﻿यहोशू.
19.
दुसरा चिट्टी शिमोन उन हेसुर मा, मतलब शिमोनिगोळ कुलगोळ अनुसार आंदुर गोत्रगोळ हेसुर मा होळ्त; अदिक आंदुर भाग यहूदागोळ्द भाग इन बीच दा ठहरूस्त. 
आंदुर भाग दा ईव नगर आव, मतलब बेर्शेबा, शेबा, मोलादा, 
हसर्शूआल, बाला, एसेम, 
एलतोलद, बतूल होर्मा, 
सिकलग, बेतर्काबोत, अदिक हसर्शूसा; ईव तेरहा नगर अदिक अऊरव ऊर आंदरी सीकदव. 
बेतलबाओत, अदिक शारूहेन; ईव तेरहा नगर अदिक ईऊरव ऊर आंदरी सीकदव. 
बाक ऐन, रिम्मोन, एतेर, अदिक आशान, ईव नाक नगर ऊरगोळ सांगुळ; 
अदिक बालत्बेर जो दक्खिन द्याश इन रामा भी कहलुसतान, अल ताका ई नगर इन नाकु दिकळव सप्पा ऊर आंदरी सीकदव. शिमोन उन गोत्र अन भाग आंदुर कुलगोळ अनुसार ईल्या ठहरूस्त. 
शिमोनिया अन भाग रा यहूदा अन अंश दा टु कोटकु आत; यतिकी यहूदा अन भाग आंदुर साटी हापाळ ईरोद, ई कारण शिमोन उन भाग आंदुर अच भाग इन बीच ठहरूस्त. 
तीसरा चिट्टी जबूलूनिगोळ कुलगोळ अनुसार आंदुर हेसुर मा होळ्त. अदिक आंदुर भाग इन सीमा सारीद नगर ताका पोहचुस्त; 
अदिक आंदुर सीमा पश्चिम इन दी मरला टु आगतेला दब्बेशेत इक पोहचुस्त, अदिक योकनाम इन मुंद इन नाला ताका पोहचुसेत; 
बाक सारीद टु अद सुर्योदय दी तिर्गकु किसलोत्ताबोर इन सीमा ताका पोहचुस्त, अदिक अल टु वाळुसतेला दाबरत दा होळ्त, अदिक यापी दी होग कुर्त; 
अल टु अद पूर्व इन दी मुंद वाळुस्कु गथेपेर अदिक इत्कासीन इन होत, अदिक आ रिम्मोन दा होळ्त जो नेआ दिशा ताका फैलुसकु आद; 
अल टु अद सीमा आऊन उत्तर इन दी टु तिर्गकु हन्नातोन मा पोहचुस्त; अदिक यिप्तहेल इन घाटी दा होगकु खतम आत; 
कत्तात, नहलाल, शिम्रोन, यिदला, अदिक बैतलहम; ईव हन्नेळ नगर आंदुर ऊर सांगुळ अदा भाग इक ठहरूस्त. 
जबूलूनिगोळ भाग आंदुर कुलगोळ अनुसार ईदा ठहरूस्त; अदिक अदुर दा तान ऊर इन सांगुळ ईवा नगर आव. 
चौथा चिट्टी इस्साकारीगोळ कुलगोळ अनुसार आंदुर हेसुर मा होळ्त. 
अदिक आंदुर्द सीमा यिज्रेल, कसुल्लोत, शूनेम, 
हपारैम, शीओन, अनाहरत, 
रब्बीत, किश्योन, एबेस, 
रेमेत, एनगन्नीम, एनहदा, अदिक बेत्पस्सेस ताका पोहचुस्त. 
बाक अद सीमा ताबोर, शहसूमा अदिक बेतशेमेश ताका पोहचुस्त, अदिक आंदुर सीमा यरदन गांगा मा होगकु खतम आत; ई प्रकार आंदरी सोला नगर तान तान ऊरगोळ सांगुळ सिकदव. 
कुलगोळ अनुसार इस्साकारीगोळ इन गोत्र अन भाग नगरगोळ अदिक ऊरगोळ सांगुळ कोटकु आत. 
पाचवा चिट्टी आशेर गोत्र अन कुलगोळ अनुसार आंदुर हेसुर मा होळ्त. 
आंदुर सीमा दा हेल्कात, हली, बेतेन, अक्षाप, 
अलाम्मेल्लेक, अमाद, अदिक मिशाल ईरोर; अदिक पश्चिम इन दी कर्मेल ताका अदिक शीहोर्लिब्रात ताका पोहचुस्त; 
बाक अद सुर्योदय दी तिर्गकु बेतदागोन इक होत, अदिक जबूलून इन भाग ताका, अदिक यिप्तहेल इन तराई देल उत्तर इन दी आगकु बेतेमेक अदिक निएल ताका पोहचुस्त; अदिक उत्तर इन दी होगकु काबूल मा होळ्त, 
अदिक अद एब्रोन, रहोब, हम्मोन, अदिक काना से आगकु धोळ्द सीदोन इक पोहचुस्त; 
अल टु अद सीमा तिर्गकु रामा टु आगतेला सोर हेसुर इन किला अन नगर ताका होटोत; बाक सीमा होसा अन दी तिर्गकु अकजीब इन हाती इन द्याश दा आगकु समुद्र मा खतम आत, 
उम्मा, अपेक, अदिक रहोब भी आंदुर भाग दा ठहरूसदव ई प्रकार बाईस नगर तान तान ऊरगोळ सांगुळ आऊक सिकदव. 
कुलगोळ अनुसार आशेर गोत्र अन भाग नगरगोळ अदिक ऊरगोळ सांगुळ ईदा ठहरूस्त. 
छटवा चिट्टी नप्तालीगोळ कुलगोळ अनुसार आंदुर हेसुर मा होळ्त. 
अदिक आंदुर सीमा हेलेप टु, अदिक सानन्नीम इन बांज मार्र से, अदामीनेकेब अदिक यब्नेल टु आगकु, अदिक लक्कूम इक होगकु यरदन मा खतम आत; 
अल अद सीमा पश्चिम इन दी तिर्गकु अजनोत्ताबोर इक होत, अदिक अल टु हुक्कोक इक होत, अदिक दक्षिण, अदिक जबूलून इन भाग ताका, अदिक पश्चिम इन दी आशेर इन भाग ताका, अदिक पूर्व दी यहूदा अन भाग इन हाती यरदन गांगा मा पोहचुस्त. 
अदिक आंदुर किला अन नगर ईव हुव, मतलब सिद्दीम, सेर, हम्मत, रक्कत, किन्नेरेत, 
अदामा, रामा, हासोर, 
केदेश, एद्रेई, एन्हासोर, 
यिरोन, मिगदलेल, होरेम, बेतनात, अदिक बेतशेमेश; ईव उन्नीस नगर ऊरगोळ सांगुळ आऊक सिकदव. 
कुलगोळ अनुसार नप्तालीगोळ गोत्र अन भाग नगरगोळ अदिक आंदुर ऊरगोळ सांगुळ ईदा ठहरूस्त. 
सातवा चिट्टी कुलगोळ अनुसार दानिगोळ गोत्र अन हेसुर मा होळ्त. 
अदिक आंदुर भाग न सीमा दा सोरा, एशताओल, ईरशेमेश, 
शालब्बीन, अय्यालोन, यितला, 
एलोन, तिम्ना, एक्रोन, 
एलतके, गिब्बतोन, बालात, 
यहूद, बनेबराक, गत्रिम्मोन, 
मेयर्कोन, अदिक एक्कोन ठहरूसदव, अदिक याफा अन मुंदळोद सीमा भी आंदुर्द ईरोद. 
अदिक दानिगोळ भाग ईदुर से येक्‍कुल आगेत, मतलब दानी लेशेम मा यारीकु आऊन से लळुसदुर, अदिक आऊक हुडुकु तलवार देल कोंद बुट्टुर, अदिक आऊक तान अधिकार दा माळकु अल बसुसेदुर, अदिक तान मुल मंळसा अन हेसुर मा लेशेम इन हेसुर दान ईटदुर. 
कुलगोळ अनुसार दानिगोळ गोत्र अन भाग नगरगोळ अदिक ऊरगोळ सांगुळ ईदा ठहरूस्त 
याग द्याश इन वाट्सकु आगोद सीमागोळ अनुसार पुरा आगेत, आग इस्त्राएली इन नून इन पार यहोशू उक भी तान बीच दा ऊंद भाग कोट्टुन. 
यहोवा अन अनोद अनुसार आंदुर आऊक आऊन बेळ्द नगर कोट्टुन, ईद एप्रैम इन पहाळी द्याश दाकळोद तिन्मत्सेरह आद; अदिक अद आ नगर इक मात्त बसुस्कु अल ईरली कुरतुन. 
जो जो भाग एलीआजर याजक, अदिक नून उन पार यहोशू, अदिक इस्त्राएलीगोळ गोत्र अन घराना अन पुर्वजगोळ मुख्य मुख्य मंळसागोळ शीलो दा, भेंट माळोद तम्बु मा, यहोवा अन मुंद चिट्टी हाक्कु हाक हाक्कु वाट्स बुट्टुर ईव अवा हु. ई प्रकार आंदुर द्याश विभाजन इन क्याल्सा पुरा माळदुर. 
