﻿निर्गमन.
20.
आग परमेश्वर ई सप्पा वचन माताळदुन: 
“ना नीन परमेश्वर यहोवा हुईन, जो नीनी दासत्व अन मान्ना मतलब मिस्त्र द्याश दा टु तेगुकु तंदान.” 
“नी नानी बिटकु दुसरा अक परमेश्वर मान्सबाळेत.” 
“नी तान साटी यातोदु मुर्ति अगुळकु माळ बाळेत, ना यारदारा प्रतिमा बनुसेत, जो आकाश दा, या पृथ्वी मा, या पृथ्वी इन नीर दा आद.” 
नी आंदरी दण्डवत माळबाळेत, अदिक ना आंदुर्द उपासना माळेत; यतिकी ना नीन परमेश्वर यहोवा जलन (ईर्ष्या) ईटावाळा परमेश्वर हुईन, अदिक जो नान से दुश्‍मनी ईटतार, आंदुर पारगोळ, नातु नतरागोळ, अदिक पळनातुगोळी भी पित्तरगोळ्द दण्ड कोळतोगतीन, 
लेकीन जो नान से प्रेम ईटतार अदिक नान आग्यागोळी मान्सतार, आ हजारों पीढ़ीगोळ मा करूणा माळतोगतीन. 
“नी तान परमेश्वर उन हेसुर व्यर्थ ताकोमबाळेत; यतिकी जो यहोवा अन हेसुर व्यर्थ ताकोंडान आव आऊक निर्दोष ठहरूसतीदील.” 
“नी विश्राम दिन इक पवित्र मानसोर साटी याद ईटेत. 
आर दिन रा नी मयनत माळकु तान सप्पा क्याल्सा-धंधा माळेत; 
लेकीन सातवा दिशी नीन परमेश्वर यहोवा अन साटी विश्राम दिन आद. अदुर दा नी ना रा यातोदु प्रकार इन क्याल्सा-धंधा माळेत, अदिक ना नीन पार, ना नीन पोर, ना नीन दास, ना नीन दासगीत, ना नीन जनावर, ना यातोवारा परदेशी जो नीन फाटकगोळ्द अंदर ईरूल. 
यतिकी आर दिन दा यहोवा आकाश, अदिक पृथ्वी, अदिक समुद्र, अदिक जो येनारा अऊर दा आद, सप्पा अक बनुसदुन, अदिक सातवा दिशी विश्राम माळदुन; ई कारण देल यहोवा विश्राम दिन इक आशीष कोट्टुन अदिक अदरी पवित्र ठहरूसदुन.” 
“नी तान आप्प अदिक तान मोय इन आदर माळेत, यदुर देल जो द्याश नीन परमेश्वर यहोवा नीनी कोळतान अदुर दा नी हापाळ दिन ताका ईत्या.” 
नी खुन माळबाळेत. 
नी व्यभिचार माळबाळेत. 
नी काळ्लपनी माळबाळेत. 
नी यारदारा खिलाप ख्वाटा गवाही कोळबाळेत. 
“नी यारदारा मान्नोद लालच माळबाळेत; ना रा यारदारा आर्त इन लालच माळेत, अदिक ना यारदारा दास-दासगीत या वस्त-वाळींद, ना यारदारा यातोदु वस्तु उन लालच माळेत.” 
सप्पा लॉकुर गर्जन अदिक बिजली अदिक नरसिंगा अन शब्द केळ्त, अदिक धुंगा येळ्त पहाळ इक नोळतेला ईत्तुर, अदिक नोळकु, नळ्गतेला दुर निद्रेदुर; 
अदिक आंदुर मूसा से अनली हतदुर, “नी ना नाम से मातगोळ हेळ, आग रा नाव केळ सक्केव; लेकीन परमेश्वर नाम से मात हेळबाळुल, हिंग आगबाळुल कि नाव सोतोदेव.” 
मूसा लॉकुर से अंदुन, “अंजबाळी; यतिकी परमेश्वर इदुरसाटी बंदान कि नीम परीक्षा माळुल, अदिक आऊन अंज्क नीम मन दा बन्सकु ईरूल कि नीव पाप माळतीदील.” 
अदिक आ लॉकुर दुर अच निदुरकु ईत्तुर लेकीन मूसा आ घोर अंधार इन हात्ती होदुन यल परमेश्वर ईरोन. 
आग यहोवा मूसा से अंदुन, “नी इस्त्राएलीगोळी नान ई वचन केळ्स: नीव लॉकुर खुद अच नोळीर कि ना नीम सांगुळ आकाश से मातगोळ हेळीन. 
नीव नान सांगुळ यारीकारा सम्मिलित माळबाळेतीर, मतलब तान साटी बेळ्ली या व्हान्ना देल देवतागोळी घळुसबाळेतीर. 
नान साटी मुण्ण इन ऊंद वेदी बनुसेतीर, अदिक तान भेड़-मर्रगोळ अदिक वस्ता-गोसीगोळ्द होमबली अदिक मेलबली इक अदुर मा येर्सेतीर; अदिक हर ऊंद जागा दा यल यल ना तान हेसुर इन याद माळसुसाईन अल अल ना बंदकु नीमी आशीष कोळाईन. 
अदिक अगर नीव नान साटी कल्लगोळ्द वेदी माळीर, रा तराशकु कल्लगोळ देल माळबाळेतीर; यतिकी यल नीव अदुर मा तान औजार हचदीर अल नीव अदरी अशुद्ध माळ बुट्टीर. 
अदिक नान वेदी मा सीळी देल यागलु येरबाळेतीर, ईलारा हिंग आगबाळुल कि नीन मय अदुर मा ऊगळा कांळ्सकु बिळुल.” 
