﻿आमोस.
2.
यहोवा ईद अनतान: “मोआब इन घळी घळी अपराध माळोद कारण, ना आऊन दण्ड बिळतीदील; यतिकी आव एदोम उन राजा अन येलुगोळी होताक्कु चुना माळ बुट्टुन. 
इदुरसाटी ना मोआब प्रदेश दा बेक्की हचाईन, अदिक अदुर देल करिय्योत नगर इन गढ़ भस्म आगेदव; अदिक मोआब हल्ला अदिक ललकार अदिक नरसिंगा अन शब्द केळ्त केळ्त सोतोदीत. 
ना अदुर न्याड्या दा टु शासक उन नाश माळाईन अदिक सांगुळ सांगुळ अच आऊन सप्पा अधिकारीगोळी भी कोंद बुळाईन,” यहोवा अन ईदा वचन आद. 
यहोवा ईद अनतान: “यहूदा प्रदेश इन घळी घळी अपराध माळोद कारण, ना आऊन दण्ड बिळतीदील; यतिकी आंदुर यहोवा अन व्यवस्था अक बेकार जान्सदुर, अदिक नान विधीगोळी मान्सीदील; अदिक तान ख्वाटा द्यावगोळ कारण यार हींद आंदुर पुर्वजगोळ नळुतोगोर, आंदुर भी भटकुसेग्यार. 
इदुरसाटी ना यहूदा दा बेक्की हचाईन, अदिक अदुर देल यरूशलेम इन भवन भस्म आगेदव.” 
यहोवा ईद अनतान: “इस्त्राएल इन घळी घळी अपराध माळोद कारण, ना आऊन दण्ड बिळतीदील; यतिकी आंदुर निर्दोष उक पैस्या साटी अदिक गरीब उक ऊंद जोळी जुतागोळ साटी मार बुटार. 
आंदुर कंगालगोळी अदिक कमजोरगोळी जमीन इन धुळा घाई मेट्ट बुळतार अदिक नम्र लॉकुरी हादी देल बयकुस बुळतार; अदिक आप्प-पार येढ्ढु मुंदुर ऊंदा कुवारा पोर इन हात्ती होगतार, यदुर देल नान पवित्र हेसुर इक अपवित्र ठहरूसुल. 
आंदुर हर ऊंद वेदी इन हात्ती बन्धक इन कपळागोळ मा मिंगतार, अदिक दण्ड इन पैस्यागोळ देल कोम्द अंगुर इन रास्सा तान द्याव इन मंदिर दा कुडु कोमतार.” 
“ना आंदुर मुंदु टु एमोरिगोळी नष्ट माळीदीन, यार्द लम्बाई देवदारगोळ घाई, अदिक यार ताकत बांज मार्र घाई ईरोद; तरी भी ना म्याकुच टु आंदुर काय, अदिक ल्यालमा टु आंदुर जळी नष्ट माळदीन. 
ना नीमी मिस्त्र द्याश दा टु तेगुकु तंदीन, अदिक सुनसान प्रदेश दा च्यालीस वर्ष ताका हुडुकु वयाळतेला ईत्तीन, कि नीव एमोरिगोळ्द द्याश इन अधिकारी आगेगी. 
ना नीम पारगोळ दा टु नबी आगोर साटी अदिक नीम थ्वाळासा हारोदोर मंळसागोळ दा टु नाजीर आगोर साटी ठहरूसदीन. हे इस्त्राएलीगोळा, येन ईद सप्पा खरा हैलेच? यहोवा अन ईद वाणी आद.” 
लेकीन नीव नाजीरगोळी सारा कुळ्सदीर, अदिक नबीगोळी आग्या कोट्टीर कि भविष्यवाणी माळबाळुल. 
“नोळी, ना नीमी हींग वत्ताईन, ह्यांग कि पेंडीगोळ देल तुम्द गाळा ल्यालमा वतकु आगतद. 
इदुरसाटी घाई देल ओळावाळेरी ओळोद जागा सिकतीदील, अदिक सामर्थी इन सामर्थ्य येनु क्याल्सा कोळतीदील; अदिक ना पराक्रमी तान जीव ऊळ्स सक्यान; 
धनुर्धारी निदुरकु ईर सकतीदील, अदिक फुर्ताई देल ओळावाळा ऊळुतीदील; सवार भी तान जीव ऊळ्स सकतीदील; 
अदिक शुरवीरगोळ दा जो यक्कुल धीर ईत्तान, आव भी आ दिशी ऊगळा ओळेदान. यहोवा अन ईदा वाणी आद.” 
