﻿यहोशू.
5.
याग यरदन इन पश्चिम इन दी ईरावाळेर एमोरियागोळ सप्पा राजागोळ, अदिक समुद्र अन हाती ईरावाळेर कनानीगोळ सप्पा राजागोळ ईद केळदुर, कि यहोवा इस्त्राएलीगोळ पार आगासताका आंदुर मुंदु टु यरदन इन नीर सरकुसकु वंळ्गींद ईट्यान, आग इस्त्राएलीगोळ्द अंज्क इन मारा आंदुर्द मन घबरूसेत, अदिक आंदुर्द जीव दा जीव ईतीदील. 
आ समय यहोवा यहोशू से अंदुन “चकमक कल्ल इन चाकुगोळी माळसुसकु दुसरा घन इस्त्राएलीगोळ्द खतना माळसुस कोम.” 
आग यहोशू चकमक कल्ल इन चाकुगोळी माळसुसकु खतना हेसुर इन पहाळी मा इस्त्राएली लॉकुर्द खतना माळसुसदुन. 
अदिक यहोशू जो खतना माळसुसदुन, ईदुर्द कारण ईद हुन, कि यास मंळसा युध्द इन योग्य मिस्त्र दा टु होटीदुर आंदुर सप्पा मिस्त्र टु होट्टुर मा आळी इन हादी मा सोतोगीदुर. 
जो मंळसा मिस्त्र द्याश टु होटीदुर आ सप्पा मुंदुर्द रा खतना आगेगीत, लेकीन यास आंदुर्द मिस्त्र टु होट्टुर मा आळी इन हादी मा पैदा आदुर आंदुर दा टु यारदु खतना ईला आगीत. 
यतिकी इस्त्राएली रा चालीस वर्ष ताका आळी दा वयाळतेला ईत्तुर, यागासताका आ सप्पा जाती इन लॉकुर, मतलब यास युध्द अन योग्य लॉकुर मिस्त्र टु होटीदुर आंदुर नष्ट आगेगीदील, यतिकी आंदुर यहोवा अन ईला मान्सीदुर; इदुरसाटी यहोवा आंदुर से किर्‍या तिनकु अंदीदुन, कि जो द्याश ना नीम पुर्वजगोळ से किर्‍या तीनकु नीमी कोळली हेळीदीन, अदिक अदुर दा हाल अदिक शयद इन धारागोळ वाहुसताव, अद द्याश ना नीमी तोर्सतीदील. 
रा आ लॉकुर पारगोळ यारी यहोवा आंदुर जागा मा पैदा माळीदुन, आदुर्द खतना यहोशू से माळसुसदुन, यतिकी हादी मा आंदुर्द खतना ईला आगदुर कारण आंदुर खतना रहित ईरोर. 
अदिक याग आ सप्पा जाती इन लॉकुर्द खतना आगेत, आग आंदुर चंगा आगासताका तान तान जागा मा ड्यारा दा ईत्तुर. 
आग यहोवा यहोशू से अंदुन, “नीम्द निंदा जो मिस्त्रीगोळ दा आग्याद, अदरी ना ईंद दुर माळदीन.” ई कारण आ जागा अन हेसुर ईंद इन दिन ताका गिलगाल बिदाद. 
इदुरसाटी इस्त्राएली गिलगाल दा ड्यारा हाक्कु ईत्तुर, अदिक आंदुर यरीहो अन हाती मैदान दा तिंगुळ इन चौदावा दिशी द्यावगा अन होती हाब्ब मान्सदुर. 
अदिक हाब्ब इन दुसरा दिशी आंदुर आ द्याश इन उपज दा टु अखमीरी रोट्टी अदिक अदा दिशी टु सुळ्द दाना भी तीनली कुरतुर. 
अदिक याता दिन टु आंदुर आ द्याश इन फसल दा टु तीनली कुरतुर, अदा दिशी व्हातर्या का मन्ना बंद आगेत; अदिक इस्त्राएलगोळी मुंद यागलु मन्ना सिकीदील, लेकीन आ वर्ष आंदुर कनान द्याश इन फसल दा टु तिंदुर. 
याग यहोशू यरीहो अन हाती ईरोन आग आव तान कण्‍ण नेगदुन, अदिक येन नोळदुन, कि कय दा उगळा तलवार हुडुकु ऊंद मंळसा मुंद नीदुरकु आन; अदिक यहोशू आऊन हाती होगकु केळदुन, “येन नी नाम दिकळव हुव, या नाम दुश्मनगोळ दिकळव?” 
आग आव उत्तर कोट्टुन, “ईला; बल्‍की ना यहोवा अन सेना अन प्रधान आगकु ईग बंदीन.” आग यहोशू जमीन मा ट्वांगरा टेक्सकु नमस्कार माळदुन, अदिक आऊन से अंदुन, “तान दास उन साटी नान प्रभु उन येन आग्या आद?” 
यहोवा अन सेना अन प्रधान यहोशू से अंदुन, “तान केरू काल दा टु तेगुकोम, यतिकी या जागा मा नी नीदुरकु आय अद पवित्र आद.” आग यहोशू हांग अच माळदुन. 
