﻿उत्पत्ति.
41.
पुरा येढ्‍ढ वर्ष आगदुर मा फिरौन ईद कांसा नोळदुन कि आव नील गांगा अन किनारा मा निदुरकु आन. 
अदिक आ नील गांगा दा टु येळ सुंदर अदिक मोटा-मोटा गोसी होटकु किनारा अन काड्डा तिनली कुरतव. 
अदिक, येन नोळदुन कि अऊर हिंद अदिक येळ गोसीगोळ, जो कुरूप अदिक कमजोर आव, नील गांगा टु होट्टव; अदिक दुसरा गोसीगोळ हात्ती गांगा अन तट मा होगकु नीदुरदव. 
ईव येळु कमजोर गोसी, सुंदर मोटा येळ गोसीगोळी तीन कोंडव, आग फिरौन येद्दुन. 
फिरौन मात्त मिंगदुन अदिक दुबारा कांसा नोळदुन. आव कांसा दा अनाज इन येळ लॉम्बा, ऊंद अनाज इन हिंद ऊगुसतेला नोळदुन. अनाज इन लॉम्बागोळ मोटा अदिक वळ्लेव ईरव. 
अदिक, येन नोळदुन कि अऊर हिंद येळ लॉम्बागोळ पतला अदिक पुरवाई टु मुरझुस्कु होट्टव. 
आग पतला लॉम्बागोळ येळ मोटा लॉम्बागोळी तीन कोंडव. ईदुर देल फिरौन उन जप खुलसेत अदिक आव समसेदुन कि अद कांसा ईरोद. 
व्हातुर आगदुर मा राजा अन्द मन बेचैन आदुन, इदुरसाटी आ कांसा अन मतलब जानसोर साटी मिस्त्र द्याश इन सप्पा ज्योतिषगोळी अदिक जादूगर कारसुसदुन अदिक फिरौन आंदरी तान येढ्ढु कांसागोळ हेळदुन लेकीन याऊ भी आ कांसागोळ्द मतलब हेळ सकीदील. 
आग प्रधान कुळसावाळा फिरौन से अंदुन, “ईंद नानी तान पाप याद बरेत्याद. 
याग फिरौन तान दासगोळ से सीट्टी बंदीदुन, नानी अदिक रोट्टी माळावाळा प्रधान उक कैद माळकु अंगरक्षकगोळ प्रधान उन मान्या बंदीगृह दा हाकीदुन; 
आग नाव येढ्ढु मुंदुर ऊंद अच ईळ्लकी, तान तान हुनर इन अनुसार कांसा नोळीदेव; 
अदिक अल नाम सांगुळ ऊंद इब्री हारोदव ईरोन, जो अंगरक्षकगोळ प्रधान उन दास ईरोन; अत: नाव आऊक हेळदेव, अदिक आव नाम कांसागोळ्द मतलब नाम से अंदुन, नाम दा ऊंद ऊंद उन कांसा अन मतलब आव नामी हेळदुन. 
अदिक ह्यांग काय आव नाम से अंदिदुन, हांग अच आत भी, मतलब नानी रा नान पद मात सीक्त, लेकीन आव फासी मा लटकुसकु आदुन.” 
आग फिरौन यूसुफ उक बुलावा कळुदुन. अदिक आव झटपट जेल टु व्हार्या तेगसुसकु आदुन, अदिक चुट्टी माळकु, अदिक कपळा बदलुसकु फिरौन उन मुंद बंदुन. 
फिरौन यूसुफ से अंदुन, “ना ऊंद कांसा नोळीन, अदिक अदुर मतलब हेळावाळा याऊ भी हैलेच; अदिक ना नीन बारा दा केळीन, कि नी कांसा केळतेला अच अदुर मतलब हेळबुळत्या.” 
यूसुफ फिरौन से अंदुन, “ना रा येनु जान्सालीन: परमेश्वर फिरौन उन साटी शुभ वचन कोट्टुन.” 
बाक फिरौन यूसुफ से अनली कुरतुन, “ना तान कांसा दा नोळदिन, कि ना नील गांगा अन किनारा मा निदुरकु आईन. 
बाक, येन नोळदीन, कि नील गांगा दा टु येळ मोटा अदिक सुंदर गोसीगोळ होटकु व्हार्या बंदव अदिक किनारा अक काड्डा तिनली कुरतव. 
बाक, येन नोळदीन, कि अऊर हिंद येळ गोसी अदिक होट्टव, जो पतला, अदिक हापाळ कुरूप, अदिक कमजोर आव; ना रा सप्पा मिस्त्र द्याश दा ईत्ता खराब गोसी यागलु नोळीदील. 
ईव कमजोर अदिक खराब गोसीगोळ आ पयला येळु गोसीगोळी तीन कोंडव. 
अदिक याग अव अवरी तीन कोंडव आग ईद ईला मालुम आगोद कि अव अवरी तीन कोंडव, यतिकी अव पयला अन घाई हांग च्या हांगा खराब ईरव. आग ना यदोदीन. 
बाक ना दुसरा कांसा नोळदीन, कि ऊंद अच कोर दा येळ वळ्लेव वळ्लेव अदिक अन्न देल तुमकु लॉम्बागोळ होट्टव. 
बाक येन नोळतीन, कि अऊर हिंद अदिक येळ लॉम्बागोळ मुरझुसकु अदिक पतला अदिक बीसी हवा देल नष्ट ईरव. 
अदिक आ पतला लॉम्बागोळ आ येळ वळ्लेव वळ्लेव लॉम्बागोळ तीन कोंडव. ईदरी ना ज्‍योतिषिगोळी हेळदीन, लेकीन ईवरी समझुसावाळा याऊ सीकीदील.” 
आग यूसुफ फिरौन से अंदुन, “फिरौन उन कांसा ऊंद अच हुन, परमेश्वर जो क्याल्सा माळोद चाहासतान, अदरी आव फिरौन मा प्रगट माळ्‍यान. 
अव येळ वळ्लेव वळ्लेव गोसी येळ वर्ष हुव; अदिक अव येळ लॉम्बागोळ भी येळ वर्ष हुव; कांसा ऊंद हुन. 
बाक अऊर हिंद जो दुर्बल अदिक कुडौल गोसीगोळ होट्टव, अदिक जो येळ मुरझुसकु अदिक पतला अदिक बीसी हवा देल नष्ट आगकु लॉम्बागोळ होट्टव, अव अकाल इन येळ वर्ष ईत्तव.” 
ईद अदा मात हुन जो ना फिरौन से अन कोंडीन, कि परमेश्वर जो क्याल्सा माळोद चाहासतान, अदरी आव फिरौन उक तोर्सदुन. 
केळ, सप्पा मिस्त्र द्याश दा येळ वर्ष रा हापाळ उपज इन आदीत. 
अदुर बाद्दा येळ वर्ष अकाल ईनव बंदव, अदिक सप्पा मिस्त्र द्याश दा लॉकुर ई सप्पा उपज इक मारतोदार; अदिक अकाल देल द्याश इन नाश आदीत. 
अद कि अकाल ईट भयानक आदीत कि वळ्लीद फसल अदिक उपज द्याश दा यारीकु याद ईरतीदील? 
अदिक फिरौन जो ईद कांसा येढ्ढ घन नोळदुन ईदुर्द भेद ईदा हुन कि ईद मात परमेश्वर उन दी टु नीवळुसकु आगेग्याद, अदिक परमेश्वर ईदरी जल्दी पुरा माळ्यान. 
“इदुरसाटी ईग फिरौन यातोवारा समझदार अदिक बुध्दिमान मंळसा अक नोळकु आऊक मिस्त्र द्याश इन प्रधानमंत्री ठहरूसुल. 
फिरौन ईद माळुल कि द्याश मा अधिकारीगोळी नीवळुसुल, अदिक यागासताका खुसहाल इन येळ वर्ष ईत्तव आगासताका आव मिस्त्र द्याश इन उपज इन पाचवा हिस्सा ताकोमुल. 
अदिक आंदुर ई वळ्लेव वर्षगोळ दा सप्पा प्रकार इन भोजन वस्तुगोळ जमा माळुल, अदिक नगर-नगर दा भंडार मान्ना भोजन इन साटी, फिरौन उन वश दा माळकु अऊर्द रक्षा माळुल. 
अदिक अव भोजन वस्तु अकाल इन आ येळ वर्षगोळ साटी, जो मिस्त्र द्याश दा बंदव, द्याश इन भोजन ई निमित्त ईटकु ईरूल, यदुर देल द्याश आ अकाल देल सत्यानाश आग बाळुल.” 
ईद मात फिरौन अदिक आऊन सप्पा क्याल्सा माळावाळेर इक वळ्लीद हत्त. 
इदुरसाटी फिरौन तान क्याल्सा माळावाळेर से अंदुन, “येन नामी ईत्ता मंळसा, ह्यांग ईव आन, यार मा परमेश्वर उन आत्मा ईरतद, सिक सकतान?” 
बाक फिरौन यूसुफ से अंदुन, “परमेश्वर जो नीनी ईट ग्यान कोटान, कि नीन बराबर याऊ समझदार अदिक बुद्धिमान हैलेच; 
ई कारण नी नान मान्या अन अधिकारी ईत्या, अदिक नीन आग्या अन अनुसार नान पुरा प्रजा नळदीत, सिर्फ राजगद्दी इन बारा दा ना नीन से धोड्डेव ठहरूसाईन.” 
बाक फिरौन यूसुफ से अंदुन, “केळ, ना नीनी मिस्त्र अन सप्‍पा द्याश इन म्याकुच अधिकारी ठहरूस बुळतीन.” 
आग फिरौन तान कय दा टु मुहर वाला ऊंगरा तेगुकु यूसुफ उन कय दा हाकसुसदुन; अदिक आऊक वळ्लेव मलमल इन कपळा हाकसुसदुन, अदिक आऊन कुत्या दा व्हान्ना अन माला हाकदुन; 
अदिक आऊक तान दुसरा रथ मा येर्सदुन; अदिक लॉकुर आऊन मुंद मुंद ईद प्रचार माळतेला नळदुर, कि ट्वागंरा टेक्सकु नमस्कार माळी अदिक आव आऊक मिस्त्र द्याश इन म्याकुच प्रधानमंत्री ठहरूसदुन. 
बाक फिरौन यूसुफ से अंदुन, “फिरौन रा ना हुईन, अदिक मिस्त्र द्याश दा याऊ भी नीन आग्या अन बीना कय काल आळगाळस्तिदील,” 
फिरौन यूसुफ उन हेसुर सापनत-पानेह ईटदुन. अदिक ओन नगर इन याजक पोतीपेरा अन पोर आसनत सांगुळ आऊन मदा माळसुसदुन. अदिक यूसुफ सप्पा मिस्त्र द्याश दा दौरा माळली कुरतुन. 
याग यूसुफ मिस्त्र अन राजा फिरौन उन हात्ती निदुरदुन, आग आव तीस वर्ष इनव ईरोन. आव फिरौन उन हात्ती टु होटकु सप्पा मिस्त्र द्याश दा दौरा माळली कुरतुन. 
सुख इनव येळु वर्ष दा जमीन हापाळ अन्न पैदा माळतेला ईत्त. 
अदिक यूसुफ आ येळु वर्षगोळ दा सप्‍पा प्रकार इन भोजन वस्तुगोळ, जो मिस्त्र द्याश दा आगतोगोद, जमा माळकु नगरगोळ दा ईटतोगोन, अदिक हर ऊंद नगर इन नाकु दीकळव केईगोळ्द भोजन वस्तुगोळ इक आव अदा नगर दा जमा माळतेला ईत्तुन. 
ई प्रकार यूसुफ अन्न इक समुद्र अन धुळा अन्द घाई बहुतायत देल राशी आळकु ईटदुन, ईल ताका कि आव अऊर्द आळोद बंद माळ बुट्टुन; यतिकी अव असंख्य आगेगीदव. 
अकाल इक पयला वर्ष बरोर से पयला यूसुफ उन येढ्ढ चिकोर, ओन नगर इन याजक पोतीपेरा अन पोर आसनत देल पैदा आदुर. 
अदिक यूसुफ तान पयला पार उन हेसुर ईद अनकु मनश्शे ईटदुन, “कि परमेश्वर नान से सप्पा क्लेश, अदिक नान आप्प उन सप्पा घराना मारसुसदुन.” 
दुसरा अन हेसुर आव ईद अनकु एप्रैम ईटदुन, कि “नानी दुख भोगस्दुर इन द्याश दा परमेश्वर फलवंत माळदुन.” 
अदिक मिस्त्र द्याश इन वळ्लीद फसल पकुसोद येळ वर्ष खतम आगेदव. 
अदिक यूसुफ उन अना अनुसार येळ वर्षगोळ साटी अकाल शुरू आगेत. सप्पा द्याशगोळ दा अकाल बिळली कुर्त; लेकीन सप्पा मिस्त्र द्याश दा अन्न ईरोद. 
याग मिस्त्र अन सप्‍पा द्याश हसु देल सायली कुर्त; आग प्रजा फिरौन से चिळ्लास चिळ्लासकु अन्न बेळली कुर्त; अदिक आव सप्‍पा मिस्त्रीगोळ से अनतोगोन, “यूसुफ उन हाती होगी; अदिक जो येनारा आव नीम से अंदान, अदा माळी.” 
इदुरसाटी याग अकाल सप्‍पा पृथ्वी मा फैलुसेत, अदिक मिस्त्र द्याश दा अकाल इन भयंकर रूप आगेत, आग यूसुफ सप्‍पा भंडारगोळी तेगु तेगुकु मिस्त्रीगोळ कय देल अन्न मारली कुरतुन. 
इदुरसाटी सप्‍पा पृथ्वी इन लॉकुर मिस्त्र दा अन्न कोमोर साटी यूसुफ उन हाती बरली कुरतुर, यतिकी सप्पा पृथ्वी मा भयंकर अकाल ईरोद. 
