेश माळोद मौका कोळबाळी; यतिकी नीम परमेश्वर यहोवा आंदरी नीम कय दा माळ कोंडान.”
JOS 10:20 याग यहोशू अदिक इस्त्राएली आंदुर संहार माळकु आंदरी नष्ट माळ कोंडार, अदिक आंदुर दा टु जो उळदोग्यार आंदुर तान तान गढ़वाळा नगर दा होक्कदुर.
JOS 10:21 आग सप्पा लॉकुर मक्केदा अन छावनी इक यहोशू उन हाती सुरक्षित वापस बंदुर; अदिक इस्त्राएलीगोळ विरूद्‍ध याऊ बाय दा टु ऊंद आवाज भी तेगदीदील.
JOS 10:22 आग यहोशू आग्या कोट्टुन, “गुफा अन बाय खोल्सकु आ अईदु राजागोळी नान हाती तेगुकु तरी.”
JOS 10:23 आंदुर हिंग अच माळदुर, अदिक यरूशलेम, हेब्रोन, यर्मूत, लाकीश, अदिक एग्लोन उन राजा अईदु राजागोळी गुफा दा टु आऊन हाती तेगुकु तंदुर.
JOS 10:24 याग आंदुर आ राजागोळ इक यहोशू उन हात्ती तेगुकु तंदुर, आग यहोशू इस्त्राएल इन सप्पा मंळसागोळी कारूकु तान सांगुळ नळावाळेर योध्दागोळ अधिकारीगोळ से अंदुर, “हाती बंदकु तान तान काल ई राजागोळ कुतक्या मा ईटी.” अदिक आंदुर हाती होगकु तान तान काल आंदुर कुतक्या मा ईटदुर.
JOS 10:25 आग यहोशू आंदुर से अंदुन, “अंज बाळी, अदिक न नीम मन कच्चा आगुल; हिम्मत माळकु मजबुत ईरी; यतिकी यहोवा नीम सप्पा दुश्मनगोळ से यार से नीव लळुसावाळेर आईर हिंगा माळ्यान.”
JOS 10:26 ईदुर बाद्दा यहोशू आंदरी कोनसुस बुट्टुन, अदिक अईद मार्रगोळ मा लटकुस बुट्टुन. अदिक आंदुर द्यावगा ताका आ मार्रगोळ मा लटकुसकु ईत्तुर.
JOS 10:27 सूर्य मुळ्क्त मुळ्कत यहोशू से आग्या पाऊसकु लॉकुर आंदरी मार्र मा टु ईळ्सकु अदा गुफा दा येल आंदुर होचकोमकु ईरोर अल हाक बुट्टुर, अदिक आ गुफा अन बाय मा धोड्डेव धोड्डेव कल्ल ईट बुट्टुर, अव ईंद ताका अल्या ईटकु आव.
JOS 10:28 अदा दिशी यहोशू मक्केदा नगर इक ताकोम कोंडुन, अदिक आऊक तलवार देल कोंदुन, अदिक आऊन राजा अन सत्यानाश माळदुन, अदिक यास प्राणी आंदुर दा ईरव आ सप्पा दा टु यारीकु जीत्ता बिटीदील; अदिक ह्यांग आव यरीहो अन राजा अन सांगुळ माळीदुन हांग अच मक्केदा अन राजा से भी माळदुर.
JOS 10:29 आग यहोशू सप्पा इस्त्राएली सांगुळ मक्केदा टु नळकु लिब्ना नगर अक होदुन, अदिक लिब्ना से लळुसदुन;
JOS 10:30 अदिक यहोवा आऊक भी राजा सांगुळ इस्त्राएली इन कय दा माळ कोंडुन; अदिक यहोशू आऊक अदिक अलेर सप्पा प्राणीगोळी तलवार देल कोंदुन; अदिक अदुर दा टु यारीकु भी जीत्ता बिटीदील; अदिक अलेव राजा सांगुळ हांग अच व्यवहार माळदुर ह्यांग आव यरीहो अन राजा अन सांगुळ माळदुन.
JOS 10:31 बाक यहोशू सप्पा इस्त्राएलीगोळ सांगुळ लिब्ना नगर टु नळुकु लाकीश नगर इक होदुन, अदिक आऊन विरूद्‍ध छावनी हाक्कु लळुसदुन;
JOS 10:32 अदिक यहोवा लाकीश उक इस्त्राएल इन कय दा माळ कोंडुन, अदिक दुसरा दिशी आव आऊक जीत्स कोंडुन; अदिक ह्यांग आव लिब्ना नगर इन सप्पा प्राणीगोळ इक तलवार देल कोंदीदुन हांग अच आव लाकीश नगर से भी माळदुन.
JOS 10:33 आग गेजेर उन राजा होराम लाकीश नगर इन मदत माळोर साटी येरेदुन; अदिक यहोशू लॉकुर सांगुळ आऊक भी हिंग बळदुन कि आऊन साटी यारीकु जीत्ता बिटीदिल.
JOS 10:34 बाक यहोशू सप्पा इस्त्राएली सांगुळ लाकीश नगर टु नळुकु एग्लोन नगर इक होदुन; अदिक आऊन विरूद्‍ध छावनी हाक्कु युध्द माळली कुरतुन;
JOS 10:35 अदिक अदा दिशी आंदुर अदरी ताकोम कोंडुर, अदिक अदुर दा ईरावाळेर सप्पा प्राणीगोळी तलवार देल कोंदुर; अदिक अदा दिशी ह्यांग आव लाकीश नगर इन सप्पा प्राणीगोळ्द सत्यानाश माळ कोंडुन हांगा आव एग्लोन नगर से भी माळदुर.
JOS 10:36 बाक यहोशू सप्पा इस्त्राएलीगोळ सांगुळ एग्लोन नगर टु नळुकु हेब्रोन नगर इक होदुन, अदिक अदुर से भी लळाई माळदुन;
JOS 10:37 अदिक आंदुर अदरी ताकोम कोंडुर, अदिक अदरी अदिक अदुर राजा अदिक सप्पा प्राणीगोळी तलवार देल कोंदुर; ह्यांग यहोशू एग्लोन नगर से माळदुन हांग अच आव हेब्रोन नगर दा भी यारीकु जीत्ता बिटीदिल; आव अदरी अदिक अलेव सप्पा प्राणीगोळ इक नष्ट माळ बुट्टुन.
JOS 10:38 आग यहोशू सप्पा इस्त्राएली सांगुळ तिर्गकु दबीर नगर इक होदुन, अदिक आंदुर से लळाई माळदुन;
JOS 10:39 अदिक राजा सांगुळ आऊक अदिक आऊन सप्पा ऊरगोळ इक ताकोम कोंडुन; अदिक आंदुर आंदरी तलवार देल घात माळदुर; अदिक नगर दा यारीकु जीत्ता बिटिदील, ह्यांग यहोशू हेब्रोन अदिक लिब्ना अदिक आऊन राजा से माळदुर हांग अच आव दबीर अदिक आऊन राजा से भी माळदुन.
JOS 10:40 ई प्रकार यहोशू आ सप्पा द्याश इक , मतलब पहाळी द्याश, दक्षिण द्याश, ल्यालमागोळोव द्याश, अदिक ढलान द्याश इक, आंदुर सप्पा राजागोळ सांगुळ कोंदुर; अदिक इस्त्राएल इन परमेश्वर यहोवा अन आग्या अन अनुसार यारीकु जीत्ता बिटीदिल, बल्की यास प्राणी ईरव सप्पा अन सत्यानाश माळ कोंडुर.
JOS 10:41 अदिक यहोशू दक्षिण इन कादेशबर्ने नगर टु गाजा नगर ताका, अदिक उत्तर इन गिबोन नगर ताका सप्पा गोशेन द्याश इन लॉकुरी कोंदुर.
JOS 10:42 ई सप्पा राजागोळी आंदुर द्याश इन सांगुळ यहोशू ऊंद अच समय दा ताकोम कोंडुन, यतिकी इस्त्राएल उन परमेश्वर यहोवा इस्त्राएलीगोळ दी टु लळुसोन.
JOS 10:43 आग यहोशू सप्पा इस्त्राएलीगोळ सांगुळ गिलगाल इन छावनी दा वापस बंदुन.
JOS 11:1 ईद केळकु हासोर इन राजा याबीन मादोन नगर इन राजा योबाब, अदिक शिम्रोन नगर अदिक अक्षाप नगर इन राजागोळी,
JOS 11:2 अदिक जो जो राजा उत्तर इन दी पहाळी द्याश दा, अदिक किन्नेरेत इन दक्षिण इन अराबा दा, अदिक ल्यालमा अन द्याश दा, अदिक पश्चिम इन दी दोर नगर इन ऊँचा द्याश दा ईरतोगोर, आंदरी
JOS 11:3 अदिक पूर्व पश्चिम येढ्ढु दीकळोर ईरावाळेर कनानीगोळ, अदिक एमोरियों, हित्तीगोळी, परिज्जीगोळी, अदिक पहाळी यबूसीगोळी, अदिक मिस्पा द्याश दा हेर्मोन पहाळी इन ल्यालमा ईरावाळेर हिब्बीगोळी बातणी कळुदुर.
JOS 11:4 अदिक आंदुर तान तान सेना अन सांगुळ, जो समुद्र अन किनारा धुळागोळ घाई हापाळ ईरोद, मीलुस्कु व्हार्या बंदुर, अदिक आंदुर सांगुळ हापाळ सा घ्वाळा अदिक रथ भी ईरव.
JOS 11:5 आग आंदुर सप्पा राजा सम माळकु जमा आदुर, अदिक इस्त्राएलगोळ सांगुळ लळाई माळोर साटी मेरोम हेसुर इन क्यार्रा अन हाती बंदकु ऊंद सांगुळ छावनी हाकदुर.
JOS 11:6 आग यहोवा यहोशू से अंदुन, “आंदुर से अंजबाळ, यतिकी नाळ ना ईदा समय ना आ सप्पा मुंदरी इस्त्राएलगोळ वश दा माळकु कोनसुस बुळाईन; आग नी आंदुर घ्वाळा अन ट्वांगरा अन नश कळसुस बुळेत, अदिक आंदुर रथ होत्ताकु भस्म माळ बुळेत.”
JOS 11:7 अदिक यहोशू सप्पा योध्दा अन सांगुळ मेरोम हेसुर इन क्यार्रा अन हाती पोहचुस्कु अचानक आंदुर मा आक्रमण माळदुर.
JOS 11:8 अदिक यहोवा आंदरी इस्त्राएलगोळ कय दा माळ कोंडुर, इदुरसाटी आंदुर आंदरी कोंदुर, अदिक धोळ्द नगर सीदोन अदिक मिस्त्रपोतमैम ताका, अदिक पूर्व अन दी मिस्पे अन मैदान ताका आंदुर पीछा माळदुन; अदिक आंदरी कोंदुन, अदिक आंदुर दा टु यारीकु जीत्ता बिटीदील.
JOS 11:9 आग यहोशू यहोवा अन आग्या अन अनुसार आंदुर से माळदुन, मतलब आंदुर घ्वाळा अन ट्वांगरा अन नश कळसुस दुन, अदिक आंदुर रथ बेक्‍की दा होत्‍ताकु भस्म माळ बुट्टुर.
JOS 11:10 आ समय यहोशू वयाळकु हासोर नगर इक जो पयले आ सप्पा राज्यगोळ्द मुख्य नगर ईरोद ताकोम कोंडुन, अदिक अलेव राजा अक तलवार देल कोंद बुट्टुन.
JOS 11:11 अदिक यास प्राणी अल ईरव आ सप्पा अक आंदुर तलवार देल कोंदकु सत्यानाश माळदुर; अदिक यातोदु प्राणी इक जीत्ता बिटीदील, अदिक हासोर इक यहोशू बेक्‍की हचकु होताक बुट्टुन.
JOS 11:12 अदिक आ सप्पा नगरगोळी अलेर सप्‍पा राजागोळ सांगुळ यहोशू ताकोम कोंडुन, अदिक यहोवा अन दास मूसा अन आग्या अन अनुसार आंदरी तलवार देल घात माळकु सत्यानाश माळदुन
JOS 11:13 लेकीन हासोर उक बिटकु, यारी यहोशू होताक्स बुट्टुन, इस्त्राएल अदिक यातोदारा नगर इक जो तान पहाळी मा बसुस्कु ईरोद होताकिदील.
JOS 11:14 अदिक ई नगर इन जनावर अदिक ईंदुर सप्पा लूट इक इस्त्राएलगोळ तांद माळ बुट्टुर; लेकीन मंळसागोळी आंदुर तलवार देल कोंद बुट्टुर, ईल ताका कि आंदुर्द सत्यानाश माळ बुट्टुर, कि ऊंद भी प्राणी इक जीत्ता बिटकु आगीदील.
JOS 11:15 जो आग्या यहोवा तान दास मूसा अक कोटीदुन अदुर्दा अनुसार मूसा यहोशू उक आग्या कोटीदुन अदिक हांगा यहोशू भी माळदुन , जो जो आग्या यहोवा मूसा अक कोटीदुन अऊर दा टु यहोशू अदुर दा यातोदु भी पुरा माळ्द बीना बिटीदील.
JOS 11:16 आग यहोशू आ सप्पा द्याश इक, मतलब पहाळी द्याश, अदिक सप्पा नेगेब द्याश, अदिक गोशेन द्याश, अदिक ल्यालमागोळोव द्याश, अराबा, अदिक इस्त्राएल इन पहाळी द्याश, अदिक अऊर्द ल्यालमागोळोव द्याश इक,
JOS 11:17 हालाक हेसुर इन पहाळी टु हुडु , जो सेईर इन ऊचाई मा आद, बालगाद नगर ताका, जो लबानोन इन मैदान दा हेर्मोन पर्वत इन ल्यालमा आद, याट द्याशगोळ आव आ सप्पा द्याशगोळी जीक्स कोंडुर अदिक आ द्याश इन सप्पा राजागोळी हुडुकु कोंद बुट्टुर.
JOS 11:18 आ सप्पा राजागोळ से युद्ध माळतेला यहोशू उक हापाळ दिन हतदव.
JOS 11:19 गिबोन इन निवासी हिब्बीगोळी बिटकु अदिक यातारा भी लॉकुर इस्त्राएलगोळ से मेल मिलाप माळीदिल; अदिक सप्पा नगरगोळी आंदुर लळाई माळकु जीक्स कोंडुर.
JOS 11:20 यतिकी यहोवा अन जो मनसा ईरोद, कि तान आ आग्या अन अनुसार जो आव मूसा अक कोटीदुन आंदुर मा येनु दया माळ बाळुल, बल्की सत्यानाश माळ बुळुल, ई कारण आव आंदुर मन हिंग कठोर माळ बुट्टुर, कि आंदुर इस्त्राएलगोळ्द सामना माळकु आंदुर से युद्ध माळदुर.
JOS 11:21 आ समय यहोशू पहाळी द्याश दा, बंदकु हेब्रोन, दबीर, अनाब, बल्‍की यहूदा अदिक इस्त्राएल सप्पा पहाळी द्याश दा ईरावाळेर अनाकीगोळ्द नाश माळदुर; यहोशू नगरगोळ सांगुळ आंदुर सत्यानाश माळ कोंडुन.
JOS 11:22 इस्त्राएल इन द्याश दा यावारा अनाकी ईतीदील; केवल गाजा, गत, अदिक अश्दोद नगर दा यारारा यारारा ईतोदुर.
JOS 11:23 ह्यांग यहोवा मूसा से अंदीदुन, हांग अच यहोशू अद सप्पा द्याश ताकोम कोंडुन; अदिक आऊक इस्त्राएल इन गोत्र अदिक कुलगोळ अनुसार वाट्सकु आंदरी कोट्ट बुट्टुन. अदिक द्याश इक लळाई देल शांती सिक्त.
JOS 12:1 यरदन गांगा अन आप्पाटी सुर्योदय दी, मतलब अर्नोन घाटी टु हुडुकु हेर्मोन पर्वत ताका द्याश, अदिक सप्पा पुर्वी अराबा अन या राजागोळी इस्त्राएलगोळ कोंदकु आदुर आ द्याश इक आंदुर तान अधिकार दा माळ कोंडीदुर अव ईव हुव;
JOS 12:2 एमोरियो नव हेशबोनवासी राजा सीहोन, जो अर्नोन घाटी इन बीच इन नगर इक बिटकु यब्बोक गांगा ताका, जो अम्मोनीगोळ्द सीमा आद, आरधा गिलाद मा,
JOS 12:3 अदिक किन्नेरेत हेसुर इन क्यार्रा टु हुडुकु बेत्यशीमोत टु आगकु अराबा अन क्यार्रा ताका, जो खारा समुद्र भी कहलुसतद, पूर्व अन दीकळोद अराबा, अदिक दक्षिण इन दी पिसगा अन ढलान इन ल्यालमा अन द्याश मा प्रभुता ईटतान.
JOS 12:4 बाक मीग्दव रपाईयो नगर दा टु बाशान इन राजा ओग इन द्याश ईरोद, जो अश्तारोत नगर अदिक एद्रेई नगर दा ईरतोगोन,
JOS 12:5 अदिक हेर्मोन पर्वत सल्का, अदिक गशूरीगोळ, अदिक माकिगोळ्द सीमा ताका कुल बाशान दा, अदिक हेशबोन इन राजा सीहोन इन सीमा ताका आरदा गिलाद दा भी शासन माळतोगोन.
JOS 12:6 इस्त्राएलगोळ अदिक यहोवा अन दास मूसा ईंदरी कोंद बुट्टुन; अदिक यहोवा अन दास मूसा आंदुर्द द्याश रूबेनिगोळ अदिक गादीगोळ अदिक मनश्शे अन आरधा गोत्र अन लॉकुरी कोट्ट बुट्टुन.
JOS 12:7 यरदन इन पश्चिम इन दी, लबानोन इन मैदान दाकळोद बालगाद नगर टु हुडुकु सेईर इन ऊचाई इन हालाक पहाळी ताका द्याश इन याता राजागोळी यहोशू अदिक इस्त्राएलगोळ कोंदकु आंदुर द्याश इस्त्राएल उन गोत्र अदिक कुलगोळ अनुसार भाग माळकु कोटीदुन अव ईव हुव
JOS 12:8 हित्ती, अदिक एमोरी, अदिक कनानी, अदिक परिज्जी, अदिक हिब्बी, अदिक यबूसी, जो पहाळी द्याश दा, अदिक ल्यालमागोळ द्याश दा, अदिक अराबा दा, अदिक उतार द्याश दा अदिक आळी दा, अदिक दक्षिणी द्याश दा ईरतोगोर.
JOS 12:9 ऊंद यरीहो अन राजा; ऊंद बेतेल इन हाती आई नगर इन राजा;
JOS 12:10 ऊंद यरूशलेम उन राजा; ऊंद हेब्रोन उन राजा;
JOS 12:11 ऊंद, यर्मूत इन राजा; ऊंद, लाकीश उन राजा;
JOS 12:12 ऊंद, एग्लोन उन राजा; ऊंद, गेजेर उन राजा;
JOS 12:13 ऊंद, दबीर उन राजा; ऊंद, गेदेर उन राजा;
JOS 12:14 ऊंद, होर्मा अन राजा; ऊंद, अराद उन राजा;
JOS 12:15 ऊंद, लिब्ना अन राजा; ऊंद अदुल्लाम उन राजा;
JOS 12:16 ऊंद, मक्केदा अन राजा; ऊंद बेतेल उन राजा;
JOS 12:17 ऊंद, तप्पूह अन राजा; ऊंद हेपेर उन राजा;
JOS 12:18 ऊंद अपेक उन राजा; ऊंद, लश्शारोन उन राजा;
JOS 12:19 ऊंद मादोन उन राजा; ऊंद, हासोर उन राजा;
JOS 12:20 ऊंद, शिम्रोन्मरोन उन राजा; ऊंद, अक्षाप उन राजा;
JOS 12:21 ऊंद तानाक उन राजा; ऊंद, मगिद्दो अन राजा;
JOS 12:22 ऊंद, केदेश उन राजा; ऊंद, कर्मेल दा योकनाम उन राजा;
JOS 12:23 ऊंद, दोर हेसुर ईनव धोळ्द द्याश इन दोर इन राजा, ऊंद, गिलगाल इन गोयीन इन राजा;
JOS 12:24 अदिक ऊंद तिर्सा अन राजा; ई प्रकार सप्पा राजा इकतीस आदुर.
JOS 13:1 यहोशू बाट्ट अदिक हापाळ ऊमर ईनव आगेगीदुन; अदिक यहोवा आऊन से अंदुन, “नी बाट्ट अदिक हापाळ ऊमर ईनव आगेग्या, अदिक हापाळ द्याश ईतोग्याव, जो इस्त्राएल इन अधिकार दा ईगासताका बरलीकाव.
JOS 13:2 ईव द्याश ईतोग्याव, मतलब पलिश्ती इन सप्पा प्रांन्त, अदिक सप्पा गशूरी द्याश
JOS 13:3 मिस्त्र अन मुंद शीहोर गांगा टु हुडुकु उत्तर इन दी एक्रोन इन सीमा ताका जो कनानीगोळ्द भाग आळुकु आगतद; अदिक पलिश्ती इन अईदु सरदार, मतलब गाजा, अश्दोद, अश्कलोन, गत, अदिक एक्रोन इन लॉकुर, अदिक दक्षिणी अदिक अव्वी जाती भी,
JOS 13:4 बाक अपेक नगर अदिक एमोरियो अन सीमा ताका कनानीगोळ्द सप्‍पा द्याश अदिक सीदोनीगोळ्द मारा हेसुर इन द्याश.
JOS 13:5 बाक गबालिगोळ्द द्याश, अदिक सुर्योदय इन दी हेर्मोन पहाळी अन ल्यालमा अन बालगाद नगर टु हुडुकु हमात इन घाटी ताका सप्पा लबानोन द्याश,
JOS 13:6 बाक लबानोन टु हुडुकु मिस्त्रपोतमैम ताका सीदोनीगोळ्द पहाळी द्याश इन निवासी. ईंदरी ना इस्त्राएलगोळ्द मुंदु टु तेगु बुळाईन; ईट आगुल कि नी नान आग्या अन अनुसार आंदुर अधिकार इस्त्राएलगोळी वाट्स कोम.
JOS 13:7 इदुरसाटी नी ईग ई द्याश इक ऊंम्बत गोत्रगोळ अदिक मनश्शे अन आरधा गोत्र अक आंदुर भाग आगोर साटी वाट्सकोम.”
JOS 13:8 रूबेनिगोळ अदिक गादीगोळ इक रा अद भाग सीकेगीत. यदरी मूसा आंदरी यरदन इन पूर्व इन दी कोटीदुन, यतिकी यहोवा अन दास मूसा आंदरी कोटीदुन.
JOS 13:9 मतलब अर्नोन हेसुर इन घाटी इन किनारा अन अरोएर टु हुडुकु, अदिक अदा घाटी इन बीच नगर इक बिटकु दीबोन ताका मेदबा अन हातीगोळोद सप्‍पा चौरस द्याश;
JOS 13:10 अदिक अम्मोनिगोळ्द सीमा ताका हेशबोन दा ईरावाळेर एमोरियो अन राजा सीहोन उन सप्पा नगर;
JOS 13:11 अदिक गिलाद द्याश, अदिक गशूरीगोळ अदिक माकिवासिगोळ्द सीमा अदिक सप्पा हेर्मोन पर्वत, अदिक सल्का नगर ताका सप्पा बाशान प्रदेश,
JOS 13:12 बाक अश्तारोत अदिक एद्रेई नगर दा बरावाळेर आ ओग इन सप्पा राज्य जो रपाई जाती दा टु आबना ऊळदोगीदुन; यतिकी ईंदरी मूसा कोंदकु आंदुर प्रजा अक आ द्याश टु तेगु बुटीदुन.
JOS 13:13 लेकीन इस्त्राएलीगोळ गशूरीगोळ अदिक माकिगोळ इक आंदुर द्याश दा टु तेगदीदील; इदुरसाटी हशूरी अदिक माकी जाती इस्त्राएलीगोळ बीच दा ईंद ताका ईरतार.
JOS 13:14 अदिक लेवी इन वंशगोळी आव येनु भाग कोटीदील; यतिकी इस्त्राएल उन परमेश्वर यहोवा अन वचन इन अनुसार आऊंदा येर्सद होमबली आंदुर साटी भाग ठहरूस्याद.
JOS 13:15 मूसा जमीन इन भाग रूबेन उन कुल इन परिवारगोळी आंदुर्द निज भाग इन रूप दा वाट्स कोंडीदुन,
JOS 13:16 मतलब अर्नोन हेसुर इन घाटी इन किनारा अन अरोएर नगर टु हुडुकु अदिक अदा घाटी इन बीच इन नगर इक बिटकु मेदबा अन हाती इन सप्पा चौरस द्याश;
JOS 13:17 बाक चौरस द्याश दाकळोद हेशबोन अदिक अदुर सप्पा ऊर; बाक दीबोन, बामोतबाल, बेतबाल्मोन,
JOS 13:18 यहसा, कदेमोत, मेपात,
JOS 13:19 किर्यातैम, सिबमा, अदिक तराई दाकळोव पहाळी मा बसुस्द सेरेथश्शहर,
JOS 13:20 बेतपोर, पिसगा अन ढलान अदिक बेत्यशीमोत,
JOS 13:21 मतलब चौरस द्याश दा कुर्तकु हेशबोन दा कुरावाळेर एमोरियो अन आ राजा सीहोन इन राज्य अन सप्पा नगर यदरी मूसा कोंद बुटीदुन. मूसा एवी, रेकेम, सूर, हूर, अदिक रेबा हेसुर इन मिद्यान इन प्रधानगोळ इक भी कोंद बुटीदुन जो सीहोन उन ठहरूसकु शासक अदिक अदा द्याश इन निवासी ईरोर.
JOS 13:22 अदिक इस्त्राएलीगोळ आंदुर अदिक आंदरी कोनावाळेर सांगुळ बोर उन पार भविष्य हेळावाळा बिलाम उक भी तलवार देल कोंद बुट्टुर.
JOS 13:23 अदिक रूबेनिगोळ्द सीमा यरदन गांगा अन किनारा ठहरूस्त, रूबेनिगोळ्द भाग आंदुर कुलगोळ अनुसार नगरगोळ अदिक ऊरगोळ्द सांगुळ ईल्या ठहरूस्त.
JOS 13:24 बाक मूसा गाद इन गोत्र वाळेर इक भी कुलगोळ अनुसार आंदुर खुद इन भाग माळकु वाट्स बुट्टुन.
JOS 13:25 आग ईद ठहरूस्त, मतलब याजेर अदिक गिलाद इन सप्पा नगर, अदिक रब्बा नगर इन मुंदळोद अरोएर नगर ताका अम्मोनिगोळ्द आरधा द्याश,
JOS 13:26 अदिक हेशबोन टु रामत-मिस्पे अदिक बतोनीम ताका, अदिक महनैम टु दबीर इन सीमा ताका,
JOS 13:27 अदिक घाटी दा बेतहारम, बेतनिम्रा, सुक्कोत, अदिक सापोन, अदिक हेशबोन इन राजा सीहोन इन राज्य अन मीकदव भाग, अदिक किन्नेरेत हेसुर इन क्यार्रा अन क्वाना ताका, यरदन इन पूर्व इन दी अद द्याश यदुर सीमा यरदन गांगा आद.
JOS 13:28 गादी लॉकुर्द भाग आंदुर कुलगोळ अनुसार नगरगोळ अदिक ऊरगोळ सांगुळ ईदा ठहरूस्त.
JOS 13:29 बाक मूसा मनश्शे अन आरधा गोत्र वाळेर इक भी आंदुर खुद इन भाग माळकु कोट्टुर; अद मनश्शेगोळ्द आरधा गोत्र अन खुद इन भाग आंदुर कुलगोळ अनुसार ठहरूस्त.
JOS 13:30 अद ईद हुन, मतलब महनैम टु हुडुकु बाशान उन राजा ओग उन राजा अन सप्पा द्याश, अदिक बाशान दा बसुस्द आईर उन साठ बस्तीगोळ,
JOS 13:31 अदिक गिलाद इन आरधा भाग, अदिक अश्तारोत, अदिक एद्रेई, जो बाशान दा ओग इन राज्य अन नगर ईरव, ईव मनश्शे अन पार माकीर उन वंश इन मतलब माकीर उन आरधा वंश इन खुद इन भाग कुलगोळ अनुसार ठहरूसदव.
JOS 13:32 जो भाग मूसा मोआब इन मैदान दा यरीहो अन हाती इन यरदन इन पूर्व इन दी वाट्स बुट्टुन अव ईवा हु.
JOS 13:33 लेकीन लेवी गोत्र अक मूसा येनु भाग कोटीदील; इस्त्राएल उन परमेश्वर यहोवा अच तान वचन इन अनुसार आंदुर भाग ठहरूसदुन.
JOS 14:1 जो-जो भाग इस्त्राएलगोळ कनान द्याश दा नोळदुर, आंदरी एलीआजर याजक, अदिक नून उन पार यहोशू, अदिक इस्त्राएली गोत्रगोळ पुर्वज इन घराना अन मुख्य मुख्य मंळसागोळ आंदरी कोट्टुर आंदुर ईंदुर उर.
JOS 14:2 जो आग्या यहोवा मूसा अन द्वारा साळे ऊंम्बत गोत्रगोळ साटी कोटीदुन, अदुर अनुसार आंदुर हिस्सा चिट्टी हाक्कु कोटकु आदव.
JOS 14:3 मूसा रा येढ्ढवार गोत्रगोळ हिस्सा यरदन इन आप्पाटी कोटीदुन; लेकीन लेवीगोळी आव आंदरी येनु भाग कोटीदील.
JOS 14:4 यूसुफ उन वंश इन रा येढ्ढ गोत्र आगीदव, मतलब मनश्शे अदिक एप्रैम; अदिक आ द्याश दा लेवीगोळी येनु भाग कोटकु आगीदील, सिर्फ ईरव नगर, अदिक जनावर अदिक धन ईटोरसाटी चराईगोळ आंदरी सिकदव.
JOS 14:5 जो आग्या यहोवा मूसा अक कोटीदुन अदुर अनुसार इस्त्राएलगोळ माळदुर; अदिक आंदुर द्याश इक वाट्स बुट्टुर.
JOS 14:6 आग यहूदा यहोशू उन हाती गिलगाल दा बंदुन; अदिक कनजी यपुन्ने उन पार कालेब आऊन से अंदुन, “नी जान्सतीद्या कि यहोवा कादेशबर्ने दा परमेश्वर उन जन मूसा से नान अदिक नीन बारा दा येन अंदीदुन.
JOS 14:7 याग यहोवा अन दास मूसा नानी ई द्याश इन भेद ताकोमोर साटी कादेशबर्ने टु कळीदुन आग ना चालीस वर्ष इनव ईरीन; अदिक सच्चा मन देल आऊन हाती बातणी तंदीन.
JOS 14:8 अदिक नान साथी जो नान सांगुळ बंदीदुर आंदुर रा प्रजा अन लॉकुर्द मन निराश माळ बुट्टुर, लेकीन ना तान परमेश्वर यहोवा अन पुरा रीति देल मात मान्सदीन.
JOS 14:9 आग आ दिशी मूसा किर्‍या तीनकु पुरा रीति देल ‘नान परमेश्वर उन मातगोळ्द अनुकरण माळ्यान, ईद कारण नि:सन्देह याता जमीन मा नी तान काल मंळस्या अद सदा साटी नीन अदिक नीन वंश इन हिस्सा आदीत.’
JOS 14:10 अदिक ईग नोळ, यागुटु यहोवा मूसा से ईद वचन अंदीदुन आग टु पैतालीस वर्ष आगेग्याव, यदुर दा इस्त्राएलगोळ आळी दा वयाळतेला ईत्तुर; आंदुर दा यहोवा तान अनोद अनुसार नानी जीत्ता ईटदुन; अदिक ईग ना पच्यासी वर्ष ईनव आईन.
JOS 14:11 याट ताकत मूसा अन कळोद समय दा नान दा ईरोद आटा ताकत ईग भी नान दा आद; युद्ध माळोर साटी बुळ्क व्हार्या होगोर बरोर साटी याट आ समय नान दा सामर्थ्य ईरोद आट ईग भी नान दा सामर्थ्य आद.
JOS 14:12 इदुरसाटी ईग अद पहाळी नानी कोळ यदुर चर्चा यहोवा आ दिशी माळीदुन; नी रा आ दिशी केळीद्या कि अल अनाकी वंश इनोर ईरतार, अदिक धोड्डेव धोड्डेव गढ़वाळा नगर भी आव; लेकीन येन पता सम्भव आद कि यहोवा नान सांगुळ ईत्तान, अदिक आऊन अनोद अनुसार ना आंदरी आंदुर द्याश दा टु तेगु कोमाईन.”
JOS 14:13 आग यहोशू आऊक आशीर्वाद कोट्टुन; अदिक हेब्रोन नगर यपुन्ने अन पार कालेब उन भाग माळ बुट्टुन.
JOS 14:14 ई कारण हेब्रोन नगर कनजी यपुन्ने अन पार कालेब उन बाग ईंद ताका बन्सकु आद, यतिकी आव इस्त्राएल उन परमेश्वर यहोवा अन पुरा रीति देल अनुसरण माळीदुन.
JOS 14:15 पयले हेब्रोन इन हेसुर किर्यतर्बा ईरोद; आव अर्बा अनाकीगोळ दा सबसे धोड्डेव मंळसा ईरोन. अदिक आ द्याश इक लळाई देल शांती सिक्त.
JOS 15:1 यहूदा अन गोत्र अन भाग आंदुर कुलगोळ अनुसार चिट्टी हाकदुर देल एदोम इन सीमा ताका, अदिक दक्षिण इन दी सीन इन आळी ताका जो दक्षिणी सीमा मा ठहरूस्त.
JOS 15:2 आंदुर भाग इन दक्षिणी सीमा मृत समुद्र अन आ सिरवाला कोल टु चालु आत जो दक्षिण इन दी वाळुस्कु आद;
JOS 15:3 अदिक अद अक्रब्बीम हेसुर इन चळाई इन दक्षिण दी टु होटकु सीन आगतेला कादेशबर्ने अन दक्षिण दी येरेत, बाक हेस्रोन उन आगकु अद्दार इक येरकु कर्कआ दी तीर्गेत,
JOS 15:4 अल टु अस्मोन आगतेला अद मिस्त्र अन नाला मा होळ्त, अदिक आ सीमा अन अन्त समुद्र आत. नीम्द दक्षिणी सीमा ईदा आदीत.
JOS 15:5 बाक पुर्वी सीमा यरदन इन मुहाना ताका मृत समुद्र अच ठहरूस्त, अदिक उत्तर दिशा अन सीमा यरदन इन मुहाना अन हाती ताल इन कोल टु चालु माळकु,
JOS 15:6 बेथोग्ला अक येरतेला बेतराबा अन उत्तर दी आगकु रूबेनी बोहन हेसुर इन कल्ल ताका येरेत;
JOS 15:7 अदिक अदा सीमा आकोर हेसुर इन झरना टु दबीर दी येरेत, अदिक उत्तर दी टु आगतेला गिलगाल दी डोक्त जो झरना अन दक्षिणी दी अदुम्मीम इन चळाई इन मुंद आद; अल टु अद एनशेमेश हेसुर इन झरना अन हाती पोहचुस्कु एनरोगेल मा होळ्त;
JOS 15:8 बाक अदा सीमा हिन्नोन उन पार उन तराई टु आगकु यबूसी जो यरूशलेम अनकु आगतद इन दक्षिण दी टु येरतेला आ पहाळी इन चोटी मा पोहचुस्त, जो पश्चिम दी अदिक हिन्नोम इन तराई इन मुंद अदिक रपाईम इन तराई इन उत्तर इन क्वाना मा आद;
JOS 15:9 बाक अदा सीमा आ पहाळी इन चोटी टु नेप्तोह हेसुर इन सोता अक होटोत, अदिक एप्रोन पहाळी इन नगरगोळ मा होळ्त; बाक अल टु बाला अक जो किर्यत्यारीम भी कहलुसतद पोहचुस्त;
JOS 15:10 बाक अद बाला टु पश्चिम इन दी तिर्गकु सेईर पहाळी ताका पोहचुस्त अदिक यारीम पहाळी जो कसालोन भी कहलुसतद, अदुर उत्तर दिशा टु आगकु बेतशेमेश इक ईळदोत, अदिक अल टु तिम्ना मा होळ्त;
JOS 15:11 अल टु अद सीमा एक्रोन इन उत्तर दिशा अन हाती टु आगतेला शिक्करोन होत, अदिक बाला पहाळी आगकु यब्नेल मा होळ्त; अदिक आ सीमा अन अन्त समुद्र अन तट मा आत.
JOS 15:12 अदिक पश्चिम इन सीमा महासमुद्र अन तट ठहरूस्त. यहूदागोळी जो भाग आंदुर कुलगोळ अनुसार सिक्त अदुर नाकु दिकळोद सीमा ईदा आत.
JOS 15:13 यपुन्ने अन पार कालेब उक आव यहोवा अन आग्या अन अनुसार यहूदियागोळ बीच भाग कोट्टुन, मतलब किर्यतर्बा जो हेब्रोन भी कहलुसतद आव अर्बा अनाक उन आप्प ईरोन.
JOS 15:14 अदिक कालेब अल टु शेशै, अहीमन, अदिक तल्मै हेसुर इन अनाक उन मुरू चिकोरी तेगु बुट्टुर.
JOS 15:15 बाक अल टु आव दबीर इन निवासीगोळ मा येरेदुन; पूर्वकाल दा रा दबीर उन हेसुर किर्यत्सेपेर ईरोन.
JOS 15:16 अदिक कालेब अंदुन, “जो किर्यत्सेपेर उक हारूस्यान ना तान पोर अकसा अन मदा आऊन से माळ कोळाईन.”
JOS 15:17 आग कालेब उन वार्ट कनजी इन पार ओत्नीएल आकिन से मदा माळदुन; अदिक आव आऊन से तान पोर अकसा अन मदा माळ बुट्टुन.
JOS 15:18 याग आक आऊन हाती बंदुर, आग आव आकी आकिन आप्प उन से येनारा जमीन बेळली उकसुसदुन, बाक आक तान गदहा मा टु ईळदुर, अदिक कालेब आकिन से केळदुन, “नी येन चाहसत्या?”
JOS 15:19 आक अंदुर नानी आशीर्वाद कोळ; “नी नानी दक्षिण द्याश दाकळोद थ्वाळासा जागा रा कोट्ट बुट्ट, नानी नीर इन झरना भी कोळ.” आग आव म्याकळव झरना, ल्यालमाकळव झरना, येढ्ढु आकी कोट बुट्टुन.
JOS 15:20 यहूदा अन गोत्र अन भाग रा आंदुर कुलगोळ अनुसार ईदा ठहरूस्त.
JOS 15:21 यहूदा अन गोत्र अन किनारा मा ईरावाळेर नगर दक्षिण द्याश दा एदोम इन सीमा दी ईव आव, मतलब कबसेल, एदेर यागूर,
JOS 15:22 कीना, दीमोना, अदादा,
JOS 15:23 केदेश, हासोर, यित्नान,
JOS 15:24 जीप, तेलेम, बालोत,
JOS 15:25 हासोर्हदत्ता, करिय्योथेस्र्नोन, जो हासोर भी कहलुसतद,
JOS 15:26 अदिक अमाम, शमा, मोलादा,
JOS 15:27 हसर्गद्दा, हेशमोन, बेत्पालेत,
JOS 15:28 हसर्शूआल, बेर्शेबा, बिज्योत्या,
JOS 15:29 बाला, इय्यीम, एसेम,
JOS 15:30 एलतोलद, कसील, होर्मा,
JOS 15:31 सिकलग, मदमन्ना, सनसन्ना,
JOS 15:32 लबाओत, शिल्हीम, ऐन, अदिक रिम्मोन; ईव सप्पा नगर उन्तीस आव, अदिक ईऊरव ऊर भी आव.
JOS 15:33 ल्यालमागोळोव द्याश दा ईव आव: मतलब एशताओल, सोरा, अशना,
JOS 15:34 जानोह, एनगन्नीम, तप्पूह, एनाम,
JOS 15:35 यर्मूत, अदुल्लाम, सोको, अजेका,
JOS 15:36 शारैम, अदीतैम, गदेरा, अदिक गदेरोतैम; ईव सप्पा चौदा नगर आव, अदिक ईऊरव ऊर भी आव.
JOS 15:37 बाक सनान, हदाशा, मिगदलगाद,
JOS 15:38 दिलान, मिस्पे, योक्तेल,
JOS 15:39 लाकीश, बोस्कत, एग्लोन,
JOS 15:40 कब्बोन, लहमास, कितलीश,
JOS 15:41 गदेरोत, बेतदागोन, नामा, अदिक मक्केदा; ईव सोलाह नगर आव, अदिक ईऊरव ऊर भी आव.
JOS 15:42 बाक लिब्ना, एतेर, आशान,
JOS 15:43 यिप्ताह, अशना, नसीब,
JOS 15:44 कीला, अकजीब अदिक मारेशा; ईव ऊम्बत नगर आव, अदिक ईऊरव ऊर भी आव.
JOS 15:45 बाक नगरगोळ अदिक ऊरगोळ सांगुळ एक्रोन,
JOS 15:46 अदिक एक्रोन टु हुडुकु समुद्र ताका, तान तान ऊरगोळ सांगुळ यास नगर अश्दोद इन दी आव.
JOS 15:47 बाक तान नगरगोळ अदिक ऊरगोळ सांगुळ अश्दोद, अदिक गाजा, बल्‍की मिस्त्र अन नाला ताका अदिक महासमुद्र अन तट ताका यास नगर आव.
JOS 15:48 पहाळी द्याश दा ईव आव; मतलब शामीर, यत्तीर, सोको,
JOS 15:49 दन्ना, किर्यत्सन्ना जो दबीर भी कहलुसतान,
JOS 15:50 अनाब, एशतमो, आनीम,
JOS 15:51 गोशेन, होलोन, अदिक गीलो; ईव हनुन नगर आव, अदिक ईंदुरव ऊर भी आव.
JOS 15:52 बाक अराब, दूमा, एशान,
JOS 15:53 यानीम, बेत्तप्पूह, अपेका,
JOS 15:54 हुमता, किर्यतर्बा जो हेब्रोन भी कहलुसतान, अदिक सीओर, ईव ऊम्बत नगर आव, अदिक ईंदुरव ऊर भी आव.
JOS 15:55 बाक माओन, कर्मेल, जीप, यूता,
JOS 15:56 यिज्रेल, योकदाम, जानोह,
JOS 15:57 कैन, गिबा, अदिक तिम्ना; ईव हत्त नगर आव, अदिक ईंदुरव ऊर भी आव.
JOS 15:58 बाक हलहूल, बेतसूर, गदोर,
JOS 15:59 मरात, बेतनोत, अदिक एलतकोन; ईव आर नगर आव, अदिक ईऊरव ऊर भी आव.
JOS 15:60 बाक किर्यतबाल जो किर्यत्यारीम भी कहलुसतद, अदिक रब्बा; ईव येढ्ढ नगर आव, अदिक ईऊरव ऊर भी आव.
JOS 15:61 आळी दा ईव नगर आव: मतलब बेतराबा, मिद्दीन, सकाका;
JOS 15:62 निबशान, लोनवाला नगर, अदिक एनगदी, ईव आर नगर आव, अदिक ईऊरव ऊर भी आव.
JOS 15:63 यरूशलेम इन निवासी यबूसिया अक यहूदीगोळ तेगु सकीदील; इदुरसाटी ईंद इन दिन ताका यबूसी यहूदीगोळ सांगुळ यरूशलेम दा ईरतार.
JOS 16:1 बाक यूसुफ उन सन्तान इन भाग चिट्टी हाक्कु ठहरूसकु आत, आंदुर सीमा यरीहो अन हाती इन यरदन गांगा टु मतलब पूर्व अन दी यरीहो अन झरना देल शुरू आगकु आ पहाळी द्याश टु आगतेला जो आळी दा आद बेतेल नगर इक पोहचुस्त;
JOS 16:2 बेतेल टु आव लूज क्षेत्र ताका पोहचुस्त, अदिक अर्की जाती इन सीमा टु आगतेला अतारोत मा होगकु होळ्त,:
JOS 16:3 अदिक पश्चिम इन दी यपलेती जाती इन सीमा टु ईळुकु बाक ल्यालमागोळोद बेथोरोन इन सीमा टु आगकु गेजेर हेसुर इन जागा मा पोहचुस्त, अदिक महासमुद्र दा खतम आत.
JOS 16:4 आग मनश्शे अदिक एप्रैम हेसुर ईनोर यूसुफ उन येढ्ढु पारगोळोर औलाद तान तान हिस्सा तांकोडुर.
JOS 16:5 एप्रैमगोळ्द सीमा आंदुर्द कुलगोळ्द अनुसार ईद ठहरूस्त; मतलब आंदुर भाग इन सीमा पूर्व टु चालु आगकु अत्रोतदार टु आगतेला म्याकुचवाळा बेथोरोन ताका पोहचुस्त;
JOS 16:6 अदिक उत्तरी सीमा पश्चिम इन दी मिकमतात टु चालु आगकु पूर्व इन दी तिर्गकु तानतशीला अक पोहचुस्त, अदिक अदुर हाती टु आगतेला यानोह ताका पोहचुस्त;
JOS 16:7 बाक यानोह टु अद अतारोत अदिक नारा अक ईळुतेला यरीहो अन हाती टु आगकु यरदन गांगा मा खतम आत.
JOS 16:8 बाक अदा सीमा तप्पूह टु होटकु, अदिक पश्चिम दी होगकु, काना नाला ताका आगकु समुद्र मा होळ्त. एप्रैमिगोळ्द गोत्र अन भाग आंदुर कुलगोळ अनुसार ईल्या ठहरूस्त.
JOS 16:9 अदिक मनश्शे कुल इन हिस्सा अन न्याड्या भी थ्वाळासा नगर तान तान ऊरगोळ सांगुळ एप्रैमिगोळ साटी अलग माळकु आदव.
JOS 16:10 लेकीन जो कनानी गेजेर दा बसुस्कु ईरोर आंदरी एप्रैमीगोळ अल टु ईला तेगदीदुर; इदुरसाटी आंदुर कनानी आंदुर बीच ईंद इन दिन ताका बसुस्कु आर, अदिक बेगारी दा दास इन घाई क्याल्सा माळतार.
JOS 17:1 बाक यूसुफ उन धोड्डेव पार मनश्शे अन गोत्र अन भाग चिट्टी हाकदुर देल ईद ठहरूस्त. मनश्शे अन धोड्डेव पार गिलाद उन आप्प माकीर योद्धा ईरोन, ई कारण आऊन वंश इक गिलाद अदिक बाशान प्रदेश कोटकु आत.
JOS 17:2 इदुरसाटी ई भाग दुसरा मनश्शे अन चिकोर साटी आंदुर कुलगोळ अनुसार ठहरूस्त, मतलब अबीएजेर, हेलेक, अस्त्रीएल, शेकेम, हेपेर, अदिक शमीदा; जो तान तान कुलगोळ अनुसार यूसुफ उन पार मनश्शे अन वंश दा मंळसा ईरोर, आंदुर अलग अलग वंशगोळ साटी ठहरूस्त.
JOS 17:3 लेकीन हेपेर जो गिलाद उन पार, माकीर उन नातु, अदिक मनश्शे अन पळनातु ईरोन, आऊन पार सलोफाद उन पारगोळ हैलेच, पोरगोळ अच आदुर; अदिक आंदुर हेसुर महला, नोआ, होग्ला, मिल्का, अदिक तिर्सा आद,
JOS 17:4 आग आंदुर एलीआजर याजक, नून उन पार यहोशू, अदिक प्रधानगोळ हाती होगकु अनली कुरतुर, “यहोवा मूसा अक आग्या कोटीदुन, कि आव नामी नाम वार्टुर बीच दा नामी भाग कोळुल.” रा यहोशू यहोवा अन आग्या अन अनुसार आंदरी आंदुर काकागोळ बीच भाग कोट्टुन.
JOS 17:5 आग मनश्शे अक, यरदन इन आप्पाटी गिलाद द्याश अदिक बाशान इक बिटकु, हत्त हिस्सा मात्त सीकदव:
JOS 17:6 यतिकी मनश्शेगोळ बीच मनश्शे अन पोरगोळी भी हिस्सा सीक्त. अदिक दुसरा मनश्शेगोळी गिलाद द्याश सिक्त.
JOS 17:7 मनश्शे अन सीमा आशेर टु हुडुकु मिकमतात ताका पोहचुस्त, जो शकेम उन मुंद आद; बाक आव दक्षिण इन दी वाळुस्कु एनतप्पूह अन निवासिगोळ ताका पोहचुस्त.
JOS 17:8 तप्पूह अन जमीन रा मनश्शे अक सिक्त, लेकीन तप्पूह नगर जो मनश्शे अन सीमा मा बसुस्कु आद अद एप्रैमिगोळ्द ठहरूस्त.
JOS 17:9 बाक अल टु अद सीमा काना अन नाला ताका ईळुकु अदुर दक्षिण इन ताका पोहचुस्त; ईव नगर मनश्शे अन नगरगोळ बीच दा ईरव तरी भी एप्रैम इन ठहरूसदव; अदिक मनश्शे अन सीमा आ नाला अन उत्तर दी टु होगकु समुद्र मा होळ्त;
JOS 17:10 दक्षिण इन दीकळोद द्याश रा एप्रैम उक अदिक उत्तर इन दीकळोद मनश्शे अक सिक्त, अदिक आऊन सीमा समुद्री ठहरूस्त; अदिक आंदुर उत्तर दी आशेर टु अदिक पूर्व दी इस्साकार टु होगकु सिक्त.
JOS 17:11 अदिक मनश्शे अक, इस्साकार अदिक आशेर तान तान नगरगोळ सांगुळ बेतशान, यिबलाम, अदिक तान नगरगोळ सांगुळ दोर निवासी, अदिक तान नगरगोळ सांगुळ एनदोर इन निवासी, अदिक तान नगरगोळ सांगुळ तानाक इन निवासी, अदिक तान नगरगोळ सांगुळ मगिद्दो अन निवासी, ईव मुरू जो ऊँचा जागा मा बसुस्कु आव सिकदव.
JOS 17:12 लेकीन मनश्शेई आ नगरगोळ निवासीगोळी अल टु तेगु सकीदील; इदुरसाटी आंदुर कनानी आ द्याश दा जबरदस्ती बसुस्कु ईत्तुर.
JOS 17:13 तरी भी याग इस्त्राएली सामर्थी आगेदुर, आग कनानीगोळ से बेगारी रा माळसुसली कुरतुर, लेकीन आंदरी पुरा रीति देल तेगुकु व्हार्या माळीदिल.
JOS 17:14 यूसुफ उन सन्तान यहोशू से अनली कुर्त, “नाव रा गिनती दा हापाळ आयेव, यतिकी ईगासताका यहोवा नामी आशीष अच कोळतेला बंदान, बाक नी नाम भाग इन साटी चिट्टी हाक्कु यती ऊंदा हिस्सा ईट्या?”
JOS 17:15 यहोशू आंदुर से अंदुन, “अगर नीव गिनती दा हापाळ आईर, अदिक एप्रैम इन पहाळी द्याश नीम साटी स्यांळ्द आगुल, जो परिज्जीगोळ अदिक रपाईगोळ अन द्याश जो आळी दा आद, अल होगकु मार्रगोळी कळ्द बुळी.”
JOS 17:16 यूसुफ उन सन्तान अंदुन, “अद पहाळी द्याश नाम साटी स्यांळ्द आद; अदिक बेतशान अदिक यिज्रेल इन तराई दा ईरावाळेर, यास कनानी लॉकुर जो ल्यालमागोळ द्याश दा ईरतार, आ सप्पा मुंदुर हाती लोहानव रथगोळ आव.”
JOS 17:17 बाक यहोशू, येन एप्रैमी येन मनश्शेई, मतलब यूसुफ उन सप्पा घराना से अंदुन, “हव, नीव लॉकुर गिनती दा हापाळ आईर, अदिक निम्द सामर्थ्य भी धोळ्द आद, इदुरसाटी नीमी ऊंदा भाग सिकतीदील;
JOS 17:18 पहाळी द्याश भी नीम्द आगेदीत; यतिकी अद आळी रा आद, लेकीन अदुरव मार्र कडुकोमी , आग अदुर आस पास इन द्याश भी नीम्द आगेदीत; यतिकी बाक कनानी सामर्थी आगुल, अदिक आंदुर हाती लोहानव रथ भी आव, तरी भी नीव आंदरी अल टु तेगु सकीर.”
JOS 18:1 बाक इस्त्राएलगोळ्द सप्पा मंडली शीलो नगर दा जमा आगकु अल मिलाप इन तम्बु अक नीदरूसदुर; यतिकी द्याश आंदुर वश दा होट्ट बंदीत.
JOS 18:2 अदिक इस्त्राएलीगोळ येळ कुल इन लॉकुर ईग भी हिंग ईरोर यारी अधिकार दा हिस्सा सिकली ईरोद.
JOS 18:3 आग यहोशू इस्त्राएलगोळ से अंदुन, “जो द्याश नीम पूर्वजगोळ परमेश्वर नीमी कोटान, अदरी तान अधिकार दा माळली नीव यागासताका ढिलाई माळतेला ईत्तीर?
JOS 18:4 ईग हर कुल दा टु मुर मंळसा ठहरूसबुळी, अदिक ना आंदरी इदुरसाटी कळाईन कि आंदुर होगकु द्याश दा वयाळ सकुल, अदिक तान तान कुल इन भाग इन प्रयोजन इन अनुसार अदुर हाल लिख्स लिख्सकु नान हाती वापस बंदार.
JOS 18:5 अदिक आंदुर द्याश इन येळ भाग लिख्सदुर, यहूदी रा दक्षिण दी तान भाग दा, अदिक यूसुफ उन घराना अन लॉकुर उत्तर इन दी तान भाग दा ईरूल.
JOS 18:6 अदिक नीव द्याश इन येळ भाग इन जानकारी लिख्सकु नान हाती तरी; अदिक ना ईल नीम साटी तान परमेश्वर यहोवा अन मुंद चिट्टी हाकाईन.
JOS 18:7 अदिक लेवीगोळ्द नीम बीच दा यातोदु भाग ईरतीदील, यतिकी यहोवा अन कोळ्द याजकपद आंदुर भाग आद; अदिक गाद, रूबेन, अदिक मनश्शे अन आरधा गोत्र अन लॉकुर यरदन इन पूर्व दी यहोवा अन दास मूसा अन कोटकु आत तान तान भाग हासिल माळ कोंडार.”
JOS 18:8 आग आ मंळसागोळ यदकु नळुली कुरतुर; अदिक जो आ द्याश इन हाल लिखसोर साटी नळदुर आंदरी यहोशू ईद आग्या कोट्टुन, “होगकु द्याश दा वयाळी, अदिक अदुर हाल लिख्सकु नान हाती वापस बरी; अदिक ना ईल शीलो दा यहोवा अन मुंद नीम साटी चिट्टी हाकाईन.”
JOS 18:9 आग आ मंळसा होदुर, अदिक आ नगर द्याश दा वयाळदुर, अदिक आऊन नगर इन येळ भाग माळकु अऊर्द हाल किताब दा लिख्सकु शीलो अन छावनी दा यहोशू अन हाती बंदुर.
JOS 18:10 आग यहोशू शीलो दा यहोवा अन मुंद आंदुर साटी चिट्टीगोळ हाकदुन; अदिक अल्या यहोशू इस्त्राएलगोळी आंदुर भागगोळ अनुसार द्याश वाट्स बुट्टुन.
JOS 18:11 बिन्यामीनगोळ कुल इन चिट्टी आंदुर कुलगोळ अनुसार होळ्त, अदिक आंदुर्द भाग यहूदा अदिक यूसुफियो अन बीच दा बीत्त.
JOS 18:12 अदिक आंदुर उत्तरी सीमा यरदन टु चालु आत, अदिक यरीहो अन उत्तर इन दी टु यरतेला पश्चिम इन दी पहाळी द्याश दा आगकु बेतावेन इन आळी दा होळ्त;
JOS 18:13 अल टु अद लूज इक होळ्त जो बेतेल भी कहलुसतद, अदिक लूज इन दक्षिणी इन दी टु आगतेला ल्यालमागोळ्द बेथोरोन इन दक्षिणी इन दी पहाळी इन हाती आग हतेला अत्रोतदार इक ईळुत.
JOS 18:14 बाक पश्चिमी सीमा तिर्गकु बेथोरोन इन मुंद अदिक अदुर दक्षिणी इन दीकळोद पहाळी टु आगतेला किर्यतबाल हेसुर इन यहूदा अन ऊंद नगर मा होळ्त जो किर्यत्यारीम भी अनकु आगतद; पश्चिम इन सीमा ईदा ठहरूस्त.
JOS 18:15 बाक दक्षिण इन दिकळोद सीमा पश्चिम टु चालु आगकु किर्यत्यारीम इन सिरे टु होटकु नेप्तोह इन झरना मा पोहचुस्त;
JOS 18:16 अदिक आ पहाळी इन सिरे मा ईळुत, जो हिन्नोन उन पार उन तराई इन मुंद अदिक रपाईम हेसुर तराई इन उत्तर दी आद; अल टु हिन्नोम इन तराई दा, मतलब यबूसी इन दक्षिणी इन दी आगकु एनरोगेल झरना मा ईळुत;
JOS 18:17 अल टु उत्तर दी तिर्गकु एनशेमेश इक होटकु आ गलीलोत इन दी होत, जो अदुम्मीम इन चळाई इन मुंद आद, बाक अल टु ईद रूबेन उन पार बोहन उन कल्ल ताका ईळुत;
JOS 18:18 अल टु अद उत्तर इन दी होगकु अराबा अन मुंद इन पहाळी इन दी आगतेला यरदन गांगा अन घाटी दा ईळुत;
JOS 18:19 अल टु सीमा बेथोग्ला अन उत्तर दी होगकु खारा समुद्र अन उत्तर दीकळोद घाटी मा यरदन इन उगम स्थान मा होळ्त; दक्षिण इन सीमा ईदा ठहरूस्त.
JOS 18:20 अदिक पूर्व दिकळोद सीमा यरदन अच ठहरूस्त. बिन्यामीनगोळ भाग, नाकु दिकळोद सीमागोळ सांगुळ, आंदुर कुलगोळ अनुसार, ईदा ठहरूस्त.
JOS 18:21 बिन्यामीनगोळ गोत्र अक आंदुर कुलगोळ अनुसार ईव नगर सिकदव, मतलब यरीहो, बेथोग्ला, एमेक्कसीस,
JOS 18:22 बेतराबा, समारैम, बेतेल,
JOS 18:23 अब्बीम, पारा, ओप्रा,
JOS 18:24 कपरम्मोनी, ओप्रनी अदिक गेबा; ईव हन्नेळ नगर अदिक ईंदुरव ऊर सीकदव.
JOS 18:25 बाक गिबोन, रामा, बेरोत,
JOS 18:26 मिस्पे, कपीरा, मोसा,
JOS 18:27 रेकेम, यिर्पेल, तरला,
JOS 18:28 सेला, एलेप, यबूसी जो यरूशलेम भी कहलुसतान, गिबत अदिक किर्यत; ईव चौदहा नगर अदिक ईऊरव ऊर सीकदव. बिन्यामीनिगोळ भाग आंदुर कुलगोळ अनुसार ईवा ठहरूदव.
JOS 19:1 दुसरा चिट्टी शिमोन उन हेसुर मा, मतलब शिमोनिगोळ कुलगोळ अनुसार आंदुर गोत्रगोळ हेसुर मा होळ्त; अदिक आंदुर भाग यहूदागोळ्द भाग इन बीच दा ठहरूस्त.
JOS 19:2 आंदुर भाग दा ईव नगर आव, मतलब बेर्शेबा, शेबा, मोलादा,
JOS 19:3 हसर्शूआल, बाला, एसेम,
JOS 19:4 एलतोलद, बतूल होर्मा,
JOS 19:5 सिकलग, बेतर्काबोत, अदिक हसर्शूसा; ईव तेरहा नगर अदिक अऊरव ऊर आंदरी सीकदव.
JOS 19:6 बेतलबाओत, अदिक शारूहेन; ईव तेरहा नगर अदिक ईऊरव ऊर आंदरी सीकदव.
JOS 19:7 बाक ऐन, रिम्मोन, एतेर, अदिक आशान, ईव नाक नगर ऊरगोळ सांगुळ;
JOS 19:8 अदिक बालत्बेर जो दक्खिन द्याश इन रामा भी कहलुसतान, अल ताका ई नगर इन नाकु दिकळव सप्पा ऊर आंदरी सीकदव. शिमोन उन गोत्र अन भाग आंदुर कुलगोळ अनुसार ईल्या ठहरूस्त.
JOS 19:9 शिमोनिया अन भाग रा यहूदा अन अंश दा टु कोटकु आत; यतिकी यहूदा अन भाग आंदुर साटी हापाळ ईरोद, ई कारण शिमोन उन भाग आंदुर अच भाग इन बीच ठहरूस्त.
JOS 19:10 तीसरा चिट्टी जबूलूनिगोळ कुलगोळ अनुसार आंदुर हेसुर मा होळ्त. अदिक आंदुर भाग इन सीमा सारीद नगर ताका पोहचुस्त;
JOS 19:11 अदिक आंदुर सीमा पश्चिम इन दी मरला टु आगतेला दब्बेशेत इक पोहचुस्त, अदिक योकनाम इन मुंद इन नाला ताका पोहचुसेत;
JOS 19:12 बाक सारीद टु अद सुर्योदय दी तिर्गकु किसलोत्ताबोर इन सीमा ताका पोहचुस्त, अदिक अल टु वाळुसतेला दाबरत दा होळ्त, अदिक यापी दी होग कुर्त;
JOS 19:13 अल टु अद पूर्व इन दी मुंद वाळुस्कु गथेपेर अदिक इत्कासीन इन होत, अदिक आ रिम्मोन दा होळ्त जो नेआ दिशा ताका फैलुसकु आद;
JOS 19:14 अल टु अद सीमा आऊन उत्तर इन दी टु तिर्गकु हन्नातोन मा पोहचुस्त; अदिक यिप्तहेल इन घाटी दा होगकु खतम आत;
JOS 19:15 कत्तात, नहलाल, शिम्रोन, यिदला, अदिक बैतलहम; ईव हन्नेळ नगर आंदुर ऊर सांगुळ अदा भाग इक ठहरूस्त.
JOS 19:16 जबूलूनिगोळ भाग आंदुर कुलगोळ अनुसार ईदा ठहरूस्त; अदिक अदुर दा तान ऊर इन सांगुळ ईवा नगर आव.
JOS 19:17 चौथा चिट्टी इस्साकारीगोळ कुलगोळ अनुसार आंदुर हेसुर मा होळ्त.
JOS 19:18 अदिक आंदुर्द सीमा यिज्रेल, कसुल्लोत, शूनेम,
JOS 19:19 हपारैम, शीओन, अनाहरत,
JOS 19:20 रब्बीत, किश्योन, एबेस,
JOS 19:21 रेमेत, एनगन्नीम, एनहदा, अदिक बेत्पस्सेस ताका पोहचुस्त.
JOS 19:22 बाक अद सीमा ताबोर, शहसूमा अदिक बेतशेमेश ताका पोहचुस्त, अदिक आंदुर सीमा यरदन गांगा मा होगकु खतम आत; ई प्रकार आंदरी सोला नगर तान तान ऊरगोळ सांगुळ सिकदव.
JOS 19:23 कुलगोळ अनुसार इस्साकारीगोळ इन गोत्र अन भाग नगरगोळ अदिक ऊरगोळ सांगुळ कोटकु आत.
JOS 19:24 पाचवा चिट्टी आशेर गोत्र अन कुलगोळ अनुसार आंदुर हेसुर मा होळ्त.
JOS 19:25 आंदुर सीमा दा हेल्कात, हली, बेतेन, अक्षाप,
JOS 19:26 अलाम्मेल्लेक, अमाद, अदिक मिशाल ईरोर; अदिक पश्चिम इन दी कर्मेल ताका अदिक शीहोर्लिब्रात ताका पोहचुस्त;
JOS 19:27 बाक अद सुर्योदय दी तिर्गकु बेतदागोन इक होत, अदिक जबूलून इन भाग ताका, अदिक यिप्तहेल इन तराई देल उत्तर इन दी आगकु बेतेमेक अदिक निएल ताका पोहचुस्त; अदिक उत्तर इन दी होगकु काबूल मा होळ्त,
JOS 19:28 अदिक अद एब्रोन, रहोब, हम्मोन, अदिक काना से आगकु धोळ्द सीदोन इक पोहचुस्त;
JOS 19:29 अल टु अद सीमा तिर्गकु रामा टु आगतेला सोर हेसुर इन किला अन नगर ताका होटोत; बाक सीमा होसा अन दी तिर्गकु अकजीब इन हाती इन द्याश दा आगकु समुद्र मा खतम आत,
JOS 19:30 उम्मा, अपेक, अदिक रहोब भी आंदुर भाग दा ठहरूसदव ई प्रकार बाईस नगर तान तान ऊरगोळ सांगुळ आऊक सिकदव.
JOS 19:31 कुलगोळ अनुसार आशेर गोत्र अन भाग नगरगोळ अदिक ऊरगोळ सांगुळ ईदा ठहरूस्त.
JOS 19:32 छटवा चिट्टी नप्तालीगोळ कुलगोळ अनुसार आंदुर हेसुर मा होळ्त.
JOS 19:33 अदिक आंदुर सीमा हेलेप टु, अदिक सानन्नीम इन बांज मार्र से, अदामीनेकेब अदिक यब्नेल टु आगकु, अदिक लक्कूम इक होगकु यरदन मा खतम आत;
JOS 19:34 अल अद सीमा पश्चिम इन दी तिर्गकु अजनोत्ताबोर इक होत, अदिक अल टु हुक्कोक इक होत, अदिक दक्षिण, अदिक जबूलून इन भाग ताका, अदिक पश्चिम इन दी आशेर इन भाग ताका, अदिक पूर्व दी यहूदा अन भाग इन हाती यरदन गांगा मा पोहचुस्त.
JOS 19:35 अदिक आंदुर किला अन नगर ईव हुव, मतलब सिद्दीम, सेर, हम्मत, रक्कत, किन्नेरेत,
JOS 19:36 अदामा, रामा, हासोर,
JOS 19:37 केदेश, एद्रेई, एन्हासोर,
JOS 19:38 यिरोन, मिगदलेल, होरेम, बेतनात, अदिक बेतशेमेश; ईव उन्नीस नगर ऊरगोळ सांगुळ आऊक सिकदव.
JOS 19:39 कुलगोळ अनुसार नप्तालीगोळ गोत्र अन भाग नगरगोळ अदिक आंदुर ऊरगोळ सांगुळ ईदा ठहरूस्त.
JOS 19:40 सातवा चिट्टी कुलगोळ अनुसार दानिगोळ गोत्र अन हेसुर मा होळ्त.
JOS 19:41 अदिक आंदुर भाग न सीमा दा सोरा, एशताओल, ईरशेमेश,
JOS 19:42 शालब्बीन, अय्यालोन, यितला,
JOS 19:43 एलोन, तिम्ना, एक्रोन,
JOS 19:44 एलतके, गिब्बतोन, बालात,
JOS 19:45 यहूद, बनेबराक, गत्रिम्मोन,
JOS 19:46 मेयर्कोन, अदिक एक्कोन ठहरूसदव, अदिक याफा अन मुंदळोद सीमा भी आंदुर्द ईरोद.
JOS 19:47 अदिक दानिगोळ भाग ईदुर से येक्‍कुल आगेत, मतलब दानी लेशेम मा यारीकु आऊन से लळुसदुर, अदिक आऊक हुडुकु तलवार देल कोंद बुट्टुर, अदिक आऊक तान अधिकार दा माळकु अल बसुसेदुर, अदिक तान मुल मंळसा अन हेसुर मा लेशेम इन हेसुर दान ईटदुर.
JOS 19:48 कुलगोळ अनुसार दानिगोळ गोत्र अन भाग नगरगोळ अदिक ऊरगोळ सांगुळ ईदा ठहरूस्त
JOS 19:49 याग द्याश इन वाट्सकु आगोद सीमागोळ अनुसार पुरा आगेत, आग इस्त्राएली इन नून इन पार यहोशू उक भी तान बीच दा ऊंद भाग कोट्टुन.
JOS 19:50 यहोवा अन अनोद अनुसार आंदुर आऊक आऊन बेळ्द नगर कोट्टुन, ईद एप्रैम इन पहाळी द्याश दाकळोद तिन्मत्सेरह आद; अदिक अद आ नगर इक मात्त बसुस्कु अल ईरली कुरतुन.
JOS 19:51 जो जो भाग एलीआजर याजक, अदिक नून उन पार यहोशू, अदिक इस्त्राएलीगोळ गोत्र अन घराना अन पुर्वजगोळ मुख्य मुख्य मंळसागोळ शीलो दा, भेंट माळोद तम्बु मा, यहोवा अन मुंद चिट्टी हाक्कु हाक हाक्कु वाट्स बुट्टुर ईव अवा हु. ई प्रकार आंदुर द्याश विभाजन इन क्याल्सा पुरा माळदुर.
JOS 20:1 बाक यहोवा यहोशू से अंदुन,
JOS 20:2 इस्त्राएलगोळ इक ईद अन, “ना मूसा अन द्वारा नीम से शरण नगरगोळ्द जो चर्चा माळीदिन अदुर अनुसार आंदरी ठहरूस बुळ.
JOS 20:3 यार से जो यातोदारा भुल देल बिना जान्सकु यारीकारा कोंद बुट्टार, आव आंदुर दा टु येल्यारा भी ओळुल; इदुरसाटी अव नगर रक्ता अन बदला ताकोमावाळेर से ऊळोरसाटी नीम शरणस्थान ठहरूसुल.”
JOS 20:4 “आ मंळसा ईद माळ पायजे, याग आव ओळतान अदिक आ नगरगोळ दा टु यातोदारा ऊंद दा पहुचुसतान रा आऊक नगर द्वार मा रोक्स पायजे अदिक नगर इन स्याणा मंळसागोळी हेळ पायजे कि येन आग्याद, आग नगर प्रमुख आऊक नगर दा प्रवेश माळगोळ सकतार, आंदुर आऊक तान बीच दा ईरोद जागा कोट्टार.
JOS 20:5 अदिक अगर खून इन बदला ताकोमावाळा आऊन पीछा माळुल, रा आंदुर ईद जान्सकु कि आव तान मान्ना हातीगोळोव बीना जान्सकु अदिक पयले आऊन से बीना दुश्मनी ईटकु कोंदुन, आ खूनी इक आऊन कय कोळबाळी.
JOS 20:6 अदिक यागासताका आव मंडली इन मुंद न्याय इन साटी निदरालुन अदिक यागासताका आ दिन इन महायाजक सोतोगालुन, आगासताका आव अदा नगर दा ईरूल; अदुर बाद्दा आव खुनी तान नगर इक यदुर देल आव वोळकु बंदान आव तान मान्या बाक होग सकतान.”
JOS 20:7 अत: आंदुर नप्ताली इन पहाळी द्याश दा गलील इन केदेश इक, अदिक एप्रैम इन पहाळी द्याश दा शकेम इक, अदिक यहूदा अन पहाळी द्याश दा, किर्यतर्बा अक, जो हेब्रोन भी कहलुसतद अदिक शरण नगर अंदकु आगतद.
JOS 20:8 अदिक यरीहो अन हात्तीगोळोद यरदन इन पूर्व इन दी आंदुर रूबेन उन गोत्र अन भाग दा बेसेर नगर इक, जो आळी दा चौरस जमीन मा बसुस्कु आद अदिक गाद इन गोत्र भाग दा गिलाद इन रामोत इक, अदिक मनश्शे अन गोत्र अन भाग दा बाशान इन गोलान नगर इक ठहरूसदुन.
JOS 20:9 सप्पा इस्त्राएलगोळ साटी अदिक आंदुर न्याड्या ईरावाळेर परदेशीगोळ साटी भी जो नगर ईद मनसा देल ठहरूसकु आदुर कि जो यावारा यातोदारा प्राणी इक भुल देल कोंदान आव आंदुर दा टु यारदारा दा ओळेगुल, अदिक यागासताका न्याय इन साटी मंडली इन मुंद निदरालुन आगासताका रक्ता अन बदला ताकोमावाळा आऊक कोन्न सकालुन अव ईवा नगरगोळ हूँ.
JOS 21:1 आग लेवीगोळ पुर्वजगोळोर घराना अन मुख्य मुख्य मंळसा एलीआजर याजक, अदिक नून उन पार यहोशू, अदिक इस्त्राएली गोत्र अन पुर्वजगोळ घराना अन मुख्य मुख्य मंळसागोळ हाती बंदकु
JOS 21:2 कनान द्याश इन शीलो नगर दा अनली कुरतुर, “यहोवा मूसा अन द्वारा नामी बसुसोर साटी नगर, अदिक नाम जनावर साटी अवा नगर इन चराई भी कोळोद आग्या कोटीदुन.”
JOS 21:3 आग इस्त्राएली यहोवा अन अनोद अनुसार तान तान भाग दा टु लेवीगोळी चराई अन सांगुळ ईव नगर कोट्टुर.
JOS 21:4 आग कहातिगोळ कुलगोळ हेसुर मा चिट्टी तेगदुर. इदुरसाटी लेवीगोळ दा टु हारून याजक इन वंश इक यहूदी, शिमोन, अदिक बिन्यामीन इन गोत्रगोळ भाग दा टु तेरहा नगर सीकदव.
JOS 21:5 बाकी कहातिगोळी एप्रैम इन गोत्र अन कुलगोळ, अदिक दान उन गोत्र, अदिक मनश्शे अन आरधा गोत्र अन भागगोळ दा चिट्टी हाक हाक्कु हत्त नगर कोटकु आदव.
JOS 21:6 बाक गेर्शोनीगोळी इस्साकार इन गोत्र अन कुलगोळ, अदिक आशेर, अदिक नप्ताली इन गोत्र अन भागगोळ दा टु, अदिक मनश्शे अन आ आरधा गोत्र अन भागगोळ दा टु भी जो बाशान दा ईरोन चिट्टी हाक हाक्कु तेरहा नगर कोटकु आदव.
JOS 21:7 कुलगोळ अनुसार मरारीगोळ इक रूबेन, गाद, अदिक जबूलून इन गोत्र अन भागगोळ दा टु हन्नेळ नगर कोटकु आदव.
JOS 21:8 जो आग्या यहोवा मूसा अन द्वारा कोटीदुन अदुर अनुसार इस्त्राएलीगोळ लेवीगोळी चराई सांगुळ ईव नगर चिट्टी हाक हाक्कु कोट्टुर.
JOS 21:9 आंदुर यहूदागोळ अदिक शिमोन उन गोत्र अन भागगोळ दा टु ईव नगर यारव हेसुर लिख्सकु आंदरी कोट्टुर;
JOS 21:10 ईव नगर लेवीय कहाती कुलगोळ दा टु हारून इन वंश इन साटी ईरव; यतिकी पयला चिट्टी आंदुर अच हेसुर मा होटीत.
JOS 21:11 मतलब आंदुर आंदरी यहूदा अन पहाळी द्याश दा नाकु दीकळोद चराई सांगुळ किर्यतर्बा नगर कोट बुट्टुन, जो अनाक उन आप्प अर्बा अन हेसुर मा कहलुसदुन अदिक हेब्रोन भी कहलुसतान.
JOS 21:12 लेकीन आ नगर इन केई अदिक आऊन ऊर आंदुर यपुन्ने उन पार कालेब उक आऊन खुद इन जमीन माळकु कोट बुट्टुर.
JOS 21:13 आग आंदुर हारून याजक इन वंश इन चराईगोळ सांगुळ खूनी इन शरण नगर हेब्रोन, अदिक तान तान चराई सांगुळ लिब्ना,
JOS 21:14 यत्तीर, एश्तमो,
JOS 21:15 होलोन, दबीर,
JOS 21:16 ऐन, यूता, अदिक बेतशेमेश कोट्टुर, ई प्रकार आ येढ्ढु गोत्रगोळ भाग दा टु ऊम्बत नगर कोटकु आदव.
JOS 21:17 अदिक बिन्यामीन इन गोत्र अन भाग दा टु तान तान चराई सांगुळ ईव नाक नगर कोटकु आदव, मतलब गिबोन, गेबा,
JOS 21:18 अनातोत अदिक अल्मोन.
JOS 21:19 ई प्रकार हारून वंशी याजकगोळी तेरहा नगर अदिक आंदुरव चराईगोळ सीकदव.
JOS 21:20 बाक बाकी कहाती लेवीगोळ कुलगोळ भाग इन नगर चिट्टी हाक हाक्कु एप्रैम इन गोत्र अन भाग दा टु कोटकु आदव.
JOS 21:21 मतलब आंदरी चराई सांगुळ एप्रैम उन पहाळी द्याश दा खूनी इन शरण ताकोमोद शकेम नगर कोटकु आत, बाक तान तान चराई सांगुळ गेजेर,
JOS 21:22 किबसैम, अदिक बेथोरोन; ईव नाक नगर कोटकु आदव.
JOS 21:23 अदिक दान इन गोत्र अन भाग दा टु तान तान चराई सांगुळ, एलतके, गिब्बतोन,
JOS 21:24 अय्यालोन, अदिक गत्रिम्मोन; ईव नाक नगर कोटकु आदव.
JOS 21:25 अदिक मनश्शे अन आरधा गोत्र अन भाग दा टु तान तान चराईगोळ सांगुळ तानाक अदिक गत्रिम्मोन; ईव येढ्ढ नगर कोटकु आदव.
JOS 21:26 ई प्रकार बाकी कहातिगोळ कुलगोळ सप्पा नगर चराई सांगुळ हत्त ठहरूसदुर.
JOS 21:27 बाक लेवीगोळ कुल दाकळोर गेर्शोनीगोळी मनश्शे अन आरधा गोत्र अन भाग दा टु तान तान चराई सांगुळ खूनी इन शरण नगर बाशान उन गोलान अदिक बेशतरा; ईव येढ्ढ नगर कोटकु आदव.
JOS 21:28 अदिक इस्साकार इन गोत्र अन भाग दा टु तान तान चराई सांगुळ किश्योन, दाबरत,
JOS 21:29 यर्मूत, अदिक एनगन्नीम; ईव नाक नगर कोटकु आदव.
JOS 21:30 अदिक आशेर इन गोत्र अन भाग दा टु तान तान चराईगोळ सांगुळ मिशाल, अब्दोन,
JOS 21:31 हेल्कात, अदिक रहोब; ईव नाक नगर कोटकु आदव.
JOS 21:32 अदिक नप्ताली इन गोत्र अन भाग दा टु तान तान चराईगोळ सांगुळ खूनी इन शरण नगर गलील इन केदेश, बाक हम्मोतदोर, अदिक कर्तान; ईव मुर नगर कोटकु आदव.
JOS 21:33 गेर्शोनीगोळ कुलगोळ अनुसार आंदुर सप्पा नगर तान तान चराई सांगुळ तेरहा ठहरूसदुर.
JOS 21:34 बाक बाकी लेवीगोळ, मतलब मरारीगोळ कुलगोळी जबूलून इन गोत्र अन भाग दा टु तान तान चराई सांगुळ योकनाम, कर्ता,
JOS 21:35 दिम्ना, अदिक नहलाल; ईव नाक नगर कोटकु आदव.
JOS 21:36 अदिक रूबेन इन गोत्र अन भाग दा टु तान तान चराई सांगुळ बेसेर, यहसा,
JOS 21:37 कदेमोत, अदिक मेपात; ईव नाक नगर कोटकु आदव.
JOS 21:38 अदिक गाद इन गोत्र अन भाग दा टु तान तान चराई सांगुळ खूनी इन शरण नगर गिलाद दाकळोद रामोत, बाक महनैम,
JOS 21:39 हेशबोन, अदिक याजेर, जो सप्पा मीलुसकु नाक नगर कोटकु आदव.
JOS 21:40 लेवीगोळ बाकी कुलगोळ मतलब मरारीगोळ कुलगोळ अनुसार आंदुर सप्पा ईवा ठहरूसदव, ई प्रकार आंदरी हन्नेळ नगर चिट्टी हाक हाक्कु कोटकु आदव.
JOS 21:41 इस्त्राएलगोळ्द निज भूमी इन बीच लेवीगोळ सप्पा नगर तान तान चराई सांगुळ अळतालीस ठहरूसदव.
JOS 21:42 ईव सप्पा नगर तान तान नाकु दीकळव चराईगोळ सांगुळ ठहरूसदव; ई सप्पा नगरगोळ्द ईदा दशा ईरोद.
JOS 21:43 ई प्रकार यहोवा इस्त्राएलगोळी अद सप्पा द्याश कोट्टुन, यदरी आव आंदुर पुर्वजगोळ से किर्‍या तीनकु कोळली हेळीदुन; अदिक आंदुर आऊन अधिकारी आगकु अल बसुसेदुर.
JOS 21:44 अदिक यहोवा आ सप्पा मातगोळ अनुसार, जो आव आंदुर पुर्वजगोळ से किर्‍या तीनकु अंदीदुन, आंदरी नाकु दी टु आराम कोट्टुन; अदिक आंदुर दुश्मनगोळ दा टु याऊ भी आंदुर मुंद टिक्स सकीदील; यतिकी यहोवा आ सप्पा अक आंदुर वश दा माळ बुट्टुन.
JOS 21:45 यास भलाई इन मातगोळ यहोवा इस्त्राएल इन घराना टु अंदीदुन अदुर दा टु यातोदु मात भी बिटीदील; सप्पा च्या सप्पा पुरा आदव.
JOS 22:1 आ समय यहोशू रूबेनिगोळ, गादीगोळ अदिक मनश्शे अन आर्धा वंश इन लॉकुरी कारूकु अंदुन.
JOS 22:2 “जो जो आग्या परमेश्वर उन दास मूसा नीमी कोटीदुन अव सप्पा नीव मान्सदीर, अदिक जो जो आग्या ना नीमी कोटीन आ सप्पा अक भी नीव मान्सदीर.
JOS 22:3 नीव तान वार्टुरी ईस दिनगोळ दा ईंद ताका बिटीदील, लेकीन तान परमेश्वर यहोवा अन आग्या नीव वळ्लीसा पालन माळदीर.
JOS 22:4 अदिक ईग नीम परमेश्वर यहोवा नीम वार्टुरी तान वचन इन अनुसार आराम कोटान; इदुरसाटी ईग नीव वापस होगकु तान ड्यारा अक, अदिक तान खुद इन जागा दा, यदरी परमेश्वर उन दास मूसा यरदन इन आपाटी नीमी कोटान, ओळेगी.
JOS 22:5 केवल ई मात इन चौकसी माळी कि जो जो आग्या अदिक व्यवस्था परमेश्वर उन दास मूसा नीमी कोटान अदरी मान्सकु तान परमेश्वर यहोवा से प्रेम ईटी, आऊन सप्पा हादीगोळ मा नळी, आऊन आग्यागोळी मान्सी, आऊन भक्ति दा लवलीन ईरी, अदिक तान सप्पा मन अदिक सप्पा प्राण देल आऊन स्यावा माळी.”
JOS 22:6 आग यहोशू आंदरी आशीर्वाद कोटकु सार्र माळदुन; अदिक आंदुर तान तान ड्यारा अक होटोदुर.
JOS 22:7 मनश्शे अन आरधा गोत्रगोळी मूसा बाशान दा भाग कोटीदुन; लेकीन आरधा गोत्र अक यहोशू आंदुर वार्टुर बीच यरदन इन पश्चिम इन दी भाग कोट्टुन, आंदरी याग यहोशू सार माळदुन कि तान तान ड्यारा दा होगुल,
JOS 22:8 आग आंदरी भी आशीर्वाद कोटकु अंदुन, “हापाळ सा जनावर, अदिक व्हान्ना, बेळ्ली, पीतल, लोहा, अदिक हापाळ सा कपळा अदिक हापाळ सा धन सम्पत्ति हुडुकु तान तान ड्यारा अक वापस होगी; अदिक तान शत्रुगोळ्द लूट इन सम्पत्ती इक तान वार्टुर सांगुळ वाट्स कोमेतीर.”
JOS 22:9 आग रूबेनी, गादी, अदिक मनश्शे अन आरधा गोत्र इस्त्राएल इन हाती टु, मतलब कनान द्याश इन शीलो नगर टु, तान गिलाद हेसुर इन खुद इन जागा दा, जो मूसा अन द्वारा कोटकु आत, यहोवा अन आग्या अन अनुसार आदुर्द खुद इन जागा आगेगीत, होगोद विचार देल वापस होदुर.
JOS 22:10 अदिक रूबेनी गादी, अदिक मनश्शे अन आरधा गोत्र यरदन इन आ तराई दा पोहचुसदुर जो कनान द्याश दा आद, आग आंदुर अल नोळोद योग्य ऊंद धोळ्द वेदी माळदुर.
JOS 22:11 अदिक ईदुर समाचार इस्त्राएलगोळ केळदुर दा बत्त, कि रूबेनिगोळ, गादीगोळ, अदिक मनश्शे आरधा गोत्रगोळ कनान द्याश इन मुंद यरदन इन तराई दा, मतलब अदुर आप्पाटी जो इस्त्राएलगोळ्द आद, ऊंद वेदी माळ्यार.
JOS 22:12 याग इस्त्राएलगोळ ईद केळदुर, आग इस्त्राएलीगोळ्द सप्पा मंडली आंदुर से लळुसोर साटी चढाई माळली शीलो दा जमा आत.
JOS 22:13 आग इस्त्राएलीगोळ रूबेनिगोळ, गादीगोळ, अदिक मनश्शे अन आरधा वंश इन लॉकुर हाती गिलाद द्याश दा एलीआजर याजक उन पार पीनहास उक,
JOS 22:14 अदिक आऊन सांगुळ हत्त प्रधानगोळी, मतलब इस्त्राएल इन ऊंद ऊंद गोत्र दा टु पूर्वजगोळ घराना अन ऊंद ऊंद प्रधान इक कळुदुन, अदिक आंदुर इस्त्राएल इन हजारगोळ दा तान तान पूर्वजगोळ घराना अन मुख्य मंळसा ईरोर.
JOS 22:15 आंदुर गिलाद द्याश दा रूबेनिगोळ, गादीगोळ, अदिक मनश्शे अन आरधा वंश इन लॉकुर हाती होगकु अनली कुरतुर,
JOS 22:16 “यहोवा अन सप्पा मंडली ईद अनतद, कि ‘नीव इस्त्राएल यहोवा परमेश्वर उन ईद ह्यांग विश्वासघात माळीर; ईंद जो नीव ऊंद वेदी माळीर, ईदुर दा नीव आऊन हिंद नळोद बिटकु आऊन खिलाप ईंद लळाई माळीर?’
JOS 22:17 केळी, पोर नगर इन विषय इन अधर्म नाम साटी येनारा कम ईरोद, अगर यहोवा अन मंडली इक भारी दण्ड सिक्त भी रा ईंद इन दिन ताका नाव आ अधर्म देल शुद्ध आगीदील; येन अद नीम नजर दा ऊंद श्याण मात आद,
JOS 22:18 कि ईंद नीव यहोवा अक त्यागस्कु आऊन हिंद नळोद बीट बुळतीर? येन नीव यहोवा टु तिर्गेगतीर, अदिक नाळ आव अद इस्त्राएल इन मंडली देल गुस्सा आदान.
JOS 22:19 लेकीन अगर नीम खुद इन जागा अशुद्ध आद, रा ईपाटी बंदकु यहोवा अन खुद इन जागा दा, येल यहोवा अन निवास ईरतद, नाम लॉकुर बीच तान तान खुद इन जागा माळ बुळी; लेकीन नाम परमेश्वर यहोवा अन वेदी इक बिटकु अदिक यातोदारा वेदी माळकु न रा यहोवा से लळाई माळी, अदिक न नाम से.
JOS 22:20 नोळी, याग जेरह अन्द पार आकान अर्पण माळ्द वस्तु अन बारा दा विश्वासघात माळदुन, आग येन यहोवा अन कोप इस्त्राएल इन पुरा मंडली मा ईला भळकुसीत? अदिक आ मंळसा अन अधर्म अन प्राणदण्ड आबना आऊक ईला सिकीत.”
JOS 22:21 आग रूबेनिगोळ, गादीगोळ, अदिक मनश्शे अन आरदा वंश इस्त्राएल इन हजारो अन मुख्य मंळसागोळ इक ईद उत्तर कोट्टुर,
JOS 22:22 “यहोवा जो ईश्वरगोळोव परमेश्वर हुन, ईश्वरगोळ परमेश्वर यहोवा ईदरी जान्सतान, अदिक इस्त्राएली भी ईदरी जान्स कोंडार, कि अगर यहोवा टु तिर्गकु या आऊन विश्वासघात माळकु नाव ईद क्याल्सा माळेव, रा नी ईंद नाम इक जीत्ता बिळबाळ,
JOS 22:23 अगर ईंद इन दिन नाव वेदी इक इदुरसाटी माळेव कि यहोवा अन हिंद नळोद बीट बुट्टेव, या इदुरसाटी कि अदुर मा होमबली, अन्नबली, या मेलबली येर्सेव, रा यहोवा नी खुद अच ईदुर हिसाब ताकोंडान;
JOS 22:24 लेकीन नाव ईदा विचार अदिक मनसा देल ईद माळेव कि येल्यारा भविष्य दा नीम सन्तान नाम सन्तान से ईद अनली हतबाळुल, ‘नीमी इस्त्राएल इन परमेश्वर से येन क्याल्सा?
JOS 22:25 यतिकी रूबेनिगोळ, हे गादीगोळ, यहोवा जो नाम अदिक नीम बीच दा यरदन इन सीमा ठहरूस्यान, इदुरसाटी यहोवा दा नीम येनु भाग हैलेच.’ हिंग अनकु नीम सन्तान नाम सन्तान दा टु यहोवा अन अंज्क बीळसुस बुट्टीत.
JOS 22:26 इदुरसाटी नाव अंदेव, ‘बरी, नाव तान साटी ऊंद वेदी माळाता, अद होमबली या मेलबलि इन साटी ईला,
JOS 22:27 लेकीन इदुरसाटी कि नाम अदिक नीम, अदिक नाम बाद्दा नीम अदिक नाम वंश इन बीच दा गवाही इन क्याल्सा कोळुल; इदुरसाटी नाव होमबली, अदिक मेलबली, अदिक बलिदान येर्सकु यहोवा अन हाती आऊन उपासना माळेव; अदिक भविष्य दा नीम औलाद नाम औलाद से ईद अन बाळुल, कि यहोवा दा नीम येनु भाग हैलेच.’
JOS 22:28 इदुरसाटी नाव अंदेव, ‘याग आ लॉकुर भविष्य दा नाम से या नाम वंश से ईद अनली कुरूल, आग नाव आऊन से अंदेव, कि यहोवा अन नमुना मा माळकु ईद वेदी इक नोळी, यदरी नाम पुर्वजगोळ इक, होमबली या मेलबलि, इन साटी माळीदिल, लेकीन इदुरसाटी माळदुर कि नाम अदिक नीम बीच दा गवाही इन क्याल्सा कोळुल.’
JOS 22:29 ईद नाम से दुर ईरूल कि यहोवा से तिर्गकु ईंद आऊन हींद नळोद बीट बुळुल, अदिक तान परमेश्वर यहोवा अन आ वेदी इक बिटकु जो आऊन निवास इन मुंद आद होमबली, अदिक अन्नबली, या मेलबलि इन साटी दुसरा वेदी माळुल.”
JOS 22:30 रूबेनिगोळ, गादीगोळ, अदिक मनश्शे अन आरदा वंश इन लॉकुर्द ई मात केळकु पीनहास याजक अदिक आऊन सांगुळ मंडली इन प्रधान, जो इस्त्राएल इन हजारो अन मुख्य मंळसा ईरोर, आंदुर हापाळ खुश आदुर.
JOS 22:31 अदिक एलीआजर याजक उन पार पीनहास रूबेनिगोळ, गादीगोळ, अदिक मनश्शेगोळ से अंदुन, “नीव जो यहोवा अन्द हिंग विश्वासघात माळीदिल, इदुर देल ईंद नाव ईद जान्स कोंडेव कि यहोवा नाम बीच दा आन: अदिक नीव लॉकुर इस्त्राएलगोळ इक यहोवा अन्द कय देल ऊळसीर.”
JOS 22:32 आग एलीआजर उन पार पीनहास प्रधानगोळ सांगुळ रूबेनिगोळ, अदिक गादीगोळ हाती टु गिलाद आगतेला कनान द्याश दा इस्त्राएलगोळ हाती होट्ट बंदुन; अदिक ईद बातणी आंदरी अंदकु केळ्सदुन.
JOS 22:33 आग इस्त्राएली खुश आदुर; अदिक परमेश्वर उक धन्य अंदुर, अदिक रूबेनिगोळ, अदिक गादीगोळ से लळुसली अदिक आंदुर ईरा द्याश ऊजळुसोर साटी चढाई माळोद मातचीत बाक माळीदिल.
JOS 22:34 अदिक रूबेनिगोळ अदिक गादीगोळ ईद अंदकु, “ईद वेदी नाम अदिक आंदुर बीच दा ई मात इन गवाही ठहरूस्याद, कि यहोवा अच परमेश्वर हुन.” आ वेदी इन हेसुर एद ईटदुर.
JOS 23:1 ईदुर हापाळ दिन इन बाद्दा, याग यहोवा इस्त्राएलगोळी आंदुर नाकु दीकळोर दुश्मनगोळ से आराम कोट्टुन, अदिक यहोशू हाळाबाट्ट अदिक हापाळ ऊमर ईनव आगेगीदुन.
JOS 23:2 आग यहोशू सप्पा इस्त्राएलगोळी, मतलब पुरनियोंगोळ, मुख्य मंळसागोळ, न्यायीगोळ, अदिक सरदारगोळी कारसुसकु अनली कुरतुन, “ना रा ईग बाट्ट अदिक हापाळ ऊमर ईनव आगेदीन;
JOS 23:3 अदिक नीव नोळदीर कि नीम परमेश्वर यहोवा नीम निमित्त ई सप्पा जातीगोळ से येन येन माळ्यान, यतिकी जो नीम दी टु लळुसतेला बंदान आव नीमव परमेश्वर यहोवा हुन.
JOS 23:4 नोळी, ना ई मीकदव जातीगोळी चिट्टी हाक हाक्कु नीम वंश इन हिस्सा माळ कोंडीन; अदिक यरदन टु हुडुकु सुर्य मुळ्कतद आत्त धोळ समुद्र ताका ईरावाळा आ सप्‍पा जातीगोळी भी हिंग अच कोटीन, यदरी ना कळ्द बुटीन.
JOS 23:5 अदिक नीम परमेश्वर यहोवा आंदरी नीम मुंदु टु आंदुर द्याश दा टु तेगु कोंडान; अदिक नीव तान परमेश्वर यहोवा अन वचन इन अनुसार आंदुर द्याश मा अधिकार माळ कोंडीर.
JOS 23:6 इदुरसाटी हापाळ हिम्मत कटकु, जो येनारा मूसा अन किताब दा लिख्सकु आद अदरी पुरा माळोर दा ध्यान माळेतीर, अदुर से न रा ईत्त डोक्केतीर न आत्त.
JOS 23:7 ईव जो जातीगोळ नीम बीच दा ईतोग्याव ईऊर बीच दा होगबाळेतीर, अदिक न ईंदुरव द्याव गोळोव हेसुर इन चर्चा माळेतीर, अदिक ना अऊर्द किर्‍या तीनसेतीर, अदिक ना अऊर उपासना माळेतीर, अदिक ना अवरी नमस्कार माळेतीर,
JOS 23:8 लेकीन ह्यांग ईंद इन दीन ताका नीव तान परमेश्वर यहोवा अन भक्ति दा लवलीन ईरतीर, हांग अच ईरतोगेतीर.
JOS 23:9 यहोवा नीम मुंद टु धोड्डेव धोड्डेव अदिक ताकतवर जातीगोळी तेगदान; अदिक नीम मुंद ईंद इन दीन ताका याऊ ठहरूस सकीदील.
JOS 23:10 नीम दा टु ऊंद मंळसा हजार मंळसागोळी खेदाळस्यान, यतिकी नीम परमेश्वर यहोवा तान वचन इन अनुसार नीम दी टु लळुसतान.
JOS 23:11 इदुरसाटी तान परमेश्वर यहोवा अन सांगुळ प्यार ईटोद पुरा ध्यान ईटेतीर.
JOS 23:12 यतिकी अगर नीव यातोदारा रिती यहोवा से तिर्गकु ई जातीगोळ बाकी लॉकुर से मीलुसली कुरतीर जो नीम बीच उळुकु ईरतार, अदिक ईंदुर से सगाई मदा माळकु ईंदुर सांगुळ समधियाना रिश्ता जोळसीर,
JOS 23:13 रा सहीदा जान्स कोमी कि मुंद नीमव परमेश्वर यहोवा ई जातीगोळी नीम मुंदु टु तेगुतिदील; अदिक ईंदुर नीम साटी जाल अदिक फंदा, अदिक नीम पांजरागोळ साटी कोळागोळ, अदिक नीम कण्‍ण दा मुळ्ल ठहरूस्यार, अदिक आखरी दा नीव ई वळ्लीद जागा मा टु जो नीम परमेश्वर यहोवा नीमी कोटान नाश आगेदीर.
JOS 23:14 “केळी, ईद नान सायोद समय आद, नीव जान्सतीर अदिक सहीदा विश्वास माळतीर कि यहोवा नीम साटी हापाळ धोड्डेव क्याल्सा माळ्यान, नीव जान्सतीर कि आव तान कोळ्द वचनगोळ दा टु यातोदु पुरा माळदुर दा असफल ईतीदील, यहोवा आ सप्पा वचनगोळी पुरा माळ्यान, जो आव नामी कोटान.
JOS 23:15 अव सप्पा वळ्लेव वचन जो नीम परमेश्वर यहोवा नामी कोटान, पुरा तरीका देल सही आग्याव. लेकीन यहोवा, अदा तरीका देल दुसरा वचनगोळी भी सत्य माळ्यान, आव चेतावनी कोटान कि अगर नीव पाप माळीर आग नीम म्याकुच विपत्तीगोळ बंदव, आव चेतावनी कोटान कि आव नीमी आ द्याश इक बीळोर साटी विवश माळ्यान यदरी आव नीमी कोटान.
JOS 23:16 ईद घटसीत, अगर नीव तान परमेश्वर यहोवा अन सांगुळ माळ्द वादा अन पालन माळोर से इनकार माळीर, अगर नीव द्यावगोळ हाती होदीर अदिक आंदुर स्यावा माळीर रा ई द्याश इक नीव खोऊस बुट्टीर, अगर नीव हिंग माळीर रा यहोवा नीम मा हापाळ सिट्टी बंदान, आग नीव ई वळ्लीद द्याश टु जल्दी से नाश आगेदीर यदरी आव नीमी कोटान.”
JOS 24:1 बाक यहोशू इस्त्राएल इन सप्पा वंश इन लॉकुरी जमा माळदुन, अदिक इस्त्राएल इन बाट्ट लॉकुर, अदिक मुख्य मंळसा, अदिक न्यायीगोळी, अदिक सरदारगोळी कारसुसदुन; अदिक आंदुर परमेश्वर उन मुंद उपस्थित आदुर.
JOS 24:2 आग यहोशू आ सप्पा लॉकुर से अंदुन, “इस्त्राएल उन परमेश्वर यहोवा ई प्रकार देल अनतान, कि ‘प्राचीनकाल दा अब्राहम अदिक नाहोर उन आप्प तेरह आदि, नीम पुरखा फरात महानद इन आप्पाटी ईरतेला दुसरा द्यावगोळ्द उपासना माळोर,
JOS 24:3 अदिक ना नीम्द मुल मंळसा अब्राहम उक फरात इन आप्पाटी टु हुडुकु कनान द्याश इन सप्पा जागागोळ दा वयाळसदीन, अदिक आऊन वंश वाळुसदीन. अदिक अदरी इसहाक उक कोट्टीन;
JOS 24:4 बाक इसहाक उक याकूब अदिक एसाव कोट्टीन. अदिक एसाव उक ना सेईर हेसुर इन पहाळी द्याश कोट्टीन कि आव अदुर अधिकारी आगुल, लेकीन याकूब पार नातुगोळ सांगुळ मिस्त्र अक होदुन.
JOS 24:5 बाक ना मूसा अदिक हारून उक कळकु आ सप्पा क्याल्सागोळ द्वारा जो ना मिस्त्र दा माळदीन आ द्याश इक नष्ट माळ कोंडीन; अदिक अदुर बाद्दा नीमी तेगुकु तंदीन.
JOS 24:6 अदिक ना नीम पुरखागोळी मिस्त्र दा टु तेगुकु तंदीन, अदिक नीव समुद्र अन हाती पोहचुसदीर, अदिक मिस्त्रीगोळ रथ अदिक सवारगोळी सांगुळ हुडुकु क्याचाँद समुद्र ताका नीम्द पीछा माळदुन.
JOS 24:7 अदिक याग नीव यहोवा अन दुहाई कोट्टीर आग आव नीम्द अदिक मिस्त्रीगोळ बीच दा अंधार माळ बुट्टुन, अदिक आंदुर मा समुद्र अक वाहुसकु आंदरी मुळ्क्सदुन; अदिक जो येनारा ना मिस्त्र दा माळदीन अदरी नीव लॉकुर तान कण्ण देल नोळदीर; बाक नीव हापाळ दिन ताका आळी दा ईत्तीर.
JOS 24:8 आग ना नीमी आ एमोरियो अन द्याश दा तंदीन, जो यरदन गांगा अन आप्पाटी पूर्व दिशा दा बसुस्कु ईरोर; अदिक आंदुर नीम से लळुसदुर अदिक ना आंदरी नीम वश दा माळ बुट्टीन, अदिक नीव आंदुर द्याश इन अधिकारी आगेदीर, अदिक ना आंदुर नीम मुंद टु सत्यानाश माळ कोंडीन.
JOS 24:9 बाक मोआब इन राजा सिप्पोर उन पार बालाक यदकु इस्त्राएल से लळुसदुन; अदिक नीमी श्राप कोळोर साटी बोर उन पार बिलाम उक कारसुसदुन,
JOS 24:10 लेकीन ना बिलाम उन केळीदील; आव नीमी आशीष अच आशीष कोळतेला होदुन; ई प्रकार देल ना नीमी इक आऊन कय दा टु ऊळ्सदीन.
JOS 24:11 आग नीव यरदन पार आगकु यरीहो अन हाती बंदीर, अदिक याग यरीहो अन लॉकुर, अदिक एमोरी, परिज्जी, कनानी, हित्ती, गिर्गाशी, हिब्बी, अदिक यबूसी नीम से लळुसदुर, आग ना आंदरी नीम वश दा माळ कोंडीन.
JOS 24:12 अदिक ना नीम मुंद बर्रागोळी कळुदीन, अदिक आंदुर एमोरीयो अन येढ्ढु राजागोळी नीम मुंदु टु तुकाळसदुन; नोळी, ईद नीम्द तलवार या धनुष इन ताकत देल आगीदील.
JOS 24:13 बाक ना नीमी हिंग द्याश कोट्टीन यदुर दा नीव मयनत माळीदिल, अदिक हिंग नगर भी कोट्टीन यवरी नीव ईला बसुसीदिर, अदिक नीव अल बसुस्कु आईर; अदिक याता दाख अदिक जैतून इन बगीचा अन काय नीव तीनतीर अवरी नीव हचीदिल.’
JOS 24:14 “इदुरसाटी ईग यहोवा अन अंज्क मान्सकु आऊन स्यावा खराई अदिक सच्चाई देल माळी; अदिक याता द्यावगोळ्द स्यावा नीम पुर्वज मेसोपोटामिया अदिक मिस्त्र दा माळतोगोर, आंदरी दुर माळकु यहोवा अन स्यावा माळी.
JOS 24:15 अदिक अगर यहोवा अन स्यावा माळोद नीमी बुरा हततद, रा ईंद नीवळुस बुळी कि नीव यार्द स्यावा माळीर, बाक आ द्यावगोळ्द यार्द स्यावा नीम पुर्वज मेसोपोटामिया दा माळतोगोर, अदिक बाक एमोरीगोळ द्यावगोळ्द स्यावा माळी यारव द्याश दा नीव ईरतीर; लेकीन ना रा तान घराना अन सांगुळ यहोवा अन अच स्यावा हमेशा माळतेला ईराईन.”
JOS 24:16 आग लॉकुर उत्तर कोट्टुर, “यहोवा अक त्यागस्कु दुसरा द्यावगोळ्द स्यावा माळोद विचार नाव यागलु माळतीदील;
JOS 24:17 यतिकी नाम परमेश्वर यहोवा आवा हुन जो नामी अदिक नाम पुर्वजगोळी मिस्त्र द्याश टु तेगुकु तंदुन, अदिक नाम नोळतेला धोळ धोळ आश्चर्यकर्म माळदुन, अदिक याता हादी मा अदिक यास जातीगोळ बीच दा टु नाव नळकु बरतोगेव आंदुर नाम रक्षा माळदुन;
JOS 24:18 अदिक नाम मुंद ई द्याश दा ईरावाळा एमोरी अदिक सप्पा जातीगोळी तेगु कोंडान; इदुरसाटी नाव भी यहोवा अन स्यावा माळेव, यतिकी नामव परमेश्वर आवा हुन.”
JOS 24:19 यहोशू लॉकुर से अंदुन, “नीम से यहोवा अन स्यावा आग सकाल; यतिकी आव पवित्र परमेश्वर हुन; आव जलन ईटावाळा परमेश्वर हुन, आव नीम अपराध अदिक पाप क्षमा माळतीदील.
JOS 24:20 अगर नीव यहोवा अक त्यागस्कु पराया द्यावगोळ्द स्यावा माळीर, रा आव भले ही नीम भला माळ्त बंदीदान तरी भी आव तिर्गकु नीम्द हानि माळ्यान अदिक नीम्द अंत भी माळ कोंडान.”
JOS 24:21 लॉकुर यहोशू से अंदुर, “ईला; नाव यहोवा अंद अच स्यावा माळेव.”
JOS 24:22 यहोशू लॉकुर से अंदुन, “नीव खुद अच तान गवाह हूईर कि नीव यहोवा अन स्यावा माळोद नीवळुसदीर.” आंदुर अंदुर, “हव, नाव साक्षी आयेव.”
JOS 24:23 यहोशू अंदुन, “तान बीच दा टु पराया द्यावगोळी इक दुर माळकु तान तान मन इस्त्राएल उन परमेश्वर यहोवा अन दी हची.”
JOS 24:24 लॉकुर यहोशू से अंदुर, “नाव रा तान परमेश्वर यहोवा अन अच स्यावा माळेव, अदिक आऊंद अच मात मानसेव.”
JOS 24:25 आग यहोशू अदा दिशी आ लॉकुर से वादा माळसुसदुन, अदिक शकेम दा आंदुर साटी विधी अदिक नियम ठहरूदुन.
JOS 24:26 ईद सप्पा वृतांत यहोशू परमेश्वर उन व्यवस्था अन किताब दा लिख्स बुट्टुन; अदिक ऊंद धोळ्द कल्ल नीवळुसकु अल ऊंद बांज मार्र इन हाती नीदरूसदुन, जो यहोवा अन पवित्र जागा दा ईरोद.
JOS 24:27 आग यहोशू सप्पा लॉकुर से अंदुन, “केळी, ईद कल्ल नाम लॉकुर्द गवाह ईत्तीत, यतिकी यास वचन यहोवा नाम से अंदान अवरी ईद केळ्याद; इदुरसाटी ईद नीम्द गवाह ईत्तीत, हिंग आग बाळुल कि नीव तान परमेश्वर से मुकुरूसीर.”
JOS 24:28 आग यहोशू लॉकुर तान तान खुद इन भाग मा होगोर साटी सार माळदुन.
JOS 24:29 ई मातगोळ बाद्दा यहोवा अन दास, नून उन पार यहोशू, ऊंद सौ हत्त वर्ष इनव आगकु सोतोदुन.
JOS 24:30 अदिक आऊक तिन्मत्सेरह दा, जो एप्रैम इन पहाळी द्याश दा गास हेसुर इन पहाळी इन उत्तर दा आद, अदुर अच भाग दा मुण्ण कोटकु आत.
JOS 24:31 अदिक यहोशू उन जीवन तीम, अदिक जो बाट्ट लॉकुर यहोशू उन सायोर बाद्दा जीत्ता ईत्तुर अदिक जानसोर कि यहोवा इस्त्राएल इन लॉकुर साटी ह्यांग ह्यांग क्याल्सा माळीदुर, आंदुर भी जीवन तीम इस्त्राएली यहोवा अन अच स्यावा माळतेला ईत्तुर.
JOS 24:32 बाक यूसुफ उन येलुगोळ यवरी इस्त्राएलीगोळ मिस्त्र टु तंदीदुर आंदुर शकेम इन जागा अन साटी आ भाग दा नळ्सकु आत, यदरी याकूब शेकेम इन आप्प हमोर उन पारगोळ से ऊंद सौ बेळ्ली इन सिक्‍कागोळ देल कोंडीदुन; इदुरसाटी आव यूसुफ उन सन्तान इन खुद इन जागा आगेत.
JOS 24:33 अदिक हारून उन पार एलीआजर भी सोतोदुन; अदिक आऊक एप्रैम इन पहाळी द्याश इन गिबा नगर दा मुण्‍ण कोटकु आत, जो आऊन पार पीनहास उक कोटकु आगीत.
EST 1:1 क्षयर्ष हेसुर इन राजा अन दिनगोळ दा ई मातगोळ आदव: ईव आवा क्षयर्ष हुन, जो ऊंद सौ सत्ताईस राज्यगोळ मा, मतलब भारत टु हुळकु कूश द्याश ताका राज माळोन.
EST 1:2 अवा दिनगोळ दा याग क्षयर्ष राजा तान आ राजगद्दी मा विराजमान ईरोन जो शूशन गढ़ हेसुर इन राजधानी दा ईरोद.
EST 1:3 अल आव तांद शासन काल इन तिसरा वर्ष दा तान सप्पा हाकिमगोळ अदिक कर्मचारीगोळी कळु बुटुन. फारस अदिक मादै द्याश इन सेनापति अदिक राज्य-राज्य अन प्रधान अदिक हाकिम आऊन मुंद आगेदुर.
EST 1:4 आव आंदरी हापाळ दिन मतलब ऊंद सौ अस्सी दिन ताका तान राजकीय वैभव इन धन अदिक तान महानता अन अनमोल चीजगोळी तोर्सतेला ईत्‍तुन.
EST 1:5 ई दिनगोळ बित्सदुर मा राजा सप्पा स्याणेर धोड्डेर लॉकुरी जो शूशन गढ़ हेसुर इन राजधानी दा जमा आगीदुर, राजभवन इन बगीचा अन आंगुळ दा येळ दिन ताका ऊमली कोट्टुन.
EST 1:6 अलेव पळदागोळ बिळेव अदिक निळा रंग इन सूत इनव ईरव, अदिक सन अदिक जांभळा रंग इन जाळीगोळ देल बेळ्ली अन छल्लागोळ दा, संगमरमर इन खम्भागोळ देल हतकु ईरव; अदिक अलेव चौकीगोळ व्हान्ना बेळ्ली नव ईरव; क्याचांद अदिक बिळेव, पिवळा अदिक करेव संगमरमर इनव बन्सदव फर्श मा हतकु ईरव.
EST 1:7 आ भोज दा राजा अन्द योग्य अंगुर इन रास्सा अलग अलग रूप इन व्हान्ना अन्द पात्रगोळ दा हाक्कु राजा अन्द उदारता देल हापाळ सा कुळ्सकु आगोद.
EST 1:8 कुडोद रा नियम इन अनुसार आगतोगोद, यारीकारा मजबुर माळकु ईला कुळ्स तोगोर; यतिकी राजा तान भवन इन सप्पा भण्डारीगोळी आग्या कोटीदुन, कि जो पावना ह्यांग चाहास्यान आऊन सांगुळ हांगा बरताव माळेतीर.
EST 1:9 रानी वशती भी राजा क्षयर्ष इन भवन दा आर्तेरी भोजन कोट्टुर.
EST 1:10 सातवा दिशी, याग राजा अन मन अंगुर इन रास्सा दा मग्न ईरोद, आग आव महूमान, बिजता, हर्बोना, बिगता, अबगता, जेतेर अदिक कर्कस हेसुर इनोर येळ किन्नरगोळ जो क्षयर्ष राजा अन साटी स्यावा टहल माळतोगोर, आग्या कोट्टुन,
EST 1:11 कि रानी वशती अक राजमुकुट धारण माळ्द राजा अन मुंद तरी; यदुर देल कि द्याश द्याश इन लॉकुर मा अदिक हाकिमगोळ मा आकिन सुंदरता प्रगट आगेगुल; यतिकी आक नोळदुर दा सुंदर ईरोर.
EST 1:12 किन्नरगोळ द्वारा राजा अन ई आग्या ताकोमकु रानी वशती बरोर से इनकार माळदुर. इदुर मा राजा हापाळ सिट्टी बंदुन.
EST 1:13 आग राजा समय समय इन भेद जानसावाळेर पंडितगोळ से केळदुन, राजा रा नीति अदिक न्याय इन सप्पा ग्यानिगोळ से हिंगा माळतोगोन.
EST 1:14 आऊन हात्‍ती कर्शना, शेतार, अदमाता, तर्शीश, मेरेस, मर्सना अदिक ममूकान हेसुर इनोर फारस अदिक मादै द्याश इनोर येळ प्रधान ईरोर, जो राजा अन दर्शन माळतोगोर, अदिक राज्य दा मुख्य मुख्य पदगोळ मा नियुक्त माळकु आगीदुर.
EST 1:15 राजा केळदुन, “रानी वशती राजा क्षयर्ष उन, किन्नरगोळ द्वारा कोळ्द आग्या अन्द उल्लंघन माळदुर, रा नीति अन अनुसार आकिन सांगुळ येन माळ पायजे.”
EST 1:16 आग ममूकान राजा अदिक हाकिमगोळ उपस्थिती दा उत्तर कोट्टुन, “रानी वशती जो अनुचित क्याल्सा माळ्यार, अद सिर्फ राजा देल अच ईला लेकीन आक सप्पा हाकिमगोळ देल अदिक आ सप्पा द्याशगोळ लॉकुर से भी जो राजा क्षयर्ष उन सप्पा राज्यगोळ दा ईरतार.
EST 1:17 यतिकी रानी इन ई क्याल्सा अन चर्चा सप्पा आर्तेर दा आदीत अदिक याग ईद अंदकु आदीत, ‘राजा क्षयर्ष रानी वशती अक तान मुंद तरोद आग्या कोटीदुन लेकीन आक बंदिदील,’ आग आंदुर भी तान तान गांडुरी तुच्छ समस्यार.
EST 1:18 ईंद इन दिशी फारसी अदिक मादी हाकिमगोळ आर्तेर यार रानी अन ई मात केळ्यार, आंदुर भी राजा अन सप्पा हाकिमगोळ से हिंगा अनली कुरतार; ई प्रकार हापाळ अच घृणा अदिक सिट्ट पैदा आदीत.
EST 1:19 अगर राजा मंजुर ईतीदाद, रा ईद आग्या तेगुल, अदिक फारसी अदिक मादीगोळ कानून दा भी लिख्सकु आगुल, यदुर देल यागलु बदलुस बाळुल, कि रानी वशती राजा क्षयर्ष उन मुंद बाक यागलु बरबाळुल, अदिक राजा पटरानी अन पद यातोदारा दुसरा अक कोट्ट बुळुल जो आकिन से वळ्लेर ईरूल.
EST 1:20 याग राजा अन ई आग्या आऊन सप्पा राज्यगोळ दा केळ्सकु आदीत, आग सप्पा हिंग्सुर तान तान गांड उन, चाहे आव धोड्डेव ईरूल या स्याणेव, आदर सम्मान माळतेला ईत्‍तार.”
EST 1:21 ईद मात राजा अदिक हाकिमगोळी पसंद बत्‍त अदिक राजा ममूकान उन सलाह मान्स कोंडुन अदिक तान राज्य दा,
EST 1:22 मतलब हापाळ सा राज्य अन अक्षरगोळ दा अदिक हापाळ सा जाती अन भाषा दा चिट्टीगोळी कळुदुन, कि सप्पा गंळ्सुर तान तान मान्या अधिकार नळसुल, अदिक तान जात इन भाषा माताळुल.
EST 2:1 ई मातगोळ बाद्दा याग राजा क्षयर्ष उन सिट्ट ठण्डा बिदोत, आग आव रानी वशती अन, अदिक जो क्याल्सा आक माळीदुर, अदिक जो आकिन बारा दा आग्या होटीत अदुर भी याद माळदुन.
EST 2:2 आग राजा अन सेवक जो आऊन खास ईरोर, अनली कुरतुर, “राजा अन साटी सुंदर अदिक हारोदोर कुवारा पोरगोळी ढुंढ्सकु आगुल.
EST 2:3 अदिक राजा तान राज्य अन सप्पा राज्यगोळ दा लॉकुरी इदुरसाटी निवळुसुल कि आंदुर सप्पा सुंदर हारोदोर कुवारा पोरगोळी शूशन गढ़ इन रनवास दा जमा माळुल अदिक आर्तेर प्रबंधक हेगे अक कोळुल जो राजा नव खास किन्नर सिपाही ईरोन; अदिक सिनगार इन वस्तुगोळी आंदरी कोटकु आगुल.
EST 2:4 आग आंदुर दा टु जो कुवारा पोरगोळ राजा अन नजर दा वळ्लेर ठहरूस्यार, आक रानी वशती अन जागा मा रानी माळकु आगुल.” ईद मात राजा अक पसंद बत्त अदिक आव हांगा माळदुन.
EST 2:5 शूशन गढ़ दा मोर्दकै हेसुर इनव ऊंद यहूदी ईरतोगोन, जो कीश हेसुर इनव ऊंद बिन्यामीनी नव पळनातु, शिमी अन नातु, अदिक याईर उन पार ईरोन.
EST 2:6 आव आ बंदीगोळ सांगुळ यरूशलेम टु बँधुआई दा होगीदुन, यारी बेबीलोन इन राजा नबूकदनेस्सर, यहूदा अन राजा यकोन्याह सांगुळ बंदी माळकु वोतीदुन.
EST 2:7 आव हदस्सा हेसुर इन तान काका अन आकतींग इक, जो एस्तेर भी कहलुस तोगोर, पालन पोसन माळीदुन; यतिकी आकिन मोय आप्प यारू ईला ईरोर, अदिक आ पोर सुंदर अदिक रूपवती ईरोर, अदिक याग आकिन मोय आप्पुर सोतोदुर, आग मोर्दकै आकी तान पोर इन घाई पाल्सदुन.
EST 2:8 याग राजा अन आग्या अदिक नियम केळ्सकु आदव, अदिक हापाळ सा आर्तेर, शूशन गढ़ दा हेगे अन अधिकार दा जमा माळकु आदुर, आग एस्तेर भी राजभवन दा आर्तेर प्रबंधक हेगे अन अधिकार दा कोटकु आदुर.
EST 2:9 आक पोर आऊन नजर दा वळ्लेर हतदुर; अदिक आव आकिन से खुश आदुन, आग आव बिना समय माळ्द आकी राजभवन दा टु सिनगार इन वस्तुगोळ, अदिक आकिन भोजन, अदिक आकिन साटी निवळुसदोर येळ सहेलीगोळी भी कोट्टुन, अदिक आकी अदिक आकिन सहेलीगोळी रनवास दा सब से वळ्लीद जागा कोट्टुन.
EST 2:10 एस्तेर ना तान जात हेळीदुर, ना तान कुल, यतिकी मोर्दकै आकी आग्या कोटीदुन कि आऊक हेळबाळेत.
EST 2:11 मोर्दकै रोज रनवास इन आंगुळ इन मुंद टेटाळोन ताकी जान्सुल कि एस्तेर ह्यांग आर अदिक आकिन सांगुळ येन आगतोगोद?
EST 2:12 याग ऊंद ऊंद पोर इन पारी बत्त, कि आंदुर क्षयर्ष राजा मुंद होगुल, अदिक ईद आ समय आत याग आकिन सांगुळ आर्तेर साटी ठहरूस्द नियम इन अनुसार बारा तिंगुळ ताका व्यवहार माळकु आगीत; मतलब आंदुर सिनगार माळव दिन ई रिती देल बित्सदव, कि आर तिंगुळ ताका गन्धरस इन याण्‍णा हचकु आगोद, अदिक आर तिंगुळ ताका सुगन्धद्रव, अदिक आर्तेर्द सिनगार माळोद दुसरा सामान हचकु आगोद
EST 2:13 ई प्रकार देल आ पोर याग राजा अन हाती होगोर, याग जो येनारा आक चाहासोर कि रनवास टु राजभवन दा वोतकु आगुल, अद आकी कोटकु आगोद.
EST 2:14 द्यावगा अक रा आक होगतोगोर अदिक व्हातर्या अक आव वापस बंदकु रनवास उन दुसरा मान्ना दा होगकु रखैलगोळ्द प्रबंधक राजा अन्द किन्नर सिपाही शाशगज उन अधिकार दा आगतोगोर, अदिक राजा अन्द हात्ती बाक ईला होगतोगोर. अगर राजा आकिन से खुश आगतोगोन, आग आकिन हेसुर ताकोमकु कारूकु आगोद.
EST 2:15 याग मोर्दकै अन्द काका अबीहैल उन पोर एस्तेर, यारी मोर्दकै पोर मान्सकु ईटीदुन, आकिन पारी बत्त कि राजा अन हात्ती होगुल, आग जो येनारा आर्तेर्द प्रबंधक राजा अन्द किन्नर सिपाही हेगे आऊन साटी ठहरूसीदुन, अदुर से येक्‍कुल आक मात्त येनु बेळीदील. यास मुंदुर एस्तेर उक नोळदुर, आंदुर सप्पा मुंदुर आकिन से खुश आदुर.
EST 2:16 आग एस्तेर राजभवन दा राजा क्षयर्ष उन हात्ती आऊन राज्य इन सातवा वर्ष इन तेबेत हेसुर इन हतवा तिंगुळ दा पोहचुस्कु आदुर.
EST 2:17 राजा एस्तेर उक अदिक सप्पा आर्तेर से येक्‍कुल प्यार माळदुन, अदिक अन्य सप्पा कुवारा पोरगोळ से येक्‍कुल आकिन अनुग्रह अदिक कृपा अन्द नजर आकी मा आत, ई कारण आव आकिन ताल्ला मा राजमुकुट ईटदुन अदिक आक इक वशती इन जागा मा रानी माळदुन.
EST 2:18 आग राजा तान सप्पा हाकिमगोळ अदिक क्याल्सा माळावाळेर इक ऊंद धोळ भोज कोट्टुन, अदिक अदरी एस्तेर इन भोज अंदुन; अदिक प्रान्तगोळ इक छुट्टी दिलुसदुन, अदिक तान उदारता अन्द योग्य ईनाम भी वाट्सदुन.
EST 2:19 याग कुवारा पोरगोळ दुसरा घन जमा माळकु आदुर, आग मोर्दकै राजभवन इन फाटक दा कुर्तकु ईरोन.
EST 2:20 एस्तेर तान जाति अदिक कुल इन पता कोटीदील, यतिकी मोर्दकै आक इक हिंग अच आग्या कोटीदुन कि हेळबाळुल; अदिक एस्तेर मोर्दकै अन्द मात हिंग मानसोर जसा कि आऊन अल तान पालन पोषण इन समय मानसोर.
EST 2:21 अवा दिनगोळ दा याग मोर्दकै राजा अन्द राजभवन इन फाटक दा कुरतोगोन, आग राजा अन किन्नरगोळ जो द्वारपाल भी ईरोर, आंदुर दा टु बिगताना अदिक तेरेश हेसुर इन येढ्ढ मुंदुर राजा क्षयर्ष राजा से नाराज आगकु आऊक कोन्नोद योजना माळदुर.
EST 2:22 ईद मात मोर्दकै अक मालुम आत, अदिक आव एस्तेर रानी इक ईद मात हेळदुन, अदिक एस्तेर मोर्दकै अन्द हेसुर ताकोमकु राजा अक सावधान माळदुर.
EST 2:23 आग जाँच पळताल आगदुर मा ईद मात खरा होळ्त अदिक आंदुर येढ्ढु मुंदुर मार्र मा लटकुसकु फासी हचदुर, अदिक ईद वृत्तान्त राजा अन्द मुंद इतिहास इन किताब दा लिख्सकु आग्याद.
EST 3:1 ई मातगोळ्द बाद्दा राजा क्षयर्ष अगागी वंश इनव हम्मदाता अन्द पार हामान उक म्याकळोद पद कोट्टुन, अदिक आऊक महत्व कोटकु आऊन साटी आऊन संगी हाकिमगोळ्द सिंहासनगोळ से ऊँचा सिंहासन ठहरूसदुन.
EST 3:2 राजा अन्द क्याल्सा जो राजभवन इन फाटक दा ईरतोगोर, आंदुर हामान इन मुंद बांगकु प्रणाम माळतोगोर यतिकी राजा आऊन बारा दा हिंग अच आग्या कोटीदुन; लेकीन मोर्दकै ईला झुकसोन अदिक न आऊक प्रणाम माळोन.
EST 3:3 आग राजा अन्द क्याल्सा माळावाळेर जो राजभवन इन फाटक दा ईरतोगोर, आंदुर मोर्दकै से केळदुर, “नी राजा अन्द आग्या अन्द येती उल्लंघन माळत्या?”
EST 3:4 याग आंदुर आऊन से हर रोज हिंग अच माळतेला ईत्तुर, अदिक आव आंदुर्द ऊंद भी केळीदील, आग आंदुर ईद नोळोद इच्छा देल कि मोर्दकै अन्द ईद मात नळदीत का ईला, हामान उक हेळ बुट्टुन; आव आंदरी हेळ बुट्टीदुन कि ना यहूदी हुईन.
EST 3:5 याग हामान नोळदुन कि मोर्दकै झुकसालुन, अदिक नान इक प्रणाम माळालुन, आग हामान हापाळ अच सिट्टी बंदुन.
EST 3:6 आव केवल मोर्दकै मा कय नेगोद तान मर्यादा से कम जान्सदुन. यतिकी आंदुर हामान उक ईद हेळ बुट्टुर कि मोर्दकै या जाती इन हुन, इदुरसाटी हामान क्षयर्ष इन साम्राज्य दा ईरावाळेर पुरा यहूदीगोळ इक भी मोर्दकै अन्द जाती जानस्कु, नष्ट माळोद योजना माळदुन.
EST 3:7 राजा क्षयर्ष उन हन्नेळवा वर्ष इन नीसान हेसुर इन पयला तिंगुळ दा, हामान अदार हेसुर इन हन्नेळवा तिंगुळ ताका अन्द ऊंद ऊंद दिन अदिक ऊंद ऊंद तिंगुळ इन साटी “पूर” मतलब चिट्टी तान मुंद हाक्सुसदुन.
EST 3:8 आग हामान राजा क्षयर्ष से अंदुन, “नीन राज्य अन्द सप्पा प्रान्तगोळ दा ईरावाळेर द्याश द्याश इन लॉकुर्द न्याड्या तितर-बितर अदिक सटुस्कु ऊंद जाति आद, अदुर्द नियमगोळ से अलग आव; अदिक आंदुर राजा अन्द कानून मा नळालुर, इदुरसाटी आंदरी ईरगोळोद राजा अक लाभदायक ईला ईरोद.
EST 3:9 अगर राजा अक स्वीकार ईरूल रा आंदरी नष्ट माळोद आग्या लिख्‍सकु आगुल, अदिक ना राजा अन्द भण्डारीगोळ्द कय दा राजभण्डार दा पहुचुसोर साटी, हत्त हजार बेळ्ली नव सिक्का कोळाईन.”
EST 3:10 आग राजा तान ऊँगरा तान कय टु ईळुकु, अगागी हम्मदाता अन्द पार हामान उक, जो यहूदीगोळ्द दुश्मन ईरोन कोट्ट बुट्टुन;
EST 3:11 अदिक राजा हामान से अंदुन, “अद बेळ्ली नीन इक कोटकु आत, अदिक आ लॉकुर भी, ताकी नी आंदुर से ह्यांग नी चाहासत्या हांगा व्यवहार माळ.”
EST 3:12 हिंग अदा पयला तिंगुळ इन तेरहवा दिन इक राजा अन्द लेखक कारूकु आदुर, अदिक हामान उन आग्या अन्द अनुसार राजा अन्द सप्पा अधिपतिगोळ, अदिक सप्पा प्रान्तगोळ्द प्रधानगोळ, अदिक द्याश द्याश इन लॉकुर्द हाकिमगोळ साटी चिट्टीगोळ, ऊंद ऊंद प्रान्त इन अक्षरगोळ दा, अदिक ऊंद ऊंद द्याश इन लॉकुर्द भाषा दा राजा क्षयर्ष इन हेसुर देल लिख्‍सकु आत; अदिक अऊर दा राजा अन्द ऊँगरा इन छाप हचकु आत.
EST 3:13 राज्य इन सप्पा प्रान्तगोळ दा ई आशय इन चिट्टीगोळ हरकारगोळ्द द्वारा कळुकु आत कि ऊंद अच दिन दा, मतलब अदार हेसुर इन हन्नेळवा तिंगुळ इन तेरवा दिन इक, येन हारोदव, येन हाळाबाट्ट, येन आर्त, येन चिकोर, सप्पा यहूदी कोंदकु आगुल, नष्ट माळकु आगुल अदिक आंदुर्द सत्यानाश माळकु आगुल; अदिक आंदुर्द धन सम्पत्ती लुट्सकु आगुल.
EST 3:14 आ आग्या अन्द लेख इन नकल सप्पा प्रान्तगोळ दा खोल्सकु कळुकु आत कि सप्पा द्याश इन लॉकुर आ दिन इन साटी तयार आगेगुल.
EST 3:15 ईद आग्या शूशन गढ़ दा कोटकु आत, अदिक हरकारे राजा अन्द आग्या देल तुरन्त होट्ट बुट्टुर. राजा अदिक हामान रा अंगुर इन रास्सा कुडुली कुरतोदुर, लेकीन शूशन नगर दा घबराहट फैलुसेत.
EST 4:1 याग मोर्दकै जान्स कोंडुन कि येन येन माळकु आग्याद आग मोर्दकै कपळा हरदुन, टाट हाक्कु, राख हाक्कु, नगर इन न्याड्या होगकु ऊँचा अदिक दुख भरा शब्द देल चिल्‍ळासली कुरतुन;
EST 4:2 अदिक आव राजभवन इन फाटक इन मुंद पोहचुस्दुन, लेकीन टाट हाक्कु राजभवन इन फाटक इन बुळ्क रा यारीकु होगोद आग्या ईला ईरोद.
EST 4:3 ऊंद ऊंद प्रान्त दा, येल येल राजा अन्द आग्या अदिक नियम पहुचुस्त, अल अल यहूदी बळा विलाप माळली अदिक उपवास माळली अदिक वर्ली पिट्सली कुरतुर; हापाळ सा मुंदुर टाट हाक्कु अदिक राख हाक्कु बिदकु ईत्तुर.
EST 4:4 एस्तेर रानी इन दासीगीतेर अदिक किन्नरगोळ होगकु आकिक हेळ बुट्टुर, आग रानी हापाळ दुखी आगेदुर; अदिक मोर्दकै अन्द हात्ती कपळा कळुकु ईद बुलावा कळुदुर कि टाट ईळुकु इवरी हाक्क कोमुल, लेकीन आव अव कपळा हुळदीदिल.
EST 4:5 आग एस्तेर राजा अन्द किन्नरगोळ दा टु हताक उक यारी राजा आऊन हात्ती ईरली हठरूसीदुन, कारूकु आग्या कोट्टुन कि मोर्दकै अन्द हात्ती होगकु मालूम माळ कोमुल कि येन मात आद, अदिक इदुर्द येन कारण आद.
EST 4:6 आग हताक नगर इन आ चौराह दा, जो राजभवन इन फाटक इन मुंद ईरोद, मोर्दकै अन्द हात्ती होदुन.
EST 4:7 मोर्दकै आऊक सप्पा येनारा हेळ बुट्टुन कि नान म्याकुच येन बितुस्याद, अदिक हामान यहूदीगोळ्द नाश माळोद अनुमति सिक्कोर साटी राजभण्डार दा यास बेळ्ली तुम्मोद वचन कोटीदुन, ईद भी ठीक ठीक हेळ बुट्टुन.
EST 4:8 बाक यहूदीगोळ्द विनाश माळोद जो आग्या शूशन दा कोटकु आगीत, अदुर्द ऊंद नकल भी आव हताक उन कय दा, एस्तेर उक तोरसोर साटी कोट्टुन, अदिक आऊक सप्पा हाल हेळोर, अदिक ईद आग्या कोळली अंदुन, कि बुळ्क राजा अन्द हात्ती होगकु तान लॉकुर्द साटी गिळगिळास्कु विनती माळुल.
EST 4:9 आग हताक एस्तेर उन हात्ती होगकु मोर्दकै अन्द मातगोळ अनकु केळ्सदुन.
EST 4:10 आग एस्तेर हताक उक मोर्दकै से ईद अनोद आग्या कोट्टुन,
EST 4:11 “राजा अन्द सप्पा क्याल्सा माळावाळेर, उल्टा राजा अन्द प्रान्त ईनोर सप्पा लॉकुर इक भी मालूम आद, कि येन गंळ्स येन आर्त, यावारा येन ईर बाळुल, जो बिना आग्या सिक्त बुळ्क आंगुळ दा राजा अन्द हात्ती होदान आऊक कोन्नोद आग्या अच आद; केवल यार दी राजा व्हान्ना अन्द राजदण्ड वाळुस्यान आवा ऊळुतान. लेकीन ना ईग तीस दिन से राजा अन्द हात्ती कारूकु आगीदील.”
EST 4:12 एस्तेर इन ईव मातगोळ मोर्दकै अक केळ होत.
EST 4:13 आग मोर्दकै एस्तेर उन हात्ती ईद बुलावा कळुदुन, “नी मन इन मन दा ईद विचार माळबाळ कि ना अच राजभवन दा ईरोद कारण अदिक सप्पा यहूदीगोळ दा ऊळुकु ईराईन.
EST 4:14 यतिकी जो नी ई समय सुंगामुंगा ईत्या, रा अदिक यातोदारा न यातोदारा उपाय देल यहूदीगोळ्द छुटकारा अदिक सहायता सिक्केदीत, लेकीन नी तान आप्प उन घराना अन्द सांगुळ नष्ट आद्या. येन मालूम नीन इक हिंग अच मुश्किल समय इन साटी राजपद सिक्याद?”
EST 4:15 आग एस्तेर मोर्दकै अन्द हात्ती ईद बुलावा कळुदुन,
EST 4:16 “नी होगकु शूशन उन सप्पा यहूदीगोळ इक जमा माळ, अदिक नीव सप्पा मुंदुर मिलुस्कु नान निमित्त उपवास माळी, मुर दिन ईळ्लक येनु तिनबाळी, अदिक येनु कुडुबाळी. ना भी तान दासीगीतेर सांगुळ अदा रीती देल उपवास माळाईन; अदिक हिंग अच दशा दा ना नियम इन विरूद्ध राजा अन्द हात्ती बुळ्क होगाईन; अदिक अगर नष्ट आगाईन रा आगाईन.”
EST 4:17 आग मोर्दकै होटोदुन अदिक एस्तेर उन आग्या अन्द अनुसार अच आव माळदुन.
EST 5:1 तीसरा दिशी एस्तेर तान राजकीय कपळा हाक्कु राजभवन इन बुळ्क इन आंगुळ दा होगकु, राजभवन इन मुंद नीदरेदुर. राजा राजभवन दा राजगद्दी मा भवन इन द्वार इन मुंद विराजमान ईरोन;
EST 5:2 अदिक याग राजा एस्तेर रानी अक आंगुळ दा नीदुरकु नोळदुन, आग आव प्रसन्न आगकु व्हान्ना अन्द राजदण्ड जो आऊन कय दा ईरोद आकिन दी वाळुसदुन. आग एस्तेर हात्ती होगकु राजदण्ड इन नोक मुटदुर.
EST 5:3 आग राजा आकिन से केळदुन, “हे एस्तेर रानी, नीन इक येन पायजे? नी येन बेळत्या? बेळ अदिक नीन इक आरधा राज्य ताका कोटकु आदीत.”
EST 5:4 एस्तेर अंदुर, “अगर राजा अक स्वीकार ईरूल, रा ईंद हामान उक हुळकु आ भोज दा बरूल, जो ना राजा अन्द साटी तयार माळदीन.”
EST 5:5 आग राजा आग्या कोट्टुन, “हामान उन तुरंत तरी, कि एस्तेर इन निमंत्रण स्वीकार माळकु आगुल.” अत: राजा अदिक हामान एस्तेर इन तयार माळ्द भोज दा बंदुर.
EST 5:6 भोज इन समय याग आळी दाकळोद शयद कुडोर, आग राजा एस्तेर से अंदुन, “नीन येन निवेदन आद? अद पुरा माळकु आदीत. नी येन बेळत्या? बेळ, अदिक आरधा राज्य ताका नीन इक कोटकु आदीत.”
EST 5:7 एस्तेर उत्तर कोट्टुर, “नान निवेदन अदिक जो ना बेळतीन अद ईद हुन,
EST 5:8 कि अगर राजा नान मा प्रसन्न आन अदिक नान निवेदन केळोद अदिक वरदान ना बेळाईन अदा कोळोद राजा अक स्वीकार आद, रा राजा अदिक हामान नाळ आ भोज दा बरूल अदरी ना आंदुर साटी माळाईन, अदिक नाळ ना राजा अन्द ई वचन इन अनुसार माळाईन.”
EST 5:9 आ दिशी हामान खुश अदिक मन दा प्रसन्न आगकु व्हार्या होदुन. लेकीन याग आव मोर्दकै अक राजभवन इन फाटक दा नोळदुन, कि आव आऊन मुंद नीदरीदील, अदिक हटसीदील, आग आव मोर्दकै अन्द विरूद्ध गुस्सा देल तुमेदुन.
EST 5:10 तौभी हामान तान तान इक रोक्‍सकु तान मान्नी होदुन; अदिक तान संगीगोळ अदिक तान हिंग्स जेरेश उक बुलावा कळुदुन.
EST 5:11 आग हामान आंदुर से तान धन इन वैभव, अदिक तान बाल-बच्यागोळ्द वाळुस्त अदिक राजा आऊक ह्यांग ह्यांग वाळुसदुन, अदिक अन्य सप्पा हाकिमगोळ अदिक तान अदिक सप्पा क्याल्सा माळावाळेर से ऊँचा पद कोटीदुन, ई सप्पा अन्द वर्णन माळदुन.
EST 5:12 हामान ईद भी अंदुन, “एस्तेर रानी भी नान इक बिटकु अदिक यारीकारा राजा अन्द सांगुळ तान माळ्द भोज दा बर गोटीदील; अदिक नाळ इन साटी भी राजा अन्द सांगुळ आक नान इक नेवता कोट्टुर.
EST 5:13 तौभी याग याग नान इक आ यहूदी मोर्दकै राजभवन इन फाटक दा कुर्तकु कांळ्सतान, आग आग ईद सप्पा नान नजर दा बेकार हतोद.”
EST 5:14 आऊन हिंग्स जेरेश अदिक आऊन सप्पा संगीगोळ आऊन से अंदुर, “पचास कय ऊँचा फाँसी इन ऊंद खम्भा माळकु आगुल, अदिक व्हातर्या राजा से अनेतीर कि आऊन मा मोर्दकै लटकुसकु आगुल; आग राजा अन्द सांगुळ खुशी देल भोज दा होगेतीर.” ई मात देल प्रसन्न आगकु हामान हांग अच फाँसी इन ऊंद खम्भा माळसुसदुन.
EST 6:1 आ ईळ्लक राजा अक जप बंदीदिल, इदुरसाटी आऊन आग्या देल इतिहास इन किताब तनकु आत, अदिक वाचुसकु राजा अक केळ्‍सकु आत.
EST 6:2 अदुर्दा ईद लिख्‍सकु सिक्त, कि याग राजा क्षयर्ष उन हाकिम जो द्वारपाल भी ईरोर, आंदुर दा टु बिगताना अदिक तेरेश हेसुर इन येढ्ढ मुंदुर आऊक कोन्नोद योजना माळीदुर अदरी मोर्दकै प्रगट माळीदुन.
EST 6:3 आग राजा केळदुन, “इदुर बदला मोर्दकै अन्द येन प्रतिष्ठा अदिक बड़ाई माळकु आगीत?” राजा अन्द जो सेवक आऊन स्यावा टहल माळतोगोर, आंदुर आऊक उत्तर कोट्टुर, “अदुर साटी येनु माळकु आगीदील.”
EST 6:4 राजा केळदुन, “आंगुळ दा याव आन?” अदा समय हामान राजा अन्द भवन टु व्हार्यागोळ्द आंगुळ दा ई मनसा देल बंदीदुन कि जो खम्भा आव मोर्दकै अन साटी तयार माळसुसीदुन, अदुर मा आऊक लटकुसोद मातचीत राजा से माळुल.
EST 6:5 आग राजा अन्द सेवकगोळ आऊन से अंदुर, “आंगुळ दा रा हामान नीदुरकु आन.” राजा अंदुन, “आऊक बुळ्क कारूकु तरी.”
EST 6:6 याग हामान बुळ्क बंदुन, आग राजा आऊन से केळदुन, “या मंळसा अन्द प्रतिष्ठा राजा माळोद चाहासतान रा आऊन साटी येन माळोद उचित आदीत?” हामान ईद सोचकु, कि नान से येक्‍कुल राजा यार्द प्रतिष्ठा माळोद चाहासतीदान,
EST 6:7 राजा अक उत्तर कोट्टुन, “या मंळसा अन्द प्रतिष्ठा राजा माळोद चाहस्यान,
EST 6:8 आऊन साटी राजकीय कपळा तंदकु आगुल, जो राजा हाकतान, अदिक ऊंद घ्वाळा भी, यदुर मा राजा सवार आगतान, अदिक आऊन ताल्ला मा जो राजकीय मुकुट हाक्कु ईरतद अद भी तंदकु आगुल.
EST 6:9 बाक अव कपळा, अदिक अद घ्वाळा राजा अन्द यातोवारा धोळ हाकिम उक सौप्सकु आगुल, अदिक यार प्रतिष्ठा राजा माळोद चाहासतान, आऊक अव कपळा हाकसुसकु आगुल, अदिक आ घ्वाळा मा सवार माळकु नगर इन चौराह दा आऊक तिर्गुसकु आगुल; अदिक आऊंद मुंद मुंद ईद प्रचार माळकु आगुल, ‘यार्द प्रतिष्ठा राजा माळोद चाहासतान, आऊन सांगुळ हिंग अच माळकु आदीत.’”
EST 6:10 राजा हामान से अंदुन, “फुर्ती माळकु तान अनोद अनुसार आ कपळा अदिक आ घ्वाळा अक हुळकु, आ यहूदी मोर्दकै से जो राजभवन इन फाटक दा कुरतोगतान, हांग अच माळ. ह्यांग नी अंद अदुर्दा येनु भी कमी आगबाळुल.”
EST 6:11 आग हामान आ कपळा, अदिक आ घ्वाळा अक हुळकु, मोर्दकै अक हाकसुसदुन, अदिक आऊक घ्वाळा मा येर्सकु, नगर इन चौराह दा ई प्रकार कारूतेला तिर्गुसदुन, “यार्द प्रतिष्ठा राजा माळोद चाहासतान आऊन सांगुळ हिंग अच माळकु आदीत.”
EST 6:12 आग मोर्दकै रा राजभवन इन फाटक दा वापस होटोदुन लेकीन हामान शोक माळतेला अदिक ताल्ला मुचकु राटनेरी तान मान्नी होदुन.
EST 6:13 हामान तान हिंग्स जेरेश अदिक तान सप्पा संगीगोळ से सप्पा येनारा जो आऊन मा बितुसीत वर्णन माळदुन. आग आऊन बुद्धिमान संगीगोळ अदिक आऊन हिंग्स जेरेश आऊन से अंदुर, “मोर्दकै यारी नी नीचा तोरसोद चाहसत्या, अगर आव यहूदीगोळ्द वंश दाकळोव आन, रा नी आऊन मा प्रबल आगतीदील आऊन से पुरा रिती देल निचा अच तोर्सकु आद्या.”
EST 6:14 आंदुर आऊन सांगुळ मात अच माळतेला ईरोर कि राजा अन्द किन्नर बंदकु हामान उक एस्तेर इन माळ्द भोज दा फुर्ती देल कारूकु ओतुर.
EST 7:1 अत: राजा अदिक हामान एस्तेर रानी इन भोज दा होट बंदुर.
EST 7:2 राजा दुसरा दिशी आळी दाकळोद शयद कुडुत कुडुत एस्तेर से मात केळदुन, “हे एस्तेर रानी! नीन येन निवेदन आद? अद पुरा माळकु आदीत. नी येन बेळत्या? बेळ, अदिक आरधा राज्य ताका नीन इक कोटकु आदीत.”
EST 7:3 एस्तेर रानी उत्तर कोट्टुर, “हे राजा! अगर नी नान मा प्रसन्न आय, अदिक राजा अक ईद स्वीकार आद, रा नान निवेदन देल नानी, अदिक नान बेळदुर देल नान लॉकुर इक प्राणदान सिकुल.
EST 7:4 यतिकी ना अदिक नान जाती इन लॉकुर मारकु आग्यार, अदिक नाव सप्पा घात अदिक नष्ट माळकु आगावाळेर आयेव. अगर नाव केवल दास-दासी आगोर साटी मारकु आदेव, रा ना सुंगा ईरायदीन; चाहे आ दशा दा आ विरोधी राजा अन्द नुकसान तुम सकालुन.”
EST 7:5 आग राजा क्षयर्ष एस्तेर रानी से केळदुन, “आव याव हुन, अदिक येल आन, जो हिंग माळोद निश्चय माळदुन?”
EST 7:6 एस्तेर उत्तर कोट्टुर, “आ विरोधी अदिक दुश्मन ईवा दुष्ट हामान हुन!” आग हामान राजा-रानी इन मुंद अंजेदुन.
EST 7:7 राजा सिट्ट देल तुमकु, आळी दाकळोद शयद कुडुतेला येदकु, राजभवन इन बगीचा दा होट्ट बुट्टुन; अदिक हामान ईद नोळकु कि राजा नान हानि ठान्स कोंडीदान, एस्तेर रानी से प्राणदान बेळ्ली नीदरेदुन.
EST 7:8 याग राजा राजभवन इन बेली टु आळी दाकळोद शयद कुडोद जागा दा वापस बंदुन आग येन नोळदुन कि हामान अदा चौकी मा यदुर मा एस्तेर कुर्तकु आर बांगेत्यान; अदिक राजा अंदुन, “येन ईद मान्ना दा अच नान मुंद अच रानी से बरबस माळोद चाहासतान?” राजा अन्द बाँय देल ईद वचन होटकु उच ईरोद, कि सेवकगोळ हामान उन बाँय झाक्स बुट्टुर.
EST 7:9 आग राजा अन्द मुंद उपस्थित ईरावाळेर किन्नरगोळ दा टु हर्बोना हेसुर इन ऊंद मंळसा राजा से अंदुन, “हामान उन अल पचास कय ऊँचा फाँसी इन ऊंद खम्भा नीदुरकु आद, जो आव मोर्दकै अन्द साटी माळसुस्यान, जो राजा अन्द हित इन मात माळीदुन.” राजा अंदुन, “आऊक अदुर्द मा लटकुस बुळी.”
EST 7:10 आग हामान अदा खम्भा मा जो आव मोर्दकै अन्द साटी तयार माळसुसीदुन, लटकुस बुट्टुर. इदुर मा राजा अन्द सिट्ट ठण्डा बिदोत.
EST 8:1 अदा दिशी राजा क्षयर्ष यहूदीगोळ्द विरोधी हामान उन मान्न मकान एस्तेर रानी इक कोट्ट बुट्टुन. मोर्दकै राजा अन्द मुंद बंदुन, यतिकी एस्तेर राजा अक हेळीदुर, कि आऊन से आकिन येन नाता ईरोद.
EST 8:2 आग राजा तान अद ऊँगरा जो आव हामान से ताकोम कोंडीदुन, ईळुकु मोर्दकै अक कोट्ट बुटुन. एस्तेर मोर्दकै अक हामान उन मान्न मकान मा अधिकारी नियुक्त माळ बुट्टुन.
EST 8:3 बाक एस्तेर दुसरा गन राजा से अंदुर; अदिक आऊन काल मा बिदकु, कण्ण इन नीर वाहुस वाहुसकु आऊन से गिळगिळास्कु विनती माळदुर कि अगागी वंश इनव हामान उन बुराई अदिक यहूदीगोळ्द नुकसान इन आऊन युक्ति रद्द माळकु आगुल.
EST 8:4 आग राजा एस्तेर उन दी व्हान्ना अन्द राजदण्ड वाळुसदुन.
EST 8:5 आग एस्तेर येदकु राजा अन्द मुंद नीदुरदुर; अदिक अनली कुरतुर, “अगर राजा अक स्वीकार इरूल अदिक आव नान से प्रसन्न आन अदिक ईद मात आऊक वळ्लीद जानस्कु बिळतद, अदिक ना भी आऊक वळ्लीद हत्तेतीन, रा जो चिट्टीगोळ हम्मदाता अगागी इन पार हामान राजा अन्द सप्पा प्रान्तगोळ्द यहूदीगोळ इक नष्ट माळोद योजना माळकु लिखसीदुर, आ चिट्टीगोळी रद्द माळोर साटी लिख्‍सकु आगुल.
EST 8:6 यतिकी ना तान कुल इन लॉकुर मा बिळावाळा आ विपत्ती इक या रीती देल नोळ सकाईन? ना तान वार्टुर्द विनाश इक ह्यांग नोळ सकाईन?”
EST 8:7 आग राजा क्षयर्ष एस्तेर रानी से अदिक मोर्दकै यहूदी से अंदुन, “ना हामान उन मान्ना मार रा एस्तेर उक कोट्ट बुट्टीन, अदिक आव फाँसी इन खम्भा मा लटकुसकु आग्यान, इदुरसाटी कि आव यहूदीगोळी कोन्नोद कोशिश माळीदुन.
EST 8:8 अत: नीव तान समझ इन अनुसार राजा अन्द हेसुर देल यहूदीगोळ हेसुर मा लिख्सी, अदिक राजा अन्द ऊँगरा अन्द छाप भी हच्ची; यतिकी जो चिट्टी राजा अन्द हेसुर देल लिख्‍सकु आगुल, अदिक अदुर मा आऊन ऊँगरा अन्द छाप हचकु आगुल, अदरी यारू रद्द माळ सकालुर.”
EST 8:9 अदा समय मतलब सीवान हेसुर इन तिसरा तिंगुळ इन तेईसवा दिन इक राजा अन्द लेखक कारूकु आदुर, अदिक या या मात इन आग्या मोर्दकै आंदरी कोटीदुन अदरी यहूदीगोळ इक अदिक अधिपतिगोळ इक अदिक भारत टु हुळकु कूश द्याश ताका, जो ऊंद सौ सत्ताईस प्रान्त आव, आ सप्पा अन्द अधिपतिगोळ अदिक हाकिमगोळ्द ऊंद ऊंद प्रान्त इन अक्षरगोळ दा अदिक ऊंद ऊंद द्याश इन लॉकुर्द भाषा दा, अदिक यहूदीगोळ इक आंदुर्द अक्षरगोळ्द अदिक भाषा दा लिख्‍सकु आत.
EST 8:10 मोर्दकै राजा क्षयर्ष उन हेसुर देल चिट्टीगोळ लिख्सकु, अदिक अऊर मा राजा अन्द ऊँगरा अन्द छाप हचकु, तेज नळावाळेर सरकारी घ्वाळागोळ अदिक खच्चरगोळ मा सवारी माळावाळेर कय दा कळु बुट्टुन.
EST 8:11 ई चिट्टीगोळ दा सप्पा नगरगोळ्द यहूदीगोळ इक राजा अन्द दी टु इजाजत कोटकु आत, कि आंदुर जमा आगुल अदिक तान तान जीव ऊळसोर साटी तयार आगकु, या जाती या प्रान्त इन लॉकुर अन्याय माळकु आंदरी या आंदुर आर्तेर अदिक बाल-बच्यागोळ इक दुख कोळोद चाहस्यान, आंदरी घात अदिक नष्ट माळुल, अदिक आंदुर धन दौलत लुट्‍स कोमुल.
EST 8:12 अदिक ईद राजा क्षयर्ष इन सप्पा प्रान्तगोळ दा ऊंद अच दिन दा माळकु आगुल, मतलब अदार हेसुर इन हन्नेळवा तिंगुळ इन तेरवा दिन इक.
EST 8:13 ई आग्या अन्द लेख इन नकलगोळ, पुरा प्रान्तगोळ दा सप्पा द्याशगोळ लॉकुर्द हात्ती तेरूकु कळुकु आत; ताकी यहूदी आ दिशी तान दुश्मनगोळ से बदला ताकोमली तयार ईरूल.
EST 8:14 अत: सवारी माळावाळेर वेग देल नळसावाळेर सरकारी घ्वाळागोळ मा सवार आगकु, राजा अन्द आग्या देल फुर्ती माळकु जल्दी होटोदुर, अदिक ईद आग्या शूशन गढ़ दा कोटकु आगीत.
EST 8:15 आग मोर्दकै निळा रंग अदिक बिळीद रंग इन राजकीय कपळा हाक्कु अदिक ताल्ला मा व्हान्ना अन्द धोळ मुकुट हुळकु, अदिक मलमल इन अदिक जांभळा रंग इन चादर होदुकु राजा अन्द मुंद टु होट्टुन, अदिक शूशन नगर इन लॉकुर आनन्द देल आऊन जयजयकार माळली कुरतुर.
EST 8:16 यहूदीगोळ इक आनन्द अदिक हर्ष आत अदिक आंदुर्द धोळ प्रतिष्ठा आत.
EST 8:17 अदिक या या प्रान्त, अदिक या या नगर दा, येल्यारा राजा अन्द आग्या अदिक नियम पोहचुसदव, अल अल यहूदीगोळ इक आनन्द अदिक हर्ष आत, अदिक आंदुर भोज माळकु आ दिन इक खुशी इन दिन मान्सदुर. अदिक आ द्याश इन लॉकुर दा टु हापाळ लॉकुर यहूदी बनसेदुर, यतिकी आंदुर मन दा यहूदीगोळ्द अंज्क सम्सकु ईरोद.
EST 9:1 अदार हेसुर इन हन्नेळवा तिंगुळ इन तेरवा दिन इक, या दिशी राजा अन्द आग्या अदिक नियम पुरा आगली ईरव, अदिक यहूदीगोळ्द दुश्मन आंदुर मा प्रबल आगोद आशा ईटतोगोर, लेकीन इदुर विपरीत यहूदी तान दुश्मनगोळ मा प्रबल आदुर;
EST 9:2 आ दिशी यहूदी लॉकुर राजा क्षयर्ष इन सप्पा प्रान्तगोळ दा तान तान नगर दा जमा आदुर, कि जो आंदुर नुकसान माळोद यत्न माळुल, आंदुर मा कय नळसुल. याऊ आंदुर सामना माळ सकीदील, यतिकी आंदुर अंज्क द्याश द्याश इन सप्पा लॉकुर्द मन दा समुस्कु ईरोद.
EST 9:3 उल्टा प्रान्तगोळ सप्पा हाकिमगोळ अदिक अधिपतिगोळ अदिक प्रधानगोळ अदिक राजा अन्द क्याल्सा माळावाळेर यहूदीगोळ्द मदत माळदुर, यतिकी आंदुर मन दा मोर्दकै अन्द अंज्क समुस्कु ईरोद.
EST 9:4 मोर्दकै रा राजा अन्द अल हापाळ प्रतिष्ठित ईरोन, अदिक कीर्ति सप्पा प्रान्तगोळ दा फैलुसेत; उल्टा आ गंळ्स मोर्दकै अन्द महिमा वाळुस्तेला होटोत.
EST 9:5 अत: यहूदीगोळ तान सप्पा दुश्मनगोळ इक तलवार देल कोंदकु अदिक घात माळकु नष्ट माळ बुट्टुर, अदिक तान दुश्मनगोळ से तान इच्छा अन्द अनुसार बर्ताव माळदुर.
EST 9:6 शूशन गढ़ दा यहूदीगोळ अईद सौ मंळसागोळ इक घात माळकु नष्ट माळदुर.
EST 9:7 आंदुर पर्शन्दाता, दल्पोन, अस्पाता,
EST 9:8 पोराता, अदल्या, अरीदाता,
EST 9:9 पर्मशता, अरीसै, अरीदे अदिक वैजाता,
EST 9:10 मतलब हम्मदाता अन पार यहूदीगोळ विरोधी हामान उन हत्त पारगोळ इक भी घात माळदुर; लेकीन आंदुर धन इक लुटसीदील.
EST 9:11 अदा दिशी शूशन गढ़ दा घात माळकु आत आंदुर गिनती राजा अक केळ्सकु आत.
EST 9:12 आग राजा एस्तेर रानी से अंदुन, “यहूदीगोळ शूशन गढ़ दा अच अईद सौ मंळसागोळ अदिक हामान उन हत्त पारगोळ इक भी घात माळकु नष्ट माळदुर; बाक राज्य अन्द अन्य प्रान्तगोळ दा आंदुर येन मालुम येन येन माळीदार! ईग इदुर से येक्‍कुल नीन निवेदन येन आद? अद भी पुरा माळकु आदीत. नी येन बेळत्या? अद भी नीन इक कोटकु आदीत.”
EST 9:13 एस्तेर अंदुर, “अगर राजा अक स्वीकार ईरूल रा शूशन इन यहूदीगोळ इक ईंद इन घाई नाळ भी माळोद आग्या कोटकु आगुल, अदिक हामान उन हत्तु पारगोळ फाँसी इन खम्भागोळ मा लटकुसकु आगुल.”
EST 9:14 राजा अंदुन, “हिंग अच माळकु आगुल;” ईद आग्या शूशन दा कोटकु आत, अदिक हामान उन हत्तु पारगोळ इक लटकुसकु आत.
EST 9:15 शूशन इन यहूदीगोळ अदार तिंगुळ इन चौदहवा दिन इक भी जमा आगकु शूशन दा मुर सौ गंळ्सुर्द घात माळदुर, लेकीन घन इक लुटसीदील.
EST 9:16 राज्य इन अन्य प्रान्तगोळ यहूदी जमा आगकु तान तान जीव ऊळसोर साटी नीदुरदुर, अदिक तान दुश्मनगोळ दा टु पचहत्तर हजार मंळसागोळ इक घात माळकु तान दुश्मनगोळ से आराम सिक्त; लेकीन धन लुटसीदील.
EST 9:17 ईद क्याल्सा अदार तिंगुळ इन तेरवा दिन इक माळकु आत, अदिक चौदहवा दिन इक आंदुर आराम माळकु भोज माळदुर अदिक आनन्द इन दिन ठहरूसदुर.
EST 9:18 लेकीन शूशन नगर इन यहूदी अदार तिंगुळ इन तेरवा दिन इक, अदिक अदा तिंगुळ इक चौदहवा दिन इक जमा आदुर, अदिक अदा तिंगुळ इन पंदरावा दिशी आंदुर आराम माळकु भोज इन अदिक आनन्द इन दिन ठहरूसदुर.
EST 9:19 ई कारण देहाती यहूदी जो बिना नगर इन दिवाल इन ऊरगोळ दा ईरतार, आंदुर अदार तिंगुळ इन चौदहवा दिन इक आनन्द अदिक भोज अदिक खुशी अदिक आपस दा भोजन सामग्री कळोद दिन नियुक्त माळकु मान्सतार.
EST 9:20 ई मातगोळ्द वृतांत लिख्‍सकु, मोर्दकै अन्द राजा क्षयर्ष अन्द सप्पा प्रांतगोळ्द दा, येन हात्ती येन दूर ईरावाळेर पुरा यहूदीगोळ्द हात्ती चिट्टीगोळ कळुदुन,
EST 9:21 अदिक ईद आग्या कोट्टुन, कि अदार तिंगुळ इन चौदहवा अदिक अदा तिंगुळ इन पंदरावा दिशी हर वर्ष मानसुल.
EST 9:22 इऊर दा यहूदीगोळ तान दुश्मनगोळ से आराम सिक्त, अदिक ईद तिंगुळ यदुर देल इदुर दा शोक आनन्द देल, अदिक विलाप खुशी से देल बदलुस्त; मानसुल अदिक आंदरी सामुहिक भोज अदिक आनन्द अदिक आबुर दाबुर हात्ती भोजन सामग्री कळुली अदिक गरीबगोळी दान कोळोद दिन मानसुल.
EST 9:23 अत: यहूदीगोळ जसा शुरू माळीदुर, अदिक जसा मोर्दकै आंदरी लिख्‍सकु
EST 9:24 यतिकी हम्मदाता अगागी इन पार हामान जो सप्पा यहूदीगोळव विरोधी ईरोन, आव यहूदीगोळ्द नाश माळोद योजना माळदुन, अदिक आंदरी मिटुस्ली अदिक नष्ट माळोर साटी “पूर” मतलब चिट्टी हाकदुन.
EST 9:25 लेकीन याग राजा ईद जान्स कोंडुन, आग आव आग्या कोट्टुन अदिक लिखसुसदुन कि जो दुष्ट योजना हामान यहूदीगोळ्द विरूद्ध माळीदुन अद आऊंदा ताल्ला मा पलटुस्कु बरूल, आग आव अदिक आऊन पारगोळ फाँसी इन खंभा मा लटकुसकु आदुर.
EST 9:26 ई कारण आ दिनगोळ हेसुर पूर शब्द टु पूरीम ईटकु आत. ई चिट्टी इन सप्पा मातगोळ कारण, अदिक जो येनारा आंदुर ई बारा दा नोळदुर अदिक जो येनारा आंदुर मा बितुस्त, अदुर कारण भी
EST 9:27 यहूदीगोळ तान तान साटी अदिक तान औलाद इन साटी, अदिक आ सप्पा मुंदुर साटी भी जो आंदुर दा मिलुसेगीदुर ईद अटल प्रण माळदुर, कि आ लेख इन अनुसार हर वर्ष आऊन ठहरूस्त समय दा आंदुर ईव येढ्ढ दिन मानसुल;
EST 9:28 अदिक पीढ़ी पीढ़ी, कुल कुल, प्रान्त प्रान्त, नगर नगर दा ईव दिन याद माळकु अदिक मान्सकु आदव, अदिक पूरीम हेसुर इन दिशी यहूदीगोळ दा यागलु मिटुसतीदील अदिक अऊर याद आंदुर वंश दा मिक्‍कु ईत्तीत.
EST 9:29 बाक अबीहैल उन पोर एस्तेर रानी, अदिक मोर्दकै यहूदी पूरीम इन बारा दा ईद दूसरी चिट्टी धोळ अधिकार इन सांगुळ लिख्सदुर.
EST 9:30 इदुर नकलगोळ मोर्दकै क्षयर्ष इन राज्य इन ऊंद सौ सत्ताईस प्रान्तगोळ्द सप्पा यहूदीगोळ्द हात्ती शांती कोळावाळेर्द अदिक खरा मातगोळ सांगुळ ई उम्मीद देल कळुदुर,
EST 9:31 कि पूरीम इन आ दिनगोळ विशेष ठहरूस्कु समयगोळ दा मोर्दकै यहूदी अदिक एस्तेर इन रानी इन आग्या अन्द अनुसार, अदिक जो यहूदीगोळ तान अदिक तान औलाद इन साटी ठान्स कोंडीदुर, अदुर अनुसार उपवास अदिक विलाप माळकु आगुल.
EST 9:32 पूरीम इन बारा दा ईद नियम एस्तेर उन आग्या से भी स्थिर माळकु आत, अदिक अदुर चर्चा किताब दा लिख्‍सकु आत.
EST 10:1 राजा क्षयर्ष द्याश अदिक समुद्र अन्द टापू येढ्ढु मा कर हचदुर.
EST 10:2 आऊन महानता अदिक पराक्रम इन क्याल्सागोळ, अदिक मोर्दकै अन्द आ बड़ाई इन पुरा ब्योरा, जो राजा आऊन माळीदुन, येन आव मादै अदिक फारस इन राजागोळ्द इतिहास इन किताब दा लिख्‍सकु हैलेच?
EST 10:3 यहूदी मोर्दकै, क्षयर्ष राजा अन्द अच ल्‍यालमा ईरोन, अदिक यहूदीगोळ्द नजर दा धोळ ईरोन, अदिक आऊन सप्पा वार्टुर आऊन से खुश ईरोर, यतिकी आव तान लॉकुर्द भलाई इन खोज दा ईरतोगोन अदिक तान सप्पा लॉकुर से शांती इन मातगोळ अनतोगोन.
ECC 1:1 यरूशलेम इन राजा, दाऊद उन पार सभा-उपदेशक उन प्रवचन.
ECC 1:2 उपदेशक ईद अनतान: सप्पा बेकार आद, सप्पा बेकार आद; सप्पा येनारा बेकार आद!
ECC 1:3 जो मेहनत मंळसा ई धरती मा माळतान, आऊक अदुर देल येन प्राप्त आगतद?
ECC 1:4 ऊंद पीढ़ी होगतद, अदिक दुसरा पीढ़ी बरतद, लेकीन पृथ्वी हांग च्या हांगा सदा ईरतद.
ECC 1:5 सूर्य होळतद, अद मुळ्कतद, अदिक अद जल्दी से आ जागा अक वापस होगतद यल टु अद होळतद.
ECC 1:6 हवा दक्षिण दिशा इन दी वाहुस्तद, अदिक तिर्गकु उत्तर दा होट बरतद, अदिक हिंग अद हमेशा तान जागा दा चक्कर हचतद, हवा तान जागा अन परिक्रमा माळतद.
ECC 1:7 सप्पा गांगागोळ समुद्र दा मिलुसताव, लेकीन समुद्र यागलु तुमाल्द. गांगागोळ तान उगम जागा टु मात्त वाहुसताव.
ECC 1:8 सप्पा मातगोळ थकुसावाळा आव, मंळसा अऊर्द वर्णन माळ सकालुन. कण्णगोळ नोळकु भी तृप्त आगालव, अदिक किवगोळ केळकु भी संतुष्ट आगालव.
ECC 1:9 जो मात आगेग्याद अद मात आदीत; जो बनसेग्याद अद मात बनसीत; ई धरती मा येनु भी व्हाशोद हैलेच.
ECC 1:10 येन पृथ्वी मा हिंग येनारा आद, अदुर बारा दा ईद अनकु आग सकुल, “नोळी, ईद व्हाशोद मात आद?” लेकीन अद नाम से हापाळ पयला टु आगतेला बरेत्याद.
ECC 1:11 हाळोद समय मातगोळ्द येनु याद ईतीदील, अदिक आगावाळा मातगोळ्द भी याद आंदुर बाद्दा बराबाळेर इक ईरतीदील.
ECC 1:12 ना सभोपदेशक, इस्त्राएल द्याश इन राजा ईरीन अदिक यरूशलेम नगर दा शासन माळीन.
ECC 1:13 ई धरती मा जो आगतद, बुद्धि देल अदुर्द खोजबीन माळली अदिक अदुर्द भेद समझुसोर साटी ना तान मन हचदीन. ईद ऊंद दुख इन क्याल्सा हुन, यारी परमेश्वर मंळसागोळ इक ईदा क्याल्सा दा व्यस्त ईरोर साटी सौपस्यान.
ECC 1:14 जो येनारा सूर्य अन ल्यालमा धरती मा आगतद, अद सप्पा ना नोळदीन. नानी अनुभव आत कि ईद सप्पा बेकार आद ईद मान्सी हवा अक हुडोद आद.
ECC 1:15 जो बदमाश आन, आव सरका आग सकालुन, अदिक जो हई हैलेच, आव आळुकु आग सकालुन.
ECC 1:16 ना तान दिल से अंदीन, “नोळ, नी हापाळ ग्यान हासील माळकोंड, ईट कि नीन ग्यान आ सप्पा से वाळुसेग्याद, जो नीन से पयले यरूशलेम दा आगीदुर. नीन इक हापाळ बुद्धि अदिक ग्यान इन अनुभव आगेग्याद.”
ECC 1:17 अत: ना तान मन ईद जानसुर दा हचदीन कि बुद्धि येन हुन, पागलपन अदिक मूर्खता येन हुन. आग नान इक मालुम आत कि ईद भी हवा अक हुडोद हुन.
ECC 1:18 यतिकी येक्‍कुल बुद्धि येक्कुल दुख इन जननी आद. ग्यान वाळुसावाळा तान दुखगोळी भी वाळुसतान.
ECC 2:1 ना तान दिल दा अंदीन, “नळ, ईग ना नीनी आनंद इन द्वारा जाचाईन, कि आनंद येन आद, लेकीन ना ईद भी नोळदीन कि ईद भी बेकार आद.”
ECC 2:2 नान इक हासी-खुशी इन बारा दा अनोद बित्त, “ईद पागलपन आद,” अदिक आनंद इन बारा दा “ईद येन क्याल्सा अन्द आद?”
ECC 2:3 ना मन दा सोचदीन कि याता प्रकार देल नान बुद्धि बन्सकु ईरूल अदिक ना तान जीव इक अंगुर इन रास्सा कुडोर से याता प्रकार बहलुसाईन अदिक ह्यांग मुर्खता अक हुडुकु ईराईन, यागासताका मालुम माळ कोमालीन कि अद वळ्लीद क्याल्सा यातोद हुन यदरी मंळसा तान जीवन तीम माळतेला ईरूल.
ECC 2:4 ना धोळ-धोळ क्याल्सा माळदीन. ना तान साटी महल माळदीन अदिक अंगुर इन बेली हचदीन.
ECC 2:5 ना तान साटी बगीचा अन्द बेली हचदीन अदिक ई बेलीगोळ दा हर प्रकार इन कायगोळ्द मार्र हचदीन.
ECC 2:6 ना तान साटी क्यार्रागोळ अगुळदीन, यलीद नीर देल आळी दाकळव मार्रगोळ इक नीर कोटकु आगोद.
ECC 2:7 ना दास-दासीगोळी कोंडीन. नान हात्ती आ गुलामगोळ भी ईरोर, यार्द जनम नान दा महल दा आगीत. नान हाती गोसी-वस्तागोळ्द ईट रेवड़ अदिक म्यांडा-मर्रगोळ्द ईट झुंड ईरव याट कि यरूशलेम दा यातोदु स्वामी अन हाती ईला ईरव.
ECC 2:8 इदुर अलावा ना राजागोळ्द अदिक प्रदेश इन व्हान्ना, बेळ्ली अदिक धन भी तान हात्ती जमा माळकु ईटीदीन. नान दरबार दा हापाळ गायिकागोळ अदिक गायक ईरोर. नान हात्ती गंळ्सुर दिल बहलुसावाळेर हापाळ रखेल आर्तेर भी ईरोर.
ECC 2:9 ई प्रकार ना तान से पयले नोर सप्पा यरूशलेम इन ईरावाळेर से येक्कुल महान अदिक धनवान आगेदीन; तरी भी नान बुद्धि नान सांगुळ बिट्टीदिल.
ECC 2:10 या वस्तुगोळी नोळोद नान इच्छा आत, ना अवरी भरपुर नजर देल नोळदीन. ना यातोदु प्रकार इन आनंद देल तान ह्दय वंचित ईटीदिल, यतिकी नान ह्दय नान मेहनत इन सप्पा क्याल्सागोळ दा आनन्द ताकोमोद अदिक ईदा आनन्द नान सप्पा मेहनतगोळ्द ईनाम ईरोद.
ECC 2:11 आग ना तान क्याल्सागोळ मा विचार माळदीन, ना आ मेहनत मा भी सोचदीन जो ना आ क्याल्सागोळ मा माळीदिन. नान इक अनुभव आत कि ईव सप्पा बेकार आव, ईद मान्सी हवा अक हुडोद आद. ई धरती मा मंळसा अन्द क्याल्सा अदिक मेहनत देल येनु लाभ हैलेच.
ECC 2:12 ईग ना बुद्धि, पागलपन अदिक मुर्खता मा विचार माळली कुरतीन, यतिकी उत्तराधिकारी जो राजा अन्द हिंद बंदान, आव येन माळ सकतान? सिर्फ अदा, जो आगतेला बरेत्याद?
ECC 2:13 ना नोळदीन कि जसा अंधकार देल प्रकाश श्रेष्ठ आद हांग अच बुद्धि मूर्खता देल श्रेष्ठ आद.
ECC 2:14 बुद्धिमान मंळसा अन्द ताल्ला दा आऊन कण्णगोळ ईरताव, अदिक आव नोळकु नळुतान, लेकीन मूर्ख मंळसा अंधकार दा टटुलस्तान. तौभी नान इक ईद अनुभव आत कि मूर्ख अदिक बुद्धिमान येढ्ढु मुंदुर दशा ऊंद घाई आगतद .
ECC 2:15 ना तान दिल दा अंदीन, “जो दशा मूर्ख अन्द आगतद, अदा नांद भी आदीत. बाक ना ईट बुद्धिमान यती आदीन?” अत: ना तान दिल दा अंदीन, “मूर्ख आगोद, अथवा बुद्धिमान आगोद भी बेकार आद.”
ECC 2:16 यतिकी ह्यांग मूर्ख अन स्मृति स्थायी ईराल्द हांग अच बुद्धिमान उन भी स्मृति स्थायी ईराल्द. थ्वाळासा अच दिनगोळ दा लॉकुर सप्पा मार्तोगतार. ह्‍यांग मूर्ख सायतान हांग अच बुद्धिमान भी.
ECC 2:17 नान इन जीवन देल घृणा आगेत, यतिकी धरती मा माळ्द सप्पा क्याल्सा नान इक बुरा हतली कुरतव. ईव सप्पा बेकार आव, ईद मान्सी हवा हुडोद आद.
ECC 2:18 ना नोळदीन कि नान इक तान मेहनत इन फल आ उत्तराधिकारी इन साटी बिटकु होगोद बिद्दीत जो ना हिंद बरावाळा आन. अत: नान इक तान पुरा मेहनत देल घृणा आगेत जो ना धरती मा माळीदिन.
ECC 2:19 याव जानस्तान कि ना उत्तराधिकारी बुद्धिमान ईत्तान अथवा मूर्ख? तौभी धरती मा आव नान पुरा मेहनत इन फल इक भोगस्यान अदिक जो येनारा ना बुद्धि देल जमा माळदीन आव अदुर्द स्वामी आदान. अत: ईद भी बेकार आद.
ECC 2:20 इदुरसाटी ना धरती मा माळ्द तान पुरा मेहनत इन प्रति निराश आगेदीन. अदुर देल विमुख आगेदीन.
ECC 2:21 यागल्यारा हिंग भी आगतद कि मंळसा बुद्धि, ग्यान अदिक कौशल देल मेहनत माळतान लेकीन आव अदुर्द फल आ मंळसा अन्द द्वारा भोगसोर साटी बिट्ट बुळतान, जो अदुर साटी येनु भी मेहनत माळीदील. ईद भी बेकार आद अदिक हापाळ बुरा आद.
ECC 2:22 धरती मा मन हचकु माळ्द मेहनत देल मंळसा अक येन लाभ?
ECC 2:23 खरा केळी रा आऊन जीवन इन सप्पा दिन दुखगोळ देल तुमकु ईरताव, अदिक आऊन क्याल्सा सन्तोष हैलेच, उल्टा सन्ताप पैदा माळतान. ईळ्ल इक भी आऊन मन इक चैन सिकाल्द. ईद भी बेकार आद.
ECC 2:24 मंळसा अन्द साटी इदुर से येक्‍कुल वळ्लीद मात अदिक यातु हैलेच कि आव तिनुल-कुडुल अदिक आनन्द इन सांगुळ मेहनत माळुल. लेकीन ना नोळदीन कि ईद भी परमेश्वर उन कय देल प्राप्त आगतद.
ECC 2:25 यतिकी आऊन बिना याव मंळसा तिन-कुडु सकतान, अदिक आनंद माळ सकतान?
ECC 2:26 या मंळसा से परमेश्वर प्रसन्न आगतान आव आऊका बुद्धि, ग्यान अदिक आनन्द प्रदान माळतान. पापी मंळसा से परमेश्वर कठोर मेहनत माळसुसतान. पापी मंळसा परमेश्वर उन प्रिय मंळसा अन्द साटी धन जमा माळतान अदिक अदरी संचित माळतान. अत: ईद भी बेकार आद, ईद मान्सी हवा अक हुडोद आद.
ECC 3:1 हर ऊंद मात इन उपयुक्त मौका, अदिक धरती मा माळोद क्याल्सा अन्द निर्धारित समय ईरतद:
ECC 3:2 जन्म इन समय; अदिक सायोद भी समय, बोऊसोद समय; अदिक बोऊसकु आग्याद अदरी कित्तोद भी समय आद.
ECC 3:3 कोन्नोद समय, अदिक चंगा माळोद समय, ढाऊसोद समय अदिक माळोद भी समय निर्धारित आद.
ECC 3:4 वर्लोद समय, अदिक नेग्गोद समय, शोक मानसोद समय, अदिक कुण्णोद भी समय आद.
ECC 3:5 कल्लगोळ इक बगरूसोद समय, अदिक कल्लगोळ इक जमा माळोद समय, कुतक्या अक हचोद समय अदिक कुतक्या टु दुर ईरोद भी समय ईरतद.
ECC 3:6 ढुंढसोद समय, अदिक काळोद भी समय, ईटोद समय, अदिक भीळोद भी समय निर्धारित आद.
ECC 3:7 हरोद समय, अदिक अइक होलोद भी समय, सुंगा ईरोद समय, अदिक माताळोद भी समय निश्चित आद.
ECC 3:8 प्यार माळोद समय, अदिक घृणा माळोद भी समय, युद्ध माळोद समय, अदिक शांती माळकु ईटोद भी समय आद.
ECC 3:9 क्याल्सा माळावाळा अक ताक मेहनत देल येन लाभ आगतद?
ECC 3:10 ना नोळदीन कि परमेश्वर मंळसा जाती मा याट भारी बोझ हाक्यान.
ECC 3:11 आव हर ऊंद वस्तु अक आऊन साटी सही समय मा अच माळदुन, आव मंळसा अन मन दा अनन्तकाल इन एहसास इक जाग्सदुन, तरी भी मंळसा सम्स सकालुन कि परमेश्वर सुरूवात टु आखरी ताका येन माळदुन.
ECC 3:12 अत: नान इक ईद अनुभव आत कि मंळसा अन्द साटी इदुर से वळ्लीद अदिक यातु मात हैलेच कि आव जीवन-तीम सुख देल अदिक खुशी मान्सतेला ईरूल.
ECC 3:13 ईद परमेश्वर उन वरदान आद कि हर ऊंद मंळसा व्‍हाट्टतीम तिनुल-कुडुल अदिक खुशी देल मेहनत माळुल.
ECC 3:14 ना ईद जान्सतीन कि जो येनारा परमेश्वर माळतान, अद हमेशा बन्सकु ईत्तीत; अदुर्दा येनु जोळ्सकु आग सकाल्द अदिक येनु गोर्त माळकु आग सकाल्द. परमेश्वर ईद इदुरसाटी माळदुन ताकी मंळसा आऊन से अंजुल.
ECC 3:15 जो आद, अद आगेग्याद, अदिक जो आगावाळा आद, अद भी आगेग्याद. परमेश्वर आऊक ढुंढ्सतान, जो खेदाळ्सकु आग्यान.
ECC 3:16 ना सूर्य अन ल्यालमा धरती मा ईद भी नोळदीन: न्याय इन जागा मा अन्याय आगेत्याद, धार्मिकता अन जागा मा अधर्म आगेत्याद.
ECC 3:17 ना तान दिल दा अंदीन, “परमेश्वर हर ऊंद मात अदिक हर ऊंद क्याल्सा अन्द समय निश्चित माळकु ईट्यान; अत: आव धार्मिक मंळसा अदिक दुष्ट येढ्ढु मुंदुर्द न्याय माळ्यान.”
ECC 3:18 ना मंळसा अन्द औलाद इन बारा दा ईद सोचदीन : परमेश्वर आंदरी ईद सच्चाई कलसोर साटी परखुसेत्यान कि आंदुर जनावर उन अलावा येनु हैलेच.
ECC 3:19 मंळसा अदिक पशु ऊंद अच दशा अक प्राप्त आगतार. ह्यांग पशु सायतद हांग अच मंळसा भी. अऊर सप्पा मुंदुर दा ऊंद अच घाई जीव आद. मंळसा पशु से श्रेष्ट हैलेच. अत: सप्पा व्यर्थ आद.
ECC 3:20 सप्पा आखरी दा ऊंद अच जागा दा होगतार. सप्पा मुण्ण देल बनस्कु आर, अदिक मुण्ण दा अच मिलुसेदार.
ECC 3:21 याव अन सकतान कि मंळसा अन्द जीव म्याकुच होगतद अदिक जनावर इन जीव ल्यालमा दी होगकु मुण्ण दा मिलुसेगतद?
ECC 3:22 अत: नानी मालुम आत कि मंळसा अन्द साटी इदुर से येक्‍कुल वळ्लीद मात अदिक यातोदु हैलेच कि आव खुशी देल तान क्याल्सा माळुल, यतिकी क्याल्सा माळोद अच आऊन नियति आद. याव मंळसा यातोवारा मंळसा अन्द सायोद बाद्दा आऊक वापस तंदकु भविष्य अन्द मातगोळ तोर्स सकतान?
ECC 4:1 आग ना मात विचार माळदीन कि धरती मा याट अत्याचार आगतद, यार मा अत्याचार आगतद, आंदुर तान कण्ण इन नीर वाहुसतार, लेकीन आंदुर कण्ण इन नीर सिटावाळा याऊ ईरालुन. अत्याचार माळावाळेर हाती ताकत ईरोद, लेकीन कण्ण इन नीर वाहुसावाळेर हाती आंदरी दिलासा कोळावाळा भी ईला ईरोन.
ECC 4:2 अदिक ना घोषणा माळदीन कि जो पयले अच सोतोग्यार आंदुर ईग भी जित्ता आर, अदिक जित्तागोळ से येक्कुल खुश आर.
ECC 4:3 लेकीन सोतकु अदिक जीत्ता मंळसागोळ से धोड्डेव आन आव मंळसा याऊन जनम आगीदील, याव सूर्य अन ल्यालमा धरती मा माळकु आदव दुष्कर्मगोळी नोळीदील.
ECC 4:4 बाक ना नोळदीन कि सप्पा मेहनत अदिक सफल क्याल्सागोळी तान मान्ना हातळोर प्रति शत्रु-भावना देल माळकु आगतद. अत: ईद भी व्यर्थ आद, ईद मान्सी हवा अक हुडोद आद.
ECC 4:5 मूर्ख कय मा कय मंळ्सकु कुर्तकु ईरतान, आव मान्सी तान तान इक अच बरबाद माळतान.
ECC 4:6 ठ्वामा तीम मन इन चैन येढ्ढ ठ्वामा मेहनत देल श्रेष्ठ आद, जो मान्सी हवा अक हुडोद आद.
ECC 4:7 ना सूर्य अन ल्यालमा धरती मा मात्त बेकार मातगोळी नोळदीन:
ECC 4:8 यद्यपि मंळसा आबना आन, आऊन पार हैलेच, वार्ट हैलेच, तौभी आव हमेशा कमुस्तेला होगतान, आऊन मेहनत इन येनु अन्त हैलेच. आऊन कण्णगोळ धन-सम्पत्ति देल तृप्त आगालव. आव तान तान इक यागलु केळालुन, “ना ईद मेहनत यार साटी माळेतीन, अदिक येती खुद इक सुख-चैन देल वंचित माळेतीन?” ईद भी व्यर्थ आद, अदिक ऊंद दुखद कार्य व्यापार आद.
ECC 4:9 ऊंद से येढ्ढ वळ्लेर आगतार, यतिकी आंदरी आंदुर्द मेहनत इन वळ्लीद फल सिकतद.
ECC 4:10 अगर आंदुर दा टु ऊंद बिळतान रा दुसरा आऊक नेगु सकतान. दुख आऊक जो आबना आन! अगर आव बिदोदान रा आऊक यार नेगदार?
ECC 4:11 अगर येढ्ढु मुंदुर सांगुळ मिंग्यार रा आंदुर गरम ईत्तार. लेकीन आबना मंळसा तान तान इक ह्यांग गरम माळ सकतान?
ECC 4:12 प्रहार माळावाळा आबना मंळसा मा प्रबल आग सकतान, लेकीन येढ्ढ मंळसा आऊन सामना माळ सकतार. जो जाळी मुर धागागोळ देल गुंळ्सकु ईरतद, अद जल्दी हराल्द.
ECC 4:13 बुद्धिमान हारोदव पार गरीब ईत्तुर देल भी हिंग हाळाबाट्ट अदिक मूर्ख राजा से उत्तम आन, जो चेतावनी मानसालुन.
ECC 4:14 बाक चाहे हारोदव पार बंदीगृह टु होटकु राजा आगुल, चाहे आव तान राज्य दा गरीब पैदा आगुल.
ECC 4:15 ना सूर्य अन ल्यालमा धरती मा वयाळतेला सप्पा जीवगोळी आ दुसरा हारोदव मंळसा अन दी होगतेला नोळदीन, जो पयलेवाळा अन जागा ताकोंडान.
ECC 4:16 आऊन अनुगामिगोळ्द संख्या, यार्द आव नेतृत्व माळदुन, अगणित ईरोद. फिर भी बरावाळा पीढ़ी आऊन से प्रसन्न आगतीदील. अत: बिना संकोच ईद भी व्यर्थ आद, ईद मान्सी हवा अक हुडोद आद.
ECC 5:1 याग नीव परमेश्वर उन मंदिर दा होगतीर आग तान आचरण इन ध्यान ईटी. मूर्ख द्वारा येर्सकु बलि इन अपेक्षा परमेश्वर उन मंदिर दा बरोद, अदिक आऊन वचन केळोद उत्तम आद. यतिकी मूर्ख ईद जानसालुन कि जो क्याल्सा आव माळतान, अद बुरा आद.
ECC 5:2 तान बाय दा टु यातोदारा मात जल्दी तेगु बाळी, अदिक उतावली दा तान दिल इन मात परमेश्वर उन मुंद प्रकट माळबाळी, यतिकी परमेश्वर रा स्वर्ग दा आन, अदिक नीव पृथ्वी मा. अत: नीम्द शब्द थ्वाळासा अच ईरूल.
ECC 5:3 जसा क्याल्सा अन्द अधीनता अन्द कारण मंळसा कांसा नोळतान, हांग अच हापाळ बकवास देल मूर्ख अन्द मूर्खता प्रकट आगतद.
ECC 5:4 याग नीव परमेश्वर उन साटी मन्नत मान्सतार आग अदरी पुरा माळदुर दा देरी माळबाळेतीर, यतिकी परमेश्वर मूर्खगोळ देल प्रसन्न आगालुर. जो मन्नत नीव मान्सतीर अदरी पुरा माळी.
ECC 5:5 मन्नत मान्सकु अदरी पुरा ईला माळदुर देल मन्नत इन ईला मानसोद अच वळ्लीद आद.
ECC 5:6 नीव तान बाय देल हिंग शब्द तेगुबाळी जो नीम इक पाप दा फसुसुल. स्वर्गदूत उन मुंद ईद अनबाळी कि नान से भूल आगेत. ईलारा परमेश्वर नीम्द आवाज केळकु खुश आगतीदील, अदिक आव मेहनत देल माळ्द नीम्द क्याल्सा अक नष्ट माळ बुट्टान.
ECC 5:7 याग मंळसा येक्‍कुल से येक्‍कुल कांसा नोळली कुरतान, आग आऊन व्यर्थ मातगोळ भी वाळुसतद. लेकीन नीव परमेश्वर उन अंज्क मान्सी.
ECC 5:8 अगर नीव यातोदारा प्रदेश दा गरीबगोळ मा अत्याचार आगतेला नोळीर, अगर नीव अल‍ न्याय अदिक धर्म अन्द कुतक्या घोट्सकु आगतेला नोळीर, रा आश्चर्य माळ बाळेतीर; यतिकी ऊंद अधिकारी इन म्याकुच आऊन से धोळ अधिकारी ईरतान अदिक आऊन से भी म्याकुच उच्च अधिकारी ईरतान.
ECC 5:9 केई इन फसल सप्पा मुंदुर साटी आद, लेकीन केई देल राजा अन भी क्याल्सा होट्ट बुळतद.
ECC 5:10 पैस्या से प्यार माळावाळा पैस्या से यागलु संतुष्ट ईरालुन; अदिक न हिंग मंळसा, यारी धन से प्यार आद, आऊन येक्‍कुल से येक्कुल लाभ देल संतुष्ट आगतान. ईद भी व्यर्थ आद.
ECC 5:11 याग सम्पत्ति वाळुस्तद आग अदरी तिनावाळेर भी वाळुसतार. अत: आऊन स्वामी इक आऊन से येन लाभ? सिर्फ ईद कि आव अदरी केवल कण्ण देल नोळुल!
ECC 5:12 मजदूर उन साटी वरदान आद, सय जप, चाहे आव आरधा व्हाट्टा तिनुल चाहे व्हाट्टा तीम. लेकीन धनवान उन धन वाळुसदुर देल आऊन कण्णगोळ से जप हारेगतद.
ECC 5:13 ना धरती मा ऊंद दुखद बुराई नोळदिन : धन इन स्वामी तान हानि इन साटी धन जमा माळतान.
ECC 5:14 अगर आऊन धन सट्टेबाजी दा हारेगतद, अदिक आऊन मान्ना दा पार जन्म ताकोमतान रा आऊन कय दा येनु मिक्‍कु ईराल्द.
ECC 5:15 जसा आव तान मोय इक गर्भ टु पैदा आगीदुन हांग अच नंगा वापस होदान, आव तान कय दा तान मेहनत इन फल वय सकालुन.
ECC 5:16 ईद दुखद बुराई आद, जसा आव बंदीदुन ठीक हांगा ईल टु वापस होदान. आऊक तान मेहनत देल येन लाभ आत?
ECC 5:17 आव व्यर्थ अच मेहनत माळदुन, आव तान पुरा जीवन उदासी अदिक दुख दा, चिन्ता अदिक रोग दा, सिट्ट दा व्यतीत माळदुन.
ECC 5:18 नोळी, जो भला मात ना अनुभव माळदीन, अदिक जो उचित भी आद, अद ईद आद : “मंळसा परमेश्वर द्वारा कोटकु आग्याद तान अल्पकाल इन जीवन दा धरती मा खुशी देल मेहनत माळुल, तिनुल अदिक कुडुल, यतिकी ईदा आऊन भाग हुन.”
ECC 5:19 हर ऊंद मंळसा, याऊक परमेश्वर धन-सम्पत्ति कोटुन अदिक आऊक भोगसोद सामर्य्थ भी कोट्टुन, आव तान भाग इक स्वीकार माळुल अदिक खुशी देल मेहनत माळुल. ईद परमेश्वर उन वरदान आद.
ECC 5:20 मंळसा तान पुरा जीवन इक हमेशा अन साटी याद ईटतीदील, यतिकी परमेश्वर मंळसा अक आ क्याल्सागोळ दा अच हचकु ईटतान, या क्याल्सागोळी माळदुर दा आ मंळसा रुची ईटतान.
ECC 6:1 ना धरती मा ऊंद अदिक बुराई नोळदीन, अदुर भार देल मंळसा वतकु ईरतान.
ECC 6:2 अद बुराई ईद हुन: परमेश्वर मंळसा अक धन-सम्पत्ति अदिक प्रतिष्ठा प्रदान माळतान, अदिक मंळसा अक तान इच्छा अन्द अनुसार सप्पा येनारा प्राप्त आगेगतद. आऊक यातोदु वस्तु अन्द अभाव ईराल्द. लेकीन आ मंळसा अक परमेश्वर धन-सम्पत्ति भोगसोद सामर्थ्य कोळाल्द; बल्‍की अनजान मंळसा आऊन धन-सम्पत्ति भोग्सतान. इदुरसाटी धन-सम्पत्ति बेकार आद, ईद भयानक दुख इ मात आद.
ECC 6:3 अगर यावारा मंळसा अन्द सौ पार पैदा आगतार, अदिक आव लम्बा उमर ताका जीत्ता ईरतान, दीर्घ आयु प्राप्त माळतान, लेकीन अगर आव जीवन इन सुखगोळ इक भोग्स सकालुन, सोतुर मा आखरी किर्या भी आऊक प्राप्त आग बाळुल, रा ना ईद अनाईन: हिंग मंळसा से अधुरा समय दा जनमुस्द सोतकु पार वळ्लेव आन.
ECC 6:4 सोतकु बच्चा ई धरती मा व्यर्थ अच बरतान, अदिक अंधकार दा लुप्त आगेगतान, अदिक आऊन हेसुर भी अंधकार दा मुच्चेगतद.
ECC 6:5 आव सूर्य अन्द प्रकाश उक नोळ सकीदील, अदिक आऊक जीवन इन येनु अनुभव आगीदील. फिर भी आऊक आ दीर्घायु वाळा मंळसा से येक्‍कुल आराम सिक्त.
ECC 6:6 चाहे मंळसा येढ्ढ हजार वर्ष जीऊसुल, लेकीन अगर आव जीवन इन आनन्द पूर्वक भोग माळालुन रा हिंग दीर्घायु देल येन लाभ? सप्पा मंळसा जीवन इन आखरी दा ऊंद अच जागा अक होगतार.
ECC 6:7 मंळसा तान व्हाट्टा अन्द साटी अच सप्पा मेहनत माळतान, तौभी आऊन व्हाट्टा यागलु तुमाल्द.
ECC 6:8 अत: बुद्धिमान मंळसा याता मात दा मूर्ख मंळसा से श्रेष्ठ आदुन? गरीब मंळसा, जो ईद जान्सतान कि जीवन दा ह्यांग आचरण माळ पायजे, आऊन से याता मात दा श्रेष्ठ सिद्ध आदुन?
ECC 6:9 कण्णगोळ देल नोळ कोमोद मन इन चंचल कामनागोळ से उत्तम आद. अत: व्हाट्टा अन्द साटी मेहनत माळोद भी बेकार आद, ईद मानसी हवा अक हुडोद आद.
ECC 6:10 जो यावारा भी मंळसा आगुल, आऊक आऊन हेसुर पयले टु अच कोटकु आगीत: मंळसा अन्द बारा दा ईद प्रकट माळकु आगेग्याद कि आव केवल मुण्ण आन. अत: आव तान से येक्‍कुल बलवान मंळसा से लळाई माळ सकालुन.
ECC 6:11 जीवन इन बारा दा याट विचार माळी, आट अच अद बेकार हततद, रा हिंग जीवन देल मंळसा अक येन लाभ?
ECC 6:12 मंळसा तान क्षणिक जीवन सावली इन घाई व्यतीत माळतान; अत: याव जानस्तान कि आऊन साटी हिंग जीवन दा उत्तम येन आद? मंळसा अक याव हेळ सकतान कि आऊन सोत्तुर बाद्दा सूर्य अन्द ल्‍यालमा धरती मा येन आदीत?
ECC 7:1 हेसुर इन सुगन्ध अनमोल अत्तर इन सुगन्ध से धोळ्द आद. सायोद दिन जनम इन दिन से उत्तम आद.
ECC 7:2 भोज इन त्योहार दा सम्मिलित आगोद अपेक्षा सायोद-शोक देल पीड़ित परिवार दा होगोद वळ्लीद आद, यतिकी सायोद अच सप्पा मंळसागोळ्द अच अन्त आद. अत: जीत्ता मंळसा गम्भीरतापूर्वक तान अन्त मा विचार माळ्यान.
ECC 7:3 नेग्गोर से वळ्लीद दुख आद; यतिकी मार्रा अन दुख दिल इन सुख आद.
ECC 7:4 बुद्धिमान मंळसा अन्द दिल शोक-पीड़ित परिवार दा हतकु ईरतद, लेकीन मूर्ख मंळसा अन्द मन आनंद माळावाळा मान्ना दा हतकु ईरतद.
ECC 7:5 मूर्खगोळ बायदेल हाळ केळोद अपेक्षा बुद्धिमान उन फटकार केळोद वळ्लीद आद.
ECC 7:6 मूर्खगोळ्द नेगोद हांग अच ईरतद जसा माळका अन्द ल्‍यालमा होततेला मुळ्लगोळ्द चरचराहट. अत: ईद भी व्यर्थ आद.
ECC 7:7 निस्सन्देह अत्याचार इन कमाई देल बुद्धिमान भी मूर्ख बनसेगतान, घुस ताकोंडुर देल बुद्धि नष्ट आगेगतद.
ECC 7:8 क्याल्सा अन्द शुरू देल अदुर्द अन्त उत्तम आद, अहंकारी गंळ्स उन अपेक्षा धीरज ईटावाळा गंळ्स श्रेष्ठ आन.
ECC 7:9 तुरन्त क्रोधित आगबाळी, यतिकी क्रोध इन वास मूर्ख उन दिल आद.
ECC 7:10 ईद अनबाळी, कि ईंद से बितुस्कु नाळ वळ्लीद आद. यतिकी ईदुर बारा दा निम्द हिंग अनोद बुद्धि द्वारा हैलेच.
ECC 7:11 बुद्धि विरासत इन घाई ऊंद वळ्लीद चीज आद, अदिक आ लॉकुर इक लाभ पहुचुसतद जो सुर्य अक नोळतार.
ECC 7:12 बुद्धि इन संरक्षण धन इन संरक्षण इन तुल्य आद. ग्यान देल ईद लाभ आद कि आव तान धारक उन जीवन सुरक्षित ईटतान.
ECC 7:13 परमेश्वर उन क्याल्सागोळ मा विचार माळी: यारी परमेश्वर वाकळा माळदुन, आऊक याव सीधा माळ सकतान?
ECC 7:14 सुख इन दिनगोळ दा खुशी मनुसी, लेकीन दुख इन दिनगोळ दा विचार माळी, यतिकी परमेश्वर सुख अदिक दुख येढ्ढु उक माळदुन, ताकी मंळसा अक ई मात इन भेद सिकबाळुल कि अदुर बाद्दा येन आगोद आद.
ECC 7:15 ना तान बेकार जीवन दा ईद नोळदीन: न्यायी मंळसा तान न्यायीपन दा सायतान, लेकीन दुर्जन मंळसा दुष्कर्म माळतेला लंबा ऊमर हासील माळतान.
ECC 7:16 अत: येक्‍कुल धार्मिक बन्सबाळी, अदिक येक्‍कुल बुद्धिमान! ईलारा नीव तान कालगोळ मा खुद कोळ्ली बळदीर.
ECC 7:17 येक्‍कुल अधार्मिक भी बन्सबाळी, अदिक न मूर्ख. ईलारा नीव समय से पयला अच सोतोदीर.
ECC 7:18 वळ्लीद ईद आद कि नीव ऊंद इक हुळकु ईटी, अदिक दुसरा अक भी तान कयगोळ से होळगोळ बाळी. जो मंळसा परमेश्वर उन भक्ति माळतान, आव ई सप्पा कठिनाईगोळ से पार आगेदान.
ECC 7:19 बुद्धी इच बुद्धिमान मंळसा अक नगर इन हत्त शासकगोळ से येक्‍कुल ताकत प्रदान माळतद.
ECC 7:20 निश्चय अच धरती मा याऊ हिंग न्यायी मंळसा हैलेच जो सदा भलाई अच माळतान, अदिक यागलु पाप माळालुन.
ECC 7:21 जो मातगोळ मंळसा अनतान, आ सप्पा मातगोळ मा कीव हचबाळेतीर. ईलारा नीव ईद मात केळीर कि नीम्द सेवक नीम्द बुराई माळोन.
ECC 7:22 नीम्द दिल जान्सतद कि खुद नीव भी हापाळ घन दुसरा मंळसागोळ बुराई माळीर.
ECC 7:23 “ईद सप्पा ना बुद्धि देल परखुसदीन. ना सोचदीन, ‘ना बुद्धिमान बनसाईन’, लेकीन बुद्धि नान से दूर अच ईत.
ECC 7:24 जो तत्व आव, अव हापाळ दूर आव, गहरा आव, अदिक अत्यंत गहरा आव. अदरी याव सम्स सकतान?”
ECC 7:25 ना ईद जानसोर साटी मन हचदीन कि बुद्धि येन हुन, सब इन सार तत्व येल आद अदुर देल नानी ग्यात आगुल कि मूर्खता अधर्म आद, मूर्खता पागलपन आद.
ECC 7:26 आग ना सायोद से येक्‍कुल कळा सत्य प्राप्त माळदीन : मतलब आ आर्त, आकिन दिल फंदा आद, आकिन मन जाल आद, आकिन कय जंजीर आव. केवल आवा गंळ्स आकिन से वाचुस सकतान, याऊन से परमेश्वर प्रसन्न ईरतान, ईलारा पापी गंळ्स अदुर्द शिकार आगेगतान.
ECC 7:27 उपदेशक अनतान: नोळी, याग ना सार तत्व तेगोर साटी आबुर दाबुर से मार जोळ्सदेव, आग नानी ईद तथ्य कय दा हत.
ECC 7:28 लेकीन ना यारी ढुंढ्सतेला ईत्तीन, आव नानी सिकीदिल. हजार गंळ्सुर दा येल्यारा ऊंद गंळ्स नानी सिकदुन, लेकीन अऊर दा नानी ऊंद भी आर्त सिकीदील.
ECC 7:29 नोळी, ना केवल ईद सच्चाई नोळदीन परमेश्वर मंळसा अक सीधा-सादा माळदुन, लेकीन मंळसा खुद जीवन इन हापाळ योजनागोळ ढुंढ्सकु तेगदुन.
ECC 8:1 बुद्धिमान मंळसा यार घाई आन? याव मंळसा तत्व अन्द अर्थ जानस्तान? मंळसा अन्द बुद्धी इन कारण आऊन बाय चमकुसतद, अदिक आऊन मार्रा अन्द दुख दुर आगेगतद.
ECC 8:2 ना नीनी सलाह कोळतीन कि, परमेश्वर उन मुंद ताकोम्द किर्‍या अन कारण नी राजा अन आग्या अन पालन माळ.
ECC 8:3 आऊन मुंद टु होटोगी; अगर आव यातोदु मात देल अप्रसन्न आन रा नीव अल ठहरूसबाळी; यतिकी राजा ह्यांग चाहासतान हांग माळतान.
ECC 8:4 राजा अन शब्दगोळ दा परम सत्ता ईरतद, राजा से याव केळ सकतान, “नीव ईद येन माळेतीर?”
ECC 8:5 जो मंळसा राजा अन्द आग्या अन्द पालन माळतान, आऊन हानि आगाल्द. बुद्धिमान मंळसा उपयुक्त समय अदिक उपयुक्त कार्य-विधि जानस्तान.
ECC 8:6 हर ऊंद मात इन उपयुक्त समय अदिक उपयुक्त कार्य-विधि ईरतद, इदुरसाटी मंळसा अन्द दुख आऊन साटी हापाळ भारी बिळतद.
ECC 8:7 मंळसा ईद जानसालुन कि येन आगावाळा आद, यतिकी याव मंळसा आऊक भविष्य दा घटुसावाळा मातगोळ हेळ सकतान?
ECC 8:8 हिंग याव मंळसा आन आऊन वश जीव मा नळुल, अदिक आव जीव इन होळा समय अदरी रोक्स कोमुल? सायोद दिन मा सायावाळा अन्द अधिकार ईराल्द. युद्ध देल छुटकारा सिकाल्द, अदिक न दुष्ट मंळसा तान दुष्टता अन्द कारण मृत्यु देल ऊळु सकतान.
ECC 8:9 याग ना धरती मा आगावाळा मातगोळ मा गम्भीरतापूर्वक तान मन हचदीन, आग ना ईद नोळदीन: याग ऊंद मंळसा दुसरा मंळसा मा प्रभुत्व जम्सतान आग आव खुद इन नाश माळतान.
ECC 8:10 आग ना दुष्टगोळ इक कबर दा नळ्स्तेला नोळदीन. आंदुर पवित्र जागा दा होगतेला बरतेला ईरोर. नगर दा यल आंदुर नाना प्रकार इन दुष्‍कर्म माळीदुर, आंदुर्द प्रशंसा आगतोगोद. ईद भी बेकार आद.
ECC 8:11 दुष्‍कर्म अन्द साटी मंळसा अक जल्दी दण्ड सिकाल्द, इदुरसाटी मंळसागोळ्द दिल दुष्‍कर्म माळदुर दा हतकु ईरतद.
ECC 8:12 यद्यपि पापी मंळसा सौ घन दुष्‍कर्म माळतान, अदिक आऊक दण्ड सिकाल्द, आव लम्बा उमर ताका जीत्ता ईरतान, यद्यपि ना ईद जान्सतीन कि परमेश्वर उन से अंजावाळेर्द अन्त भी भला अच आगतद. परमेश्वर आंदुर्द भला माळतान, यतिकी आंदुर आऊन से अंजतार.
ECC 8:13 लेकीन दुष्ट उन आखरी दा भला आगतीदील, अदिक आव छाया अन्द सदृश तान उमर लम्बा माळ सकतीदिल, यतिकी आव परमेश्वर से अंजालुन.
ECC 8:14 ऊंद मात अदिक : ईद भी व्यर्थ आद, अदिक पृथ्वी मा आगतद. सच्चा मंळसागोळ इक दुर्जन मंळसागोळ्द दुष्कर्मगोळ्द फल भुगतुसोद बिळतद, अदिक दुर्जन मंळसा सच्चा मंळसागोळ्द सत्कर्मगोळ्द फल प्राप्त माळतान. अत: ना अनतीन, ईद भी व्यर्थ आद.
ECC 8:15 इदुरसाटी ना लॉकुर इक सलाह कोळतीन: आनंद मनुसी. धरती मा मंळसा अन्द साटी तिनोद-कुडोद अदिक आनन्द मानसोद अलावा अदिक येनु भी वळ्लीद हैलेच. जो आयु परमेश्वर अदरी ई धरती मा प्रदान माळदुन, आऊन मेहनत दा ईदा खुशी सांगुळ ईत्तीत.
ECC 8:16 याग ना बुद्धि प्राप्त माळोर साटी, तथा पृथ्वी मा आगावाळा क्याल्सा व्यापार इक समसोर साटी मन हचदीन, अदिक याग ना ईद जानसोद प्रयत्न माळदीन कि ह्यांग मंळसा ईळ्ल-हागुल जागस्तेला ईरतार,
ECC 8:17 आग नान इक अनुभव आत कि परमेश्वर उन पुरा क्याल्सा, जो ई धरती मा आगतद, चाहे मंळसा अदुर्द भेद जानसोर साटी याटारा अच मेहनत येती माळबाळुल, आव अदुर्द पता हच सकालुन. अगर यावारा बुद्धिमान मंळसा आऊक जानसोद दावा माळुल तौभी आव आऊन पता हच सकालुन.
ECC 9:1 ना ई सप्पा मातगोळ इक जाचदीन-परखुसदीन अदिक मन देल गम्भीरतापूर्वक विचार माळदीन. आग नान इक ग्यात आत कि न्यायी अदिक बुद्धिमान मंळसा अदिक आंदुर्द सत्कर्मगोळ्द फल परमेश्वर उन कयगोळ दा आद. मंळसा ईद जानसालुन कि परमेश्वर आऊन क्याल्सा देल प्रसन्न आन अथवा आऊक आऊन क्याल्सागोळ से घृणा आद. अत: आऊन मुंद सप्पा व्यर्थ आद.
ECC 9:2 सप्पा अन्द नियति ऊंद अच आद: न्यायी अदिक अन्यायी, भला अदिक बुरा, शुद्ध अदिक अशुद्ध, बलि येरसावाळा-बलि ईला येरसावाळा. जो नियति वळ्लेव मंळसा अन्द आद अदा पापी मंळसा अन्द आद. जो तान किर्‍या अक पुरा माळतान, आऊन नियति अदा आद, जो तान किर्‍या अन्द उल्लंघन माळतान.
ECC 9:3 जो बुराईगोळ ई धरती मा विराजमान आद अऊर दा ऊंद ईद गलत आद: सप्पा मंळसा ऊंद अच गति अक प्राप्त आगतार. मंळसागोळ्द दिल बुराई देल तुमकु आद. यागासताका आंदुर जीत्ता ईरतार, आंदुर दा पागलपन समुस्कु ईरतद. अदुर बाद्दा आंदुर सोतकु मंळसागोळ दा मिलुस्तार.
ECC 9:4 यागासताका मंळसा जीत्ता ईरतान, आऊन दिल दा आशा अन्द दिंग्या टिमटिमुस्कु ईरतद, यतिकी जीत्ता नाय सोतकु हुल्ल इन से वळ्लीद आद.
ECC 9:5 जो जीत्ता आन, आंदुर जान्सतार कि आंदरी ऊंद दिन सायोदा बिदीत, लेकीन जो सोतोग्यार, आंदुर येन जानस्तार? आंदरी प्रतिफल सिकेग्याद. आंदुर्द स्मृति मिटुसेग्याद.
ECC 9:6 आंदुर्द प्यार, आंदुर्द घृणा, आंदुर्द दुश्मनी सप्पा नष्ट आगेत. ई धरती इन क्याल्सा-व्यापार दा ईद आंदुर्द यातोदु भाग हैलेच.
ECC 9:7 तान मान्नी होगी, खुशी देल रोट्टी तीनी, अदिक दिल इन उमंग देल अंगुर इन रास्सा कुढी, यतिकी जो नीव माळतीर, अदरी परमेश्वर पयला टु तान स्वीकृति कोट्ट बुट्टुन.
ECC 9:8 नीम्द कपळा हमेशा‍ स्वच्‍छ ईरूल, नीम्द ताल्ला मा हमेशा याण्णा हतकु ईरूल.
ECC 9:9 परमेश्वर धरती मा बेकार जीवन इन यास भी दिन कोट्टुन, अऊर दा तान प्रिय हिंग्स उन सांगुळ जीवन इन आनन्द भोगसी, यतिकी जीवन दा ईदा नीम्द भाग आद. जो मेहनत नीव धरती मा माळतीर अदुर्दा नीम्द हिस्सा आद.
ECC 9:10 नीम्द कय दा जो भी क्याल्सा बरूल, अदरी पुरा ताकत देल माळी, यतिकी अधोलोक दा, यल तान सोत्तुर बाद्दा नीव होदीर, न क्याल्सा आद, न विचार. अल न ग्यान आद, न बुद्धि.
ECC 9:11 ना मात: अनुभव माळदीन कि ई धरती मा तेज ओळावाळा धावक जिक्सालुन, अदिक न बलवान योद्धा लळाई जिक्सतान. बुद्धिमान मंळसा अक भोजन सिकाल्द, अदिक न समझदारगोळ इक धन-सम्पत्ति. विद्वानगोळ मा याऊ कृपा माळालुर. ईव सप्पा समय अदिक संयोग इन वश दा आद.
ECC 9:12 मंळसा तान समय जानसालुन. जसा मेनगोळ कुटिल जाल दा फसुसतद, जसा पक्षीगोळ फंदा दा फसुसतद, हांग अच मंळसा समय इन जाल दा फसुसतान. ईद जाल अचानक आंदुर मा बिळतद.
ECC 9:13 ना धरती मा बुद्धि इन ऊंद उदाहरण नोळदीन. ईद नान इक बड़ा महत्वपूर्ण हत.
ECC 9:14 ऊंद स्यांळतुसा नगर ईरोद. अदुर दा गिना-चुना लॉकुर ईरतोगोर. ऊंद दिशी अदुर मा यावारा धोळ राजा आक्रमण माळ बुट्टुन, अदिक अदरी घेर्स कोंडुन. अदुर नाकु दी धोळ घेराबन्दी माळ बुट्टुन.
ECC 9:15 आ स्यांळतुसा नगर दा ऊंद गरीब, लेकीन बुद्धिमान मंळसा ईरोन. आव तान बुद्धि देल आ नगर इक ऊळ्सदुन. फिर भी आ गरीब उक सप्पा लॉकुर मार्तोदुर.
ECC 9:16 लेकीन गरीब मंळसा अन्द बुद्धी इन याऊ सम्मान माळीदिल, आऊन मातगोळ मा ध्यान कोटीदील तौभी ना अनतीन: बल देल बुद्धि वळ्लीद आद.
ECC 9:17 मूर्खगोळ बीच राजा अन चिळ्लासोद से आबना दा बुध्दीमान उन मातगोळ केळ कोमोद ज्यादा वळ्लीद आद.
ECC 9:18 युद्ध इन शस्त्रगोळ से बुद्धि उत्तम आद, लेकीन ऊंद पापी हापाळ भला क्याल्सागोळ इक नष्ट माळ बुळतान.
ECC 10:1 सोतकु नॉणगोळ सुगंधित याण्णा अक दुर्गंध दा बदलुस बुळताव, ईदा प्रकार थ्वाळासा मूर्खता बुद्धि अदिक मान-सम्मान मा नीर फेर्सबुळताव.
ECC 10:2 बुद्धिमान उन दिल आऊक उचित हादी इन दी माळतद, लेकीन मूर्ख उन मन बुराई इन दी आऊक प्रेरित माळतद.
ECC 10:3 “याग मूर्ख हादी मा नळुतान आग भी आऊन दा समझ इन कमी ईरतद. अदिक आंदुर सप्पा मुंदरी तोर्सतान कि, आव याट मूर्ख आन.”
ECC 10:4 अगर शासक नीन से नाराज आन रा नीव तान जागा बिळ बाळी. यतिकी धैर्य गंभीर अपराध भी सुधार्स कोमतान.
ECC 10:5 ना धरती मा ऊंद बुराई नोळदीन. ई बुराई इन जिम्मेदार शासक आन.
ECC 10:6 मूर्ख ऊंचा जागागोळ मा कुर्सकु आगतार, अदिक धनी ल्यालमा अन जागागोळ दा.
ECC 10:7 ना गुलामगोळ इक घ्वाळागोळ मा होगतेला नोळदीन, जब कि शासक गुलामगोळ घाई पैदल नळोर.
ECC 10:8 जो दुसरा मंळसा अन्द साटी खॉदरा अगुळतान, आव खुद अदुर्दा बिद्दान. जो चोरी इन साटी दीवार वोडुतान, आऊक हाव कच्चीत.
ECC 10:9 जो सीमा अन्द दिवार इन कल्लगोळ इक सरकुसतान, आऊक कल्लगोळ देल चोट हत्तीत. जो सीमा अन्द हुल्लीगोळ इक कळदान, आऊक अऊर से खतरा ईत्तीत.
ECC 10:10 अगर कोळ्ली बोथळ ईरूल, अदिक मंळसा अदुर्द धार पैना माळबाळुल, रा आऊक उपयोग माळदुर दा येक्‍कुल ताकत हचोद बिद्दीत. लेकीन बुद्धि सफलता अन्द कुंजी आद.
ECC 10:11 अगर मंत्र से पयला हाव कच्चबुळुल, रा मंत्र फुकसावाळा से येन लाभ?
ECC 10:12 बुद्धिमान मंळसा अन्द बाय इन शब्द आऊन साटी दुसरा अन्द कृपा अन्द साधन आद. लेकीन मूर्ख मंळसा अन्द टुट्टी आऊन विनाश इन कारण आद.
ECC 10:13 मूर्ख उन बाय देल होळ्त शब्द शुरू टु आखरी ताका मूर्खता देल पुरा आगताव: आऊन मात इन अन्त दुष्टतापुर्ण पागलपन आगतद.
ECC 10:14 मूर्ख मंळसा ऊंद मात इन येढ्ढ मातगोळ माळतान, इदुरसाटी याऊ जानसालुन कि भविष्य दा येन आगोद आद; अदरी याव हेळ सकतान कि आऊन बाद्दा येन आदीत.
ECC 10:15 मूर्ख अन्द मेहनत आऊक थक्सतद, ईट कि आऊक वापसी इन साटी शहर इन हादी भी समसाल्द.
ECC 10:16 हे द्याश! धिक्कार आद नीनी, अगर नीन राजा अनुभव-हीन सेवक आन; अदिक अगर नीन सामन्त प्रांत: टु अच तिनोर-कुडोद दा जुटुस्तार.
ECC 10:17 हे द्याश, धन्य आय नी, अगर नीन राजा कुलीन वंशज आन, अदिक अगर नीन सामन्त निर्धारित समय मा तिनतार-कुडुतार, ताकत प्राप्त माळोर साटी, न कि मतवालापन इन साटी.
ECC 10:18 आलस इन कारण छत बिदोगतद, सुस्ती देल मान्ना चुनुसली हततद.
ECC 10:19 भोज आनंद इन साटी माळकु आगतद, अंगुर इन रास्सा कुडदुर देल जीवन आनन्दित आगतद. रूपये देल सप्पा येनारा प्राप्त आग सकतद.
ECC 10:20 तान मन दा भी राजा अक अपशब्द अनबाळी, अदिक न तान शयन कक्ष दा धनवान उक बुरा शब्द अनबाळी. आकाश इन पक्षी नीन शब्द ओतान, उळुसावाळा जीव-जन्तु खबर माळ बुट्टीत.
ECC 11:1 नेकी माळ अदिक दरिया दा हाक्क, हापाळ दिनगोळ बाद्दा भी नी प्रतिफल प्राप्त माळ सकत्या.
ECC 11:2 येळ, ईला येठ्ठ मंळसागोळ इक भाग कोळी, यतिकी नी जानसाल्द, कि ई पृथ्वी दा याग नीन मा विपत्ति होट बरूल.
ECC 11:3 अगर बादल नीर देल तुमकु आव, रा अव खुद भूमी मा बरसुस्याव. चाहे मार्र दक्षिण इन दी बिळुल, चाहे अव उत्तर इन दी बिळुल, अव या जागा मा बिदकु आव, अव अल्या बिदकु ईत्ताव.
ECC 11:4 जो किसान हवा अक ताक्सतान, आव बींजा बोऊस सकालुन, जो बादल इन अच विचार माळतान, आव फसल कडु सकालुन.
ECC 11:5 जसा नीव जानसालीर कि गर्भवती इन व्हाट्टा अन चिग्द दा जीव ह्यांग बिळतद, हांग अच नीव परमेश्वर उन क्याल्सागोळ इन सम्स सकालीर, जो सप्पा मुंदरी माळतान.
ECC 11:6 प्रांत: काल दा तान बींजा बोऊसोद शुरू माळी, अदिक द्यावगा भी तान कय रोक्स बाळी, अदिक क्याल्सा माळतेला ईरी, यतिकी नीव जानसालीर कि नीम इक याता क्याल्सा दा सफलता सिक्कीत ई क्याल्सा दा या आ क्याल्सा दा, या येढ्ढु दा.
ECC 11:7 सूर्य अन्द प्रकाश प्रिय हततद, बिसुल कण्णगोळ इक सुख पहुचुसतद.
ECC 11:8 अगर मंळसा हापाळ वर्ष ताका जीत्ता ईरतान रा आऊक चाहास पायजे कि आव तान उमर इन सप्पा वर्षगोळ दा जीवन इन आनन्द ताकोमुल, लेकीन आव याद ईटुल कि अंधकार इन दिन भी कम आगतीदील. अत: जो येनारा आगतद, अद व्यर्थ आद.
ECC 11:9 ओ हारोदवा, तान जवानी तीम आनन्द मनुस, तान जवानी इन दिनगोळ दा तान दिल आनन्द देल तुम कोमुल. या हादी मा नीन दिल नीन इक ओईल, जो हादी नीन कण्णगोळ दा उचित हतुल, अदुर मा नळु. लेकीन ईद मात जान्स कोमुल, नीन सप्पा क्याल्सागोळ्द बारा दा स्पष्टीकरण इन साटी परमेश्वर नीन इक कटघरा दा नीदरूस्यान.
ECC 11:10 ओ हारोदवा! तान दिल टु परेशानी इक तेगुबुळ, मय दा दुख आगगोळ बाळ; यतिकी नीन हारोदपण, अदिक बचपन येढ्ढु व्यर्थ आव.
ECC 12:1 तान हारोदपन इन दिनगोळ दा तान सृष्टीकर्ता परमेश्वर उक याद ईट, ईलारा ई दिनगोळ बाद्दा अव दिन अदिक वर्ष बंदव याग नी ईद अंद्या, “ईग जीवन दा नान इक आनन्द सिकाल्द.”
ECC 12:2 आ दिनगोळ दा नीन साटी सूर्य अदिक प्रकाश, चन्द्रमा अदिक तारा अन्धकारमय आगेदव. नीर तुमकु बादल भूमी मा माळ हुळकु वापस होदव.
ECC 12:3 आ दिनगोळ दा नीन रक्षा माळावाळा नळ्गली कुरतान, ताकतवर भी झुकसेदार. संख्या दा कम आगोद कारण हल्ल आमली कचोद बिट्टबुटाव. खिळकी दा टु झाकसावाळा अन्द कण्णगोळ धुंधला बिदोदव.
ECC 12:4 सळक इन दी तेरावाळा कीव बन्द आगेदव. चक्की पिसुसोद आवाज धीमा आगेदीत. नी चिड़ीया अन्द चहचहासोद देल भी जप देल येदोद्या. नीन सप्पा स्वर धीमा बिदोदाव.
ECC 12:5 थ्वाळासा ऊंचाई येरदुर दा नीन इक अंज्क हत्तीत. गली-कुचगोळ देल नी आतंकित आद्या. बादाम इन मार्रगोळ दा पंखुळीगोळ खिलस्याव. टिड्डी भी रेंग्सकु नळुली कुरताव. लेकीन नीन अभिलाषागोळ सोतोदाव, अदिक नी तान शाश्वत निवास जागा अक प्रस्थान माळ्‍या. भाळा अन्द वर्लावाळेर-पिटसावाळेर लॉकुर गली-कुचगोळ इक घेर्स कोंडार.
ECC 12:6 बेळ्ली इन तार मुरदोदीत, व्हान्ना अन्द प्याला मुरदोदीत. झरना अन हात्ती माळका वोळदोदीत, भाँय इन हात्ती जाळी मुरदोदीत.
ECC 12:7 आग मुण्ण मुण्ण दा मिलुसेदीत, अदिक आत्मा परमेश्वर उन हात्ती होटोदीत, यारी आऊक प्रदान माळीदुन.
ECC 12:8 सभा-उपदेशक ईद अनतान: सप्पा बेकार आद, सप्पा बेकार आद. बिना संकोच सप्पा येनारा बेकार आद!
ECC 12:9 सभा-उपदेशक बुद्धिमान रा ईरोन, आव प्रजा अक ग्यान भी कल्सतेला ईत्तुन. अदिक ध्यान हचकु अदिक जाँच-परख माळकु हापाळ सा नीतिवचन क्रम देल ईटतोगोन.
ECC 12:10 उपदेशक मनोहर शब्द ढुंढ्सदुन अदिक सच्चाई इन शिक्षा कोळावाळा वचन लिख्सदुन.
ECC 12:11 “बुद्धिमान मंळसा अन्द कथन अंकुश इन घाई ईरताव. सभा अन्द मुखियागोळ्द द्वारा कोटकु ईव संकलित कथन, मजबूती देल ठोक्सकु खूटिगोळ घाई आद, यतिकी इंदुर दाता ऊंद मात्र ‘चरवाह’ आन.
ECC 12:12 प्रिय चेला, इंदुर अलावा अन्य शिक्षागोळ देल सावधान ईरेतीर. हापाळ किताबगोळ्द रचना-क्याल्सा अन्द अन्त आगाल्द. हापाळ वाचुसदुर देल मय थकसेगतद.”
ECC 12:13 जो येनारा नीव केळदीर, अदुर्द सार ईद आद : नीव परमेश्वर उन अंज्क ईटी, अदिक आऊन आग्यागोळ्द पालन माळी; यतिकी मंळसा अन्द पुरा धर्म ईदा हुन.
ECC 12:14 परमेश्वर मंळसा अन्द हर ऊंद कर्म अक, आऊन सप्पा होचकु मातगोळ इक, चाहे अव भला आगुल या बुरा, न्याय इन समय प्रस्तुत माळ्यान.
EZE 1:1 तीसवा वर्ष इन चौथा तिंगुळ इन पाचवा दिशी, ना बन्दीगोळ बीच दा कबार गांगा अन किनारा मा ईरीन, आग स्वर्ग खुलसेत, अदिक ना परमेश्वर उन दर्शन नोळदीन.
EZE 1:2 यहोयाकीन राजा अन गुलामी इन पाचवा वर्ष इन चौथा तिंगुळ इन पाचवा दिशी,
EZE 1:3 कसदी अन द्याश दा कबार गांगा अन किनारा मा, यहोवा अन वचन बूजी इन पार यहेजकेल याजक उन हाती पोहचुस्त; अदिक यहोवा अन सामर्थ आऊन मा प्रगट आत.
EZE 1:4 याग ना नोळली कुरतीन, रा येन नोळतीन कि उत्तर दिशा टु धोळ्द बादल, अदिक लहरूसतेला बेक्की सांगुळ धोळ्द आंधी बरेत्याद, अदिक बादल इन नाकु दी ऊजुळ अदिक बेक्की इन बीचो-बीच टु चमकुस्द पीतल घाई येनारा कांळ्सतद.
EZE 1:5 अदिक अदुर बीच दा टु नाक जीवधारीगोळ घाई येनारा होट्टव. आंदुर रूप मंळसागोळ घाई ईरोद,
EZE 1:6 लेकीन आंदुर दा टु हर ऊंद उन नाक नाक बाय अदिक नाक नाक पंख ईरव.
EZE 1:7 आंदुर काल सीधा ईरव, अदिक आंदुर काल इन तलवा पाड्डा अन खुरगोळ घाई ईरव, अदिक अव चमकुसदव पीतल इन घाई ईरव.
EZE 1:8 अऊर नाकु दी पंख इन ल्यालमा, मंळसागोळ घाई इच कय ईरव, नाकु प्राणी गोळोव चेहरा अदिक पंख ई प्रकार ईरव:
EZE 1:9 आंदुरव पंख आबुर दाबुर से परस्पर जुळ्सकु ईरव, आंदुर नळाहोती तान कण्णगोळ दा सीधा नळोर, अदिक तिर्गोव ईला.
EZE 1:10 नाकु उन चेहरा अन रूप ई प्रकार ईरोद: सप्पा प्राणी इन चेहरा मुंदु टु मंळसा अन घाई ईरोद, ऊजवा दी हुल्ल इन घाई ईरोद, अदिक डाक्या दि वस्ता अन अदिक हिंदळोद दी गिधाळ घाई ईरव.
EZE 1:11 आंदुर चेहरा हींग अच ईरव. आंदुर बाय अदिक पंख म्याकुच इन दी अलग अलग ईरव, हर ऊंद जीवधारी इन येढ्ढ येढ्ढ पंख ईरव, जो आबुर दाबुर इन पंखगोळ से मीलुसकु ईरोर, अदिक येढ्ढ येढ्ढ पंखगोळ से आंदुर शरीर ढाप्सकु ईरोद.
EZE 1:12 अव सीधा तान तान मुंद अच नळुतोगोर; येल आत्मा होगोद चाहसोद, अव आतल्या होगोव, अदिक नळुतेला तिर्गव ईला.
EZE 1:13 जीवधारीगोळ रूप अंगारगोळ अदिक होततेला मशालगोळ घाई कांळ्सव, अदिक अद बेक्की जीवधारीगोळ बीच ईत्त आत्त नळुत वयाळ्त हापाळ ऊजोळ कोळतेला ईत्त; अदिक आ बेक्की देल बिजली होळतोगोद.
EZE 1:14 जीवधारीगोळ्द नळोद-वयाळोद बिजली घाई ईरोद.
EZE 1:15 याग ना जीवधारीगोळ इक नोळीन, रा येन नोळदीन कि जागा मा आंदुर हाती नाकु बायगोळ गिनती इन अनुसार, ऊंद ऊंद चक्का ईरोद.
EZE 1:16 चक्कागोळ रूप अदिक बनावट स्वर्णमणी इन घाई ईरोद, अदिक नाकु उन ऊंदा रूप ईरोद; अऊर रूप अदिक बनावट हिंग ईरोद ह्यांग ऊंद चक्का अन बीच दुसरा चक्का आगुल.
EZE 1:17 नळाहोती अव तान नाकु दी नळु सकोव, अदिक नळदुर दा तिर्गोव ईला.
EZE 1:18 आ नाकु चक्का अन घेरा हापाळ धोड्डेव अदिक अंज्क बरापरी ईरव, अदिक अऊर घेरा दा नाकु दी कण्ण अच कण्णगोळ तुमकु ईरव.
EZE 1:19 याग जीवधारी नळु तोगोव, आग चक्कागोळ भी अऊर सांगुळ नळुतोगोव; अदिक याग जीवधारी जमीन मा टु येळ तोगोव, आग चक्का भी येळ तोगोव.
EZE 1:20 यात आत्मा होगोद चाहसोद, आत्त अच अव होगोव, अदिक चक्का जीवधारीगोळ सांगुळ यळतोगोव; यतिकी अऊर आत्मा चक्का दा ईरोद.
EZE 1:21 याग अव नळुतोगोव आग ईव भी नळुतोगोव; अदिक याग याग अव नीदरव आग ईव भी निदरव; अदिक याग अव जमीन मा टु येळतोगोव आग चक्का भी अऊर सांगुळ येळतोगोव; यतिकी जीवधारीगोळ आत्मा चक्का दा ईरोद.
EZE 1:22 जीवधारीगोळ्द ताल्ला अन म्याकुच आकाश- मण्डल घाई- येनारा ईरोद जो बर्फ इन घाई भयानक रीती देल चमकुसोद, अदिक अद आंदुर ताल्लागोळ म्याकुच फैलुसकु ईरोद.
EZE 1:23 आकाश मण्डल इन ल्यालमा, अऊर पंख आबुर दाबुर दी सीधा फैलुसकु ईरव; अदिक हर ऊंद जीवधारी इन येढ्‌ढ येढ्ढ अदिक भी पंखगोळ ईरव यदुर देल अऊर शरीर मुचकु ईरव.
EZE 1:24 अऊर नळाहोती अऊर पंखगोळ्द फळफळाहट इन भास नानी हापाळ नीर, या सर्वशक्तिमान इन वाणी, या सेना अन हलचल इन घाई केळ बरोद; अदिक याग अव नीदुर तोगोव, आग तान पंख लटकुस बुळोव.
EZE 1:25 बाक अऊर ताल्ला अन म्याकुच जो आकाश मण्डल ईरोद, अदुर म्याकुच टु ऊंद शब्द केळ बरोद; अदिक याग अव नीदरव, आग तान पंखगोळ लटकुस बुळव.
EZE 1:26 जो आकाश मण्डल अऊर ताल्ला अन म्याकुच ईरोद, अदुर म्याकुच मान्सी येनारा नीलमणि इन घाई बन्सकु सिंहासन ईरोद; ई सिंहासन इन म्याकुच मंळसा अन घाई यावारा कांळ्सोन.
EZE 1:27 अऊर नेळु टु हुडुकु म्याकुच इन दी नानी मान्सी झलकुस्द पीतल इन घाई कांळ्सत, अदिक अदुर बुळ्क अदिक नाकु दी बेक्की घाई कांळ्सोद; बाक आ मंळसा अन नेळु टु हुडुकु ल्यालमा भी नानी बेक्की इन घाई कांळ्सोद; अदिक अदुर नाकु दी ऊजुळ ईरोद.
EZE 1:28 ह्यांग माळ बरा दिशी बादल दा धनुष कांळ्सकु बीळतद, हांग अच नाकु दीकळोद ऊजुळ कांळ्स तोगोद. यहोवा अन रूप इन तेज हिंगा ईरोद. अदरी नोळकु, ना बाय इन भार देल बिद्दीन, आग ना ऊंद शब्द केळदीन ह्यांग कि यावारा मातगोळ माळतान.
EZE 2:1 आव नान से अंदुन, “हे मंळसा अन पार, तान काल इन भार नीदुर, अदिक ना नीन से मात माळाईन.”
EZE 2:2 ह्यांग आव नान से ईद अंदुन, आग आत्मा नान दा समुस्कु नानी कालगोळ बल नीदरुस्त; अदिक जो नान से मातगोळ माळतोगोन ना आऊन केळदीन.
EZE 2:3 आव नान से अंदुन, “हे मंळसा अन सन्तान, ना नीनी इस्त्राएलगोळ हाती मतलब बलवा माळावाळा राज्य अन हाती कळुतीन, यार नान विरूद्‍ध बलवा माळ्यार; आंदुर पुरखा अदिक आंदुर भी ईंद इन दिन ताका ना विरूद्‍ध अपराध माळतेला बंदार.
EZE 2:4 ई पीढ़ी इन लॉकुर यार हाती ना नीनी कळुतीन, आंदुर निर्लज अदिक जीद्दी आर;
EZE 2:5 अदिक नी आंदुर से अनेत, ‘प्रभु यहोवा ईद अनतान,’ ईदुर देल आंदुर, जो बलवा माळावाळेर घरानादोर आर, बाक आंदुर केळुल या केळ बाळुल, तरी भी आंदुर ईट जान्स कोंडार कि नाम न्याड्या दा ऊंद भविष्यवक्ता प्रगट आग्यान.”
EZE 2:6 हे मंळसा अन सन्तान, नी आंदुर से अंजबाळेत; बाक नीनी मुळ्लगोळ, ऊँट कटारगोळ अदिक चेळगोळ बीच दा भी ईरोद बीद्दीत, तरी भी आंदुर वचनगोळ से अंज बाळेत, अदिक न आंदुर बाय नोळकु नीन मन कच्चा आगुल.
EZE 2:7 ईदुरसाटी बाक आंदुर केळुल या केळबाळुल; तरी भी नी नान वचन आंदुर से अनेत, आंदुर रा हापाळ झगळेलु आर.
EZE 2:8 “लेकीन हे मंळसागोळ सन्तान, जो ना नीन से अनतीन, अदरी नी केळकोम, आ विद्रोही घराना अन घाई नी भी विद्रोही आगबाळेत, जो ना नीनी कोळतीन, अदरी बाय खोल्सकु तीनकोम.”
EZE 2:9 आग ना दृष्टी माळदीन अदिक येन नोळदीन, कि नान दी ऊंद कय वाळुसकु आद अदिक अदुर दा ऊंद किताब आद.
EZE 2:10 अदरी आव नान मुंद खोल्सकु फैलुसदुन, अदिक अद येढ्ढु दी लिख्सकु ईरोद; अदिक जो अदुर दा लिख्सकु ईरोद, अव विलाप अदिक शोक अदिक दुख इन वचन ईरव.
EZE 3:1 आग आव आन से अंदुन, “हे मंळसा अन सन्तान, जो नीनी सिक्याद अदरी तीनकोम; मतलब ई किताब इक तीन, आग होगकु इस्त्राएल उन घराना से मात माळ.”
EZE 3:2 इदुरसाटी ना बाय खोल्सदीन अदिक आव अद किताब नानी तिन्सदुन.
EZE 3:3 आग आव नान से अंदुन, “हे मंळसा अन सन्तान, ईद किताब जो ना नीनी कोळतीन अदरी पचुसकोम, अदिक व्हाट्टा ईदुर देल तुम कोम.” अत: ना अदरी तीन कोंडीन; अदिक नान बाय दा अद शयद इन घाई सय हत.
EZE 3:4 बाक आव नान से अंदुन, “हे मंळसा अन सन्तान, नी इस्त्राएल उन घराना अन हाती होगकु नानव वचन केळ्स.
EZE 3:5 यतिकी नी यातोदारा अनोखा बोली या कठिन भाषावाळा राज्य अन हाती कळुकु आगाल, लेकीन इस्त्राएल अच उन घराना अन हाती कळुकु आगत्या.
EZE 3:6 नीनी ईत्ता लॉकुर इन हाती कळालीन जो अनोखा बोली माताळतार या कठिन भाषा माताळावाळेर लॉकुर आर, यार्द भाषा नी समसाल. अगर ना नीनी ईत्ता लॉकुर हाती इच कळाईदीन, रा बिना सन्देह आंदुर नान मात केळायदुर.
EZE 3:7 लेकीन इस्त्राएल उन घरानावाळेर नीन केळोर से इनकार माळ्यार; आंदुर नान भी केळोर से इनकार माळतार; यतिकी इस्त्राएल उन सारा घराना हेकळ अदिक कठोर मन इन आद.
EZE 3:8 नोळ, ना नीन बाय इक आंदुर बाय इन मुंद, अदिक नीन मस्तक इक आंदुर मस्तक इन मुंद, मजबुत माळ कोमतीन.
EZE 3:9 ना नीन मन इक चकमक कल्ल से येक्कुल कठोर माळ कोंडीन. आंदुर विद्रोही कुल इन सन्तान उर. नी आंदुर तीखा नजर देल अंजबाळेत अदिक न हतास आगेत,”
EZE 3:10 बाक आव नान से अंदुन, “हे मंळसा अन सन्तान, यास वचन ना नीन से अनाईन, अव सप्पा दिल दा ईट अदिक किवगोळ देल केळ.
EZE 3:11 अदिक आ बन्दीगोळ हाती होगकु, जो नीन राज्य अन वार्टुर हुर, आंदुर से मातगोळ माळेत अदिक अनेत, ‘प्रभु यहोवा हींग अनतान,’ बाक आंदुर केळुल या केळबाळुल.”
EZE 3:12 आग परमेश्वर उन आत्मा नानी म्याकुच नेगुत, अदिक ना तान हींद धोळ्द घळघळाहट इन सांगुळ ऊंद शब्द केळदीन: आव अंदुन, “परमेश्वर उन महिमा आशीष इन आद.”
EZE 3:13 अदिक अदुर सांगुळ अच आ जीवधारीगोळ पंखगोळ्द शब्द जो आबुर दाबुर से हत तोगोव, अदिक आंदुर सांगुळ इन चक्कागोळ्द शब्द अदिक ऊंद धोळ्द अच घळघळाहट केळ बत्त.
EZE 3:14 आग आत्मा नानी नेगुकु वोईत, अदिक ना कठिन दुख देल तुमकु, अदिक मन दा होततेला होटोदीन; अदिक यहोवा अन शक्ती नान दा प्रबल ईरोद;
EZE 3:15 अदिक आ बन्दीगोळ हाती बंदीन जो कबार गांगा अन तट मा तेलाबीब दा ईरतोगोर. अदिक अल येळ दिन ताका आंदुर बीच व्याकुल आगकु कुर्तकु ईत्तीन.
EZE 3:16 येळ दिन इन आगदुर बाद्दा यहोवा अन ईद वचन नान हाती पोहचुस्त,
EZE 3:17 “हे मंळसागोळ सन्तान, ना नीनी इस्त्राएल उन घराना अन साटी पहरेदार नियुक्त माळीन; नी नान बाय इन मात केळकु, आंदरी नान दी टु चेतावनी कोळेत.
EZE 3:18 याग ना दुष्ट से अनाईन, ‘नी सही दा सोत्या,’ अदिक अगर नी आऊक समझुसतीदील, अदिक न दुष्ट से हिंग मातगोळ अनेत कि आव समसुल अदिक तान दुष्ट हादी बिटकु जीत्ता ईरूल, रा आव दुष्ट तान अधर्म दा फसुसकु सोत्तान, लेकीन आऊन खुन इन लेखा ना नीन से अच ताकोमाईन.
EZE 3:19 लेकीन अगर नी दुष्ट उक चितुसत्या, अदिक आव दुष्टता अदिक दुष्ट हादी देल तीर्गालुन, रा आव रा तान अधर्म दा फसुसकु सोतोदान; लेकीन नी तान तान इक ऊळस्या.”
EZE 3:20 “बाक याग धर्मी मंळसा तान धर्म देल तिर्गकु कुटिल क्याल्सा माळली कुरतान, अदिक ना आऊन मुंद ठोकर ईटाईन, रा आव सोतोदान, यतिकी नी आऊक समझुसीदील, इदुरसाटी आव तान पाप दा फसुसकु सोत्तान; अदिक धर्म इन कर्म आव माळ्यान, अऊर्द सुधी ताकोमकु आगतीदील, लेकीन आऊन खुन इन लेखा ना नीन अच ताकोमाईन.
EZE 3:21 लेकीन धर्मी इक हिंग अनकु समझुस्या, कि आव पाप माळबाळुल, अदिक आव से ऊळदान, रा आव आ चितौनी इक ग्रहण माळा कारण सही दा जीत्ता ईत्तान, अदिक नी तान तान इक ऊळस्या.”
EZE 3:22 बाक यहोवा अन सामर्थ अल्या नान मा प्रगट आत, अदिक आव नान से अंदुन, “येदकु मैदान दा होग; अदिक अल नीन से मातगोळ हेळाईन.”
EZE 3:23 आग ना येदकु मैदान दा होदीन, अदिक अल येन नोळदीन, कि यहोवा अन तेज घाई नानी कबार गांगा अन तट मा, हांग अच ईल भी कांळ्सकु बिळतद, अदिक ना बाय इन भार देल बिदोदीन.
EZE 3:24 आग आत्मा नान दा समुस्कु नानी काल इन भार देल निदरूस्त; बाक आव नान से अनली कुरतुन, “होग तान मान्ना अन बुळ्क दरवाजा बंद माळकु कुर्तकु ईर.
EZE 3:25 हे मंळसा अन सन्तान, नोळ, आ लॉकुर नीनी जाळी देल जकळुसकु कटकु ईट्यार, अदिक नी होटकु आंदुर बीच होग सकतीदील.
EZE 3:26 ना नीन ल्यालग्या नीन ताळु देल हचाईन; यदुर देल नी मौन ईतकु आंदुर दनकुसावाळा ईला, यतिकी आंदुर विद्रोही घरानानोर उर.
EZE 3:27 लेकीन याग याग ना नीन से मातगोळ माळाईन, आग आग नीन बाय इक खोलसाईन, अदिक नी आंदुर से हिंग अनेत, ‘प्रभु यहोवा हींग अनतान,’ जो केळतान आव केळ कोमुल अदिक जो केळालुन आव केळबाळुल, आंदुर रा विद्रोही घरानानोर अच उर.”
EZE 4:1 “हे मंळसा अन सन्तान, नी ऊंद ईटा हुडु अदिक अदरी तान मुंद ईटकु अदुर मा ऊंद नगर, मतलब यरूशलेम इन ऊंद चित्र तेगु;
EZE 4:2 आग अदरी घेर्स मतलब अदुर विरूद्‍ध किला माळ अदिक अदुर मुंद नालीगोळ कट; अदिक छावनी हाक, अदिक अदुर नाकु दी युध्द अन यंत्र हच.
EZE 4:3 आग नी लोहा अन तावा हुडुकु अदरी लोहा अन शहरपनाह मान्सकु तान अदिक आ नगर इन बीच नीदरूस, आग तान बाय आऊन मुंद माळकु अदुर घेराबंदी माळ, ई रीती देल; नी अदरी घेर्सकु ईटेत. ईद इस्त्राएल उन घराना अन साटी चिन्ह ठहरूसीत.”
EZE 4:4 “बाक नी ऊजवा कळ ताकोमकु इस्त्राएल उन घराना अन अधर्म तान म्याकुच ईट, यतिकी यास दिन नी ऊजवा कळ ताकोमकु मिंगतेला ईत्या, आस दिन ताका आ लॉकुर इन अधर्म इन भार सहुसतेला ईत्या.
EZE 4:5 ना आंदुर साटी अधर्म इन वर्षगोळ तुल्य नीन साटी दिनगोळ ठहरूसीन, मतलब मुर सौ नब्बे दिन; आस दिन ताका नी इस्त्राएल इन घराना अन अधर्म इन भार सहुसतेला ईर.
EZE 4:6 याग ईस दिन पुरा आगेदव, आग नी डाक्या कळ मींगकु यहूदा अन घराना अन अधर्म इन भार सहुस कोमेत; ना आंदुर साटी भी अदिक नीन साटी ऊंद वर्ष इन बदला ऊंद दिन मतलब चालीस दीन ठहरूसीन.”
EZE 4:7 नी यरूशलेम इक घेर्सोर साटी बाह तेगुकु तान बाय आत्त माळकु अदुर विरूद्‍ध भविष्यवाणी माळेत.
EZE 4:8 नोळ, ना नीनी जाळीगोळ देल जकळुसाईन, अदिक यागासताका अदुर घेर्सोद इन दिन पुरा आगाल, आगासताका नी कळ ताकोम सकतीदील.
EZE 4:9 “नी गोदी, जौ, सेम, मसूर, बाजरा, अदिक कठिया गोदी, हुडुकु ऊंद बरतन दा ईटकु अऊर देल रोट्टी माळ तोगेत. यास दिन नी कळ मा मींगकु ईत्या, आस मतलब मुर सौ नब्बे दिन ताका अदरी तीन तोगेत.
EZE 4:10 जो भोजन नी तिंद्या, अदरी आळु आळुकु तिनेत, मतलब रोज येढ्ढ सौ तीस ग्राम तीम तिन तोगेत, अदिक अदरी समय समय मा तिनेत.
EZE 4:11 नीर भी आळुकु कुडु तोगेत, मतलब हर दिशी येढ्ढ गिलास कुडेत; अदिक नी नीर निश्चित समय मा कुडेत.
EZE 4:12 तान भोजन जौ इन रोट्टीगोळ घाई माळकु तीन तोगेत, अदिक अदरी मंळसा अन ल्यांडा अन कुळ्लगोळ मा आंदुर नोळतेला बनुस तोगेत.”
EZE 4:13 बाक यहोवा अंदुन, “ईदा प्रकार देल इस्त्राएल आ राज्यगोळ बीच तान तान रोट्टी अशुध्दता देल तिंदार, यल ना आंदरी जबरदस्ती पोहचुसाईन.”
EZE 4:14 आग ना अंदीन, “हाय, यहोवा परमेश्वर नोळ, नान मन कभी अशुध्द आगीदील, अदिक ना बचपन टु हुडुकु ईगासताका खुद देल सोतकु या बीचकु आग्याद जनावर इन मास तिंदीदील, अदिक न यातोदु प्रकार इन बेकार मास नान बाय दा कभी होग्याद.”
EZE 4:15 आग आव नान से अंदुन, “नोळ, ना नीन साटी मंळसा अन ल्यांडा अन बदला सेंगळी ठहरूसीन, अदिक अदुर देला नी तान रोट्टी माळेत.”
EZE 4:16 बाक आव नान से अंदुन, “हे मंळसा अन सन्तान, नोळ, ना यरूशलेम दा अन्नरूपी आधार इक दुर माळाईन; ईदुरसाटी अलेर लॉकुर आळु आळुकु अदिक चिन्ता माळ माळकु रोट्टी तिनतोदार; अदिक आळु आळुकु अदिक दुखी आग आगकु नीर कुडुतोदार.
EZE 4:17 अदिक ईदुर देल आंदरी नीर अदिक रोट्टी इन कमी आदीत; अदिक आंदुर सप्पा च्या सप्पा घबरूस्यार, अदिक तान अधर्म दा फसुसकु वंळ्गेदार.”
EZE 5:1 “हे मंळसा अन सन्तान, ऊंद पन्यार तलवार हुडु, अदिक अदरी भाली इन उस्तरा अन घाई क्याल्सा दा तनकु तान ताल्ला अदिक दाळी इन चुट्टी तेगुकोम, आग तौलुसोद काटा हुडुकु चुट्टीगोळ्द भाग माळ.
EZE 5:2 याग नगर इन घेर्सव दिन पुरा आदव, आग नगर इन बुळ्क ऊंद तिहाई बेक्की दा हाक्कु होताकेत, अदिक ऊंद तिहाई हुडुकु नाकु दी तलवार देल बडेत; अदिक ऊंद तिहाई इक हवा दा ऊळुसेत, अदिक ना तलवार जेडुकु अदुर हिंद नळसाईन.
EZE 5:3 आग ईऊर दा टु थ्वाळासा चुट्टी हुडुकु कपळा अन क्वाना दा कटेत.
EZE 5:4 बाक ईऊर दा टु भी थ्वाळासा हुडुकु बेक्की इन बीच हाकेत कि अव बेक्की दा होत्तेगुल, आग अदुर दा टु ऊंद चिंगारी भळकुसकु इस्त्राएल इन सप्पा घराना दा फैलुसेदीत.”
EZE 5:5 “प्रभु यहोवा ईद अनतान: यरूशलेम हींग अच आद; ना अदरी अन्य राज्यगोळ बीच दा ठहरूसीन, अदिक अद नाकु दी द्याशगोळ से घेर्सकु आद.
EZE 5:6 आव नान नियमगोळ खिलाप क्याल्सा माळकु अन्य राज्यगोळ से येक्कुल दुष्टता माळ्यान, अदिक नान विधीगोळ खिलाप नाकु दिकळोर द्याश इन लॉकुर से येक्कुल बुराई माळ्यार; यतिकी आंदुर नान नियमगोळी बेकार जान्सदुर, अदिक आंदुर नान विधीगोळ मा नळदिदील.
EZE 5:7 ई कारण प्रभु यहोवा ईद अनतान: नीव लॉकुर जो तान नाकु दिकळोर राज्यगोळ से येक्कुल हुल्लळ माळतेला, अदिक न नान विधीगोळ मा नळुतार, न नान नियमगोळी मान्सतार अदिक तान नाकु दिकळोर राज्यगोळ नियमगोळ अनुसार भी माळीदिल,
EZE 5:8 ई कारण प्रभु यहोवा ईद अनतान: नोळ, ना खुद नीन खिलाप आईन; अदिक अन्य राज्यगोळ नोळतेला ना नीन बीच न्याय इन क्याल्सा माळाईन.
EZE 5:9 नीनव सप्पा घिनोना क्याल्सा अन कारण ना नीन बीच हींग माळाईन, ह्यांग ईगासताका माळीदिल, अदिक न भविष्य दा बाक माळतीदील.
EZE 5:10 ईदुरसाटी नीन न्याड्या चिकोर तान तान आप्प उन, अदिक आप्प तान तान चिकोर्द मास तिंदार; अदिक नीनी इक दण्ड कोळाईन, अदिक जो लॉकुर ऊळ्दोदार, आंदरी ना नाकु क्वानागोळ दा बगरूस बुळाईन.”
EZE 5:11 ईदुरसाटी प्रभु यहोवा अन ईद वाणी आद, कि नान जीवन इन किर्या, ईदुरसाटी कि नी नान पवित्र जागा अक तान सप्पा घिनोना मुर्तीगोळ अदिक सप्पा घिनोना क्याल्सा देल अशुध्द माळ्या, ना नीनी घटुसाईन, अदिक नीन मा दया अन नजर माळतीदील, अदिक नीन मा येनु भी तरस तिनतीदील.
EZE 5:12 नींद आबादी इन ऊंद तिहाई रा महामारी देल सोत्तीत, अदिक नीन बीच हसु देल सोतकु मिटुसेदीत; ऊंद तिहाई नीन आस पास तलवार देल कोंदकु आदीत; अदिक ऊंद तिहाई इक ना नाकु दी तितर बितर माळाईन अदिक तलवार जेडुकु आंदुर हींद नळसाईन.
EZE 5:13 ई प्रकार देल नान क्रोध शांत आदीत, अदिक तान जलजलाहट आंदुर मा पुरा रीती देल भळकुसकु ना शांती पाऊसाईन; अदिक याग ना तान जलजलाहट आंदुर पुरा रीती देल भळकुस बुळाईन, आग आंदुर जान्स कोंडार कि ना यहोवा अच जलन दा बंदकु ईद अंदीन.
EZE 5:14 ना नीनी नीन नाकु दीकळोर राज्यगोळ बीच, सप्पा होगा-बरावाळेर नोळतेला नाश माळाईन, अदिक नीन बदनामी माळसुसाईन.
EZE 5:15 “ईदुरसाटी याग ना नीन इक कोप अदिक जलजलाहट अदिक हापाळ डाट फटकार सांगुळ दण्ड कोळाईन, आग नीन नाकु दीकळोर राज्यगोळ मुंद नामधराई, मज्याक, सजा अदिक विस्मय आदीत, यतिकी ना यहोवा ईद अंदीन.
EZE 5:16 ईद आ समय आदीत, याग ना आ लॉकुर्द नाश माळोर साटी नीम मा अकाल इनव घातक तीर नळ्सकु, नीम बीच अकाल वाळुसाईन, अदिक नीम अन्नरूपी आधार इक दुर माळाईन.
EZE 5:17 ना नीम बीच अकाल अदिक दुष्ट जन्तु कळाईन जो नीमी बे:औलाद माळेव; अदिक महामारी अदिक खुन नीम बीच नळुतेला ईत्तव; अदिक ना नीम मा तलवार नळसाईन, नानी यहोवा खुद अंदुन.”
EZE 6:1 बाक यहोवा अन ईद वचन नान हाती पोहचुस्त:
EZE 6:2 “हे मंळसा अन सन्तान, तान बाय इस्त्राएल इन पहाळीगोळ दी माळकु आंदुर खिलाप भविष्यवाणी माळ,
EZE 6:3 अदिक अन, हे इस्त्राएल इन पहाळीगोळा, प्रभु यहोवा अन वचन केळी! प्रभु यहोवा सप्पा पहाळीगोळ से, अदिक नालागोळ अदिक घाटीगोळ से ईद अनतान: नोळी ना नीम मा तलवार नळसुसाईन, अदिक नीम पुजा अन धोळ जागागोळ्द नाश माळाईन.
EZE 6:4 नीमव वेदीगोळ नाश आदव अदिक नीम सुर्य अन प्रतिमागोळ मुरकु आदव; अदिक ना नीम मृत लॉकुरी नीम ई मूर्तीगोळ मुंद भिट बुळाईन.
EZE 6:5 ना इस्त्राएलीगोळोव लाशगोळी आंदुर मूर्तीगोळ मुंद ईटाईन, अदिक आंदुर येलुगोळी नीम वेदीगोळ आसपास बगरूसाईन.
EZE 6:6 नीम यास भी बसुसकु नगर आव, अव सप्पा हिंग नाश आदव, कि नीमव पहाळी माकळव पुजा अन जागा खण्डर आगेदव, नीमव वेदीगोळ नाश आदव अदिक ध्वस्त आगेदव, नीमव मूर्तीगोळ मुरुकु आदव, नीमव सुर्य अन प्रतिमागोळ तुकळा तुकळा आगेदव, अदिक नीम सप्पा कारीगरी मिटुसकु आदव.
EZE 6:7 नीम बीच दा लाशगोळ ढेर हतकु ईत्तव. आग नीव अर्त कोंडीर कि ना यहोवा हुईन.”
EZE 6:8 “तरी भी इस्त्राएलगोळा, ना नीम दा टु येनारा लॉकुरी जीत्ता बीट्ट बुळाईन. येनारा लॉकुर तलवार इन मार देल उळदोदार, अदिक आंदुर दुसरा राज्य दा तितर-बितर आगेदार. दुसरा द्याशगोळ दा बिखरूसकु आर ईंदुर अच ऊळदार.
EZE 6:9 नीमोर ऊळ्दकु लॉकुर आ राष्ट्रगोळ दा नानी याद माळ्यार, येल आंदुर बन्दी माळकु निष्कासित आगीदुर. आंदुर याद माळ्यार कि ना आंदरी दण्ड कोटीदीन, यतिकी आ दिनगोळ दा आंदुर दिल इन निष्ठा नान प्रती ईला ईरोद, अदिक आंदुर दुसरा द्यावगोळ्द मूर्तीगोळ मा कामनापूर्ण ध्यान कोट्टुर, आंदुर ईद अनुभव माळकु तान बेकार क्याल्सागोळ साटी खुद तान नजर दा बेकार ठहरूस्यार, अदिक अंदार कि आंदुर यास दुष्‍कर्म माळ्यार.
EZE 6:10 आग आंदुर जान्स कोंडार कि ना यहोवा हुईन, अदिक ना जो ईद अंदीन कि ना आंदुर्द नाश माळाईन, अद बेकार अंदिदील.”
EZE 6:11 प्रभु यहोवा ईद अनतान: “तान कय बडुकु अदिक काल आपळुसकु अन, इस्त्राएल इन घराना अन सप्पा घिनोना क्याल्सागोळ मा हाय, हाय, यतिकी आंदुर तलवार, हसु, अदिक मरी देल नष्ट आगेदार.
EZE 6:12 जो दुर आन आव मरी देल सोत्तान, अदिक जो हात्ती आन आव तलवार देल कोंदकु आदान; अदिक जो उळ्दकु नगर दा ईरतेला घेर्सकु आदान, आव हसु देल सोत्तान. ई प्रकार ना तान जलजलाहट आंदुर मा पुरा रीती देल ईळसाईन.
EZE 6:13 याग हर ऊंद धोळ्द पहाळी अदिक पहाळी इन हर ऊंद चोटी मा, अदिक हर ऊंद हिवरा मार्र इन ल्यालमा, अदिक हर ऊंद घना बांज मार्र इन सावली दा, येल येल आंदुर तान सप्पा मुरतीगोळी सुखदायक सुगन्ध द्रव्य येर्सतार, अल आंदुरोर कोंदकु आग्यार आ लॉकुर तान वेदीगोळ आसपास तान मुरतीगोळ बीच दा बिदकु ईत्तार; आग नीव लॉकुर जान्स कोंडीर कि ना यहोवा हुईन.
EZE 6:14 ना तान कय आंदुर खिलाप वाळुसकु आ द्याश इक सप्पा मान्नागोळ सांगुळ आळी टु हुडुकु रिबला ताका उजाळ उजाळ अच माळ कोमाईन. आग आंदुर जान्स कोंडार कि ना यहोवा हुईन.”
EZE 7:1 बाक यहोवा अन ईद वचन नान हाती पोहचुस्त,
EZE 7:2 “हे मंळसा अन सन्तान, प्रभु यहोवा इस्त्राएल इन जागा अन बारा दा ईद अनतान: कि अन्त आत; नाकु क्वाना सांगुळ द्याश इन अन्त होट बंदाद.”
EZE 7:3 नीन अन्त भी होट्ट बंदाद, अदिक ना तान कोप नीन मा भळकुसकु नीन चाल चलन इन अनुसार नीनी दण्ड कोळाईन; अदिक नीन सप्पा घिनोना क्याल्सा अन काय नीनी कोळाईन.
EZE 7:4 नान दया दृष्टी नीन मा ईरतीदील, अदिक ना तरस तिनालीन, अदिक यागासताका नीन घिनोना पाप नीन दा बन्सकु ईत्तव आगासताका ना नीन चालचलन इन फल नीनी कोळाईन. आग नी जान्स कोंड्या कि ना यहोवा हुईन.
EZE 7:5 “प्रभु यहोवा ईद अनतान: विपत्ती आद, ऊंद धोळ्द विपत्ती आद! नोळी, अद बरतद.
EZE 7:6 अन्त होट्ट बंदाद, सप्पा मुंदुर्द अन्त बंदाद; आव नीन खिलाप जागस्यान. नोळी, आव बरतान.
EZE 7:7 हे इस्त्राएल द्याश इन ईरावाळेरा, नीम विनाश इन समय होट बंदाद! नीम साटी विनाश चक्र तिर्गेग्याद.” दिन हाती आव; पहाळीगोळ मा आनंद इन शब्द अन दिन ईला, हुल्लळ इन दिन ईत्तीत.
EZE 7:8 ईग थ्वाळासा दिनगोळ दा ना तान जलजलाहट नीन मा भळकुसाईन, अदिक नीन मा पुरा कोप रिचुसाईन अदिक नीन चालचलन इन अनुसार नीनी दण्ड कोळाईन. नीन सप्पा घिनोना क्याल्सा अन फल नीनी भुगतुसाईन.
EZE 7:9 नान दया दृष्टी नीन मा आगतीदील अदिक न ना नीन मा तरस तिनाईन. ना नीन चालचलन इन फल नीनी भुगतुसाईन, अदिक नीन घिनोना पाप नीन दा बन्सकु ईत्तव. आग नीव जान्स कोंडीर कि ना यहोवा दण्ड कोळावाळा हुईन.
EZE 7:10 नोळी, आ दिशी इक नोळी, आव बरतान, चक्र तिर्गेग्याद, अन्याय इन छळी फुलुसेग्याद, नीन घमण्ड वाळुसेग्याद.
EZE 7:11 उपद्रव वाळुस्त वाळुस्त दुष्टता अन दण्ड बनसेग्याद; आंदुर दा टु याऊ ऊळुतीदील, अदिक आंदुर भीळ भाळ, न आंदुर धन दा टु येनारा ईत्तीत; अदिक न आंदुर दा टु यारदारा साटी विलाप केळ बंदीत.
EZE 7:12 समय होट बंदाद, दिन हाती होट बंदाद; न रा कोमावाळा आनंद माळुल अदिक न मारावाळा दुख माळुल, यतिकी आंदुर सप्पा भीळ मा कोप भळकुस्याद.
EZE 7:13 चाहे आंदुर जीत्ता ईरूल, तरी भी मारावाळा मार्द वस्तु उन हात्ती कभी वापस बर सकतीदील; यतिकी सिट्ट इन ईद मात द्याश इन सप्पा भीळ मा घटुसीत, याऊ वापस होगतीदील; यावारा भी मंळसा जो अधर्म दा जीत्ता ईरतान, बल हुडु सकतीदील.
EZE 7:14 आंदुर नरसींगा ऊरदुर अदिक सप्पा येनारा तैयार माळदुर; लेकीन युध्द दा याऊ होगालुन यतिकी द्याश इन सप्पा भीळ मा नान कोप भळकुसकु आद.
EZE 7:15 “व्हार्या तलवार अदिक बुळ्क महंगा अदिक मरी आद; जो मैदान दा आन आव तलवार देल सोत्तान, अदिक जो नगर दा आन आव हसु अदिक मरी देल कोंदकु आदान.
EZE 7:16 आंदुर दा टु जो ऊळ्दकु होट्टार आंदुर ऊळदार रा सही लेकीन तान तान अधर्म दा फसुसकु ईतकु तराई दा ईरावाळेर कबूतरगोळ घाई पहाळी इन म्याकुच विलाप माळतेला ईत्तार.
EZE 7:17 सप्पा मुंदुरव कय ढीला अदिक सप्पा मुंदुरव ट्वांगरा हापाळ कमजोर आगेदव.
EZE 7:18 आंदुर नेळु मा टाट कट्यार, अदिक आंदुरव मय इनव मुळ्लगोळ नीदरेव, सप्पा अन बाय वंळ्गेव अदिक सप्पा अन ताल्ला मुंडुसकु आदव.
EZE 7:19 आंदुर ताम चांदी सळकगोळ मा भीट्टार, अदिक आंदुर व्हान्ना अशुद्ध वस्तु ठहरूसीत; यहोवा अन जलन इन दिन आंदुर व्हान्ना बेळ्ली आंदरी ऊळ्स सकतीदील, न अदुर देल आंदुर जीव संतुष्ट आदीत, न आंदुर्द व्हाट्टा तुम्मीत. यतिकी अद आंदुर्द अधर्म इन ठोकर इन कारण आग्याद.”
EZE 7:20 आंदुर्द द्याश जो शोभायमान अदिक शिरोमणि ईरोद, अदुर बारा दा आंदुर गर्व अच गर्व माळकु अदुर दा तान घृणित वस्तुगोळ मूर्तीगोळ, अदिक घृणित वस्तुगोळ माळकु ईटदुर, ई कारण ना अदरी आंदुर साटी अशुद्ध वस्तु ठहरूसीन.
EZE 7:21 ना अदरी लुटसोर साटी परदेशीगोळ कय, अदिक धन कसोर साटी धरती इन दुष्ट लॉकुर कय दा माळ कोमाईन, अदिक आंदुर अदरी अपवित्र माळ कोंडार.
EZE 7:22 ना आंदुर से मार्रा तिर्गुस बुळाईन, आग आंदुर नान रक्षीत जागा अक अपवित्र माळ्यार; डाकु अल होगकु अदरी अपवित्र माळ्यार.
EZE 7:23 “ऊंद संकली माळ कोम, यतिकी द्याश अन्याय इन हत्या देल, अदिक नगर उपद्रव देल तुमकु आद.
EZE 7:24 ना राज्य राज्य अन बुरा से बुरा लॉकुरी तराईन, जो आंदुर मान्नागोळ स्वामी आगेदार; अदिक ना ताकतवरगोळ्द गर्व मुर्द बुळाईन अदिक आंदुर पवित्र जागा अपवित्र माळकु आदव.
EZE 7:25 सत्यानाश आगदुर मा आद, आग ढुंढ्सदुर मा भी आंदरी शांती सीकतिदील.
EZE 7:26 विपत्ती मा विपत्ती बंदीत अदिक ऊळुसतेला चर्चा मा चर्चा केळ बंदीत; अदिक लॉकुर भविष्यवक्ता से दर्शन इन मात केळ्यार, लेकीन याजक उन हाती टु व्यवस्था, अदिक स्याणागोळ हाती टु सम्मति कोळोद शक्ती होगतेला ईत्तीत.
EZE 7:27 राजा रा शोक माळ्यान, अदिक रीस उदासीरूपी कपळा हाक्यार, अदिक द्याश इन लॉकुर इन कय ढीला बीद्दव. ना आंदुर चलन इन अनुसार आंदुर से बर्ताव माळाईन, अदिक आंदुर कमाई घाई आंदरी दण्ड कोळाईन; आग आंदुर जान्स कोंडार कि ना यहोवा हुईन.”
EZE 8:1 बाक सहाव्वा वर्ष इन सहाव्वा तींगुळ इन पाचवा दिन इक याग ना तान मान्या कुर्तकु ईरीन, अदिक यहूदीगोळोर स्याणागोळ नान मुंद कुर्तकु ईरोर, आग प्रभु यहोवा अन शक्ती अल्या नान मा प्रगट आत.
EZE 8:2 आग ना नोळदीन कि बेक्की इन घाई ऊंद रूप कांळ्सतद; आऊन नेळु उन ल्यालमा बेक्की आद, अदिक आऊन नेळु उन म्याकुच इन दी चमकुस्द पीतल इन झलक घाई येनारा आद.
EZE 8:3 आव कय घाई येनारा वाळुसकु नान ताल्ला अन चुट्टीगोळ हुळदुन; आग आत्मा नानी धरती अदिक आकाश इन बीच दा नेगुकु परमेश्वर उन तोर्सद दर्शनगोळ दा यरूशलेम इन मंदिर इन बुळ्क, आंगुळ इन आ फाटक इन हाती पोहचुस बुट्टुन यदुर बाय उत्तर दी आद; अदिक यदुर दा आ जलन पैदा माळवाळा प्रतिमा अन जागा ईरोद यदुर कारण द्वेश उपजुसतद.
EZE 8:4 बाल अल इस्त्राएल इन परमेश्वर उन तेज हांग अच ईरोद ह्यांग ना मैदान दा नोळीदीन.
EZE 8:5 आव नान से अंदुन, “हे मंळसा अन सन्तान, तान कण्ण उत्तर दी नेगुकु नोळ.” ना तान कण्ण उत्तर दी नेगुकु नोळदीन कि वेदी इन फाटक इन उत्तर दी अदुर प्रवेश जागा दा अच आव डाह पैदा माळावाळा प्रतिमा आद.
EZE 8:6 आग आव नान से अंदुन, “हे मंळसा अन सन्तान, येन नी नोळत्या कि ई लॉकुर येन माळीत्यार? इस्त्राएल इन घराना येन अच धोड्डेव बेकार क्याल्सा ईल माळतान, ताकी ना तान पवित्र जागा टु दुर आगेगाईन; लेकीन नी ईऊर से भी यक्कुल बेकार क्याल्सा नोळ्या.”
EZE 8:7 आग आव नानी आंगुळ इन दरवाजा मा वोतुन, अदिक ना नोळदीन, कि दीवार दा ऊंद खॉद्रा आद.
EZE 8:8 आग आव नान से अंदुन, “हे मंळसा अन सन्तान, दिवाल इक वोडु;” ईदुरसाटी ना दिवाल इक वोडुकु नोळदीन कि ऊंद दरवाजा आद.
EZE 8:9 आव नान से अंदुन, “बुळ्क होगकु नोळ कि ई लॉकुर ईल ह्यांग ह्यांग अदिक हापाळ बेकार क्याल्सा माळेत्यार.”
EZE 8:10 अत: ना बुळ्क होगकु नोळदीन कि नाकु दिकळोद दिवाल मा अलग अलग प्रकार इन रेंगसावाळा जन्तु अदिक बेकार जनावरगोळ अदिक इस्त्राएल इन सप्पा घराना अन मुर्तीगोळ चित्र तेगुकु आव.
EZE 8:11 इस्त्राएल उन घराना अन बाट्टुर दा टु सत्तर मंळसा यार बीच दा शापान उन पार याजन्याह भी आन, आंदुर आ चित्र अन मुंद नीदुरकु आर, अदिक हर ऊंद मंळसा तान कय दा धूपदान हुडुकु आन, अदिक धूप इन धुंगा अन बादल इन सुगन्ध म्याकुच येळेत्याद.
EZE 8:12 आग आव नान से अंदुन, “हे मंळसा अन सन्तान, येन नी नोळ्या कि इस्त्राएल उन घराना अन बाट्टुर तान तान नकाशीवाळा कोठरीगोळ बुळ्क मतलब अंधकार दा येन माळीत्यार? आंदुर अनतार कि यहोवा नाम इक नोळालुन; यहोवा द्याश इक त्याग्स बुटान.”
EZE 8:13 बाक आव नान से अंदुन, “नी ईंदुर से अदिक भी हापाळ बेकार क्याल्सा नोळ्या जो आंदुर माळतार.”
EZE 8:14 आग आव नानी यहोवा अन भवन इन आ फाटक इन हाती वोतुन जो उत्तर इन दी ईरोन अदिक अल आर्तेर कुर्तकु तम्मूज इन साटी वर्लोर.
EZE 8:15 आग आव नान से अंदुन, “हे मंळसा अन सन्तान, येन नी ईद नोळ्या? बाक ईऊर से भी धोड्डेव बेकार क्याल्सा नी नोळ्या.”
EZE 8:16 आग आव नानी यहोवा अन भवन इन बुळ्कळोद आंगुळ दा वोतुन; अदिक अल यहोवा अन भवन इन द्वार इन हाती हांद्रा अदिक वेदी इन बीच येनारा पच्चीस मंळसा तान बेन यहोवा अन भवन इन दी अदिक तान बाय पूर्व इन दी माळकु ईरोर; अदिक आंदुर पूर्व दिशा अन दी सूर्य अक नमस्कार माळोर.
EZE 8:17 आग आव नान से अंदुन, “हे मंळसा अन सन्तान, येन नी ईद नोळ्या? येन यहूदा अन घराना अन साटी बेकार क्याल्सा अन माळोद जो आंदुर ईल माळतार श्याण मात आद? आंदुर तान द्याश इक उपद्रव देल तुम कोंडुर, बाक ईल बंदकु नानी रिस दिलुस तोगोर. बल्की आंदुर आ डगाल इक तान मुग्ग इन मुंद हुडुकु ईरतार.
EZE 8:18 ईदुरसाटी ना भी जलजलाहट इन सांगुळ क्याल्सा माळाईन, न ना दया माळाईन अदिक न ना कोमलता माळाईन, अदिक चाहे आंदुर नान किवगोळ दा धोळ शब्द देल कारदार, तरी भी ना आंदुर मात केळतीदील.”
EZE 9:1 बाक आव नान किवगोळ दा ऊँचा शब्द देल कारकु अंदुन, “नगर इन अधिकारीगोळी तान तान कय दा नाश माळोद हतियार हुडुकु हाती तरी.”
EZE 9:2 ईदुर मा आर मंळसा, उत्तर दी ऊपरी फाटक इन हादी देल तान तान कय दा घात माळोद हतियार हुडुकु बंदुर; अदिक आंदुर बीच दा सन इन कपळा हाक्कु, नेळु मा लिखसोद दवात कटकु ऊंद अदिक मंळसा ईरोन; अदिक आंदुर सप्पा भवन इन बुळ्क होगकु पीतल इन वेदी इन हाती नीदुरदुर.
EZE 9:3 आग इस्त्राएल इन परमेश्वर उन तेज करूबगोळ मा टु, यार मा म्याकुच ईर तोगोन, भवन इन हांद्रा मा येदकु बंदीदुन; अदिक आव आ सन इन कपळा हाक्कु मंळसा अक जो नेळु मा दवात कटकु ईरोन, कारदुन.
EZE 9:4 अदिक यहोवा आऊन से अंदुन, “ई यरूशलेम नगर इन बुळ्क ईत्त आत्त होगकु यास मंळसा आ सप्पा बेकार क्याल्सा अन कारण जो अदुर दा माळकु आगताव, शोक माळतेला अदिक दुखगोळ मारा चिळ्लाळसतार, आंदुर ह्याणा मा चिन्ह हचबुळ.”
EZE 9:5 आग नान केळतेला दुसरा अंदुर, “नगर दा आंदुर हिंद हिंद नळुकु कोनतेला होगी; यारदु मा दया माळबाळेतीर अदिक न यारदारा मा तरस तिनेतीर.
EZE 9:6 बाट्टुर, हारोदोर, कुवारा पोरगोळ, चिकोर-चिण्गेर, आर्तेर, सप्पा अक कोंदकु नष्ट माळी, लेकीन यातोवारा मंळसा अन ह्याणा मा चिन्ह ईतीदाद, आऊन हाती होगबाळेतीर. नान पवित्र जागा मा टु सुरवात माळी.” अत: आंदुर आ पुराना मंळसा गोळ से सुरवात माळदुर जो भवन इन मुंद ईरोर.
EZE 9:7 बाक आव आंदुर से अंदुन, “भवन इक अशुध्द माळी, अदिक आंगुळगोळी लाशगोळ देल तुमकोमी. नळी व्हार्या होळी.” आग आंदुर नगर दा कोनली कुरतुर.
EZE 9:8 याग आंदुर कोन्नोर, अदिक ना आबना ईतोदीन, आग ना बाय इन भार देल बीद्दीन अदिक चिल्ळासकु अंदीन, “हाय प्रभु यहोवा! येन नी तान जलजलाहट यरूशलेम मा भळकुसकु इस्त्राएल इन सप्पा मीगदोर इक भी नष्ट माळ्या?”
EZE 9:9 आग आव नान से अंदुन, “इस्त्राएल अदिक यहूदा अन घरानागोळ्द अधर्म हापाळ अच यक्कुल आद, ईल ताका कि द्याश हत्या देल अदिक नगर अन्याय देल तुम्मेग्याद; यतिकी आंदुर अनतार, ‘यहोवा पृथ्वी इक त्याग्स बुटान अदिक यहोवा येनु नोळालुन.’
EZE 9:10 ईदुरसाटी आंदुर मा दया आगतीदील, न ना तरस तिनाईन, उलटा आंदुर चाल आंदुर्दा ताल्ला वापस माळाईन.”
EZE 9:11 आग ना येन नोळदीन, कि जो मंळसा सन इन कपळा हाक्कु अदिक नेळु मा दवात कटकु ईरोन, आव ईद अनकु समाचार कोट्टुन, “ह्यांग नी आग्या कोट्ट, ना हांग अच माळदीन.”
EZE 10:1 ईदुर बाद्दा ना नोळदीन कि करूबगोळ ताल्लागोळ म्याकुच जो आकाश मण्डल आद, अदुर दा नीलमणि इन सिंहासन घाई येनारा कांळ्सकु बिळतद.
EZE 10:2 आग यहोवा आ सन इन कपळा हाक्द मंळसा से अंदुन, “तिर्गावाळा चक्का अन बीच करूबगोळ ल्यालमा होग अदिक तान येढ्ढु मुठ्ठीगोळी करूबगोळ बीच इन अंगारगोळ देल तुमकु नगर मा बगरूसबुळ.” अत: आव नान नोळतेला अच बीच दा होदुन.
EZE 10:3 याग आव मंळसा बुळ्क होदुन, आग अव करूब भवन इन दक्षिण दी निदुरकु ईरव; अदिक बादल बुळ्कळोद आंगुळ दा तुमकु ईरोद.
EZE 10:4 आग यहोवा अन सामर्थ करूबगोळ म्याकुच टु यदकु भवन इन हांद्रा मा होट्ट बत्त; अदिक बादल भवन दा तुम्मेत; अदिक अद आंगुळ यहोवा अन सामर्थ इन ऊजुळ देल तुम्मेत.
EZE 10:5 करूबगोळ्द पंखगोळ्द शब्द व्हार्या अन आंगुळ ताका केळ बरतोगोद, अद सर्व सर्वशक्तिमान परमेश्वर उन माताळोद शब्द घाई ईरोद.
EZE 10:6 याग आव सन इन कपळा हाक्द मंळसा अन तिर्गावाळा चक्कागोळ बुळ्क करूबगोळ बीच दा टु बेक्की तरोद आग्या कोट्टुन, आग आव आंदुर बीच दा होगकु ऊंद चक्का अन हाती निदुरदुन.
EZE 10:7 आग करूबगोळ दा टु ऊंद करूब तान कय वाळुसकु, आ बेक्की दा टु जो करूबगोळ बीच दा ईरोद, येनारा नेगुकु सन इन कपळा हाक्द मंळसा अन मुठ्ठी दा कोळ्त; अदिक आव अदरी हुडुकु व्हार्या होटोदुन.
EZE 10:8 करूबगोळ पंख अन ल्यालमा रा मंळसा अन कय घाई येनारा कांळ्सोद.
EZE 10:9 आग ना नोळदीन, कि करूबगोळ हाती नाक चक्का आव; मतलब ऊंद ऊंद करूब इन हाती ऊंद ऊंद चक्का आद, अदिक चक्कागोळ्द रूप किमती चमकिला कल्ल घाई आद.
EZE 10:10 अऊर्द हिंग रूप आद कि नाकु ऊंद घाई कांळ्सताव, ह्यांग कि ऊंद चक्का अन बीच दुसरा चक्का ईरूल.
EZE 10:11 नळाहोती अव तान नाकु अलंगगोळ ताकत देल नळुताव; अदिक नळाहोती तिर्गालव, बल्की यात अऊर ताल्ला ईरतद अव आतल्या अदुर हिंद नळुताव अदिक नळाहोती अव तिर्गालव.
EZE 10:12 बेन कय अदिक पंखगोळ सांगुळ करूबगोळ पुरा शरीर अदिक जो चक्का अऊरव आव, अव भी सप्पा च्या सप्पा नाकु दी कण्णगोळ देल तुमकु आव.
EZE 10:13 नान केळतेला आ चक्कागोळी चक्कर अनकु आत, मतलब तिर्गावाळा चक्का.
EZE 10:14 ऊंद ऊंद इन नाक नाक चेहरा ईरव: ऊंद चेहरा रा करूबगोळ घाई, दुसरा मंळसा अन घाई, तिसरा हुल्ल इन घाई, अदिक नाकवा गिधाळ पक्षी इन घाई.
EZE 10:15 करूब जमीन मा टु येदोदव. ईव अव अच जीवधारी हुव, जो ना कबार गांगा अन हाती नोळीदिन.
EZE 10:16 याग याग आव करूब नळुतोगोव आग आग अव चक्कागोळ अऊर हाती नळुतोगोव; अदिक याग याग करूब पृथ्वी मा टु येळोर साटी तान पंख नेगोव आग आग चक्कागोळ अऊर हाती टु तिर्गोव ईला.
EZE 10:17 याग अव निदरव आग ईव भी अऊर सांगुळ निदरव; अदिक याग अव येळव आग ईव भी अऊर सांगुळ येळव; यतिकी जीवधारीगोळ्द आत्मा ईऊर दा ईरतोगोद.
EZE 10:18 यहोवा अन सामर्थ भवन इन डेवळी मा टु येदकु करूबगोळ म्याकुच ठहरूसेत.
EZE 10:19 आग करूब तान पंख नेगुकु नान नोळतेला अच पृथ्वी मा टु येदकु होट्ट बुट्टव; अदिक चक्कागोळ भी अऊर सांगुळ सांगुळ होदव, अदिक अव सप्पा यहोवा अन भवन इन पूर्वी फाटक दा नीदरेदव; अदिक इस्त्राएल उन परमेश्वर उन सामर्थ अऊर म्याकुच ठहरूस्कु ईत्त.
EZE 10:20 ईव अवा जीवधारी हुव जो ना कबार गांगा अन हाती इस्त्राएल इन परमेश्वर उन ल्यालमा नोळीदीन, अदिक ना जान्स कोंडीन कि अव भी करूब हुव.
EZE 10:21 हर ऊंद इन नाक चेहरा अदिक नाक पंख अदिक पंखगोळ ल्यालमा मंळसा अन घाई कयगोळ भी ईरव.
EZE 10:22 अऊर बायगोळ रूप अदा आद जो ना कबार गांगा अन तट मा नोळीदीन. अऊर बाय अच येन बल्की अऊर सप्पा शरीर भी हांग अच ईरोद. अव सीधा तान तान मुंद अच नळोव.
EZE 11:1 आग आत्मा नानी नेगुकु यहोवा अन भवन इन पूर्वी फाटक इन हाती यदुर्द बाय पूर्वी दिशा अन दी आद, पोहचुस बुळ्त; अदिक अल ना येन नोळदिन, कि फाटक अच दा पच्चीस मंळसा आर. ना आंदुर बीच अज्जुर उन पार याजन्याह अक अदिक बनायाह अन पार पलत्याह अक नोळदीन, जो प्रजा अन प्रधान ईरोर.
EZE 11:2 आग आव नान से अंदुन, “हे मंळसा अन सन्तान, जो मंळसा ई नगर दा अनर्थ कल्पना अदिक बुरा युक्ती माळतार आंदुर ईंदुर अच हुळ.
EZE 11:3 ईंदुर अनतार, ‘मान्ना माळोद समय हाती हैलेच, ईद नगर स्वार्रा अदिक नाव अदुर दाकळोद मास हुयेव.’
EZE 11:4 ईदुरसाटी हे मंळसा अन सन्तान, ईंदुर खिलाप भविष्यवाणी माळ, भविष्यवाणी.”
EZE 11:5 आग यहोवा अन आत्मा नान मा ईळुत, अदिक नान से अन्त, “हिंग अन, यहोवा हिंग अनतान: हे इस्त्राएल उन घराना, नीव हिंग अच अंदीर; जो येनारा नीम मन दा बरतद, अदरी ना जान्सतीन.
EZE 11:6 नीव रा ई नगर दा हापाळ मुंदरी कोंद बुटीर बल्की आऊन सळकगोळी लाशगोळ देल तुम कोंडीर.”
EZE 11:7 ई कारण प्रभु यहोवा ईद अनतान: जो मंळसा नीव कोंद बुट्टीर, आंदुर लाश अच ई नगर रूपी स्वार्रा दाकळोद मास हुव; अदिक नीव ईदुर बीच दा टु तेगुकु आदीर.
EZE 11:8 नीव तलवार देल अंजतीर, अदिक ना नीम मा तलवार नळसाईन, प्रभु यहोवा अन ईद वाणी आद.
EZE 11:9 ना नीमी ईदुर दा टु तेगुकु परदेशीगोळ कय दा माळ कोमाईन, अदिक नीमी दण्ड कोळसुसाईन.
EZE 11:10 नीव तलवार देल सोतकु बिद्दीर, अदिक ना नीम्द मुकदमा इस्त्राएल इन द्याश इन सीमा मा चुकुसाईन; आग नीव जान्स कोंडीर कि ना यहोवा हुईन.
EZE 11:11 ईद नगर नीम साटी स्वार्रा आगतीदील, अदिक न नीव ईदुर दाकळोद मास हुईर; ना नीम्द मुकदमा इस्त्राएल इन द्याश इन सीमा मा चुकुसाईन.
EZE 11:12 आग नीव जान्स कोंडीर ना यहोवा हुईन; “नीव रा नान विधीगोळ मा नळदीदील, अदिक नान नियमगोळी नीव मान्सीदील; लेकीन तान नाकु दिकळव राज्यगोळ रीतिगोळ मा नळदीर.”
EZE 11:13 ना ई प्रकार इन भविष्यवाणी माळीन कि बनयाह अन पार पलत्याह सोतोदुन. आग ना बाय इन भार देल बिदकु धोळ आवाज देल चिळ्लास कुरतीन, अदिक अंदीन, “हाय प्रभु यहोवा, येन नी इस्त्राएल उन मिकदोर आंदुर सत्यानाश माळ कोंड्या?”
EZE 11:14 आग यहोवा अन वचन नान हाती पोहचुस्त,
EZE 11:15 हे मंळसा अन सन्तान, यरूशलेम इन निवासीगोळ नीन हात्तीगोळ वार्टुर से बल्की इस्त्राएल इन सप्पा घराना से अंदार कि नीव यहोवा अन हाती टु दुर आगेगी, ईद द्याश नाम्द अच अधिकार दा कोटकु आग्याद.
EZE 11:16 लेकीन नी आंदुर से अन, “प्रभु यहोवा ईद अनतान: ना नीमी दुर दुर इन राज्यगोळ दा कुर्सदीन अदिक द्याश द्याश दा तितर बितर माळ कोंडीन, तरी भी या द्याश दा नीव बंदकु आईर, अऊर ना खुद नीम साटी थ्वाळासा दीन ताका पवित्र जागा ठहरुसाईन.”
EZE 11:17 “ईदुरसाटी आंदुर अन, प्रभु यहोवा हिंग अनतान: ना नीमी राज्य राज्य अन लॉकुर बीच दा टु वाटसाईन, अदिक या द्याशगोळ दा नीव तितर बितर माळकु आगीर, अऊर दा टु नीमी जमा माळाईन, अदिक नीनी इस्त्राएल इन जागा कोळाईन.
EZE 11:18 आंदुर अल पोहचुसक आ द्याश इन सप्पा बेकार मूर्तीगोळ अदिक बेकार क्याल्सा भी आंदुर से दुर माळ्यार.
EZE 11:19 ना आंदुर दिल ऊंद माळ कोमाईन, अदिक आंदुर बुळ्क व्हासा आत्मा पैदा माळाईन, अदिक आंदुर शरीर दा टु कल्ल इन घाई दिल तेगुकु आंदरी मास इन दिल कोळाईन,
EZE 11:20 यदुर देल आंदुर नान विधीगोळ मा नित नळुल अदिक नान नियमगोळी मान्सुल; अदिक आंदुर नान प्रजा ठहरूस्यार, अदिक ना आंदुरव परमेश्वर ठहरूसाईन.
EZE 11:21 लेकीन आ लॉकुर जो तान बेकार मूर्तीगोळ अदिक बेकार क्याल्सा दा मन हचकु नळुतेला ईरतार, आंदरी ना हींग माळाईन कि आंदुर चाल आंदुर्दा ताल्ला मा बिद्दीत, प्रभु यहोवा अन ईदा वाणी आद.”
EZE 11:22 ईदुर मा करूबगोळ पंख नेगदव, अदिक चक्का अऊर सांगुळ सांगुळ नळदव; अदिक इस्त्राएल उन परमेश्वर उन सामर्थ अऊर म्याकुच ईरोद.
EZE 11:23 आग यहोवा अन सामर्थ नगर इन बीच दा टु यदकु आ पहाळी मा ठहरूसेत जो नगर इन पूर्व दी आद.
EZE 11:24 बाक आत्मा नानी नेगुत, अदिक परमेश्वर उन आत्मा अन शक्ती देल दर्शन दा नानी कसदी अन द्याश दा बन्दीगोळ हाती पोहचुस बुट्टुन. जो दर्शन दा ना हासिल माळीदीन अद काळदोत.
EZE 11:25 बाक यास मातगोळ यहोवा नानी तोर्सीदुन, अव ना बंदीगोळी हेळ बुट्टीन.
EZE 12:1 बाक यहोवा अन ईद वचन नान हाती पोहचुस्त,
EZE 12:2 “हे मंळसा अन सन्तान, नी विद्रोह माळसुसावाळा घराना अन बीच दा ईरत्या, यारव नोळोर साटी कण्ण रा आव, लेकीन नोळालुर; अदिक केळोर साटी कीव रा आव लेकीन केळालुर; यतिकी आंदुर विद्रोह माळसुसावाळेर घराना नोर उर.”
EZE 12:3 ईदुरसाटी हे मंळसा अन सन्तान, हागुल बंधुआई इन सामान तैयार माळकु आंदुर नोळतेला यदोगेत, आंदुर नोळतेला अच तान जागा बिटकु दुसरा जागा अक होगेत. अगर आंदुर विद्रोह माळावाळेर घराना नोर उर, तरी भी संभव आद कि आंदुर ध्यान कोळुल.
EZE 12:4 “इदुरसाटी नी हागुल इक बंधुआई इन सामान घाई तान सामान तेगेत, अदिक आग नी द्यावगा अक बंधुआई दा होगावाळा अन घाई आंदुर नोळतेला यदोगेत.
EZE 12:5 आंदुर्द नोळतेला अच दिवार इक वोडुकु अल टु अच तान सामान तेगेत.
EZE 12:6 आंदुर नोळतेला अच तान खांदा मा नेगुकु अंधार दा होळेत, अदिक तान बाय कटकु ईटेत कि जमीन नीनी कोळ सकबाळुल; यतिकी ना नीनी इस्त्राएल उन घराना अन साटी ऊंद चिन्ह ठहरूसीन.”
EZE 12:7 आ आग्या अन अनुसार ना हांग अच माळदीन. हागुल ना तान सामान बंधुआई इन सामान इन घाई तेगदीन, अदिक द्यावगा अक तान कय देल दिवार वोळदीन; बाक अंधार दा सामान इक तेगुकु, आंदुर्द नोळतेला अच तान खांदा मा नेगुकु होटोदुन.
EZE 12:8 व्हातर्या यहोवा अन ईद वचन नान हाती पोहचुस्त,
EZE 12:9 “हे मंळसा अन सन्तान, येन इस्त्राएल उन घराना अन मतलब आ विद्रोह माळसुसावाळा घराना नीन से ईद केळीदील, ‘ईद नी येन माळत्या?’
EZE 12:10 नी आंदुर से अन, प्रभु यहोवा हींग अनतान: ईद प्रभावशाली वचन यरूशलेम उन प्रधान मंळसा अदिक इस्त्राएल उन सप्पा घराना अन बारा दा आद यदुर बीच दा आंदुर ईरतार.
EZE 12:11 नी आंदरी अन, ना नीम साटी चिन्ह हुईन; ह्यांग ना माळीन, हांग अच इस्त्राएली लॉकुर से भी माळकु आदीत; आंदरी यदकु गुलामी दा होगोद बिद्दीत.
EZE 12:12 आंदुर बीच दा जो प्रधान आन, आव अंधार दा तान खांदा मा बोझ नेगुकु होट्टान; आव तान सामान तेगोर साटी दिवार इक वोळदान, अदिक तान बाय कटकु ईत्तान कि आऊक जागा नोळ सकबाळुल.
EZE 12:13 ना आऊन मा तान जाल फैलुसाईन, अदिक आव नान फासा दा फसुस्यान; अदिक ना आऊक कसदी अन द्याश दा बेबीलोन दा पोहचुस बुळाईन; अगर आव आ नगर दा सोतोदान, तरी भी आऊक नोळतिदील.”
EZE 12:14 यास आऊन सहायक आऊन आस पास ईत्तार, आंदरी अदिक आंदुर टोलीगोळी सप्पा दिशागोळ दा तितर बितर माळ कोमाईन; अदिक तलवार जेडुकु आंदुर हींद नळसाईन.
EZE 12:15 “याग ना आंदरी राज्य राज्य दा तितर बितर माळ कोमाईन, अदिक द्याश द्याश दा छिन्न भिन्न माळ कोमाईन, आग आंदुर जान्स कोंडार कि ना यहोवा हुईन.
EZE 12:16 लेकीन आंदुर दा टु थ्वाळासा लॉकुरी तलवार, हसु अदिक मरी देल उळ्सकु ईटाईन; अदिक आंदुर तान बेकार क्याल्सागोळ आ राज्यगोळ दा वर्णन माळ्यार यार बीच दा आंदुर पोहचुस्यार; आग आंदुर जान्स कोंडार कि ना यहोवा हुईन,”
EZE 12:17 आग यहोवा अन वचन नान हाती पोहचुस्त,
EZE 12:18 “हे मंळसा अन पारा, नळ्गतेला तान रोट्टी तिनेत अदिक नळ्गतेला अदिक चिन्ता माळतेला तान नीर कुडेत;
EZE 12:19 अदिक ई द्याश इन लॉकुर से ईद अनेत, कि प्रभु यहोवा यरूशलेम अदिक इस्त्राएल इन द्याश इन निवासीगोळ बारा दा ईद अनतान: आंदुर तान रोट्टी चिन्ता अन सांगुळ तिंदार; यतिकी द्याश तान सप्पा ईरावाळेर उपद्रव इन कारण तान सप्पा भरपुरी देल रहित आगेदीत.
EZE 12:20 बसुस्क नगर नाश आगेदव, अदिक द्याश भी ऊजळुसेदव, आग नीव लॉकुर जान्स कोंडीर कि ना यहोवा हुईन.”
EZE 12:21 बाक यहोवा अन ईद वचन नान हाती पोहचुस्त,
EZE 12:22 “हे मंळसा अन पारा, ईद येन कहावत हुन जो नीव लॉकुर इस्त्राएल इन द्याश दा अन तोगतीर, ‘दिन हापाळ आगेग्याव, अदिक दर्शन इन यातोदु मात पुरा आगली आद?’”
EZE 12:23 ईदुरसाटी आंदुर अन, प्रभु यहोवा हींग अनतान: ना ई कहावत इक बंद माळाईन; अदिक ईद कहावत इस्त्राएल मा बाक मात नळुतीदील. नी आंदुर से अन कि अद दिन हात्ती होट्ट बंदाद, अदिक दर्शन इन सप्पा मातगोळ पुरा आगदुर मा आव.
EZE 12:24 “यतिकी इस्त्राएल इन घराना दा न रा अदिक यक्कुल ख्वाटा दर्शन इन यातोदारा मात अदिक न यातोदु चीकना चुपळा मात मात्त अंदकु आदीत.
EZE 12:25 यतिकी ना यहोवा हुईन, याग ना अनाईन, आग जो वचन ना अनाईन, अद पुरा आगेदीत. अदुर दा समय आगतीदील, लेकीन हे विद्रोह माळावाळा घराना, नीम्दा दिनगोळ दा ना वचन अनाईन, अदिक अद पुरा आगेदीत, प्रभु यहोवा अन ईद वाणी आद.”
EZE 12:26 बाक यहोवा अन ईद वचन नान हाती पोहचुस्त,
EZE 12:27 “हे मंळसा अन पारा, नोळ, इस्त्राएल उन घराना अन लॉकुर ईद अनेत्यार, जो दर्शन आव नोळतान, अद हापाळ दिन बाद्दा पुरा आगोद आद; अदिक अद दुर इन समय इन बारा दा भविष्यवाणी माळतान.
EZE 12:28 ईदुरसाटी नी आंदुर से अन, प्रभु यहोवा ईद अनतान: नान यातोदारा वचन इक पुरा आगदुर दा मात्त समय आगतीदील, बल्की जो वचन ना अनाईन अद सही दा पुरा आदीत, प्रभु यहोवा अन ईदा वाणी हुन.”
EZE 13:1 यहोवा अन ईद वचन नान हाती पोहचुस्त,
EZE 13:2 “हे मंळसा अन पारा, इस्त्राएल इन जो भविष्यवक्ता तांद अच मन इन भविष्यवाणी माळतार, आंदुर विरूद्‍ध भविष्यवाणी माळकु नी अन, ‘यहोवा अन वचन केळी.’”
EZE 13:3 प्रभु यहोवा ईद अनतान: हाय, आ मूर्ख भविष्यवक्तागोळ मा जो तान अच आत्मा अन हींद भटकुसेगतार, अदिक येनु दर्शन नोळीदील!
EZE 13:4 “हे इस्त्राएल, नीन भविष्यवक्ता खण्डर दाकळव लांडग्यागोळ घाई बन्सकु आव.
EZE 13:5 नीव दरारगोळ दा येरकु इस्त्राएल इन घराना अन साटी दीवार सुधरूसीदील, यदुर देल आंदुर यहोवा अन दिन युध्द दा स्थिर ईर सकायदुर.
EZE 13:6 आ लॉकुर जो अनतार, यहोवा अन ईद वाणी हुन, आंदुर भावी इन बेकार अदिक ख्वाटा दावा माळदुर; अदिक आग भी ईद आशा कोट्टुर कि यहोवा ईद वचन पुरा माळ्यान; तरी भी यहोवा आंदरी कळीदील.
EZE 13:7 येन नीम्द दर्शन ख्वाटा हैलेच, अदिक नीव झुठमुठ भावी अनालीर? नीव अनतीर, यहोवा अन ईद वाणी आद; लेकीन ना येनु अंदिदील.”
EZE 13:8 ई कारण प्रभु यहोवा नीम से ईद अनतान: “नीव जो बेकार मात अंदीर अदिक ख्वाटा दर्शन नोळीर, ईदुरसाटी ना नीम खिलाप आईन, प्रभु यहोवा अन ईदा वाणी आद.
EZE 13:9 जो भविष्यवक्ता ख्वाटा दर्शन नोळतार अदिक खॉटाखुटा भावी अनतार, नान कय आंदुर खिलाप आदीत, अदिक आंदुर नान प्रजा अन मंडली दा भागी आगतीदील, न आंदुर हेसुर इस्त्राएल इन नामावली दा लिख्सकु आदव, अदिक न आंदुर इस्त्राएल इन द्याश दा प्रवेश माळ सक्यार; ईदुर देल नीव जान्स कोंडीर कि ना प्रभु यहोवा हुईन.”
EZE 13:10 “यतिकी, हव, यतिकी आंदुर शांती आद, हिंग अंदकु नान प्रजा अक बयकुस्यार जब कि शांती हैलेच; ईदुरसाटी कि याग यातोदारा दिवार माळतान आग आंदुर अदुर कच्चा पोताई माळतार.
EZE 13:11 आ कच्चा पोताई माळावाळेर से अन कि अद बिदोदीत. यतिकी हापाळ जोर से माळ बंदीत, अदिक धोड्डेव धोड्डेव गारपीट भी बीद्दव, अदिक धोळ्द आँधी अदरी केळदीत.
EZE 13:12 ईदुरसाटी याग दिवार बिदोदीत, आग येन लॉकुर नीम से ईद अनतीदील, ‘जो पोताई नीव माळीर अद येल होत?’”
EZE 13:13 ई कारण प्रभु यहोवा नीम से ईद अनतान: ना होतकु अदरी धोळ्द आंधी इन द्वारा केडाईन; अदिक नान देल हापाळ माळ आदीत, अदिक नान जलजहाट देल धोड्डेव धोड्डेव गारपीट बीद्दव कि दिवाल इक नष्ट माळुल.
EZE 13:14 ई रीती या दिवार मा नीव कच्चा पोताई माळीर, अदरी ना माळ कोमाईन, बल्की मुण्ण दा मिलुसाईन, अदिक अदुर नीव खुलसेदीत; अदिक याग अद बीद्दीत, आग नीव भी अदुर ल्यालमा दब्सकु नष्ट आगेदीर; अदिक नीव जान्स कोंडीर कि ना यहोवा हुईन.
EZE 13:15 ई प्रकार ना दीवार अदिक अदुर्द कच्चा पोताई माळावाळेर येढ्ढु मा तान जलजलहाट पुरा रीती देल भळकुसाईन; बाक नीम से अनाईन, न रा दिवार ईत्त, अदिक अदरी पोताई माळावाळेर ईत्तुर,
EZE 13:16 मतलब इस्त्राएल उन आ भविष्यवक्ता जो यरूशलेम इन बारा दा भविष्यवाणी माळोर अदिक शांती इन दर्शन हेळोर, लेकीन प्रभु यहोवा अन ईद वाणी आद, कि शांती हैलेच.
EZE 13:17 बाक हे मंळसा अन पारा, नी तान लॉकुर आर्तेर से विमुख आगकु, जो तांद अच मन देल भविष्यवाणी माळतार; आंदुर खिलाप भविष्यवाणी माळकु अन,
EZE 13:18 प्रभु यहोवा ईद अनतान: जो आर्तेर कय देल सप्पा ज्वाळागोळ साटी ऊसी होलुतार अदिक जनावरगोळ्द अहेर माळली सप्पा प्रकार इन मंळसागोळ कण्ण ढाकसोर साटी कपळागोळ माळतार, आंदुर मा हाय! येन नीव नान प्रजा अन प्राणगोळ्द अहेर माळकु तान खुद इन प्राण ऊळ्स सक्कीर?
EZE 13:19 नीव रा मुठ्ठी मुठ्ठी तीम जौ अदिक रोट्टी इन तुकळा अन बदला नानी नान प्रजा अन नजर दा अपवित्र ठहरूसकु, अदिक तान आ ख्वाटा मातगोळ द्वारा, जो नान प्रजा अन लॉकुर नीम से केळतार, जो नाश इन लायक ईला ईरोर, आंदरी कोंद बुट्टीर, अदिक जो ऊळा लायक ईला ईरोर आ जीवगोळी ऊळ्सकु ईटीर.
EZE 13:20 “ई कारण प्रभु यहोवा नीम से ईद अनतान: नोळी, ना नीम आ ऊसागोळ खिलाप आईन, यऊर द्वारा नीव प्राणगोळ्द अहेर माळतीर, ईदुरसाटी यारी नीव अहेर माळ माळकु हार्सतीर आंदरी ना नीम खांदा मा टु कसुकु आंदरी बीळ्स बुळाईन.
EZE 13:21 ना नीम ताल्ला अन बुर्खागोळी हरकु तान प्रजा अन लॉकुरी इक नीम कय टु बीळसाईन, अदिक मुंद आंदुर नीम वश दा ईरतीदील कि नीव आंदुर्द अहेर माळ सक्कीर; आग नीव जान्स कोंडीर कि ना यहोवा हुईन.”
EZE 13:22 नीव जो ख्वाटा माताळकु धर्मी इन मन इक उदास माळीर, अगर ना अदरी उदास माळोद चाहसालीन, अदिक नीव दुष्ट जन उक हियाव कटसुसीर, ताकी आव तान बुरा हादी टु तिर्गबाळुल अदिक जीत्ता ईरूल.
EZE 13:23 ई कारण नीव बाक न रा ख्वाटा दर्शन नोळीर, अदिक न भावी अंदीर; यतिकी ना तान प्रजा अक नीम कय देल बीळसाईन. आग नीव जान्स कोंडीर कि ना यहोवा हुईन,
EZE 14:1 बाक इस्त्राएल इन येनारा बाट्टुर नान हाती बंदकु नान मुंद कुर्तोदुर.
EZE 14:2 आग यहोवा अन ईद वचन नान हाती पोहचुस्त.
EZE 14:3 “हे मंळसा अन पारा, ई मंळसागोळ रा तान मुर्तीगोळ तान मन दा स्थापित माळदुर, अदिक तान अधर्म इन ठोकर तान मुंद ईटदुर; बाक येन आंदुर नान से येनारा भी केळ सक्यार?”
EZE 14:4 ईदुरसाटी नी आंदुर से अन, प्रभु यहोवा ईद अनतान: इस्त्राएल इन घराना दा टु जो यावारा तान मुर्तीगोळ तान मन दा स्थापित माळकु, अदिक तान अधर्म इन ठोकर तान मुंद ईटकु भविष्यवक्ता अन हाती बंदुर, आऊक ना यहोवा, आऊन हापाळ सा मुर्तीगोळ अनुसार अच उत्तर कोळाईन,
EZE 14:5 यदुर देल इस्त्राएल उन घराना, जो तान मुर्तीगोळ द्वारा नानी त्याग्सकु दुर आगेग्याद, आंदरी ना आंदुर्द अच मन इन द्वारा फसुसाईन.
EZE 14:6 “ईदुरसाटी इस्त्राएल इन घराना से अन, प्रभु यहोवा ईद अनतान: तिर्गी अदिक तान मुर्तीगोळ इक बेन इन हींद माळी; अदिक तान सप्पा बेकार क्याल्सागोळ से बाय तिर्गुसी.
EZE 14:7 यतिकी इस्त्राएल इन घराना दा टु अदुर बीच ईरावाळेर परदेशीगोळ दा टु भी यावारा यती ईला आगुल, जो नान हींद आगोद बिटकु तान मुर्तीगोळ तान मन दा स्थापित माळुल, अदिक तान अधर्म इन ठोकर तान मुंद ईट, अदिक आग नान से तान यातोदु मात केळोर साटी भविष्यवक्ता अन हाती बंदार, रा आऊक ना यहोवा खुद अच उत्तर कोळाईन.
EZE 14:8 ना आ मंळसा अन विरूद्ध आगकु आऊक चकित माळाईन, अदिक चिन्ह ठहरूसाईन; अदिक आऊन कहावत बनसेदीत अदिक आऊन तान प्रजा दा टु नष्ट माळाईन; आग नीव लॉकुर जान्स कोंडीर कि ना यहोवा हुईन.
EZE 14:9 अगर भविष्यवक्ता ध्वाका तिनकु यातोदारा वचन अंदीदान, रा जान्सी कि ना यहोवा आ भविष्यवक्ता अक ध्वाका कोटान; अदिक ना तान कय आऊन विरूद्ध वाळुसकु आऊक तान प्रजा इस्त्राएल दा टु नष्ट माळाईन.
EZE 14:10 आंदुर सप्पा मुंदुर तन तान अर्धम इन बोझ नेगदार, मतलब ह्यांग भविष्यवक्ता से केळावाळा अन अधर्म ठहरूसीत, हांग अच भविष्यवक्ता अन भी अधर्म ठहरूसीत.
EZE 14:11 ताकी इस्त्राएल इन घराना मुंद नान हींद आगोद बीळबाळुल अदिक न तान भांती भांती इन अपराधगोळ द्वारा मुंद होगकु अशुध्द आगुल; बल्की नान प्रजा आगुल अदिक ना आंदुरव परमेश्वर ठहरूसाईन, प्रभु यहोवा अन ईदा वाणी हुन.”
EZE 14:12 आग यहोवा अन ईद वचन नान हाती पोहचुस्त,
EZE 14:13 “हे मंळसा अन पारा, याग यातोदारा द्याश इन लॉकुर नान से विश्वासघात माळकु पापी आगेगुल, अदिक ना तान कय आ द्याश इन विरूद्ध वाळुस्कु अदुर अन्नरूपी आधार दुर माळाईन, अदिक अदुर दा अकाल हाक्कु अदुर दा टु मंळसा अदिक जनावर येढ्ढु उन नाश माळाईन,
EZE 14:14 आग बाक अदुर दा नूह, दानिय्येल, अदिक अय्यूब ईंदुर मुरू मंळसा ईरूल, तरी भी आंदुर तान अधर्म इन द्वारा सिर्फ तांद अच जीवगोळी ऊळ्स सक्यार; प्रभु यहोवा अन ईदा वाणी हुन.
EZE 14:15 अगर ना यातोदारा द्याश दा दुष्ट कीळा कळाईन जो आऊक निर्जन माळकु ऊजाळ्स बुळुल, अदिक कीळागोळ कारण याऊ अदुर दा आगकु होगबाळुल,
EZE 14:16 रा चाहसुल अल आंदुर आ मुर मंळसा ईरूल, तरी भी प्रभु यहोवा अन ईदा वाणी आद, नान जीवन इन किर्या, न आंदुर पारगोळी अदिक न पोरगोळी ऊळ्स सक्यार, आंदुर अच आबना मिक्यार; लेकीन द्याश ऊजळुसेदीत आगेदीत.
EZE 14:17 अगर ना आ द्याश मा तलवार जेडुकु अनाईन, हे तलवार आ द्याश दा नळ; अदिक ई रिती ना अदुर दा टु मंळसा अदिक जनावर नष्ट माळाईन,
EZE 14:18 आग बाक अल आंदुर आ मुर मंळसा भी ईरूल, तरी भी यहोवा अन ईद वाणी आद, नान जीवन इन किर्या, न रा आंदुर पारगोळी अदिक न पोरगोळी ऊळ्स सक्यार, आंदुर आबना मिक्यार.”
EZE 14:19 अगर ना आ द्याश दा मरी फैलुसतीन अदिक अदुर मा तान जलजलाहट भळकुसकु अदुर रक्ता वाहुसेन कि अलेर मंळसा अदिक जनावर येढ्ढु नष्ट आगुल,
EZE 14:20 रा बाक चाहे नूह, दानिय्येल अदिक अय्यूब भी अल ईत्तार, तरी भी, प्रभु यहोवा अन ईद वाणी आद, नान जीवन इन किर्या, आंदुर न पारगोळी अदिक न पोरगोळी ऊळ्स सक्यार, तान धर्म इन द्वारा आंदुर तान अच जीवगोळी ऊळ्स सक्यार.
EZE 14:21 “यतिकी प्रभु यहोवा ईद अनतान: ना यरूशलेम मा तान नाकु दण्ड पोहचुसाईन, मतलब तलवार, अकाल, दुष्ट कीळा अदिक मरी, यदुर देल मंळसा अदिक जनावर सप्पा अल नष्ट आगुल.
EZE 14:22 तरी भी अल येनारा पार-पोरगोळ उळदार जो अल टु होटकु नीम हाती पोहचुस्कु आदार, अदिक नीव आंदुर चाल चलन अदिक क्याल्सागोळी नोळकु आ विपत्ती इन बारा दा जो ना यरूशलेम मा हाकाईन, बल्की यास विपत्ती ना अदुर मा हाकाईन, आ सप्पा अन बारा दा शांती पाऊसीर.
EZE 14:23 याग नीव आंदुर चाल चलन अदिक क्याल्सा नोळीर, आग आंदुर नीम शांती इन कारण आदार; अदिक नीव जान्स कोंडीर कि ना यरूशलेम दा जो येनारा माळीन, अद बीना कारण माळीदील, प्रभु यहोवा अन ईदा वाणी आद.”
EZE 15:1 बाक यहोवा अन ईद वचन नान हाती पोहचुस्त,
EZE 15:2 “हे मंळसा अन सन्तान, सप्पा अंगुर इन लता अन येन श्रेष्टता आद? अंगुर इन डगाल जो आळी इन मार्रगोळ बीच पैदा आगतद, अदुर दा येन गुण आद?
EZE 15:3 येन यातोदारा वस्तु माळोरसाटी अदुर दा टु हुळ्ली हुडुकु आगतद, या यातोदारा बर्तन टांगसोर साटी दुर दा टु खुटा आग सकतद?
EZE 15:4 अद रा अंगुर इन हुळ्ली बेक्की दा होताकोद क्याल्सा दा बरतद; अदुर येढ्ढु सीरागोळ बेक्की देल होतेगताव, अदिक अदुर बीच इन भाग भस्म आगेतद, येन अद यातोदु क्याल्सा अन आद?
EZE 15:5 नोळ, याग अद बनसीत, आग भी अद येनु क्याल्सा अन ईला ईरोद, याग अद बेक्की दा होताक्कु भस्म आगेत, आग यातोद क्याल्सा अन आग सकतद.”
EZE 15:6 ईदुरसाटी प्रभु यहोवा ईद अनतान, “ह्यांग आळी इन मार्रगोळ दा टु ना अंगुर इन लता अक बेक्की दा होताक, हांग अच ना यरूशलेम इन निवासीगोळ्द नाश माळ कोमाईन.
EZE 15:7 ना आंदुर खिलाप आगाईन, अदिक आंदुर ऊंद बेक्की दा टु होटकु बाक दुसरा बेक्की दा होताक्कु आदार; अदिक ना याग आंदुर विमुख आगाईन, आग नीव लॉकुर जान्स कोंडीर कि ना यहोवा हुईन.
EZE 15:8 ना आंदुर द्याश नाश माळ बुळाईन, यतिकी आंदुर नान से विश्वासघात माळ्यार, प्रभु यहोवा अन ईदा वाणी आद.”
EZE 16:1 बाक यहोवा अन ईद वचन नान हाती पोहचुस्त,
EZE 16:2 “हे मंळसा अन पारा, यरूशलेम इक अदुरव सप्पा बेकार क्याल्सा हेळ बुळ,
EZE 16:3 अदिक अदुर से अन, हे यरूशलेम, प्रभु यहोवा नीन से ईद अनतान: नींद जनम अदिक नींद पैदाईस कनानीगोळ द्याश देल आग्याद; नीन आप्प रा एमोरी नीन मोय हित्तीन ईरोर.
EZE 16:4 नीन जनम हिंग आग्याद कि याता दिशी नी पैदा आद, अदा दिशी नीन नाल कळकु आत, न नी शुद्ध आगोर साटी तोळकु आद, न नीन येनारा ऊप्प मलुसकु आत अदिक न नी येनारा कपळागोळ दा गुंळ्सकु आद.”
EZE 16:5 यार्दु दया दृष्टी नीन मा आगीदील कि ई क्याल्सागोळ दा टु नीन साटी ऊंद भी क्याल्सा माळकु आगाईत; बल्की तान जनम इन दिशी नी बेकार आगा कारण खुला मैदान दा भीळसुसकु आगीद.
EZE 16:6 “याग ना नीन हाती टु आगकु होट्टीन, अदिक नीनी रक्ता दा लोट्सतेला नोळदीन, आग ना नीन से अंदीन, हे रक्ता दा लोट्सतेला जीत्ता ईर; हव, नीन से अच ना अंदीन, हे रक्ता दा लोट्सतेला, जीत्ता ईर.”
EZE 16:7 बाक ना नीनी केई इन पौधा घाई वाळुसदीन, अदिक नी वाळुस्त वाळुस्त धोड्डेर आगेद अदिक हापाळ सुंदर आगेद; नीन याद्दागोळ सुडौल आदव, अदिक नीनव चुट्टी वाळुसदव, तरी भी नी ऊगळा ईर्या.
EZE 16:8 “ना मात्त नीन हाती टु आगकु होगतेला नीनी नोळदीन, अदिक ईग नी पुरा आर्त आगेगीद; ईदुरसाटी ना नीनी तान कपळा होचकु नीन शरीर होच कोंडीन; अदिक किर्या तीनकु नीन से वादा माळदीन, अदिक नी नानोर आगेद, प्रभु यहोवा अन ईदा वाणी आद.
EZE 16:9 आग ना नीनी नीर देल तोळ्सकु नीन मा टु रक्ता तोळ्द बुट्टीन, अदिक नीन शरीर मा याण्णा हचदीन.
EZE 16:10 बाक ना नीनी बूटेदार कपळा अदिक सूइस इन तोगुल इन जुतागोळ हाकसुसदीन; अदिक नीन नेळु दा सूक्ष्म सन कटदीन, अदिक रेशमी कपळा होचदीन.
EZE 16:11 आग ना नींद श्रृंगार माळदीन, अदिक कय दा बांगळागोळ अदिक कुतक्या दा गरसोली हाकसुसदीन.
EZE 16:12 बाक ना नीन मुग्‍ग दा नत्थ अदिक नीन कीवगोळ दा डोरला हाकसुसदीन, अदिक नीन ताल्ला मा शोभायमान मुकुट ईटदीन.
EZE 16:13 नीन आभूषण व्हान्ना बेळ्ली नव अदिक नीनव कपळा सूक्ष्म सन, रेशम अदिक बूटेदार कपळा अन बन्सदव; बाक नीन भोजन मैदा, शयद अदिक याण्णा आत; अदिक नी हापाळ सुंदर, बल्की रानी आगा लायक आगेद.”
EZE 16:14 नीन सुंदरता अन किर्ती अन्यजातीगोळ दा फैलुसेत, यतिकी आ प्रताप इन कारण, जो ना तान दी टु नीनी कोटीदीन, नी हापाळ सुन्दर ईर्‍या, प्रभु यहोवा अन ईदा वाणी आद.
EZE 16:15 “लेकीन नी तान सुंदरता मा भरोसा माळकु तान किर्ती इन कारण व्यभिचार माळली कुर्त, अदिक सप्पा यात्रीगोळ सांगुळ हापाळ कुकर्म माळ्द, अदिक जो यावारा नीनी चाहासोन नी आऊन से अच सिकतोग्या.
EZE 16:16 नी तान कपळा हुडुकु रंग बिरंग धोळ जागा माळ कोंड. अदिक आंदुर मा व्यभिचार माळ्द, हींग कुकर्म माळ्द जो न कभी आग्याव न अदिक आदव.
EZE 16:17 नी तान सुशोभित गहना हुडुकु जो नान कोळ्द व्हान्ना बेळ्ली इनव ईरव, अऊर से मंळसागोळव मूर्ती माळ कोंड, अदिक अऊर से व्यभिचार माळली कुर्त;
EZE 16:18 अदिक तान बूटेदार कपळा हुडुकु आंदरी हाकसुस्द, अदिक नान याण्णा अदिक नान धूप आंदुर मुंद येर्स्द.
EZE 16:19 जो भोजन ना नीनी कोटीदीन, मतलब जो मैदा, याण्णा अदिक शयद ना नीनी तिनसीन, अद सप्पा नी आंदुर मुंद सुखदायक सुगन्ध माळकु ईट्द; प्रभु यहोवा अन ईदा वाणी हुन कि हिंग अच आत.
EZE 16:20 बाक नी तान पोर पारगोळी हुडुकु यारी नी नान साटी जनम कोट्ट, आ मुर्तीगोळी बली माळकु येर्स्द. येन नीन व्यभिचार हिंग श्याण मात ईरोद;
EZE 16:21 कि नी नान चिग्द चिंळ्गेर आ मुर्तीगोळ मुंद बेक्की दा येर्सकु घात माळ्या?
EZE 16:22 नी तान सप्पा बेकार क्याल्सा दा अदिक व्यभिचार माळतेला, तान बचपन इन दीनगोळ्द यागलु सुधी ताकोंडीदील, याग कि नी ऊगळा तान रक्ता दा लथपथ बिदकु ईर्‍या.
EZE 16:23 “नीन आ सप्पा बुराई इन हींद येन आत? प्रभु यहोवा अन ईद वाणी आद, हाय, नीन मा हाय!
EZE 16:24 नी ऊंद गुम्मट माळसुस कोंड, अदिक हर ऊंद चौक दा ऊंद ऊँचा जागा माळसुस कोंड;
EZE 16:25 अदिक ऊंद ऊंद सळक इन सिरे मा भी नी तान ऊंचा जागा माळसुसकु तान सुंदरता बेकार माळ कोंड, अदिक हर ऊंद यात्री इक कुकर्म इन साटी कारकु महाव्यभिचारिणी आगेद.
EZE 16:26 नी तान बाजुवाळेर मिस्त्री लॉकुर से भी, जो मोदा ताजा आर, व्यभिचार माळ्द अदिक नानी सिट्ट कोळोर साटी तान व्यभिचार वाळुसतोद.
EZE 16:27 ई कारण ना तान कय नीन विरूद्ध वाळुस्कु, नींद हर रिज इन भोजन कम माळदीन, अदिक नीन दुश्मन पलिश्ती आर्तेर जो नीन महापाप इन चाल देल शरमुसतार, आंदुर इच्छा मा ना नीनी बिट्ट बुट्टीन.
EZE 16:28 तरी भी नीन तृष्णा बुझुसीदील, ईदुरसाटी नी अश्शूरी लॉकुर से भी व्यभिचार माळ्द; अदिक आंदुर से व्यभिचार माळदुर मा भी नीन तृष्णा बुझुसीदील.
EZE 16:29 बाक नी लेन देन इन द्याश दा व्यभिचार माळ्त माळ्त कसदीगोळ द्याश ताका पोहचुस्द, अदिक अल भी नींद तृष्णा बुझुसीदील.
EZE 16:30 “प्रभु यहोवा अन ईद वाणी आद, कि नीन दिल ह्यांग चंचल आद कि नी ईव सप्पा क्याल्सा माळत्या, जो बेसरम वेश्या नव अच क्याल्सा हुव!
EZE 16:31 नी हर ऊंद सळक इन सीरा मा जो तान गुम्मट, अदिक हर चौक दा तान जागा माळसुस्या, येन नी ईदुर दा अच रांड्या घाई ठहरूसीदील? यतिकी नी ईत्ता कमाई मा नेगत्या.
EZE 16:32 नी व्यभिचारिणी हिंग्स आय. नी पराया मंळसागोळी तान गांड उन बदला दा ग्रहण माळत्या.
EZE 16:33 सप्पा रांड्यागोळी रा पैस्या सिकताव, लेकीन नी तान सप्पा संगीगोळी खुद पैस्या कोटकु, अदिक आंदरी लालच तोर्सकु कारस्या कि आंदुर नाकु दी टु बंदकु नीन से व्यभिचार माळुल.
EZE 16:34 ई प्रकार इन व्यभिचार अन्य व्यभिचारीगोळ से उलटा आद. नीन हींद याऊ व्यभिचारी नळालुन, अदिक नी यारदु से दाम ताकोमाल, बल्की नीना कोळत्या; ईदा कारण नी उलटा ठहरूस्द.
EZE 16:35 “ई कारण, हे रांड्या, यहोवा अन वचन केळ,
EZE 16:36 प्रभु यहोवा हींग अनतान: नी व्यभिचार दा अति बेशरम आगकु, तान शरीर तान संगीगोळी तोर्स्द, अदिक तान मुर्तीगोळ से बेकार क्याल्सा माळ्द, अदिक तान चिकोर्द रक्ता वाहुसकु आंदरी बली येर्सद,
EZE 16:37 ई कारण नोळ, ना नीन सप्पा संगीगोळी जो नीन प्रेमी आर अदिक यास से नी प्‍यार हच्या, अदिक यास मुंदुर नीन से दुश्मनी ईट्यार, आ सप्पा अक नाकु दी टु नीन विरूद्ध जमा माळकु आंदरी नीन शरीर ऊगळा माळकु तोर्साईन, अदिक आंदुर नीन तन नोळ्यार.
EZE 16:38 आग ना नीनी हींग दण्ड कोळाईन, ह्यांग व्यभिचारिणीगोळी अदिक रक्ता वाहुसाळेर आर्तेरी कोटकु आगतद; अदिक सिट्ट अदिक जलन इन सांगुळ नींद रक्ता वाहुसाईन.
EZE 16:39 ई रिती देल ना नीनी आंदुर वश दा माळ कोमाईन; अदिक आंदुर नीनव गुम्मटगोळी ढाऊस कोंडार, अदिक नीन ऊँचा जागागोळी मुरू बुट्टार, आंदुर नीनव कपळा जबरदस्ती ईळस्यार, अदिक नीनव सुन्दर इसरा कसु कोंडार, अदिक नीनी ऊगळा माळकु बीट्ट बुट्टार.
EZE 16:40 आग नीन विरूद्ध ऊंद सभा जमा माळकु आंदुर नीन मा पथराव माळ्यार, अदिक तान तलवागोळ देल आरपार छेद माळ्यार.
EZE 16:41 आग आंदुर बेक्की हचकु नीन घेरागोळी होताक बुट्टार, अदिक नीनी हापाळ सा आर्तेर नोळतेला दण्ड कोट्टार; अदिक ना नीन व्यभिचार बन्द माळाईन, अदिक नी बाक रांड्यापण इन साटी दाम कोळतीदील.
EZE 16:42 याग ना नीन मा पुरा जलजलाहट प्रगट माळ कोमाईन, नीन मा अदिक होततीदील बल्की शांत आगेगाईन, अदिक बाक न सीट्टी बरतीदील.
EZE 16:43 नी जो तान बचपन इन दीनगोळ इक याद ईटीदील, बल्की ई सप्पा मातगोळ द्वारा नानी चिळुस्द, ई कारण ना नीन चाल चलन नीन ताल्ला मा हाकाईन अदिक नी तान सप्पा पयला अन बेकार क्याल्सागोळ से अदिक येक्कुल महापाप माळतीदील, प्रभु यहोवा अन ईदा वाणी हुन.
EZE 16:44 “नोळ, सप्पा कहावत अनावाळेर नीन बारा दा ईद कहावत अंदार, ‘ह्यांग मोय हांग पोर.’
EZE 16:45 नीन मोय जो तान गांड अदिक चिकोर से नफरत माळ तोगोर, नी ठीक आकिन पोर ठहरूस्द; अदिक नीन आकतींगेर जो तान तान गांड अदिक चिकोर से नफरत माळतोगोर, नी भी ठीक आंदुर आकतींग होट्ट. नीन मोय हित्तीन अदिक आप्प एमोरी ईरोन.
EZE 16:46 नीनोर धोड्डेर आकतींग शोमरोन हुळ, जो तान पोरगोळ सांगुळ नीन ऊजवा दी ईरतार, अदिक नीन श्याण आकतींग, जो नीन डाक्या दी ईरतार आक पोरगोळ सांगुळ सदोम दा आर.
EZE 16:47 नी आंदुर घाई चाल नळदीदील, अदिक न आंदुर घाई बेकार क्याल्सा देल संतुष्ट आद; ईद रा हापाळ श्याण मात ठहरूसेत, लेकीन सप्पा चाल चलन आंदुर से भी येक्कुल बीगळुसेत.
EZE 16:48 प्रभु यहोवा अन ईद वाणी आद, नान जीवन इन किर्या, नीन आकतींग सदोम तान पोरगोळ सांगुळ नीन अदिक नीनोर पोरगोळ घाई क्याल्सा माळीदील.
EZE 16:49 नोळ, नीन आकतींग सदोम इन अधर्म ईद ईरोद, कि आक तान पोरगोळ सांगुळ घमण्ड माळोर, व्हाट्टा तुम तुमकु तीनोर अदिक सुख चैन देल ईरतोगोर; अदिक कठिन समय इक ईल अंजोर.
EZE 16:50 अत: आक गर्व माळकु नान मुंद बेकार क्याल्सा माळ कुरतुर, अदिक ईद नोळकु ना आंदुर दुर माळ कोंडीन.
EZE 16:51 बाक शोमरोन नीन पापगोळ मुंद आरधा पाप भी माळीदील, नी आकिन से येक्कुल वाळुस्कु बेकार क्याल्सा माळ्द, अदिक तान घोर बेकार क्याल्सागोळ द्वारा तान आकतींगेर से जीकसेद.
EZE 16:52 ईदुरसाटी नी जो तान आकतिंगेर्द न्याय माळ्द, ई कारण शरम माळ, यतिकी नी आंदुर से वाळुस्कु बेकार पाप माळ्या; ई कारण आंदुर नीन से कम दोषी ठहरूस्यार. ईदुरसाटी नी ई मात देल शरम माळ अदिक शरम माळतेला ईर, यतिकी नी तान आकतींगेरी कम दोषी ठहरूस्या.
EZE 16:53 “याग ना आंदुर मतलब पोरगोळ सांगुळ सदोम अदिक शोमरोन इक बंधुआई टु वापस तराईन, आग आंदुर बीच दा अच नीन बंन्दीगोळ इक भी वापस तराईन,
EZE 16:54 यदुर देल नी शरम माळतेला ईर, अदिक तान सप्पा क्याल्सागोळी नोळकु शरम माळ, यतिकी नी आंदुर शांती इन कारण आग्या.
EZE 16:55 नीनोर आकतींगेर सदोम अदिक शोमरोन तान तान पोरगोळ सांगुळ तान पयला दशा दा मात्त होदार, अदिक नी भी तान पोरगोळ सांगुळ तान पयला अन दशा दा मात्त होद्या.
EZE 16:56 यागासताका नीन बुराई प्रगट ईला आगीत, मतलब याता समय ताका नी आसपास इन लॉकुर सांगुळ अरामी अदिक पलिश्ती आर्तेर इन जो ईग नाकु दी टु नीनी बेकार जान्सतार, हेसुर हुड्या,
EZE 16:57 आ तान घमण्ड इन दीनगोळ दा रा नी तान आकतींग सदोम इन हेसुर भी ईला ताकोम्या.
EZE 16:58 लेकीन ईग नीन इक तान महापाप अदिक बेकार क्याल्सागोळ्द भार खुद अच नेगोद बीदाद, यहोवा अन ईदा वाणी आद.
EZE 16:59 “प्रभु यहोवा ईद अनतान: ना नीन सांगुळ हींग अच बरताव माळाईन, ह्यांग नी माळ्या, यतिकी नी रा वादा मुरूकु किर्‍या अक तुच्छ जानस्या,
EZE 16:60 तरी भी ना नीन बचपन इन दिनगोळ्द वादा याद ईटाईन, अदिक नीन सांगुळ हमेशा अन वादा कटाईन.
EZE 16:61 याग नी तान आकतींगेरी मतलब तान धोळ अदिक श्याण आकतींगेरी ग्रहण माळ्या, आग नी तान चाल चलन याद माळकु लज्जित आद्या; अदिक ना आंदरी नीन पोरगोळ ठहरूस बुळाईन; लेकीन ईद नीन वादा अन अनुसार माळतीदील.
EZE 16:62 ना नीन सांगुळ तान वाचा स्थिर माळाईन, अदिक आग नी जान्स कोंड्या कि ना यहोवा हुईन,
EZE 16:63 यदुर देल नी याद माळकु लज्जित आद्या, अदिक शरम इन मारा बाक यागलु बाय खोल्सतीदील, ईद आ समय आदीत, याग ना नीन सप्पा क्याल्सागोळी होचाईन, प्रभु यहोवा अन ईद वाणी हुन.”
EZE 17:1 यहोवा अन ईद वचन नान हाती पोहचुस्त:
EZE 17:2 “हे मंळसा अन सन्तान, इस्त्राएल इन घराना से ईद पहली अदिक दृष्टान्त अन; प्रभु यहोवा ईद अनतान,
EZE 17:3 ऊंद लंबा पंखवाळा, अदिक रंग बिरंगा धोड्डेव गिधाळ पक्षी लबानोन होगकु ऊंद देवदार इन फुगनी तिंद कोंड्डव.
EZE 17:4 आग अद आ फुगनी इन सबसे म्याकुच इन पतला डगाल मुरू कोम्त, अदिक अदरी लेन देन माळावाळा द्याश दा वोतकु व्यापारीगोळ ऊंद नगर दा हचबुळ्त.
EZE 17:5 आग आव द्याश इन येनारा बिंजा हुडुकु ऊंद उपजाऊ केई दा हचदुन, अदिक अदरी हापाळ नीर इन जागा दा मजनू हेसुर इन मार्र इन घाई हचदुन.
EZE 17:6 अद बेळ्दकु श्यांण्द बगरूसोदवाला अंगुर इन बेली आगेत यदुर डगालगोळ आऊन दी बांगदव, अदिक अदुर जळी आऊन ल्यालमा फैलुस्त, ई प्रकार अद अंगुर इन बेली आगकु कनखा वडा अदिक पत्तागोळ से तुमली कुर्त.
EZE 17:7 “बाक अदिक ऊंद लम्बा पंखवाळा अदिक परगोळ से तुमकु धोळ्द गिधाळ पक्षी ईरोद; अदिक अद अंगुर इन बेली आ जागा टु येल अद हचकु आगीत, आ दुसरा गिधाळ इन दी तान जळी फैलुसली अदिक तान डगालगोळ बांग्सली कुर्त कि अद अदरी वाळुसुल.
EZE 17:8 लेकीन अद रा ईदुरसाटी वळ्लीद जागा मा हापाळ नीर इन हाती हचकु आगीत, कि कनखागोळ वडुल, अदिक फलसुल, अदिक वळ्लीद अंगुर इन बेली बनसुल.
EZE 17:9 ईदुरसाटी नी ईद अन, प्रभु यहोवा ईद केळतान: येन अद फुलसीत? येन आव अदरी जळ देल कितदीदील, अदिक अदुर कायगोळी झाळ्सतीदील कि अद तान सप्पा हिवरा व्हासा पत्तागोळ सांगुळ वंळ्गेगुल? अदरी जळ देल कितली येक्कुल ताकत अदिक हापाळ सा मंळसागोळ्द जरवत ईरतीदील.
EZE 17:10 बाक अद हतकु भी ईरूल, तरी भी अद फलसीत? याग पुरवाई अदरी हत्तीत, आग येन बिलकुल वंळ्गतीदील? अद येन हतकु आद अदा जागा मा वंळ्गेदीत.”
EZE 17:11 बाक यहोवा अन ईद वचन नान हाती पोहचुस्त: “आ विद्रोह माळावाळा घराना से अन,
EZE 17:12 येन नीव ई मातगोळ्द मतलब जान्सालीर? बाक आव अंदुन, बेबीलोन उन राजा यरूशलेम इक होगकु आऊन राजा अदिक अन्य प्रधानगोळ इक हुडुकु तान मान्या बेबीलोन दा पोहचुसदुन.
EZE 17:13 आग राजवंश दा टु ऊंद मंळसा अक हुडुकु आऊन से वादा कटदुन, अदिक आऊक वश दा ईरोद किर्‍या तीन्सदुन, अदिक द्याश इन सामर्थी मंळसागोळी वोतुन.
EZE 17:14 कि आ राज्य निर्बल ईरूल अदिक ताल्ला नेगु सकबाळुल, बल्की वादा अन पालन माळदुर दा स्थिर ईरूल.
EZE 17:15 तरी भी ईव घ्वाळा अदिक धोळ सेना बेळोर साटी तान दूत मिस्त्र दा कळुकु आऊन से विद्रोह माळदुन. ये आव फलस्यान? येन ईत्ता क्याल्सागोळ माळावाळा ऊळदान? येन आव तान वादा मुरदुर मा भी ऊळदोदान?
EZE 17:16 प्रभु यहोवा ईद अनतान, नान जीवन इन किर्या, या राजा अन तिन्सद किर्‍या आव बेकार सम्सदुन, अदिक यार्द वादा आव मुरदुन, आऊन मान्या याव आऊक राजा माळीदुन, मतलब बेबीलोन दा अच आऊन हाती अच सोत्तान.
EZE 17:17 याग आंदुर हापाळ सा प्राणीगोळी नाश माळोर साटी दमदमा कटदुर, अदिक गढ़ माळदुर, आग फिरौन तान धोळ सेना अदिक हापाळ मंडली ईरतेला भी युध्द दा आऊन मदत माळतीदील.
EZE 17:18 यतिकी आव किर्‍या अक बेकार जान्सदुन, अदिक वादा अक मुरदुन; नोळी, आव वचन कोळदुर मा भी ईत्ता ईत्ता क्याल्सा माळ्यान, ईदुरसाटी आव ऊळु सकतीदील.
EZE 17:19 प्रभु यहोवा ईद अनतान: नान जीवन इन किर्‍या, आव नान किर्या बेकार जान्सदुन, अदिक नांद वादा मुरदान; ईद पाप ना आऊन दा ताल्ला मा हाकाईन.
EZE 17:20 ना तान जाल आऊन मा फैलुसाईन अदिक आव नान फंदा दा फसुस्यान; अदिक आऊक बेबीलोन दा पोहचुस्कु आ विश्वासघात इन मुकदमा आऊन से आळाईन, जो आव नान से माळ्यान.
EZE 17:21 आऊन दलगोळ दा टु यास वोळ्यार आंदुर सप्पा तलवार देल कोंदकु आदार, अदिक जो ईतोदार आंदुर नाकु दिशागोळ दा तितर बितर आगेदार, आग नीव लॉकुर जान्स कोंडीर कि ना यहोवा अच हींग अंदीन.”
EZE 17:22 बाक प्रभु यहोवा ईद अनतान: “ना भी देवदार इन ऊचा फुगनी दा टु हुडुकु येनारा हचाईन, अदिक अदुर सबसे म्याकोळोद कनखागोळ दा टु ऊंद कोमल कनखा मुरकु ऊंद हापाळ ऊचा पहाळी मा हचाईन,
EZE 17:23 मतलब इस्त्राएल इन ऊचा पहाळी मा हचाईन; आग अव डगालगोळ वोडुकु ताकतवर अदिक वळ्लीद देवदार बन्सेदव, अदिक अदुर ल्यालमा मतलब अदुर डगालगोळ्द सावली दा अलग अलग इन पक्षीगोळ बसेरा माळेव.
EZE 17:24 आग मैदान इन सप्पा मार्र जान्स कोंडोव कि ना यहोवा अच ऊचा मार्र इक नीचा अदिक नीचा मर्र इक ऊचा माळीन, हिवरा मार्र इक वंळगास बु़ट्टीन, अदिक वंळगींद मार्र इक फलुसदीन. ना यहोवा अच ईद अंदीन अदिक हांग अच माळ भी कोडींन.”
EZE 18:1 बक यहोवा अन ईद वचन नान हाती पोहचुस्त:
EZE 18:2 नीव लॉकुर जो इस्त्राएल द्याश इन बारा दा ईद कहावत अनतीर, हुळ्लग अंगुर रा तिंदुर पुराना हाळाबाट्टुर, लेकीन हल्ल हुळ्लग आदव चिकोरव. ईदुर येन मतलब आद?
EZE 18:3 प्रभु यहोवा ईद अनतान कि नान जीवन इन किर्या, नीम इक इस्त्राएल दा ईद कहावत अनोद मात्त मौका सिकतीदील.
EZE 18:4 नोळी, सप्पा मुंदुरव प्राण रा नानव हुव, ह्यांग आप्प उन प्राण, हांग अच पार उन भी प्राण आद; येढ्ढु नानव अच हुव. ईदुरसाटी जो प्राणी पाप माळ्यान आव सोत्तान.
EZE 18:5 “जो यावारा धर्मी आन, अदिक न्याय अदिक धर्म इन क्याल्सा माळ्यान,
EZE 18:6 अदिक ना रा पहाळीगोळ पुजा अन जागा मा भोजन माळीदान, ना इस्त्राएल इन घराना अन मुर्तीगोळ दी कण्ण नेगुकु नोळीदान; ना पराया आर्त इक बीगळुसीदान, अदिक ऋतुमती इन हाती होग्यान,
EZE 18:7 अदिक ना यारदु मा अंधार माळ्यान बल्की ऋणी इक आऊन बन्धक वापस माळीदान, ना यारीकु लुटसीदान, बल्की हस्तकु उन तान रोट्टी कोटीदान अदिक ऊगळा अक कपळा होचीदान,
EZE 18:8 ना ब्याम मा पैस्या कोटीदान, ना पैस्या अन ब्याज ताकोंडीदान, अदिक ना तान कय कुटिल क्याल्सा देल रोकसीदान, मंळसागोळ बीच दा सच्चाई देल न्याय माळीदान,
EZE 18:9 अदिक नान विधीगोळ मा नळुतीदान अदिक नान नियमगोळी मान्सतेला सच्चाई देल क्याल्सा माळीदान, हींग मंळसा धर्मी आन, आव निश्चय जीत्ता ईत्तान, प्रभु यहोवा अन ईदा वाणी हुन.”
EZE 18:10 “लेकीन आऊन पार डाकु, हत्यारा, या म्याकुच कोटकु आग्याव आ पापगोळ दा टु यातोदु माळावाळा ईतीदान,
EZE 18:11 अदिक म्याकुच कोटकु आग्याव आ उचित क्याल्सा माळावाळा ईला ईतीदान, अदिक पहाळी इन पुजा अन जागा मा भोजन माळीदान, पराई आर्त इक बीगळुसीदान,
EZE 18:12 दीन दरिद्र मा अंधेर माळीदान, दुसरा अक लुटसीदान, बन्धक ईला वापस माळीदान, मुर्तीगोळ दी कण्ण नेगदीदान, बेकार क्याल्सा माळीदान,
EZE 18:13 ब्याज मा पैस्या कोटीदान, अदिक वाळुसकु ताकोंडीदान, रा येन आव जीत्ता ईत्तान? आव जीत्ता ईरतीदील; ईदुरसाटी कि आव ईव सप्पा बेकार क्याल्सागोळ माळ्यान आव सहीदा सोत्तान अदिक आऊन रक्ता आऊंद अच ताल्ला मा बीद्दीत.”
EZE 18:14 “बाक अगर ईत्ता मंळसा अन पार आगुल अदिक आव तान आप्प उन ईव सप्पा पाप नोळकु अंज्क इन मारा आंदुर घाई ईला माळतीदान.
EZE 18:15 मतलब ना रा पहाळी इन पुजा अन जागा मा भोजन माळ्यान, ना रा इस्त्राएल इन घराना अन मुरतीगोळ दी कण्ण नेगदीदान, ना पराया आर्त इक बीगळुस्यान,
EZE 18:16 ना यारदु मा अंधेर माळ्यान, न येनारा बन्धक ताकोंडान, ना यारीकु लुटस्यान, बल्की तान रोट्टी हस्तकु उक कोटान, ऊगळा अक कपळा होच्यान,
EZE 18:17 दीन जन इन हानि माळोर से रोकस्यान, ब्याज अदिक वाळुस्कु ईला तांकोडीदान, नान नियमगोळी मानसीदान, अदिक नान विधीगोळ मा नळदीदान, रा तान आप्प उन अधर्म इन कारण सायतीदील, बल्की जीत्ता अच ईत्तान.
EZE 18:18 आऊन आप्प, याव अंधेर माळ्यान अदिक लुटस्यान, अदिक तान वार्टुर बीच अनुचित क्याल्सा माळ्यान, आवा तान अधर्म इन कारण सोतोदान.
EZE 18:19 तरी भी नीव लॉकुर अनतीर, यती? येन पार आप्प अन अधर्म इन भार नेगालुन? याग पार उन न्याय अदिक धर्म इन क्याल्सा माळीदान, अदिक नान विधीगोळ पालन माळकु अऊर मा नळदीदान, रा आव जीत्ता अच ईत्तान.
EZE 18:20 जो प्राणी पाप माळ्यान आवा सोत्तान, न रा पार आप्प उन भार नेगदान अदिक ना आप्पा पार उन; धर्मी इक तांद अच धर्म इन काय सीक्कीत, अदिक दुष्ट उक तांद अच दुष्टता अन काय सीक्कीत.
EZE 18:21 लेकीन अगर दुष्ट मंळसा तान सप्पा पापगोळ से तिर्गकु, नान सप्पा विधीगोळ पालन माळुल अदिक न्याय अदिक धर्म इन क्याल्सा माळुल, रा आव सायतीदील; ब्लकी जीत्ता अच ईत्तान.
EZE 18:22 आव यास अपराध माळ्यान, अऊर दा टु यारदु याद आऊन विरूद्ध माळकु आगतीदील; जो धर्म इन क्याल्सा आव माळीदान, आऊन कारण आव जीत्ता ईत्तान.”
EZE 18:23 प्रभु यहोवा अन ईद वाणी आद, येन ना दुष्ट उन सोत्तुर देल येनारा खुश आगतीन? येन ना ईदुर देल खुश आगालीन कि आव तान हादी टु तिर्गकु जीत्ता ईरूल?
EZE 18:24 लेकीन याग धर्मी तान धर्म देल तिर्गकु तेळा क्याल्सा, बल्की दुष्ट इन सप्पा बेकार क्याल्सागोळ अनुसार माळली कुरतुर, रा येन आव जीत्ता ईत्तान? यास धर्म इन क्याल्सा आव माळ्यान, अदुर दा टु यातोदु याद माळकु आगतीदील. जो विश्वासघात अदिक पाप आव माळ्यान, अदुर कारण आव सोतोदान.
EZE 18:25 “तरी भी नीव लॉकुर अनतीर, ‘प्रभु उन गती ऊंद घाई हैलेच.’ हे इस्त्राएल उन घराना, नोळ, येन नान गती ऊंद घाई हैलेच? येन नीम्द अच गती अनुचित हैलेच?
EZE 18:26 याग धर्मी तान धर्म देल तिर्गकु, तेळा क्याल्सा माळली कुरूल, रा आव आंदुर कारण सोत्तान, मतलब आव तान तेळा क्याल्सा अन कारण अच सोतोदान.
EZE 18:27 बाक याग दुष्ट तान दुष्ट क्याल्सागोळ देल तिर्गकु, न्याय अदिक धर्म इन क्याल्सा माळली कुरतान, रा आव तान जीव ऊळस्यान.
EZE 18:28 आव जो सोच विचार माळकु तान सप्पा अपराधगोळ से तिर्गदुन, ई कारण आव सायतीदील, जीत्ता अच ईत्तान.
EZE 18:29 तरी भी इस्राएल उन घराना अनतद कि प्रभु उन गति ऊंद घाई हैलेच. हे इस्त्राएल इन घराना, येन नान गती ऊंद घाई हैलेच? येन नीम्द अच गति अनुचित हैलेच?”
EZE 18:30 “प्रभु यहोवा अन ईद वाणी आद, हे इस्त्राएल इन घराना, ना नीम दा हर ऊंद मंळसा अन न्याय आऊन चाल चलन इन अनुसार अच माळाईन. पश्चाताप माळी अदिक तान सप्पा अपराधगोळी बिळी, आग अच नीम्द अधर्म नीम्द ठोकर तीना कारण ईरतीदील.
EZE 18:31 तान सप्पा अपराधगोळी जो नीव माळीर, दुर माळी; तान मन अदिक तान आत्मा बदलुसकोमी! हे इस्त्राएल इन घराना, नीव यती सोत्तीर?”
EZE 18:32 यतिकी प्रभु यहोवा अन ईद वाणी आद, जो सोत्तुर, आऊन सोत्तुर देल ना खुश आगालीन, ईदुरसाटी पश्चाताप माळी, आग अच नीव जीत्ता ईत्तीर.
EZE 19:1 इस्त्राएल इन प्रधानगोळ बारा दा नी ईद दुख इन गाना केळ्स;
EZE 19:2 नीन मोय ऊंद ह्यांग हुल्लगीत ईरोर! आक हुलगोळ बीच दा कुरतोगोर अदिक तान चिकोर इक हारोद हुल्लगोळ बीच पाल्सतोगोर.
EZE 19:3 तान चिकोर दा टु आक ऊंद उक पाल्सदुर अदिक आव हारोद हुल्ल आगेदुन, अदिक अहेर हुडोद कलतोदुन; आव मंळसागोळी भी हरूकु तिंदुन.
EZE 19:4 राज्य राज्य अन लॉकुर आऊन चर्चा केळदुर, अदिक आऊक तान अगुळ्द गड्डा दा फसुसदुर, अदिक आऊन नकेल हाक्कु आऊक मिस्त्र द्याश दा ओतुर.
EZE 19:5 याग आऊन मोय नोळदुर अदिक आक धीरज ताकोमकु ईत्तुर तरी भी आकिन आशा मुरदोत, आग आक तान ऊंद चिग्द उक हुडुकु आऊक हारोद हुल्ल माळ बुट्टुर.
EZE 19:6 आग आव हारोद हुल्ल आगकु हुल्लगोळ बीच नळुली वयाळली कुरतुन, अदिक आव अहेर हुडोद कलतोदुन; अदिक मंळसागोळी भी हरूकु तिंदुन.
EZE 19:7 आव आंदुरव भवनगोळी बिगळुसदुन, अदिक आंदुर नगरगोळी ऊजाळ्सदुन बल्की आऊन गरजुसोद अंज्क इन कारण द्याश अदिक अल जो येनारा भी ईरोद सप्पा ऊजुळुसेत.
EZE 19:8 आग नाकु दीकळव राज्य राज्य अन लॉकुर तान तान प्रान्त टु आऊन विरूद्ध होटकु बंदुर, अदिक आऊन साटी जाल हचदुर; अदिक आव आंदुर अगुळकु गड्डागोळ दा फसुसेदुन.
EZE 19:9 आग आंदुर आऊन नकेल हाक्कु अदिक कठघरा दा बन्द माळकु बेबीलोन इन राजा अन हाती ओतुर, अदिक गढ़ दा बन्द माळदुर, कि आऊन बोल इस्त्राएल इन पहाळी द्याश मा बाक केळ बर बाळुल.
EZE 19:10 नीन मोय यार से नी पैदा आद, आक किनारा मा हच्द अंगुर इन बेली घाई ईरोर, अदिक गहरा नीर इन कारण कायगोळ अदिक खांदागोळ से तुमकु ईरोर.
EZE 19:11 प्रभुता माळावाळा अन राजदण्डगोळ साटी अदुर दा मोटा मोटा डगालगोळ ईरव; अदिक अदुर ऊचाई ईट आत कि अद बादलगोळ बीच ताका पोहचुस्त; अदिक तान हापाळ सा डगालगोळ सांगुळ हापाळ अच लम्बा कांळ्सली कुर्त.
EZE 19:12 तरी जलजलाहट इन सांगुळ ऊखळुसकु जमीन मा भिटकु आत, अदिक अदुर फुल पुरवाई हवा अन हत्तुर देल वंळ्गेत; अदिक अदुर मोटा डगालगोळ वंळ्गेदव; अदिक अव बेक्की देल भस्म आगेदव.
EZE 19:13 ईग आव आळी दा, बल्की निर्जल द्याश दा हचकु आग्याद.
EZE 19:14 अदुर खांदागोळ्द डगालगोळ दा टु बेक्की होळ्त, यदुर अदुर काय भस्म आगेदव, अदिक प्रभुता माळा लायक राजदण्ड इन साटी अदुर दा ईग यातोदारा मोदा डगाल ईतीदील. ईदा दुख इन गाना हुन, अदिक दुख इन गाना बन्सकु ईत्तीत.
EZE 20:1 येळवा वर्ष इन पाचवा तींगुळ इन हतवा दिशी इक इस्त्राएल इन यास हाळाबाट्टुर यहोवा से प्रश्न माळोरसाटी बंदुर, अदिक नान मुंद कुरतोदुर.
EZE 20:2 आग यहोवा अन ईद वचन नान हाती पोहचुस्त :
EZE 20:3 “हे मंळसा अन सन्तान, इस्त्राएली हाळाबाट्टुर से ईद अन, प्रभु यहोवा ईद अनतान, येन नीव नान से प्रश्न माळोरसाटी बंदीर? प्रभु यहोवा अन ईदा वाणी आद कि नान जीवन इन किर्या, नीव नान से प्रश्न माळ सकतीदील.”
EZE 20:4 हे मंळसा अन सन्तान, येन आंदुर्द न्याय माळ्या? आंदुर पुराना लॉकुर्द घिनोना क्याल्सा आंदरी हेळ कोम,
EZE 20:5 अदिक आंदुर से अन, प्रभु यहोवा ईद अनतान: या दिशी ना इस्त्राएलगोळ इक नीवळुस कोंडीन, अदिक याकूब उन घराना अन वंश से किर्या तिंदीन, अदिक मिस्त्र द्याश दा तान इक आंदुर मा प्रगट माळदीन, अदिक आंदुर से किर्‍या तिनकु अंदीन, ना नीवम परमेश्वर यहोवा हुईन,
EZE 20:6 अदा दिशी ना आंदुर से ईद भी किर्‍या तिंदीन, कि ना नीमी इक मिस्त्र द्याश टु तेगुकु ऊंद द्याश दा पोहुचासाईन, यदरी ना नीम साटी निवळुसीन; अद सप्पा द्याश इन शिरोमणी आद, अदिक अदुर दा हाल अदिक शयद इन धारागोळ वाहुसताव.
EZE 20:7 बाक ना आंदुर से अंदीन, या घिनोना वस्तुगोळ मा नीम दा टु हर ऊंद मंळसा अन कण्णगोळ हतकु आव, अवरी भीटबुळी; अदिक मिस्त्र अन मुरतीगोळ से तान इक अशुध्द माळबाळी; ना अच नीमव परमेश्वर यहोवा हुईन.
EZE 20:8 लेकीन आंदुर नान से बीगळुसेदुर अदिक नांद केळोद चाहासीदील; या घिनोना क्याल्सागोळ मा आंदुरव कण्ण हतकु ईरव, अवरी यारू भीटीदील, अदिक मिस्त्र अन मुरतीगोळी बीट्टुर. “आग ना अंदीन, ना ईल्या, मिस्त्र द्याश इन न्याड्या नीम मा तान जलजलाहट भळकुसाईन अदिक पुरा कोप तोर्साईन.
EZE 20:9 तरी भी ना तान हेसुर इन निम्मित हींग माळदीन कि यार न्याड्या आंदुर ईरोर, अदिक यार्द नोळतेला अच ना आंदरी मिस्त्र द्याश टु तेगोर साटी तान इक आंदुर मा प्रगट माळीदीन आ राज्यगोळ मुंद आंदुर अपवित्र ठहरूस बाळुल.”
EZE 20:10 ना आंदरी मिस्त्र द्याश टु तेगुकु आळी दा तंदीन.
EZE 20:11 अल आंदरी ना तान विधिगोळ हेळदीन अदिक तान नियम भी हेळदीन कि जो भी मंळसा अवरी मानस्यान, आव अऊर कारण जीत्ता ईत्तान.
EZE 20:12 बाक ना आंदुर साटी तान आराम दीनगोळ ठहरूसीदीन जो नान अदिक आंदुर न्याड्या चिन्ह ठहरूसुल; कि आंदुर जान्सुल कि ना यहोवा आंदुरव पवित्र माळावाळा हुईन.
EZE 20:13 तरी भी इस्त्राएल उन घराना आळी दा नान से झगळा माळदुर; आंदुर नान विधीगोळ मा नळदीदील, अदिक नान नियमगोळी बेकार जान्सदुर, यवरी अगर मंळसा मान्सुल रा आव अऊर कारण जीत्ता ईत्तान; अदिक आंदुर नान आराम दीनगोळी हापाळ अपवित्र माळदुर “आग ना अंदीन, ना आळी दा ईंदुर मा तान जलजलाहट भळकुसकु ईंदुर्द अन्त माळ कोमाईन.
EZE 20:14 लेकीन ना तान हेसुर इन निम्मित हींग माळदीन कि आंदुर आ राज्यगोळ मुंद, यार्द नोळतेला ना आंदरी तेगुकु तंदीदीन, अपवित्र ठहरूस बाळुल.
EZE 20:15 बाक ना आळी दा आंदुर से किर्‍या तिंदीन कि जो द्याश ना आंदरी कोट्ट बुट्टीन, अदिक सप्पा द्याशगोळ्द शिरोमणी आद, यूर दा हाल अदिक शयद इन धारागोळ वाहुसताव, अल आंदरी पोहचुसतीदील,
EZE 20:16 यतिकी आंदुर नान नियम बेकार जान्सदुर अदिक नान विधिगोळ मा नळदीदील, अदिक नान आराम दीन इक अपवित्र माळीदुर; ईदुरसाटी कि आंदुर मन आंदुर मुर्तीगोळ दी हतकु ईरूल.”
EZE 20:17 तरी भी ना आंदुर मा कृपा दृष्टी माळदीन, अदिक आंदरी नष्ट माळीदील, अदिक न आळी दा पुरा रिती देल आंदुर्द अन्त माळ कोंडीन.
EZE 20:18 “बाक ना आळी दा आंदुर औलादगोळ से अंदीन, तान हाळाबाट्टुर्द विधीगोळ मा नळुबाळी, न आंदुर रितीगोळ मान्सी अदिक न आंदुर मुर्तीगोळ पुजा माळकु तान इक अशुध्द माळी.
EZE 20:19 ना नीमव परमेश्वर यहोवा हुईन, नान विधीगोळ मा नळी, अदिक नान नियमगोळी मान्सदुर दा चौकसी माळी,
EZE 20:20 अदिक नान आराम दीनगोळी पवित्र मान्सी कि आंदुर नान अदिक नीम न्याड्या चिन्ह ठहरूसुल, अदिक यदुर देल नीव जान्सी कि ना नीमव परमेश्वर यहोवा हुईन.”
EZE 20:21 लेकीन आंदुर सन्तान भी नान से झगळा माळदुर; आंदुर नान विधीगोळ मा नळदीदील, न नान नियमगोळी मान्सदुर दा चौकसी माळदुर; यवरी अगर मंळसा मानसुल रा आव अऊर कारण जीत्ता ईत्तान; नान आराम दीनगोळी आंदुर अपवित्र माळदुर. “आग ना अंदीन, ना आळी दा आंदुर मा तान जलजलाहट भळकुसकु तान कोप तोर्साईन.
EZE 20:22 तरी भी ना कय जेडु कोंडीन, अदिक तान हेसुर इन निम्मित हिंग माळदीन, कि आ राज्यगोळ मुंद, यार्द नोळतेला ना आंदरी तेगुकु तंदिदीन, आंदुर अपवित्र ठहरूसबाळुल.
EZE 20:23 बाक ना आळी दा आंदुर से किर्‍या तिंदीन, कि ना नीमी राज्य राज्य दा तितर-बितर माळाईन, अदिक द्याश द्याश दा छितुस बुळाईन,
EZE 20:24 यतिकी आंदुर नान नियम मान्सीदील, नान विधीगोळी बेकार जान्सदुर, नान आराम दीनगोळी अपवित्र माळदुर, अदिक तान हाळाबाट्टुरगोळ्द मुर्तीगोळ दी आंदुरव कण्ण हतकु ईत्तव.”
EZE 20:25 बाक ना आंदुर साटी ईत्ता ईत्ता विधीगोळ ठहरूसदीन जो वळ्लेव ईला ईरव अदिक ईत्ता ईत्ता रितीगोळ यूर कारण आंदुर जीत्ता ईर सकालुर;
EZE 20:26 मतलब आंदुर तान पयला पार उक बेक्की दा होम माळली कुरतुर; ई रिती ना आंदरी आंदुर्द अच भेंट इन द्वारा अशुध्द माळदीन यदुर देल आंदरी निर्वंश माळ कोमाईन; अदिक आग आंदुर जान्स कोंडार कि ना यहोवा हुईन.
EZE 20:27 “हे मंळसा अन सन्तान, नी इस्त्राएल उन घराना से अन, प्रभु यहोवा ईद अनतान: नीम हाळाबाट्टुर ईदुर देल भी नांद निन्दा माळदुर कि आंदुर नान से विश्वासघात माळदुर.
EZE 20:28 यतिकी याग ना आंदरी आ द्याश दा पहुचुसदीन, यदरी आंदरी कोळोद किर्‍या ना आंदुर से तिंदीदीन, आग आंदुर हर ऊंद टीला अदिक हर ऊंद डाट मार्र मा नजर माळकु अल्या तान मेलबली येर्सली कुरतुर; अदिक अल्या रिस कोळावाळा तान भेंट येर्सली कुरतुर अदिक अल्या तान सुखदायक सुगन्ध द्रव्य होताकली कुरतुर, अदिक अल्या तान पेयबली कोळली कुरतुर.
EZE 20:29 आग ना आंदुर से केळदीन, या ऊचा जागा अक नीव लॉकुर होगतीर, अदुर देल येन प्रयोजन आद? ईदुर देल अच अदुर हेसुर ईंद ताका बामा कहलुसकु आगतद.
EZE 20:30 ईदुरसाटी इस्त्राएल उन घराना से अन, प्रभु यहोवा नीम से ईद केळतान: येन नीव भी तान पुर्वजगोळ रिती मा नळुकु अशुध्द आगकु, अदिक आंदुर घिनोना क्याल्सागोळ अनुसार व्यभिचारिणी इन घाई क्याल्सा माळतीर?”
EZE 20:31 ईंद ताका याग याग नीव तान भेटगोळ येर्सतीर अदिक तान चिकोर चिण्गेर इक होम माळकु बेक्की दा येर्सतीर, आग आग नीव तान मुर्तीगोळ कारण अशुध्द ठहरूसतीर. हे इस्त्राएल उन घराना, येन नीव नान इच्छा जान्स सकतीदील? प्रभु यहोवा अन ईदा वाणी आद, नान जीवन इन किर्या नीव नान इच्छा जान्स सकतीदील.
EZE 20:32 जो मात नीम मन दा बरतद, नाव काठ अदिक कल्ल इन उपासक आगकु जाती जाती अदिक द्याश द्याश इन कुलगोळ घाई आगेदेव, अद यातोदु प्रकार देल पुरा आगतीदील.
EZE 20:33 “प्रभु यहोवा ईद अनतान, नान जीवन इन किर्या ना सही दा ताकतवर कय अदिक वाळुस्द कय देल, अदिक भळकुस्द जलजलाहट इन सांगुळ नीम म्याकुच राज्य माळाईन.
EZE 20:34 ना बली कय अदिक वाळुस्द भुजा देल अदिक भळकुस्द जलजलाहट इन सांगुळ नीमी द्याश द्याश इन लॉकुर दा टु अलग माळाईन, अदिक आ द्याशगोळ दा यदुर दा नीव तीतर-बितर आगेगीदीर, जमा माळाईन;
EZE 20:35 अदिक ना नीमी द्याश द्याश इन लॉकुर्द आळी दा वोतकु, अल आमने सामने नीम से मुकदमा आळाईन.”
EZE 20:36 या प्रकार ना नीम पूर्वजगोळ से मिस्त्र द्याशरूपी आळी दा मुकदमा आळ तोगीन, अदा प्रकार नीम से मुकदमा आळाईन, प्रभु यहोवा अन ईदा वाणी आद.
EZE 20:37 ना नीमी लाठी इन ल्यालमा नळसाईन, अदिक नीमी वादा अन बंधन दा हाकाईन;
EZE 20:38 ना नीम दा टु सप्पा झगळा माळावाळेर इक तेगुकु, जो नान अपराध माळतार, नीमी शुद्ध माळाईन, अदिक याता द्याश दा आंदुर टिक्सतार अदुर दा टु ना आंदरी तेगु कोमाईन; लेकीन इस्त्राएल इन द्याश दा होग गोळालीन; आग नीव जान्स कोंडीर कि ना यहोवा हुईन.
EZE 20:39 “हे इस्त्राएल उन घराना नीम से रा प्रभु यहोवा ईद अनतान: होगकु तान तान मुरतीगोळ्द उपासना माळी; अदिक अगर नीव नांद केळतीदील, रा मुंद भी ईदा माळतोगी; लेकीन नान पवित्र हेसुर इन तान भेटगोळ अदिक मुर्तीगोळ द्वारा बाक अपवित्र माळबाळेतीर.
EZE 20:40 “यतिकी प्रभु यहोवा अन ईदा वाणी आद कि इस्त्राएल उन सप्पा घराना तान द्याश दा नान पवित्र पहाळी मा, इस्त्राएल इन ऊँचा पहाळी मा, सप्पा च्या सप्पा नान उपासना माळीर; अल्या ना आंदुर से खुश आगाईन, अदिक अल्या ना नीम्द नेग्द भेंटगोळ अदिक येर्सदव वळ्लीद वळ्लीद वस्तुगोळ, अदिक नीम्द सप्पा पवित्र माळ्द वस्तुगोळ नीम से ताकोम तोगाईन.
EZE 20:41 याग ना नीमी द्याश द्याश इन लॉकुर से अलग माळाईन अदिक आ द्याशगोळ से यदुर दा नीव तीतर-बितर आगीर, जमा माळाईन, आग नीमी सुखदायक सुगन्ध जान्सकु ग्रहण माळाईन, अदिक अन्य राज्यगोळ मुंद नीम द्वारा पवित्र ठहरूसकु आगाईन.
EZE 20:42 याग ना नीमी इस्त्राएल इन द्याश दा पोहचुसाईन, यदुर कोळोद किर्‍या ना नीम पूर्वजगोळ से तिंदीदीन, आग नीव जान्स कोंडीर कि ना यहोवा हुईन.
EZE 20:43 अल नीव तान चाल चलन अदिक तान सप्पा क्याल्सागोळी यदुर माळदुर देल नीव अशुध्द आगीर याद माळीर, अदिक तान सप्पा बुरा क्याल्सागोळ कारण तान नजर दा घिनौना ठहरूसीर.
EZE 20:44 हे इस्त्राएल उन घराना, याग ना नीम सांगुळ बुरा चालचलन अदिक बिगळुसदव क्याल्सागोळ अनुसार ईला, लेकीन तान अच हेसुर निम्मित बर्ताव माळाईन, आग नीव जान्स कोंडीर कि ना यहोवा हुईन, प्रभु यहोवा अन ईदा वाणी आद.”
EZE 20:45 यहोवा अन ईद वचन नान हाती पोहचुस्त:
EZE 20:46 “हे मंळसा अन सन्तान, तान बाय दक्षिण इन दी माळ, दक्षिण इन दी वचन केळ्स, अदिक दक्षिण द्याश इन आळी इन बारा दा भविष्यवाणी माळ;
EZE 20:47 अदिक दक्षिण द्याश इन आळी से अन; यहोवा अन ईद वचन केळ: प्रभु यहोवा ईद अनतान, ना नीन दा बेक्की हचाईन, अदिक नीन दा येन हिवरा, येन वंळ्गेव, यास मार्रगोळ आव, सप्पा अक अद भस्म माळीत; अदुर धधकुसतेला ज्वाला नुनुतीदील, अदिक अदुर कारण दक्षिण टु उत्तर ताका सप्पा अन बाय झुलसेदव.
EZE 20:48 आग सप्पा प्राणी जान्स कोंडव कि ईद बेक्की यहोवा अन हच्द हुन; अदिक अद यागलु नुनुतीदील.”
EZE 20:49 आग ना अंदीन, “हाय परमेश्वर यहोवा! लॉकुर रा नान बारा अन तोगतार कि येन अद दृष्टान्त अच इन अनावाळा आलच?”
EZE 21:1 बाक यहोवा अन ईद वचन नान हाती पोहचुस्त:
EZE 21:2 “हे मंळसा अन सन्तान, तान बाय यरूशलेम इन दी माळ अदिक पवित्र जागागोळ दी वचन केळ्स; इस्त्राएल इन द्याश इन बारा दा भविष्यवाणी माळ अदिक आऊन से अन,
EZE 21:3 प्रभु यहोवा ईद अनतान: नोळ, ना नीन विरूद्ध आईन, अदिक तान तलवार म्यान दा टु जेडुकु नीन दा टु धर्मी अदिक अधर्मी येढ्ढु मुंदुर नाश माळाईन.”
EZE 21:4 ईदुरसाटी कि ना नीन दा टु धर्मी अदिक अधर्मी सप्पा अन नाश माळावाळा आईन, ई कारण नान तलवार म्यान टु होटकु दक्षिण टु उत्तर ताका सप्पा प्राणीगोळ विरूद्ध नळदीत;
EZE 21:5 आग सप्पा प्राणी जान्स कोंडव कि यहोवा म्यान दा टु तान तलवार जेळदान; अदिक अद अदुर मात ईटकु आगतीदील.
EZE 21:6 “ईदुरसाटी हे मंळसा अन सन्तान, नी आह तुम, भारी दुख माळ, अदिक मुर्दकु नेळु हुडुकु लॉकुर मुंद आह तुम.
EZE 21:7 याग आंदुर नीन से केळुल, नी यती आह तुमत्या? आग अनेत, समाचार इन कारण. यतिकी हींग मात बरावाळा आद कि सप्पा अन मन मुरदोदव अदिक सप्पा अन कय ढीला बीद्दव, सप्पा अन आत्मा बेबस अदिक सप्पा अन ट्वांगरा निर्बल आगेदव. नोळी, हींग अच मात बरोद आद, अदिक अद सहीदा पुरा आदीत,” परमेश्वर यहोवा अन ईदा वाणी आद.
EZE 21:8 बाक यहोवा अन ईद वचन नान हाती पोहचुस्त,
EZE 21:9 हे मंळसा अन सन्तान, भविष्यवाणी माळकु अन, परमेश्वर यहोवा ईद अनतान: नोळ, तेज धार माळ्द तलवार, अदिक चमकुसोर साटी झलकुस्द तलवार!
EZE 21:10 अद ईदुरसाटी तेज धार येर्सकु आत तलवार माळकु आत कि अदुर देल घात माळकु आगुल, अदिक ईदुरसाटी झलकुसकु आत कि बिजली इन घाई चमकुसुल! रा येन नाव खुश आदेव? आव रा यहोवा अन पार उन राजदण्ड आद अदिक सप्पा मार्रगोळ इक बेकार जानसावाळा आन.
EZE 21:11 अद तलवार झलकुसली ईदुरसाटी कोटकु आत कि कय दा हुडुकु आगुल, अद ईदुरसाटी सान येर्सकु अदिक झलकुसकु आत कि घात माळावाळेर कय दा कोटकु आगुल.
EZE 21:12 हे मंळसा अन सन्तान चिळ्लास, अदिक हाय, हाय, माळ! यतिकी अद नान प्रजा मा नळोद चाहसतद, अद इस्त्राएल इन सप्पा प्रधानगोळ नळोद चाहसतद; नान प्रजा अन सांगुळ आंदुर भी तलवार इन वश दा होट्ट बंदुर. ई कारण नी तान याद्दा बडु.
EZE 21:13 यतिकी सहीदा अदुर्द जाच आग्याद, अदिक अगर अदरी बेकार जानसावाळा राजदण्ड भी ईला ईरूल, रा येन? परमेश्वर यहोवा अन ईदा वाणी हुन.
EZE 21:14 “ईदुरसाटी हे मंळसा अन सन्तान, भविष्यवाणी माळ, अदिक कय मा कय होडु, अदिक मुर घन तलवार इन बल दुगना माळकु आगुल; अद घात माळोद तलवार बल्की धोळ से धोळ घात माळोद तलवार हुन, यदुर देल कोठरीगोळ दा भी होचकोमकु याऊ ऊळु सकालुन.
EZE 21:15 ना घात माळावाळा तलवार इक आंदुर सप्पा फाटकगोळ विरूद्ध ईदुरसाटी ईदुरसाटी नळस्यान कि लॉकुरव मन मुरदोगुल, अदिक आंदुर हापाळ ठोकर तिंदुर. हाय, हाय! अद बीजली इन घाई माळकु आत, अदिक घात माळली तेज धार येर्सकु आग्याद.
EZE 21:16 सीकुळसकु ऊमा कय दी होग, बाक तैयार आगकु डाक्या दी तीर्ग, यात्त भी नीन बाय ईरूल.
EZE 21:17 ना भी ताळी मुरसाईन अदिक तान जलजलाहट इक ठंडा माळाईन, ना यहोवा हींग अंदीन.”
EZE 21:18 बाक यहोवा अन ईद वचन नान हाती पोहचुस्त:
EZE 21:19 “हे मंळसा अन सन्तान, येढ्ढ हादी ठहरूसकोम कि बेबीलोन उन राजा अन तलवार बरूल; येढ्ढु हादी ऊंद अच द्याश टु होळुल. बाक ऊंद चिन्ह आत, मतलब नगर इन हादी इन ताल्ला मा ऊंद चिन्ह आत;
EZE 21:20 ऊंद हादी माळ कि तलवार अम्मोनिया अन रब्बा नगर मा, अदिक यहूदा द्याश इन गढ़वाळा नगर यरूशलेम मा भी नळुल.
EZE 21:21 यतिकी बेबीलोन उन राजा तिर्मुहाने मतलब येढ्ढु हादीगोळ होळा जागा मा सुकुन जानसोर साटी निदुरदुन, आव तीरगोळी हालुस बुट्टुन, अदिक मान्यागोळ द्यावगोळ प्रश्न माळदुन, अदिक आव बली येर्सद जनावरगोळ ईरग्या अन जाच माळतान.”
EZE 21:22 आऊन ऊजवा कय दी यरूशलेम इन हेसुर आद कि आव अदुर दी युध्द अन यत्न हचुल, अदिक कुतक्या हरूकु घात माळोद आग्या कोळुल अदिक ऊचा आवाज देल चिळ्लाळसुल, फाटक दी युध्द अन यत्न हचुल अदिक घेराबन्दी माळुल अदिक कोट माळुल.
EZE 21:23 लेकीन लॉकुर रा आ भविष्य हेळावाळा अक ख्वाटा समस्यार; आंदुर जो आंदुर्द किर्या तिंदार; ई कारण आव आंदुर अधर्म इक याद माळसुसकु आंदरी हुडु कोंडान.
EZE 21:24 ई कारण प्रभु यहोवा ईद अनतान: ईदुरसाटी कि नीम्द अधर्म जो याद माळकु आग्याद, अदिक नीम अपराध जो खुलसेग्याव, यतिकी नीमव सप्पा क्याल्सागोळ दा पाप अच पाप कांळ्सकु बीदाद, अदिक नीव याद दा बंदीर, ईदुरसाटी नीव आंदुर से हुडुकु आदीर.
EZE 21:25 “हे इस्त्राएल दुष्ट प्रधान, नीन दीन होट बंदाद; अधर्म इन अन्त इन समय होट्ट बंदाद.
EZE 21:26 नीन बारा दा परमेश्वर यहोवा ईद अनतान: पगळी ईळ्स,अदिक मुकुट भी ईळ्स कोम; आव हांग च्या हांगा माळतीदील; जो नीचा आन आऊक ऊँचा माळ अदिक जो ऊँचा आन आऊक नीच माळ.
EZE 21:27 ना आऊक ऊलटुस बुळाईन अदिक उलट पुलट माळ कोमाईन; अदिक यागासताका आऊन अधिकार बराल आगासताका आव उलटा आगकु ईत्तान; आग ना आऊक कोळाईन.”
EZE 21:28 हे मंळसा अन सन्तान, भविष्यवाणी माळकु अन कि प्रभु यहोवा अम्मोनिया अदिक आंदुर्द माळ्द नींदा अन बारा दा ईद अनतान; नी ईद अन, जेळ्द तलवार आद, अद तलवार घात इन साटी झलकुसकु आग्याद कि नाश माळुल अदिक बीजली इन घाई ईरूल.
EZE 21:29 यागासताका कि आंदुर नीन बारा दा ख्वाटा दर्शन नोळतार, अदिक ख्वाटा दिलासा नीनी कोळतार कि नी आ दुष्ट असाध्य घायलगोळ गर्दनगोळ मा बीद्दव यार्द दीन होट्ट बंदाद, अदिक यार अधर्म अन अन्त इन समय होट्ट बंदाद.
EZE 21:30 “अदरी म्यान दा मात ईट. या जागा दा नी माळकु आग्या अदिक या द्याश दा नीन उत्पत्ति आग्याद, अल्या नीन न्याय माळाईन.
EZE 21:31 ना नीन मा तान सिट्ट भळकुसाईन अदिक नीन मा तान जलजलाहट इन बेक्की ऊराईन; अदिक नीनी जनावर घाई मंळसा अन कय दा माळ कोमाईन जो नष्ट माळदुर दा निपुण आर.
EZE 21:32 नी बेक्की इन कौर आद्या; नीन रक्ता द्याश दा बन्सकु ईत्तीत; नी याद दा ईरतीदील यतिकी ना यहोवा अच हींग अंदीन.”
EZE 22:1 यहोवा अन ईद वचन नान हाती पोहचुस्त:
EZE 22:2 “हे मंळसा अन सन्तान, ये नी आ हत्यारा नगर इन न्याय माळतीदील? येन नी अदुर्द न्याय माळतीदील? अदरी अदुर सप्पा घिनोना क्याल्सागोळ हेळ कोम,
EZE 22:3 अदिक अन, परमेश्वर यहोवा ईद अनतान: हे नगर नी तान न्याड्या दा हत्या माळत्या यदुर देल नीन समय बरूल, अदिक तान अच हानि माळदुर अदिक अशुध्द आगोर साटी मुर्तीगोळ माळत्या.
EZE 22:4 जो हत्या नी माळ्या, अदुर देल नी दोषी ठहरूस्द, अदिक जो मुर्तीगोळ नी माळ्या, अऊर कारण नी अशुध्द आगेग्या; नी तान आखरी इन दिनगोळी हाती तनकोंड्या, अदिक तान हिंदळोव वर्षगोळ ताका पोहचुसीग्या. ई कारण ना नीनी राज्य राज्य अन लॉकुर इन दी टु नामधराई इन, अदिक सप्पा द्याशगोळ मज्‍याक इन कारण माळ कोंड्या.
EZE 22:5 हे बदनाम, हे हुल्लड देल तुमकु नगर, जो हाती अदिक जो दुर आर, आंदुर सप्पा नीनी मज्‍याक दा हारस्यार.”
EZE 22:6 “नोळ, इस्त्राएल उन प्रधान लॉक तान तान ताकत इन अनुसार नीन दा हत्या माळावाळेर आग्यार.
EZE 22:7 नगर दा नीम दा टु याऊ भी तान मोय आप्प उन आदर माळालुन; नीव परदेशी इक ध्वाका कोळतीर अदिक विधवा अदिक अनाथ लॉकुर से लाभ नेगुतीर.
EZE 22:8 नी नान पवित्र वस्तु उक बेकार जान्सद, अदिक नान आराम इन दीनगोळी अपवित्र माळ्द.
EZE 22:9 नीन दा लुच्चा लॉकुर हत्या माळोर साटी तत्पर आग्यार, अदिक नीन लॉकुर पहाळीगोळ मा भोजन माळ्यार; नीन न्याड्या महापाप माळकु आग्याद.
EZE 22:10 नीन दा आप्प उन शरीर ईळ्सकु आग्याद; नीन दा महावारी आर्त से भोग माळकु आग्याद.”
EZE 22:11 यावारा नीन से मान्ना हात्तीळोर आर्त इन सांगुळ बेकार क्याल्सा माळ्यार; अदिक यावारा तान सास्स इक बिगळुसकु महापाप माळ्यार; अदिक यावारा तान सौतेला आकतींग मतलब तान पोर इक भ्रष्ट माळ्यान.
EZE 22:12 नीन दा हत्या माळोर साटी आंदुर घुस तिंदार; नी ब्याज अदिक मुद्दल ताकोंड अदिक तान मान्ना हात्तीगोळोर इक पीसुस पिसुसकु अन्याय देल लाभ नेग्द; अदिक नान इक नी मारतोद, प्रभु यहोवा अन ईदा वाणी हुन.
EZE 22:13 “ईदुरसाटी नोळ, जो लाभ नी अन्याय देल नेगद्या अदिक तान न्याड्या हत्या माळ्या, अदुर देल ना कय मा कय कोट्टीन.
EZE 22:14 अत: या दिनगोळ दा ना नीन न्याय माळाईन, येन नी अदुर दा नान दिल मजबुत अदिक नीन कय स्थिर ईर सक्केव? ना यहोवा अच ईद अंदीन, अदिक हींग अच माळाईन.
EZE 22:15 ना नीन लॉकुरी राज्य राज्य दा तीतर-बितर माळाईन, अदिक द्याश द्याश दा हास बुळाईन, अदिक नीन अशुध्दता अक नीन से नष्ट माळाईन.
EZE 22:16 नी राज्य राज्य अक नोळतेला तान अच नजर दा अपवित्र ठहरुसीत; आग नी जान्स कोंड्या कि ना यहोवा हुईन.”
EZE 22:17 बाक यहोवा अन ईद वचन नान हाती पोहचुस्त:
EZE 22:18 “हे मंळसा अन सन्तान, इस्त्राएल उन घराना नान नजर दा धातु उन मैल आगेदुर; आंदुर सप्पा च्या सप्पा भट्टी इन ल्यालमा अन पीतल अदिक टीन अदिक लोहा अदिक काच इन घाई आगेग्यार; आंदुर बेळ्ली इन मैल आगेग्यार.
EZE 22:19 ई कारण प्रभु यहोवा आंदुर से ईद अनतान: ईदुरसाटी कि नीव सप्पा च्या सप्पा धातु उन मैल इन घाई आगेगीर, अत: नोळी, ना नीम इक यरूशलेम इन बुळ्क जमा माळदुर मा आईन.
EZE 22:20 ह्यांग लॉकुर बेळ्ली, पीतल, लोहा, काच, अदिक टीन ईदुरसाटी भट्टी इन बुळ्क जमा ईटतार कि आंदरी बेक्की दा हचकु पीघलुसुल, हांग अच ना नीमी इक तान कोप अदिक जलजलाहट देल जमा माळकु अल्या ईटकु पीघलुस बुळाईन.
EZE 22:21 ना नीमी अल जमा माळकु तान सिट्ट इन बेक्की देल उराईन, अदिक नीव अदुर न्याड्या पीघलुसकु आदीर.
EZE 22:22 ह्यांग बेळ्ली भट्टी इन न्याड्या पीघलुसकु आगतद, हांग अच नीव अदुर न्याड्या पीघलुसकु आदीर; आग नीव जान्स कोंडीर कि याव नाम मा तान जलजलाहट भळकुस्यान, आव यहोवा हुन.”
EZE 22:23 बाक यहोवा अन ईद वचन नान हाती पोहचुस्त:
EZE 22:24 “हे मंळसा अन सन्तान, आ द्याश से अन, नी हींग द्याश आय जो शुद्ध आगीदील, अदिक जलजलाहट इन दीन दा नीन मा माळ आगतीदील.
EZE 22:25 नीन भविष्यवक्तागोळ नीन दा राजद्रोह अन गोष्ठी माळ्यार, आंदुर गरजुसावाळा हुल्ल इन घाई सिकार हुळदुर अदिक प्राणीगोळी तीन कोंडुर; आंदुर ईट्द अनमोल धन इक कसु कोमतार, अदिक नीन दा हापाळ आर्तेर इक रांड्या माळ कोंडार.
EZE 22:26 आऊन याजकगोळ नान व्यवस्था अन मतलब जेडु-जाडुकु हचीन, अदिक नान पवित्र वस्तुगोळी अपवित्र माळ्यार; आंदुर पवित्र-अपवित्र अन येनु भेद मानसीदील, अदिक न दुसरा अक शुद्ध अशुद्ध अनभेद कलस्यार, अदिक आंदुर नान आराम दिन इन बारा दा निश्चिन्त ईरतार, यदुर देल ना आंदुर न्याड्या दा अपवित्र ठहरूसतीन.”
EZE 22:27 आऊन प्रधान लांडग्या घाई सिकार हुडुतार, अदिक अन्याय देल लाभ नेगोर साटी हत्या माळतार अदिक प्राण घात माळोर साटी तत्पर ईरतार.
EZE 22:28 आऊन भविष्यवक्ता आंदुर साटी कच्चा पोताई माळतार, आदुर्द दर्शन नोळोद मिथ्या आद; यहोवा अन बिना येनारा अंदेव भी आंदुर ईद अनकु ख्वाटा भावी हेळतार कि प्रभु यहोवा ईद अनतान.
EZE 22:29 द्याश इन साधारण लॉकुर भी अत्याचार माळतार अदिक पराया धन कसुतार, आंदुर रोज गरीबी इक पीसुसतार अदिक न्याय इन चिन्ता बिटकु परदेशी मा अत्याचार माळतार.
EZE 22:30 ना आंदुर दा हींग मंळसा ढुढसोद चाहसदीन जो बाळा अक सुधरूसुल अदिक द्याश इन निम्मित नाका दा नान मुंद हींग नीदुरूसुल कि नानी आऊन नाश माळोद बीळ बाळुल, लेकीन हींग याऊ सीकीदील.
EZE 22:31 ई कारण ना आंदुर मा तान सिट्ट भळकुसदीन अदिक तान जलजलाहट इन बेक्की देल आंदरी भस्म माळ कोंडीन; ना आंदुर चाल आंदुर्द अच ताला मा वापस माळ कोंडीन; परमेश्वर यहोवा अन ईदा वाणी हुन.
EZE 23:1 बाक यहोवा अन ईद वचन नान हाती पोहचुस्त:
EZE 23:2 “हे मंळसा अन सन्तान, येढ्ढ आर्तेर ईरोर, जो ऊंद अच मोय इन पोरगोळ ईरोर.
EZE 23:3 आंदुर तान बचपन दा का वेश्या अन क्याल्सा मिस्त्र दा माळली कुरतुर; आंदुर तान कुवारापन बचपन दा खोऊस बुट्टुर अदिक आंदुर वेश्या आगेदुर.
EZE 23:4 आ पोरगोळ दा टु धोळ पोर इन हेसुर ओहोला अदिक आकिन आकतींग इन हेसुर ओहोलीबा ईरोद.” आक नानोर आगेदुर, अदिक आकिन पोर पारगोळ पैदा आदुर. आंदुर हेसुर इन अनुसार ओहोला रा शोमरोन, अदिक ओहोलीबा यरूशलेम उर.
EZE 23:5 “ओहोला याग नानोर ईरोर, आग अच व्यभिचारिणी आगकु तान संगीगोळ मा मोहीत आगली कुरतुर जो आकिन मान्‍ना हातळोर अश्शूरी योध्दा ईरोर.
EZE 23:6 आंदुर रा सप्पा च्या सप्पा नीळा कपळा हाकावाळेर मनभावना हारोदर अधिपति अदिक प्रधान ईरोर, अदिक घ्वाळा मा सवार ईरोर.
EZE 23:7 ईदुरसाटी आंदुर आंदुर्दा सांगुळ व्यभिचार माळदुर जो सप्पा च्या सप्पा सर्वोत्तम अश्शूरी ईरोर; अदिक जो यारदारा मा आक मोहीत आदुर अदा मुर्तीगोळ से आक अशुध्द आदुर.
EZE 23:8 जो व्यभिचार आक मिस्त्र दा कलतीदुर, अदरी भी आक बिटीदील; यतिकी बचपन दा मंळसागोळ आकिन सांगुळ कुकर्म माळदुर, अदिक आकिन याद्दागोळ वत्तदुर, अदिक तन-मन देल आकिन सांगुळ व्यभिचार माळकु आत.
EZE 23:9 ई कारण ना आकी अश्शूरी संगीगोळ कय दा कोट्टीन यार मा आक मोहीत आगीदुर.
EZE 23:10 आंदुर आकी ऊगळा माळदुर; आकिन पोर पारगोळ कसुकु आकी तलवार देल घात माळदुर; ई प्रकार आंदुर कय देल दण्ड पाऊसकु आक आर्तेर दा प्रशिद्ध आगेदुर.”
EZE 23:11 “आकिन आकतींग ओहोलीबा ईद नोळदुर, तरी भी आक मोहीत आगकु व्यभिचार माळदुर दा तान आकतींग से भी येक्कुल वाळुसेदुर.
EZE 23:12 आक अश्शूरी मान्‍ना हातळोर मा मोहीत आग तोगोर, जो सप्पा च्या सप्पा अति सुन्दर कपळा हाकावाळेर अदिक घ्वाळा अन सवार मनभावना, हारोदोर अधिपति अदिक सप्पा प्रकार इन प्रधान ईरोर.
EZE 23:13 आग ना नोळदीन कि आक भी अशुध्द आगेदुर; आ येढ्ढु आकतिंगेर्द ऊंद अच चाल ईरोद.”
EZE 23:14 लेकीन ओहोलीबा येक्कुल व्यभिचार माळतेला होदुर; अत: याग आक दिवाल मा सेंदुर देल जेळ्द हिंग कसदी मंळसागोळ चित्र नोळदुर
EZE 23:15 जो कटी दा फ्याटा कटकु ईरोर, ताल्ला मा छोर लटकुसतेला रंगीला पगडीगोळ हाक्कु, अदिक सप्पा चा सप्पा तान कसदी जनमभुमी मतलब बेबीलोन इन लॉकुर रिती मा प्रधानगोळ रूप हुडुकु ईरोर,
EZE 23:16 आग आंदरी नोळतेला अच आक आंदुर मा मोहीत आदुर अदिक आंदुर हाती कसदीगोळ द्याश दा दूत कळुदुर.
EZE 23:17 “ईदुरसाटी बेबीलोन उन लॉक आकिन हाती पंलग मा बंदुर, अदिक आकिन सांगुळ व्यभिचार माळकु अशुध्द माळदुर; अदिक याग आक आंदुर से अशुध्द आगेदुर, आग आकिन मन आंदुर से तिर्गेत.
EZE 23:18 तरी भी आक तन तेरूकु अदिक व्यभिचार माळतेला होदुर, आग नान मन ह्यांग आकिन आकतींग से तिर्गीत, हांग अच आकिन से भी तिर्गेत.
EZE 23:19 ईदुर मा भी आक मिस्त्र द्याश इन तान बचपन इन दिन याद माळकु याग वेश्या अन क्याल्सा माळतोगोर, अदिक येक्कुल व्यभिचार माळतेला होदुर;
EZE 23:20 अदिक ईत्ता संगीगोळ मा मोहीत आदुर, यार्द मय गदहागोळ घाई, अदिक विर्य घ्वाळा घाई ईरोद.
EZE 23:21 नी ई प्रकार देल तान बचपन इन आ समय इन महापाप इन याद माळसुसत्या याग मिस्त्री लॉक नीन याद्दा वत्त तोगोर.”
EZE 23:22 ई कारण हे ओहोलीबा, परमेश्वर यहोवा नीन से ईद अनतान: “नोळ, ना नी संगीगोळी उभार्सकु यार से नीन मन तिरग्याद नाकु दी टु नीन विरूद्ध तराईन.
EZE 23:23 मतलब बेबीलोन वासीगोळ अदिक सप्पा कसदीगोळ इक, अदिक पकोद, शो अदिक कोआ अन लॉकुरी; अदिक आंदुर सांगुळ सप्पा अश्शूरीगोळी तराईन जो सप्पा चा सप्पा घ्वाळा अन सवार मनभावना हारोदोर अधिपति, अदिक हापाळ प्रकार इन प्रतिनिधी, प्रधान अदिक नामी मंळसा आर.
EZE 23:24 आ लॉकुर हथियार, रथ, छकडा अदिक द्याश द्याश इन लॉकुर दल हुडुकु नीन मा चळाई माळ्यार; अदिक ढाल अदिक फरी अदिक टोप धारण माळकु नीन विरूद्ध नाकु दी पाती कट्यार; अदिक ना आंदुर अच कय न्याय इन क्याल्सा सोपसाईन, अदिक आंदुर तान तान नियम इन अनुसार नीन न्याय माळ्यार.”
EZE 23:25 ना नीन मा होताईन, यदुर देल आंदुर नीन सांगुळ जलजलाहट देल बर्ताव माळ्यार. आंदुर नी मुग्ग अदिक कीव कडु कोंडार, अदिक नीन जोभी मिक्कु ईत्तीत आव तलवार देल कोंदकु आदान. आंदुर नीन पोर पारगोळी कसुकु वोतार, अदिक नीन जो भी मिक्कु ईत्तीत, अद बेक्की देल भस्म आगेदीत.
EZE 23:26 आंदुर नीन कपळा भी तेगुकु नीन सुन्दर सुन्दर ईसरा कसु कोंडार.
EZE 23:27 “ई रीती देल ना नीन महापाप अदिक जो वेश्या अन क्याल्सा नी मिस्त्र द्याश दा माळ्या, अदरी भी नीन से बिळसाईन, ईल ताका कि नी तान कण्ण आंदुर दी हच्या अदिक न मिस्त्र द्याश इक बाक याद माळ्या.”
EZE 23:28 यतिकी प्रभु यहोवा नीन से ईद अनतान: नोळ, ना नीनी आंदुर कय सोपसाईन यारी नी दुश्मन सम्सत्या अदिक यार से नीन मन तिर्गेग्याद;
EZE 23:29 अदिक आंदुर नीन से दुश्‍मनी इन सांगुळ बर्ताव माळ्यार, अदिक नीन सप्पा कमाई इक नेगु कोंडार, अदिक नीनी उगळा माळकु बीट्ट बुट्टार, अदिक नीन तन तेरकु होगोर से नीन व्यभिचार अदिक महापाप प्रगट आगेदीत.
EZE 23:30 “ईव क्याल्सा नीन से ई कारण माळकु आदव यतिकी नी अन्य राज्यगोळ हिंद व्यभिचारीनी घाई आगेद, अदिक आंदुर मुर्तिगोळ पुजा माळकु अशुध्द आगेद.
EZE 23:31 नी तान आकतींग इन हादी मा नळद्या; ई कारण ना नीन कय दा आकिन घाई कटोरा कोळाईन.
EZE 23:32 प्रभु यहोवा ईद अनतान: तान आकतींग इन कटोरा देल नीनी कुडोद बिद्दीत जो गयरा अदिक चौळा आद; नी नेग्द अदिक मज्‍याक दा हार्सकु आद, यतिकी आ कटोरा दा हापाळ येनारा समुसतद.
EZE 23:33 नी मतवाला पन अदिक दुख देल दुखी आगेद्या. नी तान आकतींग शोमरोन इन कटोरा अक, मतलब विस्मय अदिक उजाळ इक कुडुकु दुखी आगेद्या.
EZE 23:34 अदुर दा टु नी गार्स गार्सकु कुळद्या, अदिक अदुर तुकळगोळी भी मेद्य अदिक तान याद्दागोळी घायल माळ्या; यतिकी ना अच हींग अंदीन, प्रभु यहोवा अन ईदा वाणी आद.
EZE 23:35 नी जो नानी मारतोग्या अदिक तान बाय नान से तिर्गुस कोंड्या, ईदुरसाटी नी खुद अच तान महापाप अदिक व्यभिचार इन भार नेगु, परमेश्वर यहोवा अन ईदा वाणी हुन.”
EZE 23:36 यहोवा नान से अंदुन: “हे मंळसा अन सन्तान, येन नी ओहोला अदिक ओहोलीबा अन न्याय माळ्या? रा बाक आऊन बेकार क्याल्सा आंदरी हेळ कोम.
EZE 23:37 यतिकी आंदुर व्यभिचार माळदुर, अदिक आंदुर कयगोळ दा रक्ता हतकु आद; आंदुर तान मुर्तीगोळ सांगुळ व्यभिचार माळदुर, अदिक तान बाल बच्चा अक जो नान से पैदा आगीदुर, आ मुर्तीगोळ मुंद भस्म आगोर साटी येर्सकु आग्याव.
EZE 23:38 बाक आंदुर नान से हींग बर्ताव भी माळदुर कि आकिन सांगुळ नान पवित्र जागा अक भी अशुध्द माळदुर अदिक नान आराम दिनगोळी अपवित्र माळ्यार.
EZE 23:39 आंदुर तान चिकोरी तान मुर्तिगोळ मुंद बली येर्सकु अदा दिशी नान पवित्र जागा अपवित्र माळोर साटी अदुर दा होकदुर. नोळ, आंदुर ई प्रकार इन क्याल्सा नान भवन इन बुळ्क माळ्यार.
EZE 23:40 आंदुर दुर टु मंळसागोळी कारसुसदुर, अदिक आदुर होट्ट भी बंदुर. आंदुर साटी नी मय तोळु, कण्णगोळ दा काजर हच्च, ईसरा हाक्कु;
EZE 23:41 सुन्दर व्हर्स मा कुर्तकु ईत्त; अदिक नीन मुंद ऊंद मेज हासकु ईरोद, यदुर मा नी नान लुबान अदिक नान याण्णा ईट्द.
EZE 23:42 आग आऊन सांगुळ निश्चिन्त लॉकुर्द भीळ इन कोलाहल केळ बत्त, अदिक आ साधारण लॉकुर हाती आळी टु कारदुर कुडावाळेर लॉकुर भी ईरोर; आंदुर आ येढ्ढु आकतींगेर कयगोळ दा बाळागोळ हाकसुसदुर, अदिक आंदुर ताल्ला मा शोभायमान मुकुट ईटदुर.
EZE 23:43 “आग जो व्यभिचार माळ्त माळ्त हाळामुंड आगेगीदुर, आकिन बारा दा माताळली कुरतीन, ईग रा आंदुर आकिन अच सांगुळ व्यभिचार माळ्यार.
EZE 23:44 यतिकी आंदुर आकिन हाती हींग होदुर ह्यांग कि लॉक वेश्या अन हाती होगतार. हांग अच आंदुर ओहोला अदिक ओहोलीबा हेसुर इन महापापी आर्तेर हाती होदुर.
EZE 23:45 अत: धर्मी लॉक व्यभिचारिणीगोळ अदिक हत्यारागोळ लायक आकिन न्याय माळुल; यतिकी आंदुर व्यभिचारिणी आर, अदिक आंदुर कयगोळ दा रक्ता हतकु आद.”
EZE 23:46 ई कारण परमेश्वर यहोवा ईद अनतान: “ना ऊंद भीळ से आंदुर मा चळाई माळसुसकु आंदरी हींग माळाईन कि आंदुर ईत्त आत्त वयाळ्यार अदिक लुट्सकु आदार.
EZE 23:47 आ भीळ इन लॉकुर आंदुर मा पथराव माळकु आंदरी तान तलवारगोळ देल कळ्द बुट्टार; आग आंदुर पोर-पारगोळ इक घात माळकु आंदुर मान्या भी बेक्की हचकु ऊरु कोंडार.
EZE 23:48 ई प्रकार ना महापाप इक द्याश दा टु दुर माळाईन, अदिक सप्पा आर्तेर शिक्षा ताकोमकु नीम घाई महापाप माळदुर देल ऊळ्दकु ईत्तार.
EZE 23:49 नीम्द महापाप नीम्द अच ताल्ला मा बीद्दीत; अदिक नीव सहीदा तान मुर्तीगोळ्द पुजा अन पापगोळ्द भार नेगदीर; अदिक आग नीव जान्स कोंडीर कि ना परमेश्वर यहोवा हुईन.”
EZE 24:1 व्हासा वर्ष इन हतवा तींगुळ इन हतवा दिशी इक, यहोवा अन ईद वचन नान हाती पोहचुस्त:
EZE 24:2 “हे मंळसा अन सन्तान, ईंद इन दीन लिख्सकु ईट, यतिकी ईंद इन अच दीन बेबीलोन उन राजा यरूशलेम बंदकु घेरस्यान.
EZE 24:3 ई बलवई घराना दा ईद दृष्टान्त अन; प्रभु यहोवा अनतान: हण्डा अक बेक्की मा ईट बुळी; अदरी ईटकु अदुर दा नीर हाक कोमी;
EZE 24:4 आग अदुर दा जांघ, खांदा अदिक सप्पा वळ्लेव वळ्लेव तुकळा जमा माळकु ईटी; अदिक अदरी वळ्लीद वळ्लीद येलुगोळ देल तुमकोमी.”
EZE 24:5 झुंड दा सबसे वळ्लेव जनावर हुडुकु आ येलुगोळी हण्डा अन ल्यालमा ढेर माळी; अदिक अवरी भली भाती बेईसी ताकी बुळ्क इनव येलुगोळ भी बेयुल.
EZE 24:6 “ईदुरसाटी प्रभु यहोवा अनतान: हाय, आ हत्यारी नगर मा! हाय आ हण्डा मा! यदुर मोर्चा अदुर दा बन्सकु आद अदिक बिटकु हैलेच; अदुर दा टु तुकळा तुकळा माळकु तेगु कोमी, अदुर मा चिट्टी हाक्कु आग बाळुल.
EZE 24:7 यतिकी आ नगर दा माळ्द रक्ता अदुर दा आद; आव अदरी जमीन मा हाक्कु धुळा देल होचीदील लेकीन ऊगळा कल्ल मा ईट कोंडुन.
EZE 24:8 ईदुरसाटी ना भी अदुर रक्ता ऊगळा कल्ल मा ईटीन कि अद होचकोम सकबाळुल अदिक कि बदला ताकोमोर साटी जलजलाहट भळकुसुल.
EZE 24:9 प्रभु यहोवा ईद अनतान: हाय आ खुनी नगर मा! ना भी ढेर इक धोळ्द माळाईन.
EZE 24:10 अदिक येक्कुल हुळ्ली हाक्कु, बेक्की दा हापाळ तेज माळकु, मास इक भला-भाती बेईस्द अदिक मसाला सीक्त, अदिक येलुगोळी भी होताक कोमी.
EZE 24:11 आग हण्डा अक छूछा माळकु कोयलगोळ मा ईटकु आगुल यदुर देल अद गरम ईरूल अदिक अदुर पीतल होतुल अदिक अदुर दाकळोद मैल गलुसुल, अदिक अदुर मोर्चा नष्ट आगेगुल.
EZE 24:12 ना आऊन कारण मयनत माळ्त माळ्त थकसेगीन, लेकीन आऊन भारी मोरचा अदुर से बीळाल, आऊन मोरचा बेक्की इन द्वारा भी बीळाल.
EZE 24:13 हे नगरी नीन अशुध्दता महापाप इन आद. ना रा नीनी शुद्ध माळोद चाहसीन, लेकीन नी शुद्ध आगीदील, ई कारण यागासताका ना तान जलजलाहट नीन मा शांत माळ कोमालीन, आगासताका नी बाक शुद्ध माळकु आगतीदील.
EZE 24:14 ना यहोवा अच ईद अंदीन; अदिक अद आगेदीत; ना हींग अच माळाईन, ना नीनी बीळतीदील, न नीन मा तरस तीनाईन, न पछतासाईन; नीन चाल चलन अदिक क्याल्सागोळ अच अनुसार नीन न्याय माळकु आदीत, प्रभु यहोवा अन ईदा वाणी आद.”
EZE 24:15 यहोवा अन ईद भी वचन नान हाती पोहचुसदुन:
EZE 24:16 “हे मंळसा अन सन्तान, नोळ, ना नीन कण्ण इन प्रिय अक कोंदकु नीन हाती टु ताकोंडुर मा आईन; लेकीन न नी वर्लेत अदिक न कण्ण इन नीर वाहुसेत.
EZE 24:17 लंबा सास ताकोम रा कोम, लेकीन अव केळ बरबाळुल; सोत्तुरगोळ साटी भी दुख माळ बाळते. ताल्ला मा पगळी कटकु अदिक कालगोळ दा जुता हाक्कु ईरेत; अदिक न रा तान टुट्टीगोळी होचेत न दुख इन लायक रोट्टी तिनेत.”
EZE 24:18 आग ना व्हातर्‍या लॉकुर से अंदीन, अदिक द्यावगा अक नान आर्त सोतोदुर. आग व्हातर्या ना आग्या अन अनुसार माळदीन.
EZE 24:19 आग लॉकुर नान से अनली कुरतुर, “येन नी नामी हेळतीदील कि ईद जो नी माळत्या, ईदुर्द नाम लॉकुर साटी येन मतलब आद?”
EZE 24:20 ना आंदरी उत्तर कोट्टीन, “यहोवा अन ईद वचन नान हाती पोहचुस्त:
EZE 24:21 ‘नी इस्त्राएल उन घराना से अन: प्रभु यहोवा ईद अनतान: नोळी, ना तान पवित्र जागा अक यदुर्द गढ़ आगदुर मा नीव फुलुसतीर; अदिक जो नीम कण्णगोळ चाहसावाळा हुन, अदिक यारी नीम मन चाहसतद, अदरी ना अपवित्र माळदुर मा आईन; अदिक तान या पोर पारगोळ इक नीव अल बिटकु बंदीर, आंदुर तलवार देल कोंदकु आदार.
EZE 24:22 ह्यांग ना माळीन हांग अच नीव भी माळीर; नीव भी तान टुट्टी होचकोम तिदील, न दुख इन लायक रोट्टी तिंदीर.
EZE 24:23 नीव ताल्ला मा पगळी कटकु अदिक कालगोळ दा जुता हाक्कु ईत्तीर, न नीव वर्लीर, न याद्दा पिटसीर, बल्की तान अधर्म इन क्याल्सागोळ दा फसुसकु गलुसतेला होदीर अदिक आबुर दाबुर दी कन्नास्तेला ईत्तीर.
EZE 24:24 ई रिती यहेजकेल नीम साटी चिन्ह ठहरूस्यान; ह्यांग आव माळ्यान, ठीक हांग अच नीव भी माळीर. याग ईद आगेदीत, आग नीव जान्स कोंडीर कि ना परमेश्वर यहोवा हुईन.’
EZE 24:25 “हे मंळसा अन सन्तान, येन ईद सही आलच, कि या दिशी ना आंदुरव मजबुत गढ़, आंदुर शोभा, अदिक हर्ष इन कारण अदिक आंदुर पोर पारगोळ जो आंदुर शोभा, आंदुर्द कण्ण इन आनंद, अदिक मन इन चाह आद, अवरी ना आंदुर से ताकोम कोमाईन,
EZE 24:26 अदा दिशी जो वोळकु ऊळदान, आव नीन हाती बंदकु नीनी समाचार केळस्यान.
EZE 24:27 अदा दिशी नीन बाय खुलसीत, अदिक नी बाक सुंगा ईरतीदील लेकीन आ ऊळ्द लॉकुर सांगुळ मातगोळ हेळ्या. ई कारण नी ई लॉकुर साटी चिन्ह ठहरूस्या; अदिक ईद जान्स कोंडार कि ना यहोवा हुईन.”
EZE 25:1 यहोवा अन ईद वचन नान हाती पोहचुस्त:
EZE 25:2 “हे मंळसा अन सन्तान, अम्मोनिया अन दी बाय माळकु आंदुर बारा दा भविष्यवाणी माळ.
EZE 25:3 आंदुर से अन, हे अम्मोनिया, परमेश्वर यहोवा अन वचन केळी, परमेश्वर यहोवा ईद अनतान कि नीव जो नान पवित्र जागा अन बारा दा याग अद अपवित्र माळकु आत, अदिक इस्त्राएल इन द्याश इन बारा दा याग अद नाश आगेत, अदिक यहूदा अन घराना अन बारा दा याग आंदुर गुलामी दा होदुर, आह, आह! अंदुन.
EZE 25:4 ई कारण नोळी, ना नीनी पूर्व द्याश इन लॉकुर्द अधिकार दा माळदुर मा आईन; अदिक आंदुर नीन न्याड्या तान छावनीगोळ हाक्यार अदिक तान मान्ना माळ्यार; आंदुर नीन काय तिंदार अदिक नींद हाल कुळदार.”
EZE 25:5 ना रब्बा नगर इक ऊँटगोळ ईरा अदिक अम्मोनिया अन द्याश इक मर्र-म्याढ्ढागोळ्द कुरोद जागा माळा कोमाईन; आग नीव जान्स कोंडीर कि ना यहोवा हुईन.
EZE 25:6 यतिकी परमेश्वर यहोवा ईद अनतान: नीव जो इस्त्राएल इन द्याश इन कारण ताळी मुरसीर अदिक ल्यालमा, अदिक तान सप्पा मन इन अभिमान देल आनंद माळदीर,
EZE 25:7 ई कारण नोळ, ना तान कय नीन म्याकुच वाळुसीन; अदिक नीनी राज्य राज्य अन लुट माळ कोमाईन, अदिक द्याश द्याश इन लॉकुर दा टु नीनी मिटुसाईन; अदिक द्याश द्याश दा टु नीनी नष्ट माळाईन. ना नींद सत्यानाश माळ कोमाईन; आग नी जान्स कोंड्या कि ना यहोवा हुईन.
EZE 25:8 “परमेश्वर यहोवा ईद अनतान: मोआब अदिक सेईर जो अनतार, नोळी, यहूदा अन घराना दुसरा द्याशगोळ घाई आगेग्याद.
EZE 25:9 ई कारण नोळ, मोआब उन द्याश उन किनारा अन नगरगोळी बेत्यशीमोत, बालमोन, अदिक किर्यातैम, जो द्याश आ द्याश इन शिरोमणी आन, ना आंदुर हादी खोल्सकु
EZE 25:10 आंदरी पूर्व दिशा अन लॉकुर वश दा हींग माळ कोमाईन कि आंदुर अम्मोनिया मा चळाई माळुल; अदिक ना अम्मोनिया अक ईल ताका आंदुर अधिकार दा माळ कोमाईन कि राज्य राज्य अन न्याड्या आंदुर्द याद बाक ईरतीदील.
EZE 25:11 ना मोआब उक भी दण्ड कोळाईन. आग आंदुर जान्स कोंडार कि ना यहोवा हुईन.
EZE 25:12 “परमेश्वर यहोवा ईद भी अनतान: एदोम जो यहूदा अन घराना से बदला तांकोडुन, अदिक आंदुर से बदला ताकोमकु हापाळ दोषी आगेदुन,
EZE 25:13 ई कारण परमेश्वर यहोवा ईद अनतान, ना एदोम द्याश इन विरूद्ध तान कय वाळुसकु अदुर दा टु मंळसा अदिक जनावर येढ्ढु उक मिटुसाईन; अदिक तेमान टु हुडुकु ददान नगर ताका अदरी नाश माळ कोमाईन; अदिक आंदुर तलवार देल कोंदकु आदार.
EZE 25:14 ना तान प्रजा इस्त्राएल इन द्वारा एदोम से तान बदला ताकोमाईन; अदिक आंदुर आ द्याश दा नान कोप अदिक जलजलाहट इन अनुसार क्याल्सा माळ्यार. आग आंदुर नान बदला ताकोमोद जान्स कोंडार, परमेश्वर यहोवा अन ईदा वाणी आद.
EZE 25:15 “परमेश्वर यहोवा ईद अनतान: यतिकी पलिश्ती लॉकुर बदला तांकोडुर, बल्की तान युग युग इन दुश्मनी इन कारण तान मन इन अभिमान देल बदला तांकोडुन कि नाश माळुल,
EZE 25:16 ई कारण परमेश्वर यहोवा ईद अनतान, नोळ, ना पलिश्तीगोळ विरूद्ध तान कय वाळुसदुर मा आईन, अदिक करेती लॉकुरी मिटुस बुळाईन; अदिक समुद्र अन किनारा अन सप्पा मिक्कु ईरावाळेर्द नाश माळाईन.
EZE 25:17 ना जलजलाहट इन सांगुळ मुकदमा आळकु, आंदुर से कळाई इन सांगुळ बदला ताकोमाईन. अदिक याग ना आंदुर से बदला ताकोम कोमाईन, आग आंदुर जान्स कोंडार कि ना यहोवा हुईन.”
EZE 26:1 हनुनवा वर्ष इन पयला तींगुळ इन पयला दिन इक यहोवा अन ईद वचन नान हाती पोहचुस्त:
EZE 26:2 “हे मंळसा अन सन्तान, सोर जो यरूशलेम इन बारा दा अंदान, ‘आह, आह! जो द्याश द्याश इन लॉकुर इन फाटक इन घाई ईरोद, अद नष्ट आगेत! अदुर नाश आगदुर देल ना हापाळ आगेगाईन.’”
EZE 26:3 ई कारण परमेश्वर यहोवा अनतान: हे सोर, नोळ, ना नीन विरूद्ध आईन; अदिक हींग माळाईन कि हापाळ सा राज्य नीन विरूद्ध हींग येद्दव ह्यांग समुद्र अन लयरगोळ येळताव.
EZE 26:4 अद सोर इन शहरपनाह अक केळदीत, अदिक आदुर गुम्मटगोळ इक मुर्द बुट्टीत; अदिक ना अदुर मा टु अदुर मुण्ण काबुरकु अदरी ऊगळा कल्ल माळ कोमाईन.
EZE 26:5 अद समुद्र अन न्याड्या अन जाल फैलुसोद अच जागा आगेदीत; यतिकी परमेश्वर यहोवा अन ईदा वाणी आद, अदिक अद राज्य राज्य देल लुटसेदान;
EZE 26:6 अदिक आकिन जो पोरगोळ मैदान दा आर, आंदुर तलवार देल कोंदकु आदार. आग आंदुर जान्स कोंडार कि ना यहोवा हुईन.
EZE 26:7 “यतिकी परमेश्वर यहोवा ईद अनतान: नोळ, ना सोर उन विरूद्ध राजाधिराज बेबीलोन इन राजा नबूकदनेस्सर उन घ्वाळागोळ, रथगोळ, सवारगोळ, धोळ भीळ, अदिक दल सांगुळ उत्तर दिशा टु तराईन.
EZE 26:8 नीन जो पोरगोळ मैदान दा आर, आंदरी आव तलवार देल कोंदान, अदिक नीन विरूद्ध कोट माळ्यान अदिक दमदमा कट्यान; अदिक ढाल नेगदान.
EZE 26:9 आव नीन शहरपनाह अन विरूद्ध युध्द इन यंत्र नळस्यान अदिक नीन गुम्मटगोळ इक फरसागोळ से ढाऊस कोंडान.
EZE 26:10 आऊन घ्वाळागोळ ईस ईत्ताव, कि नी आंदुर धुळा देल होचेद्या, अदिक याग आव नीन फाटकगोळ दा हींग होक्यान ह्यांग नाकावाळा नगर दा होकतार, आग नीन शहरपनाह सवारगोळ, छकळागोळ, अदिक रथगोळ शब्द देल नळ्गीत.
EZE 26:11 आव तान घ्वाळा अन टापगोळ देल नीन सप्पा सळकगोळी इक मेट्यान, अदिक नीन निवासीगोळ तलवार देल कोंद बुट्टान, अदिक नीन ताकत इन खंबा जमीन मा केळसुसकु आदव.
EZE 26:12 लॉकुर नीन धन लुटस्यार अदिक नीन व्यापार इन वस्तुगोळ कसु कोंडार: आंदुर नीन शहरपनाह ढाऊस कोंडेव अदिक नीन मन पसंदीदा मान्ना मुरु कोंडार; नीन कल्ल अदिक ना नीन हाळगोळ्द सुरताल बंद माळाईन, अदिक नीन वीणागोळ आवाज मात्त केळ बंदीत.
EZE 26:13 ना नीन हाळगोळ्द सुरताल बंद माळाईन, अदिक नीन वीणागोळ्द आवाज बाक केळ बरतीदील.
EZE 26:14 ना नीनी ऊगळा कल्ल माळ कोमाईन; नी जाल फैलुसोद अच जागा आगेद्या, अदिक बाक बसुसकु आगतीदील; यतिकी ना यहोवा अच ईद अंदीन, परमेश्वर यहोवा अन ईदा वाणी आद.”
EZE 26:15 “परमेश्वर यहोवा सोर से ईद अनतान: नीन बीळोर शब्द देल याग घायल लॉकुर कन्नास्यार अदिक नीन दा घात अच घात आदीत, आग येन टापू नळ्गकु येतळतीदील?
EZE 26:16 आग समुद्र तट इन द्याश इन सप्पा प्रधान लॉकुर तान तान सिंहासन मा टु ईळदार, अदिक तानबागा अदिक बूटेदार कपळा ईळ्सकु थरथराहट इन कपळा हाक्यार अदिक जमीन मा कुर्तकु घळी घळी नळग्यार; अदिक नीन कारण विस्मित ईत्तार.
EZE 26:17 आंदुर नीन बारा दा दुख इन हाळ माळकु नीन से अंदार, हाय! मल्लाहगोळ बसुसावाळेर हाय! सराही नगरी जो समुद्र अन न्याड्या दा निवासीगोळ सामर्थी ईत्तुर अदिक सप्पा ईरावाळेर अंजुसावाळा नगरी नी ह्यांग नाश आग्या?
EZE 26:18 नीन बीळा दिन टापू नळ्गकु येद्दव, अदिक नीन होगतेला ईरा कारण समुद्र अन सप्पा टापू घबरूसेदव.”
EZE 26:19 “यतिकी परमेश्वर यहोवा ईद अनतान: याग ना नीनी निर्जन नगरगोळ घाई उजाळ माळाईन अदिक नीन म्याकुच महासागर येरसाईन, अदिक नी गयरा नीर दा मुळकेद्या,
EZE 26:20 आग गड्डा दा अदिक बिळावाळा अन सांगुळ ना नीनी भी प्राचिन लॉकुर दा ईळ्स बुळाईन; अदिक गड्डा दा बिळावाळेर सांगुळ नीनी भी ल्यालमा अन लोक दा ईटकु प्राचीनकाल इन नाश आग्द जागा अन घाई माळ कोमाईन; ईल ताका कि नी बाक बसुस सकतीदील अदिक न जीवनलोक दा यातोदारा जागा नोळ्या.
EZE 26:21 ना नीनी घबरूसोद कारण माळाईन, अदिक नी भविष्य दा मात्त ईरतीदील, बल्की ढुंढ्सदुर मा भी नींद पता नळुतीदील, परमेश्वर यहोवा अन ईदा वाणी हुन.”
EZE 27:1 बाक यहोवा अन ईद वचन नान हाती पोहचुस्त,
EZE 27:2 “हे मंळसा अन पारा, सोर उन बारा दा ऊंद दुख इन हाळ माळकु आऊन से ईद अन,
EZE 27:3 हे समुद्र अन प्रवेश द्वार मा ईरावळ्त, हे हापाळ सा द्वीपगोळ साटी द्याश द्याश इन लॉकुर सांगुळ व्यापार माळावळ्त, परमेश्वर यहोवा ईद अनतान: हे सोर, नी अंद्या कि ना सर्वांग सुन्दर आईन.
EZE 27:4 नीन सीमा समुद्र अन न्याड्या आद; नीन माळावाळा नीनी सर्वांग सुन्दर माळदुन.
EZE 27:5 नीन सप्पा पटरीगोळ सनीर पहाळी इन सनौवर इन हुळ्ली इन माळकु आद; नीन मस्तूल इन साटी लबानोन उन देवदार साटी होग्यार.
EZE 27:6 नीन डाड बाशान प्रदेश इन बांज मार्रगोळ आग्याव; नीन ड्वांगागोळ पटाव कित्तिगोळ द्वीपगोळ से तनकु सीधा सनौवर इन हत्ती अन हल्ल हतकु हुळ्ली देल आत.
EZE 27:7 नीन ड्वांगागोळ्द पाल मिस्त्र टु तनकु बूटेदार सन इन कपळा बन्सदव कि नीन साटी झण्डा अन क्याल्सा कोळुल; नीन चांदनी एलीशा अन द्वीप देल लादुसकु नीळा अदिक जांभळा रंग इन रंग इन कपळा अन माळकु आत.
EZE 27:8 नीन खेऊसावाळा सीदोन अदिक अर्वद इन ईरावाळेर ईरोर; हे सोर, नींद अन न्याड्या अन बुद्धिमान लॉकुर नीनोर माँझी ईरोर.
EZE 27:9 नीनोर कारीगर गबल नगर इन हाळाबाट्टुर अदिक बुद्धिमान लॉकुर ईरोर; नीन दा व्यापार माळोर साटी मल्लाहगोळ सांगुळ समुद्र माकळव सप्पा ड्वांगा नीन दा होट्ट बंदीदव.”
EZE 27:10 नीन सेना फारसी, लूद, अदिक पूत जात इन लॉकुर भरती आगीदुर; आंदुर नीन दा ढाल, अदिक टोपी टांग्सदुर; अदिक आंदुर्द अच कारण नीन प्रताप वाळुस्त.
EZE 27:11 नीन शहरपनाह मा नीन सेना अन सांगुळ अर्वद इन नाकु दी ईरोर; अदिक नीन गुम्मटगोळ दा शूरवीर निदुरकु ईरोर; आंदुर तान ढालगोळ नीन नाकु दीकळोद शहरपनाह मा टांग्सदुर; नीन सुंदरता आंदुर द्वारा पुरा आगीत.
EZE 27:12 “तान सप्पा प्रकार इन सम्पत्ति इन बहुतायत इन कारण तर्शीशी लॉकुर नीन व्यापारी ईरोर; आंदुर बेळ्ली, लोहा, टीन अदिक सीसा कोटकु नीन माल कोंड कोंडुर.
EZE 27:13 यावान, तूबल, अदिक मेशेक इन लॉकुर नीन माल इन बदला दास दासी अदिक पीतल इन बरतन नीन से व्यापार माळतार.
EZE 27:14 तोगर्मा अन घराना अन लॉकुर इन सम्पत्ती ताकोमकु घ्वाळा, सवारी इन घ्वाळा अदिक खच्चर कोट्टुर.
EZE 27:15 ददान नगर इन व्यापारी ईरोर; हापाळ सा द्वीप नीन हाट बन्सकु ईरव; आंदुर नीन हाती हाथीहल्ल इन सींग अदिक आबनूस इन हुळ्ली व्यापार दा तर तोगोर.
EZE 27:16 नीन हापाळ कारीगर इन कारण अराम नीन व्यापारी ईरोन; मरकत, जांभळा रंग इन रंग इन अदिक बूटेदार कपळा, सन, मूंगा, अदिक लालडी कोटकु आंदुर नीन माल कोमतोगोर.
EZE 27:17 यहूदा अदिक इस्त्राएली भी नीनोर व्यापारी ईरोर; आंदुर मिन्नीत इन गोदी, पन्नग, अदिक शयद, याण्णा, अदिक बलसान कोटकु नींद माल कोंडुन.
EZE 27:18 नीन दा हापाळ कारीगर आत अदिक सप्पा प्रकार इन धन जमा आत, ईदुर देल दमिश्क नीन व्यापारी आदुन; अदिक नीन हाती हेलबोन उन अंगुर इन रास्सा अदिक बिळीद ऊन पोहचुस्कु आत.
EZE 27:19 यावान अदिक वदान इन लॉकुर नीन माल इन बदला दा सूत कोट्टुर; अदिक आंदुर कारण फौलाद, तज अदिक अगर दा भी नीन व्यापारी आदुन.
EZE 27:20 सवारी इन नाक जामे अन साटी ददान नीन व्यापारी आत.
EZE 27:21 अरब अदिक केदार इन सप्पा प्रधान नीन व्यापारी ठहरूसदुर; आंदुर पाड्डा, म्यांडा अदिक व्हातगोळ हुडुकु नीन सांगुळ लेन देन माळदुर.
EZE 27:22 शबा अदिक रामा अन व्यापारी नीनोर व्यापारी ठहरूसदुर; आंदुर उत्तम उत्तम राज्य अन सप्पा प्रकार इन मसाला, सप्पा प्रकार इन मणी, अदिक व्हान्ना कोटकु नींद माल कोंडुर.
EZE 27:23 हारान, कन्ने, एदेन, शबा अन व्यापारी, अदिक अश्शूर अदिक कलमद, ईंदुर सप्पा नीन व्यापारी ठहरूसदुर.
EZE 27:24 ईंदुर वळ्लेव वळ्लेव वस्तुगोळ मतलब होदोर साटी नीळा अदिक बूटेदार कपळा अदिक डोरीगोळ देल कटकु अदिक देवदार इन माळ्द चित्र विचित्र कपळा अन पेटीगोळ तनकु नीन सांगुळ लेन देन माळतोगोर.”
EZE 27:25 तर्शीश इन ड्वांगा नीन व्यापार इन माल इन ढाऊसावाळेर आदुर. “आंदुर द्वारा नी समुद्र अन न्याड्या ईतकु हापाळ धनवान अदिक प्रतापी आगेगीदुर.
EZE 27:26 नीन खिवैया नीनी गहरा नीर दा पोहचुसदुर, अदिक हवा नीनी समुद्र अन न्याड्या मुरू कोम्त.
EZE 27:27 या दिशी नी मुळक्या, अदा दिशी नीन धन सम्पत्ती, व्यापार इन माल, मल्लाह, माँझी, जुळाई इन क्याल्सा माळावाळेर, व्यापारी लॉकुर, अदिक नीन दा यास सिपाही आर, अदिक नीन सप्पा भीळ-भाळ समुद्र अन न्याड्या बीदोदीत.
EZE 27:28 नीन माँझीगोळ चिल्ळासोद शब्द इन मारा नीन आसपास इन जागा नळ्गकु बीद्दव.
EZE 27:29 सप्पा खेऊसावाळेर मल्लाह, अदिक समुद्र दा यास माँझी ईरतार, आंदुर तान तान ड्वांगा मा टु ईळदार.
EZE 27:30 अदिक आंदुर जमीन मा नीदुरकु नीन बारा दा ऊँचा शब्द देल बिलखुस बिलखुसकु वर्ल्यार. आंदुर तान तान ताल्ला मा धुळा हार्सकु राख दा लोटुस्यार;
EZE 27:31 अदिक नीन दुख दा तान ताल्ला टकला माळ्यार, अदिक नेळु दा टाट कटकु तान मन इन हापाळ दुख इन सांगुळ नीन बारा दा वर्ल्यार अदिक याद्दा पीटस्यार.
EZE 27:32 आंदुर विलाप माळतेला नीन बारा दा ईद हाळ माळकु हाळ्यार: सोर जो ईग समुद्र अन न्याड्या चुपचाप बीदकु आद, अदुर तुल्य याता नगरी आद?
EZE 27:33 याग नीन माल समुद्र मा टु होळ तोगोद, आग हापाळ सा राज्य अन लॉकुर तृप्त आगतोगोर; नीन धन अदिक व्यापार इन माल इन बहुतायत देल पृथ्वी इन राजा धनी आगतोगोर.
EZE 27:34 या समय नी अथाह नीर दा लयरगोळ देल मुर्द, आ समय नीन व्यापार इन माल, अदिक नीन सप्पा निवासी भी नीन बुळ्क ईतकु नष्ट आगेदुर.
EZE 27:35 समुद्र तटीय द्याश इन सप्पा ईरावाळेर नीन कारण विस्मित आदुर; अदिक आऊन सप्पा राजागोळ रोंगटागोळ नीदरेदव, अदिक आंदुर बाय मा उदासी छासेत.
EZE 27:36 द्याश द्याश इन व्यापारी नीन विरूद्ध ताना होडेत्यार; नी अंज्क इन कारण आगेग्या अदिक बाक स्थिर ईर सकतीदील.”
EZE 28:1 बाक यहोवा अन ईद वचन नान हाती पोहचुस्त,
EZE 28:2 “हे मंळसा अन पारा, सोर उन प्रधान से अन, परमेश्वर यहोवा ईद अनतान: नी मन दा फुलुस्कु ईद अंद्या, ‘ना ईश्वर हुईन, ना समुद्र अन न्याड्या परमेश्वर उन आसन मा कुर्तकु आईन,’ लेकीन अगर नी तान तानीक परमेश्वर घाई तोर्सत्या, तरी भी नी ईश्वर आलच, मंळसा अच हुय.
EZE 28:3 नी दानिय्येल से येक्कुल बुद्धिमान रा आय; यातोदु भेद नीन से होच कोमकु ईरतीदील;
EZE 28:4 नी तान बुद्धि अदिक समझ इन द्वारा धन हासील माळ्या, अदिक तान भण्डारगोळ दा व्हान्ना अदिक चाँदी ईट्या;
EZE 28:5 नी धोळ बुद्धि देल लेन देन माळ्या यदुर देल नीन धन वाळुस्याद, अदिक धन इन कारण नीन मन फुलुस्याद.
EZE 28:6 ई कारण परमेश्वर यहोवा ईद अनतान: नी जो तान मन परमेश्वर घाई तोर्सत्या,
EZE 28:7 ईदुरसाटी नोळ, ना नीन मा हींग परदेशीगोळ से चळाई माळसुसाईन, जो सप्पा राज्यगोळ से येक्कुल हुंसात्मक आद, आंदुर नीन सुंदरता अदिक बुद्धि विरूद्ध तलवारगोळ तेगदार अदिक नीन चमकुसतेला वैभव इक छेदुस कोंडार. अदिक नीन चमक-दमक इक बिगळुसतार.
EZE 28:8 आंदुर नीनी कब्र दा ईळस्यार, अदिक नी समुद्र अन न्याड्या अन कोंदुर रिती मा सोतोद्या.
EZE 28:9 आग, येन नी तान घात माळावाळेर मुंद अनतेला ईत्या, ना परमेश्वर हुईन? नी तान घायल माळावाळेर कय दा ईश्वर ईला, मंळसा अच ठहरूस्या.
EZE 28:10 नी परदेशीगोळ कय टु खतनाहीन लॉकुरगोळ घाई कोंदकु आद्या; यतिकी ना अच हींग अंदीन, परमेश्वर यहोवा अन ईदा वाणी हुन.”
EZE 28:11 बाक यहोवा अन ईद वचन नान हाती पोहचुस्त:
EZE 28:12 “हे मंळसा अन सन्तान, सोर उन राजा अन बारा दा दुख इन हाळ माळकु आऊन से अन; परमेश्वर यहोवा ईद अनतान: नी रा उत्तम से भी उत्तम आय; नी बुद्धि देल भरपुर अदिक सर्वांग सुन्दर आय.
EZE 28:13 नी परमेश्वर उन अदन हेसुर इन बगीचा दा ईर्या; नीन हाती आभूषण, माणिक, पद्यराग, हीरा, फीरोजा, सुलैमानी मणी, यशब, नीलमणि, मरकद, अदिक क्याच्यान सप्पा प्रकार इन मणी अदिक व्हान्ना अन पहिनावा ईरव; नीन टापटी अदिक कोळ्लगोळ नीन दा माळकु आगीदव; या दिशी नी माळकु आगीद, अदा दिशी आंदुर भी तैयार माळकु आगीदुर.
EZE 28:14 नी छाऊसावाळा अभिषिक्त गिधाळ ईर्‍या, ना नीनी हींग ठहरूसीन कि नी परमेश्वर उन पवित्र पहाळी मा ईरतोग्या; नी बेक्की घाई चमकुसावाळा मणीगोळ न्याड्या नळा वयाळ्या.
EZE 28:15 या दिशी नी माळकु आद, अदिक या दिशी ताका नीन दा कुटीलता नोळकु आगीदील, आ समय ताका नी तान सप्पा चालचलन दा निर्दोष ईत्त.
EZE 28:16 लेकीन लेन देन इन हापाळ इक कारण उपद्रव देल तुमकु पापी आगेद; ईदुर देल ना नीनी अपवित्र जान्सकु परमेश्वर उन पहाळी मा ईळ्सदीन, अदिक छाऊसावाळा गिधाळ ना नीनी बेक्की घाई चमकुसावाळा मणीगोळ न्याड्या टु नष्ट माळीन.
EZE 28:17 सुंदरता अन कारण नीन मन फुल्सकु बंदाद; अदिक वैभव इन कारण नीन बुद्धि बीगळुसीगीत. ना नीनी जमीन मा आपळुस बुटीदीन; अदिक राजागोळ मुंद नीनी ईटदीन कि आंदुर नीनी नोळुल.
EZE 28:18 नीन धर्म इन क्याल्सा अन हापाळ अदिक नीन लेन देन इन कुटीलता देल नीन पवित्र जागा अपवित्र आगेदव; ईदुरसाटी ना नीनी नीन से हींग बेक्की पैदा माळदीन यदुर देल नी भस्म आद, अदिक ना नीनी सप्पा नोळावाळेर मुंद जमीन मा भस्म माळ कोंडीन.
EZE 28:19 द्याश द्याश इन लॉकुर दा टु यास नीनी जान्सतार सप्पा नीन कारण विस्मित आदुर; नी अंज्क इन कारण आग्या अदिक बाक यागलु नोळकु आगतीदील.”
EZE 28:20 यहोवा अन ईद वचन नान हाती पोहचुस्त:
EZE 28:21 “हे मंळसा अन सन्तान, तान बाय सीदोन इन दी माळकु आऊन विरूद्ध भविष्यवाणी माळ,
EZE 28:22 अदिक अन, प्रभु यहोवा ईद अनतान: हे सीदोन, ना नीन विरूद्ध आईन; ना नीन न्याड्या तान महिमा माळसुसाईन. याग ना आऊन न्याड्या दण्ड कोळाईन अदिक आऊन दा तान इक पवित्र ठहरूसाईन, आग लॉकुर जान्स कोंडार कि ना यहोवा हुईन.
EZE 28:23 ना अदुर दा मरी फैलुसाईन, अदिक आऊन सकळगोळ दा रक्ता वाहुसाईन; अदिक आऊन नाकु दी तलवार नळदव; आग आऊन न्याड्या तलवार नळदव; आग आऊन न्याड्या घायल लॉकुर बीद्दार, अदिक आंदुर जान्स कोंडार कि ना यहोवा हुईन.
EZE 28:24 “इस्त्राएल उन घराना अन नाकु दीकळव यास राज्य आंदुर सांगुळ अभिमान इन बर्ताव माळताव, अऊर दा टु यातोदु नळावाळा मुळ्ल या कटावाळा शूल मात ठहरूसीतीदील; आग आंदुर जान्स कोंडार कि ना परमेश्वर यहोवा हुईन.
EZE 28:25 “परमेश्वर यहोवा ईद अनतान: याग ना इस्त्राएल उन घराना अक आ सप्पा लॉकुर दा टु जमा माळाईन, यार न्याड्या आंदुर तीतर-बितर आग्यार, अदिक द्याश द्याश इन लॉकुर मुंद आंदुर द्वारा पवित्र ठहरूसाईन, आग आंदुर आ द्याश दा वास माळ्यार जो ना तान दास याकूब उक कोटीदीन.
EZE 28:26 आंदुर अदुर दा निडर बसुसकु ईत्तार; आंदुर मान्ना माळकु अदिक अंगुर इन बगीचा हचकु निडर ईत्तार; आग ना आंदुर नाकु दीकळोर सप्पा लॉकुरी दण्ड कोळाईन जो आंदुर से अभिमान इन बर्ताव माळतार, आग आंदुर जान्स कोंडार कि आंदुर परमेश्वर यहोवा अच हुन.”
EZE 29:1 हतवा वर्ष इन हतवा तींगुळ इन हन्नेळवा दिशी यहोवा अन ईद वचन नान हाती पोहचुस्त:
EZE 29:2 “हे मंळसा अन सन्तान, तान बाय मिस्त्र अन राजा फिरौन उन दी माळकु आऊन दी अदिक सप्पा मिस्त्र अन विरूद्ध भविष्यवाणी माळ;
EZE 29:3 ईद अन परमेश्वर यहोवा ईद अनतान: हे मिस्त्र अन राजा फिरौन, ना नीन विरूद्ध आईन, हे धोड्डेव मगर, नी जो तान गांगागोळ न्याड्या बिदकु ईरत्या, याव अंदान, नील गांगा नान खुद इन हुन, अदिक ना अदरी तान साटी माळीन.”
EZE 29:4 नान नीन जबळागोळ दा आकळागोळ हाकाईन, अदिक नीन गांगा अन मेनगोळी नीन तोगुल दा चिपकुसाईन, अदिक नीन तोगुल दा चिपकुस्द नीन गांगा अन सप्पा मेनगोळ सांगुळ नीनी इक नीन गांगागोळ दा टु तेगाईन.
EZE 29:5 आग ना नीनी नीन गांगागोळ सप्पा मेनगोळ सांगुळ आळी दा तेगु कोमाईन, अदिक नी मैदान दा बीदकु ईत्या; यातोदु प्रकार देल नीन सुधी ताकोमकु आगतीदील. ना नीनी आळी दाकळव जनावर अदिक आकाश इन पक्षीगोळ्द आहार माळ कोंडीन.
EZE 29:6 आग मिस्त्र अन सप्पा निवासी जान्स कोंडार कि ना यहोवा हुईन. आंदुर रा इस्त्राएल उन घराना अन साटी नरकट इन टेक ठहरुसदुर.
EZE 29:7 याग आंदुर नीन मा कय इन बल कोट्टुर आग नी मुरदोद अदिक आंदुर खांदा कित्तेदव, अदिक याग आंदुर नीन मा टेक हचदुर, आग नी मुरदोद, अदिक आंदुर नेळु उन सप्पा नसगोळ येरेदव.
EZE 29:8 ई कारण प्रभु यहोवा ईद अनतान: नोळ, ना नीन मा तलवार नळ्सकु, नीन मंळसा अदिक जनावर, सप्पा अन नाश माळाईन.
EZE 29:9 आग मिस्त्र द्याश ऊजाळ अच ऊजाळ आदीत; अदिक आंदुर जान्स कोंडार कि ना यहोवा हुईन. “नी अंद्या, ‘नील गांगा नांद हुन, अदिक ना अच अदरी माळीन.’
EZE 29:10 ई कारण नोळ, ना नीन अदिक नीन गांगागोळ विरूद्ध आईन अदिक मिस्त्र द्याश इक मिग्दोल टु हुडुकु सवेने ताका बल्की कूश द्याश इन सीमा ताका उजाळ अच उजाळ माळ कोमाईन.”
EZE 29:11 चालीस वर्ष ताका अदुर दा मंळसा या जनावर इन काल ताका ईला बीदीत; अदिक न अदुर दा याऊ कुरतान.
EZE 29:12 चालीस वर्ष ताका ना मिस्त्र द्याश इक नाश आग्द द्याशगोळ न्याड्या उजाळ माळकु ईटाईन; अदिक अदुर नगर नाश आग्द नगरगोळ न्याड्या खण्डर अच ईत्तव. ना मिस्त्रीगोळी राज्य राज्य दा छिन्न भिन्न माळ कोमाईन, अदिक द्याश द्याश दा तितर-बितर माळ कोमाईन.
EZE 29:13 “परमेश्वर यहोवा ईद अनतान: चालीस वर्ष इन बित्सदुर मा ना मिस्त्रीगोळी आ राज्यगोळ न्याड्या टु जमा माळाईन, यदुर दा आंदुर तीतर बीतर आदुर;
EZE 29:14 अदिक ना मिस्त्रीगोळी गुलामी टु बीळ्सकु पत्रोस द्याश दा जो आंदुर्द खुद इन जनम भूमी आद, मात पोहचुसाईन; अदिक अल आंदुर्द श्याणतुसा राज्य आगेदीत.
EZE 29:15 अद सप्पा राज्य दा श्याण ईत्तीत, अदिक बाक तान ताल्ला अदिक राज्यगोळ म्याकुच नेगुतीदील; यतिकी ना मिस्त्रीगोळ इक हींग घटुसाईन कि आंदुर राज्य राज्य मा मात प्रभुता माळ सक्यार.
EZE 29:16 आव बाक इस्त्राएल उन घराना अन भरोसा अन कारण आगतीदील, यतिकी याग आंदुर मात आंदुर दी नोळली कुरूल, आग आंदुर जान्स कोंडार कि ना परमेश्वर यहोवा हुईन.”
EZE 29:17 बाक सत्ताइसवा वर्ष इन पयला तींगुळ इन पयला दिशी इक यहोवा अन ईद वचन नान हाती पोहचुस्त:
EZE 29:18 “हे मंळसा अन सन्तान, बेबीलोन उन राजा नबूकदनेस्सर सोर उन घराना दा तान सेना देल धोळ मयनत माळसुसदुन; हर ऊंद उन ताल्ला टकल आगेत, अदिक ऊंद उन खांदा अन तोगुल छिलसेत; तरी भी आऊक सोर देल न रा ई धोळ मयनत इन मजदुरी येनारा सीक्त अदिक न आऊन सेना अक.
EZE 29:19 ई कारण परमेश्वर यहोवा ईद अनतान: नोळ, ना बेबीलोन उन राजा नबूकदनेस्सर उक मिस्त्र द्याश कोळाईन, अदिक आव आऊन भीळ इक वोतान, अदिक आऊन धन सम्पती इक लुट्सकु तान माळ कोंडान; अत: ईदा मजदुरी आऊन सेना अक सीक्कीत.
EZE 29:20 ना आऊन मयनत इन बदला दा आऊक मिस्त्र द्याश इ कारण कोट्टीन कि आ लॉकुर नान साटी क्याल्सा माळीदुर, परमेश्वर यहोवा अन ईदा वाणी आद.
EZE 29:21 “अदा समय ना इस्त्राएल उन घराना अन ऊंद सींग उगुसाईन, अदिक आंदुर न्याड्या नीन बाय खोलसाईन. आग आंदुर जान्स कोंडार कि ना यहोवा हुईन.”
EZE 30:1 बाक यहोवा अन ईद वचन नान हाती पोहचुस्त:
EZE 30:2 “हे मंळसा आन पारा, भविष्यवाणी माळकु अन, परमेश्वर यहोवा ईद अनतान: हाय, हाय माळी, हाय आ दिन मा!
EZE 30:3 यतिकी अद दिन मतलब यहोवा अन दिन हाती आद; अद बादलगोळ दिन, अदिक जातीगोळ्द दण्ड इन समय आदीत.
EZE 30:4 मिस्त्र दा तलवार नळदव, अदिक याग मिस्त्र दा लॉकुर कोंदकु बिद्दार, आग कूश दा भी संकट बिद्दीत, लॉकुर मिस्त्र इक लुट्सकु वोतार, अदिक अदुर नीवगोळ उलटुसकु आदव.
EZE 30:5 कूश, पूत, लूद अदिक सप्पा दोगला, अदिक सप्पा कूब लॉकुर, अदिक वाचा कटकु आर द्याश इन लॉकुर, मिस्त्रीगोळ सांगुळ तलवार देल कोंदकु आदार.”
EZE 30:6 यहोवा ईद अनतान: मिस्त्र अन संभाळसा वाळेर भी बिद्दार, अदिक तान याता सामर्थ मा मिस्त्री फुलुसतार, अद मुरदीत; मिग्दोल टु हुडुकु सवेने ताका आंदुर निवासी तलवार देल कोंदकु आदार, परमेश्वर यहोवा अन ईदा वाणी आद.
EZE 30:7 आंदुर ऊजळा द्याशगोळ बीच ऊजळा ठहरूस्यार, अदिक आंदुर नगर खण्डर माळकु आग्याव आ नगरगोळ दा गिन्सकु आदव.
EZE 30:8 याग ना मिस्त्र दा बेक्की हचाईन अदिक अलेर सप्पा सहायक नष्ट आदार, आग आंदुर जान्स कोंडार कि ना यहोवा हुईन.
EZE 30:9 “आ समय नान मुंदु टु दूत जहाजगोळ मा येरकु निडर होट्टार अदिक कूश लॉकुरी अंजुस्यार; अदिक आंदुर मा ईत्ता संकट बिद्दीत ह्यांग कि मिस्त्र अन दण्ड इन समय; यतिकी नोळ, अद दिन बरेत्याद!
EZE 30:10 परमेश्वर यहोवा ईद अनतान: ना बेबीलोन उन राजा नबूकदनेस्सर उन कय देल मिस्त्र अन भीळ-भाळ इन नाश माळसुस बुळाईन.
EZE 30:11 आव तान प्रजा अन सांगुळ, जो सप्पा जातीगोळ दा भयानक आद, आ द्याश इन नाश माळोर साटी पोहचुस्कु आदान; अदिक आंदुर मिस्त्र अन विरूद्‍ध तलवार जेडुकु द्याश इक सोत्त मंळसागोळ देल तुम कोंडार.
EZE 30:12 ना गांगागोळी वंळगास बुळाईन, अदिक द्याश इक बुरा लॉकुरगोळ कय दा माळ बुळाईन; अदिक ना परदेशीगोळ द्वारा द्याश इक, अदिक जो येनारा अदुर दा आद, ऊजाळ्स बुळाईन; ना यहोवा अच ईद अंदीन.”
EZE 30:13 “परमेश्वर यहोवा ईद अनतान: ना नोप देल मुरतगोळ नाश माळाईन अदिक अदुर दाकळव मुरतीगोळी ईर गोळतीदिल; बाक याऊ प्रधान मिस्त्र द्याश दा येळतीदिल; अदिक ना मिस्त्र द्याश दा अंज्क पैदा माळाईन.
EZE 30:14 ना पत्रोस नगर इक ऊजाळ्स बुळाईन, अदिक सोअन दा बेक्की हचाईन, अदिक नो नगर इक दण्ड.
EZE 30:15 सीन जो मिस्त्र द्याश इन गढ़ जागा आद, अदुर मा ना तान जलजलाहट भळकुसाईन, अदिक नो नगर इन भीळ-भाळ इन अन्त माळ कोमाईन.
EZE 30:16 ना मिस्त्र दा बेक्की हचाईन; सीन हापाळ थरथरूसेदीत; अदिक नो नगर हरकु आदीत अदिक नोप नगर इन विरोधी हागुल इन होती येद्दार.
EZE 30:17 ओन अदिक पीवेसेत इन जवान तलवार देल बिद्दार, अदिक ई नगर गुलामी दा होटोदव.
EZE 30:18 याग ना मिस्त्र अन राज्य अन अन्त माळाईन, अदिक याग अदुर घमण्ड चुर-चुर आगेदीत, आग तहपन्हेस नगर दा हागुल इन ऊजोळ अंदार दा बदलुसेदीत, सप्पा मिस्त्र द्याश बादल देल मुचेदीत; अदिक अदुर सप्पा पोरगोळ गुलाम आगकु विदेश होटोदार.
EZE 30:19 ई प्रकार ना मिस्त्र द्याश इक दण्ड कोळाईन. आग मिस्त्र-निवासीगोळी मालुम आदीत कि ना अच यहोवा हुईन.”
EZE 30:20 बाक हनुंद वा वर्ष इन पयला तिंगुळ अन येळवा दिन इक यहोवा अन ईद वचन नान हाती पोहचुस्त:
EZE 30:21 “हे मंळसा अन सन्तान, ना मिस्त्र अन राजा फिरौन इन भुजा मुर्द बुट्टुन; अदिक नोळ, न रा अद जोळ्सकु आत, न रा अदुर लेप हचकु पट्टी येर्सकु आत कि अद कटदुर देल तलवार हुडा योग्य आग सकुल.
EZE 30:22 ईदुरसाटी प्रभु यहोवा ईद अनतान: नोळ; ना मिस्त्र अन राजा फिरौन इन विरूद्‍ध आईन, अदिक आऊंद वळ्लीद अदिक मुर्दकु येढ्ढु भुजागोळी मुराईन; अदिक तलवार इक आऊन कय देल केडाईन.
EZE 30:23 ना मिस्त्रीगोळी जाती-जाती दा तितर-बितर माळाईन, अदिक द्याश-द्याश दा छितरूसाईन.
EZE 30:24 ना बेबीलोन उन राजा अन भुजागोळी बली माळकु तान तलवार आऊन कय दा कोळाईन; लेकीन फिरौन इन भुजागोळी मुराईन, अदिक आव आऊन मुंद हिंग कन्नास्यान जसा कि सायावाळा घायल कन्नास्तान.
EZE 30:25 ना बेबीलोन उन राजा अन भुजागोळी संभाळसाईन, अदिक फिरौन उन भुजागोळ ढीला बिद्दव, आग आंदुर जानस्यार कि ना यहोवा हुईन. याग ना बेबीलोन उन राजा अन कय दा तान तलवार कोळाईन, आग आव अदरी मिस्त्र द्याश मा नळस्यान;
EZE 30:26 अदिक ना मिस्त्रीगोळ इक जाती जाती दा तितर-बितर माळाईन अदिक द्याश द्याश दा छिळकुस बुळाईन. आग आंदुर जान्स कोंडार ना यहोवा हुईन.”
EZE 31:1 हनुंद वा वर्ष इन तीसरा तींगुळ इन पयला दिन इक यहोवा अन ईद वचन नान हाती पोहचुस्त:
EZE 31:2 “हे मंळसा अन सन्तान, मिस्त्र अन राजा फिरौन अदिक आऊन भीळ से अन, तान बळाई दा नी यार घाई आय.
EZE 31:3 नोळ, अश्शूर रा लबानोन उन ऊंद देवदार ईरोन यारव सुन्दर सुन्दर शाखागोळ, घना सावली कोळोद अदिक हापाळ ऊँचा ईरोद; अदिक अदुर फुगनी बादलगोळ ताका पोहचुसोद.
EZE 31:4 नीर अदरी वाळुस्त, अदिक गहरा नीर इन कारण अद ऊँचा आत, यदुर देल गांगागोळ अदुर जागा अन नाकु दी वाहुसोद; अदिक अदुर नालीगोळ होटकु मैदान इन सप्पा मार्रगोळ हाती पोहचुसोद.
EZE 31:5 ई कारण अदुर ऊचाई मैदान इन सप्पा मार्रगोळ से येक्कुल आत; अदुर डगालगोळ हापाळ आदव, अदिक अदुर शाखागोळ लम्बा आगेदव, यतिकी याग अव होट्टव, आग अवरी हापाळ नीर सीक्त.
EZE 31:6 अदुर डगालगोळ दा आकाश इन सप्पा पक्षीगोळ बसेरा माळतोगोव, अदिक अदुर खांदी इन ल्यालमा मैदान इन सप्पा प्रकार इन जीवजन्तु पैदा आगव; अदिक अदुर सावली दा सप्पा धोड्डेव जातीगोळ ईरतोगोव.
EZE 31:7 अद तान वाळ अदिक तान डगालगोळ्द लम्बाई इन कारण सुन्दर आत; यतिकी अदुर जळ हापाळ नीर इन हाती ईरोद.”
EZE 31:8 परमेश्वर उन बाळी इन देवदार भी अदरी ईला होचकोम सकोर, सनौबर अदुर डगालगोळ घाई भी ईला ईरव, अदिक न अर्मोन मार्र अदुर खांदीगोळ तुल्य ईरव; परमेश्वर उन बाळी इन भी यातोदु मार्र सुंदरता दा अदुर बराबर ईला ईरोद.
EZE 31:9 ना अदरी डगालगोळ्द बहुतायत देल सुन्दर माळीदीन, ईल ताका कि अदन इन सप्पा मार्र जो परमेश्वर उन बाळी दा ईरव, अदुर से डाह माळ तोगोव.
EZE 31:10 “ई कारण परमेश्वर यहोवा ईद अंदान: अदुर ऊचाई जो वाळुसीग्याद, अदिक अदुर वाळ जो बादलगोळ ताका पोहचुस्याद, अदिक तान ऊचाई इन कारण अदुर मन जो फुलुसीग्याद,
EZE 31:11 इदुरसाटी जातीगोळ दा जो सामर्थी आन, ना आऊंद अच कय अदरी माळ कोमाईन, अदिक आव सही दा अदुर से बुरा व्यवहार माळ्यान. आऊन दुष्टता अन कारण ना आऊक तेगु बुटीन.
EZE 31:12 परदेशी, जो जातीगोळ दा भयानक लॉकुर आर, आंदुर अदरी कडुकु भीट्ट बुट्टार, अदुर डगालगोळ पहाळी मा, अदिक सप्पा तराईगोळ दा केळकु आदव, अदिक अदुर सप्पा खांदागोळ द्याश इन सप्पा नाला दा मुर्दकु बीदकु ईत्तव, अदिक जाती जाती इन सप्पा लॉकुर अदुर सावली इक बिटकु वोळेदार.
EZE 31:13 अदुर बीदकु मार्र मा आकाश इन सप्पा पक्षी बसेरा माळेव; नीन खांदागोळ मा आळी दाकळव जनावर ईरली कुरतव.
EZE 31:14 ईद इदुरसाटी आग्याद कि नीर इन हाती इन सप्पा मार्रगोळ दा टु याऊ तान ऊचाई वाळुस बाळुल, न तान फुगनी इक बादलगोळ ताका पोहचुस्यान, अदिक अऊर दा टु यास नीर पाऊसकु मजबुत आगेग्याव अव ऊँचा आगदुर कारण ताल्ला नेगुबाळुल; यतिकी अव भी सप्पा अन सप्पा कब्र दा नळ्सकु मंळसागोळ घाई मृत्यु इन वश माळकु अधोलोक दा हाक्कु आदव.”
EZE 31:15 “परमेश्वर यहोवा ईद अनतान: याता दिशी आव अधोलोक दा ईळदान, आ दिशी ना विलाप माळाईन अदिक गहरा समुद्र अक ढाप्स कोंडीन, अदिक गांगा अन हापाळ नीर रूकसेत; अदिक अदुर कारण ना लबानोन मा उदासी छाऊसदीन, अदिक मैदान इन सप्पा मार्र मूर्छित आदव.”
EZE 31:16 याग ना अदरी कब्र दा नळ्सकु आर आंदुर हाती अधोलोक दा भीट्ट बुट्टीन, आग अदुर बीळोद आवाज देल जाती जाती थरथरूसेत, अदिक अदन इन सप्पा मार्र मतलब लबानोन इन वळ्लेव वळ्लेव मार्रगोळ, यास अदुर से नीर पाऊसोर, आ सप्पा अधोलोक दा शांती पाऊसदुर.
EZE 31:17 अव भी अदुर सांगुळ तलवार देल कोंदकु आर आंदुर हाती अधोलोक दा ईळदोदव; मतलब अव जो अदुर भुजा ईरव, अदिक जाती जाती इन बीच अदुर सावली दा ईर तोगोव.
EZE 31:18 “इदुरसाटी महिमा अदिक बळाई इन बीच बारा दा अदन इन मार्रगोळ दा टु नी यार घाई आय? नी रा अदन इन अदिक मार्रगोळ सांगुळ अधोलोक दा ईळ्सकु आद्या, अदिक खतनाहीन लॉकुर बीच तलवार देल कोंदकु आर आंदुर सांगुळ बिदकु ईत्या. फिरौन तान सप्पा भीळ-बाळ सांगुळ हिंगा ईत्तान, परमेश्वर यहोवा अन ईदा वाणी आद.”
EZE 32:1 हन्नेळवा वर्ष इन हन्नेळवा तिंगुळ इन पयला दिशी यहोवा अन ईद वचन नान हाती पोहचुस्त:
EZE 32:2 “हे मंळसा अन सन्तान, मिस्त्र अन राजा फिरौन उन बारा दा दुख इन हाळ माळकु आऊक केळ्स: जाती जाती दा नीन उपमा हारोद हुल्ल देल कोटकु आगीत, लेकीन नी समुद्र अन मगर इन घाई आय; नी तान गांगागोळ दा बीदोद, अदिक आंदुर नीर इक कालगोळ देल मथलुसकु डवा माळ कोंड.
EZE 32:3 परमेश्वर यहोवा ईद अनतान: ना हापाळ सा जातीगोळ सभा अन द्वारा नीन मा तान जाल फैलुसाईन अदिक आंदुर नीनी नान महाजाल दा जेडु कोंडार.
EZE 32:4 आग ना नीनी जमीन मा बिळाईन, अदिक मैदान दा भिटकु आकाश इन सप्पा पक्षीगोळ इक नीन मा कुरसाईन; अदिक नीन मास देल सप्पा पृथ्वी इन जीवजन्तुगोळ इक तृप्त माळाईन.
EZE 32:5 ना नीन मास इक पहाळी मा ईटाईन, अदिक तराईगोळी नीन ऊचाई देल तुम कोमाईन.
EZE 32:6 या द्याश दा नी तैरूसत्या, अदरी पहाळी ताका ना नीन रक्ता देल सीचिसाईन; अदिक अदुर नाला नीन देल तुम्मेदव.
EZE 32:7 या समय ना नीनी मिटुसली हताईन, आ समय ना आकाश इक ढापसाईन अदिक तारागोळी धुंधला माळ कोमाईन; ना सुर्य अक बादल देल होचकोमाईन, अदिक चंद्रमा तान ऊजोळ कोळतीदील.
EZE 32:8 आकाश दा यास प्रकाशमान ज्योतिगोळ आव, आ सप्पा अक ना नीन कारण धुंधला माळ कोमाईन, अदिक आकाश नीन द्याश दा अंधकार माळ कोमाईन, परमेश्वर यहोवा ईदा वाणी आद.”
EZE 32:9 “याग ना नीन विनाश इन समाचार जाती जाती दा अदिक नीन अनजाना द्याशगोळ दा फैलुसाईन, आग धोड्डेव धोड्डेव द्याश इन लॉकुर इन मन दा सिट्ट पैदा माळाईन.”
EZE 32:10 ना हापाळ सा जातीगोळी नीन कारण विस्मीत माळ कोमाईन, अदिक याग ना आंदुर राजागोळ मुंद तान तलवार कळाईन, आग नीन कारण आंदुर रोंगटा नीदरेदव, अदिक नीन बीळा दिशी आंदुर तान तान जीव इन साटी नळ्गतेला ईत्तार.
EZE 32:11 यतिकी परमेश्वर यहोवा ईद अनतान: बेबीलोन उन राजा अन तलवार नीन मा नळदीत.
EZE 32:12 ना नीन भीळ इक ईत्ता शूरवीरगोळ तलवार इक द्वारा केळसुसाईन जो सप्पा जातीगोळ दा भयानक आर. “आंदुर मिस्त्र अन घमण्ड इक मुरदार, अदिक अदुर सप्पा भीळ इन सत्यानाश आदीत.
EZE 32:13 ना आउन सप्पा जनावरगोळ इक आऊन हापाळ सा जलाशयगोळ तट मा टु नष्ट माळाईन; अदिक भविष्य दा न रा मंळसा अन काल देल अदिक न जनावर उन खुरगोळ देल डवला माळकु आदव.
EZE 32:14 आग ना आंदुर नीर निर्मल माळ कोमाईन, अदिक आंदुर गांगागोळ याण्णा अन घाई वाहुसीत, परमेश्वर यहोवा अन ईदा वाणी आद.
EZE 32:15 याग ना मिस्त्र द्याश उन उजाळ माळ कोमाईन अदिक यदुर देल अद हापाळ आद, अदुर देल छुछा माळ कोमाईन, अदिक याग ना आऊन सप्पा ईरावाळेर इक कोन्नाईन, आग आंदुर जान्स कोंडार कि ना यहोवा हुईन.”
EZE 32:16 “लॉकुर दुख माळोर साटी दुख इन हाळ ईदा हुन; जाती जाती इन आर्तेर ईदरी हाळ्यार; मिस्त्र अदिक अदुर सप्पा भीळ इन बारा दा अव ईवा विलाप हाळ हाळ्यार, परमेश्वर यहोवा अन ईदा वाणी आद.”
EZE 32:17 बाक हन्नेळवा वर्ष इन पयला तींगुळ इन पंद्रवा दिशी इक यहोवा अन ईद वचन नान हाती पोहचुस्त:
EZE 32:18 “हे मंळसा अन सन्तान, मिस्त्र अन भीळ इन साटी हाय हाय माळ, अदिक आऊक प्रतापी जातीगोळोर पोरगोळ सांगुळ कबर दा नळ्सकु आर आंदुर हाती अधोलोक दा ईळ्स.
EZE 32:19 नी यार से मनोहर आय? नी ईळकु खतनाहीनगोळ सांगुळ बिदकु ईर.
EZE 32:20 “आंदुर तलवार देल सोत्तुर इन न्याड्या बीद्दार, आंदुर साटी तलवार अच ठहरूसकु आग्याद, ईदुरसाटी मिस्त्र अक अदुर सप्पा भीळ इन सांगुळ जेडुकु तरी.
EZE 32:21 सामर्थी शूरवीर आऊन से अदिक सहायकगोळ से अधोलोक दा मातगोळ माळ्यार; आंदुर खतनाहीन लॉकुर अल तलवार देल बीदकु ईत्तार.”
EZE 32:22 तान सप्पा सभा सांगुळ अश्शूर भी अल आर, आऊन कब्रगोळ आऊन नाकु दी आव; सप्पा च्या सप्पा तलवार देल कोंदकु आग्यार.
EZE 32:23 आउन कब्रगोळ गड्डा अन क्वाना दा बन्सकु आव, अदिक आऊन तलवार कबर इन नाकु दी आंदुरव सभा आव; आंदुर सप्पा च्या सप्पा जो जीवनलोक दा अंज्क उपजुसतार, ईग तलवार देल सोतकु बीदकु आर.
EZE 32:24 “अल एलाम आन, अदिक आऊन कबर इन नाकु दी आऊन सप्पा भीळ आद; आंदुर सप्पा अन तलवार देल सोतकु आग्यार, आंदुर खतनाहीन अधोलोक दा ईळदार; आंदुर जीवनलोक दा अंज्क उपजुसोर, लेकीन ईग कबर दा अदिक नळ्सकु आग्यार आंदुर बाय मा भी सियाही छाऊसकु आद.
EZE 32:25 आऊन सप्पा भीळ सांगुळ आऊक कोंदकु आर आंदुर न्याड्या सेज सिक्त, आऊन कब्रगोळ आऊन अच नाकु दी आव, आंदुर सप्पा मुंदुर खतनाहीन तलवार देल कोंदकु आग्यार; आंदुर जीवनलोक दा अंज्क पैदा माळीदुर, लेकीन ईग कबर दा अदिक गड्डागोळ सांगुळ आंदुर बाय मा सियाही छाऊसकु आद; अदिक आंदुर सोत्तुर इन न्याड्या ईटकु आग्यार.”
EZE 32:26 अल सप्पा भीळ सांगुळ मेशेक अदिक तूबल आन, आंदुर नाकु दी कब्रगोळ आव; आंदुर सप्पा च्या सप्पा खतनाहीन तलवार देल कोंदकु आग्यार, यतिकी जीवनलोक दा आंदुर अंज्क पैदा माळोर.
EZE 32:27 आ आळ्दकु खतनाहीन शूरवीरगोळ सांगुळ आंदुर बीदकु ईरतीदील जो तान तान युध्द इन हथियार हुडुकु अधोलोक दा ईळदोग्यार, अल आंदुर तलवारगोळ आंदुर ताल्ला अन ल्यालमा ईटकु आव; अदिक आंदुर अधर्म इन क्याल्सा आंदुर येलुगोळ दा व्याप्त आव; यतिकी जीवनलोक दा आंदुर से शूरवीरगोळ भी अंज्क पैदा माळोन.
EZE 32:28 ईदुरसाटी नी भी खतनाहीन उन सांगुळ अंग-भंग आगकु तलवार देल सोत्तुर सांगुळ बीदकु ईत्या.
EZE 32:29 “अल एदोम अदिक आऊन राजा अदिक आऊन सप्पा प्रधान आर, जो पराक्रमी आगदुर मा भी तलवार देल सोत्तुरगोळ सांगुळ ईटकु आर; गड्डा दा गड्डा आदव खतनाहीन लॉकुर सांगुळ आंदुर भी बीदकु ईत्तार.”
EZE 32:30 “अल उत्तर दिशा अन सप्पा प्रधान अदिक सप्पा सीदोनी भी आर जो सोत्तुर सांगुळ ईळदोग्यार; आंदुर तान पराक्रम देल अंज्क पैदा माळीदुर, लेकीन ईग आंदुर लज्जित आदुर अदिक तलवार देल अदिक सोत्तुरगोळ सांगुळ आंदुर भी खतनाहीन बीदकु आर, अदिक कबर दा अन्य नळ्सकु आर आंदुर सांगुळ बाय भी सियाही छाऊसकु आद.
EZE 32:31 ईंदरी नोळकु फिरौन भी तान सप्पा भीळ इन बारा दा शांती पाऊस्यान, हव फिरौन अदिक आऊन सप्पा सेन जो तलवार देल कोंदकु आगीत, परमेश्वर यहोवा अन ईदा वाणी आद.
EZE 32:32 यतिकी ना आऊन कारण जीवनलोक दा अंज्क पैदा माळीदीन; ईदुरसाटी अद सप्पा भीळ सांगुळ तलवार देल अदिक सोत्तुर सांगुळ खतनाहीनगोळ न्याड्या मिंग्सकु आदीत, परमेश्वर यहोवा अन ईदा वाणी आद.”
EZE 33:1 यहोवा अन ईद वचन नान हाती पोहचुस्त:
EZE 33:2 हे मंळसा अन सन्तान, तान लॉकुर से अन, याग ना यातोदारा द्याश मा तलवार नळ्सली हताईन अदिक आ द्याश इन लॉकुर यारीकारा तान पहरेदार माळकु ठहरूसतार,
EZE 33:3 आग अगर आव ईद नोळकु कि ई द्याश मा तलवार नळोद आद, नरसींगा ऊरूकु लॉकुर इन जाग्सकोम,
EZE 33:4 रा जो यावारा नरसींगा अन शब्द केळदुर मा जागसालुन अदिक तलवार इन नळदुर देल सोतोगतान, आऊन रक्ता आऊन अच ताल्ला मा बीद्दीत.
EZE 33:5 आव नरसींगा अन शब्द केळदुन, लेकीन जागसीदील; ईदुरसाटी आऊन रक्ता आऊक अच हत्तीत. लेकीन अगर आव जागसेगतान, रा तान जीव ऊळ्स कोंडान.
EZE 33:6 लेकीन अगर पहरेदार ईद नोळदुर मा कि तलवार नळोद आद नरसींगा ऊरकु लॉकुर इक जाग्सबाळ, अदिक तलवार इन नळदुर देल आंदुर दा टु यावारा सोतोदान, रा आव रा तान अधर्म दा फसुसकु सोतोदान, लेकीन आऊन रक्ता अन लेखा ना पहरेदार उन सांगुळ अच ताकोमाईन.
EZE 33:7 “ईदुरसाटी हे मंळसा अन सन्तान, ना नीनी इस्त्राएल उन घराना अन पहरेदार ठहरूस बुटीन; नी नान बाय देल वचन केळ केळकु आंदरी नान दी जाग्सकोम.
EZE 33:8 अगर ना दुष्ट से अनाईन, ‘हे दुष्ट, नी निश्चय सोतोद्या,’ आग अगर नी दुष्ट उक आऊन हादी इन बारा दा समझुसतीदील, रा आव दुष्ट तान अधर्म दा फसुसकु सोत्तान, लेकीन आऊन रक्ता अन लेखा ना नीन से ताकोमाईन.
EZE 33:9 लेकीन अगर नी दुष्ट उक आऊन हादी इन बारा दा समझुस्या कि आव तान हादी देल तिर्गबाळुल अदिक आव तान हादी देल तिर्गबाळुल, रा आव रा तान अधर्म दा फसुसकु सोत्तान, लेकीन नी तान जीव ऊळ्स कोंड्या.
EZE 33:10 “बाक मंळसा अन सन्तान, इस्त्राएल उन घराना से ईद अन, नीव लॉकुर अनतीर: ‘नाम अपराध अदिक पापगोळ्द भार नाम म्याकुच ईटकु आद अदिक नाव अदुर कारण गलुसतेला होगीतेव; नाव ह्यांग जीत्ता ईत्तेव?’
EZE 33:11 ईदुरसाटी नी आंदुर से ईद अन, परमेश्वर यहोवा अन ईदा वाणी आद: नान जीवन इन किर्या, ना दुष्ट इन सायोर से येनारा भी खुश आगालीन, लेकीन ईदुर देल कि दुष्ट तान हादी देल तिर्गकु जीत्ता ईत्तान; हे इस्त्राएल उन घराना, नीव तान तान बुरा हादी टु तिर्गेगी; नीव यती सोत्तीर?
EZE 33:12 हे मंळसा अन सन्तान, तान लॉकुर से ईद अन, याग धर्मी जन अपराध माळुल आग आऊन धर्म आऊक ऊळ्स सकतीदील, अदिक दुष्ट उन दुष्टता भी जो आगुल, याग आव अदुर से तिर्गेगुल, रा आऊन कारण आव बीळतीदील; अदिक धर्मी जन, अगर आव पाप माळुल, आग तान धर्म इन कारण जीत्ता ईत्तान.
EZE 33:13 अगर ना धर्मी से अनाईन कि नि सहीदा जीत्ता ईत्या, अदिक आव तान अधर्म मा भरोसा माळकु कुटिल क्याल्सा माळली कुरूल, आग आऊन धर्म अन क्याल्सा दा टु यारदु याद माळकु आगतीदील; जो कुटिल क्याल्सा आव माळ्यान आव अऊर दा फसुसकु सोत्तान.
EZE 33:14 याग ना दुष्ट से अनाईन, नी सहीदा सोत्या, अदिक आव तान पाप देल तिर्गकु न्याय अदिक धर्म इन क्याल्सा माळली कुरूल,
EZE 33:15 मतलब दुष्ट मंळसा बंधक वापस माळ कोमुल, तान लुट्सदव वस्तुगोळ तुमकु कोळुल, अदिक बिना कुटिल क्याल्सा माळकु जीवनदायक विधीगोळ मा नळुली कुरूल, रा आव सायतीदील; आव सहीदा जीत्ता ईत्तान.
EZE 33:16 यास पाप आव माळ्यान, अऊर दा टु यारदु याद माळकु आगतीदील; आव न्याय अदिक धर्म इन क्याल्सा माळ्यान अदिक आव सहीदा जीत्ता ईत्तान.
EZE 33:17 “तरी भी नीम लॉकुर अनतार, प्रभु उन चाल वळ्लीद हैलेच; लेकीन आंदुर्द अच चाल वळ्लीद हैलेच.
EZE 33:18 याग धर्मी तान धर्म टु तिर्गकु कुटिल क्याल्सा माळली कुरूल, आग सहीदा आंदुर फसुसकु सोतोदान.
EZE 33:19 याग दुष्ट तान दुष्टता देल तिर्गकु न्याय अदिक अधर्म इन क्याल्सा माळली कुरूल, आग आव आंदुर कारण जीत्ता ईत्तान.
EZE 33:20 तरी भी नीव अनतीर, ‘प्रभु उन चाल वळ्लीद हैलेच?’ हे इस्त्राएल उन घराना, ना हर ऊंद मंळसा अक न्याय आऊन चाल इन अनुसार अच माळाईन.”
EZE 33:21 बाक नाम्द बंधुआई इन हनुनवा वर्ष इन हतवा तींगुळ इन अईद वा दिशी इक, ऊंद मंळसा जो यरूशलेम टु वोळकु उळ्दोगीदुन, आव नान हाती बंदकु अनली कुरतुन, “नगर ताकोमकु आत.”
EZE 33:22 आ वोळकु उन बरा से पयले द्यावगा यहोवा अन ताकत नान मा आगीत; अदिक व्हातुर ताका मतलब आ मंळसा अन बरास ताका आव नान बाय खोल्स बुट्टुन; नांद बाय खुल्सकु अच ईत्त, अदिक ना बाक मुक्‍का ईतीदील.
EZE 33:23 आग यहोवा अन वचन नान हाती पोहचुस्त:
EZE 33:24 “हे मंळसा अन सन्तान, इस्त्राएल उन जमीन इन आ खण्डरगोळ दा ईरावाळेर ईद अनतार, अब्राहम ऊंद अच मंळसा ईरोन, तरी भी द्याश इन अधिकारी आदुन; लेकीन नाव लॉकुर हापाळ आयेव, ईदुरसाटी सहीदा नाम अच अधिकार दा कोटकु आग्याद.
EZE 33:25 ई कारण नी आंदुर से अन, परमेश्वर यहोवा ईद अनतान: नीव लॉकुर रा मास रक्ता सांगुळ अदिक तान मुर्तीगोळ दी नजर माळकु, अदिक हत्या माळतीर; बाक येन नीव आ द्याश इन अधिकारी ईर सकतीदील?
EZE 33:26 नीव तान तान तलवार मा भरोसा माळतीर अदिक घिनोना क्याल्सा माळतीर, अदिक तान तान मान्ना हात्तीळोर आर्तेरी अशुध्द माळतीर: बाक नीव आ द्याश इन अधिकारी ईर सक्कीर?”
EZE 33:27 नी आंदुर से अन, परमेश्वर यहोवा ईद अनतान: नान जीवन इन किर्या, नि:सन्देह जो लॉकुर खण्डरगोळ दा ईरतार, आंदुर तलवार देल बीद्दार, अदिक जो खुला मैदान दा ईरतान, आऊक ना जीवजन्तुगोळ आहार माळ कोमाईन, अदिक जो गढ़गोळ अदिक गुफागोळ दा ईरतार, आंदुर मरी देल सोत्तार.
EZE 33:28 ना आ द्याश इक उजाळ अच माळ कोमाईन; अदिक अदुर ताकत इन घमण्ड होगतेला ईत्तीत; अदिक इस्त्राएली इन पहाळी हींग नाश आदव कि अऊर मा आगकु याऊ नळुतीदील.
EZE 33:29 ईदुरसाटी याग ना आ लॉकुर्द माळ्द सप्पा घिनोना क्याल्सागोळ कारण आ द्याश इक उजाळ अच उजाळ माळ कोमाईन, आग आंदुर जान्स कोंडार कि ना यहोवा हुईन.
EZE 33:30 “हे मंळसा अन सन्तान, नीन लॉकुर दिवालगोळ हाती अदिक मान्नागोळ दरवाजा दा नीन बारा दा मातगोळ माळतार अदिक आबुर दाबुर से अनतार, ‘बरी, केळी, कि यहोवा अन दी टु यातोद वचन होळतद.’
EZE 33:31 आंदुर प्रजा अन घाई नीन हाती बरतार अदिक नान प्रजा आगकु नीन मुंद कुर्तकु वचन केळतार, लेकीन आंदुर अऊर मा नळालुर; बाय देल रा आंदुर हापाळ प्रेम तोर्सतार, लेकीन आंदुर मन लालच दा अच हतकु ईरतद.
EZE 33:32 नी आंदुर नजर दा प्रेम इन मधुर हाळ हाळावाळा अदिक वळ्लेव मुरसावाळा ठहरूस्द, यतिकी आंदुर नीन वचन केळतार, लेकीन अऊर मा नळालुर.
EZE 33:33 ईदुरसाटी याग ईद मात घटसीत, अदिक अद सहीदा घटसीत! आग आंदुर जान्स कोंडार कि नाम न्याड्या ऊंद भविष्यवक्ता बंदीदुन.”
EZE 34:1 यहोवा अन ईद वचन नान हाती पोहचुस्त:
EZE 34:2 “हे मंळसा अन सन्तान, इस्त्राएल इन चरहावा अन विरूद्ध भविष्यवाणी माळकु आ चरवाहागोळ से अन, परमेश्वर यहोवा ईद अनतान: हाय इस्त्राएल इन चरवाहा मा जो तान तान व्हाट्टा तुमतार! येन चरवाहागोळ मर्र-म्यांढ्ढागोळ्द व्हाट्टा ईला तुम पायजे?
EZE 34:3 नीव लॉकुर ण्याण तिनतीर, ऊन हाकतीर अदिक मोटा मोटा जनावरगोळ इक कडुतीर; लेकीन मर्र-म्यांढ्‌ढागोळ इक नीव आळसालीर.
EZE 34:4 नीव बिमारगोळी बलवान माळीदील, ना रोगीगोळी चंगा माळीर, न घायलगोळ्द घावगोळी कटीर, न तेग्द इक वापस माळीर, ना काळ्द इक ढुंढसीर, लेकीन नीव ताकत अदिक जबरदस्ती देल अधिकार नळसीर.
EZE 34:5 अव चरवाहा अन ईला ईत्तुर कारण तितर-बितर आदव; अदिक सप्पा आळी दाकळव जनावरगोळद आहार आगेदव.
EZE 34:6 नान मर्र-म्यांढ्ढा तितर-बितर आगेग्याव; अव सप्पा पहाळीगोळ अदिक ऊँचा ऊँचा टीलागोळ मा भटकुसव; नान मर्र-म्यांढ्ढा सप्पा पृथ्वी इन म्याकुच तितर-बितर आदव; अदिक ना याऊ अऊरव सुधी ताकोमोन, ना यावारा अवरी ढुंढसोन.
EZE 34:7 “ई कारण, हे चरवाहागोळा, यहोवा अन वचन केळी:
EZE 34:8 परमेश्वर यहोवा अन ईदा वाणी आद, नान जीवन इन किर्या, नानव मर्र-म्यांढ्ढा जो लुटुसीग्याव, अदिक नानव मर्र-म्यांढ्ढा जो चरवाहा अन ईला ईत्तुर कारण सप्पा आळी दाकळव जनावरगोळ्द आहार आगेदव; अदिक ईदुरसाटी कि नान चरवाहागोळ नान मर्र-म्यांढ्ढागोळ्द सुधी ताकोंडीदील, अदिक नान मर्र-म्यांढ्ढा अन ईला, तांद अच व्हाट्टा तुमदुर;
EZE 34:9 ई कारण हे चरवाहागोळा, यहोवा अन वचन केळी,
EZE 34:10 परमेश्वर यहोवा ईद अनतान: नोळी, ना चरवाहागोळ विरूद्ध आईन; अदिक ना आंदुर से तान मर्र-म्यांढ्ढागोळ्द लेखा ताकोमाईन, अदिक आंदरी बाक अवरी आळ्स गोळतीदील; आंदुर बाक तान तान व्हाट्टा तुम सकतीदील. ना तान मर्र-म्यांढ्ढा आंदुर बाय टु बीळसाईन कि मुंद इक अव अऊरव आहार आगबाळुल.
EZE 34:11 “यतिकी परमेश्वर यहोवा ईद अनतान: नोळी, ना खुद अच तान मर्र-म्यांढ्‌ढागोळ्द सुधी ताकोमाईन, अदिक अवरी ढुंढसाईन.
EZE 34:12 ह्यांग चरवाहा तान मर्र-म्यांढ्ढागोळ दा टु भटकुस्द इक मात तान झुंड दा जमा माळतान, हांग अच ना भी तान मर्र-म्यांढ्ढागोळ इक जमा माळाईन; ना अवरी आ सप्पा जागागोळ टु तेगुकु तराईन, येल येल अव बादल अदिक घोर अंधकार इन दिशी तितर-बितर आगेग्याव.
EZE 34:13 ना अवरी द्याश द्याश इन लॉकुर दा टु तेगाईन, अदिक द्याश द्याश टु जमा माळाईन, अदिक अऊर दा खुद इन जमीन दा तराईन; अदिक इस्त्राएल इन पहाळीगोळ मा अदिक नालागोळ दा अदिक द्याश इन सप्पा बसुस्द जागागोळ मा आळसाईन.
EZE 34:14 ना अवरी वळ्लीद चराई दा आळसाईन, अदिक इस्त्राएल इन ऊँचा ऊँचा पहाळी मा अवरी चराई सीक्कीत; अल अव वळ्लीद हरीयाली दा कुरतोदव, अदिक इस्त्राएल इन पहाळी मा वळ्लीद से वळ्लीद चराई चरूसेव.
EZE 34:15 ना खुद अच तान मर्र-म्यांढ्ढागोळोव आळसावाळा आगाईन, अदिक ना खुद अच अवरी कुरसाईन, परमेश्वर यहोवा अन ईदा वाणी हुन.
EZE 34:16 ना काळ्द इक ढुंढसाईन, अदिक तेग्द इक वापस तराईन, अदिक घायल इन घाव इक कटाईन, अदिक बीमार इक बलवान माळाईन अदिक जो मोटा अदिक ताकवर आद अवरी ना नष्ट माळाईन; ना अऊर्द चरवाही न्याय देल माळाईन.
EZE 34:17 “हे नान झुण्ड, नीम से परमेश्वर यहोवा ईद अनतान: नोळी, ना मर्र-म्यांडा अदिक व्हात इन न्याड्या न्याय माळतीन.
EZE 34:18 येन नीमी ईद श्याण मात जान्सकु बीळतद कि नीव वळ्लीद चराई चरूसी अदिक मिग्द चराई इक तान काल देल मेटी; अदिक येन नीमी ईद श्याण मात जान्सकु बीळतद कि नीव निर्मल नीर कुडुकोमी अदिक मिग्द नीर इक तान कालगोळ देल डवला माळी?
EZE 34:19 येन नान मर्र-म्यांढ्ढागोळी इक नीम कालगोळ से मेटकु आग्याव इक रचोद, अदिक नीम कालगोळ देल डवला माळ्द इक कुडोद बीद्दीत?
EZE 34:20 “ई कारण परमेश्वर यहोवा आंदुर से ईद अनतान: नोळी, ना खुद मोटा अदिक पतला मर्र-म्यांढ्ढागोळ न्याड्या न्याय माळाईन.
EZE 34:21 नीव जो सप्पा बिमारगोळी पंजागोळ अदिक खांदा देल ईल ताका ढकलुसतीर अदिक सींग देल ईल ताका बडुतीर कि अव तीतर-बितर आगेगताव,
EZE 34:22 ई कारण ना तान मर्र-म्यांढ्‌ढागोळी बीळसाईन, अदिक अव बाक ईला लुटसेव, अदिक मर्र-मर्र इन म्यांढ्ढा म्यांढ्ढा अन न्याड्या न्याय माळाईन.
EZE 34:23 ना आंदुर मा हींग चरवाहा ठहरुसाईन जो अऊर चरवाही माळ्यान, आव नान दास दाऊद आदान, आवा अवरी आळस्यान, अदिक आवा अऊरव आळसावाळा आदान.
EZE 34:24 ना, यहोवा, अऊरव परमेश्वर ठहरूसाईन, अदिक नान दास दाऊद आऊन न्याड्या प्रधान आदान; ना यहोवा अच ईद अंदीन.
EZE 34:25 “ना अऊर सांगुळ शांती इ वादा माळाईन, अदिक दुष्ट किळागोळी द्याश दा ईर गोळतीदील; अत: अव आळी दा निडर ईत्ताव, अदिक आळी दा मींगेव.
EZE 34:26 ना अवरी अदिक तान पहाळी इन आस पास इन जागागोळी आशीष इन कारण माळ कोमाईन; अदिक मेंह अक ना ठीक समय दा बरसुसाईन; अदिक अद आशीष इन माळ आदीत.
EZE 34:27 मैदान इन मार्र फलुसेव अदिक जमीन तान उपज पैदा माळीत, अदिक अव द्याश द्याश दा निडर ईत्तव; याग ना अऊर गुलामी अन जुवा अक मुरूकु आ लॉकुर कय देल बीळसाईन, जो अऊर से स्यावा माळसुसतार, आग आंदुर जान्स कोंडार कि ना यहोवा हुईन.
EZE 34:28 अव बाक जाती जाती देल लुट्सकु आगतीदील, अदिक ना आळी दाकळव जनावर अवरी हरूकु तींदव; अव निडर ईत्तव, अदिक अवरी याऊ अंजुसतीदील.
EZE 34:29 ना आंदुर साटी उपजाऊ बारी उपजुसाईन, अदिक अव द्याश दा बाक हस्तकु सायतीदील, अदिक न जाती-जाती इन लॉकुर बाक अऊर्द निंदा माळ्यार.
EZE 34:30 आंदुर जानस्यार कि ना परमेश्वर यहोवा, अऊर सांगुळ आईन, अदिक आंदुर जो इस्त्राएल उन घराना आर, आंदुर नान प्रजा उर, ना परमेश्वर यहोवा अन ईदा वाणी आद.
EZE 34:31 नीव रा नान मर्र-म्यांढ्‌ढागोळ, नान चराई इन मर्र-म्यांढ्‌ढागोळ हुईर, नीव रा मंळसा हुईर, अदिक ना नीमव परमेश्वर हुईन, परमेश्वर यहोवा अन ईदा वाणी हुन.”
EZE 35:1 यहोवा अन ईद वचन नान हाती पोहचुस्त:
EZE 35:2 “हे मंळसा अन सन्तान, तान बाय सेईर पहाळी इन दी माळकु अदुर विरूद्ध भविष्यवाणी माळ,
EZE 35:3 अदिक आऊन से अन, परमेश्वर यहोवा ईद अनतान: हे सेईर पहाळी, ना नीन विरूद्ध आईन; अदिक तान कय नीन विरूद्ध वाळुस्कु नीनी ऊजाळ अच ऊजाळ माळ कोमाईन.
EZE 35:4 ना नीन नगरगोळी खंडर माळ कोमाईन, अदिक नी उजाळ आगेद्या; आग नी जान्स कोंड्या कि ना यहोवा हुईन.”
EZE 35:5 यतिकी नी इस्त्राएलीगोळ से युग-युग इन शत्रुता ईटतोग्या, अदिक आंदुरव परेशानी इन समय याग आंदुर्द अधर्म इन दंड इन समय पोहचुस्त, आग आंदरी तलवार देल सायोर साटी कोटबुट.
EZE 35:6 ईदुरसाटी परमेश्वर यहोवा अन ईद वाणी आद: नान जीवन इन किर्या, ना नीनी हत्या अन साटी होगोर साटी तैयार माळाईन अदिक रक्ता नीन पीछा माळीत; नी रा रक्ता देल न रीस्स ईला माळ्या, ई कारण रक्ता नीन पीछा माळीत.
EZE 35:7 ईदा रीती ना सेईर पहाळी इक ऊजाळ अच ऊजाळ माळ कोमाईन, अदिक जो अदुर दा होग्त-बर्त ईतीदान, ना आऊन नाश माळाईन.
EZE 35:8 ना आऊन पहाळी इक सोत्तुर से तुम कोमाईन; नीन टीलागोळ, तराईगोळ अदिक सप्पा नालागोळ दा तलवार देल सोतकु बीद्दार.
EZE 35:9 ना नीनी युग युग इन साटी ऊजाळ माळ कोमाईन, अदिक नीन नगर बाक बसुसतीदील. आग नीव जान्स कोंडीर कि ना यहोवा हुईन.
EZE 35:10 “यतिकी नी अंद्या, ‘ईव येढ्ढु जातीगोळ अदिक येढ्ढु द्याश नानव आदव; अदिक नाव अच अऊरव स्वामी आगेदेव,’ अगर यहोवा अल ईरोन.
EZE 35:11 ई कारण, परमेश्वर यहोवा अन ईद वाणी आद, नान जीवन इन किर्या, नीन कोप इन अनुसार, अदिक जलजलाहट नी आंदुर मा तान सिट्ट इन कारण माळ्या, अदुर अच अनुसार ना नीन से बर्ताव माळाईन, अदिक याग ना नींद न्याय माळाईन, आग नीम दा तान इक प्रगट माळाईन.
EZE 35:12 नी जानस्या कि ना यहोवा नीनव सप्पा तिरस्कार इन मातगोळ केळीन, जो नी इस्त्राएल इन पहाळीगोळ बारा दा अंद्या, अव रा ऊजळुसीग्याव, अव नामी का कोटकु आग्याव कि नाव अवरी तीन कोमुल.
EZE 35:13 नीव तान बाय देल नान विरूद्ध बळाई होळ्द, अदिक नान विरूद्ध हापाळ मातगोळ अंद; ईदरी ना केळीन.
EZE 35:14 परमेश्वर यहोवा ईद अनतान: याग पृथ्वी तीम दा आनंद आदीत, आग ना नींद उजाळ माळाईन.
EZE 35:15 नी इस्त्राएल उन घराना अन खुद इन भाग इन ऊजळुसा कारण खुश आद, ईदुरसाटी ना भी नीन से हांग अच माळाईन; हे सेईर पहाळी, हे एदोम इन सप्पा द्याश, नी ऊजळुसेद्या. आग आंदुर जान्स कोंडार कि ना यहोवा हुईन.”
EZE 36:1 “बाक हे मंळसा अन सन्तान, नी इस्त्राएल इन पहाळीगोळ से भविष्यवाणी माळकु अन, हे इस्त्राएल इन पहाळीगोळा, यहोवा अन वचन केळी.
EZE 36:2 परमेश्वर यहोवा ईद अनतान: दुश्मन रा नीम बारा दा अंदान, ‘आहा! प्रचीनकाल इन ऊँचा जागा ईग नाम अधिकार दा होट बंदाव.’
EZE 36:3 ई कारण भविष्यवाणी माळकु अन, परमेश्वर यहोवा ईद अनतान: लॉकुर जो नीमी उजाळस्यार अदिक नाकु दी नीम से हींग नुंग कोंडुन कि नीव ऊळ्दकु राज्यगोळ्द अधिकार आगेगी, अदिक लुतरा नीम्द चर्चा माळतेला अदिक साधारण लॉकुर नीम निन्दा माळतार;
EZE 36:4 ई कारण, हे इस्त्राएल इन पहाळीगोळा, परमेश्वर यहोवा अन वचन केळी, परमेश्वर यहोवा नीम से ईद अनतान: मतलब पहाळी अदिक पहाळीगोळ से अदिक नाला अदिक तराईगोळ से जो नाकु दीकळोद मिग्द राज्यगोळ से लुट्सदव अदिक आंदुर नेगा कारण आगेग्यार;
EZE 36:5 परमेश्वर यहोवा ईद अनतान: सहीदा ना तान जलन इन बेक्की दा मिग्द राज्यगोळ अदिक सोर एदोम इन विरूद्ध दा अंदान कि यार नान द्याश इक तान मन इन पुरा आनंद अदिक अभिमान देल तान अधिकार दा आग्याद कि अद पराया आगकु लुट्सकु आगुल.
EZE 36:6 ई कारण इस्त्राएल इन द्याश इन बारा दा भविष्यवाणी माळकु पहाळी, पहाळीगोळ, नालागोळ, अदिक तराईगोळ से अन, परमेश्वर यहोवा ईद अनतान: नोळी नीव राज्य अन निन्दा सहन माळीर, ई कारण ना तान धोळ्द जलजलाहट देल अंदीन.”
EZE 36:7 परमेश्वर यहोवा ईद अनतान: ना ईद किर्‍या तिंदीन कि नि:सन्देह नीम नाकु दी जो राज्य आव, अवरी तान निन्दा खुद अच सहन माळोद बिद्दीत.
EZE 36:8 “लेकीन हे इस्त्राएल इन पहाळीगोळा, नीम मा डगालगोळ पलसेव अदिक अऊर काय नान प्रजा इस्त्राएल इन साटी हत्तेव; यतिकी आऊन बरोद हात्ती आद.
EZE 36:9 नोळी, ना नीम पक्ष दा आईन, अदिक नीम्द दी कृपादृष्टी माळाईन, अदिक नीव जोत्सकु-बोऊस्कु आदीर;
EZE 36:10 अदिक ना नीम मा हापाळ मंळसा मतलब इस्त्राएल इन सप्पा घराना अक बसुसाईन; अदिक नगर मात बसुसकु अदिक खण्डर मात माळकु आदव.
EZE 36:11 ना नीम मा मंळसा अदिक जनावर येढ्ढु उक हापाळ वाळुसाईन; अदिक आंदुर वाळुस्यार अदिक फलस्यार; अदिक ना नीम इक पुराना समय इन घाई बसुसाईन, अदिक पयले से येक्कुल नीम्द भलाई माळाईन. आग नीव जान्स कोंडीर कि ना यहोवा हुईन.
EZE 36:12 ना हींग माळाईन कि मंळसा मतलब नान प्रजा इस्त्राएल नीम मा नळदीत-वयाळीत; अदिक आंदुर नीमोर स्वामी आदार, अदिक नीव आंदुर खुद इन हिस्सा आदीर, अदिक आंदुर मात नीम कारण निर्वंश आगतीदील.
EZE 36:13 परमेश्वर यहोवा ईद अनतान: जो लॉकुर नीम से अनतार, ‘नी मंळसागोळ्द तिनावाळा हुय, अदिक तान मा बसुस्द राज्य अक निर्वंश माळ कोमत्या,’
EZE 36:14 ईदुरसाटी ईग नी मंळसागोळी तिनतीदील, अदिक न तान मा बसुस्द राज्य अक निर्वंश माळ्या, परमेश्वर यहोवा अन ईदा वाणी हुन.
EZE 36:15 ना बाक राज्य राज्य अन लॉकुर से नीन निन्दा केळसुसतीदील, अदिक नीनी राज्य राज्य अन दी टु बाक नामधराई सहन माळोद बिळतीदील, अदिक नीन मा बसुस्द राज्य अक नी मात ठोकर तिनस्या, परमेश्वर यहोवा अन ईदा वाणी हुन.”
EZE 36:16 बाक यहोवा अन वचन नान हाती पोहचुस्त:
EZE 36:17 “हे मंळसा अन सन्तान, याग इस्त्राएल उन घराना तान द्याश दा ईरतोगोन, आग तान चलन अदिक क्याल्सागोळ द्वारा आंदुर आऊक अशुद्ध माळतोगोर; आंदुर्द चालचलन नानी महावारी इन अशुध्दता घाई जान्सकु बिळतोगोद.
EZE 36:18 ईदुरसाटी जो हत्या आंदुर द्याश दा माळ्यार, अदिक द्याश इक तान मुरतीगोळ द्वारा अशुध्द माळदुर, ईदुर कारण ना आंदुर मा तान जलजलाहट भळकुसदीन.
EZE 36:19 ना आंदरी राज्य राज्य दा तितर-बितर माळदीन, अदिक आंदुर द्याश द्याश दा बिखरूसेदुर; आंदुर चालचलन अदिक क्याल्सागोळ अनुसार ना आंदरी दंड कोळाईन.”
EZE 36:20 लेकीन याग आंदुर आ राज्य दा पोहचुसदुर येल आंदुर पोहचुस्कु आदुर, आग आंदुर नान पवित्र हेसुर इक अपवित्र ठहरूसदुर, यतिकी लॉकुर आंदुर बारा दा ईद अनली कुरतुर, ईद यहोवा अन प्रजा हुन, लेकीन आऊन द्याश दा टु तेगुकु आग्यार.
EZE 36:21 लेकीन ना तान पवित्र हेसुर इन सुधी तांकोडीन, यदरी इस्त्राएल उन घराना अन आ राज्य अन न्याड्या अपवित्र ठहरूसीद, येल आंदुर होगीदुर.
EZE 36:22 “ई कारण नी इस्त्राएल उन घराना से अन, परमेश्वर यहोवा ईद अनतान: हे इस्त्राएल उन घराना, ना ईऊक नीम निमित्त ईला, लेकीन तान पवित्र हेसुर इन निमित्त माळतीन यदरी नीव आ राज्य दा अपवित्र ठहरूसदीर येल नीव होगीदीर.
EZE 36:23 ना तान धोळ हेसुर इक पवित्र ठहरूसाईन, जो राज्यगोळ दा अपवित्र ठहरूसकु आग्याद, यदरी नीव आंदुर न्याड्या अपवित्र माळ्द; अदिक याग ना आंदुर नजर दा नीम न्याड्या पवित्र ठहरूसाईन, आग आंदुर राज्य जान्स कोंडव कि ना यहोवा हुईन, परमेश्वर यहोवा अन ईदा वाणी हुन.”
EZE 36:24 ना नीम इक राज्यगोळ दा टु ताकोम कोमाईन, अदिक द्याशगोळ दा टु जमा माळाईन; अदिक नीम इक नीम खुद इन द्याश दा पोहचुस बुळाईन.
EZE 36:25 ना नीम मा शुद्ध नीर छिळकुसाईन, अदिक नीव शुद्ध आगेदीर; अदिक ना नीम इक नीम्द सप्पा अशुध्दता अदिक मुरतीगोळ से शुद्ध माळाईन.
EZE 36:26 ना नीम इन व्हाशोद मन कोळाईन, अदिक नीम बुळ्क व्हासा आत्मा पैदा माळाईन, अदिक नीम्द शरीर दा टु कल्ल इन दिल तेगुकु नीम इक मास इन दिल कोळाईन.
EZE 36:27 ना तान आत्मा नीम बुळ्क कोटकु हींग माळाईन कि नीव ना विधीगोळ मा नळदीर अदिक नान नियमगोळी मान्सकु अदुर अनुसार माळीर.
EZE 36:28 नीव आ द्याश दा बसुसीर जो ना नीम आप्पगोळी कोटीदीन; अदिक नीव नान प्रजा ठहरूसीर, अदिक ना नीमव परमेश्वर ठहरूसाईन. ना नीम इक नीम्द सप्पा अशुध्दता देल बीळसाईन, अदिक अन्न पैदा माळोद आग्या कोटकु, अदरी वाळुसाईन अदिक नीम न्याड्या अकाल केडुतीदील.
EZE 36:29 नीव आ द्याश दा बसुसीर जो ना नीम आप्पगोळी कोटीदीन; अदिक नीव नान प्रजा ठहरूसीर, अदिक ना नीमव परमेश्वर ठहरूसाईन. ना नीमी नीम सप्पा अशुध्दता देल बीळसाईन, अदिक अनाज पैदा माळोद आग्या कोटकु, अदरी वाळुसाईन अदिक नीम न्याड्या अकाल हाकतीदील.
EZE 36:30 ना मार्रगोळ काय अदिक केई इन उपज वाळुसाईन, कि राज्यगोळ दा अकाल इन कारण बाक नीम्द नामधराई आगतीदील.
EZE 36:31 आग नीव तान बुरा चालचलन अदिक तान क्याल्सागोळ जो वळ्लेव ईला ईरव, याद माळकु तान अधर्म अदिक घिनोना क्याल्सागोळ कारण तान से सिट्ट माळीर.
EZE 36:32 परमेश्वर यहोवा अन ईदा वाणी आद, नीव जान्स कोंडीर कि ना ईदरी नीम साटी माळालीन. हे इस्त्राएल उन घराना तान चालचलन इन बारा दा लज्जित आग अदिक नीम बाय करीद आगुल.
EZE 36:33 “परमेश्वर यहोवा ईद अनतान: याग ना नीम इक नीम्द सप्पा अधर्म इन क्याल्सागोळ से शुद्ध माळाईन, आग नीम नगरगोळी बसुसाईन; अदिक नीमव खंडर मात माळकु आदव.
EZE 36:34 नीम द्याश जो सप्पा होगा बरावाळेर घाई ऊजाळ आद, अद ऊजाळ आगा बदला जोतुस अदिक बोऊस्कु आदीत.
EZE 36:35 लॉकुर अन तोदार, ईद द्याश जो उजाळ ईरोद, अद अदन इन बगीचा घाई आगेत, अदिक जो नगर खंडर अदिक उजाळ आगेग्याव अदिक ढाऊसकु आगीदव, आंदुर गढवाळेर आदुर, अदिक बसुसकु आदुर.
EZE 36:36 आग जो राज्य नीम आस पास मिक्कु ईत्तीत, अव जान्स कोंडव कि ना यहोवा अच बिद्दुर इक मात माळदीन, अदिक उजाळ दा मार्र हचीन, ना यहोवा ईद अंदीन, अदिक हींग अच माळाईन.”
EZE 36:37 “परमेश्वर यहोवा ईद अनतान: इस्त्राएल उन घराना दा बाक नान से विनती माळकु आदीत कि ना आंदुर साटी ईद माळाईन; मतलब ना आ मंळसागोळ गिनती मर्र-म्यांढ्‌ढागोळ घाई वाळुसाईन.
EZE 36:38 ह्यांग पवित्र समयगोळ मर्र-म्यांढ्‌ढागोळ, मतलब नियत हाब्ब इन समय यरूशलेम दाकळोव मर्र-म्यांढ्ढा अनगिनत आगताव हांग अच जो नगर ईग खंडर आव अव अनगिनत मंळसागोळ्द झुंडगोळ देल तुमकु आदव. आग आंदुर जान्स कोंडार कि ना यहोवा हुईन.”
EZE 37:1 यहोवा अन ताकत नान मा आत, अदिक आव नान दा तान आत्मा हाक्कु व्हार्या वोतुन अदिक नानी घाटी इन न्याड्या नीदरूसदुन; अद घाटी येलुगोळ देल तुमकु ईरोद.
EZE 37:2 आग आव नानी आंदुर नाकु दी वयाळसदुन, अदिक घाटी इन तह मा हापाळ सा येलुगोळ ईरव; अदिक अव हापाळ वंळ्गेव ईरव.
EZE 37:3 आग आव नान से केळदुन, “हे मंळसा अन सन्तान, येन ईव येलुगोळ जीऊस सकताव?” ना अंदीन, “हे परमेश्वर यहोवा, नी अच जान्सत्या.”
EZE 37:4 आग आव नान से अंदुन, “ई येलुगोळ से भविष्यवाणी माळकु अन, हे वळ्गींद येलुगोळा, यहोवा अन वचन केळी.
EZE 37:5 परमेश्वर यहोवा नीम येलुगोळ से ईद अनतान: नोळी, ना खुद अच नीम दा श्वास हाकाईन, अदिक नीव जीत्ता आदीर.
EZE 37:6 ना नीमव नसगोळ पैदा माळकु मास येरसाईन, अदिक नीमी तोगुल देल ढापसाईन; अदिक नीम दा श्वास समुसाईन अदिक नीव जीऊसीर; अदिक नीव जान्स कोंडीर कि ना यहोवा हुईन.”
EZE 37:7 ई आग्या अन अनुसार ना भविष्यवाणी माळली कुरतीन; अदिक ना भविष्यवाणी माळीन अच, कि ऊंद आहट बत्त, अदिक भुईंडोल आत, अदिक अव येलुगोळ जमा आगकु येलु से येलु जुळसेत.
EZE 37:8 ना नोळतेला ईत्तीन, कि अऊर दा नसगोळ पैदा आदव अदिक मास बत, अदिक अद म्याकुच इन तोगुल देल ढपसेत; लेकीन अऊर दा श्वास येनु ईला ईरोद.
EZE 37:9 आग आव नान से अंदुन, “हे मंळसा अन सन्तान, श्वास देल भविष्यवाणी माळ, अदिक श्वास देल भविष्यवाणी माळकु अन, हे श्वास परमेश्वर यहोवा ईद अनतान: नाकु दिशागोळ से बंदकु ई घात माळदुर दा समुसेग कि ईंदुर जीत्ता आगुल.”
EZE 37:10 आऊन ई आग्या अन अनुसार ना भविष्यवाणी माळदीन, आग श्वास आंदुर दा होट्ट बत्त, अदिक आंदुर जीऊसकु तान तान कालगोळ बल मा नीदरेदुर; अदिक हापाळ सा धोळ्द सेना आगेत.
EZE 37:11 बाक आव नान से अंदुन, “हे मंळसा अन सन्तान, ईव येलुगोळ इस्त्राएल इन सप्पा घराना अन उपमा हुन. आंदुर अनतार, नामव येलुगोळ वंळ्गेग्याव, अदिक नाम्द आशा होगतेला ईत्त; नाव पुरा रीति देल कळदोगेव
EZE 37:12 ई कारण भविष्यवाणी माळकु आंदुर से अन, परमेश्वर यहोवा ईद अनतान: हे नान प्रजा अन लॉकुरा, नोळी, ना नीमव कब्रगोळी खोल्सकु नीमी आंदुर से तेगाईन, अदिक इस्त्राएल इन द्याश दा पोहचुस बुळाईन.
EZE 37:13 ईदुरसाटी याग ना नीम कब्रगोळी खोलसाईन, अदिक नीमी आऊर दा टु तेगु कोमाईन, आग हे नान प्रजा अन लॉकुरा, नीव जान्स कोंडीर कि ना यहोवा हुईन.
EZE 37:14 ना नीम दा तान आत्मा समुसाईन, अदिक नीव जीऊसीर; अदिक नीमी नीम खुद इन द्याश दा बसुसाईन; आग नीव जान्स कोंडीर कि ना यहोवा अच ईद अंदीन, अदिक माळीन भी, यहोवा अन ईदा वाणी हुन.”
EZE 37:15 बाक यहोवा अन वचन नान हाती पोहचुस्त:
EZE 37:16 “हे मंळसा अन सन्तान, ऊंद हुळ्ली हुडुकु अदुर मा लिख्स, यहूदा अन अदिक आऊन संगी इस्त्राएलगोळ्द; आग दुसरा हुळ्ली हुडुकु अदुर मा लिख्स, ‘यूसुफ उन मतलब एप्रैम उन, अदिक आऊन संगी इस्त्राएलगोळ्द हुळ्ली.
EZE 37:17 बाक आ हुळ्लीगोळी आबुर दाबुर से जोळ्सकु ऊंद अच माळकोम कि अव नीन कय दा ऊंद अच हुळ्ली आगेगुल.
EZE 37:18 याग नीन लॉकुर नीन से केळुल, येन नी नामी हेळ्या कि ईंदुर से नीन येन अभीप्राय आद?’
EZE 37:19 आग आंदुर से अनेत, परमेश्वर यहोवा ईद अनतान: नोळी, ना यूसुफ उन हुळ्ली इक जो एप्रैम उन कय दा आद, अदिक इस्त्राएल उन जो गोत्र आऊन संगी आर, आंदरी हुडुकु यहूदा अन हुळ्ली देल जोळ्सकु आंदुर सांगुळ ऊंद अच हुळ्ली माळ कोमाईन;
EZE 37:20 या हुळ्लीगोळ मा नी हींग लिखस्या, अव आंदुर मुंद नीन हाती ईरूल.
EZE 37:21 आग नी आ लॉकुर से अन, परमेश्वर यहोवा ईद अनतान: नोळी, ना इस्त्राएलीगोळी आ राज्यगोळ दा टु हुडुकु येल आंदुर होटोग्यार, नाकु दी जमा माळाईन; अदिक आंदुर खुद इन द्याश दा पोहचुसाईन.
EZE 37:22 ना आंदुर आ द्याश मतलब इस्त्राएल इन पहाळीगोळ मा ऊंद अच राज्य माळ कोमाईन; अदिक आ सप्पा अन ऊंद अच राज्य ईत्तीत; अदिक आंदुर बाक येढ्ढ ईरतीदील अदिक ना येढ्ढ राज्य दा कभी वाटस्यार.
EZE 37:23 आंदुर बाक तान मुरतीगोळ, अदिक घिनोना क्याल्सागोळ या तान यातोदारा पाप इन द्वारा तान इक अशुध्द माळतीदील; लेकीन ना आंदरी आ सप्पा मोहल्लागोळ से, येल आंदुर पाप माळतोगोर, तेगुकु शुद्ध माळाईन, अदिक आंदुर नान प्रजा आदार, अदिक ना आंदुरव परमेश्वर आगाईन.
EZE 37:24 नान दास दाऊद आंदुरव राजा आदान; अदिक आ सप्पा अन ऊंद अच चरवाहा आदान. आंदुर नान नियमगोळ मा नळदार अदिक नान विधीगोळ इक मान्सकु अऊर अनुसार नळदार.
EZE 37:25 आंदुर आ द्याश दा ईत्तार यदरी ना तान दास याकूब उक कोटीदीन; अदिक येल नीमोर आप्प दादागोळ ईरतोगोर, अदुर दा आंदुर अदिक आंदुर पारगोळ-नातुगोळ सदा बसुसकु ईत्तार; अदिक नान दास दाऊद सदा आंदुरव प्रधान ईत्तान.
EZE 37:26 ना आंदुर सांगुळ शांती इन वादा माळाईन; अद सदा अन वादा ठहरूसीत; अदिक ना आंदरी जागा कोटकु गिनती दा वाळुसाईन, अदिक आंदुर न्याड्या तान पवित्र जागा सदा माळकु ईटाईन.
EZE 37:27 नान निवास इन ड्यारा आंदुर म्याकुच ईत्तीत; अदिक ना आंदुरव परमेश्वर आगाईन, अदिक आंदुर नानोर प्रजा आदार.
EZE 37:28 याग नान पवित्र जागा आंदुर न्याड्या सदा अन साटी ईत्तीत, आग सप्पा राज्य जान्स कोंडीत कि ना यहोवा इस्त्राएल उन पवित्र माळावाळा हुईन.”
EZE 38:1 बाक यहोवा अन ईद वचन नान हाती पोहचुस्त:
EZE 38:2 “हे मंळसा अन सन्तान, तान बाय मागोग द्याश इन गोग इन दी माळकु जो रोश, मेशेक अदिक तूबल उन प्रधान आन, आऊन विरूद्ध भविष्यवाणी माळ,
EZE 38:3 अदिक ईद अन, हे रोश, मेशेक अदिक तूबल उन प्रधान, परमेश्वर यहोवा ईद अनतान: नोळ, ना नीन विरूद्ध आईन.
EZE 38:4 ना नीनी तीर्गुसकु तराईन, अदिक नीन जबळागोळ दा आकळागोळ हाक्कु नीनी तेगाईन; अदिक नीन सप्पा सेना अक भी मतलब घ्वाळा अदिक सवारगोळी जो सप्पा च्या सप्पा कवच हाक्कु ऊंद धोळ भीळ आद, जो फरी अदिक ढाल हुडुकु सप्पा च्या सप्पा तलवार नळसावाळेर ईत्तार;
EZE 38:5 अदिक अऊर सांगुळ फारस, कूश अदिक पूत उक, जो सप्पा च्या सप्पा ढाल हुडुकु अदिक टोप हचकु ईत्तार;
EZE 38:6 अदिक गोमेर अदिक आऊन सप्पा सैनिक दलगोळ इक, अदिक उत्तर दिशा अन दुर दुर द्याशगोळ तोगर्मा अन घराना, अदिक आऊन सप्पा दलगोळी तेगाईन; नीन सांगुळ हापाळ सा द्याश इन लॉकुर ईत्तार.
EZE 38:7 ईदुरसाटी नी तैयार आगेग; नी अदिक याट भीळ नीन हाती जमा ईत्तीत, तैयार ईरेत, अदिक नी आंदुरव अगुवा आगेत.
EZE 38:8 हापाळ दीनगोळ बीतुसदुर मा नीन सुधी ताकोमकु आदीत; अदिक आखरी इन वर्षगोळ दा नी आ द्याश दा बंद्या, जो तलवार इन वश दा टु बिटकु ईत्तीत, अदिक यदुर निवासी हापाळ सा राज्यगोळ दा टु जमा आदार; मतलब नी इस्त्राएल इन पहाळीगोळ मा बंद्या जो निरन्तर उजाळ ईताव; लेकीन आंदुर द्याश द्याश इन लॉकुर वश टु बुळ्सकु आगकु सप्पा च्या सप्पा निडर ईत्तार.
EZE 38:9 नी चळाई माळ्या, अदिक आंधी इन घाई बंद्या, अदिक तान सप्पा दलगोळ अदिक हापाळ द्याशगोळ लॉकुर सांगुळ बरफ इन घाई द्याश मा छाउसेद्या.”
EZE 38:10 “परमेश्वर यहोवा ईद अनतान: आ दिशी नीन दा ईत्ता ईत्ता मातगोळ बंदव कि नी ऊंद बुरा युक्ती भी तेगद्या;
EZE 38:11 अदिक अंद्या, ना बिन शहरपनाह अन ऊरगोळ द्याश मा चळाई माळाईन; ना आ लॉकुर हाती होगाईन जो चैन देल निडर ईरतार; जो सप्पा च्या सप्पा बिना शहरपनाह अदिक बिना बेळीगोळ अदिक पल्लागोळ बसुसकु आर,
EZE 38:12 ताकी कसुकु नी आंदरी लुट्‍स अदिक तान कय आ खण्डहरगोळ मा वाळुस जो मात बसुसकु आग्याव, अदिक आ लॉकुर विरूद्ध होगुल जो राज्यगोळ दा टु जमा आगीदुर अदिक पृथ्वी इन बोमली मा बसुसकु जनावर अदिक अन्य सम्पत्ति ईटतार.
EZE 38:13 शबा अदिक ददान इन लॉकुर अदिक तर्शीश इन व्यापारी तान द्याश इन सप्पा हारोद हुल्ल इन सांगुळ नीन से अंदार, येन नी लुटसोर साटी बरत्या? येन नी धन कसोर, व्हान्ना-बेळ्ली नेगोर, जनावर अदिक अन्य सम्पत्ती वोयोर साटी, अदिक धोळ्द लुट अपनुसोर साटी तान भीळ जमा माळ्या?”
EZE 38:14 “ई कारण, हे मंळसा अन सन्तान, भविष्यवाणी माळकु गोग से अन, परमेश्वर यहोवा ईद अनतान: या समय नीन प्रजा इस्त्राएल निडर बसुसकु ईत्तीत, येन नीनी ईदुर्द समाचार सिकतीदील?
EZE 38:15 नी उत्तर दिशा अन दुर दुर जागा टु बंद्या; नी अदिक नीन सांगुळ हापाळ सा राज्य अन लॉकुर, जो सप्पा च्या सप्पा घ्वाळागोळ मा नीदुरकु ईत्तार, मतलब ऊंद धोळ्द भीळ अदिक बलवन्त सेना.
EZE 38:16 ह्यांग बादल जमीन मा छाऊसेगतद, हांग अच नी नान प्रजा इस्त्राएल उन द्याश मा हींग चळाई माळ्या.” ईदुरसाटी हे गोग, अन्त इन दिनगोळ दा अच हिंग आदीत, कि ना नीन से आन द्याश मा ईदुरसाटी चळाई माळसुसाईन, कि याग ना राज्यगोळ इक नोळतेला नीन द्वारा तान इक पवित्र ठहरूसाईन, आग आंदुर नानी अरू कोंडार.
EZE 38:17 “परमेश्वर यहोवा ईद अनतान: येन नी आवा आलच यार्द चर्चा ना पुराना समय दा तान दासगोळ, मतलब इस्त्राएल उन आ भविष्यवक्तागोळ द्वारा माळीदीन, जो आ दिनगोळ दा वर्षगोळ ताका भविष्यवाणी माळतेला होदुर, कि यहोवा गोग से इस्त्राएलीगोळ मा चळाई माळसुस्यान?
EZE 38:18 या दिशी इस्त्राएल इन द्याश मा गोग राजा चळाई माळ्यान, अदा दिशी नान जलजलाहट नान बाय टु प्रगट आदीत, परमेश्वर यहोवा अन ईदा वाणी आद.
EZE 38:19 ना जलजलाहट अदिक सिट्ट इन बेक्की दा अंदीन कि नि:सन्देह आ दिशी इस्त्राएल इन द्याश दा धोळ भूकम्प आदीत.
EZE 38:20 नान दर्शन देल समुद्र अन मेनगोळ अदिक आकाश इन पक्षी, मैदान इन जनावर अदिक जमीन मा यास जीव जन्तु रांग्सताव, अदिक जमीन इन म्याकुच यास मंळसागोळ ईरतार, सप्पा नळ्गकु येद्दार अदिक पहाळीगोळ केळसुसकु आदव; अदिक चळाईगोळ नष्ट आदव, अदिक सप्पा दिवालगोळ बीदकु मुण्ण दा मिलुसेदव.
EZE 38:21 परमेश्वर यहोवा अन ईदा वाणी आद कि ना अदुर विरूद्ध तलवार नळ्सली तान सप्पा पहाळीगोळी कारसुसाईन अदिक हर ऊंद उन तलवार आऊन वार्टुन विरूद्ध येद्दीत.
EZE 38:22 ना मरी अदिक रक्ता अन द्वारा आऊन से मुकदमा आळाईन; अदिक आऊन मा अदिक आऊन दलगोळ मा, अदिक आ हापाळ सा राज्यगोळ मा जो आऊन हाती ईत्तीत, ना धोळ्द झळी हचाईन अदिक ओला अदिक बेक्की अदिक गन्धक बरूसाईन.
EZE 38:23 ई प्रकार ना तान इक महान अदिक पवित्र ठहरूसाईन अदिक हापाळ सा राज्यगोळ मुंद तान इक प्रगट माळाईन. आग आंदुर जान्स कोंडार कि ना यहोवा हुईन.”
EZE 39:1 “बाक हे मंळसा अन सन्तान, गोग इन विरूद्ध भविष्यवाणी माळकु अन, हे गोग, हे रोश, मेशेक अदिक तूबल उन प्रधान, परमेश्वर यहोवा ईद अनतान: ना नीन विरूद्ध आईन.
EZE 39:2 ना नीनी तिर्गुसकु तराईन, अदिक उत्तर दिशा अन दुर दुर द्याशगोळ से येर्सकु तराईन, अदिक इस्त्राएल इन पहाळीगोळ मा पोहचुसाईन.
EZE 39:3 अल ना नीन धनुष नीन डाक्या कय देल केडाईन, अदिक नीन तीरगोळी नीन ऊजवा कय देल केळसुस बुळाईन.”
EZE 39:4 नी तान सप्पा दलगोळ अदिक तान सांगुळ इन सप्पा जातीगोळ सांगुळ इस्त्राएल इन पहाळीगोळ मा कोंदकु आदान; ना नीनी अलग अलग मासाहारी पक्षीगोळ अदिक आळी दाकळव जनावरगोळ्द भोजन माळ कोमाईन.
EZE 39:5 नी केई दा बीद्या, यतिकी ना अच हींग अंदीन, परमेश्वर यहोवा अन ईदा वाणी हुन.
EZE 39:6 ना मागोग नगर दा अदिक द्वीपगोळ निडर ईरावाळेर न्याड्या बेक्की हचाईन; अदिक आंदुर जान्स कोंडार कि ना यहोवा हुईन.
EZE 39:7 “ना तान प्रजा इस्त्राएलगोळ न्याड्या तान क्याल्सा प्रगट माळाईन; अदिक तान पवित्र हेसुर मात अपवित्र आग गोळतीदील; आग राज्य राज्य अन लॉकुर भी जान्स कोंडार कि ना यहोवा, इस्त्राएल उन पवित्र हुईन.
EZE 39:8 ईद घटना आगावाळा आद अदिक अद आगेदीत, परमेश्वर यहोवा अन ईदा वाणी आद. ईद अदा दीन हुन यदुर्द चर्चा ना माळीन.”
EZE 39:9 “आग इस्त्राएल नगर दाकळोर ईरावाळेर होट्टार अदिक हथियारगोळी बेक्की हचकु होताक कोंडार, ढाल, अदिक फरी, धनुष, अदिक तीर, कोल, बर्छा, सप्पा अक आंदुर येळ वर्ष ताका होताकतेला ईत्तार.
EZE 39:10 ईदुर कारण आंदुर मैदान दा हुळ्ली बीनुसतीदील, न आळी दा कळदार, यतिकी आंदुर हथियार इक अच होताक तोदार, आंदुर तान लुट्सावाळेर इक अच लुटस्यार, अदिक कसावाळेर से कसतार, परमेश्वर यहोवा अन ईदा वाणी हुन.”
EZE 39:11 “आ समय ना गोग राज्य अक इस्त्राएल इन द्याश दा कब्रस्तान कोळाईन, अद ताल इन पूर्व दी ईत्तीत; अद होगा बरावाळेर्द तराई अनकु आदीत. अदिक होगा बरावाळेर इक अल रूकसोद बिद्दीत; अल सप्पा बीळ सांगुळ गोग इक मुण्ण कोटकु आदीत अदिक आ जागा अन हेसुर गोग इन भीळ इन तराई बिद्दीत.
EZE 39:12 इस्त्राएल उन घराना आंदरी येळ तींगुळ ताका मुण्ण कोळतेला ईत्तीत ताकी तान द्याश उक शुद्ध माळुल.
EZE 39:13 द्याश इन सप्पा लॉकुर मिलुस्कु आंदरी मुण्ण कोट्टार; अदिक या समय नान महिमा आदीत, आ समय आंदुर्द भी हेसुर धोळ्द आदीत, परमेश्वर यहोवा अन ईदा वाणी हुन.
EZE 39:14 आग आंदुर मंळसागोळी नीवळुस्यार, जो हमेशा ईदा क्याल्सा दा हतकु ईत्तार, मतलब द्याश दा वयाळ वयाळकु होगा बरावाळेर सांगुळ द्याश इक शुद्ध माळोर साटी आंदरी जो जमीन इन म्याकुच बिदकु आर, मुण्ण कोट्टार; अदिक येळ दीन तिंगुळ इन बितुसदुर ताका आंदुर ढुंढ्स ढुंढ्सकु ईद क्याल्सा माळतेला ईत्तार.
EZE 39:15 द्याश दा होगा बरावाळेर दा टु याग यावारा मंळसा अन येलु नोळुल, आग आऊन हाती ऊंद चिन्ह नीदरूस्यान, ईद आ समय ताका बन्सकु ईत्तीत यागासताका मुण्ण कोळावाळेर अदरी गोग इन भीळ इन तराई दा नळ्स कोमालुर.
EZE 39:16 अल नगर इन हेसुर भी ‘हमोना’ आद. ईद द्याश शुद्ध माळकु आदीत.”
EZE 39:17 “बाक हे मंळसा अन सन्तान, परमेश्वर यहोवा ईद अनतान: अलग अलग सप्पा पक्षीगोळ अदिक सप्पा आळी दाकळव जनावरगोळी आग्या कोळ, जमा आगकु बरी, ना ई धोळ्द यग्य दा जो ना नीम साटी इस्त्राएल इन पहाळीगोळ मा माळतीन, हर ऊंद दिशा टु जमा आगी कि नीव मास तिनी अदिक रक्ता कुडी.
EZE 39:18 नीव शुरवीरगोळ्द मास तिंदीर, अदिक पृथ्वी इन प्रधानगोळ्द रक्ता कुळदीर अदिक म्यांडा, पाड्डा, व्हातगोळ, अदिक वस्तागोळ्द भी जो सप्पा चा सप्पा बाशान इन तैयार माळकु ईत्तव.
EZE 39:19 ना आ भोज इन ण्याण टु जो ना नीम साटी तैयार माळतीन, नीव तिंत तिंत मटसेदीर, अदिक अदुर रक्ता कुडुत कुडुत छकसेदीर.
EZE 39:20 नीव नान मेज मा घ्वाळा, सवारगोळ, शूरवीरगोळ, अदिक सप्पा प्रकार इन योध्दागोळ से तृप्त आदीर, परमेश्वर यहोवा अन ईदा वाणी हुन.”
EZE 39:21 “ना राज्य राज्य अन न्याड्या तान महिमा प्रगट माळाईन, अदिक राज्य राज्य सप्पा लॉकुर नान न्याय इन क्याल्सा जो ना माळाईन, अदिक नान कय जो आंदुर मा बीद्दीत, नोळ कोंडेव.
EZE 39:22 आ दीन टु मुंद इस्त्राएल उन घराना जान्स कोंडीत कि यहोवा नामव परमेश्वर हुन.
EZE 39:23 राज्य राज्य अन लॉकुर भी जान्स कोंडार कि इस्त्राएल उन घराना तान अधर्म इन कारण गुलामी दा होगीत; यतिकी आंदुर नान से हींग विश्वासघात माळदुर कि ना आंदुर से तान बाय फेर्स कोंडीन अदिक आंदरी आंदुर दुश्मनगोळ वश दा माळ कोंडीन, अदिक आंदुर सप्पा तलवार देल कोंदकु आदुर.
EZE 39:24 ना आंदुर्द अशुध्दता अदिक अपराधगोळ्द अच अनुसार आंदुर से बर्ताव माळकु आंदुर से तान बाय फेर्स कोंडीदीन.”
EZE 39:25 “ईदुरसाटी परमेश्वर यहोवा ईद अनतान: ईग ना याकूब उक गुलामी देल वापस तराईन, अदिक इस्त्राएल इन सप्पा घराना मा दया माळाईन; अदिक तान पवित्र हेसुर इन साटी नानी जलन आदीत.
EZE 39:26 आग आ सप्पा विश्वासघात इन कारण जो आंदुर नान विरूद्ध माळदुर आंदुर लज्जित आदार; अदिक तान द्याश दा निडर ईत्तार; अदिक याऊ आंदरी अंजुसतीदील.
EZE 39:27 याग ना आंदरी राज्य राज्य अन न्याड्या टु वापस तराईन, अदिक आ दुश्मनगोळ द्याशगोळ टु जमा माळाईन, आग हापाळ जातीगोळ्द नजर दा आंदुर द्वारा पवित्र ठहरूसाईन.
EZE 39:28 आग आंदुर जान्स कोंडार कि यहोवा नामव परमेश्वर हुन, यतिकी ना आंदरी राज्य राज्य दा गुलाम माळकु आंदुर खुद इन द्याश दा जमा माळदीन. ना आंदुर दा टु यारीकु मात परदेश दा बिळतीदील,
EZE 39:29 अदिक आंदुर से तान बाय मात यागलु तिर्गुसतीदील, यतिकी ना इस्त्राएल उन घराना मा तान आत्मा हाक्कीन, परमेश्वर यहोवा अन ईदा वाणी हुन.”
EZE 40:1 नामव गुलामी इन पच्चीसवा वर्ष मतलब यरूशलेम नगर इन होगदुर बाद्दा चौदावा वर्ष इन पयला तींगुळ इन हतवा दिशी इक, यहोवा अन शक्ती नान मा आत, अदिक आव नानी अल पोहचुसदुन.
EZE 40:2 तान दर्शनगोळ दा परमेश्वर नानी इस्त्राएल उन द्याश दा पोहचुसदुन अदिक अल ताका ऊंद हापाळ ऊंचा पहाळी मा नीदरूसदुन, यदुर मा दक्षिण इन दी मान्सी यातोदारा नगर इन आकार ईरूल.
EZE 40:3 याग आव नानी अल वोतुन, रा ना येन नोळदीन कि पीतल इन घाई अदिक कय दा सन इन फिता अदिक नापसोद बास हुडुकु ऊंद मंळसा फाटक मा नीदुरकु आन.
EZE 40:4 आ मंळसा नान से अंदुन, “हे मंळसा अन सन्तान, तान कण्णगोळ देल नोळ, अदिक तान कीवगोळ से केळ; अदिक जो येनारा ना नीनी तोर्साईन अदुर मा ध्यान कोळ, यतिकी नी ईदुरसाटी अल पोहचुस्कु आग्या कि ना नीनी ईव मातगोळी तोर्साईन; अदिक जो येनारा नी नोळ्या अद इस्त्राएल उन घराना अक हेळेत.”
EZE 40:5 अदिक नोळी, भवन इन व्हार्या नाकु दी ऊंद दिवाल ईरोद, अदिक आ मंळसा अन कय दा नापसोद बास ईरोद, यदुर्द लंबाई हींग आर कय इन ईरोद जो साधारण कयगोळ देल चौवा तीम येक्कुल आद; अत: आव आ दिवाल इन मोटाई नाप्सकु बिदुर तिमुर्द नोळदुन, बाक अदुर्द ऊचाई भी नाप्सकु बिदुर तिमुर्द नोळदुन.
EZE 40:6 आग आव आ फाटक इन हाती बंदुन यदुर्द बाय पूर्व इन दी ईरोद, अदिक अदुर सीळी मा येरकु फाटक इन येढ्ढु डेवढीगोळ्द चौळाई नाप्सकु ऊंद ऊंद बास तिमुर्द नोळदीन.
EZE 40:7 पहरावाळा कोठरीगोळ बास तीम लंबा अदिक बास तीम चौळा ईरोद; अदिक येढ्ढ येढ्ढ कोठरीगोळ्द अन्तर अईद कय इन ईरोद; अदिक फाटक इन डेवढी जो फाटक इन ओसारा अन हाती भवन इन दी ईरोद, अद भी बास तीम इन ईरोद.
EZE 40:8 आग आव फाटक इन अद ओसारा जो भवन इन मुंद ईरोद, नाप्सकु बास तिमुर्द नोळदुन.
EZE 40:9 आव फाटक इन ओसारा नाप्सकु येठ्ठ कय इन नोळदुन, अदिक अदुर खंबागोळ येढ्ढ येढ्ढ कय इन नोळदुन, अदिक फाटक इन ओसारा भवन इन मुंद ईरोद.
EZE 40:10 पूर्वी फाटक इन येढ्ढु दी मुर मुर पहरेवाला कोठरीगोळ ईरव जो सप्पा ऊंद अच नाप इन ईरव, अदिक येढ्ढु दीकळव खंबा भी ऊंद नाप इन ईरव.
EZE 40:11 बाक आव फाटक इन द्वार इन चौळाई नाप्सकु हत्त कय इन नोळदुन; अदिक फाटक इन लंबाई नाप्सकु तेरहा कय इन नोळदुन.
EZE 40:12 येढ्ढु दीकळव पहरावाळा कोठरीगोळ मुंद कय तिमुर्द जागा ईरोद अदिक येढ्ढु दी कोठरीगोळ आर आर कय ईनव ईरव.
EZE 40:13 बाक आव फाटक इक ऊंद दी पहरेवाला कोठरी इन छत टु हुडुकु दुसरा दीकळोद पहरेवाला कोठरी इन छत नाप्सकु पच्चीस कय इन दुरी नोळदुन, अदिक दरवाजा आमने सामने ईरव.
EZE 40:14 बाक आव साठ कय इन खंबा नाप्सदुन, अदिक आंगुळ, फाटक इन आस पास, खंबा ताका ईरोद.
EZE 40:15 फाटक इन व्हार्या दरवाजा अन मुंद टु हुडुकु अदुर बुळ्कळोद ओसारा अन मुंद ताका पचास कय इन अन्तर ईरोद.
EZE 40:16 पहरावाला कोठरी दा, अदिक फाटक इन बुळ्क नाकु दीकळव कोठरीगोळ न्याड्या अन खंबागोळ न्याड्या न्याड्या दा झिलमिलीदार खिळकीगोळ ईरव, अदिक खंबागोळ ओसारागोळ दा भी हांग अच ईरव; अदिक फाटक इन बुळ्कळोद नाकु दी खिळकीगोळ ईरव, अदिक हर ऊंद खंबा मा खजुर इन मार्रगोळ अगुळकु ईरव.
EZE 40:17 आग आव नानी व्हार्या अन आंगुळ दा वोतुन, अदिक आ आंगुळ इन नाकु दी कोठरीगोळ ईरव; अदिक ऊंद फर्श माळकु ईरोद, यदुर मा तीस कोठरीगोळ माळकु ईरव.
EZE 40:18 ईद फर्श मतलब ल्यालमागोळ्द फर्श टु हतकु ईरोद अदिक अदुरव लंबाई इन अनुसार ईरोद.
EZE 40:19 बाक आव ल्यालमागोळोद फाटक इन मुंद टु हुडुकु बुळ्कळोद आंगुळ ताका नाप्सकु सौ कय इन नोळदुन; अद पूर्व अदिक उत्तर येढ्ढु दी हींग अच ईरोद.
EZE 40:20 आग व्हार्या अन आंगुळ उत्तरमुखी फाटक इन लंबाई अदिक चौळाई आव नाप्सदुन.
EZE 40:21 अदुर येढ्ढु दी मुर मुर पहरावाला कोठरीगोळ ईरव, अदिक ईदुर भी खंबागोळ ओसारा अन नाप पयले फाटक इन अनुसार ईरोद; ईदुर लंबाई पचास अदिक चौळाई पच्चीस कय इन ईरोद.
EZE 40:22 ईदुर भी खिळकीगोळ अदिक खंबागोळ ओसारा अदिक खजुरगोळ्द नाप पूर्वमुखी फाटक घाई ईरोद; अदिक ईदुर मा येरोर साटी येळ सीळीगोळ ईरव; अदिक अऊर मुंद ईदुर्द ओसारा ईरोद.
EZE 40:23 बुळ्कळोद आंगुळ इन उत्तर अदिक पूर्व इन दी दुसरा फाटक इन मुंद फाटक ईरव अदिक आव फाटक इन दुरी नाप्सकु सौ कय इन नोळदुन.
EZE 40:24 बाक आव नानी दक्षिण इन दी वोतुन, अदिक दक्षिण दी ऊंद फाटक ईरोद; अदिक आव ईदुरव खंबागोळ अदिक खंबागोळ्द ओसारा नाप्सकु ईऊरव हांग अच नाप नोळदुन.
EZE 40:25 आ खिळकीगोळ घाई ईदुरव अदिक ईदुरव खंबागोळ ओसारा अन नाकु दी भी खिळकीगोळ ईरव; ईदुर्द भी लंबाई पचास अदिक चौळाई पच्चीस कय इन ईरोद.
EZE 40:26 ईदुर दा भी येरोर साटी येळ सीळीगोळ ईरव अदिक अदुर मुंद खंबागोळ्द ओसारा ईरोद; अदिक अदुर येढ्ढु दी खंबागोळ मा खजुर इन मार्र अगुळकु ईरव.
EZE 40:27 दक्षिण इन दी भी बुळ्कळोद आंगुळ इन ऊंद फाटक ईरोद, अदिक आव दक्षिणी इन दी येढ्ढु फाटकगोळ दुरी नाप्सकु सौ कय इन नोळदुन.
EZE 40:28 आग आव दक्षिणी फाटक टु आगकु नानी बुळ्कळोद आंगुळ दा वोतुन, अदिक आव दक्षिणी फाटक इक नाप्सकु हांग अच नोळदुन.
EZE 40:29 मतलब ईदुरव भी पहरवाला कोठरीगोळ ईरव, अदिक खंबागोळ, अदिक खंबागोळ्द ओसारा, सप्पा हांग अच ईरव; अदिक ईदुर अदिक ईदुरव खंबागोळ ओसारा अन नाकु दी खिळकीगोळ ईरव; अदिक ईदुर्द लंबाई पचास अदिक चौळाई पच्चीस कय इन ईरोद.
EZE 40:30 ईदुर नाकु दीकळोद ओसारा भी पच्चीस कय लंबा, अदिक पचास कय चौळा ईरोद.
EZE 40:31 ईदुर खंबागोळ्द ओसारा व्हार्या आंगुळ दी ईरोद, अदिक ईदुर खंबागोळ मा भी खजुर इन मार्र अगुळकु ईरव, अदिक ईदुर मा येरली येठ्ठ सीळीगोळ ईरव.
EZE 40:32 बाक आव मंळसा नानी पूर्व इन दी बुळ्कोद आंगुळ दा वोतुन, अदिक आप्पाटी इन फाटक इक नाप्सकु हांग अच नोळदुन.
EZE 40:33 ईदुर्द भी पहरावाला कोठरीगोळ अदिक खंबागोळ अदिक खंबागोळ्द ओसारा, सप्पा हांग अच ईरव; अदिक ईदुर अदिक ईदुरव खंबागोळ ओसारा अन नाकु दी भी खिळकीगोळ ईरव; ईदुर लंबाई पचास अदिक चौळाई पच्चीस कय इन ईरोद.
EZE 40:34 ईदुर्द ओसारा भी व्हार्या अन आंगुळ इन दी ईरोद, अदिक अदुर येढ्ढु दी खंबागोळ मा खजूर इन मार्र अगुळकु ईरव; अदिक ईदुर मा भी येरली येठ्ठ सीळीगोळ ईरव.
EZE 40:35 बाक आ मंळसा नानी उत्तरी फाटक इन हाती वोतकु अदरी नाप्सदुन, अदिक अदुर्द भी नाप हांग अच नोळदुन.
EZE 40:36 अदुरव भी पहरावाला कोठरीगोळ अदिक खंबागोळ अदिक ओसारा ईरोद, अदिक अदुर नाकु दी भी खिळकीगोळ ईरव; ईदुर लंबाई पचास अदिक चौळाई पच्चीस कय इन ईरोद.
EZE 40:37 अदुर खंबागोळ व्हार्या अन आंगुळ इन दी ईरव, अदिक अऊर मा भी येढ्ढु दी खजुर इन मार्र अगुळकु ईरव; अदिक अदुर मा येरली येठ्ठ सीळीगोळ ईरव.
EZE 40:38 बाक फाटकगोळ हात्ती इन खंबागोळ हात्ती दरवाजा सांगुळ कोठरी ईरव, येल होमबली तोळकु आग तोगोद.
EZE 40:39 होमबली, पापबली, अदिक दोषबली इन जनावरगोळ्द वध माळोरसाटी फाटक इन ओसारा अन हात्ती अदुर येढ्ढु दी येढ्ढ येढ्‌ढ मेजगोळ ईरव.
EZE 40:40 फाटक इन ऊंद व्हार्या अन अलंग मा मतलब उत्तरी फाटक इन दरवाजा अन चळाई मा येढ्ढ मेजगोळ ईरव;
EZE 40:41 फाटक इन येढ्ढु दी नाक नाक मेज ईरव, सप्पा मीलुस्कु येठ्ठ मेज ईरव, जो बलीपशु वध माळोर साटी ईरव.
EZE 40:42 बाक होमबली इन साटी तराशकु कल्ल इन नाक मेजगोळ ईरव, जो देळ कय लंबा, देळ कय चौळा, अदिक कयतीम ऊंचा ईरोद; अऊर मा होमबली अदिक मेलबली इन जनावरगोळ्द वध माळोरसाटी हथियार ईटकु आगतोगोव.
EZE 40:43 बुळ्क नाकु दी चौवातीम इन हुकगोळ हतकु ईरव, अदिक मेजगोळ मा चळावा अन मास ईटकु ईरोद.
EZE 40:44 बुळ्कोद आंगुळ इन उत्तरी फाटक इन व्हार्या हाळ हाळावाळेर्द कोठरीगोळ ईरव यार द्वारा दक्षिण इन दी; अदिक पूर्वी फाटक इन दी ऊंद कोठरी ईरोद, यदुर्द दरवाजा उत्तर इन दी ईरोद.
EZE 40:45 आव नान से अंदुन, “ईद कोठरी, यदुर्द दरवाजा दक्षिण इन दी आद, आ याजकगोळ साटी हुन जो भवन इन चौकसी माळतार,
EZE 40:46 अदिक या कोठरी इन दरवाजा उत्तर इन दी आद, अद आ याजकगोळ साटी आद जो वेदी इन चौकसी माळतार; ईंदुर सदोक उन सन्तान उर; अदिक लेवीगोळ दा टु यहोवा अन स्यावा टहल माळोरसाटी सिर्फ ईंदुर अच हात्ती होगतार.”
EZE 40:47 बाक आव आंगुळ इक नाप्सकु अदरी चौकोर मतलब सौ कय लंबा अदिक सौ कय चौळा नोळदुन; अदिक भवन इन मुंद वेदी ईरोद.
EZE 40:48 बाक आव नानी भवन इन ओसारा दा वोतुन, अदिक ओसारा अन येढ्ढु दी खंबागोळी नाप्सकु अईद अईद कय इन नोळदुन; अदिक येढ्ढु दी फाटक इन चौळाई मुर मुर कय इन ईरोद.
EZE 40:49 ओसारा अन लंबाई ईप्पत कय अदिक चौळाई हन्नेळ कय इन ईरोद; अदिक अदुर मा येरली सीळीगोळ ईरव; अदिक येढ्ढु दी खंबा अन हात्ती लाटगोळ ईरव.
EZE 41:1 बाक आव नानी मंदिर इन हाती वोतुन, अदिक अदुर येढ्ढु दी खंबागोळी नाप्सकु आर आर कय चौळा नोळदीन, ईद रा ड्यारा अन चौळाई ईरोद.
EZE 41:2 दरवाजा अन चौळाई हत्त कय इन ईरोद, अदिक दरवाजा अन येढ्ढु दिकळव दिवाल अईद अईद कय ईनव ईरोव; अदिक आव मंदिर इन लंबाई नाप्सकु चालीस कय इन, अदिक अदुर्द चौळाई ईप्पत कय आत.
EZE 41:3 आग आव बुळ्क होगकु दरवाजा अन खंबागोळी नाप्सदुन, अदिक येढ्ढ येढ्ढ कय इन पाऊसदुन; अदिक दरवाजा आर कय इन ईरोद; अदिक दरवाजा अन चौळाई येळ कय इन ईरोद.
EZE 41:4 आग अव बुळ्क इन भवन अदिक चौळाई मंदिर इन मुंद नाप्सकु ईप्पत ईप्पत कय इन पाऊसदुन; अदिक आव नान से अंदुन, “ईद रा परमपवित्र जागा हुन.”
EZE 41:5 बाक आव भवन इन दिवाल इक नाप्सकु आर कय पाऊसदुन, अदिक भवन इन आसपास नाक नाक कय चौळा व्हार्या अन कोठरीगोळ ईरव.
EZE 41:6 इव व्हार्या अन कोठरीगोळ मुर मंजली ईरव; अदिक ऊंद ऊंद दा तीस तीस कोठरीगोळ ईरव. भवन इन आसपास इन दिवाल ईदुरसाटी ईरव कि व्हार्या अन कोठरीगोळ अऊर सहारा दा इरूल; अदिक अदुर दा अच कोठरीगोळ कळीगोळ फसुसकु ईरव अदिक भवन इन दिवाल इन सहारा दा ईला ईरव.
EZE 41:7 भवन इन हाती जो कोठरीगोळ व्हार्या ईरव, अऊर दा टु जो म्याकुच ईरव, अव येक्कुल चौळा ईरव; मतलब भवन इन हाती जो येनारा बन्सकु ईरोद, अद ह्यांग ह्यांग म्याकुच दी येर तोगोद, हांग हांग चौळा आगतेला होत; ई रिती, ई मान्ना अन चौळाई म्याकुच इन दी वाळुसेगीत, अदिक लॉकुर ल्यालमा अन मंजील इन न्याड्या टु म्याकळोद मंजील इक येर सकोर.
EZE 41:8 बाक ना भवन इन आसपास ऊचा जमीन नोळदीन, अदिक व्हार्यागोळ कोठरीगोळ ऊचाई जोळ ताका आर कय इन बास इन ईरोद.
EZE 41:9 व्हार्या अन कोठरीगोळ साटी जो दिवाल ईरव, अव अईद कय मोटा ईरव, अदिक जो जागा खाली ईतोगीत, अद भवन इन व्हार्या अन कोठरीगोळ्द जागा ईरोद.
EZE 41:10 व्हार्या कोठरीगोळ न्याड्या न्याड्या भवन इन आसपास ईप्पत कय इन अन्तर ईरोद.
EZE 41:11 व्हार्या अन कोठरीगोळ दरवाजा आ जागा अन दी ईरोद, जो खाली ईरोद, मतलब ऊंद दरवाजा उत्तर इन दी अदिक दुसरा दक्षिण इन दी ईरोद; अदिक जो जागा ईतोत, अदुर चौळाई नाकु दी अईद अईद कय इन ईरोद.
EZE 41:12 बाक जो भवन मंदिर इन पश्चिमी इन दी मुंद ईरोद, अद सत्तर कय चौळा ईरोद; अदिक भवन इन आसपास इन दिवाल अईद कय मोटा ईरोद, अदिक अदुर लंबाई नब्बे कय इन ईरोद.
EZE 41:13 आग आव मंदिर इन लंबाई नाप्सकु सौ कय इन नोळदुन; अदिक दिवालगोळ सांगुळ आंगुळ इन भी लंबाई नाप्सकु सौ कय इन नोळदुन.
EZE 41:14 भवन इन पुर्वी सामना अदिक अदुर्द आंगुळ सौ कय चौळा इरोद.
EZE 41:15 बाक आव हींदळोद आंगुळ इन मुंदळोद दिवाल इन लंबाई यदुर येढ्ढु दी सज्जा ईरव, नाप्सकु सौ कय इन नोळदुन, अदिक बुळ्कळोद भवन अदिक आंगुळ इन ओसारा अक भी नाप्सदुन.
EZE 41:16 आग आव डेवढीगोळ अदिक झिलमिलीदार खिळकीगोळी, अदिक आसपास इन मुरू मंजीलगोळ सज्जा अक नाप्सदुन जो डेवढी इन मुंद ईरव, अदिक नाकु दी अऊर्द पट्टीगोळ कटकु ईरव; अदिक जमीन टु खिळकीगोळ ताका अदिक खिळकीगोळ आसपास सप्पा येल्यारा पट्टीगोळ कटकु ईरव.
EZE 41:17 बाक आव दरवाजा अन म्याकुच इन जागा बुळ्कोळोद भवन ताका अदिक अदुर व्हार्या भी अदिक आसपास इन सप्पा दिवाल इन बुळ्क अदिक व्हार्या भी नाप्सदुन.
EZE 41:18 अदुर दा गिधाळ अदिक खजुर इन मार्र हींग अगुळकु ईरव कि येढ्ढ येढ्ढ गिधाळगोळ न्याड्या ऊंद ऊंद खजुर इन मार्र ईरोद; अदिक गिधाळ इन येढ्ढ येढ्ढ मार्रा ईरव.
EZE 41:19 ई प्रकार देल ऊंद ऊंद खजुर इन ऊंद दी मंळसा अन मार्रा माळकु ईरोद, अदिक दुसरा दी हारोद हुल्ल इन मार्रा माळकु ईरोद. ईदा रीती सप्पा भवन इन नाकु दी माळकु ईरोद.
EZE 41:20 जमीन टु हुडुकु दरवाजा अन म्याकुच ताका गिधाळ अदिक खजुर इन मार्र अगुळकु ईरव, मंदिर इन दिवाल ईदा प्रकार देल माळकु ईरोद.
EZE 41:21 भवन इन दरवाजा अन खंबागोळ चौकोर ईरव, अदिक पवित्र जागा अन मुंदळोद रूप मंदिर इन घाई ईरोद.
EZE 41:22 वेदी काट इन माळकु ईरोद, अदिक अदुर ऊचाई नाक कय, अदिक लंबाई येढ्ढ कय इन ईरोद; अदिक अदुर क्वाना अदिक अदुर सप्पा पाट अदिक व्हर्सगोळ भी काठ इन ईरोद. आव नान से अंदुन, “ईद रा यहोवा अन हात्ती इन मेज हुन.”
EZE 41:23 मंदिर अदिक पवित्र जागा अन दरवाजागोळ्द येढ्ढ येढ्ढ कवाळ ईरव.
EZE 41:24 अदिक हर ऊंद कवाळ दा येढ्ढ येढ्ढ मुळुसावाळा पल्ला ईरव, हर ऊंद कवाळ साटी येढ्ढ येढ्ढ पल्ला.
EZE 41:25 ह्यांग मंदिर इन दिवालगोळ दा गिधाळ अदिक खजुर इन मार्र अगुळकु ईरव, हांग अच अदुर कवाळगोळ मा भी ईरव, अदिक ओसारा अन व्हार्या इन दी हुळ्ली इन मोटा मोटा धरना ईरव.
EZE 41:26 ओसारा अन येढ्ढु दी झिलमिलीदार खिळकीगोळ ईरव अदिक खजुर इन मार्रगोळ अगुळकु ईरव; अदिक भवन इन व्हार्यागोळ कोठरीगोळ अदिक मोटा मोटा धरना भी ईरव.
EZE 42:1 बाक आव नानी व्हार्या आंगुळ दा उत्तर इन दी वोतुन, अदिक नानी आ येढ्ढ कोठरीगोळ हाती तंदुन जो भवन इन आंगुळ इन मुंद अदिक अदुर उत्तर इन दी ईरोद.
EZE 42:2 सौ कय इन दुरी मा उत्तरी दरवाजा ईरोद, अदिक चौळाई पचास इक इन ईरोद.
EZE 42:3 बुळ्कळोद आंगुळ इन ईप्पत कय मुंद अदिक व्हार्या आंगुळ इन फर्ची इन मुंद मुरु मंजील दा सज्जा ईरोव.
EZE 42:4 कोठरीगोळ मुंद बुळ्क इन दी होगोद हत्त कय चौळा ऊंद हादी ईरोद; अदिक कय तीम इन ऊंद अदिक हादी ईरोद; अदिक कोठरीगोळ्द दरवाजा उत्तर इन दी ईरोव.
EZE 42:5 म्याकुच कोठरीगोळ श्याण्णेव ईरव, मतलब सज्जागोळ कारण अव ल्यालमा अदिक न्याड्या अन कोठरीगोळ से श्यांण्द ईरोद.
EZE 42:6 यतिकी अव मुर मंजील ईरोद, अदिक आंगुळगोळ घाई अऊरव खंबा ईला ईरव; ई कारण म्याकुच इन कोठरीगोळ ल्यालमा अदिक न्याड्या अन कोठरीगोळ से श्याण्णेव ईरव.
EZE 42:7 जो दिवाल कोठरीगोळ मुंद व्हार्या आस पास ईरव मतलब कोठरीगोळ मुंद व्हार्या आंगुळ इन दी ईरव, अदुर लंबाई पचास कय इन ईरोद.
EZE 42:8 यतिकी व्हार्या अन आंगुळ कोठरीगोळ पचास कर लंबा ईरोद, अदिक मंदिर इन मुंद इन अलंग सौ कय इन ईरोद.
EZE 42:9 ई कोठरीगोळ ल्यालमा पूर्व इन दी हादी ईरोद, येल लॉकुर व्हार्या अन आंगुळ टु इऊर दा होगतोगोर.
EZE 42:10 आंगुळ इन दिवाल इन चौळाई दा पूर्व इन दी अलग अलग जागा अदिक भवन येढ्ढु उन मुंद कोठरीगोळ ईरव.
EZE 42:11 अऊर मुंदळोद हादी उत्तरी कोठरीगोळ हादी घाई ईरोद; अऊर लंबाई-चौळाई बराबर ईरोद अदिक निकास अदिक ढंग अऊर दरवाजा अन घाई ईरव.
EZE 42:12 दक्षिणी कोठरीगोळ दरवाजा अन अनुसार हादी इन ताल्ला मा दरवाजा ईरोद, मतलब पूर्व इन दी दिवाल इन मुंद, येल टु लॉक अऊर दा प्रवेश माळ तोगोर.
EZE 42:13 बाक आव नान से अंदुन, “ईव उत्तरी अदिक दक्षिणी कोठरीगोळ जो आंगुळ इन मुंद आव, अव अच पवित्र कोठरीगोळ हुव, यदुर दा यहोवा अन हाती होगावाळेर याजक परमपवित्र वस्तुगोळ तीन तोदार, अव परमपवित्र वस्तुगोळ, अदिक अन्नबली, अदिक पापबली, अदिक दोषबली, अल्या ईट्यार; यतिकी अद जागा पवित्र आद.
EZE 42:14 याग याग याजक लॉकुर बुळ्क होदार, आग आग होळा समय आंदुर पवित्र जागा टु व्हार्या आंगुळ दा हींग अच होळतीदील, मतलब आंदुर पयले तान स्यावा टहल इन कपळा पवित्र जागा दा ईट कोंडार; यतिकी ईव कोठरीगोळ पवित्र आव. आग आंदुर दुसरा कपळा हाक्कु साधारण लॉकुर जागा दा होदार.”
EZE 42:15 याग आव बुळ्कळोद भवन इन नाप्स कोंडुन, आग नानी पूर्व दिशा अन फाटक इन हादी टु व्हार्या वोतकु व्हार्या अन जागा नाकु दी नाप्सली कुरतुन.
EZE 42:16 आव पूर्वी इक नाप्सोद बास देल नाप्सकु अईद सौ बास इन पाऊसदुन.
EZE 42:17 आग आव उत्तरी इक नाप्सोर बास देल नाप्सकु अईद सौ बास इन पाऊसदुन.
EZE 42:18 आग आव दक्षणी इक नाप्सोर बास देल नाप्सकु अईद सौ बास इन पाऊसदुन;
EZE 42:19 अदिक पश्चिम इन दी तिर्गकु आव नाप्सोर बास देल नाप्सकु अदरी अईद सौ बास इन नोळदुन.
EZE 42:20 आव आ जागा अन नाकु सीमागोळ नाप्सदुन, अदिक अदुर नाकु दी ऊंद दिवाल ईरोद, अद अईद सौ बास लंबा अदिक अईद सौ बास चौळा ईरोद, अदिक ईदुरसाटी बन्सकु ईरोद कि पवित्र अदिक सर्वसाधारण इक अलग अलग माळुल.
EZE 43:1 बाक आव नान इक आ फाटक इन हाती वोतुन जो पूर्वमुखी ईरोद.
EZE 43:2 आग इस्त्राएल उन परमेश्वर उन तेज पूर्व दिशा टु बत्त; अदिक आऊन वाणी हापाळ सा नीर इन घरघराहट घाई आत; अदिक आऊन तेज देल पृथ्वी प्रकाशीत आत.
EZE 43:3 ईद दर्शन आ दर्शन इन बराबर ईरोद, जो ना आऊक नगर इन नाश माळोर साटी बर्त नोळीदीन; अदिक आ दर्शन इन घाई, जो ना कबार गांगा अन तट मा नोळीदीन; अदिक ना बाय इन भार बीदोदीन.
EZE 43:4 आग यहोवा अन तेज आ फाटक टु आगकु जो पूर्वमुखी ईरोद, भवन दा होट्ट बत्त.
EZE 43:5 आग आत्मा नानी नेगुकु बुळ्कळोद आंगुळ दा पोहचुस्त; अदिक यहोवा अन तेज भवन दा तुम्मेत.
EZE 43:6 आग ना ऊंद जन उन शब्द केळदीन, जो भवन दा टु नानी अनोन, अदिक आव मंळसा नान हाती नीदुरकु ईरोन.
EZE 43:7 आव नान से अंदुन, “हे मंळसा अन सन्तान, यहोवा अन ईद वाणी आद: ईद रा नान सिंहासन इन जागा अदिक नान काल ईटोद जागा हुन, येल ना इस्त्राएल इन न्याड्या सदा वास माळतेला ईराईन. न रा इस्त्राएल उन घराना, अदिक अदुर राजा तान व्यभिचार देल, या तान ऊचा जागा दा तान राजागोळ लाशगोळ द्वारा नान पवित्र हेसुर बाक अशुध्द ठहरूसेव.
EZE 43:8 आंदुर तान देवढी नान डेवढी इन हाती, अदिक तान दरवाजा अन खंबागोळ हाती माळतोगोर, अदिक नान अदिक आंदुर न्याड्या सिर्फ दिवाल अव ईरोद, अदिक आंदुर तान घिनोना क्याल्सागोळ से नान हेसुर अशुध्द ठहरूसीदुर; इदुरसाटी ना कोप माळकु आंदरी नष्ट माळदीन.
EZE 43:9 ईग आंदुर तान व्यभिचार अदिक राजागोळ लाश नान हाती टु दुर माळुल, आग ना आंदुर बीच सदा वास माळतेला ईराईन.
EZE 43:10 “हे मंळसा अन सन्तान, नी इस्त्राएल उन घराना अक ई भवन इन नमुना तोर्स कि आंदुर तान अधर्म इन क्याल्सागोळ से लज्जित आगकु आ नमुना अक नाप्सुल.
EZE 43:11 अगर आंदुर तान सप्पा क्याल्सागोळ से लज्जित आगुल, रा आंदरी ई भवन इन आकार अदिक स्वरूप, अदिक ईदुर व्हार्या होगा बरोद हादी, अदिक ईदुर सप्पा आकार अदिक विधीगोळ, अदिक नियम हेळेत, अदिक आंदुर मुंद लिख्सकु ईटेत; यदुर देल आंदुर इदुर सप्पा आकार अदिक इदुर सप्पा विधीगोळ याद माळकु अदुर अनुसार माळुल.
EZE 43:12 भवन इन नियम ईद आद कि पहाळी इन चोटी इन नाकु दीकळोद सप्पा हिस्सा परमपवित्र आद. नोळ, भवन इन नियम ईदा हुन.
EZE 43:13 “ईत्ता कय इन नाप देल जो साधारण कय देल चौवा तीम येक्कुल ईरूल, वेदी इन नाप ईद हुन, मतलब अदुर आधार ऊंद कय इन, अदिक अदुर चौळाई ऊंद कय इन, अदिक अदुर नाकु दीकळोद छोर मा पटरी ऊंद चौवे अन. वेदी इन ऊचाई ईदा हुन:
EZE 43:14 जमीन मा हुडुकु आधार टु हुडुकु ल्यालमा अन कुर्ची ताका येढ्ढ कय इन ऊचाई ईरूल, अदिक अदुर चौळाई कय तिमुर्द ईरूल; अदिक श्याण कुर्ची टु हुडुकु धोळ कुर्ची ताका नाक कय ईरूल अदिक अदुर चौळाई कय तिमुर्द ईरूल;
EZE 43:15 अदिक म्याकुच इन हिस्सा नाक कय ऊचा ईरूल; अदिक वेदी मा होताकोद जागा अन नाक सींग म्याकुच इन दी होटकु ईरूल.
EZE 43:16 वेदी मा होततोगोद जागा चौकोर मतलब हन्नेळ कय लंबा अदिक हनुंद कय चौळा ईरूल.
EZE 43:17 ल्यालमा अन कुर्ची चौदा कय लंबा अदिक चौदा कय चौळा ईरूल, अदिक अदुर नाकु दिकळोद पटरी आरधा कय इन ईरूल, अदिक अदुर आधार नाकु दी कय तिमुर्द ईरूल. अदुर सीळी अदुर पूर्व दी ईरूल.”
EZE 43:18 बाक आव नान से अंदुन, हे मंळसा अन सन्तान, परमेश्वर यहोवा ईद अनतान, या दिशी होमबली येर्सली अदिक रक्ता छिळकुसोर साटी वेदी माळकु आगुल, आ दिन इन विधीगोळ ईव ठहरूसुल:
EZE 43:19 “मतलब लेवीय याजक लॉकुर, जो सदोक उन सन्तान उर, अदिक नान स्यावा टहल माळली नान हाती ईरतार, आंदरी नी पापबली इन साटी ऊंद पाड्डा कोळेत, परमेश्वर यहोवा अन ईदा वाणी हुन.
EZE 43:20 आग नी अदुर रक्ता दा टु येनारा हुडुकु वेदी इन नाकु सींगगोळ अदिक कुर्चीगोळ क्वाना अदिक नाकु दी पट्टी मा हचेत; ई प्रकार देल आऊन साटी प्रायश्चित माळा द्वारा अदरी पवित्र माळेत.
EZE 43:21 आग पापबली इन पाड्डा अक हुडुकु, भवन इन पवित्र जागा अन व्हार्या ठहरूस्द जागा दा होताक कोमेत.
EZE 43:22 दुसरा दिशी ऊंद निर्दोष व्हात पापबली माळकु येर्सेत; अदिक ह्यांग पाड्डा अन द्वारा वेदी पवित्र माळकु आगुल, हांग अच अद ई व्हात इन द्वारा भी पवित्र माळकु आदीत.
EZE 43:23 याग नी अदरी पवित्र माळ कोंड्या, आग ऊंद निर्दोष पाड्डा अदिक ऊंद निर्दोष म्यांडा येर्सेत.
EZE 43:24 नी अवरी याजक उन मुंद तरेत, अदिक याजक लॉकुर अऊर मा ऊप्प हाक्कु अवरी यहोवा अक होमबली माळकु येरस्यार.
EZE 43:25 येळ दिन ताका नी रोज पापबली इन साटी ऊंद व्हात तैयार माळेत, अदिक निर्दोष पाड्डा अदिक मर्रगोळ दा टु निर्दोष म्यांडा भी तैयार माळकु आगुल.
EZE 43:26 येळ दीन याजक लॉकुर वेदी इन साटी प्रायश्चित माळकु अदरी शुद्ध माळतेला ईरूल; ईदा भाती आऊन संस्कार आगुल.
EZE 43:27 याग अव दीनगोळ खतम आगुल, आग आठवा दिन इन बाद्दा टु याजक लॉकुर नीम साटी होमबली अदिक मेलबली वेदी मा येर्स तोगुल; आग ना नीम से खुश आगाईन, परमेश्वर यहोवा अन ईदा वाणी हुन.”
EZE 44:1 बाक आव नानी पवित्र जागा अन आ व्हार्या फाटक इन हाती वापस वोतुन, जो पूर्वमुखी आद: अदिक अद बंद ईरोद.
EZE 44:2 आग यहोवा नान से अंदुन, “ईद फाटक बंद ईरूल अदिक खोल्सकु ईला आगुल; याऊ ईल टु आगकु बुळ्क होग सकबाळुल; यतिकी इस्त्राएल उन परमेश्वर यहोवा ईल टु आगकु बुळ्क बंदान; ई कारण ईद बंद ईरूल.
EZE 44:3 सिर्फ प्रधान अच, प्रधान आगा कारण, नान मुंद भोजन माळोर साटी अल कुरतान; आव फाटक इन ओसारा टु आगकु बुळ्क होगुल, अदिक ईल टु आगकु होळुल.”
EZE 44:4 बाक आव उत्तरी फाटक इन हाती टु आगकु नान भवन इन मुंद वोतुन; आग ना नोळदीन कि यहोवा अन भवन यहोवा अन तेज देल तुम्मेत; अदिक ना बाय इन भार देल बीदोदीन.
EZE 44:5 आग यहोवा नान से अंदुन, “हे मंळसा अन सन्तान, ध्यान कोटकु तान कण्णगोळ देल नोळ, अदिक जो येनारा ना नीन से तान भवन इन सप्पा विधीगोळ अदिक नियमगोळ बारा दा अनाईन, अव सप्पा तान कण्णगोळ देल केळ; अदिक भवन इन प्रवेश अदिक पवित्र जागा अन सप्पा निकासगोळ मा ध्यान कोळुल.
EZE 44:6 अदिक आ बलवाईगोळ मतलब इस्त्राएल उन घराना से अनेत, परमेश्वर यहोवा ईद अनतान: हे इस्त्राएल उन घराना, तान सप्पा बेकार क्याल्सागोळ से ईग कय नेगु.
EZE 44:7 याग नीव नान भोजन मतलब ण्याण अदिक रक्ता येर्सतोगीर, आग नीव बिराना लॉकुर इक जो मन अदिक तन येढ्ढु उन खतनाहीन ईरीर, नान पवित्र जागा दा बरगोळीर कि आंदुर नान भवन अपवित्र माळुल; अदिक आंदुर नान वादा अक मुरू बुट्टुर यदुर देल नीम सप्पा बेकार क्याल्सा वाळुसेदव.”
EZE 44:8 नीव नान पवित्र वस्तुगोळ्द रक्षा माळीदील, लेकीन नीव तान अच मन देल अन्य लॉकुरी नान पवित्र जागा दा नान वस्तुगोळ्द रक्षा माळावाळेर ठहरूसदीन.
EZE 44:9 “ईदुरसाटी परमेश्वर यहोवा ईद अनतान: इस्त्राएलगोळ बीच यास अन्य लॉकुर आर, जो मन अदिक तन येढ्ढु उन खतनाहीन आर, आंदुर दा टु याऊ नान पवित्र जागा दा बर बाळुल.”
EZE 44:10 “लेकीन लेवीय लॉकुर जो आ समय नान से दुर आगेगीदुर, याग इस्त्राएली लॉकुर नानी बिटकु तान मुरतीगोळ हींद भटकुसीगीदुर, आंदुर तान अधर्म इन भार नेगदार.
EZE 44:11 लेकीन आंदुर नान पवित्र जागा दा टहलुए आगकु भवन इन फाटकगोळ पहरा कोळावाळेर अदिक भवन इन टहलुए ईत्तुर; आंदुर होमबली अदिक मेलबली इन जनावर लॉकुर साटी वध माळुल, अदिक आंदुर्द स्यावा टहल माळली आंदुर मुंद नीदुरकु ईरूल.
EZE 44:12 यतिकी इस्त्राएल उन घराना अन स्यावा टहल आंदुर आंदुरव मुरतीगोळ मुंद माळतोगोर, अदिक आंदुर ठोकर तिनोद अदिक अधर्म दा फसुसोद कारण आगेगीदुर; ई कारण ना आंदुर बारा दा किर्‍या तिंदीन कि आंदुर तान अधर्म इन भार नेगुल, परमेश्वर यहोवा अन ईदा वाणी हुन.
EZE 44:13 नान हाती बरबाळुल, अदिक न नान साटी याजक इन क्याल्सा माळुल; अदिक न नान यातोदु पवित्र वस्तु, या यातोदु परमपवित्र वस्तु उक मुट्ट सक बाळुल; आंदुर तान शरम इन अदिक जो बेकार क्याल्सा आंदुर माळ्यार, अऊर्द भी भार नेगुल.
EZE 44:14 तरी भी ना आंदरी भवन दाकळोद सौप्सद वस्तुगोळ रक्षक ठहरूसाईन; अदुर दा स्यावा अन याट क्याल्सा आगुल, अदिक जो येनारा अदुर दा माळोद आद, अदुर माळावाळेर आंदुर अच आगुल.”
EZE 44:15 “बाक लेवीय याजक जो सदोक उन सन्तान हुन, अदिक यार आ समय नान पवित्र जागा अन रक्षा माळदुर याग इस्त्राएली नान हाती टु भटकुसीगीदुर, आंदुर नान स्यावा टहल माळोर साटी नान हाती बरतोगुल, अदिक नानी ण्याण अदिक रक्ता येर्सली नान हाती नीदरूल, परमेश्वर यहोवा अन ईदा वाणी हुन.
EZE 44:16 आंदुर नान पवित्र जागा दा बरतोगुल, अदिक नान मेज इन हाती नान स्यावा टहल माळली इक बरूल अदिक नान वस्तुगोळ्द रक्षा माळुल.
EZE 44:17 याग आंदुर बुळ्कळोद फाटक टु आगतेला होगतोगुल, आग सन इन कपळा हाक्कु होगुल, अदिक याग आंदुर बुळ्कोद आंगुळ इन फाटकगोळ दा या अदुर बुळ्क स्यावा टहल माळतीर, आग आंदुर्द यातोदु ऊन इन कपळा हाकबाळुल.
EZE 44:18 आंदुर ताल्ला मा सन इन सुन्दर टोपीगोळ हाकुल अदिक नेळु दा सन इ जंग्यागोळ कटकु ईरूल; यातोदारा ईत्ता कपळागोळ से आंदुर नेळु कटबाळुल यदुर देल पसीना आगतद.
EZE 44:19 याग आंदुर व्हार्या आंगुळ दा लॉकुर हाती होळुल, आग जो कपळा हाक्कु आंदुर स्यावा टहल माळतोगोर, अवरी ईळ्सकु अदिक पवित्र कोठरीगोळ दा ईटकु दुसरा कपळा हाकुल, यदुर लॉकुर आंदुर कपळा अन कारण पवित्र ठहरूस बाळुल.
EZE 44:20 न रा आंदुर ताल्ला मुंडुसुल, अदिक न चुट्टी लंबा आग गोळुल; आंदुर सिर्फ तान चुटटी कळसुसुल.
EZE 44:21 बुळ्कळोद आंगुळ दा होगावती याऊ याजक अंगुर इन रास्सा कुडुबाळुल.
EZE 44:22 आंदुर रांड्या या बीळ्द आर्त इन से मदा माळ बाळुल; सिर्फ इस्त्राएल उन घराना अन वंश दा टु कुवारा या हींग रांड्या से मदा माळुल जो यातारा याजक उन आर्त आगीदार.
EZE 44:23 आंदुर नान प्रजा अक पवित्र अपवित्र अन भेद कल्सतोगुल, अदिक शुद्ध अशुद्ध अन अन्तर हेळ तोगुल.
EZE 44:24 याग यातोदारा मुकदमा आगुल आग न्याय माळोरसाटी इक भी आंदुर अच कुरूल, अदिक नान नियमगोळ अनुसार न्याय माळुल. नान सप्पा नियत हाब्बगोळ बारा दा भी आंदुर नान व्यवस्था अदिक विधिगोळ पालन माळुल, अदिक नान आराम दिनगोळी पवित्र मानसुल.
EZE 44:25 आंदुर यातारा मंळसा अन लाश इन हाती होगबाळुल कि अशुध्द आगेगुल; सिर्फ मोय-आप्प, पोर-पार; वार्ट, अदिक ईत्ता आकतींग इन लाश इन कारण यार्द मदा ईला आगीदाद आंदुर तान इक शुद्ध माळ सकतार.
EZE 44:26 याग आंदुर अशुध्द आगेदार, आग आंदुर साटी येळ दीन गिन्सकु आगुल अदिक आग आंदुर शुद्ध ठहरूसुल,
EZE 44:27 अदिक याता दिशी आंदुर पवित्र जागा मतलब बुळ्कळोद आंगुळ दा स्यावा टहल माळली बाक प्रवेश माळुल, आ दीन तान साटी पापबली येर्सुल, परमेश्वर यहोवा अन ईदा वाणी हुन.”
EZE 44:28 “आंदुर्द ऊंद अच खुद इन भाग आदीत, मतलब आंदुरव भाग ना अच हुईन; नीव आंदरी इस्त्राएल इन न्याड्या येनारा हींग जमीन कोळबाळेत जो आंदुर्द खुद इन आगुल; आंदुरव खुद इन जमीन ना अच हुईन.
EZE 44:29 आंदुर अन्नबली, पापबली अदिक दोषबली तिनतोगुल; अदिक इस्त्राएल दा जो वस्तु अर्पण माळकु आगुल, अद आंदरी सीकतोगुल.
EZE 44:30 सप्पा प्रकार इन सबसे पयला उपज अदिक सप्पा प्रकार इन नेग्द वस्तु जो नीव नेगुकु येर्सी, याजकगोळी सीकुल; अदिक व्हाशोद अन्न अन पयला काल्सद हीट्ट भी याजक उक कोळ तोगेत, यदुर देल नीम लॉकुर मान्या दा आशीष ईरूल.
EZE 44:31 जो येनारा तान ताना सायुल या हरकु आग्यान, बाक पक्षी आगुल या जनावर अदुर मास याजक तिनबाळुल.”
EZE 45:1 याग नीव चिट्टी हाक्कु द्याश इन वाटसीर, आग द्याश दा टु ऊंद हिस्सा पवित्र जान्सकु यहोवा अक अर्पण माळेतीर; अदुर लंबाई पच्चीस हजार बास इन अदिक चौळाई हत्त हजार बास इन आगुल, अद भाग तान नाकु दीकळोद सीमा ताका पवित्र ठहरूसुल.
EZE 45:2 अदुर दा टु पवित्र जागा अन साटी अईद सौ बास लंबा अदिक अईद सौ बास चौळा चौकोन जमीन आगुल, अदिक अदुर नाकु दी पचास पचास कय चौळा जमीन बिटकु बीदकु ईरूल.
EZE 45:3 आ पवित्र भाग दा नीव पच्चीस हजार बास लंबा अदिक हत्त हजार बास चौळा जमीन इक नाप्सेत, अदिक अदुर दा पवित्र जागा माळेत, जो परमपवित्र ठहरूसुल.
EZE 45:4 जो याजक पवित्र जागा अन स्यावा टहल माळुल अदिक यहोवा अन स्यावा टहल माळली हात्ती बरूल, अद आंदुर अच साटी आगुल; अल आंदुर मान्नागोळ साटी जागा आगुल अदिक पवित्र जागा अन साटी पवित्र ठहरूसुल.
EZE 45:5 बाक पच्चीस हजार बास लंबा, अदिक हत्त हजार बास चौळा ऊंद भाग, भवन इन स्यावा टहल माळावाळेर लेवीगोळी ईप्पत कोठरीगोळ साटी आगुल.
EZE 45:6 “बाक नगर इन साटी, अर्पण माळदव पवित्र हिस्सा अन हाती नीव अईद हजार बास चौळा अदिक पच्चीस हजार बास लंबा, खास जमीन ठहरूसेत; अद इस्त्राएल उन सप्पा घराना साटी आगुल.”
EZE 45:7 प्रधान उन खुद इन हिस्सा अर्पण माळदव हिस्सा अदिक नगर इन खास जमीन इन येढ्ढु दी मतलब येढ्ढु उन पश्चिम अदिक पूर्व दिशागोळ दा येढ्ढु हिस्सागोळ मुंद ईरूल; अदिक अदुर लंबाई पश्चिम टु हुडुकु पूर्व ताका आ येढ्ढ हिस्सागोळ दा टु यातारा ऊंद इन तुल्य ईरूल.
EZE 45:8 इस्त्राएल उन द्याश दा प्रधान उन ईदा खुद इन जमीन आगुल. नान ठहरूसदोर प्रधान नान प्रजा मा मात्त अंधेर माळबाळुल; लेकीन इस्त्राएल उन घराना अक आऊन गोत्रगोळ अनुसार द्याश सीकुल.
EZE 45:9 “परमेश्वर यहोवा ईद अनतान: हे इस्त्राएल उन प्रधानगोळा! बस माळी, झगळा अदिक उत्पाद इक दुर माळी, अदिक न्याय अदिक धर्म इन क्याल्सा माळतोगी; नान प्रजा अन लॉकुर इक तेगोद बीट्टबुळी, परमेश्वर यहोवा अन ईदा वाणी हुन.”
EZE 45:10 “नीम हाती सच्चा तराजु, सच्चा एपा, अदिक सच्चा बट ईरूल.
EZE 45:11 एपा अदिक बट येढ्ढु ऊंद अच नाप इन ईरूल, मतलब येढ्ढु दा होमेर उन हतवा अंश समुसुल; येढ्ढु अन नाप होमेर इन हिसाब घाई ईरूल.
EZE 45:12 शेकेल ईप्पत गेरा अन ईरूल; अदिक नीम्द माना ईप्पत, पच्चीस, या पन्द्रह शेकेल इन ईरूल.”
EZE 45:13 “नीम्द नेग्द भेंट ईद ईरूल, मतलब गोदी अन होमेर टु एपा अन आरवा अंश, अदिक जौ इन होमेर दा एपा अन आरवा अंश कोळेत.
EZE 45:14 याण्णा अन नियत अंश कोर दा टु हतवा अंश आगुल; कोर रा हत्त बट मतलब ऊंद होमेर इन तुल्य आद, यतिकी होमेर हत्त बत इन ईरतद.
EZE 45:15 इस्त्राएल इन वळ्लीद वळ्लीद चराईगोळ से येढ्ढ येढ्ढ सौ मर्र-म्यांढ्ढा दा टु ऊंद मर्र या म्यांढ्ढा कोटकु आगुल. ईव सप्पा वस्तुगोळ अन्नबली अदिक मेलबली इन साटी कोटकु आगुल यदुर देल आंदुर साटी प्रायश्चित माळकु आगुल, परमेश्वर यहोवा अन ईदा वाणी आद.
EZE 45:16 इस्त्राएल उन प्रधान इन साटी द्याश इन सप्पा लॉकुर ईद भेंट कोळुल.
EZE 45:17 हाब्बगोळ, व्हासा चाँद इन दिनगोळ, आराम दिनगोळी अदिक इस्त्राएल इन घराना अन सप्पा नियत हाब्बगोळ दा होमबली, अन्नबली, अदिक अर्घ कोळेत प्रधान उन अच क्याल्सा ईरूल. इस्त्राएल उन घराना साटी प्रायश्चित माळली अद पापबली, अन्नबली, होमबली, अदिक मेलबली तैयार माळुल.”
EZE 45:18 परमेश्वर यहोवा ईद अनतान: पयला तींगुळ इन पयला दिशी इन नी ऊंद निर्दोष पाड्डा हुडुकु पवित्र जागा अक पवित्र माळेत.
EZE 45:19 ई पापबली इन रक्ता दा टु याजक येनारा हुडुकु भवन इन चौखट इन खंबागोळ, अदिक वेदी इन कुर्चीगोळ नाकु क्वाना, अदिक बुळ्कळोद आंगुळ इन फाटक इन खंबागोळ मा हचुल.
EZE 45:20 बाक भुल देल आग्यानतावश यार पाप माळीदार आंदुर साटी तींगुळ इन येळवा दिन इन भी ईद अच माळेत; ईदा प्रकार देल भवन इन साटी प्रायश्चित माळेत.
EZE 45:21 “पयला तींगुळ इन चौदावा दिशी नीम्द फसह आगतेला ईरूल, अद येळ दिन इन हाब्बा इरूल अदिक अदुर दा अखमीरी रोट्टी तीनकु आगुल.
EZE 45:22 आ दिशी प्रधान तान अदिक प्रजा अन सप्पा लॉकुर निम्मित ऊंद पाड्डा पापबली इन साटी तैयार माळुल.
EZE 45:23 हाब्ब इन येळु दिशी आव यहोवा अन साटी होमबली तैयार माळुल, मतलब हर ऊंद दिशी येळ येळ निर्दोष पाड्डागोळ अदिक येळ येळ निर्दोष म्यांडागोळ अदिक रोज ऊंद ऊंद व्हात पापबली इन साटी तैयार माळुल.
EZE 45:24 हर ऊंद पाड्डा अदिक म्यांडा अन सांगुळ आव एपा तीम अन्नबली, अदिक एपा हींद हीन तीन याण्णा तैयार माळुल.
EZE 45:25 येळवा तींगुळ इन पंदरा दिन टु हुडुकु येळ दिन ताका मतलब पूर्व इन दीनगोळ दा अद पापबली, होमबली, अन्नबली, अदिक याण्णा ईदा विधी अनुसार माळ तोगुल.”
EZE 46:1 “परमेश्वर यहोवा ईद अनतान: बुळ्क इन आंगुळ इन पूर्वमुखी फाटक क्याल्सा कळी इन आर दीन बंद ईरूल, लेकीन आराम इन दिशी खुला ईरूल. व्हासा चाँद इन दिनगोळ दा भी खुला ईरूल.
EZE 46:2 प्रधान व्हार्या टु फाटक इन ओसारा अन हादी टु बंदकु फाटक इन खंबा अन हाती नीदरेगुल, अदिक याजक आऊन होमबली अदिक मेलबली तैयार माळुल; अदिक आव फाटक इन देवळी मा नमस्कार माळुल; आग व्हार्या होगुल, अदिक फाटक द्यावगा अन पयले बंद माळकु आगबाळुल.
EZE 46:3 लॉकुर आराम अदिक व्हासा चाँद इन दिनगोळ दा आ फाटक इन दरवाजा दा यहोवा अन मुंद नमस्कार माळुल.
EZE 46:4 आराम दीन दा जो होमबली प्रधान यहोवा अन साटी येर्सुल, अद मर्री अन आर निर्दोष पाड्डा अदिक ऊंद निर्दोष म्यांडा अन आगुल.
EZE 46:5 अन्नबली ईद ईरूल: मतलब म्यांडा अन सांगुळ एपा तीम अन्न अदिक मर्र इन पाड्डागोळ सांगुळ यथाशक्ती अन्न अदिक एपा हींद हीन तीम याण्णा.
EZE 46:6 व्हासा चाँद इन दिनगोळ दा अद ऊंद निर्दोष पाड्डा अदिक मर्र इन आर पाड्डा अदिक ऊंद म्यांडा येर्सुल; ईव सप्पा निर्दोष ईरूल.”
EZE 46:7 पाड्डा अदिक म्यांडा येढ्ढु अन सांगुळ आव ऊंद ऊंद एपा अन्नबली तैयार माळुल, अदिक मर्र इन पाड्डा अन सांगुळ यथाशक्ती अन्न, अदिक एपा हींद तीम याण्णा.
EZE 46:8 याग प्रधान बुळ्क होगुल आग आव फाटक इन ओसारा टु आगकु होगुल, अदिक अदा हादी टु आगकु होट्ट बुळुल.
EZE 46:9 “याग साधारण लॉकुर नियत हाब्बगोळ दा यहोवा अन मुंद नमस्कार माळली बरूल, आग जो उत्तरी फाटक टु आगकु नमस्कार माळोर साटी बुळ्क बरूल, आव दक्षीणी फाटक टु आगकु होळुल, अदिक जो दक्षीणी फाटक टु आगकु बुळ्क बरूल, आव उत्तरी फाटक टु आगकु होळुल, मतलब जो याता फाटक टु आगकु बुळ्क बंदीदान, आव अदा फाटक टु वापस होगबाळुल, तान मुंद अच होट्ट बुळुल.”
EZE 46:10 याव आंदुर बुळ्क बरूल आग प्रधान आंदुर न्याड्या आगकु बरूल, अदिक याग आंदुर होळुल, आग आंदुर ऊंद सांगुळ होळुल.
EZE 46:11 “हाब्बगोळ्द अदिक अन्य नियत हाब्बगोळ्द अन्न बली पाड्डा हींद एपा तीम, अदिक म्यांडा हींद एपा तीम इन ईरूल; अदिक मर्र इन पाड्डा अन सांगुळ यथाशक्ती अन्न अदिक एपा हीन तीम याण्णा.
EZE 46:12 बाक याग प्रधान होमबली या मेलबलि इक खुद इन इच्छा भेंट माळकु यहोवा अन साटी तैयार माळुल, आग पूर्वमुखी फाटक आंदुर साटी तेरकु आगुल, अदिक आंदुर तान होमबली अदिक मेलबली हांग अच तैयार माळुल ह्यांग आव आराम इन दिशी माळतान; आग आव होळुल, अदिक आऊन होळोर हींद फाटक बंद माळकु आगुल.
EZE 46:13 “रोज नी वर्ष तिमोद ऊंद निर्दोष मर्र इन पाड्डा यहोवा अन होमबली इन साटी तैयार माळेत, ईद प्रती व्हातर्या माळकु आगुल.
EZE 46:14 रोज व्हातर्या अदुर सांगुळ ऊंद अन्नबली तैयार माळेत, मतलब एपा अन आरवा अंश अदिक मैदा दा मिलुसोर साटी हीन तीम याण्णा अन तिहाई यहोवा अन साटी सदा अन अन्नबली नित्य विधि इन अनुसार येर्सकु आगुल.
EZE 46:15 मर्र इन पाड्डा, अन्नबली अदिक याण्णा, रोज व्हातर्या अक नित्य होमबली माळकु येर्सकु आगुल.
EZE 46:16 “परमेश्वर यहोवा ईद अनतान: अगर प्रधान तान यातोवारा पार उक येनारा कोळुल, रा अद आऊन भाग आगकु आऊन नातुगोळी भी सीकुल; हिस्सा अन नियम इन अनुसार अद आऊन भी धन ठहरूसुल.
EZE 46:17 लेकीन अगर आव तान हिस्सा दा टु यातोवारा क्याल्सा माळावाळा अक येनारा कोळतान, रा छुट्टी इन वर्ष ताका रा आव आऊन आगकु ईरूल, लेकीन अदुर बाद्दा प्रधान उक वापस माळकु आगुल; अदिक आऊन खुद इन हिस्सा अच आऊन पारगोळी सीकुल.
EZE 46:18 प्रजा अन ईत्ता हिस्सा प्रधान ईला ताकोमुल, जो अंधेर देल आंदुर्द खुद इन जमीन टु कसुकु आग्याद; तान चिकोरी आव तांद अच खुद इन जमीन दा टु हिस्सा कोळुल; हींग आग बाळुल नान प्रजा अन लॉकुर तान तान खुद इन जमीन टु तितर-बितर आगेगुल.”
EZE 46:19 बाक आव नानी फाटक इन ऊंद दीकळोद दरवाजा टु आगकु याजकगोळ उत्तरमुखी पवित्र कोठरीगोळ दा वोतुन; अल पश्चिमी इन दी क्वाना दा ऊंद जागा ईरोद.
EZE 46:20 आग आव नान से अंदुन, “ईद अद जागा हुन यदुर दा याजक लॉकुर दोषबली अदिक पापबली इन मास इक कासुल अदिक अन्नबली इक भी कासुल, हींग आगबाळुल कि आंदरी व्हार्या अन आंगुळ दा वोयोर से साधारण लॉकुर पवित्र ठहरूसुल.”
EZE 46:21 आग आव नानी व्हार्या अन आंगुळ दा वोतकु आ आंगुळ इन नाकु दी वयाळ्सदुन, अदिक आंगुळ इन हर ऊंद क्वाना दा ऊंद ऊंद वोटा माळकु ईरोद,
EZE 46:22 मतलब आंगुळ इन नाकु क्वाना दा चालीस कय लंबा अदिक तीस कय चौळा वोटागोळ ईरव; नाकु क्वाना अन वोटागोळ्द ऊंद अच नाप ईरोद.
EZE 46:23 बुळ्क नाकु दी दिवाल ईरोद, अदिक दिवालगोळ ल्यालमा कासोर साटी चुलीगोळ माळकु ईरोव.
EZE 46:24 आग आव नान से अंदुन, “कासोद मान्ना, येल भवन इन रखवाला लॉकुरव बलिदानगोळी कासोर, आंदुर ईंदुर अच उर.”
EZE 47:1 बाक आव नानी भवन इन दरवाजा मा वापस वोतुन; अदिक भवन इन देवढी इन ल्यालमा टु ऊंद सोता होटकु पूर्व दी वाहुसोद. भवन दरवाजा रा पूर्वमुखी ईरोद, अदिक सोता भवन इन ऊजवा दी अदिक वेदी इन दक्षीणी दी ल्यालमा टु होळ तोगोद.
EZE 47:2 आग आव नानी उत्तर इन फाटक टु आगकु व्हार्या वोतुन, अदिक व्हार्या व्हार्या टु तिर्गुसकु व्हार्या मतलब पूर्वमुखी फाटक इन हाती पोहचुसदुन, अदिक दक्षीणी इन दी टु नीर वाहुसोद.
EZE 47:3 याग आव मंळसा कय दा नापसोद डोरी हुडुकु पूर्व दी होट्टुन, आग आऊन भवन टु हडुकु, हजार कय ताका आ सोता अक नाप्सदुन, अदिक नानी नीर दा टु नळ्सदुन, अदिक नीर ट्वांगरा ताका ईरोद.
EZE 47:4 बाक आव हजार कय माप्सकु नानी नीर दा टु नळ्सदुन, अदिक नीर ट्वांगरा ताका ईरोद, बाक अदिक हजार कय माप्सकु नानी नीर दा टु नळ्सदुन, अदिक नीर नेळु ताका ईरोद.
EZE 47:5 आग आव ऊंद हजार कय नाप्सदुन, अदिक हींग गांगा आगेत यदुर आप्पाटी ना होग सकीदील, यतिकी नीर वाळुसकु तैरूसा लायक ईरोद; मतलब हींग गांगा ईरोद यदुर आप्पाटी याऊ होग ईला सकोन.
EZE 47:6 आग आव नान से केळदुन , “हे मंळसा अन सन्तान, येन नी नोळ्या?” आग आव नानी गांगा अन किनारा किनारा वापस माळकु पोहचुस बुट्टुन.
EZE 47:7 वापस बंदकु ना येन नोळदीन, कि गांगा अन किनारा मा हापाळ सा मार्र आव.
EZE 47:8 आग आव नान से अंदुन, “ ईद सोता पूर्वी द्याश इन दी वाहुसीत्याद, अदिक अराबा दा ईळकु ताल दी वाहुसीत; अदिक भवन टु होटकु सीधा ताल दा मीलुसेदीत; अदिक अदुर नीर सय आगेदीत.
EZE 47:9 येल येल गांगा वाहुसीत, अल अल सप्पा प्रकार इन हापाळ तत्ती कोळावाळा जीवजन्तु जीऊसेव अदिक मेनगोळ भी हापाळ आगेदव; यतिकी ई सोता अन नीर अल पोहचुस्याद, अदिक ताल इन नीर सय आगेदीत; अदिक येल्यारा भी ईद गांगा पोहचुसीत अल सप्पा कीळा जीऊसेव.
EZE 47:10 ताल इन तट मा मेन हुडावाळेर नीदुरकु ईत्तार, अदिक एनगदी टु हुडुकु ऐनेग्लैम ताका अल जाल फैलुसकु आदव, अदिक आंदरी महासागर इन घाई अलग अलग इन अनगीनत मेनगोळ सिक्‍केव.
EZE 47:11 लेकीन तल इन हाती जो दलदल अदिक गड्डागोळ आव, अऊर नीर सय ईरतीदील; अव खर्ट अच ईत्तव.
EZE 47:12 गांगा अन येढ्ढु किनारा मा अलग अलग प्रकार ईनव तीना लायक फलदायी मार्र आदव, यदुरव याल्ला चीम्सतीदील अदिक अऊरव फलसोद भी यागलु बंद आगतीदील, यतिकी गांगा अन नीर पवित्र जागा टु होटाद. अऊर दा तींगुळ तींगुळ व्हासा व्हासा काय हत्तेव. अऊरव काय तीनोर, अदिक याल्ला औषध इन क्याल्सा दा बंदव.”
EZE 47:13 परमेश्वर यहोवा ईद अनतान: “या सीमा अन बुळ्क नीमी इक ई द्याश तान हन्नेळ गोत्रगोळ अनुसार वाटसोद बीद्दीत, अद ईद हुन: यूसुफ उक येढ्ढ भाग सीकुल.”
EZE 47:14 अदरी नीव आबुर दाबुर घाई खुद इन हिस्सा दा नोळीर, यतिकी ना किर्‍या तिंदीन कि अदरी नीम आप्पगोळी कोळाईन, ईदुरसाटी ईद द्याश नीम्द खुद इन हिस्सा ठहरूसीत.
EZE 47:15 “द्याश इन सीमा ईद आगुल: मतलब उत्तरी दीकळोद सीमा महासागर टु हडुकु हेतलोन इन हाती टु सदाद इन घाटी ताका पोहचुसुल,
EZE 47:16 अदिक आ सीमा अन हाती हमात बेरोता, अदिक सिब्रैम जो दमिश्क अदिक हमात इन सीमागोळ न्याड्या दा आव, अदिक हसर्हत्तीकोन ताका, जो हौरान इन सीमा मा आद.
EZE 47:17 ईद सीमा समुद्र टु हुडुकु दमिश्क इन सीमा अन हाती इन हसरेनोन ताका पोहचुसुल, अदिक अदुर उत्तर दी हमात ईरूल. उत्तर इन सीमा ईदा आगुल.
EZE 47:18 पुर्वी सीमा यदुर ऊंद दी हौरान दमिश्क; अदिक यरदन इन दी गिलाद अदिक इस्त्राएल इन द्याश ईरूल; उत्तरी सीमा टु हुडुकु पुर्वी ताल ताका अदरी नापसेत. पुर्वी सीमा रा ईदा आगुल.”
EZE 47:19 दक्षीणी सीमा तामार टु हुडुकु कादेश इन मरीबोत हेसुर इन सोता ताका मतलब मिस्त्र अन नाला ताका, अदिक महासागर ताका पोहचुसुल. दक्षीणी सीमा ईला आगुल.
EZE 47:20 पश्चिमी सीमा दक्षीणी सीमा टु हुडुकु हमात इन घाटी इन मुंद ताका अन महासागर ईरूल. पश्चिमी सीमा ईवा आगुल.
EZE 47:21 “ई प्रकार द्याश इक इस्त्राएल इन गोत्रगोळ अनुसार आपस दा वाट्स कोमेतीर.
EZE 47:22 ईदरी आपस दा अदिक आ परदेशीगोळ सांगुळ वाट्स कोमेतीर, जो नीम न्याड्या ईरतेला चिकोरगोळी पैदा माळुल. आंदुर नीम नजर दा देशी इस्त्राएलगोळ घाई ठहरूसुल, अदिक नीम गोत्रगोळ न्याड्या तान तान भाग पाऊसुल.
EZE 47:23 जो परदेशी याता गोत्र अन द्याश दा ईरतीदान, आऊक अदा भाग कोळेतीर, परमेश्वर यहोवा अन ईदा वाणी आद.”
EZE 48:1 गोत्रगोळ दा जमीन-वितरण “गोत्रगोळ भाग आगुल: उत्तरी सीमा देल हद्द हेतलोन इन हादी इन हाती टु हमात इन घाटी ताका, अदिक दमिश्क इन सीमा अन हाती इन हसरेनान टु उत्तर इन दी हमात इन हाती ताका ऊंद भाग दान इन ईरूल; अदिक अदुर्द पूर्वी अदिक पश्चिमी सीमा भी ईरूल.
EZE 48:2 दान इन सीमा टु हतकु पूर्व टु पश्चिम ताका आशेर उन ऊंद भाग ईरूल.
EZE 48:3 आशेर इन सीमा टु हद्द, पूर्व टु पश्चिम ताका नप्ताली इन ऊंद भाग आगुल.
EZE 48:4 नप्ताली इन सीमा टु हद्द पूर्व टु पश्चिम ताका मनश्शे अन ऊंद भाग.
EZE 48:5 मनश्शे अन सीमा टु हद्द पूर्व टु पश्चिम ताका एप्रैम उन ऊंद भाग ईरूल.
EZE 48:6 एप्रैम उन सीमा टु हद्द पूर्व टु पश्चिम ताका रूबेन उन ऊंद भाग आगुल.
EZE 48:7 रूबेन इन सीमा टु हद्द, पूर्व टु पश्चिम ताका यहूदा अन ऊंद भाग आगुल.”
EZE 48:8 यहूदा अन सीमा टु हद्द पूर्व टु पश्चिम ताका अद अर्पण माळ्द भाग आगुल, यदरी नीमी अर्पण माळोद बीद्दीत, अद पच्चीस हजार बास चौळा अदिक पूर्व टु पश्चिम ताका यातोदारा ऊंद गोत्र अन भाग इन तुल्य लंबा ईरूल, अदिक अदुर न्याड्या दा पवित्र जागा ईरूल.
EZE 48:9 जो भाग नीमी यहोवा अक अर्पण माळोद ईत्तीत, अदुर लंबाई पच्चीस हजार बास अदिक चौळाई हत्त हजार बास इन ईरूल.
EZE 48:10 ईद अर्पण माळ्द पवित्र भाग याजकगोळी सीकुल; अद उत्तर दी पच्चीस हजार बास लंबा, पश्चिम इन दी हत्त हजार बास चौळा, पूर्व दी हत्त हजार बास लंबा अदिक दक्षीण इन दी पच्चीस हजार बास लंबा आगुल; अदिक अदुर न्याड्या यहोवा अन पवित्र जागा ईरूल.
EZE 48:11 ईद खास पवित्र भाग सदोक उन सन्तान इन आ याजकगोळ्द आगुल जो नान आग्यागोळ्द पालन माळतार, अदिक इस्त्राएलगोळ्द भटकुसदुर समय लेवीगोळ घाई ईला भटकुसीदुर.
EZE 48:12 ईदुरसाटी द्याश इन अर्पण माळ्द भाग दा टु ईद आंदुर साटी अर्पण माळ्द भाग मतलब परमपवित्र द्याश ठहरूसुल; अदिक लेवीगोळ सीमा से हतकु ईरूल.
EZE 48:13 याजकगोळ सीमा देल हद्द लेवीगोळ्द भाग ईरूल, अद पच्चीस हजार बास लंबा अदिक हत्त हजार बास चौळा ईरूल. सप्पा लंबाई पच्चीस हजार बास इन अदिक चौळाई हत्त हजार बास इन आगुल.
EZE 48:14 आंदुर अदुर दा टु न रा येनारा मारूल, न दुसरा जमीन देल बदलुसुल; अदिक न जमीन इन पयला उपज अदिक यारीकारा भी कोटकु आगुल. यतिकी अद यहोवा अन साटी पवित्र आद.
EZE 48:15 “चौळाई इन पच्चीस हजार बास इन मुंद जो अईद हजार मिक्कु ईत्तीत, अद नगर अदिक मोहल्ला अदिक चराई इन साटी साधारण भाग आगुल; अदिक नगर अदुर न्याड्या दा ईरूल.
EZE 48:16 नगर इन ईद माप आगुल, मतलब उत्तर, दक्षिण, पूर्व अदिक पश्चिम इन दी साळे नाक नाक हजार कय.
EZE 48:17 नगर इन हात्ती उत्तर, दक्षिण, पूर्व पश्चिम दा चराईगोळ ईरूल. जो येढ्ढवार येढ्ढवार सौ बास चौळा ईरूल.
EZE 48:18 अर्पण माळ्द पवित्र भाग इन हाती लंबाई दा टु जो येनारा उळुल, मतलब पूर्व अदिक पश्चिम येढ्ढु दी हत्त हत्त हजार बास को अर्पण माळ्द भाग इन हाती ईरूल, अदुर ऊपज नगर दा मयनत माळावाळेर्द तीनोर साटी आगुल.
EZE 48:19 इस्त्राएल इन सप्पा गोत्र दा टु जो नगर दा मयनत माळतार, आंदुर अदुर्द खेती माळुल.
EZE 48:20 सप्पा अर्पण माळ्द भाग पच्चीस हजार बास लंबा अदिक पच्चीस हजार बास चौळा ईरूल; नीमी चौकोर पवित्र भाग अर्पण माळोद बिद्दीत यदुर दा नगर इन खास जमीन ईरूल.”
EZE 48:21 “जो भाग ईतोगुल, अद प्रधान उक सीकुल. पवित्र अर्पण माळ्द भाग इन. अदिक नगर इन खास जमीन इन येढ्ढु दी मतलब आंदुर पूर्व अदिक पश्चिम इन दी पच्चीस पच्चीस हजार बास इन चौळाई इन हात्ती, जो अदिक गोत्रगोळ भाग इन हाती ईरूल, अद प्रधान उक सीकुल. अर्पण माळ्द पवित्र भाग अदिक भवन इन पवित्र जागा आंदुर बीच दा ईरूल.
EZE 48:22 जो प्रधान उन भाग ईत्तीत, अद लेवीगोळ न्याड्या अदिक नगरगोळ खास जमीन आगुल, प्रधान उन हिस्सा यहूदा अदिक बिन्यामीन इन सीमा अन न्याड्या दा आगुल.”
EZE 48:23 “अन्य गोत्रगोळ भाग ई प्रकार आगुल: पूर्व टु पश्चिम ताका बिन्यामीन उन ऊंद भाग ईरूल.
EZE 48:24 बिन्यामीन उन सीमा से हदद पूर्व टु पश्चिम ताका शिमोन उन ऊंद भाग.
EZE 48:25 शिमोन उन सीमा से हदद पूर्व टु पश्चिम ताका इस्साकार उन ऊंद भाग.
EZE 48:26 इस्साकार इन सीमा टु हद्द पूर्व टु पश्चिम ताका जबूलून उन ऊंद भाग.
EZE 48:27 जबूलून उन सीमा से हद्द पूर्व टु पश्चिम ताका गाद उन ऊंद भाग.
EZE 48:28 अदिक गाद इन सीमा अन हात्ती दक्षीण इन दी सीमा तामार टु हुडुकु कादेश इन मरीबोत हेसुर इन सोता ताका, अदिक मिस्त्र अन नाला अदिक महासागार ताका पोहचुसुल.
EZE 48:29 जो द्याश नीमी इस्त्राएल उन गोत्रगोळ इक वाटसोद आदीत अद ईदा हुन, अदिक आंदुर भाग भी ईवा हु, परमेश्वर यहोवा अन ईदा वाणी हुन.”
EZE 48:30 “नगर इन निकास ईद आगुल, मतलब उत्तर इन दी यदुर्द लंबाई साळे नाक हजार बास इन आगुल.
EZE 48:31 अदुर दा मुर फाटक ईरूल; मतलब ऊंद रूबेन उन फाटक, ऊंद यहूदा अन फाटक, अदिक ऊंद लेवी इन फाटक आगुल; यतिकी नगर इन फाटक इन हेसुर इस्त्राएल इन गोत्रगोळ हेसुर मा ईटोद बीद्दीत.
EZE 48:32 पूर्व इन दीकळोद सीमा साळे नाक हजार बास लंबा आगुल, अदिक अदुर दा नाक फाटक ईरूल; मतलब ऊंद यूसुफ उन फाटक, ऊंद बिन्यामीन उन फाटक, अदिक ऊंद दान इन फाटक.
EZE 48:33 दक्षीण इन दी सीमा साळे नाक हजार बास लंबा ईरूल, अदिक अदुर दा मुर फाटक ईरूल; मतलब ऊंद शिमोन उन फाटक, ऊंद इस्साकार उन फाटक, अदिक जबूलून उन फाटक;
EZE 48:34 अदिक पश्चिम इन दीकळोद सीमा साळे नाक हजार बास लंबा ईरूल, अदिक अदुर दा मुर फाटक ईरूल; मतलब ऊंद गाद उन फाटक, ऊंद आशेर उन फाटक, अदिक ऊंद नप्ताली इन फाटक ईरूल.
EZE 48:35 नगर इन नाकु दी घेरा अठरा हजार बास इन ईरूल, अदिक अदिक आ दिशी टु नगर इन हेसुर ‘यहोवा शाम्मा’ ईत्तीत.”
DAN 1:1 यहूदा प्रदेश इन राजा यहोयाकीम उन राज्यकाल इन तिसरा वर्ष दा बेबीलोन द्याश इन राजा नबूकदनेस्सर यहूदा अन राजधानी यरूशलेम मा आक्रमण माळ बुटुन, अदिक अदरी घेर्स बुटुन.
DAN 1:2 आग प्रभु परमेश्वर यहूदा अन राजा यहोयाकीम अदिक आऊन नगर इक नबूकदनेस्सर उन कय दा सौप्स बु़ट्टुन. नबूकदनेस्सर परमेश्वर उन मंदिर इन थ्वाळासा पवित्र बरतनगोळ मा भी अधिकार माळ कोंडुन, अदिक आव आ बरतनगोळ इक शिनार द्याश दा तान द्याव उन मंदिर दा ओतकु, तान द्याव उन भंडारग्रह दा ईट्ट बुट्टुन.
DAN 1:3 राजा नबूकदनेस्सर तान मुख्य खोजा अशपनज उक आदेश कोट्टुन, होगी अदिक इस्त्राएली कौम इन आ बंदीगोळी तरी जो राजपरिवार अदिक कुलीन वंश इन आर.
DAN 1:4 आंदुर हारोदोर ईर पायजे अदिक आंदुर्दा यातोदु प्रकार इन शारीरिक दोष ईरबाळुल. आंदुर नोळदुर दा सुंदर ईरूल अदिक सप्पा प्रकार देल बुद्धिमान ईरूल. आंदुर ग्यान देल परिपूर्ण अदिक विद्वान ईरूल. आंदुर राजभवन दा स्यावा माळोर योग्य ईरूल. याग आंदुर बेबीलोन दा होट्ट बरूल आग आंदरी कसदी कौम इन साहित्‍य अदिक भाषा कलसेतीर. मुख्‍य खोजा अशपनज राजा नबूकदनेस्सर उन आदेश उन पालन माळदुन.
DAN 1:5 राजा आदेश कोट्टुन कि इस्राएली कौम इन आ हारोदोर पारगोळ इक अदा राजकीय भोजन कोटकु आगुल जो आंदुर खुद तिनतान; अदा सारा आंदरी कुळ्सकु आगुल जो आंदुर खुद कुडुतार. इदुर अलावा आंदरी मुर वर्ष ताका आंदुर्द पालन पोषण माळकु आगुल. ई अवधि इन बाद्दा आंदुर राजा नबूकदनेस्सर उन स्यावा दा उपस्‍थित ईरूल.
DAN 1:6 ई इस्राएली हारोदोर पारगोळ दा टु यहूदा कुल इंदुर नाक हारोदोर इंदुर ईरोर: दानिएल, हनन्याह, मीशाएल अदिक अजर्याह.
DAN 1:7 मुख्‍य खोजा अशपनज आंदरी व्हाशोद हेसुर कोट्टुन. आव दानिएल उन हेसुर बेलतशस्‍सर, हनन्याह अन्द शद्रक, मीशाएल उन मेशक अदिक अजर्याह अन्द अबेदनगो ईटदुन.
DAN 1:8 लेकीन दानिएल तान दिल दा ईद निश्‍चय माळदुन कि आव राजा अन्द भोजन तिनतीदील अदिक सारा कुडुतीदील जो राजा कुडुतान; अदिक हिंग तान तान इन अशुद्ध माळालुन. इदुरसाटी आव मुख्‍य खोजा अशपनज से निवेदन माळदुन, “नीव नान इक महाराज उन आदेश से मुक्‍त ईटुल यदुर देल ना अशुद्ध आग बाळुल.”
DAN 1:9 परमेश्वर मुख्‍य खोजा अशपनज उन दिल दा दानिएल उन प्रति कृपा अदिक दया उत्‍पन्न माळदुन.
DAN 1:10 लेकीन मुख्‍य खोजा दानिएल से अंदुन, नान इक ई मात इन अंज्क आद कि अगर नीव नान महाराजा द्वारा निश्‍चित माळ्द खान-पान ताकोंडीर ईला रा नीम्द स्‍वास्‍थ्‍य नीम्द हारोदोर संगीगोळ्द अपेक्षा बिदोदित. याग नान स्वामी नीम्द ईळुकु मार्रा नोळ्यान, आग नीव नान ताल्ला अक खतरा दा हाक्क बुट्टीर. महाराजा नान ताल्ला धड़ टु अलग माळ बुट्टान.
DAN 1:11 मुख्‍य खोजा अशपनज दानिएल, हनन्याह, मीशाएल अदिक अजर्याह अन्द भोजन-व्यवस्था माळोर साटी ऊंद मुखिया अक नियुक्‍त माळीदुर. दानिएल आ मुखिया से अंदुन,
DAN 1:12 ना नीन से विनती माळतीन कि नीव तान ई सेवकगोळ इक हत्त दिन ताका जाँच अदिक नामी भोजन दा साग-सब्‍जी अदिक कुडोर साटी नीर कोळी.
DAN 1:13 आग नीव नाम्द मार्रागोळ इक महाराजा उन द्वारा निश्‍चित माळकु आदव राजकीय भोजन माळावाळेर पारगोळ्द मार्रागोळ से मिलुसी अदिक आग नीव ह्यांग नोळीर अदिक वळ्लीद सम्सीर हांग अच व्‍यवहार तान ई सेवकगोळ सांगुळ माळी.
DAN 1:14 मुखिया ई संबंध दा दानिएल अदिक आऊन संगीगोळ्द मात मान्स कोंडुर अदिक हत्त दिन ताका आंदरी जाच्सदुर अदिक परखुसदुर.
DAN 1:15 हत्त दिन इन बाद्दा मुखिया नोळदुन कि दानिएल अदिक आऊन संगीगोळ मार्रगोळ राजकीय भोजन माळावाळेर सप्पा पारगोळ मार्रगोळ से यक्कुल खिलुस्कु आव, अदिक आंदुर वजन भी वाळुस्याद.
DAN 1:16 अत: भोजन इन व्यवस्था माळावाळा मुखिया राजा अन द्वारा निश्‍चित माळ्द खान-पान इक कोळोद बंद माळ बु़ट्टुन अदिक अऊर जागा मा आव आंदरी साग-सब्‍जी कोळली कुरतुन.
DAN 1:17 परमेश्वर ई नाक इस्राएली हारोदोर पारगोळ इक सप्पा प्रकार इन वाचुसोद-लिखसोद अदिक सप्पा प्रकार इन ग्यान इक समसोर बुद्धि अदिक चतुराई प्रदान माळदुन. दानिएल हर प्रकार इन दिव्‍य-दर्शन अदिक कांसा अन्द मतलब सम्सली कुरतुन. आऊंदा ईद होट्ट बत्त.
DAN 1:18 राजा नबूकदनेस्सर ईद आदेश कोटीदुन कि इस्राएली कौम इन सप्पा हारोदोर पारगोळ मुर वर्ष इन बाद्दा आऊन मुंद राजमहल दा प्रस्‍तुत माळकु आगुल. याग ईद समय पुरा आत आग मुख्‍य खोजा अशपनज आंदरी राजमहल दा ओतुन. आव आंदरी राजा अन्द मुंद हाजीर माळदुन.
DAN 1:19 राजा नबूकदनेस्सर आ हारोदोर पारगोळ से मात-चीत माळदुन अदिक आऊक ईद अनुभव आत कि दानिएल, हनन्याह, मीशाएल अदिक अजर्याह आ सप्पा हारोदोर पारगोळ दा टु सर्वश्रेष्‍ठ आन. अत: आव आंदरी तान स्यावा दा नियुक्‍त माळ बुट्टुन.
DAN 1:20 याग यागल्यारा राजा बुद्धि अदिक समझ इन बारा दा आंदुर से यातोदारा प्रश्‍न केळोन, आग आंदुर उत्तर केळकु राजा अक ईद अनुभव आगोद कि आंदुर आऊन राज्‍य तिमोर सप्पा ज्‍योतिषिगोळ अदिक तांत्रिकगोळ से हत्त गुणा यक्कुल प्रवीण आर.
DAN 1:21 अदिक दानिएल बेबीलोन इन दरबार दा सम्राट कुस्रू उन राज्‍यकाल इन पयला वर्ष ताका ईत्तुन.
DAN 2:1 राजा नबूकदनेस्सर उन राज्‍य अन्द दूसरा वर्ष ईरोद. आव हिंग कांसा अदिक दृश्य नोळदुन अदुर कारण आऊन मन व्याकुल आगेत अदिक आऊन कण्णगोळ दा टु जप हारेत.
DAN 2:2 राजा आदेश कोट्टुन कि भविष्य नोळावाळा, तांत्रिक, जादू-टोना माळावाळेर अदिक कसदी पंडित कारूकु आगुल ताकी आंदुर राजा अक आऊन कांसा हेळुल. अत: आंदुर बंदुर अदिक राजा अन्द मुंद नीदरेदुर.
DAN 2:3 राजा आंदुर से अंदुन, “ना ऊंद कांसा अदिक दृश्य नोळदीन अदुर कारण नान मन अशांत आद. ना कांसा अदिक अऊर मतलब जानसोद चाहसतीन.”
DAN 2:4 कसदी पंडितगोळ अरामी भाषा दा राजा से निवेदन माळदुर, महाराज सदा चिरंजीवी ईरूल! नी नामी तान कांसा हेळ, अदिक नाव नीन इक अदुर मतलब समझुस बुट्टेव.
DAN 2:5 राजा कसदी पंडितगोळ इक उत्तर कोट्टुन, “नान वचन अटल आद! अगर नीव नान कांसा अदिक अदुर मतलब नान इक हेळतीदील, रा नीव निश्‍चय जान्सी कि नीम्द मय इन तुकळा-तुकळा माळकु आदीर, अदिक नीम्द मान्ना खंडर माळकु आदव.
DAN 2:6 लेकीन अगर नीव अर्थ-सहित नान कांसा नान इक हेळ बुट्टीर रा ना नीम इक पुरस्‍कारगोळ-उपहारगोळ देल लाद्स बुळाईन, अदिक नीम्द बड़ा सम्‍मान माळाईन. अच्‍छा, ईग नान इक नान कांसा अदिक अदुर मतलब हेळी.”
DAN 2:7 आंदुर राजा से दूसरा घन निवेदन माळदुर, “महाराज, तान सेवकगोळ इक तान कांसा हेळ अदिक नाव, नीनोर सेवक, महाराज उक अदुर मतलब समझुस बुट्टेव.”
DAN 2:8 राजा उत्तर कोट्टुन, “ना निश्‍चयपूर्वक जान्सतीन कि नीव ईव मातगोळ केवल समय कडोर साटी अनेतीर; यतिकी नीव जान्सतीर कि नान ईद वचन अटल आद.
DAN 2:9 कि अगर नीव नान कांसा नान इक हेळतीदील, रा नीम साटी प्राणदण्‍ड निश्‍चित आद. नीव आपस दा ई मात दा ऊंदमत आगेदीर कि आ समय ताका नीव नान से ख्वाटा मात माताळी, नान इक ख्वाटा उत्तर कोळी यागासताका नान ध्‍यान न भटकुसुल. इदुरसाटी ईग तुरन्‍त नान इक नान कांसा हेळी यदुर देल नान इक मालूम आगेगुल कि नीव नान इक अदुर्द मतलब भी हेळ सकीर.”
DAN 2:10 कसदी पंडितगोळ राजा अक उत्तर कोट्टुर, महाराज, “संसार दा हिंग याऊ मंळसा हैलेच जो नीन मात इक पुरा माळ सकुल. यावारा भी महान अदिक हाकिम ज्‍योतिषिगोळ, तांत्रिकगोळ, अदिक कसदी पंडितगोळ से यागलु हिंग मात केळीदील.
DAN 2:11 जो मात राजा नाम से केळेत्यान, अद कठिन आद, अदिक केवल द्यावगोळ अच राजा अक आऊन कांसा हेळ सकतान. लेकीन द्यावगोळ रा मंळसागोळ्द न्याड्या ईरालव.”
DAN 2:12 ईद मात केळकु राजा नाराज आगेदुन. आऊन गुस्सा भळकुस्त. आव राजा आग्या कोट्टुन कि बेबीलोन द्याश इन पुरा दरबारी विद्वान-ज्‍योतिषी, तांत्रिक, जादू-टोना माळावाळेर अदिक कसदी पंडित-मौत इन घाट ईळकु आदार.
DAN 2:13 ईद राज आग्या पुरा द्याश दा प्रसारित माळकु आत कि दरबार इन सप्पा विद्वानगोळ्द वध माळकु आदीत. राजा अन्द अंगरक्षक दानिएल अदिक आऊन संगीगोळ्द वध माळोर साटी आंदरी ढूंडसोर.
DAN 2:14 आग दानिएल राजा अन्द अंगरक्षकगोळ्द प्रधान अर्योक से सोच-सम्सकु, बुद्धिमानी देल मातगोळ माळदुन. अर्योक बेबीलोन द्याश इन पुरा दरबारी विद्वानगोळ्द वध माळली होटीदुन.
DAN 2:15 दानिएल प्रधान अर्योक से केळदुन, महाराज ईट कठिन राज आग्या यती प्रसारित माळदुन? आग अर्योक दानिएल उक कारण हेळदुन.
DAN 2:16 अत: दानिएल राजमहल दा होदुन, अदिक आव राजा नबूकदनेस्सर से निवेदन माळदुन, “राजा, नीव नान साटी यातोदारा समय निश्‍चित माळबुळी; यतिकी ना ई निश्‍चित समय मा महाराज उन कांसा अदिक अदुर्द मतलब हेळ बुळाईन.”
DAN 2:17 अदुर बाद्दा दानिएल तान मान्नी होदुन, अदिक अल आव तान संगीगोळ हनन्याह, मीशाएल अदिक अजर्याह अक ईद मात हेळदुन,
DAN 2:18 अदिक आव आंदुर से अंदुन कि आंदुर ई रहस्‍य अन्द संबंध दा स्‍वर्गिक परमेश्‍वर से प्रार्थना माळकु आऊन दया प्राप्‍त माळुल ताकी बेबीलोन इन सप्पा दरबारी विद्वानगोळ सांगुळ दानिएल अदिक आऊन संगीगोळी भी नष्‍ट माळकु आग बाळुल.
DAN 2:19 अदिक ईळ्लक इन समय दर्शन इन माध्‍यम देल दानिएल मा रहस्‍य प्रकट माळकु आत. दानिएल टु स्‍वर्गिक परमेश्‍वर उक धन्‍यवाद कोट्टुर.
DAN 2:20 आव अंदुन: परमेश्‍वर उन हेसुर युग-युगांत धन्‍य आद, बुद्धि अदिक पराक्रम आऊंदा हुन.
DAN 2:21 परमेश्‍वर अच काल इन नियंता अदिक ऋतुगोळ्द परिवर्तनकर्त्ता आन. आवा राजागोळ इक सिंहासन मा कुर्सतान, अदिक आवा आंदरी पदच्‍युत माळतान. परमेश्‍वर अच बुद्धिमान उक बुद्धि अदिक समझदार उक समझ कोळतान.
DAN 2:22 परमेश्‍वर अच रहस्‍यमय भेदगोळ इक प्रकट माळतान; आव अंधकार दा होचकु भेद इक जान्सतान; आऊन सांगुळ ज्योति इन निवास आद.
DAN 2:23 “हे परमेश्‍वर, नान पूर्वजगोळ्द परमेश्‍वर, ना नीन इक धन्‍यवाद कोळतीन, अदिक नीन स्‍तुति माळतीन. नी इच नान इक बुद्धि अदिक बल प्रदान माळ्द; अदिक ईग नी आ रहस्‍य अक नाम मा प्रकट माळ्द, जो नाव नीन से बेळदेव; नी नामी राजा अन्द कांसा हेळ बुट्ट.”
DAN 2:24 दानिएल अर्योक उन हात्ती होदुन, यारी राजा बेबीलोन इन दरबारी विद्वानगोळ्द वध माळोर साटी नियुक्‍त माळीदुन. दानिएल आऊन निवेदन माळदुन, “नीव बेबीलोन इन दरबारी विद्वानगोळ्द हत्‍या माळबाळी. कृपया, नीव नान इक राजमहल दा महाराज उन हात्ती ओई. ना महाराज उक आऊन कांसा अदिक अदुर मतलब हेळाईन.”
DAN 2:25 अत: अर्योक दानिएल उक बिना देरी माळ्त राजा अन्द महल दा ओतुन. आव राजा से हिंग अंदुन, महाराज, “नान इक यहूदा प्रदेश इन प्रवासिगोळ दा ईव मंळसा सिकदुन, जो नीम्द कांसा अदिक अदुर्द मतलब नीम इक हेळ सकतान.”
DAN 2:26 दानिएल, आऊन हेसुर बेलतशस्‍सर ईरोद, राजा नबूकदनेस्सर केळदुन, येन नीन दा ईट सामर्थ्य आद कि नी नान नोळ्द कांसा अक अदिक अदुर्द मतलब नान इक हेळ सक्या?
DAN 2:27 दानिएल राजा अक उत्तर कोट्टुन, महाराज, जो रहस्‍य इन मात नी केळ्द, अदरी न पंडित, न तांत्रिक, न ज्‍योतिषी अदिक न जादू-टोना माळावाळा हेळ सकतान, ईद यातोदु मंळसा से ईद संभव हैलेच.
DAN 2:28 लेकीन स्‍वर्ग दा विराजमान परमेश्‍वर सप्पा रहस्‍यगोळ मा टु परदा हटुस्तान. आवा राजा अक भविष्‍य दा घटुसोद घटनागोळ्द दर्शन कांसा दा माळसुसदुन. नीम कांसा अदिक नीम मन दा अंकित नजारा जो नीव पलंग मा मींगा समय नोळदीर, अव ईव हु:
DAN 2:29 महाराज, याग नीव पलंग मा मिंगकु ईरीर आग नीम्द मन दा ईद विचार बत कि भविष्‍य दा येन आदीत. आग सप्पा रहस्‍यगोळ मा परदा हटुसावाळा परमेश्‍वर भविष्‍य दा घटुसावाळा मातगोळ्द नजारा नीम इक तोर्सदुन.
DAN 2:30 नान मा ईद रहस्‍य इदुरसाटी प्रकट माळकु आगीदील कि ना अन्य सप्पा जीत्ता मंळसागोळ से यक्कुल बुद्धिमान आईन. ईला, बल्‍कि परमेश्‍वर ईद रहस्‍य नान मा इदुरसाटी प्रकट माळदुन कि ना महाराज उक इदुर्द मतलब हेळ सकाईन अदिक नीव तान मन इन विचारगोळ इक सम्स सकी.
DAN 2:31 महाराज, नीव नजर म्याकुच माळदीर रा नीव तान मुंद ऊंद धोळ्द मूर्ति नोळदीर. ईद मूर्ति हापाळ ऊंचा ईरोद अदिक हापाळ चमकुसतेला ईरोद. अदुर्द रूप भयानक ईरोद.
DAN 2:32 ई मूर्ति इन ताल्ला शुद्ध व्हान्ना अन्द ईरोद. अदुर्द याद्दा अदिक भुजागोळ चांदी इन ईरव. अदुर्द व्हाट्टा अदिक जांघगोळ पीतल इन ईरव.
DAN 2:33 अदुर्द टांगगोळ लोहा अन्द, अदिक काल इन येनारा भाग लोहा अन्द अदिक येनारा भाग मुण्ण इन ईरोद.
DAN 2:34 महाराज, याग नीव मूर्ति इक नोळ्या आग अचानक कल्ल इन ऊंद तुकळा तान-ताना कित्तेत, अदिक मूर्ति इन लोहा अदिक मुण्ण इन माळ्द कालगोळ मा बित्त, अदिक अदरी चकनाचुर माळ बुळ्त.
DAN 2:35 अदुर बाद्दा लोहा, मुण्ण, पीतल, बेळ्ली अदिक व्हान्ना भी ऊंद सांगुळ चूर-चूर आगेत, अदिक अव ब्यासक्या अन दिन दा खर्यान इन भूसा अन्द घाई कण-कण आगेत. हवा अदरी हार्सबुळ्त, अदिक अव गायब आगेदव, अऊर चिन्ह भी मिक्कु ईतीदील. लेकीन जो कल्ल मूर्ति इन कालगोळ मा प्रहार माळीत, अद ऊंद धोळ्द पर्वत इन रूप बदलुसेत, अदिक पुरा पृथ्‍वी मा फैलुसेत.
DAN 2:36 राजा अन कांसा ईदा हुन. ईग नाव महाराज उक इदुर्द मतलब हेळेव.
DAN 2:37 राजा, राजागोळोव महाराजा, नीमी स्‍वर्ग दा विराजमान परमेश्‍वर ईद राज्‍य, पराक्रम, सामर्थ्य अदिक महिमा प्रदान माळदुन.
DAN 2:38 परमेश्‍वर नीम कयगोळ दा पृथ्‍वी इन पुरा मंळसागोळ, आळी दाकळव पशु अदिक आकाश इन पक्षी सौपस्यान. परमेश्‍वर अच नीमी अऊर मा शासन माळोद सामर्थ्य कोटान. नीव अच मूर्ति इन व्हान्ना अन्द ताल्ला हुन.
DAN 2:39 नीम बाद्दा ऊंद दूसरा राज्‍य इन उदय आदीत. अद नीम से कम वैभवशाली राज्‍य ईत्तीत. अदुर बाद्दा तिसरा पीतल इन राज्‍य उदय आदीत जो पुरा पृथ्‍वी मा शासन माळीत.
DAN 2:40 आग चौथा राज्‍य अन्द उदय आदीत जो लोहा अन्द घाई मजबूत ईत्तीत. जसा लोहा सप्पा वस्‍तुगोळ इक तुकळा-तुकळा माळ बुळतद, अवरी चूर-चूर माळ बुळतद, हांग अच ईद राज्‍य ई सप्पा अक चूर-चूर अदिक तुकळा-तुकळा माळ बुट्टीत.
DAN 2:41 जसा कि नीव मूर्ति इन कालगोळ इक अदिक बेळ्लगोळ इक नोळदुन कि अव येनारा कुम्हार उन मुण्ण इन अदिक येनारा लोहा अन्द माळकु ईरोद, अदा प्रकार ईद चौथा राज्‍य अलग-अलग वाटस्कु ईत्तीत. जसा नीव नोळदीर कि लोहा दा लसदार मुण्ण मिलुस्कु ईरोद, हांग अच अदुर्दा भी लोहा अन्द घाई मजबूती ईत्तीत.
DAN 2:42 या तरीका देल कालगोळ बेळ्लगोळ येनारा लोहा अन्द अदिक येनारा मुण्ण इन ईरव, हांग अच अद राज्य येनारा मजबूत अदिक येनारा कमजोर ईत्तीत.
DAN 2:43 जसा कि नीव नोळदीर कि लोहा लसदार मुण्ण इन सांगुळ मिलुस्कु ईरोद, हांग अच ई राज्‍य इन लॉकुर आपस दा वैवाहिक सम्‍बन्‍धगोळ द्वारा आपस दा मिलुस-जुलुस्कु रा ईत्तार; लेकीन या तरिका देल लोहा अदिक मुण्ण दा ऊंद मेल आगाल्द, हांग अच ई राज्‍य इन लॉकुर आपस दा मिलुस-घुलुस्कु ईरतीदील.
DAN 2:44 आ राजागोळ्द राज्‍य-काल दा स्‍वर्ग दा विराजमान परमेश्‍वर ऊंद हिंग राज्‍य उदय माळ्यान जो अनंत काल ताका नष्‍ट आगाल्द अदिक न आऊन राज्‍य-सत्ता यातोवारा दूसरा कौम इन कय दा सौप्सकु आदीत. ईद राज्‍य सप्पा राज्‍यगोळ्द अंत माळ बुट्टीत, अवरी मिटुस बुट्टीत; पर अद खुद सदा-सर्वदा सुदृढ़ बनस्कु ईत्तीत.
DAN 2:45 जसा नीव नोळदीर कि ऊंद कल्ल यावारा अन्द कय इन बिना अगुळ्द पहाड दा टु कित्तेत, अदिक अद कल्ल लोहा, पीतल, मुण्ण, बेळ्ली अदिक व्हान्ना अक चूर-चूर माळ बुळ्त. ईदा रीती देल महान परमेश्‍वर राजा अक हेळदुन कि इदुर बाद्दा भविष्‍य दा येन येन आगावाळा आद. नीम्द कांसा खरा अदिक अदुर्द मतलब भी निश्‍चित आद.
DAN 2:46 ईद केळकु राजा नबूकदनेस्सर बांगकु प्रणाम माळदुन दानिएल उन प्रति सम्‍मान प्रकट माळदुन अदिक आव आदेश कोट्टुन कि दानिएल उक भेंट येर्सी अदिक आऊन मुंद सुगंधित धूप येर्सकु आगुल.
DAN 2:47 राजा दानिएल से अंदुन, “बिना संकोच नीम्द परमेश्‍वर अच सप्पा द्यावगोळ ईश्‍वर अदिक राजागोळ स्‍वामी आन, आवा सप्पा रहस्‍यगोळ्द भेद खोलसावाळा आन. केवल नी इच नान रहस्‍य मा टु परदा नेग्द.”
DAN 2:48 राजा दानिएल उक तान दरबार दा ऊंचा पद मा नियुक्‍त माळदुन अदिक आऊक हापाळ किमती उपहार कोट्टुन. आव दानिएल उक बेबीलोन द्याश इन पुरा क्षेत्र मा शासक नियुक्‍त माळ बुट्टुन अदिक आऊक बेबीलोन इन दरबारी विद्वान-मंडली इन अध्‍यक्ष माळ बुट्टुन.
DAN 2:49 दानिएल उन निवेदन मा राजा शद्रक, मेशक अदिक अबेदनगो उक बेबीलोन द्याश इन शासन-कार्यगोळ्द व्यवस्था माळोर साटी नियुक्‍त माळदुन. लेकीन खुद दानिएल राजा अन दरबार दा अच ईरतोगोन.
DAN 3:1 नबूकदनेस्सर राजा व्हान्ना अन्द ऊंद धोळ्द मूर्ति माळसुसदुन. अदुर्द ऊंचाई साठ कय, अदिक चौड़ाई आर कय इन ईरोद. आव अद मूर्ति इक बेबीलोन द्याश इन दूरा हेसुर इन मैदान दा स्‍थापित माळदुन.
DAN 3:2 अदुर बाद्दा आव तान साम्राज्‍य इन सप्पा प्रदेशगोळ्द अधिपतीगोळ, हाकिमगोळ, राज्‍यपालगोळ, मंत्रीगोळ, खजांचिगोळ, न्‍यायाधीशगोळ, दंडाधिकारीगोळ अदिक प्रदेशगोळ्द सप्पा उच्चधिकारीगोळ्द हात्ती बातणी कळुदुन कि आंदुर महाराज नबूकदनेस्सर उन द्वारा स्‍थापित स्‍वर्ण-मूर्ति इन प्रतिष्‍ठान अन्द मौका मा हाजिर ईरूल.
DAN 3:3 आग सम्राट उन आदेशानुसार बेबीलोन साम्राज्‍य इन सप्पा प्रदेश इन अधिपती, हाकिम, राज्‍यपाल, मंत्री, खजांची, न्‍यायाधीश, दंडाधिकारी अदिक अन्य उच्चधिकारी तान राजा नबूकदनेस्सर उन द्वारा स्‍थापित स्‍वर्ण-मूर्ति इन प्रतिष्‍ठान हाब्‍ब मा उपस्‍थित आगोद उद्देश्‍य देल जमा आदुर. आंदुर मूर्ति इन मुंद नीदुरदुर.
DAN 3:4 “आग घोषणा माळावाळा उद्घोषक ऊंचा दण देल अंदुन, हे द्याश द्याश अदिक राज्य राज्य इन लॉकुरा, अदिक अलग अलग भाषा अन्द माताळावाळेर, नीम इक ईद आग्या केळ्‍सकु आगेत्याद कि,
DAN 3:5 कि या पल नीव नरसिंग, पाऊल, वीणा, तारवाळा वाजा, सितार, शहनाई अदिक अन्य सप्पा प्रकार इन वाद्य-यंत्रगोळ्द स्‍वर केळीर, आग नीव अदा क्षण राजा नबूकदनेस्सर उन द्वारा स्‍थापित स्‍वर्ण-मूर्ति इन मुंद बिदकु अदुर्द सम्मान माळेतीर.
DAN 3:6 जो मंळसा मूर्ति इन बिदकु अदुर्द सम्मान माळालुन, आव अदा पल धधकुस्तेला बेक्की इन भट्ठी दा भिटकु आदान.”
DAN 3:7 अत: विश्‍व अन्द अलग अलग कौमगोळा, राष्‍ट्रगोळा अदिक भाषा अन्द लॉकुरा हिंग अच माळदुर. आंदुर या क्षण नरसिंगे, पाऊल, वीणा, तारवाळा वाजा, सितार, शहनाई अदिक अन्य सप्पा प्रकार इन वाद्ययंत्रगोळ्द स्‍वर केळदुर, आंदुर तुंरत राजा नबूकदनेस्सर उन द्वारा स्‍थापित स्‍वर्ण-मूर्ति इन मुंद बिद्दुर, अदिक हिंग आंदुर मूर्ति इन प्रति सम्‍मान प्रकट माळदुर.
DAN 3:8 लेकीन अदा समय येनारा कसदी लॉकुर राजा नबूकदनेस्सर उन हात्ती होदुर, अदिक आंदुर यहूदीगोळ्द प्रति द्वेष इन कारण राजा से आंदुर्द चुगली हचदुर.
DAN 3:9 आंदुर नबूकदनेस्सर राजा से अंदुर, नी हमेशा जीत्ता ईर!
DAN 3:10 महाराज, नी राज आग्या कोटीद कि हर ऊंद मंळसा नरसिंग, पाऊल, वीणा, तारवाळा वाजा, सितार, शहनाई अदिक अन्य सप्पा प्रकार इन वाद्ययंत्रगोळ्द स्‍वर केळतेला अच स्‍वर्ण-मूर्ति इन मुंद बिदकु अदरी प्रणाम माळुल;
DAN 3:11 अदिक जो मंळसा मूर्ति इन मुंद बिदकु अदरी प्रणाम ईला माळ्यान, आव धधकुस्तेला बेक्की इन भट्ठी दा भिटकु आदान.
DAN 3:12 महाराज, नी जो यहूदीगोळ इक बेबीलोन द्याश इन राजकीय क्याल्सागोळ्द व्यवस्था माळोर साटी नियुक्‍त माळ्द, आंदुर नीन आदेशगोळ्द पालन माळालुर. ईव आंदुर हेसुर आव : शद्रक, मेशक अदिक अबेदनगो. आदुर नीन उपेक्षा माळतार. महाराज, आंदुर न रा नीन द्यावगोळ्द स्यावा-आराधना माळतार, अदिक न नीन द्वारा स्‍थापित स्‍वर्ण-मूर्ति इन प्रति सम्‍मान प्रकट माळतार.
DAN 3:13 ईद केळतेला अच नबूकदनेस्सर राजा अन सिट्ट भळकुस्त. आव गुस्सा दा बंदकु आदेश कोट्टुन कि शद्रक, मेशक अदिक अबेदनगो उक पेश माळकु आगुल. सैनिकगोळ मुरू मंळसागोळ इक राजा अन्द मुंद हाजिर माळदुर.
DAN 3:14 नबूकदनेस्सर राजा आंदुर से केळदुन, “शद्रक, मेशक अदिक अबेदनगो, येन ईद खरा आद कि नीव नान द्यावगोळ्द स्यावा-आराधना माळालीर, अदिक नान द्वारा स्‍थापित स्‍वर्ण-मूर्ति इक प्रणाम माळालीर?
DAN 3:15 ईग अगर नीव नरसिंग, पाऊल, वीणा, तारवाळा वाजा, सितार, शहनाई अदिक अन्य सप्पा प्रकार इन वाद्यगोळ्द स्‍वर केळकु नान द्वारा स्‍थापित मूर्ति इन मुंद बिदकु अदरी प्रणाम माळली तयार आईर, रा ठीक आद; नीम्द नुकसान आगाल्द. लेकीन अगर नीव मूर्ति इक प्रणाम माळालीर, रा नीव बिना देरी देल धधकुस्तेला बेक्की इन भट्ठी दा भिटकु आदीर. आग ना नोळाईन कि याता ईश्‍वर नीमी नान कय देल ऊळस्यान?”
DAN 3:16 शद्रक, मेशक अदिक अबेदनगो राजा अक उत्तर कोट्टुन, “हे नबूकदनेस्सर, ई संबंध दा नाव उत्तर कोळोद जरूरी समसालेव.
DAN 3:17 अगर नान सांगुळ हिंग व्‍यवहार माळकु आदीत, रा नाव या परमेश्‍वर उन स्यावा-आराधना माळतेव, आव नामी धधकुस्तेला बेक्की इन भट्ठी दा टु भी बिळ्स सकतान.
DAN 3:18 महाराज, अगर नी नामी धधकुस्तेला बेक्की इन भट्ठी दा हाक्या या ईला भी हाक्या, तरी भी नाव नीन द्यावगोळ्द स्यावा-आराधना माळालेव, अदिक नीन द्वारा स्‍थापित स्‍वर्ण-मूर्ति इन मुंद बांगकु अदरी प्रणाम माळालेव.”
DAN 3:19 नबूकदनेस्सर गुस्सा देल तुमेदुन. आऊन मार्रा अन्द रंग बदलुसेत. आऊन गुस्सा शद्रक, मेशक अदिक अबेदनगो अन्द प्रति भळकुसेत. आव आदेश कोट्टुन कि भट्ठी इन बेक्की येळ गुणा यक्कुल तेज माळकु आगुल.
DAN 3:20 तुरंत बाद्दा आव तान सेना अन्द येनारा बलवान योध्दागोळ इक आदेश कोट्टुन कि आंदुर शद्रक, मेशक अदिक अबेदनगो अक कटकु धधकुस्तेला बेक्की इन भट्ठी दा भिट्ट बुळुल. बलवान योध्दागोळ हिंग अच माळदुर.
DAN 3:21 आंदुर ई मुरू मंळसागोळ इक आंदुर्द पयजामागोळ, अंगरखगोळ, पगळीगोळ अदिक अन्य कपळागोळ सांगुळ कटबुट्टुर अदिक आंदरी धधकुस्तेला बेक्की इन भट्टी दा भिट्ट बुट्टुर.
DAN 3:22 राजा अन कठोर आग्या अन्द कारण भट्ठी इन आंच यक्कुल तेज माळकु आत. भट्ठी यक्कुल होतोद. अदुर दा टु लपटागोळ होळव. अदिक या लॉकुर शद्रक, मेशक अदिक अबेदनगो अक भट्ठी दा भिळोर साटी नेगदुर, आंदरी भट्ठी इन लपटागोळ भस्म माळ बुट्टव,
DAN 3:23 अदिक इंदुर मुरू मंळसागोळ−शद्रक, मेशक अदिक अबेदनगो कट-मटकु आ धधकुस्तेला बेक्की इन भट्ठी दा बिदोदुर.
DAN 3:24 राजा नबूकदनेस्सर उक आश्‍चर्य आत. आव तुरंत येद्दुन. आव तान मंत्रीगोळ से केळदुन, “येन नाव मुर अच मंळसागोळ इक भट्ठी दा हाकदेव?” आंदुर राजा अक उत्तर कोट्टुर, “हाव, महाराज खरा मात हुन.”
DAN 3:25 राजा अंदुन, लेकीन ना नाक मंळसागोळ इक बेक्की इन म्याकुच नळुतेला-वयाळतेला नोळेतीन. आंदुर कटकु आर. आंदुर्द मय ऊंद भी होत्तीदील. चौथा मंळसा अन्द रूप ईश्वर उन दूत उन घाई आद.
DAN 3:26 नबूकदनेस्सर धधकुस्तेला बेक्की इन भट्ठी इन द्वार इन हात्ती बंदुन. आव कारदुन, “हे सर्वोच्‍च परमेश्‍वर उन सेवकगोळा−शद्रक, मेशक अदिक अबेदनगो, व्हार्या होळी, ईल बरी!” अत: शद्रक, मेशक अदिक अबेदनगो बेक्की टु व्हार्या होटकु बंदुर.
DAN 3:27 अधिपती, हाकिम, राज्‍यपाल अदिक राज-मंत्री जमा आगेदुर. आंदुर नोळदुर कि मुरू मंळसागोळ्द मय मा बेक्की इन येनु भी प्रभाव बिदिदील. आंदुर्द ताल्ला अन्द ऊंद चुट्टी भी होत्तीदील, आंदुरव पयजामागोळ हांग च्या हांग ईरव. आंदुर मय टु होतोद सुंगध ताका ईला बरोद.
DAN 3:28 नबूकदनेस्सर अंदुन, “धन्‍य आन शद्रक, मेशक अदिक अबेदनगो उन परमेश्‍वर, जो दूत कळुकु तान विश्वास योग्य सेवकगोळ इक ऊळ्सदुन, जो नान राज आग्या अन्द उपेक्षा माळदुर, अदिक तान मय बेक्की इक अर्पण माळ बुट्टुर कि आंदुर यातोवारा अन्य द्यावगोळ्द आराधना माळबाळुल केवल तान अच परमेश्‍वर उन आराधना माळुल.
DAN 3:29 इदुरसाटी ना ईद राज आग्या प्रसारित माळतीन: अगर यातोवारा भी अगर राज्य, राष्ट्र अदिक भाषा अन्द मंळसा शद्रक, मेशक अदिक अबेदनगो अन परमेश्‍वर उन विरूद्ध येनारा अंदान, रा आऊन मय इन तुकळा-तुकळा माळकु आदाव, अदिक आऊन मान्ना खंडर माळकु आदीत; यतिकी आंदुर परमेश्‍वर उन अलावा अदिक याऊ ईश्‍वर हैलेच जो ई ढंग देल तान सेवकगोळ इक ऊळ्स सक्यान.”
DAN 3:30 आग राजा नबूकदनेस्सर बेबीलोन द्याश दा शद्रक, मेशक अदिक अबेदनगो अन्द पद मात ऊँचा माळदुन.
DAN 4:1 नबूकदनेस्सर उन परिपत्र: “पृथ्‍वी इन सप्पा राज्यगोळ, राष्‍ट्रगोळ अदिक भाषागोळ लॉकुर! नीम्द सुख-समृद्धि हापाळ गुणा वाळुसुल.”
DAN 4:2 “सर्वोच्‍च परमेश्‍वर नान इक अदभुत चिन्ह अदिक चमत्‍कार तोर्सदुन. नान इक ईद वळ्लीद हत कि ना अवरी नीम मा प्रगट माळाईन.”
DAN 4:3 परमेश्‍वर उन चिन्ह याट भव्‍य आव, आऊन अदभुत क्याल्सा याट सामर्थ्यपूर्ण आव! आऊन राज्‍य शाश्‍वत राज्‍य आद, आऊन शासन पीढ़ी टु पीढ़ी ताका माळकु ईरतद.
DAN 4:4 “ना, नबूकदनेस्सर तान निवास-स्थान दा सुख-चैन देल ईरीन अदिक तान महल दा सुख-समृद्धि भोगसीन.
DAN 4:5 ना ऊंद कांसा नोळदीन. अद कांसा नान इक अंजुस बुळ्त. याग ना व्हर्स मा मिंगीन आग नान मन दा विचार, अदिक कांसा अन्द नजारा नान इक परेशान माळव.
DAN 4:6 आग ना ऊंद राज आग्या प्रसारित माळदीन कि बेबीलोन द्याश इन सप्पा दरबारी विद्वान नान मुंद प्रस्‍तुत आगुल अदिक नान इक नान कांसा अन्द मतलब हेळुल.
DAN 4:7 आग नान आदेश इन अनुसार ज्‍योतिषी, तांत्रिक, जादु-टोना माळावाळेर अदिक कसदी पंडित नान महल दा बंदुर. ना आंदरी तान कांसा हेळदीन, लेकीन अदुर्द मतलब नान मा प्रकट माळ सकिदील.”
DAN 4:8 अदुर बाद्दा दानिएल बंदुन, आऊन हेसुर नान ईश-द्याव उन हेसुर मा बेलतशस्‍सर ईटकु आत, अदिक आऊन दा पवित्र परमेश्‍वर उन आत्मा निवास माळतद. ना दानिएल उक तान कांसा हेळदीन अदिक आऊन से ईद अंदीन,
DAN 4:9 “हे ज्‍योतिषिगोळ अगुवा, बेलतशस्‍सर! ना जान्सतीन कि नीम दा पवित्र परमेश्‍वर उन आत्मा निवास माळतद, अदिक नीम साटी यातोदारा भी रहस्‍य इन भेद हेळोद कठिन हैलेच. केळी, ना ईद कांसा नोळदीन. नान इक इदुर्द मतलब हेळी.
DAN 4:10 याग ना हासक्या मा मिंगकु ईरीन, आग ना ई दर्शन नोळदीन: ना नोळदीन कि पृथ्‍वी इन बीचोबीच ऊद्‍द मार्र आद अदिक आ मार्र इन ऊंचाई हापाळ ऊंचा आद.
DAN 4:11 अद मार्र वाळुसतेला अच होत अदिक मजबुत आगतेला होत. अद ईट वाळुस्त कि अदुर्द शिखर आकाश इक मुटली कुर्त. अद ईट ऊंचा आगेत कि पृथ्‍वी इन छोर टु कांळ्सली कुर्त.
DAN 4:12 अदुर याल्ला कांळ्सदुर दा सुंदर ईरव अदिक अद कायगोळ देल लदुस्कु ईरोद. अदुर्दा ईट काय ईरव कि सप्पा प्राणी अवरी तिनकु तृप्‍त आग सकोर. अदुर सावली दा सप्पा वन-पशु बसेरा माळोर. अदुर डगालीगोळ मा आकाश इन पक्षिगोळ गोदा माळ कोंडीदुर. पृथ्‍वी इन प्राणी अदुर काय तिनकु तान भरण-पोषण माळतोगोर.”
DAN 4:13 “याग ना हासक्या मा मिंगकु तान मन दा ईद दर्शन नोळीन, आग ना दर्शन दा ऊंद पहरेदार उक नोळदीन. आव पवित्र दूत ईरोन, जो स्‍वर्ग टु ल्‍यालमा ईळदुन.”
DAN 4:14 आव ऊंचा दण्ण देल कारदुन, अदिक ईद अंदुन, “ई मार्र इक कडु बुळी, अदिक इदुर डगालीगोळ इक छाट्सबुळी. इदुर याल्लागोळ इक झाड्सबुळी, अदिक इदुर कायगोळ इक बगरूसबुळी. इदुर सावली दा कुर्तकु वन पशुगोळ इक तुळकाळ्सबुळी. इदुर डगाली दा बसेरा माळावाळेर पक्षिगोळ इक उळुसबुळी.”
DAN 4:15 “लेकीन भूमी मा अदुर तना अक बिट्ट बुळी, अदिक अदुर्द जड़ इक अगुळ बाळी. तना अक लोहा अदिक पीतल इन जंजीर देल कट्टी, अदिक अदरी मैदान दा हसीद काड्डा अन्द न्याड्या बिट्टबुळी, ताकी अद आकाश इन ओद देल सींचुस्कु आगुल अदिक पशु उन घाई भूमी इन काड्डा तिनुल.”
DAN 4:16 अदुर मन बदलुसुल! “अदरी मंळसा अन्द मन इन बदला पशु उन मन सिकुल. अद येळ वर्षगोळ ताका ईदा दशा दा ईरूल.”
DAN 4:17 “ईद आग्या पहरेदारगोळ्द निर्णय देल पवित्र दूतगोळ्द वचन इन अनुरूप आद. ईद इदुरसाटी कोटकु आत कि जीव-लोक इन प्राणी जान्स कोमुल कि सर्वोच्‍च परमेश्‍वर मंळसागोळ्द राज्‍य मा शासन माळतान, अदिक आव यारी चाहासतान, आऊक ईद राज्‍य कोळतान, अदिक अदुर मा शासन माळोर साटी स्यांळ से स्यांण मंळसा अक भी नियुक्‍त माळतान.”
DAN 4:18 “राजा नबूकदनेस्सर, ना ईद कांसा नोळदीन. ईग, नीव, अद बेलतशस्‍सर, इदुर्द मतलब हेळी; यतिकी नान राज्य अन्द यावारा भी दरबारी विद्वान इदुर्द मतलब नान इक हेळ सकीदील. लेकीन नी नान कांसा अन्द मतलब हेळ सकत्या; यतिकी कि पवित्र परमेश्‍वर उन आत्मा नीम दा निवास माळतद.”
DAN 4:19 “ईद केळकु दानिएल, यारी बेलतशस्‍सर अनतार, थ्वाळासा समय ताका सुंगा नीदुरकु ईत्तुन. आऊन दिल दा हापाळ विचार बंदव, जो आऊक व्‍याकुल माळ बुटव.” ना अंदीन, “हे बेलतशस्‍सर, नान कांसा, अथवा अदुर्द मतलब देल नी व्‍याकुल आगबाळ.” बेलतशस्‍सर उत्तर कोट्टुन, “महाराज, नान स्‍वामी! काश, ईद कांसा नीन दुश्मनगोळ साटी ईरूल, इदुर्द मतलब नीन दुश्मनगोळ मा बिळुल!”
DAN 4:20 “महाराज, जो मार्र नी नोळ्द, अदिक जो वाळुस्कु मजबूत आगेत, अदिक जो ईट वाळुस्त कि अदुर्द स्यांडा आकाश इक मुटली कुर्त, अदिक ईट ऊंचा आगेत कि पृथ्वी इन दी टु कांळ्सली कुर्त;
DAN 4:21 अदुर्द याल्लागोळ कांळ्सदुर दा सुंदर ईरव, अदिक जो कायगोळ देल लदुस्कु ईरोद; अदुर्द ईट कायगोळ हतकु ईरव कि अवरी तिनकु सप्पा प्राणी तृप्‍त आग सकोर; अदुर्द सावली दा सप्पा वन-पशु बसेरा माळतोगव; अदिक अदुर्द डगालीगोळ मा आकाश इन पक्षिगोळ गोदा माळीदुर,
DAN 4:22 अद मार्र नी हुय, महाराज! नी इच वाळुस्कु शक्‍तिशाली आगेग्या. नीन महानता वाळुस्कु आकाश इक मुटली कुर्त. नीन राज्‍य पृथ्‍वी इन नाकु दी पहुंचुसेत.”
DAN 4:23 जो पवित्र पहरेदार नी नोळ्द, जो स्‍वर्ग टु ल्‍यालमा ईळदुन अदिक जो ऊंचा दण्ण देल ईद अंदुन कि “ई मार्र इक कडुकु नष्ट माळबुळी, लेकीन भूमी मा इदुर तना अक बिट्टबुळी, अदिक इदुर्द जड़ इक अगुळ बाळी. लेकीन तना अक लोहा अदिक पीतल इन जंजीरगोळ देल कट्टी, अदिक अदरी मैदान दा हिवरा काड्डा दा बिट्ट बुळी, ताकी अद आकाश इन ओद देल सींचुसकु आगुल, अदिक वन-पशु उन घाई अद भूमी इन काड्डा तिनुल. अद येळ वर्षगोळ ताका ईदा दशा दा ईरूल.”
DAN 4:24 महाराज, अदुर्द ईद मतलब आद: सर्वोच्‍च परमेश्‍वर उन आदेश आद; आव नीन प्रति ईद निर्णय माळदुन, अदिक ईद नीन मा घटित आदीत:
DAN 4:25 नी मंळसा-समाज इन न्याड्या टु तेगुकु आद्या, अदिक नीन इक वन-पशुगोळ सांगुळ ईरोद बिद्दीत. नी वस्तागोळ घाई काड्डा तिनद्या, अदिक आकाश इन ओद दा हस आद्या. येळ वर्ष ताका नीन ईदा दशा ईत्तीत. अदुर बाद्दा नीन इक अनुभव कि सर्वोच्‍च परमेश्‍वर अच मंळसागोळ्द राज्य मा शासन माळतान, अदिक आव यारी चाहासतान, आऊक ईद राज्य कोट्ट बुळतान.
DAN 4:26 “पवित्र स्वर्गदूत ईद आदेश कोटीदुन कि तना अक जड़ इन सांगुळ बिट्ट बुळी. अदुर्द ईद मतलब आद: या समय नीन इक अनुभव आगेदीत कि स्‍वर्ग दा विराजमान परमेश्‍वर अच मानव-जाति मा राज्‍य माळतान, आ समय अच नीन राज्‍य नीन इक प्राप्‍त आगेदीत.
DAN 4:27 ना नीन से निवेदन माळतीन, नी नान ईद सुझाव स्‍वीकार माळ: वळ्लीद आचरण माळ तान पाप इन बंधनगोळी मुरू बुळ. नी पीड़ितगोळ्द प्रति दया माळ अधर्म देल मुक्‍त आगेग. आग संभव आद कि नीन शांति इन ईव दिनगोळ लंबा आगेगुल.”
DAN 4:28 ईद सप्पा येनारा नबूकदनेस्सर मा घटुस्त.
DAN 4:29 हन्नेळ तिंगुळ इन बाद्दा ना बेबीलोन इन राजमहल इन छत मा वोयाळीन.
DAN 4:30 आग ना सोचदीन, “येन ईद बेबीलोन नगर महान हैलेच? ना इदरी तान धोळ ताकत देल माळदीन ताकी ईद नान राजधानी बन्सुल अदिक इदुर माध्‍यम देल नान बड़ाई इन नाकु दी प्रशंसा आगुल.”
DAN 4:31 ईव शब्‍द नान बाय दा अच ईरव कि अचानक स्‍वर्ग टु ईद आवाज केळकु बत्त: “हे राजा नबूकदनेस्सर, ईद मात नीन से अंदकु आगेत्याद. नीन राज्य नीन कय देल होटबुळ्त!
DAN 4:32 नी मंळसा-समाज इन न्याड्या टु तेगुकु आद्या, अदिक नीन इक वन-पशुगोळ सांगुळ ईरोद बिद्दीत. नी वस्ता घाई काड्डा तिंद्या. येळ वर्षगोळ ताका नीन ईद अच दशा ईत्तीत. अदुर्द बाद्दा अच नीन इक अनुभव आदीत कि सर्वोच्‍च परमेश्‍वर अच मंळसागोळ्द राज्य मा शासन माळतान, अदिक आव यारी चाहासतान, आऊका ईद राज्‍य कोट बुळतान”
DAN 4:33 “अदा समय ईद वाणी नान मा पुरा आत. आव मंळसा-समाज इन न्याड्या टु तेगुकु आदुन. आव वस्तागोळ घाई काड्डा तिंदुन. आऊन मय आकाश इन ओद इन बुंदगोळ देल हस आत. आऊन चुट्टी गरूड़ इन कालगोळ घाई ऊंद-ऊंद वाळुसदव. आऊन नखगोळ चिड़ियागोळ चंगुल इन घाई धोळ-धोळ आगेदव.”
DAN 4:34 “येळ वर्षगोळ बितुसदुर बाद्दा ना नबूकदनेस्सर स्‍वर्ग इन दी दीनता देल कण्‍णगोळ नेगदीन, अदिक नान विवेक वापस बत्त. ना सर्वोच्‍च परमेश्‍वर उक धन्‍य अंदीन, जो सदा-सर्वदा जीत्ता आन.” ना ई शब्दगोळ दा आऊन महिमा अदिक स्‍तुति माळदीन; “परमेश्‍वर उन राज्‍य हमेशा साटी आद; आऊन शासन पीढ़ी टु पीढ़ी माळकु ईरतद.
DAN 4:35 पृथ्‍वी इन पुरा ईरावाळेर आऊन मुंद नगण्‍य आर; आव स्‍वर्ग इन सेना दा, पृथ्‍वी इन प्राणिगोळ न्याड्या, तान इच्‍छा अन्द अनुसार क्याल्सा माळतान. याऊ आऊन कय रोक्स सकालुन, अदिक प्रश्‍न केळोद साहस माळ सकालुन, कि ‘नी ईद येन माळ्द?’”
DAN 4:36 “अदा समय नान विवेक वापस बत्त. नान राज्‍य इन कीर्ति इन साटी नान प्रताप अदिक वैभव नान इक मात प्राप्‍त आगेदव. अदिक नान मंत्री अदिक प्रधान लॉकुर नान से भेंट माळोर साटी बरली कुरतुर, अदिक ना मात्त तान राज्य इन म्याकुच राजा अन्द रूप दा प्रतिष्‍ठित आगेदीन. नान महानता मात वाळुसेत.”
DAN 4:37 “ईग ना, नबूकदनेस्सर, स्‍वर्ग इन राजा अन्द स्‍तुति अदिक महिमा माळतीन, आऊन गुणगोळ्द हाळ हाळतीन; यतिकी आऊन सप्पा क्याल्सा खरा, अदिक हर ऊंद व्‍यवहार न्‍यायपूर्ण आद.” “जो मंळसा घमण्‍ड देल ताल्ला म्याकुच माळकु नळुतान, आऊक आव नीचा माळ सकतान.”
DAN 5:1 ऊंद दिशी राजा बेलशस्सर तान ऊंद हजार प्रधानगोळ इक धोळ भोज कोट्टुन. आव आंदुर सांगुळ दाखमधु कुळदुन.
DAN 5:2 दाखमधु कुळदुर बाद्दा बेलशस्सर तान क्याल्सा माळावाळेर इक आदेश कोट्टुन कि आऊन आप्प नबूकदनेस्सर द्वारा यरूशलेम इन मंदिर टु तनकु आत व्हान्ना-बेळ्ली इन बर्तन आऊन मुंद तंदकु आगुल, ताकी आ बरतनगोळ दा आव, आऊन प्रधान, आऊन रानीगोळ अदिक रखेल दाखमधु कुडुल.
DAN 5:3 आग जो व्हान्ना-बेळ्ली इन बर्तन यरूशलेम दा परमेश्‍वर उन मंदिर टु तनकु आगीदव, अवरी क्याल्सा माळावाळेर राजा बेलशस्सर उन मुंद पेश माळदुर. आग राजा अदिक आऊन प्रधानगोळ, रानीगोळ अदिक रखेलगोळ आ बर्तनगोळ दा दाखमधु हाक्कु कुळदुर.
DAN 5:4 आंदुर दाखमधु कुडुकु व्हान्ना, बेळ्ली, पीतल, लोहा हुळ्ली अदिक कल्ल इन द्यावगोळ्द मूर्तिगोळ्द स्‍तुति माळली कुरतुर.
DAN 5:5 अदा समय दा बेळ्ल कांळ्सली कुरतव. ईव मंळसा अन्द कय इन बेळ्लगोळ घाई ईरव. आंदुर दीवट इन मुंद राजमन्‍दिर इन दीवार मा, जो चुना देल पोचकु ईरोद, येनारा लिख्सदुर. याग कय दीवार मा लिखसोद आग राजा हथेली इक नोळदुन.
DAN 5:6 राजा अन्द मार्र इन रंग बदलुसेत. आऊन मन दा हापाळ विचार बंदव, जो आऊक व्याकुल माळ बुट्टव. आऊन कय-काल नळ्गली कुरतव, अदिक टाँगरागोळ आपस दा टकरूसली कुरतव.
DAN 5:7 आव ऊंचा दण्ण दा आदेश कोट्टुन कि तांत्रिक, कसदी पंडित अदिक जादू-टोना माळावाळेर आऊन मुंद प्रस्‍तुत माळकु आगुल. तांत्रिक, कसदी पंडित अदिक जादू-टोना माळावाळेर बरूल. राजा बेबीलोन इन ई ग्यानीगोळ से अंदुन, “जो मंळसा दीवार इन ई लेख इक वाचुस कोंडान, अदिक अदुर्द मतलब नान इक हेळ्यान, ना आऊक राजसी कपळागोळ देल विभूषित माळाईन. आऊन कुतक्या दा व्हान्ना अन्द माला हाकाईन, अदिक आव नान राज्‍य इन तीसरा प्रमुख शासक आदान.”
DAN 5:8 राजा अन्द ग्यानी बुळ्क बंदुर, पर आंदुर दीवार मा लिखस्द लेख इक वाचुस सकिदील अदिक राजा अक अदुर्द मतलब हेळ सकिदील.
DAN 5:9 इदुर मा राजा बेलशस्सर हापाळ घबरूसेदुन अदिक आऊन मार्र इन रंग बदलुसेत. आऊन प्रधानगोळ भी हापाळ व्याकुल आगेदुर अदिक समझुस सकिदील कि येन माळेव अदिक येन ईला.
DAN 5:10 राजा अदिक सामंतगोळ्द आवाज केळकु राजमाता भोज-भवन दा बंदुर. आव अदिक अनली कुरतुर, “महाराज, लाखों वर्ष ताका जित्ता ईरूल! नी तान दिल इन विचारगोळ्द कारण व्याकुल आगबाळ अदिक नीन मार्र इन रंग बदलुसबाळ.
DAN 5:11 नीन राज्‍य दा ऊंद हिंग मंळसा आन आऊन दा पवित्र परमेश्‍वर उन आत्मा निवास माळतद. नीन आप्प उन राज्‍यकाल दा ऊंद हिंग घटना घटुसीत इदुर देल ईद पता नळुत कि आ मंळसा दा ज्योति अदिक समझ आद, द्यावगोळ्द बुद्धि इन घाई आऊन दा भी बुद्धि आद. अत: नीन आप्प राजा नबूकदनेस्सर आऊक ज्‍योतिषिगोळ, तांत्रिकगोळ, कसदी पंडितगोळ अदिक जादू-टोना माळावार्ळेद मुखिया माळ बुट्टीदुन;
DAN 5:12 यतिकी आऊन दा वळ्लीद आत्‍म ग्यान अदिक समझ ईरोद, अदिक आव कांसा अन्द मतलब हेळ सकोन, पहेलिगोळ इक समझुसोन अदिक समस्‍यागोळ इक सुलझुसोन. ईद सप्पा गुण दानिएल दा ईरव, आऊन हेसुर नीन आप्प बेलतशस्‍सर ईटदुन. अत: ईग नी दानिएल उक कारू. आव नीन इक दीवार पर लिखस्द लेख इन मतलब हेळ्यान.”
DAN 5:13 क्याल्सा माळावाळेर दानिएल उक राजा बेलशस्सर उन मुंद प्रस्‍तुत माळदुर. राजा दानिएल से अंदुन, “येन नी आवा दानिएल हुय जो यहूदा प्रदेश टु बंदी बन्सकु बंदीद, अदिक यारी नान आप्प यहूदा प्रदेश टु तंदीदुन?
DAN 5:14 ना केळदीन कि पवित्र परमेश्‍वर उन आत्मा नीन दा निवास माळतद अदिक नीन दा ग्यान, समझ अदिक वळ्लीद बुद्धि भी आद.
DAN 5:15 नान द्याश इन ग्यानी लॉकुर, ज्‍योतिषी नान मुंद राजमन्‍दिर दा तंदकु आंदुर कि आंदुर ई लेख इक वाचुसुल अदिक नान इक इदुर्द मतलब हेळुल. लेकीन आंदुर हेळ सकीदील.
DAN 5:16 ना केळदीन कि नी न केवल कांसा अन्द मतलब हेळ सकत्या बल्‍कि समस्‍यागोळ इक सुलझुस भी सकत्या. अगर नी दीवार इन ई लेख इक वाचुस कोंड्या अदिक इदुर्द मतलब नान इक हेळ्या रा ना नीन इक राजसी कपळा देल विभूषित माळाईन, नीन कुतक्या दा व्हान्ना हाकाईन अदिक नीन इक तान राज्य इन तीसरा प्रमुख शासक माळ बुळाईन.”
DAN 5:17 आग दानिएल राजा अन्द मुंद बंदकु ईद उत्तर कोट्टुन, “महाराज, नी तान ईद पुरस्‍कार तान हात्ती इच ईट अदिक यावारा दुसरा मंळसा अक कोट बुळ. फिर भी ना नीन साटी ई लेख इक वाचुसाईन अदिक इदुर्द मतलब हेळाईन.”
DAN 5:18 “महाराज, सर्वोच्‍च परमेश्‍वर नीन आप्प नबूकदनेस्सर उक राज्‍य, महानता, कीर्ति अदिक वैभव प्रदान माळीत.
DAN 5:19 यतिकी परमेश्‍वर नीन आप्प उक महान माळीदुन इदुरसाटी विश्‍व इन सप्पा कौमगोळ, राष्ट्र अदिक अलग-अलग भाषागोळ मात माताळावाळेर आऊन मुंद नळगोर अदिक अंजतोगोर. नीन आप्प यारी चाहासोन आऊक कोनसुस बुळोन अदिक यारी चाहासोन, आऊक जीत्ता बिट्ट बिळोन. आव तान इच्छा अन्द या मंळसा अक चाहासोन आऊन पदोन्नति माळ बुळोन, अदिक यारी चाहासोन आऊक पद टु ल्‍यालमा ईळ्स बुळोन.
DAN 5:20 याग नीन आप्प उन दिल अहंकार देल तुम्मेत, याग नीन आप्प उन आत्मा कठोर बनसेत अदिक आव घमण्‍ड दा बंदकु अनुचित क्याल्सा माळली कुरतुन, आग परमेश्‍वर आऊक आऊन राजसिंहासन टु ईळ्स बुट्टुन अदिक आऊन से आऊन ऐश्‍वर्य कसु बुट्टुन.
DAN 5:21 आ मंळसा-समाज टु व्हार्या माळकु आदुर अदिक आंदुर्द दी पशु उन दिल इन घाई बनसेत. आंदुर जंगली गधागोळ सांगुळ आळी दा ईरतोगोर. आंदुर वस्तागोळ घाई काड्डा तिनतोगोर. आंदुर मय आकाश इन ओद देल हसीद आगतोगोद. आग आंदरी अनुभव आत कि केवल सर्वोच्‍च परमेश्‍वर अच मंळसागोळ राज्‍य मा शासन माळतान अदिक आव यारी चाहासतान, आऊक राजा अन्द रूप दा प्रतिष्‍ठित माळतान.”
DAN 5:22 “हे बेलशस्सर, नी आऊन पार हुय, अदिक सप्पा येनारा जानस्कु भी तान दिल इक नम्र माळीदिल.
DAN 5:23 नी स्‍वर्ग दा विराजमान अधिपति इन प्रति अहंकार दा ताल्ला नेग्द अदिक आऊन मंदिर इन पवित्र बरतन नीम्द मुंद प्रस्‍तुत माळकु आदव, अदिक नी, नीम्द सामंतगोळ, नीम्द रानीगोळ अदिक रखेलगोळ आ बरतनगोळ दा सार्रा हाक्कु कुळदुर. नीव सार्रा कुडुकु बेळ्ली-व्हान्ना, पीतल, लोहा, हुळ्ली अदिक पाषाण इन द्यावगोळ्द मूर्तिगोळ्द स्‍तुति माळदीर, जो नोळालव, अदिक केळालव, अदिक येनु समसालव. हे बेलशस्सर! या परमेश्‍वर उन कय दा नीम्द जीव आद, जो नीम्द जीवन इक तान नियंत्रण दा ईटतान, आऊन सम्‍मान नीव माळीदिल.”
DAN 5:24 “अत: सर्वोच्‍च परमेश्‍वर तान दरबार टु ऊंद कय प्रेषित माळदुन अदिक ईद लेख लिखसुसदुन.”
DAN 5:25 जो लेख लिख्‍सकु आग्याद अदुर्द विवरण ईद आद: “मने, मने, तकेल” अदिक “पर्सीन”.
DAN 5:26 ईद वाक्य इन ईद मतलब आद : “मने” मतलब आळुकु; परमेश्‍वर नीम्द राज्‍य-काल इन दिनगोळ्द गिनती माळकु अदुर्द अंत माळ बुट्टुन.
DAN 5:27 “तकेल” मतलब तौलुस्कु; नीव कसौटी रूपी तराजू मा तौलुस्कु आगीर, अदिक हल्‍का सिद्ध आदीर.
DAN 5:28 “परेस” “मतलब वाट्सकु; नीम्द राज्‍य मादीगोळ अदिक फारसीगोळ कौमगोळ्द न्याड्या वाट्सकु आंदरी कोटकु आत.”
DAN 5:29 ईद केळतेला अच बेलशस्सर आदेश कोट्टुन कि दानिएल उक राजसी कपळा हाकसुसकु आगुल, आऊन उन कुतक्या दा व्हान्ना अन्द माला हाक्कु आगुल. राजा अन्द आदेश इन पालन माळकु आत. बेबीलोन दा घोषणा माळकु आत कि दानिएल राज्‍य इन तीसरा प्रमुख शासक हुन.
DAN 5:30 यावारा अदा ईळ्लक इक कसदीगोळ राजा बेलशस्सर उक कोंद बुट्टुन,
DAN 5:31 अदिक आऊन राज्‍य मादीगोळ्द दारा अक प्राप्‍त आगेत. आ समय दारा अन्द उमर लगभग बासठ वर्ष इन ईरोद.
DAN 6:1 सम्राट दारा तान पुरा साम्राज्‍य दा शासन माळोर साटी ऊंद सौ ईप्पत अधिपती नियुक्‍त माळदुन. आऊक तान ईद क्याल्सा उचित हत.
DAN 6:2 आव ई ऊंद सौ ईप्पत अधिपतीगोळ म्याकुच मुर अध्‍यक्ष नियुक्‍त माळदुन, आंदुर दा टु ऊंद अध्‍यक्ष दानिएल ईरोन. अधिपती आ अध्‍यक्षगोळ इक लेखा-जोखा कोळतोगोन. ई प्रकार सम्राट उक शासन कार्य दा यातोदु प्रकार इन आर्थिक हानि ईला आगतोगोद.
DAN 6:3 दानिएल दा ऊंद वळ्लीद आत्मा ईरोद, इदुरसाटी आव अध्‍यक्षगोळ अदिक अधिपतीगोळ दा प्रतिष्‍ठित आगेदुन. सम्राट दारा ऊंद योजना माळदुन कि आव पुरा राज्‍य इन म्याकुच दानिएल उक प्रशासक नियुक्‍त माळुल.
DAN 6:4 आंदुर प्रशासन इन संबंध दा दानिएल उन विरूद्ध शिकायत माळोद आधार ढूंढ्सदुर, लेकीन आंदरी शिकायत इन येनु आधार सकिदील अदिक दानिएल उन यातोदु भ्रष्‍ट क्याल्सा. दानिएल ऊंद ईमानदार प्रशासक ईरोन. अत: अध्‍यक्षगोळ अदिक अधिपतीगोळ इक आऊन क्याल्सागोळ्द संबंध दा यातोदु भूल-चूक सिक्कीदील.
DAN 6:5 इदुरसाटी आंदुर आपस दा ईद अंदुर, “दानिएल उन प्रशासन-कार्य अन्द संबंध दा शिकायत इन येनु आधार नामी सिकतीदील; लेकीन नाव आऊन परमेश्‍वर उन व्यवस्था अन्द संबंध दा यातोवारा गलती ढूंढ्स सकतेव.”
DAN 6:6 आग आंदुर अध्‍यक्ष अदिक अधिपति ऊंद मत आगकु सम्राट दारा अन्द हात्ती बंदुर, अदिक आंदुर आऊन से ईद अंदुर, “महाराज दारा, नी हमेशा जित्ता ईत्या!
DAN 6:7 नीन राज्‍य इन अध्‍यक्षगोळ, हाकिमगोळ, अधिपतिगोळ, मंत्रीगोळ अदिक राज्‍यपालगोळ ऊंद मत देल ईद निर्णय तांकोडुर कि महाराज उक ईद परामर्श कोळुल कि नी ईद आदेश अदिक आग्या प्रसारित माळुल कि जो मंळसा तीस दिन इन अवधि इन दौरान नीन अलावा यातोदु द्याव उन अथवा मंळसा से विनती माळ्यान रा आव हुल्ल इन गुफा दा हाक्कु आदान.
DAN 6:8 ईग, महाराज, ई आग्या अक पक्‍का माळबुळ अदिक ई चिट्टी मा हस्‍ताक्षर माळबुळ, इदुर देल, मादीगोळ अदिक फारसीगोळ्द व्यवस्था अन अनुसार अदुर दा येनु परिवर्तन आग सकाल्द अदिक अदरी रद्द माळकु आग सकाल्द.”
DAN 6:9 आग सम्राट दारा आ आग्या चिट्टी मा हस्‍ताक्षर माळकु आग्या जारी माळ बुट्टुन.
DAN 6:10 याग दानिएल उक ईद मालूम आत कि आग्या अन्द चिट्टी मा सम्राट दारा अन्द हस्‍ताक्षर आगेत, आग आव तान मान्नी होदुन. आऊन मान्ना अन्द म्याकुच इन मंजिल इन कमरा अन्द खिळकीगोळ यरूशलेम नगर इन दिशा दा खुलसव. आंदुर हागुल दा मुर घन टाँगरा टेक्सकु परमेश्‍वर से प्रार्थना माळोर अदिक आऊक धन्‍यवाद कोळतोगोर. आग भी हांग अच माळतेला ईत्तुन.
DAN 6:11 अदा समय अध्‍यक्ष अदिक अधिपती बंदुर जो ऊंद मत आगेगीदुर. आंदुर दानिएल उक तान परमेश्‍वर से निवेदन माळतेला अदिक प्रार्थना विनती माळतेला नोळदुर.
DAN 6:12 आग आंदुर सम्राट दारा अन्द हात्ती बंदुर, अदिक आंदुर आग्या अन्द संबंध दा आऊन मुंद अंदुर, “महाराज, ‘येन नी आग्या अन्द चिट्टी मा हस्‍ताक्षर माळीदिल कि जो मंळसा तीस दिन इन अवधि इन दौरान नीन अलावा यातोदु द्याव उन अथवा मंळसा से विनती माळ्यान, रा आव हुल्ल इन पिंजरा दा हाक्कु आदान?’ सम्राट उत्तर कोट्टुन, ‘मादीगोळ अदिक फारसीगोळ्द व्यवस्था अन अनुसार ईद आग्या पक्का आद, अदिक अदुर दा परिवर्तन आग सकाल्द, अदिक अदरी रद्द माळकु आगाल्द.’”
DAN 6:13 अध्‍यक्षगोळ अदिक अधिपतिगोळ सम्राट दारा अन्द मुंद अंदुर, “महाराज, आव दानिएल, जो यहूदा प्रदेश इन गुलामगोळ दा टु ऊंद आन, नीन उपेक्षा माळतार. या आग्या चिट्टी मा नी हस्‍ताक्षर माळ्द, आंदुर अदुर मा ध्‍यान कोळालुर. आंदुर तान परमेश्‍वर से हागुल दा मुर घन विनती माळतार.”
DAN 6:14 ईव मातगोळ केळकु सम्राट दारा अक हापाळ दु:ख आत. आव दानिएल उक ऊळसोर साटी उपाय सोचली कुरतुन. आव व्‍हातुर टु द्यावगा ताका दानिएल उन रक्षा अन्द साटी मन अच मन प्रयत्‍न माळतेला ईत्तुन.
DAN 6:15 आग अध्‍यक्ष अदिक अधिपती जो ऊंद मत आगेगीदुर सम्राट दारा अन्द हात्ती मात बंदुर. आंदुर सम्राट से अंदुर, “महाराज, याद ईट: मादीगोळ अदिक फारसीगोळ्द व्यवस्था अन ईद कानून आद: राजा द्वारा ठहरूस्कु आदेश अथवा आग्या दा परिवर्तन आग सकाल्द अदिक अदरी रद्द माळ सकालुर.”
DAN 6:16 आग सम्राट दारा दानिएल उक बंदी माळोद आदेश कोट्ट बुट्टुन. आऊक उक हुळकु तंदुर, अदिक आऊक हुल्लगोळ्द गुफा दा हाक्क बुट्टुर. सम्राट आऊन से अंदुन, “हे दानिएल, या परमेश्‍वर उन नी हमेशा आराधना माळत्या, आव नीन रक्षा माळुल!”
DAN 6:17 आग सम्राट उन क्याल्सा माळावाळेर ऊंद धोळ कल्ल तंदुर. आंदुर अदरी गुफा अन्द बाय मा ईट बुट्टुर. इदुर बाद्दा सम्राट दारा तान ऊंगरा अदिक सामंतगोळ ऊंगरागोळ देल गुफा अन्द बाय मा मोहर हच बुट्टुर कि दानिएल उन दशा अक बदलुस्कु आग बाळुल.
DAN 6:18 अदुर बाद्दा सम्राट दारा तान महल दा होटोदुन. आव आ ईळ्लक इक ऊंडीदील. आव तान मनोरंजन माळावाळेर इक मना माळ बुट्टुन; अत: आ ईळ्लक इक आऊन हात्ती याऊ बंदीदिल. आऊन कण्‍णगोळ दा टु जप हारेत.
DAN 6:19 व्हातर्‍या, सूरज होळतेला अच सम्राट दारा पलंग टु येद्दुन अदिक बिना देरी माळतेला हुल्लगोळ्द गुफा दी होदुन.
DAN 6:20 आव गुफा अन्द हात्ती पोहचुसदुन, अल दानिएल बंद ईरोन. आव दुख भरा दण्ण दा दानिएल उक कारदुन, “हे दानिएल, जीत्ता परमेश्‍वर उन सेवक! येन नीन परमेश्‍वर याऊन नी हमेशा आराधना माळत्या, नीन इक हुल्ल इन बाय दा टु ऊळ्सदुन?”
DAN 6:21 दानिएल सम्राट से अंदुन, “महाराज, नी हमेशा जित्ता ईरूल!
DAN 6:22 नान परमेश्‍वर तान ऊंद दूत कळुदुन, आव हुल्लगोळ बाय बंद माळ बुट्टुन; यतिकी ना परमेश्‍वर उन नजर दा निर्दोष ईरीन, इदुरसाटी हुल्लगोळ नान इक हानि पहुचुसीदिल. महाराज, ईदा प्रकार ना नीन मुंद भी निरअपराध आईन; यतिकी ना यातोदु गलती माळीदिल.
DAN 6:23 ईद केळकु सम्राट दारा हापाळ प्रसन्न आदुन. आव दानिएल उक गुफा टु व्हार्या होळोद आदेश कोट्टुन. सम्राट उन क्याल्सा माळावाळेर दानिएल उक गुफा टु व्हार्या तेगदुर. दानिएल उन मय मा खरोंच भी हतीदिल; यतिकी आव तान परमेश्‍वर मा भरोसा माळतोगोन.”
DAN 6:24 आग सम्राट दारा अन्द आदेश टु आ लॉकुर तंदकु आदुर जो दानिएल मा दोष हचीदुर. आंदुर तान हिंग्स अदिक बाल-बच्यागोळ सांगुळ हुल्ल इन पिंजरा दा भिटकु आदुर. आंदुर पिंजरा अन्द किनारा मा पहुचुसीदुर कि हुल्लगोळ म्याकुच हारकु आंदरी तान-तान बाय दा हुळ कोंडुर, अदिक आंदुर येलु सांगुळ आंदरी मेट्ट बुट्टुर.
DAN 6:25 सम्राट दारा तान साम्राज्‍य इन अन्‍तर्गत पृथ्‍वी इन ईरावाळेर सप्पा द्याशगोळ, राष्‍ट्रगोळ अदिक भाषागोळ लॉकुर इक ईद चिट्टी लिख्सदुर: “नीम्द सुख-समृद्धि हागुल येढ्ढ गुणा अदिक ईळ्लक नाक गुणा वाळुसुल!
DAN 6:26 ना ईद राज आग्या प्रसारित माळेतीन कि नान साम्राज्‍य इन पुरा लॉकुर दानिएल उन परमेश्‍वर उन मुंद नळ्गतेला अदिक अंजतेला ईत्तार, यतिकी केवल आवा जीत्ता परमेश्‍वर आन; आव युगानुयुग विद्यमान आन. आऊन राज्‍य यागलु नष्‍ट आगाल्द, आऊन शासन इन यागलु अंत आगतीदील.
DAN 6:27 जो दानिएल उक हुल्लगोळ देल ऊळस्यान, आवा वाचुसावाळा अदिक ऊळसावाळा हुन; अदिक स्वर्ग दा अदिक पृथ्वी मा चिन्हगोळ्द अदिक चमत्कारगोळ इक प्रगट माळावाळा हुन.”
DAN 6:28 ई प्रकार दानिएल, सम्राट दारा अदिक फारसी सम्राट कुस्रू, येढ्ढु मुंदुर राज्‍यकाल दा सुख-चैन देल जीवन व्‍यतीत माळतेला ईत्तुन.
DAN 7:1 बेबीलोन द्याश इन राजा बेलशस्सर उन राज्‍यकाल इन पयला वर्ष दा दानिएल ऊंद कांसा अदिक अनेक दर्शन नोळदुन याग आव हासक्या मा मिंगोन. आव कांसा अक लिख्स बुट्टुन अदिक कांसा अन्द सारांश हेळदुन.
DAN 7:2 दानिएल अंदुन, “ना ईळ्लक इक ईद दर्शन नोळदीन. ना नोळदीन कि आकाश इन नाकु दिशागोळ टु आँधी महासागर मा बरेत्याद.
DAN 7:3 आग महासागर दा टु नाक धोळ-धोळ पशु होट्टव. ईव नाकु पशु आबुर-दाबुर से अलग ईरव.
DAN 7:4 पयला पशु हुल्ल इन घाई ईरोद, पर अदुर दा गरूड़ इन पंख हतकु ईरव. याग ना अदरी नोळीन आग अदुर पंख कितकु आदव. अदरी भूमी मा टु नेगुकु आगीत अदिक मंळसा अन्द घाई अदरी येढ्ढ कालगोळ मा नीदरूस्कु आत. आऊक मंळसा अन्द दिल कोटकु आत.”
DAN 7:5 दूसरा पशु भालु उन घाई ईरोद. अद हिंद इन कालगोळ बल मा नीदुरकु ईरोद. अदुर्द हल्लगोळ्द न्याड्या मुर पसलिगोळ ईरव. यावारा अनोर, “येळ अदिक हापाळ मांस तिन.”
DAN 7:6 “अदुर बाद्दा ना ऊंद अदिक पशु उक नोळदिन. अद चिता अन्द घाई ईरोद. लेकीन अदुर्द बेन मा पक्षिगोळ घाई नाक पंख ईरव. अदुर नाक ताल्ला ईरव. अदरी शासन माळोद अधिकार कोटकु आत.”
DAN 7:7 “इदुर बाद्दा ना ईळ्लक इन दर्शनगोळ दा चौथा पशु नोळदीन. अद नोळदुर दा भयानक, डरावना अदिक हापाळ धोळ्द ईरोद. अदुर बाय दा लोहा अन्द धोळ-धोळ हल्ल ईरव. अद सप्पा येनारा तिनोद अदिक तुकळा-तुकळा माळ बुळोद. जो अदुर्द बाय दा मिक्कोद, अदरी अद तान पंजागोळ देल मेट्ट बुळोद. अद पयलेवाळा मुरू पशुगोळ से अलग ईरोद. अदुर हत्त सींग ईरव.
DAN 7:8 ना अदुर सींगगोळ इक ध्यान देल नोळदीन. अदा समय आ सींगगोळ न्याड्या टु ऊंद मात सींग होळ्त, अदुर कारण मुर सींग जड़ टु कितदेव. ईद सींग स्यांणद ईरोद, अदिक इदुर दा मंळसा अन्द कण्णगोळ घाई कण्ण ईरव. इदुर दा बाय भी ईरोद, जो धोळ मातगोळ माताळोद.”
DAN 7:9 “ना दर्शन दा नोळदिन कि सिंहासन ईटकु आव, अदिक ऊंद प्राचीन युग-गंळ्स विराजमान आदुन. आऊन फळक्या बरफ इन घाई बिळीद ईरोद; अदिक ताल्ला अन्द चुट्टी शुद्ध चुट्टी इन घाई चमकदार ईरव. आऊन सिंहासन अग्निमय ईरोद; अदिक सिंहासन इन कालगोळ धधकुस्तेला ज्‍वालागोळ घाई.
DAN 7:10 आऊन मुंद टु अग्‍नि-ज्‍वाला होळोद, हजारों-हजार सेवक आऊन प्रशंसा माळोर; अदिक हजार-लाख लॉकुर आऊन मुंद कय-जोळ्सकु नीदुरकु ईरोर. न्‍याय माळोर साटी दरबार हतकु ईरोद; अदिक व्यवस्था अन ग्रंथ तेरूकु ईरव.”
DAN 7:11 “याग अद सींग धोळ मात माताळोद, आग अदुर दण्ण देल नान ध्‍यान पशु उन दी होत. ना नोळदिन कि पशु उन वध माळ बुट्टुर. अदुर्द शरीर नष्‍ट माळ बुट्टुर, अदिक अदुर्द लाश बेक्की दा होताकोर साटी कोट्ट बुट्टुर.”
DAN 7:12 मिक्कु पशुगोळ्द अधिकार ताकोमकु आत, लेकीन आंदुर जीव थ्वाळासा समय इन साटी ऊळ्सकु आत.
DAN 7:13 “ना ईळ्लक इन दर्शन दा ईद नोळदीन: आकाश इन मेघगोळ सांगुळ मंळसा अन्द पार उन घाई यावारा बरेत्यान. आव प्राचीन युग-गंळ्स उन हात्ती बंदुन, अदिक आऊन मुंद प्रस्‍तुत आदुन.”
DAN 7:14 आग प्राचीन युग-गंळ्स आऊक शासन इन अधिकार, महिमा अदिक राज्‍य प्रदान माळदुन ताकी पृथ्‍वी इन पुरा कौमगोळ, राष्ट्र अदिक अलग-अलग भाषागोळ माताळावाळेर लॉकुर आऊन स्यावा माळुल. आऊन शासन यागलु खतम आगावाळा शासन हुन; जो यागलु खतम आगतीदील; आऊन राज्‍य युगानुयुग अटल आद, अदुर्द यागलु नाश आगतीदील.
DAN 7:15 नान-दानिएल उन अन्‍त:करण चिंतित आगेत. मन दा नोळ्त ई दर्शनगोळ नान इक व्‍याकुल माळ बुट्टव.
DAN 7:16 अत: ना स्यावा माळावाळेर दा टु यावारा ऊंद मंळसा अन मुंद होदीन अदिक आऊन से ई दर्शनगोळ्द वास्‍तविकता अन्द बारा दा केळदिन. आव नान इक हेळदुन अदिक नान मा ई दर्शनगोळ्द मतलब प्रकट माळदुन.
DAN 7:17 आव अंदुन, “ईव नाक धोळ पशु नाक महान राजागोळ हुळ, जो पृथ्‍वी मा पैदा आदार.
DAN 7:18 लेकीन सर्वोच्‍च परमेश्‍वर उन पवित्र लॉकुर अच राज्‍य इक प्राप्‍त माळ्यार. आंदुर सदा-सर्वदा आ राज्‍य मा अधिकार माळ्यार, युगानुयुग ताका.”
DAN 7:19 “आग नान इच्छा आत कि ना चौथा पशु उन बारा दा आऊन से वास्‍तविक मात केळाईन. ईव पशु अन्य मुरू पशुगोळ से अलग ईरोद. अद नोळदुर दा बड़ा भयानक ईरोद. अदुर हल्ल लोहा अन्द अदिक नख पीतल इन ईरव. अद सप्पा येनारा तिनोद अदिक तुकळा-तुकळा माळ बुळोद. जो अदुर बाय दा मिक्कोद, अवरी अद तान पंजागोळ देल मेट्ट बुळोद.
DAN 7:20 ना अदुर्द हत्त सिंगगोळ्द बारा दा भी केळदीन, जो अदुर्द ताल्ला मा ईरोद. ना अदुर से आ स्यांण सींगगोळ बारा दा भी केळदीन जो हत्त सींगगोळ न्याड्या होटीत, अदिक अदुर कारण मुर सींग बिदोगीदव, अदुर कण्णगोळ ईरव, अदिक अदुर दा धोळ मात माताळोद बाय ईरोद, अदिक अन्य संगी-सींगगोळ दा हापाळ धोळ भयानक प्रतीत आगोद.”
DAN 7:21 याग ना ई सींग मा नगर माळदीन, आग नान इक कांळ्सकु बिळ्त कि ई सींग परमेश्‍वर उन पवित्र लॉकुर से युद्ध छेळ्स बुटाद अदिक ईद आंदुर मा प्रबल आगेत.
DAN 7:22 यागासताका आव अति प्राचीन बरालुन, अदिक परमप्रधान इन पवित्र लॉकुर न्यायी न ठहरूसुल, अदिक आ पवित्र लॉकुर्द राज्यधिकारी आगोद समय बनकु पहुचुसाल्द.
DAN 7:23 आव अंदुन, “आ चौथा पशु उन अर्थ, ऊंद चौथा राज्य आद, जो पृथ्वी मा आगकु अदिक सप्पा राज्यगोळ से अलग ईत्तीत, अदिक पृथ्वी इन नाश माळ्यान, अदिक तान पंजागोळ दल मेटकु चूर–चूर माळ्यान.
DAN 7:24 अदुर्द हत्त सींगगोळ्द ईद मतलब आद: ई राज्‍य दा टु हत्त राजा पैदा आदार, अदिक अदुर बाद्दा ऊंद अदिक राजा पैदा आदान. आव तान पयले नोर राजागोळ से अलग ईत्तान, अदिक तान उदय देल मुर राजागोळ इक कोंद बुट्टान.
DAN 7:25 ईव राजा सर्वोच्‍च परमेश्‍वर उन निन्‍दा माळ्यान, अदिक आऊन भक्‍तगोळ इक पिसुस बुट्टान. ईव निर्धारित हाब्‍ब इन समय इक अदिक व्यवस्था अक बदलुसोद प्रयत्‍न माळ्यान; सर्वोच्‍च परमेश्‍वर उन भक्‍त साढ़े मुर वर्ष ताका ईऊन कय दा सौप्सकु आदाव.
DAN 7:26 आग सर्वोच्‍च परमेश्‍वर उन दरबार न्‍याय इन साटी कुरतीत; अदिक आ राजा अन्द कय देल आऊन राज्‍य-सत्ता कसुकु आदीत आऊन शासन पुरा तरीका देल नष्‍ट आगेदीत, आऊन पुरा अंत आगेदीत.
DAN 7:27 राज्‍य अदिक शासन, पुरा आकाश इन ल्‍यालमा पृथ्‍वी इन सप्पा राज्‍यगोळ्द महानता, सर्वोच्‍च परमेश्‍वर उन पवित्र लॉकुर्द समूह अक कोटकु आदीत. आंदुर राज्‍य यागलु खतम ईला आगावाळा राज्‍य ईत्तीत; पृथ्‍वी इन सप्पा शासक आंदुर्द स्यावा माळ्यार आंदुर आऊन आग्या अन्द पालन माळ्यार.”
DAN 7:28 दर्शन इन वास्‍तविक मतलब इन चर्चा ईल खतम आत. लेकीन यल ताका नान संबंध आद, नान विचारगोळ नान इक व्‍याकुल माळ बुट्टव. नान मार्रा अन्द रंग बदलुसेत. लेकीन ई मात ना तान मन दा अच ईटदीन, अदिक यारूकु हेळीदिल.
DAN 8:1 “म्याकळोद दर्शन इन बाद्दा ना-दानिएल उक राजा बेलशस्सर उन राज्‍यकाल इन तीसरा वर्ष दा ऊंद अदिक दर्शन कांळ्सकु बत.
DAN 8:2 याग ना एलाम प्रदेश इन राजधानी शूशन हेसुर इन किला दा ईरतोगीन. ईद ना दर्शन दा नोळदीन. इदुर बाद्दा ना नोळदीन कि ना ऊलै हेसुर इन गांगा अन्द किनारा मा नीदुरकु ईरीन.
DAN 8:3 ना नजर म्याकुच माळदीन, रा नोळदीन कि गांगा अन्द किनारा मा ऊंद म्यांडा नीदुरकु आद. अऊर येढ्ढ सींग आव. ईव येढ्ढु सींग धोळ-धोळ ईरव, लेकीन ऊंद सींग-दूसरा सींग से धोळ ईरोद. जो सींग धोळ ईरोद, अद स्यांण सींग इन बाद्दा होटीत.”
DAN 8:4 ना नोळदीन कि म्यांडा पश्‍चिम, उत्तर अदिक दक्षिण दिशागोळ दा आक्रमण माळ बुळ्त, अदिक अदुर्द मुंद याऊ पशु टिक्स सकीदील. अदुर कय देल ऊळसावाळा याऊ ईला ईरोन. अद हापाळ व्‍यवहार माळ्त, अदिक खुद इक हापाळ उन्नत माळ्त.
DAN 8:5 ना सोचतेला अच ईरीन, रा बाक येन नोळदीन कि ऊंद व्हात पश्चिम दिशा टु होटकु पुरा पृथ्वी इन म्याकुच हिंग तिर्गत कि नळुत समय भूमी मा काल हत गोटीदील अदिक आ व्हात इन कण्णगोळ न्याड्या ऊंद नोळा योग्य सींग ईरोद.
DAN 8:6 अद आ येढ्ढ सींगवाळा म्यांडा अन्द हात्ती होगकु, यारी ना गांगा अन्द मुंद नीदुरकु नोळीदिन, अदुर मा गुस्सा देल तान पुरा ताकत देल हरूकु टक्कर होडुत.
DAN 8:7 ना नोळदीन कि अद म्यांडा अन्द एकदम हात्ती पहुचुसेत, अदिक आऊन प्रति अद गुस्सा दा उबलुसेत्याद. अद अदुर मा झपटुस्त, अदिक अद अदुर्द येढ्ढु सींग मुर्द बुळ्त. म्यांडा दा ईट ताकत ईला ईरोद कि अद व्हात इन सामना माळ सकुल. व्हात म्यांडा अक भूमी मा पटकुस बुळ्त अदिक अदरी तान खुरागोळ देल मेट्ट बुळ्त. व्हात इन कय टु आ म्यांडा अक ऊळसावाळा याऊ ईला ईरोन.
DAN 8:8 ईग व्हात यक्कुल शक्‍ति सम्‍पन्न आगेत. लेकीन याग अद ताकद इन शिखर मा ईरोद आग अदुर्द धोळ सींग मुरूत, अदिक अदुर जागा मा नाक विचित्र सींग होट्टव, अदिक अव आकाश इन नाकु दिशागोळ दी वाळुस्ली कुरतव.
DAN 8:9 “ई नाकु सींगगोळ दा टु ऊंद सींग टु ऊंद अदिक स्यांण सींग होळ्त. अद स्यांळ्द सींग वाळुस्ली कुर्त अदिक वाळुस्त-वाळुस्त दक्षिण पूर्व दी वाळुस्ली कुर्त अदिक ईद सींग सुंदर धरती दी मुंद वाळुस्ली कुर्त.
DAN 8:10 अद वाळुस्तेला-वाळुस्तेला स्‍वर्ग इन सेना ताका पहुचुसेत, अदिक अदुर्द तारागणगोळ दा टु थ्वाळासा तारागोळ इक पृथ्‍वी मा भिट्ट बुट्टुर, अदिक अवरी मेट्ट बुट्टुन.
DAN 8:11 अद स्‍वर्ग इन सेना अन्द अध्‍यक्ष से भी येक्कुल खुद इक सर्वोच्‍च घोषित माळ बुळ्त; अदिक जो हमेशा अग्निबलि स्‍वर्ग इन सेना अन्द अध्‍यक्ष उक येर्सकु आगोद, अदरी बंद माळ बुट्टुन. अद आऊन पवित्र निवास-जागा तोड़-फोड़ माळ्त
DAN 8:12 अदिक तान सेना अक सौप्स बुळ्त. पवित्र जागा दा हमेशा अग्‍नि बलि इन बदला अधर्ममय उपासना माळली कुरतुर. सींग सत्य अक धुळा दा मिलुस बुळ्त अदिक अद तान अन्‍यायपूर्ण क्याल्सा दा सफल आगेदुन.”
DAN 8:13 आग ना ऊंद भक्‍त उक माताळतेला केळदीन. ऊंद मात पवित्र जन ई माताळावाळा जन उन से केळोन, “हमेशा अग्निबलि अदिक विध्‍वंसकारी अधर्म इन बारा दा जो दर्शन तोर्सकु आग्याद अद याग पुरा आदीत? पवित्र जागा अन्द तोड़-फोड़ अदिक स्‍वर्ग इन सेना अन्द तारागणगोळ्द मेटकु आगोद यागासताका आगतेला ईत्तीत?”
DAN 8:14 पयला जन आऊक ईद हेळदुन, “यागासताका तेईस सौ द्याव अदिक व्हातुर बितसेगालव, आगासताका अधर्म आगतेला ईत्तीत. ई अवधि इन बाद्दा पवित्र जागा शुद्ध माळकु आदीत.”
DAN 8:15 याग, ना दानिएल, ईद दर्शन नोळदीन आग ना इदुर्द मतलब इक समझुसोद प्रयत्न माळदीन. ना नोळदिन कि एकदम नान मुंद यावारा बंदकु नीदरेदुन; आव मंळसा अन्द घाई कांळसोन.
DAN 8:16 ना यावारा मंळसा अन्द दण्ण केळदीन. अद ऊलै गांगा न्याड्या दा टु होळ्त. अद वाणी ऊंचा दण्ण दा अंत, “हे जिब्राएल ई मंळसा अक दर्शन इन मतलब समझुस बुळ.”
DAN 8:17 अत: जिब्राएल नान हात्ती बंदुन, यल ना नीदुरकु ईरीन. याग आव नान मुंद बंदुन आग ना अंजेदीन अदिक भूमी मा बाय इन भार देल बिद्दीन. आव नान से अंदुन, “हे मंळसा, जो दर्शन नी नोळ्द अदुर्द मतलब सम्स. ईद दर्शन हमेशा अन्द बारा दा आद.”
DAN 8:18 आव नान से माताळतेला अच ईरोन कि ना अचेतन आगेदीन अदिक भूमी मा उलटा-बाय देल बिद्दीन. लेकीन आव नान इक कय मुटदुन, अदिक नान इक कालगोळ मा नीदरूस बुट्टुन.
DAN 8:19 आव अंदुन, “केळ, ई कोप-युग इन आखरी दिनगोळ दा जो घटनागोळ घटुस्याव, अवरी ना नीन मा प्रकट माळेतीन. ईव ठहरूस्कु आग्याद युगांत इन संबंध दा आद.”
DAN 8:20 “जो म्यांडा अन्द येढ्ढ सींग नी नोळ्द, अव मादी अदिक फारसी साम्राज्‍य अन्द येढ्ढ राजा हु;
DAN 8:21 अदिक चुट्टीवाळा व्हात यूनान द्याश इन राजा हुन. ई व्हात इन येढ्ढु कण्णगोळ न्याड्या दा स्‍थित सींग इन मतलब आद : यूनान इन पयला राजा.
DAN 8:22 जो नाक सींग ई सींग इन मुरदुर बाद्दा इदुर जागा मा होट्टव, इदुर ईद मतलब आद: यूनानी राष्ट्र दा टु नाक राज्‍यगोळ्द उदय आदीत, लेकीन अव इदुर घाई शक्‍तिशाली आगतीदील.”
DAN 8:23 ई नाकु राज्‍य इन आखरी दिनगोळ दा, याग आंदुर पाप इन घड़ा तुमेदीत, ऊंद राजा पैदा आदान. आऊन मार्र कठोर अदिक जिद्दी कुटिल स्‍वभाव इन ईत्तीत. आव दोगला मातगोळ माळ्यान.
DAN 8:24 आव शक्‍तिशाली आदान, अदिक हर जागा विनाश इन भयानक ढेर हच कोंडान. जो भी क्याल्सा आव कय दा ताकोंडान, अदुर दा आव सफल आदान. आव शक्‍तिशाली लॉकुर्द अदिक पवित्र लॉकुर्द जनसमुदायगोळ इक नष्‍ट माळ्यान.
DAN 8:25 आव तान चतुराई दा तान हर ऊंद कपटपूर्ण क्याल्सा दा सफल आदान. तान सफलता देल आव मन अच मन फूलुस्कु निडर आगेदान. आव बिना चेतावनी कोटकु हापाळ लॉकुर्द वध माळ बुट्टान. ईल ताका कि आव “शासकगोळ्द शासक” उन भी विरोध माळ्यान. लेकीन आव आखरी दा बिना यावारा मंळसा अन्द कय हचदुर देल अच नाश आगेदीत.
DAN 8:26 “जो नी द्यावगा अन्द अदिक व्हातुर इन दर्शन नोळ्द, जो नीन इक हेळकु आत, अद खरा आद. लेकीन नी अदरी मुहरबन्‍द माळकु सुरक्षित ईटेत, यारीकु हेळ बाळेत; यतिकी अद ईंद टु हापाळ दिन इन बाद्दा घटुसीत.”
DAN 8:27 “ना, दानिएल, ईद दर्शन पाऊसकु ईट कमजोर आगेदीन कि थ्वाळासा दिनगोळ ताका बीमार बिदकु ईत्तीन. याग ना स्‍वस्‍थ आदीन आग व्हर्स टु येद्दीन अदिक राजकाज दा व्‍यस्‍त आगेदीन. लेकीन ना दर्शन इन कारण चकित ईरीन; यतिकी ना अदरी सम्स सकिदील.”
DAN 9:1 “मादी लॉकुर इन सम्राट क्षयर्ष उन पार दारा कसदी लॉकुर इन द्याश मा राज्‍य माळली कुरतुन.
DAN 9:2 आऊन राज्‍य-काल इन पयला वर्ष दा ना-दानिएल धर्मग्रन्‍थगोळ दा उल्‍लिखित आ वर्ष इन संख्‍या अन्द गणना माळ कोंडुन, अदुर दौरान यरूशलेम नगर उजाड़ बिदकु ईत्त, जसा प्रभु नबी यिर्मयाह अन्द माध्‍यम देल हेळीदुन. ईद संख्‍या ईरोद सत्तर वर्ष.”
DAN 9:3 आग ना तान स्वामी परमेश्वर उन दी तान बाय माळदीन. ना पश्‍चात्ताप प्रकट माळोर साटी बॉरा अन कपळा हाकदीन, अदिक तान ताल्ला मा राख हाकदीन. ना उपवास ईटदीन. ना परमेश्‍वर उन कृपा-दृष्‍टि सिक्कोर साटी प्रार्थना अदिक विनती माळली कुरतीन.
DAN 9:4 ना प्रभु परमेश्वर से तान पाप स्‍वीकार माळदीन, अदिक आग आऊन से ई शब्‍दगोळ दा प्रार्थना माळदीन: “हे स्‍वामी, नी महान अदिक भययोग्‍य परमेश्वर आय. जो लॉकुर नीन से प्रेम माळतार, अदिक नीन आग्यागोळ्द पालन माळतार, आंदुर मा नी करूणा माळत्या, अदिक आंदुर सांगुळ तान वादा अक पुरा माळत्या.
DAN 9:5 नाव पाप माळदेव. नाव दुष्‍कर्म माळदेव, अदिक नीन प्रति दुष्‍ट व्‍यवहार माळदेव. नीन आग्यागोळ्द अदिक आदेशगोळ्द अवहेलना माळकु नीन से विद्रोह माळदेव.
DAN 9:6 ना नीन सेवक नबीगोळ्द संदेश इन केळीदील. आंदुर नाम्द राजागोळ, शासकगोळ, अदिक नाम्द पूर्वजगोळ इक अदिक द्याश इन पुरा जनता अक नीन हेसुर देल सन्‍देश केळसीदीन.
DAN 9:7 हे स्वामी, केवल नी अच धार्मिक आय, अदिक नाम्द ताल्ला शर्म देल बांगकु आद. ईंद भी नाव, यहूदा प्रदेश इन निवासी, यरूशलेम नगर इन ईरावाळेर, पुरा इस्त्राएली कौम इन लॉकुर जो दूर अदिक हात्ती इन द्याशगोळ दा प्रवास माळेत्यार, अल नी आंदरी तान प्रति विश्वासघाती आचरण इन कारण ईरोर साटी विवश माळ्द, शरम इन कारण हापाळ लज्‍जित आर.
DAN 9:8 नाम्द भाग्‍य दा केवल शरम आद. हे प्रभु! नाव सप्पा नाम्द राजा, नाम्द शासक अदिक नाम आप्प तान पाप इन कारण लज्‍जित आर; यतिकी नाव नीन प्रति पाप माळदेव.
DAN 9:9 हे स्वामी नाम परमेश्वर, केवल नी इच दयालु अदिक क्षमाशील आय. नाव नीन प्रति विद्रोह माळदेव,
DAN 9:10 अदिक नीन धर्म इन व्यवस्था अन अनुसार आचरण माळीदिल, जो नी तान सेवक नबीगोळ माध्‍यम देल नाम्द मुंद ईट्द. प्रभु, ई प्रकार नाव तान स्‍वामी परमेश्वर उन वाणी केळीदील.
DAN 9:11 पुरा इस्त्राएली लॉकुर नीन दण्ण इक केळदुर देल इनकार माळदुर. आंदुर नीन व्यवस्था अन्द उल्लंघन माळदुर अदिक नी दी टु बार फेर्स बुट्टुर. अत: जो श्राप अदिक किर्‍या परमेश्वर उन सेवक मूसा अन्द व्यवस्था दा लिख्‍सकु आव, अव नाम मा बरसुसली कुरतव; यतिकी नाव नीन प्रति पाप माळीदेव.
DAN 9:12 हे परमेश्वर, जो वचन नी नाम्द अदिक नामोर न्यायीगोळ प्रति अंदीद, अवरी नी पुरा माळ्द. नी नाम मा महा विपत्ति तंद. ह्यांग विपत्ति यरूशलेम मा तंद हांग अच पुरा आकाश इन ल्‍यालमा धरती मा अदिक येलु बंदिदील.
DAN 9:13 मूसा अन्द व्यवस्था दा लिख्‍सकु पुरा परेशानीगोळ नाम मा बिद्दव, तरी भी नाव तान प्रभु परमेश्‍वर उन कृपा-दृष्‍टि प्राप्‍त माळोद प्रयत्‍न माळीदिल अदिक नाव तान अधर्ममय आचरण इक बिटकु नीन सत्य वचन केळली तत्‍पर आगीदील.
DAN 9:14 ई कारण यहोवा सोच विचार माळकु नाम मा विपत्ति हाक्द; यतिकी नाम परमेश्वर यहोवा याट क्याल्सा माळतान आ सप्पा दा न्यायी ठहरूस्तान; लेकीन नाव आऊन केळीदील.
DAN 9:15 “हे स्‍वामी नाम परमेश्वर, नी तान भुजबल टु तान निज लॉकुर इक मिस्त्र द्याश इन गुलामी टु मुक्‍त माळीद अदिक ई प्रकार तान हेसुर इक महान माळसुस्द, जसा अव ईंद भी आद. प्रभु, नाव पाप माळदेव. नाव दुष्‍ट आचरण माळदेव
DAN 9:16 स्‍वामी, तान धर्ममय आचरण इन अनुरूप तान गुस्सा अदिक प्रकोप यरूशलेम टु सर्कुस कोम. प्रभु, यरूशलेम नगर नीन अच पवित्र पहाळी नगर हुन. नाम्द पूर्वजगोळ्द पापमय अदिक नाम्द अच अधर्ममय आचरण इन कारण यरूशलेम नगर अदिक नीन निज लॉकुर आसपास इन राष्‍ट्रगोळ दा बदनाम आगेगीदुर.
DAN 9:17 अत: हे नाम परमेश्वर, तान ई सेवक उन प्रार्थना अदिक विनती इन केळ. हे स्वामी, ऊजळुस्कु पवित्र जागा मा तान अच महिमा अन्द साटी तान बाय इन प्रकाश चमकुस्त.
DAN 9:18 हे नान परमेश्वर, नान प्रार्थना अक तान कीव हच अदिक अदरी केळ. तान कण्णगोळ इक तेरू अदिक नाम विनाश मा नजर माळ. जो नगर नीन हेसुर देल कारूकु आगतद, अदरी नोळ. प्रभु, तान धार्मिकता अन्द कारण ईला बल्‍कि नीन महान दया मा भरोसा ईटकु नाम ईद प्रार्थना, ईद विनती नीन मुंद प्रस्‍तुत माळेतेव.
DAN 9:19 हे स्वामी, नाम्द प्रार्थना अक केळ. हे स्‍वामी, नाम्द अपराध इक क्षमा माळ. हे स्वामी, नाम मा ध्‍यान कोळ अदिक नामी मुक्‍त माळ. हे नान परमेश्वर, तान अच महिमा अन्द साठी देरी माळबाळ, यतिकी नीन नगर अदिक नीन खुद इन लॉकुर नीन अच हेसुर देल कारूकु आगतद.”
DAN 9:20 ई प्रकार ना अनीन. ना प्रार्थना माळीन. ना तान अदिक तान इस्त्राएली कौम इन पाप इक स्‍वीकार माळीन. याग ना तान प्रभु परमेश्वर उन मुंद आऊन पवित्र पहाळी नगर इन साटी याचना प्रस्‍तुत माळीन;
DAN 9:21 याग ना प्रार्थना अन्द शब्‍दगोळ इक माताळतेला अच ईरीन, आग आवा जिब्राएल स्‍वर्गदूत तेज गती देल नान हात्ती बंदुन, यारी ना पयला दर्शन दा नोळीदिन. द्यावगा-बलि इन समय ईरोद.
DAN 9:22 आव नान इक समझुसतेला ईद अंदुन, “दानिएल, ना नीन इक बुद्धि अदिक समझ कोळोर साटी बंदीन.
DAN 9:23 नी प्रार्थना माळोद शुरू माळीद कि नान इक आदेश प्राप्‍त आत. ना नीन इक अदा हेळली बंदीन, यतिकी नी परमेश्‍वर उक परमप्रिय आय. ईग नी नान शब्‍दगोळ इक ध्‍यान देल केळ अदिक तान दर्शन इक सम्स.”
DAN 9:24 नीन लॉकुर अदिक नीन पवित्र नगर इन साटी वर्ष इन सत्तर हप्ता निश्‍चित माळकु आदव. ई वर्षगोळ व्‍यतीत आगदुर दा सप्पा प्रकार इन अपराध खतम आगेदव, पाप इन अंत आगेदीत, अधर्म इन प्रायश्‍चित माळकु आदीत, धार्मिकता प्रकट माळकु आदीत, दर्शन अदिक नबूवत सत्‍य प्रमाणित आदीत अदिक परम पवित्र जागा अन्द अभिषेक माळकु आदीत.
DAN 9:25 निएल, इदुरसाटी नी ईद मात इक जान्स अदिक इदरी सम्स कि या पल यरूशलेम नगर इन पुनर्निर्माण अदिक अदरी मात कुर्सोद आग्या प्रसारित माळकु आदीत, आ समय टु हुळकु “अभिषेक माळकु आग्याद” जो “प्रधान भी आन, आगमन इन समय ताका वर्ष इन येळ हप्ता आदाव. आग वर्ष इन बासठ हप्तागोळ ताका संकट काल बंदीत. ई संकट-काल दा नगर मात निर्मित आदीत. अऊर चौक मात बनस्याव अदिक खाई मात अगुळकु आदीत.
DAN 9:26 बासठ हप्तागोळ बाद्दा ऊंद दूसरा ‘अभिषेक माळकु’ आदान. आव कडुकु आदान, अदिक आऊन हात्ती येनु ईरतीदील, ऊंद प्रधान बंदान. आऊन सेना नगर अदिक पवित्र जागा अक खंडर माळ बुट्टीत. अदुर अंत बाढ़ देल आदीत, अदिक आखरी ताका युद्ध आगतेला ईत्तीत. विनाश ठहरूस्कु आगेग्याद.”
DAN 9:27 “प्रधान हापाळ लॉकुर सांगुळ पक्‍का वादा माळ्यान. ई वादा अन अवधि वर्ष इन ऊंद हप्ता अन्द आदीत अदिक ई वर्षगोळ आरधा हप्ता ताका अगुआ पशुबलि अदिक अन्नबलि भेंट येरसोद बंद माळ बुट्टान. आग घृणित मूर्तिपूजा इन छास्कु आगदुर देल आ प्रधान विनाशक सिद्ध आदान. आव आ समय ताका विनाश माळतेला होदान यागासताका आऊन अंत इन निश्‍चित समय बरतीदील.”
DAN 10:1 फारस द्याश इन सम्राट कुस्रू उन राज्‍य-काल इन तिसरा वर्ष दा दानिएल उक जो बेलतशस्‍सर भी अनतार, परमेश्‍वर उन दी टु ऊंद वाक्य केळ्सकु आत, अदिक ईद वाक्य खरा ईरोद, अदिक वाक्य अन्द संबंध ऊंद धोळ युद्ध से ईरोद. दानिएल वाक्य इन मतलब सम्स कोंडुन. आऊन दा दर्शन इक सम्सोद सामर्थ्य ईरोद.
DAN 10:2 आ दिनगोळ दा, ना-दानिएल मुर हप्ता ताका आत्‍म-शुद्धि इन साटी शोक माळतेला ईत्तीन.
DAN 10:3 पुरा मुर हप्ता ताका ना राजसी भोजन माळीदिल. अदिक ना रा मॉदरा भी तिंदीदील अदिक दाखमधु भी बाय दा हाक्कीदील. ना मुर हप्ता ताका मय मा याण्णा अन्द मालिश भी माळीदील.
DAN 10:4 पयला तिंगुळ इन चौबीसवा दिन ना हिद्देकेल हेसुर इन किनारा मा नीदुरकु ईरीन.
DAN 10:5 अचानक ना तान कण्ण म्याकुच नेगदीन रा ना नोळदीन कि ऊंद गंळ्स नीदुरकु आन. आव सन इन कपळा हाक्कु आन. आऊन नेळु दा ऊफाज द्याश इन व्हान्ना अन्द पट्टा कटकु आद.
DAN 10:6 आऊन मय फिरोजा कल्ल इन घाई चमकुसोद. आऊन रूप विद्युत उन चमक इन घाई आद. आऊन कण्णगोळ ज्‍वाला होततद आ मशालगोळ घाई आद. आऊन भुजागोळ अदिक काल चमकुस्तेला पीतल इन घाई आव. आऊन शब्‍दगोळ्द आवाज भीड़ इन आवाज इन घाई भारी आद.
DAN 10:7 नान सांगुळ थ्वाळासा मंळसा ईरोर. आंदरी ईद दर्शन कांळ्सकु बिदिदील. ईद दर्शन केवल ना-दानिएल नोळदीन. लेकीन आंदुर नळ्गली कुरतुर, अदिक होचकोमोर साटी ओळदुर.
DAN 10:8 ना आबना ईतोदुन, अदिक ना ईद महादर्शन नोळदीन. लेकीन दर्शन नोळदुर बाद्दा नान दा शक्ति ऊळदीदील. नान दनकुस्तेला मार्र अंज्क देल वंळ्गेत, अदिक ना निर्बल आगेदीन.
DAN 10:9 आग ना आऊन शब्‍दगोळ्द आवाज केळदीन. ना आवाज केळतेला अच अचेतन आगेदीन, अदिक भूमी मा बाय इन भार देल बिदोदिन.
DAN 10:10 लेकीन यावारा कय नान मा स्‍पर्श माळदुन, अदिक नान इक कयगोळ अदिक ट्वांगरा अन्द बल मा कुर्सदुन. नान कय अदिक ट्वांगरा नळगव.
DAN 10:11 आव नान से अंदुन, “हे दानिएल, परमेश्‍वर उन परमप्रिय गंळ्स! जो शब्‍द ना नीन से अनली होगेतीन, अवरी ध्‍यान देल केळ, अदिक सीधा नीदुर; यतिकी ना नीन इक सन्‍देश केळसोर साटी नीन हात्ती कळुकु आगीन.” आव नान से ईद शब्‍द अनतेला अच ईरोन कि ना नळ्गतेला निदुरदीन.
DAN 10:12 आव नान से अंदुन, “दानिएल, अंजबाळ, यतिकी नी दर्शन इन मतलब सम्सोद मजबूत निश्‍चय माळ्द, अदिक खुद इक परमेश्वर उन मुंद विनम्र माळ्द. आ दिन अच नीन प्रार्थना अन्द शब्‍द परमेश्वर केळदुन. ना नीन प्रार्थना अन्द कारण अच ईल बंदीन.
DAN 10:13 “फारस द्याश उन स्‍वर्गदूत नान इक इक्कीस दिन ताका संघर्ष दा उलझुस्कु ईत्तीन, अदिक ना बर सकीदील. आग मीखाएल, जो ऊंद मुख्‍य स्‍वर्गदूत आन, नान मदत इन साटी बंदुन. इदुरसाटी ना फारस इन राजागोळ हात्ती ईत्तीन,
DAN 10:14 ताकी नीन इक अव मातगोळ समझुसाईन जो आखरी इन दिनगोळ दा नीन लॉकुर सांगुळ येन दशा घटुसीत. जो दर्शन नी नोळ्द अद आगामी येनारा दिनगोळ बाद्दा पुरा आदव.”
DAN 10:15 याग आव नान से ईव मातगोळ अंद बुटीदुन, आग ना भूमी इन दी ताल्ला बांग्स कोंडीदीन अदिक सुंगा ईतोदीन.
DAN 10:16 आग आव, जो मंळसा अन्द पार उन घाई कांळसोन, नान टुट्टीगोळ इक मुटदुन. आग ना तान बाय खोल्सदीन अदिक ईद अंदीन, “हे नान स्वामी, ई दर्शन इन कारण ना दुख नेगदीन. नान दा ताकत मिक्कु ईतीदील.
DAN 10:17 नान स्‍वामी इन ईव सेवक तान स्वामी से मातगोळ माळोद साहस ह्यांग जुटुस सकतान? स्‍वामी, नान मय दा ताकत अदिक जीव हैलेच.”
DAN 10:18 आग आव, जो मंळसा अन्द पार उन घाई कांळ्सतोगोन, मात नान इक मुटदुन, अदिक नान इक ताकत कोट्टुन.
DAN 10:19 आव नान से अंदुन, “हे परमेश्‍वर उन परमप्रिय गंळ्स! अंजबाळ, नीन इक ताकत सिकुल, नी शक्‍तिशाली अदिक साहसी बन्स.” याग आव नान से ईव मातगोळ अंदुन आग नान इक ताकत प्राप्‍त आत. ना अंदीन, “स्वामी, ईग नी माताळ, यतिकी नी नान इक ताकत कोट्ट.”
DAN 10:20 आव अंदुन, “नी रा जान्सत्या कि ना नीन हात्ती येती बंदीन. लेकीन ईग नान इक फारस उन प्रधान से लळुसोर साटी वापस होगोद बिद्दीत. अदिक याग ना होळाईन, आग यूनान इन प्रधान बंदान.
DAN 10:21 फिर भी जो मातगोळ सत्य ग्रंथ दा लिख्‍सकु आद अव ना नीन इक हेळतीन. नीन कौम इन स्‍वर्गदूत मीखाएल उन अलावा अदिक यातोदु स्‍वर्गदूत हैलेच, जो आंदुर विरूद्ध नान सहायता माळुल.”
DAN 11:1 “ना मादी लॉकुर्द इन सम्राट दारा अन्द राज्‍यकाल इन पयला वर्ष टु आऊन मदत माळतेला बरेतीन, अदिक ना आऊक शक्‍ति भी प्रदान माळदीन.”
DAN 11:2 “ईग ना नीन इक सत्य इन दर्शन माळसुसाईन. नोळ, फारस साम्राज्‍य इन मुर व्हाशोर सम्राट पैदा आदार, लेकीन ऊंद मात सम्राट पैदा आदान. ईव चौथा सम्राट अन्य मुरू सम्राटगोळ से येक्कुल धनवान आदान. याग आव तान धन इन ताकद मा शक्‍तिशाली आगेदान, आग आव यूनान राज्‍य इन विरोध दा अन्य राज्‍यगोळ इक भळकुस्यान.
DAN 11:3 आग ऊंद व्हाशोद राजा पैदा आदान जो महायोद्धा आदान. आव ऊंद धोळ्द साम्राज्‍य इन स्‍थापना माळ्यान अदिक तान इच्‍छा अनुसार आंदुर मा शासन माळ्यान.
DAN 11:4 याग आव धोड्डेव आदान, आऊन राज्य मुरूकु नाकु दिशागोळ दा वाटसेदीत. अदिक आऊन शक्ती इन प्रभाव आ राज्य मा बिळतीदील, यतिकी आऊन राज्य कसुकु यावारा दुसरा अक कोटकु आदीत.”
DAN 11:5 “आग दक्षिण द्याश इन राजा शक्‍तिशाली आदान. लेकीन आऊन ऊंद हाकिम आऊन से भी येक्कुल शक्‍तिशाली आगेदान, अदिक आव ऊंद व्हाशोद राज्‍य स्‍थापित माळ्यान, अदिक आऊन राज्‍य धोळ्द साम्राज्‍य बनसेदित.
DAN 11:6 हापाळ वर्ष इन बाद्दा आंदुर आपस दा समझोता माळ्यार. आंदुर दा रोटी-बेटी इन संबंध स्‍थापित आदीत. संबंध स्‍थापित माळोर साटी मिस्र द्याश इन राजा तान पोर इन मदा सीरिया द्याश इन राजा से माळ्यान. लेकीन अल आऊन पोर इन ताकत हमेशा बनस्कु ईरतीदील अदिक आकिन वंशज टिक्सकु ईरतीदील. आकिन पोर, पोर इन सेविकागोळ, आकिन नातु अदिक आकिन पोर इन संकट-काल दा ताकत कोळावाळा, इंदुर सप्पा मुंदुर मौत इन घाट ईळ्सकु आदार.”
DAN 11:7 आग आ पोर इन वंश इन ऊंद जन आऊन जागा दा येद्दान. आव सीरिया द्याश इन राजा अन्द सेना मा आक्रमण माळ्यान, अदिक राजा अन्द गढ़ मा प्रवेश माळ्यान अदिक लळाई माळ्यान अदिक जिकस्यान.
DAN 11:8 आव हापाळ द्यावगोळ्द मूर्तिगोळ, ढलुस्कु आग्याव प्रतिमागोळ, मंदिर इन व्हान्ना-बेळ्ली इन किमती बरतन मिस्त्र द्याश इक ओतान. आग आव येनारा वर्ष ताका सीरिया द्याश इन राजा मा आक्रमण माळालुन.
DAN 11:9 लेकीन सीरिया द्याश इन राजा आऊन मा आक्रमण माळली बंदान, लेकीन आऊक पराजय इन बाय नोळोद बिळबाळुल इदुरसाटी आव तान द्याश इक वापस होटोदान.
DAN 11:10 “बाक सीरिया द्याश इन राजा अन्द पार युद्ध छेळ्स बुट्टान. आंदुर धोळ्द सेनागोळ्द गुठ जमा माळ्यार, जो बाढ़ इन घाई मिस्र द्याश उक ढाक्स कोंडार. अव अदुर दा टु गुजरूस्तेला लळाई इक आऊन गढ़ ताका वोताव.
DAN 11:11 आग मिस्र द्याश इन राजा गुस्सा दा तुमकु येद्दान. आव गढ़ इन व्हार्या होट्टान, अदिक सीरिया द्याश इन राजा से युद्ध माळ्यान. आ राजा धोळ्द सेना नीदरूस्यान. लेकीन आऊन सेना मिस्र द्याश इन राजा अन्द कय दा सौप्सकु आदीत.”
DAN 11:12 “याग मिस्र द्याश इन राजा आऊन सेना अक पराजित माळ बुट्टीत, आग आऊन दिल घमण्‍ड देल फूलुसीत. आव लाखों सैनिकगोळ्द वध माळ्यान, लेकीन आव अदुर मा प्रबल आगतीदील;
DAN 11:13 यतिकी सीरिया द्याश इन राजा ऊंद दुसरा सेना नीदरूस्यान, अदिक अद सेना पयला धोळ्द सेना से येक्कुल धोळ्द ईत्तीत. आ द्याश इन राजा हापाळ वर्ष इन बाद्दा आव पुरा तयारी इन सांगुळ ऊंद सेना हुळकु मुंद वाळुस्यान.”
DAN 11:14 “आ दिनगोळ दा मिस्र द्याश इन राजा अन्द विरूद्ध हापाळ सामन्‍त विद्रोह माळ्यार. खुद नीन थ्वाळासा लॉकुर जो हिंसक ईत्तार, यातारा दिव्‍य दर्शन इक पुरा माळोद आशा देल, विद्रोह माळ्यार. लेकीन नीन ई हिंसक मंळसा तान लक्ष्य दा सफल आगतीदील.”
DAN 11:15 “आग सीरिया द्याश इन राजा चढ़ाई माळ्यान, अदिक मोर्चाबन्‍दी माळकु ऊंद सुदृढ़ नगर मा कब्जा माळ कोंडान. मिस्र द्याश इन सेनागोळ आऊन मुंद टिक्सतीदील, अदिक आऊन नीवळुस्द योद्धागोळ्द दलगोळ दा ईट ताकत ईरतीदील कि आंदुर आऊन सामना माळ सकुल.
DAN 11:16 आग आव जो आऊन विरूद्ध बंदान, आव ह्यांग चाहस्यान हांग माळ्यान, अदिक याऊ भी आऊन मुंद ठहरूस सकालुन. आव तान तान इक आ सुंदर द्याश दा नीदरूस्यान, अदिक आऊन हात्ती अदरी नाश माळोद शक्ती ईत्तीत.
DAN 11:17 इदुर बाद्दा आव तान राज्‍य इन पुरा शक्‍ति इक संचित माळ्यान अदिक मिस्र द्याश इन साम्राज्‍य अक तान अधिकार दा माळोर साटी इच्छुक आदान. पयले आव राजा अन्द सांगुळ समझौता माळ्यान अदिक बाक आऊक नष्‍ट माळोद उद्देश्‍य देल आऊन सांगुळ तान पोर इन मदा भी माळकु कोट्टान. फिर भी आऊन ईद कूटनीति सफल आगतीदील अदिक आऊक येनु लाभ आगतीदील.
DAN 11:18 आग आव तान ध्यान समुद्र अन्द किनारा मा हच्यान अदिक अऊर दा टु हापाळ राज्यगोळ इक तान अधिकार दा माळ कोंडान; लेकीन ऊंद सेनापती आऊन अहंकार इक खतम माळ बुट्टान. अदिक आऊन अहंकार इन अनुसार आऊन से बदला ताकोंडान.
DAN 11:19 सीरिया द्याश इन राजा तान द्याश इन गढ़गोळ दी लौटुसोर साटी वापस आदान. लेकीन आव हादी दा ठोकर तिंदकु बिद्दान अदिक आऊन येलु पता नळुतीदील.
DAN 11:20 आग आऊन जागा मा ऊंद हिंग राजा बंदान, जो राजकीय वेभव उक माळकु ईटोर साटी कर जमा माळावाळा अक कळ्यान. फिर भी थ्वाळासा वर्षगोळ दा नाश आगेदान, लेकीन आव गुस्सा अदिक युद्ध माळदुर बिना सोतोदान.”
DAN 11:21 “आऊन जागा मा ऊंद तुच्‍छ मंळसा गद्दी मा कुरतान जो राज्‍य-प्रतिष्‍ठा अन्द योग्य हैलेच. आव चापलूसी इन माध्‍यम देल राज्‍य प्राप्‍त माळ्यान. याग जनता असावधान आदीत आग आव बिना चेतावनी कोटकु गद्दी मा कुर्तोदान.
DAN 11:22 अदिक सेनागोळ आऊन मुंद पुरा तरीका देल नष्‍ट आगेदव उल्टा नाम्द वादा अन्द प्रमुख मंळसा भी नाश आगेदान.
DAN 11:23 जो राज्‍य आऊन सांगुळ वादा माळीत फिर भी आव आंदुर सांगुळ छल माळकु आव थ्वाळासा लॉकुर इक सांगुळ हुळकु ताकत इन सांगुळ राज्य मा शासन माळ्यान.
DAN 11:24 याग धनी राज्य सुरक्षित महसुस माळ्यार अदा समय आव आंदुर मा आक्रमण माळ्यान अदिक हिंग सफलता प्राप्त माळ्यान अदिक जो आऊन पुर्वजगोळ पुर्वज भी यागलु माळीदिल. आव लूट इन माल अदिक धन-सम्पत्ति तान लॉकुर दा वाट्स कोंडान. आव थ्वाळासा समय ताका सुदृढ़ गढ़गोळ विरूद्ध षड्‍यन्त्र माळ्यान. लेकीन थ्वाळासा अच समय इन साटी.
DAN 11:25 अदुर बाद्दा आव तान ताकत अदिक तान साहस इन कारण ईट उत्तेजित आदान कि आव ऊंद धोळ्द सेना अक हुळकु मिस्र द्याश मा हमला माळ बुट्टान. आ द्याश इन राजा भी महाविशाल सेना अन्द सांगुळ युद्ध दा आऊन सामना माळ्यान, लेकीन आव आऊन मुंद टिक्सतीदील; यतिकी खुद आऊन द्याश दा आऊन विरूद्ध षड्‍यन्त्र माळकु आदीत.
DAN 11:26 ईल ताका कि राजा अन्द द्वारा कोळ्द भोजन इक तिनतोगोर आंदुर अच आऊक नाश माळोद कोशिश माळ्यार, आऊन सेना तुळकाळस्यार अदिक आ सप्पा लॉकुर मौत इन घाट ईळ्सकु आदार.
DAN 11:27 आग येढ्ढु राजागोळ्द मन कुकर्म माळोर मा उतारू आगेदव. आंदुर ऊंद अच मेज मा कुर्तकु भी आबुर-दाबुर से ख्वाटा माताळ्यार. लेकीन अदुर देल येनु लाभ आगतीदील; यतिकी ठहरूस्कु समय दा ईद सप्पा आगावाळा आद.”
DAN 11:28 “आग सीरिया द्याश इन राजा दक्षिण द्याश इन धोळ्द लुट्सकु तान द्याश इक वापस होदान. लेकीन आऊन दिल पवित्र वादा अन विरूद्ध आदीत. आव तान इच्‍छा अन्द अनुसार महिमा-मंडित पवित्र नगर दा क्याल्सा माळ्यान अदिक मात तान द्याश इक वापस होदान.”
DAN 11:29 “ठहरूस्कु समय मा आव मात मिस्र द्याश मा आक्रमण माळ्यान, लेकीन ई घन इन स्‍थिति पयले अन्द स्‍थिति टु अलग ईत्तीत.
DAN 11:30 समुद्र तट इन निवासी कित्तिगोळ्द जहाजी बेळा आऊन विरूद्ध मिस्र द्याश दा बंदाव अदिक सीरिया अंज्कु वापस होदान. आव वापस होगा समय तान गुस्सा पवित्र नगर मा ईळस्यान अदिक पवित्र वादा अन विरूद्ध तान इच्‍छा पुरा माळ्यान. वापस होदुर बाद्दा आव आ लॉकुर इक ढुंढस्यान जो पवित्र वादा अक मुर्द बुट्टुर.
DAN 11:31 आऊन द्वारा कळुद सैन्‍यदल पवित्र-जागा अदिक गढ़ इक अशुद्ध माळ बुट्टव. आंदुर हमेशा अग्‍नि-बलि इक बंद माळ बुट्टार. आंदुर आ घृणित वस्‍तु उक चालु माळ्यार जो विध्‍वंस इन कारण आदीत.
DAN 11:32 जो मंळसा वादा अक मुरदान, आऊक आव सय-सय मातगोळ देल बयकुस बुट्टान. लेकीन या लॉकुर इक परमेश्वर उन ग्यान ईत्तीत आंदुर तान विश्‍वास दा अटल ईत्तार अदिक उचित क्याल्सा माळ्यार.
DAN 11:33 जो लॉकुर समझदार आर, आंदुर जनता अन्द हापाळ लॉकुर इक समझुस्यार. लेकीन तान ई क्याल्सा अन्द साटी आंदरी शहीद आगोद बिद्दीत: आंदुर तलवार देल मौत इन घाट ईळ्सकु आदार; आंदुर होततेला बेक्की दा भिटकु आदार; आंदुर बंदीगृह दा हाक्कु आदार अदिक आंदुर्द धन-सम्पत्ति लुट्सकु आदीत. ईद दुख केवल थ्वाळासा दिनगोळ साटी ईत्तीत.
DAN 11:34 याग आंदुर मा दुखगोळ बंदाव, आग आंदरी येनारा सहायता प्राप्‍त आदीत; लेकीन हापाळ लॉकुर आंदुर्द चापलूसी माळकु आंदुर से सिक्केदार.
DAN 11:35 थ्वाळासा समझदार लॉकुर भी वादा टु बिदोदार. आंदुर इदुरसाटी बिद्दार कि आंदुर तान विश्वास इन साटी जांचस्कु अदिक परखुस्कु आगुल, आंदुर तान विश्‍वास दा शुद्ध अदिक उज्वल माळकु आदार. ईद स्‍थिति हमेशा बनस्कु ईत्तीत; यतिकी ई सप्पा मातगोळ्द अंत ठहरूस्कु समय मा आदीत.
DAN 11:36 “अदिक सिरीया अन्द राजा तान इच्‍छा अन्द अनुसार क्याल्सा माळ्यान. आव खुद इक सप्पा द्यावगोळ्द म्याकुच प्रतिष्‍ठित माळ्यान अदिक तान तान इक आंदुर से धोळ हेळ्यान. आव ईश्वरगोळ्द ईश्‍वर, परमेश्‍वर उन विरूद्ध भी अनोखा मातगोळ माताळ्यान. आव आगासताका सफल आगतेला ईत्तान यागासताका कि आऊन पाप इन घड़ा तुमालव; यतिकी जो निश्‍चित आद, अद रा आदीत अच.
DAN 11:37 आव तान पूर्वजगोळ्द द्यावगोळ्द परवाह भी ईला माळ्यान अदिक आर्तेर्द प्रिय इष्‍ट द्याव उन भी परवाह माळालुन. आव यातोदु द्याव उन परवाह माळालुन, यतिकी आव सप्पा द्यावगोळ्द म्याकुच खुद इक धोड्डेव समस्यान.
DAN 11:38 आव ई द्यावगोळ जागा मा ‘गढ़ इन द्याव’ उन पुजा माळ्यान. ई द्याव उक आऊन पुर्वज भी ईला जानसोर. आव व्हान्ना, बेळ्ली किमती मणि अदिक किमती भेंट तान ई गढ़ इन द्याव उक येरस्यान.
DAN 11:39 आव ऊंद पराया द्याव उन मदत देल सप्पा सुदृढ़ गढ़गोळ मा आक्रमण माळ्यान. जो लॉकुर आऊक तान शासक स्‍वीकार माळ कोंडार, आंदरी आव हापाळ सम्‍मान कोट्टान. आव आंदरी हापाळ लॉकुर मा शासक नियुक्‍त माळ्यान अदिक आंदरी पुरस्‍कार दा भूमी प्रदान माळ्यान.
DAN 11:40 “आखरी समय दा मिस्र द्याश इन राजा आऊन मा आक्रमण माळ्यान. लेकीन सीरिया द्याश इन राजा रथगोळ, घुड़सवारगोळ अदिक जहाजी बेड़गोळ सांगुळ बवंडर इन घाई आऊन मा झपटुस्कु बिद्दान. आव हापाळ द्याशगोळ दा होक्यान. आव आंदरी उलट-पुलट माळ बुट्टान अदिक अऊर दा टु गुजरूस्तेला मुंद वाळुसेदान.
DAN 11:41 आव नाम्द ‘वैभव-सम्‍पन्न द्याश’ दा भी बंदान. नाम द्याश इन लाखों निवासी मौत इन घाट ईळुकु आदार. लेकीन एदोम अदिक मोआब अदिक अम्मोन द्याश इन लॉकुर्द मुख्‍य भाग आऊन विनाशकारी कय देल ऊळदेव.
DAN 11:42 आव दुसरा द्याशगोळ इक कबजा माळोर साटी तान कय वाळुस्यान अदिक मिस्त्र द्याश उक भी बिळतीदील.
DAN 11:43 आव मिस्त्र द्याश इन व्हान्ना-बेळ्ली अदिक दुसरा किमती वस्‍तुगोळ्‍द मालिक बनसेदान. लीबिया अदिक इथियोपिया द्याश इन ईरावाळेर भी आऊन अधीन आगेदार.
DAN 11:44 लेकीन पूर्व अदिक उत्तर टु समाचार बंदीत, अदरी केळकु आव व्‍याकुल आगेदान अदिक गुस्सा दा तुमतेला हापाळ लॉकुर्द नाश माळली अदिक आंदरी निराश माळोर साटी अल टु होट्टान.
DAN 11:45 आव समुद्र अदिक तेजोमय पवित्र पर्वत इन न्याड्या तान राजसी तम्बू नळस्यान. तरी भी आऊन अन्‍त आदीत अच. आऊक ऊळसावाळा याऊ ईरतीदील.
DAN 12:1 “आ समय महा स्‍वर्गदूत मीखाएल, जो नीन लॉकुर्द रक्षक-दूत आन, रक्षा अन्द साटी बंदान. अद संकट इन समय ईत्तीत. राष्ट्र इन उत्‍पत्ति टु हुळकु ईग ताका हिंग संकट यागलु आगीदील. लेकीन ईदा संकट-काल दा नीन लॉकुर्द उद्धार भी माळकु आदीत. या लॉकुर्द हेसुर परमेश्वर उन किताब दा लिख्‍सकु आव, आंदुर मुक्‍त माळकु आदार.
DAN 12:2 भूमी इन ल्‍यालमा कबर दा मिंगकु आर, आंदुर दा टु हापाळ येद्दार: थ्वाळासा मुंदुर इक शाश्‍वत जीवन प्राप्‍त आदीत, थ्वाळासा अक अपमान अदिक स्‍थायी घृणा अन्द पात्र बनसोद बिद्दीत.
DAN 12:3 जो ग्यानी लॉकुर आर, आंदुर आकाश इन ज्योति इन घाई चमकुस्यार, अदिक जो हापाळ मुंदरी धर्म इन हादी दी ओयतार आंदुर तारा अन घाई हमेशा चमकुस्तेला ईत्तार.
DAN 12:4 दानिएल, नी ई ग्रंथ मा मुहर हच, अदिक युगांत ताका अन्द साटी ई मातगोळ इक सुरक्षित ईट. हापाळ लॉकुर केळोर साटी ईल-अल भाग-दौड़ माळ्यार, अदिक तान ग्यान इन वृद्धि माळ्यार.”
DAN 12:5 याग ना दानिएल म्याकुच नोळदीन, रा नान इक येढ्ढ मंळसा कांळ्सदुर. ऊंद मंळसा गांगा अन ईप्पाटी नीदुरकु ईरोन अदिक दूसरा मंळसा गांगा अन आप्पाटी.
DAN 12:6 ना गांगा अन नीर इन म्याकुच नीदुरकु अदिक सन इन कपळा हाक्कु मंळसा से केळदीन, “ई आश्चर्यपुर्ण क्याल्सागोळ्द घटित आगदुर दा याट समय मिक्कु आद?”
DAN 12:7 आव तान ऊम्मा अदिक डाक्या कय स्वर्ग दी नेगदुन, अदिक ना आऊक शाश्‍वत अदिक जीत्ता परमेश्‍वर उन किर्‍या ताकोमतेला केळदीन: “साढ़े मुर वर्ष ताका ईद दशा ईत्तीत. याग पवित्र लॉकुर्द ताकत मुरूत-मूरूत खतम आगेदीत, आग ईव मातगोळ पुरा आदव.”
DAN 12:8 ना आऊन ई मात केळदीन लेकीन ना सम्स सकीदील. अत: ना आऊन से मात केळदीन, “नान स्वामी, ई मातगोळ्द आखरी परिणाम येन आदीत?”
DAN 12:9 लेकीन आव उत्तर कोट्टुन, “दानिएल, ईग होग! ई मातगोळ आखरी समय इन साटी मुहर-हचकु आगेत.
DAN 12:10 ई अवधि दा हापाळ विश्‍वासी जन खुद इक निर्मल अदिक शुद्ध माळ कोंडेव, लेकीन दुर्जन दुष्‍कर्म अच माळतेला ईत्तार, अदिक याऊ भी दुष्‍कर्मी ई मातगोळ इक सम्स सकालुन. पर जो समझदार आन, आंदुर अच इदरी समस्यार.
DAN 12:11 या दिशी पवित्र मंदिर दा रोज इन अग्‍नि-बलि येरसोद बंद माळकु आदीत अदिक घृणित वस्‍तु आ जागा मा स्थापित माळकु आदीत, जो विनाश इन कारण ईत्तीत, आ दिन टु हन्नेळ सौ नब्‍बे दिन बितुस्याव.
DAN 12:12 धन्‍य आन आव मंळसा जो धीरज इन सांगुळ ऊंद हजार मुर सौ पैतीस दिन पुरा माळ्यान.
DAN 12:13 दानिएल ईग नी होगकु तान जीवन इन आखरी-समय ताका तान हादी मा नळुतेला ईत्तान अदिक नीन इक आराम प्राप्‍त आदीत. आखरी दा नीन इक नीन ठहरूस्कु हिस्सा सिक्कीत.”
AMO 1:1 तकोआवासी आमोस जो म्यांडा-मर्रीगोळ्द आळसावाळेर दा टु ईरोन, आऊन ई वचन हुव जो आव यहूदा अन राजा उजिय्याह अन, अदिक योआश उन पार इस्त्राएल इन राजा यारोबाम उन दिनगोळ दा, भूकम्प से येढ्‌ढ साल पयले, इस्त्राएल इन बारा दा दर्शन नोळकु अंदुन:
AMO 1:2 “यहोवा सिय्योन टु गरजुस्यान, अदिक यरूशलेम टु तान शब्द केळस्यान; आग चरवाहगोळ्द चराईगोळ विलाप माळ्याव, अदिक कर्मेल पहाळी इन चोटीगोळ झुलसुसेदाव.”
AMO 1:3 यहोवा ईद अनतान: “दमिश्क इन मुर येन, उलटा नाक अपराधगोळ कारण ना आऊन दण्ड बिळतीदील; यतिकी आंदुर गिलाद इक लोहा अन हल्लगोळ देल मेट बुटार.
AMO 1:4 इदुरसाटी ना हजाएल इन गढ़ दा बेक्की हचाईन, अदिक अदुर देल बेन्हदद इन गढ़ भी भस्म आगेदव.
AMO 1:5 ना दमिश्क इन प्रवेश द्वारगोळी मुर्द बुळाईन, अदिक आवेन हेसुर इन तराई इन ईरावाळेरी अदिक बेतएदेन इन मान्या ईरावाळेर राजदण्डधारी इक नष्ट माळाईन; अदिक अराम इन लॉकुर बन्दी आगकु कीर नगर इक होदार, यहोवा अन ईदा वचन आद.”
AMO 1:6 यहोवा ईद अनतान: गाजा अन घळी घळी अपराध माळोद कारण ना आऊन दण्ड बिळतीदील; यतिकी आंदुर सप्पा लॉकुरी बन्दी माळकु ओतुर कि आंदरी एदोम उन वश दा माळ बुळुल.
AMO 1:7 इदुरसाटी ना गाजा अन दिवाल दा बेक्की हचाईन अदिक अदुर देल आऊन भवन भस्म आगेदव.
AMO 1:8 ना अश्दोद इन ईरावाळेरी अदिक अश्कलोन इन राजदण्डधारी इक नष्ट माळाईन; ना तान कय एक्रोन उन खिलाप नळसाईन, अदिक मिग्द पलिश्ती लॉकुर नष्ट आदार, परमेश्वर यहोवा अन ईदा वचन आद.
AMO 1:9 यहोवा ईद अनतान: “सोर इन घळी घळी अपराध माळोद कारण ना आऊन दण्ड बिळतीदील; यतिकी आंदुर सप्पा लॉकुरी बन्दी माळकु एदोम उन वश दा माळ बुट्टुर अदिक वार्ट उन सांगुळ माळ्द वाचा अक याद माळीदील.
AMO 1:10 इदुरसाटी ना सोर इन दिवाल मा बेक्की हचाईन, अदिक अदुर देल आऊन भवन भी भस्म आगेदव.”
AMO 1:11 यहोवा ईद अनतान: “एदोम इन घळी घळी अपराध माळोद कारण ना आऊन दण्ड बिळतीदील; यतिकी आव तान वार्ट उक तलवार हुडुकु तुकाळ्सदुन अदिक येनु उच दया माळीदील, लेकीन सिट्ट देल आंदरी हमेशा हरूतेला अच ईत्तुन, अदिक तान रोष इक अनन्त काल ताका बनुस्कु ईत्तुन.
AMO 1:12 इदुरसाटी ना तेमान शहर दा बेक्की हचाईन, अदिक अदुर देल बोस्रा अन गढ़ भस्म आगेदव.”
AMO 1:13 यहोवा ईद अनतान: “अम्मोन उन घळी घळी अपराध माळोद कारण ना आऊन दण्ड बिळतीदील यतिकी आंदुर तान सीमा अक वाळुसोर साटी गिलाद क्षेत्र अन आर्तेर जो व्हाट्टा दी ईरोर आंदुर व्हाट्टा सिळ बुट्टर.
AMO 1:14 इदुरसाटी ना रब्बा अन शहर इन दिवार दा बेक्की हचाईन, अदिक अदुर देल आऊन गढ़ भी भस्म आगेदव. आ लळाई इन दिशी ललकार आदीत, अद आंधी उलटा माट्या अन दिन ईत्तीत;
AMO 1:15 अदिक आंदुर राजा तान अधिकारीगोळ समेत गुलामी दा होदान,” यहोवा अन ईदा वचन आद.
AMO 2:1 यहोवा ईद अनतान: “मोआब इन घळी घळी अपराध माळोद कारण, ना आऊन दण्ड बिळतीदील; यतिकी आव एदोम उन राजा अन येलुगोळी होताक्कु चुना माळ बुट्टुन.
AMO 2:2 इदुरसाटी ना मोआब प्रदेश दा बेक्की हचाईन, अदिक अदुर देल करिय्योत नगर इन गढ़ भस्म आगेदव; अदिक मोआब हल्ला अदिक ललकार अदिक नरसिंगा अन शब्द केळ्त केळ्त सोतोदीत.
AMO 2:3 ना अदुर न्याड्या दा टु शासक उन नाश माळाईन अदिक सांगुळ सांगुळ अच आऊन सप्पा अधिकारीगोळी भी कोंद बुळाईन,” यहोवा अन ईदा वचन आद.
AMO 2:4 यहोवा ईद अनतान: “यहूदा प्रदेश इन घळी घळी अपराध माळोद कारण, ना आऊन दण्ड बिळतीदील; यतिकी आंदुर यहोवा अन व्यवस्था अक बेकार जान्सदुर, अदिक नान विधीगोळी मान्सीदील; अदिक तान ख्वाटा द्यावगोळ कारण यार हींद आंदुर पुर्वजगोळ नळुतोगोर, आंदुर भी भटकुसेग्यार.
AMO 2:5 इदुरसाटी ना यहूदा दा बेक्की हचाईन, अदिक अदुर देल यरूशलेम इन भवन भस्म आगेदव.”
AMO 2:6 यहोवा ईद अनतान: “इस्त्राएल इन घळी घळी अपराध माळोद कारण, ना आऊन दण्ड बिळतीदील; यतिकी आंदुर निर्दोष उक पैस्या साटी अदिक गरीब उक ऊंद जोळी जुतागोळ साटी मार बुटार.
AMO 2:7 आंदुर कंगालगोळी अदिक कमजोरगोळी जमीन इन धुळा घाई मेट्ट बुळतार अदिक नम्र लॉकुरी हादी देल बयकुस बुळतार; अदिक आप्प-पार येढ्ढु मुंदुर ऊंदा कुवारा पोर इन हात्ती होगतार, यदुर देल नान पवित्र हेसुर इक अपवित्र ठहरूसुल.
AMO 2:8 आंदुर हर ऊंद वेदी इन हात्ती बन्धक इन कपळागोळ मा मिंगतार, अदिक दण्ड इन पैस्यागोळ देल कोम्द अंगुर इन रास्सा तान द्याव इन मंदिर दा कुडु कोमतार.”
AMO 2:9 “ना आंदुर मुंदु टु एमोरिगोळी नष्ट माळीदीन, यार्द लम्बाई देवदारगोळ घाई, अदिक यार ताकत बांज मार्र घाई ईरोद; तरी भी ना म्याकुच टु आंदुर काय, अदिक ल्यालमा टु आंदुर जळी नष्ट माळदीन.
AMO 2:10 ना नीमी मिस्त्र द्याश दा टु तेगुकु तंदीन, अदिक सुनसान प्रदेश दा च्यालीस वर्ष ताका हुडुकु वयाळतेला ईत्तीन, कि नीव एमोरिगोळ्द द्याश इन अधिकारी आगेगी.
AMO 2:11 ना नीम पारगोळ दा टु नबी आगोर साटी अदिक नीम थ्वाळासा हारोदोर मंळसागोळ दा टु नाजीर आगोर साटी ठहरूसदीन. हे इस्त्राएलीगोळा, येन ईद सप्पा खरा हैलेच? यहोवा अन ईद वाणी आद.”
AMO 2:12 लेकीन नीव नाजीरगोळी सारा कुळ्सदीर, अदिक नबीगोळी आग्या कोट्टीर कि भविष्यवाणी माळबाळुल.
AMO 2:13 “नोळी, ना नीमी हींग वत्ताईन, ह्यांग कि पेंडीगोळ देल तुम्द गाळा ल्यालमा वतकु आगतद.
AMO 2:14 इदुरसाटी घाई देल ओळावाळेरी ओळोद जागा सिकतीदील, अदिक सामर्थी इन सामर्थ्य येनु क्याल्सा कोळतीदील; अदिक ना पराक्रमी तान जीव ऊळ्स सक्यान;
AMO 2:15 धनुर्धारी निदुरकु ईर सकतीदील, अदिक फुर्ताई देल ओळावाळा ऊळुतीदील; सवार भी तान जीव ऊळ्स सकतीदील;
AMO 2:16 अदिक शुरवीरगोळ दा जो यक्कुल धीर ईत्तान, आव भी आ दिशी ऊगळा ओळेदान. यहोवा अन ईदा वाणी आद.”
AMO 3:1 हे इस्त्राएलीगोळा, ईद वचन केळी जो यहोवा नीम बारा दा मतलब आ सप्पा कुल इन बारा दा अंदान यदरी ना मिस्त्र द्याश टु तंदीन.
AMO 3:2 “धरती इन सप्पा कुलगोळ दा टु ना सिर्फ नीम मा का मन हचीन. ई कारण ना नीम सप्पा अपराधगोळ्द दण्ड कोळाईन.”
AMO 3:3 “अगर येढ्ढ मंळसा आबुर दाबुर सांगुळ सहमत हैलेच; रा येन आंदुर ऊंद सांगुळ नळु सक्यार?
AMO 3:4 येन हुल्ल बिना शिकार इन आळी दा डकरूसित? येन हारोद हुल्ल बिना येनारा हुडुकु तान गुफा दा टु गुर्रासीत?
AMO 3:5 येन पक्षी बिना फंदा हचकु फसुसीत? येन बिना येनारा फसुसकु फंदा जमीन मा ऊचकुसित?
AMO 3:6 येन यातारा नगर दा नरसिंगा ऊयदुर मा लॉकुर नळ्गतीदील? येन यहोवा अन बिना कळुद यातारा नगर दा येनारा विपत्ति बिद्दीत?
AMO 3:7 ईदा प्रकार देल प्रभु यहोवा तान दास भविष्यवक्तागोळ मा तान भेद बिना प्रगट माळ्द येनु उच ईला माळ्यान.
AMO 3:8 हुल्ल डकरूस्त; याव अंजतीदील? परमेश्वर यहोवा अंदुन, याव आन जो भविष्यवाणी माळतीदील?”
AMO 3:9 अश्दोद इन गढ़ अदिक मिस्त्र द्याश इन गढ़ मा प्रचार माळकु अनी: “सामरिया पहाळीगोळ मा जमा आगकु नोळी कि अदुर दा येन अच धोळ्द हल्ला अदिक अदुर न्याड्या येन अच अत्याचार इन क्याल्सा आगेत्याव!”
AMO 3:10 यहोवा अन ईद वाणी आद, “जो लॉकुर तान गढ़गोळ दा उपद्रव अदिक डकैती इन धन जमा माळकु ईटतार, आंदुर सरका क्याल्सा माळोद जान्सालुर अच.”
AMO 3:11 ई कारण परमेश्वर यहोवा ईद अनतान: “द्याश इन घेर्सावाळा दुश्मन आदान, अदिक आव नीन ताकत मुरदान, अदिक नीन गढ़ लुट्सकु आदव.”
AMO 3:12 यहोवा ईद अनतान: “याता प्रकार देल चरवाहा हुल्ली इन बाय दा टु येढ्ढ कालगोळ या किव इन ऊंद तुकळा बिळ्सतान, हांगा इस्राएली लॉकुर, जो सामरिया दा हासक्या अन ऊंद क्वाना या रेशमी गद्दी मा कुर्तकु ईरतार, आंदुर भी बिळ्सकु आदार.”
AMO 3:13 सेनागोळव परमेश्वर, प्रभु यहोवा अन ईद वाणी आद, “नोळी, अदिक याकूब उन घराना से खिलाप गवाही कोळी;
AMO 3:14 याता समय ना इस्राएली अदुर अपराधगोळ्द दण्ड कोळाईन, अदा समय ना बेतेल इन वेदीगोळी भी दण्ड कोळाईन, अदिक वेदी इन सींग मुर्दकु जमीन मा बिदोदाव.”
AMO 3:15 ना ठंडी इन गढ़ इक अदिक बिसुल माळग्या अन गढ़, येढ्ढु उक केडाईन; अदिक हत्तीहल्ल इन बनुस्द गढ़ भी नष्ट आदाव, अदिक धोड्डेव धोड्डेव मान्ना नष्ट आगेदव. यहोवा अन ईदा वाणी आद.
AMO 4:1 “हे सामरिया राज्य अन धनवान आर्तेरा, हे सामरी पहाळी इन आर्तेरा, ईद वचन केळी, नीव जो कंगालगोळ मा अत्याचार माळतीर, अदिक दरिद्रगोळी मेट्ट बुळतीर, अदिक तान तान गंळ्स उक आदेश कोळतीर: ‘सारा तरी, कि नाव कुळदेव.’”
AMO 4:2 परमेश्वर यहोवा तान पवित्रता अन किर्या तिनकु अनतान, नोळी, नीम मा ईत्ता दिन बरव आव, कि नीव मुळ्लगोळ से, अदिक नीम औलाद मेन इन गरीगोळ देल जेडुकु आदार.
AMO 4:3 नीम दा टु हर ऊंद दिवार इन दरारगोळ दा टु आगतेला सरका होट बुट्टीर अदिक हर्म्मोन पहाळी दा हाक्कु आदीर, यहोवा अन ईदा वाणी आद.
AMO 4:4 “बेतेल दा बंदकु अपराध माळी, अदिक गिलगाल नगर दा बंदकु हापाळ सा अपराध माळी; तान चळावा व्हातर्‍या का, अदिक तान दशमांश हर तीसरा दिशी तरतोगी;
AMO 4:5 धन्यवाद बली खमीर मिलुस्कु येर्सी, अदिक तान इच्छा बलीगोळ्द चर्चा नळ्सकु अऊर्द प्रचार माळी; यतिकी हे इस्त्राएलीगोळा, हिंग माळोद नीमी वळ्लीद हततद,” परमेश्वर यहोवा अन ईदा वाणी आद.
AMO 4:6 “ना नीम नगरगोळ दा अकाल कळुदीन, अदिक नीम सप्पा जागागोळ दा रोट्टी इन कमी माळीन, तरी भी नीव नान दी तिर्गकु बंदीदील,” यहोवा अन ईदा वाणी आद.
AMO 4:7 “याग कटनी इन मुर तींगुळ ईतोदव, आग ना नीम साटी माळ बरसुसीदील; ना ऊंद नगर दा नीर बरसुसकु दुसरा नगर दा बरसुसीदील; ऊंद केई दा माळ बत्त, अदिक दुसरा केई दा यदुर दा बरसुसीदील, अद वंळ्गेत.
AMO 4:8 इदुरसाटी लॉकुर नीर कुडोर साटी लंग लंग ओयाळतेला ऊंदा नगर दा बंदुर, लेकीन तृप्त आगीदील; तरी भी नीव नान दी तिर्गीदील,” यहोवा अन ईदा वाणी आद.
AMO 4:9 “ना नीमी गरमी इन झकार अदिक गेरूई किळा देल बळदीन; अदिक याग नीमव बगीचागोळ अदिक अंगुर इन बेलीगोळ, अदिक अंजीर अदिक जैतून इन मार्र हापाळ आगेदव, आग फाफागोळ अवरी तीन कोंडव; तरी भी नीव नान दी तिर्गकु बंदीदील,” यहोवा अन ईदा वाणी आद.
AMO 4:10 “ना नीम न्याड्या दा मिस्त्र द्याश इन घाई मरी फैलुसदीन; ना नीम घ्वाळागोळी कस्तकु नीम हारोदोर मंळसागोळी तलवार देल कोन्सुस बुट्टीन; अदिक नीम छावनी इन दुर्गन्ध नीम हात्ती पोहचुसदीन; तरी भी नीव नान दी तिर्गकु बंदीदील,” यहोवा अन ईदा वाणी आद.
AMO 4:11 “ना नीम दा टु हापाळ ईत्ता मंळसागोळी नाश माळदीन ह्यांग परमेश्वर सदोम अदिक गमोरा अक नाश माळीदीन, अदिक नीव बेक्की दा टु तेग्द कोर्री घाई ठहरूसदीर; तरी भी नीव नान दी तिर्गकु बंदिदील,” यहोवा अन ईदा वाणी आद.
AMO 4:12 “ई कारण, हे इस्राएल, ना नीन से हींगा माळाईन, अदिक इदुरसाटी कि ना नीन दा ईद क्याल्सा माळदुर मा आईन, हे इस्राएल, तान परमेश्वर उन मुंद बरोर साटी तयार आगेग!”
AMO 4:13 नोळ, पहाळीगोळ्द माळावाळा अदिक हवा अक निर्माण माळावाळा, अदिक मंळसा अक आऊन मन इन विचार हेळावाळा अदिक हुंजकुका अंधार माळावाळा, अदिक जो धरती इन ऊचा जागागोळ मा नळावाळा हुन, आऊंदा हेसुर सेनागोळव परमेश्वर यहोवा आद!
AMO 5:1 हे इस्त्राएल इन घराना, ई विलाप इन हाळ इन वचन केळ जो नीम बारा दा अनतीन:
AMO 5:2 “इस्त्राएल राज्य जो कुवारा पोर हुळ जो बिदोदुर, अदिक बाक येळ सकतीदील; आक तांद अच जमीन मा पटकुसकु आग्यार, अदिक आक इक नेगावाळा याऊ हैलेच.”
AMO 5:3 यतिकी परमेश्वर यहोवा ईद अनतान: “याता नगर टु हजार सैनिक होळतोगोर, अदुर दा इस्त्राएल इन घराना नोर सौ अच ऊळ्दकु ईत्तार, अदिक यदुर दा टु सौ होळतोगोर, अदुर दा हत्त मिक्कु ईत्तार.”
AMO 5:4 यहोवा, इस्त्राएल इन घराना से ईद अनतान: नान खोज दा हती, आग जीत्ता ईत्तीर.
AMO 5:5 बेतेल इन खोज दा हतबाळी, गिलगाल दा प्रवेश माळबाळी, अदिक न बेर्शेबा अक होगी; यतिकी गिलगाल सहीदा गुलामी दा होदीत, अदिक बेतेल सुनसान बिद्दीत.
AMO 5:6 यहोवा अन खोज माळी, आग जीत्ता ईत्तीर, ईलारा आव यूसुफ उन घराना मा बेक्की घाई भळकुस्यान, अदिक अद अदरी भस्म माळीत, अदिक बेतेल दा याऊ अदुर नुनाकावाळा ईरतीदील.
AMO 5:7 हे न्याय इक केयपन दा बदलुसावाळेरा अदिक न्यायीपन इक मुण्ण दा मीसळुसा वाळेर लॉकुरा!
AMO 5:8 जो कचपचिया अदिक मृगशिरा अन बनुसावाळा हुन, जो धोळ अंधार इक हुंजकुका अन ऊजुळ माळतान, जो दिन इक अंधार माळकु ईळ्लक माळ कोमतान, अदिक समुद्र अन नीर जमीन इन म्याकुच वाहुस बुळतान, आऊन हेसुर यहोवा आद.
AMO 5:9 आव राटनेरी इच बलवान उन विनाश माळ कोमतान, अदिक गढ़ इन भी सत्यानाश माळतान.
AMO 5:10 जो कचेरी दा सच्चाई देल न्याय माळतान आऊन से आंदुर दुश्मनी ईटतार, अदिक खरा मात माताळावाळा से नफरत माळतार.
AMO 5:11 नीव जो कंगालगोळ्द इस्तेमाल माळतीर, अदिक आंदुर अनाज मा कर इन भार हाकतीर, ईदुरसाटी जो मान्ना नीव गळुस्द कल्लगोळ देल बनुसीर, अऊर दा ईर सकतीदील; अदिक जो मनभावनी अंगुर इन बेलीगोळ नीव हचीर, अऊर्द सार्रा कुडु सकतीदील.
AMO 5:12 यतिकी ना जान्सतीन कि नीम पाप भारी आव. नीव सरका मंळसा अक सतुसतीर अदिक रिस्वत ताकोमतीर, अदिक कचेरी दा गरीबगोळ्द न्याय बिगळुसतीर.
AMO 5:13 ई कारण जो ग्यानी ईतीदान, आव ईत्ता समय सुंगा ईरूल, यतिकी समय बुरा आद.
AMO 5:14 हे लॉकुरा, बुराई इक ईला, भलाई इक ढुंढ्सी. ताकी नीव जीत्ता ईत्तीर; अदिक सेनागोळव प्रभु यहोवा खराखुरा नीम सांगुळ ईत्तान ह्यांग नीव अनतीर.
AMO 5:15 बुराई देल दुश्मनी अदिक भलाई देल प्यार ईटी, अदिक कचेरी दा न्याय इक स्थिर ईटी; येन पता सेनागोळव प्रभु यहोवा यूसुफ उन मिग्द मंळसागोळ मा अनुग्रह माळुल.
AMO 5:16 ई कारण सेनागोळव प्रभु, यहोवा ईद अनतान: “सप्पा चौकगोळ दा वर्लोद याद्दा बडोद आदीत; अदिक सप्पा सळकगोळ दा लॉकुर हाय, हाय माळ्यार! आंदुर केईवाळेरी शोक माळोर साटी, अदिक जो लॉकुर विलाप माळदुर दा निपुन आर, आंदरी वर्लली याद्दा बडुली कारदार;
AMO 5:17 अदिक सप्पा अंगुर इन बेलीगोळ दा वर्लोद याद्दा बडोद आदीत,” यतिकी यहोवा ईद अनतान, “ना नीम न्याड्या दा टु आगकु होगाईन.”
AMO 5:18 हाय नीम मा, जो यहोवा अन दिन इन अभिलाषा माळतीर! यहोवा अन दिन देल नीम येन फायदा आदीत? अद रा ऊजुळ इन ईला, अंधार इन दिन ईत्तीत.
AMO 5:19 ह्यांग यावारा हुल्ली नोळकु ओळुल अदिक आऊक भालू सिकुल; या मान्या बंदकु भीती मा कय टेकसुल अदिक आऊक हाव कचुल.
AMO 5:20 येन ईद खरा हैलेच कि यहोवा अन दिन ऊजुळ इन ईला, उलटा अंधार इन अच ईत्तीत? हव हींग धोळ अंधार इन यदुर दा येनु उच चमक ईरतीदील.
AMO 5:21 “ना नीम हाब्बगोळ से दुश्मनी ईटतीन, अदिक अऊर्द इनकार माळतीन, अदिक नीम महासभागोळ से ना खुश हैलेच.
AMO 5:22 चाहे नीव नान साटी होमबली अदिक अन्नबलि येर्सी, तरी भी ना खुश आगतीदील, अदिक नीम पाल्स्द जनावरगोळ्द मेलबलीगोळ दी ताक्सतीदील.
AMO 5:23 तान भजन इन हाळगोळ नान से दुर माळी; नीम्द सारंगीगोळ्द सूर ना केळतीदील.
AMO 5:24 लेकीन न्याय इक गांगा अन घाई, अदिक सच्चाई इक धारा घाई वाहुस गोळी.”
AMO 5:25 हे इस्राएल इन घरानागोळा, नीव आळी दा च्यालीस साल ताका पशुबलि अदिक अन्नबलि येन नानी का येर्सतेला ईतीर?
AMO 5:26 नीव रा तान राजा अन तम्बु, अदिक तान मूर्तीगोळ्द पांळसी अदिक तान द्याव उन तारा हुडुकु वयाळतेला ईतीर.
AMO 5:27 ई कारण ना नीमी दमिश्क इन आप्पाटी गुलामी दा माळ बुळाईन, सेनागोळव परमेश्वर प्रभु यहोवा अन ईदा वचन आद.
AMO 6:1 “हाय आंदुर मा जो सिय्योन दा निश्चिंताई देल ईरतार, अदिक आंदुर मा जो सामरिया अन पहाळी मा सुरक्षित महसुस माळतार, आंदुर जो श्रेष्ट राज्य दा प्रसिद्ध आर, यार हात्ती इस्राएल इन घराना बरतद!”
AMO 6:2 कलने नगर इक होगकु नोळी, अदिक अल टु हमात हेसुर इन धोळ नगर इक होगी; बाक पलिश्तीगोळ्द गत नगर इक होगी. येन अव ई राज्यगोळ से उत्तम आव? येन आंदुर सीमा नीम सीमा से थ्वाळासा धोळ्द आद?
AMO 6:3 नीव बेकार दिन इक दुर माळ बुळतीर, अदिक उपद्रव इन गद्दी इक हात्ती तंद कोमतीर.
AMO 6:4 “नीव हत्ती हल्ल इन पलंगगोळ मा लेट्सतीर, अदिक तान तान हासक्यागोळ मा काल किसुकु मिंगतीर, अदिक म्यांडा-मर्रीगोळ दा टु मेम्नागोळ अदिक गौशालागोळ दा टु पाड्डागोळ तिनतीर.
AMO 6:5 नीव सारंगी इन सांगुळ हाळ हाळतीर अदिक दाऊद उन घाई अलग अलग प्रकार इन वाजा अन आवाज तेगुतीर;
AMO 6:6 अदिक कटोरागोळ दा टु सार्रा कुडुतीर, अदिक उत्तम उत्तम याण्णा हचतीर, लेकीन यूसुफ मा बरावाळा विपत्ति इन हाल केळकु शोकित आगालीर!
AMO 6:7 ई कारण आंदुर ईग द्याश दा टु तेगुकु आदार, अदिक जो काल किसुकु मिंगतार, आंदुर मौजमस्ती खतम आगेदीत.”
AMO 6:8 परमेश्वर यहोवा तांदा किर्या तिनकु अंदान: “यार मा याकूब घमण्ड माळतान, आऊन से ना नफरत, अदिक आऊन गढ़गोळ देल दुश्मनी ईटतीन; अदिक ना ई नगर इक आ सप्पा समेत जो अदुर दा आद, दुश्मन उन वश दा माळ बुळाईन.”
AMO 6:9 अगर यातारा मान्या हत्त आरीगोळ ऊळुकु ईत्तार, तरी भी आंदुर सोतोदार.
AMO 6:10 याग यारदारा काक्क, जो आऊन होताकावाळा आगुल, आऊन येलुगोळी मान्या टु तेगोर साटी नेगदान, अदिक जो मान्या अन क्वाना दा ईत्तान आऊन से अंदान, “येन नीन हात्ती मात्त यावारा आन?” आग आव अंदान, “याऊ हैलेच;” आग आव अंदान, “सुंगा ईर! नामी यहोवा अन हेसुर ईला ताकोम पायजे.”
AMO 6:11 “यतिकी यहोवा अन आग्या देल धोळ धोळ तुकळा, अदिक श्यांण्द मान्या दरार आदीत.
AMO 6:12 येन घ्वाळागोळ चट्टान मा हरदाव? येन यावारा ईत्ता जागा दा वस्तागोळ देल जोतसुल यल नीव लॉकुर न्याय इक जयर दा, अदिक न्यायीपन इन काय इक केय काय दा बदलुस बुटीर?”
AMO 6:13 नीव ईत्ता वस्तु उन कारण खुशी माळतीर जो बेकार आद; अदिक अनतीर, “येन नाव तान अच यत्न देल सामर्थी आगीदील?”
AMO 6:14 ई कारण सेनागोळव परमेश्वर यहोवा अन ईद वाणी आद, “हे इस्राएल इन घराना, नोळ, ना नीम खिलाप ऊंद ईत्ता राज्य निद्रुसाईन, जो हमात इन घाटी टु हुडुकु अराबा इन गांगा ताका नीमी संकट दा हाक्कीत.”
AMO 7:1 परमेश्वर यहोवा नानी ईद तोर्सदुन: अदिक ना येन नोळतीन कि आव हिंदळा काड्डा अन ऊगुसोद सुरवात दा हत्तीफाफा पैदा माळदुन; अदिक अद राजा अन फसल कटनी इन बाद्दा अन हिंदळा काड्डा ईरोद.
AMO 7:2 याग अव सप्पा काड्डा तिन कोंडव, आग ना अंदीन, “हे परमेश्वर यहोवा, माफ माळ! ईलारा याकूब ह्यांग संची ईर सक्यान? आव याट कमजोर आन!”
AMO 7:3 ईदुर बारा दा यहोवा तान मन बदलुसदुन, अदिक अंदुन, “ईत्ता मात ईग आगतीदील.”
AMO 7:4 परमेश्वर यहोवा नानी ईद तोर्सदुन: अदिक येन नोळतीन कि परमेश्वर यहोवा बेक्की इन द्वारा मुकदमा लळुसली कारदुन, अदिक आ बेक्की देल महासागर वंळ्गेत, अदिक जमीन भी भस्म आगली हत्तेगीत.
AMO 7:5 आग ना अंदीन, “हे परमेश्वर यहोवा, ऊंजाईर! ईलारा याकूब ह्यांग संची ईर सक्यान? आव ह्यांग कमजोर आन.”
AMO 7:6 ईदुर बारा दा भी यहोवा पछतासदुन; अदिक परमेश्वर यहोवा अंदुन, “ईत्ता मात बाक यागलु आगतीदील.”
AMO 7:7 आव नानी ईद भी तोर्सदुन: ना नोळदीन कि प्रभु गोला हचकु बनुस्द यातारा दिवाल मा निदुरकु आन, अदिक आऊन कय दा गोला आद.
AMO 7:8 यहोवा नान से अंदुन, “हे आमोस, नीनी येन कांळ्सकु बिळतद?” ना अंदीन, “ऊंद गोला.” आग परमेश्वर अंदुन, “नोळ, ना तान प्रजा इस्त्राएल इन बीच दा गोला हचाईन. ना ईग आंदरी बिळतीदील.
AMO 7:9 इसहाक उन धोळ जागागोळ नाश माळाईन, अदिक इस्त्राएल इन पवित्रस्थान सुनसान आगेदव, अदिक ना यारोबाम उन घराना मा तलवार जेडुतेला चढ़ाई माळाईन.”
AMO 7:10 आग बेतेल इन याजक अमस्याह इस्त्राएल इन राजा यारोबाम उन हात्ती बातणी कळुदुन, “आमोस इस्त्राएल इन घराना अन बीच दा नीन से साजीस इन योजना माळ्यान; आऊन सप्पा वचनगोळी द्याश सहन माळ सकाल.
AMO 7:11 यतिकी आमोस ईद अनतान, ‘यारोबाम तलवार देल कोंदकु आदान, अदिक इस्राएल तान द्याश टु बन्दी माळकु तेगुकु आदार.’”
AMO 7:12 आग अमस्याह आमोस से अंदुन, “हे दर्शन नोळावाळा, ईल टु होटकु यहूदा द्याश दा ओळेग, अदिक अल्या रोट्टी तिनतोग, अदिक अल्या भविष्यवाणी माळतोग;
AMO 7:13 लेकीन बेतेल दा मात्त यागलु भविष्यवाणी माळबाळेत, यतिकी ईद राजा अन पवित्रस्थान अदिक राज नगर हुन.”
AMO 7:14 आमोस उत्तर कोटकु अमस्याह से अंदुन, “ना न रा भविष्यवक्ता ईरीन, अदिक न भविष्यवक्ता अन पार; ना रा जनावरगोळी आळसावाळा, अदिक उम्बर इन मार्रगोळी छाट्सावाळा ईरीन,
AMO 7:15 अदिक यहोवा नानी म्यांडा मर्रीगोळ्द हींद हींद वयाळदुर देल कारूकु अंदुन, ‘होग, नान प्रजा इस्राएल से भविष्यवाणी माळ.’
AMO 7:16 इदुरसाटी ईग नी यहोवा अन वचन केळ, नी अनत्या, ‘इस्राएल इन खिलाप भविष्यवाणी माळबाळ; अदिक इसहाक उन घराना अन खिलाप घळी घळी वचन केळ्सबाळ.’
AMO 7:17 ई कारण यहोवा ईद अनतान: ‘नीन आर्त नगर दा वेश्या आगेदार, अदिक नीन पार पोरगोळ तलवार देल कोंदकु आदार, अदिक नीन जमीन दॉरा हाक्कु वाट्सकु आदीत; अदिक नी खुद अशुद्ध द्याश दा सोत्या, अदिक इस्राएल तान द्याश टु बन्दी माळकु तेगुकु आदार.’”
AMO 8:1 परमेश्वर यहोवा नानी ईद तोर्सदुन: कि बिसुल माळग्या अन कायगोळ देल तुम्द ऊंद फुट्टी आद.
AMO 8:2 आव अंदुन, “हे आमोस, नीनी येन कांळ्सकु बिळतद?” ना अंदीन, “बिसुल माळग्या अन कायगोळ देल तुम्द ऊंद फुट्टी.” आग यहोवा नान से अंदुन, “नान प्रजा इस्राएल इन अन्त होट बंदाद; ना ईग अदरी मात्त बिळतीदील.”
AMO 8:3 परमेश्वर यहोवा अन वाणी आद, “आ दिशी मंदिर इन हाळ हाहाकार दा बदलुसेदाव, अदिक लाशगोळ्द धोळ्द डुंबर हत्तीत; अदिक सप्पा जागागोळ दा अव सुंगामुंगा भिटकु आगेदव.”
AMO 8:4 ईद केळी, नीव जो कंगालगोळी मेट्टोद अदिक द्याश इन पिड़ीत लॉकुरी नष्ट माळोद चाहासतीर,
AMO 8:5 जो अनतीर, “व्हासा चाँद इन दिन याग होदीत कि नाव अनाज मार सक्केव? आराम दिन याग बितुसीत, यदुर देल नाव तान गोदी मारली तर सक्केव, नाव तराजु उन बट इक हिंग माळ कोंडेव कि लॉकुरी ठगुस सक्केव.
AMO 8:6 कि नाव कंगालगोळी पैस्या कोटकु, अदिक दरिद्रगोळी कवळी इन दाम मा कोंड कोंडेव, अदिक गाडर्या हतकु अनाज मारेव?”
AMO 8:7 यहोवा, याकूब उन घमण्ड, आवा तान किर्या तिनकु अनतान, “ना नीम यातोदारा क्याल्सा अक यागलु मारूतिदील.
AMO 8:8 येन ई कारण जमीन नळ्गतीदील? येन अऊर माकळोर सप्पा ईरावाळेर विलाप माळतीदील? ईद द्याश सप्पा च्या सप्पा मिस्त्र अन नील गांगा अन घाई आदीत, जो वाळुसतद, अदिक गोर्त आगेगतद.”
AMO 8:9 परमेश्वर यहोवा अन ईदा वाणी आद, “आ समय ना सुर्य अक हागुल इन होती अस्त माळाईन, अदिक ई द्याश इक हाट्टा हागुल अंधार माळ बुळाईन.
AMO 8:10 ना नीम हाब्बगोळ्द उत्सवगोळी दुर माळकु विलाप माळसुसाईन, अदिक नीम सप्पा हाळगोळी दुर माळकु विलाप इन हाळ हाळसुसाईन; ना नीम सप्पा मुंदुर्द कटि दा शोक इन फळक्या हाकसुसाईन, अदिक नीम सप्पा मुंदुर्द ताल्लागोळी टक्कल माळाईन, अदिक हींग विलाप माळसुसाईन ह्यांग ऊंदठेसा अन साटी आगतद, अदिक अदुर अन्त कठिन दुख इन दिन इन घाई आदीत.”
AMO 8:11 परमेश्वर यहोवा अन ईद वाणी आद, “नोळी, ईत्ता दिन बरेत्याव, याग ना ई द्याश दा अकाल कळाईन; अदुर दा हस्तकु रा ईत्तार लेकीन अनाज इन साटी ईला अदिक निरळ्कु रा ईत्तार लेकीन नीर इन साटी ईला, लेकीन यहोवा अन वचनगोळी केळोद अच हसु निरळ्क ईत्तीत.
AMO 8:12 लॉकुर यहोवा अन वचन इन खोज दा समुद्र टु समुद्र ताका अदिक उत्तर टु पूर्व ताका लंग लंग वयाळ्यार, लेकीन आऊन खोज माळ सकतीदील.
AMO 8:13 “आ समय सुन्दर कुवारा पोरगोळ अदिक हारोदोर पारगोळ येढ्ढु मुंदुर निरळ्क इन मारा देल मुर्छित आदार.
AMO 8:14 जो लॉकुर सामरिया अन पापमूल, अदिक, ‘दान इन द्याव उन जिन्दगी इन किर्या, अदिक बेर्शेबा अन पंथ! इन किर्या, तिनतार आंदुर सप्पा बिद्दार, अदिक बाक येळतीदील.’”
AMO 9:1 ना प्रभु उक वेदी इन म्याकुच निदुर्त नोळदीन, अदिक आव अंदुन: “खंबागोळ्द स्यांडा मा बडु यदुर देल सपर्‍यागोळ आळगाळुल, अदिक अवरी सप्पा लॉकुर ताल्ला मा केडुकु तुकळा तुकळा माळ; अदिक जो नष्ट आगोर देल ऊळदार, आंदरी ना तलवार देल घात माळाईन; आंदुर दा टु ऊंद भी ओळ सकतीदील, अदिक जो तान इक ऊळस्यान, आव ऊळु सकतीदील.
AMO 9:2 “यतिकी चाहे आंदुर अगुळकु अधोलोक दा ईळ्दोगुल, तरी ना अल टु कय वाळुस्कु आंदरी तराईन; चाहे आंदुर आकाश मा येरेगुल, तरी ना अल टु आंदरी ईळ्सकु तराईन.
AMO 9:3 चाहे आंदुर कर्मेल दा होचकोमुल, लेकीन अल भी ना आंदरी ढुंढ ढुंढ्सकु हुडु कोमाईन, अदिक चाहे आंदुर समुद्र अन खोल दा नान नजर देल दुर आगुल, अल भी ना हाव इक आंदरी फन होडोद आग्या कोळाईन.
AMO 9:4 चाहे दुश्मन आंदरी जुप्सकु गुलामी दा ओयुल, अल भी ना आग्या कोटकु तलवार देल आंदरी घात माळाईन; अदिक ना आंदुर मा भलाई माळोर साटी ईला, बुराई इच माळोर साटी नजर तिर्गुसाईन.”
AMO 9:5 सेनागोळव परमेश्वर यहोवा अन मुटदुर देल धरती पिघलुसतद, अदिक अदुर सप्पा ईरावाळेर विलाप माळतार; अदिक अद सप्पा च्या सप्पा मिस्त्र अन गांगा अन घाई आगेतद, जो वाळुसतद, अदिक गोर्त आगेगतद.
AMO 9:6 जो आकाश दा तान मान्ना बनुसतान, अदिक तान आकाश मण्डल इन पायवा धरती मा हाकतान, अदिक आग्या कोटकु समुद्र अन नीर धरती मा वाहुस बुळतान, आऊंदा हेसुर यहोवा आद.
AMO 9:7 “हे इस्त्राएलीगोळा,” यहोवा अन ईद वाणी आद, “येन नीव नान साटी कूशिगोळ घाई हैलेच? येन ना इस्राएल इक मिस्त्र द्याश टु अदिक पलिश्तीगोळी कप्तोर टु तेगुकु तंदिदील? अदिक अरामीगोळी कीर टु तंदिदील?
AMO 9:8 नोळी, परमेश्वर यहोवा अन नजर ई पापमय राज्य मा हतकु आद, अदिक ना ईदरी धरती मा टु नाश माळाईन; तरी भी पुरा रिति देल याकूब उन घराना अन नाश माळतीदील,” यहोवा अन ईदा वाणी आद.
AMO 9:9 “नान आग्या देल इस्राएल इन घराना सप्पा राज्यगोळ दा हींग चाल्सकु आदीत ह्यांग अनाज चालनी दा चाल्सकु आगतद, लेकीन अदुर्द ऊंद भी पुष्ट दाना जमीन मा बिळतीदील.
AMO 9:10 नान प्रजा दाकळोर सप्पा पापी जो अनतार, ‘आ विपत्ति नाम मा बिळतीदील, अदिक नामी घेर्सतीदील,’ आंदुर सप्पा तलवार देल कोंदकु आदार.
AMO 9:11 “आ समय ना दाऊद उन बिदकु झोपड़ी इक निद्रुसाईन, अदिक आऊन वाळा अन दरारगोळी सुधरूसाईन, अदिक आऊन खण्डरगोळी मात्त बनुसाईन, अदिक ह्यांग आव प्राचीनकाल दा ईरोन, आऊक हांगा बनुस बुळाईन;
AMO 9:12 यदुर देल आ ऊळ्द एदोमीगोळी उलटा सप्पा राज्यगोळी जो नान हेसुर देल कारूकु आगताव, तान अधिकार दा ताकोमुल,” यहोवा जो ई क्याल्सा पुरा माळतान, आऊन ईदा वाणी आद.
AMO 9:13 यहोवा अन ईद भी वाणी आद, “नोळी, समय बरेत्याद याग फसल कडावाळा कटाई खतम भी माळ सकतीदील कि नागर नळसावाळा होट बंदान; बींजा बोऊसावाळा अन बोऊसोद पुरा भी आगतीदील कि अंगुर मेट्टावाळा होट बंदान, पहाळीगोळ दा टु सय अंगुर इन रास्सा टपकुसित, अदिक सप्पा पहाळीगोळ अदुर दा मुळ्केदाव.
AMO 9:14 ना तान प्रजा इस्राएल इन बंदीगोळी वापस तराईन, अदिक आंदुर ऊजळुस्द नगरगोळी मात्त बनुस्कु अऊर दा ईत्तार; आंदुर अंगुर इन बेली हचकु अऊर काय तिंदार.
AMO 9:15 ना आंदरी, आंदुर्दा जमीन दा बोऊसाईन, अदिक आंदुर तान जमीन दा टु जो ना आंदरी कोटीन, बाक यागलु कितकु आगतीदील,” नीम परमेश्वर यहोवा अन ईदा वचन आद.
JON 1:1 परमेश्वर उन वचन अमितै अन पार योना अक सिक्त:
JON 1:2 “तैयार आग, अदिक महानगर नीनवे अक होग. आऊन खिलाप बातणी केळ्स; यतिकी आऊन नागरिकगोळ दुष्कर्मगोळ्द मातकात नान ताका पोहचुस्याद.”
JON 1:3 योना येद्दुन. आव प्रभु उन मुंद टु ओळदुन. आव समुद्र अन आप्पाटी तर्शीश नगर होगली याफा बन्दरगाह होदुन. अल आऊक ऊंद जहाज सिक्त जो तर्शीश नगर इक होगोद. इदुरसाटी आव जहाज इन भाळा कोट्टुन, अदिक अदुर मा येरेदुन. आव ड्वांगा नळसावाळेर सांगुळ तर्शीश नगर होगोद चाहासोन ताकी आव यहोवा अन नजर टु दुर आगेगुल.
JON 1:4 लेकीन प्रभु समुद्र मा ऊंद धोळ्द हवा धुंधाळ कळुदुन. आग समुद्र मा भयंकर तुफान येळ्त अदिक जहाज इन मुरोद अंज्क पैदा आगेत.
JON 1:5 जहाज नळसावाळेर अंजेदुर, अदिक तान-तान द्यावगोळ्द दुहाई कोळली कुरतुर. आंदुर जहाज इन भार कम माळोर साटी जहाज इन माल समुद्र दा भिट्ट बुट्टुर. लेकीन योना जहाज इन बुळकोद भाग दा होगकु अल्या मिंगेदुन, अदिक आव भर जप दा ईरोन.
JON 1:6 जहाज इन मुखिया आऊन हात्ती बंदकु कारदुन, “ये मिंगावाळा, ईद येन? येळ, तान द्याव उक कारू, कदाचित परमेश्वर नाम दी ध्यान कोळुल अदिक नाव ऊळदोदेव.”
JON 1:7 जहाज नळसावाळेर आपस दा अंदुर, “बरी, नाव चिट्टीगोळ हाकाता, अदिक ईद पता हचाता कि ईद विपत्ती याता मंळसा अन्द कारण नाम मा बिदाद. इदुरसाटी आंदुर चिट्टीगोळ हाकदुर, अदिक चिट्टी योना अन्द हेसुर मा होळ्त.
JON 1:8 आंदुर योना से केळदुर, ‘नामी हेळी, ईद विपत्ति नाम मा येती बत्त?’ नी येन क्याल्सा धंदा माळत्या? नी येल टु बंद्या? नी याता द्याश इन ईरावाळा हुय? नी याता समुदाय इनव हुय?”
JON 1:9 आग योना आंदरी ईद हेळदुन, “ना इब्री हुईन; ना समुद्र अदिक जमीन इक माळावाळा स्वर्गीक प्रभु परमेश्वर उन आराधक हुईन.”
JON 1:10 ईद केळकु जहाज नळसावाळेर हापाळ अंजेदुर. आंदुर योना से अंदुर, “ईद नी येन माळ्द?” योना प्रभु उन मुंद टु ओळेत्यान, ईद मात आंदुर जानसोर; यतिकी खुद योना आंदरी हेळीदुन.
JON 1:11 आंदुर योना से केळदुर, “समुद्र शांत आगेगुल, इदुर साटी नाव नीन सांगुळ येन माळेव?” आ समय समुद्र अन लयरगोळ हापाळ उफान होडोव.
JON 1:12 योना आंदुर से अंदुन, “नानी नेगुकु समुद्र दा भिटबुळी, आग समुद्र शांत आगेदीत; यतिकी ना जान्सतीन, ईद भयंकर तुफान नान कारण नीम मा बंदाद.”
JON 1:13 ड्वांगा नळसावाळेर जहाज इक किनारा मा तरोद पुरा कोशिश माळदुर, लेकीन आंदुर अदरी किनारा मा ओय सकिदील. समुद्र अन्द लयरगोळ आंदुर खिलाप भयंकर आगतेला होत्त.
JON 1:14 आखरी दा जहाज नळसावाळेर प्रभु से प्रार्थना माळदुर, “हे यहोवा, नाव नीन से विनती माळतेव. ई मंळसा अन्द जीव इन बदला दा नामी नष्ट माळबाळ, निर्दोष मंळसा अन्द हत्या अन्द दोष नाम मा हचबाळ; यतिकी हे यहोवा, नी तान इच्छा अनुसार ईद क्याल्सा माळ्या.”
JON 1:15 आग आंदुर योना अक येब्सदुर अदिक समुद्र दा आऊक भिट्ट बुट्टुर. अदिक समुद्र अन्द भयंकर लयरगोळ शांत आगेदव.
JON 1:16 ईद नोळकु आंदुर यहोवा अन हापाळ अच अंज्क मान्सदुर, अदिक आऊक बलि येर्सदुर अदिक मन्नतगोळ मान्सदुर.
JON 1:17 यहोवा ऊंद धोळधुसा मेन ठहरूसीदुन. कि योना अक नुंग बुळुल; अदिक योना आ मेन इन व्हाट्टा दा मुर दिन अदिक मुर ईळ्लक बिदकु ईत्तुन.
JON 2:1 योना मेन इन व्हाट्टा दा तान परमेश्वर यहोवा से प्रार्थना माळदुर.
JON 2:2 आव अंदुन: “हे यहोवा, ना तान संकट दा नीन इक कारदीन, अदिक नी नान इक उत्तर कोट्ट. ना अधोलोक इन खाई दा नीन दुहाई कोट्टीन, अदिक नी बिना संकोच नान पुकार केळ्द.
JON 2:3 नी नानी ल्यालमा समुद्र अन गहराई दा हाक्क कोंडीद; ना धारागोळ बीच दा बिदकु ईरीन. नीन भळकुस्द लयरगोळ अदिक तरंगगोळ नान म्याकुच टु वाहुसेदव.
JON 2:4 आग ना ईद सोचदीन: ना नीन मुंदु टु तेगुकु आगेगीन. ईग ना ह्यांग नीन पवित्र मंदिर इन दर्शन माळ सकाईन?
JON 2:5 ना नीर देल ईल ताका घेर्सकु ईरीन कि नान जीव होळतोगोद; गयरा सागर नान नाकु दी ईरोद, अदिक नान ताल्ला दा काई गुंळ्सकु ईरोद.
JON 2:6 ना पहाळगोळ्द जळी ताका पोहचुसेगीदीन. ना हमेशा साटी जमीन दा बन्द आगेगीदीन; तरी भी हे नान परमेश्वर यहोवा, नी नान जीव इक गड्डा दा टु नेगद्या.
JON 2:7 याग ना बेहोस आगावाळा अच ईरीन, आग ना यहोवा अक याद माळदीन; अदिक नान प्रार्थना नीन हात्ती उलटा नीन पवित्र मंदिर दा पोहचुसेत.
JON 2:8 जो लॉकुर ध्वाका अन बेकार वस्तुगोळ मा मन हचतार, आंदुर तान अनुग्रह माळावाळा परमेश्वर उक बिट बुळतार.
JON 2:9 लेकीन ना धन्यवाद इन हाळ हाळकु नीनी बलिदान येर्साईन; जो मन्नत ना मानसीन, अदरी पुरा माळाईन. उद्धार यहोवा देल अच आगतद!”
JON 2:10 आग यहोवा मेन इक आग्या कोट्टुन, अदिक मेन योना अक समुद्र किनारा मा व्हार्या तेग्त बुळ्त.
JON 3:1 प्रभु उन वचन योना अक दुसरा घन सिक्त:
JON 3:2 “‘यदकु आ नीनवे नगर इक होग. अदिक जो बातणी ना नीन इक कोळाईन, नी आऊक केळसेत.’
JON 3:3 योना येद्दुन. आव यहोवा अन आदेश इन अनुसार नीनवे नगर इक होदुन. नीनवे ऊंद महानगर ईरोद. नगर इन ऊंद क्वाना टु दुसरा क्वाना ताका होगली मुर दिन हत्तोगोव.
JON 3:4 योना नगर इन यात्रा माळोद शुरू माळदुन. आव ऊंद दिन इन दुरी तय माळदुन. आव ईद प्रचार माळदुन, ‘सिर्फ चालीस दिन मिक्कु आव, अदिक आग नीनवे नगर इन विनाश आगेदीत.’”
JON 3:5 नीनवे अन्द ईरावाळेर परमेश्वर मा विश्वास माळदुर. आंदुर दुख माळोर साटी उपवास इन घोषणा माळदुर. स्यांण-धोड्डेर सप्पा ईरावाळेर दुख इन फळक्या हाकुल.
JON 3:6 ईद खबर नीनवे अन्द राजा अक सिक्त. आव आटोटीका तान सिंहासन टु येद्दुन. आव तान राजसी फळक्या ईळ्सदुन, अदिक दुख इन फळक्या हाकदुन. आग आव राख इन ढेर मा कुरतोदुन.
JON 3:7 आव पुरा नीनवे नगर दा ईद राज आग्या अन घोषणा माळदुन: “राजा अदिक मंत्री-मंडल इन दी टु ईद आदेश आद: मंळसा अदिक जनावर, म्यांडा अदिक मर्री अदिक गोसी अदिक वस्ता तान बाय दा अनाज इन दाना भी ईटबाळुल. यारू भोजन माळबाळुल अदिक नीर कुडुबाळुल.
JON 3:8 हर ऊंद मंळसा अदिक पशु तान मय मा शोक इन कपळा हाकुल. मंळसा याद्दा बडु बडुकु परमेश्वर उन दोहाई कोट्टार. हर ऊंद मंळसा तान दुराचरण इक त्याग्स बुळुल, अदिक दुष्ट हादी इक बिट्ट बुळुल.
JON 3:9 आग सकतद, कि शायद परमेश्वर तान निर्णय इक बदलुस बुळुल अदिक तान भळकुस्द सिट्ट शांत माळुल अदिक नाव नष्ट आगदुर देल ऊळदेव?”
JON 3:10 याग परमेश्वर ईद नोळदुन कि नीनवे अन्द निवासीगोळ दुख माळदुर, अदिक आंदुर तान दुष्‍कर्म बिट्ट बुट्टुर, आग आव आंदुर मा विपत्ति हाक्कोद विचार त्याग्स बुट्टुन. परमेश्वर अंदीदुन कि आव आंदुर मा विपत्ति हाक्यान. लेकीन आव हिंग माळीदिल.
JON 4:1 ईद मात योना अक हापाळ अच बेकार हत, अदिक आऊक सिट्ट बत्त.
JON 4:2 आव प्रभु से प्रार्थना माळदुन. आव अंदुन, “‘हे यहोवा, नान नीन से ईद प्रार्थना आद: याग ना तान द्याश दा ईरीन, आग ना नीन से ईदा रा अंदीदिन? ईग रा अदा मात आत. ईदा कारण ना तुरंत तर्शीश नगर इक ओळीदिन. ना जानसीन कि नी कृपालु अदिक दयालु परमेश्वर आय. नी देरी देल गुस्सा माळावाळा अदिक करूणा अन्द सागर आय. नी दुख हाक्कोद तान निर्णय इक भी बदलुसत्या.
JON 4:3 इदुरसाटी ईग ना नीन से ईद विनती माळतीन: हे यहोवा, नी नान जीव नान से ताकोम कोम. नान साटी जीत्ता ईरोर से वळ्लीद सायोद आद.’
JON 4:4 यहोवा अंदुन, ‘येन नीन ईद सिट्ट माळोद उचित आद?’”
JON 4:5 आग योना नगर टु व्हार्या होट्टुन. आव नगर इन पूर्व दा ईरली कुरतुन. आव तान ताल्ला मा ऊंद छपर्या हाकदुन. आव छपर्या अन सावली दा कुर्तोदुन अदिक नोळली कुरतुन कि नगर इन ईग येन आदीत?
JON 4:6 प्रभु परमेश्वर योना अन्द ताल्ला अन्द म्याकुच येरंडी इन ऊंद मार्र बेळ्सदुन कि अद योना अन्द ताल्ला मा सावली माळुल अदिक आऊक आराम कोळ सकुल. योना ई मार्र इक नोळकु हापाळ खुश आदुन.
JON 4:7 दुसरा दिशी याग व्हातुर आत, आग परमेश्वर ऊंद किळा अक कळुदुन. कीळा येरंडी इन मार्र इक कच्त अदिक येरंडी इन मार्र वंळ्गेत.
JON 4:8 याग सूर्य होळ्त आग परमेश्वर पूर्व दिशा टु गरम हवा वाहुसदुन. योना अन्द ताल्ला मा सूरज इन किरणगोळ बिद्दव अदिक आव मुर्छित आगली हतदुन; योना मृत्यु इन इच्छा माळली कुरतुन. आव अंदुन, “नान साटी जीत्ता ईरोर से सायोद वळ्लीद आद.”
JON 4:9 आग परमेश्वर योना से केळदुन, “येन ईद उचित आद कि नी येरंडी इन मार्र इन कारण नाराज आय?” योना उत्तर कोट्टुन, “हव वळ्लीद आद, ईदुर देल नान जीव भी होदीत तरी भी नळदीत.”
JON 4:10 प्रभु आऊक उत्तर कोट्टुन, “नी आ येरंडी इन मार्र इन साटी येती दुखी आय, यार साटी नी यातोदु मयनत माळीदिल. नी अदरी हचीदिल अदिक वाळुसीदिल; अद ऊंद ईळ्लकी बेळुत अदिक दुसरा ईळ्लक दा नष्ट आगेत.
JON 4:11 ई महानगर नीनवे दा ऊंद लाख ईप्पत हजार से येक्कुल मंळसा आर, जो तान ऊजवा डाक्या कय इन भी अंतर अरालुर. इदुर अलावा निर्दोष पशु भी आव. आग येन नानी ई महानगर इन साटी दया ईला माळ पायजे?”
MIC 1:1 यहोवा अन वचन, जो यहूदा अन राजा योताम, आहाज अदिक हिजकिय्याह अन दिनगोळ दा मोरेशेतवासी मीका अक पोहचुस्त, यदरी आव सामरी नगर अदिक यरूशलेम इन बारा दा अरतुन.
MIC 1:2 हे राज्य राज्य अन सप्पा लॉकुरा, केळी! हे धरती नी आ सप्पा सांगुळ जो नीन दा आद, ध्यान कोळ! यहोवा नीन खिलाप प्रभु तान पवित्र मंदिर दा टु नीन मा गवाही कोळुल.
MIC 1:3 यतिकी नोळ, यहोवा तान पवित्र जागा दा टु व्हार्या होळेत्यान, अदिक आव ईळुकु धरती इन ऊचा स्थानगोळ मा नळदान.
MIC 1:4 पहाळीगोळ आऊन ल्यालमा गलुसेदाव, अदिक ऊतार भाग हिंग हरदाव, जसा मोम बेक्की इन आच देल, अदिक नीर जो घाट से ल्यालमा वाहुसतद.
MIC 1:5 ई सप्पा याकूब उन अपराध अदिक इस्त्राएल इन घराना अन कारण आगतद. याकूब उन अपराध येन आद? येन सामरिया आल्लच? अदिक यहूदा उन ऊचा स्थान येन हुव? येन यरूशलेम आल्लच?
MIC 1:6 परमेश्वर अंदुन, ई कारण ना सामरिया अक मैदान इन ढेर माळ बुळाईन, अदिक अंगुर इन बेली बनुसाईन; अदिक ना अऊर कल्लगोळी गड्डा दा ढकलुस बुळाईन, अदिक अदुर्द पायवा कित्त बुळाईन.
MIC 1:7 अऊर्द सप्पा माळदव मुर्तीगोळ तुकळा तुकळा माळकु आदव; अदिक जो येनारा आव कसुकु कमुस्यान अद बेक्की देल भस्म माळकु आदीत, अदिक आऊन सप्पा प्रतिमागोळी ना चुरचुर माळाईन; यतिकी वेश्‍यावृत्ति इन कमाई देला आव अऊर्द जमावळा माळ्यान, अदिक अद मात्त वेश्‍यावृत्ति घाई कमाई आगेदीत.
MIC 1:8 ई कारण ना याद्दा बडुकु हाय, हाय, माळाईन; ना उगळा काल अदिक बिन फळक्या देल ओयाळतोगाईन; ना कोल्यागोळ घाई चिल्लासाईन, अदिक शुतुरमुर्ग उन घाई वर्लाईन.
MIC 1:9 यतिकी आऊन घाव यागलु तुम सकाल; अदिक विपत्ति यहूदा मा भी बंदकु बित्त, उलटा आव नान लॉकुर मा बिदकु यरूशलेम इन फाटक ताका पोहचुसेग्याद.
MIC 1:10 गत नगर दा ईदुर्द चर्चा माळबाळी, अदिक वर्लबाळी; बेतआप्रा दा धूलि दा लोटपोट माळी.
MIC 1:11 हे शापीर इन ईरावळ्त बिना कपळा अन आगकु निर्लज होटोग; सानान इन ईरावळ्त होळ सकालुर; बेतसेल इन ओर्लोद कारण अदुर्द शरण इन जागा नीन से ताकोमकु आदीत.
MIC 1:12 यतिकी मारोत उन ईरावळ्त रा मदत इन हादी काईत काईत दुखी आगेग्यार, यतिकी यहोवा अन दी टु यरूशलेम इन फाटक ताका विपत्ति बंदकु बिदाद.
MIC 1:13 हे लाकीश इन ईरावळ्त तान रथगोळ दा वेग देल नळावाळा घ्वाळागोळ जोत्स; नीन देला सिय्योन इन प्रजा अन पाप इन सुरवात आत, यतिकी इस्त्राएल इन अपराध नींदा का कांळ्सकु बिद्दव.
MIC 1:14 ई कारण नी गत इन मोरेशेत इक दान कोटकु दुर माळबुट्या; अकजीब इन मान्ना से इस्त्राएल इन राजागोळ ध्वाका अच तिंदार.
MIC 1:15 हे मारेशा अन ईरावळती ना मात्त नीन मा ऊंद अधिकारी ठहरूसाईन, अदिक इस्त्राएल इन प्रतिष्ठित लॉकुरी अदुल्लाम इन गुफा दा बरोद बिद्दीत.
MIC 1:16 तान प्यारा चिकोर साटी दुख दा तान ताल्ला चुट्टी कोय, उलटा तान पुरा ताल्ला गिधाळ घाई टक्कल माळ कोम, यतिकी आंदुर बन्दी आगकु नीन हात्ती टु होटोग्यार.
MIC 2:1 हाय आंदुर मा, जो हासक्या मा बिदकु बुराई इन कल्पना अदिक दुष्ट कर्मगोळ्द इच्छा ईटतार, अदिक बलवान आगदुर कारण हुंजकुका अच आंदुर अवरी पुरा माळतार.
MIC 2:2 आंदुर केई इन लालच माळकु अवरी कसु कोमतार, अदिक मान्नगोळ्द लालच माळकु अवरी भी ताकोम कोमतार; अदिक अदुर्द घराना समेत गंळ्सुर मा, अदिक आऊन खुद इन भाग समेत यावारा गंळ्स मा अंधार अदिक अत्याचार माळतार.
MIC 2:3 ई कारण: यहोवा ईद अनतान: ना ई कूल मा ईत्ता विपत्ति हाकदुर मा आईन, यदुर ल्यालमा नीव तान म्याड्डा सरकुस सकतीदिल; न तान ताल्ला म्याकुच माळकु नळुसकतीदील; यतिकी अद विपत्ति इन समय ईत्तीत.
MIC 2:4 आ समय ईद अत्यंत शोक इन हाळ दृष्‍टान्त इन रिती मा हाळकु आदीत: “नाम्द रा सर्वनाश आगेत; आव नान लॉकुर्द भाग इक बिगळुसतान; हाय, आव आऊक नान से याट दुर माळ बुळतान! आव नाम केईगोळ ध्वाका कोळावाळेरी कोट बुळतान.
MIC 2:5 ई कारण नीनव हिंग याऊ ईरतीदील, जो यहोवा अन मंडली दा चिट्टी हाक्कु आळोद जाळी हाकुल.”
MIC 2:6 बकवास माळावाळेर अनतोगतार, “बकवास माळबाळी! ई मातगोळ साटी अनतोगबाळी!” ईत्ता लॉकुर दा टु अपमान मिटुसतीदिल.
MIC 2:7 हे याकूब उन घराना, येन ईद अंदकु आगुल कि यहोवा अन आत्मा धीरज काळ्दकु कुरताद? येन ई क्याल्सा आऊन अवा माळकु आग्याव? येन नान वचनगोळ देल आऊन भला आगाल्द जो सीधाई देल नळुतान?
MIC 2:8 लेकीन नीन इन मात हुन कि नान प्रजा दुश्मन बन्सकु नान खिलाप येद्दाद; नीव शांत अदिक भोला भाला हादीवाळेर्द मय मा टु चद्दर जेडु कोमतीर जो लळाई इन विचार ईला माळकु बेधळक होगतार.
MIC 2:9 नान प्रजा अन आर्तेरी नीव आंदुर्द सुखी मान्नागोळ दा टु तेगु कोमतीर; अदिक आंदुर्द श्याण चिकोर हात्ती टु नान कोळ्द उत्तम वस्तुगोळ हमेशा साटी कसु कोमतीर.
MIC 2:10 येळी, होटोगी! यतिकी ईद नीम्द आराम इन जागा आल्लच; ईदुर्द कारण आ अशुद्धता हुन जो कठिन दुख इन सांगुळ नीम्द सर्वनाश माळीत.
MIC 2:11 अगर यावारा ख्वाटा आत्मा दा नळुतेला ख्वाटा अदिक बेकार मातगोळ अनुल अदिक अनुल कि ना नीमी सारा अदिक हमेशा अंगुर इन रास्सा अन साटी प्रचार केळ्सतेला ईराईन, रा आवा ई लॉकुर्द भविष्यवक्ता ठहरूस्यान.
MIC 2:12 हे याकूब, ना जरूर नीमी सप्पा मुंदुरी जमा माळाईन; ना इसत्राएल इन मिग्द लॉकुरी जरूर जमा माळाईन; अदिक क्वाटक्या अन आळ-मर्रीगोळ घाई सांगुळल्या ईटाईन. आ झुण्ड इन घाई जो वळ्लीद चराई दा ईरताव, व मंळसागोळ्द बहुतायत इन मारा देल हल्ला मचुस्याव.
MIC 2:13 अऊर मुंद मुंद क्वाटक्या अक मुरावाळा होग्यान, इदुरसाटी अव भी अवरी मुरेत्याव, अदिक फाटक दा टु आगतेला होगेत्याव; अऊर राजा अऊर मुंद मुंद होदुन मतलब यहोवा अऊरव अगुवा हुन.
MIC 3:1 ना अंदीन: हे याकूब उन प्रधानगोळा, हे इस्त्राएल इन घराना अन न्यायिगोळा, केळी! येन न्याय इन भेद जानसोद नीम क्याल्सा आल्लच?
MIC 3:2 नीव जो भलाई देल दुश्मनी, अदिक बुराई देल प्यार ईटतीर, मान्सी, नीव लॉकुर मा टु आंदुर तोगुल ईळ्स कोमतीर, अदिक आंदुर येलुगोळ मा टु आंदुर्द मास तेग्द बुळतीर;
MIC 3:3 लेकीन नीव नान लॉकुर्द मांस भी तिन कोमतीर, अदिक आंदुर्द तोगुल भी छिल्स बुळतीर; नीव आंदुर्द येलुगोळी स्वार्रा दा बेईसोर साटी मुर्द बुळतीर अदिक आंदुर्द मास गळग्या दा बेईसोर साटी तुकळा तुकळा माळतीर.
MIC 3:4 आंदुर आ समय यहोवा अन दोहाई कोट्टार, लेकीन आव आंदुर केळतीदिल, लेकीन आ समय आव आंदुर्द बेकार क्याल्सागोळ कारण आंदुर से मार्रा तिर्गुस बुट्टान.
MIC 3:5 यहोवा अन ईद वचन हुन जो भविष्यवक्ता नान प्रजा अक भटकुस बुळतार, अदिक याग आंदरी तिनली सिकतद आग “शांती, शांती” कारूतार, अदिक अगर यावारा आंदरी तिनली कोळालुर, रा आऊन खिलाप लळाई माळली तयार आगेगतार.
MIC 3:6 ई कारण नीम मा ईत्ता ईळ्लक बंदीत, कि नीमी दर्शन सिकतीदील, अदिक नीव ईत्ता अंधार दा बिद्दीर कि भावी अन सकतीदिल. भवष्यवक्तागोळ साटी सुर्य मुळकीत, अदिक हागुल इन होती भी आंदुर मा अंधार आगकु ईत्तीत.
MIC 3:7 दर्शन तोर्सावाळेर शर्मिंदा आदार, अदिक भावी अनावाळेर मार्रगोळ करेव आदाव; अदिक आंदुर सप्पा च्या सप्पा तान बाय इदुरसाटी मुच्यार कि परमेश्वर दी टु उत्तर सिकाल.
MIC 3:8 लेकीन ना रा यहोवा अन आत्मा देल शक्ति, न्याय अदिक ताकत हासिल माळकु परिपुर्ण आईन कि ना याकूब उक आऊन अपराध अदक इस्त्राएल इक अदुर्द पाप जतुस सकाईन.
MIC 3:9 हे याकूब उन घराना अन प्रधानगोळा, हे इस्त्राएल इन घराना अन न्यायीगोळा, हे न्याय से घृणा माळावाळेरा अदिक सप्पा सीधा मातगोळी वाकळा तिकळा माळावाळेरा, ईद मात केळी.
MIC 3:10 नीव सिय्योन नगर इन हत्या माळकु अदिक यरूशलेम इक कुटीलता माळकु मजबूत माळतीर.
MIC 3:11 अदुर्द प्रधानगोळ घुस ताकोम ताकोमकु विचार माळतार, अदिक याजक दाम ताकोम ताकोमकु व्यवस्था कोळतार, अदिक भविष्यवक्ता पैस्या साटी भविष्य हेळावाळेर अनतार; तरी भी आंदुर ईद अंदकु यहोवा मा भरोसा ईटतार, “यहोवा नाम बीच दा आन, इदुरसाटी यातोदु विपत्ति नाम मा बरतीदील.”
MIC 3:12 इदुरसाटी सिय्योन नीम कारण जोत्सकु केई माळकु आदीत, अदिक यरूशलेम खण्डरगोळ्द ढेर आगेदीत, अदिक याता पहाळी मा भवन बन्सकु आद, अद आळी इन ऊचा स्थान घाई आगेदीत.
MIC 4:1 आखरी इन दिनगोळ दा हींग आदीत कि यहोवा अन भवन इन पहाळी सप्पा पहाळीगोळ मा मजबुत माळकु आदीत, अदिक सप्पा पहाळीगोळ से यक्कुल ऊचा माळकु आदीत; अदिक सप्पा राज्य अन लॉकुर गांगा अन घाई आऊन दी नळदार,
MIC 4:2 अदिक हापाळ सारा राज्य अन लॉकुर होदार, अदिक आपस दा अंदार, “बरी, नाव यहोवा अन पहाळी मा येरकु, याकूब उन परमेश्वर उन भवन दा होगाता; आग आव नामी तान हादी कलस्यान, अदिक नाव आऊन हादीगोळ मा नळदेव.” यतिकी यहोवा अन व्यवस्था सिय्योन टु, अदिक आऊन वचन यरूशलेम टु होट्टीत.
MIC 4:3 आव हापाळ सारा द्याश इन लॉकुर्द न्याय माळ्यान, अदिक दुर दुर ताका नोर सामर्थी राज्यगोळ्द झगळा मिटुस्यान; इदुरसाटी आंदुर तलवार बडुकु नागर इन फार, अदिक तान भालागोळ से कुळगुल बनुस्यार; आग ऊंद राज्य दुसरा राज्य अन खिलाप तलवार यागलु नळ्सतीदिल;
MIC 4:4 अदिक लॉकुर मुंद युद्ध विद्या कलुतीदिल. लेकीन तान तान अंगुर इन बेली अदिक अंजीर इन मार्र इन ल्यालमा कुर्तोदार, अदिक याऊ आंदरी अंजुसतीदील; सेनागोळव यहोवा ईदा वचन कोटान.
MIC 4:5 सप्पा राज्य लॉकुर रा तान तान द्याव इन हेसुर ताकोमकु नळुतार, लेकीन नाव लॉकुर तान परमेश्वर यहोवा अन हेसुर ताकोमकु हमेशा नळुतेला ईत्तेव.
MIC 4:6 यहोवा अन ईद वाणी आद, आ समय ना प्रजा अन लंगळागोळी, अदिक जबरदस्ती तेग्द लॉकुरी, अदिक यारी ना दुख कोटीन आ सप्पा मुंदुरी जमा माळाईन;
MIC 4:7 अदिक लंगळागोळी ना ऊळ्सकु ईटाईन, अदिक दुर माळ्द मंळसागोळी ऊंद सामर्थी जाती माळ बुळाईन; अदिक यहोवा आंदुर मा सिय्योन पहाळी इन म्याकुच टु हमेशा राज्य माळतेला ईत्तान.
MIC 4:8 हे एदेर इन गुम्मट, हे सिय्योन इन पहाळी, नीनी पयले अन घाई शासन हासील अदीत, मतलब यरूशलेम इन राज्य नीनी सिक्कीत.
MIC 4:9 ईग नी येती किटुरत्या? येन नीन दा याऊ राजा ईतीदील? येन नीन युक्ति माळावाळा नष्ट आगेदुन, यदुर देल व्‍हाट्‍यादी ईरावळ्त आर्त इन घाई नीनी दुख येळतद?
MIC 4:10 हे सिय्योन इन पोर, गर्भवती आर्त इन घाई दुख नेगुकु पैदा माळ; यतिकी ईग नी नगर दा टु होटकु मैदान दा बसुस्या, उलटा बेबीलोन ताका होद्या; अल्या नी बिळसुस्कु आद्या, मतलब आवा यहोवा नीनी नीन दुश्मनगोळ वश दा टु बिळ्स बुट्टान.
MIC 4:11 ईग हापाळ सारा राज्य नीन खिलाप येदकु नीन बारा दा अंदाव, “सिय्योन अपवित्र माळकु आगुल, अदिक नाव तान कण्णगोळ देल अदरी नाश आगतेला नोळेव.”
MIC 4:12 लेकीन आंदुर यहोवा अन कल्पनागोळी जान्सालुर, ना आऊन युक्ति सम्सतार, कि आव आंदरी हींग आंदान जसा केई दा टु फुलागोळी जमा माळतार.
MIC 4:13 हे सिय्योन, येळ अदिक दावनी माळ, ना नीन गॉट्टागोळी लॉहा अन, अदिक नीन खुरगोळी पीतळा अन माळ बुळाईन; अदिक नी हापाळ सारा राज्यगोळी चुर चुर माळ्या, अदिक आंदुर कमाई यहोवा अक अदिक आंदुर धन दौलत धरती इन प्रभु उन साटी अर्पण माळ्या.
MIC 5:1 ईग हे हापाळ दल इन स्वामिनी, दल कट कटकु जमा आग, यतिकी आव नाम लॉकुरी घेर्स बुटान; आंदुर इस्त्राएल इन न्यायी इन गाल्ला मा सोटा बळदार.
MIC 5:2 हे बैतलहम एप्राता, अगर नी हींग श्याणेव आय कि यहूदा अन हजारगोळ दा आळ्दकु आगाल, तरी भी नीन दा टु नान साटी ऊंद मंळसा होट्टान, जो इस्त्राएलीगोळ दा प्रभुता माळावाळा आदान; अदिक आऊन होळोद प्राचीनकाल टु, उलटा अनादि काल टु आग्त बंदाद.
MIC 5:3 ई कारण आव आंदरी आ समय ताका त्याग्सकु ईत्तान, यागासताका व्‍हाट्यादी ईरावळ्त हाळालुर; आग इस्त्राएलीगोळ हात्ती आऊन ऊळ्दकु वार्टुर लौटुस्कु आंदुर से मिळुस्यार.
MIC 5:4 अदिक आव निदुरकु यहोवा अन कोळ्द ताकत देल, अदिक तान परमेश्वर यहोवा अन हेसुर इन तेज देल, आंदुर्द चरवाही माळ्यान. आंदुर सुरक्षित ईत्तार, यतिकी ईग आव धरती न क्वाना ताका महान ठहरूस्यान.
MIC 5:5 आव शांती इन मूल ईत्तान. छुटकारा अन दण्ड याग अश्शूरी सेना नाम द्याश मा चढ़ाई माळ्यार, अदिक नाम राजभवनगोळ दा काल ईट्यार, आग नाव आंदुर खिलाप येळ चरवाहागोळ अदिक येठ्ठ प्रधान मंळसा निदरूसाता;
MIC 5:6 अदिक आंदुर अश्शूर उन द्याश इन उलटा प्रवेश इन जागा ताका निम्रोद उन द्याश इक तलवार नळ्सकु कोंद बुळाता; अदिक यग अश्शूरी लॉकुर नाम द्याश दा बंदार, अदिक अदुर सीमा अन बुळ्क काल ईट्यार, आग आ मंळसा अन नामी आंदुर से ऊळस्यान.
MIC 5:7 आग याकूब उन ऊळ्द लॉकुर हापाळ राज्य अन बीच दा ईत्ता क्याल्सा कोट्टार, ह्यांग यहोवा अन दी टु बिळावाळा ओद, अदिक काड्डा माकळोद माळ, जो यारदु साटी रूकसाल अदिक मंळसा अन हादी कायाल.
MIC 5:8 याकूब उन ऊळ्द लॉकुर राज्यगोळ दा अदिक द्याश द्याश इन लॉकुर बीच दा हींग ईत्तार ह्यांग आळी इन जनावरगोळ दा हुल्ल, या आळ मर्रीगोळ झुण्ड दा हारोद हुल्ल ईरतद, यतिकी याग आव आंदुर बीच दा टु होदीत, रा कोन्नतेला अदिक हरूतेला होदीत, अदिक याऊ ऊळ्स सकतीदील.
MIC 5:9 नीन कय नीन द्रोहीगोळ मा बिळुल अदिक नीन सप्पा दुश्मन नष्ट आगेगुल.
MIC 5:10 यहोवा अन ईद वाणी आद, आ समय ना नीन घ्वाळागोळ्द नीन बीच दा टु नाश माळाईन; अदिक नीन रथगोळ्द विनाश माळाईन.
MIC 5:11 ना नीन द्याश इन नगरगोळी भी नष्ट माळाईन, अदिक नीन किल्लागोळी केळ्द बुळाईन.
MIC 5:12 ना नीन तंत्र मंत्र अन नाश माळाईन, अदिक नीन दा जादु टोनागोळ मिक्कु ईरतीदील.
MIC 5:13 ना नीन अगुळ मुर्तीगोळ, अदिक नीन लाठगोळ, नीन बीच द टु नष्ट माळाईन; अदिक नी मुंदु टु तान कय इन बनुस्द वस्तुगोळी दण्डवत माळतीदील.
MIC 5:14 ना नीन अशेरा हेसुर इन मूर्ति इक नीन जमीन द टु कित्त बुळाईन, अदिक नीन नगरगोळ्द विनाश माळाईन.
MIC 5:15 अदिक ना राज्य राज्य से जो नान मात केळालव, आंदुर से ना भयंकर क्रोध देल बदला ताकोमाईन.
MIC 6:1 जो मात यहोवा अनतान, अदरी केळी: येदकु पहाळीगोळ मुंद वादविवाद माळ, अदिक टिलागोळ भी नीन केळ सकुल.
MIC 6:2 हे पहाळीगोळा, अदिक हे धरती इन अटल पायवागोळा, यहोवा अन वादविवाद केळी, यतिकी यहोवा अन तान प्रजा अन सांगुळ शिकायत आद, अदिक आव इस्त्राएल से वादविवाद माळतान.
MIC 6:3 “हे नान प्रजा, ना नीन येन बिगळुसीन? याता मात देल ना नीमी दुख कोटीन?
MIC 6:4 ना रा नीनी मिस्त्र द्याश दा टु तेगुकु तंदीन, अदिक दासत्व अन मान्ना दा टु नीनी बिळ्सकु तंदीन; अदिक नीन अगुवाई माळली मूसा, हारून अदिक मरियम इक कळु बुट्टीन.
MIC 6:5 हे नान प्रजा, याद माळ, कि मोआब इन राजा बालाक नीन खिलाप यातोद युक्ति माळदुन, अदिक बोर उन पार बिलाम आऊक येन सम्मति कोट्टुन, अदिक शित्तीम टु गिलगाल ताका अन मातगोळ याद माळ, यदुर देल नी यहोवा अन न्याय इन क्याल्सा सम्स सक्या.”
MIC 6:6 “ना येन हुडुकु यहोवा अन हात्ती होगाईन, अदिक म्याकुच ईरावाळा परमेश्वर उन मुंद बांगाईन? येन ना होमबलि इन साटी ऊंद ऊंद साल इन पाड्डगोळ हुडुकु आऊन हात्ती होगाईन?
MIC 6:7 येन यहोवा हजार म्यांढ्ढागोळ दा टु, या जैतुन याण्णा अन लाखों गांगागोळ देल खुश आदान? येन ना तान अपराध इन प्रायश्चित दा तान पयला पार उक या तान पाप इन बदला दा तान हाळ्द यारीकारा कोळाईन?”
MIC 6:8 हे मंळसा, आव नीनी हेळ बुटान कि वळ्लीद येन आद; अदिक यहोवा नीन से ईदरी बिटकु मात्त येन चाहासतान, कि नी न्याय देल क्याल्सा माळ, अदिक कृपा देल प्यार ईट, अदिक तान परमेश्वर उन सांगुळ नम्रता देल नळु?
MIC 6:9 यहोवा ई नगर इक कारेत्यान, अदिक सम्पूर्ण बुद्धि नीन हेसुर इन अंज्क मानसोद हुन: राजदण्ड इन, अदिक जो अदरी कोळावाळा हुन आऊन मात केळी!
MIC 6:10 येन ईगासताका दुष्ट उन मान्या दुष्टता देल सिक्द धन अदिक स्यांळ्द एपा घृणित हैलेच?
MIC 6:11 येन ना कपट इन तराजु अदिक घटबढ़ इन बटखरा अन झ्वारा हुळकु पवित्र ठहरूस सकतीन?
MIC 6:12 ईलेर पैस्यावाळेर लॉकुर उपद्रव इन क्याल्सा नोळतोगतार; अदिक ईलेर सप्पा ईरावाळेर ख्वाटा माताळतार अदिक आंदुर बाय दा टु छल इन मातगोळ होळताव.
MIC 6:13 ई कारण ना नीनी बडुत बडुत अच घायल माळतीन, अदिक नीन पापगोळ कारण नीनी उजाळ्स बुळतीन.
MIC 6:14 नी तिंद्या, लेकीन तृप्त आगतीदील, नीन व्हाट्टा होततेला अच ईत्तीत; अदिक नी तान संपत्ति हुडुकु नळद्या, लेकीन ऊळ्स सकतीदील, अदिक जो येनारा नी ऊळ्स भी कोंड, अदरी ना तलवार नळ्सकु लुटुस बुळाईन.
MIC 6:15 नी बोऊस्या, लेकीन कोय सकतीदील; नी जैतुन इन याण्णा तेगद्या, लेकीन हच सकतीदील; अदिक अंगुर अच्या, लेकीन अंगुर इन रास्सा कुडु सकतीदील.
MIC 6:16 यतिकी आंदुर ओम्री इन विधीगोळ मा, अदिक अहाब उन घराना अन सप्पा क्याल्सागोळ मा नळुतार; अदिक नीव आंदुर युक्ति इन अनुसार नळुतीर; इदुसाटी ना नीनी ऊजाळ्स बुळाईन, अदिक ई नगर इन ईरावाळेर मा थापळ्या मुरसुसाईन, अदिक नीव नान प्रजा अन नामधराई सयन माळीर.
MIC 7:1 हाय नान मा! यतिकी ना आ मंळसा अन घाई आगेगीन जो ब्यासक्या अन काय कोयदुर मा, या मिग्द अंगुर आया समय इन आखरी दा होट बरूल, नानी रा पिकुस्द अंजीर इन लालसा ईरोद, लेकीन तिनोर साटी यातोदु गुच्छा ईतीदील.
MIC 7:2 भक्त लॉकुर धरती मा टु नष्ट आगेग्यार, अदिक मंळसागोळ दा ऊंद भी सीधा मंळसा ईतीदील; आंदुर सप्पा च्या सप्पा कोन्नोर साटी घात हचतार, अदिक जार हचकु तान तान वार्टुर्द आहेर माळतार.
MIC 7:3 आंदुर तान येढ्ढु कय देल मन हचकु बुराई माळतार; हाकिम घुस बेळतान, अदिक न्यायी घुस ताकोमली तयार ईरतान, अदिक क्याचानववाळा तान मन इन दुष्टता वर्णन माळतान; ई प्रकार देल आंदुर सप्पा मिळुस्कु जालसाजी माळतार.
MIC 7:4 आंदुर दा टु जो सब से उत्तम आन, आव मुळ्ल इन झाळी घाई दुखदाई आन, जो सब से सीधा आन, आव मुळ्ल इन वाळागोळ से भी बेकार आन. नीन कायावाळेर माताळ्द दिन मतलब नीन दण्ड इन दिन होट बंदाद. ईग आंदुर जल्दी चमकुसेदार.
MIC 7:5 मान्ना हातळोर मा विश्वास माळबाळी, परममित्र मा भी भरोसा ईटबाळी; उलटा तान हिंग्स उन से भी सांभाळ्सकु माताळेतीर.
MIC 7:6 यतिकी पार आप्प उन अपमान माळतान, अदिक पोर मोय इन, अदिक सास्स आत्ता अन खिलाप येळतार; मंळसा अन दुश्मन आऊन मान्या नोरा जात इन लॉकुर ईरतार.
MIC 7:7 लेकीन ना यहोवा दी नोळतेला ईराईन, ना तान उद्धारकर्ता परमेश्वर उन हादी कायतेला ईराईन; नान परमेश्वर नान केळ्यान.
MIC 7:8 हे नान दुश्मनगोळ, नान मा आनन्द माळबाळ; यतिकी ह्यांग ना बिळाईन हांगा येळाईन; अदिक ह्यांग ना अंधार दा बिळाईन हांगा यहोवा नान साटी ऊजुळ इन क्याल्सा कोट्टान.
MIC 7:9 ना यहोवा अन खिलाप पाप माळीन, ई कारण ना आ समय ताका आऊन क्रोध इक सयन माळाईन यागासताका कि आव नान मुकदमा लळुस्कु नान न्याय चुकुस कोमालुन. आ समय आव नानी ऊजुळ दा तेगुकु तंदान, अदिक ना आऊन न्याय नोळाईन.
MIC 7:10 आग नान दुश्मनगोळ जो नान से ईद अनतार कि नीन परमेश्वर यहोवा येल ईत्तुन, आक भी आऊक नोळ्यार अदिक शरम देल मार्रा होचकोंडार. ना तान कण्णगोळ देल आऊक नोळाईन; आग आक हादी इन केसुर घाई हार्सकु आदार.
MIC 7:11 नीन वाळागोळ्द कटोद दिन आऊन सीमा वाळुस्कु आदीत.
MIC 7:12 आ दिशी अश्शूर से, अदिक मिस्त्र अन नगरगोळ से अदिक मिस्त्र अदिक फरात गांगा अन बीच इन, अदिक समुद्र समुद्र अदिक पहाळी पहाळी इन बीच इन द्याशगोळ दा टु लॉकुर नीन हात्ती बंदार.
MIC 7:13 तरी भी धरती मा ईरावाळेर कारण अदिक आंदुर बेकार क्याल्सागोळ कारण उजाळ अच ईत्तीत.
MIC 7:14 नी कोल हुडुकु तान प्रजा अन चरवाही माळ, मतलब तान निज भाग इन आळ मर्रीगोळ्द, जो कर्म्मेल इन आळी दा ब्यार्र कुरताव; अव पूर्वकाल इन घाई बाशान अदिक गिलाद द्याश दा आळ्सतेला ईरूल.
MIC 7:15 ह्यांग कि मिस्त्र द्याश दा टु नीन होटकु बरोद दिनगोळ दा, हांगा ईग ना आऊक अदभुत क्याल्सा तोर्साईन.
MIC 7:16 सप्पा राज्य नोळकु तान सप्पा पराक्रम इन बारा दा सरमुस्यार; आंदुर तान मार्रा अक कय देल छुपुस्यार, अदिक आंदुर कीवगोळ बयरा आगेदव.
MIC 7:17 आंदुर हाव घाई मुण्ण नेक्यार, अदिक जमीन मा रेंग्सावाळा जन्तुगोळ घाई तान ख्वादारा दा टु नळ्गतेला होट्टार, आंदुर नाम परमेश्वर यहोवा अन हात्ती नळ्गतेला बंदार, अदिक आंदुर नीन से अंज्यार.
MIC 7:18 नीन घाई परमेश्वर येल आन जो अन्याय इक क्षमा माळुल अदिक तान निज भाग इन ऊळ्द लॉकुर्द अपराध इक मुच्‍च बुळुल? आव तान क्रोध इक हमेशा बनुस्कु ईरालुन, यतिकी आव करुणा से प्रीती ईटतान.
MIC 7:19 आव मात्त नाम मा दया माळ्यान, अदिक नाम अन्याय इन क्याल्सागोळी दुर माळ्यान. नी आंदुर सप्पा पापगोळी गयरा समुद्र दा हाक्क बुट्या.
MIC 7:20 नी याकूब उन बारा दा आ सच्चाई, अदिक अब्राहम उन बारा दा आ करुणा पुरा माळ्या, यदुर किर्या नी प्राचीनकाल इन दिनगोळ टु हुडुकु ईगासताका नाम पुर्वजगोळ से तिनतेला बंद्या.
MAT 1:1 अब्राहम उन पार, दाऊद उन पार, यीशु मसीह अन्द वंशावली ई प्रकार देल आद.
MAT 1:2 अब्राहम देल इसहाक पैदा आदुन, इसहाक देल याकूब, याकूब देल यहूदा अदिक आऊन वार्टुर पैदा आदुर.
MAT 1:3 यहूदा अदिक तामार देल फिरिस अदिक जोरह पैदा आदुर, फिरिस देल हिस्त्रोन, अदिक हिस्त्रोन देल एराम पैदा आदुन.
MAT 1:4 एराम देल अम्मीनादाब पैदा आदुन, अम्मीनादाब देल नहशोन, अदिक नहशोन देल सलमोन पैदा आदुन.
MAT 1:5 सलमोन अदिक राहाब देल बोअज पैदा आदुन, बोअज अदिक रूत देल ओबेद, अदिक ओबेद देल यिशै पैदा आदुन.
MAT 1:6 अदिक यिशै देल दाऊद राजा पैदा आदुन. अदिक दाऊद देल सुलैमान, आ आर्त इन व्हाट्या टु पैदा आदुन जो पयले उरिय्याह अन्द हिंग्स ईरोर.
MAT 1:7 सुलैमान देल रहबाम पैदा आदुन, रहबाम देल अबिय्याह, अदिक अबिय्याह देल आसाफ पैदा आदुन.
MAT 1:8 आसाफ देल यहोशाफात पैदा आदुन, यहोशाफात देल योराम, अदिक योराम देल उज्जियाह पैदा आदुन.
MAT 1:9 उज्जियाह देल योताम पैदा आदुन, योताम देल आहाज, अदिक आहाज देल हिजकिय्याह पैदा आदुन.
MAT 1:10 हिजकिय्याह देल मनश्शिह पैदा आदुन, मनश्शिह देल आमोन, अदिक आमोन देल योशिय्याह पैदा आदुन.
MAT 1:11 अदिक बाक इस्त्राएल इन लॉकुरी बंदी माळकु बेबीलोन ओया होती योशिय्याह देल यकुन्याह, अदिक आऊन वार्टुर पैदा आदुर.
MAT 1:12 बंदी आगकु बेबीलोन पोहचुसदुर बाद्दा यकुन्याह देल शालतिएल पैदा आदुन, अदिक शालतिएल देल जरूब्बाबिल पैदा आदुन.
MAT 1:13 जरूब्बाबिल देल अबीहूद पैदा आदुन, अबीहूद देल इल्याकीम, अदिक इल्याकीम देल अजोर पैदा आदुन.
MAT 1:14 अजोर देल सदोक पैदा आदुन, सदोक देल अखीम, अदिक अखीम देल इलीहूद पैदा आदुन,
MAT 1:15 इलीहूद देल इलियाजार पैदा आदुन, इलियाजार देल मत्‍तान, अदिक मत्‍तान देल याकूब पैदा आदुन.
MAT 1:16 याकूब देल यूसुफ पैदा आदुन, जो मरियम इनव गांड्ड ईरोन, अदिक मरियम देल यीशु जो मसीह कहलुस्तान, पैदा आदुन.
MAT 1:17 ईद प्रकार अब्राहम टु हुळकु दाऊद ताका चौदा पीढ़ी आदव, अदिक दाऊद टु बेबीलोन इक बंदी आगकु पोहचुस्कु आगासताका चौदा पीढ़ी, अदिक बंदी आगकु बेबीलोन इक पोहचुस्कु आगा समय टु मसीह ताका चौदा पीढ़ी आदव.
MAT 1:18 यीशु मसीह अन्द जनम इत्‍ता प्रकार देल आत, कि याग आऊन मोय मरियम इन सगाई यूसुफ उन सांगुळ आगेत, रा आंदुर्द मिलन आगोर से पयले अच आक पवित्र आत्मा दी टु व्हाट्या दी ईरोर.
MAT 1:19 इदुरसाटी आकिन गांड्ड यूसुफ जो न्यायी मंळसा ईरोन अदिक आकी बदनाम माळोद ईला चाहासोन, आकी चुपचाप बिट्ट बुळोद विचार माळदुन.
MAT 1:20 याग आव ईव मातगोळ्द सोच दा का ईरोन रा प्रभु उन स्वर्गदूत आऊक कान्सा दा कांळ्सकु अनली कुरतुन, “हे यूसुफ! दाऊद उन पार, नी मरियम उक हिंग्स माळली अंजबाळ, यतिकी जो आकिन गर्भ दा आद, अद पवित्र आत्मा दी टु आद.
MAT 1:21 आक पार उक हाळदार अदिक नी आऊन हेसुर यीशु ईटेत, यतिकी आव तान लॉकुरी आंदुर पापगोळ देल बिळस्यान.”
MAT 1:22 ईद सब इदुरसाटी आत कि जो वचन प्रभु भविष्यवक्ता अन्द द्वारा अंदिदुन, अद पुरा आगुल:
MAT 1:23 “ऊंद कुवारा पोर व्हाट्या दी ईत्‍तार अदिक ऊंद पार उक हाळदार, अदिक आऊन हेसुर इम्मानुएल ईटकु आदीत,” यदुर्द मतलब आद, “परमेश्वर नाम सांगुळ.”
MAT 1:24 आग यूसुफ जप दा टु यदकु प्रभु अन्द स्वर्गदूत उन आग्या अन्द अनुसार मरियम उक हिंग्स माळकु मान्या तंदुन;
MAT 1:25 अदिक यागासताका आक पार हाळदिदील आगासताका यूसुफ आकिन हात्‍ती होगीदिल: अदिक आव आ पार उन हेसुर यीशु ईटदुन.
MAT 2:1 हेरोदेस राजा अन्द दिनगोळ दा याग यहूदिया प्रदेश इन बैतलहम ऊरा यीशु उन जनम आत, रा नोळी, पूर्व दिशा टु हापाळ सा जानकार लॉकुर यरूशलेम दा बंदकु केळली कुरतुर,
MAT 2:2 “यहूदीगोळव राजा यार्द जनम आग्याद, यल आन? यतिकी नाव पूर्व दा आऊन तारा नोळेव, अदिक नाव आऊक प्रणाम माळली बंदेव.”
MAT 2:3 ईद केळकु हेरोदेस राजा अदिक आऊन सांगुळ पुरा यरूशलेम घबरूसेत.
MAT 2:4 आग आव यहूदी समाज इन सप्पा प्रधान याजकगोळी अदिक शास्त्रीगोळी जमा माळकु आंदुर से केळदुन, “कि मसीह अन्द जनम यल आग पायजे.”
MAT 2:5 आंदुर आऊन से अंदुर, “यहूदिया अन्द बैतलहम दा, यतिकी परमेश्वर उन भविष्यवक्ता अन्द द्वारा ईद लिख्सकु आग्याद:
MAT 2:6 ‘हे बैतलहम, नी जो यहूदा अन्द प्रदेश दा आय, नी यातोदारा भी रीति देल यहूदा अन्द अधिकारीगोळ दा सब से स्याणेव हैलेच; यतिकी नीन दा टु ऊंद अधिपती होट्टान, जो नान प्रजा इस्त्राएल इन रखवाली माळ्यान.’”
MAT 2:7 आग हेरोदेस जानकारगोळी चुपचाप कारूकु आंदुर से केळदुन कि तारा ठीक याता समय दा कांळ्सीत,
MAT 2:8 इदुरसाटी आव ईद अनकु आंदरी बैतलहम कळुदुन, “होगी, आ पार उन बारा दा बेस-बेस मालूम माळी, अदिक याग आव सिक्‍केदान रा नानी बातणी कोळी ताकी ना भी बंदकु आऊक प्रणाम माळाईन.”
MAT 2:9 आंदुर राजा अन्द मात केळकु होटोदुर, अदिक जो तारा आंदुर पूर्व दी नोळीदुर अदा तारा आंदुर मुंद-मुंद नळोद; अदिक यल चिग्द ईरोद, आ जागा अन्द म्याकुच पोहचुस्कु रूकसेत.
MAT 2:10 आ तारा अक नोळकु आंदुर हापाळ खुश आदुर.
MAT 2:11 आंदुर आ मान्ना दा पोहचुस्कु आ पार उक आऊन मोय मरियम इन सांगुळ नोळदुर, अदिक बांगकु आ पार उक प्रणाम माळदुर, अदिक तान-तान झ्वारा खोल्सकु आऊक व्हान्ना, लुबान, अदिक गन्धरस इन भेंट येर्सदुर.
MAT 2:12 आग परमेश्वर कान्सा दा आंदरी चेतावनी कोटकु ईद अंदुन कि हेरोदेस उन हात्‍ती मात्‍त होगबाळेतीर, आंदुर दुसरा हादी देल तान द्याश दा होटोदुर.
MAT 2:13 आंदुर होगदुर बाद्दा प्रभु उन ऊंद स्वर्गदूत कान्सा दा यूसुफ उक कांळ्सकु अंदुन, “येळ, आ पार उक अदिक आऊन मोय इक हुळकु मिस्त्र द्याश इक ओळेग; अदिक यागासताका ना नीन से अनालीन, आगासताका अल्या ईरेत; यतिकी हेरोदेस ई पार उक ढुंढ़सेत्यान कि आऊक कोन्सुस बुळुल.”
MAT 2:14 आग आव ईळ्लकी इच यदकु पार अदिक आऊन मोय इक हुळकु मिस्त्र द्याश इक ओळेदुन,
MAT 2:15 अदिक हेरोदेस उन सायास्ताका अल्या ईत्‍तुन. इदुरसाटी कि अद वचन जो प्रभु भविष्यवक्ता अन्द द्वारा अंदिदुन अद पुरा आगुल: “ना तान पार उक मिस्त्र द्याश टु कार्सदिन.”
MAT 2:16 याग हेरोदेस ईद नोळदुन, कि तारागोळ्द बारा दा जानकारी ताकोमावाळेर जानकार लॉकुर आऊन सांगुळ ध्वाका माळदुर, आग आव सिट्ट देल बेक्‍की घाई आगेदुन, अदिक लॉकुरी कळुकु जानकार लॉकुर द्वारा तारा नोळोद समय इन अनुसार बैतलहम अदिक अदुर आसपास इन जागा अन्द सप्पा चिकोरी जो येढ्ढ वर्ष इनोर या आंदुर से स्याणेर ईरोर, कोन्सुस बुटुन.
MAT 2:17 आग अद वचन जो यिर्मयाह भविष्यवक्ता अन्द द्वारा अंदकु आगीत, अद पुरा आत:
MAT 2:18 “रामाह ऊर दा दुख भरा ऊंद आवाज केळ बत्‍त, वोरलोद अदिक हापाळ गयरा विलाप इन ईरोद; राहेल तान चिकोर साटी वोरलोर, अदिक शांत आगोद ईला चाहासोर, यतिकी ईग आ चिकोर सोतोगीदुर.”
MAT 2:19 हेरोदेस उन सोत्‍तुर बाद्दा, प्रभु उन स्वर्गदूत मिस्त्र दा यूसुफ उक कान्सा दा कांळ्सकु अंदुन.
MAT 2:20 “येळ, पार उक अदिक आऊन मोय इक हुळकु इस्त्राएल इन द्याश दा होटोग, यतिकी जो पार उन जीव ताकोमोद चाहासोर, आंदुर सोतोग्यार.”
MAT 2:21 यूसुफ येद्दुन, अदिक पार उक अदिक आऊन मोय इक सांगुळ हुळकु इस्त्राएल इन द्याश दा बंदुन.
MAT 2:22 लेकीन ईद केळकु कि अरखिलाउस तान आप्प हेरोदेस उन जागा दा यहूदिया मा राज्य माळेत्यान, अल होगोर से अंजदुन. बाक कान्सा दा परमेश्वर उन दी टु बातणी ताकोमकु गलील प्रदेश दा होटोदुन.
MAT 2:23 आव अल नासरत हेसुर इन नगर दा होगकु कुरतुन, ताकी अद वचन पुरा आगुल, जो भविष्यवक्तागोळ द्वारा अंदकु आगीत: “आव नासरी कहलुस्यान.”
MAT 3:1 आ दिनगोळ दा बपतिस्मा कोळावाळा यूहन्ना बंदकु यहूदिया अन्द आळी दा ईद प्रचार माळली कुरतुन:
MAT 3:2 “पापगोळ देल मन तिर्गुसी, यतिकी स्वर्ग इन राज्य हात्‍ती होट बंदाद.”
MAT 3:3 इव आवा हुन यार्द मातकात यशायाह भविष्यवक्ता अन्द द्वारा माळकु आग्याद: “आळी दा ऊंद कारावाळा अन्द आवाज केळ बरेत्याद, कि प्रभु उन हादी तयार माळी, आऊन सळकगोळी सरका माळी.”
MAT 3:4 ईव यूहन्ना ऊँट इन चुट्टीगोळ्द फळक्या हाक्‍कु अदिक नेळु मा तोगुल इन पट्टा कटकु ईरतोगोन. फाफा अदिक आळी दाकळोद शयद तिनतोगोन.
MAT 3:5 आग यरूशलेम अदिक पुरा यहूदिया प्रदेश, अदिक यरदन गांगा अन्द आस-पास इन सप्पा क्षेत्र अन ईरावाळेर लॉकुर आऊंद हात्‍ती बंदकु जमा आदुर.
MAT 3:6 आंदुर तान-तान पापगोळी मान्सकु यरदन गांगा दा आऊन से बपतिस्मा ताकोंडुर.
MAT 3:7 याग आव हापाळ सा फरीसी अदिक सदूकीगोळी बपतिस्मा ताकोमोर साटी तान हात्‍ती बर्त नोळदुन, रा यूहन्ना अंदुन, “हे हाव इन चिकोरा, याव नीमी चतरा माळ बुटुन कि परमेश्वर उन बरावाळा प्रकोप देल ओळी?
MAT 3:8 इदुरसाटी हिंग मातगोळ माळी जो नीम पश्चाताप इक तोर्सतद,
MAT 3:9 अदिक तान-तान मन दा ईद विचार माळबाळी कि नाम आप्प अब्राहम हुन; यतिकी ना नीम से अनतीन कि परमेश्वर ई कल्लगोळ देल भी अब्राहम उन साटी औलाद पैदा माळ सकतान.
MAT 3:10 ईग कोळ्ली मार्रगोळ्द जळी मा ईटकु आद, इदुरसाटी जो-जो मार्र वळ्लीद काय तराल, अदरी कळकु अदिक बेक्‍की दा हाक्‍कु आदीत.
MAT 3:11 ना रा नीर देल नीमी मन तिर्गुसोद बपतिस्मा कोळतीन, लेकीन जो नान बाद्दा बरावाळा आन, आव नान से ताकतवर आन; ना रा आऊन केरू तेगा लायक भी हैलेच. आव नीमी पवित्र आत्मा अदिक बेक्‍की देल बपतिस्मा कोट्टान.
MAT 3:12 आऊन मार्र आऊन कय दा आद, अदिक आव तान केई वळ्लीद तरीका देल साफ माळ्यान, अदिक तान गोदीगोळी रा ढ्वाला दा जमा माळ्यान, लेकीन भूसा अन्द गवान्डा अक आ बेक्‍की दा होताक्यान जो यागलु नुनाल्द.”
MAT 3:13 आ समय यीशु गलील टु यरदन गांगा अन्द किनारा मा बपतिस्मा कोळावाळा यूहन्ना अन्द हात्‍ती आऊन से बपतिस्मा ताकोमली बंदुन.
MAT 3:14 लेकीन यूहन्ना ईद अनकु आऊक रोक्सली कुरतुन, “नानी रा नींद कय देल बपतिस्मा ताकोमोद जरवत आद, अदिक नी नान हात्‍ती बंद्या?”
MAT 3:15 यीशु आऊक ईद उत्‍तर कोट्टुन, “ईग रा हिंग अच आगगोळ, यतिकी नामी ईदा रीति देल सप्पा न्यायीपन इन क्याल्सागोळी पुरा माळोद उचित आद.” आग यूहन्ना आऊन मात मान्स कोंडुन.
MAT 3:16 अदिक यीशु बपतिस्मा ताकोमकु तुरन्त नीर दा टु म्याकुच बंदुन, अदिक अदा समय आऊन साटी स्वर्ग खुल्सेत, अदिक आव परमेश्वर उन आत्मा अक कबूतर इन घाई ईळुतेला अदिक तान म्याकुच बरतेला नोळदुन.
MAT 3:17 अदिक स्वर्ग टु ईद आकाशवाणी आत “ईव नान प्रिय पार हुन, ईऊन से ना हापाळ खुश आईन.”
MAT 4:1 आग पवित्र आत्मा यीशु उक सुनसान जागा दा ओईत ताकी शैतान उन द्वारा आऊन परीक्षा आगुल.
MAT 4:2 आव चालीस दिन, अदिक चालीस ईळ्लक, उपास माळ कोंडुन, आग आऊक हशु हत्‍त.
MAT 4:3 आग परखुसावाळा शैतान हात्‍ती बंदकु आऊन से अंदुन, “अगर नी परमेश्वर उन पार हुय, रा अंदकोम, कि ई कल्ल रोट्टगोळ बंसेगुल.”
MAT 4:4 यीशु उत्‍तर कोट्टुन: “शास्त्र दा लिख्सकु आद, ‘मंळसा सिर्फ रोट्टी देल अच जित्‍ता ईरतीदील, लेकीन हर ऊंद वचन देल जो परमेश्वर उन बाय देल होळतद.’”
MAT 4:5 आग शैतान यीशु उक यरूशलेम इन पवित्र नगर दा ओईत अदिक मंदिर इन स्यांडा मा नीदरूस्त,
MAT 4:6 अदिक आऊन से अंत, “अगर नी परमेश्वर उन पार हुय, रा तान तान इक ल्यालमा केळ्दबुळ; यतिकी शास्त्र दा लिख्सकु आद: ‘आव नीन बारा दा तान स्वर्गदूतगोळी आग्या कोट्टान, अदिक आंदुर नीनी कयगोळ दा नेगु कोंडार; ईलारा हिंग आगबाळुल कि नीन कालगोळी कल्ल देल ठेस हत्‍तुल.’”
MAT 4:7 यीशु आऊन से अंदुन, शास्त्र दा ईद भी लिख्सकु आद: “नी प्रभु तान परमेश्वर उन परीक्षा माळबाळ.”
MAT 4:8 बाक शैतान यीशु उक ऊंद हापाळ ऊँचा पहाळी मा ओईत अदिक पुरा दुनिया अन्द राज्य अदिक अदुर्द वैभव तोर्सकु,
MAT 4:9 आग शैतान यीशु से अंत, “अगर नी बांगकु नानी प्रणाम माळ्या, रा ना ईद सब कुछ नीनी कोट बुळाईन.”
MAT 4:10 आग यीशु आ शैतान उक उत्‍तर कोट्टुन, “हे शैतान दुर आगेग, यतिकी शास्त्र दा लिख्सकु आद: नी तान प्रभु परमेश्वर उन भक्ति माळ, अदिक सिर्फ आऊंदा उपासना माळ.”
MAT 4:11 अदिक नोळी शैतान आऊन हात्‍ती टु होटोत, अदिक स्वर्गदूत बंदकु आऊन स्यावा माळली कुरतुर.
MAT 4:12 याग यीशु ईद केळदुन कि बपतिस्मा कोळावाळा यूहन्ना बंदी माळकु आगेग्यान, रा आव गलील इक होटोदुन.
MAT 4:13 अदिक आव नासरत इक बिटकु कफरनहूम नगर दा बंदुन, जो झील इन किनारा जबूलून अदिक नप्ताली इन द्याश दा आद, होगकु ईरली कुरतुन;
MAT 4:14 ताकी जो यशायाह भविष्यवक्ता अन्द द्वारा अंदकु आगीत, अद पुरा आगुल:
MAT 4:15 “जबूलून अदिक नप्ताली इन द्याश, झील इन हादी देल यरदन इन आप्पाटी, गैरयहूदीगोळ द्याश गलील दा!
MAT 4:16 जो लॉकुर अंधार जिंदगी माळोर, आंदुर ऊंद धोळ्द महान ज्योति नोळदुर; अदिक जो मृत्यु उन द्याश अदिक सावली दा कुर्तकु ईरोर, आंदुर मा ज्योति चमकुस्त.”
MAT 4:17 आ समय टु यीशु प्रचार माळोद अदिक ईद अनोद सुरूवात माळदुन, “तान पापगोळ देल मन तिर्गुसी यतिकी स्वर्ग इन राज्य हात्‍ती होट बंदाद.”
MAT 4:18 गलील इन झील इन किनारा वयाळतेला यीशु येढ्ढ वार्टुरी मतलब शमौन उक जो पतरस कहलुस्तान, अदिक आऊन वार्ट अन्द्रियास उक झील दा जार हाक्त नोळदुन; यतिकी आंदुर मेन हुडावाळेर ईरोर.
MAT 4:19 यीशु आंदुर से अंदुन, “नान हिंद बरी, रा ना नीमी मंळसागोळी ह्यांग परमेश्वर उन राज्य दा तरतार अद कलसाईन.”
MAT 4:20 आंदुर तुरन्त जारगोळी बिटकु आऊन हिंद होटोदुर.
MAT 4:21 अल टु मुंद वाळुसकु, यीशु मात्‍त येढ्ढ वार्टुरी मतलब जब्दी इन पार याकूब अदिक आऊन वार्ट यूहन्ना अक नोळदुन. आंदुर तान आप्प जब्दी इन सांगुळ ड्वांगा मा तान जारगोळी सुधारसोर. आव आंदरी भी कारदुन.
MAT 4:22 आंदुर तुरन्त ड्वांगा अदिक तान आप्प उक बिटकु आऊन हिंद होटोदुर.
MAT 4:23 यीशु पुरा गलील दा वयाळतेला आंदुर्द सभागृहगोळ दा उपदेश कोळोन, अदिक राज्य अन्द खुशखबरी प्रचार माळोन, अदिक लॉकुर्द हर प्रकार इन बिमारगोळी चंगा माळदुन अदिक कमजोरी इक दुर माळतेला ईत्‍तुन.
MAT 4:24 अदिक पुरा सीरिया द्याश दा आऊन यश फैलुसेत; अदिक लॉकुर सब बिमारगोळी जो नाना प्रकार इन बिमारगोळ अदिक दुखगोळ दा जकळुसकु ईरोर, अदिक यारदा दुष्टआत्मागोळ ईरव, अदिक मिर्गीवाळेर अदिक लकवा नोर रोगीगोळी, आऊन हात्‍ती तंदुर अदिक आव आंदरी चंगा माळदुन.
MAT 4:25 गलील अदिक दिकापुलिस, यरूशलेम, यहूदीया अदिक यरदन गांगा अन्द आप्पाटी टु भीळ इन भीळ आऊन हिंद आगेत.
MAT 5:1 यीशु भीळ इक नोळकु पहाळी मा येरेदुन, अदिक याग कुरतोदुन रा आऊन चेलागोळ आऊन हात्‍ती बंदुर.
MAT 5:2 अदिक आव आंदरी ईद उपदेश कोळली कुरतुन:
MAT 5:3 धन्य आर आंदुर, जो मन देल गरीब आर, यतिकी स्वर्ग इन राज्य आंदुर दा आद.
MAT 5:4 “धन्य आर आंदुर, जो शोक माळतार, यतिकी आंदरी दिलासा सिक्‍कीत.
MAT 5:5 धन्य आर आंदुर, जो नम्र आर, यतिकी आंदुर धरती इन वारीसदार आदार.”
MAT 5:6 “धन्य आर आंदुर, जो न्यायीपन इन हस्तकु अदिक निरळ्ककु आर, यतिकी आंदुर संतुष्ट माळकु आदार.”
MAT 5:7 “धन्य आर आंदुर, जो दयालु आर, यतिकी आंदुर मा दया माळकु आदीत.”
MAT 5:8 धन्य आर आंदुर, यार्द मन शुद्ध आव, यतिकी आंदुर परमेश्वर उक नोळ्यार.
MAT 5:9 धन्य आर आंदुर, जो मेल माळावाळेर आर, यतिकी आंदुर परमेश्वर उन चिकोर कहलुस्यार.
MAT 5:10 धन्य आर आंदुर, जो न्यायीपन इन कारण सतुस्कु आगतार, यतिकी स्वर्ग इन राज्य आंदुर्द अच हुन.
MAT 5:11 धन्य आईर नीव, याग मंळसा नान कारण नीम्द अपमान माळ्यान, अदिक सतुस्यान अदिक ख्वाटा माताळ माताळकु नीम्द विरोध दा सब प्रकार इन बुरा मात अंदान.
MAT 5:12 आग खुश अदिक मगन ईरेतीर, यतिकी नीम साटी स्वर्ग दा धोळ्द प्रतिफल आद. यतिकी आंदुर आ भविष्यवक्तागोळी भी जो नीम से पयले ईरोर ईदा रीति देल सतुसीदुर.
MAT 5:13 “नीव पृथ्वी इन ऊप्प हुईर, लेकीन अगर ऊप्प इन स्वाद बिगळुसेदित, रा अद बाक याता चिज देल नमकीन माळकु आदीत? बाक अद यातोदु क्याल्सा अन्द हैलेच, सिर्फ इदुर्द कि व्हार्या भिटकु आगुल अदिक मंळसागोळ्द काल देल मेटकु आगुल.”
MAT 5:14 नीव दुनिया अन्द ज्योति हुईर. जो नगर पहाळी मा बसुस्कु आद अद होचकु ईरसकाल.
MAT 5:15 अदिक लॉकुर दिंग्या होत्‍ताकु बर्तन इन ल्यालमा ईटालुर लेकीन दीवट मा ईटतार, आग अदुर देल मान्ना अन्द सप्पा लॉकुरी ऊजुळ सिकतद.
MAT 5:16 अदा प्रकार नीम ऊजुळ मंळसागोळ्द मुंद चमकुसुल कि आंदुर नीम वळ्लीद क्याल्सागोळी नोळकु नीम आप्प उन, जो स्वर्ग दा आन, बळाई माळुल.
MAT 5:17 “ईद सम्सबाळी, कि ना व्यवस्था या भविष्यवक्तागोळ किताबगोळी नाश माळली बंदीन, नाश माळली ईला, लेकीन पुरा माळली बंदीन.
MAT 5:18 यतिकी ना नीम से खरा माताळतीन, कि यागासताका आकाश अदिक पृथ्वी टलुसेगाल, आगासताका व्यवस्था ऊंद ऊंद मात भी बिना पुरा आग्द टलुसतीदिल.”
MAT 5:19 इदुरसाटी जो यावारा इव स्यांळ्द से स्यांळ्द आग्यागोळ दा टु यातोदारा ऊंद आग्या अक मुरूल, अदिक हांग अच लॉकुरी कल्सुल, आव स्वर्ग इन राज्य दा सप्पा मुंदुर से स्याणेव कहलुस्यान; लेकीन जो यावारा आ आग्यागोळ्द पालन माळ्यान अदिक अवरी कलस्यान, आवा स्वर्ग इन राज्य दा महान कहलुस्यान.
MAT 5:20 यतिकी ना नीम से अनतीन, कि अगर नीम न्यायीपन शास्त्रीगोळ अदिक फरीसीगोळ्द न्यायीपन देल धोळ्द ईरतीदील, रा नीव स्वर्ग इन राज्य दा यागलु प्रवेश माळ सकतीदिल.
MAT 5:21 “नीव केळ कोंडीर, कि पूर्वकाल इन लॉकुर से अंदकु आगीत, कि ‘कोन्न बाळी’ अदिक ‘जो यावारा कोनतान आव कचेरी दा सजा अन्द लायक ईत्‍तान.’
MAT 5:22 लेकीन ना नीम से ईद अनतीन, कि जो यावारा तान वार्ट उन सिट्ट माळ्यान, आव कचेरी दा सजा अन्द लायक ईत्‍तान, अदिक जो यावारा तांद वार्ट उक निकम्मा अंदान आव महासभा दा सजा अन्द लायक ईत्‍तान; अदिक जो यावारा अंदान ‘ये मूर्ख’ आव नरक इन बेक्‍की दा सजा अन्द लायक ईत्‍तान.
MAT 5:23 इदुरसाटी अगर नी तान भेंट वेदी मा तंद्या, अदिक अल नी याद माळ्या, कि नीन वार्ट उन मन दा नीन साटी येनारा विरोध आद,
MAT 5:24 रा तान भेंट अल्या वेदी इन मुंद बिट बुळ, अदिक होगकु पयले तान वार्ट उन से मेल मिलाप माळ अदिक राजी आगकु बर अदिक तान भेंट येर्स.”
MAT 5:25 यागासताका नी तान आरोप हचावाळा अन सांगुळ हादी मा का आय, आऊन से झटपट मेल मिलाप माळकोम ईदारा हिंग आगबाळुल कि आरोप हचावाळा नीनी न्यायाधीश उक सोप्सुल, अदिक न्यायाधीश नीनी कत्‍तीहुडावाळा अक सोप्स बुळुल, अदिक नीनी जयल दा हाक्‍कु आगुल.
MAT 5:26 ना नीन से खरा माताळतीन कि यागासताका नी कवळी-कवळी तुम कोळाल आगासताका अल टु बिळ सकतीदिल.
MAT 5:27 “नीव केळ कोंडीर कि अंदकु आगीत, ‘व्यभिचार माळबाळेतीर.’
MAT 5:28 लेकीन ना नीम से ईद अनतीन, कि जो यावारा यातारा आर्त इक बुरा नजर देल नोळतान आव तान मन दा आकिन से व्यभिचार माळ कोंडुन.
MAT 5:29 अगर नीन ऊम्मा कण्ण नीनी ठोकर तिनसुल, रा अदरी तेगुकु भीट बुळ; यतिकी नीन साटी ईदा वळ्लीद आद कि नीन शरीर दा टु ऊंद अंग नाश आगेगुल अदिक नीन पुरा शरीर नरक दा हाक्‍कु आगबाळुल.
MAT 5:30 अगर नीन ऊमा कय नीनी ठोकर तिन्सतद, रा अदरी कळकु भीट बुळ; यतिकी नीन साटी ईदा वळ्लीद आद कि नीन मय दा टु ऊंद नाश आगुल अदिक नींद पुरा शरीर नरक दा हाक्‍कु आगबाळुल.”
MAT 5:31 “ईद भी अंदकु आगीत, ‘जो यावारा तान हिंग्स उक बिळोद चाहास्यान, रा आकी छोळचिट्टी कोळुल.’
MAT 5:32 लेकीन ना नीम से ईद अनतीन की जो यावारा तान हिंग्स उक व्यभिचार इन शिवाय अदिक दुसरा कारण देल बिट्ट बुळतान, रा आव आकिन से व्यभिचार माळसुसतान; अदिक जो यावारा आ आर्त इन से जो गांड्ड उक बिटकु आर मदा माळतान, रा आव भी व्यभिचार माळतान.”
MAT 5:33 “बाक नीव केळ कोंडीर कि पूर्वकाल इन लॉकुर से अंदकु आगीत, ‘ख्वाटा किर्‍या तिनबाळेतीर, लेकीन प्रभु उन साटी तान किर्‍या अक पुरा माळेतीर.’
MAT 5:34 लेकीन ना नीम से ईद अनतीन कि यागलु किर्‍या तिनबाळेतीर; ना रा स्वर्ग इन, यतिकी अद परमेश्वर उन सिंहासन हुन;
MAT 5:35 ना धरती अन्द, यतिकी अद आऊन कालगोळ्द पायदान हुन; ना यरूशलेम इन, यतिकी अद महान राजा अन्द नगर हुन.
MAT 5:36 तान ताल्ला अन्द भी किर्‍या तिनबाळेतीर यतिकी नीव ऊंद चुट्टी इक भी ना बिळीद, ना करीद माळ सकतीर.
MAT 5:37 लेकीन नीम्द मात ‘हव’ इन ‘हव,’ या ‘ईला’ अन्द ‘ईला’ आगुल; यतिकी जो येनारा इदुर से यक्कुल आगतद अद बुराई देल आगतद.”
MAT 5:38 “नीव केळ कोंडीर कि अंदकु आगीत, ‘कण्ण इन बदला कण्ण, अदिक हल्ल इन बदला हल्ल.’
MAT 5:39 लेकीन ना नीम से ईद अनतीन कि जो नीम से बुरा व्यवहार माळतान आऊन सामना माळबाळेतीर; लेकीन जो यावारा नीम्द ऊम्मा गाल्ला मा क्याबरा बळदान, रा आऊन दी दुसरा गाल्ला भी तिर्गुस बुळी.
MAT 5:40 अगर यावारा नीम मा जबरदस्ती माळकु नीम्द कुळता बेळोद चाहास्यान, रा आऊक कोट भी कोट्ट बुळी.
MAT 5:41 जो यावारा नीमी कोस तिम जागा दा वोतान, रा आऊन सांगुळ येढ्ढ कोस होटोग.
MAT 5:42 जो यावारा नीम से बेळ्यान, आऊक कोळी; अदिक जो नीम से उदार बेळोद चाहासतान, आऊन से बाय तिर्गुसबाळी.”
MAT 5:43 “नीव केळ कोंडीर कि अंदकु आगीत, ‘तान मान्ना हातळोर से प्यार ईटेतीर, अदिक दुश्मनगोळ से दुश्मनी.’
MAT 5:44 लेकीन ना नीम से ईद अनतीन कि तान दुश्मनगोळ से प्यार ईटी अदिक जो नीमी सतुस्तार आंदुर साटी प्रार्थना माळी,
MAT 5:45 यदुर देल नीव तान स्वर्गीय आप्प उन औलाद ठहरूसीर यतिकी आव तान सुर्य वळ्लीद अदिक बुरा येढ्ढु मा उदय माळतान, न्यायी अदिक अन्यायी येढ्ढु मा नीर बरसुस्तान.
MAT 5:46 यतिकी अगर नीव तान प्यार इट्टावाळेर से अच प्यार ईट्टीर, रा नीम साटी येन फल आदीत? येन कर ताकोमावाळेर भी हिंगा माळालुर?”
MAT 5:47 “अगर नीव सिर्फ तान वार्टुर्द अच भलाई माळीर, रा यातोद धोळ्द क्याल्सा माळतीर? येन गैरयहूदी लॉकुर भी हिंगा माळालुर?
MAT 5:48 इदुरसाटी नीव सिद्ध आगी, ह्यांग नीमव स्वर्गीय आप्प सिद्ध आन.”
MAT 6:1 “सावधान ईरी! नीव मंळसागोळी तोरसोर साटी तान न्याय इन क्याल्सा माळबाळेतीर, ईलारा नीव तान स्वर्गीय आप्प उन से येनु उच प्रतिफल ताकोम सकतीदिल.”
MAT 6:2 “इदुरसाटी याग नीव दान माळी, रा तान मुंद सैनाई मुर्सुसबाळी, ह्यांग कपटी लॉकुर, सभागोळ अदिक गलीगोळ दा माळतार, ताकी लॉकुर आंदुर बळाई माळुल. ना नीम से खरा माताळतीन कि आंदुर तान प्रतिफल ताकोम कोंडार.
MAT 6:3 लेकीन याग नीव दान माळी, रा जो नीम ऊम्मा कय माळतद, अद नीव तान डाक्या कय इक मालूम नळुगोळ बाळेतीर.
MAT 6:4 कि नीम दान होचकु ईरूल, अदिक आग नीम आप्प जो होचकु नोळतान, नीमी प्रतिफल कोट्टान.”
MAT 6:5 “याग नीव प्रार्थना माळीर, रा कपटीगोळ घाई आगबाळी, यतिकी लॉकुरी तोरसोर साटी सभागृह दा अदिक सळक इन मोळ मा निदुरकु प्रार्थना माळोद आंदरी वळ्लीद हततद. ना नीम से खरा माताळतीन कि आंदुर तान प्रतिफल ताकोम कोंडार.
MAT 6:6 लेकीन याग नीव प्रार्थना माळी, रा तान कमरा दा होगी; अदिक कवाळ बंद माळकु तान आप्प उन से गुप्त दा प्रार्थना माळीर. आग नीम आप्प जो होचकु नोळतान नीमी प्रतिफल कोट्टान.”
MAT 6:7 प्रार्थना माळाहोती गैरयहूदीगोळ घाई घळी-घळी माताळ बाळेतीर, यतिकी आंदुर सोचतार कि आंदुर्द हापाळ माताळदुर देल आंदुर्द केळकु आदीत.
MAT 6:8 इदुरसाटी नीव आंदुर्द घाई आगबाळी, यतिकी नीम आप्प नीम बेळा से पयला अच जान्सतान कि नीम येन येन जरवतगोळ आव.
MAT 6:9 इदुरसाटी नीव ईत्‍ता रीति देल प्रार्थना माळतोगी: “हे नाम आप्प, नी जो स्वर्ग दा आय; नीन हेसुर पवित्र मान्सकु आगुल.
MAT 6:10 दुनिया दा नीन राज्य बरूल. नीन इच्छा ह्यांग स्वर्ग दा पुरा आगताव, हांग अच पृथ्वी मा भी आगुल.
MAT 6:11 नाम हागुल तिर्मुद रोट्टी ईंद नामी कोळ.
MAT 6:12 अदिक यात्‍ता प्रकार देल नाव तान अपराधीगोळ माफ माळेव, हांग अच नी भी नाम पापगोळी माफ माळ.
MAT 6:13 अदिक नामी परीक्षा दा तरबाळ, लेकीन बुराई देल ऊळ्स.”
MAT 6:14 “इदुरसाटी अगर नीव मंळसागोळ्द अपराध माफ माळीर, रा नीम स्वर्गीय आप्प भी नीमी माफ माळ्यान.
MAT 6:15 अदिक अगर नीव मंळसागोळ्द अपराध माफ माळतीदील, रा नीम स्वर्गीय आप्प भी नीमव अपराध माफ माळतीदील.”
MAT 6:16 “याग नीव उपास माळीर, रा कपटीगोळ घाई नीम मार्रा मा उदासी ईरबाळुल, यतिकी आंदुर तान मार्रा हांग अच माळकु ईटतार, यतिकी लॉकुर आंदरी उपासी समसुल. ना नीम से खरा माताळतीन कि आंदुर तान प्रतिफल ताकोम कोंडार.
MAT 6:17 लेकीन याग नीव उपास माळीर रा तान ताल्ला मा याण्णा ऊदी अदिक मार्रा तोळी,
MAT 6:18 ताकी लॉकुर ईला लेकीन नीन आप्प जो गुप्त आन, नीनी उपासी जान्सुल ई दशा दा नीन आप्प जो गुप्त कर्मगोळी नोळकु, नीनी अऊर्द प्रतिफल कोट्टान.”
MAT 6:19 “तान साटी पृथ्वी मा धन जमा माळबाळेतीर, यल किळा अदिक जंग नाश माळताव, अदिक यल काळ्लुर तिजोरी वडुतार अदिक काळ्लपनी माळतार.
MAT 6:20 लेकीन तान साटी स्वर्ग दा धन जमा माळी, यल न रा किळा, अदिक जंग नाश माळीत, अदिक यल काळ्लुर ना तिजोरी वळदार अदिक ना चोरी माळ्यार.
MAT 6:21 यतिकी यल नीम धन आद अल नीम मन भी हतकु ईत्‍तीत.”
MAT 6:22 “नीन मय इन दिंग्या कण्ण हुन: इदुरसाटी अगर नीन कण्ण निर्मल आव रा नीन सप्पा मय भी ऊजुळ इन घाई आदीत.
MAT 6:23 लेकीन अगर नीन कण्ण बुरा ईरूल, रा नीन पुरा मय भी अंधकारमय आदीत; ईद कारण अद ऊजुळ जो नीन दा आद अगर अंधकारमय आद रा अद अंधार याट खोल आदीत!”
MAT 6:24 “यावारा मंळसा येढ्ढ स्वामीगोळ्द स्यावा माळ सकालुन, यतिकी आव ऊंद मंळसा से दुश्मनी अदिक दुसरा मंळसा से प्यार ईट्यान, या ऊंद से मेल मिलाप माळ्यान अदिक दुसरा मंळसा अक नीच जानस्यान. नीव परमेश्वर अदिक धन येढ्ढु स्यावा सांगुळल्या माळ सकालीर.”
MAT 6:25 “इदुरसाटी ना नीम से अनतीन कि तान जीवा अन्द साटी ईद चिन्ता माळबाळी कि नाव येन तिनदेव अदिक येन कुळदेव; अदिक तान मय इन साटी फळक्यागोळ्द चिन्ता माळबाळी. येन जीव भोजन देल, अदिक मय फळक्यागोळ देल अनमोल हैलेच?
MAT 6:26 आकाश ईनव पक्षीगोळी नोळी! अव ना बींजा हचताव, ना कोयताव, अदिक ना तान तिना जागा दा संगरूस्कु ईटताव: तरी भी नीम स्वर्गीय आप्प अवरी पाल्सतान. येन नीम किमत अऊर से यक्कुल हैलेच?
MAT 6:27 नीम दा टु हिंग याव आन, जो चिन्ता माळकु तान जिंदगी दा ऊंद घळी भी वाळुस सकतान?”
MAT 6:28 “अदिक फळक्यागोळ साटी येती चिन्ता माळतीर? आळी दाकळव फूलगोळ मा ध्यान माळी कि अव ह्यांग वाळुसताव; अव ना रा मयनत माळताव, ना तान साटी फळक्यागोळ माळताव.
MAT 6:29 तरी भी ना नीम से अनतीन कि सुलैमान राजा भी, तान पुरा जीवन दा अऊर दा टु यारदु घाई कपळागोळ हाक्‍कु ईला ईरोन.
MAT 6:30 इदुरसाटी याग परमेश्वर मैदान इन काड्डा अक, जो ईंद आद अदिक नाळ बेक्‍की दा झोक्सकु आदीत, हिंग कपळा हाकसुसतान, रा हे अल्पविश्वासीगोळा, आव नीमी ईऊर से वळ्लीद येती हाकसुसतिदिल?
MAT 6:31 “इदुरसाटी नीव विचार माळकु ईद अनबाळी कि नाव येन तिनदेव, या येन कुळदेव, या येन हाक्केव.
MAT 6:32 यतिकी गैरयहूदी ई सप्पा वस्तुगोळ्द खोज दा ईरतार, पर नीम स्वर्गीय आप्प जान्सतान कि नीमी ई सप्पा वस्तुगोळ्द जरवत आद.
MAT 6:33 इदुरसाटी पयले नीव परमेश्वर उन राज्य अदिक आऊन न्याय इन खोज माळी रा ई सप्पा वस्तुगोळ भी नीमी सिक्‍केदव.
MAT 6:34 इदुरसाटी नाळ इन चिन्ता माळबाळी, यतिकी नाळ इन दिन तान चिन्ता खुद माळ कोंडीत; ईंद इन साटी ईंद इन दा दुख काफी आद.
MAT 7:1 “दोष हचबाळी कि नीम मा भी दोष हचकु आगुल.
MAT 7:2 यतिकी या प्रकार देल नीव दोष हचतीर, अदा प्रकार देल नीम मा भी दोष हचकु आदीत; अदिक याता नाप देल नीव आळुतीर, अदा प्रकार देल नीम साटी भी आळुकु आदीत.”
MAT 7:3 “नी येती तान वार्ट उन कण्ण इन तिनका अक नोळत्या, अदिक तान कण्ण इन लठ्टा नीनी ऊमसाल?
MAT 7:4 याग नींद अच कण्ण दा लठ्टा आद, रा नी तान वार्ट उन से ह्यांग अन सकत्या, ‘ता ना नीन कण्ण दा टु तिनका तेगु कोळतीन?’
MAT 7:5 हे कपटी, पयले नी तान कण्ण दा टु लठ्टा तेगु कोम, आग नी तान वार्ट उन कण्ण दा टु तिनका वळ्लीसा नोळकु तेगु सकत्या.
MAT 7:6 पवित्र वस्तु नायगोळी कोळबाळी, अदिक तान मोती हंदीगोळ मुंद हाक्‍कबाळी; हिंग आगबाळुल कि अव अवरी कालगोळ ल्यालमा मेटबुळुल अदिक तिर्गकु नीमी हर्द बुळुल.”
MAT 7:7 “बेळीर, रा नीमी कोटकु आदीत; ढुंढ़सीर रा नीमी सिक्‍कीत; ठोकसीर, रा नीम साटी तेरूकु आदीत.
MAT 7:8 यतिकी जो यावारा बेळ्यान, आऊक कोटकु आदीत; अदिक जो ढुंढ़स्यान, आऊक सिक्‍कीत; अदिक जो ठोकस्यान आऊन साटी तेरूकु आदीत.”
MAT 7:9 “नीम दा टु हिंग याता मंळसा आन, कि अगर आऊन पार आऊक रोट्टी बेळुल, रा आव आऊक कल्ल कोट्टान?
MAT 7:10 या मेन बेळुल, रा आव आऊक हाव कोट्टान?
MAT 7:11 इदुरसाटी याग नीव बुरा ईतकु, तान चिकोरी वळ्लीद वस्तु कोळोद जान्सतीर, रा नीम स्वर्गीय आप्प तान बेळावाळेरी वळ्लीद वस्तु यती कोळतीदील!
MAT 7:12 ईद कारण जो येनारा नीव चाहासतीर कि लॉकुर नीम सांगुळ बरताव माळुल, नीव भी आंदुर सांगुळ हांग अच बरताव माळी; यतिकी मूसा अन व्यवस्था अदिक भविष्यवक्ता अन्द शिक्षा ईदा हुन.”
MAT 7:13 “स्यांळ्द हादी टु होगोद-बरोद माळी, यतिकी चौळा आद अद फाटक अदिक आसान आद अद हादी जो विनाश दी ओयतद; अदिक हापाळ सा आर जो अल टु होगोद-बरोद माळतार.
MAT 7:14 यतिकी स्यांळ्द आद अद फाटक कठिन आद अद हादी जो जीवन दी ओयतद; अदिक थ्वाळासा अच लॉकुर आर जो आ हादी इक हासिल माळतार.
MAT 7:15 “ख्वाटा भविष्यवक्तागोळ से सावधान ईरी, जो लांडग्या अन भेष दा नीम हात्‍ती बरतार, लेकीन आंदुर बुळ्क टु हरूकु तिनावाळेर म्यांडागोळ उर.
MAT 7:16 आंदुर करनी देल नीव आंदरी अरू कोंडीर. येन लॉकुर झाळीगोळ दा टु अंगुर, मुळ्लगोळ दा टु अंजीर कोयतार?
MAT 7:17 ईदा प्रकार देल हर ऊंद वळ्लीद मार्र वळ्लीद काय तरतद अदिक बेकार मार्र बेकार काय तरतद.
MAT 7:18 वळ्लीद मार्र बेकार काय तर सकाल, अदिक ना बेकार मार्र वळ्लीद काय तर सकतद.
MAT 7:19 जो जो मार्र वळ्लीद काय तरतिदील, अद कळकु अदिक बेक्‍की दा हाक्‍कु आदीत.
MAT 7:20 ईद प्रकार देल नीव आंदुर क्याल्सागोळ्द कर्मगोळ देल ख्वाटा भविष्यवक्तागोळी अर्त कोंडीर.
MAT 7:21 “जो नान से, ‘हे प्रभु! हे प्रभु!’ अनतान, आंदुर दा टु हर ऊंद स्वर्ग इन राज्य दा प्रवेश माळतीदील, लेकीन आवा जो नान स्वर्गीय आप्प उन इच्छा मा नळुतान.
MAT 7:22 न्याय इन दिन हापाळ सा लॉकुर नान से अंदार, ‘हे प्रभु! हे प्रभु! येन नाव नीन हेसुर देल भविष्यवाणी माळीदील, अदिक नीन हेसुर देल दुष्टआत्मागोळी तेगदिदील, अदिक नीन हेसुर देल हापाळ सा आश्चर्य चकित क्याल्सा माळीदील?’
MAT 7:23 आग ना आंदुर से खुला शब्द दा अंद बुळाईन, ‘ना नीमी यागलु अरतीदिल. हे कुकर्म माळावाळेरा, नान हात्‍ती टु होटोगी.’
MAT 7:24 “इदुरसाटी जो यावारा नान ई मातगोळी केळकु अवरी माळतान, आव आ बुद्धिमान मंळसा अन्द घाई ठहरूस्यान याव तान मान्ना चट्टान मा कटदुन.
MAT 7:25 अदिक माळ बत्‍त, अदिक बाळ बत्‍त, अदिक आँधी तुफान नळुत, अदिक आ मान्ना से टकरूस्त, फिर भी अद बिदिदील, यतिकी अदुर्द पायवा चट्टान मा अगुळकु आगीत.
MAT 7:26 लेकीन जो यावारा नान ई मातगोळी केळतान अदिक अऊर मा नळालुन, आव आ मूर्ख मंळसा अन्द घाई ठहरूस्यान याव तान मान्ना धुळा मा कटदुन.
MAT 7:27 अदिक माळ बत्‍त, अदिक बाळ बत्‍त, अदिक आँधी तुफान नळुत, अदिक आ मान्ना से टकरूस्त अदिक अद जोर देल बिदकु सत्यानाश आगेत.”
MAT 7:28 याग यीशु ई मातगोळी माताळ कोंडुन, रा हिंग आत कि भीळ आऊन उपदेश देल सट्ट आत,
MAT 7:29 यतिकी आव आंदुर शास्त्रीगोळ घाई ईला लेकीन अधिकारीगोळ घाई उपदेश कोळतोगोन.
MAT 8:1 याग यीशु आ पहाळी मा टु ल्यालमा ईळदुन, रा ऊंद धोळ्द भीळ आऊन हिंद आगेत.
MAT 8:2 अदिक नोळी, ऊंद कोढ़ इन रोगी मंळसा हात्‍ती बंदकु आऊक प्रणाम माळदुन अदिक अंदुन, “हे प्रभु, अगर नी चाहास्या, रा नानी शुद्ध माळ सकत्या.”
MAT 8:3 यीशु कय मुंद माळकु आऊक मुटदुन, अदिक अंदुन, “ना चाहसतीन, नी शुद्ध आगेग.” अदिक आव तुरन्त कोढ़ इन रोग देल शुद्ध आगेदुन.
MAT 8:4 बाक यीशु आऊन से अंदुन, “नोळ, यारीकु हेळबाळेत, लेकीन होगकु तान तान इक याजक उक तोर्स अदिक मूसा अन आदेश इन अनुसार भेंट येर्स, ताकी लॉकुर साटी गवाही आगुल.”
MAT 8:5 याग यीशु कफरनहूम नगर दा बंदुन रा ऊंद रोमी सिपाहीगोळ्द सुबेदार आऊन हात्‍ती बंदकु आऊन से विनती माळदुन,
MAT 8:6 “हे प्रभु, नान दास उक लकवा होळ्द बुटाद अदिक आव हापाळ दुख दा आन.”
MAT 8:7 आग यीशु सुबेदार से अंदुन, “ना बंदकु आऊक चंगा माळाईन.”
MAT 8:8 सुबेदार उत्‍तर कोट्टुन, “हे प्रभु, ना ई लायक हैलेच कि नी नांद मान्ना ताका बंद्या, लेकीन सिर्फ आग्या कोटबुळ रा नान सेवक चंगा आगेदान.
MAT 8:9 यतिकी ना भी जिम्मेदार मंळसा हुईन, अदिक सिपाही नान हात्‍ती आर. याग ना ऊंद से अनतीन, ‘होग!’ रा आव होगतान; अदिक दुसरा से अनतीन, ‘बर!’ रा आव बरतान; अदिक याग तान दास से अनतीन, ‘ईद माळ!’ रा आव माळतान.”
MAT 8:10 ईद केळकु यीशु उक अचम्भा आत, अदिक जो आऊन हिंद बरोर आंदुर से अंदुन, “ना नीम से खरा माताळतीन कि ना इस्त्राएल दा भी हिंग मजबुत विश्वास नोळीदील.
MAT 8:11 अदिक ना नीम से अनतीन कि पूर्व अदिक पश्चिम टु हापाळ सा लॉकुर बंदार अदिक आंदुर भोज दा अब्राहम, इसहाक अदिक याकूब उन सांगुळ स्वर्ग इन राज्य दा कुरतार.
MAT 8:12 लेकीन राज्य अन्द औलाद व्हार्या अंधार दा हाक्‍कु आदार: अल वोरलोद अदिक हल्लगोळ्द कच्चोद आदीत.”
MAT 8:13 आग यीशु सुबेदार से अंदुन, “होग, ह्यांग नीन विश्वास आद, हांग अच नीन साटी आगुल.” अदिक आऊन दास अदा घळी दा चंगा आगेदुन.
MAT 8:14 यीशु याग पतरस उन मान्या बंदुन, रा आव आऊन आत्‍ता अक तेज मय देल बिदकु नोळदुन.
MAT 8:15 यीशु आकिन कय मुटदुन अदिक आकिन मय ईळदोदव, अदिक आक यदकु आऊन स्यावा माळली कुरतुर.
MAT 8:16 याग द्याव आत आग आंदुर आऊन हात्‍ती हापाळ सा लॉकुरी तंदुर यारदा दुष्टआत्मागोळ ईरव अदिक यीशु आ दुष्टआत्मागोळी तान वचन देल तेग्द बुट्टुन; अदिक सप्पा रोगीगोळी चंगा माळदुन.
MAT 8:17 यतिकी जो वचन यशायाह भविष्यवक्तागोळ द्वारा अंदकु आगीत अद पुरा आगुल: “यीशु खुद नाम कमजोरीगोळी हुळदुन अदिक नाम बिमारगोळी नेगुकु दुर माळदुन.”
MAT 8:18 यीशु याग तान नाकु दी ऊंद धोळ्द भीळ नोळदुन रा चेलागोळी झील इन आप्पाटी होगोद आग्या कोट्टुन.
MAT 8:19 आग ऊंद शास्त्री हात्‍ती बंदकु आऊन से अंदुन, “हे गुरु, नी यल होद्या, ना नीन हिंद होट्ट बराईन.”
MAT 8:20 यीशु आऊन से अंदुन, “कोल्यागोळ गुफा अदिक आकाश इन पक्षीगोळ ग्वादा ईरताव; लेकीन मंळसा अन पार उन साटी ताल्ला होचकोमोद भी जागा हैलेच.”
MAT 8:21 मात्‍त ऊंद चेला आऊन से अंदुन, “हे प्रभु, नानी पयले होगगोळ कि ना तान आप्प उक नळसाईन.”
MAT 8:22 यीशु आऊन से अंदुन, “नी नान हिंद आगेग, अदिक सोद्द मंळसागोळी तान मुर्दा नळ्सगोळ.”
MAT 8:23 याग यीशु ड्वांगा मा येरदुन, रा आऊन चेलागोळ आऊन हिंद आगेदुर.
MAT 8:24 अदिक नोळी, अचानक झील दा ऊंद हिंग धोळ्द तुफान येळ्त कि ड्वांगा लयरगोळ से मुचली हत, लेकीन यीशु मिंगोन.
MAT 8:25 आग चेलागोळ हात्‍ती बंदकु आऊक येब्सदुर अदिक अंदुर, “हे प्रभु, नामी ऊळ्स, नाव मुळ्केतेव.”
MAT 8:26 यीशु आंदुर से अंदुन, “हे अविश्वासीगोळा, यती अंजेतीर?” आग आव यदकु आँधी अदिक नीर इक डटकार्सदुन, अदिक सप्पा शांत आगेत.
MAT 8:27 अदिक आंदुर अचम्भा माळकु अनली कुरतुर, “ईव ह्यांग मंळसा हुन कि आँधी अदिक नीर भी ईऊन आग्या मान्सताव.”
MAT 8:28 याग यीशु आप्पाटी गदरेनियों अन प्रदेश दा पोहचुसदुन, रा येढ्ढ मंळसागोळ यारदा दुष्टआत्मागोळ ईरव कब्रगोळ दा टु होटकु आऊक सिकदुर. आंदुर ईट भयानक ईरोर कि याऊ आ हादी देल होग ईला सकोन.
MAT 8:29 आंदुर चिल्ळास्कु अंदुर, “हे परमेश्वर उन पारा, नाम्द नीन से येन क्याल्सा? येन नी समय से पयले नामी दुख कोळली इल बंद्या?”
MAT 8:30 आंदुर से थ्वाळासा दुर मा हापाळ सा हंदीगोळ्द ऊंद झुण्ड आळोद.
MAT 8:31 दुष्टआत्मागोळ आऊन से ईद अंदकु विनती माळदव, “अगर नीनी नामी तेगोद अच आद, रा आ हंदीगोळ्द झुण्ड दा कळुबुळ.”
MAT 8:32 आव आ दुष्टआत्मागोळ से अंदुन, “होगी!” अदिक आ दुष्टआत्मागोळ होटकु हंदीगोळ दा होक्केदव अदिक नोळी, पुरा झुण्ड ऊतार मा टु झील इन नीर दा होगकु बित्‍त अदिक मुळ्ककु सोतोत.
MAT 8:33 आ हंदीगोळी आळसावाळेर अल टु ओळदुर, अदिक नगर दा होगकु ई सप्पा मातगोळी अदिक यारदा दुष्टआत्मागोळ ईरव आंदुर्द सप्पा हाल केळ्सदुर.
MAT 8:34 आग पुरा नगर इन लॉकुर यीशु से भेंट माळोर साटी होटकु बंदुर, अदिक आऊक नोळकु विनती माळदुर कि नाम क्षेत्र दा टु व्हार्या होटोग.
MAT 9:1 बाक यीशु ड्वांगा मा कुर्तकु समुद्र अन आप्पाटी होदुन, अदिक तान नगर दा बंदुन.
MAT 9:2 अदिक नोळी, हापाळ लॉकुर ऊंद लकवा अन्द रोगी इक व्हर्स मा मिंग्सकु आऊन हात्‍ती तंदुर. यीशु आंदुर विश्वास नोळकु, आ लकवा अन्द रोगी से अंदुन, “हे पारा, हिम्मत ईट; नीन पाप माफ आदव.”
MAT 9:3 इदुर मा हापाळ शास्त्रीगोळ माताळली कुरतुर, “इव रा परमेश्वर उन अपमान माळतान.”
MAT 9:4 यीशु आंदुर्द मन इन मातगोळी अरूकु अंदुन, “नीव लॉकुर तान-तान मन दा बुरा विचार येती माळेतीर?
MAT 9:5 आसान येन आद? ईद अनोद, ‘नीन पाप माफ आदव,’ या ईद अनोद कि, ‘येळ नळु अदिक टेट.’
MAT 9:6 लेकीन इदुरसाटी कि नीव जान्स कोमी कि मंळसा अन्द पार उक पृथ्वी मा पाप माफ माळोद अधिकार आद.” इदुरसाटी यीशु लकवा अन्द रोगी से अंदुन, “येळ, तान व्हर्स नेगु, अदिक तान मान्नी होटोग.”
MAT 9:7 आग लकवा अन रोगी यदकु तान मान्नी होटोदुन.
MAT 9:8 लॉकुर ईद नोळकु अंजेदुर अदिक परमेश्वर उन बळाई माळली कुरतुर याव मंळसा अक हिंग अधिकार कोटान.
MAT 9:9 अल टु मुंद होगकु यीशु मत्ती हेसुर इन ऊंद मंळसा अक कर ताकोमोद चौकी मा कुर्तकु नोळदुन, अदिक आऊन से अंदुन, “नान हिंद आगेग.” आव यदकु आऊंद हिंद आगेदुन.
MAT 9:10 याग यीशु मत्ती इन मान्या ऊमोर साटी कुरतुन रा कर ताकोमावाळेर अदिक पापी बंदकु यीशु अदिक आऊन चेलागोळ सांगुळ ऊमली कुरतुर.
MAT 9:11 ईद नोळकु फरीसीगोळ आऊन चेलागोळ से अंदुर, “नीम गुरु कर ताकोमावाळेर अदिक पापीगोळ्द सांगुळ येती तिनतान?”
MAT 9:12 ईद केळकु यीशु आंदुर से अंदुन, वैद्य भला चंगागोळ साटी ईला लेकीन बिमारगोळ साटी जरूरी आन.
MAT 9:13 “इदुरसाटी नीव होगकु इदुर्द अर्थ कल्त कोमी: ‘ना बलिदान ईला लेकीन दया चाहासतीन.’ यतिकी ना न्यायी लॉकुरी ईला, लेकीन पापीगोळी कारूली बंदीन.”
MAT 9:14 आग बपतिस्मा कोळावाळा यूहन्ना अन्द चेलागोळ आऊन हात्‍ती बंदकु अंदुर, “येन कारण आद कि नाव अदिक फरीसी ईट उपास ईटतेव, पर नीन चेलागोळ उपास ईटालुर?”
MAT 9:15 यीशु आंदुर से अंदुन, “येन वराती, यागासताका मंळगार आंदुर सांगुळ आन, शोक माळ सकतार? पर अव दिन बंदव याग मंळगार आंदुर से ब्यार्र माळकु आदान, आ समय आंदुर उपास माळ्यार.”
MAT 9:16 “क्वारा कपळा अन्द थिगर हाळोद कपळा मा याऊ हचालुन, यतिकी अद थिगर आ कपळा से येनारा मात्‍त जेडु कोमतद, अदिक बाक अद यक्कुल हर्दोगतद.
MAT 9:17 अदिक लॉकुर व्हाशोद अंगुर इन रास्सा हाळोद तोगुल इन चिला दा तुमालुर, यतिकी हिंग माळदुर देल तोगुल इन चिला हर्दोगताव अदिक अंगुर इन रास्सा चेल्लेगतद अदिक तोगुल इन चिला नाश आगेगताव; लेकीन व्हाशोद अंगुर इन रास्सा व्हाशोद तोगुल इन चिला दा तुमतार अदिक अव येढ्ढु उळ्दकु ईरताव.”
MAT 9:18 यीशु आंदुर से इव मातगोळ अनतेला अच ईरोन, कि नोळी यहूदी सभागृह अन ऊंद सरदार बंदकु आऊक प्रणाम माळदुन अदिक अंदुन, “नान पोर ईगल्या सोतार, लेकीन नळुकु तान कय आकिन मा ईट, रा आक जित्‍ता आगेदार.”
MAT 9:19 यीशु यदकु तान चेलागोळ सांगुळ आऊन सांगुळ होटोदुन.
MAT 9:20 अदिक नोळी, ऊंद आर्त ईरोर आक इक हन्नेळ वर्ष टु खुन होगोद रोग ईरोद, हिंदु टु बंदकु आऊन कपळा अन्द किनारा अक मुटदुर.
MAT 9:21 यतिकी आक तान मन दा अनतोगोर, “अगर ना आऊन कपळा का मुट बुळाईन रा चंगा आगेगाईन.”
MAT 9:22 यीशु तिर्गकु आकी नोळदुन अदिक अंदुन, “पोरी धीरज ईट; नीन विश्वास नीनी वळ्लीद माळ्याद. इदुरसाटी आक आर्त आटोटीका चंगा आगेदुर.”
MAT 9:23 याग यीशु आ सरदार उन मान्या पोहचुसदुन अदिक कोळ्ल ऊयावाळेर इक अदिक भीळ इक सोरसराबा मचुस्त नोळदुन,
MAT 9:24 आग आव लॉकुर से अंदुन, “सरकुसेगी, पोर सायली आर, लेकीन मिंगेत्यार.” इदुर मा आंदुर आऊन मज्याक हार्सली कुरतुर.
MAT 9:25 लेकीन याग भीळ इक व्हार्या तेगुकु आत, रा आव बुळ्क होगकु पोर इन कय हुळदुन, अदिक पोर यदकु कुर्तोदुर.
MAT 9:26 अदिक ई मात इन चर्चा द्याश इन सप्पा प्रदेश दा फैलुसेत.
MAT 9:27 याग यीशु अल टु मुंद वाळुसदुन, रा येढ्ढ कुढ्ढ मंळसागोळ आऊन हिंद ईद कारूतेला नळदुर, “हे दाऊद उन औलाद, नाम मा दया माळ!”
MAT 9:28 याग आव मान्या बुळ्क पोहचुसदुन, रा आ कुढ्ढगोळ आऊन हात्‍ती बंदुर, अदिक यीशु आंदुर से अंदुन, “येन नीमी विश्वास आद कि ना चंगा माळ सकतीन?” आंदुर आऊन से अंदुर, “हव, प्रभु!”
MAT 9:29 आग आव आंदुर्द कण्णगोळी कय हचकु अंदुन, नीम विश्वास इन अनुसार नीम साटी हांगा आगुल “ह्यांग नीव चाहासतीर.”
MAT 9:30 अदिक आंदुर्द कण्णगोळ देल कांळ्सली हत्त. यीशु आंदरी चेतावनी कोटकु अंदुन, “सावधान, ईदुर बारा दा यारीकु मालूम ईला नळु पायजे.”
MAT 9:31 लेकीन आंदुर अल टु होटकु पुरा द्याश दा आ समाचार इक फैलुस बुटुर.
MAT 9:32 याग आंदुर व्हार्या होगोर, रा नोळी, लॉकुर ऊंद मुक्‍का अक यारदा दुष्टआत्मा ईरोद, आऊन हात्‍ती तंदुर;
MAT 9:33 अदिक याग दुष्टआत्मा तेग्द बुट्टुन, रा मुक्‍का मंळसा माताळली हत्‍तेदुन. इदुर मा भीळ अचम्भा माळकु अंत, “इस्त्राएल दा हिंग यागलु नोळकु आगीदील.”
MAT 9:34 लेकीन फरीसीगोळ अंदुर, “इव रा दुष्टआत्मागोळ्द सरदार उन मदत देल दुष्टआत्मागोळी तेगुतान.”
MAT 9:35 यीशु सप्पा नगरगोळ अदिक ऊरगोळ दा वयाळतोगोन, अदिक राज्य अन्द खुशखबरी प्रचार माळतोगोन, अदिक हर प्रकार इन बिमारी अदिक कमजोरी इक दुर माळतेला ईत्‍तुन.
MAT 9:36 याग आव भीळ इक नोळदुन रा आऊक लॉकुर मा दया बत्‍त, यतिकी आंदुर आ म्यांडागोळ घाई ईरोर यार्द याऊ रखवाला ईला ईरोन, आंदुर व्याकुल अदिक भटकुसकु ईरोर.
MAT 9:37 आग आव तान चेलागोळ से अंदुन, “हण्ण केई रा हापाळ आव पर क्याल्सा माळावाळेर मजदुर गोर्त आर.
MAT 9:38 इदुरसाटी फसल इन स्वामी से विनती माळी कि आव केई इन फसल कडोर साटी मजदूर कळु बुळुल.”
MAT 10:1 बाक यीशु तान हन्नेळ चेलागोळी तान हात्‍ती कारदुन, आंदरी दुष्टआत्मागोळ मा अधिकार कोट्टुन कि अवरी तेगुल अदिक सप्पा प्रकार ईनव बिमारगोळ अदिक सप्पा प्रकार ईनव कमजोरीगोळी अक दुर माळुल.
MAT 10:2 इंदुर हन्नेळ प्रेरितगोळ्द हेसुर हिंग आव: पयला शमौन, आऊक पतरस भी अनतान, अदिक आऊन वार्ट अन्द्रियास; जब्दी इन पार याकूब, अदिक आऊन वार्ट यूहन्ना;
MAT 10:3 फिलिप्पुस, अदिक बरतुल्‍मै, थोमा, अदिक कर ताकोमावाळा मत्ती, हलफई नव पार याकूब, अदिक तद्दै,
MAT 10:4 शमौन कनानी, अदिक यहूदा इस्करियोती याव यीशु उक ध्वाका देल हुळसुस बुटीदुन.
MAT 10:5 ई हन्नेळ प्रेरितगोळी यीशु आग्या कोटकु कळुदुन: “गैरयहूदीगोळ दी होगबाळेतीर, अदिक सामरीगोळ्द यात्‍तोदु नगर दा प्रवेश माळबाळेतीर.
MAT 10:6 लेकीन इस्त्राएल इन घराना अन्द अच काळ्द म्यांडागोळ्द हात्‍ती होगेतीर.
MAT 10:7 अदिक नळुत-नळुत ईद प्रचार माळी: कि ‘स्वर्ग अन राज्य हात्‍ती होट बंदाद.’
MAT 10:8 बिमारगोळी चंगा माळी, सोद्द मंळसागोळी जित्‍ता माळी, कोढ़ी मंळसा अक शुद्ध माळी, दुष्टआत्मागोळी तेगी. नीमी फुकट दा सिक्याद, नीव भी फुकट दा वाटसी.
MAT 10:9 तान खिसा दा ना रा व्हान्ना, अदिक ना बेळ्ली, अदिक ना तांबा ईटेतीर;
MAT 10:10 हादी इन साटी ना झ्वारा, ना दुसरा कुळता, ना जुता अदिक ना कोल हुडी, यतिकी क्याल्सा माळावाळा मजदूर उक आऊन मजदूरी सिक पायजे.
MAT 10:11 “येल्यारा यातोदारा नगर या ऊरा दा होगी, रा पता हची कि अल याव लायक आन. अदिक यागासताका अल टु होळालीर, अदा मान्या ईरेतीर.
MAT 10:12 मान्या प्रवेश माळाहोती आऊक आशीष कोळेतीर.
MAT 10:13 अगर आ मान्या नोर लॉकुर योग्य ईतीदार रा नीम आशिर्वाद आंदुर ताका पोहचुसीत, लेकीन अगर आंदुर योग्य ईला इतीदार रा नीम आशिर्वाद नीम हात्‍ती वापस होट बंदीत.
MAT 10:14 जो यावारा नीमी ग्रहण माळतीदील अदिक नीम मात केळतीदिल, आ मान्ना या आ नगर टु होळावती तान काल इन धुळा झाळ्स बुळी.
MAT 10:15 ना नीम से खरा माताळतीन कि न्याय इन दिन आ नगर इन दशा से सदोम अदिक गमोरा अन्द द्याश इन दशा यक्कुल सहन माळा लायक ईत्‍तीत.
MAT 10:16 “नोळी, ना नीमी म्यांडागोळ घाई लांडग्यागोळ न्याड्या कळुतीन, इदुरसाटी हावगोळ घाई बुद्धिमान अदिक कबूतरगोळ घाई भोला बन्सी.
MAT 10:17 लेकीन लॉकुर से सावधान ईरी, यतिकी आंदुर नीमी महासभागोळ दा सोपस्यार, अदिक तान पंचायतगोळ दा नीमी क्वाळा देल बळदार.
MAT 10:18 नीव नान साटी हाकिमगोळ अदिक राजागोळ मुंद आंदुर मा, अदिक गैरयहूदीगोळ मा गवाह आगोर साटी पोहचुस्कु आदीर.
MAT 10:19 याग आंदुर नीमी हुळसुस्यार रा ईद चिन्ता माळबाळेतीर कि नाव याता रीति देल या येन अंदेव, यतिकी जो येनारा नीमी अनोद ईत्‍तीत, अद अदा घळी नीमी हेळकु आदीत.
MAT 10:20 यतिकी माताळावाळेर नीव आल्लच, लेकीन नीम स्वर्गीय आप्प उन आत्मा नीम दा माताळतद.
MAT 10:21 “वार्ट, वार्ट उक अदिक आप्प पार उक, कोन्नोर साटी सोपस्यार, अदिक चिकोर मोय-आप्पुर विरोध दा यदकु आंदरी कोन्सुस बुट्टार.
MAT 10:22 नान हेसुर इन कारण सप्पा लॉकुर नीम से दुश्मनी माळ्यार, लेकीन जो आखरी ताका धीरज हुडुकु ईत्‍तान आऊंदा उद्धार आदीत.
MAT 10:23 याग आंदुर नीमी ऊंद नगर दा सतुस्यार, रा नीव दुसरा दी ओळेगेतीर. ना नीम से खरा माताळतीन, नीव इस्त्राएल इन सप्पा नगरगोळ दा होगा से पयले अच मंळसा अन्द पार होट बंदान.
MAT 10:24 “चेला तान गुरु से धोड्डेव ईरालुन; अदिक न दास तान स्वामी से.
MAT 10:25 चेला तान गुरु अक अदिक दास तान स्वामी इन बराबर आगोद अच काफी आद. याग आंदुर मान्ना अन स्वामी इक शैतान अंदुर रा आऊन मान्नावाळेर इक येन येनारा अनतीदिल!
MAT 10:26 “इदुरसाटी मंळसागोळ से अंजबाळी; यतिकी येनारा होचकु हैलेच जो तेर्दकु आगतीदील, अदिक न येनारा रहस्यमय आद जो प्रगट आगतीदील.
MAT 10:27 जो ना नीम से अंधार दा अनतीन, अद नीव ऊजुळ दा अनी; अदिक जो ना नीम किव दा अंदीन, अदरी नीव आळा मा टु प्रचार माळी.
MAT 10:28 आंदुर से अंजबाळी जो मय इक नुकसान माळतार, लेकीन आत्मा अक नुकसान माळ सकालुर; लेकीन परमेश्वर से अच अंजी, जो आत्मा अदिक शरीर येढ्ढु नरक दा नष्ट माळ सकतान.
MAT 10:29 येन ऊंद पैस्या दा येढ्ढ चिमणी पक्षी मारालव? तरी भी नीम आप्प उन इच्छा अन्द अलावा अऊर दा टु ऊंद भी धरती मा बिळसकाल.
MAT 10:30 नीम ताल्ला अन चुट्टी भी सप्पा आळुकु आव.
MAT 10:31 इदुरसाटी अंजबाळी; नीव हापाळ चिमणीगोळ से भी बार्र आईर.
MAT 10:32 “जो यावारा मंळसागोळ मुंद नानी मान्स कोंडान, आऊक ना भी तान स्वर्गीय आप्प उन मुंद मान्स कोमाईन.
MAT 10:33 लेकीन जो यावारा मंळसागोळ मुंद नान इनकार माळ्यान, आऊक ना भी तान स्वर्गीय आप्प उन मुंद इनकार माळाईन.
MAT 10:34 “ईद सम्सबाळी कि ना धरती मा शांती तरली बंदीन; ना शांती तरली ईला, पर तलवार नळसोर साटी बंदीन.
MAT 10:35 ना रा बंदीन कि: ‘पार उक आऊन आप्प उन से, अदिक पोर इक आकिन मोय इन से, अदिक सास्सा अक आकिन आत्‍ता से ब्यार्र माळ कोमाईन;
MAT 10:36 मंळसा अन्द दुश्मन आऊन मान्या अन लॉकुर अच ईत्‍तार.’
MAT 10:37 “जो तान मोय या आप्प उक नान से यक्कुल प्रिय जान्सतान, आव नान लायक हैलेच; अदिक जो तान पार या पोर इक नान से यक्कुल प्रिय जान्सतान, आव नान लायक हैलेच;
MAT 10:38 अदिक जो तान क्रूस नेगुकु नान हिंद नळालुर आंदुर नान लायक हैलेच.
MAT 10:39 जो तान जीव ऊळसोद चाहास्यान, आव अदरी खोऊस्यान; अदिक जो नान कारण तान जीव खोऊस्यान, आव अदरी हासिल माळ्यान.
MAT 10:40 “जो नीमी ग्रहण माळतान, आव नानी ग्रहण माळतान; अदिक जो नानी ग्रहण माळतान, आव नानी कळावाळा अक ग्रहण माळतान.
MAT 10:41 जो भविष्यवक्ता अक भविष्यवक्ता जान्सकु ग्रहण माळुल, आव भविष्यवक्ता अन प्रतिफल हासिल माळ्यान; अदिक जो न्यायी इक न्यायी जान्सकु ग्रहण माळुल, आव न्यायी इन प्रतिफल हासिल माळ्यान.
MAT 10:42 जो यावारा ई स्याणेर दा टु ऊंद मंळसा अक नान चेला जान्सकु सिर्फ ऊंद वाटी नीर कुळस्यान, ना नीम से खरा माताळतीन, आव यातोदु रीति देल तान प्रतिफल खोऊसतिदिल.”
MAT 11:1 याग यीशु तान हन्नेळ चेलागोळी निर्देश कोट बुटुन, रा आव आंदुर्द नगरगोळ दा उपदेश अदिक प्रचार माळली अल टु होटोदुन.
MAT 11:2 बपतिस्मा कोळावाळा यूहन्ना याग बंदीगृह दा मसीह अन क्याल्सागोळ्द समाचार केळदुन अदिक तान चेलागोळी आऊन से ईद केळली कळुदुन,
MAT 11:3 “येन बरावाळा नीना हुय, या नाव यावारा दुसरा अन्द हादी कादेव?”
MAT 11:4 यीशु उत्‍तर कोट्टुन, “जो येनारा नीव केळतीर अदिक नोळतीर, अद सप्पा होगकु बपतिस्मा कोळावाळा यूहन्ना अक हेळबुळी,
MAT 11:5 कि कुढ्ढगोळ नोळतार अदिक लंगळागोळ नळुतार वयाळतार, कोढ़ी शुद्ध माळकु आगतार अदिक बयरागोळ केळतार, मुर्दागोळ जित्‍ता माळकु आगताव, अदिक कंगालगोळी खुशखबरी केळ्सकु आगतद.
MAT 11:6 अदिक धन्य आर आंदुर, जो नान कारण ठोकर तिनालुर.”
MAT 11:7 याग बपतिस्मा कोळावाळा यूहन्ना अन चेलागोळ अल टु होदुर, रा यीशु यूहन्ना अन्द बारा दा लॉकुर से अनली कुरतुन, “नीव आळी दा येन नोळली होगीदिर? येन हवा देल हालुसतेला सरकण्डा अक?
MAT 11:8 बाक नीव येन नोळली होगीदिर? येन मुलायम कपळा हाग्द मंळसा अक? नोळी जो मुलायम कपळा हाकतार, आंदुर राजभवनगोळ दा ईरतार.
MAT 11:9 रा बाक येती येन नोळली होगीदिर? येन यावारा भविष्यवक्ता अक? हव, ना नीम से खरा अनतीन कि भविष्यवक्ता से भी धोड्डेव उक.
MAT 11:10 ईव आवा हुन यार्द बारा दा लिख्सकु आद: ‘नोळ, ना तान दूत उक नीन मुंद कळुतीन, जो नीन मुंद नीन हादी तयार माळ्यान.’
MAT 11:11 ना नीम से खरा माताळतीन कि जो आर्तेर से पैदा आग्यार, आंदुर्दा टु यूहन्ना बपतिस्मा कोळावाळा से याऊ धोड्डेव आगीदील; पर जो स्वर्ग इन राज्य दा स्याणेव से स्याणेव आन आव यूहन्ना से धोड्डेव आन.
MAT 11:12 यूहन्ना बपतिस्मा कोळावाळा अन्द दिनगोळ टु ईगासताका स्वर्ग इन राज्य दा बलपूर्वक प्रवेश आगतेला ईताद, अदिक बलवान अदरी कसुकोमतार.
MAT 11:13 यूहन्ना अन बरासताका सप्पा भविष्यवक्तागोळ अदिक मूसा अन व्यवस्था भविष्यवाणी माळीत.
MAT 11:14 अदिक मानसोद चाहासतीर रा मान्सी कि एलिय्याह जो बरावाळा ईरोन, आव यूहन्ना अच हुन.
MAT 11:15 यार किव आव, आव केळ कोमुल.”
MAT 11:16 “ना ई पीढ़ी इन लॉकुर्द तुलना यार देल माळाईन? आंदुर आ चिकोरगोळ घाई आर, जो सात्‍तागोळ दा कुर्तकु आबुर दाबुर से कारूकु अनतार.”
MAT 11:17 “नाव नीम साठी कोळ्ल मुर्सदेव, अदिक नीव कुणदीदिल; नाव विलाप माळदेव, अदिक नीव दुखी आगीदील.”
MAT 11:18 “यतिकी यूहन्ना बपतिस्मा कोळावाळा ना रा रोट्टी तिंत बंदुन अदिक ना अंगुर इन रास्सा कुडुत बंदुन, लेकीन लॉकुर अनतार, ‘आऊन दा दुष्टआत्मा आद.’
MAT 11:19 मंळसा अन्द पार तिंत कुडुत बंदुन, अदिक लॉकुर अनतार ‘नोळी, व्हाट्टा तुम्मावाळा अदिक सारा कुडावाळा मंळसा, कर ताकोमावाळेर अदिक पापीगोळव संगी!’ लेकीन परमेश्वर उन ग्यान तान क्याल्सा देल सही ठहरूसकु आग्याद.”
MAT 11:20 आग यीशु आ नगरगोळी धिक्‍कार्सली कुरतुन, यऊर्दा यीशु हापाळ सा सामर्थ्य ईनव क्याल्सा माळीदुन, यतिकी आंदुर तान मन ईला तिर्गुसीदुर.
MAT 11:21 “हे खुराजीन! नीन मा हाय! हे बैतसैदा! नीन मा हाय! यतिकी जो सामर्थ्य ईनव क्याल्सा नीम दा माळकु आदव, अगर अव सूर अदिक सैदा दा माळकु आगायदव रा अव हापाळ पयले बॉरा होदुकु अदिक राख मा कुर्तकु तान पापगोळ देल तिर्गेगायदव.
MAT 11:22 लेकीन ना नीम से अनतीन कि न्याय इन दिशी नीम दशा से सूर अदिक सैदा अन्द दशा यक्कुल सहन माळा लायक ईत्‍तीत.
MAT 11:23 अदिक हे कफरनहूम, येन नी स्वर्ग ताका म्याकुच नेगुकु आद्या? नी पाताल लोक ताका ल्यालमा होद्या! यतिकी जो सामर्थ्य ईनव क्याल्सा नीन दा माळकु आदव, अगर अव सदोम दा माळकु आगायदव, रा अद नगर ईगासताका बनस्कु ईराईत.
MAT 11:24 लेकीन ना नीम से अनतीन कि न्याय इन दिशी नीम द्याश से सूर अदिक सैदा अन्द दशा यक्कुल सहन माळा लायक ईत्‍तीत.”
MAT 11:25 आटा होती यीशु अंदुन, “हे आप्पा, स्वर्ग अदिक पृथ्वी नव प्रभु, ना नीन धन्यवाद माळतीन कि नी ई मातगोळी आंदुर से जो ग्यानी आर अदिक कल्त माळकु लॉकुर से होचकोमकु ईट्द, अदिक चिकोरगोळ मा प्रगट माळ्द.
MAT 11:26 हव, हे आप्पा, यतिकी नीनी ईदा वळ्लीद हत्‍त.”
MAT 11:27 “नान आप्प नानी सप्पा येनारा सोप्स बुटान; आप्प उन अलावा पार उक याऊ अरालुन, सिर्फ आप्प; अदिक न पार उन अलावा आप्प उक यावारा अरूतान, सिर्फ पार; या आवा यार साटी पार आऊक प्रगट माळतान.”
MAT 11:28 “हे सप्पा मयनत माळावाळेर अदिक कर्ज देल मुळ्ककु लॉकुरा, नान हात्‍ती बरी; ना नीमी आराम कोळाईन.
MAT 11:29 नान भार तान म्याकुच नेगु कोमी, अदिक नान से कली; यतिकी ना नम्र अदिक मुलायम आईन: अदिक तान मन दा विश्राम नोळीर.
MAT 11:30 यतिकी नान भार आसान अदिक नान ओझा हल्‍का आद.”
MAT 12:1 आ समय यीशु आराम इन दिशी केईगोळ दा टु आगतेला होगोन, अदिक आऊन चेलागोळी हसु हत्‍त रा आंदुर गोदी नव लॉम्बा मुरू मुरूकु तिनली कुरतुर.
MAT 12:2 फरीसीगोळ ईद नोळकु आऊन से अंदुर, “नोळ, नीन चेलागोळ अद क्याल्सा माळीत्यार, जो आराम इन दिशी माळोद मूसा अन व्यवस्था अन अनुसार उचित हैलेच.”
MAT 12:3 यीशु आंदुर से अंदुन, “येन नीव वाचुसीदील, कि दाऊद, याग आऊक अदिक आऊन संगीगोळी हसु हत रा येन माळदुर?
MAT 12:4 आव ह्यांग परमेश्वर उन भवन दा होदुन, अदिक भेंट येर्सद रोट्टीगोळी तिंदुन, यवरी तिनोद दाऊद उक अदिक आऊन संगीगोळी उचित ईला ईरोद लेकीन सिर्फ याजकगोळी उचित ईरोद?
MAT 12:5 येन नीव मूसा अन व्यवस्था दा वाचुसीदील कि याजक आराम इन दिशी सभागृह दा आराम इन दिन इन विधी इक मुरदुर मा भी निर्दोष ठहरूसतार?”
MAT 12:6 पर ना नीम से अनतीन कि ईल आव आन जो सभागृह से भी धोड्डेव आन.
MAT 12:7 अगर नीव शास्त्रगोळ दा लिखस्द मातगोळ्द मतलब जान्सायदीर, “ना दया देल संतुष्ट आगतीन, बलिदान देल ईला, रा नीव निर्दोष उक दोषी ईला ठहरूसायदीर.
MAT 12:8 मंळसा अन पार रा आराम इन दिन ईनव भी स्वामी हुन.”
MAT 12:9 अल टु नळुकु यीशु आंदुर्द यहूदी लॉकुर्द सभागृह दा बंदुन.
MAT 12:10 अल ऊंद मंळसा ईरोन, यार कय वंळ्गकु ईरोद. फरीसीगोळ यीशु मा दोष हचोर साटी आऊन से केळदुर, “येन आराम इन दिशी चंगा माळोद मूसा अन व्यवस्था अन अनुसार उचित आद?”
MAT 12:11 यीशु आंदुर से अंदुन, “नीम दा हिंग याव आन यार्द ऊंद अच म्यांडा ईरूल, अदिक अद आराम इन दिशी ख्वॉद्रा दा बिदोगुल, रा आव अदरी हुळकु व्हार्या तेगुतिदील?
MAT 12:12 भला मंळसा अन्द किमत म्यांडा से याट यक्कुल आद! इदुरसाटी आराम इन दिशी भलाई माळोद उचित आद.”
MAT 12:13 आग आव आ मंळसा से अंदुन, “तान कय मुंद माळ.” आव मुंद माळदुन, अदिक आ कय बाक दुसरा कय इन घाई वळ्लीद आगेत.
MAT 12:14 आग फरीसीगोळ व्हार्या होगकु आऊन विरोध दा योजना माळदुर कि आऊक याता प्रकार देल कोंदेव.
MAT 12:15 ईद जान्सकु यीशु अल टु होटोदुन. अदिक हापाळ लॉकुर आऊन हिंद आगेदुर, अदिक आव सप्पा मुंदुरी चंगा माळदुन,
MAT 12:16 अदिक आंदरी चेतावनी कोट्टुन कि नानी प्रगट माळबाळेतीर,
MAT 12:17 ताकी जो वचन यशायाह भविष्यवक्ता अन्द द्वारा अंदकु आगीत, अद पुरा आगुल:
MAT 12:18 “नोळी, ईव नान सेवक हुन, यारी ना निवळुसीन; नान प्रिय, यार देल नान मन संतुष्ट आद: ना तान आत्मा आऊन मा हाकाईन, अदिक आव गैरयहूदीगोळी न्याय इन खुशखबरी कोट्टान.
MAT 12:19 आव ना रा झगळा माळ्यान, अदिक ना धूम मचुस्यान, अदिक ना रा सात्यागोळ दा यावारा आऊन आवाज केळ्यान.
MAT 12:20 आव मेड्द सरकण्डागोळी मुरूतिदिल, अदिक धुंगा कोळ्द बत्‍ती इक भी नुनाकतिदिल, यागासताका आव न्याय इक विजय माळ कोमालुन.
MAT 12:21 अदिक गैरयहूदी लॉकुर आऊन हेसुर मा आशा ईट्यार.”
MAT 12:22 आग लॉकुर ऊंद कुढ्ढ अदिक मुक्‍का अक यारदा दुष्टआत्मा ईरोद, यीशु उन हात्‍ती तंदुर; अदिक आव आऊक चंगा माळदुन, अदिक आव माताळली अदिक नोळली कुरतुन.
MAT 12:23 ईदुर मा सप्पा लॉकुर चकित आगकु अनली कुरतुर, “ईव येन दाऊद उन औलाद हुन?”
MAT 12:24 लेकीन फरीसीगोळ ईद केळकु अंदुर, “ईव रा दुष्टआत्मागोळव सरदार बालज़बूल उन मदत देल दुष्टआत्मागोळी तेगुतान.”
MAT 12:25 आव आंदुर्द मन इन मात अरूकु आंदुर से अंदुन, “अगर यातोदारा राज्य दा फूट बिळतद, अद ऊजाळसेगतद; अदिक यातोदारा नगर या घराना दा फूट बिळतद, अद टीकुसकु ईरतीदील.
MAT 12:26 अदिक अगर शैतान अच शैतान उक तेगदीत, रा अद खुद इन दा विरोधी आगेग्याद; बाक अदुर्द राज्य ह्यांग टीकुसकु ईत्‍तीत?
MAT 12:27 भला, अगर ना शैतान उन सरदार उन सहायता देल दुष्टआत्मागोळी तेगुतीन, रा नीम अनुयायीगोळ यार सहायता देल तेगुतार? इदुरसाटी आंदुर अच नीम न्याय माळ्यार.
MAT 12:28 पर अगर ना परमेश्वर उन आत्मा अन्द सहायता देल दुष्टआत्मागोळी तेगुतीन, रा परमेश्वर उन राज्य नीम हात्‍ती होट बंदाद.”
MAT 12:29 या ह्यांग यावारा मंळसा यातोवारा ताकतवर मंळसा अन्द मान्या होक्‍कु आऊन माल कदू सकतान यागासताका कि पयले आव आ ताकतवर मंळसा अक कट कोमालुन? आगासताका आव आऊन मान्या होक्‍कु माल कदू सकालुन.
MAT 12:30 जो नान सांगुळ हैलेच आव नान विरोध दा आन, अदिक जो नान सांगुळ जमा माळालुन आव बगरूस्तान.
MAT 12:31 इदुरसाटी ना नीम से अनतीन कि मंळसा अन्द सब प्रकार इन पाप अदिक अपमान माफ माळकु आदीत, लेकीन जो यावारा पवित्र आत्मा अन अपमान माळतान आऊक माफ माळकु आगतीदील.
MAT 12:32 जो यावारा मंळसा अन्द पार उन विरोध दा येनारा मात अंदान, आऊन ईद अपराध माफ माळकु आदीत, लेकीन जो यावारा पवित्र आत्मा अन्द विरोध दा येनारा अंदान, आऊन अपराध न रा ई युग दा अदिक न बरावाळा युग दा माफ माळकु आगतीदील.
MAT 12:33 “अगर मार्र वळ्लीद आद, रा अदुर्द काय भी वळ्लीद ईत्‍तीत, या मार्र निकम्मा आद, रा अदुर्द काय भी निकम्मा ईत्‍तीत; यतिकी मार्र तान काय देल अच अर्तकु आगतद.
MAT 12:34 हे हाव ईनव चिकोरा, नीव बुरा आगकु ह्यांग वळ्लीद मातगोळी अन सकतीर? यतिकी जो मन दा तुमकु आद, अदा बाय दा बरतद.
MAT 12:35 वळ्लेव मंळसा तान मन इन वळ्लीद भंडार दा टु वळ्लीद मातगोळी तेगुतान, अदिक बेकार मंळसा बेकार भंडार दा टु बेकार मातगोळी तेगुतान.”
MAT 12:36 “अदिक ना नीम से अनतीन कि जो जो निकम्मा मातगोळी मंळसागोळ अंदार, न्याय इन दिशी आंदुर हर ऊंद आ मात इन लेखा कोट्टार.
MAT 12:37 यतिकी नी तान मातगोळ कारण निर्दोष, अदिक तान मातगोळ दा कारण दोषी ठहरूस्कु आद्या.”
MAT 12:38 ईदुर मा थ्वाळासा शास्त्रीगोळ अदिक फरीसीगोळ यीशु से अंदुर, “हे गुरु, नाव नीन कय देल ऊंद चमत्कार नोळोद चाहासतेव.”
MAT 12:39 आव आंदरी उत्‍तर कोट्टुन, “ई दुनिया अन्द बेकार अदिक व्यभिचारी लॉकुर योना अन्द चमत्कार ढुंढ्सतार, लेकीन योना भविष्यवक्ता अन्द चमत्कार इक बिटकु यातोदु दुसरा चमत्कार आंदरी कोटकु आगतीदील.
MAT 12:40 योना मुर दिन अदिक मुर ईळ्लक आ समुद्र अन धोळ मेन इन व्हाट्या ईत्‍तुन, हांग अच मंळसा अन्द पार मुर दिन अदिक मुर ईळ्लक धरती इन बुळ्क ईत्‍तान.
MAT 12:41 नीनवे नगर इन लॉकुर न्याय इन दिशी ई दुनिया अन्द लॉकुर सांगुळ यदकु आंदरी दोषी ठहरूस्यार, यतिकी आंदुर योना अन्द प्रचार केळकु मन तिर्गुसीदुर; अदिक नोळी, ईल आव आन जो योना से भी धोड्डेव आन.
MAT 12:42 दक्षिण इन रानी न्याय इन दिशी ई दुनिया अन्द लॉकुर सांगुळ यदकु आंदरी दोषी ठहरूस्यार, यतिकी आक सुलैमान उन ग्यान केळोर साटी धरती इन क्वाना टु बंदुर; अदिक नोळी, ईल आव आन जो सुलैमान से भी धोड्डेव आन.
MAT 12:43 “याग दुष्टआत्मा मंळसा दा टु होट बुळतद, रा वंळगींद जागागोळ दा आराम ढुंढ्सली वयाळतद, अदिक अदरी सिकाल.
MAT 12:44 आग अनतद, ‘ना तान अदा मान्ना दा यल टु होटोदीन, होटोगाईन.’ अदिक होटकु अदरी सूना, झाळ-झुळ्सकु अदिक सजुसकु नोळतद.
MAT 12:45 आग अद होगकु तान से मात्‍त बेकार येळ आत्मागोळी तान सांगुळ तरतद, अदिक अव आ मान्या समुस्कु अल ईरताव, अदिक आ मंळसा अन्द दशा पयला टु भी बेकार आगेगतद. ई दुनिया अन बुरा लॉकुर्द दशा भी हिंग अच आदीत.”
MAT 12:46 याग यीशु भीळ से मातगोळी हेळ्त अच ईरोन, आग आऊन मोय अदिक वार्टुर व्हार्या निदुरकु ईरोर अदिक आऊन से मात हेळोद चाहासोर.
MAT 12:47 यावारा आऊन से अंदुन, “नोळ, नीन मोय अदिक नीन वार्टुर व्हार्या निदुरकु आर, अदिक नीन से मात हेळोद चाहासतार.”
MAT 12:48 ईद केळकु आव अनावाळेर इक उत्‍तर कोट्टुन, “याक हुळ नान मोय? अदिक यार उर नान वार्टुर?”
MAT 12:49 अदिक तान चेलागोळ दी तान कय वाळुसकु अंदुन, “नोळी, नान मोय अदिक नान वार्टुर इंदुरा उर.
MAT 12:50 यतिकी जो यावारा नान स्वर्गीय आप्प उन इच्छा मा नळदान, आवा नान वार्ट, अदिक नान आकतींग, अदिक नान मोय हुळ.”
MAT 13:1 अदा दिशी यीशु मान्या टु होटकु झील इन किनारा मा होगकु कुरतुन.
MAT 13:2 अदिक आऊन हात्‍ती हिंग धोळ्द भीळ जमा आत कि आव ड्वांगा मा येरेदुन, अदिक सप्पा भीळ किनारा मा निदुरकु ईत्‍त.
MAT 13:3 अदिक आव आंदुर से उदाहरणगोळ दा हापाळ सा मातगोळी अंदुन: “ऊंद बोऊसावाळा बींजा बोऊसली होट्टुन.
MAT 13:4 बोऊसा होती थ्वाळासा बींजा हादी इन किनारा मा बिद्दव अदिक पक्षीगोळ बंदकु अवरी तिनली कुरतव.
MAT 13:5 येनारा बींजा कल्ल इन जागा मा बिद्दव, यल अवरी यक्कुल मुण्ण सिकिदील अदिक गहरा मुण्ण ईला सिकदुर कारण अव जल्दी बेळदोदव.
MAT 13:6 पर सुर्य होळदुर मा अव होत्‍तेदव, अदिक जळ ईला हुळदुर देल वंळ्गेदव.
MAT 13:7 थ्वाळासा बींजा मार्र दा बिद्दव अदिक मार्रगोळ वाळुसकु अवरी वत्‍त बुट्टव.
MAT 13:8 पर थ्वाळासा बींजा वळ्लीद जागा मा बिद्दव, अदिक काय तनदव, यातारा सौ गुणा, यातारा साठ गुणा, अदिक यातारा तीस गुणा.”
MAT 13:9 यार किव आव आव केळ कोमुल.
MAT 13:10 चेलागोळ हात्‍ती बंदकु यीशु से अंदुर, “नी लॉकुर से उदाहरण दा येती मातगोळ माळत्या?”
MAT 13:11 यीशु उत्‍तर कोट्टुन, “नीमी परमेश्वर उन राज्य अन्द भेदगोळ्द समझ कोटकु आग्याद, पर आंदरी ईला.
MAT 13:12 यतिकी यार हात्‍ती आद, आऊक मात्‍त कोटकु आदीत, अदिक आऊन हात्‍ती यक्कुल आगेदीत; पर यार्द हात्‍ती येनु हैलेच, अदुर से जो येनारा आऊन हात्‍ती आद, अद भी ताकोमकु आगेदीत.
MAT 13:13 ना आंदुर से उदाहरणगोळ दा इदुरसाटी मातगोळी माळतीन कि आंदुर नोळकु भी नोळालुर अदिक केळकु भी केळालुर, अदिक समसालुर.”
MAT 13:14 आंदुर बारा दा यशायाह अन्द ईद भविष्यवाणी पुरा आगतद: “नीव किवगोळ देल रा केळतीर, पर सम्सालीर; अदिक कण्णगोळ देल रा नोळतीर, पर नीमी कांळ्साल.”
MAT 13:15 “यतिकी ई लॉकुर्द मन कट्टर आगेग्याद, अदिक आंदुर केळकु भी अनसुना माळतार अदिक आंदुर तान कण्णगोळी मुच्च बुळतार; ईलारा हिंग आगबाळुल कि आंदुर कण्णगोळ देल नोळुल, अदिक किवगोळ देल केळुल अदिक मन देल समसुल, अदिक आंदुर तिर्गकु बरूल, अदिक ना आंदरी चंगा माळाईन.”
MAT 13:16 पर धन्य आव नीमव कण्णगोळ, कि अव नोळताव; अदिक नीमव किव अद केळताव.
MAT 13:17 यतिकी ना नीम से खरा माताळतीन कि हापाळ सा भविष्यवक्तागोळ अदिक न्यायीगोळ याता मातगोळी नोळोद चाहासोर अवरी नीव नोळेतीर. लेकीन आंदुर अवरी नोळ सकिदील, अदिक याता मातगोळी आंदुर केळोद चाहासोर, अवरी नीव केळेतीर. लेकीन आंदुर अवरी केळ सकिदील.
MAT 13:18 “इग नीव बींजा बोऊसावाळा अन्द उदाहरण इन अर्थ केळी.
MAT 13:19 जो यावारा राज्य अन्द वचन केळकु समसालुन, आऊन मन दा जो येनारा बोऊस्कु आगीत, अदरी आ दुष्ट बंदकु कसुकु वोयतान. ईद अदा हुन, जो हादी इन किनारा मा बोऊस्कु आगीत.
MAT 13:20 अदिक जो कल्ल इन जागा मा बोऊस्कु आत, ईद अद हुन, जो वचन केळकु तुरन्त खुशी इन सांगुळ मान्स कोमतान.
MAT 13:21 पर तांदुर दा जळ ईला ईटदुर कारण आंदुर थ्वाळासा अच दिनी नोर आर, अदिक याग वचन इन कारण क्लेश या उपद्रव आगतद, रा आंदुर तुरन्त ठोकर तिनतार.
MAT 13:22 जो झाळीगोळ दा बोऊस्कु आत, ईद अद हुन, जो वचन इक केळतार, पर ईद दुनिया अन चिन्ता अदिक धन इन ध्वाका वचन इक वत्‍त बुळतद, अदिक आंदुर काय तरसकालुर.
MAT 13:23 जो वळ्लीद जागा दा बोऊस्कु आत, ईद अद हुन, जो वचन इक केळकु सम्सतार, अदिक काय तरतार; यारारा सौ गुणा, यारारा साठ गुणा, अदिक यारारा तीस गुणा.”
MAT 13:24 यीशु आंदरी मात्‍त ऊंद उदाहरण कोट्टुन: “स्वर्ग इन राज्य आ मंळसा अन्द घाई आद याव तान केई दा वळ्लीद बींजा बोऊस्दुन.
MAT 13:25 पर याग लॉकुर मिंगोर रा आऊन दुश्मन बंदकु गोदी इन न्याड्या आळी दाकळोद बींजा बोऊस्कु होटोदुन.
MAT 13:26 याग कोम होट्टव अदिक लॉम्बागोळ हतदव, रा आळी दाकळोद बींजागोळ्द मार्रगोळ भी कांळ्सदव.
MAT 13:27 ईदुर मा मान्ना अन्द दासगोळ बंदकु आऊन से अंदुर, ‘हे स्वामी, येन नी तान केई दा वळ्लीद बींजा बोऊसीदिल? बाक आळी दाकळोद बींजा अन्द मार्रगोळ अदुर्दा यल टु बंदव?’
MAT 13:28 आव आंदुर से अंदुन, ‘ईद यावारा दुश्मन उन क्याल्सा हुन.’ दासगोळ आऊन से अंदुर, ‘येन नीन इच्छा आद, कि नाव होगकु अवरी कित बुटेव?’
MAT 13:29 आव अंदुन, ‘ईला, हिंग आगबाळुल कि आळी दाकळोद बींजा अन्द मार्रगोळ किता होती नीव अऊर सांगुळ गोदी भी कित कोमी.
MAT 13:30 कटाई ताका येढ्ढु उक ऊंद सांगुळ वाळुसगोळी, अदिक कटनी इन समय दा ना कडावाळेर से अनाईन कि पयले आळी दाकळोद बींजा अन्द मार्रगोळी जमा माळकु होताकोर साटी अऊर गट्टा कट कोमी, अदिक गोदी इक नान केई दा जमा माळी.’”
MAT 13:31 यीशु आंदरी मात्‍त ऊंद उदाहरण कोट्टुन: “स्वर्ग इन राज्य राई इन ऊंद बींजा अन घाई आद, यदरी यातोवारा मंळसा हुडुकु तान केई दा बोऊस कोंडुन.
MAT 13:32 अद सप्पा बींजागोळ से स्यांळ्द रा ईरतद लेकीन याग धोळ्द आगेगतद आग सप्पा काण्णा-कस से धोळ्द आगेगतद; अदिक हिंग मार्र आगेगतद कि आकाश ईनव पक्षी बंदकु अदुर डगालगोळ मा ग्वादा माळ कोमताव.”
MAT 13:33 यीशु आंदरी मात्‍त ऊंद उदाहरण केळ्सदुन: “स्वर्ग इन राज्य खमीर इन घाई आद यदरी यातोदारा आर्त हुडुकु हन्नेळ किलो हीट्ट दा मीलुस बुटुर अदिक आग्त-आग्त अद सप्पा हीट खमीर आगेत.”
MAT 13:34 ईव सप्पा मातगोळ यीशु उदाहरणगोळ दा लॉकुर से अंदुन, अदिक बिना उदाहरण देल आव आंदुर से येनु ईला अनतोगोन,
MAT 13:35 कि जो वचन भविष्यवक्ता अन्द द्वारा अंदकु आगीत, अद पुरा आगुल: “ना उदाहरण अनली तान बाय खोलसाईन: ना आ मातगोळी जो दुनिया अन्द उत्पत्ति टु होचकु ईताव प्रगट माळाईन.”
MAT 13:36 आग यीशु भीळ इक बिटकु मान्नी बंदुन, अदिक यीशु उन चेलागोळ आऊन हात्‍ती बंदकु अंदुर, “केई इन आळी दाकळोद बींजा अन्द उदाहरण नामी समझुसबुळ.”
MAT 13:37 यीशु आंदरी उत्‍तर कोट्टुन, “याव वळ्लीद बींजा अक बोऊसीदुन आव मंळसा अन्द पार हुन.
MAT 13:38 केई दुनिया हुन, वळ्लीद बींजा राज्य अन्द औलाद हुन, अदिक आळी दाकळोद बींजा दुष्ट इन औलाद हुन.
MAT 13:39 या दुश्मन अवरी बोऊस्यान आव शैतान हुन; कटनी दुनिया अन्द अन्त हुन, अदिक कडावाळेर स्वर्गदूत उर.
MAT 13:40 इदुरसाटी ह्यांग आळी दाकळोद कचरा जमा माळकु होताक्‍कु आगताव हांग अच दुनिया अन्द आखरी दा आदीत.
MAT 13:41 मंळसा अन्द पार तान स्वर्गदूतगोळ इक कळ्यान, अदिक आंदुर आऊन राज्य दा टु सप्पा ठोकर इन कारणगोळी अदिक कुकर्म माळावाळेरी इक जमा माळ्यार,
MAT 13:42 अदिक आंदरी बेक्‍की इन कुण्ड दा हाक्यार, यल आंदुर वरल्यार अदिक हल्ल कच्यार.
MAT 13:43 आ समय न्यायी तान आप्प उन राज्य दा सुर्य अन्द घाई चमकुस्यार. यार किव आव आव केळ कोमुल.”
MAT 13:44 “स्वर्ग इन राज्य केई दा होचकु धन इन घाई आद, या यावारा मंळसा अक सिक्त अदिक आव अदरी मात होचकु ईटदुन, अदिक हापाळ खुश आदुन अदिक होगकु तान सब येनारा मार बुट्टुन अदिक आ केई इक कोंड कोंडुन.”
MAT 13:45 “बाक स्वर्ग इन राज्य ऊंद व्यापारी इन घाई आद जो वळ्लीद मोतीगोळ्द खोज दा ईरोन.
MAT 13:46 याग आऊक ऊंद बहूमुल्य मोती सिक्त रा आव होगकु तान सब कुछ मार बुट्टुन अदिक अदरी कोंड कोंडुन.”
MAT 13:47 “बाक स्वर्ग इन राज्य आ धोळ्द जार इन घाई आद जो समुद्र दा हाक्‍कु आत, अदिक हर प्रकार इन जीवगोळी जमा माळकु तर्त.
MAT 13:48 अदिक याग जार मेनगोळ देल तुम्मेत, रा मेन हुडावाळेर अदरी किनारा मा जेडुकु तंदुर, अदिक कुर्तकु वळ्लेव-वळ्लेव बर्तनगोळ दा जमा माळदुर अदिक बेकार-बेकार मेनगोळी भीट बुटुर.
MAT 13:49 दुनिया अन्द आखरी दा हिंग अच आदीत. स्वर्गदूत बंदकु पापीगोळी न्यायी लॉकुर से अलग माळ्यार,
MAT 13:50 अदिक आंदरी बेक्‍की इन कुण्ड दा हाक्यार. यल आंदुर वरल्यार अदिक हल्ल कच्यार.”
MAT 13:51 यीशु तान चेलागोळ से केळदुन, “येन नीव ई सप्पा मातगोळ सम्सदीर?” चेलागोळ उत्‍तर कोट्टुर, “हव.”
MAT 13:52 यीशु आंदुर से अंदुन, “इदुरसाटी हर ऊंद शास्त्री जो स्वर्ग इन राज्य अन्द चेला बनस्यान, आव आ मान्नावाळा अन्द घाई आन जो ताम भंडार दा टु व्हाशोद अदिक हाळोद वस्तुगोळी तेगुतान.”
MAT 13:53 याग यीशु ई सप्पा उदाहरण अंद कोंडुन, रा अल टु होटोदुन.
MAT 13:54 अदिक तान नगर दा बंदकु आंदुर्द यहूदी लॉकुर्द सभागृह दा आंदरी हिंग उपदेश कोळली कुरतुन कि आंदुर चकित आगकु अनली कुरतुर, “ईऊक ईद ग्यान अदिक सामर्थ्य अन्द क्याल्सा यल टु सिकदव?
MAT 13:55 येन ईव व्हर्स हुळ्ली माळावाळा अन पार आलच? अदिक येन ईऊन मोय इन हेसुर मरियम अदिक ईऊन वार्टुर्द हेसुर याकूब, यूसुफ, शमौन अदिक यहूदा हैलेच?
MAT 13:56 अदिक येन ईऊन सप्पा आकतींगेर नाम न्याड्या दा ईरालुर? बाक ईऊक ईद सप्पा ग्यान यल टु सिक्त?”
MAT 13:57 ईद प्रकार आंदुर आऊन कारण ठोकर तिंदुर, यीशु आंदुर से अंदुन, “भविष्यवक्ता अन्द तान द्याश अदिक तान मान्ना अक बिटकु अदिक यल उच अपमान आगाल.”
MAT 13:58 अदिक आव अल आंदुर्द अविश्वास इन कारण हापाळ सा सामर्थ्य इन क्याल्सा माळीदील.
MAT 14:1 आ समय दा चौथाई द्याश इन राजा हेरोदेस यीशु उन बारा दा चर्चा केळदुन,
MAT 14:2 अदिक तान सेवकगोळ से अंदुन, “ईव यूहन्ना बपतिस्मा कोळावाळा हुन! आव सोत्‍तुर दा टु जित्‍ता आग्यान, इदुरसाटी आऊन से सामर्थ्य नव क्याल्सा प्रगट आगताव.”
MAT 14:3 यतिकी हेरोदेस राजा तान वार्ट फिलिप्पुस उन हिंग्स हेरोदियास इन कारण, बपतिस्मा कोळावाळा यूहन्ना अक हुडुकु कटसुसदुन अदिक जयलखाना दा हाक्‍क बुट्टुन.
MAT 14:4 यतिकी यूहन्ना आऊन से अंदिदुन कि तान स्यांळ्द वार्ट उन हिंग्स उक ईटोद नीन साठी उचित हैलेच.
MAT 14:5 इदुरसाटी आव आऊक कोंद बुळोद चाहासोन, पर लॉकुर से अंजतोगोन यतिकी आंदुर बपतिस्मा कोळावाळा यूहन्ना अक भविष्यवक्ता मान्सतोगोर.
MAT 14:6 लेकीन याग हेरोदेस उन जनम दिन बत्‍त, रा हेरोदियास इनोर पोर हाब्ब दा तान नाच तोर्सकु हेरोदेस उक खुश माळदुर.
MAT 14:7 ईदुर मा आव किर्‍या तिनकु वचन कोट्टुन, “जो येनारा नी नानी बेळ्या, ना नीनी कोळाईन.”
MAT 14:8 आक तान मोय इन भळकुसदुर देल ईद अंदुर, “यूहन्ना बपतिस्मा कोळावाळा अन्द ताल्ला टाटी दा ईटकु ईगल्या नानी ईल तंदकोळ.”
MAT 14:9 राजा दुखी आदुन, लेकीन तान किर्‍या अन, अदिक सांगुळ कुरावाळेर कारण, आग्या कोट्टुन कि जो ई पोर अंदुर अद कोटकु आगुल.
MAT 14:10 अदिक आव जयलखाना दा लॉकुरी कळुकु यूहन्ना अन्द ताल्ला कळसुस बुट्टुन;
MAT 14:11 अदिक आऊन ताल्ला टाटी दा तनकु आत अदिक पोर इक कोटकु आत, अदरी आक तान मोय इन हात्‍ती ओतुर.
MAT 14:12 आग यूहन्ना नोर चेलागोळ बंदुर अदिक आऊन लाश इक ओतकु नळ्सदुर, अदिक होगकु यीशु उक ईद समाचार कोट्टुर.
MAT 14:13 याग यीशु यूहन्ना अन बारा दा केळदुन, रा आव ड्वांगा मा येरकु अल टु यातोदारा सुनसान जागा अक, आबना दा होटोदुन. लॉकुर ईद केळकु नगर-नगर टु पैदल अच आऊन हिंद आगेदुर.
MAT 14:14 यीशु होटकु ऊंद धोळ्द भीळ नोळदुन अदिक आंदुर मा तरस तिंदुन, अदिक आंदुर्द बिमार मंळसागोळी चंगा माळदुन.
MAT 14:15 याग द्याव आत रा आऊन चेलागोळ आऊन हात्‍ती बंदकु अंदुर, “ईद सुनसान जागा आद अदिक समय आगेग्याद; लॉकुरी विदा माळकु अन कि आंदुर मोहल्लागोळ दा होगकु तान साठी ऊमोद कोमुल.”
MAT 14:16 पर यीशु आंदुर से अंदुन, “आंदुर्द होगोद जरूरी हैलेच! नीव अच इंदरी तिनली कोळी.”
MAT 14:17 आंदुर आऊन से अंदुर, “ईल नाम हात्‍ती अईद रोट्टी अदिक येढ्ढ मेनगोळी बिटकु मात्‍त येनु हैलेच.”
MAT 14:18 यीशु अंदुन, “अवरी नान हात्‍ती ईल तरी.”
MAT 14:19 आग यीशु लॉकुरी काड्डा मा कुरली हेळदुन, अदिक आ अईद रोट्टीगोळी अदिक येढ्ढ मेनगोळी हुळदुन; अदिक स्वर्ग दी नोळकु धन्यवाद माळदुन अदिक रोट्टीगोळी मुरू मुरूकु चेलागोळी कोट्टुन, अदिक चेलागोळ लॉकुरी कोट्टुर.
MAT 14:20 याग सप्पा लॉकुर तिनकु संतुष्ट आगेदुर, रा चेलागोळ मिक्‍कु तुकळागोळ दा टु तुमकु हन्नेळ फुट्टीगोळी नेगदुर.
MAT 14:21 अदिक तिनावाळेर आर्तेर अदिक चिकोरगोळी बिटकु, अईद हजार मंळसागोळ हात्‍तीपास ईरोर.
MAT 14:22 आग आव तुरन्त तान चेलागोळी ड्वांगा मा येरोरसाटी मजबुर माळदुन कि आंदुर आऊन से पयला आप्पाटी होटोगुल, आगासताका आव लॉकुरी सार माळ्यान.
MAT 14:23 यीशु लॉकुरी सार माळकु, प्रार्थना माळली अलग पहाळ मा होटोदुन; अदिक द्यावगा आव अल आबना ईरोन.
MAT 14:24 आ समय ड्वांगा किनारा टु दुर ईरोद अदिक झील इन न्याड्या दा नीर इन लयर देल लयरगोळ देल ईत्‍त आत्‍त आलगाळोद, यतिकी आँधी ड्वांगा अन्द ऊलट ईरोद.
MAT 14:25 अदिक यीशु हुंजकुका अन मुर टु आर मुरा अन दरम्यान झील मा नळुतेला आंदुर हात्‍ती बंदुन.
MAT 14:26 चेला आऊक झील मा नळुतेला नोळकु घबरूसेदुर. अदिक अनली कुरतुर, “ईव भूत हुन!” अदिक अंज्क इन मारा देल चिल्ळास कुरतुर.
MAT 14:27 आग यीशु तुरन्त आंदुर से मातगोळी माळदुन अदिक अंदुन, “हिम्मत ईटी! ना हुईन, अंजबाळी!”
MAT 14:28 पतरस आऊक उत्‍तर कोट्टुन, “हे प्रभु, अगर नीच हुय, रा नानी तान हात्‍ती नीर मा नळुकु बरोद आग्या कोळ.”
MAT 14:29 आव अंदुन, “बा!” आग पतरस ड्वांगा मा टु ईळुकु यीशु उन हात्‍ती होगली नीर मा नळुली कुरतुन.
MAT 14:30 पर हवा अक नोळकु अंजेदुन, अदिक याग मुळ्कली कुरतुन रा चिळ्लासकु अंदुन, “हे प्रभु, नानी ऊळ्स!”
MAT 14:31 यीशु तुरन्त कय वाढ़ुस्कु आऊक हुडुकोंडुन अदिक आऊन से अंदुन, “हे अल्पविश्वासी, नी येती शंका माळ्द?”
MAT 14:32 याग आंदुर ड्वांगा मा येरदुर, रा हवा रूकसेत.
MAT 14:33 ईदुर मा आंदुर जो ड्वांगा मा ईरोर, आऊक दण्डवत माळकु अंदुर, “खराखुरा, नी परमेश्वर उन पार हुय.”
MAT 14:34 आंदुर आप्पाटी ईळुकु गन्नेसरत इन भूमी मा पोहचुसदुर.
MAT 14:35 अलेर लॉकुर आऊक अर्त कोंडुर अदिक आस-पास इन पुरा प्रदेश दा समाचार कळुदुर, अदिक सब बिमार मंळसागोळी आऊन हात्‍ती तंदुर,
MAT 14:36 अदिक आऊन से विनती माळली कुरतुर कि आव आंदरी तान कपळा अन्द पल्लाक अच मुट गोळुल; अदिक यास मुंदुर आऊक मुटदुर, आंदुर चंगा आगेदुर.
MAT 15:1 आग यरूशलेम टु थ्वाळासा फरीसी अदिक शास्त्री यीशु उन हात्‍ती बंदकु अनली कुरतुर,
MAT 15:2 “नीन चेलागोळ पुर्वजगोळ्द परंपरागोळी येती टाल्सतार, कि बिना कय तोळुकु रोट्टी तिनतार?”
MAT 15:3 यीशु आंदरी उत्‍तर कोट्टुन, “नीव भी तान परंपरागोळ कारण येती परमेश्वर उन आग्या टाल्सतीर?
MAT 15:4 यतिकी परमेश्वर अंदान, ‘तान आप्प अदिक तान मोय इन आदर माळेत,’ अदिक ‘जो यावारा आप्प या मोय इक बुरा भला अंदान, आऊक कोंदकु आदीत.’
MAT 15:5 लेकीन नीव अनतीर कि अगर यावारा तान आप्प या मोय से अनुल, ‘जो येनारा नीनी नान से लाभ पोहचुस सकोद, अद परमेश्वर उक भेंट येर्सकु आगेग्याद,’
MAT 15:6 रा आव तान आप्प उन आदर माळालुन, ईद प्रकार नीव तान परंपरा अन्द कारण परमेश्वर उन वचन टाल्स बुट्टीर.
MAT 15:7 हे कपटीगोळा, यशायाह नीम बारा दा ईद भविष्यवाणी खरा अच माळ्यान.”
MAT 15:8 “ई लॉकुर टुटगोळ देल रा नान आदर माळतार, लेकीन इंदुर मन नान से दुर ईरतद.
MAT 15:9 अदिक आंदुर बेकार नान उपासना माळतार, यतिकी मंळसागोळ विधीगोळी नियम शास्त्र बन्सकु कल्सतार.”
MAT 15:10 आग यीशु लॉकुरी तान हात्‍ती कारूकु आंदुर से अंदुन, “केळी, अदिक समसी:
MAT 15:11 जो बाय दा होगतद, अद मंळसा अक अशुध्द माळाल, पर जो बाय टु होळतद, अदा मंळसा अक अशुध्द माळतद.”
MAT 15:12 आग चेलागोळ बंदकु आऊन से अंदुर, “येन नी जान्सत्या कि ईद वचन केळकु फरीसीगोळ्द भावनागोळी ठेस पोहचुस्त?”
MAT 15:13 यीशु उत्‍तर कोट्टुन, “हर मार्र जो नान स्वर्गीय आप्प हचीदिल, कितकु आदीत.
MAT 15:14 आंदरी होगगोळी; आंदुर कुढ्ढ मार्गदर्शक आर अदिक कुढ्ढ अगर कुढ्ढ मंळसा अक हादी तोरसुल, रा येढ्ढु मुंदुर खॉदरा दा बिदोदार.”
MAT 15:15 ईद केळकु पतरस आऊन से अंदुन, “ईद उदाहरण नामी समजुस बुळ.”
MAT 15:16 यीशु अंदुन, “येन नीव भी ईगासताका ना समझ आईर?
MAT 15:17 येन नीव जान्सालीर कि जो येनारा बाय दा होगतद अद व्हाट्टा दा होगतद, अदिक शरीर टु होट्ट बुळतद?
MAT 15:18 पर जो येनारा बाय दा टु होळतद, अद मन देल होळतद, अदिक अदा मंळसा अक अशुध्द माळतद.
MAT 15:19 यतिकी बुरा विचार, कोन्नोद, परस्त्रीगमन, व्यभिचार, काळ्लपनी, ख्वाटा गवाही अदिक अपमान मन देल अच होळतद.
MAT 15:20 ईवा हुव जो मंळसा अक अशुध्द माळताव, लेकीन बिना कय तोळ्द ऊमली कुरोद मंळसा अक अशुध्द माळाल.”
MAT 15:21 यीशु अल टु होटकु, सूर अदिक सैदा अन्द प्रदेश दी होटोदुन.
MAT 15:22 आ प्रदेश टु ऊंद कनानी आर्त होट्टुर, अदिक चिळ्लासकु अनली कुरतुर, “हे प्रभु! दाऊद उन पारा, नान मा दया माळ! नान पोर इक दुष्टआत्मा हापाळ सतुसीत्याद.”
MAT 15:23 पर यीशु आकी येनु उत्‍तर कोटीदील. आग आऊन चेलागोळ बंदकु आऊन से विनती माळदुर, “ईकी सार माळ, यतिकी आक नाम हिंद चिल्ळासतेला बरेत्यार.”
MAT 15:24 आव उत्‍तर कोट्टुन, “इस्त्राएल इन घराना अन्द काळ्द म्यांडागोळी बिटकु ना यारदु हात्‍ती कळुकु आगीदील.”
MAT 15:25 लेकीन आक बंदुर, अदिक यीशु उक प्रणाम माळकु अनली कुरतुर, “हे प्रभु, नान मदत माळ.”
MAT 15:26 आव उत्‍तर कोट्टुन, “चिकोरगोळ्द रोट्टी हुळकु नायगोळ्द मुंद हाक्‍कोद उचित हैलेच.”
MAT 15:27 आक अंदुर, “खरा आद प्रभु, पर नायगोळ भी अद चुराचारा तिनताव, जो अऊर्द स्वामीगोळ मेज मा टु बिळतद.”
MAT 15:28 ईदुर मा यीशु आकी उत्‍तर कोट्टुन, “हे आर्त, नीन विश्वास धोळ्द आद. ह्यांग नी चाहसत्या, नीन साठी हांगा आगुल.” अदिक आकिन पोर अदा घळी चंगा आगेदुर.
MAT 15:29 यीशु अल टु गलील इन समुद्र अन्द हात्‍ती बंदुन अदिक पहाळी मा येरकु कुर्तोदुन.
MAT 15:30 आग भीळ इन भीळ आऊंद हात्‍ती बत्‍त. आंदुर तान सांगुळ लंगळागोळी, कुढ्ढगोळी, मुक्‍कागोळी, डुण्डागोळी अदिक मात्‍त हापाळ सा मुंदरी आऊन हात्‍ती तंदुर, अदिक आंदरी आऊन कालगोळ मा हाक्‍क बुटुर, अदिक आव आंदरी चंगा माळदुन.
MAT 15:31 याग लॉकुर नोळदुर कि मुक्‍कागोळ माताळतार, अदिक डुण्डागोळ चंगा आगतार, अदिक लंगळागोळ नळुतार, अदिक कुढ्ढ नोळतार रा लॉकुर अचम्भा माळदुर अदिक इस्त्राएल इन परमेश्वर उन बळाई माळदुर.
MAT 15:32 यीशु तान चेलागोळी हात्‍ती कारूकु आंदुर से अंदुन, “नानी ई भीळ मा हापाळ दया बरेत्याद, यतिकी आंदुर मुर दिन टु नान सांगुळ आर अदिक आंदुर हात्‍ती येनु तिनली हैलेच. ना आंदरी उपासा सार माळोद चाहसालीन, ईलारा हिंग आगबाळुल कि आंदुर हादी मा थक्सकु ईतोगुल.”
MAT 15:33 चेलागोळ आऊन से अंदुर, “नामी ई आळी दा यल टु ईस रोट्टीगोळ सिक्याव कि नाव ईट धोळ्द भीळ इक संतुष्ट माळेव?”
MAT 15:34 यीशु आंदुर से केळदुन, “नीम हात्‍ती यास रोट्टीगोळ आव?” आंदुर अंदुर, “येळ, अदिक थ्वाळासा स्याणेव मेनगोळ.”
MAT 15:35 आग यीशु लॉकुरी ल्याल्‍मा कुरोद आग्या कोट्टुन.
MAT 15:36 अदिक आ येळ रोट्टीगोळी अदिक मेनगोळी हुळदुन, धन्यवाद माळकु मुरदुन, अदिक तान चेलागोळी कोळतोदुन, अदिक चेलागोळ लॉकुरी.
MAT 15:37 ईद प्रकार देल सप्पा तिनकु संतुष्ट आगेदुर अदिक चेलागोळ मिग्द तुकळागोळ दा टु येळ फुट्टी नेगदुर.
MAT 15:38 तिनावाळेर आर्तेर अदिक चिकोरी बिटकु नाक हजार मंळसा ईरोर.
MAT 15:39 याग आव भीळ इक सार माळकु ड्वांगा मा येरेदुन, अदिक मगदन प्रदेश दा बंदुन.
MAT 16:1 फरीसीगोळ अदिक सदूकीगोळ हात्‍ती बंदकु यीशु उक परखुसोर साटी आऊन से अंदुर, “नामी स्वर्ग इन येनारा तरी चमत्कार इन चिन्ह तोर्स.”
MAT 16:2 यीशु आंदरी उत्‍तर कोट्टुन, “द्यावमुळका अक नीव अनतीर, ‘मौसम वळ्लीद ईत्‍तीत, यतिकी आकाश क्याचांद आद,’
MAT 16:3 अदिक व्हातर्या अक अंतीर, ‘ईंद आंधी बंदीत, यतिकी आकाश क्याचांद अदिक करीद आद.’ नीव आकाश इन लक्षण नोळकु हवामान इन अंदाजा हच सकतीर, पर समय इन चिन्ह अन अंदाज येती हच सकालीर?
MAT 16:4 ई युग इन बेकार मंळसा अदिक व्यभिचारी लॉकुर चिन्ह ढुंढ्सतार, पर योना अन्द चमत्कार इन चिन्ह अक बिटकु आंदरी मात्‍त यातोदु चिन्ह कोटकु आगतीदील.” अदिक यीशु आंदरी बिटकु होटोदुन.
MAT 16:5 चेलागोळ झील इन आप्पाटी पोहचुसदुर, पर आंदुर रोट्टी हुडोद मारतोगीदुर.
MAT 16:6 यीशु आंदुर से अंदुन, “नोळी, फरीसीगोळ अदिक सदूकीगोळ्द खमीर देल सावधान ईरेतीर.”
MAT 16:7 आंदुर आपस दा मातचीत माळली कुरतुर, “नाव रोट्टी तंदिदील अनकु आव हिंग अनेत्यान.”
MAT 16:8 ईद जान्सकु, यीशु आंदुर से अंदुन, “हे अल्पविश्वासीगोळा, नीव आपस दा यती विचार माळतीर कि नाम हात्‍ती रोट्टी हैलेच?
MAT 16:9 येन नीव ईगासताका समसीदील? येन नीमी आ अईद हजार इन अईद रोट्टीगोळ याद हैलेच, अदिक ना ईद कि नीव यास फुट्टीगोळ नेगदिदीर?
MAT 16:10 अदिक ना आ नाक हजार लॉकुर साटी येळ रोट्टीगोळ, अदिक ना ईद कि नीव यास फुट्टीगोळ नेगदिदीर?
MAT 16:11 नीव यती समसालीर कि ना नीम से रोट्टीगोळ बारा दा अंदिदील, लेकीन ईद कि नीव फरीसीगोळ अदिक सदूकीगोळ खमीर देल सावधान ईरेतीर.”
MAT 16:12 आग आंदुर समझ दा बत्‍त कि आव रोट्टी इन खमीर देल ईला, पर फरीसीगोळ अदिक सदूकीगोळ्द शिक्षा देल सावधान ईरली हेळीदुन.
MAT 16:13 यीशु कैसरिया फिलिप्पी इन प्रदेश दा बंदुन, अदिक तान चेलागोळ से केळली कुरतुन, “लॉकुर मंळसा अन पार उन बारा दा येन अनतार?”
MAT 16:14 आंदुर अंदुर, “यारारा यूहन्ना बपतिस्मा कोळावाळा अंतार, अदिक यारारा एलिय्याह, अदिक यारारा यिर्मयाह या भविष्यवक्तागोळ दा टु ऊंद यावारा अंतार.”
MAT 16:15 यीशु आंदुर से अंदुन, “लेकीन नीव नानी येन अंतीर?”
MAT 16:16 शमौन पतरस उत्‍तर कोट्टुन, “नी जित्‍ता परमेश्वर उन पार मसीह हुय.”
MAT 16:17 यीशु आऊक उत्‍तर कोट्टुन, “हे शमौन, योना अन्द पारा, नी धन्य आय; यतिकी मास अदिक खुन देल ईला, लेकीन नान आप्प जो स्वर्ग दा आन, ईद मात नीन मा प्रगट माळ्यान.
MAT 16:18 अदिक ना भी नीन से अनतीन कि नी पतरस हुय, अदिक ना ईद कल्ल मा तान मंडली माळाईन, अदिक अधोलोक इन फाटक अदुर मा प्रबल आगतीदील.
MAT 16:19 ना नीनी स्वर्ग इन राज्य इन चाबीगोळ कोळाईन: अदिक जो येनारा नी धरती मा कट्टया, अद स्वर्ग दा कट्टीत; अदिक जो येनारा नी पृथ्वी मा खोल्सया, अद स्वर्ग दा खुलसीत.”
MAT 16:20 आग यीशु चेलागोळी चेतावनी कोट्टुन कि यारदु से अनबाळेतीर कि ना मसीह हुईन.
MAT 16:21 आ समय टु यीशु तान चेलागोळी हेळली कुरतुन, “जरूरी आद कि ना यरूशलेम इक होगाईन अदिक पुरनियों, अदिक प्रधान याजकगोळ, अदिक शास्त्रीगोळ कय देल हापाळ दुख नेगाईन; अदिक कोंदकु आगाईन; अदिक मुर दिन इन बाद्दा जित्‍ता आगाईन.”
MAT 16:22 इदुर मा पतरस यीशु उक अलग दनकुसकु अंदुन, “हे प्रभु, परमेश्वर माळबाळुल! नीन सांगुळ हिंग यागलु आगतीदील.”
MAT 16:23 यीशु तिर्गकु पतरस से अंदुन, “हे शैतान, नान मुंद टु दुर आग! नी नान साटी ठोकर इन कारण आय; यतिकी नी परमेश्वर उन मातगोळ मा ईला, लेकीन मंळसा अन मातगोळ मा मन हचत्या.”
MAT 16:24 आग यीशु तान चेलागोळ से अंदुन, “अगर यावारा नान हिंद बरोद चाहासतान, रा तान तान इन इनकार माळुल अदिक तान क्रूस नेगुल, अदिक नान हिंद आगेगुल.
MAT 16:25 यतिकी जो यावारा तान जीव ऊळसोद चाहास्यान, आव अदरी खोऊस्यान; अदिक जो यावारा नान साटी तान जीव खोऊस्यान, आव अदरी हासिल माळ्यान.
MAT 16:26 अगर मंळसा पुरा दुनिया अक हासिल माळ्यान, अदिक तान जीव इन हानि नेगदान, रा आऊक येन लाभ आदीत? या मंळसा तान जीव इन बदला येन कोट्टान?
MAT 16:27 मंळसा अन पार तान स्वर्गदूतगोळ सांगुळ तान आप्प उन महिमा दा बंदान, अदिक आ समय ‘आ हर ऊंद मंळसा अक आऊन क्याल्सा अन्द अनुसार प्रतिफल कोट्टान.’
MAT 16:28 ना नीम से खरा माताळतीन कि जो इल निदुरकु आर, आंदुर दा टु यारारा हिंग आर कि आंदुर यागासताका मंळसा अन पार उक आऊन राज्य दा बर्त नोळतीदिल, आगासताका मृत्यु उन स्वाद यागलु नेकतीदिल.”
MAT 17:1 आर दिन इन बाद्दा यीशु पतरस अदिक याकूब अदिक आऊन वार्ट यूहन्ना अक सांगुळ हुळदुन, अदिक आंदरी आबना दा यातोदारा ऊँचा पहाळ मा ओतुन. अदिक आंदुर अलावा अल याऊ ईला ईरोन.
MAT 17:2 अल आंदुर्द मुंद यीशु उन रूप बदलुसेत, अदिक आऊन बाय सुर्य अन्द घाई चमकुस्त अदिक आऊन कपळा ज्योत इन घाई उजुळ आगेदव.
MAT 17:3 अदिक मूसा अदिक एलिय्याह आऊन सांगुळ मातगोळ हेळतेला आंदरी कांळ्सदुर.
MAT 17:4 इदुर मा पतरस यीशु से अंदुन, “हे प्रभु, नाम ईल ईरोद ठीक आद. अगर नीन इच्छा आद रा ना इल मुर हांद्रा माळाईन; ऊंद नीन साटी, ऊंद मूसा अन साटी, अदिक ऊंद एलिय्याह अन साटी.”
MAT 17:5 यीशु माताळतेला अच ईरोन कि ऊंद उजला बादल आंदरी झाक्स बुळ्त, अदिक आ बादल दा टु ईद शब्द होळ्त: “ईव नान प्रिय पार हुन, ईऊन से ना खुश आईन: ईऊन केळी.”
MAT 17:6 चेलागोळ ईद केळकु बाय इन भार देल बिदोदुर अदिक हापाळ अंजेदुर.
MAT 17:7 यीशु हात्‍ती बंदकु आंदरी मुटदुन, अदिक अंदुन, “येळी, अंजबाळी.”
MAT 17:8 आग आंदुर तान कण्णगोळ नेगदुर अदिक यीशु उक बिटकु अदिक यारीकु नोळीदील.
MAT 17:9 याग आंदुर पहाळी मा टु ईळा होती यीशु आंदरी ईद आग्या कोट्टुन, “यागासताका मंळसा अन्द पार सोत्‍तुर दा टु जित्‍ता आगालुन, आगासताका जो येनारा नीव नोळीर यारीकु हेळबाळेतीर.”
MAT 17:10 इदुर मा यीशु उन चेलागोळ आऊन से केळदुर, “बाक शास्त्री यती अनतार कि एलिय्याह अन्द पयले बरोद जरूरी आद?”
MAT 17:11 यीशु उत्‍तर कोट्टुन, “एलिय्याह जरूर बंदान, अदिक सप्पा येनारा सुधरूस्यान.
MAT 17:12 लेकीन ना नीम से अनतीन कि एलिय्याह होटबंदुन, अदिक लॉकुर आऊक अरतीदिल; लेकीन ह्यांग चाहासदुर हांग अच आऊन सांगुळ माळदुर. ईदा रीति देल मंळसा अन्द पार भी आंदुर्द कय देल दुख नेगदान.”
MAT 17:13 आग चेलागोळ सम्सदुर कि यीशु नाम से यूहन्ना बपतिस्मा कोळावाळा अन्द बारा दा अंदुन.
MAT 17:14 याग आंदुर भीळ इन हात्‍ती पोहचुसदुर, रा ऊंद मंळसा यीशु उन हात्‍ती बंदुन, अदिक ट्वांगरा टेक्सकु अनली कुरतुन,
MAT 17:15 “हे प्रभु, नान पार उन मा दया माळ! यतिकी आऊक मिर्गी बरतद, अदिक आव हापाळ दुख नेगुतान; अदिक घळी-घळी बेक्‍की दा अदिक घळी-घळी नीर दा बीळतोगतान.
MAT 17:16 ना तान पार उक नीन चेलागोळ हात्‍ती तंदिदीन, पर आंदुर आऊक चंगा माळ सकिदील.”
MAT 17:17 यीशु अंदुन, “हे अविश्वासी अदिक हठीला लॉकुरगोळा, ना यागासताका नीम सांगुळ ईराइन? यागासताका नीम्द सहन माळाईन? आ पार उक ईल नान हात्‍ती तरी.”
MAT 17:18 आग यीशु दुष्टआत्मा अक आग्या कोट्टुन, अदिक अद आऊन दा टु होट बुळ्त; अदिक पार अदा घळी चंगा आगेदुन.
MAT 17:19 आग चेलागोळ आबना दा यीशु उन हात्‍ती बंदकु अंदुर, “नाव आ दुष्टआत्मा अक यती तेगु सकिदील?”
MAT 17:20 यीशु आंदुर से अंदुन, “तान विश्वास इन कमी इन कारण, यतिकी ना नीम से खरा अनतीन, अगर नीम्द विश्वास राई इन दाना अन बराबर भी आद, रा ईद पहाळी से अन सक्‍कीर, ‘ईल टु सरकुसकु अल होटोग,’ रा अद होटोदीत; अदिक यातोदु मात नीम साटी असंभव ईरतीदील.
MAT 17:21 लेकीन ईव दुष्टआत्मागोळ प्रार्थना अदिक उपास इन अलावा यातोदु उपाय देल होळालव.”
MAT 17:22 याग आंदुर गलील क्षेत्र दा ईरोर, रा यीशु आंदुर से अंदुन, “ना मंळसा अन पार मंळसागोळ्द कय देल हुळसुस्कु आगाईन अदिक सौप्सकु आगाईन;
MAT 17:23 अदिक आंदुर आऊक कोंद बुट्टार, अदिक आव तीसरा दिशी जित्‍ता आदान.” ई मात मा चेलागोळ हापाळ उदास आदुर.
MAT 17:24 याग यीशु अदिक आऊन चेलागोळ कफरनहूम दा पोहचुसदुर, रा सभागृह अन कर ताकोमावाळेर पतरस उन हात्‍ती बंदकु केळली कुरतुर, “येन नीम गुरु सभागृह अन कर कोळालुन?”
MAT 17:25 पतरस अंदुन, “हव, कोळतान.” याग आव मान्या बंदुन, रा यीशु आऊन केळा पयले अच आऊन से अंदुन, “हे शमौन, नी येन सोचत्या? पृथ्वी इन राजा महसूल या कर यार से ताकोमतार? तान चिकोर से या परायागोळ से?”
MAT 17:26 पतरस आऊन से अंदुन, “परायागोळ से.” यीशु आऊन से अंदुन, “आग अच रा चिकोर कर कोळदुर देल ऊळ्दोदुर.
MAT 17:27 तरी भी इदुरसाटी कि नाव आंदरी ठोकर तिन्सतीदील, नी समुद्र अन्द किनारा मा होगकु गरी हाक, अदिक जो मेन पयले होट्टीत, अदरी हुडु; अदुर्द बाय तेरदुर मा नीनी ऊंद सिक्‍का सिक्‍कीत, अदरी का हुडुकु नान अदिक तान कर आंदरी कोटबुळेत.”
MAT 18:1 अदा घळी चेलागोळ यीशु उन हात्‍ती बंदकु केळली कुरतुर, “स्वर्ग इन राज्य दा धोड्डेव याव आन?”
MAT 18:2 इदुर मा यीशु ऊंद पार उक हात्‍ती कारूकु आंदुर्द न्याड्या दा नीदरूसदुन,
MAT 18:3 अदिक अंदुन, “ना नीम से खरा अनतीन कि यागासताका नीव बदलुसालीर अदिक चिकोर घाई बनसालीर, नीव स्वर्ग इन राज्य दा प्रवेश माळ सकालीर.
MAT 18:4 जो यावारा तान तान इक ई पार उन घाई स्याणेव माळ्यान, आव स्वर्ग इन राज्य दा धोड्डेव आदान.
MAT 18:5 अदिक जो यावारा नान हेसुर देल ऊंद हिंग पार उक ग्रहण माळतान आव नानी ग्रहण माळतान.
MAT 18:6 “पर जो यारारा ई स्याणेर दा टु जो नान मा विश्वास माळतार ऊंद मंळसा अक ठोकर तिनस्यार, आऊन साटी भला आगाईत कि धोळ्द चक्‍की इन पट्टा आऊन कुतक्या दा लटकुसकु आगाईत, अदिक आऊक खोल समुद्र दा मुळ्कुस्कु आगाईत.
MAT 18:7 ठोकरगोळ्द कारण दुनिया मा हाय! ठोकरगोळ्द हत्‍तोद जरूरी आद; पर हाय आ मंळसा मा यार्द कारण ठोकर हततद.
MAT 18:8 “अगर नीन कय या नीन काल नीनी ठोकर तिनस्याव, रा अवरी कळकु भिटबुळ; डुण्डा या लंगळा आगकु जीवन दा प्रवेश माळोद नीन साटी इदुर से वळ्लीद आद कि येढ्ढ कय या येढ्ढ काल ईतकु नी अनन्त बेक्‍की दा हाक्‍कु आगाईद.
MAT 18:9 अगर नीनव कण्णगोळ नीनी ठोकर तिनस्याव, रा अवरी तेगुकु भिटबुळ; कुढ्ढ आगकु जीवन दा प्रवेश माळोद नीन साटी इदुर से वळ्लीद आद कि येढ्ढ कण्ण ईतकु नी नरक इन बेक्‍की दा हाक्‍कु आगाईद.
MAT 18:10 “नीव ई स्याणेर दा टु यारीकु तुच्छ जान्सबाळेतीर; यतिकी ना नीम से अनतीन कि स्वर्ग दा आंदुर स्वर्गदूत नान स्वर्गीय आप्प उन मार्रा हमेशा नोळतार.
MAT 18:11 यतिकी मंळसा अन्द पार काळ्द मंळसागोळी उळ्सली बंदान.
MAT 18:12 “नीव येन सोचतीर? अगर यावारा मंळसा अन्द सौ म्यांडागोळ आव, अदिक अदुर्दा टु ऊंद भटकुसेगुल, रा येन आव निन्यानबे अक बिटकु, अदिक पहाळीगोळ मा होगकु, आ भटकुस्द म्यांडा अक ढुँढ्सतीदिल?
MAT 18:13 अदिक अगर हिंग आत कि अद आऊक सिक्त, रा ना नीम से खरा माताळतीन कि आव आ निन्यानबे म्यांडागोळ साटी जो भटकुसकु ईला ईरव, आट खुश आगतीदील याट कि ई म्यांडा अन्द साटी आदान.
MAT 18:14 हिंग अच नीम आप्प उन जो स्वर्ग दा आन ईद इच्छा हैलेच कि ई स्याणेर दा टु ऊंद भी नाश आगुल.
MAT 18:15 “अगर नीन वार्ट नीन खिलाप अपराध माळुल, रा होग अदिक आबना दा मातचीत हेळकु आऊक समजुस; अगर आव नींद केळ्यान रा नी तान वार्ट उक हासिल माळ कोंड.
MAT 18:16 अगर आव केळालुन, रा ऊंद या येढ्ढ मुंदरी तान सांगुळ मात्‍त वोय, कि ‘हर ऊंद मात येढ्ढ या मुर गवाहगोळ्द बाय देल निश्चित माळोद आगुल.’
MAT 18:17 अगर आव आंदुर्द भी केळालुन, रा मंडली से अंदकोम, लेकीन अगर आव मंडली अन भी केळालुन रा नी आऊक गैरयहूदी अदिक कर ताकोमावाळेर घाई मान्स कोम.
MAT 18:18 “ना नीम से खरा माताळतीन, जो येनारा नीव पृथ्वी मा कट्टीर, अद स्वर्ग दा कट्टीत अदिक जो येनारा नीव धरती मा कट्टया, अद स्वर्ग दा खुलसीत.
MAT 18:19 बाक ना नीम से अनतीन, अगर नीम दा टु येढ्ढ मुंदुर पृथ्वी मा यातोदारा मात इन साटी ऊंद मन आगकु अदरी बेळीर, रा अद नान आप्प उन दी टु जो स्वर्ग दा आन, आंदुर्द साटी आगेदीत.
MAT 18:20 यतिकी येल येढ्ढ या मुर मुंदुर नान हेसुर मा जमा आगतार, अल ना आंदुर न्याड्या दा ईरतीन.”
MAT 18:21 आग पतरस हात्‍ती बंदकु यीशु से अंदुन, “हे प्रभु, अगर नान वार्ट अपराध माळतेला ईत्‍तान, रा ना यास अनली आऊक माफ माळाईन? येन येळ घन ताका?”
MAT 18:22 यीशु आऊन से अंदुन, “ना नीन से ईद अनालीन कि येळ घन ताका लेकीन येळ घन इन सत्‍तर गुणा ताका.”
MAT 18:23 “इदुरसाटी स्वर्ग इन राज्य आ राजा अन्द घाई आद, याव तान दासगोळ से हिसाब ताकोमोद चाहासदुन.
MAT 18:24 याग आव हिसाब ताकोमली कुरतुन, रा ऊंद मंळसा आऊन मुंद तनकु आदुन जो करोळो नव कर्जदार ईरोन.
MAT 18:25 याग आऊन हात्‍ती पैस्या खण्ळ्सली येनु ईला ईरोद, रा आऊन स्वामी अंदुन, ‘ईव अदिक ईऊन हिंग्स अदिक चिकोर चिण्ग अदिक जो येनारा ईऊन आद सप्पा मारकु आगुल, अदिक कर्ज तुमकु आगुल.’
MAT 18:26 इदुर मा आ दास बिदकु आ स्वामी इक प्रणाम माळदुन, अदिक अंदुन, ‘हे स्वामी धीरज हुडु, ना सब कुछ तुम बुळाईन.’
MAT 18:27 आग आ दास उन स्वामी तरस तिनकु आऊक बिट बुट्टुन, अदिक आऊन कर्जा भी माफ माळ बुट्टुन.
MAT 18:28 “लेकीन याग आव दास व्हार्या होट्टुन, रा आऊन संगी दासगोळ दा टु ऊंद आऊक सिकदुन जो आऊन सौ दीनार इन कर्जदार ईरोन; आव आऊक हुडुकु आऊन कुतक्या ओतदुन अदिक अंदुन, ‘जो येनारा नीन मा कर्ज आद तुमकोम.’
MAT 18:29 इदुर मा आऊन संगी दास बिदकु आऊन से विनती माळली कुरतुन, ‘धीरज हुडु, ना सब तुम बुळाईन.’
MAT 18:30 आव मानसिदिल, लेकीन होगकु आऊक बंदीगृह दा हाक बुट्टुन कि यागासताका कर्ज तुम कोमालुन, आगासताका अल्या ईरूल.
MAT 18:31 आऊन संगी दास ईद जो आगीत नोळकु हापाळ उदास आदुर, अदिक होगकु तान स्वामी इक पुरा हाल हेळ बुटुर.
MAT 18:32 आग आऊन स्वामी आऊक कारूकु आऊन से अंदुन, ‘हे दुष्ट दास, नी जो नान से विनती माळ्द, रा ना नींद अद पुरा कर्ज माफ माळदीन.
MAT 18:33 इदुरसाटी ह्यांग ना नीन मा दया माळदीन, हांग अच नीनी भी तान संगी दास मा दया ईला माळोद हुन?’
MAT 18:34 अदिक आऊन स्वामी गुस्सा दा बंदकु आऊक सजा कोळावाळेर्द कय दा सौप्स बुट्टुन, कि यागासताका आव पुरा कर्ज तुम कोमालुन, आगासताका आंदुर्दा कय दा ईरूल.
MAT 18:35 “ईदा प्रकार अगर नीम दा टु हर ऊंद तान वार्ट उक मन देल माफ माळ्यान, रा नान आप्प जो स्वर्ग दा आन, नीम से भी हांग अच माळ्यान.”
MAT 19:1 याग यीशु ईव मातगोळ अंद कोंडुन, रा गलील टु होटोदुन; अदिक यरदन गांगा अन्द आप्पाटी यहूदिया अन्द प्रदेश दा बंदुन.
MAT 19:2 आग धोळ्द भीळ यीशु उन हिंद आगेत, अदिक आव अल आंदरी चंगा माळदुन.
MAT 19:3 आग फरीसी आऊन परीक्षा माळोर साटी हात्‍ती बंदकु अनली कुरतुर, “येन यातोदारा भी कारण देल तान हिंग्स उक छोळ चिट्ठी कोळोद उचित आद?”
MAT 19:4 यीशु आंदरी उत्‍तर कोट्टुन, “येन नीव शास्त्र दा वाचुसीदील कि याव आंदरी माळ्यान, आव सुरूवात टु गंळ्स अदिक आर्त इन रूप दा माळदुन,
MAT 19:5 अदिक अंदुन, ‘इदुरसाटी मंळसा तान मोय-आप्प उक बिटकु तान हिंग्स उन सांगुळ ईत्‍तान अदिक आंदुर येढ्ढु मुंदुर ऊंद तन आदार.’
MAT 19:6 इदुरसाटी आंदुर ईग येढ्ढ ईला, लेकीन ऊंद तन आर. इदुरसाटी यारीक परमेश्वर जोळस्यान, अदरी यावारा भी मंळसा अलग माळबाळुल.”
MAT 19:7 आंदुर यीशु से अंदुर, “बाक मूसा ईद यती ठहरूसदुन कि छोळचिट्टी कोटकु तान हिंग्स उक बिट बुळी?”
MAT 19:8 यीशु आंदुर से अंदुन, “मूसा नीम मन इन कठोरता अन्द कारण नीमी तान-तान हिंग्स उक बिट बुळोद आग्या कोटीदुन, लेकीन सुरूवात टु हिंग ईला ईरोद.
MAT 19:9 अदिक ना नीम से अनतीन, कि जो यावारा व्यभिचार इक बिटकु अदिक याता कारण देल तान हिंग्स उक त्यागस्कु दुसरा अन सांगुळ मदा माळुल, रा आव व्यभिचार माळतान; अदिक जो आ बिटकु आर्त से मदा माळुल, रा आव भी व्यभिचार माळतान.”
MAT 19:10 चेलागोळ यीशु से अंदुर, “अगर गंळ्स उन आर्त इन सांगुळ हिंग संबंध आव, रा मदा माळोद वळ्लीद हैलेच.”
MAT 19:11 यीशु आंदुर से अंदुन, “सब मदा अन बिना ईर सकालुर, सिर्फ आंदुर यारीक ईद दान कोटकु आग्याद.
MAT 19:12 यतिकी यारारा नपुंसक हिंग आर, जो मोय इन व्हाट्या टु उच हिंग पैदा आग्यार; अदिक यारारा नपुंसक हिंग आर, यारी लॉकुर नपुंसक माळ्यार; अदिक यारारा हिंग आर, यार स्वर्ग इन राज्य अन्द साटी तान तान इक नपुंसक माळ्यार. जो इदरी ग्रहण माळ सकतान, आव ग्रहण माळुल.”
MAT 19:13 आग लॉकुर चिकोर इक यीशु उन हात्‍ती तंदुर कि आव आंदुर मा कय ईटुल अदिक प्रार्थना माळुल, पर चेलागोळ लॉकुरी दनकुसदुर.
MAT 19:14 यीशु अंदुन, “चिकोरी नान हात्‍ती बरगोळी, अदिक आंदरी मना माळबाळी, यतिकी स्वर्ग इन राज्य हिंग अच चिकोर्द हुन.”
MAT 19:15 अदिक यीशु आंदुर ताल्ला मा कय ईटकु आंदरी आशिषीत माळदुन अदिक अल टु होटोदुन.
MAT 19:16 ऊंद धनी मंळसा यीशु उन हात्‍ती बंदुन अदिक आऊन से अंदुन, “हे गुरु, ना यातोद वळ्लीद क्याल्सा माळाईन कि नानी अनन्त जीवन सिकुल?”
MAT 19:17 यीशु आऊन से अंदुन, “नी नान से भलाई इन बारा दा यती केळत्या? भला रा ऊन्दा आद, पर अगर नी जीवन दा प्रवेश माळोद चाहासत्या, रा आग्यागोळी मान्सतोग.”
MAT 19:18 आव यीशु से अंदुन, “यातव आग्यागोळ?” यीशु अंदुन, “ईद कि यारीकारा कोन्न बाळी, व्यभिचार माळबाळी, काळ्लपनी माळबाळी, ख्वाटा गवाही कोळबाळी,
MAT 19:19 तान आप्प अदिक तान मोय इन आदर माळी, अदिक तान मान्ना हातळोर से तान घाई प्यार ईटी.”
MAT 19:20 आ हारोदव मंळसा आऊन से अंदुन, “ई सब रा ना मानसीन; ईग नान दा याता मात इन कमी आद?”
MAT 19:21 यीशु आऊन से अंदुन, “अगर नी सिद्ध आगोद चाहसत्या रा होग, तान माल मारकु कंगालगोळी कोळ, अदिक नीनी स्वर्ग दा धन सिक्‍कीत; अदिक बंदकु नान हिंद आगेग.”
MAT 19:22 लेकीन आव हारोदव मंळसा ईद मात केळकु उदास आगकु होटोदुन, यतिकी आव हापाळ धनी ईरोन.
MAT 19:23 आग यीशु तान चेलागोळ से अंदुन, “ना नीम से खरा अनतीन कि धनवान मंळसा अन स्वर्ग इन राज्य दा प्रवेश माळोद मुश्किल आद.
MAT 19:24 नीन से मात्‍त अनतीन कि परमेश्वर उन राज्य दा धनवान उन प्रवेश माळदुर देल ऊँट इन मुग्ग इन खॉदरा दा टु चुजी होटबुळोद आसान आद.”
MAT 19:25 ईद केळकु चेलागोळ हापाळ चकित आगकु अंदुर, “बाक यार्द उद्धार आग सकतद?”
MAT 19:26 यीशु आंदुर दी नोळकु अंदुन, “मंळसागोळ से रा ईद आगसकाल, लेकीन परमेश्वर से सब कुछ आग सकतद.”
MAT 19:27 इदुर मा पतरस आऊन से अंदुन, “नोळ, नाव रा सप्पा येनारा बिटकु नीन हिंद आगीदेव: रा नामी येन सिक्‍कीत?”
MAT 19:28 यीशु आंदुर से अंदुन, ना नीम से खरा अनतीन कि व्हाशोद सृष्टी दा याग मंळसा अन्द पार तान महिमा अन्द सिंहासन मा कुरतान, रा नीव भी जो नान हिंद आगेगीर, हन्नेळ सिंहासनगोळ मा कुर्तकु इस्त्राएल इन हन्नेळ वंशगोळ्द न्याय माळीर.
MAT 19:29 अदिक जो यावारा नान साटी तान मान्नगोळ, या वार्टुर, या आकतींगेर, या आप्प, या मोय, या चिकोर-चिण्गेर, या केईगोळी नान हेसुर साटी बिट बुटान, आऊक सौ गुणा सिक्‍कीत, अदिक आव अनन्त जीवन इन अधिकारी आदान.
MAT 19:30 लेकीन हापाळ मुंदुर जो पयला आर, हिंदळोर आदार; अदिक जो हिंदळोर आर, आंदुर पयला आदार.
MAT 20:1 “स्वर्ग इन राज्य यातोवारा मान्नावाळा अन घाई आद, जो व्हातर्या होट्टुन कि तांद अंगुर इन बेली दा मजदूरगोळी क्याल्सा मा हचुल.
MAT 20:2 आव मजदूरगोळी प्रती ऊंद मंळसा अक ऊंद दीनार रोजी मा ईटदुन अदिक आंदरी तान अंगुर इन बेली दा कळुदुन.
MAT 20:3 व्हातर्या अक लगभग ऊंम्बत मुरा आव व्हार्या होट्टुन रा दुसरा लॉकुरी सात्‍ता दा बेकार निदुर्त नोळकु,
MAT 20:4 अदिक आव आंदुर से अंदुन, ‘नीव भी अंगुर इन बेली दा होगी, अदिक जो येनारा वळ्लीद आद, नीमी कोळाईन.’ अदिक आंदुर भी होटोदुर.
MAT 20:5 आग आ लॉकुर भी होटोदुर बाक हन्नेळ मुरा अदिक मुर मुरा अन हात्‍तीपास आव व्हार्या होटकु हांग अच माळदुन.
MAT 20:6 अईद मुरा आव मात्‍त व्हार्या होटकु दुसरा अक निदुरकु नोळदुन, अदिक आंदुर से अंदुन, ‘नीव यती हागुल तीम बेकार निदुरकु ईरतीर?’
MAT 20:7 आंदुर आऊन से अंदुर, ‘इदुरसाटी कि याऊ नामी क्याल्सा मा हचीदिल.’ आव आंदुर से अंदुन, ‘नीव भी नान अंगुर इन बेली दा होगी.’”
MAT 20:8 “द्यावमुळका अंगुर इन बेली इन स्वामी तान मुनीम से अंदुन, ‘क्याल्सा माळावाळेर इक कारूकु आखरी मजदूर हात्‍ती टु पयला मजदूर ताका आंदरी मजदूरी कोटबुळ.’
MAT 20:9 कम से कम अईद मुरा जो क्याल्सा मा हचकु आगीदुर रा आंदरी ऊंद ऊंद दीनार सिक्त.
MAT 20:10 जो पयले बंदीदुर आंदुर ईद सम्सदुर कि नामी यक्कुल सिक्‍कीत, लेकीन आंदरी भी ऊंद ऊंद दीनार अच सिक्त.
MAT 20:11 याग आंदरी ऊंद दीनार सिक्त रा ईद अनकु केईवाळा मा बळबुळ्सकु अनली कुरतुर,
MAT 20:12 ‘ई जो बाद्दा बंदार ईंदुर रा ऊंद घंटा अच क्याल्सा माळदुर, अदिक नी आंदरी भी नाम बराबर रोजी कोट, यार हागुल तीम ओझा नेगदुर अदिक बिसुल झेल्सदुर.’”
MAT 20:13 आव आंदुर दा टु ऊंद मंळसा अक उत्‍तर कोट्टुन, “हे संगी, ना नीन सांगुळ येनु अन्याय माळालीन. येन नी नान सांगुळ ऊंद दीनार इन मजदूरी पक्‍का ईला माळीद?
MAT 20:14 जो नींद आद, नेगु कोम अदिक होटोग; नान इच्छा ईद आद कि याट नीनी कोटीन आट अच ई हिंदळावाळा अक भी कोळाईन.
MAT 20:15 येन ईद उचित हैलेच कि ना तान माल से जो चाहसाईन अद माळाईन? येन नान भला ईरोद नीन कण्णगोळी नळतद?
MAT 20:16 ई प्रकार देल जो हिंदळोर आर, आंदुर पयले आदार; अदिक जो पयले आर, आंदुर हिंदळोर आदार.”
MAT 20:17 यीशु यरूशलेम इक होगाहोती हन्नेळ चेलागोळी आबना दा ओतुन, अदिक हादी मा आंदुर से अनली कुरतुन,
MAT 20:18 “नोळी, नाव यरूशलेम इक होगीतेव; अदिक मंळसा अन पार प्रधान याजकगोळ अदिक शास्त्रीगोळ्द कय दा हुळसुस्कु आदान, अदिक आंदुर आऊक मृत्यु इन लायक ठहरूस्यार.
MAT 20:19 अदिक आंदुर आऊक गैरयहूदीगोळ कय दा सोपस्यार कि आंदुर आऊन मज्याक हारसुल, अदिक क्वाळा बडुल, अदिक क्रूस मा येरसुल, अदिक आव तिसरा दिन जित्‍ता आदान.”
MAT 20:20 आग जब्दी इन पारगोळ्द मोय, तान पारगोळ सांगुळ यीशु उन हात्‍ती बंदकु प्रणाम माळदुर, अदिक आऊन से येनारा तरी बेळली कुरतुर.
MAT 20:21 यीशु आकिन से अंदुन, “नी येन चाहासत्या?” आक आऊन से माताळदुर, “ईद वचन कोळ कि नानोर ई येढ्ढ चिकोर नीन राज्य दा ऊंद नीन ऊमा कय अदिक ऊंद नीन डाक्या कय दी कुरतार.”
MAT 20:22 यीशु उत्‍तर कोट्टुन, “नीव जान्सालीर कि येन बेळेतीर. येन नीव अद प्याला कुडू सकतीर यदरी ना कुडोर मा आईन?” आंदुर आऊन से अंदुर, “कुडू सकतेव.”
MAT 20:23 आव आंदुर से अंदुन, “नीव नान प्याला रा कुळदीर, पर तान ऊमा कय अदिक डाक्या कय दी यारीकारा कुरसोद नान क्याल्सा आलच, लेकीन यार्द साटी नान आप्प उन दी टु तयार माळकु आग्याद, आंदुर दा साटी हुन.”
MAT 20:24 ईद केळकु हत्‍त चेलागोळ आ येढ्ढु वार्टुर मा नाराज आदुर.
MAT 20:25 यीशु आंदरी हात्‍ती कारूकु अंदुन, “नीव जान्सतीर कि गैरयहूदीगोळ हाकिम आंदुर मा विश्वास माळतार; अदिक जो धोड्डेर आर, आ लॉकुर आंदुर मा अधिकार जतुसतार.
MAT 20:26 लेकीन नीम दा हिंग आगतीदील; लेकीन जो यावारा नीम दा धोड्डेव आगोद चाहास्यान, आव नीम सेवक आगुल;
MAT 20:27 अदिक जो नीम दा प्रधान आगोद चाहासतान, आव नीम दास आगुल;
MAT 20:28 ह्यांग कि मंळसा अन पार; ना इदुरसाटी बंदिदील कि आऊन स्यावा माळकु आगुल, लेकीन इदुरसाटी बंदान कि खुद स्यावा टहल माळ सकुल, अदिक हापाळ लॉकुर्द छुटकारा साटी तान जीव कोळ सकुल.”
MAT 20:29 याग यीशु अदिक आऊन चेलागोळ यरीहो नगर टु होळोर, रा ऊंद धोळ्द भीळ आऊन हिंद आगेत.
MAT 20:30 अदिक येढ्ढ कुढ्ढगोळ, जो हादी इन किनारा मा कुर्तकु ईरोर, ईद केळकु कि यीशु होगेत्यान, हेसुर ताकोमकु अनली कुरतुर, “हे प्रभु, दाऊद उन औलाद, नाम मा दया माळ.”
MAT 20:31 लॉकुर आंदरी दनकुसदुर कि सुंगा ईरूल; पर आंदुर मात्‍त जोर देल चिळ्लासकु अंदुर, “हे प्रभु, दाऊद उन औलाद, नाम मा दया माळ.”
MAT 20:32 आग यीशु निदुरकु, आंदरी कारदुन अदिक अंदुन, “नीव येन चाहासतीर कि ना नीम साटी माळाईन?”
MAT 20:33 आंदुर यीशु उक अंदुर, “हे प्रभु, ईद कि नाव कण्णगोळ देल नोळ सक्‍केव.”
MAT 20:34 यीशु दया माळकु आंदुर कण्णगोळी मुटदुन, अदिक आंदुर तुरन्त नोळली कुरतुर, अदिक आऊन हिंद आगेदुर.
MAT 21:1 याग आंदुर यरूशलेम इन हात्‍ती पोहचुसदुर अदिक जैतून पहाळ मा बैतफगे नगर इन हात्‍ती बंदुर, रा यीशु येढ्ढ चेलागोळी ईद अनकु कळुदुन,
MAT 21:2 “मुंदळोद ऊर दा होगी. अल होगतेला ऊंद गधा कटकु, अदिक अदुर सांगुळ पाड्डा नीमी सिक्‍कीत. अवरी खोल्सकु नान हात्‍ती तरी.
MAT 21:3 अगर नीम से यावारा येनारा अनुल, रा अनेतीर कि प्रभु अक ईऊर्द जरवत आद, आग आव तुरन्त अवरी कळु बुट्टान.”
MAT 21:4 ईद इदुरसाटी आत कि जो वचन भविष्यवक्ता अन्द द्वारा अनकु आगीत, अद पुरा आगुल:
MAT 21:5 “सिय्योन इन पोर इन से अनी, ‘नोळ, नीन राजा नीन हात्‍ती बरेत्यान; आव नम्र आन, अदिक गधा मा कुर्तकु आन; मतलब गधा इन पाड्डा मा.’”
MAT 21:6 चेलागोळ होगकु, ह्यांग यीशु आंदरी अंदिदुन, हांग अच माळदुर.
MAT 21:7 अदिक गधा अदिक अदुर्द पाड्डा अक तनकु, अऊर मा तान कपळा हाकदुर, अदिक आव आ पाड्डा मा कुरतुन.
MAT 21:8 आग हापाळ सा लॉकुर तान कपळा हादी मा हासदुर, अदिक दुसरा लॉकुर मार्रगोळ्द डगाली कडुकु हादी मा हासदुर.
MAT 21:9 जो भीळ मुंद-मुंद होगतोगोद अदिक हिंद-हिंद बरतोगोद, कारू-कारूकु अनतोगोर, “दाऊद उन औलाद उक स्तुति, धन्य आन आव जो प्रभु उन हेसुर देल बरतान, दाऊद उन औलाद उन स्तुति आगुल.”
MAT 21:10 याग यीशु यरूशलेम दा प्रवेश माळदुन, रा पुरा नगर दा हलचल मचुसेत, अदिक लॉकुर अनली कुरतुर, “ईव याव हुन?”
MAT 21:11 लॉकुर अंदुर, “ईव गलील इन नासरत उन भविष्यवक्ता यीशु हुन.”
MAT 21:12 यीशु परमेश्वर उन मंदिर दा होगकु आ सप्पा मुंदरी, जो मंदिर दा लेन-देन माळोर, तेग्द बुट्टुन, अदिक सर्राफागोळ्द पांळ्सीगोळ अदिक कबूतर मारावाळेर्द चौकिगोळ उलटुस बुट्टुन;
MAT 21:13 अदिक आंदुर से अंदुन, “शास्त्र दा लिख्सकु आद, ‘नान मान्ना प्रार्थना अन्द मान्ना कहलुसीत,’ लेकीन नीव अदरी डाकूगोळ्द हड्डा माळतीर.”
MAT 21:14 आग कुढ्ढ अदिक लंगळागोळ, मंदिर दा आऊन हात्‍ती बंदुर, अदिक आव आंदरी चंगा माळदुन.
MAT 21:15 लेकीन याग प्रधान याजकगोळ अदिक शास्त्रीगोळ ई अदभुत क्याल्सागोळी, जो आव माळदुन, अदिक चिकोर इक मंदिर दा “दाऊद उन औलाद उक स्तुति” अनतेला नोळदुर, रा आंदुर गुस्सा आदुर,
MAT 21:16 अदिक आऊन से अनली कुरतुर, “सयेन नी केळत्या कि इंदुर येन अंतार?” यीशु आंदुर से अंदुन, “हव; येन नीव ईद यागलु वाचुसीदील: चिकोर अदिक हाल कुडुत चिग्द उर बाय देल अपार स्तुति माळसुस्द?”
MAT 21:17 आग यीशु आंदरी बिटकु नगर इन व्हार्या बैतनिय्याह अक होदुन अदिक अल आव ईळ्लक बितुसदुन.
MAT 21:18 व्हातर्या का याग यीशु नगर इक वापस बरोन रा आऊक हसु हत्‍त.
MAT 21:19 हादी इन किनारा अंजीर इन ऊंद मार्र नोळकु यीशु अदुर हात्‍ती होदुन, अदिक याल्ला अक बिटकु अद मार्र मा मात्‍त येनु ईला ईरोद आव आ मार्र इक अंदुन, “ईग टु नीन दा बाक यागलु काय हततिदील.” अदिक अंजीर इन मार्र तुरन्त वंळगेत.
MAT 21:20 ईद नोळकु चेलागोळी अचम्भा आत अदिक आंदुर अंदुर, “ईद अंजीर इन मार्र तुरन्त ह्यांग वंळगेत?”
MAT 21:21 यीशु आंदरी उत्‍तर कोट्टुन, “ना नीम से खरा अंतीन, अगर नीव विश्वास ईटी अदिक संदेह माळबाळी, रा न सिर्फ ईद माळेतीर जो ईद पहाळी इक भी अंदीर, ‘कित्‍तेग, अदिक समुद्र दा होगकु बिळ,’ रा ईद आगेदीत.
MAT 21:22 अदिक जो येनारा नीव प्रार्थना दा विश्वास देल बेळतीर अद सब नीमी सिक्‍कीत.”
MAT 21:23 यीशु मंदिर दा मात्‍त होगकु उपदेश कोळली कुरतुन, रा प्रधान याजकगोळ अदिक लॉकुर्द पुरनियागोळ आऊन हात्‍ती बंदकु केळदुर, “नी ईद क्याल्सा यार्द अधिकार देल माळत्या? अदिक नीनी ईद अधिकार याव कोटान?”
MAT 21:24 यीशु आंदरी उत्‍तर कोट्टुन, “ना भी नीम से ऊंद मात केळतीन; अगर अद नानी हेळेतीर, रा ना भी नीमी हेळाईन कि ईव क्याल्सा यातोद अधिकार देल माळतीन.
MAT 21:25 यूहन्ना अन्द बपतिस्मा यल टु ईरोद? स्वर्ग दी टु या मंळसागोळ दी टु?” आग आंदुर आपस दा मातगोळ माळली कुरतुर, “अगर नाव अंदेव ‘स्वर्ग दी टु,’ रा आव नाम से अंदान, ‘बाक नीव आऊन विश्वास यती माळीदिल?’
MAT 21:26 अदिक अगर अंदेव ‘मंळसागोळ दी टु,’ रा नामी भीळ इन अंज्क आद, यतिकी आंदुर सप्पा यूहन्ना अक भविष्यवक्ता मान्सतार.”
MAT 21:27 इदुरसाटी आंदुर यीशु उक उत्‍तर कोट्टुर, “नाव अरालेव.” आव भी आंदुर से अंदुन, “रा ना भी नीमी हेळालीन कि ई क्याल्सा ना याता अधिकार देल माळतीन.
MAT 21:28 “नीव येन सोचेतीर? यावारा मंळसा अन येढ्ढ पारगोळ ईरोर; आव पयला पार उन हात्‍ती होगकु अंदुन, ‘हे पारा, ईद अंगुर इन बेली दा क्याल्सा माळ.’
MAT 21:29 आव उत्‍तर कोट्टुन, ‘ना होग सकालीन,’ लेकीन बाद्दा पसतास्कु होदुन.
MAT 21:30 बाक आप्प दुसरा पार उन हात्‍ती होगकु हिंग अच अंदुन, आव उत्‍तर कोट्टुन, ‘हव जी होगतीन,’ लेकीन होगीदिल.
MAT 21:31 इंदुर येढ्ढु दा टु यार तान आप्प उन इच्छा पुरा माळदुर?” आंदुर अंदुर, “पयला पार.” यीशु आंदुर से अंदुन, “ना नीम से खरा अनतीन कि कर ताकोमावाळेर अदिक वेश्या नीम से पयले परमेश्वर उन राज्य दा प्रवेश माळतार.
MAT 21:32 यतिकी यूहन्ना न्यायीपन इन हादी दर्शुसतेला नीम हात्‍ती बंदुन, अदिक नीव आऊन विश्वास माळीदील; पर कर ताकोमावाळेर अदिक वेश्यागोळ आऊन विश्वास माळदुर: अदिक नीव ईद नोळदीर, लेकीन नीव पश्चाताप माळीदील अदिक आऊन मा विश्वास माळीदील.”
MAT 21:33 “मात्‍त ऊंद उदाहरण केळी: ऊंद केई इन मालिक ईरोन, आव अंगुर इन बेली हचीदुन, अदुर्द नाकु दी भाळा कटदुन, अदुर्दा रास्सा अन्द कुंड अगुळदुन अदिक मचान माळदुन, अदिक किसानगोळी अदुर्द ठ्याका कोटकु परदेश होटोदुन.
MAT 21:34 याग काय इन समय हात्‍ती बत्‍त, रा आव तान दासगोळी अदुर्द काय तरोरसाटी किसानगोळ हात्‍ती कळुदुन.
MAT 21:35 पर किसानगोळ आऊन दासगोळी हुडुकु, यारीकारा रा बळदुर, अदिक यारीकारा कोंद बुटुर, अदिक तिसरा अक कल्लगोळ बळदुर.
MAT 21:36 बाक आव पयले टु यक्कुल अदिक दासगोळी कळुदुन, अदिक आंदुर आ दासगोळ सांगुळ भी हांग अच माळदुर.
MAT 21:37 आखरी दा आव तान पार उक आंदुर हात्‍ती ईद सोचकु कळुदुन कि आंदुर नान पार उन आदर माळ्यार.
MAT 21:38 लेकीन किसानगोळ पार उक नोळकु आपस दा अंदुर, ‘ईव रा वारीस हुन, बरी, ईऊक कोंद बुळाता अदिक ईऊन धन संपत्‍ती हुडु कोमाता.’
MAT 21:39 इदुरसाटी आंदुर आऊक हुळदुर अदिक अंगुर इन बेली टु व्हार्या तेगुकु कोंद बुटुर.
MAT 21:40 इदुरसाटी याग अंगुर इन बेली इन मालिक बंदान, रा आ किसानगोळ सांगुळ येन माळ्यान?”
MAT 21:41 आंदुर आऊन से अंदुर, “आव आ बुरा लॉकुरी बुरा रीति देल नाश माळ्यान; अदिक अंगुर इन बेली इन ठ्याका दुसरा किसानगोळी कोट्टान, जो उचित समय मा काय तनकु कोट्टार.”
MAT 21:42 यीशु आंदुर से अंदुन, “येन नीव यागलु पवित्रशास्त्र दा ईद वाचुसीदील: ‘याता कल्ल इक राजमिस्त्रीगोळ बेकार ठहरूसेदुर, अदा कोना अन्द सिरा अन्द कल्ल आगेत? ईद प्रभु उन दी टु आगीत, अदिक नाम नजर दा अदभुत आद.’
MAT 21:43 इदुरसाटी ना नीम से अनतीन कि परमेश्वर उन राज्य नीम से ताकोमकु आदीत अदिक हिंग लॉकुरी कोटकु आदीत जो ईदुर प्रतिफल तरतार.
MAT 21:44 जो ईद कल्ल मा बिद्दान आव चकनाचुर आगेदान; अदिक यदुर मा अद बिद्दीत, अदरी पीसुस बुट्टीत.”
MAT 21:45 प्रधान याजक अदिक फरीसी यीशु उन उदाहरणगोळी केळकु समसेदुर कि आव आंदुर बारा दा अनतान.
MAT 21:46 अदिक आंदुर आऊक हुडोद चाहासोर, लेकीन लॉकुर से अंजेदुर यतिकी आंदुर आऊक भविष्यवक्ता मान्सतोगोर.
MAT 22:1 यीशु मात्‍त आंदुर से उदाहरणगोळ दा अनली कुरतुन,
MAT 22:2 “स्वर्ग इन राज्य आ राजा अन घाई आद, जो तान पार उन मदा अन भोजन कोट्टुन.
MAT 22:3 अदिक आव तान दासगोळी ईद अनकु कळुदुन कि आमन्त्रित लॉकुरी मदा दा ऊमली कारी; लेकीन आंदुर बरोद चाहासीदिल.
MAT 22:4 बाक आव मात्‍त दासगोळी ईद अनकु कळुदुन, ‘आमन्त्रित लॉकुरी अनेतीर: नोळी ना ऊमोद तयार माळ कोंडीन, नान वस्ता अदिक नानव पालस्दव जनावर कडुकु आदव, अदिक सब कुछ तयार आद; मदा अन्द भोज दा बरी.’
MAT 22:5 लेकीन आंदुर ध्यान कोटीदील अदिक तान हादी इक होटोदुर: यावारा तान केई दा रा यावारा तान व्यापार इक.
MAT 22:6 दुसरा लॉकुर जो मिक्‍कु ईरोर आऊन दासगोळी हुडुकु आंदुर्द अपमान माळदुर अदिक आंदरी कोंद बुटुर.
MAT 22:7 आग राजा अक सिट्ट बत्‍त, अदिक आव तान सेना अक कळुकु आ कोन्नावाळेर्द नाश माळदुन, अदिक आंदुर्द नगर इक होताक बुट्टुन.”
MAT 22:8 “आग आव तान दासगोळ से अंदुन, ‘मदा अन्द भोज रा तयार आद लेकीन निमंत्रित लॉकुर आ लायक ईला ईरोर.
MAT 22:9 इदुरसाटी हादी इन किनारा मा होगी अदिक यास लॉकुर नीमी सिक्यार, सप्पा लॉकुरी मदा अन्द भोजन दा कारूकु तरी.’
MAT 22:10 इदुरसाटी आ दासगोळ हादी इन किनारा मा होगकु जो भी वळ्लेर या बेकार लॉकुर आंदरी सिकदुर जमा माळदुर; अदिक मदा अन्द मान्ना पावनागोळ देल तुम्मेत.”
MAT 22:11 “याग राजा पाऊनागोळी नोळली बंदुन, रा आव अल ऊंद मंळसा अक नोळदुन, जो मदा अन्द कपळा हाक्‍कु ईला ईरोन.
MAT 22:12 राजा आऊन से केळदुन, ‘हे संगी; नी मदा अन्द कपळा हाग्द बिना इल यती बंद्या?’ आऊन बाय बंद आगेत.
MAT 22:13 आग राजा नवकरगोळ से अंदुन, ‘ईऊन कय-काल कटकु ईऊक व्हार्या अंधार दा हाक बुळी, अल वोरलोद अदिक हल्ल कच्चोद आदीत.’
MAT 22:14 यतिकी कारदोर रा हापाळ आर लेकीन नीवळुसदोर थ्वाळासा अच आर.”
MAT 22:15 आग फरीसीगोळ होगकु आपस दा विचार माळदुर कि यीशु उक याता प्रकार देल मातगोळ दा फसुसेव.
MAT 22:16 इदुरसाटी आंदुर तान चेलागोळी हेरोदिया अन सांगुळ आऊन हात्‍ती ईद अनली कळुदुर, “हे गुरु, नाव जान्सतेव कि नी खरा आय, अदिक परमेश्वर उन हादी सच्चाई देल कल्सत्या, अदिक यारदु परवा माळाल, यतिकी नी मंळसागोळ्द मार्रा नोळकु मातगोळ माळाल.
MAT 22:17 इदुरसाटी नामी हेळ नी येन सोचत्या? रोमी सरकार उक कर कोळोद उचित आद कि हैलेच.”
MAT 22:18 यीशु आंदुर्द कपट पन नोळकु अंदुन, “हे कपटीगोळा, नानी येती परखुसेतीर?
MAT 22:19 नानी अद ऊंद दीनार तोर्स, यदुर देल कर कोटकु आगतद.” आग आंदुर आऊन हात्‍ती ऊंद चाँदी इन सिक्‍का तंदुर.
MAT 22:20 आव आंदुर से केळदुन, “ईद छाप अदिक हेसुर यार्द हुन?”
MAT 22:21 आंदुर यीशु से अंदुर, “कैसर सरकार उन हुन.” आग आव आंदुर से अंदुन, “जो कैसर सरकार उन हुन, अद कैसर सरकार उक; अदिक जो परमेश्वर उन हुन, अद परमेश्वर उक कोळी.”
MAT 22:22 ईद केळकु आंदुर अचम्भित आदुर, अदिक आऊक बिटकु होटोदुर.
MAT 22:23 अदा दिन सदूकी जो पुनरूत्थान इक मान्सालुर, यीशु उन हात्‍ती बंदुर अदिक आऊन से केळदुर,
MAT 22:24 “हे गुरु, मूसा अंदिदुन कि अगर यावारा मंळसा बिन औलाद सोतोदान, रा आऊन वार्ट आऊन हिंग्स उन सांगुळ मदा माळकु तान वार्ट उन साटी औलाद पैदा माळ्यान.
MAT 22:25 ईग नाम मान्या येळ वार्टुर ईरोर; पयला मदा माळकु सोतोदुन, अदिक औलाद ईला आगदुर कारण तान रांड्या हिंग्स उक तांद वार्ट उन साटी बिट्ट बुटुन.
MAT 22:26 ईदा प्रकार देल दुसरा अदिक तिसरा भी माळदुन, अदिक येळु वार्टुर ताका हिंग अच आत.
MAT 22:27 आखरी दा सप्पा मुंदुर्द बाद्दा आ आर्त भी सोतोदुर.
MAT 22:28 इदुरसाटी जित्‍ता आगदुर मा आ आर्त येळु दा टु यारोर हिंग्स आदार? यतिकी आक सप्पा मुंदुर्द हिंग्स आगिदुर.”
MAT 22:29 यीशु आंदरी उत्‍तर कोट्टुन, “नीव पवित्रशास्त्र अदिक परमेश्वर उन महिमा जान्सालीर; ई कारण नीव भूल दा बिदकु आईर.
MAT 22:30 यतिकी जित्‍ता आगदुर मा आंदुर न मदा माळ्यार अदिक न मदा दा कोटकु आदार लेकीन स्वर्ग दा परमेश्वर उन स्वर्गदूतगोळ घाई आदार.
MAT 22:31 लेकीन सोत्‍त मंळसा अन्द जित्‍ता आगोद बारा दा येन नीव ईद वचन वाचुसीदील जो परमेश्वर नीम से अंदुन:
MAT 22:32 ‘ना अब्राहम उन परमेश्वर, अदिक इसहाक उन परमेश्वर, अदिक याकूब उन परमेश्वर हुईन?’ आव सोत्‍त मंळसा नव आलच? लेकीन जित्‍ता लॉकुर्द परमेश्वर हुन.”
MAT 22:33 ईद केळकु लॉकुर आऊंद उपदेश देल चकित आदुर.
MAT 22:34 याग फरीसीगोळ केळदुर कि यीशु सदूकीगोळ्द बाय बंद माळ बुट्टुन, रा आंदुर जमा आदुर.
MAT 22:35 आंदुर दा टु ऊंद यहूदी व्यवस्था अन शिक्षक यीशु उक परखुसोर साटी आऊक केळदुन,
MAT 22:36 “हे गुरु, व्यवस्था दा यातोद आग्या सब से धोळ्द आद?”
MAT 22:37 यीशु आऊन से अंदुन, “नीव परमेश्वर तान प्रभु से तान पुरा मन अदिक तान पुरा जीव अदिक तान पुरा बुद्धी इन सांगुळ प्यार ईट.
MAT 22:38 सब से धोळ्द अदिक मुख्य आग्या रा ईदा हुन.
MAT 22:39 अदिक अदुर्दा घाई ईद दुसरा आग्या भी आद कि नी तान मान्ना हातळोर से तान घाई प्यार ईट.
MAT 22:40 ईवा येढ्ढ आग्यागोळ पुरा व्यवस्था अदिक भविष्यवक्तागोळ्द आधार आद.”
MAT 22:41 याग फरीसी लॉकुर जमा ईरोर, रा यीशु आंदुर से केळदुन,
MAT 22:42 “मसीह अन्द बारा दा नीव येन सोचतीर? आव यार औलाद हुन?” आंदुर यीशु उक अंदुर, “दाऊद ईनव.”
MAT 22:43 यीशु आंदुर से केळदुन, रा दाऊद आत्मा दा ईत्‍तकु आऊक प्रभु यती अनतान?
MAT 22:44 “प्रभु, नान प्रभु से अंदुन, नान ऊम्मा कय दी कुर, यागासताका कि नाव नींद दुश्मनगोळी नींद काल इन ल्यालमा तंदकोमालेव.”
MAT 22:45 “याग दाऊद आऊक प्रभु अनतान, रा आव आऊन पार ह्यांग आदान?”
MAT 22:46 इदुर्द उत्‍तर दा याऊ भी ऊंद मात अन सकिदील. आ दिन टु यारीकु बाक आऊन से येनु केळोद हिम्मत आगीदील.
MAT 23:1 आग यीशु भीळ से अदिक तान चेलागोळ से अंदुन,
MAT 23:2 “न्याय कल्सावाळेर शास्त्री अदिक फरीसी मूसा अन्द गद्दी मा कुर्तकु आर;
MAT 23:3 इदुरसाटी आंदुर नीम से जो येनारा अंदार अद माळेतीर अदिक मान्सेतीर, लेकीन आंदुर घाई क्याल्सा माळबाळेतीर; यतिकी आंदुर अंतार पर माळालुर.
MAT 23:4 आंदुर ऊंद भारी ओझा अक यदरी नेगोद मुश्किल आद, कटकु अदरी मंळसागोळ्द खांदा मा ईटतार; लेकीन खुद अदरी तान बेळ्ल देल सरकुसोद चाहासालुर.
MAT 23:5 आंदुर तान सप्पा क्याल्सा लॉकुरी तोरसोर साटी माळतार” आंदुर तान ताबीजगोळी चौळा माळतार अदिक तान कपळा अन्द झालर ऊदान माळतार ताकी लॉकुर आंदरी न्यायात्मा समसुल.
MAT 23:6 आंदुर हाब्बगोळ दा मुख्य-मुख्य जागा हासिल माळोद चाहासतार, सभागोळ दा मुख्य-मुख्य आसनगोळ मा कुरोद चाहासतार.
MAT 23:7 सात्‍तागोळ दा आदर सत्कार चाहसोद, अदिक मंळसागोळ दा गुरु अंदकु आगोद आंदरी वळ्लीद हततद.
MAT 23:8 लेकीन नीव गुरु अनबाळेतीर, यतिकी नीमव ऊंदा गुरु आन, अदिक नीव सप्पा वार्टुर हुईर.
MAT 23:9 पृथ्वी मा यारीकु आप्प अनबाळेतीर, यतिकी नीमव ऊंदा आप्प आन, जो स्वर्ग दा आन.
MAT 23:10 अदिक स्वामी भी अनबाळेतीर, यतिकी नीमव ऊंदा स्वामी आन, मतलब मसीह.
MAT 23:11 जो नीम दा धोड्डेव आगव चाहास्यान आव नीमव सेवक आगुल.
MAT 23:12 जो यावारा तान तान इक धोळ्द माळ्यान, आव स्याण माळकु आदान: अदिक जो यावारा तान तान इक नम्र माळ्यान, आव धोळ्द माळकु आदान.
MAT 23:13 “हे कपटी शास्त्रीगोळा अदिक फरीसीगोळा, नीम मा हाय! नीव मंळसागोळ साटी स्वर्ग इन राज्य अन्द दरवाजा बंद माळतीर, अदिक न रा खुद अदुर्दा होगतीर अदिक न रा अदुर्दा होगावाळेरी होगगोळालीर.
MAT 23:14 हे कपटी शास्त्री अदिक फरीसीगोळा, नीम मा हाय! नीव रांड्यागोळ्द मान्नागोळी बरबाद माळ कोमतीर, अदिक आ लॉकुर दिखावा माळोर साटी हापाळ होत ताका प्रार्थना माळतेला ईरतीर: इदुरसाटी नीमी यक्कुल दण्ड सिक्‍कीत.
MAT 23:15 “हे कपटी शास्त्री अदिक फरीसीगोळा, नीम मा हाय, नीव ऊंद मंळसा अक तान मत दा तरोरसाटी पुरा जल अदिक थल मा टेटतीर, अदिक याग आव नीम मत दा होट बरतान रा आऊक तान से येढ्ढ गुणा कपटी माळ कोमतीर.
MAT 23:16 “हे कुढ्ढ अगुवागोळा, नीम मा हाय! जो अनतार कि अगर यावारा मंदिर इन किर्‍या तिंदान रा येनु ईला, लेकीन अगर यावारा मंदिर इन व्हान्ना अन्द किर्‍या तिंदान रा अऊर देल कट्टोदान.
MAT 23:17 हे मूर्खगोळा अदिक कुढ्ढगोळा, याव धोड्डेव आन; व्हान्ना या अद मंदिर यदुर देल व्हान्ना पवित्र आगतद?
MAT 23:18 बाक अनतीर कि अगर यावारा वेदी इन किर्‍या तिंदान रा येनु ईला, लेकीन जो भेंट अदुर मा आद, अगर यावारा अदुर्द किर्‍या तिंदान रा अदुर देल कट्टोदान.
MAT 23:19 हे कुढ्ढगोळा, याव धोड्डेव आन; भेंट या वेदी यदुर देल भेंट पवित्र आगतद?
MAT 23:20 इदुरसाटी जो वेदी इन किर्‍या तिनतान, आव अऊर्द भी किर्‍या तिनतान जो आ वेदी मा आद.
MAT 23:21 जो मंदिर इन किर्‍या तिनतान, आव मंदिर अदिक अदुर दा ईरावाळा परमेश्वर उन भी किर्‍या तिनतान.
MAT 23:22 जो स्वर्ग इन किर्‍या तिनतान, आव परमेश्वर उन सिंहासन इन अदिक अदुर मा कुरावाळेर्द भी किर्‍या तिनतान.
MAT 23:23 “हे कपटी शास्त्री अदिक फरीसीगोळा, नीम मा हाय, नीव पदीना, अदिक सौफ, अदिक जीरा अन्द दसवा अंश रा कोळतीर, लेकीन नीव व्यवस्था अन्द गंभीर मातगोळी मतलब न्याय, अदिक दया, अदिक विश्वास इक बिटबुटीर; आगली पायजे होता कि इवरी भी माळतेला ईरायदीर अदिक अवरी भी ईला बिळायदिर.
MAT 23:24 हे कुढ्ढ अगुवागोळा, नीव मच्छर इक रा ढुंढ्स कोमतीर, लेकीन ऊँट इक तीन कोमतीर.
MAT 23:25 “हे कपटी शास्त्री अदिक फरीसीगोळा, नीम मा हाय, नीव वाटी अदिक तंळग्या अक म्याक म्याकुच टु रा ऊदतीर लेकीन अव बुळ्क करेव अदिक लालच खुद इन दा भला माळदुर दा तुमकु आव.
MAT 23:26 हे कुढ्ढ फरीसी, पयले कटोरा अदिक तंळग्या अक बुळ्क टु ऊद्द कि अव व्हार्या टु भी वळ्लेव कांळ्सुल.
MAT 23:27 “हे कपटी शास्त्री अदिक फरीसीगोळा, नीम मा हाय, नीव चुना हज्द मटगोळ घाई आईर जो म्याकुच टु रा सुंदर कांळ्सताव, लेकीन बुळ्क मुर्दा अन्द येलुगोळ अदिक सब प्रकार इन गंदगी देल तुमकु आव.
MAT 23:28 ईदा रीति देल नीव भी म्याकुच टु मंळसागोळी न्यायी कांळ्स तोगतीर, लेकीन बुळ्क कपट अदिक बुराई देल तुमकु आईर.
MAT 23:29 “हे कपटी शास्त्री अदिक फरीसीगोळा, नीम मा हाय, नीव भविष्यवक्तागोळ्द कब्रगोळी सुधार्सतीर अदिक न्यायीगोळ्द कब्रगोळी सजुसतीर,
MAT 23:30 अदिक अनतीर, ‘अगर नाव तान आजा बाबागोळ्द जमानानोर ईरायदेव रा भविष्यवक्तागोळी कोन्नोर दा भागीदार ईला ईरायदेव.’
MAT 23:31 इदुर देल रा नीव खुद अच गवाही कोळतीर कि नीव भविष्यवक्तागोळी कोन्नावाळेर औलाद हुईर.
MAT 23:32 इदुरसाटी नीव तान आजा बाबागोळ्द पाप इन माळका पुरा तरीका देल तुमकोमी.
MAT 23:33 हे हावगोळा, हे हावगोळ चिकोरगोळा, नीव नरक इन दण्ड देल ह्यांग ऊळदीर?
MAT 23:34 इदुरसाटी नोळी, ना नीम हात्‍ती भविष्यवक्तागोळ अदिक बुद्धिमानगोळी अदिक शास्त्रीगोळी कळुतीन; अदिक नीव आंदुर दा टु यावारा अक कोंद बुट्टीर अदिक क्रूस मा येरसीर, अदिक यावारा तान सभागृहगोळ दा क्वाळा बळदीर अदिक ई नगर टु आ नगर दा जेडुतेला ओयाळीर.
MAT 23:35 याव न्यायी हाबील टु हुडुकु बिरिक्याह अन्द पार जकरयाह ताका, यारी नीव मंदिर अदिक वेदी इन न्याड्या दा कोंद बुटीदीर, यास न्यायीगोळ्द खुन धरती मा वाहुसकु आग्याद अद सप्पा नीम ताल्ला मा बिद्दीत.
MAT 23:36 ना नीम से खरा माताळतीन, ई सप्पा मातगोळ ईद समय इन लॉकुर मा बंदकु बिद्दीत.
MAT 23:37 “हे यरूशलेम, हे यरूशलेम! नी भविष्यवक्तागोळी कोंद बुळत्या, अदिक जो नींद हात्‍ती कळुकु आग्यार, आंदुर मा कल्लगोळ देल हमला माळत्या. यास अनली ना चाहासदीन कि ह्यांग कोळी तान पाड्डगोळी तान पिक्‍कागोळ्द ल्यालमा जमा माळतद, हांग अच ना भी नीन चिकोरगोळी जमा माळ कोमाईन, लेकीन नी चाहासीदिल.
MAT 23:38 नोळी, नीम मान्ना नीम साटी सुनसान बिटकु आगतद.
MAT 23:39 यतिकी ना नीम से अनतीन कि ईगी टु आगासताका नीव नानी बाक यागलु नोळतीदिल यागासताका नीव अनतीदिल, ‘धन्य आन आव, जो प्रभु अन्द हेसुर देल बरतान.’”
MAT 24:1 याग यीशु मंदिर टु होटकु होगोन, रा आऊन चेलागोळ आऊक मंदिर इन रचना तोरसोर साटी आऊन हात्‍ती बंदुर.
MAT 24:2 यीशु आंदुर से अंदुन, “नीव ईद सप्पा नोळेतीर ना! ना नीम से खरा माताळतीन, ईल कल्ल मा कल्ल भी ईला बिळतीदील जो मंळ्सकु आगतीदील.”
MAT 24:3 याग यीशु जैतून पहाळी मा कुर्तकु ईरोन, रा चेलागोळ आबना अंदा आऊन हात्‍ती बंदकु अंदुर, “नामी हेळ कि ई सब मातगोळ याग आदव? नीन बरोद अदिक दुनिया अन्द आखरी इन येन चमत्कार ईत्‍तीत?”
MAT 24:4 यीशु आंदरी उत्‍तर कोट्टुन, “सावधान ईरी! याऊ नीमी भरमुस बाळुल,
MAT 24:5 यतिकी हापाळ सा लॉकुर हिंग ईत्‍तार जो नान हेसुर देल बंदकु अंदार, ‘ना मसीह हुईन,’ अदिक हापाळ मुंदरी भरमुस्यार.
MAT 24:6 नीव लळाईगोळ मातचीत केळीर अदिक लळाईगोळ्द बारा दा अफवाह केळीर, रा घबरूस बाळेतीर यतिकी इदुर्द आगोद जरूरी आद, लेकीन आ समय दा अन्त आगतीदील.
MAT 24:7 यतिकी द्याश मा द्याश, अदिक राज्य मा राज्य चढ़ाई माळेव, अदिक हर जागा दा अकाल बिद्दव, अदिक भूकम्प आदव.
MAT 24:8 ईव सप्पा मातगोळ दुखगोळ्द सुरूवात माळेव.”
MAT 24:9 आग आंदुर क्लेश कोळोर साटी नीमी हुळसुस्कु सोपस्यार, अदिक नीमी कोंद बुट्टार, अदिक नान हेसुर इन कारण सप्पा जातीगोळ लॉकुर नीम से दुश्मनी ईट्यार.
MAT 24:10 आग हापाळ सा लॉकुर ठोकर तिंदार, अदिक आबुर दाबुर हुळसुस्यार, अदिक आबुर दाबुर से दुश्मनी ईट्यार.
MAT 24:11 हापाळ सा ख्वाटा भविष्यवक्तागोळ बंदार, अदिक हापाळ मुंदरी भरमुस्यार.
MAT 24:12 अन्याय इन वाळुसदुर देल हापाळ मुंदुर्द प्यार ठंडा बिदोदीत,
MAT 24:13 लेकीन जो आखरी ताका धीरज हुळकु ईत्‍तान, आऊंदा उद्धार आदीत.
MAT 24:14 अदिक राज्य इन ईद खुशखबरी पुरा दुनिया दा प्रचार माळकु आदीत, कि सप्पा जातीगोळ मा गवाही आगुल, आग अन्त होट्ट बंदीत.
MAT 24:15 “इदुरसाटी याग नीव आ उजुळसावाळा बेकार वस्तुगोळ्द यदुर्द चर्चा दानिय्येल भविष्यवक्ता अन्द द्वारा आगीत, पवित्र जागा दा नीदुरकु आद हिंग नोळी, वाचुसावाळा खुद अच समसुल कि ईदुर येन मतलब आद.
MAT 24:16 आग जो यहूदिया प्रदेश दा ईतीदार आंदुर पहाळगोळ मा ओळेगुल.
MAT 24:17 जो छत मा ईतीदार, आव तान मान्ना दा टु सामान ताकोमली ईळुबाळुल;
MAT 24:18 अदिक जो केई दा ईतीदार, आंदुर तान कपळा ताकोमली हिंद होगबाळुल.
MAT 24:19 आ आर्तेर साटी हाय जो आ दिनगोळ दा व्हाट्या दी ईत्‍तार अदिक जो हाल कुळ्सतेला ईत्‍तार!
MAT 24:20 प्रार्थना माळतेला ईरी कि नीमी सोळ इन दिनगोळ दा या आराम इन दिन ओळोद बिळबाळुल.
MAT 24:21 यतिकी आ समय दा हिंग भारी क्लेश आदीत, जसा न रा दुनिया अन्द सुरूवात टु ईग ताका आगिदील अदिक न यागलु आदीत.
MAT 24:22 अदिक अगर परमेश्वर आ दिनगोळी घटुसोद निश्चय ईला माळायदुन रा ऊंद भी जीव ईला ऊळाईत, लेकीन तान निवळुस्द लॉकुर साटी आव दिनगोळी गोर्त माळ्यान.
MAT 24:23 “आ समय अगर यावारा नीम से अनुल, ‘नोळी, मसीह इल आन’ या ‘आव अल आन,’ रा विश्वास माळबाळेतीर.
MAT 24:24 यतिकी ख्वाटा मसीह अदिक ख्वाटा भविष्यवक्ता यदकु निदर्‍यार, अदिक धोळ्द चिन्ह, अदिक लॉकुरी ध्वाका कोळोर साटी अदभुत क्याल्सा तोरस्यार की अगर आग सकुल रा निवळुसकु आग्यार आंदरी भी बैकुश बुळुल.
MAT 24:25 नोळी, ना नीमी सप्पा मातगोळ पयले टु ना हेळ बुटीन.”
MAT 24:26 “इदुरसाटी अगर आंदुर नीम से अनुल, ‘नोळी, आव आळी दा आन,’ रा व्हार्या होळबाळेतीर; या ‘नोळी, आव कोठरीगोळ दा आन,’ रा विश्वास माळबाळेतीर.
MAT 24:27 यतिकी जसा सुर्य अन्द किरण पूर्व टु होटकु पश्चिम ताका चमकुसतद, हांग अच मंळसा अन पार उन भी बरोद आदीत.”
MAT 24:28 “यल लाश ईत्‍तीत, अल्या गीधाळ जमा आदव.”
MAT 24:29 अचानक आ दिनगोळ दा क्लेश इन तुरन्त बाद्दा सुर्य अन्धकारमय आगेदीत, अदिक चन्द्रमा अन्द प्रकाश होगतेला ईत्‍तीत, अदिक तारा आकाश टु बीळतेला ईत्‍तव अदिक आकाश इन शक्तिगोळी हालुस्कु आदीत.
MAT 24:30 आग ना मंळसा अन पार उन चिन्ह आकाश दा कांळ्सीत, अदिक आग पृथ्वी इन सप्पा कुलगोळ लॉकुर याद्दा पीटस्यार; अदिक मंळसा अन पार उक धोळ्द सामर्थ्य अदिक महिमा अन सांगुळ आकाश इन बादलगोळ मा बरतेला नोळ्यार.
MAT 24:31 आव तुरही इन धोळ्द आवाज इन सांगुळ तान स्वर्गदूतगोळी कळ्यान, अदिक आंदुर आकाश इन ईद छोर टु आ छोर ताका, नाकु क्वाना टु आऊन निवळुस्द लॉकुरी जमा माळ्यार.
MAT 24:32 “अंजीर इन मार्र देल ईद शिक्षा ताकोमी: याग अदुर्द डगाली मुलायम आगताव अदिक याल्ला होळली कुरताव, रा नीव जान्स कोमतीर की बिसुल इन दिन हात्‍ती आद.
MAT 24:33 ईदा रीति देल याग नीव ईव मातगोळी आगतेला नोळीर, रा जान्स कोमी की अद दरवाजा मा का आद, अदिक अद दरवाजा मा का आद.
MAT 24:34 ना नीम से खरा अनतीन की यागासताका इव सप्पा मातगोळ पुरा आगालव, आगासताका ईद पीढ़ी इन अन्त आगतीदील.
MAT 24:35 आकाश अदिक पृथ्वी टलुसेदित, लेकीन नान मात्‍तगोळ यागलु टलुसतीदिल.”
MAT 24:36 “लेकीन आ दिन अदिक आ समय इन बारा दा यारू जान्सालुर, न स्वर्गदूतगोळ अदिक ना मंळसा अन पार, लेकीन सिर्फ आप्प जान्सतान.”
MAT 24:37 “ह्यांग नूह अन दिन ईरव, हांग अच मंळसा अन पार उन भी बरोद आदीत.
MAT 24:38 ह्यांग नीर इन बाळ बरा से पयला अन्द दिनगोळ ताका लॉकुर तिंत-कुडुत ईत्‍तुर, अदिक मदा माळ्त ईत्‍तुर यागासताका नूह जहाज मा येरीदिल.
MAT 24:39 अदिक यागासताका जल प्रलय बंदकु आ सप्पा मुंदरी वाहुसकु ओतीदिल, आगासताका आंदरी येनु उच पता नळदिदील; हांग अच मंळसा अन पार उन भी बरोद आदीत.
MAT 24:40 आ समय दा येढ्ढ मुंदुर केई दा क्याल्सा माळ्त ईत्‍तार, ऊंद नेगुकु आदान अदिक दुसरा बिटकु आदान.
MAT 24:41 येढ्ढ आर्तेर जाता दा पीसुसतेला ईत्‍तार, ऊंद नेगुकु आदार अदिक दुसरा बिटकु आदार”
MAT 24:42 “इदुरसाटी जाग्सतेला ईरी, यतिकी नीव जान्सालीर कि नीम प्रभु याता दिशी बंदान.
MAT 24:43 लेकीन ईद जान्स कोमी कि अगर मान्ना अन्द स्वामी जान्स कोमायदुन कि चोर यास मुरा बंदान रा च्याता ईरायदुन, अदिक तान मान्ना अन काळ्लपनी ईला आग गोळायदुन.
MAT 24:44 इदुरसाटी नीव भी तयार ईरी, यतिकी याता घळी आऊन बरोद बारा दा नीव सोच भी सकालीर, अदा घळी मंळसा अन पार होट बंदान.”
MAT 24:45 “इदुरसाटी आव विश्वासयोग्य अदिक बुद्धिमान दास याव हुन, यारी स्वामी तान नौकर-चाकरगोळ मा अधिकारी ठहरूसदुन कि समय मा आंदरी ऊमली कोळुल?
MAT 24:46 धन्य आन आव दास, यारी आऊन स्वामी बंदकु हिंग अच माळतेला नोळुल.
MAT 24:47 ना नीम से खरा अनतीन, आ स्वामी आऊक तान सप्पा संपत्‍ती मा अधिकारी नियुक्त माळ्यान.”
MAT 24:48 लेकीन अगर आ दुष्ट दास ईद सोचुल कि नान स्वामी इक बरली समय आद,
MAT 24:49 अदिक तान संगी दासगोळी बडुली हतुल, अदिक सारा कुडावाळेर सांगुळ तिनुल-कुडुल.
MAT 24:50 रा आ दास उन स्वामी ईत्‍ता दिन दा बंदान, याग आव आऊन हादी ईला कायतीदान, अदिक हिंग समय यदरी आव जान्सालुन,
MAT 24:51 आग स्वामी आऊक कठोर दण्ड कोट्टान अदिक आऊन पापगोळी कपटीगोळ सांगुळ आळदान: यल लॉकुर सिर्फ वर्लतोदार अदिक हल्ल कचतोदार.
MAT 25:1 “स्वर्ग इन राज्य आ हत्‍त कुवारा पोरगोळ घाई ईत्‍तीत जो तान मशाल हुडुकु मंळगार से भेंट माळली होटार.
MAT 25:2 आंदुर दा टु अईद मूर्ख अदिक अईद समझदार ईरोर.
MAT 25:3 आ अईद मूर्ख पोरगोळ तान मशालगोळ रा हुळदुर, लेकीन तान सांगुळ याण्णा हुळदीदिल;
MAT 25:4 लेकीन समझदार पोरगोळ तान मशालगोळ सांगुळ तान चाळीगोळ दा याण्णा भी तुम कोंडुर.
MAT 25:5 याग मंळगार उक बरली समय आत्‍त, रा आंदुर सप्पा पोरगोळ जपस्ली कुरतुर अदिक मिंगेदुर.”
MAT 25:6 “आर्धा ईळ्लक इक धूम मचुस्त: ‘नोळी, मंळगार बरेत्यान! आऊन से भेंट माळोर साटी नळी.’
MAT 25:7 आग आंदुर सप्पा कुवारा पोरगोळ यदकु तान मशालगोळी ठीक माळली कुरतुर.
MAT 25:8 अदिक मूर्ख पोरगोळ समझदार पोरगोळ से अंदुर, ‘तान याण्णा दा टु थ्वाळासा नामी भी कोळी, यतिकी नाम मशालगोळ नूनेत्याव.’
MAT 25:9 लेकीन समझदार पोरगोळ उत्‍तर कोट्टुर, ईला! नाव कोळ सकालेव. कदाचित ईद नाम अदिक नीम साटी पुरा आगिदील, ‘भला रा ईद आद कि नीव याण्णा मारावाळेर हात्‍ती होगकु तान साटी कोंडकु तंदकोमी.’
MAT 25:10 याग आंदुर याण्णा कोमोर साटी होगोर रा मंळगार होटबंदुन, अदिक जो तयार ईरोर, आंदुर आ मंळगार उन सांगुळ यल मदा आगताव आ मान्ना दा होटोदुर अदिक दरवाजा बंद माळकु आगीत.”
MAT 25:11 “इदुर बाद्दा आंदुर दुसरा कुवारा पोरगोळ भी बंदकु अनली कुरतुर, ‘हे स्वामी, हे स्वामी, नाम साटी दरवाजा तेरू अदिक नामी बुळ्क बरगोळ!’
MAT 25:12 आ मंळगार उत्‍तर कोट्टुन, ‘ना नीम से खरा अनतीन, ना नीमी अरालीन.’”
MAT 25:13 इदुरसाटी जाग्सतेला ईरी, यतिकी नीव न आ दिन इक जान्सतीर, न आ समय इक.
MAT 25:14 “स्वर्ग इन राज्य आ मंळसा अन्द घाई ईत्‍तीत याव परदेश होगाहोती तान दासगोळी कारूकु तान धन आंदरी सौप्स बुट्टुन.
MAT 25:15 आव पयला अक अईद हजार व्हान्ना अन सिक्‍कागोळ कोट्टुन, दुसरा अक येढ्ढ, अदिक तीसरा अक ऊंद; मतलब हर ऊंद मंळसा अक आऊन सामर्थ्य इन अनुसार कोट्टुन, अदिक आग परदेश होटोदुन.
MAT 25:16 आग, याऊक अईद हजार व्हान्ना अन सिक्‍कागोळ सिकीदव, आव तुरन्त होगकु सिक्‍कागोळ देल लेन देन माळदुन, अदिक अईद हजार सिक्‍का मात्‍त कमुसदुन.
MAT 25:17 ईदा रीति देल याऊक येढ्ढ हजार सिक्‍कागोळ सिकीदव, आव भी येढ्ढ हजार सिक्‍कागोळ मात्‍त कमुसदुन.
MAT 25:18 लेकीन याऊक ऊंद हजार व्हान्ना अन सिक्‍कागोळ सिकीदव, आव होगकु मुण्ण अगुळदुन, अदिक तान स्वामी इन धन मुण्ण दा होचकु ईटदुन.”
MAT 25:19 “हापाळ दिन इन बाद्दा आ दासगोळ्द स्वामी बंदकु आंदुर से हिसाब ताकोमली कुरतुन.
MAT 25:20 याऊक अईद हजार व्हान्ना अन सिक्‍कागोळ सिकीदव, आव अईद हजार सिक्‍कागोळ मात्‍त तनकु अंदुन, ‘हे स्वामी, नी नानी अईद हजार व्हान्ना अन सिक्‍का कोटीद, नोळ, ना अदुर मा अईद हजार सिक्‍कागोळ मात्‍त कमुसीन.’
MAT 25:21 आऊन स्वामी आऊन से अंदुन, ‘शाब्बास, हे वळ्लेव अदिक विश्वासयोग्य दास, नी थ्वाळासा दा विश्वासयोग्य ईत्‍त; ना नीनी हापाळ वस्तुगोळ्द अधिकारी माळाईन. तान स्वामी इन खुशी दा सहभागी आग.’”
MAT 25:22 “अदिक याऊक येढ्ढ हजार सिक्‍कागोळ सिकीदव, आव भी बंदकु अंदुन, ‘हे स्वामी, नी नानी येढ्ढ हजार सिक्‍कागोळ सौप्सीद, नोळ, ना येढ्ढ हजार सिक्‍कागोळ मात्‍त कमुसदिन.’
MAT 25:23 आऊन स्वामी आऊन से अंदुन, ‘शाब्बास, हे वळ्लेव अदिक विश्वासयोग्य दास, नी थ्वाळासा दा विश्वासयोग्य ईत्‍त; ना नीनी हापाळ वस्तुगोळ्द अधिकारी माळाईन. तान स्वामी इन खुशी दा सहभागी आग.’
MAT 25:24 “आग याऊक ऊंद हजार व्हान्ना अन सिक्‍कागोळ सिकीदव, आव बंदकु अंदुन, ‘हे स्वामी, ना नीनी अरूतीन कि नी कठोर मंळसा आय: नी यल टु बोऊसाल अल टु कडुत्या, अदिक यल बींजा हाकाल अल टु ताकोमत्या.
MAT 25:25 इदुरसाटी ना अंजेदीन अदिक होगकु नीन व्हान्ना अन सिक्‍कागोळ मुण्ण दा होचकु इटदीन. नोळ, जो नींद आद, अद ईद हुन.’”
MAT 25:26 आऊन स्वामी आऊक उत्‍तर कोट्टुन, “हे दुष्ट अदिक आलसी दास, याग नी ईद जानस्या कि यल ना बोऊसीदिल अल टु कडुतीन, अदिक यल ना बींजा हाकीदील अल टु ताकोमतीन;
MAT 25:27 आग नी ईद माळाईद कि नान धन सावकार उन हात्‍ती ईट बुळाईद, आग ना बंदकु तान धन ब्याज समेत आऊन से ताकोम कोमायदीन.
MAT 25:28 इदुरसाटी आऊन से अव ऊंद हजार सिक्‍कागोळ ताकोमकोमी, अदिक यार्द हात्‍ती हत्‍त हजार सिक्‍कागोळ आव, आऊक कोटबुळी.
MAT 25:29 यतिकी यार हात्‍ती आद, आऊक मात्‍त कोटकु आदीत; अदिक आऊन हात्‍ती हापाळ आगेदीत: लेकीन याऊन हात्‍ती हैलेच, आऊन से अद भी जो आऊन हात्‍ती आद, ताकोमकु आदीत.
MAT 25:30 अदिक ई निकम्मा दास उक व्हार्या अंधार दा हाक्‍क बुळी, यल वोरलोद अदिक हल्ल कच्चोद आदीत.”
MAT 25:31 “याग मंळसा अन पार तान महिमा दा बंदान अदिक सप्पा स्वर्गदूत आऊन सांगुळ बंदार, रा आव तान महिमा अन्द सिंहासन मा विराजमान आदान.
MAT 25:32 अदिक सप्पा राज्य अन लॉकुर आऊन मुंद जमा माळकु आदार; अदिक ह्यांग चरवाह लांडग्यागोळी मरगोळ से अलग माळ बुळतान, हांग अच आव आंदरी आबुर दाबुर से अलग माळ्यान.
MAT 25:33 आव लांडग्यागोळी ऊम्मा कय मा अदिक मरगोळी डाक्या कय मा नीदरूस्यान.
MAT 25:34 आग राजा तान ऊम्मा कय दी नीदरावाळेर से अंदान, ‘हे नांद आप्प उन धन्य लॉकुरा, बरी, आ राज्य अन्द अधिकारी आगेगी, जो दुनिया अन्द पयला टु उच नीम साटी तयार माळकु आग्याद.
MAT 25:35 यतिकी ना हस्तकु ईरीन, अदिक नीव नानी तिनली कोट्टीर; ना निरळ्कु ईरीन, अदिक नीव नानी नीर कुळ्सदीर; ना अनजान ईरीन, अदिक नीव नानी ताम मान्या ईटदीर;
MAT 25:36 ना ऊगळा ईरीन, अदिक नीव नानी कपळा हाक्सुसदीर; ना बिमार ईरीन, अदिक नीव नान देखभाल माळदीर, ना बंदीगृह दा ईरीन, अदिक नीव नान से भेंट ताकोमली बंदीर.’
MAT 25:37 “आग न्यायी लॉकुर आऊक उत्‍तर कोट्टार, ‘हे प्रभु, नाव याग नीनी हस्तकु नोळदेव अदिक तीन्सदेव? या निरळ्कु नोळदेव अदिक नीर कुळ्सदेव?
MAT 25:38 नाव याग नीनी अनजाना नोळदेव अदिक तान मान्या ईटदेव? या ऊगळा नोळदेव अदिक कपळा हाक्सुसदेव?
MAT 25:39 नाव याग नीनी बिमार या बंदीगृह दा नोळदेव अदिक नीन से भेंट माळली बंदेव?’
MAT 25:40 आग राजा आंदरी उत्‍तर कोट्टान, ‘ना नीम से खरा अनतीन कि नीव जो नान स्यांळ्द से स्यांळ्द वार्टुर दा टु यावारा ऊंद मंळसा अन्द सांगुळ माळदीर, अद नांदा सांगुळ माळदीर.’”
MAT 25:41 “आग आव डाक्या कय दी नीदरावाळेर से अंदान, ‘हे शापित लॉकुरा, नान मुंद टु अद अनन्त बेक्‍की दा होटोगी, जो शैतान अदिक आऊन दूतगोळ साटी तयार माळकु आग्याद.
MAT 25:42 यतिकी ना हस्तकु ईरीन, अदिक नीव नानी तिनली कोटीदील; ना निरळ्कु ईरीन, अदिक नीव नानी नीर कुळसिदील;
MAT 25:43 ना अनजाना ईरीन, अदिक नीव नानी तान मान्या ईटीदील; ना ऊगळा ईरीन, अदिक नीव नानी कपळा हाक्सुसीदिल; ना बिमार अदिक बंदीगृह दा ईरीन, अदिक नीव नान देखभाल माळीदील.’
MAT 25:44 “आग आंदुर उत्‍तर कोट्टार, ‘हे प्रभु, नाव नीनी याग उपासा, या निरळ्कु, या परदेशी, या ऊगळा, या बिमार, या बंदीगृह दा नोळदेव, अदिक नींद स्यावा टहल माळीदिल?’
MAT 25:45 आग आव आंदरी उत्‍तर कोट्टान, ‘ना नीम से खरा अनतीन कि नीव जो ई स्यांळ्द टु स्याणेर दा टु यावारा ऊंद मंळसा अन सांगुळ माळीदिल, अद नांद सांगुळ भी माळीदिल.’
MAT 25:46 अदिक इंदुर अनन्त दण्ड भोगसोर साटी कळुकु आदार लेकीन न्यायी लॉकुर अनन्त जीवन दा प्रवेश माळ्यार.”
MAT 26:1 याग यीशु इव सप्पा मात अंद बुट्टुन रा तान चेलागोळ से अनली कुरतुन,
MAT 26:2 “नीव जान्सतीर कि येढ्ढ दिन इन बाद्दा फसह अन्द हाब्ब आद, अदिक मंळसा अन्द पार क्रूस मा येरसोर साटी हुळसुसकु आदान.”
MAT 26:3 आग प्रधान याजक अदिक प्रजा अन्द पुरनिए कैफा हेसुर इन महायाजक उन भवन दा जमा आदुर,
MAT 26:4 अदिक आपस दा विचार माळली कुरतुर कि यीशु उक गुप्त तरीका देल हुळकु कोंद बुटेव.
MAT 26:5 लेकीन आंदुर अनतोगोर, “हाब्बा अन समय दा ईला, ईलारा हिंग आगबाळुल कि लॉकुर दा दंगा फसाद आगेगुल.”
MAT 26:6 याग यीशु बैतनिय्याह दा शमौन कोढ़ी इन मान्या ईरोन,
MAT 26:7 रा ऊंद आर्त संगमरमर इन बाटुल दा बार्र ईत्‍तर हुळकु यीशु उन हात्‍ती बंदुर, अदिक याग आव ऊमोर साटी कुरतीदुन रा आऊन ताल्ला मा ऊलटुसदुर.
MAT 26:8 ईद नोळकु आऊन चेलागोळी सिट्ट बत्‍त अदिक आंदुर अनली कुरतुर, “ई ईत्‍तर येती बरबाद माळकु आग्याद?
MAT 26:9 इदरी रा वळ्लीद दाम दा मारकु कंगालगोळ दा वाटस्कु आग सकोद.”
MAT 26:10 ईद जान्सकु यीशु आंदुर से अंदुन, “आ आर्त इक येती सतुसतीर? आक नान साटी भलाई इन क्याल्सा माळ्यार.
MAT 26:11 कंगाल रा नीम सांगुळ हमेशा ईरतार, लेकीन ना नीम सांगुळ हमेशा ईर सकालीन.
MAT 26:12 आक नान मय मा जो ईत्‍तर हाक्यार, अद नान सोत्‍तुर बाद्दा नळ्सकु आगोद तयारी हुन.
MAT 26:13 ना नीम से खरा माताळतीन, कि सप्पा दुनिया दा येल्यारा भी ईद खुशखबरी प्रचार माळकु आदीत, अल आकिन ईद क्याल्सा अन्द वर्णन भी आकिन याद दा माळकु आदीत.”
MAT 26:14 आग यहूदा इस्करियोती, जो हन्नेळ चेलागोळ दा टु ऊंद ईरोन, प्रधान याजकगोळ्द हात्‍ती होदुन,
MAT 26:15 अदिक आव अंदुन, “अगर ना आऊक नीम कय दा हुळसुस कोळाईन रा नानी येन कोट्टीर?” आंदुर आऊक तीस चाँदी नव सिक्‍कागोळ आळुकु कोट बुटुर.
MAT 26:16 अदिक आव अदा समय टु आऊक हुळसुसोद सही मवका ढुंढ्सली कुरतुन.
MAT 26:17 अखमीरी रोट्टी इन हाब्बा इन पयला दिन, चेलागोळ यीशु उन हात्‍ती बंदकु केळली कुरतुर, “नी येन चाहासत्या कि नाव नींद साटी फसह तिनोद तयारी माळेव?”
MAT 26:18 यीशु अंदुन, “नगर दा अमुक मंळसा अन्द हात्‍ती होगकु आऊन से अनी, ‘गुरु अनेत्यान कि नांद समय हात्‍ती आद. ना तान चेलागोळ्द सांगुळ नीन मान्या फसह हाब्ब मानसाईन.’”
MAT 26:19 इदुरसाटी चेलागोळ यीशु उन आग्या स्वीकार माळदुर अदिक फसह तयार माळदुर.
MAT 26:20 याग द्याव आत रा आव हन्नेळ चेलागोळ सांगुळ ऊमली कुरतीदुन.
MAT 26:21 याग आंदुर तीनोर रा यीशु अंदुन, “ना नीम से खरा अनतीन कि नीम दा टु ऊंद नानी हुळसुस्यान.”
MAT 26:22 इदुर मा आंदुर च्याच उदास आदुर, अदिक हर ऊंद चेला यीशु से केळली कुरतुन, “हे गुरु, येन आव ना हुईन?”
MAT 26:23 यीशु उत्‍तर कोट्टुन, “आव जो नान सांगुळ तंळग्या दा ऊमतान, आवा नानी हुळसुसकु सोपस्यान.
MAT 26:24 ना मंळसा अन्द पार ह्यांग नान बारा दा शास्त्र दा लिख्सकु आद, अद आदीत अच; लेकीन आ मंळसा अन्द साटी शोक आद याऊन द्वारा मंळसा अन पार हुळसुसकु आदान: अगर आ मंळसा अन्द जनम अच ईला आगाईत, रा आऊन साटी भला आगाईत.”
MAT 26:25 आग यीशु उक हुळसुसकु सौप्सावाळा यहूदा अंदुन, “हे गुरु, येन आव ना हुईन?” यीशु आऊन से अंदुन, “नी रा अंदबुट.”
MAT 26:26 “याग आंदुर ऊमोर रा यीशु रोट्टी ताकोंडुन, अदिक आशीष बेळकु मुरदुन, अदिक चेलागोळी कोटकु अंदुन, हुडी, तिनी; ईद नांद मय हुन.”
MAT 26:27 बाक यीशु कटोरा हुळकु धन्यवाद माळदुन, अदिक आंदरी कोटकु अंदुन, “नीव सप्पा लॉकुर इदुर दा टु कुडी,
MAT 26:28 यतिकी ईद वाचा अन्द नान अद रक्ता हुन, जो सप्पा लॉकुर पापगोळ माफ अन्द साटी वाहुसकु आगतद.
MAT 26:29 ना नीम से खरा अनतीन कि अंगुर इन ईद रास्सा आ दिन ताका यागलु कुढ़ालीन, यागासताका नीम सांगुळ तान आप्प उन राज्य दा व्हाशोद रास्सा कुडू कोमालीन.”
MAT 26:30 बाक आंदुर भजन हाळ्त-हाळ्त जैतून पहाळी मा होदुर.
MAT 26:31 आग यीशु चेलागोळ से अंदुन, “नीव सप्पा मुंदुर ईंदल्या ईळ्लक इक नांद बारा दा ठोकर तिंदीर, यतिकी शास्त्र दा लिख्सकु आद: ‘ना चरवाह अक कोनाईन, अदिक झुण्ड इन म्यांडागोळ तितर-बितर आगेदव.’
MAT 26:32 लेकीन ना तान जित्‍ता आगदुर बाद्दा नीम से पयले गलील इक होगाईन.”
MAT 26:33 इदुर मा पतरस यीशु से अंदुन, “अगर सप्पा मुंदुर नीन बारा दा ठोकर तिंदार रा तिंदार, लेकीन ना यागलु ठोकर तिनतीदील.”
MAT 26:34 यीशु आऊन से अंदुन, “ना नीन से खरा अनतीन कि ईंदल्या ईळ्लकी हुंज इन कुग्गोर से पयले, नी मुर घन नांद इनकार माळ्या.”
MAT 26:35 पतरस यीशु से अंदुन, “अगर नानी नीन सांगुळ सायोद भी बिद्दीत, तरी ना नींद यागलु इनकार माळतीदील.” अदिक हिंग अच सप्पा चेलागोळ भी अंदुर.
MAT 26:36 आग यीशु तान चेलागोळ्द सांगुळ गतसमनी हेसुर इन ऊंद जागा दा बंदुन अदिक तान चेलागोळ से अनली कुरतुन, “ईल्या कुर्तकु ईरेतीर, आगासताका ना अल होगकु प्रार्थना माळतीन.”
MAT 26:37 यीशु पतरस अदिक जब्दी इन येढ्ढु पारगोळी सांगुळ ओतुन, अदिक उदास अदिक व्याकुल आगली कुरतुन.
MAT 26:38 आग यीशु आंदुर से अंदुन, “नान मन च्याच उदास आद. इल ताका कि नान जीव होळतेला आद. नीव ईल्या ठहरूसी अदिक नांद सांगुळ च्याता ईरी.”
MAT 26:39 बाक यीशु थ्वाळासा मात्‍त मुंद होगकु बाय इन भार देल बिद्दुन, अदिक ईद प्रार्थना माळदुन, “हे नांद आप्पा, अगर आग सकुल रा ईद संकट नान मा टु टलसेगुल, तौभी ह्यांग ना चाहासतीन हांग ईला, लेकीन ह्यांग नी चाहासत्या हांग अच आगुल.”
MAT 26:40 बाक यीशु चेलागोळ्द हात्‍ती बंदकु आंदरी मिंगतेला नोळदुन अदिक पतरस से अंदुन, “येन नीव नान सांगुळ ऊंद घळी भी च्याता ईला ईर सकीर?
MAT 26:41 नीव परीक्षा दा बिळतीदील इदुरसाटी च्याता ईरी, अदिक प्रार्थना माळतेला ईरी: आत्मा रा तयार आद, लेकीन शरीर कमजोर आद.”
MAT 26:42 बाक यीशु दुसरा बार होगकु ईद प्रार्थना माळदुन, “हे नांद आप्पा, अगर ईद नांद कुढा बिना ईला हट्सतीदाद रा नींद इच्छा पुरा आगुल.”
MAT 26:43 आग यीशु बंदकु आंदरी मात्‍त मिंगतेला नोळदुन, यतिकी आंदुरव कण्णगोळ जप देल तुमकु ईरव.
MAT 26:44 आंदरी बिटकु यीशु मात्‍त होटोदुन, अदिक अवा आवाजगोळ दा मात्‍त तीसरा बार प्रार्थना माळदुन.
MAT 26:45 आग यीशु चेलागोळ्द हात्‍ती बंदकु आंदुर से अंदुन, “ईग मिंगतेला ईरी, अदिक आराम माळी: नोळी, घळी होट बंदाद, अदिक ना मंळसा अन्द पार पापीगोळ कय देल हुळसुसकु आगाईन.
MAT 26:46 येळी, होगाता; नोळी, नानी ध्वाका देल हुळसुस्कु सौप्सावाळा नान हात्‍ती होट्ट बंदान.”
MAT 26:47 यीशु ईद अनतेला अच ईरोन कि यहूदा जो हन्नेळ चेलागोळ दा टु ऊंद ईरोन बंदुन, अदिक आऊन सांगुळ प्रधान याजकगोळ अदिक लॉकुर्द पुरनियागोळ दी टु धोळ भीळ तलवारगोळ अदिक कोलगोळ हुळकु बंदुर.
MAT 26:48 यीशु उक हुळसुसावाळा आंदरी ईद संकेत कोटीदुन: “यार्द ना चुम्मा ताकोमाईन आवा हुन; आऊक हुडु कोमेतीर.”
MAT 26:49 अदिक तुरन्त यीशु उन हात्‍ती बंदकु अंदुन, “हे गुरु, नमस्कार!” अदिक आऊंद हापाळ चुम्मा ताकोंडुन.
MAT 26:50 यीशु आऊन से अंदुन, “हे संगी, या क्याल्सा अन्द साटी नी बंद्या, अदरी माळकोम.” आग आंदुर हात्‍ती बंदकु यीशु मा कय हाकदुर अदिक आऊक हुडुकोंडुर.
MAT 26:51 यीशु उन संगीगोळ दा टु ऊंद संगी कय मुंद माळकु तान तलवार जेडु कोंडुन अदिक महायाजक उन दास मा नळ्सकु आऊन किव हार्स बुट्टुन.
MAT 26:52 आग यीशु आऊन से अंदुन, “तान तलवार मयान दा ईट कोम यतिकी जो तलवार नळ्सतार आंदुर सप्पा मुंदुर तलवार देल नाश माळकु आदार.
MAT 26:53 येन नी जान्साल कि ना तान आप्प उन से विनती माळ सकतीन, अदिक आव स्वर्गदूतगोळ्द हन्नेळ पलटन से यक्कुल नान हात्‍ती ईगल्या उपस्थित माळ बुटान?
MAT 26:54 लेकीन पवित्रशास्त्र नव अव मातगोळ कि हिंग अच आगोद जरूरी आद, ह्यांग पुरा आदव?”
MAT 26:55 आ समय यीशु भीळ से अंदुन, येन नीव तलवारगोळ अदिक कोलगोळी हुळकु नानी डाकूगोळ घाई हुडुली होटीर? ना हर रोज मंदिर दा कुर्तकु उपदेश कोळतोगीन, आग रा नीव नानी हुळदिदील.
MAT 26:56 “लेकीन ई सप्पा इदुरसाटी आग्याद कि भविष्यवक्तागोळ्द वचन पुरा आगुल.” आग सप्पा चेलागोळ यीशु उक बिटकु वोळेदुर.
MAT 26:57 आग यीशु उक हुडावाळेर आऊक कैफा हेसुर इन महायाजक उन हात्‍ती ओतुर, यल नियम इन गुरु अदिक पुर्वजगोळ जमा आगीदुर.
MAT 26:58 पतरस दुर दुर टु उच आऊन हिंद-हिंद महायाजक उन आंगुळ ताका होदुन, अदिक बुळ्क होगकु यीशु उन अन्त नोळली सिपाहीगोळ सांगुळ कुरतोदुन.
MAT 26:59 प्रधान याजक अदिक सप्पा महासभा यीशु उक कोन्नोर साटी आऊन विरोध दा ख्वाटा गवाही इन खोज दा ईरोर,
MAT 26:60 लेकीन हापाळ सा ख्वाटा गवाहगोळ बंदुर मा भी आंदरी येनु हासिल आगीदील. आखरी दा येढ्ढ मुंदुर बंदुर,
MAT 26:61 अदिक अंदुर, “ईव अंदान कि ना परमेश्वर उन मंदिर इक केडु सकतीन अदिक अदरी मुर दिन दा माळ सकतीन.”
MAT 26:62 आग महायाजक नीदुरकु यीशु से अंदुन, “येती नी येनु उत्‍तर कोळाल? ई लॉकुर नीन विरोध दा येन गवाही कोळेत्यार?”
MAT 26:63 लेकीन यीशु सुंगा ईत्‍तुन. आग महायाजक यीशु से अंदुन, “ना नीनी जित्‍ता परमेश्वर उन किर्‍या कोळतीन कि अगर नी परमेश्वर उन पार मसीह हुय, रा नाम से अंद बुळ.”
MAT 26:64 यीशु आऊन से अंदुन, “नी रा खुद अच अंदबुट; लेकीन ना नीम से ईद भी अनतीन कि ईगी टु नीव मंळसा अन पार उक सर्वशक्तिमान उन ऊमा कय दी कुर्त, अदिक आकाश इन बादलगोळ मा बर्त नोळीर.”
MAT 26:65 इदुर मा महायाजक तानव कपळा हरदुन अदिक अंदुन, “ईव परमेश्वर उन अपमान माळ्यान, ईग नामी गवाहगोळ्द येन जरवत आद? नोळी, नीव ईगल्या ईद अपमान केळीर!
MAT 26:66 नीव येन सोचेतीर?” आंदुर उत्‍तर कोट्टुर, “ईव मृत्यु दण्ड इन योग्य आन.”
MAT 26:67 आग आंदुर यीशु उन बाय मा ऊगुळदुर अदिक आऊक बुक्‍की बळदुर, दुसरा लॉकुर क्याबरा बळकु अंदुर,
MAT 26:68 “हे मसीह, नाम से भविष्यवाणी माळकु अन कि यार नीनी बळदुर?”
MAT 26:69 पतरस व्हार्या आंगुळ दा कुर्तकु ईरोन कि ऊंद दासी आऊन हात्‍ती बंदुर अदिक अंदुर, “नी भी यीशु गलीली इन सांगुळ ईर्या.”
MAT 26:70 आव सप्पा मुंदुर्द मुंद ईद अनतेला इनकार माळदुन, “ना जान्सालीन नी येन अनीत्या.”
MAT 26:71 याग आव व्हार्या दरवाजा मा होदुन, रा दुसरा दासी आऊक नोळकु आंदुर से अंदुर जो अल ईरोर, “ईव भी रा आ यीशु नासरी इन सांगुळ ईरोन.”
MAT 26:72 आव किर्‍या तिनकु मात्‍त इनकार माळकु अंदुन: “ना आ मंळसा अक अरालीन.”
MAT 26:73 घळी तिमुर बाद्दा लॉकुर जो अल नीदुरकु ईरोर, पतरस उन हात्‍ती बंदकु आऊन से अंदुर, “खराखुरा नी भी आंदुर दा टु ऊंद हुय, यतिकी नीन बोली भाषा नींद भेद खोल्स बुळतद.”
MAT 26:74 आग आव मना माळली अदिक किर्‍या तिनली कुरतुन: “ना आ मंळसा अक अरालीन.” अदिक तुरन्त हुंज कुग्त.
MAT 26:75 आग पतरस उक यीशु उन आ मात याद बत्‍त: “हुंज इन कुग्गोर से पयले नी मुर घन नान इनकार तुम्या.” अदिक आव व्हार्या होगकु हापाळ दुखी आगकु वर्लदुन.
MAT 27:1 याग व्हातुर आत रा सब प्रधान याजक लॉकुर्द पुरनिएगोळ यीशु उक कोंद बुळोद साटगाट माळदुर.
MAT 27:2 आंदुर आऊक कटदुर अदिक वोतकु पिलातुस न्यायाधीश उन कय दा कोट बुट्टुन.
MAT 27:3 याग यहूदा, याव यीशु उक हुळसुसीदुन, ईद नोळदुन कि यीशु उक दोषी ठहरूसकु आग्याद, रा आव पछतासदुन, अदिक चाँदी नव तीस सिक्‍कागोळी प्रधान याजक अदिक पुरनिएगोळी वापस माळदुन
MAT 27:4 अदिक अंदुन, “ना ऊंद निर्दोष मंळसा अक ध्वाका देल कोन्नोर साटी हुळसुसकु पाप माळदीन!” आंदुर अंदुर, “नामी येन माळोद आद? नी तान जान्स.”
MAT 27:5 आग आव आ सिक्‍कागोळी मंदिर दा भिटकु होटोदुन, अदिक होगकु खुद तान-तान इक फाँसी हचदुन.
MAT 27:6 प्रधान याजकगोळ आ सिक्‍कागोळी हुळकु अंदुर, “इवरी, दान भंडार दा ईटोद उचित हैलेच, यतिकी ईद खुन इन दाम हुन.”
MAT 27:7 अदिक आंदुर आपस दा साटगाट माळदुर अदिक आ पैस्यागोळ देल परदेशीगोळी नळसोर साटी गळग्या माळावाळा अन्द केई कोंडुर.
MAT 27:8 इदुर कारण आ केई ईगासताका खुन इन केई कहलुसतद.
MAT 27:9 आग आ वचन यिर्मयाह भविष्यवक्ता अन्द द्वारा अंदकु आगीत अद पुरा आत: “आंदुर आ तीस सिक्‍का मतलब आ जो ठहरूस्द दाम इक (यदरी इस्त्राएल इन औलाद दा टु यास मुंदुर ठहरूसीदुर) ताकोम कोंडुर,
MAT 27:10 अदिक ह्यांग प्रभु नानी आग्या कोटीदुन हांग अच अवरी गळग्या माळावाळेर्द केई इन दाम दा कोट बुट्टुन.”
MAT 27:11 याग यीशु न्यायाधीश उन मुंद निदुरकु ईरोन रा न्यायाधीश आऊन से केळदुन, “येन नी यहूदीगोळ्द राजा हुय?” यीशु आऊन से अंदुन, “नी खुद अच अनेत्या.”
MAT 27:12 याग प्रधान याजक अदिक पुरनिए आऊन मा दोष हच्चोर, रा यीशु येनु उत्‍तर कोटीदील.
MAT 27:13 इदुर मा पिलातुस यीशु से अंदुन, “येन नी येनु केळाल कि इंदुर नीन विरोध दा याट गवाही कोळेत्यार?”
MAT 27:14 लेकीन यीशु आऊक ऊंद मात इन भी उत्‍तर कोटीदील, इल ताका कि न्यायाधीश उक हापाळ आश्चर्य आत.
MAT 27:15 न्यायाधीश उन ईद रीति ईरोद कि आ हाब्ब दा लॉकुर्द साटी यावारा ऊंद कैदी इक यारी आंदुर चाहासतोगोर, बिळतोगोन.
MAT 27:16 आ समय दा आंदुर बंदीगृह दा बरअब्बा हेसुर ईनव ऊंद जाना माना कैदी ईरोन.
MAT 27:17 इदुरसाटी याग आंदुर जमा आदुर, रा पिलातुस आंदुर से अंदुन, “नीव यार इक चाहासतीर कि ना नीम साटी बिट बुळाईन? बरअब्बा अक, या यीशु उक जो मसीह कहलुस्तान?”
MAT 27:18 यतिकी आव जानसोन कि आंदुर यीशु उक ध्वाका देल हुळसुसकु सोपस्यार.
MAT 27:19 याग पिलातुस राजा न्याय इन गद्दी मा कुर्तकु ईरोन रा आऊन हिंग्स आऊक बुलावा कळुदुर कि, “नी आ न्यायी मंळसा अन्द मामला दा कय हाकबाळ, यतिकी ना ईंद कान्सा दा आऊन कारण हापाळ दुख नेगदीन.”
MAT 27:20 प्रधान याजकगोळ अदिक पुरनिएगोळ लॉकुरी भळकुसदुर कि आंदुर बरअब्बा अक बेळ कोमुल, अदिक यीशु उन नाश माळसुसुल.
MAT 27:21 न्यायाधीश आंदुर से केळदुन, “इंदुर येढ्ढु मुंदुर दा टु यार इक चाहासतीर कि ना नीम साटी बिट बुळाईन? आंदुर अंदुर, बरअब्बा अक.”
MAT 27:22 पिलातुस आंदुर से केळदुन, “बाक यीशु उक जो मसीह कहलुस्तान, येन माळाईन?” सप्पा मुंदुर पिलातुस राजा से अंदुर, “आऊक क्रूस मा येर्स बुळ!”
MAT 27:23 न्यायाधीश अंदुन, “यती, आव येन बुराई माळ्यान?” लेकीन आंदुर मात्‍त चिल्ळास-चिळ्लासकु अनली कुरतुर, “आऊक क्रूस मा येर्स बुळ.”
MAT 27:24 याग पिलातुस नोळदुन कि नान से येनु आगसकाल लेकीन उलटा झगळा वाळुसेत्याद, रा आव नीर हुडुकु भीळ इन मुंद तान कय तोळदुन अदिक अंदुन, “ना ई मंळसा अन्द रक्ता देल निर्दोष आईन; नीव अच नोळी.”
MAT 27:25 सप्पा लॉकुर उत्‍तर कोट्टुर, “ईऊन खुन नाम मा अदिक नाम औलाद मा आगुल!”
MAT 27:26 इदुर मा पिलातुस राजा बरअब्बा अक आंदुर साटी बिट बुट्टुन, अदिक यीशु उक क्वाळा बळ्दकु सौप्स बुट्टुन, कि आऊक क्रूस मा येर्सकु आगुल.
MAT 27:27 आग न्यायाधीश ईनोर सिपाहीगोळ यीशु उक किला दा वोतकु सप्पा पलटन आऊन नाकु दी जमा माळदुर,
MAT 27:28 अदिक आऊन कपळा ईळ्सकु आऊक क्याचांद रंग इन कपळा हाक्सुसदुर,
MAT 27:29 अदिक मुळ्ल इन मुकुट तयार माळकु यीशु उन ताल्ला मा ईटदुर, अदिक आऊन ऊम्मा कय दा सरकण्डा कोट्टुर अदिक आऊन मुंद ट्वांगरा टेक्सकु आऊन मज्याक हार्सली कुरतुर अदिक अंदुर, “हे यहूदीगोळ्द राजा, नमस्कार!”
MAT 27:30 अदिक आऊन मा ऊगुळदुर; अदिक अदा सरकण्डा हुळकु आऊन ताल्ला मा बडुली कुरतुर.
MAT 27:31 याग आंदुर यीशु उन मज्याक हार्स बुटुर, रा अद च्वॉगा आऊन मा टु ईळ्सकु आऊन अच कपळा आऊक हाक्सुसदुर, अदिक क्रूस मा येरसोर साटी वयली कुरतुर.
MAT 27:32 याग आंदुर व्हार्या होळोर रा आंदरी शमौन हेसुर ईनव ऊंद कुरेनी मंळसा सिकदुन. आंदुर आऊक बेकार दा हुळदुर कि आऊन क्रूस नेगुकु नळुल.
MAT 27:33 अदिक याग आंदुर आ जागा मा बंदुर जो गुलगुता कहलुसतद, मतलब खोपळी इन जागा, पोहचुस्कु,
MAT 27:34 आंदुर पित्त मिलुसकु अंगुर इन रास्सा यीशु उक कुडुली कोट्टुर, लेकीन आव नेकदुन रा आऊक केय हत्‍त अनकु आव हुळदीदिल.
MAT 27:35 आग आंदुर आऊक क्रूस मा येर्सदुर, अदिक चिट्ठी हाक्‍कु आऊन कपळागोळ वाटा माळदुर,
MAT 27:36 अदिक अल कुर्तकु आऊक कायली कुरतुर.
MAT 27:37 अदिक आऊन दोषपत्र आऊन ताल्ला अन्द म्याकुच हचदुर, कि “इव यहूदीगोळ्द राजा यीशु हुन.”
MAT 27:38 आग आऊन सांगुळ येढ्ढ डाकूगोळ ऊंद ऊम्मा कय दी अदिक ऊंद डाक्या कय दी, क्रूस मा येर्सकु आदुर.
MAT 27:39 होगा-बरावाळेर ताल्ला आलगाळ्स-आलगाळ्सकु आऊन अपमान माळतोगोर,
MAT 27:40 अदिक ईद अनतोगोर, “हे मंदिर इक केळावाळा अदिक मुर दिन दा माळावाळा, तान तान इक रा ऊळ्स! अगर नी परमेश्वर उन पार हुय, रा क्रूस मा टु ईळ्दकु बर.”
MAT 27:41 ईदा रीति देल प्रधान याजक भी नियम इन गुरुगोळ अदिक पुरनियागोळ्द सांगुळ मज्याक माळ माळकु अनतोगोर,
MAT 27:42 “ईव रा च्याच मुंदुर इक ऊळस्यान, अदिक तान तान इक ऊळ्स सकालुन. इव रा ‘इस्त्राएल इन राजा’ हुन. ईग क्रूस मा टु ईळुकु बंदान रा नाव आऊन मा विश्वास माळेव.
MAT 27:43 आव परमेश्वर मा भरोसा ईटदुन; अगर आव ईऊक चाहासतान, रा ईग इऊक बिळ्स कोमुल, यतिकी ईव अंदिदुन, ‘ना परमेश्वर उन पार हुईन.’”
MAT 27:44 ईदा प्रकार डाकू भी जो आऊन सांगुळ क्रूस मा येर्सकु आगीदुर, आऊन अपमान माळतोगोर.
MAT 27:45 हन्नेळ मुरा टु रा मुर मुरास ताका आ सप्पा प्रदेश दा अंधार आगकु ईत्‍त.
MAT 27:46 मुर मुरा अन्द हात्‍तीपास यीशु धोळ्द आवाज दा चिळ्लासकु अंदुन, “एली, एली, लमा शबक्तनी?” मतलब “हे नान परमेश्वर, हे नान परमेश्वर, नी नानी येती बिटबुट?”
MAT 27:47 जो अल नीदुरकु ईरोर, आंदुर दा टु यास मुंदुर ईद केळकु अंदुर, “आव रा एलिय्याह अक कारूतान.”
MAT 27:48 आंदुर दा टु ऊंद मंळसा तुरन्त हरदुन, अदिक स्पंज हुळकु सिरका दा डोब्सदुन, अदिक सरकण्डा मा ईटकु आऊक नेक्सदुन.
MAT 27:49 अदिक च्याच मुंदुर अंदुर, “ईल्या ईरी, नोळाता एलिय्याह आऊक ऊळ्सली बरतान का ईला.”
MAT 27:50 आग यीशु मात्‍त धोळ्द आवाज देल चिळ्लासकु जीव बिट बुटुन.
MAT 27:51 अदिक नोळी, मंदिर इन परदा म्याकुच टु ल्यालमा ताका हर्दकु येढ्ढ तुकळा आगेत: अदिक धरती डोलसेत अदिक चट्टानगोळ तळकुसेदव,
MAT 27:52 अदिक कब्रगोळ तेरदोदव, अदिक जो कब्रगोळ दा मिंगकु ईरोर आ पवित्र लॉकुर्द हापाळ सा लाश जित्‍ता आदव,
MAT 27:53 अदिक आऊन जित्‍ता आगदुर बाद्दा आंदुर कब्रगोळ दा टु होटकु पवित्र नगर दा होदुर अदिक हापाळ मुंदुर इक कांळ्सदुर.
MAT 27:54 आग सूबेदार अदिक जो लॉकुर आऊन सांगुळ यीशु उक कायोर, याग आंदुर भूकम्प अदिक जो येनारा आगीत अदरी नोळकु हापाळ अंजेदुर अदिक अंदुर, “खराखुरा ईव परमेश्वर उन पार ईरोन!”
MAT 27:55 अल हापाळ सा आर्तेर जो गलील टु यीशु उन स्यावा माळतेला आऊन सांगुळ बंदीदुर, दुर टु ईद नोळोर.
MAT 27:56 आंदुर्दा मरियम मगदलीनी, अदिक याकूब अदिक योसेस उन मोय मरियम, अदिक जब्दी इन चिकोरगोळ्द मोय ईरोर.
MAT 27:57 याग द्याव आत रा यूसुफ हेसुर ईनव अरिमतिया अन्द ऊंद धनी मंळसा, जो खुद अच यीशु उन चेला ईरोन, बंदुन.
MAT 27:58 आव पिलातुस उन हात्‍ती होगकु यीशु उन लाश बेळदुन. इदुर मा पिलातुस कोळोद आग्या कोट्टुन.
MAT 27:59 आग यूसुफ लाश इक वोतकु बिळीद मलमल इन चद्दर दा गुंळ्सदुन,
MAT 27:60 अदिक यीशु उक तान व्हाशोद कब्र दा ईटदुन, जो आव चट्टान दा अगळुसीदुन, अदिक कब्र अन्द दरवाजा मा धोळ्द कल्ल ढकलुस्कु होटोदुन.
MAT 27:61 मरियम मगदलीनी अदिक दुसरा मरियम अल कब्र अन्द मुंद कुर्तकु ईरोर.
MAT 27:62 दुसरा दिशी जो तयारी इन दिन इन बाद इन दिन ईरोद, प्रधान याजकगोळ अदिक फरीसीगोळ पिलातुस उन हात्‍ती जमा आगकु अंदुर,
MAT 27:63 “हे स्वामी, नामी याद आद कि आ भरमुसावाळा याग आव जित्‍ता ईरोन, अंदिदुन, ‘ना मुर दिन इन बाद्दा जित्‍ता आगाईन.’
MAT 27:64 इदुरसाटी आग्या कोळ कि तीसरा दिन ताका कब्र अन्द रखवाली माळकु आगुल, हिंग आगबाळुल कि आऊन चेलागोळ बंदकु आऊक काळताना माळकु वोयुल अदिक लॉकुर से अनली हतुल, ‘आव सोत्‍तुर दा टु जित्‍ता आग्यान.’ आग हिंदळोद ध्वाका पयला टु भी बुरा आदीत.”
MAT 27:65 पिलातुस आंदुर से अंदुन, “नीम हात्‍ती पहरेदार रा आन. होगी, तान समझ इन अनुसार रखवाली माळी.”
MAT 27:66 इदुरसाटी आंदुर पहरेदारगोळी सांगुळ ओतुर, अदिक कल्ल मा मोहर हचकु कब्र अन्द रखवाली माळदुर.
MAT 28:1 आराम इन दिन इन बाद्दा हप्ता अन्द पयला दिन व्हातुर आगतेला अच मरियम मगदलीनी अदिक दुसरा मरियम कब्र अक नोळली बंदुर.
MAT 28:2 अदिक नोळी, ऊंद हापाळ अच भारी भूकम्प आत, यतिकी परमेश्वर उन ऊंद स्वर्गदूत स्वर्ग टु ईळुकु बंदुन अदिक आव कल्ल इक अलग ढकलुस्कु अदुर मा कुरतुन.
MAT 28:3 आऊन रूप बिजली इन घाई अदिक आऊन कपळा बरफ इन घाई बिळेव ईरव.
MAT 28:4 आऊन अंज्क देल पहरेदार नळ्गली कुरतुर, अदिक सोत्‍तुर घाई आगेदुर.
MAT 28:5 स्वर्गदूत आ येढ्ढ आर्तेर से अंदुर, “अंजबाळी ना जान्सतीन कि नीव यीशु उक जो क्रूस मा येर्सकु आगीदुन आऊक ढुंढ़सेतीर.
MAT 28:6 आव ईल हैलेच, तान वचन इन अनुसार जित्‍ता आग्यान. बरी, आ जागा अक नोळी यल प्रभु बिदकु ईरोन.
MAT 28:7 आऊन चेलागोळी इक तुरन्त होगकु हेळी कि आव सोत्‍तुर दा टु जित्‍ता आग्यान, अदिक नोळी, आव नीम से पयला गलील इक होदान. अल नीमी आऊन अव दर्शन सिक्‍केव अदिक नीव आऊक नोळ सकीर. नोळी, ना नीमी हेळ बुटीन.”
MAT 28:8 इदुर मा आंदुर अंज्क अदिक बळा खुशी इन सांगुळ तुरन्त कब्र टु वापस आगकु अदिक चेलागोळी इक ईद समाचार कोळोर साटी वोळली कुरतुर.
MAT 28:9 आग यीशु आंदरी सिकदुन. अदिक अंदुन, “सलाम.” आंदुर हात्‍ती बंदकु अदिक आऊन नव काल हुळकु प्रणाम माळदुर.
MAT 28:10 आग यीशु आ आर्तेरी अंदुन, “अंजबाळी; नांद वार्टुरी होगकु अनी कि गलील इक होगी, अल नानी नोळ्यार.”
MAT 28:11 आंदुर होगतेला अच ईरोर कि पहरेदारगोळ दा टु थ्वाळासा पहरेदारगोळ बंदकु पुरा हाल प्रधान याजकगोळ से अनकु केळ्सदुर.
MAT 28:12 आग आंदुर पुर्वजगोळ सांगुळ जमा आगकु सम्मति माळदुर अदिक सिपाहीगोळी हापाळ चाँदी नव सिक्‍कागोळ कोटकु अंदुर,
MAT 28:13 “ईद अनेतीर कि ईळ्लक इक याग नाव मिंगकु ईरेव, रा आऊन चेलागोळ बंदकु आऊक काळताना माळकु ओतुर.
MAT 28:14 अदिक अगर ईद मात न्यायाधीश उन किव ताका पहुचुसीत, रा नाव आऊक समझुस बुटेव अदिक नीमी जोखिम टु वाचुस कोंडेव.”
MAT 28:15 इदुरसाटी आंदुर पैस्या ताकोमकु ह्यांग आंदरी कल्सकु आगीत. हांग अच माळदुर. ईद मात यहूदीगोळ दा दुर दुर ताका फैलुसेत अदिक ईगासताका प्रचलित आद.
MAT 28:16 हन्नेळ चेलागोळ गलील इन आ पहाळ मा होदुर, यारी यारी यीशु हेळीदुन.
MAT 28:17 आंदरी यीशु नव दर्शन सिकदव अदिक आऊक प्रणाम माळदुर, पर यारीकारा यारीकारा शंका आत.
MAT 28:18 यीशु आंदुर हात्‍ती बंदकु अंदुन, “स्वर्ग अदिक पृथ्वी इन पुरा अधिकार नानी कोटकु आग्याद.
MAT 28:19 इदुरसाटी नीव होगी, सप्पा जातीगोळ लॉकुरी चेला माळी; अदिक आंदरी आप्प, पार अदिक पवित्र आत्मा अन्द हेसुर देल बपतिस्मा कोळी,
MAT 28:20 अदिक जो आग्यागोळ ना नीमी कोट्टीन अदुर्द पालन ह्यांग माळतार अद कल्सी. अदिक नोळी, ना युग इन अन्त ताका सदा नीम सांगुळ आईन.”
MAR 1:1 परमेश्वर उन पार, यीशु मसीह अन्द खुशखबरी इन सुरूवात.
MAR 1:2 जसा यशायाह भविष्यवक्ता अन्द किताब दा लिख्सकु आद, परमेश्वर अंदुन, “नोळ, ना नीन मुंद तान बातणी कोळावाळा अक कळुतीन, जो नीन साटी हादी तयार माळ्यान.”
MAR 1:3 आळी दा ऊंद कारावाळा अन्द आवाज केळ बरेत्याद: कि “प्रभु उन हादी तयार माळी, अदिक आऊक होगोर साटी सळकगोळी सरका माळी.”
MAR 1:4 बपतिस्मा कोळावाळा यूहन्ना आळी दा बंदुन, “जो बपतिस्मा अन्द प्रचार माळतोगोन, अदिक पापगोळ्द माफ अन्द साठी मन तिर्गुसोद बपतिस्मा कोळतोगोन अदिक अनतोगोन, परमेश्वर नीम पापगोळी माफ माळ्यान.”
MAR 1:5 पुरा यहूदिया अन्द प्रदेश, अदिक यरूशलेम इन सप्पा ईरावाळेर निवासी होटकु आऊन हात्‍ती होदुर, “अदिक तान पापगोळी मान्सकु यरदन गांगा दा आऊन से बपतिस्मा ताकोंडुर.”
MAR 1:6 यूहन्ना ऊँट इन चुट्टीगोळ्द फळक्या हाक्‍कु अदिक नेळु मा तोगुल इन पट्टा कटकु ईरतोगोन. फाफा अदिक आळी दाकळोद शयद तिनतोगोन,
MAR 1:7 अदिक हिंग अंद अंदकु प्रचार माळतोगोन कि, “नान बाद्दा आव बरावाळा आन, जो नान से यक्कुल ताकतवर आन, ना रा ई लायक भी हैलेच कि बांगकु आऊन काल ईनव केरू तेगु सकाईन.
MAR 1:8 ना रा नीमी नीर दा बपतिस्मा कोट्टीन, लेकीन आव नीमी पवित्र आत्मा देल बपतिस्मा कोट्टान.”
MAR 1:9 आ दिनगोळ दा हिंग आत कि यीशु गलील इन नासरत नगर टु बंदकु, यरदन गांगा दा बपतिस्मा कोळावाळा यूहन्ना से बपतिस्मा ताकोंडुन.
MAR 1:10 अदिक याग आव नीर दा टु होटकु म्याकुच बंदुन, रा तुरन्त आव स्वर्ग इक खुल्सत अदिक पवित्र आत्मा अक कबूतर इन घाई तान म्याकुच ईळुतेला नोळदुन.
MAR 1:11 आग स्वर्ग दा टु ईद आकाशवाणी आत कि, “नी नान प्रिय पार हुय, ना नीन देल हापाळ खुश आईन.”
MAR 1:12 आग पवित्र आत्मा तुरन्त यीशु उक आळी दी कळुत.
MAR 1:13 अदिक चालीस दिन ताका सुनसान जागा दा आऊन परीक्षा, शैतान उन द्वारा आगतेला ईरोद; अदिक आव आळी दाकळव पशुगोळ सांगुळ ईत्‍तुन, अदिक आग स्वर्गदूत बंदकु आऊन स्यावा माळतेला ईत्‍तुर.
MAR 1:14 बपतिस्मा कोळावाळा यूहन्ना अक बंदी माळदुर बाद्दा यीशु गलील दा बंदकु परमेश्वर उन राज्य अन्द खुशखबरी प्रचार माळदुन,
MAR 1:15 अदिक अंदुन, “समय पुरा आगेग्याद, ‘अदिक परमेश्वर उन राज्य हात्‍ती होट्ट बंदाद; मन तिर्गुसी अदिक खुशखबरी मा विश्वास माळी.’”
MAR 1:16 याग यीशु गलील इन झील इन किनारा किनारा होगोन, रा आव शमौन अदिक आऊन वार्ट अन्द्रियास उक झील दा जार हाक्त नोळदुन; यतिकी आंदुर मेन हुडावाळेर ईरोर.
MAR 1:17 यीशु आंदुर से अंदुन, “नान हिंद बरी; ना नीमी मंळसागोळी परमेश्वर उन हात्‍ती ह्यांग तरतार अद कलसाईन.”
MAR 1:18 आंदुर तुरन्त जारगोळी बिटकु आऊंद हिंद नळुली कुरतुर.
MAR 1:19 थ्वाळासा मुंद होगदुर मा, आव जब्दी इन पार याकूब, अदिक आऊन वार्ट यूहन्ना अक, ड्वांगा मा कुर्तकु जारगोळी सुधरूसतेला नोळदुन.
MAR 1:20 ह्यांग यीशु आंदरी नोळदुन हांगा तुरन्त कारदुन; अदिक आंदुर तान आप्प जब्दी इक मजदूरगोळ्द सांगुळ ड्वांगा मा बिटकु, आऊन हिंद होटोदुर.
MAR 1:21 आग आंदुर कफरनहूम नगर दा बंदुर, अदिक आव तुरन्त आराम इन दिन यहूदी लॉकुर्द सभागृह दा होगकु उपदेश कोळली कुरतुन.
MAR 1:22 अदिक लॉकुर आऊन उपदेश केळकु सट्ट आगेदुर; यतिकी आव आंदरी शास्त्रीगोळ्द घाई ईला, लेकीन अधिकारीगोळ्द घाई उपदेश कोळतोगोन.
MAR 1:23 आटोटीका, आंदुर्द यहूदी लॉकुर्द सभागृह दा ऊंद मंळसा ईरोन, यारदा ऊंद दुष्टआत्मा ईरोद.
MAR 1:24 आव ईद अनकु चिल्ळास कुरतुन, “हे यीशु नासरी, नामी नीन से येन क्याल्सा? येन नी नामी नाश माळली बंद्या? ना नीनी अरूतीन, नी याव हुय? परमेश्वर उन पवित्र जन!”
MAR 1:25 यीशु आऊक दनकुसकु अंदुन, “सुंगा ईर; अदिक आ मंळसा दा टु होटबुळ.”
MAR 1:26 आग दुष्टआत्मा आऊक मुरकुळ्सकु, अदिक धोळ्द आवाज देल चिळ्लासकु आऊन दा टु होट बुळ्त.
MAR 1:27 इदुर मा सप्पा लॉकुर आश्चर्य माळतेला आपस दा मातचीत माळली कुरतुर, “ईद येन मात आद? ईद रा ऊंद व्हाशोद उपदेश आद! आव अधिकार देल दुष्टआत्मागोळी भी आग्या कोळतान, अदिक दुष्टआत्मा भी आऊन आग्या मान्सताव.”
MAR 1:28 अदिक यीशु उन हेसुर इन बारा दा ईद बातणी तुरन्त गलील इन आसपास इन सप्पा प्रदेश दा फैलुसेत.
MAR 1:29 यीशु अदिक आऊन चेलागोळ यहूदी लॉकुर्द सभागृह दा टु होटकु याकूब अदिक यूहन्ना अन्द सांगुळ शमौन अदिक अन्द्रियास उन मान्या बंदुर.
MAR 1:30 अल शमौन उन आत्‍त मय देल व्हर्स मा बिदकु ईरोर; अदिक आंदुर तुरन्त यीशु उन बारा दा आकी हेळदुर.
MAR 1:31 आग आव हात्‍ती होगकु आकिन कय हुळकु आक इक येब्सदुन; अदिक आकिन मय तुरन्त ईळदोदव, अदिक आक यीशु अदिक आऊन चेलागोळ्द स्यावा-पानी माळली कुरतुर.
MAR 1:32 द्यावगान होती याग सुर्य मुळकेत रा आग लॉकुर सब बिमारगोळी अदिक आंदरी, यारदा दुष्टआत्मागोळ ईरव, आंदरी भी यीशु उन हात्‍ती तंदुर.
MAR 1:33 अदिक सप्पा नगर इन लॉकुर शमौन उन मान्ना अन्द दरवाजा मा बंदकु जमा आदुर.
MAR 1:34 यीशु च्याच मुंदरी जो अलग अलग प्रकार इन बिमारी देल दुखी ईरोर, चंगा माळदुन, हापाळ सा दुष्टआत्मागोळी तेगदुन, अदिक दुष्टआत्मागोळी माताळ गोटीदील, यतिकी अव आऊक अरव.
MAR 1:35 अदिक यीशु व्हातुर आगोर से हापाळ पयले, मान्या टु यदकु व्हार्या होटुन, अदिक ऊंद सुनसान जागा दा होगकु प्रार्थना माळली कुरतुन.
MAR 1:36 आग शमौन अदिक आऊन संगीगोळ यीशु उन खोज दा होदुर.
MAR 1:37 याग आव सिकदुन, रा आऊक अंदुर, “सप्पा लॉकुर नीनी ढुंढ़सेत्यार.”
MAR 1:38 यीशु आंदुर से अंदुन, “बरी; नाव मात्‍त येल्यारा आसपास इन ऊरगोळ दा होगाता, कि ना अल भी प्रचार माळाईन, यतिकी ना इदुर्दा साटी बंदीन.”
MAR 1:39 इदुरसाटी आव पुरा गलील दा यहूदी लॉकुर्द सभागृहगोळ दा होग होगकु प्रचार माळदुन अदिक दुष्टआत्मागोळी तेगुतेला ईत्‍तुन.
MAR 1:40 ऊंद कोढ़ इन रोगी मंळसा यीशु उन हात्‍ती बंदुन, अदिक आऊन मुंद ट्वांगरा टेक्सकु आऊन से विनती माळदुन, कि “अगर नी चाहास्या रा नानी शुद्ध माळ सकत्या.”
MAR 1:41 यीशु आऊन मा तरस तिनकु तान कय वाळुसदुन, अदिक आऊक मुटकु अंदुन, “ना चाहासतीन कि नी शुद्ध आगेग.”
MAR 1:42 अदिक तुरन्त आऊंद कोढ़ इन बिमारी वळ्लीद आगेत अदिक आव शुद्ध आगेदुन.
MAR 1:43 आग यीशु आऊक चेतावनी कोटकु तुरन्त सार माळदुन,
MAR 1:44 अदिक आऊन से अंदुन, “नोळ, यारीकु येनु हेळबाळेत, लेकीन होगकु तान तान इक याजक उक तोर्स, अदिक तान शुद्ध आगोद बारा दा जो येनारा मूसा ठहरूस्यान अदरी भेंट येर्स, कि आंदुर मा गवाही आगुल.”
MAR 1:45 लेकीन आव मंळसा व्हार्या होगकु ईद मात इन हापाळ प्रचार माळली अदिक ईल ताका फैलुस्ली कुरतुन कि यीशु बाक खुलेआम नगर दा ईला होग सकोन, लेकीन व्हार्या आळी दा ईरोन; अदिक नाकु दिकळोर लॉकुर आऊन हात्‍ती बरतेला ईरोर.
MAR 2:1 हापाळ दिन इन बाद्दा यीशु बाक कफरनहूम दा बंदुन, अदिक खबर फैलुस्त कि आव मान्या आन.
MAR 2:2 बाक ईस लॉकुर जमा आदुर कि दरवाजा अन्द हात्‍ती भी जागा ईला ईरोद; अदिक आव आंदरी वचन केळसोन.
MAR 2:3 अदिक लॉकुर ऊंद लकवा अन्द रोग इक नाक मंळसागोळ कय देल नेगुकु आऊन हात्‍ती तंदुर.
MAR 2:4 लेकीन याग आंदुर भीळ इन कारण आऊन हात्‍ती होग सकिदील, रा आंदुर आ छत इक यदुर ल्यालमा आव नीदुरकु ईरोन, खोल्स बुटुर; अदिक याग आंदुर अदरी बिच्छ बुटुर, रा आ व्हर्स इक यदुर मा लकवा अन्द रोगी बिदकु ईरोन, आऊक ल्यालमा ईळ्सदुर अदिक व्हर्स इक हिलगुस बुटुर.
MAR 2:5 यीशु आंदुर विश्वास नोळकु आ लकवा अन्द रोग इक अंदुन, “हे नान पारा, नीन पाप माफ आदव.”
MAR 2:6 आग हापाळ नियमगोळ गुरु जो अल कुर्तकु ईरोर, आंदुर तान-तान मन दा विचार माळली कुरतुर,
MAR 2:7 “इव मंळसा येती हिंग अनेत्यान? इव रा परमेश्वर उन अपमान माळीत्यान! परमेश्वर उक बिटकु अदिक याव पाप माफ माळ सकतान?”
MAR 2:8 यीशु तुरन्त खुद तान आत्मा दा ईद जान्स कोंडुन कि आंदुर तान-तान मन दा हिंग विचार माळीत्यार, इदुरसाटी आव आंदुर से अंदुन, “नीव येती तान-तान मन दा ईद मात इन विचार माळेतीर?
MAR 2:9 आसान येन आद? येन लकवा अन्द रोगी से ईद अनोद कि नीन पाप माफ आदव, या ईद अनोद कि येळ तान व्हर्स नेगुकु नळु अदिक टेटाळ?
MAR 2:10 ना नीम मुंद साबित माळ बुळाईन, कि मंळसा अन पार उक ईद पृथ्वी मा पाप माफ माळोद भी अधिकार आद.”
MAR 2:11 यीशु आ लकवा अन्द रोगी से अंदुन, “ना नीन से अनेतीन, येळ, तान व्हर्स नेगु अदिक तान मान्नी होटोग.”
MAR 2:12 बाक आव येद्दुन अदिक तुरन्त तांद व्हर्स नेगुकु सप्पा मुंदुर मुंद टु होटकु ओळेदुन, इदुर मा सप्पा लॉकुर सट्ट आदुर, अदिक परमेश्वर उन बळाई माळकु अनली कुरतुर, “नाव रा हिंग यागलु नोळीदील!”
MAR 2:13 यीशु बाक अल टु होटकु क्यार्रा अन्द किनारा मा होदुन, अदिक सप्पा भीळ आऊन हात्‍ती बत्‍त, अदिक आव आंदरी उपदेश कोळली कुरतुन.
MAR 2:14 अल टु होगावती यीशु हलफई नव पार लेवी इक कर ताकोमोद चौकी मा कुर्तकु नोळदुन, अदिक यीशु आऊन से अंदुन, “नान हिंद आगेग.” अदिक आव यदकु आऊन हिंद आगेदुन.
MAR 2:15 बाक हिंग आत कि याग यीशु तान चेलागोळ सांगुळ आऊन मान्या ऊमली कुरतुन, आग हापाळ मुंदुर कर ताकोमावाळेर अदिक पापी लॉकुर, यीशु अदिक आऊन चेलागोळ सांगुळ ऊमली कुरतुर; यतिकी आंदुर हापाळ मुंदुर ईरोर, अदिक आऊन हिंद आगेगीदुर.
MAR 2:16 नियम इनोर गुरुगोळ अदिक फरीसीगोळ ईद नोळदुर कि आव रा पापीगोळ अदिक कर ताकोमावाळेर सांगुळ ऊमेत्यान, रा आऊन चेलागोळी अंदुर, “आव रा कर ताकोमावाळेर अदिक पापीगोळ सांगुळ तिनतान-कुडुतान?”
MAR 2:17 ईद केळकु यीशु आंदुर से अंदुन, “भला चंगा मंळसागोळी वैद्यगोळ्द जरवत हैलेच, लेकीन बिमार मंळसागोळी आद: ना न्यायीगोळी ईला, लेकीन पापी लॉकुरी कारूली बंदीन.”
MAR 2:18 बपतिस्मा कोळावाळा यूहन्ना अन्द चेलागोळ, अदिक फरीसी लॉकुर चेलागोळ उपास माळतोगोर. अदिक थ्वाळासा लॉकुर बंदकु यीशु से अनली कुरतुर, “यूहन्ना अन्द चेलागोळ अदिक फरीसी नोर चेलागोळ येती उपास ईटतार? लेकीन नीन चेलागोळ येती उपास ईटालुर?”
MAR 2:19 यीशु आंदुर से अंदुन, “येन नीव उम्मीद माळतीर कि ऊंद मदा दा वरातीगोळ बिना ऊंडुर तिंदुर देल होदार? बिलकुल ईला! यागासताका मंळगार आंदुर सांगुळ आन, आगासताका आंदुर उपासा होग सकालुर.
MAR 2:20 लेकीन अव दिन बंदव याग मंळगार उक आंदुर से अलग माळकु आदीत; अदिक आ दिन आंदुर उपास माळ्यार.”
MAR 2:21 “क्वारा कपळा अन्द थिगर हाळोद कपळा मा यारू हचालुर. ईलारा अद थिगर अदुर दा टु येनारा जेडु कोंडीत, आग व्हाशोद, हाळोद से, अदिक अद पयले से यक्कुल हरदोदित.”
MAR 2:22 व्हाशोद अंगुर इन रास्सा अक हाळोद तोगुल इन चिला दा यारू ईटालुर, ईलारा अंगुर इन रास्सा तोगुल इन चिला अक हर्द बुट्टीत, अदिक अंगुर इन रास्सा अदिक तोगुल इन चिला येढ्ढु नाश आगेदव, “लेकीन व्हाशोद अंगुर इन रास्सा व्हाशोद तोगुल इन चिला दा तुमकु आगतद.”
MAR 2:23 अदिक हिंग आत कि यीशु आराम इन दिशी केई दी टु आगतेला होगोन; अदिक आऊन चेलागोळ नळुतेला गोदी नव लॉम्बागोळी मुरू कुरतुर.
MAR 2:24 आग फरीसीगोळ आऊन से अंदुर, “नोळ, इंदुर आराम इन दिन दा अद क्याल्सा येती माळतार जो नियम इन अनुसार माळोद उचित हैलेच?”
MAR 2:25 यीशु आंदरी उत्‍तर कोट्टुन, येन नीव ईद यागलु वाचुसीदील, कि याग दाऊद उक जरवत ईरोद, याग आव अदिक आऊन संगीगोळ हस्तकु ईरोर, आग आव येन माळीदुन?
MAR 2:26 “आव ह्यांग अबियातार महायाजक उन समय दा, परमेश्वर उन भवन दा होगकु भेंट इन रोट्टीगोळी तिंदुन, यदुर्द तिनोद याजकगोळी बिटकु अदिक यारीकु भी उचित हैलेच, अदिक तान संगीगोळी भी कोट्टुन?”
MAR 2:27 आग यीशु आंदुर से अंदुन, “आराम इन दिन मंळसागोळ्द साठी माळकु आग्याद, ना कि मंळसा आराम दिन इन साटी.
MAR 2:28 इदुरसाटी मंळसा अन पार आराम दिन इन भी स्वामी आन.”
MAR 3:1 अदिक यीशु बाक यहूदी लॉकुर्द सभागृह दा होदुन; अदिक अल ऊंद मंळसा ईरोन यार्द कय वंळ्गेगीत,
MAR 3:2 अदिक आंदुर यीशु मा दोष हचोर साटी आऊन ताक मा हतकु ईरोर कि नोळाता, आव आराम दिन दा आऊक चंगा माळतान का ईला.
MAR 3:3 यीशु वंळगींद कयवाळा मंळसा से अंदुन, “येळ, लॉकुर न्याड्या दा नीदरेग.”
MAR 3:4 अदिक यीशु आंदुर से अंदुन, “येन आराम इन दिन दा नियम इन अनुसार भलाई माळोद उचित आद या बुरा माळोद? जीव इक उळसोद उचित आद या कोन्नोद?” लेकीन आंदुर सुंगा ईत्‍तुर.
MAR 3:5 बाक यीशु आंदुर मन इन कठोरता देल उदास आगकु, आंदरी सिट्ट देल नाकु दी नोळदुन, अदिक आ मंळसा से अंदुन, “तान कय मुंद वाळुस.” आव वाळुसदुन, अदिक आऊंद कय पयले अन्द घाई वळ्लीद आगेत.
MAR 3:6 आग फरीसीगोळ यहूदी लॉकुर्द सभागृह दा टु व्हार्या होगकु तुरन्त हेरोदियों लॉकुर सांगुळ यीशु उन विरोध दा साठगाठ माळली कुरतुर कि आऊक याता प्रकार देल नाश माळेव.
MAR 3:7 बाक यीशु तान चेलागोळ सांगुळ क्यार्रा दी होटोदुन. अदिक गलील दा टु ऊंद धोळ्द भीळ आऊन हिंद नळुली कुर्त,
MAR 3:8 अदिक यहूदिया, अदिक यरूशलेम, अदिक इदूमिया, अदिक यरदन गांगा अन आप्पाटी, अदिक सूर अदिक सैदा अन्द आसपास टु ऊंद धोळ्द भीळ ईद केळकु आऊन हात्‍ती बंदुर कि, आव ह्यांग अचम्भा अन्द क्याल्सा माळतान.
MAR 3:9 अदिक बाक यीशु तान चेलागोळ से अंदुन, “भीळ इन कारण ऊंद स्यांळ्दतुसा ड्वांगा नान साटी तयार ईरूल ताकी आंदुर नानी वत्‍त ईला सकुल.”
MAR 3:10 यतिकी आव हापाळ मुंदरी चंगा माळीदुन; इदुरसाटी अल यास लॉकुर रोग देल बिमार ईरोर, आऊक मुट्टोर साटी आऊन मा बिळली आगोर.
MAR 3:11 अदिक दुष्टआत्मागोळ देल ग्रस्त लॉकुर भी, याग आऊक नोळतोगोर, अरा आऊन मुंद बिळतोगोर, अदिक चिळ्लासकु अनतोगोर कि “नी परमेश्वर उन पार हुय.”
MAR 3:12 यीशु दुष्टआत्मागोळी आदेश कोट्टुन कि अव यारीकु भी ईद हेळतीदील कि आव याव हुन.
MAR 3:13 बाक यीशु पहाळ मा येरेदुन अदिक यारी आव चाहासोन, आंदरी तान हात्‍ती कारदुन. अदिक आंदुर आऊन हात्‍ती बंदुर.
MAR 3:14 आग यीशु आंदुर दा टु हन्नेळ मंळसागोळ्द निवळ माळदुन, यारी आव प्रेरितगोळ हेसुर कोट्टुन. अदिक अंदुन, “कि ना नीमी तान सांगुळ ईटोरसाटी नीवळुसदीन, ‘ना नीमी प्रचार माळली व्हार्या कळाईन,
MAR 3:15 अदिक नीम हात्‍ती दुष्टआत्मागोळी तेगोद अधिकार ईत्‍तीत.’”
MAR 3:16 ई प्रकार देल आव हन्नेळ चेलागोळ्द निवळ माळदुन. शमौन यार्द हेसुर आव पतरस ईटदुन,
MAR 3:17 अदिक जब्दी इन पार याकूब, अदिक याकूब उन वार्ट यूहन्ना, यार्द हेसुर आव बुअनरगिस मतलब “गर्जन उन पार” ईटदुन,
MAR 3:18 अदिक अन्द्रियास, फिलिप्पुस, बरतुल्‍मै, मत्ती, थोमा, हलफई इन पार याकूब, तद्दै अदिक शमौन कनानी जो रोमन सरकार उन खिलाप ईरोन.
MAR 3:19 अदिक यहूदा इस्करियोती, जो यीशु उक ध्वाका देल हुळसुसीदुन.
MAR 3:20 बाक यीशु अदिक आऊन चेलागोळ मान्नी बंदुर; अदिक हिंग भीळ जमा आगेत, कि आंदुर रोट्टी भी तिन सकिदील
MAR 3:21 याग आऊन मान्यागोळोर लॉकुर ईद केळदुर, रा आंदुर आऊक हुडोर साटी होट्टुर, यतिकी आंदुर अनतोगोर, कि आऊन मन ठिकान मा हैलेच.
MAR 3:22 अदिक शास्त्री भी जो यरूशलेम टु बंदीदुर, ईद अनतोगोर, कि “आऊन दा बालज़बूल शैतान समुस्कु आन, अदिक ईद भी, कि आव दुष्टआत्मागोळव सरदार उन मदत देल दुष्टआत्मागोळी तेगुतान.”
MAR 3:23 इदुरसाटी यीशु आंदरी हात्‍ती कारूकु, आंदुर से उदाहरण दा अनली कुरतुन, “शैतान ह्यांग शैतान उक तेगु सकतान?”
MAR 3:24 अदिक अगर यातोदारा राज्य दा फूट बिळुल, रा अद राज्य ह्यांग संची ईर सकतद?
MAR 3:25 अदिक अगर यातोदारा मान्ना दा फूट बिळुल, रा अद मान्ना ह्यांग संची ईर सक्‍कीत?
MAR 3:26 इदुरसाटी अगर शैतान तान अच राज्य अन्द विरोधी आगकु तान दा फूट केडुल, रा आव तान राज्य अक ह्यांग सुरक्षित ईट सकतान? आऊंद रा अन्त अच आगेदीत.
MAR 3:27 लेकीन यावारा मंळसा यातोवारा ताकतवर मंळसा अन्द मान्या होक्‍कु आऊंद माल हिंग अच कदू सकालुन, पयले आव आ ताकतवर मंळसा अक कट्यान; अदिक आग आ मंळसा आ ताकतवर मंळसा अन्द मान्ना अन्द बुळ्क ईड्द सामान इक कदू सकतान.
MAR 3:28 ना नीम से खरा माताळतीन, कि मंळसागोळ्द औलाद ईनव सप्पा पाप अदिक अपमान जो आंदुर माळतार, माफ माळकु आदव.
MAR 3:29 लेकीन जो यावारा पवित्र आत्मा अन्द खिलाप अपमान माळतान, आऊक यागलु माफ माळकु आगतीदील, “यतिकी आव अनन्त पाप इन अपराधी आन.”
MAR 3:30 यीशु आ लॉकुरी इदुरसाटी ईव सब मातगोळ अंदुन “यतिकी लॉकुर अनतोगोर, कि आऊन दा दुष्टआत्मा आद.”
MAR 3:31 अदिक यीशु उन मोय आकतींग अदिक वार्ट बंदुर अदिक व्हार्या नीदुरकु यीशु उक कारूली कळुदुर.
MAR 3:32 अदिक भीळ यीशु उन आसपास कुर्तकु ईरोद, अदिक आंदुर आऊन से अंदुर, “नोळ, नीन मोय नीन वार्ट अदिक आकतींग व्हार्या नीनी कारेत्यार.”
MAR 3:33 यीशु आंदरी उत्‍तर कोट्टुन, कि “नान मोय नान वार्ट अदिक नान आकतींग याक हुळ?”
MAR 3:34 अदिक आव तान आसपास कुर्तकु ईरोर आ लॉकुरी नोळदुन अदिक अंदुन, “नोळी! नान मोय, आकतींग अदिक वार्टुर इंदुरा उर.
MAR 3:35 यतिकी जो यावारा भी परमेश्वर उन इच्छा मा नळदान, आवा नान वार्ट, आकतींग, अदिक मोय हुळ.”
MAR 4:1 यीशु बाक झील इन किनारा मा उपदेश कोळली कुरतुन: अदिक हिंग धोळ्द भीळ आऊन हात्‍ती जमा आगेत कि आव झील इन ऊंद ड्वांगा मा येरकु कुरतोदुन अदिक सप्पा भीळ भूमी मा झील इन किनारा मा नीदुरकु ईत्‍त.
MAR 4:2 अदिक यीशु आंदरी उदाहरणगोळ दा हापाळ सा मात कल्सली कुरतुन, अदिक तान उपदेश दा आंदुर से अंदुन.
MAR 4:3 “केळी! ऊंद घन ऊंद मंळसा ईरोन जो बींजा बोऊसोर साठी होटीदुन.
MAR 4:4 अदिक आव केई दा बींजा भिटुन आटोटी येनारा बींजा हादी मा बिद्दव, अदिक पक्षीगोळ बंदकु अवरी तिन कोंडोव.
MAR 4:5 अदिक येनारा बींजा कल्ल इन जागा मा बिद्दव यल अदरी यक्कुल मुण्ण सकिदील. अदिक गहरा मुण्ण ईला सिकदुर देल अव राटनेरी अंकुर हुळदव.
MAR 4:6 बाक याग सुर्य होळ्त; रा स्याणेव मार्रगोळी होताक बुळ्त; यतिकी जळीगोळ जादा गयरा ईला आगीदव, अदिक मार्रगोळ जल्दी अच वंळ्गेदव.
MAR 4:7 अदिक थ्वाळासा बींजा मुळ्ल इन झुनकुळ दा बिद्दव, अदिक धोड्डेव आगकु बेळुकु बींजा अक वत्‍त बुट्टव अदिक आ बींजागोळी काय हत सकिदील.
MAR 4:8 लेकीन थ्वाळासा बींजा वळ्लीद जागा मा बिद्दव, अदिक अव बेळदव अदिक बेळुकु अनाज पैदा माळदव; यातोवारा तीस गुणा, यातोवारा साठ गुणा अदिक यातोवारा सौ गुणा फसल तंदव.”
MAR 4:9 आग यीशु अंदुन, “यार हात्‍ती केळोर साटी किव आव, आव केळ कोमुल.”
MAR 4:10 याग यीशु आबना ईरोन, रा याता लॉकुर आऊन उदाहरण केळीदुर, आंदुर दा टु येनारा लॉकुर हन्नेळ चेलागोळ सांगुळ आऊन हात्‍ती बंदुर अदिक आऊक उदाहरण इन मतलब येन आद.
MAR 4:11 यीशु आंदुर से अंदुन, नीमी परमेश्वर उन राज्य अन्द भेदगोळ्द समझ कोटकु आग्याद, लेकीन व्हार्या नोर लॉकुर साटी, सप्पा मातगोळ उदाहरणगोळ दा अंदकु आग्याद:
MAR 4:12 यतिकी आंदुर नोळुल अदिक नोळतेला अच ईरूल, लेकीन आंदरी येनु सम्सबाळुल, केळुल अदिक केळतेला अच ईरूल लेकीन येनु सम्सबाळुल. हिंग आगबाळुल कि आंदुर मन परमेश्वर उन दी तिर्गुल अदिक आंदरी माफ माळकु आगुल.
MAR 4:13 बाक यीशु आंदुर से अंदुन, येन नीव ईद उदाहरण समसालीर? रा बाक दुसरा यातोदारा उदाहरणगोळी ह्यांग समसीर?
MAR 4:14 केईवाळा जो बोऊसतान, अद परमेश्वर उन वचन हुन.
MAR 4:15 येनारा लॉकुर हादी माकळोर बिदकु बींजा अन्द घाई आर जो परमेश्वर उन वचनगोळी केळतार. रा शैतान तुरन्त बंदकु वचन रूपी बींजा जो आंदुर्दा बोऊस्कु आग्याद नेगुकु वोयतान.
MAR 4:16 दुसरा लॉकुर बींजागोळ घाई ईरतार जो कलवाळा जागा मा बीळताव. ह्यांग आंदुर बातणी केळतार, आंदुर इदरी खुशी देल ग्रहण माळ कोमतार.
MAR 4:17 लेकीन तान बुळ्क जळ ईला ईटदुर कारण आंदुर थ्वाळासा अच दिनगोळ साटी ईरतार; इदुर्द बाद्दा याग वचन इन कारण आंदुर मा क्लेश या उपद्रव आगताव, रा आंदुर तुरन्त ठोकर तिनतार.
MAR 4:18 दुसरा लॉकुर मुळ्लवाला झुनकुळ दा बोऊस्कु बींजा अन घाई आर. इंदुर वचन केळावाळेर उर.
MAR 4:19 अदिक दुनिया अन चिन्ता, धन इन ध्वाका, अदिक च्याच वस्तुगोळ्द लोभ आंदुर्दा तुमकु वचनगोळी वत्‍त बुळतद. अदिक अद निष्फल ईतोगतार.
MAR 4:20 लेकीन यारारा लॉकुर वळ्लीद जागा अन्द घाई आर, जो वचन केळकु ग्रहण माळतार अदिक वळ्लीद फसल तरतार, यारारा तीस गुणा, यारारा साठ गुणा, अदिक यारारा सौ गुणा.
MAR 4:21 अदिक यीशु आंदुर से अंदुन; येन दिंग्या अक इदुर्दा साटी तरतार कि बर्तन या व्हर्स इन ल्यालमा ईटुल? येन अदरी दीवट मा ईट सकालुर?
MAR 4:22 जो येनारा भी होचकु आद अदरी व्हार्या तनकु आदीत, अदिक जो येनारा भी कवर माळकु आग्याद, अदरी उजागर माळकु आदीत.
MAR 4:23 अगर यारोवारा केळव किव आव, रा आव केळ कोमुल.
MAR 4:24 बाक यीशु आंदुर से अंदुन, “जो नीव केळतीर अदुर मा ध्यान कोळी. याता नाप देल नीव दुसरा अक आळुतीर अदा नियम देल नीमी भी आळुकु आदीत, अदिक नीम साटी अदुर्दा यक्कुल जोळ्सकु आदीत.
MAR 4:25 यतिकी यार हात्‍ती आद, आऊक मात्‍त यक्कुल कोटकु आदीत; अदिक यार हात्‍ती हैलेच, आऊन से अद भी जो आऊन हात्‍ती आद, ताकोमकु आदीत.”
MAR 4:26 बाक यीशु अंदुन, “परमेश्वर उन राज्य हिंग आद, जसा यावारा मंळसा तान केई इन भूमी दा बींजा भिळतान,
MAR 4:27 अदिक आव इळ्लकी मिंगदुन अदिक व्हातर्या येद्दुन अदिक अद बींजा अंकुरीत आगकु हिंग बेळुत, कि आव अरू सकिदील कि ईद ह्यांग आत.
MAR 4:28 पृथ्वी तान ताना अनाज तरतद. पयले अंकुर, बाक लॉम्बा, अदिक आग अदुर बाद्दा लॉम्बा दा तयार बींजा.
MAR 4:29 लेकीन याग बींजा हण्ण आगेगतद, आग आव केईवाळा तुरन्त कुळगुल देल कडुली हततान, यतिकी फसल इन कटाई होट्ट बंदाद.”
MAR 4:30 बाक यीशु केळदुन, “नाव परमेश्वर उन राज्य ह्यांग आद इदुर उपमा यार देल कोट्टेव. अदिक याता उदाहरण देल आऊन वर्णन माळेव?
MAR 4:31 आव राई इन दाना अन्द घाई आन याग पृथ्वी मा बोऊस्कु आगतद रा पृथ्वी इन सप्पा बींजागोळ से स्यांळ्द ईरतद.
MAR 4:32 लेकीन याग बींजा बेळदोगतद, रा बेळुकु सप्पा मारगोळ से धोळ्द आगेगतद, अदिक अदुर्द हिंग धोळ्द डगालगोळ होळताव यल आकाश इन पक्षी अदुर्द सावली दा ग्वादा माळकु ईरताव.”
MAR 4:33 यीशु आंदरी ईत्‍ता प्रकार ईनव हापाळ सा उदाहरण कोट-कोटकु आंदुर्द समझ इन अनुसार यक्कुल से यक्कुल समझ दा बरूल ई प्रकार देल वचन केळ्सतोगोन,
MAR 4:34 अदिक बिना उदाहरण अंदकु यीशु लॉकुरी येनु ईला कल्सतोगोन. लेकीन आबना दा आव तान निजी चेलागोळी सप्पा मातगोळ्द मतलब हेळतोगोन.
MAR 4:35 अदा दिशी द्यावगा अक, यीशु तान चेलागोळ से अंदुन, “बरी, नाव झील इन आप्पाटी होगाता.”
MAR 4:36 आंदुर भीळ इक बिट्टुर, याता ड्वांगा दा यीशु ईरोन अदा ड्वांगा मा चेलागोळ भी बंदुर अदिक यीशु उक तान सांगुळ झील इन आप्पाटी ओतुर; अदिक अल आऊन सांगुळ, मात हापाळ सा ड्वांगा भी ईरव.
MAR 4:37 अचानक आग ऊंद भयानक आँधी बत्‍त, अदिक लयरगोळ ड्वांगा देल टकरूसली हत्‍त ईल ताका कि नीर ड्वांगा दा तुमली हत्‍त.
MAR 4:38 अदिक यीशु ड्वांगा अन्द हिंदळोद भाग दा ऊसी मा ताल्ला ईटकु मिंगोन. अदिक आंदुर आऊक येब्सदुर अदिक अंदुर, “हे गुरु, येन नीनी चिन्ता हैलेच कि नाव मुळ्केतेव?”
MAR 4:39 आग यीशु यदकु आँधी अक दनकुसदुन, अदिक लयरगोळ से अंदुन, “शांत आगेग, थाम्सेग!” अदिक आँधी थामसेत अदिक नाकु दी हापाळ सन्नाटा आगेत.
MAR 4:40 अदिक यीशु तान चेलागोळ से अंदुन, “नीव येती अंजेतीर? येन नीमी ईगासताका विश्वास हैलेच?”
MAR 4:41 अदिक चेलागोळ हापाळ अंजेदुर अदिक आपस दा अनली कुरतुर, “ईव मंळसा याव हुन ईल ताका कि आँधी अदिक लयरगोळ भी ईऊन आग्या मान्सताव?”
MAR 5:1 यीशु अदिक आऊन चेलागोळ झील इन आप्पाटी गिरासेनियागोळ्द प्रदेश दा पोहचुसदुर.
MAR 5:2 याग यीशु ड्वांगा मा टु ईळदुन रा तुरन्त ऊंद मंळसा जो कि यारदा दुष्टआत्मा हतकु ईरोद, कब्रस्तान दा टु होटकु यीशु से मिलुसदुन.
MAR 5:3 आव कब्रस्तान दा ईरतोगोन अदिक याऊ आऊक शंकलीगोळ देल भी कटकु ईला ईट सकोन,
MAR 5:4 यतिकी आऊक बेळीगोळ अदिक शंकलीगोळ देल कटकु आगीत, लेकीन आव हापाळ अनली शंकलीगोळी मुर्द बुटीदुन अदिक बेळीगोळ्द तुकळा-तुकळा माळ कोंडीदुन, अदिक यारू आऊक बस दा ईला माळसकोर.
MAR 5:5 आव लगातार ईळ्लक-हागुल कब्रस्तान अदिक पहाळीगोळ दा वयाळोन अदिक कीटुरतोगोन, अदिक तान तान इक कलगोळ देल घायल माळतोगोन.
MAR 5:6 आव यीशु उक दुर टु उच नोळदुन, अदिक आव ओळतेला यीशु उन हात्‍ती बंदुन अदिक ट्वांगरा अन्द भार देल बिदकु प्रणाम माळदुन.
MAR 5:7 अदिक आव धोळ आवाज देल चिळ्लासकु अंदुन, “हे यीशु, महान परमेश्वर उन पारा, नानी नीन से येन क्याल्सा? ना नीनी परमेश्वर उन किर्‍या कोळतीन, कि नी नानी दुख कोळबाळ.”
MAR 5:8 आव यीशु से इदुरसाटी हिंग अंदुन यतिकी यीशु आऊन से अंदिदुन, “हे दुष्टआत्मा, ई मंळसा अन्द मय दा टु होटबुळ!”
MAR 5:9 यीशु आ दुष्टआत्मा से केळदुन, “नीन येन हेसुर आद?” अद यीशु से अन्त, “नान हेसुर सेना आद; यतिकी नाव हापाळ सा आयेव.”
MAR 5:10 अदिक दुष्टआत्मा यीशु से च्याच विनती माळकु अन्त, कि नामी ई प्रदेश टु व्हार्या कळुबाळ.
MAR 5:11 हात्‍तीगोळ्द पहाळ इन ढलान मा हंदीगोळ्द ऊंद धोळ्द झुण्ड आळोद.
MAR 5:12 दुष्टआत्मागोळ यीशु से विनती माळकु अंदव, “नामी आ हंदीगोळ्द झुण्ड दा कळुबुळ कि नाव आंदुर बुळ्क होक्‍केव.”
MAR 5:13 इदुरसाटी यीशु आंदरी आग्या कोटुन अदिक दुष्टआत्मा आ मंळसा दा टु होटकु हंदीगोळ्द बुळ्क होकदव अदिक झुण्ड, जो लगभग येढ्ढ हजार इन ईरोद, ढलान मा टु घसरूस्कु झील दा होगकु बित्‍त. अदिक अल्या मुळ्ककु सोत्‍तव.
MAR 5:14 हंदीगोळी आळसावाळेर ओळकु नगर अदिक ऊरगोळ दा ईद खबर केळ्सदुर, अदिक जो आगीत, लॉकुर अदरी नोळली बंदुर.
MAR 5:15 यीशु उन हात्‍ती लॉकुर बंदकु, आ मंळसा अक नोळदुर यारदा दुष्टआत्मागोळ ईरव, मतलब सेना समुस्कु ईरोद, कपळा हाक्‍कु अदिक गुमसुम कुर्त नोळकु अंजेदुर.
MAR 5:16 या लॉकुर ईद घटना अक पयले नोळीदुर रा हेळदुर कि नोळावाळेर आऊन, यारदा दुष्टआत्मागोळ ईरव, अदिक हंदीगोळ्द पुरा हाल आंदरी अंदकु हेळदुर.
MAR 5:17 आग लॉकुर यीशु से विनती माळकु अनली कुरतुर कि नाम प्रदेश दा टु होटोग.
MAR 5:18 अदिक याग यीशु ड्वांगा मा येरली कुरतुन रा आव यारदा पयले दुष्टआत्मागोळ ईरव, यीशु से विनती माळली कुरतुन, “नानी तान सांगुळ ईरगोळ.”
MAR 5:19 लेकीन यीशु आऊक आग्या कोटीदील, अदिक आऊन से अंदुन, “तान मान्या होगकु तान परिवार इक हेळ कि नीन मा दया माळकु प्रभु नीन साटी ह्यांग धोड्डेव क्याल्सा माळ्यान.”
MAR 5:20 बाक आव होगकु दिकापुलिस दा ई मातगोळी हेळली कुरतुन कि यीशु नान साठी ह्यांग धोड्डेव क्याल्सा माळ्यान; अदिक सप्पा लॉकुर ईद केळकु चकित आदुर.
MAR 5:21 याग यीशु बाक ड्वांगा देल झील इन आप्पाटी होदुन, रा ऊंद धोळ्द भीळ आऊन हात्‍ती बंदकु जमा आगेत. आव झील इन किनारा मा का ईरोन.
MAR 5:22 याईर हेसुर ईनव ऊंद यहूदी मंळसा, जो यहूदी लॉकुर्द सभागृह अन्द सरदारगोळ दा टु ऊंद सरदार बंदुन, अदिक यीशु उक नोळकु आऊन कालगोळ मा बिदोदुन,
MAR 5:23 अदिक ईद अंदकु यीशु से हापाळ विनती माळदुन, “नान स्याण पोर सायापरी आगेग्यार: नी बंदकु आकिन मा कय ईट कि आक वळ्लीद आगकु जित्‍ता ईरूल.”
MAR 5:24 आग यीशु आऊन सांगुळ नळदुन अदिक ऊंद धोळ्द भीळ आऊन हिंद आगेत, ईल ताका कि लॉकुर आऊन मा बिळली आगोर.
MAR 5:25 अल्या ऊंद आर्त ईरोर, आक इक हन्नेळ वर्ष टु खुन होगोद रोग ईरोद.
MAR 5:26 आ आर्त हापाळ परेशान ईरोर आक हापाळ वैद्यगोळ से तान ईलाज माळीदुर तरी भी यक्कुल दुखी आगेगीदुर. अदिक तान सप्पा धन लुट्सदुर बाद्दा भी आकी येनु आराम सिकिदील, लेकीन मात यक्कुल रोगी आगेगीदुर.
MAR 5:27 आक यीशु उन बारा दा चर्चा केळीदुर, अनकु “भीळ दा हिंदु टु बंदकु आऊन कपळा अन्द किनारा अक मुटदुर.”
MAR 5:28 यतिकी आक मन मन दा अच अनतोगोर, “अगर ना आऊन कपळा अक मुटाईन, रा वळ्लीद आगेगाईन.”
MAR 5:29 आग आक यीशु उन कपळा अक मुटदुर अदिक तुरन्त आकिन खुन होगोद बंद आगेत, अदिक आ आर्त तान शरीर दा ईद जान्स कोंडुर कि ना तान आ बिमारी देल वळ्लेर आगेदीन.
MAR 5:30 यीशु तुरन्त तान मन दा जान्स कोंडुन कि नान दा टु ईद सामर्थ्य होटाद. अदिक आव भीळ दा हिंद तिर्गकु केळदुन, “नान कपळा अक यार मुटदुर?”
MAR 5:31 आग आऊन चेलागोळ आऊक अंदुर, नी नोळत्या कि भीळ नीन मा बिळली इक आगतद, अदिक नी अनत्या कि यार नानी मुटदुर?
MAR 5:32 लेकीन यीशु आक इक नोळोर साठी नाकु दी कण्ण नेगुकु नोळदुन, कि यार नानी मुटदुर.
MAR 5:33 आग आ आर्त जो आकिन सांगुळ आगीत आक ईद जान्सकु कि नान ह्यांग भलाई आग्याद, अंज्त अदिक नळ्गतेला बंदुर, अदिक आऊन कालगोळ मुंद ट्वांगरा टेक्सकु आऊक सब हाल खरा-खरा हेळ बुटुर.
MAR 5:34 यीशु आकिन से अंदुन, “हे पोरी, नीन विश्वास नीनी वळ्लीद माळ्याद: खुशी देल होग, अदिक तान ईद बिमारी देल ऊळ्दकु ईर.”
MAR 5:35 यीशु ईद अनतेला अच ईरोन कि यहूदी लॉकुर्द सभागृह अन्द सरदार उन मान्या टु थ्वाळासा लॉकुर बंदकु अंदुर, “नीन पोर रा सोतोग्यार, ईग गुरु उक येतरी दुख कोळत्या?”
MAR 5:36 लेकीन जो मात आंदुर अनोर, अदरी यीशु केळदुन पर ध्यान कोटीदील, यहूदी लॉकुर्द सभागृह अन्द सरदार से अंदुन, “अंजबाळ, सिर्फ विश्वास ईट.”
MAR 5:37 अदिक यीशु पतरस अदिक याकूब अदिक आऊन वार्ट यूहन्ना अक बिटकु, दुसरा यारीकु तान सांगुळ बर गोटीदील.
MAR 5:38 याग आंदुर सप्पा मुंदुर यहूदी लॉकुर्द सभागृह अन्द सरदार उन मान्या बंदुर, रा यीशु नोळदुन कि अल खलबली मचुसकु आद. अदिक लॉकुरी हापाळ वर्लतेला अदिक चिल्ळासतेला नोळदुन.
MAR 5:39 आग यीशु मान्या अन्द बुळ्क होक्‍कु आंदुर से अंदुन, “नीव येतरी खलबली मचुसतीर अदिक वर्लेतीर? पोर सायलिका आर, लेकीन मिंगेत्यार.”
MAR 5:40 आंदुर यीशु उन मज्याक हार्सली कुरतुर, लेकीन आव सप्पा मुंदरी तेगुकु पोर इन मोय-आप्प अदिक तान मुर चेलागोळ सांगुळ बुळ्क यल पोर बिदकु ईरोर, अल होदुर.
MAR 5:41 अदिक आव पोर इन कय हुळकु आकिन से अंदुन, “तलीता कुमी!” यदुर्द मतलब आद, “हे पोरी, ना नीन से अनतीन, येळ.”
MAR 5:42 अदिक आ स्याण पोर तुरन्त यदकु नळुली अदिक वयाळली कुरतुर; यतिकी आक हन्नेळ वर्ष इनोर ईरोर. इदुर मा लॉकुर हापाळ सट्ट आगेदुर.
MAR 5:43 बाक यीशु आंदरी चेतावनी कोटकु आग्या कोटुन कि ईद मात यारू जान्स ईला पायजे, अदिक आव अंदुन “पोर इक येनारा तिनली कोळी.”
MAR 6:1 अल टु होटकु यीशु तान प्रदेश दा बंदुन; अदिक आऊन चेलागोळ भी आऊन हिंद बंदुर.
MAR 6:2 आराम इन दिशी आव यहूदी लॉकुर्द सभागृह दा उपदेश कोळली होदुन, अल हापाळ सा लॉकुर ईरोर, याग लॉकुर आऊन मातगोळ केळदुर, रा आंदुर सट्ट आगेदुर अदिक अनली कुरतुर, “ईऊक ईव मातगोळ यल टु होटबंदव? अदिक ईद याता ग्यान हुन जो ईऊक कोटकु आग्याद? आव चमत्कार ह्यांग माळतान?
MAR 6:3 येन ईव व्हर्स हुळ्ली माळावाळा अन पार आलच, जो मरियम उन पार, अदिक याकूब, योसेस, यहूदा, अदिक शमौन उन वार्ट हुन? येन आऊन आकतींगेर ईल नाम न्याड्या दा ईरालुर?” इदुरसाटी लॉकुर आऊंद इनकार माळ बुटुर.
MAR 6:4 यीशु आंदुर से अंदुन, “भविष्यवक्ता अन्द तान नगर, तान परिवार, अदिक तान मान्या मान सम्मान आगाल लेकीन दुसरा लॉकुर आंदुर्द मान सम्मान माळतार.”
MAR 6:5 अदिक यीशु अल येनु सामर्थ्य इन क्याल्सा माळीदील, सिर्फ थ्वाळासा बिमार लॉकुर मा कय ईटकु आंदरी चंगा माळदुन.
MAR 6:6 अदिक यीशु उक आंदुर्द अविश्वास मा हापाळ आश्चर्य आत, अदिक आव नाकु दाकळव ऊरगोळ दा उपदेश कोळतेला वयाळदुन.
MAR 6:7 यीशु तान हन्नेळ चेलागोळी तान हात्‍ती कारदुन अदिक आंदरी दुष्टआत्मागोळी तेगोद अधिकार कोट्टुन. अदिक येढ्ढ-येढ्ढ माळकु नगर दा कळुदुन
MAR 6:8 अदिक आंदरी आग्या कोट्टुन, “हादी इन साठी कोल इक बिटकु अदिक येनु हुडुबाळी; ना रा रोट्टी, ना झ्वारा, अदिक ना नीम खिसा दा पैस्या,
MAR 6:9 लेकीन केरू हाकी अदिक यातोदारा दुसरा कुळता ओयबाळी.”
MAR 6:10 अदिक यीशु चेलागोळ से अंदुन, “येल्यारा नीम्द यारदारा मान्या स्वागत आत, रा यागासताका अल टु सार आगालीर आगासताका अदा मान्या दा रूक्सकु ईरी.
MAR 6:11 अगर नीव ऊंद ईत्‍ता नगर दा होगतीर येल लॉकुर नीम्द स्वागत माळालुर या नीम मातगोळी केळालुर, रा अदरी बिट बुळी अदिक तान कालगोळ्द धुळा झाळ्स कोमी. ईद आंदुर साटी ऊंद चेतावनी आदीन.”
MAR 6:12 आग आंदुर अल टु होटोदुर. अदिक आंदुर होगकु प्रचार माळदुर, तान पापगोळी बिळी अदिक परमेश्वर उन दी तिर्गी.
MAR 6:13 आंदुर हापाळ सा दुष्टआत्मागोळी तेगदुर, अदिक हापाळ सा बिमार मंळसागोळ मा जैतून इन याण्णा अन्द मालिस माळकु आंदरी चंगा माळदुर.
MAR 6:14 हेरोदेस राजा भी यीशु उन चर्चा केळदुन, यतिकी आऊन हेसुर हापाळ फैलुसेगित, अदिक येनारा लॉकुर अंदुर, “यूहन्ना बपतिस्मा कोळावाळा सोत्‍तुर दा टु जित्‍ता आग्यान, इदुरसाटी आऊन से इव सामर्थ्य ईनव क्याल्सा प्रगट आगताव.”
MAR 6:15 दुसरा लॉकुर अंदुर, “इव एलिय्याह हुन.” लेकीन यारारा दुसरा लॉकुर अंदुर, “इव भविष्यवक्ता हुन, हाळोद जमाना अन भविष्यवक्तागोळ घाई ऊंद.”
MAR 6:16 ईद केळकु हेरोदेस राजा अंदुन, “आव बपतिस्मा कोळावाळा यूहन्ना हुन. यार्द ताल्ला ना कळसुसीदीन, आवा सोत्‍तुर दा टु जित्‍ता आग्यान!”
MAR 6:17 हेरोदेस राजा तान सिपाईगोळी कळुकु यूहन्ना अक हुळसुसदुन अदिक संकलीगोळ देल कटकु जयल दा हाक बुटीदुन. ईद हेरोदियास इन कारण हेरोदेस हिंग माळदुन, यतिकी हेरोदेस तान वार्ट फिलिप्पुस उन हिंग्स हेरोदियास इन सांगुळ मदा माळ कोंडीदुन.
MAR 6:18 बपतिस्मा कोळावाळा यूहन्ना घळी घळी हेरोदेस राजा से अनतेला ईत्‍तुन, “नीन साटी तान वार्ट उन हिंग्स उन से मदा माळोद उचित हैलेच.”
MAR 6:19 इदुरसाटी हेरोदियास बपतिस्मा कोळावाळा यूहन्ना से दुश्मनी ईटतोगोर अदिक ईद चाहासोर कि आऊक ह्यांगारा भी कोन्सुस बुळाईन; लेकीन हेरोदेस राजा अन्द कारण देल हिंग माळ सकिदील.
MAR 6:20 हेरोदेस यूहन्ना से अंजतोगोन. यतिकी हेरोदेस जान्सतोगोन कि बपतिस्मा कोळावाळा यूहन्ना ऊंद न्यायी अदिक पवित्र मंळसा आन, इदुरसाटी हेरोदेस आऊक ऊळस्कु ईटतोगोन, अदिक यागल्यारा भी आव यूहन्ना अन्द मातगोळ केळतोगोन रा हापाळ अंजेगतोगोन, लेकीन खुशी देल आऊन मातगोळ भी केळतोगोन.
MAR 6:21 आखरी दा हेरोदियास इक हेरोदेस उन जनम दिन मा वळ्लीद मौका सिक्त. अदिक आंदुर प्रधानगोळी, सेनापतीगोळी, अदिक गलील इन धोळ धोळ लॉकुरी ऊमली कार्सदुर.
MAR 6:22 रा हेरोदियास इन पोर बुळ्क बंदुर, अदिक कुणुकु हेरोदेस उक अदिक आऊन सांगुळ जो कुर्तकु पावनागोळ ईरोर आंदरी खुश माळदुर. रा राजा आ पोर इन से अंदुन, “नी जो चाहास्या अद नान से बेळ, ना नीनी कोळाईन.”
MAR 6:23 अदिक आव किर्‍या तिनकु आकी वचन कोट्टुन, कि नी जो भी नान से बेळ्या अद ना नीनी कोळाईन, ईल ताका कि नांद आरधा राज्य भी.
MAR 6:24 आग आ पोर व्हार्या होगकु तान मोय इन से केळदुर, “ना येन बेळाईन?” रा आक इन मोय हेरोदियास माताळदुर, “यूहन्ना बपतिस्मा कोळावाळा अन्द ताल्ला.”
MAR 6:25 आक तुरन्त राजा हेरोदेस उन हात्‍ती बुळ्क बंदुर अदिक आऊन से विनती माळदुर, “ना चाहासतीन, कि नी ईगल्या बपतिस्मा कोळावाळा यूहन्ना अन्द ताल्ला ऊंद टाटी दा नानी कारस्कु कोळ.”
MAR 6:26 इदुर देल हेरोदेस राजा हापाळ उदास आदुन, लेकीन आव तान सप्पा पाऊनागोळ्द मुंद वादा माळीदुन अदिक किर्‍या तिंदीदुन. ई कारण देल आकी मना माळ सकिदील.
MAR 6:27 इदुरसाटी राजा तुरन्त ऊंद सिपाही इक आग्या कोटकु कळुदुन कि बपतिस्मा कोळावाळा यूहन्ना अन ताल्ला कळकु तंदान, आग जल्लाद जेलखाना दा होगकु आऊन ताल्ला कळदुन.
MAR 6:28 अदिक ऊंद टाटी दा ईटकु तंदुन अदिक आ पोर इक कोट्टुन, अदिक पोर तान मोय इक कोट्टुर.
MAR 6:29 ईद केळकु यूहन्ना नोर चेला बंदुर, अदिक आऊन लाश इक ओतुर अदिक कब्र दा ईटदुर.
MAR 6:30 आग प्रेरितगोळ वापस बंदुर अदिक यीशु से सिकदुर, अदिक जो भी आंदुर माळीदुर अदिक कलसीदुर, सब यीशु अक हेळदुर.
MAR 6:31 यीशु आंदुर से अंदुन, “नळी अदिक अलग येल्यारा सुनसान जागा दा नळुकु आराम माळी.” यतिकी अल हापाळ लॉकुर होगोद-बरोद माळतोगोर, अदिक आंदरी ऊमोद मवका भी ईला सिकतोगोद.
MAR 6:32 इदुरसाटी आंदुर ड्वांगा मा येरकु, सुनसान जागा दा अलग होटोदुर.
MAR 6:33 हापाळ मुंदुर आंदरी होग्त नोळदुर अदिक ऊंद घन दा अर्त कोंडुर कि आंदुर यार उर; अदिक सप्पा लॉकुर नगरगोळ दा टु जमा आगकु अल पैदल हरदुर अदिक यीशु अदिक आऊन चेलागोळ से पयले होगकु पोहचुसदुर.
MAR 6:34 याग यीशु ड्वांगा दा टु व्हार्या होट्टुन रा ऊंद धोळ्द भीळ नोळदुन, अदिक आऊक आंदुर मा दया होट्ट बत्‍त, यतिकी आंदुर आ म्यांडागोळ घाई ईरोर, यार्द यारू रखवाला ईरालुर; इदुरसाटी यीशु आंदरी हापाळ सा मातगोळी कल्सली कुरतुन.
MAR 6:35 याग द्याव हापाळ मुळकेत, रा आऊन चेलागोळ आऊन हात्‍ती बंदकु अनली कुरतुर, “ईद सुनसान जागा आद, अदिक द्याव हापाळ मुळ्केग्याद.
MAR 6:36 लॉकुरी सार माळ कि नाकु दाकळव ऊरगोळ अदिक मोहल्ला दा होगकु, ताम साटी येनारा तिनली कोंड कोमुल.”
MAR 6:37 लेकीन यीशु आंदरी उत्‍तर कोट्टुन, “नीवा आंदरी येनारा तिनली कोळी.” चेलागोळ यीशु से अंदुर, “नाव येढ्ढ सौ दीनार इन रोट्टीगोळी कोंडेव, अदिक आंदरी तिनसेव?”
MAR 6:38 इदुरसाटी यीशु आंदुर से अंदुन, “होगकु नोळी नीम हात्‍ती यास रोट्टीगोळ आव?” आंदुर मालूम माळकु अंदुर, “अईद रोट्टीगोळ अदिक येढ्ढ मेन.”
MAR 6:39 आग यीशु तान चेलागोळी आग्या कोटुन, कि सब मुंदरी हसीद काड्डा मा पंगत पंगत दा कुर्स बुळी.
MAR 6:40 आग आंदुर सौ सौ अदिक पचास पचास माळकु पंगत पंगत दा कुरतोदुर.
MAR 6:41 आव आ अईद रोट्टीगोळी अदिक येढ्ढ मेनगोळी हुळदुन, अदिक स्वर्ग दी नोळकु परमेश्वर उक धन्यवाद माळदुन, अदिक रोट्टीगोळ मुरू-मुरूकु चेलागोळी कोळतोदुन कि आंदुर लॉकुरी वाळसुल, अदिक अव येढ्ढ मेनगोळ भी आ सब मुंदुर दा वाळ्स बुट्टुन.
MAR 6:42 अदिक सब मुंदुर तिनकु संतुष्ट आगेदुर.
MAR 6:43 अदिक चेलागोळ मिक्‍कु रोट्टीगोळ अदिक मेनगोळ्द तुकळा देल हन्नेळ फुट्टीगोळ तुमकु नेगदुर.
MAR 6:44 यार रोट्टीगोळी तिंदुर, आंदुर्दा सिर्फ मंळसागोळ्द संख्या अईद हजार ईरोद.
MAR 6:45 आग यीशु तुरन्त तान चेलागोळी ड्वांगा मा कुरोर साटी मजबुर माळदुन कि आंदुर आऊन से पयले झील इन आप्पाटी बैतसैदा नगर इक होटोगुल, कि आव आगासताका लॉकुरी सार माळ्यान.
MAR 6:46 लॉकुरी सार माळकु यीशु पहाळी मा प्रार्थना माळली होटोदुन.
MAR 6:47 याग द्याव मुळकेत, रा आग ड्वांगा झील इन न्याड्या दा ईरोद, अदिक यीशु आबना क्यार्रा अन्द भूमी इन किनारा मा ईरोन.
MAR 6:48 याग यीशु नोळदुन कि आंदुर ड्वांगा नळ्स नळ्सकु घबरूसेग्यार, यतिकी आँधी ड्वांगा अन्द ऊलट ईरोद, रा ईळ्लक इन मुर अदिक आर पहर इन हात्‍ती आव झील मा नळुतेला आंदुर हात्‍ती बंदुन; अदिक आंदुर से मुंद होटबुळोद चाहासोन.
MAR 6:49 लेकीन आंदुर आऊक झील मा नळुतेला नोळकु रा सम्सदुर कि ईद ऊंद भूत हुन, अदिक चिल्ळास कुरतुर;
MAR 6:50 यतिकी सप्पा मुंदुर आऊक नोळकु अंजेगीदुर. लेकीन यीशु तुरन्त आंदुर से मात हेळदुन अदिक अंदुन, “हिम्मत ईटी: ना हुईन; अंजबाळी!”
MAR 6:51 आग आव आंदुर हात्‍ती ड्वांगा मा बंदुन, अदिक हवा रूकसेत: अदिक आंदुर हापाळ अच आश्चर्य माळली कुरतुर.
MAR 6:52 आ चेलागोळ अईद हजार लॉकुरी रोट्टीगोळ तिनसोद मात सम्स ईला सकीदुर, यतिकी आंदुर अव मन कट्टर आगेगीदव.
MAR 6:53 यीशु अदिक आऊन चेलागोळ आप्पाटी ईळुकु गन्नेसरत इन भूमी मा पोहचुसदुर, अदिक ड्वांगा घाट इन किनारा मा हचदुर.
MAR 6:54 याग आंदुर ड्वांगा मा टु ईळदुर, रा लॉकुर तुरन्त यीशु उक अर्त कोंडुर.
MAR 6:55 आसपास इन पुरा प्रदेश दा हरदुर, अदिक बिमारगोळी व्हर्स मा मिंग्सकु, येल येल समाचार केळदुर कि आव हुन, अल अल हरूतेला वयाळदुर.
MAR 6:56 अदिक येल्यारा यीशु ऊरगोळ, नगरगोळ या मोहल्ला दा होगतोगोन, रा लॉकुर बिमारगोळी सात्‍तागोळ दा ईटकु आऊन से विनती माळतोगोर, कि आव आंदरी तान कपळा अन्द पल्लाक अच मुट गोळुल: अदिक यास आऊक मुटतोगोर, आंदुर सब चंगा आगेगोर.
MAR 7:1 आग फरीसी अदिक थ्वाळासा शास्त्री जो यरूशलेम टु बंदीदुर, यीशु उन आसपास जमा आदुर,
MAR 7:2 आंदुर नोळदुर कि फरीसीगोळ्द शिक्षा अन्द अनुसार अशुध्द मतलब बिना कय तोळ्द आऊन चेलागोळ रोट्टीगोळ तिनेत्यार.
MAR 7:3 यतिकी फरीसी अदिक सप्पा यहूदी, तान पुर्वजगोळ्द परंपरा मा नळुतार, अदिक आंदुर आगासताका ऊमालुर यागासताका वळ्लीसा कय तोळ्द कोमालुर.
MAR 7:4 सात्‍ता टु तर्त यातोदु चिज इक बिना तोळ्द तिनालुर, अदिक हिंग हापाळ सा दुसरा मातगोळ आव, जो पुर्वजगोळ्द शिक्षा अन्द अनुसार आंदुर हात्‍ती मानसोर साठी पोहचुस्कु आग्याद, जसा कटोरा, अदिक गळु, व्हर्स अदिक तांबा नव बरतनगोळी तोळोद.
MAR 7:5 इदुरसाटी आ फरीसी अदिक नियम इन शास्त्रीगोळ आऊन से केळदुर, “नीनोर चेलागोळ येती पुर्वजगोळ्द परंपरा अन्द पालन माळालुर, अदिक बिना कय तोळ्द रोट्टी तिनतार?”
MAR 7:6 यीशु आंदुर से अंदुन, यशायाह नीम कपटीगोळ्द बारा दा खरा अच भविष्यवाणी माळीदुन; ह्यांग लिख्सकु आद; ई लॉकुर टुटगोळ देल रा नान आदर माळतार, लेकीन इंदुर मन नान से दुर ईरतद.
MAR 7:7 इंदुर बेकार अच नान उपासना माळतार, यतिकी इंदुर खुद इन नियमगोळी परमेश्वर उन नियम माळकु कल्सतार.
MAR 7:8 यतिकी नीव परमेश्वर उन आग्या अक टाल्सकु मंळसागोळ्द रीतीगोळी मान्सतीर.
MAR 7:9 यीशु आंदुर से अंदुन, नीव परमेश्वर उन आग्या अक टाल्सदुर दा बळा चतुर आगेगीर, कि तान परंपरागोळ्द स्थापना माळ सक्‍कीर.
MAR 7:10 यतिकी मूसा अंदान, तान आप्प अदिक तान मोय इन आदर माळी अदिक जो यावारा भी तान आप्प या मोय इक बुरा भला अनुल, रा आऊक जरूर कोंद बुळी.
MAR 7:11 लेकीन नीव अनतीर कि अगर यावारा तान आप्प या मोय से अनुल, जो येनारा नीनी नान से लाभ आग सकोद, अद ना पयले टु उच परमेश्वर उक अर्पित माळ बुटीन.
MAR 7:12 रा नीमी आऊन आप्प या आऊन मोय इन स्यावा ईला माळोद बहाना सिक्‍केगतद.
MAR 7:13 ई प्रकार देल नीव लॉकुर तान परंपरागोळ देल, नियम ठहरूस्तीर, अदिक परमेश्वर उन वचन टाल्स बुळतीर; अदिक हिंग हापाळ सा मातगोळ माळतीर.
MAR 7:14 आग यीशु लॉकुरी तान हात्‍ती कारूकु आंदुर से अंदुन, “नीव सब नान मातगोळ केळी, अदिक समसी.
MAR 7:15 हिंग रा यातोद भी वस्तु ईलच जो मंळसा दा व्हार्या टु बुळ्क बंदकु आऊक अशुध्द माळीत लेकीन जो वस्तुगोळ मंळसा अन्द बुळ्क टु व्हार्या होळताव अव अच रा मंळसा अक अशुध्द माळताव.
MAR 7:16 अगर यारोवारा केळव किव आव रा केळ कोमुल.”
MAR 7:17 याग यीशु भीळ इन हात्‍ती टु मान्या होदुन, रा आऊन चेलागोळ ईद उदाहरण इन बारा दा आऊन से केळकु समझुसली हेळदुर.
MAR 7:18 यीशु आंदुर से अंदुन, येन नीव भी हिंग नासमज आईर? येन नीव समसालीर कि जो वस्तु व्हार्या टु मंळसा अन्द बुळ्क होगतद, अद आऊक अशुध्द माळ सकाल?
MAR 7:19 यतिकी अद आऊन मन दा ईला, लेकीन आऊन व्हाट्टा दा होगतद अदिक थाळ्लकु दा टु व्हार्या होट्ट बुळतद! ईद अनकु आव सप्पा भोजन वस्तुगोळी शुद्ध ठहरूसदुन.
MAR 7:20 बाक यीशु अंदुन, “जो मंळसा अन मन दा टु होळतद, अदा मंळसा अक अशुध्द माळतद.
MAR 7:21 यतिकी बुळ्क टु, मतलब कि मंळसा अन मन दा टु, बेकार-बेकार विचार, व्यभिचार, दुष्टता, काळ्लपनी, कोन्नोद, परस्त्रीगमन,
MAR 7:22 लोभ, छल-कपट, लुचपन, बुरानजर, ईर्ष्या, अपमान, अभिमान, अहंकार अदिक मूर्खता होळतद.
MAR 7:23 ई सप्पा बुरा मातगोळ मन इन बुळ्क टु होळताव अदिक मंळसा अक अशुध्द माळताव.”
MAR 7:24 बाक यीशु अल टु यदकु सूर इन आसपास इन प्रदेश दा बंदुन; अदिक ऊंद मान्या होदुन अदिक आव ईला चाहासोन कि यारीकु पता नळुल; कि आव अल आन लेकीन तरी भी आव होचकोम सकिदील.
MAR 7:25 अदिक तुरन्त ऊंद आर्त यार्द स्यांळ्द पोर इन दा दुष्टआत्मा ईरोद, आऊन बारा दा केळकु, अदा घनी आऊन हात्‍ती बंदुर अदिक आऊन कालगोळ मा बिदोदुर.
MAR 7:26 ई आर्त गैरयहूदी ईरोर अदिक सीरिया अन्द फिनीकी दा पैदा आगीदुर. आक यीशु से विनती माळदुर कि नान पोर इन दा टु दुष्टआत्मा तेगुकोळ.
MAR 7:27 यीशु आकिन से अंदुन, “पयले पारगोळी संतुष्ट आगगोळ, यतिकी पारगोळ्द रोट्टी हुळकु नायगोळ्द मुंद हाक्‍कोद उचित हैलेच.”
MAR 7:28 लेकीन आ आर्त यीशु उक उत्‍तर कोट्टुर, “खरा आद प्रभु; तरी भी नायगोळ भी रा मेज इन ल्यालमा चिकोर्द रोट्टी इन चुराचारा तिन कोमताव.”
MAR 7:29 इदुरसाटी यीशु आ आर्त इन से अंदुन, “ई उत्‍तर इन कारण देल होटोग; दुष्टआत्मा नीन पोर इन मय दा टु होटबुटाद.”
MAR 7:30 अदिक आक तान मान्नी बंदकु नोळदुर कि पोर व्हर्स मा मिंगकु आर, अदिक दुष्टआत्मा आकिन मय दा टु होटबुटाद.
MAR 7:31 बाक यीशु सूर हेसुर इन प्रदेश टु होटकु सैदा टु आगतेला गलील इन क्यार्रा मा बंदकु आव दिकापुलिस ताका बंदुन.
MAR 7:32 रा लॉकुर ऊंद बयरा अक जो तोतळा भी ईरोन, यीशु उन हात्‍ती तंदकु आंदुर आऊन से विनती माळदुर कि तान कय आऊन मा ईटुल.
MAR 7:33 आग यीशु आऊक भीळ टु अलग आबना दा ओतुन, अदिक तान बेळ्लगोळी आऊन किव दा हाकदुन, अदिक ऊगुळकु आऊन ल्यालग्या अक मुटदुन;
MAR 7:34 अदिक स्वर्ग इन दी नोळकु लंबा सास ताकोंडुन, अदिक आऊन से अंदुन, “इप्फत्‍तह!” मतलब “तेरदोग!”
MAR 7:35 अदिक आऊन अव किव तेरदोदव, अदिक आऊन ल्यालग्या अन्द गाठ भी तेरदोत, अदिक आव साफ साफ माताळली कुरतुन.
MAR 7:36 आग यीशु आंदरी चेतावनी कोट्टुन कि यारीकु हेळबाळी; लेकीन याट आव आंदरी चेतावनी कोटीदुन आट अच आंदुर मात प्रचार माळली कुरतुर.
MAR 7:37 आंदुर हापाळ अच आश्चर्य चकित आगकु अनली कुरतुर, “यीशु याट वळ्लीद तरीका देल ई सब येनारा माळतान; आव बयरागोळी भी केळोद, अदिक मुक्‍कागोळी माताळोद शक्ति कोळतान.”
MAR 8:1 आ दिनगोळ दा याग धोळ्द भीळ जमा आत, अदिक आंदुर हात्‍ती तिनली येनु ईला ईरोद, रा यीशु तान चेलागोळी हात्‍ती कारूकु आंदुर से अंदुन,
MAR 8:2 “नानी ई भीळ मा हापाळ दया बरेत्याद यतिकी इंदुर मुर दिन टु बराबर नान सांगुळ आर, अदिक इंदुर हात्‍ती तिनली येनु हैलेच!
MAR 8:3 अगर ना आंदरी उपासी मान्या कळाईन, रा हादी मा थक्सकु बिदोदार; यतिकी आंदुर दा टु यार यारारा हापाळ दुर टु बंदार.”
MAR 8:4 यीशु उन चेलागोळ आऊक उत्‍तर कोट्टुर, “ईल आळी दा ईस रोट्टी यारारा यल टु तर सकतार कि इंदुर संतुष्ट आगुल?”
MAR 8:5 यीशु आंदुर से केळदुन, “नीम हात्‍ती यास रोट्टीगोळ आव?” आंदुर अंदुर, “येळ.”
MAR 8:6 आग यीशु भीळ इक ल्यालमा कुरोद आदेश कोट्टुन, अदिक आ येळ रोट्टीगोळी हुळदुन, अदिक परमेश्वर उक धन्यवाद माळकु मुरदुन, अदिक अवरी तान चेलागोळी कोट्टुन कि आंदुर आ मंळसागोळ मुंद ईटुल, अदिक आंदुर लॉकुर मुंद वाळ्स बुटुर!
MAR 8:7 आंदुर हात्‍ती थ्वाळासा स्याणेव मेनगोळ भी ईरव. आव अऊर मा परमेश्वर उक धन्यवाद माळकु अवरी भी लॉकुर दा वाळ्सली अंदुन.
MAR 8:8 आंदुर तिनकु संतुष्ट आगेदुर अदिक चेलागोळ जो मिग्द तुकळागोळ येळ फुट्टी तुमकु नेगदुर!
MAR 8:9 अदिक लॉकुर नाक हजार इन हात्‍तीपास ईरोर. यीशु आंदरी विदा माळदुन,
MAR 8:10 अदिक आव तुरन्त तान चेलागोळ सांगुळ ड्वांगा मा येरकु दलमनुता प्रदेश इक होटोदुन.
MAR 8:11 बाक फरीसी बंदकु यीशु से बैसबाजी माळली कुरतुर, अदिक आऊन परीक्षा ताकोमोर साटी आंदुर आऊन से ऊंद स्वर्गीय चमत्कार बेळदुर!
MAR 8:12 आव तान आत्मा दा आह तुमकु अंदुन, “ई समय इन लॉकुर योना अन्द चमत्कार येती ढुंढ्सतार? ना नीम से खरा-खरा अनतीन कि ई समय इन लॉकुरी येनु चमत्कार कोटकु आगतीदील.”
MAR 8:13 अदिक यीशु आंदरी बिटकु ड्वांगा मा येरेदुन अदिक दुसरा किनारा मा होटोदुन.
MAR 8:14 चेलागोळ रोट्टी हुडोद मारतोगीदुर, अदिक ड्वांगा मा आंदुर हात्‍ती ऊंद अच रोट्टी ईरोद!
MAR 8:15 यीशु आंदरी चेतावनी कोटकु अंदुन, “नोळी, फरीसी नव खमीर अदिक हेरोदेस ईनव खमीर देल सावधान ईरी.”
MAR 8:16 आंदुर आपस दा मातचीत माळली कुरतुर, कि “नाम हात्‍ती रोट्टी हैलेच अनकु आव हिंग अनेत्यान.”
MAR 8:17 ईद जान्सकु यीशु आंदुर से अंदुन, “नीव आपस दा येती ईद विचार माळेतीर कि नाम हात्‍ती रोट्टी ईलच? येन नीम मन कट्टर आगेग्याव?
MAR 8:18 येन कण्ण ईतकु भी नीव नोळ सकालीर? अदिक किव ईतकु भी केळ सकालीर? अदिक येन नीमी याद ईलच?”
MAR 8:19 कि याग ना अईद हजार लॉकुर साटी अईद रोट्टी मुरदिदीन रा नीव तुकळा गोळ्द यास फुट्टी तुमकु नेगदिदीर? आंदुर यीशु से अंदुर, “हन्नेळ फुट्टीगोळ.”
MAR 8:20 अदिक येन नीमी याद हैलेच कि “याग ना नाक हजार लॉकुर साटी येळ रोट्टी मुरदिदीन रा नीव तुकळा गोळ्द यास फुट्टी तुमकु नेगदिदीर?” आंदुर आऊन से अंदुर, येळ फुट्टीगोळ.
MAR 8:21 बाक यीशु आंदुर से केळदुन, “येन नीव ईगासताका समसीदील?”
MAR 8:22 आंदुर बैतसैदा दा बंदुर; अदिक लॉकुर ऊंद कुढ्ढ मंळसा अक आऊन हात्‍ती तंदुर अदिक यीशु उन से विनती माळदुर कि आऊक मुट्ट.
MAR 8:23 आव कुढ्ढ मंळसा अन्द कय हुळकु आऊक ऊर इन व्हार्या ओतुन, अदिक आऊन कण्णगोळ मा उगुळकु आऊन मा कय ईटदुन, अदिक आऊन से केळदुन, “येन नीनी येनारा कांळ्सतद?”
MAR 8:24 आव कण्ण नेगुकु अंदुन, “ना मंळसागोळी नोळ सकतीन; आंदुर नानी मार्रगोळ आसपास नळुतेला कांळ्सीत्यार.”
MAR 8:25 आग यीशु दुबारा आऊन कण्णगोळ मा कय ईटदुन, अदिक आ कुढ्ढ मंळसा ध्यान देल नोळदुन. आव चंगा आगेदुन, अदिक सब साफ-साफ नोळली कुरतुन.
MAR 8:26 यीशु आऊक ईद अनकु मान्नी कळुदुन, “ईद ऊर इन बुळ्क टु आगकु होगबाळ सीधा तान मान्नी होग.”
MAR 8:27 यीशु अदिक आऊन चेला कैसरिया फिलिप्पी इन ऊरगोळ दा होटोदुर! हादी मा आव तान चेलागोळ से केळदुन, “लॉकुर नान बारा दा येन अनतार कि ना याव हुईन?”
MAR 8:28 आंदुर उत्‍तर कोट्टुर, ईव “यूहन्ना बपतिस्मा कोळावाळा; पर यारारा ईव एलिय्याह अदिक यारारा ईव भविष्यवक्तागोळ दा टु यावारा ऊंद हुन.”
MAR 8:29 यीशु आंदुर से केळदुन, “लेकीन नीव नानी येन अनतीर?” पतरस आऊक उत्‍तर कोट्टुन, “नी मसीह उध्दारक हुय.”
MAR 8:30 आग आव आंदरी आग्या कोटकु अंदुन कि नान बारा दा यारीकु हेळबाळेतीर!
MAR 8:31 आग यीशु तान चेलागोळी कल्सली कुरतुन कि मंळसा अन पार उन साटी जरूरी आद कि आव हापाळ दुख नेगदान, अदिक स्याणा अदिक प्रधान याजक, अदिक नियम शास्त्रीगोळ द्वारा ठहरूसकु आगकु आऊक तुच्छ सम्सकु कोंदबुटार, लेकीन आव मुर दिन इन बाद्दा जित्‍ता आगेदान.
MAR 8:32 आव ईद मात आंदुर से साफ-साफ अंद बुट्टुन. इदुर मा पतरस आऊक दनकुसकु अंदुन हिंग आगसकाल.
MAR 8:33 लेकीन यीशु तिर्गकु तान चेलागोळ दी नोळदुन, अदिक पतरस उक दनकुसकु अंदुन, “हे शैतान, नान मुंद टु दुर आग; यतिकी नी परमेश्वर उन मात मा ईला, लेकीन मंळसा अन मातगोळ मा मन हचत्या.”
MAR 8:34 यीशु भीळ इक तान चेलागोळ सांगुळ हात्‍ती कारूकु आंदुर से अंदुन, “जो यावारा नान हिंद बरोद चाहासतान, आव तान खुद इन इनकार माळुल अदिक आऊक दुख नेगोद बिद्दीत अदिक सायोद बिद्दीत आवा, तान क्रूस नेगुकु, नान हिंद आगुल.
MAR 8:35 यतिकी जो यावारा तान जीव ऊळसोद चाहास्यान आव अदरी खोऊस्यान, लेकीन जो यावारा नान अदिक खुशखबरी इन साटी तान जीव खोऊस्यान, आव अदरी ऊळस्यान.
MAR 8:36 अगर मंळसा पुरा दुनिया अक हासिल माळुल अदिक तान जीव इन नुकसान आगगोळुल, रा आऊक येन लाभ आदीत?
MAR 8:37 मंळसा तान जीव इन बदला दा येन कोट्टान?
MAR 8:38 जो यावारा ईद व्यभिचारी अदिक पापी जाती इन न्याड्या नान से अदिक नान मातगोळ देल लाजुस्यान, ना मंळसा अन पार याग पवित्र स्वर्गदूतगोळ सांगुळ तान आप्प उन महिमा अन्द सांगुळ बराईन, आग आव नान से भी लाजुस्यान आंदरी भी ना अपनुसाईन.”
MAR 9:1 यीशु आऊन से अंदुन, “ना नीम से खरा-खरा अनतीन कि जो ईल नीदुरकु आर, आंदुर दा टु यारारा-यारारा हिंग आर, कि यागासताका परमेश्वर उन राज्य अक सामर्थ्य सहित बर्त नोळकोमालुर, आगासताका आंदुर सायतीदील.”
MAR 9:2 आर दिन इन बाद्दा यीशु, पतरस, याकूब अदिक यूहन्ना अक सांगुळ हुळदुन, अदिक आबना अन दा ऊंद धोळ्द पहाळी मा ओतुन. अल आंदुर मुंद आऊन रूप बदलुसेत,
MAR 9:3 अदिक आऊन कपळा हिंग चमकुसली हतदव अदिक ईल ताका उजुळ आत, कि पृथ्वी मा यातोवारा धोबी भी हांग उजुळ माळ सकालुन.
MAR 9:4 अदिक आंदरी मूसा अन्द सांगुळ एलिय्याह कांळ्सदुन; आंदुर यीशु उन सांगुळ मात माळतोगोर!
MAR 9:5 इदुर मा पतरस यीशु से अंदुन, “हे गुरु, नाम ईल ईरोद वळ्लीसा आद: इदुरसाटी नाव मुर हांद्रा माळाता; ऊंद नीन साटी, ऊंद मूसा साटी, अदिक ऊंद एलिय्याह अन्द साठी.”
MAR 9:6 पतरस ईला जानसोन कि येन उत्‍तर कोळाईन, इदुरसाटी कि आंदुर हापाळ अंजेगीदुर!
MAR 9:7 आग ऊंद बादल आंदरी घेर्सकोम्त, अदिक आ बादल दा टु ईद आवाज होळ्त, इव नान प्रिय पार हुन, ईऊन केळी.
MAR 9:8 आग आंदुर अचानक नाकु दी नजर माळकु नोळदुर, अदिक यीशु उक बिटकु तान सांगुळ अदिक यारीकु नोळीदील.
MAR 9:9 पहाळी मा टु ईळा होती यीशु आंदरी आग्या कोट्टुन कि यागासताका ना मंळसा अन पार सोत्‍तुर दा टु जित्‍ता आगालीन, आगासताका जो येनारा नीव नोळीर अद यारीकु हेळबाळेतीर.
MAR 9:10 आंदुर आऊन आग्या अक मान्सदुर; अदिक आपस दा चर्चा माळली हतदुर, “सोत्‍तुर दा टु जित्‍ता आगोद येन मतलब आद?”
MAR 9:11 अदिक आंदुर आऊन से केळदुर, “बाक शास्त्री यती अनतार कि एलिय्याह अन्द पयले बरोद जरूरी आद?”
MAR 9:12 आव आंदरी उत्‍तर कोट्टुन, “एलिय्याह खराखुरा पयले बंदकु सब येनारा सुधार्सली बंदान, लेकीन मंळसा अन पार उन बारा दा ईद येती लिख्सकु आद कि आव हापाळ दुख नेगदान, अदिक ठुकरूस्कु आदान?
MAR 9:13 लेकीन ना नीम से अनतीन, कि एलिय्याह रा होटबंदुन, अदिक जसा आऊन बारा दा लिख्सकु आद, आंदुर ह्यांग चाहासदुर हांग अच आऊन सांगुळ माळदुर.”
MAR 9:14 याग यीशु चेलागोळ हात्‍ती बंदुन, रा नोळदुन कि आंदुर्द नाकु दी धोळ्द भीळ हतकु आद, अदिक नियम इन शास्त्री आंदुर सांगुळ विवाद माळीत्यार.
MAR 9:15 आऊक नोळतेला अच सप्पा लॉकुर हापाळ आश्चर्य माळली कुरतुर, अदिक ह्यांग आंदुर यीशु उक नोळदुर रा आऊन दी ओळकु आऊक नमस्कार माळदुर.
MAR 9:16 यीशु आ चेलागोळ से केळदुन, “नीव इंदुर से येन बहस माळेतीर?”
MAR 9:17 भीळ दा टु ऊंद मंळसा यीशु उक उत्‍तर कोट्टुन, “हे गुरु, ना तान पार उक, यारदा मुक्‍की आत्मा समुस्याद, अदिक आव माताळ सकालुन नीन हात्‍ती तंदिदीन.
MAR 9:18 आक आऊक येल्यारा भी हुडूतार, अल्या पटकुस बुळतार: अदिक आव बाय दा फेस तरतान, अदिक हल्ल कचतान, अदिक वंळ्गतेला होगतान. ना नीन चेलागोळ से अंदीन कि नीव आ दुष्टआत्मा अक तेगी, लेकीन आंदुर तेगु सकिदील.”
MAR 9:19 ईद केळकु यीशु चेलागोळी उत्‍तर कोटकु अंदुन, “हे अविश्वासी लॉकुरा, ना यागासताका नीम सांगुळ ईराइन? अदिक यागासताका नीम्द सहन माळाईन? आ पार उक नान हात्‍ती तरी.”
MAR 9:20 आग आंदुर आ पार उक आऊन हात्‍ती तंदुर: अदिक याग आव आऊक नोळदुन, रा अद आत्मा तुरन्त आऊक मुरकुळस्त; अदिक आव जागा मा बिद्दुन, अदिक बाय दा टु फेस तेगुतेला गळबळी तिनली कुरतुन.
MAR 9:21 यीशु आऊन आप्प उन से केळदुन, “ईऊंद हिंग दशा यागी टु आद?” आव अंदुन, “बचपन टु.
MAR 9:22 आ दुष्टआत्मा ईऊक कोन्नोर साटी यागलु बेक्‍की दा अदिक यागलु नीर दा केडुकु कोन्नोद कोशिश माळतद; लेकीन अगर नी येनारा माळ सकत्या रा, नाम मा तरस तिनकु नाम सहायता माळ.”
MAR 9:23 यीशु आऊन से अंदुन, “अगर नी माळ सकत्या? रा विश्वास माळ. यतिकी विश्वास माळावाळेर साटी सब येनारा आग सकतद.”
MAR 9:24 पार उन आप्प तुरन्त गिळगिळास्कु अंदुन, “हे प्रभु, ना विश्वास माळतीन, लेकीन नान विश्वास काफी हैलेच नांद अविश्वास इन उपाय माळ.”
MAR 9:25 याग यीशु नोळदुन कि लॉकुर ओळकु भीळ जमा माळीत्यार, रा आव दुष्टआत्मा अक ईद अनकु दनकुसदुन, “हे मुक्‍की अदिक दुश्मन दुष्टआत्मा, ना नीनी आग्या कोळतीन, आऊन दा टु होळबुळ, अदिक आऊन दा बाक यागलु प्रवेश माळबाळेत.”
MAR 9:26 आग दुष्टआत्मा चिळ्लासकु अदिक आऊक हापाळ मुरकुळ्सकु, होट्ट बुळ्त; अदिक पार सोत्‍तुर घाई आगेदुन, ईल ताका कि हापाळ लॉकुर अंदुर, “आव सोतोदुन.”
MAR 9:27 लेकीन यीशु आऊन कय हुळकु आऊक येब्सदुन. अदिक आव पार नीदरेदुन.
MAR 9:28 याग यीशु मान्नी बंदुन, रा आऊन चेलागोळ आबना दा आऊन से केळदुर, “नाव आ दुष्टआत्मा अक आ पार उन दा टु यती तेगु सकिदील?”
MAR 9:29 आव आंदुर से अंदुन, “ईद प्रार्थना अन्द अलावा अदिक दुसरा उपाय देल होळ सकाल.”
MAR 9:30 बाक यीशु अदिक आऊन चेला अल टु होटकु, गलील टु आग्त होगोर. आव ईला चाहासोन कि यारीकु भी पता आगुल कि ना ईल आईन,
MAR 9:31 यतिकी आव तान चेलागोळी उपदेश कोळोन अदिक आंदुर से अनतोगोन, “ना मंळसा अन पार, मंळसा अन कयदेला हुळसुस्कु आगाईन, अदिक आंदुर नानी कोंद बुट्टार; अदिक ना सोतकु मुर दिन इन बाद्दा जित्‍ता आगाईन.”
MAR 9:32 पर ईद मात आंदुर्द समझ दा बंदिदील, अदिक चेलागोळ यीशु उक केळोर से अंजतोगोर.
MAR 9:33 बाक आंदुर कफरनहूम दा बंदुर; अदिक मान्ना दा बंदकु यीशु चेलागोळ से केळदुन, “हादी मा नीव याता मात मा बहस माळीर?”
MAR 9:34 लेकीन आंदुर सुंग्गा ईत्‍तुर, यतिकी हादी मा आंदुर आपस दा ईद बहस माळीदुर कि नाम दा टु धोड्डेव याव आन.
MAR 9:35 आग यीशु कुर्तकु हन्नेळ चेलागोळी कारदुन अदिक आंदुर से अंदुन, “अगर यावारा धोड्डेव आगोद चाहासतान, रा आव सब से स्याणेव अदिक सप्पा मुंदुर्द सेवक आगुल.”
MAR 9:36 अदिक आव ऊंद पार उक हुळकु आंदुर्द न्याड्या दा नीदरूसदुन, अदिक आऊक मोगुल दा हुळकु आंदुर से अंदुन,
MAR 9:37 “जो यावारा नान हेसुर देल ईत्‍ता पारगोळ दा टु यातोवारा ऊंद पार उक ग्रहण माळतान, आव नानी ग्रहण माळतान; अदिक जो यावारा नानी ग्रहण माळतान, आव नानी ईला, लेकीन नानी याव कळ्यान आव आऊक ग्रहण माळतान.”
MAR 9:38 आग यूहन्ना यीशु से अंदुन, “हे गुरु, नाव ऊंद मंळसा अक नीन हेसुर देल दुष्टआत्मागोळी तेगुतेला नोळदेव अदिक नाव आऊक मना माळली कुरतेव, यतिकी आव नाम समुह दाकळव ईला ईरोन.”
MAR 9:39 यीशु अंदुन, “आऊक मना माळबाळी; यतिकी हिंग यारू हैलेच जो नान हेसुर देल सामर्थ्य इन क्याल्सा माळुल, अदिक राटनेरी नानी बुरा अन सकुल,
MAR 9:40 यतिकी आव नाम्द विरोध दा हैलेच, आव नाम्द सांगुळ आन.
MAR 9:41 जो यावारा नीमी ऊंद वाटी नीर, इदुरसाटी कुळसुल कि नीव मसीह नोर हुईर, रा ना नीम से खरा माताळतीन कि आव तान प्रतिफल यातोदारा भी रीति देल खोऊसतिदिल.”
MAR 9:42 “जो यावारा भी स्याणेर दा टु नान मा विश्वास माळतार अदिक आंदरी यारारा ठोकर तिनस्यार रा आऊन साटी वळ्लीद ईद आद कि ऊंद धोळ्द चक्‍की इन पट्टा आऊन कुतक्या दा लटकुसकु आगुल अदिक आव समुद्र दा हाक्‍कु आगुल.
MAR 9:43 अगर नीन कय नीन पाप माळोद कारण बन्सतद रा वळ्लीद आद कि अदरी कळ्द बुळ. डुण्डा आगकु जीवन दा प्रवेश माळेत, नीन साटी इदुर से भला आद कि येढ्ढ कय ईतकु नी, नरक इन बेक्‍की दा हाक्‍कु आद्या जो यागलु नुनाल्द.
MAR 9:44 येल किळा सायाल्द अदिक बेक्‍की नुनाल्द.
MAR 9:45 अगर नीन काल पाप माळोद कारण आगुल रा अदरी कळ्द बुळ. लंगळा आगकु जीवन दा प्रवेश माळोद नीन साठी इदुर से वळ्लीद आद कि नी येढ्ढ काल ईतकु नरक दा हाक्‍कु आद्या!
MAR 9:46 येल किळा सायाल्द अदिक बेक्‍की नुनाल्द!
MAR 9:47 अगर नीन कण्ण नीनी ठोकर तिन्सतद रा, अदरी तेगुकु भीळ. वळ्लीद आद कि कुढ्ढ आगकु परमेश्वर उन राज्य दा प्रवेश माळ. अपेक्षा इदुर्द कि नी येढ्ढ कण्णगोळ ईतकु नरक दा हाक्‍कु आद्या!
MAR 9:48 यल किळा शाय्याल अदिक बेक्‍की नुनाल्द.”
MAR 9:49 यतिकी हर ऊंद मंळसा अक बेक्‍की देल शुद्ध माळकु आदीत? ह्यांग बलिदान उक ऊप्प देल शुद्ध माळकु आगतद?
MAR 9:50 “ऊप्प रा वळ्लीसा आद; लेकीन अगर ऊप्प इन स्वाद ओळेत, रा अदरी मात नमकीन ह्यांग माळीर?” ताम जीवन इक शुद्ध ईटी, जसा यातोदारा वस्तु ऊप्प देल शुद्ध माळकु आगतद, अदिक आपस दा संगीपना माळकु ईटी अदिक शांती देल ईरी.
MAR 10:1 बाक यीशु अल टु होटकु यहूदिया अन्द प्रदेश टु आगतेला यरदन गांगा अन क्षेत्र अन्द आप्पाटी बंदुन. अदिक भीळ मात्‍त आऊन हात्‍ती बंदकु जमा आगेत, अदिक आव तान रीति अन्द अनुसार आंदरी मात्‍त उपदेश कोळली कुरतुन.
MAR 10:2 आग थ्वाळासा फरीसीगोळ आऊन हात्‍ती बंदुर अदिक आऊक फसुशोर कोशिश दा आऊन से केळदुर, नामी हेळ “येन ईद नियम इन अनुसार सही आद कि यावारा मंळसा अन साटी ईद उचित आद कि आव तान हिंग्स उक छोळ चिट्ठी कोळुल?”
MAR 10:3 यीशु आंदरी उत्‍तर कोट्टुन, “मूसा नीमी यातोद नियम कोटान?”
MAR 10:4 आंदुर यीशु उक अंदुर, मूसा इजाजत कोटान कि ऊंद मंळसा छोळचिट्टी लिख्सकु तान हिंग्स उक बिळ सकतान.
MAR 10:5 यीशु आंदुर से अंदुन, “मूसा नीम साटी ईद नियम लिखस्यान यतिकी नीमी कलसोद हापाळ मुश्किल आद.
MAR 10:6 लेकीन ह्यांग शास्त्र दा लिख्सकु आद, सुरूवात दा परमेश्वर आंदरी गंळ्स अदिक आर्त इन रूप दा माळदुन.”
MAR 10:7 ईद कारण देल ऊंद मंळसा तान मोय-आप्प उक बिटकु तान हिंग्स उन सांगुळ ईत्‍तान.
MAR 10:8 अदिक आंदुर येढ्ढु मुंदुर ऊंद तन आदार; इदुरसाटी आंदुर ईग येढ्ढ ईला पर ऊंद तन आर.
MAR 10:9 इदुरसाटी आंदुर ईग येढ्ढ ईला, लेकीन ऊंद तन आर. इदुरसाटी यारीक परमेश्वर जोळस्यान, अदरी यावारा भी मंळसा अलग माळबाळुल.
MAR 10:10 याग आंदुर बाक मान्या वापस बंदुर आग चेलागोळ इदुर बारा दा यीशु उक मात्‍त केळदुर.
MAR 10:11 आव आंदुर से अंदुन, ऊंद मंळसा जो तान पयला हिंग्स उक छोळ चिट्ठी कोळतान अदिक दुसरा आर्त इन से मदा माळतान, रा आव तान पयला हिंग्स उन खिलाप व्यभिचार माळतान.
MAR 10:12 अदुर्दा घाई, ऊंद आर्त तान गांड्ड उक छोळ चिट्ठी कोळतार, अदिक दुसरा मंळसा से मदा माळतार रा आक तान पयला गांड्ड उन खिलाप व्यभिचार माळतार.
MAR 10:13 बाक लॉकुर चिकोरी यीशु उन हात्‍ती तरली कुरतुर कि आव आंदुर मा कय ईटुल, पर चेलागोळ लॉकुरी दनकुसदुर.
MAR 10:14 याग यीशु ईद नोळदुन रा सिट्टी बंदुन अदिक तान चेलागोळ से अंदुन, “चिकोरी नान हात्‍ती बरगोळी आंदरी मना माळबाळी, यतिकी परमेश्वर उन राज्य इंदुर्दा हुन.
MAR 10:15 ना नीम से खरा अनतीन कि जो यावारा परमेश्वर उन राज्य चिकोर घाई हासिल माळालुन, रा आव परमेश्वर उन राज्य दा यागलु उच दाखल आग सकालुन.”
MAR 10:16 आग यीशु आ चिकोरी क्वारा दा हुळदुन, अदिक आंदुर मा तान कय ईटकु आंदरी आशिर्वाद कोट्टुन.
MAR 10:17 याग यीशु अल टु होटकु हादी मा टु होगोन, रा ऊंद मंळसा आऊन हात्‍ती ओळतेला बंदुन, अदिक आऊन मुंद ट्वांगरा टेक्सकु आऊन से केळदुन, “हे वळ्लेव गुरु, अनन्त जीवन हासिल माळोर साटी नानी येन माळोद बिद्दीत?”
MAR 10:18 यीशु आ धनी मंळसा से अंदुन, “नी नानी वळ्लेव येती अनत्या? परमेश्वर उन अलावा यारू वळ्लेव हैलेच.
MAR 10:19 नी परमेश्वर उन आग्यागोळी जान्सत्या: ‘यारीकु कोन्न बाळी, व्यभिचार माळबाळी, चोरी माळबाळी, यारदारा खिलाप ख्वाटा गवाही कोळबाळी, बयमानी माळबाळी, तान आप्प अदिक तान मोय इन आदर माळी.’”
MAR 10:20 आ मंळसा यीशु से अंदुन, “हे गुरु, ना रा स्याणपणी टु ईव सप्पा मातगोळ्द पालन माळतेला बंदीन.”
MAR 10:21 यीशु आऊक प्यार देल नोळदुन अदिक अंदुन, “नीन दा ईग भी ऊंद मात इन कमी आद जो येनारा नीन हात्‍ती आद, अदरी मारकु अव पैस्या गरीब लॉकुर दा वाट्स बुळ. नीनी स्वर्ग दा धन सिक्‍कीत, अदिक बंदकु नान हिंद आगेग.”
MAR 10:22 याग आ मंळसा ई मातगोळी केळदुन रा आऊन मार्रा अन्द नीर हारेत अदिक आव उदास आगेदुन, यतिकी आव हापाळ धनी ईरोन.
MAR 10:23 यीशु नाकु दी नोळकु तान चेलागोळ से अंदुन, “आ लॉकुर साटी, यार्द हात्‍ती धन आद, आंदरी परमेश्वर उन राज्य दा प्रवेश माळोद याट कठिन आद!”
MAR 10:24 चेलागोळ आऊन मातगोळ देल अचम्भित आदुर. इदुर मा यीशु मात्‍त आंदरी अंदुन, “हे चिकोरगोळा, जो धन मा भरोसा ईटतार, आंदुर साटी परमेश्वर उन राज्य दा प्रवेश माळोद याट कठिन आद!
MAR 10:25 परमेश्वर उन राज्य दा धनवान उन प्रवेश माळदुर देल ऊँट इन मुग्ग दा टु चुजी होटबुळोद आसान आद!”
MAR 10:26 इदुर मा चेलागोळ हापाळ चकित आगेदुर अदिक आबुर दाबुर से केळली कुरतुर, “रा बाक यार्द उद्धार आग सकतद?”
MAR 10:27 यीशु आंदुर दी नोळकु अंदुन, “ईद मंळसागोळ साटी असंभव आद, लेकीन परमेश्वर उन साटी सब येनारा सम्भव आद; यतिकी परमेश्वर से सब येनारा आग सकतद.”
MAR 10:28 आग पतरस यीशु उक अनली कुरतुन, “नोळ, नाव रा सप्पा येनारा बिटकु नीन हिंद आगेगेव.”
MAR 10:29 यीशु अंदुन, “ना नीम से खरा अनेतीन कि हिंग यारू हैलेच, जो नान साटी अदिक खुशखबरी इन साटी मान्ना या वार्टुरी या आकतींगेरी या मोय या आप्प या चिकोर-चिंळ्गेर या केईगोळी बिट बुटीदान,
MAR 10:30 ई वर्तमान युग दा यक्कुल हापाळ हासिल माळ्यार. आंदुर सौ गुणा यक्कुल मान्ना, वार्टुर, आकतींगेर, मोयगोळ, चिकोर अदिक केईगोळी हासिल माळ्यार. अदिक अऊर सांगुळ हापाळ दुखगोळी भी, अदिक बरावाळा युग दा आंदुर अनन्त जीवन हासिल माळ्यार.
MAR 10:31 पर हापाळ सा लॉकुर जो पयला आर, आंदुर हिंदळोर आदार; अदिक जो हिंदळोर आर, आंदुर पयला आदार.”
MAR 10:32 यीशु अदिक आऊन चेलागोळ ईग यरूशलेम इक होगोद हादी मा ईरोर. यीशु तान चेलागोळ से मुंद-मुंद होगोन, चेलागोळ घबरूसकु ईरोर अदिक जो लॉकुर आऊन हिंद-हिंद नळोर आंदुर अंजकु ईरोर. ऊंद घन मात्‍त यीशु तान हन्नेळ चेलागोळी अलग वोतकु आंदुर से अव मातगोळी अनली कुरतुन, जो आऊन सांगुळ आगव ईरव.
MAR 10:33 आव आंदुर से अंदुन, “केळी, नाव यरूशलेम इक होगेतेव, अदिक मंळसा अन पार प्रधान याजकगोळ अदिक नियम उन शास्त्रीगोळ कय दा कोटकु आदान, अदिक आंदुर आऊक कोन्नोर साटी आऊन मा दोष हच्यार, अदिक आंदुर आऊक गैरयहूदीगोळ कय दा कोट्टार.
MAR 10:34 आंदुर आऊन मज्याक हारस्यार, आऊन मा ऊगळ्यार, आऊक क्वाळागोळ देल बळदार, आऊक जान देल कोंद बुट्टार, अदिक मुर दिन इन बाद्दा आव जित्‍ता आदान.”
MAR 10:35 आग जब्दी इन पार याकूब अदिक यूहन्ना यीशु उन हात्‍ती बंदुर अदिक अंदुर, “हे गुरु, नाव चाहासतेव कि जो येनारा नाव नीन से बेळेव, अद नी नाम साटी माळेत.”
MAR 10:36 यीशु आंदुर से अंदुन, “नीव येन चाहासतीर कि ना नीम साटी माळाईन?”
MAR 10:37 आंदुर यीशु से अंदुर, “नामी ईद अधिकार कोळ कि नीन महिमा दा याग नी सिंहासन मा कुरत्या, रा नाव चाहासतेव कि नाम दा टु ऊंद नीन ऊमा कय दी अदिक दुसरा अपमान डाक्या कय दी कुरूल.”
MAR 10:38 लेकीन यीशु आंदुर से अंदुन, “नीव जान्सालीर कि नीव येन बेळेतीर. जो दुख इन प्याला ना कुडावाळा आईन, येन नीव कुडू सकतीर? अदिक जो बपतिस्मा ना ताकोमावाळा आईन येन नीव ताकोम सकतीर?”
MAR 10:39 आंदुर आऊन से अंदुर, “नाम से आग सकतद.” यीशु आंदुर से अंदुन, जो दुख इन प्याला ना कुडावाळा आईन, नीव कुळदीर अदिक जो बपतिस्मा ना ताकोमावाळा आईन अदरी ताकोंडीर.
MAR 10:40 लेकीन नान अधिकार दा ईलच कि याव नान ऊमा कय दी अदिक डाक्या कय दी कुरतान. परमेश्वर यार साटी ईद तयार माळदुन, आंदरी बिटकु अदिक यारीकु तान ऊमा कय दी अदिक तान डाक्या कय दी कुरसोद नान क्याल्सा आलच.
MAR 10:41 दुसरा हत्‍त चेलागोळ ईद केळदुर रा आंदुर याकूब अदिक यूहन्ना देल नाराज आदुर!
MAR 10:42 इदुरसाटी यीशु आ सप्पा मुंदरी हात्‍ती कारूकु आंदुर से अंदुन, नीव जान्सालीर कि जो गैर यहूदीगोळव शासक सम्सतार इंदुर आंदुर मा प्रभुता माळतार; अदिक आंदुर्दा जो धोड्डेर आर, आंदुर मा अधिकार जतुसतार, ईद नीव जान्सालीर.
MAR 10:43 पर नीम दा हिंग हैलेच, जो यावारा नीम दा धोड्डेव आगोद चाहासतान, रा नीमी बाकी लॉकुर्द सेवक आग पायजे;
MAR 10:44 अदिक जो यावारा नीम दा प्रधान आगोद चाहासतान, आव नीम सप्पा मुंदुर दास आगुल.
MAR 10:45 यतिकी ना मंळसा अन पार इदुरसाटी बंदिदील कि नान स्यावा माळुल, पर ना इदुरसाटी बंदीन कि नीम्द सप्पा मुंदुर्द स्यावा माळाईन, अदिक लॉकुर अव पापगोळ छुटकारा अन्द साटी तान जीवन कोळ सकाईन!
MAR 10:46 बाक यीशु अदिक आऊन चेलागोळ यरीहो दा बंदुर, अदिक याग आव अदिक आऊन चेलागोळ ऊंद धोळ्द भीळ इन सांगुळ यरीहो दा टु होगोर, आग ऊंद कुढ्ढ भिखारी, यार्द हेसुर तिमाई नव पार बरतिमाई ईरोद, सळक इन किनारा मा कुर्तकु ईरोन.
MAR 10:47 आव ईद केळकु कि यीशु नासरी हुन, कारू-कारूकु अनली कुरतुन, “हे दाऊद उन पारा यीशु नान मा दया माळ!”
MAR 10:48 आग हापाळ मुंदुर आऊक दनकुसदुर कि सुंगा ईर. पर आव यक्कुल जोर देल कारूली कुरतुन, “हे दाऊद उन पारा नान मा दया माळ!”
MAR 10:49 आग यीशु निदुरकु अंदुन, “आऊक कारी.” अदिक लॉकुर आ कुढ्ढ मंळसा अक कारूकु आऊन से अंदुर. हिम्मत ईट, येळ! आव नीनी कारेत्यान!
MAR 10:50 आव तान कपळा भिटकु तुरन्त येद्दुन, अदिक यीशु उन हात्‍ती बंदुन.
MAR 10:51 इदुर मा यीशु आऊन से अंदुन, “नी येन चाहासत्या कि ना नीन साटी माळाईन?” कुढ्ढ मंळसा आऊन से अंदुन, “हे गुरु, ना पयले घाई नोळोद चाहासतीन.”
MAR 10:52 यीशु आऊन से अंदुन, “होटोग, नीन विश्वास नीनी वळ्लीद माळबुटाद.” आव तुरन्त नोळली कुरतुन, अदिक हादी मा आऊन हिंद आगेदुन.
MAR 11:1 बाक याग आंदुर यरूशलेम इन हात्‍ती, जैतून पहाळी मा बैतफगे अदिक बैतनिय्याह अन्द हात्‍ती बंदुर रा यीशु तान चेलागोळ दा टु येढ्ढ मुंदरी ईद सुझाव कोटकु कळुदुन,
MAR 11:2 “कि मुंदळोद ऊर दा होगी, अदिक अदुर दा पोहचुसतेला अच ऊंद गधा अन पाड्डा, अदुर मा यागलु यारू कुरतीदील, अद नीमी कटकु सिक्‍कीत. अदरी बिटकु तरी.
MAR 11:3 अगर नीम से यारारा केळ्यार, ‘ईद येती माळतीर?’ रा अनेतीर, प्रभु उक इदुर्द जरवत आद, अदिक आव तुरन्त अदरी बाक ईल वापस कळु बुटान.”
MAR 11:4 आंदुर होगकु आ गधा अन पाड्डा अक व्हार्या द्वारा इन हात्‍ती चौक दा कटकु नोळदुर, अदिक अदरी बिळली कुरतुर.
MAR 11:5 थ्वाळासा लॉकुर जो अल नीदुरकु ईरोर, यारारा यारारा अनली कुरतुर, ईद येन माळेतीर, गधा अन पाड्डा अक येतरी बिळतीर?
MAR 11:6 अदिक यीशु ह्यांग हेळीदुन आंदुर हांग अच आंदुर से अंद बुटुर; आग लॉकुर आंदरी आ पाड्डा अक वोयगोटुर.
MAR 11:7 आंदुर पाड्डा अक यीशु उन हात्‍ती तनकु अदुर मा तान कपळा हाकदुर अदिक यीशु अदुर मा कुरतुन.
MAR 11:8 आग हापाळ सा लॉकुर तान कपळा हादी मा हासदुर अदिक हापाळ मुंदुर केईगोळ दा टु खजुर इन डगाली कळ-कळकु हादी मा हासदुर.
MAR 11:9 जो आऊन मुंद-मुंद होगोर अदिक जो हिंद-हिंद नळुतेला बरोर, कारू-कारूकु अनतेला होगतोगोर, “परमेश्वर उन स्तुती आगुल! जो प्रभु उन हेसुर देल बरतान!
MAR 11:10 नाम आप्प दाऊद उन बरावाळा राज्य इक परमेश्वर आशीष कोळुल अदिक परमेश्वर उन स्तुति आगुल!”
MAR 11:11 यीशु यरूशलेम पोहचुस्कु मंदिर दा बंदुन; अदिक नाकु दी सप्पा वस्तुगोळी नोळकु हन्नेळ चेलागोळ सांगुळ बैतनिय्याह होदुन, यतिकी द्याव मुळकेगीत.
MAR 11:12 दुसरा दिशी याग यीशु अदिक आऊन चेलागोळ बैतनिय्याह टु वापस बरोर रा आऊक हसु हत्‍त.
MAR 11:13 अदिक याल्ला देल तुमकु ऊंद अंजीर इन मार्र इक दुर टु नोळकु, यीशु अदुर हात्‍ती होदुन कि अल येनारा तिनली सिक्‍केदित. अल पोहचुस्कु याल्ला गोळी बिटकु अदिक येनु ईला ईरोद, यतिकी काय हत्‍तोद मौसम ईला ईरोद.
MAR 11:14 आग यीशु आ मार्र से अंदुन, “ईगी टु यारू नींद काय यागलु तिनतीदील.” अदिक आऊन चेलागोळ केळोर.
MAR 11:15 बाक यीशु यरूशलेम दा बंदुन अदिक आव मंदिर दा होगकु अल लेन-देन माळावाळेरी तेगुली कुरतुन, अदिक सावकारगोळ्द पांळ्सी अदिक कबूतर मारावाळेर्द चौकीगोळी ऊलटुसदुन;
MAR 11:16 अदिक आव यारीकु भी मंदिर दा टु आगकु सामान वयोद आग्या कोटीदील.
MAR 11:17 अदिक आव आंदरी उपदेश कोळली कुरतुन, “येन ईद शास्त्र दा लिख्सकु हैलेच, ‘कि नांद मान्ना सप्पा राष्ट्र अन साटी प्रार्थना अन्द मान्ना कहलुसीत?’ पर नीव अदरी डाकूगोळ्द हड्डा माळकु ईटीर.”
MAR 11:18 प्रधान याजकगोळ अदिक नियम इन गुरुगोळ ईद केळदुर, रा आंदुर यीशु उक कोन्नोर साटी मवका ढुंढ्सली कुरतुर, यतिकी आंदुर आऊन से अंजतोगोर, इदुरसाटी कि सप्पा लॉकुर आऊन उपदेश देल चकित ईरोर.
MAR 11:19 अदिक द्यावगा आगतेला अच, यीशु अदिक आऊन चेला नगर टु व्हार्या होटोदुर.
MAR 11:20 बाक दुसरा दिशी व्हातर्या का याग आंदुर हादी मा टु होगोर रा आ अंजीर इन मार्र इक म्याकुच टु जळ ताका वंळगींद नोळदुर.
MAR 11:21 पतरस उक अद मात याद बत्‍त, अदिक आव यीशु से अंदुन, “हे गुरु, नोळ! ईद अंजीर इन मार्र यदरी नी श्राप कोटीद, वंळ्गेग्याद.”
MAR 11:22 यीशु आंदरी उत्‍तर कोट्टुन, “परमेश्वर मा विश्वास ईटी.
MAR 11:23 ना नीम से खरा अनतीन कि जो यावारा ई पहाळी से अंदान, ‘नी अल टु कित्‍तेग, अदिक समुद्र दा होगकु बिळ,’ अदिक तान मन दा संक्या ईट बाळुल, लेकीन विश्वास माळुल कि जो अनतीन अद आगेदीत, रा आऊन साठी हांग अच आदीन.
MAR 11:24 इदुरसाटी ना नीम से अनतीन, कि जो येनारा नीव प्रार्थना माळकु बेळीर, रा विश्वास माळकोमी कि अद नीमी सिक्‍केत, अदिक अद नीम्द आगेत.
MAR 11:25 अदिक याग यागलु नीव नीदुरकु प्रार्थना माळतीर रा अगर नीम मन दा यारदारा प्रती येनारा विरोध आद, रा माफ माळी, इदुरसाटी कि नीम स्वर्गीय आप्प परमेश्वर भी निमोव अपराध माफ माळुल.
MAR 11:26 अदिक अगर नीव माफ माळतीदील रा नीम आप्प भी जो स्वर्ग दा आन नीम अपराध माफ ईला माळ्यान.”
MAR 11:27 आंदुर मात्‍त ऊंद घन यरूशलेम दा बंदुर, अदिक याग यीशु मंदिर दा वयाळोन रा प्रधान याजक अदिक नियम इन गुरु अदिक स्याणागोळ आऊन हात्‍ती बंदकु केळली कुरतुर,
MAR 11:28 “नी ईद क्याल्सा याता अधिकार देल माळत्या? अदिक ईद अधिकार नीनी याव कोटान कि नी ईद क्याल्सा माळत्या?”
MAR 11:29 यीशु आंदुर से अंदुन, “ना भी नीम से ऊंद प्रश्न केळतीन; नानी उत्‍तर कोळी रा ना नीमी हेळाईन कि ना ईद क्याल्सा यातोद अधिकार देल माळतीन.
MAR 11:30 यूहन्ना अक बपतिस्मा कोळोद अधिकार स्वर्ग इन दी टु ईरोद या मंळसागोळ दी टु ईरोद. नानी उत्‍तर कोळी.”
MAR 11:31 आग आंदुर आपस दा मातगोळ माळली कुरतुर कि अगर नाव अंदेव स्वर्ग इन दी टु, रा आव अंदान, बाक नीव यूहन्ना मा विश्वास येती माळीदील?
MAR 11:32 अदिक अगर नाव अंदेव, मंळसागोळ दी टु, रा लॉकुर नाम मा अच सिट्ट माळ्यार आंदुर नियम इन गुरु लॉकुर से हापाळ अंजतोगोर यतिकी सप्पा लॉक ईद मानसोर कि यूहन्ना वास्तव दा ऊंद भविष्यवक्ता आन.
MAR 11:33 इदुरसाटी आंदुर यीशु उक उत्‍तर कोट्टुर, “नाव जानसालेव.” यीशु आंदुर से अंदुन, “ना भी नीमी हेळालीन कि ईद क्याल्सा ना याता अधिकार देल माळतीन.”
MAR 12:1 बाक यीशु उदाहरणगोळ दा आंदुर से मात माळली कुरतुन; ऊंद घन ऊंद मंळसा ईरोन याव ऊंद अंगुर इन केई हचदुन, अदिक बेली इन नाकु दी ज्वाळा कटदुन, अदिक रास्सा अन्द गड्डा अगुळदुन, अदिक मचान माळदुन; अदिक दुसरा केईवाळेरी आ अंगुर इन केई अन्द ठ्याका कोटकु दुसरा द्याश दा होटोदुन.
MAR 12:2 बाक काय इन मौसम दा आव केईवाळेर हात्‍ती ऊंद दास उक कळुदुन, कि आ केईवाळेर से अंगुर इन केई इन फसल इन हिस्सा ताकोमुल.
MAR 12:3 लेकीन आंदुर आ दास उक हुळकु बळदुर अदिक आऊक खाली कय कळु बुटुर!
MAR 12:4 मालिक मात्‍त ऊंद दास उक आंदुर हात्‍ती कळुदुन; आंदुर आऊन ताल्ला ओळ्द बुटुर अदिक आऊन अपमान माळदुर!
MAR 12:5 बाक मालिक ऊंद दास उक अदिक कळुदुन; आंदुर आऊक कोंद बुटुर. अदिक आंदुर हापाळ लॉकुर सांगुळ हांगा व्यवहार माळदुर, आंदुर दा टु आंदुर यारीकारा बळदुर, अदिक यारीकारा कोंद बुटुर!
MAR 12:6 ईग ऊंदा ईरोन, जो आऊन प्रिय पार ईरोन; आखरी दा आव आऊक भी आंदुर हात्‍ती ईद सोचकु कळुदुन कि आंदुर नान पार उन आदर माळ्यार.
MAR 12:7 लेकीन आ केईवाळेर आबुर दाबुर से अंदुर, ईवा रा वारीस हुन; बरी, नाव ईऊक कोंद बुळाता, अदिक आऊन धन दौलत नाम्द आदीत!
MAR 12:8 इदुरसाटी आंदुर आ पार उक हुळ कोंडुर अदिक आऊक कोंद बुटुर, अदिक अंगुर इन केई इन व्हार्या भीट बुटुर!
MAR 12:9 इदुर मा यीशु से केळदुर अंगुर इन केई इन “स्वामी येन माळ्यान? आव बंदकु केईवाळेर्द नाश माळ्यान अदिक अंगुर इन केई दुसरा अक कोट बुटान.”
MAR 12:10 येन नीव शास्त्र दा ईद वचन वाचुसीदील: “याता कल्ल इक कारीगरीगोळ बेकार मान्सीदुर, अदा क्वाना अन्द महत्वपुर्ण कल्ल बनसेत;
MAR 12:11 ईद प्रभु अन्द दी टु आत, अदिक नाम नजर दा अदभुत आद.”
MAR 12:12 आग नियम इन गुरुगोळ आऊक हुडोद चाहासदुर; यतिकी समसेगिदुर कि यीशु नाम विरोध दा ईद उदाहरण अंदान. लेकीन आंदुर लॉकुर से अंजोर, अदिक आऊक बिटकु होटोदुर.
MAR 12:13 आग आंदुर आऊक मातगोळ दा फसुसोरसाटी येनारा फरीसीगोळ अदिक हेरोदेस राजा अन्द पक्ष इन येनारा लॉकुरी यीशु उन हात्‍ती कळुदुर.
MAR 12:14 अदिक आंदुर बंदकु आऊन से अंदुर, “हे गुरु, नाव जान्सतेव, कि नी खरा आय, अदिक यारदु परवा माळाल; यतिकी नी मंळसागोळ्द बाय नोळकु मात माळाल, लेकीन परमेश्वर उन खरा हादी कल्सत्या! रा येन सरकार उक कर कोळोद उचित आद का ईला?”
MAR 12:15 आव आंदुर्द कपट जान्सकु आंदुर से अंदुन, “नानी येती फसुसोद कोशिश माळेतीर? ऊंद दीनार नान हात्‍ती तरी, कि ना अदरी नोळाईन.”
MAR 12:16 आंदुर ऊंद चाँदी इन सिक्‍का आऊन हात्‍ती तंदुर, अदिक आव आंदुर से अंदुन, “ईद छाप अदिक हेसुर यार्द हुन?” आंदुर अंदुर, “रोमन राजा अन्द हुन.”
MAR 12:17 अदिक यीशु आंदुर से अंदुन, “जो रोमन राजा अन्द हुन अद रोमन राजा अक कोळी, अदिक जो परमेश्वर उन आद अद परमेश्वर उक कोळी.” अदिक आंदुर यीशु नव मात केळकु चकित आगेदुर.
MAR 12:18 बाक सदूकीगोळ भी, जो अनतार कि सोत्‍त मंळसागोळ्द जित्‍ता आगोद हई हैलेच, यीशु उन हात्‍ती बंदकु आऊन से केळ कुरतुर,
MAR 12:19 आंदुर अंदुर, “हे गुरु, आंदुर यीशु उक अंदुर, मूसा इजाजत कोटान कि ऊंद मंळसा छोळ चिट्ठी लिख्सकु तान हिंग्स उक तलाक कोळ सकतान. नाम साटी लिखस्यान कि अगर यारदारा वार्ट बिना औलाद पैदा माळ्त सोतोदान अदिक आऊनोर हिंग्स ईतोदार, रा आऊन वार्ट आऊन हिंग्स उन से मदा माळ कोमुल, अदिक तान वार्ट उन साठी वंश पैदा माळुल.
MAR 12:20 ऊंद जागा दा येळ वार्टुर ईरोर. पयला वार्ट मदा माळकु बिना औलाद सोतोदुन;
MAR 12:21 आग दुसरा वार्ट आ आर्त से मदा माळ कोंडुन अदिक आव भी बिना औलाद सोतोदुन; अदिक हांग अच तिसरा भी माळदुन.
MAR 12:22 अदिक येळु वार्टुर्द ऊंद भी औलाद आगीदील. सप्पा मुंदुर हिंद आ आर्त भी सोतोदुर.
MAR 12:23 इदुरसाटी पुनरूत्थान आगदुर बाद्दा आक आंदुर दा टु यारोर हिंग्स आदार? यतिकी आक रा येळु मुंदुर हिंग्स आगेगीदुर.”
MAR 12:24 यीशु आंदुर से अंदुन, “नीव रा शास्त्र अक जान्सतीर, अदिक ना ही परमेश्वर उन सामर्थ्य इक इदुरसाटी नीव गलती माळतीर?
MAR 12:25 यतिकी याग आंदुर सोत्‍तुर दा टु जित्‍ता आदार, रा आंदुर ना मदा माळ्यार अदिक ना मदा दा कोटकु आदार, लेकीन स्वर्ग दा स्वर्गदूतगोळ घाई आदार.
MAR 12:26 सोत्‍तुर दा टु जित्‍ता आगोद बारा दा येन नीव मूसा अन्द किताब दा होत्‍त झाळी इन कात्‍ता दा वाचुसीदील कि परमेश्वर आऊन से अंदुन, ‘ना अब्राहम उन परमेश्वर, अदिक इसहाक उन परमेश्वर, अदिक याकूब उन परमेश्वर हुईन?’
MAR 12:27 परमेश्वर जो सोत्‍तुर आंदुरव ईला उलटा जित्‍तागोळोव परमेश्वर हुन; इदुरसाटी नीव पुरा पुरा तरीका देल ख्वाटा आईर.”
MAR 12:28 आग शास्त्रीगोळ दा टु ऊंद बंदकु आंदरी विवाद माळ्त केळदुन, अदिक ईद जान्सकु कि यीशु सदूकीगोळी वळ्लीद रीति देल उत्‍तर कोट्टुन, आऊन से केळदुन, “सब से मुख्य आग्या यातोद आद?”
MAR 12:29 यीशु आऊक उत्‍तर कोट्टुन, सब आग्यागोळ दा टु ईद मुख्य आद: “हे इस्त्राएल इन लॉकुरा केळी! प्रभु नामव परमेश्वर ऊंदा प्रभु आन,
MAR 12:30 अदिक नी प्रभु तान परमेश्वर से तान पुरा मन देल, अदिक तान पुरा जीव देल, अदिक तान पुरा बुद्धी देल, अदिक तान पुरा ताकत देल प्यार ईटेत.”
MAR 12:31 अदिक दुसरा आग्या ईद आद, “नी तान मान्ना हातळोर से तांदा घाई प्यार ईटेत. ईव येढ्ढ आग्यागोळी बिटकु दुसरा यातु धोळ्द आग्या ईलच.”
MAR 12:32 नियमगोळ गुरु यीशु से अंदुन, “हे गुरु,” हापाळ वळ्लीद! नी खरा अन्द कि परमेश्वर ऊंदा आन, अदिक आऊक बिटकु अदिक याऊ दुसरा परमेश्वर हैलेच.
MAR 12:33 अदिक आऊन से पुरा मन, अदिक पुरा बुद्धी, अदिक पुरा जीव, अदिक पुरा ताकत देल प्यार ईटेत; अदिक बाजुवाळेर से तान घाई प्यार ईटेत, पुरा अग्नि-बलिगोळ्द अदिक पशु-बलिगोळ से यक्कुल आद.
MAR 12:34 याग यीशु नोळदुन कि आव समझदारी देल उत्‍तर कोटुन, रा आऊन से अंदुन, “नी परमेश्वर उन राज्य टु दुर हैलेच.” अदिक यारीकु बाक आऊन से येनु केळोद हिम्मत आगीदील.
MAR 12:35 बाक यीशु मंदिर दा उपदेश माळतेला ईद अंदुन, “नियम इन गुरुगोळ अंदुर कि मसीह ह्यांग दाऊद उन औलाद आग सकतान?”
MAR 12:36 दाऊद तान पवित्र आत्मा अन्द सामर्थ्य देल हिंग अंदुन: प्रभु परमेश्वर नान प्रभु से अंदुन, “नान ऊमा कय मा कुरूल, यागासताका कि ना नीनोर दुश्मनगोळी अपमान काल दिशी तरालिन.”
MAR 12:37 दाऊद रा खुद अच आऊक प्रभु अनतान, बाक आव आऊन पार ह्यांग आदुन? अदिक भीळ दाकळोर लॉकुर आऊंद मात खुशी देल केळतोगोर.
MAR 12:38 यीशु तान उपदेश दा आंदुर से अंदुन, “शास्त्रीगोळ से सावधान ईरी, सम्मान सिक्‍कोर साटी आंदुर ऊद्द-ऊद्द च्वांगा हाक्‍कु वयाळतार अदिक सात्‍तागोळ दा खुद इक नमस्कार माळसुसोद आंदरी वळ्लीद हततद.
MAR 12:39 अदिक यहूदी लॉकुर्द सभागृहगोळ दा मुख्य आसन अदिक भोज दा मुख्य जागा भी चाहास्तार.
MAR 12:40 आंदुर रांड्यागोळ्द मान्नागोळ इक तिंद बुळतार, अदिक लॉकुरी दिखावा साटी हापाळ होत्त ताका प्रार्थना माळतेला ईरतार. इंदरी यक्कुल से यक्कुल दण्ड सिक्‍कीत.”
MAR 12:41 यीशु मंदिर इन दानपेटी इन मुंद कुर्तकु नोळतोगोन कि लॉकुर मंदिर इन दानपेटी दा याता प्रकार देल पैस्या हाकतार; अदिक यक्कुल पैस्यावाळेर लॉकुर भी हापाळ येनारा हाकदुर.
MAR 12:42 इटुर दा ऊंद कंगाल रांड्यागीत बंदकु तांबा अन्द येढ्ढ स्याण-स्याणेव सिक्‍का हाकदुर यदुर किमत ईतु आतुटु ऊंद पैस्या अन्द बराबर ईतीदाद, हाकदुर.
MAR 12:43 आग यीशु तान चेलागोळी हात्‍ती कारूकु आंदुर से अंदुन, “ना नीम से खरा खरा अनतीन, कि मंदिर इन दानपेटी दा हाक्‍कावाळेर दा टु ई कंगाल रांड्यागीत सप्पा मुंदुर से यक्कुल हाकदुर;
MAR 12:44 यतिकी सप्पा मुंदुर तान बळोतरी दा टु हाक्यार, लेकीन इक तांद कमी दा टु जो येनारा आकिन ईरोद, इदुर मतलब तांद पुरा जीविका हाक्‍क बुटार.”
MAR 13:1 याग यीशु मंदिर टु होळोन, रा आऊन चेलागोळ दा टु ऊंद चेला आऊन से अंदुन, “हे गुरु, नोळ, ह्यांग धोड्डेव कल्ल अदिक ह्यांग भव्य भवन आव!”
MAR 13:2 यीशु आऊन से अंदुन, “येन नीव इव धोड्डेव-धोड्डेव भवन नोळतीर: ईल कल्ल मा कल्ल भी ऊळ्दकु ईरतीदील जो ढाऊस्कु आगतीदील.”
MAR 13:3 याग यीशु जैतून इन पहाळ मा मंदिर इन मुंद कुर्तकु ईरोन, रा पतरस अदिक याकूब अदिक यूहन्ना अदिक अन्द्रियास अलग होगकु आऊन से केळदुर,
MAR 13:4 “नामी हेळ कि ईव मात याग आदव? अदिक याग ईव सब मात पुरा आग्त होदव आ समय इन येन चिन्ह ईत्‍तीत?”
MAR 13:5 यीशु आंदुर से अनली कुरतुन, सावधान ईरी कि यारू नीमी भरमुस बाळुल.
MAR 13:6 अनेक नान हेसुर देल ईद अनतेला बंदार, “ना मसीह हुईन!” अदिक आंदुर हापाळ मुंदरी भरमुस्यार.
MAR 13:7 याग नीव लळाईगोळ मातचीत केळीर अदिक लळाईगोळ्द बारा दा अफवाह केळीर, रा घबरूस बाळेतीर; यतिकी अव मातगोळ्द ईरोद जरूरी आद, लेकीन आ समय दा अन्त आगतीदील.
MAR 13:8 यतिकी द्याश मा द्याश, अदिक राज्य मा राज्य चढ़ाई माळ्यार. हर जागा दा भूकम्प आदव, अदिक अकाल बिद्दव. ईद रा भयानक दुख इन सुरूवात आदीत.
MAR 13:9 “लेकीन नीव तान बारा दा सावधान ईरी; यतिकी लॉकुर नीमी महासभागोळ दा सोपस्यार अदिक नीव पंचायतगोळ दा बळ्सकोंडीर, अदिक नान कारण न्यायाधीशगोळ अदिक राजागोळ मुंद निदरूसकु आदीर, ताकी नीम साटी खुशखबरी केळसोर साटी मौका आदीत.”
MAR 13:10 पर जरूरी आद कि पयला खुशखबरी सब जातीगोळ्दा प्रचार माळकु आगुल.
MAR 13:11 याग आंदुर नीमी हुळकु न्यायालय दा ओतार, रा पयले टु चिंता माळबाळेतीर कि नाव येन अंदेव; पर जो येनारा नीमी आटोटीका हेळकु आदीत अदा अनेतीर; यतिकी अनावाळेर नीव आलच, लेकीन पवित्र आत्मा हुन.
MAR 13:12 वार्ट उक वार्ट ध्वाका कोट्टान, अदिक आप्प तान पार उक कोनोर साटी निदर्‍यान, अदिक पार तान आप्प उक बडोर साटी निदर्‍यान अदिक चिकोर तान मोय आप्पुर खिलाप यदकु आंदरी कोन्सुस बुट्टार.
MAR 13:13 अदिक नान हेसुर इन कारण पुरा लॉकुर नीम से दुश्मनी माळ्यार; लेकीन जो आखरी ताका आऊन मा विश्वास ईट्यार, आंदुर्दा उद्धार आदीत.
MAR 13:14 लेकीन याग नीव अद बरबाद माळावाळा बेकार वस्तु उक यल उचित ईलच अल नीदुरकु नोळीर, वाचुसावाळा समसेगुल आग जो लॉकुर यहूदिया दा आर आंदुर पहाळी मा ओळेगुल;
MAR 13:15 जो छत मा आर, आव तान मान्ना टु येनारा ताकोमोर साटी ल्यालमा ईळुबाळुल अदिक बुळ्क होगबाळुल;
MAR 13:16 अदिक आंदुर जो केई दा आर, आव तान कपळा तरोरसाटी हिंद होगबाळुल.
MAR 13:17 आ दिनगोळ दा जो व्हाट्या दी ईरोर अदिक जो चिग्द ऊरी हाल कुळ्सतेला ईतीदार, आंदुर साटी आ दिन याट भयानक ईत्‍तव!
MAR 13:18 अदिक परमेश्वर से प्रार्थना माळतेला ईरी कि ईद सोळ इन दिनगोळ दा आगबाळुल.
MAR 13:19 यतिकी आ दिन हिंग बरबाद ईनव ईत्‍तव कि दुनिया अन्द सुरूवात टु, जो परमेश्वर रच्यान, ईगासताका ना रा आग्याव अदिक ना बाक यागलु आदव.
MAR 13:20 अगर प्रभु आ दिनगोळी ईला घटुसायदुन, रा यातोदु प्राणी भी ईला ऊळाईत; लेकीन आ निवळुस्कु आग्यार आ लॉकुर कारण यारी आव निवळुसदुन, आ दिनगोळी गोर्त माळ्यान.
MAR 13:21 आ समय दा अगर यावारा नीम से अंदान; नोळी, मसीह ईल आन, या नोळी, अल आन, रा विश्वास माळबाळेतीर;
MAR 13:22 यतिकी ख्वाटा मसीह अदिक ख्वाटा भविष्यवक्ता यदकु निदर्‍यार, अदिक हिंग-हिंग चमत्कार अदिक अदभुत क्याल्सा तोरस्यार कि अगर आग सकुल रा निवळुस्कु आग्यार आ लॉकुरी भी बैकुश बुळुल.
MAR 13:23 लेकीन नीव सावधान ईरी: नोळी, ना नीमी सप्पा मात पयले टु ना हेळ बुटीन.
MAR 13:24 “आ दिन दा, आ बरबाद इन बाद्दा दा सुरज अंधार आगेदीत, अदिक चन्द्रमा उजुळ कोळतीदील;
MAR 13:25 अदिक आकाश टु तारागन बिळली हत्‍तेव; अदिक आकाश ईनव शक्तिगोळी हालुसेदव.”
MAR 13:26 आग लॉकुर ना मंळसा अन पार उक धोळ्द सामर्थ्य अदिक महिमा अन्द सांगुळ बादल दा बरतेला नोळ्यार.
MAR 13:27 आ समय आव तानव स्वर्गदूतगोळी कळुकु, पृथ्वी इन ईद भाग टु हुळकु आ भाग ताका, नाकु दिशा दी टु परमेश्वर तान निवळुस्द लॉकुरी जमा माळ्यान.
MAR 13:28 “अंजीर इन मार टु ईद उदाहरण कली: याग अदुर्द डगाली मुलायम आगताव, अदिक याल्ला होळली हतताव; रा नीव जान्स कोमतीर कि बिसुल इन दिन हात्‍ती आव.”
MAR 13:29 ईदा प्रकार याग नीव ईव मातगोळी आगतेला नोळीर, रा जान्स कोमी कि नान बरोद समय हात्‍ती आद.
MAR 13:30 ना नीम से खरा अनतीन कि यागासताका इव सप्पा मातगोळ पुरा आगालव, आगासताका ई पीढ़ी नोर लॉकुर सायतीदील.
MAR 13:31 आकाश अदिक पृथ्वी टलुसेदित, लेकीन नान मात्‍तगोळ यागलु टलुसतीदिल.
MAR 13:32 “आ दिन या आ घळी अन्द बारा दा यारू जान्सालुर, ना स्वर्ग ईनव स्वर्गदूत अदिक ना मंळसा अन पार; लेकीन सिर्फ आप्प जान्सतान.
MAR 13:33 नोळी, सावधान ईरी अदिक जाग्सतेला ईरी; यतिकी नीव जान्सालीर कि अद घळी याग बंदीत.
MAR 13:34 ईद आ मंळसा अन्द ह्यांग दशा आद, जो यात्रा दा होगाहोती तान मान्ना बिटकु होगुल, अदिक तान दासगोळी अधिकार कोळुल: अदिक हर ऊंद मंळसा अक आऊंद क्याल्सा हेळबुळुल, अदिक चौकीदार उक जाग्सतेला ईरोद आग्या कोळुल.”
MAR 13:35 इदुरसाटी जाग्सतेला ईरी, यतिकी नीव जान्सालीर कि मान्ना नव मालिक याग बंदान, द्यावगा या आरधा ईळ्लकी, या हुंज कुगतद आ घळी या व्हातुर आगोर से पयले.
MAR 13:36 हिंग आगबाळुल कि आव अचानक बंदकु नामी मिंगतेला नोळबाळुल.
MAR 13:37 अदिक जो ना नीम से अनेतीन, अदा सप्पा मुंदुर से अनतीन: “जाग्सतेला ईरी!”
MAR 14:1 येढ्ढ दिन इन बाद्दा फसह अदिक अखमीरी रोट्टी अन्द हाब्ब आगोद ईरोद. प्रधान याजक अदिक नियम इन गुरु ईद मात इन खोज दा ईरोर कि आऊक ह्यांग कपट देल हुळकु कोनदेव;
MAR 14:2 लेकीन अनतोगोर, “हाब्ब इन रोज हिंग ईला, ईलारा लॉकुर दा झगळा आगेदीत.”
MAR 14:3 याग यीशु बैतनिय्याह दा शमौन कोढ़ी यारी कोढ़ इन रोग ईरोद आऊन मान्या ऊमली कुर्तकु ईरोन, आग ऊंद आर्त संगमरमर इन बाटुल दा जटामांसी अन्द बार्र शुद्ध अत्‍तर हुळकु बंदुर; अदिक बाटुल इक मुरूकु अत्‍तर इक यीशु उन ताल्ला मा लपटुसदुर.
MAR 14:4 लेकीन यारारा यारारा तान मन दा कुळकुळुस्कु अनली कुरतुर, “ईद अत्‍तर इन येती सत्यानाश माळकु आत?
MAR 14:5 इदुर मा यीशु अंदुन येती ईद अत्‍तर इक मुर सौ दीनार से यक्कुल बार्र दा मारकु कंगालगोळ दा वाटस्कु आग सकोद.” अदिक आंदुर आक इक दनकुस्ली कुरतुर.
MAR 14:6 यीशु अंदुन, “आकी बिट्ट बुळी; आकी येती सतुसतीर? आक रा नान सांगुळ भलाई माळदुर.
MAR 14:7 कंगाल नीम सांगुळ हमेशा ईरतार, अदिक नीव याग चाहासीर आग आंदुर से भलाई माळ सकतीर; पर ना नीम सांगुळ हमेशा ईरतीदील.
MAR 14:8 जो येनारा आक माळसकोर, आक माळदुर; आक नान नळसोद तयारी दा पयले टु ना नांद शरीर मा अत्‍तर मलुस्यार.
MAR 14:9 ना नीम से खरा माताळतीन कि पुरा दुनिया दा येल्यारा भी खुशखबरी प्रचार माळदुर दा बंदीत, अल आक इन ईद क्याल्सा अन्द चर्चा भी आक इन याद दा माळकु आदीत.”
MAR 14:10 आग यहूदा इस्करियोती जो हन्नेळ चेलागोळ दा टु ऊंद ईरोन, प्रधान याजकगोळ हात्‍ती होदुन कि यीशु उक आंदुर्द कय देल हुळसुसकु आंदरी सौप्स बुळुल.
MAR 14:11 आंदुर ईद केळकु खुश आदुर, अदिक आऊक पैस्या कोळोद स्वीकार माळदुर; अदिक आव मवका नोळोन कि आऊक ह्यांगारा भी प्रकार देल हुळसुसकु आंदुर्द कय दा सौप्स बुळुल.
MAR 14:12 अखमीरी रोट्टी इन हाब्ब इन पयला दिन, यदुर्दा आंदुर फसह दा म्यांडा अन्द पाड्डा अन्द बलिदान माळतोगोर, यीशु उन चेलागोळ आऊक केळदुर, “नी येन चाहासत्या कि नाव होगकु नीन साटी फसह तिनोद तयारी माळेव?”
MAR 14:13 यीशु तान चेलागोळ दा टु येढ्ढ मुंदरी ईद अनकु कळुदुन, “नगर दा होगी, अदिक ऊंद मंळसा नीर इन माळका नेगुत नीमी सिक्यान, आऊंद हिंद आगेगेतीर;
MAR 14:14 अदिक आव याता मान्या होदान, आ मान्ना अन्द मालिक से अनेतीर, ‘गुरु अनतान कि पाऊनागोळ्द ईरोद जागा पाऊनागोळ्द कमरा यल आद यदुर्दा ना तान चेलागोळ सांगुळ फसह तिनाईन अद जागा यल आद?’
MAR 14:15 आव नीमी ऊंद सजुस्कु सजुस्द, अदिक तयार माळ्द धोळ्द म्याकळोद ठिकान तोरस्यान, अल नाम साटी फसह तिनोद तयारी माळेतीर.”
MAR 14:16 चेलागोळ अल टु होट्टकु नगर दा बंदुर, अदिक ह्यांग यीशु आंदुर से अंदिदुन, हांग अच सिक्त; अदिक आंदुर फसह तिनोद तयारी माळदुर.
MAR 14:17 याग द्याव आत, रा आव हन्नेळ चेलागोळ सांगुळ बंदुन.
MAR 14:18 याग आंदुर कुर्तकु ऊमोर, रा यीशु चेलागोळ से अंदुन, “ना नीम से खरा अनतीन कि नीम दा टु ऊंद, जो नान सांगुळ ऊमेत्यान, आव नानी ध्वाका देल हुळसुसकु दुश्मनगोळ कय दा सौप्स कोंडान.”
MAR 14:19 अदिक चेलागोळ मा उदासी छासेत अदिक आंदुर ऊंद ऊंद माळकु यीशु उक अनली कुरतुर, “येन आव ना हुईन?”
MAR 14:20 यीशु आंदुर से अंदुन, “आंदुर नीम हन्नेळ दा टु ऊंद आन, जो नान सांगुळ तंळग्या दा कय हाकतान.
MAR 14:21 यतिकी ना मंळसा अन पार, ह्यांग नान बारा दा लिख्सकु आग्याद, लेकीन आ मंळसा अन मा हाय याऊन द्वारा ना मंळसा अन पार उक हुळसुसकु आदीत अदिक सौप्सकु आदीत! अगर आ मंळसा अन्द जनम अच ईला आगाईत, रा आऊन साटी भला आगाईत.”
MAR 14:22 याग यीशु अदिक आऊन चेलागोळ ऊमतेला अच ईरोर, आव रोट्टी ताकोंडुन, अदिक परमेश्वर उक धन्यवाद कोटकु मुरदुन, अदिक आव चेलागोळी भी कोट्टुन, अदिक अंदुन, “हुडी, ईद नान शरीर हुन.”
MAR 14:23 बाक यीशु कटोरा हुळकु परमेश्वर उक धन्यवाद माळदुन, अदिक आंदरी कोट्टुन; अदिक आंदुर सप्पा मुंदुर अदुर दा टु कुळदुर.
MAR 14:24 अदिक यीशु चेलागोळ से अंदुन, “अद नान खुन हुन, जो हापाळ मुंदुर साटी वाहुसकु आगतद,” ईद प्रमाणित माळतद कि परमेश्वर अदिक मंळसा अन न्याड्या व्हाशोद वाचा अक दर्शुसतद.
MAR 14:25 “ना नीम से खरा अनतीन कि अंगुर इन रास्सा आ दिन ताका बाक यागलु कुडुतीदील, यागासताका परमेश्वर उन राज्य दा ना व्हाशोद अंगुर इन रास्सा ना कुडुतीदील.”
MAR 14:26 बाक आंदुर भजन हाळ हाळकु व्हार्या जैतून पहाळी मा होदुर.
MAR 14:27 आग यीशु चेलागोळ से अंदुन, “नीव नानी बिटकु ओळीर, यतिकी शास्त्र हिंग अच अनतद: ‘ना रखवाला अक कोनाईन, अदिक म्यांडा तितर-बितर आगेदव.’
MAR 14:28 लेकीन ना तान जित्‍ता आगदुर बाद्दा नीम से पयले गलील इक होगाईन.”
MAR 14:29 पतरस आऊन से अंदुन, “अगर सब नीनी बिट्टार रा बिट्टार, पर ना नीनी बिटकु होगालीन.”
MAR 14:30 यीशु आऊन से अंदुन, “ना नीन से खरा अनतीन कि ईंदल्या ईदा ईळ्लक इक हुंज इन येढ्ढ घन कुग्गोर से पयले, नी मुर घन नान इनकार माळ्या.”
MAR 14:31 बाक पतरस अदिक जोर कोटकु अंदुन, “अगर नानी नीन सांगुळ सायोद भी बिद्दीत, तरी ना नीन इनकार यागलु माळतीदील.” ईदा प्रकार देल अदिक सप्पा मुंदुर भी अंदुर.
MAR 14:32 बाक यीशु अदिक आऊन चेलागोळ गतसमनी हेसुर इन ऊंद जागा दा बंदुर, अदिक आव तान चेलागोळ से अंदुन, “ईल कुर्तकु ईरी, आगासताका ना प्रार्थना माळतीन.”
MAR 14:33 अदिक आव पतरस अदिक याकूब अदिक यूहन्ना अक तान सांगुळ ओतुन; अदिक च्याच दुखी अदिक व्याकुल आगली कुरतुन,
MAR 14:34 अदिक आंदुर से अंदुन, “नान मन च्याच उदास आद, ईल ताका कि ना सायोर मा आईन: नीव ईल रूकसी, अदिक जाग्सतेला ईरी.”
MAR 14:35 बाक आव थ्वाळासा मुंद होदुन अदिक धरती मा बिदकु प्रार्थना माळली कुरतुन कि अगर आग सकुल रा ईद घळी नान मा टु टल्सेगुल,
MAR 14:36 अदिक अंदुन, “हे बाबा, हे आप्पा, नीन से सप्पा येनारा आग सकतद; ईद दुख इन कटोरा अक नान हाती टु हटुसबुळ: तौभी ह्यांग ना चाहासतीन हांग ईला, पर जो नी चाहासत्या अदा आगुल.”
MAR 14:37 बाक यीशु वापस बंदुन अदिक नोळदुन कि मुरू चेलागोळ मिंगेग्यार ईद नोळकु पतरस से अंदुन, “हे शमौन, नी मिंगेत्या? येन नी ऊंद तास भी जाग्स सकिदील?
MAR 14:38 जाग्सतेला अदिक प्रार्थना माळतेला ईरी कि नीव परीक्षा दा बिळबाळी. आत्मा अन्द रा इच्छा आद, पर मय कमजोर आद.”
MAR 14:39 अदिक यीशु बाक ओळेदुन अदिक अवा शब्दगोळ्दा प्रार्थना माळली कुरतुन.
MAR 14:40 बाक यीशु बंदकु आंदरी मिंगत नोळदुन, यतिकी आंदुर अव कण्णगोळ जप देल तुमकु ईरव; अदिक ईला जान्सोर कि आऊक येन उत्‍तर कोट्टेव.
MAR 14:41 बाक यीशु तिसरा गन बंदकु आंदुर से अंदुन, “ईग भी नीव मिंगेतीर अदिक आराम माळेतीर? नोळी, घळी होट्ट बंदाद; नोळी ना मंळसा अन पार पापीगोळ्द कय देल हुळकु सौप्सकु आगाईन.
MAR 14:42 येळी, होगाता! नोळी, नानी ध्वाका देल हुळसुस्कु सौप्सावाळा नान हात्‍ती होट्ट बंदान!”
MAR 14:43 यीशु ईद अनतेला अच ईरोन कि यहूदा जो हन्नेळ चेलागोळ दा टु ऊंद ईरोन, आऊन हात्‍ती बंदुन. अदिक तान सांगुळ प्रधान याजक अदिक शास्त्रीगोळ अदिक स्याणागोळ्द द्वारा ऊंद धोळ्द भीळ कळुकु आगीत, जो तलवार अदिक कोलगोळ हुळकु बंदीदुर.
MAR 14:44 यीशु उक हुळसुस्कु सौप्सावाळा आंदरी ईद पता कोटीदुन कि याऊक ना चुम्मा ताकोमाईन आवा मंळसा हुन, आऊक हुळकु शंकलीगोळ देल कटकु सावधानी देल वयेतीर ताकी आव ओळ बाळुल.
MAR 14:45 यहूदा बंदुन, अदिक तुरन्त यीशु उन हात्‍ती होगकु अंदुन, “हे गुरु!” अदिक आऊन चुम्मा ताकोंडुन.
MAR 14:46 आग आंदुर यीशु मा कय हाक्‍कु आऊक हुडुकोंडुर अदिक कठ कोंडुर.
MAR 14:47 आंदुर दा टु जो हात्‍ती नीदुरकु ईरोर, ऊंद मंळसा तलवार जेळकु महायाजक उन सेवक मा नळ्सदुन, अदिक आऊंद किव हार्स बुट्टुन.
MAR 14:48 यीशु आंदुर से अंदुन, “येन ना यावारा अपराधी हुईन, जो नानी हुडोर साटी तलवार अदिक कोलगोळ हुळकु बंदीर?
MAR 14:49 ना रा हर रोज मंदिर दा नीम सांगुळ ईतकु उपदेश कोळतोगीन, अदिक आग नीव नानी हुळदीदिल: लेकीन ईद इदुरसाटी आग्याद कि शास्त्र अन्द मात पुरा आगुल.”
MAR 14:50 इव मातगोळ केळकु आऊन सप्पा चेलागोळ आऊक आबना बिटकु वोळेदुर.
MAR 14:51 ऊंद हारोदव पार तान दंगदंगा मय मा लुंगी होदुकु यीशु उन हिंद-हिंद होगोन; अदिक लॉकुर आऊक हुडोद कोशिश माळदुर.
MAR 14:52 अदिक आव लुंगी बिटकु नंगा ओळेदुन.
MAR 14:53 बाक आंदुर यीशु उक महायाजक उन मान्नी तंदुर; अदिक सब प्रधान याजक अदिक स्याणा अदिक नियम इन गुरु आऊन मान्या जमा आगेदुर.
MAR 14:54 पतरस दुर दुर टु आऊंद हिंद-हिंद महायाजक उन आंगुळ इन बुळ्क ताका होदुन, अदिक आव पहरेदारगोळ सांगुळ कुर्तकु बेक्‍की सेक्सली कुरतुन.
MAR 14:55 प्रधान याजक अदिक सप्पा यहूदीगोळ्द महासभा यीशु उक कोंद बुळोरसाठी आऊंद विरोध दा गवाही इन खोज दा ईरोर, पर आऊंद विरोध दा यातोद भी सबुत सिकिदील.
MAR 14:56 यतिकी हापाळ सा लॉकुर यीशु उन विरोध दा ख्वाटा गवाही कोळोर, पर आंदुर्द गवाही ऊंद सारखा ईला ईरोद.
MAR 14:57 आग येनारा लॉकुर यदकु यीशु उन खिलाप ईद ख्वाटा गवाही कोळली कुरतुर,
MAR 14:58 “नाव ईऊक ईद अन्त केळेव, ना ईद मंळसागोळ्द कय देल माळ्द ईद मंदिर इक केळ्द बुळाईन, अदिक मुर दिन दा दुसरा माळाईन, जो मंळसागोळ्द कय देल माळकु ईरतीदील.”
MAR 14:59 ईदुर मा भी आंदुर्द गवाही ऊंद सारखा होटीदिल.
MAR 14:60 आग महायाजक न्याड्या दा नीदुरकु यीशु से केळदुन, “नी येनु उत्‍तर कोळाल? ई लॉकुर नीन विरोध दा येन गवाही कोळतार?”
MAR 14:61 लेकीन यीशु सुंगा ईत्‍तुन, अदिक आव येनु उत्‍तर कोटीदील. महायाजक आऊन से मात्‍त केळदुन, “येन नी आ परमधन्य परमेश्वर उन पार मसीह हुय?”
MAR 14:62 यीशु अंदुन, हाव “ना हुईन: अदिक नीव मंळसा अन पार उक सर्वशक्तिमान इन ऊम्मा कय दी कुर्त, अदिक आकाश इन बादल इन सांगुळ बर्त नोळीर.”
MAR 14:63 आग महायाजक तानव फळक्या हरकु अंदुन, “ईग नामी यक्कुल गवाहगोळ्द येन जरवत आद?”
MAR 14:64 “येन नीव केळीदील, कि ईव परमेश्वर उन अपमान माळतान. ईग नीम्द येन राय आद?” आ सप्पा लॉकुर आऊक अपराधी ठहरूसतेला अंदुर, कि ईऊक जीव दण्ड सीक पायजे.
MAR 14:65 आग यारारा आऊन मा उगुळली कुरतुर, अदिक यारारा आऊन कण्णगोळ मा पट्टी कटकु आऊक बुक्‍का बडुली कुरतुर, अदिक आऊन से अनली कुरतुर, “भविष्यवाणी माळ.” नीनी यार बळदुर, अदिक पहरेदारगोळ आऊक हुळकु क्याबरा बळदुर.
MAR 14:66 याग पतरस ल्यालमा आंगुळ दा ईरोन, रा महायाजक इन दासीगोळ दा टु ऊंद दासी अल बंदुर.
MAR 14:67 अदिक आ दासीगीत पतरस उक बेक्‍की सेक्सत नोळकु आऊक टकटकी हचकु नोळदुर अदिक अनली कुरतुर, “नी भी रा आ नासरी यीशु उन सांगुळ ईर्या.”
MAR 14:68 अदिक आव बदलुसेदुन, अदिक अंदुन, “ना जान्सालीन अदिक ना सम्सालीन कि नी येन अनेत्या.” बाक आव अल टु दरवाजा ताका होदुन; अदिक आटा होती हुंज कुग्त.
MAR 14:69 आ दासी आऊक नोळकु आंदुर से अंदुर जो आऊन हात्‍ती नीदुरकु ईरोर, “ईव मंळसा आंदुर दा टु ऊंद हुन.”
MAR 14:70 लेकीन आव मात्‍त बदलुसेदुन. घळी तिमुर बाद्दा दा आंदुर जो हात्‍ती नीदुरकु ईरोर मात्‍त पतरस से अंदुर, “खरा दा नी आंदुर दा टु ऊंद हुय; यतिकी नी गलीली भी हुय.”
MAR 14:71 आग आव इनकार माळकु अनली कुरतुन कि ना किर्‍या तिनकु खरा अनतीन, “ना आ मंळसा अक, यार्द नीव मातचीत माळेतीर, ना अरालीन.”
MAR 14:72 बाक तुरन्त दुसरा घन हुंज कुग्त. अदिक पतरस उक अद मात जो यीशु आऊन से अंदिदुन याद बत्‍त: “हुंज इन येढ्ढ घन कुग्गोर से पयले नी मुर घन नान इनकार माळ्या.” अदिक आव ईद मात इक सोचकु आव वर्लली कुरतुन.
MAR 15:1 व्हातुर आगतेला अच तुरन्त प्रधान याजकगोळ, स्याणागोळ, अदिक शास्त्रीगोळ उलटा सप्पा यहूदी महासभा आपस दा सलाह माळकु यीशु उक कट्सुसदुर, अदिक आऊक वोतकु पिलातुस उन कय दा सौप्सदुर.
MAR 15:2 पिलातुस आऊन से केळदुन, “येन नी यहूदीगोळ्द राजा हुय?” यीशु आऊक उत्‍तर कोट्टुन, हव “ह्यांग नी खुद अच अनत्या.”
MAR 15:3 प्रधान याजक आऊन मा हापाळ मात ईनव दोष हच्चोर.
MAR 15:4 पिलातुस यीशु से मात्‍त केळदुन, “येन नी येनु उत्‍तर कोळाल? नोळ इंदुर नीन मा यास मात ईनव दोष हचीत्यार!”
MAR 15:5 यीशु फिर भी येनु उत्‍तर कोटीदील; ईल ताका कि पिलातुस उक बळा आश्चर्य आत.
MAR 15:6 हर ऊंद फसह हाब्ब इन घळी दा पिलातुस यावारा भी ऊंद कैदी इक यारी यहूदी लॉकुर चाहासतोगोर, आऊक आंदुर साठी बिट्टबुळ तोगोन.
MAR 15:7 बरअब्बा हेसुर ईनव ऊंद मंळसा ईरोन जो आ विद्रोह इन सांगुळ कैदी ईरोन, जो रोमन सरकार उन खिलाप विद्रोह दा हत्या माळीदुर.
MAR 15:8 अदिक भीळ म्याकुच होगकु पिलातुस से विनती माळली कुर्त, कि ह्यांग नी नाम साटी माळतेला बंद्या हांग अच माळ.
MAR 15:9 पिलातुस आंदरी उत्‍तर कोट्टुन, “येन नीव चाहासतीर कि ना नीम साटी यहूदीगोळ राजा अक बिट बुळाईन?”
MAR 15:10 यतिकी पिलातुस जानसोन कि प्रधान याजकगोळ आऊक सिट्ट देल सौप्सीदुर.
MAR 15:11 लेकीन प्रधान याजकगोळ लॉकुरी येर्सदुर कि आव बरअब्बा अक अच आंदुर साठी बीटबुळुल.
MAR 15:12 ईद केळकु पिलातुस आंदुर से मात्‍त केळदुन, “रा यारी नीव यहूदीगोळव राजा अनतीर, आऊक ना येन माळाईन?”
MAR 15:13 आंदुर मात्‍त चिळ्लासदुर, अदिक अंदुर “आऊक क्रूस मा येर्सबुळी!”
MAR 15:14 पिलातुस आंदुर से अंदुन, “येती ईव येन बुराई माळ्यान?” लेकीन आंदुर मात्‍त अदिक चिल्ळासदुर, “आऊक क्रूस मा येर्सबुळी!”
MAR 15:15 आग पिलातुस भीळ इक खुश माळोद इच्छा देल, बरअब्बा अक आंदुर साठी बिट्ट बुटुन, अदिक यीशु उक कोळागोळ देल बळकु सौप्सदुर कि क्रूस मा येरसुल.
MAR 15:16 सैनिकगोळ यीशु उक किला अन्द बुळ्क राज्यपाल उन मान्ना अन्द आंगुळ दा ओतुर जो प्रीटोरियुम कहलुसतद, अदिक बाकी नोर रोमी सिपाईगोळी कारूकु तंदुर.
MAR 15:17 आग आंदुर आऊक जांभळा रंग इन कपळा हाक्सुसदुर अदिक मुळ्ल इन मुकुट माळकु आऊन ताल्ला मा मंळ्सदुर,
MAR 15:18 अदिक ईद अनकु आऊक नमस्कार माळली कुरतुर, “हे यहूदीगोळ राजा, नीन जय आगुल!”
MAR 15:19 आंदुर आऊन ताल्ला मा सरकण्डा बडोर, अदिक आऊन मा ऊग्ळोर, अदिक ट्वांगरा टेक्सकु आऊक प्रणाम माळतेला ईत्‍तुर.
MAR 15:20 याग आंदुर आऊंद मज्याक हार्सकोंड्डुर, रा आऊन मय मा कळ्व जाभळा रंग इन फळक्या ईळ्सकु आऊन अवा कपळा मात हाक्सुसदुर; अदिक आग आऊक क्रूस मा येरसोर साठी व्हार्या ओतुर.
MAR 15:21 आंदरी कुरेन ईनव ईरावाळा शमौन हेसुर ईनव मंळसा, हादी मा सिकदुन. आव ऊरी टु बरोन. अदिक आव सिकन्दर अदिक रूफुस उन आप्प ईरोन. सिपाहीगोळ आऊन मा जबरदस्ती दबाव हाकदुर कि आव यीशु उन क्रूस नेगुकु नळदान.
MAR 15:22 आंदुर यीशु उक गुलगुता हेसुर इन जागा मा तंदुर, यदुर मतलब खोपळी इन जागा हुन.
MAR 15:23 अल यीशु उक केय मसाला मीसळुस्द अंगुर इन रास्सा कोळली कुरतुर, लेकीन आव ताकोंडीदील.
MAR 15:24 आग आंदुर आऊक क्रूस मा येर्सदुर अदिक आऊन कपळा मा चिट्ठी गोळ हाक्‍कु, कि यारीक येन सिक्‍कीत, अवरी वाट्स बुटुर.
MAR 15:25 याग आंदुर आऊक क्रूस मा येर्सदुर रा व्हातरी नव ऊंम्बत मुरदिदव.
MAR 15:26 अदिक आऊन दोषपत्र लिख्सकु क्रूस मा आऊंद ताल्ला अन्द म्याकुच चिपकुस बुटुर “यहूदीगोळ राजा.”
MAR 15:27 आंदुर आऊन सांगुळ येढ्ढ डाकूगोळी भी क्रूस मा येर्सदुर, ऊंद डाकू उक ऊमा कय दी अदिक दुसरा डाकू उक डाक्या कय दी क्रूस मा येर्सदुर.
MAR 15:28 आग पवित्रशास्त्र अन्द अद वचन कि आऊक अपराधीगोळ सांगुळ आळुकु आदीत, पुरा आत.
MAR 15:29 अदिक हादी मा टु होगावाळेर ताल्ला हालु-हालुस्कु अदिक ईद अन-अनकु आऊंद अपमान माळतोगोर, “वाह. मंदिर इक केळावाळा, अदिक मुर दिन दा माळावाळा!
MAR 15:30 तान तान इक ऊळ्स अदिक क्रूस मा टु ईळुकु बा.”
MAR 15:31 ईदा रीति देल प्रधान याजक भी, शास्त्रीगोळ सांगुळ, आपस दा आऊंद मज्याक हार्सकु अनतोगोर, “ईव रा दुसरा अक ऊळस्यान,” लेकीन तान तान इक ऊळ्स सकालुन.
MAR 15:32 इस्त्राएल इन राजा, मसीह, ईग क्रूस मा टु ईळ्दकु बर कि नाव नोळकु विश्वास माळेव. अदिक जो आऊन सांगुळ क्रूस मा येर्सकु आगीदुर, आंदुर भी आऊन नीम्दा माळतोगोर.
MAR 15:33 याग दुसरा पहर आत रा पुरा द्याश दा अंधार आगेत अदिक मुर मुरास ताका हांग अच ईत्‍त.
MAR 15:34 अदिक मुर मुरा दी यीशु हापाळ धोळ्द शब्द दा चिल्ळास्कु अंदुन, “इलोई, इलोई, लमा शबक्तनी?” यदुर्द मतलब हुन, “हे नान परमेश्वर, हे नान परमेश्वर, नी नानी येती बिटबुट?”
MAR 15:35 आग जो आऊन हात्‍ती ईरोर आंदुर दा टु आरधा लॉकुर ईद केळकु अनली कुरतुर, “नोळी, आव एलिय्याह अक कारेत्यान.”
MAR 15:36 अदिक ऊंद मंळसा ओळकु स्पंज इक सिरके दा नेनाकदुन, अदिक सरकण्डे मा ईटकु आऊक नेक्सदुन अदिक अंदुन, “थाम्सेगी, नोळाता एलिय्याह आऊक ईळसोर साटी बरतान का ईला.”
MAR 15:37 आग यीशु धोळ्द शब्द दा चिल्ळास्कु जीव बिट बुटुन.
MAR 15:38 अदिक मंदिर इन परदा म्याकुच टु ल्यालमा ताका हरूकु येढ्ढ तुकळा आगेत.
MAR 15:39 जो सुबेदार आऊन मुंद नीदुरकु ईरोन, याग आऊक हिंग चिल्ळास्कु जीव बीळतेला नोळदुन, रा आव अंदुन, “खरा ई आद ईव मंळसा, परमेश्वर उन पार ईरोन!”
MAR 15:40 हापाळ आर्तेर भी दुर टु नोळतोगोर: आंदुर्दा मरियम मगदलीनी, स्याणेव याकूब अदिक योसेस उन मोय मरियम, अदिक सलोमी ईरोर.
MAR 15:41 याग आव गलील दा ईरोन रा इंदुर आऊंद हिंद आगेगोर; अदिक आऊंद स्यावा टहल माळतोगोर; अदिक दुसरा हापाळ आर्तेर भी ईरोर, जो आऊन सांगुळ यरूशलेम दा बंदीदुर.
MAR 15:42 याग द्याव मुळकेत रा इदुरसाटी कि तयार इन दिन ईरोद, जो आराम इन ऊंद दिन पयले ईरतद,
MAR 15:43 अरिमतिया नव ईरावाळा यूसुफ बंदुन, जो महासभा दव सदस्य ईरोन अदिक तावा परमेश्वर उन राज्य अन्द हादी कायोन. आव हिम्मत माळकु पिलातुस उन हात्‍ती होगकु यीशु उन लाश बेळदुन.
MAR 15:44 पिलातुस उक आश्चर्य आत कि आऊंद जीव ईट जल्दी होटोत; अदिक आव सुबेदार उक कारूकु केळदुन, “येन आव सोतोग्यान?”
MAR 15:45 याग आव सुबेदार उन बाय देल हाल केळदुन, रा लाश यूसुफ उक बेळ कोट्टुन.
MAR 15:46 आग आव मलमल इन ऊंद चादर कोंडुन, अदिक लाश इक ईळ्सकु आ चादर दा गुंळ्सदुन, अदिक ऊंद कब्र दा जो चट्टान दा अगुळकु आगीत ईटदुन, अदिक कब्र अन्द दरवाजा मा ऊंद कल्ल ढकलुसदुन.
MAR 15:47 मरियम मगदलीनी अदिक योसेस उन मोय मरियम नोळतोगोर कि आऊक येल ईटकु आग्याद.
MAR 16:1 याग आराम इन दिन बितसेत, रा मरियम मगदलीनी, अदिक याकूब उन मोय मरियम, अदिक सलोमी सुगन्धित अत्‍तर कोंडुर अदिक बंदकु यीशु उन लाश मा हच्चेव.
MAR 16:2 यहूदीगोळ्द अनुसार हप्ता अन्द पयला दिन आयत्यार इन व्हातर्या अन्द आर मुरा याग सुर्य होळ्त, आंदुर कब्र मा बंदुर,
MAR 16:3 अदिक आपस दा अनतोगोर, “नाम साटी कब्र अन्द दरवाजा मा टु कल्ल याव ढकलुस्यान?”
MAR 16:4 कल्ल हापाळ धोळ्द ईरोद. याग आंदुर कण्ण नेगुकु नोळदुर रा कल्ल कब्र टु हटुस्कु ईरोद.
MAR 16:5 आ आर्तेर याग कब्र अन्द बुळ्क होदुर रा आंदुर ऊंद स्वर्गदूत उक हारोदव मंळसा अन घाई बिळेव कपळा मा ऊमा कय दी कुर्तकु नोळदुर, अदिक हापाळ अंजेदुर.
MAR 16:6 स्वर्गदूत आंदुर से अंदुर, “अंजबाळी, नीव नासरत इन यीशु उक ढुंढ़सेतीर, याऊक क्रूस मा येर्सकु आगीत. आव जित्‍ता आग्यान, ईल हैलेच; नोळी, ईदा अद जागा हुन, यल आंदुर आऊक ईटीदुर.
MAR 16:7 लेकीन नीव होगी, अदिक आऊन चेलागोळ अदिक पतरस से अनी कि आव नीम से पयले गलील इक होदान. ह्यांग आव नीम से अंदिदुन, नीव अल्या आऊक नोळीर.”
MAR 16:8 अदिक आ आर्तेर होटकु कब्र टु वोळेदुर; यतिकी थरथराहट अदिक घबराहट आंदुर मय दा तुम्मेगीत; अदिक आंदुर यारदारा से येनु अंदिदील, यतिकी आंदुर हापाळ अंजकु ईरोर.
MAR 16:9 आयत्यार इक व्हातुर आगतेला अच यीशु जित्‍ता आगकु पयले मरियम मगदलीनी इक कांळ्सदुन. आकिन दा टु आव येळ दुष्टआत्मागोळ तेगदीदुन.
MAR 16:10 आक होगकु यीशु उन संगीगोळी जो शोक दा मुळ्ककु ईरोर अदिक वोरलोर, ईद समाचार कोट्टुर.
MAR 16:11 आंदुर ईद केळदुर कि यीशु जित्‍ता आन अदिक मरियम मगदलीनी आऊक नोळ्यार, रा आंदुर आकिन मातगोळ मा विश्वास माळीदील.
MAR 16:12 ईदुर बाद्दा दा यीशु दुसरा रूप दा आंदुर दा टु येढ्ढ चेलागोळी याग आंदुर ऊर इन दी होगोर, कांळ्सदुन.
MAR 16:13 आंदुर भी होगकु दुसरा चेलागोळी ईद समाचार कोट्टुर, लेकीन आंदुर फिर भी आंदुर्द मातगोळ मा विश्वास माळीदील.
MAR 16:14 यीशु आ हनुन चेलागोळी भी कांळ्सदुन, याग आंदुर ऊमली कुर्तीदुर, कांळ्सदुन, अदिक आंदुर्द अविश्वास अदिक मन इन कठोरता मा आंदरी दनकुसदुन, यतिकी यार आऊंद जित्‍ता आगदुर बाद्दा आऊक नोळीदुर, आंदुर आऊंद विश्वास माळीदिल.
MAR 16:15 अदिक यीशु चेलागोळ से अंदुन, “नीव पुरा दुनिया दा होगकु पुरा दुनिया अन लॉकुरी खुशखबरी प्रचार माळी.
MAR 16:16 जो विश्वास माळ्यार अदिक बपतिस्मा ताकोंडार आऊंदा उद्धार आदीत, लेकीन जो विश्वास माळतीदील आऊंद न्याय आदीत अदिक आऊक दोषी ठहरूस्कु आदीत;
MAR 16:17 विश्वास माळावाळेर दा ईव चिन्ह ईत्‍ताव कि आंदुर नान हेसुर देल दुष्टआत्मागोळी तेगदार, अदिक व्हासा व्हासा भाषा माताळ्यार,
MAR 16:18 अदिक आंदुर हाव इक नेगु कोंडार, अदिक अगर आंदुर जयर भी कुडु कोंडार रा आंदरी येनु नुकस्‍यान आगतीदील; आंदुर बिमारगोळ मा कय मंळस्यार, अदिक बिमार चंगा आगेदार.”
MAR 16:19 प्रभु यीशु आंदुर से माताळदुर बाद्दा दा स्वर्ग मा नेगुकु आदुन, अदिक परमेश्वर उन ऊम्मा कय दी कुरतुन.
MAR 16:20 अदिक आंदुर होटकु हर जागा मा प्रचार माळदुर, अदिक प्रभु आंदुर सांगुळ क्याल्सा माळतेला ईत्‍तुन, अदिक आ चिन्ह अन्द द्वारा जो सांगुळ सांगुळ आगतोगोव, वचन इक मजबूत माळतेला ईरोन. आमीन.
LUK 1:1 श्रीमान थियुफिलुस, हापाळ सा लॉकुर आ मातगोळी जो नाम न्याड्या दा घळुस्याव, इतिहास लिखसोर साटी कय हच्यार,
LUK 1:2 ह्यांग कि आंदुर जो पयले टु ना ई मातगोळव नोळावाळेर अदिक खुशखबरी इन प्रचार माळावाळेर सेवक ईरोर, नाम ताका पोहचुसदुर.
LUK 1:3 इदुरसाटी, थियुफिलुस नानी भी ईद उचित मालूम आत कि आ सप्पा मातगोळ्द पुरा हाल सुरू टु वळ्लीसा-वळ्लीसा जाँच माळकु, आंदरी नीन साटी क्रम इन अनुसार लिख्साईन.
LUK 1:4 ना ईद इदुरसाटी लिख्सदीन ताकी नीमी पुरा हकिगत यकीन मालूम आगेगुल.
LUK 1:5 यहूदीगोळव राजा हेरोदेस उन समय अबिय्याह अन्द दल दा जकरयाह हेसुर ईनव ऊंद याजक ईरोन, अदिक आऊन हिंग्स हारून इन वंश इनोर ईरोर आकिन हेसुर इलीशिबा ईरोद.
LUK 1:6 आंदुर येढ्ढु मुंदुर परमेश्वर उन नजर दा न्यायी ईरोर, अदिक प्रभु उन सप्पा आग्यागोळ मा अदिक सप्पा विधीगोळ मा निर्दोष नळावाळेर ईरोर.
LUK 1:7 आंदुर्द यातोदु औलाद ईला ईरोद, यतिकी इलीशिबा वांझला ईरोर, अदिक आंदुर येढ्ढु मुंदुर बाट्ट हाळामुंड ईरोर.
LUK 1:8 याग जकरयाह तान दल इन पारी मा परमेश्वर उन मुंद याजक उन क्याल्सा माळोन,
LUK 1:9 रा याजकगोळ्द रीति इन अनुसार आऊन हेसुर मा चिट्ठी होळ्त कि प्रभु उन मंदिर दा होगकु धूप होताकुल.
LUK 1:10 धूप होताका समय लॉकुर्द सप्पा मंडली व्हार्या प्रार्थना माळोद.
LUK 1:11 आ समय प्रभु उन ऊंद स्वर्गदूत धूप इन वेदी इन ऊम्मा कय दी नीदुरकु आऊन मुंद प्रगट आदुन.
LUK 1:12 जकरयाह आऊक नोळकु घबरूस्दुन अदिक आऊन मा धोळ्द अंज्क तुम्मेत.
LUK 1:13 लेकीन स्वर्गदूत आऊन से अंदुन, “हे जकरयाह, अंजबाळ, यतिकी नीन प्रार्थना केळकु आगेग्याद; अदिक नीन हिंग्स इलीशिबा देल नीन साटी ऊंद पार पैदा आदान, अदिक नी आऊन हेसुर यूहन्ना ईटेत.
LUK 1:14 आऊन जनम इन कारण नीनी खुशी अदिक हर्ष आदीत: अदिक हापाळ लॉकुर आऊन जनम इन कारण खुश आदार,
LUK 1:15 यतिकी आव प्रभु उन नजर दा महान आदान; अदिक अंगुर इन रास्सा अदिक सारा यागलु कुडुतीदील; अदिक तान मोय इन व्हाट्टा दा टु अच पवित्र आत्मा देल परिपुर्ण आगेदान;
LUK 1:16 अदिक इस्त्राएलगोळ दा टु हापाळ लॉकुरी आंदुर प्रभु परमेश्वर उन दी वापस तंदान.
LUK 1:17 आव एलिय्याह अन्द घाई आत्मा अदिक सामर्थ्य दा आगकु आऊन मुंद मुंद नळदान कि आप्प दादागोळ्द मन चिकोर-चिनगेर दी हतकु ईरूल; अदिक आग्या ईला मान्सावाळेर इक न्यायीगोळ्द घाई आंदुर समझ दा तरूल; अदिक प्रभु उन साटी ऊंद योग्य प्रजा तयार माळुल.”
LUK 1:18 जकरयाह स्वर्गदूत से केळदुन, “ना ईद ह्यांग जानसाईन? यतिकी ना रा हाळाबाट आईन; अदिक नान हिंग्स भी हाळामुंड आगेग्यार.”
LUK 1:19 स्वर्गदूत आऊक उत्‍तर कोट्टुन, “ना जिब्राईल हुईन, जो परमेश्वर उन मुंद निदुरकु ईरतीन; अदिक नानी नीन से मातगोळी हेळली अदिक नीनी ईद खुशखबरी केळ्सली नानी कळुकु आग्याद.
LUK 1:20 नोळ, या दिन ताका ई मातगोळ पुरा आगालव, आ दिन ताका नी मौन अवस्था दा ईत्या अदिक माताळ सकतीदिल, यतिकी नी नान मातगोळ्द जो तान समय मा पुरा आदव, ई नान वचनगोळ मा नी विश्वास माळीदिल.”
LUK 1:21 लॉकुर जकरयाह अन्द हादी कायतेला ईत्‍तुर अदिक आश्चर्य माळली कुरतुर कि आऊक मंदिर दा ईट समय येती हत.
LUK 1:22 याग आव व्हार्या बंदुन, रा आंदुर से माताळ सकिदील: अत: आंदुर अर्त कोंडुर कि आव मंदिर दा यातोद तरी दर्शन नोळ्यान; अदिक आव अदुर बारा दा आंदुर से संकेत माळतेला ईत्‍तुन, अदिक मुक्‍का आगकु ईतोदुन.
LUK 1:23 याग आऊन मंदिर इन स्यावा अन्द दिन पुरा आदव, रा आव तान मान्नी होटोदुन.
LUK 1:24 ई दिनगोळ्द बाद्दा आऊन हिंग्स इलीशिबा व्हाट्या दी ईत्‍तुर; अदिक आक ईद अनकु तान तान इक अईद तिंगुळ ताका होचकु ईटदुर,
LUK 1:25 अदिक इलीशिबा खुद अच अनतोगोर, कि “ई दिनगोळ दा प्रभु नान मा कृपा नजर माळकु, मंळसागोळी नान अपमान इक दुर माळोर साटी इच प्रभु नान साटी हिंग माळदुन.”
LUK 1:26 इलीशिबा अन्द गर्भ-अवस्था अन्द आर तिंगुळ दा परमेश्वर उन दी टु जिब्राईल स्वर्गदूत, गलील इन नासरत नगर दा,
LUK 1:27 ऊंद कुवारा पोर इन हात्‍ती कळुकु आदुन यार्द सगाई यूसुफ हेसुर इन दाऊद उन घराना अन्द ऊंद मंळसा से आगीत: आ कुवारा पोर इन हेसुर मरियम ईरोद.
LUK 1:28 स्वर्गदूत आकिन हात्‍ती बुळ्क बंदकु अंदुन, “नी धन्य आय, नीन मा परमेश्वर उन अनुग्रह आग्याद! प्रभु नीन सांगुळ आन!”
LUK 1:29 मरियम आ स्वर्गदूत उन वचन देल हापाळ घबरूसेदुर, अदिक मन दा सोचली कुरतुर कि ईद याता प्रकार इन अभिवादन हुन?
LUK 1:30 स्वर्गदूत आकिन से अंदुन, “हे मरियम, अंजबाळ, यतिकी परमेश्वर उन अनुग्रह नीन मा आग्याद.
LUK 1:31 नोळ, नी व्हाट्या दी ईत्या, अदिक नीनी ऊंद पार पैदा आदान; नी आऊन हेसुर यीशु ईटेत.
LUK 1:32 आव महान ईत्‍तान अदिक परमेश्वर उन पार जो सब से धोड्डेव आन अंदकु आदान; अदिक प्रभु परमेश्वर आऊन आप्प दाऊद उन सिंहासन आऊक कोट्टान,
LUK 1:33 अदिक आव याकूब ऊंद घराना मा हमेशा राज माळ्यान; अदिक आऊन राज्य अन्द अन्त यागलु आगतीदील.”
LUK 1:34 मरियम स्वर्गदूत से अंदुर, “ईद ह्यांग आदीत. ना रा यातोवारा भी मंळसा अन्द संपर्क दा हैलेच.”
LUK 1:35 स्वर्गदूत आक इक उत्‍तर कोट्टुन, “पवित्र आत्मा दी टु नी व्हाट्या दी ईत्या, अदिक परमेश्वर उन सामर्थ्य नीन मा सावली माळीत; इदुरसाटी आ पवित्र जो पैदा आगावाळा आन, परमेश्वर उन पार अंदकु आदान.
LUK 1:36 अदिक नोळ, नीन कुटुम्ब इनोर इलीशिबा अक भी बुळपन दा पार आगावाळा आन, ईद आकिन, यारी लॉकुर वांझला अनतोगोर आरवा तिंगुळ हुन.
LUK 1:37 यतिकी परमेश्वर उन साटी येनु असम्भव हैलेच.”
LUK 1:38 मरियम अंदुर, “नोळ, ना प्रभु उन दासी हुईन, नानी नीन वचन इन अनुसार अच आगुल.” आग स्वर्गदूत आकिन हात्‍ती टु होटोदुन.
LUK 1:39 आ दिनगोळ दा मरियम यदकु तुरन्त अच पहाळी द्याश दा यहूदा अन्द ऊंद नगर इक होदुर,
LUK 1:40 अदिक आव जकरयाह अन्द मान्या होगकु मरियम इलीशिबा अक नमस्कार माळदुर.
LUK 1:41 आग हिंग आत कि ह्यांग इलीशिबा मरियम इन नमस्कार केळदुर, हांग अच चिग्द आकिन व्हाट्या दा हारदुन, अदिक इलीशिबा पवित्र आत्मा देल परिपुर्ण आगेदुर.
LUK 1:42 अदिक इलीशिबा धोळ्द शब्द दा कारूकु अंदुर, “नी आर्तेर दा धन्य आय, अदिक नीन व्हाट्या अन्द चिग्द भी धन्य आद!
LUK 1:43 ईद अनुग्रह नानी यल टु आत कि नान प्रभु उन मोय नान हात्‍ती बंदुर?
LUK 1:44 ह्यांग नीन नमस्कार इन शब्द नान किव मा बित्‍त, हांग अच चिग्द नान व्हाट्या दा खुशी देल हारली हत.
LUK 1:45 धन्य आर आक यार विश्वास माळदुर कि जो मातगोळ प्रभु उन दी टु आकिन से अंदकु आग्याव, अव पुरा आदव!”
LUK 1:46 आग मरियम अंदुर, “नान जीवन प्रभु उन बळाई माळतद
LUK 1:47 अदिक नान आत्मा नान उद्धार माळावाळा परमेश्वर देल खुश आद,
LUK 1:48 यतिकी आव तान दासी मा नजर ईट्यान; इदुरसाटी नोळी, ईगी टु सप्पा युग-युग इन पीढ़ी नानी धन्य अंदीत,
LUK 1:49 यतिकी आ शक्तिमान प्रभु नान साटी धोळ्द-धोळ्द क्याल्सा माळ्यान. आऊन हेसुर पवित्र आद,
LUK 1:50 अदिक आऊन दया आंदुर मा, जो आऊन से अंजतार, पीढ़ी टु पीढ़ी ताका बन्सकु ईरतद.
LUK 1:51 आव तान भुजा अन्द ताकत तोर्सदुन, अदिक जो तान मन दा घमण्ड माळतोगोर, आंदरी तितर-बितर माळदुन.
LUK 1:52 आव बलवानगोळी आंदुर्द राज सिंहासनगोळ मा टु केळ्द बुट्टुन; अदिक नम्र लॉकुरी म्याकुच नेगदुन.
LUK 1:53 आव हस्तकु लॉकुरी वळ्लीद वस्तुगोळ देल संतुष्ट माळदुन, अदिक धनवानगोळी खाली कय तेग्द बुट्टुन.
LUK 1:54 आव तान सेवक इस्त्राएल उक सम्भाल्स कोंडुन कि तान आ दया अक याद माळुल,
LUK 1:55 जो अब्राहम अदिक आऊन वंश मा हमेशा ईत्‍तीत, ह्यांग आव नाम आप्प-दादागोळ से अंदिदुन.”
LUK 1:56 मरियम इलीशिबा अन्द सांगुळ लगभग मुर तिंगुळ ईतकु तान मान्नी वापस बंदुर.
LUK 1:57 आग इलीशिबा अन्द चिग्द हाळोद समय पुरा आत, अदिक आक पार उक जनम कोट्टुर.
LUK 1:58 आकिन मान्ना अन्द हात्‍तीवाळेर अदिक कुटुम्बीगोळ ईद केळकु कि प्रभु आकिन मा हापाळ दया माळ्यान, आकिन सांगुळ खुशी मनुस्दुर,
LUK 1:59 अदिक हिंग आत कि आठवा दिशी आंदुर आ चिग्द ऊंद खतना माळली बंदुर अदिक आऊन हेसुर आऊन आप्प उन हेसुर मा जकरयाह ईटावाळेर ईरोर.
LUK 1:60 इदुर मा आऊन मोय उत्‍तर कोट्टुर, “ईद ईला; उलटा आऊन हेसुर यूहन्ना ईटकु आगुल.”
LUK 1:61 आंदुर आकिन से अंदुर, “नीन कुटुम्ब दा यारदु हेसुर ईद हैलेच!”
LUK 1:62 आग आंदुर आऊन आप्प उक इशारा माळकु केळदुर कि नी आऊन हेसुर येन ईटोद चाहासत्या?
LUK 1:63 आव लिखसोद पट्टी कारस्कु लिख्स बुट्टुन, “आऊन हेसुर यूहन्ना आद,” अदिक सप्पा लॉकुरी आश्चर्य आत.
LUK 1:64 आग आ चिग्द उन बाय अदिक ल्यालग्या तुरन्त खुलसेत; अदिक आव माताळली अदिक परमेश्वर उन धन्यवाद माळली कुरतुन.
LUK 1:65 आऊन आसपास इनोर सप्पा ईरावाळेर मा अंज्क तुम्मेत; अदिक आ सप्पा मातगोळ्द चर्चा पुरा यहूदी इन पहाळी प्रदेश दा फैलुसेत,
LUK 1:66 अदिक सप्पा केळावाळेर तान-तान मन दा विचार माळकु अंदुर, “ई पार ह्यांग ईतीदान?” यतिकी प्रभु उन कय आऊन मा ईरोद.
LUK 1:67 आऊन आप्प जकरयाह पवित्र आत्मा देल परिपुर्ण आगेदुन, अदिक आव परमेश्वर उन बातणी कोळली कुरतुन:
LUK 1:68 “प्रभु इस्त्राएल ईनव परमेश्वर धन्य ईरूल, यतिकी आव तान लॉकुर मा नजर ईटदुन अदिक आंदुर्द छुटकारा माळदुन,
LUK 1:69 अदिक तान सेवक दाऊद उन घराना दा नाम साटी ऊंद सामर्थ्यकारी उध्दारक कोटान.
LUK 1:70 आव तान पवित्र भविष्यवक्तागोळ्द द्वारा जो दुनिया अन्द सुरूवात टु आगतेला बंदार, अंदिदुन.
LUK 1:71 मतलब नाम दुश्मनगोळ से अदिक नाम से नफरत ईटावाळेर्द कय देल नाम उद्धार माळदुन,
LUK 1:72 आव तान आप्प-दादागोळ से अंदिदुन कि आव दया माळ्यान कि तान पवित्र वाचा अन्द याद माळुल,
LUK 1:73 अद किर्‍या आव नामव आप्प अब्राहम से तिंदीदुन,
LUK 1:74 आव नामी ईद कोट्टान कि नाव तान दुश्मनगोळ्द कय दा टु बिटकु,
LUK 1:75 आऊन मुंद पवित्रता अदिक न्यायीपन देल पुरा जीवन तीम निडर ईतकु आऊन स्यावा माळतेला ईत्‍तेव.
LUK 1:76 अदिक नी हे पारा, परमेश्वर उन भविष्यवक्ता कहलुस्या, यतिकी नी प्रभु उन हादी तयार माळोर साटी आऊन मुंद-मुंद नळद्या,
LUK 1:77 कि आऊन लॉकुरी उद्धार इन ग्यान कोट्टान, जो आंदुर्द पापगोळी माफ माळीत.
LUK 1:78 ईद नाम परमेश्वर उन अदा धोळ्द करूणा देल आग्याद; यदुर कारण म्याकुच टु नाम मा व्हातुर इन उजुळ उदय आदीत,
LUK 1:79 कि अंधकार अदिक मृत्यु ऊंद सावली दा कुरावाळेर इक प्रकाश कोळुल, अदिक नाम कालगोळी शांती इन हादी मा सरका नळसुल.”
LUK 1:80 अदिक आ चिग्द धोळ्द अदिक आत्मा दा बलवन्त आगतेला ईत्‍तुन, अदिक इस्त्राएल मा प्रगट आगोद दिन ताका आळीगोळ दा ईत्‍तुन.
LUK 2:1 आ दिनगोळ दा रोम इन राजा औगुस्तुस उन दी टु आग्या होळ्त कि पुरा रोमन साम्राज्य अन्द लॉकुर्द हेसुर नोंदणी माळकु आगुल.
LUK 2:2 ईद पयला जनगणना आ समय आत, याग सरकारी अधिकारी क्विरिनियुस हेसुर इन मंळसा सीरिया हेसुर इन नगर इन शासक ईरोन,
LUK 2:3 सप्पा लॉकुर हेसुर लिखसुसोर साटी तान तान नगर इक होटोदुर.
LUK 2:4 इदुरसाटी यूसुफ भी दाऊद उन घराना नव ईरोन, इदुरसाटी गलील इन नासरत नगर टु यहूदिया दा दाऊद उन नगर बैतलहम इक होदुन,
LUK 2:5 कि तान हिंग्स मरियम इन सांगुळ जो व्हाट्या दी ईरोर हेसुर लिखसुसुल.
LUK 2:6 आंदुर्द अल ईरा समय दा मरियम इन चिग्द हाळोद दिन पुरा आदव,
LUK 2:7 अदिक मरियम तान पयला चिग्द उक हाळदुर अदिक आ चिग्द उक कपळा दा लपटुसकु चरनी दा ईटदुर; यतिकी आंदुर साटी सरई दा जागा ईला ईरोद.
LUK 2:8 अदिक आ प्रदेश दा यास चरवाहगोळ ईरोर, जो ईळ्लक इक मैदान दा ईतकु तान तान झुण्ड इन पहरा कोळतोगोर.
LUK 2:9 अदिक प्रभु उन ऊंद स्वर्गदूत आंदुर हात्‍ती बंदकु नीदरेदुन, अदिक प्रभु उन तेज आंदुर्द नाकु दी चमकुस्त, अदिक आंदुर हापाळ अंजेदुर.
LUK 2:10 आग स्वर्गदूत आंदुर से अंदुन, “अंजबाळी; यतिकी, ना नीमी हापाळ खुशी इन खुशखबरी केळ्सतीन जो सप्पा लॉकुर साटी ईत्‍तीत,
LUK 2:11 कि ईंद दाऊद उन नगर दा नीम साटी ऊंद उद्धारकर्ता पैदा आग्यान, अदिक ईवा मसीह प्रभु हुन.
LUK 2:12 अदिक इदुर्द नीम साटी ईद चिन्ह आद कि नीव ऊंद पार उक कपळा दा लपटुसकु अदिक चरनी दा बिदकु नोळीर.”
LUK 2:13 आग अचानक आ स्वर्गदूत उन सांगुळ स्वर्गदूतगोळ्द दल परमेश्वर उन स्तुति माळतेला अदिक ईद अनतेला कांळ्सदव,
LUK 2:14 “आकाश दा परमेश्वर उन महिमा अदिक पृथ्वी मा आ मंळसागोळ देल यार से आव प्रसन्न आन, शांती आगुल.”
LUK 2:15 याग स्वर्गदूत आंदुर हात्‍ती टु स्वर्ग दी होटोदुर, रा चरवाहगोळ आपस दा अंदुर, “बरी, नाव बैतलहम होगकु ई मात जो आग्याव, अदिक यारी प्रभु नाम मा प्रगट माळ्यान, नोळाती.”
LUK 2:16 अदिक आंदुर तुरन्त होगकु मरियम अदिक यूसुफ उन हात्‍ती होदुर, अदिक आ चिग्द उक चरनी दा बिदकु नोळदुर.
LUK 2:17 ईद नोळकु चरवाहागोळ आ मात इक प्रगट माळ बुटुर, जो ई चिग्द उन बारा दा आंदुर से अंदकु आगीत,
LUK 2:18 अदिक सप्पा लॉकुर आ मातगोळी केळकु जो चरवाहगोळ आंदुर से अंदुर आश्चर्य माळदुर.
LUK 2:19 लेकीन मरियम ई सप्पा मातगोळी तान दिल दा ईटकु मन दा विचार माळतेला ईत्‍तुर.
LUK 2:20 चरवाहगोळ ह्यांग स्वर्गदूतगोळ हेळीदुर सब येनारा हांग अच केळकु अदिक नोळकु परमेश्वर उन महिमा अदिक स्तुति माळतेला होटोदुर.
LUK 2:21 ह्यांग येठ्ठ दिन पुरा आदव अदिक आऊन खतना अन्द समय बत्‍त, रा आऊन हेसुर यीशु ईटकु आत जो स्वर्गदूत आऊन मोय इन गर्भ दा बरोद से पयला अंदिदुन.
LUK 2:22 याग आंदुर यीशु उक अंदुर, मूसा इजाजत कोटान कि ऊंद मंळसा छोळ चिट्ठी लिख्सकु तान हिंग्स उक तलाक कोळ सकतान. व्यवस्था अन्द अनुसार यूसुफ अदिक मरियम इन तान खुद इन शुद्ध आगव दिन पुरा आदव, रा आंदुर यीशु उक यरूशलेम दा ओतुर कि प्रभु उन मुंद अर्पण माळुल,
LUK 2:23 ह्यांग कि प्रभु उन व्यवस्था अन्द किताब दा लिख्सकु आद: “हर ऊंद पयला पार परमेश्वर उन साटी पवित्र ठहरूस्यान.”
LUK 2:24 अदिक प्रभु उन व्यवस्था अन्द वचन इन अनुसार आंदुर: “फंडकी इन ऊंद ज्वाळा, या कबूतर इन येढ्ढ पाड्डगोळ” तंदकु बली येरसुल.
LUK 2:25 यरूशलेम दा शमौन हेसुर ईनव ऊंद मंळसा ईरोन, अदिक आ मंळसा न्यायी अदिक भक्त ईरोन; अदिक इस्त्राएल इन लॉकुरी ऊळसावाळा अन्द हादी कायोन, अदिक पवित्र आत्मा आऊन मा ईरोद.
LUK 2:26 अदिक पवित्र आत्मा अन्द द्वारा आऊन बारा दा वादा माळकु आगीत कि यागासताका नी प्रभु उन प्रगट मसीह अक नोळ कोमाल, आगासताका नी सायतीदील.
LUK 2:27 शिमिओन पवित्र आत्मा अन्द प्रेरणा देल मंदिर दा बंदुन; अदिक याग मोय अदिक आप्प व्यवस्था अन्द विधी इक पुरा माळोर साटी चिग्द यीशु उक मंदिर दा तंदुर,
LUK 2:28 आग आव यीशु उक क्वारा दा हुळदुन अदिक परमेश्वर उक धन्यवाद माळकु अंदुन:
LUK 2:29 “हे प्रभु, ईग तान दास उक नी जो वादा माळीद अदुर अनुसार शांती देल सायगोळ,
LUK 2:30 यतिकी नान कण्णगोळ नीन उद्धार इक नोळ कोंडाद,
LUK 2:31 यदरी नी सप्पा प्रदेश इन लॉकुर्द मुंद तयार माळ्या,
LUK 2:32 कि आव अन्य गैरयहूदीगोळी सच्चाई प्रगट माळावाळा प्रकाश कोळोर साटी ज्योति, अदिक नीन निजी जात इस्त्राएल इन साटी महिमा आगुल.”
LUK 2:33 आऊन आप्प अदिक मोय आ मातगोळ देल जो शिमिओन अनतोगोन, आश्चर्य माळतोगोर.
LUK 2:34 आग शमौन आंदरी आशीष कोटकु यीशु उन मोय मरियम से अंदुन, “नोळ, ई पार उक इस्त्राएल दा हापाळ मुंदुर्द बिळोद, अदिक येळोद साटी, अदिक ऊंद हिंग चमत्कार आगोर साटी ठहरूसकु आग्याद, यार्द विरोध दा मातगोळ हेळकु आदाव.
LUK 2:35 इदुर देल हापाळ लॉकुर मन दा विचार प्रगट आदव उलटा नीन दिल भी दुखगोळ देल तुमकु आदीत.”
LUK 2:36 आशेर इन गोत्र दा टु हन्नाह हेसुर इन फनूएल उन पोर ऊंद भविष्यवक्तागित ईरोर. आक हापाळ हाळामुंड ईरोर, अदिक मदा आगदुर बाद्दा येळ वर्ष तान गांड्ड उन सांगुळ ईत्‍तुर बाद्दा आकिन गांड्ड सोतोगिदुन.
LUK 2:37 ईग आक चौर्‍यासी वर्ष टु रांड्या ईरोर: अदिक आक मंदिर इक ईला बिळतोगोर, लेकीन ईळ्लक-हागुल उपास अदिक प्रार्थना माळ माळकु स्यावा दा हतकु ईरतोगोर.
LUK 2:38 अदिक आक आ घळी अल बंदकु प्रभु उन धन्यवाद माळली कुरतुर, अदिक आ सप्पा मुंदुर से, जो यरूशलेम इन लॉकुर्द छुटकारा अन्द हादी कायतोगोर, आ चिग्द उन बारा दा मातगोळ हेळली कुरतुर.
LUK 2:39 याग आंदुर प्रभु उन व्यवस्था अन्द अनुसार सब येनारा पुरा माळ कोंडुर रा गलील दा तान नगर नासरत इक होटोदुर.
LUK 2:40 अदिक आ चिग्द वाढ़ुस्त, अदिक बलवन्त आग्त, अदिक बुद्धी देल परिपुर्ण आग्त होदुन; अदिक परमेश्वर उन अनुग्रह आऊन मा ईरोद.
LUK 2:41 यीशु उन मोय अदिक आप्प हर वर्ष फसह अन्द हाब्ब दा यरूशलेम होगतोगोर.
LUK 2:42 याग यीशु हन्नेळ वर्ष ईनव आदुन, रा आंदुर हाब्ब इन रीति इन अनुसार यरूशलेम इक होदुर.
LUK 2:43 याग आंदुर आ दिनगोळी पुरा माळकु वापस बरली आदुर, रा स्याण पार यीशु यरूशलेम दा ईतोदुन; अदिक ई मात आऊन मोय अदिक आप्प उक मालूम ईला ईरोद.
LUK 2:44 आंदुर ईद सम्सकु कि आव दुसरा यात्रीगोळ सांगुळ इतिदान, ऊंद रोज इन हादी नळदोदुर: अदिक आऊक तान कुटुम्बगोळ अदिक जान पयचान वाळेर्द हात्‍ती ढुंढ्सली कुरतुर.
LUK 2:45 पर याग आव सिकिदील, रा ढुंढ्सत-ढुंढ्सत मात्‍त यरूशलेम इक होटोदुर,
LUK 2:46 अदिक मुर दिन इन बाद्दा आंदुर आऊक मंदिर दा उपदेश कोळावाळेर्द न्याड्या दा कुर्त, अदिक आंदुर केळ्त, अदिक आंदुर से प्रश्न माळतेला नोळदुर.
LUK 2:47 यास आऊन केळतोगोर, आंदुर सप्पा आऊन समझ अदिक आऊन उत्‍तरगोळ देल चकित ईरोर.
LUK 2:48 आग आंदुर आऊक नोळकु चकित आदुर अदिक आऊन मोय आऊन से अंदुर, “हे पारा, नी नाम से येती हिंग व्यवहार माळ्द? नोळ, नीन आप्प अदिक ना व्याकुल आगकु नीनी ढुंढसेव?”
LUK 2:49 यीशु आंदुर से अंदुन, “नीव नानी येती ढुंढ्सीर? येन नीव ईला जान्सीर कि नानी तान आप्प उन भवन दा ईरोद जरूरी आद?”
LUK 2:50 लेकीन जो मात आव आंदुर से अंदुन, आंदरी आ मात समसिदिल.
LUK 2:51 आग यीशु आंदुर सांगुळ होदुन, अदिक नासरत नगर दा बंदुन, अदिक आंदुर बस दा ईत्‍तुन; अदिक आऊन मोय ई सप्पा मातगोळ तान मन दा ईटदुर.
LUK 2:52 अदिक यीशु बुद्धी अदिक मय देल वाळुसदुन, अदिक परमेश्वर अदिक मंळसा अन्द अनुग्रह दा वाळुसली कुरतुन.
LUK 3:1 तिबिरियुस रोमन इन राज्य अन्द पंद्रावा वर्ष दा पुन्तियुस पिलातुस यहूदिया अन्द न्यायाधीश ईरोन, अदिक गलील दा हेरोदेस, इतूरैया अदिक त्रखोनीतिस द्याश दा आऊन वार्ट फिलिप्पुस, अदिक अबिलेने दा लिसानियास, चौथाई इन राजा ईरोर,
LUK 3:2 अदिक याग हन्ना अदिक कैफा महायाजक ईरोर, आ समय दा परमेश्वर उन वचन आळी दा जकरयाह अन्द पार यूहन्ना अन्द हात्‍ती पोहचुस्त.
LUK 3:3 बपतिस्मा कोळावाळा यूहन्ना यरदन इन आसपास इन सप्पा प्रदेश दा होगकु, पश्चाताप माळी, बपतिस्मा ताकोमी बाक परमेश्वर नीम पापगोळी माफ माळ्यान, हिंग प्रचार माळ्त टेटदुन.
LUK 3:4 ह्यांग यशायाह भविष्यवक्ता अन्द माताळ्द वचनगोळ किताब दा लिख्सकु आव: “आळी दा ऊंद कारावाळा अन्द आवाज केळ बरेत्याद कि, ‘प्रभु उन हादी तयार माळी, अदिक आऊन यात्रा अन्द साटी सळकगोळी सरका माळी.
LUK 3:5 हर ऊंद घाटी तुमकु आदीत, अदिक हर ऊंद पहाळी अदिक टीला ल्यालमा माळकु आदीत; अदिक जो वाकळा आद अद सीधा, अदिक जो म्याकुच आद अद ल्यालमा अदिक जो ल्यालमा आद अद म्याकुच अदिक अद चौरस हादी बनसीत.
LUK 3:6 अदिक हर ऊंद मंळसा परमेश्वर उन उद्धार इक नोळीत.’”
LUK 3:7 जो भीळ इन भीळ आऊन हात्‍ती बपतिस्मा ताकोमली होटकु बरतोगोद, आंदुर से यूहन्ना अनतोगोन, “हे हाव इन चिकोरा, याव नीमी चतरा माळ बुटुन कि परमेश्वर उन बरावाळा प्रकोप देल ओळी?
LUK 3:8 इदुरसाटी हिंग मातगोळ माळी जो नीम पश्चाताप इक तोर्सतद, अदिक तान तान मन दा ईद विचार माळबाळी कि नाम आप्प अब्राहम हुन; यतिकी ना नीम से अनतीन कि परमेश्वर ई कल्लगोळ देल भी अब्राहम उन साटी औलाद पैदा माळ सकतान.
LUK 3:9 ईग कोळ्ली मार्रगोळ्द जळी मा ईटकु आद, इदुरसाटी जो-जो मार्र वळ्लीद काय तराल, अदरी कळकु अदिक बेक्‍की दा हाक्‍कु आदीत.”
LUK 3:10 आग लॉकुर आऊन से केळदुर, “रा नाव येन माळेव?”
LUK 3:11 आव आंदरी उत्‍तर कोट्टुन, “यार्द हात्‍ती येढ्ढ कुळता आव, आव आऊक ऊंद कुळता कोळुल यार्द हात्‍ती हैलेच अदिक यार्द हात्‍ती तिनोद आद, आव भी हिंग अच माळुल.”
LUK 3:12 कर ताकोमावाळेर भी बपतिस्मा ताकोमली बंदुर, अदिक आऊन से केळदुर, “हे गुरु, नाव येन माळेव?”
LUK 3:13 आव आंदुर से अंदुन, “जो नीम साटी ठहरूसकु आग्याद, अदुर से यक्कुल ताकोम बाळेतीर.”
LUK 3:14 सिपाहीगोळ भी आऊन से ईद केळदुर, “नाव येन माळेव?” यूहन्ना आंदुर से अंदुन, “यारदारा मा दबाव हाक्‍कु आऊन से पैस्या ताकोमबाळी अदिक ख्वाटा दोष हचबाळी, लेकीन तान रोजी देल अच संतुष्ट ईरी.”
LUK 3:15 याग लॉकुर आस हचकु ईरोर, अदिक सप्पा तान तान मन दा यूहन्ना अन्द बारा दा विचार माळोर कि येन ईवा रा मसीह आलच,
LUK 3:16 रा बपतिस्मा कोळावाळा यूहन्ना आ सप्पा मुंदुर से अंदुन, “ना रा नीमी नीर देल बपतिस्मा कोळतीन, लेकीन आव बरावाळा आन जो नान से यक्कुल ताकतवर आन; ना रा ई लायक भी हैलेच कि आऊन केरू उन बंध खोल्स सकाईन. आव नीमी पवित्र आत्मा अदिक बेक्‍की देल बपतिस्मा कोट्टान.
LUK 3:17 आऊन मार्र, आऊन कय दा आद; अदिक आव तान केई वळ्लीद तरीका देल साफ माळ्यान; अदिक तान गोदीगोळी रा ढ्वाला दा जमा माळ्यान; लेकीन भूसा अन्द गवान्डा अक आ बेक्‍की दा होताक्यान जो यागलु नुनाल्द.”
LUK 3:18 इदुरसाटी आव हापाळ सा शिक्षा कोट कोटकु लॉकुरी चेतावनी कोळतोगोन कि तान हादी बदलुसुल.
LUK 3:19 लेकीन याग आव चौथाई द्याश इन राजा हेरोदेस उक आऊन वार्ट फिलिप्पुस उन हिंग्स हेरोदियास इन बारा दा अदिक सप्पा कुकर्मगोळ्द बारा दा जो आव माळीदुन, फटकार्सदुन,
LUK 3:20 रा हेरोदेस आ सप्पा देल वाढ़ुस्कु ईद कुकर्म भी माळदुन कि बपतिस्मा कोळावाळा यूहन्ना अक बंदीगृह दा हाक बुट्टुन.
LUK 3:21 याग सप्पा लॉकुर बपतिस्मा ताकोंडुर अदिक यीशु भी बपतिस्मा ताकोमकु प्रार्थना माळोन, रा स्वर्ग खुल्सेत,
LUK 3:22 अदिक पवित्र आत्मा कबूतर इन घाई आऊन मय मा ईळुत, अदिक स्वर्ग टु ईद आकाशवाणी आत कि: “नी नान प्रिय पार हुय, ना नीन देल हापाळ खुश आईन.”
LUK 3:23 याग यीशु खुद उपदेश कोळली कुरतुन, रा लगभग तीस वर्ष ईनव ईरोन ह्यांग लॉकुर सम्सतोगोर अदिक यीशु यूसुफ ईनव पार ईरोन; अदिक यूसुफ एली नव,
LUK 3:24 अदिक एली मत्‍तात ईनव, अदिक मत्‍तात लेवी नव, अदिक लेवी मलकी नव, अदिक मलकी यन्ना नव, अदिक यन्ना यूसुफ ईनव,
LUK 3:25 अदिक यूसुफ मत्‍तित्याह नव, अदिक मत्‍तित्याह आमोस ईनव, अदिक आमोस नहूम ईनव, अदिक नहूम असल्याह नव, अदिक असल्याह नोगह ईनव,
LUK 3:26 अदिक नोगह मात ईनव, अदिक मात मत्‍तित्याह नव, अदिक मत्‍तित्याह शिमी नव, अदिक शिमी योसेख ईनव, अदिक योसेख योदाह ईनव,
LUK 3:27 अदिक योदाह यूहन्ना नव, अदिक यूहन्ना रेसा नव, अदिक रेसा जरूब्बाबिल ईनव, अदिक जरूब्बाबिल शालतिएल ईनव, अदिक शालतिएल नेरी ईनव,
LUK 3:28 अदिक नेरी मलकी नव, अदिक मलकी अद्दी नव, अदिक अद्दी कोसाम ईनव, अदिक कोसाम इलमोदाम ईनव, अदिक इलमोदाम एर ईनव,
LUK 3:29 अदिक एर यहोशू नव, अदिक यहोशू इलाजार ईनव, अदिक इलाजार योरीम ईनव, अदिक योरीम मत्‍तात ईनव, अदिक मत्‍तात लेवी नव,
LUK 3:30 अदिक लेवी शमौन ईनव, अदिक शमौन यहूदा नव, अदिक यहूदा यूसुफ ईनव, अदिक यूसुफ योनान ईनव, अदिक योनान इल्याकीम ईनव,
LUK 3:31 अदिक इलयाकीम मलेआह ईनव, अदिक मलेआह मिन्नाह ईनव, अदिक मिन्नाह मत्‍तात ईनव, अदिक मत्‍तात नातान ईनव, अदिक नातान दाऊद ईनव,
LUK 3:32 अदिक दाऊद यिशै ईनव, अदिक यिशै ओबेद ईनव, अदिक ओबेद बोअज ईनव, अदिक बोअज सलमोन ईनव, अदिक सलमोन नहशोन ईनव,
LUK 3:33 अदिक नहशोन अम्मीनादाब ईनव, अदिक अम्मीनादाब अरनी नव, अदिक अरनी हिस्त्रोन ईनव अदिक हिस्त्रोन फिरिस ईनव, अदिक फिरिस यहूदा नव,
LUK 3:34 अदिक यहूदा याकूब ईनव, अदिक याकूब इसाहक ईनव, अदिक इसहाक अब्राहम ईनव, अदिक अब्राहम तिरह ईनव, अदिक तिरह नाहोर ईनव,
LUK 3:35 अदिक नाहोर सरूग ईनव, अदिक सरूग रऊ नव, अदिक रऊ फिलिग ईनव, अदिक फिलिग एबिर ईनव, अदिक एबिर शिलह ईनव,
LUK 3:36 अदिक शिलह केनान ईनव, अदिक केनान अरफक्षद ईनव, अदिक अरफक्षद शेम ईनव, अदिक शेम नूह नव, अदिक नूह लिमिक ईनव,
LUK 3:37 अदिक लिमिक मथूशिलह ईनव, अदिक मथूशिलह हनोक ईनव, अदिक हनोक यिरिद ईनव, अदिक यिरिद महललेल ईनव, अदिक महललेल केनान ईनव,
LUK 3:38 अदिक केनान एनोश ईनव, अदिक एनोश शेत ईनव, अदिक शेत आदम ईनव, अदिक आदम परमेश्वर उन पार ईरोन.
LUK 4:1 बाक यीशु पवित्र आत्मा देल परिपुर्ण आगकु यरदन गांगा टु वापस बंदुन.
LUK 4:2 अदिक चालीस दिन ताका आत्मा अन्द कल्सदुर देल सुनसान जागा दा टेटाळतेला ईत्‍तुन; अदिक शैतान आऊन परीक्षा माळतेला ईत्‍त. आ दिनगोळ दा यीशु येनु तंदिदील, अदिक याग अव दिन पुरा आदव, रा आऊक हसु हत.
LUK 4:3 आग शैतान यीशु उक अंदुन, “अगर नी परमेश्वर उन पार हुय, रा ई कल्ल देल अन, कि रोट्टी आगेगुल.”
LUK 4:4 यीशु आ शैतान उक उत्‍तर कोट्टुन, “शास्त्र दा लिख्सकु आद: मंळसा सिर्फ रोट्टी देल अच जित्‍ता ईरतीदील.”
LUK 4:5 बाक शैतान यीशु उक ऊंद हापाळ ऊँचा पहाळी मा ओईत अदिक आऊक घळी तिमुर दा दुनिया अन्द सप्पा राज्य तोर्स बुळ्त,
LUK 4:6 अदिक आग शैतान यीशु से अंत, “ना ई सप्पा अधिकार, अदिक सप्पा वैभव ना नीनी कोट बुळाईन, यतिकी अद नानी सोपस्कु आग्याद: अदिक ना यारी चाहासतीन आऊक कोट बुळतीन.
LUK 4:7 इदुरसाटी अगर नी बांगकु नानी प्रणाम माळ्या, रा ई सप्पा अपमान आगेदीत.”
LUK 4:8 यीशु आ शैतान उक उत्‍तर कोट्टुन, “शास्त्र दा लिख्सकु आद, ‘नी तान प्रभु परमेश्वर उन भक्ति माळ; सिर्फ आऊंदा उपासना माळ.’”
LUK 4:9 आग आ शैतान यीशु उक यरूशलेम दा वोतकु मंदिर इन स्यांडा मा नीदरूस्त, अदिक आऊन से अंत, “अगर नी परमेश्वर उन पार हुय, रा तान तान इक ईल टु ल्यालमा केळ्दबुळ.
LUK 4:10 यतिकी शास्त्र दा लिख्सकु आद: ‘आव नीन बारा दा तान स्वर्गदूतगोळी आग्या कोट्टान, कि आंदुर नीन रक्षा माळुल.’
LUK 4:11 अदिक हिंग भी अंदकु आग्याद, ‘आंदुर नीनी तुरन्त तान कयगोळ दा नेगु कोंडार, ताकी नीन कालगोळी कल्ल देल ठेस हतबाळुल.’”
LUK 4:12 यीशु आऊक उत्‍तर कोट्टुन, “शास्त्र दा ईद भी लिख्सकु आद: ‘नी तान प्रभु परमेश्वर उन परीक्षा माळबाळ.’”
LUK 4:13 याग शैतान सप्पा परीक्षा माळकोम्त, आग थ्वाळासा समय इन साटी आऊन हात्‍ती टु होटोत.
LUK 4:14 बाक यीशु आत्मा अन्द सामर्थ्य देल तुमकु मात्‍त गलील दा बंदुन, अदिक आऊन चर्चा आसपास इन सप्पा प्रदेश दा फैलुसेत.
LUK 4:15 यीशु आंदुर्द यहूदी लॉकुर्द सभागृहगोळ दा उपदेश कोळतेला ईत्‍तुन, अदिक सप्पा मुंदुर आऊन बळाई माळतोगोर.
LUK 4:16 बाक यीशु नासरत नगर दा बंदुन, यल आव स्याण टु धोड्डेव आगीदुन; अदिक तान रीति इन अनुसार आराम इन दिन यहूदी लॉकुर्द सभागृह दा होगकु वाचुसोर साटी नीदुरदुन.
LUK 4:17 अदिक यशायाह भविष्यवक्ता अन्द किताब आऊक कोटकु आत, अदिक आव किताब खोल्सकु, अद जागा तेगदुन यल हिंग लिख्सकु ईरोद:
LUK 4:18 “प्रभु उन आत्मा नान मा ईळ्दाद, इदुरसाटी कि आव कंगालगोळी खुशखबरी केळसोर साटी आव नान अभिषेक माळ्यान, अदिक नानी इदुरसाटी कळ्यान कि बंदीगोळी छुटकारा अन्द घोषणा अदिक कुढ्ढगोळी नोळोद खुशखबरी प्रचार माळाईन अदिक दलितगोळी बिळसुसाईन,
LUK 4:19 अदिक परमेश्वर उन कृपा दृष्टी इन वर्ष इन घोषणा माळाईन.”
LUK 4:20 आग आव किताब बंद माळकु सेवक उन कयगोळ दा कोट बुट्टुन अदिक कुर्तोदुन; अदिक यहूदी लॉकुर्द सभागृह अन्द सप्पा लॉकुर आऊक तार कोटकु नोळोर.
LUK 4:21 आग आव आंदुर से अनली कुरतुन, “ईंदल्या अच ईद लेखा ना वाचुसदिन अदिक नीम केळदुर देल पुरा आग्याद.”
LUK 4:22 सप्पा लॉकुर आऊन वाहवाही माळदुर, अदिक जो अनुग्रह नव मातगोळ आऊन बाय दा टु होळतोगोव, आ मातगोळ देल अचम्भित आदुर; अदिक अनली कुरतुर, “येन ईव यूसुफ उन पार आलच?”
LUK 4:23 यीशु आंदुर से अंदुन, “नीव नान बारा दा ई उदाहरण अंदीर कि ‘हे वैद्य, पयले तान तान इक वळ्लीद माळ! नाव केळेव कि जो येनारा नी कफरनहूम दा माळ्या, अद ईल तान नगर दा भी माळ.’”
LUK 4:24 अदिक आव अंदुन, “ना नीम से खरा माताळतीन यावारा भी भविष्यवक्ता अक तान द्याश दा मान सम्मान सिकाल.”
LUK 4:25 लेकीन ना नीम से जो खरा आद अद माताळतीन कि एलिय्याह अन्द दिनगोळ दा याग साळे मुर वर्ष ताका आकाश बंद ईरोद ईल ताका सूखा बित्‍त अदिक इस्त्राएल द्याश दा भयंकर अकाल बित्‍त, रा इस्त्राएल दा हापाळ सा रांड्यागितेर ईरोर.
LUK 4:26 “लेकीन एलिय्याह अक आंदुर दा टु यारदारा मंळसा अन्द हात्‍ती कळुकु आगीदील, सिर्फ सैदा अन्द सारफत नगर दा ऊंद रांड्यागित इन हात्‍ती आऊक कळुकु आगीत.
LUK 4:27 अदिक एलीशा भविष्यवक्ता अन्द काल दा इस्त्राएल दा ईरतोगोर आंदुर हापाळ लॉकुर कोढ़ इन बिमारी देल ईरोर, लेकीन सीरिया नव ईरावाळा नामान सीरियाई इक बिटकु सप्पा मुंदरी शुद्ध माळकु आत.”
LUK 4:28 ईव मातगोळ केळतेला अच यास यहूदी लॉकुर्द सभागृह दा ईरोर, सप्पा लॉकुर सिट्ट दा बंदुर,
LUK 4:29 अदिक आंदुर यदकु आऊक ऊरा दा टु व्हार्या तेगदुर, अदिक यात्‍ता पहाळी मा आऊन ऊर बसुस्कु ईरोद, अदुर्द स्यांडा मा ओतुर कि आऊक अल टु ल्यालमा भीळ सक्‍केव.
LUK 4:30 लेकीन आव आंदुर न्याड्या दा टु होटकु होटोदुन.
LUK 4:31 बाक यीशु गलील इन कफरनहूम नगर इक होटोदुन; अदिक आराम इन दिन लॉकुरी उपदेश कोळोन.
LUK 4:32 आंदुर आऊन उपदेश देल सट्ट आगेदुर यतिकी आऊन वचन अधिकार देल माताळव.
LUK 4:33 यहूदी लॉकुर्द सभागृह दा ऊंद मंळसा ईरोन, यारदा दुष्टआत्मा ईरोद आ दुष्टआत्मा जो परमेश्वर उन मुंद अशुध्द ठहरूसतद, आव धोळ्द शब्द देल चिल्ळासली कुरतुन,
LUK 4:34 “हे यीशु नासरी, नामी नीन से येन क्याल्सा? येन नी नामी नाश माळली बंद्या? ना नीनी जान्सतीन नी याव हुय? नी परमेश्वर उन पवित्र जन हुय!”
LUK 4:35 यीशु आऊक दनकुसकु अंदुन, “सुंगा ईर, अदिक आऊन दा टु होटबुळ!” आग दुष्टआत्मा आऊक न्याड्या दा पटकुसकु बिना हानि पोहचुस्त आऊन दा टु होट्ट बुळ्त.
LUK 4:36 इदुर मा सप्पा लॉकुर इक अचम्भा आत, अदिक आंदुर आपस दा मातचीत माळकु अनली कुरतुर, “ईद ह्यांग वचन हुन? यतिकी आव अधिकार अदिक सामर्थ्य इन सांगुळ अशुध्द आत्मागोळी आग्या कोळतान, अदिक आ दुष्टआत्मा आत्मागोळ होट बुळताव.”
LUK 4:37 ई प्रकार देल नाकु दिशा दी यीशु उन चर्चा आगली कुरतव.
LUK 4:38 यीशु यहूदी लॉकुर्द सभागृह दा टु यदकु शमौन उन मान्नी होदुन. शमौन उन आत्‍त ज्वर इन बिमारी देल बिदकु ईरोर, अदिक आंदुर आकिन साटी यीशु उक विनती माळदुर.
LUK 4:39 यीशु आकिन हात्‍ती नीदुरकु मय इक दनकुसदुन अदिक मय ईळदोदव, अदिक आक तुरन्त यदकु आंदुर्द स्यावा-पानी माळली कुरतुर.
LUK 4:40 द्यावगान होती, याता-याता मान्या लॉकुर अलग अलग प्रकार इन बिमारीगोळ देल बिदकु ईरोर, आंदुर सब आंदरी आऊन हात्‍ती तंदुर, अदिक यीशु ऊंद ऊंद मा कय ईटकु आंदरी चंगा माळदुन.
LUK 4:41 अदिक दुष्टआत्मागोळ भी चिल्ळासव अदिक ईद अनतेला कि, “नी परमेश्वर उन पार हुय,” हापाळ मुंदुर दा टु होट बुट्टव. पर यीशु अवरी दनकुसदुन अदिक माताळ गोटीदील, यतिकी आ अशुध्द आत्मागोळ जानसव कि आव मसीह हुन.
LUK 4:42 याग व्हातुर आत रा यीशु होटकु ऊंद सुनसान जागा दा होटोदुन, अदिक भीळ इन भीळ आऊक ढुंढ्सतेला आऊन हात्‍ती बत्‍त, अदिक यीशु उक रोक्सली कुरतुर कि आव आंदरी बिटकु होगबाळुल.
LUK 4:43 लेकीन यीशु आंदुर से अंदुन, “नानी दुसरा नगरगोळ दा भी परमेश्वर उन राज्य इन खुशखबरी केळसोद जरूरी आद, यतिकी नानी इदुर्दा साटी कळुकु आग्याद.”
LUK 4:44 अदिक यीशु गलील इन प्रदेश दा अदिक सप्पा यहूदीगोळ्द यहूदी लॉकुर्द सभागृहगोळ दा प्रचार माळतेला ईत्‍तुन.
LUK 5:1 याग भीळ परमेश्वर उन वचन केळोर साटी आऊन मा बिळली आगतोगोद, अदिक यीशु गन्नेसरत इन झील इन किनारा मा नीदुरकु ईरोन, रा हिंग आत
LUK 5:2 कि आव झील इन किनारा दा येढ्ढ ड्वांगागोळी हतकु ईरव अवरी नोळदुन, अदिक मेन हुडावाळेर अऊर मा टु ईळुकु जार तोळोर.
LUK 5:3 आ ड्वांगागोळ दा टु ऊंद मा, जो शमौन उन ईरोद, येरकु यीशु आऊन से विनती माळदुन कि किनारा टु थ्वाळासा सरकुसकु नळु. आग आव कुर्तकु लॉकुरी ड्वांगा मा टु उपदेश कोळली कुरतुन.
LUK 5:4 याग यीशु उन मातगोळ हेळकु आदव रा आव शमौन उक अंदुन, “खोल नीर दा होग, अदिक मेन हुडोर साटी तान जार हाक्‍क.”
LUK 5:5 शमौन यीशु उक उत्‍तर कोट्टुन, “हे स्वामी, नाव पुरा ईळ्लक तीम मेहनत माळदेव अदिक येनु सिक्‍कीदील; तरी नीन कयना देल ना जार हाकतीन.”
LUK 5:6 याग आंदुर हिंग माळदुर, रा हापाळ मेनगोळ जार दा बंदव, अदिक आंदुर्द जार हरूली कुर्त.
LUK 5:7 इदुर मा आंदुर तान संगीगोळी जो दुसरा ड्वांगा मा ईरोर, आंदरी कारदुर कि बंदकु नाम मदत माळी, अदिक आंदुर बंदकु येढ्ढु ड्वांगागोळी इल ताका तुमदुर कि आ ड्वांगागोळ मुळ्कली कुरतव.
LUK 5:8 ईद चमत्कार नोळकु शमौन पतरस यीशु उन काल मा बिद्दुन अदिक अंदुन, “हे प्रभु, नान हात्‍ती टु होटोग, यतिकी ना पापी मंळसा आईन!”
LUK 5:9 यतिकी ईस मेनगोळ हुळदुर देल आऊक अदिक आऊन संगीगोळी हापाळ अचम्भा आत,
LUK 5:10 अदिक हांग अच जब्दी इन पार याकूब अदिक यूहन्ना अक भी, जो शमौन उन भागीदार ईरोर, अचम्भा आत. आग यीशु शमौन से अंदुन, “अंजबाळ; ईगी टु नी मंळसागोळी परमेश्वर उन राज्य दा तंद्या.”
LUK 5:11 अदिक आंदुर ड्वांगागोळी किनारा मा तंदुर अदिक सप्पा येनारा बिटकु आऊन हिंद होटोदुर.
LUK 5:12 ऊंद घन याग यीशु यातोदारा तरी नगर दा ईरोन, आग आऊन हात्‍ती ऊंद मंळसा बंदुन; यारी कोढ़ इन रोग हतकु ईरोद, आव यीशु उक नोळकु आऊन काल मा बिद्दुन, अदिक विनती माळदुन, “हे प्रभु, अगर नी चाहास्या रा नानी शुद्ध माळ सकत्या.”
LUK 5:13 यीशु कय मुंद माळकु आऊक मुटदुन अदिक अंदुन, “ना चाहसतीन, कि नी शुद्ध आगेग.” अदिक आऊन कोढ़ इन रोग तुरन्त दूर आगेत.
LUK 5:14 यीशु आऊक आग्या कोट्टुन, “यारीकु हेळबाळेत, लेकीन होगकु तान तान इक याजक उक तोर्स, अदिक तान शुद्ध आगोद बारा दा जो येनारा मूसा नीनी आग्या कोटान अदरी भेंट येर्स कि आंदुर मा गवाही आगुल.”
LUK 5:15 लेकीन यीशु उन चर्चा दुर दुर ताका फैलुस्तेला होगोद, अदिक भीळ इन भीळ आऊन मातगोळ केळोर साटी अदिक तान बिमारीगोळ देल चंगा आगोर साटी जमा आत.
LUK 5:16 लेकीन आव आळीगोळ दा येल्यारा भी ब्यार्र होगकु प्रार्थना माळतोगोन.
LUK 5:17 ऊंद दिन हिंग आत कि यीशु उपदेश कोळोन, अदिक फरीसी अदिक व्यवस्थापक अल कुर्तकु ईरोर जो गलील अदिक यहूदिया अन्द हर ऊंद ऊरा टु अदिक यरूशलेम टु बंदीदुर, अदिक चंगा माळोर साटी प्रभु उन सामर्थ्य यीशु उन सांगुळ ईरोद.
LUK 5:18 आ समय हापाळ लॉकुर ऊंद मंळसा अक जो लकवा अन्द रोगी ईरोन, व्हर्स मा नेगुकु तंदुर, अदिक आंदुर आऊक बुळ्क वयली अदिक यीशु उन मुंद ईटोद उपाय ढुढ़सोर.
LUK 5:19 पर याग भीळ इन कारण आऊक बुळ्क वोय सकिदील रा आंदुर मान्ना मा येरकु अदिक खपरेल सरकुसकु, आऊक व्हर्स सांगुळ न्याड्या दा यीशु उन मुंद ईळ्स बुटुर.
LUK 5:20 आग यीशु आंदुर विश्वास नोळकु आऊन से अंदुन, “हे मंळसा, नीन पाप माफ आदव.”
LUK 5:21 आग नियम इन गुरु अदिक फरीसी तान तान मन दा विचार माळली कुरतुर, “ईव याव हुन? जो परमेश्वर उन अपमान माळतान! परमेश्वर उक बिटकु अदिक याव पापगोळी माफ माळ सकतान?”
LUK 5:22 यीशु आंदुर मन इन मातगोळ जान्सकु, आंदुर से अंदुन, “नीव तान तान मन दा याता मात इन विचार माळेतीर?
LUK 5:23 आसान येन आद? येन ईद अनोद कि ‘नीन पाप माफ आदव,’ या ईद अनोद कि ‘येळ अदिक टेटाळ?’
LUK 5:24 लेकीन इदुरसाटी कि नीव जान्स कोमी कि ना मंळसा अन पार उक पृथ्वी मा पाप माफ माळोद भी अधिकार आद.” बाक यीशु आ लकवा अन्द रोगी से अंदुन, “ना नीन से अनतीन, येळ अदिक तान व्हर्स नेगुकु तान मान्नी होटोग.”
LUK 5:25 आव तुरन्त यीशु ऊंद मुंद येद्दुन, अदिक या व्हर्स मा आव बिदकु ईरोन अदरी नेगुकु, परमेश्वर उन बळाई माळतेला तान मान्नी होटोदुन.
LUK 5:26 आग सप्पा लॉकुर चकित आदुर अदिक परमेश्वर उन बळाई माळली हतदुर अदिक हापाळ अंजतेला अनली कुरतुर, “ईंद नाव अदभुत क्याल्सागोळी नोळेव!”
LUK 5:27 इदुर बाद्दा यीशु व्हार्या होदुन अदिक लेवी हेसुर इन ऊंद कर ताकोमावाळा अक कर ताकोमोद चौकी मा कुर्तकु नोळदुन, अदिक आऊन से अंदुन, “नान हिंद आगेग.”
LUK 5:28 आग लेवी सब येनारा बिटकु येद्दुन, अदिक आऊन हिंद आगेदुन.
LUK 5:29 आग लेवी तान मान्या आऊन साटी ऊंद धोळ्द भोज ईटदुन; अदिक कर ताकोमावाळेर्द अदिक दुसरा लॉकुर्द जो आऊन सांगुळ ऊमली कुर्तीदुर, ऊंद धोळ्द भीळ ईरोद.
LUK 5:30 ईदुर मा फरीसी अदिक आंदुर नियम इन गुरु आऊन चेलागोळ से ईद अंदकु बळबुळस्ली कुरतुर, “नीव कर ताकोमावाळेर अदिक पापीगोळ्द सांगुळ येती तीनतीर अदिक कुडुतीर?”
LUK 5:31 यीशु आंदरी उत्‍तर कोट्टुन, “वैद्य भला चंगागोळ साटी ईला, लेकीन बिमारगोळ साटी जरूरी आन.
LUK 5:32 ना न्यायीगोळी ईला, लेकीन पापीगोळ्द पापगोळी पश्चाताप माळसुसोर साटी कारूली बंदीन.”
LUK 5:33 आंदुर यीशु उक अंदुर, “बपतिस्मा कोळावाळा यूहन्ना अन्द चेलागोळ रा बराबर उपास ईटतार अदिक प्रार्थना माळतार, अदिक हांग अच फरीसी नोर चेलागोळ भी, लेकीन नीन चेलागोळ रा तीनतार अदिक कुडुतार.”
LUK 5:34 यीशु आंदुर से अंदुन, “येन नीव वरातीगोळ से, यागासताका मंळगार आंदुर सांगुळ ईत्‍तान, उपास माळसुस सकतीर? बिलकुल ईला!
LUK 5:35 लेकीन अव दिन बंदाव, याग मंळगार आंदुर से ब्यार्र माळकु आदान, आग आंदुर आ दिनगोळ दा उपास माळ्यार.”
LUK 5:36 यीशु मात ऊंद उदाहरण भी आंदु़र से अंदुन: “यावारा मंळसा क्वारा व्हाशोद कपळा हरूकु हाळोद कपळा दा थिगर हचालुन, ईलारा व्हाशोद कपळा हर्दोदित अदिक आ थिगर हाळोद कपळा दा मेल भी तिनतीदील.
LUK 5:37 अदिक यावारा मंळसा व्हाशोद अंगुर इन रास्सा हाळोद तोगुल इन चिला दा तुम्मालुन, ईलारा व्हाशोद अंगुर इन रास्सा तोगुल इन चिलागोळी वळकु चेल्लेदित, अदिक तोगुल इन चिलागोळ्द भी नाश आगेदीत.
LUK 5:38 लेकीन व्हाशोद अंगुर इन रास्सा व्हाशोद तोगुल इन चिला दा अच तुम्म पायजे.
LUK 5:39 यतिकी मंळसा हाळोद अंगुर इन रास्सा कुडुकु व्हाशोद रास्सा अन्द इच्छा माळालुन यतिकी आव अनतान, कि हाळोद रास्सा अच वळ्लीद आद.”
LUK 6:1 बाक ऊंद आराम इन दिन दा हिंग आत कि यीशु केईगोळ दा टु आगतेला होगोन, अदिक आऊन चेलागोळ गोदी नव लॉम्बा मुरू-मुरूकु अदिक कय देल मसुस-मसुसकु तिंत होगतोगोर.
LUK 6:2 आग फरीसीगोळ दा टु थ्वाळासा लॉकुर अनली कुरतुर, “नीव अद क्याल्सा येती माळतीर जो आराम इन दिन दा नियम इन विरूद्ध आद.”
LUK 6:3 यीशु आंदरी उत्‍तर कोट्टुन, “येन नीव ईद वाचुसीदील कि दाऊद, याग आव अदिक आऊन साथी उपासा ईरोर रा येन माळदुन?
LUK 6:4 आव ह्यांग परमेश्वर उन भवन दा होदुन, अदिक भेंट इन रोट्टीगोळ हुळकु तिंदुन, यवरी तिनोद याजकगोळी बिटकु अदिक बाकी मुंदुर साटी नियम इन विरूद्ध आद, अदिक आव तान संगीगोळी भी कोट्टुन?”
LUK 6:5 अदिक यीशु आंदुर से अंदुन, “ना मंळसा अन पार आराम इन दिन ईनव भी स्वामी हुईन.”
LUK 6:6 हिंग आत कि यातोदारा मात्‍त दुसरा आराम इन दिन दा यीशु यहूदी लॉकुर्द सभागृह दा होगकु उपदेश माळली कुरतुन; अदिक अल ऊंद मंळसा ईरोन जो ऊम्मा कय देल लकवा ग्रस्त ईरोन.
LUK 6:7 आग नियम इन गुरु अदिक फरीसी यीशु मा दोष हच्चोद मौका अन्द ताक मा ईरोर कि नोळाता आव आराम इन दिन दा आऊक चंगा माळतान का ईला.
LUK 6:8 लेकीन आव आंदुर विचार जानसोन; इदुरसाटी आव वंळगींद कयवाळा मंळसा से अंदुन, “येळ, न्याड्या दा नीदुर.” आव यदकु नीदरेदुन.
LUK 6:9 यीशु आंदुर से अंदुन, “ना नीम से ईद केळतीन कि नियम इन अनुसार आराम इन दिन दा येन उचित आद, भलाई माळोद या बुरा माळोद; जीव इक ऊळसोद या अदुर्द नाश माळोद?”
LUK 6:10 आग आव नाकु दी आ सप्पा मुंदुर इक नोळकु आ मंळसा से अंदुन, “तान कय मुंद माळ.” आव हांग अच माळदुन, अदिक आऊन कय मात्‍त वळ्लीद आगेत.
LUK 6:11 लेकीन आंदुर गुस्सा दा तान सप्पा सुद-बुद मार्तकु आपस दा मातचीत माळकु विचार माळली हतदुर कि “नाव यीशु उन सांगुळ येन माळेव?”
LUK 6:12 आ दिनगोळ दा यीशु पहाळी मा प्रार्थना माळली होदुन, अदिक ईळ्लक तीम परमेश्वर ऊंद प्रार्थना माळतेला ईत्‍तुन.
LUK 6:13 याग व्हातुर आत रा आव तान चेलागोळी कारूकु आंदुर दा टु हन्नेळ मुंदुर्द चुनाव माळदुन, अदिक आंदरी प्रेरित हिंग हेसुर कोट्टुन;
LUK 6:14 अदिक आंदुर हेसुर हिंग आव: शमौन यार्द हेसुर आव पतरस भी ईटदुन, अदिक आऊन वार्ट अन्द्रियास, अदिक याकूब, अदिक यूहन्ना, अदिक फिलिप्पुस, अदिक बरतुल्‍मै,
LUK 6:15 अदिक मत्ती, अदिक थोमा, अदिक हलफई नव पार याकूब, अदिक शमौन याऊक द्याश भक्त भी अनतोगोर,
LUK 6:16 अदिक याकूब उन पार यहूदा, अदिक यहूदा इस्करियोती जो आऊक हुळसुसावाळा आदुन.
LUK 6:17 आग यीशु आंदुर सांगुळ ईळुकु चौरस जागा दा निदुरदुन, अदिक आऊन चेलागोळ्द धोळ्द भीळ, अदिक सप्पा यहूदिया, यरूशलेम, अदिक सूर अदिक सैदा अन्द समुद्र अन्द किनारा अन्द हापाळ लॉकुर,
LUK 6:18 जो आऊन उपदेश केळली अदिक तान बिमारगोळ देल चंगा आगोर साटी आऊन हात्‍ती बंदीदुर, जो अल निदुरकु ईरोर. अदिक अशुध्द आत्मागोळ देल परेशान लॉकुर भी आऊन हात्‍ती चंगा आगतोगोर.
LUK 6:19 सप्पा मुंदुर आऊक मुट्टोद चाहासोर, यतिकी आऊन दा टु सामर्थ्य होटकु सप्पा मुंदुर इक चंगा माळतोगोद.
LUK 6:20 आग यीशु तान चेलागोळ दी नोळकु अंदुन, “धन्य आईर नीव जो मन देल गरीब आईर, यतिकी परमेश्वर उन राज्य नीम्द हुन.”
LUK 6:21 “धन्य आईर नीव जो हस्तकु आईर, यतिकी नीव संतुष्ट माळकु आदीर.” “धन्य आईर नीव जो ईग वर्लेतीर, यतिकी बाद्दा नेग्गीर.”
LUK 6:22 “धन्य आईर नीव याग ना मंळसा अन पार उन कारण लॉकुर नीम से दुश्मनी ईट्यार, अदिक नीमी तेग्द बुट्टार, अदिक नीम अपमान माळ्यार, अदिक नीम हेसुर इक बेकार जानस्यार.”
LUK 6:23 “आ दिन खुश आगकु हारेत, यतिकी नोळी, नीम साटी स्वर्ग दा धोळ्द प्रतिफल आद; यतिकी आंदुर आप्प-दादागोळ भी भविष्यवक्तागोळ सांगुळ हांग अच माळतोगोर.”
LUK 6:24 लेकीन नीम मा हाय जो धनवान आईर, यतिकी नीव तान सुख ताकोम कोंडीर.
LUK 6:25 “हाय नीम मा जो ईग संतुष्ट आईर, यतिकी बाद्दा उपासा ईत्‍तीर, ‘हाय नीम मा जो ईग नेगेतीर, यतिकी शोक माळीर अदिक वर्लीर.’”
LUK 6:26 हाय नीम मा याग सप्पा मंळसा नीमी भला अनुल, यतिकी आंदुर आप्प-दादागोळ भी ख्वाटा भविष्यवक्तागोळ्द सांगुळ भी हिंग अच माळतोगोर.
LUK 6:27 “लेकीन ना नीव जो केळेतीर नीम से अनतीन कि तान दुश्मनगोळ से प्यार ईटी; जो नीम से नफरत माळतार, आंदुर्द भला माळी.
LUK 6:28 जो नीमी श्राप कोट्टार, आंदरी आशीष कोळी; जो नीम सांगुळ दुर-व्यवहार माळुल, आंदुर साटी प्रार्थना माळी.
LUK 6:29 जो नीन ऊंद गाल्ला मा क्याबरा बडुल रा आऊन दी दुसरा गाल्ला भी तिर्गुस बुळ; अदिक जो नीन कोट कसुल, रा आऊक कुळता ओयोर देल भी रोक्सबाळ.
LUK 6:30 जो यावारा नीन से बेळुल, आऊक कोळ; अदिक जो नीन चीजगोळ कस्तबुळुल, आऊन से बाक वापस बेळबाळ.
LUK 6:31 ह्यांग नीव चाहासतीर कि लॉकुर नीम सांगुळ व्यवहार माळुल, नीव भी आंदुर सांगुळ हांग अच व्यवहार माळी.
LUK 6:32 “अगर नीव तान प्यार ईटावाळेर्द सांगुळ प्यार ईटी, रा नीम येन बळाई? यतिकी पापी लॉकुर भी तान प्यार ईटावाळेर्द सांगुळ प्यार ईटतार.
LUK 6:33 अगर नीव तान भलाई माळावाळेर्द सांगुळ भलाई माळतीर, रा नीम येन बळाई? यतिकी पापी लॉकुर भी रा हिंग अच माळतार.
LUK 6:34 यार्द हात्‍ती टु वापस सिक्‍कोद आशा आद आंदरी नीव उदार कोट्टीर, रा अदुर दा नीम येन बळाई? याट कोटीर आट वापस सिक्‍कोद आशा देल पापी लॉकुर भी पापी लॉकुरी उदार कोळतार.
LUK 6:35 लेकीन तान दुश्मनगोळ से प्यार ईटी, अदिक आंदुर्द भलाई माळी, अदिक उदार कोटकु वापस सिकोद आशा माळबाळी, अदिक नीम साटी प्रतिफल धोळ्द आदीत अदिक नीव परमप्रधान उन पारगोळ ठहरूसिर, यतिकी आव खुद अच दुष्टगोळ मा उपकार माळतान.
LUK 6:36 ह्यांग नीम स्वर्गीय आप्प दयालु आन, हांग अच नीव भी दयालु बन्सी.
LUK 6:37 “यारदारा मा दोष हचबाळी, रा नीम मा भी दोष हचकु आगतीदील. याऊकु दोषी ठहरूसबाळी रा नीव भी दोषी ठहरूसकु आगतीदील. माफ माळीर रा नीमी भी माफ माळकु आदीत.
LUK 6:38 कोळतोगी, रा परमेश्वर भी नीमी कोट्टान. लॉकुर नीम क्वारा दा पुरा-पुरा नाप, वत्‍त-वोतकु अदिक आलगाळ-आलगाळ्सकु सीग हचकु हाक्यार. यतिकी या नाप देल नीव दुसरा अन साटी आळेतीर, अदा नाप देल नीम साटी भी आळुकु आदीत.”
LUK 6:39 बाक यीशु आंदुर से ऊंद उदाहरण अंदुन: “येन ऊंद कुढ्ढ मंळसा, दुसरा कुढ्ढ मंळसा अक हादी हेळ सकतान? येन आंदुर येढ्ढु मुंदुर खॉदरा दा बिळतीदील?
LUK 6:40 चेला गुरु से धोड्डेव ईरालुन, लेकीन पुरा तरीका देल सप्पा ग्यान ताकोमकु आगदुर बाद्दा हर ऊंद चेला गुरु उन घाई आगेगतान.”
LUK 6:41 नी तान वार्ट उन कण्ण इन तिनका अक येती नोळत्या? येन नी तान कण्ण इन लठ्टा नोळ सकाल?
LUK 6:42 जब नी तान अच कण्ण इन लठ्टा नोळ सकाल, रा तान वार्ट उन से ह्यांग अन सकत्या, “हे वार्ट; थामसेग ना नीन कण्ण दा टु तिनका तेगु कोळतीन?” हे कपटी, पयला तान कण्ण इन लठ्टा तेगु, आग जो तिनका नीन वार्ट उन कण्ण दा आद, अदरी वळ्लीसा तरीका देल नोळकु तेगु सक्या.
LUK 6:43 “यातोदारा वळ्लीद मार्र बेकार काय कोळाल्द अदिक ना यातोदारा बेकार मार्र वळ्लीद काय कोळतद.
LUK 6:44 हर ऊंद मार्र तान काय देल अर्तकु आगतद; यतिकी लॉकुर मुळ्ल इन झाळीगोळ दा टु अंजीर कोयालुर अदिक ना मईन काय इन मार्र मा टु अंगुर.
LUK 6:45 वळ्लीद मंळसा तान आत्मा अन्द वळ्लीद भंडार दा टु वळ्लीद मातगोळी का तेगुतान, अदिक बुरा मंळसा तान दिल इन बुरा भंडार दा टु बुरा मातगोळी तेगुतान; यतिकी जो दिल दा तुमकु आद अदा आऊन बाय दा बरतद.
LUK 6:46 “याग नीव नान कहना मान्सालिर रा येती नानी ‘हे प्रभु, हे प्रभु,’ अनतीर?
LUK 6:47 जो यावारा नान हात्‍ती बरतान अदिक नान मातगोळ केळकु अवरी मान्सतान, ना नीमी हेळतीन कि आव यार घाई आन:
LUK 6:48 आव आ मंळसा अन घाई आन, याव मान्ना माळाहोती जमीन खोल अगुळकु चट्टान मा पायवा हाकदुन, अदिक याग बाळ बत्‍त रा धारा आ मान्ना अक हत्‍त लेकीन अदरी आलगाळ्स सकिदील; यतिकी अद मजबूत माळकु ईरोद.
LUK 6:49 लेकीन जो केळकु मान्सालुन आव आ मंळसा अन घाई आन, याव पृथ्वी मुण्ण जागा भूमी जमीन मा बिना पायवा अन्द मान्ना माळदुन, याग अदुर मा धारा हत्‍त रा अद तुरन्त बिद्दोत अदिक बिदकु अदुर्द सत्यानाश आगेत.”
LUK 7:1 याग यीशु लॉकुर से ई सप्पा मातगोळ अंद बुट्टुन, रा कफरनहूम नगर दा होदुन.
LUK 7:2 अल यावारा सौ रोमी सिपाहीगोळ्द सूबेदार उन ऊंद दास जो आऊन प्रिय ईरोन, बिमारी देल सायोर मा ईरोन.
LUK 7:3 आव यीशु उन चर्चा केळकु यहूदीगोळ्द हापाळ स्याणागोळी आऊन से ईद विनती माळली आऊन हात्‍ती कळुदुन कि बंदकु नान दास उक चंगा माळुल.
LUK 7:4 आंदुर यीशु उन हात्‍ती बंदुर, अदिक आऊन से धोळ विनती माळकु अनली हतदुर, “आव ई लायक आन कि नी आऊन साटी ई सप्पा माळ सक्या,
LUK 7:5 यतिकी आव नाम जाती से प्यार ईटतान, अदिक आवा नाम यहूदी लॉकुर्द सभागृह कटकु कोटान.”
LUK 7:6 यीशु आंदुर सांगुळ होदुन, लेकीन याग आव मान्ना अन्द हात्‍ती पोहचुसदुन, रा सुबेदार आऊन हात्‍ती तान संगीगोळी ईद अनली कळुदुन, “हे प्रभु नी तान तान इक यक्कुल कष्ट कोळबाळ, यतिकी ना ई लायक हैलेच कि नी नान मान्ना अन्द छपर्या ताका बर सक्या.
LUK 7:7 ईदा कारण ना तान तान इक ई लायक भी समसिदिल कि ना नीन हात्‍ती बराईन, लेकीन सिर्फ आग्या कोटबुळ रा नान सेवक चंगा आगेदान.
LUK 7:8 ना भी वास्तव दा शासन इन हात्‍ती आईन, अदिक सिपाही नान हात्‍ती आर; अदिक याग ऊंद सिपाही इक अनतीन, ‘होग,’ रा आव होगतान; अदिक दुसरा से अनतीन, ‘बर,’ रा बरतान; अदिक तान यावारा दास उक अनतीन कि ‘अमुक क्याल्सा माळ,’ रा आव अदा माळतान.”
LUK 7:9 ईद केळकु यीशु उक अचम्भा आत अदिक आव मार्रा तिर्गुसकु आ भीळ से जो आऊन हिंद बरोद, अंदुन, “ना नीम से अनतीन कि ना इस्त्राएल दा भी हिंग विश्वास नोळीदील.”
LUK 7:10 अदिक जो कळुकु आगिदुर आ लॉकुर मान्या बंदकु आ दास उक चंगा नोळदुर.
LUK 7:11 थ्वाळासा दिन इन बाद्दा यीशु नाईन हेसुर इन ऊंद नगर दा होदुन. अल आऊन चेलागोळ अदिक धोळ्द भीळ आऊन सांगुळ होगोद.
LUK 7:12 याग यीशु नगर इन फाटक इन हात्‍ती पोहचुसदुन, रा लॉकुर ऊंद मुर्दा अक व्हार्या वोयोर; जो तान मोय इन ऊंदा पार ईरोन, अदिक आक रांड्या ईरोर; अदिक नगर इन हापाळ सा लॉकुर आकिन सांगुळ ईरोर.
LUK 7:13 आकी नोळकु प्रभु उक दया बत्‍त, अदिक आव आकिन से अंदुन, “वर्लबाळ.”
LUK 7:14 आग आव हात्‍ती बंदकु सकोली इक मुटदुन, अदिक सकोली नेगावाळेर रूकसेदुर. आग आव अंदुन, “हे जवान, ना नीन से अनतीन, येळ!”
LUK 7:15 आग आ सोतकु पार यदकु कुरतुन, अदिक आ पार माताळली कुरतुन. बाक आव आ पार उक आऊन मोय इक सोप्स बुट्टुन.
LUK 7:16 इदुर देल सप्पा मुंदुर मा अंज्क तुम्मेत, अदिक आंदुर परमेश्वर उन बळाई माळकु अनली हतदुर, “नाम न्याड्या दा ऊंद धोड्डेव भविष्यवक्ता बंदान, अदिक परमेश्वर तान लॉकुर मा कृपा दृष्टी माळ्यान.”
LUK 7:17 अदिक आऊन बारा दा ईद मात सप्पा यहूदिया अदिक आसपास इन सप्पा प्रदेश दा फैलुसेत.
LUK 7:18 बपतिस्मा कोळावाळा यूहन्ना अक आऊन चेलागोळ ई सप्पा मातगोळ्द समाचार कोट्टुर.
LUK 7:19 आग यूहन्ना तान चेलागोळ दा टु येढ्ढ मुंदुर इक कारूकु प्रभु उन हात्‍ती ईद केळली कळुदुन, “येन बरावाळा नीना हुय, या नाव यावारा दुसरा अन्द हादी नोळेव?”
LUK 7:20 आंदुर यीशु उन हात्‍ती बंदकु अंदुर, “यूहन्ना बपतिस्मा कोळावाळा नामी नीन हात्‍ती ईद केळली कळ्यान कि येन बरावाळा नी अच हुय, या नाव यावारा दुसरा अन्द हादी नोळेव?”
LUK 7:21 अदा समय आव हापाळ सा लॉकुरी बिमारगोळ देल अदिक दुखगोळ अदिक दुष्टआत्मागोळ देल चंगा माळदुन; अदिक हापाळ सा कुढ्ढ मंळसागोळी कण्ण कोट्टुन;
LUK 7:22 अदिक आव आंदुर से अंदुन, “जो येनारा नीव नोळीर अदिक केळीर, होगकु बपतिस्मा कोळावाळा यूहन्ना से अंदबुळी; कि कुढ्ढगोळ नोळतार, अदिक लंगळा नळुतार अदिक टेटतार, कोढ़ी लॉकुर शुद्ध माळकु आगतार, बयरागोळ केळतार, मुर्दागोळ जित्‍ता माळकु आगताव, अदिक कंगालगोळी खुशखबरी केळ्सकु आगतद.
LUK 7:23 धन्य आर आंदुर जो नान बारा दा ठोकर तिनालुर.”
LUK 7:24 याग बपतिस्मा कोळावाळा यूहन्ना अन्द कळुद लॉकुर होटोदुर रा यीशु यूहन्ना अन्द बारा दा लॉकुर से अनली कुरतुन, “नीव आळी दा येन नोळली होगीदिर? येन हवा देल हालुस्द सरकण्डागोळी?”
LUK 7:25 रा बाक नीव येन नोळली होगीदिर? येन मुलायम कपळा हाग्द मंळसा अक? जो भळकीला कपळा हाकतार अदिक सुखविलास देल ईरतार, आंदुर राजभवनगोळ दा ईरतार.
LUK 7:26 रा बाक येन नोळली होगीदिर? येन यावारा भविष्यवक्ता अक? हव, ना नीम से अनतीन, उलटा भविष्यवक्ता से भी धोड्डेव उक.
LUK 7:27 ईव आवा यूहन्ना हुन, यार्द बारा दा लिख्सकु आद: “परमेश्वर अंदुन, ना तान स्वर्गदूत उक नीन मुंद-मुंद कळुतीन, जो नीन मुंद अपमान हादी सरका माळ्यान.”
LUK 7:28 “ना नीम से अनतीन कि जो आर्तेर दा टु पैदा आग्यार, आंदुर दा टु यूहन्ना बपतिस्मा कोळावाळा से धोड्डेव यारू हैलेच. पर जो परमेश्वर उन राज्य दा स्याण से स्याणेव आन, आव आऊन से भी धोड्डेव आन.”
LUK 7:29 अदिक सप्पा साधारण लॉकुर केळकु अदिक कर ताकोमावाळेर भी यूहन्ना अन्द बपतिस्मा ताकोमकु परमेश्वर उन हादी इक खरा मान्स कोंडुर.
LUK 7:30 लेकीन फरीसीगोळ अदिक व्यवस्थापकगोळ यूहन्ना से बपतिस्मा ईला ताकोमकु तान संबंध दा परमेश्वर उन योजना अक अस्वीकार माळदुर.
LUK 7:31 “इदुरसाटी ना ई पीढ़ी इन लॉकुर्द तुलना यार देल कोळाईन कि आंदुर यार घाई आर?
LUK 7:32 इंदुर आ चिकोर घाई आर जो सात्‍तागोळ दा कुर्तकु ईरतार अदिक आबुर दाबुरी इक कारूकु अनतार, ‘नाव नीम साटी कोळ्ल मुर्सदेव, अदिक नीव कुणदीदिल; नाव विलाप इन हाळ हाळदेव, अदिक नीव वर्लीदिल!’
LUK 7:33 यतिकी यूहन्ना बपतिस्मा कोळावाळा ना रा रोट्टी तिंत बंदुन अदिक ना अंगुर इन रास्सा कुडुत बंदुन, अदिक नीव अनतीर, ‘आऊन दा दुष्टआत्मा आद.’
LUK 7:34 ना मंळसा अन पार तिंत-कुडुत बंदीन, अदिक नीव अनतीर, ‘नोळी, व्हाट्टा तुम्मावाळा अदिक कुडावाळा मंळसा, कर ताकोमावाळेर अदिक पापीगोळव संगी.’
LUK 7:35 जो लॉकुर परमेश्वर उन ग्यान स्वीकार माळतार आंदुर साबित माळतार कि अद ग्यान खरा आद.”
LUK 7:36 बाक यावारा ऊंद फरीसी यीशु से विनती माळदुन कि आव आऊन सांगुळ ऊमली कुरूल, इदुरसाटी यीशु आ फरीसी इन मान्या होगकु ऊमली कुरतुन.
LUK 7:37 आ नगर इन ऊंद पापी आर्त ईद जान्सकु कि आव फरीसी इन मान्या ऊमली कुरतान, संगमरमर इन बाटुल दा ईत्‍तर तंदुर,
LUK 7:38 अदिक आऊन कालगोळ हात्‍ती, हिंद निदुरकु, वर्लतेला आऊन कालगोळी आसुगोळ देल नेनाकली अदिक तान ताल्ला अन्द चुट्टी देल सिटली हतदुर, अदिक आऊन कालगोळ्द घळी-घळी चुम्मा ताकोमकु अऊर मा अत्‍तर मलुसदुर.
LUK 7:39 ईद नोळकु आ फरीसी याव यीशु उक कारदिदुन, तान मन दा सोचली कुरतुन, “अगर ईव भविष्यवक्ता ईरायदुन रा जान्सेगायदुन कि इक जो आऊक मुटेत्यार, आक यार अदिक ह्यांग आर्त आर, यतिकी आक रा पापीगीत आर.”
LUK 7:40 यीशु आऊन उत्‍तर दा अंदुन, “हे शमौन, नानी नीन से येनारा अनोद आद.” आव माताळदुन, “हे गुरु, अन.”
LUK 7:41 यीशु अंदुन, “यावारा महाजन उन येढ्ढ कर्जदार ईरोर, ऊंद अईद सौ चाँदी इन सिक्‍कागोळ्द अदिक दुसरा पचास सिक्‍का अन्द कर्जदार ईरोन.
LUK 7:42 याग आंदुर्द हात्‍ती चुकुसली येनु ईतीदील, रा आव येढ्ढु मुंदुर इक माफ माळ बुट्टुन. इदुरसाटी आंदुर दा टु याव आऊन से यक्कुल प्यार ईट्यान?”
LUK 7:43 शमौन उत्‍तर कोट्टुन, “नान समझ देल आव, यार्द आव यक्कुल बिट बुट्टुन.” आव आऊन से अंदुन, “नी बराबर विचार माळ्या.”
LUK 7:44 अदिक आ आर्त इन दी तिर्गकु आव शमौन से अंदुन, “येन नी ई आर्त इक नोळीत्या? ना नीन मान्या बंदीन लेकीन नी नान काल तोळोर साटी नीर कोटीदील, पर इक नान काल आसुगोळ देल नेनाकदुर अदिक तान चुट्टीगोळ देल सिटदुर.
LUK 7:45 नी नानी चुमसीदिल, पर यागी टु ना बंदीन आगी टु इक नान कालगोळ्द चुम्मा ताकोमोद बिटीदिल.
LUK 7:46 नी नान ताल्ला मा याण्णा मलुसिदिल, पर इक नान कालगोळी ईत्‍तर मलुस्यार.
LUK 7:47 इदुरसाटी ना नीन से अनतीन कि ईकीन पाप जो हापाळ ईरव, माफ आदव, यतिकी इक हापाळ प्यार माळदुर; पर यार्द थ्वाळा पाप माफ आग्याव, आव थ्वाळा अच प्यार माळतान.”
LUK 7:48 अदिक यीशु आ आर्त इन से अंदुन, “नीन पाप माफ आदव.”
LUK 7:49 आग जो लॉकुर यीशु उन सांगुळ ऊमली कुर्तकु ईरोर, आंदुर तान-तान मन दा विचार माळली हतदुर, “ईव याव हुन जो पापगोळी भी माफ माळतान?”
LUK 7:50 बाक यीशु आ आर्त इन से अंदुन, “नीन विश्वास नीनी ऊळ्सबुटाद, शांती देल होटोग.”
LUK 8:1 ईदुर बाद्दा यीशु नगर-नगर अदिक ऊर-ऊर दा प्रचार माळतेला, अदिक परमेश्वर उन राज्य अन्द खुशखबरी केळ्सतेला टेटली कुरतुन, अदिक आ हन्नेळ चेलागोळ आऊन सांगुळ ईरोर,
LUK 8:2 यीशु उन स्यावा माकळोर आर्तेर भी ईरोर जो दुष्टआत्मागोळ देल अदिक बिमारगोळ देल चंगा माळकु आगीदुर, अदिक ईंदुर आंदुर उर: मरियम जो मगदलीनी अंदकु आगतार, यारदा टु येळ दुष्टआत्मागोळ होटीदव,
LUK 8:3 अदिक हेरोदेस उन सेवक खुज़ा अन्द हिंग्स योअन्ना, अदिक सूसन्नाह, अदिक हापाळ सा दुसरा आर्तेर. ईंदुर तान धन सम्पत्ति दा टु आऊन स्यावा माळतोगोर.
LUK 8:4 याग धोळ्द भीळ जमा आत अदिक नगर-नगर इन लॉकुर यीशु उन हात्‍ती बरतोगोर, रा यीशु उदाहरण दा अंदुन:
LUK 8:5 “ऊंद बोऊसावाळा बींजा बोऊसली होट्टान. बोऊसतेला येनारा हादी इन किनारा मा बित्‍त, अदिक काल देल मेटकु आत, आकाश इन पक्षीगोळ बंदकु अदरी तिन कोंडव.
LUK 8:6 येनारा बींजा कल्ल इन जागा बित्‍त, अदिक बेळुतेला अच वंळगेत, यतिकी अदुर्दा नमी ईला ईरोद.
LUK 8:7 थ्वाळासा बींजा मुळ्लगोळ मार्र इन न्याड्या दा बित्‍त, अदिक मार्रगोळ सांगुळ-सांगुळ वाळुसकु अदरी वत्‍त बुट्टव.
LUK 8:8 थ्वाळासा बींजा वळ्लीद जागा मा बित्‍त, अदिक बेळुकु सौ गुणा बींजा तर्त.” ईद अंदकु आव धोळ्द आवाज देल अंदुन, “यारव केळव किव इतिदाव आव केळ कोमुल.”
LUK 8:9 यीशु उन चेलागोळ यीशु से केळदुर कि ई उदाहरण इन मतलब येन आद?
LUK 8:10 आव अंदुन, “नीमी परमेश्वर उन राज्य अन्द भेदगोळ्द समझ कोटकु आग्याद, पर दुसरा अक उदाहरणगोळ दा केळ्सकु आगतद,” इदुरसाटी कि “आंदुर नोळतेला भी ना नोळुल, अदिक केळतेला भी ना समसुल.”
LUK 8:11 “उदाहरण इन मतलब ईद आद: बींजा परमेश्वर उन वचन हुन.
LUK 8:12 हादी इन किनारा दोर आंदुर उर, यार वचन रा केळदुर; लेकीन शैतान बंदकु आंदुर मन दा टु वचन नेगुकु वोयतान कि ईदारा हिंग आगबाळुल कि आंदुर विश्वास माळकु आंदुर्द उद्धार आगुल.
LUK 8:13 कल्ल माकळोर आंदुर उर जो वचन केळदुर मा अदरी हापाळ खुशी देल ग्रहण रा माळतार, पर जळी मजबूत ईला ईटदुर कारण घळी तिम रा विश्वास माळतार पर याग परीक्षा बरतद रा बैकुसेगतार.
LUK 8:14 जो मुळ्लगोळ मार्र दा बित्‍त, इंदुर आंदुर उर जो केळतार, पर मुंद नळुकु चिन्ता, अदिक धन, अदिक जीवन इन सुखविलास दा फसुसेगतार अदिक परिपक्वता अन्द साटी आंदुर काय हण्ण आगाल.
LUK 8:15 लेकीन वळ्लीद जागा मा बिदकु बींजा इंदुर उर, जो वचन केळकु तान शुद्ध अदिक वळ्लीद दिल दा अदरी मजबूती देल ईटतार अदिक आंदुर बळा धीरज देल काय तरतार.”
LUK 8:16 याऊ दिंग्या होत्‍ताकु बर्तन देल मुच्चालुन, अदिक ना व्हर्स इन ल्यालमा ईटतान, लेकीन दीवट मा ईटतान कि बुळ्क बरावाळेर इक ऊजुळ सिक्‍कुल.
LUK 8:17 यतिकी येनु भी होचकु हैलेच जो प्रगट आगतीदील, ना येनारा गुप्त मात आद जो जान्सकु आगतीदील.
LUK 8:18 इदुरसाटी सावधान ईरी कि नीव याता प्रकार देल केळतीर? यतिकी यार्द हात्‍ती आद आऊक मात्‍त कोटकु आदीत, अदिक यार हात्‍ती हैलेच आऊन से अद भी ताकोमकु आगेदीत, यदरी आव तान सम्सतान.
LUK 8:19 यीशु उन मोय अदिक आऊन वार्टुर यीशु उन हात्‍ती बंदुर, पर भीळ इन कारण आऊन से भेंट माळ सकिदील.
LUK 8:20 आऊक हेळकु आत, “नीन मोय अदिक नीन वार्टुर व्हार्या निदुरकु आर, आंदुर नीन से मिलुसोद चाहास्तार.”
LUK 8:21 यीशु इदुर उत्‍तर दा आंदुर से अंदुन, “नान मोय अदिक नान वार्टुर इंदुरा उर, जो परमेश्वर उन वचन केळतार अदिक मान्सतार.”
LUK 8:22 बाक ऊंद दिशी यीशु अदिक आऊन चेलागोळ ड्वांगा मा येरदुर, अदिक यीशु आंदुर से अंदुन, “बरी, झील इन आप्पाटी होगाता.” इदुरसाटी आंदुर ड्वांगा खोल्स बुटुर.
LUK 8:23 लेकीन याग ड्वांगा नळोद, रा यीशु मिंगेदुन: अदिक झील दा तुफान बत्‍त, अदिक ड्वांगा नीर देल तुमली हत्‍त अदिक आंदुर जोखिम दा ईरोर.
LUK 8:24 आग आंदुर हात्‍ती होगकु आऊक येब्सदुर, अदिक अंदुर, “स्वामी! स्वामी! नाव नाश आगतेला होगीतेव.” आग आव यदकु तुफान इक अदिक नीर इन लयरगोळी दनकुसदुन अदिक अव थामसेदव अदिक सप्पा शांत आगेत.
LUK 8:25 आग आव आंदुर से अंदुन, “नीम विश्वास यल ईरोद?” लेकीन आंदुर अंजेदुर अदिक अचम्भित आगकु आपस दा अनली हतदुर, “ईव याव हुन जो तुफान अदिक नीर इक भी आग्या कोळतान, अदिक अव सप्पा आऊन मात केळताव?”
LUK 8:26 बाक यीशु अदिक आऊन चेलागोळ गिरासेनियागोळ्द प्रदेश दा पोहचुसदुर, जो गलील इन झील इन आप्पाटी आद.
LUK 8:27 याग यीशु किनारा मा ईळदुन रा आ नगर इन ऊंद मंळसा आऊक सिकदुन यारदा दुष्टआत्मागोळ ईरव. आव हापाळ दिनगोळ टु ना कपळा हाकतोगोन अदिक ना मान्या ईरतोगोन उलटा कब्रगोळ दा ईरतोगोन.
LUK 8:28 आव यीशु उक नोळकु चिल्ळासदुन अदिक आऊन मुंद बिदकु धोळ्द आवाज दा अंदुन, “हे परमप्रधान परमेश्वर उन पार यीशु! नानी नीन से येन क्याल्सा? ना नीन से विनती माळतीन, नानी पीळा कोळबाळ.”
LUK 8:29 यतिकी आव आ अशुध्द आत्मा अक आ मंळसा दा टु होळोद आग्या कोळोन, इदुरसाटी कि अद आऊन मा घळी घळी प्रगट आगतोगोद. याग कि लॉकुर आऊक शंकलीगोळ अदिक बेळीगोळ देल कटकु आऊन मा पहरा हचीदुर तरी आव बंधनगोळी मुरूकु भिळतोगोन, अदिक दुष्टआत्मा आऊक आळी दा वयाळ्सतेला टेटतोगोद.
LUK 8:30 यीशु आऊक केळदुन, “नीन येन हेसुर आद?” आव अंदुन, “सेना,” यतिकी हापाळ दुष्टआत्मागोळ आऊन दा होक्‍कोंडीदव.
LUK 8:31 आंदुर आऊन से विनती माळदुर कि नामी अनन्त अधोलोक दा होगोद आग्या कोळबाळ.
LUK 8:32 अल पहाळी मा हंदीगोळ्द ऊंद धोळ्द झुण्ड आळोद, इदुरसाटी आंदुर आऊन से विनती माळदुर कि नामी अऊर दा हाकबुळ. यीशु आंदरी होगोद आग्या कोट्टुन.
LUK 8:33 आग दुष्टआत्मागोळ आ मंळसा दा टु होटकु हंदीगोळ दा होदव अदिक आ झुण्ड ढलान मा टु झपटुसकु झील दा होगकु बिद्दव अदिक मुळ्ककु सोत्‍तव.
LUK 8:34 चरवाहागोळ ईद सप्पा जो आगीत नोळकु ओळदुर, अदिक नगर दा अदिक ऊरगोळ दा होगकु आ घटना अन्द खबर कोट्टुर.
LUK 8:35 लॉकुर ईद जो आगीत अदरी नोळली होट्टुर, अदिक यीशु उन हात्‍ती बंदकु या मंळसा दा टु दुष्टआत्मागोळ होटीदव, आऊक यीशु उन काल इन हात्‍ती कपळा हाक्त अदिक सचेत अवस्था दा कुर्त नोळकु अंजेदुर;
LUK 8:36 अदिक जो यावारा ई सप्पा नोळीदुर आंदुर आ लॉकुरी हेळदुर कि आव दुष्टआत्मा अन्द सतुस्द मंळसा यात्‍ता प्रकार देल वळ्लेव आग्यान.
LUK 8:37 आग गिरासेनिया अन्द आसपास इन सप्पा लॉकुर यीशु से विनती माळदुर कि नाम नगर दा टु होटोग; यतिकी आंदुर हापाळ अंजेगीदुर. इदुरसाटी आव ड्वांगा मा येरकु होटोदुन.
LUK 8:38 या मंळसा दा टु दुष्टआत्मागोळ होटीदव आव आऊन से विनती माळली कुरतुन कि नानी तान सांगुळ ईरगोळ, लेकीन यीशु आऊक विदा माळकु अंदुन,
LUK 8:39 “तान मान्नी होटोग अदिक लॉकुरी हेळ कि परमेश्वर नीन साटी ह्यांग धोळ धोड्डेव क्याल्सा माळ्यान.” आव होगकु सप्पा नगर दा प्रचार माळली कुरतुन कि यीशु नान साटी ह्यांग धोळ-धोड्डेव क्याल्सा माळ्यान.
LUK 8:40 याग यीशु गलील वापस बंदुन रा लॉकुर आऊन स्वागत माळदुर, यतिकी आंदुर सप्पा आऊन हादी कायोर.
LUK 8:41 इटुर दा याईर हेसुर ईनव ऊंद यहूदी मंळसा जो यहूदी लॉकुर्द सभागृह अन्द सरदारगोळ दा टु ऊंद सरदार ईरोन, बंदुन अदिक यीशु उन काल मा बिदकु आऊन से विनती माळली कुरतुन कि नान मान्नी नळ,
LUK 8:42 यतिकी आऊन हन्नेळ वर्ष इन ऊंद ठैसा अच पोर ईरोर, अदिक आक सायोर मा ईरोर. याग आव होगोन, आग लॉकुर आऊन मा बिळली आगोर.
LUK 8:43 ऊंद आर्त आक इक हन्नेळ वर्ष टु खुन होगोद रोग ईरोद, अदिक जो तान सप्पा पैस्या कवळी वैद्यगोळ्द हिंद बरबाद माळ बुटीदुर, तरी भी यारदु कय देल चंगा आगसकीदिल,
LUK 8:44 हिंदु टु बंदकु आऊन कपळा अन्द किनारा अक मुटदुर, अदिक तुरन्त आकिन खुन होगोद बंद आगेत.
LUK 8:45 इदुर मा यीशु अंदुन, “नानी याव मुटदुन?” याग सप्पा इनकार माळली कुरतुर, रा पतरस अंदुन, “हे स्वामी, नीनी रा भीळ वोत्‍तेत्याद अदिक नीन मा बिळेत्याद.”
LUK 8:46 लेकीन यीशु अंदुन, “यावारा रा नानी मुट्यार, यतिकी ना जान्स कोंडीन कि नान दा टु सामर्थ्य होटाद.”
LUK 8:47 याग आ आर्त नोळदुर कि ना होचकोम सकालीन, आग नळ्गतेला बंदुर अदिक आऊन काल मा बिदकु सप्पा लॉकुर्द मुंद हेळदुर कि आक यात्‍ता कारण देल आऊक मुटदुर, अदिक ह्यांग तुरन्त चंगा आगेदुर.
LUK 8:48 यीशु आकिन से अंदुन, “पोरी, नीन विश्वास नीनी वळ्लीद माळ्याद, कुशल देल होटोग.”
LUK 8:49 यीशु ईद अनतेला अच ईरोन कि यावारा यहूदी लॉकुर्द सभागृह अन्द सरदार उन अल टु बंदकु अंदुन, “नीन पोर सोतोदुर: गुरु उक दुख कोळबाळ.”
LUK 8:50 यीशु ईद मात केळकु याईर उक उत्‍तर कोट्टुन, “अंजबाळ; सिर्फ विश्वास ईट, रा आक ऊळदोदार.”
LUK 8:51 मान्या बंदकु आव पतरस, यूहन्ना, याकूब, अदिक पोर इन मोय-आप्प उक बिटकु दुसरा यारीकु तान सांगुळ बुळ्क बर गोटीदील.
LUK 8:52 सप्पा आकिन साटी वोरलोर, लेकीन आव अंदुन, “वर्लबाळी; आक सायली आर लेकीन मिंगेत्यार.”
LUK 8:53 आंदुर ईद जान्सकु कि आक सोतोग्यार आऊन मज्याक हार्सली हतदुर.
LUK 8:54 लेकीन आव आऊन कय हुळदुन, अदिक कारूतेला अंदुन, “हे पोरी, येळ!”
LUK 8:55 आग आकिन जीव वापस बत्‍त अदिक आक तुरन्त यदकु निदरेदुर. बाक आव आग्या कोट्टुन कि आकी येनारा तिनली कोळी.
LUK 8:56 आकिन मोय-आप्प चकित आदुर, लेकीन आव आंदरी आदेश कोट्टुन कि ईद जो आग्याद यारदारा से अनबाळेतीर.
LUK 9:1 बाक यीशु तान हन्नेळ चेलागोळी तान हात्‍ती कारदुन आंदरी सप्पा दुष्टआत्मागोळ अदिक बिमारगोळी दुर माळोद सामर्थ्य अदिक अधिकार कोट्टुन,
LUK 9:2 अदिक आंदरी परमेश्वर उन स्वर्गीय राज्य अन्द प्रचार माळली अदिक बिमारगोळी वळ्लीद माळोद साटी कळुदुन.
LUK 9:3 यीशु आंदुर से अंदुन, “तान यात्रा अन्द साटी येनु वोयबाळेतीर, ना रा कोल, ना झ्वारा, ना रोट्टी, ना पैस्या अदिक ना येढ्ढ-येढ्ढ कुळता.
LUK 9:4 जो यातोदु मान्या नीव ईळदीर, अल्या ईरी, अदिक अल टु उच विदा आगी.
LUK 9:5 जो यावारा नीमी ग्रहण माळालुर, आ नगर टु होळावती तान कालगोळ्द धुळा झाळ्स बुळी कि आंदुर मा गवाही आगुल.”
LUK 9:6 इदुरसाटी आंदुर होटकु ऊरा-ऊरा खुशखबरी केळसोर, अदिक हर जागा दा लॉकुरी चंगा माळ्त टेटतेला ईत्‍तुर.
LUK 9:7 द्याश इन चौथाई इन राजा हेरोदेस याग ई सप्पा घटनागोळ बारा दा केळदुन रा आव हापाळ घबरूसेदुन, यतिकी थ्वाळासा लॉकुर अंदुर कि यूहन्ना बपतिस्मा कोळावाळा सोत्‍तुर दा टु जित्‍ता आग्यान,
LUK 9:8 अदिक थ्वाळासा लॉकुर ईद अंदुर कि एलिय्याह कांळस्यान, अदिक थ्वाळासा दुसरा लॉकुर ईद अंदुर कि हाळोद भविष्यवक्तागोळ दा टु यावारा जित्‍ता आग्यान.
LUK 9:9 लेकीन हेरोदेस अंदुन, “यूहन्ना अन्द रा ताल्ला ना कळसुसीदीन, ईग ई मंळसा याव हुन यार्द बारा दा ना हिंग मातगोळ केळेतीन?” अदिक आव यीशु उक नोळोद प्रयत्न माळतेला ईत्‍तुन.
LUK 9:10 बाक प्रेरितगोळ वापस बंदकु जो येनारा आंदुर माळीदुर, यीशु उक हेळ बुटुर; अदिक यीशु आंदरी अलग माळकु बैतसैदा हेसुर इन नगर दा ओतुन.
LUK 9:11 ईद जान्सकु भीळ आऊन हिंद आगेत, अदिक आव खुशी देल आंदुर से मिलुसदुन, अदिक आंदुर से परमेश्वर उन राज्य अन्द मातगोळ हेळली कुरतुन, अदिक जो चंगा आगोद चाहासोर आंदरी चंगा माळदुन.
LUK 9:12 याग द्याव आगली हत्‍त रा हन्नेळ चेलागोळ बंदकु यीशु से अंदुर, “भीळ इक विदा माळ कि नाकु दिकळोद ऊरगोळ अदिक ऊरगोळ दा होगकु तान साटी ईरली जागा अदिक तिनली येनारा तरी ढुंढ्स सकुल, यतिकी नाव ईल सुनसान जागा दा आयेव.”
LUK 9:13 यीशु आंदुर से अंदुन, “नीव अच आंदरी तिनली इक कोळी.” चेलागोळ अंदुर, “नाम हात्‍ती अईद रोट्टी अदिक येढ्ढ मेनगोळी बिटकु अदिक येनु हैलेच; लेकीन हव, अगर नी चाहासत्या कि नाव होगकु ई सप्पा लॉकुर साटी भोजन कोंडेव, रा आग सकतद.” यतिकी आ लॉकुर्द संख्या रा अईद हजार इन हात्‍तीपास ईरोद.
LUK 9:14 आग यीशु तान चेलागोळ से अंदुन, “लॉकुरी पचास-पचास माळकु पंगत-पंगत दा कुर्स बुळी.”
LUK 9:15 आंदुर हिंग अच माळदुर, अदिक सप्पा मुंदरी कुर्स बुटुर.
LUK 9:16 आग आव अव अईद रोट्टीगोळी अदिक येढ्ढ मेनगोळी हुळदुन, अदिक स्वर्ग दी नोळकु परमेश्वर उक धन्यवाद माळदुन, अदिक रोट्टी मुरू-मुरूकु चेलागोळी कोळ्त होदुन कि लॉकुरी वाळसुल.
LUK 9:17 आग सप्पा लॉकुर तिनकु संतुष्ट आदुर, अदिक चेलागोळ ऊळ्द टुकळागोळ दा टु हन्नेळ फुट्टी तुमकु नेगदुर.
LUK 9:18 याग यीशु आबना दा प्रार्थना माळोन अदिक चेलागोळ आऊन सांगुळ ईरोर, रा आव आंदुर से केळदुन, “लॉकुर नान बारा दा येन अनतार?”
LUK 9:19 चेलागोळ उत्‍तर कोट्टुर, “यूहन्ना बपतिस्मा कोळावाळा, अदिक यावारा यावारा एलिय्याह, अदिक यावारा ईद कि हाळव भविष्यवक्तागोळ्द दा टु यावारा जित्‍ता आग्यान.”
LUK 9:20 यीशु आंदुर से केळदुन, “लेकीन नीव नानी येन अनतीर?” पतरस उत्‍तर कोट्टुन, “परमेश्वर उन द्वारा कळुद मसीह.”
LUK 9:21 आग यीशु आंदरी आदेश कोटकु अंदुन कि ईद मात इन उल्लेख यारदु से माळबाळेतीर.
LUK 9:22 बाक यीशु अंदुन, “ना मंळसा अन पार उन साटी जरूरी आद कि ना दुख नेगाईन, अदिक स्याणा अदिक प्रधान याजक अदिक नियम इन गुरु नानी तुच्छ जान्सकु कोंद बुट्टार, अदिक ना मुर दिन दा जित्‍ता आगाईन.”
LUK 9:23 यीशु सप्पा मुंदुर से अंदुन, “अगर यावारा नान हिंद बरोद चाहासतान, रा आव तान तान इक इनकार माळुल अदिक रोज जो तान जीव नान साटी क्रूस मा समर्पित माळुल आवा नान हिंद आगेगुल.
LUK 9:24 यतिकी जो यावारा तान जीव ऊळसोद चाहास्यान आव अदरी खोऊस्यान, लेकीन जो यावारा नान साटी तान जीव खोऊस्यान आव अदरी ऊळस्यान.
LUK 9:25 अगर मंळसा पुरा दुनिया अक हासिल माळुल अदिक तान जीव खोऊस बुळुल या अदुर्द हानि नेगुल, रा आऊक येन लाभ आदीत?
LUK 9:26 जो नान देल अदिक नान वचन देल लज्जित आगतान, आऊन देल ना मंळसा अन पार भी, आ समय लज्जित आदान याग आव खुद अदिक तान आप्प उन अदिक पवित्र स्वर्गदूतगोळ्द महिमा दा बंदान.
LUK 9:27 ना नीम से खरा माताळतीन, कि जो ईल निदुरकु आर, आंदुर दा टु यारारा हिंग आर कि यागासताका परमेश्वर उन राज्य नोळतीदिल, आगासताका सायतीदील.”
LUK 9:28 ई मातगोळ्द लगभग येठ्ठ दिन इन बाद्दा यीशु पतरस, यूहन्ना अदिक याकूब उक सांगुळ हुळकु प्रार्थना माळोर साटी पहाळी मा होदुन.
LUK 9:29 याग आव प्रार्थना माळतेला अच ईरोन, रा आऊन चेहरा अन्द रूप बदलुसेत, अदिक आऊन कपळा बिळेव आगकु चमकुसली हत्‍त.
LUK 9:30 अदिक अचानक, मूसा अदिक एलिय्याह, ई येढ्ढ मंळसा आऊन सांगुळ मातगोळ हेळोर.
LUK 9:31 आंदुर स्वर्गीय महिमा सहित कांळ्सदुर अदिक यीशु उन सायोद चर्चा माळोर, जो परमेश्वर उन उद्देश यरूशलेम दा पुरा आगोद ईरोद.
LUK 9:32 पतरस अदिक आऊन साथीगोळ कण्णगोळ जप देल तुमकु ईरव, लेकीन याग आंदुर पुर्ण रूप देल च्याता आदुर, रा आंदुर आऊन महिमा अक अदिक आ येढ्ढ मंळसागोळी, जो यीशु उन सांगुळ निदुरकु ईरोर, नोळदुर.
LUK 9:33 याग आंदुर आऊन हात्‍ती टु होगली हतदुर, रा पतरस यीशु से अंदुन, “हे स्वामी, नाम्द ईल ईरोद वळ्लीद आद: इदुरसाटी नाव मुर हांद्रा माळेव, ऊंद नीन साटी, ऊंद मूसा अन्द साटी, अदिक ऊंद एलिय्याह अन्द साटी.” आव ईला जानसोन कि आव येन माळेत्यान.
LUK 9:34 आव ईद माताळतेला अच ईरोन कि ऊंद बादल बंदकु आंदरी होचकोम्त, अदिक याग चेलागोळ आ बादल देल घेरूसली हतदुर रा अंजेदुर.
LUK 9:35 आग आ बादल दा टु आवाज होळ्त, “ईव नानव पार अदिक नान चुनुसदव हुन, ईऊंद केळी.”
LUK 9:36 ईव आवाज आगतेला अच यीशु आबना अच कांळ्सदुन; अदिक आंदुर सुंगा ईत्‍तुर, अदिक जो येनारा नोळीदुर अदुर्द बारा दा आंदुर आ दिनगोळ दा यारदारा से येनु माळीदिल.
LUK 9:37 दुसरा दिन याग यीशु अदिक आऊन मुर चेलागोळ पहाळ मा टु ईळदुर रा ऊंद धोळ्द भीळ बंदकु यीशु से मिळुस्त.
LUK 9:38 अदिक नोळी, भीळ दा टु ऊंद मंळसा चिळ्लासकु अंदुन, “हे गुरु, ना नीन से विनती माळतीन कि नान पार उन म्याकुच कृपादृष्टि माळ; यतिकी आव नानव ऊंद ठैसा पार आन.
LUK 9:39 अदिक नोळ, ऊंद दुष्टआत्मा आऊक हुडूतद, अदिक आव अचानक चिळ्लासकु येळतान; अदिक अद आऊक हिंग मुरकुळस्तद कि आव बाय दा फेस तुमकु तरतान; अदिक आऊक कठिनाई देल बिळतद.
LUK 9:40 ना नीन चेलागोळ से विनती माळदीन कि आ दुष्टआत्मा अक तेगुल लेकीन आंदुर तेगु सकिदील.”
LUK 9:41 यीशु आंदरी उत्‍तर कोट्टुन, “हे अविश्वासी अदिक जिद्दी लॉकुरा, ना यागासताका नीम सांगुळ ईराइन अदिक नीम सहन माळाईन? तान पार उक ईल तर.”
LUK 9:42 आव पार बरतेला अच ईरोन कि दुष्टआत्मा आऊक पटकुसकु मुरकुळस्त, लेकीन यीशु अशुध्द आत्मा अक दनकुसदुन अदिक पार उक वळ्लीद माळकु आऊन आप्प उक सौप्सदुन.
LUK 9:43 आग सब लॉकुर परमेश्वर उन महासामर्थ्य देल चकित आदुर. लेकीन याग सब लॉकुर आ सब क्याल्सागोळ देल जो यीशु माळतोगोन, अचम्भित ईरोर, रा आव तान चेलागोळ से अंदुन,
LUK 9:44 “नीव ई मातगोळ मा ध्यान कोळी, यतिकी ना मंळसा अन पार मंळसागोळ्द कय दा सौप्सकु आगाईन.”
LUK 9:45 लेकीन आंदुर ई मात इक ईला समसोर, अदिक ईद आंदुर से होचकु ईत कि आंदुर आऊक जान्स ईला सकुल; अदिक आंदुर ई मात इन बारा दा यीशु उक केळली अंजतोगोर.
LUK 9:46 बाक आंदुर्दा ईद विवाद आगली कुर्त कि नाम दा टु धोळ याव आन.
LUK 9:47 लेकीन यीशु आंदुर्द मन इन विचार जान्स कोंडुन, अदिक ऊंद पार उक हुळकु तान हात्‍ती नीदरूसदुन,
LUK 9:48 अदिक आंदुर से अंदुन, “जो यावारा नान हेसुर देल ई पार उक ग्रहण माळतान, आव नानी ग्रहण माळतान; अदिक जो यावारा नानी ग्रहण माळतान, आव नान कळावाळेर इक ग्रहण माळतान, यतिकी जो नीम दा सब से स्याणेव टु स्याणेव आन, आवा धोड्डेव आन.”
LUK 9:49 आग यूहन्ना अंदुन, “हे स्वामी, नाव ऊंद मंळसा अक अपमान हेसुर देल दुष्टआत्मागोळी तेगुतेला नोळदेव, अदिक नाव आऊक मना माळदेव, यतिकी आव नाम सांगुळ आगकु अपमान हिंद आगालुन.”
LUK 9:50 यीशु यूहन्ना अदिक बाकी चेलागोळ से अंदुन, “आऊक मना माळबाळी; यतिकी जो नीम विरोध दा हैलेच, आव नीम्द सांगुळ आन.”
LUK 9:51 याग यीशु उन स्वर्ग दा नेगुकु आगोद दिन हात्‍ती बरली हतदव रा आव यरूशलेम होगोद मजबूत निश्चय माळदुन.
LUK 9:52 आव तान मुंद स्वर्गदूत कळुदुन. आंदुर सामरीगोळ्द ऊंद ऊर दा होदुर कि आऊन साटी जागा तयार माळुल.
LUK 9:53 लेकीन आ लॉकुर आऊक ईळु गोटीदील, यतिकी आव यरूशलेम होगोन.
LUK 9:54 ईद नोळकु यीशु उन चेलागोळ याकूब अदिक यूहन्ना अंदुर, “हे प्रभु, येन नी चाहासत्या कि नाव आग्या कोट्टेव, कि आकाश टु बेक्‍की बिळसुस्कु आंदरी भसम माळसुस बुळुल?”
LUK 9:55 लेकीन यीशु तिर्गकु आंदरी दनकुसदुन.
LUK 9:56 यीशु अदिक आऊन चेलागोळ दुसरा ऊर दा होटोदुर.
LUK 9:57 याग आंदुर हादी देल होगोर, रा चेलागोळ दा टु यावारा यीशु से अंदुन, “यल-यल नी होद्या, ना नीन हिंद आगेगाईन.”
LUK 9:58 यीशु आऊन से अंदुन, “कोल्यागोळ गुफा अदिक आकाश इन पक्षीगोळ ग्वादा ईरताव, लेकीन ना मंळसा अन पार उन साटी ताल्ला होचकोमोर साटी भी जागा हैलेच.”
LUK 9:59 यीशु दुसरा से अंदुन, “नान हिंद आगेग.” आव अंदुन, “हे प्रभु, नानी पयले होगगोळ कि तान आप्प उक नळसाईन.”
LUK 9:60 यीशु आऊन से अंदुन, “सोद्द मंळसागोळी तान मुर्दा नळ्सगोळ, लेकीन नी होगकु परमेश्वर उन राज्य अन्द पुरा प्रचार माळ.”
LUK 9:61 ऊंद मात्‍त मंळसा भी अंदुन, “हे प्रभु, ना नीन हिंद आगेगाईन; लेकीन पयले नानी होगगोळ कि तान मान्ना अन्द लॉकुर से विदा ताकोमकु बराईन.”
LUK 9:62 यीशु आऊन से अंदुन, “जो यावारा तान कय नांगर मा ईटकु हिंद नोळतान, आव परमेश्वर उन राज्य अन्द लायक हैलेच.”
LUK 10:1 ई मातगोळ्द बाद्दा प्रभु यीशु मात्‍त बहात्‍तर मंळसागोळी नियुक्त माळदुन, अदिक याता-याता नगर अदिक जागा अक आव होगली ईरोन, अल आंदरी येढ्ढ-येढ्ढ माळकु तान मुंद कळुदुन.
LUK 10:2 यीशु आंदुर से अंदुन, हण्ण केई हापाळ आव, पर क्याल्सा माळावाळेर मजदुर गोर्त आर; इदुरसाटी फसल इन स्वामी से विनती माळी कि आव तान फसल कडोर साटी मजदूर कळु बुळुल.
LUK 10:3 होगी; ना नीमी म्यांडागोळ घाई लांडग्यागोळ न्याड्या कळुतीन.
LUK 10:4 इदुरसाटी तान सांगुळ ना चीला, ना झ्वारा, ना केरूगोळ हुडी; अदिक ना हादी मा यारदारा से नमस्कार माळी.
LUK 10:5 यातारा मान्या होगी, पयले अनी, “ई मान्ना मा कल्याण आगुल.”
LUK 10:6 अगर अल यावारा कल्याण इन लायक ईतीदान, रा नीम कल्याण आऊन मा ईत्‍तीत, ईलारा नीम हात्‍ती वापस बंदीत.
LUK 10:7 अदा मान्या ईरी, अदिक जो येनारा आंदुर से सिक्‍कीत, अदा तिनी-कुडी, यतिकी मजदूर उक तान मजदूरी सिक पायजे; मान्या-मान्या टेटबाळेतीर.
LUK 10:8 या नगर दा नीव होगी, अदिक अलेर लॉकुर याग नीम स्वागत माळ्यार रा जो येनारा नीम मुंद ईटकु आदीत अदा तिनी.
LUK 10:9 अलेर बिमारगोळी चंगा माळी अदिक आंदुर से अनी, “परमेश्वर उन राज्य हात्‍ती होट बंदाद.”
LUK 10:10 लेकीन या नगर दा होदिर, अदिक अलेर लॉकुर नीमी ग्रहण माळतीदील, रा आंदुर्द गलीगोळ दा होगकु अनी,
LUK 10:11 “नीम विरोध दा नाव नीम नगर इन धुळा अक भी जो नाम कालगोळ मा हत्याद झाळ्स कोळतेव; फिर भी ईद जान्स कोमी कि परमेश्वर उन राज्य नीम हात्‍ती होट बंदाद.”
LUK 10:12 ना नीम से अनतीन कि आ दिन परमेश्वर न्याय माळ्यान आ दिशी सदोम इन दशा आ नगर से हापाळ गुणा सहन माळा लायक ईत्‍तीत.
LUK 10:13 “हाय खुराजीन! हाय बैतसैदा! जो सामर्थ्य ईनव क्याल्सा नीम दा माळकु आदव, अगर अव सूर अदिक सैदा दा माळकु आगायदव रा बॉरा होदुकु अदिक राख दा कुर्तकु आंदुर यागुटु मन तिर्गुसायदुर.
LUK 10:14 लेकीन न्याय इन दिन सूर अदिक सैदा अन्द दशा नीम से यक्कुल सहन माळा लायक ईत्‍तीत.
LUK 10:15 अदिक हे कफरनहूम, येन नी स्वर्ग ताका म्याकुच नेगुकु आद्या? नी पाताल लोक ताका ल्यालमा होद्या.”
LUK 10:16 यीशु तान चेलागोळ से अंदुन, “जो नीम केळतान, आव नान केळतान; अदिक जो नीमी तुच्छ जान्सतान, आव नानी तुच्छ जान्सतान; अदिक जो नानी तुच्छ जान्सतान, आव नान कळावाळेर इक तुच्छ जान्सतान.”
LUK 10:17 आंदुर बहात्‍तर चेलागोळ खुशी माळतेला बंदुर अदिक अनली हतदुर, “हे प्रभु, नीन हेसुर देल दुष्टआत्मा भी नाम आग्या मान्सताव.”
LUK 10:18 यीशु आंदुर से अंदुन, “ना शैतान उक बिजली इन घाई स्वर्ग टु बिळ्स नोळीन.
LUK 10:19 केळी, कि ना नीमी हाव अदिक पुरा सामर्थ्य मा अधिकार कोटीन; अदिक नीमी येनु हानि आगतीदील.
LUK 10:20 फिर भी ईदुर देल खुश आगबाळी कि आत्मा नीम वश दा आद, लेकीन इदुर देल खुश आगी कि नीम हेसुर स्वर्ग दा लिख्सकु आद.”
LUK 10:21 आ समय यीशु पवित्र आत्मा दा आगकु खुशी देल तुम्मेदुन, अदिक अंदुन, हे आप्पा, स्वर्ग अदिक पृथ्वी नव प्रभु, ना नीन धन्यवाद माळतीन कि नी ई मातगोळी आंदुर से जो ग्यानी आर अदिक कल्त माळकु लॉकुर से होचकोमकु ईट्द, अदिक चिकोरगोळ मा प्रगट माळ्द. हव, हे आप्पा, यतिकी नीनी ईदा वळ्लीद हत्‍त.
LUK 10:22 नान आप्प नानी सप्पा येनारा सोप्स बुट्टुन; अदिक याऊ जान्सालुन कि पार याव हुन सिर्फ आप्प, “अदिक आप्प याव हुन ईद भी याऊ जान्सालुन सिर्फ पार अदिक आव यार मा पार अदरी प्रगट माळोद चाहासतान.”
LUK 10:23 आग चेलागोळ दी तिर्गकु आबना दा अंदुन, “धन्य आव अव कण्णगोळ, जो ई मातगोळ जो नीव नोळतीर अव नोळताव.
LUK 10:24 यतिकी ना नीम से अनतीन कि हापाळ सा भविष्यवक्तागोळ अदिक राजागोळ चाहासदुर कि जो मातगोळ नीव नोळतीर आंदुर नोळुल पर नोळीदील, अदिक जो मातगोळ नीव केळतीर आंदुर केळुल पर केळीदील.”
LUK 10:25 अदिक ऊंद व्यवस्थापक येद्दुन अदिक ईद अनतेला यीशु उन परीक्षा माळली कुरतुन, “हे गुरु, अनन्त जीवन सिकोद साटी ना येन माळाईन?”
LUK 10:26 यीशु आऊन से अंदुन, “मूसा अन्द व्यवस्था दा येन लिख्सकु आद? नी ह्यांग वाचुसत्या?”
LUK 10:27 आव उत्‍तर कोट्टुन, “मूसा अन्द व्यवस्था अनतद, ‘नी प्रभु तान परमेश्वर से तान सप्पा मन अदिक तान सप्पा जीव अदिक तान सप्पा शक्ति अदिक तान सप्पा बुद्धी इन सांगुळ प्यार ईट अदिक तान मान्ना हातळोर से तान घाई प्यार ईट.’”
LUK 10:28 यीशु आऊन से अंदुन, “नी बराबर उत्‍तर कोट्ट, ईदा माळ रा नी जित्‍ता ईत्या.”
LUK 10:29 लेकीन आव तान तान इक न्यायी ठहरूसोद इच्छा देल यीशु से केळदुन, “रा नान मान्ना हातळोर याव हुन?”
LUK 10:30 यीशु उत्‍तर कोट्टुन, “ऊंद मंळसा यरूशलेम टु यरीहो अक होगोन कि डाकूगोळ आऊक घेर्सकु आऊन कपळा ईळ्स बुटुर, अदिक बडु माळकु आऊक सायोर साटी बिटकु होटोदुर.
LUK 10:31 अदिक हिंग आत कि अदा हादी देल ऊंद याजक होगोन, लेकीन आऊक नोळकु आव अनदेखा माळदुन अदिक होटोदुन.
LUK 10:32 ईदा रीति देल ऊंद लेवी भी आ जागा मा बंदुन, आव भी आऊक अनदेखा माळकु होटोदुन.
LUK 10:33 लेकीन ऊंद सामरी जाती नव यात्री अल टु होगोन, अदिक आऊक नोळकु आऊन मा तरस तिंदुन.
LUK 10:34 आव आऊन हात्‍ती बंदकु आऊन जखमगोळ मा याण्णा अदिक अंगुर इन रास्सा हाक्‍कु पट्टी कटदुन, अदिक तान सवारी मा येर्सकु आऊक सरई दा ओतुन, अदिक आऊन स्यावा टहल माळदुन.
LUK 10:35 दुसरा दिन आव येढ्ढ बेळ्ली इन सिक्‍का तेगुकु सरई इन मालिक उक कोट्टुन, अदिक अंदुन, ‘ईऊन स्यावा टहल माळेत, अदिक जो येनारा अपमान दी टु हत्‍तीत, अद ना वापस बंदुर मा नीनी तुम कोळाईन.’”
LUK 10:36 ईग यीशु “नीन विचार देल ई मुरू दा टु आ मंळसा अन्द जो डाकूगोळ्द कय दा सिक्‍केगीदुन, याव मान्ना हातळोर आदुन?”
LUK 10:37 आव अंदुन, “आवा याव आऊन मा दया माळदुन.” यीशु आऊन से अंदुन, “होग, नी भी हिंग अच माळ.”
LUK 10:38 याग आंदुर होगोर रा यीशु ऊंद ऊर दा होदुन, अदिक मार्था हेसुर इनोर ऊंद आर्त यीशु उन तान मान्या स्वागत माळदुर.
LUK 10:39 मरियम हेसुर इनोर आकिन ऊंद आकतींग ईरोर. आक प्रभु उन कालगोळ दी कुर्तकु आऊन वचन केळतोगोर.
LUK 10:40 लेकीन मार्था स्यावा माळ्त-माळ्त व्याकुल आगेदुर, अदिक आऊन हात्‍ती बंदकु अनली हतदुर, “हे प्रभु, येन नीनी येनु अच चिन्ता हैलेच कि नान आकतींग नानी स्यावा माळोद साटी आबना अच बिट बुटार? इदुरसाटी आकिन से अन कि नान सहायता माळुल.”
LUK 10:41 प्रभु आक इक उत्‍तर कोट्टुन, “मार्था, हे मार्था; नी हापाळ मातगोळ्द साटी चिन्ता माळत्या अदिक व्याकुल आगत्या.
LUK 10:42 लेकीन ऊंद मात जरूरी आद, अदिक आ वळ्लीद भाग इक मरियम चुनुस कोंडार जो आकिन से कस्तकु आगतीदील.”
LUK 11:1 यीशु यातोदारा जागा दा प्रार्थना माळोन. याग यीशु प्रार्थना माळ कोंडुन, रा आऊन चेलागोळ दा टु ऊंद चेला आऊन से अंदुन, “हे प्रभु, ह्यांग नीर-संस्कार कोळावाळा यूहन्ना तान चेलागोळी प्रार्थना माळोद कलस्यान हांग अच नामी भी नी कल्सबुळ.”
LUK 11:2 यीशु आंदुर से अंदुन, याग नीव प्रार्थना माळी रा अनी: हे आप्पा: नीन हेसुर पवित्र मान्सकु आगुल, नीन राज्य बरूल.
LUK 11:3 नाम हागुल तिर्मुद रोट्टी रोज-रोज नामी कोळतोग,
LUK 11:4 ह्यांग नाव तान हर ऊंद अपराधीगोळी माफ माळतेव, हांग अच नी भी नाम पापगोळी माफ माळ, अदिक नामी परीक्षा दा तरबाळ.
LUK 11:5 आग यीशु आंदुर से अंदुन, “नीम दा टु याव आन कि आऊन संगी आगुल, अदिक आव आर्धा ईळ्लकी आऊन हात्‍ती होगकु आऊन से अनुल, ‘हे संगी; नानी मुर रोट्टीगोळ कोळ.
LUK 11:6 यतिकी ऊंद यात्री संगी नान हात्‍ती बंदान, अदिक आऊन तिनसोर साटी नान हात्‍ती येनु हैलेच.’”
LUK 11:7 अदिक आव तान मन इन बुळ्क टु उत्‍तर कोळुल, “नानी माळबाळ; ईग रा दरवाजा बंद आद अदिक नान चिकोर नान हात्‍ती हासक्या मा आर, इदुरसाटी ना यदकु नीनी रोट्टी कोळ सकालीन?”
LUK 11:8 ना नीम से अनतीन, अगर आव आऊन संगी हुन तरी भी आव आऊक यदकु रोट्टी कोळालुन, फिर भी रोट्टी बेळावाळा तान शरम बिटकु बेळुल रा ईद कारण आव यदकु आऊक याट जरवत आद आस रोट्टी कोट्टान.
LUK 11:9 अदिक ना नीम से अनतीन कि बेळी, रा नीमी कोटकु आदीत; ढुंढ्सी, रा नीमी सिक्‍कीत; ठोकसीर, रा नीम साटी तेरूकु आदीत.
LUK 11:10 यतिकी जो यावारा बेळतान, आऊक कोटकु आगतद; अदिक जो ढुंढ्सतान, आऊक सिकतद; अदिक जो ठोक्सतान, आऊन साटी तेरूकु आगतद.
LUK 11:11 नीम दा टु हिंग याव आप्प आन, कि आऊन पार मेन बेळतान, रा मेन इन जागा आऊक हाव कोळतान?
LUK 11:12 या तत्‍ती बेळुल रा आऊक चेळ कोळुल?
LUK 11:13 इदुरसाटी याग नीव बुरा ईतकु तान चिकोरी वळ्लीद वस्तु कोळोद जान्सतीर, रा नीम स्वर्गीय आप्प तान बेळावाळेरी पवित्र आत्मा यती कोळतीदील.
LUK 11:14 बाक यीशु ऊंद दुष्टआत्मा अक जो आऊन बुळ्क होगदुर मा आ मंळसा माताळ ईला सकोन आ दुष्टआत्मा अक तेगदुन. याग दुष्टआत्मा होट बुळ्त रा मुक्‍का मंळसा माताळली कुरतुन; अदिक लॉकुरी अचम्भा आत.
LUK 11:15 लेकीन आंदुर दा टु थ्वाळासा लॉकुर अंदुर, “ईव रा बालज़बूल हेसुर ईनव दुष्टआत्मागोळव सरदार उन मदत देल दुष्टआत्मागोळी तेगुतान.”
LUK 11:16 दुसरा लॉकुर यीशु उन परीक्षा माळोर साटी आऊन से आकाश इन चमत्कार बेळदुर जो हिंग तोर्सुल कि परमेश्वर आऊन सांगुळ आन.
LUK 11:17 लेकीन आव आंदुर मन इन मातगोळी जान्सकु, आंदुर से अंदुन, “या-या राज्य दा फूट बिळतद, अद राज्य बरबाद आगेगतद; अदिक या मान्या फूट बिळतद, अद नाश आगेगतद.
LUK 11:18 अगर शैतान तान अच विरोधी आगेगुल, रा आऊन राज्य ह्यांग बन्सकु ईत्‍तीत? यतिकी नीव नान बारा दा रा अनतीर कि ईव बालज़बूल उन सहायता देल दुष्टआत्मा तेगुतान.
LUK 11:19 भला अगर ना बालज़बूल उन सहायता देल दुष्टआत्मागोळी नेगुतीन, रा नीम मान्सावाळेर यार सहायता देल तेगुतार? इदुरसाटी आंदुर अच नीम न्याय माळावाळेर आदार.
LUK 11:20 लेकीन अगर ना परमेश्वर उन आत्मा अन्द सहायता देल दुष्टआत्मागोळी नेगुतीन, रा परमेश्वर उन राज्य नीम हात्‍ती होट बंदाद.
LUK 11:21 “याग ताकतवर मंळसा हथियार हुडुकु तान हवेली इन रखवाली माळतान, रा आऊन संपत्‍ती ऊळ्दकु ईरतद.”
LUK 11:22 पर याग आऊन से धोड्डेव यावारा मात्‍त ताकतवर मंळसा चढ़ाई माळकु अदरी जीक्स कोमतान, रा आऊन अव हथियार यऊर मा आऊक भरोसा ईरोद, कस्त कोमतान अदिक आऊन संपत्‍ती कस्तकु वाट्स बुळतान.
LUK 11:23 जो नान सांगुळ हैलेच आव नान विरोध दा आन, अदिक जो नान सांगुळ जमा माळालुन आव बगरूस्तान.
LUK 11:24 “याग दुष्टआत्मा मंळसा दा टु होट बुळतद रा वंळगींद जागागोळ दा आराम ढुंढ्सतेला टेटतद, अदिक याग जागा सिकाल रा अनतद, ‘ना तान अदा मान्या दा यल टु ना होटीदिन होटोगाईन.’
LUK 11:25 अदिक बंदकु आ मान्ना अक झाळ-झुळ्सकु अदिक सजुसकु नोळतद.
LUK 11:26 आग अद होगकु तान से बेकार येळ अदिक आत्मागोळी तान सांगुळ तरतद, अदिक अव आ मान्या होक्‍कु अल निवास माळताव, अदिक आ मंळसा अन्द दशा पयला टु भी बेकार आगेगताव.”
LUK 11:27 याग यीशु ईव मातगोळ अनतेला अच ईरोन रा भीळ दा टु यातारा आर्त धोळ्द आवाज देल अंदुर, “धन्य आद अद गर्भ यदुर्दा नी इत्या अदिक अव स्तन यार्द हाल नी कुळद्या.”
LUK 11:28 यीशु अंदुन, “हव; लेकीन धन्य आंदुर आर जो परमेश्वर उन वचन केळतार अदिक मान्सतार.”
LUK 11:29 याग धोळ्द भीळ जमा आगतोगोद रा यीशु अनली कुरतुन, “ई दुनिया अन्द लॉकुर बुरा आर; आंदुर चमत्कार ढुंढ्सतार; पर योना अन्द चमत्कार अक बिटकु यातोदारा दुसरा चमत्कार आंदरी कोटकु आगतीदील.
LUK 11:30 ह्यांग योना नीनवे अन्द लॉकुर्द साटी चमत्कार ठहरूसदुन, हांग अच मंळसा अन पार भी ई दुनिया अन्द लॉकुर्द साटी ठहरूस्यान.
LUK 11:31 दक्षिण इन रानी न्याय इन दिशी ई दुनिया अन्द मंळसागोळ्द सांगुळ यदकु आंदरी दोषी ठहरूस्यार, यतिकी आक सुलैमान उन ग्यान केळली पृथ्वी इन छोर टु बंदार, अदिक नोळी, ईल आव आन जो सुलैमान से भी धोड्डेव आन.
LUK 11:32 नीनवे नगर इन लॉकुर न्याय इन दिशी ई दुनिया अन्द लॉकुर सांगुळ निदुरकु, आंदरी दोषी ठहरूस्यार; यतिकी आंदुर योना अन्द प्रचार केळकु पाप माळोद बिट बुटुर, अदिक नोळी, ईल आव आन जो योना से भी धोड्डेव आन.
LUK 11:33 “यावारा मंळसा दिंग्या होत्‍ताकु येल्यारा होचकु या बर्तन इन ल्यालमा ईटालुन, लेकीन दीवट मा ईटतान कि बुळ्क बरावाळेर इक ऊजुळ सिकुल.
LUK 11:34 नीन मय इन दिंग्या नीन कण्ण हुन, इदुरसाटी याग नीन कण्ण निर्मल आव रा नीन सप्पा मय भी ऊजुळ इन घाई आद; लेकीन याग नीन कण्णगोळ अच बुरा आव रा नीन मय भी अंधार इन घाई आद.
LUK 11:35 इदुरसाटी सावधान ईरेत कि जो ऊजुळ नीन दा आद अद अंधारकुप आगबाळुल.
LUK 11:36 इदुरसाटी अगर नीन सप्पा मय ऊजुळ आगुल अदिक अदुर्द यातोदु भाग अंधार ईरबाळुल रा सप्पा अन्द सप्पा हिंग ऊजुळ आदीत, ह्यांग आ समय आगतद याग दिंग्या तान चमक देल नीनी ऊजुळ कोळतद.”
LUK 11:37 याग यीशु उन मातगोळ हेळकु आगेगीत रा यातोवारा फरीसी आऊन से विनती माळदुन कि नान मान्या भोजन माळ. यीशु बुळ्क होगकु भोजन माळली कुरतुन.
LUK 11:38 फरीसी इक ईद नोळकु अचम्भा आत कि आव ऊमोर से पयले यहूदीगोळ्द रीति इन अनुसार कय तोळदिदील.
LUK 11:39 प्रभु आऊन से अंदुन, “हे फरीसीगोळा, नीव वाटी अदिक तंळग्या अक म्याक म्याकुच टु रा ऊदतीर, लेकीन नीम बुळ्क अंधार अदिक दुष्टता तुमकु आद.
LUK 11:40 हे निर्बुद्धीगोळा, याव व्हार्या अन्द भाग माळ्यान, येन आव बुळ्क इन भाग माळीदिल?
LUK 11:41 लेकीन हा, जो नीम हात्‍ती आद अद गरीबगोळी कोटबुळी, रा नोळी, सब येनारा नीम साटी शुद्ध आगेदीत.
LUK 11:42 “पर हे फरीसीगोळा, नीम मा हाय! नीव पदीना अदिक सुदाब जळीबुटी इन अदिक हापाळ प्रकार इन साग पात इन दसवा अंश कोळतीर, लेकीन न्याय इक अदिक परमेश्वर उन प्यार इक टाल्स बुळतीर; माळोद रा हुन कि इवरी भी माळतेला ईरायदीर अदिक अवरी भी ईला बिळायदिर.”
LUK 11:43 “हे फरीसीगोळा, नीम मा हाय! नीव यहूदी लॉकुर्द सभागृहगोळ दा मुख्य-मुख्य आसन अदिक सात्‍तागोळ दा नमस्कार अदिक प्यार चाहासतीर.
LUK 11:44 हाय नीम मा! यतिकी नीव आ होचकोम्द कब्रगोळ घाई आईर, यार मा लॉकुर नळुतार लेकीन अरालुर.”
LUK 11:45 आग ऊंद व्यवस्थापक आऊक उत्‍तर कोट्टुन, “हे गुरु, ई मातगोळ्द अंदुर देल नी नाम अपमान माळत्या.”
LUK 11:46 आव अंदुन, “हे व्यवस्थापकगोळा, नीम मा भी हाय! नीव हिंग ओझा यदरी नेगोद कठिन आद, मंळसागोळ मा रचतीर लेकीन नीव खुद आ ओजागोळी नेगोर साटी तान ऊंद बेळ्ल भी हचालीर.
LUK 11:47 हाय नीम मा! नीव आ भविष्यवक्तागोळ्द कब्रगोळ माळतीर, यवरी नीम्द अच आप्प-दादागोळ कोंद बुटीदुर.
LUK 11:48 इदुरसाटी नीव गवाह आईर, अदिक तान आप्प-दादागोळ्द क्याल्सागोळ देल सयमत आईर; यतिकी आंदुर आंदरी कोंद बुटुर अदिक नीव आंदुर्द कब्रगोळ माळतीर.
LUK 11:49 इदुरसाटी परमेश्वर उन बुद्धी भी अंदाद, ‘ना आंदुर हात्‍ती भविष्यवक्तागोळ अदिक प्रेरितगोळी कळाईन, अदिक आंदुर आंदुर दा टु यारारा अक कोंद बुट्टार, अदिक यारारा अक सतुस्यार.’
LUK 11:50 ताकी यास भविष्यवक्तागोळ्द खुन दुनिया अन्द उत्पत्ति देल वाहुसकु आग्याद, सप्पा मुंदुर्द हिसाब ई दुनिया अन्द लॉकुर देल ताकोमकु आगुल:
LUK 11:51 हाबील उक कोंदकु आगीत आगुटु हुडुकु जकरयाह अक कोन्नोद ताका, जो वेदी अदिक मंदिर इन न्याड्या दा घात माळकु आगीत. ना नीम से खरा अनतीन, ई सप्पा मुंदुर्द हिसाब ई समय इन लॉकुर देल ताकोमकु आदीत.
LUK 11:52 “हाय नीव व्यवस्थापकगोळ मा! नीव ग्यान इन कुंजी रा तान हात्‍ती इच ईटदीर, लेकीन नीव खुद अच प्रवेश माळीदिल, अदिक प्रवेश माळावाळेर इक भी रोक्स बुट्टीर.”
LUK 11:53 याग यीशु अल टु होट्टुन, रा नियम इन गुरु अदिक फरीसी कय तोळकु आऊन हिंद बिदोदुर अदिक हापाळ धोळ्द वाद माळली हतदुर कि आव हापाळ सा मातगोळ्द चर्चा माळुल,
LUK 11:54 अदिक घात मा हतकु ईत्‍तुर कि आऊन बाय इन यातोदारा मात हुडुल.
LUK 12:1 ईट्टुर दा याग हजारो लॉकुर्द भीळ हत्‍तेत, ईल ताका कि आंदुर आबुर दाबुर मा बिळली आगतोगोर, रा यीशु सब से पयले तान चेलागोळ से अनली कुरतुन, “फरीसीगोळ्द कपटरूपी खमीर देल सावधान ईरतीर.
LUK 12:2 येनु होचकु हैलेच, जो तेरूकु आगतीदील; अदिक ना येनारा होचकु आद, जो जान्सकु आगतीदील.
LUK 12:3 इदुरसाटी जो येनारा नीव अंधार दा अंदीर, अद ऊजुळ दा केळकु आदीत; अदिक जो नीव बुळ्क इन कमरागोळ दा कानो कान अंदीर, अद छत मा टु प्रचार माळकु आदीत.
LUK 12:4 “ना नीम से जो नान संगी हुईर अनतीन कि जो मय इन घात माळतार लेकीन अदुर्द हिंद मात्‍त येनु माळ सकालुर, आंदुर से अंजबाळी.
LUK 12:5 ना नीमी चेतावनी कोळतीन कि यार से अंज पायजे, घात माळदुर बाद्दा यार इक नरक दा हाक्‍कोद अधिकार आद, आ परमेश्वर से अच अंजी; हव, ना नीम से अनतीन, आऊन से अच अंजी.
LUK 12:6 “येन येढ्ढ पैस्या अन्द अईद चिमणी पक्षी मारालव? तरी भी परमेश्वर अऊर दा टु ऊंद जीव इक भी मारालुन.
LUK 12:7 नीमव ताल्ला अन्द सप्पा चुट्टी भी आळुकु आव, इदुरसाटी अंजबाळी, नीव हापाळ चिमणीगोळ से भी किमती आईर.
LUK 12:8 “ना नीम से अनतीन जो यावारा मंळसागोळ मुंद नानी मान्स कोंडान आऊक मंळसा अन पार भी परमेश्वर उन स्वर्गदूतगोळ्द मुंद मान्स कोंडान.
LUK 12:9 लेकीन जो मंळसागोळ्द मुंद नान इनकार माळुल आऊन परमेश्वर उन स्वर्गदूतगोळ्द मुंद इनकार माळकु आदीत.
LUK 12:10 “जो यावारा मंळसा अन पार उन विरोध दा यातोवारा मात अनुल, आऊन अद अपराध माफ माळकु आदीत, लेकीन जो पवित्र आत्मा अन्द अपमान माळुल, आऊन अपराध माफ माळकु आगतीदील.
LUK 12:11 “याग लॉकुर नीमी सभागोळ अदिक न्यायाधीशगोळ अदिक अधिकारीगोळ्द मुंद ओतार, रा चिन्ता माळबाळेतीर कि नाव याता रीति देल या येन उत्‍तर कोट्टेव, या येन अंदेव.
LUK 12:12 यतिकी पवित्र आत्मा अदा समय नीमी कल्स बुट्टीत कि येन अनोद आद.”
LUK 12:13 बाक भीळ दा टु ऊंद मंळसा यीशु से अंदुन, “हे गुरु, नान वार्ट से अन कि आप्प उन संपत्‍ती नान सांगुळ वाट्स कोमुल.”
LUK 12:14 आव आऊन से अंदुन, “हे मंळसा, याव नानी नीन न्यायी या बटवारा माळावाळा नियुक्त माळ्यान?”
LUK 12:15 अदिक आव आंदुर से अंदुन, “सावधान ईरी, अदिक हर प्रकार इन लोभ देल तान तान इक ऊळ्सकु ईटी; यतिकी यारदारा जीवन आऊन संपत्‍ती मा निर्भर ईराल्द.”
LUK 12:16 यीशु आंदुर से ऊंद उदाहरण अंदुन: “यावारा धनवान उन जमीन मा धोळ उपज आत.
LUK 12:17 आग आव तान मन दा विचार माळली कुरतुन, ‘ना येन माळाईन? यतिकी नान अल जागा हैलेच यल तान उपज ईट सकाईन.’
LUK 12:18 अदिक आव अंदुन, ‘ना ईद माळाईन: ना तान लेल इन खर्यान मुर्दकु अदुर से वळ्लीद माळाईन; अदिक अल तान सप्पा अन्न अदिक संपत्‍ती ईटाईन;
LUK 12:19 अदिक ना खुद तान जीव से अनाईन कि, नीन हात्‍ती हापाळ वर्ष इन साटी हापाळ संपत्‍ती ईटकु आद; चैन ईट, तिन, कुडू, वळ्लीद देल ईर.’
LUK 12:20 लेकीन परमेश्वर आऊन से अंदुन, हे मूर्ख! ईदा ईळ्लक नीन जीव नीन से ताकोमकु आदीत; आग जो येनारा नी जमा माळ्या अद यार्द आदीत?
LUK 12:21 “हिंग अच आव मंळसा भी आन जो तान साटी धन जमा माळतान, लेकीन परमेश्वर उन नजर दा धनी हैलेच.”
LUK 12:22 बाक यीशु तान चेलागोळ से अंदुन, “इदुरसाटी ना नीम से अनतीन, तान जीव इन चिन्ता माळबाळी कि नाव येन तिनदेव; ना तान मय इन कि येन हाक्‍केव.
LUK 12:23 यतिकी भोजन से जीव, अदिक फळक्यागोळ से मय किमती आद.
LUK 12:24 आकाश ईनव पक्षीगोळी नोळी; अव ना बींजा हचताव, ना कोयताव; ना तान तिना जागा दा संगरूस्कु ईटताव; तरी भी परमेश्वर अवरी पाल्सतान. नीम किमत रा पक्षीगोळ से हापाळ यक्कुल आद!
LUK 12:25 नीम दा टु हिंग याव आन जो चिन्ता माळकु तान जिंदगी दा ऊंद घळी भी वाळुस सकतान?
LUK 12:26 इदुरसाटी अगर नीव सब से स्यांळ्द क्याल्सा भी माळ सकालीर, रा दुसरा मातगोळ्द साटी येती चिन्ता माळतीर?
LUK 12:27 आळी दाकळव फूलगोळ मा ध्यान माळी कि अव ह्यांग वाळुसताव, ना तान साटी फळक्यागोळ माळताव; तरी भी ना नीम से अनतीन कि सुलैमान राजा भी तान पुरा जीवन दा, अऊर दा टु यारदु घाई कपळा हाक्‍कु ईला ईरोन.
LUK 12:28 इदुरसाटी अगर परमेश्वर मैदान इन काड्डा अक, जो ईंद आद अदिक नाळ बेक्‍की दा झोक्सकु आदीत, हिंग कपळा हाकसुसतान; रा हे अल्पविश्वासीगोळा, आव नीमी येती हाकसुसतिदिल?”
LUK 12:29 “अदिक नीव ई मात इन खोज दा ईरबाळी कि येन तिनदेव अदिक येन कुळदेव, अदिक विचार भी माळबाळी.
LUK 12:30 यतिकी ई दुनिया अन्द लॉकुर ई सप्पा वस्तुगोळ्द खोज दा ईरतद: अदिक नीम आप्प जान्सतान कि नीमी ई वस्तुगोळ्द जरवत आद.
LUK 12:31 लेकीन आऊन राज्य अन्द खोज दा ईरी, रा ई वस्तुगोळ भी नीमी सिक्‍केदव.”
LUK 12:32 “हे नान स्यांळ्द झुण्ड इन लॉकुरा, अंजबाळी; यतिकी नीमव आप्प प्रसन्नता देल, नीमी राज्य कोळोद चाहास्यान.
LUK 12:33 तान संपत्‍ती मारकु दान माळबुळी; अदिक तान साटी हिंग चीलागोळ माळी जो हाळोदव आगालव, मतलब स्वर्ग दा धन जमा माळी जो कम आगाल अदिक यऊर हात्‍ती काळ्ल होगालुन, अदिक किळा भी बिगळुसाल.
LUK 12:34 यतिकी यल नीम धन आद, अल नीम मन भी हतकु ईत्‍तीत.”
LUK 12:35 नीम नेळुगोळ कटकु ईरूल अदिक नीम दिंग्या होत्‍ताकु ईटी,
LUK 12:36 अदिक नीव आ मंळसागोळ घाई बन्सी, जो तान स्वामी इन हादी कायेत्यार कि आव मदा दा टु याग बंदान, कि याग आव बंदकु दरवाजा ठोकसुल रा तुरन्त आऊन साटी तेरू बुळुल
LUK 12:37 धन्य आर आ दासगोळ यारी स्वामी बंदकु च्याता नोळुल; ना नीम से खरा अनतीन कि आव नेळु कटकु आंदरी भोजन माळली कुरस्यान, अदिक हात्‍ती बंदकु आंदुर्द स्यावा माळ्यान.
LUK 12:38 अगर आव ईळ्लक इन दुसरा पहर या तिसरा पहर इक बंदकु आंदरी च्याता नोळुल, रा आ दासगोळ धन्य आर.
LUK 12:39 लेकीन “नीव ईद ध्यान ईटी कि अगर मान्ना अन्द स्वामी अरायदुन कि काळ्ल याता समय बंदान, रा च्याता ईरायदुन अदिक तान मान्या मान्ना अन काळ्लपनी ईला आग गोळायदुन.”
LUK 12:40 नीव भी तयार ईरी; यतिकी याता घळी नीव भी सोचालीर, अदा घळी ना मंळसा अन पार होट बंदान.
LUK 12:41 आग पतरस अंदुन, “हे प्रभु, येन ईद उदाहरण नी नाम से अच या सप्पा मुंदुर से अनत्या.”
LUK 12:42 प्रभु अंदुन, आव विश्वासलायक अदिक बुद्धिमान सेवक याव हुन, यार्द मुनीम आऊक नौकर चाकरगोळ्द म्याकुच अधिकारी नियुक्त माळुल कि आंदरी समय मा भोजन सामग्री कोळुल.
LUK 12:43 धन्य आन आव दास, यारी आऊन स्वामी बंदकु हिंग अच माळ्त नोळुल.
LUK 12:44 ना नीम से खरा अनतीन, आव आऊक तान सप्पा संपत्‍ती मा अधिकारी नियुक्त माळ्यान.
LUK 12:45 लेकीन अगर आ दास तान मन दा ईद अनुल कि नान स्वामी हापाळ समय देल बंदान, अदिक दास अदिक दासीगोळी बडुली-मेटली हतुल अदिक तिंदुर-कुळदुर दा हत्‍त ईतकु नशा दा चूर ईरूल.
LUK 12:46 रा आ दास उन स्वामी हिंग दिन, याग आव आऊन हादी ईला कायतीदान, अदिक हिंग समय यदरी आव जान्सालुन, बंदान अदिक आऊक भारी दण्ड कोटकु आऊन जागा अविश्वासीगोळ्द सांगुळ ठहरूस्यान.
LUK 12:47 आ दास जो तान स्वामी इन इच्छा जानसोन, पर तयार आगकु आऊन इच्छा अन्द अनुसार कार्य माळीदिल, हापाळ बळ्सकोंडान.
LUK 12:48 लेकीन जो ईद ईला जान्सकु बळ्सकोमोद कार्य माळुल आव कम बळ्सकोंडान. इदुरसाटी यारी हापाळ कोटकु आग्याद, आऊन से हापाळ बेळकु आदीत; अदिक यारी हापाळ सौप्सकु आग्याद, आऊन से हापाळ ताकोमकु आदीत.
LUK 12:49 “ना पृथ्वी मा बेक्‍की हचली बंदीन; अदिक नान हापाळ इच्छा आद कि अद बेक्‍की ईगल्या हत्‍तेगाईत!
LUK 12:50 नानी रा दुसरा प्रकार देल बपतिस्मा ताकोमोद आद, अदिक यागासताका अद पुरा आगाल आगासताका ना ह्यांग दुविधा दा ईराइन!
LUK 12:51 नीव येन सम्सतीर कि ना धरती मा मिलाप माळसुसली बंदीन? ना नीम से अनतीन; ईला, उलटा ब्यार्र माळसुसली बंदीन.
LUK 12:52 यतिकी ईगी टु ऊंद मान्या दा अईद मुंदुर आपस दा दुश्मनी ईट्यार, मुर मुंदुर येढ्ढ मुंदुर से अदिक येढ्ढ मुंदुर मुर मुंदुर से.
LUK 12:53 आप्प पार उन, अदिक पार आप्प उन खिलाप होदान; मोय पोर इन, अदिक पोर मोय इन, आत्‍त सास्सा अन्द, अदिक सास्स आत्‍ता अन्द खिलाप होदार.”
LUK 12:54 यीशु भीळ से अंदुन, “याग नीव बादल इक पश्चिम टु येळ्त नोळतीर रा तुरन्त अनतीर कि माळ बंदीत, अदिक हांग अच आगतद;
LUK 12:55 अदिक याग दक्षिण टु हवा नळुत नोळतीर रा अनतीर कि बिसुल हत्‍तीत, अदिक हांग अच आगतद.
LUK 12:56 हे कपटीगोळा, नीव पृथ्वी अदिक आकाश इन रूप-रंग दा भेद माळ सकतीर, लेकीन ई युग इन बारा दा भेद माळोद येती जान्सालीर?
LUK 12:57 “नीव खुद अच निर्णय येती माळ कोमालीर कि उचित येन आद?
LUK 12:58 याग नी तान मुद्दई इन सांगुळ न्यायाधीश उन हात्‍ती होगेत्या रा हादी मा अच आऊन से बिळसुसोद प्रयत्न माळकोम, हिंग आगबाळुल कि आव नीनी न्यायी इन हात्‍ती जेडुकु वोईल, अदिक न्यायी नीनी सिपाही इक सोप्सुल अदिक सिपाही नीनी बंदीगृह दा हाक बुळुल.
LUK 12:59 ना नीम से अनतीन कि यागासताका नी कवळी-कवळी तुम कोळतीदील आगासताका नी तान तान इक अल टु बिळ्स सकतीदिल.”
LUK 13:1 आ समय थ्वाळासा लॉकुर पोहचुस्दुर, अदिक यीशु से आ गलीलीगोळ्द बारा दा चर्चा माळली कुरतुर, यार्द खुन पिलातुस माळीदुन.
LUK 13:2 ईद केळकु यीशु आंदुर से उत्‍तर दा ईद अंदुन, “येन नीव सम्सतीर कि ई गलीली येन सप्पा गलीलीगोळ से यक्कुल पापी ईरोर कि आंदुर मा हिंग विपत्‍ती बित्‍त?
LUK 13:3 ना नीम से अनतीन कि ईला; लेकीन अगर नीव पाप माळोद बंद माळतीदील रा नीव सप्पा मुंदुर भी ईदा रीति देल नाश आगीदीर.
LUK 13:4 या, येन नीव सम्सतीर कि आंदुर अठरा मुंदुर यार मा शीलोह इन गुम्मट बित्‍त, अदिक आंदुर दब्सकु सोतोदुर: यरूशलेम इन अदिक ईरावाळेर से यक्कुल अपराधी ईरोर?
LUK 13:5 ना नीम से अनतीन का ईला; लेकीन अगर नीव पाप माळोद बंद माळतीदील रा नीव सप्पा मुंदुर भी ईदा रीति देल नष्ट आदीर.”
LUK 13:6 बाक यीशु ईद उदाहरण भी अंदुन: “यारदारा अंगुर इन केई दा ऊंद अंजीर इन मार्र हतकु ईरोद. आव अदुर्दा काय ढुंढ्सली बंदुन, लेकीन नोळीदील.
LUK 13:7 आग आव बेल इन कायावाळा से अंदुन, ‘नोळ, मुर वर्ष टु ना ईद अंजीर इन मार्र दा काय ढुंढ्सली बरतीन, लेकीन नोळालीन. इदरी कळ्द बुळ कि ईद जागा अक भी येती रोक्सकु ईटुल?’
LUK 13:8 आग बेली कायावाळा उत्‍तर कोट्टुन, ‘हे स्वामी, इदरी ई वर्ष अदिक ईरगोळ कि ना इदुर नाकु दी अगुळकु खात हाक्‍काईन.
LUK 13:9 बरावाळा साल दा अगर फलस्त रा भला, ईलारा अदरी कडु कोमेत.’”
LUK 13:10 विश्राम इन दिन यीशु ऊंद यहूदी लॉकुर्द सभागृह दा उपदेश माळोन.
LUK 13:11 अल ऊंद आर्त ईरोर यारी अठरा वर्ष टु ऊंद कमजोर माळावाळा दुष्टआत्मा हतकु ईरोद, अदिक आक कुबळा आगेगीदुर अदिक यातोदु रीति देल सीधा ईला आग सकोर.
LUK 13:12 यीशु आक इक नोळकु कारदुन अदिक अंदुन, “हे आर्त, नी तान कमजोरी देल वळ्लेर आगेद.”
LUK 13:13 आग आव आकिन मा कय ईटदुन, अदिक आक तुरन्त सरका आगेदुर अदिक परमेश्वर उन महिमा माळली हतदुर.
LUK 13:14 इदुरसाटी कि यीशु विश्राम इन दिन आकी वळ्लीसा माळीदुन, यहूदी इन यहूदी लॉकुर्द सभागृह अन्द सरदार सिट्ट दा बंदकु लॉकुर से अनली कुरतुन, “आर: दिन आव यदुर्दा क्याल्सा माळ पायजे अत: आ अच दिनगोळ दा बंदकु चंगा आगुल, लेकीन विश्राम इन दिन दा ईला.”
LUK 13:15 ईद केळकु प्रभु उत्‍तर कोट्टुन, “हे कपटीगोळा, येन विश्राम इन दिन नीम दा टु हर ऊंद मंळसा तान वस्ता या गधा अक क्वाटक्या दा टु खोल्सकु नीर कुळस्ली वयालीर?
LUK 13:16 रा येन उचित ईला ईरोद कि ई आर्त जो अब्राहम इन औलाद उर यारी शैतान अठरा वर्ष टु कटकु ईटीदुन, आराम इन दिन ईद बंधन देल बिळ्सकु आगायदुर?”
LUK 13:17 याग आव ई मातगोळी अंदुन, रा आऊन सप्पा विरोधी सर्मुसेदुर, अदिक सप्पा भीळ अव महिमा अन्द क्याल्सागोळ से जो आव माळतोगोन, खुश आदुर.
LUK 13:18 बाक यीशु अंदुन, “परमेश्वर उन राज्य यार घाई आद? अदिक ना आऊन उपमा यार देल कोळाईन?
LUK 13:19 आव राई इन ऊंद बींजा अन्द घाई आन, यारी यावारा मंळसा हुळकु तान केई दा बोऊस्दुन: अदिक अद वाळुसकु मार्र आगेत; अदिक आकाश इन पक्षीगोळ अदुर डगालीगोळ मा बसेरा माळदव.”
LUK 13:20 यीशु बाक अंदुन, “ना परमेश्वर ऊन राज्य अन्द उपमा यार देल कोळाईन?
LUK 13:21 आव खमीर इन घाई आन, यदरी याकारा आर्त हुळकु हापाळ सा हीट दा मिलुस्दुर, अदिक आग्त-आग्त अद सप्पा हीट खमीर आगेत.”
LUK 13:22 यीशु नगर-नगर, अदिक ऊर-ऊर आगकु उपदेश माळतेला यरूशलेम इन दी होगोन,
LUK 13:23 रा यावारा आऊन से केळदुन, “हे प्रभु, यारी उद्धार सिकतद आंदुर थ्वाळासा अच आर?” यीशु आऊन से अंदुन,
LUK 13:24 “स्यांळ्द हादी टु प्रवेश माळोद कोशिश माळी, यतिकी ना नीम से अनतीन कि हापाळ सा प्रवेश माळोद चाहस्यार, अदिक माळ सकतीदिल.
LUK 13:25 याग मान्ना अन्द स्वामी यदकु दरवाजा बंद माळ कोंडान, अदिक नीव व्हार्या नीदुरकु दरवाजा ठोक्सकु अनी, ‘हे प्रभु, नाम साटी खोल्स बुळ,’ अदिक आव उत्‍तर कोळुल, ‘ना नीमी अरालीन, नीव येलेर हुईर?’
LUK 13:26 आग नीव अनली हत्‍तीर, नाव नीन सामने तिंदीन-कुळदीन अदिक नी नाम सात्‍तागोळ दा उपदेश माळ्द.
LUK 13:27 लेकीन आव अंदान, ना नीम से अनतीन, ‘ना अरालीन नीव येलेर हुईर. हे अन्याय माळावाळेरा, नीव सब नान से दुर आईर.’
LUK 13:28 अल वोरलोद अदिक हल्ल कच्चोद आदीत; याग नीव अब्राहम अदिक इसहाक अदिक याकूब अदिक सब भविष्यवक्तागोळी परमेश्वर उन राज्य दा कुर्तकु नोळीर, अदिक तान तान इक व्हार्या तेगुत नोळीर.
LUK 13:29 अदिक पूर्व अदिक पश्चिम; उत्‍तर अदिक दक्षिण टु लॉकुर बंदकु परमेश्वर उन राज्य अन्द भोज दा भागी आदार.
LUK 13:30 अदिक आंदुर जो ईग हिंदळोर आर आंदुर पयला आदार, अदिक जो ईग पयला आर, आंदुर हिंदळोर आदार.”
LUK 13:31 अदा घळी येनारा फरीसीगोळ बंदकु यीशु से अंदुर, “ईल टु होटकु येल्यारा अलग होटोग, यतिकी हेरोदेस नीनी कोंद बुळोद चाहासतान.”
LUK 13:32 यीशु आंदुर से अंदुन, “होगकु आ कोल्या घाई चतरा मंळसा से अंदबुळी कि नोळ, ना ईंद अदिक नाळ दुष्टआत्मागोळी नेगुतीन अदिक बिमारगोळी चंगा माळतीन, अदिक तिसरा दिन तांद क्याल्सा पुरा माळाईन.
LUK 13:33 तरी नीनी ईंद अदिक नाळ अदिक तिसरा दिशी नळोद जरूरी आद, यतिकी आगसकाल कि यावारा भविष्यवक्ता यरूशलेम इन व्हार्या कोन्सुसकु आगुल.
LUK 13:34 “हे यरूशलेम! हे यरूशलेम! नी जो भविष्यवक्तागोळी कोंद बुळत्या, अदिक जो परमेश्वर उन दी टु अपमान हात्‍ती कळुकु आग्यार आंदुर मा पथराव माळत्या. यास अच घन ना ईद चाहासदीन कि ह्यांग कोळी तान पाड्डगोळी तांद पिक्‍कागोळ्द ल्यालमा जमा माळतद, हांग अच ना भी नीन चिकोरगोळी जमा माळाईन, पर नीव ईद चाहासीदिल.
LUK 13:35 नीम मान्ना नीम साटी उजाळ बिटकु होगतद, अदिक ना नीम से अनतीन: यागासताका नीव ईला अंदीर, धन्य आन आव, जो प्रभु ऊंद हेसुर देल बरतान, आगासताका नीव नानी बाक यागलु नोळतीदिल.”
LUK 14:1 बाक आव आराम इन दिन फरीसीगोळ सरदारगोळ दा टु यारदारा मान्या रोट्टी तिनली होदुन; अदिक आंदुर आऊंद घात दा ईरोर.
LUK 14:2 अल ऊंद मंळसा आऊन सामने ईरोन, यारी मय इन सुजन इन बिमारी ईरोद.
LUK 14:3 ईदुर मा यीशु व्यवस्थापकगोळ अदिक फरीसीगोळ से अंदुन, “नाम नियम इन अनुसार येन आराम इन दिन वळ्लीद माळोद उचित आद या ईला?”
LUK 14:4 लेकीन आंदुर सुंगा ईत्‍तुर. आग आव आऊक मुटकु चंगा माळदुन अदिक होग गोट्टुन,
LUK 14:5 यीशु आंदुर से अंदुन, “नीम दा टु हिंग याव आन, यार्द पार या वस्ता भाय दा बिदोगुल अदिक आव आराम इन दिन अदरी तुरन्त व्हार्या तेगुतिदील?”
LUK 14:6 आंदुर ई मातगोळ्द येनु उत्‍तर कोळ सकिदील.
LUK 14:7 याग यीशु नोळदुन कि आमन्त्रित लॉकुर ह्यांग मुख्य-मुख्य जागा नीवळुस कोमतार रा ऊंद उदाहरण कोटकु आंदुर से अंदुन,
LUK 14:8 “याग यावारा नीनी मदा दा कारदान, रा मुख्य जागा मा कुरबाळेत, ईदारा हिंग आगबाळुल कि आव नीन से भी यावारा धोड्डेव उक नेवता कोटीदान,
LUK 14:9 अदिक याव नीनी अदिक आऊक येढ्ढु मुंदरी नेवता कोटान, बंदकु नीन से अनुल, ईऊक जागा कोळ, अदिक आग नीनी सर्मिंदा आगकु सब से ल्यालमा जागा दा कुरोद बिद्दीत.
LUK 14:10 पर याग नीनी कारूकु आगुल रा सब से ल्यालमागोळ्द जागा मा होगकु कुर कि याग आव, याव नीनी बावस्या कोटान बरूल, रा नीन से अनुल, ‘हे संगी, मुंद बंदकु कुर,’ आग नीन सांगुळ कुरावाळेर्द मुंद नीन बळाई आदीत.
LUK 14:11 यतिकी जो यावारा तान तान इक धोड्डेव हेळ्यान, आव स्याणेव माळकु आदान; अदिक जो यावारा तान तान इक स्याणेव हेळ्यान, आव धोड्डेव माळकु आदान.”
LUK 14:12 आग यीशु तान बावस्या कोळावाळा से भी अंदुन, “याग नी हागुल इन या ईळ्लक इन भोज ईट, रा तान संगीगोळी या वार्टुरी या कुटुम्बगोळ या धनवान मान्ना हातळोर इक कारूबाळ, ईदारा हिंग आगबाळुल कि आंदुर भी नीनी बावस्या कोळुल, अदिक नीन वाटा खंळ्सेगुल.
LUK 14:13 लेकीन याग नी भोज माळ्या रा कंगालगोळी, लंगळा, लुलागोळी अदिक कुढ्ढगोळी कारू.
LUK 14:14 आग नी धन्य आद्या, यतिकी आंदुर हात्‍ती नीनी बदला कोळली येनु हैलेच, लेकीन नीनी न्यायीगोळ जित्‍ता आगदुर मा इदुर प्रतिफल सिक्‍कीत.”
LUK 14:15 आऊन सांगुळ भोजन माळावाळेर दा टु ऊंद मंळसा ई मातगोळी केळकु यीशु से अंदुन, “धन्य आन आव जो परमेश्वर उन राज्य दा धोळ्द भोज तिंदान.”
LUK 14:16 यीशु आऊन से अंदुन, “यावारा मंळसा धोळ्द भोज कोट्टुन अदिक हापाळ मुंदुर इक कारदुन.
LUK 14:17 याग भोजन तयार आगेत रा आव ताम दास उन कय देल आमन्त्रित लॉकुरी कारूली कळुदुन ‘बरी, ईग भोजन तयार आद.’
LUK 14:18 पर आंदुर सब इन सब माफ बेळ्ली कुरतुर. पयला आऊन से अंदुन, ना केई कोंड कोंडीन, अदिक जरूरी आद कि ना अदरी नोळाईन; ना नीन से विनती माळतीन, नानी माफ माळकोम.
LUK 14:19 दुसरा मंळसा अंदुन, ना अईद जोडी वस्ता कोंड कोंडीन, अदिक अऊर जाँच माळली होगतीन; ना नीन से विनती माळतीन नानी माफ माळ बुळ.
LUK 14:20 ऊंद मंळसा मात्‍त अंदुन, ना मदा माळीन, इदुरसाटी ना बर सकालीन.
LUK 14:21 “आ दास बंदकु तान स्वामी इक ई मातगोळी अंदकु हेळदुन. आग मान्यागोळ स्वामी सिट्ट दा बंदकु तान दास से अंदुन, ‘नगर इन सात्‍तागोळ दा अदिक गलीगोळ दा तुरन्त होगकु कंगालगोळी, लुला, लंगळागोळ अदिक कुढ्ढगोळी ईल तरी.’
LUK 14:22 दास मात्‍त अंदुन ‘हे स्वामी, ह्यांग नी अंदिद, हांग अच माळकु आग्याद; अदिक तरी भी जागा आद.’
LUK 14:23 स्वामी दास से अंदुन, ‘सळकगोळ मा अदिक वाळागोळ दी होग अदिक लॉकुरी विवश माळकु ता ताकी नान मान्ना तुम्मेगुल.
LUK 14:24 यतिकी ना नीम से अनतीन कि आ आमन्त्रित लॉकुर दा टु यारू नांद भोज इक नेकतीदिल.’”
LUK 14:25 याग धोळ्द भीळ आऊन सांगुळ होगोद, रा यीशु हिंद तिर्गकु आंदुर से अंदुन,
LUK 14:26 “अगर यावारा नान हात्‍ती बंदान अदिक तान आप्प अदिक मोय अदिक हिंग्स अदिक चिकोर अदिक वार्टुर अदिक आकतींगेर उलटा तान जीव इक भी नान से यक्कुल अप्रिय जान्सालुन, रा आव नान चेला आग सकालुन;
LUK 14:27 अदिक जो यावारा मंळसा दुख नेगुकु क्रूस मा सायली तयार आगालुन, अदिक नान हिंद बरालुन, आव भी नान चेला आग सकालुन.
LUK 14:28 “नीम दा टु याव आन जो मान्ना माळोद चाहस्तीदान, अदिक पयला कुर्तकु खर्च जोळसालुन कि याट खर्चा आदीत अदरी पुरा माळोद ताकत नान हात्‍ती आद का ईला?
LUK 14:29 ईदारा हिंग आगबाळुल कि याग आव पायवा रा हाक्‍क बुट्टुन पर पुरा तयार माळसकीदिल, रा सप्पा नोळावाळेर ईद अंदकु आऊक मज्याक दा हार्सली हतदुर,
LUK 14:30 ‘ईव मंळसा माळली रा कुरतुन पर तयार माळ सकिदील!’
LUK 14:31 “या याव हिंग राजा आन जो दुसरा राजा से युद्ध माळली होगतान, अदिक पयले कुर्तकु विचार माळ कोमालुन कि जो ईप्पत हजार सेना हुळकु नान मा येरकु बरतान, येन ना हत्‍त हजार सेना हुडुकु आऊंद सामना माळ सकतीन, या ईला?
LUK 14:32 ईलारा आऊन दुर ईरतेला अच आव स्वर्गदूतगोळ इक कळुकु मिलाप माळोद चाहास्यान.
LUK 14:33 ईदा रीति देल नीम दा टु जो यावारा तान सब येनारा त्यागसालुन, आव नांद चेला आग सकालुन.
LUK 14:34 “ऊप्प रा वळ्लीसा आद, लेकीन अगर ऊप्प इन स्वाद बिगळुसेत, रा अद याता चिज देल नमकीन माळकु आदीत.
LUK 14:35 अद ना रा जागा अन्द अदिक ना खात इन साठी क्याल्सा दा बरतद: अदरी रा लॉकुर व्हार्या भीट बुळतार. यारव केळव किव आव आव केळ कोमुल.”
LUK 15:1 सब कर ताकोमावाळेर अदिक पापी यीशु उन हात्‍ती बंदुर ताकी आऊन केळुल.
LUK 15:2 पर फरीसी अदिक नियम इन गुरु कुळकुळुस्कु अनली कुरतुर, “ईव पापीगोळ से सिकतान अदिक आंदुर सांगुळ तिनतान.”
LUK 15:3 आग आव आंदुर से ईद उदाहरण अंदुन:
LUK 15:4 “नीम दा टु याव आन यार्द सौ म्यांडागोळ ईरूल, अदिक अऊर दा टु ऊंद काळ्दोगुल, रा नीन्यानव म्यांडागोळी आळी दा बिटकु, आ काळ्द म्यांडा अक यागासताका सिक्‍काल आगासताका ढुंढ्सतेला ईरबाळुल?
LUK 15:5 अदिक याग सिक्‍केगताव, आग आव बळा खुशी देल अदरी खांदा मा नेगु बुळतान;
LUK 15:6 अदिक मान्या बंदकु संगीगोळी अदिक मान्ना हातळोर लॉकुरी जमा माळकु अनतान, ‘नान सांगुळ खुशी माळी, यतिकी नान म्यांडा जो काळ्दोगीत सिक्‍केग्याद.’
LUK 15:7 ना नीम से अनतीन कि ईदा रीति देल ऊंद मन तिर्गुसावाळा पापी इन बारा दा भी स्वर्ग दा ईट अच खुशी आदीत, याट कि नीन्यानव ईत्‍ता न्यायीगोळ्द बारा दा आगाल्द, जो पाप माळोद पयला अच बिट बुटार.
LUK 15:8 “या याक हिंग आर्त ईतीदार यार्द हात्‍ती हत्‍त सिक्‍कागोळ ईरूल, अदिक अऊर दा टु ऊंद काळ्दोगुल, रा आक दिंग्या होत्‍ताकु अदिक मान्ना उळ्ग उळ्गकु, यागासताका आ सिक्‍का सिक्‍केगाल जी जान हचकु ढुँढ्सतीदिल?
LUK 15:9 अदिक याग सिक्‍केगतद, रा आक तान सैलीगोळी अदिक मान्ना बाजुवाळेर इक जमा माळकु अनतार, ‘नांद सांगुळ खुशी माळी, यतिकी नांद सिक्‍का जो काळ्दोगित सिक्‍केग्याद.’
LUK 15:10 ना नीम से अनतीन कि ईदा रीति देल ऊंद मन तिर्गुसावाळा पापी अन्द बारा दा परमेश्वर उन स्वर्गदूतगोळ्द मुंद खुशी आगतद.”
LUK 15:11 बाक यीशु अंदुन, “यावारा मंळसा नव येढ्ढ चिकोर ईरोर.
LUK 15:12 आंदुर दा टु स्याणेव आप्प से अंदुन, ‘हे आप्पा, संपत्‍ती दा टु जो भाग नांद आद अद नानी कोटबुळी.’ आव आंदरी तान सम्पत्ति वाट्सदुन.
LUK 15:13 यक्कुल दिन बित्सलीका ईरव कि स्याणेव पार सब येनारा जमा माळकु दुर द्याश इक होटोदुन, अदिक अल कुकर्म इन क्याल्सा दा तान सप्पा सम्पत्ति हार्स बुट्टुन.
LUK 15:14 याग आव सब येनारा खर्च माळ कोंडुन, रा आ द्याश दा धोळ्द अकाल बित्‍त, अदिक आव कंगाल आगेदुन.
LUK 15:15 इदुरसाटी आव आ द्याश दा अल ईरावाळा ऊंद मंळसा अन्द मान्या क्याल्सा नोळली होदुन. आव आऊक तान केय दा हंदी आळसोर साटी कळुदुन.
LUK 15:16 अदिक आव चाहासोन कि अव फल्लीगोळ से यवरी हंदी तिनव, तांद व्हाट्टा तुम्मुल; अदिक आऊक याऊ येनु ईला कोळोन.
LUK 15:17 याग आव तान होश दा बंदुन आग अनली कुरतुन, नान आप्प ऊंद यासारा अच मजदूरगोळी व्हाट्टा से यक्कुल रोट्टी सिकताव, अदिक ना ईल उपास सायेतिन.
LUK 15:18 ना ईग यदकु तान आप्प उन हात्‍ती होगाईन अदिक आऊन से अनाईन कि हे आप्प, ना स्वर्ग इन विरोध दा अदिक नीन नजर दा पाप माळदीन.
LUK 15:19 ईग ई लायक ईतीदील कि नानी नीन पार अंदकु आगुल, नानी तान ऊंद मजदूर उन घाई ईट कोम.
LUK 15:20 आग आव यदकु, तान आप्प उन हात्‍ती होदुन: “आव ईगल्या दुर अच ईरोन कि आऊन आप्प उक आऊक नोळकु दया बत्‍त, अदिक ओळतेला आऊक तान याद्दा से हचदुन, अदिक आऊंद हापाळ चुम्मा ताकोंडुन.
LUK 15:21 पार आऊन से अंदुन, ‘हे आप्प, ना स्वर्ग इन विरोध दा अदिक नीन नजर दा पाप माळीन; ना ईग नीन पार अना लायक ईतीदील.’
LUK 15:22 लेकीन आप्प तान दासगोळ से अंदुन, ‘जल्दी वळ्लीसा सा वळ्लीसा कपळा तेगुकु आऊक हाकसुसी, अदिक आऊंद कय दा ऊँगरा, अदिक कालगोळ दा केरू हाकसुसी,
LUK 15:23 अदिक पाल्सद व्हात तनकु कोण्णी ताकी नाव तिनदेव अदिक खुशी मान्सेव.
LUK 15:24 यतिकी नानव ईव पार सोतोगिदुन, बाक जित्‍ता आग्यान: काळ्दोगिदुन, ईग सिक्‍केग्यान.’ अदिक आंदुर खुशी माळली कुरतुर.
LUK 15:25 “लेकीन आऊन धोळ पार केई दा ईरोन. याग आव बरतेला मान्ना अन्द हात्‍ती पोहचुसदुन, रा आव गाना मुरसोद अदिक कुण्णोद आवाज केळदुन.
LUK 15:26 इदुरसाटी आव ऊंद दास उक कारूकु केळदुन, ‘ईद येन आगेत्याद?’
LUK 15:27 आव आऊन से अंदुन ‘नीन स्याणेव वार्ट बंदान, अदिक नीन आप्प आऊक भला चंगा नोळ्यान, इदुरसाटी नीन आप्प धोळ्द पाल्सद व्हात कळसुस्यान.’
LUK 15:28 “ईद केळकु आव सिट्ट देल तुम्मेदुन अदिक बुळ्क होगोद चाहासीदिल, लेकीन आऊन आप्प व्हार्या बंदकु आऊक मनुस्ली कुरतुन.
LUK 15:29 आव तान आप्प उक उत्‍तर कोट्टुन, ‘नोळ, ना ईस वर्ष टु नीन स्यावा माळीतीन अदिक ना यागलु भी नीन आग्या टाल्सीदील, तरी नी नानी यागलु ऊंद मर्री इन पाड्डा भी कोटीदील कि ना अदरी वोतकु तान संगीगोळी सांगुळ खुशी माळाईन.
LUK 15:30 लेकीन याग नीनव ईव पार बंदुन, याव नीन सप्पा संपत्‍ती वेश्यागोळ मा हार्स बुट्टुन, तरी आऊन साठी नी धोळ्द पाल्सद पाड्डा कळसुस बुट.’
LUK 15:31 आप्प तान धोळ पार उन से अंदुन, ‘नान पारा, नी हमेशा नान सांगुळ ईत्या; अदिक जो येनारा नांद आद अद सप्पा अपमान अच हुन.
LUK 15:32 लेकीन नामी ईग खुशी माळोद अदिक मग्न ईरोद आद यतिकी नीनव ई वार्ट सोतोगिदुन, ईग जित्‍ता आगेग्यान; अदिक पयले काळ्दोगिदुन, ईग सिक्‍केग्यान.’”
LUK 16:1 बाक यीशु चेलागोळ से भी अंदुन, “यातोवारा धनवान ईनव ऊंद मुनीम ईरोन, अदिक लॉकुर आऊन सामने आऊन मा ईद दोष हचदुर कि आव अपमान सप्पा सम्पत्ति हार्स कोमतान.
LUK 16:2 इदुरसाटी आव आऊक कारूकु अंदुन, ईद येन हुन जो ना नीन बारा दा केळेतीन? तांद मुनीमगीरी इन लेखा कोळ, यतिकी नी मुंद नळुकु भंडारी ईरसकाल.”
LUK 16:3 आग मुनीम विचार माळली कुरतुन, “ईग ना येन माळाईन? यतिकी नान स्वामी रा ईग इन क्याल्सा नान कय दा टु कसेत्यान. मुण्ण रा नान से अगुळकु आगाल; अदिक भीख बेळदुर दा नानी शरम बरतद.
LUK 16:4 ना सम्सेगीन कि येन माळाईन ताकी याग ना मुनीम इन क्याल्सा मा टु तेगुकु आगाईन रा लॉकुर नानी तान मान्नागोळ दा ताकोम कोमुल.”
LUK 16:5 “आग आव ताम स्वामी इन देनदारगोळी ऊंद-ऊंद माळकु कारदुन अदिक पयला देनदार उन से केळदुन, नीन मा नान स्वामी इन याट कर्ज आद?”
LUK 16:6 आव अंदुन, “सौ माफ जैतून इन याण्णा,” आग आव आऊन से अंदुन, “तान खाता हुडु अदिक कुर्तकु तुरन्त पचास मन लिख्स कोम.”
LUK 16:7 बाक आव दुसरा से केळदुन, नीन मा याट कर्ज आद? आव अंदुन, “सौ मन गोदी नव बॉरा,” आग आव आऊन से अंदुन, तान खाता दा येठ्ठ सौ लिख्स कोम.
LUK 16:8 “स्वामी आ न्यायी मुनीम उन वाहवाही माळदुन यतिकी आव चतुराई देल क्याल्सा माळदुन. ई दुनिया अन लॉकुर तान समय इन लॉकुर सांगुळ रीति व्यवहारगोळ दा ऊजुळ दा नळावाळेर लॉकुर से यक्कुल चालाक आर.”
LUK 16:9 अदिक यीशु आंदुर से अंदुन कि दुनिया अन धन देल तान साठी संगी माळकोमी, यतिकी याग आंदुर होग्त ईत्‍तार रा आंदुर नीमी अनन्त निवासगोळ दा ताकोम कोमुल.
LUK 16:10 जो थ्वाळासा दा विश्वासलायक आन, आव हापाळ दा विश्वासलायक आन: अदिक जो थ्वाळासा दा अन्यायी आन, आव हापाळ दा भी अन्यायी आन.
LUK 16:11 इदुरसाटी याग नीव दुनिया अन धन दा खरा ठहरूसतीदील, रा विश्वासलायक धन नीमी याव सोपस्यान?
LUK 16:12 अदिक अगर नीव दुसरा लॉकुर धन इन प्रती विश्वासयोग्य ईरतीदील रा जो नीम्द धन आद, अदरी नीमी यार कोट्टार?
LUK 16:13 “यावारा दास येढ्ढ स्वामीगोळ्द स्यावा माळ सकालुन: यतिकी आव रा ऊंद से दुश्मनी अदिक दुसरा से प्यार ईट्यान; या ऊंद मंळसा अक ईमानदार अदिक दुसरा अक नीच जानस्यान. नीव परमेश्वर अदिक धन येढ्ढु स्यावा माळ सकालीर.”
LUK 16:14 फरीसी जो धन इन लालची ईरोर, ई सब मातगोळी केळकु अवरी मज्याक दा हार्सली हतदुर.
LUK 16:15 यीशु आंदुर से अंदुन, नीव रा मंळसागोळ मुंद तान तान इक न्यायी ठहरूसतिर, लेकीन परमेश्वर नीम मन इक जान्सतान, यतिकी जो वस्तु मंळसागोळ्द नजर दा महान आद, अद परमेश्वर ऊंद हात्‍ती बेकार आद.
LUK 16:16 “मूसा अन्द व्यवस्था अदिक भविष्यवक्ता यूहन्ना बपतिस्मा कोळावाळा ताका ईरूल; आ समय टु परमेश्वर उन राज्य अन्द खुशखबरी केळ्सकु आगेत्याद, अदिक हर यावारा अदुर दा प्रबलता देल प्रवेश माळतान.
LUK 16:17 आकाश अदिक पृथ्वी इन टलसोद व्यवस्था अन्द ऊंद बिंदु उन मिटसोर से यक्कुल आसान आद.”
LUK 16:18 “जो यावारा मंळसा तान हिंग्स उक छोळ चिट्ठी कोटकु दुसरा से मदा माळतान, आव व्यभिचार माळतान, अदिक जो यावारा हिंग छोळ चिट्ठी वळ्त आर्त इन से मदा माळतान, आव भी व्यभिचार माळतान.”
LUK 16:19 “ऊंद धनवान मंळसा ईरोन जो रेशमी धागा अन्द कपळा अदिक मुलायम कपळा हाकतोगोन अदिक हर रोज सुख-विलास देल ईरतोगोन.
LUK 16:20 अदिक लाज़र हेसुर नव ऊंद कंगाल मंळसा घावगोळ देल तुमकु आ धनी मंळसा अन्द दरवाजा मा बिटकु आगतोगोन,
LUK 16:21 अदिक आव चाहासोन कि धनवान इन मेज माकळोद बिद्द खाना देल तान व्हाट्टा तुम्यान; ईल ताका कि नायगोळ भी बंदकु आऊन घावगोळी नेकतोगव.”
LUK 16:22 “हिंग आत कि आव गरीब मंळसा सोतोदुन, अदिक स्वर्गदूतगोळ आऊक वोतकु अब्राहम उन हात्‍ती पोहचुसदुर. आव धनवान मंळसा भी सोत्‍तुन अदिक नळ्सकु आदुन,
LUK 16:23 अदिक मृत्यु अन्द दुनिया दा आव पीळा दा बिदकु तान कण्णगोळी नेगदुन, अदिक दुर अब्राहम उन हात्‍ती लाज़र उक नोळदुन.”
LUK 16:24 आग आव कारूकु अंदुन, “हे आप्प अब्राहम, नान मा दया माळकु लाज़र उक कळुबुळ, ताकी आव तान बेळ्ल इन सिरा नीर दा नेनाक्‍कु नान ल्यालग्या अक ठंडा माळुल, यतिकी ना ई ज्वाला दा तळपुसेतिन.”
LUK 16:25 लेकीन अब्राहम अंदुन, “हे पारा, याद माळ कि नी तान जीवन दा वळ्लीद वस्तुगोळी कोंड कोंड्या, अदिक हांग अच लाज़र बेकार वस्तुगोळी: लेकीन ईग आव ईल सुख ताकोमेत्यान, अदिक नी तळपुसेत्या.
LUK 16:26 ई सब मातगोळी बिटकु नाम्द अदिक नीम्द न्याड्या ऊंद गड्डा ठहरूस्कु आग्याद कि जो ईल टु आप्पाटी नीम हात्‍ती होगोद चाहास्तार, आंदुर होगसकीदिल; अदिक ना यावारा अल टु ईपाटी नाम हात्‍ती बरसकीदिल.”
LUK 16:27 आ धनी मंळसा अंदुन, “रा हे आप्पा अब्राहम, ना नीन से विनती माळतीन कि नी लाज़र उक नान आप्प उन मान्या कळु,
LUK 16:28 यतिकी अल नान अईद वार्टुर आर; आव आंदुर मुंद ई मातगोळ्द चेतावनी कोळुल, हिंग आगबाळुल कि आंदुर भी ई पीळा अन्द जागा दा बरूल.”
LUK 16:29 अब्राहम आऊन से अंदुन, “नीन वार्टुर हात्‍ती रा मूसा अन्द नियम अदिक भविष्यवक्तागोळ्द किताबगोळ आव जो आंदरी चेतावनी कोळताव, आंदुर अदुर्द केळुल.”
LUK 16:30 आव अंदुन, “ईला, हे आप्प अब्राहम; पर अगर यावारा जित्‍ता आगकु आंदुर हात्‍ती होगुल, रा आंदुर पापगोळी माळोद बंद माळ बुट्टार.”
LUK 16:31 अब्राहम आऊन से अंदुन, “जब आंदुर मूसा अदिक भविष्यवक्तागोळ्द केळालुर, रा अगर सोत्‍तुर दा टु यावारा जित्‍ता भी आगुल तरी आऊंद मान्सालुर.”
LUK 17:1 बाक यीशु तान चेलागोळ से अंदुन, “ईद रा आगोद अच आद कि मंळसा थ्वाळासा मातगोळ कारण पाप दा बिळुल, लेकीन हाय, आ मंळसा मा यार कारण पाप आगताव!
LUK 17:2 जो ई स्याणेर दा टु यावारा ऊंद मंळसा अक पाप दा हाकतान, आऊन साटी ईद भला आगाईत कि चक्‍की इन पट्टा आऊन कुतक्या दा हिलगुसकु आगाईत, अदिक आऊक समुद्र दा हाक्‍कु आगाईत.”
LUK 17:3 सचेत ईरी; अगर “नीन वार्ट अपराध माळुल रा आऊक समझुस, अदिक अगर पसतावा माळतान रा आऊक माफ माळ.
LUK 17:4 अगर हागुल तिम दा आव येळ घन नीन खिलाप पाप माळुल अदिक येळु घन नीन हात्‍ती बंदकु अनुल, ‘ना पसतावा माळेतीन,’ रा आऊक माफ माळ.”
LUK 17:5 आग प्रेरितगोळ यीशु से अंदुर, “नाम्द विश्वास वाळुस.”
LUK 17:6 प्रभु अंदुन, “अगर नीमी राई इन बींजा अन्द बराबर भी विश्वास ईराईत, रा नीव ई शहतूत इन मार्र से अनायदीर कि तान ताना जळ सकट कितकु समुद्र दा हत्‍तेग, रा अद नीम आग्या मान्स कोमाईत.
LUK 17:7 “नीम दा टु हिंग याव आन, यार्द दास नांगर जोत्सतिदान या म्यांडागोळी आळ्सतिदान, अदिक याग आव केई दा टु बरूल, रा आऊन से अनुल, ‘तुरन्त बंदकु ऊमली कुर?’
LUK 17:8 निश्चित अच ईला! आव आऊन से ईला अंदान, ‘नान ऊमोर साटी येनारा माळ अदिक अदिक यागासताका ना तिनोद-कुडोद माळ कोमालीन, आगासताका नान स्यावा माळ; अदुर बाद्दा नी भी तिनोद-कुडोद माळ कोमेत?’
LUK 17:9 आग्यागोळ्द पालन माळोर साटी येन आव तान दास उक धन्यवाद कोट्टान?
LUK 17:10 ईदा रीति देल नीव भी याग आ सप्पा क्याल्सागोळी माळ कोंडीर यदुर्द आग्या नीमी कोटकु आगीत, रा अनी, ‘नाव साधारण दास आयेव; जो नामी माळ पायजे ईरोद नाव सिर्फ अदा माळदेव.’”
LUK 17:11 हिंग आत कि यीशु यरूशलेम होगाहोती सामरीया अदिक गलील इन न्याड्या टु आग्त होगोन.
LUK 17:12 यातोदारा ऊर दा प्रवेश माळाहोती आऊक हत्‍त कोढ़ी लॉकुर सिकदुर जो आऊन से दुर निदुरकु ईरोर.
LUK 17:13 आंदुर धोळ्द आवाज दा कारूकु अंदुर, “हे यीशु, हे स्वामी, नाम मा दया माळ!”
LUK 17:14 यीशु आंदरी नोळकु अंदुन, “होगी, अदिक तान तान इक याजकगोळी तोरसी.” अदिक होग्त-होग्त अच आंदुर शुद्ध आगेदुर.
LUK 17:15 आग आंदुर दा टु ऊंद ईद नोळकु कि ना चंगा आगेगिन, ऊँचा आवाज देल परमेश्वर उन बळाई माळतेला वापस बंदुन;
LUK 17:16 अदिक यीशु उन कालगोळ मा बाय इन भार बिदकु आऊन धन्यवाद माळली कुरतुन; अदिक आव सामरी ईरोन.
LUK 17:17 ईदुर मा यीशु अंदुन, “येन हत्‍तु मुंदुर शुद्ध आगीदील, रा बाक आंदुर ऊंम्बत यल आर?
LUK 17:18 येन ई परदेशी अक बिटकु मात्‍त यावारा वापस बंदिदील जो परमेश्वर उन बळाई माळायदुन?”
LUK 17:19 आग यीशु आऊन से अंदुन, “यदकु होटोग; नीन विश्वास नीनी वळ्लीद माळ्याद.”
LUK 17:20 याग फरीसीगोळ यीशु से केळदुर कि परमेश्वर उन राज्य याग बंदीत, रा यीशु आंदरी उत्‍तर कोट्टुन, “परमेश्वर उन राज्य दृश्य रूप दा बराल.
LUK 17:21 अदिक लॉकुर ईद अनतीदिल, ‘नोळी, ईल आद, या अल आद.’ यतिकी, परमेश्वर उन राज्य नीम न्याड्या आद.”
LUK 17:22 बाक आव चेलागोळ से अंदुन, “हिंग दिन बंदव, यारदा नीव मंळसा अन पार उन दिनगोळ दा टु ऊंद दिन इक नोळोद चाहासीर, अदिक नीव नोळ सकतीदिल.
LUK 17:23 लॉकुर नीम से अंदार, ‘नोळी, अल आन!’ या ‘नोळी, ईल आन!’ लेकीन नीव होगबाळेतीर अदिक आंदुर्द हिंद भी आगबाळेतीर.
LUK 17:24 यतिकी ह्यांग बिजली आकाश इन ऊंद छोर टु दुसरा छोर ताका चमकुसतद, हांग अच मंळसा अन पार भी तान दिन दा प्रगट आदान.
LUK 17:25 लेकीन पयला जरूरी आद कि आव हापाळ दुख नेगदान, अदिक ई समय इन लॉकुर द्वारा आऊक तुच्छ ठहरुसकु आदीत.
LUK 17:26 ह्यांग नूह अन्द दिनगोळ दा आगीत, हांग अच मंळसा अन पार उन दिनगोळ दा भी आदीत.
LUK 17:27 याता दिन ताका नूह जहाज मा येरीदिल, आ दिन ताका लॉकुर तिनोर-कुडोर, अदिक आंदुर दा मदा आगतोगोव. आग नीर इन बाळ बंदकु आ सब मुंदरी नाश माळ्त.
LUK 17:28 अदिक ह्यांग लूत इन दिनगोळ दा आगीत कि लॉकुर तिनोर-कुडोर, लेन-देन माळोर, मार्र हचोर अदिक मान्ना माळतोगोर;
LUK 17:29 लेकीन याता दिशी लूत सदोम टु होट्टुन, आ दिशी बेक्‍की अदिक गन्धक आकाश टु बरसुस्त अदिक सब मुंदरी नाश माळ बुळ्त.
LUK 17:30 मंळसा अन पार उन प्रगट आगोद दिशी भी हिंग अच आदीत.”
LUK 17:31 “आ दिशी जो मान्ना अन्द आळा मा ईत्‍तान अदिक आऊन सामान मान्या ईत्‍तीत, आव अदरी नेगुली ईळुबाळुल; अदिक हांग अच जो केई दा आन आव वापस मान्नी होगबाळुल.
LUK 17:32 लूत इन हिंग्स उक याद ईटी!
LUK 17:33 जो यावारा तान जीव ऊळसोद चाहास्यान आव अदरी खोऊस्यान, अदिक जो यावारा अदरी खोऊस्यान आव अदरी ऊळस्यान.
LUK 17:34 ना नीम से अनतीन, आ ईळ्लक इक येढ्ढ मंळसा ऊंद व्हर्स मा मिंग्त ईत्‍तार; ऊंद ताकोमकु आदान अदिक दुसरा बिटकु आदान.
LUK 17:35 येढ्ढ आर्तेर ऊंद सांगुळ जाता दा पीसुसतेला ईत्‍तार, ऊंद ताकोमकु आदार अदिक दुसरा बिटकु आदार.
LUK 17:36 येढ्ढ मुंदुर केई दा ईत्‍तार, ऊंद ताकोमकु आदान अदिक दुसरा बिटकु आदान.”
LUK 17:37 ईद केळकु आंदुर आऊन से केळदुर, “हे प्रभु ईद यल आदीत?” आव आंदुर से अंदुन, “यल लाश बिदकु आद, अल गीधाळ जमा आदव.”
LUK 18:1 बाक यीशु चेलागोळ से इदुर बारा दा लगातार प्रार्थना माळ पायजे अदिक हिम्मत ईला बिळ पायजे, हिंग उदाहरण अंदुन:
LUK 18:2 “यातोदारा नगर दा ऊंद न्यायी ईरतोगोन, जो ना परमेश्वर से अंजतोगोन अदिक ना यातोवारा मंळसा अन्द परवा माळतोगोन.
LUK 18:3 अदा नगर दा ऊंद रांड्या भी ईरतोगोर, जो आऊन हात्‍ती बंद-बंदकु अनतोगोर, ‘नांद न्याय माळकु नानी आरोपी देल ऊळ्स.’
LUK 18:4 थ्वाळासा समय ताका रा आव मानसिदिल लेकीन आखरी दा आव तान तान इक अंदुन, ‘यतिकी ना परमेश्वर से अंजतीन, अदिक ना मंळसागोळ्द येनारा परवा माळतीन;
LUK 18:5 तरी ई रांड्या नानी सतुसतेला ईरतार, इदुरसाटी ना आकिन न्याय माळाईन, ईदारा हिंग आगबाळुल कि घळी-घळी बंदकु अन्त दा नांद मुग्ग दा दम माळुल.’”
LUK 18:6 प्रभु अंदुन, “केळी, ईव न्यायी येन अनतान?
LUK 18:7 इदुरसाटी येन परमेश्वर तान निवळुस्द लॉकुर्द न्याय माळतीदील, जो ईळ्लक-हागुल मदत साटी वर्ल्त ईरतार? येन आव आंदुर्द बारा दा समय माळ्यान?
LUK 18:8 ना नीम से अनतीन, आव तुरन्त आंदुर्द न्याय माळ्यान. तरी मंळसा अन पार याग बंदान, रा येन आव पृथ्वी मा विश्वास नोळ्यान?”
LUK 18:9 यीशु आंदुर से जो तान म्याकुच भरोसा ईटतोगोर, कि नाव न्यायी आयेव, अदिक दुसरागोळी तुच्छ जान्सतोगोर, ईद उदाहरण अंदुन:
LUK 18:10 “येढ्ढ मंळसा मंदिर दा प्रार्थना माळोर साठी होदुर; ऊंद फरीसी ईरोन अदिक दुसरा कर ताकोमावाळा.”
LUK 18:11 फरीसी नीदुरकु तान मन दा ईद प्रार्थना माळली कुरतुन, “हे परमेश्वर, ना अपमान धन्यवाद माळतीन कि ना दुसरा मंळसागोळ्द घाई लोभी, बयमान अदिक व्यभिचारी हैलेच, अदिक ई कर ताकोमावाळा अन्द घाई भी हैलेच.
LUK 18:12 ना हप्ता दा येढ्ढ गण उपास ईटतीन; ना तान सप्पा कमाई इन दसवा हिस्सा भी कोळतीन.”
LUK 18:13 “लेकीन कर ताकोमावाळा दुर नीदुरकु, स्वर्ग दी कण्णगोळी नेगोद भी चाहासीदिल, उलटा तान याद्दा पिट्स-पिट्सकु अंदुन, ‘हे परमेश्वर, ना पापी मंळसा मा दया माळ!’
LUK 18:14 ना नीम से अनतीन कि आव दुसरा आलच, लेकीन ईवा कर ताकोमावाळा मंळसा न्यायी ठहरूस्कु आदुन अदिक तान मान्नी होदुन; यतिकी जो यावारा तान तान इक महान माळ्यान, आव नम्र माळकु आदान; अदिक जो तान तान इक नम्र माळ्यान, आव महान माळकु आदान.”
LUK 18:15 बाक लॉकुर तान चिकोरी भी आऊन हात्‍ती तरली कुरतुर कि आव आंदुर मा कय ईटुल; लेकीन चेलागोळ नोळकु आंदरी चिल्ळासली कुरतुर.
LUK 18:16 यीशु चिकोरी हात्‍ती कारूकु अंदुन, “चिकोरी नान हात्‍ती बरगोळी, अदिक आंदरी मना माळबाळी: यतिकी परमेश्वर उन राज्य आंदुर्द अच घाई आद.
LUK 18:17 ना नीम से खरा अनतीन कि जो यावारा परमेश्वर उन राज्य अक चिग्द उन घाई ग्रहण माळतीदील आव अदुर्दा यागलु प्रवेश माळ सकतीदिल.”
LUK 18:18 ऊंद यहूदी अधिकारी यीशु से केळदुन, “हे वळ्लीद गुरु, अनन्त जीवन इन अधिकारी आगोर साटी ना येन माळाईन?”
LUK 18:19 यीशु आऊन से अंदुन, “नी नानी वळ्लीद येती अनत्या? याऊ वळ्लीद हैलेच, सिर्फ ऊंद, मतलब परमेश्वर उक बिटकु याऊ वळ्लीद हैलेच.
LUK 18:20 नी आग्यागोळी रा जान्सत्या: ‘व्यभिचार माळबाळी, यारीकु कोन्न बाळी, अदिक काळ्लपनी माळबाळी, यारदु ख्वाटा कोळबाळी, तान आप्प अदिक तान मोय इन आदर माळी.’”
LUK 18:21 यहूदी अधिकारी अंदुन, “ना रा ई सप्पा आग्यागोळी स्याणपणी टु अच मान्सतेला बंदीन.”
LUK 18:22 ईद केळकु यीशु आऊन से अंदुन, “नीन दा ईग भी अदिक ऊंद मात माळोद आद, तान सब येनारा मारकु कंगालगोळ दा वाट्स बुळ; नीनी स्वर्ग दा धन सिक्‍कीत, अदिक बंदकु नान हिंद आगेग.”
LUK 18:23 आव ईद केळकु हापाळ उदास आदुन, यतिकी आव हापाळ धनी ईरोन.
LUK 18:24 यीशु आऊक नोळकु अंदुन, “धनवानगोळ्द परमेश्वर उन राज्य दा प्रवेश माळोद याट कठिन आद!
LUK 18:25 परमेश्वर उन राज्य दा धनवानगोळ साटी प्रवेश माळदुर देल ऊँट इन मुग्ग दा टु चुजी होटबुळोद आसान आद.”
LUK 18:26 ईदुर मा केळावाळेर अंदुर, “रा बाक यार्द उद्धार आग सकतद?”
LUK 18:27 यीशु अंदुन, “जो मंळसा अन्द साटी असंभव आद, अद परमेश्वर उन साटी संभव आद.”
LUK 18:28 पतरस अंदुन, “नोळ, नाव रा मान्न-मार बिटकु नीन हिंद आगेगेव.”
LUK 18:29 आव आंदुर से अंदुन, “ना नीम से खरा माताळतीन कि हिंग याऊ हैलेच जो परमेश्वर उन राज्य अन्द साठी मान्न मार, या हिंग्स, या वार्टुर, या मोय-आप्प, या चिकोर चिंळ्गेर बिट बुटीदान;
LUK 18:30 याऊक ई समय हापाळ यक्कुल अदिक बरावाळा युग दा अनन्त जीवन सकतीदिल हिंग याऊ हैलेच.”
LUK 18:31 बाक यीशु हन्नेळ चेलागोळी बाजु दा वोतकु आंदुर से अंदुन, “नोळी, नाव यरूशलेम इक होगतेव, अदिक यास मातगोळ मंळसा अन पार उन साटी भविष्यवक्तागोळ द्वारा लिख्सकु आग्याव, अव सप्पा पुरा आदव.
LUK 18:32 यतिकी आव गैरयहूदीगोळ कय दा सोपस्कु आदान, अदिक आंदुर आऊक मज्याक दा हारस्यार; अदिक आऊंद अपमान माळ्यार, अदिक आऊन मा ऊगळ्यार,
LUK 18:33 अदिक आऊक क्वाळा बळदार, अदिक घात माळ्यार; अदिक आव तिसरा दिशी जित्‍ता आदान.”
LUK 18:34 पर चेलागोळी ई मातगोळ दा टु जो यीशु अंदिदुन यातोदु मात उमसीदिल; अदिक ई मात आंदुर से होचकु ईत्‍त, अदिक जो अंदकु आगीत अद आंदुर्द समझ दा बंदिदील.
LUK 18:35 याग यीशु यरीहो अन्द हात्‍ती पोहचुसदुन, रा ऊंद कुढ्ढ मंळसा सळक इन किनारा मा कुर्तकु भीख बेळोन.
LUK 18:36 आव लॉकुर्द भीळ इन नळोद आवाज केळकु केळली कुरतुन, “ईद येन आगेत्याद?”
LUK 18:37 आंदुर आऊक हेळदुर, “यीशु नासरी होगेत्यान.”
LUK 18:38 आग आव कारूकु अंदुन, “हे यीशु, दाऊद उन औलाद, नान मा दया माळ!”
LUK 18:39 जो मुंद मुंद होगोर, आंदुर आऊक दनकुसली कुरतुर कि आव सुंगा ईरूल; लेकीन आव अदिक जोर से चिल्ळासली कुरतुन, “हे दाऊद उन औलाद नान मा दया माळ!”
LUK 18:40 आग यीशु नीदुरकु आग्या कोट्टुन कि आ कुढ्ढ मंळसा अक नान हात्‍ती तरी, अदिक याग आव हात्‍ती बंदुन रा आव आऊन से केळदुन,
LUK 18:41 “नी येन चाहासत्या कि ना नीन साटी माळाईन?” आव अंदुन, “हे प्रभु, ईद कि ना मात्‍त नोळली हत्‍तुल.”
LUK 18:42 यीशु आऊन से अंदुन, “नोळली हत्‍त; नीन विश्वास नीनी वळ्लीद माळबुटाद.”
LUK 18:43 आग आव तुरन्त नोळली कुरतुन अदिक परमेश्वर उन बळाई माळतेला आऊन हिंद आगेदुन; अदिक सप्पा लॉकुर नोळकु परमेश्वर उन स्तुति माळदुर.
LUK 19:1 यीशु यरीहो दा प्रवेश माळकु होगोन.
LUK 19:2 अल जक्‍कई हेसुर ईनव ऊंद मंळसा ईरोन जो कर ताकोमावाळेर प्रधान ईरोन अदिक धनी ईरोन.
LUK 19:3 आव यीशु अक नोळोद चाहासोन कि आव याव हुन. लेकीन भीळ इन कारण नोळ ईला सकोन, यतिकी आव गुड्ड ईरोन.
LUK 19:4 आग आऊक नोळोर साटी आव मुंद ओळकु ऊंद उम्बर इन मार्र मा येरेदुन, यतिकी यीशु अदा हादी देल होगावाळा ईरोन.
LUK 19:5 याग यीशु आ जागा पोहचुसदुन, रा म्याकुच दृष्टी माळकु आऊन से अंदुन, “हे जक्‍कई, झट से ल्यालमा ईळुकु बर; यतिकी ईंद नानी नीन मान्या ईरोद जरूरी आद.”
LUK 19:6 आव तुरन्त ईळुकु खुशी देल आऊंद स्वागत माळदुन.
LUK 19:7 ईद नोळकु सप्पा लॉकुर कुळकुळुस्कु अनली कुरतुर, “आव रा ऊंद पापी मंळसा अन मान्या पाऊना बन्सकु ईळदान.”
LUK 19:8 जक्‍कई नीदुरकु प्रभु से अंदुन, “हे प्रभु, नोळ, ना तान आर्धा सम्पत्ति कंगालगोळी कोळतीन, अदिक अगर यारदारा येनारा भी अन्याय माळकु ताकोम कोंडीन रा अदरी नाकगुना वापस माळ बुळतीन.”
LUK 19:9 आग यीशु आऊन से अंदुन, “ईंद ई मान्या उद्धार बंदान, इदुरसाटी कि ईव भी अब्राहम उन ऊंद औलाद हुन.
LUK 19:10 यतिकी मंळसा अन पार जो काळ्दोग्यार आंदरी ढुंढ्सली अदिक आंदुर्द उद्धार माळली बंदान.”
LUK 19:11 याग आंदुर ई मातगोळी केळोर, रा यीशु उन उदाहरण अंदुन, इदुरसाटी कि आव यरूशलेम इन हात्‍ती ईरोन, अदिक आंदुर सम्सतोगोर कि परमेश्वर उन राज्य प्रगट आगोद आद.
LUK 19:12 इदुरसाटी आव अंदुन, “ऊंद धोळ पद इन मंळसा दुर राज्य दा होदुन ताकी राजपद हासिल माळकु बर सकुल.
LUK 19:13 आव तान दासगोळ दा टु हत्‍त मुंदुर इक कारूकु आंदरी हत्‍त व्हान्ना अन्द सिक्‍का कोट्टुन अदिक आंदुर से अंदुन, ‘नांद वापस बरासताका ताका लेन देन माळेतीर.’
LUK 19:14 लेकीन आऊन खुद इन लॉकुर आऊन से दुश्मनी ईटतोगोर, अदिक आऊन हिंद स्वर्गदूतगोळ द्वारा खबर कळुदुर, ‘नाव चाहसालेव कि ईव नाम मा राज्य माळुल.’”
LUK 19:15 “याग आव राजपद हासिल माळकु बंदुन, रा हिंग आत कि आव तान दासगोळी यारी व्हान्ना अन्द सिक्‍का कोटीदुन, तान हात्‍ती कार्सदुन ताकी आऊक मालूम नळुल कि आंदुर लेन देन देल येन-येन कमुसदुर.
LUK 19:16 आग पयला दास बंदकु अंदुन, ‘हे स्वामी, नीन व्हान्ना अन्द सिक्‍का देल ना मात्‍त हत्‍त व्हान्ना नव सिक्‍का कमुसीन.’
LUK 19:17 आव आऊन से अंदुन, ‘शाब्बास, हे वळ्लेव अदिक विश्वासयोग्य दास! नी हापाळ अच गोर्त दा विश्वासलायक होट्ट ईग हत्‍त नगरगोळ मा अधिकार ईट.’
LUK 19:18 दुसरा दास बंदकु अंदुन, ‘हे स्वामी, नीन सिक्‍का देल अईद मात्‍त सिक्‍का कमुसीन.’
LUK 19:19 स्वामी आऊन से भी अंदुन, ‘नी भी अईद नगरगोळ मा अधिकार ईट.’”
LUK 19:20 तिसरा बंदकु अंदुन, “हे स्वामी, नोळ नीन सिक्‍का ईद हुन, यदरी ना कपळा अन्द तुकळा दा कटकु ईटिदीन.
LUK 19:21 यतिकी नी कठोर मंळसा आय, इदुरसाटी ना नीन से अंजतोगीन: जो नी ईटीदील अदरी नेगु कोमत्या, अदिक जो नी बोऊसीदिल, अदरी भी कळ्द बुळत्या.”
LUK 19:22 आव आऊन से अंदुन, “हे दुष्ट दास, ना नीन आवाज देल अच नीनी दोषी ठहरूसतीन. नी नानी अरूतोग्या कि कठोर मंळसा आईन, जो ना ईटीदील अदरी नेगु कोमतीन, अदिक जो ना बोऊसीदिल अदरी कळ्द बुळतीन;
LUK 19:23 रा नी नान सिक्‍का सावकार उन हात्‍ती येती ईट कोंडीदिल कि ना बंदकु ब्याज समेत ताकोम कोमयदीन?”
LUK 19:24 अदिक जो लॉकुर हात्‍ती नीदुरकु ईरोर, आव आंदुर से अंदुन, “अद सिक्‍का आऊन से ताकोमकोमी, अदिक यार्द हात्‍ती हत्‍त व्हान्ना नव सिक्‍का आव आऊक कोट्ट बुळी.”
LUK 19:25 आंदुर आऊन से अंदुर, “हे स्वामी, आऊन हात्‍ती रा पयले टु अच हत्‍त सिक्‍कागोळ आव.”
LUK 19:26 “ना नीम से अनतीन कि यार्द हात्‍ती आद, आऊक मात्‍त कोटकु आदीत; अदिक यार हात्‍ती हैलेच, आऊन से अद भी जो आऊन हात्‍ती आद ताकोमकु आदीत.
LUK 19:27 लेकीन नानोर आ दुश्मनगोळ जो ईला चाहासोर कि ना आंदुर मा राज्य माळाईन, आंदरी ईल तनकु नान मुंद घात माळी.”
LUK 19:28 ईव मातगोळी अंदकु यीशु यरूशलेम इन दी आंदुर मुंद मुंद नळदुन.
LUK 19:29 याग आव जैतून हेसुर इन पहाळ मा बैतफगे अदिक बैतनिय्याह अन हात्‍ती पोहचुसदुन, रा आव तान चेलागोळ दा टु येढ्ढ मुंदरी ईद अनकु कळुदुन,
LUK 19:30 “मुंदळोद ऊर दा होगी; अदिक अल होग्त अच ऊंद गधा अन्द पाड्डा यदुर मा याऊ यागलु सवार आगीदील, कटकु नीमी सिक्‍कीत, अदरी खोल्सकु तरी.
LUK 19:31 अगर यावारा नीम से केळ्यान कि येती खोल्सतीर, रा ईद अंद बुळेतीर कि प्रभु अक इदुर्द प्रयोजन आद.”
LUK 19:32 जो कळुकु आगीदुर, आंदुर होगकु ह्यांग यीशु आंदुर से अंदिदुन, हांग अच नोळदुर.
LUK 19:33 याग आंदुर गधा अन्द पाड्डा अक खोलसोर, रा गधा अन्द मालिक आंदुर से केळदुन, “ई पाड्डा अक येती खोल्सतीर?”
LUK 19:34 आंदुर अंदुर, “प्रभु उक ईदुर्द जरवत आद.”
LUK 19:35 आंदुर अदरी यीशु उन हात्‍ती तंदुर, अदिक तान कपळा आ पाड्डा मा हाक्‍कु यीशु उक अदुर मा कुर्स बुटुर.
LUK 19:36 याग आव होगोन, रा आंदुर तान कपळा हादी मा हासतेला होगतोगोर.
LUK 19:37 हात्‍ती बरतेला याग आव जैतून पहाळ इन ढलान मा पोहचुसदुन, रा चेलागोळ्द सप्पा मंडली आ सप्पा सामर्थ्य अन्द क्याल्सागोळ्द कारण जो आंदुर नोळीदुर, खुश आगकु धोळ्द आवाज देल परमेश्वर उन स्तुति माळली हतदुर:
LUK 19:38 “परमेश्वर आ राजा अक आशीष कोळुल, जो प्रभु अन हेसुर देल बरतान! स्वर्ग दा शांती अदिक आकाश मंडल दा महिमा आगुल!”
LUK 19:39 आग भीळ दा टु येनारा फरीसी आऊन से अनली कुरतुर, “हे गुरु, तान चेलागोळी आग्या कोटकु दनकुस.”
LUK 19:40 आव उत्‍तर कोट्टुन, “ना नीम से अनतीन, अगर इंदुर सुंगा ईत्‍तुर रा कल्ल चिल्ळासली हत्‍तेव.”
LUK 19:41 “याग आव हात्‍ती बंदुन रा नगर इक नोळकु अदुर मा वर्लदुन
LUK 19:42 अदिक अंदुन, अगर नी, ईंद इन दिशी शांती नव मातगोळ जान्स कोमाईद, रा याट वळ्लीद आगेगाईत, लेकीन ईग अव नीन कण्ण इन हात्‍ती टु गुप्त ईटकु आगेग्याव.
LUK 19:43 यतिकी अव दिन नीन मा बंदव कि नीन से दुश्मनी ईटावाळेर मोर्चा कटकु नीनी घेर्स कोंडार, अदिक नाकु दी टु नीनी वत्‍त बुट्टार;
LUK 19:44 अदिक नीनी अदिक नीन चिकोरगोळी जो नीन दा आर, मुण्ण दा मिलुस्यार, अदिक नीन दा ऊंद कल्ल मा दुसरा कल्ल भी बिळतीदील; यतिकी परमेश्वर नीमी ऊळ्सली बंदीदुन ई समय इक नीव अरतीदिल.”
LUK 19:45 आग यीशु मंदिर दा होगकु व्यापारीगोळी व्हार्या तेगुली कुरतुन,
LUK 19:46 अदिक परमेश्वर अनतान, “शास्त्र दा लिख्सकु आद, ‘नान मान्ना प्रार्थना अन्द मान्ना आदीत,’ लेकीन नीव अदरी डाकूगोळ्द हड्डा माळ बुट्टीर.”
LUK 19:47 यीशु रोज मंदिर दा उपदेश माळतोगोन; अदिक प्रधान याजक अदिक नियम इन गुरु अदिक लॉकुर्द प्रमुख आऊक कोनोद चाहासोर.
LUK 19:48 लेकीन याऊ उपाय तेगु सकिदील कि ईव याता प्रकार माळेव, यतिकी सप्पा लॉकुर बळा चाह देल आऊंद केळतोगोर.
LUK 20:1 ऊंद दिशी हिंग आत कि याग यीशु मंदिर दा लॉकुरी उपदेश कोळोन अदिक खुशखबरी केळसोन, रा प्रधान याजक अदिक नियम इन गुरु, पुरनियागोळ्द सांगुळ हात्‍ती बंदकु निदुरदुर;
LUK 20:2 अदिक अनली हतदुर, “नामी हेळ, नी ई क्याल्सागोळी याता अधिकार देल माळत्या, अदिक आव याव हुन याव नीनी ईद अधिकार कोटान?”
LUK 20:3 यीशु आंदरी उत्‍तर कोट्टुन, “ना भी नीम से ऊंद सवाल केळतीन; नानी हेळी
LUK 20:4 यूहन्ना अक बपतिस्मा कोळोद अधिकार स्वर्ग दी टु ईरोद या मंळसागोळ दी टु ईरोद?”
LUK 20:5 “आग आंदुर आपस दा चर्चा माळली कुरतुर, नाव येन अंदेव, अगर स्वर्ग इन दी टु,” रा आव अंदान, “बाक नीव आऊंद विश्वास येती माळीदिल?”
LUK 20:6 अदिक अगर नाव अंदेव, मंळसागोळ दी टु, रा सप्पा लॉकुर नाम मा कलगोळ भिटार, यतिकी आंदुर खराखुरा अरूतार कि यूहन्ना भविष्यवक्ता ईरोन.
LUK 20:7 इदुरसाटी आंदुर उत्‍तर कोट्टुर, “नाव अरालेव कि आव यार दी टु ईरोन.”
LUK 20:8 यीशु आंदुर से अंदुन, “रा ना भी नीमी हेळालीन कि ना ईद क्याल्सा याता अधिकार देल माळतीन.”
LUK 20:9 आग यीशु लॉकुर से ईद उदाहरण अनली कुरतुन: “यावारा मंळसा अंगुर इन बेली हचदुन, अदिक किसानगोळी अदरी बटई दा कोट बुट्टुन अदिक हापाळ दिनगोळ्द साटी परदेश होटोदुन.
LUK 20:10 याग अंगुर इन जमा माळोद समय बत्‍त रा मालक किसानगोळ हात्‍ती ऊंद दास उक कळुदुन कि आंदुर अंगुर इन केई अन येनारा कायगोळ भाग आऊक कोळुल, पर किसानगोळ आऊक बळकु खाली कय कळु बुटुर.
LUK 20:11 बाक आव ऊंद अदिक दास उक कळुदुन, अदिक आंदुर आऊक भी बळकु अदिक आऊन अपमान माळकु खाली कय कळु बुटुर.
LUK 20:12 बाक आव तिसरा दास उक कळुदुन, अदिक आंदुर आऊक भी घायल माळकु व्हार्या तेगु बुटुर.
LUK 20:13 आग अंगुर इन केई नव स्वामी अंदुन, ‘ना येन माळाईन? ना तान प्रिय पार उक कळाईन, जरूर अच आंदुर आऊन आदर माळ्यार.’
LUK 20:14 याग किसानगोळ आऊक नोळदुर रा आपस दा विचार माळली कुरतुर, ‘ईव रा वारीस हुन; बरी, नाव ईऊक कोंद बुळाती रा बाक आऊन जायदाद नाम्द आगेदीत.’
LUK 20:15 अदिक आंदुर आऊक अंगुर इन केई टु व्हार्या तेगुकु कोंद बुटुर.” “इदुरसाटी अंगुर इन केई इन स्वामी आंदुर्द सांगुळ येन माळ्यान?
LUK 20:16 आव बंदकु आ किसानगोळी नाश माळ्यान, अदिक अंगुर इन केई दुसरा अक सोपस्यान.” ईद केळकु आंदुर अंदुर “परमेश्वर माळुल हिंग आगबाळुल.”
LUK 20:17 यीशु आंदुर दी नोळकु अंदुन, बाक ईद येन लिख्सकु आद: “याता कल्ल इक राजमहल माळावाळेर बेकार ठहरुसीदुर, अदा क्वाना अन्द सिरा आगेत.”
LUK 20:18 “जो यातोदारा कल्ल मा बिद्दान आव चकनाचुर आगेदान; अदिक यदुर मा अद बिद्दीत, अदरी पीसुस बुट्टीत.”
LUK 20:19 आटा होती नियम इन गुरुगोळ अदिक प्रधान याजकगोळ आऊक हुडोद चाहासदुर, यतिकी आंदुर समसेगिदुर कि आव नाम मा ईद उदाहरण अंदान, लेकीन आंदुर लॉकुर से अंजदुर.
LUK 20:20 अदिक आंदुर आऊन ताक दा हतदुर अदिक भेद ताकोमावाळेरी कळुदुर कि न्याय इन भेष हुळकु यीशु उक आंदुर सवाल दा हुडुल, ताकी बाक आऊक रोमन शासक उन कय दा सौप्स बुळुल.
LUK 20:21 आ जासुसगोळ यीशु से केळदुर, “हे गुरु, नाव जान्सतेव कि नी बराबर अनत्या अदिक कल्सत्या, अदिक यारदु पक्षपात माळाल, उलटा परमेश्वर उन हादी सच्चाई देल हेळत्या.
LUK 20:22 येन नामी कैसर सरकार उक कर कोळोद उचित आद या ईला?”
LUK 20:23 आव आंदुर्द चतुराई इक अरूकु आंदुर से अंदुन,
LUK 20:24 “ऊंद चाँदी इन सिक्‍का नानी तोरसी. ईदुर मा यार्द छाप अदिक हेसुर आद?” आंदुर अंदुर “कैसर सरकार उन.”
LUK 20:25 यीशु आंदुर से अंदुन, “रा जो कैसर सरकार उन हुन, अद सरकार उक कोळी; अदिक जो परमेश्वर उन आद, अद परमेश्वर उक कोळी.”
LUK 20:26 आंदुर लॉकुर्द मुंद ईद मात दा यीशु उक फसुस सकिदील, उलटा आऊन उत्‍तर देल अचम्भित आगकु सुंगा आगेदुर.
LUK 20:27 बाक सदूकीगोळ जो अनतार कि सोत्‍तुर दा टु जित्‍ता आगोद अच हैलेच, आंदुर्दा टु थ्वाळासा लॉकुर आऊन हात्‍ती बंदकु केळदुर,
LUK 20:28 “हे गुरु, मूसा नाम साठी हिंग नियम लिखस्यान: अगर यारोवारा धोळ वार्ट तान हिंग्स उन ईतकु भी बिना औलाद सोतोदान, रा आऊन वार्ट आ रांड्यागित इन से मदा माळ कोमुल, अदिक तान वार्ट उन साठी वंश पैदा माळुल.
LUK 20:29 येळ वार्टुर ईरोर, पयला वार्ट मदा माळकु बिना औलाद सोतोदुन.
LUK 20:30 बाक दुसरा वार्ट भी आकिन से मदा माळदुन,
LUK 20:31 अदिक तिसरा वार्ट भी अदा आर्त से मदा माळ कोंडुन. ईदा रीति देल येळु वार्टुर बिना औलाद देल सोतोदुर.
LUK 20:32 आखरी दा आ आर्त भी सोतोदुर.
LUK 20:33 इदुरसाटी जित्‍ता आगदुर मा आक आंदुर्दा टु यारोर हिंग्स आदार? यतिकी आ येळु वार्टुर आकिन से मदा माळीदुर.”
LUK 20:34 यीशु आंदुर से अंदुन, “ई युग इन लॉकुर दा रा मदगोळ आगताव,
LUK 20:35 लेकीन जो लॉकुर ई लायक ठहरूस्यार कि आ युग इक अदिक सोत्‍तुर दा टु जित्‍ता आगोद प्राप्त माळुल, आंदुर ना मदा माळ्यार अदिक ना मदा दा कोटकु आदार.
LUK 20:36 बाक आंदुर ना रा यागलु सोत्‍तार, यतिकी आंदुर पुनरूत्थान इन औलाद बन्सकु स्वर्गदूतगोळ्द घाई अदिक सोत्‍तुर दा टु जित्‍ता आगदुर कारण देल परमेश्वर उन औलाद ईत्‍तार.
LUK 20:37 लेकीन ई मात इक कि सोत्‍तुर जित्‍ता आगतार, मूसा भी होत्‍त झाळी इन उदाहरण दा प्रगट माळ्यान कि आव प्रभु अक ‘अब्राहम उन परमेश्वर, अदिक इसहाक उन परमेश्वर अदिक याकूब उन परमेश्वर’ अनतान.
LUK 20:38 परमेश्वर रा मुर्दागोळ ईला लेकीन जित्‍तागोळ्द परमेश्वर हुन: यतिकी आऊन हात्‍ती सप्पा जित्‍ता आर.”
LUK 20:39 आग ईद केळकु शास्त्रीगोळ दा टु येनारा ईद अंदुर, “हे गुरु, नी बराबर उत्‍तर कोट्ट.”
LUK 20:40 अदिक आ सदूकीगोळी बाक आऊन से येनारा अदिक केळोद हिम्मत आगीदील.
LUK 20:41 बाक यीशु आंदुर से केळदुन, “मसीह अक दाऊद उन औलाद ह्यांग अनतार?”
LUK 20:42 दाऊद तान भजन संहिता अन किताब दा अनतान: “प्रभु नान प्रभु से अंदुन,
LUK 20:43 नान ऊम्मा कय दी कुर, यागासताका कि ना नीन से दुश्मनी ईटावाळेर इक नीन काल दिशी माळ कोमालीन.”
LUK 20:44 “दाऊद रा आऊक प्रभु अनतान; रा बाक आव आऊन औलाद ह्यांग ठहरूसदुन?”
LUK 20:45 याग सप्पा लॉकुर केळोर, रा यीशु तान चेलागोळ से अंदुन,
LUK 20:46 “शास्त्रीगोळ से सावधान ईरी, यारी ऊद्द-ऊद्द च्वांगा हाक्‍कु वयाळोद वळ्लीद हततद, अदिक यारी सात्‍तागोळ दा नमस्कार अदिक आदर, अदिक यहूदी लॉकुर्द सभागृहगोळ दा मुख्य आसन अदिक भोज दा मुख्य जागा प्रिय हतताव.
LUK 20:47 आंदुर रांड्यागोळ्द मान्नागोळ इक तिंद बुळतार अदिक आंदुर फायदा नेगुतार, अदिक लॉकुरी दिखावा साटी हापाळ होत्त ताका प्रार्थना माळतेला ईरतार: इंदरी यक्कुल से यक्कुल दण्ड सिक्‍कीत.”
LUK 21:1 बाक यीशु नाकु दी कण्ण नेगुकु पैस्यावाळेर लॉकुर इक तान मंदिर इन दानपेटी दा दान हाक्त नोळदुन.
LUK 21:2 आव ऊंद कंगाल रांड्या अक भी अदुर्दा येढ्ढ तांबा नव सिक्‍का हाक्त नोळदुन.
LUK 21:3 आग यीशु आंदुर से अंदुन, “ना नीम से खरा अनतीन कि ई कंगाल रांड्यागीत सप्पा मुंदुर से यक्कुल हाक्यार.
LUK 21:4 यतिकी आ सप्पा मुंदुर तान तान बचत दा टु दान कोट्टुर, लेकीन इक तान कंगालपन दा टु तान सप्पा जीविका, हाक्‍क बुटुर.”
LUK 21:5 याग चेलागोळ दा टु थ्वाळासा चेलागोळ मंदिर इन बारा दा अनोर कि अद ह्यांग सुंदर कल्लगोळ अदिक परमेश्वर उक कोळ्द भेंट इन वस्तुगोळ से सवारसकु आग्याद, रा यीशु अंदुन,
LUK 21:6 “अव दिन बंदव, यारदा ईद सप्पा जो नीव नोळतीर, अऊर्दा टु ईल ऊंद कल्ल मा कल्ल भी ईरतीदील जो केडुकु आगतीदील.”
LUK 21:7 आंदुर यीशु से केळदुर, “हे गुरु, ई सब याग आदीत? अदिक ई मातगोळ याग पुरा आगदुर मा ईत्‍तव, रा आ समय इन येन चमत्कार ईत्‍तीत?”
LUK 21:8 आव अंदुन, “सावधान ईरी कि नीव भरमुसकु आगतीदील, यतिकी हापाळ सा नान हेसुर देल बंदकु अंदार, ‘ना आवा हुईन,’ अदिक ईद भी कि, ‘समय हात्‍ती होट्ट बंदाद.’ नीव आंदुर हिंद होगबाळेतीर.
LUK 21:9 याग नीव लळाईगोळ मातचीत केळीर अदिक लळाईगोळ्द बारा दा अफवाह केळीर रा घबरूस बाळेतीर, यतिकी ईऊर्द आगोद जरूरी आद; लेकीन आ समय तुरन्त अन्त आगतीदील.”
LUK 21:10 आग आव आंदुर से अंदुन, “द्याश मा द्याश अदिक राज्य मा राज्य चढ़ाई माळीत,
LUK 21:11 अदिक धोड्डेव-धोड्डेव भूकम्प आदव, अदिक जागा जागा मा अकाल अदिक महामारी बिद्दव, अदिक आकाश टु भयंकर मातगोळ अदिक धोड्डेव-धोड्डेव चमत्कार प्रगट आदव.
LUK 21:12 लेकीन इव सप्पा मातगोळ से पयले आंदुर नान हेसुर इन कारण नीमी हुळदार, अदिक सतुस्यार, अदिक पंचायतगोळ दा सोपस्यार, अदिक बंदीगृह दा हाकसुस्यार, अदिक राजागोळ अदिक शासकगोळ मुंद ओतार.
LUK 21:13 पर ईद नीम साठी खुशखबरी इन गवाही कोळोद मवका आगेदीत.
LUK 21:14 इदुरसाटी तान तान मन दा ठानस्कु ईटी कि नाव पयले टु तान तान इक ऊळसोर साटी येन अंदेव ईदुर चिन्ता माळबाळेतीर.
LUK 21:15 यतिकी ना नीमी हिंग बोल अदिक बुद्धी कोळाईन कि नीम यावारा भी विरोधी सामना या खंडन माळ सकतीदिल.
LUK 21:16 नीम मोय आप्प, अदिक वार्टुर, अदिक रिश्तेदार, अदिक संगी भी नीमी हुळसुस्यार; ईल ताका कि नीम दा टु थ्वाळासा मुंदुर इक कोंसुस बुट्टार.
LUK 21:17 नान कारण सप्पा लॉकुर नीम से दुश्मनी ईट्यार.
LUK 21:18 लेकीन नीम ताल्ला अन्द ऊंद चुट्टी भी कित सकतीदिल.
LUK 21:19 धीरज ईट्टीर रा नीव तान जीवगोळी ऊळस्कु ईट्टीर.
LUK 21:20 “याग नीव यरूशलेम इक सेनागोळ से घेर्सकु नोळीर, रा जान्स कोमेतीर कि अदुर्द बरबाद आगोद हात्‍ती आद.
LUK 21:21 आग जो यहूदिया दा आर आंदुर पहाळीगोळ मा ओळेगुल; अदिक जो यरूशलेम इन बुळ्क आर आंदुर व्हार्या होट्ट बुळुल; अदिक जो ऊरगोळ दा आर आंदुर नगरगोळ दा होगबाळुल.
LUK 21:22 यतिकी ईव बदला ताकोमव हिंग दिन ईत्‍तव, यदुर दा वचन दा लिख्सकु अव सप्पा मातगोळ पुरा आगेदव.
LUK 21:23 आ दिनगोळ दा जो व्हाट्या दी अदिक हाल कुळ्सतीदार, आंदुर साटी हाय, हाय! यतिकी पृथ्वी मा धोळ्द क्लेश अदिक ई लॉकुर मा धोळ्द प्रकोप ईत्‍तीत.
LUK 21:24 आंदुर तलवार देल कोंसुसकु आदार, अदिक सप्पा द्याशगोळ लॉकुर दा बंदी आगकु पोहचुस्कु आदार; अदिक यागासताका गैरयहूदीगोळ्द समय पुरा आगाल्द, आगासताका यरूशलेम गैरयहूदीगोळ देल मेटकु आदीत.
LUK 21:25 “सूरज, अदिक चंद्र, अदिक तारागोळ दा चमत्कार कांळसेव; अदिक पृथ्वी मा द्याश-द्याश इनोर लॉकुरी संकट आदीत, यतिकी आंदुर समुद्र अन गर्जन अदिक लयरगोळ आवाज देल घबरूसेदार.
LUK 21:26 अंज्क इन कारण अदिक दुनिया मा बरोद घटनागोळ्द हादी नोळ्त-नोळ्त लॉकुर्द जीव दा जीव ईरतीदील, यतिकी आकाश इन शक्तिगोळी आलगाळ्सकु आदीत.
LUK 21:27 आग आंदुर मंळसा अन पार उक सामर्थ्य अदिक धोळ्द महिमा अन्द सांगुळ बादल मा बरतेला नोळ्यार.
LUK 21:28 याग ई मातगोळ आगली कुरतव, रा निदुरकु तान ताल्ला म्याकुच नेगेतीर; यतिकी नीम छुटकारा हात्‍ती आदीत.”
LUK 21:29 यीशु आंदुर से ऊंद उदाहरण भी अंदुन: “अंजीर इन मार्र अदिक सप्पा मार्रगोळी नोळी.
LUK 21:30 ह्यांग अऊर्दा कोम होळताव, रा नीव नोळकु खुद अच जान्स कोमतीर कि बिसुल इन दिन हात्‍ती आव.
LUK 21:31 ईदा रीति देल याग नीव ईव मातगोळी आगतेला नोळीर, आग जान्स कोमी कि परमेश्वर उन राज्य हात्‍ती आद.
LUK 21:32 “ना नीम से खरा अनतीन कि यागासताका इव सप्पा मातगोळ आगालव, आगासताका ईद पीढ़ी इन यागलु अन्त आगतीदील.
LUK 21:33 आकाश अदिक पृथ्वी टलुसेदित, लेकीन नान मात्‍तगोळ यागलु टलुसतीदिल.”
LUK 21:34 “इदुरसाटी सावधान ईरी, हिंग आगबाळुल कि नीम मन दुराचार, पियक्‍कळपन अदिक जीवन इन चिन्तागोळ्द भार देल वत्‍तेगुल, अदिक अद दिन अचानक नीम मा फंदा अन्द घाई होट्ट बरूल.
LUK 21:35 यतिकी अद सप्पा पृथ्वी अन सब ईरावाळेर मा ईदा प्रकार देल बंदकु बिद्दीत.
LUK 21:36 इदुरसाटी जाग्सतेला ईरी अदिक हर घळी विनती माळ्त ईरी कि नीव ई सप्पा बरावाळा घटनागोळ देल वुळुली अदिक मंळसा अन पार उन मुंद निदरोद लायक आगी.”
LUK 21:37 यीशु हर रोज मंदिर दा शिक्षा कोळतोगोन, अदिक हर रोज द्यावगा होगकु जैतून हेसुर इन पहाळी मा ईळ्लक कडुतोगोन;
LUK 21:38 अदिक रोज हुंजकुका सप्पा लॉकुर आऊंद शिक्षा केळोर साटी मंदिर दा आऊन हात्‍ती बरतोगोर.
LUK 22:1 अखमीरी रोट्टी अन हाब्ब जो फसह कहलुसतद, हात्‍ती ईरोद;
LUK 22:2 अदिक प्रधान याजक अदिक नियम इन गुरु ई मात इन खोज दा ईरोर कि यीशु उक ह्यांग कोंद बुटेव, पर आंदुर लॉकुर से अंजतोगोर.
LUK 22:3 आग शैतान यहूदा दा समुस्त, जो इस्करियोती कहलुस्तान अदिक हन्नेळ चेलागोळ दा आळुकु आगतोगोन.
LUK 22:4 आव यहूदा दा होगकु प्रधान याजकगोळ अदिक मंदिर इन पहरेदारगोळ्द सरदारगोळ सांगुळ मातचीत माळदुन कि यीशु उक याता प्रकार आंदुर कय देल हुळसुस्यार.
LUK 22:5 आंदुर खुश आदुर, अदिक आऊक पैस्या कोळोर साटी तयार आदुर.
LUK 22:6 आव मान्स कोंडुन, अदिक मौका ढुंढ्सली कुरतुन कि याग भीळ ईरतीदील रा आऊक आंदुर कय देल हुळसुस कोंडेव.
LUK 22:7 आग अखमीरी रोट्टी इन हाब्ब इन दिन बत्‍त, यारदा फसह म्यांडा अन्द पाड्डा अन्द बलि कोळोद जरूरी ईरोद.
LUK 22:8 यीशु पतरस अदिक यूहन्ना अक ईद अनकु कळुदुन: “होगकु नाम फसह अन्द ऊमोद तयारी माळी.”
LUK 22:9 आंदुर आऊन से केळदुर, “नी यल चाहासत्या कि नाव इदरी तयार माळेव?”
LUK 22:10 आव आंदुर से अंदुन, “नोळी, नगर दा प्रवेश माळतेला अच ऊंद मंळसा नीर इन माळका नेगुकु नीमी सिक्यान; याता मान्ना दा आव होदान नीव आऊन हिंद होटोगेतीर,
LUK 22:11 अदिक आ मान्ना अन स्वामी से अनेतीर: ‘गुरु नीन से अनतान कि अद पाऊनागोळ्द कमरा यल आद यदुर दा ना तान चेलागोळ सांगुळ फसह अन्द भोजन तिनाईन?’
LUK 22:12 आव नीमी ऊंद सजुस्द धोळ्द म्याकुच इन कमरा तोरस्यान; अल्या तयारी माळेतीर.
LUK 22:13 “आंदुर होगकु, ह्यांग यीशु आंदुर से अंदिदुन, हांग अच नोळदुर अदिक फसह अन्द भोजन तयार माळदुर.”
LUK 22:14 याग घळी होट्ट बत्‍त, रा आव चेलागोळ सांगुळ ऊमली कुरतुन.
LUK 22:15 अदिक आव आंदुर से अंदुन, “नान हापाळ इच्छा ईरोद कि दुख भोगसोर से पयले ईद फसह अन्द भोजन नीम सांगुळ तिनाईन.
LUK 22:16 यतिकी ना नीम से अनतीन कि यागासताका अद परमेश्वर उन राज्य दा पुरा आगाल आगासताका ना अदरी यागलु तिनतीदील.”
LUK 22:17 आग यीशु कटोरा हुळकु धन्यवाद माळदुन अदिक अंदुन, “इदरी हुडी अदिक आपस दा वाट्स कोमी.
LUK 22:18 यतिकी ना नीम से अनतीन कि यागासताका परमेश्वर उन राज्य बराल्द आगासताका ना अंगुर इन रास्सा ईगी टु यागलु कुडुतीदील.”
LUK 22:19 बाक आव रोट्टी हुळदुन, अदिक धन्यवाद माळकु मुरदुन, अदिक आंदरी ईद अनतेला कोट्टुन, “ईद नांद शरीर हुन जो नीम साठी कोटकु आगतद: नांद याद इन साठी ईदा माळतोगी.”
LUK 22:20 ईदा रीति देल आव भोजन इन बाद्दा कटोरा भी ईद अनतेला कोट्टुन, “ईद कटोरा नांद आ खुन इन व्हाशोद वाचा हुन. जो नीम साठी वाहुसकु आगतद.
LUK 22:21 “पर नोळी, नानी हुळसुसावाळा अन कय नान सांगुळ मेज मा आद.
LUK 22:22 यतिकी मंळसा अन पार रा जसा आऊन साठी ठहरूस्कु आग्याद, हांग अच आव सोत्‍तान, पर हाय आ मंळसा मा यार्द द्वारा आव हुळसुस्कु आदान!”
LUK 22:23 आग आंदुर आपस दा विचार माळली कुरतुन कि नाम दा टु याव आन, जो ईद क्याल्सा माळ्यान.
LUK 22:24 आंदुर्दा ईद वाद-विवाद भी आत कि आंदुर दा टु याव धोड्डेव सम्सकु आगतान.
LUK 22:25 यीशु आंदुर से अंदुन, “गैरयहूदीगोळ्द राजा आंदुर मा प्रभुता माळतार; अदिक जो आंदुर मा अधिकार ईटतार, आंदुर उपकार माळावाळेर कहलुस्तार.
LUK 22:26 लेकीन नीव हिंग आगबाळेतीर; उलटा जो नीम दा धोड्डेव आन, आव स्याणेव उन घाई अदिक जो स्याणा आन, आव सेवक उन घाई आगुल.
LUK 22:27 धोड्डेव याव आन, आव जो ऊमोर साटी कुर्तकु आन, या आव जो स्यावा माळतान? येन आव ईला जो ऊमली कुर्तकु आन? लेकीन ना नीम न्याड्या सेवक उन घाई आईन.
LUK 22:28 “नीव आंदुर हुईर, जो नान परीक्षागोळ दा लगातार नान सांगुळ ईतीर;
LUK 22:29 अदिक ह्यांग नान आप्प नानी राज्य मा अधिकार कोटान, हांग अच ना भी नीमी हांग अच अधिकार कोळतीन,
LUK 22:30 ताकी नीव नान राज्य दा नान मेज मा तिनी-कुडी, उलटा सिंहासनगोळ मा कुर्तकु इस्त्राएल इन हन्नेळ वंशगोळ्द न्याय माळी.
LUK 22:31 “शमौन, हे शमौन! शैतान नीम लॉकुरी परखुसोर साटी आग्या बेळ कोंडान कि बेकार दा टु वळ्लेर इक अलग माळुल ह्यांग केईवाळा गोदी दा टु फरकंडा अलग माळतान,
LUK 22:32 लेकीन ना नीन साठी विनती माळदीन कि नीन विश्वास गोर्त आगबाळुल; अदिक याग नी वापस बंद्या, रा तान वार्टुर इक हिम्मत कोळेत.”
LUK 22:33 पतरस यीशु से अंदुन, “हे प्रभु, ना नीन सांगुळ बंदीगृह दा होगली, अदिक सायली भी तयार आईन.”
LUK 22:34 यीशु अंदुन, “हे पतरस, ना नीन से अनतीन कि ईंद हुंज कुग्गतिदील आगासताका नी मुर घन नांद इनकार माळ कोंड्या कि नी नानी जान्साल.”
LUK 22:35 बाक यीशु आंदुर से अंदुन, “याग ना नीमी चीला, झ्वारा, अदिक जुता बिना कळीदीन, रा येन नीमी यातोदारा वस्तु उन कमी आगीत?” “आंदुर अंदुर, यातोदु वस्तु उन ईला.”
LUK 22:36 आव आंदुर से अंदुन, “लेकीन ईग यार्द हात्‍ती चीला आद आव अदरी हुडुल अदिक हांग अच झ्वारा भी, अदिक यार्द हात्‍ती तलवार ईला ईतीदाद आव तान कपळा मारकु ऊंद कोंड कोमुल.”
LUK 22:37 यतिकी ना नीम से अनतीन, कि ईद जो लिख्सकु आद: “अद अपराधीगोळ सांगुळ आळुकु आग्याद, अदुर्द नान दा पुरा आगोद जरूरी आद; यतिकी नान बारा दा लिख्सद मातगोळ पुरा आगदुर मा आव.”
LUK 22:38 आंदुर अंदुर, “हे प्रभु, ईल येढ्ढ तलवारगोळ आव.” आव आंदुर से अंदुन, “हापाळ आव.”
LUK 22:39 आग यीशु व्हार्या होटकु तान रीति इन अनुसार जैतून इन पहाळी मा होदुन, अदिक चेलागोळ आऊन हिंद आगेदुर.
LUK 22:40 आ जागा दा होगकु आव आंदुर से अंदुन, “प्रार्थना माळी कि नीव परीक्षा दा बिळबाळी.”
LUK 22:41 आव आंदुर से अलग लगभग कल्ल भीळोद ईट दुर ताका होदुन अदिक ट्वांगरा टेक्सकु प्रार्थना माळली कुरतुन,
LUK 22:42 “हे आप्पा, अगर नी चाहास्या रा ईद दुख देल तुम्द कटोरा अक नान हात्‍ती टु सर्कुसबुळ, तरी भी नान ईला लेकीन नीन इच्छा पुरा आगुल.”
LUK 22:43 आग स्वर्ग दा टु ऊंद स्वर्गदूत आऊक कांळ्सदुन जो आऊक सामर्थ्य कोळतोगोन.
LUK 22:44 आव हापाळ व्याकुल आगकु मात्‍त यक्कुल वेदना देल प्रार्थना माळली कुरतुन; अदिक आऊन पच्ची रा खुन इन धोळ्द-धोळ्द बुंद इन घाई धरती मा बिळतोगोद.
LUK 22:45 आग आव प्रार्थना माळकु येद्दुन अदिक तान चेलागोळ्द हात्‍ती बंदकु आंदरी उदासी इन मारा देल मिंग्त नोळदुन
LUK 22:46 अदिक आंदुर से अंदुन, “येती मिंगेतीर? येळी, प्रार्थना माळी कि नीव परीक्षा दा बिळबाळी.”
LUK 22:47 यीशु ईद अंत अच ईरोन कि ऊंद भीळ बत्‍त, अदिक आ हन्नेळ दा टु ऊंद यार्द हेसुर यहूदा ईरोद आंदुर्द मुंद मुंद बरोन. आव यीशु उन हात्‍ती बंदुन कि आऊन गाल्ला अन्द चुम्मा ताकोम सकुल.
LUK 22:48 यीशु आऊन से अंदुन, “हे यहूदा, येन नी चुम्मा ताकोमकु मंळसा अन पार उक हुळसुसली बंद्या?”
LUK 22:49 आऊन चेलागोळ जो यीशु उन सांगुळ ईरोर याग नोळदुर कि येन आगावाळा आद, रा अंदुर, “हे प्रभु, येन नाव तलवार नळसेव?”
LUK 22:50 अदिक आंदुर दा टु ऊंद मंळसा महायाजक ऊंद दास मा तलवार नळ्सकु आऊन ऊम्मा किव हार्स बुट्टुन.
LUK 22:51 इदुर मा यीशु अंदुन, “ईग बस माळी.” अदिक आऊन किव इक मुटकु आऊक वळ्लीद माळदुन.
LUK 22:52 आग यीशु प्रधान याजकगोळ अदिक मंदिर इन पहरेदारगोळ्द सरदारगोळ अदिक पुरनियागोळ से, जो आऊन मा येरकु बंदीदुर, अंदुन, “येन नीव नानी विद्रोह जान्सकु तलवारगोळ अदिक कोलगोळ हुडुकु होटीर?
LUK 22:53 याग ना मंदिर दा हर रोज नीम सांगुळ ईरीन, रा नीव नानी हुडोद कोशिश माळीदील; पर ईद नीम समय आद, अदिक अंधकार इन राज आद.”
LUK 22:54 बाक आंदुर यीशु उक हुडुकु ओतुर, अदिक महायाजक उन मान्या तंदुर. पतरस दुर दुर टु उच आऊन हिंद-हिंद नळुतोगोन;
LUK 22:55 अदिक याग आंदुर आंगुळ दा बेक्‍की होत्‍ताकु ऊंद ऊज्या कुरतुर, रा पतरस भी आंदुर न्याड्या दा कुरतोदुन.
LUK 22:56 आग ऊंद दासी आऊक सिगळी इन उजुळ दा कुर्त नोळकु अदिक आऊक वळ्लीसा नोळकु अनली कुरतुर, “ईव भी रा यीशु उन सांगुळ ईरोन.”
LUK 22:57 लेकीन पतरस ईद अंदकु इनकार माळदुन, “हे आर्त, ना आऊक अरालीन.”
LUK 22:58 थ्वाळासा समय इन बाद्दा यावारा दुसरा मंळसा आऊक नोळकु अंदुन, “नी भी रा आंदुर दा टु ऊंद हुय.” पतरस अंदुन, “हे मंळसा, ना आलच.”
LUK 22:59 बाक मात्‍त ऊंद घंटा अन्द बाद्दा ऊंद मंळसा भरोसा माळकु अंदुन, “जरूर ईव भी रा आऊन सांगुळ ईरोन, यतिकी ईव गलीली हुन.”
LUK 22:60 पतरस अंदुन, “हे मंळसा, ना जान्सालीन कि नी येन अनेत्या!” आव अनतेला अच ईरोन कि तुरन्त हुंज कुग्त.
LUK 22:61 आग प्रभु तिर्गकु पतरस उन दी नोळदुन, अदिक पतरस उक प्रभु उन आ मात याद बत्‍त जो आव अंदिदुन: “ईंद हुंज इन कुग्गोर से पयला, नी मुर घन नान इनकार माळ्या.”
LUK 22:62 अदिक आव व्हार्या होटकु हुदक्या कोट कोटकु वर्लदुन.
LUK 22:63 जो मंळसागोळ यीशु उक हुडुकु ईरोर, आंदुर आऊन मज्याक हार्सकु आऊक बडुली कुरतुर;
LUK 22:64 आंदुर आऊन कण्णगोळ मा पट्टी कटकु आऊन से केळदुर, “भविष्यवाणी हेळ कि नीनी याव बळदुन!”
LUK 22:65 अदिक आंदुर आऊन अपमान माळकु आऊन विरोध दा हापाळ सा मातगोळ अंदुर.
LUK 22:66 याग हागुल आत रा लॉकुर्द स्याणा अदिक प्रधान याजक अदिक नियम इन गुरु जमा आदुर, अदिक यीशु उक तान महासभा दा तनकु केळदुर,
LUK 22:67 “येन नी मसीह हुय? रा नाम से अंद बुळ!” यीशु आंदरी उत्‍तर कोट्टुन, “अगर ना नीम से अनाईन, तरी भी नीव विश्वास माळतीदील;
LUK 22:68 अदिक अगर ना सवाल केळाईन रा नीव उत्‍तर कोळतीदील.
LUK 22:69 लेकीन ईगी टु ना मंळसा अन पार सर्वशक्तिमान परमेश्वर उन ऊमा कय दी कुर्तकु ईराइन.”
LUK 22:70 इदुर मा सप्पा मुंदुर अंदुर, “रा येन नी परमेश्वर उन पार हुय?” यीशु उत्‍तर कोट्टुन, “नीव खुद अच अंतीर, कि ना हुईन.”
LUK 22:71 आग आंदुर अंदुर, “ईग नामी गवाही इन येन जरवत आद; यतिकी नाव खुद आऊन बाय देल केळ कोंडेव.”
LUK 23:1 आग सप्पा सभा यदकु यीशु उक पिलातुस उन हात्‍ती ओतुर.
LUK 23:2 आंदुर ईद अनकु आऊन मा दोष हचली कुरतुर: “नाव ईऊक यहूदी लॉकुरी बयकुस्त, अदिक रोमन सम्राट उक कर कोळोद से मना माळ्त, अदिक तान तान इक मसीह, अन राजा अनतेला केळेव.”
LUK 23:3 पिलातुस यीशु उक केळदुन, “येन नी यहूदीगोळ्द राजा हुय?” यीशु आऊक उत्‍तर कोट्टुन, “नी खुद अच अनेत्या.”
LUK 23:4 आग पिलातुस प्रधान याजकगोळ अदिक लॉकुर से अंदुन, “ना ई मंळसा अन्द बुळ्क यातोदु दोष नोळालीन.”
LUK 23:5 लेकीन आंदुर मात्‍त यक्कुल यकीन देल अनली कुरतुर, “ईव गलील टु ईल ताका, सप्पा यहूदी प्रदेश दा उपदेश कोट कोटकु लॉकुरी भळकुस्तान.”
LUK 23:6 ईद केळकु पिलातुस केळदुन, “येन ईव मंळसा गलीली हुन?”
LUK 23:7 अदिक याग पिलातुस ईद जान्सदुन कि आव हेरोदेस उन रियासत ईनव हुन, रा आऊक हेरोदेस उन हात्‍ती कळु बुट्टुन, यतिकी आ दिनगोळ दा हेरोदेस भी यरूशलेम दा ईरोन.
LUK 23:8 हेरोदेस यीशु उक नोळकु हापाळ खुश आदुन, यतिकी आव हापाळ दिनी टु आऊक नोळोद चाहासोन; यतिकी हेरोदेस आऊन बारा दा केळीदुन, अदिक आऊन से येनारा चमत्कार नोळोद आशा ईटोन.
LUK 23:9 आव आऊन से हापाळ सा प्रश्न केळ्त ईत्‍तुन, पर आव आऊक येनु उत्‍तर कोटीदील.
LUK 23:10 प्रधान याजक अदिक नियम इन गुरु निदुरकु आऊन मा गंभीर आरोप हचतेला ईत्‍तुर.
LUK 23:11 आग हेरोदेस तान सिपाहीगोळ्द सांगुळ आऊन अपमान माळकु आऊक मज्याक दा हार्सदुन, अदिक सुंदर कपळा हाकसुस्कु आऊक पिलातुस उन हात्‍ती कळु बुट्टुन.
LUK 23:12 अदा दिशी पिलातुस अदिक हेरोदेस संगी आगेदुर; इदुर से पयले आंदुर आबुर दाबुर्द दुश्मन ईरोर.
LUK 23:13 पिलातुस प्रधान याजकगोळ अदिक सरदारगोळ अदिक लॉकुरी कारदुन,
LUK 23:14 अदिक आंदुर से अंदुन, “नीव ई मंळसा अक लॉकुरी बयकुसावाळा सम्सकु नान हात्‍ती तंदीर, अदिक नोळी, ना नीम मुंद आऊन जाँच माळदीन, लेकीन या मातगोळ्द नीव आऊन मा दोष हचेतीर आ मातगोळ्द बारा दा रा ना आऊन बुळ्क दा येनु अच दोष नोळीदील;
LUK 23:15 अदिक ना रा हेरोदेस राजा आऊन दा येनारा दोष नोळदुन, यतिकी आव आऊक नाम हात्‍ती कळु बुट्टुन; अदिक नोळी, आऊन से हिंग यातोदु दोष आगीदील कि आऊक मृत्यु दण्ड कोटकु आगुल.
LUK 23:16 इदुरसाटी ना आऊक बळसुस्कु बिट बुळतीन.”
LUK 23:17 यतिकी आ हाब्ब इन समय दा पिलातुस उक आंदुर साटी ऊंद बंदी इक बिळोद बिळतोगोद.
LUK 23:18 आग सप्पा मुंदुर गुट माळकु चिळ्लासकु येद्दुर, “ईऊक कोंद बुळ, अदिक नाम साटी बरअब्बा अक बिट बुळ!”
LUK 23:19 बरअब्बा दंगा फसाद इन कारण जो नगर दा आगीत, अदिक हत्या अन्द कारण बंदीगृह दा हाक्‍कु आगीदुन.
LUK 23:20 लेकीन पिलातुस यीशु उक बिळोद इच्छा देल लॉकुरी मात्‍त समजुसदुन,
LUK 23:21 लेकीन आंदुर मात्‍त चिल्ळास्कु अंदुर, “आऊक क्रूस मा येर्स, क्रूस मा!”
LUK 23:22 आव तिसरा घन आंदुर से अंदुन, “येती, आव याता गुणा माळ्यान? ना आऊन बुळ्क मृत्यु दण्ड इन लायक यातोदु दोष नोळीदील. इदुरसाटी ना आऊक क्वाळा बळसुस्कु बिट बुळतीन.”
LUK 23:23 लेकीन आंदुर चिल्ळास-चिल्ळास्कु आऊन हिंद हत्‍तेदुर कि आऊक क्रूस मा येर्सकु आगुल, अदिक आखरी दा आंदुर्द चिल्ळासोद सफल आगेत.
LUK 23:24 इदुरसाटी ह्यांग लॉकुर चाहासदुर हांग अच पिलातुस आंदुर मांग इन अनुसार सहमती कोट्टुन.
LUK 23:25 आव आ मंळसा अक जो दंगा फसाद अदिक हत्या अन्द कारण बंदीगृह दा हाक्‍कु आगीदुन, अदिक यारी आ लॉकुर बेळोर, आऊक बिट बुट्टुन; अदिक यीशु उक आ लॉकुर्द इच्छा अन्द अनुसार सौप्स बुट्टुन, कि आंदुर जो चाहस्यार अद आऊन सांगुळ माळ सकुल.
LUK 23:26 याग आंदुर यीशु उक ओयोर, रा आंदुर शमौन हेसुर इन ऊंद कुरेनी मंळसा जो नगर दी टु बरोन, आऊक हुडुकु आऊन मा क्रूस मंळ्स बुटुर कि आऊक यीशु ऊंद हिंद-हिंद वोय सकुल.
LUK 23:27 लॉकुर्द धोळ्द भीळ आऊन हिंद आगेत अदिक अदुर्दा हापाळ सा आर्तेर भी ईरोर जो आऊन साटी याद्दा-पिटसोर अदिक विलाप माळतोगोर.
LUK 23:28 यीशु आंदुर दी तिर्गकु अंदुन, “हे यरूशलेम इन पोरगोळा, नान साटी वर्लबाळी; लेकीन तान अदिक तान चिकोरगोळ साटी वर्ली.
LUK 23:29 यतिकी नोळी, अव दिन बरताव, या दिन दा लॉकुर अंदार, ‘धन्य आर आंदुर जो वांझला आर अदिक अव गर्भ जो हाळदिदील अदिक अव स्तन जो हाल कुळसिदील.’
LUK 23:30 आ समय ‘आंदुर पहाळीगोळ से अंदार कि नाम मा बिळी, अदिक ट्याकरागोळ से अंदार कि नामी मुच्च बुळी.’
LUK 23:31 यतिकी याग आंदुर हिवरा मार्र इन सांगुळ हिंग माळतार, रा वंळगींद मार्र इन सांगुळ येन-येन माळतीदील?”
LUK 23:32 आंदुर अन्य येढ्ढ मंळसागोळी जो अपराधी ईरोर आंदरी भी यीशु उन सांगुळ कोनली ओतुर.
LUK 23:33 याग आंदुर आ जागा यारी खोपळी अनतार होदुर, रा आंदुर अल यीशु उक अदिक आ अपराधीगोळी भी, ऊंद मंळसा अक ऊमा कय दी अदिक दुसरा मंळसा अक डाक्या कय दी क्रूसगोळ मा येर्सदुर.
LUK 23:34 आग यीशु अंदुन, “हे आप्पा, इंदरी माफ माळ, यतिकी इंदुर जान्सालुर कि इंदुर येन माळीत्यार.” अदिक आंदुर चिट्ठी गोळी हाक्‍कु आऊन कपळा वाट्स कोंडुर.
LUK 23:35 लॉकुर निदुर-निदुरकु नोळोर, अदिक सरदार भी मज्याक माळ माळकु अनतोगोर: “ईव दुसरा अक ऊळ्सदुन, अगर ईव परमेश्वर उन मसीह हुन, अदिक आऊन निवळुसदव हुन, रा तान तान इक ऊळ्स कोमुल.”
LUK 23:36 सिपाही भी हात्‍ती बंदकु अदिक केय हुळ्लग अंगुर इन रास्सा कोटकु आऊन मज्याक हार्सकु अनतोगोर,
LUK 23:37 “अगर नी यहूदीगोळ्द राजा हुय, रा तान तान इक ऊळ्स!”
LUK 23:38 अदिक आऊन म्याकुच ऊंद दोष चिट्ठी भी हच बुटुर: “ईव यहूदीगोळ्द राजा हुन.”
LUK 23:39 जो अपराधीगोळ अल लटकुसकु आगिदुर, आंदुर दा टु ऊंद अपराधी यीशु उन अपमान माळकु अंदुन, “येन नी मसीह आलच? रा बाक तान तान इक अदिक नामी ऊळ्स!”
LUK 23:40 ईदुर मा दुसरा अपराधी आऊन मा चिळ्लासकु अंदुन, “येन नी परमेश्वर से भी अंजाल? नीनी भी रा अदा दण्ड सिक्‍केत्याद,
LUK 23:41 अदिक नामी रा न्यायनुसार दण्ड सिकेत्याद, यतिकी नामी तान क्याल्सागोळ्द बराबर फल सिकेत्याद; लेकीन ईव रा यातोदु अपराध माळीदिल.”
LUK 23:42 आग आव अंदुन, “हे यीशु, याग नी तान राज्य दा बंद्या, रा नांद याद माळेत.”
LUK 23:43 यीशु आऊन से अंदुन, “ना नीन से खरा माताळतीन कि ईंदल्या अच नी नान सांगुळ सुखदलोक दा ईत्या.”
LUK 23:44 ईग ईद हागुल इन लगभग हन्नेळ मुरांद समय ईरोद अदिक हागुल इन मुर मुरास ताका सप्पा द्याश दा अंधार आगकु ईत्‍त,
LUK 23:45 अदिक सुर्य अन्द उजुळ होग्त ईत्‍त, अदिक मंदिर इन परदा न्याड्या दा टु हरदोत,
LUK 23:46 अदिक यीशु धोळ्द आवाज देल कारूकु अंदुन, “हे आप्प, ना तान आत्मा नीन कय दा सौप्सतीन.” अदिक ईद अंदकु सोतोदुन.
LUK 23:47 सिपाहीगोळव अधिकारी, जो येनारा आगीत नोळकु परमेश्वर उन स्तुति माळदुन, अदिक अंदुन, “निश्चय ई मंळसा न्यायी ईरोन.”
LUK 23:48 अदिक भीळ जो ई येनारा आगीत नोळली जमा आगीत, ई घटना अक नोळकु याद्दा बडुत वापस होटोत.
LUK 23:49 लेकीन आऊनोर सप्पा जान पयचान वाळेर, अदिक जो आर्तेर गलील टु आऊन हिंद बंदीदुर, दुर निदुरकु ई सप्पा नोळोर.
LUK 23:50 अल यूसुफ हेसुर ईनव महासभा अन्द ऊंद वळ्लीद सदस्य ईरोन जो सज्जन अदिक न्यायी ईरोन.
LUK 23:51 अदिक आंदुर्द फैसला देल अदिक आंदुर्द ई क्याल्सा देल सयमत ईला ईरोन. आव यहूदीगोळ्द अरिमतिया नगर इन ईरावाळा अदिक परमेश्वर उन राज्य अन्द हादी कायावाळा ईरोन.
LUK 23:52 आव पिलातुस उन हात्‍ती होगकु यीशु ऊंद लाश बेळदुन;
LUK 23:53 अदिक आग यीशु उक क्रूस मा टु ईळ्सकु मलमल इन चद्दर दा गुंळ्सदुन, अदिक ऊंद कब्र दा ईटदुन, जो कल्ल इन जागा दा अगुळकु ईरोद; अदिक आ जागा दा यावारा अक भी यागलु ईटकु आगीदील.
LUK 23:54 अद तयारी इन दिन ईरोद, अदिक आराम इन दिन सुरू आगोद ईरोद.
LUK 23:55 मरियम मगदलीनी जो यीशु उन सांगुळ गलील टु बंदीदुर, यूसुफ उन हिंद हिंद होगकु आ कब्र अक नोळदुर, अदिक ईद भी नोळदुर कि आऊन लाश इक याता रीति देल ईटकु आग्याद.
LUK 23:56 आग आंदुर वापस मान्या बंदकु सुगन्धित अत्‍तर अदिक मसालागोळ तयार माळदुर; अदिक आराम इन दिन आंदुर आग्या अन्द अनुसार आराम माळदुर.
LUK 24:1 लेकीन हप्ता अन्द पयला दिशी हापाळ व्हातर्या का आंदुर आ सुगन्धित सामानगोळी जो आंदुर तयार माळीदुर, हुळकु कब्र मा बंदुर.
LUK 24:2 आंदुर जो कल्ल कब्र अन्द दरवाजा मा झाक्सकु ईरोद अदरी सरकुसकु नोळदुर,
LUK 24:3 पर याग आंदुर बुळ्क होदुर रा आंदरी प्रभु यीशु उन लाश कांळ्सीदील.
LUK 24:4 याग आंदुर ई मात देल चकित आगोर रा नोळी, येढ्ढ मंळसा बरफ इन घाई बिळेव चमकदार झलकुस्त कपळा हाक्‍कु आंदुर हात्‍ती बंदकु निदुरदुर.
LUK 24:5 याग आंदुर अंजेदुर अदिक पृथ्वी इन दी बाय बांग्सोर रा आ स्वर्गदूतगोळ आंदुर से अंदुर, “नीव जित्‍ता मंळसा अक सोत्‍तकु मंळसा दा येती ढुंढ़सेतीर?
LUK 24:6 आव ईल हैलेच, लेकीन जित्‍ता आग्यान. याद माळी कि आव गलील दा ईतकु नीम से येन अंदिदुन,
LUK 24:7 ‘जरूरी आद कि ना मंळसा अन पार पापीगोळ्द कय दा हुळसुस्कु आगाईन, अदिक क्रूस मा येर्सकु आगाईन, अदिक तिसरा दिशी मात्‍त जित्‍ता आगाईन.’”
LUK 24:8 आग यीशु जो मातगोळ आंदरी अंदिदुन अव मातगोळ आंदरी याद बंदव,
LUK 24:9 अदिक कब्र टु बंदकु आंदुर आ हनुन मुंदरी, अदिक अन्य सप्पा मुंदरी, इव मातगोळी अनकु केळ्सदुर.
LUK 24:10 आंदुर प्रेरितगोळ से ईव मातगोळी अंदुर आंदुर मरियम मगदलीनी अदिक योअन्ना अदिक याकूब उन मोय मरियम अदिक आंदुर सांगुळ इन दुसरा आर्तेर भी ईरोर.
LUK 24:11 लेकीन आंदुर मातगोळ आंदरी फालतु हतदव, अदिक आंदुर आंदुर्द विश्वास माळीदील.
LUK 24:12 आग पतरस यदकु कब्र दी ओळतेला होदुन, अदिक बांगकु सिर्फ कफन इन कपळा बिदकु नोळदुन, अदिक जो आगीत अदुर देल अचम्भा माळतेला तान मान्नी होटोदुन.
LUK 24:13 अदा दिशी आंदुर दा टु येढ्ढ मुंदुर इम्माऊस हेसुर इन ऊंद ऊर इक होगोर, जो यरूशलेम टु येनारा येळ कोस इन दुरी मा ईरोद.
LUK 24:14 आंदुर इव सप्पा मातगोळ मा जो आगीदव, आपस दा मातचीत माळतेला होगोर,
LUK 24:15 अदिक याग आंदुर आपस दा मातचीत अदिक जाँच माळोर, रा यीशु खुद हात्‍ती बंदकु आंदुर सांगुळ आगेदुन.
LUK 24:16 आंदुर आऊक नोळदुर लेकीन अरू सकिदील.
LUK 24:17 यीशु आंदुर से केळदुन, “ईव येन मातगोळ आव, जो नीव नळुत नळुत आपस दा माळतीर?” आंदुर उदास सा निदुरकु ईतोदुर.
LUK 24:18 ईद केळकु आंदुर दा टु क्लियोपास हेसुर ईनव ऊंद मंळसा अंदुन, “येन नी यरूशलेम दा आबना परदेशी आय, जो जान्सालुन कि ई दिनगोळ दा अदुर्दा येन येन आग्याद?”
LUK 24:19 आव आंदुर से केळदुन, “यातव मातगोळ?” आंदुर आऊन से अंदुर, “यीशु नासरी इन बारा दा जो परमेश्वर अदिक सप्पा लॉकुर हात्‍ती क्याल्सा अदिक वचन दा सामर्थी भविष्यवक्ता ईरोन,
LUK 24:20 अदिक प्रधान याजकगोळ अदिक नाम सरदारगोळ आऊक हुळसुस बुटुर कि आऊन मा मृत्यु ऊंद आग्या कोटकु आगुल; अदिक आऊक क्रूस मा येर्सुसदुर.
LUK 24:21 लेकीन नामी आशा ईरोद कि ईवा इस्त्राएल द्याश इक छुटकारा कोट्टान. इव सब मातगोळ्द अलावा ईद घटना अक आत तिसरा दिन हुन,
LUK 24:22 अदिक नाम दा टु हापाळ आर्तेर भी नामी आश्चर्य दा हाक बुटार, जो हुंजकुका अच कब्र मा होगीदुर;
LUK 24:23 अदिक याग यीशु उन लाश नोळीदील रा ईद अनतेला बंदुर कि नाव स्वर्गदूतगोळ्द दर्शन माळदेव, यार अंदुर कि आव जित्‍ता आन.
LUK 24:24 आग नाम साथीगोळ दा टु हापाळ मुंदुर कब्र मा होदुर, अदिक ह्यांग आर्तेर अंदीदुर हांग अच नोळदुर; लेकीन आऊक नोळीदील.”
LUK 24:25 आग यीशु आंदुर से अंदुन, “हे निर्बुद्धीगोळा, अदिक भविष्यवक्तागोळ्द सब मातगोळ मा विश्वास माळदुर दा याट धीर आईर!
LUK 24:26 येन जरूरी ईला ईरोद कि मसीह ईद दुख नेगुकु तान महिमा दा प्रवेश माळुल?”
LUK 24:27 आग आव मूसा से अदिक सप्पा भविष्यवक्तागोळ से सुरूवात माळकु सप्पा पवित्रशास्त्र दा टु तान बारा दा लिख्सदव मातगोळ्द अर्थ, आंदरी समझुस बुट्टुन.
LUK 24:28 इटुर दा आंदुर आ ऊर इन हात्‍ती पोहचुसदुर यल आंदुर होगोर, अदिक आऊन ढंग देल हिंग समझ दा बरोद कि आव मुंद आगोद चाहासतान.
LUK 24:29 लेकीन आंदुर ईद अनकु आऊक विनती माळकु रोक्सदुर, “नाम सांगुळ ईर, यतिकी द्याव मुळ्कत बरेत्याद अदिक हागुल हापाळ ढलुसीग्याद.” आग आव आंदुर सांगुळ ईरोर साठी बुळ्क होदुन.
LUK 24:30 याग आव आंदुर सांगुळ ऊमली कुरतुन, रा आव रोट्टी हुळकु परमेश्वर उन धन्यवाद माळदुन अदिक अदरी मुरूकु आंदरी कोळली कुरतुन.
LUK 24:31 आग आंदुर्द कण्णगोळ तेर्दोदव; अदिक आंदुर आऊक अर्त कोंडुर, अदिक आव आंदुर कण्णगोळ देल पच्चेदुन.
LUK 24:32 आंदुर आपस दा अंदुर, “याग आव हादी मा नाम से मातगोळी माळतोगोन अदिक पवित्रशास्त्र अन्द अर्थ नामी समझुस तोगोन, रा येन नाम मन दा उत्‍तेजना पैदा आगीदील?”
LUK 24:33 आंदुर अदा समय यदकु मात्‍त यरूशलेम इक होटोदुर, अदिक आ हनुन चेलागोळी अदिक आंदुर संगीगोळी जमा नोळदुर.
LUK 24:34 आंदुर अनतोगोर, “प्रभु खराखुरा जित्‍ता आग्यान, अदिक शमौन उक कांळस्यान.”
LUK 24:35 आग आंदुर हादी इन मातगोळी आंदरी हेळ बुटुर अदिक ईद भी कि येढ्ढु मुंदुर यीशु उक रोट्टी मुरा होती ह्यांग अरतुर.
LUK 24:36 आंदुर ई मातगोळी अनतेला अच ईरोर कि आव खुद अच आंदुर न्याड्या दा निदुरदुन, अदिक आंदुर से अंदुन, “नीमी शांती सिकुल.”
LUK 24:37 लेकीन आंदुर घबरूसेदुर अदिक अंजेदुर, अदिक समसेदुर कि नाव यातोदारा भूत इक नोळीतेव.
LUK 24:38 आव आंदुर से अंदुन, “येती घबरूसेतीर? अदिक नीम मन दा येती संदेह येळताव?
LUK 24:39 नान कय अदिक नान कालगोळी नोळी कि ना आवा हुईन. नानी मुटकु नोळी, यतिकी भूत इन येलु दा मास ईराल ह्यांग नान दा नोळतीर.”
LUK 24:40 ईद अंदकु यीशु आंदरी तान कय काल तोर्सदुन.
LUK 24:41 आंदरी खुशी इन मारा देल विश्वास ईला आगोद, अदिक आंदुर आश्चर्य माळतोगोर, रा आव आंदुर से केळदुन, “येन ईल नीम हात्‍ती येनारा ऊम्मोद आद?”
LUK 24:42 आंदुर आऊक सुळ्द मेन इन तुकळा कोट्टुर.
LUK 24:43 आव हुडुकु आंदुर मुंद तिंदुन.
LUK 24:44 बाक आव आंदुर से अंदुन, “ईव नानव अव मातगोळ हु, जो ना नीम सांगुळ ईरतेला नीम से अंदिदीन कि जरूरी आद कि यास मातगोळ मूसा अन व्यवस्था अदिक भविष्यवक्तागोळ अदिक भजनगोळ किताबगोळ दा नान बारा दा लिख्सकु आव, सप्पा पुरा आगुल.”
LUK 24:45 आग यीशु पवित्रशास्त्र जानसोर साटी आंदुर समझ खोल्सदुन,
LUK 24:46 अदिक यीशु अंदुन, “ईद लिख्सकु आद कि मसीह दुख नेगदान, अदिक तिसरा दिशी सोत्‍तुर दा टु जित्‍ता आदान,
LUK 24:47 अदिक यरूशलेम टु हुळकु सप्पा जातीगोळ्द लॉकुर दा आंदुर हिंग प्रचार माळली कुरतुर कि आंदुर तान पाप माळोद बंद माळुल अदिक परमेश्वर आंदरी माफ माळुल.
LUK 24:48 नीव ई सप्पा मातगोळ्द गवाह आईर.
LUK 24:49 अदिक नोळी, जो ईनाम नान आप्प नानी कोळोद वादा माळीदुन, ना अदरी नीम मा ईळसाईन अदिक यागासताका म्याकुच स्वर्ग टु सामर्थ्य सिकाल, आगासताका नीव ईदा नगर दा रूक्सकु ईरी.”
LUK 24:50 आग यीशु आंदरी बैतनिय्याह ताका नगर इन व्हार्या ओतुन, अदिक तान कय नेगुकु आंदरी आशीष कोट्टुन;
LUK 24:51 अदिक आंदरी आशीष कोळतेला आव आंदुर से अलग आगेदुन अदिक स्वर्ग मा नेगुकु आदुन.
LUK 24:52 आग आंदुर आऊक दण्डवत माळकु बळा खुशी देल यरूशलेम इक मात्‍त वापस बंदुर;
LUK 24:53 अदिक आंदुर लगातार मंदिर दा उपस्थित आगकु परमेश्वर उन धन्यवाद माळतोगोर.
JOH 1:1 सुरूवात दा शब्द ईरोद, अदिक शब्द परमेश्वर उन सांगुळ ईरोद, अदिक शब्द परमेश्वर ईरोन.
JOH 1:2 ईदा शब्द सुरूवात टु परमेश्वर उन सांगुळ ईरोद.
JOH 1:3 सप्पा येनारा शब्द इन द्वारा पैदा आत, अदिक जो येनारा पैदा आग्याद अदुर दा टु यातोदारा भी चिज आऊन सिवाय बनसीदील.
JOH 1:4 शब्द जीवन इन स्त्रोत ईरोद अदिक अद जीवन लॉकुर साटी ऊजुळ तर्त.
JOH 1:5 ऊजुळ अंधार दा चमकुसतद, अदिक अंधार यागलु इदरी हारूस सकाल.
JOH 1:6 परमेश्वर ऊंद बातणी कोळावाळा कळुदुन यार्द हेसुर यूहन्ना ईरोद.
JOH 1:7 आव गवाही कोळली बंदुन कि ऊजुळ इन गवाही कोळुल, ताकी सप्पा मुंदुर आऊन बातणी केळकु विश्वास माळुल.
JOH 1:8 आव खुद रा ऊजुळ ईला ईरोन, लेकीन आ ऊजुळ इन गवाही कोळोर साटी बंदीदुन.
JOH 1:9 खरा ऊजुळ जो हर ऊंद मंळसा अक प्रकाशित माळतद, दुनिया दा बरावाळा ईरोद.
JOH 1:10 अद शब्द दुनिया दा ईरोद, अदिक परमेश्वर आऊन द्वारा दुनिया माळदुन, तरी भी दुनिया आऊक अरतीदिल.
JOH 1:11 आव तान खुद इन लॉकुर हाती बंदुन लेकीन आऊन खुद इन लॉकुर आऊक ग्रहण माळीदील.
JOH 1:12 लेकीन यास मुंदुर आऊक ग्रहण माळदुर, मतलब आंदरी जो आऊन हेसुर मा विश्वास ईटतार, आव आंदरी परमेश्वर उन औलाद आगोद अधिकार कोट्टुन.
JOH 1:13 आंदुर ना रा स्वाभाविक तरीका देल परमेश्वर उन औलाद बन्सदुर, मतलब मानवीय आप्प उन देल पैदा आगीदील बल्‍की परमेश्वर खुद आंदुरव आप्प ईरोन.
JOH 1:14 अदिक वचन देहधारी आत; अदिक अनुग्रह अदिक सच्चाई देल परिपुर्ण आगकु नाम न्याड्या ड्यारा हाक्त, अदिक नाव अदुर्द हिंग महिमा नोळदेव, जसा आप्प उन ऊंद ठैसा अन्द महिमा.
JOH 1:15 यूहन्ना आऊन बारा दा गवाही कोट्टुन, अदिक कारूकु अंदुन, “ईव आवा हुन, यार्द वर्णन ना माळदीन कि जो नान बाद्दा बरेत्यान, आव नान से वाळुसकु आन यतिकी आव नान से पयले ईरोन.”
JOH 1:16 यतिकी आऊन परिपुर्णता दा टु नाव सप्पा मुंदुर प्राप्त माळदेव मतलब अनुग्रह मा अनुग्रह प्राप्त माळदेव.
JOH 1:17 इदुरसाटी कि व्यवस्था रा मूसा अन्द द्वारा कोटकु आत, लेकीन अनुग्रह अदिक सच्चाई यीशु मसीह अन्द द्वारा बत्‍त.
JOH 1:18 परमेश्वर उक याऊ यागलु नोळीदील, ऊंद ठैसा पार जो आप्प उन क्वारा दा आन, आवा परमेश्वर उक प्रगट माळदुन.
JOH 1:19 यूहन्ना अन्द गवाही ईद आद, कि याग यहूदीगोळ यरूशलेम टु याजकगोळ अदिक कर ताकोमावाळेर इक आऊन से ईद केळोर साटी कळुदुर, “नी याव हुय?”
JOH 1:20 रा आव ईद मान्स कोंडुन अदिक इनकार माळीदिल, लेकीन मान्स कोंडुन, “ना मसीह आलच.”
JOH 1:21 आग आंदुर आऊन से केळदुर, “रा बाक नी याव हुय? येन नी एलिय्याह हुय?” आव अंदुन, ईला, “ना एलिय्याह आलच.” “रा येन नी आ भविष्यवक्ता हुय?” आव उत्‍तर कोट्टुन, “ईला.”
JOH 1:22 आग आंदुर आऊन से केळदुर, “बाक नी हुय याव? यतिकी नाव तान कळावाळेर इक उत्‍तर कोट्टेव. नी तान बारा दा येन हेळत्या?”
JOH 1:23 यूहन्ना अंदुन, “ह्यांग यशायाह भविष्यवक्ता अंदान: “ना आळी दा ऊंद कारावाळा अन्द आवाज हुईन कि नीव प्रभु उन हादी सरका माळी.”
JOH 1:24 आंदुर फरीसीगोळ्द दी टु कळुकु आगीदुर.
JOH 1:25 आंदुर आऊन से केळदुर, “अगर नी मसीह आलच, अदिक ना एलिय्याह, अदिक ना आ भविष्यवक्ता हुय, रा बाक बपतिस्मा येती कोळत्या?”
JOH 1:26 बपतिस्मा कोळावाळा यूहन्ना आंदरी उत्‍तर कोट्टुन, “ना रा नीर देल बपतिस्मा कोळतीन, लेकीन नीम बीच दा ऊंद मंळसा निदुरकु आन यारी नीव अरालीर.
JOH 1:27 मतलब नान बाद्दा बरावाळा आन, आऊन केरू उन बन्ध भी ना खोल्सा लायक हैलेच.”
JOH 1:28 “ई मातगोळ यरदन गांगा अन्द आप्पाटी बैतनिय्याह नगर दा आदव, यल यूहन्ना बपतिस्मा कोळतोगोन.”
JOH 1:29 “दुसरा दिशी यूहन्ना यीशु उक तान दी बर्त नोळकु अंदुन, नोळी ईव परमेश्वर उन म्यांडा अन पाड्डा हुन जो दुनिया अन्द पाप नेगुकु वोयतान.
JOH 1:30 ईव आवा हुन यार्द बारा दा ना अंदिदीन, ऊंद मंळसा नान हिंद बरतान जो नान से श्रेष्ट आन, यतिकी आव नान से पयले ईरोन.
JOH 1:31 ना भी रा आऊक ईला अरीन, लेकीन इदुरसाटी ना नीर देल बपतिस्मा कोळतेला बंदीन कि आव इस्त्राएल मा प्रगट आगेगुल.”
JOH 1:32 अदिक बपतिस्मा कोळावाळा यूहन्ना ईद गवाही कोट्टुन: “ना पवित्र आत्मा अक कबूतर इन घाई स्वर्ग टु ईळुतेला नोळीन, अदिक नोळदीन कि आ आत्मा आऊन मा बंदकु ठेहरूसेत.
JOH 1:33 ना रा आऊक ईला अरीन, लेकीन याव नानी नीर देल बपतिस्मा कोळली कळुदुन, आवा नान से अंदुन, ‘यार मा नी आत्मा अक ईळुत अदिक ठेहरूस्त नोळ्या, आवा पवित्र आत्मा देल बपतिस्मा कोळावाळा हुन.’
JOH 1:34 अदिक ना नोळदीन, अदिक गवाही कोट्टीन कि ईवा परमेश्वर उन पार हुन.”
JOH 1:35 दुसरा दिन मात्‍त यूहन्ना तान येढ्ढ चेलागोळ सांगुळ निदुरकु ईरोन,
JOH 1:36 अदिक आव यीशु उक होग्त नोळदुन, अदिक अंदुन, “नोळी, ईव परमेश्वर उन म्यांडा अन पाड्डा हुन.”
JOH 1:37 आग आंदुर येढ्ढु चेलागोळ आऊन मातगोळ केळकु यीशु उन हिंद आगेदुर.
JOH 1:38 यीशु तिर्गकु आंदरी बर्त नोळदुन अदिक आंदुर से अंदुन, “नीव यार्द खोज दा आईर?” आंदुर आऊन से अंदुर, “हे गुरु, नी यल ईरत्या?”
JOH 1:39 यीशु आंदुर से अंदुन, “नळी, रा नोळ कोंडीर.” आग आंदुर होगकु आऊन ईरोद जागा नोळदुर, अदिक आ दिन आऊन सांगुळ ईत्‍तुर. यतिकी द्यावमुळका नव लगभग नाक मुरदोगिदव.
JOH 1:40 आ येढ्ढु मुंदुर दा टु, जो यूहन्ना अन्द मात केळकु हिंद आगेगीदुर, ऊंद शमौन पतरस उन वार्ट अन्द्रियास ईरोन.
JOH 1:41 आव पयले तान सग्गा वार्ट शमौन से सिक्‍कु आऊन से अंदुन, “नामी ख्रिस्त, मतलब मसीह, सिक्‍केग्यान.”
JOH 1:42 अन्द्रियास आऊक यीशु उन हात्‍ती तंदुन. यीशु आऊन मा दृष्टी माळकु अंदुन, “नी यूहन्ना अन्द पार शमौन हुय: नीनी कैफा मतलब पतरस अंदकु आदीत.
JOH 1:43 “दुसरा दिशी यीशु गलील नगर इक होगोद चाहासदुन. यीशु फिलिप्पुस से भेंट माळदुन अदिक अंदुन, ‘नान हिंद आगेग.’”
JOH 1:44 फिलिप्पुस, अन्द्रियास अदिक पतरस उन नगर बैतसैदा नव ईरावाळा ईरोन.
JOH 1:45 फिलिप्पुस नतनएल से भेंट माळदुन अदिक आऊन से अंदुन, “यार्द वर्णन मूसा व्यवस्था अन्द किताब दा अदिक भविष्यवक्तागोळ माळ्यार, आव नामी सिक्‍केदुन; आव यूसुफ उन पार, यीशु नासरी हुन.”
JOH 1:46 नतनएल आऊन से अंदुन, “येन येनारा वळ्लीद वस्तु भी नासरत नगर टु होळ सकतद?” फिलिप्पुस आऊन से अंदुन, “नळुकु नोळ कोम.”
JOH 1:47 यीशु नतनएल उक तान दी बर्त नोळकु आऊन बारा दा अंदुन, “नोळी, ईव सही दा इस्त्राएली हुन: ईऊन बुळ्क कपट हैलेच.”
JOH 1:48 नतनएल आऊन से अंदुन, “नी नानी ह्यांग अरूत्या?” यीशु आऊक उत्‍तर कोट्टुन, “इदुर से पयले कि फिलिप्पुस नीनी कारदुन, याग नी अंजीर इन मार्र इन ल्यालमा ईर्‍या, आग ना नीनी नोळीदीन.”
JOH 1:49 नतनएल आऊक उत्‍तर कोट्टुन, “हे गुरु, नी परमेश्वर उन पार हुय; नी इस्त्राएल इन राजा हुय.”
JOH 1:50 यीशु आऊक उत्‍तर कोट्टुन, “ना जो नीन से अंदीन कि ना नीनी अंजीर इन मार्र इन ल्यालमा नोळदीन, येन नी इदुरसाटी नान मा विश्वास माळत्या? नी इदुर से भी धोड्-धोड्डेव क्याल्सा नोळ्या.”
JOH 1:51 बाक आऊन से अंदुन, “ना नीम से खरा खरा माताळतीन कि नीव स्वर्ग इक तेरूतेला, अदिक परमेश्वर उन स्वर्गदूतगोळ इक मंळसा अन पार उन म्याकुच ईळुत अदिक म्याकुच होग्त नोळीर.”
JOH 2:1 तिसरा दिशी गलील इन काना नगर दा यारदारा मदा ईरोद, अदिक यीशु उन मोय भी अल ईरोर.
JOH 2:2 यीशु अदिक आऊन चेलागोळ भी आ मदा दा आमंत्रित ईरोर.
JOH 2:3 याग अंगुर इन रास्सा खतम आगेत, रा यीशु उन मोय यीशु से अंदुर, “आंदुर हात्‍ती अंगुर इन रास्सा मिकिदिल.”
JOH 2:4 यीशु आकिन से अंदुन “हे मोयी, नानी नीन से येन क्याल्सा? ईगल्या नान समय बरली आद.”
JOH 2:5 आऊन मोय सेवकगोळ से अंदुर, “जो येनारा आव नीम से अंदान, अदा माळेतीर.”
JOH 2:6 अल यहूदीगोळ्द कय-काल तोळोद प्रथा अन्द अनुसार कल्लगोळ्द आर: माळका ईटकु ईरव, हर ऊंद माळका दा लगभग येढ्ढ-येढ्ढ, मुर-मुर मन तुमकु आगोद.
JOH 2:7 यीशु सेवकगोळ से अंदुन, “माळकागोळ दा नीर तुम बुळी.” आंदुर अवरी सीगासीग तुम बुटुर.
JOH 2:8 आग आव आंदुर से अंदुन, “ईग थ्वाळासा नीर तेगुकु सयपाक माळावाळा प्रधान उन हात्‍ती ओई.” अदिक आंदुर ओतुर.
JOH 2:9 याग सयपाक माळावाळा प्रधान अद नीर इक नेकदुन, जो अंगुर इन रास्सा बनसेगित अदिक आव ईला अरोन कि अद यल टु बंदाद लेकीन जो सेवकगोळ नीर तेगदिदुर आंदुर अरोर, रा सयपाक माळावाळा प्रधान मंळगार उक कारूकु आऊन से अंदुन,
JOH 2:10 “हर ऊंद मंळसा पयले वळ्लीद अंगुर इन रास्सा कोळतान, अदिक याग लॉकुर कुडुकु संतुष्ट आगेगतार, आग थ्वाळासा मध्यम प्रकार इन रास्सा कोळतान; लेकीन नी रा वळ्लीद अंगुर इन रास्सा ईगासताका मिक्सकु ईट्या.”
JOH 2:11 यीशु गलील इन काना नगर दा तान ईद पयला चमत्कार तोर्सकु तान महिमा प्रगट माळदुन अदिक आऊन चेलागोळ आऊन मा विश्वास माळदुर.
JOH 2:12 इदुर बाद्दा यीशु अदिक आऊन मोय अदिक आऊन वार्टुर अदिक आऊन चेलागोळ कफरनहूम नगर इक होदुर अदिक अल थ्वाळासा दिन ईत्‍तुर.
JOH 2:13 यहूदीगोळ्द फसह अन्द हाब्ब हात्‍ती ईरोद, अदिक यीशु यरूशलेम इक होदुन.
JOH 2:14 आव मंदिर दा वस्ता, म्यांडा अदिक कबूतर मारावाळेर अदिक व्हान्ना मारावाळेर लॉकुरी कुर्तकु नोळदुन.
JOH 2:15 आग आव जाळीगोळ्द क्वाळा माळकु, सप्पा म्यांडागोळ अदिक वस्तागोळी मंदिर टु तेग्द बुट्टुन, अदिक व्हान्ना मारावाळेर लॉकुर्द पैस्या भिटकु सळा माळ बुट्टुन अदिक पांळ्सीगोळी उलटुस बुट्टुन,
JOH 2:16 अदिक कबूतरमारावाळेर से अंदुन, “इवरी ईल टु राटनेरी ओई. नान आप्प उन मान्ना अक व्यापार इन मान्ना माळबाळी.”
JOH 2:17 आग आऊन चेलागोळी याद बत्‍त कि लिख्सकु शास्त्र आद, “नीन मान्ना अन्द धुन नानी तिंद बुट्टीत.”
JOH 2:18 इदुर मा यहूदीगोळ आऊन से अंदुर, “नी जो ईद माळत्या रा नामी यातोद चमत्कार तोर्सत्या?”
JOH 2:19 यीशु आंदरी उत्‍तर कोट्टुन, “ई मंदिर इक केळ्द बुळी, अदिक ना इदरी मुर दिन दा निदरूस बुळाईन.”
JOH 2:20 यहूदीगोळ अंदुर, “ई मंदिर इक माळदुर दा छ्यालीस वर्ष हत्याव, अदिक येन नी ईदरी मुर दिन दा निदरूस बुट्या?”
JOH 2:21 लेकीन यीशु तान मय इन मंदिर इन बारा दा अंदिदुन.
JOH 2:22 इदुरसाटी याग आव सोत्‍तुर दा टु जित्‍ता आदुन रा आऊन चेलागोळी याद बत्‍त कि आव ईद अंदिदुन; अदिक आंदुर पवित्रशास्त्र अदिक आ वचन इन जो यीशु अंदिदुन, विश्वास माळदुर.
JOH 2:23 याग यीशु यरूशलेम दा फसह अन्द समय हाब्ब दा ईरोन, रा हापाळ मुंदुर आ चमत्कारगोळी जो आव तोर्सतोगोन नोळकु आऊन हेसुर मा विश्वास माळदुर.
JOH 2:24 लेकीन यीशु तान तान इक आंदुर भरोसा मा बिटीदिल, यतिकी आव सप्पा मुंदुर मनगोळी अरूतोगोन;
JOH 2:25 अदिक आऊक जरवत ईला ईरोद कि मंळसा अन्द बारा दा यावारा गवाही कोळुल, यतिकी आव खुद अच अरोन कि मंळसा अन्द मन दा येन आद?
JOH 3:1 फरीसीगोळ दा नीकुदेमुस हेसुर ईनव ऊंद मंळसा ईरोन, जो यहूदी लॉकुरव सरदार ईरोन.
JOH 3:2 आव ईळ्लक इक यीशु उन हात्‍ती बंदकु आऊन से अंदुन, “हे गुरु, नाव जान्सतेव कि नी परमेश्वर दी टु गुरु आगकु बंद्या, यतिकी ई चिन्हगोळी जो नी तोर्सत्या, अगर परमेश्वर नीन सांगुळ ईला ईरायदुन रा नी ई चिन्हगोळी ईला तोर्स सकाईद.”
JOH 3:3 यीशु आऊक उत्‍तर कोट्टुन, “ना नीन से खरा खरा अनतीन, अगर यावारा व्हाशोद रीति देल पैदा आगालुन रा आव परमेश्वर उन राज्य नोळ सकालुन.”
JOH 3:4 नीकुदेमुस यीशु उक अंदुन, “मंळसा याग हाळाबाट आगेदुन, रा ह्यांग पैदा आग सकतान? येन आव तान मोय इन गर्भ दा दुसरा घन प्रवेश माळकु पैदा आग सकतान?”
JOH 3:5 यीशु उत्‍तर कोट्टुन, “ना नीन से खरा खरा अनतीन, यागासताका यावारा मंळसा नीर अदिक आत्मा देल पैदा आगालुन आगासताका आव परमेश्वर उन राज्य दा प्रवेश माळ सकालुन.
JOH 3:6 यतिकी जो मय देल पैदा आग्याद, अद मय हुन; अदिक जो आत्मा देल पैदा आग्याद, अद आत्मा हुन.
JOH 3:7 अचम्भा माळबाळ कि ना नीन से अंदीन, ‘नीनी व्हाशोद रीति देल पैदा आगोद जरूरी आद.’
JOH 3:8 हवा यात चाहासतद आत नळुतद अदिक नी अदुर्द शब्द केळत्या, लेकीन अरू सकाल कि अद यातु टु बरतद अदिक यात होगतद? जो यावारा आत्मा देल पैदा आग्यान आव हिंग अच आन.”
JOH 3:9 नीकुदेमुस आऊक उत्‍तर कोट्टुन, “ईव मातगोळ ह्यांग आग सकताव?”
JOH 3:10 ईद केळकु यीशु आऊन से अंदुन, “नी इस्त्राएलीगोळ्द गुरु ईतकु भी येन ई मातगोळी समसाल?
JOH 3:11 ना नीन से खरा खरा अनतीन कि नाव जो अरूतेव अद माताळतेव, अदिक यदरी नाव नोळेव अदुर्द गवाही कोळतेव, अदिक नीव नाम गवाही ग्रहण माळालीर.
JOH 3:12 याग ना नीम से पृथ्वी इन मातगोळ माळदीन अदिक नीव विश्वास माळीदिल, रा अगर ना नीम से स्वर्ग इन मातगोळ माळाईन रा बाक ह्यांग विश्वास माळीर?
JOH 3:13 याऊ स्वर्ग मा येरीदिल, सिर्फ आवा जो स्वर्ग टु ईळदान, मतलब मंळसा अन पार जो स्वर्ग दा आन.”
JOH 3:14 अदिक याता रीति देल मूसा आळी दा हाव इक ऊँचाई मा येर्सदुन, अदा रीति देल जरूरी आद कि मंळसा अन पार भी ऊँचाई मा येर्सकु आगुल;
JOH 3:15 ताकी जो यावारा आऊन मा विश्वास माळ्यान आऊक अनन्त जीवन सिकुल.
JOH 3:16 “यतिकी परमेश्वर दुनिया से हिंग प्यार ईटदुन कि आव तान ऊंद ठैसा पार कोट बुट्टुन, ताकी जो यावारा आऊन मा विश्वास माळ्यान आऊन नाश आगबाळुल, लेकीन आऊक अनन्त जीवन सिकुल.
JOH 3:17 परमेश्वर तान पार उक दुनिया दा इदुरसाटी कळीदिल कि दुनिया मा दण्ड इन आग्या कोळुल, लेकीन इदुरसाटी कळ्यान कि दुनिया अक आऊन द्वारा उद्धार सिकुल.
JOH 3:18 “जो आऊन मा विश्वास माळतान, आऊन मा दण्ड इन आग्या आगाल, लेकीन जो आऊन मा विश्वास माळालुन, आव दोषी ठहरूसतान; इदुरसाटी कि आव परमेश्वर उन ऊंद ठैसा पार उन हेसुर मा विश्वास माळीदिल.
JOH 3:19 अदिक दण्ड इन आग्या अन्द कारण ईद आद कि ज्योति दुनिया दा बंदाद, अदिक मंळसागोळ अंधार इक ज्योति से यक्कुल प्रिय सम्सदुर यतिकी आंदुर क्याल्सा बुरा ईरव.
JOH 3:20 यतिकी जो यावारा बुराई माळतान, आव ज्योति से दुश्मनी ईटतान, अदिक ज्योति इन हात्‍ती बरालुन, हिंग आगबाळुल कि आऊन क्याल्सागोळ मा दोष हचकु आगुल.
JOH 3:21 लेकीन आव जो सच्चाई मा नळुतान, अदिक ज्योति इन हात्‍ती बरतान, यदुर देल ईद प्रगट आगेगुल कि आऊन क्याल्सा परमेश्वर उन दी टु माळकु आग्याव.”
JOH 3:22 इदुर बाद्दा यीशु अदिक आऊन चेलागोळ यहूदिया द्याश दा बंदुर; अदिक यीशु अल आंदुर सांगुळ ईतकु बपतिस्मा कोळली कुरतुन.
JOH 3:23 यूहन्ना भी शालेम नगर इन हात्‍ती ऐनोन दा बपतिस्मा कोळतोगोन, यतिकी अल हापाळ नीर ईरोद, अदिक लॉकुर बंदकु बपतिस्मा ताकोम तोगोर.
JOH 3:24 यूहन्ना आ समय ताका बंदीगृह दा हाक्‍कु आगली ईरोन.
JOH 3:25 अल यूहन्ना अन्द चेलागोळ्द यावारा यहूदी इन सांगुळ शुद्धीकरण इन बारा दा वाद-विवाद आत.
JOH 3:26 अदिक आंदुर यूहन्ना अन्द हात्‍ती बंदकु आऊन से अंदुर, “हे गुरु, जो मंळसा यरदन इन आप्पाटी नीन सांगुळ ईरोन, अदिक यार्द नी गवाही कोट्या; नोळ, आव बपतिस्मा कोळतान, अदिक सप्पा मुंदुर आऊन हात्‍ती बरतार.”
JOH 3:27 यूहन्ना उत्‍तर कोट्टुन, “यागासताका मंळसा अक स्वर्ग इन दी टु कोटकु आगाल, आगासताका आव येनु हासिल माळ सकालुन.
JOH 3:28 नीव रा खुद अच नान गवाह हुईर कि ना अंदीन, ‘ना मसीह आलच, लेकीन आऊन मुंद कळुकु आगीन.’
JOH 3:29 यार्द मंळगीत आर, आवा मंळगार हुन; लेकीन मंळगार उन संगी जो निदुरकु आऊन केळतान, मंळगार उन शब्द केळकु हापाळ खुश आगतान: ईग नान ईद खुशी पुरा आग्याद.
JOH 3:30 जरूरी आद कि आव धोड्डेव आगुल अदिक ना स्याणेव.
JOH 3:31 “जो म्याकुच टु बरतान आव सब से वळ्लेव आन; जो पृथ्वी टु बरतान आव पृथ्वी नव हुन, अदिक पृथ्वी इन मातगोळी हेळतान: जो स्वर्ग टु बरतान, आव सप्पा मुंदुर्द म्याकुच आन.
JOH 3:32 जो येनारा आव नोळ्यान अदिक केळ्यान, अदुर्दा गवाही कोळतान; अदिक याऊ आऊन गवाही ग्रहण माळालुन.
JOH 3:33 याव आऊन गवाही ग्रहण माळ कोंडुन आव ई मात मा छाप हच बुट्टुन कि परमेश्वर खरा आन.
JOH 3:34 यतिकी यारी परमेश्वर कळ्यान, आव परमेश्वर उन मातगोळ अनतान; यतिकी आव आत्मा आळु आळुकु कोळालुन.
JOH 3:35 आप्प पार से प्यार ईटतान, अदिक आव सप्पा वस्तुगोळ आऊन कय दा ईट बुटान.
JOH 3:36 जो पार मा विश्वास माळतान, अनन्त जीवन आऊन हुन; लेकीन जो पार उन मातगोळी मान्सालुन, आव जीवन इक नोळतीदिल, लेकीन परमेश्वर उन सिट्ट आऊन मा ईरतद.”
JOH 4:1 फरीसीगोळ केळ्यार कि यीशु बपतिस्मा माळावाळा यूहन्ना से यक्कुल चेलागोळी बपतिस्मा कोळतान.
JOH 4:2 यीशु खुद यागलु ईला उलटा आऊन चेलागोळ बपतिस्मा कोळतोगोर.
JOH 4:3 याग यीशु अक पता नळुत कि फरीसीगोळ हिंग मातगोळी माळतार रा आव यहूदिया बिटकु गलील इक ओळेदुन,
JOH 4:4 अदिक आऊक सामरीया टु आगकु होगोद जरूरी ईरोद.
JOH 4:5 इदुरसाटी आव सूखार हेसुर इन सामरीया अन्द ऊंद नगर ताका बंदुन, जो आ भूमी इन हात्‍ती आद यदरी याकूब तान पार यूसुफ उक कोटीदुन;
JOH 4:6 अदिक याकूब उन भाय भी अल्या ईरोद. इदुरसाटी यात्रा टु थक्स माळकु यीशु भाय इन हात्‍ती हिंग अच कुरतोदुन. आ समय लगभग हागुल इनव हन्नेळ मुरदिदव.
JOH 4:7 इटुर दा ऊंद सामरी जाती नोर आर्त नीर तुमली बंदुर. यीशु आकिन से अंदुन, “नानी नीर कुळ्स.”
JOH 4:8 यतिकी आऊन चेलागोळ रा नगर दा भोजन कोम्मोर साटी होगीदुर.
JOH 4:9 आ सामरी जात इन आर्त आऊन से अंदुर, “नी यहूदी ईतकु ना सामरी जाती नोर आर्त इन से नीर येती बेळत्या?” यतिकी यहूदी सामरी जात इन लॉकुर सांगुळ यातोदु प्रकार इन व्यवहार ईटालुर.
JOH 4:10 यीशु उत्‍तर कोट्टुन, “अगर नी परमेश्वर उन वरदान इक जानसाईद, अदिक ईद भी जानसाईद कि आव याव हुन जो नीन से अनतान, ‘नानी नीर कुळ्स,’ रा नी आऊन से बेळाईद, अदिक आव नीनी जीवन इन नीर कोळायदुन.”
JOH 4:11 आर्त आऊन से अंदुर, “हे प्रभु, नीन हात्‍ती नीर तुमली रा बाल्टी भी हैलेच, अदिक भाय खोल आद; रा बाक अद जीवन इन नीर नीन हात्‍ती यल टु बत्‍त?
JOH 4:12 येन नी नाम आप्प याकूब से धोड्डेव आय, याव नामी ईद भाय कोट्टुन; अदिक खुद अच तान औलाद, अदिक तान जनावरगोळ सांगुळ इदुर दा टु नीर कुळदुन?”
JOH 4:13 यीशु आक इक उत्‍तर कोट्टुन, “जो यावारा ईद नीर कुळदान आव मात्‍त प्यासा ईत्‍तान,
JOH 4:14 लेकीन जो यावारा आ नीर इक कुळदान जो ना आऊक कोळाईन, आव बाक अनन्त काल ताका प्यासा आगतीदील; लेकीन जो नीर ना आऊक कोळाईन, अद आऊन दा ऊंद झरना बनसेदित जो अनन्त जीवन इन साटी उमळुसतेला ईत्‍तीत.”
JOH 4:15 आर्त आऊन से अंदुर, “हे प्रभु, अद नीर नानी कोळ ताकी ना प्यासा आगबाळुल अदिक ना नीर तुमली ईट दुर बराईन.”
JOH 4:16 यीशु आकिन से अंदुन, “होग, तान गांड्ड उक ईल कारूकु तर.”
JOH 4:17 आर्त उत्‍तर कोट्टुर, “ना बिना गांड्ड उन आईन.” यीशु आकिन से अंदुन, “नी ठीक अनत्या, ‘ना बिना गांड्ड उन आईन.’
JOH 4:18 यतिकी नी अईद गांडुरी माळ कोंड्या, अदिक यार हात्‍ती नी ईग आय आव भी नीन गांड्ड आल्लच. ईद नी सही अच अनत्या.”
JOH 4:19 आर्त आऊन से अंदुर, “हे प्रभु, नानी हततद कि नी भविष्यवक्ता हुय.
JOH 4:20 नाम आप्प दादागोळ ईदा पहाळी मा आराधना माळदुर, अदिक नीव अनतीर कि अद जागा यल आराधना माळ पायजे यरूशलेम दा आद.”
JOH 4:21 यीशु आकिन से अंदुन, “हे आर्त, नान मात इन विश्वास माळ कि अद समय बरतद कि नीव ना रा ईद पहाळी मा आप्प उन आराधना माळीर, ना यरूशलेम दा.
JOH 4:22 नीव यारी जान्सालीर, आऊन आराधना माळतीर; अदिक नाव यारी जान्सतेव आऊन आराधना माळतेव; यतिकी उद्धार यहूदीगोळ दा टु आद.
JOH 4:23 लेकीन अद समय बरतद, लेकीन ईग भी आद, यारदा खरा भक्त आप्प उन आराधना आत्मा अदिक सच्चाई देल माळेव, यतिकी आप्प तान साटी हिंग अच आराधकगोळी ढुंढ्सतान.
JOH 4:24 परमेश्वर आत्मा आन, अदिक जरूरी आद कि आऊन आराधना माळावाळेर आत्मा अदिक सच्चाई देल आराधना माळुल.”
JOH 4:25 आर्त आऊन से अंदुर, “ना जान्सतीन कि मसीह जो ख्रिस्त कहलुस्तान, बरावाळा आन; याग आव बंदान, रा नामी सप्पा मातगोळी हेळ बुट्टान.”
JOH 4:26 यीशु आकिन से अंदुन, “ना जो नीन से अनेतीन, आवा हुईन.”
JOH 4:27 इटुर दा यीशु उन चेलागोळ होट्ट बंदुर, अदिक अचम्भा माळली कुरतुर कि आव आर्त से मातगोळी हेळेत्यान; तरी याऊ केळीदील, “नी येन चाहासत्या?” या “यदुर साटी आकिन से मातगोळी हेळत्या?”
JOH 4:28 आग आर्त तान घागरी बिटकु नगर दा वोळेदुर, अदिक लॉकुर से अनली कुरतुर,
JOH 4:29 “बरी, ऊंद मंळसा अक नोळी, याव सप्पा येनारा जो ना माळीन नानी हेळ बुटुन. येनारा ईवा रा मसीह आल्लच?”
JOH 4:30 इदुरसाटी लॉकुर नगर टु होटकु आऊन हात्‍ती बरली कुरतुर.
JOH 4:31 ईदुर बीच दा आऊन चेलागोळ यीशु से ईद विनती माळदुर, “हे गुरु, येनारा तिन कोम.”
JOH 4:32 लेकीन आव आंदुर से अंदुन, “नान हात्‍ती तिनोर साटी हिंग भोजन आद यदरी नीव जान्सालीर.”
JOH 4:33 आग चेलागोळ आपस दा अंदुर, “येन यावारा आऊन साटी येनारा तिनली तंदान?”
JOH 4:34 यीशु आंदुर से अंदुन, “नान भोजन ईद आद कि तान कळावाळा अन्द इच्छा अन अनुसार नळाईन अदिक आऊन क्याल्सा पुरा माळाईन.
JOH 4:35 येन नीव अनालीर, ‘कटनी आगदुर दा ईग भी नाक तिंगुळ बाकी आव?’ नोळी, ना नीम से अनतीन, तान कण्णगोळी नेगुकु केयगोळ मा नजर हाक्‍की कि अव कटाई इन साटी फसल पकसेग्याद.
JOH 4:36 फसल कडावाळा अक मजदूरी सिकतद अदिक अनन्त जीवन इन साटी काय जमा माळतान, ताकी हचावाळा अदिक कडावाळा येढ्ढु मुंदुर मिलुसकु आनन्द माळुल.
JOH 4:37 यतिकी ईल ईद कहावत सही कुरतद: ‘फसल हचावाळा दुसरा आन अदिक कडावाळा दुसरा.’
JOH 4:38 ना नीमी अद केई कडोर साटी कळुदीन यदुर्दा नीव मेहनत माळीदील: दुसरागोळ मेहनत माळदुर अदिक नीव आंदुर्द मेहनत इन फल दा हिस्सेदार आदीर.”
JOH 4:39 आ नगर इन हापाळ सा सामरी लॉकुर आ आर्त इन अंदुर देल यीशु मा विश्वास माळदुर; यतिकी आक ईद गवाही कोटीदुर: आव सप्पा येनारा जो ना माळदीन, नानी हेळ बुटुन.
JOH 4:40 इदुरसाटी याग ई सामरी लॉकुर आऊन हात्‍ती बंदुर, रा आऊन से विनती माळली कुरतुर कि नाम ईल ईर. इदुरसाटी आव अल येढ्ढ दिन ताका ईत्‍तुन.
JOH 4:41 आऊन वचन इन कारण अदिक भी हापाळ सा लॉकुर विश्वास माळदुर
JOH 4:42 अदिक आ आर्त से अंदुर, “ईग नाव नीन अंदुर देल अच विश्वास माळालेव; यतिकी नाव खुद अच केळ कोंडेव, अदिक जान्सतेव कि ईवा सही दा दुनिया अन उद्धारकर्ता हुन.”
JOH 4:43 बाक आ येढ्ढ दिनगोळ बाद्दा यीशु अल टु होटकु गलील इक होदुन,
JOH 4:44 यतिकी यीशु खुद अच गवाही कोट्टुन कि भविष्यवक्ता अन्द तान द्याश दा आदर आगाल्द.
JOH 4:45 याग आव गलील दा बंदुन, रा गलीली लॉकुर खुशी देल आऊन सांगुळ मिलुसदुर; यतिकी यास क्याल्सा आव यरूशलेम दा हाब्ब इन समय माळीदुन, आंदुर आ सप्पा अक नोळीदुर, यतिकी आंदुर भी हाब्ब दा होगीदुर.
JOH 4:46 आग यीशु बाक गलील इन काना नगर दा बंदुन, यल आव नीर इक अंगुर इन रास्सा माळीदुन. अल राजा अन ऊंद कर्मचारी ईरोन यार पार कफरनहूम नगर दा बिमार ईरोन.
JOH 4:47 आव ईद केळकु कि यीशु यहूदिया टु गलील दा होट बंदान, आऊन हात्‍ती होदुन अदिक आऊन से ईद विनती माळली कुरतुन कि नळुकु नान पार उक चंगा माळुल: यतिकी आव सोत्‍तुर मा ईरोन.
JOH 4:48 यीशु आऊन से अंदुन, “यागासताका नीव चमत्कार अदिक अदभुत क्याल्सा नोळालीर आगासताका यागलु विश्वास माळतीदील.”
JOH 4:49 राजा अन कर्मचारी आऊन से अंदुन, “हे प्रभु, नान पार उन सायोर से पयले नळ.”
JOH 4:50 यीशु आऊन से अंदुन, “होग, नीन पार जित्‍ता आन.” आ मंळसा यीशु उन अंद मात इन भरोसा माळदुन अदिक ओळेदुन.
JOH 4:51 आव हादी मा का ईरोन कि आऊन दास आऊन से बंदकु सिकदुर अदिक अनली कुरतुर, “नीन पार जित्‍ता आन.”
JOH 4:52 आव आंदुर से केळदुन, “याता घळी आव वळ्लेव आगली कुरतुन?” आंदुर आऊन से अंदुर, “नाळ सातवा तास दा आऊन मय ईळदव.”
JOH 4:53 आग आप्प जान्स कोंडुन कि ईद अदा घळी आत याता घळी यीशु आऊन से अंदुन, “नीन पार जित्‍ता आन,” अदिक आव अदिक आऊन सप्पा परिवार विश्वास माळदुर.
JOH 4:54 ईद दुसरा आश्चर्यकर्म ईरोद जो यीशु यहूदिया टु गलील दा बंदकु तोर्सदुन.
JOH 5:1 ई मातगोळ बाद्दा यहूदीगोळ्द ऊंद हाब्ब आत, अदिक यीशु यरूशलेम इक होदुन.
JOH 5:2 यरूशलेम दा भेंट-फाटक इन हात्‍ती ऊंद कुण्ड आद जो इब्रानी भाषा बैतसैदा कहलुसतद; अदुर अईद छपर्या आव.
JOH 5:3 इऊर दा हापाळ सा बिमार, कुढ्ढ, लंगळा अदिक लकवा अन रोगी लॉकुर बिदकु ईरतोगोर.
JOH 5:4 यतिकी निवळुस्द समय मा परमेश्वर उन स्वर्गदूत कुण्ड दा ईळुकु नीर इक हालुसतोगोर. नीर हालुसतेला अच जो यावारा पयले ईळुतोगोन आव चंगा आगेग तोगोन बाक आऊक यातोदारा बिमारी येती आगबाळुल.
JOH 5:5 अल ऊंद मंळसा ईरोन, जो अळतीस वर्ष टु बिमारी देल बिदकु ईरोन.
JOH 5:6 यीशु आऊक बिदकु नोळकु अदिक ईद जान्सकु कि आव हापाळ दिन टु ई दशा दा बिदकु आन, आऊन से केळदुन, “येन नी चंगा आगोद चाहासत्या?”
JOH 5:7 आ बिमार मंळसा आऊक उत्‍तर कोट्टुन, “हे प्रभु, नान हात्‍ती याऊ मंळसा हैलेच कि जो नीर हालुस्कु आगुल, रा नानी कुण्ड दा ईळस्यान; लेकीन नान पोहचुस ताका यावारा दुसरा नान से पयले ईळदोगतान.”
JOH 5:8 यीशु आऊन से अंदुन, “येळ, तान व्हर्स नेगु, नळु अदिक वयाळ.”
JOH 5:9 आव मंळसा तुरन्त चंगा आगेदुन, अदिक तान व्हर्स नेगुकु नळुली कुरतुन.
JOH 5:10 अद आराम इन दिन ईरोद. इदुरसाटी यहूदी आऊन से जो चंगा आगीदुन, अनली कुरतुर, “ईंद रा आराम इन दिन आद, नीनी व्हर्स नेगोद उचित हैलेच.”
JOH 5:11 आव आंदरी उत्‍तर कोट्टुन, “याव नानी चंगा माळदुन, आवा नान से अंदुन, ‘तान व्हर्स नेगु, नळु अदिक वयाळ.’”
JOH 5:12 आंदुर आऊन से केळदुर, “आव याव मंळसा हुन याव नीन से अंदुन, ‘व्हर्स नेगु, नळु अदिक वयाळ.’”
JOH 5:13 लेकीन जो चंगा आगेगिदुन आव ईला जानसोन कि आव याव हुन, यतिकी आ जागा दा भीळ इन कारण यीशु अल टु हटसेगिदुन.
JOH 5:14 ई मातगोळ बाद्दा आव यीशु अक मंदिर दा सिकदुन. यीशु आऊन से अंदुन, “नोळ, नी चंगा आगेग्या: मात्‍त पाप माळबाळेत, हिंग आगबाळुल कि इदुर देल यातोदारा भारी परेशानी नीन मा बंदकु बिळुल.”
JOH 5:15 आ मंळसा होगकु यहूदी लॉकुर से अंद बुटुन कि याव नानी चंगा माळदुन आव यीशु हुन.
JOH 5:16 ईद कारण यहूदी यीशु अक सतुस्ली कुरतुर, यतिकी आव ईत्‍ता क्याल्सा आराम इन दिशी माळतोगोन.
JOH 5:17 इदुर मा यीशु आंदुर से अंदुन, “नान आप्प ईगासताका क्याल्सा माळतान, अदिक ना भी क्याल्सा माळतीन.”
JOH 5:18 ईद कारण यहूदी अदिक भी यक्कुल आऊक कोंद बुळोद कोशिश माळली कुरतुर, यतिकी आव ना सिर्फ आराम इन दिन इन विधी अक मुरोन, लेकीन परमेश्वर उक तान आप्प अंदकु तान तान इक परमेश्वर उन घाई भी ठहरूसतोगोन.
JOH 5:19 इदुर मा यीशु आंदुर से अंदुन, “ना नीम से खरा खरा अनतीन, पार खुद देल येनु माळ सकालुन, सिर्फ आव जो आप्प उक माळ्त नोळतान; यतिकी याता याता क्याल्सागोळी आव माळतान अवरी पार भी अदा रीति देल माळतान.
JOH 5:20 यतिकी आप्प पार उन से प्यार ईटतान अदिक जो जो क्याल्सा आव खुद माळतान, आव सप्पा आऊक तोर्सतान; अदिक आव इऊर से भी धोड्डेव क्याल्सा आऊक तोर्सतान, ताकी नीव अचम्भा माळीर.
JOH 5:21 ह्यांग आप्प सोत्‍तुरी नेगुतान अदिक जित्‍ता माळतान, हांग अच पार भी यारी चाहासतान आंदरी जित्‍ता माळतान.
JOH 5:22 आप्प यारदु न्याय माळालुन, लेकीन न्याय माळोद सप्पा क्याल्सा पार उक कोट्ट बुटुन,
JOH 5:23 कि सप्पा लॉकुर ह्यांग आप्प उन आदर माळतार हांग अच पार उन भी आदर माळुल. जो पार आदर माळालुन, आव आप्प उन यारी आव कळ्यान, आदर माळालुन.
JOH 5:24 ना नीम से खरा खरा अनतीन, जो नान वचन केळकु नान कळावाळा मा विश्वास माळतान, अनन्त जीवन आऊंद हुन; अदिक आऊन मा दण्ड इन आग्या आगाल्द लेकीन आव मृत्यु टु आप्पाटी आगकु जीवन दा प्रवेश माळ कोंडान.
JOH 5:25 “ना नीम से खरा खरा अनतीन अद समय बरतद, अदिक ईग आद, यारदा सायावाळेर परमेश्वर उन पार उन आवाज केळ्यार, अदिक जो केळ्यार आंदुर जित्‍ता ईत्‍तार.
JOH 5:26 यतिकी याता रीति देल आप्प तान तान दा जीवन ईटतान, अदा रीति देल आव पार उक भी ईद अधिकार कोटान कि तान तान दा जीवन ईटुल;
JOH 5:27 लेकीन आऊक न्याय माळोद भी अधिकार कोटान, इदुरसाटी कि आव मंळसा अन पार हुन.
JOH 5:28 इदुर देल अचम्भा माळबाळी; यतिकी अद समय बरतद कि यास कब्रगोळ दा आर आंदुर आऊन आवाज केळकु व्हार्या होटकु बंदार.
JOH 5:29 यार वळ्लीद माळ्यार आंदुर जीवन इन पुनरूत्थान इन साटी जित्‍ता आदार अदिक यार बुराई माळ्यार आंदुर दण्ड इन पुनरूत्थान इन साटी जित्‍ता आदार.
JOH 5:30 “ना तान तान देल येनु माळ सकालीन; ह्यांग केळतीन, हांगा न्याय माळतीन; अदिक नान न्याय खरा आद, यतिकी ना तान इच्छा देल ईला लेकीन तान कळावाळा अन्द इच्छा चाहासतीन.
JOH 5:31 अगर ना खुद अच तान गवाही कोळाईन, रा नान गवाही खरा हैलेच.
JOH 5:32 दुसरा अदिक आन जो नान गवाही कोळतान, अदिक ना जान्सतीन कि नान जो गवाही आव कोळतान, अद खरा आद.
JOH 5:33 नीव यूहन्ना से केळसुसदीर अदिक आव सच्चाई इन गवाही कोट्टुन.
JOH 5:34 लेकीन ना तान बारा दा मंळसा अन गवाही चाहासालीन; तरी ना ई मातगोळी इदुरसाटी अनतीन कि नीमी उद्धार सिक्‍कुल.
JOH 5:35 आव रा होत्‍ततेला अदिक चमकुसतेला दिंग्या ईरोन, अदिक नीमी येनारा समय ताका आऊन ज्योति दा मग्न आगोद वळ्लीद हत.
JOH 5:36 लेकीन नान हात्‍ती जो गवाही आद अद यूहन्ना अन गवाही देल धोळ्द आद; यतिकी जो क्याल्सा आप्प नानी पुरा माळोर साटी कोटान मतलब ईदा क्याल्सा जो ना माळतीन, अव नान गवाह आव कि आप्प नानी कळ्यान.
JOH 5:37 अदिक आप्प याव नानी कळ्यान, आवा नान गवाही कोटान. नीव ना यागल्यारा आऊंद आवाज केळदीर, अदिक ना आऊंद रूप नोळदीर;
JOH 5:38 अदिक आऊन वचन इक मन दा जमा ईटालीर, यतिकी आव यारी कळ्यान नीव आऊंद विश्वास माळालीर.
JOH 5:39 नीव पवित्रशास्त्र दा ढुंढ्सतीर, यतिकी सम्सतीर कि अदुर्दा अनन्त जीवन नीमी सिकतद; अदिक ईव आवा हुन जो नान गवाही कोळतान;
JOH 5:40 तरी भी नीव जीवन साटी नान हात्‍ती बरोद चाहासालीर.
JOH 5:41 ना मंळसागोळ से आदर चाहासालीन.
JOH 5:42 लेकीन ना नीमी जान्सतीन कि नीम दा परमेश्वर उन प्यार हैलेच.
JOH 5:43 ना तान आप्प उन हेसुर देल बंदीन, अदिक नीव नानी ग्रहण माळालीर; अगर दुसरा यावारा तांद अच हेसुर देल बंदान, रा आऊक ग्रहण माळ कोंडीर.
JOH 5:44 नीव जो आबुर दाबुर से आदर चाहासतीर अदिक अद आदर जो ऊंद मात्र परमेश्वर उन दी टु आद, चाहासालीर, याता प्रकार विश्वास माळ सकतीर?
JOH 5:45 ईद सम्सबाळी कि ना आप्प उन मुंद नीम मा दोष हचाईन; नीम मा दोष हचावाळा रा मूसा हुन, यार मा नीव भरोसा ईटीर.
JOH 5:46 यतिकी अगर नीव मूसा अन विश्वास माळायदीर, रा नान भी विश्वास माळायदीर, इदुरसाटी कि आव नान बारा दा लिखस्यान.
JOH 5:47 लेकीन अगर नीव आऊन लिख्सद मातगोळ मा विश्वास माळालीर, रा नान मातगोळ मा ह्यांग विश्वास माळीर?”
JOH 6:1 ई मातगोळ्द बाद्दा यीशु गलील इन झील मतलब तिबिरियास इन झील इन आप्पाटी होदुन.
JOH 6:2 अदिक ऊंद धोळ्द भीळ आऊन हिंद आगेत यतिकी जो आश्चर्यकर्म आव बिमारगोळ मा तोर्सतोगोन आंदुर अवरी नोळतोगोर.
JOH 6:3 आग यीशु पहाळी मा येरकु तान चेलागोळ सांगुळ अल कुरतोदुन.
JOH 6:4 यहूदीगोळ्द फसह अन हाब्ब हात्‍ती ईरोद.
JOH 6:5 याग यीशु तान कण्णगोळी नेगुकु ऊंद धोळ्द भीळ इक तान हात्‍ती बर्त नोळदुन, रा फिलिप्पुस से अंदुन, “नाव इंदुर भोजन इन साटी यल टु रोट्टी कोंडकु तंदेव?”
JOH 6:6 आव ईद मात आऊक परखुसोर साटी अंदुन, यतिकी आव खुद जानसोन कि आव येन माळ्यान.
JOH 6:7 फिलिप्पुस आऊक उत्‍तर कोट्टुन, “येढ्ढ सौ दीनार इन रोट्टी भी आंदुर साटी पुरा आगतीदील कि आंदुर दा टु हर ऊंद इक थ्वाळा-थ्वाळा सिक्‍केगुल.”
JOH 6:8 आऊन चेलागोळ दा टु शमौन पतरस उन वार्ट अन्द्रियास आऊन से अंदुन,
JOH 6:9 “ईल ऊंद पार आन यार हात्‍ती जवारी इन अईद रोट्टी अदिक येढ्ढ मेनगोळ आव; लेकीन ईस लॉकुर साटी अव येन आव?”
JOH 6:10 यीशु अंदुन, “लॉकुरी कुर्स बुळी.” आ जागा दा हापाळ काड्डा ईरोद: आग लॉकुर यारदा गंळ्सुर्द संख्या लगभग अईद हजार इन ईरोद, कुरतोदुर.
JOH 6:11 आग यीशु रोट्टीगोळी हुळदुन, अदिक धन्यवाद माळकु कुरावाळेर इक वाट्स बुटुन; अदिक हांग अच मेनगोळ दा टु यास आंदुर चाहासोर वाट्स बुटुन.
JOH 6:12 याग आंदुर तिनकु संतुष्ट आगेदुर रा आव तान चेलागोळ से अंदुन, “मिक्‍कु तुकळागोळी जमा माळबुळी कि येनु भिटकु आगबाळुल.”
JOH 6:13 इदुरसाटी आंदुर जमा माळदुर, अदिक जवारी इन अईद रोट्टीगोळ तुकळागोळ से जो तिनावाळेर ऊळोर, हन्नेळ फुट्टी तुमदव.
JOH 6:14 आग जो आश्चर्यकर्म आव माळकु तोर्सदुन अदरी आ लॉकुर नोळकु अनली कुरतुर, “आव भविष्यवक्ता जो दुनिया दा बरावाळा ईरोन निश्चय ईवा हुन.”
JOH 6:15 यीशु ईद जान्सकु कि आंदुर नानी राजा माळोर साटी हुडोद चाहासतार, बाक पहाळी मा आबना ओळेदुन.
JOH 6:16 याग द्याव मुळ्कत, रा यीशु उन चेलागोळ झील इन किनारा मा होदुर,
JOH 6:17 अदिक ड्वांगा मा येरकु झील इन आप्पाटी कफरनहूम इक होगली कुरतुर. आ समय अंधार आगेगीत, अदिक यीशु ईगासताका आंदुर हात्‍ती ईला बंदीदुन.
JOH 6:18 आँधी अन कारण झील दा लयरगोळ येळली कुरतव.
JOH 6:19 याग आंदुर केई केई अईद-आर कोस इन लगभग होटोदुर, रा आंदुर यीशु उक झील मा नळुत अदिक ड्वांगा अन हात्‍ती बर्त नोळदुर, अदिक अंजेदुर.
JOH 6:20 लेकीन आव आंदुर से अंदुन, “ना हुईन; अंजबाळी.”
JOH 6:21 इदुरसाटी आंदुर आऊक ड्वांगा मा येरसोर साटी तयार आदुर अदिक तुरन्त अद ड्वांगा आ जागा मा पोहचुसेत यल आंदुर होगोर.
JOH 6:22 दुसरा दिशी आ भीळ, जो झील इन आप्पाटी निदुरकु ईरोद, ईद नोळदुर कि ईल ऊंद इक बिटकु अदिक यातोदु ड्वांगा ईला ईरोद; अदिक यीशु तान चेलागोळ सांगुळ आ ड्वांगा मा ईला येरीदुन, लेकीन सिर्फ आऊन चेलागोळ अच होगीदुर.
JOH 6:23 आग हापाळ ड्वांगागोळ तिबिरियास टु आ जागा अन हात्‍ती बंदव, यल आंदुर प्रभु उक धन्यवाद माळदुर बाद्दा रोट्टी तिंदीदुर.
JOH 6:24 इदुरसाटी याग भीळ नोळ्त कि ईल ना यीशु आन अदिक ना आऊन चेलागोळ, रा आंदुर भी ड्वांगागोळ मा येरकु यीशु उक ढुंढ्सतेला कफरनहूम पोहचुसदुर.
JOH 6:25 झील इन आप्पाटी याग लॉकुर्द भीळ यीशु से सिकदुर रा अंदुर, “हे गुरु, नी ईल याग बंद?”
JOH 6:26 यीशु आंदरी उत्‍तर कोट्टुन, “ना नीम से खरा खरा अनतीन, नीव नानी इदुरसाटी ढुंढसालीर कि नीव आश्चर्यकर्म नोळदीर, लेकीन इदुरसाटी कि नीव रोट्टीगोळी तिनकु संतुष्ट आदीर.
JOH 6:27 नाशवान भोजन इन साटी मेहनत माळबाळी, लेकीन आ भोजन इन साटी जो अनन्त जीवन ताका ठहरूसतद, यारी मंळसा अन पार नीमी कोट्टान; यतिकी आप्प मतलब परमेश्वर अदुर मा छाप हच्यान.”
JOH 6:28 आंदुर आऊन से अंदुर, “परमेश्वर उन क्याल्सा माळोर साटी नाव येन माळेव?”
JOH 6:29 यीशु आंदरी उत्‍तर कोट्टुन, “परमेश्वर उन क्याल्सा ईद आद कि नीव आऊन मा विश्वास माळी, यारी आव कळ्यान.”
JOH 6:30 आग आंदुर आऊन से अंदुर, “बाक नी यातोद चमत्कार तोर्सत्या कि नाव अदरी नोळकु नीन विश्वास माळेव? नी यातोद क्याल्सा तोर्सत्या?”
JOH 6:31 नाम आप्प दादागोळ आळी दा मन्ना तिंदुर; ह्यांग लिख्सकु आद, “आव आंदरी तिनोर साटी स्वर्ग टु रोट्टी कोट्टुन.”
JOH 6:32 यीशु आंदुर से अंदुन, “ना नीम से खरा खरा अनतीन कि मूसा नीमी अद रोट्टी स्वर्ग टु कोटीदील, लेकीन नान आप्प नीमी खरा रोट्टी स्वर्ग टु कोळतान.
JOH 6:33 यतिकी परमेश्वर उन रोट्टी अदा हुन जो स्वर्ग टु ईळुकु दुनिया अक जीवन कोळतद.”
JOH 6:34 आग आंदुर आऊन से अंदुर, “हे प्रभु, ईद रोट्टी नामी हमेशा कोळतेला ईर.”
JOH 6:35 यीशु आंदुर से अंदुन, “जीवन इन रोट्टी ना हुईन: जो नान हात्‍ती बरतान आव यागलु उपासा ईरतीदील, अदिक जो नान मा विश्वास माळतान आव यागलु प्यासा ईरतीदील.
JOH 6:36 लेकीन ना नीम से अंदिदीन कि नीव नानी नोळ भी कोंडीर तरी विश्वास माळालीर.
JOH 6:37 जो येनारा आप्प नानी कोळतान अद सप्पा नान हात्‍ती बंदीत, अदिक जो यावारा नान हात्‍ती बंदान आऊक ना यागलु तेगुतिदील.
JOH 6:38 यतिकी ना तान इच्छा ईला लेकीन तान कळावाळा अन्द इच्छा पुरा माळोर साटी स्वर्ग टु ईळदीन;
JOH 6:39 अदिक नान कळावाळा अन इच्छा ईद आद कि जो येनारा आव नानी कोटान, अदुर दा टु ना येनारा खोऊसालीन, लेकीन आऊक आखरी दिशी बाक जित्‍ता माळाईन.
JOH 6:40 यतिकी नान आप्प उन इच्छा ईद आद कि जो यावारा पार उक नोळुल अदिक आऊन मा विश्वास माळुल, आऊक अनन्त जीवन सिक्‍कीत; अदिक ना आऊक आखरी दिशी बाक जित्‍ता माळाईन.”
JOH 6:41 “इदुरसाटी यहूदी लॉकुर आऊन मा कुळकुळ्सली हतदुर, यतिकी आव अंदिदुन, जो रोट्टी स्वर्ग टु ईळुत, अद ना हुईन.”
JOH 6:42 अदिक आंदुर अंदुर, “येन ईव यूसुफ उन पार यीशु आल्लच, यार मोय-आप्प उक नाव अरूतेव? रा आव ह्यांग अनतान कि ना स्वर्ग टु ईळदीन?”
JOH 6:43 यीशु आंदरी उत्‍तर कोट्टुन, आपस दा कुळकुळुसबाळी.
JOH 6:44 याऊ नान हात्‍ती बर सकालुन यागासताका आप्प, याव नानी कळ्यान, आऊक जेडु कोमालुन; अदिक ना आऊक आखरी दिशी बाक जित्‍ता माळाईन.
JOH 6:45 भविष्यवक्तागोळ्द लेखगोळ दा ईद लिख्सकु आद: “आंदुर सप्पा परमेश्वर उन दी टु कल्सकु ईत्‍तार.” जो यावारा आप्प से केळ्यान अदिक कलतान, आव नान हात्‍ती बरतान.
JOH 6:46 ईद ईला कि यावारा आप्प उक नोळ्यान; लेकीन जो परमेश्वर उन दी टु आन, सिर्फ आवा आप्प उक नोळ्यान.
JOH 6:47 “ना नीम से खरा खरा अनतीन कि जो यावारा विश्वास माळतान, अनन्त जीवन आऊंदा हुन.
JOH 6:48 जीवन इन रोट्टी ना हुईन.
JOH 6:49 नीम आप्प दादागोळ आळी दा मन्ना तिंदुर लेकीन आंदुर सोतोदुर.
JOH 6:50 लेकीन ईद अद रोट्टी हुन जो स्वर्ग टु ईळुतद ताकी मंळसा अदरी तिनुल अदिक सायबाळुल.
JOH 6:51 जीवन इन रोट्टी जो स्वर्ग टु ईळुत, ना हुईन. अगर यावारा ईद रोट्टी दा टु तिंदान, रा सदा जित्‍ता ईत्‍तान; अदिक जो रोट्टी ना दुनिया अक जित्‍ता ईरोरसाटी कोळाईन, अद नान मय हुन.”
JOH 6:52 इदुर मा यहूदी ईद अनकु आपस दा झगळा माळली कुरतुर, “ईव मंळसा ह्यांग नामी तान मय तिनली कोळ सकतान?”
JOH 6:53 यीशु आंदुर से अंदुन, “ना नीम से खरा खरा अनतीन कि यागासताका नीव मंळसा अन पार उन मय तिनालीर, अदिक आऊन खुन कुडालीर, नीम दा जीवन हैलेच.
JOH 6:54 जो नान मास तिनतान अदिक नान खुन कुडुतान, अनन्त जीवन आऊंदा आद; अदिक ना आऊक आखरी दिशी बाक जित्‍ता माळाईन.
JOH 6:55 यतिकी नान मास सही दा तिनोद चिज हुन, अदिक नान खुन सही दा कुडोद चिज हुन.
JOH 6:56 जो नान मास तिनतान अदिक नान खुन कुडुतान आव नान दा संची बन्सकु ईरतान, अदिक ना आऊन दा.
JOH 6:57 ह्यांग जित्‍ता आप्प नानी कळ्यान, अदिक ना आप्प उन कारण जित्‍ता आईन, हांगा आव भी जो नानी तिंदान नान कारण जित्‍ता ईत्‍तान.
JOH 6:58 जो रोट्टी स्वर्ग टु ईळुत अदा हुन, आ रोट्टी अन घाई यारी आप्प दादागोळ तिंदुर अदिक सोतोदुर; जो यावारा ईद रोट्टी तिंदान, आव सदा जित्‍ता ईत्‍तान.”
JOH 6:59 ई मातगोळी आव कफरनहूम इन ऊंद यहूदी लॉकुर्द सभागृह दा उपदेश कोळाहोती अंदुन.
JOH 6:60 यीशु उन चेलागोळ दा टु हापाळ मुंदुर ईद केळकु अंदुर, “ईद कठोर मात आद; इदरी याव केळ सकतान?”
JOH 6:61 यीशु तान मन दा ईद जान्सकु कि नान चेलागोळ आपस दा ईद मात मा कुळकुळुसतार, आंदुर से केळदुन, “येन ईद मात देल नीमी ठोकर हततद?
JOH 6:62 अगर नीव मंळसा अन पार उक येल आव पयले ईरोन, अल म्याकुच होग्त नोळीर, रा येन आदीत?
JOH 6:63 आत्मा रा जीवनदायक आद, मय देल येनु लाभ हैलेच; जो मातगोळी ना नीम से अंदीन अव आत्मा हु, अदिक जीवन भी हुन.
JOH 6:64 लेकीन नीम दा टु येनारा हिंग आर जो विश्वास माळालुर.” यतिकी यीशु पयले टु अच जानसोन कि जो विश्वास माळालुर, आंदुर यार उर; अदिक याव नानी हुळसुस्यान.
JOH 6:65 अदिक आव अंदुन, “इदुर्दा साटी ना नीम से अंदिदीन कि यागासताका यारीकारा आप्प उन दी टु ईद वरदान कोटकु आगाल्द आगासताका आव नान हात्‍ती बर सकालुन.”
JOH 6:66 इदुर मा आऊन चेलागोळ दा टु हापाळ मुंदुर वापस आगेदुर अदिक अदुर बाद्दा आऊन सांगुळ होगीदील.
JOH 6:67 आग यीशु आ हन्नेळ चेलागोळी अंदुन, “येन नीव भी होगोद चाहासतीर?”
JOH 6:68 शमौन पतरस आऊक उत्‍तर कोट्टुन, “हे प्रभु, नाव यार हाती होदेव? अनन्त जीवन इन मातगोळ रा नींद अच हाती आव;
JOH 6:69 अदिक नाव विश्वास माळदेव अदिक जान्स कोंडेव कि परमेश्वर उन पवित्र जन नीना हुय.”
JOH 6:70 यीशु आंदरी उत्‍तर कोट्टुन, “येन ना नीव हन्नेळ मुंदरी नीवळुसीदील? तरी नीम दा टु ऊंद मंळसा शैतान आन.”
JOH 6:71 ईद आव शमौन इस्करियोती इन पार यहूदा अन बारा दा अंदिदुन, यतिकी आवा जो हन्नेळ चेलागोळ दा टु ऊंद ईरोन, आऊक हुळसुसोद ईरोद.
JOH 7:1 ई मातगोळ्द बाद्दा यीशु गलील दा टेटाळतेला ईत्‍तुन; यतिकी यहूदी लॉकुर आऊक कोंद बुळोद कोशिश माळोर, इदुरसाटी आव यहूदिया दा टेटाळोद ईला चाहासोन.
JOH 7:2 यहूदीगोळ्द झोपळीगोळ्द हाब्ब हात्‍ती ईरोद.
JOH 7:3 इदुरसाटी आऊन वार्टुर आऊन से अंदुर, “ईल टु यहूदिया अक होग, कि जो क्याल्सा नी माळत्या अवरी नीन चेलागोळ अल भी नोळुल.
JOH 7:4 यतिकी हिंग याऊ ईला ईतीदान जो प्रसिद्ध आगोद चाहासुल, अदिक होचकु क्याल्सा माळुल. अगर नी क्याल्सा माळत्या, रा तान तान इक दुनिया मा प्रगट माळ.”
JOH 7:5 यतिकी आऊन वार्टुर भी आऊन मा विश्वास ईला माळतोगोर.
JOH 7:6 आग यीशु आंदुर से अंदुन, “नान समय ईगासताका बंदिदील, लेकीन नीम साटी सप्पा समय आद.
JOH 7:7 दुनिया नीम से दुश्मनी माळ सकाल, लेकीन अद नान से दुश्मनी माळतद यतिकी ना अदुर विरोध दा ईद गवाही कोळतीन कि अदुर क्याल्सा बुरा आद.
JOH 7:8 नीव हाब्ब दा होगी; ना ईगल्या ईद हाब्ब दा होगालीन, यतिकी ईगासताका नान समय पुरा आगीदील.”
JOH 7:9 आव आंदुर से ई मातगोळी अनकु गलील दा अच ईतोदुन.
JOH 7:10 लेकीन याग आऊन वार्टुर हाब्ब दा वोळेदुर रा आव खुद भी, प्रगट दा ईला लेकीन मान्सी गुप्त रूप देल होदुन.
JOH 7:11 यहूदी हाब्ब दा आऊक ईद अनकु ढुंढ्सली कुरतुर, “आव यल आन?”
JOH 7:12 अदिक लॉकुर दा आऊन बारा दा सुंगा मुंगा हापाळ सा मातगोळ आदव: यारारा अनतोगोर, “आव वळ्लेव मंळसा आन.” अदिक यारारा अनतोगोर, “ईला, आव लॉकुरी भरमुसतान.”
JOH 7:13 तरी यहूदीगोळ्द अंज्क इन कारण याऊ मंळसा आऊन बारा दा खुल्सकु ईला माताळोन.
JOH 7:14 याग हाब्ब इन आर्धा दिन बितसेदव; रा यीशु मंदिर दा होगकु उपदेश माळली कुरतुन.
JOH 7:15 आग यहूदीगोळ चकित आगकु अंदुर, “ईऊक बिना वाचुस्द अक्‍कल ह्यांग होटबत?”
JOH 7:16 यीशु आंदरी उत्‍तर कोट्टुन, “नान उपदेश नांद ईला, लेकीन नान कळावाळा अन हुन.
JOH 7:17 अगर यावारा आऊन इच्छा मा नळोद चाहासतान, रा आव ईद उपदेश इन बारा दा जान्स कोंडान कि ईद परमेश्वर उन दी टु हुन या तान दी टु अनतीन.
JOH 7:18 जो तान दी टु येनारा अनतान, आव तांद अच बळाई चाहासतान; लेकीन जो तान कळावाळा अन बळाई चाहासतान आवा खरा आन, अदिक अदुर दा अन्याय ईला.
JOH 7:19 येन मूसा नीमी व्यवस्था कोटीदील? तरी नीम दा टु याऊ व्यवस्था मा नळालुन. नीव येती नानी कोंद बुळोद चाहासतीर?”
JOH 7:20 लॉकुर उत्‍तर कोट्टुर, “नीन दा दुष्टआत्मा आद! याव नीनी कोंद बुळोद चाहासतान?”
JOH 7:21 यीशु आंदरी उत्‍तर कोट्टुन, “ना ऊंद क्याल्सा माळदीन, अदिक नीव सप्पा आश्चर्य माळतीर.
JOH 7:22 ईदा कारण मूसा नीमी खतना अन आग्या कोटान ईद ईला कि अद मूसा अन दी टु आद लेकीन आप्प दादागोळ टु नळुत बंदाद, अदिक नीव आराम इन दिन मंळसा अन खतना माळतीर.
JOH 7:23 याग आराम इन दिन मंळसा अन खतना माळकु आगतद ताकी मूसा अन व्यवस्था अन आग्या टलुस बाळुल, रा नीव नान मा येती इदुरसाटी सिट्ट माळतीर कि ना आराम इन दिन ऊंद मंळसा अक पुरा रीति देल चंगा माळदीन.
JOH 7:24 बाय नोळ्द न्याय माळबाळी, लेकीन ठीक ठीक न्याय माळी.”
JOH 7:25 आग येनारा यरूशलेम इन लॉकुर अनली कुरतुर, “येन ईव आवा आल्लच यारी कोंद बुळोद कोशिश माळकु आगेत्याद?
JOH 7:26 लेकीन नोळी, आव रा मसीहगोळ घाई खुल्लम खुल्ला मातगोळी माळतान अदिक याऊ सरदार आऊन से येनु अनालुर.
JOH 7:27 ईऊक रा नाव जान्सतेव कि ईव येलेव हुन; लेकीन मसीह याग बंदान रा याऊ जान्सतीदील कि आव येलेव हुन.”
JOH 7:28 आग यीशु मंदिर दा उपदेश कोळतेला कारूकु अंदुन, “नीव नानी जान्सतीर, अदिक ईद भी जान्सतीर कि ना येलेव हुईन. ना रा खुद देल बंदिदील, लेकीन नानी कळावाळा खरा आन, आऊक नीव जान्सालीर.
JOH 7:29 ना आऊक जान्सतीन यतिकी ना आऊन दी टु आईन अदिक आवा नानी कळ्यान.”
JOH 7:30 इदुर मा आंदुर आऊक हुडोद चाहासदुर, तरी याऊ आऊन मा कय हाकिदील यतिकी आऊन सही समय ईगासताका बरली का ईरोद.
JOH 7:31 तरी भी भीळ दा टु हापाळ सा लॉकुर आऊन मा विश्वास माळदुर, अदिक अनली कुरतुर, “मसीह याग बंदान रा येन इदुर से यक्कुल आश्चर्यकर्म तोरस्यान जो ईव तोर्सदुन?”
JOH 7:32 फरीसीगोळ लॉकुरी यीशु उन बारा दा ई मातगोळ सुंगा मुंगा अंत केळदुर; अदिक प्रधान याजकगोळ अदिक फरीसीगोळ आऊक हुडोर साटी सिपाही कळुदुर.
JOH 7:33 इदुर मा यीशु अंदुन, “ना थ्वाळासा समय ताका अदिक नीम सांगुळ आईन, आग तान कळावाळा अन हात्‍ती होटोगाईन.
JOH 7:34 नीव नानी ढुंढसीर, लेकीन नीमी सिकतीदील; अदिक येल ना आईन, अल नीव बर सकालीर.”
JOH 7:35 इदुर मा यहूदीगोळ आपस दा अंदुर, “ईव येल होदान कि नामी सिकतीदील? येन ईव आंदुर हात्‍ती होदान जो ग्रीकगोळ दा तितर-बितर आगकु ईरतार, अदिक ग्रीकगोळी भी उपदेश कोट्टान?
JOH 7:36 ईद येन मात आद जो आव अंदुन, कि ‘नीव नानी ढुंढसीर, लेकीन सिकतीदील; अदिक येल ना आईन, अल नीव बर सकालीर.’”
JOH 7:37 हाब्ब इन आखरी दिशी, जो मुख्य दिन आद, यीशु निदुरदुन अदिक कारूकु अंदुन, “अगर यावारा प्यासा आन रा नान हात्‍ती बरूल अदिक कुडुल.
JOH 7:38 जो नान मा विश्वास माळ्यान, ह्यांग पवित्रशास्त्र दा बंदाद, ‘आऊन दिल दा टु जीवन इन नीर इन गांगा वाहुसकु होट्टीत.’”
JOH 7:39 आव ईद वचन पवित्र आत्मा अन बारा दा अंदुन, यारी आऊन मा विश्वास माळावाळेरी सिक्‍कोद ईरोद; यतिकी आत्मा ईगासताका ईला ईळदीत, यतिकी यीशु ईगासताका तान महिमा अक ईला पोहचुसीदुन.
JOH 7:40 आग भीळ दा टु यारारा यारारा ई मातगोळी केळकु अंदुर, “सही दा ईवा आव भविष्यवक्ता हुन.”
JOH 7:41 दुसरागोळ अंदुर, “ईव मसीह हुन.” लेकीन येनारा लॉकुर अंदुर, “येती? येन मसीह गलील टु बंदान?
JOH 7:42 येन पवित्रशास्त्र दा ईद बंदिदील कि मसीह दाऊद इन वंश टु अदिक बैतलहम ऊर टु बंदान, यल दाऊद ईरतान?”
JOH 7:43 इदुरसाटी आऊन कारण लॉकुर दा फूट बित्‍त.
JOH 7:44 आंदुर दा टु यारारा आऊक हुडोद चाहासोर, लेकीन याऊ आऊन मा कय हाकीदील.
JOH 7:45 आग सिपाही प्रधान याजक अदिक फरीसीगोळ हात्‍ती वापस बंदुर; आंदुर सिपाहीगोळ से अंदुर, “नीव आऊक येती तंदिदील?”
JOH 7:46 सिपाहीगोळ उत्‍तर कोट्टुर, “यावारा मंळसा यागलु हिंग मातगोळी माळीदील.”
JOH 7:47 फरीसीगोळ आंदरी उत्‍तर कोट्टुर, “येन नीव भी भरमुसकु आगीर?
JOH 7:48 येन सरदारगोळ या फरीसीगोळ दा टु यारारा आऊन मा विश्वास माळ्यार?
JOH 7:49 लेकीन ई लॉकुर जो व्यवस्था जान्सालुर, शापित आर.”
JOH 7:50 नीकुदेमुस, जो पयले आऊन हात्‍ती बंदीदुन अदिक आंदुर दा टु ऊंद ईरोन, आंदुर से अंदुन,
JOH 7:51 “येन नाम व्यवस्था यावारा मंळसा अक, यागासताका पयले आऊंद केळकु जान्स कोमालुर कि आव येन माळतान, दोषी ठहरूसतार?”
JOH 7:52 आंदुर आऊक उत्‍तर कोट्टुर, “येन नी भी गलील इन हुय? ढुंढ्स अदिक नोळ कि गलील टु यावारा भविष्यवक्ता प्रगट ईला आगोद.”
JOH 7:53 आग सप्पा लॉकुर तान तान मान्नी वोळेदुर.
JOH 8:1 लेकीन यीशु जैतून इन पहाळी मा होदुन.
JOH 8:2 व्हातर्या आव मात्‍त मंदिर दा बंदुन; सप्पा लॉकुर आऊन हात्‍ती बंदुर अदिक आव कुर्तकु आंदरी उपदेश कोळली कुरतुन.
JOH 8:3 आग शास्त्री अदिक फरीसी ऊंद आर्त इक तंदुर जो व्यभिचार दा हुळकु आगीदुर, अदिक आकी बीच दा निदरूसकु यीशु से अंदुर,
JOH 8:4 “हे गुरु, ई आर्त व्यभिचार माळ्त हुळकु आदुर.
JOH 8:5 व्यवस्था दा मूसा नामी आग्या कोटान कि हिंग आर्तेर मा पथराव माळुल. इदुरसाटी नी ई आर्त इन बारा दा येन अनत्या?”
JOH 8:6 आंदुर आऊक परखुसोर साटी ईद मात अंदुर ताकी आऊन मा दोष हचोर साटी येनारा मात सिक्‍कुल. लेकीन यीशु बांगकु बेळ्ल देल जागा मा लिख्सली कुरतुन.
JOH 8:7 याग आंदुर आऊन से केळतेला अच ईत्‍तुर, रा आव सिधा निदुरकु आंदुर से अंदुन, “नीम दा जो निष्पाप आन, आवा पयले आकी कल्ल होळदान.”
JOH 8:8 अदिक बाक बांगकु जागा मा बेळ्ल देल लिख्सली कुरतुन.
JOH 8:9 लेकीन आंदुर ईद केळकु धोड्डेर टु हुळकु स्याणेर ताका, ऊंद ऊंद माळकु होट्ट बुटुर, अदिक यीशु आबना ईतोदुन, अदिक आर्त अल्या बीच दा निदुरकु ईतोदुर.
JOH 8:10 यीशु सरका आगकु आकिन से अंदुन, “हे आर्त, आंदुर येल होदुर? येन यारारा दण्ड इन आग्या कोटीदील?”
JOH 8:11 आक अंदुर, “हे प्रभु, याऊ ईला.” यीशु अंदुन “ना भी नीनी दण्ड इन आग्या कोळालीन; होग, अदिक बाक पाप माळबाळेत.”
JOH 8:12 यीशु बाक लॉकुर से अंदुन, “दुनिया अन ज्योति ना हुईन; जो नान हिंद आगेदान आव अंधकार दा नळुतीदील; लेकीन जीवन इन ज्योति सिक्‍कीत.”
JOH 8:13 फरीसीगोळ आऊन से अंदुर, “नी तान गवाही खुद अच कोळत्या, नीन गवाही सही हैलेच.”
JOH 8:14 यीशु आंदरी उत्‍तर कोट्टुन, “भला ही ना तान गवाही खुद अच कोळतीन, तरी भी नान गवाही खरा आद, यतिकी ना जान्सतीन कि ना यल टु बंदीन अदिक यल होगतीन? लेकीन नीव जान्सालीर कि ना यल टु बरतीन या यल होगतीन.
JOH 8:15 नीव मय इन अनुसार न्याय माळतीर; ना यारदु न्याय माळालीन.
JOH 8:16 अदिक अगर ना न्याय माळाईन भी, रा नान न्याय खरा आद; यतिकी ना आबना हैलेच, लेकीन ना हुईन, अदिक आप्प आन याव नानी कळुदुन.
JOH 8:17 नीम व्यवस्था दा भी लिख्सकु आद कि येढ्ढ मुंदुर गवाही मिलुसकु सही आगतद;
JOH 8:18 ऊंद रा ना खुद तान गवाही कोळतीन, अदिक दुसरा आप्प नान गवाही कोळतान याव नानी कळ्यान.”
JOH 8:19 आंदुर आऊन से अंदुर, “नीन आप्प यल आन?” यीशु उत्‍तर कोट्टुन, “ना नीव नानी जान्सतीर, ना नान आप्प उक, अगर नानी जान्सायदीर रा नान आप्प उक भी जान्सायदीर.”
JOH 8:20 ई मातगोळी आव मंदिर दा उपदेश कोळतेला भंडार मान्या अंदुन, अदिक याऊ आऊक हुळदीदिल, यतिकी आऊन समय ईगासताका ईला बंदीत.
JOH 8:21 यीशु बाक आंदुर से अंदुन, “ना होगतीन, अदिक नीव नानी ढुंढसीर अदिक तान पाप दा सोत्‍तीर; यल ना होगतीन, अल नीव बर सकालीर.”
JOH 8:22 इदुर मा यहूदीगोळ अंदुर, “येन आव तान तान इक कोंद बुटान, जो अनतान, ‘यल ना होगतीन अल नीव बर सकालीर.’”
JOH 8:23 आव आंदुर से अंदुन, “नीव ल्यालमा नोर हुईर, ना म्याकुच इनव हुईन; नीव दुनिया नोर हुईर, ना दुनिया इनव आल्लच.
JOH 8:24 इदुरसाटी ना नीम से अंदीन कि तान पापगोळ दा सोत्‍तीर, यतिकी अगर नीव विश्वास माळतीदील कि ना आवा हुईन रा तान पापगोळ दा सोत्‍तीर.”
JOH 8:25 आंदुर आऊन से अंदुर, “नी याव हुय?” यीशु आंदुर से अंदुन, “आवा हुईन जो सुरूवात टु नीम से अनतेला बंदीन.
JOH 8:26 नीम बारा दा नानी हापाळ येनारा अनोद अदिक निर्णय माळोद आद; लेकीन नान कळावाळा खरा आन, अदिक जो ना आऊन से केळदीन अदा दुनिया अक अनतीन.”
JOH 8:27 आंदुर ईद समसीदील कि नाम से आप्प उन बारा दा अनतान.
JOH 8:28 आग यीशु अंदुन, “याग नीव मंळसा अन पार उक म्याकुच येरसीर, रा जानसीर कि ना आवा हुईन; ना तान तान से येनु माळालीन लेकीन ह्यांग नान आप्प नानी कलस्यान हांग अच ई मातगोळी अनतीन.
JOH 8:29 नान कळावाळा नान सांगुळ आन; आव नानी आबना बिटीदिल यतिकी ना सदा अदा क्याल्सा माळतीन यदुर देल आव प्रसन्न आगतान.”
JOH 8:30 आव ईव मातगोळी अनतेला अच ईरोन कि हापाळ मुंदुर आऊन मा विश्वास माळदुर.
JOH 8:31 आग यीशु आ यहूदीगोळ से यार आऊन मा विश्वास माळीदुर, अंदुन, “अगर नीव नान वचन दा बन्सकु ईत्‍तीर, रा सही दा नान चेलागोळ ठहरूसीर.
JOH 8:32 नीव सही अक जानसीर, अदिक सही नीमी स्वतंत्र माळीत.”
JOH 8:33 आंदुर आऊक उत्‍तर कोट्टुर, “नाव रा अब्राहम उन वंश टु आयेव, अदिक यागलु यारदु दास आगीदील. बाक नी ह्यांग अनत्या कि नीव स्वतंत्र आगेदीर?”
JOH 8:34 यीशु आंदरी उत्‍तर कोट्टुन, “ना नीम से खरा खरा अनतीन कि जो यावारा पाप माळतान आव पाप इन दास आन.
JOH 8:35 दास सदा मान्या ईरालुन; पार सदा ईरतान.
JOH 8:36 इदुरसाटी अगर पार नीमी स्वतंत्र माळ्यान, रा सचमुच नीव स्वतंत्र आगेदीर.
JOH 8:37 ना जान्सतीन कि नीव अब्राहम उन वंश टु आईर; तरी नान वचन नीम दिल दा जागा हुडाल्द, इदुरसाटी नीव नानी कोंद बुळोद चाहासतीर.
JOH 8:38 ना अदा अनतीन, जो तान आप्प उन मान्या नोळदीन; अदिक नीव अदा माळतेला ईरतीर जो नीव तान आप्प उन से केळदीर.”
JOH 8:39 आंदुर आऊक उत्‍तर कोट्टुर, “नाम आप्प रा अब्राहम हुन.” यीशु आंदुर से अंदुन, “अगर नीव अब्राहम उन औलाद आगयदीर, रा अब्राहम उन घाई क्याल्सा माळायदीर.
JOH 8:40 लेकीन ईग नीव नान घाई मंळसा अक कोंद बुळोद चाहासतीर, याव नीमी अद सही वचन हेळदुन जो परमेश्वर से केळदेव; हिंग रा अब्राहम ईला माळीदुन.
JOH 8:41 नीव तान आप्प उन घाई क्याल्सा माळतीर.” आंदुर आऊन से अंदुर, “नाव व्यभिचार देल पैदा आगीदील, नाम ऊंद आप्प आन मतलब परमेश्वर.”
JOH 8:42 यीशु आंदुर से अंदुन, “अगर परमेश्वर नीम आप्प ईरायदुन, रा नीव नान से प्यार ईटायदीर; यतिकी ना परमेश्वर उन दी टु बंदीन. ना खुद देल बंदिदील, लेकीन आवा नानी कळ्यान.
JOH 8:43 नीव नान मात येती समसालीर? इदुरसाटी कि नीव नान वचन केळ सकालीर.
JOH 8:44 नीव तान आप्प शैतान उन दी टु आईर अदिक तान आप्प उन लालसागोळी पुरा माळोद चाहासतीर. आव रा सुरूवात टु हत्यारा आन अदिक सही मा संची ईतीदील; यतिकी सही आऊन दा हैलेच. याग आव ख्वाटा माताळतान, रा तान स्वभाव देल अच माताळतान; यतिकी आव झुठा आन अदिक झुठ इन आप्प आन.
JOH 8:45 लेकीन ना जो खरा माताळतीन, इदुर्दा साटी नीव नांद विश्वास माळालीर.
JOH 8:46 नीम दा टु याव नानी पापी ठहरूसतान? अगर ना खरा माताळतीन, रा नीव नान विश्वास येती माळालीर?
JOH 8:47 जो परमेश्वर टु आगतान, आव परमेश्वर उन मातगोळी केळतान; अदिक नीव इदुरसाटी केळालीर कि परमेश्वर उन दी टु आल्लच.”
JOH 8:48 ईद केळकु यहूदीगोळ यीशु से अंदुर, “येन नाव खरा अनालेव कि नी सामरी हुय, अदिक नीन दा दुष्टआत्मा आद?”
JOH 8:49 यीशु उत्‍तर कोट्टुन, “नान दा दुष्टआत्मा हैलेच; लेकीन ना तान आप्प उन आदर माळतीन, अदिक नीव नान निरादर माळतीर.
JOH 8:50 लेकीन ना तान प्रतिष्ठा चाहासालीन; हव, ऊंद आन जो चाहासतान अदिक न्याय माळतान.
JOH 8:51 ना नीम से खरा खरा अनतीन कि अगर यावारा मंळसा नान वचन मा नळदान, रा आव अनन्त काल ताका मृत्यु अक नोळतीदिल.”
JOH 8:52 यहूदीगोळ आऊन से अंदुर, “ईग नाव जान्स कोंडेव कि नीन दा दुष्टआत्मा आद. अब्राहम सोतोदुन, अदिक भविष्यवक्तागोळ भी सोतोग्यार; अदिक नी अनत्या, ‘अगर यावारा नान वचन मा नळदान रा आव अनन्त काल ताका मृत्यु नोळतीदिल.’
JOH 8:53 नाम आप्प अब्राहम रा सोतोदुन. येन नी आऊन से धोड्डेव आय? अदिक भविष्यवक्तागोळ भी सोतोदुर. नीमी येन हततद कि नीव येन हुईर?”
JOH 8:54 यीशु उत्‍तर कोट्टुन, “अगर ना खुद तान महिमा माळाईन, रा नान महिमा येनु ईला; लेकीन नान महिमा माळावाळा नान आप्प आन, यारी नीव अनतीर कि आव नीम परमेश्वर हुन.
JOH 8:55 नीव रा आऊक जानसीदील: लेकीन ना आऊक जान्सतीन. अगर ना अनाईन कि ना आऊक जान्सालीन, रा ना नीम घाई ख्वाटा ठहरूसाईन; लेकीन ना आऊक जान्सतीन अदिक आऊन वचन मा नळुतीन.
JOH 8:56 नीम आप्प अब्राहम नान हागुल नोळोद आशा देल हापाळ मग्न ईरोन; अदिक आव नोळदुन अदिक खुश आदुन.”
JOH 8:57 यहूदीगोळ आऊन से अंदुर, “ईगासताका नी पचास वर्ष इन हैलेच, तरी भी नी अब्राहम उक नोळ्या?”
JOH 8:58 यीशु आंदुर से अंदुन, “ना खरा खरा अनतीन, कि पयले इदुर्द कि अब्राहम पैदा आदुन, ना आईन.”
JOH 8:59 आग आंदुर आऊक बडोर साटी कल्ल नेगदुर, लेकीन यीशु होचकु मंदिर टु होटबुटुन.
JOH 9:1 होगाहोती यीशु ऊंद मंळसा अक नोळदुन जो जनम टु कुढ्ढ ईरोन.
JOH 9:2 आऊन चेलागोळ आऊन से केळदुर, “हे गुरु, याव पाप माळीदुन कि ईव कुढ्ढ पैदा आदुन, ई मंळसा या ईऊन मोय या ईऊन आप्प?”
JOH 9:3 यीशु उत्‍तर कोट्टुन, “ना रा ईव पाप माळीदुन, ना ईऊन मोय ना आप्प; लेकीन ईद इदुरसाटी आत कि परमेश्वर उन क्याल्सा आऊन मा प्रगट आगुल.
JOH 9:4 याव नानी कळ्यान, नामी आऊन क्याल्सा हागुल ईरतेला अच माळोद जरूरी आद; अद ईळ्लक बरोद आद यदुर्दा याऊ क्याल्सा माळ सकतीदिल.
JOH 9:5 यागासताका ना दुनिया दा आईन, आगासताका दुनिया अन ज्योति आईन.”
JOH 9:6 ईद अनकु आव जागा मा ऊगुळदुन, अदिक आ ऊगळा देल मुण्ण इक काल्सदुन, अदिक अद मुण्ण आ कुढ्ढ उन कण्णगोळ मा हचकु
JOH 9:7 आऊन से अंदुन, “होग, शीलोह अन कुण्ड दा तोळकोम” आव होगकु तोळदुन, अदिक नोळतेला वापस बंदुन.
JOH 9:8 आग आऊन बाजुवाळेर अदिक यार पयले आऊक भीख बेळतेला नोळीदुर, अनली कुरतुर, “येन ईव आवा आल्लच, जो कुर्तकु भीख बेळतोगोन?”
JOH 9:9 येनारा लॉकुर अंदुर, “ईव आवा हुन,” दुसरागोळ अंदुर, “ईला, लेकीन आऊन घाई आन.” आव अंदुन, “ना आवा हुईन.”
JOH 9:10 आग आंदुर आऊन से केळली कुरतुर, “नीन कण्णगोळ ह्यांग खुलसेदव?”
JOH 9:11 आव उत्‍तर कोट्टुन, “यीशु हेसुर इन ऊंद मंळसा मुण्ण काल्सदुन, अदिक नान कण्णगोळ मा हचकु नान से अंदुन, ‘शीलोह दा होगकु तोळकोम,’ इदुरसाटी ना होदीन अदिक तोळदिन अदिक नोळली कुरतीन.”
JOH 9:12 आंदुर आऊन से केळदुर, “आव यल आन?” आव अंदुन, “ना जान्सालीन.”
JOH 9:13 लॉकुर आऊक जो पयले कुढ्ढ ईरोन फरीसीगोळ हात्‍ती ओतुर.
JOH 9:14 याता दिशी यीशु मुण्ण काल्सकु आऊन कण्णगोळी तेरदीदुन, अद आराम इन दिन ईरोद.
JOH 9:15 बाक फरीसीगोळ भी आऊन से केळदुर कि आऊन कण्णगोळ याता रीति देल खुलसेदव. आव आंदुर से अंदुन, “आव नान कण्णगोळ मा मुण्ण हचदुन, बाक ना तोळु कोंडीन, अदिक ईग ना नोळ सकतीन.”
JOH 9:16 इदुर मा येनारा फरीसी अनली कुरतुर, “ई मंळसा परमेश्वर उन दी टु आल्लच, यतिकी आव आराम इन दिन मानसालुन.” दुसरागोळ अंदुर, “पापी मंळसा हिंग चमत्कार ह्यांग तोर्स सकतान?” इदुरसाटी आंदुर दा फूट बिदोत.
JOH 9:17 आंदुर आ कुढ्ढ मंळसा से मात्‍त अंदुर, “आव नीन कण्णगोळी खोलस्यान. नी आऊन बारा दा येन अनत्या?” आव अंदुन, “आव भविष्यवक्ता आन.”
JOH 9:18 लेकीन यहूदीगोळी विश्वास आगीदील कि आव कुढ्ढ ईरोन अदिक ईग नोळतान, यागासताका आंदुर आऊन, यार्द कण्णगोळ खुलसेगीदव, आऊन मोय-आप्प उक कारूकु
JOH 9:19 आंदुर से केळीदील, “येन ईव नीम पार हुन, यारी नीव अनतीर कि कुढ्ढ पैदा आगीदुन? बाक ईग ह्यांग नोळतान?”
JOH 9:20 आऊन मोय-आप्प उत्‍तर कोट्टुर, “नाव रा जान्सतेव कि ईव नाम पार हुन, अदिक कुढ्ढ पैदा आगीदुन:
JOH 9:21 लेकीन नाव ईद जानसालेव कि ईग ह्यांग नोळतान, अदिक ना ईद जान्सतेव कि याव आऊन कण्णगोळी तेरदुन. आव स्याणा आन, आऊन से अच केळ कोमी: आव तान बारा दा खुद अंद बुटान.”
JOH 9:22 ई मातगोळी आऊन मोय आप्प इदुरसाटी अंदुर यतिकी आंदुर यहूदीगोळ से अंजोर, यतिकी यहूदी ऊंद मत आगेगीदुर कि अगर यावारा अंदान कि आव मसीह हुन, रा आव सभागृह टु तेगुकु आदान.
JOH 9:23 ईदा कारण आऊन मोय आप्प अंदुर, “आव स्याणा आन, आऊन से अच केळ कोमी.”
JOH 9:24 आग आंदुर आ मंळसा अक जो कुढ्ढ ईरोन, दुसरा घन कारूकु आऊन से अंदुर, “परमेश्वर उन स्तुती माळ. नाव रा जान्सतेव कि आ मंळसा पापी आन.”
JOH 9:25 आव उत्‍तर कोट्टुन, “ना जानसालीन कि आव पापी आन या हैलेच; ना ऊंद मात जान्सतीन कि ना पयले कुढ्ढ ईरीन अदिक ईग नोळतीन.”
JOH 9:26 आंदुर आऊन से मात्‍त अंदुर, “आव नीन सांगुळ येन माळदुन? अदिक याता प्रकार देल नीन कण्णगोळी खोल्सदुन?”
JOH 9:27 आव आंदुर से अंदुन, “ना रा नीम से अंद कोंडीन, अदिक नीव केळीदील; ईग दुसरा घन येती केळोद चाहासतीर? येन नीव भी आऊन चेला बनसोद चाहासतीर?”
JOH 9:28 आग आंदुर आऊक बुरा भला अनली कुरतुर, “नी अच आऊन चेला आय, नाव रा मूसा अन चेला हुयेव.
JOH 9:29 नाव जान्सतेव कि परमेश्वर मूसा से मातगोळी हेळदुन; लेकीन ई मंळसा अक जानसालेव कि येलेव हुन.”
JOH 9:30 आव आंदरी उत्‍तर कोट्टुन, “ईद रा आश्चर्य अन मात आद कि नीव जानसालीर कि आव येलेव हुन, लेकीन आव नान कण्णगोळी खोल्स बुटुन.
JOH 9:31 नाव जान्सतेव कि परमेश्वर पापीगोळ्द केळालुन, लेकीन अगर यावारा परमेश्वर उन भक्त आन अदिक आऊन इच्छा मा नळुतान, रा आव आऊन केळतान.
JOH 9:32 दुनिया अन सुरूवात देल ईद यागलु केळदुर दा बंदिदील कि यावारा जनम इन कुढ्ढ उन कण्णगोळी खोल्सदुन.
JOH 9:33 अगर ईव मंळसा परमेश्वर उन दी टु ईला ईरायदुन, रा येनु भी ईला माळ सकायदुन.”
JOH 9:34 आंदुर आऊक उत्‍तर कोट्टुर, “नी रा बिलकुल पापगोळ दा पैदा आग्या, नी नामी येन कल्सत्या?” अदिक आंदुर आऊक व्हार्या तेग्द बुटुर.
JOH 9:35 यीशु केळदुन कि आंदुर आऊक व्हार्या तेग्द बुटुर, अदिक याग आऊन से भेंट आत रा अंदुन, “येन नी परमेश्वर उन पार उन मा विश्वास माळत्या?”
JOH 9:36 आव उत्‍तर कोट्टुन, “हे प्रभु, आव याव हुन, कि ना आऊन मा विश्वास माळाईन?”
JOH 9:37 यीशु आऊन से अंदुन, “नी आऊक नोळ्या, अदिक जो नीन सांगुळ मातगोळी हेळेत्यान आव आवा हुन.”
JOH 9:38 आव अंदुन, “हे प्रभु, ना नीन मा विश्वास माळतीन.” अदिक आऊक बांगकु प्रणाम माळदुन.
JOH 9:39 आग यीशु अंदुन, “ना ई दुनिया दा न्याय इन साटी बंदीन, ताकी जो नोळालुर आंदुर नोळुल, अदिक जो नोळतार आंदुर कुढ्ढ आगेगुल.”
JOH 9:40 जो फरीसी आऊन सांगुळ ईरोर आंदुर आऊन ई मातगोळी केळकु आऊन से अंदुर, “येन नाव भी कुढ्ढ आयेव?”
JOH 9:41 यीशु आंदुर से अंदुन, “अगर नीव कुढ्ढ ईरायदीर रा पापी ईला ठहरूसायदीर; लेकीन ईग अनतीर कि नाव नोळतेव, इदुरसाटी नीम दा पाप बन्सकु ईरतद.
JOH 10:1 “ना नीम से खरा खरा अनतीन कि जो यावारा दरवाजा टु म्यांडाशाला दा प्रवेश माळालुन, लेकीन दुसरा दी टु येरतान, आव काल्ळ अदिक डाकू हुन.
JOH 10:2 लेकीन जो दरवाजा टु बुळ्क प्रवेश माळतान आव म्यांडागोळ्द चरवाहा हुन.
JOH 10:3 आऊन साटी चौकीदार दरवाजा खोल्स बुळतान, अदिक म्यांडा आऊन आवाज केळताव, अदिक आव तान म्यांडागोळी हेसुर ताकोम ताकोमकु कारूतान अदिक व्हार्या वोयतान.
JOH 10:4 याग आव तान सप्पा म्यांडागोळी व्हार्या तेगु कोमतान, रा अऊर मुंद मुंद नळुतान, अदिक म्यांडागोळ आऊन हिंद हिंद आगेगताव, यतिकी अव आऊन आवाज अरूताव.
JOH 10:5 लेकीन अव दुसरा अन हिंद होगतीदील, लेकीन आऊन से दुर ओळेव, यतिकी अव दुसरा अन आवाज अरालव.”
JOH 10:6 यीशु आंदुर से ईद उदाहरण अंदुन, लेकीन आंदुर समसीदील कि ईव याता मातगोळ हु जो आव नाम से अनतान.
JOH 10:7 आग यीशु आंदुर से मात्‍त अंदुन, “ना नीम से खरा खरा अनतीन, म्यांडागोळ दरवाजा ना हुईन.
JOH 10:8 यास नान से पयले बंदुर आंदुर सप्पा काल्ळुर अदिक डाकू उर, लेकीन म्यांडागोळ आंदुर्द केळीदील.
JOH 10:9 दरवाजा ना हुईन; अगर यावारा नान द्वारा बुळ्क प्रवेश माळ्यान, रा उद्धार सिक्‍कीत, अदिक बुळ्क व्हार्या होग्त बर्त ईत्‍तान अदिक चारा सिक्‍कीत.
JOH 10:10 काल्ळ यातोदारा क्याल्सा अन साटी ईला लेकीन सिर्फ चोरी माळली अदिक घात माळली अदिक नाश माळली इक बरतान; ना इदुरसाटी बंदीन कि आंदरी जीवन सिक्‍कुल, अदिक हापाळ जीवन सिक्‍कुल.”
JOH 10:11 “वळ्लेव चरवाहा ना हुईन; वळ्लेव चरवाहा म्यांडागोळ साटी तान जीव कोळतान.
JOH 10:12 मजदूर जो ना चरवाहा आन अदिक ना म्यांडागोळ मालिक आन, लांडग्या अक बर्त नोळ म्यांडागोळी बिटकु वोळेगतान; अदिक लांडग्या अवरी हुडुतद अदिक तितर बितर माळ बुळतद.
JOH 10:13 आव इदुरसाटी वोळेगतान कि आव मजदूर हुन, अदिक आऊक म्यांडागोळ चिंता हैलेच.
JOH 10:14 वळ्लेव चरवाहा ना हुईन; ना तान म्यांडागोळी जान्सतीन, अदिक नान म्यांडागोळ नानी जान्सताव.
JOH 10:15 ह्यांग आप्प नानी जान्सतान अदिक ना आप्प उक जान्सतीन अदिक ना म्यांडागोळ साटी तान जीव कोळतीन.
JOH 10:16 नान अदिक भी म्यांडागोळ आव, जो ई म्यांडाशाला अन आल्लच. नानी अवरी भी तरोद जरूरी आद. अव नान आवाज केळेव, आग ऊंद अच झुण्ड अदिक ऊंद अच चरवाहा ईत्‍तान.
JOH 10:17 आप्प इदुरसाटी नान से प्यार ईटतान कि ना तान जीव कोळतीन कि अदरी मात्‍त ताकोम कोमाईन.
JOH 10:18 याऊ अदरी नान से कसालुन, लेकीन ना अदरी खुद अच कोळतीन. नानी आऊंद कोळोद भी अधिकार आद, अदिक अदरी बाक ताकोम कोमोद भी अधिकार आद: ईद आग्या नान आप्प उन देल नानी सिक्याद.”
JOH 10:19 ई मातगोळ कारण यहूदीगोळ दा मात्‍त फूट बिदोत.
JOH 10:20 आंदुर से हापाळ सा लॉकुर अनली कुरतुर, “आऊन दा दुष्टआत्मा आद, अदिक आव येर्र आन; आऊंद येती केळतीर?”
JOH 10:21 अन्य लॉकुर अंदुर, “ई मातगोळ ईत्‍ता मंळसा नव आल्लच यारदा दुष्टआत्मा आद. येन दुष्टआत्मा कुढ्ढगोळ कण्णगोळी खोल्स सकतद?”
JOH 10:22 यरूशलेम दा स्थापना हाब्ब मनुस्कु आगोद; अदिक सोळ इन दिन ईरव.
JOH 10:23 यीशु मंदिर दा सुलैमान उन छपर्या दा टेटाळोन.
JOH 10:24 आग यहूदीगोळ आऊक बंदकु घेर्सदुर अदिक केळदुर, “नी नाम मन इक यागासताका दुविधा दा ईट्या? अगर नी मसीह हुय रा नाम से साफ साफ अंद बुळ.”
JOH 10:25 यीशु आंदरी उत्‍तर कोट्टुन, “ना नीम से अंद बुटीन पर नीव विश्वास अच माळालीर. जो क्याल्सा ना तान आप्प उन हेसुर देल माळतीन अव अच नान गवाह हु,
JOH 10:26 लेकीन नीव इदुरसाटी विश्वास माळालीर यतिकी नीव नान म्यांडागोळ दा टु आल्लच.
JOH 10:27 नान म्यांडागोळ नान आवाज केळताव; ना अवरी जान्सतीन, अदिक अव नान हिंद हिंद नळुताव;
JOH 10:28 अदिक ना अवरी अनन्त जीवन कोळतीन. अव यागलु नाश आगतीदील, अदिक याऊ अवरी नान कय दा टु कसु सकालुन.
JOH 10:29 नान आप्प, याव अवरी नानी कोटान, सप्पा से धोड्डेव आन अदिक याऊ अवरी आप्प उन कय देल कसु सकालुन.
JOH 10:30 ना अदिक नान आप्प ऊंद आयेव.”
JOH 10:31 यहूदीगोळ आऊन मा पथराव माळोर साटी मात्‍त कल्लगोळी नेगदुर.
JOH 10:32 इदुर मा यीशु आंदुर से अंदुन, “ना नीमी तान आप्प उन दी टु हापाळ सा भला क्याल्सा तोर्सदीन; अऊर दा टु याता क्याल्सा अन साटी नीव नान मा पथराव माळतीर?”
JOH 10:33 यहूदीगोळ आऊक उत्‍तर कोट्टुर, “भला क्याल्सा अन साटी नाव नीन मा पथराव माळालेव लेकीन परमेश्वर उन अपमान माळोद कारण; अदिक इदुरसाटी कि नी मंळसा आगकु भी तान तान इक परमेश्वर माळत्या.”
JOH 10:34 यीशु आंदरी उत्‍तर कोट्टुन, “येन नीम व्यवस्था दा लिख्सकु हैलेच, ‘ना अंदीन, नीव मय हुईर?’
JOH 10:35 अगर आव आंदरी मय अंदुन यार हात्‍ती परमेश्वर उन वचन पोहचुस्त अदिक शास्त्र अन मात ख्वाटा आग सकालव.
JOH 10:36 रा यारी आप्प पवित्र ठहरूस्कु दुनिया दा कळुदुन, नीव आऊन से अनतीर, ‘नी अपमान माळत्या,’ इदुरसाटी कि ना अंदीन, ‘ना परमेश्वर उन पार हुईन?’
JOH 10:37 अगर ना तान आप्प उन क्याल्सा माळालीन, रा नान विश्वास माळबाळी.
JOH 10:38 लेकीन अगर ना माळतीन, रा चाहे नान विश्वास भी माळबाळी, लेकीन आ क्याल्सागोळ्द रा विश्वास माळी, ताकी नीव जान्सी अदिक समसी कि आप्प नान दा आन अदिक ना आप्प दा आईन.”
JOH 10:39 आग आंदुर मात्‍त आऊक हुडोद कोशिश माळदुर लेकीन आव आंदुर कय दा टु होटबुटुन.
JOH 10:40 बाक आव यरदन इन आप्पाटी आ जागा मा ओळेदुन, यल यूहन्ना पयले बपतिस्मा कोळतोगोन, अदिक अल्या ईत्‍तुन.
JOH 10:41 हापाळ सा लॉकुर आऊन हात्‍ती बंदकु अनतोगोर, “यूहन्ना रा यातोदु चमत्कार तोरसीदील, लेकीन जो येनारा यूहन्ना ईऊंद बारा दा अंदिदुन, अद सप्पा सही ईरोद.”
JOH 10:42 अदिक अल हापाळ सा लॉकुर यीशु मा विश्वास माळदुर.
JOH 11:1 मरियम अदिक आकिन आकतींग मार्था अन्द ऊर बैतनिय्याह अन्द लाज़र हेसुर इन ऊंद मंळसा बिमार ईरोन.
JOH 11:2 इक आका मरियम ईरोर यार प्रभु मा अत्‍तर हाक्‍कु आऊन कालगोळी तान चुट्टीगोळ देल सिटीदुर, ईकी नवा वार्ट लाज़र बिमार ईरोन.
JOH 11:3 इदुरसाटी आऊन आकतींगेर यीशु उक बातणी कळुदुर, “हे प्रभु, नोळ, यार से नी प्यार ईटत्या, आव बिमार आन.”
JOH 11:4 ईद केळकु यीशु अंदुन, “ईद बिमारी सायोद आलच; लेकीन परमेश्वर उन महिमा अन्द साटी हुन, कि आऊन द्वारा परमेश्वर उन पार ऊंद महिमा आगुल.”
JOH 11:5 यीशु मार्था अदिक आकिन आकतींग अदिक लाज़र से प्यार ईटतोगोन.
JOH 11:6 तरी भी याग आव केळदुन कि आव बिमार आन, रा याता जागा मा आव ईरोन, अल येढ्ढ दिन मात्‍त रूकसेदुन.
JOH 11:7 ईदुर बाद्दा आव चेलागोळ से अंदुन, “बरी, नाव मात्‍त यहूदिया नगर इक होगाता.”
JOH 11:8 चेलागोळ यीशु से अंदुर, “हे गुरु, ईगल्या रा यहूदी लॉकुर नीन मा कल्लगोळी होडोद चाहासोर, अदिक येन नी मात्‍त अल्या होगोद चाहासत्या?”
JOH 11:9 यीशु उत्‍तर कोट्टुन, “येन हागुल ईनव हन्नेळ घंटा ईरालव? अगर यावारा हागुल इन होती नळुतान रा ठोकर तिनालुन, यतिकी ई दुनिया अन्द उजुळ नोळतान.
JOH 11:10 लेकीन अगर यावारा ईळ्लक इन होती नळुतान रा ठोकर तिनतान, यतिकी अदुर्दा उजुळ हैलेच.”
JOH 11:11 आव ई मातगोळ अंदुन, अदिक ईदुर बाद्दा आंदुर से अनली कुरतुन, “नाम संगी लाज़र मिंगेग्यान, लेकीन ना आऊक येब्सली होगतीन.”
JOH 11:12 आग चेलागोळ आऊन से अंदुर, “हे प्रभु, अगर आव मिंगेग्यान, रा वळ्लेव आगेदान.”
JOH 11:13 यीशु रा आऊन मृत्यु ऊंद बारा दा अंदिदुन, लेकीन आंदरी हिंग हत्‍त कि आव जप देल मिंगोद बारा दा अंदान.
JOH 11:14 आग यीशु आंदुर से साफ साफ अंद बुट्टुन, “लाज़र सोतोग्यान;
JOH 11:15 अदिक ना नीम कारण खुश आईन कि ना अल ईला ईरीन यदुर देल नीव विश्वास माळी. लेकीन ईग बरी, नाव आऊन हात्‍ती होगाता.”
JOH 11:16 आग थोमा यारी दिदुमुस अनतार, तान साथी चेलागोळ से अंदुन, “बरी, नाव भी आऊन सांगुळ सायली होगाता.”
JOH 11:17 अल होगदुर मा यीशु उक ईद मालूम आत कि लाज़र उक कब्र दा ईटकु नाक दिन आगेग्याव.
JOH 11:18 बैतनिय्याह यरूशलेम इन हात्‍ती येढ्ढ मील इन दुरी मा ईरोद.
JOH 11:19 हापाळ सा यहूदी मार्था अदिक मरियम इन हात्‍ती आकिन वार्ट ऊंद मृत्यु मा शांती कोळोर साटी बंदीदुर.
JOH 11:20 याग मार्था यीशु ऊंद बरोद समाचार केळदुर रा आऊन से मुलाकात माळली होदुर, लेकीन मरियम मान्या अच ईत्‍तुर.
JOH 11:21 मार्था यीशु से अंदुर, “हे प्रभु, अगर नी ईल ईराईद, रा नान वार्ट ईला सायायदुन.
JOH 11:22 लेकीन ना ईग भी जान्सतीन कि नी जो येनारा परमेश्वर से बेळ्या, परमेश्वर नीनी कोट्टान.”
JOH 11:23 यीशु आकिन से अंदुन, “नीन वार्ट मात्‍त जित्‍ता आदान.”
JOH 11:24 मार्था आऊन से अंदुर, “ना जान्सतीन कि आखरी दिनगोळ दा पुनरूत्थान इन समय आव जित्‍ता आदान.”
JOH 11:25 यीशु आकिन से अंदुन, “पुनरूत्थान अदिक जीवन ना अच हुईन; जो यावारा नान मा विश्वास माळतान आव अगर सोतो भी दान तरी भी जित्‍ता आदान,
JOH 11:26 अदिक जो यावारा जित्‍ता आन अदिक नान मा विश्वास माळतान, आव अनन्त काल ताका सायतीदील. येन नी ई मात मा विश्वास माळत्या?”
JOH 11:27 आक आऊन से अंदुर, “हव हे प्रभु, ना विश्वास माळतीन कि परमेश्वर उन पार मसीह जो दुनिया दा बरावाळा ईरोन, आव नी अच हुय.”
JOH 11:28 ईद अनकु आक होटोदुर, अदिक तान आकतींग मरियम इक कारूकु सुंगासुंग अंदुर, “गुरु ईवा हुन अदिक नीनी कारूतान.”
JOH 11:29 ईद केळ्त अच आक तुरन्त यदकु आऊन हात्‍ती बंदुर.
JOH 11:30 यीशु ईगल्या ऊर दा बरली इक ईरोन लेकीन अदा जागा मा ईरोन यल मार्था आऊन से मुलाकात माळीदुर.
JOH 11:31 आग जो यहूदी आऊन सांगुळ मान्या ईरोर अदिक आऊक शांती कोळोर, ईद नोळकु कि मरियम तुरन्त यदकु व्हार्या होग्यार आंदुर ईद सम्सदुर कि आक कब्र मा वर्ली होगेत्यार, रा आकिन हिंद आगेदुर.
JOH 11:32 याग मरियम अल पोहचुसदुर यल यीशु ईरोन, रा आऊक नोळ्त अच आऊन कालगोळ मा बिदोदुर अदिक अंदुर, “हे प्रभु, अगर नी ईल ईराईद रा नान वार्ट ईला सायायदुन.”
JOH 11:33 याग यीशु आक इक अदिक आ यहूदीगोळी जो आकिन सांगुळ बंदीदुर, वर्लतेला नोळदुन, रा तान आत्मा दा हापाळ अच उदास अदिक व्याकुल आदुन,
JOH 11:34 अदिक अंदुन, “नीव आऊक यल ईटीर?” आंदुर आऊन से अंदुर, “हे प्रभु, नळुकु नोळ कोम.”
JOH 11:35 यीशु वर्लदुन.
JOH 11:36 आग यहूदी अनली हतदुर, “नोळी, आव आऊन से याट प्यार ईटतान.”
JOH 11:37 लेकीन आंदुर दा टु थ्वाळासा यहूदीगोळ अंदुर, “येन ईव याव कुढ्ढ मंळसा अन्द कण्णगोळ तेरदुन, येन ईद भी माळ सकिदील कि ई मंळसा ईला सायायदुन?”
JOH 11:38 यीशु तान मन दा मात्‍त हापाळ अच उदास आगकु कब्र मा बंदुन. अद ऊंद गुफा ईरोद अदिक ऊंद कल्ल आ गुफा मा ईटकु ईरोद.
JOH 11:39 यीशु अंदुन, “कल्ल सरकुसी.” जो सोतकु ईरोन आऊन आकतींग मार्था आऊन से अनली हतदुर, “हे प्रभु, आऊन दा टु ईग वास बरतद, यतिकी आऊक सोतकु नाक दिन आगेग्याव.”
JOH 11:40 यीशु आकिन से अंदुन, “येन ना नीन से ईला अंदिदीन कि अगर नी विश्वास माळ्या, रा परमेश्वर ऊंद महिमा अक नोळ्या.”
JOH 11:41 आग आंदुर आ कल्ल इक सरकुसदुर. यीशु तान कण्णगोळ नेगुकु अंदुन, “हे आप्पा, ना नींद धन्यवाद माळतीन कि नी नांद केळ कोंड्या.
JOH 11:42 ना जानसीन कि नी हमेशा नांद केळत्या, लेकीन जो भीळ आसपास निदुरकु आद, आंदुर कारण ना हिंग अंदीन, यदुर देल कि आंदुर विश्वास माळुल कि नी नानी कळ्या.”
JOH 11:43 ईद अंदकु आव धोळ्द आवाज देल कारदुन, “हे लाज़र, व्हार्या बा!”
JOH 11:44 जो सोतोगिदुन आव कब्र दा टु ह्यांग आऊनव कय काल कटकु ईरव हांगा व्हार्या बंदुन, अदिक आऊन बाय गमछा देल होचकु ईरोद. यीशु आंदुर से अंदुन, “आऊक तेरू बुळी अदिक होगगोळी.”
JOH 11:45 आग जो यहूदी मरियम इन हात्‍ती बंदीदुर अदिक यीशु उन ईद क्याल्सा नोळीदुर, आंदुर दा टु हापाळ मुंदुर आऊन मा विश्वास माळदुर.
JOH 11:46 लेकीन आंदुर दा टु थ्वाळासा यहूदीगोळ फरीसीगोळ्द हात्‍ती होगकु यीशु उन क्याल्सागोळ्द बातणी कोट्टुर.
JOH 11:47 ईदुर मा प्रधान याजकगोळ अदिक फरीसीगोळ महासभा कार्सदुर, अदिक अंदुर, “नाव येन माळेतेव? ई मंळसा रा हापाळ चमत्कार तोर्सतान.
JOH 11:48 अगर नाव आऊक हिंग अच बिट बुटेव, रा सप्पा आऊन मा विश्वास माळ कोंडार, अदिक रोमी साम्राज्य अन्द लॉकुर बंदकु नाम जागा अदिक जाती येढ्ढु मा अधिकार माळ कोंडार.”
JOH 11:49 आग आंदुर दा टु कैफा हेसुर ईनव ऊंद मंळसा जो आ वर्ष ईनव महायाजक ईरोन, आंदुर से अंदुन, “नीव येनु अच जानसालीर;
JOH 11:50 अदिक ना नीमी ईद ऊम्सतद कि नीम साटी ईद वळ्लीद आद कि नाम लॉकुर्द साटी ऊंद मंळसा सायुल, अदिक सप्पा जाती इन नाश आगबाळुल.”
JOH 11:51 ईद मात आव तान दी टु अंदिदील, लेकीन आ वर्ष इन महायाजक आगकु भविष्यवाणी माळदुन, कि यीशु आ जाती इन साटी सोत्‍तान;
JOH 11:52 अदिक ना सिर्फ आ जाती इन साटी, उलटा इदुरसाटी भी कि परमेश्वर उन जो तितर-बितर औलाद आव अवरी ऊंद माळ सकुल.
JOH 11:53 इदुरसाटी अदा दिन टु आंदुर आऊक कोंद बुळोद साजीश माळली कुरतुर.
JOH 11:54 इदुरसाटी यीशु आ समय टु यहूदीगोळ दा प्रगट आगकु टेटीदिल, लेकीन अल टु आळी इन हात्‍तीपास इन प्रदेश इन इफ्राईम हेसुर इन ऊंद नगर इक होटोदुन; अदिक तान चेलागोळ्द सांगुळ अल्या ईरली कुरतुन.
JOH 11:55 यहूदीगोळ्द फसह अन्द हाब्ब हात्‍ती ईरोद, अदिक हापाळ सा लॉकुर फसह से पयले देहात टु यरूशलेम इक होदुर कि तान तान इक शुद्ध माळुल.
JOH 11:56 इदुरसाटी आंदुर यीशु उक ढुंढ्सली हतदुर अदिक मंदिर दा निदुरकु आपस दा अनली हतदुर, “नीव येन सोचतीर? येन आव हाब्ब दा बरतीदील?”
JOH 11:57 प्रधान याजकगोळ अदिक फरीसीगोळ ईद आदेश कोटकु ईटीदुर कि यावारा यीशु उक नोळुल रा खबर कोळुल, कि आंदुर आऊक हुडु सकुल.
JOH 12:1 यीशु फसह हाब्ब इन आर दिन पयले बैतनिय्याह दा बंदुन यल लाज़र ईरोन, यारी यीशु सोत्‍तुर दा टु जित्‍ता माळीदुन.
JOH 12:2 अल आंदुर आऊन साठी भोजन तयार माळदुर; अदिक मार्था स्यावा माळोर, अदिक लाज़र आंदुर दा टु ऊंद ईरोन जो आऊन सांगुळ भोजन माळली कुरतीदुन.
JOH 12:3 आग मरियम जटामांसी इन आर्धा लीटर किमती शुद्ध अत्‍तर तनकु यीशु उन कालगोळ मा हाकदुर, अदिक तान चुट्टीगोळ देल आऊन काल सिटदुर; अदिक अत्‍तर इन वास देल सप्पा मान्ना सुगन्धित आगेत.
JOH 12:4 लेकीन आऊन चेलागोळ दा टु यहूदा इस्करियोती हेसुर ईनव ऊंद चेला जो आऊक हुळसुसदुर मा ईरोन, अनली कुरतुन,
JOH 12:5 “ईद अत्‍तर मुर सौ दीनार दा मारकु कंगालगोळी येती कोटकु आगीदील?”
JOH 12:6 आव ईद मात इदुरसाटी अंदिदील कि आऊक कंगालगोळ्द चिन्ता ईरोद लेकीन इदुरसाटी कि आव काळ्ल ईरोन, अदिक आऊन हात्‍ती आंदुर्द झ्वारा ईरतोगोद अदिक अदुर्दा जो येनारा भी हाक्‍कु आगतोगोद, आव तेगु कोम तोगोन.
JOH 12:7 यीशु अंदुन, “आऊक ईरगोळी. आऊक ईद नांद नळसा दिशी इन साठी ईटगोळी.
JOH 12:8 यतिकी कंगाल रा नीम सांगुळ सदा ईरतार, लेकीन ना नीम सांगुळ सदा ईरतीदील.”
JOH 12:9 याग यहूदीगोळ्द धोळ्द भीळ जान्सेत कि आव अल आन, रा आंदुर ना सिर्फ यीशु उन कारण बंदुर लेकीन इदुरसाटी भी कि लाज़र उक नोळुल, यारी आव सोत्‍तुर दा टु जित्‍ता माळदुन.
JOH 12:10 आग प्रधान याजकगोळ लाज़र उक भी कोंद बुळोद साजीश रचुसदुर.
JOH 12:11 यतिकी आऊन कारण हापाळ सा यहूदी होटोदुर अदिक यीशु मा विश्वास माळदुर.
JOH 12:12 दुसरा दिशी हापाळ सा लॉकुर जो हाब्ब दा बंदीदुर ईद केळदुर कि यीशु यरूशलेम दा बरेत्यान.
JOH 12:13 इदुरसाटी आंदुर खजुर इन डगालगोळी हुळदुर अदिक आऊन से भेंट माळोर साठी होट्टुर, अदिक कारूली कुरतुर, “होशाना! धन्य इस्त्राएल ईनव राजा, जो प्रभु उन हेसुर देल बरतान.”
JOH 12:14 याग यीशु उक गधा अन्द पाड्डा सिक्त; रा आव अदुर मा कुरतुन, ह्यांग शास्त्र दा लिख्सकु आद,
JOH 12:15 “हे सिय्योन इन पोरी, अंजबाळ; नोळ, नीन राजा गधा अन्द पाड्डा मा येरकु नीन हात्‍ती बरेत्यान.”
JOH 12:16 आऊन चेलागोळ ई मातगोळी पयले सम्स सकिदील, लेकीन याग यीशु उन महिमा प्रगट आत रा आंदरी याद बत्‍त कि ई मातगोळ आऊन बारा दा लिख्सकु ईरोव अदिक लॉकुर आऊन से ईदा प्रकार इन व्यवहार माळीदुर.
JOH 12:17 आग भीळ इन आ लॉकुर गवाही कोट्टुर, जो आ समय आऊन सांगुळ ईरोर याग आव लाज़र उक कब्र दा टु कारूकु सोत्‍तुर दा टु जित्‍ता माळदुन.
JOH 12:18 ईदा कारण लॉकुर आऊन से मुलाकात माळली बंदीदुर यतिकी आंदुर केळीदुर कि आव ईद आश्चर्यकर्म तोरस्यान.
JOH 12:19 आग फरीसीगोळ आपस दा अंदुर, “सोची रा सही कि नीम से येनु बनसाल. नोळी, दुनिया आऊन हिंद आगेत्याद.”
JOH 12:20 जो लॉकुर आ हाब्ब दा आराधना माळली बंदीदुर आंदुर दा टु येनारा गैरयहूदी ईरोर.
JOH 12:21 आंदुर गलील इन बैतसैदा नोर ईरावाळेर फिलिप्पुस उन हात्‍ती बंदकु आऊन से विनती माळदुन, “श्रीमान, नाव यीशु से मुलाकात माळोद चाहासतेव.”
JOH 12:22 फिलिप्पुस बंदकु अन्द्रियास से अंदुन, आग अन्द्रियास अदिक फिलिप्पुस होगकु यीशु से अंदुन.
JOH 12:23 ईदुर मा यीशु आंदुर से अंदुन, “आ समय होट बंदाद कि मंळसा अन पार उन महिमा आगुल.
JOH 12:24 ना नीम से खरा खरा अनतीन कि यागासताका गोदी इन बींजा जमीन मा बिदकु सोतोगाल, अद आबना ईरतद; लेकीन याग सोतोगतद, रा हापाळ फसल तरतद.
JOH 12:25 जो तान जीव इक प्रिय जान्सतान, आव अदरी खोऊस बुळतान; अदिक जो ई दुनिया दा तान जीव इक अप्रिय जान्सतान, आव अनन्त जीवन इन साठी अदुर्द रक्षा माळ्यान.
JOH 12:26 अगर यावारा नान स्यावा माळ्यान, रा नान हिंद आगेगुल; अदिक यल ना आईन, अल नान सेवक भी ईत्‍तान. अगर यावारा नान स्यावा माळ्यान, रा नान आप्प आऊन आदर माळ्यान.
JOH 12:27 “ईग नान जीव व्याकुल आद. इदुरसाटी ईग ना येन अनाईन, ‘हे आप्पा, नानी ई घळी देल ऊळ्स?’ ईला, यतिकी ना ईदा कारण ई घळी इक पोहचुसीन.
JOH 12:28 हे आप्पा, तान हेसुर इन महिमा माळ.” “आग ईद आकाशवाणी आत, ना आऊंद महिमा माळीन, अदिक मात्‍त माळाईन.”
JOH 12:29 आग जो लॉकुर निदुरकु केळोर आंदुर अंदुर कि बादल गरजुस्त. दुसरागोळ अंदुर, येनारा स्वर्गदूत आऊन से माताळदुन.
JOH 12:30 ईदुर मा यीशु अंदुन, “ईद आवाज नान साटी ईला, लेकीन नीम साटी बंदाद.
JOH 12:31 ईग ई दुनिया अन न्याय आगतद, ईग ई दुनिया अन सरदार तेगुकु आदान;
JOH 12:32 अदिक ना अगर पृथ्वी मा टु म्याकुच येर्सकु आगाईन, रा सप्पा मुंदुरी तान हात्‍ती जेडाईन.”
JOH 12:33 हिंग अंदकु आव ईद प्रगट माळ बुट्टुन कि आव ह्यांग मृत्यु देल सोत्‍तान.
JOH 12:34 इदुर मा लॉकुर आऊन से अंदुर, “नाव व्यवस्था अन्द ईद मात केळेव कि मसीह हमेशा ईत्‍तान, बाक नी येती अनत्या कि मंळसा अन्द पार उक म्याकुच येरसोद जरूरी आद? ईव मंळसा अन पार याव हुन?”
JOH 12:35 यीशु आंदुर से अंदुन, “ज्योति ईग थ्वाळासा देर ताका नीम बीच दा आद. यागासताका ज्योति नीम सांगुळ आद आगासताका नळुतेला ईरी, हिंग आगबाळुल कि अंधकार नीमी बंदकु घेर्सुल; जो अंधकार दा नळुतान आव जानसालुन कि यात्‍त होगतान.
JOH 12:36 यागासताका ज्योति नीम सांगुळ आद, ज्योति मा विश्वास माळी ताकी नीव ज्योति अन औलाद आगी.” ईव मातगोळी अंदकु यीशु ओळेदुन अदिक आंदुर से होचकु ईत्‍तुन
JOH 12:37 आव आंदुर मुंद ईस चमत्कार तोर्सदुन, तरी आंदुर आऊन मा विश्वास माळीदिल;
JOH 12:38 ताकी यशायाह भविष्यवक्ता अन्द वचन पुरा आगुल जो आव अंदुन: “हे प्रभु, नाम बातणी इन याव विश्वास माळ्यान? अदिक प्रभु अन्द ताकत यार मा प्रगट आग्याद?”
JOH 12:39 ई कारण आंदुर विश्वास माळ सकिदील, यतिकी यशायाह ईद भी अंदान:
JOH 12:40 “आव आंदुर कण्णगोळी कुढ्ढ, अदिक आंदुर मन कठोर माळ बुटुन; येल्यारा हिंग आगबाळुल कि आंदुर कण्णगोळ देल नोळुल, अदिक मन देल समसुल, अदिक तिर्गुल, अदिक ना आंदरी चंगा माळाईन.”
JOH 12:41 यशायाह ई मातगोळी इदुरसाटी अंदुन कि आव आऊन महिमा नोळदुन, अदिक आव आऊन बारा दा मातगोळी हेळदुन.
JOH 12:42 तरी अधिकारीगोळ दा टु हापाळ लॉकुर आऊन मा विश्वास माळदुर, लेकीन फरीसीगोळ कारण प्रगट दा ईला मानसोर, येल्यारा हिंग आगबाळुल कि आंदुर यहूदी लॉकुर्द सभागृह दा टु तेगुकु आदार:
JOH 12:43 यतिकी मंळसागोळ दी टु प्रशंसा आंदरी परमेश्वर उन दी टु प्रशंसा अन्द अपेक्षा यक्कुल प्रिय हततोगोद.
JOH 12:44 यीशु कारूकु अंदुन, “जो नान मा विश्वास माळतान, आव नान मा ईला उलटा नान कळावाळा मा विश्वास माळतान.
JOH 12:45 अदिक जो नानी नोळतान, आव नान कळावाळा अक नोळतान.
JOH 12:46 ना दुनिया दा ज्योति आगकु बंदीन, ताकी जो यावारा नान मा विश्वास माळुल आव अंधकार दा ईरबाळुल.
JOH 12:47 अगर यावारा नान मातगोळी केळकु मान्सालुन, रा ना आऊक दोषी ठहरूसालीन; यतिकी ना दुनिया अक दोषी ठहरूसोर साटी ईला, लेकीन दुनिया अन्द उद्धार माळोर साटी बंदीन.
JOH 12:48 जो नानी तुच्छ जानस्तान अदिक नान मातगोळी ग्रहण माळालुन आऊक दोषी ठहरूसावाळा रा ऊंद आन: मतलब जो वचन ना अंदीन, अदा हिंदळोव दिन दा आऊक दोषी ठहरूसीत.
JOH 12:49 यतिकी ना तान दी टु मातगोळी माळीदिल; लेकीन आप्प याव नानी कळ्यान आवा नानी आग्या कोटान कि येन येन अनाईन अदिक येन येन माताळाईन?
JOH 12:50 अदिक ना जान्सतीन कि आऊन आग्या अनन्त जीवन आद. इदुरसाटी ना जो येनारा माताळतीन, अद ह्यांग आप्प नान से अंदान हांगा माताळतीन.”
JOH 13:1 फसह इन हाब्ब से पयले, याग यीशु जान्स कोंडुन कि नांद आ घळी होट्ट बंदाद कि दुनिया बिटकु आप्प उन हात्‍ती होगाईन, रा तान लॉकुर से जो दुनिया दा ईरोर ह्यांग प्यार आव ईटतोगोन, आखरी ताका हांग अच प्यार ईटतेला ईत्‍तुन.
JOH 13:2 याग शैतान शमौन उन पार यहूदा इस्करियोती इन मन दा ईद हाक बुटीदुन कि आऊक हुळसुसुल, रा भोजन इन समय
JOH 13:3 यीशु, ईद जान्सकु कि आप्प सप्पा येनारा नांद कय दा माळ बुटान अदिक ना परमेश्वर उन हात्‍ती टु बंदीन अदिक परमेश्वर उन हात्‍ती होगतीन,
JOH 13:4 भोजन मा टु यदकु तान म्याकळव कपळागोळी ईळ्स बुट्टुन, अदिक गमछा हुडुकु तान नेळु कटदुन.
JOH 13:5 आग बरतन दा नीर तुमकु चेलागोळ्द काल तोळुली अदिक याता गमछा देल आऊन नेळु कटकु ईरोद अदुर देल अच सीटली कुरतुन.
JOH 13:6 याग आव शमौन पतरस उन हात्‍ती बंदुन, आग पतरस आऊन से अंदुन, “हे प्रभु, येन नी नांद काल तोळुत्या?”
JOH 13:7 यीशु आऊक उत्‍तर कोट्टुन, “जो ना माळतीन, नी अदरी ईगल्या जान्साल, लेकीन ईदुर बाद्दा नीनी ऊमसीत.”
JOH 13:8 पतरस आऊन से अंदुन, “नी नान काल यागलु तोळु सकतीदिल!” ईद केळकु यीशु आऊन से अंदुन, “अगर ना नीन काल तोळुतीदिल, रा नांद सांगुळ नींद येनु संबंध हैलेच.”
JOH 13:9 शमौन पतरस आऊन से अंदुन, “हे प्रभु, रा बाक नान काल अच ईला, उलटा कय अदिक ताल्ला भी तोळु कोळ.”
JOH 13:10 यीशु आऊन से अंदुन, “जो मय तोळु कोंडान आऊक काल इन अलावा अदिक येनु तोळोद जरवत हैलेच, लेकीन आव बिलकुल शुद्ध आन; अदिक नीव शुद्ध आईर, लेकीन सप्पा अन्द सप्पा मुंदुर ईला.”
JOH 13:11 आव रा तान हुळसुसावाळा अक अरोन इदुरसाटी आव अंदुन, “नीव सप्पा मुंदुर शुद्ध हैलेच.”
JOH 13:12 याग आव आंदुर काल तोळ्द बुट्टुन, अदिक तान कपळा हाक्‍कु मात्‍त कुरतोदुन, रा आंदुर से अनली कुरतुन, “येन नीव सम्सदीर कि ना नीम सांगुळ येन माळदीन?
JOH 13:13 नीव नानी गुरु अदिक प्रभु अनकु कारूतीर, अदिक ठीक अच अनतीर, यतिकी ना आवा हुईन.
JOH 13:14 अगर ना प्रभु अदिक गुरु ईतकु नीम काल तोळदिन, रा नीमी भी आबुर दाबुर काल तोळु पायजे.
JOH 13:15 यतिकी ना नीमी नमुना तोर्स बुटीन कि ह्यांग ना नीम सांगुळ माळदीन, नीव भी हांग अच माळतोगी.
JOH 13:16 ना नीम से खरा खरा माताळतीन, दास तान स्वामी देल धोड्डेव हैलेच, अदिक ना कळुदव तान कळावाळा से.
JOH 13:17 नीव ई मातगोळ जान्सतीर, अदिक अगर अऊर मा नळी रा धन्य आईर.
JOH 13:18 ना नीम सप्पा मुंदुर बारा दा अनालीन; यार्द ना चुनाव माळीन, आंदरी ना अरूतीन; लेकीन ईद इदुरसाटी हुन कि पवित्रशास्त्र अन्द अद वचन पुरा आगुल, ‘जो नांद रोट्टी तिनतान, आव नान मा ल्यात नेगदुन.’
JOH 13:19 ईग ना अदुर आगोर से पयले नीमी हेळ बुळतीन कि याग ईद पुरा आगेदीत रा नीव विश्वास माळेतीर कि ना आवा हुईन.
JOH 13:20 ना नीम से खरा खरा माताळतीन कि जो नानी कळावाळा अक ग्रहण माळतान, आव नानी ग्रहण माळतान; अदिक जो नानी ग्रहण माळतान, आव नानी कळावाळा अक ग्रहण माळतान.”
JOH 13:21 ई मातगोळ अंदकु यीशु आत्मा दा व्याकुल आदुन अदिक ईद गवाही कोट्टुन, “ना नीम से खरा खरा अनतीन कि नीम दा टु ऊंद मंळसा नानी हुळसुस्यान.”
JOH 13:22 चेलागोळ संदेह देल, आबुर दाबुर दी नोळली कुरतुर कि आव यार बारा दा अनेत्यान.
JOH 13:23 आऊन चेलागोळ दा टु ऊंद यार से यीशु प्यार ईटतोगोन, यीशु उन याद्दा अन्द दी बांगकु कुर्तकु ईरोन.
JOH 13:24 शमौन पतरस आऊन दी इशारा माळकु आऊन से केळदुन, “रा हेळ, आव यार बारा दा अनेत्यान?”
JOH 13:25 आग आव हांग अच यीशु उन याद्दा अन्द दी बांगकु आऊन से केळदुन, “हे प्रभु, आव याव हुन?”
JOH 13:26 यीशु उत्‍तर कोट्टुन, “यारी ना ईद रोट्टी इन तुकळा तंळग्या दा डोब्सकु कोळाईन आवा हुन.” अदिक आव तुकळा डोब्सकु शमौन इस्करियोती इन पार यहूदा अक कोट्टुन.
JOH 13:27 तुकळा ताकोम्त अच शैतान आऊन दा समुसेत. आग यीशु आऊन से अंदुन, “जो नी माळत्या, तुरन्त माळ.”
JOH 13:28 लेकीन कुरावाळेर दा टु यावारा भी जान्सीदिल कि आव ईद मात आऊन से यदुर साठी अंदुन.
JOH 13:29 यहूदा अन्द हात्‍ती झ्वारा ईरतोगोद, इदुरसाटी यारारा यारारा सम्सदुर कि यीशु आऊन से अनेत्यान कि जो येनारा नामी हाब्ब इन साठी पायजे अद कोंड कोम, या ईद कि कंगालगोळी येनारा कोळ.
JOH 13:30 इदुरसाटी आव तुकळा हुळकु तुरन्त व्हार्या होटोदुन; अदिक ईद ईळ्लक इन समय ईरोद.
JOH 13:31 याग आव व्हार्या होटोदुन रा यीशु अंदुन, “ईग मंळसा अन पार उन महिमा आग्याद, अदिक परमेश्वर उन महिमा आऊन दा आग्याद;
JOH 13:32 अगर परमेश्वर उन महिमा आऊन द्वारा आत, रा परमेश्वर भी तान द्वारा आऊन महिमा प्रगट माळ्यान अदिक तुरन्त माळ्यान.
JOH 13:33 हे चिकोरगोळा, ना मात्‍त घळी तिम नीम हात्‍ती आईन: बाक नीव नानी ढुंढसीर, अदिक ह्यांग ना यहूदीगोळ से अंदीन, ‘यल ना होगतीन अल नीव बर सकालीर,’ हांग अच ना ईग नीम से भी अनतीन.
JOH 13:34 ना नीमी ऊंद व्हाशोद आग्या कोळतीन कि आबुर दाबुर से प्यार ईटी; ह्यांग ना नीम से प्यार ईटीन, हांग अच नीव भी आबुर दाबुर से प्यार ईटी.
JOH 13:35 अगर नीव आपस दा प्यार ईट्टीर, रा ईदुर देल सप्पा मुंदुर जानस्यार कि नीव नांद चेलागोळ हुईर.”
JOH 13:36 शमौन पतरस यीशु से अंदुन, “हे प्रभु, नी यल होगत्या?” यीशु उत्‍तर कोट्टुन, “यल ना होगतीन अल नी ईगल्या नान हिंद बर सकाल; लेकीन बाद्दा नी नान हिंद बंद्या.”
JOH 13:37 पतरस आऊन से अंदुन, “हे प्रभु, ईगल्या ना नीन हिंद येती बर सकालीन? ना रा नीन साठी तान जीव भी कोट्ट बुळाईन.”
JOH 13:38 यीशु उत्‍तर कोट्टुन, “येन नी नान साठी तान जीव कोट्या? ना नीन से खरा खरा माताळतीन कि हुंज कुग्गोर से पयले ताका नी नांद मुर घन इनकार माळ कोंड्या.
JOH 14:1 “नीम मन व्याकुल आगबाळुल; परमेश्वर मा विश्वास ईटी अदिक नान मा भी विश्वास ईटी.
JOH 14:2 नान आप्प उन मान्या हापाळ सा ईरोद जागा आद, अगर ईला ईराईत रा ना नीम से अनबुळायदिन; यतिकी ना नीम साटी जागा तयार माळली होगतीन.
JOH 14:3 अदिक अगर ना होगकु नीम साटी जागा तयार माळाईन, रा बाक बंदकु नीमी तान मान्या ओयाईन कि ना यल इराईन नीव भी अल ईरी.
JOH 14:4 ना यल होगतीन नीव अल ईद हादी अरूतीर.”
JOH 14:5 थोमा आऊन से अंदुन, “हे प्रभु, नाव ईद अरालेव कि नी यल होगेत्या; रा हादी ह्यांग अरतेव?”
JOH 14:6 यीशु आऊन से अंदुन, “हादी अदिक सच्चाई अदिक जीवन ना अच हुईन; बिना नान द्वारा याऊ आप्प उन हात्‍ती होग सकालुन.
JOH 14:7 आव आंदुर से अंदुन अगर नीव नानी अर्त कोमायदीर, रा नान आप्प उक भी अरायदिर; अदिक ईग आऊक अरूतीर, अदिक आऊक नोळीर भी.”
JOH 14:8 फिलिप्पुस आऊन से अंदुन, “हे प्रभु, आप्प उक नामी तोर्स बुळ, ईदा नाम साटी हापाळ आद.”
JOH 14:9 यीशु आऊन से अंदुन, “हे फिलिप्पुस, ना ईस दिन टु नीम सांगुळ आईन, अदिक येन नी नानी जान्साल? याव नानी नोळ्यान आव आप्प उक नोळ्यान. नी येती अनत्या कि आप्प उक नामी तोर्स?”
JOH 14:10 येन नी विश्वास माळाल कि ना आप्प दा आईन अदिक आप्प नान दा आन? ई मातगोळी जो ना नीम से अनतीन, तान दी टु अनालीन, लेकीन आप्प नान दा ईतकु तान क्याल्सा माळतान.
JOH 14:11 नान विश्वास माळी कि ना आप्प उन दा आईन अदिक आप्प नान दा आन; ईदारा क्याल्सागोळ्द अच कारण नान विश्वास माळी.
JOH 14:12 “ना नीम से खरा खरा अनतीन कि जो नान मा विश्वास ईटतान, ई क्याल्सा जो ना माळतीन आव भी माळ्यान, बल्‍की ईऊर से भी धोड्डेव क्याल्सा माळ्यान, यतिकी ना आप्प उन हात्‍ती होगतीन.
JOH 14:13 जो येनारा नीव नान हेसुर देल बेळीर, अदा ना माळाईन कि पार उन दरवाजा मा आप्प उन महिमा आगुल.
JOH 14:14 अगर नीव नान से नान हेसुर देल येनारा बेळीर, रा ना अदरी माळाईन.”
JOH 14:15 “अगर नीव नान से प्यार ईटतीर, रा नान आग्यागोळी मानसीर.
JOH 14:16 ना आप्प उन से विनती माळाईन, अदिक आव नीमी ऊंद अदिक सहायक कोट्टान कि आव सदा नीम सांगुळ ईरूल.
JOH 14:17 मतलब खरा अन आत्मा, यारी दुनिया ग्रहण माळ सकाल्द, यतिकी आव ना आऊक नोळतान अदिक ना आऊक अरूतान; नीव आऊक अरूतीर, यतिकी आव नीम सांगुळ ईरतान, अदिक आव नीम दा ईत्‍तान.
JOH 14:18 ना नीमी अनाथ बिळतीदील; ना नीम हात्‍ती बरतीन.
JOH 14:19 अदिक थ्वाळासा समय ईतोग्याद कि बाक दुनिया नानी नोळतीदिल, लेकीन नीव नानी नोळीर; इदुरसाटी कि ना जित्‍ता आईन, नीव भी जित्‍ता ईत्‍तीर.
JOH 14:20 आ दिशी नीव जानसीर कि ना तान आप्प दा आईन, अदिक नीव नान दा, अदिक ना नीम दा.
JOH 14:21 यार हात्‍ती नान आग्यागोळ आव अदिक आव अवरी मान्सतान, आवा नान से प्यार ईटतान; अदिक जो नान से प्यार ईटतान आऊन से नान आप्प प्यार ईट्यान, अदिक ना आऊन से प्यार ईटाईन अदिक तान तान इक आऊन मा प्रगट माळाईन.”
JOH 14:22 आ यहूदा जो इस्करियोती ईला ईरोन, आऊन से अंदुन, “हे प्रभु, येन आत कि नी तान तान इक नाम मा प्रगट माळोद चाहासत्या अदिक दुनिया मा ईला?”
JOH 14:23 यीशु आऊक उत्‍तर कोट्टुन, “अगर यावारा नान से प्यार ईट्यान रा आव नान वचन इक मानस्यान, अदिक नान आप्प आऊन से प्यार ईट्यान, अदिक नाव आऊन हात्‍ती बंदेव अदिक आऊन सांगुळ वास माळेव.
JOH 14:24 जो नान से प्यार ईटालुन, आव नान वचन मानसालुन; अदिक जो वचन नीव केळतीर अद नांद ईला लेकीन आप्प उन हुन, याव नानी कळुदुन.”
JOH 14:25 “ई मातगोळी ना नीम सांगुळ ईतकु नीम से अंदीन.
JOH 14:26 लेकीन सहायक मतलब पवित्र आत्मा यारी आप्प नान हेसुर देल कळ्यान, आव सप्पा मातगोळी कलस्यान, अदिक जो येनारा ना नीम से अंदीन, आव सप्पा नीमी याद माळसुस्यान.
JOH 14:27 ना नीमी शांती कोटकु होगतीन, तान शांती नीमी कोळतीन; ह्यांग दुनिया कोळतद, ना नीमी हांग कोळालीन: नीम मन व्याकुल आगबाळुल अदिक अंजबाळुल.”
JOH 14:28 नीव केळदीर कि ना नीम से अंदीन, “ना होगतीन, अदिक नीम हात्‍ती मात्‍त बराईन.” अगर नीव नान से प्यार ईटायदीर, रा ई मात देल खुश आगायदीर कि ना आप्प उन हात्‍ती होगतीन, यतिकी आप्प नान से धोड्डेव आन.
JOH 14:29 अदिक ना ईग इदुर्द आगोर से पयले नीम से अंद बुटीन, कि याग अद आगेदीत, रा नीव विश्वास माळी.
JOH 14:30 ना ईग नीम सांगुळ अदिक हापाळ मातगोळी माळतीदील, यतिकी ई दुनिया अन सरदार बरतान. नान मा आऊन येनु अधिकार हैलेच;
JOH 14:31 लेकीन ईद इदुरसाटी आगतद कि दुनिया जानसुल कि ना आप्प से प्यार ईटतीन, अदिक ह्यांग आप्प नानी आग्या कोट्टुन ना हांग अच माळतीन. येळी, ईल टु नळी.
JOH 15:1 “खरा दाखलता ना हुईन, अदिक नान आप्प किसान आन.
JOH 15:2 जो खांदी नान दा आद अदिक फलसाल्द, अदरी आव कळ्द बुळतान; अदिक जो फल्सतद, अदरी आव छाट्सतान ताकी अदिक फलसुल.
JOH 15:3 नीव रा आ वचन इन कारण जो ना नीम से अंदीन, शुद्ध आईर.
JOH 15:4 नीव नान दा बन्सकु ईरी, अदिक ना नीम दा. ह्यांग खांदी अगर दाखलता दा बन्सकु ईरतीदील रा तान तान देल फल्स सकाल्द, हांगा नीव भी अगर नान दा बन्सकु ईरतीदील रा फल्स सकालीर.
JOH 15:5 ना दाखलता हुईन: अदिक नीव खांदीगोळ हुईर. जो नान दा बन्सकु ईरतान अदिक ना आऊन दा, अद हापाळ काय तरतद, यतिकी नान से अलग आगकु नीव येनु माळ सकालीर.
JOH 15:6 अगर यावारा नान दा बन्सकु ईरूल, रा आव खांदी अन घाई भिटकु आगतान, अदिक वंळ्गेगतान; अदिक लॉकुर अवरी सकलुसकु बेक्‍की दा भीट बुळतार, अदिक अव होत्‍तेगताव.
JOH 15:7 अगर नीव नान दा बन्सकु ईत्‍तीर अदिक नान वचन नीम दा बन्सकु ईत्‍तीत, रा जो चाहासीर बेळी अदिक अद नीम साटी आगेदीत.
JOH 15:8 नान आप्प उन महिमा ईदुर देल आगतद कि नीव हापाळ सा काय तरी, आग अच नीव नान चेला ठहरूसीर.”
JOH 15:9 ह्यांग आप्प नान से प्यार ईटदुन, हांग अच ना नीम से प्यार ईटदीन; नान प्यार दा बन्सकु ईरी.
JOH 15:10 अगर नीव नान आग्यागोळी मानसीर, रा नान प्यार दा बन्सकु ईत्‍तीर; ह्यांग कि ना तान आप्प उन आग्यागोळी मान्सदीन, अदिक आऊन प्यार दा बन्सकु ईरतीन.
JOH 15:11 ना ई मातगोळी नीम से इदुरसाटी अंदीन, कि नान खुशी नीम दा बन्सकु ईरूल, अदिक नीम खुशी पुरा आगेगुल.
JOH 15:12 “नान आग्या ईद आद, कि ह्यांग ना नीम से प्यार ईटदीन, हांग अच नीव भी आबुर दाबुर से प्यार ईटी.
JOH 15:13 इदुर से धोळ्द प्यार यारदु ईला कि यावारा तान संगीगोळ साटी तान जीव कोळुल.
JOH 15:14 जो आग्या ना नीमी कोळतीन, अगर अदरी मानसीर रा नीव नान संगी हुईर.
JOH 15:15 ईगी टु ना नीमी दास अनतीदिल, यतिकी दास जानसालुन कि आऊन मालिक येन माळतान; लेकीन ना नीमी संगी अंदीन, यतिकी जो मातगोळी ना तान आप्प से केळदीन, अव सप्पा नीमी हेळ बुटीन.
JOH 15:16 नीव नानी नीवळुसीदील लेकीन ना नीमी नीवळुसदीन कि नीव होगकु काय तरी अदिक नीम काय बन्सकु ईरूल, कि नीव नान हेसुर देल जो येनारा आप्प से बेळी, अद नीमी कोळुल.
JOH 15:17 ई मातगोळ आग्या ना नीमी इदुरसाटी कोळतीन कि नीव आबुर दाबुर से प्यार ईटी.”
JOH 15:18 “अगर दुनिया नीम से दुश्मनी ईटतद, रा नीव जान्सतीर कि आव नीम से पयले नान से दुश्मनी ईटदुर.
JOH 15:19 अगर नीव दुनिया नोर आगायदीर, रा दुनिया तानोर से प्यार ईटाईत; लेकीन ईद कारण कि नीव दुनिया अन आल्लच, लेकीन ना नीमी दुनिया दा टु नीवळुस कोंडीन, इदुरसाटी दुनिया नीम से दुश्मनी ईटतद.
JOH 15:20 जो मात ना नीम से अंदिदीन, ‘दास तान स्वामी से धोड्डेव ईरालुन,’ अदरी याद ईटी. अगर आंदुर नानी सतुसदुर, रा नीमी भी सतुस्यार; अगर आंदुर नान मात मान्सदुर, रा नीम्द भी मानस्यार.
JOH 15:21 लेकीन ईद सप्पा येनारा आंदुर नान हेसुर इन कारण नीम सांगुळ माळ्यार, यतिकी आंदुर नानी कळावाळा अक जानसालुर.
JOH 15:22 अगर ना ईला बरायदीन अदिक आंदुर से मातगोळी ईला माळायदीन, रा आंदुर पापी ईला ठहरूसयदुर; लेकीन ईग आंदरी पाप इन साटी येनु बहाना हैलेच.
JOH 15:23 जो नान से दुश्मनी ईटतान, आव नान आप्प से भी दुश्मनी ईटतान.
JOH 15:24 अगर ना आंदुर दा आंदुर क्याल्सा ईला माळायदीन जो अदिक याऊ माळीदील, रा आंदुर पापी ईला ठहरूसयदुर; लेकीन ईग रा आंदुर नानी अदिक नान आप्प येढ्ढु मुंदरी नोळदुर अदिक येढ्ढु से दुश्मनी माळदुर.
JOH 15:25 ईद इदुरसाटी आत कि अद वचन पुरा आगुल, जो आंदुर्द व्यवस्था दा लिख्सकु आद, ‘आंदुर नान से फालतु दुश्मनी माळदुर.’
JOH 15:26 लेकीन याग आव मदतगार बंदान, यारी ना नीम हाती आप्प उन दी टु कळाईन, मतलब सच्चाई अन आत्मा जो आप्प उन दी टु होळतान, रा आव नान गवाही कोट्टान;
JOH 15:27 अदिक नीव भी नान गवाह आईर यतिकी सुरूवात टु नान सांगुळ ईतीर.”
JOH 16:1 “ई मातगोळी ना नीम से इदुरसाटी अंदीन कि नीव ठोकर तिनबाळी.
JOH 16:2 आंदुर नीमी यहूदी लॉकुर्द सभागृहगोळ दा टु तेगु बुट्टार, लेकीन अद समय बंदाद, कि जो यावारा नीमी कोंद बुट्टान आव समस्यान कि ना परमेश्वर उन स्यावा माळतीन.
JOH 16:3 हिंग आंदुर इदुरसाटी माळ्यार कि आंदुर ना आप्प उक जानस्यार अदिक ना नानी जान्सतार.
JOH 16:4 लेकीन ई मातगोळी ना इदुरसाटी अंदीन, कि याग इंदुर समय बंदीत रा नीमी याद होट बंदीत कि ना नीम से पयले अच अंद बुटीदीन.” “ना सुरूवात टु नीम से ई मातगोळी इदुरसाटी अंदिदील यतिकी ना नीम सांगुळ ईरीन.
JOH 16:5 लेकीन ईग ना तान कळावाळा अन हात्‍ती होगतीन; अदिक नीम दा टु याऊ नान से केळालुन, कि ‘नी येल होगत्या.’”
JOH 16:6 लेकीन ना जो ई मातगोळी नीम से अंदीन, इदुरसाटी नीम मन शोक देल तुम्मेग्याद.
JOH 16:7 तरी ना नीम से खरा माताळतीन कि नांद होगोद नीम साटी वळ्लीद आद, यतिकी अगर ना होगतीदील रा आव सहायक नीम हात्‍ती बरतीदील; लेकीन अगर ना होगाईन, रा आऊक नीम हात्‍ती कळाईन.
JOH 16:8 आव बंदकु दुनिया अक पाप अदिक न्यायीपन अदिक न्याय इन बारा दा समझुस्यान.
JOH 16:9 पाप इन बारा दा इदुरसाटी कि आंदुर नान मा विश्वास माळालुर;
JOH 16:10 अदिक न्यायीपन अन बारा दा इदुरसाटी कि ना आप्प उन हात्‍ती होगतीन, अदिक नीव नानी बाक नोळतीदिल;
JOH 16:11 न्याय इन बारा दा इदुरसाटी कि दुनिया अन सरदार दोषी ठहरूस्कु आग्यान.
JOH 16:12 “नानी नीम से अदिक भी हापाळ सा मातगोळी अनोद आद, लेकीन ईगल्या नीव अवरी सहन माळ सकालीर.
JOH 16:13 लेकीन याग आव मतलब सच्चाई अन आत्मा बंदान, रा नीमी सप्पा सच्चाई अन हादी हेळ्यान, यतिकी आव तान दी टु ईला अंदान लेकीन जो येनारा केळ्यान अदा अंदान, अदिक बरावाळा मातगोळी नीमी हेळ्यान.
JOH 16:14 आव नांद महिमा माळ्यान, यतिकी आव नान मातगोळ दा टु हुळकु नीमी हेळ्यान.
JOH 16:15 जो येनारा आप्प उन आद, अद सप्पा नान हुन; इदुरसाटी ना अंदीन कि आव नान मातगोळ दा टु हुळकु नीमी हेळ्यान.
JOH 16:16 “घळी तीमुर दा नीव नानी नोळतीदिल, अदिक बाक घळी तीमुर दा का नानी नोळीर.”
JOH 16:17 आग आऊन येनारा चेलागोळ आपस दा अंदुर, “ईद येन हुन जो आव नाम से अनतान, ‘घळी तीमुर दा नीव नानी नोळतीदिल, अदिक बाक घळी तीमुर दा का नानी नोळीर?’ अदिक ईद ‘इदुरसाटी कि ना आप्प उन हात्‍ती होगतीन.’”
JOH 16:18 आग आंदुर अंदुर, “ईद ‘घळी तीमुर’ जो आव अनतान, येन मात आद? नाव जानसालेव कि आव येन अनतान.”
JOH 16:19 यीशु ईद जान्सकु कि आंदुर नान से केळोद चाहासतार, आंदुर से अंदुन, “येन नीव आपस दा नान ई मात इन बारा दा जाँच माळतीर, ‘घळी तीमुर दा नीव नानी नोळतीदिल, अदिक बाक घळी तीमुर दा का नानी नोळीर?’
JOH 16:20 ना नीम से खरा खरा अनतीन कि नीव वर्लीर अदिक दुख माळीर, लेकीन दुनिया खुशी माळीत; नीमी शोक आदीत, लेकीन नीम शोक खुशी दा बदलुसेदीत.
JOH 16:21 चिग्द हाळोद समय आर्त इक दुख आगतद, यतिकी आकिन दुख इन घळी होट बंदाद, लेकीन याग आक चिग्द उक जनम कोट बुळतार, रा ईद खुशी देल कि दुनिया दा ऊंद मंळसा पैदा आदुन, आ संकट इक बाक याद माळालुर.
JOH 16:22 अदा प्रकार नीमी भी ईग रा दुख आद, लेकीन ना नीम से बाक सिकाईन अदिक नीम मन खुशी देल तुम्मेदव; अदिक नीम खुशी याऊ नीम से कसु सकतीदिल.
JOH 16:23 आ दिशी नीव नान से येनु कोळतीदील. ना नीम से खरा खरा माताळतीन, अगर आप्प उन से येनारा बेळीर, रा आव नान हेसुर देल नीमी कोट्टान.
JOH 16:24 ईगासताका नीव नान हेसुर देल येनु बेळीदील; बेळीर रा नीमी सिक्‍कीत ताकी नीम खुशी पुरा आगेगुल.
JOH 16:25 “ना ई मातगोळी नीम से उदाहरणगोळ दा अंदीन, लेकीन अद समय बंदीत कि ना नीम से बाक उदाहरणगोळ दा अनतीदिल, लेकीन खुल्सकु नीमी आप्प उन बारा दा हेळाईन.
JOH 16:26 आ दिशी नीव नान हेसुर देल बेळीर; अदिक ना नीम से ईद अनालीन कि ना नीम साटी आप्प उन से विनती माळाईन;
JOH 16:27 यतिकी आप्प रा खुद अच नीव से प्यार ईटतान, इदुरसाटी कि नीव नान से प्यार ईटदीर अदिक ईद भी विश्वास माळदीर कि आप्प उन दी टु बंदीन.
JOH 16:28 ना आप्प उन दी टु दुनिया दा बंदीन; ना मात्‍त दुनिया अक बिटकु आप्प उन हात्‍ती होगतीन.”
JOH 16:29 आऊन चेलागोळ अंदुर, “नोळ, ईग रा नी खुल्सकु अनत्या, अदिक येनु उदाहरण अनाल.
JOH 16:30 ईग नाव जान्स कोंडेव कि नी सब येनारा जान्सत्या, अदिक इदुर जरवत हैलेच कि यावारा नीन से येनारा केळुल; इदुर देल नाव विश्वास माळतेव कि नी परमेश्वर उन दी टु बंद्या.”
JOH 16:31 ईद केळकु यीशु आंदुर से अंदुन, “येन नीव ईग विश्वास माळतीर?
JOH 16:32 नोळी, अद घळी बरतद बल्‍की होट बंदाद कि नीव सप्पा तितर बितर आगकु तान तान हादी हुळदीर, अदिक नानी आबना बिट बुट्टीर; तरी ना आबना ईला यतिकी आप्प नान सांगुळ आन.
JOH 16:33 ना ई मातगोळी नीम से इदुरसाटी अंदीन कि नीमी नान दा शांती सिकुल. दुनिया दा नीमी दुख आगतद, लेकीन हिम्मत ईटी, ना दुनिया अक जीत्स कोंडीन.”
JOH 17:1 यीशु ई मातगोळी अंदुन अदिक तान कण्णगोळी आकाश इन दी म्याकुच नेगुकु अंदुन, “हे आप्पा, अद घळी होट बंदाद; तान पार उन महिमा माळ कि पार भी नीन महिमा माळुल,
JOH 17:2 यतिकी नी आऊक सप्पा प्राणीगोळ मा अधिकार कोट्या, कि यारी नी आऊक कोट्या आ सप्पा अक आव अनन्त जीवन कोळुल.
JOH 17:3 अदिक अनन्त जीवन ईद आद कि आंदुर नीन ऊंद मात्र खरा परमेश्वर उक अदिक यीशु मसीह अक, यारी नी कळ्या, जानसुल.
JOH 17:4 जो क्याल्सा नी नानी माळली कोटीद, अदरी पुरा माळकु ना पृथ्वी मा नीन महिमा माळीन.
JOH 17:5 ईग हे आप्प, नी तान सांगुळ नान महिमा आ महिमा देल माळ जो दुनिया अन दुनिया से पयले, नांद नीन सांगुळ ईरोद.
JOH 17:6 “ना नीन हेसुर आ मंळसागोळ मा प्रगट माळीन यारी नी दुनिया दा टु नानी कोट्ट. आंदुर नीनोर ईरोर अदिक नी आंदरी नानी कोट्ट, अदिक आंदुर नीन वचन इक मान्स कोंडुर.
JOH 17:7 ईग आंदुर जान्स कोंडुर कि जो येनारा नी नानी कोट्या अद सप्पा नीन दी टु आद;
JOH 17:8 यतिकी जो वचन नी नानी कोट्ट, ना अवरी आंदुर हाती पोहचुस बुटीन; अदिक आंदुर अवरी ग्रहण माळदुर, अदिक खरा खरा जान्स कोंडुर कि ना नीन दी टु बंदीन, अदिक विश्वास माळ कोंडुर कि नी अच नानी कळ्या.
JOH 17:9 ना आंदुर साटी विनती माळतीन; दुनिया अन साटी विनती माळालीन लेकीन आंदुर्दा साटी यारी नी नानी कोट्या, यतिकी आंदुर नीनोर उर;
JOH 17:10 अदिक जो येनारा नांद आद अद सप्पा नींद हुन, अदिक जो नींद हुन अद नांद हुन, अदिक ईऊर देल नांद महिमा प्रगट आग्याद.
JOH 17:11 ना ईग दुनिया दा ईरतीदील, लेकीन इंदुर दुनिया दा ईत्‍तार, अदिक ना नीन हात्‍ती बरतीन. हे पवित्र आप्प, तान आ हेसुर देल जो नी नानी कोट्या, अऊर्द रक्षा माळ कि अव नाम घाई ऊंद आगुल.
JOH 17:12 याग ना आंदुर सांगुळ ईरीन, रा ना नीन अद हेसुर देल, जो नी नानी कोट्या अदुर्द रक्षा माळदीन. ना आंदुर्द सावधानी माळदीन, अदिक विनाश इन पार उक बिटकु आंदुर दा टु याऊ नाश आगीदील, इदुरसाटी कि जो पवित्रशास्त्र दा अंदकु आग्याद अद पुरा आगुल.
JOH 17:13 ईग ना नीन हात्‍ती बरतीन, अदिक ई मातगोळी दुनिया दा अनतीन, कि आंदुर नान खुशी तान दा पुरा आगुल.
JOH 17:14 ना नीन वचन आंदरी पोहचुस बुटीन; अदिक दुनिया आंदुर से दुश्मनी माळ्त, यतिकी ह्यांग ना दुनिया नव आल्लच, हांग अच आंदुर भी दुनिया नोर आल्लच.
JOH 17:15 ना ईद विनती माळालीन कि नी आंदरी दुनिया टु नेगु कोम; लेकीन ईद कि नी आंदरी आ दुष्ट टु ऊळ्सकु ईट.
JOH 17:16 ह्यांग ना दुनिया नव आल्लच, हांगा आंदुर भी दुनिया नोर आल्लच.
JOH 17:17 सच्चाई अन द्वारा आंदरी पवित्र माळ: नीन वचन सही आद.
JOH 17:18 ह्यांग नी नानी दुनिया दा कळुद, हांगा ना भी आंदरी दुनिया दा कळुदीन;
JOH 17:19 अदिक आंदुर साटी ना तान तान इक पवित्र माळतीन, ताकी आंदुर भी सही अन द्वारा पवित्र माळकु आगुल.
JOH 17:20 “ना सिर्फ इंदुर्दा साटी विनती माळालीन, लेकीन आंदुर साटी भी जो इंदुर वचन इन द्वारा नान मा विश्वास माळ्यार,
JOH 17:21 कि आंदुर सप्पा ऊंद आगुल; ह्यांग नी हे आप्प नान दा आय, अदिक ना नीन दा आईन, हांग अच आंदुर भी नाम दा आगुल, यार से दुनिया विश्वास माळुल कि नी अच नानी कळ्या.
JOH 17:22 अद महिमा जो नी नानी कोट्या ना आंदरी अद कोट्टीन, कि आंदुर हांग अच ऊंद आगुल ह्यांग कि नाव ऊंद आयेव,
JOH 17:23 ना आंदुर दा अदिक नी नान दा कि आंदुर सिद्ध आगकु ऊंद आगेगुल, अदिक दुनिया जानसुल कि नी अच नानी कळ्या, अदिक ह्यांग नी नान से प्यार ईट्द हांग अच आंदुर से प्यार ईट्द.
JOH 17:24 हे आप्प, ना चाहासतीन कि यारी नी नानी कोट्या, येल ना आईन अल आंदुर भी नान सांगुळ ईरूल, कि आंदुर नान आ महिमा अक नोळुल जो नी नानी कोट्या, यतिकी नी दुनिया अन उत्पत्ति से पयले नान से प्यार ईट्द.
JOH 17:25 हे न्यायी आप्प, दुनिया नानी जानसीदील, लेकीन ना नीनी जान्सदीन; अदिक इंदुर भी जान्सदुर कि नी अच नानी कळ्या.
JOH 17:26 ना नीन हेसुर आंदरी हेळदीन अदिक हेळ्त ईराइन कि जो प्यार नीनी नान से ईरोद अद आंदुर दा ईरूल, अदिक ना आंदुर दा ईरूल.”
JOH 18:1 यीशु ई मातगोळी अनकु तान चेलागोळ सांगुळ किद्रोन नाला अन आप्पाटी होदुन. अल ऊंद बेली ईरोद, यदुर्दा आव अदिक आऊन चेलागोळ होदुर.
JOH 18:2 आऊक हुळसुसावाळा यहूदा भी अद जागा जानसोन, यतिकी पयले हापाळ घन यीशु तान चेलागोळ सांगुळ अल होगीदुन.
JOH 18:3 आग यहूदा, सैनिकगोळ्द ऊंद दल इक अदिक प्रधान याजकगोळी अदिक फरीसीगोळ दी टु चौकीदारगोळी हुळकु, कंदीलगोळ, मशालगोळी अदिक हथियारगोळी हुळकु अल बंदुन.
JOH 18:4 आग यीशु, आ सप्पा मातगोळी जो आऊन मा बरावाळा ईरव जान्सकु, होट्टुन अदिक आंदुर से अंदुन, “यारी ढुंढ्सतीर?”
JOH 18:5 आंदुर आऊक उत्‍तर कोट्टुर, “यीशु नासरी अक.” यीशु आंदुर से अंदुन, “ना हुईन.” आऊक हुळसुसावाळा यहूदा भी आंदुर सांगुळ निदुरकु ईरोन.
JOH 18:6 आऊंद ईद अनतेला अच, “ना हुईन,” आंदुर हिंद सरकुसकु जागा मा बिदोदुर.
JOH 18:7 आग आव मात्‍त आंदुर से केळदुन, “नीव यारी ढुंढ्सतीर.” आंदुर अंदुर, “यीशु नासरी अक.”
JOH 18:8 यीशु उत्‍तर कोट्टुन, “ना रा नीम से अंद कोडींन कि ना हुईन, अगर नानी ढुंढ्सतीर रा इंदरी होगगोळी.”
JOH 18:9 ईद इदुरसाटी आत कि अद वचन पुरा आगुल जो आव अंदिदुन: “यारी नी नानी कोट्या आंदुर दा टु ना ऊंद इक भी खोऊसीदील.”
JOH 18:10 आग शमौन पतरस तलवार, जो आऊन हात्‍ती ईरोद, जेळदुन अदिक महायाजक उन दास मा नळ्सकु आऊन ऊमा किव हार्स बुटुन. आ दास उन हेसुर मलखुस ईरोद.
JOH 18:11 आग यीशु पतरस से अंदुन, “तान तलवार म्यान दा ईट. जो कटोरा आप्प नानी कोटान, येन ना अदरी कुडुतीदील?”
JOH 18:12 आग सैनिकगोळ अदिक आंदुर सूबेदार अदिक यहूदीगोळ चौकीदारगोळ यीशु उक हुळकु कट बुटुर,
JOH 18:13 अदिक पयले आऊक हन्ना अन हात्‍ती ओतुर, यतिकी आव आ वर्ष इन महायाजक कैफा अन मॉव ईरोन.
JOH 18:14 ईव आवा कैफा ईरोन, यार यहूदीगोळी सलाह कोटीदुन कि नाम लॉकुर साटी ऊंद मंळसा अन सायोद वळ्लीद आद.
JOH 18:15 शमौन पतरस अदिक ऊंद अन्य चेला भी यीशु उन हिंद आगेदुर. ईव चेला महायाजक उन जाना पयचाना ईरोन, इदुरसाटी आव यीशु उन सांगुळ महायाजक उन आंगुळ दा होदुन,
JOH 18:16 लेकीन पतरस व्हार्या दरवाजा मा निदुरकु ईत्‍तुन. आग आव दुसरा चेला जो महायाजक उन जान पयचान इनव ईरोन, व्हार्या होट्टुन अदिक चौकीदारगीत इन से अनकु पतरस उक बुळ्क तंदुन.
JOH 18:17 आ दासी जो चौकीदारगीत ईरोर, पतरस से अंदुर, “येनारा नी भी ई मंळसा अन चेलागोळ दा टु रा हैलेच?” आव अंदुन, ईला “ना आल्लच.”
JOH 18:18 दास अदिक चौकीदार सोळ इन कारण कॉरसा होत्‍ताकु निदुरकु बेक्‍की सेकसोर, अदिक पतरस भी आंदुर सांगुळ निदुरकु बेक्‍की सेकसोन.
JOH 18:19 आग महायाजक यीशु से आऊन चेलागोळ बारा दा अदिक आऊन उपदेश इन बारा दा जाँच माळदुन.
JOH 18:20 यीशु आऊक उत्‍तर कोट्टुन, “ना दुनिया अन सांगुळ खुल्सकु मातगोळी हेळदीन; ना सभागृहगोळ अदिक मंदिर दा, यल सप्पा यहूदी जमा आगतोगोर, सदा उपदेश माळदीन अदिक गुप्त दा येनु अंदिदील.
JOH 18:21 नी नान से येती केळत्या? केळावाळेर से केळ कि ना आंदुर से येन अंदीन. नोळ, आंदुर जान्सतार कि ना येन येन अंदीन.”
JOH 18:22 याग आव ईद अंदुन, रा चौकीदारगोळ दा टु ऊंद जो हात्‍ती निदुरकु ईरोन, यीशु उक क्याबरा बळकु अंदुन, “येन नी महायाजक उक ईत्‍ता प्रकार देल उत्‍तर कोळत्या?”
JOH 18:23 यीशु आऊक उत्‍तर कोट्टुन, “अगर ना बुरा अंदीन, रा आ बुराई अन गवाही कोळ; लेकीन अगर भला अंदीन, रा नानी येती बडुत्या?”
JOH 18:24 हन्ना आऊक कटकु कैफा महायाजक उन कळु बुटुन.
JOH 18:25 शमौन पतरस निदुरकु बेक्‍की सेकसोन. आग आंदुर आऊन से अंदुर, “येनारा नी भी रा आऊन चेलागोळ दा टु रा हैलेच?” आव इनकार माळकु अंदुन, “ना आल्लच.”
JOH 18:26 महायाजक उन दासगोळ दा टु ऊंद, जो परिवार दा टु ईरोन यार्द किव पतरस कोद बुटीदुन, अंदुन, “येन ना नीनी आऊन सांगुळ बेली दा ईला नोळीदिन?”
JOH 18:27 पतरस मात्‍त इनकार माळदुन, अदिक तुरन्त हुंज कुग्त.
JOH 18:28 आग आंदुर यीशु उक कैफा अन हात्‍ती टु किला अक ओतुर, अदिक व्हातुर इन समय ईरोद, लेकीन आंदुर खुद किला अन बुळ्क होगीदील ताकी अशुध्द आगबाळुल लेकीन फसह तिन सकुल.
JOH 18:29 आग पिलातुस आंदुर हात्‍ती व्हार्या होटकु बंदुन अदिक अंदुन, “नीव ई मंळसा मा याता मात इन आरोप हचतीर?”
JOH 18:30 आंदुर आऊक उत्‍तर कोट्टुर, “अगर आव कुकर्मी ईला ईरायदुन रा नाव आऊक नीन कय दा ईला कोळायदेव.”
JOH 18:31 पिलातुस आंदुर से अंदुन, “नीव अच ईऊक वोतकु तान व्यवस्था अन अनुसार आऊंद न्याय माळी.” यहूदीगोळ आऊन से अंदुर, “नामी अधिकार हैलेच कि यारदारा जीव ताकोंडेव.”
JOH 18:32 ईद इदुरसाटी आत कि यीशु उन अद मात पुरा आगुल जो आव ईद संकेत कोळाहोती अंदिदुन कि आऊंद मृत्यु ह्यांग आदीत.
JOH 18:33 आग पिलातुस मात्‍त किला अन बुळ्क होदुन, अदिक यीशु उक कारूकु आऊन से केळदुन, “येन नी यहूदीगोळ राजा हुय?”
JOH 18:34 यीशु उत्‍तर कोट्टुन, “येन नी ईद मात तान दी टु अनत्या या दुसरागोळ नान बारा दा नीन से ईद अंदार?”
JOH 18:35 पिलातुस उत्‍तर कोट्टुन, “येन ना यहूदी हुईन? अपमान अच जाती अदिक प्रधान याजकगोळ नीनी नान कय दा कोटार. नी येन माळ्या?”
JOH 18:36 यीशु उत्‍तर कोट्टुन, “नान राज्य ई दुनिया अन आल्लच; अगर नान राज्य ई दुनिया अन आगाईत, रा नान सेवकगोळ लळाई माळायदुर कि नानी यहूदीगोळ कय दा कोटकु आगबाळुल: लेकीन नान राज्य ईल ईद आल्लच.”
JOH 18:37 पिलातुस आऊन से अंदुन, “रा येन नी राजा हुय?” यीशु उत्‍तर कोट्टुन, “नी अनत्या कि ना राजा हुईन. ना इदुरसाटी पैदा आदीन अदिक इदुरसाटी दुनिया दा बंदीन कि सच्चाई इन गवाही कोळाईन. जो यावारा सच्चाई नव आन, आव नान आवाज केळतान.”
JOH 18:38 पिलातुस आऊन से अंदुन, “सही येन आद?” ईद अनकु आव मात्‍त यहूदीगोळ हात्‍ती होदुन अदिक आंदुर से अंदुन, “नानी रा आऊन दा येनु दोष सिक्‍कीदील.
JOH 18:39 लेकीन नीम्द ईद रीति आद कि ना फसह दा नीम्द साटी ऊंद मंळसा अक बिट बुळाईन. इदुरसाटी येन नीव चाहासतीर कि ना नीम साटी यहूदीगोळ राजा अक बिट बुळाईन?”
JOH 18:40 आग आंदुर मात्‍त चिल्ळासकु अंदुर, “ईऊक ईला, लेकीन नाम साटी बरअब्बा अक बिट बुळ.” अदिक बरअब्बा डाकू ईरोन.
JOH 19:1 इदुर मा पिलातुस यीशु उक क्वाळा बळसुसदुन.
JOH 19:2 सिपाहीगोळ मुळ्लगोळ मुकुट माळकु आऊन ताल्ला मा ईटदुर, अदिक जांभळा कलर इन कपळा हाकसुसदुर.
JOH 19:3 अदिक आऊन हात्‍ती खुशी देल बंद बंदकु अनली कुरतुर, “हे यहूदीगोळ राजा, प्रणाम!” अदिक आऊक क्याबरा भी बळदुर.
JOH 19:4 आग पिलातुस मात्‍त व्हार्या होटकु लॉकुर से अंदुन, “नोळी, ना आऊक नीम हात्‍ती मात्‍त व्हार्या तरतीन; ताकी नीव जान्सी कि आऊन दा नानी येनु भी दोष सिक्‍कीदील.”
JOH 19:5 आग यीशु मुळ्लगोळ मुकुट अदिक जांभळा कलर इन कपळा हाक्‍कु व्हार्या होट्टुन; अदिक पिलातुस आंदुर से अंदुन, “नोळी, ईव मंळसा!”
JOH 19:6 “याग प्रधान याजकगोळ अदिक चौकीदारगोळ आऊक नोळदुर, रा चिल्ळासकु अंदुर, आऊक क्रूस मा येर्स, क्रूस मा!” पिलातुस आंदुर से अंदुन, “नीव अच आऊक हुळकु क्रूस मा येरसी, यतिकी नानी आऊन दा येनु दोष सिक्‍कीदील.”
JOH 19:7 यहूदीगोळ आऊक उत्‍तर कोट्टुर, “नाम्द भी व्यवस्था आद अदिक आ व्यवस्था अन अनुसार आव कोंद बुळोद योग्य आन, यतिकी आव तान तान इक परमेश्वर उन पार माळदुन.”
JOH 19:8 याग पिलातुस ईद मात केळदुन रा अदिक भी अंजेदुन,
JOH 19:9 अदिक मात्‍त किला अन बुळ्क होदुन अदिक यीशु से अंदुन, “नी येलेव हुय?” लेकीन यीशु आऊक येनु भी उत्‍तर कोटीदील.
JOH 19:10 इदुर मा पिलातुस आऊन से अंदुन, “नान से येती माताळाल? येन नी जान्साल कि नीनी बिट बुळोद अधिकार नानी आद, अदिक नीनी क्रूस मा येरसोद भी अधिकार नानी आद.”
JOH 19:11 यीशु उत्‍तर कोट्टुन, “अगर नीनी म्याकुच टु कोटकु ईला आगाईत, रा नीन नान मा येनु अधिकार ईला ईराईत; इदुरसाटी याव नानी नीन कय दा हुळसुस्यान आऊन पाप यक्कुल आव.”
JOH 19:12 इदुर मा पिलातुस आऊक बिट बुळोद चाहासदुन, लेकीन यहूदीगोळ चिल्ळास चिल्ळासकु अंदुर, “अगर नी ईऊक बिटबुट्या, रा नीन भक्ति कैसर सरकार उन दी हैलेच. जो यावारा तान तान इक राजा माळतान आव कैसर सरकार इन सामना माळतान.”
JOH 19:13 ई मातगोळी केळकु पिलातुस यीशु उक व्हार्या तंदुन अदिक आ जागा कल्ल इन ऊंद चबूतरा ईरोद जो इब्रानी भाषा दा “गब्बता” कहलुसतद, अदिक अल न्याय आसन मा कुरतुन.
JOH 19:14 ईद फसह अन तयारी इन दिन ईरोद, अदिक सहावा घंटा अन लगभग ईरोद. आग आव यहूदीगोळ से अंदुन, “नोळी नीम राजा!”
JOH 19:15 लेकीन आंदुर चिल्ळासदुर, “ओय! ओय! आऊक क्रूस मा येर्स!” पिलातुस आंदुर से अंदुन, “येन ना नीम राजा अक क्रूस मा येरसाईन?” प्रधान याजकगोळ उत्‍तर कोट्टुर, “कैसर सरकार उक बिटकु नाम याऊ राजा हैलेच.”
JOH 19:16 आग पिलातुस यीशु उक आंदुर कय दा कोट बुटुन ताकी आव क्रूस मा येर्सकु आगुल. इदुरसाटी आंदुर आऊक तान कबजा दा माळदुर.
JOH 19:17 आग आंदुर यीशु उक ओतुर, अदिक आव तान क्रूस नेगुकु आ जागा ताका व्हार्या होदुन, जो “खोपळी इन जागा” अनकु आगतद अदिक इब्रानी भाषा दा “गुलगुता.”
JOH 19:18 अल आंदुर आऊक अदिक आऊन सांगुळ अदिक येढ्ढ मंळसागोळी क्रूस मा येर्सदुर, ऊंद इक इत्‍त अदिक ऊंद इक आत्‍त, अदिक न्याड्या दा यीशु उक.
JOH 19:19 पिलातुस ऊंद दोष चिट्ठी लिख्सकु क्रूस मा हच बुटुन, अदिक अदुर दा ईद लिख्सकु ईरोद, “यीशु नासरी, यहूदीगोळ राजा.”
JOH 19:20 ईद दोष चिट्ठी हापाळ सा यहूदीगोळ वाचुसदुर, “यतिकी अद जागा यल यीशु क्रूस मा येर्सकु आगीदुन नगर इन हाती ईरोद; अदिक चिट्ठी इब्रानी अदिक लतीनी अदिक ग्रीक भाषा दा लिख्सकु ईरोद.
JOH 19:21 आग यहूदीगोळ प्रधान याजकगोळ पिलातुस से अंदुर, ‘यहूदीगोळ राजा’ लिख्सबाळ लेकीन ईद कि ‘आव अंदुन’ ना यहूदीगोळ राजा हुईन.”
JOH 19:22 पिलातुस उत्‍तर कोट्टुन, “ना जो लिख्स बुटीन, अद लिख्स बुटीन.”
JOH 19:23 याग सैनिक यीशु उक क्रूस मा येर्स बुटुर, रा आऊन कपळा हुळकु नाक भाग माळदुर, हर सैनिक उन साटी ऊंद भाग, अदिक कुळता. भी ताकोंडुर, लेकीन कुळता. बिना होल्दकु म्याकुच टु ल्यालमा ताका बन्सकु ईरोद.
JOH 19:24 इदुरसाटी आंदुर आपस दा अंदुर, “नाव इदरी हरालेव, लेकीन इदुर मा चिट्ठी हाक्‍केव कि ईद यार्द आदीत.” ईद इदुरसाटी आत कि पवित्रशास्त्र दा जो लिख्सकु आद पुरा आगुल “आंदुर नान कपळा आपस दा वाट्स बुटुर अदिक नान कपळा मा चिट्ठी हाकदुर.”
JOH 19:25 इदुरसाटी सैनिकगोळ हिंग अच माळदुर. यीशु उन क्रूस इन हाती आऊन मोय, अदिक आऊन मोय इन आकतींग, क्लोपास उन हिंग्स मरियम, अदिक मरियम मगदलीनी निदुरकु ईरोर.
JOH 19:26 याग यीशु तान मोय, अदिक आ चेला अक यार से आव प्यार ईटतोगोन हात्‍ती निदुरकु नोळदुन रा तान मोय से अंदुन, “हे मोयी, नोळ, ईव नीन पार हुन.”
JOH 19:27 आग आव चेला से अंदुन, “ईक नीन मोय उर.” अदिक अदा समय टु आव चेला आकी तान मान्या ओतुन.
JOH 19:28 इदुर बाद्दा यीशु ईद जान्सकु कि ईग सप्पा येनारा पुरा आगेग्याद, इदुरसाटी कि पवित्रशास्त्र दा जो अंदकु आगीत अद पुरा आगुल, अंदुन, “ना प्यासा आईन.”
JOH 19:29 अल हुळ्लग अंगुर इन रास्सा देल तुमकु ऊंद बरतन ईटकु ईरोद, इदुरसाटी आंदुर अंगुर इन रास्सा दा नेनाक्द ऊंद स्पंज इक हिस्सप इन डगालगोळ मा ईटदुर अदिक म्याकुच नेगुकु, आऊन बाय इक हचदुर.
JOH 19:30 याग यीशु अद सिरका हुळदुन अदिक अंदुन, “पुरा आत.” अदिक ताल्ला ल्यालमा माळकु जीव बिट बुटुन.
JOH 19:31 इदुरसाटी कि अद तयारी अन दिन ईरोद यहूदीगोळ पिलातुस से विनती माळदुर कि आंदुर कालगोळी मुर्दकु आगुल अदिक आंदुर ईळ्सकु आगुल, ताकी आराम इन दिशी आंदुर क्रूस मा ईरबाळुल, यतिकी अद आराम इन दिन धोळ्द दिन ईरोद.
JOH 19:32 इदुरसाटी सैनिकगोळ बंदकु आ मंळसागोळ दा टु पयला मंळसा अन कालगोळी मुरदुर आग दुसरा अन भी, जो यीशु उन सांगुळ क्रूस मा येर्सकु आगीदुर;
JOH 19:33 लेकीन यीशु उन हात्‍ती बंदकु नोळदुर कि आव सोतोग्यान, रा आऊन कालगोळी मुरदीदील.
JOH 19:34 लेकीन सैनिकगोळ दा टु ऊंद सैनिक बरची देल आऊंद हतोरी दा छेद माळदुन, अदिक अदुर दा टु तुरन्त खुन अदिक नीर होळ्त.
JOH 19:35 याव ईद नोळदुन, आव गवाही कोटान, अदिक आऊन गवाही खरा आद; अदिक आव जान्सतान कि आव सही अनतान कि नीव भी विश्वास माळी.
JOH 19:36 ई मातगोळ इदुरसाटी आदव कि पवित्रशास्त्र दा जो अनकु आगीत अद पुरा आगुल, “आऊंद यातोदु येलु मुरूकु आगतीदील.”
JOH 19:37 मात्‍त ऊंद अदिक शास्त्र दा ईद लिख्सकु आद, “यारी आंदुर छेद माळ्यार, अदुर मा आंदुर नजर हाक्यार.”
JOH 19:38 ई मातगोळ बाद्दा अरिमतिया अन यूसुफ जो यीशु उन चेला ईरोन, लेकीन यहूदीगोळ अंज्क देल ई मात इक होचकु ईटतोगोन, पिलातुस से विनती माळदुन कि येन आव यीशु उन लाश ओय सकतान. पिलातुस आऊन विनती केळदुन, अदिक आव बंदकु आऊन लाश ओतुन.
JOH 19:39 नीकुदेमुस भी, जो यीशु उन हात्‍ती ईळ्लकी होगीदुन, पचास सेर इन लगभग मिलुस्द अत्‍तर अदिक एलवा तंदुन.
JOH 19:40 आग आंदुर यीशु उन लाश ताकोंडुर, अदिक यहूदीगोळ नळसोद रीति अन अनुसार आऊक सुगन्ध द्रव इन सांगुळ मलमल इन चद्दर दा गुंळ्सदुन.
JOH 19:41 आ जागा मा यल यीशु क्रूस मा येर्सकु आगीदुन, ऊंद बेली ईरोद, अदिक आ बेली दा ऊंद व्हाशोद कब्र ईरोद यल यागलु यारदु लाश ईटकु ईला आगीत.
JOH 19:42 इदुरसाटी यहूदीगोळ तयारी अन दिन इन कारण आंदुर यीशु उक अदुर दा ईटदुर, यतिकी अद कब्र हाती ईरोद.
JOH 20:1 हप्ता अन पयला दिशी मरियम मगदलीनी व्हातर्या का अंधार ईरतेला अच कब्र मा बंदुर, अदिक कल्ल इक कब्र मा टु हटुस्कु नोळदुर.
JOH 20:2 आग आक ओळतेला होदुर अदिक शमौन पतरस अदिक आ दुसरा चेला अन हात्‍ती यार से यीशु प्यार ईटतोगोन, बंदकु अंदुर, “आंदुर प्रभु उक कब्र दा टु तेगुकु ओतुर, अदिक नाव जानसालेव कि आऊक येल ईट बुटार.”
JOH 20:3 आग पतरस अदिक आव दुसरा चेला होटकु कब्र अन दी होदुर.
JOH 20:4 आंदुर येढ्ढु मुंदुर सांगुळ सांगुळ ओळोर, लेकीन दुसरा चेला पतरस से मुंद वाळुसकु कब्र मा पयले पोहचुसदुन;
JOH 20:5 अदिक बांगकु कफन इन कपळा बिदकु नोळदुन, तरी आव बुळ्क होगीदील.
JOH 20:6 आग शमौन पतरस आऊन हिंद हिंद पोहचुसदुन, अदिक कब्र अन बुळ्क होदुन अदिक कफन इन कपळा बिदकु नोळदुन;
JOH 20:7 अदिक अद गमछा जो आऊन ताल्ला अक कटकु ईरोद, कफन इन कपळागोळ सांगुळ बिदकु ईला ईरोद, लेकीन अलग ऊंद जागा दा लपटुसकु ईटकु नोळदुन.
JOH 20:8 आग दुसरा चेला भी जो कब्र मा पयले पोहचुसीदुन, बुळ्क होदुन अदिक नोळकु विश्वास माळदुन.
JOH 20:9 आंदुर रा ईगासताका पवित्रशास्त्र अन अद मात ईला समसीदुर कि आऊक सोत्‍तुर दा टु जित्‍ता आगोद बिद्दीत.
JOH 20:10 आग ई चेलागोळ तान मान्नी होटोदुर.
JOH 20:11 लेकीन मरियम वर्लतेला कब्र अन हात्‍ती अच व्हार्या निदुरकु ईत्‍तुर, अदिक वर्ल्त वर्ल्त कब्र अन दी बांगकु,
JOH 20:12 येढ्ढ स्वर्गदूतगोळ इक बिळेव कपळा हाक्‍कु ऊंद इक ताल्ला अन दी अदिक दुसरा अक काल इन दी कुर्तकु नोळदुर, यल यीशु उन लाश ईटकु आगीत.
JOH 20:13 आंदुर आकिन से अंदुर, “हे नारी, नी येती वर्लत्या?” आक आंदुर से अंदुर, “आंदुर नान प्रभु उक नेगुकु ओतुर अदिक ना जानसालीन कि आऊक येल ईट्यार.”
JOH 20:14 ईद अनकु आक हिंद नोळदुर अदिक यीशु उक निदुरकु नोळदुर, लेकीन पहचानसीदील कि ईव यीशु हुन.
JOH 20:15 यीशु आकिन से अंदुन, “हे नारी, नी येती वर्लत्या? यारी ढुंढ्सत्या?” आक माली सम्सकु आऊन से अंदुर, “हे महाराज, अगर नी आऊक नेगु कोंड्या रा नानी हेळ कि आऊक येल ईट्या, अदिक ना आऊक ओयाईन.”
JOH 20:16 यीशु आकिन से अंदुन, “मरियम!” आक हिंद नोळकु आऊन से इब्रानी भाषा दा अंदुर, “रब्बूनी!” मतलब “हे गुरु.”
JOH 20:17 यीशु आकिन से अंदुन, “नानी मुटबाळ, यतिकी ना ईगासताका आप्प उन हात्‍ती म्याकुच होगली आईन, लेकीन नान वार्टुर हात्‍ती होगकु आंदुर से अंद बुळ, कि ना तान आप्प अदिक नीम आप्प, अदिक तान परमेश्वर अदिक नीम परमेश्वर उन हात्‍ती म्याकुच होगतीन.”
JOH 20:18 मरियम मगदलीनी होगकु चेलागोळी हेळदुर, “ना प्रभु उक नोळदीन, अदिक आव नान से ई मातगोळी अंदुन.”
JOH 20:19 अदा दिशी जो हप्ता अन पयला दिन ईरोद, द्यावगा अन होती याग अलेव दरवाजा येल चेलागोळ ईरोर, यहूदीगोळ अंज्क इन मारा देल बंद ईरव, आग यीशु बंदुन अदिक आंदुर न्याड्या दा निदुरकु आंदुर से अंदुन, “नीमी शांती सिकुल.”
JOH 20:20 अदिक ईद अनकु आव तान कय अदिक तान हतोरी आंदरी तोर्सदुन. आग चेलागोळ प्रभु उक नोळकु खुश आदुर.
JOH 20:21 यीशु आंदुर से मात्‍त अंदुन, “नीमी शांती सिकुल; ह्यांग आप्प नानी कळ्यान, हांग अच ना भी नीमी कळुतीन.”
JOH 20:22 ईद अनकु आव आंदुर मा ऊरदुन अदिक आंदुर से अंदुन, “पवित्र आत्मा हुडी.
JOH 20:23 यार पाप नीव माफ माळी, अव आंदुर साटी माफ माळकु आग्याव; यार नीव ईटी, अव ईटकु आग्याव.”
JOH 20:24 लेकीन हन्नेळ दा टु ऊंद, मतलब थोमा जो दिदुमुस कहलुस्तान, याग यीशु बंदुन रा आंदुर सांगुळ ईला ईरोन.
JOH 20:25 याग अन्य चेलागोळ आऊन से अनली कुरतुर, “नाव प्रभु उक नोळेव,” आग आव आंदुर से अंदुन, “यागासताका ना आऊन कयगोळ दा खिल्लागोळ छेद नोळ कोमालीन, अदिक खिल्लागोळ छेद दा तान बेळ्ल हाक्‍क कोमालीन, अदिक आऊन हतोरी दा तान कय हाक्‍क कोमालीन, आगासताका ना विश्वास माळतीदील.”
JOH 20:26 येठ्ठ दिन इन बाद्दा आऊन चेलागोळ मात्‍त मान्ना अन बुळ्क ईरोर, अदिक थोमा आंदुर सांगुळ ईरोन; अदिक दरवाजा बंद ईरव, आग यीशु बंदुन अदिक आंदुर बीच दा निदुरकु अंदुन, “नीमी शांती सिकुल.”
JOH 20:27 आग आव थोमा से अंदुन, “तान बेळ्ल ईल तनकु नान कयगोळी नोळ अदिक तान कय तनकु नान कुसी दा हाक्‍क, अदिक अविश्वासी ईला लेकीन विश्वासी आग.”
JOH 20:28 ईद केळकु थोमा उत्‍तर कोट्टुन, “हे नान प्रभु, हे नान परमेश्वर!”
JOH 20:29 यीशु आऊन से अंदुन, “नी नानी नोळ्या, येन इदुरसाटी विश्वास माळ्द? धन्य आंदुर आर यार बिना नोळ्द विश्वास माळदुर.”
JOH 20:30 यीशु अदिक भी हापाळ सा चमत्कार चेलागोळ मुंद तोर्सदुन, जो ई किताब दा लिख्सकु आगीदील;
JOH 20:31 लेकीन ईव इदुरसाटी लिख्सकु आदव कि नीव विश्वास माळी कि यीशु अच परमेश्वर उन पार मसीह हुन, अदिक विश्वास माळी कि आऊन हेसुर देल जीवन सिक्‍कुल.
JOH 21:1 ई मातगोळ बाद्दा यीशु तान तान इक तिबिरियास झील इन किनारा चेलागोळ मा प्रगट माळदुन, अदिक ई रीति देल प्रगट माळदुन:
JOH 21:2 शमौन पतरस, अदिक थोमा जो दिदुमुस कहलुस्तान, अदिक गलील इन काना नगर इन नतनएल, अदिक जब्दी अन पार, अदिक आऊन चेलागोळ दा टु येढ्ढ मुंदुर जमा ईरोर.
JOH 21:3 शमौन पतरस आंदुर से अंदुन, “ना मेन हुडुली होगेतीन.” आंदुर आऊन से अंदुर, “नाव भी नीन सांगुळ बरतेव.” इदुरसाटी आंदुर होटकु ड्वांगा मा येरदुर, लेकीन आ ईळ्लकी येनु हुळदीदील.
JOH 21:4 व्हातुर आगतेला अच यीशु किनारा मा बंदकु निदुरदुन; तरी चेलागोळ पहचानसीदील कि ईव यीशु हुन.
JOH 21:5 आग यीशु आंदुर से अंदुन, “हे चिकोरगोळा, येन नीम हात्‍ती येनारा मेनगोळ आव?” आंदुर उत्‍तर कोट्टुर, “ईला.”
JOH 21:6 आव आंदुर से अंदुन, “ड्वांगा अन ऊमा कय इन दी जार हाक्‍की रा सिक्‍केव.” इदुरसाटी आंदुर जार हाकदुर, अदिक सप्पा मेनगोळ बहुतायत इन कारण अदरी जेडु सकिदील.
JOH 21:7 आग आ चेला यार से यीशु प्यार ईटतोगोन, पतरस से अंदुन, “ईव रा प्रभु हुन!” शमौन पतरस ईद केळकु कि आव प्रभु हुन, नेळु मा गमछा कसुसदुन, यतिकी आव बिना कपळा नव ईरोन, अदिक झील दा हारेदुन.
JOH 21:8 लेकीन दुसरा चेलागोळ ड्वांगा मा मेनगोळ देल तुमकु जार जेडुतेला बंदुर, यतिकी आंदुर किनारा टु यक्कुल दुर ईला ईरोर, लेकीन येनारा येढ्ढ सौ कय मा ईरोर.
JOH 21:9 याग आंदुर किनारा मा ईळदुर, रा आंदुर कॉरसा अन बेक्‍की अदिक अदुर मा मेन ईटकु, अदिक रोट्टी नोळदुर.
JOH 21:10 यीशु आंदुर से अंदुन, “जो मेनगोळी नीव ईगल्या हुळदीर, अऊर दा टु येनारा तरी.”
JOH 21:11 रा शमौन पतरस ड्वांगा मा येरकु ऊंद सौ तिरूपन धोड्डेव मेनगोळ देल तुमकु जार किनारा मा जेळदुन, अदिक ईस मेनगोळ ईत्‍तुर मा भी जार हरदीदील.
JOH 21:12 यीशु आंदुर से अंदुन, “बरी, भोजन माळी.” चेलागोळ दा टु यारूकु साहस आगीदील कि आऊन से केळुल, “नी याव हुय?” यतिकी आंदुर जानसोर कि ईव प्रभु अच हुन.
JOH 21:13 यीशु बंदुन अदिक रोट्टी हुळकु आंदरी कोट्टुन, अदिक हांग अच मेन भी.
JOH 21:14 ईद तिसरा बार हुन कि यीशु सोत्‍तुर दा टु जित्‍ता आगदुर बाद्दा चेलागोळी कांळ्सदुन.
JOH 21:15 भोजन माळदुर बाद्दा यीशु शमौन पतरस से अंदुन, “हे शमौन, यूहन्ना अन पार, येन नी इंदुर से वाळुसकु नान से प्यार ईटत्या?” आव आऊन से अंदुन, “हव, प्रभु; नी रा जान्सत्या कि ना नीन से प्यार ईटतीन.” आव आऊन से अंदुन, “नान म्यांडा अन पाड्डागोळी आळ्स.”
JOH 21:16 आव मात्‍त दुसरा घन आऊन से अंदुन, “हे शमौन, यूहन्ना अन पार, येन नी नान से प्यार ईटत्या?” आव आऊन से अंदुन, “हव, प्रभु; नी रा जान्सत्या कि ना नीन से प्यार ईटतीन.” आव आऊन से अंदुन, “नान म्यांडागोळ रखवाली माळ.”
JOH 21:17 आव तिसरा घन आऊन से अंदुन, “हे शमौन, यूहन्ना अन पार, येन नी नान से प्यार ईटत्या?” पतरस उदास आदुन कि यीशु आऊन से तिसरा घन अंदुन, “येन नी नान से प्यार ईटत्या?” अदिक आऊन से अंदुन, “हे प्रभु, नी रा सप्पा येनारा जान्सत्या; नी ईद जान्सत्या कि ना नीन से प्यार ईटतीन.” यीशु आऊन से अंदुन, “नान म्यांडागोळी आळ्स.
JOH 21:18 ना नीन से सही सही अनतीन, याग नी हारोदव ईर्या रा तान नेळु कटकु येल चाहस्या अल टेटाळ्या; लेकीन नी याग हाळाबाट आद्या रा तान कय फैलुस्या, अदिक दुसरा नीन नेळु कटकु येल नी चाहासतीदील अल नीनी वोतान.”
JOH 21:19 आव ई मातगोळ देल इशारा कोट्टुन कि पतरस ह्यांग मृत्यु देल परमेश्वर उन महिमा माळ्यान. अदिक आग आव आऊन से अंदुन, “नान हिंद आगेग.”
JOH 21:20 पतरस पलटुस्कु आ चेला अक हिंद बरतेला नोळदुन, यार से यीशु प्यार ईटतोगोन, अदिक याव भोजन इन समय आऊन याद्दा अन दी बांगकु केळीदुन, “हे प्रभु, नीनी हुळसुसावाळा याव हुन?”
JOH 21:21 आऊक नोळकु पतरस यीशु से अंदुन, “हे प्रभु, ईऊंद येन हाल आदीत?”
JOH 21:22 यीशु आऊन से अंदुन, “अगर ना चाहासाईन कि आव नान बरासताका रूक्सकु ईरूल, रा नीनी इदुर से येन? नी नान हिंद आगेग.”
JOH 21:23 इदुरसाटी वार्टुर दा ईद मात फैलुसेत कि आव चेला सायतीदील, तरी यीशु आऊन से ईद अंदिदील कि आव सायतीदील, लेकीन ईद कि “अगर ना चाहासाईन कि आव नान बरासताका रूक्सकु ईरूल, रा नीनी इदुर से येन?”
JOH 21:24 ईव आवा चेला हुन जो ई मातगोळ गवाही कोळतान अदिक याव ई मातगोळी लिखस्यान, अदिक नाव जान्सतेव कि आऊन गवाही खरा आद.
JOH 21:25 अदिक भी हापाळ सा क्याल्सा आव, जो यीशु माळदुन; अगर अव ऊंद ऊंद माळकु लिख्सकु आगायदव, रा ना सम्सतीन कि किताबगोळ जो लिख्सकु आगायदव अव दुनिया दा भी ईला समुसयदव.
ACT 1:1 हे प्रिय, थियुफिलुस: ना पयला किताब आ सप्पा मातगोळ्द बारा दा लिख्सीन जो यीशु सुरूवात टु माळतेला अदिक कल्सतेला ईत्‍तुन
ACT 1:2 आ दिशी ताका यागासताका आव आ प्रेरितगोळी यारी आव नीवळुसिदुन पवित्र आत्मा अन्द द्वारा आग्या कोटकु म्याकुच नेगुकु आगीदील, निर्देश कोळतेला ईत्‍तुन
ACT 1:3 आव सोत्‍तुर बाद्दा हापाळ सा पक्‍का प्रमाणगोळ देल तान-तान इक आंदरी जित्‍ता तोर्सदुन, अदिक चालीस दिन ताका आव आंदरी कांळ्सतेला ईत्‍तुन, अदिक परमेश्वर उन राज्य अन्द मातगोळी हेळतेला ईत्‍तुन.
ACT 1:4 अदिक आंदुर से सीक्‍कु आंदरी आग्या कोट्टुन, “यरूशलेम इक बिळबाळी, लेकीन आप्प उन आ वादा अन्द पुरा आगोद हादी कायतेला ईरी, यार्द बारा दा ना नीमी हेळीदिन.
ACT 1:5 यतिकी बपतिस्मा कोळावाळा यूहन्ना रा नीर दा बपतिस्मा कोटान लेकीन थ्वाळासा दिनगोळ्द बाद्दा नीव पवित्र आत्मा देल बपतिस्मा ताकोंडीर.”
ACT 1:6 इदुरसाटी आंदुर जमा आगकु आऊन से केळदुर, “हे प्रभु, येन नी ईदा समय इस्त्राएल इक राज्य मात्‍त वापस माळ कोंड्या?”
ACT 1:7 यीशु आंदुर से अंदुन, “आ समयगोळी या कालगोळी जानसोद, यारी आप्प तांद अच अधिकार दा ईट्यान, नीम्द क्याल्सा आलच.
ACT 1:8 लेकीन याग पवित्र आत्मा नीम मा बंदीत आग नीमी सामर्थ्य सिक्‍कीत; अदिक यरूशलेम अदिक पुरा यहूदिया अदिक सामरीया दा, अदिक पृथ्वी इन आखरी ताका नान गवाह ईत्‍तार.”
ACT 1:9 ईद अनकु आव आंदुर नोळ्त-नोळ्त अच म्याकुच नेगुकु आदुन, अदिक आकाश इन ढग आऊक आंदुर कण्णगोळ देल होच बुळ्त.
ACT 1:10 यीशु उन होगाहोती याग आंदुर आकाश दी तार हचकु नोळोर, रा नोळी, येढ्ढ मंळसागोळ बिळेव चमकदार कपळा हाक्‍कु आंदुर हात्‍ती बंदकु निदुरदुर,
ACT 1:11 अदिक आंदुर से अंदुर, “हे गलीली लॉकुरा, नीव येती निदुरकु आकाश दी नोळेतीर? ईवा यीशु, जो नीम हात्‍ती टु स्वर्ग मा नेगुकु आदुन, याता रीति देल नीव आऊक स्वर्ग इक होग्त नोळदीर अदा रीति देल आव मात्‍त बंदान.”
ACT 1:12 आग प्रेरित जैतून हेसुर इन पहाळी टु ईळदुर जो यरूशलेम नगर इन हात्‍ती आरधा कोश इन दुरी मा आद, यरूशलेम इक मात्‍त वापस बंदुर.
ACT 1:13 याग आंदुर अल पोहचुसदुर रा आ म्याकुच इन कमरा दा होदुर, यल पतरस अदिक यूहन्ना अदिक याकूब अदिक अन्द्रियास अदिक फिलिप्पुस अदिक थोमा अदिक बरतुल्‍मै अदिक मत्ती अदिक हलफई नव पार याकूब अदिक द्याश भक्त शमौन अदिक याकूब उन पार यहूदा ईरतोगोर.
ACT 1:14 ई सप्पा मुंदुर हापाळ आर्तेर अदिक यीशु उन मोय मरियम अदिक आ वार्टुर सांगुळ ऊंद मन अदिक जमा आगकु प्रार्थना दा हतकु ईत्‍तुर.
ACT 1:15 अवा दिनगोळ दा पतरस, विश्वासी वार्टुर बीच दा जो ऊंद सौ ईप्पत मंळसागोळ लगभग ईरोर, निदुरकु अनली कुरतुन,
ACT 1:16 “हे नान वार्टुरा,” यीशु अक बंदी माळावाळेर अगुवा यहूदा अन बारा दा पवित्रशास्त्र अन अद लेख यारी दाऊद उन बाय देल पवित्र आत्मा हापाळ पयले अच अंद बुटीत, अदुर पुरा आगोद जरूरी ईरोद.
ACT 1:17 यतिकी यहूदा रा नाम दा टु ऊंद ईरोन, अदिक ई क्याल्सा दा सहभागी आगोर साटी आऊक निवळुस्कु आगीत.
ACT 1:18 आव अन्याय इन कमाई देल ऊंद केई कोंड कोंडुन, अदिक ताल्ला अन्द भार देल बिद्दुन अदिक आऊन व्हाट्टा वळदोत अदिक आऊन कळ्लपच्चीगोळ होटकु बिदोदव.
ACT 1:19 ई मात इक यरूशलेम ईनोर सप्पा ईरावाळेर अर्त कोंडुर, ईल ताका कि आ केई इन हेसुर आंदुर भाषा दा हकलदमा, मतलब “खुन इन केई” बिदोत.
ACT 1:20 “भजन संहिता अन्द किताब दा लिख्सकु आद,” आऊन मान्ना बरबाद आगेदीत; अदिक अदुर दा यारू ईरबाळी. अदिक आऊन पद यावारा दुसरा ताकोम कोमुल.
ACT 1:21 इदुरसाटी यास दिन ताका प्रभु यीशु नाम सांगुळ होग्त बर्त ईत्‍तुन, मतलब यूहन्ना अन्द बपतिस्मा टु हुडुकु आऊन नाम हात्‍ती टु नेगासताका जो लॉकुर बराबर नाम सांगुळ ईत्‍तुर,
ACT 1:22 उचित आद कि आंदुर दा टु ऊंद मंळसा नाम सांगुळ प्रभु अन्द जित्‍ता आगोद गवाह आगेगुल.
ACT 1:23 आग आंदुर येढ्ढ मुंदुर इक निदरूसदुर, ऊंद यूसुफ उक यार इक बरसब्बा अंदकु आगतद, आऊन दुसरा हेसुर यूस्तुस आद, दुसरा मत्तियाह अक,
ACT 1:24 अदिक ईद प्रार्थना माळदुर, “हे प्रभु, नी जो सप्पा मुंदुर्द मन अरूत्या, ईद प्रगट माळ कि ई येढ्ढु मुंदुर दा टु नी यार इक नीवळुस्या,
ACT 1:25 ताकी आव ई सेवकाई अदिक प्रेरित पद इन जागा ग्रहण माळुल, यदरी यहूदा बिटकु तान जागा अक होटोदुन.”
ACT 1:26 आग आंदुर तान साटी चिट्ठी गोळ हाकदुर, अदिक चिट्ठी मत्तियाह अन्द हेसुर देल होळ्त. इदुरसाटी आव आ हनुन प्रेरितगोळ्द सांगुळ आळुकु आदुन.
ACT 2:1 याग पिन्तेकुस्त उन दिन बंदव, “मतलब फसह अन हाब्ब खतम आगतद आग टु पचासवा दिन” बत्‍त, रा आंदुर सप्पा विश्वासी ऊंद जागा मा जमा ईरोर.
ACT 2:2 अचानक आकाश दी टु धोळ्द आंधी घाई सनसनाहट इन शब्द केळ बत्‍त, अदिक आ शब्द देल सप्पा मान्ना यल आंदुर सप्पा मुंदुर कुर्तकु ईरोर, तुम्मेत.
ACT 2:3 अदिक आंदरी बेक्‍की इन घाई ल्यालग्या हरूतेला अदिक फैलुसतेला कांळ्सत अदिक आंदुर दा टु हर ऊंद मंळसा मा बंदकु रूकसेत.
ACT 2:4 आंदुर सप्पा मुंदुर पवित्र आत्मा देल तुम्मेदुर, अदिक या प्रकार देल आत्मा आंदरी माताळोद सामर्थ्य कोळ्त, आंदुर अलग-अलग भाषा दा माताळली कुरतुर.
ACT 2:5 आकाश इन ल्यालमा नोर सप्पा द्याशगोळ दा टु बरावाळेर अलग-अलग प्रकार इन भाषा माताळावाळेर यहूदी भक्त आ समय यरूशलेम दा ईरतोगोर.
ACT 2:6 याग ईद शब्द आत रा हापाळ भीळ हत्‍तेत अदिक लॉकुर चकित आगेदुर, यतिकी हर ऊंद मंळसा अक ईदा केळ बरतोगोद कि ईंदुर नांद अच मात दा माताळेत्यार.
ACT 2:7 आंदुर सप्पा मुंदुर चकित अदिक अचम्भित आगकु अनली कुरतुर, “नोळी, ईंदुर जो माताळेत्यार येन सप्पा गलीली आल्लच?
ACT 2:8 रा बाक येती नाम दा टु हर ऊंद मंळसा तान-तान जनम भूमी इन भाषा केळतान?
ACT 2:9 नाव जो पारथी अदिक मेदी अदिक एलामी अदिक मेसोपोटामिया अदिक यहूदिया अदिक कप्पदूकिया अदिक पुन्तुस अदिक आसिया,
ACT 2:10 अदिक फ्रूगिया अदिक पंफूलिया अदिक मिस्त्र अदिक लीबिया द्याश जो कुरेन इन आसपास आद, ई सप्पा द्याश इनोर ईरावाळेर अदिक रोमी प्रवासी,
ACT 2:11 मतलब यहूदी अदिक यहूदी मत धारण माळावाळेर, क्रेती अदिक अरबी भी आर, लेकीन तान-तान भाषा दा आंदुर से परमेश्वर उन धोळ्द-धोळ्द क्याल्सागोळ्द चर्चा केळतार.”
ACT 2:12 अदिक आंदुर सप्पा मुंदुर चकित आदुर अदिक घबरूसकु आबुर दाबुर से अनली कुरतुर, “ईद येन आगेत्याद?”
ACT 2:13 लेकीन दुसरा लॉकुर मज्याक माळकु अंदुर, “आंदुर रा कुडुकु नशा दा चूर आर.”
ACT 2:14 आग पतरस आ हनुन प्रेरितगोळ्द सांगुळ निदुरदुन अदिक धोळ्द शब्द दा अनली कुरतुन, “हे यहूदी अदिक हे यरूशलेम इनोर सप्पा ईरावाळेर लॉकुरा, ईद अर्त कोमी अदिक किव हचकु नान मातगोळ केळी.
ACT 2:15 ह्यांग नीव समसेतिर; ई लॉकुर नशा दा हैलेच, यतिकी ईगल्या रा व्हातुर ईनव ऊंम्बत अच मुरदाव.
ACT 2:16 लेकीन ईद अद मात हुन, जो परमेश्वर उन दी टु बातणी तरावाळा योएल उन द्वारा अंदकु आगीत”
ACT 2:17 परमेश्वर अनतान: कि आखरी इन दिनगोळ दा हिंग आदीत कि ना तान आत्मा सप्पा मंळसा जाती मा हाक्‍काईन. अदिक नीम पारगोळ अदिक पोरगोळ परमेश्वर उन दी टु बातणी कोट्टार, अदिक नीम हारोदोर मंळसागोळ दर्शन नोळ्यार, अदिक नीम स्याणागोळ कान्सा नोळ्यार.
ACT 2:18 ना तान दासगोळ अदिक तान दासीगोळ मा भी आ दिनगोळ दा तान आत्मा दा टु हाक्‍काईन, अदिक आंदुर परमेश्वर उन दी टु बातणी कोट्टार.
ACT 2:19 अदिक ना म्याकुच आकाश मा अदभुत क्याल्सा अदिक ल्यालमा पृथ्वी मा चमत्कारगोळी तोर्साईन, मतलब खुन अदिक बेक्‍की अदिक धुंगा अन्द बादल तोरसाईन.
ACT 2:20 प्रभु उन महान अदिक तेजस्वी दिन इन बरोर से पयले सुर्य करीद अदिक चंद्र खुन घाई क्याचांद आगेदीत.
ACT 2:21 अदिक जो यावारा परमेश्वर उन हेसुर देल प्रार्थना माळ्यान, आऊन उद्धार आदीत.
ACT 2:22 हे इस्त्राएलगोळा, ई मातगोळी केळी: यीशु नासरी ऊंद मंळसा ईरोन यार्द परमेश्वर उन दी टु आगोद प्रमाण आ सामर्थ्य अन्द क्याल्सागोळ अदिक आश्चर्य अन्द क्याल्सागोळ अदिक चमत्कारगोळ देल प्रगट आद, जो परमेश्वर नीम न्याड्या आऊन द्वारा माळकु तोरस्यान यदरी नीव खुद अच अरूतीर.
ACT 2:23 अदिक नीव आवा यीशु उक, जो परमेश्वर उन ठहरूस्द योजना अदिक पूर्व ग्यान इन अनुसार हुळसुसकु आदुन, नीव अन्यायीगोळ्द कय देल क्रूस मा येरसुसकु कोंद बुट्टीर.
ACT 2:24 लेकीन आऊका परमेश्वर मृत्यु उन बंधन दा टु बिळ्सकु जित्‍ता माळदुन; यतिकी ईद अशक्य ईरोद कि यीशु परमेश्वर उन वश दा ईरायदुन.
ACT 2:25 यतिकी दाऊद आऊन बारा दा अनतान, ना परमेश्वर उक हमेशा तान मुंद नोळतेला ईत्‍तीन: यतिकी आव नांद ऊम्मा कय दी आन, कि नान मनोबल कम आगेगबाळुल.
ACT 2:26 ईदा कारण नान मन खुश आत, अदिक नान ल्यालग्या मग्न आत; उलटा नान मय इक भी आशा देल आराम सिक्‍कीत.
ACT 2:27 यतिकी नी नान जीव इक मृत्यु अन दुनिया दा बिळतीदील; अदिक ना तान पवित्र जनगोळी कब्रगोळ दा हुळु गोट्या.
ACT 2:28 नी नानी जीवन इन हादी हेळ्या; नी नानी तान दर्शन इन द्वारा खुशी देल तुम बुट्या.
ACT 2:29 हे वार्टुरा, ना नाम पुर्वज दाऊद उन बारा दा नीम से हिम्मत देल अन सकतीन कि आव रा सोतोदुन अदिक नळ्सकु भी आदुन लेकीन आऊन कब्र ईंद भी नाम अल उपस्थित आद.
ACT 2:30 यतिकी आव परमेश्वर उन दी टु बातणी तरावाळा ईरोन, आव जानसोन कि परमेश्वर नान से हिंग किर्‍या तिंदान कि ना नींद वंश दा टु ऊंद मंळसा अक नीन सिंहासन मा कुरसाईन;
ACT 2:31 आव आगावाळा मात इक पयले टु अच नोळकु मसीह अन्द जित्‍ता आगोद बारा दा भविष्यवाणी माळदुन कि ना रा आऊन जीव मृत्यु अन्द दुनिया दा बिटकु आदीत अदिक ना आऊन मय हुळतित.
ACT 2:32 ईवा यीशु उक परमेश्वर सोत्‍तुर दा टु जित्‍ता माळदुन, यार्द नाव सप्पा मुंदुर गवाह आयेव.
ACT 2:33 ई प्रकार आव नेगुकु आदुन अदिक परमेश्वर उन उजवा कय देल सर्वोच्च पद ताकोमकु, अदिक आप्प से अद पवित्र आत्मा हासिल माळकु यदुर्द वादा माळकु आगीत, आव ईद रिचुस बुटान जो नीव नोळतीर अदिक केळतीर.
ACT 2:34 यतिकी दाऊद रा स्वर्ग मा येरीदिल; लेकीन आव खुद अनतान, प्रभु नान परमेश्वर से अंदुन, नान ऊमा कय दी कुर,
ACT 2:35 यागासताका कि ना नीन से दुश्मनी ईटावाळेर इक नीन काल दिशी तनकु आंदरी नीन काल इन आशन माळ कोमालीन.
ACT 2:36 “इदुरसाटी ईग इस्त्राएल इन सप्पा घराना निश्चित रूप देल अर्त कोमुल कि परमेश्वर आवा यीशु अक यारी नीव क्रूस मा येर्सदिर, प्रभु भी ठहरूसदुन अदिक मसीह भी.”
ACT 2:37 आग केळावाळेर मन तुम्मेदव, अदिक आंदुर पतरस अदिक मिक्‍कु प्रेरितगोळ से केळली कुरतुर, “हे वार्टुरा, नाव येन माळेव?”
ACT 2:38 पतरस आंदुर से अंदुन, “मन तिर्गुसी, अदिक नीम दा टु हर ऊंद मंळसा तान-तान पापगोळ्द माफ अन्द साटी यीशु मसीह अन्द हेसुर देल बपतिस्मा ताकोम; रा नीमी पवित्र आत्मा अन्द दान सिक्‍कीत.
ACT 2:39 यतिकी ईद वादा नीम, अदिक नीम औलादगोळ, अदिक आ सप्पा दुर-दुर इन लॉकुर साटी भी हुन यारी प्रभु नाम परमेश्वर तान हात्‍ती कारस्यान.”
ACT 2:40 आव मात्‍त हापाळ मातगोळ देल भी गवाही कोट कोटकु समजुसदुन कि “तान-तान इक ई बेकार पीढ़ी देल ऊळ्सकु ईटी.”
ACT 2:41 इदुरसाटी यार आऊन वचन ग्रहण माळदुर आंदुर बपतिस्मा ताकोंडुर; अदिक अदा दिशी मुर हजार मंळसागोळ हात्‍तीपास आंदुर्दा जमा आगेदुर.
ACT 2:42 अदिक आंदुर प्रेरितगोळ से शिक्षा ताकोमली, अदिक संगत ईटली, अदिक भोजन माळली, अदिक प्रार्थना माळदुर दा मग्न ईरतोगोर.
ACT 2:43 अदिक सप्पा लॉकुर मा अंज्क तुम्मेत, अदिक हापाळ सा अदभुत क्याल्सा अदिक चमत्कार प्रेरितगोळ द्वारा प्रगट आगतोगोव.
ACT 2:44 अदिक सप्पा विश्वास माळावाळेर ऊंदा ऊज्या जमा ईरतोगोर, अदिक आंदुर सप्पा वस्तुगोळ गुट दा ईरव.
ACT 2:45 आंदुर तान-तान सम्पत्ति अदिक सामान मार मारकु यार्द ह्यांग जरवत ईरतोगोद वाट्सतोगोर.
ACT 2:46 आंदुर हर दिशी ऊंद मन आगकु मंदिर दा ऊंदा ऊज्या जमा आगतोगोर, अदिक मानोन मान्नी खुशी अदिक पवित्र मन देल ऊमतोगोर,
ACT 2:47 अदिक परमेश्वर उन स्तुति माळतोगोर, अदिक सप्पा लॉकुर आंदुर से खुश ईरोर: अदिक यारी उद्धार सिकतोगोद, आंदरी प्रभु हर दिशी आंदुर दा जमा माळ बुळतोगोन.
ACT 3:1 पतरस अदिक यूहन्ना मदणी अन्द मुर मुरा प्रार्थना अन्द होती आंदुर म्याकुच मंदिर दी होगोर.
ACT 3:2 अदिक लॉकुर ऊंद पैयदायसी लंगळा अक तरोर, यारी आंदुर रोज मंदिर इन आ दरवाजा मा यदरी सुंदर अंदकु आगतद, कुर्स बुळतोगोर कि आव मंदिर दा होगावाळेर से भीख बेळ सकुल.
ACT 3:3 याग आव पतरस अदिक यूहन्ना अक मंदिर दा होग्त नोळदुन, रा आंदुर से भीखा बेळदुन.
ACT 3:4 पतरस यूहन्ना अन्द सांगुळ आऊन दी ध्यान देल नोळकु अंदुन, “नाम दी नोळ!”
ACT 3:5 इदुरसाटी आव आंदुर से येनारा ताकोमोद लालसा ईटतेला आंदुर दी तार हचकु नोळली कुरतुन.
ACT 3:6 लेकीन पतरस अंदुन, “व्हान्ना बेळ्ली रा नान हाती हैलेच, लेकीन जो नान हाती आद अद नीनी कोळतीन; यीशु मसीह नासरी इन हेसुर देल नळु अदिक ओयाळ.”
ACT 3:7 अदिक पतरस आऊन ऊमा कय हुडुकु आऊक नेगदुन; अदिक तुरन्त आऊन कालगोळ अदिक ट्वांगरागोळ दा जोर होट बत्‍त.
ACT 3:8 आव यदकु निदरेदुन अदिक नळुली कुरतुन; अदिक नळुतेला, हारतेला अदिक परमेश्वर उन स्तुति माळतेला आंदुर सांगुळ मंदिर दा होदुन.
ACT 3:9 सप्पा लॉकुर आऊक नळुत टेटाळ्त अदिक परमेश्वर उन स्तुति माळ्त नोळकु,
ACT 3:10 आऊक अर्त कोंडुर कि ईव आवा हुन जो मंदिर इन सुंदर फाटक मा कुर्तकु भीखा बेळतोगोन; अदिक आ घटना देल जो आऊन सांगुळ आगीत आंदुर हापाळ अचम्भित अदिक चकित आदुर.
ACT 3:11 याग आव पतरस अदिक यूहन्ना अक हुडुकु ईरोन, रा सप्पा लॉकुर हापाळ आश्चर्य माळतेला आ छपर्या दा यदरी सुलैमान उन छपर्या अंदकु आगतद, आंदुर हाती ओळतेला बंदुर.
ACT 3:12 ईद नोळकु पतरस लॉकुर से अंदुन, “हे इस्त्राएलगोळा, नीव ई मंळसा मा येती आश्चर्य माळेतीर, अदिक नाम दी हिंग येती नोळेतीर जसा नाव अच तान सामर्थ्य या भक्ति देल ईऊक नळोद अदिक टेटाळोद लायक माळ बुटेव.
ACT 3:13 अब्राहम अदिक इसहाक अदिक याकूब उन परमेश्वर, नाम आप्प दादागोळ परमेश्वर तान सेवक यीशु उन महिमा माळदुर, यारी नीव हुळसुस बुट्टीर, अदिक याग पिलातुस आऊक बिळोद विचार माळदुन, आग नीव आऊन मुंद आऊन इनकार माळदीर.
ACT 3:14 नीव आ पवित्र अदिक न्यायी मंळसा अन्द इनकार माळदीर, अदिक विनती माळदीर कि ऊंद हत्यारा अक नीम साटी बिटकु आगेगुल;
ACT 3:15 अदिक नीव जीवन इन कर्ता धर्ता अक कोंद बुट्टीर, यारी परमेश्वर सोत्‍तुर दा टु जित्‍ता माळदुन; अदिक ई मात इन गवाह नाव आयेव.
ACT 3:16 अदिक आऊंदा हेसुर, आ विश्वास इन द्वारा जो आऊन हेसुर मा आद, ई मंळसा अक यारी नीव नोळतीर अदिक अरूतीर सामर्थ्य कोटान. अदा विश्वास जो आऊन द्वारा आद, ईऊक नीम सप्पा मुंदुर मुंद बिलकुल भला चंगा माळ बुटान.
ACT 3:17 “ईग हे वार्टुरा, नानी मालूम आद कि ईद क्याल्सा नीव अग्यानता दा माळदीर, अदिक हांगा नीम अधिकारीगोळ भी माळदुर.
ACT 3:18 लेकीन याता मातगोळी परमेश्वर सप्पा भविष्यवक्तागोळ बाय देल पयले अच हेळ बुटीदुन, कि आऊन मसीह दुख नेगदान, अवरी आव ई रीति देल पुरा माळदुन.
ACT 3:19 इदुरसाटी, मन तिर्गुसी अदिक वापस बरी कि नीम पाप माफ माळकु आदव,
ACT 3:20 ताकी आत्मिकता शांती इन समय प्रभु उन देल बरूल अदिक आव यीशु अक कळुल जो नीम साटी पयले टु ना मसीह ठहरूस्कु आग्यान,
ACT 3:21 जरूरी आद कि आव स्वर्ग दा आ समय ताका ईरूल यागासताका कि आव सप्पा मातगोळ्द सुधार माळ कोमालुन यदुर्द चर्चा स्याणा लॉकुर काल टु परमेश्वर तान पवित्र भविष्यवक्तागोळ बाय देल माळ्यान.
ACT 3:22 ह्यांग कि मूसा अंदुन, ‘प्रभु परमेश्वर नीम वार्टुर दा टु नीम साटी नान घाई ऊंद भविष्यवक्ता पैदा माळ्यान, जो येनारा आव नीम से अंदान, नीव आऊन केळी.
ACT 3:23 लेकीन हर ऊंद मंळसा जो आ भविष्यवक्ता अन्द केळतीदिल, परमेश्वर उन लॉकुर दा टु ब्यार्र माळकु नाश माळकु आदान.’
ACT 3:24 अदिक शमूएल इन हात्‍ती टु हुडुकु रा आऊन बादवाळेर ताका यास भविष्यवक्ता माताळदुर आ सप्पा ई दिनगोळ बारा दा बातणी कोटार.
ACT 3:25 नीव भविष्यवक्तागोळ औलाद अदिक आ वादा अन भागी हुईर, जो परमेश्वर नीम आप्प दादागोळ से कटदुन, याग आव अब्राहम से अंदुन, ‘नीन घराना अन्द द्वारा पृथ्वी इन सप्पा लॉकुरी आर्शिवाद सिक्‍कीत.’
ACT 3:26 परमेश्वर तान सेवक उक नेगुकु पयले नीम हात्‍ती कळुदुन, कि नीम दा टु हर ऊंद मंळसा अक आऊन बुराईगोळ देल तिर्गुसकु आर्शिवाद कोळुल.”
ACT 4:1 याग पतरस अदिक यूहन्ना लॉकुर से ईद अनोर, रा याजक अदिक मंदिर इन रखवाली माळावाळेर्द शासक अदिक सदूकी आंदुर मा येरकु बंदुर.
ACT 4:2 यतिकी आंदुर हापाळ सिट्टी बंदुर कि पतरस अदिक यूहन्ना लॉकुरी उपदेश कोळतेला यीशु उन सोत्‍तुर दा टु जित्‍ता आगोद द्वारा अदिक यीशु उन उदाहरण कोट कोटकु सोत्‍तुर दा टु जीत्‍ता आगोद प्रचार माळतोगोर.
ACT 4:3 आंदुर आंदरी हुडुकु दुसरा दिन ताका जयल दा ईटदुर यतिकी द्याव मुळकेगित.
ACT 4:4 लेकीन वचन इक केळावाळेर दा टु हापाळ मुंदुर विश्वास माळदुर, अदिक आंदुर गिनती अईद हजार मंळसागोळ्द हात्‍तीपास आगेत.
ACT 4:5 दुसरा दिशी यरूशलेम दा यहूदी अधिकारीगोळ अदिक स्याणा लॉकुर अदिक न्यायशास्त्र अन्द गुरुगोळ,
ACT 4:6 अदिक महायाजक हन्ना अदिक कैफा अदिक यूहन्ना अदिक सिकन्दर अदिक यास महायाजक इन घराना नोर ईरोर, सप्पा यरूशलेम दा जमा आदुर.
ACT 4:7 आंदुर पतरस अदिक यूहन्ना अक न्याड्या निदरूसकु केळली कुरतुर कि “नीव ईद क्याल्सा याता सामर्थ्य देल अदिक याता हेसुर देल माळीर.”
ACT 4:8 आग पतरस पवित्र आत्मा देल परिपुर्ण आगकु आंदुर से अंदुन, “हे लॉकुर्दव अधिकारी अदिक स्याणा लॉकुरा.
ACT 4:9 ई लंगळा मंळसा अन्द सांगुळ जो भलाई माळकु आग्याद, अगर ईंद नाम से आऊन बारा दा केळकु आगतद, कि आव ह्यांग वळ्लेव आदुन.
ACT 4:10 रा नीव सप्पा अदिक पुरा इस्त्राएली लॉकुर जान्स कोमी कि यीशु मसीह नासरी इन हेसुर दा जो सामर्थ्य आद अदुर द्वारा ई लंगळा मंळसा नीम मुंद भला चंगा निदुरकु आन, या यीशु अक नीव क्रूस मा येर्सदिर, अदिक परमेश्वर सोत्‍तुर दा टु जित्‍ता माळदुन.
ACT 4:11 शास्त्र दा लिख्सकु आद, ईव यीशु अदा कल्ल हुन यारी नीव राजमिस्त्रीगोळ बेकार मान्सदिर अदिक आव हापाळ महत्वपुर्ण कल्ल आगेदुन.
ACT 4:12 यावारा दुसरा अन्द द्वारा उद्धार ईला; यतिकी स्वर्ग इन ल्यालमा मंळसागोळ दा अदिक यातोदु दुसरा हेसुर कोटकु आगीदील, यार्द द्वारा नामी उद्धार सिकुल.”
ACT 4:13 याग आंदुर पतरस अदिक यूहन्ना अन्द हिम्मत नोळदुर, अदिक ईद अरतुर कि इंदुर अनपढ़ अदिक साधारण मंळसा आर, रा आश्चर्य माळदुर; बाक आंदरी अरतुर, कि इंदुर यीशु उन सांगुळ ईतार.
ACT 4:14 आ लंगळा मंळसा अक जो वळ्लेव आगीदुन, पतरस अदिक यूहन्ना अन्द सांगुळ निदुर्त नोळकु, आंदुर विरोध दा येनु अन सकिदील.
ACT 4:15 लेकीन आंदरी सभा अन्द व्हार्या होगोद आग्या कोटकु, आंदुर तांदुर दा विचार माळली कुरतुर,
ACT 4:16 अदिक अनली कुरतुर, “नाव ई मंळसागोळ सांगुळ येन माळेव? यतिकी यरूशलेम इन सप्पा ईरावाळेर मा प्रगट आद, कि इंदुर द्वारा ऊंद प्रसिद्ध चमत्कार तोर्सकु आग्याद, अदिक नाव अदुर्द इनकार माळ सकालेव.
ACT 4:17 इदुरसाटी कि ई मात लॉकुर दा मात्‍त यक्कुल फैलुस बाळुल, नाव आंदरी धमकुसेव, कि आंदुर यीशु उन हेसुर देल बाक यातोदु मंळसा से मातगोळी हेळतीदील.”
ACT 4:18 आग आंदुर पतरस अदिक यूहन्ना अक कारदुर अदिक चेतावनी कोटकु ईद अंदुर, “यीशु उन हेसुर देल येनु अच माताळ बाळेतीर अदिक कल्स बाळेतीर.”
ACT 4:19 लेकीन पतरस अदिक यूहन्ना आंदरी उत्‍तर कोट्टुर, “नीवा न्याय माळी; येन ईद परमेश्वर उन नजर दा भला आद कि नाव परमेश्वर उन मात से यक्कुल नीम मात केळेव.
ACT 4:20 यतिकी ईद रा नाम से आगसकाल कि जो नाव नोळेव अदिक केळेव, अद अनतीदिल.”
ACT 4:21 आग आंदुर आंदरी मात्‍त यक्कुल धमकी कोटकु बिट बुटुर, यतिकी आंदरी समझ दा बंदिदील कि आंदरी ह्यांग दण्ड कोट्टेव, यतिकी जो घटना आगीत अदुर कारण सप्पा लॉकुर परमेश्वर उन बळाई माळतोगोर.
ACT 4:22 आ लंगळा मंळसा, यार मा ईद चंगाई इन चमत्कार तोर्सकु आगीत, चालीस साल से यक्कुल उमर ईनव ईरोन.
ACT 4:23 पतरस अदिक यूहन्ना बिटकु तान संगीगोळ हात्‍ती बंदुर, अदिक जो येनारा प्रधान याजकगोळ अदिक स्याणा लॉकुर आंदुर से अंदीदुर, आंदरी केळ्स बुटुर.
ACT 4:24 ईद केळकु विश्वासीगोळ ऊंद मन आगकु धोळ्द आवाज देल परमेश्वर से अंदुर, हे स्वामी, नी आवा हुय याव स्वर्ग अदिक पृथ्वी अदिक समुद्र अदिक जो येनारा अऊर्दा आद माळ्या.
ACT 4:25 नी पवित्र आत्मा अन द्वारा तान सेवक नाम पुर्वज दाऊद उन बाय देल अंद, गैरयहूदीगोळ हल्ला येती मचुसदुर? अदिक द्याश-द्याश इन लॉकुर येती बिना मतलब इन मातगोळ्द विचार माळदुर?
ACT 4:26 प्रभु अदिक आऊन मसीह अन्द विरोध दा पृथ्वी इन राजा निदुरदुर, अदिक अधिकारीगोळ ऊंद सांगुळ जमा आगेदुर.
ACT 4:27 यतिकी खराखुरा नीन पवित्र सेवक यीशु उन खिलाप दा, यार्द नी अभिषेक माळ्द, हेरोदेस अदिक पुन्तियुस पिलातुस भी गैरयहूदीगोळ अदिक इस्त्राएलीगोळ सांगुळ ई नगर दा जमा आदुर,
ACT 4:28 आंदुर जमा आदुर यतिकी नीन ताकत अदिक इच्छा अन अनुसार जो येनारा पयले अच निश्चित आगेगीत अद पुरा आगुल.
ACT 4:29 ईग हे प्रभु, आंदुर धमकीगोळी नोळ; अदिक तान दासगोळी ईद इजाजत कोळ कि नीन वचन हापाळ हिम्मत देल केळसुल.
ACT 4:30 चंगा माळोर साटी नी तान कय मुंद माळ कि चमत्कार अदिक अदभुत क्याल्सा नीन पवित्र सेवक यीशु उन हेसुर देल माळकु आगुल.
ACT 4:31 याग आंदुर प्रार्थना माळ कोंडुर, रा अद जागा यल आंदुर जमा ईरोर हालुसेत, अदिक आंदुर सप्पा मुंदुर पवित्र आत्मा देल परिपुर्ण आगेदुर, अदिक परमेश्वर उन वचन हिम्मत देल केळ्सतेला ईत्‍तुर.
ACT 4:32 विश्वास कळावार्ळेद मंडली ऊंद चित्त अदिक ऊंद मन इन ईरोद, ईल ताका कि यावारा भी तान धन सम्पत्ति तान ईला अनतोगोन, लेकीन सप्पा येनारा गुट दा ईरोद.
ACT 4:33 प्रेरित बळा सामर्थ्य देल प्रभु यीशु उन जित्‍ता आगोद गवाही कोळ्त ईत्‍तुर अदिक आ सप्पा मुंदुर मा हापाळ अनुग्रह ईरोद.
ACT 4:34 आंदुर दा याऊ भी गरीब बेळावाळा ईला ईरोन; यतिकी यार्द हात्‍ती जागा अदिक मान्नागोळ ईरव, आंदुर अवरी मार-मोटकु, मार्द वस्तुगोळ्द दाम तरोर,
ACT 4:35 अदिक अवरी प्रेरितगोळ्द कालगोळ मा ईटतोगोर; अदिक ह्यांग यारी जरवत ईरतोगोद, अदुर अनुसार हर ऊंद मंळसा अक कोट बुळतोगोर.
ACT 4:36 यूसुफ हेसुर ईनव साइप्रस नगर इन ऊंद लेवी ईरोन यार्द हेसुर प्रेरितगोळ बरनबास मतलब हिम्मत कोळावाळा ईटीदुर.
ACT 4:37 आऊन थ्वाळासा जागा जमीन ईरोद, यदरी आव मारदुन, अदिक दाम इन पैस्या तनकु प्रेरितगोळ्द कालगोळ मा ईट बुटुन.
ACT 5:1 हनन्याह हेसुर इन ऊंद मंळसा ईरोन, अदिक आव तान हिंग्स सफीरा अन सांगुळ तान थ्वाळासा जागा मारदुन.
ACT 5:2 अदिक आव आ जागा अन दाम दा टु थ्वाळासा पैस्या ईट बुटुन; अदिक ईद मात आऊन हिंग्स भी जानसोर, अदिक अदुर मिग्द भाग तनकु प्रेरितगोळ्द कालगोळ मुंद ईट बुटुन.
ACT 5:3 पतरस अंदुन, “हे हनन्याह! शैतान नीन मन दा ईद मात ह्यांग हाक्त कि नी पवित्र आत्मा से ख्वाटा माताळ्या, अदिक जागा अन दाम दा टु येनारा ईट्या?
ACT 5:4 यागासताका अद नीन हात्‍ती ईत्‍त, येन अद जागा अपमान ईतीदील? अदिक याग अद मारेत रा येन अदुर किमत नीन अधिकार दा ईला ईरोद? अदिक नी ई मात इन तान मन दा येती बिचार माळ्द? नी मंळसागोळ से ईला, लेकीन परमेश्वर से ख्वाटा माताळ्द.”
ACT 5:5 ई मातगोळ केळकु हनन्याह बिदोदुन अदिक जीव बिट बुटुन, अदिक सप्पा केळावाळेर मा धोळ्द अंज्क तुम्मेत.
ACT 5:6 बाक हारोद मंळसागोळ यदकु आऊन सकोली तयार माळदुर अदिक आऊन लाश व्हार्या ओतकु नळ्स बुटुर.
ACT 5:7 लगभग मुर तास इन बाद्दा आऊन हिंग्स, जो येनारा आगीत ईला जान्सकु, बुळ्क बंदुर.
ACT 5:8 आग पतरस आकिन से अंदुन, “नानी हेळ येन नीव अद जागा इटुर दा अच मार बुटीदीर?” आक अंदुर, “हव, इटुर दा अच.”
ACT 5:9 पतरस आकिन से अंदुन, “ईद येन मात हुन कि नीव येढ्ढु मुंदुर प्रभु अन्द आत्मा अन परीक्षा साटी ऊंद मन माळदीर? नोळ, नीन गांड्ड उक नळसावाळेर दरवाजा मा अच निदुरकु आर, अदिक नीनी भी व्हार्या ओतार.”
ACT 5:10 आग आक तुरन्त आऊन कालगोळ मा बिद्दुर, अदिक सोतोदुर; अदिक हारोद मंळसागोळ बुळ्क बंदकु आकी सोतकु नोळदुर, अदिक व्हार्या वोतकु आकिन गांड्ड उन हात्‍ती नळ्स बुटुर.
ACT 5:11 सप्पा मंडली मा अदिक ई मातगोळ्द सप्पा केळावाळेर मा धोळ्द अंज्क तुम्मेत.
ACT 5:12 प्रेरितगोळ्द कयगोळ देल हापाळ चमत्कार अदिक अदभुत क्याल्सा लॉकुर न्याड्या दा तोर्सकु आगतोगोव, अदिक आंदुर सप्पा ऊंद मन आगकु सुलैमान उन छपर्या दा जमा आगतोगोर.
ACT 5:13 लेकीन हापाळ दा टु यारीकु ईद हिम्मत ईला आगतोगोद कि आंदुर दा होगकु मिलुसेव; तरी लॉकुर आंदुर्द बळाई माळतोगोर.
ACT 5:14 विश्वास माळावाळेर हापाळ सा मंळसा अदिक आर्तेर मंडलीगोळ दा धोळ्द संख्या दा सिक्त ईत्‍तुर.
ACT 5:15 ईल ताका कि लॉकुर बिमारगोळी सळकगोळ मा तन तनकु, व्हर्सगोळ मा मिंग्स बुळतोगोर कि याग पतरस बंदान, रा आऊन सावली अच आंदुर दा टु यारदारा मा बिदोगुल.
ACT 5:16 यरूशलेम इन आसपास इन नगरगोळ से भी हापाळ लॉकुर बिमारगोळ अदिक अशुध्द आत्मागोळ्द सतुस्द लॉकुरी तन तनकु, जमा आगतोगोर, अदिक सप्पा वळ्लेर माळकु आगोर.
ACT 5:17 आग महायाजक अदिक आऊन सप्पा संगी जो सदूकीगोळ्द पंथ नोर ईरोर, जलनखोरी देल तुम्मेदुर.
ACT 5:18 अदिक प्रेरितगोळी हुडुकु बंदीगृह दा बंद माळ बुटुर.
ACT 5:19 लेकीन ईळ्ल इक प्रभु उन ऊंद स्वर्गदूत बंदीगृह अन्द दरवाजा तेरूकु आंदरी व्हार्या तनकु अंदुन,
ACT 5:20 “होगी, मंदिर दा निदुरकु ई व्हाशोद जीवन इन सप्पा मातगोळ लॉकुरी केळसी.”
ACT 5:21 आंदुर ईद केळकु व्हातुर आगतेला अच मंदिर दा होगकु शिक्षा कोळली कुरतुर. लेकीन महायाजक अदिक आऊन साथीगोळ बंदकु इस्त्राएलगोळ सप्पा स्याणा लॉकुर्द पुरा सभा अक जमा माळदुर, अदिक बंदीगृह दा बातणी कळुदुर कि आंदरी तरूल.
ACT 5:22 लेकीन अधिकारीगोळ अल पोहचुस्कु आंदरी बंदीगृह दा नोळीदील, अदिक वापस बंदकु बातणी कोट्टुर,
ACT 5:23 “नाव बंदीगृह अक हापाळ सावधानी देल बंद माळकु, अदिक पहरेदारगोळी व्हार्या दरवाजागोळ मा निदुरकु नोळदेव; लेकीन याग तेरदेव, रा बुळ्क याऊ सिक्‍कीदील.”
ACT 5:24 याग मंदिर इन सरदार अदिक प्रधान याजक ई मातगोळी केळदुर, आंदरी समझ दा बंदीदिल कि प्रेरितगोळ्द येन आत अदिक ईग येन आदीत!
ACT 5:25 ईटुर दा यावारा बंदकु आंदरी हेळदुन, “नोळी, यारी नीव बंदीगृह दा बंद ईटीदीर, आ मंळसागोळ मंदिर दा निदुरकु लॉकुरी शिक्षा कोळेत्यार.”
ACT 5:26 आग सरदार, अधिकारीगोळ सांगुळ होगकु, आंदरी तंदुन, लेकीन ताकत देल ईला, यतिकी आंदुर लॉकुर से अंजतोगोर कि नाम मा पथराव माळबाळुल.
ACT 5:27 आंदुर प्रेरितगोळी तनकु महासभा अन्द मुंद निदुरूस बुटुर; अदिक महायाजक आंदुर से पूछताछ माळदुन,
ACT 5:28 “येन नाव नीमी कठोर आग्या कोटीदील कि नीव ई हेसुर देल शिक्षा कोळ बाळेतीर? तरी भी नोळी, नीव सप्पा यरूशलेम इक तान शिक्षा देल तुम बुट्टीर अदिक आ मंळसा अन्द खुन नाम कुतक्या मा तरोद चाहासतीर.”
ACT 5:29 आग पतरस अदिक दुसरा प्रेरितगोळ उत्‍तर कोट्टुर, “मंळसागोळ्द आग्या से वाळुसकु परमेश्वर उन आग्या अन्द पालन माळोद अच नाम्द कर्तव्य आद.
ACT 5:30 नाम आप्प दादागोळ्द परमेश्वर यीशु उक सोत्‍तुर दा टु जित्‍ता माळदुन, यारी नीव क्रूस मा येर्सकु कोंद बुटीदीर.
ACT 5:31 आऊक अच परमेश्वर शासक अदिक उद्धारकर्ता ठहरूस्कु, तान ऊमा कय मा नेग्द बुट्टुन, कि आव इस्त्राएलगोळी मन तिर्गुसोद ताकत अदिक पापगोळ्द माफ प्रदान माळुल.
ACT 5:32 नाव ई मातगोळ गवाह आयेव अदिक हांगा पवित्र आत्मा भी, यारी परमेश्वर आंदरी कोटान जो आऊन आग्या मान्सतार.”
ACT 5:33 ईद केळकु आंदुर सिट्टी होट बंदुर, अदिक प्रेरितगोळी कोंद बुळोद चाहासदुर.
ACT 5:34 लेकीन गमलीएल हेसुर इन ऊंद फरीसी जो व्यवस्था अन शिक्षक अदिक सप्पा लॉकुर दा मानवाईक ईरोन, न्याय सभा दा निदुरकु प्रेरितगोळी थ्वाळासा समय इन साटी व्हार्या माळोद आग्या कोट्टुन.
ACT 5:35 आग आव अंदुन, “हे इस्त्राएलगोळा, नीव जो येनारा ई मंळसागोळ सांगुळ माळोद चाहासतीर, सोच विचार माळकु माळेतीर.
ACT 5:36 यतिकी ई दिनगोळ से पयले थियूदास ईद अनतेला अच विद्रोह अन्द झंडा नेगदीदुन, कि ना भी येनारा आईन; अदिक कम से कम नाक सौ मंळसा आऊन सांगुळ आगेदुर, लेकीन आव कोन्सुसकु आदुन अदिक यास लॉकुर आऊक मान्सतोगोर, सप्पा तितर बितर आदुर अदिक मिट्सेदुर.
ACT 5:37 अदुर बाद्दा जनगणना अन्द दिनगोळ दा गलील दा ईरावाळा यहूदा विद्रोह दा ताल्ला नेगदुन, अदिक थ्वाळासा लॉकुरी तान दी माळ कोंडुन; अदिक आव भी नाश आगेदुन अदिक यास लॉकुर आऊक मान्सतोगोर, सप्पा तितर बितर आगेदुर.
ACT 5:38 इदुरसाटी ईग ना नीम से अनतीन, ई मंळसागोळ से दुर अच ईरी अदिक इंदरी होगगोळी; यतिकी अगर ईद न्याय या क्याल्सा मंळसागोळ दी टु आद आग रा मिटुसेदीत;
ACT 5:39 लेकीन अगर परमेश्वर उन दी टु आद, रा नीव आंदरी यागलु मिटुस सकतीदिल. ईलारा हिंग आगबाळुल कि नीव परमेश्वर से भी लळुसावाळेर ठहरूसी. आग सभा अन लॉकुर गमलीएल उन मात मान्स कोंडुर.”
ACT 5:40 अदिक प्रेरितगोळी कार्सकु बळसुसदुर; अदिक ईद आदेश कोटकु बिट बुटुर कि यीशु उन हेसुर देल बाक यातोदु मात माळबाळेतीर.
ACT 5:41 प्रेरितगोळ ई मात देल खुश आगकु महासभा अन्द मुंदु टु अनतेला होटोदुर, कि नाव यीशु उन हेसुर इन साटी अपमानीत आगोद लायक रा ठहरूसदेव.
ACT 5:42 आंदुर रोज मंदिर दा अदिक मानोन मान्नी लगातार खुशखबरी इन प्रचार माळतोगोर अदिक कल्सतोगोर कि यीशु उच मसीह हुन.
ACT 6:1 आ दिनगोळ दा चेलागोळ्द संख्या हापाळ वाळुसली कुर्त, आग गैरयहूदी भाषा माताळावाळेर इब्रानी भाषा मातावाळेर मा कुळकाळ माळली हतदुर, कि रोज इन दान दा नाम रांड्यागोळ्द बारा दा विचार माळकु आगाल्द.
ACT 6:2 आग आ हन्नेळ प्रेरितगोळ चेलागोळ्द मंडली इक तान हात्‍ती कारूकु अंदुर, “ईद ठीक हैलेच कि नाव परमेश्वर उन वचन बिटकु तिन्सदुर कुळ्सदुर स्यावा दा ईत्‍तेव.
ACT 6:3 इदुरसाटी, हे वार्टुरा अदिक आकतींगेरा, तान दा टु येळ मानवाईक मंळसागोळी जो पवित्र आत्मा अदिक बुद्धी देल परिपुर्ण आर, निवळुस कोमी, कि नाव आंदरी ई क्याल्सा मा ठहरूस बुटेव.
ACT 6:4 लेकीन नाव रा प्रार्थना दा अदिक वचन केळसोद सेवकाई दा हतकु ईत्‍तेव.”
ACT 6:5 ईद मात सप्पा मंडली इक वळ्लीद हत, अदिक आंदुर स्तिफनुस हेसुर इन ऊंद मंळसा अक जो विश्वास अदिक पवित्र आत्मा देल परिपुर्ण ईरोन, अदिक फिलिप्पुस, अदिक प्रुखुरूस, अदिक नीकानोर, अदिक तीमोन, अदिक परमिनास, अदिक अन्ताकिया वासी नीकुलाउस उक जो यहूदी मत दा होट्ट बंदीदुन, नीवळुस कोंडुर.
ACT 6:6 इंदरी प्रेरितगोळ्द मुंद निदरूसदुर अदिक आंदुर प्रार्थना माळकु आंदुर मा कय ईटदुर.
ACT 6:7 परमेश्वर उन वचन फैलुस्तेला होत अदिक यरूशलेम दा चेलागोळ गिनती हापाळ वाळुसेत; अदिक याजकगोळ्द ऊंद धोळ्द समाज ई मत इक मान्सावाळा आगेत.
ACT 6:8 स्तिफनुस अनुग्रह अदिक सामर्थ्य देल परिपुर्ण आगकु लॉकुर दा धोळ धोड्डेव अदभुत क्याल्सा अदिक चमत्कार तोर्सतोगोन.
ACT 6:9 आग आ सभागृह दा टु जो लिबिरतीन इन कहलुसतोगोद, अदिक कुरेनी अदिक सिकन्दरिया अदिक किलिकिया अदिक आसिया अन लॉकुर दा टु थ्वाळासा लॉकुर यदकु स्तिफनुस से झगळा माळली हतदुर.
ACT 6:10 लेकीन आ ग्यान अदिक आ आत्मा अन्द यार देल प्रेरित आगकु स्तिफनुस मातगोळी माळतोगोन, आंदुर सामना माळ सकिदील.
ACT 6:11 इदुर मा आंदुर थ्वाळासा लॉकुरी भळकुसदुर जो अनली कुरतुर, “नाव ईऊक मूसा अदिक परमेश्वर उन विरोध दा तिरस्कार इन मातगोळी अनतेला केळेव.”
ACT 6:12 अदिक लॉकुर अदिक स्याणागोळ अदिक शास्त्रीगोळी भळकुसदुर अदिक आंदुर आऊक हुडुकु महासभा दा तंदुर.
ACT 6:13 अदिक ख्वाटा गवाह निदरूसदुर, आंदुर अंदुर, “ईव मंळसा ई पवित्र जागा अदिक व्यवस्था अन्द विरोध दा माताळोद बिळालुन.
ACT 6:14 यतिकी नाव आऊक ईद अनतेला केळेव कि ईवा यीशु नासरी ई मंदिर इक केळ्द बुट्टान, अदिक आ रीतीगोळी बदलुस बुट्टान जो मूसा नामी सोपस्यान.”
ACT 6:15 आग सप्पा लॉकुर जो सभा दा कुर्तकु ईरोर, स्तिफनुस मा नजर हाकदुर रा आऊन बाय स्वर्गदूत उन घाई नोळदुर.
ACT 7:1 आग महायाजक स्तिफनुस से अंदुन, “येन ई मातगोळ सही आव?”
ACT 7:2 स्तिफनुस अंदुन, “हे वार्टुरा, अदिक आप्पगोळा केळी. नाम स्याणा अब्राहम हारान द्याश दा कुरोर से पयले मेसोपोटामिया दा ईरोन; रा तेजोमय परमेश्वर आऊक दर्शन कोट्टुन,
ACT 7:3 अदिक आऊन से अंदुन, ‘नी तान द्याश अदिक तान कुटुम्ब टु होटकु आ द्याश दा होग, यदरी ना नीनी तोरसाईन.’
ACT 7:4 आग आव कसदियागोळ द्याश दा टु होटकु हारान द्याश दा होगकु कुरतुन. अब्राहम उन आप्प उन सोत्‍तुर बाद्दा परमेश्वर आऊक अल टु ई द्याश दा तनकु कुर्सदुन यदुर्दा ईग नीव कुरतीर,
ACT 7:5 अदिक आऊक येनारा मीरास मतलब काल ईटली भी आऊक जागा कोटीदील, लेकीन वादा माळदुन कि ना ईद द्याश नींद अदिक नीन बाद्दा नीन वंश इन कय दा माळ बुळाईन; लेकीन आ समय आऊन यातोदु औलाद भी ईला ईरोद.
ACT 7:6 अदिक परमेश्वर ईद अंदुन, ‘नीन औलाद इन लॉकुर दुसरा द्याश दा परदेशी आदार, अदिक लॉकुर आंदरी दास माळ्यार अदिक नाक सौ वर्ष ताका सतुस्कु आदार.’
ACT 7:7 बाक परमेश्वर अंदुन, ‘या राष्ट्र इन आंदुर दास आदार, आंदरी ना दण्ड कोळाईन, अदिक इदुर बाद्दा आंदुर होटकु ईदा जागी नान स्यावा माळ्यार.’
ACT 7:8 अदिक परमेश्वर आऊन से खतना अन्द वादा माळदुन; अदिक ईदा दशा दा इसहाक आऊन से पैदा आदुन अदिक आऊन जनम इन बाद्दा आठवा दिशी आऊन खतना माळकु आत; अदिक इसहाक से याकूब पैदा आदुन अदिक याकूब से हन्नेळ पारगोळ पैदा आदुर ईंदुर्द भी खतना माळकु आत आंदुर नाम कुलपती बन्सदुर.
ACT 7:9 “कुलपतिगोळ यूसुफ से जलन माळकु आऊक मिस्त्र द्याश होगावाळेर इक मारदुर. लेकीन परमेश्वर आऊन सांगुळ ईरोन,
ACT 7:10 अदिक आऊक आऊन सप्पा दुखगोळ देल बिळ्सकु मिस्त्र अन्द राजा फिरौन उन नजर दा अनुग्रह अदिक बुद्धी प्रदान माळदुन, अदिक आव आऊक मिस्त्र मा अदिक तान सप्पा मान्ना मा शासक नियुक्त माळदुन.
ACT 7:11 आग मिस्त्र अदिक कनान इन सप्पा द्याश दा अकाल बित्‍त; यदुर देल भारी दुखगोळ बंदव, अदिक नाम आप्प दादागोळी तिनली ईला सिकतोगोद.
ACT 7:12 लेकीन याकूब ईद केळकु कि मिस्त्र द्याश दा अनाज आद, नाम आप्प दादागोळी पयला घन कळुदुन.
ACT 7:13 दुसरा घन यूसुफ खुद इक तान वार्टुर मा प्रगट माळदुन अदिक यूसुफ उन जाती फिरौन उक मालूम आगेत.
ACT 7:14 आग यूसुफ तान आप्प याकूब अदिक तान सप्पा कुटुम्ब इक, जो पच्यात्‍तर मंळसा ईरोर, बातणी कळुदुन.
ACT 7:15 आग याकूब मिस्त्र दा ल्यालमा होदुन; अदिक अल आव अदिक आऊन चिकोर सोतोदुर.
ACT 7:16 आंदुर लाश शकेम नगर दा पोहचुस्कु आ कब्र दा ईटकु आदव, यारी अब्राहम चाँदी इन सिक्‍का कोटकु शकेम दा हमोर उन औलाद से कोंडीदुन.
ACT 7:17 “लेकीन याग आ वादा अन्द पुरा आगोद घळी हात्‍ती बत्‍त जो परमेश्वर अब्राहम से माळीदुन, रा मिस्त्र द्याश दा आ लॉकुर वाळुसेदुर अदिक हापाळ आगेदुर.
ACT 7:18 आग मिस्त्र दा दुसरा राजा आदुन जो यूसुफ उक ईला अरोन.
ACT 7:19 आव नाम जाती से चालाकी माळकु नाम आप्प दादागोळ सांगुळ ईल ताका बुरा व्यवहार माळदुन, कि आंदरी तान चिकोरी भीट बुळोर साटी मजबुर माळदुन.
ACT 7:20 आ समय मूसा पैदा आदुन. आव परमेश्वर उन नजर दा हापाळ अच सुंदर ईरोन. आव मुर तिंगुळ ताका तान आप्प उन मान्या पालस्कु आदुन.
ACT 7:21 याग भिटकु आदुन रा फिरौन उन पोर आऊक नेगु कोंडुर, अदिक तान पार उन घाई पाल्सदुर.
ACT 7:22 मूसा अक मिस्त्रीगोळ सप्पा विद्या कल्सकु आत, अदिक आव वचन अदिक कर्म येढ्ढु दा ताकतवर ईरोन.
ACT 7:23 “याग आव चालीस वर्ष इनव आदुन, रा आऊन मन दा बत्‍त कि ना इस्त्राएली वार्टुर से मुलाकात माळाईन.
ACT 7:24 आव ऊंद मंळसा मा अन्याय आग्त नोळकु आऊक ऊळ्सदुन, अदिक मिस्त्री इक कोंदकु अत्याचार माळ्द मंळसा अन्द बदला ताकोंडुन.
ACT 7:25 आव विचार माळदुन कि आऊन लॉकुर समस्यार कि परमेश्वर आऊन कयगोळ देल आंदुर्द उद्धार माळ्यान, लेकीन आंदुर समसीदील.
ACT 7:26 दुसरा दिशी याग आंदुर आपस दा झगळा माळोर, रा आव अल बंदुन; अदिक ईद अनकु आंदरी मिलुसोर साटी समजुसदुन, हे मंळसागोळा, आव अंदुन, ‘नीव रा वार्टुर-वार्टुर हुईर,’ आबुर दाबुर मा येती अन्याय माळतीर?
ACT 7:27 लेकीन जो तान बाजुवाळा मा अन्याय माळोन, आव आऊक ईद अनकु हटुस बुटुन, ‘नीनी याव नाम मा अधिकार अदिक न्याय माळावाळा ठहरूस्यान?
ACT 7:28 येन याता रीति देल नी नीन मिस्त्री इक कोंद बुट नानी भी कोंद बुळोद चाहासत्या?’
ACT 7:29 ईद मात केळकु मूसा ओळदुन अदिक मिद्यान द्याश दा परदेशी आगकु ईरली कुरतुन, अदिक अल आऊन येढ्ढ पारगोळ पैदा आदुर.
ACT 7:30 “याग पुरा चालीस वर्ष बितसेदव, रा ऊंद स्वर्गदूत सीनै पहाळी इन आळी दा आऊक होततेला झाळी इन बेक्‍की अन लपेट दा दर्शन कोट्टुन.
ACT 7:31 मूसा अक ईद दर्शन नोळकु आश्चर्य आत, अदिक याग नोळोर साटी आव हात्‍ती होदुन, रा प्रभु अन्द ईद आवाज बत्‍त,
ACT 7:32 ना नीन आप्प दादागोळ, अब्राहम, इसहाक अदिक याकूब उन परमेश्वर हुईन. आग रा मूसा नळ्गली कुरतुन, ईल ताका कि आऊक नोळोद हिम्मत आगीदील.
ACT 7:33 आग प्रभु आऊन से अंदुन, ‘तान कालगोळ दा टु केरू तेगु कोम, यतिकी याता जागा दा नी निदुरकु आय, अद पवित्र जागा हुन.
ACT 7:34 ना सचमुच तान लॉकुर्द जो मिस्त्र द्याश दा आर, दुर्दशा अक नोळीन; अदिक आंदुर्द आह अदिक आंदुर्द वोरलोद केळीन; इदुरसाटी आंदरी बिळसोर साटी ईळदीन. ईग बा, ना नीनी मिस्त्र द्याश दा कळाईन.’
ACT 7:35 “या मूसा अक आंदुर ईद अनकु अस्वीकार माळीदुर, ‘नीनी यार नाम मा अधिकार अदिक न्याय माळावाळा ठहरूस्यार?’ आऊक अच परमेश्वर शासक अदिक बिळसावाळा ठहरूस्कु, आ स्वर्गदूत उन द्वारा यार आऊक झाळी दा दर्शन कोटीदुन, कळुदुन.
ACT 7:36 ईवा मंळसा मिस्त्र द्याश अदिक क्याचांद समुद्र अदिक आळी दा चालीस वर्ष ताका अदभुत क्याल्सा अदिक चमत्कार तोर्स तोर्सकु आंदरी तेगुकु तंदुन.
ACT 7:37 ईव आवा मूसा हुन, याव इस्त्राएलगोळ से अंदुन, ‘परमेश्वर नीम वार्टुर दा टु नीम साटी नान घाई ऊंद बातणी तरावाळा नेगदान.’
ACT 7:38 ईव आवा हुन, याव आळी दा मंडली अन न्याड्या आ स्वर्गदूत उन सांगुळ सीनै पहाळी मा आऊन से मातगोळी हेळदुन अदिक नाम आप्प दादागोळ सांगुळ ईरोन, आऊक अच जीवित वचन सिक्याव कि नाम ताका पोहचुसुल.
ACT 7:39 लेकीन नाम आप्प दादागोळ आऊन मानसोद चाहसीदील, बल्‍की आऊक हटुस्कु तान मन मिस्त्र दी फेर्सदुर,
ACT 7:40 अदिक हारून से अंदुन, ‘नाम साटी हिंग देवता माळ, जो नाम मुंद-मुंद नळुल, यतिकी ईव मूसा जो नामी मिस्त्र द्याश टु तेगुकु तंदुन, नाव जानसालेव आऊक येन आग्याद?’
ACT 7:41 आ दिनगोळ दा आंदुर ऊंद वस्ता अन घाई कांळ्सावाळा मूर्ति माळदुर, अदिक अदुर मा बली येर्सदुर, अदिक तान कयगोळ देल पाऊनचार माळकु खुशी मान्सदुर.
ACT 7:42 इदुरसाटी परमेश्वर अनदेखा माळकु आंदरी बिट बुटुन, कि आकाशगण इन पुजा माळुल, ह्यांग भविष्यवक्तागोळ किताब दा लिख्सकु आद, ‘हे इस्त्राएल इन घराना, येन नीव आळी दा चालीस वर्ष ताका पशुबली अदिक अन्नबली नान इक अच येर्सत ईत्‍तीर?
ACT 7:43 नीव मोलेक इन तम्बू अदिक रिफान देवता अन्द तारा अक हुडुकु टेटाळ तोगीर, मतलब आ मूर्तिगोळी यारी नीव दण्डवत माळोर साटी माळदीर. इदुरसाटी ना नीमी बेबीलोन इन हात्‍ती ओतकु कुरसाईन.’
ACT 7:44 “नाम आप्प दादागोळ हात्‍ती परमेश्वर उन सानिध्य अन्द तम्बू, ह्यांग परमेश्वर मूसा अक हेळदुन हांग माळीदुन. अद आ नमुना अन घाई ईरोद जो मूसा अक तोर्सकु आगीत.”
ACT 7:45 अदा तम्बू अक नाम आप्प दादागोळ पूर्वकाल टु हुडुकु यहोशू अन्द सांगुळ ईल तंदुर; याता समय इन आंदुर आ गैरयहूदीगोळ मा अधिकार माळदुर, यारी परमेश्वर नाम आप्प दादागोळ मुंद टु तेगु बुट्टुन, अदिक अद तम्बू दाऊद उन समय ताका ईत्‍त.
ACT 7:46 आऊन मा परमेश्वर अनुग्रह माळदुन; इदुरसाटी आव विनती माळदुन कि आव याकूब उन परमेश्वर उन साटी निवास स्थान माळुल.
ACT 7:47 आव ईला लेकीन सुलैमान आऊन साटी मान्ना माळदुन.
ACT 7:48 लेकीन परमप्रधान कय इन माळ्द मान्नागोळ दा ईरालुन, ह्यांग कि भविष्यवक्ता अंदुन,
ACT 7:49 प्रभु अनतान, स्वर्ग नांद सिंहासन अदिक पृथ्वी नान कालगोळ तल्ला अन्द आशन हुन, नान साटी नीव याता प्रकार इन मान्ना माळीर? अदिक नांद आराम इन साटी यातोद जागा ईत्‍तीत?
ACT 7:50 येन ई सप्पा वस्तुगोळ नान कय इन माळदव आल्लच?
ACT 7:51 “नीव याट जीद्दी आईर, अदिक मन अदिक किव इन खतनारहित लॉकुरा, नीव हमेशा पवित्र आत्मा अन्द विरोध माळतीर. ह्यांग नीम आप्प दादागोळ माळतोगोर, हांगा नीव भी माळतीर.
ACT 7:52 भविष्यवक्तागोळ दा टु यारी नीम आप्प दादागोळ सतुसीदील? आंदुर आ न्यायी अन्द आगमन इन पूर्वकाल टु बातणी कोळावाळेर इक कोंद बुटुर; अदिक ईग नीव भी आ न्यायी मंळसा अक हुळसुसावाळेर अदिक कोन्सुसावाळेर आदीर.
ACT 7:53 नीव स्वर्गदूतगोळ द्वारा ठहरूस्द व्यवस्था रा नोळदीर, लेकीन अदुर पालन माळदीर.”
ACT 7:54 ई मातगोळी केळकु आंदुर होत्‍तेदुर अदिक आऊन मा हल्ल कचली कुरतुर.
ACT 7:55 लेकीन आव पवित्र आत्मा से परिपुर्ण आगकु स्वर्ग दी नोळदुन अदिक परमेश्वर उन महिमा अक अदिक यीशु उक परमेश्वर उन ऊमा कय दी निदुर्त नोळकु अंदुन,
ACT 7:56 “नोळी, ना स्वर्ग इक तेरूत अदिक मंळसा अन पार उक परमेश्वर उन ऊमा कय दी निदुरकु नोळतीन.”
ACT 7:57 आग आंदुर धोळ्द आवाज देल चिळ्लासकु किव बंद माळ बुटुर, अदिक सभा अन सभासदगोळ ऊंद सांगुळ आऊन मा झपट्टा होळदुर;
ACT 7:58 अदिक आऊक नगर इन व्हार्या तेगुकु आऊन मा कल्लगोळी होडुली कुरतुर. गवाहगोळ तान कपळा शाऊल हेसुर ईनव ऊंद हारोद मंळसा अन कालगोळ हात्‍ती तेगुकु ईट बुटुर.
ACT 7:59 आंदुर स्तिफनुस मा कल्लगोळी होडुतेला ईत्‍तुर, अदिक आव ईद अनकु प्रार्थना माळतेला ईत्‍तुन, “हे प्रभु यीशु, नान आत्मा अक ग्रहण माळ.”
ACT 7:60 बाक ट्वांगरा टेक्सकु धोळ्द आवाज देल कारदुन, “हे प्रभु, ईद पाप आंदुर मा हचबाळ.” अदिक ईद अनकु आव सोतोदुन.
ACT 8:1 शाऊल आऊक कोन्नोर दा सहमत ईरोन. अदा दिशी टु यरूशलेम इन मंडली मा धोळ्द दुख इन सुरूवात आत अदिक प्रेरितगोळी बिटकु सप्पा अन्द सप्पा मुंदुर यहूदिया अदिक सामरीया द्याशगोळ दा तितर बितर आगेदुर.
ACT 8:2 येनारा भक्तगोळ स्तिफनुस उक कब्र दा ईटदुर अदिक आऊन साटी जोर जोर देल वर्लदुर.
ACT 8:3 शाऊल मंडली अक बरबाद माळोन; अदिक मानोन मान्नी होक्‍कु मंळसागोळी अदिक आर्तेर इक जेडु जेडुकु बंदीगृह दा हाक्‍क तोगोन.
ACT 8:4 जो विश्वासी लॉकुर तितर बितर आगीदुर, आंदुर खुशखबरी केळ्सतेला टेटाळोर;
ACT 8:5 अदिक फिलिप्पुस ल्यालमा सामरीया नगर दा होगकु लॉकुर दा मसीह अन्द प्रचार माळली कुरतुन.
ACT 8:6 जो मातगोळी फिलिप्पुस अंदुन अवरी लॉकुर केळकु अदिक जो चमत्कार आव तोर्सतोगोन अवरी नोळ नोळकु, ऊंद चित्त आगकु मन हचदुर.
ACT 8:7 यतिकी हापाळ दा टु अशुध्द आत्मागोळ धोळ्द शब्द दा चिल्ळासतेला होट्ट बुटव, अदिक हापाळ सा लकवा अन्द रोगी अदिक लंगळागोळ भी वळ्लेर माळकु आदुर;
ACT 8:8 अदिक आ नगर दा धोळ्द खुशी छासेत.
ACT 8:9 इदुर से पयले आ नगर दा शमौन हेसुर ईनव ऊंद मंळसा ईरोन, जो जादू टोना माळकु सामरीया अन्द लॉकुरी चकित माळतोगोन अदिक तान तान इक ऊंद धोळ्द मंळसा हेळतोगोन.
ACT 8:10 स्याणेर से धोड्डेर ताका सप्पा आऊंद सम्मान माळकु अनतोगोर, “ईव मंळसा परमेश्वर उन अद ताकत हुन, जो महान कहलुसतद.”
ACT 8:11 आव हापाळ दिनगोळ टु आंदरी तान जादू अन्द क्याल्सागोळ देल चकित माळकु ईटीदुन, इदुरसाटी आंदुर आऊक हापाळ मानसोर.
ACT 8:12 लेकीन याग आंदुर फिलिप्पुस उन बातणी इन विश्वास माळदुर जो परमेश्वर उन राज्य अदिक यीशु मसीह अन्द हेसुर इन खुशखबरी केळ्सतोगोन, रा लॉकुर, येन मंळसा, येन आर्तेर, बपतिस्मा ताकोमली कुरतुर.
ACT 8:13 आग शमौन खुद भी विश्वास माळदुन अदिक बपतिस्मा ताकोमकु फिलिप्पुस उन सांगुळ ईरली कुरतुन. आव धोड्डेव-धोड्डेव चमत्कार अदिक चमत्कार इन क्याल्सा आग्त नोळकु चकित आगतोगोन.
ACT 8:14 याग प्रेरितगोळ जो यरूशलेम दा ईरोर, केळदुर कि सामरीयागोळ परमेश्वर उन वचन मान्स कोंडार रा पतरस अदिक यूहन्ना अक आंदुर हाती कळुदुर.
ACT 8:15 आंदुर होगकु विश्वासीगोळ साटी प्रार्थना माळदुर कि पवित्र आत्मा सिक्‍कुल.
ACT 8:16 यतिकी ईगासताका आंदुर दा टु यारदु मा पवित्र आत्मा ईळदीदिल; आंदुर रा सिर्फ प्रभु यीशु अन्द हेसुर देल बपतिस्मा ताकोंडीदुर.
ACT 8:17 आग पतरस अदिक यूहन्ना आंदुर मा कय ईटदुर अदिक आंदरी पवित्र आत्मा सिक्त.
ACT 8:18 याग शमौन नोळदुन कि प्रेरितगोळ कय ईटदुर देल पवित्र आत्मा कोटकु आगतद, रा आंदुर हात्‍ती पैस्या तनकु अंदुन,
ACT 8:19 “ईद अधिकार नानी भी कोळी, कि जो यावारा मंळसा मा कय ईटाईन आऊक पवित्र आत्मा सिक्‍कुल.”
ACT 8:20 पतरस आऊन से अंदुन, “नीन पैस्या नीन सांगुळ नाश आगुल, यतिकी नी परमेश्वर उन दान पैस्यागोळ देल कोंड कोमोद विचार माळ्द.
ACT 8:21 ई मात दा ना नान हिस्सा आद, ना भाग; यतिकी नीन मन परमेश्वर उन मुंद वळ्लीद हैलेच.
ACT 8:22 इदुरसाटी तान ई बुराई देल मन तिर्गुस प्रभु से प्रार्थना माळ, आग सकतद कि अपमान मन इन विचार माफ माळकु आगुल.
ACT 8:23 यतिकी ना नोळतीन कि नी पित्त घाई केयजोर अदिक अन्याय अन्द बंधन दा बिदकु आय.”
ACT 8:24 शमौन, पतरस अदिक यूहन्ना से अंदुन, “नीव नान साटी प्रभु से प्रार्थना माळी कि जो मातगोळी नीव अंदीर, अऊर दा टु यातोदारा नान मा बंदकु बिळबाळुल.”
ACT 8:25 इदुरसाटी आंदुर गवाही कोटकु अदिक प्रभु उन वचन केळ्सकु यरूशलेम इक होटोदुर, अदिक सामरीगोळ्द हापाळ सा ऊरगोळ दा खुशखबरी केळ्सत होदुर.
ACT 8:26 बाक प्रभु अन्द ऊंद स्वर्गदूत फिलिप्पुस से अंदुन, “येळ, अदिक दक्षिण दी आ हादी मा होग, जो यरूशलेम टु गाज़ा अक होगतद.” ईद धुळा अन्द हादी हुन.
ACT 8:27 आव यदकु होटोदुन, अदिक नोळी, कूश द्याश इन ऊंद मंळसा बरोन जो खोजा जाती अदिक कूश इन रानी कन्दाके अन्द मंत्री अदिक पैस्या अन्द हिसाब ईटावाळा खजांची ईरोन. आव आराधना माळली यरूशलेम बंदीदुन.
ACT 8:28 आव तान रथ मा कुर्तकु ईरोन, अदिक यशायाह भविष्यवक्ता अन्द किताब वाचुसतेला वापस होगोन.
ACT 8:29 आग पवित्र आत्मा फिलिप्पुस से अन्त, “हात्‍ती होगकु ई रथ इन सांगुळ आगेग.”
ACT 8:30 फिलिप्पुस आऊन दी हरदुन अदिक आऊक यशायाह भविष्यवक्ता अन्द किताब वाचुसतेला केळदुन, अदिक आऊन से केळदुन, “नी जो वाचुसित्या येन अदरी नी सम्सत्या भी?”
ACT 8:31 आव अंदुन, “यागासताका यावारा नानी समझुसतीदील रा ना ह्यांग समसाईन?” अदिक आव फिलिप्पुस से विनती माळदुन कि आव येरकु आऊन हात्‍ती कुरूल.
ACT 8:32 पवित्रशास्त्र अन्द जो अध्याय आव वाचुसोन, अद ईद ईरोद: “आव म्यांडा अन घाई बली आगली पोहचुस्कु आदुन, अदिक ह्यांग म्यांडा अन पाड्डा तान चुट्टी कातरूसावार्ळेद मुंद चुपचाप ईरतद, हांगा आव भी तान बाय खोलसीदील.
ACT 8:33 आऊन दीनता दा आऊंद न्याय ईला आग पायजे आऊंद समय इन लॉकुर्द वर्णन याव माळ्यान? यतिकी पृथ्वी टु आऊंद जीव तेगुकु आगेत.”
ACT 8:34 इदुर मा खोजा जाती इन ऊंद अधिकारी मंळसा फिलिप्पुस से केळदुन, “ना नीन से विनती माळतीन, ईद हेळ कि भविष्यवक्ता ईद यार बारा दा अनतान, तांद या यावारा दुसरा अन्द बारा दा?”
ACT 8:35 आग फिलिप्पुस तान बाय खोल्सदुन, अदिक ईद शास्त्र भाग से सुरूवात माळकु आऊक यीशु उन खुशखबरी केळ्सदुन.
ACT 8:36 हादी मा नळुत नळुत आंदुर यातोदारा नीर इन जागा मा पोहचुसदुर. आग खोजा जाती इन अधिकारी मंळसा अंदुन, “नोळ ईल नीर आद, ईग नानी बपतिस्मा ताकोंडुर दा येन रोक आद.”
ACT 8:37 फिलिप्पुस अंदुन, “अगर नी पुरा मन देल विश्वास माळत्या रा ताकोम सकत्या.” आव उत्‍तर कोट्टुन, “ना विश्वास माळतीन कि यीशु मसीह परमेश्वर उन पार हुन.”
ACT 8:38 आग आव रथ निदरूसोद आग्या कोट्टुन, अदिक फिलिप्पुस अदिक खोजा नीर दा ईळदुर, अदिक आव खोजा अक बपतिस्मा कोट्टुन.
ACT 8:39 याग आंदुर नीर दा टु होटकु म्याकुच बंदुर, रा प्रभु अन्द आत्मा फिलिप्पुस उक नेगुकु ओईत, अदिक खोजा जाती इन अधिकारी आऊक बाक नोळीदील, अदिक आव खुशी माळतेला तान हादी मा होटोदुन.
ACT 8:40 फिलिप्पुस उक हिंग हत्‍त कि आव अशदोद नगर दा आन, अदिक यागासताका कैसरिया दा पोहचुसीदील, आगासताका नगर नगर खुशखबरी केळ्सतेला होदुन.
ACT 9:1 शाऊल जो ईगासताका प्रभु अन्द चेलागोळी धमकुसोद अदिक कोंद बुळोद धुन दा ईरोन, महायाजक उन हात्‍ती होदुन
ACT 9:2 अदिक आऊन से दमिश्क इन सभागृहगोळ दा हेसुर मा ई अभिप्राय इन चिट्ठी गोळी बेळदुन कि येन गंळ्स येन आर्त, यारी आव ई पंथ मा नोळ्यार आंदरी कटकु यरूशलेम तरूल.
ACT 9:3 लेकीन नळुत नळुत याग आव दमिश्क इन हात्‍ती पोहचुसदुन, रा अचानक आकाश टु आऊंद नाकु दी ज्योति चमकुस्त,
ACT 9:4 अदिक आव जमीन मा बिद्दुन अदिक ईद शब्द केळदुन, “हे शाऊल, हे शाऊल, नी नानी येती सतुसेत्या?”
ACT 9:5 शाऊल केळदुन, “हे प्रभु, नी याव हुय?” आव अंदुन, “ना यीशु हुईन, यारी नी सतुसेत्या.
ACT 9:6 लेकीन ईग यदकु नगर दा होग, अदिक जो नीनी माळोद आद अद नीन से अंदकु आदीत.”
ACT 9:7 जो मंळसागोळ आऊन सांगुळ ईरोर, आंदुर सट्ट ईतोदुर; यतिकी शब्द रा केळ बरतोगोद लेकीन याऊ कांळ्सतोगोन ईला.
ACT 9:8 आग शाऊल भूमी मा टु येद्दुन, लेकीन याग कण्णगोळी तेरदुन रा आऊक येनु कांळ्सीदील, अदिक आंदुर आऊन कय हुडुकु दमिश्क नगर दा ओतुर.
ACT 9:9 आव मुर दिन ताका नोळ सकिदील, अदिक ना तिंदुन अदिक ना कुळदुन.
ACT 9:10 दमिश्क दा हनन्याह हेसुर इन ऊंद चेला ईरोन, आऊन से प्रभु दर्शन दा अंदुन, “हे हनन्याह!” आव अंदुन, “प्रभु, ना हुईन.”
ACT 9:11 आग प्रभु आऊन से अंदुन, “यदकु आ गली दा होग जो ‘सरका’ कहलुसतद, अदिक यहूदा अन्द मान्ना दा शाऊल हेसुर इन ऊंद तरसुसवासी इक केळ; नोळ, आव प्रार्थना माळेत्यान,
ACT 9:12 अदिक आव हनन्याह हेसुर इन ऊंद मंळसा अक बुळ्क बर्त अदिक तान म्याकुच कय ईटतेला उदाहरण दा नोळदुन; ताकी दुबारा नोळ सकुल.”
ACT 9:13 हनन्याह उत्‍तर कोट्टुन, “हे प्रभु, ना ई मंळसा अन्द बारा दा हापाळ मुंदुर से केळीन कि ईव यरूशलेम दा नीन पवित्र लॉकुर सांगुळ धोळ्द-धोळ्द बुराईगोळ माळ्यान;
ACT 9:14 अदिक ईल भी ईऊक प्रधान याजकगोळ्द दी टु अधिकार सिक्याद कि जो लॉकुर नीन हेसुर ताकोमतार, आ सप्पा मुंदरी कटबुळ.”
ACT 9:15 लेकीन प्रभु आऊन से अंदुन, “नी होटोग; यतिकी आव रा गैरयहूदीगोळी अदिक राजागोळी अदिक इस्त्राएलीगोळ्द मुंद नान हेसुर प्रगट माळोर साटी नान नीवळुस्द पात्र हुन.
ACT 9:16 अदिक ना आऊक हेळाईन कि नान हेसुर इन साटी आऊक ह्यांग-ह्यांग दुख नेगोद बिद्दीत.”
ACT 9:17 आग हनन्याह यदकु आ मान्ना दा होदुन, अदिक आऊन मा तान कय ईटकु अंदुन, “हे वार्ट शाऊल, प्रभु, मतलब यीशु, जो आ हादी मा, याता हादी देल नी बंद्या नीनी कांळ्सीदुन, आवा नानी कळ्यान कि नीनी मात्‍त कण्णगोळ देल कांळ्सुल अदिक नी पवित्र आत्मा देल परिपुर्ण आगेगुल.”
ACT 9:18 अदिक तुरन्त आऊन कण्णगोळ दा टु छिलका घाई बित्‍त अदिक आव नोळली कुरतुन, अदिक यदकु बपतिस्मा ताकोंडुन;
ACT 9:19 बाक भोजन माळकु आऊक आऊंद ताकत वापस सिक्त. शाऊल हापाळ दिन ताका आ चेलागोळ्द सांगुळ ईत्‍तुन जो दमिश्क दा ईरोर.
ACT 9:20 अदिक आव तुरन्त यहूदी लॉकुर्द सभागृहगोळ दा यीशु उन प्रचार माळली कुरतुन कि आव परमेश्वर उन पार हुन.
ACT 9:21 सप्पा केळावाळेर चकित आगकु अनली कुरतुर, “येन ईव आवा मंळसा आल्लच जो यरूशलेम दा आंदरी जो यीशु उन उपासना माळावाळेर इक, नाश माळतोगोन; अदिक ईल भी इदुरसाटी बंदीदुन कि आंदरी कटकु प्रधान याजकगोळ्द हात्‍ती तरूल?”
ACT 9:22 लेकीन शाऊल मात्‍त ताकतवर आगतेला होदुन, अदिक ई मात इन प्रमाण कोट कोटकु कि मसीह ईवा हुन, दमिश्क इन ईरावाळेर यहूदीगोळी आश्चर्य चकित माळ्त ईत्‍तुन.
ACT 9:23 याग हापाळ दिन बितसेदव, रा यहूदीगोळ मिलुसकु आऊक कोंद बुळोद साजीश रचुसदुर.
ACT 9:24 लेकीन आंदुर्द साजीश शाऊल उक मालूम नळदोत. आंदुर रा आऊक कोन्नोर साटी ईळ्लक हागुल नगर इन फाटकगोळ मा तयार ईरतोगोर.
ACT 9:25 लेकीन ईळ्लकी आऊन चेलागोळ आऊक फुट्टी दा कुर्सदुर, अदिक दिवार इन ख्वादरा दा टु हिलगुकसकु ईळ्स बुटुर.
ACT 9:26 यरूशलेम दा पोहचुस्कु शाऊल चेलागोळ सांगुळ मिलुसोद कोशिश माळदुन; लेकीन सप्पा आऊन से अंजतोगोर, यतिकी आंदरी विश्वास ईला आगतोगोद, कि आव भी चेला हुन.
ACT 9:27 लेकीन बरनबास आऊक तान सांगुळ प्रेरितगोळ हात्‍ती ओतकु आंदरी हेळदुन कि ईव याता रीति देल हादी मा प्रभु उक नोळदुन, अदिक आव ईऊन से मातगोळी हेळदुन; बाक दमिश्क दा ईव ह्यांग हिम्मत देल यीशु उन हेसुर देल प्रचार माळदुन.
ACT 9:28 आव आंदुर सांगुळ यरूशलेम दा होग्त बर्त अदिक पुरा हिम्मत देल प्रभु उन हेसुर इन प्रचार माळली कुरतुन.
ACT 9:29 अदिक गैरयहूदी भाषा माताळावाळेर यहूदीगोळ्द सांगुळ मातचीत अदिक झगळा माळतोगोन; लेकीन आंदुर आऊक कोंद बुळोद कोशिश माळली कुरतुर.
ACT 9:30 ईद जान्सकु वार्टुर आऊक कैसरिया बंदरगाह दा तंदुर, अदिक तरसुस नगर इक कळु बुटुर.
ACT 9:31 ई प्रकार सप्पा यहूदिया, गलील, अदिक सामरीया दा मंडली अक शांती सिक्त, अदिक अदुर्द उन्नती आग्त ईत्‍त; अदिक अद प्रभु उन अंज्क अदिक पवित्र आत्मा अन्द शांती दा नळुत अदिक वाळुस्त ईत्‍त.
ACT 9:32 बाक हिंग आत कि पतरस हर जागा टेटाळतेला, परमेश्वर उन पवित्र लॉकुर हात्‍ती भी पोहचुसदुन जो लुद्दा नगर दा ईरतोगोर.
ACT 9:33 अल आऊक एनियास हेसुर इन लकवा अन्द ऊंद रोगी मंळसा सिकदुन, जो येठ्ठ वर्ष टु व्हर्स मा बिदकु ईरोन.
ACT 9:34 पतरस आऊन से अंदुन, “हे एनियास! यीशु मसीह नीनी चंगा माळतान. येळ, तान हासक्या नेगु.” आग आव तुरन्त यदकु निदुरदुन.
ACT 9:35 आग लुद्दा अदिक शारोन इन सप्पा ईरावाळेर आऊक नोळकु प्रभु उन दी तिर्गदुर.
ACT 9:36 याफा दा तबीता गैरयहूदी दा दोरकास मतलब हिरण हेसुर इनोर ऊंद विश्वासिनी ईरतोगोर. आक हापाळ सा वळ्लेव क्याल्सा अदिक दान माळतोगोर.
ACT 9:37 अवा दिनगोळ दा आक बिमार आगकु सोतोदुर; अदिक आंदुर आकिन मय तोळ्सकु म्याकुच इन कमरा दा ईट बुटुर.
ACT 9:38 इदुरसाटी कि लुद्दा याफा अन हात्‍ती ईरोद, चेलागोळ ईद केळकु कि पतरस अल आन, येढ्ढ मंळसा कळुकु आऊन से विनती माळदुर, “नाम हाती बरोर साटी देर माळबाळ.”
ACT 9:39 आग पतरस यदकु आंदुर सांगुळ आगेदुन, अदिक याग आव पोहचुसदुन रा आंदुर आऊक आ अटारी म्याकुच मा ओतुर. सप्पा रांड्यागितेर वर्लतेला आऊन हात्‍ती बंदकु निदुरदुर, अदिक जो कुळता गोळ अदिक कपळागोळ दोरकास याग आक जित्‍ता ईरोर आंदुर सांगुळ ईरतेला माळीदुर, तोर्सली कुरतुर.
ACT 9:40 आग पतरस सप्पा मुंदरी व्हार्या माळ बुटुन, अदिक ट्वांगरा टेक्सकु प्रार्थना माळदुन अदिक लाश इन दी तिर्गकु नोळदुन अदिक अंदुन, “हे तबीता, येळ.” आग आक तान कण्णगोळी तेरदुर; अदिक पतरस उक नोळकु यदकु कुरतुर.
ACT 9:41 आव कय कोटकु आकी नेगदुन, अदिक परमेश्वर उन पवित्र लॉकुर अदिक रांड्यागितेर इक कारूकु आकी जित्‍ता तोर्स बुटुन.
ACT 9:42 ईद मात सप्पा याफा दा फैलुसेत; अदिक हापाळ सा लॉकुर प्रभु मा विश्वास माळदुर.
ACT 9:43 अदिक पतरस याफा दा शमौन हेसुर इन यावारा तोगुल इन धंदा माळावाळा अन्द मान्या हापाळ दिन ताका ईत्‍तुन.
ACT 10:1 कैसरिया दा कुरनेलियुस हेसुर इन ऊंद मंळसा ईरोन, जो इटालियन सेनादल इन अध्यक्ष ईरोन.
ACT 10:2 आव परमेश्वर उक अंजावाळा भक्त ईरोन, अदिक तान सप्पा घराना सांगुळ परमेश्वर उन आराधना माळतोगोन, अदिक यहूदी लॉकुरी हापाळ दान कोळतोगोन, अदिक रोज परमेश्वर उन से प्रार्थना माळतोगोन.
ACT 10:3 आव मदणी लगभग मुर मुरा अन हात्‍ती दर्शन दा स्पष्ट रूप देल नोळदुन कि परमेश्वर उन ऊंद स्वर्गदूत आऊंद हात्‍ती बुळ्क बंदकु अनतान, “हे कुरनेलियुस!”
ACT 10:4 कुरनेलियुस स्वर्गदूत उक ध्यान देल नोळदुन अदिक अंजकु अंदुन, “हे प्रभु, येन हुन?” स्वर्गदूत आऊन से अंदुन, “नीन प्रार्थनागोळ अदिक नीन दान न्याय इन क्याल्सा हिसाब कोळोर साटी परमेश्वर उन मुंद पोहचुस्याव;
ACT 10:5 अदिक ईग याफा दा मंळसा कळुकु शमौन उक, जो पतरस कहलुस्तान, कार्स कोमी.
ACT 10:6 आव शमौन हेसुर इनव मंळसा जो तोगुल इन धंदा माळतान आऊन मान्या पतरस पाऊना आन, यार्द मान्ना समुद्र अन्द किनारा मा आद.”
ACT 10:7 याग आव स्वर्गदूत याव आऊन से मातगोळी हेळीदुन होटोदुन, रा आव येढ्ढ सेवक, जो आऊन हात्‍ती मौजुद ईरतोगोर आंदुर दा टु ऊंद भक्त सिपाही इक कारदुन,
ACT 10:8 अदिक आंदरी सप्पा मातगोळी हेळकु याफा नगर इक कळुदुन.
ACT 10:9 दुसरा दिशी याग आंदुर नळुत नळुत याफा नगर इन हात्‍ती पोहचुसदुर, रा मदणी इन हात्‍ती पतरस छत मा प्रार्थना माळली येरदुन.
ACT 10:10 आऊक हसु हत अदिक येनारा तिनोद चाहासोन, लेकीन याग ऊम्मोद बनसोद आग अच आऊक दर्शन आत;
ACT 10:11 अदिक आव नोळदुन, कि आकाश खुलसेत; अदिक ऊंद पात्र धोळ्द चादर इन घाई नाकु क्वाना टु लटकुसतेला, पृथ्वी इन दी ईळेत्याद.
ACT 10:12 आ चादर दा पृथ्वी इन सप्पा प्रकार इन नाक कालवाळा पशु अदिक रेंगसावाळा जन्तु अदिक आकाश इन पक्षी ईरव.
ACT 10:13 आऊक ऊंद हिंग शब्द केळ बत्‍त, “हे पतरस येळ, कोन्न अदिक तीन.”
ACT 10:14 लेकीन पतरस अंदुन, “ईला प्रभु, यागलु ईला; यतिकी ना यागलु यातोदु अपवित्र या अशुध्द वस्तु तंदिदील.”
ACT 10:15 बाक दुसरा घन आऊक शब्द केळ बत्‍त, “जो येनारा परमेश्वर शुद्ध ठहरूस्यान, अदरी नी अशुध्द मान्सबाळ.”
ACT 10:16 मुर घन हिंग अच आत; अदिक तुरन्त अद चादर आकाश मा नेगुकु आगेत.
ACT 10:17 याग पतरस तान मन दा दुविधा दा ईरोन, कि ईद दर्शन जो ना नोळदीन अद येन आग सकतद, रा नोळी, आ मंळसागोळ यारी कुरनेलियुस कळीदुन, शमौन उन मान्ना अन्द पता हचकु दरवाजा मा बंदकु निदुरदुर,
ACT 10:18 अदिक कारूकु केळली कुरतुर, “येन शमौन जो पतरस कहलुस्तान, ईवा पाऊना हुन?”
ACT 10:19 पतरस रा आ दर्शन मा सोचतेला अच ईरोन, कि आत्मा आऊन से अंदुन, “नोळ, मुर मंळसा नीन खोज दा आर.
ACT 10:20 इदुरसाटी यदकु ल्यालमा होग, अदिक बिना संकोच देल आंदुर सांगुळ आगेग; यतिकी ना अच आंदरी कळीन.”
ACT 10:21 आग पतरस ईळुकु आ मंळसागोळ से अंदुन, “नोळी, यार्द खोज नीव माळेतीर, आव ना अच हुईन. नीम्द बरोद येन कारण आद?”
ACT 10:22 आंदुर अंदुर, “कुरनेलियुस सूबेदार नामी कळ्यान जो न्यायी अदिक परमेश्वर उन उपासना माळावाळा अदिक सप्पा यहूदी लॉकुर दा मानवाईक मंळसा आन, आऊक ऊंद परमेश्वर उन पवित्र स्वर्गदूत से ईद निर्देश सिक्याद कि नीनी तान मान्या कारूकु नीन से वचन केळुल.”
ACT 10:23 आग पतरस आंदरी बुळ्क कारूकु आंदुर्द पाऊनचार माळदुन. दुसरा दिशी आव आंदुर सांगुळ होदुन, अदिक याफा अन्द वार्टुर दा टु येनारा आऊन सांगुळ आगेदुर.
ACT 10:24 दुसरा दिशी आंदुर कैसरिया पोहचुसदुर, अदिक कुरनेलियुस तान परिवार अदिक हात्‍तीगोळोर संगीगोळी जमा माळकु आंदुर्द हादी कायोन.
ACT 10:25 याग पतरस बुळ्क बरोन, रा कुरनेलियुस आऊन से भेंट माळदुन, अदिक आऊन कालगोळ मा बिदकु आऊक प्रणाम माळदुन;
ACT 10:26 लेकीन पतरस आऊक नेगुकु अंदुन, “निदुर, ना भी रा सिर्फ मंळसा हुईन.”
ACT 10:27 अदिक पतरस कुरनेलियुस उन सांगुळ मातचीत माळतेला बुळ्क होदुन, यल आव हापाळ सा लॉकुरी जमा नोळदुन.
ACT 10:28 आंदुर से अंदुन, “नीव जान्सतीर कि गैरयहूदी अन्द संगत माळोद या आऊन मान्या होगोद यहूदीगोळ इन साटी अन्याय आद, लेकीन परमेश्वर नानी हेळदुन कि यावारा मंळसा अक अपवित्र या अशुध्द अनबाळेत.
ACT 10:29 इदुरसाटी ना याग कारूकु आदीन रा बिना येनारा माताळोद होटबंदीन. ईग ना केळतीन कि नानी याता क्याल्सा अन्द साटी कारूकु आग्याद?”
ACT 10:30 कुरनेलियुस अंदुन, “ईदा घळी टु पुरा नाक दिन पयले, ना तान मान्या मदणी इन मुर मुरा अन लगभग प्रार्थना माळीन; रा नोळी, अचानक ऊंद मंळसा चमकीला कपळा हाक्‍कु, नान मुंद बंदकु निदुरदुन
ACT 10:31 अदिक अनली कुरतुन, ‘हे कुरनेलियुस, नीन प्रार्थना केळकु आगेग्याद अदिक नीन दान न्याय इन स्यावा परमेश्वर उन मुंद याद माळकु आग्याव.
ACT 10:32 इदुरसाटी यारीकारा याफा कळुकु शमौन उक जो पतरस कहलुस्तान, कारू. आव समुद्र अन्द किनारा मा शमौन जो तोगुल इन धंदा माळतान अन्द मान्या पाऊना आन.’
ACT 10:33 आग ना तुरन्त नीन हात्‍ती लॉकुरी कळुदीन, अदिक नी भला माळ्द जो होटबंद. ईग नाव सप्पा ईल परमेश्वर उन मुंद आयेव, ताकी जो येनारा परमेश्वर नीन से माताळोर साटी अंदान अदरी केळेव.”
ACT 10:34 आग पतरस अंदुन, “ईग नानी सही दा पता नळुत कि परमेश्वर यारदु पक्षपात माळालुन,
ACT 10:35 लेकीन हर राष्ट्र अन्द लॉकुर दा जो आऊन से अंजतार अदिक न्याय इन क्याल्सा माळतार, आंदुर आऊक भाऊस्तार.
ACT 10:36 अद वचन नीव जान्सतीर, जो वचन आव इस्त्राएलगोळ हात्‍ती कळुदुन, याग आव यीशु मसीह अन्द द्वारा जो सप्पा मुंदुर प्रभु आन शांती इन खुशखबरी केळ्सदुन,
ACT 10:37 नीव आ महान घटना अक जान्सतीर, जो इस्त्राएल इन जागा मा आगीत, गलील दा सुरूवात आगकु यूहन्ना अन द्वारा बपतिस्मा कोट्टुर बाद्दा टु यदुर्द प्रचार माळकु आगीत:
ACT 10:38 नीव नासरी यीशु उन बारा दा जान्सायदीर कि ह्यांग परमेश्वर आऊन मा पवित्र आत्मा अदिक सामर्थ्य पलटुसीदुन, अदिक यीशु वळ्लेव क्याल्सा माळतेला अदिक आ सप्पा मुंदरी जो शैतान उन वश दा ईरोर चंगा माळतेला नाकु दी आव ह्यांग ओयाळोन, यतिकी परमेश्वर आऊन सांगुळ ईरोन.
ACT 10:39 नाव आ सप्पा क्याल्सागोळ्द गवाह आयेव; जो आव इस्त्राएल इन भूमी मा अदिक यरूशलेम दा भी माळदुन, अदिक आंदुर आऊक क्रूस मा येर्सकु कोंद बुटुर.
ACT 10:40 लेकीन आऊक परमेश्वर तिसरा दिशी मात्‍त जित्‍ता माळदुन, अदिक प्रगट भी माळ बुटुन;
ACT 10:41 सप्पा लॉकुर मा ईला लेकीन आ गवाहगोळ मा यारी परमेश्वर पयले टु निवळुस कोंडीदुन, मतलब नाम मा यार आऊन सोत्‍तुर दा टु जित्‍ता आगदुर बाद्दा आऊन सांगुळ तिनदेव कुळदेव;
ACT 10:42 अदिक आव नामी आग्या कोट्टुन कि लॉकुर दा प्रचार माळी अदिक गवाही कोळी, कि ईव आवा हुन यारी परमेश्वर जीवित अदिक सोतकु लॉकुर्द न्यायी ठहरूस्यान.
ACT 10:43 आऊंद सप्पा भविष्यवक्ता गवाही कोळतार कि जो यावारा आऊन मा विश्वास माळ्यान, आऊक आऊंद हेसुर इन ताकत इन द्वारा पापगोळ्द माफ सिक्‍कीत.”
ACT 10:44 पतरस ई मातगोळी अनतेला अच ईरोन कि पवित्र आत्मा वचन इन सप्पा केळावाळेर मा ईळुकु बत्‍त.
ACT 10:45 अदिक यास यहूदी विश्वासी जो याफा टु पतरस उन सांगुळ बंदीदुर, आंदुर सप्पा चकित आदुर कि गैरयहूदीगोळ मा भी पवित्र आत्मा अन्द दान पलटुस्कु आग्याद.
ACT 10:46 यतिकी आंदुर आंदरी अलग अलग भाषा माताळ्त अदिक परमेश्वर उन बळाई माळ्त केळदुर. इदुर मा पतरस अंदुन,
ACT 10:47 “येन यावारा इंदरी नीर देल बपतिस्मा ताकोमली रोक्स सकतान, यारी नाम घाई पवित्र आत्मा सिक्याद?”
ACT 10:48 अदिक आव आग्या कोट्टुन कि आंदरी यीशु मसीह अन्द हेसुर देल बपतिस्मा कोटकु आगुल, आग आंदुर पतरस से विनती माळदुर कि आव येनारा दिन अदिक आंदुर सांगुळ ईरूल.
ACT 11:1 बाक प्रेरितगोळ अदिक विश्वासी वार्टुर जो यहूदिया दा ईरोर केळदुर कि गैरयहूदीगोळ भी परमेश्वर उन वचन मान्स कोंडार.
ACT 11:2 इदुरसाटी याग पतरस यरूशलेम दा बंदुन, रा यहूदी विश्वासी खतना माळ्द लॉकुर आऊन से झगळा माळली कुरतुर,
ACT 11:3 “नी खतना ईला माळ्द गैरयहूदी लॉकुर मान्या होगकु आंदुर सांगुळ तिंद.”
ACT 11:4 आग पतरस आंदरी सुरूवात टु येन येन आत अद सप्पा हेळदुन:
ACT 11:5 “ना याफा नगर दा प्रार्थना माळीन, आग ऊंद दर्शन नोळदीन कि ऊंद वस्तु, धोळ्द चादर इन घाई नाकु क्वाना टु लटकुस्द, आकाश टु ईळुकु नान हात्‍ती बत्‍त.
ACT 11:6 याग ना अदुर मा ध्यान माळदीन, रा अदुर्दा पृथ्वी इन नाक कालवाळा पालतु पशुगोळ अदिक वनपशु अदिक रेंगसावाळा जन्तु अदिक आकाश इन पक्षी नोळदीन;
ACT 11:7 अदिक ईद शब्द भी केळदीन, ‘हे पतरस येळ, कोन्न अदिक तिन!’
ACT 11:8 लेकीन ना अंदीन, ‘ईला प्रभु, ईला; यतिकी यातोदु अपवित्र या अशुध्द भोजन नान बाय दा यागलु होगीदील.’
ACT 11:9 इदुर उत्‍तर दा आकाश टु दुसरा घन आवाज आत, ‘जो येनारा परमेश्वर शुद्ध ठहरूस्यान, अदरी अशुध्द अनबाळ.’
ACT 11:10 मुर घन हांगा आत; आग सप्पा येनारा बाक आकाश मा जेडुकु आगेत.
ACT 11:11 अदिक नोळी, तुरन्त मुर मंळसा जो कैसरिया टु नान हात्‍ती कळुकु आगीदुर, आ मान्या यल नाव ईरेव, बंदकु निदुरदुर.
ACT 11:12 आग आत्मा नान से आंदुर सांगुळ बिना संकोच देल आगली हेळ्त, अदिक याफा दा टु आर विश्वासी वार्टुर भी नान सांगुळ कैसरिया बंदुर; अदिक नाव कुरनेलियुस उन मान्या होदेव.
ACT 11:13 कुरनेलियुस नामी हेळदुन, कि आव ऊंद स्वर्गदूत उक तान मान्या निदुरकु नोळदुन, याव आऊन से अंदुन, ‘याफा दा यातारा मंळसा अक कळुकु शमौन उक जो पतरस कहलुस्तान, कारसुस बुळ.
ACT 11:14 आव नीम से हिंग मातगोळी अंदान, यार द्वारा नीनी अदिक अपमान सप्पा परिवार इक उद्धार सिक्‍कीत.’
ACT 11:15 याग ना मातगोळी हेळली कुरतीन, रा पवित्र आत्मा आंदुर मा अदा रीति देल ईळुत याता रीति देल सुरूवात दा नाम मा ईळदीत.
ACT 11:16 आग नानी प्रभु उन अद वचन याद बत्‍त; जो आव अंदिदुन, ‘बपतिस्मा कोळावाळा यूहन्ना रा नीर देल बपतिस्मा कोट्टुन, लेकीन नीमी पवित्र आत्मा देल बपतिस्मा सिक्‍कीत.’
ACT 11:17 इदुरसाटी याग परमेश्वर गैरयहूदीगोळी भी अदा दान कोट्टुन, जो नामी प्रभु यीशु मसीह मा विश्वास माळदुर देल सिक्‍कीत; रा ना याव ईरीन जो परमेश्वर उक रोक्स सकीन?”
ACT 11:18 ईद केळकु आंदुर अपमान माळोद बंद माळकु, अदिक परमेश्वर उन बळाई माळकु अनली कुरतुर, “आग रा परमेश्वर गैरयहूदीगोळी भी जीवन इन साटी मन तिर्गुसोद दान कोटान.”
ACT 11:19 विश्वासीगोळ दा टु थ्वाळासा लॉकुर आ दुख इन मारा देल जो स्तिफनुस उन मृत्यु उन समय दा बिदीत, तितर बितर आगेगीदुर, आंदुर वयाळ्त-वयाळ्त फिनीकी अदिक साइप्रस अदिक अन्ताकिया दा बंदुर; लेकीन यहूदीगोळी बिटकु यारीकु वचन ईला केळ्सतोगोर.
ACT 11:20 लेकीन आंदुर दा टु थ्वाळासा साइप्रस निवासी अदिक कुरेनी ईरोर, जो अन्ताकिया दा बंदकु गैरयहूदीगोळी भी प्रभु यीशु उन खुशखबरी इन मातगोळी केळ्सली कुरतुर.
ACT 11:21 प्रभु उन सामर्थ्य आंदुर सांगुळ ईरोद, अदिक हापाळ लॉकुर विश्वास माळकु प्रभु उन दी तिर्गदुर.
ACT 11:22 याग आंदुर चर्चा यरूशलेम इन मंडली अन्द केळदुर दा बत्‍त, रा आंदुर बरनबास उक अन्ताकिया कळुदुर.
ACT 11:23 याग आव अल पोहचुसदुन अदिक नोळदुन कि परमेश्वर लॉकुरी ह्यांग आशिषीत माळ्यान, अदिक आव खुश आदुन अदिक आंदुर से विनती माळदुन कि तान सप्पा मन इन सांगुळ पुरा सच्चाई देल अदिक विश्वासयोग्य प्रभु उन सांगुळ बन्सकु ईरी.
ACT 11:24 बरनबास ऊंद वळ्लेव मंळसा ईरोन, अदिक पवित्र आत्मा अदिक विश्वास देल परिपुर्ण ईरोन; अदिक अन्य हापाळ सा लॉकुर प्रभु दा बंदकु मिलुसदुर.
ACT 11:25 आग आव शाऊल उक नोळोर साटी तरसुस नगर इक होटोदुन.
ACT 11:26 याग आव आऊन से मिलुसदुन रा आऊक अन्ताकिया तंदुन; अदिक हिंग आत कि आंदुर ऊंद वर्ष ताका मंडली अन्द सांगुळ सिकोर अदिक हापाळ सा लॉकुरी उपदेश कोळतेला ईत्‍तुर; अदिक सब से पयले अन्ताकिया दा ईदा चेलागोळी मसीह अंदकु आत.
ACT 11:27 अवा दिनगोळ दा थ्वाळासा भविष्यवक्ता यरूशलेम टु अन्ताकिया बंदुर.
ACT 11:28 आंदुर दा टु अगबुस हेसुर इन ऊंद मंळसा निदुरकु आत्मा अन्द अगुवाई दा भविष्यवाणी माळदुन कि सप्पा दुनिया दा धोळ्द अकाल बिद्दीत. अद अकाल क्लौदियुस उन समय दा बित्‍त.
ACT 11:29 आग चेलागोळ निर्णय माळदुर कि हर ऊंद तान तान पूंजी इन अनुसार यहूदिया दा ईरावाळेर विश्वासी वार्टुर मदत अन्द साटी येनारा कळुल.
ACT 11:30 आंदुर हांगा माळदुर; अदिक बरनबास अदिक शाऊल उन कय मंडली अन्द स्याणागोळ हात्‍ती थ्वाळासा पैस्या कळुदुर.
ACT 12:1 आ समय हेरोदेस राजा मंडली अन्द थ्वाळासा सदस्यगोळी सतुसोद सुरूवात माळदुन.
ACT 12:2 आव यूहन्ना अन्द वार्ट याकूब उक तलवार देल कोन्सुस बुट्टुन.
ACT 12:3 याग आव नोळदुन कि यहूदी लॉकुर आऊन से खुश आगतार, रा आव पतरस उक भी हुडुकोंडुन. अव दिन अखमीरी रोट्टी इन हाब्ब ईनव दिन ईरव.
ACT 12:4 आव पतरस उक हुडुकु बंदीगृह दा हाकदुन, अदिक रखवाली माळोर साटी नाक नाक सिपाहीगोळ्द नाक समुह माळीदुन; ईद विचार देल कि फसह अन बाद्दा आऊक लॉकुर मुंद तरूल.
ACT 12:5 बंदीगृह दा पतरस बंद ईरोन; लेकीन मंडली आऊन साटी मन हचकु परमेश्वर से प्रार्थना माळोद.
ACT 12:6 याग हेरोदेस आऊक लॉकुर मुंद तरली ईरोन, अदा ईळ्लकी पतरस येढ्ढ शंकलीगोळ देल कटकु येढ्ढ सिपाहीगोळ्द बीच दा मिंगोन; अदिक पहरेदारगोळ दरवाजा मा बंदीगृह अन्द रखवाली माळोर.
ACT 12:7 रा नोळी, प्रभु उन ऊंद स्वर्गदूत बंदकु निदुरदुन अदिक आ कोठरी दा ज्योति चमकुस्त, अदिक आव पतरस उन पासळी मा कय बळकु आऊक येद्दुन अदिक अंदुन, “येळ, जल्दी माळ.” अदिक आऊन कयगोळ दा टु शंकलीगोळ बिटकु बिदोदव.
ACT 12:8 आग स्वर्गदूत आऊन से अंदुन, “नेळु कट, अदिक तान केरू हाक्‍क कोम.” आव हांगा माळदुन. बाक स्वर्गदूत आऊन से अंदुन, “तान कपळा हाक्‍कु नान हींद आगेग.”
ACT 12:9 पतरस होटकु आऊन हींद नळुत नळुत बंदीगृह टु व्हार्या बंदुन; लेकीन ईद ईला जानसोन कि जो येनारा स्वर्गदूत माळेत्यान अद सही आद, लेकीन ईद सम्सदुन कि ना दर्शन नोळेतीन.
ACT 12:10 आग आंदुर पयला अदिक दुसरा पहरा टु होटकु आ लोवा अन्द फाटक मा पोहचुसदुर, जो नगर दी हादी होगतद. अद फाटक आंदुर साटी तान ताना खुलसेत, अदिक आंदुर होटकु ऊंद अच गली टु आगकु ऊंद हादी मा बंदुर, अदिक तुरन्त अच स्वर्गदूत आऊक बिटकु होटोदुन.
ACT 12:11 आग पतरस सावधान आगकु अंदुन, “ईग ना जान्स कोंडीन कि प्रभु तान स्वर्गदूत कळुकु नानी हेरोदेस उन कय देल अदिक यहूदीगोळ्द सप्पा आशा टु बिळ्स बुट्टुन.”
ACT 12:12 ईद जान्सकु पतरस आ यूहन्ना अन्द मोय मरियम इन मान्या बंदुन, जो मरकुस कहलुसतान. अल हापाळ सा लॉकुर जमा आगकु प्रार्थना माळोर.
ACT 12:13 याग आव फाटक इन खिळकी ठोक्सदुन, रा रूदे हेसुर इन ऊंद दासी दरवाजा तेरोर साटी बंदुर.
ACT 12:14 पतरस उन शब्द केळकु आक खुशी अन मारा देल फाटक तेर्दिदील, लेकीन ओळकु बुळ्क होदुर अदिक हेळदुर कि पतरस दरवाजा मा निदुरकु आन.
ACT 12:15 आंदुर आकिन से अंदुर, “नी यर्र आय.” लेकीन आक हिम्मत माळकु अंदुर कि हिंग अच आद, “आग आंदुर अंदुर आऊन स्वर्गदूत आगीदान.”
ACT 12:16 लेकीन पतरस ठोक्सतेला अच ईत्‍तुन: आखरी दा आंदुर खिळकी खोल्सदुर, अदिक आऊक नोळकु चकित ईतोदुर.
ACT 12:17 आग आव आंदरी कय देल इशारा माळदुन कि चुप ईरूल; अदिक आंदरी हेळदुन कि प्रभु याता रीति देल आऊक बंदीगृह दा टु तेगुकु तंदान. बाक अंदुन, “याकूब अदिक बाकी विश्वासी वार्टुरी ईद मात हेळ बुळेतीर.” आग होटकु येल्यारा दुसरा जागा अक होटोदुन.
ACT 12:18 हुंजकुका अच सिपाहीगोळ दा बळा हलचल मचुसेत कि पतरस उन येन आत.
ACT 12:19 याग हेरोदेस सिपाहीगोळ से आऊन खोज माळोद आदेश कोट्टुन लेकीन पतरस सिक्‍कीदील, रा पहरेदारगोळ जाँच माळकु आग्या कोट्टुन कि आंदरी कोंदकु आगुल: अदिक आव यहूदिया अक बिटकु कैसरिया दा होगकु ईरली कुरतुन अदिक अल आव थ्वाळासा समय बितुसदुन.
ACT 12:20 हेरोदेस सूर अदिक सैदा अन्द लॉकुर से हापाळ सिट्ट दा ईरोन. इदुरसाटी आंदुर ऊंद समुह माळकु राजा से मिलुसली बंदुर, पयले आंदुर बलास्तुस उक जो राजा अन्द ऊंद सेवक ईरोन, समझुस्कु मेल माळोद चाहासदुर; यतिकी हेरोदेस राजा अन्द द्याश देल आंदुर्द द्याश इन पालन पोषण आगतोगोद.
ACT 12:21 ठहरूस्द दिशी हेरोदेस राजा अन कपळा हाक्‍कु सिंहासन मा कुरतुन, अदिक आंदरी भाषण कोळली कुरतुन.
ACT 12:22 आग लॉकुर चिल्ळास कुरतुर, “ईद रा मंळसा अन्द ईला परमेश्वर उन आवाज हुन.”
ACT 12:23 अदा घळी प्रभु उन ऊंद स्वर्गदूत तुरन्त आऊक बळदुन, यतिकी आव परमेश्वर उक महिमा कोटीदील; अदिक आव किळा हतकु सोतोदुन अदिक अव किळागोळ आऊक तिनली हतदव.
ACT 12:24 लेकीन परमेश्वर उन वचन लगातार वाळुस्त अदिक फैलुसतेला होत.
ACT 12:25 याग बरनबास अदिक शाऊल यरूशलेम दा तान क्याल्सा पुरा माळकु यूहन्ना अक जो मरकुस कहलुस्तान, सांगुळ हुडुकु अन्ताकिया वापस बंदुर.
ACT 13:1 अन्ताकिया अन्द मंडली दा कई भविष्यवक्ता अदिक गुरु ईरोर; जसा: बरनबास, शमौन जो (नीगर) करेव कहलुसतान; अदिक लूकियुस कुरेनी, अदिक मनाहेम जो हेरोदेस शासक उन सांगुळ दा धोड्डेर आदुन, अदिक शाऊल.
ACT 13:2 याग आंदुर उपास सहित प्रभु उन स्यावा माळोर, रा पवित्र आत्मा आंदुर से अन्त, “नान साटी बरनबास अदिक शाऊल उक आ क्याल्सा अन्द साटी अलग माळी यार साटी ना आंदरी कार्सीन.”
ACT 13:3 आग आंदुर उपास अदिक प्रार्थना माळकु अदिक आंदुर मा कय ईटकु आंदरी सार माळदुर.
ACT 13:4 इदुरसाटी बरनबास अदिक शाऊल पवित्र आत्मा अन कळुद सिलूकिया अक होदुर; अदिक अल टु जहाज मा कुर्तकु साइप्रस इक होदुर;
ACT 13:5 अदिक सलमीस दा पोहचुस्कु, परमेश्वर उन वचन यहूदीगोळ्द सभागृहगोळ दा केळ्सदुर. यूहन्ना जो मरकुस कहलुसोन, मदत माळावाळा अन रूप दा आंदुर सांगुळ ईरोन.
ACT 13:6 आंदुर आ सप्पा टापू दा आगतेला पाफुस ताका पोहचुसदुर. अल आंदरी बार-यीशु हेसुर इन ऊंद यहूदी जादूगर अदिक ख्वाटा भविष्यवक्ता सिकदुन.
ACT 13:7 आव शासक सिरगियुस पौलुस उन संगी ईरोन, जो बुद्धिमान मंळसा ईरोन. आव बरनबास अदिक शाऊल उक तान हात्‍ती कारूकु परमेश्वर उन वचन केळोद चाहासदुन.
ACT 13:8 लेकीन इलीमास जादूगर, यतिकी गैरयहूदीगोळ दा ईदा आऊन हेसुर इन मतलब आद, आंदुर विरोध माळकु शासक उक विश्वास माळोर से रोकसोद चाहासदुन.
ACT 13:9 आग शाऊल यार्द हेसुर पौलुस भी आद, पवित्र आत्मा देल परिपुर्ण आगकु इलीमास जादुगर उन दी टकटकी हचकु नोळदुन अदिक अंदुन,
ACT 13:10 “हे सप्पा कपट अदिक सप्पा चतुराई देल तुमकु शैतान उन औलाद, सप्पा न्यायीपन अन्द दुश्मन, येन नी प्रभु उन सरका हादीगोळी वाकळा माळोद बिळतीदील?
ACT 13:11 ईग नोळ, प्रभु उन कय नीन विरोध दा येदोग्याद; अदिक नी थ्वाळासा समय ताका कुढ्ढ ईत्या अदिक सुर्य अन्द उजुळ नोळतीदिल.” आग तुरन्त धुंधरापन अदिक अंधार आऊन कण्णगोळ मा छासेत, अदिक आव ईत्‍त आत्‍त ताळु कुरतुन ताकी यावारा आऊन कय हुडुकु आऊक संभाळसुल.
ACT 13:12 आग शासक जो येनारा अल आगीत अदरी नोळकु अदिक प्रभु उन उपदेश देल चकित आगकु विश्वास माळदुन.
ACT 13:13 पौलुस अदिक आऊन संगी पाफुस टु जहाज इन द्वारा पंफूलिया प्रदेश इन पिरगा नगर दा बंदुर; अदिक यूहन्ना आंदरी बिटकु यरूशलेम इक होटोदुन.
ACT 13:14 पिरगा नगर टु मुंद वाळुसकु आंदुर पिसिदिया अन्द अन्ताकिया दा पोहचुसदुर; अदिक आराम इन दिन यहूदी लॉकुर्द सभागृह दा होगकु कुरतोदुर.
ACT 13:15 मूसा अन्द व्यवस्था अदिक भविष्यवक्तागोळ किताब देल वाचुसदुर बाद्दा यहूदी लॉकुर्द सभागृह अन्द अधिकारीगोळ आंदुर हात्‍ती बातणी कळुदुर, “हे वार्टुरा अदिक आकतींगेरा, नाव चाहासतेव कि लॉकुरी प्रोत्साहित माळोर साटी नीम मन दा येनारा मात आद रा अनी.”
ACT 13:16 आग पौलुस निदुरकु अदिक कय देल इशारा माळकु अंदुन, “हे इस्त्राएलगोळा, अदिक सप्पा गैरयहूदीगोळा जो परमेश्वर उन आराधना माळतीर, केळी:
ACT 13:17 ई इस्त्राएली लॉकुर्द परमेश्वर नाम आप्प दादागोळी नीवळुस कोंडीदुन, अदिक याग ई लॉकुर मिस्त्र द्याश दा परदेशी आगकु ईरतोगोर, रा आंदुर्द उन्नती माळदुन; अदिक धोळ्द सामर्थ्य देल आंदरी इजिप्त टु तेगुकु तंदुन.
ACT 13:18 आव येनारा चालीस वर्ष ताका रेगिस्तान दा आंदुर्द सहन माळतेला ईत्‍तुन,
ACT 13:19 अदिक कनान द्याश दा येळ राष्ट्रगोळ्द नाश माळकु परमेश्वर अद पृथ्वी इस्त्राएल इन लॉकुरी अत्‍तरधिकारी इन रूप दा कोट बुट्टुन.
ACT 13:20 इदुर बाद्दा आव शमूएल भविष्यवक्ता ताका आंदुर दा न्यायी ठहरूसदुन.
ACT 13:21 अदुर बाद्दा आंदुर ऊंद राजा बेळदुर: आग परमेश्वर चालीस वर्ष इन साटी बिन्यामीन इन जाती दा टु ऊंद मंळसा; मतलब कीश उन पार शाऊल उक आंदुर मा राजा ठहरूसदुन.
ACT 13:22 बाक आऊक अलग माळकु दाऊद उक आंदुर राजा माळदुन; यार बारा दा आव गवाही कोट्टुन, ‘नानी ऊंद मंळसा, यिशै उन पार दाऊद, नान मन इन अनुसार सिक्‍केदुन; आवा नांद सप्पा इच्छा पुरा माळ्यान.’
ACT 13:23 दाऊद उन वंश दा टु परमेश्वर तान वादा अन्द अनुसार इस्त्राएल इन हात्‍ती ऊंद उद्धारकर्ता, मतलब यीशु उक कळुदुन.
ACT 13:24 यीशु तान कार्यगोळ्द सुरूवात माळोर से पयले यूहन्ना सप्पा इस्त्राएलगोळ दा मन तिर्गुसोद प्रचार माळदुन अदिक बपतिस्मा माळदुन.
ACT 13:25 याग बपतिस्मा कोळावाळा यूहन्ना तांद स्यावा पुरा माळदुर मा ईरोन, रा आव अंदुन, ‘नीव नानी येन सम्सतीर? ना आव आल्लच यार हादी नीव कायेतीर. उलटा नोळी, नान बाद्दा ऊंद बरावाळा आन, आऊन कालगोळ केरू उन बंध भी ना खोल्सा लायक हैलेच.’
ACT 13:26 “हे इस्त्राएली वार्टुरा, नीव जो अब्राहम उन औलाद हुईर; अदिक सप्पा गैरयहूदी जो परमेश्वर उन आराधना माळतार, नीम हात्‍ती ई उद्धार इन वचन कळुकु आग्याद.
ACT 13:27 यतिकी यरूशलेम इन ईरावाळेर अदिक आंदुर अधिकारीगोळ ना उद्धारकर्ता अक अरतुर अदिक ना भविष्यवक्तागोळ्द अव मातगोळ जो हर ऊंद आराम इन दिन वाचुसकु आगतद आऊक सम्सत. अदिक यीशु उक दोषी ठहरूसदुर द्वारा भविष्यवक्तागोळ्द मातगोळी सही साबित माळ्द.
ACT 13:28 आंदरी कोंद बुळोद लायक येनु दोष आऊन दा सिक्‍कीदील, तरी भी पिलातुस से विनती माळदुर कि आव कोंदकु आगुल.
ACT 13:29 याग शास्त्र दा आऊन बारा दा लिख्सद सप्पा मातगोळ आंदुर पुरा माळदुर, रा आऊक क्रूस मा टु ईळ्सकु कब्र दा ईटदुर.”
ACT 13:30 लेकीन परमेश्वर आऊक सोत्‍तुर दा टु जित्‍ता माळदुन,
ACT 13:31 अदिक आव आंदरी जो आऊन सांगुळ गलील टु यरूशलेम बंदीदुर, हापाळ दिनगोळ ताका कांळ्सतेला ईत्‍तुन; इस्त्राएल लॉकुर्द मुंद ईग आंदुर अच आऊन गवाह आर.
ACT 13:32 नाव नीमी आ वादा अन्द बारा दा जो नाम आप्प दादागोळ से माळकु आगीत, ईद खुशखबरी केळ्सतेव,
ACT 13:33 कि परमेश्वर यीशु उक जित्‍ता माळकु, अदा वादा नाम औलाद इन साटी पुरा माळदुन; ह्यांग भजन संहिता दा भी लिख्सकु आद, नी नान पार हुय; ईंद ना अच नीनी पैदा माळीन.
ACT 13:34 अदिक परमेश्वर आऊक सोत्‍तुर दा टु जित्‍ता माळकु येब्सदुन ताकी सळुसोर साटी कब्र दा बिदकु ईला ईरूल, इदुरसाटी आव ईद अंदुन, ना नीनी पवित्र अदिक अटल आशीष कोळाईन जो ना दाऊद उन सांगुळ वादा माळीन.
ACT 13:35 इदुरसाटी आव भजन संहिता दा भी अंदान, नी तान विश्वासयोग्य सेवक उक कब्र दा सळुस गोळतीदील.
ACT 13:36 यतिकी दाऊद रा परमेश्वर उन इच्छा अन्द अनुसार तान समय दा स्यावा माळकु सोतोदुन, अदिक तान आप्प दादागोळ सांगुळ दा नळ्सकु आदुन, अदिक आऊन मय कब्र दा सळुसेत.
ACT 13:37 लेकीन यारी परमेश्वर सोत्‍तुर दा टु जित्‍ता माळदुन, आव सळुसीदील.
ACT 13:38 इदुरसाटी, हे नान इस्त्राएली संगीगोळा, नीव जान्स कोमी कि यीशु उन द्वारा पापगोळ्द माफ अन्द बातणी नीमी कोटकु आगतद;
ACT 13:39 अदिक याता मातगोळ दा नीव मूसा अन्द व्यवस्था अन्द द्वारा पापगोळ देल मुक्त आग सकालीर, अवा सप्पा दा हर ऊंद यीशु मा विश्वास माळावाळा पापगोळ देल मुक्त आगतान.
ACT 13:40 इदुरसाटी सावधान ईरी, हिंग आगबाळुल कि जो भविष्यवक्तागोळ किताब दा बंदाद, नीम मा भी अद घटुस बाळुल:
ACT 13:41 हे अपमान माळावाळेरा, नोळी, चकित आगी, अदिक सोतोगी; यतिकी ना नीम दिनगोळ दा ऊंद क्याल्सा माळतीन, हिंग क्याल्सा कि अगर यावारा नीम से आऊन बारा दा मातचीत माळुल, रा नीव यागलु विश्वास माळतीदील.
ACT 13:42 पौलुस अदिक बरनबास उन यहूदी सभागृह टु व्हार्या होळा समय लॉकुर आंदुर से विनती माळली कुरतुर कि अगला आराम इन दिन नामी ई मातगोळी बाक केळ्सकु आगुल.
ACT 13:43 याग सभा येदोत रा यहूदीगोळ अदिक गैरयहूदी मत दा बरावाळेर भक्तगोळ दा टु हापाळ सा पौलुस अदिक बरनबास इन हिंद आगेदुर; अदिक प्रेरितगोळ आंदुर से मातगोळी हेळकु प्रोत्साहित माळदुर कि परमेश्वर उन अनुग्रह दा जीवन बन्सकु ईटी.
ACT 13:44 अगला आराम इन दिन नगर इन सप्पा लॉकुर परमेश्वर उन वचन केळोर साटी जमा आगेदुर.
ACT 13:45 लेकीन यहूदी भीळ इक नोळकु जलन देल तुम्मेदुर, अदिक अपमान माळतेला पौलुस उन मातगोळ्द विरोध दा अपशब्द अनली कुरतुर.
ACT 13:46 आग पौलुस अदिक बरनबास निडर आगकु अंदुर, जरूरी ईरोद कि परमेश्वर उन वचन पयले नीमी केळ्सकु आगाईत; लेकीन याग नीव अदरी ठुकरूस बुळतीर, अदिक खुद इक अनन्त जीवन इन योग्य ठहरूसालीर, रा नोळी, नाव नीमी बिटकु गैरयहूदी लॉकुर दी तिर्गतेव.
ACT 13:47 यतिकी प्रभु नामी ईद आग्या कोटान, ना नीनी गैरयहूदीगोळ साटी ज्योति ठहरूसीन, ताकी पुरा संसार ऊळ्सकु आगुल.
ACT 13:48 ईद केळकु गैरयहूदीगोळ खुश आदुर, अदिक परमेश्वर उन वचन इन बळाई माळली कुरतुर; अदिक यास अनन्त जीवन इन साटी ठहरूसकु आगीदुर, आंदुर विश्वास माळदुर.
ACT 13:49 आग प्रभु उन वचन आ सप्पा द्याश दा फैलुसली कुर्त.
ACT 13:50 लेकीन यहूदीगोळ परमेश्वर उन आराधना माळावाळेर अदिक प्रसिद्ध गैरयहूदी आर्तेर इक अदिक नगर इन प्रमुख लॉकुरी उकसुसदुर, अदिक पौलुस अदिक बरनबास इन विरूद्ध उपद्रव माळसुसकु आंदरी तान सीमा दा टु तेग्द बुटुर.
ACT 13:51 आग प्रेरित आंदुर मुंद आंदुर विरोध दा तान कालगोळ धुळा झाळ्सकु इकुनियुम नगर इक होटोदुर.
ACT 13:52 अदिक अन्ताकिया नोर विश्वासी पुरा खुशी देल अदिक पवित्र आत्मा देल परिपुर्ण आगतेला होदुर.
ACT 14:1 इकुनियुम दा हिंग आत कि पौलुस अदिक बरनबास यहूदीगोळ्द सभागृहगोळ दा सांगुळल्या होदुर, अदिक ई प्रकार देल मातगोळी हेळदुर कि यहूदीगोळ अदिक गैरयहूदीगोळ येढ्ढु दा टु हापाळ मुंदुर विश्वास माळदुर.
ACT 14:2 लेकीन विश्वास ईला माळावाळेर यहूदीगोळ गैरयहूदी लॉकुर्द मन दा विश्वासी वार्टुर विरोध दा उकसुसदुर अदिक आंदुर मन दा कळवाहटपन पैदा माळ कोंडुर.
ACT 14:3 पौलुस अदिक बरनबास हापाळ दिन ताका अल ईत्‍तुर, अदिक प्रभु उन बारा दा निर्भयता देल प्रचार माळ्त ईत्‍तुर आंदुर्द द्वारा प्रभु अदभुत चिन्ह अदिक आश्चर्यगोळी माळसुसतेला तान अनुग्रह अन्द बातणी ईद पुरा सच्चाई देल आद इदरी प्रगट माळतेला ईत्‍तुन.
ACT 14:4 लेकीन नगर इन लॉकुर दा फूट बिदोत, इदुर देल यास रा यहूदीगोळ दी अदिक यास प्रेरितगोळ्द दी आगेदुर.
ACT 14:5 आग थ्वाळासा गैरयहूदी अदिक यहूदी तान अधिकारीगोळ सांगुळ मिलुसकु आंदुर सांगुळ बुरा व्यवहार माळली अदिक आंदुर मा कल्लगोळ भिळोद चाल नळदुर.
ACT 14:6 आग पौलुस अदिक बरनबास उक ई मात इन पता नळुत आग आंदुर लुकाउनिया अन्द लुस्त्रा अदिक दिरबे घाई नगरगोळ दा अदिक अदुर्द आसपास इन क्षेत्रगोळ दा ओळदुर.
ACT 14:7 अदिक आंदुर अल खुशखबरी केळ्सली कुरतुर.
ACT 14:8 लुस्त्रा दा ऊंद मंळसा कुर्तकु ईरोन, जो कालगोळ देल अपंग ईरोन. आव जनम टु अच लंगळा ईरोन अदिक यागलु नळु ईला सकोन.
ACT 14:9 आव पौलुस उक मातगोळी माळ्त केळोन. पौलुस आऊंद दी तार हचकु नोळदुन कि आऊक वळ्लेव आगोद विश्वास आद,
ACT 14:10 अदिक धोळ शब्द देल अंदुन, “तान कालगोळ बल देल सीधा निदुर.” आग आव हारकु नळुली टेटाळली कुरतुन.
ACT 14:11 लॉकुर पौलुस उन ईद क्याल्सा नोळकु लुकाउनिया अन्द भाषा दा धोळ्द आवाज देल अंदुर, “द्यावगोळ मंळसागोळ्द रूप दा आगकु नाम हात्‍ती ईळुकु बंदार.”
ACT 14:12 आंदुर बरनबास उक ज्यूस, अदिक पौलुस उक हिरमेस अंदुर, यतिकी पौलुस मातगोळ हेळदुर दा मुख्य ईरोन.
ACT 14:13 ज्यूस द्याव उन आ मंदिर इन पुजारी जो आंदुर नगर इन मुंद ईरोन, वस्ता अदिक फूलगोळ हार फाटकगोळ मा तनकु लॉकुर सांगुळ बलिदान माळोद चाहासोन.
ACT 14:14 लेकीन बरनबास अदिक पौलुस प्रेरितगोळ याग ईद केळदुर, रा तान कपळा हरदुर अदिक भीळ दा होदुर, अदिक कारूकु अनली कुरतुर,
ACT 14:15 “हे लॉकुरा, नीव ईद येती माळेतीर? नाव भी रा नीम घाई मंळसा हुयेव, अदिक नीमी परमेश्वर उन खुशखबरी केळसोर साटी नाव ईल आयेव, कि नीव ई बेकार वस्तुगोळ देल अलग आगकु जित्‍ता परमेश्वर उन दी तिर्गी, याव स्वर्ग अदिक पृथ्वी अदिक समुद्र अदिक जो येनारा अऊर्दा आद माळदुन.
ACT 14:16 आव बितुस्द समयगोळ दा सप्पा लॉकुरी तान तान हादीगोळ दा नळु गोट्टुन.
ACT 14:17 लेकीन आव हमेशा भला क्याल्सा माळदुर द्वारा तान अस्तित्व अक प्रमाणित माळदुन: आव नीमी आकाश टु माळ कोट्टुन अदिक मौसम इन अनुसार फसल कोट्टुन; आवा नीमी तिनली कोळतान अदिक नीम दिलगोळी खुशी देल तुम्म बुळतान.”
ACT 14:18 ईद अनकु भी प्रेरितगोळ लॉकुरी धोळ्द परेशानी देल रोक्सदुर कि आंदुर साटी बलिदान माळबाळुल.
ACT 14:19 लेकीन येनारा यहूदीगोळ पिसिदिया अन्द अन्ताकिया अदिक इकुनियुम टु बंदकु लॉकुरी तान दी माळ कोंडुर, अदिक पौलुस मा कल्लगोळ देल बळदुर, अदिक सोतकु सम्सकु आऊक नगर इन व्हार्या जेडुकु ओतुर.
ACT 14:20 पर याग चेलागोळ आऊन नाकु दी बंदकु निदुरदुर, रा आव यदकु मात्‍त नगर दा होदुन अदिक दुसरा दिशी बरनबास उन सांगुळ दिरबे अक होटोदुन.
ACT 14:21 पौलुस अदिक बरनबास दिरबे नगर इन लॉकुरी खुशखबरी केळ्सकु, अदिक हापाळ सा चेलागोळी माळकु, लुस्त्रा अदिक इकुनियुम अदिक पिसिदिया अन्द अन्ताकिया अक वापस बंदुर,
ACT 14:22 अदिक चेलागोळ मन इक संची माळ्त ईत्‍तुर अदिक ईद प्रोत्साहन कोळोर कि विश्वास दा सच्चाई देल बन्सकु ईरी; अदिक ईद शिक्षा कोळतोगोर, “नामी बळा दुख नेगुकु परमेश्वर उन राज्य दा प्रवेश माळोद आद.”
ACT 14:23 अदिक आंदुर हर ऊंद मंडली दा आंदुर साटी स्याणा लॉकुरी नियुक्त माळदुर अदिक उपास सहित प्रार्थना माळकु आंदरी प्रभु उन कय दा सौप्सदुर यार मा आंदुर विश्वास माळतोगोर.
ACT 14:24 आग पिसिदिया टु आगतेला आंदुर पंफूलिया पोहचुसदुर;
ACT 14:25 बाक पिरगा दा वचन केळ्सकु अत्तलिया दा बंदुर,
ACT 14:26 अदिक अल टु आंदुर जहाज मा अन्ताकिया होदुर, यल आंदुर आ क्याल्सा अन्द साटी जो आंदुर पुरा माळीदुर परमेश्वर उन अनुग्रह दा कोटकु आगीदुर.
ACT 14:27 याग आंदुर अन्ताकिया बंदुर रा आंदुर मंडली अन लॉकुर जमा माळकु जो परमेश्वर आंदुर सांगुळ माळदुन अद केळ्सदुर अदिक हेळदुर कि ह्यांग परमेश्वर गैरयहूदीगोळ्द विश्वास माळोर साटी दरवाजा तेरदुन.
ACT 14:28 अदिक आंदुर विश्वासीगोळ सांगुळ हापाळ दिन ताका अल ईत्‍तुर.
ACT 15:1 बाक थ्वाळासा लॉकुर यहूदिया टु अन्ताकिया बंदकु विश्वासी वार्टुरी कल्सली हतदुर: “अगर मूसा अन्द व्यवस्था अन अनुसार नीम्द खतना ईला आगाईत रा नीमी उद्धार सिक सकाल.”
ACT 15:2 इदुर बारा दा पौलुस अदिक बरनबास आंदुर से सहमत ईला ईरोर ईदा कारण देल आंदुर सांगुळ आंदुर्द हापाळ धोळ्द झगळा आत रा ईद ठहरूस्कु आत कि पौलुस अदिक बरनबास अदिक आंदुर दा टु थ्वाळासा संगीगोळ ई मात इन समाधान माळोर साटी प्रेरितगोळ अदिक मंडली नोर स्याणा मंळसागोळ हात्‍ती यरूशलेम इक कळुकु आगुल.
ACT 15:3 इदुरसाटी मंडली आंदरी येनारा दुर ताका सफर माळोर साटी पोहचुसदुर; अदिक आंदुर फिनीकी अदिक सामरीया टु आगतेला गैरयहूदी लॉकुर ह्यांग परमेश्वर उन दी तिर्गदुर इदुर्द जानकारी केळ्सतेला होदुर, अदिक ई जानकारी देल विश्वासी वार्टुर हापाळ खुश आदुर.
ACT 15:4 याग आंदुर यरूशलेम पोहचुसदुर, रा मंडली अदिक प्रेरित अदिक मंडली नोर स्याणा लॉकुर आंदुर स्वागत माळदुर, अदिक आंदुर हेळदुर कि परमेश्वर आंदुर सांगुळ आगकु येन-येन क्याल्सा माळीदुन.
ACT 15:5 लेकीन फरीसीगोळ समुह दा टु थ्वाळासा लॉकुर जो यार विश्वास माळीदुर, आंदुर यदकु अंदुर, “गैरयहूदीगोळ्द खतना आग अच पायजे अदिक आंदुर मूसा अन्द व्यवस्था अन पालन माळ पायजे.”
ACT 15:6 आग प्रेरित अदिक मंडली अन स्याणा लॉकुर ई मात इन बारा दा विचार माळोर साटी जमा आदुर.
ACT 15:7 आग पतरस हापाळ झगळा आगदुर बाद्दा निदुरकु आंदुर से अंदुन, “हे वार्टुरा, नीव जान्सतीर कि हापाळ दिन पयले परमेश्वर नीम दा टु नानी नीवळुस कोंडुन कि नान बाय देल गैरयहूदीगोळी खुशखबरी इन वचन केळसुसुल ताकी आंदुर केळकु विश्वास माळुल.
ACT 15:8 सप्पा मुंदुर्द मन अरावाळा परमेश्वर आंदरी भी नाम घाई पवित्र आत्मा कोटकु आंदुर गवाही कोटकु आंदुर्द संबंध दा तान समर्थन दर्शुसिदुन;
ACT 15:9 अदिक विश्वास इन द्वारा आंदुर पापगोळी माफ माळदुन आंदुर्द अदिक नाम्द न्याड्या येनु भेदभाव ईटीदिल.
ACT 15:10 रा ईग नीव येती परमेश्वर उन परीक्षा माळतीर कि विश्वासीगोळ कुतक्या मा हिंग जुआळी ईटी, यारी ना नाम आप्प दादागोळ नेगु सकीदुर अदिक ना नाव नेगु सकतेव?
ACT 15:11 ईला, नाम्द ईद विश्वास आद कि जसा ह्यांग नाम प्रभु यीशु उन अनुग्रह देल उद्धार आग्याद; हांगा आंदुर्द भी आग्याद.”
ACT 15:12 आग सप्पा सभा चुपचाप बरनबास अदिक पौलुस उन केळली कुरतुर, कि परमेश्वर आंदुर द्वारा गैरयहूदीगोळ दा ह्यांग धोळ धोळ चमत्कार अदिक अदभुत क्याल्सा तोर्सदुन.
ACT 15:13 याग आंदुर चुप आदुर रा याकूब अनली कुरतुन, हे वार्टुरा, अदिक आकतींगेरा, नांद केळी.
ACT 15:14 शमौन ईगल्या हेळदुन कि परमेश्वर पयले गैरयहूदीगोळ मा ह्यांग कृपा दृष्टी माळदुन, कि आंदुर दा टु तान हेसुर इन साटी ऊंद लॉकुर माळ कोमुल.
ACT 15:15 इदुर देल भविष्यवक्तागोळ वचन भी समर्थन माळताव, जसा कि शास्त्र दा लिख्सकु आद,
ACT 15:16 इदुर बाद्दा ना मात्‍त बंदकु दाऊद उन बिदकु राज्य मात्‍त स्थापित माळाईन, अदिक आऊन खंडरगोळी मात्‍त मजबूत कटाईन,
ACT 15:17 इदुरसाटी कि मिग्द मंळसागोळ, मतलब सप्पा गैरयहूदी जो नान हेसुर इन कहलुस्तार, प्रभु अक ढुंढसुल,
ACT 15:18 ईद आवा प्रभु अनतान जो दुनिया अन उत्पत्ति देल ई मातगोळी प्रगट माळतेला बंदान.
ACT 15:19 “इदुरसाटी नान विचार ईद आद कि गैरयहूदीगोळ दा टु जो लॉकुर परमेश्वर उन दी तिर्गतार, नाव आंदरी दुख कोळतीदील;
ACT 15:20 बल्‍की नामी आंदुर हात्‍ती चिट्ठी लिख्सकु कळु पायजे: कि आंदुर भोजन तिनबाळुल जो प्रथा अन अनुसार अशुध्द आद यतिकी अद मूर्तीगोळ मा येर्सद हुन, व्यभिचार देल आंदुर दुर ईरूल अदिक कुतक्या ओतकु कोंद यातोदु पशु उन मास अदिक खुन तिनबाळुल.
ACT 15:21 यतिकी स्याणा लॉकुर काल टु नगर नगर मूसा अन्द व्यवस्था अन्द प्रचार माळावाळेर आग्त बंदार, अदिक अद हर आराम इन दिन सभागृह दा वाचुसकु आगतद.”
ACT 15:22 आग सप्पा मंडली सहित प्रेरितगोळ अदिक मंडली अन्द स्याणागोळ निश्चय माळदुर कि नाम दा टु येनारा येढ्ढ मंळसागोळी नीवळुसुल, मतलब यहूदा जो बरसब्बा कहलुस्तान, अदिक सीलास उक जो वार्टुर दा स्याणा ईरोन; अदिक आंदरी पौलुस अदिक बरनबास उन सांगुळ अन्ताकिया कळुल.
ACT 15:23 आंदुर आंदुर्द कय दा ईद चिट्ठी लिख्सकु कळुदुर: “अन्ताकिया अदिक सीरिया अदिक किलिकिया अन्द ईरावाळेर वार्टुर इक जो गैरयहूदीगोळ दा टु आर, प्रेरितगोळ अदिक स्याणा लॉकुर वार्टुर्द नमस्कार.
ACT 15:24 नाव ईद केळदेव कि नाम दा टु यावारा आदेश हासिल माळ्द बिना अच नाम दा टु थ्वाळासा लॉकुर होगकु, तान शब्दगोळ देल नीमी परेशानी अदिक दुख पोहुचुस्यान.
ACT 15:25 नाव सप्पा मुंदुर आपस दा सहमत आगकु ईद निश्चय माळदेव कि नाम दा टु निवळुस्द मंळसागोळी तान प्रिय बरनबास अदिक पौलुस उन सांगुळ नीम हात्‍ती कळेव.
ACT 15:26 ई हिंग मंळसा आर यार तान जीव नाम प्रभु यीशु मसीह अन्द क्याल्सागोळ साटी जोखिम दा हाक्यार.
ACT 15:27 इदुरसाटी नाव यहूदा अदिक सीलास उक कळेव, जो मातगोळ नाव लिख्सेतेव, आंदुर ऊंद आगकु नीमी ईवा मातगोळ हेळ्यार.
ACT 15:28 पवित्र आत्मा अक अदिक नामी उचित जान्सकु बित्‍त कि ई जरूरी मातगोळी बिटकु, नीम मा बोझ हाकबाळुल;
ACT 15:29 कि नीव मूर्तीगोळ मा बली माळावाळेर से अदिक खुन देल, अदिक कुतक्या वत्‍त पशुगोळ्द मास देल, अदिक व्यभिचार देल दुर ईरी. ईऊर से दुर ईरी रा नीम्द भला आदीत. नाम शुभकामनागोळ मुंद नीम सांगुळ ईरूल.”
ACT 15:30 बाक आंदुर सार आगकु अन्ताकिया पोहचुसदुर, अदिक विश्वासीगोळ्द सभा अक जमा माळकु अद चिट्ठी आंदरी कोट्ट बुटुर.
ACT 15:31 आ लॉकुर चिट्ठी जोर देल वाचुसकु अद प्रोत्साहन सिक्‍कावाळा बातणी इन द्वारा हापाळ खुश आगेदुर.
ACT 15:32 यहूदा अदिक सीलास जो खुद भी भविष्यवक्ता ईरोर, हापाळ मातगोळ देल वार्टुरी शिक्षा कोटकु प्रोत्साहित अदिक संची माळदुर.
ACT 15:33 आंदुर येनारा दिन ईतकु, विश्वासी वार्टुर आंदरी शांती देल आंदुर दा हात्‍ती वापस होगली विदा माळदुर जो आंदरी कळीदुर.
ACT 15:34 लेकीन सीलास उक अल ईरोद वळ्लीद हत.
ACT 15:35 लेकीन पौलुस अदिक बरनबास अन्ताकिया दा ईतोदुर: अदिक अन्य हापाळ सा लॉकुर्द सांगुळ प्रभु उन वचन केळ्सतेला ईत्‍तुर.
ACT 15:36 थ्वाळासा दिन बाद्दा पौलुस बरनबास से अंदुन, “या नगर दा नाव प्रभु उन वचन केळसीदेव, बरी, बाक आंदुर दा नळुकु तान वार्टुरी अदिक आकतींगेरी नोळाता कि आंदुर ह्यांग आर.”
ACT 15:37 आग बरनबास यूहन्ना अक जो मरकुस कहलुस्तान, सांगुळ हुडोद विचार माळदुन.
ACT 15:38 लेकीन पौलुस ईद वळ्लीद समसीदील कि आऊक तान सांगुळ हुळदेव, यतिकी यूहन्ना जो मरकुस कहलुसतान, पंफूलिया टु आंदुर हात्‍ती वापस हिंद तिर्गेगिदुन अदिक आंदुर स्यावा कार्य पुरा आगासताका आंदुर सांगुळ ईला ईरोन.
ACT 15:39 इदुर मा बरनबास अदिक पौलुस उन दा धोळ्द विरोध पैदा आगेत अदिक परिणाम ईद सिक्त कि आंदुर आपस दा आबुर दाबुर से अलग आगेदुर; बरनबास, मरकुस उक हुडुकु जहाज मा साइप्रस होटोदुन.
ACT 15:40 लेकीन पौलुस सीलास उक निवळुस कोंडुन, अदिक विश्वासी वार्टुर से परमेश्वर उन अनुग्रह दा कोटकु अल टु होटोदुन;
ACT 15:41 अदिक आव मंडलीगोळी संची माळतेला सीरिया अदिक किलिकिया टु आगतेला होट्टुन.
ACT 16:1 बाक पौलुस दिरबे अदिक लुस्त्रा दा भी होदुन. अल तीमुथियुस हेसुर इन ऊंद मसीह ईरोन, आऊन मोय यहूदी विश्वासी ईरोर, लेकीन आऊन आप्प गैरयहूदी ईरोन.
ACT 16:2 आव लुस्त्रा अदिक इकुनियुम उन वार्टुर दा वळ्लेव मंळसा ईरोन.
ACT 16:3 पौलुस उन इच्छा ईरोद कि तीमुथियुस आऊन सांगुळ बरूल; अदिक जो यहूदी लॉकुर आ जागागोळ दा ईरोर आंदुर कारण आव आऊंद खतना माळदुन, यतिकी आंदुर सप्पा जानसोर, कि आऊन आप्प गैरयहूदी ईरोन.
ACT 16:4 अदिक नगर नगर होगतेला आंदुर आ नियमगोळी जो यरूशलेम इन प्रेरितगोळ अदिक स्याणागोळ ठहरूसीदुर, मानसोर साटी आंदरी हेळकु आगोद.
ACT 16:5 ई प्रकार मंडलीगोळ विश्वास दा संची आगतेला होत अदिक संख्या दा रोज वाळुस्त होत.
ACT 16:6 आंदुर फ्रूगिया अदिक गलातिया प्रदेशगोळ दा टु आगकु होदुर, यतिकी पवित्र आत्मा आंदरी आसिया दा वचन केळसोर से मना माळ्त.
ACT 16:7 आंदुर मूसिया अन्द सीमा अन हात्‍ती पोहचुस्कु, बितूनिया क्षेत्र दा होगोद चाहासदुर; लेकीन यीशु उन आत्मा आंदरी इजाजत कोटीदील.
ACT 16:8 इदुरसाटी आंदुर मूसिया टु आगकु त्रोआस दा बंदुर.
ACT 16:9 अल पौलुस ईळ्लकी ऊंद दर्शन नोळदुन कि ऊंद मकिदुनी मंळसा निदुरकु आऊन से विनती माळकु अनेत्यान, “ईपाटी ईळुकु मकिदुनिया दा बा, अदिक नाम्द मदत माळ.”
ACT 16:10 आऊन ईद दर्शन नोळतेला अच नाव तुरन्त मकिदुनिया होगोद चाहासदेव, ईद सम्सकु कि परमेश्वर नामी आंदरी खुशखबरी केळसोर साटी कारस्यान.
ACT 16:11 इदुरसाटी त्रोआस टु जहाज कुर्तकु नाव सिधा सुमात्राके होदेव अदिक दुसरा दिशी नियापुलिस दा बंदेव.
ACT 16:12 अल टु नाव फिलिप्पी पोहचुसदेव, जो मकिदुनिया द्याश इन मुख्य नगर अदिक रोमीगोळ्द ऊर हुन; अदिक नाव आ नगर दा थ्वाळासा दिन ताका ईत्‍तेव.
ACT 16:13 आराम इन दिन नाव नगर इन फाटक इन व्हार्या गांगा अन्द किनारा ईद सम्सकु होदेव कि अल प्रार्थना माळोद जागा ईतीदाद, अदिक कुर्तकु आ आर्तेर से जो जमा आगीदुर, मातगोळी माळली कुरतेव.
ACT 16:14 लुदिया हेसुर इन थुआतीरा नगर इन जांभळा रंग इन कपळा मारावळ्त ऊंद भक्त आर्त केळोर. प्रभु आकिन मन खोल्सदुन कि आक पौलुस उन मातगोळ मा मन हचुल.
ACT 16:15 याग लुदिया तान घराना समेत बपतिस्मा ताकोंडुर, रा आक नाम से विनती माळदुर, “अगर नीव नानी प्रभु उन विश्वासिनी सम्सतीर, रा नळुकु नान मान्या ईरी,” अदिक आक नामी मान्सकु ओतुर.
ACT 16:16 ऊंद दिशी याग नाव प्रार्थना माळोद जागा मा होगेव, रा नाम मुलाकात ऊंद हारोद आर्त दासी से आत यारदा भविष्य हेळावाळा दुष्टआत्मा ईरोद; अदिक लॉकुर्द भविष्य हेळदुर देल स्वामीगोळ साटी हापाळ पैस्या कमुसकु तरतोगोद.
ACT 16:17 आक पौलुस उन दी नाम हींद बंदकु चिल्ळासली कुरतुर, “ई मंळसा परमप्रधान परमेश्वर उन दास हुय, जो नामी उद्धार इन हादी इन कात्‍ता केळ्सतार.”
ACT 16:18 आक हापाळ दिन ताका हिंग अच माळतेला ईत्‍तुर; लेकीन पौलुस परेशान आदुन, अदिक पलटुस्कु आ दुष्टआत्मा से अंदुन, “ना नीनी यीशु मसीह अन्द हेसुर देल आग्या कोळतीन कि आकिन दा टु होटबुळ.” अदिक अद आत्मा अदा घळी होट बुळ्त.
ACT 16:19 याग आ पोर इन स्वामीगोळ नोळदुर कि नाम्द कमाई इन आशा होग्त ईत्‍त, रा पौलुस अदिक सीलास उक हुळकु चौक दा प्रधानगोळ हात्‍ती जेडुकु ओतुर;
ACT 16:20 अदिक आंदरी रोमन अधिकारीगोळ हात्‍ती ओतुर अदिक अंदुर, “ई लॉकुर जो यहूदी आर, नाम नगर दा बळा अशांती फैलुसेत्यार;
ACT 16:21 अदिक हिंग रीति रिवाजगोळी कल्सेत्यार, यारी ग्रहण माळोद या मानसोद नाम रोमीगोळ साटी वळ्लीद हैलेच अदिक नाव ईदुर्द पालन भी माळ सकालेव अदिक मान्स भी सकालेव.”
ACT 16:22 आग भीळ इन लॉकुर आंदुर्द विरोध दा जमा आगकु पौलुस अदिक सीलास उन मा येरतेला बंदुर, अदिक शासकगोळ आंदुर कपळा हरदुर अदिक अदिक आंदरी कोळागोळ बडोद आग्या कोट्टुर.
ACT 16:23 हापाळ कोळा बळसुस्कु आंदुर आंदरी बंदीगृह दा हाक बुटुर अदिक दरोगा अक आग्या कोट्टुर कि आंदरी कळक बंदोबस्त दा ईटुल.
ACT 16:24 आऊक हिंग आग्या सिक्तेला अच आव आंदरी बुळ्क इन कोठरी दा ईटदुन अदिक आंदुर कालगोळ कोल इक ठोक्स बुटुन.
ACT 16:25 आर्धा ईळ्लक इन लगभग पौलुस अदिक सीलास प्रार्थना माळतेला परमेश्वर उन भजन हाळोर, अदिक कैदी आंदुर्द केळोर.
ACT 16:26 इटुर दा अचानक धोळ्द भूकम्प बत्‍त, ईल ताका कि बंदीगृह अन्द पायवा हालुसेदव अदिक तुरन्त सप्पा दरवाजा खुलसेदव; अदिक सप्पा कैदीगोळव बंधन खुलसेदव.
ACT 16:27 दरोगा जप दा टु येद्दुन, अदिक बंदीगृह अन्द दरवाजा खुला नोळकु सम्सदुन कि कैदी ओळेग्यार, इदुरसाटी आव तलवार तेगुकु तान तान इक कोंद बुळोद चाहासदुन.
ACT 16:28 लेकीन पौलुस धोळ शब्द दा कारूकु अंदुन, “तान तान इक येनु हानि पहचुसबाळ, यतिकी नाव सप्पा ईल्या आयेव.”
ACT 16:29 आग बंदीगृह अन्द दरोगा दिंग्या कार्सदुन अदिक राटनेरी बुळ्क होदुन, अदिक अंज्क देल नळ्गतेला पौलुस अदिक सीलास उन मुंद बिदोदुन;
ACT 16:30 अदिक आंदरी व्हार्या तनकु अंदुन, “हे सज्जनगोळा, उद्धार सिक्‍कोर साटी ना येन माळाईन?”
ACT 16:31 आंदुर अंदुर, “प्रभु यीशु मसीह मा विश्वास माळ, रा नीनी अदिक नीन घराना अक उद्धार सिक्‍कीत.”
ACT 16:32 अदिक आंदुर आऊक अदिक आऊंद सप्पा मान्ना अन्द लॉकुरी प्रभु उन वचन केळ्सदुर.
ACT 16:33 ईळ्लकी अदा घळी दरोगा आंदरी ओतकु आंदुर्द जखमगोळी तोळदुन, अदिक आव तान सप्पा घराना समेत तुरन्त बपतिस्मा ताकोंडुन.
ACT 16:34 आग आव पौलुस अदिक बरनबास उक तान मान्या ओतकु आंदुर्द मुंद भोजन ईटदुन, अदिक सप्पा घराना समेत परमेश्वर मा विश्वास माळकु खुशी माळदुन.
ACT 16:35 याग हागुल आत आग रोमन शासकगोळ तान सिपाहीगोळ अधिकारीगोळ्द कय देल बातणी कळुदुर कि आ मंळसागोळी बिट बुळी.
ACT 16:36 दरोगा ईद मातगोळी पौलुस से अंदुन, “शासकगोळ नीमी बिट बुळोद आग्या कळु बुटार. इदुरसाटी ईग होटकु शांती देल होटोगी.”
ACT 16:37 लेकीन पौलुस सिपाहीगोळ अधिकारीगोळ से अंदुन, “आंदुर नामी जो रोमी मंळसा आर, दोषी ठहरूस्द बिना लॉकुर मुंद बळदुर अदिक बंदीगृह दा हाकदुर. ईग येन नामी चुपचाप तेगेत्यार? हिंग ईला; लेकीन आंदुर खुद बंदकु नामी व्हार्या तेगुल.”
ACT 16:38 सिपाहीगोळ्द अधिकारीगोळ ई मातगोळ्द रोमी शासकगोळी जानकारी कोट्टुर, अदिक आंदुर ईद केळकु कि पौलुस अदिक सीलास रोमन नागरीत्वावाळेर लॉकुर उर, अंजेदुर,
ACT 16:39 आग रोमन अधिकारीगोळ बंदकु आंदुर से माफ विनती माळदुर, अदिक आंदरी बंदीगृह टु व्हार्या तनकु नगर बिटकु होगली हेळदुर.
ACT 16:40 पौलुस अदिक सीलास बंदीगृह टु होटकु लुदिया अन्द ईल होदुर, अदिक विश्वासी वार्टुर से भेंट माळकु आंदरी प्रोत्साहन कोटकु होटोदुर.
ACT 17:1 बाक पौलुस अदिक सीलास अम्फिपुलिस अदिक अपुल्लोनिया आगकु थिस्सलुनीके दा बंदुर, यल यहूदीगोळ्द ऊंद यहूदी लॉकुर्द सभागृह ईरोद.
ACT 17:2 पौलुस तान रीति इन अनुसार सभागृह दा होदुन, अदिक मुर आराम इन दिन नियम शास्त्रगोळ देल यहूदी लॉकुर सांगुळ झगळा माळदुन;
ACT 17:3 अदिक अऊर अर्थ आसान भाषा दा समझुस तोगोन कि मसीह अक दुख नेगोद, अदिक सोत्‍तुर दा टु जित्‍ता माळोद, जरूरी ईरोद; अदिक “ईवा यीशु यार्द बारा दा ना नीमी हेळतीन, मसीह हुन.”
ACT 17:4 आंदुर दा टु येनारा लॉकुर विश्वास माळदुर अदिक पौलुस अदिक सीलास उन सांगुळ मीलुसेदुर. परमेश्वर उन आराधना माळावाळेर हापाळ पुरा गैरयहूदीगोळ भी आंदुर दा मीलुसेदुर, ईंदुर दा मुख्य आर्तेर भी ईरोर,
ACT 17:5 लेकीन यहूदीगोळ जलन देल तुमकु बाजारू लॉकुर दा टु येनारा दुष्ट मंळसागोळी तान सांगुळ दा हुळदुर, अदिक भीळ जमा माळकु नगर दा हल्ला मचुसली कुरतुर, अदिक यासोन उन मान्ना मा चढ़ाई माळकु अदिक कोशिश माळली कुरतुर कि ह्यांगारा तरी पौलुस अदिक सीलास उक लॉकुर मुंद तंदेव.
ACT 17:6 आंदरी अल ईला नोळकु आंदुर ईद चिल्ळासतेला यासोन अदिक येनारा विश्वासी वार्टुरी नगर इन शासकगोळ मुंद जेडुतेला तंदुर अदिक अंदुर, “ई लॉकुर यार सप्पा दी मुसीबत पैदा माळ बुटार, आंदुर नाम नगर दा भी होट बंदार.
ACT 17:7 अदिक यासोन आंदरी तान मान्या ईट्यान. ई सप्पा च्या सप्पा ईद अनतार कि यीशु राजा आन, अदिक कैसर उन नियमगोळ्द विरोध माळतार.”
ACT 17:8 आंदुर लॉकुरी अदिक नगर इन शासकगोळी ईद केळ्सकु भळकुस बुटुर.
ACT 17:9 इदुरसाटी आंदुर यासोन अदिक बाकी लॉकुर से जमानत ताकोमकु आंदरी बिट बुटुर.
ACT 17:10 विश्वासी वार्टुर तुरन्त ईळ्लक इन ईळ्लक इच पौलुस अदिक सीलास उक बिरीया कळु बुटुर; अदिक आंदुर अल पोहचुस्कु यहूदीगोळ्द सभागृह दा होदुर.
ACT 17:11 आ लॉकुर रा थिस्सलुनीके अन्द लॉकुर से भला ईरोर, अदिक आंदुर धोळ लालसा देल वचन ग्रहण माळदुर, अदिक रोज शास्त्रगोळ दा अध्ययन माळ माळकु नोळोर कि जो ई मातगोळ पौलुस हेळदुन अव सही आव का ईला.
ACT 17:12 अदिक इदुर परिणाम स्वरूप हापाळ सा यहूदीगोळ अदिक मानवाईक यूनानी आर्तेर मंळसागोळ भी विश्वास ग्रहण माळदुर.
ACT 17:13 लेकीन याग थिस्सलुनीके अन्द यहूदी जान्स कोंडुर कि पौलुस बिरीया दा भी परमेश्वर उन वचन केळ्सतान, रा अल भी बंदकु लॉकुरी भळकुसली अदिक दंगा माळली कुरतुर.
ACT 17:14 आग विश्वासी वार्टुर तुरन्त पौलुस उक विदा माळदुर कि समुद्र अन्द किनारा होटोगुल; लेकीन सीलास अदिक तीमुथियुस अल्या ईतोदुर.
ACT 17:15 पौलुस उक विश्वासी वार्टुर एथेंस ताका ओतुर; अदिक सीलास अदिक तीमुथियुस उन साटी आंदुर पौलुस उन से ईद आग्या ताकोमकु विदा आदुर कि आंदरी नान हात्‍ती जल्दी से जल्दी कळुल.
ACT 17:16 याग पौलुस एथेंस दा तीमुथियुस अदिक सीलास उन हादी कायोन, अदिक एथेंस नगर इक मूर्तीगोळ देल तुमकु नोळकु आव हापाळ निराश आगेदुन.
ACT 17:17 इदुरसाटी आव यहूदी लॉकुर्द सभागृह दा यहूदीगोळ अदिक गैरयहूदीगोळ जो परमेश्वर उन आराधना माळतोगोर, अदिक चौक दा होगा बरावाळेर लॉकुर आऊन से सिकतोगोर आंदुर से हर रोज झगळा माळतोगोन.
ACT 17:18 आग इपिकूरी अदिक स्तोईकी गुरुगोळ दा टु थ्वाळासा गुरु आऊन से तर्क माळली कुरतुर, अदिक येनारा अंदुर, “ईव अग्यानी येन अनोद चाहासतान?” लेकीन दुसरा अंदुर, आव “अन्य देवतागोळ्द प्रचारक मालूम बिळतान.” यतिकी आव यीशु उन अदिक आऊन पुनरूत्थान इन खुशखबरी केळ्सतोगोन.
ACT 17:19 आग आंदुर पौलुस उक तान सांगुळ अरियुपगुस इन नगर दा ओतुर अदिक केळदुर, “येन नाव जान्स सकतेव कि ईद व्हाशोद शिक्षा जो नी हेळत्या, येन हुन?
ACT 17:20 यतिकी नी अनोखा मातगोळी नामी केळ्सत्या, इदुरसाटी नाव जानसोद चाहासतेव कि ईऊर्द अर्थ येन आद.”
ACT 17:21 इदुरसाटी कि सप्पा एथेंसवासी अदिक परदेशी जो अल ईरतोगोर, सप्पा आऊन व्हासा व्हासा मातगोळी केळली अदिक हेळदुर दा समय बितुसतोगोर.
ACT 17:22 आग पौलुस अरियुपगुस उन नगर इन सभा अन न्याड्या दा निदुरकु अंदुन, हे एथेंस इन लॉकुरा, ना नोळतीन कि नीव हर प्रकार देल धार्मिक आईर.
ACT 17:23 यतिकी ना नगर दा टेटाळतेला याग नीम्द आराधना माळोद जागागोळी नोळीन, रा ऊंद हिंग वेदी भी नोळदीन, यदुर मा लिख्सकु ईरोद, अनजाना परमेश्वर उन साटी. इदुरसाटी यार्द नीव बिना नोळ्द आराधना माळतीर, ना नीमी आऊंद बारा दा हेळतीन.
ACT 17:24 या परमेश्वर पृथ्वी अदिक अदुर सप्पा वस्तुगोळी माळदुन, आव स्वर्ग अदिक पृथ्वी इन स्वामी आन, अदिक आव कय इन माळ्द मंदिरगोळ दा ईरालुन;
ACT 17:25 ना यातोदु वस्तु उन जरवत इन कारण मंळसागोळ्द कयगोळ्द स्यावा ताकोमतान, यतिकी आव खुद अच सप्पा मुंदरी जीवन अदिक श्वास अदिक सप्पा येनारा कोळतान.
ACT 17:26 आव ऊंद अच मंळसा द्वारा पुरा मंळसागोळ्द पैदा माळदुन अदिक सप्पा पृथ्वी मा आव ईरसकुल इदुरसाटी आव माळदुन. अदिक आव पयले टुच लॉकुर्द समय निश्चित माळ कोंडान अदिक आंदुर निवास इन यल आंदुर ईरतार अदुर्द सीमागोळी कट बुट्टुन,
ACT 17:27 ईद इदुरसाटी माळदुन कि लॉकुर परमेश्वर उक ढुंढसुल, आग सकतद कि आंदुर आऊन ताका पोहचुस्कु हासिल माळ कोमुल, तरी भी आव नाम दा टु यारदु से दुर हैलेच.
ACT 17:28 जसा यावारा अंदान कि नाव आऊंदा जित्‍ता ईरतेव, अदिक नळुतेला वयाळतेला ईरतेव, अदिक आऊन दा अच नाम अस्तित्व आद. ईदा प्रकार खुद नीम्द अच थ्वाळासा कविगोळ भी अंदार, नाव रा आऊंदा औलाद हुयेव.
ACT 17:29 इदुरसाटी परमेश्वर उन औलाद आगकु नामी ईद समसोद उचित हैलेच कि परमेश्वर उन दिव्य रूप व्हान्ना या पैस्या या कल्ल इन घाई आद, जो मंळसा अन्द कारीगरी अदिक कल्पना देल माळकु आगीदाव.
ACT 17:30 “इदुरसाटी परमेश्वर याग लॉकुर परमेश्वर उक ईला जानसोर आ समयगोळ मा ध्यान कोटीदील, लेकीन ईग हर जागा सप्पा मंळसागोळी मन तिर्गुसोद आग्या कोळतान.
ACT 17:31 परमेश्वर ऊंद दिन निश्चित माळ्यान आ दिशी आव तान निवळुस्द ऊंद मंळसा अन द्वारा सच्चाई देल दुनिया अन न्याय माळ्यान अदिक ई मात इन प्रमाण आव आ मंळसा अक सोत्‍तुर दा टु जित्‍ता माळकु सप्पा मुंदुरी कोटान.”
ACT 17:32 सोत्‍तुर दा टु जित्‍ता आगोद इन मात केळकु थ्वाळासा लॉकुर पौलुस से मज्याक माळली कुरतुर, लेकीन दुसरा थ्वाळासा लॉकुर अंदुर, “नाव ईद मातगोळ नीन से केळोद चाहासतेव.”
ACT 17:33 ईदुर मा पौलुस आंदुर न्याड्या दा टु होटबुटुन.
ACT 17:34 लेकीन थ्वाळासा मंळसा आऊन सांगुळ मीलुसेदुर, अदिक विश्वास माळदुर; यारदा दियुनुसियुस जो नगर सभा अन सदस्य ईरोन, अदिक दमरिस हेसुर इन ऊंद आर्त ईरोर, अदिक आंदुर सांगुळ मात्‍त दुसरा लॉकुर ईरोर.
ACT 18:1 इदुर बाद्दा पौलुस एथेंस नगर इक बिटकु कुरिन्थुस नगर दा बंदुन.
ACT 18:2 अल आऊक अक्विला हेसुर इन ऊंद यहूदी सिकदुन, यार्द जनम पुन्तुस दा आगीत. आव तान हिंग्स प्रिसकिल्ला अन्द सांगुळ इटली टु ईग ईग अच बंदीदुन, यतिकी क्लौदियुस सप्पा यहूदीगोळी रोम टु होट्ट बुळोद आग्या कोटीदुन. इदुरसाटी आव आंदुर अल होदुन.
ACT 18:3 आंदुर ऊंदा ऊज्या ईरतोगोर अदिक आंदुर क्याल्सा ऊंदा ईरोद आंदुर तान कमाई इन साटी तम्बू माळोद क्याल्सा माळतोगोर.
ACT 18:4 आव हर ऊंद आराम इन दिन यहूदी लॉकुर्द सभागृह दा झगळा माळकु यहूदीगोळ अदिक गैरयहूदीगोळी भी समझुस तोगोन.
ACT 18:5 याग सीलास अदिक तीमुथियुस मकिदुनिया टु बंदुर, रा पौलुस वचन केळ्सदुर दा पुरा समय कोट्टुन अदिक यहूदीगोळी गवाही कोळली कुरतुन कि यीशु उच मसीह हुन.
ACT 18:6 लेकीन याग आंदुर विरोध अदिक अपमान माळली कुरतुर, रा आव तान कपळा झाळ्सकु आंदुर से अंदुन, “नीम सायोद कारण नीव खुद आईर! ना निर्दोष आईन. अदिक इदुर जिम्मेदार ना हैलेच, ईग टु ना गैरयहूदीगोळ्द हाती होगाईन.”
ACT 18:7 अल टु होटकु आव तीतुस यूस्तुस हेसुर इन परमेश्वर उन आराधना माळावाळा ऊंद मंळसा अन्द मान्या बंदुन; यार्द मान्ना यहूदी सभागृह टु हतकु ईरोद.
ACT 18:8 आग सभागृह अन सरदार क्रिसपुस तान सप्पा घराना समेत प्रभु मा विश्वास माळदुन; अदिक हापाळ सा कुरिन्थवासी ईद बातणी केळकु विश्वास माळदुर अदिक बपतिस्मा ताकोंडुर.
ACT 18:9 प्रभु ऊंद ईळ्लकी दर्शन इन द्वारा पौलुस से अंदुन, “अंजबाळ, उलटा अनतेला ईर अदिक सुंगा ईरबाळ;
ACT 18:10 यतिकी ना नीन सांगुळ आईन, अदिक याऊ नीन मा चढ़ाई माळकु अपमान हानि माळतीदील; यतिकी ई नगर दा नान हापाळ सा लॉकुर आर.”
ACT 18:11 इदुरसाटी आव आंदुर्दा परमेश्वर उन वचन कल्सतेला दिळ वर्ष ताका ईत्‍तुन.
ACT 18:12 याग गल्लियो अक अखाया द्याश इन शासक माळकु आत, आग यहूदी लॉकुर ऊंद आगकु पौलुस मा येरतेला बंदुर, अदिक आऊक न्याय आसन इन मुंद तंदुर,
ACT 18:13 अदिक अनली कुरतुर, “ईव लॉकुरी समझुस्तान कि परमेश्वर उन उपासना हिंग रीति देल माळी, जो नाम्द व्यवस्था अन्द विपरीत आद.”
ACT 18:14 याग पौलुस माताळदुर मा अच ईरोन, रा गल्लियो यहूदीगोळ से अंदुन, “हे यहूदीगोळा, अगर ईद येनारा अन्याय या दुष्टता अन्द मात आगाईत, रा उचित ईरोद कि ना नीम्द केळायदिन.
ACT 18:15 लेकीन अगर ईद झगळा शब्दगोळ, अदिक हेसुरगोळ, अदिक नीम खुद इन व्यवस्था अन्द बारा दा आद, रा नीव अच खुद सुलझुसी; यतिकी ना ई मातगोळ्द न्यायी बनसोद चाहासालीन.”
ACT 18:16 अदिक आव आंदरी न्याय आसन इन मुंद टु तेगसुसबुटुन.
ACT 18:17 आग सप्पा लॉकुर सभागृह अन अध्यक्ष सोस्थिनेस उक हुळकु न्याय आसन इन मुंद बळदुर. लेकीन गल्लियो ई मातगोळ मा ध्यान कोटीदील.
ACT 18:18 पौलुस हापाळ दिन ताका कुरिन्थुस दा ईत्‍तुन. बाक विश्वासी वार्टुर से विदा ताकोमकु जहाज देल सीरिया होदुन आग आऊन सांगुळ प्रिसकिल्ला अदिक अक्विला भी ईरोर. पौलुस किंख्रिया दा तान मुंडन माळदुन, यतिकी आव ऊंद मन्नत बेळीदुन.
ACT 18:19 आव इफिसुस पोहचुस्कु प्रिसकिल्ला अदिक अक्विला अक अल बिट्टुन, अदिक खुद सभागृह दा होगकु यहूदीगोळ से झगळा माळली कुरतुन.
ACT 18:20 याग अलेर लॉकुर आऊन से विनती माळदुर, “नाम सांगुळ अदिक थ्वाळासा दिन ईर.” रा आव स्वीकार माळीदील;
ACT 18:21 लेकीन ईद अनकु आंदुर से सार आदुन, “अगर परमेश्वर चाहास्यान रा ना नीम हात्‍ती मात्‍त बराईन.” आग आव इफिसुस टु जहाज मा कुर्तकु होटोदुन;
ACT 18:22 अदिक कैसरिया दा ईळुकु यरूशलेम इक होदुन अदिक मंडली अक मुलाकात माळकु अन्ताकिया दा बंदुन.
ACT 18:23 बाक येनारा दिन अन्ताकिया दा ईतकु गलातिया अदिक फ्रूगिया क्षेत्र टु आगतेला होट्टुन, अदिक सप्पा चेलागोळी विश्वास दा संची माळतेला तिर्गदुन.
ACT 18:24 अपुल्लोस हेसुर इन ऊंद यहूदी ईरोन, यार्द जनम सिकन्दरिया दा आगीत, जो अक्‍कलवाळा मंळसा ईरोन अदिक शास्त्र अक वळ्लीद तरीका देल जानसोन, इफिसुस दा बंदुन.
ACT 18:25 आव प्रभु उन हादी इन शिक्षा ताकोंडिदुन, अदिक मन हचकु अदिक पुरा उत्साह देल यीशु उन बारा दा वळ्लीद-वळ्लीद केळसोन अदिक कलसोन, लेकीन आव सिर्फ यूहन्ना अन्द बपतिस्मा अन्द मात जानसोन.
ACT 18:26 आव सभागृह दा निडर आगकु माताळली कुरतुन, लेकीन प्रिसकिल्ला अदिक अक्विला आऊंद मातगोळी केळकु आऊक तान मान्या ओतुर अदिक परमेश्वर उन हादी आऊक मात्‍त वळ्लीद-वळ्लीद हेळदुन.
ACT 18:27 याग अपुल्लोस निश्चय माळदुन कि आप्पारी ईळुकु अखाया अक होदेव इफिसुस उन विश्वासी वार्टुर आऊन हिम्मत वाळुसदुर अदिक अखाया अन अनुयायीगोळी आऊन स्वागत माळोर साटी ऊंद चिट्ठी कळुदुर; अदिक आव अल पोहचुस्कु आ लॉकुर्द बळा सहायता माळदुन जो परमेश्वर उन अनुग्रह अन कारण विश्वास दा बंदीदुर.
ACT 18:28 यतिकी आव शास्त्र देल प्रमाण कोट कोटकु कि यीशु उच मसीह हुन, धोळ प्रबलता देल यहूदीगोळ्द सप्पा मुंदुर मुंद बोलती बंद माळ्त ईत्‍तुन.
ACT 19:1 याग अपुल्लोस कुरिन्थुस दा ईरोन, रा पौलुस म्याकुच इन सप्पा प्रदेश टु यात्रा माळतेला इफिसुस दा बंदुन. अल आऊक थ्वाळासा चेलागोळ सिकदुर
ACT 19:2 आव आंदुर से केळदुन, “येन नीव विश्वास माळावती पवित्र आत्मा अक नोळदीर?” आंदुर आऊन से अंदुर, “नाव रा पवित्र आत्मा अन्द चर्चा भी केळीदील.”
ACT 19:3 आव आंदुर से अंदुन, “रा बाक नीव यार्द बपतिस्मा ताकोंडीर?” आंदुर अंदुर, “यूहन्ना अन्द बपतिस्मा.”
ACT 19:4 पौलुस अंदुन, यूहन्ना आंदरी बपतिस्मा कोट्टुन कि आंदुर तान पापगोळ देल तिरगुल, कि जो नान बाद्दा बरावाळा आन, आऊन मा मतलब यीशु मा विश्वास माळेतीर.
ACT 19:5 ईद केळकु आंदुर प्रभु यीशु उन हेसुर दा बपतिस्मा ताकोंडुर.
ACT 19:6 याग पौलुस आंदुर मा कय ईटदुन, रा पवित्र आत्मा आंदुर मा ईळुत, अदिक आंदुर अलग-अलग भाषा माताळली अदिक भविष्यवाणी माळली कुरतुर.
ACT 19:7 इंदुर सप्पा लगभग हन्नेळ मंळसा ईरोर.
ACT 19:8 आव यहूदी सभागृह दा होगकु मुर तिंगुळ ताका निडर आगकु माताळतेला ईत्‍तुन, अदिक परमेश्वर उन राज्य अन्द बारा दा झगळा माळतेला अदिक समझुसतेला ईत्‍तुन.
ACT 19:9 लेकीन याग येनारा लॉकुर कठोर आगकु आऊंद मान्सीदील उलटा लॉकुर मुंद ई हादी अक बेकार अनली कुरतुर, रा आव आंदरी बिट बुटुन अदिक चेलागोळी अलग माळ बुटुन, अदिक रोज तुरन्नुस उन शिक्षा अन मान्ना दा झगळा माळतोगोन.
ACT 19:10 येढ्ढ वर्ष ताका ईदा आगतेला ईत्‍त, ईल ताका कि आसिया नोर ईरावाळेर येन यहूदी येन गैरयहूदी सप्पा प्रभु उन वचन केळ कोंडुर.
ACT 19:11 परमेश्वर पौलुस उन कयगोळ देल सामर्थ्य अन्द अनोखा क्याल्सा तोर्सतोगोन.
ACT 19:12 ईल ताका कि रूमाल अदिक गमछा आऊन मय देल स्पर्श माळसुसकु बिमारगोळ मा हाकतोगोर, अदिक आंदुर बिमारीगोळ होग्त ईरतोगोव; अदिक दुष्टआत्मागोळ आंदुर दा टु होट बुळतोगव.
ACT 19:13 लेकीन येनारा यहूदी जो झाळ फुक माळ्त टेटाळोर, आंदुर प्रभु यीशु मसीह अन हेसुर इस्तेमाल माळली कुरतुर आंदुर दुष्टआत्मागोळी अनतोगोर, “या यीशु उन प्रचार पौलुस माळतान, ना नीमी आ यीशु उन हेसुर देल आग्या कोळतीन.”
ACT 19:14 अदिक स्क्किवा हेसुर इन ऊंद यहूदी प्रधान याजक उन येळ चिकोर ईरोर, जो हिंग माळतोगोर.
ACT 19:15 लेकीन दुष्टआत्मा आंदरी उत्‍तर कोळ्त, “यीशु उक ना अरूतीन, अदिक पौलुस उक भी अरूतीन, लेकीन नीव यार हुईर?”
ACT 19:16 अदिक आ मंळसा यारदा दुष्टआत्मा ईरोद आंदुर मा हावी आगकु अदिक आंदरी वश दा तनकु, आंदरी हिंग बडुत कि आंदुर ऊगळा अदिक घायल आगकु आ मान्या टु होटकु ओळदुर.
ACT 19:17 ईद मात इफिसुस इन ईरावाळेर सप्पा यहूदी अदिक गैरयहूदी भी जान्स कोंडुर, अदिक आ सप्पा मुंदुर दा अंज्क तुम्मेत; अदिक प्रभु यीशु उन हेसुर इन बळाई आत.
ACT 19:18 यार विश्वास माळीदुर, आंदुर दा टु हापाळ मुंदुर बंदकु तान तान बेकार क्याल्सागोळी मान्स कोंडुर अदिक अल बंदुर.
ACT 19:19 जादू माळावाळेर दा टु हापाळ मुंदुर तान तान पोथळीगोळी जमा माळकु सप्पा मुंदुर मुंद होताक बुटुर, अदिक याग अऊर्द दाम जोळ्सकु आत, रा पचास हजार बेळ्ली इन सिक्‍कागोळ बराबर होळ्त.
ACT 19:20 ई प्रकार प्रभु उन वचन बलपूर्वक फैलुस्त अदिक मजबूत आगतेला होत.
ACT 19:21 याग ई मातगोळ आगेदव रा पौलुस मन दा ठान्सदुन कि मकिदुनिया अदिक अखाया टु आगकु यरूशलेम इक होगाईन, अदिक अंदुन, “अल होगदुर बाद्दा नानी रोम इक भी नोळोद जरूरी आद.”
ACT 19:22 इदुरसाटी तान स्यावा माळावाळेर दा टु तीमुथियुस अदिक इरास्तुस उक मकिदुनिया कळुकु खुद थ्वाळासा दिन आसिया दा ईतोदुन.
ACT 19:23 आ समय इफिसुस दा प्रभु उन हादी इन बारा दा बळा हंगामा आत.
ACT 19:24 अल बेळ्ली इन क्याल्सा माळावाळा देमेत्रियुस हेसुर इनव ऊंद सोनार ईरतोगोन आव देवी अरतिमिस इन बेळ्ली इन मंदिर माळतोगोन, यदुर देल कारीगरगोळी हापाळ फायदा सिकतोगोद.
ACT 19:25 आव आंदरी अदिक हिंग अच वस्तुगोळ्द कारीगरगोळी जमा माळकु अंदुन, “हे मंळसागोळा, नीव जान्सतीर कि ई क्याल्सा देल नामी याट धन सिकतद.
ACT 19:26 नीव नोळतीर अदिक केळतीर कि सिर्फ इफिसुस अच दा ईला, उलटा सप्पा आसिया क्षेत्र दा ईद अन अनकु ई पौलुस हापाळ सा लॉकुरी समझुसदुन, कि जो कय इन कारीगरी आद, आंदुर परमेश्वर आल्लच.
ACT 19:27 इदुर देल ईग सिर्फ ईदा मात इन अच अंज्क हैलेच कि नाम ई धंदा अन्द महत्व होग्त ईत्‍तीत, उलटा ईद कि महान देवी अरतिमिस इन मंदिर तुच्छ सम्सकु आदीत, अदिक यारी सप्पा आसिया अदिक दुनिया पुजा माळतद आकिन महत्व भी होग्त ईत्‍तीत.”
ACT 19:28 आंदुर ईद केळकु सिट्ट देल तुम्मेदुर अदिक चिल्ळास चिळ्लासकु अनली कुरतुर, इफिसिगोळ अरतिमिस देवी, महान आर!
ACT 19:29 अदिक सप्पा नगर दा धोळ्द हंगामा मचुसेत, अदिक लॉकुर गयुस अदिक अरिस्तर्खुस उक जो पौलुस उन संगी यात्री ईरोर जो मकिदुनिया टु बंदीदुर, आंदरी हुळ्द बुटुर, अदिक नाटक घर दा ओतुर.
ACT 19:30 याग पौलुस लॉकुर्द हात्‍ती बुळ्क होगोद चाहासदुन रा चेलागोळ आऊक होग गोटीदील.
ACT 19:31 आसिया नोर शासकगोळ दा टु भी आऊन कई संगीगोळ आऊन हात्‍ती बातणी कळुदुर अदिक विनती माळदुर कि नाटक घर दा होगकु जोखिम नेगुबाळेत.
ACT 19:32 अल यावारा येनारा चिल्ळासोन रा यावारा येनारा, यतिकी सभा दा बळा गळबळी आगोद, अदिक हापाळ सा लॉकुर रा ईद जानसोर भी ईला कि नाव यदुर साटी जमा आगेव.
ACT 19:33 आग आंदुर सिकन्दर उक, यारी यहूदीगोळ निदरूसिदुर, भीळ दा टु मुंद वाळुसदुर. सिकन्दर कय देल इशारा माळकु लॉकुर मुंद खुद इन बचाव इन साटी भाषण कोळोद चाहासोन.
ACT 19:34 लेकीन याग आंदुर जान्स कोंडुर कि आव यहूदी हुन, रा सप्पा च्या सप्पा ऊंद आवाज देल कम से कम येढ्ढ तास ताका चिल्ळासतेला ईत्‍तुर, “इफिसिगोळ अरतिमिस, महान आर.”
ACT 19:35 आग नगर इन लेखा जोखा ईटावाळा लॉकुरी शांत माळकु अंदुन, “हे इफिसुस इन लॉकुरा, येन दुनिया दा हिंग यावारा मंळसा आन जो जान्सालुन कि इफिसिगोळ नगर इन महान देवी अरतिमिस, मंदिर इन अदिक स्वर्ग टु बिळावाळा पवित्र कल्ल इन रक्षा माळावळ्त उर.
ACT 19:36 इदुरसाटी जब कि ई मातगोळ्द खंडन अच आगसकाल, रा उचित आद कि नीव शांत ईरी अदिक बिना सोच्द सम्द येनु माळबाळी.
ACT 19:37 यतिकी नीव ई मंळसागोळी तंदीर जो ना मंदिर इन लुटसावाळेर आर ना नाम देवी इन अपमान माळावाळेर उर.
ACT 19:38 अगर देमेत्रियुस अदिक आऊन संगी कारीगरगोळी यारदारा से शिकायत आद रा कचेरी खुला आद अदिक शासक भी आन; अल होगकु आंदुर आबुर दाबुर मा आरोप हचुल.
ACT 19:39 लेकीन अगर नीव यातोदारा दुसरा मात इन बारा दा येनारा केळोद चाहास्तीर, रा कानूनी सभा दा फैसला माळकु आदीत.
ACT 19:40 यतिकी ईंद इन दंगा अन्द कारण नाम मा दोष हच्चोद अंज्क आद, इदुरसाटी कि इदुर येनु कारण हैलेच, अदिक नाव ई भीळ इन जमा आगोद येनु उत्‍तर कोळ सकालेव.”
ACT 19:41 ईद अनकु नगर इन लेखा जोखा कोळावाळा सभा अक सार माळदुन.
ACT 20:1 याग दंगा थामसेत रा पौलुस चेलागोळी कारसुसकु हिम्मत वाळुसदुन, अदिक आंदुर से सार आगकु मकिदुनिया अन्द दी होटोदुन.
ACT 20:2 आ सप्पा प्रदेश दा टु आगकु अदिक चेलागोळी हापाळ उत्साहीत माळकु आव अखाया दा बंदुन.
ACT 20:3 याग मुर तिंगुळ ईतकु आव अल टु जहाज मा सीरिया अन दी होगोन, रा यहूदी आऊक कोनली ताक दा हतकु ईरोर, इदुरसाटी आव ईद निश्चय माळदुन कि मकिदुनिया आगकु वापस आगेगुल.
ACT 20:4 बिरीया अन्द पुर्रुस उन पार सोपत्रुस अदिक थिस्सलुनीके अन्द अरिस्तर्खुस अदिक सिकुन्दुस, अदिक दिरबे अन्द गयुस, अदिक तीमुथियुस, अदिक आसिया अन्द तुखिकुस अदिक त्रुफिमुस आसिया ताका आऊन सांगुळ ईरोर.
ACT 20:5 आंदुर मुंद होटोदुर अदिक त्रोआस दा नाम हादी कायतेला ईत्‍तुर.
ACT 20:6 अदिक नाव अखमीरी रोट्टी इन हाब्ब खतम आगदुर बाद्दा फिलिप्पी टु जहाज देल होटकु अईद दिन इन बाद्दा त्रोआस दा बंदकु आंदुर से मुलाकात माळदेव, अदिक ऊंद हप्ता अल्या ईत्‍तेव.
ACT 20:7 बाक नाव शण्यार इन द्यावगा याग ऊमोर साटी आपस दा जमा आदेव, रा पौलुस आंदुर से मातचीत हेळली कुरतुन, आऊक दुसरा दिशी इच होगोद ईरोद, इदुरसाटी आव आर्धा ईळ्लक ताका मातगोळी हेळतेला ईत्‍तुन.
ACT 20:8 या म्याकुच इन कमरा दा नाव जमा ईरेव, अदुर दा हापाळ दिंग्या होत्‍तव.
ACT 20:9 अदिक यूतुखुस हेसुर इन ऊंद हारोदव खिळकी मा कुर्तकु भर जप्प देल डोलसोन. याग पौलुस हापाळ होत ताका मातगोळी हेळतेला ईत्‍तुन रा आव जप्प इन झ्वाका देल तिसरा मंजील मा टु ल्यालमा बिद्दुन, अदिक याग आंदुर आऊक नेगदुर रा आव सोतोगीदुन.
ACT 20:10 लेकीन पौलुस ल्यालमा ईळदुन अदिक आऊन से लपटुसेदुन, अदिक कुतक्या हतकु अंदुन, “घबरूसबाळी; यतिकी आव जित्‍ता आन.”
ACT 20:11 अदिक पौलुस म्याकुच होगकु ऊंडुन अदिक ईट होत ताका आंदुर से मातगोळी हेळतेला ईत्‍तुन कि व्हातुर आगेत. बाक आव होटोदुन.
ACT 20:12 अदिक आंदुर आ हारोदव पार उक जित्‍ता तंदुर अदिक हापाळ शांती सिक्त.
ACT 20:13 नाव पयले अच जहाज मा कुर्तकु अस्सुस इक ईद विचार देल मुंद होदेव कि अल टु नाव पौलुस उक सांगुळ हुडुकोंडेव, यतिकी आव ईद इदुरसाटी ठहरूसीदुन कि खुद अच पैदल बरोद चाहासोन.
ACT 20:14 याग पौलुस अस्सुस दा नामी सिकदुन रा नाव आऊक जहाज दा कुर्सकु मितुलेने नगर दा वळेदेव.
ACT 20:15 अल टु जहाज दा कुर्तकु नाव दुसरा दिशी खियुस नगर इन मुंद पोहचुसदेव, अदिक दुसरा दिशी सामुस नगर दा बंदेव; बाक अदुर दुसरा दिशी नाव मिलेतुस नगर दा बंदेव.
ACT 20:16 यतिकी पौलुस इफिसुस उन हात्‍ती टु आगकु होगोद निश्चय माळीदुन कि येल्यारा हिंग आगबाळुल कि आऊक आसिया दा समय हतुल; यतिकी आव जल्दी दा ईरोन कि अगर आग सकुल रा आव पिन्तेकुस्त हाब्ब दिशी यरूशलेम दा ईरूल.
ACT 20:17 पौलुस मिलेतुस नगर टु इफिसुस नगर दा बातणी कळुदुन, अदिक मंडली अन्द स्याणागोळी कार्सुसदुन.
ACT 20:18 याग आंदुर आऊन हात्‍ती बंदुर, रा आव अंदुन: नीव जान्सतीर कि पयला अच दिशी टु याग ना आसिया दा पहुचुसदीन, ना हर समय नीम सांगुळ याता प्रकार देल ईत्‍तीन.
ACT 20:19 मतलब बळा नम्रता देल, अदिक वर्ल वर्लकु, अदिक आ परीक्षागोळ दा जो यहूदीगोळ्द साजीश इन कारण नान मा बंदकु बित्‍त, ना प्रभु उन स्यावा माळतेला अच ईत्‍तीन;
ACT 20:20 अदिक जो जो मातगोळ नीम फायदा नव ईरव, आंदरी हेळली अदिक लॉकुर्द मुंद अदिक मानोन मान्नी कलसोर से यागलु हिंद आगीदील,
ACT 20:21 उलटा यहूदीगोळ अदिक गैरयहूदीगोळ्द मुंद गवाही कोळ्त ईत्‍तुन कि परमेश्वर उन दी मन तिर्गुसोद अदिक नाम प्रभु यीशु मसीह मा विश्वास माळ पायजे.
ACT 20:22 ईग नोळी, ना पवित्र आत्मा अन आग्या अन अनुसार यरूशलेम इक होगतीन, अदिक जान्सालीन कि अल नान मा येन येन बितसीत;
ACT 20:23 ना रा बस ईट चाहासतीन कि हर ऊंद नगर दा पवित्र आत्मा नानी चेतावनी कोळतद कि बंदीगृह अदिक मुश्किल घळीगोळ नान हादी कायताव.
ACT 20:24 लेकीन ना तान जीव इक येनु समसालीन, सिर्फ ईट चाहासतीन कि प्रभु यीशु उन कोळ्द क्याल्सा अक पुरा माळाईन, जो क्याल्सा आव नानी कोटान, अदिक अद क्याल्सा ईद कि परमेश्वर उन अनुग्रह अन्द खुशखबरी इन घोषणा माळाईन.
ACT 20:25 ना परमेश्वर उन राज्य अन प्रचार नीम सप्पा मुंदुर दा माळ्त ओयाळदिन, अदिक ना जान्सतीन कि नीम दा टु नानी यावारा भी यागलु नोळ सकतीदिल.
ACT 20:26 इदुरसाटी ना ईंद इन दिशी पुरा रीति अदिक सफाई देल नीम से अनतीन, कि नीम नाश इन जिम्मेदार ना आल्लच ना निर्दोष आईन.
ACT 20:27 यतिकी ना परमेश्वर उन पुरा योजना जो नीम साटी आव, पुरा रीति देल हेळोर साटी हिंद आगीदील.
ACT 20:28 तान अदिक तान लॉकुर्द पुरा गुट इन देखभाल माळावाळेर बन्सी यतिकी पवित्र आत्मा आंदुर दा टु नीमी आंदुर्द चिंता माळावाळा माळ्यान, कि नीव परमेश्वर उन मंडली अन्द रखवाली माळी, यारी आव तान खुन देल कोंडीदुन.
ACT 20:29 ना जान्सतीन कि नान होगदुर बाद्दा भयंकर लांडग्यागोळ नीम लॉकुर न्याड्या होक्‍केव अदिक अव ई भोला भाला लॉकुर गुट इक बिळतीदील.
ACT 20:30 हिंग समय बंदीत कि नीम्द अच न्याड्या दा टु भी हिंग-हिंग लॉकुर येद्दार जो चेलागोळी तान हींद जेडुली उलटा सिधा मातगोळी हेळ्यार.
ACT 20:31 इदुरसाटी सावधान ईरी, अदिक याद ईटेतीर कि ना मुर वर्ष ताका ईळ्ल हागुल वर्ल वर्लकु हर ऊंद मंळसा अक कलसीन.
ACT 20:32 अदिक ईग ना नीमी परमेश्वर उक, अदिक आऊन अनुग्रह अन्द बातणी इन कय दा सोप्स बुळतीन; जो नीमी पवित्र माळ सकतान अदिक सप्पा लॉकुर दा सप्पा आशीष कोळ सकतान.
ACT 20:33 ना यारदारा बेळ्ली, व्हान्ना या कपळा अन लालच माळीदील.
ACT 20:34 नीव खुद अच जान्सतीर कि ईवा कयगोळ नान अदिक नान संगीगोळ्द जरवत पुरा माळदव.
ACT 20:35 ना नीमी सप्पा येनारा माळकु तोर्सदीन कि ईद रीति देल मेहनत माळतेला निर्बलगोळी संभालसोद अदिक प्रभु यीशु उन वचन याद ईटोद जरूरी आद, जो आव खुद अच अंदिदुन: ताकोमोर से कोळोद वळ्लीद आद.
ACT 20:36 ईद अनकु पौलुस आंदुर सांगुळ ट्वांगरा टेक्सदुन प्रार्थना माळदुन.
ACT 20:37 आग आंदुर सप्पा मुंदुर हापाळ वर्लदुर अदिक पौलुस उन कुतक्या हुडुकु आऊन चुम्मा ताकोमली कुरतुर अदिक सार माळदुर.
ACT 20:38 आंदुर खास माळकु ई मात देल शोक दा ईरोर जो आव अंदिदुन कि नीव नान मार्रा बाक नोळतीदिल. आग आंदुर आऊक जहाज ताका पोहचुसदुर.
ACT 21:1 याग नाव आंदुर से अलग आगकु जहाज खोल्सदेव, रा सरका हादी देल कोस नगर दा बंदेव, अदिक दुसरा दिशी रूदुस दा अदिक अल टु पतरा दा होदेव.
ACT 21:2 अल ऊंद जहाज फिनीकी अक होगतेला सिक्त, अदिक नाव अदुर मा येरकु अदुर मा कुर्तोदेव.
ACT 21:3 याग साइप्रस कांळ्सत, रा नाव अदरी डाक्या कय दी बिट्टेव, अदिक सीरिया अक नळुकु सूर दा ईळदेव; यतिकी अल जहाज इन माल ईळसोद ईरोद.
ACT 21:4 अल नामी थ्वाळासा विश्वासीगोळ सिकदुर अदिक नाव अल येळ दिन ताका ईत्‍तेव. आंदुर आत्मा अन्द सामर्थ्य अन द्वारा पौलुस से अंदुर कि यरूशलेम होगबाळेत.
ACT 21:5 बाक अल रूकसोद नाम समय पुरा आगेत, रा नाव आंदुर से विदा ताकोमकु अल टु सार आगेदेव; अदिक सप्पा मुंदुर आर्तेर अदिक चिकोर समेत नामी नगर इन व्हार्या ताका पोहचुसदुर; अदिक नाव किनारा मा ट्वांगरा टेक्सकु प्रार्थना माळदेव,
ACT 21:6 आग आबुर दाबुर से विदा आगकु, नाव रा जहाज मा येरदेव अदिक आंदुर तान तान मान्नी वापस होटोदुर.
ACT 21:7 आग नाव सूर टु जलयात्रा पुरा माळकु पतुलिमयिस दा पोहचुसदेव, अदिक विश्वासी वार्टुरी नमस्कार माळकु आंदुर सांगुळ ऊंद दिन ईत्‍तेव.
ACT 21:8 दुसरा दिशी नाव अल टु नळुकु कैसरिया दा बंदेव, अदिक फिलिप्पुस खुशखबरी प्रचारक उन मान्या जो निवळुस्द विशेष येळ सेवकगोळ दा टु ऊंद ईरोन; होगकु आऊन मान्या ईत्‍तेव.
ACT 21:9 आऊन नाक कुवारा पोरगोळ ईरोर, जो परमेश्वर उन दी टु बरावाळा बातणी कोळतोगोर.
ACT 21:10 याग नाव अल हापाळ दिन ईत कोंडेव, रा अगबुस हेसुर इन ऊंद भविष्यवक्ता यहूदिया टु बंदुन.
ACT 21:11 आव नाम हात्‍ती बंदकु पौलुस उन पट्टा ताकोंडुन, अदिक तान कय काल कटकु अंदुन, “पवित्र आत्मा ईद अनतद कि याता मंळसा अन्द ईद पट्टा हुन, आऊक यरूशलेम दा यहूदी ईदा रीति देल कट्यार, अदिक गैरयहूदीगोळ कय दा सोपस्यार.”
ACT 21:12 याग नाव ई मातगोळ केळदेव, रा नाव अदिक अलेर लॉकुर आऊन से विनती माळदुर कि यरूशलेम इक होगबाळुल.
ACT 21:13 लेकीन पौलुस उत्‍तर कोट्टुन, “नीव येन माळतीर, हिंग वर्ल वर्लकु नान मन मुरूतीर? ना रा प्रभु यीशु उन हेसुर इन साटी यरूशलेम दा सिर्फ कटकु आगोर साटी अच ईला उलटा सायोर साटी भी तयार आईन.”
ACT 21:14 याग आव मान्सीदील रा नाव ईद अनकु चुप आगेदेव, “प्रभु उन इच्छा पुरा आगुल.”
ACT 21:15 अल काईक दिन ईत्‍तुर बाद्दा नाव तयारी माळदेव अदिक यरूशलेम इक होटोदेव.
ACT 21:16 कैसरिया टु भी थ्वाळासा चेलागोळ नाम सांगुळ आगेदुर, अदिक नामी मनासोन हेसुर इन साइप्रस इन ऊंद हाळव चेला अन्द मान्या तंदुर, कि नाव आऊन मान्या इत्‍तेव.
ACT 21:17 याग नाव यरूशलेम दा पोहचुसदेव, रा विश्वासी वार्टुर बळा खुशी इन सांगुळ नाम स्वागत माळदुर.
ACT 21:18 दुसरा दिशी पौलुस नामी हुळकु याकूब उन हात्‍ती होदुन, यल सप्पा स्याणा लॉकुर जमा ईरोर.
ACT 21:19 आग पौलुस आंदरी नमस्कार माळकु, जो जो क्याल्सा परमेश्वर आऊन सेवकाई इन द्वारा गैरयहूदीगोळ दा माळीदुन, ऊंद ऊंद माळकु सप्पा हेळदुन.
ACT 21:20 आंदुर ईद केळकु परमेश्वर उन महिमा माळदुर, बाक आऊन से अंदुर, “हे वार्ट पौलुस, नी नोळत्या कि यहूदीगोळ दा टु कई हजार लॉकुर विश्वास माळदुर; अदिक सप्पा व्यवस्था अन साटी धुन हचकु आर.
ACT 21:21 आंदरी नीन बारा दा कल्सकु आग्याद कि नी गैरयहूदीगोळ दा ईरावाळेर यहूदीगोळी मूसा अन व्यवस्था अक बिट बुळोद कल्सत्या, अदिक अनत्या, कि ना तान चिकोर्द खतना माळसुसी अदिक ना रीतिगोळ मा नळी.
ACT 21:22 रा बाक येन माळ पायजे? लॉकुर जरूर केळ्यार कि नी बंद्या.
ACT 21:23 इदुरसाटी जो नाव नीन से अनतेव, अद माळ. नाम ईल नाक मंळसा आर यार मन्नत बेळ्यार.
ACT 21:24 आंदरी हुळकु आंदुर सांगुळ तान तान इक शुद्ध माळ; अदिक आंदुर साटी खर्चा माळ कि आंदुर मुंडन आगुल. आग सप्पा जान्स कोंडार कि जो मातगोळ आंदरी नीन बारा दा हेळकु आग्याद, अऊर्दा येनु सच्चाई हैलेच लेकीन नी खुद भी मूसा अन व्यवस्था अक मान्सकु अदुर अनुसार नळुत्या.
ACT 21:25 लेकीन आ गैरयहूदीगोळ्द बारा दा यार विश्वास माळ्यार, नाव ईद निर्णय माळकु आंदरी चिट्ठी लिख्सकु कळुदेव कि आंदरी येनारा ईत्‍ता भोजन ईला तिन पायजे जो मूर्तीगोळ मा बली येर्सकु आग्याद, अदिक खुन देल अदिक कुतक्या वत्‍त पशु उन मास देल, अदिक व्यभिचार देल ऊळ्दकु ईरूल.”
ACT 21:26 ई प्रकार पौलुस आ मंळसागोळी तान सांगुळ हुळदुन, अदिक दुसरा दिशी आंदुर सांगुळ शुद्धीकरण इन रीति इन अनुसार तान तान इक शुद्ध माळदुन अदिक मंदिर दा होदुन यल आव घोषणा माळदुन, कि शुद्धीकरण इन दिन याग पुरा आदव अदिक नाम दा टु हर ऊंद मंळसा अन साटी चढ़ावा याग येर्सकु आदीत.
ACT 21:27 याग अव येळ दिन पुरा आगदुर मा ईरव, रा आसिया अन यहूदीगोळ पौलुस उक मंदिर दा नोळकु सप्पा भीळ इक भळकुस बुटुर, अदिक पौलुस उक हुडुकोंडुर,
ACT 21:28 आंदुर चिळ्लासकु अनली कुरतुर, “हे इस्त्राएलगोळा, सहायता माळी; ईव आवा मंळसा हुन, जो इस्त्राएली लॉकुर्द, अदिक मूसा अन व्यवस्था अन, अदिक ई मंदिर इन विरोध दा हर जागा सप्पा लॉकुरी कल्सतान, ईल ताका कि गैरयहूदीगोळी भी मंदिर दा तनकु आव ई पवित्र जागा अक अपवित्र माळ्यान.”
ACT 21:29 आंदुर हिंग इदुरसाटी अंदुर, यतिकी आंदुर इदुर से पयले इफिसुसवासी त्रुफिमुस उक आऊन सांगुळ नगर दा नोळीदुर, अदिक समसीदुर कि पौलुस आऊक मंदिर दा हुळकु बंदान.
ACT 21:30 आग सप्पा नगर भळकुसेत, अदिक लॉकुर ओळकु जमा आदुर अदिक पौलुस उक हुळकु मंदिर इन व्हार्या जेडुकु तंदुर, अदिक तुरन्त दरवाजा बंद माळकु आदव.
ACT 21:31 याग भीळ इन लॉकुर आऊक कोंद बुळोद चाहासोर, रा रोमी तुकळी इन सेनानायक उक खबर सिक्त कि पुरा यरूशलेम दा खलबली मचुसेग्याद.
ACT 21:32 आग आव तुरन्त सैनिकगोळी अदिक सूबेदारगोळी हुळकु आंदुर हात्‍ती ल्यालमा ओळकु बंदुन; अदिक आंदुर पलटन इन सूबेदार उक अदिक सैनिकगोळी नोळकु पौलुस उक बडोद बिट बुटुर.
ACT 21:33 आग रोमी सेनानायक पौलुस उन हात्‍ती बंदुन अदिक आऊक बंदी माळ कोंडुन; अदिक आव आऊक येढ्ढ शंकलीगोळ देल कटोद आग्या कोटकु केळदुन, “ईव याव हुन अदिक ईव येन माळ्यान?”
ACT 21:34 लेकीन भीळ दा टु यावारा येनारा रा यावारा येनारा चिल्ळासतेला ईत्‍तुर. याग आव दंगा इन कारण निश्चित रूप देल सच्चाई जान्स सकिदील, रा आऊक किला दा ओयोद आग्या कोट्टुन.
ACT 21:35 याग आव सीळी मा पोहचुसदुन, रा हिंग आत कि भीळ इन दबाव इन कारण सैनिकगोळी आऊक नेगुकु ओयोद बित्‍त,
ACT 21:36 यतिकी लॉकुर्द भीळ ईद चिल्ळासतेला आऊन हिंद बिदकु ईरोद, “आऊक कोंद बुळी.”
ACT 21:37 याग सैनिक पौलुस उक किला दा ओयोर मा ईरोर, रा आव रोमी सेनानायक से अंदुन, “येन नानी आग्या आद कि ना नीन से येनारा अनाईन?” आग सेनानायक आव अंदुन, “येन नी ग्रीक भाषा माताळत्या?
ACT 21:38 येन नी आव मिस्त्री मंळसा रा आल्लच, याव थ्वाळासा समय पयले विद्रोह सुरू माळसुसिदुन, अदिक जो ईल रेगिस्तान दा नाक हजार कटारबन्द आतंकवादीगोळ्द अगुवाई माळोन?”
ACT 21:39 आग पौलुस अंदुन, “ना रा तरसुस इन यहूदी मंळसा हुईन! किलिकिया अन्द प्रसिद्ध नगर इन निवासी हुईन. ना नीन से विनती माळतीन कि नानी लॉकुर से मातगोळी हेळगोळ.”
ACT 21:40 याग आव आग्या कोट्टुन, रा पौलुस सीळी मा निदुरकु लॉकुरी कय देल इशारा माळदुन. याग आंदुर चुप आगेदुर रा आव इब्रानी भाषा दा माताळली कुरतुन:
ACT 22:1 “हे वार्टुरा अदिक आप्प उन घाई सज्जनगोळा, नान बचाव दा जो नानी माताळोद आद अदरी केळी, जो ना ईग नीम मुंद प्रस्तुत माळतीन.”
ACT 22:2 आंदुर ईद केळकु कि आव नाम से इब्रानी भाषा दा माताळतान, रा आंदुर मात्‍त यक्कुल चुप आगेदुर. आग आव अंदुन:
ACT 22:3 “ना रा ऊंद यहूदी मंळसा हुईन, किलिकिया अन तरसुस दा पैदा आदीन; लेकीन ईदा यरूशलेम नगर दा गमलीएल इन कालगोळ्द हात्‍ती कुर्तकु पुर्वजगोळ्द नियमगोळी कठिन निर्देशगोळी प्राप्त माळदीन, अदिक परमेश्वर उन साटी हिंग धुन हचकु ईरीन, ह्यांग नीव सप्पा ईंद हचकु आईर.
ACT 22:4 ना मंळसा अदिक आर्तेर येढ्ढु मुंदरी कैदी माळ माळकु बंदीगृह दा हाकदीन, ई हादी मा नळावाळेर इक ईल ताका सतुसदीन कि आंदरी कोन्सुस भी बुटीन.
ACT 22:5 ना सही माताळतीन ई मात इन साटी महायाजक अदिक सप्पा स्याणागोळ गवाह आर, ना दमिश्क दा यहूदी वार्टुर्द हेसुर देल ईंदुर से चिट्ठी भी ताकोंडीदिन, कि जो लॉकुर ई हादी मा नळुतार आंदरी बंदी माळकु यरूशलेम दा तराईन कि आंदरी ना दण्ड कोळसुस सकाईन.
ACT 22:6 “याग ना यात्रा माळतेला दमिश्क इन हात्‍ती पहुचुसदीन, रा हिंग आत कि लगभग मदणी इक अचानक ऊंद तेज उजुळ आकाश टु नान नाकु दी चमकुस्त.
ACT 22:7 अदिक ना जागा मा बिदोदीन अदिक ईद आवाज केळदीन, ‘हे शाऊल, हे शाऊल, नी नानी येती सतुसत्या?’
ACT 22:8 ना उत्‍तर कोटीन, ‘हे प्रभु, नी याव हुय?’ आव नान से अंदुन, ‘ना यीशु नासरी हुईन, यारी नी सतुसत्या.’
ACT 22:9 नान संगीगोळ ज्योति रा नोळदुर, लेकीन जो नान से माताळोन आऊन आवाज केळीदील.
ACT 22:10 आग ना अंदीन, ‘हे प्रभु, ना येन माळाईन?’ प्रभु नान से अंदुन, ‘यदकु दमिश्क दा होग, अदिक जो येनारा नीन माळोर साटी ठहरूस्कु आग्याद अल नीन से सप्पा हेळकु आगेदीत.’
ACT 22:11 आ तेज ऊजुळ इन कारण ना कुढ्ढ आगेगिदीन, रा नान संगीगोळ नान कय हुडुकु दमिश्क दा तंदुर.
ACT 22:12 “आग हनन्याह हेसुर इन व्यवस्था अन अनुसार नळावाळा ऊंद भक्त मंळसा, जो अल ईरावाळेर सप्पा यहूदीगोळ दा सुनाम ईरोन, नान हात्‍ती बंदुन,
ACT 22:13 अदिक निदुरकु नान से अंदुन, ‘हे वार्ट शाऊल, बाक नोळली हत.’ अदा घळी नान कण्णगोळ खुलसेदव अदिक ना आऊक नोळदीन.
ACT 22:14 आग आव अंदुन, ‘नाम आप्प दादागोळ परमेश्वर नीनी इदुरसाटी ठहरूसेव कि नी आऊन इच्छा अक जानस्या, अदिक आ न्यायी सेवक उक नोळ्या अदिक आऊन बाय देल मातगोळी केळ्या.
ACT 22:15 यतिकी नी आऊन दी टु सप्पा मंळसागोळ्द मुंद आ मातगोळ्द गवाह आद्या जो नी नोळ्या अदिक केळ्या.
ACT 22:16 ईग येती देर माळत्या? येळ, बपतिस्मा ताकोम, अदिक आऊन हेसुर ताकोमकु तान पापगोळी तोळ्द बुळ.’
ACT 22:17 “याग ना बाक यरूशलेम दा बंदकु मंदिर दा प्रार्थना माळीन, रा ऊंद दर्शन नोळदीन,
ACT 22:18 अदिक यदुर दा ना प्रभु उक नोळदीन कि आव नान से अनतान, ‘जल्दी माळकु यरूशलेम टु राटनेरी होटबुळ; यतिकी आ लॉकुर नान बारा दा नीन गवाही मान्सतीदील.’
ACT 22:19 ना अंदीन, ‘हे प्रभु, अद रा नीव जान्सतीर कि ना नीन मा विश्वास माळावाळेरी बंदीगृह दा हाक तोगीन अदिक जागा जागा सभागृह दा बळसुस तोगीन.
ACT 22:20 याग नीन गवाह स्तिफनुस उक कोन्सुसकु आत आग ना भी अल निदुरकु ईरीन अदिक ई मात दा सयमत ईरीन, अदिक आऊन कोन्नावाळेर्द कपळागोळ रखवाली माळ तोगीन.’
ACT 22:21 अदिक प्रभु नान से अंदुन, ‘होटोग: यतिकी ना नीनी गैरयहूदीगोळ हात्‍ती दुर दुर कळाईन.’”
ACT 22:22 आंदुर ईद मात ताका पौलुस उन केळतेला ईत्‍तुर, आग ऊँचा आवाज दा चिल्ळासदुर, “हिंग मंळसा अन अन्त माळी, आऊन ई संसार दा जित्‍ता ईरोद उचित हैलेच!”
ACT 22:23 याग आंदुर चिल्ळास तोगोर अदिक कपळा भीळतोगोर अदिक हवा दा धुळा हार्स तोगोर;
ACT 22:24 रा रोमी सेनानायक अंदुन, “इऊक किला दा ओयी, अदिक क्वाळा बळकु जाँच माळी, कि ना जान्साईन कि यहूदी लॉकुर याता कारण आऊन विरोध दा हिंग चिल्ळासेत्यार.”
ACT 22:25 याग आंदुर आऊक बडोर साटी कटदुर रा पौलुस आ सूबेदार से अंदुन जो हात्‍ती निदुरकु ईरोन, “येन ईद उचित आद कि नीव ऊंद रोमी मंळसा अक, अदिक आव भी बिना दोषी ठहरूस्द, क्वाळा बडी?”
ACT 22:26 सूबेदार ईद केळकु सेनानायक उन हात्‍ती होगकु अंदुन, “नी ईद येन माळत्या? ईव रा रोमी मंळसा हुन.”
ACT 22:27 आग रोमी सेनानायक आऊन हात्‍ती बंदकु अंदुन, “नानी हेळ, येन नी रोमी मंळसा हुय?” आव अंदुन, “हव.”
ACT 22:28 ईद केळकु सेनानायक अंदुन, “नानी रोमी नागरीक आगोद पद हापाळ पैस्या कोटकु सिक्याद.” पौलुस अंदुन, ना रा जनम टु रोमी मंळसा हुईन.
ACT 22:29 आग जो लॉकुर आऊक जाँच माळावाळेर ईरोर, आंदुर तुरन्त आऊन हात्‍ती टु हटसेदुर; अदिक रोमी सेनानायक भी ईद जान्सकु कि ईव रोमी हुन अदिक ना ईऊक कट्टीन, अंजेदुन.
ACT 22:30 दुसरा दिशी रोमी सेनानायक ठीक ठीक जानसोद इच्छा देल कि यहूदी आऊन मा येती दोष हचतार, आऊन बंधन खोल्स बुट्टुन; अदिक प्रधान याजकगोळ अदिक पुरा महासभा अक जमा आगोद आग्या कोट्टुन, अदिक पौलुस उक ल्यालमा ओतकु आंदुर्द मुंद निदरूस बुटुन.
ACT 23:1 पौलुस महासभा दी टकटकी हचकु नोळदुन अदिक अंदुन, “हे इस्त्राएल इन वार्टुरा, ना ईंद ताका परमेश्वर उन साटी बिलकुल वळ्लीद विवेक देल जीवन बितुसीन.”
ACT 23:2 इदुर मा हनन्याह महायाजक आंदरी जो आऊन हाती निदुरकु ईरोर, आऊन बाय मा क्याबरा बडोद आग्या कोट्टुन.
ACT 23:3 आग पौलुस आऊन से अंदुन, “हे चुना हच्द भीती, परमेश्वर नीनी बळदान. नी व्यवस्था अन अनुसार नान न्याय माळली कुरत्या, अदिक नी खुद व्यवस्था अन विरूद्ध नानी बडोद आग्या कोळत्या?”
ACT 23:4 जो पौलुस उन हात्‍ती निदुरकु ईरोर आंदुर अंदुर, “येन नी परमेश्वर उन महायाजक उक बुरा भला अनत्या?”
ACT 23:5 पौलुस अंदुन, “हे नान इस्त्राएल इन वार्टुरा, ना ईला जानसीन कि ईव महायाजक हुन; यतिकी शास्त्र दा लिख्सकु आद: ‘तान लॉकुर्द अधिकारी इक बुरा माताळबाळेत.’”
ACT 23:6 आग पौलुस ईद जान्सकु कि ऊंद दल सदूकीगोळ अदिक दुसरा फरीसीगोळ्द हुन, सभा दा कारूकु अंदुन, “हे इस्त्राएल इन वार्टुरा, ना फरीसी अदिक फरीसीगोळ्द वंश इन हुईन, सोत्‍तुर आंदुर आशा अदिक पुनरूत्थान इन बारा दा नान मुकदमा आगेत्याद.”
ACT 23:7 याग आव ईद मात अंदुन रा फरीसीगोळ अदिक सदूकीगोळ दा झगळा आगली कुर्त; अदिक सभा दा फूट बिदोत.
ACT 23:8 यतिकी सदूकी रा ईद अनतार, कि ना सोत्‍तुर दा टु जित्‍ता आगोद आद, ना स्वर्गदूत अदिक ना आत्मा आद; लेकीन फरीसी ईव सप्पा अक मान्सतार.
ACT 23:9 आग बळा हल्ला मचुस्त अदिक येनारा नियम इन गुरुगोळ जो फरीसीगोळ दल इन ईरोर, यदकु निदुरदुर अदिक ईद अनकु झगळुस्ली कुरतुर, “नाव ई मंळसा दा येनु बुराई नोळालेव, अदिक अगर यातोदारा आत्मा या स्वर्गदूत आऊन से माताळ्यान रा बाक येन?”
ACT 23:10 याग हापाळ झगळा आत, रा पलटन इन सरदार ईद अंज्क देल कि आंदुर पौलुस उन तुकळा तुकळा माळबाळुल, पलटन इक आग्या कोट्टुन कि ईळुकु आऊक आंदुर न्याड्या दा टु जबरदस्ती तेगुल, अदिक गढ़ दा ओयुल.
ACT 23:11 अदा ईळ्लकी प्रभु आऊन हात्‍ती निदुरकु अंदुन, “हे पौलुस, हिम्मत ईट; यतिकी ह्यांग नी यरूशलेम दा नान गवाही कोट्ट, हांग अच नीनी रोम दा भी गवाही कोळोद बिद्दीत.”
ACT 23:12 दुसरा दिशी थ्वाळासा यहूदीगोळ मिलुसकु साजीश रचदुर अदिक किर्‍या तिंदुर कि यागासताका नाव पौलुस उक कोंद बुळालेव, आगासताका नाव येनारा तिनदेव या कुळदेव.
ACT 23:13 यार आपस दा ईद साजीश रचुसीदुर, आंदुर चालीस मुंदुर से यक्कुल ईरोर.
ACT 23:14 आंदुर प्रधान याजकगोळ अदिक स्याणागोळ हात्‍ती होगकु अंदुर, “नाव ईद ठान्स कोंडेव कि यागासताका नाव पौलुस उक कोंद बुळालेव, आगासताका येनु तिनतीदील अदिक कुडुतीदील.
ACT 23:15 इदुरसाटी ईग महासभा समेत पलटन इन सरदार उक समझुसी कि आऊक नीम हात्‍ती तरूल, मान्सी कि नीव आऊन बारा दा यक्कुल अच वळ्लीसा जाँच माळोद चाहासतीर; अदिक नाव आऊन पोहचुसोर से पयले अच आऊक कोन्नोर साटी तयार ईत्‍तेव.”
ACT 23:16 पौलुस उन आकतींग इन पार केळदुन कि आंदुर आऊन घात दा आर, रा गढ़ दा होगकु पौलुस उक बातणी कोट्टुन.
ACT 23:17 पौलुस सूबेदारगोळ दा टु ऊंद मंळसा अक तान हात्‍ती कारूकु अंदुन, “ईव आऊन से येनारा अनोद चाहासतान.”
ACT 23:18 इदुरसाटी आव आऊक पलटन इन सरदार उन हात्‍ती ओतकु अंदुन, “बंदी पौलुस नानी कारूकु विनती माळदुन कि ईव जवान पलटन इन सरदार से येनारा अनोद चाहासतान; ईऊक आऊन हाती ओय.”
ACT 23:19 पलटन इन सरदार आऊन कय हुडुकु अदिक अलग ओतकु केळदुन, “नी नान से येन अनोद चाहासत्या?”
ACT 23:20 आव अंदुन, “यहूदीगोळ साजीश रचुस्यार कि नीन से विनती माळुल कि नाळ पौलुस उक महासभा दा तरूल, आंदुर हिंग दिखावा माळ्यार कि अदिक ठीक देल आऊंद जाँच माळोद चाहास्तार.
ACT 23:21 लेकीन आंदुर्द मान्सबाळेत, यतिकी आंदुर दा टु चालीस से म्याकुच मंळसा आऊन घात दा आर, यार ठान्स कोंडार कि यागासताका आंदुर पौलुस उक कोंद बुळालुर, आगासताका ना तिंदार अदिक ना कुळदार. अदिक ईग आंदुर तयार आर अदिक नीन फैसला अन हादी कायेत्यार.”
ACT 23:22 आग पलटन इन सरदार जवान उक ईद आग्या कोटकु सार माळदुन, “यारदु से अनबाळेत कि नी नान ईक ई मातगोळ हेळ्या.”
ACT 23:23 आग आव येढ्ढ सूबेदारगोळी तान हात्‍ती कारूकु अंदुन, “कैसरिया होगोर साटी ईळ्लकी ऊंम्बत मुरा ताका येढ्ढ सौ सैनिक, सत्‍तर घोळसवार, अदिक येढ्ढ सौ भालावाळेर इक तयार ईटी.”
ACT 23:24 अदिक पौलुस उन सवारी साटी घ्वाळागोळी तयार ईटी, कि आऊक फेलिक्स शासक उन हात्‍ती वळ्लीसा पोहचुस बुळुल.
ACT 23:25 आव ई प्रकार इन चिट्ठी भी लिख्सदुन:
ACT 23:26 “महामहिम फेलिक्स शासक उक क्लौदियुस लूसियास उन नमस्कार.
ACT 23:27 ई मंळसा अक यहूदीगोळ हुडुकु कोंद बुळोद चाहासदुर, लेकीन याग ना जान्सदीन कि रोमी हुन, रा पलटन हुळकु बिळ्सकु तंदीन.
ACT 23:28 ना जान्सोद चाहासीन कि आंदुर आऊन मा याता कारण दोष हचतार, इदुरसाटी आऊक आंदुर्द सभा दा वोतीन.
ACT 23:29 आग ना जान्स कोंडीन कि आंदुर तान व्यवस्था अन विवादगोळ बारा दा आऊन मा दोष हचतार, लेकीन कोंद बुळोद या शंकलीगोळ देल कटकु आगोद योग्य आऊन दा येनु दोष हैलेच.
ACT 23:30 याग नानी हेळकु आत कि आंदुर ई मंळसा अन घात दा हतकु आर रा ना तुरन्त आऊक नीन हात्‍ती कळु बुटीन; अदिक आऊन मा दोष हचावाळेर इक भी आग्या कोट्टीन कि आंदुर्द हच्द दोष आव नीन मुंद ईटुल.”
ACT 23:31 इदुरसाटी ह्यांग सैनिकगोळी आग्या कोटकु आगीत, हांग अच आंदुर पौलुस उक हुळकु ईळ्लकी इन ईळ्लकी अन्तिपत्रिस उन हात्‍ती तंदुर.
ACT 23:32 दुसरा दिशी घ्वाळा अन सवारगोळी पौलुस उन सांगुळ मुंद होगोर साटी पैदल नळावाळेर सिपाहीगोळ बिट बुटुर अदिक आंदुर वापस किला दा होट बंदुर.
ACT 23:33 आंदुर कैसरिया पोहचुस्कु शासक उक चिट्ठी कोट्टुर; अदिक पौलुस उक भी आऊन मुंद निदरूसदुर.
ACT 23:34 आव चिट्ठी वाचुसकु केळदुन, ईव याता द्याश इन हुन? अदिक याग जान्स कोंडुन कि किलिकिया अन हुन,
ACT 23:35 रा आव अंदुन, “याग नान दोष हचावाळेर बंदार, आग ना नीन केळाईन.” अदिक आव आग्या कोट्टुन कि आऊक हेरोदेस शासक उन किला दा सुरक्षा दा ईटकु आगुल.
ACT 24:1 अईद दिन इन बाद्दा हनन्याह महायाजक कई स्याणागोळ अदिक तिरतुल्लुस हेसुर इन वकील उक सांगुळ हुळकु बंदुन. आंदुर शासक फेलिक्स उन मुंद पौलुस मा आरोप हचदुर.
ACT 24:2 याग पौलुस उक कारूकु आत रा तिरतुल्लुस आऊन मा दोष हचकु अनली कुरतुन: “हे महामहिम फेलिक्स, नीन अगुवाई दा नाव हापाळ समय टु धोळ्द शांती इन सांगुळ ईरेतेव, अदिक नीन दुर दृष्टी देल द्याश दा हापाळ वळ्लेव सुधार आग्याव.
ACT 24:3 फेलिक्स शासक उक नाव हर जागा अदिक हर प्रकार देल इदुर्द स्वागत माळतेव अदिक नाव नीम प्रती हापाळ आभारी आयेव.
ACT 24:4 ना नीम्द हापाळ यक्कुल समय ताकोमोद चाहासालीन, रा ना नीन से विनती माळतीन कि कृपया नीव थ्वाळासा दा नाम्द केळकोम.
ACT 24:5 यतिकी नाव ई मंळसा अक उपद्रवी अदिक दुनिया दा सप्पा यहूदीगोळ दा फूट हाकावाळा, अदिक नासरीगोळी समुह दा स्याणा मान्सतेव.
ACT 24:6 आव मंदिरगोळी अपवित्र माळोद चाहासदुन, लेकीन नाव आऊक हुडुकोंडेव.
ACT 24:7 लेकीन पलटन इन सरदार लूसियास आऊक जबरदस्ती नाम कय दा टु कसु कोंडुन,
ACT 24:8 ई सप्पा मातगोळी यदुर्द बारा दा नाव आऊन दोष हचतेव, नी खुद अच आऊक जाँच माळकु जान्स कोंड्या.”
ACT 24:9 यहूदीगोळ भी इदुर दा शामिल आगकु हिम्मत देल सांगुळ कोटकु अंदुर, कि ई मातगोळ सप्पा सही आव.
ACT 24:10 याग शासक पौलुस उक माताळोद इशारा माळदुन, रा आव उत्‍तर कोट्टुन: “ना ईद जान्सकु कि नी हापाळ साल टु ई जाती इन न्याय माळेत्या, ईद जान्सकु ना खुशी देल तान बचाव साटी थ्वाळासा मातगोळी माताळोद चाहासतीन.
ACT 24:11 नी खुद जान्स सकत्या कि यागी टु ना यरूशलेम दा आराधना माळली बंदीन, नानी हन्नेळ दिन से यक्कुल आगीदील.
ACT 24:12 यहूदीगोळ नानी ना रा यहूदी सभागृह दा अदिक ना रा नगर दा लॉकुर भीळ दा दंगा माळ्त नोळदुर.
ACT 24:13 अदिक ना रा आंदुर आ मातगोळी, यार्द बारा दा नान मा दोष हचतार, नीन मुंद सच प्रमाणित माळ सकतार.
ACT 24:14 लेकीन ना नीन मुंद ईद मान्स कोमतीन कि याता हादी इक आंदुर ख्वाटा अनतार, अदुर्दा रीति मा ना तान आप्प दादागोळ परमेश्वर उन आराधना माळतीन. लेकीन ना ईद भी विश्वास माळतीन जो मातगोळ मूसा अन व्यवस्था अदिक भविष्यवक्ता अन किताब दा लिख्सकु आद.
ACT 24:15 अदिक परमेश्वर उन मा हांगा आशा ईटतीन ह्यांग आंदुर खुद भी ईटतार, कि वळ्लेर अदिक बेकार येढ्ढु लॉकुर्द भी पुनरूत्थान आदीत.
ACT 24:16 इदुर से ना खुद भी कोशिश माळतीन कि परमेश्वर उन, अदिक मंळसागोळ दी नान विवेक हमेशा निर्दोष ईरूल.
ACT 24:17 “हापाळ वर्ष इन बाद्दा ना तान गरीब लॉकुरी पैस्या कोळली, अदिक बलिदान येर्सली बंदिदीन.
ACT 24:18 याग आंदुर नानी हासिल माळदुर आग ना शुद्धीकरण इन रीति इक पुरा माळीन अदिक ना नान हात्‍ती यातोदारा भीळ ईरोद अदिक ना यातोदारा अव्यवस्था फैलुसिदीन.
ACT 24:19 लेकीन अल आसिया क्षेत्र अन थ्वाळासा यहूदी भी ईरोर. आंदरी जरूरी ईरोद, कि अगर नान विरोध दा आंदुर हात्‍ती येनारा मात आद रा ईल नीन मुंद बंदकु नान मा दोष हचायदुर.
ACT 24:20 या ईद खुद अच हेळुल कि याग ना महासभा अन मुंद निदुरकु ईरीन, रा आंदुर नान दा यातोद अपराध नोळदुर?
ACT 24:21 सिवाय ईदुर्द कि याग आंदुर न्याड्या दा ईरीन आग ना धोळ दण दा अंदिदीन ‘सोत्‍तुर दा टु जित्‍ता आगोद बारा दा नान विश्वास इन कारण नान न्याय माळकु आगेत्याद.’”
ACT 24:22 फेलिक्स, जो ई हादी इन बारा दा ठीक ठीक जानसोन, आंदरी ईद अनकु टाल्स बुटुन, “याग पलटन इन सरदार लूसियास बंदान, रा नीम मात इन निर्णय माळाईन.”
ACT 24:23 अदिक सूबेदार उक आग्या कोट्टुन कि पौलुस उक येनारा छुट कोटकु रखवाली माळेत, अदिक आऊन संगीगोळ दा टु यारीकु भी आऊन स्यावा माळोर से रोक्सबाळेत.
ACT 24:24 थ्वाळासा दिनगोळ बाद्दा फेलिक्स तान हिंग्स द्रुसिल्ला अक, जो यहूदीनी ईरोर, सांगुळ हुळकु बंदुन अदिक पौलुस उक कार्सुस्कु आ विश्वास इन बारा दा जो मसीह यीशु मा आद, आऊन से केळदुन.
ACT 24:25 याग आव वळ्लेव मातगोळ, अदिक संयम, अदिक बरावाळा न्याय इन दिन इन चर्चा माळोन, रा फेलिक्स अंजकु उत्‍तर कोट्टुन, “ईग नी होग; मवका नोळकु ना नीनी मात्‍त काराईन.”
ACT 24:26 आऊक पौलुस टु येनारा पैस्या सीकोव भी आशा ईरोद, इदुरसाटी घळी घळी कारूकु आऊन से मातगोळ हेळतोगोन.
ACT 24:27 लेकीन याग येढ्ढ वर्ष बीतसेदव रा पुरकियुस फेस्तुस, फेलिक्स इन जागा मा व्हासा शासक बन्सकु बंदुन; अदिक फेलिक्स यहूदीगोळी खुश माळोद इच्छा देल पौलुस उक बंदी इच बिटकु होदुन.
ACT 25:1 फेस्तुस आ द्याश दा पोहचुसोद मुर दिन बाद्दा कैसरिया टु यरूशलेम इक होदुन.
ACT 25:2 आग प्रधान याजकगोळ अदिक यहूदीगोळ्द प्रमुख लॉकुर आऊन मुंद पौलुस उन मा आरोप हचदुर; अदिक आऊन से विनती माळदुर.
ACT 25:3 कि आव पौलुस उक यरूशलेम दा कारसुल कि आंदुर आऊक हादी मा अच कोंदबुळुल.
ACT 25:4 फेस्तुस उत्‍तर कोट्टुन, “पौलुस कैसरिया अन्द कैद दा आन, अदिक ना खुद राटनेरी अल होगाईन.”
ACT 25:5 बाक अंदुन, “नीम दा जो अधिकार ईटतार आंदुर नान सांगुळ कैसरिया नळुल, अदिक अगर ई मंळसा येनारा अनुचित क्याल्सा माळ्यान रा आऊन मा दोष हचुल.”
ACT 25:6 आंदुर न्याड्या येनारा येठ्ठ हत्‍त दिन ईतकु फेस्तुस कैसरिया होटोदुन; अदिक दुसरा दिशी न्याय आसन मा कुर्तकु पौलुस उक तरोद आग्या कोट्टुन.
ACT 25:7 याग पौलुस बंदुन रा जो यहूदी यरूशलेम टु बंदीदुर, आंदुर आसपास निदुरकु आऊन मा हापाळ सा गंभीर आरोप हचदुर, यदरी आंदुर साबित ईला माळसकोर.
ACT 25:8 लेकीन पौलुस खुद इन बचाव दा उत्‍तर कोट्टुन, “ना रा ना यहूदीगोळ्द व्यवस्था अन अदिक ना मंदिर इन, अदिक ना रोमन शासक कैसर उन विरूद्ध येनारा पाप माळीन.”
ACT 25:9 आग फेस्तुस यहूदीगोळी खुश माळोद इच्छा देल पौलुस से अंदुन, “येन नी चाहासत्या कि यरूशलेम इक होद्या; अदिक अल नान मुंद नीन ईद मुकदमा तय माळकु आगुल?”
ACT 25:10 पौलुस अंदुन, “ना कैसर इन न्याय आसन इन मुंद निदुरकु आईन; नान मुकदमा अन्द ईल्या फैसला आग पायजे. ह्यांग नी वळ्लीद तरीका देल जान्सत्या, यहूदीगोळ्द ना येनु अपराध माळीदील.
ACT 25:11 अगर ना अपराधी आईन अदिक कोंद बुळोद लायक येनारा क्याल्सा माळीन, रा सायोर से मार्रा तिर्गुसालीन लेकीन याता मातगोळ्द ईंदुर नान मा दोष हचतार, अगर अऊर दा टु यातोदारा भी मात सही आगीदील, रा नानी याऊ आंदुर कय दा कोळ सकालुन. हिंग ना कैसर उन से विनती माळतीन.”
ACT 25:12 आग फेस्तुस सलाहकारगोळ से सलाह मसवरा माळकु उत्‍तर कोट्टुन, “नी कैसर उन से विनती माळ्या, इदुरसाटी नीनी कैसर उन हात्‍ती इच ओतकु आदीत.”
ACT 25:13 येनारा दिन बित्सदुर बाद्दा अग्रिप्पा राजा अदिक बिरनीके कैसरिया दा बंदकु फेस्तुस से भेंट माळदुर.
ACT 25:14 आंदुर हापाळ दिन अल ईत्‍तुर बाद्दा फेस्तुस पौलुस उन बारा दा राजा अक हेळदुन: “ऊंद मंळसा आन, यारी फेलिक्स बंदीगृह दा बिटकु होटोग्यान.
ACT 25:15 याग ना यरूशलेम होगीदीन, रा प्रधान याजक अदिक यहूदीगोळ्द स्याणागोळ आऊन मा आरोप हचदुर अदिक चाहासदुर कि ना आऊक दोषी साबित माळाईन.
ACT 25:16 लेकीन ना आंदरी उत्‍तर कोटीन कि रोमीगोळ्द ईद रीति हैलेच कि यावारा मंळसा अक दण्ड इन साटी यारदारा कय दा कोट्ट बुळुल, यागासताका आरोपी इक तान दोष हचावाळेर मुंद निदुरकु दोष इन उत्‍तर कोळोद मवका सिकाल.
ACT 25:17 इदुरसाटी याग आंदुर नान सांगुळ ईल बंदुर, रा ना येनु देर माळीदील, लेकीन दुसरा अच दिशी न्याय आसन मा कुर्तकु पौलुस उक तरोद आग्या कोटीन.
ACT 25:18 याग आऊन दोष हचावाळेर निदुरदुर, रा आंदुर हिंग अनुचित मातगोळ्द दोष हचीदिल, ह्यांग ना समसीन.
ACT 25:19 लेकीन यहूदी रीति इन अनुसार अदिक यीशु हेसुर इनव यावारा मंळसा अन बारा दा, जो सोतोगिदुन अदिक पौलुस आऊक जीवित हेळतोगोन, विवाद माळतोगोर.
ACT 25:20 ना उलझन दा ईरीन कि ई मातगोळ्द पता ह्यांग हचाईन? इदुरसाटी ना आऊन से केळदीन, ‘येन नी यरूशलेम होद्या कि अल ई मातगोळ्द फैसला आगुल?’
ACT 25:21 लेकीन याग पौलुस विनती माळदुन कि आऊंद मुकदमा अन फैसला कैसर उन अल आगुल, रा ना आग्या कोटीन कि यागासताका आऊक कैसर उन हात्‍ती कळालीन, आऊक कैद दा ईटकु आगुल.”
ACT 25:22 आग अग्रिप्पा फेस्तुस से अंदुन, “ना भी आ मंळसा अन केळोद चाहासतीन.” आव अंदुन, “नी नाळ केळ कोंड्या.”
ACT 25:23 इदुरसाटी दुसरा दिशी याग अग्रिप्पा अदिक बिरनीके बळा धूमधाम देल बंदुर अदिक पलटन इन सरदारगोळ अदिक नगर इन प्रमुख लॉकुर्द सांगुळ दरबार दा पोहचुसदुर. आग फेस्तुस आग्या कोट्टुन कि आंदुर पौलुस उक तरूल.
ACT 25:24 फेस्तुस अंदुन, “हे राजा अग्रिप्पा, अदिक हे सप्पा मंळसागोळा जो ईल नाम सांगुळ आईर, नीव ई मंळसा अक नोळतीर, यार्द बारा दा सप्पा यहूदीगोळ यरूशलेम दा अदिक ईल भी चिल्ळास चिळ्लासकु नान से विनती माळदुर कि ईऊंद जित्‍ता ईरोद उचित हैलेच.
ACT 25:25 लेकीन ना जान्स कोंडीन कि आव हिंग येनु माळीदील कि कोंदकु आगुल; अदिक जब कि आव खुद अच कैसर उन से नान न्याय आगुल हिंग विनती माळदुन, रा ना आऊक रोम दाकळोद निर्णय माळदीन.
ACT 25:26 लेकीन ना आऊन बचाव इन बारा दा यातोदु निश्चित मात नोळीदील कि कैसर उन हात्‍ती लिख्सकु कळाईन. इदुरसाटी ना आऊक नीम मुंद अदिक खास माळकु हे राजा अग्रिप्पा, नीन मुंद तंदीन कि जाँच्सदुर बाद्दा नानी येनारा रा आऊन बारा दा लिख्सली सिकुल.
ACT 25:27 यतिकी बंदी इक कळोद अदिक जो दोष आऊन मा हचकु आग्याव, अवरी स्पष्ट रीति देल ईला हेळोद, नानी बेकार जान्सकु बिळतद.”
ACT 26:1 अग्रिप्पा पौलुस से अंदुन, “नीनी तान बारा दा माताळोद आग्या आद.” आग पौलुस कय वाळुसकु उत्‍तर कोळली कुरतुन:
ACT 26:2 “हे राजा अग्रिप्पा, यास मातगोळ्द यहूदी नान मा दोष हचतार, ईंद नीन मुंद आंदुर्द उत्‍तर कोळोर दा ना तान इक धन्य सम्सतीन,
ACT 26:3 खास माळकु इदुरसाटी कि नी यहूदीगोळ्द सप्पा रीति रिवाजगोळी अदिक झगळागोळी जान्सत्या. इदुरसाटी ना विनती माळतीन, धीरज देल नांद केळ.”
ACT 26:4 “नान चाल चलन सुरूवात टु तान लॉकुर न्याड्या अदिक यरूशलेम दा ह्यांग ईरोद, अद सप्पा यहूदी जान्सतार.
ACT 26:5 आंदुर नानी हापाळ समय टु अरूतार अदिक अगर आंदुर चाहासतिदार रा ई मात इन गवाही कोळ सकतार कि ना तान रीति इन सब से कट्टर फरीसी समुह अन ऊंद सदस्य अन रूप दा जीवन जीऊसीन.
ACT 26:6 अदिक ईग आ वादा दा आशा अन कारण जो परमेश्वर नाम आप्प दादागोळ से माळीदुन, नान मा मुकदमा नळेत्याद.
ACT 26:7 अदा वादा अन पुरा आगोद आशा हचकु, नाम हन्नेळ गोत्र तान पुरा मन देल ईळ्लक-हागुल परमेश्वर उन स्यावा माळतेला बंदार. हे राजा, ईदा आशा अन बारा दा यहूदी नान मा दोष हचतार.
ACT 26:8 याग कि परमेश्वर सोत्‍तुरी जित्‍ता माळ्यान, रा नीम मान्या ईद मात येती विश्वास इन योग्य समसालुर?”
ACT 26:9 “ना भी खुद विचार माळ तोगीन कि यीशु नासरी इन हेसुर इन विरोध दा ना हापाळ येनारा माळाईन.
ACT 26:10 अदिक ना यरूशलेम दा हिंग अच माळदीन; अदिक प्रधान याजकगोळ से अधिकार ताकोमकु हापाळ सा पवित्र लॉकुरी बंदीगृह दा हाकदीन, अदिक याग आंदुर कोंदकु आगतोगोर रा ना भी आंदुर्द विरोध दा तान सम्मती कोळतोगीन.
ACT 26:11 हर यहूदी सभागृह दा ना आंदरी हापाळ अनली सजा कोळसुस्कु यीशु उन माकळोद विश्वास इक नकार माळली हेळ तोगीन, आंदुर प्रती नान सिट्ट यक्कुल ईरोद कि आंदरी सतुसोर साटी ईल ताका कि ना विदेशी नगरगोळ दा भी होदीन.
ACT 26:12 “ईदा उद्देश इक हुडुकु ना प्रधान याजकगोळ से अधिकार अदिक आग्या-चिट्ठी ताकोमकु दमिश्क इक होगीन;
ACT 26:13 रा हे राजा, हादी दा मदणी इन समय ना आकाश टु सुर्य अन तेज से भी वाळुसकु ऊंद ज्योति, तान अदिक तान सांगुळ नळावाळेर्द नाकु दी चमकुसतेला नोळदीन.
ACT 26:14 याग नाव सप्पा जागा मा बिद्देव, रा ना इब्रानी भाषा दा, नान से ईद अनतेला ऊंद शब्द केळदीन, ‘हे शाऊल, हे शाऊल, नी नानी येती सतुसत्या? नी हिंग माळकु तान तान इक का दुख कोळेत्या ह्यांग वस्ता तान ल्यात तुतारी इन आरू मा होडेत्याद.’
ACT 26:15 ना अंदीन, ‘हे प्रभु, नी याव हुय?’ प्रभु अंदुन, ‘ना यीशु हुईन, यारी नी सतुसत्या.
ACT 26:16 लेकीन नी येळ, तान कालगोळ मा निदुर; यतिकी ना नीनी इदुरसाटी दर्शन कोटीन कि नीनी आ मातगोळ्द भी सेवक अदिक गवाह ठहरूसाईन, जो नी ईंद नोळ्या, अदिक अदुर साटी भी जो ना नीनी भविष्य दा हेळाईन.
ACT 26:17 अदिक ना नीनी नीन लॉकुर यहूदीगोळ से अदिक गैरयहूदीगोळ से बिळसाईन, यार हात्‍ती ना ईग नीनी कळाईन
ACT 26:18 कि नी आंदुर्द कण्णगोळी तेरद्या कि आंदुर अंधकार देल ज्योति दी, अदिक शैतान इन अधिकार देल परमेश्वर उन दी तिर्गुल; कि आंदुर्द विश्वास इन द्वारा जो नान मा आद आंदुर आंदुर्द पापगोळ्द माफ अदिक परमेश्वर उन निवळुस्द लॉकुर सांगुळ पवित्र स्थान हासिल माळ्यार.’
ACT 26:19 “इदुरसाटी हे राजा अग्रिप्पा, ना आ स्वर्गीय दर्शन इन आग्या टालसीदील,
ACT 26:20 लेकीन पयले दमिश्क इन, बाक यरूशलेम इन, अदिक आग यहूदिया अन सप्पा द्याश इन ईरावाळेर इक, अदिक गैरयहूदीगोळी समझुसतेला ईत्‍तीन, कि पापगोळ से पश्चाताप माळी अदिक परमेश्वर उन दी तिर्गकु मन तिर्गुसोद लायक क्याल्सा माळी.
ACT 26:21 ई मातगोळ्द कारण यहूदी नानी मंदिर दा हुडुकु कैद दा हाकदुर अदिक कोंद बुळोद कोशिश माळतोगोर.
ACT 26:22 लेकीन परमेश्वर उन सहायता देल ना ईंद ताका बन्सकु आईन अदिक स्याणेर धोड्डेर सप्पा मुंदुर मुंद ईल निदुरकु गवाही कोळतीन, अदिक आ मातगोळी बिटकु येनु अनालीन जो भविष्यवक्तागोळ अदिक मूसा भी अंदुन कि आगावाळा आद,
ACT 26:23 कि मसीह अक दुख नेगोद बिद्दीत, अदिक आवा सब से पयले सोत्‍तुर दा टु जित्‍ता आगकु, नाम यहूदी लॉकुर दा अदिक गैरयहूदीगोळ दा मुक्ति इन ऊजुळ इन बातणी कोट्टान.”
ACT 26:24 याग पौलुस तान बचाव दा ई मातगोळी माताळोन, रा फेस्तुस धोळ्द शब्द देल चिळ्लासकु अंदुन, “हे पौलुस, नी यर्र आय. हापाळ अक्‍कल नीनी यर्र माळबुटाद.”
ACT 26:25 लेकीन पौलुस अंदुन, “हे ग्यानी फेस्तुस, ना यर्र हैलेच, लेकीन सही अदिक सम्सावाळा मातगोळी अनतीन.
ACT 26:26 खुद राजा अग्रिप्पा भी ई मातगोळी जान्सतान अदिक ना पुरा हिम्मत इन सांगुळ ई मातगोळ आऊन से हेळेतीन यतिकी ना पक्‍का जान्सतीन कि ईऊर दा टु यातोदु मात आंदरी पता हैलेच हिंग हैलेच ना हिंग इदुरसाटी अनेतीन कि ईव मात यातोदारा क्वाना दा होचकोमकु आगीदील.
ACT 26:27 हे राजा अग्रिप्पा, येन नी भविष्यवक्तागोळ्द विश्वास माळत्या? हव, ना जान्सतीन कि नी विश्वास माळत्या.”
ACT 26:28 आग अग्रिप्पा पौलुस से अंदुन, “येन नी ईद विचार माळत्या कि ईट सरलता देल अदिक कम समय दा नी नानी मसीह माळ सकत्या?”
ACT 26:29 पौलुस उत्‍तर कोट्टुन, थ्वाळा समय दा अन या यक्कुल समय दा, “परमेश्वर से नान प्रार्थना आद कि ना सिर्फ नी हांगा आगेग ह्यांग ना आईन लेकीन सिवाय ई शंकलीगोळ्द.”
ACT 26:30 आग राजा, शासक, बिरनीके अदिक आंदुर सांगुळ कुरावाळेर निदुरदुर;
ACT 26:31 अदिक ब्यार्र होगकु आपस दा अनली कुरतुर, “ईव मंळसा हिंग रा येनु माळालुन, जो मृत्यु दण्ड या बंदीगृह दा हाक्‍कु आगोद लायक ईरूल.”
ACT 26:32 अग्रिप्पा फेस्तुस से अंदुन, “अगर ईव मंळसा कैसर उक न्याय ईला बेळायदुन, रा बिळ सकोन.”
ACT 27:1 याग ईद तय आगेत कि नाव जहाज द्वारा इटली होदेव, रा आंदुर पौलुस अदिक थ्वाळासा दुसरा बंदीगोळी भी यूलियुस हेसुर ईनव औगुस्तुस उन पलटन इन ऊंद सुबेदार उन कय दा कोट्ट बुटुर.
ACT 27:2 याग ना आसिया क्षेत्र अन किनारा मा जो ऊंद बंदरगाह ईरोद अल टु होगावाळेर अद्रमुत्‍तियुम हेसुर इन नगर इन ऊंद जहाज मा कुर्तकु होट्टुर आग मकिदुनिया अन थिस्सलुनीके नगर इन ऊंद अरिस्तर्खुस हेसुर इन मंळसा नाम सांगुळ ईरोन.
ACT 27:3 दुसरा दिन नाव सैदा नगर दा जहाज टु ईळदेव, अदिक यूलियुस पौलुस मा कृपा माळकु आऊक संगीगोळ अल होग गोटुन कि आऊक जो वस्तुगोळ हतताव अदुर्द पुर्ती माळ सकुल.
ACT 27:4 अल टु नाव समुद्र अन हादी देल होट्टेव हवा नाम विरूद्ध दिशा दा ईरोद ई कारण नाव साइप्रस टापू उन बाजु दा टु आगकु होदेव;
ACT 27:5 अदिक किलिकिया अदिक पंफूलिया नगर इन हात्‍तीगोळ्द समुद्र दा टु आग्त लूसिया अन्द मूरा नगर दा ईळदेव.
ACT 27:6 अल सेनानायक उक सिकन्दरिया अन्द ऊंद जहाज इटली होगतेला सिक्त, अदिक आव नामी अदुर मा येर्स बुट्टुन.
ACT 27:7 याग नाव हापाळ दिन ताका धीरू-धीरू नळुतेला कठिनाई देल कनिदुस नगर इन मुंद पोहचुसदेव, रा इदुरसाटी कि हवा नामी मुंद वाळुस ईला गोळोद, नाव सलमोने नगर इन मुंदु टु आग्त क्रेते टापू उन आड्ड आगतेला नळदेव.
ACT 27:8 अदिक अदुर किनारा-किनारा कठिनाई देल नळुकु सुरक्षित बंदरगाह हेसुर इन ऊंद जागा दा पोहचुसदेव, यल टु लूसिया नगर हात्‍ती ईरोद.
ACT 27:9 याग नाव हापाळ समय अल बीतुसदेव अदिक जहाज इक मुंद वाळुसोर साटी इदुरसाटी तकलीफ आगोद यतिकी उपास इन दिन ईग खतम आगेगीदव. इदुरसाटी पौलुस आंदरी ईद अंदकु समजुसदुन,
ACT 27:10 “हे लॉकुरा, नानी हिंग हतेत्याद कि ईद समुद्र यात्रा हापाळ खतरनाक आदीत, ना सिर्फ माल मत्‍ता अदिक जहाज इन साटी अच उलटा नाम जीवन इन साटी भी.”
ACT 27:11 लेकीन सुबेदार पौलुस उन मातगोळ से यक्कुल जहाज नळसावाळा अदिक जहाज इन मालिक इन मातगोळी वाळुसकु मान्सदुन.
ACT 27:12 ईद बंदरगाह सोळ इन समय कडोद साटी वळ्लीद ईला ईरोद, इदुरसाटी हापाळ मुंदुर्द आग सकुल रा फीनिक्स पोहचुसोद कोशिश माळोद अच ठान्सदुर अदिक सोळ इन समय अल्या कडोद निश्चय माळदुर. ईद रा क्रेते अन्द ऊंद बंदरगाह आद जो दक्षिण-पश्चिम अदिक उत्‍तर पश्चिम येढ्ढु दिशा अन दी खुल्सतद.
ACT 27:13 याग थ्वाळा-थ्वाळा दक्षिणी टु हवा बरली हत, रा ईद सम्सकु कि नाम योजना पुरा माळ सक्‍केव, लंगर नेगदेव अदिक क्रेते अन किनारा टु नळुतेला जहाज इक मुंद वाळुसली हतदेव.
ACT 27:14 लेकीन घळी तिमुर दा जमीन दी टु ऊंद धोळ्द तुफान येळ्त, यदरी उत्‍तर पूर्व तुफान अंदकु आगतद.
ACT 27:15 याग तुफान जहाज से टकरूस्त रा आ जहाज अदुर कारण मुंद ईला वाळुस सकोद, अदिक नाव कोशिश माळोद बिट बुटेव अदिक जहाज इक हवा सांगुळ यात होगोद आत होग गोट्टेव.
ACT 27:16 आग कौदा हेसुर इन ऊंद स्यांळ्दतुसा टापू उन आळ दा वाहुस्त-वाहुस्त नाव कठिनाई देल जहाज इक वश दा माळदेव.
ACT 27:17 बाक जहाज नळसावाळेर अदरी नेगुकु अनेक उपाय माळकु जहाज इक ल्यालमा टु कटदुर, अदिक सुरतिस इन चोरबालु मा टिकसोद अंज्क देल पाल अदिक सामान ईळ्सकु जहाज इक नीर दा वाहुस गोट्टुर.
ACT 27:18 याग नाव तुफान देल हापाळ ऊफान अदिक धक्‍कागोळ तिनदेव, रा दुसरा दिन आंदुर जहाज इन माल भीळली हतदुर;
ACT 27:19 अदिक तिसरा दिन आंदुर तान कयगोळ देल जहाज इन साज-सामान भी भीट बुटुर.
ACT 27:20 याग हापाळ दिनगोळ ताका ना सुर्य अदिक तारागोळ कांळ्सीदील अदिक धोळ्द तुफान नळुतेला ईत्‍त, रा आखरी दा तान ऊळोद सप्पा आशा नाव बिट बुटेव.
ACT 27:21 याग आंदुर हापाळ दिनगोळ ताका उपासा ईतोदुर, रा पौलुस आंदुर न्याड्या निदुरकु अंदुन, “हे लॉकुरा, अगर क्रेते टु रवाना ईला आगोद नान सलाह नीव मान्स कोमायदीर रा ई विनाश अदिक नुकसान देल ऊळ्दोगायदीर.
ACT 27:22 लेकीन ईग ना नीम से विनती माळतीन कि तान हिम्मत कटकु ईटी, यतिकी नीम दा टु यारदु जीव इन हानि आगतीदील, पर सिर्फ ईद जहाज नष्ट आगेदीत.
ACT 27:23 यतिकी अंसी इन ईळ्लकी, याता परमेश्वर उन ना हुईन अदिक यार्द ना आराधना माळतीन आऊन ऊंद स्वर्गदूत नान हात्‍ती बंदुन,
ACT 27:24 अदिक अंदुन ‘हे पौलुस, अंजबाळ! नीनी कैसर उन मुंद निदरोद जरूरी आद. नोळ, परमेश्वर सप्पा मुंदुरी जो नीन सांगुळ यात्रा माळेत्यार, आंदुर भी जीवन नीन सांगुळ आद.’
ACT 27:25 इदुरसाटी, हे लॉकुरा, हिम्मत ईटी; यतिकी ना परमेश्वर उन विश्वास माळतीन, कि ह्यांग आव नान से अंदान, हांग अच आदीत.
ACT 27:26 लेकीन नामी यातोदारा टापू मा होगकु टिकसोद बिद्दीत.”
ACT 27:27 याग चौदावा ईळ्लक बत्‍त, अदिक नाव भूमध्य समुद्र दा भटकुसतेला टेटाळेव, रा आर्धा ईळ्लक इन हात्‍ती जहाज नळसावाळेर अनुमान हचकु जान्सदुर कि नाव यातोदारा जमीन इन हात्‍ती पोहचुसेतेव.
ACT 27:28 नीर इन गहराई अन अंदाज ताकोंडुर मा ऊंद सौ ईप्पत फूट इन गहराई ईरोद, अदिक थ्वाळा मुंद वाळुसकु बाक गहराई अन अंदाज ताकोंडुर रा नब्बे फूट गहराई ईरोद.
ACT 27:29 आग कल्ल इन जागागोळ देल टकरूसोद अंज्क देल आंदुर जहाज इन हिंदळोद भाग दा नाक लंगर हाकदुर, अदिक व्हातुर आगोद प्रार्थना माळोर.
ACT 27:30 लेकीन याग जहाज नळसावाळेर जहाज मा टु ओळोद कोशिश माळोर, अदिक गली टु लंगर हाक्‍कोद बहाना देल जहाज समुद्र दा ईळ्स बुटुर;
ACT 27:31 लेकीन पौलुस सूबेदार अदिक सैनिकगोळ से अंदुन, “अगर इंदुर जहाज मा ईतीदील, रा नीव भी ऊळु सकालीर.”
ACT 27:32 आग सैनिकगोळ जाळी कडुकु जहाज समुद्र दा होग गोट्टुर.
ACT 27:33 याग व्हातुर आगदुर मा ईरोद, आग पौलुस ईद अनकु, सप्पा मुंदरी ऊम्मोर साटी विनती माळदुन, “ईंद चौदा दिन आदव कि नीव हादी काईत काईत उपास ईतीर, अदिक येनु तंदिदील.
ACT 27:34 ना इदुरसाटी नीमी तिनोर साटी विनती माळेतीन कि नीम जित्‍ता ईरोरसाटी जरूरी आद; यतिकी नीम दा टु यारदु ताल्ला अन्द ऊंद चुट्टी भी बिळबाळुल.”
ACT 27:35 ईद अनकु आव रोट्टी हुडुकु सप्पा मुंदुर मुंद परमेश्वर उन धन्यवाद माळदुन अदिक मुरूकु तिनली कुरतुन.
ACT 27:36 आग आंदुर सप्पा मुंदुर भी हिम्मत कटकु ऊमली कुरतुर.
ACT 27:37 नाव सप्पा मिलुसकु जहाज मा येढ्ढ सौ छ्यात्‍तर मुंदुर ईरेव.
ACT 27:38 याग आंदुर ऊंडकु संतुष्ट आदुर, रा गोदी इक समुद्र दा भिटकु जहाज इक हल्‍का माळली कुरतुर.
ACT 27:39 याग व्हातुर आत रा आंदुर आ द्याश इक अरतीदिल, लेकीन ऊंद खाळी इन किनारा कांळ्सत, अदिक विचार माळदुर कि अगर आग सकुल रा इदुर मा जहाज इक टेकसेव.
ACT 27:40 आग आंदुर लंगरगोळी खोल्सकु समुद्र दा बिट बुटुर अदिक अदा समय जाळीगोळ्द बंधन खोल्स बुटुर, अदिक जहाज इन मुंद मुंदळोद पाल येर्सकु किनारा दी होटोदुर.
ACT 27:41 लेकीन येढ्ढ समुद्र अन संगम इन जागा हुडुकु आंदुर जहाज इक टेक्सदुर, अदिक जहाज इन मुंदळोद हिस्सा धक्‍का तिनकु नट्टोत अदिक आलगाळ सकिदील; लेकीन हिंदळोद लयरगोळ्द बल देल मुरूली हत.
ACT 27:42 आग सैनिकगोळ ईद विचार आत कि बंदीगोळी कोंद बुटेव, हिंग आगबाळुल कि यावारा तैरूस्कु ओळेगुल.
ACT 27:43 लेकीन सूबेदार पौलुस उक सुरक्षित माळोद इच्छा देल आंदरी ईद विचार देल रोक्सदुन अदिक उल्टा ईद आग्या कोट्टुन, कि जो तैरूस सकतार, पयले हारकु किनारा मा होट बुळुल;
ACT 27:44 अदिक बाकी यारारा पट्टीगोळ मा, अदिक यावारा जहाज इन मुर्द तुकळा गोळ्द सहारा देल होट बुळुल. ईद रीति देल सप्पा मुंदुर किनारा मा सुरक्षित ऊळ्दकु होट्टुर.
ACT 28:1 याग नाव किनारा मा सुरक्षित पोहचुसदेव, आग पता नळुत कि ईद टापू उक माल्टा अंदकु आगतद.
ACT 28:2 अलेर निवासीगोळ नाम मा अनोखा कृपा माळदुर; यतिकी माळ बरोद कारण सोळ इन ईरोद, इदुरसाटी आंदुर बेक्‍की होत्‍ताकु नाम सप्पा मुंदुर्द स्वागत माळदुर.
ACT 28:3 याग पौलुस वंळ्गेव हुळ्लीगोळ्द गट्टा सकलुसकु बेक्‍की मा ईटदुन, रा ऊंद हाव बेक्‍की इन आच देल होळ्त अदिक आऊन कय इक गुणसेत.
ACT 28:4 याग आ निवासीगोळ हाव इक आऊन कय इक गुंडस्कु नोळदुर, रा आपस दा अंदुर, “सचमुच ईव मंळसा हत्यारा आन लेकीन ईऊन किस्मत वळ्लेव आव जो समुद्र दा ऊळदोदुन, तरी भी न्याय जीवित ईर गोटीदील.”
ACT 28:5 आग आव हाव इक बेक्‍की दा झटकुस बुटुन, अदिक पौलुस उक येनु हानि भी पोहचुसीदील.
ACT 28:6 लेकीन आंदुर हादी कायतोगोर कि आव बातोदान या एकाएक बिदकु सोतोदान, लेकीन याग आंदुर हापाळ होत ताका नोळ्त ईत्‍तुर अदिक नोळकु आऊक असाधारण रूप दा भी येनु आगिदील, रा तान विचार बदलुस्कु अनली हतदुर, “ईव रा यावारा देवता हुन.”
ACT 28:7 आ जागा अन आसपास आ टापू उन प्रधान अधिकारी पुबलियुस उन जागा ईरोद. आव नामी तान मान्या ओतकु नाम स्वागत माळदुन मुर दिन संगीभाव देल पाऊनचार माळदुन.
ACT 28:8 पुबलियुस उन आप्प मय देल अदिक आव खुन देल रोगी बिदकु ईरोन. इदुरसाटी पौलुस आऊन हात्‍ती मान्या होगकु प्रार्थना माळदुन अदिक आऊन मा कय ईटकु आऊक चंगा माळदुन.
ACT 28:9 याग हिंग आत रा आ टापू उन बाकी बिमार बंदुर अदिक चंगा माळकु आदुर.
ACT 28:10 आंदुर नाम्द हर प्रकार देल आदर माळदुर, अदिक याग नाव होगली कुरतेव रा जो येनारा नाम साटी जरूरी ईरोद, जहाज मा ईट बुटुर.
ACT 28:11 मुर तिंगुळ इन बाद्दा नाव सिकन्दरिया अन्द ऊंद जहाज मा येरदेव, अदिक ई जहाज ईदा टापू दा सोळ इन दिनगोळ कारण ईल्या रूक्सकु ईरोद, आ जहाज इक जुळवा ईश्वर अंदकु आगोद.
ACT 28:12 नाव सुरकूसा दा पोहचुसदेव अदिक मुर दिन ताका अल्या ईत्‍तेव.
ACT 28:13 अल टु नाव रवाना आगकु रेगियुम नगर दा बंदेव; अदिक दुसरा दिशी दक्षिण टु हवा नळुत, अदिक नाव दुसरा दिशी पुतियुली नगर दा बंदेव.
ACT 28:14 अल नामी विश्वासी वार्टुर सिकदुर, अदिक आंदुर कहना देल नाव आंदुर अल येळ दिन ताका ईत्‍तेव; अदिक ई रीति देल नाव रोम इक होटोदेव.
ACT 28:15 याग रोम इन विश्वासी वार्टुर इक नाम सुचना सिक्त रा अप्पियुस इन सात्‍ता अदिक मुर-सराए ताका नाम से मुलाकात माळली बंदुर, यारी नोळकु पौलुस परमेश्वर उन धन्यवाद माळदुन अदिक प्रोत्साहित आदुन.
ACT 28:16 याग नाव रोम दा पोहचुसदेव, रा पौलुस उक ऊंद सैनिक उन सांगुळ जो आऊन रखवाली माळतोगोन, आबना ईरोद आग्या सिक्‍केत.
ACT 28:17 मुर दिन इन बाद्दा आव यहूदीगोळ्द प्रमुख लॉकुरी कारदुन, अदिक याग आंदुर जमा आदुर रा आंदुर से अंदुन, “हे वार्टुरा, ना तान लॉकुर्द या आप्प दादागोळ व्यवहारगोळ्द विरोध दा येनु अच माळीदील, तरी नानी बंदी माळकु यरूशलेम टु रोमीगोळ्द कय दा कोटकु आत.
ACT 28:18 आंदुर नान जाँच माळदुर अदिक नानी बिट बुळोद चाहासदुर, यतिकी नान दा मृत्यु उन योग्य येनु दोष ईला ईरोद.
ACT 28:19 लेकीन याग यहूदी ईदुर्द विरोध दा माताळली कुरतुर, रा नानी कैसर से न्याय बेळोद प्रार्थना माळोद बित्‍त: इदुरसाटी ईला कि नानी तान लॉकुर मा येनारा दोष हचोद ईरोद.
ACT 28:20 इदुरसाटी ना नीमी कारदिन कि नीम से मिलुसाईन अदिक मातचीत हेळाईन; यतिकी आ मंळसा अन साटी ना ई शंकली देल जकळुसकु आईन यार्द इस्त्राएल इन लॉकुर आशा माळतोगोर.”
ACT 28:21 आंदुर आऊन से अंदुर, “ना नामी नीन बारा दा यहूदीगोळ से चिट्ठी गोळ सिकदव, अदिक ना वार्टुर दा टु यावारा बंदकु नीन बारा दा येनारा हेळदुर अदिक ना बुरा अंदुर.
ACT 28:22 लेकीन नीन विचार येन आद? अदा नाव नीन से केळोद चाहासतेव, यतिकी नाव जान्सतेव कि नी याता समुह टु बरत्या अद समुह अन विरोध सप्पा दी लॉकुर माळतार.”
ACT 28:23 आग आंदुर आऊन साटी ऊंद दिन ठहरूसदुर, अदिक हापाळ सा लॉकुर जमा आदुर, अदिक आव परमेश्वर उन राज्य अन गवाही कोळतेला, अदिक मूसा अन व्यवस्था अदिक भविष्यवक्तागोळ्द किताबगोळ देल यीशु उन बारा दा समझुस समझुस्कु व्हातर्या टु द्यावगा ताका वर्णन माळतेला ईत्‍तुन.
ACT 28:24 आग थ्वाळासा लॉकुर आ मातगोळी मान्स कोंडुर, अदिक थ्वाळासा लॉकुर विश्वास माळीदील.
ACT 28:25 बाक आंदुर आपस दा आबुर दाबुर देल असयमत आगतेला आंदुर अल टु होग कुरतुर, आग पौलुस ईद ऊंद मात अंदुन अदिक यशायाह भविष्यवक्ता अन द्वारा पवित्र आत्मा नीम आप्प दादागोळ से याट सही अंदीत,
ACT 28:26 यतिकी आव अंदुन, होगकु ई लॉकुर से अन, कि नीव केळीर, लेकीन सम्सतिदील, अदिक नीव नोळतेला अच ईत्‍तीर, लेकीन नीमी कांळ्सतिदील;
ACT 28:27 यतिकी ई लॉकुर्द मन कठोर अदिक आंदुर तान किव बंद माळ बुटार, अदिक आंदुर कण्णगोळ बंद आगेग्याव, हिंग आगबाळुल कि आंदुर यागलु कण्णगोळ देल नोळुल अदिक किवगोळ देल केळुल अदिक मन देल समसुल अदिक नान दी तिर्गुल, अदिक ना आंदरी चंगा माळाईन.
ACT 28:28 अदिक पौलुस ई मात देल ईदुर्द समापन माळदुन कि “नीमी जान्स कोम पायजे कि परमेश्वर उन ई उद्धार इन बातणी गैरयहूदीगोळ हात्‍ती कळुकु आगेग्याद, आंदुर ईदरी केळ्यार.”
ACT 28:29 याग आव ईद अंदुन रा यहूदी आपस दा हापाळ झगळा माळली कुरतुर अदिक अल टु होटोदुर.
ACT 28:30 पौलुस पुरा येढ्ढ वर्ष तान किराया अन मान्या ईत्‍तुन, अदिक जो आऊन हात्‍ती आऊन से मुलाकात माळली बरतोगोर, आ सप्पा मुंदुर्द स्वागत माळ्त ईत्‍तुन.
ACT 28:31 अदिक पुरा स्वतंत्रता अदिक हिम्मत इन सांगुळ परमेश्वर उन राज्य अन्द प्रचार माळोन अदिक प्रभु यीशु मसीह अन बारा दा कल्सतेला ईत्‍तुन.
ROM 1:1 पौलुस उन दी टु जो यीशु मसीह अन दास आन, अदिक यारी परमेश्वर प्रेरित आगोर साटी कारस्यान, अदिक परमेश्वर उन आ खुशखबरी इन प्रचार इन साटी अलग माळकु आत.
ROM 1:2 यारी पयले अच संदेश कोळावाळेर्द द्वारा प्रतिग्या माळकु आत, ह्यांग पवित्रशास्त्र दा लिख्सकु आग्याद.
ROM 1:3 अद आऊन पार उन बारा दा हुन; आव मय इन भाव देल रा दाऊद उन वंश देल पैदा आदुन.
ROM 1:4 अदिक पवित्रता अन आत्मा अन भाव देल सोत्‍तुर दा टु जित्‍ता आगोद कारण सामर्थ्य अन सांगुळ परमेश्वर उन पार ठहरूस्कु आदुन; आव यीशु मसीह नाम प्रभु हुन.
ROM 1:5 आऊंदा द्वारा परमेश्वर नामी अनुग्रह कोट्टुन कि प्रेरिताई सिकुल, ताकी सप्पा गैरयहूदी लॉकुर आऊन हेसुर मा विश्वास माळुल अदिक आग्या अन पालन माळुल.
ROM 1:6 इदुर दा नीव भी शामिल आईर जो रोम दा ईरतीर, यारी परमेश्वर यीशु मसीह नोर आगोर साटी कारस्यान.
ROM 1:7 आ सप्पा मुंदुर हेसुर ना लिखसेतीन जो रोम दा परमेश्वर उन प्रिय आर, अदिक आंदरी परमेश्वर तान लॉकुर आगोर साटी कारस्यान. नाम आप्प परमेश्वर अदिक प्रभु यीशु मसीह अन दी टु नीमी अनुग्रह अदिक शांती सिकतेला ईरूल.
ROM 1:8 पयले ना नीम सप्पा मुंदुर साटी यीशु मसीह अन द्वारा तान परमेश्वर उन धन्यवाद माळतीन, यतिकी नीम विश्वास इन बारा दा पुरा दुनिया दा चर्चा आगेत्याद.
ROM 1:9 परमेश्वर यार्द स्यावा ना तान आत्मा देल आऊन पार उन खुशखबरी इन बारा दा माळतीन, आवा नान गवाह आन कि ना नीमी याता प्रकार लगातार याद माळ्त ईरतीन,
ROM 1:10 अदिक लगातार तान प्रार्थनागोळ दा ना हमेशा अच विनती माळतीन कि यातोदारा रीति देल ईग नीम हाती बरोद नान यात्रा परमेश्वर उन इच्छा देल सफल आगुल.
ROM 1:11 यतिकी ना नीम से मिलुसोद इच्छा हापाळ ईटतीन कि नीम सांगुळ आत्मिक आशीषगोळ वाट्स सकाईन यदुर देल नीमी सामर्थ्य सिकुल;
ROM 1:12 मतलब ईद कि याग ना नीम बीच दा आगाईन, रा नामी आ विश्वास इन द्वारा जो नान दा अदिक नीम दा आद, आबुर दाबुर से प्रोत्साहन सिकुल.
ROM 1:13 हे वार्टुरा अदिक आकतींगेरा, ना घळी घळी नीम हाती बरोद चाहासदीन, कि ह्यांग नानी गैरयहूदीगोळ दा व्हासा विश्वासीगोळ्द काय सिक्त, हांग अच नीम दा भी सिकुल, लेकीन ईगासताका रूकावटगोळ बंदव.
ROM 1:14 ना सप्पा लॉकुर्द कर्जदार आईन यूनानीगोळ्द अदिक गैर यूनानीगोळ्द, कल्तकु अदिक अशिक्षितगोळ्द.
ROM 1:15 इदुरसाटी ना नीमी भी जो रोम नगर दा ईरतीर, खुशखबरी केळसोर साटी हापाळ उत्साहीत आईन.
ROM 1:16 यतिकी ना खुशखबरी देल नाचालीन, इदुरसाटी कि अद हर ऊंद विश्वास माळावाळा अन साटी, पयले रा यहूदी बाक गैरयहूदी, यतिकी ईद उद्धार तरावाळा परमेश्वर उन सामर्थ्य हुन.
ROM 1:17 यतिकी खुशखबरी ईद प्रगट माळतद कि परमेश्वर मंळसागोळी तान प्रती सही ह्यांग माळतान ईद सुरूवात टु आखरी ताका विश्वास इन द्वारा अच आद. ह्यांग कि शास्त्र दा लिख्सकु आद, “जो मंळसा परमेश्वर उन सांगुळ न्यायी आन आव विश्वास इन द्वारा जित्‍ता ईत्‍तान.”
ROM 1:18 परमेश्वर उन सिट्ट रा आ लॉकुर्द पाप अदिक बुराई मा स्वर्ग टु प्रगट आगतद, जो सत्य अक बुराई देल वोतकु ईटतार.
ROM 1:19 इदुरसाटी कि परमेश्वर उन ग्यान आंदुर्द मनगोळ दा प्रगट आद, यतिकी परमेश्वर आंदुर मा प्रगट माळ्यान.
ROM 1:20 यागी टु परमेश्वर दुनिया अन्द रचना माळदुन आगी टु आऊन अदृश्य विशेषतागोळ, मतलब अनन्त ताकत अदिक आऊन दैविक स्वभाव आ वस्तुगोळ दा जो परमेश्वर रच्यान पुरा रीति देल साफ कांळ्सकु बिळतद. इदुरसाटी आ लॉकुर हात्‍ती येनु बहाना हैलेच.
ROM 1:21 यतिकी आंदुर परमेश्वर उक अरूतार लेकीन जो आऊन सम्मान आद अद आऊक कोळालुर अदिक ना धन्यवाद माळतार. लेकीन आऊन जागा आंदुर विचार पुरा रीति देल निरर्थक आग्याव अदिक आंदुरव खाली दिमाक अंधार देल तुम्मेग्याव.
ROM 1:22 आंदुर तान तान इक बुद्धिमान सम्सतार लेकीन मूर्ख आर,
ROM 1:23 अदिक अविनाशी परमेश्वर उन महिमा अक नाशवान मंळसागोळ, पक्षीगोळ, नाक कालवाळा जनावरगोळ, अदिक रेंगसावाळा किळागोळ मूर्ति इन समानता दा आंदुर बदलुस बुटुर.
ROM 1:24 ई कारण परमेश्वर आंदरी आंदुर मन इन अभिलाषागोळ अनुसार अशुध्दता अन साटी बिट्ट बुटुन कि आंदुर आपस दा तान शरीर इन अनादर माळुल.
ROM 1:25 यतिकी आंदुर परमेश्वर उन सच्चाई अक बदलुस्कु ख्वाटा माळ बुटुर, अदिक परमेश्वर उन बदला दुनिया अन उपासना अदिक स्यावा माळदुर यदरी आव घळुस्यान, ना कि आ माळावाळा अन्द जो हमेशा धन्य आन! आमीन.
ROM 1:26 इदुरसाटी परमेश्वर आंदरी नीच वासनागोळ कय दा सोप्स बुट्टुन; ईल ताका कि आंदुर आर्तेर स्वाभाविक यौन संबंधगोळ बदला अस्वभाविक यौन संबंध ईटली कुरतुर.
ROM 1:27 हांग अच गंळ्सुर भी आर्तेर सांगुळ स्वाभाविक व्यवहार बिटकु आपस दा कामातुर आगकु होतली हतदुर, अदिक गंळ्सुर दुसरा गंळ्सुर सांगुळ निर्लज क्याल्सा माळकु तान गलत कर्मगोळ्द सजा ताकोंडुर.
ROM 1:28 याग आंदुर परमेश्वर उक अरोद चाहासीदील, रा परमेश्वर भी आंदरी आंदुर्द भ्रष्ट मन मा बिट बुट्टुन कि आंदुर अनुचित क्याल्सा माळली हतुल जो ईला माळ पाहीजे होता.
ROM 1:29 इदुरसाटी आंदुर सप्पा प्रकार इन अन्याय, दुष्टता, लोभ, अदिक अनैतिकता देल तुम्मेग्यार; अदिक आंदुर जलन, हत्या, अदिक झगळा, छल कपट, अदिक बुराईगोळ देल तुम्मेदुर, अदिक चुगलीखोर आगेदुर,
ROM 1:30 अदिक आबुर दाबुर बुराई माळावाळेर, परमेश्वर उन अपमान माळावाळेर, अदिक अय्यासी माळावाळेर, घमण्डी अदिक अहंकारी, अदिक बुराई माळोर साटी अनेक हादी ढुंढ्सावाळेर, अदिक मोय आप्पुर्द आग्या ईला मान्सावाळेर बन्सतार,
ROM 1:31 आंदुर मन इन कमजोर, अदिक तान कोळ्द वचन मुरावाळेर, अदिक आबुर दाबुर्द प्रती निर्दयी आगेग्यार.
ROM 1:32 आंदुर जान्सतार कि परमेश्वर उन व्यवस्था येन अनतद जो लॉकुर ई हादी मा नळुतार आंदुर मृत्यु दण्ड इन लायक आर, तरी भी ई लॉकुर ना सिर्फ आ क्याल्सागोळी माळतार उलटा हांग माळावाळेर इक साथ भी कोळतार.
ROM 2:1 इदुरसाटी हे दोष हचावाळा, नी यावारा येती आगबाळुल, नी निरुत्तर आय; यतिकी याता मात दा नी दुसरा मा दोष हचत्या अदा मात दा तान तान इक भी दोषी ठहरूसत्या, इदुरसाटी कि नी जो दोष हचत्या खुद अच अद क्याल्सा माळत्या.
ROM 2:2 यतिकी नाव जान्सतेव कि जो लॉकुर हिंग क्याल्सा माळतार, परमेश्वर आदुर्द सच्चाई देल न्याय माळतान.
ROM 2:3 लेकीन हे मंळसा, नी जो हिंग-हिंग क्याल्सा माळावाळेर मा दोष हचत्या अदिक खुद अच अव क्याल्सा माळत्या; येन ईद सम्सत्या कि नी परमेश्वर उन न्याय देल ऊळदोद्या?
ROM 2:4 येन नी आऊन महान दया, अदिक शहनशीलता, अदिक धीरज इक तुच्छ जान्सत्या? येन नी सही दा ईद समसाल कि परमेश्वर उन दया नीनी मन फिराव दी ओयतद?
ROM 2:5 लेकीन नी तान कठोरता अदिक जीद्दी मन इन कारण आ दिन इन साटी, जो दिन परमेश्वर उन सिट्ट अदिक खरा न्याय प्रगट आदीत, नी तान साटी दण्ड तयार माळेत्या.
ROM 2:6 परमेश्वर नाम सप्पा मुंदुरी तान कर्मगोळ्द हिसाब देल प्रतिफल कोट्टान:
ROM 2:7 जो लॉकुर वळ्लीद क्याल्सा दा हतकु ईरतार परमेश्वर उन दी टु सीकतद महिमा, आदर, अदिक अमरता अन खोज दा आर, आंदरी परमेश्वर अनन्त जीवन कोट्टान;
ROM 2:8 लेकीन जो लॉकुर मतलबी आर अदिक जो सच्चाई इक स्वीकार माळतार. ताकी बुरा क्याल्सा माळ सकुल ईत्‍ता लॉकुर मा परमेश्वर तान सिट्ट अदिक प्रकोप पलटुस्यान.
ROM 2:9 दुख अदिक परेशानी हर ऊंद मंळसा मा जो बुराई माळतान बंदीत, पयले यहूदी मा बाक गैरयहूदीगोळ मा;
ROM 2:10 लेकीन परमेश्वर जो वळ्लेव क्याल्सा माळतार आंदरी महिमा, आदर अदिक शांती प्रदान माळ्यान, पयले यहूदीगोळ इक बाक गैरयहूदीगोळ इक.
ROM 2:11 यतिकी परमेश्वर बिना पक्षपात देल सप्पा मुंदुर्द न्याय माळतान.
ROM 2:12 गैरयहूदीगोळ हात्‍ती मूसा अन्द व्यवस्था हैलेच अदिक आंदुर्द न्याय भी बिना व्यवस्था देल आदीत, यहूदीगोळ हात्‍ती मूसा अन्द व्यवस्था आद अदिक आंदुरव माळदव पापगोळ न्याय व्यवस्था अन अनुसार अच आदीत.
ROM 2:13 यतिकी परमेश्वर उन मान्या व्यवस्था अक केळावाळेर न्यायी हैलेच, लेकीन व्यवस्था मा नळावाळेर न्यायी ठहरूस्कु आदार.
ROM 2:14 गैरयहूदी लॉकुर यार हात्‍ती व्यवस्था हैलेच, लेकीन आंदुर तान तान दा व्यवस्था मा नळुतार, इदुरसाटी आंदुर तान तान दा अच व्यवस्था आर, जब की आंदुर हात्‍ती मूसा अन्द व्यवस्था हैलेच.
ROM 2:15 आ लॉकुर्द चाल चलन तोर्सतद कि व्यवस्था आंदुर्द दिलगोळ दा लिख्सकु आग्याद. अदिक आंदुरव मन भी अनताव कि ईदा सत्य हुन, अदिक ईदरी हुडुकु आंदुरव विचार आंदरी यागलु निर्दोष या यागलु अपराधी ठहरूसताव;
ROM 2:16 आ दिशी परमेश्वर नान प्रचार माळ्द खुशखबरी इन अनुसार परमेश्वर यीशु मसीह अन द्वारा मंळसागोळ गुप्त विचारगोळ्द न्याय माळ्यान.
ROM 2:17 अगर नी तान तान इक यहूदी अनत्या, अदिक नीनी तान परमेश्वर मा अभिमान आद,
ROM 2:18 अदिक नीनी मालूम आद कि परमेश्वर नीन से येन माळसुसोद चाहासतान अदिक सही मातगोळ इक निवळुसोद नी व्यवस्था देल कलत्या;
ROM 2:19 अदिक तान तान मा भरोसा ईटतान कि ना कुढ्ढगोळव अगुवा, अदिक अंधकार दा बिदकु आर आंदुर ज्योति,
ROM 2:20 मुर्खगोळ इक निर्देश कोळावाळा, अदिक भोला मंळसा गोळोव शिक्षक आन. अदिक नी सही आय कि जो नियम शास्त्र नीन हात्‍ती आद, अदुर्दा पुरा सत्यता अदिक पुरा ग्यान इन समावेश आद.
ROM 2:21 इदुरसाटी येन नी जो दुसरागोळी कल्सत्या, तान तान मा येती लागु माळाल? येन नी जो काळ्लपन ईला माळोद शिक्षा कोळत्या, खुद अच काळ्लपन येती माळत्या?
ROM 2:22 नी जो अनत्या, “व्यभिचार ईला माळ पायजे,” रा खुद अच व्यभिचार येती माळत्या? नी जो मूर्तीगोळ से घृणा माळत्या, येन खुद अच मंदिरगोळी येती लुट्सत्या?
ROM 2:23 नी जो व्यवस्था अन बारा दा घमण्ड माळत्या, रा खुद परमेश्वर उन व्यवस्था ईला मान्सकु परमेश्वर उन अनादर माळत्या?
ROM 2:24 “यतिकी नीम कारण गैरयहूदीगोळ दा परमेश्वर उन हेसुर इन अपमान माळकु आगतद,” ह्यांग शास्त्र दा लिख्सकु आद.
ROM 2:25 अगर नी व्यवस्था अन्द पालन माळ्या रा खतना देल लाभ रा आद, लेकीन अगर नीव व्यवस्था अन उल्लंघन माळत्या रा नींद खतना बिना खतना अन्द दशा ठहरूस्त.
ROM 2:26 इदुरसाटी अगर गैरयहूदी यार्द खतना आगीदील तरी भी व्यवस्था अन्द पालन माळतान रा येन आऊन खतनारहित आगदुर मा भी खतना माळकु आत आळुकु आगतीदील?
ROM 2:27 अदिक खुद यहूदीगोळी गैरयहूदीगोळ द्वारा दोषी ठहरूस्कु आदीत जब की नीम हात्‍ती लिख्सद व्यवस्था अदिक खतना माळकु आगीर लेकीन गैरयहूदी व्यवस्था अन पालन माळतार जब की आंदुर्द शारीरिक रूप देल खतना आगीदील.
ROM 2:28 ऊंद खरा यहूदी यार्द सही दा खतना आग्याद, आव याव हुन? खरा यहूदी आव आलच जो सिर्फ बाहरी रूप देल यहूदी आन, यार्द खतना सिर्फ शारीरिक आद.
ROM 2:29 लेकीन खरा यहूदी आवा हुन जो बुळ्क टु यहूदी आन; यार्द दिल देल खतना आग्याद अदिक ईद परमेश्वर उन आत्मा अन्द क्याल्सा हुन, ना कि लिख्सद व्यवस्था अन्द. ईत्‍ता मंळसा परमेश्वर उन दी टु प्रशंसा पाऊस्यान ना कि मंळसा अन दी टु.
ROM 3:1 इदुरसाटी गैरयहूदीगोळ मुंद नीम्द यहूदी आगोद येन फायदा? अदिक नीम्द खतना अन्द येन लाभ?
ROM 3:2 सप्‍पा प्रकार देल हापाळ लाभ आद. पयले रा ईद कि परमेश्वर उन वचन यहूदीगोळी कोटकु आग्याव.
ROM 3:3 अगर येनारा यहूदी विश्वासघाती होट्टुर भी रा येन आत? येन आंदुर विश्वासघाती आगदुर देल परमेश्वर उन सच्चाई बेकार ठहरूसीत?
ROM 3:4 यागलु ईला! लेकीन परमेश्वर खरा आन अदिक हर ऊंद मंळसा ख्वाटा ठहरूस सकतान, ह्यांग शास्त्र दा लिख्सकु आद, “याग नी खुद इन बचाव दा माताळ्या आग नी सही ठहरूस्या अदिक न्याय माळावती नीनी जीत प्राप्त आदीत.”
ROM 3:5 इदुरसाटी अगर नाम गलत क्याल्सा परमेश्वर उक सही ठहरूस बुळतद, रा नाव येन अंदेव? येन ईद कि परमेश्वर जो दण्ड कोळतान गलत माळतान? ईद रा ना साधारण सवाल केळीतीन.
ROM 3:6 यागलु ईला! ईदारा परमेश्वर ह्यांग दुनिया अन न्याय माळ्यान?
ROM 3:7 अगर नान झुठ इन कारण परमेश्वर उन सच्चाई आऊन महिमा अन साटी, यक्कुल माळकु प्रगट आत रा बाक येती पापी अन घाई ना दण्ड इन साटी ठहरूस्कु आगतीन?
ROM 3:8 “नाव येती बुराई माळेव कि भलाई होळुल?” ह्यांग नाम मा ईदा दोष हचकु भी आगतद, अदिक येनारा अनतार कि इंदुर्द ईदा अनोद आद. लेकीन ईत्‍तोरी दोषी ठहरूसोद ठीक आद.
ROM 3:9 रा बाक येन आत? येन नाव यहूदी आ गैरयहूदीगोळ से वळ्लेर आयेव? यागलु ईला; यतिकी नाव यहूदीगोळ अदिक गैरयहूदीगोळ येढ्ढु मा ईद दोष हच कोंडेव कि आंदुर सप्पा च्या सप्पा पाप इन वश दा आर.
ROM 3:10 ह्यांग शास्त्र दा लिख्सकु आद: “याऊ न्यायी हैलेच, ऊंद भी हैलेच.
ROM 3:11 याऊ समझदार हैलेच; याऊ परमेश्वर उक ढुंडसावाळा हैलेच.
ROM 3:12 सप्पा परमेश्वर उन से भटकुसेग्यार, सप्पा च्या सप्पा निकम्मा बनसेग्यार; याऊ भलाई माळावाळा हैलेच, ऊंद भी हैलेच.
ROM 3:13 आंदुर्द कुतक्या खुल्सद कब्र हुन, आंदुर तान ल्यालग्यागोळ देल छल माळ्यार, आंदुर्द टुट्टीगोळ दा हावगोळ्द जहर आद.
ROM 3:14 आंदुर्द बाय श्राप अदिक कळवाहट देल तुमकु आद.
ROM 3:15 आंदुर काल खुन वाहुस्ली फुर्तीला आव,
ROM 3:16 आंदुर हादीगोळ मा नाश अदिक क्लेश आद,
ROM 3:17 आंदुर शांती इन हादी अरालुर.
ROM 3:18 आंदुर्द कण्णगोळ मुंद परमेश्वर उन अंज्क हैलेच.”
ROM 3:19 नाव जान्सतेव कि व्यवस्था जो येनारा अनतद आंदुर से अच अनतद, जो व्यवस्था अन हात्‍ती आर; इदुरसाटी कि हर ऊंद बाय बंद माळकु आगुल अदिक पुरा दुनिया परमेश्वर उन न्याय इन लायक ठहरूसुल;
ROM 3:20 यतिकी व्यवस्था अन क्याल्सागोळ देल यातोदु मंळसा परमेश्वर उन मुंद न्यायी ठहरूसतीदील, इदुरसाटी कि व्यवस्था अन द्वारा पाप इन पयचान आगतद.
ROM 3:21 लेकीन ईग व्यवस्था टु अलग परमेश्वर उन अद न्यायीपन प्रगट आग्याद, यदुर्द गवाही मूसा अन व्यवस्था अदिक भविष्यवक्ता कोळतार,
ROM 3:22 मतलब परमेश्वर उन अद न्यायीपन जो यीशु मसीह मा विश्वास माळदुर देल सप्पा विश्वास माळावाळेर साटी आद. यतिकी येनु फरक हैलेच;
ROM 3:23 इदुरसाटी कि सप्पा मुंदुर पाप माळ्यार अदिक परमेश्वर उन महिमा देल हापाळ दुर आर,
ROM 3:24 लेकीन आऊन अनुग्रह देल आ छुटकारा अन द्वारा जो मसीह यीशु दा आद, सप्पा च्या सप्पा न्यायी ठहरूस्कु आगतार.
ROM 3:25 यीशु उक परमेश्वर आऊन रक्ता अन द्वारा ऊंद हिंग प्रायश्चित बली ठहरूसदुन, जो विश्वास माळदुर देल कार्यकारी आगतद, कि जो पाप पयले माळकु आग्याव अदिक यऊर मा परमेश्वर तान सहनशीलता अन कारण ध्यान कोटीदील. यीशु उन रक्ता अन बारा दा आव तान न्यायीपन प्रगट माळुल.
ROM 3:26 लेकीन ईदा समय आऊन न्यायीपन प्रगट आगुल कि यदुर देल आव खुद अच न्यायी ठहरूसुल, अदिक जो यीशु मा विश्वास माळुल आऊन भी न्यायी ठहरूसावाळा ईरूल.
ROM 3:27 रा घमण्ड येल आद? अदिक घमण्ड इक व्हार्या माळकु आत? येन नाव व्यवस्था अन पालन माळतेव? ईला, लेकीन नाव विश्वास माळतेव इदुरसाटी.
ROM 3:28 इदुरसाटी नाव ईद परिणाम मा पोहचुसतेव कि मंळसा व्यवस्था अन क्याल्सागोळ से अलग आन, मंळसा परमेश्वर मा विश्वास इन द्वारा अच न्यायी ठहरूस्तान.
ROM 3:29 या परमेश्वर सिर्फ यहूदीगोळव अच हुन? येन गैर यहूदीगोळव परमेश्वर हैलेच? निश्चित अच आव गैर यहूदीगोळव भी परमेश्वर हुन.
ROM 3:30 यतिकी ऊंद अच परमेश्वर आन, जो यहूदीगोळी विश्वास देल अदिक गैरयहूदीगोळी भी विश्वास इन द्वारा न्यायी ठहरूस्यान.
ROM 3:31 रा येन नाव व्यवस्था अक विश्वास इन द्वारा बेकार ठहरूसतेव? यागलु ईला! लेकीन व्यवस्था अक कायम ईटतेव.
ROM 4:1 इदुरसाटी नाव येन अंदेव नाम शारीरिक आप्प अब्राहम उक येन हासिल आत?
ROM 4:2 यतिकी अगर अब्राहम क्याल्सागोळ देल न्यायी ठहरूस्कु आगायदुन, रा आऊक घमण्ड माळोद जागा ईराईत, लेकीन परमेश्वर उन नजर दा ईला.
ROM 4:3 पवित्रशास्त्र येन अनतद? ईद कि “अब्राहम परमेश्वर मा विश्वास माळदुन, अदिक आऊन विश्वास इन कारण परमेश्वर आऊक न्यायी ठहरूसदुन.”
ROM 4:4 क्याल्सा माळावाळा अन्द मजदूरी कोळोद दान आलच, लेकीन हक्‍क सम्सकु आगतद.
ROM 4:5 लेकीन जो विश्वास मा निर्भर ईरतान ना कि क्याल्सागोळ मा, अदिक परमेश्वर मा विश्वास माळतान जो परमेश्वर अभक्तिहिन उक भक्तिहीन माळतान, आऊन ईदा विश्वास देल परमेश्वर आऊक न्यायी ठहरूसतान.
ROM 4:6 यारी परमेश्वर बिना कर्मगोळ्द न्यायी ठहरूस्तान, आऊक दाऊद भी धन्य अनतान:
ROM 4:7 धन्य आर आंदुर यारव अन्याय माफ आदव, अदिक यारव पाप होतुर्सकु आदव.
ROM 4:8 धन्य आन आ मंळसा यारी परमेश्वर पापी ठहरूसतीदील.
ROM 4:9 “जो धन्य आगोद मात दाऊद अनेत्यान, येन खतना माळ्द यहूदीगोळ्द साटी अच हुन या बिना खतना माळ्द गैरयहूदीगोळ्द साटी भी हुन. अब्राहम परमेश्वर मा विश्वास माळदुन अदिक आऊन विश्वास इन कारण अच परमेश्वर आऊक न्यायी स्वीकार माळदुन.”
ROM 4:10 रा ईद याग आत? येन याग आऊन खतना आगेगीत या आव बिना खतना अन्द ईरोन. ईला, खतना अन बाद्दा ईला उलटा खतना आगा पयले हिंग आत.
ROM 4:11 अदिक आऊन खतना आगोद अद ऊंद चिन्ह बन्सत कि तोर्स सकुल कि परमेश्वर आऊक खतना आगा पयले अच आऊन विश्वास इन द्वारा न्यायी स्वीकार माळदुन. अदिक अब्राहम सप्पा विश्वासीगोळ्द आत्मिक आप्प बन्सदुन यतिकी आंदुर बिना खतना नोर आर लेकीन विश्वासी आर, इदुरसाटी आंदुर भी न्यायी ठहरूसकु आदार.
ROM 4:12 अदिक आव आंदुर भी आप्प हुन यार्द खतना आग्याद, आ लॉकुर सिर्फ खतना माळकु ना ईला ईरोर उलटा नाम आप्प अब्राहम उन विश्वास इन पद चिन्हगोळ मा नळावाळेर ईरोर आव अब्राहम जो खतना आगोर से पयले नळदुन.
ROM 4:13 याग परमेश्वर अब्राहम अदिक आऊन वंशजगोळ से प्रतिग्या माळदुन कि आंदुर दुनिया अन्द वारीस आदार, ईद प्रतिग्या अब्राहम उक व्यवस्था अन पालन माळदुर देल अच सकिदील लेकीन आव विश्वास माळदुन अदिक आव परमेश्वर उन द्वारा न्यायी स्वीकार माळकु आदुन ई कारण अच सिक्त.
ROM 4:14 अदिक इदुरसाटी अगर नीव मान्सतीर कि परमेश्वर उन कोळ्द प्रतिग्या ईद व्यवस्था अन पालन माळावाळेर कारण सिक्त रा नीम्‍द विश्वास बेकार अदिक परमेश्वर उन कोळ्द प्रतिग्या भी बेकार आद.
ROM 4:15 यतिकी व्यवस्था देल परमेश्वर उन सिट्ट पैदा आगतद, लेकीन यल व्यवस्था हैलेच, अल अदुर्द उल्लंघन भी हैलेच.
ROM 4:16 ईदा कारण प्रतिग्या विश्वास मा आधारित आद अदिक ईद प्रतिग्या ई सप्पा अब्राहम उन वंशजगोळ साटी परमेश्वर उन मुफ्त उपहार हुन, ईद सिर्फ व्यवस्था अन पालन माळावाळेर साटी इच ईला लेकीन आंदुर साटी भी आद जो विश्वास माळतार ह्यांग विश्वास अब्राहम माळदुन यतिकी अब्राहम नाम सप्पा मुंदुरव आत्मिक आप्प हुन.
ROM 4:17 ह्यांग शास्त्र दा लिख्सकु आद, “ना नीनी हापाळ सा द्याशगोळ्द आप्प ठहरूसीन” अदिक ईद प्रतिग्या परमेश्वर उन नजर दा वळ्लीद आद. ईव आव परमेश्वर हुन यार मा अब्राहम विश्वास माळदुन अदिक जो सोत्‍तुरी जित्‍ता माळतान, अदिक ईव आव परमेश्वर हुन जो मातगोळ अस्तित्व दा हैलेच आ मातगोळी अस्तित्व दा तरतान.
ROM 4:18 ह्यांग शास्त्र दा लिख्सकु आद, “नी हापाळ सा द्याशगोळ्द आत्मिक आप्प आद्या. अदिक नीन वंशजगोळ तारागोळ घाई आदार ई मात मा आशा ईटोद येनु कारण ईला ईरोद तरी भी अब्राहम विश्वास अदिक आशा ईटदुन,”
ROM 4:19 यतिकी आव लगभग सौ साल इनव आगेगिदुन लेकीन आऊन विश्वास आऊन शरीर इन घाई कमजोर ईला आगीत ह्यांग कि आऊन शरीर लगभग सायापरी आगेगीत अदिक सच्चाई रा ईद भी आद कि सारा अन क्वाता भी चिग्द उक हाळु ईला सकोद.
ROM 4:20 तरी भी आव तान विश्वास इक बिटीदिल अदिक ना आव परमेश्वर उन प्रतिग्या मा सक माळदुन आऊन विश्वास आऊक सामर्थ्य देल तुम्त अदिक आव परमेश्वर उन महिमा माळदुन;
ROM 4:21 अदिक आऊक पुरा भरोसा ईरोद कि परमेश्वर आऊक जो प्रतिग्या कोटीदुन, आव अदरी पुरा माळदुर दा भी समर्थ आन.
ROM 4:22 ई कारण परमेश्वर अब्राहम उक आऊन विश्वास इन द्वारा न्यायी स्वीकार माळदुन.
ROM 4:23 अदिक ईद वचन, “विश्वास इन द्वारा न्यायी स्वीकार माळोद” सिर्फ आऊन आबना अन साटी लिख्सकु ईला आगित.
ROM 4:24 ऊलटा ईद नाम साटी भी लिख्सकु आत जो नाव न्यायी ठहरूसकु आगेव अदिक जो यीशु नाम प्रभु जो सोत्‍तुर दा टु जित्‍ता आदुन आऊन मा विश्वास माळतार.
ROM 4:25 यतिकी आव नाम पापगोळ कारण मृत्यु उन साटी सौप्सकु आदुन अदिक नामी परमेश्वर उन सांगुळ न्यायी ठहरूसोर साटी सोत्‍तुर दा टु जित्‍ता आदुन.
ROM 5:1 ईग जो नाव तान विश्वास इन कारण परमेश्वर उन मुंद न्यायी ठहरूसेव, रा नाम प्रभु यीशु मसीह अन कारण परमेश्वर नामी शांती कोटान.
ROM 5:2 अदिक ईग आऊंदा द्वारा विश्वास इन कारण नाव परमेश्वर उन अनुग्रह दा जीवन व्यतीत माळतेव. अदिक नाव आ आशा मा घमण्ड माळतेव यदुर द्वारा नामी परमेश्वर उन महिमा अन सांगुळ भागीदारी सिक्याद.
ROM 5:3 सिर्फ ईटा ईला, यतिकी नाव तान आपदगोळ मा घमण्ड माळतेव यतिकी नामी मालूम आद नाम आपद धीरज इक उत्पन्न माळतद.
ROM 5:4 अदिक धीरज देल वळ्लीद चरित्र बन्सतद, अदिक वळ्लीद चरित्र देल आशा उत्पन्न आगतद;
ROM 5:5 अदिक ईद आशा नामी निराश माळाल, यतिकी परमेश्वर आऊन प्यार नाम मनगोळ दा हाक्यान, मतलब पवित्र आत्मा जो नाम साटी परमेश्वर उन उपहार हुन.
ROM 5:6 यतिकी याग नाव आशाहीन ईरेव, रा ठीक समय मा नाव भक्तिहीनगोळ साटी मसीह तान बलिदान माळदुन.
ROM 5:7 यावारा न्यायी जन इन साटी यावारा सायुल, ईद रा दुर्लब आद; लेकीन आग सकतद यावारा वळ्लेव मंळसा अन साटी यावारा सायोद भी हिम्मत माळुल.
ROM 5:8 लेकीन परमेश्वर नाम मा तान प्यार इन भलाई ई रीति देल प्रगट माळतान कि याग नाव पापी अच ईरेव आग भी मसीह नाम साटी सोत्‍तुन.
ROM 5:9 इदुरसाटी याग कि नाव ईग आऊन रक्ता अन कारण न्यायी ठहरूसदेव, रा आऊन द्वारा परमेश्वर उन सिट्ट देल येती ऊळ्सकु आगतीदील?
ROM 5:10 यतिकी याग नाव परमेश्वर उन दुश्मन ईरेव लेकीन परमेश्वर तान पार उन मृत्यु उन द्वारा नाम सांगुळ मेल मिलाप माळदुन, रा ईग नाव परमेश्वर उन संगी आयेव रा आ मसीह अन जीवन इन द्वारा नाम हापाळ यक्कुल उद्धार आदीत.
ROM 5:11 सिर्फ ईदा ईला, लेकीन नाव तान प्रभु यीशु मसीह से, यार्द द्वारा नाम परमेश्वर उन सांगुळ मेल मिलाप आत, परमेश्वर दा खुश आगतार.
ROM 5:12 इदुरसाटी ह्यांग ऊंद मंळसा अन द्वारा पाप दुनिया दा बत्‍त, अदिक पाप इन द्वारा मृत्यु बत्‍त, अदिक ई रीति देल मृत्यु सप्पा मंळसागोळ दा फैलुसेत, यतिकी सप्पा मुंदुर पाप माळदुर.
ROM 5:13 व्यवस्था अन कोटकु आगोर से पयले ताका पाप दुनिया दा रा ईरोद, लेकीन येल व्यवस्था हैलेच अल पाप आळ्दकु आगाल्द.
ROM 5:14 लेकीन आग भी आदम टु मूसा ताका पुरा मृत्यु आ लॉकुर मा राज्य माळ्त याग कि आ लॉकुर आदम घाई आग्या मुरोद पाप माळीदिल तरी भी पापी ठहरूसीदील, जो आ बरावाळा अन चमत्कार हुन, आ अपराध घाई पाप माळीदिल.
ROM 5:15 लेकीन ह्यांग अपराध इन दशा आद, हांगा अनुग्रह अन वरदान इन हैलेच, यतिकी याग ऊंद आदम उन अपराध देल हापाळ लॉकुर सोत्‍तुर, रा परमेश्वर उन अनुग्रह अदिक आऊन जो दान ऊंद मंळसा अन, मतलब यीशु मसीह अन अनुग्रह देल हापाळ लॉकुरी कृपा सिक्त.
ROM 5:16 अदिक परमेश्वर उन भेंट अदिक ऊंद मंळसा अन पाप ई येढ्ढु दा फरक आद. तरी भी पाप इन कारण दोष इन न्याय बत्‍त, लेकीन हापाळ पुरा पापगोळ्द बाद्दा अदिक निर्दोष आगोद यदुर्द नाव लायक ईला ईरेव अद भेंट बत्‍त.
ROM 5:17 यतिकी याग ऊंद मंळसा अन अपराध इन कारण मृत्यु आ ऊंद मंळसा अन द्वारा अच राज्य माळ्त, रा जो लॉकुरी अनुग्रह अदिक न्यायरूपी वरदान बहुतायत देल सिकतद आंदुर ऊंद मंळसा अन, मतलब यीशु मसीह अन द्वारा जरूरी अच अनन्त जीवन दा राज्य माळ्यार.
ROM 5:18 इदुरसाटी ह्यांग ऊंद अपराध सप्पा मंळसागोळ साटी दण्ड इन आग्या अन कारण आत, हांग अच ऊंद न्यायीपन इन क्याल्सा भी सप्पा लॉकुरी मुक्त माळतद अदिक आंदरी जीवन कोळतद.
ROM 5:19 यतिकी ह्यांग ऊंद मंळसा अन आग्या ईला मान्सदुर देल हापाळ लॉकुर पापी ठहरूसदुर, हांग अच ऊंद मंळसा अन आग्या मानसोद कारण सप्पा लॉकुर परमेश्वर उन मुंद न्यायी ठहरूसकु आदार.
ROM 5:20 व्यवस्था अन पयचान इदुरसाटी आत कि अपराध वाळुसेगुल, लेकीन यल पाप वाळुस्त अल परमेश्वर अनुग्रह अदिक यक्कुल वाळुस्त,
ROM 5:21 कि ह्यांग पाप मृत्यु फैलुसतेला राज्य माळ्त, हांग अच नाम प्रभु यीशु मसीह अन द्वारा अनुग्रह भी अनन्त जीवन इन साटी न्यायीपन इन द्वारा राज्य माळीत.
ROM 6:1 रा नाव ईग येन अंदेव? येन नाव लगातार पाप माळतेला ईत्‍तेव कि परमेश्वर उन अनुग्रह आगुल?
ROM 6:2 निश्चित अच ईला! नाव याग पाप इन साटी सोतोदेव रा बाक ईदुर मुंद अदुर दा ह्यांग जीवन बितुसेव?
ROM 6:3 येन नीव जान्सालीर कि नाव सप्पा यार मसीह यीशु दा बपतिस्मा ताकोंडेव, आऊन मृत्यु उन भागीदारी दा बपतिस्मा ताकोंडेव.
ROM 6:4 इदुरसाटी आ मृत्यु उन बपतिस्मा ताकोंडुर देल नाव आऊन सांगुळ नळस्कु आदेव, ताकी ह्यांग मसीह आप्प उन महिमा अन द्वारा सोत्‍तुर दा टु जित्‍ता आदुन, हांग अच नाव भी व्हाशोद जीवन इन घाई चाल नळदेव.
ROM 6:5 यतिकी अगर नाव आऊन मृत्यु उन समानता दा आऊन सांगुळ जमा आगेगेव, रा निश्चय आऊन जित्‍ता आगोद समानता दा भी जमा आगेदेव.
ROM 6:6 नाव जान्सतेव कि नाम हाळोद मनुष्यत्व आऊन सांगुळ क्रूस मा येर्सकु आत ताकी पाप इन मय बेकार आगेगुल, अदिक नाव मुंद पाप इन दासत्व दा ईरतीदील.
ROM 6:7 यतिकी जो सोतोदुन, आव पाप इन बंधन देल न्यायी आगेदुन.
ROM 6:8 इदुरसाटी अगर नाव मसीह अन सांगुळ सोतोदेव, रा नाम विश्वास ईद आद कि आऊन सांगुळ जित्‍ता भी ईत्‍तेव.
ROM 6:9 यतिकी ईंदुर जान्सतार कि मसीह सोत्‍तुर दा टु जित्‍ता आगकु मात्‍त सायतीदील; आऊन मा मात्‍त मृत्यु उन प्रभुता आगतीदील.
ROM 6:10 अदिक आव सोतोदुन आऊन मा पाप इन बंधन हैलेच अदिक ईग आव परमेश्वर उन सांगुळ आऊन जीवन व्यतीत माळतान.
ROM 6:11 हिंग अच नीव भी तान बारा दा ईद समसी कि नीव भी पाप इन साटी सोतोगीर, लेकीन मसीह यीशु उन द्वारा परमेश्वर दा जित्‍ता समसी.
ROM 6:12 इदुरसाटी पाप नीम मरनहार शरीर दा राज्य माळबाळुल, कि नीव अदुर लालसागोळ हात्‍ती ईरी;
ROM 6:13 तान शरीर इन अंगगोळी अर्धम इन स्यावा अन साटी पाप इन हवाला माळबाळी, उलटा सोत्‍तुर दा टु जित्‍ता आगावाळेर घाई परमेश्वर उन हवाला माळबुळी, अदिक तान शरीर इन अंगगोळी न्यायीपन इन स्यावा अन साधन इन रूप दा परमेश्वर उन हवाला माळबुळी.
ROM 6:14 आग नीम मा पाप इन प्रभुता आगतीदील, यतिकी नीव व्यवस्था अन हात्‍ती ईला उलटा परमेश्वर उन अनुग्रह अन हात्‍ती आईर.
ROM 6:15 रा नाव येन माळेव? येन नाव पाप माळेव यतिकी नाव व्यवस्था अन हात्‍ती हैलेच उलटा परमेश्वर उन अनुग्रह अन हात्‍ती जीऊसतेव? निश्चित अच ईला!
ROM 6:16 येन नीव जान्सालीर कि यावारा ऊंद मंळसा अन आग्या मानसोर साटी नीव तान तान इक दासगोळ घाई सोप्स बुळतीर रा यार्द आग्या मान्सतीर आऊंदा दास बन्सेगतीर: चाहे बाक पाप इन, यदुर्द परिणाम मृत्यु आद, चाहे बाक आग्या मान्सावाळेर्द, यार्द अन्त न्यायीपन आद?
ROM 6:17 लेकीन परमेश्वर उन धन्यवाद आगुल कि नीव जो पाप इन दास ईरीर ईग मन देल आ सच्चाई इक ग्रहण माळदीर अदिक उपदेश मान्सावाळेर आगेदीर, यार्द साचा दा ढलस्कु आगेदीर,
ROM 6:18 अदिक नीव पाप देल बिटकु न्याय इन दास आगेदीर.
ROM 6:19 ना नीम शारीरिक कमजोरी अन कारण मंळसागोळ रीति मा अनतीन. ह्यांग नीव तान अंगगोळी कुकर्म अदिक अशुध्दता अन दास माळकु सौप्सदीर, हांग अच ईग तान अंगगोळी पवित्रता अन साटी न्यायीपन इन दास माळकु सोप्स बुळी.
ROM 6:20 याग नीव पाप इन दास ईरीर, रा न्याय इन दी टु स्वतंत्र ईरीर.
ROM 6:21 इदुरसाटी याता मातगोळ देल ईग नीव लज्जित आगतीर, अऊर से आ समय नीमी येन काय सिकतोगोद? यतिकी आ मातगोळ अन्त रा मृत्यु आद.
ROM 6:22 लेकीन ईग पाप देल स्वतंत्र आगकु परमेश्वर उन दास बन्सकु नीमी काय सिक्त यदुर देल पवित्रता हासिल आगतद, अदिक अदुर अन्त अनन्त जीवन आद.
ROM 6:23 यतिकी पाप इन मजदूरी रा मृत्यु आद, लेकीन नाम परमेश्वर उन अनुग्रह अन भेंट नाम प्रभु मसीह यीशु दा अनन्त जीवन आद.
ROM 7:1 हे वार्टुरा अदिक आकतींगेरा, येन नीव जान्सालीर, ना व्यवस्था अन जान्सावाळेर से अनतीन, कि यागासताका मंळसा जित्‍ता ईरतान, आगासताका आऊन मा व्यवस्था अन अधिकार ईरतद?
ROM 7:2 उदाहरण इन साटी ऊंद मदावळ्त आर्त तान मान्नावाळा अन व्यवस्था अन अनुसार आगासताका बंधन दा आर यागासताका आकिन मान्नावाळा जित्‍ता आन लेकीन अगर आकिन मान्नावाळा सोतोगतान रा आक मदा संबंधी व्यवस्था देल मुक्त आगेगतार.
ROM 7:3 इदुरसाटी अगर गांड्ड उन जीते जी आक यावारा दुसरा गंळ्स उन आगेगुल, रा व्यभिचारिणी अंदकु आदार, लेकीन अगर गांड्ड सोतोगुल, रा आक आ व्यवस्था देल बिट्टोदुर, ईल ताका कि अगर यावारा दुसरा गंळ्स उन आगेदुर तरी भी व्यभिचारिणी ठहरूसतीदील.
ROM 7:4 हांग अच हे नान वार्टुरा अदिक आकतींगेरा, नीव भी मसीह अन मय इन द्वारा व्यवस्था अन साटी सोतकु बनसेदीर, कि आ दुसरा अन आगेगी, जो सोत्‍तुर दा टु जित्‍ता आदुन: ताकी नाव परमेश्वर उन स्यावा दा उपयोगी ठहरुसुल.
ROM 7:5 यतिकी याग नाव शारीरिक स्वभाव इन हात्‍ती ईरेव, रा पापगोळ अभिलाषागोळ जो व्यवस्था अन द्वारा ईरोद, मृत्यु अन काय पैदा माळोर साटी नाम अंगगोळ दा क्याल्सा माळोद.
ROM 7:6 लेकीन यार्द बंधन दा नाव ईरेव आऊन साटी सोतकु, ईग व्यवस्था देल हिंग बिटोदेव, कि शास्त्र लेख इन हाळोद रीति मा ईला, उलटा आत्मा अन व्हाशोद रीति मा स्यावा माळतेव.
ROM 7:7 रा नाव येन अंदेव? येन व्यवस्था पाप आद? यागलु ईला! उलटा बिना व्यवस्था अन ना पाप इक अरालीन: व्यवस्था अगर ईला अनाईत, कि लालच माळबाळ रा ना लालच इन बारा दा ईला जान्स सकायदिन.
ROM 7:8 लेकीन पाप मौका नोळकु आग्या अन द्वारा नान दा सप्पा प्रकार इन लालच पैदा माळ्त, यतिकी बिना व्यवस्था अन पाप मुर्दा आद.
ROM 7:9 ना रा व्यवस्था अन बिना पयले जित्‍ता ईरीन, लेकीन याग आग्या बत्‍त, रा पाप जित्‍ता आगेत, अदिक ना सोतोदीन.
ROM 7:10 अदिक अदा आग्या जो जीवन तरोरसाटी ईरोद, नान साटी मृत्यु उन कारण ठहरूस्त.
ROM 7:11 यतिकी पाप मवका नोळकु आग्या अन द्वारा नानी बहकुस्त, अदिक अदुर्दा द्वारा नानी कोंद भी बुळ्त.
ROM 7:12 इदुरसाटी व्यवस्था पवित्र आद, अदिक आग्या भी सही अदिक वळ्लीद आद.
ROM 7:13 रा येन अद जो वळ्लीद ईरोद, नान साटी मृत्यु ठहरूस्त? यागलु ईला! लेकीन पाप आ वळ्लीद वस्तु उन द्वारा नान साटी मृत्यु उक पैदा माळावाळा आत कि अदुर पाप आगोद प्रगट आगुल, अदिक आग्या अन द्वारा पाप हापाळ अच पापमय ठहरूसुल.
ROM 7:14 नाव जान्सतेव कि व्यवस्था रा आत्मिक आद, लेकीन ना शारीरिक अदिक पाप इन कय देल मारकु आईन.
ROM 7:15 जो ना माळतीन अदरी अरालीन; यतिकी जो ना चाहासतीन अद माळालीन, लेकीन यदुर देल नानी घृणा बरतद अदा माळतीन.
ROM 7:16 अगर जो ना चाहासालीन अदा माळतीन, रा ना मान्स कोमतीन कि व्यवस्था भला आद.
ROM 7:17 रा हिंग दशा दा अदुर्द माळावाळा ना आल्लच, उलटा पाप हुन जो नान दा कुर्तकु आद.
ROM 7:18 यतिकी ना जान्सतीन कि नान दा मतलब नान मय दा यातोदु वळ्लीद वस्तु वास माळाल्द. इच्छा रा नान दा आद, लेकीन वळ्लीद क्याल्सा नान से आग सकालव.
ROM 7:19 यतिकी यातोद वळ्लीद क्याल्सा अन ना इच्छा माळतीन, अद रा माळालीन, लेकीन यातोद बुराई अन इच्छा माळालीन, अदा माळतीन.
ROM 7:20 इदुरसाटी अगर ना अदा माळतीन यदुर्द इच्छा माळालीन, रा अदुर्द माळावाळा ना ईतीदील, लेकीन पाप जो नान दा कुर्तकु आद.
ROM 7:21 ई प्रकार ना ईद अनुभव ताकोमतीन कि याग भलाई माळोद इच्छा माळतीन, रा बुराई नान से आगतद.
ROM 7:22 यतिकी ना अंतर आत्मा देल रा परमेश्वर उन नियम देल हापाळ खुश ईरतीन.
ROM 7:23 लेकीन नानी तान शरीर दा दुसरा प्रकार इन व्यवस्था कांळ्सकु बिळतद, जो नान दिमाक इन नियम देल लळाई माळतद अदिक नानी पाप इन नियम इन बंधन दा हाकतद जो नान शरीर दा आद.
ROM 7:24 ना ह्यांग दुखी मंळसा आईन! नानी ई मृत्यु उन मय देल याव बिळस्यान?
ROM 7:25 जो नानी पापगोळ देल छुटकारा कोळतान आ प्रभु यीशु मसीह अन द्वारा आ परमेश्वर उन धन्यवाद माळतीन. ईत्‍ता प्रकार बुद्धी देल परमेश्वर उन नियम इन पालन माळतीन.
ROM 8:1 इदुरसाटी ईग जो मसीह यीशु दा जीवन व्यतीत माळतार, आंदुर मा दण्ड इन आग्या हैलेच.
ROM 8:2 यतिकी जीवन इन आत्मा अन व्यवस्था मसीह यीशु दा नानी पाप इन अदिक मृत्यु अन व्यवस्था देल स्वतंत्र माळबुटाद.
ROM 8:3 यतिकी जो क्याल्सा व्यवस्था शरीर इन कारण दुर्बल आगकु माळ सकिदील, अदरी परमेश्वर माळदुन, मतलब तांद अच पार उक पापमय शरीर इन समानता दा अदिक पाप बली आगोर साटी कळुकु, शरीर दा पाप मा दण्ड इन आग्या कोट्टुन.
ROM 8:4 इदुरसाटी कि व्यवस्था अन आवश्यकतागोळ नाम दा शरीर इन अनुसार ईला उलटा आत्मा अन अनुसार नळुतार, पुरा माळकु आगुल.
ROM 8:5 यतिकी शारीरिक मंळसागोळ शरीर इन मातगोळ मा मन हचतार; लेकीन जो आत्मा अन मातगोळ मा मन हचतार.
ROM 8:6 शरीर मा मन हचोद रा मृत्यु हुन, लेकीन आत्मा मा मन हचोद जीवन अदिक शांती हुन;
ROM 8:7 यतिकी शरीर मा मन हचोद रा परमेश्वर उन से दुश्मनी ईटोद हुन, यतिकी ना रा परमेश्वर उन व्यवस्था अन हात्‍ती आद अदिक ना आग सकतद;
ROM 8:8 अदिक जो शरीर इन हात्‍ती आर, आंदुर परमेश्वर उक खुश माळ सकालुर.
ROM 8:9 लेकीन याग कि परमेश्वर उन आत्मा नीम दा वास माळतद, रा नीव शारीरिक दशा दा ईला लेकीन आत्मिक दशा दा आईर. अगर यारदारा दा मसीह अन आत्मा हैलेच रा आंदुर आऊन लॉकुर आल्लच.
ROM 8:10 अगर मसीह नीम दा आन, रा शरीर पाप इन कारण सोतकु आद; लेकीन आत्मा न्यायीपन इन कारण जित्‍ता आद.
ROM 8:11 अगर आऊंदा आत्मा याव यीशु उक सोत्‍तुर दा टु जित्‍ता माळदुन, नीम दा वास माळेत्याद; रा याव मसीह अक सोत्‍तुर दा टु जित्‍ता माळदुन आव नीम सोतकु शरीरगोळी भी तान आत्मा अन द्वारा जो नीम दा वास माळेत्याद, जित्‍ता माळ्यान.
ROM 8:12 इदुरसाटी हे वार्टुरा अदिक आकतींगेरा, नाम मा भौतिक शरीर इन कर्जा रा आद लेकीन ईदुर्द ईद मतलब हैलेच कि नाव ईदुर अनुसार जीत्‍ता ईत्‍तेव,
ROM 8:13 यतिकी नीव मय इन अनुसार दिन कळदीर रा सोत्‍तीर, अगर आत्मा देल मय इन क्याल्सागोळी कोंदीर रा जित्‍ता ईत्‍तीर.
ROM 8:14 इदुरसाटी कि यास लॉकुर परमेश्वर उन आत्मा अन अनुसार नळुतार, आंदुर अच परमेश्वर उन चिकोर उर.
ROM 8:15 यतिकी नीमी दासगोळ्द आत्मा सकिदील कि मात्‍त अंजबाळुल, लेकीन परमेश्वर उन सन्तान इन आत्मा सिक्याद, यदुर देल नाव हे अब्बा, हे आप्पा अनकु कारूतेव.
ROM 8:16 परमेश्वर उन आत्मा खुद अच नाम आत्मा अन सांगुळ गवाही कोळतद, कि नाव परमेश्वर उन सन्तान हुयेव;
ROM 8:17 अदिक अगर सन्तान आर रा वारीस भी आर, उलटा परमेश्वर उन वारीस अदिक मसीह अन सांगुळ वारीस आयेव, कि याग नाव आऊन सांगुळ दुख नेगदेव रा आऊन सांगुळ महिमा भी सिकुल.
ROM 8:18 यतिकी ना समझुसतीन कि ई समय इन दुख अदिक क्लेश आ महिमा अन मुंद, जो नाम मा प्रगट आगावाळा आद, येनु अच हैलेच.
ROM 8:19 यतिकी दुनिया हापाळ आशा तुम्द नजर देल परमेश्वर उन पारगोळ प्रगट आगोद हादी कायेत्याद.
ROM 8:20 यतिकी दुनिया तान इच्छा देल ईला लेकीन हात्‍ती माळावाळा अन दी टु, व्यर्थया अन हात्‍ती ई आशा देल माळकु आग्याद
ROM 8:21 कि दुनिया भी खुद अच विनाश इन दासत्व देल छुटकारा ताकोमकु, परमेश्वर उन चिकोर्द महिमा अन स्वतंत्रता प्राप्त माळीत.
ROM 8:22 यतिकी नाव जान्सतेव कि सप्पा दुनिया ईगासताका मिलुसकु कन्नासतेला अदिक दुखगोळ दा बिदकु तळपुसतद; ह्यांग कि चिग्द पैदा आगा समय मा तळपुसतान.
ROM 8:23 अदिक सिर्फ आवा ईला लेकीन नाव भी यार हाती आत्मा अन पयला काय आद, खुद अच तांदुर दा कन्नासतेव; अदिक लेपालक आगोद, मतलब तान मय इन छुटकारा अन हादी कायतेव.
ROM 8:24 ई आशा अन द्वारा नाम उद्धार आग्याद; लेकीन याता वस्तु अन आशा माळकु आगतद, याग अद नोळदुर दा बंदीत रा बाक आशा येल ईत्‍त? यतिकी याता वस्तु अक यावारा नोळत्यान अदुर आशा येन माळ्या?
ROM 8:25 लेकीन याता वस्तु अक नाव नोळ सकालेव, अगर अदुर्द आशा ईटतेव, रा धीरज देल अदुर्द हादी भी कायतेव.
ROM 8:26 ईदा रीति देल आत्मा भी नाम कमजोरी दा सहायता माळतद: यतिकी नाव जानसालेव कि प्रार्थना याता रीति देल माळ पायजे, लेकीन आत्मा खुद अच हिंग आहट तुम तुमकु, जो बयान देल व्हार्या आद, नाम साटी विनती माळतद;
ROM 8:27 अदिक परमेश्वर जान्सतान कि नाम मनगोळ दा येन आद, कि परमेश्वर आत्मा अन मनसा येन आद? यतिकी आव पवित्र लॉकुर साटी परमेश्वर उन इच्छा अन अनुसार विनती माळतान.
ROM 8:28 नाव जान्सतेव कि जो लॉकुर परमेश्वर से प्यार ईटतार, आंदुर साटी सप्पा मातगोळ मिलुसकु वळ्लीद इका पैदा माळतान; मतलब आंदुर्दा साटी जो आऊन इच्छा अन अनुसार कार्सकु आग्यार.
ROM 8:29 यतिकी यारी आव पयले टु जान्स कोंडान आंदरी पयले टु अच ठहरूस्यान कि आऊन पार उन स्वरूप दा आगुल, ताकी आव हापाळ वार्टुर दा पयला ठहरूसुल.
ROM 8:30 बाक यारी आव पयले टु ठहरूसदुन, आंदरी कार्सदुन भी; अदिक यारी कार्सदुन, आंदरी न्यायी भी ठहरूसदुन अदिक आंदरी महिमा भी कोट्टुन.
ROM 8:31 इदुरसाटी नाव ई मातगोळ बारा दा येन अंदेव? अगर परमेश्वर नाम दी आन, रा नाम खिलाप याव आग सकतान?
ROM 8:32 याव तान निज पार उक भी ईटीदील, लेकीन आऊक नाम सप्पा मुंदुर साटी कोट्ट बुटुन, आव आऊन सांगुळ नामी अदिक सप्पा येनारा मुफ्त दा येती कोळतीदील?
ROM 8:33 परमेश्वर उन निवळुस्द लॉकुर मा दोष याव हच्यान? परमेश्वर अच आन जो आंदरी न्यायी ठहरूसावाळा आन.
ROM 8:34 बाक याव आन जो दण्ड इन आग्या कोट्टान? यीशु मसीह अच आन जो सोतोदुन लेकीन मुर्दागोळ दा टु जित्‍ता भी आदुन, अदिक परमेश्वर उन ऊमा कय इन दी आन, अदिक नाम साटी समझौता भी माळतान.
ROM 8:35 याव नामी मसीह अन प्यार देल अलग माळ्यान? येन क्लेश, या कठिन समय, या सताव, या अकाल, या गरीबी, या जोखिम, या मृत्यु?
ROM 8:36 ह्यांग शास्त्र दा लिख्सकु आद, नीन साटी नाव हागुल तीम घात माळकु आगतेव; नाव वध आगावाळा म्यांडागोळ घाई आळुकु आगेव.
ROM 8:37 लेकीन ई सप्पा मातगोळ दा नाव आऊन द्वारा याव नाम से प्यार माळ्यान, पुरा तरीका देल विजय प्राप्त माळेतेव.
ROM 8:38 यतिकी ना निश्चय जान्सतीन कि याऊ नामी आऊन प्यार देल अलग माळ सकालुन ना मृत्यु, ना जीवन, ना स्वर्गदूत, ना दुष्ट शासन, ना वर्तमान, ना भविष्य, ना सामर्थ्य, ना ऊँचाई,
ROM 8:39 ना धरती इन गहराई, अदिक ना धरती इन ऊंचाई अदिक ना संसार इन यातोदु निर्मित वस्तु नामी परमेश्वर उन प्यार देल जो नाम प्रभु मसीह यीशु दा आद, अलग माळ सक्‍कीत.
ROM 9:1 ना मसीह दा सही अनतीन, ना ख्वाटा माताळालीन अदिक नान मन भी पवित्र आत्मा दा गवाही कोळतद
ROM 9:2 कि नानी बळा दुख आद, अदिक नान मन हमेशा दुखी ईरतद,
ROM 9:3 यतिकी ना ईल ताका चाहासीन कि तान वार्टुर साटी जो मय इन भाव देल नान कुटुम्बी आर, खुद अच परमेश्वर देल श्रापित अदिक मसीह से अलग आगेगतद.
ROM 9:4 आंदुर इस्त्राएली उर, अदिक परमेश्वर उन पार उन अधिकार अदिक महिमा अदिक वादागोळ अदिक व्यवस्था अन उपहार अदिक परमेश्वर उन उपासना अदिक प्रतिग्यागोळ आंदुरवा हुव.
ROM 9:5 पुर्वज भी आंदुर्दा उर, अदिक मसीह भी मय इन भाव देल आंदुर दा टु आदुन. परमेश्वर जो सप्पा मुंदुर म्याकुच राज्य माळतान आव हमेशा हमेशा धन्य ईरूल. आमीन.
ROM 9:6 लेकीन ईद ईला कि परमेश्वर उन वचन टलसेत, इदुरसाटी कि जो इस्त्राएल इन वंश आर, आंदुर सप्पा इस्त्राएली आल्लच;
ROM 9:7 अदिक ना अब्राहम उन वंश आगोद कारण सप्पा आऊन औलाद ठहरूसदुर, लेकीन शास्त्र दा लिख्सकु आद, “इसहाक टु अच नीन वंश कहलुस्यान.”
ROM 9:8 मतलब मय इन औलाद परमेश्वर उन औलाद आल्लच, लेकीन प्रतिग्या अन औलाद वंश आळुकु आगतद.
ROM 9:9 यतिकी प्रतिग्या अन वचन ईद हुन: “ना उचित समय इन अनुसार बराईन, अदिक सारा अक पार आदान.”
ROM 9:10 अदिक सिर्फ ईदा ईला, लेकीन याग रिबका भी ऊंद देल मतलब नाम आप्प इसहाक देल येढ्ढ पारगोळ आदुर,
ROM 9:11 लेकीन आकिन ऊंद चिग्द उक निवळुसोद ईद पुरा तरीका देल परमेश्वर उन खुद इन उपदेश इन परिणाम ईरोद, परमेश्वर आकिन से अंदुन, धोड्डेव स्याणेव उन स्यावा माळ्यान.
ROM 9:12 ई मातगोळ परमेश्वर आंदुर जनम इन पयले अदिक आंदुर येनारा बुरा भला माळ से पयले अंदुन रा परमेश्वर उन पसंद आऊन कारदुर मा निर्भर आद, ना अदुर मा कि आंदुर येन माळदुर.
ROM 9:13 ह्यांग शास्त्र दा लिख्सकु आद, “ना याकूब से प्यार माळदीन, लेकीन एसाव उक अप्रिय जान्सदीन.”
ROM 9:14 इदुरसाटी नाव येन अंदेव? येन परमेश्वर उन हाती अन्याय आद? यागलु ईला.
ROM 9:15 यतिकी आव मूसा से अनतान, “ना याता मंळसा मा दया माळोद चाहासाईन आऊन मा अच दया माळाईन, अदिक याता मंळसा मा कृपा माळोद चाहासाईन, आऊन मा का कृपा माळाईन.”
ROM 9:16 इदुरसाटी ईद ना रा चाहासावाळा अन, ना मयनत माळावाळा अन लेकीन दया माळावाळा परमेश्वर मा निर्भर आद.
ROM 9:17 यतिकी शास्त्र दा फिरौन से अंदकु आत, “ना नीनी इदुर्दा साटी निदरूसीन कि नीन दा तान सामर्थ्य तोरसाईन, अदिक नान हेसुर इन प्रचार पुरा पृथ्वी मा आगुल.”
ROM 9:18 इदुरसाटी आव यार मा चाहासतान आऊन मा दया माळतान, अदिक यारी चाहासतान आऊक कठोर माळ बुळतान.
ROM 9:19 इदुरसाटी नीम दा टु यावारा नानी ईद अंदान, “रा बाक परमेश्वर नामी दोषी येती ठहरूसतान? याव परमेश्वर उन इच्छा अन सामना माळ सकतान?”
ROM 9:20 हे मंळसा, नी याव हुय जो परमेश्वर उन विरोध दा माताळत्या? ऊंद घळुस्द वस्तु तान घळुसावाळा से केळ सकतद, “नी नानी हिंग येती माळ्या?”
ROM 9:21 येन कुंभार उक मुण्ण मा अधिकार हैलेच कि ऊंद अच ल्वांदा दा टु ऊंद बरतन आदर इन साटी अदिक दुसरा अक अनादर इन साटी माळ्यान?
ROM 9:22 परमेश्वर तान सिट्ट तोर्सली अदिक तान सामर्थ्य प्रगट माळोद इच्छा देल सिट्ट इन बरतनगोळ्द, जो विनाश इन साटी तयार माळकु आगीदव, बळा धीरज देल सहन माळदुन;
ROM 9:23 अदिक दया अन बरतनगोळ मा, यवरी आव महिमा अन साटी पयले टु तयार माळदुन, तान महिमा अन धन इक प्रगट माळोद इच्छा माळदुन?
ROM 9:24 मतलब नाम मा यारी आव ना सिर्फ यहूदीगोळ दा टु, उलटा गैरयहूदीगोळ दा टु भी कारदुन.
ROM 9:25 ह्यांग आव होशे अन किताब दा भी अनतान, “जो नान लॉकुर ईला ईरोर, आंदरी ना तान लॉकुर अनाईन; अदिक याता लॉकुर मा प्यार ईला ईरोद, आंदरी प्रिय अनाईन.
ROM 9:26 अदिक हिंग आदीत कि याता जागा दा आंदुर से ईद अनकु आगीत कि नीव नान लॉकुर आल्लच, अदा जागा आंदुर जित्‍ता परमेश्वर उन औलाद अंदकु आदार.”
ROM 9:27 अदिक यशायाह इस्त्राएल इन बारा दा कारूकु अनतान, “चाहे इस्त्राएल इन औलादगोळ गिनती समुद्र अन धुळा अन बराबर ईरूल, तरी भी आंदुर दा टु थ्वाळासा अच ऊळ्सकु आदार.
ROM 9:28 यतिकी प्रभु तान वचन पृथ्वी मा पुरा माळकु, राटनेरी अदरी सिद्ध माळ्यान.”
ROM 9:29 ह्यांग यशायाह पयले भी अंदिदुन, “अगर सेनागोळ प्रभु नाम साटी येनारा वंश बिळालुन, रा नाव सदोम उन घाई आगेगायदेव, अदिक गमोरा अन सदृश ठहरूसायदेव.”
ROM 9:30 इदुरसाटी नाव येन अंदेव? ईद कि गैरयहूदीगोळ जो न्यायीपन इन खोज ईला माळतोगोर, न्यायीपन हाशील माळदुर मतलब आ न्यायीपन इक विश्वास देल हाशील माळ्यार;
ROM 9:31 लेकीन इस्त्राएली, जो न्यायीपन इन व्यवस्था अन खोज माळतोगोर आ व्यवस्था ताका पोहचुसीदील.
ROM 9:32 यदुर साटी? इदुरसाटी कि आंदुर विश्वास देल ईला, लेकीन कर्मगोळ देल अदुर खोज माळतोगोर. आंदुर आ ठोकर इन कल्ल मा ठोकर तिंदुर,
ROM 9:33 ह्यांग पवित्रशास्त्र दा लिख्सकु आद, “नोळी, ना सिय्योन दा ऊंद चट्टान ईटतीन, अदिक जो परमेश्वर उन वचन मा विश्वास माळ्यान आव लज्जित आगतीदील.”
ROM 10:1 हे वार्टुरा अदिक आकतींगेरा, नान मन इन अभिलाषा अदिक आंदुर साटी परमेश्वर से नान प्रार्थना आद कि आंदरी उद्धार सिक्‍कुल.
ROM 10:2 यतिकी ना ई मात देल गवाही कोळतीन आंदुर परमेश्वर दा मगन ईरतार, लेकीन आंदुर भक्ति खरा ग्यान मा आधारित हैलेच.
ROM 10:3 यतिकी आंदुर परमेश्वर उन न्यायीपन देल अनजान आगकु, अदिक तान न्यायीपन स्थापित माळोद कोशिश माळकु, परमेश्वर उन न्यायीपन इन हात्‍ती आगीदील.
ROM 10:4 मसीह व्यवस्था अन अन्त माळदुन कि हर ऊंद जो विश्वास माळतान परमेश्वर उन साटी न्यायी आगुल.
ROM 10:5 यतिकी मूसा ईद लिखस्यान कि जो मंळसा आ न्यायीपन मा जो व्यवस्था देल आद, नळुतान, आव अदुर देला जित्‍ता ईत्‍तान.
ROM 10:6 लेकीन जो न्यायीपन विश्वास देल आद, अदुर बारा दा शास्त्र ईद अनतद, “नी तान मन दा ईद अनबाळेत कि, मसीह अक ईळ्सकु तरोरसाटी स्वर्ग मा याव येर्‍यान?” मतलब मसीह अक ल्यालमा तरोरसाटी,
ROM 10:7 या “मसीह अक सोत्‍तुर दा टु जित्‍ता माळकु म्याकुच तरोरसाटी अधोलोक दा याव ईळदान?” मतलब मसीह अक सोत्‍तुर बाद्दा म्याकुच ओयोर साटी.
ROM 10:8 लेकीन अद येन अनतद? ईद कि “वचन नीन हाती आद, नीन बाय दा अदिक नीन मन दा आद,” ईद अदा विश्वास इन वचन हुन, जो नाव प्रचार माळतेव,
ROM 10:9 कि अगर नी तान बाय देल यीशु उक प्रभु जान्सकु अंगीकार माळ्या, अदिक तान मन देल विश्वास माळ्या कि परमेश्वर आऊक सोत्‍तुर दा टु जित्‍ता माळदुन, रा नीन जरूर उद्धार आदीत.
ROM 10:10 यतिकी विश्वास माळदुर देल नाव परमेश्वर उन सांगुळ सही संबंध दा बरतेव अदिक बाय देल कबुल माळदुर देल नामी मुक्ति सिकतद.
ROM 10:11 यतिकी पवित्रशास्त्र ईद अनतद, “जो यावारा आऊन मा विश्वास माळतान आव लज्जित आगतीदील.”
ROM 10:12 यहूदीगोळ अदिक गैरयहूदीगोळ दा येनु फरक हैलेच, इदुरसाटी कि आव परमेश्वर सप्पा मुंदुर प्रभु हुन अदिक आव सप्पा मुंदुरी बहूतायत देल आशिषीत माळतान जो आऊक कारूतार.
ROM 10:13 यतिकी शास्त्र दा लिख्सकु आद, “जो यावारा प्रभु उक मदत साटी कारूतान, आव ऊळ्सकु आदान.”
ROM 10:14 लेकीन यार मा आंदुर विश्वास माळीदील, आंदुर आऊक ह्यांग मदत साटी कारदान? अदिक यार संदेश केळीदील आऊन मा ह्यांग विश्वास माळ्यार? अदिक प्रचारक बिना ह्यांग केळ्यार?
ROM 10:15 अदिक अगर संदेश केळसावाळेर कळुकु आगतीदील, रा ह्यांग प्रचार माळ्यार? ह्यांग शास्त्र दा लिख्सकु आद, “आंदुर काल येन सुहावना आव, जो खुशखबरी हुडुकु बरतार!”
ROM 10:16 लेकीन सप्पा मुंदुर आ खुशखबरी मा किव हचीदिल: यशायाह अनतान, “हे प्रभु, याव नाम समाचार मा विश्वास माळ्यान?”
ROM 10:17 इदुरसाटी विश्वास संदेश इन केळदुर देल अदिक संदेश मसीह अन वचन देल आगतद.
ROM 10:18 लेकीन ना अनतीन, येन आंदुर केळीदील? केळोद रा जरूरी आद; यतिकी शास्त्र दा लिख्सकु आद, “आंदुर स्वर सप्पा पृथ्वी मा, अदिक आंदुर वचन दुनिया अन आखरी ताका पोहचुसेग्याव.”
ROM 10:19 ना मात्‍त अनतीन, येन इस्त्राएली ईला जानसोर? पयले रा मूसा अनतान, “ना आंदुर द्वारा जो लॉकुर ईला, नीम मन दा जलन उपजुसाईन; ना ऊंद मूळ लॉकुर द्वारा नीमी सिट्ट तोर्साईन.”
ROM 10:20 बाक यशायाह हापाळ हिम्मत इन सांगुळ अनतान, “जो नानी ईला ढुंढसोर, आंदरी ना सिक्‍केदीन; अदिक जो नानी केळतोगोर भी ईला, आंदुर मा ना प्रगट आगेदीन.”
ROM 10:21 लेकीन इस्त्राएल इन बारा दा आव ईद अनतान, “ना पुरा दिन तान कय ऊंद आग्या ईला मानसावाळेर अदिक झगळा माळावाळेर लॉकुर दी पसरूस्कु ईत्‍तीन.”
ROM 11:1 इदुरसाटी ना अनतीन, येन परमेश्वर तान लॉकुरी त्याग्स बुटुन? यागलु ईला! ना भी रा इस्त्राएली हुईन; अब्राहम उन वंश अदिक बिन्यामीन उन गोत्र दा टु आईन.
ROM 11:2 परमेश्वर तान लॉकुरी त्याग्सीदील, यारी आव पयले टु अच निवळुसदुन. येन नीव जान्सालीर कि शास्त्र एलिय्याह अन बारा दा येन अनतद, याग आव इस्त्राएल इन विरोध दा परमेश्वर से विनती माळतान?
ROM 11:3 “हे प्रभु, आंदुर नीन भविष्यवक्तागोळ्द घात माळदुर, अदिक नीन वेदीगोळी केळ्द बुटार; अदिक ना अच आबना ऊळदीन, अदिक आंदुर नानी भी कोन्नोर साटी खोज माळेत्यार.”
ROM 11:4 लेकीन परमेश्वर से आऊक येन उत्‍तर सिक्त? “ना तान साटी येळ हजार गंळ्सुरी ईटकु बिटीन, यार ख्वाटा बाअल भगवान उन उपासना माळीदिल.”
ROM 11:5 ठीक ईदा रीति देल ई समय भी, अनुग्रह देल निवळुस्द थ्वाळासा लॉकुर मिक्‍कु आर.
ROM 11:6 अगर ईद अनुग्रह देल आग्याद, रा बाक कर्मगोळ देल ईला; ईदारा अनुग्रह बाक अनुग्रह ईतीदील.
ROM 11:7 इदुरसाटी परिणाम येन आत? ईद कि इस्त्राएल यार्द खोज दा ईरोर, अद आंदरी सकिदील; लेकीन निवळुस्द लॉकुरी सिक्त, अदिक बाकी लॉकुर कठोर माळकु आदुर.
ROM 11:8 ह्यांग शास्त्र दा लिख्सकु आद, “परमेश्वर आंदुर मन अदिक दिलगोळी चेतना शुन्य माळ बुटान, अदिक हिंग कण्णगोळी कोट्टुन जो नोळबाळुल अदिक हिंग किव जो केळबाळुल.”
ROM 11:9 अदिक दाऊद अनतान, “आंदुर भोजन आंदुर साटी जाल अदिक फासा, ताकी आंदुर बिळुल अदिक आंदरी दण्ड सिकुल.
ROM 11:10 आंदुर कण्णगोळ मा अंधार छासेगुल ताकी नोळ ईला सकुल, अदिक नी हमेशा आंदुर बेन इक बांग्सकु ईट.”
ROM 11:11 इदुरसाटी ना अनतीन येन आंदुर इदुरसाटी ठोकर तिंदुर कि बिदोगुल? यागलु ईला! लेकीन आंदुर बिळोद कारण गैरयहूदीगोळी उद्धार सिक्त, कि आंदरी जलन आगुल.
ROM 11:12 इदुरसाटी अगर आंदुर्द बिळोद दुनिया अन साटी धन अदिक आंदुर घटी गैरयहूदीगोळ साटी सम्पत्ति इन कारण आत, रा आंदुर्द भरपुरी देल येन आगतीदील.
ROM 11:13 ईग ना नीव गैरयहूदीगोळ से ई मातगोळी अनतीन. यागासताका ना विशेष रूप देल गैरयहूदीगोळ साटी प्रेरित आईन, रा ना तान स्यावा अन प्रती बळाई माळतीन,
ROM 11:14 ताकी यातोदारा रीति देल ना तान कुटुम्बगोळ दा जलन पैदा माळसुसकु आंदुर दा टु थ्वाळासा लॉकुर्द उद्धार माळसुसाईन.
ROM 11:15 यतिकी अगर परमेश्वर उन द्वारा आंदुर नकार माळकु आगोद इदुर देल परमेश्वर उन सांगुळ मेल मिलाप आगतद रा बाक आंदुर अपनुसदुर देल येन सोत्‍तुर दा टु जित्‍ता आगोद आगतीदील?
ROM 11:16 याग भेंट इन पयला लोई पवित्र ठहरूस्त, रा पुरा काल्सद हीट भी पवित्र आद; अदिक याग मार्र इन जळ पवित्र ठहरूस्त, रा खांदीगोळ भी हिंग अच आव.
ROM 11:17 लेकीन अगर थ्वाळासा खांदीगोळ मुरूकु आदव, अदिक नी आळी दाकळोद जैतून आगकु अऊर्दा हचकु आद, अदिक जैतून इन जळ इन चिकनाई इन भागी आग्या,
ROM 11:18 रा खांदीगोळ मा घमण्ड माळबाळेत; अदिक अगर नी घमण्ड माळ्या रा जान्स कोम कि नी जळ इक ईला लेकीन जळ नीनी संभाल्सतद.
ROM 11:19 बाक नी अंद्या, “खांदीगोळ इदुरसाटी मुरूकु आदव कि ना अल हचकु आगाईन.”
ROM 11:20 ठीक आद, अव रा अविश्वास इन कारण मुरूकु आदव, लेकीन नी रा विश्वास देल बन्सकु ईरत्या इदुरसाटी अभिमानी आगबाळ, लेकीन अंज्क मान्स,
ROM 11:21 यतिकी परमेश्वर स्वाभाविक खांदीगोळी बिटीदिल रा नीनी भी बिळतीदील.
ROM 11:22 इदुरसाटी परमेश्वर उन कृपा अदिक कठोरता अक नोळ! जो बिदोदुर आंदुर मा कठोरता, लेकीन नीन मा कृपा, अगर नी आऊन दा बन्सकु ईत्या, रा ठीक आद ईदारा नी भी कळकु आद्या.
ROM 11:23 अगर यहूदी भी अविश्वास दा ईतीदील, रा हचकु मार्र से जोळ्सकु आदार; यतिकी परमेश्वर समर्थ आन अदिक आंदरी मात्‍त जोळ्स सकतान.
ROM 11:24 यतिकी अगर गैरयहूदी आ जैतून देल, जो स्वभाव देल आळी दाकळोद आद, कळकु आत अदिक स्वभाव इन विरूद्ध वळ्लीद जैतून दा जोळ्सकु आत, रा ईव जो यहूदी खांदीगोळ आव, तांद अच जैतून दा येती हचकु आगतीदील.
ROM 11:25 हे वार्टुरा अदिक आकतींगेरा, ईदारा हिंग आगबाळुल कि नीव तान तान इक बुद्धिमान सम्स कोमी; इदुरसाटी ना चाहासालीन कि नीव ई भेद देल अनजान ईरी कि यागासताका गैरयहूदीगोळ पुरा रीति देल प्रवेश माळ कोमालुर, आगासताका इस्त्राएल इन ऊंद भाग हिंग अच कठोर ईत्‍तीत.
ROM 11:26 अदिक ई रीति देल सप्पा इस्त्राएल इक उद्धार सिक्‍कीत. ह्यांग शास्त्र दा लिख्सकु आद, “बिळसावाळा सिय्योन टु बंदान, अदिक अभक्ति इक याकूब उन वंशगोळ से दुर माळ्यान;
ROM 11:27 अदिक आंदुर सांगुळ नान ईदा वादा आग आदीत, याग ना आंदुर पापगोळी दुर माळ बुळाईन.”
ROM 11:28 यतिकी आंदुर खुशखबरी इक अस्वीकार माळदुर अदिक गैरयहूदीगोळ हेसुर इन कारण यहूदी परमेश्वर उन दुश्मन आगेदुर, लेकीन निवळुस्कु आगदुर देल आंदुर आंदुर्द आप्प दादागोळ्द कारण परमेश्वर उन प्रिय आर.
ROM 11:29 यतिकी परमेश्वर तान वरदानगोळ देल यागलु बदलुसालुन अदिक आशीषगोळ अटल आव.
ROM 11:30 यतिकी ह्यांग नीव गैरयहूदीगोळ पयले परमेश्वर उन आग्या मान्सीदील, लेकीन हांगा ईग यहूदीगोळ्द आग्या ईला मान्सदुर देल नीम मा दया आत;
ROM 11:31 नीम मा जो दया आत अदुर कारण यहूदी ईग परमेश्वर उन आग्या मान्सालुर, इदुरसाटी कि ईग नीम घाई दया आंदुर मा भी आगुल.
ROM 11:32 यतिकी परमेश्वर सप्पा मुंदरी आग्या उल्लंघन माळदुर कारण बंदी माळकु ईटदुन, ताकी आव सप्पा मुंदुर मा दया माळुल.
ROM 11:33 आहा! परमेश्वर उन धन अदिक दिमाक अदिक ग्यान येन महान आद! आऊन फैसलागोळी याव स्पष्ट माळ सकतान अदिक आऊन हादीगोळी याव सम्स सकतान!
ROM 11:34 ह्यांग शास्त्र दा लिख्सकु आद, “प्रभु उन मन इक याव जान्स सकतान? अदिक आऊक याव सलाह कोळ सकतान?
ROM 11:35 येन यावारा परमेश्वर उक येनारा कोटान यदरी आव मात्‍त आऊक वापस कोळुल?”
ROM 11:36 यतिकी आऊंदा दी टु, अदिक आऊंदा द्वारा, अदिक आऊंदा साटी सब कुछ माळकु आग्याद. आऊन महिमा हमेशा हमेशा आगतेला ईरूल: आमीन.
ROM 12:1 इदुरसाटी हे वार्टुरा अदिक आकतींगेरा, ना नीम से परमेश्वर उन दया याद तोर्सकु विनती माळतीन कि तान शरीर इक जित्‍ता, अदिक पवित्र, अदिक परमेश्वर उक संतोष कोळावाळा बलिदान माळकु येरसी. अगर नीम्द खरा उपासना आद.
ROM 12:2 ई दुनिया अन घाई आगबाळी; लेकीन नीम मन इन व्हाशोद आगदुर देल नीम चाल चलन भी बदलुसतेला ईरूल, यदुर देल नीव परमेश्वर उन भला, अदिक भावती, अदिक सिद्ध इच्छा अनुभव देल मालूम माळतेला ईत्‍तीर.
ROM 12:3 यतिकी ना आ अनुग्रह अन कारण जो नानी सिक्याद, नीम दा टु हर ऊंद मंळसा से अनतीन कि ह्यांग सम्स पायजे अदुर देल यक्कुल यावारा भी तान तान इक सम्सबाळुल; लेकीन ह्यांग परमेश्वर हर ऊंद मंळसा अक विश्वास परिणाम इन अनुसार वाट्स बुटान, हांग अच सुबुध्दि इन सांगुळ तान इक समसुल.
ROM 12:4 यतिकी ह्यांग नाम शरीर दा हापाळ सा अंग आव, अदिक सप्पा अंगगोळ्द ऊंदा घाई क्याल्सा हैलेच;
ROM 12:5 हांग अच नाव जो हापाळ अंग ईतकु भी मसीह दा आबुर दाबुर अंग आयेव.
ROM 12:6 याग कि आ अनुग्रह अन अनुसार जो नामी कोटकु आग्याद, नामी संदेश हेळोद वरदान सिक्याद, रा यारी भविष्यवाणी इन दान सिक्याद, आव विश्वास इन परिणाम इन अनुसार भविष्यवाणी माळुल;
ROM 12:7 अगर स्यावा माळोद दान सिकीदाद, रा स्यावा दा हतकु ईरूल; अगर यावारा कल्सावाळा आन, रा कल्सदुर दा हतकु ईरूल;
ROM 12:8 जो प्रोत्साहन कोळवाळा आन, आव प्रोत्साहन कोळुल; दान कोळावाळा उदारता देल कोळुल; अदिक जो अगुवाई माळावाळा आन, आव लगन इन सांगुळ अगुवाई माळुल; अदिक यारी दया तोरसोद दान आद, माळुल, आव खुशी देल दान माळुल.
ROM 12:9 नीम प्यार निष्कपट ईरूल; बुराई देल घृणा माळी; अदिक भलाई दा हतकु ईरी.
ROM 12:10 भाईचारा अन भाव देल आबुर दाबुर से प्यार ईटी; परस्पर आदर माळदुर दा आबुर दाबुर से वाळुसकु नळी.
ROM 12:11 कोशिश माळदुर दा आलसी ईरबाळुल; आत्मिक उत्सुक दा तुमकु ईरी; प्रभु उन स्यावा माळतेला ईरी.
ROM 12:12 आशा दा खुश ईरी; क्लेश दा स्थिर ईरी; हर समय प्रार्थना दा हतकु ईरी.
ROM 12:13 पवित्र लॉकुरी जो येनारा जरूरी आद, अदुर दा आंदुर्द मदत माळी; पाहुनचार माळदुर दा हतकु ईरी.
ROM 12:14 तान सतुसावाळेरी आशीष कोळी; आशीष अच कोळी श्राप कोळबाळी.
ROM 12:15 आनन्द माळावाळेर सांगुळ आनन्द माळी, अदिक वर्ला वाळेर सांगुळ वर्ली.
ROM 12:16 आपस दा ऊंद घाई मन ईटी; अभिमानी आगबाळी, लेकीन गरीबगोळ सांगुळ संगत ईटी; तान नजर दा तान तान इक बुद्धिमान सम्सबाळी.
ROM 12:17 बुराई इन बदला यारदु से बुराई माळबाळी; जो मातगोळ सप्पा लॉकुर नजर दा भला आव, अवरी माळोद कोशिश माळी.
ROM 12:18 येल ताका आग सकुल, नीव सप्पा मंळसागोळ सांगुळ शांती देल ईरी.
ROM 12:19 हे प्रियगोळा, बदला ताकोम बाळेतीर, लेकीन परमेश्वर उन सिट्ट इक मौका कोळी, यतिकी शास्त्र दा लिख्सकु आद, “बदला ताकोमोद नान क्याल्सा आद, प्रभु अनतान ना अच बदला ताकोमाईन.”
ROM 12:20 लेकीन “अगर नीन दुश्मन उपासा आन रा आऊक तिनली कोळ, अगर नीरअळ्क देल आन रा आऊक नीर कुळ्स; यतिकी हिंग माळदुर देल आव खुद अच नीन से शर्मिंदा आदान.”
ROM 12:21 बुराई देल हारूसबाळी, लेकीन भलाई देल बुराई इक जीतुस कोमी.
ROM 13:1 हर ऊंद मंळसा शासकीय अधिकारीगोळ हात्‍ती ईरूल, यतिकी यातोदु अधिकार हिंग हैलेच जो परमेश्वर उन दी टु ईला ईतीदाद; अदिक जो अधिकार आद, अद परमेश्वर उन दी टु ठहरूस्कु आव.
ROM 13:2 इदुरसाटी जो यावारा अधिकार इन विरोध माळतान, आव परमेश्वर उन विधी इन विरोध माळतान, अदिक विरोध माळावाळेरी दण्ड सिक्‍कीत.
ROM 13:3 यतिकी शासक वळ्लीद क्याल्सा नोर हैलेच, लेकीन बेकार क्याल्सा अन साटी अंज्क इन कारण आर; इदुरसाटी अगर नी शासक से निडर ईरोद चाहासत्या, रा वळ्लीद क्याल्सा माळ, अदिक आऊन दी टु नीन बळाई आदीत;
ROM 13:4 यतिकी आव नीन भलाई इन साटी परमेश्वर उन सेवक आन. लेकीन अगर नी बुराई माळ्या, रा अंज, यतिकी आव तलवार बेकार हुळकु हैलेच; अदिक परमेश्वर उन सेवक हुन कि आऊन सिट्ट इन अनुसार बेकार क्याल्सा माळावाळा अक दण्ड कोळुल.
ROM 13:5 इदुरसाटी नीव अधिकारीगोळ्द आग्या मान्सी, सिर्फ परमेश्वर उन दण्ड इन कारण ईला, लेकीन नाम मन इन कारण देल.
ROM 13:6 इदुरसाटी कर भी कोळी यतिकी शासन माळावाळेर परमेश्वर उन सेवक उर अदिक हमेशा ईदा क्याल्सा दा हतकु ईरतार.
ROM 13:7 इदुरसाटी हर ऊंद मंळसा अन हक्‍क चुक्ता माळी; यारी कर पायजे, आऊक कर कोळी; यारी महसूल पायजे, आऊक महसूल कोळी; यारी मान पायजे, आऊक मान कोळी; यार्द आदर माळ पायजे, आऊन आदर माळी.
ROM 13:8 आपस इन प्यार इक बिटकु अदिक यातोदु मात दा यारदु कर्जदार आगबाळी; यतिकी जो दुसरा से प्यार ईटतान, आवा व्यवस्था अन पालन माळ्यान.
ROM 13:9 यतिकी ईद कि “व्यभिचार माळबाळेतीर, कोन्न बाळेतीर, चोरी माळबाळेतीर, लालच माळबाळेतीर,” अदिक इवरी बिटकु अदिक यातोद भी आग्या ईतीदाद रा सप्पा अन सारांश ई आग्या दा सिकतद, “तान मान्ना हात्‍तीवाळेर से तान घाई प्यार ईट.”
ROM 13:10 प्यार तान संगी इन यागलु बुरा माळाल्द, इदुरसाटी प्यार माळोद ईद व्यवस्था अन पालन माळोद हुन.
ROM 13:11 समय इक अरूकु हिंग अच माळी, इदुरसाटी कि ईग नीम साटी जप्प दा टु येळोद समय होट बंदाद; यतिकी याता समय नाव विश्वास माळीदेव, आ समय इन विचार देल ईग नाम उद्धार हात्‍ती आव.
ROM 13:12 ईळ्लक हापाळ आगेग्याद, अदिक व्हातुर आगदुर मा आद; इदुरसाटी नाव अंधकार इन क्याल्सागोळी त्यागस्कु ज्योति इन हथियार कट कोंडेव.
ROM 13:13 ह्यांग हागुल इक शोभा कोळतद, हांग अच नाव सीधा चाल ईट्टेव, ना कि कामवासना अदिक पियक्‍कळपन दा, ना व्यभिचार अदिक लुचपन दा, अदिक ना झगळा अदिक डाह दा.
ROM 13:14 लेकीन प्रभु यीशु मसीह अन हथियार हुडु कोमी, अदिक तान मानव स्वभाव इन शरीर इन अभिलाषागोळी पुरा माळदुर दा हतकु ईरबाळी.
ROM 14:1 जो विश्वास दा निर्बल आन, आऊक तान संगती दा ताकोमकोमी, लेकीन आऊन व्यक्तिगत विचारगोळ मा झगळा माळोर साटी ईला.
ROM 14:2 ऊंद मंळसा अक विश्वास आद कि सप्पा येनारा तिनोद उचित आद, लेकीन जो विश्वास दा निर्बल आन आव साग पात अच तिनतान.
ROM 14:3 तिनावाळा जो तिनालुन आऊक तुच्छ जान्स बाळुल, अदिक जो तिनालुन आव तिनावाळा मा दोष हचबाळुल; यतिकी परमेश्वर आऊक ग्रहण माळ्यान.
ROM 14:4 नी याव हुय जो दुसरा अन सेवक मा दोष हचत्या? आऊन स्थिर ईरोद या बिदोगोद आऊन स्वामी से अच संबंध ईटतद; बल्‍की आव स्थिर अच माळकु आदान, यतिकी प्रभु आऊक स्थिर ईट सकतान.
ROM 14:5 यावारा रा ऊंद दिन इक दुसरा दिन से यक्कुल महत्वपुर्ण मान्सतान, अदिक यावारा सप्पा दिनगोळी ऊंदा घाई मान्सतान. हर ऊंद तांद अच मन दा निश्चय माळ कोमुल.
ROM 14:6 जो यातोदारा दिन इक महत्वपुर्ण मान्सतान, रा आव प्रभु उक महत्वपुर्ण मान्सतान. अदिक जो सब कुछ तिनतान, आव प्रभु उन साटी तिनतान, यतिकी आव आंदुर भोजन इन द्वारा परमेश्वर उन धन्यवाद माळतान, अदिक जो मास बिटकु साग पात तिनतान, आव प्रभु उन साटी तिनालुन अदिक परमेश्वर उन धन्यवाद माळतान.
ROM 14:7 यतिकी नाम दा टु यावारा तान साटी जित्‍ता आन, अदिक ना यावारा तान साटी सायतान.
ROM 14:8 अगर नाव जित्‍ता आयेव, रा प्रभु उन साटी जित्‍ता आयेव; अदिक अगर सायतेव, रा प्रभु उन साटी सायतेव; इदुरसाटी नाव जित्‍ता ईत्‍तेव या सोत्‍तेव, नाव प्रभु नोर अच हुयेव.
ROM 14:9 यतिकी मसीह इदुर्दा साटी सोत्‍तुन अदिक जित्‍ता भी आग्यान कि आव सोत्‍तुरी अदिक जित्‍ता आग्यार येढ्ढु मुंदुर प्रभु आगुल.
ROM 14:10 नी तान वार्ट उन मा येती दोष हचत्या? या नी बाक येती तान वार्ट उक तुच्छ जान्सत्या? नाव सप्पा च्या सप्पा मुंदुर परमेश्वर उन न्याय सिंहासन इन मुंद निदरेव.
ROM 14:11 यतिकी शास्त्र दा लिख्सकु आद, “प्रभु अनतान, नान जीवन इन किर्‍या कि हर ऊंद ट्वांगरा नान मुंद टिकसीत, अदिक हर ऊंद ल्यालग्या ईद कबुल माळीत कि ना परमेश्वर हुईन.”
ROM 14:12 इदुरसाटी नाम दा टु हर ऊंद मंळसा परमेश्वर उक तान तान लेखा जोखा कोट्टान.
ROM 14:13 इदुरसाटी मुंद टु नाव आबुर दाबुर मा दोष हचतिदील, लेकीन नीव ईद ठान्स कोमी कि यावारा तान वार्ट उन मुंद ठोकर तिनकु पाप दा बिळोद कारण बन्सबाळुल.
ROM 14:14 प्रभु यीशु दा ऊंद आगदुर नाता देल ना निश्चित जान्सतीन यातोदारा वस्तु तांदुर देल अशुध्द हैलेच, लेकीन जो अदरी अशुध्द सम्सतान आऊन साटी अशुध्द आद.
ROM 14:15 अगर नीन वार्ट या आकतींग नीन भोजन इन कारण दुखी आगतार, रा बाक नी प्यार इन रीति देल नळाल; यदुर साटी मसीह सोत्‍तुन, आऊक नी तान भोजन इन द्वारा नाश माळबाळ.
ROM 14:16 यारी नीव भला मान्सतीर आऊक यारीकु बुरा माताळगोळ बाळेतीर.
ROM 14:17 यतिकी परमेश्वर उन राज्य तिनोद कुडोद ईला, लेकीन न्यायीपन, शांती अदिक आनन्द जो पवित्र आत्मा कोळतद.
ROM 14:18 जो यावारा ई रीति देल मसीह अन स्यावा माळतान, आव परमेश्वर उक भाऊस्तान अदिक मंळसागोळ दा ग्रहण माळा लायक ठहरूस्तान.
ROM 14:19 इदुरसाटी नाव आ मातगोळ दा हतकु ईत्‍तेव यऊर देल मेल मिलाप अदिक आबुर दाबुरी आत्मिक उन्नती दा मदत सिकतद.
ROM 14:20 भोजन इन साटी जो परमेश्वर माळ्यान अदरी नष्ट माळबाळी. सप्पा येनारा शुद्ध रा आद, लेकीन आ खाना देल यारीकारा ठोकर हततद रा अद बेकार आद.
ROM 14:21 भला रा ईद आद कि नी ना रा मास तिन अदिक ना रा सारा कुडू, अदिक ना रा हिंग येनारा माळेत यदुर देल नीन विश्वासी वार्ट या आकतींग ठोकर तिनुल.
ROM 14:22 नीन जो विश्वास ईरूल, अदरी परमेश्वर उन मुंद तांद अच मन दा ईट. धन्य आन आव जो आ मात दा, यदरी आव ठीक सम्सतान, तान तान इक दोषी ठहरूसालुन.
ROM 14:23 लेकीन जो लॉकुर संदेह माळकु तिनतार आंदरी परमेश्वर दोषी ठहरूसतान, यतिकी आंदुर कार्य विश्वास इन आधार मा हैलेच; अदिक जो येनारा विश्वास इन आधार मा हैलेच, अद पाप हुन.
ROM 15:1 इदुरसाटी नाव बलवानगोळी पायजे कि निर्बलगोळ्द निर्बलतागोळी सहन माळेव, ना कि तान तान इक संतुष्ट माळेव.
ROM 15:2 नाम दा टु हर ऊंद तान मान्ना अन आंदुर्द भलाई इन साटी खुश माळेव ताकी आंदुर्द विश्वास दा उन्नती आगुल.
ROM 15:3 यतिकी मसीह तान तान इक खुश माळीदील, लेकीन ह्यांग शास्त्र दा लिख्सकु आद: “नीन अपमान माळावाळेर्द अपमान नान मा बंदकु बिदाद.”
ROM 15:4 यास मातगोळ पयले टु लिख्सकु आग्याव, अव नाम्द अच शिक्षा अन साटी लिख्सकु आग्याव कि नाव धीरज अदिक शास्त्र अन प्रोत्साहन द्वारा आशा ईटुल.
ROM 15:5 धीरज अदिक शांती अन दाता परमेश्वर नीमी ईद वरदान कोळुल कि मसीह यीशु अन अनुसार आपस दा ऊंद मन ईरी.
ROM 15:6 ताकी नीव ऊंद मन अदिक ऊंद स्वर दा नाम प्रभु यीशु मसीह अन आप्प परमेश्वर उन स्तुति माळी.
ROM 15:7 इदुरसाटी, ह्यांग मसीह परमेश्वर उन महिमा अन साटी नीमी ग्रहण माळ्यान, हांग अच नीव भी आबुर दाबुर इक ग्रहण माळी.
ROM 15:8 इदुरसाटी ना अनतीन कि जो वादागोळ आप्प दादागोळी कोटकु आगीदव अवरी मजबूत माळोर साटी मसीह, परमेश्वर उन सच्चाई इन प्रणाम कोळोर साटी, यहूदी लॉकुर्द सेवक बन्सदुन;
ROM 15:9 अदिक गैरयहूदीगोळ भी दया अन कारण परमेश्वर उन स्तुति माळुल; ह्यांग शास्त्र दा लिख्सकु आद, “इदुरसाटी पुरा राष्ट्र दा नीन धन्यवाद माळाईन, अदिक नीन हेसुर इन भजन हाळाईन.”
ROM 15:10 बाक अंदान, “हे गैरयहूदीगोळ, परमेश्वर उन निवळुस्द लॉकुर सांगुळ आनन्द माळी.”
ROM 15:11 अदिक बाक, “हे गैरयहूदीगोळ सप्पा लॉकुर, प्रभु उन स्तुति माळी; अदिक हे राष्ट्र अन लॉकुरा, आऊक समसी.”
ROM 15:12 अदिक बाक यशायाह अनतान, “यिशै अन ऊंद वंशज प्रगट आदीत, अदिक आव गैरयहूदीगोळ मा शासन माळ्यान, अदिक आ लॉकुर आऊन मा आशा ईट्यार.”
ROM 15:13 परमेश्वर जो आशा अन दाता आन नीमी विश्वास माळदुर दा सप्पा प्रकार इन आनन्द अदिक शांती देल परिपुर्ण माळुल, कि पवित्र आत्मा अन सामर्थ्य देल नीम आशा वाळुसतेला होगुल.
ROM 15:14 हे नान वार्टुरा अदिक आकतींगेरा, ना खुद नीम बारा दा सही दा जान्सतीन कि नीव भी खुद अच भलाई देल तुमकु अदिक ईश्वरीय ग्यान देल भरपुर आईर, अदिक आबुर दाबुर इक कल्स सकी.
ROM 15:15 तरी भी ना येल्यारा-येल्यारा याद दिलुसोर साटी नीमी जो हापाळ हिम्मत माळकु चिट्ठी लिख्सदीन. ईद आ अनुग्रह अन कारण आत जो परमेश्वर नानी कोट्टान,
ROM 15:16 कि ना गैरयहूदीगोळ साटी मसीह यीशु उन सेवक आगकु परमेश्वर उन खुशखबरी इन स्यावा याजक उन घाई माळाईन, यदुर देल गैरयहूदीगोळ मान्सी चळुस्कु आगोद, पवित्र आत्मा देल पवित्र बन्सकु ग्रहण माळकु आगुल.
ROM 15:17 इदुरसाटी आ मातगोळ बारा दा जो परमेश्वर उन से संबंध ईटताव, ना मसीह यीशु दा बळाई माळ सकतीन.
ROM 15:18 यतिकी आ मातगोळी बिटकु नानी अदिक यातोदु मात इन बारा दा अनोद हिम्मत हैलेच, जो मसीह गैरयहूदीगोळ हात्‍ती ता अन साटी वचन, अदिक कर्म,
ROM 15:19 अदिक चमत्कारगोळ, अदिक अदभुत क्याल्सागोळ सामर्थ्य देल, अदिक पवित्र आत्मा अन सामर्थ्य देल नांद अच द्वारा माळकु आदव; ईल ताका कि ना यरूशलेम टु ताकोमकु नाकु दी इल्लुरिकुम ताका मसीह अन खुशखबरी इन पुरा पुरा प्रचार माळदीन.
ROM 15:20 लेकीन नान मन इन उमंग आद कि येल येल मसीह अन हेसुर ताकोमकु आगीदील, अदा खुशखबरी केळसाईन ताकी हिंग आगबाळुल कि दुसरा अन पायवा मा मान्ना माळाईन.
ROM 15:21 लेकीन ह्यांग शास्त्र दा लिख्सकु आद हांग अच आगुल, “यारी आऊन खुशखबरी पोहचुसीदील, आंदुर अच नोळ्यार अदिक यार केळीदील आंदुर अच समस्यार.”
ROM 15:22 इदुर्दा साटी ना नीम हाती बरोर से घळी घळी थाम्सकु ईत्‍तीन.
ROM 15:23 लेकीन ईग ई द्याशगोळ दा नान क्याल्सा अन साटी अदिक जागा ईतीदील, अदिक हापाळ साल टु नानी नीम हाती बरोद लालच आद.
ROM 15:24 इदुरसाटी याग ना स्पेन इक होगाईन रा नीम हाती टु आगतेला होगाईन, यतिकी नानी आशा आद कि आ यात्रा दा नीम से मुलाकात आदीत, अदिक याग नीम से सीकाईन रा नीव नानी येनारा दुर मुंद पोहचुस बुळेतीर.
ROM 15:25 लेकीन ईगल्या रा ना परमेश्वर उन लॉकुर्द स्यावा माळोर साटी यरूशलेम इक होगतीन.
ROM 15:26 यतिकी मकिदुनिया अदिक अखाया अन लॉकुरी ईद वळ्लीद हत्‍त कि यरूशलेम इन पवित्र लॉकुर दा निर्धनगोळ साटी येनारा चंदा माळुल.
ROM 15:27 आंदरी वळ्लीद रा हत्‍त, लेकीन आंदुर आंदुर्द कर्जदार भी आर, यतिकी अगर गैरयहूदीगोळ आंदुर्द आत्मिक मातगोळ दा भागी आदुर, रा आंदरी भी उचित आद कि शारीरिक मातगोळ दा आंदुर्द स्यावा माळुल.
ROM 15:28 इदुरसाटी ना ईद क्याल्सा पुरा माळकु अदिक आंदरी ईद भेंट कोटकु नीम हाती टु आगतेला स्पेन इक होगाईन.
ROM 15:29 अदिक ना जान्सतीन कि याग ना नीम हाती बराईन, रा मसीह अन पुरा आर्शिवादगोळ सांगुळ बराईन.
ROM 15:30 हे वार्टुरा अदिक आकतींगेरा, नाम प्रभु यीशु मसीह अन अदिक पवित्र आत्मा अन प्यार इन याद दिलुस्कु ना नीम से विनती माळतीन, कि नान साटी परमेश्वर से प्रार्थना माळदुर दा नान सांगुळ हतकु ईरी
ROM 15:31 कि ना यहूदिया अन अविश्वासी लॉकुर से ऊळ्दकु ईराइन, अदिक नान अद स्यावा जो यरूशलेम इन साटी आद, परमेश्वर उन लॉकुरी पंसद बरूल;
ROM 15:32 अदिक ना परमेश्वर उन इच्छा देल नीम हाती आनन्द इन सांगुळ बंदकु नीम सांगुळ आराम माळाईन.
ROM 15:33 शांती अन परमेश्वर नीम सप्पा मुंदुर सांगुळ ईरूल. आमीन.
ROM 16:1 ना नीम से फीबे अन साटी जो नाम आकतींग अदिक किंख्रिया अन मंडली नोर सेविका आर, विनती माळतीन
ROM 16:2 कि नीम, ह्यांग कि परमेश्वर उन लॉकुरी पायजे, आकी प्रभु दा ग्रहण माळी; अदिक यातोदारा मात दा आकी नाम जरवत आद, आकिन मदत माळी, यतिकी आक भी हापाळ मुंदुर्द बल्‍की नान भी मदत माळावळ्त ईतार.
ROM 16:3 प्रिस्का अदिक अक्विला अक जो मसीह यीशु दा नान सहकर्मी आर, नमस्कार.
ROM 16:4 आंदुर नान जीव इन साटी तांद अच जीवन जोखिम दा हाक बुटीदुर; अदिक सिर्फ ना अच ईला, बल्‍की गैरयहूदीगोळ्द सप्पा मंडलीगोळ भी आंदुर्द धन्यवाद माळतद.
ROM 16:5 आ मंडली अक भी नमस्कार जो आंदुर मान्या आद. नान प्रिय इपैनितुस उक, जो मसीह अन साटी आसिया प्रांत इन पयला फल आद, नमस्कार.
ROM 16:6 मरियम इक, याक नीम साटी हापाळ मयनत माळदुर, नमस्कार.
ROM 16:7 अन्द्रुनीकुस अदिक यूनियास उक जो नान घरजनी नोर आर, अदिक नान सांगुळ कैद आगीदुर अदिक प्रेरितगोळ दा हेसुर वाळेर आर, अदिक नान से पयले मसीह आगीदुर, नमस्कार.
ROM 16:8 अम्पलियातुस उक, जो प्रभु दा नान प्रिय संगी आन, नमस्कार.
ROM 16:9 उरबानुस उक, जो मसीह दा नाम सहकर्मी आन, अदिक नान प्रिय इस्तखुस उक नमस्कार.
ROM 16:10 अपुल्लोस उक जो मसीह दा सही होट्टुन, नमस्कार. अरिस्तुबुलुस उन घराना इक नमस्कार.
ROM 16:11 नान रिश्तेदार हेरोदियोन यहूदी संगी इक नमस्कार. नरकिस्सुस उन घराना इन जो लॉकुर प्रभु दा आर, आंदरी नमस्कार.
ROM 16:12 त्रूफेना अदिक त्रूफोसा अक जो प्रभु दा मेहनत माळतार, नमस्कार. प्रिय पिरसिस उक, याव प्रभु दा हापाळ मेहनत माळदुन नमस्कार.
ROM 16:13 रूफुस उक जो प्रभु दा निवळुस्कु आन अदिक आऊन मोय इक, जो नान भी मोय उर, येढ्ढु मुंदरी नमस्कार.
ROM 16:14 असुंक्रितुस, फिलगोन, हिर्मेस, पत्रुबास, हिर्मास अदिक आंदुर सांगुळ इन वार्टुर अदिक आकतींगेरी नमस्कार.
ROM 16:15 फिलुलुगुस, यूलिया, नेर्युस अदिक आकिन आकतींग, अदिक उलुम्पास अदिक आंदुर सांगुळ इन सप्पा परमेश्वर उन लॉकुरी नमस्कार.
ROM 16:16 आपस दा पवित्र चुम्बन देल नमस्कार माळी. नीमी मसीह अन सप्पा मंडलीगोळ दी टु नमस्कार.
ROM 16:17 ईग हे वार्टुरा अदिक आकतींगेरा, ना नीम से विनती माळतीन, कि जो लॉकुर आ शिक्षा अन विपरीत, जो नीमी सिक्याद, फूट हाक्‍कोद अदिक ठोकर तिनसोद कारण बन्सतार, आंदरी अर्त कोमी अदिक आंदुर से दुर ईरी.
ROM 16:18 यतिकी हिंग लॉकुर नाम प्रभु मसीह नोर आल्लच, लेकीन तान व्हाट्टा अन स्यावा माळतार; अदिक चिकना चुपळा मातगोळ देल सीधा साधा मन इन लॉकुरी बयकुस बुळतार.
ROM 16:19 नीम आग्या मानसोद चर्चा सप्पा लॉकुर दा फैलुसेत, इदुरसाटी ना नीम बारा दा आनन्द माळतीन, लेकीन ना ईद चाहासतीन कि नीव भलाई इन साटी बुद्धिमान लेकीन बुराई इन साटी भोला बन्सकु ईरी.
ROM 16:20 शांती इन परमेश्वर शैतान उक नीम कालगोळ देल राटनेरी मेटसुस बुट्टान. नाम प्रभु यीशु मसीह अन अनुग्रह नीम मा आगतेला ईरूल.
ROM 16:21 नान सहकर्मी तीमुथियुस उन, अदिक नान घराना इन लूकियुस, यासोन अदिक सोसिपत्रुस ई नान यहूदी संगीगोळ्द नीमी नमस्कार.
ROM 16:22 ना चिट्ठी लिखसावाळा तिरतियुस उन, प्रभु दा नीमी नमस्कार.
ROM 16:23 (२४) गयुस जो नान अदिक मंडली अन पाहुनचार माळावाळा आन, आऊन नीमी नमस्कार. इरास्तुस जो नगर इन भंडारी आन, अदिक वार्ट क्वारतुस उन नीमी नमस्कार.
ROM 16:24 
ROM 16:25 आ परमेश्वर उन महिमा आगुल नीम विश्वास ईग जो नीमी नान खुशखबरी मतलब यीशु मसीह अन संदेश इन प्रचार इन अनुसार स्थिर माळ सकतद, परमेश्वर उन ई रहस्य पुर्ण सत्य युगयुग टु होचकु ईरोद,
ROM 16:26 लेकीन ईग प्रगट आगकु सनातन परमेश्वर उन आग्या देल भविष्यवक्तागोळ्द किताबगोळ द्वारा सप्पा जातीगोळी हेळकु आग्याद कि आंदुर विश्वास देल आग्या मानसावाळेर आगेगुल,
ROM 16:27 आवा सिर्फ ऊंद बुद्धिमान परमेश्वर उन यीशु मसीह अन द्वारा हमेशा हमेशा महिमा आगतेला ईरूल. आमीन.
1CO 1:1 पौलुस उन दी टु जो परमेश्वर उन इच्छा देल यीशु मसीह अन्द प्रेरित आगोर साटी कारूकु आत अदिक वार्ट सोस्थिनेस दी टु,
1CO 1:2 परमेश्वर उन आ मंडली अन्द हेसुर जो कुरिन्थुस दा आद, मतलब आंदुर हेसुर जो मसीह यीशु दा पवित्र माळकु आग्यार, अदिक पवित्र आगोर साटी कारूकु आग्यार; अदिक आ सप्पा मुंदुर हेसुर भी जो हर जागा दा आंदुर अदिक नाम प्रभु यीशु मसीह अन्द हेसुर देल प्रार्थना माळतार.
1CO 1:3 नाम आप्प परमेश्वर अदिक प्रभु यीशु मसीह अन्द दी टु नीमी अनुग्रह अदिक शांती सिकतेला ईरूल.
1CO 1:4 ना नीम्द बारा दा तान परमेश्वर उन धन्यवाद हमेशा माळतीन, इदुरसाटी कि परमेश्वर उन ईद अनुग्रह नीम मा यीशु मसीह दा आत.
1CO 1:5 कि नीव यीशु मसीह दा ऊंद आगदुर कारण नीव हर मात दा, मतलब सप्पा वचन अदिक सप्पा ग्यान दा धनी माळकु आदीर.
1CO 1:6 यीशु मसीह अन्द बारा दा बातणी नीम दा पक्‍का होळुल.
1CO 1:7 इदुरसाटी कि यातोदारा वरदान दा नीमी कमी ना आगुल, ह्यांग नीव नाम प्रभु यीशु मसीह अन्द बरोद हादी नोळतेला ईरतीर.
1CO 1:8 आव नीमी आखरी ताका पक्‍का भी माळ्यान कि नीव नाम्द प्रभु यीशु मसीह अन्द वापस बरोद दिन दा निर्दोष ठहरूसी.
1CO 1:9 परमेश्वर विश्वास इन लायक आन, याव नीमी तान पार नाम्द प्रभु यीशु मसीह इन संगत दा कारस्यान.
1CO 1:10 हे वार्टुरा, ना नीम से नाम प्रभु यीशु मसीह अन्द हेसुर देल विनती माळतीन कि नीव सप्पा मुंदुर ऊंद अच मात अनी, अदिक नीम दा फूट बिळबाळुल, लेकीन ऊंद अच मन अदिक ऊंद अच मत आगकु मिलुसकु ईरी.
1CO 1:11 हे नान वार्टुरा अदिक आकतींगेरा, खलोए अन्द घराना अन्द लॉकुर नानी नीम्द बारा दा हेळदुर कि नीम दा झगळा आगेत्याव.
1CO 1:12 नांद अनोद मतलब ईद आद कि नीम दा टु यावारा रा तान तान इक “पौलुस उन,” यावारा “अपुल्लोस उन,” यावारा “कैफा अन,” रा यावारा “मसीह अन्द” अनुयायी अनतार.
1CO 1:13 येन मसीह अन्द वाटा हिस्सा आगेत? येन पौलुस नीम साटी क्रूस मा येर्सुसकु आदुन? या नीमी पौलुस उन हेसुर मा बपतिस्मा सिक्त?
1CO 1:14 ना परमेश्वर उन धन्यवाद माळतीन कि क्रिसपुस अदिक गयुस उक बिटकु ना नीम दा टु याऊकु भी बपतिस्मा कोटीदील,
1CO 1:15 इदुरसाटी हिंग आगबाळुल कि यावारा अनुल कि नीमी नान हेसुर मा बपतिस्मा सिक्त.
1CO 1:16 अदिक हा, ना स्तिफनास इन घराना अक भी बपतिस्मा कोट्टीन; इंदरी बिटकु ना जान्सालीन कि ना अदिक यारीक बपतिस्मा कोट्टीन.
1CO 1:17 यतिकी मसीह नानी बपतिस्मा कोळली ईला, लेकीन खुशखबरी केळ्सली कळुदुन, अदिक ईद भी मंळसा अन्द ग्यान इन आवाजगोळ्द अनुसार ईला, हिंग आगबाळुल कि यीशु मसीह अन्द क्रूस बेकार ठहरूसुल.
1CO 1:18 यतिकी क्रूस इन कात्‍ता नाश आगावाळेर साटी मूर्खता आद, लेकीन नाव उद्धार ताकोमावाळेर साटी परमेश्वर उन सामर्थ्य आद.
1CO 1:19 यतिकी शास्त्र दा लिख्सकु आद, “ना ग्यानवंतगोळ ग्यान इक नाश माळाईन, अदिक समझदार गोळ्द समझ इक सब से बेकार माळ बुळाईन.”
1CO 1:20 येल आन ग्यानवान? येल आन नियम इन गुरु? येल आन ई दुनिया अन विवाद माळावाळा? येन परमेश्वर ई दुनिया अन ग्यान इक मूर्खता ठहरूसीदील?
1CO 1:21 यतिकी याग परमेश्वर उन ग्यान इन अनुसार ईद दुनिया तान ग्यान देल परमेश्वर उक जान्स सकिदील, रा परमेश्वर उक ईद वळ्लीद हत कि ई प्रचार इन “मूर्खता” अन्द द्वारा विश्वास माळावाळेर इक उद्धार कोळुल.
1CO 1:22 यहूदी रा चमत्कार इन चमत्कार चाहासतार, अदिक ग्रीक ग्यान इन खोज दा आर,
1CO 1:23 लेकीन नाव रा आ क्रूस मा येर्सकु आग्यान आ मसीह अन्द प्रचार माळतेव, जो यहूदीगोळ्द साटी ठोकर इन कारण अदिक गैरयहूदीगोळ साटी मूर्खता आद;
1CO 1:24 लेकीन जो कारूकु आग्यार, येन यहूदी येन गैरयहूदी, आंदुर हात्‍ती मसीह परमेश्वर उन सामर्थ्य अदिक परमेश्वर उन ग्यान आद.
1CO 1:25 यतिकी परमेश्वर उन मूर्खता मंळसागोळ्द ग्यान देल ग्यानवान आद, अदिक परमेश्वर उन कमजोरी मंळसागोळ्द ताकत देल हापाळ बलवान आद.
1CO 1:26 हे वार्टुरा अदिक आकतींगेरा, तान कारूकु आगोद मा रा सोची कि ना मय इन अनुसार हापाळ ग्यानवान, अदिक ना हापाळ सामर्थी, अदिक ना हापाळ वळ्लीद घराना टु कारूकु आग्यार.
1CO 1:27 लेकीन परमेश्वर दुनिया अन मूर्खगोळी नीवळुसदुन कि ग्यानवंतगोळी शर्मिंदा माळुल, अदिक परमेश्वर दुनिया अन कमजोर मंळसागोळी निवळुसदुन कि बलवानगोळी शर्मिंदा माळुल;
1CO 1:28 अदिक परमेश्वर दुनिया अन नीचगोळी अदिक तुच्छगोळी इक भी जो खुद ईला अन्द बराबर सम्सतार आंदरी भी नीवळुसदुन, ताकी महत्वपुर्ण मातगोळ आंदरी व्यर्थ ठहरूसुल.
1CO 1:29 परमेश्वर हिंग माळदुन ताकी यातोदु प्राणी आऊन मुंद घमण्ड माळबाळुल.
1CO 1:30 लेकीन परमेश्वर नामी यीशु मसीह दा ऊंद माळदुन, जो परमेश्वर उन दी टु नाम साटी ग्यान ठहरूस्त. आऊन द्वारा नाव परमेश्वर उन मुंद न्यायी ठहरूसुल, अदिक पवित्र अदिक स्वतंत्र माळकु आदेव;
1CO 1:31 ताकी ह्यांग शास्त्र दा लिख्सकु आद, हांग अच आगुल, “जो घमण्ड माळ्यान आव प्रभु दा घमण्ड माळुल.”
1CO 2:1 हे वार्टुरा अदिक आकतींगेरा, याग ना परमेश्वर उन रहस्यमय सच्चाई अदिक भेद केळ्सतेला नीम्द हात्‍ती बंदीन, रा आवाजगोळ या ग्यान इन उत्‍तमता अन्द सांगुळ बंदिदील.
1CO 2:2 यतिकी ना ईद ठान्स कोंडीदिन कि नीम्द न्याड्या यीशु मसीह बल्‍की क्रूस मा येर्सकु आदुन मसीह अदिक आऊन मृत्यु इक बिटकु यातोदु अदिक मात इक जान्सतीदील.
1CO 2:3 ना कमजोरी अदिक अंज्क इन सांगुळ, अदिक हापाळ नळ्गत-नळ्गत नीम हात्‍ती बंदीन;
1CO 2:4 अदिक नान वचन, अदिक नान प्रचार दा ग्यान इक लूभावना मातगोळ ईला, बल्‍की आत्मा अदिक सामर्थ्य इन प्रमाण ईरोद,
1CO 2:5 इदुरसाटी कि नीम्द विश्वास मंळसागोळ्द ग्यान मा ईला, लेकीन परमेश्वर उन सामर्थ्य मा निर्भर ईरूल.
1CO 2:6 तरी भी जानकार लॉकुर दा नाव ग्यान केळ्सतेव; लेकीन ई दुनिया अन अदिक ई दुनिया अन नाश आगावाळेर शासकगोळ्द ग्यान ईला;
1CO 2:7 लेकीन नाव परमेश्वर उन अद होचकु ग्यान, भेद इन रहस्य अन्द वर्णन माळतेव मतलब आ होचकु ग्यान इक यारी परमेश्वर दुनिया माळोद पयले टु ना नाम्द महिमा अन्द साटी ठहरूस्यान,
1CO 2:8 यारी ई दुनिया अन शासकगोळ दा टु यारू जान्सीदिल, यतिकी अगर आंदुर जान्सायदुर रा महिमा माळावाळा प्रभु उक क्रूस मा ईला येर्सायदुर.
1CO 2:9 लेकीन ह्यांग लिख्सकु आद, “जो मात कण्णगोळ नोळीदील अदिक किवगोळ केळीदील, अदिक जो मातगोळ मंळसा अन्द मगज दा तुमीदिल, आंदुर अच उर जो परमेश्वर तान प्यार ईटावाळेर साटी तयार माळ्यान.”
1CO 2:10 लेकीन परमेश्वर आंदरी तान आत्मा अन्द द्वारा नाम मा प्रगट माळदुन, यतिकी आत्मा सप्पा मातगोळ, उलटा परमेश्वर उन रहस्यमय मातगोळ भी जाँच तान.
1CO 2:11 मंळसागोळ दा टु याव यावारा मंळसा अन्द मातगोळी जान्सतान, सिर्फ मंळसा अन आत्मा जो आऊंदा आद? हांग अच परमेश्वर उन मातगोळ भी याऊ जान सकालुन, सिर्फ परमेश्वर उन आत्मा अच जान सकतद.
1CO 2:12 लेकीन नामी दुनिया अन आत्मा ईला, लेकीन अद आत्मा सिक्याद जो परमेश्वर उन दी टु आद कि नाव आ मातगोळी जान्सेव जो परमेश्वर नामी कोटान.
1CO 2:13 यारी नाव मंळसागोळ्द ग्यान इन कल्सद मातगोळ दा ईला, लेकीन परमेश्वर उन आत्मा अन्द कल्सद मातगोळ मा, यारी परमेश्वर उन आत्मा आद आंदरी आत्मिक मातगोळ केळ्सतेव.
1CO 2:14 जो मंळसा परमेश्वर उन आत्मा अन्द मातगोळी ग्रहण माळालुन, यतिकी अव आऊन नजर दा मूर्खता नव मातगोळ आव, अदिक ना आव आंदरी जान्स सकतान यतिकी आंदुर जाँच आत्मा अन्द रीति देल आगतद.
1CO 2:15 यारी परमेश्वर उन आत्मा आद आव मंळसा सप्पा येनारा जाँच तान, लेकीन आव खुद यारदु से जाँच कु आगालुन.
1CO 2:16 ह्यांग पवित्रशास्त्र दा लिख्सकु आद, “याव जान्स सकतान प्रभु उन मन इक? याव आऊक सलाह कोळ सकतान?” लेकीन नाम दा मसीह अन्द मन आद.
1CO 3:1 हे वार्टुरा अदिक आकतींगेरा, ना नीम से ई रीति देल मातगोळ माळ सकिदील ह्यांग कि आत्मिक लॉकुर से, लेकीन ह्यांग कि दुनिया अन लॉकुर से, अदिक आंदुर से जो मसीह दा चिकोर आर.
1CO 3:2 ना नीमी हाल कुळ्सदीन, अनाज तिनसिदील; यतिकी नीव अदरी पचुस ईला सकीर; सही दा नीव ईगास ताका अदरी पचुस सकालीर,
1CO 3:3 यतिकी नीव ईगास ताका दुनिया अन लॉकुर घाई आईर. यागासताका नीम दा मतभेद अदिक झगळा आद, रा येन नीव ई दुनिया नोर आल्लच? अदिक येन मंळसा अन्द रीति मा नळालीर?
1CO 3:4 यतिकी याग पयला अनतान, “ना पौलुस उन हुईन,” अदिक दुसरा अनतान, “ना अपुल्लोस उन हुईन,” रा येन नीव दुनिया अन मंळसागोळ्द घाई जीऊस सकालीर?
1CO 3:5 येन हुन अपुल्लोस? अदिक येन हुन पौलुस? सिर्फ सेवक, याऊन द्वारा नीव विश्वास माळदीर, ह्यांग हर ऊंद मंळसा अक प्रभु सौप्सदुन हांग आंदुर क्याल्सा माळ पायजे.
1CO 3:6 ना हचदीन, अपुल्लोस सिचुसदुन, लेकीन परमेश्वर वाळुसदुन.
1CO 3:7 इदुरसाटी ना हचावाळा येनारा आन अदिक अदरी सिचावाळा, लेकीन परमेश्वर अच सप्पा येनारा आन जो वाळुसावाळा आन.
1CO 3:8 हचावाळा अदिक सिचावाळा येढ्ढु ऊंद सारखा आर; लेकीन हर ऊंद मंळसा अक तान अच मेहनत इन अनुसार आऊक परमेश्वर आऊन क्याल्सा अन्द अनुसार आऊक मजदूरी कोट्टान.
1CO 3:9 यतिकी नाव परमेश्वर उन सहकर्मी आयेव; नीव परमेश्वर उन केई अदिक परमेश्वर उन रचना हुईर.
1CO 3:10 परमेश्वर उन आ अनुग्रह अन्द अनुसार जो नानी कोटकु आग्याद, ना बुद्धिमान राजमिस्त्री इन घाई पायवा हाकदिन, अदिक दुसरा अदुर मा रद्दा मंळ्सतान. लेकीन हर ऊंद मंळसा सावधान ईरूल कि आव आऊन मा ह्यांग रद्दा ईटतान.
1CO 3:11 यतिकी आ पायवा अक बिटकु जो बिदकु आद, अदिक अद यीशु मसीह हुन, याऊ दुसरा पायवा हाक सकालुन.
1CO 3:12 अगर यावारा मंळसा ई पायवा मा व्हान्ना, बेळ्ली, बार्र कल्ल, हुळ्ली या काड्डा देल रद्दा मंळस्यान,
1CO 3:13 रा हर ऊंद मंळसा अन्द क्याल्सा प्रगट आगेदीत; यतिकी न्याय इन अद दिन आऊक हेळीत, इदुरसाटी कि बेक्‍की इन सांगुळ प्रगट आदान अदिक अद बेक्‍की हर ऊंद मंळसा अन्द क्याल्सा परखुसीत कि ह्यांग आद.
1CO 3:14 याऊन क्याल्सा आ नीव मा माळकु स्थिर ईत्‍तीत, रा आऊक मजदूरी सिक्‍कीत.
1CO 3:15 अगर यावारा मंळसा अन्द क्याल्सा होतेदित, रा आव घाटा नेगदान; लेकीन आव खुद ऊळदोदान लेकीन व्हत्‍तेला-व्हत्‍तेला.
1CO 3:16 येन नीव जान्सालीर कि नीव परमेश्वर उन मंदिर हुईर, अदिक परमेश्वर उन आत्मा नीम दा वास माळतद?
1CO 3:17 अगर यावारा मंळसा परमेश्वर उन मंदिर इक नाश माळ्यान रा परमेश्वर आऊक नाश माळ्यान; यतिकी परमेश्वर उन मंदिर पवित्र आद, अदिक अद नीव हुईर.
1CO 3:18 याऊ तान तान इक ध्वाका कोळबाळुल. अगर नीम दा टु यावारा ई दुनिया दा तान तान इक ग्यानी सम्सतान, रा आव मूर्ख बनसुल कि ग्यानी आगेगुल.
1CO 3:19 यतिकी ई दुनिया अन ग्यान परमेश्वर उन हात्‍ती मूर्खता आद, ह्यांग शास्त्र दा लिख्सकु आद, “आव ग्यानीगोळी आंदुर्द चतुराई दा फसुस कोमतान,”
1CO 3:20 शास्त्र दा हिंग लिख्सकु आद कि, “प्रभु ग्यानीगोळ्द विचारगोळी इक जान्सतान कि अव व्यर्थ आव.”
1CO 3:21 इदुरसाटी मंळसागोळ बारा दा यारू घमण्ड माळबाळी, यतिकी सप्पा येनारा नीम दा हुन:
1CO 3:22 येन पौलुस, येन अपुल्लोस, येन कैफा, येन दुनिया, येन जीवन, येन सायोद, येन वर्तमान, येन भविष्य, सप्पा येनारा नीम्दा हुन:
1CO 3:23 नीव मसीह नव हुईर, अदिक मसीह परमेश्वर उन हुन.
1CO 4:1 मंळसा नामी मसीह अन सेवक अदिक परमेश्वर उन मातगोळ्द मुनीम समसुल.
1CO 4:2 बाक ईल भंडारी दा ईद मात जरूरी आद कि भंडारी देखरेख माळावाळा मुनीम विश्वासलायक ईरूल.
1CO 4:3 लेकीन नांद नजर दा ईद हापाळ स्यांळ्द मात आद कि नीव या मंळसागोळ्द यावारा न्यायालय नानी न्याय दिलुसुल, बल्‍की ना खुद तान तान इक न्याय दिलुस सकालीन.
1CO 4:4 यतिकी नांद मन नान न्याय माळाल्द, लेकीन इदुर देल ना निर्दोष ठहरूसालीन, यतिकी नांद जाँच माळावाळा प्रभु आन.
1CO 4:5 इदुरसाटी यागासताका प्रभु बरालुन, समय टु पयला यातोदु मात इन न्याय माळबाळी: आवा अंधकार इन होचकु मातगोळ ज्योति दा तोरस्यान, अदिक मनगोळ अभिप्रायगोळी इक प्रगट माळ्यान, आग परमेश्वर उन दी टु हर ऊंद मंळसा अन्द प्रशंसा आदीत.
1CO 4:6 हे वार्टुरा अदिक आकतींगेरा, ना ई मातगोळ दा नीम साटी तान अदिक अपुल्लोस उन मातगोळ उदाहरण इन रीति मा माळीन, इदुरसाटी कि नीव नाम द्वारा ईद कली कि जो शास्त्र दा लिख्सकु आद अदुर से मुंद आगबाळेतीर, अदिक ऊंद मंळसा अन्द विरोध दा अदिक दुसरा मंळसा अन्द विरोध दा गर्व माळबाळेतीर.
1CO 4:7 नीन दा अदिक दुसरा मंळसा दा याव भेद माळतान? अदिक नीन हात्‍ती येन आद जो नीनी परमेश्वर देल सिक्‍कीदील? अदिक याग कि नीनी परमेश्वर देल सिक्याद, रा हिंग घमण्ड येती माळत्या कि मान्सी नानी सिक्‍कीदील?
1CO 4:8 नीव रा संतुष्ट आगीदीर, नीव धनी आगीदीर, नीव नाम बिना राज्य माळदीर; लेकीन भला आगाईत कि नीव राज्य माळायदीर कि नाव भी नीम सांगुळ राज्य माळायदेव.
1CO 4:9 नान समझ दा परमेश्वर नाव प्रेरितगोळी सब मुंदुर्द बाद्दा आ लॉकुर घाई ठहरूस्यान, यार्द सायोद आग्या आगेग्याद; यतिकी नाव दुनिया अदिक स्वर्गदूतगोळ अदिक मंळसागोळ साटी ऊंद तमाशा ठहरूसकु आयेव.
1CO 4:10 नाव मसीह अन साटी मूर्ख आयेव, लेकीन नीव मसीह दा बुद्धिमान आईर! नाव कमजोर आयेव, लेकीन नीव बलवान आईर! नीमी आदर सिकतद, लेकीन नाम्द अपमान आगतद!
1CO 4:11 नाव ई घळी ताका हस्तकु नीरअळ्क अदिक हरकु कपळा हाकतेव, नाम सांगुळ बुरा तरीका देल व्यवहार माळतार अदिक नाव मारा मारा टेटतेव;
1CO 4:12 अदिक तान अच कयगोळ देल क्याल्सा माळकु मेहनत माळतेव. लॉकुर नामी बुरा अनतार, नाव आशीष कोळतेव; आंदुर सतुस्तार, नाव सहन माळतेव.
1CO 4:13 आंदुर बदनाम माळतार, नाव विनती माळतेव. नाव ईंद ताका दुनिया अन मईल अदिक सप्पा वस्तुगोळ्द खात कचरा अन घाई ठहरूसकु आयेव.
1CO 4:14 ना नीमी शर्मिंदा माळोर साटी ईव मातगोळ लिखसालीन, लेकीन नानव प्रिय चिकोर घाई सम्सकु नीमी चेतावनी कोळतीन.
1CO 4:15 यतिकी अगर मसीह दा नीमी कल्सावाळेर हत्‍त हजार भी ईरायदुर, तरी भी नीमव गुरुगोळ हापाळ सा हैलेच; इदुरसाटी कि मसीह यीशु दा खुशखबरी इन द्वारा ना नीमव आप्प आदीन.
1CO 4:16 इदुरसाटी ना नीम से विनती माळतीन कि नीव नान अनुकरण माळी.
1CO 4:17 ईदा कारण ना तीमुथियुस उक, जो प्रभु दा नानव प्रिय पार अदिक विश्वासयोग्य सेवक आन, नीम हात्‍ती कळुदीन. आव नीमी मसीह दा नान आचरण इन याद माळ्यान, ह्यांग कि ना हर जागा दा, हर ऊंद मंडली अक उपदेश कोळतीन.
1CO 4:18 येनारा लॉकुर घमण्ड देल हिंग बातोग्यार, मान्सी ईग ना नीम हात्‍ती बरातीदील.
1CO 4:19 लेकीन प्रभु चाहास्यान रा ना नीम हात्‍ती राटनेरी इच बराईन, अदिक आ बातकुगोळ्द मातगोळ इक ईला, लेकीन आंदुर सामर्थ्य इक जान्स कोमाईन.
1CO 4:20 यतिकी परमेश्वर उन राज्य मातगोळ दा ईला लेकीन सामर्थ्य दा आद.
1CO 4:21 नीव येन चाहासतीर? येन ना कोल हुळकु नीम हात्‍ती बराईन, या प्यार अदिक नम्रता अन सांगुळ?
1CO 5:1 ईद सही दा केळ सिक्याद कि नीम बीच दा व्यभिचार आगतद, अदिक हिंग व्यभिचार जो गैरयहूदीगोळ दा भी आगाल्द, मतलब ऊंद मंळसा तान आप्प उन हिंग्स उक ईटतान.
1CO 5:2 पर नीव घमण्ड देल बातोगीर, अदिक नीव इदुर बदला दुख माळालीर, यदुर देल कि हिंग क्याल्सा माळावाळा नीम बीच दा टु तेगुकु आगायदुन.
1CO 5:3 ना रा मय देल दुर ईरीन, लेकीन आत्मा देल नीम सांगुळ आगकु मान्सी उपस्थिती इन दशा दा हिंग क्याल्सा माळावाळेर्द बारा दा ईद आग्या कोटबुट्टीन कि याग नीव अदिक नांद आत्मा, नामव प्रभु यीशु उन सामर्थ्य इन सांगुळ जमा आगुल, रा हिंग मंळसा नामव प्रभु यीशु उन हेसुर देल
1CO 5:5 रा हिंग मंळसा मय इन विनाश इन साटी भूत इक सौप्सकु आगुल, कि आऊन आत्मा अक प्रभु यीशु उन दिन दा उद्धार सिक्‍कुल.
1CO 5:6 नीम्द घमण्ड माळोद वळ्लीद ईलच; येन नीव जान्सालीर कि थ्वाळासा खमीर पुरा कालस्कु हीट इक खमीर माळ बुळतद?
1CO 5:7 हाळोद खमीर तेगुकु तान तान इक शुद्ध माळी कि व्हाशोद कालस्कु हीट आगेगी; मतलब नीव अखमीरी हीट आगेगी ह्यांग नीव सही दा आईर. यतिकी नाम्द भी फसह, जो मसीह आन, आऊन बलिदान आग्याद.
1CO 5:8 इदुरसाटी बरी, नाव हाब्ब दा खुशी मानसाता, ईदारा हाळोद खमीर टु अदिक ना बुराई अदिक दुष्टता अन खमीर टु, लेकीन सीधाई अदिक सच्चाई इन अखमीरी रोट्टी देल.
1CO 5:9 ना तान चिट्ठी दा नीमी लिख्सीन कि व्यभिचारीगोळ्द संगती माळबाळेत.
1CO 5:10 ईद ईला कि नीव ई दुनिया अन व्यभिचारीगोळ, या लोभ माळावाळेर, या अंधार माळावाळेर, या मूर्ति इन पुजा माळावाळेर्द संगती माळबाळी; यतिकी ईद दशा दा टु होटबुळोद अच बिळाईत.
1CO 5:11 पर नान कहना ईद आद कि अगर यावारा वार्ट अंदकु, व्यभिचारी, या लोभ माळावाळा, या मूर्ति इन पुजा माळावाळा, या बोयावाळा, या सारा कुडावाळा, या अंधार माळावाळा हुन, रा आऊन संगती माळबाळेत; उलटा हिंग मंळसा अन्द सांगुळ ऊम भी बाळेतीर.
1CO 5:12 यतिकी नानी व्हार्यावाळेर्द न्याय माळदुर देल येन क्याल्सा? येन नीमी आंदुर्द न्याय माळोद ईलच जो मंडली दा आर?
1CO 5:13 लेकीन व्हार्यावाळेर्द न्याय परमेश्वर माळतान. इदुरसाटी आ कुकर्मी अक तान बीच दा टु तेगु बुळी.
1CO 6:1 याग नीम न्याड्या आपस दा झगळा आगतद रा येन नीम दा टु हिंग यावारा आन जो पवित्र लॉकुर हात्‍ती होगोद बदला अविश्वासीगोळ देल न्याय माळसुसोद दुस्साहस माळतान?
1CO 6:2 येन नीव जान्सालीर कि विश्वासी पवित्र लॉकुर दुनिया अन न्याय माळ्यार? इदुरसाटी याग नीमी दुनिया अन न्याय माळोद आद, रा येन नीव स्यांळ्द से स्यांळ्द झगळागोळ्द भी निर्णय माळोद लायक ईलच?
1CO 6:3 येन नीव जान्सालीर कि नाव स्वर्गदूतगोळ न्याय माळेव? रा येन सांसारिक मातगोळ्द निर्णय माळतीदील?
1CO 6:4 अगर नीमी सांसारिक मातगोळ्द निर्णय माळोद ईतीदाद, रा येन आंदरी अक अच कुरसेतीर यार्द मंडली दा येनु भी संबंध ईलच?
1CO 6:5 ना नीमी शर्मिंदा माळोर साटी ईद अनतीन. येन खराखुरा नीम दा ऊंद भी बुद्धिमान सिकालुन, जो तान वार्टुर निर्णय माळ सकुल?
1CO 6:6 नीम दा वार्टुर वार्टुर दा मुकदमा आगतद, अदिक अद भी अविश्वासीगोळ मुंद.
1CO 6:7 लेकीन सही दा नीम दा हापाळ दोष रा ईद आद कि आपस दा मुकदमा माळतीर. अन्याय येती सहन माळालीर? तान हानि येती सहन माळालीर?
1CO 6:8 लेकीन नीव रा खुद अच अन्याय माळतीर अदिक हानि पहुचुसतीर, अदिक अद भी वार्टुरी का.
1CO 6:9 येन नीव जान्सालीर कि अन्यायी लॉकुर परमेश्वर उन राज्य अन्द वारीस आगसकालुर? ध्वाका तिनबाळी; ना यौन संबंध, ना मूर्ति इन पुजा माळावाळा, ना परस्त्रीगामी, ना गंळ्सगामी,
1CO 6:10 ना काळ्ल, ना लोभी, ना सारा कुडावाळा, ना बोयावाळा, अदिक ठगुसावाळेर परमेश्वर उन राज्य अन्द वारीस आदार.
1CO 6:11 अदिक नीम दा टु यास हिंग अच ईरोर, लेकीन नीव प्रभु यीशु मसीह अन्द हेसुर देल अदिक नाम परमेश्वर उन आत्मा देल तोळुकु आदव अदिक पवित्र आदुर अदिक न्यायी ठहरूसदुर.
1CO 6:12 सप्पा वस्तुगोळ नान साटी उचित रा आद, लेकीन सप्पा वस्तुगोळ लाभ इन आलच; सप्पा वस्तुगोळ नान साटी उचित आद, लेकीन ना यार्दु मात इन हात्‍ती आगालीन.
1CO 6:13 आमली काण्णा व्हाट्टा अन्द साटी, अदिक व्हाट्टा आमली काण्णा अन्द साटी आद, लेकीन परमेश्वर इदरी अदिक अदरी येढ्ढु उक नाश माळ्यान. लेकीन शरीर व्यभिचार इन साटी ईला, बल्‍की प्रभु उन साटी हुन, अदिक प्रभु शरीर इन देखभाल माळोर साटी आन.
1CO 6:14 परमेश्वर तान सामर्थ्य देल प्रभु उक जित्‍ता माळदुन, अदिक नामी भी जित्‍ता माळ्यान.
1CO 6:15 येन नीव जान्सालीर कि नीम्द मय मसीह अन्द मय इन अंग हुन? रा येन ना मसीह अन्द मय इन अंग हुळकु आंदरी वेश्या अन्द अंग माळाईन? यागलु ईला.
1CO 6:16 येन नीव जान्सालीर कि जो यावारा वेश्या से संगती माळतान, आव आकिन सांगुळ ऊंद तन आगेगतान? यतिकी शास्त्र दा लिख्सकु आद: “आंदुर येढ्ढु मुंदुर ऊंद तन आदार.”
1CO 6:17 अदिक जो प्रभु उन संगती दा जोळ्सकु आग्यार, आव आऊन सांगुळ ऊंद आत्मा बनसेगुल.
1CO 6:18 व्यभिचार देल ऊळ्दकु ईरी. यास अन्य पाप मंळसा माळतान अव मय इन व्हार्या आद, लेकीन व्यभिचार माळावाळा तान अच मय इन विरूद्ध पाप माळतान.
1CO 6:19 येन नीव जान्सालीर कि नीम्द मय पवित्र आत्मा अन्द मंदिर आद, जो नीम दा कुर्तकु आद अदिक नीमी परमेश्वर उन दी टु सिक्याद; अदिक नीव तानव आलच?
1CO 6:20 यतिकी परमेश्वर नीमी दाम कोटकु कोंडुन, इदुरसाटी तान मय इन द्वारा परमेश्वर उन महिमा माळी.
1CO 7:1 आ मातगोळ बारा दा जो नीव लिख्सीर, ईद वळ्लीद आद कि गंळ्स आर्त इक मुठबाळुल.
1CO 7:2 लेकीन व्यभिचार इन अंज्क देल हर ऊंद गंळ्स उन हिंग्स, अदिक हर ऊंद आर्त इन गांड्ड ईरूल.
1CO 7:3 गांड्ड तान हिंग्स उन हक्‍क पुरा माळुल; अदिक हांग अच हिंग्स भी तान गांड्ड उन हक्‍क पुरा माळुल.
1CO 7:4 हिंग्स उक तान मय मा अधिकार हैलेच लेकीन आकिन गांड्ड उन अधिकार आद; हांग अच गांड्ड उक भी तान मय मा अधिकार हैलेच, लेकीन हिंग्स उन आद.
1CO 7:5 नीव आबुर दाबुरी ई अधिकार देल वंचित माळबाळी, लेकीन सिर्फ आपसी सहमती देल थ्वाळासा समय ताका अलग ईरी कि प्रार्थना अन्द साटी मवका सिक्‍कुल, अदिक बाक ऊंद सांगुळ आगेगी, ईदारा हिंग आगबाळुल कि नीम्द असंयम इन कारण भूत नीम्द परीक्षा ताकोमुल.
1CO 7:6 लेकीन ना इजाजत इन रूप दा ईद अनतीन, आदेश इन रूप दा ईला.
1CO 7:7 ना ईद चाहासतीन कि ह्यांग ना आईन, हांग अच सप्पा मंळसा ईरूल; लेकीन हर ऊंद मंळसा अक परमेश्वर उन दी टु विशेष विशेष वरदान सिक्याव; यारीकारा यातोदारा प्रकार इन, अदिक यारीकारा यातोदारा अलग प्रकार इन.
1CO 7:8 ईग ना कुवारा अदिक रांड्यागीतेर बारा दा अनतीन कि आंदुर साटी हिंग अच ईरोद वळ्लीद आद, ह्यांग ना आईन.
1CO 7:9 लेकीन अगर आंदुर संयम ईट सकालुर, रा मदा माळुल; यतिकी मन दा गलत बिचार माळदुर देल मदा माळोद भला आद.
1CO 7:10 यार्द मदा आगेग्याद, आंदरी ना ईला, बल्‍की प्रभु आग्या कोळतान कि हिंग्स तान गांड्डुन से अलग आगबाळुल.
1CO 7:11 अदिक अगर अलग भी आदार, रा दुसरा मदा माळबाळुल हांगा ईरूल; या तान गांड्ड उन से बाक मेल माळ कोमुल, अदिक ना गांड्ड तान हिंग्स उक बिळबाळुल.
1CO 7:12 दुसरा से प्रभु ईला लेकीन ना अच अनतीन, अगर यावारा वार्ट उन हिंग्स विश्वास ईला ईटतीदार अदिक आऊन सांगुळ ईत्‍तुर देल खुश ईतीदार, रा आव आक इक बिळबाळुल.
1CO 7:13 या आर्त इन गांड्ड अविश्वासी ईतीदान, अदिक आकिन सांगुळ ईत्‍तुर देल खुश ईरूल; रा आक तान गांड्ड उक बिळबाळुल.
1CO 7:14 यतिकी हिंग गांड्ड जो अविश्वासी ईतीदान, आव हिंग्स उन कारण पवित्र ठहरूस्तान; अदिक हिंग हिंग्स जो विश्वास ईला ईटतीदार, गांड्ड उन कारण पवित्र ठहरूस्तार; ईदारा नीमव चिकोर-चिंळ्गेर अशुध्द ईरायदुर, लेकीन ईग रा पवित्र आर.
1CO 7:15 लेकीन जो गंळ्स अविश्वास ईतीदान, अगर आव अलग आदान रा अलग आगगोळी, हिंग दशा दा याऊ वार्ट या आकतींग बंधन दा ईला. परमेश्वर नामी मेल मिलाप माळोर साटी कारस्यान.
1CO 7:16 यतिकी हे आर्त, नी येन जान्सत्या कि नी तान गांड्ड उन उद्धार माळसुस कोंड्या? अदिक हे गंळ्सा, नी येन जान्सत्या कि नी तान हिंग्स उन उद्धार माळसुस कोंड्या?
1CO 7:17 ह्यांग प्रभु हर ऊंद मंळसा अक जीवन कोट्टुन, अदिक ह्यांग परमेश्वर हर ऊंद मंळसा अक कारदुन, हांग अच आव नळुल. ना सप्पा मंडलीगोळ दा हिंग अच कल्सतीन.
1CO 7:18 येन यावारा खतना अन्द दशा दा कारूकु आग्यान, अदिक परमेश्वर ह्यांग यारी कारस्यान, आव खतनारहित बन्सबाळुल. जो खतनारहित दशा दा कारूकु आग्यान? आव खतना माळबाळुल?
1CO 7:19 ना खतना येनु आद अदिक ना खतनारहित, लेकीन परमेश्वर उन आग्यागोळ अनुसार नळोद सप्पा येनारा आद.
1CO 7:20 हर ऊंद मंळसा या दशा दा परमेश्वर कारदान, आव अदा दशा दा ईरूल.
1CO 7:21 अगर नी दास उन दशा दा कारूकु आगीद्या रा चिन्ता माळबाळ; लेकीन अगर नी आजाद आगोद चाहासत्या, रा हिंग अच क्याल्सा माळ.
1CO 7:22 यतिकी जो दास उन दशा दा प्रभु दा कारूकु आग्यान, आव प्रभु उन स्वतंत्र माळकु जन हुन. हांग अच जो स्वतंत्रता अन्द दशा दा कारूकु आग्यान, आव मसीह अन्द दास हुन.
1CO 7:23 नीमी परमेश्वर दाम कोटकु कोंडुन; मंळसागोळ्द दास बन्सबाळी.
1CO 7:24 हे वार्टुरा अदिक आकतींगेरा, जो यावारा या दशा दा कारूकु आग्यान, आव परमेश्वर उन मुंद ईरूल.
1CO 7:25 कुवारा पोरगोळ बारा दा प्रभु उन यातोदु आग्या नानी सिक्‍कीदील, लेकीन विश्वासयोग्य आगोर साटी ह्यांग दया प्रभु नान मा माळदुन, ना अदुर्दा अनुसार सम्मति कोळतीन.
1CO 7:26 नांद समझ दा ईद वळ्लीद आद कि ईंद नाळ क्लेश इन कारण, मंळसा ह्यांग आन हांग अच ईरूल.
1CO 7:27 अगर नीन हिंग्स आर, रा आकिन से अलग आगोद प्रयास माळबाळ; अदिक अगर नीन हिंग्स ईलच, रा हिंग्स उन खोज माळबाळ.
1CO 7:28 लेकीन अगर नी मदा भी माळ्या रा पाप माळाल. अदिक अगर कुवारा पोर मदा माळुल, रा आक पाप माळालुर. तरी भी मदा माळतार आंदरी ई जीवन दा शारीरिक दुख आदीत, अदिक ना नीमी ऊळसोद चाहासतीन.
1CO 7:29 हे वार्टुरा अदिक आकतींगेरा, ना ईद अनतीन कि समय कम माळकु आग्याद, इदुरसाटी ईग टु यार हिंग्स आर आंदुर हिंग ईरी मान्सी कि आंदुर्द हिंग्स ईलच;
1CO 7:30 अदिक वर्ला वाळेर हिंग ईरूल मान्सी वर्लालुर, अदिक खुशी माळावाळेर हिंग ईरूल मान्सी खुशी माळालुर. अदिक जो पैस्या कोटकु कोमावाळेर आर आंदुर हिंग ईरूल मान्सी आंदुर हात्‍ती येनु हईच ईलच.
1CO 7:31 अदिक ई दुनिया अन सांगुळ व्यवहार माळावाळेर हिंग ईरूल, मान्सी कि आंदुर आ व्यवहार होचकु हैलेच; यतिकी ई दुनिया अन रीति अदिक व्यवहार खतम आगेगताव.
1CO 7:32 लेकीन ना ईद चाहासतीन कि नीमी चिंता आगबाळुल. बिना मदावाळा गंळ्स प्रभु उन मातगोळ्द चिंता दा इरतान कि प्रभु उक ह्यांग खुश ईटुल.
1CO 7:33 लेकीन मदावाळा मंळसा दुनिया अन मातगोळ्द चिन्ता दा इरतान कि तान हिंग्स उक याता रीति देल खुश ईटुल.
1CO 7:34 मदावळ्त अदिक बिना मदावळ्त पोर दा भी भेद आद: बिना मदावळ्त पोर प्रभु उन चिन्ता दा ईरतार कि आक मय अदिक आत्मा येढ्ढु दा पवित्र ईरूल, लेकीन मदावळ्त दुनिया अन चिन्ता दा ईरतार कि तान गांड्ड उक खुश ईटुल.
1CO 7:35 ना ईद मात नीम्दा लाभ साटी अनतीन, ना कि नीम मा बंधन हच्चोर साटी, बल्‍की इदुरसाटी कि ह्यांग शोभा कोळतद हांग अच माळ पायजे, कि नीव ऊंद मगज आगकु प्रभु उन स्यावा दा हतकु ईरी.
1CO 7:36 या सगाई माळ्त ज्वाळा मदा ईला माळोद निर्णय ताकोंडाद, लेकीन अगर आ मंळसा अक हततद, कि आऊन व्यवहार आ कुवारा पोर इन प्रती वळ्लीद हैलेच, अदिक आऊन भावनागोळ हापाळ मजबूत आव अदिक आऊक हततद, कि आंदरी मदा माळकोम पायजे, रा आंदरी जरूर मदा माळ पायजे ह्यांग आव चाहासतान, ईदुर दा येनु पाप हैलेच.
1CO 7:37 लेकीन याव ईद मामला अक तान दिमाक दा तय माळदुन, जो यातोदारा भी मजबुरी अन हात्‍ती हैलेच, लेकीन तान इच्छा मा काबु ईटतान, अदिक याव कुवारा पोर इन से मदा ईला माळोद तान मन माळ कोंडान, आव मंळसा भी वळ्लीद माळतान.
1CO 7:38 जो मदा माळतान, आव वळ्लीद माळतान, अदिक जो मदा माळालुन, आव मात्‍त अदिक भी वळ्लीद माळतान.
1CO 7:39 यागासताका यातारा आर्त इन गांड्ड जित्‍ता इरतान, आगासताका आ आर्त आऊन बंधन दा ईरतार; लेकीन अगर आकिन गांड्ड सोतोदान रा यारी चाहस्यार आऊन से मदा माळ सकतार, लेकीन प्रभु दा विश्वासी ईर पायजे.
1CO 7:40 लेकीन अगर आक बिना मदा माळदुर देल ईरूल, रा नान विचार दा अदिक भी धन्य आर; अदिक ना सम्सतीन कि परमेश्वर उन आत्मा नान दा भी आद.
1CO 8:1 ईग मूर्तिगोळ्द मुंद बली माळ्द भोजन वस्तुगोळ्द बारा दा नाव जान्सतेव कि नाव सप्पा मुंदरी ग्यान आद. ग्यान घमण्ड पैदा माळतद, लेकीन प्यार देल उन्नती आगतद.
1CO 8:2 अगर यावारा समसुल कि ना येनारा जान्सतीन, रा ह्यांग जान्सोद पायजे हांगा ईग ताका जान्सालुन.
1CO 8:3 लेकीन अगर यावारा परमेश्वर से प्यार ईटतान, रा परमेश्वर आऊक अरूतान.
1CO 8:4 इदुरसाटी मूर्तीगोळ्द मुंद बली माळ्द वस्तुगोळ्द तिनोद बारा दा नाव जान्सतेव कि मूर्ति इन दुनिया दा येनु अस्तित्व ईलच, अदिक आऊक बिटकु याऊ परमेश्वर ईलच.
1CO 8:5 इदुरसाटी आकाश दा अदिक पृथ्वी मा हापाळ सा “द्याव” कहलुसतार. ह्यांग कि हापाळ सा द्याव अदिक हापाळ सा “प्रभु” आर.
1CO 8:6 तौभी नाम साटी रा ऊंद अच परमेश्वर आन: मतलब आप्प याऊन दी टु सप्पा वस्तुगोळ माळकु आग्याव, अदिक नाव आऊन साटी आयेव. अदिक आव ऊंद अच प्रभु आन, मतलब यीशु मसीह याऊन द्वारा सप्पा वस्तुगोळ माळकु आव, अदिक नाव भी आऊन द्वारा माळकु आगेव.
1CO 8:7 लेकीन सप्पा मंळसागोळी ईद ग्यान ईलच, लेकीन येनारा लॉकुर ईग ताका मूर्ति इन संपर्क दा ईत्‍तुर कारण ईग ताका बली कोळ्द वस्तु अक हिंग तिनतार मान्सी खराखुरा मूर्ति इन मुंद बली माळकु आग्याद, अदिक आऊन विवेक निर्बल आगोद कारण अशुध्द आगेगतान.
1CO 8:8 ऊमोद नामी परमेश्वर उन हात्‍ती पहुचुसाल्द. अगर नाव तिनतीदील रा नाम्द येनु हानि ईलच, अदिक अगर तिनदेव रा येनु लाभ ईलच.
1CO 8:9 लेकीन सावधान! हिंग आगबाळुल कि नीम्द ईद आजादी ईदारा निर्बलगोळ साटी ठोकर इन कारण आगेगुल.
1CO 8:10 अगर यावारा मंळसा नीन घाई ग्यानी इक मूर्ति इन मंदिर दा ऊमतेला नोळ्यान अदिक आव निर्बल जन आगुल रा येन इदुर देल आऊन विवेक इक मूर्ति इन मुंद बली माळ्द वस्तु तिनोद हिम्मत आगतीदील.
1CO 8:11 ई रीति देल अपमान ग्यान इन कारण आव निर्बल वार्ट यार्द साटी मसीह सोत्‍तुन, नाश आगेदान.
1CO 8:12 ई प्रकार वार्टगोळ विरूद्ध अपराध माळदुर देल अदिक आदुर्द निर्बल मन इक दुख पोहचुसदुर देल, नीव मसीह अन्द विरूद्ध अपराध माळतीर.
1CO 8:13 ई कारण अगर ऊमोद नान वार्ट उक ठोकर तिनसीत, रा ना यागलु यातारा रीति देल मॉदरा तिनतीदील, ना आगुल कि ना तान वार्ट उन साटी ठोकर इन कारण बनसाईन.
1CO 9:1 येन ना आजाद हैलेच? येन ना भी प्रेरित आल्लच? येन ना यीशु उक जो नामव प्रभु हुन, नोळीदील? येन नीव प्रभु दा नांद मेहनत इन प्रतिफल आल्लच.
1CO 9:2 अगर ना दुसरा अन्द साटी प्रेरित आल्लच, तरी भी नीम साटी रा हुईन; यतिकी ना परमेश्वर उन क्याल्सा माळदीन, नीम प्रभु दा एकता अच नान प्रेरित आगोद प्रमाण आद.
1CO 9:3 जो नानी जाँच तार, आंदुर साटी ईदा नांद उत्‍तर आद.
1CO 9:4 येन नामी कमाई माळकु तिनोद कुडोद अधिकार ईलच?
1CO 9:5 येन नामी ईद अधिकार ईलच, कि यातारा मसीह आकतींग इन सांगुळ मदा माळकु आक इक हुळकु टेटेव, ह्यांग दुसरा प्रेरित अदिक प्रभु उन वार्ट अदिक कैफा माळतार?
1CO 9:6 या सिर्फ नानी अदिक बरनबास उक अच कमाई माळकु तिनोद अधिकार ईलच.
1CO 9:7 हिंग याव आन जो तांद अच खर्च मा सेना दा स्यावा माळतान? याव आन जो अंगुर इन केई हचकु अदुर्द काय तिनालुन? हिंग याव आन जो म्यांडागोळ्द रखवाली माळकु अऊर्द हाल कुडालुन?
1CO 9:8 येन ना ईव मातगोळ मंळसागोळ्द अच रीति मा अनतीन? यतिकी व्यवस्था अन्द किताब दा ईदा मात लिख्सकु आद.
1CO 9:9 येन व्यवस्था ईद अनाल्द? यतिकी मूसा अन्द व्यवस्था दा लिख्सकु आद, “दावन दा नळुतेला वस्ता अन्द बाय कट बाळेतीर.” येन परमेश्वर वस्तागोळ्द अच चिन्ता माळतान?
1CO 9:10 या विशेष माळकु नाम साटी अनतान. हा नाम साटी अच लिख्सकु आग्याद, यतिकी उचित आद कि नांगर नळसावाळा आशा देल केई नळसुल, अदिक दावन कोळावाळा फसल सिक्‍कोद आशा देल दावनी माळुल.
1CO 9:11 याग नाव नीम्द साटी आत्मिक मातगोळ बोऊसदेव, अदिक अगर नाव आ शारीरिक वस्तुगोळ्द फसल कडुतेव, रा येन अद धोळ्द मात आद.
1CO 9:12 अगर नीम मा दुसरा लॉकुर अधिकार जतुसतार, रा येन नाम्द नीम मा यक्कुल अधिकार हैलेच? तरी भी नाव ई अधिकार इन इस्तेमाल माळीदिल, लेकीन नाव सब येनारा सहन माळतेव कि नाम्द द्वारा मसीह अन खुशखबरी दा अळचन बरबाळुल.
1CO 9:13 येन नीव जान्सालीर कि जो मंदिर दा स्यावा माळतार, आंदुर मंदिर दा टु तिनतार; अदिक जो वेदी इन स्यावा माळतार, आंदुर वेद इन भेंट इन सहभागी आगतार?
1CO 9:14 ईदा रीति देल प्रभु भी ठहरूसदुन कि जो लॉकुर खुशखबरी केळ्सतार, आंदुर जीविका खुशखबरी देल आगुल.
1CO 9:15 लेकीन ना इदुर दा टु यातोदारा भी मात इक क्याल्सा दा तंदिदील, अदिक ना ईव मातगोळ इदुरसाटी लिख्सीदिल कि नांद साटी हिंग माळुल, यतिकी इदुर देल रा नांद सायोद अच भला आद कि यावारा नांद घमण्ड इक बेकार ठहरूसुल.
1CO 9:16 अगर ना खुशखबरी केळसाईन, रा नांद साटी येनु घमण्ड इन मात आलच; यतिकी ईद रा नांद साटी जरूरी आद. अगर ना खुशखबरी ईला केळसाईन, रा नान मा हाय!
1CO 9:17 यतिकी अगर तान इच्छा देल ईद माळतीन रा मजदूरी नानी सिकतद, अदिक अगर तान इच्छा देल माळालीन तरी भी परमेश्वर नानी ईद सौप्सदुन अदिक ईदा नांद कर्तव्य हुन.
1CO 9:18 रा नांद मजदूरी येन हुन? ईद कि याग ना खुशखबरी प्रचार माळाईन रा अदरी फुकट दा माळाईन, अदिक खुशखबरी दा जो नान अधिकार आद अदरी पुरा रीति देल उपयोग दा ईला तराईन.
1CO 9:19 यतिकी ना मंळसागोळ से आजाद आईन तरी भी ना तान तान इक सप्पा मुंदुर्द दास माळ कोंडीन कि हापाळ लॉकुरी परमेश्वर उन राज्य दा तर सकुल.
1CO 9:20 ना यहूदीगोळ साटी यहूदी आदीन कि यहूदीगोळी परमेश्वर उन राज्य दा तर सकुल. जो लॉकुर मूसा अन्द व्यवस्था अन्द हात्‍ती आर आंदुर साटी ना व्यवस्था अन्द हात्‍ती ईला आगदुर मा भी व्यवस्था अन्द हात्‍ती आदीन कि आंदरी जो व्यवस्था अन्द हात्‍ती आर, आंदरी भी परमेश्वर उन राज्य दा तर सकुल.
1CO 9:21 जो व्यवस्थारहित आर आंदुर साटी ना यीशु मसीह जो परमेश्वर उन व्यवस्था देल रहित आईन, व्यवस्थारहित-सा आगेदीन कि जो व्यवस्थारहित आर आंदरी भी परमेश्वर उन राज्य दा तर सकुल.
1CO 9:22 ना निर्बलगोळ साटी निर्बल सा आगेदीन कि निर्बलगोळी जिक्सकु तराईन. ना सब मंळसागोळ साटी सब येनारा बन्सदीन कि यातोद ना यातोद रीति देल यावारा ऊंद मंळसा अन्द उद्धार माळसुसाईन.
1CO 9:23 ना ईद सब येनारा खुशखबरी इन साटी माळतीन कि दुसरा अन्द सांगुळ अदुर्द भागी आगेगाईन.
1CO 9:24 येन नीव जान्सालीर कि दवळ दा रा सप्पा अच वोळतार, लेकीन ईनाम ऊंदा मंळसा वोयतान? नीव भी ई प्रकार देल वोळी कि नीव जीत्स सकी.
1CO 9:25 आळोद प्रतियोगिता दा भाग ताकोमावाळा हर ऊंद खिलाळी सप्पा प्रकार इन संयम ईटतान. आव रा नाश आगोद हार इन प्राप्ती इन साटी ईद सप्पा येनारा माळतार, लेकीन नाव रा आ मुकुट साटी माळतेव जो मुरझुसाल.
1CO 9:26 इदुरसाटी ना रा ईदा रीति देल हरूतीन, लेकीन लक्ष्यहीन ईलच; ना भी ईदा रीति देल बुक्‍की देल आळतीन, लेकीन अदुर घाई ईला जो हवा पीट्सतेला आळतान.
1CO 9:27 लेकीन ना तान मय इक बडुतीन कुटतीन अदिक वश दा तरतीन, यागल्यारा हिंग ना आगबाळुल कि दुसरा अक प्रचार माळकु ना खुद अच यातोदारा रीति देल निकम्मा ठहरूसाईन.
1CO 10:1 हे वार्टुरा अदिक आकतींगेरा, ना चाहसालीन कि नीव ई मात देल अनजान ईरी कि नाम सप्पा आप्पुर मुतीगोळ बादल इन ल्यालमा ईरोर, अदिक सप्पा च्या सप्पा समुद्र अन्द न्याड्या टु आप्पाटी होटोदुर;
1CO 10:2 अदिक सप्पा मुंदुर बादल दा अदिक समुद्र दा, मूसा अन्द बपतिस्मा ताकोंडुर;
1CO 10:3 अदिक सप्पा मुंदुर ऊंद अच आत्मिक भोजन माळदुर;
1CO 10:4 अदिक सप्पा मुंदुर ऊंद अच आत्मिक नीर कुळदुर, यतिकी आंदुर आ आत्मिक चट्टान देल कुडोर जो आंदुर सांगुळ-सांगुळ नळोद, अदिक अद चट्टान मसीह ईरोन.
1CO 10:5 लेकीन परमेश्वर आंदुर दा टु हापाळ सा मंळसागोळ देल खुश आगीदील, इदुरसाटी आंदुर आळी दा सोतकु ढेर आगेदुर.
1CO 10:6 ई मातगोळ नाम साटी उदाहरण ठहरूसदव, कि ह्यांग आंदुर लालच माळदुर, हांग नाव बेकार वस्तुगोळ्द लालच माळतीदील;
1CO 10:7 अदिक मूर्ति इन पुजा माळावाळेर आगबाळी जसा कि आंदुर दा टु यास मुंदुर आगेगीदुर, ह्यांग शास्त्र दा लिख्सकु आद, “लॉकुर तिनली-कुडुली कुरतुर, अदिक बाद्दा आबुर दाबुर सांगुळ कुकर्म माळली कुरतुर.”
1CO 10:8 अदिक नाव व्यभिचार माळालेव, ह्यांग आंदुर दा टु यास मुंदुर माळदुर; अदिक ऊंद दिन दा तेवीस हजार मंळसागोळ सोतोदुर.
1CO 10:9 नामी प्रभु यीशु मसीह अक परीक्षा दा हाक्‍कोद हैलेच, ह्यांग आंदुर दा टु यास मुंदुर माळदुर, जसा कि आंदुर दा टु थ्वाळासा मुंदुर हिंग माळीदुर अदिक आंदुर हावगोळ द्वारा नाश माळकु आदुर.
1CO 10:10 अदिक नीव कुळकुळुस बाळेतीर, या रीति देल आंदुर दा टु यास कुळकुळुसदुर अदिक स्वर्गदूत उन द्वारा नाश माळकु आदुर.
1CO 10:11 लेकीन ई सप्पा मातगोळ, जो आंदुर मा घळुसदव, उदाहरण इन रीति मा ईरव; अदिक आंदुर नाम चेतावनी इन साटी जो दुनिया अन आखरी समय दा ईरतार लिख्सकु आगीदव.
1CO 10:12 इदुरसाटी जो सम्सतान, “ना स्थिर आईन,” आव सावधान ईरूल कि येल्यारा बिळबाळुल.
1CO 10:13 नीव यातोदारा हिंग परीक्षा दा बिळबाळी, जो मंळसागोळ्द सहन इन व्हार्या आद. परमेश्वर खरा आन अदिक आव नीमी सामर्थ्य देल व्हार्या परीक्षा दा बिळगोळालुन, बल्‍की परीक्षा अन्द सांगुळ ऊळसोद उपाय भी माळ्यान कि नीव अदरी सहन माळ सक्‍कीर.
1CO 10:14 ई कारण, हे प्रिय नान वार्टुरा अदिक आकतींगेरा, मूर्तिपूजा देल ऊळुकु ईरी.
1CO 10:15 ना नीमी बुद्धिमान जान्सकु नीम से अनतीन: जो ना अनतीन, अदरी नीव परखुसी.
1CO 10:16 जो प्याला प्रभु भोज दा उपयोग माळतार यदुर दा टु नाव कुडुतेव प्रभु उन धन्यवाद माळतेव; अद रोट्टी यदरी नाव मुरूतेव, येन अद मसीह अन्द मय इन सहभागी ईलच?
1CO 10:17 इदुरसाटी कि ऊंद अच रोट्टी आद रा नाव भी जो हापाळ आयेव, ऊंद शरीर आयेव: यतिकी नाव सब अदा ऊंद रोट्टी दा भागीदार आगतेव.
1CO 10:18 जो इस्त्राएली आर, आंदरी नोळी: येन बलिदान इन तिनावाळेर परमेश्वर उन वेदी इन सहभागी ईलच?
1CO 10:19 नांद अनोद मतलब येन आद? येन ईद कि मूर्तीगोळ्द मुंद बली येर्सद वस्तु येनारा दुसरा आद, या मूर्ति येनारा दुसरा आद?
1CO 10:20 ईला, पर ना ईद अनतीन कि प्रभु उक ईला जान्सावाळेर लॉकुर जो बलिदान माळतार; आंदुर परमेश्वर उन साटी ईला लेकीन दुष्टआत्मागोळ साटी बलिदान माळतार अदिक ना चाहसालीन कि नीव दुष्टआत्मागोळ्द सहभागी आगी.
1CO 10:21 नीव प्रभु उन प्याला अदिक दुष्टआत्मागोळ्द प्याला येढ्ढु दा टु कुडू सकालीर. नीव प्रभु उन मेज अदिक दुष्टआत्मागोळ्द मेज येढ्ढु मुंदुर सहभागी आग सकालीर.
1CO 10:22 येन नाव प्रभु उक सिट्ट तरसुसोद चाहसतेव? येन नाव आऊन से ताकतवर आयेव?
1CO 10:23 येनारा लॉकुर अनतार, सप्पा वस्तुगोळ्द उपयोग माळोद नान साटी उचित आद, लेकीन सप्पा फायदा अन्द ईलच: लेकीन दुसरा लॉकुर अनतार, “सप्पा वस्तुगोळ नांद साटी सही रा आव.” लेकीन सप्पा वस्तुगोळ देल उन्नती ईलच.
1CO 10:24 याऊ तान हित इन चिन्ता माळबाळुल लेकीन दुसरा अन्द हित इन चिन्ता माळुल.
1CO 10:25 जो मॉदरा कसाई सात्‍ता दा मारतान, अदरी तिनी, अदिक विवेक इन कारण येनु केळबाळी? कि नीम्द मन नीमी मन इन मन दा अच तिनबाळुल.
1CO 10:26 यतिकी पवित्रशास्त्र अनतद, पृथ्वी अदिक जो येनारा अदुर दा आद सप्पा प्रभु उन हुन.
1CO 10:27 अगर अविश्वासीगोळ दा टु यावारा नीमी बावस्या कोळुल, अदिक नीव होगोद चाहासीर, रा जो येनारा नीम्द मुंद ईटकु आगुल अदा तिनी; अदिक मन इन कारण येनु केळबाळी.
1CO 10:28 लेकीन अगर यावारा नीम से अनुल, “ईद रा मूर्ति इक बली माळ्द वस्तु हुन,” रा आवा हेळावाळा अन्द कारण अदिक मन इन कारण तिनबाळी.
1CO 10:29 नान मतलब नीन मन से हैलेच लेकीन आ दुसरा मंळसा अन्द मन देल आद. “भला नांद,” आजादी आ दुसरा अन्द मन देल येती परखुसकु आदीत.
1CO 10:30 अगर ना परमेश्वर उक धन्यवाद माळकु सहभागी आगतीन, रा यार मा ना धन्यवाद माळतीन आऊन कारण नान बदनामी येती आगतद?
1CO 10:31 इदुरसाटी नीव चाहे तिनी, चाहे कुडी, चाहे जो येनारा माळी, सप्पा येनारा परमेश्वर उन महिमा अन्द साटी माळी.
1CO 10:32 नीव ना यहूदीगोळ, ना गैरयहूदीगोळ, अदिक ना परमेश्वर उन मंडली अन्द साटी ठोकर इन कारण बन्सी.
1CO 10:33 ह्यांग ना भी सप्पा मातगोळ दा सप्पा मुंदुरी खुश ईटतीन, अदिक तान ईला लेकीन हापाळ मुंदुर्द फायदा ढुंढ्सतीन कि आंदरी उद्धार सिकुल.
1CO 11:1 ह्यांग ना मसीह अन्द अनुकरण माळतीन, हांग अच नीव भी नांद अनुकरण माळी.
1CO 11:2 हे वार्टुरा अदिक आकतींगेरा, ना नीम्द बळाई माळतीन कि सप्पा मातगोळ दा नीव नानी याद माळतीर; अदिक जो शिक्षागोळ इक ना नीमी सौप्सदीन, अदुर्द पालन माळतीर.
1CO 11:3 लेकीन ना चाहासतीन कि नीव ईद जान्स कोमी कि हर ऊंद गंळ्स उन ताल्ला मसीह हुन, अदिक आर्त इन ताल्ला गंळ्स हुन, अदिक मसीह अन्द ताल्ला परमेश्वर हुन.
1CO 11:4 जो गंळ्स ताल्ला होचकु प्रार्थना या परमेश्वर उन दी टु बातणी कोळतान, आव तान ताल्ला अन्द अपमान माळतान.
1CO 11:5 लेकीन जो आर्त ताल्ला तेरूकु प्रार्थना या परमेश्वर उन दी टु बातणी कोळतार, आक तान ताल्ला अन्द अपमान माळतार, यतिकी आक हिंग आर्त इन घाई आर आकिन ताल्ला मुंडन माळकु आग्याद.
1CO 11:6 अगर आर्त ओढ़नी देल शेरग्या हाकालुर रा चुट्टी भी कळ्द बुळुल; अगर आर्त इन साटी चुट्टी कळसुसोद या मुंडन माळसुसोद शरम इन मात आद, रा ओढ़नी देल शेरग्या हाकुल.
1CO 11:7 हा, गंळ्स उक तान ताल्ला होच्चोद बराबर ईलच, यतिकी आव परमेश्वर उन स्वरूप अदिक महिमा हुन; लेकीन आर्त रा गंळ्स उन महिमा हुळ.
1CO 11:8 यतिकी गंळ्स आर्तेर देल आगीदील, लेकीन आर्त गंळ्स देल आग्यार;
1CO 11:9 अदिक गंळ्स आर्त इन साटी माळकु आगीदील, लेकीन आर्त गंळ्स उन साटी माळकु आग्यार.
1CO 11:10 ई कारण अदिक स्वर्गदूतगोळ्द कारण आर्त इक जरूरी आद कि अधिकार इन चिन्ह सम्सकु तान ताल्ला मा ईटुल.
1CO 11:11 तरी भी, प्रभु दा एकता अन्द कारण, आर्त बिना गंळ्स उन अलग ईलच अदिक गंळ्स उन बिना आर्त अलग ईलच.
1CO 11:12 यतिकी ह्यांग आर्त गंळ्स देल आर, हांग अच गंळ्स आर्त इन द्वारा जनम ताकोमतान; लेकीन सप्पा वस्तुगोळ परमेश्वर उन द्वारा बंदाद.
1CO 11:13 नीव खुद अच बिचार माळी, येन आर्त इक बिना शेरग्या देल परमेश्वर से प्रार्थना माळोद शोभा कोळतद?
1CO 11:14 येन स्वाभाविक रीति देल भी नीव जान्सालीर कि अगर गंळ्स ऊद्द चुट्टी ईटुल, रा आऊन साटी अपमान आद.
1CO 11:15 लेकीन अगर आर्त ऊद्द चुट्टी ईरूल रा आक इक शोभा कोळतद यतिकी चुट्टी आक इक शेरग्या हाक्‍कोर साटी कोटकु आग्याव.
1CO 11:16 लेकीन अगर यावारा झगळा माळोद चाहस्यान, रा ईद जान्स कोमुल कि ना नाम्द अदिक ना परमेश्वर उन मंडलीगोळ्द हिंग रीति आद.
1CO 11:17 याग नीव परमेश्वर उन आराधना माळोर साटी जमा आगतीर. रा ईद आग्या कोळतेला ना नीम्द ईज्जत माळालीन, इदुरसाटी कि नीम जमा आगदुर देल भलाई आगाल्द, लेकीन नुसक्यान आगतद.
1CO 11:18 यतिकी पयला रा ना ईद केळतीन, कि याग नीव मंडली दा जमा आगतीर रा नीम दा फूट बिळतद, अदिक ना ईदुर मा थ्वाळा-थ्वाळा विश्वास भी माळतीन.
1CO 11:19 यतिकी गुटबन्दी भी नीम दा जरूरी ईतीदाद, इदुरसाटी कि जो लॉकुर नीम दा सही आर आंदुर प्रगट आगेगुल.
1CO 11:20 इदुरसाटी नीव जो ऊंद जागा दा जमा आगतीर रा ईदुर मतलब प्रभु-भोज तिनोर साटी आल्लच,
1CO 11:21 यतिकी तिनोद समय ऊंद मंळसा दुसरा मंळसा से पयला तान भोज तिन कोमतान, ई प्रकार यावारा रा हस्तकु ईरतान अदिक यावारा मस्त आगेगतान.
1CO 11:22 येन तिनोद-कुडोद साटी नीम्द मान्ना हैलेच? या परमेश्वर उन मंडली अक तुच्छ जान्सतीर, अदिक यार्द हात्‍ती हैलेच आंदरी शर्मिंदा माळतीर? ना नीम से येन अनाईन? येन ई मात दा नीम्द प्रशंसा माळाईन? ईला, ना प्रशंसा माळालीन.
1CO 11:23 यतिकी ईद शिक्षा नानी जो प्रभु दी टु सिक्त, अदिक ना नीम दी भी पहुचुस बुटीन कि प्रभु यीशु या ईळ्लक आव हुळसुस्कु आगीदुन, रोट्टी ताकोंडुन,
1CO 11:24 अदिक परमेश्वर उन धन्यवाद माळकु अदरी मुरदुन अदिक अंदुन, “ईद नान शरीर हुन, जो नीम साटी कोटकु आग्याद: नांद याद साटी ईदा माळतेला ईरी.”
1CO 11:25 ईदा रीति देल आव कटोरा भी हुळदुन अदिक अंदुन, “ईद कटोरा नांद खुन दा व्हाशोद वादा हुन: जब यागल्यारा कुडी, रा नांद याद साटी ईदा माळतेला ईरी.”
1CO 11:26 यतिकी जब यागलु नीव ईद रोट्टी तीनतीर अदिक ई कटोरा दा टु कुडुतीर, रा प्रभु उन मृत्यु इक यागासताका आव बरालुन, प्रचार माळतेला ईरी.
1CO 11:27 इदुरसाटी जो यावारा अनुचित रीति देल प्रभु उन रोट्टी तिनुल या आऊन कटोरा दा टु कुडुल, आव प्रभु उन मय अदिक खुन उन पापी ठहरूस्यान.
1CO 11:28 इदुरसाटी मंळसा तान तान इक जाँच कोमुल अदिक ईदा रीति देल ई रोट्टी दा टु तिनुल, अदिक ई कटोरा दा टु कुडुल.
1CO 11:29 यतिकी जो तिनोद-कुडोद समय प्रभु उन मय इक अरालुन, आव ई तिनोद अदिक कुडोर देल तान म्याकुच दण्ड तरतान.
1CO 11:30 ईदा कारण नीम दा हापाळ सा निर्बल अदिक रोगी आर, अदिक हापाळ सा सोतोग्यार.
1CO 11:31 अगर नाव तान तान इक जाँचायदेव रा दण्ड ईला सिकाईत.
1CO 11:32 लेकीन प्रभु नामी दण्ड कोटकु नाम्द न्याय माळतान, इदुरसाटी कि नाव दुनिया अन सांगुळ दोषी ईला ठहरूसुल.
1CO 11:33 इदुरसाटी, हे नांद वार्टुरा अदिक आकतींगेरा, याग नीव प्रभु भोज तिनोर साटी जमा आगतीर रा आबुर दाबुर साटी थाम्सी.
1CO 11:34 अगर यावारा हस्तकु ईरूल रा तान मान्या तिनुल, यदुर देल नीम्द जमा आगोद दण्ड इन कारण आगबाळुल. मिकदव मातगोळी ना बंदकु वळ्लीद माळाईन.
1CO 12:1 हे वार्टुरा अदिक आकतींगेरा, ना चाहसालीन कि नीव पवित्र आत्मा अन्द वरदानगोळ बारा दा अनजान ईरी.
1CO 12:2 नीव जान्सतीर कि याग नीव खरा परमेश्वर उक अरालीर, हापाळ मुक्‍का मूर्तीगोळ्द पुजा माळकु अदिक अवरी मान्सोर अदिक अऊर हिंद नळोर.
1CO 12:3 इदुरसाटी ना नीमी चेतावनी कोळतीन कि जो यावारा परमेश्वर उन आत्मा अन्द अगुवाई देल माताळतान, आव अनालुन कि यीशु स्रापित आन; अदिक ना यावारा पवित्र आत्मा अन बिना अन सकतान कि यीशु प्रभु आन.
1CO 12:4 वरदान रा हापाळ प्रकार इन आव, लेकीन पवित्र आत्मा ऊंद अच आद;
1CO 12:5 अदिक स्यावा भी हापाळ प्रकार इन आव, लेकीन प्रभु ऊंद अच आन;
1CO 12:6 अदिक प्रभावशाली क्याल्सा हापाळ प्रकार ईनव आव, लेकीन परमेश्वर ऊंद अच आन, जो सब दा हर प्रकार इन प्रभाव पैदा माळतान.
1CO 12:7 लेकीन सप्पा मुंदरी लाभ पहुचुसोर साटी हर ऊंद इक परमेश्वर उन पवित्र आत्मा अन प्रगट आगोद.
1CO 12:8 यतिकी ऊंद अक आत्मा अन्द द्वारा बुद्धी इन मातगोळ कोटकु आगतव, अदिक दुसरा अक अदा आत्मा अन्द अनुसार ग्यान इन मातगोळ.
1CO 12:9 यावारा अक अदा आत्मा देल विश्वास, अदिक यावारा अक अदा ऊंद आत्मा देल चंगा माळोद वरदान कोटकु आगतद.
1CO 12:10 बाक यावारा अक सामर्थ्य अन्द क्याल्सा माळोद शक्ति, अदिक यावारा अक परमेश्वर उन वचन कोळोद दान कोट्टुन, अदिक यावारा अक परमेश्वर उन आत्मा अन्द दान इक परखुशोर साटी, अदिक यावारा अक अनेक प्रकार इन भाषा माताळोर साटी, अदिक यारीकारा अग्यात भाषागोळ्द अर्थ हेळोर साटी.
1CO 12:11 लेकीन ईव सप्पा प्रभावशाली क्याल्सा अदा ऊंद अच परमेश्वर उन पवित्र आत्मा माळसुसतद, अदिक यारी जो चाहासतान अद वाट्स कोमतान.
1CO 12:12 यतिकी या प्रकार शरीर रा ऊंद आद अदिक अदुरव अंग हापाळ सा आव, अदिक आ ऊंद शरीर इन सप्पा अंग हापाळ आगदुर मा भी सप्पा मिलुसकु ऊंद अच शरीर आद, अदा प्रकार मसीह अन्द मय भी आद.
1CO 12:13 यतिकी नाव सप्पा मुंदुर येन यहूदी आगुल येन गैरयहूदी, येन दास आगुल येन स्वतंत्र, ऊंद अच आत्मा अन्द द्वारा ऊंद शरीर आगोर साटी बपतिस्मा ताकोंडेव, अदिक नाव सप्पा मुंदरी ऊंद अच परमेश्वर उन आत्मा कोटकु आग्याद.
1CO 12:14 इदुरसाटी कि शरीर दा ऊंद अच अंग ईला लेकीन हापाळ सा आव.
1CO 12:15 अगर काल अनुल, “ना कय आलच, इदुरसाटी शरीर इन आलच,” रा येन अद ई कारण शरीर इन आलच?
1CO 12:16 अदिक अगर किव अनुल, “ना कण्ण आलच, इदुरसाटी शरीर इन आलच,” रा येन अद ई कारण शरीर इन आलच?
1CO 12:17 अगर पुरा शरीर कण्ण अच आगाईत रा केळोद यल टु आगाईत? अगर पुरा शरीर किव अच आगाईत, रा सूँघसोद यल टु आगाईत?
1CO 12:18 लेकीन परमेश्वर अंगगोळी तान इच्छा अन्द अनुसार ऊंद ऊंद माळकु मय दा ईट्यान.
1CO 12:19 अगर आंदुर सप्पा ऊंद अच अंग ईरायदुर, रा मय यल ईराईत?
1CO 12:20 लेकीन ईग अंग रा हापाळ सा आव, लेकीन मय ऊंद अच आद.
1CO 12:21 कण्ण कय देल अन सकाल्द, “नानी नींद जरवत हैलेच,” अदिक ना ताल्ला कालगोळ देल अन सकतद, “नानी नीम्द जरवत हैलेच.”
1CO 12:22 लेकीन मय इन आ अंग जो दुसरागोळ देल निर्बल हतताव, हापाळ अच जरवत आद;
1CO 12:23 अदिक मय इन या अंगगोळी इक यदरी तोर्सोर देल नामी शरम बरतद हिंग अंगगोळी नाव वळ्लीद तरीका देल मुचतेव. अदरी नाव आदर इन योग्य समसालेव आंदरी अक अच नाव यक्कुल आदर कोळतेव; अदिक नामव जंग अंग अदिक भी हापाळ सुंदर आगेगताव.
1CO 12:24 तरी भी नाम्द सुंदर अंगगोळी इक इदुर जरवत हैलेच. लेकीन परमेश्वर मय इक हिंग माळ कोंडुन कि या अंग इक आदर इन कमी ईरोद अदरी का अदिक भी हापाळ आदर सिकतद.
1CO 12:25 ताकी मय दा फूट बिळ बाळुल, लेकीन अंग इन अवयव आबुर दाबुर बराबर चिन्ता माळुल.
1CO 12:26 इदुरसाटी अगर ऊंद अंग इन हिस्सा अक दुख सिकतद, रा सब अंगगोळ हिस्सा अक अदुर सांगुळ दुख सिकताव; अदिक अगर ऊंद अंग इनव हिस्सा अन बळाई आगतद, रा अदुर सांगुळ सब अंग आनन्द माळताव.
1CO 12:27 ई प्रकार नीव सब मिलुसकु मसीह इन मय हुईर, अदिक अलग अलग आऊनव अंग हुईर;
1CO 12:28 अदिक परमेश्वर मंडली दा अलग अलग मंळसागोळ्द निवळ माळदुन: पयला प्रेरित, दुसरा भविष्यवक्ता, तिसरा गुरु, बाक सामर्थ्य इन क्याल्सा माळावाळेर, बाक चंगा माळावाळेर, अदिक उपकार माळावाळेर, अदिक व्यवस्था अन वरदान माळावाळेर, अदिक अग्यात प्रकार इन भाषा माताळावाळेर.
1CO 12:29 येन सब प्रेरित आर? येन सब भविष्यवक्ता आर? येन सब शिक्षा कोळावाळा गुरु हुन? येन सब सामर्थ्य अन्द क्याल्सा माळावाळेर आर?
1CO 12:30 येन सप्पा मुंदरी चंगा माळोद वरदान सिक्याद? येन सप्पा मुंदुर अग्यात प्रकार इन भाषा माताळतार? येन सप्पा मुंदुर अग्यात भाषा अन्द अनुवाद माळ सकतार?
1CO 12:31 नीव धोळ से धोळ वरदानगोळ्द लालसा ईटतीर. लेकीन ना नीमी अदिक भी सब से वळ्लीद हादी हेळतीन.
1CO 13:1 अगर ना मंळसागोळ अदिक स्वर्गदूतगोळ्द भाषागोळ माताळाईन अदिक प्यार ईटालीन, रा ना ठनठनासकु पीतल इन धोळ घंटी अदिक झनझनासकु झाँझ हुईन.
1CO 13:2 अदिक अगर ना परमेश्वर उन दी टु बरावाळा बातणी इन प्रचार माळ सकाईन, अदिक सब भेदगोळ अदिक सब प्रकार इन ग्यान इक समसाईन, अदिक नानी ईल ताका पुरा विश्वास आगेदीत कि ना पहाळगोळी सरकुस बुळाईन, लेकीन प्यार ईटालीन, रा ना येनु अच हैलेच.
1CO 13:3 अगर ना तान पुरा धन संपत्‍ती कंगालगोळी तिन्स बुळाईन, या तान मय होताकोर साटी कोट बुळाईन, अदिक प्यार ईटालीन, रा नानी येनु अच लाभ हैलेच.
1CO 13:4 प्यार धीरजवन्त आद, अदिक कृपालु आद; प्यार जलन माळाल्द; प्यार तान बळाई माळाल्द, अदिक बायाल्द,
1CO 13:5 अद अनरीति नळाल्द, अद तान भलाई चाहसाल्द, चिळुसाल्द, प्यार दुसरा अन्द बुरा मातगोळ लेखा ईटाल्द.
1CO 13:6 अन्याय देल खुश आगाल्द, लेकीन सच्चाई देल खुश आगतद.
1CO 13:7 आव सप्पा मातगोळ सहन माळतान, सप्पा मातगोळ मा विश्वास माळतान, सप्पा मातगोळ्द आशा ईटतान, सप्पा मातगोळ दा धीरज ईटतान.
1CO 13:8 प्यार यागलु खतम आगाल्द; परमेश्वर उन दी टु बरावाळा बातणी खतम आगेदव; अग्यात भाषागोळ दा सिक्‍कावाळा दान आगुल रा होगतेला ईत्‍तव; ग्यान आगुल, रा मिटसेदाव.
1CO 13:9 यतिकी नाम्द ग्यान अधूरा आद, अदिक परमेश्वर उन दी टु बरावाळा बातणी अधूरा आद;
1CO 13:10 लेकीन याग परमेश्वर सप्पा पुरा माळ्यान, रा अधूरा पन मिटसेदित.
1CO 13:11 याग ना चिग्द ईरीन, रा ना चिगदुरगोळ घाई माताळीन, चिगदुरगोळ घाई मन ईरोद, चिगदुर घाई समझ ईरोद; लेकीन याग समझदार आगेदीन रा स्यानपनी नव मातगोळ बिट बुटीन.
1CO 13:12 ईग नामी आरसा दा धुँधला सा कांळ्सतद, लेकीन आ समय आमने सामने नोळेव; ई समय नांद ग्यान अधूरा आद, लेकीन आ समय हिंग पुरा रीति देल अराईन, ह्यांग नानी परमेश्वर अरतुन.
1CO 13:13 पर ईग विश्वास, आशा, प्यार ईव मुरू नाम सांगुळ आव, पर इऊर दा सब से धोळ्द प्यार आद.
1CO 14:1 प्यार इन अनुकरण माळोर साटी कोशिश माळी, अदिक आत्मिक वरदानगोळ्द भी धुन दा ईरी, खास माळकु परमेश्वर उन दी टु बरावाळा बातणी इन दान माळी.
1CO 14:2 यतिकी जो अग्यात भाषा दा मातगोळ माळतान आव मंळसागोळ से ईला लेकीन परमेश्वर से मातगोळ माळतान; इदुरसाटी कि आऊन मातगोळी याऊ समसालुन, यतिकी आव भेद इन मातगोळ पवित्र आत्मा अन्द सामर्थ्य दा आगकु माताळतान.
1CO 14:3 लेकीन जो परमेश्वर उन बातणी वाळस्तान, आव मंळसागोळ से उन्नती अदिक उपदेश अदिक दिलासा अन्द मातगोळ माताळतान.
1CO 14:4 जो अग्यात भाषा दा मातगोळ माळतान, आव तांद अच उन्नती माळतान; लेकीन जो भविष्यवाणी माळतान, आव मंडली अन्द उन्नती माळतान.
1CO 14:5 ना चाहासतीन कि नीव सप्पा मुंदुर अग्यात भाषागोळ दा मातगोळ माळी लेकीन इदुर से यक्कुल ईद चाहासतीन कि परमेश्वर उन दी टु बरावाळा बातणी इन मातगोळ माळी: यतिकी अगर अग्यात भाषा माताळावाळा मंडली अन्द उन्नती इन साटी अनुवाद माळबाळुल रा परमेश्वर उन दी टु बरावाळा बातणी अग्यात भाषा टु वाळुसकु आद.
1CO 14:6 इदुरसाटी हे वार्टुरा अदिक आकतींगेरा, अगर ना नीम हात्‍ती बंदकु अग्यात भाषागोळ दा मातगोळ माळाईन, रा नान से नीनी येन लाभ आदीत. अदिक ऊजुळ या ग्यान या परमेश्वर उन दी टु बरावाळा बातणी या उपदेश इन मातगोळ माळाईन, रा नीमी यक्कुल फायदा आदीत,
1CO 14:7 ईदा प्रकार अगर निर्जीव वस्तुगोळ भी यदुर देल आवाज होळतद, जसा कोळ्ल या बीन, अगर अऊर्द स्वरगोळ दा भेद ईरतीदील रा जो कोळ्ल ऊयकु या बिन मुर्सकु आगतद, आ हाळ इक ह्यांग अरूकु आदीत?
1CO 14:8 अदिक अगर तुरही इन आवाज साफ ईरतीदील, रा याव लळाई इन साटी तयारी माळ्यान?
1CO 14:9 हिंग अच नीव भी अगर ल्यालग्या देल साफ मातगोळ अनतीदिल, रा जो येनारा अंदकु आगतद अद ह्यांग सम्सकु आदीत? नीव रा हवा देल मातगोळ हेळावाळेर ठहरूसीर.
1CO 14:10 दुनिया दा यासारा अच प्रकार इन भाषागोळ येती ईला इतिदाव, लेकीन अऊर दा टु यातोदारा भी बिना मतलब इन ईला ईतीदाद.
1CO 14:11 इदुरसाटी अगर ना यातोदारा भाषा अन्द मतलब समसालीन, रा माताळावाळा अन्द नजर दा ना परदेशी ठहरूसाईन अदिक माताळावाळा नान नजर दा परदेशी ठहरूस्यान.
1CO 14:12 इदुरसाटी नीव भी याग आत्मिक वरदानगोळ्द धुन दा आईर, रा हिंग कोशिश माळी कि या वरदानगोळ देल मंडली अन्द उन्नती आगतद. आ वरदानगोळ्द कोशिश माळी.
1CO 14:13 ई कारण जो अग्यात भाषा माताळुल, आव दान सिक्‍कोद साटी प्रार्थना माळुल कि अदुर्द अनुवाद भी माळ सकुल.
1CO 14:14 इदुरसाटी अगर ना अग्यात भाषा दा प्रार्थना माळाईन, रा नान आत्मा प्रार्थना माळतद लेकीन नान दिमाक क्याल्सा कोळाल.
1CO 14:15 इदुरसाटी येन माळ पायजे? ना आत्मा देल भी प्रार्थना माळाईन, अदिक दिमाक देल भी प्रार्थना माळाईन; ना आत्मा देल भी हाळाईन, अदिक दिमाक देल भी हाळाईन.
1CO 14:16 ईलारा अगर नी आत्मा देल अच धन्यवाद माळ्या, रा बाक लॉकुर नीन धन्यवाद मा आमीन अनकु सहमत ह्यांग आदार? यतिकी आव रा अरालुन कि नी येन अनत्या?
1CO 14:17 नी रा सही देल धन्यवाद माळत्या, लेकीन दुसरा अन्द उन्नती आगाल.
1CO 14:18 ना तान परमेश्वर उन धन्यवाद माळतीन, कि ना नीम सप्पा मुंदुर से यक्कुल अग्यात भाषागोळ दा माताळतीन.
1CO 14:19 लेकीन मंडली दा अग्यात भाषा दा हत्‍त हजार मातगोळ माताळदुर देल नानी ईद वळ्लीद सम्सतद, कि दुसरा मंळसागोळी कलसोर साटी दिमाक देल अईद अच मातगोळ अनाईन.
1CO 14:20 हे वार्टुरा अदिक आकतींगेरा, नीव समझदारी दा चिकोर घाई आगबाळी: बुराई दा रा चिकोर घाई अनजान ईरी, लेकीन समझदारी दा स्याणा मंळसा घाई आगी.
1CO 14:21 व्यवस्था दा लिख्सकु आद कि प्रभु अनतान, “ना अपरिचित भाषा माताळावाळेर्द द्वारा, अदिक पराया बाय देल माताळावाळेर लॉकुर द्वारा ई लॉकुर से मातगोळ माळाईन तरी भी आंदुर नांद केळतीदिल.”
1CO 14:22 इदुरसाटी अग्यात भाषागोळ माताळोद वरदान विश्वासीगोळ साटी ईला, लेकीन अविश्वासीगोळ साटी चमत्कार इन चमत्कार हुन; लेकीन परमेश्वर उन दी टु बरावाळा बातणी अविश्वासीगोळ साटी ईला, लेकीन विश्वासीगोळ साटी चमत्कार इन चमत्कार हुन.
1CO 14:23 इदुरसाटी अगर मंडली ऊंद जागा दा जमा आगुल, अदिक सप्पा च्या सप्पा मुंदुर अग्यात भाषागोळ माताळुल, अदिक व्हार्यावाळेर या अविश्वासी लॉकुर बुळ्क होट बरूल रा येन आंदुर नीमी पागल अनतीदिल?
1CO 14:24 लेकीन अगर सप्पा मुंदुर परमेश्वर उन दी टु सिकावाळा बातणी कोळली हत्यार, अदिक यावारा अविश्वासी या व्हार्यावाळा मंळसा बुळ्क होट बरूल, रा सप्पा मुंदुर आऊक दोषी ठहरूस बुट्टार अदिक जाँच कोंडार कि आव पापी आन; अदिक आव जान्स कोंडान कि आऊक पश्चाताप इन जरवत आद.
1CO 14:25 अदिक आऊन मन इन भेद प्रगट आगेदव, अदिक आग आव बाय इन भार देल बिदकु परमेश्वर उक दण्डवत माळ्यान, अदिक कबुल माळ कोंडान कि खराखुरा परमेश्वर नाम न्याड्या आन.
1CO 14:26 इदुरसाटी हे वार्टुरा अदिक आकतींगेरा, येन माळ पायजे? याग नीव जमा आगतीर, रा हर ऊंद मंळसा अन्द मन दा हाळ या उपदेश या अग्यात भाषा या प्रकाशक या अग्यात भाषा अन्द अर्थ हेळोद ईरतद. सप्पा येनारा मंडली अन्द उन्नती इन साटी आग पायजे.
1CO 14:27 अगर अग्यात भाषा दा मातगोळ माळोद आद रा येढ्ढ या हापाळ मुंदुर ईरूल रा मुर मुंदुर पारी-पारी देल माताळुल, अदिक ऊंद मंळसा अनुवाद माळुल.
1CO 14:28 लेकीन अगर अनुवाद माळावाळा हैलेच, रा अग्यात भाषा माताळावाळा मंडली दा सुंगा ईरूल, अदिक तान मन देल परमेश्वर से मातगोळ माळुल.
1CO 14:29 परमेश्वर उन दी टु बरावाळा बातणी इक माताळावाळेर दा टु येढ्ढ या मुर मुंदुर माताळुल, अदिक बाकी लॉकुर आंदुर वचन इक परखुसुल.
1CO 14:30 लेकीन जो कुर्तकु आन अगर आऊन मा, येनारा मय उन दी टु बातणी प्रगट आत. रा आव पयला मंळसा सुंगा आगेगुल.
1CO 14:31 यतिकी नीव सप्पा मुंदुर ऊंद ऊंद माळकु परमेश्वर उन दी टु सिक्‍कावाळा बातणी इक कल्स सकतार, ताकी सप्पा मुंदुर कलुल अदिक सप्पा मुंदुरी शांती सिकुल.
1CO 14:32 यतिकी परमेश्वर उन दी टु बातणी कोळावाळा अन्द आत्मा बातणी कोळावाळा अन्द वश दा आद.
1CO 14:33 यतिकी परमेश्वर अव्यवस्था अन्द ईला, लेकीन शांती इन परमेश्वर हुन. ह्यांग पवित्र लॉकुर्द सप्पा मंडलीगोळ दा हिंग अच आगतद.
1CO 14:34 आर्तेर मंडली अन्द सभा दा सुंगा ईरूल, यतिकी आंदरी मातगोळ माळोद आग्या हैलेच, लेकीन आंदुर हात्‍ती ईरोद आग्या आद, ह्यांग व्यवस्था दा लिख्सकु आद.
1CO 14:35 अगर आंदुर येनारा कलोद चाहसतार, रा मान्या तान तान मान्नावाळा से केळुल, यतिकी आर्त इन मंडली अन्द सभा दा मातगोळ माळोद नाच्क इन मात आद.
1CO 14:36 येन परमेश्वर उन वचन नीम दा टु होटाद? या सिर्फ नीम ताका अच पोहचुस्याद?
1CO 14:37 अगर यावारा मंळसा तान तान इक परमेश्वर उन दी टु बरावाळा बातणी कोळावाळा सम्सुल या आऊन हात्‍ती पवित्र आत्मा अन्द वरदान आद, रा ईद अर्त कोमुल कि जो मातगोळ ना नीमी लिख्सतीन, अव प्रभु उन आग्यागोळ हु.
1CO 14:38 लेकीन अगर यावारा ईद स्वीकार माळालुर, रा आंदरी भी स्वीकार माळकु आगतीदील.
1CO 14:39 इदुरसाटी हे वार्टुरा अदिक आकतींगेरा, परमेश्वर उन दी टु बरावाळा बातणी इन धुन दा ईरी अदिक अग्यात भाषा माताळदुर देल मना माळबाळी;
1CO 14:40 पर सप्पा मातगोळ क्रम देल अदिक व्यवस्थित रूप देल माळकु आगुल.
1CO 15:1 हे वार्टुरा अदिक आकतींगेरा, ईग ना नीमी याद दिलुसोद चाहसतीन अदा खुशखबरी केळ्सतीन जो पयला केळ्स बुटीन, यारी नीव अंगीकार भी माळदीर अदिक यदुर दा नीव स्थिर भी आईर.
1CO 15:2 अदुर्दा द्वारा नीम्द उद्धार भी आगतद, अगर आ खुशखबरी इक जो ना नीमी केळ्सीदिन ध्यान दा ईटतीर; ईदारा नीम विश्वास माळोद बेकार आत.
1CO 15:3 ईदा कारण ना सब से पयले नीमी अदा मात पहुचुसदीन, जो नान हात्‍ती पहुचुसीत ईद पयला महत्वपुर्ण हुन कि पवित्रशास्त्र अन वचन इन अनुसार यीशु मसीह नाम पापगोळ साटी सोतोदुन,
1CO 15:4 अदिक नळ्सकु आदुन, अदिक पवित्रशास्त्र अन अनुसार तिसरा दिशी जित्‍ता भी आदुन,
1CO 15:5 आव कैफा अक अदिक हन्नेळ प्रेरितगोळी कांळ्सदुन.
1CO 15:6 बाक आव अईद सौ से यक्कुल विश्वासी वार्टुरी सांगुळल्या कांळ्सदुन, यारदा टु हापाळ सा ईगासताका जित्‍ता आर पर येनारा मंळसा सोतोग्यार.
1CO 15:7 बाक आव याकूब उक कांळ्सदुन आग सप्पा प्रेरितगोळी कांळ्सदुन.
1CO 15:8 सप्पा मुंदुर बाद्दा नानी भी कांळ्सदुन, जो मान्सी समय इन पयला पैदा आगीदान.
1CO 15:9 यतिकी ना प्रेरितगोळ दा सब से स्याणेव आईन, बल्‍की प्रेरित अनोद योग्य भी हैलेच, यतिकी ना परमेश्वर उन मंडली इक सतुसीदीन.
1CO 15:10 लेकीन ना जो येनारा भी आईन, परमेश्वर उन अनुग्रह देल आईन. आऊन अनुग्रह जो नान मा आत, अद बेकार आगीदील; लेकीन ना आ सप्पा मुंदुर से वाळुसकु मेहनत भी माळदीन: तरी भी ईद नान दी टु आगीदील लेकीन परमेश्वर उन अनुग्रह देल जो नान मा ईरोद.
1CO 15:11 इदुरसाटी चाहे बाक ना आगुल, चाहे बाक आंदुर आगुल, नाव सब ईदा प्रचार माळतेव, अदिक इदुर मा नीव भी विश्वास माळदीर.
1CO 15:12 इदुरसाटी याग भी यीशु मसीह अन्द ईद प्रचार माळकु आगतद कि आव सोत्‍तुर दा टु जित्‍ता आग्यान, रा नीम दा टु यास मुंदुर ह्यांग अनतार कि सोत्‍तकु मंळसा जित्‍ता आग अच सकालुन?
1CO 15:13 अगर सोत्‍तुर मंळसा अन्द जित्‍ता आगोद अच ईलच, रा मसीह भी जित्‍ता आगीदील;
1CO 15:14 अदिक अगर मसीह जित्‍ता आगीदील, रा नाम्द प्रचार माळोद भी बेकार आद, अदिक नीम्द विश्वास भी बेकार आद.
1CO 15:15 इदुर से भी वाळुसकु नाव परमेश्वर उन ख्वाटा गवाह ठहरूसेव; यतिकी नाव परमेश्वर उन बारा दा ईद गवाही कोट्टेव कि आव मसीह इक जित्‍ता माळदुन, लेकीन सोतकु मंळसा सही दा जित्‍ता माळ सकालुर रा आव मसीह अक भी जित्‍ता माळीदील.
1CO 15:16 अदिक अगर मुर्दा जित्‍ता आगालव, रा मसीह भी जित्‍ता आगीदील;
1CO 15:17 अदिक अगर मसीह जित्‍ता आगीदील, रा नीम्द विश्वास बेकार आद, अदिक नीव ईग ताका तान पापगोळ्द भागीदार आईर.
1CO 15:18 बल्‍की जो मसीह मा विश्वास माळतार आंदुर भी सोतोग्यार.
1CO 15:19 अगर नाव सिर्फ ईदा जीवन दा मसीह देल आशा ईटतेव रा नाव सब मंळसागोळ देल यक्कुल अभागा आयेव.
1CO 15:20 लेकीन सही दा मसीह सोत्‍तुर दा टु जित्‍ता आग्यान, अदिक जो सोतोग्यार आंदुर भी जित्‍ता आदार ईद पयला प्रमाण हुन.
1CO 15:21 यतिकी याग ऊंद मंळसा अन्द द्वारा मृत्यु बत्‍त, रा ऊंद मंळसा अन्द अच द्वारा सोत्‍तुर मंळसा अन्द पुनरूत्थान भी बत्‍त.
1CO 15:22 अदिक ह्यांग आदम सब मा मृत्यु तंदुन, हांग अच मसीह भी विश्वास ईटावाळेर इक जित्‍ता माळ्यान,
1CO 15:23 लेकीन हर ऊंद तान तान पारी देल: पयला मसीह जित्‍ता आदुन, बाक मसीह अन्द वापस बंदुर देल आऊन मा विश्वास माळावाळेर लॉकुर जित्‍ता आदार.
1CO 15:24 इदुर बाद्दा अन्त आदीत. आ समय सब प्रधान माळावाळा दुष्टआत्मा अदिक पुरा अधिकार. अदिक सामर्थ्य अन्द मसीह अन द्वारा अन्त माळकु आदीत अदिक राज्य अक परमेश्वर आप्प उन कय दा सौप्स कोंडान.
1CO 15:25 यतिकी यागासताका आव तान दुश्मनी ईटावाळेरी तान काल इन ल्यालमा तरतीदील, आगासताका मसीह अन्द राज्य माळोद जरूरी आद.
1CO 15:26 सब से आखरी दुश्मनी माळावाळा जो नाश माळकु आदान, अद मृत्यु हुन.
1CO 15:27 यतिकी पवित्र शास्त्र अनतद, “परमेश्वर सप्पा येनारा आऊन काल इन ल्यालमा माळ कोंडुन,” लेकीन याग आव अनतान कि सप्पा येनारा मसीह अन्द हात्‍ती माळकु आग्याद रा प्रत्यक्ष आद कि यार आऊन हात्‍ती माळ कोंडुन, परमेश्वर खुद अलग ईत्‍तुन.
1CO 15:28 अदिक याग सप्पा हात्‍ती आगेदार, रा पारा खुद अच परमेश्वर उन हात्‍ती आगेदान, याव सप्पा येनारा आऊन हात्‍ती माळ कोंडुन, यदुर देल कि परमेश्वर सब वस्तुगोळ मा पुरा तरीका देल राज्य माळ्यान.
1CO 15:29 ईदारा जो लॉकुर सोतकु मंळसा अन्द साटी बपतिस्मा ताकोमतार आंदुर येन माळ्यार? अगर सोतकु मंळसा जित्‍ता आगालुर रा बाक येती आंदुर साटी बपतिस्मा ताकोमतार?
1CO 15:30 अदिक नाव भी येती हर घळी जोखिम दा बिदकु ईरतार?
1CO 15:31 हे वार्टुरा अदिक आकतींगेरा, नानी आ घमण्ड इन किर्‍या जो नाम्द मसीह यीशु दा ना नीम्द बारा दा माळतीन कि ना हर दिन सायतीन.
1CO 15:32 अगर ना मंळसा अन्द रीति मा इफिसुस दा आळी अन पशुगोळ घाई लळाई आळदीन रा नानी येन लाभ आत? अगर मुर्दा जित्‍ता माळकु आगालव, “रा बरी, तिनी-कुडी, यतिकी नाळ रा सायोद अच आद.”
1CO 15:33 ध्वाका तिनबाळी, “बुरा संगत वळ्लीद चरित्र अक बिगळुस बुळतद.”
1CO 15:34 सही विचार माळोद सुरू माळी अदिक पाप इक बिट बुळी; यतिकी येनारा हिंग आर जो परमेश्वर उक जान्सालुर, ना नीमी शर्मिंदा माळोर साटी ईद अनतीन.
1CO 15:35 ईग यावारा ईद अंदान, “मुर्दा या रीति देल जित्‍ता आगताव, अदिक ह्यांग मय इन सांगुळ बरताव?”
1CO 15:36 हे निर्बुद्धी! जो येनारा नी बोऊसत्या, यागासताका आव सायालुन जित्‍ता माळकु आगालुन.
1CO 15:37 अदिक जो नी बोऊसत्या, ईद अद मार्र आलच जो वाळुसावाळा आद, लेकीन सिर्फ दाना हुन, चाहे गोदी इन चाहे यातोदु अदिक अनाज इन.
1CO 15:38 लेकीन परमेश्वर तान इच्छा अन्द अनुसार आऊक मय कोळतान, अदिक हर ऊंद बींजा अक अदुर्द विशेष मय.
1CO 15:39 सब मय ऊंद घाई ईलच: मंळसागोळ्द मय अलग आद, पशुगोळ्द मय अलग आद; पक्षीगोळ्द मय अलग आद; मेनगोळ्द मय अलग आद.
1CO 15:40 स्वर्गीय मय आद अदिक अलग पार्थिव मय भी आद लेकीन स्वर्गीय मयगोळ्द तेज अलग आद, अदिक पार्थिव इन अलग.
1CO 15:41 सुर्य अन्द तेज अलग आद, चंद्रमा अन्द तेज अलग आद, अदिक तारागनगोळ्द तेज अलग आद, यतिकी ऊंद तारा से दुसरा तारा अन्द तेज दा फरक आद.
1CO 15:42 मुर्दागोळ्द जित्‍ता आगोद भी हिंग अच आद. मय नाशवान दशा दा बोऊस्कु आगतद अदिक अविनाशी रूप दा जित्‍ता आगतद.
1CO 15:43 अद अपमान इन सांगुळ बोऊस्कु आगतद, अदिक तेज इन सांगुळ जित्‍ता आगतद; निर्बलता अन्द सांगुळ नळ्सकु आगतद. अदिक सामर्थ्य इन सांगुळ जित्‍ता आगतद.
1CO 15:44 स्वाभाविक मय नळ्सकु आगतद, अदिक आत्मिक मय जित्‍ता आगतद: जब कि स्वाभाविक मय आद, रा आत्मिक मय भी आद.
1CO 15:45 हिंग अच शास्त्र दा लिख्सकु आद, कि “पयला मंळसा मतलब आदम जित्‍ता प्राणी आदुन” अदिक आखरी आदम, जीवनदायक आत्मा आदुन.
1CO 15:46 लेकीन पयला आत्मिक मय ईला ईरोद पर स्वाभाविक ईरोद, इदुर बाद्दा आत्मिक आत.
1CO 15:47 पयला मंळसा आदम पृथ्वी टु मतलब मुण्ण इन ईरोन; दुसरा स्वर्गीय आन.
1CO 15:48 ह्यांग आव मुण्ण इनव ईरोन, हांग अच आंदुर भी आर जो मुण्ण इनोर आर; अदिक ह्यांग आव स्वर्गीय आन, हांग अच आंदुर भी आर जो स्वर्गीय आर.
1CO 15:49 अदिक ह्यांग नाव आऊन मय धारण माळदेव जो मुण्ण इन ईरोद हांग अच आ स्वर्गीय अन्द मय भी धारण माळेव.
1CO 15:50 हे वार्टुरा अदिक आकतींगेरा, ना ईद अनतीन कि मास अदिक खुन परमेश्वर उन राज्य दा प्रवेश माळ सकालव, अदिक ना नाशवान अविनाशी इन प्रवेश आग सकतद.
1CO 15:51 नोळी, ना नीम से भेद इन मात अनतीन: नाव सप्पा मुंदुर सायालेव, लेकीन सब बदलुसेव,
1CO 15:52 अदिक ईद क्षण भर दा, पतनी होडुतेला अच आखरी तुरही ऊएतेला अच ईतीदान. यतिकी तुरही ऊयकु आदीत अदिक मुर्दा अविनाशी दशा दा नेगुकु आदाव, अदिक नाव बदलुसेदव.
1CO 15:53 यतिकी जरूरी आद कि ईद नाशवान मय अविनाश इक हाक्‍क कोमुल, अदिक ईद मरनहार मय अमरता अक हाक्‍क कोमुल.
1CO 15:54 याग अद वचन जो शास्त्र दा लिख्सकु आद पुरा आगेदीत: अदिक याग ईद नाशवान अविनाश इक हाक्‍क कोंडीत, अदिक ईद मरनहार अमरता अक हाक्‍क कोंडीत, मृत्यु इन अन्त आत अदिक विजय प्राप्त आत.
1CO 15:55 हे मृत्यु, अपमान जय यल ईत्‍त? हे मृत्यु, अपमान डंक यल ईत्‍त?
1CO 15:56 मृत्यु इन डंक पाप आद, अदिक पाप इन बल मूसा अन्द नियम शास्त्र टु बरतद.
1CO 15:57 लेकीन परमेश्वर उन धन्यवाद आगुल, जो नाम्द प्रभु यीशु मसीह अन्द द्वारा नामी जयवन्त माळतान.
1CO 15:58 इदुरसाटी हे नान प्रिय वार्टुरा अदिक आकतींगेरा, मजबूत अदिक अटल ईरी, अदिक प्रभु उन क्याल्सा दा सदा वाळुसतेला होगी, यतिकी ईद जान्सतीर कि नीम्द मेहनत प्रभु दा बेकार हैलेच.
1CO 16:1 ईग आ चन्दा अन्द बारा दा जो परमेश्वर उन पवित्र यहूदा लॉकुर साटी माळकु आगोद, ह्यांग आग्या ना गलातिया अन्द मंडलीगोळ इक कोट्टीन, हांग अच नीव भी माळी.
1CO 16:2 हप्ता अन्द पयला दिन नीम दा टु हर ऊंद तान आमदनी अन्द अनुसार येनारा तान हात्‍ती ईटकु ईरूल कि नान बंदुर मा चन्दा माळोद बिळबाळुल.
1CO 16:3 अदिक याग ना बराईन, रा यारी नीव चाहासीर आंदरी ना चिट्ठी गोळ कोटकु कळु बुळाईन कि नीम्द दान यरूशलेम पहुचुस बुळुल.
1CO 16:4 अगर नांद भी होगोद उचित आत, रा आंदुर नांद सांगुळ होदार.
1CO 16:5 ना मकिदुनिया आगकु नीम्द हात्‍ती बराईन, यतिकी नानी मकिदुनिया आगकु होगोद अच आद.
1CO 16:6 लेकीन संभव आद कि ना नीम्द सांगुळ ठहरूसाईन अदिक सोळी इन मौसम दा भी नीम्द सांगुळ ईल कढाईन, आग या दिशा दी नांद होगोद आगुल आ दिशा दी नीव नानी पहुचुस बुळेतीर.
1CO 16:7 यतिकी ना ईग हादी दा नीम से भेंट माळोद चाहसालीन; लेकीन नानी आशा आद कि अगर प्रभु चाहस्यान रा येनारा समय ताका नीम्द सांगुळ ईराइन.
1CO 16:8 लेकीन ना पिन्तेकुस्त इन हाब्ब ताका इफिसुस दा ईराइन,
1CO 16:9 नान साटी अल ऊंद धोळ अदिक उपयोगी दरवाजा तेरकु आद, अदिक विरोधी हापाळ सा आर.
1CO 16:10 अगर तीमुथियुस होट बंदान, रा नोळेतीर कि आऊक नीम्द अल सम्मान सिकुल; यतिकी आव नान घाई प्रभु उन क्याल्सा माळतान.
1CO 16:11 इदुरसाटी याऊ आऊक बेकार सम्सबाळी, लेकीन अदरी खुशी देल ईपाटी पोहचुस बुळी कि नान हात्‍ती होट बरूल; यतिकी ना आऊंद हादी नोळेतीन कि आव वार्टुर सांगुळ बरूल.
1CO 16:12 वार्ट अपुल्लोस से ना हापाळ विनती माळदीन कि नीम्द हात्‍ती वार्टगोळ सांगुळ होगाता; लेकीन आव ई समय होगोद येनु भी इच्छा माळीदिल, लेकीन याग मवका सिक्‍कीत आग होट बंदान.
1CO 16:13 जागस्तेला ईरी, विश्वास दा स्थिर ईरी, हिम्मत ईटी, अदिक बलवन्त आगी.
1CO 16:14 जो येनारा माळतीर प्यार देल माळी.
1CO 16:15 हे वार्टुरा, नीव स्तिफनास उन घराना अक जान्सतीर कि आंदुर अखाया अन्द पयला विश्वासी उर, अदिक परमेश्वर उन पवित्र लॉकुर्द स्यावा अन्द साटी तयार ईरतार.
1CO 16:16 इदुरसाटी ना नीम से विनती माळतीन कि हिंग माळावाळेर्द हात्‍ती ईरी, अदिक हर ऊंद मंळसा अन्द जो ई क्याल्सा दा मेहनती अदिक सहकर्मी आन.
1CO 16:17 ना स्तिफनास अदिक फूरतूनातुस अदिक अखईकुस उन बंदुर देल खुश आईन, यतिकी आंदुर नीम्द घट इक पुरा माळदुर.
1CO 16:18 आंदुर नानी अदिक नीम्द आत्मागोळ इक चैन कोट्टुर, इदुरसाटी हिंग माळावाळेर इक मान्सी.
1CO 16:19 आसिया इन मंडलीगोळ्द दी टु नीमी नमस्कार; अक्विला अदिक प्रिस्का अन्द अदिक आंदुर्द मान्ना अन्द मंडली अन्द भी नीमी प्रभु दा हापाळ हापाळ नमस्कार!
1CO 16:20 सप्पा विश्वासी वार्टुर्द नीमी नमस्कार. पवित्र चुम्मा आबुर दाबुर इक कुतक्या अक हचकु आपस दा नमस्कार माळी.
1CO 16:21 ना पौलुस उन तान कय देल लिख्सकु ईरोद नमस्कार.
1CO 16:22 अगर यावारा प्रभु से प्यार ईला ईटुल रा आऊन मा हाय. हे नाम प्रभु, बर!
1CO 16:23 प्रभु यीशु उन अनुग्रह नीम मा आगतेला ईरूल.
1CO 16:24 नांद प्यार मसीह यीशु दा नीव सप्पा मुंदुर सांगुळ ईरूल. आमीन.
2CO 1:1 पौलुस उन दी टु जो परमेश्वर उन इच्छा देल मसीह यीशु उन प्रेरित हुन, अदिक वार्ट तीमुथियुस उन दी टु परमेश्वर उन आ मंडली इन हेसुर, जो कुरिन्थुस दा आद, अदिक सप्पा अखाया नगर इन सप्पा पवित्र लॉकुर हेसुर:
2CO 1:2 नाम आप्प परमेश्वर अदिक प्रभु यीशु मसीह अन्द दी टु नीमी अनुग्रह अदिक शांती सिकतेला ईरूल.
2CO 1:3 नामव प्रभु यीशु मसीह अन्द परमेश्वर अदिक आप्प उन धन्यवाद आगुल, जो दया अन्द आप्प अदिक सप्पा प्रकार इन शांती इन परमेश्वर हुन
2CO 1:4 आव नामव सप्पा क्लेशगोळ दा दिलासा कोळतान; ताकी नाव आ दिलासा अन्द कारण जो परमेश्वर नामी कोळतान, आंदरी भी दिलासा कोळ सकुल जो यातारा प्रकार इन क्लेश दा इतीदार.
2CO 1:5 यतिकी ह्यांग मसीह अन्द दुखगोळ दा नाव यक्कुल सहभागी आगतेव, हांग अच नाव शांती दा भी मसीह अन्द द्वारा यक्कुल सहभागी आगतेव.
2CO 1:6 अगर नामी क्लेश सिकतद, रा ईद नीम्द शांती अदिक उद्धार इन साटी हुन; अदिक अगर शांती सिकतद, रा ईद नीम्द शांती इन साटी हुन; यदुर प्रभाव देल नीव धीरज इन सांगुळ आ क्लेशगोळ इक सहन माळ कोमतीर, यवरी नाव भी सहन माळतेव.
2CO 1:7 नाम्द आशा नीम्द बारा दा मजबूत आद; यतिकी नाव अरूतेव कि नीव ह्यांग नाम दुखगोळ दा, हांग अच शांती दा भी सहभागी आईर.
2CO 1:8 हे वार्टुरा अदिक आकतींगेरा, नाव चाहसालेव कि नीव नाम आ क्लेश देल अनजान ईरी जो आसिया प्रदेश दा नाम मा बित्‍त; नाव ईत्‍ता भारी बोझ देल वत्‍तेगीदेव, जो नाम सामर्थ्य अन व्हार्या ईरोद, ईल ताका कि नाव जीवन देल भी कय तोळकु कुर्तीदेव.
2CO 1:9 अदिक नाव तान मन दा समसेगीदेव कि नाम मा मृत्यु उन आग्या आगेग्याद. ताकी नाव तान भरोसा ईटतीदिल बल्‍की आ परमेश्वर उन जो सोत्‍तुर इक जित्‍ता माळतान.
2CO 1:10 आवा नामी मृत्यु उन हिंग धोळ्द संकट देल ऊळ्सदुन, अदिक ऊळस्यान; अदिक आऊन मा नामी ईद आशा आद कि आव मुंद भी ऊळ्सतेला ईत्‍तान.
2CO 1:11 नीव भी ऊंद आगकु प्रार्थना अन्द द्वारा नाम सहायता माळीर कि जो वरदान नामी हापाळ मुंदुर द्वारा सिक्त, अदुर कारण हापाळ लॉकुर नाम दी टु धन्यवाद माळुल.
2CO 1:12 यतिकी नाव तान अंतर मन इन ई गवाही मा घमण्ड माळतेव, कि दुनिया दा अदिक विशेष माळकु नीम न्याड्या, नाम चरित्र परमेश्वर उन योग्य हिंग पवित्रता अदिक सच्चाई सहित ईरोद, जो शारीरिक ग्यान देल ईला लेकीन परमेश्वर उन अनुग्रह अन्द सांगुळ ईरोद.
2CO 1:13 नाव अदा लिख्सतेव जो नीव वाचुस या सम्स सकतीर. लेकीन बाक भी नीव नामी थ्वाळासा सम्सतीर.
2CO 1:14 अदिक नानी आशा आद कि या दिन प्रभु यीशु मसीह नीम हात्‍ती बंदान आ दिन नीव घमण्ड इन दिनगोळ दा अदिक अन्त ताका भी मान्सतेला ईत्‍तीर.
2CO 1:15 ईदा भरोसा देल ना चाहासीन कि पयले नीम हात्‍ती बराईन कि नीमी दुगना खुशी सिकुल;
2CO 1:16 ना सोचदिन कि नीम हात्‍ती टु आगकु मकिदुनिया नगर इक होगतेला, नीम से सीकाईन, अदिक बाक मकिदुनिया नगर टु नीम हात्‍ती बराहोती; मात्‍त सीकाईन; अदिक नीव नानी यहूदीगोळ दी थ्वाळासा दुर ताका सार माळी.
2CO 1:17 इदुरसाटी ना जो ईद इच्छा माळीदिन रा येन ना अनुचित ईरीन? या जो माळोद चाहासतीन येन मय इन अनुसार माळोद चाहासतीन कि ना मात दा “हव, हव” भी माळाईन अदिक थ्वाळासा समय दा “ईला ईला” भी माळाईन?
2CO 1:18 परमेश्वर खरा गवाह आन कि नाम आ बातणी दा जो नीम से अंदुन “हव” अदिक “ईला” येढ्ढु शब्द सिकालव.
2CO 1:19 यतिकी परमेश्वर उन पार यीशु मसीह यार्द नाम द्वारा मतलब नान अदिक सिलवानुस अदिक तीमुथियुस उन द्वारा नीम न्याड्या दा प्रचार आत, अदुर दा “हव” अदिक “ईला” येढ्ढु ईला ईरव, इदुरसाटी परमेश्वर नामव हव हुन.
2CO 1:20 यतिकी परमेश्वर उन यास भी वादा आव, अव सप्पा अदुर दा “हव” इन सांगुळ आव. इदुरसाटी आऊन द्वारा “आमीन” भी आत कि नाम द्वारा परमेश्वर उन महिमा आगुल.
2CO 1:21 अदिक जो नामी नीम सांगुळ मसीह दा ऊंद माळकु मजबूत माळतान, अदिक याव नामी अभिषेक माळ्यान आवा परमेश्वर हुन,
2CO 1:22 नाव आऊन नव हुयेव याव नाम मा आऊन आगोद छाप हच्यान अदिक बयाना दा आत्मा अक नाम मनगोळ दा कोटान. जो भविष्य दा सिकोद आद.
2CO 1:23 ना परमेश्वर उक गवाह माळकु अनतीन कि ना ईगासताका कुरिन्थुस दा इदुरसाटी बंदिदील, कि ना ईला चाहासीन कि नीमी बोयाईन.
2CO 1:24 ईद ईला कि नाव विश्वास इन बारा दा नीम मा प्रभुता जतुसोद चाहासतेव; लेकीन नीम खुशी दा सहायक आयेव यतिकी नीव विश्वास देल अच संची ईरतीर.
2CO 2:1 ना तान मन दा ईदा ठान्स कोंडीदिन कि बाक मात्‍त नीम हात्‍ती नीमी उदास माळली बरतीदील.
2CO 2:2 यतिकी ना अगर नीमी उदास माळाईन, रा नानी खुशी कोळावाळा याव ईत्‍तान, सिर्फ आवा यारी ना उदास माळदीन?
2CO 2:3 अदिक ना ईदा मात नीमी इदुरसाटी लिख्सदीन कि यागल्यारा हिंग आगबाळुल कि नान बंदुर मा, यार देल नानी खुशी सीक पायजे नानी आंदुर से उदासी सिकुल; यतिकी नानी नीम सप्पा मुंदुर मा ई मात इन भरोसा आद कि जो नान खुशी आद, अदा खुशी नीम सप्पा मुंदुर्द भी आद.
2CO 2:4 धोळ क्लेश अदिक मन इन दुख देल ना हापाळ सा नीर कण्णगोळ दा टु वाहुसकु नीमी लिख्सीदीन, अद इदुरसाटी ईला कि नीव उदास आगी लेकीन इदुरसाटी कि नीव नान आ धोळ प्यार इक अर्त कोमी, जो नानी नीम से आद.
2CO 2:5 अगर यावारा नीमी दुख कोटान, रा नानी का ईला बल्‍की ना आऊन सांगुळ यक्कुल दुख इन व्यवहार माळालीन थ्वाळा-थ्वाळा नीम सप्पा मुंदरी भी उदास माळ्यान.
2CO 2:6 ईत्‍ता मंळसा अन्द साटी ईद दण्ड जो वार्टुर दा टु हापाळ मुंदुर कोटार, हापाळ आद.
2CO 2:7 इदुरसाटी ईदुर से वळ्लीद ईद आद कि आऊन अपराध माफ माळी अदिक आऊक दिलासा कोळी, ईदारा हिंग आगबाळुल आ मंळसा हापाळ उदासी दा मुळकेगुल.
2CO 2:8 ई कारण ना नीम से विनती माळतीन कि आऊक तान प्यार इन एहसास तोरसी.
2CO 2:9 यतिकी ना इदुरसाटी भी लिख्सीदीन कि नीमी वळ्लीद देल परकुस कोमाईन कि नीव नान सप्पा मातगोळ मानसोर साटी तयार आईर का ईला.
2CO 2:10 अगर नीव यारीकारा माफ माळतीर रा आऊक ना भी माफ माळतीन, यतिकी ना भी जो येनारा माफ माळीन, अगर हिंग माळीन, रा नीम कारण मसीह अन्द जागा दा ईतकु माफ माळीन
2CO 2:11 कि नाम मा शैतान उन दावपेच नळु बाळुल, यतिकी नाव आऊन युक्तिगोळ देल अनजान हैलेच.
2CO 2:12 याग ना मसीह अन्द खुशखबरी केळ्सली त्रोआस नगर दा बंदीन, अदिक प्रभु नान क्याल्सा अक पुरा माळोर साटी ऊंद दरवाजा तेर्द बुट्टुन,
2CO 2:13 रा नान मन इक चैन सक्कीदील, यतिकी ना तान वार्ट तीतुस उक अल नोळीदील; इदुरसाटी आंदुर से विदा ताकोमकु ना मकिदुनिया नगर इक होटोदिन.
2CO 2:14 लेकीन परमेश्वर उन धन्यवाद आगुल जो मसीह दा हमेशा नामी जय इन हाब्ब दा हुळकु वयाळतान, अदिक मसीह अन्द ग्यान इन वास नाम द्वारा सप्पा जागा दा फैलुसतान.
2CO 2:15 यतिकी नाव परमेश्वर उन हात्‍ती उद्धार ताकोमावाळेर अदिक नाश आगावाळेर येढ्ढु मुंदुर साटी मसीह अन्द वास हुयेव.
2CO 2:16 थ्वाळासा लॉकुर साटी रा सोत्‍तुर घाई मृत्यु उन वास, अदिक हापाळ सा लॉकुर साटी जीवन इन घाई जीवन इन वास. ई मातगोळ्द लायक याव आन?
2CO 2:17 यतिकी नाव आ हापाळ मुंदुर घाई हैलेच जो तान फायदा साटी परमेश्वर उन वचन इस्तेमाल माळतार; परमेश्वर नामी कळ्यान. मन इन सच्चाई देल अदिक परमेश्वर उन सेवक आगोद नाता देल नाव परमेश्वर उक उपस्थित जान्सकु मसीह दा माताळतेव.
2CO 3:1 येन नाव मात्‍त तान बळाई माळली हत्‍तेव? या मात्‍त नामी दुसरा लॉकुर घाई सिफारीश इन चिट्ठी गोळ नीम हात्‍ती तरोद या नीम से ताकोमोद आद?
2CO 3:2 नाम चिट्ठी नीवा हुईर, जो नाम दिलगोळ मा लिख्सकु आद अदिक अदरी सप्पा मंळसा अरूतार अदिक वाचुसतार.
2CO 3:3 ईद प्रगट आद कि नाम नीम न्याड्या दा सेवकाई इन कारण देल नीव मसीह अन्द चिट्ठी हुईर. अदिक जो स्याही देल ईला लेकीन जित्‍ता परमेश्वर उन आत्मा देल, कल्ल इन पाटीगोळ मा ईला, लेकीन दिल इन मास रूपी पाटीगोळ मा जो मसीह लिखस्यान.
2CO 3:4 नामी मसीह अन्द द्वारा परमेश्वर मा भरोसा आद अदा कारण नाव हिंग अनतेव.
2CO 3:5 नाव ई लायक हैलेच कि तान दी टु यातारा क्याल्सा माळ सक्केव, लेकीन नाम लायकीयत परमेश्वर उन दी टु आद,
2CO 3:6 परमेश्वर नामी व्हाशोद वाचा अन्द सेवक आगोद लायक भी माळदुन, जो लिख्सद व्यवस्था अन्द नियम देल ईला पर आत्मा अन्द नियम देल आद; यतिकी नियम कोंतद, लेकीन आत्मा जित्‍ता माळतद.
2CO 3:7 मूसा अन्द व्यवस्था यऊर अक्षर कल्लगोळ मा अगुळकु आगीदव, ईल ताका चमकदार आदव कि मूसा अन्द मार्रा मा ऊजुळ इन कारण जो गोर्त भी आगतोगोद, इस्त्राएली लॉकुर आऊन मार्रा मा दृष्टी माळ ईला सकोर.
2CO 3:8 ईद गौरव मुरजुसेत रा पवित्र आत्मा अन्द स्यावा अदिक यक्कुल चमकदार येती आगतीदील?
2CO 3:9 याग मृत्यु दण्ड कोळोद क्याल्सा चमकदार आद, रा उद्धार कोळोद क्याल्सा याट चमकदार ईत्‍तीत?
2CO 3:10 अदिक जो चमकदार ईरोद, अद भी आ तेज इन कारण जो अदुर से यक्कुल चमकदार ईरोद, हाळोद तेज पचेत्याद अदिक व्हाशोद तेज यक्कुल चमकदार आगेत्याद.
2CO 3:11 यतिकी याग जो गोर्त आग्त होगोद अद चमकदार ईरोद, रा अद जो संची ईत्‍तीत मात्‍त यक्कुल चमकदार येती ईरतीदील?
2CO 3:12 इदुरसाटी हिंग आशा ईटकु नाव हिम्मत इन सांगुळ माताळतेव,
2CO 3:13 अदिक मूसा अन्द घाई ईला, याव तान बाय मा पळदा माळ बुटीदुन ताकी इस्त्राएली लॉकुर आ गोर्त आगावाळा तेज इन अन्त इक नोळ सकबाळुल.
2CO 3:14 लेकीन आंदुर मतिमन्द आगेदुर, यतिकी ईगासताका हाळोद नियम वाचुसाहोती आंदुर दिलगोळ मा अदा पळदा बिदकु ईरतोगोद, याग यावारा मंळसा मसीह दा होट बरतान आग अद पळदा येदोगतद.
2CO 3:15 ईगासताका यागल्यारा भी मूसा अन्द किताब वाचुसकु आगतद, रा आंदुर्द दिलगोळ मा पळदा बिदकु ईरतद.
2CO 3:16 लेकीन याग भी आंदुर्द दिल प्रभु उन दी तिर्गित, आग अद पळदा येदोदीत.
2CO 3:17 प्रभु रा आत्मा हुन: अदिक येल्यारा भी प्रभु उन आत्मा आद अल आजादी आद.
2CO 3:18 लेकीन याग नाव सप्पा मुंदुर्द खुला चेहरा देल प्रभु उन तेज इत्‍ता प्रकार प्रगट आगतद, ह्यांग आरसा दा, रा प्रभु उन द्वारा जो आत्मा आद, नाव अदा तेजस्वी रूप दा अंश अंश माळकु बदलुस्त होगतेव.
2CO 4:1 इदुरसाटी याग नाम मा हिंग दया आत कि नामी ईद स्यावा सिक्त, रा नाव हिम्मत बिळालेव.
2CO 4:2 लेकीन नाव शरम इन होचकु क्याल्सागोळ्द त्याग माळ बुटेव, अदिक ना चतुराई देल नळुतेव, अदिक ना परमेश्वर उन वचन दा मिलावट माळतेव; लेकीन सच्चाई इक प्रगट माळकु, परमेश्वर उन मुंद हर ऊंद मंळसा अन्द अंतर मन दा तान भलाई कुर्सतेव.
2CO 4:3 लेकीन ईद खुशखबरी जो नाव केळ्सतेव इदुर मा पळदा बिदकु आद, रा ईद नाश आगावाळेर दा साटी बिदकु आद.
2CO 4:4 अदिक आ अविश्वासीगोळ्द साटी, यार्द बुद्धी ई दुनिया अन मय कुढ्ढ माळ बुटान, ताकी मसीह जो परमेश्वर उन प्रतिरूप हुन, आऊन चमकदार खुशखबरी इन उजुळ आंदुर नोळ सकबाळुल.
2CO 4:5 यतिकी नाव तान तान इक ईला, लेकीन मसीह यीशु उक प्रचार माळतेव कि आव प्रभु हुन; अदिक तान बारा दा ईद अनतेव कि नाव खुद यीशु मसीह नव सेवक हुयेव.
2CO 4:6 इदुरसाटी कि परमेश्वर अच हुन, याव अंदुन, “अंधार दा टु ज्योति चमकुसुल,” अदिक अदा नाम दिलगोळ दा चमकुस्त कि परमेश्वर उन महिमा अन्द पयचान इन ज्योति यीशु मसीह अन्द मार्रा मा टु प्रकाशमान आगुल.
2CO 4:7 लेकीन नाव जो मुण्ण इन गळग्यागोळ घाई आयेव यदुर दा अद आत्मिक धन ईटकु आद कि ईद तोरसोर साटी कि ईद असीम सामर्थ्य नाम दी टु ईला, बल्‍की परमेश्वर उन दी टु अच हुन.
2CO 4:8 नाव नाकु दी टु क्लेश रा भोग्सतेव, लेकीन मुसीबत दा बिळालेव; नीर उपाय रा आयेव, पर निराश आगालेव;
2CO 4:9 सतुस्कु रा आगतेव, पर त्यागस्कु आगालेव; केडुकु रा आगतेव; लेकीन नाश आगालेव.
2CO 4:10 नाव यीशु उन मृत्यु उक तान मय मा हर समय हुडुकु वयाळतेव कि यीशु उन जीवन भी नाम मय दा प्रगट आगुल.
2CO 4:11 यतिकी नाव जित्‍ता जी हमेशा यीशु उन कारण मृत्यु उन कय दा सोपस्कु आगतेव कि यीशु उन जीवन भी नाम मरनहार मय दा प्रगट आगुल.
2CO 4:12 ई प्रकार सायोद कार्य नाम मा प्रभाव हाकतद अदिक जीवन नीम मा.
2CO 4:13 इदुरसाटी कि नाम दा अदा विश्वास इन आत्मा आद, यदुर बारा दा शास्त्र दा लिख्सकु आद, “ना विश्वास माळदीन, इदुरसाटी ना माताळदिन.” इदुरसाटी नाव भी विश्वास माळतेव, इदुरसाटी माताळतेव.
2CO 4:14 यतिकी नाव जान्सतेव कि याव प्रभु यीशु मसीह अक जित्‍ता माळदुन, आवा नामी भी मसीह दा भागी जान्सकु जित्‍ता माळ्यान, अदिक नीमी तान मुंद उपस्थित माळ्यान.
2CO 4:15 यतिकी सप्पा वस्तुगोळ नीम साटी हुव, ताकी अनुग्रह हापाळ मुंदुर द्वारा यक्कुल आगकु परमेश्वर उन महिमा साटी धन्यवाद कोळोद यक्कुल वाळुसित.
2CO 4:16 इदुरसाटी नाव हिम्मत बिळालेव; यतिकी नाम मय इन नाश आग्त ईरतद, तरी भी नाम बुळ्क इन मंळसातत्व दिन रोज व्हाशोद आग्त होगतद.
2CO 4:17 यतिकी नाम घळी तिमुर्द स्यांळ्दतुसा क्लेश नाम साटी हापाळ महत्वपुर्ण अदिक अनन्त महिमा उत्पन्न माळ्त होगतद;
2CO 4:18 अदिक नाव रा नोळ्द वस्तुगोळी ईला लेकीन अनदेखा वस्तुगोळी नोळ्त ईरतेव; यतिकी नोळ्द वस्तुगोळ थ्वाळासा अच दिन साटी आव, लेकीन अनदेखा वस्तुगोळ अनन्त काल ताका बन्सकु ईरताव.
2CO 5:1 यतिकी नाव जान्सतेव कि याग नाम पृथ्वी माकळोद ड्यारा घाई मान्ना केडुकु आदीत, रा नामी परमेश्वर उन दी टु स्वर्ग मा ऊंद हिंग भवन सिक्‍कीत जो मान्ना कय देल माळकु ईरतीदील, लेकीन अनन्तकालीन आद.
2CO 5:2 ईदुर दा रा नाव यक्कुल श्वास ताकोमकु माताळतेव अदिक हापाळ लालसा ईटतेव कि तान स्वर्गीय मान्ना अक हाक्‍क कोंडेव
2CO 5:3 कि ईदुर हाकदुर देल नाव दंगदंगा सीक बाळुल.
2CO 5:4 अदिक नाव ई ड्यारा दा ईरतेला बोझ देल वोतकु श्वास ताकोमतेला माताळ्त ईरतेव, यतिकी नाव ईळसोद ईला बल्‍की हाक्कोद चाहासतेव, ताकी अद जो मरनहार आद जीवन दा मुळकेगुल.
2CO 5:5 याव नामी ईदा मात इन साटी तयार माळ्यान आव परमेश्वर हुन, याव नामी बयाना दा आत्मा भी कोटान.
2CO 5:6 इदुरसाटी नाव हमेशा हिम्मत कटकु ईरतेव अदिक ईद जान्सतेव कि यागासताका नाव मय दा ईरतेव, आगासताका प्रभु से ब्यार्र आयेव.
2CO 5:7 यतिकी नाव रूप इक नोळकु ईला, लेकीन विश्वास देल नळुतेव.
2CO 5:8 इदुरसाटी नाव हिम्मत कटकु ईरतेव, अदिक मय टु ब्यार्र आगकु प्रभु उन सांगुळ ईरोद मात्‍त यक्कुल वळ्लीद सम्सतेव.
2CO 5:9 ईदुर कारण नाम मन इन उमंग ईद आद कि चाहे सांगुळ ईत्‍तेव चाहे ब्यार्र ईत्‍तेव, लेकीन नाव आऊक भाऊस्त ईत्‍तेव.
2CO 5:10 यतिकी जरूरी आद कि नाव सप्पा मुंदुर्द हाल मसीह अन्द न्याय आसन इन मुंद तेर्दोगुल, कि हर ऊंद मंळसा तान तान वळ्लीद बुरा क्याल्सागोळ्द बदला जो आव मय इन द्वारा माळ्यान सिकुल.
2CO 5:11 इदुरसाटी प्रभु उन अंज्क मान्सकु नाव लॉकुरी समझुसतेव; लेकीन परमेश्वर मा नाम हाल प्रगट आद, अदिक नान आशा ईद आद कि नीम विवेक मा भी प्रगट आगीदाद.
2CO 5:12 नाव तरी भी तान बळाई नीम मुंद माळालेव, बल्‍की नाव तान बारा दा नीमी घमण्ड माळोद मवका कोळतेव कि नीव आंदरी उत्‍तर कोळ सकी, जो मन मा ईला बल्‍की दिखावटी मातगोळ मा घमण्ड माळतार.
2CO 5:13 अगर नाव बेसुध आयेव रा परमेश्वर उन साटी, अदिक अगर चैतन्य आयेव रा नीम साटी आयेव.
2CO 5:14 यतिकी मसीह अन प्यार नामी मजबुर माळ बुळतद; इदुरसाटी कि नाव ईद सम्सतेव कि याग ऊंद सप्पा मुंदुर साटी सोत्‍तुन रा सप्पा सोत्‍तुर.
2CO 5:15 अदिक आव ई निमित्त सप्पा मुंदुर साटी सोत्‍तुन कि जो जित्‍ता आर, आंदुर मुंद इक तान साटी जित्‍ता ईरबाळुल लेकीन आऊन साटी जो आंदुर साटी सोत्‍तुन अदिक बाक जित्‍ता आदुन.
2CO 5:16 इदुरसाटी ईग टु नाव यारीकु मय इन अनुसार सम्सतीदील. यतिकी नाव मसीह अक भी मय इन अनुसार जान्सीदेव, तरी भी ईग टु आऊक हिंग जान्सतीदील.
2CO 5:17 इदुरसाटी अगर यावारा मसीह दा आन रा आव व्हाशोद दुनिया आन: हाळोद मातगोळ बितसेग्याव; नोळी, सप्पा मातगोळ व्हाशेव आगेग्याव.
2CO 5:18 ईव सप्पा मातगोळ परमेश्वर उन दी टु आव, याव मसीह अन द्वारा तान सांगुळ नाम मेल-मिलाप माळ कोंडुन, अदिक मेल-मिलाप इन स्यावा नामी सौप्सदुन.
2CO 5:19 मतलब परमेश्वर मसीह अन द्वारा तान सांगुळ दुनिया अन मेल-मिलाप माळ कोंडुन, अदिक आंदुर्द अपराधगोळ्द दोष आंदुर मा हचीदिल, अदिक आव मेल-मिलाप इन वचन नामी सौप्सदुन.
2CO 5:20 इदुरसाटी, नाव मसीह अन राजस्वर्गदूत हुयेव; मान्सी परमेश्वर नाम द्वारा विनती माळेत्यान. नाव मसीह अन दी टु निवेदन माळतेव कि परमेश्वर उन सांगुळ मेल-मिलाप माळकोमी.
2CO 5:21 जो पाप देल अग्यात ईरोन, आऊक अच आव नाम साटी पाप ठहरूसदुन कि नाव आऊन दा आगकु परमेश्वर उन मुंद नेक मंळसा बनसेगुल.
2CO 6:1 नाव जो परमेश्वर उन सहकर्मी आयेव ईद भी हेळतेव कि आऊन अनुग्रह जो नीम मा आत, अदरी वाया होगगोळबाळी.
2CO 6:2 यतिकी आव रा अनतान, “तान खुश आगोद समय दा ना नीन केळ कोंडीन, अदिक उद्धार इन दिन ना नीन सहायता माळदीन.” नोळी, ईग अद खुश इन समय आद; नोळी, ईग अद उद्धार इन दिन आद.
2CO 6:3 नाव यातोदु मात दा ठोकर तिनोद यातोद भी मवका कोळालेव ताकी नाम स्यावा मा यातोद भी दोष बरबाळुल.
2CO 6:4 लेकीन हर मात देल परमेश्वर उन सेवकगोळ्द घाई तान लायकत इक प्रगट माळतेव, बळा धीरज देल, क्लेशगोळ देल, दरिद्रगोळ देल, संकटगोळ देल,
2CO 6:5 क्वाळा तिनोद देल, कैद आगदुर देल, दंगा देल, मयनत देल, च्याता ईरोद देल, उपास माळदुर देल,
2CO 6:6 पवित्रता देल, आ ग्यान देल, धीरज देल, परमेश्वर उन प्यार अदिक कृपा देल, पवित्र आत्मा देल,
2CO 6:7 सही प्यार देल, सच्चाई इन वचन देल, परमेश्वर उन सामर्थ्य देल, न्यायीपन इन हथियारगोळ देल जो उजवा डाक्या कयगोळ दा आव,
2CO 6:8 आदर अदिक निरादर देल, बेकार कीर्ति अदिक वळ्लीद कीर्ति देल. अगर भरमुसावाळेर घाई मालूम आगतेव तरी भी सही आयेव;
2CO 6:9 अनजानगोळ्द घाई आयेव, तरी भी प्रसिद्ध आयेव; सोत्‍तुर घाई आयेव अदिक नोळी जित्‍ता आयेव; बळ्सकोमावाळेर्द घाई आयेव पर जीव देल कोनसुस्कु आगालेव;
2CO 6:10 शोक माळावाळेर्द घाई आयेव, पर हमेशा खुश ईरतेव; कंगालगोळ्द घाई आयेव, पर हापाळ मुंदुर इक धनवान माळ बुळतेव; हिंग आयेव जसा नाम हात्‍ती येनु हैलेच तरी भी सब येनारा ईटतेव.
2CO 6:11 हे कुरिन्थिगोळा, नाव तान मन तेरूकु नीम से मातगोळ हेळेव, नाम मन नीम दी तेरूकु आव
2CO 6:12 नीम साटी नाम मन दा यातोदु संकोच हैलेच, लेकीन नीम्द अच मनगोळ दा संकोच आद.
2CO 6:13 लेकीन तान चिकोर जान्सकु नीम से अनतीन कि नीव भी अदुर बदला दा तान मन तेर्द बुळी.
2CO 6:14 अविश्वासीगोळ्द सांगुळ संबंध माळकु जुआळी दा जुत्सबाळी, यतिकी न्यायीपन अदिक अन्याय इन येन मेल-जोल आद? या उजुळ अदिक अंधार इन येन संगती?
2CO 6:15 अदिक मसीह अन्द शैतान उन सांगुळ येन लगाव? या विश्वासी इन सांगुळ अविश्वासी इन येन नाता?
2CO 6:16 अदिक मूर्तीगोळ्द सांगुळ परमेश्वर उन मंदिर इन येन संबंध? यतिकी नाव रा जित्‍ता परमेश्वर उन मंदिर हुयेव; ह्यांग परमेश्वर अंदान, “ना आंदुर दा ईराइन अदिक आंदुर दा नळुतोगाईन; अदिक ना आंदुर परमेश्वर आगाईन, अदिक आंदुर नान लॉकुर आदार.”
2CO 6:17 इदुरसाटी प्रभु अनतान, “आंदुर न्याड्या दा टु होळी अदिक ब्यार्र ईरी; अदिक अशुध्द वस्तु उक मुट बाळी, रा ना नीमी ग्रहण माळाईन;
2CO 6:18 अदिक ना नीम आप्प आगाईन, अदिक नीव नान पार अदिक पोर आदीर. ईद सर्वशक्तिमान प्रभु परमेश्वर उन वचन हुन.”
2CO 7:1 इदुरसाटी हे प्रियगोळा, याग कि ई वादागोळ नामी सिक्याव, रा बरी, नाव तान तान इक मय अदिक आत्मा अन्द सप्पा मलिनता देल शुद्ध माळेव, अदिक परमेश्वर उन अंज्क ईटतेला पवित्रता अक सिद्ध माळेव.
2CO 7:2 नामी तान दिल दा जागा कोळी. नाव ना रा यारदु सांगुळ अन्याय माळेव, ना यारीकारा बिगळुसेव अदिक ना यारीकारा ठगुसेव.
2CO 7:3 ना नीनी दोषी ठहरूसोर साटी ईद अनालीन. यतिकी ना पयले अच अन बुटीन कि नी नाम दिल दा हिंग कुर्तोग्या कि नाव नीन सांगुळ सायोर अदिक ऊळोर साटी तयार आयेव.
2CO 7:4 ना नीम से हापाळ हिम्मत इन सांगुळ माताळेतिन, नानी नीम मा बळा घमण्ड आद; ना शांती देल तुम्मेगीन. तान सप्पा क्लेश दा ना खुशी देल हापाळ तुमकु ईरतीन.
2CO 7:5 यतिकी याग नाव मकिदुनिया नगर दा बंदेव, आग भी नाम मय इक चैन सिकीदील, लेकीन नामी नाकु दी टु क्लेश सिकतोगोद; व्हार्या लळाईगोळ ईरव, बुळ्क भयंकर मातगोळ ईरव.
2CO 7:6 फिर भी दिन गरीब मंळसागोळी शांती कोळावाळा परमेश्वर तीतुस उन बंदुर देल नामी शांती कोट्टुन;
2CO 7:7 अदिक ना सिर्फ आऊन बंदुर देल लेकीन आऊन आ शांती देल भी, जो आऊक नीम दी टु सिकीत. आव नीम लालसा, नीम दुख अदिक नान साटी नीम धुन इन बातणी नामी केळ्सदुन, यदुर देल नानी मात्‍त खुशी आत.
2CO 7:8 यतिकी कदाचित ना तान चिट्ठी देल नीनी दुखी माळदीन, लेकीन अदुर देल पछतासालिन ह्यांग कि पयले पछतासिन, यतिकी ना नोळतीन कि आ चिट्ठी देल नीनी दुख रा आत लेकीन अद घळी तिमुर्द साटी ईरोद.
2CO 7:9 ईग ना खुश आईन पर इदुरसाटी ईला कि नीनी दुख पोहचुस्त, उलटा इदुरसाटी कि नी आ दुख इन कारण मन तिर्गुस्द, यतिकी नीन दुख परमेश्वर उन इच्छा अन्द अनुसार ईरोद कि नाम दी टु नीनी यातोदु मात दा हानि पोहचुस बाळुल.
2CO 7:10 यतिकी परमेश्वर-भक्ति इन दुख हिंग पश्चाताप पैदा माळतान यदुर्द परिणाम उद्धार आद अदिक बाक अदुर देल पछतासोद बिळाल. लेकीन दुनिया अक दुख मृत्यु पैदा माळतद.
2CO 7:11 इदुरसाटी नोळी ईदा मात देल कि नीमी परमेश्वर उन दी टु बरोद दुख आत नीम दा याट उत्साह अदिक खुद इक उळसोद इच्छा अदिक हतास, अदिक अंज्क, अदिक लालसा, अदिक आस्था अदिक न्याय कोळोद विचार पैदा आत? नीव हर प्रकार देल ईद सिद्ध माळकु तोर्सदीर कि नीव ई मात दा निर्दोष आईर.
2CO 7:12 बाक ना जो नीम हात्‍ती लिखसीदिन, अद ना रा आऊन कारण लिख्सदीन याव अन्याय माळदुन अदिक ना आऊन कारण यार मा अन्याय माळकु आत, लेकीन इदुरसाटी कि नीम उत्साह जो नाम साटी आद, अद परमेश्वर उन मुंद नीम मा प्रगट आगेगुल.
2CO 7:13 इदुरसाटी नामी दिलासा सिक्त. नाम ई दिलासा अन्द सांगुळ तीतुस उन खुशी इन कारण मात्‍त यक्कुल खुशी आत यतिकी आऊन जीव नीम सप्पा मुंदुर कारण खुश आगेत.
2CO 7:14 यतिकी अगर ना आऊन मुंद नीम बारा दा येनारा घमण्ड तोर्सदीन, रा लज्जित आगीदील, लेकीन ह्यांग नाव नीम से सप्पा मातगोळ सही-सही अन बुटिदेव, हांग अच नाम घमण्ड तोरसोद तीतुस उन मुंद भी सही होळ्त.
2CO 7:15 याग आऊक नीम सप्पा मुंदुर्द आग्याकारी आगोद याद आगतद कि ह्यांग नीव अंज्क अदिक नळ्गतेला आऊन से मुलाकात माळदीर; रा आऊन प्यार नीम दी मात्‍त यक्कुल वाळुसेगतद.
2CO 7:16 ना खुश आईन यतिकी ना हर मात दा नीम मा पुरा भरोसा माळ सकतीन.
2CO 8:1 ईग हे वार्टुरा अदिक आकतींगेरा, नाव नीमी परमेश्वर उन अनुग्रह जो मकिदुनिया नगर इन मंडलीगोळ मा आत नाव चाहासतेव कि नीमी मालूम नळुल.
2CO 8:2 कि क्लेश इन धोळ्द परीक्षा दा आंदुर्द धोळ्द खुशी अदिक भारी कंगालपन दा आंदुर उदारता हापाळ वाळुसेत.
2CO 8:3 आंदुर बारा दा नान ईद गवाही आद कि आंदुर तान सामर्थ्य तुमकु उलटा सामर्थ्य से भी व्हार्या, मन देल कोटार.
2CO 8:4 अदिक ई दान दा अदिक यहूदीगोळ्द परमेश्वर उन पवित्र लॉकुर्द स्यावा दा सहभागी आगोद अनुग्रह अन्द बारा दा, नाम से घळी-घळी हापाळ विनती माळदुर,
2CO 8:5 अदिक ह्यांग नाव आशा माळीदेव, हांग अच ईला उलटा आंदुर प्रभु उक बाक परमेश्वर उन इच्छा देल नामी भी तान तान इक कोट बुट्टुर.
2CO 8:6 इदुरसाटी नाव तीतुस से विनती माळीदेव कि ह्यांग आव पयले सुरूवात माळीदुन, हांग अच नीम न्याड्या दा ई दान कोळोद कृपा अन्द क्याल्सा अक लगातार पुरा माळुल.
2CO 8:7 इदुरसाटी ह्यांग नीव सप्पा मात दा मतलब विश्वास, वचन, ग्यान अदिक सप्पा प्रकार इन कोशिश दा, अदिक आ प्यार दा जो नाम से ईटतीर, वाळुस्त होगतीर, हांग अच ई दान इन कृपा अन्द क्याल्सा दा भी वाळुस्त होगी.
2CO 8:8 ना आग्या अन्द रीति मा रा ईला, लेकीन दुसरा लॉकुर्द तोर्सद उत्साह देल नीम प्यार इन सच्चाई इक परखुसोर साटी अनतीन.
2CO 8:9 नीव नाम प्रभु यीशु मसीह अन अनुग्रह अरूतीर कि आव धनी ईतकु भी नीम साटी कंगाल आगेदुन, ताकी आऊन कंगाल आगदुर देल नीव धनी आगेगी.
2CO 8:10 ई मात दा नान सला ईदा आद: ईद नीम साटी वळ्लीद आद, जो ऊंद साल टु ना रा सिर्फ क्याल्सा अक माळदुर दा अच, लेकीन ई मात इन चाहासदुर दा भी पयला आगिदुर,
2CO 8:11 इदुरसाटी ईग ईद क्याल्सा पुरा माळी कि ह्यांग इच्छा माळदुर दा नीव तयार ईरीर, हांग अच तान तान पूंजी इन अनुसार पुरा भी माळी.
2CO 8:12 यतिकी अगर मन देल कोळोद तयारी आद रा अदुर अनुसार परमेश्वर आ दान इक ग्रहण भी माळ्यान जो आऊन हात्‍ती आद, ना कि आऊन अनुसार जो आऊन हात्‍ती हैलेच.
2CO 8:13 हिंग ईला कि दुसरा अक चैन अदिक नीमी क्लेश सिकुल,
2CO 8:14 लेकीन बराबरी इन विचार देल ई समय नीम बळती आंदुर घटी दा क्याल्सा बरूल, ताकी आंदुर बळती भी नीम घटी दा क्याल्सा बरूल कि बराबरी आगेगुल.
2CO 8:15 ह्यांग शास्त्र दा लिख्सकु आद, “याव हापाळ जेळदुन आऊन ज्यादा होटीदिल, अदिक याव थ्वाळासा जेळदुन आऊन गोर्त भी होटीदिल.”
2CO 8:16 परमेश्वर उन धन्यवाद आगुल, याव नीम साटी अदा उत्साह तीतुस उन दिल दा हाक्‍क बुटान!
2CO 8:17 कि आव नाम समजुसोद मान्स कोंडुन उलटा हापाळ उत्साही आगकु आव तान इच्छा देल नीम हात्‍ती होग्याद.
2CO 8:18 नाव आऊन सांगुळ आ वार्ट उक भी कळेव यार्द हेसुर खुशखबरी इन बारा दा सप्पा मंडली दा फैलुसकु आद;
2CO 8:19 अदिक ईट अच ईला, लेकीन आव मंडली द्वारा नियुक्त भी आदुन कि ई दान इन क्याल्सा अन्द साटी नाम सांगुळ होगुल. नाव ईद स्यावा इदुरसाटी माळतेव कि प्रभु उन महिमा अदिक नाम मन इन तयारी प्रगट आगेगुल.
2CO 8:20 नाव ई मात दा सावधान ईरतेव कि ई उदारता अन्द क्याल्सा अन्द बारा दा यार स्यावा नाव माळतेव, यावारा नाम मा दोष हच सकबाळुल.
2CO 8:21 यतिकी जो मातगोळ सिर्फ प्रभु उन हात्‍ती इच ईला, लेकीन मंळसागोळ्द हात्‍ती भी भला आव नाव अऊर्द चिन्ता माळतेव.
2CO 8:22 नाव आऊन सांगुळ तान वार्ट उक भी कळेव, यारी नाव घळी-घळी परखुस्कु हापाळ सा मातगोळ दा उत्साही आगतेला नोळेव; लेकीन ईग नीम मा आऊक हापाळ भरोसा आद, ई कारण आव मात्‍त यक्कुल उत्साही आन.
2CO 8:23 अगर यावारा तीतुस उन बारा दा केळुल, रा आव नान संगी अदिक नीम साटी नान सहकर्मी हुन; अदिक अगर नाम वार्टुर्द बारा दा केळुल, रा आंदुर मंडलीगोळ्द कळुकु अदिक मसीह अन्द महिमा उर.
2CO 8:24 इदुरसाटी तान प्यार अदिक नाम अद घमण्ड जो नीम बारा दा आद मंडलीगोळ्द मुंद सिद्ध माळकु आंदरी तोरसी.
2CO 9:1 ईग आ स्यावा अन्द बारा दा जो पवित्र लॉकुर्द साटी माळकु आगतद, नानी नीमी लिखसोद जरूरी हैलेच.
2CO 9:2 यतिकी ना नीम मन इन तयारी इक अरूतीन, यदुर कारण ना नीम बारा दा मकिदुनिया नगर इन ईरावाळेर्द मुंद घमण्ड तोर्सतिन कि अखाया नगर इन लॉकुर ऊंद साल टु तयार आग्यार, अदिक नीम उत्साह मात्‍त हापाळ मुंदुर इक भी तयार माळ्याद.
2CO 9:3 लेकीन ना वार्टुर इक इदुरसाटी कळीन कि नाव जो घमण्ड नीम बारा दा तोर्सदेव, अद ई मात दा व्यर्थ ईरबाळुल; लेकीन ह्यांग ना अंदीन हांग अच नीव तयार ईरी,
2CO 9:4 हिंग आगबाळुल कि अगर यावारा मकिदुनिया नोर ईरावाळेर नान सांगुळ बरूल अदिक नीमी तयार ईला नोळुल, रा आग सकतद कि ई भरोसा अन्द कारण नाव ईद अनालेव कि नीव लज्जित आदेव.
2CO 9:5 इदुरसाटी ना वार्टुर से ईद विनती माळोद जरूरी सम्सदीन कि आंदुर पयले टु नीम हात्‍ती होगुल, अदिक नीम उदारता अन्द काय यदुर बारा दा पयले टु वचन कोटकु आगीत, तयार माळकु ईटुल कि ई दबाव देल ईला लेकीन उदारता अन्द काय इन घाई तयार आगुल.
2CO 9:6 लेकीन मात ईद आद: जो थ्वाळासा बोऊसतान, आव थ्वाळा अच कळदान; अदिक जो हापाळ बोऊसतान, आव हापाळ कळदान.
2CO 9:7 हर ऊंद मंळसा ह्यांग मन दा ठानस्यान हांग अच दान माळुल; ना कुळकुळ्स तेला अदिक ना दबाव देल, यतिकी परमेश्वर खुशी देल जो कोळतान आऊन से अच प्यार ईटतान.
2CO 9:8 परमेश्वर सप्पा प्रकार इन अनुग्रह नीमी हापाळ तरीका देल कोळ सकतान यदुर देल हर मात दा अदिक हर समय, सप्पा येनारा, जो नीमी जरूरी आद, नीम हात्‍ती ईरूल; अदिक हर ऊंद वळ्लीद क्याल्सा अन्द साटी नीम हात्‍ती हापाळ येनारा ईरूल.
2CO 9:9 ह्यांग शास्त्र दा लिख्सकु आद, “आव सळग्यान माळदुन, आव कंगालगोळी दान कोट्टुन, आऊन न्याय हमेशा बन्सकु ईत्‍तीत.”
2CO 9:10 इदुरसाटी जो बोऊसावाळा अक बींजा अदिक ऊमोर साटी रोट्टी कोळतान, आव नीमी बींजा कोट्टान, अदिक आऊक फलवन्त माळ्यान; अदिक नीम न्याय इन कायगोळी वाळुस्यान.
2CO 9:11 नीव हर मात दा सप्पा प्रकार इन उदारता अन्द साटी जो नाम द्वारा परमेश्वर उन धन्यवाद माळसुसतद, धनवान माळकु आदीर.
2CO 9:12 यतिकी ई स्यावा अक पुरा माळदुर देल ना सिर्फ पवित्र लॉकुर्द जरवतगोळ पुरा आगताव, लेकीन लॉकुर दी टु परमेश्वर उन भी हापाळ धन्यवाद आगतद.
2CO 9:13 यतिकी ई स्यावा अक प्रमाण स्वीकार माळकु आंदुर परमेश्वर उन महिमा प्रगट माळतार कि नीव मसीह अन्द खुशखबरी इक मान्सकु आऊन हात्‍ती ईरतीर, अदिक आंदुर्द अदिक सप्पा मुंदुर्द सहायता माळदुर दा उदारता प्रगट माळतेला ईरतीर.
2CO 9:14 अदिक आंदुर नीम साटी प्रार्थना माळतार; अदिक इदुरसाटी कि नीम मा परमेश्वर उन हापाळ अच अनुग्रह आद, नीम लालसा माळतेला ईरतार.
2CO 9:15 परमेश्वर उन, आऊन आ दान इन साटी जो वर्णन टु व्हार्या आद, धन्यवाद आगुल.
2CO 10:1 ना आवा पौलुस हुईन जो नीम मुंद गरीब आईन लेकीन बेन हिंद नीम दी साहस माळतीन, नीमी मसीह अन्द नम्रता अदिक कोमलता अन्द कारण समझुसतीन.
2CO 10:2 ना ईद विनती माळतीन कि नीम मुंद नानी निर्भय आगकु साहस माळोद बिळबाळुल, ह्यांग ना थ्वाळासा लॉकुर मा जो नामी मय इन अनुसार नळावाळेर सम्सतार, आंदरी साहस तोरसोद विचार माळतीन.
2CO 10:3 यतिकी नाव मय इन अनुसार नळुतेव अदिक वयाळतेव, तरी भी नाव मय इन अनुसार लळाई माळालेव.
2CO 10:4 यतिकी नाम लळाई इन हथियार शारीरिक ईला, लेकीन किल्लागोळ्द नाश माळोर साटी परमेश्वर उन सामर्थ्य देल परिपुर्ण आद.
2CO 10:5 इदुरसाटी नाव कल्पनागोळ्द अदिक हर ऊंद धोळ्द मात इन, जो परमेश्वर उन पयचान इन विरोध दा येळतद, खंडन माळतेव; अदिक हर ऊंद भावना अक कैद माळकु मसीह अन्द आग्याकारी माळ बुळतेव,
2CO 10:6 अदिक तयार ईरतेव कि याग नीम आग्या पालन पुरा आगेगुल, रा हर ऊंद प्रकार इन आग्या अन्द उल्लंघन माळावाळेर इक दण्डित माळेव.
2CO 10:7 नीव अवा मातगोळी नोळी, जो कण्णगोळ्द मुंद आव. अगर यारीकारा तान मा ईद भरोसा आद कि ना मसीह नव हुईन, रा आव ईद भी जान्स कोमुल कि ह्यांग आव मसीह नव हुन हांग अच नाव भी हुयेव.
2CO 10:8 यतिकी अगर ना आ अधिकार इन बारा दा मात्‍त यक्कुल घमण्ड तोरसाईन, जो प्रभु नीम बीगळुसोर साटी ईला लेकीन सुधरूसोद साटी नामी कोटान, रा ना लज्जित ईला आगाईन.
2CO 10:9 ईद ना इदुरसाटी अनतीन कि चिट्ठी गोळ्द द्वारा नीमी अंजक्या तोरसावाळा ठहरूसतीदील.
2CO 10:10 यतिकी आंदुर अनतार, “आऊन चिट्ठी गोळ रा गंभीर अदिक प्रभावशाली आव; लेकीन याग आव मुंद इरतान, रा आव मय देल कमजोर अदिक माताळदुर दा हल्का अरूकु आगतान.”
2CO 10:11 जो हिंग अनतान, आव ईद ऊमसुल कि ह्यांग बेन हिंद चिट्ठी गोळ दा नामव वचन आव, हांग अच नीम मुंद नामव क्याल्सा भी ईत्‍ताव.
2CO 10:12 यतिकी नामी ईद साहस हैलेच कि नाव तान तान इक आंदुर दा टु येनारा सांगुळ आळुल या आंदुर से खुद इक मीलुसुल, जो तान प्रशंसा खुद माळतार, अदिक तान तान इक आपस दा आळ्‍दकु तौलुस्कु आबुर दाबुर से मिलान माळतार, आ लॉकुर खुद मूर्ख ठहरूस्तार.
2CO 10:13 नाव रा सीमा टु व्हार्या घमण्ड यागलु भी माळतीदील, लेकीन अदा सीमा ताका जो परमेश्वर नाम साटी ठहरूस्यान, अदिक अदुर्दा नीव भी होट बंदीर, अदिक आऊंदा अनुसार घमण्ड भी माळ्यार.
2CO 10:14 यतिकी नाव तान मर्यादा अन्द व्हार्या होगालेव, जसा कि नीम ताका पोहचुसोद दशा दा ईला ईराईत, उलटा मसीह अन्द खुशखबरी केळ्सतेला नीम ताका पोहचुसेग्याव.
2CO 10:15 नाव मर्यादा टु व्हार्या दुसरा अन मेहनत मा घमण्ड माळालेव; लेकीन नामी आशा आद कि याग-याग नीम विश्वास वाढुस्तेला होदीत आग-आग नाव तान मर्यादा अन्द अनुसार नीम कारण मात्‍त वाढ़ुस्त होदेव,
2CO 10:16 ताकी नाव नीम मर्यादा से मुंद वाढ़ुस्कु खुशखबरी केळसेव, अदिक ईद ईला कि नाव दुसरा अन मर्यादा अन्द बुळ्क माळदव क्याल्सा मा घमण्ड माळेव.
2CO 10:17 ह्यांग शास्त्र अनतद, घमण्ड माळोद आद, आव प्रभु मा घमण्ड माळुल.
2CO 10:18 यतिकी जो तान बळाई माळतान आव ईला, लेकीन यार्द बळाई प्रभु माळतान, आवा ग्रहण माळकु आगतान.
2CO 11:1 अगर नीव नान थ्वाळासा मूर्खता सहन माळ कोमायदीर रा येन ईद भला आगाईत; हव, नान सहन भी माळी.
2CO 11:2 ना नीम बारा दा ईर्ष्या ईटतीन ह्यांग परमेश्वर ईटतान, नीव ऊंद पवित्र कुवारा पोर इन घाई आईर, यारी ना सिर्फ ऊंद मंळसा अक, खुद मसीह अन्द सांगुळ मदा माळोद वादा माळीदिन.
2CO 11:3 लेकीन ना अंजतीन कि ह्यांग हाव तान चतुराई देल हवा अक बयकुस्त, हांग अच नीम सीधा साधा मन अदिक पवित्रता देल जो मसीह अन्द सांगुळ ईर पायजे, येल्यारा भ्रष्ट माळकु आगबाळुल.
2CO 11:4 अगर यावारा नीम हात्‍ती बंदकु यावारा दुसरा यीशु उन प्रचार माळुल, यार्द प्रचार नाव माळीदील; या यातारा दुसरा आत्मा नीमी सिकुल, जो पयले ईला सिकीदाद; या मात्‍त यावारा खुशखबरी केळसुल यदरी नीव पयले मान्सीदील, रा नीव अदरी स्वीकार माळ कोमतीर.
2CO 11:5 ना रा सम्सतीन कि ना यातारा मात दा धोळ से धोळ प्रेरितगोळ से गोर्त हैलेच.
2CO 11:6 अगर ना माताळदुर दा अनाळी आईन, तरी भी ग्यान दा गोर्त हैलेच. नाव इदरी हर मात दा सप्पा प्रकार देल नीम साटी प्रगट माळेव.
2CO 11:7 येन ईदुर दा ना येनारा पाप माळीन कि ना नीमी परमेश्वर उन खुशखबरी ह्यांगारा-मुंगारा केळ्सदीन; अदिक तान तान इक नम्र माळदीन कि नीव म्याकुच आगेगी?
2CO 11:8 ना दुसरा मंडलीगोळी लुट्सदिन, मतलब ना आंदुर से मजदूरी ताकोंडीन ताकी नीम स्यावा माळाईन.
2CO 11:9 अदिक याग ना नीम सांगुळ ईरीन अदिक नानी गोर्त आत, रा ना यारदु मा बोझ हाक्‍कीदिल, यतिकी वार्टुर मकिदुनिया नगर टु बंदकु नान जो गोर्त ईरोद अदरी पुरा माळदुर; अदिक ना हर मात दा तान तान इक नीम मा बोझ आगदुर देल रोक्सदिन, अदिक रोक्सकु ईटाईन.
2CO 11:10 अगर मसीह अन्द सच्चाई नान दा आद रा अखाया द्याश दा याऊ नानी ई घमण्ड देल रोक्सतिदिल.
2CO 11:11 येती? येन इदुरसाटी कि ना नीम से प्यार ईटालीन? परमेश्वर ईद अरूतान कि ना प्यार ईटतीन.
2CO 11:12 लेकीन जो ना माळतीन, अदा माळ्त ईराइन कि जो धोळ प्रेरित मवका ढुंढ्सतार ना आ धोळ सीक गोळालीन, ताकी याता मात दा आंदुर घमण्ड माळतार, अदुर्दा आंदुर नाम्द अच घाई ठहरूसुल.
2CO 11:13 यतिकी ईत्‍ता लॉकुर ख्वाटा प्रेरित, अदिक छल कपट देल क्याल्सा माळावाळेर, अदिक मसीह अन्द प्रेरितगोळ्द रूप ताकोमावाळेर उर.
2CO 11:14 ईद येनु अचम्भा अन्द मात आल्लच यतिकी शैतान खुद भी ज्योतिर्मय स्वर्गदूत उन रूप धारण माळतान.
2CO 11:15 इदुरसाटी अगर आऊन सेवक भी न्याय इन सेवकगोळ्द घाई रूप ताकोमुल, रा येनु धोळ्द मात हैलेच, लेकीन आंदुर न्याय आंदुर कर्मगोळ्द अनुसार आदीत.
2CO 11:16 ना मात्‍त अनतीन, याऊ नानी मूर्ख सम्सबाळुल; ईलारा मूर्ख अच सम्सकु नान सहन माळी, ताकी थ्वाळासा ना भी घमण्ड माळ सकाईन.
2CO 11:17 ई आत्मविश्वास इन घमण्ड दा जो येनारा ना अनतीन, अद प्रभु उन आग्या अन्द अनुसार ईला पर मान्सी मूर्खता देल अच अनतीन.
2CO 11:18 याग कि हापाळ सा लॉकुर मय इन अनुसार घमण्ड माळतार, रा ना भी घमण्ड माळाईन.
2CO 11:19 नीव रा समझदार ईतकु खुशी देल मूर्ख लॉकुर्द सहन माळ कोमतीर.
2CO 11:20 यतिकी याग यावारा नीमी दास माळ कोमतान, या फायदा नेगुतान, या फसुस कोमतान, या तान तान इक धोड्डेव माळतान, या नीम बाय मा क्याबरा बडुतान, रा नीव सहन माळ कोमतीर.
2CO 11:21 नान अनोद अनादर इन अच बारा दा आद, मान्सी नाव इदुरसाटी निर्बल घाई ईरेव. लेकीन याग यावारा यातोदारा मात दा हिम्मत माळतान-ना मूर्खता देल अनतीन-रा ना भी हिम्मत माळतीन.
2CO 11:22 येन आंदुर अच इब्रानी उर? ना भी हुईन. येन आंदुर अच इस्त्राएली उर? ना भी हुईन. येन आंदुर अच अब्राहम उन वंश उर? ना भी हुईन.
2CO 11:23 येन आंदुर अच मसीह अन्द सेवक उर ना यर्र इन घाई अनतीन ना आंदुर से यक्कुल आईन. यक्कुल मयनत माळदुर दा; घळी घळी कैद आगदुर दा; क्वाळागोळ तिंदुर दा; घळी घळी मृत्यु उन जोखीमगोळ दा.
2CO 11:24 अईद घन ना यहूदीगोळ्द कय देल उंच्यालीस क्वाळागोळ तिनदिन.
2CO 11:25 मुर घन ना बळ्सकोंड्डीन; ऊंद घन नान मा कल्लगोळ देल पथराव माळकु आत; मुर घन जहाज, यऊर मा ना येरीदिन, मुरदोदव; ऊंद ईळ्लक ऊंद हागुल ना समुद्र दा कळदिन.
2CO 11:26 ना घळी घळी यात्रागोळ दा; गांगागोळ जोखीमगोळ दा; डाकूगोळ जोखीमगोळ दा; तान जातीवाळेर देल जोखीमगोळ दा; गैरयहूदीगोळ देल जोखीमगोळ दा; नगरगोळ जोखीमगोळ दा; आळी इन जोखीमगोळ दा; समुद्र अन्द जोखीमगोळ दा; ख्वाटा वार्टुर्द न्याड्या जोखीमगोळ दा ईत्‍तीन.
2CO 11:27 मयनत अदिक कष्ट दा; घळी घळी च्याता ईरदुर दा; हसु-नीरअळ्क दा; घळी घळी उपास माळदुर दा; सोळ इन दिन दा; बिन फळक्या अन्द ईरदुर दा;
2CO 11:28 अदिक दुसरा मातगोळी बिटकु यऊर वर्णन ना माळालीन; सप्पा मंडलीगोळ्द चिन्ता हर दिन नानी वत्‍त बुळतद.
2CO 11:29 यार निर्बलता देल ना निर्बल आगालीन? यार्द ठोकर तिंदुर देल नान जीव नोयाल?
2CO 11:30 अगर घमण्ड माळोद जरूरी आद, रा ना तान निर्बलता अन्द मातगोळ मा घमण्ड माळाईन.
2CO 11:31 प्रभु यीशु उन परमेश्वर अदिक आप्प जो हमेशा धन्य आन, अरूतान कि ना ख्वाटा माताळालीन.
2CO 11:32 दमिश्क नगर दा अरितास राजा दी टु जो शासक ईरोन, आव नानी हुळसुसोर साटी दमिश्किगोळ्द नगर मा पयरा कुर्सकु ईटीदुन.
2CO 11:33 लेकीन नानी जाळी इन माळ्द फुट्टी दा कुर्सकु ऊंद दिवार इन खिळकी टु ईळ्सकु आत, ईत्‍ता प्रकार देल ना आऊन कय दा टु ऊळ्दकु होटोदिन.
2CO 12:1 यतिकी घमण्ड माळोद नान साटी ठीक हैलेच तरी भी माळोद बिळतद; इदुरसाटी ना प्रभु उन कोळ्द दर्शनगोळ अदिक प्रकाशगोळ्द चर्चा माळाईन.
2CO 12:2 ना मसीह दा ऊंद मंळसा अक अरूतीन; जो चौदा वर्ष आग्याव कि मालूम ईला शरीर सहित, मालूम ईला शरीर रहित, परमेश्वर अरूतान; हिंग मंळसा तिसरा स्वर्ग ताका नेगुकु आदुन.
2CO 12:3 ना हिंग मंळसा अक अरूतीन कि मालूम ईला शरीर सहित, या मालूम ईला शरीर रहित परमेश्वर अच अरूतान
2CO 12:4 कि स्वर्गलोक मा नेगुकु आदुन, अदिक हिंग मातगोळ केळदुन जो माताळकु आगालव; अदिक आ मातगोळी बाय मा तरोद बराबर हैलेच.
2CO 12:5 हिंग मंळसा मा रा ना घमण्ड माळाईन, लेकीन तान मा तान निर्बलतागोळी बिटकु, तान बारा दा घमण्ड माळतीदील.
2CO 12:6 यतिकी अगर ना घमण्ड माळोद चाहसाईन भी रा मूर्ख आगतीदील, यतिकी ना सही माताळाईन; तरी भी रूक्सेगतिन, हिंग आगबाळुल कि ह्यांग नानी यावारा नोळतान या नान से केळतान, नानी अदुर देल यक्कुल समसुल.
2CO 12:7 इदुरसाटी कि ना परमेश्वर उन प्रकाशन इन यक्‍कुलता अन कारण तुम्मेगाईन, नान मय दा ऊंद मुळ्ल नळ्सकु आत, मतलब शैतान उन ऊंद स्वर्गदूत नानी बुक्‍की बडुल अदिक घमण्ड माळदुर देल नानी रोक्सकु ईटुल.
2CO 12:8 ईदुर बारा दा ना प्रभु से मुर घन विनती माळीन कि ईद नान से दुर आगेगुल.
2CO 12:9 अदिक आव नान से अंदुन, “नान अनुग्रह नीन साटी हापाळ आद; यतिकी नान सामर्थ्य निर्बलता दा सिद्ध आगतद.” इदुरसाटी ना हापाळ खुशी देल तान निर्बलतागोळ मा घमण्ड माळाईन कि मसीह अन्द सामर्थ्य नान मा सावली माळतेला ईरूल.
2CO 12:10 ई कारण ना मसीह अन्द साटी निर्बलतागोळ दा, अपमान गोळ दा, अदिक गरीबी दा, अदिक उपद्रवगोळ दा, अदिक संकटगोळ दा खुश आईन; यतिकी याग ना निर्बल ईरतीन आग अच सामर्थी आगतीन.
2CO 12:11 ना मूर्ख रा बन्सदीन, लेकीन नीव अच नानी ईद माळोर साटी मजबुर माळदीर. नीव रा नान प्रशंसा माळायदीर, यतिकी अगर ना येनु हैलेच, तरी भी आ धोड्डेर से धोड्डेर प्रेरितगोळ से यातोदारा मात दा गोर्त हैलेच.
2CO 12:12 सही प्रेरितगोळ्द लक्षण भी नीम न्याड्या सप्पा प्रकार इन धीरज सांगुळ चमत्कारगोळ, अदिक अदभुत क्याल्सागोळ, अदिक सामर्थ्य अन्द क्याल्सागोळ देल तोर्सकु आदव.
2CO 12:13 नीव याता मात दा दुसरा मंडलीगोळ देल गोर्त ईरीर, सिर्फ इदुर दा कि ना नीम मा तान भार हाक्‍कीदिल. नान ईद अन्याय माफ माळी.
2CO 12:14 ना तिसरा घन नीम हात्‍ती बरली तयार आईन, अदिक ना नीम मा यातोदारा भार हाकतिदिल, यतिकी ना नीम धन दौलत ईला उलटा नीमी का चाहासतीन. यतिकी चिकोरगोळी मोय-आप्प उन साटी धन दौलत जमा माळोद बिळाल, पर मोय-आप्प उक चिकोरगोळ साटी धन जमा माळोद बिळतद.
2CO 12:15 ना नीम आत्मागोळ साटी हापाळ खुशी देल खर्च माळाईन, उलटा खुद भी खर्च आगेगाईन. येन याट यक्कुल ना नीम से प्यार ईटतीन, आट अच गोर्त नीव नान से प्यार ईट्टीर?
2CO 12:16 हिंग आग सकतद कि ना नीम मा भार हाकीदिल, लेकीन चतुराई देल नीमी ध्वाका कोटकु फसुस कोंडीन!
2CO 12:17 भला, यारी ना नीम हात्‍ती कळुदीन, येन आंदुर दा टु यारदारा द्वारा ना छल कपट माळकु नीम से येनारा ताकोम कोंडीन?
2CO 12:18 ना तीतुस उक विनती माळदीन अदिक आऊन सांगुळ ऊंद वार्ट उक कळुदीन, रा तीतुस छल कपट माळकु नीम से येनारा ताकोंडुन का? नाव ऊंद अच आत्मा देल सारखा अच हादी देल नळदिदील का?
2CO 12:19 नीव ईगासताका सम्सतिदीर कि नाव नीम मुंद खुद इन बचाव माळेतेव. नाव रा परमेश्वर उक उपस्थित जान्सकु मसीह दा माताळतेव, अदिक हे प्रियगोळा, सप्पा मातगोळ नीम उन्नती साटी अच अनतेव.
2CO 12:20 नानी अंज्क आद, ईदारा हिंग आगबाळुल कि ना बंदकु ह्यांग चाहासतीन, हांंग नीमी नोळतीदिल; अदिक नानी भी ह्यांग नीव चाहसालीर हांग अच नोळीर; अदिक नीम दा झगळा, जलन, सिट्ट, विरोध, ईर्ष्या, चुगली, अभिमान अदिक चेंगळ आगुल;
2CO 12:21 अदिक ईलारा हिंग आगबाळुल कि नान परमेश्वर नान मात्‍त नीम मान्या बंदुर मा नान मा दबाव हाकुल अदिक नानी हापाळ मुंदुर साटी मात्‍त शोक माळोद बिळुल, यार पयले पाप माळीदुर अदिक खराब क्याल्सा अदिक व्यभिचार अदिक वासना देल, जो आंदुर माळदुर, मन तिर्गुसिदील.
2CO 13:1 ईग तिसरा बार ना नीम हात्‍ती बरतीन: हर ऊंद मुकदमा सिद्ध माळोर साटी येढ्ढ या मुर गवाहगोळ्द जरवत ईरतद.
2CO 13:2 ह्यांग ना दुसरा बार नीम सांगुळ ईरीन, हांगा ईग दुर ईरतेला आ लॉकुर से यार पयले पाप माळ्यार, अदिक अन्य सप्पा लॉकुर से ईग पयले से अन बुळतीन कि अगर ना मात बराईन रा बिळतीदील,
2CO 13:3 यतिकी नीव रा इदुर्द सबुत चाहासतीर कि मसीह नान दा माताळतान, जो नीम साटी कमजोर ईला लेकीन नीम दा सामर्थी आद.
2CO 13:4 आव कमजोर इन कारण क्रूस मा येर्सकु रा आदुन, तरी भी परमेश्वर उन सामर्थ्य देल जित्‍ता आन. नाव भी अदुर्दा कमजोर आयेव, लेकीन परमेश्वर देल जो नीम साटी आन, आऊन सांगुळ ऊळदेव.
2CO 13:5 तान तान इक जाच विश्वास दा आईर का ईला. तान तान इक जाच. येन नीव तान बारा दा ईद जान्सालीर कि यीशु मसीह नीम दा आन? ईलारा नीव जाच दा निकम्मा होटीर.
2CO 13:6 लेकीन नान आशा आद कि नीव जान्स कोंडीर कि नाव निकम्मा हैलेच.
2CO 13:7 नाव तान परमेश्वर से ईद प्रार्थना माळतेव कि नीव येनु बुराई माळबाळी, इदुरसाटी ईला कि नाव सही कांळ्सीगेव, लेकीन इदुरसाटी कि नीव भलाई माळी, बाक नाव निकम्मा अच ठहरूसेगुल.
2CO 13:8 यतिकी नाव सच्चाई इन विरोध दा येनु माळ सकालेव, लेकीन सच्चाई इन साटी इच माळ सकतेव.
2CO 13:9 याग नाव कमजोर आयेव अदिक नीव ताकतवर आईर, रा नाव खुश आगतेव, अदिक ईद प्रार्थना भी माळतेव कि नीव सिद्ध आगेगी.
2CO 13:10 ईदुर कारण ना नीम बेन हींद ई मातगोळी लिख्सतीन, कि उपस्थित आगकु नानी आ अधिकार इन अनुसार यदरी प्रभु बीगळुसोर साटी ईला लेकीन नीम भलाई इन साटी कोटान, कटनाई देल येनु माळोद बिळबाळुल.
2CO 13:11 इदुरसाटी हे वार्टुरा अदिक आकतींगेरा, खुश ईरी; सिद्ध आगतेला होगी; हिम्मत ईटी; ऊंदा मन ईटी; मेल मिलाप देल ईरी. अदिक प्यार अदिक शांती इन दाता परमेश्वर नीम सांगुळ ईत्‍तान.
2CO 13:12 परमेश्वर उन शुद्ध प्यार दा आबुर दाबुरी पवित्र चुम्मा देल नमस्कार माळी.
2CO 13:13 सप्पा मसीह परमेश्वर उन लॉकुर नीमी प्यार अदिक नमस्कार अनतार.
2CO 13:14 प्रभु यीशु मसीह अन अनुग्रह अदिक परमेश्वर उन प्यार अदिक पवित्र आत्मा अन सहभागीता नीम सप्पा मुंदुर सांगुळ आगतेला ईरूल.
GAL 1:1 पौलुस उन दी टु यारी प्रेरित निवळुस्कु आत जो ना मंळसागोळ दी टु अदिक ना मंळसा अन द्वारा, उलटा यीशु मसीह अदिक परमेश्वर आप्प उन द्वारा, याव आऊक सोत्‍तुर दा टु जित्‍ता माळदुन, प्रेरित हुन
GAL 1:2 अदिक सप्पा विश्वासी वार्टुर दी टु जो नान सांगुळ आर, गलातिया अन मंडलीगोळी शुभकामनागोळ कळदुर दा शामिल आर:
GAL 1:3 नाम परमेश्वर आप्प अदिक प्रभु यीशु मसीह अन दी टु नीमी अनुग्रह अदिक शांती कोळतेला ईरूल.
GAL 1:4 प्रभु यीशु मसीह तान तान इक नाम पापगोळ साटी कोट बुट्टुन, ताकी नाम परमेश्वर अदिक आप्प उन इच्छा अन अनुसार नामी ई वर्तमान बुरा युग देल बिळसुसुल.
GAL 1:5 परमेश्वर उन स्तुति अदिक महिमा हमेशा आगतेला ईरूल. आमीन.
GAL 1:6 नानी आश्चर्य आगतद कि याव नीमी मसीह अन अनुग्रह देल कार्सदुन आऊन से नीव ईट जल्दी तिर्गकु दुसरा अच प्रकार इन खुशखबरी इन दी झुक्सली हतदीर.
GAL 1:7 लेकीन अद दुसरा खुशखबरी इच हैलेच: लेकीन मात ईद आद कि यास हिंग आर जो नीमी उलझन दा हाक्‍क बुळतार, अदिक मसीह अन खुशखबरी इक बिगळुसोद चाहासतार.
GAL 1:8 लेकीन अगर नाव, या स्वर्ग टु यावारा स्वर्गदूत भी खुशखबरी इक बिटकु जो नाव नीमी प्रचार माळकु केळसेव, यावारा अलग खुशखबरी नीमी प्रचार माळकु केळसुल, जो आ खुशखबरी टु अलग आद, रा आंदुर शापित आदार.
GAL 1:9 ह्यांग नाव पयले अंद कोंडेव, हांग अच ना ईग मात्‍त अनतीन कि आ खुशखबरी इक बिटकु यदरी नीव ग्रहण माळीर, अगर यावारा मात्‍त खुशखबरी केळ्सतान, रा शापित आगुल.
GAL 1:10 ईग ना येन मंळसागोळी मान्सतीन या परमेश्वर उक? येन ना मंळसागोळी समझुसोद चाहासतीन? अगर ना ईगासताका मंळसागोळी इच समझुसतेला ईरायदीन रा मसीह अन दास ईला आगायदीन.
GAL 1:11 हे वार्टुरा अदिक आकतींगेरा, ना नीमी हेळ बुळतीन कि जो खुशखबरी ना केळ्सदीन, अद मंळसागोळ्द आल्लच.
GAL 1:12 यतिकी अद नानी मंळसा अन दी टु पोहचुसीदील, अदिक ना नानी केळ्सकु आत, लेकीन यीशु मसीह अन प्रकाशन देल सिक्त.
GAL 1:13 यहूदी मत दा जो पयले नांद चाल चलन ईरोद अदुर्द बारा दा नीव केळ कोंडीर कि ना परमेश्वर उन मंडली इक हापाळ अच सतुसीन अदिक नाश माळ तोगीन.
GAL 1:14 तान हापाळ सा जातीवाळेर से जो नान अवस्था अन ईरोर, यहूदी मत दा यक्कुल वाळुसतेला होगतोगोद अदिक तान आप्प दादागोळ परंपरागोळ साटी हापाळ अच उत्साही ईरीन.
GAL 1:15 लेकीन परमेश्वर उन, याव नान मोय इन गर्भ टु अच नानी ठहरूसदुन अदिक तान अनुग्रह देल कार्स बुट्टुन,
GAL 1:16 याग इच्छा आत कि नान दा तान पार उक प्रगट माळुल कि ना गैरयहूदीगोळ दा आऊन खुशखबरी केळसाईन, रा ना मास अदिक रक्ता देल सलाह ताकोंडीन,
GAL 1:17 अदिक ना यरूशलेम इक आंदुर हाती होदीन जो नान से पयले प्रेरित ईरोर, लेकीन अरब इक ओळेदीन अदिक बाक अल टु दमिश्क इक वापस बंदीन.
GAL 1:18 बाक मुर वर्ष इन बाद्दा ना कैफा टु मुलाकात माळोर साटी यरूशलेम होदीन, अदिक आऊन हाती पंदरा दिन ताका ईत्‍तीन.
GAL 1:19 लेकीन प्रभु उन वार्ट याकूब उक बिटकु अदिक प्रेरितगोळ दा टु यारूकु नोळीदील.
GAL 1:20 जो मातगोळ ना नीमी लिख्सतीन, नोळी, परमेश्वर उक उपस्थित जान्सकु अनतीन कि अव ख्वाटा हैलेच.
GAL 1:21 इदुर बाद्दा ना सीरिया अदिक किलिकिया अन ऊरगोळ दा बंदीन.
GAL 1:22 लेकीन यहूदिया अन मंडलीगोळ जो मसीह दा ईरोर, नान बाय यागलु ईला नोळीदुर;
GAL 1:23 लेकीन ईदा केळतोगोर कि जो नामी पयले सतुस तोगोन, आव ईग अदा विश्वास इन खुशखबरी केळ्सतान यारी पयले नाश माळतोगोन.
GAL 1:24 अदिक आंदुर नान बारा दा परमेश्वर उन महिमा माळतोगोर.
GAL 2:1 चौदा वर्ष इन बाद्दा ना बरनबास उन सांगुळ मात्‍त यरूशलेम इक होदीन, अदिक तीतुस उक भी सांगुळ ओतीन.
GAL 2:2 नान होगोद ईश्वरीय प्रकाशन इन अनुसार आत; अदिक जो खुशखबरी ना गैरयहूदीगोळ दा प्रचार माळतीन, अदरी ना आंदरी हेळ बुटीन, लेकीन आबना दा आंदरी जो धोड्डेर सम्सकु आगोर, ताकी हिंग आगबाळुल कि नान ई समय इन या पिछला दवळ धूप बेकार ठहरूसुल.
GAL 2:3 लेकीन तीतुस उक भी जो नान सांगुळ ईरोन अदिक गैरयहूदी आन, खतना माळसुसोर साटी मजबुर माळकु आगीदील.
GAL 2:4 ईद आ ख्वाटा वार्टुर कारण आत जो चोरी देल बंदीदुर, कि आ स्वतंत्रता अन जो मसीह यीशु दा नामी सिक्याद, भेद ताकोमकु नाम मा नियंत्रण हासिल माळुल.
GAL 2:5 ऊंद घळीतीम आंदुर्द हात्‍ती आगोद नाव मान्सीदील, इदुरसाटी कि खुशखबरी इन उपज नीम दा बन्सकु ईरूल.
GAL 2:6 बाक जो लॉकुर येनारा सम्सकु आगोर आंदुर चाहे ह्यांग भी ईतीदार नानी इदुर से येनु लेना-देना हैलेच; परमेश्वर यारदु पक्षपात माळालुन आंदुर से जो येनारा सम्सकु आगोर, नानी येनु भी प्राप्त आगीदील.
GAL 2:7 लेकीन इदुर विपरीत याग आंदुर विश्वास इक नोळदुर कि ह्यांग यहूदी लॉकुर साटी खुशखबरी इन क्याल्सा पतरस उक कोटकु आत, हांग अच गैरयहूदीगोळ साटी नानी खुशखबरी केळसोद कोटकु आत.
GAL 2:8 यतिकी याव पतरस से खतना माळ्द लॉकुर दा प्रेरिताई इन क्याल्सा बळा प्रभाव सहित माळसुसदुन, आवा नान से भी गैरयहूदीगोळ दा प्रभावशाली क्याल्सा माळसुसदुन,
GAL 2:9 अदिक याग आंदुर आ अनुग्रह अक जो नानी सिक्‍कीत जान्स कोंडुर, रा याकूब, अदिक कैफा, अदिक यूहन्ना जो मंडली इन खंबा सम्सकु आगोर, नानी अदिक बरनबास उक संगती इन ऊमा कय कोट्टुर कि नाव गैरयहूदीगोळ हात्‍ती होदेव अदिक आंदुर खतना माळ्द लॉकुर हात्‍ती;
GAL 2:10 सिर्फ ईद अंदुर कि नाव कंगालगोळ्द सुधी ताकोंडेव, अदिक ईदा क्याल्सा अक माळोद ना खुद भी कोशिश माळीन.
GAL 2:11 लेकीन याग कैफा अन्ताकिया दा बंदुन, रा ना आऊन बाय मा आऊन सामना माळदीन, यतिकी आव दोषी ठहरूसीदुन.
GAL 2:12 इदुरसाटी कि याकूब उन दी टु येनारा लॉकुर बरोर से पयले आव गैरयहूदीगोळ सांगुळ तिनतोगोन, लेकीन याग आंदुर बंदुर रा खतना माळ्द लॉकुर अंज्क इन कारण आव हिंद सरकुसेदुन अदिक किनारा माळली कुरतुन.
GAL 2:13 आऊन सांगुळ जमा यहूदीगोळ भी कपट माळदुर, ईल ताका कि बरनबास भी आंदुर कपट दा बिदोदुन.
GAL 2:14 लेकीन याग ना नोळदीन कि आंदुर खुशखबरी इन सच्चाई मा सीधा चाल नळालुर, रा ना सप्पा मुंदुर मुंद कैफा से अंदीन, “याग नी यहूदी आगकु गैरयहूदीगोळ घाई नळुत्या अदिक यहूदीगोळ घाई ईलारा नी गैरयहूदीगोळी यहूदीगोळ घाई नळुली येती अनत्या?”
GAL 2:15 नाव रा जनम टु यहूदी हुयेव, अदिक पापी गैरयहूदीगोळ दा टु हैलेच.
GAL 2:16 तरी ईद जान्सकु कि मंळसा व्यवस्था अन क्याल्सागोळ देल ईला, लेकीन सिर्फ यीशु मसीह मा विश्वास माळोद द्वारा न्यायी ठहरूसतान, नाव खुद भी मसीह यीशु मा विश्वास माळदेव कि नाव व्यवस्था अन क्याल्सागोळ देल ईला, लेकीन मसीह मा विश्वास माळदुर देल न्यायी ठहरूसदेव; इदुरसाटी कि व्यवस्था अन क्याल्सागोळ देल यातोदु प्राणी न्यायी ठहरूसतीदील.
GAL 2:17 नाव जो मसीह दा न्यायी ठहरूसोद चाहासतेव, अगर खुद अच पापी होट्टेव रा येन मसीह पाप इन सेवक आन? यागलु ईला!
GAL 2:18 यतिकी जो येनारा ना केळ्द बुटीन अगर अदरी मात्‍त माळतीन, रा तान तान इक अपराधी ठहरूसतीन.
GAL 2:19 ना रा व्यवस्था अन द्वारा व्यवस्था अन साटी सोतोदीन कि परमेश्वर मसीह अन्द साटी जित्‍ता ईराइन.
GAL 2:20 ना मसीह अन सांगुळ क्रूस मा येर्सकु आगीन, ईग ना जित्‍ता ईतीदील, लेकीन मसीह नान दा जित्‍ता आन; अदिक ना मय दा ईग जो जित्‍ता आईन रा सिर्फ आ विश्वास देल जित्‍ता आईन जो परमेश्वर उन पार उन मा आद, याव नान से प्यार माळदुन अदिक नान साटी तान तान इक कोट बुट्टुन.
GAL 2:21 ना परमेश्वर उन अनुग्रह अक बेकार ठहरूसालीन; यतिकी अगर व्यवस्था अन द्वारा न्यायीपन आगाईत, रा मसीह अन सायोद बेकार आगाईत.
GAL 3:1 हे निर्बुद्धी गलातिगोळा, याव नीमी मोहीत माळ कोंडान? नीम रा मान्सी कण्णगोळ मुंद यीशु मसीह क्रूस मा येर्सकु आदुन!
GAL 3:2 ना नीम से सिर्फ ईद जानसोद चाहासतीन कि नीमी आत्मा, येन व्यवस्था अन क्याल्सागोळ देल या विश्वास इन समाचार देल सिक्त?
GAL 3:3 येन नीव हिंग निर्बुद्धी आईर कि आत्मा अन रीति मा सुरूवात माळकु ईग मय इन रीति मा अन्त माळीर?
GAL 3:4 येन नीव ईट दुख बेकार अच नेगदीर? लेकीन यागलु बेकार हैलेच.
GAL 3:5 जो नीमी आत्मा दान माळतान अदिक नीम दा सामर्थ्य नव क्याल्सा माळतान, आव येन व्यवस्था अन क्याल्सागोळ देल या खुशखबरी मा विश्वास देल हिंग माळतान?
GAL 3:6 “अब्राहम रा परमेश्वर मा विश्वास माळदुन अदिक ईद आऊन साटी न्यायीपन आळुकु आत.”
GAL 3:7 इदुरसाटी ईद जान्स कोमी कि जो विश्वास माळावाळेर आर, आंदुर अच अब्राहम उन औलाद उर.
GAL 3:8 अदिक पवित्रशास्त्र पयले टु अच ईद जान्सकु कि परमेश्वर गैरयहूदीगोळी विश्वास देल न्यायी ठहरूस्यान, पयले टु अच अब्राहम उक ईद खुशखबरी केळ्स बुट्टुन कि “नीन दा सप्पा जातीगोळी आशीष सिक्‍कीत.”
GAL 3:9 इदुरसाटी जो विश्वास माळावाळेर आर, आंदरी अब्राहम उन सांगुळ आशीष सिक्‍कीत.
GAL 3:10 इदुरसाटी यास लॉकुर व्यवस्था अन क्याल्सागोळ मा भरोसा ईटतार, आंदुर सप्पा श्राप इन हात्‍ती आर, यतिकी शास्त्र दा लिख्सकु आद, “जो यावारा व्यवस्था अन किताब दा लिख्सकु सप्पा मातगोळ माळदुर दा स्थिर ईरालुन, आव श्रापित आन.”
GAL 3:11 लेकीन ईद मात प्रगट आद कि व्यवस्था अन द्वारा परमेश्वर उन ईल याऊ न्यायी ठहरूसालुन, यतिकी न्यायी जन विश्वास देल जित्‍ता ईत्‍तान.
GAL 3:12 लेकीन व्यवस्था अन विश्वास देल येनु संबंध हैलेच; यतिकी “जो अवरी मानस्यान, आव अऊर कारण जित्‍ता ईत्‍तान.”
GAL 3:13 मसीह जो नाम साटी श्रापित बन्सदुन, नामी कोंडकु व्यवस्था अन श्राप देल बिळ्सुसदुन, यतिकी शास्त्र दा लिख्सकु आद, “जो यावारा क्रूस मा लटकुसकु आगतान आव श्रापित आन.”
GAL 3:14 ईद इदुरसाटी आत कि अब्राहम उन आशीष मसीह यीशु दा गैरयहूदीगोळ ताका पोहचुसुल, अदिक नाव विश्वास इन द्वारा आ आत्मा अक प्राप्त माळेव यदुर्द वादा आग्याद.
GAL 3:15 हे वार्टुरा अदिक आकतींगेरा, ना मंळसा अन रीति मा अनतीन; मंळसा अन वाचा जो पक्‍का आगेगतद, रा ना यावारा अदरी टाल्सतान अदिक ना अदुर्दा येनारा वाळुस्तान.
GAL 3:16 इदुरसाटी वादागोळ अब्राहम उक अदिक आऊन वंश इक कोटकु आग्याव. आव ईद अनालुन, “वंशगोळी,” ह्यांग हापाळ मुंदुर बारा दा अंदुन; लेकीन ह्यांग ऊंद इन बारा दा कि “नीन वंश इक” अदिक आव मसीह हुन.
GAL 3:17 लेकीन ना ईद अनतीन: जो वाचा परमेश्वर पयले टु पक्‍का माळीदुन, अदरी व्यवस्था नाक सौ तीस वर्ष इन बाद्दा बंदकु टाल्स सकाल्द कि वादा बेकार ठहरूसुल.
GAL 3:18 यतिकी अगर मीरास व्यवस्था देल सिक्याद रा बाक वादा देल ईला, लेकीन परमेश्वर अब्राहम उक वादा अन द्वारा कोट बुटान.
GAL 3:19 आग बाक व्यवस्था येती कोटकु आत? अद रा अपराधगोळ कारण बाद्दा कोटकु आत कि आ वंश इन बरासताका ईरूल, यारी वादा कोटकु आगीत; अदिक आव स्वर्गदूतगोळ द्वारा ऊंद मध्यस्थ अन कय दा ठहरूसकु आत.
GAL 3:20 मध्यस्थ रा ऊंद इन आगाल्द, लेकीन परमेश्वर ऊंद अच आन.
GAL 3:21 रा येन व्यवस्था परमेश्वर उन वादागोळ विरोध दा आद? यागलु ईला! यतिकी अगर हिंग व्यवस्था कोटकु आगाईत जो जीवन कोळ सकाईत, रा खराखुरा न्यायीपन व्यवस्था देल ईराईत.
GAL 3:22 लेकीन पवित्रशास्त्र सप्पा मुंदरी पाप इन हात्‍ती माळ बुळ्त, ताकी अद वादा यदुर्द आधार यीशु मसीह मा विश्वास माळोद आद, विश्वास माळावाळेर साटी पुरा आगेगुल.
GAL 3:23 लेकीन विश्वास इन बरोर से पयले व्यवस्था अन हात्‍ती ता दा नाम रखवाली आगतोगोद, अदिक आ विश्वास इन बरासताका जो प्रगट आगावाळा ईरोद, नाव अदुर्दा बंधन दा ईत्‍तेव.
GAL 3:24 इदुरसाटी व्यवस्था मसीह ताका पोहचुसोर साटी नाम गुरु आग्याद कि नाव विश्वास देल न्यायी ठहरुसेव.
GAL 3:25 लेकीन याग विश्वास होट्ट बत्‍त, रा ईग नाव गुरु उन हात्‍ती ईतीदील.
GAL 3:26 यतिकी नीव सप्पा आ विश्वास इन द्वारा जो मसीह यीशु मा आद, परमेश्वर उन औलाद हुईर.
GAL 3:27 अदिक नीम दा टु यास मुंदुर मसीह दा बपतिस्मा ताकोंडार आंदुर मसीह अक हाक्‍क कोंडार.
GAL 3:28 ईग ना यावारा यहूदी ईत्‍तुन अदिक ना यावारा गैरयहूदी, ना यावारा दास ना यावारा स्वतंत्र, ना यावारा नर ना नारी, यतिकी नीव सप्पा यीशु मसीह दा ऊंद आईर.
GAL 3:29 अदिक अगर नीव मसीह अन आईर रा अब्राहम उन वंश अदिक वादा अन अनुसार वारीस भी हुईर.
GAL 4:1 ना ईद अनतीन कि वारीस यागासताका चिग्द आन, बल्‍की सप्पा वस्तुगोळ्द स्वामी आन, तरी आऊन दा अदिक दास दा यातोदु भेद हैलेच.
GAL 4:2 लेकीन आप्प उन ठहरूस्द समय ताका संरक्षकगोळ अदिक मुनीमगोळ वश दा ईरतान.
GAL 4:3 हांग अच नाव भी, याग चिकोर ईरव, रा दुनिया अन पयले टु शिक्षा अन वश दा आगकु दास बन्सकु ईरव.
GAL 4:4 लेकीन याग समय पुरा आत, रा परमेश्वर तान पार उक कळुदुन जो आर्त देल पैदा आदुन, अदिक व्यवस्था अन हात्‍ती पैदा आदुन,
GAL 4:5 ताकी व्यवस्था अन हात्‍ती गोळी कोंडकु बिळ्स कोमुल, अदिक नामी पार आगोद हक्क सिकुल.
GAL 4:6 अदिक नीव जो पार हुईर, इदुरसाटी परमेश्वर तान पार उन आत्मा अक, जो “हे अब्बा, हे आप्प” अनकु कारूतान, नाम दिलगोळ दा कळ्यान.
GAL 4:7 इदुरसाटी नी ईग दास हैलेच, लेकीन पार हुय; अदिक याग पार आद, रा परमेश्वर उन द्वारा वारीस भी आद.
GAL 4:8 पयले रा नीव परमेश्वर उक ईला जान्सकु आंदुर दास ईरोर जो स्वभाव देल परमेश्वर हैलेच,
GAL 4:9 लेकीन ईग जो नीव परमेश्वर उक अर्त कोंडीर बल्‍की परमेश्वर नीमी अरतुन, रा आ निर्बल अदिक निकम्मा पयले टु शिक्षा अन मातगोळ दी येती तिर्गतीर, यार्द नीव दुबारा दास आगोद चाहासतीर?
GAL 4:10 नीव दिनगोळ अदिक तिंगुळगोळ अदिक नियत समयगोळ अदिक वर्षगोळी मान्सतीर.
GAL 4:11 ना नीम बारा दा अंजतीन, येल्यारा हिंग आगबाळुल कि जो मेहनत ना नीम साटी माळदीन अद बेकार ठहरूसुल.
GAL 4:12 हे वार्टुरा अदिक आकतींगेरा, ना नीम से विनती माळतीन, नीव नान घाई आगेगी; यतिकी ना भी नीम घाई आगेगीन; नीव नांद येनु बिगळुसीदील.
GAL 4:13 लेकीन नीव जान्सतीर कि पयले पयले ना मय इन निर्बलता अन कारण नीमी खुशखबरी केळ्सदीन.
GAL 4:14 अदिक नीव नान शारीरिक दशा अक जो नीम परीक्षा अन कारण ईरोद, तुच्छ जान्सीदील; ना अदुर देल घृणा माळदीन; अदिक परमेश्वर उन स्वर्गदूत बल्‍की खुद यीशु मसीह अन घाई नानी ग्रहण माळदुन.
GAL 4:15 रा अद नीम खुशी मानसोद येल होत? ना नीम गवाह हुईन कि अगर आग सकाईत रा नीव तान कण्णगोळी भी तेगुकु नानी कोट्ट बुळायदीर.
GAL 4:16 रा येन नीम से सही माताळोद कारण ना नीम दुश्मन बनसेगीन?
GAL 4:17 आंदुर नीमी संगी माळोद रा चाहासतार, लेकीन भला उद्देश देल ईला; बल्‍की नीमी ब्यार्र माळोद चाहासतार कि नीव आंदरी का संगी माळकोमी.
GAL 4:18 लेकीन ईद भी वळ्लीद आद कि भला मात दा हर समय संगी माळोद कोशिश माळकु आगुल, ना सिर्फ अदा समय याग ना नीम सांगुळ ईरतीन.
GAL 4:19 हे नान चिकोरा, यागासताका नीम दा मसीह अन रूप बनसेगाल्द, आगासताका ना नीम साटी बाक चिग्द हाळाहोती जो दुख आगतद अद दुख नेगुतीन.
GAL 4:20 इच्छा रा ईद आगतद कि ईग नीम हाती बंदकु दुसरा अच प्रकार देल माताळाईन, यतिकी नीम बारा दा ना उलझन दा आईन.
GAL 4:21 नीव जो व्यवस्था अन हात्‍ती आगोद चाहासतीर, नानी हेळी, येन नीव व्यवस्था अन केळालीर?
GAL 4:22 शास्त्र दा ईद लिख्सकु आद कि अब्राहम उन येढ्ढ पारगोळ आदुर; ऊंद दासी देल अदिक ऊंद स्वतंत्र आर्त देल.
GAL 4:23 लेकीन जो दासी देल आदुन, आव शारीरिक रीति देल पैदा आदुन; अदिक जो स्वतंत्र आर्त देल आदुन, आव वादा अन अनुसार पैदा आदुन.
GAL 4:24 ई मातगोळ दा उदाहरण आद: ई आर्तेर मान्सी येढ्ढ वाचागोळ आर, ऊंद रा सीनै पहाळ इन यदुर देल दास अच पैदा आगतार; अदिक आक हाजिरा हुळ.
GAL 4:25 अदिक हाजिरा मान्सी अरब इन सीनै पहाळ हुळ, अदिक आधुनिक यरूशलेम आकिन बराबर आद, यतिकी आक तान चिकोर समेत दासत्व दा आर.
GAL 4:26 लेकीन म्याकुच इन यरूशलेम स्वतंत्र आद, अदिक अद नाम मोय हुन.
GAL 4:27 यतिकी शास्त्र दा लिख्सकु आद, “हे वांझला, नी जो पैदा माळाल खुशी माळ; नी यारी दुख नेगाल, कुतक्या खोल्सकु जय जयकार माळ; यतिकी त्याग्सद मंळसा अन्द औलाद सुहागीन इन औलाद देल भी यक्कुल आद.”
GAL 4:28 हे वार्टुरा अदिक आकतींगेरा, नाव इसहाक इन घाई वादा अन औलाद हुयेव.
GAL 4:29 अदिक ह्यांग आ समय मय इन अनुसार पैदा आग्द आत्मा अन अनुसार पैदा आग्द उक सतुसोद, हांग अच ईग भी आगतद.
GAL 4:30 लेकीन पवित्रशास्त्र येन अनतद? “दासी अदिक आकिन पार उक तेगु बुळ, यतिकी दासी अन पार स्वतंत्र आर्त इन पार उन सांगुळ उत्‍तराधिकारी आगतीदील.”
GAL 4:31 इदुरसाटी हे वार्टुरा अदिक आकतींगेरा, नाव दासी नोर ईला लेकीन स्वतंत्र आर्त इनोर औलाद हुयेव.
GAL 5:1 मसीह स्वतंत्रता अन साटी नामी स्वतंत्र माळ्यान; इदुरसाटी इदुर्दा अच स्थिर ईरी, अदिक दासत्व अन जुआ दा मात्‍त बिळबाळी.
GAL 5:2 नोळी, ना पौलुस नीम से अनतीन कि अगर खतना माळसुसीर, रा मसीह देल नीमी येनु लाभ आगतीदील.
GAL 5:3 तरी भी ना हर ऊंद खतना माळसुसावाळा अक विनती माळतीन कि आऊक सप्पा व्यवस्था मानसोद बिद्दीत.
GAL 5:4 नीव जो व्यवस्था अन द्वारा न्यायी ठहरूसोद चाहासतीर, मसीह देल अलग अदिक अनुग्रह देल बिदोगीर.
GAL 5:5 यतिकी आत्मा अन कारण नाव विश्वास देल, आशा माळ्द न्यायीपन इन हादी कायतेव.
GAL 5:6 मसीह यीशु दा ना खतना अदिक ना खतनारहित येनारा क्याल्सा अन आद, लेकीन सिर्फ विश्वास, जो प्यार इन द्वारा प्रभाव हाकत्या.
GAL 5:7 नीव रा भला भाति हरीर. ईग याव नीमी रोक्स बुटुन कि सच्चाई इन भरोसा माळबाळी.
GAL 5:8 हिंग सीख नीम कारावाळा अन दी टु हैलेच.
GAL 5:9 थ्वाळासा खमीर सप्पा काल्सद हीट इक खमीर माळ बुळतद.
GAL 5:10 ना प्रभु मा नीम बारा दा भरोसा ईटतीन कि नीम यातोदारा दुसरा विचार ईरतीदील; लेकीन जो नीमी घबरूस बुळतान, आव यावारा येती आगबाळुल फैसला आदीत.
GAL 5:11 लेकीन हे वार्टुरा अदिक आकतींगेरा, अगर ना ईगासताका खतना अन प्रचार माळतीन, रा येती ईगासताका सतुस्कु आगतीन? बाक रा क्रूस इन ठोकर होगतेला ईत्‍त.
GAL 5:12 भला आगाईत कि जो नीमी डावाडोल माळतार, आंदुर तान मय अच कोद बुळायदुर.
GAL 5:13 हे वार्टुरा अदिक आकतींगेरा, नीव स्वतंत्र आगोर साटी कार्सकु आगीर; लेकीन हिंग आगबाळुल कि ईद स्वतंत्रता शारीरिक क्याल्सागोळ साटी मवका बनसुल, बल्‍की प्यार देल आबुर दाबुर दास बन्सी.
GAL 5:14 यतिकी सप्पा व्यवस्था ई ऊंद अच मात दा पुरा आगेगतद, “नी तान हातळोर से तान घाई प्यार ईट.”
GAL 5:15 लेकीन अगर नीव आबुर दाबुर इक हल्ल देल कचतीर अदिक हरूकु तिनतीर, रा सावधान ईरी कि आबुर दाबुर सत्यानाश ना माळबुळी.
GAL 5:16 लेकीन ना अनतीन, आत्मा अन अनुसार नळदीर रा नीव मय इन लालसा यातोदारा रीति देल पुरा माळतीदील.
GAL 5:17 यतिकी मय आत्मा अन विरोध दा अदिक आत्मा मय इन विरोध दा लालसा माळतद, अदिक ईव आबुर दाबुर विरोधी आव, इदुरसाटी कि जो नीव माळोद चाहासतीर अद माळ सकबाळी.
GAL 5:18 अदिक अगर नीव आत्मा अन नळ्सदुर देल नळुतीर रा व्यवस्था अन हात्‍ती ईतीदील.
GAL 5:19 मय इन क्याल्सा रा प्रगट आव, मतलब व्यभिचार, खराब क्याल्सा, लुचपन,
GAL 5:20 मूर्तिपूजा, जादु टोना, दुश्मनी, झगळा, जलन, सिट्ट, विरोध, फूट, स्वार्थीपन,
GAL 5:21 जलन, मतवालापन, अवैध संबंध, अदिक ईऊर घाई मात्‍त दुसरा क्याल्सा आव, ईऊर बारा दा ना नीम से पयले टु अच अंद बुळतीन ह्यांग पयले अंद भी कोंडीन, कि ईत्‍ता क्याल्सा माळावाळेर परमेश्वर उन राज्य अन वारीस आगतीदील.
GAL 5:22 लेकीन आत्मा अन काय, प्यार, खुशी, शांती, धीरज, कृपा, भलाई, विश्वास,
GAL 5:23 नम्रता, अदिक संयम आद; हिंग-हिंग क्याल्सागोळ विरोध दा यातोदारा भी व्यवस्था हैलेच.
GAL 5:24 अदिक जो मसीह यीशु नोर आर, आंदुर मय इक आऊन लालसागोळ अदिक अभिलाषागोळ समेत क्रूस मा येर्स बुटार.
GAL 5:25 अगर नाव आत्मा अन द्वारा जित्‍ता आयेव, रा आत्मा अन अनुसार नळदेव भी.
GAL 5:26 नाव घमण्डी आगकु ना आबुर दाबुर इक छेळसेव, अदिक ना आबुर दाबुर से जलनखोरी माळेव.
GAL 6:1 हे वार्टुरा अदिक आकतींगेरा, अगर यावारा मंळसा यातोदारा अपराध दा हुळकु भी आगतान रा नीव जो आत्मिक आईर, नम्रता अन सांगुळ ईत्‍ता मंळसा अक संभाळसी, अदिक तांद भी सावधानी ईटी कि नीव भी परीक्षा दा बिळबाळी.
GAL 6:2 नीव आबुर दाबुर बोझ नेगी, अदिक ईत्‍ता प्रकार मसीह अन व्यवस्था अक पुरा माळी.
GAL 6:3 यतिकी अगर यावारा येनु ईला ईत्‍तुर मा भी तान तान इक येनारा सम्सतान, रा तान तान इक ध्वाका कोळतान.
GAL 6:4 लेकीन हर ऊंद तांद अच क्याल्सा अक जाच कोमुल, अदिक आग दुसरा अन बारा दा ईला लेकीन तांद अच बारा दा आऊक घमण्ड माळोद मवका सिक्‍कीत.
GAL 6:5 यतिकी हर ऊंद मंळसा तांद अच बोझ नेगदान.
GAL 6:6 यारी वचन इन शिक्षा सिकतद, आव सप्पा वळ्लेव वस्तुगोळ दा कलसावाळा अक भागी माळुल.
GAL 6:7 ध्वाका तिनबाळी; परमेश्वर मज्याक दा हार्सकु आगालुन, यतिकी मंळसा जो फसल हच्यान आव अदा कळदान.
GAL 6:8 यतिकी जो तान मय इन साटी हचतान, आव मय इन द्वारा विनाश इन कटनी कळदान; अदिक जो आत्मा अन साटी हचतान, आव आत्मा अन द्वारा अनन्त जीवन इन कटनी कळदान.
GAL 6:9 नीव भला क्याल्सा माळदुर दा साहस बिळबाळी, यतिकी अगर नाव ढिला ईरतीदील रा ठीक समय मा कटनी कळदेव.
GAL 6:10 इदुरसाटी येल ताका समय सिक्‍कीत नाव सप्पा घराना अन सांगुळ वळ्लीद माळेव, विशेष माळकु विश्वासी वार्टुर सांगुळ.
GAL 6:11 नोळी, ना ह्यांग धोळ धोळ अक्षरगोळ दा नीमी तान कय देल लिख्सीन.
GAL 6:12 जो लॉकुर शारीरिक दिखावा चाहासतार आंदुर अच नीम्द खतना माळसुसोर साटी दबाव हाकतार, सिर्फ इदुरसाटी कि आंदुर मसीह अन क्रूस इन कारण सतुस्कु आगबाळुल.
GAL 6:13 यतिकी खतना माळसुसावाळेर खुद रा व्यवस्था मा नळालुर, लेकीन नीम खतना इदुरसाटी माळसुसोद चाहासतार कि नीम शारीरिक दशा मा घमण्ड माळुल.
GAL 6:14 लेकीन हिंग आगबाळुल कि ना दुसरा यातोदारा मात मा घमण्ड माळाईन, सिर्फ नाम प्रभु यीशु मसीह अन क्रूस इन, यार्द द्वारा दुनिया नान नजर दा अदिक ना दुनिया अन नजर दा क्रूस मा येर्सकु आगीन.
GAL 6:15 यतिकी ना खतना अदिक ना खतनारहित येनारा आद, लेकीन व्हाशोद दुनिया.
GAL 6:16 यास ई नियम मा नळदार आंदुर मा, अदिक परमेश्वर उन इस्त्राएल मा शांती अदिक दया आगतेला ईरूल.
GAL 6:17 मुंद नानी याऊ दुख कोळबाळुल, यतिकी ना यीशु अन दागगोळी तान मय दा हुळकु टेटाळतीन.
GAL 6:18 हे वार्टुरा अदिक आकतींगेरा, नाम प्रभु यीशु मसीह अन अनुग्रह नीम आत्मा अन सांगुळ ईरूल. आमीन.
EPH 1:1 नान पौलुस उन दी टु जो परमेश्वर उन इच्छा देल यीशु मसीह अन प्रेरित आन, आ पवित्र अदिक मसीह यीशु दा विश्वासी लॉकुर्द हेसुर जो इफिसुस दा आद:
EPH 1:2 नाम्द आप्प परमेश्वर अदिक प्रभु यीशु मसीह अन्द दी टु नीमी अनुग्रह अदिक शांती सिकतेला ईरूल.
EPH 1:3 नाम्द प्रभु यीशु मसीह अन्द परमेश्वर अदिक आप्प उन धन्यवाद आगुल कि आव नामी मसीह दा स्वर्गीय जागागोळ दा सब प्रकार इन आत्मिक आशीष कोट्टुन.
EPH 1:4 ह्यांग आव नामी दुनिया अन उत्पत्ति टु पयला अदुर्दा नीवळुस कोंडान कि नाव आऊन हात्‍ती प्यार दा पवित्र अदिक निर्दोष आगुल.
EPH 1:5 अदिक तान इच्छा अन्द भला अभिप्राय इन अनुसार नामी तान साटी पयला टु ठहरूसदुन कि यीशु मसीह अन्द द्वारा नाव आऊन गोद पार आगुल,
EPH 1:6 कि आऊन आ अनुग्रह अन्द महिमा अन्द स्तुति आगुल, यारी आव नामी आ प्रिय दा सेंत-मेंत कोट्टुन.
EPH 1:7 नामी अदुर्दा आऊन रक्ता अन द्वारा छुटकारा, मतलब अपराधगोळ्द माफी, आऊन आ अनुग्रह अन्द धन इन अनुसार सिक्याद,
EPH 1:8 यारी आव पुरा ग्यान अदिक समझ सहित नाम मा बहुतायत देल माळदुन.
EPH 1:9 यतिकी आव तान इच्छा अन्द भेद आ भला अभिप्राय इन अनुसार नामी हेळदुन, यारी आव खुद तान दा ठान्स कोंडीदुन
EPH 1:10 कि समयगोळ्द पुरा आगोद हिंग प्रबन्ध आगुल कि जो येनारा स्वर्ग दा आद अदिक जो येनारा पृथ्वी मा आद, सप्पा येनारा अद मसीह दा जमा माळुल.
EPH 1:11 अदुर्दा यदुर्दा नाव भी आऊन मनसा देल जो तान इच्छा अन्द मत इन अनुसार सप्पा येनारा माळतान, पयला टु ठहरूसकु आगकु मीरास बनसुल
EPH 1:12 कि नाव, यार पयला टु मसीह मा आशा ईटीदेव, आऊन महिमा अन्द स्तुति इन कारण आगुल.
EPH 1:13 अदिक अदुर्दा नीम मा भी, याग नीव सच्चाई इन वचन केळदीर जो नीम्द उद्धार इन खुशखबरी आद अदिक यदुर मा नीव विश्वास माळदीर, वादा माळकु आत पवित्र आत्मा अन्द छाप हत्‍त.
EPH 1:14 परमेश्वर उन साटी पैस्या देल कोंडकु आग्यार आंदुर्द छुटकारा अन्द साटी नाम्द मीरास इन बयाना हुन, कि आऊन महिमा अन्द स्तुति आगुल.
EPH 1:15 ई कारण, ना भी आ विश्वास इन बातणी केळकु जो नीम लॉकुर दा प्रभु यीशु मा आन अदिक सप्पा पवित्र लॉकुर मा प्यार प्रगट आद,
EPH 1:16 नीम साटी धन्यवाद माळोद बिळालीन, अदिक तान प्रार्थनागोळ दा नीमी याद माळतेला ईरतीन
EPH 1:17 कि नाम्द प्रभु यीशु मसीह अन्द परमेश्वर जो महिमा अन्द आप्प हुन, नीमी तान पहचान दा ग्यान अदिक प्रकाश इन आत्मा कोळुल,
EPH 1:18 अदिक नीम्द मन इन कण्णगोळ ज्योतिर्मय आगुल कि नीव जान्स कोमी कि आऊन बुलाहट इन आशा येन आद, अदिक पवित्र लॉकुर दा आऊन मीरास इन महिमा अन्द धन ह्यांग आद,
EPH 1:19 अदिक आऊन सामर्थ्य नाम दा जो विश्वास माळतार, याट महान आद, आऊन शक्ति इन प्रभाव इन आ कार्य अन्द अनुसार
EPH 1:20 जो आव मसीह दा माळदुन कि आऊक सोत्‍तुर दा टु जित्‍ता माळकु स्वर्गीय जागागोळ दा तान ऊम्मा कय दी कुर्सदुन
EPH 1:21 ताकी सब प्रकार इन प्रधानता, अदिक अधिकार, अदिक सामर्थ्य, अदिक प्रभुता अन्द, अदिक हर ऊंद हेसुर इन म्याकुच, जो ना सिर्फ ई दुनिया दा पर बरावाळा दुनिया दा भी ताकोमकु आदीन, कुर्सदुन;
EPH 1:22 अदिक सप्पा येनारा आऊन कालगोळ ल्यालमा माळ बुट्टुन; अदिक आऊक सब वस्तुगोळ मा श्रेष्ट ठहरूसकु मंडली इक कोट बुट्टुन,
EPH 1:23 ईद आऊन मय हुन, अदिक आऊन परिपुर्णता आद जो सब दा सब येनारा पुरा माळतान.
EPH 2:1 आव नीमी भी जित्‍ता माळदुन, जो तान अपराधगोळ अदिक पापगोळ्द कारण सोतकु ईरोर
EPH 2:2 यदुर मा नीव पयला ई दुनिया अन रीति मा, अदिक आकाश इन अधिकार इन शासक मतलब आ आत्मा अन्द अनुसार नळीर, जो ईग भी आग्या ईला मान्सावाळेर्द कार्य माळतान.
EPH 2:3 इंदुर दा नाव भी सप्पा अच मुंदुर पयला तान मय इन लालसागोळ दा दिन बितुसेव, अदिक मय अदिक मन इन इच्छागोळी पुरा माळेव, अदिक अन्य लॉकुर घाई स्वभाव देल सिट्ट इन औलाद ईरेव.
EPH 2:4 लेकीन परमेश्वर जो दया अन्द धनी आन, तान आ धोळ प्यार इन कारण यार देल आव नाम से प्यार माळदुन,
EPH 2:5 याग नाव अपराधगोळ्द कारण सोतकु ईरेव रा नामी मसीह अन्द सांगुळ जित्‍ता माळदुन अनुग्रह देल अच नीम्द उद्धार आत,
EPH 2:6 अदिक मसीह यीशु दा आऊन सांगुळ नेगदुन, अदिक स्वर्गीय जागा दा आऊन सांगुळ कुर्सदुन
EPH 2:7 कि आव तान आ कृपा देल जो मसीह यीशु दा नाम मा आद, बरावाळा समय इन दुनिया दा तान अनुग्रह अन्द असीम धन तोर्सदुन.
EPH 2:8 यतिकी विश्वास इन भेंट इन द्वारा अनुग्रह देल अच नीम्द उद्धार आत, अदिक ईद नीम्द दी टु ईला, बल्‍की परमेश्वर उन दान हुन,
EPH 2:9 अदिक ना कर्मगोळ्द कारण, हिंग आगबाळुल कि यावारा घमण्ड माळुल.
EPH 2:10 यतिकी आव नामी माळ्यान, अदिक मसीह यीशु दा आ वळ्लीद क्याल्सागोळ्द साटी माळकु आगीर यारी परमेश्वर पयला टु नामी माळोर साटी तयार माळदुन.
EPH 2:11 ई कारण याद माळी कि नीव जो शारीरिक रीति देल गैरयहूदी आईर अदिक जो लॉकुर मय दा कय इन माळकु खतना देल खतनावाळेर कहलुस्तार, आंदुर नीम इक खतनारहित अनतार,
EPH 2:12 नीव लॉकुर आ समय मसीह टु अलग, अदिक इस्त्राएल इन प्रजा अन्द पद देल अलग माळकु आदीर, अदिक वादा अन्द वाचागोळ्द भागी ईला ईरोर, अदिक आशाहीन अदिक दुनिया दा मय रहित ईरोर.
EPH 2:13 लेकीन ईग मसीह यीशु दा नीव जो पयला दुर ईरीर, मसीह अन्द रक्ता अन द्वारा हात्‍ती आगेगीर.
EPH 2:14 यतिकी आवा नाम्द मेल हुन जो येढ्ढु मुंदरी ऊंद माळ कोंडुन अदिक अलग माळावाळा दिवार इक जो बीच दा ईरोद केडु बुट्टुन,
EPH 2:15 अदिक तान मय दा दुश्मनी मतलब अद व्यवस्था यदुर्द आग्यागोळ विधीगोळ्द रीति मा ईरव, मिटकुस बुट्टुन कि येढ्ढु देल तान दा ऊंद व्हाशोद मंळसा पैदा माळकु मेल माळसुस बुळुल,
EPH 2:16 अदिक क्रूस मा दुश्मनी इक नाश माळकु इदुर द्वारा येढ्ढु मुंदरी ऊंद मय माळकु परमेश्वर देल भेंट माळसुस्यान.
EPH 2:17 आव बंदकु नीमी जो दुर ईरीर अदिक आंदरी जो हात्‍ती ईरोर, येढ्ढु मुंदरी मेल मिलाप इन खुशखबरी केळ्सदुन.
EPH 2:18 यतिकी आऊन द्वारा नाव येढ्ढु मुंदुर्द ऊंद आत्मा दा आप्प उन हात्‍ती प्रवेश आगतद.
EPH 2:19 इदुरसाटी नीव ईग परदेशी अदिक मुसाफिर ईतीदील, लेकीन पवित्र लॉकुर्द संगी स्वदेशी अदिक परमेश्वर उन घराना दोर आगेदीर.
EPH 2:20 अदिक प्रेरितगोळ अदिक भविष्यवक्तागोळ्द पायवा मा, यार्द क्वाना अन्द कल्ल मसीह यीशु खुद अच आन, माळकु आगीर.
EPH 2:21 यदुर्दा पुरा रचना ऊंद सांगुळ मिलुसकु प्रभु दा ऊंद पवित्र मंदिर बन्सतेला होगतद,
EPH 2:22 यदुर्दा नीव भी आत्मा अन्द द्वारा परमेश्वर उन निवास स्थान आगोर साटी ऊंद सांगुळ माळकु आगतीर.
EPH 3:1 ईदा कारण ना पौलुस जो नीव गैरयहूदीगोळ्द साटी मसीह यीशु दा बंदीन.
EPH 3:2 अगर नीव परमेश्वर उन आ अनुग्रह अन्द प्रबन्ध इन समाचार केळीदीर, जो नीम्द साटी नानी कोटकु आग्याद,
EPH 3:3 मतलब ईद कि अद भेद नान मा प्रकाशन इन द्वारा प्रगट आत, ह्यांग ना पयला अच थ्वाळासा दा लिख्सदीन,
EPH 3:4 यारी नीव वाचुसकु जान्स सकतीर कि ना मसीह अन्द अद भेद यल ताका सम्सतीन.
EPH 3:5 जो अन्य समयगोळ दा मंळसागोळ्द औलादगोळ इक हिंग ईला हेळकु आगीत, ह्यांग कि आत्मा अन्द द्वारा ईग आऊन पवित्र प्रेरितगोळ अदिक भविष्यवक्तागोळ मा प्रगट माळकु आग्याद.
EPH 3:6 मतलब ईद कि मसीह यीशु दा खुशखबरी इन द्वारा गैरयहूदी लॉकुर मीरास दा हिस्सेदार, अदिक ऊंद अच मय इन अदिक वादा अन्द भागी आर.
EPH 3:7 ना परमेश्वर उन अनुग्रह अन्द आ दान इन अनुसार, जो आऊन सामर्थ्य अन्द प्रभाव इन अनुसार नानी कोटकु आग्याद, आ खुशखबरी इन सेवक बन्सदीन,
EPH 3:8 नान मा जो सप्पा पवित्र लॉकुर दा टु स्याणेर दा टु भी स्याणेव आईन, ईद अनुग्रह आत कि ना गैरयहूदीगोळ इक मसीह अन्द अगम्य धन इन खुशखबरी केळ्साईन,
EPH 3:9 अदिक सब मा ईद मात प्रकाशित माळुल कि आ भेद इन प्रबन्ध येन आद, जो सप्पा मुंदुर सृजनहार परमेश्वर दा सुरूवात टु गुप्त ईरोद.
EPH 3:10 ताकी ईग मंडली इन द्वारा, परमेश्वर उन अलग अलग प्रकार इन ग्यान आ प्रधानगोळी अदिक अधिकारीगोळ मा जो स्वर्गीय जागा दा आर, प्रगट माळकु आगुल.
EPH 3:11 आ अनन्त मंळसा अन्द अनुसार जो आव नाम प्रभु मसीह यीशु दा माळीदुन.
EPH 3:12 यदुर दा नामी आऊन मा विश्वास माळदुर देल साहस अदिक भरोसा अन्द सांगुळ परमेश्वर उन हात्‍ती बरोद अधिकार आद.
EPH 3:13 इदुरसाटी ना विनती माळतीन कि जो क्लेश नीम साटी नानी आगेत्याद, अदुर कारण साहस बिळबाळी, यतिकी अदुर दा नीम्द महिमा आद.
EPH 3:14 ना ईदा कारण आ पृथ्वी मा आप्प उन मुंद ट्वांगरा टेक्सतीन,
EPH 3:15 यदुर देल स्वर्ग अदिक पृथ्वी मा, हर ऊंद घराना अन्द हेसुर ईटकु आगतद,
EPH 3:16 कि आव तान महिमा अन्द धन इन अनुसार नीमी ईद दान कोळुल कि नीव आऊन आत्मा देल तान बुळ्क इन मंळसातत्व दा सामर्थ्य हासिल माळकु बलवन्त आगतेला होगी;
EPH 3:17 अदिक विश्वास इन द्वारा मसीह नीम्द दिल दा कुरूल कि नीव प्यार दा जळ हुळकु अदिक पायवा हाक्‍कु,
EPH 3:18 सप्पा पवित्र लॉकुर्द सांगुळ भला-भाति समसोद शक्ति सिकुल कि आऊन चौळाई, अदिक लंबाई, अदिक ऊँचाई, अदिक गहराई याट आद,
EPH 3:19 अदिक मसीह अन्द आ प्यार इक जान्स सकी जो ग्यान देल अनजान आर कि नीव परमेश्वर उन पुरा भरपुरी ताका परिपुर्ण आगेगी.
EPH 3:20 ईग जो हिंग सामर्थी आन कि नाम्द विनती अदिक समझ देल मात्‍त यक्कुल क्याल्सा माळ सकतान, आ सामर्थ्य अन्द अनुसार जो नाम दा कार्य माळतान,
EPH 3:21 मंडली दा अदिक मसीह यीशु दा आऊन महिमा पीढ़ी टु पीढ़ी ताका हमेशा हमेशा आगतेला ईरूल. आमीन.
EPH 4:1 इदुरसाटी ना जो प्रभु दा बंदीन नीम से विनती माळतीन कि या बुलाहट देल नीव कारूकु आगीदीर, अदुर लायक व्यवहार माळी,
EPH 4:2 मतलब पुरा दीनता अदिक नम्रता सहित, अदिक धीरज हुळकु प्यार देल आबुर दाबुर्द सहन माळी;
EPH 4:3 अदिक मेल इन बंधन दा आत्मा अन्द एकता ईटोद यत्न माळी.
EPH 4:4 ऊंद अच मय आद अदिक ऊंद अच आत्मा; ह्यांग नीमी जो कारूकु आगीदीर तान कारूकु आगोर देल ऊंद अच आशा आद.
EPH 4:5 ऊंद अच प्रभु आन, ऊंद अच विश्वास ऊंद अच बपतिस्मा,
EPH 4:6 अदिक सब मुंदुरव ऊंद अच परमेश्वर अदिक आप्प आन, जो सप्पा मुंदुर म्याकुच अदिक सप्पा मुंदुर बीच दा अदिक सब मुंदुर दा आन.
EPH 4:7 लेकीन नाम दा टु हर ऊंद मंळसा अक मसीह अन्द दान इन परिमाण इन अनुसार अनुग्रह सिक्याद.
EPH 4:8 इदुरसाटी आव अनतान: “आव ऊँचाई मा येरदुन अदिक बंदीगोळ इक कटकु ओतुन, अदिक मंळसागोळ इक दान कोट्टुन.”
EPH 4:9 आऊन येरदुर देल, अदिक येन सिकतद सिर्फ ईद कि अद पृथ्वी इन ल्यालमा जागागोळ्द दा ईळसी भी दुन.
EPH 4:10 अदिक जो ईळदुन ईव आवा हुन जो पुरा आकाश टु म्याकुच येरे भी दुन कि सब येनारा परिपुर्ण माळुल.
EPH 4:11 आव थ्वाळासा लॉकुरी प्रेरित नियुक्त माळकु, अदिक थ्वाळासा लॉकुरी भविष्यवक्ता नियुक्त माळकु, अदिक थ्वाळासा लॉकुरी खुशखबरी केळावाळेर नियुक्त माळकु, अदिक थ्वाळासा लॉकुरी रखवाला अदिक उपदेशक नियुक्त माळकु कोट बुट्टुन,
EPH 4:12 यदुर देल पवित्र लॉकुर सिद्ध आगेगुल अदिक स्यावा अन्द क्याल्सा माळकु आगुल अदिक मसीह अन्द मय इक उन्नती सिक्‍कुल,
EPH 4:13 यागासताका कि नाव सब इन सब विश्वास अदिक परमेश्वर उन पार उन पहचान दा ऊंद आगबाळुल, अदिक ऊंद सिद्ध मंळसा आगबाळुल अदिक मसीह अन्द पुरा डील-डौल ताका ना वाळुसुल.
EPH 4:14 ताकी नाव मुंदु टु चिकोर ईरतीदील जो मंळसागोळ्द ठग-विद्या अदिक चतुराई देल, आंदुर भ्रम इन युक्तिगोळ्द अदिक उपदेश इन हर ऊंद ध्वाका देल उछलस्कु अदिक ईल अल तिर्गुसकु आगताव.
EPH 4:15 बल्‍की प्यार दा सच्चाई देल माताळतेला सब मातगोळ दा अदुर्दा जो ताल्ला आद, मतलब मसीह दा वाळुसतेला होगुल,
EPH 4:16 यदुर देल पुरा मय, हर ऊंद जोळ इन सहायता देल ऊंद सांगुळ मिलुसकु अदिक ऊंद सामर्थ्य सांगुळ गठुस्कु, आ प्रभाव उन अनुसार जो हर ऊंद अंग इन ठीक-ठीक कार्य माळोर द्वारा आऊन दा आगतद, तान तान इक वाळुसतद कि आव प्यार दा उन्नती माळतेला होगुल.
EPH 4:17 इदुरसाटी ना ईद अनतीन अदिक प्रभु दा आग्रह माळतीन कि ह्यांग गैरयहूदी लॉकुर तान मन इन अनर्थ रीति मा नळुतार, नीव ईगी टु बाक हिंग व्यवहार माळबाळेतीर.
EPH 4:18 यतिकी आंदुर बुद्धी भ्रष्ट आगेग्याद, अदिक आ अग्यानता अन्द कारण जो आंदुर दा आद अदिक आंदुर मन इन कठोरता अन्द कारण आंदुर परमेश्वर उन जीवन टु अलग माळकु आदुर;
EPH 4:19 अदिक आंदुर सुन्न आगकु लुचपन दा हतेदुर कि सब प्रकार इन खराब क्याल्सा लालसा देल माळुल.
EPH 4:20 पर नीव मसीह अन्द हिंग शिक्षा ताकोंडीदील.
EPH 4:21 बल्‍की नीव खराखुरा आऊंदा केळदीर अदिक, ह्यांग यीशु दा सच्चाई आद, अदुर दा कल्सकु भी आग्यार
EPH 4:22 कि नीव पिछला चाल चलन इक हाळोद मंळसातत्व अक जो भरमुसावळ्त अभिलाषागोळ्द अनुसार भ्रष्ट आगेगतद, ईळु बुळी
EPH 4:23 अदिक तान मन इन आत्मिक स्वभाव दा व्हाशोद बन्सतेला होगी,
EPH 4:24 अदिक व्हाशोद मंळसातत्व अक हाक्‍क कोमी जो परमेश्वर उन अनुरूप सच्चाई इन न्यायीपन अदिक पवित्रता दा सजुस्कु आग्याद.
EPH 4:25 ई कारण ख्वाटा माताळोद बिटकु हर ऊंद मंळसा तान मान्ना हातळोर से सही माताळुल, यतिकी नाव आपस दा आबुर दाबुर अंग हुयेव.
EPH 4:26 सिट्ट रा माळी, पर पाप माळबाळी; सुर्य मुळका ताका नीम्द गुस्सा ईरबाळुल,
EPH 4:27 अदिक ना शैतान उक मवका कोळी.
EPH 4:28 काळताना माळावाळा बाक काळताना माळबाळुल, बल्‍की वळ्लीद क्याल्सा माळोर साटी तान कयगोळ देल मेहनत माळुल, इदुरसाटी कि यारी प्रयोजन आद आऊक कोळली आऊन हात्‍ती येनारा ईरूल.
EPH 4:29 यातोदु सही मात नीम्द बाय देल होळबाळुल, पर जरवत इन अनुसार अदा होळुल जो उन्नती इन साटी वळ्लीद ईरूल, ताकी आऊन से केळावाळेर मा अनुग्रह ईरूल.
EPH 4:30 परमेश्वर उन पवित्र आत्मा अक दुख माळबाळी, यदुर देल नीम मा छुटकारा अन्द दिन इन साटी छाप कोटकु आग्याद.
EPH 4:31 सब प्रकार इन कळवाहट, अदिक प्रकोप अदिक सिट्ट, अदिक कलह, अदिक अपमान, सप्पा बैरभाव समेत नीम से दुर माळकु आगुल.
EPH 4:32 आबुर दाबुर मा कृपा माळी अदिक मेहरबान आगी, अदिक ह्यांग परमेश्वर मसीह दा नीम्द अपराध माफ माळदुन, हांग अच नीव भी आबुर दाबुर्द अपराध माफ माळी.
EPH 5:1 इदुरसाटी प्रिय चिकोरगोळ घाई परमेश्वर उन अनुकरण माळी,
EPH 5:2 अदिक प्यार दा नळी ह्यांग मसीह भी नीम से प्यार माळदुन, अदिक नाम साटी तान तान इक सुखदायक सुगन्ध इन साटी परमेश्वर उन मुंद भेंट माळकु बलिदान माळ बुट्टुर.
EPH 5:3 ह्यांग पवित्र लॉकुर्द लायक आद. हांग नीम दा व्यभिचार अदिक यातोदु प्रकार इन अशुध्द क्याल्सा या लोभ इन मात भी आगबाळुल;
EPH 5:4 अदिक ना निर्लज्जता, ना मूढ़ता अन्द मातचीत माळदेव, ना मज्याक माळदेव; यतिकी ईव मातगोळ शोभा कोळालव, बल्‍की धन्यवाद अच केळकु आगुल.
EPH 5:5 यतिकी नीव ईद जान्सतीर कि यावारा व्यभिचारी, या अशुध्द जन, या लोभी मंळसा अन्द, जो मूर्ति इन पुजा माळावाळा अन बराबर आन, मसीह अदिक परमेश्वर उन राज्य दा मीरास ईल्लच.
EPH 5:6 यावारा नीमी व्यर्थ मातगोळ देल ध्वाका कोळबाळुल, यतिकी ईवा क्याल्सागोळ्द कारण परमेश्वर उन सिट्ट आग्या ईला मान्सावाळेर मा भळकुसतद.
EPH 5:7 इदुरसाटी नीव आंदुर सहभागी ईरबाळी.
EPH 5:8 यतिकी नीव रा पयला अंधकार ईरीर लेकीन ईग प्रभु दा ज्योति आईर, इदुरसाटी ज्योति इन औलाद इन घाई नळी
EPH 5:9 यतिकी ज्योति इन फल सब प्रकार इन भलाई, अदिक न्यायीपन, अदिक सच्चाई आद,
EPH 5:10 अदिक ईद परखुसी कि प्रभु उक येन भाऊसतद.
EPH 5:11 अंधकार इन निष्फल क्याल्सागोळ दा सहभागी ईरबाळी, बल्‍की अदुर मा उलाहना कोळी.
EPH 5:12 यतिकी आंदुर गुप्त क्याल्सागोळ्द चर्चा भी शरम इन मात आद.
EPH 5:13 पर यास क्याल्सागोळ मा उलाहना कोटकु आगतद अव सप्पा ज्योति टु प्रगट आगतद, यतिकी जो सप्पा येनारा अक प्रगट माळतद अद ज्योति हुन.
EPH 5:14 ई कारण आव अनतान, “हे मिंगावाळा, जाग्स अदिक मुर्दागोळ दा टु जित्‍ता येळ; रा मसीह अन्द ज्योति नीन मा चमकुसीत.”
EPH 5:15 इदुरसाटी ध्यान देल नोळी, कि ह्यांग चाल नळुतीर: निर्बुद्धीगोळ्द घाई ईला पर बुद्धिमानगोळ्द घाई नळी.
EPH 5:16 मवका अक बार्र सम्सी, यतिकी दिन बुरा आव.
EPH 5:17 ई कारण निर्बुद्धी ईरबाळी, पर ध्यान देल सम्सी कि प्रभु उन इच्छा येन आद.
EPH 5:18 अंगुर इन रास्सा टु मतवाला बन्सबाळी, यतिकी इदुर देल लुचपन आगतद, पर आत्मा देल परिपुर्ण आगतेला होगी,
EPH 5:19 अदिक आपस दा भजन अदिक स्तुति हाळ अदिक आत्मिक हाळगोळ हाळतोगी, अदिक तान तान मन दा प्रभु उन मुंद हाळतेला अदिक कीर्तन माळतेला ईरी.
EPH 5:20 अदिक हमेशा सब मातगोळ्द साटी नाम्द प्रभु यीशु मसीह अन्द हेसुर देल परमेश्वर आप्प उन धन्यवाद माळतेला ईरी.
EPH 5:21 मसीह अन्द अंज्क देल आबुर दाबुर्द हात्‍ती ईरी.
EPH 5:22 हे हिंग्सुरा, तान तान गांड्ड उन हिंग हात्‍ती ईरी जसा प्रभु उन.
EPH 5:23 यतिकी गांड्ड हिंग्स उन ताल्ला हुन ह्यांग कि मसीह मंडली इन ताल्ला आन अदिक खुद अच मय इन उद्धारकर्ता आन.
EPH 5:24 पर ह्यांग मंडली मसीह अन्द हात्‍ती आद, हांग अच हिंग्सुर भी हर मात दा तान तान गांड्ड उन हात्‍ती ईरूल.
EPH 5:25 हे गांड्डुरा, तान तान हिंग्सुर से प्यार ईटी ह्यांग मसीह भी मंडली से प्यार माळकु तान तान इक अदुर साटी कोट बुट्टुन
EPH 5:26 कि आऊक वचन इन द्वारा नीर इन मयतोळदुर देल शुद्ध माळकु पवित्र माळी,
EPH 5:27 अदिक आऊक ऊंद हिंग तेजस्वी मंडली माळकु तान हात्‍ती निदुर्सुल, यदुर दा ना कलंक, ना झुर्री, ना यातोदारा अदिक हिंग वस्तु ईरूल बल्‍की पवित्र अदिक निर्दोष ईरूल.
EPH 5:28 ईदा प्रकार उचित आद कि गांड्ड तान तान हिंग्सुर से तान मय इन घाई प्यार ईटली पायजे. जो तान हिंग्स उन से प्यार ईटतान, आव तान तान से प्यार ईटतान.
EPH 5:29 यतिकी याऊ यागलु तान मय देल दुश्मनी ईटीदिल बल्‍की अदुर्द पालन-पोषण माळतान, जसा मसीह भी मंडली इन सांगुळ माळतान.
EPH 5:30 इदुरसाटी कि नाव आऊन मय इन अंग हुयेव.
EPH 5:31 “ई कारण मंळसा तान मोय-आप्प उक बिटकु तान हिंग्स उन सांगुळ ईत्‍तान, अदिक आंदुर येढ्ढु ऊंद तन आदार.”
EPH 5:32 ईद भेद रा धोळ आद, पर ना ईल मसीह अदिक मंडली इन बारा दा अनतीन.
EPH 5:33 पर नीम दा टु हर ऊंद तान हिंग्स उन से तान घाई प्यार ईटुल, अदिक हिंग्स भी तान गांड्ड उन आदर माळुल.
EPH 6:1 हे चिकोरगोळा, प्रभु दा तान मोय-आप्प उन आग्याकारी बन्सी, यतिकी ईद उचित आद.
EPH 6:2 “तान मोय अदिक आप्प उन आदर माळ ईद पयला आग्या हुन यदुर सांगुळ वादा भी आद.
EPH 6:3 कि अपमान भला आगुल, अदिक नी पृथ्वी मा हापाळ दिन ताका जित्‍ता ईर.”
EPH 6:4 हे चिकोरवाळेरा, तान चिकोर इक गुस्सा तरगोळबाळी लेकीन प्रभु उन शिक्षा अदिक चेतावनी कोळतेला आंदुर्द पालन-पोषण माळी.
EPH 6:5 हे दासगोळा, जो लॉकुर ई दुनिया दा नीम स्वामी आर, तान मन इंद सही देल अंज्क अदिक नळ्गतेला, ह्यांग मसीह अन्द हांगा आंदुर्द भी आग्या मान्सी.
EPH 6:6 मंळसागोळी खुश माळावाळेर घाई तोरसोर साटी स्यावा माळबाळी, लेकीन मसीह अन्द दासगोळ घाई अंतर आत्मा देल परमेश्वर उन इच्छा मा नळी,
EPH 6:7 अदिक आ स्यावा अक मंळसागोळ्द ईला लेकीन प्रभु उन स्यावा जान्सकु खरा मन देल माळी.
EPH 6:8 यतिकी नीव जान्सतीर कि हर मंळसा ह्यांगारा वळ्लीद क्याल्सा माळ्यान, या रा दास ईरूल या रा स्वतंत्र, प्रभु से हांगा हासिल माळ्यान.
EPH 6:9 हे स्वामीगोळा, नीव भी धमकीगोळ कोळव बिटकु आंदुर सांगुळ हांग अच व्यवहार माळी; यतिकी नीव जान्सतीर कि आंदुर अदिक नीम येढ्ढु मुंदुरव स्वामी स्वर्ग दा आन, अदिक आव यारदु पक्षपात माळालुन.
EPH 6:10 इदुरसाटी प्रभु दा अदिक आऊन शक्ति इन प्रभाव दा ताकतवर बन्सी.
EPH 6:11 परमेश्वर उन सप्पा हथियार हाक्‍क बुळी कि नीव शैतान उन युक्तिगोळ मुंद निदुरकु ईर सकीर.
EPH 6:12 यतिकी नाम्द ईद मल्लयुद्ध रक्ता अदिक मास देल ईला लेकीन प्रधानगोळ देल, अदिक अधिकारीगोळ देल, अदिक ई दुनिया अन अंधकार इन शासकगोळ देल अदिक आ दुष्टता अन्द आत्मिक सेनागोळ देल आद जो आकाश दा आव.
EPH 6:13 इदुरसाटी परमेश्वर उन पुरा हथियार कट कोमी कि नीव बुरा दिन दा सामना माळ सकी, अदिक सप्पा येनारा पुरा माळकु संची ईर सकी.
EPH 6:14 इदुरसाटी सच्चाई देल तान नेळु कसुसकु, अदिक न्यायीपन इन कवच हाक्‍कु,
EPH 6:15 अदिक कालगोळ दा मेल इन खुशखबरी इन तयारी इन जुता हाक्‍कु;
EPH 6:16 अदिक ई सब मुंदुर सांगुळ विश्वास इन ढाल हुडुकु स्थिर ईरी यदुर देल नीव आ दुष्ट इन सब होततेला तीरगोळ इक नुनाक सकी.
EPH 6:17 अदिक उद्धार इन टोप, अदिक आत्मा अन्द तलवार, जो परमेश्वर उन वचन हुन, ग्रहण माळकोमी.
EPH 6:18 हर समय अदिक हर प्रकार देल आत्मा दा प्रार्थना, अदिक विनती माळतेला ईरी, अदिक इदुरसाटी जाग्सतेला ईरी कि सब पवित्र लॉकुर्द साटी लगातार विनती माळतेला ईरी,
EPH 6:19 अदिक नान साटी भी कि नानी माताळोद समय हिंग प्रबल वचन कोटकु आगुल कि ना साहस इन सांगुळ खुशखबरी इन भेद खोलसोद कार्य माळ सकाईन,
EPH 6:20 ई खुशखबरी इन खातिर ना शंकली देल जकळुसकु राजस्वर्गदूत हुईन; हालाकि ईग ना जयल दा आईन. प्रार्थना माळी कि ना खुशखबरी इन बारा दा माताळली साहसी आग सकतीन ईद जरूरी आद जसा कि ना आईन.
EPH 6:21 तुखिकुस, जो प्रिय वार्ट अदिक प्रभु दा विश्वासयोग्य सेवक आन, नीमी सब मातगोळ हेळ्यान कि नीव भी नान दशा जान्सी कि ना ह्यांग ईरतीन.
EPH 6:22 आऊक ना नीम्द हात्‍ती इदुरसाटी कळुदीन कि नीव नाम्द दशा अक जान्सी, अदिक आव नीम्द मनगोळ इक शांती कोळुल.
EPH 6:23 परमेश्वर आप्प अदिक प्रभु यीशु मसीह अन्द दी टु वार्टुरी शांती अदिक विश्वास सहित प्यार सिकुल.
EPH 6:24 जो नाम्द प्रभु यीशु मसीह टु खरा प्यार ईटतार, आ सब मा अनुग्रह आगतेला ईरूल.
PHI 1:1 मसीह यीशु उन दास पौलुस अदिक तीमुथियुस उन दी टु, सप्पा पवित्र लॉकुर हेसुर जो यीशु मसीह दा आगकु फिलिप्पी दा, अध्यक्षगोळ अदिक सेवकगोळ सांगुळ ईरतार.
PHI 1:2 नामव आप्प परमेश्वर अदिक प्रभु यीशु मसीह अन दी टु नीमी अनुग्रह अदिक शांती सिकतेला ईरूल.
PHI 1:3 ना याग याग नीमी याद माळतीन, आग आग तान परमेश्वर उन धन्यवाद माळतीन;
PHI 1:4 अदिक याग यागलु नीम सप्पा अन साटी विनती माळतीन, रा हमेशा खुशी इन सांगुळ विनती माळतीन.
PHI 1:5 इदुरसाटी कि नीव पयला दिन टु हुडुकु ईंद ताका खुशखबरी बगरूसदुर दा नान सहभागी ईतीर.
PHI 1:6 नानी ई मात इन भरोसा आद कि याव नीम दा वळ्लीद क्याल्सा सुरू माळ्यान, आवा अदरी यीशु मसीह अन्द दिन ताका पुरा माळ्यान.
PHI 1:7 उचित आद कि ना नीम सप्पा मुंदुर साटी हिंग अच विचार माळाईन, यतिकी नीव नान मन दा बंदकु बसुसेगीर, अदिक ना शंकलीगोळ देल कैद दा अदिक खुशखबरी इन साटी उत्‍तर अदिक प्रमाण कोळदुर दा नीव सप्पा मुंदुर नान सांगुळ अनुग्रह दा सहभागी आगी.
PHI 1:8 इदुर दा परमेश्वर नान गवाह आन कि ना मसीह यीशु उन घाई प्यार माळकु नीम सप्पा मुंदुर्द लालसा माळतीन.
PHI 1:9 ना तरी भी ईद प्रार्थना माळतीन कि नीम प्यार ग्यान अदिक हर प्रकार इन विवेक सांगुळ अदिक यक्कुल वाळुस्त होगुल,
PHI 1:10 ईल ताका कि नीव वळ्लीद से वळ्लीद मातगोळ्द जाच माळी, अदिक मसीह अन्द दिन ताका खरा बन्सकु ईरी, अदिक ठोकर तिनबाळी;
PHI 1:11 अदिक आ न्यायीपन इन काय देल जो यीशु मसीह अन्द द्वारा आगताव, यक्कुल आग्त होगी यदुर देल परमेश्वर उन महिमा अदिक स्तुति आग्त ईरूल.
PHI 1:12 हे वार्टुरा, ना चाहासतीन कि नीव ईद जान्स कोमी कि नान मा जो घळुस्याद, अदुर देल खुशखबरी वाळुसतेला होग्याद.
PHI 1:13 ईल ताका कि कैसर उन राजभवन इन सप्पा पलटन अदिक मिग्द सप्पा लॉकुर मा ईद प्रगट आगेग्याद कि ना मसीह अन्द साटी शंकलीगोळ देल कैद दा आईन;
PHI 1:14 अदिक प्रभु दा जो वार्टुर आर, आंदुर दा टु यक्कुल मुंदुर नान शंकलीगोळ देल कैद आगदुर कारण, भरोसा माळकु परमेश्वर उन वचन बेधळक केळसोद मात्‍त यक्कुल हिम्मत माळतार.
PHI 1:15 थ्वाळासा रा जलन अदिक झगळा अन्द कारण मसीह अन्द प्रचार माळतार अदिक थ्वाळासा भला इच्छा देल.
PHI 1:16 हापाळ पुरा रा ईद जान्सकु कि ना खुशखबरी इन साटी उत्‍तर कोळली ठहरूस्कु आगीन, प्यार देल प्रचार माळतार.
PHI 1:17 अदिक हापाळ मुंदुर रा सरका ईला लेकीन मतलब देल मसीह अन्द कात्‍ता केळ्सतार, ईद विचार माळकु कि ना शंकलीगोळ देल कैद दा आईन नान साटी क्लेश पैदा माळुल.
PHI 1:18 रा येन आत? सिर्फ ईद कि हर प्रकार देल, या बहाना देल या सच्चाई देल, मसीह अन्द कात्‍ता केळ्सकु आगतद, अदिक ना ईदुर देल खुश आईन अदिक खुश भी ईराइन.
PHI 1:19 यतिकी ना जान्सतीन कि नीम विनती इन द्वारा, अदिक यीशु मसीह अन्द आत्मा अन्द दान इन द्वारा, इदुर्द प्रतिफल नान उद्धार आदीत.
PHI 1:20 ना रा ईदा हापाळ लालसा अदिक आशा ईटतीन कि ना यातोदु मात दा लज्जित आगतीदील, लेकीन ह्यांग नान प्रबल हिम्मत इन कारण मसीह अन्द बळाई नान मय इन द्वारा हमेशा आग्त ईताद, हांग अच ईग भी आगुल, चाहे ना जित्‍ता ईराइन या सोतोगाईन.
PHI 1:21 यतिकी नान साटी जित्‍ता ईरोद मसीह हुन, अदिक सोतोगोद फायदा हुन.
PHI 1:22 लेकीन अगर मय दा जित्‍ता ईरोद अच नान क्याल्सा साटी फायदा मंद आद रा ना जान्सालीन कि यदुर्द चुनाव माळाईन.
PHI 1:23 यतिकी ना येढ्ढु चीज इन न्याड्या अधर दा हिलगुसकु आईन; जीव रा चाहासतद कि होगकु मसीह अन्द हात्‍ती ईराइन, यतिकी ईद रा हापाळ वळ्लीद आद,
PHI 1:24 लेकीन मय दा ईरोद नीम कारण मात्‍त यक्कुल जरूरी आद.
PHI 1:25 इदुरसाटी कि नानी इदुर्द भरोसा आद इदुरसाटी ना जान्सतीन कि ना जित्‍ता ईराइन, उलटा नीम सप्पा मुंदुर सांगुळ ईराइन यदुर देल नीव विश्वास दा मजबूत आग्त होगी अदिक अदुर दा खुश ईरी;
PHI 1:26 अदिक जो घमण्ड नीव नान बारा दा माळतीर, अद नांद मात्‍त नीम हात्‍ती बंदुर देल मसीह यीशु दा यक्कुल वाळुसेगुल.
PHI 1:27 सिर्फ ईट माळी कि नीम चाल-चलन मसीह अन्द खुशखबरी इन लायक ईरूल कि चाहे रा ना बंदकु नीमी नोळाईन, चाहे रा बर भी तिदिल, नीम बारा दा नानी ईदा केळ सिकुल कि नीव ऊंद अच अंतरात्मा दा जित्‍ता आईर, अदिक ऊंद मन आगकु खुशखबरी इन विश्वास इन साटी मयनत माळ्त ईरतीर.
PHI 1:28 अदिक यातोदारा मात दा विरोध माळावाळेर से अंज्क तुमालीर. ईद आंदुर साटी विनाश इन स्पष्ट चमत्कार हुन, लेकीन नीम साटी उद्धार इन अदिक ईद परमेश्वर उन दी टु आद.
PHI 1:29 यतिकी मसीह अन्द कारण नीम मा ईद अनुग्रह आत कि ना सिर्फ आऊन साटी भरोसा कोळी लेकीन आऊन साटी दुख भी नेगी;
PHI 1:30 अदिक नीमी हांग अच मयनत माळोद आद, ह्यांग नीव नानी माळतेला नोळीर, अदिक ईग भी केळतीर कि ना हांग अच माळतीन.
PHI 2:1 इदुरसाटी अगर मसीह दा थ्वाळासा शांती, अदिक प्यार देल हिम्मत, अदिक आत्मा अन्द प्रोत्साहन, अदिक थ्वाळासा करूणा अदिक संगती आद,
PHI 2:2 रा नान ईद खुशी पुरा माळी कि ऊंद मन आगकु ईरी, अदिक ऊंद अच प्यार, ऊंद अच चित्त, अदिक ऊंद अच मनसा ईटी.
PHI 2:3 मतलब देल या ख्वाटा बळाई साटी येनु माळबाळी, लेकीन दीनता देल आबुर दाबुर इक तान से वळ्लेर समसी.
PHI 2:4 हर ऊंद तान हित इन ईला, उलटा दुसरा अन्द हित इन भी चिन्ता माळुल.
PHI 2:5 ह्यांग मसीह यीशु उन विचार ईरव हांग अच नीम भी विचार ईरूल;
PHI 2:6 याव परमेश्वर उन स्वरूप दा ईतकु भी परमेश्वर उन तुल्य आगली तान वश दा ईटोद वस्तु समसीदील.
PHI 2:7 उलटा तान तान इक हिंग शुन्य माळ बुट्टुन, अदिक दास उन रूप धारण माळदुन, अदिक मंळसा अन्द समानता दा आगेदुन.
PHI 2:8 अदिक मंळसा अन्द रूप दा प्रगट आगकु तान तान इक दीन माळदुन, अदिक ईल ताका आग्याकारी ईत्‍तुन कि मृत्यु, हव, क्रूस इन मृत्यु भी सहन माळदुन.
PHI 2:9 ई कारण परमेश्वर आऊक हापाळ महान भी माळदुन, अदिक आऊक अद हेसुर कोट्टुन जो सप्पा हेसुरगोळ से श्रेष्ट आद,
PHI 2:10 कि जो स्वर्ग दा अदिक पृथ्वी मा अदिक पृथ्वी इन ल्यालमा आद, अव सप्पा यीशु उन हेसुर मा ट्वांगरा टेकसुल;
PHI 2:11 अदिक परमेश्वर आप्प उन महिमा साटी हर ऊंद ल्यालग्या अंगीकार माळ कोमुल कि यीशु मसीह अच प्रभु हुन.
PHI 2:12 इदुरसाटी हे नान प्रियगोळा, ह्यांग नीव हमेशा टु आग्या मान्सतेला बंदीर, हांग अच ईग भी ना सिर्फ नान सांगुळ ईरा होती लेकीन जरूर माळकु ईग नान दुर ईत्‍तुर मा भी अंज्क अदिक नळ्गतेला तान तान उद्धार इन क्याल्सा पुरा माळ्त होगी;
PHI 2:13 यतिकी परमेश्वर अच हुन याव तान खुद इन इच्छा अन्द कारण नीम मन दा इच्छा अदिक क्याल्सा, येढ्ढु मातगोळ्द माळोद प्रभाव हाक्यान.
PHI 2:14 सप्पा क्याल्सा बिना बळबळ अदिक बिन बाय कय मुर्सद माळतोगी,
PHI 2:15 कि नीव निर्दोष अदिक भोला आगकु वाकळा अदिक जिद्दी लॉकुर न्याड्या परमेश्वर उन निष्कलंक औलाद बन्सकु ईरी, यार न्याड्या दा नीव जीवन इन वचन हुडुकु दुनिया दा होतकु दिंग्यागोळ घाई कांळ्सतीर,
PHI 2:16 कि मसीह अन्द दिशी नान हात्‍ती कारण ईरूल कि ना नान जित्‍ता इरोद अदिक ना नांद घमण्ड माळोद बेकार आत.
PHI 2:17 अगर नानी नीम विश्वास रूपी बलिदान अदिक स्यावा अन्द सांगुळ तान रक्ता भी वाहुसोद बिळुल, तरी भी ना खुश आईन अदिक नीम सप्पा मुंदुर सांगुळ खुशी माळतीन.
PHI 2:18 हांग अच नीव भी खुश ईरी अदिक नान सांगुळ खुशी माळी.
PHI 2:19 नानी प्रभु यीशु दा आशा आद कि ना तीमुथियुस उक नीम हात्‍ती तुरन्त कळाईन, ताकी नीम दशा केळकु नानी खुशी सिकुल.
PHI 2:20 यतिकी नान हात्‍ती हिंग स्वभाव इनव याऊ हैलेच जो शुद्ध मन देल नीम चिन्ता माळुल.
PHI 2:21 यतिकी सप्पा मुंदुर तान स्वार्थ इन खोज दा ईरतार, ना कि यीशु मसीह अन्द.
PHI 2:22 लेकीन आऊक रा नीव परकुसदीर अदिक जान्स भी कोंडीर कि ह्यांग पार आप्प उन सांगुळ माळतान, हांग अच आव खुशखबरी इक फैलुसदुर दा नान सांगुळ स्यावा माळदुन.
PHI 2:23 इदुरसाटी नानी आशा आद कि ह्यांग नानी समझ दा बंदीत कि नान येन दशा आदीन, हांग अच ना आऊक तुरन्त कळु बुळाईन.
PHI 2:24 अदिक नानी प्रभु दा भरोसा आद कि ना खुद भी राटनेरी बराईन.
PHI 2:25 लेकीन ना इपफ्रुदीतुस उक जो नान वार्ट अदिक सहकर्मी अदिक संगी योद्धा अदिक नीम स्वर्गदूत, अदिक जरूरी मातगोळ दा नान स्यावा टहल माळावाळा हुन, नीम हात्‍ती कळोद जरूरी सम्सदीन.
PHI 2:26 यतिकी आऊन लालसा नीम सप्पा मुंदुर दा हतकु ईरोद, ई कारण आव व्याकुल ईरतोगोन यतिकी नीव आऊन बिमारी इन बारा दा केळीदीर.
PHI 2:27 निश्चय आव बिमार रा आगेगिदुन ईल ताका कि सायोर मा ईरोन, लेकीन परमेश्वर आऊन मा दया माळदुन, अदिक सिर्फ आऊन मा अच ईला लेकीन नान मा भी कि नानी शोक मा शोक सिकबाळुल.
PHI 2:28 इदुरसाटी ना आऊक कळोद मात्‍त यक्कुल कोशिश माळदीन कि नीव आऊक मात्‍त नोळकु खुश आगेगी अदिक नान भी दुख गोर्त आगेगुल.
PHI 2:29 इदुरसाटी नीव प्रभु दा आऊन से हापाळ खुशी इन सांगुळ मुलाकात माळेतीर, अदिक ईत्‍तोर्द आदर माळतोगेतीर.
PHI 2:30 यतिकी आव मसीह अन्द क्याल्सा साटी तान जीव इक जोखिम दा हाक्‍कु मृत्यु उन हात्‍ती होट बंदीदुन ताकी जो कमी नीम दी टु नान स्यावा दा आत अदरी पुरा माळुल.
PHI 3:1 इदुरसाटी हे नान वार्टुरा, प्रभु दा खुश ईरी. अव अच मातगोळ नीमी घळी घळी लिख्सली नानी रा येनु तकलीफ आगाल, अदिक ईदुर दा नीम कुशलता आद,
PHI 3:2 नायगोळ से सावधान ईरी, आ बेकार क्याल्सा माळावाळेर से सावधान ईरी, आ काट कूट माळावाळेर से सावधान ईरी.
PHI 3:3 यतिकी खतनावाळेर रा नाव अच हुयेव जो परमेश्वर उन आत्मा अन्द अगुवाई देल उपासना माळतेव, अदिक मसीह यीशु मा घमण्ड माळतेव, अदिक मय मा भरोसा ईटालेव.
PHI 3:4 लेकीन ना रा मय मा भी भरोसा ईट सकतीन. अगर यारारा दुसरा अक मय मा भरोसा ईटोद विचार आगुल, रा ना आऊन से यक्कुल ईट सकतीन.
PHI 3:5 आठवा दिशी नान खतना आत, इस्त्राएल इन वंश अदिक बिन्यामीन इन गोत्र नव हुईन; इब्रानिगोळव इब्रानी हुईन; व्यवस्था अन्द बारा दा अगर अंदीर रा फरीसी हुईन.
PHI 3:6 उत्साह अन्द बारा दा अगर अंदीर रा मंडली इन सतुसावाळा; अदिक व्यवस्था अन्द न्यायीपन इन बारा दा अगर अंदीर रा निर्दोष ईरीन.
PHI 3:7 लेकीन जो जो मातगोळ नान फायदा नव ईरव, अवरीका ना मसीह अन्द कारण नुकसान सम्स कोंडीन.
PHI 3:8 उलटा ना तान प्रभु यीशु मसीह अन्द पयचान इन उत्‍तमता अन्द कारण सप्पा मातगोळी नुकसान सम्सतीन. यदुर कारण ना सप्पा वस्तुगोळ्द नुकसान नेगदीन, अदिक अवरी काळी कचरा सम्सतीन, यदुर से ना मसीह अक हासिल माळाईन
PHI 3:9 अदिक अदुर दा ना सिक्कु आगुल; ना कि तान अद न्यायीपन इन सांगुळ, जो व्यवस्था देल आद, उलटा आ न्यायीपन इन सांगुळ जो मसीह मा विश्वास माळदुर कारण आद अदिक परमेश्वर दी टु विश्वास माळदुर मा सिकतद;
PHI 3:10 ताकी ना अदरी अदिक अदुर्द मृत्युंजय इन सामर्थ्य अक, अदिक अदुर सांगुळ दुखगोळ दा सहभागी आगोद मर्म इक जान्साईन, अदिक आऊन मृत्यु उन समानता अक हासिल माळाईन.
PHI 3:11 कि ना यातोदारा भी रीति देल सोत्‍तुर दा टु जित्‍ता आगोद पद ताका पोहचुसाईन.
PHI 3:12 ईद मतलब हैलेच कि ना ईग हासिल माळ कोंडीन, या सिद्ध आगेगिन; लेकीन आ पदार्थ अक हुडोर साटी ओळ्त होगतीन, यदुर साटी मसीह यीशु नानी हुळदिदुन.
PHI 3:13 हे वार्टुरा, नान ईद भावना हैलेच कि ना हासिल माळ कोंडीन; लेकीन सिर्फ ऊंद क्याल्सा माळतीन कि जो मातगोळ हिंद ईतोग्याव अवरी मारूकु, मुंदळव मातगोळ दी वाळुसतेला,
PHI 3:14 निशाना दी ओळ्त होगतीन, ताकी अद ईनाम हासिल माळाईन यदुर साटी परमेश्वर नानी मसीह यीशु दा म्याकुच कारदान.
PHI 3:15 नाम दा टु यास सिद्ध आर, ईदा विचार ईटुल, अदिक अगर यातोदारा मात दा नीम दुसरा अच विचार ईरूल रा परमेश्वर अदरी भी नीम मा प्रगट माळ बुट्टान.
PHI 3:16 इदुरसाटी यल ताका नाव पोहचुसेव, अदुर्दा अनुसार नळदेव.
PHI 3:17 हे वार्टुरा, नीव सप्पा मुंदुर मिलुसकु नान घाई व्यवहार माळी, अदिक आंदरी पयचान दा ईटी जो ई रीति मा नळुतार यदुर उदाहरण नीव नाम दा नोळतीर;
PHI 3:18 यतिकी हापाळ सा हिंग व्यवहार माळतार, यार्द चर्चा ना नीम से घळी घळी माळीन, अदिक ईग भी वर्ल वर्लकु अनतीन कि आंदुर तान चाल-चलन देल मसीह अन्द क्रूस देल दुश्मनी माळावाळेर उर.
PHI 3:19 आंदुर अन्त विनाश आद, आंदुर मय व्हाट्टा हुन, आंदुर तान शरम इन मातगोळ मा विचार माळतार अदिक पृथ्वी इन वस्तुगोळ मा महिमा हचकु ईरतार.
PHI 3:20 लेकीन नाम स्वदेश स्वर्ग मा आद; अदिक नाव ऊंद उद्धारकर्ता प्रभु यीशु मसीह अन्द अल टु बरोद हादी कायेतेव.
PHI 3:21 आव तान शक्ति इन आ प्रभाव इन अनुसार यदुर द्वारा आव सप्पा वस्तुगोळी तान वश दा माळ सकतान, नाम दीन-हीन मय इन रूप बदलुसकु, तान महिमा अन्द मय इन अनुकूल माळ बुट्टान.
PHI 4:1 इदुरसाटी हे नान प्रिय वार्टुरा, यदुर दा नान जीव हतकु ईरतद, जो नान खुशी अदिक मुकुट हुईर, हे प्रिय वार्टुरा, प्रभु दा हिंगा हादी कायतेला स्थिर ईरी.
PHI 4:2 ना यूओदिया अक भी विनती माळतीन अदिक सुन्तुखे अक भी, कि आंदुर प्रभु दा ऊंद विचार आगकु ईरूल.
PHI 4:3 हे खरा सहकर्मी, ना नीन से भी विनती माळतीन कि नी आ आर्तेर मदत माळ, यतिकी आंदुर नान सांगुळ खुशखबरी प्रचार माळदुर दा, क्लेमेंस अदिक नान दुसरा सहकर्मीगोळ सांगुळ मयनत माळदुर, यार्द हेसुर जीवन इन किताब दा लिख्सकु आव.
PHI 4:4 प्रभु दा हमेशा खुश ईरी; ना मात्‍त अनतीन, खुश ईरी.
PHI 4:5 नीम कोमलता सप्पा मंळसागोळ मा प्रगट आगुल. प्रभु हात्‍ती आन.
PHI 4:6 यातोदु मात इन चिन्ता माळबाळी; लेकीन हर ऊंद मात दा नीम निवेदन, प्रार्थना अदिक विनती इन द्वारा धन्यवाद इन सांगुळ परमेश्वर उन मुंद उपस्थित माळकु आगुल.
PHI 4:7 आग परमेश्वर उन शांती, जो सप्पा मुंदुर समझ इन व्हार्या आद, नीम मन अदिक नीम विचारगोळी मसीह यीशु दा सुरक्षित ईट्टीत.
PHI 4:8 इदुरसाटी हे वार्टुरा, जो जो मातगोळ सच्चाई आव, अदिक जो जो मातगोळ आदरणीय आव, अदिक जो जो मातगोळ उचित आव, अदिक जो जो मातगोळ पवित्र आव, अदिक जो जो मातगोळ सुहावनी आव, अदिक जो जो मातगोळ मनभावनी आव, मतलब जो भी सदगुण अदिक प्रशंसा अन्द मातगोळ आव अऊर मा ध्यान हचतोगी.
PHI 4:9 जो मातगोळ नीव नान हात्‍ती टु कलतीर, अदिक ग्रहण माळदीर, अदिक केळदीर, अदिक नांदुर्दा नोळदीर, अऊर्दा पालन माळतोगी, आग परमेश्वर जो शांती नव सोता आन नीम सांगुळ ईत्‍तान.
PHI 4:10 ना प्रभु दा हापाळ खुश आईन कि ईग ईस दिनगोळ बाद्दा नीम चिन्ता नान बारा दा मात्‍त जागृत आग्याद; निश्चय नीमी सुरूवात दा भी इदुर्द विचार ईरोद, लेकीन नीमी मवका सिकिदील.
PHI 4:11 ईद ईला कि ना तान कमी इन कारण ईद अनतीन यतिकी ना ईद कलतीन कि याता दशा दा आईन; अदा दशा दा संतुष्ट ईराइन.
PHI 4:12 ना दीन आगोद भी जान्सतीन अदिक वाळुसोद भी जान्सतीन; हर ऊंद मात अदिक सप्पा दशागोळ दा ना संतुष्ट आगोद, उपास ईरोद, अदिक वाळुसोद-घटुसोद कलतीन.
PHI 4:13 जो नानी सामर्थ्य कोळतद अदुर दा ना सप्पा येनारा माळ सकतीन.
PHI 4:14 तरी भी नीव वळ्लीद माळदीर कि नान क्लेश दा नान सहभागी आदीर.
PHI 4:15 हे फिलिप्पिगोळा, नीव खुद भी जान्सतीर कि खुशखबरी प्रचार इन सुरूवात दा, याग ना मकिदुनिया टु विदा आदीन, आग नीमी बिटकु मात्‍त यातोदु मंडली लेन देन इन बारा दा नान सहायता माळीदिल.
PHI 4:16 ईदा प्रकार याग ना थिस्सलुनीके दा ईरीन, आग भी नीव नान कमी पुरा माळोर साटी ऊंद घन येन उलटा येढ्ढ घन येनारा कळीदिर.
PHI 4:17 ईद ईला कि ना दान बेळोद चाहासतीन लेकीन ना हिंग काय चाहासतीन जो नीम फायदा साटी वाळुस्त होगुल.
PHI 4:18 नान हात्‍ती सप्पा येनारा आद, उलटा हापाळ पुरा भी आद; जो वस्तुगोळ नीव इपफ्रुदीतुस उन कय देल कळीदिर अवरी प्राप्त माळकु ना संतुष्ट आगेगिन, अद रा सुखदायक सुगन्ध, ग्रहण माळा लायक बलिदान आद, जो परमेश्वर उक वळ्लीद हततद.
PHI 4:19 नान परमेश्वर भी तान आ धन इन अनुसार जो महिमा सांगुळ मसीह यीशु दा आद, नीम हर ऊंद कमी इक पुरा माळीत.
PHI 4:20 नाम परमेश्वर अदिक आप्प उन महिमा हमेशा हमेशा आगतेला ईरूल. आमीन.
PHI 4:21 हर ऊंद पवित्र जन उक, जो यीशु मसीह दा आन नमस्कार अनी. जो वार्ट नान सांगुळ आन, नीमी नमस्कार अनतार.
PHI 4:22 सप्पा पवित्र लॉकुर, विशेष माळकु जो कैसर उन घराना नोर उर, नीमी नमस्कार अनतार.
PHI 4:23 नाम प्रभु यीशु मसीह अन्द अनुग्रह नीम आत्मा अन्द सांगुळ ईरूल.
COL 1:1 पौलुस अदिक आऊन वार्ट तीमुथियुस उन दी टु, जो परमेश्वर उन इच्छा देल मसीह यीशु उन प्रेरित आन,
COL 1:2 कुलुस्से दा ईरावाळेर परमेश्वर उन आ पवित्र विश्वासयोग्य वार्टुर इक जो मसीह दा ऊंद आर: नाम आप्प परमेश्वर उन दी टु नीमी अनुग्रह अदिक शांती सिकतेला ईरूल.
COL 1:3 नाव नीम साटी हमेशा प्रार्थना माळतेव आग नाव तान प्रभु यीशु मसीह अन्द आप्प परमेश्वर उन धन्यवाद माळतेव.
COL 1:4 यतिकी नाव मसीह यीशु दा नीम विश्वास अदिक सप्पा परमेश्वर उन पवित्र लॉकुर प्रती नीम प्यार इन बारा दा केळेव;
COL 1:5 याग सही बातणी, खुशखबरी, पयला घन नीम हात्‍ती बत्‍त, रा नीव ई आशा अन्द बारा दा केळदीर कि ईद प्रदान माळतद. इदुरसाटी नीम विश्वास अदिक प्यार आ वस्तु मा आधारित आद, यदुर नीव उम्मीद माळतीर, जो नीम साटी स्वर्ग दा सुरक्षित ईटकु आद.
COL 1:6 खुशखबरी आशिर्वाद तरेत्याद अदिक सप्पा दुनिया दा फैलुसेत्याद, ठीक हांग अच ह्यांग नीम न्याड्या दा आ दिशी टु आद या दिशी टु नीव पयला घन परमेश्वर उन कृपा अन बारा दा केळीदीर अदिक अदुर देल ईद पता नळुत कि ईद सही दा आद.
COL 1:7 परमेश्वर उन अनुग्रह अक नीव नाम प्रिय सहकर्मी सेवक इपफ्रास उन से कलतीर, जो नाम दी टु मसीह नव विश्वासयोग्य कर्मचारी आन.
COL 1:8 आवा नामी आ प्यार इन बारा दा हेळ्यान जो आत्मा नीमी कोटाद.
COL 1:9 ई कारण यागी टु नाव नीम बारा दा केळेव आगी टु नाव नीम साटी हमेशा प्रार्थना माळेव, परमेश्वर उन से नाव प्रार्थना माळतेव कि अद पुरा बुद्धी अदिक समझ जो आऊन आत्मा कोळतद आऊन सांगुळ अदुर्द इच्छा अन्द ग्यान देल नीमी तुम बुळुल.
COL 1:10 ताकी नीम्द चाल चलन प्रभु उन लायक ईरूल, अदिक आव सब प्रकार देल प्रसन्न ईरूल, अदिक नीम जीवन दा टु वळ्लेव क्याल्सा होळुल, अदिक नीव परमेश्वर उन ग्यान दा वाळुसतेला होगी.
COL 1:11 आऊन महिमामय शक्ति देल जो सामर्थ्य प्राप्त आगतद अदुर दा शक्तिशाली आग्त ईरी, ताकी नीव धीरज इन सांगुळ सप्पा येनारा सहन माळा लायक बन्सी.
COL 1:12 अदिक खुशी इन सांगुळ आप्प उक धन्यवाद माळी, याव नीमी ई लायक माळदुन कि परमेश्वर उन आ लॉकुर सांगुळ जो आव आंदुर साटी पयले टु ना सुरक्षित माळ्द प्रकाश इन राज्य दा नीव पवित्र लॉकुर सांगुळ उत्‍तराधिकार प्राप्त माळदुर दा सहभागी बन्सी.
COL 1:13 आवा नामी अंधकार इन वश टु बचाव माळकु तान प्रिय पार उन राज्य दा प्रवेश माळसुसदुन,
COL 1:14 अदिक आऊन द्वारा नाव स्वतंत्र माळकु आदेव, मतलब नामी नाम पापगोळ्द माफ सिक्त.
COL 1:15 मसीह अदृश्य परमेश्वर उन समानता दा दृश्य रूप हुन अदिक आव सप्पा निर्मितीगोळ दा पयला पार हुन.
COL 1:16 परमेश्वर तान द्वारा स्वर्ग अदिक पृथ्वी मा सुरूवात टु सप्पा येनारा माळदुन, आध्यात्मिक शक्तिगोळ, प्रभुगोळ, शासकगोळ अदिक अधिकारीगोळ सहित नोळ्द या बिननोळ्द वस्तुगोळ, परमेश्वर आऊन द्वारा पुरा ब्रम्हाण्ड इन निर्माण माळदुन.
COL 1:17 सप्पा वस्तुगोळ से पयले मसीह अन्द अस्तित्व ईरोद अदिक आऊन दा सप्पा वस्तुगोळ तान सही जागा मा स्थिर ईरताव.
COL 1:18 आव तान मय इन स्याणा हुन, मतलब मंडली इन ताल्ला हुन; आवा सुरूवात हुन, अदिक सोत्‍तुर दा टु जित्‍ता आगावाळा पयला जनम ताकोमावाळा पार हुन, ताकी सप्पा वस्तुगोळ दा पयला स्थान हासिल माळ सकुल.
COL 1:19 यतिकी परमेश्वर उन खुद इन ईद फैसला ईरोद कि आऊन दा परमेश्वर उन सप्पा परिपुर्णता वास माळुल.
COL 1:20 पार उन माध्यम देल परमेश्वर पुरा दुनिया अक तान ताना वापस तरोद फैसला माळदुन परमेश्वर क्रूस मा तान पार उन रक्ता अन माध्यम देल शांती माळदुन अदिक इदुरसाटी पृथ्वी अदिक स्वर्ग दा सप्पा वस्तुगोळी वापस तंदुन.
COL 1:21 ऊंद समय ईरोद याग नीव परमेश्वर उन से हापाळ दुर ईरीर अदिक तान विचारगोळ अदिक बेकार कर्मगोळ कारण परमेश्वर उन दुश्मन ईरीर;
COL 1:22 लेकीन ईग, आव तान पार उन शारीरिक मय इन मृत्यु उन द्वारा नीमी तान संगी माळ कोंडान, ताकी नीमी तान हात्‍ती पवित्र अदिक शुद्ध, अदिक निर्दोष माळकु उपस्थित माळुल.
COL 1:23 अगर नीव विश्वास इन पायवा मा मजबूत बन्सकु ईत्‍तीर अदिक आ खुशखबरी इन आशा अक यदरी नीव केळीर बिळबाळी, यदुर्द प्रचार आकाश इन ल्यालमा अन्द पुरा दुनिया दा माळकु आत, अदिक यदुर्द ना, पौलुस, सेवक बन्सदीन.
COL 1:24 ईग ना आ दुखगोळ्द कारण खुशी माळतीन, जो नीम्द साटी नेगेतीन अदिक मसीह अन्द क्लेशगोळ्द कमी आऊन मय इन साटी, मतलब मंडली इन साटी, तान मय दा पुरा माळतीन;
COL 1:25 अदिक नानी परमेश्वर उन द्वारा मंडली इन सेवक माळकु आत अदिक याव नानी नीम भलाई इन क्याल्सा अन्द साटी कोट्टुन, अदिक ई क्याल्सा पुरा तरीका देल आऊन बातणीगोळ्द घोषणा माळतद.
COL 1:26 ईद बातणी रहस्य पुर्ण सच्चाई आद जो सुरूवात काल टु सप्पा मंळसागोळ से गुप्त ईटसुसकु आग्याद, लेकीन ईग आऊन पवित्र लॉकुर मा प्रगट माळकु आग्याद.
COL 1:27 परमेश्वर उन ईद योजना ईरोद कि तान लॉकुर मा ईद रहस्य प्रगट माळुल कि ईद रहस्य याट महिमामय किमती आ जो तान लॉकुर साटी आद. अदिक अद रहस्य ईद हुन कि मसीह नीम दा आन, मतलब नीव परमेश्वर उन महिमा अन्द सहभागी आग सकतीर.
COL 1:28 इदुरसाटी नाव मसीह अन्द प्रचार सप्पा मुंदुरी माळतेव. अदिक जो बुद्धी नामी प्राप्त आग्याद आ सप्पा बुद्धी इन इस्तेमाल माळतेला नाव सप्पा मुंदुरी निर्देश अदिक शिक्षा प्रदान माळतेव ताकी नाव आंदरी मसीह दा ऊंद व्यक्तिगत परिपुर्ण मंळसा माळकु परमेश्वर उन मुंद उपस्थित माळ सक्केव.
COL 1:29 अदिक इदरी पुरा माळोर साटी मसीह अन्द महान सामर्थ्य जो नानी सिकतेला ईरतद अदिक नान दा कार्य माळतद, अदुर्द इस्तेमाल माळतेला ना कठिन मयनत अदिक संघर्ष माळेतीन.
COL 2:1 ना चाहासतीन नीमी ई मात इन पता नळ्दोगुल कि ना नीम साटी, लौदीकिया दा ईरावाळेर लॉकुर साटी अदिक आ सप्पा मुंदुर साटी जो व्यक्तिगत रूप देल नानी यागलु सिकिदील, ना याट कठिन मयनत माळेतीन.
COL 2:2 ताकी आंदुर मनगोळी प्रोत्साहित सिकुल अदिक परस्पर प्यार दा एकजुट आगेगुल, अदिक अद पुरा विश्वास इन धन जो खरा समझ देल प्राप्त आगतद आंदरी सिक्केगुल. ई प्रकार देल आंदरी परमेश्वर उन भेद पता नळदोदित, जो मसीह खुश आन.
COL 2:3 याऊन दा परमेश्वर उन बुद्धी इन भंडार अदिक ग्यान होचकु आद.
COL 2:4 ईद ना इदुरसाटी अनतीन कि यावारा मंळसा नीमी ख्वाटा वाद विवाद देल ध्वाका कोळबाळुल. बाक चाहे आंदुर याटारा भी वळ्लेर येती हतबाळुल.
COL 2:5 ना मय इन भाव देल नीम से दुर आईन, तरी भी आत्मिक भाव देल नीम्द हात्‍ती आईन, अदिक नीम्द व्यवस्थित जीवन इक अदिक नीम्द विश्वास इन, जो मसीह दा आर, मजबूती नोळकु प्रसन्न आगतीन.
COL 2:6 इदुरसाटी ह्यांग नीव मसीह यीशु उक प्रभु मान्सकु ग्रहण माळ कोंडीर, हांगा आऊन दा बन्सकु ईरी.
COL 2:7 अदिक अदुर्दा जळ हुळकु अदिक वाळुसतेला ईरी; अदिक ह्यांग नीव कल्सकु आगीर हांग अच विश्वास दा मजबूत आगतेला होगी, अदिक यक्कुल से यक्कुल धन्यवाद माळतेला ईरी.
COL 2:8 सावधान ईरी कि यावारा नीमी आ मंळसा अन्द बुद्धी इन व्यर्थ ध्वाका देल गुलाम माळसुस बुळुल, जो मंळसागोळ्द परंपरागोळ देल प्राप्त आगतेला बंदाद अदिक ब्रम्हाण्ड इक शासन माळावाळा आत्मागोळ्द देन हुन, ना कि मसीह अन्द.
COL 2:9 यतिकी आऊन दा ईश्वरत्व स्वभाव हमेशा मसीह अन्द मय दा वास माळतद.
COL 2:10 अदिक नीमी आऊन एकता दा पुरा जीवन कोटकु आग्याद. आव सुरूवात टु सप्पा आध्यात्मिक शासकगोळ अदिक अधिकार इन स्याणा हुन.
COL 2:11 मसीह अन्द सांगुळ दा नीम्द खतना माळकु आग्याद, ना कि आ खतना अन्द सांगुळ जो मंळसागोळ कय देल माळकु आग्याद, लेकीन मसीह अन्द द्वारा माळ्द खतना अन्द सांगुळ, नीम पापगोळ्द सामर्थ्य देल मुक्त माळकु आगताव.
COL 2:12 याग नीव बपतिस्मा ताकोंडीदिर रा नीमी मसीह अन्द सांगुळ दफनुसकु आगीत अदिक बपतिस्मा दा नीम परमेश्वर उन सक्रिय शक्ति दा विश्वास इन माध्यम देल मसीह अन्द सांगुळ भी नेगुकु आगीत, आऊन सांगुळ जित्‍ता भी आदुर.
COL 2:13 ऊंद समय नीव भी आत्मिकता दा सोतकु ईरीर यतिकी नीव पापी, अदिक गैरयहूदी बिना व्यवस्था नोर ईरोर. लेकीन ईग परमेश्वर नीमी मसीह अन्द सांगुळ जीवन दा तंदान. परमेश्वर नाम सप्पा अपराधगोळ इक माफ माळ्यान.
COL 2:14 परमेश्वर नाम बेकार क्याल्सागोळ्द लेखा जोखा अक नाम न्याड्या दा टु हटुस बुट्टुन यदुर दा आ विधीगोळ्द उल्लेख माळकु आगीत जो नाम प्रतिकुल अदिक नाम विरूद्ध ईरोद आव अदरी क्रूस मा खिल्लागोळ देल ठोक्सकु मिटुस बुटान.
COL 2:15 अदिक मसीह क्रूस इन द्वारा आध्यात्मिक शासकगोळ्द सुरूवात टु सामर्थ्य अक अदिक अधिकारीगोळी शासन हीन माळ बुट्टुन अदिक तान विजय अभियान दा बंदी माळकु लॉकुर मुंद आंदुर तमाशा माळदुन.
COL 2:16 इदुरसाटी यावारा भी मंळसा नीम तिनोद-कुडोद या हाब्ब या व्हाशोद चांद इन हाब्ब, या विश्राम इन दिन इन बारा दा नीम्द याऊ न्याय माळबाळुल.
COL 2:17 यतिकी ईव सब बरावाळा मातगोळ्द छाया हुव, लेकीन वास्तविकता अच मसीह हुन.
COL 2:18 यातोवारा भी मंळसा अन्द द्वारा तान अपमान माळसुसोद इजाजत कोळबाळी जो विशेष दर्शन इन कारण श्रेष्ट आगोद दावा माळतद अदिक जो ख्वाटा विनम्रता अदिक स्वर्गदूतगोळ्द पुजा मा जोर कोळतद. बिना यातोदारा कारण इन ईत्‍ता मंळसा तान मानवीय सोच देल व्यर्थ बायतान.
COL 2:19 अदिक मसीह अक हुळकु ईटोद बंद माळ बुटार, आव मसीह जो मय इन ताल्ला हुन. मसीह अन्द हात्‍ती ता दा सप्पा मय आद जो जोळगोळ अदिक नशगोळ से ऊंदा सांगुळ जोळ्सकु आव, अदिक परमेश्वर जसा वाळुसोद चाहासतान हांग वाळुस्त होगतद.
COL 2:20 यतिकी नीव मसीह अन्द सांगुळ सोतोगीर अदिक ब्रम्हाण्ड इन शासन माळावाळा आत्मागोळ से मुक्त माळकु आगीर. रा बाक येती आंदुर घाई जो दुनिया नोर आर जीवन जीऊसतीर? नीव ईत्‍ता विधीगोळ वश दा येती ईरतीर.
COL 2:21 कि “इदरी मुठबाळेतीर, अदरी नेकबाळेतीर, अदिक अदरी कय हचबाळेतीर?”
COL 2:22 ईव सप्पा वस्तुगोळ क्याल्सा दा तरास ताका नष्ट आगेदव यतिकी ईव मंळसागोळ नियम अदिक आग्यागोळ अदिक शिक्षागोळ्द अनुसार आव.
COL 2:23 निश्चित अच ईत्‍ता प्रकार इन सप्पा नियम स्वर्गदूतगोळ्द जबरदस्ती देल पुजा अदिक ख्वाटा विनम्रता, अदिक मय इन गंभीर उपचारगोळ ग्यान मा आधारित आद लेकीन शारीरिक लालसागोळी रोक्सदुर दा ईऊर देल येनु उच फायदा आगाल्द.
COL 3:1 याग नीव मसीह अन्द सांगुळ जित्‍ता माळकु आगीर, इदुरसाटी तान दिल इक स्वर्गीय मातगोळ मा हची, यल मसीह तान ऊम्मा कय दी विराजमान आन अदिक परमेश्वर उन ऊम्मा कय दी कुर्तकु आन.
COL 3:2 पृथ्वी माकळव वस्तुगोळ ईला लेकीन स्वर्गीय वस्तुगोळ मा ध्यान हची,
COL 3:3 यतिकी नीव रा सोतोगीर अदिक नीम्द जीवन मसीह अन्द सांगुळ परमेश्वर दा होचकु आद.
COL 3:4 नीम खरा जीवन मसीह हुन याग मसीह प्रगट आदान, आग नीव भी आऊन सांगुळ महिमा सहित प्रगट माळकु आदीर.
COL 3:5 इदुरसाटी पृथ्वी माकळव तान आ संसारिक इच्छागोळी कोंद बुळी जो नीम दा कार्य माळतद, मतलब व्यभिचार, अशुध्दता, दुष्कामना, बेकार लालसा अदिक लोभ इक जो मूर्तिपूजा अन्द बराबर आद.
COL 3:6 यतिकी ईवा मातगोळ कारण जो आऊन आग्या मान्सालुर आंदुर मा परमेश्वर उन सिट्ट प्रगट आगली होगेत्याद.
COL 3:7 अदिक ऊंद समय ईरोद याग नीव भी ईत्‍तव इच्छागोळ अनुसार तान जीवन जीऊसतोगीर, अदिक नीम जीवन आऊंदा प्रभुत्व दा का ईरोद.
COL 3:8 लेकीन ईग नीव भी ईव सप्पा मातगोळी, मतलब सिट्ट, उत्‍तेजना, बैरभाव, अपमान अदिक बाय देल बोयोद ईव सप्पा मातगोळ बिट बुळी.
COL 3:9 आबुर दाबुर से ख्वाटा माताळबाळी, यतिकी नीव हाळोद स्वभाव इक आऊन आदतगोळ सांगुळ ईळ्स कोंडीर.
COL 3:10 अदिक व्हाशोद व्यक्तित्व अक धारण माळ कोंडीर, जो तान सृजनहार इन स्वरूप दा पुरा ग्यान प्राप्त माळोर साटी लगातार व्हाशोद बन्सतेला ईरतद.
COL 3:11 अदिक ईदुर परिणाम ईद आद कि अल यहूदी अदिक गैरयहूदी दा येनु फरक ईराल, अदिक ना रा यातोदारा खतना माळ्द अदिक खतनारहित दा, अदिक ना यातोदारा सभ्य अदिक ना असभ्य दा, ना दास अदिक ना स्वतंत्र मंळसा दा, लेकीन मसीह अच सब येनारा हुन अदिक सप्पा विश्वासीगोळ दा मसीह अन्द वास आद.
COL 3:12 अदिक नीव परमेश्वर उन लॉकुर हुईर आव नीम से प्यार माळतान अदिक आव तान पवित्र आगोर साटी नीम चुनाव माळ्यान. रा बाक सहानुभुती, दया, नम्रता, कोमलता अदिक धीरज इक धारण माळी.
COL 3:13 अदिक अगर यारीकारा यारदारा मा दोष हचोद यातारा कारण ईरूल, रा आबुर दाबुर सहन माळी अदिक आबुर दाबुर्द अपराध माफ माळी; ह्यांग प्रभु नीम्द अपराध माफ माळदुन, हांग अच नीव भी माळी.
COL 3:14 अदिक ई सप्पा मातगोळ अलावा प्यार इक धारण माळी, प्यार अच सप्पा मुंदुरी आपस दा कटकु ईटतद अदिक परिपुर्ण माळतद.
COL 3:15 नीम साटी होगावाळा निर्णयगोळ मा अद शांती इन जो मसीह देल प्राप्त आगतद मार्गदर्शन ईरूल, इदुरसाटी परमेश्वर नीमी ऊंदा सांगुळ आ शांती दा ऊंद मय आगोर साटी कारस्यान. अदिक हमेशा धन्यवाद माळ्त ईरी.
COL 3:16 तान सप्पा संपन्नता अन्द सांगुळ मसीह अन्द बातणी नीम दिलगोळ दा वास माळुल. अदिक तान सप्पा बुद्धी देल आबुर दाबुर इक शिक्षा अदिक निर्देश कोळ्त ईरी. भजनगोळ स्तुति अदिक आत्मिक हाळगोळी हाळतेला तान दिलगोळ दा परमेश्वर उक धन्यवाद कोळ्त ईरी.
COL 3:17 जो येनारा भी नीव माळी या अनी अद सप्पा प्रभु यीशु उन हेसुर मा आग पायजे, अदिक आऊन द्वारा परमेश्वर आप्प उन धन्यवाद माळी.
COL 3:18 हे हिंग्सुरा, तान तान गांड्डुर्द हात्‍ती ईरी, ह्यांग मसीह अन्द अनुयायीगोळी शोभा कोळतद.
COL 3:19 हे गांड्डुरा, तान तान हिंग्सुर से प्यार ईटी, अदिक आंदुर से कठोर व्यवहार माळबाळी.
COL 3:20 हे चिकोरा, सप्पा मातगोळ दा तान तान मोय-आप्प उन आग्या अन्द पालन माळी, यतिकी मसीह अनुयायी इन ईत्‍ता व्यवहार देल परमेश्वर प्रसन्न आगतान.
COL 3:21 हे मोय आप्पुरा, तान चिकोर इक तंग माळबाळी, हिंग आगबाळुल कि आंदुर्द साहस मुरदोगुल.
COL 3:22 हे सेवकगोळा, जो मय इन अनुसार नीम्द स्वामी आन, सप्पा मातगोळ दा आंदुर्द आग्या अन्द पालन माळी, सिर्फ लॉकुरी खुश माळोर साटी अदा समय ईला याग आंदुर नोळतेला आर, बल्‍की खरा मन देल आंदुर्द मान्सी यतिकी नीव प्रभु उन आदर माळतीर.
COL 3:23 जो येनारा क्याल्सा नीव माळतीर, तान पुरा मन देल माळी, ईद सम्सकु कि मंळसागोळ्द साटी ईला लेकीन प्रभु उन साटी माळतेव;
COL 3:24 याद ईटी कि प्रभु ईदुर प्रतिफल नीमी कोट्टान जो आव तान लॉकुर साटी ईट्यान, यतिकी मसीह खरा स्वामी हुन यार्द नीव स्यावा माळतीर.
COL 3:25 जो अपराध माळतान आव तान अपराध इंद फल ताकोंडान, यतिकी परमेश्वर यारदारा सांगुळ पक्षपात माळालुन.
COL 4:1 हे स्वामीगोळा, नीव तान तान सेवकगोळी आंदुर क्याल्सागोळ अनुसार जो सही बदला आद आंदरी कोळी. याद ईटी कि स्वर्ग दा नीमव भी यावारा स्वामी आन.
COL 4:2 प्रार्थना दा लगातार हतकु ईरी, अदिक परमेश्वर उक धन्यवाद कोळतेला अदुर दा जागृत ईरी;
COL 4:3 अदिक इदुर सांगुळ सांगुळ अच नाम साटी भी प्रार्थना माळतेला ईरी, कि परमेश्वर नाम साटी मसीह अन्द आ भेद इन बातणी प्रचार माळोर साटी वळ्लीद मवका प्रदान माळुल, यतिकी इदुर दा कारण ना कैद दा आईन.
COL 4:4 प्रार्थना माळी कि ना इदरी हिंग स्पष्टता अन्द सांगुळ हेळ सकाईन ह्यांग नानी हेळोद जरूरी आद.
COL 4:5 समय इन पुरा पुरा इस्तेमाल माळी अदिक अविश्वासीगोळ सांगुळ बुद्धिमानी देल व्यवहार माळी.
COL 4:6 नीम मातगोळ पुरा अनुग्रह देल तुमकु अदिक लॉकुरी पसंद बरा लायक ईरूल ताकी नीव जान्स कोमी कि हर मंळसा अक ह्यांग उत्‍तर कोळोद जरूरी आद.
COL 4:7 नाम प्रिय वार्ट अदिक विश्वासयोग्य सेवक, तुखिकुस, जो प्रभु दा नान सहकर्मी आन, नान सप्पा समाचार नीमी हेळ बुट्टान.
COL 4:8 आऊक ना इदुरसाटी नीम्द हात्‍ती कळुदीन कि नीमी नाम्द दशा मालूम आगेगुल अदिक आव नीम्द दिलगोळ इक प्रोत्साहित माळुल.
COL 4:9 आऊन सांगुळ ना उनेसिमुस उक भी कळुदीन जो विश्वासलायक अदिक प्रिय वार्ट अदिक नीम दा टु ना ऊंद हुन; ईंदुर नीमी ईलेव सप्पा मातगोळ हेळ बुट्टार.
COL 4:10 अरिस्तर्खुस, जो नान सांगुळ बंदीगृह दा सांगुळ ईतान, अदिक बरनबास उन वार्ट मरकुस उन नीमी नमस्कार, मरकुस उन बारा दा नीमी निर्देश सिक्‍केग्याद अच अगर आव नीम हात्‍ती बंदान रा आऊन स्वागत माळकु आऊक ग्रहण माळेतीर.
COL 4:11 यूस्तुस अंदकु आगावाळा यीशु उन भी नीमी नमस्कार सिकुल. सिर्फ ई मुरा मुंदुरा यहूदी विश्वासी परमेश्वर उन राज्य अन्द साटी नान सांगुळ क्याल्सा माळेत्यार, अदिक ईंदुर्द नानी हापाळ सहायता सिक्याद.
COL 4:12 इपफ्रास, जो नीम दा टु ऊंद आन अदिक मसीह यीशु उन दास आन, नीमी नमस्कार अनतान अदिक सदा नीम साटी प्रार्थनागोळ दा प्रयत्न माळतान, ताकी नीव सिद्ध आगकु पुरा विश्वास इन सांगुळ परमेश्वर उन इच्छा मा स्थिर ईरी.
COL 4:13 ना व्यक्तिगत रीति देल आऊन गवाह आईन कि आव नीम साटी अदिक लौदीकिया अदिक हियरापुलिसवाळेर्द साटी कठिन मेहनत माळतेला ईरतान.
COL 4:14 नाम प्रिय वैद्य लूका अदिक देमास नीमी नमस्कार कळुतार.
COL 4:15 लौदीकिया अन्द विश्वासी वार्टुर, अदिक आकतींग नुमफास अदिक आकिन मान्ना अन्द मंडली इक नाम दी टु नमस्कार अनेत.
COL 4:16 याग ईद चिट्ठी नीम अल वाचुसकु आदीत रा हिंग माळेतीर कि लौदीकिया अन्द मंडली दा भी वाचुसकु आगुल, अदिक अदा समय अद चिट्ठी जो लौदीकिया नोर विश्वासी नीमी कळ्यार अदरी नीव भी वाचुसेतीर.
COL 4:17 अदिक अरखिप्पुस से अनेतीर कि “जो स्यावा प्रभु दा आऊक सौप्सकु आग्याद आव अदरी निश्चय इन सांगुळ पुरा माळुल.
COL 4:18 “ना पौलुस खुद तान कय देल नीमी नमस्कार लिखसेतीन. याद ईटी कि ना शंकलीगोळ देल कटकु बंदीगृह दा आईन,” परमेश्वर उन अनुग्रह नीम सांगुळ बन्सकु ईरूल.
1TH 1:1 पौलुस अदिक सिलवानुस अदिक तीमुथियुस उन दी टु थिस्सलुनीकेगोळ मंडली नव हेसुर जो परमेश्वर आप्प अदिक प्रभु यीशु मसीह अन लॉकुर आर अनुग्रह अदिक शांती नीमी सिकतेला ईरूल.
1TH 1:2 नाव तान प्रार्थनागोळ दा नीमी हमेशा याद माळतेव अदिक हमेशा नीम सप्पा अन बारा दा परमेश्वर उन धन्यवाद माळतेव.
1TH 1:3 अदिक तान परमेश्वर अदिक आप्प उन मुंद नीमव विश्वास इन क्याल्सा अदिक प्यार इन मेहनत अदिक नाम प्रभु यीशु मसीह दा धीरज देल हुळकु आशा अक लगातार याद माळतेव.
1TH 1:4 नामोर वार्टुरा अदिक आकतींगेरा, नाव जान्सतेव कि परमेश्वर नीम से प्यार माळतान आव नीमी नीवळुस्यान.
1TH 1:5 यतिकी नाव नीम हात्‍ती नाम्द खुशखबरी सिर्फ शब्दगोळ देल अच ईला लेकीन सामर्थ्य देल, अदिक पवित्र आत्मा अन्द पुरा सच्चाई इन निश्चिता देल तंदान; ह्यांग नीव जान्सतीर कि नाव नीम सांगुळ ईरेव, रा नाव ह्यांग ईत्‍तेव ईद नीम भलाई इन साटी ईरोद.
1TH 1:6 नीव धोळ्द क्लेशगोळ बावजुद. पवित्र आत्मा देल सिक्द खुशी इन सांगुळ, वचन इक ग्रहण माळदुर अदिक नाम्द अदिक प्रभु उन अनुकरण माळली हतदुर.
1TH 1:7 इदुरसाटी हिंग माळदुर देल मकिदुनिया अदिक अखाया द्याश इन सप्पा विश्वासीगोळ साटी नीव आदर्श बन्सेदिर.
1TH 1:8 यतिकी नीम हात्‍ती टु प्रभु उन वचन सिर्फ मकिदुनिया अदिक अखाया दा अच केळ्सकु आत हिंग अच ईला, लेकीन नीम विश्वास इन जो परमेश्वर मा आद, हर जागा दा अदुर चर्चा फैलुसेत कि ईदुर बारा दा नामी येनु अनोद जरवत अच हैलेच.
1TH 1:9 यतिकी आ लॉकुर नाम बारा दा हेळतार कि नीम्द हात्‍ती नाम्द स्वागत ह्यांग आत; अदिक नीव ह्यांग मूर्तीगोळ देल परमेश्वर उन दी तिर्गदिर ताकी जित्‍ता अदिक खरा परमेश्वर उन स्यावा माळी,
1TH 1:10 अदिक आऊन पार उन स्वर्ग मा टु बरोद हादी कायतेला ईरी यारी आव सोत्‍तुर दा टु जित्‍ता माळ्यान, अर्थात यीशु उन, जो नामी परमेश्वर उन बरोद आद प्रकोप देल उळस्तान.
1TH 2:1 हे वार्टुरा अदिक आकतींगेरा, नीव खुद अच जान्सतीर कि नाम नीम हात्‍ती बरोद बेकार आगीदील
1TH 2:2 लेकीन नीव खुद अच जान्सतीर नीम हात्‍ती बरोर से पयले फिलिप्पी दा दुख नेगुली अदिक अपमान सहन माळदुर मा भी नाम परमेश्वर नामी ईत्‍ता साहस कोट्टुन, कि नाव परमेश्वर उन खुशखबरी भारी विरोधगोळ ईरतेला भी नीमी केळसेव.
1TH 2:3 यतिकी नाम्द उपदेश गलतीगोळ से हैलेच अदिक अशुध्द विचार देल, अदिक चालाकी इन सांगुळ हैलेच;
1TH 2:4 लेकीन ह्यांग परमेश्वर नामी योग्य ठहरूस्कु खुशखबरी सौप्सदुन, नाव हांग अच हेळतेव, अदिक इदुर दा मंळसागोळी इक ईला, लेकीन परमेश्वर उक, जो नाम मन इन उद्देशगोळी जाच तान, प्रसन्न माळतेव.
1TH 2:5 यतिकी नीव जान्सतीर, नाव ना रा यागलु चापलुसी माळेव अदिक ना पैस्या अन लालच इन साटी येनारा बहाना माळेव परमेश्वर नाम गवाह आन
1TH 2:6 अदिक नाव ना मंळसागोळ देल, ना दुसरा से, अदिक ना खुद देल प्रशंसा चाहसदेव.
1TH 2:7 यीशु मसीह अन प्रेरित आगा नाता देल नाम नीम मा बोझ हाक सकेव. लेकीन याता प्रकार मोय तान चिकोर्द पालन पोषण माळतार हांग अच नाव भी नीम न्याड्या दा ईतकु धोळ्द कोमलता तोर्सदेव;
1TH 2:8 अदिक हांग अच नाव नीमी हापाळ प्यार माळतेला, नाव खुशी इन सांगुळ परमेश्वर उन खुशखबरी दा नाम जीवन इन द्वारा पुरा तरीका देल सामर्थ्य देल नीम्द मदत माळली तयार ईरेव, इदुरसाटी कि नीव नाम प्रिय आगेगीदीर.
1TH 2:9 यतिकी, हे वार्टुरा अदिक आकतींगेरा, निश्चित अच नीव नाम मेहनत अदिक कष्ट इक याद ईटतीर; नाव इदुरसाटी ईळ्लक हागुल क्याल्सा धंदा माळतेला नीम दा परमेश्वर उन खुशखबरी प्रचार माळदेव कि नीम दा टु यारदु मा भार आगबाळुल.
1TH 2:10 नीव ई मात इन गवाह हुईर, अदिक हांग अच परमेश्वर भी आन, कि नाव नीम विश्वासीगोळ सांगुळ पवित्रता, लायकत अदिक निर्दोषता अन व्यवहार माळेव.
1TH 2:11 नीव जान्सतीर कि नाव नीम सांगुळ हांग अच व्यवहार माळतेव ह्यांग आप्प तान चिकोरगोळ सांगुळ व्यवहार माळतान.
1TH 2:12 कि नाव नीमी प्रोत्साहित माळदेव दिलासा कोट्टेव नाव नीमी विनती माळतेला ईत्‍तेव कि तान जीवन हिंग बितुसी कि परमेश्वर खुश आगुल, याव नीमी तान महिमा अदिक राज्य दा सहभागी आगोर साटी कारदान.
1TH 2:13 इदुरसाटी नाव भी परमेश्वर उन धन्यवाद लगातार माळतेव कि याग नाम द्वारा परमेश्वर उन खुशखबरी इन वचन नीम हात्‍ती पोहचुस्त, रा नीव अदरी मंळसागोळ्द ईला लेकीन परमेश्वर उन वचन सम्सकु ग्रहण माळदीर; अदिक सही दा ईद हिंग अच आद; अदिक अद नीम विश्वासीगोळ दा जो विश्वास ईटतीर, प्रभावशाली आद.
1TH 2:14 इदुरसाटी हे वार्टुरा अदिक आकतींगेरा, नीम सांगुळ भी अदा मात आगतद ह्यांग मसीह यीशु दा परमेश्वर उन आ मंडलीगोळ्द यहूदिया दा आद, यतिकी नीव तान लॉकुर से हांग अच छल सहन माळतीर, ह्यांग आंदुर भी यहूदीगोळ द्वारा सहन माळीदुर,
1TH 2:15 यार प्रभु यीशु उक अदिक भविष्यवक्तागोळी भी कोंद कोंडुर अदिक नाम सांगुळ छल माळदुर, अदिक परमेश्वर आंदुर से प्रसन्न हैलेच, अदिक आंदुर सप्पा मंळसागोळ्द विरोध माळतार,
1TH 2:16 अदिक आंदुर गैरयहूदीगोळी आंदुर उद्धार इन साटी परमेश्वर उन खुशखबरी हेळोर साटी नामी रोक्सतार कि हमेशा तान पाप इन घळा तुमतेला ईरूल; लेकीन आंदुर मा परमेश्वर उन भयानक प्रकोप होट बंदाद.
1TH 2:17 हे वार्टुरा अदिक आकतींगेरा, याग नाव थ्वाळासा समय इन साटी, मन दा ईला लेकीन मय देल, नीम से अलग आगेगीदेव, रा नाव हापाळ कोशिशगोळ सांगुळ नीमी नोळोर साटी हापाळ कोशिश माळदेव.
1TH 2:18 इदुरसाटी नाव ऊंद धन ईला लेकीन घळी-घळी नीम हात्‍ती बरोद चाहसदेव, लेकीन शैतान नामी रोक्सकु ईटदुन.
1TH 2:19 भला नाम आशा या आनन्द या बळाई इन मुकुट येन आद? येन नाम प्रभु यीशु उन मुंद आऊन बरोद समय नीम अच ईरतीदील?
1TH 2:20 नाम बळाई अदिक खुशी नीव अच हुईर.
1TH 3:1 इदुरसाटी याग नाम से अदिक ईतकु आगीदील, रा नाव ईद ठहरूसदेव कि एथेंस नगर दा आबना ईतोगुल,
1TH 3:2 अदिक नाव तीमुथियुस उक, जो मसीह अन खुशखबरी दा नामव वार्ट अदिक परमेश्वर उन भी सेवक आन, इदुरसाटी कळ्यान कि आव नीमी संची माळुल अदिक नीम विश्वास इन बारा दा नीमी समझुसुल.
1TH 3:3 कि नीम दा टु यावारा भी इव क्लेशगोळ कारण डगमगुस बाळुल. यतिकी नीव खुद अच जान्सतीर कि ईद सताप नाम साटी परमेश्वर उन इच्छा अन भाग हुन.
1TH 3:4 यतिकी पयला अच, याग नाव नीम सांगुळ ईर तोगेव रा नीम से अन तोगेव कि नामी क्लेश नेगव बिद्दव, अदिक हिंग अच आग्याद, ह्यांग कि नीव जान्सतीर भी.
1TH 3:5 ईद कारण याग नान से अदिक ईतकु आगीदील, रा नीम्द विश्वास इन बारा दा जानसोर साटी कळुदीन, कि यागलु हिंग आगबाळुल कि परीक्षा माळावाळेर शैतान नीम परीक्षा माळीदार, अदिक नाम मेहनत बेकार आगीदाद.
1TH 3:6 लेकीन ईगल्या तीमुथियुस, जो नीम हात्‍ती टु नाम हात्‍ती बंदान, नीम्द वळ्लीद विश्वास अदिक प्यार इन बातणी केळ्सदुन अदिक ईद मात इक भी केळ्सदुन कि नीव हमेशा प्यार इन सांगुळ नामी याद माळतीर, अदिक ह्यांग नाव नीमी नोळोर साटी लालच ईटतेव हांगा नीव भी ईटतीर.
1TH 3:7 इदुरसाटी हे वार्टुरा अदिक आकतींगेरा, तान सप्पा दुख अदिक क्लेश दा नीम विश्वास इन कारण नामी नीम बारा दा प्रोत्साहन सिक्त.
1TH 3:8 यतिकी ईग अगर नीव प्रभु दा संची ईरी रा नाव जित्‍ता आयेव.
1TH 3:9 यतिकी नाव नीम साटी परमेश्वर उन धन्यवाद माळ सकतेव. जो खुशी नामी परमेश्वर उन उपस्थिती दा सिकतद, इदुरसाटी परमेश्वर उन धन्यवाद माळतेव.
1TH 3:10 नाव ईळ्लक हागुल हापाळ अच प्रार्थना माळतेला ईरतेव कि नीमी मुंद नोळेव, अदिक नीम विश्वास इन कमी पुरा माळेव.
1TH 3:11 ईग नामव परमेश्वर अदिक आप्प खुद अच अदिक नाम प्रभु यीशु, नीम हात्‍ती बरोर साटी नाम हादी तेरूल;
1TH 3:12 अदिक प्रभु हिंग माळुल कि ह्यांग नाव नीम से प्यार ईटतेव, हांग अच नीम प्यार भी आपस दा अदिक सप्पा मंळसागोळ सांगुळ वाळुसुल, अदिक उन्नती माळतेला होगुल,
1TH 3:13 ताकी आव नीम मनगोळी हिंग संची माळुल कि याग नामव प्रभु यीशु तान सप्पा पवित्र लॉकुर सांगुळ बरूल, रा खुद नाम परमेश्वर आप्प उन उपस्थिती निर्दोष ठहरूसुल.
1TH 4:1 इदुरसाटी हे वार्टुरा अदिक आकतींगेरा, नाव नीम से विनती माळतेव अदिक नीमी प्रभु यीशु मसीह दा समझुसतेव कि ह्यांग नीव नाम से योग्य चाल नळोद अदिक परमेश्वर उक खुश माळोद कलतीर, अदिक ह्यांग नीव नळुतीर भी, हांग अच अदिक भी वाळुस्तेला होगी.
1TH 4:2 यतिकी नीव जान्सतीर कि नाव प्रभु यीशु उन अधिकार देल नीमी याता-याता शिक्षागोळ कोटेव.
1TH 4:3 परमेश्वर उन इच्छा ईद आद कि नीव पवित्र बन्सी: अर्थात व्यभिचार देल उळ्दकु ईरी,
1TH 4:4 अदिक नीम दा टु हर ऊंद मंळसा अक ईद जान्स पायजे कि तान-तान हिंग्स उन सांगुळ पवित्रता अदिक आदर इन सांगुळ व्यवहार माळोद आद ईद नीमी कलु पायजे,
1TH 4:5 अदिक ईद क्याल्सा अभिलाषा देल ईला, अदिक ना आ गैरयहूदीगोळ घाई जो परमेश्वर उक जान्सालुर,
1TH 4:6 कि ईद मात दा याऊ तान सहकर्मी वार्ट उक ठगुसबाळुल, अदिक आऊन फायदा नेगुबाळी, यतिकी प्रभु ईव सप्पा मातगोळ बदला ताकोमावाळा आन; ह्यांग कि नाव पयले अच नीम से अंदेव अदिक चितुस देव भी.
1TH 4:7 यतिकी परमेश्वर नामी अशुध्द दा ईरोरसाटी ईला, लेकीन पवित्र आगोर साटी कारदान.
1TH 4:8 ईद कारण जो ईद शिक्षा अक नकार्सतान, आव मंळसा अक ईला लेकीन परमेश्वर उक नकार्सतान, जो तान पवित्र आत्मा नीमी कोळतान.
1TH 4:9 लेकीन भाईचारा अन प्यार इन बारा दा ईद जरूरी हैलेच कि ना नीम हात्‍ती येनारा लिख्साईन, यतिकी आपस दा प्यार ईटोद नीव खुद अच परमेश्वर देल कलतीर;
1TH 4:10 अदिक पुरा मकिदुनिया नोर सप्पा वार्टुर आकतींगेर सांगुळ हिंग प्यार माळतीर. लेकीन हे वार्टुरा अदिक आकतींगेरा, नाव नीमी समझुसतेव कि यक्कुल अच वाळुस्तेला होगी,
1TH 4:11 अदिक ह्यांग नाव नीमी आग्या कोटेव, हांग अच शांती देल जीवन जीऊसोद अदिक तान-तान क्याल्सा माळली अदिक तान-तान कय देल कमुसोद कोशिश माळी;
1TH 4:12 ताकी व्हार्यावाळेर से आदर प्राप्त माळी, अदिक नीमी यातोदु वस्तु उन कमी आगबाळुल.
1TH 4:13 हे वार्टुरा अदिक आकतींगेरा, नाव चाहसालेव कि नीव आंदुर बारा दा जो सोतकु आर, अग्यानी ईरी; हिंग आगबाळुल कि नीव दुसरा अन घाई शोक माळी यारी आशा हैलेच.
1TH 4:14 यतिकी अगर नाव विश्वास माळतेव कि यीशु सोत्‍तुन अदिक जित्‍ता भी आदुन, रा हांग अच परमेश्वर आंदरी भी जो यीशु मा विश्वास माळतेला सोत्‍तुर, यीशु उन सांगुळ जित्‍ता माळ्यान.
1TH 4:15 यतिकी जो प्रभु नामी कलस्यान नाव प्रभु उन वचन इन अनुसार नीम से ईद अनतेव कि नाव जो जित्‍ता आयेव अदिक प्रभु उन बरासताका ताका उळ्दकु ईत्‍तेव, सोत्तुर देल मुंद वाळुसतीदिल.
1TH 4:16 यतिकी प्रभु खुद अच स्वर्ग टु ईळदान; आ समय ललकार, अदिक प्रधान स्वर्गदूत उन शब्द केळ बंदीत, अदिक परमेश्वर उन तुरही उदकु आदीत; अदिक जो मसीह दा विश्वास माळतेला सोतार, आंदुर पयले जित्‍ता माळकु आदार.
1TH 4:17 आग नाव जो जित्‍ता अदिक उळ्दकु ईत्‍तेव आंदुर सांगुळ बादलगोळ मा नेगुकु आदेव कि हवा दा प्रभु उन सांगुळ सिकुल; अदिक ईद रीति देल नाव हमेशा प्रभु उन सांगुळ ईत्‍तेव.
1TH 4:18 ईद प्रकार इव मातगोळ देल आबुर दाबुरी प्रोत्साहित माळतोगी.
1TH 5:1 लेकीन हे वार्टुरा अदिक आकतींगेरा, समय अदिक कालगोळ बारा दा नीमी येनु लिखसोद जरवत हैलेच.
1TH 5:2 यतिकी नीव खुद अच जान्सतीर कि ह्यांग ईळ्लक इक काळ्ल बरतान, हांग अच प्रभु उन दिन बरोद आद.
1TH 5:3 याग लॉकुर अनतेला ईत्‍तार, “कुशल आद, अदिक येनु अंज्क हैलेच,” रा आंदुर मा अचानक विनाश बंदीत, याता प्रकार व्हाट्या दी आर्त इक दुख; अदिक आंदुर यातोदु रीति देल ऊळुतीदील.
1TH 5:4 लेकीन हे वार्टुरा अदिक आकतींगेरा, नीव रा अंधकार दा हैलेच कि अद दिन नीम मा काळ्ल उन घाई बंदकु बिळुल.
1TH 5:5 यतिकी नीव सब ज्योति अदिक हागुल इन चिकोर हुईर; नाव ना ईळ्लक इन आयेव, ना अंधकार इन आयेव.
1TH 5:6 इदुरसाटी नाव दुसरा अन घाई मिंगकु ईरतीदील, लेकीन जागस्तेला अदिक सावधान ईत्‍तेव.
1TH 5:7 यतिकी जो मींगतार आंदुर ईळ्लकी इच मींगतार, अदिक जो मतवाला ईरतार आंदुर ईळ्लकी इच मतवाला ईरतार.
1TH 5:8 लेकीन नाव जो हागुल इनोर हुयेव, विश्वास अदिक प्यार इन कवच हाक्‍कु अदिक उद्धार इन आशा अन टोप हाक्‍कु सावधान ईत्तेव.
1TH 5:9 यतिकी परमेश्वर नामी सिट्ट इन साटी ईला, लेकीन इदुरसाटी ठहरूस्यान कि नाव तान प्रभु यीशु मसीह अन द्वारा उद्धार प्राप्त माळेव.
1TH 5:10 यीशु नाम साटी ईद कारण सोत्‍तुन कि नाव जित्‍ता ईरूल या सोतकु ईरूल, याग आव बंदान आग सप्पा मीलुस्कु आऊंदा सांगुळ जीऊसेव.
1TH 5:11 ईद कारण आबुर दाबुरी दिलासा कोळी अदिक आबुर दाबुर इन मदत इन कारण बन्सी, ह्यांग कि नीव माळतीर भी.
1TH 5:12 हे वार्टुरा अदिक आकतींगेरा, नाव नीम से विनती माळतेव कि जो नीम दा मेहनत माळतार, अदिक नीम मसीह जीवन दा नीमोर अगुवे आर, अदिक नीमी शिक्षा कोळतार, आंदुर्द सम्मान माळी.
1TH 5:13 अदिक आंदुर क्याल्सा अन कारण प्यार इन सांगुळ आंदरी हापाळ अच आदर इन योग्य समसी. आपस दा मेल मिलाप देल ईरी.
1TH 5:14 हे वार्टुरा अदिक आकतींगेरा, नाव नीमी समझुसतेव कि जो ठीक चाल नळालुर आंदरी समझुसी, कायरगोळी हिम्मत कोळी, निर्बलगोळी सभांळसी, सप्पा दी सहनशीलता तोर्सी.
1TH 5:15 सावधान. याऊ यारदु से बुराई इन बदला बुराई माळबाळुल; लेकीन हमेशा वळ्लीद माळदुर मा तत्पर ईरी, आपस दा अदिक सप्पा मुंदुर से भी भलाई माळी.
1TH 5:16 हमेशा खुश ईरी.
1TH 5:17 हमेशा प्रार्थना दा हतकु ईरी.
1TH 5:18 हर मात दा धन्यवाद माळी; यतिकी नीम मसीह यीशु दा परमेश्वर उन ईदा इच्छा आद.
1TH 5:19 आत्मा अक नुनाक बाळी.
1TH 5:20 परमेश्वर उन दी टु बरावाळा बातणी इन धिक्कार माळबाळी.
1TH 5:21 सप्पा मातगोळी परखुसी; जो वळ्लेव आव अवरी हुळकु ईटी.
1TH 5:22 सप्पा प्रकार इन बुराई देल उळ्दकु ईरी.
1TH 5:23 शांती नव परमेश्वर खुद अच नीमी पुरा रीति देल पवित्र माळुल; अदिक नीम्द आत्मा अदिक जीव अदिक शरीर नाम प्रभु यीशु मसीह अन बरोद ताका पुरा-पुरा अदिक निर्दोष सुरक्षित ईरूल.
1TH 5:24 नीमव कारावाळा विश्वासलायक आन, अदिक आव हिंग अच माळ्यान.
1TH 5:25 हे वार्टुरा अदिक आकतींगेरा, नाम साटी प्रार्थना माळी.
1TH 5:26 सप्पा विश्वासी वार्टुरी परमेश्वर उन पवित्र प्यार दा नमस्कार.
1TH 5:27 ना नीमी प्रभु उन अधिकार देल नीमी विनती माळतीन कि ईद चिट्ठी सप्पा विश्वासी वार्टुरी वाचुसकु केळ्सकु आगुल.
1TH 5:28 नाम प्रभु यीशु मसीह अन्द अनुग्रह नीम मा आगतेला ईरूल.
2TH 1:1 पौलुस अदिक सिलवानुस अदिक तीमुथियुस इन सांगुळ नाम आप्प परमेश्वर अदिक प्रभु यीशु मसीह अन लॉकुरी चिट्ठी लिख्सतीन, थिस्सलुनीकेगोळ मंडली दा आद:
2TH 1:2 नाम आप्प परमेश्वर अदिक प्रभु यीशु मसीह अन दी टु नीमी अनुग्रह अदिक शांती सिकतेला ईरूल.
2TH 1:3 हे वार्टुरा अदिक आकतींगेरा, नीम बारा दा नामी हर समय परमेश्वर उन धन्यवाद माळ पायजे, अदिक ईद उचित भी आद, इदुरसाटी कि नीम विश्वास हापाळ वाळुसीग्याद, अदिक नीम सप्पा मुंदुर्द प्यार आपस दा हापाळ अच वाळुसतेला होगेत्याद.
2TH 1:4 ईल ताका कि नाव खुद परमेश्वर उन मंडली दा नीम बारा दा घमण्ड माळतेव कि यास उपद्रव अदिक क्लेश नीव सहन माळतीर, आ सब दा नीम धीरज अदिक विश्वास प्रगट आगतद.
2TH 1:5 ईद परमेश्वर उन खरा न्याय इन स्पष्ट प्रमाण हुन कि नीव परमेश्वर उन राज्य अन योग्य ठहरूसी, यदुर साटी नीव दुख भी नेगुतीर.
2TH 1:6 यतिकी परमेश्वर उन हात्‍ती ईद न्याय आद कि जो नीमी क्लेश कोळतार, आंदरी बदला दा क्लेश कोळुल
2TH 1:7 अदिक नीमी, जो क्लेश पाऊसतीर, नाम सांगुळ चैन कोळुल; आ समय याग कि प्रभु यीशु तान सामर्थी स्वर्गदूतगोळ सांगुळ, धधकुसतेला बेक्‍की दा स्वर्ग टु प्रगट आदान,
2TH 1:8 अदिक जो परमेश्वर उक अरालुर अदिक नाम प्रभु यीशु उन खुशखबरी इक मानसालुर आंदुर से बदला ताकोंडान.
2TH 1:9 आंदुर प्रभु उन मुंदु टु अदिक आऊन ताकत इन तेज देल दुर आगकु अनन्त विनाश इन दण्ड ताकोंडार.
2TH 1:10 ईद आ दिशी आदीत, याग आव तान पवित्र लॉकुर दा महिमा ताकोमोर अदिक सब विश्वास माळावाळेर दा आश्चर्य अन कारण आगोर साटी बंदान; ईंदुर दा नीव भी सहभागी आईर यतिकी नीव नाम गवाही मा विश्वास माळदीर.
2TH 1:11 इदुरसाटी नाव हमेशा नीम साटी प्रार्थना भी माळतेव कि नाम परमेश्वर नीमी आ जीवन इन योग्य समसुल, अदिक भलाई इन हर ऊंद इच्छा अदिक विश्वास इन हर ऊंद क्याल्सा अक सामर्थ्य सहित पुरा माळुल,
2TH 1:12 ताकी नाम परमेश्वर अदिक प्रभु यीशु मसीह इन अनुग्रह अन अनुसार नाम प्रभु यीशु उन हेसुर इक महिमा सिकुल, अदिक नीमी भी.
2TH 2:1 हे वार्टुरा अदिक आकतींगेरा, ईग नाव तान प्रभु यीशु मसीह अन बरोद, अदिक आऊन हात्‍ती तान जमा आगोद बारा दा नीम से विनती माळतेव.
2TH 2:2 कि परमेश्वर उन दी टु बरावाळा बातणी, या वचन, या चिट्ठी इन द्वारा, जो कि नाम चिट्ठी इन द्वारा नीमी ईतीदाद, ईद सम्सकु कि प्रभु उन दिन होट बंदाद, नीम मन अचानक असंची आगबाळुल अदिक नीव दुखी आगबाळी.
2TH 2:3 यातारा रीति देल यारदारा ध्वाका दा बरबाळेतीर, यतिकी प्रभु उन दिन आगासताका बरतीदील यागासताका परमेश्वर उन खिलाप आखरी विद्रोह सुरू आगतीदील, अदिक आव पाप इन मंळसा मतलब दुष्ट मंळसा प्रगट आगतीदील जो नरक दा नष्ट माळकु आदान.
2TH 2:4 आव दुष्ट मंळसा विरोध माळतान, अदिक हर ऊंद से जो ईश्वर उन या पुजा अन वस्तुगोळ्द विरोध माळतान, तान तान इक अदुर से धोळ्द ठहरूस्तान, ईल ताका कि आव परमेश्वर उन मंदिर दा कुर्तकु तान तान इक ईश्वर कहलुस्तान.
2TH 2:5 येन नीमी याद हैलेच कि याग ना नीम सांगुळ ईरीन, रा नीम से ईव मातगोळ अनतोगिन?
2TH 2:6 नीव आ मात इक जान्सतीर, जो आऊक ईग प्रगट आगली रोक्सेत्याद. अदिक आव दुष्ट मंळसा सही समय मा बंदान.
2TH 2:7 यतिकी होच्द दुष्ट शक्तिगोळ ईग भी क्याल्सा माळ्त होगताव, लेकीन ईगल्या ऊंद रोकसावाळा आन, अदिक यागासताका अद दुर आगेगाल आव रोक्सकु ईत्‍तान.
2TH 2:8 आग आव दुष्ट मंळसा प्रगट आदान, लेकीन याग प्रभु यीशु मसीह बंदान अदिक आ दुष्ट मंळसा अक तान बाय इन फुक देल कोंद बुट्टान, अदिक तान आगमन इन तेज देल भसम माळ्यान.
2TH 2:9 आ दुष्ट मंळसा अन बरोद शैतान उन सामर्थ्य देल आदीत सब प्रकार इन ख्वाटा सामर्थ्य, अदिक चमत्कार, अदिक अदभुत क्याल्सागोळ सांगुळ आदीत,
2TH 2:10 अदिक नाश आगावाळेर साटी सप्पा प्रकार इन दुष्टता देल फसुस्यान. यतिकी आ लॉकुर्द नाश आदीत यार आ सत्य से प्यार ईटीदिल.
2TH 2:11 ईदा कारण परमेश्वर आंदुर्दा ऊंद जो भटकुसतद आ सामर्थ्य अक कळ्यान कि आंदुर ख्वाटा अन विश्वास माळुल,
2TH 2:12 ताकी यास लॉकुर सत्य अन विश्वास माळालुर, उलटा अन्याय देल प्रसन्न आगतार, आंदरी सप्पा मुंदुरी दण्ड सिकुल.
2TH 2:13 हे वार्टुरा अदिक आकतींगेरा, अदिक प्रभु उन प्रिय लॉकुरा, आगली होना कि नाव नीम बारा दा हमेशा परमेश्वर उन धन्यवाद माळतेला ईत्‍तेव, यतिकी परमेश्वर पयले टु नीमी नीवळुस्यान कि पवित्र आत्मा अन सामर्थ्य अन्द द्वारा पवित्र आगकु, अदिक सत्य अन विश्वास माळकु उद्धार ताकोमी,
2TH 2:14 यदुर साटी नाव जो खुशखबरी नीमी केळ्सदेव, कि नीव नाम प्रभु यीशु मसीह अन महिमा दा सहभागी आगी.
2TH 2:15 इदुरसाटी हे वार्टुरा अदिक आकतींगेरा, संची ईरी; अदिक जो जो मातगोळ नीव उपदेश या चिट्ठी इन द्वारा नीमी कोटेव, अवरी हुळकु ईटी.
2TH 2:16 नाम प्रभु यीशु मसीह खुद अच, अदिक नाम आप्प परमेश्वर, याव नाम से प्यार ईटदुन अदिक अनुग्रह देल प्रोत्साहन शांती अदिक वळ्लीद आशा नामी कोटान,
2TH 2:17 नीम मनगोळ दा प्रोत्साहन कोळुल अदिक नीमी हर ऊंद वळ्लीद क्याल्सा अदिक वचन दा मजबूत माळुल.
2TH 3:1 अन्त दा, हे वार्टुरा अदिक आकतींगेरा, नाम साटी प्रार्थना माळतोगी कि प्रभु उन वचन हिंग राटनेरी फैलुसुल अदिक महिमा आगुल, ह्यांग नीम दा आत,
2TH 3:2 अदिक नाव तेळा अदिक दुष्ट मंळसागोळ देल उळ्दकु ईरूल यतिकी हर मंळसा वचन मा विश्वास माळालुन.
2TH 3:3 प्रभु विश्वासयोग्य आन; आव नीमी मजबूती देल संची माळ्यान अदिक आ शैतान उन से सुरक्षित ईट्यान.
2TH 3:4 नामी प्रभु नीम बारा दा भरोसा कोळतान कि जो-जो आग्या नाव नीमी कोळतेव, अवरी नीव मान्सतिर, अदिक मान्सतेला भी ईत्‍तीर.
2TH 3:5 परमेश्वर उन प्यार अदिक मसीह दा हिम्मत ईला बिळोद अदिक प्रभु नीम मन इन अगुवाई माळुल.
2TH 3:6 हे वार्टुरा अदिक आकतींगेरा, नाव नीमी तान प्रभु यीशु मसीह अन हेसुर देल आग्या कोळतेव कि नीव हर ऊंद ईत्‍ता विश्वासी से ब्यार्र ईरी जो अनुचित चाल नळुतान अदिक जो शिक्षा आव नाम से ताकोंडान अदुर अनुसार माळालुन.
2TH 3:7 यतिकी नीव खुद अच जान्सतीर कि याता रीति देल नाम घाई चाल नळु पायजे, यतिकी नाव नीम न्याड्या दा ईरेव आग आलसी ईला ईरेव,
2TH 3:8 अदिक यारदु रोट्टी फुकट दा तंदिदील; लेकीन मयनत अदिक कष्ट देल ईळ्लक हागुल क्याल्सा धंदा माळतोगेव कि नीम दा टु यारदु मा भार बरबाळुल.
2TH 3:9 हिंग ईला कि नामी नीम से मदत बेळोद अधिकार हैलेच, लेकीन इदुरसाटी कि तान तान इक नीम साटी आदर्श ठहरूसदेव कि नीव नाम घाई चाल नळी.
2TH 3:10 यतिकी याग नाव नीम मान्या ईरेव, आग भी ईद आग्या नीमी कोळ तोगेव कि “अगर यावारा क्याल्सा ईला माळोद चाहसतिदान रा ऊम भी बाळुल.
2TH 3:11 नाव केळतेव कि थ्वाळासा लॉकुर नीम न्याड्या दा आलसी आर अदिक येनु क्याल्सा धंदा माळालुर, लेकीन दुसरा अन क्याल्सा दा कय हाकतोगतार.
2TH 3:12 ईत्‍ता मंळसागोळी नाव प्रभु यीशु मसीह दा आग्या कोळतेव अदिक समझुसतेव कि वळ्लीद रीति देल क्याल्सा माळकु तांद अच रोट्टी तिनुल.
2TH 3:13 “नीव, हे वार्टुरा अदिक आकतींगेरा, भलाई माळदुर दा हिम्मत बिळबाळी.
2TH 3:14 अगर यावारा नाम ई चिट्ठी इन मात इक मान्सालुन रा आऊन मा नजर ईटी, अदिक आऊन संगत माळबाळी, यदुर देल आव लज्जित आगुल.
2TH 3:15 तरी भी आऊक दुश्मन सम्सबाळी, लेकीन सप्पा मुंदुरी विश्वासी जान्सकु समझुसी.”
2TH 3:16 ईग प्रभु जो शांती नव सोता हुन खुद अच नीमी हमेशा अदिक हर प्रकार देल शांती कोळुल. प्रभु नीम सप्पा मुंदुर सांगुळ हमेशा ईरूल.
2TH 3:17 ना, पौलुस, तान कय देल नमस्कार लिख्सतीन. हर चिट्ठी इक ना हिंग खतम माळतीन; ना ईदा प्रकार देल लिख्सतीन अदिक हर ऊंद चिट्ठी दा ना हिंगा हस्ताक्षर माळतीन.
2TH 3:18 नाम प्रभु यीशु मसीह अन्द अनुग्रह नीम सब मा आगतेला ईरूल.
1TI 1:1 नामव उद्धारकर्ता परमेश्वर अदिक नाम्द आशा अन आधार मसीह यीशु उन आग्या देल मसीह यीशु उन प्रेरित पौलुस उन दी टु,
1TI 1:2 तीमुथियुस उन हेसुर जो विश्वास दा नानव खरा पार आन. आप्प परमेश्वर, अदिक नामव प्रभु यीशु मसीह अन दी टु नीनी अनुग्रह, अदिक दया अदिक शांती सिकतेला ईरूल.
1TI 1:3 ह्यांग ना मकिदुनिया अक होगतेला नीनी समझुसीदीन, कि इफिसुस दा ईतकु थ्वाळासा लॉकुरी आग्या कोळुल कि ख्वाटा सिद्धांतगोळ शिक्षा कोळबाळुल,
1TI 1:4 आंदरी अन पुरातन काल्पनिक कात्‍तागोळ अदिक अनन्त वंशावलीगोळ मा मन हचबाळी, यदुर देल विवाद आगताव, इव परमेश्वर उन कार्य ईला, जो विश्वास इन द्वारा आव आन.
1TI 1:5 आग्या अन उद्देश ईद आद कि शुद्ध मन अदिक वळ्लीद विवेक, प्यार अदिक कपट रहित विश्वास इन द्वारा बरतद.
1TI 1:6 इवरी बिटकु थ्वाळासा लॉकुर बेकार मातगोळ दी भटकुसेग्यार.
1TI 1:7 अदिक आंदुर व्यवस्था अन गुरु रा आगोद चाहसतार, लेकीन जो मातगोळ अनतार अदिक यवरी मजबूती देल माताळतार, आंदरी सम्सालेव भी.
1TI 1:8 लेकीन नाव जान्सतेव कि अगर यावारा व्यवस्था अक उचित रीति देल क्याल्सा दा तंदान रा अद भला आद.
1TI 1:9 नाव ईद भी जान्सतेव कि व्यवस्था लॉकुर साटी ईला लेकीन व्यवस्था अक ईला मान्सावाळेर, विद्रोह, परमेश्वर उन अनादर माळावाळेर, पापीगोळ, अपवित्र अदिक न्यायी मंळसागोळ, मोय आप्प उन घात माळावाळेर, हत्या माळावाळेर,
1TI 1:10 व्यभिचारीगोळ, गंळ्स गामिगोळ, गुलाम उक मारावाळेर, ख्वाटा माताळावाळेर, अदिक ख्वाटा गवाही तीनावाळेर, अदिक इंदुर्द अतिरिक्त खरा सिद्धांतगोळ शिक्षा अन विरोधीगोळ साटी ठहरूसकु आग्याद.
1TI 1:11 ईद खुशखबरी महिमामय परमेश्वर यार हात्‍ती सप्पा आशीषगोळ आव अदिक आऊन द्वारा नानी सौप्सकु आग्याद.
1TI 1:12 ना तान प्रभु यीशु मसीह अन्द याव नानी सामर्थ्य कोटान, धन्यवाद माळतीन कि आव नानी विश्वासलायक सम्सकु तान स्यावा अन्द साटी ठहरूसदुन.
1TI 1:13 ना रा पयले अपमान माळावाळा, अदिक सतुसावाळा, अदिक हिंसा माळावाळा ईरीन; तरी भी नान मा दया आत, यतिकी ना अविश्वास इन दशा दा बिना सोच समझुस्कु ई क्याल्सागोळ माळीदीन.
1TI 1:14 अदिक नाम प्रभु उन अनुग्रह आ विश्वास अदिक प्यार इन सांगुळ जो मसीह यीशु दा आद, हापाळ इदुर देल आत.
1TI 1:15 ईद मात खरा अदिक हर प्रकार देल मानसोद लायक आद कि मसीह यीशु पापीगोळ उद्धार माळोर साटी दुनिया दा बंदुन, यारदा सब से बेकार पापी ना आईन.
1TI 1:16 लेकीन नान मा इदुरसाटी दया आत कि ना सब से बेकार पापी नान दा यीशु मसीह तान पुरा सहनशीलता तोरसुल, कि जो लॉकुर आऊन मा अनन्त जीवन साटी विश्वास माळ्यार आंदुर साटी ना ऊंद आदर्श बनसाईन.
1TI 1:17 ईग अनन्त राजा मतलब अविनाशी, अदृश्य, ऊंद मात्र परमेश्वर उन आदर अदिक महिमा हमेशा हमेशा आगतेला ईरूल. आमीन.
1TI 1:18 हे नान पारा तीमुथियुस, आ भविष्यवाणीगोळ अनुसार जो पयले नीन बारा दा माळकु आगीदव, ना ईद आग्या कोळतीन कि नी अऊर्द अनुसार वळ्लीद लळाई माळतेला ईर,
1TI 1:19 अदिक विश्वास अदिक आ वळ्लीद विवेक इक हुडुकु ईट, यदुर्द इनकार माळदुर कारण यास मुंदुर्द विश्वास रूपी जहाज मुळकेत.
1TI 1:20 आंदुर दा टु उच हुमिनयुस अदिक सिकन्दर हुन, यारी ना शैतान उक कोट्ट बुटीन कि आंदुर परमेश्वर उन अपमान माळोद कलु बाळुल.
1TI 2:1 ईग ना सब से पयले ईद आग्रह माळतीन कि विनती, प्रार्थना, निवेदन, अदिक धन्यवाद सप्पा मंळसागोळ साटी माळकु आगुल.
1TI 2:2 राजागोळ अदिक सप्पा धोळ अधिकारीगोळ्द निमित्त इदुरसाटी कि नाव शांती अदिक चैन इन सांगुळ परमेश्वर उक आदर कोळतेला अदिक पवित्रता देल जीवन बीतुसेव
1TI 2:3 ईद नाम उद्धारकर्ता परमेश्वर उक वळ्लीसा हततद अदिक प्रसन्न भी माळतद,
1TI 2:4 जो ईद चाहासतान कि सप्पा मंळसागोळ ऊळ्सकु आगुल, अदिक आंदुर सच्चाई इन ग्यान इक जान्स कोमुल.
1TI 2:5 यतिकी परमेश्वर ऊंद अच आन, अदिक परमेश्वर अदिक मंळसागोळ न्याड्या दा भी ऊंद अच मध्यस्थ भी आन, मतलब मसीह यीशु जो मंळसा हुन.
1TI 2:6 यीशु नाम सप्पा मुंदरी छुटकारा कोळोर साटी तान बलिदान कोटकु आजादी कोंडुन, अदिक आऊन गवाही सही समय मा कोटकु आत.
1TI 2:7 ना सही अनतीन, ख्वाटा माताळालीन, कि ना ईदा उद्देश देल प्रचारक अदिक प्रेरित अदिक गैरयहूदीगोळ साटी खरा विश्वास इन उपदेशक ठहरूस्कु आदीन.
1TI 2:8 इदुरसाटी मंडली दा आराधना हाळाहोती ना चाहसतीन कि हर जागा मंळसा, बिना सिट्ट अदिक विवाद इन पवित्र कयगोळी नेगुकु प्रार्थना माळतोगुल.
1TI 2:9 हांग अच आर्तेर भी नम्रता अदिक खुद: नियंत्रण इन सांगुळ साधासुधा कपळागोळ देल तान तान इक सवारसुल; ना कि चुट्टी सवारसकु अदिक ना व्हान्ना अदिक मोती अदिक किमती कपळा देल,
1TI 2:10 लेकीन भला क्याल्सा देल, यतिकी परमेश्वर उन भक्ति माळावळतेर आर्तेरी भी ईदा वळ्लीद आद.
1TI 2:11 आर्त इक शांतता देल अदिक पुरा हात्‍ती ता देल कलु पायजे.
1TI 2:12 ना आर्तेरी ईजाजत कोळालीन कि आर्त ना शिक्षा कोळुल अदिक ना मंळसा मा अधिकार जतुसुल, लेकीन सुंगा मुंगा ईरूल.
1TI 2:13 यतिकी आदम पयले, आऊन बाद्दा हवा माळकु आदुर;
1TI 2:14 अदिक आदम ईला जो बहकुसकु आगीदुन, लेकीन आ आर्त हुळ जो बहकुसकु आगिदुर अदिक पापी ठहरूसदुर.
1TI 2:15 तरी भी आर्त इक चिकोर पैदा माळोर द्वारा उद्धार सिक्‍कीत, अगर आक संयम सांगुळ विश्वास, प्यार, अदिक पवित्रता दा संची ईरूल.
1TI 3:1 ईद मात सही आद अगर यावारा तान मन दा सोचतान कि स्याण्णा आगोद चाहासतान, आव भला क्याल्सा अन इच्छा माळतान.
1TI 3:2 ईद जरूरी आद कि स्याण्णा निर्दोष, अदिक ऊंदा हिंग्स उन गंळ्स, शालीन, आत्मसंयमी, आदरणीय, अतिथी-सत्कार माळावाळा, अदिक कलसोर दा निपुण ईरूल.
1TI 3:3 कुडावाळा या बडाबडी माळावाळा ईला ईरूल; बल्‍की मुलायम ईरूल, अदिक ना झगळेलु, अदिक ना धन इन लालची ईरूल.
1TI 3:4 तान मान्ना अन वळ्लीद व्यवस्था माळुल, अदिक तान चिकोर चिंळ्गेर अनुशासन दा ईटकु आंदुर से आदर ताकोमावाळा ईरूल.
1TI 3:5 अगर यावारा तान मान्ना अन्द अच व्यवस्था माळोद ईला जान्सतीदान, रा परमेश्वर उन मंडली इन रखवाली ह्यांग माळ्यान?
1TI 3:6 बाक ईद कि आव विश्वास दा परीपक्व ईरूल, ईदारा हिंग आगबाळुल कि अभिमान माळकु शैतान उन घाई दण्ड पाऊसुल.
1TI 3:7 अदिक मंडली इन व्हार्या दा भी आऊन हेसुर आगुल, हिंग आगबाळुल कि अपमानीत आगकु शैतान उन फासा दा फसुसेगुल.
1TI 3:8 हांग अच मंडली अन्द सेवकगोळी भी गंभीर आग पायजे, येढ्ढ रंगवाळेर, कुडावाळेर अदिक नीच कमाई इन लोभ माळावाळेर ईला ईरूल;
1TI 3:9 लेकीन विश्वास इन भेद इन शुद्ध विवेक इक गहराई देल हुडुकु ईटुल.
1TI 3:10 अदिक आंदुर पयले परख आगुल, आग अगर निर्दोष होट्टुर रा बाक मंडली इन सेवक उन क्याल्सा माळुल.
1TI 3:11 ईदा प्रकार देल आंदुर हिंग्सुर भी आदर ताकोमा लायक आर्तेर ईरूल; अदिक अपमान इन मातगोळी माळावळतेर ईला ईरूल, लेकीन शालीन अदिक सप्पा मातगोळ दा विश्वास इन लायक ईरूल.
1TI 3:12 मंडली इन सेवक ऊंदा हिंग्स उन गंळ्स ईरूल अदिक चिकोर चिण्ग अदिक तान मान्ना अन्द वळ्लीद व्यवस्था माळोद जानसुल.
1TI 3:13 यतिकी जो मंडली इन सेवक वळ्लीद क्याल्सा माळतार, आंदुर तान साटी वळ्लीद पद अदिक मसीह यीशु दा जो आंदुर्द विश्वास आद, अदुर्दा महान साहस हासिल माळतार.
1TI 3:14 ना नीन हात्‍ती राटनेरी बरोद आशा ईटदुर मा भी ई चिट्ठी नीनी इदुरसाटी लिख्सतीन,
1TI 3:15 कि अगर नान बंदुर दा समय आगुल, रा नी जान्स कोम कि परमेश्वर उन घराना दा जो जित्‍ता परमेश्वर उन मंडली आद अदिक जो सच्चाई इन खंबा अदिक पायवा आद, लॉकुर आपस दा ह्यांग बर्ताव माळ पायजे.
1TI 3:16 ईदुर दा संदेह हैलेच कि भक्ति इन भेद गंभीर आद, मतलब अद जो मय दा प्रगट आत, आत्मा दा न्यायी ठहरूस्त, स्वर्गदूतगोळ इक कांळ्सदुन, गैरयहूदीगोळ दा आऊन प्रचार आत, दुनिया दा आऊन मा विश्वास माळकु आत, अदिक महिमा दा म्याकुच नेगुकु आदुन.
1TI 4:1 पवित्र आत्मा स्पष्टता देल अनतद कि बरावाळा समयगोळ दा हापाळ सप्पा लॉकुर तान विश्वास इक त्याग्स बुट्टार अदिक भटकुसावाळा आत्मागोळ अदिक शैतान उन द्वारा कल्सद मातगोळ हींद आगेदार.
1TI 4:2 ईद आ ख्वाटा पाखंडी मंळसागोळ्द कारण आदीन, यार्द विवेक मान्सी होततेला लोवा देल दाग्सकु आग्याद,
1TI 4:3 जो मदा माळोर से रोकस्यार, अदिक ऊमोद येनारा वस्तुगोळ देल अलग ईरोद आग्या कोट्टार, यवरी परमेश्वर इदुरसाटी घळुस्यान कि विश्वासी अदिक सच्चाई इक अरावाळेर अवरी धन्यवाद इन सांगुळ तिनुल.
1TI 4:4 यतिकी परमेश्वर उन माळ्द हर ऊंद वस्तु वळ्लीद आद, अदिक यातोदु वस्तु अस्वीकार माळोद लायक हैलेच; लेकीन ईद कि धन्यवाद इन सांगुळ तिनकु आगुल,
1TI 4:5 यतिकी परमेश्वर उन वचन अदिक प्रार्थना अन द्वारा शुद्ध आगेगतद.
1TI 4:6 अगर नी वार्टुर इक ई मातगोळ्द याद कोळतेला ईत्या, अदिक विश्वास इन सच्चाई अदिक आ वळ्लीद शिक्षा अन मातगोळ से, जो नी मान्सतेला बंद्या; रा मसीह यीशु उन वळ्लेव सेवक ठहरूस्या.
1TI 4:7 परमेश्वर रहित कात्‍ता-कात्‍तागोळ देल जो सिर्फ हाळामुंडगोळ द्वारा केळ्सकु अशुध्द कात्‍तागोळ आव येनु संबंध ईटबाळ, लेकीन भक्ति इन साधना माळ.
1TI 4:8 यतिकी मय इन साधना देल फायदा गोर्त आगतद, लेकीन भक्ति सप्पा मातगोळ साटी लाभदायक आद, यतिकी ई समय इन जीवन अदिक बरावाळा जीवन इन भी वादा इदुर्दा साटी आद.
1TI 4:9 हिंग ऊंद विश्वास ईटा लायक कहावत आद, जो पुरा रीति देल स्वीकार माळा लायक आद.
1TI 4:10 यतिकी नाव मयनत अदिक कोशिश इदुरसाटी माळतेव कि नाम आशा आ जित्‍ता परमेश्वर मा आद, जो सप्पा मंळसागोळ्द अदिक खास माळकु विश्वासीगोळव उद्धारकर्ता आन.
1TI 4:11 इव मातगोळ्द आग्या कोळ अदिक कल्सतेला ईर.
1TI 4:12 याऊ नीन जवानी इक तुच्छ सम्सबाळुल; लेकीन वचन, माताळदुर दा, चाल-चलन, अदिक प्यार, अदिक विश्वास, अदिक पवित्रता दा विश्वासीगोळ साटी आदर्श बनसेग.
1TI 4:13 यागासताका ना बरालीन, आगासताका लॉकुर न्याड्या प्रभु उन वचन वाचुसदुर दा अदिक उपदेश कोळदुर दा अदिक कल्सदुर दा तान इक मग्न ईट.
1TI 4:14 आ वरदान इन प्रती जो नीन दा आद, अदिक भविष्यवाणी इन द्वारा स्याणागोळ्द कय दा ईटा होती नीनी सीकीत, अदरी अनदेखा माळबाळ.
1TI 4:15 ई मातगोळ्द विचार माळ्त ईर अदिक ईऊर दा तान ध्यान हचकु ईट, ताकी नीन उन्नती सप्पा मुंदुर मा प्रगट आगुल.
1TI 4:16 तान जीवन इन दी अदिक तान शिक्षागोळ सावधानी ईट. ई मातगोळ मा संची ईर, यतिकी अगर हिंग माळतेला ईत्या रा नी तान अदिक तान केळावाळेर साटी भी उद्धार इन कारण आद्या.
1TI 5:1 यातारा बाट्ट उक कठोरता देल दनकुस बाळेत, लेकीन आऊक आप्प सम्सकु समझुसबुळ, अदिक हारोदोर मंळसागोळी वार्ट सम्सकु;
1TI 5:2 हाळामुंड आर्तेर इक मोय सम्सकु; अदिक हारोदोर आर्तेर इक आकतींग सम्सकु पुरा पवित्रता देल समझुसबुळ.
1TI 5:3 आ रांड्यागोळ्द ध्यान ईट, जो सही दा जरवतमंद आर.
1TI 5:4 अगर यातारा रांड्या अन चिकोर या नातु-नतरागोळ ईतीदार, रा आंदुर तान मोय-आप्प अदिक आजा-आजी इन पालन पोषण इन बदला चुकुसली अदिक तान परिवार इन चिन्ता माळोर द्वारा तान न्यायी मातगोळी जीवन कार्य दा तरोद पयले कलु पायजे, यतिकी ईद परमेश्वर उक पंसद आद.
1TI 5:5 जो रांड्या सही दा जरवतमंद आर, अदिक आकिन यारू हैलेच, अदिक आक तान पुरा आशा परमेश्वर मा ईट्यार, अदिक ईळ्लक हागुल विनती अदिक प्रार्थना माळतेला परमेश्वर से मदत बेळतार;
1TI 5:6 लेकीन जो रांड्या भोग विलास दा जीऊसतार, आक जित्‍ता हैलेच लेकीन जित्‍ता दा का सोतोग्यार.
1TI 5:7 इव मातगोळ्द भी लॉकुरी निर्देश कोळतोग ताकी आंदुर निर्दोष ईरूल.
1TI 5:8 लेकीन अगर यावारा तान रिश्तेदारगोळ दी, विशेष तान परिवार इन सदस्यगोळ्द मदत माळालुन, रा आव विश्वास देल तिरगेग्यान अदिक अविश्वासी देल भी हापाळ बुरा बनसेग्यान.
1TI 5:9 आ रांड्यागोळ्द विशेष सुची दा जो आर्थिक सहायता ताकोमेत्यार आका रांड्या अन हेसुर लिख्सकु आगुल जो साठ वर्ष से कमीनोर ईला ईतीदार, अदिक तान गंळ्स उन विश्वासलायक ईतीदार,
1TI 5:10 अदिक भला क्याल्सा दा सुनाम ईतीदार, याक चिकोर्द पालन-पोषण माळीदार; पाऊनागोळ्द स्यावा माळीदार, पवित्र लॉकुर्द काल तोळदिदार, दुखीगोळ्द सहायता माळीदार, अदिक हर ऊंद भला क्याल्सा दा मन हचीदार.
1TI 5:11 लेकीन हारोदोर रांड्यागितेर्द ईद सुची सम्मिलीत माळबाळी यतिकी मसीह अन प्रती आंदुर्द समरपन मा याग आंदुर्द बारा दा वासना पुरा इच्छागोळ हावी आगताव रा आंदुर मात मदा माळोद चाहसतार,
1TI 5:12 अदिक दोषी ठहरूस्तार, यतिकी आंदुर तान पयला वचन इक मुर्द बुट्टुर.
1TI 5:13 ईदुर अलावा आंदुर बेकार आगतार अदिक मानोन-मान्नी वयाळकु आलसी आगोद कलुतार, अदिक सिर्फ आलसी ईला लेकीन ईत्‍त आत्‍त माळतार अदिक बिना मतलब इन अनुचित मातगोळ माताळतार.
1TI 5:14 इदुरसाटी ना ईद चाहासतीन कि हारोदोर रांड्यागितेर मदा माळुल, अदिक चिकोर हाळुल अदिक मान्न मकान संभाळसुल, अदिक यातारा विरोध इक बदनाम माळोद मवका कोळबाळुल.
1TI 5:15 यतिकी हापाळ रा बयकुस्कु शैतान उन हिंद आगेग्यार.
1TI 5:16 अगर यातारा विश्वासीगीत इन मान्या रांड्यागोळ आर, रा आका आंदुर्द सहायता माळुल कि मंडली मा बोझ ईला आगुल, ताकी आंदुर आंदुर्द सहायता माळ सकुल जो रांड्यागोळ खराखुरा जरवतमंद आर.
1TI 5:17 जो हाळाबाट्टुर मंडली इन वळ्लीद स्यावा माळतार, खास माळकु आंदुर जो वचन केळसोर अदिक कल्सदुर दा मयनत माळतार, आंदुर येढ्ढ गुणा आदर इन लायक सम्सकु आगुल.
1TI 5:18 यतिकी शास्त्र अनतद, “जो वस्ता दावन इन आद अदुर बाय कट बाळेतीर,” यतिकी “मजदूर तान मजदूरी इन हकदार आन.”
1TI 5:19 यातारा दोष यातारा मंडली इन हाळाबाट्टुर मा हचकु आगुल रा येढ्ढ या मुर गवाहगोळ्द बिना अदरी केळबाळ.
1TI 5:20 पाप माळावाळेर इक सप्पा मुंदुर मुंद दनकुस, ताकी दुसरा लॉकुर भी अंजुल.
1TI 5:21 परमेश्वर, अदिक मसीह यीशु अदिक निवळुस्द स्वर्गदूतगोळ इक उपस्थित जान्सकु ना नीनी चेतावनी कोळतीन कि ई निर्देशगोळी बिना मतभेद इन अदिक यावारा ऊंद इन पक्षपात ताकोमकु यातोदु क्याल्सा माळबाळ.
1TI 5:22 मंडली इन स्यावा अन्द नियुक्ती इन साटी बिना सोच सम्सकु यारदारा मा तान कय राटनेरी ईट बाळेत, अदिक दुसरा अन पापगोळ दा भागी आगबाळेत; तान-तान इक पवित्र माळकु ईटेत.
1TI 5:23 सिर्फ नीर इक अच कुडावाळा ईरबाळ, लेकीन तान व्हाट्टा अन्द घळी-घळी बिमार आगोद कारण थ्वाळा-थ्वाळा अंगुर इन रास्सा भी क्याल्सा दा तरतोग.
1TI 5:24 थ्वाळासा मंळसागोळव पाप स्पष्ट रूप देल प्रगट आगेगताव, अदिक न्याय इन साटी प्रस्तुत माळकु आगेगताव, लेकीन दुसरा मंळसागोळव पाप बाद्दा प्रगट आगताव.
1TI 5:25 ईदा प्रकार भला क्याल्सा भी स्पष्ट रूप देल प्रगट आगेगताव; लेकीन जो भला क्याल्सा प्रगट आगालव अव भी होचकु ईर सकालव.
1TI 6:1 यास दासगोळ जुआळी इन ल्यालमा आर, आंदुर तान-तान स्वामी इक धोळ्द आदर इन लायक जानसुल, ताकी परमेश्वर उन हेसुर अदिक शिक्षा अन्द अपमान आगबाळुल.
1TI 6:2 यार स्वामी विश्वासी आर आंदरी आंदुर कम आदर कोळबाळुल यतिकी आंदुर वार्टुर उर, बल्‍की आंदुर्द मात्‍त यक्कुल स्यावा माळी, यतिकी यारी स्यावा अन लाभ सीकतद आंदुर विश्वासी अदिक आंदुर प्रिय आर. ई मातगोळ शिक्षा कोळी अदिक हांग अच माळोर साटी प्रोत्साहित माळतेला ईरी.
1TI 6:3 अगर यावारा दुसरा अच प्रकार इन शिक्षा कोळतान अदिक सही मातगोळी, मतलब नाम प्रभु यीशु मसीह अन्द निर्देशगोळ इक अदिक आ शिक्षा इक मान्सालुन, जो देवी शिक्षा अन अनुसार आद,
1TI 6:4 रा आव अभिमानी आगेदुन, अदिक येनु जान्सालुन; बल्‍की आऊक विवाद अदिक शब्दगोळ मा तर्क हचोद बिमारी आद, यदुर देल ह्यावा, अदिक झगळा, अदिक अपमान नव मातगोळ, अदिक बेकार-बेकार संक्या,
1TI 6:5 अदिक आ मंळसागोळ दा फालतु लळाई-झगळा पैदा आगताव यार्द दिमाक भ्रष्ट आगेग्याद, अदिक आंदुर सच्चाई इन हादी देल अलग आगेग्यार, जो सम्सतार कि भक्ति कमाई इंद जरया हुन.
1TI 6:6 लेकीन सन्तोष इन सांगुळ भक्ति माळोद धोळ्द कमाई आद.
1TI 6:7 यतिकी नाव रा ना दुनिया दा येनारा हुडुकु बंदेव अदिक ना येनारा वय सकतेव.
1TI 6:8 अगर नाम हात्‍ती तिनली अदिक हाकली आद, रा ईऊर्दा का सन्तोष ईर पायजे.
1TI 6:9 लेकीन जो धनी आगोद चाहासतार, आंदुर ईत्‍ता परीक्षा अदिक फासा अदिक हापाळ सा मूर्खतापुर्ण अदिक हानिकारक लालसागोळ दा फसुसतार, जो मंळसागोळी बिगळुस बुळतद अदिक विनाश इन खाई दा ढकलुस बुळतद.
1TI 6:10 यतिकी पैस्या अन्द लोभ हर प्रकार इन बुराईगोळ्द जळ हुन, यदरी हासिल माळोद कोशिश माळतेला हापाळ मुंदुर विश्वास देल भटकुसकु तान-तान इक कई प्रकार इन दुखगोळ देल छल्ली माळ कोंडार.
1TI 6:11 लेकीन हे परमेश्वर उन विश्वासी जन, नी ई मातगोळ हात्‍ती टु ओळ, अदिक न्याय, भक्ति, विश्वास, प्यार, धीरज अदिक नम्रता अन्द हिंद हत.
1TI 6:12 विश्वास इन वळ्लीद कुस्ती आळ; अदिक तान साटी आ अनन्त जीवन इक हासिल माळकोम, यदुर साटी नी कारूकु आग्या अदिक हापाळ सा गवाहगोळ मुंद वळ्लीद अंगीकार माळीद.
1TI 6:13 ना नीनी ईद आग्या परमेश्वर उन मुंद जो सप्पा मुंदुरी जीवन कोळतान, अदिक मसीह यीशु उक गवाह माळकु याव पुन्तियुस पिलातुस उन मुंद वळ्लीद गवाही कोट्टुन. कोळतीन,
1TI 6:14 कि नी नाम प्रभु यीशु मसीह अन्द प्रगट आगासताका ई आग्या अक निष्कलंक अदिक निर्दोष ईट,
1TI 6:15 परमेश्वर जो परमधन्य अदिक ऊंद मात्र शासक अदिक राजागोळ राजा अदिक प्रभुगोळ प्रभु हुन, आऊन द्वारा यारी आव ठीक समय मा प्रगट माळ्यान.
1TI 6:16 अदिक अमरता सिर्फ आऊंदा हुन, अदिक आव ज्योति दा ईरतान, येल ताका याऊ पोहचुस सकालुन, अदिक ना आऊक यावारा मंळसा नोळ्यान अदिक ना नोळ सकतान. आऊन प्रतिष्ठा अदिक सामर्थ्य हमेशा हमेशा ईत्‍तीत. आमीन.
1TI 6:17 ई दुनिया अन धनवानगोळी आग्या कोळ कि आंदुर अभिमानी आगबाळुल अदिक चंचल धन मा आशा ईट बाळुल, लेकीन परमेश्वर मा जो नाम सुख इन साटी सप्पा येनारा बहुतायत देल कोळतान.
1TI 6:18 आंदरी आग्या कोळ कि आंदुर भलाई माळुल, अदिक भला क्याल्सागोळ दा धनी आगुल. अदिक उदारता देल सहायता कोळदुर दा तयार ईरूल,
1TI 6:19 अदिक मुंदळोद साटी ऊंद वळ्लीद पायवा हाक्‍कु ईटुल कि खरा जीवन इक वश दा माळ कोमुल.
1TI 6:20 हे तीमुथियुस, ई धरोवर इन रखवाली माळ; अदिक यदरी येनारा लॉकुर गलती देल ग्यान अनतार, अदुर्द बेकार मातगोळ अदिक विरोध इन मातगोळ देल अलग ईर.
1TI 6:21 यास मुंदुर ई ग्यान इक मान्सकु विश्वास देल भटकुसेग्यार. नीम मा अनुग्रह आग्त ईरूल.
2TI 1:1 पौलुस इन दी टु जो परमेश्वर उन इच्छा देल मसीह यीशु उन प्रेरित आन, अदिक यारी यीशु मसीह दा ऊंद आगोर साटी वादा अन प्रचार माळोर साटी कळ्यान,
2TI 1:2 प्रिय पार तीमुथियुस उन हेसुर: परमेश्वर आप्प अदिक नामव प्रभु मसीह यीशु उन दी टु नीनी अनुग्रह अदिक दया अदिक शांती सिकतेला ईरूल.
2TI 1:3 याता परमेश्वर उन स्यावा ना तान आप्प दादागोळ रीति मा शुद्ध विवेक देल माळतीन, आऊन धन्यवाद आगुल अदिक ईळ्लक हागुल याग ना प्रार्थनागोळ दा नीमी हमेशा याद माळतीन, अदिक आऊक धन्यवाद माळतीन.
2TI 1:4 अदिक नीन कण्ण दाकळव नीर इन याद माळ माळकु दिल देल नीनी भेंट माळोद लालच ईटतीन कि खुशी देल तुमेगाईन.
2TI 1:5 ना नींद आ खरा विश्वास इक याद माळतीन, जो पयले नीन आजी लोईस अदिक नीन मोय यूनीके दा ईरोद, अदिक नानी पुरा यकीन आद कि अदा विश्वास नीन दा भी आद.
2TI 1:6 ईदा कारण ना नीनी याद कोळतीन कि नी आ वरदान इक जित्‍ता ईट जो नीन म्याकुच नांद कय ईटदुर द्वारा परमेश्वर नीनी कोटान.
2TI 1:7 यतिकी परमेश्वर नामी अंज्क इन ईला लेकीन सामर्थ्य अदिक प्यार अदिक संयम इन आत्मा कोटान.
2TI 1:8 इदुरसाटी नामव प्रभु उन गवाही देल, अदिक नान देल जो मसीह अन कैदी आईन, लज्जित आगबाळ, लेकीन आ सामर्थ्य जो परमेश्वर नीनी कोटान अदुर अनुसार खुशखबरी साटी नान सांगुळ दुख नेगु
2TI 1:9 याव नामी ऊळस्यान अदिक पवित्र जीवन जीऊसोर साटी नामी कारदुन, अदिक ईद नाम क्याल्सा अन अनुसार ईला लेकीन आऊन उद्देश अदिक अनुग्रह अन अनुसार आद. आव ईद अनुग्रह नाम मा माळ्यान मतलब प्रभु यीशु मसीह अन द्वारा काल इन सुरूवात देल नाम मा आग्याद,
2TI 1:10 लेकीन ईग नाम उद्धार माळावाळा मसीह यीशु उन प्रगट आगोद द्वारा प्रगटीत आत, याव मृत्यु उन सामर्थ्य अन नाश माळदुन अदिक जीवन इक खुशखबरी इन द्वारा प्रगट माळदुन.
2TI 1:11 यार साटी परमेश्वर नानी प्रेरित, अदिक शिक्षा कोळावाळा नियुक्त माळदुन, ताकी ना खुशखबरी इन प्रचार माळाईन.
2TI 1:12 ई कारण ना ई दुखगोळी भी नेगुतीन, लेकीन नाचालीन, यतिकी ना आऊक यार मा ना विश्वास माळदीन, अरूतीन; अदिक नानी विश्वास आद कि आव नांद धरोवर इंद आ दिन ताका रखवाली माळ सकतान.
2TI 1:13 जो सही मातगोळ नी नान बाय देल केळ्या अवरी आ विश्वास अदिक प्यार इन सांगुळ, जो मसीह यीशु दा आद, तान आदर्श माळकु ईट,
2TI 1:14 अदिक पवित्र आत्मा अन द्वारा जो नाम दा समुस्कु आद, ई वळ्लीद मातगोळ रखवाली माळ.
2TI 1:15 नी जान्सत्या कि आसिया नगर वाळेर सप्पा मुंदुर नान से तिर्गेग्यार, यारदा फूगिलुस अदिक हिरमुगिनेस आर.
2TI 1:16 उनेसिफुरूस उन घराना मा प्रभु दया माळुल, यतिकी आव हापाळ अनली नानी सुख पोहचुस्यान, अदिक आव नान शंकलीगोळ दा ईत्‍तुर देल नाचीदिल.
2TI 1:17 लेकीन याग आव रोम दा बंदुन, रा यागासताका ना सिकिदील आगासताका आव नानी ढुंढ्सतेला ईत्‍तुन, अदिक नान से मुलाकात माळदुन
2TI 1:18 प्रभु माळुल कि आ दिशी आऊन मा प्रभु उन दया आगुल अदिक जो जो स्यावा आव इफिसुस दा माळ्यान अवरी भी नी वळ्लीद देल जान्सत्या.
2TI 2:1 इदुरसाटी हे नान पारा, नी आ अनुग्रह देल जो मसीह यीशु दा आद, बलवन्त आगेग,
2TI 2:2 अदिक जो शिक्षागोळ नी हापाळ सा गवाहगोळ मुंद नान से केळ्या, अवरी विश्वासी मंळसागोळी सौप्स बुळ; जो दुसरा अक भी कलसोद लायक ईरूल.
2TI 2:3 मसीह यीशु उन वळ्लीद योद्धा अन घाई नान सांगुळ दुख नेगु.
2TI 2:4 याग यावारा योद्धा लळाई मा होगतान, रा इदुरसाटी कि आऊक जो भरती माळ्यार आंदरी खुश माळुल, आव तान तान इक दुनिया अन क्याल्सागोळ दा फसुसालुन.
2TI 2:5 बाक अखाळा दा लळुसावाळा अगर नियम इन अनुसार लळुसालुन रा ईनाम सीक सकाल.
2TI 2:6 जो मयनती किसान मयनत माळतान, रा काय इन अंश पयले आऊक सीक पायजे.
2TI 2:7 जो ना अनतीन ई सप्पा मातगोळ मा ध्यान कोळ, अदिक प्रभु नीनी सप्पा मातगोळ्द समझ कोळुल.
2TI 2:8 यीशु मसीह अक याद ईट, जो दाऊद उन वंश देल आग्यान अदिक सोत्‍तुर दा टु जित्‍ता आदुन, अदिक ईद नान खुशखबरी इन अनुसार आद.
2TI 2:9 यार साटी ना कुकर्मी इन घाई दुख नेगुतीन, ईल ताका कि बंधन भी आईन; लेकीन परमेश्वर उन वचन कैद हैलेच.
2TI 2:10 ई कारण ना निवळुस्द लॉकुर साटी सप्पा येनारा सहन माळतीन, कि आंदरी भी आ उद्धार जो मसीह यीशु दा आद अनन्त महिमा अन्द सांगुळ सिकुल.
2TI 2:11 ईद मात खरा आद, कि अगर नाव आऊन सांगुळ सोतोगेव, रा आऊन सांगुळ जित्‍ता भी आदेव;
2TI 2:12 अगर नाव धीरज देल सहन माळ्त ईत्‍तेव, रा आऊन सांगुळ राज्य भी माळेव; अगर नाव आऊन इनकार माळेव, रा आव भी नाम इनकार माळ्यान;
2TI 2:13 अगर नाव अविश्वासी भी आयेव, तरी भी आव विश्वासयोग्य बन्सकु ईरतान, यतिकी आव खुद तान इनकार माळ सकालुन.
2TI 2:14 ई मातगोळ्द याद आंदरी तोर्स अदिक प्रभु उन मुंद विश्वास देल हेळ कि शब्दगोळ मा तर्क-वितर्क माळतोग बाळुल, यऊर देल येनु फायदा आगाल उलटा केळावाळेर्द नाश आगेगतद.
2TI 2:15 तान तान इक परमेश्वर उन ग्रहण माळा लायक अदिक हिंग क्याल्सा माळावाळा ठहरूसोद कोशिश माळ, जो नाच्क ईला पायजे, अदिक जो सच्चाई इन वचन इक बराबर रीति देल क्याल्सा दा तरतोगुल.
2TI 2:16 लेकीन बेकार मातगोळ देल ऊळ्दकु ईर, यतिकी हिंग लॉकुर मात्‍त यक्कुल अभक्ति दा वाळुस्त ईत्‍तार,
2TI 2:17 अदिक आंदुर वचन हुळ्तकु दुख घाई फैलुस्त होदित. हुमिनयुस अदिक फिलेतुस आंदुर दा टु आर,
2TI 2:18 जो ईद अंदकु कि पुनरूत्थान आगेग्याद सच्चाई इन हादी टु काळदोग्यार, अदिक यास मुंदुर्द विश्वास इक नाश माळ बुळतार.
2TI 2:19 तरी भी परमेश्वर उन पक्‍का पायवा बन्सकु ईरतद, अदिक आऊन मा ईद छाप हतकु आद: “प्रभु तान लॉकुरी अरूतान,” अदिक “जो यावारा प्रभु उन हेसुर ताकोमतान, आव अन्याय देल ऊळ्दकु ईरूल.”
2TI 2:20 धोळ मान्या सिर्फ व्हान्ना-बेळ्ली इंद अच ईला, लेकीन हुळ्ली अदिक मुण्ण इन भी गळग्या ईरताव; यातारा-यातारा आदर, अदिक यातारा-यातारा अनादर इन साटी.
2TI 2:21 अगर यावारा तान तान इक ईऊर देल शुद्ध माळ्यान, रा अद आदर इन गळग्या मात्‍त पवित्र ठहरूसीत; अदिक स्वामी इन क्याल्सी बंदीत, अदिक सप्पा वळ्लीद क्याल्सा साटी तयार आदीत.
2TI 2:22 हारोदपन इन मोहमाया देल ओळ, अदिक जो शुद्ध मन देल प्रभु उन हेसुर ताकोमतार आंदुर सांगुळ न्याय, अदिक विश्वास, अदिक प्यार, अदिक मेल मिलाप इन हिंद हत.
2TI 2:23 लेकीन मूर्खपन अदिक अविद्या अन्द विवादगोळ देल अलग ईर, यतिकी नी जान्सत्या कि ईऊर देल झगळा निर्माण आगताव.
2TI 2:24 प्रभु उन दास उक झगळेलु ईला ईर पायजे, लेकीन आव सप्पा मुंदुर सांगुळ मुलायम अदिक शिक्षा दा निपुण अदिक सहन माळावाळा ईरूल.
2TI 2:25 आव विरोध माळावाळेर इक नम्रता देल समझुसुल, येन मालूम परमेश्वर आंदरी मन तिर्गुसोद मन कोळुल कि आंदुर भी सच्चाई इक अरूल,
2TI 2:26 अदिक आंदुर सचेत आगकु शैतान उन फासा दा टु बिट्टोगुल. याव आंदरी आंदुर्द इच्छा पुरा माळोर साटी बंदी माळदुन.
2TI 3:1 लेकीन ईद याद ईट कि आखरी दिनगोळ दा कठिन समय बंदव.
2TI 3:2 यतिकी मंळसा मतलबी, धन इन लालची, घमण्ड माळावाळेर, अभिमानी, अपमान माळावाळेर, मोय-आप्पुर्द आग्या कडावाळेर, एहसान मारावाळेर, अपवित्र,
2TI 3:3 प्यार ईला माळावाळेर, माफ ईला माळावाळेर, अपमान माळावाळेर, असंयमी, कठोर, भलाई इन दुश्मन,
2TI 3:4 विश्वासघात माळावाळेर, लापरवाह, घमण्ड माळावाळेर, अदिक परमेश्वर उन ईला उलटा सुखविलास इक चाहासावाळेर ईत्‍तार.
2TI 3:5 आंदुर भक्ति इन भेष रा माळ्यार, लेकीन अदुर्द ताकत इक मान्सतिदिल; हिंग लॉकुर से दुर ईरेत.
2TI 3:6 ईंदुर दा टु अच आ लॉकुर आर जो मान्नागोळ दा वत्‍त काल देल होक्‍कोमतार, अदिक आ दुर्बल आर्तेर इक वश दा माळ कोमतार जो पापगोळ देल वोतकु अदिक सप्पा प्रकार इंद अभिलाषागोळ्द वश दा आर,
2TI 3:7 अदिक ईत्‍ता आर्तेर हमेशा कलुतेला रा ईरतार लेकीन सच्चाई इक जान्स सकालुर.
2TI 3:8 ह्यांग यन्नेस अदिक यम्ब्रेस मूसा अन्द विरोध माळीदुर, हांग अच ईंदुर भी सच्चाई इन विरोध माळतार; ईंदुर हिंग मंळसा आर, यार्द दिमाक भ्रष्ट आगेग्याद अदिक ईंदुर विश्वास दा असफल आर.
2TI 3:9 लेकीन ई लॉकुर ईदुर से मुंद वाळुस सकालुर, यतिकी सप्पा लॉकुर नोळ्यार कि आंदुर याट मूर्ख आर. हांग अच ह्यांग यन्नेस अदिक यम्ब्रेस उन सांगुळ आत.
2TI 3:10 लेकीन नी नान शिक्षा, नान जीवन इन आचरण, उद्देश विश्वास, धीरज, प्यार, सहनशीलता ई सप्पा मातगोळी वळ्लीद रीति देल जान्सत्या;
2TI 3:11 नांद सताव अदिक नानव दुख, अदिक अन्ताकिया अदिक इकुनियुम अदिक लुस्त्रा दा जो भयंकर यातनागोळ नानी कोटकु आगीदव अदिक यदरी ना सहन माळदीन, ईद नी जान्सत्या, तरी भी प्रभु नानी ईव सप्पा दुखगोळ से बीळ्सदुन.
2TI 3:12 लेकीन यास मसीह यीशु दा भक्ति इन सांगुळ जिन्दगी बितुसोद चाहासतार आंदुर सप्पा मुंदुर सतुस्कु आदार;
2TI 3:13 लेकीन दुष्ट अदिक बयकुसावाळेर ध्वाका कोळतेला अदिक ध्वाका तिनतेला, बिगळुस्त होटोदार.
2TI 3:14 लेकीन नी आ सच्चाई इन मातगोळ मा जो नी कलत्या अदिक विश्वास माळ्या, ईद जान्सकु मजबूत बन्सकु ईर कि नी अवरी याता लॉकुर से कलत्या,
2TI 3:15 अदिक स्याणपन टु पवित्रशास्त्र अपमान अर्तकु आद, जो नीनी यीशु मसीह मा विश्वास माळदुर देल उद्धार हासिल माळोर साटी हुश्यार माळ सकतद.
2TI 3:16 सम्पुर्ण पवित्रशास्त्र परमेश्वर उन प्रेरणा देल रचुसकु आग्याद अदिक उपदेश, अदिक समजुसोद, अदिक सुधारन माळोद, अदिक न्यायीपन इन शिक्षा साटी फायदेमंद आद,
2TI 3:17 ताकी परमेश्वर उन जन सिद्ध आगुल, अदिक हर ऊंद वळ्लीद क्याल्सा साटी तयार आगेगुल.
2TI 4:1 ना परमेश्वर अदिक मसीह यीशु उन मुंद जो जित्‍ता अदिक सोतकु मंळसागोळ्द न्याय माळ्यान, अदिक राजा आगकु शासन माळोर साटी बंदान, आंदरी गवाह मान्सकु ना विनती माळतीन,
2TI 4:2 कि नी वचन इन प्रचार माळ, समय बेसमय तयार ईर, सप्पा प्रकार इन सहनशीलता अदिक शिक्षा अन्द सांगुळ निर्देश कोळ, दनकुस अदिक समजुस.
2TI 4:3 यतिकी हिंग समय बंदीत याग लॉकुर सच्चाई इन शिक्षा केळतीदिल, लेकीन आंदुर खुद इक समाधान सीकुल ईत्‍ता मातगोळ केळोर साटी तान अभिलाषागोळ्द अनुसार तान साटी हापाळ सा शिक्षा कोळावाळेर जमा माळ कोंडार,
2TI 4:4 अदिक तान किव सच्चाई इन हादी दी टु तिर्गुसकु काल्पनिक कात्‍तागोळ मा हच्यार.
2TI 4:5 लेकीन नी सप्पा मातगोळ दा नियंत्रण ईट, दुख नेगु, खुशखबरी प्रचार इन क्याल्सा माळ, अदिक तान स्यावा अक पुरा माळ.
2TI 4:6 यतिकी ईग नांद अर्पण इन घळी होट बंदाद, अदिक नान ईद जीवन इक त्यागसोद समय होट बंदाद.
2TI 4:7 ना वळ्लीद कुस्ती आळ कोंडीन, ना तान दवळ पुरा माळ कोंडीन, ना विश्वास इन रखवाली माळीन.
2TI 4:8 भविष्य दा नान साटी विजयी ईनाम इन मुकुट ईटकु आद, यदरी प्रभु, जो आसान हादी देल नळसावाळा हुन, नानी आ दिशी कोट्टान, अदिक नानी इच ईला उलटा आ सप्पा मुंदुर इक भी जो आऊन प्रगट आगोद प्रिय जान्सतार
2TI 4:9 नान हात्‍ती राटनेरी बरोद कोशिश माळ.
2TI 4:10 यतिकी देमास ई दुनिया अक प्रिय जान्सकु नानी बिट बुटान अदिक थिस्सलुनीके अक होटोग्यान. क्रेसकेंस गलातिया अक अदिक तीतुस दलमतिया अक होटोग्यान.
2TI 4:11 सिर्फ लूका नान सांगुळ आन. मरकुस उक हुडुकु होटबर; यतिकी स्यावा अन्द साटी आव हापाळ उपयोगी आन.
2TI 4:12 तुखिकुस उक ना इफिसुस कळीन.
2TI 4:13 याग नी बंद्या रा झागा अक यदरी ना त्रोआस दा करपुस उन मान्या बिटकु बंदिदीन तरेत; अदिक नानव किताबगोळ विशेष माळकु तोगुल इन चिट्ठी गोळी हुडुत बरेत.
2TI 4:14 धातु उन क्याल्सा माळावाळा सिकन्दर नानी हापाळ नुकसान पोहचुस्यान; प्रभु आऊक आऊन क्याल्सागोळ अनुसार बदला कोट्टान.
2TI 4:15 नी भी आऊन से सावधान ईर, यतिकी आव नाम उपदेशगोळ्द हापाळ अच विरोध माळ्यान.
2TI 4:16 नान पयले पक्ष इन समय याऊ भी नान साथ कोटीदील, उलटा सप्पा मुंदुर नानी बिट बुटीदुर.
2TI 4:17 लेकीन प्रभु नान सांगुळ नीदुरकु ईत्‍तुन अदिक नानी सामर्थ्य कोट्टुन, ताकी नान द्वारा पुरा पुरा प्रचार आगुल अदिक सप्पा गैरयहूदी लॉकुर केळ कोमुल. ना हुल्ल इन बाय देल बिळ्सकु आगीन.
2TI 4:18 अदिक प्रभु नानी हर ऊंद बुरा क्याल्सा देल बिळस्यान, अदिक तान स्वर्गीय राज्य दा उद्धार माळकु पोहचुस्यान. आऊन महिमा हमेशा हमेशा आगतेला ईरूल. आमीन.
2TI 4:19 प्रिस्का अदिक अक्विला अक अदिक उनेसिफुरूस इन घराना अक नमस्कार.
2TI 4:20 इरास्तुस कुरिन्थुस दा ईतोदुन, अदिक त्रुफिमुस उक ना मिलेतुस दा बिमार आगा कारण बिटीन.
2TI 4:21 सोळीन दिन से पयले बरोद कोशिश माळ. यूबूलुस, अदिक पूदेस, अदिक लीनुस अदिक क्लौदिया, अदिक सप्पा विश्वासी वार्टुर्द नीनी नमस्कार.
2TI 4:22 प्रभु नीन आत्मा अन सांगुळ ईरूल. नीम मा अनुग्रह आगतेला ईरूल.
TIT 1:1 पौलुस उन दी टु जो परमेश्वर उन दास अदिक यीशु मसीह अन्द प्रेरित हुन. नाम मंडली इन खरा ग्यान इन अगुवाई माळोर साटी कळकु आग्याद अदिक सच्चाई इन पयचान जो भक्ति इन अनुसार आद,
TIT 1:2 आ अनन्त जीवन इन आशा मा यदुर्द वादा परमेश्वर, जो ख्वाटा माताळालुन सनातन देल माळ्यान,
TIT 1:3 लेकीन सही समय मा तान वचन इक आ प्रचार इन द्वारा प्रगट माळदुन, जो नाम उद्धारकर्ता परमेश्वर उन आग्या अन अनुसार नानी सौप्सकु आग्याद.
TIT 1:4 तीतुस उन हेसुर, जो विश्वास इन सहभागीता अन्द विचार देल नान खरा पार हुन: परमेश्वर आप्प अदिक नाम उद्धारकर्ता मसीह यीशु उन दी टु नीनी अनुग्रह अदिक शांती सिकतेला ईरूल.
TIT 1:5 ना इदुरसाटी नीनी क्रेते दा बिटकु बंदिदीन कि नी मिग्द मातगोळ्द सुधारन माळ्या, अदिक नान आग्या अन अनुसार नगर नगर स्याणागोळी नियुक्त माळ्या.
TIT 1:6 जो निर्दोष अदिक ऊंदा हिंग्स उन गंळ्स ईरूल, यारोर चिकोर विश्वासी ईरूल, अदिक अनुशासन इन हिनता अन्द दोष आंदुर मा हचकु ईला आग सकुल तथा आंदुर निरंकुश भी ईरबाळुल.
TIT 1:7 यतिकी मंडली इन अध्यक्ष उक परमेश्वर उन कार्य अन निरीक्षक आगा कारण आव निर्दोष ईर पायजे; आऊक ना हटीला, ना सिट्ट, या कुडावाळा, या झगळेलु, या पैस्या अन लालची ईला ईर पायजे,
TIT 1:8 लेकीन पाऊनागोळ्द आदर माळावाळा, भलाई इक चाहसावाळा, संयमवाळा, न्याय माळावाळा, पवित्र अदिक सभ्यताशील ईरूल;
TIT 1:9 आऊक आ विश्वास माळा योग्य अदिक सिद्धांतगोळ मा सयमत आगावाळा बातणी इक मजबूती देल हुडुकु ईर पायजे ई प्रकार आव लॉकुरी सही शिक्षा कोटकु आंदरी प्रोत्साहित माळुल अदिक ईदुर दा सांगुळ जो ईदुर विरोधी आर आंदुर्द खंडन माळ सकुल.
TIT 1:10 यतिकी हापाळ सा लॉकुर निरंकुश, व्यर्थ माताळावाळेर अदिक ध्वाका कोळावाळेर आर; यक्कुल माळकु यहूदी दा टु बंदार.
TIT 1:11 ईद जरूरी आद कि ईंदुर बाय बंद माळ पायजे. यतिकी ई लॉकुर नीच कमाई साटी अनुचित मातगोळी कल्सकु मान्ना अन्द मान्ना बिगळुस बुळतार.
TIT 1:12 आंदुर दा टु ऊंद क्रेते नोर अच भविष्यवक्ता, तान लॉकुर बारा दा खुद अंदान, “क्रेते अन निवासी हमेशा ख्वाटा माताळतार आंदुर आळी दाकळोद जनावर आर अदिक आलसी व्हाट्टा तुमावाळेर आर.”
TIT 1:13 ईद गवाही सत्य आद, इदुरसाटी आंदरी कळकता देल चेतावनी कोळतोग कि आंदुर विश्वास दा पक्‍का आगेगुल,
TIT 1:14 अदिक यहूदीगोळ्द कहानी कात्‍तागोळ अदिक आ मंळसागोळ्द आग्यागोळ मा मन हचबाळुल, जो सच्चाई इन हादी देल काळदोगतार.
TIT 1:15 शुद्ध लॉकुर साटी सप्पा वस्तुगोळ शुद्ध आव, लेकीन अशुध्द अदिक अविश्वासीगोळ साटी येनु भी शुद्ध हैलेच, उलटा आंदुर्द बुद्धी अदिक विवेक येढ्ढु अशुध्द आव.
TIT 1:16 आंदुर अनतार कि नाव परमेश्वर उक अरूतेव, लेकीन तान क्याल्सा देल आऊन इनकार माळतार; यतिकी आंदुर बेकार अदिक आग्या ईला मानसावाळेर उर, अदिक यातोदु वळ्लीद क्याल्सा अन लायक हैलेच.
TIT 2:1 लेकीन नी ईत्‍ता मातगोळ अनतोग जो सही सिद्धांतगोळ लायक आव.
TIT 2:2 मतलब हाळाबाट मंळसा शालीन, सचेत अदिक खुद नियंत्रित ईरूल, अदिक विश्वास दा मजबूत, प्यार अदिक धैर्य पुर्ण सहनशील ईरूल.
TIT 2:3 हांगा हाळामुंड आर्तेर्द चाल-चलन पवित्र लॉकुर घाई ईरूल; आंदुर निंदक आगबाळुल तथा अंगुर शयद या याल्ला अन्द लत आंदरी ईरबाळुल लेकीन वळ्लीद मातगोळ कल्सावळ्तेर ईरूल.
TIT 2:4 ताकी आंदुर हारोदोर आर्तेर इक चेतावनी कोळ्त ईरूल कि तान गांडुर से अदिक चिकोर से प्यार ईटुल;
TIT 2:5 अदिक खुद नियंत्रित, पवित्र, अदिक मान्ना अन्द वळ्लीद व्यवस्था माळावळ्त, अदिक तान गांड्ड उन हात्‍ती ईरावळ्त ईरूल, ताकी यावारा भी परमेश्वर उन दी टु बरावाळा वचन इन अपमान ईला माळुल.
TIT 2:6 हिंग अच हारोदोर मंळसागोळी भी समझुसतोग कि खुद नियंत्रित आगुल.
TIT 2:7 सप्पा मातगोळ दा तान तान इक वळ्लीद आचरण इन नमुना माळ. नीन शिक्षा दा सफाई, गंभीरता,
TIT 2:8 अदिक हिंग सच्चाई सिकुल कि यावारा अदुर्द आलोचना माळ सकबाळुल, ताकी नीन विरोधी लज्जित आगुल यतिकी आंदुर हात्‍ती नीन विरोध दा अनली येनु ईरतीदील.
TIT 2:9 दासगोळी समजुस कि तान-तान स्वामी इन सांगुळ ईरूल, अदिक सप्पा मातगोळ दा आंदरी खुश ईटुल, अदिक तिर्गकु जवाब कोळबाळुल;
TIT 2:10 काळ्लपनी अदिक चालाकी माळबाळुल, लेकीन हर प्रकार देल पुरा विश्वासी होळुल कि आंदुर सप्पा मातगोळ दा नाम उद्धारकर्ता परमेश्वर उन बारा दा शिक्षा अन शोभा वाळुसुल.
TIT 2:11 यतिकी परमेश्वर उन अद अनुग्रह प्रगट आद, जो सप्पा मंळसागोळ्द उद्धार इन कारण आद,
TIT 2:12 अदिक अद अनुग्रह नामी कल्सतद कि नाव अभक्ति इन जीवन अदिक सांसारिक अभिलाषागोळी त्याग्स बुटेव अदिक खुद नियंत्रित, अदिक पवित्र अदिक भक्तिमय जीवन ईद दुनिया दा माळेव.
TIT 2:13 अदिक धन्य आर आ आशा अन्द मतलब तान महान परमेश्वर अदिक उद्धारकर्ता यीशु मसीह अन्द महिमा अन्द प्रगट आगोद हादी काईत ईरूल.
TIT 2:14 याव तान तान इक नाम साटी कोट बुट्टुन कि नामी सप्पा प्रकार इन अन्याय देल बीळसुस बुळुल, अदिक नामी आऊंदा पवित्र लॉकुर माळुल अदिक वळ्लेव-वळ्लेव क्याल्सागोळ दा ईरूल.
TIT 2:15 तान पुरा अधिकार इन सांगुळ ई मातगोळ कल्स, ह्यांग नी तान विरोधीगोळी दनकुसत्या अदिक प्रोत्साहित माळत्या. ताकी याऊ नीनी तुच्छ सम्सबाळुल.
TIT 3:1 लॉकुरी याद तोर्स कि शासक अदिक अधिकारीगोळ हात्‍ती ईरूल, अदिक आंदुर्द आग्या मानसुल, अदिक हर ऊंद वळ्लीद क्याल्सा साटी तयार ईरूल,
TIT 3:2 आंदरी हेळ कि यारदु बारा दा बुरा अनबाळुल, लेकीन शांती प्रिय अदिक संगीभाव देल ईरूल, अदिक सप्पा मुंदुर सांगुळ हमेशा शालीन व्यवहार ईटुल.
TIT 3:3 यतिकी नाव भी पयले निर्बुद्धी, अदिक आग्या ईला मान्सावाळेर, अदिक गलत ईरेव. अदिक अलग अलग प्रकार इन अभिलाषागोळ अदिक सुखविलास इन गुलामी दा ईरेव, अदिक दुश्मनी भाव, अदिक जलनखोरी माळदुर दा जीवन व्यतीत माळतोगेव, अदिक बेकार ईरेव, अदिक आबुर दाबुर से दुश्मनी ईटतोगेव.
TIT 3:4 लेकीन याग नाम उद्धारकर्ता परमेश्वर उन करूणा अदिक प्यार प्रगट आत,
TIT 3:5 रा आव नाम उद्धार माळदुन; अदिक ईद वळ्लेव कर्मगोळ वजह देल ईला, जो नाव खुद माळेव, लेकीन आऊन दया देल नामी उळ्सदुन पवित्र आत्मा अन द्वारा, जो नामी व्हाशोद जनम कोळतान अदिक शुद्ध माळकु व्हाशोद जीवन कोळतान.
TIT 3:6 परमेश्वर नाम मा पवित्र आत्मा अक उद्धारकर्ता यीशु मसीह अन द्वारा भरपुरी देल कोटान.
TIT 3:7 इदुरसाटी परमेश्वर नामी तान अनुग्रह अन द्वारा आऊन सांगुळ न्यायी ठहरूस्यान ताकी यार्द आशा नाव माळेव आ अनन्त जीवन इन उत्‍तराधिकारी इक हासिल माळ सक्केव.
TIT 3:8 ईद सही अनकु आग्याद, अदिक ना चाहासतीन कि नी ई मातगोळ्द बारा दा हिम्मत देल माताळ इदुरसाटी कि यार परमेश्वर मा विश्वास माळ्यार, आंदुर वळ्लीद-वळ्लीद क्याल्सागोळ दा हतकु ईरोद ध्यान ईटुल. ई मातगोळ वळ्लेव अदिक मंळसागोळ्द फायदा नव आव.
TIT 3:9 लेकीन मूर्खपन इंद विवादगोळ अदिक वंशावलीगोळ, अदिक विरोध अदिक झगळागोळ देल जो व्यवस्था अन्द बारा दा आद, रा ऊळ्दकु ईर; यतिकी अव निष्फल अदिक व्यर्थ आव.
TIT 3:10 यावारा फूट हाकावाळा मंळसा अक कम से कम येढ्ढ घन चेतावनी कोळ, अदिक बाक आऊन सांगुळ ज्यादा येनु माळबाळ.
TIT 3:11 यतिकी नीव जान्सतीर कि ईत्‍ता लॉकुर भ्रष्ट आगेग्यार अदिक आंदुर पाप आंदुर्द गलत आगोद प्रमाण कोळताव.
TIT 3:12 याग ना नीन हात्‍ती अरतिमास या तुखिकुस उक कळाईन रा नान हात्‍ती निकुपुलिस नगर दा बरोद कोशिश माळेत, यतिकी ना अल्या सोळ कडोद तय माळीन.
TIT 3:13 जेनास व्यवस्थापक अदिक अपुल्लोस उक कोशिश माळकु मुंद पोहचुस बुळ, अदिक नोळ कि आंदरी यातोदु चिज इन कमी आगबाळुल.
TIT 3:14 नाम लॉकुर भी वळ्लेव क्याल्सा माळोर साटी समय तेगोद कलु पायजे ताकी जो जरूरी आद अदुर्द पुर्ती आग सकुल ताकी आंदुर बेकार इन जीवन जीऊस बाळुल.
TIT 3:15 नान सप्पा साथीगोळ्द नीनी नमस्कार. जो विश्वास इन कारण नाम से प्यार ईटतार, आंदरी नमस्कार. नीम सप्पा मुंदुर मा परमेश्वर उन अनुग्रह आग्त ईरूल.
PHM 1:1 पौलुस उन दी टु जो मसीह यीशु उन कैदी आन, अदिक वार्ट तीमुथियुस उन दी टु नाम प्रिय सहकर्मी फिलेमोन,
PHM 1:2 अदिक आकतींग अफफिया, अदिक नाम संगी योद्धा अरखिप्पुस अदिक फिलेमोन उन मान्ना अन्द मंडली नव हेसुर:
PHM 1:3 नाम आप्प परमेश्वर अदिक प्रभु यीशु मसीह अन्द दी टु अनुग्रह अदिक शांती नीमी सिक्त ईरूल.
PHM 1:4 वार्ट फिलेमोन, ना हमेशा परमेश्वर उन धन्यवाद माळतीन, अदिक तान प्रार्थनागोळ दा भी नीनी याद माळतीन,
PHM 1:5 यतिकी ना नीन आ प्यार अदिक विश्वास इन चर्चा केळतीन, जो सप्पा परमेश्वर उन पवित्र लॉकुर सांगुळ अदिक प्रभु यीशु मा आद.
PHM 1:6 ना प्रार्थना माळतीन कि खुद विश्वास दा नीन सहभागी आगोद, नीम सप्पा भलाई इन पयचान दा, मसीह अन्द साटी प्रभावशाली ईरूल.
PHM 1:7 यतिकी हे वार्ट, नानी नीन प्यार देल हापाळ खुशी अदिक शांती सिक्याद, इदुरसाटी कि नीन द्वारा परमेश्वर उन पवित्र लॉकुर्द मन वळ्लेव आगेग्याव.
PHM 1:8 इदुरसाटी अगर नानी मसीह दा हापाळ साहस आद कि जो मात ठीक आद, अदुर आग्या नीनी कोळाईन.
PHM 1:9 तरी भी ना बाट्ट पौलुस उक जो ईग मसीह यीशु उन साटी कैदी आईन, ईद मात्‍त वळ्लीद जान्सकु आत कि प्यार देल विनती माळाईन.
PHM 1:10 ना तान चिग्द उनेसिमुस उन साटी, जो नान देल नान बंधन दा पैदा आग्यान, नीन से विनती माळतीन.
PHM 1:11 आव रा पयले नीन येनु क्याल्सा नव ईला ईरोन, लेकीन ईग नीन अदिक नान येढ्ढु मुंदुर्द हापाळ क्याल्सा नव आन.
PHM 1:12 आऊका मतलब जो नान दिल इन तुकळा हुन, ना नीन हात्‍ती वापस माळ बुटीन.
PHM 1:13 आऊक ना तान हात्‍ती इच ईटोद चाहासीन कि आव नीन दी टु ई बंधन दा जो खुशखबरी इन कारण आन, नान स्यावा माळुल.
PHM 1:14 लेकीन ना नीन इच्छा अन्द बगेर येनु भी माळोद चाहासीदिल, कि नीन ईद कृपा दबाव देल ईला लेकीन इच्छा देल आगुल
PHM 1:15 यतिकी शायद आव नीन से थ्वाळासा दिन साटी ईदा कारण अलग आदुन कि हमेशा नीन हात्‍ती ईरूल.
PHM 1:16 लेकीन ईगी टु दास उन घाई ईला उलटा दास से भी वळ्लेव प्रिय वार्ट उन घाई, मतलब ना रा आऊन से प्यार माळतीन, लेकीन नीव आऊक मंळसा अन नाता देल अदिक प्रभु उन नाता देल नान से यक्कुल प्यार माळी.
PHM 1:17 इदुरसाटी अगर नी नानी तान सहभागी सम्सत्या, रा आऊक ईत्‍ता प्रकार देल ग्रहण माळ ह्यांग नानी माळत्या.
PHM 1:18 अगर आव नीन येनारा नुकसान माळ्यान, या आऊन मा नांद येनारा कर्ज बरतद, रा नान हेसुर मा लिख्स कोम.
PHM 1:19 ना पौलुस तान कय देल लिख्सतीन कि ना खुद तुम कोळाईन; अदिक ईद अनोद येनु जरवत हैलेच कि नान कर्जा जो नीन मा आद आव नी अच हुय.
PHM 1:20 हे वार्ट, ईद खुशी नानी प्रभु दा नीन दी टु सिक्याद. मसीह दा नान जीव इक हिरवा-गार माळ बुळ.
PHM 1:21 ना नीन आग्याकारी आगोद भरोसा ईटकु नीनी लिख्सतीन, अदिक ईद जान्सतीन कि जो येनारा ना अनतीन, नी नान से यक्कुल माळ्या.
PHM 1:22 अदिक ईद भी कि नान साटी ठहरूसोद जागा तयार ईट. नानी आशा आद कि नीम प्रार्थनागोळ द्वारा ना नीमी कोटकु आगेगाईन.
PHM 1:23 इपफ्रास, जो मसीह यीशु दा नान सांगुळ कैदी आन,
PHM 1:24 अदिक मरकुस अदिक अरिस्तर्खुस अदिक देमास अदिक लूका जो नान सहकर्मी आर, ईंदुर्द नीनी नमस्कार.
PHM 1:25 नाम प्रभु यीशु मसीह अन्द अनुग्रह नीम आत्मा मा आगतेला ईरूल. आमीन.
HEB 1:1 पयला अन्द युग दा परमेश्वर आप्प दादागोळ से थ्वाळा-थ्वाळा माळकु अदिक अलग-अलग देल भविष्यवक्तागोळ द्वारा मातगोळ हेळदुन,
HEB 1:2 ई आखरी दिनगोळ दा आव नाम से पार उन द्वारा मातगोळी हेळदुन, यारी आव सप्पा वस्तुगोळ्द वारीस ठहरूसदुन अदिक आऊंदा द्वारा परमेश्वर सप्पा दुनिया अन्द रचना माळ्यान.
HEB 1:3 आव परमेश्वर उन महिमा अन्द ऊजुळ अदिक आऊन स्वरूप इन छाप हुन, अदिक सप्पा वस्तुगोळी तान सामर्थ्य अन्द वचन देल संभाळ्सतान. आव मंळसा जाती इन पापगोळी माफ माळकु स्वर्ग दा होगकु महामहिम परमेश्वर उन ऊमा कय दी होगकु कुरतुन;
HEB 1:4 ई प्रकार पार स्वर्गदूतगोळ से महान माळकु आदुन, अदा प्रकार ह्यांग परमेश्वर आऊक स्वर्गदूतगोळ से वळ्लीद हेसुर कोट्टुन.
HEB 1:5 यतिकी परमेश्वर यातोदु भी स्वर्गदूतगोळ से हिंग अंदिदील, “नी नान पार हुय, ईंद ना नीन आप्प बनसीन.” अदिक ना यातोदु स्वर्गदूत से परमेश्वर ईद अंदुन, “ना नीन आप्प बनसाईन, अदिक नी नान पार बनस्या.”
HEB 1:6 अदिक याग परमेश्वर तान पयला पैदा आग्द पार उक दुनिया दा कळुतान, रा आव अनतान, “परमेश्वर उन सप्पा स्वर्गदूत आऊंद उपासना माळुल.”
HEB 1:7 लेकीन स्वर्गदूतगोळ्द बारा दा परमेश्वर ईद अनतान, “आव तान दूतगोळी पवन, अदिक तान सेवकगोळी भळकुस्द बेक्‍की माळतान.”
HEB 1:8 लेकीन परमेश्वर पार उन बारा दा अनतान, “हे परमेश्वर, नीन सिंहासन हमेशा हमेशा ईत्‍तीत: अदिक नीन शासन नीन लॉकुर मा न्याय इन सांगुळ आगतद.
HEB 1:9 नी सच्चाई से प्यार अदिक अन्याय से दुश्मनी ईट्द; ईद कारण परमेश्वर, नीन परमेश्वर, आनन्द इन याण्णा देल अभिषेक माळदुर द्वारा नीन संगीगोळ से वाळुसकु निवळुसदुन.”
HEB 1:10 वचन ईद भी अनतद, “हे प्रभु, सुरूवात दा नी पृथ्वी इन पायवा हाक्द, अदिक स्वर्ग नीन कय इंद कारीगरी हुन.
HEB 1:11 अव रा नाश आगेदव, लेकीन नी हांगा ईत्या; अदिक अव सप्पा फळक्यागोळ घाई कंदुसेदाव,
HEB 1:12 अदिक नी अवरी चादर इन घाई गुंडस्या, अदिक अव फळक्यागोळ घाई बदलुसेदव: पर नी हांग अच बन्सकु ईत्या अदिक नीन जीवन इन अन्त आगतीदील.”
HEB 1:13 अदिक स्वर्गदूतगोळ दा टु परमेश्वर यार से याग अंदुन, “नी नान ऊम्मा कय दी कुर, यागासताका कि ना नीन दुश्मनगोळी नीन कालगोळ्द ल्यालमा अन्द पांळ्सी माळ कोमालीन?”
HEB 1:14 येन स्वर्गदूत अव आल्लच, जो आत्मागोळ परमेश्वर उन स्यावा अदिक आऊन द्वारा उद्धार ताकोमावाळेर इक मदत माळोर साटी कळुकु आग्याव.
HEB 2:1 ई कारण पायजे कि जो सत्य मातगोळी नाव केळेव, अदिक यक्कुल अच सावधानी देल अऊर मा मन हची, हिंग आगबाळुल कि वाहुसकु अऊर से दुर होटोगुल.
HEB 2:2 यतिकी जो बातणी स्वर्गदूतगोळ द्वारा नाम पुर्वजगोळी कोटकु आत अद खरा ठहरूस्त, यार आंदुर्द उल्लंघन माळदुर आंदरी दण्ड प्राप्त आत यदुर आंदुर लायक ईरोर.
HEB 2:3 अगर नाव ईद महान उद्धार मा ध्यान कोटीदील रा नाव ह्यांग उळु सकतेव? यदुर चर्चा पयले पहल प्रभु उन द्वारा आत, अदिक यार केळदुर आंदुर नामी ईद साबित माळदुर कि अद उद्धार खरा आद.
HEB 2:4 अदिक सांगुळ अच परमेश्वर भी तान इच्छा अन्द अनुसार चमत्कारगोळ, अदिक अदभुत क्याल्सागोळ, अदिक अलग प्रकार इन सामर्थ्य इन क्याल्सागोळ, अदिक पवित्र आत्मा अन्द वरदानगोळी वाट्सदुर द्वारा इदुर्द गवाही कोळतेला ईत्‍तुन.
HEB 2:5 परमेश्वर आ बरावाळा दुनिया अक यदुर चर्चा नाव माळतेव, स्वर्गदूतगोळ हात्‍ती माळीदिल.
HEB 2:6 बल्‍की यावारा शास्त्र दा ईद गवाही कोटान, “मंळसा येन हुन कि नी आऊक याद माळत्या? या मंळसा येन हुन कि नी आऊंद चिंता माळत्या?
HEB 2:7 नी आऊक स्वर्गदूतगोळ से थ्वाळासा अच गोर्त माळ्द; नी आऊन मा महिमा अदिक आदर इन मुकुट ईट्द,
HEB 2:8 अदिक आऊक तान कयगोळ्द क्याल्सागोळ मा अधिकार कोट्ट नी सप्पा आऊन कालगोळ ल्यालमा माळ्द.” इदुरसाटी याग आव सप्पा येनारा आऊन हात्‍ती माळ कोंडुन, रा आव येनु भी बिटीदिल जो आऊन हात्‍ती ईला ईरोद. लेकीन ईग नाव सप्पा येनारा वस्तु आऊन हात्‍ती नोळालेव.
HEB 2:9 लेकीन नाव यीशु उक जो स्वर्गदूतगोळ से थ्वाळासा कम माळकु आगीदुन, मृत्यु उन दुख नेगदुर कारण महिमा अदिक आदर इन मुकुट हाक्‍कु नोळतेव, ताकी परमेश्वर उन अनुग्रह देल आव हर ऊंद मंळसा अन्द साटी सायुल.
HEB 2:10 ईद परमेश्वर उन साटी वळ्लीद हत्‍त याव सप्पा मातगोळी माळदुन अदिक संभाळ्सकु ईटदुन, यीशु उक भी यातनागोळ द्वारा परिपुर्ण माळ पायजे ताकी हापाळ सा चिकोर आऊन महिमा दा भागी आगुल. यतिकी यीशु अच आव ऊंद हुन जो आंदरी उद्धार इन दी ओयतान.
HEB 2:11 यतिकी लॉकुरी आंदुर पापगोळ से पवित्र माळतान अदिक आंदुर येढ्ढु पवित्र माळकु आग्यार, सप्पा मुंदुरव आप्प ऊंद अच आन, इदुरसाटी यीशु आंदरी तान वार्टुर अनोर से नाचालुन.
HEB 2:12 आव परमेश्वर से अनतान, “ना तान वार्टुर अदिक आकतींगेर न्याड्या दा नींद हेसुर इन प्रचार माळाईन; सभा अन्द न्याड्या दा ना नींद प्रशंसा माळाईन.”
HEB 2:13 अदिक आव ईद भी अनतान, “ना तान भरोसा परमेश्वर मा ईटाईन. अदिक अनतान, ना ईल परमेश्वर उन कोळ्द चिकोर सांगुळ आईन,”
HEB 2:14 इदुरसाटी याग कि पारगोळ मास अदिक रक्ता अन्द भागी आर, रा यीशु खुद भी आंदुर घाई आंदुर सहभागी आगेदुन, ताकी मृत्यु उन द्वारा शैतान उक नाश माळ सकुल मतलब यार हाती मृत्यु उन शक्ति आद;
HEB 2:15 ईदा रीति देल आ मंळसागोळी मुक्त माळकोमी यार्द जीवन मृत्यु उन अंज्क इन मारा गुलामी या दासत्व दा ईरोर.
HEB 2:16 यतिकी ईद स्पष्ट आद कि आव रा स्वर्गदूतगोळ इक ईला बल्‍की अब्राहम उन वंश इन सहायता माळतान.
HEB 2:17 ई कारण आऊक चाहसोद ईरोद, कि सप्पा मातगोळ दा तान वार्टुरगोळ घाई बनसुल; यदुर देल आव आ मातगोळ दा जो परमेश्वर देल संबंध ईटतद, ऊंद दयालु अदिक विश्वासलायक महायाजक बनसुल ताकी लॉकुर्द पापगोळ साटी प्रायश्चित माळुल.
HEB 2:18 यतिकी याग आव परीक्षा अन्द दशा दा दुख नेगदुन, रा आव आंदुर्द भी मदत माळ सकतान यार्द परीक्षा आगतद.
HEB 3:1 इदुरसाटी हे मसीह वार्टुरा अदिक आकतींगेरा, नीव जो परमेश्वर उन द्वारा कारूकु आगिर नीव तान ध्यान यीशु मा हचकु ईटी यारी परमेश्वर प्रमुख याजक माळोर साटी कळुकु आगीदुन, आ अदुर मा नाव तान कबुली कोळतेव.
HEB 3:2 आव याव आऊक निवळुस्यान आ परमेश्वर उन प्रती विश्वासलायक ईरोन, ठीक हांगा ह्यांग मूसा तान क्याल्सा अन प्रती परमेश्वर उन घराना दा विश्वासलायक ईरोन.
HEB 3:3 ह्यांग भवन इन निर्माण माळावाळा अक खुद भवन से यक्कुल आदर सिकतद, हांग अच यीशु मूसा से यक्कुल आदर इन पात्र मान्सकु आदुन.
HEB 3:4 यतिकी हर ऊंद मान्ना अन्द यावारा ना यावारा माळावाळा ईरतान, लेकीन परमेश्वर रा सप्पा वस्तु उन माळावाळा हुन.
HEB 3:5 मूसा रा परमेश्वर उन मान्या सेवक घाई विश्वासलायक ईरोन, अदिक आव अव मातगोळी अंदुन जो भविष्य दा परमेश्वर उन द्वारा अंदकु आगोव ईरव.
HEB 3:6 लेकीन मसीह पार आगा नाता देल परमेश्वर उन मान्या विश्वासलायक आन. अदिक आऊन मान्ना नाव हुयेव, अगर नाव नाम साहस अदिक यदुर मा नाव घमण्ड माळतेव आ आशा मा मजबूती देल स्थिर ईरूल.
HEB 3:7 इदुरसाटी ह्यांग पवित्र आत्मा अनतद, “अगर ईंद परमेश्वर उन आवाज केळी,
HEB 3:8 रा तान मन इक कठोर माळबाळेतीर, ह्यांग कि निमोर पुर्वजगोळ याग आंदुर्द मरूस्थल दा परीक्षा आगोद परमेश्वर उन खिलाप बगावत माळीदुर.
HEB 3:9 परमेश्वर अनतान कि अल आंदुर नांद परीक्षा माळदुर अदिक परखुसदुर, अदिक नान क्याल्सागोळी नोळदुर यवरी ना चालीस साल टु माळतेला बरेतीन.”
HEB 3:10 ईद कारण ना आ समय इन लॉकुर से सिट्ट दा ईत्‍तीन, अदिक अंदीन, “इंदुर मन हमेशा टु अच अप्रामाणिक आव अदिक नान आग्या अक ठुकरूसतार.”
HEB 3:11 इदुरसाटी ना सिट्ट दा बंदकु किर्‍या तिंदीन, “इदुरसाटी येल ना आंदरी आराम कोळाईन आ जागा दा आंदुर यागलु होग सकतीदिल.”
HEB 3:12 हे वार्टुरा अदिक आकतींगेरा, सावधान ईरी कि नीम दा ईत्‍ता बेकार अदिक अविश्वासी मन आगबाळुल, जो नीमी जित्‍ता परमेश्वर से दुर ओयुल.
HEB 3:13 लेकीन ईदुर बदला यागासताका ईद “ईंद इन दिन” अनकु आगतद, नीव हर दिशी आबुर दाबुर इक धीरज कोळतेला ईरी, ताकी नीम दा टु यावारा भी पाप दा भरमुसकु ईला आगुल, अदिक ना कठोर आगेगुल.
HEB 3:14 अगर नाव आखरी ताका मजबूती इन सांगुळ तान सुरूवात इन आत्मविश्वास इक हुडुकु ईरतेव रा नाव मसीह अन भागीदार बनसेगतेव.
HEB 3:15 ह्यांग शास्त्र अनतद, “अगर ईंद नीव परमेश्वर उन आवाज केळीर, रा तान मन इक कठोर माळबाळेतीर, ह्यांग कि बगावत इन दिनगोळ दा नीम पुर्वजगोळ माळीदुर.”
HEB 3:16 भला आंदुर या लॉकुर ईरोर यार परमेश्वर उन आवाज केळदुर अदिक आऊन खिलाप बगावत माळदुर? येन आंदुर आ लॉकुर ईला ईरोर, यारी मूसा मिस्त्र दा टु उळ्सकु तेगदीदुन?
HEB 3:17 अदिक परमेश्वर चालीस वर्ष ताका याता लॉकुर से सिट्ट दा ईत्‍तुन? येन आंदुर से अच ईला यार पाप माळदुर, अदिक आंदुर लाश मरूस्थल दा बिदकु ईत्‍तव?
HEB 3:18 अदिक परमेश्वर याता लॉकुर साटी किर्‍या तिंदुन कि नीव नान आराम इन जागा दा प्रवेश माळ सकतीदिल? येन आंदुर ई लॉकुर आल्लच यार आऊन आग्या मान्सीदील?
HEB 3:19 इदुरसाटी नाव नोळतेव कि आंदुर अविश्वास इन कारण अच आ जागा दा प्रवेश माळ सकिदील.
HEB 4:1 इदुरसाटी याग कि परमेश्वर उन आराम इन जागा दा प्रवेश माळोद प्रतिग्या ईगासताका ताका आद, रा नामी ध्यान ईट पायजे हिंग आगबाळुल कि नीम दा टु यावारा जन आऊन से वंचित ईतोगुल.
HEB 4:2 यतिकी नाव खुशखबरी केळदेव ह्यांग आंदुर केळीदुर, लेकीन जो बातणी आंदुर केळीदुर आंदुर साटी येनु किमत ईला ईरोद, यतिकी याग आंदुर अदरी केळदुर रा ईदरी विश्वास इन सांगुळ स्वीकार माळीदिल.
HEB 4:3 नाव जो विश्वासी आयेव, आ आराम इक यदुर्द परमेश्वर प्रतिग्या माळीदुन अदरी नाव प्राप्त माळतेव. ह्यांग कि परमेश्वर अंदान, “ना सिट्ट दा ईदुर मा किर्‍या तिनकु अंदिदीन आंदुर यागलु नान आराम इन जागा दा शामिल आग सकतीदिल.” आव ईद अंदिदुन, याग कि दुनिया अन्द रचना माळदुर बाद्दा आऊन क्याल्सा पुरा आगेगीत.
HEB 4:4 यतिकी सातवा दिन इन बारा दा येल्यारा तरी शास्त्र दा आद, “अदिक बाक सातवा दिशी तान सप्पा क्याल्सागोळ माळकु परमेश्वर आराम माळदुन.”
HEB 4:5 अदिक ई संदर्भ दा आव मात्‍त अनतान, “आंदुर नान आराम इन जागा दा यागलु प्रवेश माळ सकतीदिल.”
HEB 4:6 यार पयले खुशखबरी केळदुर आंदुर आ आराम इक प्राप्त माळ सकिदील यतिकी आंदुर विश्वास ईला माळीदुर. लेकीन दुसरा अन साटी आराम इन दरवाजा ईगलु तेरकु आव.
HEB 4:7 इदुरसाटी परमेश्वर बाक ऊंद विशेष दिन निश्चित माळदुन अदिक अदरी अनकु आत “ईंद इन दिन.” थ्वाळासा साल इन बाद्दा दाऊद उन द्वारा परमेश्वर आ दिन इन बारा दा शास्त्रगोळ दा हेळीदुन यदुर्द उल्लेख शास्त्र पयले टु अच माळतद, “अगर ईंद नीव परमेश्वर उन आवाज केळीर, ह्यांग पयले अंदकु आग्याद, रा तान मन इक कठोर माळबाळी.”
HEB 4:8 अगर यहोशू आंदरी आ आराम इन जागा दा ओयायदुन यदुर्द परमेश्वर प्रतिग्या माळीदुन, रा परमेश्वर बाद्दा यातोदु दुसरा दिन इन बारा दा ईला अनायदुन.
HEB 4:9 रा जो भी आगुल, ह्यांग परमेश्वर सातवा दिन दा आराम माळतान हांग अच परमेश्वर उन लॉकुर साटी अल ऊंद आराम मिक्‍कु आद.
HEB 4:10 यतिकी जो यावारा भी परमेश्वर उन प्रतिग्या माळ्द आराम दा प्रवेश माळतार, आंदरी तान कर्म इन अनुसार अदुर दा आराम सिक्‍कीत हांग अच ह्यांग परमेश्वर उक तान क्याल्सागोळ से आराम सिक्याद.
HEB 4:11 इदुरसाटी बरी ईग नाव भी आ आराम इक हासिल माळोर साटी पुरा रीति देल कोशिश माळाता, ताकी हिंग आगबाळुल कि नाम न्याड्या दा टु यावारा भी अदरी हासिल माळदुर दा असफल आगबाळुल ह्यांग आंदुर तान विश्वास इन कमी इन द्वारा आगीदुर.
HEB 4:12 यतिकी परमेश्वर उन वचन जित्‍ता, क्रियाशील, अदिक हर ऊंद दोधारी तलवार से भी हापाळ तेज आद; अदिक हर जीव आत्मा अक, अदिक जोळ-जोळ इक ब्यार्र माळकु आर-पार गड्डा माळतद अदिक मन इन इच्छागोळ अदिक विचारगोळ्द न्याय माळतद.
HEB 4:13 अदिक दुनिया अन्द यातोदारा भी वस्तु परमेश्वर उन नजर देल होचकोमकु हैलेच, आऊन कण्णगोळ मुंद यारी नामी लेखा जोखा कोळोद आद हर वस्तु बीना यातोदु आवरण इन तेरकु आद अदिक येनु अच ओझल हैलेच.
HEB 4:14 इदुरसाटी याग नामव ईत्‍ता धोड्डेव महायाजक आन, जो स्वर्ग दा टु आगकु होग्यान, मतलब परमेश्वर उन पार यीशु, रा बरी, तान विश्वास इक जो नाव प्राप्त माळेव मजबूती देल हुडुकु ईत्‍तेव.
HEB 4:15 यतिकी नामव जो महायाजक आन आव हिंग हैलेच कि जो नाम कमजोरीगोळ सांगुळ सहानुभुती ईट सक्यान, आऊक हर प्रकार देल हांगा परखुसकु आत ह्यांग नामी लेकीन आव हमेशा पाप रहित ईत्‍तुन.
HEB 4:16 रा बाक बरी, नाव आत्मविश्वास इन सांगुळ अनुग्रह ताकोमोर साटी परमेश्वर उन सिंहासन दी वाळुसेव ताकी जरवत बीळदुर मा नाम सहायता अन साटी नाव दया अदिक अनुग्रह अक हासिल माळ सक्केव.
HEB 5:1 हर ऊंद महायाजक मंळसागोळ दा टु अच निवळुस्कु आगतान, अदिक लॉकुर्द प्रतिनिधीत्व माळोर साटी परमेश्वर इन स्यावा साटी नियुक्ती माळकु आगतद ताकी आव पापगोळ साटी भेंट अदिक बलिदान येर्सुल.
HEB 5:2 यतिकी खुद भी हापाळ रीति देल कमजोरी इन हात्‍ती आन इदुरसाटी आव अग्यानीगोळ अदिक भुला भटका लॉकुर सांगुळ कोमलता देल व्यवहार माळ सकतान.
HEB 5:3 इदुरसाटी आऊक पायजे कि ह्यांग लॉकुर साटी हांग अच तान साटी भी पाप-बली येरसुल.
HEB 5:4 ईद मुख्य याजक आदर इन पद याऊ तान तान इक निवळुस्कु ताकोमालुन, याग कि हारून उन घाई परमेश्वर उन दी टु ठहरूसकु आगालुन.
HEB 5:5 हांग अच मसीह भी महायाजक आगोद आदर तांदुर देल ग्रहण माळीदील, बल्‍की परमेश्वर आऊन से अंदुन “नी नान पार हुय, अदिक ईंद ना नीन आप्प बनसीन.”
HEB 5:6 ईदा प्रकार आव दुसरा जागा दा भी अनतान, “नी मलिकिसिदक इन रीति मा हमेशा साटी याजक आय.”
HEB 5:7 यीशु तान शरीर दा ईरोद दिनगोळ दा धोळ्द शब्द दा वर्ल-वर्लकु अदिक कण्ण इन नीर वाहुसकु आऊन से जो आऊक मृत्यु देल ऊळ्स सकोन, प्रार्थना अदिक विनती माळदुन, भक्ति अदिक नम्रता अन कारण परमेश्वर आऊन केळदुन.
HEB 5:8 लेकीन अगर आव परमेश्वर उन ईरोन तरी भी दुखगोळ झेल्सतेला आव आग्या अन पालन माळोद कलतुन.
HEB 5:9 अदिक सिद्ध बन्सदुर मा, तान सप्पा आग्या मानसावाळेर साटी अनन्त काल इन उद्धार इन स्त्रोत बन्सेदुन,
HEB 5:10 अदिक आ परमेश्वर उन दी टु मलिकिसिदक इन रीति मा महायाजक बनस्कु आदुन.
HEB 5:11 इदुर बारा दा नामी हापाळ सा मातगोळ माताळोव आव, लेकीन यऊर्द वर्णन माळोद कठिन आद, यतिकी नीव सम्सदुर दा हापाळ धीरा आईर.
HEB 5:12 वास्तव दा ई समय ताका रा नीमी शिक्षक आगेगोद हुन, तरी भी ईद जरूरी आगेग्याद कि यावारा नीमी परमेश्वर उन वचनगोळ्द शिक्षा सुरूवात टु मात्‍त कलसुल. नीव रा हिंग आगेदीर कि नीमी ठोस भोजन इन बदला ईग भी हाल अच पायजे.
HEB 5:13 यतिकी जो हाल कुडुतान आव चिग्द अच आन अदिक आऊक सही गलत इन येनु अनुभव ईराल.
HEB 5:14 लेकीन ठोस भोजन स्याणागोळ साटी आद, आव याव तान अनुभव देल वळ्लीद अदिक बुरा अन्द ग्यान माळोद कलतोग्यान.
HEB 6:1 इदुरसाटी बरी मसीह अन सुरूवात इन स्तर शिक्षा अक सुरूवात इन मातगोळी बिटकु नाव सिद्धता दी मुंद वाळुस्तेला होगाता, मृत्यु उन अगुवाई माळोर द्वारा प्रायश्चित इन पायवा मात हाकबाळुल, अदिक परमेश्वर मा विश्वास माळोद,
HEB 6:2 बपतिस्मा अन्द शिक्षा अदिक म्याकुच कयगोळी ईटोद, अदिक सोत्‍तुर दा टु जित्‍ता आगोद, अदिक अनन्त न्याय ताका.
HEB 6:3 अगर परमेश्वर चाहास्यान रा नाव ईदा माळेव.
HEB 6:4 जो लॉकुर तान विश्वास इक त्याग्स बुळतार आंदरी मात पश्चाताप माळोर साटी ह्यांग तनकु आग सकतद, आंदुर ऊंद घन परमेश्वर उन प्रकाश दा ईरोर, आंदुर स्वर्ग इन उपहार नेकदुर अदिक पवित्र आत्मा अन्द तान हिस्सा हासिल माळदुर,
HEB 6:5 अदिक परमेश्वर उन वळ्लीद वचन इन अदिक बरावाळा दुनिया अन सामर्थ्य अन अदिक आंदुर परमेश्वर उन वचन याट वळ्लीद आद ईदुर्द अनुभव माळ्यार.
HEB 6:6 अगर आंदुर आंदुर्द विश्वास देल भटकुसेदार रा आंदरी मन तिर्गुसोर साटी मात्‍त वापस तरोद असंभव आद; यतिकी आंदुर परमेश्वर उन पार उक मात्‍त क्रूस मा येर्सतार, तथा आऊक सार्वजनिक रूप देल अपमान इन विषय बन्सतार.
HEB 6:7 आ धरती जो हमेशा बिळावाळा बरसात इन नीर इक सोक्स बुळतद, जो जोतसावाळेर अदिक बोऊसावाळेर साटी उपयोगी फसल प्रदान माळतद, अद मुण्ण परमेश्वर से आशीष ताकोमतद.
HEB 6:8 लेकीन आ धरती मुळ्ल अदिक घासपुस पैदा माळतद, रा अद बेकार इन आद अदिक अद परमेश्वर उन दी टु श्रापित आगदुर मा आद अदिक अदुर्द अन्त होताक्‍कु आगोद हुन.
HEB 6:9 हे प्रिय संगीगोळा, नाव भला ईत्‍ता प्रकार इन मातगोळ चाहसतेव लेकीन नीम बारा दा नामी ईदुर से भी वळ्लीद मातगोळ्द आत्मविश्वास आद अव मातगोळ जो नीम विश्वास से जुळ्सकु आव.
HEB 6:10 नीव परमेश्वर उन लॉकुर्द लगातार मदत माळतेला जो प्यार तोर्सीर, अदरी अदिक नीम दुसरा क्याल्सागोळी परमेश्वर यागलु मारूतीदिल, आव अन्यायी हैलेच.
HEB 6:11 नाव चाहसतेव की नीम दा टु हर ऊंद आखरी ताका हिंग अच मेहनत माळतेला ईरूल, ताकी नीव निश्चय अदरी हासिल माळ सकीर यदुर्द नीव आशा माळतेला ईतीर.
HEB 6:12 नाव चाहसालेव कि नीव आलसी आगेगी, बल्‍की आंदुर्द अनुकरण माळी जो विश्वास अदिक धीरज इन सांगुळ आ वस्तुगोळी हासिल माळेत्यार यऊर्द परमेश्वर प्रतिग्या माळ्यान.
HEB 6:13 परमेश्वर अब्राहम से प्रतिग्या हाळाहोती याग किर्‍या तीनोर साटी यारीकु तान से धोड्डेव नोळीदील, रा तांद अच किर्‍या तिंदुन,
HEB 6:14 अदिक अंदुन “ना सही दा नीनी हापाळ आशीष कोळाईन, अदिक नीनी अनेक वंशज कोळाईन.”
HEB 6:15 अदिक ईत्‍ता रीति देल अब्राहम धीरज हुडुकु परमेश्वर उन माळ्द प्रतिग्यागोळी हासिल माळदुन.
HEB 6:16 मंळसा रा तान से यातारा धोड्डेव मंळसा अन किर्‍या तीनतार, अदिक अद किर्‍या सप्पा तर्क विर्तकगोळ्द अन्त माळकु जो येनारा अंदकु आगतद, अदरी पक्‍का माळ बुळतद.
HEB 6:17 परमेश्वर उन माळ्द प्रतिग्या अक हासिल माळावाळेर इक परमेश्वर स्पष्ट माळकोमोद चाहासतान कि आव तान उद्देश इक यागलु बदलुसालुन इदुरसाटी आव तान प्रतिग्या अन सांगुळ तान किर्‍या अक जोळ्स बुट्टुन.
HEB 6:18 ईल येढ्ढ मातगोळ आव आऊन प्रतिग्या अदिक आऊन किर्‍या जो यागलु बदलुस सकालव, अदिक यऊर बारा दा परमेश्वर यागलु ख्वाटा माताळ सकालुन. इदुरसाटी नाव जो परमेश्वर उन हात्‍ती सुरक्षा ताकोमोर साटी बंदेव, अदिक जो आशा आव नामी कोटान अदरी हुडुकु हापाळ उत्साहीत आयेव.
HEB 6:19 अद आशा नाम जीव इन साटी ईत्‍ता लंगर आद जो स्थिर अदिक मजबूत आद, अदिक परदा अन बुळ्क इन पवित्र जागा ताका पहुचुसतद,
HEB 6:20 यल यीशु नाम दी टु नाम से पयले प्रवेश माळदुन, अदिक मलिकिसिदक इन परंपरा दा हमेशा हमेशा साटी प्रमुख याजक बनसेदुन.
HEB 7:1 ईव मलिकिसिदक शालेम इन राजा ईरोन, अदिक परमप्रधान परमेश्वर उन याजक ईरोन. याग अब्राहम नाक राजागोळी युद्ध दा पराजीत माळकु वापस आगोन आग मलिकिसिदक अब्राहम उक सिकदुन अदिक आऊक आशीष कोट्टुन.
HEB 7:2 अदिक अब्राहम आ सप्पा दा टु जो आव युद्ध दा जीकसीदुन अदुर्द दसवा हिस्सा कोट्टुन. मलिकिसिदक उन हेसुर इन पयला मतलब आद न्यायीपन इन राजा, अदिक अदुर्द ईद भी मतलब आद, “शालेम उन राजा” मतलब “शांती इन राजा.”
HEB 7:3 यार आप्प, मोय, अदिक पुर्वजगोळ्द यातोदु इतिहास सिकाल, आऊन जनम या मृत्यु उन भी यातोदु उल्लेख हैलेच; लेकीन परमेश्वर उन पार उन घाई इच हमेशा अन साटी याजक बन्सकु ईरतान.
HEB 7:4 थ्वाळासा विचार माळी कि आव याट महान ईरोन यारी कुलपती अब्राहम युद्ध दा हासिल माळ्द माल इन दसवा हिस्सा कोट्टुन.
HEB 7:5 अदिक लेवी इन वंशज दा टु जो याजक इन पद हासिल माळतार, आंदरी व्यवस्था अन अनुसार आग्या सिक्याद कि इस्राएल इन लॉकुर से मतलब तान खुद इन लॉकुर से, दसवा हिस्सा ताकोम बाक आंदुर अब्राहम उन वंशजगोळ्द भी वंशज येती आगबाळुल.
HEB 7:6 लेकीन मलिकिसिदक, जो लेवी वंशज दाकळव भी ईला ईरोन, अब्राहम से दसवा हिस्सा ताकोंडुन, अदिक आ अब्राहम उक आशीषगोळ कोट्टुन यार हात्‍ती परमेश्वर उन प्रतिग्यागोळ ईरव.
HEB 7:7 इदुर्दा येनु शक हैलेच कि जो आशिर्वाद कोळतान आव आर्शिवाद ताकोमावाळा से धोड्डेव ईरायदुन.
HEB 7:8 यल ताका लेवीगोळ सवाल आद आंदुर दा दसवा हिस्सा आ मंळसागोळ द्वारा संघरूसकु आगतद जो मंळसागोळ सायतार लेकीन मलिकिसिदक उन यल ताका सवाल आद दसवा हिस्सा आऊन द्वारा संघरूसकु आगाईत जो शास्त्र अन अनुसार ईग भी जित्‍ता आन.
HEB 7:9 रा नाव ईद भी अन सकतेव कि लेवी भी, जो दसवा हिस्सा ताकोमतान, अब्राहम उन द्वारा दसवा हिस्सा कोट्टुन.
HEB 7:10 यतिकी याता समय मलिकिसिदक अब्राहम से भेंट माळीदुन, आग रा लेवी इन जनम भी ईला आगित आव रा तान पुर्वजगोळ्द शरीर दा ईरोन.
HEB 7:11 अगर लेवी याजकता अन परंपरा अन द्वारा संपुर्णता हासिल माळकु आग सकोद रा यावारा दुसरा याजक उन बरोद अच येन जरवत ईरोद? यतिकी ईदुर दा आधार मा लॉकुरी व्यवस्था भी कोटकु आगित, ऊंद हिंग याजक उन येन जरवत ईरोद जो मलिकिसिदक उन परंपरा नव ईरूल ना कि हारून उन परंपरा नव.
HEB 7:12 यतिकी याग याजक उन पद बदलुसेगतद, रा व्यवस्था अन भी बदलुसोद जरूरी आद.
HEB 7:13 यतिकी नाम प्रभु उन बारा दा ईव मातगोळ अनकु आगताव कि आव दुसरा गोत्र इनव हुन, यार गोत्र दा टु याऊ याजक उन रूप दा वेदी इन स्यावा माळीदिल,
HEB 7:14 रा प्रगट आद कि नाम प्रभु यहूदा अन गोत्र दा टु पैदा आग्यान, अदिक ई गोत्र अन बारा दा मूसा याजक पद इन येनु चर्चा माळीदिल.
HEB 7:15 नाम दावा मात्‍त स्पष्टता देल प्रगट आगेगतद, याग मलिकिसिदक उन घाई दुसरा याजक पैदा आगतान,
HEB 7:16 जो शारीरिक आग्यागोळ अन नियमगोळ अनुसार ईला, लेकीन अविनाशी जीवन इन सामर्थ्य अन अनुसार याजक बनस्यान.
HEB 7:17 यतिकी शास्त्र अनतद, “नी मलिकिसिदक उन रीति मा युगानुयुग याजक आय.”
HEB 7:18 पयला नियम इदुरसाटी रद्द माळकु आत, यतिकी अद कमजोर अदिक व्यर्थ ईरोद.
HEB 7:19 इदुरसाटी कि मूसा अन्द व्यवस्था यारीकु पुरा सिद्ध माळ सकिदील. अदिक ईग आऊन जागा मा ऊंद हिंग वळ्लीद आशा ईटकु आग्याद यदुर द्वारा नाव परमेश्वर उन हात्‍ती होग सकतेव.
HEB 7:20 मसीह अन नियुक्ती परमेश्वर उन किर्‍या अन्द द्वारा आत लेकीन दुसरा अक बिना किर्‍या अन्द अच याजक माळकु आगीत.
HEB 7:21 लेकीन यीशु आग ऊंद किर्‍या देल याजक बन्सीदुन, याग परमेश्वर आऊन से अंदिदुन, “प्रभु किर्‍या तिंदान अदिक आव तान मन यागलु बदलुसतिदील, ‘नी हमेशा साटी याजक बन्सकु ईत्या.’”
HEB 7:22 ई किर्‍या अन कारण यीशु मात्‍त ऊंद वळ्लीद वाचा अन्द हमी बनसेदुन.
HEB 7:23 ईग नोळी, हिंग हापाळ सा याजक ईरतोगोर लेकीन आंदरी मृत्यु आंदुर पदगोळ मा कायम ईर गोटीदील,
HEB 7:24 लेकीन यीशु अमर आन, अदिक आऊन याजक इन क्याल्सा हमेशा हमेशा साटी बन्सकु ईरोदाद.
HEB 7:25 इदुरसाटी जो आऊन द्वारा परमेश्वर उन हात्‍ती बरतार, आव आंदुर पुरा रीति देल उद्धार माळदुर दा समर्थ आन यतिकी आव परमेश्वर से आंदुर साटी विनती माळली हमेशा जित्‍ता आन.
HEB 7:26 हिंगा महायाजक नाम जरवतगोळी पुरा माळ सकतान. आव पवित्र आन, आव निर्दोष आन अदिक आऊन दा यातोदु पाप हैलेच, आव पापीगोळ से भी ब्यार्र माळकु आग्यान, अदिक स्वर्ग से भी आऊक म्याकुच नेगुकु आग्याद.
HEB 7:27 आ दुसरा महायाजकगोळ घाई आऊक जरूरी हैलेच कि हर रोज पयले तान पापगोळी अदिक बाक लॉकुर पापगोळ साटी बलिदान येर्सुल; यतिकी आव तान तान इक बलिदान येर्सकु अदरी ऊंद अच घन दा पुरा माळ कोंडुन.
HEB 7:28 मूसा अन्द व्यवस्था मंळसागोळी जो पुरा हैलेच आंदरी महायाजक नियुक्त माळतद, लेकीन परमेश्वर उन प्रतिग्या आऊन किर्‍या अन सांगुळ बन्सकु आग्याद ईद प्रतिग्या व्यवस्था अन्द बाद्दा बंदाद अदिक ई प्रतिग्या प्रमुख याजक उन रूप दा पार उक नियुक्त माळ्याद जो हमेशा हमेशा साटी आद अदिक परिपुर्ण बन्सकु ईरतद.
HEB 8:1 ईग जो मातगोळ नाव अनतेव आंदुर दा टु अदुर्दा सब से धोळ्द मात ईद आद कि नाम ईत्‍ता महायाजक आन, जो स्वर्ग मा महा महिमा अन्द सिंहासन इन ऊमा कय दी होगकु कुरतान,
HEB 8:2 अदिक पवित्र जागा दा मतलब खरा तम्बू दा यदरी परमेश्वर स्थापित माळ्यान ना कि मंळसा, आ जागा दा आव महायाजक क्याल्सा माळतान.
HEB 8:3 यतिकी हर ऊंद महायाजक भेंट अदिक बलिदान येरसोर साटी ठहरूस्कु आगतान, ईद कारण जरूरी आद कि ई याजक उन हात्‍ती भी येनारा येर्सली ईरूल.
HEB 8:4 अगर आव पृथ्वी मा ईरायदुन रा यागलु याजक ईला आगायदुन, यतिकी अल पयले टु अच हिंग याजक आर जो यहूदी व्यवस्था अन्द अनुसार भेंट येर्सतार.
HEB 8:5 जो याजकपन इन क्याल्सा आंदुर माळतार, अद स्वर्ग दा जो आद अदुर्द ऊंद सावली अदिक प्रतीकृती आद. ईद हांगा प्रकार आद याग मूसा पवित्र तम्बू उन निर्माण माळावाळा अच ईरोन आग परमेश्वर आऊन से अंदिदुन, “ध्यान दा ईरूल कि नी हर चीज बराबर अदा प्रतिरूप इन अनुसार माळ जो नीनी पहाळी मा तोर्सकु आगीत.”
HEB 8:6 लेकीन आ याजकगोळ से वाळुसकु स्यावा यीशु उक सिक्त यतिकी आव मात्त वळ्लीद-वळ्लीद वाचा अन मध्यस्थ ठहरूसदुन, जो मात्त वळ्लीद प्रतिग्यागोळ आसरा देल कटकु आग्याद.
HEB 8:7 यतिकी अगर अद पयला वाचा निर्दोष ईराईत, रा दुसरा वाचा साटी येनु जरवत ईला ईराईत.
HEB 8:8 लेकीन परमेश्वर उक आ लॉकुर दा दोष सिक्त अदिक आव अनतान, “प्रभु अनतान, नोळी, अव दिन बरताव कि ना इस्त्राएल इन लॉकुर सांगुळ, अदिक यहूदा अन्द लॉकुर सांगुळ व्हाशोद वाचा कटाईन.
HEB 8:9 ईद आ वाचा अन घाई ईरतीदील, जो ना आंदुर आप्प-दादागोळ सांगुळ आ समय कटकु आगीत, याग ना आंदुर्द कय हुळकु आंदरी मिस्त्र द्याश टु तेगुकु तंदीन; यतिकी आंदुर नान वाचा मा विश्वासयोग्य ईतीदील यदरी ना आंदुर सांगुळ कटीदिन, अदिक इदुरसाटी ना आंदुर मा ध्यान हचीदिल.
HEB 8:10 बाक प्रभु अनतान, कि जो वाचा ना आ दिनगोळ बाद्दा इस्त्राएल इन घराना अन सांगुळ कटाईन, अद ईद हुन कि ना तान व्यवस्था अक आंदुर मनगोळ दा हाकाईन, अदिक अदरी आंदुर दिलगोळ मा लिख्साईन, अदिक ना आंदुरव परमेश्वर ठहरूसाईन अदिक आंदुर नान लॉकुर ठहरूस्यार.
HEB 8:11 अदिक यावारा भी तान संगीगोळी अदिक मान्ना हात्‍तीवाळेर वार्टुर इक ईद शिक्षा कोळतीदील, कि नी प्रभु उक अरू, यतिकी स्याण हाती टु धोड्डेर ताका सप्पा नानी अर्त कोंडार.
HEB 8:12 ना आंदुर पापगोळी माफ माळाईन अदिक यागलु आंदुर पाप याद ईटतिदिल.”
HEB 8:13 ई वाचा अक व्हाशोद अंदकु आव पयला वाचा अक हाळोद माळ बुट्टुन अदिक जो हाळोद अदिक जीर्ण आगेगतद अद रा बाक राटनेरी गायब आगेदीत.
HEB 9:1 ईग नोळी आ पयला वाचा दा भी उपासना माळोद नियम ईरव, अदिक ऊंद उपासना अन्द जागा ईरोद जो मंळसा अन द्वारा माळकु आगीत.
HEB 9:2 ऊंद तम्बू माळकु ईरोद, यदुर्द पयला कमरा दा दिंग्या ईटोद जागा, अदिक मेज अदिक परमेश्वर उक भेंट माळव रोट्टीगोळ ईरव; अदिक आ जागा अक पवित्र जागा अंदकु आगतोगोद.
HEB 9:3 दुसरा परदा अन हिंद मात्‍त ऊंद कमरा ईरोद, यदरी परम पवित्र जागा अंदकु आगतोगोद.
HEB 9:4 ईऊर दा सुगन्धित धूपदानी इन साटी व्हान्ना अन वेदी, अदिक व्हान्ना देल मळुस्द वाचा अन्द संदुक ईरोद ई संदुक दा व्हान्ना अन्द माळ्द मन्ना अन्द ऊंद जार इरोद, अदिक हारून उन आ छळी ईरोद यदुर मा अंकुर बेळ्दीदव अदिक येढ्ढ कल्ल यदुर मा आग्यागोळ लिख्सकु ईरव.
HEB 9:5 संदुक इन म्याकुच परमेश्वर उन उपस्थिती इन प्रतिक मतलब करूब बन्सकु ईरव जो तान पिक्‍कागोळी फैलुसकु माफ अन जागा मा सावली माळतोगव. लेकीन ई समय नाव ईव मातगोळ्द विस्तार देल चर्चा माळ सकालेव.
HEB 9:6 सप्पा येनारा संची आगदुर बाद्दा याजक पयला कमरा दा हर रोज प्रवेश माळकु तान स्यावा अन्द कार्य पुरा माळोर साटी होगतोगोर.
HEB 9:7 लेकीन परदा अन बुळ्क इन दुसरा कमरा दा सिर्फ प्रधान याजक अच साल दा ऊंद अनली प्रवेश माळतोगोन, आव बिना आ रक्ता अन यागलु प्रवेश ईला माळतोगोन यदरी आव तान द्वारा अदिक तान लॉकुर द्वारा अनजाना दा माळ्द पापगोळ साटी परमेश्वर उक भेंट येर्सतोगोन.
HEB 9:8 ईदुर द्वारा पवित्र आत्मा स्पष्ट रीति देल ईद कल्सतद कि यागासताका ताका पयला तम्बू निदुरकु आद आगासताका ताका परम पवित्र जागा अन्द हादी ईगासताका तेरकु ईला ईरोद.
HEB 9:9 ईद ऊंद तम्बू हुन जो वर्तमान समय इन साटी ऊंद उदाहरण आद; मतलब यदुर्दा उन ईत्‍ता भेंट अदिक बलिदान येर्सदुर बाद्दा भी आराधना माळावाळेर मन सिद्ध आग सकालव.
HEB 9:10 ईद रा सिर्फ तिनोद कुडोद अदिक अलग-अलग प्रकार इन सुद्धिकरणगोळ्द विधीगोळ हुव. अद तम्बु यदुर दा आव स्यावा माळतान अद यक्कुल वळ्लीद परिपुर्ण तम्बु हुन अद मंळसागोळ्द कय इन माळ्द तम्बु आल्लच अदिक अद ई संसार इन निर्मिती इन भाग आल्लच.
HEB 9:11 लेकीन जो मातगोळ पयले टु अच ईल आव हिंग वळ्लीद वस्तुगोळ्द याग मसीह पयले टु प्रधान याजक बन्सकु बंदान. रा आव मात्‍त यक्कुल धोळ्द अदिक सिद्ध तम्बू टु आगकु, जो मंळसा अन कय इंद बन्सकु ईला मतलब ई सृष्टी इन ईला,
HEB 9:12 अदिक व्हातगोळ अदिक वस्तागोळ रक्ता अन द्वारा ईला लेकीन तांद अच रक्ता अन द्वारा, मसीह ऊंद अच घन तम्बु दा टु आगतेला महापवित्र जागा दा प्रवेश माळदुन अदिक नाम साटी पापगोळ देल अनन्त छुटकारा प्राप्त माळदुन.
HEB 9:13 यतिकी याग व्हातगोळ अदिक वस्तागोळ्द रक्ता अदिक होद्द पाड्डगोळ्द राकळ इक विधी इन अनुसार अशुध्द लॉकुर मा छिळकुसदुर देल आंदुर शुद्ध आगेगतार अदिक विधी इन अनुसार आंदुर अशुध्दता व्हार्यागोळ्द रीति देल होटोगतद.
HEB 9:14 याग ईद सही आद रा मसीह अन रक्ता याट प्रभावशाली ईतीदाद, आव अनन्त आत्मा अन द्वारा तान तान इक ऊंद संपुर्ण बली इन रूप दा परमेश्वर उक समर्पित माळ बुट्टुन. रा आऊन रक्ता नाम चेतना अक आ कर्मगोळ देल कोळसुसित जो मृत्यु दी ओयतार कि नाव जित्‍ता परमेश्वर उन स्यावा माळ सक्‍केव.
HEB 9:15 ईदा कारण मसीह ऊंद व्हाशोद वाचा अन्द मध्यस्थ आदुन, ताकी यारी परमेश्वर उन द्वारा कारूकु आग्याद आंदुर परमेश्वर उन प्रतिग्या माळ्द अनन्त आशिषगोळ्द वारीस आग सकुल. ईग नोळी पयला वाचा अन हात्‍ती ता दा माळ्द पापगोळ से मुक्त माळोर साटी फिरोती इन रूप दा आव तान जीव कोट बुटान.
HEB 9:16 यल ताका वसीयत नामा अन सवाल आद रा अदुर साटी याव आऊक माळ्यान आऊन मृत्यु उक प्रमाणित माळोद जरूरी आद.
HEB 9:17 यतिकी यातोदारा भी वसीयत नामा सिर्फ आगा प्रभावित आगतद याग अदुर्द लिखसावाळा अन मृत्यु आगेगतद, यागासताका अदुर्द लिखसावाळा जित्‍ता ईरतान रा अदुर्द यागलु प्रभावित बिळाल.
HEB 9:18 इदुरसाटी पयला वाचा भी रक्ता अन्द इस्तेमाल द्वारा प्रभावित आत.
HEB 9:19 पयले मूसा याग व्यवस्था अन विधान इन सप्पा आदेशगोळी सप्पा लॉकुरी घोषणा माळ कोंडान रा आव नीर इन सांगुळ व्हातगोळ अदिक पाड्डगोळ्द रक्ता अक क्याचांद इन अदिक हिस्सप इन डगालगोळ देल व्यवस्था अन किताब अदिक सप्पा लॉकुर मा छिळकुस बुटीदुन.
HEB 9:20 अदिक आव अंदिदुन, “ईद आ वाचा अन रक्ता हुन, यदरी पालसोद आग्या परमेश्वर नीमी कोटान.”
HEB 9:21 अदिक ईदा रीति देल आव तम्बू अदिक उपासना माळोद सप्पा वस्तुगोळ मा रक्ता छिळकुसदुन.
HEB 9:22 वास्तव दा व्यवस्था अन अनुसार लगभग रक्ता द्वारा अच सप्पा वस्तुगोळ शुद्ध आगताव, अदिक बिना रक्ता वाहुस्द पापगोळी माफ हैलेच.
HEB 9:23 रा बाक ईद जरूरी आद कि अव वस्तुगोळ जो स्वर्ग इन प्रतिकृती आव अवरी जनावरगोळ्द बलिदानगोळ से शुद्ध माळकु आगुल लेकीन स्वर्ग टु वस्तुगोळ रा ईऊर से भी वळ्लीद बलिदानगोळ देल शुद्ध माळकु आगोद अपेक्षा माळतद.
HEB 9:24 यतिकी मसीह मंळसागोळ्द कय इन माळ्द पवित्र जागा दा, जो खरा पवित्र जागा अन नमुना आद, प्रवेश माळीदिल लेकीन स्वर्ग दा अच प्रवेश माळदुन, ताकी नाम दी टु परमेश्वर उन मुंद प्रगट आगुल.
HEB 9:25 ईद ईला कि आव तान तान इक घळी-घळी बली येर्सुल, ह्यांग कि महायाजक हर साल पशुगोळ रक्ता हुडुकु पवित्र जागा दा प्रवेश माळतान,
HEB 9:26 ईलारा दुनिया अन उत्पत्ति टु हुडुकु मसीह अक घळी-घळी दुख नेगोद बिळाईत; लेकीन ईग युग इन अन्त दा आव ऊंद अच घन सप्पा मुंदुर साटी प्रगट आग्यान, ताकी तांद अच बलिदान इन द्वारा पाप इक दुर माळ बुळुल.
HEB 9:27 अदिक ह्यांग मंळसागोळ साटी ऊंद घन सायोद अदिक अदुर बाद्दा परमेश्वर उन द्वारा न्याय इन आगोद तय आद,
HEB 9:28 हांग अच मसीह भी हापाळ मंळसागोळ्द पापगोळी नेगोर साटी ऊंद घन बलिदान आदुन; अदिक जो लॉकुर आऊन हादी कायतार आंदुर उद्धार इन साटी ईग आव दुसरा घन प्रगट आदान रा पापगोळी दुर माळोर साटी ईला बल्‍की जो आऊन हादी कायेतार आंदरी उद्धार कोळोर साटी.
HEB 10:1 व्यवस्था रा बरावाळा वळ्लीद मातगोळ्द सिर्फ सावली हुन, लेकीन अद आ वास्तविक मातगोळ्द सप्पा अदिक वास्तविक मातगोळ्द दाखला ईला. इदुरसाटी अवा बलिगोळ द्वारा यवरी लगातार हर साल अनन्त रूप देल येर्सकु आगतद, आराधना अन साटी हात्‍ती बरावाळेर इक हमेशा साटी सम्पुर्ण सिद्ध माळकु आगसकाल.
HEB 10:2 अगर हिंग आग सकाईत रा येन अऊर्द येर्सकु आगोद बंद ईला आगेगाईत? यतिकी बाक रा उपासना माळावाळेर ऊंदा घन दा हमेशा साटी पवित्र आगेगायदुर अदिक तान पापगोळ साटी बाक यागलु तान इक दोषी ईला समसायदुर.
HEB 10:3 लेकीन हर साल येर्सद बलिगोळ मंळसागोळी आंदुर पाप याद तोर्सतद.
HEB 10:4 यतिकी वस्तागोळ अदिक व्हातगोळ्द रक्ता पापगोळी दुर माळुल, ईद संभव हैलेच.
HEB 10:5 इदुरसाटी याग मसीह दुनिया दा बंदीदुन रा आव अंदिदुन, “नीनी याऊ बलिदान अदिक भेंट चाहासीदिल, लेकीन नी नान साटी ऊंद शरीर तयार माळ्द.”
HEB 10:6 अग्नि-बलिगोळ्द अदिक पाप-बलिगोळ देल नी खुश आगीदील.
HEB 10:7 आग बाक ना अंदिदीन, अदिक ह्यांग व्यवस्था अन किताब दा भी लिख्सकु आद, “ना ईल आईन, हे परमेश्वर, नीन इच्छा पुरा माळोर साटी बंदीन.”
HEB 10:8 आव पयले अंदिदुन, “बलिगोळ अदिक भेंट, अग्नि-बलिगोळ्द अदिक पापबलीगोळ नी चाहसाल अदिक ना रा नी अऊर से खुश आगीद.” तरी भी व्यवस्था ईद चाहासतद कि अव येर्सकु आगुल.
HEB 10:9 बाक आव अंदिदुन, ना ईल आईन, नान नीन इच्छा पुरा माळोर साटी बंदीन, रा आव दुसरा व्यवस्था अक स्थापित माळोर साटी पयला रद्द माळ बुळतान.
HEB 10:10 परमेश्वर उन इच्छा देल नाव यीशु मसीह अन शरीर इन पयला अच घन बलिदान येर्सकु आगदुर द्वारा पवित्र माळकु आदेव.
HEB 10:11 हर ऊंद याजक हर रोज नीदुरकु तान न्याय इन कर्तव्यगोळी पुरा माळतान, अदिक ऊंद अच प्रकार इन बलिदान इक जो पापगोळी यागलु दुर माळ सकालव घळी-घळी येर्सतान.
HEB 10:12 लेकीन मसीह रा याजक उन रूप दा पापगोळ साटी, हमेशा साटी ऊंदा बलिदान येर्सकु परमेश्वर उन ऊम्मा कय दी होगकु कुरतुन,
HEB 10:13 अदिक अदा समय टु तान विरोधीगोळी परमेश्वर उन द्वारा कालगोळ्द पांळसी माळकु आगोद हादी कायेत्यान.
HEB 10:14 यतिकी आव ऊंद अच चढ़ावा अन द्वारा आंदरी जो पवित्र माळकु आगतार, हमेशा साटी पुरा सिद्ध माळ कोंडान.
HEB 10:15 अदिक पवित्र आत्मा भी नामी ईदा गवाही कोळतद; यतिकी अद पयले अनतद.
HEB 10:16 “प्रभु अनतान कि जो वाचा ना आ दिनगोळ बाद्दा आंदुर से कटाईन अद ईद हुन कि ना तान नियमगोळी आंदुर दिलगोळ मा मंळसाईन अदिक ना आंदुर मनगोळ मा लिख्साईन.”
HEB 10:17 बाक आव ईद अनतान, “ना आंदुर पापगोळी अदिक आंदुर अन्याय इन क्याल्सागोळी बाक यागलु याद माळतीदील.”
HEB 10:18 अगर ईंदुर्द पापगोळ्द माफ आगेग्याद, रा यातोदु बली इन येनु जरवत अच हैलेच.
HEB 10:19 इदुरसाटी हे वार्टुरा अदिक आकतींगेरा, यतिकी यीशु उन रक्ता अन द्वारा आ परम पवित्र जागा दा प्रवेश माळोद निडर आत्मविश्वास आद,
HEB 10:20 यारी आव परदा अन द्वारा, मतलब आऊन खुद इन शरीर इन द्वारा ऊंद व्हाशोद अदिक जित्‍ता हादी इन माध्यम नाम साटी तेर्द बुटान.
HEB 10:21 अदिक नाम हात्‍ती हिंग महान याजक आन, जो परमेश्वर उन मान्ना अन अधिकारी आन,
HEB 10:22 रा बरी, नाव खरा मन अदिक पुरा विश्वास इन सांगुळ, अदिक नामी मन इन दोष इन भावनागोळी शुद्ध माळोर साटी अदिक दिल मा रक्ता छिळकुसकु, अदिक शरीर इक शुद्ध नीर देल तोळकु परमेश्वर उन हात्‍ती होदेव.
HEB 10:23 बरी नाव तान आशा अन अंगीकार इक मजबूती देल हुडुकु ईत्‍तेव, यतिकी याव प्रतिग्या माळ्यान, आव विश्वासयोग्य आन;
HEB 10:24 अदिक बरी नाव ध्यान ईटाता कि नाव प्यार अदिक वळ्लीद क्याल्सागोळ्द प्रती आबुर दाबुर इक ह्यांग मदत माळ सकतेव,
HEB 10:25 अदिक ऊंद सांगुळ सभागोळ दा बरोद तान ई आदतगोळी बिळबाळी, ह्यांग कि थ्वाळासा लॉकुरी अल ईला बरोद आदत बिदोग्याद, लेकीन आबुर दाबुरी मात्‍त यक्कुल प्रोत्साहित माळतेला ईरी; ह्यांग कि नीव नोळेतीर प्रभु उन दिन हात्‍ती बरेत्याद.
HEB 10:26 यतिकी सत्य अन पयचान हासिल माळदुर बाद्दा अगर नाव जान बुझुस्कु पाप माळतेला ईत्‍तेव, रा पापगोळ साटी बाक यातोदु दुसरा बलिदान मिक्‍कु हैलेच.
HEB 10:27 उलटा बाक रा बरावाळा न्याय अदिक भीषण बेक्‍की इन अंज्क इन सांगुळ हादी कायोद अच सिर्फ मिक्‍कु ईरतद जो परमेश्वर उन विरोधीगोळी भसम माळ कोंडीत.
HEB 10:28 जो यावारा मूसा अन व्यवस्था अन पालन माळालुन, आऊन मा बिना दया माळ्द येढ्ढ या मुर मुंदुर गवाहगोळ्द गवाही मान्सकु कोंदकु आगतद,
HEB 10:29 रा विचार माळकोमी कि आव याट मात्त भारी दण्ड इन लायक ठहरूस्यान, याव परमेश्वर उन पार उक काल देल मेटदुन अदिक वाचा अन रक्ता अक, यदुर द्वारा आव पवित्र ठहरूस्कु आगीदुन, अपवित्र जान्सदुन, अदिक अनुग्रह अन आत्मा अन अपमान माळदुन.
HEB 10:30 यतिकी नाव आऊक अरूतेव, याव अंदिदुन, “बदला ताकोमोद नान क्याल्सा आद, ना अच बदला ताकोमाईन.” अदिक बाक आव ईद भी अनतान, कि “प्रभु तान लॉकुर्द न्याय माळ्यान.”
HEB 10:31 जित्‍ता परमेश्वर उन कय दा बिळोद भयानक मात आद.
HEB 10:32 लेकीन आ हिंदळोव दिनगोळी याद माळी, यदुर दा नीव परमेश्वर उन ऊजुळ हासिल माळकु, अदिक अदुर बाद्दा याग नीव मयनतगोळ्द सामना माळतेला कठोर संघर्ष दा मजबूती इन सांगुळ बन्सकु ईत्‍तीर.
HEB 10:33 आग यागल्यारा रा सप्पा लॉकुर मुंद नीमी अपमानीत अदिक सतुसकु आत अदिक यागल्यारा यार सांगुळ हिंग बर्ताव माळकु आगतोगोद, नीव आंदुर साथ कोट्टीर.
HEB 10:34 यतिकी नीव कैदीगोळ दुख दा भी सहभागी आदीर, अदिक तान संपत्‍ती भी खुशी देल लुटुस गोट्टीर; ईद जान्सकु कि नीम हात्‍ती ऊंद मात्‍त वळ्लीद अदिक हमेशा ठहरूसावाळा संपत्‍ती आद. जो हमेशा साटी बन्सकु ईरतद.
HEB 10:35 इदुरसाटी तान निडर आत्मविश्वास बिळबाळी यतिकी अदुर्द प्रतिफल धोळ्द आद.
HEB 10:36 यतिकी नीमी धीरज ताकोमोद जरूरी आद, ताकी परमेश्वर उन इच्छा अक पुरा माळ सकीर अदिक जो प्रतिग्या माळकु आग्याद अदरी हासिल माळीर.
HEB 10:37 “यतिकी ह्यांग शास्त्र अनतद, हापाळ जल्दी जो बरावाळा आन आव बंदान आव बिलकुल समय हचतिदील.
HEB 10:38 नान सच्चाई देल नळावाळेर लॉकुर विश्वास देल जित्‍ता ईत्‍तार; अदिक अगर आंदुर दा टु यावारा हिंद हटस्यान रा ना आऊन से खुश ईरतीदील.”
HEB 10:39 लेकीन नाव आंदुर दा टु हैलेच जो हिंद हट्सतार अदिक नाश आगेगतार उलटा आंदुर दा टु आयेव जो विश्वास माळतार अदिक ऊळ्सकु आगतार.
HEB 11:1 विश्वास इन मतलब आद यार्द आशा हचकु ईटतेव आऊन साटी निश्चित आगोद, अदिक यातोदारा वस्तु उक नाव चाहे नोळालेव अदुर अस्तित्व अन बारा दा निश्चित आगोद अच विश्वास हुन.
HEB 11:2 ईदा कारण स्याणा लॉकुर काल इन लॉकुरी आंदुर विश्वास इन द्वारा परमेश्वर उन सहमती हासिल आगित.
HEB 11:3 विश्वास देल अच नाव जान्स कोमतेव कि पुरा दुनिया अन्द रचना परमेश्वर उन शब्द अन द्वारा आग्याद. इदुरसाटी जो माळ्द मातगोळ दृश्य आव, अव दृश्य देल अच बनसीदील.
HEB 11:4 विश्वास इन द्वारा अच हाबील परमेश्वर उक कैन से वळ्लीद बलिदान येर्सीदुन, अदिक आऊन विश्वास इन द्वारा अच सच्चाई देल नळावाळा मंळसा आगोद सहमती परमेश्वर से हासिल माळदुन; यतिकी परमेश्वर खुद अच आऊन दानगोळी सहमती कोट्टुन. ईदुर मतलब हाबिल विश्वास इन कारण अच ईंद भी माताळतान, याग कि आव सोतोग्यान.
HEB 11:5 विश्वास देल अच हनोक नेगुकु आदुन कि मृत्यु उक नोळबाळुल, अदिक आऊक याऊ ढुंढ्स सकिदील यतिकी परमेश्वर आऊक म्याकुच नेगु कोंडीदुन, शास्त्र अनतद कि हनोक उन म्याकुच नेगा से पयले आव परमेश्वर उक प्रसन्न माळीदुन.
HEB 11:6 अदिक विश्वास बिना परमेश्वर उक खुश माळोद असंभव आद; यतिकी जो परमेश्वर उन हात्‍ती बरतान आऊक विश्वास माळ पाहीजे यतिकी परमेश्वर उन अस्तित्व आद अदिक आंदरी प्रतिफल कोळतान जो आऊक ढुंढ्सतार.
HEB 11:7 विश्वास इन कारण देल अच नूह अक याग परमेश्वर उन द्वारा अव भविष्य अन मातगोळ्द बारा दा चेतावनी कोटकु आगित जो आव नोळीदुन भी ईला, रा आव पवित्र अंज्क पुर्वक तान परिवार इक ऊळसोर साटी ऊंद ड्वांगा अन निर्माण माळीदुन. परिणाम स्वरूप आऊन विश्वास इन द्वारा अच आव दुनिया अक दोषी ठहरूसदुन; अदिक विश्वास इन द्वारा परमेश्वर से बरावाळा न्यायीपन इक हासिल माळदुन.
HEB 11:8 विश्वास देल अच अब्राहम उक याग परमेश्वर कारदुन रा आग्या मान्सकु ईत्‍ता जागा दा होटोदुन यदुर्द परमेश्वर प्रतिग्या माळीदुन; अदिक आव ईला जानसोन कि आव यल होगेत्यान, तरी भी तान द्याश बिट बुट्टुन.
HEB 11:9 विश्वास इन कारण अच प्रतिग्या माळ्द धरती मा आव ऊंद अनजाना परदेशी घाई तान मान्ना माळकु निवास माळदुन. आव तम्बूगोळ दा हांगा ईत्‍तुन ह्यांग इसहाक अदिक याकूब ईतिदुर जो आऊन सांगुळ परमेश्वर उन अदा प्रतिग्या अन उत्‍तराधिकारी ईरोर.
HEB 11:10 अब्राहम आ नगर इन हादी कायोन, यदरी परमेश्वर आकार कोटकु माळदुन अदिक हमेशा मजबूत ईरावाळा पायवा हाकदुन.
HEB 11:11 विश्वास इन कारण अच अब्राहम जो हापाळ बाट्ट आगेगिदुन अदिक सारा जो खुद वांझला ईरोर, लेकीन आक परमेश्वर मा विश्वास माळदुर कि आव आकिन प्रतिग्या पुरा माळतान अदिक अब्राहम आप्प बन्सेदुन.
HEB 11:12 ईद कारण अब्राहम देल अच, जो सोत्‍तुर घाई ईरोन, आकाश ईनव तारागोळ अदिक समुद्र अन धुळा घाई अनगिनत वंशज पैदा आदुर.
HEB 11:13 विश्वास इक तान मन दा हुडुकु ई सप्पा लॉकुर सोतोदुर; याता वस्तुगोळ्द परमेश्वर प्रतिग्या माळीदुन आंदुर ई वस्तुगोळ हासिल माळीदिल, आंदुर बस अवरी दुर टु ना नोळदुर अदिक अऊर्द स्वागत माळदुर अदिक आंदुर ईद खुला हिसाब देल मान्स कोंडुर कि आंदुर ई धरती मा परदेशी अदिक अनजाना आर.
HEB 11:14 आ लॉकुर जो ईत्‍ता मातगोळ अनतार, आंदुर ईद तोर्सतार कि आंदुर ऊंद ईत्‍ता द्याश इन खोज दा आर जो आंदुर्द खुद इन आद.
HEB 11:15 जो द्याश आंदुर बिटार अदुर बारा दा आ लॉकुर विचार माळतेला ईरालुर, अगर विचार माळतेला ईरायदुर रा आंदरी मात्‍त वापस बरोद मौका ईराइत.
HEB 11:16 लेकीन आंदुर ऊंद वळ्लीद मतलब स्वर्गीय द्याश इन अभिलाषी आर; इदुरसाटी परमेश्वर आंदुर परमेश्वर कहलुसली सरमुसालुन, यतिकी आव आंदुर साटी ऊंद नगर तयार माळ्यान.
HEB 11:17 विश्वास इन कारण अच अब्राहम, याग परमेश्वर आऊन परीक्षा ताकोमोन, तान पार इसहाक उक बलिदान इन रूप दा भेंट कोट्टुन; अब्राहम आव ईरोन यार से परमेश्वर प्रतिग्या माळीदुन तरी भी आव तान ऊंद ठैसा पार उक बली येरसोर साटी तयार ईरोन.
HEB 11:18 रा इदुरसाटी परमेश्वर आऊन से अंदिदुन, “इसहाक उन द्वारा अच नीन वंश वाळुसित.”
HEB 11:19 अब्राहम विचार माळीदुन परमेश्वर इसहाक उक सोत्‍तुर दा टु भी जित्‍ता माळ सकतान, अदिक हांग नोळकु आगुल रा ऊंद प्रकार देल अब्राहम इसहाक उक मृत्यु दा टु मात्‍त वापस नोळदुन.
HEB 11:20 विश्वास देल अच इसहाक याकूब अदिक एसाव उक आंदुर भविष्य अन बारा दा आशीष कोट्टुन.
HEB 11:21 विश्वास देल अच याकूब साया होती यूसुफ उन येढ्ढु पारगोळ दा टु ऊंद ऊंद पार उक आशीष कोट्टुन, अदिक तान कोल इन सहारा ताकोमकु परमेश्वर उन आराधना माळदुन.
HEB 11:22 विश्वास देल अच यूसुफ, याग आव सायदुर मा ईरोन, रा इस्त्राएलगोळी मिस्त्र टु होटकु होगोद बारा दा माताळीदुन, अदिक तान अस्थीगोळ सांगुळ येन माळ पाहीजे अदुर निर्देश हेळीदुन.
HEB 11:23 विश्वास देल अच मूसा अन मोय आप्प आऊक पैदा आगदुर बाद्दा मुर तिंगुळ ताका होचकोमकु ईटदुर; यतिकी आंदुर नोळदुर, कि चिग्द सुंदर आद, अदिक आंदुर राजा अन्द आग्या मुरदुर देल अंजीदिल.
HEB 11:24 विश्वास देल अच मूसा धोड्डेव आगकु फिरौन उन पोर इन पार अंदकु आगली इनकार आदुन.
HEB 11:25 इदुरसाटी कि आऊक पाप दा थ्वाळासा दिन इन सुख भोगस्दुर देल परमेश्वर उन लॉकुर सांगुळ दुख भोगसोद यक्कुल वळ्लीद हत्‍त.
HEB 11:26 अदिक मसीह अन कारण निन्दीत आगली मिस्त्र अन भंडार देल धोळ्द धन सम्सदुन: यतिकी आऊन कण्ण भविष्य अन प्रतिफल हासिल माळदुर दी हतकु ईरव.
HEB 11:27 विश्वास देल अच राजा अन सिट्ट देल बिना अंजकु मूसा मिस्त्र अक बिट बुट्टुन, यतिकी मान्सी कि आऊक अदृश्य परमेश्वर कांळसोन.
HEB 11:28 विश्वास देल अच आव फसह अन हाब्बा अदिक कवाळ मा रक्ता छिळकुसोद पालन माळदुन, कि मृत्यु उन दूत इस्त्राएलीगोळ्द पैदा आग्द पयला औलादगोळी कोंद सकबाळुल.
HEB 11:29 विश्वास देल अच इस्त्राएली लॉकुर क्याचांद समुद्र अन आप्पाटी हिंग ईळदुर, ह्यांग कि वंळगींद जागा मा टु; अदिक याग मिस्त्रीगोळ हांग अच माळोद चाहासदुर, रा सप्पा नीर दा मुळकेदुर.
HEB 11:30 विश्वास देल अच यरीहो अन दिवार, याग येळ दिन ताका अदुर्द परिक्रमा इस्त्राएलीगोळ माळदुर रा अद बिदोत.
HEB 11:31 विश्वास देल अच राहाब वेश्या आग्या ईला मान्सावाळेर सांगुळ कोन्सुसकु आगीदील; यतिकी आक इस्त्राएली गुप्तचरगोळ संगीपना पुर्ण स्वागत माळीदुर.
HEB 11:32 ईग ना मात्‍त येन अनाईन? यतिकी समय ईतीदील, कि गिदोन, बाराक अदिक शिमशोन, यिफताह, दाऊद शमूएल अदिक भविष्यवक्तागोळ्द वर्णन माळाईन.
HEB 11:33 इंदुर विश्वास इन द्वारा अच राज्य जीक्स कोंडुर; जो सही अवा क्याल्सा माळदुर; अदिक परमेश्वर प्रतिग्यागोळ कोट्टुन अवरी हासिल माळदुर, आंदुर हुल्लीगोळव बाय बंद माळ बुट्टुर.
HEB 11:34 बेक्‍की इन लपटागोळी शांत माळदुर; तलवार इन धार देल उळ्दकु होट्टुर, निर्बलता दा ताकतवर आदुर; लळाई दा वीर होट्टुर; परदेशीगोळ फौजगोळ मा विजय हासिल माळदुर.
HEB 11:35 विश्वास इन द्वारा आर्तेर तान सोतकु रिश्तेदारगोळी मात्‍त जित्‍ता नोळदुर; यास रा सतुसतेला कोन्सुसकु आदुर; अदिक छुटकारा चाहासीदिल; इदुरसाटी आंदुर कि वळ्लीद जीवन इन पुनरूत्थान हासिल माळ सकुल.
HEB 11:36 हापाळ मुंदुर मज्याक हार्सकु आत; अदिक क्वाळागोळ्द सामना माळकु आत याग कि थ्वाळासा मुंदुरी संकलीगोळ देल कटकु बंदीगृह दा हाक्‍कु आत.
HEB 11:37 आंदुर मा पथराव माळकु आदव, आंदरी आरी देल सिळकु येढ्ढ भाग माळकु आदव, आंदरी तलवार देल मौत इन घाट ईळ्सकु आत. आंदुर गरीब ईरोर आंदरी यातनागोळ कोटकु आदव अदिक आंदुर सांगुळ बुरा व्यवहार माळकु आत. मर्री म्यांडागोळ तोगुल हाक्‍कु ईत्‍त आत्‍त भटकुसतेला ईत्‍तुर.
HEB 11:38 अदिक मरूस्थल, पहाळीगोळ, गुफागोळ दा अदिक धरती इन फुटगोळ दा वयाळदुर, ई दुनिया आंदुर लायक ईला ईरोद.
HEB 11:39 विश्वास देल अच आंदुर्द वळ्लीद लेखा जोखा ईटकु आत, तरी भी परमेश्वर उन प्रतिग्या माळ्द मातगोळ आंदरी सकिदील.
HEB 11:40 यतिकी परमेश्वर नाम साटी पयले टु ऊंद वळ्लीद योजना ठहरूसीदुन, आऊन उद्देश ईद ईरोद कि आंदरी भी नाम सांगुळ अच संपुर्ण सिद्ध माळकु आगुल.
HEB 12:1 यल ताका नाव गवाहगोळ्द हिंग धोळ्द बादल देल घेरस्कु आयेव, रा बाक बरी, हर ऊंद बादा हाकावाळा वस्तु उक अदिक आ पाप इक जो आसानी देल नामी ऊलझुस बुळतद अदरी भीट बुटेव, अदिक बरी, अद दवळ जो नामी ओळोद आद अदरी धिरज इन सांगुळ ओळेव,
HEB 12:2 अदिक नाम विश्वास इन कर्ता अदिक सिद्ध माळावाळा यीशु उन दी तान कण्णगोळी हचकु ईत्‍तेव. याव तान मुंद उपस्थित खुशी इन साटी क्रूस इन यातनागोळ झेल्सदुन, अदुर शरम इन येनु चिन्ता माळीदिल अदिक परमेश्वर उन सिंहासन इन ऊमा कय दी विराजमान आगेदुन.
HEB 12:3 इदुरसाटी आऊन मा ध्यान माळी, याव तान विरोध दा पापीगोळ्द ईट विरोध सहन माळदुन कि नीव निराश आगकु साहस बिट बुळतिदिल.
HEB 12:4 नीव लॉकुरी पाप इन विरोध दा संघर्ष माळतेला ईट सहन माळोद बिदिदील कि नीम रक्ता वाहुसिदाद;
HEB 12:5 येन नीव आ प्रोत्साहन इन शब्दगोळी, यारी परमेश्वर तान चिकोर सम्सकु नीम से अंदुन, येन नीव मारतोगीर? “हे नान पारा, याग परमेश्वर नीनी सुधरूस्यान आग ध्यान हच, अदिक याग आव नीन ताळना माळ्यान रा हताश आगबाळ.
HEB 12:6 यतिकी प्रभु यार से प्यार माळतान, आऊक सुधरूस्तान भी, अदिक यारी पार माळ कोमतान, आऊक दण्ड भी कोळतान.”
HEB 12:7 नीव दुख इक ताळना सम्सकु सहन माळकोमी; परमेश्वर नीमी पार जान्सकु नीम सांगुळ बर्ताव माळतान. हिंग याता पार हुन जो आप्प उन द्वारा सजा भोगसालुन?
HEB 12:8 अगर अद ताळना यदुर भागी सप्पा आगतार, नीम्द आगीदील रा नीव आऊन चिकोर आल्लच, लेकीन नीव घटिया मंळसा आईर.
HEB 12:9 बाक याग कि नाम शारीरिक आप्प भी नाम ताळना माळतोगोर अदिक नाव आंदुर्द आदर माळदेव, रा येन नाव आत्मिक आप्प उन यक्कुल हात्‍ती आगकु जीवन ईला बीतुसेव.
HEB 12:10 नाम शारीरिक आप्पगोळ थ्वाळासा समय इन साटी ह्यांग आंदुर वळ्लीद सम्सदुर नामी ताळना माळदुर, लेकीन परमेश्वर नाम भलाई इन साटी ताळना माळतान यदुर देल नाव आऊन पवित्रता अन सहभागी आग सक्केव.
HEB 12:11 वर्तमान दा हर ऊंद प्रकार इन ताळना आनन्द इन ईला, लेकीन अद दुखद हततद; तरी भी जो अदरी सहन माळ-माळकु पक्‍का आगेग्यार, बाद्दा आंदरी न्यायीपन इन जीवन अदिक शांती इन प्रतिफल हासिल आगतद.
HEB 12:12 इदुरसाटी थक्स कयगोळी नेगी अदिक निर्बल ट्वांगरागोळी मजबूत माळी,
HEB 12:13 अदिक तान कालगोळ साटी सीधा हादी माळी कि लंगळा भटकुस बाळुल लेकीन भला चंगा आगेगुल.
HEB 12:14 सप्पा मुंदुर सांगुळ शांती इन सांगुळ ईरली अदिक पवित्र जीवन जीऊसोर साटी हर प्रकार देल प्रयत्नशील ईरी, यतिकी इदुर बिना यावारा भी प्रभु उक नोळ सकतीदिल.
HEB 12:15 तान तान इन सावधानी माळी, ताकी यावारा परमेश्वर उन अनुग्रह देल हींद होगबाळुल. अदिक यावारा भी केय खांदी घाई वाळुस बाळुल, यतिकी आदुर जहर देल यातोदारा झगळा उत्पन्न आग ईला पाहीजे.
HEB 12:16 यावारा भी अनैतिक अदिक अन्यायी या एसाव उन घाई आगबाळुल याव ऊंद घन इन भोजन इन बदला तान धोळ पार आगोद अधिकार मार बुट्टुन.
HEB 12:17 अदुर बाद्दा नीव जान्सतीर कि याग आव तान आप्प उन से आशीष ताकोमोद चाहासदुन रा अयोग्य आळुकु आदुन, अदिक वर्ल-वर्लकु आव आशीष ताकोमोद कोशिश माळदुन तरी भी आऊक आऊन पाप इन मन तिर्गुसोद मौका सिकिदील.
HEB 12:18 नीव बेक्‍की देल होद्द आ सिनाय पहाळी इन हात्‍ती बंदीदिल, यदरी महसुस माळकु आग सकोद अदिक ना रा अंधार अदिक ना रा उदासीनता अदिक बवंडर इन हात्‍ती बंदीर ह्यांग इस्त्राएली लॉकुर बंदीदुर.
HEB 12:19 अदिक तुरही इन आवाज, अदिक माताळावाळेर्द ईत्‍ता शब्द अन हात्‍ती बंदीदिल, यार केळावाळेर विनती माळदुर कि ईग नाम से मात्‍त मातगोळ माळकु आगबाळुल.
HEB 12:20 यतिकी आंदुर आ आग्या अक सहन माळ सकिदील: “अगर यातोदारा प्राणी भी पहाळ इक मुट्टीत रा अदुर मा कल्लगोळ भिटकु आगुल.”
HEB 12:21 अदिक अद नजारा हिंग भयानक ईरोद कि मूसा अंदुन, “ना हापाळ अंजक्या देल अदिक नळ्गेतीन.”
HEB 12:22 लेकीन नीव सिय्योन इन पहाळी, जित्‍ता परमेश्वर उन नगर, अदिक स्वर्गीय यरूशलेम अदिक हजार स्वर्गदूतगोळ आनन्द पुर्ण सभा दा होट बंदीर.
HEB 12:23 नीव परमेश्वर से पयले पैदा आग्द यार हेसुर स्वर्ग दा लिख्सकु आव आंदुर सभा दा पोहचुसेगीर. नीव आ परमेश्वर उन हात्‍ती बंदीर जो सप्पा लॉकुर न्याय माळतान कि न्यायी लॉकुर्द आत्मागोळ सिद्ध आगुल.
HEB 12:24 अदिक ऊंद व्हाशोद वाचा अन मध्यस्थ यीशु अदिक छिळकाव इन आ रक्ता अन हात्‍ती होट बंदीर, जो हाबील उन रक्ता अन अपेक्षा वळ्लीद वस्तुगोळ्द प्रतिग्या माळतान.
HEB 12:25 सावधान ईरी, अदिक आ अनावाळा से बाय तिर्गुसबाळी, यतिकी आ लॉकुर याग पृथ्वी माकळव चेतावनी कोळावाळा से नकार माळकु ऊळु सकिदील, रा नाव स्वर्ग मा टु चेतावनी कोळावाळा से बाय वाकळा माळकु ह्यांग ऊळु सक्केव?
HEB 12:26 आ समय रा आऊन शब्द पृथ्वी इक आलगाळ्स कोम्त, लेकीन ईग आव ईद प्रतिग्या माळ्यान, “ऊंद घन बाक ना सिर्फ पृथ्वी इक बल्‍की आकाश इक भी आलगाळ्सकु ईट बुळाईन.”
HEB 12:27 ईव शब्द “ऊंद घन मात्‍त” आ हर वस्तु दी प्रगट माळतद कि जो मातगोळ निर्मित माळकु आग्याव अव आलगाळ्सकु आदव अदिक अस्थिर ईत्‍ताव कि जो मातगोळ आलगाळ्सकु आगालव अव स्थिर ईरूल.
HEB 12:28 इदुरसाटी बाक याग नामी हिंग राज्य सिकेत्याद यदरी आलगाळ्सकु आगाल रा बरी धन्यवादी बनसाती अदिक आदर मिलुस्कु अंज्क इन सांगुळ परमेश्वर उन उपासना माळेव कि परमेश्वर अदुर देल प्रसन्न आगुल;
HEB 12:29 यतिकी नाम परमेश्वर भसम माळावाळा बेक्‍की हुन.
HEB 13:1 आबुर दाबुर दा विश्वासी वार्टुर्द प्यार बन्सकु ईरूल.
HEB 13:2 अनजाना लॉकुर्द तान मान्या सत्कार माळोद मारूबाळी, यतिकी हिंग माळतेला अच थ्वाळासा लॉकुर अनजाना दा स्वर्गदूतगोळ्द स्वागत माळदुर.
HEB 13:3 कैदीगोळ्द इत्‍ता सुधी ताकोमी, कि मान्सी आंदुर सांगुळ नीव भी कैद आईर; अदिक यार सांगुळ बुरा बर्ताव माळकु आगतद, आंदुर्द ईत्‍ता प्रकार सुधी ताकोमी, मान्सी नीव भी पिळीत आगेतीर.
HEB 13:4 मदा सब दा आदर इन मात सम्सकु आगुल, अदिक गांड-हिंग्स आबुर दाबुर सांगुळ विश्वासयोग्य ईरूल, यतिकी परमेश्वर अनैतिक अदिक व्यभिचारीगोळ्द न्याय माळ्यान.
HEB 13:5 नीम स्वभाव धन से प्यार माळोद ईरबाळुल, अदिक जो नीम हात्‍ती आद, अदुर दा संतुष्ट ईरी यतिकी परमेश्वर अंदान ना नीनी यागलु बिळतीदील, अदिक यागलु मारूतीदिल.
HEB 13:6 इदुरसाटी नाव बेधळक आगकु अनतेव, कि प्रभु, नान सहायक आन; ना अंजालीन; मंळसा नान येन माळ सकतान.
HEB 13:7 जो नीमोर अगुवागोळ ईरोर, अदिक यार नीमी परमेश्वर उन वचन केळस्यार, आंदरी याद ईटी; अदिक ध्यान देल आंदुर्द चाल चलन इन अन्त नोळकु आंदुर्द विश्वास इन अनुकरण माळी.
HEB 13:8 यीशु मसीह नीन अदिक ईंद अदिक युगानुयुग ऊंदा घाई आन.
HEB 13:9 हर प्रकार इन अपरिचित शिक्षागोळ देल भरमुसकु आगबाळी. नाम मन इन साटी ईद वळ्लीद आद कि आंदुर अनुग्रह अन द्वारा मजबूत बनसुल ना कि तिनोद कुडोद संबंध दा नियमगोळी मान्सदुर देल, यदुर देल आंदुर यागलु भला आगीदील यार अवरी मान्सदुर.
HEB 13:10 नाम्द ऊंद हिंग वेदी आद यदुर मा टु तिनोद अधिकार आ याजकगोळी हैलेच, जो तम्बू दा स्यावा माळतार.
HEB 13:11 यतिकी याता पशुगोळ रक्ता महायाजक पाप-बली इन साटी महापवित्र जागा दा ओयतान, अदिक आ जनावरगोळ शरीर आ तम्बूगोळ्द छावनी इन व्हार्या होताक्कु आगताव.
HEB 13:12 ईदा कारण, यीशु भी नगर इन व्हार्या सोत्‍तुन ताकी लॉकुर पापगोळ देल आऊन रक्ता अन द्वारा शुद्ध आग सकुल.
HEB 13:13 रा बाक बरी, आऊन हात्‍ती छावनी इन व्हार्या होगाता, अदिक आऊन अपमान दा सहभागी आगाता.
HEB 13:14 यतिकी ईल पृथ्वी मा नाम येनु स्थाई नगर हैलेच, बल्‍की नाव ऊंद बरावाळा नगर इन हादी कायेतेव.
HEB 13:15 नळी नाव यीशु उन द्वारा परमेश्वर उक स्तुतिरूपी बलिदान अर्पण माळाता जो आ टुटगोळ्द काय हुन यार आऊन हेसुर इक अरतार.
HEB 13:16 भलाई माळोद अदिक आबुर दाबुर सहायता माळोद मारूबाळी, यतिकी परमेश्वर हिंगा बलिदानगोळ देल खुश आगतान.
HEB 13:17 तान अगुवागोळ्द आग्या मान्सी अदिक आंदुर आदेशगोळ मा नळी. आंदुर नीम मा बिना आराम माळ्द हिंग सावधानी ईटतार ह्यांग मान्सी आंदरी तान क्याल्सागोळ्द लेखा जोखा परमेश्वर उक कोळोद आद; अगर नीव आंदुर आग्या मानसीर रा आनन्द इन सांगुळ तान क्याल्सा माळ्यार, अगर मान्सतीदील रा आंदुर दुख इन सांगुळ तान क्याल्सा माळ्यार अदिक अद नीम साटी मदतगार साबित आगतीदील.
HEB 13:18 नाम साटी प्रार्थना माळतेला ईरी, यतिकी नामी भरोसा आद कि नाम विवेक शुद्ध आद: अदिक नाव सप्पा मातगोळ दा वळ्लीद चाल नळोद चाहसतेव.
HEB 13:19 ना नीम से आग्रह माळतीन कि नीव प्रार्थना माळतोगी ताकी राटनेरी ना नीम हाती बर सकाईन.
HEB 13:20 याव म्यांडागोळ घाई आ महान चरवाहा नाम प्रभु यीशु उन रक्ता अन द्वारा आ सनातन वाचा मा मोहर हचकु सोत्‍तुर दा टु जित्‍ता माळदुन आव शांती इन दाता परमेश्वर,
HEB 13:21 नीमी सप्पा वळ्लीद साधनगोळ देल संपन्न माळुल, यदुर देल नीव आऊन इच्छा पुरा माळ सकीर, अदिक यीशु मसीह अन द्वारा आव नाम बुळ्क आ सप्पा मातगोळी सक्रिय माळुल जो आऊक वळ्लीद हततद. मसीह अन महिमा युगानुयुग आगतेला ईरूल. आमीन.
HEB 13:22 हे वार्टुरा अदिक आकतींगेरा, ना नीम से आग्रह माळतीन कि ईद प्रोत्साहन इन संदेश इक धीरज इन सांगुळ केळी, यतिकी ई चिट्टी जो ना नीमी लिख्सीन यक्कुल धोळ्द हैलेच.
HEB 13:23 ना चाहासतीन कि नीमी ईद पता नळुल नाम वार्ट तीमुथियुस कैद दा टु बिटकु आग्यान. अदिक अगर आव राटनेरी बंदुन रा ना आऊन सांगुळ नीम से मुलाकात माळली बराईन.
HEB 13:24 तान सप्पा अगुवागोळी अदिक सप्पा परमेश्वर उन लॉकुरी नमस्कार अनेतीर. इटलीवाळेर विश्वासी लॉकुर नीमी नमस्कार अनतार.
HEB 13:25 नीम सप्पा मुंदुर मा परमेश्वर उन अनुग्रह आगतेला ईरूल. आमीन.
JAM 1:1 परमेश्वर उन अदिक प्रभु यीशु मसीह नव दास याकूब उन दी टु आ हन्नेळ गोत्रगोळी जो तितर-बितर आगकु ईरतार नमस्कार पोहचुसुल.
JAM 1:2 हे नान वार्टुरा अदिक आकतींगेरा, याग नीव अलग प्रकार इन परीक्षागोळ दा बिळी, रा इदरी पुरा खुशी इन मात समसी,
JAM 1:3 ईद जान्सकु कि नीम विश्वास इन परख आगदुर देल धीरज पैदा आगतद.
JAM 1:4 लेकीन धीरज इक तान सप्पा क्याल्सा माळगोळी कि नीव पुरा अदिक सिद्ध आगेगी, अदिक नीम दा यातोदु मात इन कमी ईरबाळुल.
JAM 1:5 लेकीन नीम दा टु यारीकारा दिमाक इन कमी ईरूल रा परमेश्वर से बेळुल, जो सप्पा मुंदुरी बिना दोष हचकु अनुग्रहपुर्वक कोळतान, अदिक आऊक कोटकु आदीत.
JAM 1:6 लेकीन विश्वास देल बेळुल, अदिक येनु सक माळबाळुल, यतिकी सक माळावाळा समुद्र अन्द लयर इन घाई आन जो हवा देल वाहुसतद अदिक हारतद.
JAM 1:7 हिंग मंळसा ईद सम्सबाळुल कि नानी प्रभु उन हाती टु येनारा सिक्‍कीत,
JAM 1:8 आ मंळसा येढ्ढ चित्‍तवाळा हुन अदिक तान सप्पा मातगोळ दा संची हैलेच.
JAM 1:9 गरीब वार्टुरा याग परमेश्वर नीमी धोळ्द पद कोळतान रा खुशी माळी,
JAM 1:10 अदिक अमीर तान नीच दशा मा; यतिकी आव काड्डा अन्द फूल इन घाई ओळेदान.
JAM 1:11 यतिकी सुर्य अन होळतेला अच हापाळ बिसुल बिळतद अदिक काड्डा अक वंळ्गास बुळतद, अदिक अदुर्द फूल झळसेगतद अदिक अदुर शोभा नाश आगेगतद. ईदा प्रकार अमीर भी तान हादी मा नळुत-नळुत नाश आगेदान.
JAM 1:12 धन्य आन आ मंळसा जो परीक्षा दा स्थिर ईरतान, यतिकी आव सही होटकु जीवन इंद अद मुकुट हासिल माळ्यान यदुर्द वादा प्रभु तान प्यार माळावाळेर से माळ्यान.
JAM 1:13 याग यारदारा परीक्षा आगुल, रा आव ईद अनबाळुल कि नान परीक्षा परमेश्वर उन दी टु आगतद; यतिकी ना रा बेकार मातगोळ से परमेश्वर उन परीक्षा आग सकतद, अदिक ना आव यारदारा परीक्षा खुद माळतान.
JAM 1:14 लेकीन हर ऊंद मंळसा तांद अच बेकार अभिलाषागोळ देल जेडुकु अदिक फसुसकु परीक्षा दा बिळतान.
JAM 1:15 बाक बेकार अभिलाषा व्हाट्टा दी ईतकु खुद इन निर्माण माळतद अदिक पाप याग पुरा रीति देल वाळुसेगतद रा मृत्यु उक तयार माळतद.
JAM 1:16 हे नान प्रिय वार्टुरा अदिक आकतींगेरा, ध्वाका तिनबाळी.
JAM 1:17 यतिकी हर ऊंद वळ्लीद दान अदिक हर ऊंद परिपुर्ण उपहार स्वर्ग टु अच आद, अदिक अद आ परमेश्वर उन द्वारा ज्योति याव स्वर्गीय प्रकाश इक माळ्यान ल्यालमा तनकु आगताव, आव हमेशा बदलुस्त सावली घाई बदलुसालुन.
JAM 1:18 आव तांद अच इच्छा देल नामी सच्चाई अन्द वचन इन द्वारा तयार माळदुन, कि नाव आऊन दुनिया दा जो वस्तुगोळ आव अऊर दा टु ऊंद प्रकार इन पयला काय आदेव.
JAM 1:19 हे नान प्रिय वार्टुरा अदिक आकतींगेरा, ईद मात नीव जान्स कोमी: हर ऊंद मंळसा केळोर साटी तत्पर अदिक माताळदुर दा धीर अदिक सिट्ट दा धीरा ईरूल,
JAM 1:20 यतिकी मंळसा अन्द सिट्ट परमेश्वर उन न्यायी उद्देश इक प्राप्त माळ सकाल्द.
JAM 1:21 इदुरसाटी सप्पा मईलपन अदिक दुश्मनी भाव इन बळती इक दुर माळकु, आ वचन इक नम्रता देल ग्रहण माळकोमी जो मन दा बोऊस्कु आत अदिक जो नीम उद्धार माळ सकतद.
JAM 1:22 सिर्फ केळावाळेर अच ईला जो तान तान इक ध्वाका कोळतार, लेकीन वचन मा नळावाळेर बन्सी.
JAM 1:23 यतिकी जो यावारा वचन इन केळावाळा ईरूल अदिक अदुर मा नळावाळा ईला आगुल, रा आव आ मंळसा अन्द घाई आन जो तान स्वाभाविक मार्रा आरसा दा नोळतान.
JAM 1:24 आव तान तान इक नोळकु होटोगतान अदिक तुरन्त मारतोगतान कि ना ह्यांग ईरीन.
JAM 1:25 लेकीन जो मंळसा स्वतंत्रता अन्द सिद्ध व्यवस्था मा ध्यान माळतान, आऊक परमेश्वर आऊन क्याल्सा दा इदुरसाटी आशीष कोट्टान कि केळकु मारालुन लेकीन हांग अच क्याल्सा माळतान.
JAM 1:26 येन नीम दा टु यावारा तान तान इक न्यायी सम्सतान? अगर नीव तान ल्यालग्या अक वश दा माळ सकालीर रा नीव तान तान इक ध्वाका कोळतीर अदिक नीम न्यायीपन बेकार आद.
JAM 1:27 नाम परमेश्वर अदिक आप्प उन हात्‍ती शुद्ध अदिक निर्मल भक्ति ईद आद कि अनाथगोळ अदिक रांड्यागोळ्द क्लेश दा आऊन सुधी ताकोमुल, अदिक तान तान इक दुनिया से निष्कलंक ईटुल.
JAM 2:1 हे नान वार्टुरा अदिक आकतींगेरा, नाम महिमायुक्त प्रभु यीशु मसीह मा नीम विश्वास पक्षपात इन सांगुळ आगबाळुल.
JAM 2:2 समसी अगर ऊंद धनवान मंळसा व्हान्ना अन्द छल्ला अदिक सुंदर फळक्या हाक्‍कु नीम सभा दा बरूल, अदिक ऊंद गरीब मंळसा भी रेंदुसदव फळक्या हाक्‍कु बरूल,
JAM 2:3 अदिक नीव आ सुंदर फळक्यावाळा अन्द चेहरा नोळकु अंदीर, “नी अल वळ्लीद जागा दा कुर,” अदिक आ गरीब मंळसा से अंदीर, “नी ईल निदुरकु ईर,” या “नान कालगोळ हात्‍ती कुर.”
JAM 2:4 रा येन नीव आपस दा भेद-भाव माळीदिल अदिक बेकार उद्देश देल न्याय माळावाळेर ठहरूसीदील?
JAM 2:5 हे नान प्रिय वार्टुरा अदिक आकतींगेरा, केळी. येन परमेश्वर ई दुनिया अन्द गरीबगोळ्द चुनाव माळीदिल कि विश्वास दा धनी अदिक आ राज्य अन्द अधिकारी आगुल, यदुर्द वादा आव आंदुर से माळ्यान जो आऊन से प्यार ईटतार?
JAM 2:6 लेकीन नीव गरीब उन अपमान माळदीर. अदिक आंदुर यार उर जो नीम मा अत्याचार माळतार अदिक नीमी कचेरीगोळ दा जेडु जेडुकु ओयतार?
JAM 2:7 येन आंदुर ईंदुर आल्लच जो मसीह अन वळ्लीद हेसुर इंद अपमान माळतार? जो नीमी कोटकु आग्याद.
JAM 2:8 तरी भी अगर नीव पवित्रशास्त्र अन्द ई वचन इन अनुसार कि “नी तान मान्ना हातळोर वाळेर से तान घाई प्यार ईट” खराखुरा आ राज व्यवस्था अक पुरा माळतीर, रा वळ्लीद अच माळतीर.
JAM 2:9 लेकीन अगर नीव लॉकुर्द बाहरी पहराव नोळकु व्यवहार माळतीर, रा नीव पापी आईर, अदिक व्यवस्था नीमी नियम मुरावाळा ठहरूसतद.
JAM 2:10 यतिकी जो यावारा सप्पा व्यवस्था अन्द पालन माळतान लेकीन ऊंद अच मात दा चुकसेगुल रा आव सप्पा मातगोळ दा दोषी ठहरूसकु आग्यान.
JAM 2:11 याव ईद अंदुन, “नी व्यभिचार माळबाळेत,” आवा ईद भी अंदिदुन, “नी हत्या माळबाळेत,” इदुरसाटी अगर नी व्यभिचार रा माळीदिल लेकीन हत्या माळ्द तरी भी नी व्यवस्था अन्द उल्लंघन माळावाळा ठहरूस्द.
JAM 2:12 नीव आ लॉकुर घाई वचन माताळी अदिक क्याल्सा भी माळी, यार्द न्याय आ व्यवस्था अन्द अनुसार आदीत जो नामी स्वतंत्र माळतद.
JAM 2:13 इदुरसाटी जो दयालु हैलेच आऊन साटी परमेश्वर उन न्याय भी बिना दया अन्द अच आदीत लेकीन दया न्याय मा विजयी आद.
JAM 2:14 हे नान वार्टुरा अदिक आकतींगेरा, अगर यावारा अनुल कि नानी विश्वास आद लेकीन आव कर्म माळालुन, रा इदुर से येन फायदा? येन ईत्‍ता विश्वास यागल्यारा आऊन उद्धार माळ सकतद?
JAM 2:15 अगर यावारा वार्टुरा या आकतींग इन हाती जंग कपळा ईरूल अदिक आंदरी हर रोज भोजन इंद कमी ईरूल,
JAM 2:16 अदिक नीम दा टु यावारा आंदुर से अनुल, “शांती देल होगी, नीमी पर्याप्त कपळा सिकुल अदिक नीव वळ्लीद खाना तीनकु संतुष्ट ईरी,” लेकीन जो वस्तुगोळ मय इन साटी जरूरी आव अव आंदरी ईला कोळुल रा येन फायदा?
JAM 2:17 हांग अच, अगर विश्वास भी कर्म सहित हैलेच रा तान स्वभाव दा सोतकु आद.
JAM 2:18 अगर यावारा अनतान, “नीनी विश्वास आद अदिक कर्म ना माळतीन.” नी तान विश्वास नानी कर्म इन बिना रा तोर्स; अदिक ना तान विश्वास तान कर्मगोळ्द द्वारा तोरसाईन.
JAM 2:19 येन नीनी विश्वास आद कि ऊंद अच परमेश्वर आन? नी वळ्लीद माळत्या. दुष्टआत्मा भी विश्वास ईटताव, अदिक नळ्गताव.
JAM 2:20 लेकीन हे निकम्मा मंळसा, येन नी ईद भी अरू सकाल कि कर्म इन बिना विश्वास व्यर्थ आद?
JAM 2:21 याग नाम पुर्वज अब्राहम तान पार इसहाक उक वेदी मा यर्सदुन, रा येन आव कर्मगोळ देल न्यायी ईला ठहरूसीदुन?
JAM 2:22 इदुरसाटी नी नोळ कोंड कि विश्वास आऊन क्याल्सागोळ सांगुळ मिलुसकु प्रभाव हाक्याद, अदिक कर्मगोळ देल विश्वास सिद्ध आत,
JAM 2:23 अदिक पवित्रशास्त्र अन्द ईद वचन पुरा आत: “अब्राहम परमेश्वर उन विश्वास माळदुन, अदिक ईद आऊन साटी न्यायी आळुकु आदुन,” अदिक आऊक परमेश्वर उन संगी अंदकु आत.
JAM 2:24 ई प्रकार नीव नोळ कोंडीर कि मंळसा सिर्फ विश्वास देल अच ईला, उलटा कर्मगोळ देल भी न्यायी ठहरूसकु आगतान.
JAM 2:25 हांगा राहाब वेश्या भी, याग आक स्वर्गदूतगोळी तान मान्या ईळ्सदुर अदिक दुसरा हादी देल विदा माळदुर, रा येन आक कर्मगोळ देल न्यायी ठहरूसदुर?
JAM 2:26 हांगा ह्यांग मय आत्मा अन्द बिना सोतकु आद, हांग अच विश्वास भी कर्म इन बिना सोतकु आद.
JAM 3:1 हे नान वार्टुरा अदिक आकतींगेरा, नीम दा टु हापाळ सा लॉकुर शिक्षा कोळावाळेर बन्सबाळुल, यतिकी जान्सतीर कि नाव शिक्षा कोळावार्ळेद यक्कुल गंभीरता देल न्याय माळकु आदीत.
JAM 3:2 इदुरसाटी कि नाव सप्पा मुंदुर हापाळ घन चुकसेगतेव; लेकीन अगर यावारा माताळदुर दा यातोदारा भी गलती माळतीदील रा आव ऊंद सिद्ध मंळसा आन अदिक सप्पा मय मा भी नियंत्रण ईट सकतान.
JAM 3:3 याग नाव तान आग्या मानसुसोर साटी घ्वाळा अन्द बाय दा लगाम हचतेव, रा नाव अदरी बाक यल चाहे अल तिर्गुस सकतेव.
JAM 3:4 जहाज भी, हिंग धोड्डेव ईरताव अदिक प्रचंड हवा देल नळ्सकु आगताव, तरी भी ऊंद स्यांळ्दतुसा सा पतवार इन द्वारा माँझी इन इच्छा अन्द अनुसार तिर्गुसकु आगताव.
JAM 3:5 हांग अच ल्यालग्या भी ऊंद स्यांळ्दतुसा सा हिस्सा आद अदिक अद धोळ्द-धोळ्द डींग होडुतद. जरासा सोची, थ्वाळासा बेक्‍की देल याट धोळ्द आळी दा बेक्‍की हत्‍तेगतद.
JAM 3:6 ल्यालग्या भी ऊंद बेक्‍की हुन; ल्यालग्या नाम मय इन हिस्सा दा अन्याय इन दुनिया हुन, अदिक सप्पा मय मा कलंक हचतद, अदिक जीवन-गति मा बेक्‍की हच बुळतद, अदिक नरक कुण्ड इन बेक्‍की देल होत्‍त ईरतद.
JAM 3:7 यतिकी सप्पा प्रकार इन आळी, पशु, पक्षी, अदिक रेंगसावाळा जन्तु, अदिक नीर इन जीव जन्तु रा मंळसा जाती इन वश दा आग सकताव अदिक आगेग्याव भी,
JAM 3:8 लेकीन ल्यालग्या अक मंळसागोळ दा टु याऊ वश दा माळ सकालुन; अद ऊंद हिंग बला आद जो यागलु अच रूकसाल, अद जीव नाशक जयर देल तुमकु आद.
JAM 3:9 इदुर देल अच नाव प्रभु अदिक आप्प उन स्तुती माळतेव, अदिक इदुर देल अच मंळसागोळी जो परमेश्वर उन स्वरूप दा पैदा आग्यार शराप कोळतेव.
JAM 3:10 ऊंद अच बाय देल धन्यवाद अदिक शराप येढ्ढु होळताव. हे नान वार्टुरा अदिक आकतींगेरा, हिंग ईला आग पायजे.
JAM 3:11 येन नीर इन सोता अन्द ऊंद अच बाय देल सय अदिक डवला नीर येढ्ढु होळताव?
JAM 3:12 हे नान वार्टुरा, येन अंजीर इन मार्र मा जैतून, या अंगुर इन केई मा अंजीर हत सकताव? हांग अच डवला नीर इन सोता टु सय नीर होळ सकाल.
JAM 3:13 नीम दा बुद्धिमान अदिक समझदार याव आन? जो हिंग आन आव तान क्याल्सागोळी वळ्लीद चाल चलन देल आ नम्रता सहित प्रगट माळुल जो ग्यान देल पैदा आगतद.
JAM 3:14 लेकीन नीव तान-तान मन दा जलन, कळवाहट अदिक स्वार्थीपन ईटतीर, रा बुद्धी मा घमण्ड माळकु सच्चाई इन विरोध दा पाप माळबाळी.
JAM 3:15 ईद ग्यान अद आल्लच जो स्वर्ग टु ईळुतद, उलटा सांसारिक, अदिक शारीरिक, अदिक शैतानी आद.
JAM 3:16 यतिकी यल जलन अदिक स्वार्थीपन ईरतद, अल अव्यवस्थापन अदिक सप्पा प्रकार इन बेकार मातगोळ आगताव.
JAM 3:17 लेकीन जो ग्यान स्वर्ग टु बरतद अद पयले रा पवित्र ईरतद बाक मिलनसार, मुलायम अदिक शांतीमय अदिक दया अदिक वळ्लीद काय देल लटालोम अदिक पक्षपात अदिक कपट रहित ईरतद.
JAM 3:18 शांती प्रस्थापित माळावाळेर लॉकुरी अच न्यायी जीवन इन काय प्राप्त आदीत अगर अदरी शांतीपूर्ण वातावरण दा बोऊस्कु आग्याद.
JAM 4:1 नीम दा लळाई झगळागोळ यल टु होटबंदव? येन ईद नीम इच्छागोळ देल आगाल्द जो नीम मय दा लळाई-झगळा माळताव?
JAM 4:2 नीव चाहासतीर, लेकीन नीमी सिकाल; इदुरसाटी नीव हत्या माळतीर. नीव पुरा रीति देल इच्छा ईटतीर, अदिक येनु हासिल माळ सकालीर; इदुरसाटी नीव लळाई अदिक झगळा माळतीर. जो नीव चाहासतीर नीमी सिकाल यतिकी नीव परमेश्वर से बेळालीर.
JAM 4:3 नीव बेळतीर लेकीन नीमी सिकाल, इदुरसाटी कि बेकार इच्छा माळकु बेळतीर, कि तान भोग-विलास दा हार्स बुळी.
JAM 4:4 हे विश्वासहीन लॉकुरा, येन नीव जान्सालीर कि दुनिया से संगीपना माळोद परमेश्वर से दुश्मनी माळोद हुन? जो यावारा दुनिया अन्द संगी आगोद चाहासतान, आव तान तान इक परमेश्वर उन दुश्मन माळतान.
JAM 4:5 येन नीव ईद सम्सतीर कि पवित्रशास्त्र बेकार अनतद, “याता आत्मा अक आव नाम बुळ्क घळुस्यान, येन अद हिंग लालसा माळतद यदुर्द प्रतिफल इर्ष्या आगुल?”
JAM 4:6 आव रा मात्त यक्कुल अनुग्रह कोळतान; ई कारण ईद शास्त्र दा लिख्सकु आद, “परमेश्वर अभिमानीगोळ्द विरोध माळतान लेकीन गरीबगोळ मा अनुग्रह माळतान.”
JAM 4:7 इदुरसाटी परमेश्वर उन हात्‍ती आगेगी; अदिक शैतान उन सामना माळी, रा अद नीम्द हात्‍ती टु ओळकु होदित.
JAM 4:8 परमेश्वर उन हात्‍ती बरी रा आव भी नीम्द हात्‍ती बंदान. हे पापीगोळा, तान कय तोळ कोमी; अदिक हे पाखंडी लॉकुरा, तान मन इक शुद्ध माळी.
JAM 4:9 दुखी आगी, अदिक शोक माळी, अदिक वर्ली. नीम्द नेग्गोद शोक दा, अदिक नीम्द खुशी उदासी दा बदलुसुल.
JAM 4:10 प्रभु उन मुंद नम्र बन्सी रा आव नीमी म्याकुच नेगदान.
JAM 4:11 हे वार्टुरा अदिक आकतींगेरा, आबुर दाबुर अपमान माळबाळी. जो तान मसीह वार्ट उन अपमान माळतान या मसीह वार्टुन मा दोष हचतान, आव व्यवस्था अन्द अपमान माळतान अदिक व्यवस्था मा दोष हचतान; अदिक अगर नी व्यवस्था मा दोष हचत्या, रा नी व्यवस्था मा नळावाळा ईला पर अदुर मा न्याय माळावाळा ठहरुस्द.
JAM 4:12 व्यवस्था कोळावाळा अदिक न्याय माळावाळा रा ऊंद अच परमेश्वर आन, आव आबना अच ऊळ्स सकतान या नाश माळ सकतान. नीव याव आगतीर तान मान्ना हातळोर न्याय माळावाळेर?
JAM 4:13 केळी, नीव जो ईद अनतीर, “ईंद या नाळ नाव यातोदारा अदिक नगर दा होगकु अल ऊंद वर्ष बितुसेव, अदिक व्यापार माळकु पैस्या कमुसेव.”
JAM 4:14 अदिक ईद जान्सालेव कि नाळ येन आदीत. केळ रा कोमी, नीम्द जीवन आद अच येन? नीव रा भाप इन घाई आईर, जो घळीतीम कांळ्सतद बाक गायब आगेगतद.
JAM 4:15 इदुर उलटा नीमी ईद अनली पायजे, “अगर प्रभु चाहास्यान रा नाव जित्‍ता ईत्‍तेव, अदिक ईद क्याल्सा या अद क्याल्सा भी माळेव.”
JAM 4:16 लेकीन ईग नीव तान डींग होडुतीर अदिक घमण्ड माळतीर; हिंग सप्पा घमण्ड बेकार आगतद.
JAM 4:17 इदुरसाटी जो यावारा भलाई माळोद जान्सतान लेकीन माळालुन, आव पाप इन दोषी आन.
JAM 5:1 हे अमीरगोळा, केळ रा कोमी, नीव तान बरावाळा विपत्‍तीगोळ मा वर्ली अदिक ऊँचा स्वर देल विलाप माळी.
JAM 5:2 नीम धन हुळतोग्याद अदिक नीम फळक्यागोळी उदई हत्‍तेग्याद.
JAM 5:3 नीम व्हान्ना-बेळ्ली दा जंग हत्‍तेग्याद; अदिक अद जंग नीम मा गवाही कोट्टीत, अदिक बेक्‍की घाई नीम मास तिंद बुट्टीत. नीव आखरी दुनिया दा धन जमा माळीर.
JAM 5:4 नोळी, याता क्याल्सावाळेर नीम केई दा मजदूरी माळदुर, आंदुर्द अद मजदूरी जो नीव ध्वाका कोटकु ईट बुट्टीर किटरेत्याद, अदिक कडावाळेर्द आक्रोश सर्वशक्तिमान प्रभु उन किव ताका ओळेग्याद.
JAM 5:5 नीव पृथ्वी मा भोग-विलास दा हतकु ईत्‍तीर अदिक हापाळ सुख भोग्सदिर; नीव ई वध इन दिन इन साटी तान मन इंद पालन-पोषण माळकु खुद इक मोटा-तरोताजा माळदीर.
JAM 5:6 नीव न्यायी मंळसा अक दोषी ठहरूसकु कोंद बुट्टीर, आव नीम सामना ईला माळायदुन.
JAM 5:7 इदुरसाटी हे वार्टुरा अदिक आकतींगेरा, प्रभु उन आगमन ताका धीरज ईटी. नोळी, किसान पृथ्वी इन किमती फसल इन आशा ईटतेला पयला अदिक आखरी माळ बिळास ताका धीरज ईटतान.
JAM 5:8 नीव भी धीरज ईटी; अदिक तान आशा अक माळकु ईटी, यतिकी प्रभु उन आगमन हात्‍ती होट बंदाद.
JAM 5:9 हे वार्टुरा अदिक आकतींगेरा, आबुर दाबुर प्रती सिकायत माळबाळी ताकी परमेश्वर नीम न्याय माळबाळुल; नोळी, न्यायाधीश प्रगट आगदुर मा आन.
JAM 5:10 हे वार्टुरा अदिक आकतींगेरा, याता भविष्यवक्तागोळ प्रभु उन हेसुर देल मात माळदुर, आंदरी दुख नेगोद समय आंदुर धैर्य अक ऊंद आदर्श समसी.
JAM 5:11 नोळी, नाव आ भविष्यवक्तागोळी यार धीरज ईटदुर धन्य अनतेव. नीव अय्यूब उन धीरज इन बारा दा रा केळदीर अच, अदिक प्रभु उन दी टु जो अदुर्द प्रतिफल आत अदरी भी अर्त कोंडीर, यदुर देल प्रभु उन यक्कुल करूणा अदिक दया प्रगट आगतद.
JAM 5:12 लेकीन हे नान वार्टुरा अदिक आकतींगेरा, सब से धोळ मात ईद आद कि किर्‍या ईला तिनोद, ना आकाश इन, ना धरती इन, ना यातोवारा दुसरा चिज इन; लेकीन नीम मातकात हव इन हव, अदिक ईला अन्द ईला ईरूल, कि परमेश्वर उन न्याय नीम मा बरबाळुल.
JAM 5:13 अगर नीम दा यावारा विपत्‍ती दा बिदान? रा आंदरी प्रार्थना माळ पायजे. येन नीम दा यावारा खुश आन? रा आंदरी स्तुति अन्द भजन हाळ पायजे.
JAM 5:14 येन नीम दा यावारा रोगी आन? रा आंदरी पायजे कि मंडली इन स्याणा गवाहगोळी कारूल, कि आंदुर आंदुर साटी प्रार्थना माळुल अदिक आंदुर मा प्रभु उन हेसुर देल जैतून इन याण्णा हचुल.
JAM 5:15 अदिक विश्वास इन प्रार्थना अन्द द्वारा रोगी ऊळस्यान अदिक प्रभु आऊक मात्‍त स्वस्थ मय प्रदान माळ्यान; अदिक अगर आव पाप भी माळीदान, रा अव भी माफ आगेदव.
JAM 5:16 इदुरसाटी नीव आपस दा आबुर दाबुर मुंद तान-तान पापगोळी मान्स कोमी, अदिक आबुर दाबुर साटी प्रार्थना माळी, यदुर देल चंगा आगेगी: न्यायी जन इन प्रार्थना प्रभावशाली अदिक परिणाम कारक आगतद.
JAM 5:17 एलिय्याह भी रा नाम घाई दुख-सुख भोगसावाळा मंळसा ईरोन; अदिक आव गिळगिळास्कु प्रार्थना माळदुन कि माळ बरबाळुल; अदिक साढ़े मुर वर्ष ताका पृथ्वी मा माळ बंदिदील.
JAM 5:18 बाक आव प्रार्थना माळदुन, रा आकाश टु माळ बत्‍त, अदिक पृथ्वी फलवन्त आत्‍त.
JAM 5:19 हे नान वार्टुरा, अगर नीम दा टु यावारा सत्य अन हादी टु भटकुस्यान अदिक यावारा आऊक हादी मा तरूल,
JAM 5:20 रा आव ईद जान्स कोमुल कि जो यावारा यातोदारा भटकुस्त पापी इक हादी मा तंदान, आव ऊंद जीव इक सोत्‍तुर देल ऊळस्यान अदिक अनेक पापगोळ मा परदा हाक्यान.
1PE 1:1 पतरस उन दी टु जो यीशु मसीह अन प्रेरित आन, आ निवळुस्कु आदुर परमेश्वर उन लॉकुर्द हेसुर जो तितर बितर आगकु पुन्तुस, गलातिया, कप्पदूकिया, आसिया अदिक बितूनिया दा ईरतार,
1PE 1:2 नीव परमेश्वर आप्प उन पूर्व उद्देश इन अनुसार निवळुस्कु आगीर अदिक आऊन आत्मा अन्द क्याल्सा द्वारा पवित्र लॉकुर ठहरूस्कु आगीर, इदुरसाटी कि यीशु मसीह अन आग्या मानसुल अदिक आऊन रक्ता अन द्वारा शुद्ध आगेगुल. नीमी अनुग्रह अदिक शांती बहुतायत देल सिकतेला ईरूल.
1PE 1:3 नाम प्रभु यीशु मसीह अन परमेश्वर अदिक आप्प उन धन्यवाद आगुल, याव यीशु मसीह अन सोत्‍तुर दा टु जित्‍ता आगोर द्वारा, तान हापाळ प्यार देल नामी जित्‍ता आशा कोळोर साटी व्हाशोद जनम कोट्टुन,
1PE 1:4 मतलब ऊंद अविनाशी, अदिक निर्मल, अदिक अजर विरासत इन साटी जो नीम साटी स्वर्ग दा ईटकु आद;
1PE 1:5 जो विश्वास इन द्वारा सुरक्षित आर, परमेश्वर उन सामर्थ्य अन द्वारा आ उद्धार इन साटी जो आखरी समय दा प्रगट आगोर साटी तयार आद.
1PE 1:6 ई कारण नीव हापाळ खुश ईरी, लेकीन येनारा थ्वाळासा समय इन साटी अलग अलग परीक्षागोळ दा बिदकु दुख नेगोद बिद्दीत;
1PE 1:7 अदिक ईद इदुरसाटी आद कि नीम्द विश्वास परखुसकु आगुल, शुद्ध होळी अदिक स्थिर ईरी, जो नाशवान व्हान्ना आद यदरी बेक्‍की दा परखुस्कु आगतद अदुर देल भी हापाळ यक्कुल बार्र आद, आ दिन याग यीशु मसीह प्रगट आदान आग नीमी प्रशंसा अदिक महिमा अदिक आदर प्राप्त आदीत.
1PE 1:8 नीव आऊन से प्यार माळतीर जब कि नीव आऊक नोळीदील, अदिक नीव आऊन मा विश्वास माळतीर जब कि नीव आऊक ईगल्या नोळीदील. रा नीव हापाळ महिमामय खुशी देल खुश आईर जो शब्दगोळ देल बयान माळकु आगसकाल;
1PE 1:9 नीम्द आत्मागोळ उद्धार ईद जो नीम्द विश्वास इन उद्देश नीव अदुर्दा प्राप्त माळतीर.
1PE 1:10 ईदा उद्धार इन बारा दा आ भविष्यवक्तागोळ ध्यान देल खोजबीन अदिक जाँच पळताल माळदुर, यार आ अनुग्रह अन बारा दा जो नीम मा आगली ईरोद, भविष्यवाणी माळीदुर.
1PE 1:11 आ भविष्यवक्तागोळ मसीह मा बरावाळा दुखगोळ्द समय अदिक अद महिमा जो ई दुखगोळ्द बाद्दा प्रगट आदव इदुर्द खोज मसीह अन्द आत्मा अन द्वारा माळदुन जो आंदुर दा ईरोद.
1PE 1:12 परमेश्वर आ भविष्यवक्तागोळ मा प्रगट माळदुन कि आंदुर तान ईला बल्‍की नीम्द स्यावा अन साटी ईव मातगोळ अनतोगोर, यार्द जानकारी ईग नीमी आंदुर्द द्वारा सिक्त यार पवित्र आत्मा अन द्वारा, जो स्वर्ग टु कळुकु आग्याद, नीमी खुशखबरी केळ्सदुन; अदिक ई मातगोळ इक स्वर्गदूत भी ध्यान देल नोळोद लालसा ईटतार.
1PE 1:13 ई कारण तान तान नेळु कटकु सावधान ईरी, खुद नियंत्रित ईरी, याग यीशु मसीह प्रगट आदान आग जो आशीष नीमी सिकोद आद, अदुर मा तान आशा पुरा रीति देल हचकु ईटी.
1PE 1:14 आग्या मानसावाळेर चिकोरगोळ घाई, आ समय इन बेकार इच्छागोळ्द अनुसार तान तान इक ढाल्सबाळी जो नीम दा पयले ईरोद, याग नीव अग्यानी ईरीर.
1PE 1:15 लेकीन ह्यांग नीम कारावाळा पवित्र आन, हांग अच नीव भी तान सप्पा चाल चलन दा पवित्र बन्सी.
1PE 1:16 यतिकी शास्त्र दा लिख्सकु आद, “पवित्र बन्सी, यतिकी ना पवित्र आईन.”
1PE 1:17 अदिक याग कि नीव “हे आप्प” अनकु आऊन से प्रार्थना माळतीर, जो बिना पक्षपात हर ऊंद उन क्याल्सा अन आचरण इन अनुसार न्याय माळतान, इदुरसाटी तान परदेशी आगोद समय अंज्क देल बितुसी.
1PE 1:18 यतिकी नीव जान्सतीर कि नीम्द निकम्मा चाल चलन तरीका जो आप्प दादागोळ हाती टु नळुतेला बरेत्याद, अदुर देल नीम्द छुटकारा व्हान्ना बेळ्ली मतलब नाशवान चिजगोळ द्वारा आगीदील;
1PE 1:19 बल्‍की किमती मसीह अन्द अर्पण इन द्वारा जो ऊंद निर्दोष अदिक कलंक रहित म्यांडा अन पाड्डा अन रक्ता अन घाई ईरोन.
1PE 1:20 दुनिया अन निर्माण इन पयले परमेश्वर उन द्वारा मसीह अक चुनुस्कु आगीत, लेकीन नीम साटी ईव आखरी दिनगोळ दा आऊक प्रगट माळकु आत.
1PE 1:21 आ मसीह अन द्वारा नीव आ परमेश्वर मा विश्वास माळतीर, यारी परमेश्वर आऊक सोत्‍तुर दा टु जित्‍ता माळदुन अदिक महिमा कोट्टुन ताकी नीम्द विश्वास अदिक आशा परमेश्वर मा पक्‍का आगुल.
1PE 1:22 ईग याग नीव सच्चाई इन पालन माळतेला खरा भाईचारा अन प्यार इक प्रदर्शित माळोर साटी तान आत्मागोळ इक शुद्ध माळ कोंडीर, रा पुरा मन इन सांगुळ आबुर दाबुर से प्यार माळी.
1PE 1:23 यतिकी नीमी नाशवान ईला लेकीन अविनाशी बींजा देल, परमेश्वर उन जित्‍ता अदिक हमेशा ठहरूसावाळा वचन इन द्वारा व्हाशोद जनम सिक्याद.
1PE 1:24 यतिकी पवित्रशास्त्र दा लिख्सकु आद: “हर ऊंद मंळसा प्राणी काड्डा अन घाई आन, अदिक आऊंद सप्पा शोभा आळी दाकळोद फूला अन घाई आव. अदिक काड्डा वंळ्गेगतद, अदिक फूला झळसेगताव,
1PE 1:25 लेकीन प्रभु उन वचन हमेशा हमेशा संची ईरतद.” अदिक ईदा खुशखबरी इन वचन आद जो नीमी घोषित माळकु आगीत.
1PE 2:1 इदुरसाटी सप्पा प्रकार इन बुराईगोळ अदिक पाखंड अदिक पुरा ख्वाटा मातगोळ या होत्‍तोद या अपमानीत माळोर भाषा देल तान तान इक ऊळस्कु ईटी.
1PE 2:2 व्हासा पैदा आगा चिकोर इन घाई हमेशा निर्मल आत्मिक हाल इन लालच ईटी, इदुरसाटी इदरी कुडोद द्वारा नीम्द विकास अदिक उद्धार आगुल.
1PE 2:3 जसा कि पवित्रशास्त्र दा लिख्सकु आद, “नीव तान तान इन साटी जान्स कोंडीर कि प्रभु याट भला आन.”
1PE 2:4 प्रभु उन हात्‍ती बरी, अद सजीव कल्ल जो लॉकुर द्वारा बेकार सम्सकु नकार्सकु आगीदुन लेकीन आव परमेश्वर साटी किमती आन जो परमेश्वर उन द्वारा निवळुस्कु आगीदुन.
1PE 2:5 नीव भी खुद जित्‍ता कल्लगोळ घाई ऊंद आध्यात्मिक मंदिर इन रूप दा माळकु आगेतीर, ताकी ऊंद हिंग पवित्र याजक मंडल इन रूप दा स्यावा माळ सकी यदुर्द कर्तव्य हिंग आत्मिक बलिदान समर्पित माळोद आद जो यीशु मसीह अन द्वारा परमेश्वर उक ग्रहण लायक आगुल.
1PE 2:6 ईद कारण पवित्रशास्त्र दा भी लिख्सकु आद: “ना ऊंद किमती कल्ल निवळुस्कु यारी ना सिय्योन इन क्वाना अन्द कल्ल माळकु ईटेतीन: अदिक जो यावारा आऊन मा विश्वास माळ्यान, आव यातोदारा रीति देल निराश आगतीदील.”
1PE 2:7 नीव विश्वासीगोळ साटी ईद कल्ल हापाळ किमती आद; लेकीन जो विश्वास माळालुर आंदुर साटी “अद कल्ल यारी राजमिस्त्रीगोळ बेकार सम्सकु इनकार माळीदुर, अदा कल्ल सप्पा मुंदुर साटी महत्वपुर्ण क्वाना अन कल्ल बनसेत,”
1PE 2:8 अदिक शास्त्र दा ईद भी लिख्सकु आद, “ईद अद कल्ल हुन जो अपराधी लॉकुरी ठेस पहुचुसोद कारण बनसीत, ईद चट्टान लॉकुरी ठोकर हचकु केळदित.” आंदुर ठोकर तिंदार यतिकी आंदुर परमेश्वर उन वचन मा विश्वास माळालुर अदिक ईदा आंदुर साटी परमेश्वर उन इच्छा ईरोद.
1PE 2:9 लेकीन नीव ऊंद निवळुस्कु वंश, राज-पदधारी याजकगोळ्द समाज, पवित्र जाती, अदिक परमेश्वर उन खुद इन लॉकुर आईर, इदुरसाटी कि याव नीमी अंधकार दा टु तान अदभुत ज्योति दा कार्सदुन, आऊन महान कार्य अन्द घोषणा माळी.
1PE 2:10 ऊंद समय दा नीव परमेश्वर उन लॉकुर ईला ईरीर, लेकीन ईग नीव आऊन लॉकुर हुईर; ऊंद समय ईरोद याग नीम मा परमेश्वर उन दया ईला आगीत, लेकीन ईग नीम मा आऊन दया आग्याद.
1PE 2:11 हे प्रिय संगीगोळा, ना नीम से, जो ई दुनिया दा अजनबीगोळ रूप दा आईर, निवेदन माळतीन कि आ शारीरिक इच्छागोळ देल दुर ईरी जो नीम्द आत्मा से लळुस्तेला ईरतद.
1PE 2:12 दुसरा जातीगोळ न्याड्या तान चाल चलन हिंग वळ्लीद माळकु ईटी कि चाहे आंदुर अपराधीगोळ्द रूप दा नीम्द आलोचना माळ्यार लेकीन नीम्द वळ्लीद कर्मगोळ्द परिणाम स्वरूप आऊन बरव दिन आंदुर परमेश्वर उक महिमा प्रदान माळुल.
1PE 2:13 प्रभु उन साटी तान तान इक हर मानव अधिकार इन हात्‍ती ईरी: राजा अन हात्‍ती इदुरसाटी कि आव सब मा शासन माळतान,
1PE 2:14 अदिक शासकगोळ्द, यतिकी आंदुर बुरा लॉकुरी दण्ड कोळोद अदिक वळ्लेव लॉकुर्द प्रशंसा अन साटी आऊन द्वारा कळुकु आग्यार.
1PE 2:15 यतिकी परमेश्वर उन नीम से ईद इच्छा आद कि नीव तान भलाई इन क्याल्सागोळ देल मूर्ख लॉकुर्द अग्यान देल तुमकु मातगोळ इक सुंगा माळबुळी.
1PE 2:16 स्वतंत्र मंळसा अन घाई जीवन बीतुसी, लेकीन तान स्वतंत्रता अन्द इस्तेमाल बुरा मातगोळ इक होच्चोर साटी माळबाळी; लेकीन परमेश्वर उन सेवकगोळ्द घाई जित्‍ता ईरी.
1PE 2:17 सप्पा मुंदुर्द आदर माळी, तान दुसरा विश्वासी वार्टुर से प्यार ईटी, परमेश्वर उन आदर इन सांगुळ अंज्क मान्सी, राजा अन सम्मान माळी.
1PE 2:18 हे सेवकगोळा, तान तान इक तान स्वामीगोळ्द हात्‍ती ईटी, अदिक आंदरी पुरा रीति देल आदर कोळी, ना सिर्फ आंदरी जो वळ्लेर आर अदिक दुसरा अन भलाई माळतार बल्‍की आंदरी भी जो कठोर आर.
1PE 2:19 यतिकी अगर यावारा परमेश्वर उन विचार माळकु अन्याय देल दुख नेगुतेला क्लेश सहन माळतान रा ईद वळ्लीद आद.
1PE 2:20 यतिकी अगर नीव अपराध माळकु बुक्‍की तिंदीर अदिक धीरज हुळदीर, रा ईदुर दा येन बळाई इन मात आद? लेकीन अगर भलाई इन क्याल्सा माळकु दुख नेगुतीर अदिक धीरज हुडुतीर, रा ईद परमेश्वर उक भाऊसतद.
1PE 2:21 लेकीन नीमी परमेश्वर इदुरसाटी कारदुन, यतिकी मसीह नीम साटी दुख नेगदुन अदिक हिंग माळकु नाम्द साटी ऊंद उदाहरण बिट्टुन ताकी नीव भी आऊन पद-चमत्कारगोळ मा नळु सकीर.
1PE 2:22 आव येनु पापगोळ माळीदिल अदिक यावारा यागल्यारा भी आऊन बाय देल ख्वाटा मातगोळ केळीदील.
1PE 2:23 याग आव अपमानीत आदुन आग आव याऊकु अपमानीत माळकु प्रती उत्‍तर माळीदील, याग आव दुख झेल्सदुन आग आव यारूकु धमकी कोटीदील, बल्‍की आ खरा न्याय माळावाळा न्यायी परमेश्वर दा तान आशा अक ईटदुन.
1PE 2:24 मसीह खुद अच नामव पापगोळ तान मय मा ताकोमकु क्रूस मा येरेदुन, ताकी नाव तान पापगोळ्द प्रती नाम मृत्यु आगेगुल अदिक न्यायीपन इन साटी जीवन बितुसेव: ईद आऊन आ बलिदान इन कारण अच आत यऊर देल नीव चंगा माळकु आगीर.
1PE 2:25 यतिकी नीव पयले भटकुसकु म्यांडा अन घाई ईरीर, लेकीन ईग तान जीवगोळ रखवाला अदिक अध्यक्ष अन हात्‍ती बंदीर.
1PE 3:1 ईदा रीति देल हे हिंग्सुरा, नीव भी तान गांड्ड उन हात्‍ती ईरी, ताकी याव परमेश्वर उन वचन मा विश्वास माळालुर रा तान चाल चलन देल अच नीव आऊक विश्वास देल जीत सकतीर. इदुरसाटी नीमी आऊन से मातचीत माळोद भी जरवत हैलेच.
1PE 3:2 यतिकी आंदुर नोळ्यार नीम्द चाल चलन ह्यांग पवित्र अदिक भक्तिपुर्ण आद.
1PE 3:3 तान तान इक सुंदर माळोर साटी व्हार्या अन साझ श्रृंगार इन इस्तेमाल माळबाळी, जसा कि चुट्टी गुथसोर साटी, या बाक व्हान्ना अन बांगळागोळ, या वळ्लेव-वळ्लेव कपळा हाक्‍कोर साटी,
1PE 3:4 बल्‍की नीमी सुंदर नीम्द भितरी व्यक्तित्व माळतद, मुलायम मन अदिक शांत आत्मा अन्द अविनाशी सुंदरता देल युक्त आगी, परमेश्वर उन नजर दा जो किमती आईर.
1PE 3:5 पूर्वकाल दा भक्ति माळावाळेर आर्तेर भी, जो परमेश्वर मा पवित्र आशा ईटतोगोर, तान तान इक ईदा रीति देल सवार्सतोगोर अदिक तान तान गांड्ड उन हात्‍ती ईरतोगोर.
1PE 3:6 जसा सारा तान गांड्ड अब्राहम उन आग्या मान्सोर अदिक आऊक तान स्वामी अनतोगोर. ईदा प्रकार नीव भी अगर भलाई माळीर अदिक यातोदारा प्रकार इन अंज्क देल अंजतीदील, रा प्रभु पोरगोळ ठहरूसीर.
1PE 3:7 हांग अच हे गांड्ड उरा, नीव तान हिंग्सुर सांगुळ समझदारी देल ईरी, अदिक आंदरी कमजोर आर्त जान्सकु आंदुर्द आदर माळी, परमेश्वर उन जीवन इन वरदान दा आंदरी तान सह उत्‍तराधिकारी मान्सी, ताकी नीम्द प्रार्थनागोळ दा बाधा बिळबाळुल.
1PE 3:8 अन्त दा नीव सप्पा मुंदरी समान विचार, सहानुभुती, तान वार्टुरगोळ से प्यार माळावाळा, दयालु अदिक नम्र आगली पायजे.
1PE 3:9 बुराई इन बदला बुराई माळबाळी अदिक श्राप इन बदला श्राप कोळबाळी; बल्‍की प्रत्युत्‍तर दा आशीष अच कोळी, यतिकी आशीष अच आद जो परमेश्वर नीमी कोळोद वचन कोटीदुन याग नीमी कार्सीदुन.
1PE 3:10 जसा शास्त्र दा लिख्सकु आद, “अगर आव जीवन इन प्यार ताकोमोद चाहासतान, अदिक वळ्लेव दिन नोळोद चाहासतान, आव तान ल्यालग्या अक बुरा मातगोळ देल, अदिक तान टुट्टीगोळ इक ख्वाटा माताळदुर देल रोक्सकु ईटी इदुर्दा अच भलाई आद.
1PE 3:11 आव बुराई इन सांगुळ बिळुल, अदिक भलाई इच माळुल; आव पुरा मन देल शांती इन साटी प्रयास माळुल.
1PE 3:12 यतिकी प्रभु उन कण्णगोळ न्याय मा हतकु ईरताव, अदिक आऊन किव आंदुर्द विनती दा हतकु ईरताव; लेकीन प्रभु बुराई माळावाळेर्द विंमुख ईरतान.”
1PE 3:13 अगर नीव भलाई माळोर साटी तयार ईत्‍तीर रा नीम्द बुराई माळावाळा बाक याव आन?
1PE 3:14 अगर नीव सच्चाई इन कारण दुख भी नेगदीर, रा धन्य आईर; लेकीन लॉकुर्द अंजुसदुर देल अंजबाळी, अदिक घबरूसबाळी,
1PE 3:15 लेकीन तान मन दा मसीह अन साटी सम्मान ईटी, आऊक प्रभु जान्सकु आदर कोळी. अदिक अगर यावारा नीम इक नीम्द शुद्ध आशा अन बारा दा जो नीम दा आद समझुस्ली अनुल; रा आऊक उत्‍तर कोळोर साटी हमेशा तयार ईरी.
1PE 3:16 लेकीन ईद विनम्रता अदिक भलाई इन सांगुळ अच माळी. अदिक तान विवेक इक भी शुद्ध ईटी, ताकी यीशु मसीह दा नीम्द वळ्लीद चाल चलन देल नीम सम्मान आगुल अदिक निंदा माळावाळेर लॉकुर नीम्द अपमान माळाहोती लज्जित आगुल.
1PE 3:17 यतिकी अगर परमेश्वर उन ईदा इच्छा आद कि नीव भलाई माळोद कारण दुख नेगी, रा बुराई माळोद बदला दुख नेगोद वळ्लीद आद.
1PE 3:18 इदुरसाटी मसीह भी पुरा पापगोळ न्याय माळोर साटी ऊंद अच घन सोत्‍तुन, मतलब आव जो निर्दोष ईरोन नाव पापीगोळ साटी सोतोदुन कि नामी परमेश्वर उन हाती ओयुल. मय इन भाव देल रा आव कोंदकु आदुन, लेकीन आत्मा अन भाव देल जित्‍ता माळकु आदुन.
1PE 3:19 अदिक आऊन आत्मा अन्द स्थिती दा अच आव होगकु आ कैदी आत्मागोळ इक प्रचार माळदुन,
1PE 3:20 ईव अव आत्मागोळ हुव जो आ समय परमेश्वर उन आग्यागोळ मा विश्वास ईला माळतोगोर याग नूह अन्द ड्वांगा माळकु आगोद अदिक परमेश्वर धीरज इन सांगुळ हादी कायोन आग आ ड्वांगा दा थ्वाळासा मतलब सिर्फ येठ्ठ मंळसागोळ अच नीर दा टु ऊळदीदुर.
1PE 3:21 ईद नीर आ बपतिस्मा अन्द घाई आद यदुर देल नीम्द भलाई आगतद इदुर दा मय इन मईल तोळोद ईला बल्‍की ऊंद शुद्ध विवेक इन साटी परमेश्वर से विनती आद ईग रा बपतिस्मा नीमी यीशु मसीह अन्द पुनरूत्थान इन द्वारा ऊळस्तद.
1PE 3:22 आव स्वर्ग मा होगकु परमेश्वर उन ऊमा कय दी कुरतोदुन; अदिक स्वर्गदूत अदिक स्वर्गीय अधिकारी अदिक सामर्थ्य आऊन हात्‍ती माळकु आदुर.
1PE 4:1 इदुरसाटी याग कि मसीह मय दा आगकु दुख नेगदुन रा नीव भी अदा मनसा अक हथियार इन घाई धारण माळी, यतिकी याव मय दा दुख नेगदुन आव पापगोळ देल बिटोदुन,
1PE 4:2 ईग टु मुंद नीम्द वाचुस्त समय पृथ्वी इन जीवन मानवीय इच्छागोळ्द अनुसार ईला बल्‍की परमेश्वर उन इच्छा अन अनुसार जीवन व्यतीत माळुल.
1PE 4:3 यतिकी मूर्ति पुजा माळावाळेर्द इच्छा अन्द अनुसार क्याल्सा माळोद, अदिक असभ्यता, वासना, पियक्‍कळपन अवैध संबंध, रंगरेली, अदिक बेकार मूर्तिपूजा दा यल ताका नाव पयले समय गऊसदेव, अदा हापाळ आत.
1PE 4:4 इदुर देल आंदुर अचम्भा माळतार कि नीव हिंग बोयोद जंगलीपन अदिक लापरवाह अन्द जीवन जगुसोर दा आंदुर साथ कोळालीर, अदिक इदुरसाटी आंदुर नीम्द अपमान माळतार;
1PE 4:5 लेकीन जो सोतकु आर अदिक जित्‍तागोळ्द न्याय माळोर साटी तयार आन आ परमेश्वर उक नामी तान व्यवहार इन लेखा जोखा कोळोद बिद्दीत.
1PE 4:6 इदुरसाटी आ विश्वासीगोळ इक जो सोतोग्यार खुशखबरी इन उपदेश कोटकु आगीत कि शारीरिक रूप देल चाहे आंदुर्द न्याय मानवीय स्थल मा आगुल लेकीन आत्मिक रूप देल आंदुर परमेश्वर उन अनुसार जित्‍ता ईरूल.
1PE 4:7 सप्पा मातगोळ्द अन्त तुरन्त आगावाळा आद; इदुरसाटी संयमी आगकु प्रार्थना माळोर साटी सचेत ईरी.
1PE 4:8 सब से धोळ मात ईद आद कि आबुर दाबुर से प्यार ईटी, यतिकी प्यार अनेक पापगोळ इक मुच्च बुळतद.
1PE 4:9 बिना कुळकुळ्सकु आबुर दाबुर अतिथी-सत्कार माळी.
1PE 4:10 यारी जो वरदान सिक्याद, आव अदरी परमेश्वर उन अलग-अलग प्रकार इन अनुग्रह अन भला भंडारीगोळ घाई आबुर दाबुर स्यावा दा हची.
1PE 4:11 जो यावारा प्रचार माळुल, आव परमेश्वर उन वचन इन प्रचार माळुल; जो यावारा स्यावा माळुल, रा आ शक्ति इन सांगुळ माळुल जो परमेश्वर कोळतान; इदुरसाटी ई सप्पा मातगोळ दा यीशु मसीह अन द्वारा, परमेश्वर उन स्तुति आगुल. महिमा अदिक साम्राज्य हमेशा हमेशा आऊन आद. आमीन.
1PE 4:12 हे प्रिय संगीगोळा, याग नीम्द अग्नि परीक्षा आगतद आग हिंग असामान्य मातगोळ आगतेला नोळकु नीव आश्चर्य चकित आगबाळी.
1PE 4:13 लेकीन ह्यांग-ह्यांग मसीह अन दुख दा सहभागी आगतीर, खुश ईरी, यदुर देल याग आऊन महिमा प्रगट आदीत आ घन भी नीव पुरा रीति देल आनन्दित आगेगी.
1PE 4:14 बाक अगर मसीह अन हेसुर इन साटी नीव अपमानीत आगतीर रा नीव धन्य माळी, यतिकी आव महिमामय परमेश्वर उन आत्मा नीम मा आगतद.
1PE 4:15 नीम दा टु यावारा मंळसा हत्यारा या काळ्ल या कुकर्मी आगदुर मा, या पराया क्याल्सा दा कय हाका कारण दुख ईला सिकुल.
1PE 4:16 लेकीन ई मात साटी परमेश्वर उन धन्यवाद माळी, यतिकी नीव मसीह हेसुर ग्रहण माळदीर.
1PE 4:17 यतिकी न्याय माळोद समय इन सुरूवात आगेग्याद कि पयले परमेश्वर उन लॉकुर्द न्याय माळकु आगुल; अदिक याग कि न्याय इन सुरूवात नाम देल अच आदीत रा आंदुर्द येन अन्त आदीत जो परमेश्वर उन खुशखबरी मा विश्वास माळालुर?
1PE 4:18 हिंग शास्त्र दा लिख्सकु आद, “अगर वळ्लेव न्याय माळावाळा मंळसा अक अच कठिनाई देल उद्धार सिक्‍कीत, रा भक्तिहीन बयमान अदिक पापी इन येन आदीत?”
1PE 4:19 इदुरसाटी जो परमेश्वर उन इच्छा अन अनुसार दुख नेगुतार, आंदुर भलाई माळतेला तान-तान जीव विश्वासलायक सृजनहार इन कय दा सौप्स बुळुल.
1PE 5:1 नीम दा जो स्याणा आन, ना आंदुर घाई स्याणा अदिक मसीह अन दुखगोळ्द गवाह अदिक प्रगट आगावाळा महिमा दा सहभागी आगकु आंदरी ईद समझुसतीन.
1PE 5:2 कि परमेश्वर उन आ झुण्ड इन, जो नीम्द न्याड्या दा आद रखवाली माळी; अदिक दबाव देल ईला लेकीन परमेश्वर उन इच्छा अन अनुसार खुशी देल, अदिक कमाई इन लालच साटी ईला लेकीन मन हचकु.
1PE 5:3 जो लॉकुर नीम्द देखरेख इन साटी सौप्सकु आग्यार, नीव आंदुर मा अधिकार जतुसबाळी, बल्‍की झुण्ड इन साटी ऊंद आदर्श बन्सी.
1PE 5:4 याग प्रधान रखवाला प्रगट आदान, रा नीमी महिमा अन मुकुट कोटकु आदीत यदुर्द चमक यागलु खतम आगाल.
1PE 5:5 ईदा प्रकार हे नवयुवकगोळा, नीव भी तान स्याणागोळ्द हात्‍ती ईरी, अदिक नीव सप्पा च्या सप्पा आबुर दाबुर स्यावा माळोर साटी विनम्रता धारण माळी, यतिकी शास्त्र दा लिख्सकु आद, “परमेश्वर अभिमानीगोळ्द विरोध माळतान, लेकीन नम्र लॉकुर मा अनुग्रह माळतान.”
1PE 5:6 इदुरसाटी परमेश्वर उन बलवन्त कय इन ल्यालमा दीनता देल ईरी, यदुर देल आव नीमी उचित समय मा वाळुसुल.
1PE 5:7 तान सप्पा चिन्ता आऊन मा हाक बुळी, यतिकी आऊक नीम्द ध्यान आद.
1PE 5:8 सचेत आगी, अदिक जाग्सतेला ईरी; यतिकी नीम्द दुश्मन शैतान गरजुसतेला हुल्ल इन घाई ईल अल ओयाळतेला ई ताक दा ईरतान कि यारीक हरकु तिनुल.
1PE 5:9 विश्वास दा मजबूत आगकु, अदिक ईद जान्सकु आऊन सामना माळी कि नीम वार्टुर जो दुनिया दा आर हिंग अच दुख झेलसेत्यार.
1PE 5:10 ईग परमेश्वर जो सप्पा अनुग्रह अन दाता आन, याव नीमी मसीह दा तान अनन्त महिमा अन साटी कारदुन, नीम्द थ्वाळासा समय ताका दुख नेगदुर बाद्दा खुद अच नीमी सिद्ध अदिक संची अदिक बलवन्त माळ्यान.
1PE 5:11 आऊंदा साम्राज्य हमेशा हमेशा ईरूल. आमीन.
1PE 5:12 ना नीमी ऊंद संक्षिप्त चिट्ठी सिलवानुस उन सहयोग देल लिख्सदीन, यारी ना विश्वासलायक मसीह वार्ट मान्सतीन. ना नीमी प्रोत्साहित माळोद चाहसतीन अदिक नांद गवाही कोळतीन जो परमेश्वर उन सही अनुग्रह हुन, ईदुर दा संची ईरी.
1PE 5:13 जो बेबीलोन दा नीम्द घाई निवळुस्द मंडली इन लॉकुर, आंदुर नीमी नमस्कार अनतार अदिक मसीह दा नान पार मरकुस उन भी नीमी नमस्कार.
1PE 5:14 मसीह दा प्यार पुर्ण भाव देल आबुर दाबुर इक कुतक्या हुडुकु नमस्कार माळी. नीमी सप्पा मुंदरी, जो मसीह दा आईर, शांती सिकतेला ईरूल.
2PE 1:1 शमौन पतरस उन दी टु, जो यीशु मसीह अन्द दास अदिक प्रेरित आर, आ लॉकुर हेसुर यार नामव परमेश्वर अदिक उद्धारकर्ता यीशु मसीह अन्द न्याय इन द्वारा नाम घाई किमती विश्वास प्राप्त माळ्यार.
2PE 1:2 परमेश्वर उन अदिक नाम प्रभु यीशु उन पयचान इन द्वारा अनुग्रह अदिक शांती नीम दा बहुतायत देल वाळुस्त होगुल.
2PE 1:3 यतिकी परमेश्वर उन ईश्वरीय सामर्थ्य सप्पा येनारा जो भक्तिमय जीवन हततद, नामी अदुर्दा पयचान इन द्वारा कोटान, याव नामी तान अच महिमा अदिक सदगुण इन अनुसार कारदान.
2PE 1:4 यऊर द्वारा आव नामी किमती अदिक हापाळ अच धोळ्द वादा कोटुन: कि इऊर द्वारा नीव आ भ्रष्टता देल बीळस्कु, जो दुनिया दा बेकार अभिलाषागोळ देल आगतद, ईश्वरीय स्वभाव इन सहभागी आगेगी.
2PE 1:5 ईदा कारण सप्पा प्रकार इन कोशिश माळकु तान विश्वास दा भक्तिभाव इक जोळसी; अदिक भक्तिभाव दा ग्यान इक,
2PE 1:6 अदिक तान ग्यान दा आत्मसंयम इक जोळ्स, अदिक आत्मसंयम दा धीरज इक जोळसी, अदिक धीरज दा परमेश्वर उन भक्ति इक,
2PE 1:7 अदिक नीम्द परमेश्वर उन भक्ति दा मसीह भाईचारा अक; अदिक मसीह भाईचारा दा प्यार इक जोळ्सी.
2PE 1:8 यतिकी ईव पुरा गुणगोळ्द जरवत आद, अदिक अगर ईव मातगोळ नीम दा बहुतायत देल आव रा ईद नीमी नाम्द प्रभु यीशु मसीह अन ग्यान दा क्रियाशील अदिक प्रभावशाली माळ्याव.
2PE 1:9 लेकीन अगर नीम दा ईव मातगोळ ईलच, रा नीम इक दुर दृष्टी ईला नीव कुढ्ढ आईर तथा मारतोगीर कि नीम्द पयला अन पाप तोळकु आगेग्याव.
2PE 1:10 ईदा कारण हे वार्टुरा, तान कारूकु आगोद, अदिक निवळुस्द आगोद इक सिद्ध माळोर साटी वळ्लीद रीति देल कोशिश माळतोगी, यतिकी अगर हिंग माळीर रा यागलु ठोकर तिनतीदील;
2PE 1:11 बल्‍की ई रीति देल नीव नाम्द प्रभु अदिक उद्धारकर्ता यीशु मसीह अन्द अनन्त राज्य दा धोळ्द आदर इन सांगुळ प्रवेश माळ सकीर.
2PE 1:12 इदुरसाटी अगर नीव ईव मातगोळी जान्सतीर, अदिक जो सच्चाई इन वचन नीमी सिक्याद अदुर दा बन्सकु ईरतीर, तरी ना नीमी ईव मातगोळ्द याद तोरसोर साटी हमेशा तयार ईराइन.
2PE 1:13 ना ईद तान साटी सही सम्सतीन कि यागासताका ना ईद मय दा जित्‍ता आईन, आगासताका ना नीमी याद तोर्सतेला ईराइन.
2PE 1:14 यतिकी ना जान्सतीन कि ना तान नाशवन्त मय बिळावाळा आईन, ह्यांग कि नामव प्रभु यीशु मसीह नानी ईद हेळीदुन.
2PE 1:15 इदुरसाटी ना तान दी टु पुरा कोशिश माळाईन कि नान सोत्‍तुर बाद्दा भी नीव लॉकुर ईव सप्पा मातगोळ इक हमेशा याद माळ सकीर.
2PE 1:16 यतिकी याग नाव नीमी तान प्रभु यीशु मसीह अन सामर्थ्य इन अदिक आगमन इन समाचार कोटीदेव, रा अद चतुराई देल नटकु कात्‍तागोळ्द अनुकरण ईला ईरोद बल्‍की नाव खुद अच आऊन महानता अक नोळीदेव.
2PE 1:17 यतिकी याग आऊक परमेश्वर आप्प से आदर अदिक प्रशंसा सिक्त अदिक आ प्रतापमय महिमा दा टु ईद वाणी बत्‍त, “ईव नान प्रिय पार हुन, यार देल ना खुश आईन.”
2PE 1:18 याग नाव आऊन सांगुळ पवित्र पहाळी मा ईरेव अदिक आकाश टु ईद वाणी बर्त केळदेव.
2PE 1:19 नाम हात्‍ती जो भविष्यवक्तागोळ वचन आद, अद ई घटना देल मजबूत ठहरूस्त. नीव ईद वळ्लीद माळतीर जो ईद सम्सकु आऊन मा ध्यान माळतीर कि आव ऊंद दिंग्या हुन, जो अंधार जागा दा आ समय ताका उजुळ कोळतेला ईरतद यागासताका कि व्हातुर आगाल अदिक व्हातुर इन तारा नीम्द मन दा चमकुसाल्द.
2PE 1:20 सब से धोळ मात ईद आद कि नीमी ईद जान्स कोम पायजे कि शास्त्र अन यातोदारा भी भविष्यवाणी यातोदु भविष्यवक्ता अन नीजी विचारगोळ्द आधार मा कोळ्द स्पष्टीकरण आल्लच.
2PE 1:21 यतिकी यातोदारा भी भविष्यवाणी मंळसा अन इच्छा देल यागलु आगीदील, लेकीन भक्त जन प्रभावित आगकु पवित्र आत्मा अन द्वारा परमेश्वर उन दी टु माताळतोगोर.
2PE 2:1 ह्यांग पूर्वकाल दा लॉकुर्द न्याड्या दा ख्वाटा भविष्यवक्ता प्रगट आगीदुर, अदा प्रकार नीम्द न्याड्या दा भी ख्वाटा गुरु प्रगट आदार. आंदुर भटकुसावाळा सच्चाई सिद्धांतगोळ इक तंदार, अदिक आ स्वामी इन इनकार माळ्यार याव आंदरी कोंड कोंडान, अदिक हिंग माळकु आंदुर तान जल्दी विनाश इक निमंत्रण कोट्टार.
2PE 2:2 तरी भी हापाळ पुरा लॉकुर आंदुर्द अनैतिक हादीगोळ मा नळदार; यतिकी जो आंदुर माळतार, आदुर वजह देल दुसरा मुंदुर अपमान सच्चाई अन्द बदला माळ्यार.
2PE 2:3 आंदुर लोभ दा बंदकु ख्वाटा मातगोळी माळ्यार अदिक नीम से अनुचित लाभ नेगदार. दण्ड इन आग्या रा आंदुर मा पयले टु अच आगेग्याद, अदिक आंदुर्द विनाश इन निर्णय आगेग्याद.
2PE 2:4 यतिकी याग परमेश्वर आ स्वर्गदूतगोळ इक यार पाप माळदुर आंदरी बिटीदिल, लेकीन नरक दा कळुकु अंधार दा हाक्‍क बुट्टुर ताकी न्याय इन दिन ताका शंकलीगोळ दा दुख सहन माळुल;
2PE 2:5 अदिक स्याणा लॉकुर युग इन दुनिया अक भी बिटीदिल बल्‍की भक्तिहीन दुनिया मा महा जल प्रलय कळुदुन, लेकीन न्याय इन प्रचार माळावाळा नूह अदिक येळ मंळसागोळी ऊळ्स बुट्टुन;
2PE 2:6 अदिक सदोम अदिक गमोरा अन नगरगोळ इक दोषी ठहरूस्कु दण्ड कोट्टुन अदिक आंदरी बेक्‍की देल भसम माळदुन ताकी आंदुर बरावाळेर भक्तिहीन लॉकुर्द शिक्षा अन साटी उदाहरण बनसुल,
2PE 2:7 अदिक न्यायी लूत इक जो अन्यायीगोळ्द अनैतिक चाल चलन देल हापाळ दुखी ईरोन छुटकारा कोट्टुन.
2PE 2:8 यतिकी आव न्यायी आंदुर बीच दा ईरतेला अदिक आंदुर अन्याय इन क्याल्सागोळ इक नोळ नोळकु अदिक केळ केळकु, हर दिन दुख देल तळपुस तोगोन.
2PE 2:9 रा प्रभु भक्तगोळ इक परीक्षा दा टु तेगोद अदिक अन्यायीगोळ इक न्याय इन दिन ताका दण्ड इन दशा दा ईटोद भी जानस्तान,
2PE 2:10 विशेष माळकु आंदरी जो कलंकीत अभिलाषागोळ हिंद मय इन अनुसार नळुतार अदिक प्रभु अक तुच्छ जानस्तार. आंदुर ढीठ, अदिक जिद्दी आर, अदिक धोळ पदवाळेर इक भला बुरा माताळली अंजालुर,
2PE 2:11 तरी भी स्वर्गदूतगोळ जो न्याय अदिक सामर्थ्य दा ख्वाटा गुरुगोळ देल धोड्डेर आर, प्रभु उन मुंद आंदरी बुरा भला अनकु दोष हचालुर.
2PE 2:12 लेकीन ई लॉकुर निर्बुद्धी पशुगोळ्द अच तुल्य आर, जो हुळकु आगोर साटी अदिक नाश आगोर साटी पैदा आग्यार; अदिक या मातगोळ इक जानसालुर अच अदुर बारा दा दुसरा अक भला बुरा अनतार, आंदुर आळी दाकळोद पशुगोळ्द घाई नाश माळकु आदार.
2PE 2:13 दुसरा अन बुरा माळोद बदला आंदुर दा बुरा आदीत. आंदरी ईळ्लक हागुल भोग विलास माळोद भला हततद. हिंग लॉकुर कलंकीत अदिक दोषी आर; याग आंदुर नीम सांगुळ तिनतार अदिक कुडुतार, रा आंदुर ध्वाका धळी देल भोज माळकु भोग विलास माळतार.
2PE 2:14 आंदुर कण्णगोळ दा व्यभिचार कुर्तकु आद, अदिक आंदुर पाप माळदुर बिना रूक्स सकालुर. आंदुर कमजोर लॉकुरी जाल दा फसुस कोमतार. आंदुर मन इक लोभ माळोद अभ्यास आगेग्याद; परमेश्वर उन शराप आंदुर मा आद.
2PE 2:15 आंदुर सीदा हादी अक बिटकु भटकुसेग्यार, अदिक बओर उन पार बिलाम उन हादी मा आगेग्यार, याव अन्याय इन मजदूरी इक प्रिय जान्सदुर;
2PE 2:16 अदिक आऊक आऊन पाप इन बारा दा फटकार सिक्त, ईल ताका कि अबोल गधा मंळसा अन बोली देल आ भविष्यवक्ता अक आऊन बावलापन देल रोक्सत.
2PE 2:17 ई लॉकुर वंळगींद भायगोळ, अदिक आंधी इन हार्स्द बादल उर; परमेश्वर आंदुर साटी अनन्त खोल अंधकार ठहरूस्यान.
2PE 2:18 आंदुर बेकार घमण्ड इन मातगोळी माळ माळकु अनैतिक क्याल्सागोळ द्वारा, आ लॉकुरी शारीरिक अभिलाषागोळ दा फसुस बुळतार जो भटकुसकु दा टु होळोद सुरूवात ईगल्या अच माळेत्यार.
2PE 2:19 आंदुर आंदरी स्वतंत्र माळोद प्रतिग्या रा माळतार, लेकीन खुद अच भ्रष्टता अन दास आर; यतिकी जो मंळसा यार देल हारूसेग्यान, आव आऊन दास बनसेगतान.
2PE 2:20 याग आंदुर प्रभु अदिक उद्धारकर्ता यीशु मसीह अन पयचान इन द्वारा दुनिया अन नाना प्रकार इन कलंक देल उळ्दकु होट्टुर, अदिक मात्‍त आंदुर दा फसुसकु हारूसेदूर, रा आंदुर्द पिछला दशा पयले टु भी बेकार आगेग्याद.
2PE 2:21 यतिकी न्याय इन हादी इन ईला जानसोद अच आऊन साटी इदुर से भला आगाईत कि अदरी जान्सकु, आ पवित्र आग्या देल बदलुसेगायदुर जो आंदरी कोटकु आगीत.
2PE 2:22 आंदुर मा ईद कहावत सही कुरतद, कि नाय तान माळ्स इन दी अदिक मय कय तोळ्द हंदी केसुर दा गळबळ्या होडोर साटी मात्‍त ओळेगतद.
2PE 3:1 हे प्रिय संगीगोळा, ईग ना नीमी ईद दुसरा चिट्ठी लिख्सतीन, अदिक येढ्ढु दा याद कोळसुस्कु नीम्द शुद्ध मन इक जागृत माळोद विचार माळतीन,
2PE 3:2 कि नीव आ मातगोळ इक जो पवित्र भविष्यवक्ता पयले टु अंदार, अदिक प्रभु अदिक उद्धारकर्ता अन आ आग्या अक याद माळी जो नीम्द प्रेरितगोळ उन द्वारा कोटकु आगीत.
2PE 3:3 सब से पयले ईद जान्स कोमी कि आखरी दिनगोळ दा नीम्द मज्याक हार्सावाळेर बंदार जो तान अच अभिलाषागोळ्द अनुसार नळदार
2PE 3:4 अदिक केळ्यार, “आव बरोद प्रतिग्या माळीदुन, येन आव माळीदिल? आव येल आन? नाम पुर्वज रा पयला टु अच सोतोग्यार लेकीन यागी टु दुनिया बनस्याद सप्पा मातगोळ हांग अच नळुतेला बरेत्याव.”
2PE 3:5 आंदुर रा जान बुझुस्कु ईद मारतोदुर कि परमेश्वर उन कोळ्द आग्या देल आकाश अदिक पृथ्वी माळकु आग्याद अदिक पृथ्वी नीर दा टु बन्सत अदिक नीर दा संची आद,
2PE 3:6 इदुर्दा कारण आ दुनिया अन दुनिया नीर दा मुळ्ककु नाश आगेत.
2PE 3:7 लेकीन ईद आकाश अदिक पृथ्वी ईंद अस्तित्व दा आद, आऊंदा आदेश इन द्वारा बेक्‍की देल नाश आगोर साटी सुरक्षित आद; इंदरी आ दिन इन साटी ईटकु आगेत्याद याग अन्यायी लॉकुर्द न्याय आदीन अदिक आंदुर नाश माळकु आदार.
2PE 3:8 हे प्रिय संगीगोळा, ईद ऊंद मात इक मारूबाळी कि प्रभु उन नजर दा ऊंद दिन अदिक ऊंद हजार साल दा येनु फरक हैलेच; आऊन साटी ईव येढ्ढु बराबर आव.
2PE 3:9 प्रभु तान प्रतिग्या अन बारा दा समय माळालुन, ह्यांग समय थ्वाळासा लॉकुर सम्सतार; लेकीन नीम्द बारा दा संयम हुडुतान, अदिक चाहासालुन कि यावारा नाश आगुल, बल्‍की ईद कि सप्पा मुंदरी मन फिराव इन मवका सिकुल.
2PE 3:10 लेकीन प्रभु उन दिन काळ्ल उन घाई होट बंदीत, आ दिशी आकाश हापाळ गर्जना अन सांगुळ अदृश्य आगेदीत, अदिक आकाश इन पुरा चिजगोळ होतकु नाश आगेदव अदिक पृथ्वी अदिक अदुर दाकळव सप्पा मातगोळ गायब आगेदव.
2PE 3:11 जब कि ईव सप्पा वस्तुगोळ ई रीति देल नाश आगावाळा आव, रा नीमी याता प्रकार इन लॉकुर आग पायजे? नीम्द जीवन पवित्र अदिक परमेश्वर उन दी समर्पित आगली पायजे,
2PE 3:12 अदिक परमेश्वर उन आ दिशी इन हादी याता रीति देल काय पायजे अदिक आऊन जल्दी बरोद साटी ह्यांग कोशिश माळ पायजे, यदुर कारण आकाश बेक्‍की देल नाश माळकु आदीत, अदिक आकाश इन पुरा वस्तुगोळ गरमी देल पिघलुसेव.
2PE 3:13 लेकीन आऊन वादा अन अनुसार नाव ऊंद व्हाशोद आकाश अदिक व्हाशोद पृथ्वी इन आस नोळतेव यदुर दा न्याय वास माळीत.
2PE 3:14 इदुरसाटी, हे प्रिय संगीगोळा, ह्यांग नीव आ दिन इन हादी कायेतीर, रा तान दी टु पुरा कोशिश माळी कि नीव शांती देल परमेश्वर उन नजर दा आलोचना रहित अदिक निष्कलंक ठहरूसी,
2PE 3:15 नाम्द प्रभु उन धीरज इक जो आव नामी कोटान उद्धार इन संधी सम्सी, ह्यांग नाम प्रिय संगी पौलुस भी आ ग्यान देल जो परमेश्वर वार्ट उक कोटीदुन अदुर्द इस्तेमाल माळकु लिख्सदुन.
2PE 3:16 हांग अच आव तान सप्पा चिट्ठी गोळ दा भी ईव मातगोळ इक लिख्सदुन, यारदा येनारा मातगोळ हिंग आव यवरी समसोद कठिन आद, अदिक अनपढ़ अदिक चंचल लॉकुर अदुर अर्थगोळी इक भी शास्त्र अन अन्य मातगोळ घाई जेडुकु तांद अच नाश इन कारण माळतार.
2PE 3:17 इदुरसाटी हे प्रिय संगीगोळा, नीव लॉकुर पयला टु उच ईव मातगोळी जान्सकु सावधान ईरी, ताकी न्यायविरूद्ध लॉकुर्द गलतीगोळ्द द्वारा तान स्थिरता अक येल्यारा कय देल काळुकोमी.
2PE 3:18 लेकीन नामव प्रभु अदिक उद्धारकर्ता यीशु मसीह अन अनुग्रह अदिक ग्यान दा वाळुसतेला होगी. आऊन दा प्रशंसा सही मायना दा आगुल, अदिक हमेशा आगतेला ईरूल. आमीन.
1JO 1:1 आ जीवन इन वचन इन बारा दा जो पयले टु ईरोद. यदरी नाव केळेव, अदिक यदरी तान कण्णगोळ देल नोळदेव, उलटा यदरी नाव ध्यान देल नोळदेव अदिक कयगोळ देल मुटदेव.
1JO 1:2 ईद जीवन प्रगट आत्‍त, अदिक नाव आऊक नोळदेव, अदिक आऊन गवाही कोळतेव, अदिक नीमी आ अनन्त जीवन इन समाचार कोळतेव जो आप्प उन सांगुळ ईरोन अदिक नाम मा प्रगट आदुन.
1JO 1:3 जो येनारा नाव नोळेव अदिक केळेव अदुर्द समाचार नीमी भी कोळतेव, इदुरसाटी कि नीव भी नाम सांगुळ सहभागी आगी; अदिक नाम्द ईद सहभागीता आप्प उन सांगुळ अदिक आऊन पार यीशु मसीह अन सांगुळ आद.
1JO 1:4 अदिक ई मातगोळ नाव इदुरसाटी लिख्सतेव कि नाम्द खुशी पुरा आगेगुल.
1JO 1:5 जो समाचार नाव आऊन से केळेव अदिक नीमी केळ्सतेव, अद ईद हुन कि परमेश्वर प्रकाश हुन अदिक आऊन दा येनु उच अंधकार हैलेच.
1JO 1:6 अगर नाव अंदेव कि आऊन सांगुळ नाम्द सहभागीता आद अदिक मात्‍त पाप दा नळदेव, रा नाव ख्वाटा आयेव अदिक सच्चाई मा नळालेव;
1JO 1:7 लेकीन अगर ह्यांग आव प्रकाश दा आन, हांग अच नाव भी प्रकाश दा नळदेव, रा आबुर दाबुर से सहभागीता ईटतेव, अदिक आऊन पार यीशु उन रक्ता नामी सप्पा पापगोळ देल शुद्ध माळतद.
1JO 1:8 अगर नाव अंदेव कि नाम दा येनु भी पाप ईल्लच, रा तान तान इक ध्वाका कोळतेव, अदिक नाम दा सच्चाई ईल्लच.
1JO 1:9 अगर नाव तान पापगोळी मान्स कोंडेव, रा परमेश्वर नामव पापगोळ इक माफ माळोद अदिक नामी सप्पा पापगोळ देल शुद्ध माळदुर दा विश्वासलायक अदिक न्यायी आन.
1JO 1:10 अगर नाव अंदेव कि नाव येनु पाप माळीदिल, रा परमेश्वर उक ख्वाटा ठहरूसतेव, अदिक आऊन वचन नाम दा हैलेच.
1JO 2:1 हे नान चिकोरगोळा, ना ईव मातगोळ नीमी इदुरसाटी लिख्सतीन कि नीव पाप माळबाळी; अदिक अगर यावारा पाप माळतान, रा आप्प उन हात्‍ती नामव ऊंद सहायक आन, मतलब न्यायी यीशु मसीह;
1JO 2:2 अदिक आवा नामव पापगोळ इक माफ माळतान, अदिक उलटा नाम्द अच ईला बल्‍की पुरा दुनिया अन पापगोळ्द भी.
1JO 2:3 अगर नाव परमेश्वर उन आग्यागोळ इक मान्सतेव, रा इदुर देल नाव जान्स कोंडेव कि नाव आऊक जान्सेगेव.
1JO 2:4 जो यावारा ईद अनतान, “कि नाव आऊक जान्स कोंडीन,” लेकीन आऊन आग्यागोळ इक मान्सालुन, रा आव ख्वाटा आन अदिक आऊन दा सच्चाई ईल्लच;
1JO 2:5 पर जो यावारा आऊन आग्यागोळ मा नळुतान, आऊन दा खराखुरा परमेश्वर उन प्यार सिद्ध आग्याद. इदुर देल नाव जान्सतेव कि नाव परमेश्वर उन संगती दा ऊंद आयेव:
1JO 2:6 जो यावारा ईद अनतान कि ना आऊन दा बन्सकु ईरतीन, आऊक पायजे कि खुद भी हांग अच नळुल ह्यांग आव नळुतोगोन.
1JO 2:7 हे प्रिय, ना नीमी यातोदु व्हाशोद आग्यागोळ लिखसालीन, पर अदा हाळोद आग्या जो पयले टु नीमी सिक्याद; ईद हाळोद आग्या अद वचन हुन यदरी नीव केळीर.
1JO 2:8 तरी भी ना नीमी व्हाशोद आग्यागोळ लिख्सतीन, अदिक ईद अदुर दा अदिक नीम दा सही ठहरूसतद; यतिकी अंधकार खतम आगेगतद अदिक सच्चाई इन प्रकाश ईग चमकुस्ली हत्याद.
1JO 2:9 जो यावारा ईद अनतान कि ना प्रकाश दा आईन अदिक आव तान मसीह वार्ट से दुश्मनी ईटतान, आव ईगासताका अंधकार दा अच आन.
1JO 2:10 जो यावारा तान मसीह वार्ट से प्यार ईटतान आव प्रकाश दा ईरतान, अदिक आव यारदु ठोकर इन कारण बन्स सकालुन.
1JO 2:11 पर जो यावारा तान मसीह वार्ट से दुश्मनी ईटतान आव अंधकार दा आन अदिक अंधकार दा नळुतान, अदिक जानसालुन कि याता जागा दा होगेत्यान, यतिकी अंधकार आऊन कण्णगोळी कुढ्ढ माळबुटाद.
1JO 2:12 हे चिकोरगोळा, ना नीमी इदुरसाटी लिख्सतीन कि आऊन हेसुर देल नीम पाप माफ आग्याव.
1JO 2:13 हे आप्पगोळा, ना नीमी इदुरसाटी लिख्सतीन कि जो पयले टु आद नीव अदरी अरूतीर. हे हारोदोरा, ना नीमी इदुरसाटी लिख्सतीन कि नीव आ दुष्ट मा जय हासिल माळीर. हे पारगोळा, ना नीमी इदुरसाटी लिख्सदीन कि नीव आप्प उक जान्स कोंडीर.
1JO 2:14 हे चिकोरगोळा, ना नीमी इदुरसाटी लिख्सतीन कि जो पयले टु आद नीव अदरी जान्स कोंडीर. हे हारोदोरा, ना नीमी इदुरसाटी लिख्सतीन कि नीव ताकतवर आईर, अदिक परमेश्वर उन वचन नीम दा बन्सकु ईरतद, अदिक नीव आ दुष्ट मा जय हासिल माळीर.
1JO 2:15 नीव ना रा दुनिया से अदिक ना दुनिया अन्द वस्तुगोळ से प्यार ईटी. अगर यावारा दुनिया से प्यार ईटतान, रा आऊन दा आप्प उन प्यार हैलेच.
1JO 2:16 यतिकी जो येनारा संपत्‍ती दुनिया दा आद, मतलब मय इन अभिलाषा अदिक कण्णगोळ्द इच्छा अदिक जीव इन घमण्ड, अद आप्प उन दी टु ईला लेकीन दुनिया दी टु उच आद.
1JO 2:17 पुरा दुनिया अदिक अदुर्द अभिलाषागोळ येढ्ढु मिटुसेगताव, लेकीन जो परमेश्वर उन इच्छा मा नळुतान आव हमेशा बन्सकु ईत्‍तान.
1JO 2:18 हे पारगोळा, ईद आखरी समय आद; अदिक ह्यांग नीव केळीर कि मसीह अन्द विरोधी बरावाळा आन, अदुर अनुसार ईग भी हापाळ सा मसीह-विरोधी यदकु निदर्‍यार; इदुरसाटी नाव जान्सतेव कि ईद आखरी समय हुन.
1JO 2:19 आंदुर होटार भी रा नाम दा टु उच, लेकीन नाम दा टु ईला ईरोर; यतिकी अगर आंदुर नाम दा टु ईरायदुर रा नाम सांगुळ ईरायदुर; लेकीन होटकु इदुरसाटी होदुर कि ईद प्रगट आगुल कि आंदुर सप्पा मुंदुर नाम दा टु आल्लच.
1JO 2:20 लेकीन नीम्द रा आ पवित्र आत्मा देल अभिषेक आग्याद, अदिक नीव सप्पा येनारा जान्सतीर.
1JO 2:21 ना नीमी इदुरसाटी लिखसिदिल कि नीव सच्चाई इक जान्सालीर, लेकीन इदुरसाटी कि आऊक जान्सतीर, अदिक इदुरसाटी कि यातोदु भी ख्वाटा वस्तु, सच्चाई दी टु हैलेच.
1JO 2:22 ख्वाटा याव आन? सिर्फ आव जो यीशु उन मसीह ईरोद से इनकार माळतान; अदिक मसीह अन्द विरोधी आवा हुन, जो आप्प उन अदिक पार उन इनकार माळतान.
1JO 2:23 जो यावारा पार उन इनकार माळतान आऊन हात्‍ती आप्प भी हैलेच: जो पार उक मान्स कोमतान, आऊन हात्‍ती आप्प भी आन.
1JO 2:24 जो येनारा नीव पयले टु केळीर, अदा नीम दा बन्सकु ईरूल; जो नीव सुरू टु केळीर, अगर अद नीम दा बन्सकु ईरूल रा नीव भी पार दा अदिक आप्प उन दा बन्सकु ईत्‍तीर.
1JO 2:25 अदिक यदुर्द आव नाम से वादा माळदुन अद अनन्त जीवन हुन.
1JO 2:26 ना ई मातगोळ नीमी आ लॉकुर बारा दा लिख्सतीन, जो नीमी बैकुसतार;
1JO 2:27 लेकीन नीम्द अद अभिषेक जो आऊन दी टु माळकु आत्‍त, नीम दा बन्सकु ईरतद, अदिक नीमी इदुर्द जरवत ईला कि यावारा नीमी कलसुल, उलटा ह्यांग अद अभिषेक जो आऊन दी टु माळकु आत नीमी सप्पा मातगोळ कल्सतद, अदिक ईद सही आद अदिक ख्वाटा हैलेच; अदिक ह्यांग आव नीमी कलस्यान हांग अच नीव अदुर्दा बन्सकु ईरतीर.
1JO 2:28 इदुरसाटी हे चिकोरा, अदुर्दा बन्सकु ईरी कि याग आव प्रगट आदान रा नाम दा हिम्मत ईरूल, अदिक नाव आऊन बंदुर मा आऊन मुंद नाच्कतिदिल.
1JO 2:29 अगर नीव जान्सतीर, कि आव न्यायी आन, रा ईद भी जान्सतीर कि जो यावारा न्याय इन क्याल्सा माळतान आव आऊन से पैदा आग्यान.
1JO 3:1 नोळी, आप्प नाम से ह्यांग प्यार माळकु कारदुन कि नाव परमेश्वर उन औलाद अंदकु आदेव; अदिक नाव आयेव भी. ईद कारण दुनिया नामी अराल, यतिकी आव आंदरी भी अरतीदिल.
1JO 3:2 हे प्रिय संगीगोळा, ईग नाव परमेश्वर उन औलाद आयेव, अदिक ईगासताका ईद प्रगट आगीदील कि नाव अदिक येन आदेव! ईट जान्सतेव कि याग प्रगट आदीत रा नाव आऊन घाई आदेव, यतिकी आऊक हांग अच नोळेव ह्यांग आव आन.
1JO 3:3 अदिक जो यावारा मसीह मा ईद आशा ईटतान, आव तान तान इक हांगा शुद्ध माळतान ह्यांग मसीह शुद्ध आन
1JO 3:4 जो यावारा पाप माळतान, आव व्यवस्था अन्द विरोध माळतान; अदिक पाप रा व्यवस्था अन्द विरोध हुन.
1JO 3:5 नीव जान्सतीर कि आव इदुरसाटी प्रगट आदुन कि पापगोळी तेग्द बुळुल; अदिक आऊन स्वभाव दा पाप हैलेच.
1JO 3:6 जो यावारा आऊन एकता दा बन्सकु ईरतान, आव पाप माळालुन: जो यावारा पाप माळतान, आव ना रा आऊक नोळ्यान अदिक ना आऊक जानस्यान.
1JO 3:7 हे चिकोरा, यारदारा बैकावा दा बरबाळेतीर. जो न्याय इन क्याल्सा माळतान, आव अच आऊन घाई आन.
1JO 3:8 जो यावारा पाप माळतान आव शैतान दी टु आन, यतिकी शैतान पयले टु उच पाप माळ्त बंदान. परमेश्वर उन पार इदुरसाटी प्रगट आदुन कि शैतान उन क्याल्सागोळ्द नाश माळकु छुटकारा कोळुल.
1JO 3:9 जो यावारा परमेश्वर उन से पैदा आग्यान आव पाप माळालुन; यतिकी आऊन स्वभाव दा बन्सकु ईरतान, अदिक आव पाप माळ अच सकालुन यतिकी आव परमेश्वर देल पैदा आग्यान.
1JO 3:10 इदुर देल अच परमेश्वर उन औलाद अदिक शैतान उन औलाद अरूकु आगतद; जो यावारा न्याय इन क्याल्सा माळालुन आव परमेश्वर देल पैदा आगीदील, अदिक ना आव जो तान मसीह वार्ट से प्यार ईटालुन.
1JO 3:11 यतिकी जो समाचार नीव पयले टु केळीर, अद ईद आग्या हुन कि नाव आबुर दाबुर से प्यार ईट्टेव;
1JO 3:12 अदिक कैन उन घाई बन्सबाळी जो आ दुष्टगोळ दा टु ईरोन, अदिक याव तान मसीह वार्ट उक कोंद बुट्टुन. अदिक आऊक याता कारण देल कोंद बुट्टुन? ई कारण कि ईऊन क्याल्सा बुरा ईरव, अदिक आऊन क्याल्सा न्याय इनव ईरव.
1JO 3:13 हे मसीह वार्ट अदिक आकतींगेरा, अगर दुनिया नीम से दुश्मनी माळतद रा अचम्भा माळबाळी.
1JO 3:14 नाव जान्सतेव कि नाव मृत्यु टु पार आगकु जीवन दा प्रवेश माळेव; यतिकी नाव मसीह वार्टुर से प्यार ईटतेव. जो प्यार ईटालुन आव मृत्यु उन दशा दा ईरतान.
1JO 3:15 जो यावारा तान मसीह वार्ट से दुश्मनी ईटतान, आव हत्यारा हुन; अदिक नीव जान्सतीर कि यावारा हत्यारा दा अनन्त जीवन ईराल्द.
1JO 3:16 नाव प्यार ईदुर देल अच जान्सदेव कि आव नाम साटी तान जीव कोट बुट्टुन; अदिक नामी भी खुद मसीह वार्ट अदिक आकतींगेर साटी जीव कोळ पायजे.
1JO 3:17 लेकीन जो यारदारा हात्‍ती दुनिया अन्द संपत्‍ती ईरूल अदिक आव तान मसीह वार्ट उक कंगाल नोळकु आऊन जरवत मा तरस तिनोद चाहासालुन, रा आऊन दा परमेश्वर उन प्यार ह्यांग बन्सकु ईर सकतद?
1JO 3:18 हे चिकोरा, नाव वचन अदिक ल्यालग्या देल अच ईला, लेकीन क्याल्सा अदिक सच्चाई अन्द द्वारा भी प्यार ईट्टेव.
1JO 3:19 इदुर देल अच नाव जान्सेव कि नाव सच्चाई नव हुयेव; अदिक याता मात दा नाम मन नामी दोष कोट्टीत, अदुर बारा दा नाव परमेश्वर उन मुंद आत्मविश्वास देल ईत्‍तेव;
1JO 3:20 यतिकी परमेश्वर नाम मन देल हापाळ धोड्डेव आन, अदिक सप्पा येनारा जान्सतान.
1JO 3:21 हे प्रिय संगीगोळा, अगर नाम मन नामी दोष कोळाल, रा नामी परमेश्वर उन मुंद हिम्मत ईरतद;
1JO 3:22 नाव आऊन से जो येनारा बेळतेव, अद नामी आऊन हात्‍ती टु सिकतद, यतिकी नाव आऊन आग्यागोळ इक मान्सतेव अदिक जो आऊक वळ्लीद हततद अदा माळतेव.
1JO 3:23 आऊन आग्या ईद आद कि नाव आऊन पार यीशु मसीह अन्द हेसुर मा विश्वास माळेव, अदिक ह्यांग आव नामी आग्या कोटान आऊंदा अनुसार आबुर दाबुर दा प्यार ईट्टेव.
1JO 3:24 जो परमेश्वर उन आग्यागोळ इक मान्सतान, आव परमेश्वर दा अदिक परमेश्वर आंदुर दा बन्सकु ईरतान: अदिक इदुर देल अच, मतलब आ आत्मा देल जो परमेश्वर नामी कोटान, नाव जान्सतेव कि परमेश्वर नाम दा बन्सकु ईरतान.
1JO 4:1 हे प्रिय संगीगोळा, हर ऊंद आत्मा अन्द विश्वास माळबाळी, उलटा आत्मागोळ्द परख माळी कि अव परमेश्वर दी टु हुव का आल्लच; यतिकी हापाळ सा ख्वाटा भविष्यवक्तागोळ दुनिया दा होटकु निदुरकु आर.
1JO 4:2 परमेश्वर उन आत्मा नीव ईदा रीति देल जान्स सकतीर: जो आत्मा मान्स कोमतद कि यीशु मसीह मय दा टु आगकु बंदान आव परमेश्वर उन दी टु हुन,
1JO 4:3 अदिक जो आत्मा यीशु मसीह इक मानसाल, अद परमेश्वर उन दी टु आल्लच; अदिक अदा रा मसीह अन विरोधी इन आत्मा हुन, यदुर्द चर्चा नीव केळ कोंडीर कि आव बरावाळा आन, अदिक ईग भी दुनिया दा आन.
1JO 4:4 हे चिकोरा, नीव परमेश्वर नोर हुईर, अदिक नीव आ आत्मागोळ मा जय हासिल माळीर; यतिकी जो नीम दा आद अद आऊन से जो दुनिया दा आन, महान आन.
1JO 4:5 आंदुर दुनिया नोर आर, ई कारण आंदुर दुनिया अन मातगोळ माताळतार, अदिक दुनिया आंदुर्द केळतद.
1JO 4:6 नाव परमेश्वर उन हुयेव. जो परमेश्वर उक जान्सतान, आव नाम्द केळतान; जो परमेश्वर उक जान्सालुन आव नाम्द केळालुन. ई प्रकार नाव सच्चाई इन आत्मा अदिक भरम इंद आत्मा अक अर्त कोमतेव.
1JO 4:7 हे प्रिय, नाव आबुर दाबुर दा प्यार ईट्टेव, यतिकी प्यार परमेश्वर से आद, जो यावारा प्यार माळतान, आव परमेश्वर से पैदा आग्यान अदिक परमेश्वर उक जान्सतान.
1JO 4:8 जो प्यार ईटालुन आव परमेश्वर उक जान्सालुन, यतिकी परमेश्वर प्यार हुन.
1JO 4:9 जो प्यार परमेश्वर नाम से ईटतान, अद ईदुर देल प्रगट आग्याद कि परमेश्वर तान ऊंद ठैसा पार उक दुनिया दा कळ्यान कि नाव आऊन द्वारा जीवन प्राप्त माळेव.
1JO 4:10 प्यार इदुर दा हैलेच कि नाव परमेश्वर से प्यार माळदेव, लेकीन इदुर दा आद कि आव नाम से प्यार माळदुन अदिक नाम पापगोळ्द माफ अन साटी तान पार उक कळुदुन.
1JO 4:11 हे प्रिय, याग परमेश्वर नाम से हिंग प्यार माळदुन, रा नामी भी आबुर दाबुर दा प्यार ईट पायजे.
1JO 4:12 परमेश्वर उक याऊ यागलु नोळीदील; अगर नाव आबुर दाबुर दा प्यार ईट्टेव, रा परमेश्वर नाम दा बन्सकु ईरतान अदिक आऊन प्यार नाम दा सिद्ध आग्याद.
1JO 4:13 इदुर देल अच नाव जान्सतेव कि नाव आऊन दा बन्सकु ईरतेव, अदिक आव नाम दा; यतिकी आव तान आत्मा नामी कोटान.
1JO 4:14 नाव नोळ भी कोण्डेव अदिक गवाही कोळतेव कि आप्प पार उक दुनिया दा उद्धारकर्ता माळकु कळ्यान.
1JO 4:15 जो यावारा ईद मान्स कोमतान कि यीशु परमेश्वर उन पार हुन, परमेश्वर आऊन दा बन्सकु ईरतान, अदिक आव परमेश्वर दा
1JO 4:16 जो प्यार परमेश्वर नाम से ईटतान, अदरी नाव जान्स कोंडेव अदिक नामी आऊन विश्वास आद. परमेश्वर प्यार हुन, अदिक जो प्यार दा बन्सकु ईरतान आव परमेश्वर दा बन्सकु ईरतान, अदिक परमेश्वर आऊन दा बन्सकु ईरतान.
1JO 4:17 इदुर देल अच प्यार नाम दा सिद्ध आग्याद कि नामी न्याय इन दिशी हिम्मत ईरूल; यतिकी ह्यांग मसीह आन हांग अच दुनिया दा नाव भी आयेव.
1JO 4:18 प्यार दा अंज्क ईराल, उलटा सिद्ध प्यार अंज्क इक दुर माळ बुळतद; यतिकी अंज्क इन संबंध दण्ड देल ईरतद, अदिक जो अंज्क ईटतान आव प्यार दा सिद्ध आगीदील.
1JO 4:19 नाव इदुरसाटी प्यार माळतेव, कि पयले आव नाम से प्यार माळदुन.
1JO 4:20 अगर यावारा अंदान, “ना परमेश्वर से प्यार ईटतीन,” अदिक तान मसीह वार्ट से दुश्मनी ईटुल रा आव ख्वाटा आन; यतिकी जो तान वार्ट से यारी आव नोळ्यान प्यार ईटालुन, रा आव परमेश्वर से भी यारी आव नोळीदील प्यार माळालुन.
1JO 4:21 आऊन से नामी ईद आग्या सिक्याद, कि जो यावारा परमेश्वर से प्यार ईटतान आव तान मसीह वार्ट से भी प्यार ईटुल.
1JO 5:1 यार्द ईद विश्वास आद कि यीशु अच मसीह हुन, आव परमेश्वर से पैदा आग्यान; अदिक जो यावारा पैदा माळावाळा से प्यार ईटतान, आव आऊन से भी प्यार ईटतान जो आऊन से पैदा आग्यान.
1JO 5:2 याग नाव परमेश्वर से प्यार ईटतेव अदिक आऊन आग्यागोळ इक मान्सतेव, रा इदुर देल अच नाव जान्सतेव कि नाव परमेश्वर उन औलादगोळ से प्यार ईटतेव.
1JO 5:3 यतिकी परमेश्वर से प्यार ईटोद ईद हुन कि नाव आऊन आग्या अक मान्सेव; अदिक आऊन आग्यागोळ कठिन हैलेच.
1JO 5:4 यतिकी जो येनारा परमेश्वर देल पैदा आग्याद, अद दुनिया मा जय हासिल माळतद; अदिक अद विजय यदुर देल दुनिया मा जय हासिल आगतद अदा नाम विश्वास हुन.
1JO 5:5 दुनिया मा जय हासिल माळावाळा याव हुन? सिर्फ आव यार्द ईद विश्वास आद कि यीशु, परमेश्वर उन पार हुन.
1JO 5:6 ईवा हुन आव जो नीर अदिक खुन अन द्वारा बंदीदुन, मतलब यीशु मसीह: आव सिर्फ नीर इन द्वारा ईला लेकीन नीर अदिक रक्ता येढ्ढु चिज इन द्वारा बंदीदुन ईद गवाही सच्चाई हुन.
1JO 5:7 अदिक जो गवाही कोळतद, अद आत्मा हुन; यतिकी आत्मा सच्चाई आद.
1JO 5:8 गवाही कोळावाळा मुर आव, आत्मा, अदिक नीर, अदिक रक्ता; अदिक मुरू ऊंदा मात मा सयमत आव.
1JO 5:9 याग नाव मंळसागोळ्द गवाही मान्स कोमतेव, रा परमेश्वर उन गवाही रा अऊर से वाळुसकु आद; अदिक परमेश्वर उन गवाही ईद आद कि जो आव तान पार उन बारा दा कोटान.
1JO 5:10 जो परमेश्वर उन पार मा विश्वास माळतान आव तान मन दा अच गवाही ईटतान. याव परमेश्वर मा विश्वास माळीदिल आव आऊक ख्वाटा ठहरूसदुन, यतिकी आव आ गवाही मा विश्वास माळीदिल जो परमेश्वर तान पार उन बारा दा कोटान.
1JO 5:11 अदिक अद गवाही ईद हुन कि परमेश्वर नामी अनन्त जीवन कोटान, अदिक ईद जीवन आऊन पार उन दा आद.
1JO 5:12 यार हात्‍ती पार आन, आऊन हात्‍ती जीवन आद, अदिक यार हात्‍ती परमेश्वर उन पार हैलेच, आऊन हात्‍ती जीवन भी हैलेच.
1JO 5:13 ना नीमी, जो परमेश्वर उन पार उन हेसुर मा विश्वास माळतीर, इदुरसाटी लिख्सतीन कि नीव अर्त कोमी कि अनन्त जीवन नीम्द आद.
1JO 5:14 अदिक नामी आऊन मुंद जो हिम्मत सिकतद, अद ईद हुन; कि अगर नाव आऊन इच्छा अन्द अनुसार येनारा बेळतेव, रा आव नाम केळतान.
1JO 5:15 याग नाव जो येनारा आऊन से बेळतेव आव नाम केळतान, रा ईद भी जान्सतेव कि जो येनारा नाव आऊन से बेळदेव, आव कोळतान.
1JO 5:16 अगर यावारा तान मसीह वार्ट उक हिंग पाप माळतेला नोळुल यदुर्द अंजाम मृत्यु आगाल, रा विनती माळकु बेळुल, अदिक परमेश्वर आऊक आंदुर साटी, यार हिंग पाप माळ्यार यदुर्द अंजाम मृत्यु आगाल, जीवन कोटान. पाप हिंग भी आगतद यदुर्द अंजाम मृत्यु आगतद; इदुर बारा दा ना विनती माळोर साटी हेळालीन.
1JO 5:17 सप्पा प्रकार इन अन्याय रा पाप हुन, लेकीन हिंग पाप भी आद यदुर्द अंजाम मृत्यु आल्लच.
1JO 5:18 नाव जान्सतेव, कि जो यावारा परमेश्वर उन से पैदा आग्यान, आव पाप माळालुन; लेकीन जो परमेश्वर से पैदा आग्यान, आऊक आव ऊळ्सकु ईटतान, अदिक आ दुष्ट आऊक मुट सकाल.
1JO 5:19 नाव जान्सतेव कि नाव परमेश्वर से आयेव, अदिक सप्पा दुनिया आ दुष्ट उन वश दा बिदकु आद.
1JO 5:20 नाव ईद भी जान्सतेव कि परमेश्वर उन पार होट बंदान अदिक आव नामी समझ कोटान कि नाव आ सही परमेश्वर उक अरतेव; अदिक नाव अदुर दा जो सच्चाई आद, मतलब आऊन पार यीशु मसीह दा ईरतेव. खरा परमेश्वर अदिक अनन्त जीवन ईदा हुन.
1JO 5:21 हे चिकोरा, तान तान इक मूर्तीगोळ देल ऊळ्सकु ईटी.
2JO 1:1 नानी स्याणा दी टु आ निवळुस्द आर्तेर अदिक आंदुर्द चिकोरगोळव हेसुर, यार से ना खरा प्यार ईटतीन, अदिक सिर्फ ना अच ईला उलटा आंदुर सप्पा मुंदुर भी प्यार ईटतार जो सच्चाई इक अरूतार;
2JO 1:2 अद सच्चाई जो नाम दा स्थिर ईरतद, अदिक हमेशा नाम सांगुळ अटल ईत्‍तीत;
2JO 1:3 परमेश्वर आप्प, अदिक आप्प उन पार यीशु मसीह दी टु अनुग्रह अदिक दया अदिक शांती, सच्चाई अदिक प्यार इन सांगुळ नाम सांगुळ ईत्‍ताव.
2JO 1:4 ना हापाळ खुश आदीन कि ना नीन थ्वाळासा चिकोर इक आ आग्या अन्द अनुसार, जो नामी आप्प उन दी टु सिकीत, सच्चाई मा नळुतेला सिक्त.
2JO 1:5 ईग हे आर्त, ना नीनी ईग यातोदु व्हाशोद आग्या ईला, लेकीन अदा जो पयले टु नाम हात्‍ती आद, लिख्सतीन; अदिक नीन से विनती माळतीन कि नाव आबुर दाबुर से प्यार ईट्टेव.
2JO 1:6 अदिक प्यार ईद हुन कि नाव आऊन आग्या अन्द अनुसार नळदेव; ईद अदा आग्या हुन जो नीव पयले टु केळीर, अदिक नीमी इदुर मा नळुली भी पायजे.
2JO 1:7 यतिकी हापाळ सा हिंग बैकुसावाळेर दुनिया दा होटकु बंदार, जो ईद मान्सालुर कि यीशु मसीह मय दा टु होटकु बंदान; बैकुसावाळा अदिक मसीह-विरोध माळावाळा ईवा हुन.
2JO 1:8 तान बारा दा सावधान ईरी, कि जो मयनत नाव माळेव अद नीम से काळुबाळुल, उलटा अदुर सप्पा प्रतिफल नीव ताकोमी.
2JO 1:9 जो यावारा मसीह अन्द शिक्षा देल मुंद वाळुसेगतान अदिक अदुर दा बन्सकु ईरालुन, आऊन हात्‍ती परमेश्वर हैलेच; जो यावारा आऊन शिक्षा दा स्थिर ईरतान, आऊन हात्‍ती आप्प भी आन अदिक पार भी.
2JO 1:10 अगर यावारा नीम हात्‍ती बरतान अदिक ईदा शिक्षा कोळालुन, आऊक ना रा मान्या बरगोळी अदिक ना नमस्कार माळी.
2JO 1:11 यतिकी जो यावारा ईत्‍ता मंळसा अक नमस्कार माळतान, आव आऊन बुरा क्याल्सागोळ दा सहभागी आगतान.
2JO 1:12 नानी हापाळ सा मातगोळ नीमी लिख्सव आव, लेकीन कागद अदिक स्याही देल लिखसोद चाहासालीन, लेकीन आशा आद कि ना नीम हात्‍ती बराईन अदिक आमने-सामने मातकात हेळाईन, यदुर देल नीम खुशी पुरा आगुल.
2JO 1:13 नीन निवळुस्द आकतींग इन चिकोर नीनी नमस्कार अनतार.
3JO 1:1 नान स्याणा अन दी टु प्रिय गयुस उन हेसुर, यार से ना सही प्यार ईटतीन.
3JO 1:2 हे प्रिय, नान ईद प्रार्थना आद कि ह्यांग नी आत्मिक उन्नती माळेत्या, हांग अच नी सप्पा मातगोळ दा उन्नती माळ अदिक भला चंगा ईर.
3JO 1:3 यतिकी याग वार्टुर बंदकु नीन आ सच्चाई इन गवाही कोट्टुर, यदुर मा खराखुरा नळुत्या, रा ना हापाळ खुश आदीन.
3JO 1:4 नानी इदुर से यक्कुल मात्‍त यातोदु खुशी इन जरवत हैलेच यदरी ना केळाईन, कि नान चिकोर सच्चाई मा नळुतार.
3JO 1:5 हे प्रिय, जो येनारा नी आ वार्टुर सांगुळ माळत्या, जो परदेशी आद, अदरी सच्चाई देल माळत्या.
3JO 1:6 आंदुर मंडली इन मुंद नीन प्यार इन गवाही कोटार. अगर नी आंदरी आ प्रकार देल विदा माळ्या यात्‍ता प्रकार देल परमेश्वर उन लॉकुर साटी उचित आद रा वळ्लीद माळ्या.
3JO 1:7 यतिकी आंदुर आ हेसुर साटी होटार, अदिक दुसरा जाती नोर लॉकुर से येनु ताकोमालुर.
3JO 1:8 इदुरसाटी नाव मसीह लॉकुरी हिंग लॉकुर्द स्वागत माळ पायजे, यदुर देल नाव भी सच्चाई अन्द पक्ष दा आंदुर सहकर्मी आदेव.
3JO 1:9 ना मंडली इक येनारा लिखसीदिन, लेकीन दियुत्रिफेस जो आंदुर दा धोड्डेव आगोद चाहासतान, नामी ग्रहण माळालुन.
3JO 1:10 इदुरसाटी याग ना बराईन रा आऊन क्याल्सागोळ्द जो आव माळेत्यान, सुधी तोरसाईन, कि आव नाम बारा दा बेकार-बेकार मातगोळ माताळतान; अदिक इदुर मा भी संतोष ईला आगकु खुद अच वार्टुर इक ग्रहण माळालुन, अदिक आंदरी जो ग्रहण माळोद चाहासतार मना माळतान अदिक मंडली दा टु तेग्द बुळतान.
3JO 1:11 हे प्रिय, बुराई इन ईला लेकीन भलाई इन अनुयायी आगी. जो भलाई माळतान, आव परमेश्वर उन दी टु हुन; लेकीन जो बुराई माळतान, आव परमेश्वर उक नोळीदील.
3JO 1:12 देमेत्रियुस उन बारा दा सप्पा मुंदुर, उलटा सच्चाई भी खुद अच गवाही कोळ्त; अदिक नाव भी गवाही कोळतेव, अदिक नी जान्सत्या कि नाम गवाही सही आद.
3JO 1:13 नानी नीनी हापाळ येनारा लिखसोद रा ईरोद, लेकीन स्याही अदिक कलम देल लिखसोद चाहासालीन.
3JO 1:14 लेकीन नानी आशा आद कि नीन से राटनेरी मुलाकात माळाईन, आग नाव आमने-सामने मातकात हेळाता.
3JO 1:15 नीनी शांती सिक्त ईरूल. ईलेर संगी नीनी नमस्कार माळतार. अलेर संगीगोळ हेसुर ताकोम ताकोमकु नमस्कार माळ कोमेत.
JUD 1:1 यहूदा अन दी टु जो यीशु मसीह अन दास अदिक याकूब उन वार्ट हुन, जो कार्सकु आग्यार आंदुर हेसुर जो परमेश्वर आप्प दा प्रिय अदिक यीशु मसीह अन साटी सुरक्षित आन.
JUD 1:2 दया अदिक शांती अदिक प्यार नीमी हापाळ सा प्राप्त आगतेला ईरूल.
JUD 1:3 हे प्रिय संगीगोळा, याग ना नीमी आ उद्धार इन बारा दा लिख्सदुर दा हापाळ मेहनत देल कोशिश माळीन यदुर दा नाव सप्पा सहभागी आयेव, रा ना नीमी ईद समझुसोद जरूरी सम्सदीन कि नीमी प्रोत्साहित माळाईन आ विश्वास इन साटी पुरा कोशिश माळी जो पवित्र लॉकुरी ऊंद अच घन सौप्सकु आगीत.
JUD 1:4 यतिकी यास ईत्‍ता मंळसा चुपचाप नाम दा बंदकु सिकदुर, यार्द ई दण्ड इन वर्णन हाळोद समय दा पयले टु अच भविष्यवाणी माळकु आगीत: हिंग लॉकुर परमेश्वर उन बिना, अदिक हिंग लॉकुर परमेश्वर उन अनुग्रह अक लुचपन दा बदलुस बुळतार, अदिक नाम ऊंद मात्र स्वामी अदिक प्रभु यीशु मसीह अन इनकार माळतार.
JUD 1:5 लेकीन नीव सप्पा मात ऊंद घन जान्स कोंडीर, तरी ना नीमी ई मात इन सुधी कोळोद चाहासतीन कि प्रभु ऊंद कुल इक मिस्त्र द्याश टु बीळ्सदुर बाद्दा विश्वास ईला तरावाळेर इक नाश माळ बुट्टुन.
JUD 1:6 बाक जो स्वर्गदूतगोळ तान धोळ्द पद इक संची ईटीदील उलटा तान निज निवास इक बिट बुट्टुर, आव आंदरी भी आ भीषण दिन इन न्याय इन साटी अंधकार दा, जो सदा काल इन साटी आद बंधनगोळ दा ईटकु आद.
JUD 1:7 याता रीति देल सदोम अदिक गमोरा अदिक आंदुर आसपास इन नगर, जो स्वर्गदूतगोळ घाई व्यभिचारी आगेगीदुर अदिक पराया मय इन हिंद हत्‍तेगीदुर बेक्‍की इन अनन्त दण्ड दा बिदकु उदाहरण ठहरूस्यार.
JUD 1:8 अदा रीति देल ई स्वप्नदर्शी भी तान तान मय इक अशुध्द माळतार, अदिक परमेश्वर उक तुच्छ जान्सतार, अदिक दिव्य स्वर्गदूतगोळ इक बुरा भला अनतार.
JUD 1:9 लेकीन प्रधान स्वर्गदूत मीकाईल, याग शैतान से मूसा अन लाश इन बारा दा वाद विवाद माळदुन, रा आऊक बुरा भला अनकु दोष हचोद साहस माळीदील लेकीन ईद अंदुन, “प्रभु नींद न्याय माळुल.”
JUD 1:10 लेकीन ई लॉकुर याता मातगोळी जान्सालुर आंदरी बुरा भला अनतार, अदिक याता मातगोळी अचेतन पशुगोळ घाई स्वभाव देल अच जान्सतार, आंदुर दा तान तान इक नाश माळतार.
JUD 1:11 आंदुर मा हाय! यतिकी आंदुर कैन इन चाल नळदुर, अदिक पैस्या अन लोभ इन साटी बिलाम इन घाई भ्रष्ट आगेग्यार, अदिक कोरह अन घाई विरोध माळकु नाश आग्यार.
JUD 1:12 ईद नीम प्यार भोज दा आ होचकु चट्टानगोळ घाई आद जो घातक आद. जो सिर्फ तान स्वार्थ इंद अच चिंता माळतार. अदिक बिना नीर इन बादल इन घाई आर, आंदुर पतझळ इन ईत्‍ता मार्र उर यदुर मा काय ईराल्द आंदुर येढ्ढ घन सोतकु आर अदिक आंदरी जळ देल कीतकु आग्याद.
JUD 1:13 इंदुर समुद्र अन प्रचंड लयर उर, जो तान शरम इन फेस भिळतार; इंदुर डावाडोल तारा उर, यार साटी परमेश्वर सनातन काल ताका घोर अंधकार ईट्यान.
JUD 1:14 हनोक भी जो आदम टु सातवा पीढ़ी दा ईरोन, इंदुर बारा दा ईद भविष्यवाणी माळदुन, “नोळी, प्रभु तान हजारो पवित्र स्वर्गदूतगोळ सांगुळ बंदान.”
JUD 1:15 कि सप्पा मुंदुर न्याय माळुल, अदिक सप्पा भक्तिहीनगोळी आंदुर अभक्ति इन सप्पा क्याल्सागोळ बारा दा जो आंदुर भक्तिहीन आगकु माळ्यार, अदिक आ सप्पा कठोर मातगोळ बारा दा जो भक्तिहीन पापीगोळ आऊन विरोध दा अंदार, दोषी ठहरूसुल.
JUD 1:16 इंदुर रा असंतुष्ट, कुळकुळुसावाळेर, अदिक तान बेकार लालसागोळ्द अनुसार नळावाळेर उर, अदिक तान बाय देल घमण्ड इन मातगोळ माताळतार, अदिक आंदुर लाभ इन साटी बाय नोळकु बळाई माळतार.
JUD 1:17 लेकीन हे प्रियगोळा, नीव आ मातगोळी याद ईटी जो नाम प्रभु यीशु मसीह अन प्रेरित पयले अच अन कोंडार.
JUD 1:18 इदुरसाटी आंदुर नीम से अनतोगोर, “आखरी दिनगोळ दा हिंग मज्याक माळावाळेर ईत्‍तार जो तान भक्तिहीन लालसा अन अनुसार नळदार.”
JUD 1:19 इंदुर आंदुर उर जो फूट हाकतार; इंदुर जो शारीरिक इच्छागोळ्द निमंत्रण दा आर, यारदा परमेश्वर उन आत्मा हैलेच.
JUD 1:20 लेकीन हे प्रिय संगीगोळा, नीव तान अति पवित्र विश्वास दा उन्नती माळतेला अदिक पवित्र आत्मा दा प्रार्थना माळतेला,
JUD 1:21 तान तान इक परमेश्वर उन प्यार दा माळकु ईटी; अदिक अनन्त जीवन इन साटी नाम प्रभु यीशु मसीह अन दया अन हादी कायतेला ईरी.
JUD 1:22 आंदुर मा जो शंका दा आर दया माळी;
JUD 1:23 अदिक हापाळ मुंदरी बेक्‍की दा टु झपटुसकु तेगी; अदिक हापाळ मुंदुर मा अंज्क इन सांगुळ दया माळी, लेकीन आंदुर्द कपळागोळ से भी सिट्ट माळी जो मय इन द्वारा कलंकीत आगेग्याद.
JUD 1:24 ईग जो नीमी आऊन प्रती बिळदुर देल ऊळ्स सकतान, अदिक तान महिमा अन भरपुरी इन मुंद निर्दोष निदरूस सकतान,
JUD 1:25 आ ऊंद मात्र परमेश्वर नामव उद्धारकर्ता अन महिमा अदिक गौरव अदिक पराक्रम अदिक अधिकार, नामव प्रभु यीशु मसीह अन द्वारा ह्यांग अनन्त काल टु आद, ईग भी आगुल अदिक हमेशा हमेशा ईरूल. आमीन.
REV 1:1 यीशु मसीह अन्द प्रकाशितवाक्य, जो आऊक परमेश्वर इदुरसाटी कोटान कि तान दासगोळी आ मातगोळ, यऊर्द राटनेरी आगोद जरूरी आद, तोरसुल; अदिक आव तान स्वर्गदूतगोळ इक कळुकु आऊन द्वारा तान दास यूहन्ना अक हेळदुन,
REV 1:2 यूहन्ना परमेश्वर उन वचन अदिक यीशु मसीह अन्द गवाही, मतलब जो येनारा आव नोळीदुन अदुर्द गवाही कोट्टुन.
REV 1:3 धन्य आन आव जो ई भविष्यवाणी इन वचन इक वाचुसतान, अदिक आंदुर जो केळतार अदिक इदुर दा लिख्सद मातगोळी मान्सतार; यतिकी समय हात्‍ती आद.
REV 1:4 यूहन्ना अन्द दी टु आसिया अन्द येळ मंडलीगोळ्द हेसुर: आऊन दी टु जो आन अदिक जो ईरोन अदिक जो बरावाळा आन; अदिक आ येळ आत्मागोळ दी टु जो आऊन सिंहासन इन मुंद आन,
REV 1:5 अदिक यीशु मसीह दी टु जो विश्वासयोग्य गवाह अदिक सोत्‍तुर दा टु जीत्‍ता आगावाळेर दा पयला अदिक पृथ्वी इन राजागोळव न्यायाधीश हुन, नीमी अनुग्रह अदिक शांती सिकतेला ईरूल. आव नाम से प्यार ईटतान, अदिक आव तान रक्ता अन द्वारा नामी पापगोळ देल बिळसुस्यान,
REV 1:6 अदिक नामी ऊंद राज्य अदिक तान आप्प परमेश्वर उन साटी याजक भी माळ बुट्टुन; आऊंदा महिमा अदिक पराक्रम हमेशा ईरूल. आमीन.
REV 1:7 नोळी, आव बादलगोळ सांगुळ बरावाळा आन, अदिक हर ऊंद कण्ण आऊक नोळीत, उलटा यार आऊक छेद केळदीदुर आंदुर भी आऊक नोळ्यार, अदिक पृथ्वी इन सप्पा जाती आऊन कारण याद्दा बळदार. हव. आमीन.
REV 1:8 प्रभु परमेश्वर, जो आन अदिक जो ईरोन अदिक जो बरावाळा आन, जो सर्वशक्तिमान आन, ईद अनतान, “ना अच पयला अदिक आखरी हुईन.”
REV 1:9 ना यूहन्ना, जो नीम वार्ट अदिक यीशु उन क्लेश अदिक राज्य अदिक धीरज दा नीम सहभागी आईन, परमेश्वर उन वचन अदिक यीशु उन गवाही इन कारण पतमुस हेसुर इन टापू दा ईरीन.
REV 1:10 ना प्रभु उन दिन आत्मा दा होटबंदीन, अदिक तान हिंद तुरही घाई धोळ्द शब्द ईद अनतेला केळदीन,
REV 1:11 “जो येनारा नी नोळत्या अदरी किताब दा लिख्सकु येळु मंडलीगोळ्द हात्‍ती कळुबुळ, मतलब इफिसुस, स्मुरना, पिरगमुन, थुआतीरा, सरदीस, फिलदिलफिया, अदिक लौदीकिया अक.”
REV 1:12 आग ना आऊक, जो नान से माताळोन, नोळोर साटी तान मार्रा तिर्गुसदीन; अदिक हिंद तिर्गकु ना व्हान्ना अन्द येळ दिंग्या ईटोद जागा ऊंद जागा नोळदीन,
REV 1:13 अदिक आ दिंग्या ईटोद जागा अन्द न्याड्या दा मंळसा अन पार उन घाई ऊंद आरी इक नोळदीन, जो काल ताका फळक्या हाक्‍कु, अदिक याद्दा मा व्हान्ना अन्द पट्टा कटकु ईरोन.
REV 1:14 आऊन ताल्ला अदिक चुट्टी बिळेव ऊन बल्‍की पाला अन घाई चमकदार ईरव, अदिक आऊन कण्णगोळ बेक्‍की इन ज्वाला अन्द घाई ईरव.
REV 1:15 आऊन कालगोळ वळ्लीद पीतळा अन घाई ईरव जसा हिंग हतव कि भट्टी दा सेक्सकु आग्याव, अदिक आऊन शब्द हापाळ नीर इन आवाज इन घाई ईरोद.
REV 1:16 आव तान ऊम्मा कय दा येळ तारा हुळकु ईरोन, अदिक आऊन बाय देल तेज येढ्ढ धार इन तलवार होळतोगोद. आऊन मार्रा हिंग प्रज्वलित ईरोद, ह्यांग सुर्य भर बिसुल इन समय चमकुसतद.
REV 1:17 याग ना आऊक नोळदीन रा आऊन कालगोळ मा मुर्दा घाई बिदोदीन. आव नान मा तान ऊम्मा कय ईटकु अंदुन, “अंजबाळ; ना पयला अदिक आखरी अदिक जीवता हुईन;
REV 1:18 ना सोतोगीदीन, अदिक ईग नोळ ना हमेशा हमेशा जित्‍ता आईन; अदिक मृत्यु अदिक अधोलोक इन चाबीगोळ नान दा हात्‍ती आव.
REV 1:19 इदुरसाटी जो मातगोळ नी नोळ्या अदिक जो मातगोळ आगेत्याव अदिक जो मातगोळ ईदुर बाद्दा आगव आव, अव सप्पा मातगोळी लिख्स कोम.
REV 1:20 मतलब आ येळ तारागोळ्द भेद नी अवरी नान ऊम्मा कय दा नोळीद, अदिक आ येळ व्हान्ना अन्द दिंग्या ईटोद जागा अन्द भेद: अव येळ तारा येळु मंडलीगोळव स्वर्गदूत हुव, अदिक अव येळ दिंग्या ईटव जागा येळ मंडलीगोळ हुव.
REV 2:1 “इफिसुस उन मंडली इन स्वर्गदूत उक ईद लिख्स: “जो येळु तारा तान ऊम्मा कय दा हुळकु आन, अदिक व्हान्ना अन्द येळु दिंग्या ईटोद जागा अन्द न्याड्या दा टेटतद, अद ईद अनतद कि
REV 2:2 ना नीन क्याल्सा, नीन मयनत, अदिक नीन धीरज इक जान्सतीन; अदिक ईद भी कि नी बेकार लॉकुरी नोळ सकाल, अदिक जो तान तान इक प्रेरित अनतार, अदिक आल्लच, आंदरी नी परखुस्कु ख्वाटा माळ्द.
REV 2:3 नी धीरज हुडुत्या, अदिक नान हेसुर इन साटी दुख नेगुत नेगुत थक्सीदील.
REV 2:4 लेकीन नानी नीन खिलाप ईद अनोद आद कि नी तान पयला अन्द घाई प्यार बिटबुट्या.
REV 2:5 इदुरसाटी याद माळ कि नी यल टु बिद्या, अदिक मन तिर्गुस अदिक पयला अन्द घाई क्याल्सा माळ. अगर नी मन तिर्गुसतिदिल, रा ना नीन हात्‍ती बंदकु नीन दिंग्या ईटोद जागा अक अदुर जागा दा टु सरकुस बुळाईन.
REV 2:6 लेकीन हव, नीन दा ईद मात रा आद कि नी नीकुलइयोगोळ्द क्याल्सागोळ देल घृणा माळत्या, आंदुर देल ना भी नफरत माळतीन.
REV 2:7 “यार किव ईतीदाव आव केळ कोमुल कि आत्मा मंडलीगोळ से येन अनतद. जो विजय हासिल माळतान, ना आऊक आ जीवन इन मार्र दा टु जो परमेश्वर उन स्वर्गलोक दा आद, काय तिनली कोळाईन.”
REV 2:8 “स्मुरना अन्द मंडली इन स्वर्गदूत उक ईद लिख्स: “जो पयला अदिक आखरी आन, जो सोतोगीदुन अदिक ईग जित्‍ता आगेग्यान, आव ईद अनतान कि
REV 2:9 ना नीन क्लेश अदिक गरीबी इक जान्सतीन लेकीन नी धनी आय, अदिक जो लॉकुर तान तान इक यहूदी अनतार अदिक आल्लच, लेकीन शैतान उन सभा उर, आंदुर अपमान इक भी जान्सतीन.
REV 2:10 जो दुख नीनी झेलसोद बिद्दीत, अऊर देल अंजबाळ. यतिकी नोळी, शैतान नीम दा टु काईक मुंदुरी जेलखाना दा हाकावाळा आन ताकी नीम परख आग सकुल; अदिक नीमी हत्‍त दिन ताका क्लेश नेगोद बिद्दीत. जीव कोळासताका विश्वासी ईर, रा ना नीनी जीवन इन मुकुट कोळाईन.
REV 2:11 “यार किव ईतीदाव आव केळ कोमुल कि आत्मा मंडलीगोळ से येन अनतद. जो विजय हासिल माळतान, आऊक दुसरा मृत्यु देल नुकसान आगतीदील.”
REV 2:12 “पिरगमुन उन मंडली इन स्वर्गदूत उक ईद लिख्स: “यार हात्‍ती येढ्ढ धार इंद अदिक तेज तलवार आद, आव ईद अनतान कि
REV 2:13 ना ईद जान्सतीन कि नी अल ईरत्या यल शैतान उन सिंहासन आद; नी नान हेसुर मा स्थिर ईरत्या, अदिक नान मा विश्वास माळदुर देल आ दिनगोळ दा भी हिंद हटसीदिल यदुर दा नान विश्वासयोग्य गवाह अन्तिपास, नीम न्याड्या आ जागा मा घात माळकु आदुन यल शैतान ईरतद.
REV 2:14 लेकीन नानी नीन खिलाप येनारा मातगोळ माताळोव आव, यतिकी नीन अल काईक मुंदुर हिंग आर, जो बिलाम इन शिक्षा अक मान्सतार, याव बालाक उक इस्त्राएलीगोळ्द मुंद ठोकर इन कारण ईटोद कल्सदुन कि आंदुर मूर्तीगोळ मा येर्सद चीजगोळ तिनुल अदिक व्यभिचार माळुल.
REV 2:15 हांगा नीन अल काईक हिंग आर, जो नीकुलइयो अन्द शिक्षा अक मान्सतार.
REV 2:16 इदुरसाटी मन तिर्गुस, ईलारा ना नीन हात्‍ती राटनेरी बंदकु तान बाय इन तलवार देल आंदुर सांगुळ लळाई माळाईन.
REV 2:17 “यार किव ईतीदाव आव केळ कोमुल कि आत्मा मंडलीगोळ से येन अनतद. जो विजय हासिल माळतान, आऊक ना गुप्त मन्ना दा टु कोळाईन, अदिक आऊक ऊंद बिळीद कल्ल भी कोळाईन; अदिक आ कल्ल मा ऊंद हेसुर लिख्सकु ईत्‍तीत, अदरी हासिल माळावाळेर्द अलावा अदिक याऊ अदरी अरूतीदील.”
REV 2:18 “थुआतीरा अन्द मंडली इन स्वर्गदूत उक ईद लिख्स: “परमेश्वर उन पार यारव कण्णगोळ बेक्‍की इन ज्वाला घाई, अदिक यारव कालगोळ वळ्लीद पीतळा अन्द घाई आव, आव ईद अनतान कि
REV 2:19 ना नीन क्याल्सागोळ, नीन प्यार अदिक विश्वास अदिक स्यावा अदिक धीरज, इक जान्सतीन अदिक ईद भी कि नीनव हिंदळोव क्याल्सा पयले से वळ्लेव आव.
REV 2:20 लेकीन नानी नीन खिलाप ईद अनोद आद कि नी आ आर्त इजेबेल इक ईरगोळत्या जो तान तान इक भविष्यवक्ता अनतार, अदिक नान दासगोळी व्यभिचार माळली अदिक मूर्तीगोळ मा येर्सद चीजगोळी तिनोद कल्सकु भरमुसतार.
REV 2:21 ना आकिक मन तिर्गुसोर साटी मवका कोट्टीन, लेकीन आक तान व्यभिचार देल मन तिर्गुसोद चाहासालुर.
REV 2:22 नोळ, ना आकिक व्हर्स मा हाकतीन यल आक रोगशैय्या मा ईरोर; अदिक जो आकिन सांगुळ व्यभिचार माळतार अगर आंदुर भी आकिन घाई क्याल्सागोळ देल मन तिर्गुसतिदिल रा ना आंदरी धोळ्द क्लेश दा हाकाईन.
REV 2:23 ना आकिन चिकोर इक कोंद बुळाईन; आग सप्पा मंडली जान्स कोंडीत कि दिल अदिक मन इक अरावाळा ना अच हुईन, अदिक ना नीम दा टु हर ऊंद मंळसा अक आऊन क्याल्सा अन्द अनुसार बदला कोळाईन.
REV 2:24 लेकीन नीव थुआतीरा अन्द बाकी लॉकुर से, यास ई शिक्षा अक मान्सालुर अदिक आ मातगोळी यवरी शैतान उन गयरा मातगोळ अनतार जान्सालीर, ईद अनतीन कि ना नीम मा मात्‍त ओझा हाकतिदिल.
REV 2:25 लेकीन हव, जो नीम हात्‍ती आद अदरी नान बरासताका ताका रोक्सकु ईटी.
REV 2:26 “जो विजय हासिल माळुल अदिक नान क्याल्सागोळ्द अनुसार आखरी ताका माळ्त ईरूल, ना आऊक गैर यहूदी लॉकुर मा अधिकार कोळाईन,
REV 2:27 अदिक आव लोवा अन्द छळी हुडुकु आंदुर मा राज्य माळ्यान, याता प्रकार गळग्या माळावाळा नव मुण्ण इन बर्तन चकनाचुर आगेगताव: नानी भी हिंगा अधिकार तान आप्प उन हात्‍ती टु सिक्याद;
REV 2:28 अदिक ना आऊक व्हातुर इंद तारा कोळाईन.
REV 2:29 यार किव ईतीदाव आव केळ कोमुल कि आत्मा मंडलीगोळ से येन अनतद.”
REV 3:1 सरदीस उन मंडली इन स्वर्गदूत उक ईद लिख्स: “यार हात्‍ती परमेश्वर उन येळ आत्मागोळ अदिक येळ तारा आव, आव ईद अनतान कि ना नीन क्याल्सागोळी जान्सतीन: नीनी जित्‍ता रा अंदकु आगतद, लेकीन आय नी सोतकु
REV 3:2 जागृत आग, अदिक आ चीजगोळी जो मिक्‍केग्याव अदिक अऊर नाश आगली आद, अवरी मजबूत माळ; यतिकी ना नीन यातोदु क्याल्सा अक तान परमेश्वर उन हात्‍ती पुरा आग्त नोळीदील.
REV 3:3 इदुरसाटी याद माळ कि नी ह्यांग शिक्षा प्राप्त माळीद अदिक केळीद, अदिक अदुर दा बन्सकु ईर अदिक मन तिर्गुस. अगर नी जागृत ईरतीदील रा नी यागलु जान्स सकतीदिल कि ना याता समय नीन मा बंदकु बिळाईन.
REV 3:4 लेकीन हव, सरदीस दा नीन अल काईक हिंग लॉकुर आर यार तान तान फळक्यागोळ अशुध्द माळीदिल, आंदुर बिळेव फळक्या हाक्‍कु नान सांगुळ टेट्यार, यतिकी आंदुर ईदुर लायक आर.”
REV 3:5 जो विजय हासिल माळ्यान आऊक हिंगा बिळेव फळक्या हाकसुसकु आदीत, अदिक ना आऊन हेसुर जीवन इन किताब दा टु यातोदु रीति देल कडुतिदिल; लेकीन आऊन हेसुर तान आप्प अदिक आऊन स्वर्गदूतगोळ मुंद मान्स कोमाईन.
REV 3:6 यार किव ईतीदाव आव केळ कोमुल कि आत्मा मंडलीगोळ से येन अनतद.
REV 3:7 “फिलदिलफिया अन्द मंडली इन स्वर्गदूत उक ईद लिख्स: “जो पवित्र अदिक सही आन, अदिक जो दाऊद उन चाबी ईटतान, यार्द तेरदुर बाद्दा याऊ बंद माळ सकालुन अदिक बंद माळदुर बाद्दा याऊ तेरू सकालुन, आव अनतान कि
REV 3:8 ना नीन क्याल्सागोळी जान्सतीन; नोळ, ना नीन मुंद ऊंद दरवाजा तेरूकु ईटीन, यदरी याऊ बंद माळ सकालुन; नीन सामर्थ्य थ्वाळासा रा आद, तरी भी नी नान वचन इन पालन माळ्द अदिक नान हेसुर इन इनकार माळीदिल.
REV 3:9 नोळ, ना शैतान उन आ सभावाळेर इक नीन वश दा माळ बुळाईन जो यहूदी बन्सकु कुरतोग्यार, लेकीन आल्लच उलटा ख्वाटा माताळतार-नोळ, ना हिंग माळाईन कि आंदुर बंदकु नीनी प्रणाम माळ्यार, अदिक ईद जान्स कोंडार कि ना नीन से प्यार ईटीन.
REV 3:10 नी नांद धीरज इन वचन इक हुळद्या, इदुरसाटी ना भी नीनी परीक्षा अन्द आ समय ऊळ्सकु ईटाईन जो पृथ्वी मा ईरावाळेर्द परख माळोर साटी दुनिया मा बरावाळा आद.
REV 3:11 ना राटनेरी इच बरावाळा आईन; जो येनारा नीन हात्‍ती आद अदरी हुडुकु ईर कि याऊ नीन मुकुट कसुबाळुल.
REV 3:12 जो विजय हासिल माळ्यान आऊक ना तान परमेश्वर उन मंदिर दा ऊंद खंबा माळाईन, अदिक आव बाक यागलु व्हार्या होळतीदिल; अदिक ना तान परमेश्वर उन हेसुर अदिक तान परमेश्वर उन नगर मतलब व्हाशोद यरूशलेम इन हेसुर, जो नान परमेश्वर उन हात्‍ती टु स्वर्ग मा टु ईळोद आद, अदिक तान व्हाशोद हेसुर अदुर मा लिख्साईन.
REV 3:13 यार किव ईतीदाव आव केळ कोमुल कि आत्मा मंडलीगोळ से येन अनतद.
REV 3:14 “लौदीकिया अन्द मंडली इन स्वर्गदूत उक ईद लिख्स: “जो आमीन अदिक विश्वासयोग्य अदिक खरा गवाह आन, अदिक परमेश्वर उन दुनिया अन मुल कारण हुन, आव अनतान कि
REV 3:15 ना नीन क्याल्सागोळी जान्सतीन कि नी रा ना ठंडा आय अदिक ना बिसक्यांड: वळ्लीद आगाईत कि नी ठंडा या बिसक्यांड ईराईद.
REV 3:16 इदुरसाटी कि नी क्वामा-क्वामा आय, अदिक ना ठंडा आय ना बिसक्यांड, अनकु ना नीनी तान बाय दा टु तेगदुर मा आईन.
REV 3:17 नी अनत्या कि ना धनी आईन अदिक धनवान आगेगिन अदिक नानी यातोदु चीज इन कमी हैलेच; अदिक ईद जान्साल कि नी अभागा अदिक तुच्छ अदिक भिखारी अदिक कुढ्ढ अदिक ऊगळा आय.
REV 3:18 इदुरसाटी ना नीनी सम्मती कोळतीन कि बेक्‍की देल शुद्ध माळ्द व्हान्ना नान से कोम कि नी धनी आगेग, अदिक बिळेव फळक्या कोंड कोम कि हाक्‍कु नीनी तान ऊगळापन इंद शरम हतबाळुल, अदिक तान कण्णगोळी हचोर साटी सुरमा कोंडकु रगळुस कि नी नोळली हत्‍तेग.
REV 3:19 ना यार यार से प्यार माळतीन, आ सप्पा मुंदुरी उलाहना अदिक शिक्षा कोळतीन; इदुरसाटी आस्था ईट अदिक मन तिर्गुस.
REV 3:20 नोळ, ना दरवाजा मा निदुरकु ठोक्सतिन; अगर यावारा नान शब्द केळकु दरवाजा तेरदान, रा ना आऊन हात्‍ती बुळ्क बंदकु आऊन सांगुळ ऊमाईन अदिक आव नान सांगुळ.
REV 3:21 “जो विजय हासिल माळ्यान ना आऊक तान सांगुळ तान सिंहासन मा कुरसाईन, ह्यांग ना भी विजय हासिल माळकु तान आप्प उन सांगुळ आऊन सिंहासन मा कुर्तोदिन.
REV 3:22 यार किव ईतीदाव आव केळ कोमुल कि आत्मा मंडलीगोळ से येन अनतद.”
REV 4:1 ई मातगोळ बाद्दा जो ना दृष्टी माळदीन रा येन नोळतीन कि स्वर्ग दा ऊंद दरवाजा तेरकु आद, अदिक यारी ना पयले तुरही इन घाई शब्द देल तान सांगुळ माताळ्त केळीदीन, आवा अनतान, “ईल म्याकुच होटबर; अदिक ना आ मातगोळ नीनी तोरसाईन, यऊर्द ई मातगोळ बाद्दा पुरा आगोद जरूरी आद.”
REV 4:2 तुरन्त ना आत्मा दा होटबंदीन; अदिक येन नोळतीन कि ऊंद सिंहासन स्वर्ग दा ईटकु आद, अदिक आ सिंहासन मा यावारा कुर्तकु आन.
REV 4:3 जो अदुर मा कुर्तकु आन आव यशब अदिक माणिक्य घाई कांळ्सदुर दा बरतान, अदिक आ सिंहासन इन नाकु दी मरकत घाई ऊंद मेघधनुष कांळ्सतद.
REV 4:4 आ सिंहासन इन नाकु दी ईप्पतनाक सिंहासन आव; अदिक ई सिंहासनगोळ मा ईप्पतनाक स्याणा लॉकुर बिळी फळक्या हाक्‍कु कुर्तकु आर, अदिक आंदुर ताल्लागोळ मा व्हान्ना नव मुकुट आव.
REV 4:5 आ सिंहासन दा टु बिजली अदिक गर्जन गुमरान होळतद अदिक सिंहासन इन मुंद बेक्‍की इन येळ दिंग्या होतेत्याव, अव परमेश्वर उन येळ आत्मागोळ हुव,
REV 4:6 अदिक आ सिंहासन इन मुंद मान्सी जसा बिल्लौर घाई काँच इन समुद्र आद. सिंहासन इन न्याड्या दा अदिक सिंहासन इन नाकु दी नाक प्राणी आव, यऊर्द हिंद मुंद कण्ण अच कण्ण आव.
REV 4:7 पयला प्राणी हुल्ल इन घाई आद, अदिक दुसरा प्राणी गोसी इन पाड्डा घाई आद, तिसरा प्राणी इन बाय मंळसा अन्द घाई आद, अदिक चौथा प्राणी ऊळुसतेला गीधाळ इन घाई आद.
REV 4:8 नाकु प्राणीगोळव आर: पिक्का आव, अदिक नाकु दी अदिक बुळ्क कण्ण अच कण्ण आव; अदिक अव ईळ्लक हागुल बिना आराम ताकोम्त ईद अनतेला ईरताव, “पवित्र, पवित्र, पवित्र प्रभु परमेश्वर, सर्वशक्तिमान, जो ईरोन अदिक जो आन अदिक जो बरावाळा आन.”
REV 4:9 याग अव प्राणी आऊन जो सिंहासन मा कुर्तकु आन, अदिक जो हमेशा हमेशा जित्‍ता आन, महिमा अदिक आदर अदिक धन्यवाद माळ्याव;
REV 4:10 आग ईप्पतनाक इन ईप्पतनाक स्याणा लॉकुर सिंहासन मा कुरावाळेर मुंद बिदोदार; अदिक अदुर्द पुजा माळतार, जो हमेशा हमेशा जीविता आर प्रणाम माळ्यार. अदिक आंदुर तान-तान मुकुट सिंहासन इन मुंद ईद अनतेला हाक्‍क बुट्टार,
REV 4:11 “हे नाम प्रभु अदिक परमेश्वर, नी अच महिमा अदिक आदर अदिक सामर्थ्य अन्द लायक आय; यतिकी नी अच सप्पा चीजगोळी निर्माण माळ्या अदिक अव अपमान अच इच्छा देल ईरव अदिक अस्तित्व दा बंदव.”
REV 5:1 जो सिंहासन मा कुर्तकु ईरोन, ना आऊन ऊम्मा कय दा ऊंद किताब नोळदीन जो बुळ्क अदिक व्हार्या टु लिख्सकु ईरोद, अदिक अद येळ मोहर हचकु बंद माळकु आगीत.
REV 5:2 बाक ना ऊंद ताकतवर स्वर्गदूत उक नोळदीन जो धोळ शब्द देल ईद प्रचार माळतोगोन, “ई किताब इक तेरोद अदिक अदुर्द मोहर मुरोद लायक याव आन?”
REV 5:3 लेकीन ना स्वर्ग दा, ना पृथ्वी मा, ना पृथ्वी इन ल्यालमा यावारा आ किताब इक तेरोद या अदुर मा दृष्टी हाक्कोद लायक होट्टुन.
REV 5:4 आग ना हुदक्या कोट कोटकु वर्ली हतदीन, यतिकी आ किताब इक तेरोद या अदुर मा दृष्टी हाक्‍कोद लायक याऊ सिकिदील.
REV 5:5 ईदुर मा आ स्याणागोळ दा टु ऊंद नान से अंदुन, “वर्लबाळ; नोळ, यहूदा अन्द गोत्र नव अद हुल्ल जो दाऊद उन मुल आद, आ किताब इक तेरोद अदिक अदुर्द येळु मोहरगोळ मुरोद साटी जयवन्त आग्याद.”
REV 5:6 आग ना आ सिंहासन अदिक नाकु प्राणीगोळ अदिक आ स्याणागोळ्द न्याड्या दा, मतलब ऊंद बली कोळ्द म्यांडा अन्द पाड्डा नीदुरकु नोळदीन. अदुर येळ गॉट्टा अदिक येळ कण्णगोळ ईरव; ईव परमेश्वर उन येळु आत्मागोळ हुव, जो सप्पा धरती मा कळुकु आग्याव.
REV 5:7 आव बंदकु आऊन ऊम्मा कय देल जो सिंहासन मा कुर्तकु ईरोन, आ किताब हुळ्द कोंडुन.
REV 5:8 याग आव किताब हुळ्द कोंडुन, रा अव नाकु प्राणी अदिक ईप्पतनाक इन ईप्पतनाक स्याणा लॉकुर आ म्यांडा अन्द पाड्डा अन्द मुंद बिदोदुर. आंदुर दा टु हर ऊंद जन उन कय दा वीणा अदिक ऊदबत्‍ती, जो पवित्र लॉकुर्द प्रार्थनागोळ हुव, देल तुमकु व्हान्ना नव कटोरा ईरव.
REV 5:9 आंदुर ईद व्हाशोद हाळ हाळली कुरतुर, “नी ई किताब इक हुडोद, अदिक ईदुर्द मोहरगोळ तेरोद लायक आय; यतिकी नी बली आगकु तान रक्ता देल हर ऊंद कुल अदिक भाषा अदिक लॉकुर अदिक जाती दा टु परमेश्वर उन साटी लॉकुरी कोंड्या,
REV 5:10 अदिक आंदरी नाम परमेश्वर उन साटी ऊंद राज्य अदिक याजक माळ्द; अदिक आंदुर धरती मा राज्य माळतार.”
REV 5:11 याग ना नोळदीन, रा आ सिंहासन अदिक आ प्राणीगोळ अदिक आ स्याणागोळ नाकु दी हापाळ सा स्वर्गदूतगोळ्द शब्द केळदीन, यार गिनती लाखों अदिक करोळो अन्द ईरोद,
REV 5:12 अदिक आंदुर धोळ शब्द देल अनतोगोर, “बली कोळ्द म्यांडा अन्द पाड्डा अच सामर्थ्य अदिक धन अदिक ग्यान अदिक ताकत अदिक आदर अदिक महिमा अदिक धन्यवाद इन लायक आद!”
REV 5:13 बाक ना स्वर्ग दा अदिक धरती मा अदिक धरती इन ल्यालमा अदिक समुद्र अन्द सप्पा माळ्द वस्तुगोळी, अदिक सप्पा येनारा जो अऊर दा आव, ईद अनतेला केळदीन, “जो सिंहासन मा कुर्तकु आन आऊन अदिक म्यांडा अन्द पाड्डा अन्द धन्यवाद अदिक आदर अदिक महिमा अदिक राज्य हमेशा ईरूल!”
REV 5:14 अदिक नाकु प्राणीगोळ आमीन अंदव, अदिक स्याणागोळ बांगकु दण्डवत माळदुर.
REV 6:1 बाक ना नोळदीन कि म्यांडा अन्द पाड्डा आ येळ मोहरगोळ दा टु ऊंद मोहर इक तेरूत; अदिक आ नाकु प्राणीगोळ दा टु ऊंद प्राणी इंद गर्जन घाई शब्द केळदीन, “बर!”
REV 6:2 ना दृष्टी माळदीन, अदिक नोळी, ऊंद बिळी घ्वाळा आद, अदिक अदुर सवारी माळावाळा बाण हुडुकु आन; अदिक आऊक ऊंद मुकुट कोटकु आत, अदिक आव जय जयकार माळ्त होट्टुन कि मात्‍त यक्कुल जय हासिल माळुल.
REV 6:3 याग अद दुसरा मोहर तेरूत, रा ना दुसरा प्राणी इक ईद अनतेला केळदीन, “बर!”
REV 6:4 बाक मात्‍त ऊंद घ्वाळा होळ्त जो क्याचांद रंग इन ईरोद; अदुर सवारी माळावाळा अक ईद अधिकार कोटकु आत कि धरती मा टु मेल मिलाप नेग्द बुळ, ताकी लॉकुर आबुर दाबुर इक कोनुल; अदिक आऊक ऊंद धोळ्द तलवार कोटकु आत.
REV 6:5 याग अद तिसरा मोहर तेरूत, रा ना तिसरा प्राणी इक ईद अनतेला केळदीन, “बर!” ना दृष्टी माळदीन, अदिक नोळी, ऊंद करीद घ्वाळा आद, अदिक अदुर सवारी माळावाळा अन्द कय दा ऊंद तराजू आद;
REV 6:6 अदिक ना आ नाकु प्राणीगोळ न्याड्या दा टु ऊंद शब्द ईद अनतेला केळदीन, “दीनार इन सेर तीम गोदी, अदिक दीनार इन मुर सेर जऊस, लेकीन याण्णा अदिक अंगुर इन रास्सा अन्द नुकसान माळबाळेतीर.”
REV 6:7 याग अद चौथा मोहर तेरूत, रा ना चौथा प्राणी इन शब्द ईद अनतेला केळदीन, “बर!”
REV 6:8 ना दृष्टी माळदीन, अदिक नोळी, ऊंद पिवळा रंग घाई घ्वाळा आद; अदिक अदुर मा सवारी माळावाळा अन्द हेसुर मृत्यु आद, अदिक अधोलोक आऊन हिंद हिंद आद; अदिक आंदरी धरती इन ऊंद चौथाई भाग मा ईद अधिकार कोटकु आत कि तलवार, अदिक अकाल, अदिक मरी, अदिक धरती इन आळी दाकळव पशुगोळ द्वारा लॉकुरी कोंदबुळुल.
REV 6:9 याग अद पाचवा मोहर तेरूत, रा ना वेदी इन ल्यालमा आंदुर जीवगोळी नोळदीन जो परमेश्वर उन वचन इन कारण अदिक आ गवाही इन कारण जो आंदुर कोटीदुर बली येर्सकु आगीदव.
REV 6:10 आंदुर धोळ शब्द दा कारूकु अंदुर, “हे स्वामी, हे पवित्र अदिक सत्य; नी यागासताका न्याय माळ्या? अदिक धरती मा ईरावाळेर से नाम रक्ता अन बदला यागासताका ताकोंड्या?”
REV 6:11 आंदुर दा टु हर ऊंद जन उक बिळी फळक्या कोटकु आत, अदिक आंदुर से अंदकु आत कि मात्‍त घळी तिम आराम माळी, यागासताका कि नीम संगी दास अदिक वार्टुर जो नीम घाई बली येर्सकु आगावाळेर आर आंदुर भी गिनती पुरा आगेगाल.
REV 6:12 याग अद सहावा मोहर तेरूत, रा ना नोळदीन कि ऊंद धोळ्द भूकम्प आत, अदिक सुर्य धुसा घाई करीद अदिक पुरा बेळदिंग रक्ता अन घाई आगेत.
REV 6:13 आकाश इन तारागोळ धरती मा हिंग बिद्दव जसा धोळ्द आंधी देल आळगाळकु अंजीर इन मार्र मा टु कच्चा काय झळ्सताव.
REV 6:14 आकाश हिंग सरकुसेत जसा चिट्टी गुंळ्सदुर देल सरकुसेगतद; अदिक हर ऊंद पहाळी, अदिक टापू तान तान जागा मा टु सरकुसेदव.
REV 6:15 आग धरती इन राजा, अदिक प्रधान, अदिक सरदार, अदिक धनवान अदिक सामर्थी लॉकुर, अदिक हर ऊंद दास अदिक हर ऊंद स्वतंत्र पहाळीगोळ्द गुफागोळ दा अदिक चट्टानगोळ दा होगकु होचकोंडव,
REV 6:16 अदिक पहाळीगोळ अदिक चट्टानगोळ देल अनली हतदव, “नाम मा बिळी; अदिक नामी आऊन बाय देल जो सिंहासन मा कुर्तकु आन, अदिक म्यांडा अन्द पाड्डा अन्द प्रकोप देल होच्सकोम बुळी.
REV 6:17 यतिकी आंदुर प्रकोप इन भयानक दिन होट बंदाव, ईग याव ऊंजेर सकतान?”
REV 7:1 इदुर बाद्दा ना पृथ्वी इन नाकु क्वाना मा नाक स्वर्गदूत नीदुरकु नोळदीन. आंदुर पृथ्वी इन नाकु हवा अक रोक्सकु ईरोर ताकी पृथ्वी या समुद्र या यातोदु मार्र मा हवा नळु बाळुल.
REV 7:2 बाक ना मात्‍त ऊंद स्वर्गदूत उक जित्‍ता परमेश्वर उन मोहर हुडुकु पूर्व टु म्याकुच बर्त नोळदीन; आव आ नाकु स्वर्गदूतगोळ देल यवरी पृथ्वी अदिक समुद्र अन्द नुकसान माळोद अधिकार कोटकु आगीत, धोळ शब्द देल कारूकु अंदुन,
REV 7:3 “यागासताका नाव तान परमेश्वर उन दासगोळ ह्याणा मा मोहर हच कोमालेव, आगासताका पृथ्वी अदिक समुद्र अदिक मार्रगोळी नुकसान पोहचुस बाळेतीर.”
REV 7:4 यार मा मोहर कोटकु आत ना आंदुर गिनती केळदीन, मतलब इस्त्राएल इन औलादगोळ्द सप्पा गोत्र दा टु ऊंद लाख चौवालीस हजार मा मोहर कोटकु आत:
REV 7:5 यहूदा अन्द गोत्र दा टु हन्नेळ हजार मा मोहर कोटकु आत; रूबेने अन्द गोत्र दा टु हन्नेळ हजार मा, गाद इन गोत्र दा टु हन्नेळ हजार मा.
REV 7:6 आशेर इन गोत्र दा टु हन्नेळ हजार मा, नप्ताली इन गोत्र दा टु हन्नेळ हजार मा, मनश्शिह अन्द गोत्र दा टु हन्नेळ हजार मा,
REV 7:7 शमौन उन गोत्र दा टु हन्नेळ हजार मा, लेवी इन गोत्र दा टु हन्नेळ हजार मा, इस्साकार इन गोत्र दा टु हन्नेळ हजार मा,
REV 7:8 जबूलून उन गोत्र दा टु हन्नेळ हजार मा, यूसुफ उन गोत्र दा टु हन्नेळ हजार मा, अदिक बिन्यामीन उन गोत्र दा टु हन्नेळ हजार मा मोहर कोटकु आत.
REV 7:9 इदुर बाद्दा ना नजर तिर्गुसदिन, अदिक नोळी, हर ऊंद जाती अदिक कुल अदिक लॉकुर अदिक भाषा दा टु ऊंद हिंग धोळ्द भीळ, यदरी याऊ आळु ईला सकोन, बिळी फळक्या हाक्‍कु अदिक तान कयगोळ दा खजुर इन डगालगोळ हुडुकु सिंहासन इन मुंद अदिक म्यांडा अन्द पाड्डा अन्द मुंद निदुरकु आद,
REV 7:10 अदिक धोळ्द शब्द देल कारूकु अनतद, “उद्धार इन साटी नाम परमेश्वर उन, जो सिंहासन मा कुर्तकु आन, अदिक म्यांडा अन्द पाड्डा अन्द जय-जयकार आगुल!”
REV 7:11 अदिक सप्पा स्वर्गदूत आ सिंहासन अदिक स्याणागोळ अदिक नाकु प्राणीगोळ नाकु दी निदुरकु आर; बाक आंदुर सिंहासन इन मुंद बाय इन भार देल बिदोदुर अदिक परमेश्वर उक दण्डवत माळकु अंदुर,
REV 7:12 “आमीन! नाम परमेश्वर उन स्तुति अदिक महिमा अदिक ग्यान अदिक धन्यवाद अदिक आदर अदिक सामर्थ्य अदिक ताकत हमेशा हमेशा बन्सकु ईरूल. आमीन!”
REV 7:13 इदुर मा स्याणागोळ दा टु ऊंद नान से अंदुन, “ई बिळी फळक्यागोळ हाक्‍कु यार उर? अदिक यल टु बंदार?”
REV 7:14 ना आंदुर से अंदीन, “हे स्वामी, नी अच जान्सत्या.” आव नान से अंदुन, “ईंदुर आंदुर उर, जो आ महाक्लेश दा टु होटकु बंदार; इंदुर तान-तान फळक्या म्यांडा अन्द पाड्डा अन्द रक्ता दा तोळकु बिळेव माळ्यार.
REV 7:15 ईदा कारण आंदुर परमेश्वर उन सिंहासन इन मुंद आर, अदिक आऊन मंदिर दा ईळ्लक-हागुल आऊन स्यावा माळतार, अदिक जो सिंहासन मा कुर्तकु आन, आव आंदुर म्याकुच तान तम्बू तानस्यान.
REV 7:16 आंदुर बाक उपासा अदिक नीरअळ्क देल ईरतीदील; अदिक ना आंदुर मा यागल्यारा बिसुल बिद्दीत.
REV 7:17 यतिकी म्यांडा अन्द पाड्डा जो सिंहासन इन न्याड्या दा आद आंदुर जागनी माळीत, अदिक आंदरी जीवन रूपी नीर इन डोबन इन हात्‍ती ओतीत; अदिक परमेश्वर आंदुर कण्णगोळी बाक यागलु वर्लगोळतिदिल.
REV 8:1 “याग आव सातवा मोहर तेरदुन, रा स्वर्ग दा आर्धा घंटा ताका सन्नाटा आगेत.
REV 8:2 आग ना आ येळु स्वर्गदूतगोळ इक नोळदीन जो परमेश्वर उन मुंद निदुरकु ईरतार, अदिक आंदरी येळ तुरहीगोळ कोटकु आत.”
REV 8:3 बाक मात्‍त ऊंद स्वर्गदूत व्हान्नोद ऊदबत्‍ती दान हुडुकु बंदुन, अदिक वेदी इन हात्‍ती निदुरदुन; अदिक आऊक हापाळ ऊदबत्‍ती कोटकु आत कि सप्पा पवित्र लॉकुर्द प्रार्थनागोळ सांगुळ व्हान्ना अन्द आ वेदी मा, जो सिंहासन इन मुंद आद येर्सुल.
REV 8:4 आ ऊदबत्‍ती इन धुंगा पवित्र लॉकुर्द प्रार्थना सहित स्वर्गदूत उन कय दा टु परमेश्वर उन मुंद पोहचुसेत.
REV 8:5 आग स्वर्गदूत ऊदबत्‍ती दान हुडुकु अदुर दा वेदी इन बेक्‍की तुमदुन अदिक धरती मा हाक बुट्टुन; अदिक गर्जन अदिक शब्द अदिक बिजलीगोळ अदिक भूकम्प आगली कुरतव.
REV 8:6 आग आ येळु स्वर्गदूत यार हात्‍ती येळ तुरहीगोळ ईरव अवरी ऊरूली तयार आदुर.
REV 8:7 पयला स्वर्गदूत तुरही ऊरूदुन, अदिक रक्ता देल मिलुसकु क्यांडागोळ अदिक बेक्‍की तयार आत, अदिक धरती मा हाक्‍कु आत; अदिक धरती इन ऊंद तिहाई भाग होत्‍तेत, अदिक मार्रगोळ्द ऊंद तिहाई भाग होत्‍तेत, अदिक सप्पा हिवरा काड्डा भी होत्‍तेत.
REV 8:8 दुसरा स्वर्गदूत तुरही ऊरदुन, रा बेक्‍की घाई होत्‍ततेला ऊंद धोळ्द पहाळी समुद्र दा हाक्‍कु आत; अदिक समुद्र अन्द ऊंद तिहाई भाग रक्ता आगेत,
REV 8:9 अदिक समुद्र अन्द ऊंद तिहाई जीव सोतोदव, अदिक ऊंद तिहाई जहाज नाश आगेदव.
REV 8:10 तिसरा स्वर्गदूत तुरही ऊरदुन, अदिक ऊंद धोळ तारा जो मशाल घाई होत्‍तोगोद स्वर्ग दा टु मुरूत, अदिक गांगागोळ्द ऊंद तिहाई मा अदिक नीर इन डोबनगोळ मा बंदकु बित्‍त.
REV 8:11 आ तारा अन्द हेसुर नागदौना आद; अदिक ऊंद तिहाई नीर नागदौना घाई केय आगेत, अदिक हापाळ सा मंळसागोळ आ नीर इन केय आगदुर देल सोतोदुर.
REV 8:12 चौथा स्वर्गदूत तुरही ऊरदुन, अदिक सुर्य अन्द ऊंद तिहाई भाग, अदिक बेळदिंग्या अन्द ऊंद तिहाई अदिक तारागोळ्द ऊंद तिहाई भाग मा आपत्ति बत्‍त, ईल ताका कि अऊर्द ऊंद तिहाई भाग अंधार आगेत अदिक दिन इन ऊंद तिहाई भाग दा ऊजुळ ईतीदील, अदिक हांगा ईळ्लक दा भी.
REV 8:13 याग ना मात्‍त नोळदीन, रा आकाश इन न्याड्या दा गीधाळ इक ऊळुसतेला अदिक धोळ शब्द दा ईद अनतेला केळदीन, “आ मुर स्वर्गदूतगोळ्द तुरही इन शब्दगोळ कारण, यार्द ऊरोद ईगल्या मिक्‍कु आद, धरती नोर ईरावाळेर मा हाय, हाय, हाय!”
REV 9:1 याग पाचवा स्वर्गदूत तुरही ऊरदुन, रा ना स्वर्ग टु पृथ्वी मा ऊंद तारा बिळतेला नोळदीन, अदिक अदरी अथाह अधोलोक इंद चाबी कोटकु आत.
REV 9:2 अद अथाह अधोलोक इक तेरूत, अदिक कुंड दा टु धोळ्द भट्टी घाई धुंगा येळ्त, अदिक कुंड इन धुंगा देल सुर्य अदिक वायु अंधारकाय आगेदव.
REV 9:3 आ धुंगा दा टु पृथ्वी मा हत्‍तीफाफा होट्टव, अदिक अवरी पृथ्वी इन चेळगोळ घाई शक्ति कोटकु आत.
REV 9:4 अऊर से अंदकु आत कि ना पृथ्वी इन काड्डा अक, ना यातोदारा हरयाली इक, ना यातोदारा मार्र इक नुकसान पोहचुसेत, सिर्फ आ मंळसागोळी नुकसान पोहचुसेत यार ह्याणा मा परमेश्वर उन मोहर हैलेच.
REV 9:5 अवरी लॉकुरी कोंद बुळोद रा ईला लेकीन अईद तिंगुळ ताका पीळा कोळोद अधिकार कोटकु आत: अदिक आंदुर पीळा हिंग ईरोद ह्यांग चेळ उन डंक होळदुर देल मंळसा अक आगतद.
REV 9:6 आ दिनगोळ दा मंळसागोळ मृत्यु उक ढुंढस्यार अदिक आंदरी मृत्यु सिकतीदील; अदिक सायोद लालसा माळ्यार, अदिक मृत्यु आंदुर से दुर ओळीत.
REV 9:7 आ हत्‍तीफाफागोळ्द आकार लळाई इन साटी तयार माळ्द घ्वाळागोळ घाई ईरव, अदिक अऊर ताल्लागोळ मा व्हान्ना अन्द मुकुट ईरव; अदिक अऊर मार्रगोळ मंळसागोळ घाई ईरव.
REV 9:8 अऊर चुटगोळ आर्तेर चुटगोळ घाई अदिक हल्ल हुल्ल इन हल्लगोळ घाई ईरव.
REV 9:9 अव लोवा घाई झिलम हाक्‍कु ईरव; अदिक अऊर पिक्‍कागोळ्द शब्द हिंग ईरोद जसा रथ अदिक हापाळ सा घ्वाळागोळ्द जो लळाई दा ओळताव.
REV 9:10 अऊर्द पुसटी चेळगोळ घाई ईरव अदिक अऊर दा डंक ईरव, अदिक अवरी अईद तिंगुळ ताका मंळसागोळी दुख पोहचुसोद जो शक्ति सिकीत, अद अऊर्द पुसटीगोळ दा ईरोद.
REV 9:11 अथाह अधोलोक इन स्वर्गदूत अऊर मा राजा ईरोन; आऊन हेसुर इब्रानी दा अबद्दोन, अदिक यूनानी दा अपुल्लयोन आद.
REV 9:12 पयला विपत्‍ती नष्ट आगेत, नोळी, ईग इदुर बाद्दा येढ्ढ परेशानीगोळ मात्‍त बरव आव.
REV 9:13 याग सहावा स्वर्गदूत तुरही ऊरूदुन रा व्हान्ना अन्द वेदी जो परमेश्वर उन मुंद आद अदुर गॉट्टागोळ दा टु ना हिंग शब्द केळदीन,
REV 9:14 मतलब यावारा सहावा स्वर्गदूत से, यार हात्‍ती तुरही ईरोद, अनेत्यान, “आ नाकु स्वर्गदूतगोळ इक जो धोळ गांगा फुरात इन हात्‍ती कटकु आर, खोल्स बुळ.”
REV 9:15 आ नाकु स्वर्गदूत खोल्सकु आदुर जो आ समय, अदिक दिन, अदिक तिंगुळ, अदिक साल इन साटी मंळसागोळ्द ऊंद तिहाई भाग इक कोंद बुळली तयार माळकु आगिदुर.
REV 9:16 अऊर्द फौज इन सवारगोळ्द गिनती ईप्पत करोळ ईरोद; ना अऊर्द गिनती केळदीन.
REV 9:17 नानी ई दर्शन दा घ्वाळागोळ अदिक अऊर्द हिंग सवार कांळ्सदुर यार झिलमगोळ बेक्‍की, अदिक धूम्रकान्त, अदिक गन्धक घाई ईरोद, अदिक आ घ्वाळागोळ्द ताल्ला हुल्ल इन ताल्ला घाई ईरव; अदिक अऊर बाय दा टु बेक्‍की, धुंगा अदिक गन्धक होळतोगोद.
REV 9:18 ई मुरू महामारीगोळ्द मतलब बेक्‍की अदिक धुंगा अदिक गन्धक देल, जो अऊर बाय दा टु होळतोगोद मंळसागोळ्द ऊंद तिहाई कोंदकु आत.
REV 9:19 यतिकी आ घ्वाळागोळ्द सामर्थ्य अऊर बाय अदिक पुसटीगोळ दा ईरोद; इदुरसाटी कि अऊर पुसटीगोळ हावगोळ घाई ईरव, अदिक आ पुसटीगोळ्द ताल्ला भी ईरव अदिक ईऊर देला अव दुख पोहचुसतोगव.
REV 9:20 मिग्द मंळसागोळ जो आ मरी देल सायली ईरोर, तान कयगोळ्द क्याल्सा देल, मन तिर्गुसदुर, कि दुष्टआत्मागोळ्द, अदिक व्हान्ना अदिक बेळ्ली अदिक पीतळा अदिक कल्ल अदिक हुळ्ली इन मूर्तीगोळ्द पुजा माळबाळुल जो ना नोळ सकताव, ना केळ सकताव, ना नळु सकताव;
REV 9:21 अदिक जो रक्ता, अदिक जादू टोना, अदिक व्यभिचार, अदिक काळ्लपनी आंदुर माळीदुर, अदुर देल मन तिर्गुसिदिल.
REV 10:1 बाक ना मात्‍त ऊंद ताकतवर स्वर्गदूत उक आकाश होच्त स्वर्ग टु ईळुत नोळदीन. आऊन ताल्ला मा मेघधनुष ईरोद. आऊन बाय सुर्य अन्द घाई अदिक आऊन कालगोळ बेक्‍की इन खंबा घाई ईरव.
REV 10:2 आऊन कय दा ऊंद स्यांळ्दतुसा किताब तेरूकु ईरोद. आव तान ऊम्मा काल समुद्र मा अदिक डाक्या काल पृथ्वी मा ईटदुन,
REV 10:3 अदिक हिंग धोळ्द शब्द देल चिल्ळासदुन, ह्यांग हुल्ल गरजुसतद; अदिक याग आव चिल्ळासदुन रा गर्जन इन सांगुळ शब्द केळ बंदव.
REV 10:4 याग येळु गर्जन इनव शब्द केळकु आगेदव, रा ना लिख्सदुर मा ईरीन, लेकीन ना स्वर्ग टु ईद शब्द केळदीन, “जो मातगोळ गर्जन इन आ येळ शब्दगोळ से केळ्या अवरी गुप्त ईट, अदिक लिख्सबाळ.”
REV 10:5 याता स्वर्गदूत उक ना समुद्र अदिक पृथ्वी मा निदुर्त नोळीदिन, आव तान ऊम्मा कय स्वर्ग दी नेगदुन,
REV 10:6 अदिक जो हमेशा हमेशा जित्‍ता आन, अदिक याव स्वर्ग इक अदिक जो येनारा अदुर दा आद, अदिक पृथ्वी इक अदिक जो येनारा अदुर दा आद, अदिक समुद्र अक अदिक जो येनारा अदुर दा आद सजुस्कु, अऊर्दा किर्‍या तिनकु अंदुन, “ईग रा मात्‍त समय आगतीदील.
REV 10:7 बल्‍की सातवा स्वर्गदूत उन तुरही ऊरदुर मा जो आगव आव शब्द इन दिनगोळ दा परमेश्वर उन गुप्त मनोरथ आ खुशखबरी इन अनुसार जो आव तान दास भविष्यवक्तागोळी कोट्टुन, पुरा आदीत.”
REV 10:8 याता शब्द अक ना स्वर्ग टु माताळ्त केळीदीन, अद मात्‍त नान सांगुळ मात हेळली कुर्त, “होग, जो स्वर्गदूत समुद्र अदिक पृथ्वी मा निदुरकु आन, आऊन कय दाकळोद अद किताब हुडु कोम जो तेरकु आद.”
REV 10:9 ना स्वर्गदूत उन हात्‍ती होगकु अंदीन, “ईद स्यांळ्द किताब नानी कोळ.” आव नान से अंदुन, “हुडु, इदरी तिन कोम; ईद नीन व्हाट्टा केय रा माळीत, लेकीन नीन बाय दा सयद घाई सय हत्‍तीत.”
REV 10:10 अत: ना अद स्यांळ्द किताब आ स्वर्गदूत उन कय दा टु हुडुकु तिंद बुटीन. अद नान बाय दा सयद घाई सय रा हत, लेकीन याग ना अदरी नुंग बुट्टीन, रा नान व्हाट्टा केयजोर आगेत.
REV 10:11 आग नान से ईद अंदकु आत, “नीनी हापाळ सा लॉकुर, अदिक जातीगोळ, अदिक भाषागोळ अदिक राजागोळ्द बारा दा मात्‍त भविष्यवाणी माळोद बिद्दीत.”
REV 11:1 बाक नानी आळोर साटी ऊंद सरकंडा कोटकु आत, अदिक यारारा अंदुर, “येळ, परमेश्वर उन मंदिर अदिक वेदी, अदिक अदुर दा उपासना माळावाळेर इक आळ्द कोम.
REV 11:2 लेकीन मंदिर इन व्हार्या अन्द आंगुळ बिट बुळ; अदरी आळुबाळ यतिकी अद गैरयहूदी इक कोटकु आग्याद, अदिक आंदुर पवित्र नगर इक ब्यालीस दिन ताका काल दिशी मेट्ट्यार.
REV 11:3 ना तान येढ्ढ गवाहगोळी ईद अधिकार कोळाईन कि टाट होदुकु ऊंद हजार येढ्ढ सौ साठ दिन ताका भविष्यवाणी माळुल.
REV 11:4 “ईव अवा जैतुन इन येढ्ढ मार्र अदिक येढ्ढ दिंग्या ईटव जागा हुव, जो पृथ्वी इन प्रभु उन मुंद निदुरकु ईतार.
REV 11:5 अगर यावारा आंदरी नुकसान पोहचुसोद चाहासतान, रा आंदुर बाय दा टु बेक्‍की होटकु आंदुर दुश्मनगोळी भसम माळतद; अदिक अगर यावारा आंदरी नुकसान पोहचुसोद चाहास्यान, रा जरूर ईत्‍ता रीति देल कोन्सुसकु आदान.
REV 11:6 आंदरी अधिकार आद कि आकाश इक बंद माळुल, कि आंदुर्द भविष्यवाणी इन दिनगोळ दा सयद बरसुसबाळुल; अदिक आंदरी सप्पा नीरनळी मा अधिकार आद कि अदरी रक्ता माळुल, अदिक याग याग चाहास्यार आग आग पृथ्वी मा हर प्रकार इंद विपत्‍ती तरूल.”
REV 11:7 याग आंदुर्द गवाही कोटकु आगेदीत, रा अद पशु जो अथाह अधोलोक दा टु होट्टीत, आंदुर से लळाई माळकु अवरी जीतुसित अदिक आंदरी कोंद बुट्टीत.
REV 11:8 आंदुर लाश आ धोळ्द नगर इन चौक दा बिदकु ईत्‍ताव, यदरी आत्मिक रूप देल सदोम अदिक मिस्त्र अंदकु आगतद, यल आंदुर प्रभु भी क्रूस मा येर्सकु आगिदुन.
REV 11:9 सप्पा लॉकुर अदिक कुलगोळ अदिक भाषागोळ अदिक जातीगोळ्द लॉकुर आंदुर मुर्दागोळी इक साढ़े मुर दिन ताका नोळतेला ईत्‍तार, अदिक आंदुर मुर्दागोळ इक कब्र दा ईट कोळतीदील.
REV 11:10 धरती मा ईरावाळेर आंदुर सोत्‍तुर देल खुश अदिक मग्न आदार, अदिक आबुर दाबुर हात्‍ती भेंट कळ्यार, यतिकी ई दिनगोळ दा भविष्यवक्तागोळ धरती मा ईरावाळेर इक सतुस्यार.
REV 11:11 लेकीन साढ़े मुर दिन इन बाद्दा परमेश्वर उन दी टु जीवन इन श्वास आंदुर दा होक्त, अदिक आंदुर तान कालगोळ ताकत देल निदरेदुर, अदिक आंदुर नोळावाळेर मा धोळ्द अंज्क तुम्मेत.
REV 11:12 आग आंदरी स्वर्ग टु ऊंद धोळ्द शब्द केळ बत्‍त, “ईल म्याकुच बरी!” ईद केळकु आंदुर बादल मा सवार आगकु तान दुश्मनगोळ नोळतेला अच स्वर्ग मा येरेदुर.
REV 11:13 बाक आ घळी ऊंद धोळ्द भूकम्प आत, अदिक नगर इन दहावा भाग बिदोत; अदिक आ भूकम्प देल येळ हजार मंळसागोळ सोतोदुर, अदिक बाकी नोर जो ऊळ्दकु ईरोर आंदुर अंजेदुर अदिक स्वर्ग इन परमेश्वर उन महिमा माळली कुरतुर.
REV 11:14 दुसरा परेशानी बितसेत; नोळी, तिसरा परेशानी जल्दी बरावाळा आद.
REV 11:15 याग सातवा स्वर्गदूत तुरही ऊरदुन, रा स्वर्ग दा ई बारा दा धोड्डेव-धोड्डेव शब्द आगली कुरतव: “दुनिया अन राज्य नामव प्रभु उन अदिक आऊन मसीह अन्द आगेत, अदिक आव हमेशा हमेशा राज्य माळ्यान.”
REV 11:16 आग चौबीसा स्याणा लॉकुर जो परमेश्वर उन मुंद तान तान सिंहासन मा कुर्तकु ईरोर, बाय इन भार देल बिदकु परमेश्वर उक प्रणाम माळकु
REV 11:17 ईद अनली कुरतुर, “हे सर्वशक्तिमान प्रभु परमेश्वर, जो आन अदिक जो ईरोन, नाव नीन धन्यवाद माळतेव कि नी तान धोळ्द सामर्थ्य इक क्याल्सा दा तनकु राज्य माळ्या.
REV 11:18 अन्य जातीगोळ सिट्ट दा तुमकु ईरोर, लेकीन नींद प्रकोप बंदकु बित्‍त, अदिक अद समय बंदाद कि जो सोत्‍तुर आंदुर्द न्याय माळकु आगुल, अदिक नीनोर दास परमेश्वर उन बातणी केळसावाळेर अदिक पवित्र लॉकुरी अदिक आ स्याण धोड्डेर इक जो नींद हेसुर देल अंजतार बदलुस्कु आगुल, अदिक पृथ्वी इक बिगळुसा वाळेर इक नष्ट माळकु आगुल.”
REV 11:19 आग परमेश्वर उन जो मंदिर स्वर्ग दा आद अद तेरकु आत, अदिक आऊन मंदिर दा आऊंदा वाचा अन्द संदुक कांळ्सत; अदिक बिजलीगोळ अदिक शब्द अदिक गर्जन अदिक भूकम्प आदव अदिक धोड्डेव ओला बिद्दव.
REV 12:1 बाक स्वर्ग दा ऊंद धोळ्द चिन्ह कांळ्सत, मतलब ऊंद आर्त जो सुर्य होदुकु ईरोर, अदिक बेळदिंग आकिन काल दिशी ईरोद, अदिक आकिन ताल्ला मा हन्नेळ तारागोळ्द मुकुट ईरोद.
REV 12:2 आक व्हाट्या दी आदुर, अदिक किटरोर, यतिकी आक प्रसव इन दुख दा ईरोर.
REV 12:3 ऊंद अदिक चिन्ह स्वर्ग दा कांळ्सत; अदिक नोळी, ऊंद धोळ्द क्याचांद अजगर ईरोद, अदरी येळ ताल्ला अदिक हत्‍त गॉट्टा ईरव, अदिक अदुर्द ताल्ला मा येळ राजमुकुट ईरव.
REV 12:4 अदुर पुसटी आकाश इन तारा अन्द ऊंद तिहाई इक जेडुकु पृथ्वी मा हाक कोम्त. अद अजगर येनारा ईरोर आ आर्त इन मुंद ईरोद, निदुर्त कि याग आक चिग्द हाळदार रा आ चिग्द उक नुंग कोमुल.
REV 12:5 आक पार हाळदुर जो लोवा अन्द छळी इक ताकोमकु सप्पा जातीगोळ मा राज्य अन्द साटी बंदीदुन, अदिक आव पार एकाएक परमेश्वर उन हात्‍ती अदिक आऊन सिंहासन इन हात्‍ती नेगुकु पोहचुस्कु आदुन;
REV 12:6 अदिक आ आर्त आ आळी दा ओळतेला होदुर यल परमेश्वर उन दी टु आकिन साटी ऊंद जागा तयार माळकु आगीत कि अल आक ऊंद हजार येढ्ढ सौ साठ दिन ताका सालकु आगुल.
REV 12:7 बाक स्वर्ग दा लळाई आत, मीकाईल अदिक आऊन स्वर्गदूत अजगर इन सांगुळ लळाई माळली होट्टुर; अदिक अजगर अदिक अदुर दूत आऊन सांगुळ लळुसदव.
REV 12:8 लेकीन प्रबल आगीदील, अदिक स्वर्ग दा आंदुर साटी बाक जागा ईतीदील.
REV 12:9 आग अद धोळ्द अजगर, मतलब अदा हाळोद हाव जो इब्लीस अदिक शैतान कहलुसतद अदिक पुरा दुनिया अक भरमुसावाळा हुन, पृथ्वी मा केळसुस्कु आत, अदिक अदुर दूत अदुर सांगुळ केळसुस्कु आदव.
REV 12:10 बाक ना स्वर्ग टु ईद धोळ्द शब्द बरतेला केळदीन, “ईग नाम परमेश्वर उन उद्धार अदिक सामर्थ्य अदिक राज्य अदिक आऊन मसीह अन्द अधिकार प्रगट आग्याद, यतिकी नाम वार्टुर मा दोष हचावाळा, जो ईळ्लक हागुल नाम परमेश्वर उन मुंद आंदुर मा दोष हचतोगोन केळसुस्कु आदुन.”
REV 12:11 “आंदुर म्यांडा अन्द पाड्डा अन कारण अदिक तान गवाही इन वचन इन कारण आऊन मा जयवन्त आदुर, अदिक आंदुर तान जीव इक प्रिय जानसीदिल, ईल ताका कि मृत्यु भी सहन माळ कोंडुर.”
REV 12:12 “ई कारण हे स्वर्गगोळा अदिक अदुर्दा ईरावाळेरा, मग्न ईरी; हे पृथ्वी, अदिक समुद्र, नीम मा हाय! यतिकी शैतान बळा सिट्ट इन सांगुळ नीम हात्‍ती ईळुकु बंदुन, यतिकी जान्सत्या कि थ्वाळासा अच समय अदिक बाकी आद.”
REV 12:13 याग अजगर नोळ्त कि ना पृथ्वी मा केडुकु आगेदीन, रा आ आर्त इक जो पार हाळीदुर, सतुस्त.
REV 12:14 लेकीन आ आर्त इक धोळ गीधाळ इन येढ्ढ पिक्‍का कोटकु आगीदव कि हाव उन मुंद टु ऊळुसकु आळी दा आ जागा दा होटोगुल, यल अद ऊंद समय अदिक समयगोळ, अदिक आर्धा समय ताका पालस्कु आगुल.
REV 12:15 अदिक हाव आ आर्त इन हिंद तान बाय देल गांगा अन्द घाई नीर वाहुस्त कि आकी ई गांगा देल वाहुस बुळुल.
REV 12:16 लेकीन पृथ्वी आ आर्त इन सहायता माळ्त, अदिक तान बाय खोल्सकु आ गांगा अक जो अजगर तान बाय देल वाहुसीदुन कळुत.
REV 12:17 आग अजगर आर्त मा गुस्सा आत्त, अदिक आकिन बाकी नव चिकोर देल, जो परमेश्वर उन आग्यागोळ इक मानसोर अदिक यीशु उन गवाही कोळदुर मा स्थिर आर, लळाई माळली होत्त.
REV 12:18 अदिक अद समुद्र अन्द धुळा मा होगकु नीदुरकु ईत्त.
REV 13:1 आग ना ऊंद पशु उक समुद्र दा टु होळ्त नोळदीन, यदुर्द हत्‍त गॉट्टा अदिक येळ ताल्ला ईरव. अदुर गॉट्टागोळ मा हत्‍त राजमुकुट अदिक अदुर ताल्लागोळ मा परमेश्वर उन निन्दा नव हेसुर लिख्सकु ईरव.
REV 13:2 जो पशु ना नोळदीन अद चिता अन्द घाई ईरोद; अदिक अदुर कालगोळ भालू घाई, अदिक बाय हुल्ली इन घाई ईरोद. अद अजगर तान सामर्थ्य अदिक तान सिंहासन अदिक धोळ्द अधिकार अदरी कोट बुळ्त.
REV 13:3 ना अऊर्द ताल्लागोळ दा टु ऊंद मा हिंग भयंकर घाव हतकु नोळदीन कि हिंग हतुल कि अद सायदुर मा आद, बाक अदुर्द प्राणघातक घाव वळ्लीद आगेत, अदिक सप्पा धरती इन लॉकुर आ पशु उन हिंद-हिंद अचम्भा माळतेला नळदुर.
REV 13:4 लॉकुर अजगर इन पुजा माळदुर, यतिकी अद पशु उक तान अधिकार कोट बुटीत, अदिक ईद अनकु पशु उन पुजा माळदुर, “ई पशु उन घाई याव आन? याव ईदुर से लळाई माळ सकतान?”
REV 13:5 बळा बोल माताळली अदिक अपमान माळोर साटी अदरी ऊंद बाय कोटकु आग्याद, अदिक अदरी ब्यालीस तिंगुळ ताका क्याल्सा माळोद अधिकार कोटकु आग्याद.
REV 13:6 आव परमेश्वर उन अपमान माळोर साटी बाय तेरदुन कि आऊन हेसुर अदिक आऊन तम्बू मतलब स्वर्ग इन ईरावाळेर इन अपमान माळुल.
REV 13:7 आऊक ईद भी अधिकार कोटकु आग्याद कि पवित्र लॉकुर सांगुळ लळाई माळुल अदिक आंदुर मा जय सिकुल, अदिक आऊक हर ऊंद कुल अदिक लॉकुर अदिक भाषा अदिक जाती मा अधिकार कोटकु आग्याद.
REV 13:8 धरती मा ईरावाळेर आंदुर सप्पा, यार हेसुर आ म्यांडा अन्द पाड्डा अन्द जीवन इन किताब दा लिख्सकु आगीदील जो दुनिया अन उत्पत्ति इन समय टु घात आग्याद, आ पशु उन पुजा माळ्यार.
REV 13:9 यार किव आव आव केळुल.
REV 13:10 यारी कैद दा बिळोद आद, आव कैद दा बिद्दान; जो तलवार देल कोंदान, जरूरी आद कि आव तलवार देल कोंदकु आदान. पवित्र लॉकुर्द धीरज अदिक विश्वास ईदुर दा आद.
REV 13:11 बाक ना ऊंद अदिक पशु उक पृथ्वी दा टु होळतेला नोळदिन, अदुर्द म्यांडा अन्द पाड्डा अन्द घाई येढ्ढ गॉट्टा ईरव, अदिक अद अजगर इन घाई माताळोद.
REV 13:12 अद आ पयला पशु उन पुरा अधिकार अदुर मुंद क्याल्सा दा तरोद; अदिक पृथ्वी अदिक अदुर्द ईरावाळेर देल आ पयला पशु उन, यदुर्द जीव घातक घाव वळ्लीद आगेगीत, पुजा माळसुसोद.
REV 13:13 अद धोळ-धोळ चिन्ह तोर्सोन, ईल ताका कि मंळसागोळ्द मुंद स्वर्ग टु पृथ्वी मा बेक्‍की बरसुस बुळोन.
REV 13:14 आ चिन्हगोळ्द कारण, यारी आ पशु उन मुंद तोरसोद अधिकार अदरी कोटकु आगीत, अद पृथ्वी इन ईरावाळेर इक भरमुसोद अदिक पृथ्वी इन ईरावाळेर देल अनोद कि या पशु उक तलवार हतीत अद जित्‍ता आग्याद, अदुर्द मूर्ति माळी.
REV 13:15 अदरी आ पशु उन मूर्ति दा जीव हाक्कोद अधिकार कोटकु आग्याद कि पशु उन मूर्ति माताळली हतुल, अदिक यास लॉकुर आ पशु उन मूर्ति इन पुजा माळतीदील, आंदरी कोन्सुस बुळुल.
REV 13:16 आव स्यांळ्द-धोळ, धनी-कंगाल, स्वतंत्र-दास सप्पा मुंदुर ऊम्मा कय दी या आंदुर मस्तक मा ऊंद ऊंद छाप माळ बुट्टुन,
REV 13:17 कि अदरी बिटकु याऊन मा छाप मतलब आ पशु उन हेसुर या अदुर हेसुर इन अंक ईरूल, दुसरा यावारा लेन-देन माळ ईला सकुल.
REV 13:18 ग्यान ईदुर दा आद: यारी बुद्धी आद आव ई पशु उन अंक जोळ्स कोमुल, यतिकी अद मंळसा अन्द अंक हुन, अदिक अदुर अंक आर सौ छैसठ आद.
REV 14:1 बाक ना नजर माळदीन, अदिक नोळी, आ म्यांडा अन्द पाड्डा सिय्योन पहाळ मा नीदुरकु आद, अदिक अदुर सांगुळ ऊंद लाख चौवालीस हजार मुंदुर आर, यार ह्याणा मा आऊन अदिक आऊन आप्प उन हेसुर लिख्सकु आद.
REV 14:2 अदिक स्वर्ग टु नानी ऊंद हिंग शब्द केळ बत्‍त जो नीर इन हापाळ धारागोळ अदिक बळा गर्जन इन शब्द ईरोद, अदिक जो शब्द ना केळदीन अद हिंग ईरोद मान्सी वीणा मुरसावाळेर वीणा मुरसेत्यार.
REV 14:3 आंदुर सिंहासन इन मुंद अदिक नाकु प्राणीगोळ अदिक स्याणागोळ्द मुंद ऊंद व्हाशोद हाळ हाळोर. आ ऊंद लाख चौवालीस हजार लॉकुरी बिटकु, जो पृथ्वी मा टु कोंडकु आगीदुर, यारू आ हाळ इक कलु ईला सकोर.
REV 14:4 इंदुर आंदुर उर जो आर्तेर सांगुळ अशुध्द आगीदील, पर कुवारा आर; इंदुर आंदुरा उर कि येल्यारा म्यांडा अन्द पाड्डा होगतद, अऊर आऊन हिंद आगेगतार; इंदुर रा परमेश्वर उन निमित्त पयला फल आगोर साटी मंळसागोळ दा टु कोंडकु आग्यार.
REV 14:5 आंदुर बाय दा टु यागलु ख्वाटा मात होटीदिल, आंदुर निर्दोष आर.
REV 14:6 बाक ना ऊंद अदिक स्वर्गदूत उक आकाश इन न्याड्या दा उळुसतेला नोळदीन, यार हात्‍ती पृथ्वी माकळोर ईरावाळेर्द हर ऊंद जाती, अदिक कुल, अदिक भाषा, अदिक लॉकुरी केळसोर साटी अनन्त खुशखबरी ईरव.
REV 14:7 स्वर्गदूत धोळ शब्द देल अंदुन, “परमेश्वर से अंजी, अदिक आऊन महिमा माळी, यतिकी आऊन न्याय माळोद समय होट बंदाद; अदिक आऊन भजन माळी, याव स्वर्ग अदिक पृथ्वी अदिक समुद्र अदिक नीर इन झरना माळ्यान.”
REV 14:8 बाक इदुर बाद्दा ऊंद मात्‍त, दुसरा, स्वर्गदूत ईद अनतेला बंदुन, “बित्त, आ धोळ बेबीलोन बित्त, यार तान व्यभिचार इन कोपमय सारा पुरा जातीगोळी इक कुळस्याद.”
REV 14:9 बाक इंदुर बाद्दा ऊंद मात्‍त, तीसरा, स्वर्गदूत धोळ शब्द देल ईद अनतेला बंदुन, “जो यावारा आ पशु अदिक अदुर्द मूर्ति इन पुजा माळुल, अदिक तान ह्याणा या तान कय मा अदुर्द छाप ताकोमुल
REV 14:10 अद परमेश्वर उन प्रकोप इन निरी सारा, जो आऊन सिट्ट इन कटोरा दा हाक्‍कु आग्याद, कुळदान अदिक पवित्र स्वर्गदूतगोळ्द मुंद अदिक म्यांडा अन्द पाड्डा अन्द मुंद बेक्‍की अदिक गन्धक इन पीळा दा बिद्दान.
REV 14:11 आदुर्द पीळा अन्द धुंगा हमेशा हमेशा येळतेला ईत्‍तीत, अदिक जो आ पशु अदिक अदुर्द मूर्ति इन पुजा माळतार, अदिक जो अदुर हेसुर इन छाप ताकोमतार, आंदरी ईळ्लक हागुल चैन सिकतीदील.”
REV 14:12 पवित्र लॉकुर्द धीरज इदुर दा आद, जो परमेश्वर उन आग्यागोळ इक मान्सतार अदिक यीशु मा विश्वास ईटतार.
REV 14:13 बाक ना स्वर्ग टु ईद शब्द केळदीन, “कि लिख्स: जो मुर्दा प्रभु दा सायतान, आंदुर ईग टु धन्य आर.” आत्मा अनतद, “हव, यतिकी आंदुर तान पुरा मेहनत देल आराम ताकोंडार, अदिक आंदुर कार्य आंदुर सांगुळ ईत्‍ताव.”
REV 14:14 ना दृष्टी माळदीन, अदिक नोळी, नान मुंद ऊंद बिळीद ढग आद, अदिक आ ढग मा मंळसा अन पार उन घाई यावारा कुर्तकु आन, आऊन ताल्ला मा व्हान्ना अन्द मुकुट अदिक कय दा पन्यार कुळगुल आद.
REV 14:15 बाक ऊंद अदिक स्वर्गदूत मंदिर दा टु होटकु आऊन से, जो ढग मा कुर्तकु ईरोन, धोळ शब्द देल कारूकु अंदुन, “तान कुळगुल हचकु कटाई माळ, यतिकी कटाई इन समय होट बंदान, इदुरसाटी कि पृथ्वी इन केई इन फसल हण्ण आगेग्याद.”
REV 14:16 इदुरसाटी जो ढग मा कुर्तकु ईरोन आव पृथ्वी मा तान कुळगुल हचदुन, अदिक पृथ्वी इन केई इन कटाई माळदुन.
REV 14:17 बाक ऊंद अदिक स्वर्गदूत आ मंदिर दा टु होट्टुन जो स्वर्ग दा आन, अदिक आऊन हात्‍ती भी पन्यार कुळगुल ईरोद.
REV 14:18 बाक ऊंद अदिक स्वर्गदूत, यारी बेक्‍की मा अधिकार ईरोद, वेदी दा टु होट्टुन, अदिक यार हात्‍ती पन्यार कुळगुल ईरोद आऊन से धोळ शब्द देल अंदुन, “तान पन्यार कुळगुल हचकु पृथ्वी इन अंगुर इन केई इन काय इन गुच्छा कडुकोम, यतिकी अद अंगुर इन काय हण्ण आगेग्याद.”
REV 14:19 आग आ स्वर्गदूत पृथ्वी मा तान कुळगुल हचदुन अदिक पृथ्वी इन अंगुर इन गुच्छा अन्द काय कडुकु तान परमेश्वर उन प्रकोप इन धोळ रसकुण्ड दा हाक्‍क बुट्टुन;
REV 14:20 अदिक नगर इन व्हार्या आ रसकुण्ड दा अंगुर मेटकु आदव, अदिक रसकुण्ड दा टु ईट रक्ता होळ्त कि घ्वाळा अन्द लगामगोळ ताका पहुचुस्त, अदिक मुर सौ किलोमीटर ताका वाहुसेत.
REV 15:1 बाक ना स्वर्ग दा ऊंद अदिक धोळ अदिक अदभुत चिन्ह नोळदीन, मतलब येळ स्वर्गदूत यार हात्‍ती येळु आखरी परेशानीगोळ ईरव, यतिकी अदुर खतम आगदुर मा परमेश्वर उन प्रकोप इन अन्त आद.
REV 15:2 आग ना बेक्‍की दा मिलुसकु काँच इन घाई ऊंद समुद्र नोळदीन; अदिक जो लॉकुर आ पशु मा अदिक अदुर्द मूर्ति मा अदिक अदुर हेसुर इन अंक मा जयवन्त आगीदुर, आंदरी आ काँच इन समुद्र अन्द हात्‍ती परमेश्वर उन वीणागोळ इक हुळकु नीदुरकु नोळदुर.
REV 15:3 आंदुर परमेश्वर उन दास मूसा अन्द हाळ, अदिक म्यांडा अन्द पाड्डा अन्द हाळ, हाळ हाळकु अनतोगोर, “हे सर्वशक्तिमान प्रभु परमेश्वर, नीन कार्य महान अदिक अदभुत आव; हे युगयुग इन राजा, नीन चाल वळ्लीद अदिक खरा आद.”
REV 15:4 “हे प्रभु, याव नीन से अंजतीदील अदिक नीन हेसुर इन महिमा माळतीदील? यतिकी सिर्फ नी आबना अच पवित्र आय. पुरा द्याश इन लॉकुर बंदकु नीन मुंद दण्डवत माळ्यार, यतिकी नीन न्याय इन क्याल्सा प्रगट आगेग्याव.”
REV 15:5 इदुर बाद्दा ना नोळदीन कि स्वर्ग दा गवाही इन तम्बू उन मंदिर खोल्सकु आग्याद;
REV 15:6 अदिक आंदुर येळु स्वर्गदूत यार हात्‍ती येळु परेशानीगोळ ईरव, मलमल इन शुद्ध अदिक चमकदार कपळा हाक्‍कु अदिक याद्दा मा व्हान्ना अन्द पट्टागोळ कटकु मंदिर टु होट्टुर.
REV 15:7 आग आ नाकु प्राणीगोळ दा टु ऊंद आ येळ स्वर्गदूतगोळी परमेश्वर, जो हमेशा हमेशा जित्‍ता आन, आऊन प्रकोप देल तुमकु व्हान्ना अन्द येळ कटोरा कोट्टुर;
REV 15:8 अदिक परमेश्वर उन महिमा अदिक आऊन सामर्थ्य अन कारण मंदिर धुंगा देल तुम्मेत, अदिक यागासताका आ येळु स्वर्गदूतगोळ्द येळु परेशानीगोळ खतम आगीदील आगासताका याऊ मंदिर दा होग सकिदील.
REV 16:1 बाक ना मंदिर दा यारीकारा ऊँचा शब्द देल आ येळु स्वर्गदूतगोळ देल ईद अनतेला केळदिन, “होगी, परमेश्वर उन प्रकोप इन येळु कटोरागोळ इक पृथ्वी मा पलटुस बुळी.”
REV 16:2 इदुरसाटी पयले स्वर्गदूत होगकु तान कटोरा पृथ्वी मा पलटुस बुट्टुन. आग आ मंळसागोळ्द, यार मा पशु उन छाप ईरव अदिक जो अदुर्द मूर्ति इन पुजा माळोर, ऊंद प्रकार इन बुरा अदिक दुखदाई फ्वाळा होळ्त.
REV 16:3 दुसरा स्वर्गदूत तान कटोरा समुद्र मा उलटुस बुट्टुन, अदिक आव सोतकु मंळसा अन्द रक्ता घाई बन्सेदुन, अदिक समुद्र दाकळव हर ऊंद जीवधारी सोतोदव.
REV 16:4 तीसरा स्वर्गदूत तान कटोरा गांगागोळ अदिक नीर इन झरनागोळ मा पलटुस बुट्टुन, अदिक आंदुर रक्ता बन्सदुर.
REV 16:5 आग ना नीर इन स्वर्गदूत उक ईद अनतेला केळदीन, “हे पवित्र, जो आद अदिक जो ईरोद, नी न्यायी आय अदिक नी ईद न्याय माळ्द.
REV 16:6 यतिकी आंदुर पवित्र लॉकुर अदिक भविष्यवक्तागोळ्द रक्ता वाहुसीदुर, अदिक नी आंदरी रक्ता कुळ्सद; यतिकी आंदुर ईदा योग्य आर.”
REV 16:7 बाक ना वेदी टु ईद शब्द केळदीन, “हव, हे सर्वशक्तिमान प्रभु परमेश्वर, नीन निर्णय वळ्लीद अदिक खरा आद.”
REV 16:8 चौथा स्वर्गदूत तान कटोरा सुर्य मा उलटुस बुट्टुन, अदिक आऊक मंळसागोळ इक बेक्‍की देल झुलसुसोद अधिकार कोटकु आत.
REV 16:9 मंळसा हापाळ बिसुल देल झुलसुसदुर, अदिक परमेश्वर उन हेसुर इन यारी ई परेशानीगोळ मा अधिकार आद, अपमान माळदुन लेकीन आऊन महिमा माळोर साटी मन तिर्गुसिदील. आऊन महानता अन्द प्रशंसा माळतार.
REV 16:10 पाचवा स्वर्गदूत तान कटोरा आ पशु उन सिंहासन मा पलटुस बुट्टुन, अदिक आऊन राज्य मा अंधार छासेत. लॉकुर दुख इन मारा तान तान ल्यालग्या कचली हतदुर,
REV 16:11 अदिक तान पीळागोळ अदिक फ्वाळागोळ्द कारण स्वर्ग इन परमेश्वर उन अपमान माळदुर; लेकीन तान तान क्याल्सागोळ देल मन तिर्गुसिदील.
REV 16:12 सहावा स्वर्गदूत तान कटोरा महागांगा फुरात मा पलटुस बुट्टुन, अदिक अदुर्द नीर वंळगेत कि पूर्व दिशा अन्द राजागोळ्द साटी हादी तयार आगेगुल.
REV 16:13 बाक ना आ अजगर इन बाय देल, अदिक आ पशु उन बाय देल अदिक आ ख्वाटा भविष्यवक्ता अन्द बाय देल मुर अशुध्द आत्मागोळ इक भ्याबकागोळ्द रूप दा होळतेला नोळदिन.
REV 16:14 ईव चिन्ह तोर्सावाळेर दुष्टआत्मागोळ हुव, जो पुरा दुनिया अन राजागोळ्द हात्‍ती होटकु इदुरसाटी होगताव कि आंदरी सर्वशक्तिमान परमेश्वर उन आ धोळ दिन इन लळाई इन साटी जमा माळुल.
REV 16:15 “नोळ, ना काळ्ल उन घाई बरतीन; धन्य आव आन जो जागस्तेला ईरतान, अदिक तान कपळागोळ्द सावधानी माळतान कि ऊगळा वयाळबाळुल, अदिक लॉकुर आऊन ऊगळापन नोळबाळुल.”
REV 16:16 अदिक आंदुर आंदरी आ जागा दा जमा माळदुर जो इब्रानी दा हर-मगिदोन कहलुसतद.
REV 16:17 सातवा स्वर्गदूत तान कटोरा हवा मा उलटुसदुन, अदिक मंदिर इन सिंहासन टु ईद धोळ शब्द आत, “आगेग्याद!”
REV 16:18 बाक बिजलीगोळ चमकुसदव, अदिक शब्द अदिक गर्जन आत, अदिक ऊंद हिंग धोळ भूकम्प बत्‍त कि यागी टु मंळसा अन्द उत्पत्ति पृथ्वी मा आत, आगी टु हिंग धोळ भूकम्प यागलु बंदिदील.
REV 16:19 इदुर देल आ धोळ नगर इन मुर तुकळा आगेदव, अदिक गैर यहूदीगोळव नगर बिद्दव; अदिक धोळ बेबीलोन इन याद परमेश्वर उन अल आत कि आव तान सिट्ट इन जलजलाहट इन सारा आऊक कुळसुल.
REV 16:20 अदिक हर ऊंद टापू तान जागा टु टलुसेत, अदिक पहाळगोळ्द पता हतीदील.
REV 16:21 आकाश टु मंळसागोळ मा मन-मन तुमकु धोळ गारगोटी बिद्दव, अदिक इदुरसाटी कि ईद विपत्‍ती हापाळ अच भारी ईरोद, लॉकुर गारगोटी इन विपत्‍ती इन कारण परमेश्वर उन अपमान माळदुर.
REV 17:1 या येळ स्वर्गदूतगोळ्द हात्‍ती अव येळ कटोरा ईरव, आंदुर दा टु ऊंद बंदकु नान से ईद अंदुन, “ईल बर, ना नीनी आ धोळ वेश्या अन्द दण्ड तोर्साईन, जो हापाळ सा नीर मा कुर्तकु आर,
REV 17:2 यार सांगुळ पृथ्वी इन राजागोळ व्यभिचार माळदुर; अदिक पृथ्वी इन ईरावाळेर आऊन व्यभिचार इन सारा देल मतवाला आगेगीदुर.”
REV 17:3 आग आव नानी आत्मा दा आळी दी ओतुन, अदिक ना क्याचांद पशु मा, जो अपमान इन हेसुरगोळ देल तुमकु ईरोद अदिक यार येळ ताल्ला अदिक हत्‍त गॉट्टा ईरव, ऊंद आर्त इक कुर्तकु नोळदिन.
REV 17:4 ई आर्त जाभळा रंग इन अदिक क्याचांद रंग इन कपळा हाक्‍कु ईरोर, अदिक व्हान्ना अदिक किमती मणिगोळ अदिक मोतिगोळ देल सजुस्कु ईरोर, अदिक आकिन कय दा ऊंद व्हान्ना अन्द कटोरा ईरोद जो बेकार वस्तुगोळ देल अदिक आकिन व्यभिचार इन अशुध्द वस्तुगोळ देल तुमकु ईरोद.
REV 17:5 आकिन ह्याणा मा ई हेसुर लिख्सकु ईरोद, “भेद-धोळ बेबीलोन पृथ्वी इन वेश्यागोळ अदिक बेकार वस्तुगोळ्द मोय.”
REV 17:6 ना आ आर्त इक पवित्र लॉकुर्द रक्ता अदिक यीशु उन गवाहगोळ्द रक्ता कुळदुर देल मतवाला नोळदीन; आकी नोळकु ना चकित आगेदीन.
REV 17:7 आग आ स्वर्गदूत नान से अंदुन, “नी येती चकित आद? ना ई आर्त अदिक आ पशु उक, यदुर मा आक सवार आर अदिक यार येळ ताल्ला अदिक हत्‍त गॉट्टा आव, नीनी भेद हेळतीन.
REV 17:8 “जो पशु नी नोळया, अद पयला रा ईरोद पर ईग ईल्लच, अदिक अथाह अधोलोक दा टु होटकु विनाश दा बिद्दीत; अदिक पृथ्वी इन ईरावाळेर यार हेसुर दुनिया अन उत्पत्ति इन समय टु जीवन इन किताब दा लिख्सकु आगीदील, ई पशु उन ईद दशा नोळकु कि पयला ईरोद अदिक ईग ईल्लच अदिक बाक होट बंदीत, अचम्भा माळ्यार.
REV 17:9 आ बुद्धी इन साटी यारदा ग्यान आद, ईदा मवका आद: अव येळु ताल्ला येळ पहाळ हुव यार मा आ आर्त कुर्तकु आर. आंदुर येळ राजा भी उर.
REV 17:10 अव येळ राजा भी हुव, अईद रा आगेग्याव, अदिक ऊंद ईग आन, अदिक ऊंद ईग ताका बरली आन, अदिक याग बंदान रा येनारा समय ताका अदुर्द ईरोद भी जरूरी आद.
REV 17:11 जो पशु पयला ईरोन, अदिक ईग ईल्लच, आव खुद आठवा हुन अदिक आ येळु दा टु पैदा आदुन, अदिक विनाश दा बिद्दान.
REV 17:12 जो हत्‍त गॉट्टा नी नोळ्द अव हत्‍त राजा हुव यारी ईग ताका राज्य सिक्‍कीदील, पर आ पशु उन सांगुळ घळी तीमोर साटी राजागोळ घाई अधिकार सिक्‍कीत.
REV 17:13 ईव सप्पा ऊंद मन आदार, अदिक अव तान तान सामर्थ्य अदिक अधिकार आ पशु उक कोट्टार.
REV 17:14 अव मेमनागोळ देल लळाई माळ्याव, अदिक म्यांडा अन्द पाड्डा अऊर मा जय पाऊस्याव, यतिकी आव प्रभुगोळ प्रभु अदिक राजागोळ राजा हुव, अदिक जो कारूकु आग्याव अदिक निवळुस्कु आग्याव अदिक विश्वासी आव अव आऊन सांगुळ आव; आंदुर भी जय पाऊस्याव.”
REV 17:15 बाक आव नान से अंदुन, “जो नीर नी नोळ्द, यदुर मा वेश्या कुर्तकु आर, आंदुर रा लॉकुर अदिक भीळ अदिक जातीगोळ अदिक भाषागोळ हुव.
REV 17:16 जो हत्‍त गॉट्टा नी नोळ्द, अव अदिक पशु आ वेश्या देल दुश्मनी ईट्याव, अदिक आकी लाचार अदिक नंगा माळ बुट्टाव, अदिक आकिन मास तीन बुट्टाव, अदिक आकी बेक्‍की दा होताक बुट्टाव.
REV 17:17 यतिकी परमेश्वर आंदुर मन दा ईद हाक्यान कि आंदुर आऊन मनसा पुरा माळुल, अदिक यागासताका परमेश्वर उन वचन पुरा आगाल्द आगासताका ऊंद मन आगकु तान तान राज्य पशु उक कोटबुळी.
REV 17:18 आ आर्त, यारी नी नोळ्द, अद धोळ नगर हुन जो पृथ्वी इन राजागोळ मा राज्य माळतद.”
REV 18:1 इदुर बाद्दा ना ऊंद स्वर्गदूत उक स्वर्ग टु ईळुतेला नोळदीन, यारी धोळ अधिकार प्राप्त ईरोद; अदिक पृथ्वी आऊन तेज देल चमकुसकु येळ्त.
REV 18:2 आव धोळ शब्द देल कारूकु अंदुन, “बिद्दोत, धोळ बेबीलोन बिद्दोत! अद दुष्टआत्मागोळ्द निवास, अदिक हर ऊंद अशुध्द आत्मा अन्द हड्डा, अदिक हर ऊंद अशुध्द अदिक बेकार पक्षी इन हड्डा आगेत.
REV 18:3 यतिकी आऊन व्यभिचार इन भयानक सारा अन्द कारण सब जातीगोळ बिदव, अदिक पृथ्वी इन राजागोळ आऊन सांगुळ व्यभिचार माळदुर, अदिक पृथ्वी इन व्यापारी आऊन सुख-विलास इन बहुतायत इन कारण धनवान आदुर.”
REV 18:4 बाक ना स्वर्ग टु ऊंद अदिक शब्द केळदीन, “हे नान लॉकुरा, आऊन दा टु होटबुळी कि नीव आऊन पापगोळ दा भागी आगबाळी, अदिक आऊन वित्तिगोळ दा टु याऊ नीम मा बरबाळुल.
REV 18:5 यतिकी आऊन पापगोळ्द ढेर स्वर्ग ताका पहुचुसेत, अदिक आऊन अपराध परमेश्वर उक याद होट बंदाव.
REV 18:6 ह्यांग आव नीमी कोट्टुन हांग अच आऊक कोळी, अदिक आऊन क्याल्सागोळ्द अनुसार आऊक येढ्ढ गुणा ज्यादा कोळी; या कटोरा दा आव तुमकु कोटीदुन अदुर दा आऊन साटी येढ्ढ गुणा तुमकु कोळी.”
REV 18:7 याट आव तान बळाई माळदुन अदिक सुखविलास माळदुन, आट आऊक दुख अदिक शोक कोळी; यतिकी अद तान मन दा अनतद, “ना रानी आगकु कुर्तीन, रांड्यागीत ईला; अदिक शोक दा यागलु बिळतीदील.”
REV 18:8 ई कारण ऊंद अच दिन दा आकी मा परेशानीगोळ होट बंदाव, मतलब सायोद, अदिक शोक, अदिक अकाल, अदिक आक बेक्‍की दा भसम माळकु आदार, यतिकी आकिन न्यायी प्रभु परमेश्वर शक्तिमान आन.
REV 18:9 “पृथ्वी इन राजा यार आऊन सांगुळ व्यभिचार अदिक सुख-विलास माळदुन, याग आऊन होत्‍तोद धुंगा नोळ्यार, रा आऊन साटी वर्लेयार अदिक याद्दा पीटस्यार.”
REV 18:10 आऊन पीळा अन्द अंज्क इन मारा आंदुर बळा दुर नीदुरकु अंदार, “हे धोळ नगर, बेबीलोन! हे मजबूत नगर, हाय! हाय! घळीतीम दा अच नीनी दण्ड सिकेग्याद.”
REV 18:11 “पृथ्वी इन व्यापारी आऊन साटी वर्लेयार अदिक कलपुस्यार, यतिकी ईग याऊ आंदुर माल कोम सकालुन;
REV 18:12 मतलब व्हान्ना, बेळ्ली, रत्न, मोती, अदिक मलमल, अदिक जांभळा, रेशमी, अदिक क्याचांद रंग इन कपळा, अदिक हर प्रकार इन सुगन्धित हुळ्ली अदिक हत्ती इन हल्ल इन हर प्रकार इन वस्तुगोळ, अदिक किमती काठ अदिक पीतळा अदिक लोवा अदिक संगमरमर इन सब प्रकार इन वस्तुगोळ,
REV 18:13 अदिक कलमी, मसाला, धूप, अत्‍तर, लुबान, सारा, जैतुन इन याण्णा, मैदा, गोदी, गोसी-वस्ता, म्यांडा-आळगोळ, घ्वाळा रथ, अदिक दास, अदिक मंळसागोळ्द जीव.
REV 18:14 ईग नीन मन भाऊसावाळा काय नीन हात्‍ती टु होगतेला ईत्‍तव, अदिक स्वादिष्ट अदिक भळकीला वस्तुगोळ नीन से दुर आगेग्याव, अदिक अव बाक यागलु सिकतीदील.”
REV 18:15 ई वस्तुगोळ व्यापारी जो आऊन द्वारा धनवान आगीदुर, आऊन पीळा अन्द अंज्क इन मारा दुर नीदुरकु ईत्‍तार, अदिक वर्लतेला अदिक कलपुस्तेला अंदार,
REV 18:16 “हाय! हाय! ईद धोळ नगर जो मलमल, अदिक जाभळा रंग इन अदिक क्याचांद रंग इन कपळा हाक्‍कु ईरोन, अदिक व्हान्ना अदिक रत्नगोळ अदिक मोतिगोळ देल सजुस्कु ईरोन;
REV 18:17 घळीतीम दा अच आऊन हिंग भारी धन नाश आगेत.” हर ऊंद माँझी अदिक यात्री अदिक मल्लाह, अदिक याट समुद्र टु कमुसतार, सब दुर नीदुरदुर,
REV 18:18 अदिक आऊन होत्‍तोद धुंगा नोळकु कारूकु अंदार, “यातोद नगर ई धोळ नगर इन घाई आद?”
REV 18:19 अदिक तान तान ताल्लागोळ मा धुळा हाक्यार, अदिक वर्लतेला अदिक कलपुस्तेला चिल्लास चिळ्‍लासकु अंदार, “हाय! हाय! ईद धोळ नगर यदुर्द सम्पत्ति इन द्वारा समुद्र अन्द सब जहाजवाळेर धनी आगेगीदुर, घळीतीम दा अच ऊजळुसेत.”
REV 18:20 हे स्वर्ग, अदिक हे पवित्र लॉकुरा, अदिक प्रेरितगोळा, भविष्यवक्तागोळ, आऊन मा आनन्द माळी, यतिकी परमेश्वर न्याय माळकु आऊन से नीम्द बदला ताकोंडुन!
REV 18:21 बाक ऊंद बलवान स्वर्गदूत बळा चक्‍की इन पट्टा अन्द घाई ऊंद कल्ल नेगदुन, अदिक ईद अनकु समुद्र दा भीट बुट्टुन, धोळ नगर बेबीलोन हिंग अच धोळ ताकत देल केडुकु आदीत, अदिक बाक यागलु अदुर पता हततिदील.
REV 18:22 वीणा मुरसावाळेर, अदिक गायकगोळा, अदिक कोळ्ल मुरसावाळेरा, अदिक तुरही ऊयावाळेर्द शब्द बाक यागलु नीन दा केळ बरतीदील; अदिक यावारा उद्घम उन यावारा कारीगर भी बाक यागलु नीन दा मिलुसतीदील; अदिक जाता अन्द नळोद आवाज बाक यागलु नीन दा केळ बरतीदील;
REV 18:23 अदिक दिंग्या अन्द ऊजुळ बाक यागलु नीन दा चमकुसतीदील, अदिक मंळगार अदिक मंळगीत इन शब्द बाक यागलु नीन दा केळ बरतीदील; यतिकी नीन व्यापारी पृथ्वी इन प्रधान ईरोर, अदिक नीन टोना देल सब जातीगोळ भरमुसकु आगीदव.
REV 18:24 भविष्यवक्तागोळ अदिक पवित्र लॉकुर, अदिक पृथ्वी मा सब घात माळकु आदुर आंदुर्द रक्ता आऊन दा सिक्याद.
REV 19:1 इदुर बाद्दा ना स्वर्ग दा मान्सी धोळ भीळ इक ऊँचा शब्द देल ईद अनतेला केळदीन, “हल्लिलूय्याह! उद्धार अदिक महिमा अदिक सामर्थ्य नाम्द परमेश्वर उन अच हुन.
REV 19:2 यतिकी आऊन निर्णय खरा अदिक ठीक आव. आव आ धोळ वेश्या अन्द, जो तान व्यभिचार देल पृथ्वी इक भ्रष्ट माळोर, न्याय माळदुन अदिक आकिन से तान दासगोळ्द रक्ता अन बदला ताकोंडुन.”
REV 19:3 बाक दुसरा बार आंदुर अंदुर, “हल्लिलूय्याह! आऊन होत्‍तोद धुंगा हमेशा हमेशा येळतेला ईत्‍तीत.”
REV 19:4 आग चोवीस स्याणागोळ अदिक नाक प्राणीगोळ बिदकु परमेश्वर उक प्रणाम माळदुर, जो सिंहासन मा कुर्तकु ईरोन, अदिक अंदुन, “आमीन! हल्लिलूय्याह!”
REV 19:5 आग सिंहासन दा टु ऊंद शब्द होळ्त, “हे नामव परमेश्वर देल सब अंजावाळेर दासगोळा, येन स्याणेव, येन धोड्डेव; नीव सब आऊन स्तुति माळी.”
REV 19:6 बाक ना धोळ भीळ इन घाई अदिक हापाळ नीर इन घाई शब्द, अदिक गर्जन इन घाई धोळ शब्द केळदीन: “हल्लिलूय्याह! यतिकी प्रभु नाम्द परमेश्वर सर्वशक्तिमान राज्य माळतान.
REV 19:7 बरी, नाव आनन्दित अदिक मग्न आगाता, अदिक आऊन स्तुति माळाता, यतिकी म्यांडा अन्द पाड्डा अन्द मदा होट बंदाद, अदिक आऊन मंळगीत तान तान इक तयार माळ कोंडुर.
REV 19:8 आऊक शुद्ध अदिक चमकदार महीन मलमल हाक्‍कोद अधिकार कोटकु आग्याद.” यतिकी आ साफ मलमल इन मतलब पवित्र लॉकुर्द न्याय इन क्याल्सा आद.
REV 19:9 आग स्वर्गदूत नान से अंदुन, “ईद लिख्स कि धन्य आंदुर आर, जो म्यांडा अन्द पाड्डा अन्द मदा अन्द भोज दा कारूकु आग्यार.” बाक आव नान से अंदुन, “ई वचन परमेश्वर उन सत्य वचन हुन.”
REV 19:10 आग ना आऊक प्रणाम माळोर साटी आऊन कालगोळ मा बिद्दीन. आव नान से अंदुन, “नोळ, हिंग माळबाळ, ना अपमान अदिक नीन वार्टुरगोळ्द संगी दास हुईन जो यीशु उन गवाही कोळदुर मा स्थिर आन. परमेश्वर उक अच प्रणाम माळ.” यतिकी यीशु उन गवाही भविष्यवाणी इन आत्मा हुन.
REV 19:11 बाक ना स्वर्ग इक तेरूकु नोळदीन, अदिक नोळतीन कि ऊंद बिळीद घ्वाळा आद; अदिक अदुर मा ऊंद सवार आन, जो विश्वासयोग्य अदिक सत्य कहलुस्तान; अदिक आव न्याय इन सांगुळ न्याय अदिक लळाई माळतान.
REV 19:12 आऊन कण्णगोळ बेक्‍की इन ज्वाला आव, अदिक आऊन ताल्ला मा हापाळ सा राजमुकुट आव. आऊन मा ऊंद हेसुर लिख्सकु आद, यारी आऊक बिटकु अदिक याऊ जान्सालुन.
REV 19:13 आव रक्ता सिप्सकु कपळा हाक्‍कु आन, अदिक आऊन हेसुर परमेश्वर उन वचन हुन.
REV 19:14 स्वर्ग इन सेना बिळीद घ्वाळागोळ मा सवार अदिक बिळीद अदिक शुद्ध मलमल कपळा हाक्‍कु आऊन हिंद हिंद आर.
REV 19:15 जाती जाती इक बडोर साटी आऊन बाय देल ऊंद तेज धार इन तलवार होळतद. आव लोवा अन्द छळी हुळकु आंदुर मा राज्य माळ्यान, अदिक सर्वशक्तिमान परमेश्वर उन भयानक प्रकोप इन जलजलाहट इन सारा अन्द कुंड दा अंगुर मेट्यान.
REV 19:16 आऊन कपळा अदिक जांघ मा ईद हेसुर लिख्सकु आद: “राजागोळ राजा अदिक प्रभुगोळ प्रभु.”
REV 19:17 बाक ना ऊंद स्वर्गदूत उक सुर्य मा नीदुरकु नोळदीन. आव धोळ शब्द देल कारूकु आकाश इन न्याड्या दा टु ऊळुसावाळेर सब पक्षीगोळ देल अंदुन, “बरी, परमेश्वर उन धोळ भोज इन साटी जमा आगेगी,
REV 19:18 यदुर देल नीव राजागोळ्द मास, अदिक सरदारगोळ्द मास, अदिक शक्तिमान गंळ्सगोळ्द मास, अदिक घ्वाळागोळ्द अदिक अऊर मा सवार आगतार आंदुर मास, अदिक येन स्वतंत्र येन दास, येन स्याणेव येन धोड्डेव, सब लॉकुर्द मास तिनी.”
REV 19:19 बाक ना आ पशु, अदिक पृथ्वी इन राजागोळ इक अदिक आंदुर्द सेनागोळ इक आ घ्वाळा अन्द सवार अदिक आऊन सेना से लळाई माळोर साटी जमा नोळदीन.
REV 19:20 अद पशु, अदिक अदुर सांगुळ आव ख्वाटा भविष्यवक्ता हुळकु आदुन याव आऊन मुंद हिंग चिन्ह तोर्सीदुन यदुर द्वारा आव आंदरी भरमुसदुन यदुर मा आ पशु उन छाप ईरोद अदिक जो अदुर मूर्ति इन पुजा माळतोगोर. ईव येढ्ढु जित्‍ता जीव आ बेक्‍की इन झील दा, जो गन्धक देल होततद, हाक्‍कु आदुर.
REV 19:21 बाकी नोर लॉकुर आ घ्वाळा अन्द सवार इन तलवार देल, जो अदुर बाय देल होळतोगोद, कोंदकु आदुर; अदिक सब पक्षी आंदुर मास देल संतुष्ट आगेदुर.
REV 20:1 बाक ना ऊंद स्वर्गदूत उक स्वर्ग टु ईळुतेला नोळदीन, याऊन कय दा अथाह-अधोलोक इन कुंजी अदिक ऊंद धोळ शंकली ईरोद.
REV 20:2 आव आ अजगर, मतलब हाळोद हाव इक, जो इब्लीस अदिक शैतान आन, हुडुकु हजार वर्ष इन साटी कट बुट्टुन,
REV 20:3 अदिक अदरी अथाह-अधोलोक दा हाक्‍कु बंद माळ बुट्टुन अदिक अदुर मा मोहर हच बुट्टुन कि अद हजार वर्ष इन पुरा आगासताका गैर यहूदी लॉकुरी बाक भरमुस बाळुल. इदुर बाद्दा जरूरी आद कि अद घळी तीम साटी बाक खोल्सकु आगुल.
REV 20:4 बाक ना सिंहासन नोळदीन, अदिक अऊर मा लॉकुर कुरतुर, अदिक आंदरी न्याय माळोद अधिकार कोटकु आत. ना आंदुर आत्मागोळ इक भी नोळदीन, यार ताल्ला यीशु उन गवाही कोळोद अदिक परमेश्वर उन वचन इन कारण कडुकु आगीदव, अदिक यार ना आ पशु उन, अदिक ना अदुर मूर्ति इन पुजा माळीदुर, अदिक ना अदुर छाप तान ह्याणा अदिक कयगोळ मा ताकोंडीदुर. आंदुर जित्‍ता आगकु मसीह अन्द सांगुळ हजार वर्ष ताका राज्य माळतेला ईरूल.
REV 20:5 यागासताका ईव हजार वर्ष पुरा आगीदील आगासताका बाकी नोर सोतकु मंळसा जित्‍ता आगीदील. ईद रा पयला पुनरूत्थान हुन.
REV 20:6 धन्य अदिक पवित्र आव आन, जो ई पयला पुनरूत्थान इन भागी आर. हिंगुर मा दुसरा मृत्यु उन यातोदु अधिकार हैलेच, पर आंदुर परमेश्वर अदिक मसीह अन्द याजक आदार अदिक आऊन सांगुळ हजार साल ताका राज्य माळ्यार.
REV 20:7 याग हजार साल पुरा आगेदव रा शैतान कैद टु बिळसुस्कु आगेदान.
REV 20:8 अद आ जातीगोळी जो धरती इन नाकु दी ईत्‍तीत, मतलब गोग अदिक मागोग इक यऊर्द गिनती समुद्र अन्द गागरा अन्द बराबर ईत्‍तीत, भरमुसकु लळाई इन साटी जमा माळली होट्टीत.
REV 20:9 अव सप्पा धरती मा फैलुसकु पवित्र लॉकुर्द छावनी अदिक प्रिय नगर इक घेर्स बुट्टाव; अदिक बेक्‍की स्वर्ग टु ईळुकु आंदरी भसम माळीत.
REV 20:10 आंदुर्द भरमुसावाळा शैतान बेक्‍की अदिक गन्धक इन आ झील दा, यदुर दा आ पशु अदिक ख्वाटा भविष्यवक्ता भी ईत्‍तान, हाकसुसकु आदार; अदिक आंदुर ईळ्लक हागुल हमेशा हमेशा दुख दा तळपुळस्त ईत्‍तार.
REV 20:11 बाक ना ऊंद धोळ बिळीद सिंहासन अदिक आऊक, जो अदुर मा कुर्तकु आन, नोळदीन; आऊन मुंद टु पृथ्वी अदिक आकाश ओळेदव, अदिक आंदुर साटी जागा सिकिदील.
REV 20:12 बाक ना स्याणेर धोड्डेर सब सोतकु मंळसागोळ इक सिंहासन इन मुंद नीदुरकु नोळदीन, अदिक किताबगोळ खोल्सकु आदव; अदिक बाक ऊंद मात्‍त किताब खोल्सकु आत, मतलब जीवन इन किताब; अदिक ह्यांग आ किताबगोळ दा लिख्सकु ईरोद, हांग अच आंदुर क्याल्सागोळ्द अनुसार सोतकु मंळसागोळ्द न्याय माळकु आत.
REV 20:13 समुद्र आ सोतकु मंळसागोळ इक जो अदुर दा ईरव कोट बुळ्त, अदिक मृत्यु अदिक अधोलोक आ सोतकु मंळसागोळ इक जो अदुर दा ईरव कोट बुळ्त; अदिक आंदुर दा टु हर ऊंद मंळसा अक आंदुर क्याल्सागोळ अन्द अनुसार आंदुर न्याय माळकु आत.
REV 20:14 मृत्यु अदिक अधोलोक बेक्‍की इन झील दा हाक्‍कु आदव. ईद बेक्‍की इन झील दुसरा मृत्यु हुन;
REV 20:15 अदिक यारदारा हेसुर जीवन इन किताब दा लिख्सकु सिकतीदील, आव बेक्‍की इन झील दा हाक्‍कु आदुन.
REV 21:1 बाक ना व्हाशोद आकाश अदिक व्हाशोद पृथ्वी इक नोळदीन, यतिकी पयला आकाश अदिक पयला पृथ्वी होगतेला ईरोद, अदिक समुद्र भी ईतीदील.
REV 21:2 बाक ना पवित्र नगर व्हाशोद यरूशलेम इक स्वर्ग टु परमेश्वर उन हात्‍ती टु ईळुतेला नोळदीन. अद आ मंळगीत इन घाई ईरोद जो तान गांड्ड उन साटी सिंगार माळकु आर.
REV 21:3 बाक ना सिंहासन दा टु यावारा अक धोळ शब्द देल ईद अनतेला केळदीन, “नोळ, परमेश्वर उन ड्यारा मंळसागोळ्द न्याड्या दा आद. आव आंदुर सांगुळ ड्यारा माळ्यान, अदिक आंदुर आऊन लॉकुर आदार, अदिक परमेश्वर खुद आंदुर सांगुळ ईत्‍तान अदिक आंदुर परमेश्वर आदान.
REV 21:4 आव आंदुर कण्णगोळ देल सप्पा नीर सिट्ट कोंडान; अदिक इदुर बाद्दा मृत्यु ईला ईत्‍तीत, अदिक न शोक, न विलाप, न पीळा ईत्‍तीत; पयला मातगोळ होगतेला ईत्‍तव.”
REV 21:5 जो सिंहासन मा कुर्तकु ईरोन, आव अंदुन, “नोळ, ना सब येनारा व्हाशोद माळकु कोळतीन.” बाक आव अंदुन, “लिख्स कोम, यतिकी ईव वचन विश्वास इन योग्य अदिक सत्य आव.”
REV 21:6 बाक आव नान से अंदुन, “ईव मातगोळ पुरा आगेग्याव. ना अल्फा अदिक ओमेगा, पयला अदिक आखरी हुईन. ना प्यासा अक जीवन इन नीर इन झरना दा टु फुकट दा कुडोद अधिकार कोळाईन.
REV 21:7 जो विजय आदान आवा ई वस्तुगोळ्द वारीस आदान, अदिक ना आऊन परमेश्वर आगाईन अदिक आव नान पार आदान.
REV 21:8 लेकीन डरपोकगोळा, अदिक अविश्वासीगोळा, अदिक नीच हरकत माळावाळेरा, अदिक हत्या माळावाळेरा अदिक व्यभिचारीगोळा, अदिक जादू टोना माळावाळेरा, अदिक मूर्ति इन पुजा माळावाळेरा, अदिक सब ख्वाटा मातगोळ्द भाग आ झील दा सिक्‍कीत जो बेक्‍की अदिक गन्धक देल होततेला ईरतद: ईद दुसरा मृत्यु हुन.”
REV 21:9 बाक आ येळ स्वर्गदूतगोळ हात्‍ती येळ आखरी परेशानी देल तुमकु येळ कटोरागोळ ईरव, आंदुर दा टु ऊंद नान हात्‍ती बंदुन, अदिक नान सांगुळ मातगोळ माळकु अंदुन, “ईल बर, ना नीनी मंळगीत मतलब म्यांडा अन्द पाड्डा अन्द हिंग्स तोर्साईन.”
REV 21:10 आग आव नानी आत्मा दा ऊंद धोळ अदिक ऊँचा पहाळ मा ओतुन, अदिक पवित्र नगर यरूशलेम इक स्वर्ग टु परमेश्वर उन हात्‍ती टु ईळुतेला तोर्सदुन.
REV 21:11 परमेश्वर उन महिमा आंदुर्दा ईरोद, अदिक आऊन ज्योति हापाळ अच किमती कल्ल, मतलब बिल्लौर इन घाई यशब उन घाई स्वच्छ ईरोद.
REV 21:12 आऊन दिवार शयरपनाह धोळ ऊँचा ईरोद, अदिक आऊन हन्नेळ फाटक अदिक फाटकगोळ मा हन्नेळ स्वर्गदूत ईरोर; अदिक आ फाटकगोळ मा इस्त्राएलीगोळ्द हन्नेळ गोत्रगोळ्द हेसुर लिख्सकु ईरव.
REV 21:13 पूर्व दिशा अन दी मुर फाटक, उत्‍तर दिशा अन दी मुर फाटक, दक्षिण दिशा अन दी मुर फाटक, अदिक पश्चिम दिशा अन दी मुर फाटक ईरव.
REV 21:14 नगर इन दिवार इन शयरपनाह अन्द हन्नेळ नींवगोळ ईरव, अदिक अदुर मा म्यांडा अन्द पाड्डा अन्द हन्नेळ प्रेरितगोळ्द हन्नेळ हेसुर लिख्सकु ईरव.
REV 21:15 जो नान सांगुळ मातगोळ माळोन आऊन हात्‍ती नगर अदिक आऊन फाटकगोळ अदिक आऊन शयरपनाह अक आळोर साटी ऊंद व्हान्ना अन्द गज ईरोद.
REV 21:16 अद नगर वर्गाकार बसुस्कु ईरोद अदिक अदुर्द लंबाई, चौळाई इन बराबर ईरोद; अदिक आव आ गज देल नगर इक आळदुन, रा साढ़े येळ सौ कोस इन होळ्त: अदुर्द लंबाई अदिक चौळाई अदिक ऊँचाई बराबर ईरोद.
REV 21:17 आव आऊन शयरपनाह अक मंळसा अन्द मतलब स्वर्गदूत उन नाप देल आळदुन, रा ऊंद सौ चौवालीस कय होळ्त.
REV 21:18 आऊन शयरपनाह यशब इन बन्सकु ईरोद, अदिक नगर हिंग शुद्ध व्हान्ना अन्द ईरोद जो स्वच्छ काँच इन घाई ईरूल.
REV 21:19 आ नगर इन नींवगोळ हर प्रकार इन किमती कल्लगोळ देल सवारस्कु ईरोद; पयला पायवा यशब देल, दुसरा नीलमणी देल, तीसरा लालळी देल, चौथा मरकत देल,
REV 21:20 पाचवा गोमेदक देल, सहावा माणिक्य देल, सातवा पीतमणी देल, आठवा पेरोज देल, नववा पुखराज देल, दसवा लहसनिए देल, ग्यारवा धूम्रकान्त देल, अदिक बारवा चन्द्रकाँत मणी देल बन्सकु ईरोद.
REV 21:21 हन्नेळु फाटक हन्नेळ मोतीगोळ्द ईरव; ऊंद ऊंद फाटक ऊंद ऊंद मोती इन माळकु ईरोद. नगर इन सळक स्वच्छ काँच इन घाई शुद्ध व्हान्ना अन्द ईरोद.
REV 21:22 ना अदुर्दा यातोदु मंदिर नोळीदील, यतिकी सर्वशक्तिमान प्रभु परमेश्वर अदिक म्यांडा अन्द पाड्डा अदुर्द मंदिर आद.
REV 21:23 आ नगर दा सुर्य अदिक चंद्रमा अन्द ऊजुळ इन जरवत हैलेच, यतिकी परमेश्वर उन तेज देल अदुर्दा ऊजुळ आगेत्याद, अदिक म्यांडा अन्द पाड्डा आऊन दिंग्या हुन.
REV 21:24 जाती-जाती इन लॉकुर आऊन ज्योति दा नळुकु वयाळ्यार, अदिक पृथ्वी इन राजा तान तान तेज इन सामाईन अदुर दा तंदार.
REV 21:25 आऊन फाटक हागुल इक यागलु बंद आगतीदील, अदिक ईळ्लक अल आगतीदील.
REV 21:26 लॉकुर जाती जाती इन तेज अदिक वैभव इन सामाईन अदुर दा तंदार.
REV 21:27 लेकीन अदुर्दा यातोदु अपवित्र वस्तु या बेकार क्याल्सा माळावाळा, या ख्वाटा मात्‍तगोळ गढुसावाळा यातोदु रीति देल प्रवेश माळ सकालुन, पर सिर्फ आ लॉकुर यार हेसुर म्यांडा अन्द पाड्डा अन्द जीवन इन किताब दा लिख्सकु आव.
REV 22:1 बाक आव नानी बिल्लौर इन घाई झलकुसतेला, जीवन इन नीर इन गांगा तोर्सदुन, जो परमेश्वर अदिक म्यांडा अन्द पाड्डा अन्द सिंहासन टु होटकु
REV 22:2 आ नगर इन सळक इन न्याड्या वाहुसोद. गांगा अन ईप्पाटी अदिक आप्पाटी जीवन इन मार्र ईरोद; अदुर्दा हन्नेळ प्रकार इन काय हत्तव, अदिक अदरी हर तिंगुळ काय हत्तव; अदिक आ मार्र इन याल्लागोळ देल गैर यहूदी लॉकुर चंगा आगतोगोर.
REV 22:3 बाक श्राप आगतीदील, अदिक परमेश्वर अदिक म्यांडा अन्द पाड्डा अन्द सिंहासन आ नगर दा ईत्‍तीत अदिक आऊन दास आऊन स्यावा माळ्यार.
REV 22:4 आंदुर आऊन बाय नोळ्यार, अदिक आऊन हेसुर आंदुर ह्याणागोळ मा लिख्सकु ईत्‍तीत.
REV 22:5 बाक ईळ्लक आगतीदील, अदिक आंदरी दिंग्या अदिक सुर्य अन्द ऊजुळ इन जरवत बिळतीदील, यतिकी प्रभु परमेश्वर आंदरी ऊजुळ कोट्टान, अदिक आंदुर हमेशा हमेशा राज्य माळ्यार.
REV 22:6 बाक आव नान से अंदुन, “ईव मातगोळ विश्वास इन योग्य अदिक सही आव. प्रभु, जो भविष्यवक्तागोळ आत्मागोळ्द परमेश्वर हुन, तान स्वर्गदूत उक इदुरसाटी कळुदुन कि तान दासगोळी अव मातगोळ, यदुर राटनेरी पुरा आगोद जरूरी आद, तोरस्यार.”
REV 22:7 “नोळ, ना राटनेरी बरावाळा आईन! धन्य आन आव, जो ई किताब इन भविष्यवाणी इन मातगोळ मान्सतान.”
REV 22:8 ना आवा यूहन्ना हुईन, जो ईव मातगोळ केळीन अदिक नोळतोगीन. याग ना केळदीन अदिक नोळदीन, रा जो स्वर्गदूत नानी ईव मातगोळ तोर्सतोगोन, ना आऊन कालगोळ मा प्रणाम माळोर साटी बिद्दीन.
REV 22:9 लेकीन आव नान से अंदुन, “नोळ, हिंग माळबाळ; यतिकी ना नीन, अदिक नीन वार्ट भविष्यवक्तागोळ, अदिक ई किताब इन मातगोळ इक मान्सावाळेर्द संगी दास हुईन. परमेश्वर उक अच प्रणाम माळ.”
REV 22:10 बाक आव नान से अंदुन, ई किताब इन भविष्यवाणी इन मातगोळी बंद माळबाळ; यतिकी समय हात्‍ती आद.
REV 22:11 जो अन्याय माळतान, आव अन्याय अच माळतेला ईरूल; अदिक जो मलिन आन, आव मलिन बन्सकु ईरूल; अदिक जो न्यायी आन, आव न्यायी बन्सकु ईरूल; अदिक जो पवित्र आन; आव पवित्र बन्सकु ईरूल.
REV 22:12 “नोळ, ना राटनेरी बरावाळा आईन; अदिक हर ऊंद मंळसा अन्द क्याल्सा अन्द अनुसार मोहबदला कोळोर साटी प्रतिफल नान हात्‍ती आद.
REV 22:13 ना अल्फा अदिक ओमेगा, पयला अदिक आखरी, पयले टु अदिक अन्त हुईन.
REV 22:14 “धन्य आंदुर आर, जो तान कपळा ओगु कोमतार, यतिकी आंदरी जीवन इन मार्र इन हात्‍ती बरोद अधिकार सिक्‍कीत, अदिक आंदुर फाटकगोळ देल आगकु नगर दा प्रवेश माळ्यार.
REV 22:15 लेकीन नायगोळ, अदिक टोना माळावाळेर, अदिक व्यभिचारी, अदिक खुनीगोळ अदिक मूर्ति इन पुजा माळावाळा, अदिक हर ऊंद ख्वाटपन इक चाहसावाळा अदिक घळुसावाळा व्हार्या ईत्‍तान.
REV 22:16 “नानी यीशु तान स्वर्गदूत उक इदुरसाटी कळुदुन कि नीम मुंद मंडलीगोळ्द बारा दा ई मातगोळ्द गवाही कोळुल. ना दाऊद उन मुल अदिक वंश, अदिक व्हातुर इन चमकुसतेला तारा हुईन.”
REV 22:17 आत्मा अदिक मंळगीत येढ्ढु अंतार, “बर!” अदिक केळावाळा भी अंदान, “बर!” जो नीरळ्कु ईतीदान आव बरूल, अदिक जो यावारा चाहासतान आव जीवन इन नीर फुकट दा ताकोमुल.
REV 22:18 ना हर ऊंद मंळसा अक, जो ई किताब इन भविष्यवाणी इन मातगोळ केळतान, गवाही कोळतीन: अगर यावारा मंळसा ई मातगोळ दा येनारा वाळुस्यान रा परमेश्वर आ परेशानीगोळ इक, जो ई किताब दा लिख्सकु आव, आऊन मा वाळुस्यान.
REV 22:19 अगर यावारा ई भविष्यवाणी इन किताब इन मातगोळ दा टु येनारा तेगु कोंडान, रा परमेश्वर आ जीवन इन मार्र अदिक पवित्र नगर दा टु, यदुर्द वर्णन ई किताब दा आद, अदुर भाग तेगु कोंडान.
REV 22:20 जो ईव मातगोळ्द गवाही कोळतान आव ईद अनतान, “हव, ना जल्दी बरावाळा आईन.” आमीन. हे प्रभु यीशु बर!
REV 22:21 प्रभु यीशु उन अनुग्रह पवित्र लॉकुर्द सांगुळ ईरूल. आमीन.
