﻿मरकुस.
4.
यीशु बाक झील इन किनारा मा उपदेश कोळली कुरतुन: अदिक हिंग धोळ्द भीळ आऊन हात्‍ती जमा आगेत कि आव झील इन ऊंद ड्वांगा मा येरकु कुरतोदुन अदिक सप्पा भीळ भूमी मा झील इन किनारा मा नीदुरकु ईत्‍त. 
अदिक यीशु आंदरी उदाहरणगोळ दा हापाळ सा मात कल्सली कुरतुन, अदिक तान उपदेश दा आंदुर से अंदुन. 
“केळी! ऊंद घन ऊंद मंळसा ईरोन जो बींजा बोऊसोर साठी होटीदुन. 
अदिक आव केई दा बींजा भिटुन आटोटी येनारा बींजा हादी मा बिद्दव, अदिक पक्षीगोळ बंदकु अवरी तिन कोंडोव. 
अदिक येनारा बींजा कल्ल इन जागा मा बिद्दव यल अदरी यक्कुल मुण्ण सकिदील. अदिक गहरा मुण्ण ईला सिकदुर देल अव राटनेरी अंकुर हुळदव. 
बाक याग सुर्य होळ्त; रा स्याणेव मार्रगोळी होताक बुळ्त; यतिकी जळीगोळ जादा गयरा ईला आगीदव, अदिक मार्रगोळ जल्दी अच वंळ्गेदव. 
अदिक थ्वाळासा बींजा मुळ्ल इन झुनकुळ दा बिद्दव, अदिक धोड्डेव आगकु बेळुकु बींजा अक वत्‍त बुट्टव अदिक आ बींजागोळी काय हत सकिदील. 
लेकीन थ्वाळासा बींजा वळ्लीद जागा मा बिद्दव, अदिक अव बेळदव अदिक बेळुकु अनाज पैदा माळदव; यातोवारा तीस गुणा, यातोवारा साठ गुणा अदिक यातोवारा सौ गुणा फसल तंदव.” 
आग यीशु अंदुन, “यार हात्‍ती केळोर साटी किव आव, आव केळ कोमुल.” 
याग यीशु आबना ईरोन, रा याता लॉकुर आऊन उदाहरण केळीदुर, आंदुर दा टु येनारा लॉकुर हन्नेळ चेलागोळ सांगुळ आऊन हात्‍ती बंदुर अदिक आऊक उदाहरण इन मतलब येन आद. 
यीशु आंदुर से अंदुन, नीमी परमेश्वर उन राज्य अन्द भेदगोळ्द समझ कोटकु आग्याद, लेकीन व्हार्या नोर लॉकुर साटी, सप्पा मातगोळ उदाहरणगोळ दा अंदकु आग्याद: 
यतिकी आंदुर नोळुल अदिक नोळतेला अच ईरूल, लेकीन आंदरी येनु सम्सबाळुल, केळुल अदिक केळतेला अच ईरूल लेकीन येनु सम्सबाळुल. हिंग आगबाळुल कि आंदुर मन परमेश्वर उन दी तिर्गुल अदिक आंदरी माफ माळकु आगुल. 
बाक यीशु आंदुर से अंदुन, येन नीव ईद उदाहरण समसालीर? रा बाक दुसरा यातोदारा उदाहरणगोळी ह्यांग समसीर? 
केईवाळा जो बोऊसतान, अद परमेश्वर उन वचन हुन. 
येनारा लॉकुर हादी माकळोर बिदकु बींजा अन्द घाई आर जो परमेश्वर उन वचनगोळी केळतार. रा शैतान तुरन्त बंदकु वचन रूपी बींजा जो आंदुर्दा बोऊस्कु आग्याद नेगुकु वोयतान. 
दुसरा लॉकुर बींजागोळ घाई ईरतार जो कलवाळा जागा मा बीळताव. ह्यांग आंदुर बातणी केळतार, आंदुर इदरी खुशी देल ग्रहण माळ कोमतार. 
लेकीन तान बुळ्क जळ ईला ईटदुर कारण आंदुर थ्वाळासा अच दिनगोळ साटी ईरतार; इदुर्द बाद्दा याग वचन इन कारण आंदुर मा क्लेश या उपद्रव आगताव, रा आंदुर तुरन्त ठोकर तिनतार. 
दुसरा लॉकुर मुळ्लवाला झुनकुळ दा बोऊस्कु बींजा अन घाई आर. इंदुर वचन केळावाळेर उर. 
अदिक दुनिया अन चिन्ता, धन इन ध्वाका, अदिक च्याच वस्तुगोळ्द लोभ आंदुर्दा तुमकु वचनगोळी वत्‍त बुळतद. अदिक अद निष्फल ईतोगतार. 
लेकीन यारारा लॉकुर वळ्लीद जागा अन्द घाई आर, जो वचन केळकु ग्रहण माळतार अदिक वळ्लीद फसल तरतार, यारारा तीस गुणा, यारारा साठ गुणा, अदिक यारारा सौ गुणा. 
अदिक यीशु आंदुर से अंदुन; येन दिंग्या अक इदुर्दा साटी तरतार कि बर्तन या व्हर्स इन ल्यालमा ईटुल? येन अदरी दीवट मा ईट सकालुर? 
जो येनारा भी होचकु आद अदरी व्हार्या तनकु आदीत, अदिक जो येनारा भी कवर माळकु आग्याद, अदरी उजागर माळकु आदीत. 
अगर यारोवारा केळव किव आव, रा आव केळ कोमुल. 
बाक यीशु आंदुर से अंदुन, “जो नीव केळतीर अदुर मा ध्यान कोळी. याता नाप देल नीव दुसरा अक आळुतीर अदा नियम देल नीमी भी आळुकु आदीत, अदिक नीम साटी अदुर्दा यक्कुल जोळ्सकु आदीत. 
यतिकी यार हात्‍ती आद, आऊक मात्‍त यक्कुल कोटकु आदीत; अदिक यार हात्‍ती हैलेच, आऊन से अद भी जो आऊन हात्‍ती आद, ताकोमकु आदीत.” 
बाक यीशु अंदुन, “परमेश्वर उन राज्य हिंग आद, जसा यावारा मंळसा तान केई इन भूमी दा बींजा भिळतान, 
अदिक आव इळ्लकी मिंगदुन अदिक व्हातर्या येद्दुन अदिक अद बींजा अंकुरीत आगकु हिंग बेळुत, कि आव अरू सकिदील कि ईद ह्यांग आत. 
पृथ्वी तान ताना अनाज तरतद. पयले अंकुर, बाक लॉम्बा, अदिक आग अदुर बाद्दा लॉम्बा दा तयार बींजा. 
लेकीन याग बींजा हण्ण आगेगतद, आग आव केईवाळा तुरन्त कुळगुल देल कडुली हततान, यतिकी फसल इन कटाई होट्ट बंदाद.” 
बाक यीशु केळदुन, “नाव परमेश्वर उन राज्य ह्यांग आद इदुर उपमा यार देल कोट्टेव. अदिक याता उदाहरण देल आऊन वर्णन माळेव? 
आव राई इन दाना अन्द घाई आन याग पृथ्वी मा बोऊस्कु आगतद रा पृथ्वी इन सप्पा बींजागोळ से स्यांळ्द ईरतद. 
लेकीन याग बींजा बेळदोगतद, रा बेळुकु सप्पा मारगोळ से धोळ्द आगेगतद, अदिक अदुर्द हिंग धोळ्द डगालगोळ होळताव यल आकाश इन पक्षी अदुर्द सावली दा ग्वादा माळकु ईरताव.” 
यीशु आंदरी ईत्‍ता प्रकार ईनव हापाळ सा उदाहरण कोट-कोटकु आंदुर्द समझ इन अनुसार यक्कुल से यक्कुल समझ दा बरूल ई प्रकार देल वचन केळ्सतोगोन, 
अदिक बिना उदाहरण अंदकु यीशु लॉकुरी येनु ईला कल्सतोगोन. लेकीन आबना दा आव तान निजी चेलागोळी सप्पा मातगोळ्द मतलब हेळतोगोन. 
अदा दिशी द्यावगा अक, यीशु तान चेलागोळ से अंदुन, “बरी, नाव झील इन आप्पाटी होगाता.” 
आंदुर भीळ इक बिट्टुर, याता ड्वांगा दा यीशु ईरोन अदा ड्वांगा मा चेलागोळ भी बंदुर अदिक यीशु उक तान सांगुळ झील इन आप्पाटी ओतुर; अदिक अल आऊन सांगुळ, मात हापाळ सा ड्वांगा भी ईरव. 
अचानक आग ऊंद भयानक आँधी बत्‍त, अदिक लयरगोळ ड्वांगा देल टकरूसली हत्‍त ईल ताका कि नीर ड्वांगा दा तुमली हत्‍त. 
अदिक यीशु ड्वांगा अन्द हिंदळोद भाग दा ऊसी मा ताल्ला ईटकु मिंगोन. अदिक आंदुर आऊक येब्सदुर अदिक अंदुर, “हे गुरु, येन नीनी चिन्ता हैलेच कि नाव मुळ्केतेव?” 
आग यीशु यदकु आँधी अक दनकुसदुन, अदिक लयरगोळ से अंदुन, “शांत आगेग, थाम्सेग!” अदिक आँधी थामसेत अदिक नाकु दी हापाळ सन्नाटा आगेत. 
अदिक यीशु तान चेलागोळ से अंदुन, “नीव येती अंजेतीर? येन नीमी ईगासताका विश्वास हैलेच?” 
अदिक चेलागोळ हापाळ अंजेदुर अदिक आपस दा अनली कुरतुर, “ईव मंळसा याव हुन ईल ताका कि आँधी अदिक लयरगोळ भी ईऊन आग्या मान्सताव?” 
